The New Testament of our Lord and Saviour Jesus Christ
1:1 Jetoh daptar tato hiang Yesus Kristus, panakan Dawid, panakan Abraham. Aran kare tato hiang Yesus bara Abraham sampai Dawid te kalotoh: 1:2-6a Abraham, Isaak, Yakob, Yehuda tuntang kare paharie, Peres tuntang Sera (indu ewen te arae Tamar), Hesron, Aram, Aminadab, Nahason, Salmon, Boas (indue te Rahab), Obed (indue te Rut), Isai, tuntang Raja Dawid. 1:6b-11 Bara Dawid sampai katika oloh Israel inawan akan Babel maka aton tarasurat kare aran toh: Salomo (indue te solake sawan Uria), Rahabeam, Abia, Asa, Yosapat, Yoram, Usia, Yotam, Ahas, Hiskia, Manase, Amon, Yosia, Yekhonia tuntang kare paharie. 1:12-16 Bara wayah oloh Israel inawan akan Babel sampai Yesus inakan, maka aton tarasurat kare aran toh: Yekhonia, Sealtiel, Serubabel, Abihud, Eliakim, Asor, Sadok, Akhim, Eliud, Eleasar, Mathan, Yakob, Yosep, banan Maria. Tuntang bara Maria te jari inakan Yesus je inyewut Kristus. 1:17 Jadi bara Abraham sampai Dawid, samandiaie aton epat walas turunan. Bara Dawid sampai wayah oloh Israel inawan akan Babel sampai Kristus inakan, aton tinai epat walas turunan kea. 1:18 Kalotoh auh saritae tahiu Yesus Kristus inakan. Indue, iete Maria, batunangan dengan Yosep. Tapi helo bara ewen kawin, te gitan ampin Maria te jari mimbit arepe. Tapi Yosep jaton katawan je Maria te batihi awi Roh Hatalla. 1:19 Yosep, tunangae te, puna oloh je baketep manumon kare atoran agama. Jadi ie handak manggeto hubungae dengan tunangae te suni-suni uka Maria dia impahawen hong taharep oloh are. 1:20 Pandehan Yosep manirok hal te, te ie tapatiroh palus nupi. Hong nupie te ie mite ije malekat Tuhan hamauh dengae, "Yosep, panakan Dawid, ela mikeh kawin dengan Maria; basa anak je huang kanaie te manjadi awi kuasan Roh Hatalla. 1:21 Maria kareh manak ije biti anak hatue. Ikau musti manenga aran anak te Yesus, karana ie manyalamat ungkup ayue bara dosan ewen". 1:22 Taloh handiai te manjadi kalote uka tulus taloh je insanan Tuhan mahalau nabi ayue, iete, 1:23 "Ije biti bujang salia kareh mimbit arepe tuntang manak ije anak hatue. Anak te kareh inggare Imanuel." (Imanuel jete auh kotak bara basa Ibrani, rimae, "Hatalla aton hinje itah".) 1:24 Limbah te Yosep misik, ie malalus taloh je insanan malekat Tuhan te akae. 1:25 Ie kawin dengan Maria. Tapi katahin Maria hindai luas anak te, Yosep dia hinje batiroh dengan Maria. Limbah anak te jari inakan, Yosep manenga arae Yesus.
2:1 Yesus inakan hong lewu Betlehem hong tanah Yudea; je manjadi raja metoh te iete Herodes. Hong katika te pire-pire ahli ilmu bintang bara Timor dumah akan Yerusalem. 2:2 Ewen misek hong hete-hete, "Hong kueh Anak te, je inakan uka manjadi Rajan oloh Yehudi? Ikei mite bintange lembut hila Timor, tuntang ikei dumah mangat manyembah ie." 2:3 Katika Raja Herodes mahining hal te, ie paham tarewen, kalote kea kakare oloh hong Yerusalem. 2:4 Ie manyoho kakare imam kapala tuntang kare guru agama oloh Yehudi dumah hapumpong. Palus ie misek dengan ewen, "Hong kueh Raja je injanji Hatalla te akan inakan?" 2:5 Ewen tombah, "Intu Lewu Betlehem hong tanah Yudea. Basa kalotoh auh je inyurat awi nabi, 2:6 'Ikau Betlehem hong tanah Yudea ikau samasinde dia je pangkakorike bara kare lewu mambatang hong Yudea. Karana bara ikau akan dumah ije biti pamimpin je akan mamimpin Israel.' " 2:7 Limbah mandino katarangan te, Herodes mantehau kare ahli bintang bara Timor te suni-suni. Palus ie misek dengan ewen hamparea katika je pas ewen nampara mite bintang te. 2:8 Limbah te ie manyoho ewen akan Betlehem dengan peteh kalotoh, "Lius, gau Anak te titi-titip. Tuntang amon keton manyondau ie, sanan akangku, mangat aku kea manalih manyembah ie." 2:9-10 Balalu ewen haguet. Ewen mite tinai bintang je gitan ewen bihin hila Timor. Paham kahanjak ewen mite bintang te! Bintang te mananselo ewen, balalu tende hunjun eka Anak te. 2:11 Ewen tame akan huang huma te tuntang mite Anak te dengan indue Maria. Ewen sontop tuntang manyembah Anak te, palus mukei sarangan ramon ewen, tuntang manenga akae amas, garo, tuntang mur. 2:12 Hatalla mampingat ewen huang nupi uka ela haluli manalih Herodes. Jadi ewen buli mahoroi jalan je beken. 2:13 Limbah kare ahli bintang te haguet, malekat Tuhan mamparahan arepe akan Yosep huang nupi. Malekat te hamauh, "Herodes handak manggau Anak te palus mampatei ie. Tagal te misik, imbit Anak te dengan indue hadari akan Misir. Melai ih intu hete sampai aku hakotak tinai dengam." 2:14 Yosep misik, tuntang alem te kea ie mimbit Anak te dengan indue hadari akan Misir. 2:15 Ewen melai hete sampai Herodes matei. Kalote maka manjadi taloh ije insanan Tuhan mahalau nabi ayue kalotoh, "Aku mantehau anakku bara Misir." 2:16 Katika Herodes katawan ahli bintang bara Timor te mananjaro ie, ie paham balait. Palus ie marentah uka mampatei anak hatue je umure due nyelo kapenda intu Betlehem tuntang eka hakalilinge. Jete cocok dengan katarangan je dinoe bara kare ahli bintang te tuntang katika bintang te gitan. 2:17 Kalote maka manjadi taloh je insanan awi Nabi Yeremia, iete, 2:18 "Intu Rama tarahining auh tatum, tarahing hayak tangis. Rahel manatum kare anake ie jaton maku iampong awi ewen jari nihau." 2:19 Limbah Herodes matei, katika Yosep magon hong Misir, ije malekat Tuhan mamparahan arepe tinai akan Yosep huang nupi. 2:20 Malekat te hamauh, "Kare oloh je handak mampatei Anak te jari nihau. Tagal te misik, duan Anak te dengan indue tuntang buli akan Israel." 2:21 Maka Yosep misik, palus mimbit Anak te dengan indue haluli akan Israel. 2:22 Tapi rahian Yosep mahining Arkelaus, anak Herodes jari mangganti bapae manjadi raja hong Yudea. Jadi Yosep mikeh haguet akan hete. Limbah ie mandino nasihat tinai bara Tuhan huang nupi, ie haguet manalih daerah Galilea. 2:23 Hong hete ie melai intu lewu je arae Nasaret. Kalote maka manjadi taloh je insanan awi kare nabi tahiu anak te: "Ie kareh inyewut Oloh Nasaret."
3:1 Hong katika te maka dumah Yohanes Pampandoi hong padang pasir intu Yudea tuntang ie manampara bahotbah. 3:2 "Hobah keton," koae, "Karana Hatalla kareh bajeleng marentah kilau Raja!" 3:3 Yohanes toh oloh je inyewut awi Nabi Yesaya je hamauh kalotoh, "Aton oloh hong padang pasir, je teha-tehau hai auhe, 'Natap jalan akan Tuhan; keleh mamparata jalan akae.' " 3:4 Yohanes mahapan pakaian bara bulon onta. Peteng kahange bara upak meto, panginae te sangkalap tuntang mado. 3:5 Maka are oloh bara Yerusalem, bara hapus daerah Yudea tuntang kare eka je hakatokep dengan Sungei Yordan, dumah manalih Yohanes. 3:6 Ewen mangaku kare dosan ewen, tuntang Yohanes mampandoi ewen hong Sungei Yordan. 3:7 Are kea oloh Parisi tuntang Saduki dumah manalih Yohanes uka impandoi. Tapi metoh ie mite ewen te dumah, ie hamauh dengan ewen, "Keton kau oloh papa! Eweh je mansanan je keton toh tau luput bara hukum Hatalla je akan dumah? 3:8 Parahan hapan gawin keton je keton jari hobah bara kare dosan keton. 3:9 Ela manyangka keton tau liwus bara hukuman baya awi keton manyewut Abraham te tato hiang keton. Ingat, bara kare batu toh, Hatalla mahin olih manampa panakan Abraham! 3:10 Kapak jari inatap hapan maneweng kayu palus sampai akan kare parokate. Gagenep batang je dia mampalembut bua je bahalap, kareh ineweng tuntang inganan akan apui. 3:11 Aku mampandoi keton hapan danum uka mamparahan je keton toh jari hobah bara kare dosan keton: tapi je akan dumah limbah aku, kareh mampandoi keton mahapan Roh Hatalla tuntang apui. Ie labih hai bara aku. Mimbit sapatue bewei aku toh mahin dia patut. 3:12 Hong lengee aton nyiru hapan mangiap kare parei sampai barasih. Parei kareh imumponge huang lepau, tapi kakare apise kareh inusul intu huang apui je jaton tarabelep." 3:13 Hong katika te Yesus haguet bara Galilea akan Sungei Yordan. Hong hete ie manalih Yohanes tuntang balaku impandoi. 3:14 Tapi Yohanes mancoba manolak palakue te. Yohanes hamauh, "Aku toh je kapunae impandoi awi Bapa. Toh salenga Bapa je dumah manalih aku." 3:15 Tapi Yesus tombah, "Nauhe ih sinde toh. Basa dengan jete itah malalus taloh samandiai je ingahandak Hatalla." Jadi Yohanes mampandoi Yesus. 3:16 Limbah impandoi, Yesus balalu lumpat bara danum sungei te. Te salenga langit buap tuntang Yesus mite Roh Hatalla mohon kilau burung dara akan hunjun ie. 3:17 Limbah te tarahining auh Hatalla hamauh, "Ie toh Anakku je inyintaku. Ie manyanang ateiku."
4:1 Limbah te Yesus iagah awi Roh Hatalla akan padang pasir uka iningkes awi setan. 4:2 Epat puluh andau epat puluh alem Yesus dia kuman. Balalu ie mangkeme balau'. 4:3 Setan dumah tuntang hamauh, "Diakah ikau toh Anak Hatalla? Soho kare batu toh manjadi rote." 4:4 Yesus tombah, "Huang Surat Barasih aton tarasurat: Olon dia tau belom baya awi rote bewei, tapi awi gagenep auh je ingotak Hatalla kea." 4:5 Limbah te setan mimbit Yesus akan Yerusalem, lewu barasih, tuntang mingkes ie hunjun Human Tuhan. 4:6 Palus setan hamauh dengae, "Diakah ikau toh Anak Hatalla? Amon kalote, sewu ih ikau akan penda; basa huang Surat Barasih aton tarasurat kalotoh, 'Hatalla akan manyoho kare malekat ayue mangalindong ikau, ewen akan manyambut ikau mahapan lengen ewen, mangat paim mahin jaton tapohos batu.' " 4:7 Yesus tombah, "Tapi huang Surat Barasih aton kea tarasurat, 'Ela ikau maningkes Tuhan Hatallam.' " 4:8 Limbah te setan mimbit Yesus tinai akan bukit je gantong toto tuntang mamparahan akae kakare karajaan hong kalunen hayak dengan kakare panataue. 4:9 Palus setan hamauh dengan Yesus, "Uras kare taloh toh handak inengaku akam, amon ikau sontop manyembah aku." 4:10 Yesus tombah, "Dari ikau setan! Huang Surat Barasih aton tarasurat: Sembah Tuhan Hatallam, tuntang keleh manempo ie bewei!" 4:11 Kajariae setan malihi Yesus, tuntang kare malekat dumah mandohop ie. 4:12 Katika mahining Yohanes inamean akan huang penjara, Yesus haguet mangejau arepe akan Galilea. 4:13 Ie malihi Nasaret palus melai hong Kapernaum, intu saran Danau Galilea hong daerah Sebulon tuntang Naptali. 4:14 Awi Yesus malalus hal te, maka tulus auh je inyampai awi Nabi Yesaya: 4:15 "Tanah Sebulon tuntang tanah Naptali, hong jalan akan danau, silan Sungei Yordan, Galilea tanah oloh je dia Yehudi! 4:16 Utus oloh je belom huang kakaput jari mite kalawa je paha-pahai! Akan oloh je melai huang lewun kangkalingen pampatei jari lembut kalawa hai!" 4:17 Bara katika te Yesus nampara mambarita, "Hobah keton bara kare dosan keton, karana Hatalla kareh bajeleng marentah kilau Raja!" 4:18 Metoh Yesus mananjong hong saran Danau Galilea, ie mite due biti palauk, iete Simon (ije inggaree kea Petrus) dengan andie, Andreas. Ewen te kanjerae malauk hong danau te mahapan jala. 4:19 Yesus hamauh dengan ewen, "Kahetoh, omba aku. Aku handak majar keton manjala olon." 4:20 Balalu ewen te malihi jalae palus omba Yesus. 4:21 Yesus marajur tanjonge, palus ie mite tinai due biti oloh beken hampahari, iete Yakobus tuntang Yohanes, ewen te anak Sebedeus. Ewen habapa te kanjerae mangambuah jalae hong arut. Yesus mantehau ewen kea, 4:22 tuntang ewen balalu malihi arute dengan bapae, palus omba Yesus. 4:23 Hong Galilea, Yesus manamuei mangumbang daerah te tuntang majar hong kare huma sombayang, ie mangabar Barita Bahalap tahiu Hatalla je handak marentah. Tuntang ie kea mampakeleh kare oloh je haban tuntang cacat. 4:24 Kabar tahiu Yesus te tayap akan hapus daerah Siria, sampai are oloh dumah manalih ie. Ewen mimbit kare oloh je buah macam-macam ampin panyakit tuntang kasusah. Kare oloh ije ingumpang awi roh papa, je awi inyon, ije lumpuh, uras impakeleh awi Yesus. 4:25 Are toto oloh je omba Yesus wayah te. Aton je dumah bara Galilea, bara Lewu Sapuluh, bara Yerusalem, bara Yudea, tuntang aton tinai je bara lewu hong dipah silan Yordan.
5:1 Katika Yesus mite oloh are te, ie mandai' akan hunjun bukit. Limbah ie mondok, kare muride dumah manalih ie, 5:2 palus ie majar ewen: 5:3 "Salamat oloh je mangkeme jaton kaabase tuntang harap baya dengan Tuhan bewei; ewen te anak ungkup ain Hatalla! 5:4 Salamat oloh je kapehe ateie; maka Hatalla handak mampong ewen! 5:5 Salamat oloh je randah ateie; maka Hatalla handak manggenep janjie akan ewen! 5:6 Salamat oloh je haus huange handak malalus kahandak Hatalla; maka Hatalla handak mameda angat huang ewen! 5:7 Salamat oloh je masi dengan oloh beken; maka Hatalla handak masi ewen kea! 5:8 Salamat oloh je tinduh ateie; ewen kareh mangasene Hatalla. 5:9 Salamat oloh je bagawi akan kabuah oloh kalunen; maka Hatalla handak mangaku ewen kilau anake! 5:10 Salamat oloh je buah kapehe awi malalus kahandak Hatalla; basa ewen te anak ungkup ain Hatalla! 5:11 Salamat keton amon keton ihalalea atawa ingapehe, tuntang imapa tagal aku. 5:12 Kare nabi je belom helo bara keton mahin jari ingapehe kilau te. Buah keton hanjak rantang, basa hai upah je inatap Tuhan akan keton." 5:13 "Keton toh uyah kalunen. Amon uyah manjadi batawah, en tau ie ingahing haluli? Jete jaton baguna hindai, malengkan inganan tuntang ihunje oloh. 5:14 Keton toh kalawan kalunen. Lewu je aton hunjun bukit dia tau basilim. 5:15 Jaton oloh mambelom sumbo, palus manutup sumbo te mahapan balanai. Tapi ie kareh mingkes sumbo te hong tantahan sumbo, mangat manenga kalawa akan gagenep oloh intu huma. 5:16 Kalote kea kalawan keton musti paha-pahai intu taharep oloh, uka ewen mite kare gawin keton je bahalap, palus manara Bapa keton je huang sorga." 5:17 "Ela keton manyangka aku dumah handak manganan hukum Moses tuntang auh ajar kare nabi. Aku dumah dia handak manganae, tapi mangat mamparahan rimae ije bujur. 5:18 Ingat! Katahin langit tuntang kalunen magon aton, ije hurup atawa titik je paling korik mahin jaton tau nihau bara huang hukum te, amon kare auh ajar huang hukum te hindai manjadi! 5:19 Tagal te eweh bewei je malanggar aloh ije bara kare parentah te, aloh kilen ampin kakorike; tuntang majar oloh beken mawie kalote kea, ie kareh manjadi ije paling korik bara kare anak ungkup Hatalla. Tapi eweh bewei je malalus kare parentah te tuntang majar oloh beken mawie kalote kea, ie kareh manjadi hai bara marak kare anak ungkup Hatalla. 5:20 Jadi, ingat bua-buah: Keton dia olih manjadi ungkup ain Hatalla, amon keton dia labih bara kare guru agama tuntang kare oloh Parisi huang hal malalus kahandak Hatalla!" 5:21 "Keton katawan ain tato hiang itah aton auh ajar kalotoh: Ela mampatei olon; ewe-eweh ije mampatei, musti iimbit akan pakara. 5:22 Tapi toh aku hamauh dengan keton, ewe-eweh je balait dengan oloh beken, kareh iimbit akan pakara; tuntang ewe-eweh je hamauh dengan oloh beken, 'Ceh ikau toh jaton gunae,' kareh iimbit manaharep Majelis Agama. Tuntang eweh bewei je manyewut oloh beken 'Humong', patut inganan akan apui naraka. 5:23 Tagal te amon aton ije bara keton metoh ie manyarah parapahe akan Hatalla, hete ie teraingat aton oloh je kapehe ateie dengae, 5:24 keleh ie malihi helo parapahe te hong baun mesbeh, palus tolak badamai dengan oloh te. Limbah te ie tau haluli tuntang manyarah parapahe te akan Hatalla. 5:25 Paribasae aton oloh mangado keton akan pangadilan, keleh badamai ih dengae sarai' magon aton katika helo bara sampai akan pangadilan. Amon dia, oloh te kareh manyarah keton akan hakim je handak manyarah keton akan polisi. Palus polisi kareh manamean keton akan huang penjara. 5:26 Tuntang ingat: keton pasti dia baka tau balua bara penjara te, helo bara keton mamunah kare danda je musti imbayar keton." 5:27 "Keton katawan aton auh ajar kalotoh: Ela habandong. 5:28 Tapi toh aku hamauh dengan keton: ewe-eweh je manampayah oloh bawi sampai lembut kipee, oloh te jari habandong dengan oloh bawi te huang ateie. 5:29 Amon matam hila gantau mawi sabab ikau badosa, karuit tuntang kanan matam te! Labih bahalap ikau nihau ije bara kare ramon berengm bara ikau dengan hapus bitim inganan akan huang apui naraka. 5:30 Amon lengem gantau mawi sabab ikau badosa, tetek tuntang kanan lengem te! Labih bahalap ikau nihau silan lengem bara hapus bitim tame akan naraka." 5:31 "Aton kea auh ajar kalotoh: genep oloh je manganan sawae, musti manenga surat hatolang akae. 5:32 Tapi toh aku hamauh dengan keton: ewe-eweh je manganan sawae padahal oloh bawi te jaton gawie je sala, ie mawi sabab sawae te habandong amon sawae te kawin tinai. Tuntang ewe-eweh je kawin dengan oloh bawi je inganan kalote, ie habandong kea." 5:33 "Keton katawan ain tato hiang itah aton auh ajar kalotoh: ela malawan janji. Taloh je jari injanjim hapan sumpah intu taharep Hatalla, musti ikau malaluse. 5:34 Tapi toh aku hamauh dengan keton: ela samasinde basumpah, maninjok langit, basa langit te padadusan Hatalla, 5:35 atawa maninjok petak, basa petak te lapik paie; atawa maninjok Yerusalem, basa jete lewun Raja hai. 5:36 Ela kea basumpah maninjok takolokm, basa ikau kabuat jaton tau manampa balaum mawie jadi baputi atawa babilem, aloh ije kalambar. 5:37 Sewut ih 'Yoh' atawa 'Dia' -- labih bara te, jete dumah bara setan." 5:38 "Keton katawan aton kea auh ajar kalotoh: mate ganti mate, kasinge ganti kasinge. 5:39 Tapi toh aku hamauh dengan keton: ela mambaleh mawi oloh ije mawi kapapa dengan keton. Tapi amon oloh manampar pipim hila gantau, nauhe ie manampar pipim hila sambil kea. 5:40 Tuntang amon oloh mangado keton akan hakim tuntang mimes bajum, tenga kea akae jubahm. 5:41 Amon aton pejabat pamarentah mamaksa keton meton ramoe akan ije kilo meter kakejaue, eton akae sampai due kilometer. 5:42 Amon oloh balaku taloh en-en dengan keton, tenga ih akae. Tuntang ela kea manolak oloh je handak minjam taloh en-en dengan keton." 5:43 "Keton katawan aton auh ajar kalotoh: keleh keton sinta kare kawal keton tuntang basingi musoh keton. 5:44 Tapi toh aku hamauh dengan keton: keleh sinta musoh keton, tuntang balakudoa akan kare oloh je mangapehe keton, 5:45 uka keton manjadi anak Bapa keton je huang sorga. Basa Hatalla mampalembut matanandau ayue akan oloh je bahalap tuntang akan oloh je papa kea. Ie mampamohon ujan akan oloh je mawi gawi bahalap tuntang akan oloh je mawi gawi papa kea. 5:46 Basa amon keton sinta baya dengan oloh je sinta keton bewei, akan en Hatalla musti mambaleh gawin keton te? En dia kah kare panagih pajak mahin mawie kalote? 5:47 Tuntang amon keton manenga hormat baya akan kare kawal keton bewei, narai kea kalabiee te? Kare oloh je dia mangasene Hatalla mahin mawie kalote! 5:48 Bapa keton huang sorga sinta dengan oloh handiai hapan katinduh. Keton musti kalote kea."
6:1 "Ingat, ela keton malalus ampin kapatut agaman keton hong taharep oloh are mangat gitan oloh. Amon keton mawie kalote, Bapa keton huang sorga dia baka manenga upah akan keton. 6:2 Jadi, amon keton manenga sadakah akan oloh je belom susah, ela manarong hal te kilau je iawi kare oloh haliau. Ewen rajin malalus jete intu huang huma sombayang tuntang hong bentok jalan hai, mangat inara oloh. Ingat, ewen te jari manarima upahe. 6:3 Tapi keton, amon keton manenga sadakah, tenga suni-suni, sampai jaton oloh je katawae. 6:4 Keleh gawim te dia usah ingatawan awi eweh bewei, tapi baya awi Bapa keton hong sorga. Ie mite gawim je basilim tuntang ie handak manenga upah akan keton." 6:5 "Amon keton balakudoa, ela kilau kare oloh je rajin pura-pura. Ewen rajin balakudoa sambil mendeng hong huma sombayang tuntang hong simpang jalan mangat gitan oloh. Ingat, jete ih upah je jari inarima ewen. 6:6 Tapi amon ikau balakudoa, tame kamarm tuntang atep bauntonggang, palus balakudoa akan Bapam je dia gitan te. Maka Bapam je mite gawim je basilim te kareh manenga upah akam. 6:7 Amon keton balakudoa, ela auh keton lulang-luli kilau kare oloh je dia mangasene Tuhan. Ewen manyangka palakun ewen te akan ihining, awi lakudoan ewen je panjang te. 6:8 Ela keton kilau ewen. Bapa keton jari katawan taloh je imerlu keton, helo bara keton balakue. 6:9 Jadi keleh balakudoa kalotoh, 'Bapa ikei hong sorga: Ikau bewei Hatalla je Tunggal. Keleh ikau inyembah tuntang ihormat. 6:10 Ikau bewei Rajan ikei. Keleh ikau marentah hunjun petak tuntang kahandakm imenda kilau huang sorga. 6:11 Tenga ah andau toh panginan je imerlu ikei. 6:12 Ampun ikei bara kare kasalan ikei, kilau ikei jari mampun oloh je basala dengan ikei. 6:13 Ela ah manalua ikei nihau kapercayan ikei hong katika ikei iningkes tapi paliwus ikei bara kuasan taloh papa Ikau bewei Raja je kuasa tuntang hai tuntang katatahie, Amen.' 6:14 Amon keton mampun oloh je basala dengan keton, Bapa keton je huang sorga mahin kareh mampun kasalan keton. 6:15 Tapi amon keton dia mampun kasalan oloh beken, Bapa keton hong sorga kea dia baka mampun kasalan keton." 6:16 "Amon keton puasa, ela baun keton kilau oloh je rajin pura-pura. Ewen mobah ampin tampayah baue mangat oloh katawan ewen te puasa. Ingat, tikas te ih upah je jari dinon ewen. 6:17 Tapi amon keton puasa, enyau baun keton tuntang nyarak balau' keton, 6:18 mangat jaton oloh je katawan keton puasa, baya Bapam je dia gitan te bewei. Ie mite gawim je basilim te tuntang kareh manenga upah akam." 6:19 "Ela manampunan panatau akan arep keton hong kalunen toh, je eka gagat tuntang tagar tau marusake tuntang maling tau manakaue. 6:20 Tapi tampunan panatau sorga, je eka gagat tuntang tagar dia tau marusake, tuntang maling dia tau dumah manakaue. 6:21 Karana hong kueh panataum, hete kea ateim!" 6:22 "Mate jete sumbo akan bereng. Amon matam barasih, maka hapus berengm bakarinah kalawae. 6:23 Tapi amon matam hawur, maka hapus berengm kaput pijem. Jadi amon sumbo huang arepm te kaput, paham haream kakaput te!" 6:24 "Ije biti mahin jaton oloh tau bagawi akan due kapala. Basa ie kareh labih sinta ije bara je beken te. Atawa ie kareh labih heret dengan kapala ije te bara je beken. Kalote kea dengan keton. Keton dia tau bagawi akan Hatalla tuntang akan ramon panatau kea. 6:25 Awi te ingat; ela mikeh tahiu pambelom keton, tahiu taloh je kinan tuntang taloh je ihop keton, atawa taloh je akan hapan keton. Diakah pambelom labih hai bara panginan, tuntang bereng labih bara pakaian? 6:26 Ite burung hong penda langit. Ewen jaton mimbul, jaton manggetem, tuntang jaton kea manampunan hasil taloh imbule akan huang lepau. Aloh kalote, Bapa keton je huang sorga mahaga ewen! Diakah keton toh kejau kahain regan keton bara burung? 6:27 Eweh bara keton je tagal kikehe tau mamanjang umure isut barangai? 6:28 Mbuhen keton mikeh tahiu pakaian keton? Keleh keton manantuani kare kambang bakung je belom hong padang. Kare kambang te jaton bagawi tuntang manjawet; 6:29 Tapi Raja Salomo je kalote katataue mahin jaton mahapan pakaian je sama kahalape kilau kambang te! 6:30 Oru hong padang lembut andau toh tuntang andau jewu lepah inusul. Tapi Hatalla makaian oru te kalote kahalape. Mahin tinai je keton! Tapi keton kurang percaya! 6:31 Ela keton mikeh tuntang hamauh, 'Narai je akan indu kinan itah' atawa 'narai taloh ihop itah', atawa 'narai taloh je akan hapan itah'? 6:32 Kare taloh te harajur inggoang awi kare oloh je dia kasene Hatalla. Padahal Bapa keton je huang sorga katawan je keton manggau taloh samandiai te. 6:33 Jadi, gau helo jalan mangat Hatalla marentah hong pambelom keton tuntang lalus kahandake. Maka kare taloh awang beken kareh inenga Hatalla kea akan keton. 6:34 Tagal te, ela mikeh tahiu andau jewu. Basa andau jewu aton tinai kikeh ayue kabuat. Andau toh jari sukup kasusahe, dia usah indahang tinai."
7:1 "Ela mahakim oloh beken, uka keton kabuat dia ihakim kea awi Hatalla. 7:2 Karana sama kilau keton mahakim oloh beken, kalote kea Hatalla mahakim keton. Tuntang ukuran je hapan keton akan oloh beken, kareh ihapan Hatalla kea buah keton. 7:3 Mbuhen keton mite rutik huang matan paharim, padahal balok huang matam kabuat dia ikau manantuanie? 7:4 Kilen keton tau hamauh dengan paharin keton, 'Hetoh aku mampalua rutik te bara matam,' padahal huang matam kabuat aton balok? 7:5 O, oloh haliau! Palua helo balok te bara matam kabuat, harue ikau tau mite tarang batantu, tuntang tau mampalua rutik bara matan paharim. 7:6 Ela manenga taloh barasih akan aso, mangat ela aso te mules tuntang mamok ikau. Tuntang ela manenga mutiara akan bawoi, mangat bawoi te dia manandik mutiara te." 7:7 "Laku, maka keton kareh manarima. Gau, maka keton kareh mandino. Tegah, maka bauntonggang kareh iuap akan keton. 7:8 Karana oloh je balaku kareh manarima; oloh je manggau kareh mandino; tuntang oloh ije manegah, akae baun tonggang iuap. 7:9 En aton bara marak keton ije bapa je manenga batu akan anake amon anake te balaku rote? 7:10 Atawa manenga handipe amon ie balaku lauk? 7:11 Aloh keton oloh papa, mahin katawan keton kea je manenga taloh bahalap akan kare anak keton. Mahin tinai Bapa keton hong sorga! Ie labih haream manenga ije bahalap akan oloh ije balaku dengae. 7:12 Lalus gawi akan oloh tumon je ingahandak keton oloh mawie kea akan keton. Jete teras hukum Moses tuntang auh ajar kare nabi." 7:13 "Tame mahalau bauntonggang je seke, basa bauntonggang tuntang jalan je manintu naraka puna hai tuntang lombah, tuntang are oloh je mahalau hete. 7:14 Tapi puna seke tuntang bahali bauntonggang tuntang jalan je mimbit oloh akan pambelom. Tuntang baya isut oloh je sondaue." 7:15 "Bua-buah keton dengan kare nabi pananjaro. Ewen dumah manalih keton kilau ampin tabiri, tapi sapunae ewen te kilau sarigala je basiak. 7:16 Keton kareh mangasene ewen bara hasil gawie. Ruwut bahu haduhi dia tau mampalembut bua anggur, tuntang ruwut haduhi dia mampalembut bua ara. 7:17 Bara batang je basiwuh oloh mandino bua je bahalap, tuntang bara batang je dia basiwuh, bua je papa. 7:18 Batang je basiwuh dia tau mampalembut bua je papa, tuntang batang je dia basiwuh dia tau mampalembut bua je bahalap. 7:19 Gagenep batang je dia mampalembut bua je bahalap, ineweng tuntang inusul. 7:20 Kalote kea dengan kare nabi pananjaro. Keton mangasene ewen bara hasil gawie." 7:21 "Dia uras oloh je mantehau aku 'Tuhan, Tuhan,' kareh manjadi anak ungkup ain Hatalla, tapi baya kare oloh je malalus kahandak Bapaku je hong sorga. 7:22 Hong Andau Kiamat are oloh kareh hamauh dengangku, 'Tuhan, Tuhan, en dia huang aram ikei jari mansanan peteh Hatalla? Tuntang diakah huang aran Tuhan kea ikei jari maharak kare setan tuntang mawi are taloh heran?' 7:23 Tapi aku kareh tombah, 'Aku dia puji mangasene keton! Dari bara hetoh, keton je mawi taloh papa!' " 7:24 "Nah oloh je mahining auhku toh, tuntang manumoe, sama kilau oloh pintar je mamangun humae hunjun batu. 7:25 Katika ujan mohon tuntang danum soho dumah hayak riwut karas manampur huma te, maka huma te dia baduroh awi jari imangun hong hunjun batu. 7:26 Tuntang oloh je mahining auhku toh, tapi dia manumoe, ie sama kilau oloh humong je mamangun humae hunjun pasir. 7:27 Metoh ujan dumah palus danum soho paham hayak riwut karas manampur huma te, maka huma te baduroh. Tuntang karusake paham toto!" 7:28 Kajariae auh ajar Yesus te hapus, tuntang kare oloh je aton hete paham hengan mahining ajare. 7:29 Basa ie majar hapan kahain pangaruhe, dia kilau kare guru agama ain ewen.
8:1 Yesus mohon bara bukit tuntang are oloh manuntut ie. 8:2 Hong katika te maka dumah ije biti oloh je buah panyakit kerai je bakaike-ikeh ampie. Ie sontop mandeko utute intu taharep Yesus, palus hamauh, "Pa, amon Bapa handak, Bapa tau mampakeleh aku." 8:3 Yesus manggayap oloh te sambil hamauh, "Yoh aku handak. Ikau keleh!" Hemben te kea panyakite te nihau. 8:4 Palus koan Yesus dengae, "Ingat! Ela manyaritae akan eweh bewei. Tapi keleh ikau haguet talih imam, tuntang balaku dengae uka manukas ikau toh jari keleh. Limbah te sarah parapahm tumon je irentah awi Moses, kilau bukti akan kare oloh je ikau puna toto-toto jari keleh!" 8:5 Metoh Yesus tame lewu Kapernaum, ije biti perwira Romawi dumah manyondau ie, tuntang balaku dohop dengae. 8:6 "Bapa," koan perwira te, "jipengku haban hong huma. Ie menter lemo-lupek hong ekae batiroh tuntang paham kapehee." 8:7 Koan Yesus, "Aku kareh dumah mampakeleh ie." 8:8 "Dia usah Pa," koan perwira te, "Aku dia patut manarima Bapa intu humangku. Bapa manenga parentah ih. Kareh jipengku te keleh ih awi parentahm. 8:9 Awi aku mahin musti tunduk dengan parentah atasan ayungku. Tuntang penda aku aton kea kare prajuritku je musti tunduk dengan parentahku. Amon aku manyoho ije biti prajurit 'Haguet!' maka ie haguet. Dengan je beken aku hamauh 'Kahetoh!' maka ie dumah; tuntang amon aku marentah jipengku 'Lalus jetoh!' maka ie malaluse." 8:10 Metoh Yesus mahining taloh je insanan perwira te, ie paham jungun. Palus ie hamauh dengan kare oloh je aton omba ie, "Tamam toto oloh toh. Bara marak oloh Israel mahin hindai puji aku sondau kapercaya je kahain toh! 8:11 Toto! Are oloh kareh dumah bara Timor tuntang Barat uka hanja-hanjak hayak dengan Abraham, Isaak tuntang Yakob hong Lewu Taheta ain Hatalla. 8:12 Tapi kare oloh je sapunae manjadi ungkup ain Hatalla te kareh inganan akan eka kakaput hong luar. Intu hete ewen kareh manangis tuntang kapehe." 8:13 Palus Yesus hamauh dengan perwira te, "Buli ih, taloh je imercayam te akan manjadi." Tuntang hemben te kea jipee te keleh. 8:14 Yesus haguet akan human Petrus. Intu hete ie mite empo Petrus je bawi metohe haban badarem hong ekae batiroh. 8:15 Yesus manggayap lengee, palus dareme nihau. Ie misik tuntang nampara manyang Yesus. 8:16 Katika andau nampara halemei, oloh mimbit manalih Yesus, are oloh je ingumpang setan. Tuntang hapan ije kabawak kotak ih, Yesus maharak kare setan te tuntang mampakeleh kea kare oloh je haban. 8:17 Yesus malalus taloh handiai te, tuntang hapan jete maka manjadi kea taloh je insanan awi Nabi Yesaya, iete, "Ie mananggong kapehen itah tuntang mampakeleh panyakit itah." 8:18 Maka are toto oloh mangaliling Yesus. Metoh Yesus mite ewen te samandiai, ie manyoho kare muride dimpah danau. 8:19 Palus dumah ije biti guru agama manalih ie tuntang hamauh, "Bapa Guru, aku handak omba Bapa akan kueh bewei!" 8:20 Yesus tombah, "Sarigala aton rumbake, tuntang burung aton sarangae, tapi Anak Olon jaton ekae mampeter arepe." 8:21 Palus ije muride je beken hamauh, "Pa, aku balaku paramisi buli helo mangat mangubur bapaku." 8:22 Tapi Yesus tombah, "Hetoh, keleh omba aku, nauhe ih oloh matei mangubur jalahan ayue kabuat je matei!" 8:23 Yesus lumpat akan arut tuntang kare muride omba hayak dengae. 8:24 Te salenga riwut barat je paham toto manampur danau sampai arut ewen ihampas galumbang. Katika te Yesus batiroh. 8:25 Maka kare muride manalih ie tuntang mampisik ie. "Pa! Dohop! Calaka itah toh!" koan ewen. 8:26 "Mbuhen keton mikeh?" koan Yesus. "Keton tapas kepercayan keton dengangku!" Limbah te Yesus mendeng palus malait riwut tuntang danau te. Balalu danau te manjadi tadoh toto. 8:27 Kare murid Yesus hengan. Ewen hamauh, "Oloh en kea ie toh, sampai riwut tuntang galumbang mahin manumon parentahe!" 8:28 Yesus sampai dipah silan danau hong tanah Gadara. Intu hete aton due biti oloh je ingumpang setan dumah manalih ie. Kadadue oloh te basiak toto ampie, sampai jaton ije biti oloh je bahanyi mahalau hete. 8:29 Ewen balua bara liang kubur tuntang mangkariak, "Anak Hatalla, narai je handak iawim dengan ikei? En ikau handak mangapehe ikei helo bara wayahe?" 8:30 Dia kejau bara hete are toto bawoi je kanjerae manggau panginae. 8:31 Kare setan te balaku dengan Yesus, "Amon ikau handak manyoho ikei balua, soho ikei tame akan huang kare bawoi te." 8:32 "Balua!" koan Yesus. Kare setan te balua bara kadadue oloh te palus tame akan huang bawoi. Kare bawoi te balalu hadari tuntang manangkero bara saran tiwing akan huang danau, palus buseng. 8:33 Kare oloh je manjaga bawoi te hadari akan lewu tuntang manyarita taloh handiai je manjadi te, tuntang kea tahiu taloh je manjadi buah due biti oloh je ingumpang setan te. 8:34 Maka oloh are huang lewu te palus manyondau Yesus. Metoh ewen mite Yesus, ewen balaku nyame-nyame uka ie malihi daerah ewen te.
9:1 Yesus lumpat akan arut, palus dimpah danau, palus buli akan lewu-humae. 9:2 Intu hete oloh mimbit manalih ie ije biti oloh lumpuh, je menter hong ekae batiroh. Katika Yesus mite ampin kapercayan oloh te je dia lue-luen, ie hamauh dengan oloh je lumpuh te, "O anak, mente-menteng ateim! Kare dosam jari iampun." 9:3 Pire-pire guru agama je aton hete hamauh huang ateie, "Oloh toh mamapa Hatalla!" 9:4 Yesus katawan tirok ewen, palus ie hamauh, "Mbuhen tirok keton papa kalote? 9:5 Je kueh je labih murah: manyewut 'Dosam jari iampun', atawa manyewut, 'Hingkat tuntang mananjong'? 9:6 Tapi toh aku handak mambukti akan keton je Anak Olon aton kuasae hong hunjun petak toh uka mampun dosa." Palus Yesus hamauh dengan oloh lumpuh te, "Hingkat, gatang ekam batiroh, tuntang buli!" 9:7 Oloh lumpuh te palus hingkat tuntang buli akan humae. 9:8 Metoh kare oloh mite kajadian te, ewen takikeh tuntang manara Hatalla, basa Hatalla jari manenga kuasa je kalote kahai akan olon. 9:9 Limbah te Yesus malihi eka te. Pandehan mananjong, ie mite ije biti oloh panagih pajak, arae Mateus, metohe mondok hong kantor pajak. Yesus hamauh dengae, "Kantoh, omba aku!" Maka Mateus mendeng palus omba Yesus. 9:10 Metoh Yesus kuman hong human Mateus, maka dumah kare panagih pajak tuntang kare oloh je inaha dia bahalap awi kare oloh, omba kuman haya-hayak dengan Yesus tuntang kare muride. 9:11 Kare oloh Parisi aton mite hal te. Tuntang ewen misek dengan kare murid Yesus, "En sababe gurun keton kuman haya-hayak dengan panagih pajak tuntang kare oloh je dia bahalap?" 9:12 Yesus mahining auh paisek ewen balalu ie tombah, "Oloh je barigas dia perlu dokter, baya oloh je haban bewei. 9:13 Riksa narai rimae auh Surat Barasih toh: 'Aku mangahandak asi, tuntang dia mangahandak meto akan parapah'. Basa aku dumah dia uka mantehau oloh je manaha arepe jari bahalap, tapi oloh je inaha papa." 9:14 Limbah te kare murid Yohanes Pampandoi dumah manalih Yesus. Palus ewen misek, "Mbuhen ikei tuntang kare oloh Parisi puasa tapi kare murid Bapa dia?" 9:15 Yesus tombah, "Kilen angat tirok keton? En tau kare oloh maja hong pesta kawin kapehe ateie amon panganten hatue magon hinje ewen? Batantu dia! Tapi kareh akan dumah katikae panganten hatue te induan bara ewen. Katika te harue ewen puasa. 9:16 Jaton aton oloh manumpang baju je jari kupit mahapan tantanan benang je magon taheta. Karana tantanan benang te kareh kanjorot tuntang marantat baju te, sampai kajariae mawi rabite paham hai. 9:17 Jaton kea oloh manyuang anggur je taheta akan huang kambut upak meto je usang. Karana kambut te kareh babindai tuntang rusak, palus anggur te nihau mananya. Anggur je taheta musti inyuang akan huang kambut je taheta kea, uka kadaduee te tetep bahalap." 9:18 Metoh Yesus hakotak dengan kare murid Yohanes Pampandoi, maka dumah ije biti pamimpin huma sombayang. Ie sontop mandeko utute intu taharep Yesus tuntang hamauh, "Anakku je bawi harue nihau, tapi keleh pahias dumah uka mimbing ie mangat ie belom tinai." 9:19 Yesus harikas tuntang haya-hayak dengan kare muride haguet dengan oloh te. 9:20-21 Hong benteng jalan, ije biti oloh bawi je jari due walas nyelo katahie buah panyakit baduroh dahae, dumah manokep Yesus bara hila likut. Ie manirok, "Asal aku manigong jubahe bewei, aku palus keleh." Palus ie manigong lawin jubah Yesus. 9:22 Maka hemben te kea Yesus tampaliau tuntang mite oloh bawi te palus hamauh dengae, "Mente-menteng ikau, anakku! Awi ikau percaya dengangku, ikau keleh!" Hemben te kea oloh bawi te keleh. 9:23 Limbah te Yesus sampai hong human kapala huma sombayang te. Katika ie mite kare oloh je main musik hong eka oloh matei tuntang are oloh je ridu-ridu, 9:24 ie hamauh dengan ewen, "Balua urase keton! Anak toh dia matei; ie baya batiroh." Ewen uras manatawe Yesus. 9:25 Limbah kare oloh te balua, Yesus tame akan huang kamar anak te tuntang mimbing lengee. Balalu anak bawi te hingkat. 9:26 Kabar tahiu hal te tayap akan hapus daerah hete. 9:27 Yesus haguet bara hete tuntang hong benteng jalan due biti oloh babute manuntut ie. Ewen mangkariak, "Anak Dawid, pasi ikei!" 9:28 Katika Yesus tame akan huang huma, kadadue oloh babute te dumah manalih ie. Yesus misek dengan ewen, "En keton percaya je aku toh tau mampakeleh keton?" "Percaya Pa!" koan ewen. 9:29 Palus Yesus manggayap matan ewen sambil hamauh, "Awi keton percaya, keleh kare kaharap keton te manjadi." 9:30 Palus ewen tau mite. Yesus mampingat ewen hapan kapehes auhe, uka ela mansanan hal te akan eweh bewei. 9:31 Tapi ewen haguet tuntang manyiar barita tahiu Yesus akan hapus tanah te. 9:32 Katika kadadue oloh te haguet, ije biti oloh bisu je inguasa awi setan imbit oloh manalih Yesus. 9:33 Yesus maharak setan te tuntang hong katika te kea oloh bisu te tau hakotak tinai. Oloh are te hengan tuntang hamauh, "Hindai puji itah mite kajadian kilau toh hong Israel!" 9:34 Tapi kare oloh Parisi hamauh, "Kapalan kare setan ih je manenga kuasa akae hapa maharak setan te." 9:35 Kalote Yesus haguet mangumbang kare eka bara lewu ije akan lewu je beken tuntang bara dokoh ije akan dokoh je beken. Ie majar hong kare huma sombayang tuntang mangabar Barita Bahalap tahiu ampin Hatalla marentah kilau Raja. Ie mampakeleh kare oloh je kapehe awi buah sepsimpan ampin kare panyakit tuntang karusak bereng. 9:36 Katika Yesus mite oloh are te, lembut asie dengan ewen, awi ewen heka toto ampie tuntang jaton katawan en taloh je musti iawi ewen, sama kilau tabiri je jaton bara sakatik. 9:37 Palus Yesus hamauh dengan kare muride, "Taloh je inggetem toh are, tapi oloh je manggeteme isut ih. 9:38 Awi te laku ih dengan oloh je tempon kabun te uka mampait oloh je manggetem akan taloh je inggetem."
10:1 Hong sinde andau Yesus mantehau due walas muride uka hapumpong. Palus ie manenga akan ewen kuasa hapan maharak kare roh papa tuntang mampakeleh sepsimpan ampin panyakit tuntang kare karusak bereng. 10:2 Aran due walas rasul te ie te: je solake, Simon (je inyewut kea Petrus) dengan paharie Andreas, palus Yakobus dengan paharie Yohanes, ewen te anak Sebedeus. 10:3 Limbah te Pilippus tuntang Bartolomeus, dengan Tomas tuntang Mateus, panagih pajak, tuntang Yakobus anak Alpeus, tuntang Taddeus; 10:4 balalu Simon je Menteng, tuntang Yudas Iskariot je mandurhaka mawi Yesus. 10:5 Limbah te kare due walas rasul te inyoho Yesus dengan auh peteh kalotoh, "Ela manalih akan daerah ain kare oloh je dia Yehudi. Ela kea akan kare lewun oloh Samaria. 10:6 Tapi talih akan kare oloh Israel, je mambatang akan ewen je layang. 10:7 Sanan akan ewen je Hatalla te kareh bajeleng marentah kilau Raja. 10:8 Pakeleh kare oloh je haban; mbelom kare oloh je matei; pakeleh kare oloh je buah panyakit kerai je mimbit bahaya, tuntang harak kare setan. Keton jari manarima kare taloh samandiai te dia imbayar. Jadi tenga kea jete kilau te kea. 10:9 Ela mimbit duit amas, duit perak atawa duit tambaga. 10:10 Ela kea mimbit kambut sadakah atawa due lambar pakaian akam hong jalan, atawa sapatu, atawa sukah. Karana oloh je bagawi, puna inanggong huang kare katapase. 10:11 Amon keton sampai kota atawa lewun oloh, gau oloh je maku manarima keton. Melai ih omba ie sampai keton tolak tinai. 10:12 Metoh keton tame huma, keleh keton hamauh, 'Keleh Tuhan mamberkat keton.' 10:13 Amon kare oloh huma te manarima keton, nauhe ih auh taben keton te tetep melai hong ewen. Tapi amon ewen dia manarima keton, jijit haluli auh taben keton te. 10:14 Amon aton huma atawa lewu je dia maku manarima keton atawa dia maku mahining auh keton, lihi ih eka te tuntang ngibas kawon petak bara tatap pain keton. 10:15 Ingat! Hong Andau Kiamat, kare oloh hong lewu Sodom tuntang Gomora labih murah iampun awi Hatalla, bara kare oloh hong lewu te!" 10:16 "Hining toh: aku manyoho keton kilau tabiri je jaton bara kaabas manalih bentok kare sarigala je basiak. Keton musti barendeng kilau handipe tuntang bujur atei kilau burung dara. 10:17 Keleh keton tetep bajaga, basa keton kareh inawan tuntang iimbit akan pengadilan. Keton kareh ingapehe hong kare huma sombayang. 10:18 Keton kareh iimbit manaharep kare oloh je mimbing kuasa tuntang kare raja awi keton muridku. Tuntang jete katika je bahalap akan keton manyaksi tahiu aku taharep ewen tuntang taharep kare oloh je dia mangasene Hatalla. 10:19 Tapi amon keton iimbit akan pengadilan, ela mikeh tahiu taloh je musti ingotak keton, atawa kilen ampie keton musti hakotak. Basa taloh je musti insanan keton te, kareh insanan akan keton pas tumon katikae. 10:20 Karana je hakotak metoh te dia ie keton, tapi Roh Bapa je hong sorga, mahalau keton. 10:21 Maka kareh akan manjadi: oloh manyarah paharie kabuat uka impatei. Jete kea kareh manjadi awi bapae dengan anake. Kare anak kareh malawan indue tuntang bapae, tuntang manyarah ewen uka impatei. 10:22 Keton kareh inyingi awi oloh samandiai awi keton toh muridku. Tapi oloh je tahan sampai kalepahe kareh inyalamat. 10:23 Amon keton ingapehe hong ije lewu, hadari keton akan lewu je beken. Aku mansanan akan keton: Helo bara keton manalih lepah kare lewu hong Israel, Anak Olon jari dumah. 10:24 Murid dia labih hai bara gurue, tuntang jipen dia labih hai bara tempoe. 10:25 Sukup ih ije biti murid olih sama kilau gurue, tuntang ije biti jipen kilau tempoe. Amon kapala keluarga jari inggare Beelsebul, mahin hindai oloh je huang hapus humae. Ewen kareh inggare oloh labih papa hindai!" 10:26 "Ela mikeh dengan olon. Jaton taloh je basilim, je kareh dia gitan, tuntang jaton taloh je basahokan, je kareh dia iungkar. 10:27 Taloh je insanangku akan keton hong eka je kaput keton musti mansanae tinai hong katarang andau. Tuntang taloh je imbisik huang pindingm, mbarita jete akan hete-hete sapire kaolih keton! 10:28 Ela mikeh dengan ewen je mampatei bereng, tapi jaton kuasae mampatei hambaruan. Keleh keton mikeh dengan Hatalla je kuasa marusak bereng kalote kea hambaruan intu apui naraka. 10:29 Due kongan burung ampit olih imili hapan ije kabawak duit je pangkakorike. Tapi aloh kalote, ije kongan mahin jaton ewen manjato akan petak amon dia ingahandak awi Bapa keton. 10:30 Kare balau' hong takolok keton mahin uras jari iise. 10:31 Awi te, ela mikeh! Keton toh labih barega bara kare burung ampit!" 10:32 "Ewe-eweh je dengan katoton auhe mangaku arepe muridku intu taharep oloh are, aku kareh mahin mangaku ie intu taharep Bapaku je huang sorga. 10:33 Tapi ewe-eweh je milim arepe muridku intu taharep oloh are, aku kareh milim ie kea intu taharep Bapaku je huang sorga." 10:34 "Ela manyangka aku toh mimbit kadamai akan kalunen toh. Aku dia mimbit kadamai tapi kalawan. 10:35 Aku dumah mawi sabab sampai anak hatue malawan bapae, anak bawi malawan indue, manantu bawi malawan empoe je bawi. 10:36 Yoh, je kareh manjadi musoh je pangkahaie, iete oloh huang keluarga te kabuat. 10:37 Oloh je masi bapae atawa indue malabien bara aku, dia patut manjadi muridku. Kalote kea oloh je masi anake bawi atawa hatue labien bara aku. 10:38 Tuntang oloh je dia maku meton sampalakie tuntang omba aku, dia patut manjadi muridku. 10:39 Oloh je mahaga pambelom ayue kabuat, kareh nihau pambelome, tapi oloh je nihau pambelome awi kaketepe dengangku, kareh mandino pambelome." 10:40 "Oloh je manarima keton, manarima aku, tuntang oloh je manarima aku, manarima ie je manyoho aku, 10:41 Oloh je manarima nabi awi ie nabi, kareh manarima upah ije biti nabi. Tuntang ewen je manarima ije biti oloh bahalap awi ie bahalap, ie kareh manarima upah ije biti oloh bahalap. 10:42 Eweh bewei manenga danum ihop, aloh baya danum sadingen, akan ije biti bara kare oloh je naniha toto ampie toh, awi ie muridku, percaya bewei ie pasti kareh manarima upahe!"
11:1 Limbah Yesus manenga kare nasihat te akan due walas muride, ie malihi eka te. Ie haguet majar tuntang manyiar peteh Hatalla hong kare lewu je tokep hete. 11:2 Yohanes Pampandoi je metoh hong penjara, mahining tahiu gawin Kristus. Palus ie manyoho pire-pire muride haguet manalih Yesus uka misek, 11:3 "En Bapa toh oloh je akan dumah manumon janjin Hatalla, atawa musti ikei mentai oloh beken?" 11:4 Yesus tombah, "Buli ih talih Yohanes, tuntang sanan akae taloh je hining tuntang gitan keton: 11:5 Oloh babute tau mite, oloh lumpuh tau mananjong, oloh je buah panyakit kerai je baka ike-ikeh keleh; oloh badengen tau mahining, oloh matei belom haluli, tuntang Barita Bahalap bara Hatalla imbarita akan kare oloh je belom susah. 11:6 Salamat oloh je dia manggau saketa hapae manolak aku!" 11:7 Limbah kare sarohan Yohanes te haguet Yesus nampara hakotak dengan oloh are tahiu Yohanes, koae, "Keton manalih padang pasir handak mite narai? Ije kalambar oru je inariup riwutkah? 11:8 Keton handak haguet mite narai? Mite oloh je hapakaian bahalapkah? Kare oloh je hapakaian kalote aton melai huang istana! 11:9 Jadi mbuhen keton haguet akan padang pasir? Handak mite ije biti nabikah? Toto, labih haream bara ije biti nabi. 11:10 Karana Yohanes te je inyewut huang ayat Surat Barasih toh, 'jetoh ie sarohangku, koan Hatalla, aku manyoho ie helo bara ikau uka ie muap jalan akam.' 11:11 Ingat! hong kalunen toh dia puji aton oloh je labih hai bara Yohanes Pampandoi. Aloh kalote, oloh je pangkakorike bara kare anak ungkup ain Hatalla, labih hai bara Yohanes. 11:12 Bara katika Yohanes mangabar baritae sampai katika toh, ungkup ain Hatalla ilawan awi kare oloh je manggau akal handak manguasae hapan kakarase. 11:13 Sampai pandumah Yohanes, kakare hukum Moses tuntang auh ajar kare nabi, uras manujum tahiu kare taloh je musti manjadi. 11:14 Tuntang amon keton handak percaya, Yohanes te jete Elia, je pandumahe jari inujum. 11:15 Amon aton pinding, keleh mahining! 11:16 Hapan en aku musti mananding kare oloh jaman jetoh? Ewen kilau anak oloh je mondok hong pasar. Ije kakawan ewen te mangkariak dengan awang beken, 11:17 'Ikei manyanyi lagu rami akan keton, tapi keton dia maku manari! Ikei manyanyi lagu susah, tuntang keton dia maku manangis!' 11:18 Yohanes dumah -- ie puasa tuntang dia mihop anggur; tuntang kare oloh hamauh, 'Ie ingumpang setan!' 11:19 Toh Anak olon dumah -- ie kuman tuntang mihop; balalu kare oloh hamauh, 'Ite oloh te! Babungo, pambusau, kawal panagih pajak tuntang kawal oloh badosa.' Aloh kalote, kapintar kaharatin Hatalla gitan bara kare hasile." 11:20 Balalu Yesus nampara manida ampin kasalan kare lewu je ekae paling are mawi taloh heran. Basa kare oloh huang lewu te dia maku hobah bara kare dosan ewen. 11:21 "Calaka keton, Korasim! Tuntang calaka kea ikau Betsaida! Paribasa kare taloh heran je iawi hong marak keton jari iawi hong Tirus tuntang Sidon, pasti kare oloh hete jari tahi hobah bara kare dosan ewen tuntang mahapan pakaian oloh je kapehe atei tagal pampatei hayak mambuwur kawo hunjun takoloke. 11:22 Ingat, hong Andau Kiamat, kare oloh Tirus tuntang Sidon labih murah mandino ampun bara Hatalla amon inanding dengan ampun je dinon keton! 11:23 Tuntang keton, Kapernaum! En keton inggatang sampai akan sorga? Dia! Malahan keton kareh inganan akan apui naraka! Basa paribasa kare tanda heran je iawi marak keton te jari iawi hong Sodom, Sodom te mahin magon aton sampai wayah toh! 11:24 Ingat, hong Andau Kiamat, oloh Sodom akan labih murah iampun awi Hatalla bara keton!" 11:25 Hong katika te Yesus balakudoa, "Bapa, Tuhan je manguasa langit tuntang petak. Aku manarima kasih akam tagal taloh handiai te je inyahokam bara kare oloh pintar tuntang oloh ba-ilmu, tapi ikau mamparahae akan kare oloh je jaton pangatawae. 11:26 Jete bewei je manyanang atei Bapa." 11:27 Palus Yesus hamauh, "Kare taloh handiai jari inyarah Bapa akangku. Jaton ije biti oloh mangasene Anak, beken bara Bapa. Jaton kea je mangasene Bapa, beken bara Anak, tuntang kare oloh je akae Anak te jari mamparahan Bapa. 11:28 Keleh dumah talih aku keton samandiai je heka, tuntang je mangkeme katanggongan; aku handak mampangat keton. 11:29 Keleh manumon auh parentahku tuntang keleh bajar dengangku. Basa aku toh balemo tuntang randah atei, maka keton kareh mangkeme kamangat. 11:30 Karana kare parentahku mampangat, tuntang tanggongan je inengaku akan keton te mahian."
12:1 Hong ije andau Sabat, metoh Yesus mahalau ije padang gandum, kare muride manampara mamutik gandum palus kumae awi balau'. 12:2 Katika kare oloh Parisi mite hal te, ewen hamauh dengan Yesus, "Ite! Kare muridm malanggar hukum agaman itah awie malalus taloh je ingahana hong andau Sabat." 12:3 Yesus tombah, "En keton hindai puji mambasa taloh je iawi Dawid metoh ie tuntang kare oloh ayue balau'? 12:4 Ie tame akan huang human Hatalla; palus kuman rote je jari inyarah akan Hatalla. Padahal manumon hukum agaman itah, ie tuntang kare oloh ayue te dia tau kuman rote te -- baya kare imam ih je tau. 12:5 Atawa keton hindai puji mambasa intu huang hukum ain Moses je genep andau Sabat, kare imam je bagawi hong human Tuhan, malanggar atoran andau Sabat, tapi dia inyalan? 12:6 Hining taloh je koangku toh: intu hetoh aton ije je labih hai bara Human Tuhan. 12:7 Huang Surat Barasih aton tarasurat: Gawin asi je ingahandakku, dia ie parapah. Jaka keton toto-toto harati auh toh, pasti keton dia handak manyalan kare oloh je dia basala. 12:8 Karana Anak Olon aton kuasae hunjun andau Sabat." 12:9 Yesus malihi eka te palus haguet akan ije huma sombayang. 12:10 Hete aton due biti oloh je matei lengee silae. Pire-pire oloh je tantai handak manggau kasalan Yesus, misek dengae, "En tau mampakeleh oloh hong andau Sabat?" 12:11 Yesus tombah, "Paribasa aton ije biti bara keton tempon tabiri ije kongan, tuntang hong andau Sabat tabiri te manjato akan huang luwang je handalem; en diakah oloh je tempon tabiri te manggau jalan mangat mampalua tabiri te bara huang luwang te? 12:12 Nah, olon labih barega bara tabiri! Jadi, amon kalote, tau ih mandohop oloh hong andau Sabat." 12:13 Limbah te Yesus hamauh dengan oloh je matei lengee silae te, "Tajok lengem." Oloh te mantajok lengee, tuntang lengee te keleh sama kilau lengee je silae. 12:14 Tapi kare oloh Parisi malihi huma sombayang te, palus pakat uka mampatei Yesus. 12:15 Yesus katawan kare oloh Parisi te aton kahandak atei ewen je papa dengae. Jadi ie haguet bara eka te tuntang are oloh manuntut ie. Balalu ie mampakeleh kakare oloh je haban. 12:16 Tapi ie mangahana ewen mansanan akan oloh beken tahiu ie. 12:17 Kalote maka manjadi taloh je insanan Hatalla hajamban nabi Yesaya, 12:18 "Jetoh ie sarohangku je iintihku Oloh je inyintaku tuntang manyanang ateiku. Rohku handak inengaku akae, Katetekku kareh imbarita akan kare utus oloh. 12:19 Ie dia akan mawi karidu kalahi atawa mangkariak, atawa bapidato hong kare jalan hai. 12:20 Dereh je nantahulei kareh dia imeleke lantera je pini-pinit kareh dia imbelepe. Ie kareh manaharep kare tantangan sampai olih mandino kaadilan; 12:21 Kare utus oloh mingkes kaharape dengae." 12:22 Limbah te oloh mimbit manalih Yesus ije biti oloh babute tuntang bisu awi kuasan setan. Yesus mampakeleh oloh te sampai ie tau hakotak tuntang mite. 12:23 Kakare oloh hengan tuntang hamauh, "En puna ie toh Anak Dawid je injanji te?" 12:24 Katika kare oloh Parisi mahining jete, ewen tombah, "Oloh toh baya olihe maharak setan, awi Beelsebul, kapalan kare setan te, jari manenga kuasa akae." 12:25 Yesus katawan auh tirok kare oloh Parisi te. Jadi, ie hamauh dengan ewen, "Amon ije negara tapisah-darai awi kare baris oloh je hamusoh sama arepe, negara te dia baka tahan, tuntang ije lewu atawa keluarga je tapisah-darai tuntang hamusoh sama arepe, akan rusak. 12:26 Kalote kea huang karajaan setan; amon ije baris maharak baris je beken, maka karajaan setan te jari bapusit tuntang akan baduroh. 12:27 Koan keton aku toh maharak setan hapan kuasan Beelsebul! Amon kalote, hapan kuasan en kare murid keton maharak setan? Kare murid keton te kabuat je mambukti keton te sala! 12:28 Tapi aku maharak setan hapan kuasan Roh Hatalla. Tuntang jete rimae Hatalla jari nampara marentah marak keton. 12:29 Kilen ampie oloh olih tame akan huang human ije biti oloh gancang uka marampas ramoe, amon dia ie labih helo manjarat oloh gancang te? Limbah te harue ie olih marampas ramoe. 12:30 Oloh je dia mamihak aku, ie toto-toto malawan aku. Tuntang oloh je dia mandohop aku, ie puna handak marusak gawingku! 12:31 Awi te buah keton katawan, amon oloh mawi dosa tuntang mampalua auh je mamapa, ie tau iampun! 12:32 Amon oloh mawi auh je malawan Anak Olon, ie tau iampun, tapi amon oloh mamapa Roh Hatalla, ie dia olih iampun, aloh wayah toh aloh hong wayah je rahian!" 12:33 "Mangat tau mandino bua je bahalap, maka batang musti basiwuh. Amon batange dia basiwuh, buae kea dia bahalap. En batange te basiwuh atawa dia, tau ingatawan bara buae. 12:34 Keton toh oloh papa, kilen ampie keton olih mansanan taloh bahalap amon keton papa. Taloh je impalua awi nyame, jete lembut bara atei! 12:35 Oloh bahalap mansanan kare taloh bahalap awi ie kontep dengan kahalap. Tapi oloh papa mansanan kare taloh je papa awi ie kontep dengan kapapa. 12:36 Jadi, ingat: hong Andau Kiamat genep biti musti mananggong kare kotake je dia baguna. 12:37 Karana auh bawak kotakm bewei je akan ihapan uka mamutus en ikau sala atawa dia." 12:38 Limbah te pire-pire guru agama tuntang kare oloh Parisi hamauh, "Pa Guru, ikei handak mite Bapa mawi taloh heran." 12:39 "Lalehan kapapae tuntang kadurhakae kare oloh jaman jetoh!" koan Yesus tombah. "Keton balaku aku mawi taloh heran? Ije tanda heran mahin dia baka inenga akan keton, kacuali taloh heran je iawi Nabi Yona. 12:40 Yona melai telo andau telo alem intu huang kanain lauk hai. Kalote kea Anak Olon telo andau telo alem melai intu huang kanain petak. 12:41 Hong Andau Kiamat, oloh lewu Niniwe kareh harikas haya-hayak dengan oloh jaman jetoh tuntang mandawa ewen. Basa kare oloh Niniwe te hobah bara kare dosan ewen, katika Yona bahotbah akan ewen. Tapi hong hetoh wayah toh aton ije je labih hai bara Yona! 12:42 Hong Andau Kiamat, raja bara hila Salatan kareh hingkat haya-hayak dengan kare oloh jaman jetoh tuntang mandawa ewen. Basa mangat tau mahining auh ajar Salomo je pintar harati, maka raja bawi te mawi jalanae je kejau toto bara tapakan kalunen. Tapi intu hetoh metoh toh aton je labih hai bara Salomo!" 12:43 "Amon roh papa malihi ije biti oloh, roh te mangumbang kare eka je keang uka manggau ekae manyandehan, tapi ie jaton sondau ekae. 12:44 Tagal te ie hamauh, 'Terai, aku buli akan humangku je jari ilihiku.' Metoh ie sampai hete, huma te buang, barasih tuntang bungas. 12:45 Palus ie haguet tuntang mimbit uju roh beken je labih papa bara ie. Limbah te ewen tame akan huang oloh te, palus melai hete. Tuntang ampin oloh te menjadi labih papa bara helo. Jete kea je kareh menjadi buah kare oloh papa jaman jetoh." 12:46 Pandehan Yesus magon hakotak dengan oloh are te, maka dumah indue tuntang kare paharie. Ewen mendeng intu luar tuntang manggau jalan mangat tau hakotak dengae. 12:47 Ije bara kare oloh are te hamauh dengan Yesus, "Pa, indu tuntang paharin Bapa aton intu luar. Ewen handak hakotak dengan Bapa." 12:48 Balalu Yesus tombah, "Eweh induku? Eweh paharingku?" 12:49 Balalu ie maninjok akan hila kare muride tuntang hamauh, "Jetoh ie induku tuntang paharingku. 12:50 Oloh je malalus kahandak Bapaku je huang sorga, jete paharingku hatue, paharingku bawi tuntang induku."
13:1 Hong andau te kea Yesus malihi huma te palus haguet akan saran danau tuntang mondok hete. 13:2 Are toto oloh je mangarimpong Yesus, awi te ie haguet mondok huang arut, tuntang oloh are te mendeng intu saran danau. 13:3 Balalu Yesus te majar are hal akan ewen mahapan paribasa. "Aton ije biti oloh pamalan haguet manawor binyi," koan Yesus nampara saritae. 13:4 "Metoh ie manawore, maka aton binyi je manjato intu jalan. Palus burung dumah tuntang binyi te lepah kinae. 13:5 Aton kea je manjato intu eka je are batue, tapi petake isut. Kare binyi te bajeleng lembut awi tapas petake. 13:6 Tapi metoh matanandau jari ambo, kare salundike te nampara balayu, limbah te keang tuntang matei awi uhate dia olih timben akan penda. 13:7 Aton kea binyi je manjato akan marak kare ruwut haduhi. Ruwut haduhi te belom tuntang mangalambo kare salundike te sampai dia tau mamua. 13:8 Tapi aton binyi je manjato akan petak je basiwuh, palus mamua; aton je saratus, aton je jahawen puluh, tuntang aton kea je telo puluh lipet." 13:9 Limbah manyarita paribasa te Yesus hamauh, "Amon keton aton pinding, keleh mahining!" 13:10 Limbah te kare murid Yesus dumah tuntang misek dengae, "Mbuhen Bapa mahapan paribasa amon hakotak dengan oloh are te?" 13:11 Yesus tombah, "Awi keton jari dinon panenga uka mangatawan taloh basilim tahiu ampin Hatalla marentah, tapi akan ewen te jaton. 13:12 Karana oloh je jari mandino akan inenga labih are tinai, tuntang ayue te kareh malabien karee. Tapi oloh je dia dinon taloh en-en, maka je isut huang ie mahin akan induan. 13:13 Jete sababe aku mahapan paribasa amon hakotak dengan oloh are, awi ewen te marenang, tapi kilau oloh je dia tau mite; ewen manyeneh tapi kilau oloh je dia mahining tuntang dia haratie. 13:14 Kalote maka, manjadi taloh je inujum awi Nabi Yesaya, 'Hatalla hamauh: Ewen kareh tetep mahining tapi dia haratie; Ewen akan tetep manantuanie tapi dia katawan taloh je manjadi 13:15 Awi tirok itong oloh te jari tumpul, pinding ewen te jari badengen tuntang matan ewen jari ngambutep. Jetoh manjadi uka matan ewen ela mite, pinding ewen ela mahining, tirok itong ewen ela haratie tuntang ela haluli manalih aku, palus aku mampakeleh ewen.' " 13:16 "Tapi dia laluen kaontong keton," koan Yesus dengan kare muride, "awi keton toto mite tuntang mahining. 13:17 Ingat, are nabi tuntang oloh je baketep dengan Hatalla mipen mite taloh je gitan keton wayah toh, tapi ewen dia mitee. Ewen mipen mahining taloh je ihining keton wayah toh, tapi ewen dia mahininge." 13:18 "Hining auh riman paribasa tahiu panawur binyi te. 13:19 Binyi je manjato intu jalan jete tanding kare oloh je mahining barita tahiu ampin Hatalla marentah, tapi ewen dia haratie. Taloh Papa te dumah tuntang marampas taloh je jari inawor huang atei ewen. 13:20 Binyi je manjato hong eka je are batue, tanding kare oloh je mahining barita te, tuntang balalu manarimae dengan hanjak ateie. 13:21 Tapi barita te dia muhat huang atei ewen, sampai dia tahan tahi. Sana ewen mangkeme kasusah atawa kapehe ganan barita te, te ewen balalu mangabele barita te. 13:22 Binyi je manjato marak kare ruwut haduhi, tanding kare oloh je mahining barita te, tapi mikeh tahiu pambelom ewen tuntang mipen belom tatau sanang. Tagal te barita bara Hatalla te ingalambon huang atei ewen sampai dia tau mamua. 13:23 Tuntang binyi je manjato intu petak je basiwuh, jete tanding kare oloh je mahining barita te tuntang haratie. Ewen mamua labat, aton je saratus, aton je jahawen puluh, tuntang aton je telo puluh lipet hasile." 13:24 Yesus manyarita tinai ije paribasa akan oloh are koae, "Amon Hatalla marentah, jete ampie sama kilau paribasa toh: Ije biti oloh pamalan manawor binyi je bahalap intu tanae. 13:25 Hong ije alem, metoh oloh samandiai uras batiroh, musoh oloh pamalan te dumah manawor binyi tingen intu marak parei te, palus haguet. 13:26 Katika kare taloh imbul te jari belom, tuntang kare bungehe nampara lembut, te kare tingen te gitan kea. 13:27 Balalu kare oloh je iupah awi pamalan te dumah manalih pamalan te tuntang hamauh, 'Tuan, en dia binyi je bahalap je iimbul tuan intu tanan tuan? Kilen ampie sampai aton tingen hete?' 13:28 Pamalan te tombah, 'Jete gawin musoh.' Balalu kare oloh je iupah pamalan te misek tinai, 'En tuan hakon amon ikei manjawut tingen te?' 13:29 'Dia,' koae, 'Basa amon tingen te injawut, kareh parei te omba tajawut kea. 13:30 Nauhe ih kare tingen te belom haya-hayak sampai wayah getem. Kareh aku handak hamauh dengan kare oloh je manggetem: Nampunan helo tingen te, meteng, palus inusul. Limbah te nampunan parei te, palus iingkes huang lepau.' " 13:31 Yesus manyarita tinai ije paribasa akan kare oloh are, koae, "Amon Hatalla marentah, jete ampie sama kilau paribasa toh: Ije bawak sawi, induan awi oloh palus iimbule intu tanae. 13:32 Bawak sawi jete binyi je paling korik. Tapi amon jari belom, ie tau manjadi je pangkahaie bara kare taloh imbul. Ie manjadi upon kayu, sampai kare burung dumah manyarangan intu kare edae." 13:33 Aton ije paribasa beken inyarita Yesus akan oloh are. "Amon Hatalla marentah, jete ampie kilau ragi je induan awi ije biti oloh bawi, palus iewoie dengan epat puluh liter tepung gandum sampai kamer urase!" 13:34 Kare taloh samandiai te iajar awi Yesus akan kare oloh mahapan paribasa. 13:35 Kalote maka manjadi taloh je insanan awi nabi, "Aku mahapan paribasa amon hakotak dengan ewen; aku kareh mambarita kare taloh basilim bara tamparan kalunen toh injadian." 13:36 Limbah te Yesus malihi oloh are te palus tame huma. Kare muride dumah tuntang hamauh, "Coba Bapa manarang akan ikei riman paribasa tahiu tingen marak parei te." 13:37 Yesus tombah, "Oloh je manawor binyi je bahalap te, jete Anak Olon. 13:38 Tana te, jete kalunen toh. Binyi je bahalap te iete kare oloh je manjadi ungkup ain Hatalla. Tingen jete kare oloh je omba mamihak setan. 13:39 Musoh je mimbul tingen te, jete setan. Wayah getem jete andau kiamat, tuntang kare oloh je manggetem, jete kare malekat. 13:40 Sama kilau tingen te je inampunan tuntang inusul akan apui, kalote kea hong Andau Kiamat kareh. 13:41 Anak Olon kareh manyoho kare malekat ayue mamumpong bara kare ungkup ayue kare oloh je mawi sabab sampai oloh beken mawi dosa, tuntang kakare oloh beken je malalus kapapa. 13:42 Ewen samandiai inganan akan huang tungku apui je halendang: intu hete ewen manangis tuntang kapehe. 13:43 Tuntang kare oloh je malalus kahandak Hatalla kareh manyangkowong kilau matanandau je huang Lewu Taheta ain Hatalla, Bapa ewen. Jadi amon aton pinding keleh mahining!" 13:44 "Amon Hatalla marentah, jete ampie kilau paribasa toh: aton ramo je bakalian hong penda petak palus inyondau awi ije biti oloh, tuntang inamean tinai akan huang petak. Limbah te awi kahanjake, oloh te haguet manjual salepah kare ramoe, palus haluli tuntang mamili petak te." 13:45 "Amon Hatalla marentah, jete ampie kilau paribasa toh: Ije biti oloh dagang manggau kare mutiara je barega. 13:46 Katika ie sondau ije kabawak mutiara je jaton tarasanan kahalape, maka ie balalu haguet tuntang manjual kare ramoe, palus mamili mutiara ije kabawak te." 13:47 "Amon Hatalla marentah, jete tau inanding dengan jala je imbirik akan danau, palus dinon are macam lauk. 13:48 Limbah jala te kontep, jala te inggatang akan hunjun petak awi kare oloh palauk. Limbah te ewen mondok tuntang mintih kare lauk te: lauk je bahalap iingkes ewen huang balanai tuntang je dia bahalap inganan. 13:49 Kalote kea ampin taloh hong Andau Kiamat, kare malekat kareh haguet mamisah kare oloh papa bara kare oloh je malalus kahandak Hatalla. 13:50 Limbah te kare oloh papa te inganan akan huang dapur je belom apuie. Intu hete ewen kareh manangis tuntang kapehe." 13:51 "En keton harati kare taloh samandiai te?" koan Yesus misek. "Harati Pa!" koan ewen tombah. 13:52 Balalu Yesus hamauh, "Tagal jete maka gagenep guru agama je jari manjadi anak ungkup ain Hatalla, sama kilau ije biti tuan huma je mampalua kare ramoe je taheta tuntang je usang bara eka panataue." 13:53 Limbah Yesus manyarita kare paribasa te, ie malihi eka te, 13:54 palus haluli akan lewu humae. Hong hete ie haguet majar intu huma sombayang, tuntang oloh je mahining ie hete, hengan toto. Ewen hamauh, "Bara kueh oloh toh mandino kapintar kaharati je kilau te? Tuntang bara kueh ie mandino kuasa uka mawi taloh heran? 13:55 Diakah ie toh anak tukang kayu te? Diakah Maria indue; tuntang kare paharie te Yakobus, Yosep, Simon tuntang Yudas? 13:56 Tuntang kare paharie awang bawi te dia melai hetoh kea? Bara kueh ie mandino kare taloh te?" 13:57 Maka ewen dia maku manarima Yesus. Balalu Yesus hamauh dengan ewen, "Ije biti nabi ihormat hong kueh bewei, tapi dia huang lewun ayue kabuat." 13:58 Tagal te Yesus dia mawi are taloh heran hong hete awi ewen te dia percaya.
14:1 Hong katika te Herodes, je tempon kuasa hong daerah Galilea, mahining tahiu Yesus. 14:2 Herodes hamauh dengan kare pagawai ayue, "Pasti Yohanes Pampandoi jari belom haluli! Awi te ie aton kuasae mawi taloh heran." 14:3 Basa helo bara te Herodes manyoho manawan Yohanes tuntang manjarat ie palus manamean ie akan huang penjara. Herodes mawi ie kalote awi soal Herodias sawan paharie kabuat, iete Pilippus. 14:4 Basa Yohanes puji hamauh kalotoh dengan Herodes, "Dia tau ikau kawin dengan Herodias!" 14:5 Sapunae Herodes handak ih mampatei Yohanes, tapi ie mikeh dengan kare oloh awi ewen mangira Yohanes te nabi. 14:6 Katika Herodes mawi pesta ulang tahun ayue, anak Herodias je bawi manari hong bentok oloh are. Tarie te paham mampahanjak atei Herodes, 14:7 sampai Herodes hajanji dengae hapan sumpah, koae, narai bewei je ilakue, akan inenga akae. 14:8 Ganan iajar awi indue, anak bawi te hamauh, "Aku balaku takolok Yohanes Pampandoi nenga akangku metoh toh kea hong hunjun baki!" 14:9 Awi mahining auh palaku te, Herodes paham kapehe ateie. Tapi awi ie jari sumpah intu taharep kare oloh je dumah, ie marentah uka palakun anak bawi te inenga ih. 14:10 Ie manyoho oloh manalih penjara uka manetek takolok Yohanes. 14:11 Limbah te takolok Yohanes te iimbit tame tuntang iingkes intu hunjun baki tuntang inenga akan anak bawi te. Palus anak bawi te mimbite tinai akan indue. 14:12 Limbah te kare murid Yohanes manduan hantun Yohanes tuntang mangubure. Balalu ewen haguet tuntang mansanan hal te akan Yesus. 14:13 Katika Yesus mahining barita te, ie lumpat arut kabuate tuntang malihi eka te, uka haguet akan eka je benyem. Tapi katika kare oloh mahining tahiu hal te, ewen malihi kare lewu-humae tuntang haguet manuntut Yesus jalan hunjun petak. 14:14 Metoh Yesus mohon bara arut tuntang mite oloh are te, ie masi dengan ewen. Palus ie mampakeleh kare oloh haban je aton marak ewen. 14:15 Katika andau jari halemei kare murid Yesus dumah tuntang hamauh dengae, "Andau jari halemei tuntang eka toh kejau bara lewu. Labih bahalap Bapa manyoho kare oloh toh haguet, mangat tau mamili panginan intu kare lewu." 14:16 "Dia usah ih haguet", koan Yesus, "Keton ih manenga panginan akan ewen." 14:17 "Ain ikei baya aton lime kabawak rote tuntang due kongan lauk!" koan kare murid Yesus te tombah. 14:18 "Imbit kahetoh," koan Yesus. 14:19 Limbah te ie manyoho oloh are te mondok hunjun oru, palus ie manduan lime kabawak rote tuntang due kongan lauk te, palus mananggera akan langit tuntang manarimakasih akan Hatalla. Limbah te ie mangiwak-mangiwak rote te hapan lengee tuntang manengae akan kare muride uka ewen mambagie akan oloh are te. 14:20 Ewen samandiai kuman sampai besoh. Limbah te kare murid Yesus manampunan kalabien panginan te; aton due walas lontong kontep. 14:21 Oloh je kuman hong katika te aton kurang labih lime koyan biti, luar bara kare oloh bawi tuntang anak korik. 14:22 Limbah te Yesus manyoho kare muride lumpat arut tuntang batolak helo dimpah danau, pandehan te ie manyoho oloh are te buli. 14:23 Limbah oloh are te haguet, Yesus mandai' ije bukit kabuate uka balaku doa. Metoh andau jari hamalem, Yesus magon aton hete kabuate. 14:24 Metoh te arut je ihapan kare murid Yesus nah, jari kejau hong bentok danau. Arut te kinjap tahampas awi riak, awi tintun riwut te hakalawan dengan arut. 14:25 Helat pukul telo dengan pukul jahawen hanjewu, Yesus dumah manalih ewen mananjong hunjun danum. 14:26 Katika kare muride mite ie mananjong hunjun danum, ewen paham tarewen. "Kambe!" koan ewen mangkariak sambil mikeh. 14:27 Tapi Yesus hemben te kea tombah, "Dia men ih! Aku toh Yesus. Ela mikeh!" 14:28 Balalu Petrus hamauh, "Amon ikau puna Yesus, soho aku manalih tuntang mananjong hunjun danum." 14:29 "Talih ih," koan Yesus. Jadi Petrus mohon bara arut, mananjong hunjun danum tuntang manalih Yesus. 14:30 Tapi metoh Petrus mite kapaham kahain riwut hong danau te, ie mikeh tuntang nampara leteng. "Tuhan, dohop!" koae mangkariak. 14:31 Yesus bajeleng mantajok lengee tuntang manokep ie tuntang hamauh, "Petrus, Petrus, ikau toh tapas kapercayam. Mbuhen ikau ragu-ragu dengangku?" 14:32 Balalu ewen due lumpat akan arut te, tuntang riwut mahin tadoh. 14:33 Maka kare murid Yesus sontop manyembah ie. Koan ewen, "Toto Tuhan toh Anak Hatalla!" 14:34 Katika ewen sampai saran danau dipah silae, ewen lumpat intu Genesaret. 14:35 Tuntang katika kare oloh hete mite oloh je dumah te Yesus, ewen mangabar barita te akan kare eka hakaliling lewu te. Palus kakare oloh haban iimbit manalih Yesus. 14:36 Tuntang ewen balaku dengae uka tau manigong jubahe, lawie mahin barangai ih. Maka kakare oloh je manigong jubahe balalu keleh.
15:1 Aton ije baris oloh Parisi tuntang pire-pire guru agama bara Yerusalem dumah manalih Yesus. Ewen misek dengae, 15:2 "Mbuhen kare muridm malanggar hadat tato hiang itah? Metoh handak kuman ewen dia menyau lengee helo manumon atoran!" 15:3 Yesus tombah, "Tuntang mbuhen keton kea mahin malanggar parentah Hatalla, baya awi keton handak manumon hadat tato hiang keton? 15:4 Basa Hatalla hamauh, 'Hormat bapam tuntang indum,' tuntang 'ewe-eweh je manyapa indu-bapae, musti buah hukum pampatei.' 15:5 Tapi keton majar: amon oloh hamauh dengan oloh bakase, 'Taloh je musti inengaku akan indu tuntang bapaku jari inyarahku akan Hatalla,' 15:6 maka oloh te balalu dia mahormat oloh bakase. Jadi, tagal hadat tato hiang keton, keton manaha gampang auh Hatalla. 15:7 Keton oloh haliau! Pas kilau auh je inujum awi nabi Yesaya tahiu keton, iete, 15:8 'Kalotoh auh Hatalla: Kare oloh te manyembah aku baya hapan kotake, tapi atei ewen kejau bara aku. 15:9 Ngahus ih ewen manyembah aku, awi ewen majar atoran kalunen iawie kila-kilau atoran bara aku.' " 15:10 Limbah te Yesus mantehau oloh are tuntang hamauh dengan ewen, "Hining toh mangat harati! 15:11 Taloh je tame akan nyame, jete dia tau mawi kapapan oloh; baya je balua bara nyamae, jete je tau mawi kapapae." 15:12 Balalu kare murid Yesus dumah tuntang hamauh dengae, "En katawan Bapa kare oloh Parisi te basingi angat ateie awi Bapa hamauh kalote?" 15:13 Yesus tombah, "Gagenep taloh imbul je dia Bapaku mimbule, akan injawut. 15:14 Dia usah keton paraba oloh Parisi te. Ewen te kare pamimpin babute; tuntang amon oloh babute mamimpin oloh babute, maka kadaduee kareh manjato hong parit." 15:15 Petrus hamauh, "Dohop manarang paribasa te akan ikei, Pa!" 15:16 Yesus tombah auh ewen, "En keton magon hindai haratie? 15:17 En dia keton katawan, taloh je tame akan huang nyame mohon akan kanai, tuntang limbah te balua tinai? 15:18 Tapi taloh je balua bara nyame, asale bara atei; tuntang jete je mawi oloh manjadi papa. 15:19 Basa bara atei lembut kare tirok papa je mawi sabab oloh tau mampatei, habandong, pahabawi, manakau, mananjaro tuntang mamapa. 15:20 Kare taloh te je mawi oloh manjadi papa, dia ie awie kuman mahapan lenge je dia ienyau." 15:21 Limbah te Yesus malihi eka te tuntang haguet akan daerah tokep lewu Tirus tuntang Sidon. 15:22 Ije biti bawin oloh Kanaan bara eka te, dumah manalih Yesus sambil kariak-kariak, "Anak Dawid, pasi aku! Anakku je bawi ingumpang setan. Ampie paham kapehe toto." 15:23 Yesus dia tombah samasinde auh oloh bawi te. Balalu kare murid Yesus dumah manalih ie tuntang balaku, "Pa, soho oloh bawi te haguet. Ie baya mamparidu ih hila likut itah!" 15:24 Yesus tombah, "Aku inyoho dumah baya akan utus Israel, je mambatang akan kare ewen je layang." 15:25 Oloh bawi te dumah balalu sontop manyembah intu taharep Yesus tuntang hamauh, "Dohop aku, Tuhan." 15:26 Yesus tombah, "Dia bahalap manduan panginan bara anak oloh korik tuntang manjakahe akan aso." 15:27 "Toto, Tuhan," koan oloh bawi te, "tapi aso mahin kuman tisan panginan je manjato bara mejan tempoe." 15:28 Palus Yesus hamauh dengae, "Ibu, kapercayam paham hai! Keleh manjadi akam tumon kahandakm!" Hemben te kea anak oloh bawi te keleh. 15:29 Yesus malihi eka te palus mananjong mahoroi saran Danau Galilea. Limbah te ie mandai' akan ije bukit palus mondok hete. 15:30 Are oloh dumah manalih ie mimbit kare oloh je batimpang, je babute, je lumpuh, je bisu, tuntang are tinai oloh haban je beken. Ewen mingkes kare oloh te intu taharep Yesus, tuntang ie mampakeleh oloh te. 15:31 Oloh are je aton hete paham hengan metoh ewen mite oloh bisu tau hakotak, oloh batimpang keleh, oloh lumpuh mananjong, tuntang oloh babute tau mite. Palus ewen manara Hatallan oloh Israel. 15:32 Limbah te Yesus mantehau kare muride balalu hamauh dengan ewen, "Aku masi angatku dengan oloh are toh. Jari telo andau katahie ewen omba aku, tuntang ewen jaton panginae. Aku dia handak manalua ewen buli hayak balau', bele ewen tujah hong jalan." 15:33 Kare muride misek ie, "Hong kueh itah tau mandino panginan hong eka benyem toh je kejau bara lewun oloh hapa mampakanan oloh kilau toh karee?" 15:34 "Pire aton rote ain keton?" koan Yesus misek ewen. "Uju" tombah ewen, "tuntang lauk korik pire-pire kongan." 15:35 Balalu Yesus manyoho oloh are te mondok intu petak. 15:36 Limbah te ie manduan uju rote te dengan lauke palus manarima kasih akan Hatalla. Limbah te ie mangiwak-mangiwak rote dengan lauk te hapan lengee palus manenga te akan kare muride. Tinai kare muride mambagi kare rote te akan oloh are. 15:37 Uras oloh are te kuman sampai besoh, limbah te kare murid Yesus, manampunan tisan panginan te samandiai kontep uju lontong. 15:38 Kare oloh hatue je kuman metoh te aton epat koyan biti, hindai iise oloh bawi tuntang anak oloh korik. 15:39 Limbah te Yesus manyoho oloh are te buli. Ie balalu lumpat akan ije arut tuntang tolak akan daerah Magadan.
16:1 Aton pire-pire oloh Parisi tuntang oloh Saduki dumah manalih Yesus handak manjabak ie. Ewen balaku ie mawi taloh heran uka mambukti je ie te dumah bara Hatalla. 16:2 Yesus tombah, "Amon metoh matanandau handak belep, keton hamauh, 'Bahalap ampin andau, awi langite mahindang.' 16:3 Tuntang hong hanjewu, keton hamauh, 'Andau toh handak ujan awi langit mahindang hayak kundom.' Nah, keton tau maramal ampin andau awi mite ampin langit, padahal kare tanda jaman dia keton tau maramale!" 16:4 "Lalehan kapapae tuntang kadurhakae oloh jaman jetoh. Keton balaku aku mawi taloh heran. Akan keton jaton inenga taloh heran. Aloh ije mahin dia, kacuali taloh heran ain nabi Yona." Limbah hamauh kalote Yesus malihi ewen, palus haguet. 16:5 Katika kare murid Yesus sampai hong saran danau dipah silae, harue ewen taraingat ewen kalapean mimbit rote. 16:6 Yesus hamauh dengan ewen, "Keleh bua-buah keton taharep ragin oloh Parisi tuntang Saduki." 16:7 Sana mahining auh Yesus te, kare muride nampara hakotak sama arepe, "Ie hamauh kalote awi itah jaton mimbit rote." 16:8 Yesus katawan narai taloh je inahiu ewen te. Maka ie hamauh, "Mbuhen keton mamander soal jaton rote? Keton toh tapas kapercaya! 16:9 En keton magon hindai harati? En keton dia mingat tahiu lime rote je imbagiku akan lime koyan oloh? Pire lontong kalabien rote je inampunan keton? 16:10 Tuntang kilen tinai dengan uju rote akan epat koyan biti oloh te? Pire lontong kalabien panginan je nampunan keton? 16:11 Mbuhen keton sampai dia haratie je aku dia hakotak tahiu rote dengan keton? Keleh bua-buah keton manaharep kare ragin oloh Parisi tuntang Saduki!" 16:12 Kajariae kare murid Yesus haratie kea Yesus manyoho ewen bua-buah dia ganan ragi je ihapan manampa rote, tapi manaharep kare auh ajar ain kare oloh Parisi tuntang Saduki. 16:13 Yesus haguet akan daerah tokep lewu Kaisarea Pilippi. Intu hete ie misek kare muride, "Manumon koan oloh, Anak Olon te eweh?" 16:14 Kare muride tombah, "Aton je manyewut Yohanes Pampandoi. Aton kea je manyewut Elia. Je beken tinai manyewut Yeremia, atawa salahimbal bara kare nabi." 16:15 "Tapi manumon koan keton kabuat, aku toh eweh?" 16:16 Simon Petrus tombah, "Bapa toh Raja Panyalamat, Anak Hatalla je belom." 16:17 "Ontong toto ikau, Simon anak Yona!" koan Yesus, "Basa dia ie olon je mansanan hal te akam, malengkan Bapaku je huang sorga. 16:18 Awi te buah ikau katawan, ikau toh Petrus, batu je dehen, intu hunjun batu toh aku handak mamangun Gareja ayungku, je dia olih impakalah; aloh awi pampatei! 16:19 Aku manenga akam kunci bara Lewu Taheta ain Hatalla. Taloh je ingahana hunjun petak, ingahana kea hong sorga. Tuntang je koam bujur hong kalunen, bujur kea hong sorga." 16:20 Limbah te Yesus mampingat kare muride uka ewen dia mansanan akan eweh bewei je ie te Raja Panyalamat. 16:21 Nampara bara katika te, Yesus hakotak terus-tarang dengan kare muride, je ie musti haguet akan Yerusalem tuntang ie kareh mandino are kapehe bara kare pamimpin, kare imam tuntang kare guru agama. Ie akan impatei, tapi huang andau je kateloe ie kareh imbelom tinai. 16:22 Palus Petrus manjijit Yesus akan sare tuntang maningak ie, koae, "Keleh Hatalla mangejau taloh te, Tuhan! Ela sampai soal te manjadi buah Tuhan!" 16:23 Yesus tampaliau palus hamauh dengan Petrus, dari bara hetoh, setan! Ikau mahambang aku. Tirokm te tirok olon; dia ie tirok Hatalla! 16:24 Limbah te Yesus hamauh dengan kare muride, "Oloh je handak omba aku, musti mangalapean kamangat ayue kabuat, ie mananggong sampalakie tuntang tetep omba aku. 16:25 Karana oloh je baya handak halaluan pambelome, kareh nihau pambelome. Tapi oloh je manyarah pambelome akangku, kareh mandino jete. 16:26 Narai kaontonge akan oloh amon ie dinon hapus kalunen toh akan panataue tapi ie nihau pambelome? En tau pambelom te inakiri hapan taloh beken? 16:27 Dia tahi tinai anak olon, haya-hayak dengan kare malekat ayue, handak dumah dengan kuasan Bapae. Hong katika te ie kareh mambaleh akan genep bitin oloh manumon kare ampin gawie. 16:28 Ingat! Bara keton hetoh aton je dia akan matei, helo bara ie mite Anak Olon dumah kilau Raja."
17:1 Jahawen andau limbah te Yesus mimbit Petrus dengan Yakobus tuntang paharie Yohanes, mangejau arep ewen akan ije bukit gantong. 17:2 Intu hila baun ewen, Yesus hobah ampie; Baue manjadi hasangkowong kilau matanandau tuntang pakaian baputi malinyau. 17:3 Limbah te katatelo muride te mite Moses dengan Elia hakotak dengan Yesus. 17:4 Palus Petrus hamauh dengan Yesus, "Tuhan mangat toto itah hong hetoh. Amon Tuhan handak, aku tau mampendeng telo huma hetoh: ije akan Tuhan, ije akan Moses, tuntang ije tinai akan Elia." 17:5 Metoh Petrus magon hakotak, maka baunandau je balawa toto mangalukop ewen tuntang bara baunandau te tarahining auh je hamauh, "Ie toh anakku je inyintaku. Ie manyanang ateiku. Hining auhe!" 17:6 Katika kare murid Yesus mahining auh te, ewen paham mikeh sampai mahingkep akan petak. 17:7 Tapi Yesus dumah tuntang manigong ewen. "Hingkat," koae, "ela mikeh!" 17:8 Katika ewen manampayah, ewen jaton mite ewe-eweh beken bara Yesus ih. 17:9 Katika ewen mohon bara bukit te, Yesus mampingat ewen, "Ela mansanan akan eweh bewei taloh je jari gitan keton nah, helo bara Anak Olon impisik bara pampatei." 17:10 Kare murid Yesus misek dengae, "Mbuhen kare guru agama hamauh je Elia musti dumah labih helo?" 17:11 Yesus tombah, "Elia puna dumah tuntang ie handak manatap kare taloh samandiai. 17:12 Tapi aku hamauh dengan keton, Elia jari dumah, tapi oloh dia mangasene ie; ewen mawi ie sakahandak ewen kabuat ih. Tuntang kalote kea ewen handak mawi Anak Olon." 17:13 Palus kare muride harati je Yesus hakotak tahiu Yohanes Pampandoi. 17:14 Katika Yesus dengan katatelo muride haluli manalih oloh are te, ije biti oloh hatue dumah, sontop manyembah intu taharep Yesus, 17:15 tuntang hamauh, "Bapa, pasi anakku. Ie haban awi inyon. Amok inyon te karas toto sampai ie kinjap toto lawo akan apui tuntang kinjap kea akan danum. 17:16 Aku jari kea mimbit ie akan murid Bapa, tapi ewen dia olih mampakeleh ie." 17:17 Yesus tombah, "Lalehan keton toh! Keton toh toto-toto oloh je layau tuntang dia percaya. Sampai hamparea aku musti melai hinje keton tuntang sabar dengan keton? Imbit anak te akan hetoh!" 17:18 Palus Yesus manyoho roh papa te je huang anak te balua. Tuntang roh papa te balua, palus anak te keleh hemben te kea. 17:19 Limbah te kare murid Yesus dumah manalih ie marak sama arep ewen ih tuntang misek ie, "Pa, en sababe ikei dia olih maharak roh papa te?" 17:20 Yesus tombah, "Awi tapas kapercayan keton. Ingat! Amon ain keton aton kapercaya kahain bawak sawi, keton tau hamauh dengan bukit toh, 'Bindah akan kanih!' pasti bukit toh kareh bindah. Tuntang ije mahin jaton taloh je dia keton tau mawie! 17:21 Tapi roh papa je macam toh, baya tau iharak hapan lakudoa tuntang puasa ih." 17:22 Metoh kare murid Yesus hapumpong hong Galilea, Yesus hamauh dengan ewen, "Dia tahi hindai, Anak Olon inyarah akan kuasan kalunen. 17:23 Ie kareh impatei, tapi hong andau kateloe ie kareh impisik." Maka kare muride paham angat kapehen ateie. 17:24 Katika Yesus dengan kare muride sampai hong Kapernaum, kare panagih pajak Human Tuhan dumah manalih Petrus tuntang misek, "En Gurun keton mambayar pajak Human Tuhan atawa dia?" 17:25 Petrus tombah, "Bayar!" Katika Petrus buli, Yesus labih helo misek ie, "Simon, kilen manumon tirokm? Eweh je musti mambayar bea atawa pajak akan kare raja hong kalunen toh? En rayat atawa oloh tamuei bara luar?" 17:26 "Oloh tamuei," koan Petrus. "Amon kalote," koan Yesus, "Rayat dia perlu mambayar. 17:27 Tapi mangat ela manjadi tantarang pangkeme kare oloh te, keleh ikau haguet akan danau uka mamisi. Duan lauk je pangkasolake ikau dinoe. Hong nyamae te ikau kareh sondau bawak duit je sukup hapan mambayar pajak itah badue. Duan duit te tuntang bayar akan ewen pajak itah akan Human Tuhan."
18:1 Hong katika te kare murid Yesus dumah manalih ie tuntang misek, "Eweh je pangkahaie bara marak kare anak ungkup ain Hatalla?" 18:2 Yesus mantehau ije biti anak korik, tuntang manyoho ie mendeng intu taharep ewen. 18:3 Palus ie hamauh, "Percaya bewei! Asal keton hobah tuntang manjadi kilau anak korik, keton kareh manjadi anak ungkup ain Hatalla. 18:4 Oloh je mamparandah arepe tuntang manjadi kilau anak korik toh, ie te je pangkahaie bara marak kare anak ungkup ain Hatalla. 18:5 Tuntang oloh je manarima anak je kilau toh tagal aku, rimae manarima aku kea." 18:6 "Eweh je mawi sabab sampai ije biti bara kare anak korik toh dia percaya tinai dengangku, labih bahalap amon batu kisaran hai injarat intu uyate tuntang ie impaleteng intu tasik je handalem. 18:7 Calaka toto kalunen toh tagal kare hal je mimbit oloh mawi dosa. Puna kare taloh te harajur aton, tapi calaka toto oloh je mawi sabab te! 18:8 Amon lenge gantaum atawa paim mawi ikau badosa, tetek tuntang kanan jete. Labih bahalap ikau belom dengan Hatalla dia halenge sila atawa pai, bara ikau inganan akan apui naraka dengan due lengem tuntang paim. 18:9 Tuntang amon matam mawi sabab ikau mawi dosa, karuit tuntang kanan. Labih bahalap ikau belom dengan Hatalla hapan ije mate bara ikau inganan akan apui naraka dengan due matam." 18:10 "Awas! Ela mahina ije bara kare oloh je korik toh. Basa ingat, kare malekat ewen te harajur aton intu taharep Bapaku hong sorga. 18:11 Basa Anak Olon dumah uka manyalamat oloh je layang! 18:12 Kilen huang tirok keton! Paribasae aton ije biti oloh je tempon saratus kongan tabiri, ije kongan bara tabiri te nihau, en je handak ilalus awi oloh te? Pasti ie kareh malihi tabiri je jalatien puluh jalatien kongan te hong bukit tuntang haguet manggau je nihau te. 18:13 Tuntang amon ie sondau tinai tabiri te, percaya ih auhku -- ie kareh labih hanjak dengan tabiri je ije kongan te bara je jalatien puluh jalatien kongan awang beken je dia nihau te. 18:14 Kalote kea Bapa keton hong sorga dia handak ije bara kare oloh je harue percaya dengangku toh layang." 18:15 "Amon paharim badosa intu taharepm, talih ie tuntang sanan akae kasalae. Lalus jete suni-suni baya akan arep keton due ih. Amon ie manumon kare auhm, maka ikau bahasil mandino paharim te haluli. 18:16 Tapi amon dia, imbit ije atawa due biti oloh tinai. Basa huang Surat Barasih aton tarasurat, 'Paling isut due atawa telo biti saksi inggau hapan mangarinah kasalan oloh je indawa.' 18:17 Amon ie dia manarima nasihat kare oloh te, sanan hal te akan ungkup. Tuntang kalepahe haliai, amon ie dia maku manarima nasihat ungkup, anggap ih ie kilau oloh panagih pajak tuntang oloh je dia mangasene Hatalla." 18:18 "Keleh keton katawan: Taloh je ingahana keton hong kalunen, ingahana kea hong sorga. Tuntang je tau ilalus hong kalunen, tau kea ilalus hong sorga. 18:19 Tuntang keleh keton katawan kea: Amon aton bara marak keton je hong kalunen due biti oloh hapakat tahiu en bewei palus balakudoa akan taloh te, maka lakudoae te kareh inarima awi Bapaku hong sorga. 18:20 Basa hong kueh aton due atawa telo biti oloh hapumpong tagal aku, aku aton hong bentok ewen te." 18:21 Limbah te Petrus dumah manalih Yesus tuntang misek, "Tuhan, amon paharingku badosa dengangku, sampai pire kali aku musti mampun ie? Sampai uju kali kah?" 18:22 Yesus tombah, "Dia, dia ie uju kali, tapi uju puluh kali uju kali! 18:23 Basa amon Hatalla marentah, jete tau inanding kilau paribasa toh: Ije raja je handak mamberes utang kare jipee. 18:24 Sana ie nampara mariksa ewen, maka aton imbit oloh manalih ie ije jipen je butang bajuta-juta, 18:25 tuntang dia olihe manahore. Jadi, raja te marentah uka jipee te injual haya-hayak dengan kare anak-sawae tuntang kare ramoe hapan mambayar utange. 18:26 Jipen te sontop manyembah intu taharep raja te, tuntang balaku, 'Tuan, sabar helo dengangku. Aku kareh manahor lepah kare utangku.' 18:27 Raja te masi dengae sampai ie mempas jipen te bara kare utange. 18:28 Katika jipen te balua, ie hasondau dengan kare kawale, sama-sama jipen kea, je butang pire-pire koyan dengae. Ie manawan kawale te, mahekak uyate, tuntang hamauh, 'Bayar palepah utangm!' 18:29 Palus kawale te sontop manyembah taharep ie sambil balaku, 'Sabar helo le, kakare utangku te kareh imbayarku lepah!' 18:30 Tapi jipen te manolak. Malahan ie manamean kawale te akan huang penjara sampai ie mambayar utange. 18:31 Katika kare jipen awang beken mite kare taloh je jari manjadi, ewen kapehe atei tuntang mansanan hal te akan raja. 18:32 Maka raja te mantehau jipen je papa te tuntang hamauh dengae, 'Jipen je papa! Salepah utangm jari iempasku bara ikau baya awim balaku nyame-nyame dengangku. 18:33 En dia mustikah ikau masi kea dengan kawalm sama kilau aku kea jari masi ikau?' 18:34 Raja te paham sangit. Jipen je papa te inamean akan huang penjara sampai ie mambayar lepah kare utange." 18:35 Yesus mahapus saritae hapan auh toh, "Kalote kea Bapaku hong sorga kareh mawi keton, amon keton dia mampun gagenep paharin keton dengan atei barasih."
19:1 Limbah Yesus mahapus kare auh te, ie malihi Galilea palus haguet akan daerah Yudea hong silan Sungei Yordan. 19:2 Are oloh omba manuntut ie, tuntang ie mampakeleh ewen intu hete. 19:3 Palus kare oloh Parisi dumah handak mancoba ie. Ewen misek, "Manumon hukum agaman itah, en taukah oloh manolang sawae dengan saketa narai bewei?" 19:4 Yesus tombah, "En keton hindai mambasa huang Surat Barasih, ie je manampa taloh handiai, bara solake manampa olon iete oloh hatue tuntang oloh bawi? 19:5 Tuntang limbah te ie hamauh, 'Jete sababe oloh hatue malihi indu-bapae tuntang hinje dengan sawae maka kadaduee te manjadi ije.' 19:6 Jadi ewen dia tinai due biti, tapi ije. Jete sababe taloh je jari impahinje Hatalla dia tau imisah awi olon." 19:7 Palus kare oloh Parisi misek dengae, "Amon kalote mbuhen Moses manyoho oloh manenga surat hatolang akan sawae je inolange?" 19:8 Yesus tombah, "Moses manyoho keton manolang sawan keton awi keton bahali iajar. Tapi sapunae dia kalote metoh hong tamparae. 19:9 Jadi keleh hining toh: Eweh je manolang sawae -- padahal oloh bawi te dia nyaleweng -- limbah te ie kawin tinai dengan oloh bawi beken, oloh te habandong." 19:10 Maka kare murid Yesus hamauh dengae, "Amon soal hubungan oloh dengan kabalie puna macam te, keleh dia usah kawin ih." 19:11 Yesus tombah, "Dia uras oloh tau manarima kare auh te, baya kare oloh je jari inantu awi Hatalla ih. 19:12 Basa aton oloh je dia olih kawin, awi ewen puna inakan kalote. Aton kea je dia olih kawin awi ie iawi kalote awi oloh beken. Tuntang aton tinai je puna kahandak ayue kabuat uka dia kawin, mangat tau manempo Hatalla. Oloh je olih manarima auh ajar toh, keleh ie manarimae." 19:13 Aton kare oloh mimbit anak korik manalih Yesus uka ie mina lengee hunjun takolok ewen tuntang balaku doa akan ewen. Tapi kare murid Yesus malait kare oloh te. 19:14 Maka Yesus hamauh dengan kare muride, "Nauhe ih kare anak korik te dumah manalih aku! Ela mangahana ewen, basa kare oloh je tumon toh je manjadi anak ungkup ain Hatalla." 19:15 Palus Yesus mina lengee hunjun takolok kare anak korik te tuntang mamberkat ewen. Limbah te ie haguet bara hete. 19:16 Hong sinde andau ije biti oloh hatue dumah manalih Yesus. "Pa Guru," koae, "gawi bahalap en je musti iawiku mangat tau manarima pambelom je katatahie?" 19:17 Yesus tombah, "Mbuhen ikau misek dengangku tahiu taloh je bahalap? Baya aton Ije je bahalap. Amon ikau handak belom, ikau musti mamenda kare parentah Hatalla." 19:18 "Parentah je kueh te?" koan oloh te misek. Yesus tombah, "Ela mampatei oloh, ela habandong, ela manakau, ela mawi saksi tanjaro, 19:19 hormat bapam tuntang indum; tuntang keleh sinta sama arep keton kilau ikau sinta arepm kabuat." 19:20 "Uras kare parentah te jari inumongku," koan oloh tabela te tombah. "Narai tinai je tapas?" 19:21 Yesus hamauh dengae, "Amon ikau handak manjadi oloh je tinduh barasih, lius jual salepah ramom. Tenga duite akan oloh je belom susah, tuntang ikau kareh mandino ramo hong sorga. Limbah te dumah ih omba aku!" 19:22 Awi mahining kare auh te, oloh tabela te haguet dengan kapehen ateie awi ie tatau toto. 19:23 Balalu Yesus hamauh dengan kare muride, "Aku hamauh dengan keton, bahali toto akan oloh tatau manjadi anak ungkup ain Hatalla. 19:24 Tuntang jetoh je handak insanangku tinai akan keton; labih murah ije kongan onta tame rumbak pilus, bara ije biti oloh tatau tame Lewu Taheta ain Hatalla." 19:25 Katika kare muride mahining auh te, ewen hengan. "Amon kalote," koan ewen, "eweh je tau salamat?" 19:26 Yesus manampayah ewen balalu hamauh, "Akan olon jete mastahel! Tapi akan Hatalla, uras olih manjadi." 19:27 Balalu Petrus hamauh, "Item ikei jari malihi kare taloh samandiai mangat omba Bapa. Tuntang narai taloh je akan inarima ikei?" 19:28 Yesus hamauh dengan ewen, "Percaya ih: Hong Lewu je Taheta, Anak Olon kareh mondok hunjun padadusae je tinduh barasih. Hong katika te keton kare muridku kareh mondok hunjun due walas padadusan tuntang mahakim due walas utus oloh Israel! 19:29 Tuntang gagenep oloh je tagal aku malihi humae, atawa paharie bawi atawa hatue, atawa indu-bapae, atawa anak jariae, atawa tana nyeloe, oloh te kareh manarima haluli saratus kali lipet. Tuntang ie kea kareh manarima pambelom je bujur tuntang katatahie. 19:30 Tapi are oloh je wayah toh mananjong helo, kareh manjadi je pangkarahiae tuntang je wayah toh mananjong pangkarahiae kareh manjadi je pangkaheloe."
20:1 "Amon Hatalla marentah, jete ampie kilau paribasa toh: Ije biti oloh tempon kabun anggur hong jajewu manggau oloh uka bagawi hong kabun anggur ayue. 20:2 Limbah jari imakat uka ie mambayar upah ije duit perak jandau akan ewen, ie manyoho ewen bagawi intu kabun anggure. 20:3 Pukul jalatien hanjewu, oloh je tempon kabun anggur te haguet tinai, tuntang mite pire-pire oloh je kanjerae manggaleor intu pasar. 20:4 Maka ie hamauh dengan ewen, 'Haguet ih keton bagawi hong kabun anggurku. Kareh aku mambayar akan keton hapan upah je patut kea kahaie.' 20:5 Maka ewen haguet kea. Pukul duewalas bentok andau, tuntang pukul telo halemei, tukang kabun te balua tinai tuntang mawie kalote kea. 20:6 Tuntang kira-kira pukul lime halemei, ie balua tinai tuntang mite magon aton oloh je melai bewei. Palus ie misek dengan ewen, 'Mbuhen keton tetep mendeng janda-jandau hetoh tuntang jaton mawi taloh en-en?' 20:7 Kare oloh te tombah, 'Jaton ati oloh je manenga gawi akan ikei.' 'Amon kalote,' koan tempon kabun anggur te, 'Lius keton bagawi hong kabun anggurku.' 20:8 Halemei andau, tempon kabun te hamauh dengan mandure, 'Tehau kare oloh je bagawi te tuntang bayar upah akan ewen gagenep bitie, nampara bara oloh je pangkarahiae tame sampai dengan je pangkasolake tame.' 20:9 Maka kare oloh je bagawi nah dumah nampara bara pukul lime halemei. Genep bitin ewen te manarima ije duit perak. 20:10 Limbah te dumah tinai kare oloh je bagawi bara hanjewu. Ewen manirok, ewen tau dinon labih hai. Padahal akan ewen baya inenga ije duit perak kea. 20:11 Metoh manarima duit te, ewen bakotok dengan tempon kabun. 20:12 'Oloh je pangkarahiae dumah bagawi te baya bagawi ije jam. Tapi ikei bagawi janda-jandau penda lasot matanandau, tapi tuan mambayar akan ewen sama dengan ikei!' 20:13 Tempon kabun anggur te tombah dengan ije biti bara kare ewen te, 'Ule, aku dia basala dengam. Kan ikau setuju manarima upah ije duit perak akan gawi ije andau? 20:14 Nah, duan upahm, tuntang haguet ih. Aku puna handak manenga akan oloh je tame pangkarahiae te upah je sama dengan je inengaku akan keton. 20:15 En dia taukah aku mawie tumon kahandakku ih dengan ramo ayungku? Atawa ikau bahiri, awi aku toh bajenta ateiku?' " 20:16 Palus Yesus hamauh tinai, "Kalote kea kare oloh je pangkarahiae kareh manjadi je pangkaheloe, tuntang kare oloh je pangkaheloe manjadi je pangkarahiae." 20:17 Katika Yesus haguet manalih Yerusalem, hong benteng jalan ie mantehau due walas muride uka ewen hapumpong dengae kabuat ih. Palus ie hamauh dengan ewen, 20:18 "Hining toh! Itah metoh toh haguet manintu Yerusalem. Hong kanih Anak Olon kareh inyarah akan kare imam kapala tuntang kare guru agama. Palus ie kareh ihukum matei. 20:19 Limbah te inyarah akan kare oloh je dia Yehudi. Ewen kareh halalea ie, mangapehe ie, tuntang manyampalaki ie. Tapi hong andau kateloe, ie impisik tinai." 20:20 Limbah te sawan Sebedeus dumah dengan kare anake manalih Yesus. Intu taharep Yesus ie sontop manyembah tuntang balaku taloh en-en. 20:21 "Ibu handak en?" koan Yesus misek. Ibu te tombah, "Aku handak mangat kadadue anakku toh mondok hila sambil tuntang hila gantaun Bapa amon Bapa manjadi Raja kareh." 20:22 "Keton dia katawan narai taloh je ilaku keton," koan Yesus dengan ewen. "En olih keton mihop bara cangkir kajake je musti aku mihope?" "Olih," koan ewen tombah. 20:23 Yesus hamauh, "Punae, keton kareh mihop kea bara cangkirku. Tapi tahiu eweh je mondok hila sambil tuntang hila gantaungku, jete dia aku je tempon hak manukase. Kare eka te, ain kare oloh je jari inantu awi Bapaku." 20:24 Katika sapuluh ewen murid awang beken mahining hal te, ewen balait dengan due biti oloh hampahari te. 20:25 Awi te Yesus mantehau ewen samandiai palus hamauh, "Keton katawan je pamimpin utus je dia mangasene Hatalla te mahenyek rayate. Tuntang kare oloh hai ain ewen te mahapit ewen. 20:26 Tapi keton dia tau kalote. Malahan, oloh je handak manjadi oloh hai hong marak keton, musti manjadi jipen keton. 20:27 Tuntang oloh je handak manjadi oloh hai hong marak keton, musti manjadi jipen keton. 20:28 Sama kilau Anak Olon te kea; ie dumah dia uka ie ianyang tapi uka ie manyang, tuntang manyarah hambaruae hapan maliwus are oloh." 20:29 Metoh ewen malihi Yerikho, are oloh manuntut Yesus. 20:30 Due oloh babute mondok intu saran jalan. Sana ewen mahining Yesus mahalau ewen mangkariak, "Anak Dawid pasi ikei!" 20:31 Oloh are je aton hong hete balait dengan ewen tuntang manyoho ewen suni. Tapi ewen mangkariak sasar hai haream auhe, "Tuhan, Anak Dawid, pasi ikei toh!" 20:32 Balalu Yesus tende tuntang mantehau ewen. "Narai je kahandak keton mangat aku tau mawie akan keton?" koan Yesus misek. 20:33 Ewen tombah, "Tuan, ikei handak mite!" 20:34 Yesus masi dengan ewen, palus manggayap matan ewen. Hemben te kea ewen tau mite. Ewen palus omba Yesus.
21:1 Katika jari tokep Yerusalem, ewen sampai hong Betpage intu Bukit Batang Undus. Intu hete Yesus manyoho due biti muride mananjong labih helo. 21:2 "Lius talih lewu je hila baun te," koan peteh Yesus dengan ewen. "Balalu keton kareh mite ije kongan kalidai injarat dengan anake. Engkak jarate tuntang imbit akan hetoh. 21:3 Amon aton oloh maningak taloh gawin keton te, sanan akan oloh te, 'Tuhan perlu mahapae', maka oloh te balalu manalua keton mimbit kalidai te." 21:4 Hal te manjadi uka tulus taloh je insanan awi nabi kalotoh, 21:5 "Sanan akan kota Sion, Rajam toh dumah manalih ikau. Ie randah ateie tuntang manungkang ije kongan anak kalidai, ije kongan anak kalidai tabela." 21:6 Maka kadadue murid te haguet tuntang malalus taloh je inyoho Yesus ewen. 21:7 Maka ewen mimbit kalidai te dengan anake. Palus ewen malapik likut kare kalidai te hapan jubah ewen. Limbah te Yesus lumpat hunjue. 21:8 Are oloh intu hete mambirang kare jubah ewen intu jalan, awang beken tinai manetek kare edan kayu tuntang manataie intu bentok jalan. 21:9 Oloh are je mananjong intu hila baun tuntang hila likut Yesus mangkariak hayak hamauh, "Tara hormat akan Anak Dawid! Imberkat ie je dumah hong aran Tuhan! Tara hormat akan Hatalla hong ngambo!" 21:10 Maka metoh Yesus tame Yerusalem, hapus lewu te palus geger. "Eweh toh?" koan kare oloh lewu te misek. 21:11 "Ie toh Nabi Yesus, bara Nasaret hong Galilea," koan oloh are je mairing Yesus. 21:12 Limbah te Yesus tame akan Human Tuhan, tuntang maharak kakare oloh je hajual-habili hete. Ie mambalik kare mejan oloh pahurup duit, tuntang kare bangku ain oloh je bajual burung dara. 21:13 Palus ie hamauh dengan kare oloh te, "Huang Surat Barasih aton tarasurat kalotoh, 'Humangku kareh inyewut huma eka balakudoa.' Tapi keton mawie manjadi eka bigal manyarangan." 21:14 Kare oloh babute tuntang lumpuh dumah manalih Yesus hong Human Tuhan, tuntang ie mampakeleh ewen. 21:15 Tapi kare imam kapala tuntang kare guru agama balait mite kare taloh heran je ilalus awi Yesus. Tuntang ewen balait kea mahining kare anak oloh basura-surak hong Human Tuhan, "Tara hormat akan Anak Dawid!" 21:16 Ewen hamauh dengan Yesus, "Hiningm narai je koan ewen te?" "Iyoh, hiningku," koan Yesus tombah. "En hindai puji keton mambasa huang Surat Barasih auh toh: 'Kare anak korik tuntang awau jari iajarku uka mambo auh tara je tinduh barasih'?" 21:17 Limbah te Yesus malihi ewen, palus balua bara lewu te akan Betania tuntang baramalem hete. 21:18 Hayak jajewu andau ije tinai, jalanae haluli akan lewu, Yesus balau'. 21:19 Ie mite ije kabatang upon sikon hong saran jalan. Ie manalih upon kayu te, tapi ije mahin jaton sondau buae, baya kare dawee ih. Palus Yesus hamauh dengan batang kayu te, "Ikau dia olih mamua tinai!" Balalu ih batang sikon te balayu. 21:20 Katika kare murid Yesus mite kajadian te, ewen paham hengan. "Kilen ampie batang sikon te tau balalu matei urase?" koan ewen misek. 21:21 Yesus tombah, "Toto auhku dengan keton. Amon keton percaya tuntang dia bembang, keton tau mawi taloh je jari iawiku dengan batang sikon toh. Tuntang dia baya jete bewei, keton mahin tau hamauh dengan bukit toh, 'Hingkat tuntang palus sewu akan huang tasik'; maka jete kareh manjadi. 21:22 Narai bewei je ilaku keton huang lakudoan keton, keton kareh manarimae asal keton percaya." 21:23 Limbah te Yesus haluli akan Human Tuhan, palus tame tuntang majar hete. Metoh ie majar, kare imam kapala tuntang kare pamimpin Yehudi dumah manalih ie tuntang misek, "Hunjun dasar narai ikau malalus taloh samandiai toh? Eweh je manenga hak te akam?" 21:24 Yesus kea tombah, "Aku kea handak misek keton. Tuntang amon keton tau tombah, aku handak mansanan akan keton hapan hak eweh aku malalus kare hal toh. 21:25 Yohanes mampandoi mahapan hak eweh? Hatalla atawa olon?" Balalu kare imam kapala tuntang kare pamimpin Yehudi te nampara barunding sama arepe, "Amon koan itah, 'Hapan hak Hatalla,' ie akan hamauh, 'Amon kalote mbuhen keton dia percaya dengae?' 21:26 Tapi amon itah hamauh 'Mahapan hak olon,' itah dia bahanyi dengan oloh are, basa ewen uras manyewut Yohanes te ije biti nabi." 21:27 Jadi ewen tombah, "Ikei dia katawan," Palus Yesus hamauh dengan ewen, "Amon kalote aku mahin dia handak mansanan akan keton mahapan hak eweh aku malalus taloh samandiai toh." 21:28 "Nah, toh kilen tirok keton tahiu hal jetoh?" koan Yesus manontong auhe. "Aton ije biti bapa tempon due anak hatue. Oloh te manalih anake je bakas tuntang hamauh, 'Nak, ikau haguet bagawi akan kabun anggur andau toh.' 21:29 'Aku dia handak,' koan anak te tombah. Tapi limbah te ie mobah tiroke tuntang haguet akan kabun anggur te. 21:30 Limbah te bapae haguet manalih anake je kaduee, tuntang mansanan auh je sama kalote kea. 'Iyoh, bapa,' koan anak je kaduee te tombah. Tapi ie dia haguet. 21:31 Nah, bara kadadue anak te, je kueh je malalus kahandak bapae?" "Ije bakas," koan kare imam kapala tuntang kare pamimpin Yehudi te. Maka Yesus hamauh dengan ewen, "Percaya ih: kare panagih pajak tuntang kare bawin lahung kareh labih helo manjadi anak ungkup ain Hatalla bara keton. 21:32 Karana Yohanes Pampandoi dumah, tuntang mamparahan akan keton cara belom je ingahandak Tuhan, tapi keton dia maku percaya dengan auh ajare; tapi kareh panagih pajak tuntang kare bawin lahung percaya dengae. Tapi aloh keton jari mite kare taloh samandiai te, keton dia kea mobah tirok keton tuntang dia percaya dengan Tuhan." 21:33 "Hining paribasa ije toh tinai," koan Yesus. "Ije biti oloh tuan tanah, mimbul ije kabun anggur. Kaliling kabun te ingarambange, tuntang mangali rumbak eka mahamis bua anggur, limbah te mampendeng manara panjaga. Limbah te ie mampasewa kabun anggur te akan tukang panggarap palus haguet akan daerah beken. 21:34 Katika jari sampai wayah mamutik bua anggur, tuan tanah te mampait kare oloh ayue manalih kare tukang panggarap te uka manarima bagin ayue. 21:35 Tapi kare tukang panggarap te manawan kare oloh ain tuan tanah te: Ije biti buah pukul, je beken impatei, tuntang je beken tinai imanting hapan batu. 21:36 Tuan tanah te mampait tinai oloh ayue awang beken, labih are hindai bara je impaite solake te. Tapi ewen te mahin iawi oloh panggarap te hapan cara je sama kalote kea. 21:37 Kajariae, oloh tatau te mampait manalih ewen anake kabuat, 'Pasti anakku toh kareh ihormat oloh,' koan tiroke. 21:38 Tapi metoh oloh panggarap te mite anak tuan tanah te, ewen hamauh sama arepe, 'Nah, toh ie, ahli warise. Ayo itah mampatei ie, mangat itah mandino warise!' 21:39 Balalu anak te inawan palus iimbit balua tuntang impatei." 21:40 Yesus misek, "Amon tempon kabun anggur te buli, en je handak iawie dengan kare oloh panggarap te?" 21:41 Ewen tombah, "Pasti ie kareh mampatei kare oloh papa te, palus mampasewa kabun anggur te akan oloh beken je handak manenga bagin hasil petak te akae amon sampai wayahe." 21:42 Maka Yesus hamauh dengan ewen, "En keton hindai puji mambasa taloh je inyurat huang Surat Barasih? 'Batu je dia ihapan awi tukang huma jari manjadi batu je mambatang. Jetoh ie gawin Tuhan; lalehan kahalape!' " 21:43 "Jadi keleh mingat," koan Yesus, "kakare hak ain anak ungkup Hatalla kareh induan bara keton tuntang inenga akan utus oloh je kareh malalus kare parentah Hatalla. 21:44 Oloh je manjato intu batu te, akan rotek-ramok; tuntang oloh je penyet batu te, imipis manjadi kawo." 21:45 Hong katika kare imam kapala tuntang kare oloh Parisi mahining kare paribasa ain Yesus te, ewen katawan je Yesus te hakotak tahiu ewen. 21:46 Jadi ewen manggau akale uka manawan ie. Tapi ewen mikeh dengan oloh are, basa oloh are te manaha Yesus te ije biti nabi.
22:1 Yesus hakotak tinai dengan oloh are mahapan paribasa, 22:2 koae, "Amon Hatalla marentah sama kilau paribasa toh: Ije biti raja mawi pesta kawin akan anake je hatue. 22:3 Raja te manyoho kare oloh ayue haguet manduan kare oloh je irawei akan pesta te. Tapi kare oloh je irawei te dia maku dumah. 22:4 Limbah te raja te manyoho tinai kare oloh ayue je beken. Koae dengan ewen te: 'Sanan akan kare oloh je irawei te: Taloh kinan hong pesta jari tatap. Sapi tuntang kare anak sapi ayungku je pangkalepahe jari inyambalih. Taloh handiai jari tatap. Has keleh dumah akan pesta kawin!' 22:5 Tapi kare oloh je irawei te dia paduli auhe. Ewen uras haguet akan gawi ayu-ayue -- ije biti manalih tanae, je beken tinai akan satiare; 22:6 tuntang aton je beken tinai manawan kare oloh ain raja te, palus mamukul tuntang mampatei ewen. 22:7 Metoh raja te mahining hal te ie sangit toto. Ie mampait kare tentarae uka mampatei kare oloh pamuno tuntang manusul lewun ewen. 22:8 Limbah te ie mantehau kare oloh ayue palus hamauh, 'Pesta kawin jari tatap, tapi kare oloh je irawei te jaton patut. 22:9 Toh lius keton akan kare jalan hai, tuntang rawei sapire kare oloh je hasondau dengan keton dumah akan pesta kawin toh.' 22:10 Maka kare oloh ain raja te palus haguet. Ewen haguet akan kare jalan hai palus mamumpong oloh samandiai je hasondau dengan ewen hete, iete kare oloh bahalap tuntang oloh papa kea. Te maka kontep eka oloh pesta kawin te awi kare oloh je irawei. 22:11 Limbah te raja te tame tuntang mite-mite kare ampin oloh je dumah. Ie mite aton ije biti hong pesta te je dia mahapan pakaian pesta. 22:12 Palus ie misek dengan oloh te, 'Ule, kilen ampie ikau tau tame hetoh dia mahapan pakaian pesta?' Oloh te jaton olih mawi auh en-en. 22:13 Balalu raja te hamauh dengan kare oloh ayue, 'Jarat pai-lengen oloh te, tuntang jakah ie akan luar intu eka je kaput. Hong hete kareh aton auh tangis tuntang kapehe.' " 22:14 Balalu Yesus mahapus paribasa te kalotoh, "Are je irawei, tapi isut je iintih." 22:15 Limbah te kare oloh Parisi haguet palus pakat marunding tahiu kilen ampie ewen tau manjabak Yesus mahapan kare paisek. 22:16 Maka ewen manyoho kare sarohan ewen manalih Yesus haya-hayak dengan pire-pire oloh bara baris Herodes. Kare oloh te hamauh dengan Yesus, "Pa Guru, ikei katawan Bapa toh jujur. Bapa majar tara-tarang tahiu kahandak Hatalla akan olon, dia paduli auh eweh bewei. Basa Bapa dia mintih ampin oloh. 22:17 Tagal te, coba Bapa mansanan akan ikei: Manumon atoran agaman itah, en tau mambayar pajak akan Kaisar atawa dia?" 22:18 Awi Yesus katawan kahandak atei ewen je papa te, maka ie hamauh, "O, oloh haliau! Mbuhen keton handak manjabak aku? 22:19 Coba parahan akangku bawak duit je ihapan keton mambayar pajak te!" Balalu ewen manenga akae ije kabawak duit perak. 22:20 Yesus misek dengan ewen, "Gambar tuntang aran eweh toh?" 22:21 "Kaisar," koan ewen tombah. Maka Yesus hamauh dengan ewen, "Amon kalote, tenga akan Kaisar taloh je ain Kaisar, tuntang akan Hatalla taloh je ain Hatalla." 22:22 Metoh ewen mahining auh katarangan te ewen manjadi hengan. Maka ewen haguet malihi Yesus. 22:23 Hong andau te kea, pire-pire oloh Saduki dumah manalih Yesus. Ewen te baris oloh je dia percaya oloh matei tau belom haluli. 22:24 "Bapa Guru," koan ewen, "Moses majar kalotoh: Amon ije biti oloh hatue matei, tuntang ie jaton anake, paharie musti kawin dengan balo ayue te uka manuron anak akan oloh je jari matei te. 22:25 Puji aton uju biti oloh hampahari je melai hong hetoh. Je bakas kawin palus matei jaton dinon anak. Maka baloe te ilihie akan paharie. 22:26 Limbah te paharie te matei kea marak jaton dinon anak. Sama kalote manjadi tinai dengan paharie je kateloe tuntang palus sampai je kaujue. 22:27 Kajariae oloh bawi te kabuat mahin matei kea. 22:28 Nah, hong wayah oloh matei impisik tinai, jadi sawan eweh oloh bawi te? Basa kauju-uju ewen te uras puji kawin dengae." 22:29 Yesus tombah, "Keton sala toto, awi keton dia harati Surat Barasih, tuntang kea kuasan Hatalla. 22:30 Basa amon oloh matei kareh misik, ewen dia kawin tinai, tapi ewen kareh belom kilau malekat hong sorga. 22:31 En keton hindai puji mambasa taloh je insanan Hatalla tahiu oloh matei je impisik tinai? Hatalla hamauh, 22:32 'Aku toh Hatallan Abraham, Hatallan Isaak tuntang Hatallan Yakob.' Ie dia Hatalla ain oloh matei. Ie Hatallan oloh belom!" 22:33 Katika oloh are te mahining katarangan Yesus, ewen jungun toto dengan auh ajare. 22:34 Hong katika oloh Parisi mahining tahiu Yesus je jari mawi kare oloh Saduki dia olih mawi auh en-en hindai, maka ewen hapumpong. 22:35 Ije bara ewen te guru agama mancoba manjabak Yesus dengan ije paisek. 22:36 "Bapa guru," koae, "parentah je kueh je paling mambatang intu huang hukum agama?" 22:37 Yesus tombah, "Sinta Tuhan Hatallam dengan salepah ateim, dengan salepah hambaruam, tuntang dengan salepah kaharatim. 22:38 Jete parentah je mambatang tuntang je pangkahaie! 22:39 Parentah je kaduee sama dengan je solake te: Sinta sama arep keton sama kilau ikau sinta arepm kabuat. 22:40 Salepah hukum agama je inenga awi Moses tuntang auh ajar kare nabi uras hagalang hunjun due parentah te." 22:41 Pandehan kare oloh Parisi hapumpong hete, Yesus misek dengan ewen, 22:42 "Kilen manumon itong keton tahiu Raja Panyalamat? Panakan eweh ie te?" "Panakan Dawid," koan ewen. 22:43 "Amon kalote," koan Yesus misek, "narai sababe Roh Hatalla mampalawa atei Dawid mangat ie manyewut Raja Panyalamat te 'Tuhan'? Basa Dawid hamauh, 22:44 'Tuhan hamauh dengan Tuhangku: mondok bewei hila gantaungku sampai aku manjadian kare musohm mamenda ikau.' 22:45 Jadi amon Dawid manyewut Raja Panyalamat te 'Tuhan', kilen ampie ie salenga tau panakan Dawid?" 22:46 Maka ije biti mahin jaton oloh tau tombah auh Yesus. Tuntang nampara bara andau te, jaton aton oloh je bahanyi misek taloh en-en hindai dengae.
23:1 Palus Yesus hamauh dengan kare oloh are tuntang dengan kare muride, 23:2 "Kare guru agama tuntang kare oloh Parisi mandino kuasa uka manarang riman hukum ain Moses. 23:3 Awi te keleh mamenda tuntang manumon taloh samandiai je inyoho ewen. Tapi ela malalus taloh je iawi ewen, basa ewen dia manjalan taloh je iajar ewen. 23:4 Ewen manuntut kare hal je bahali tuntang manenga kare atoran je babehat, tapi isut mahin jaton ewen tau mandohop oloh manjalae. 23:5 Uras kare taloh je ilalus ewen te baya akan indu tampayah oloh ih. Ewen tantai ihate mahapan talin sombayang je lomba-lombah tuntang mamanjang kawir jubah ewen! 23:6 Ewen rajin eka je bahalap hong kare pesta, tuntang karusi je tamam hong kare huma sombayang. 23:7 Ewen rajin ihormat awi oloh hong kare pasar, tuntang intehau 'Bapa Guru'. 23:8 Tapi keton ela handak intehau 'Bapa guru', basa gurun keton baya aton ije tuntang keton samandiai uras hampahari. 23:9 Tuntang ela aton oloh hong kalunen toh keton mantehau 'Bapa', basa Bapa keton baya aton ije, iete Bapa je huang sorga. 23:10 Tuntang ela keton handak intehau 'Pamimpin', basa pamimpin keton baya aton ije, iete Raja Panyalamat je injanji Hatalla. 23:11 Oloh je pangkahaie hong marak keton, musti ie manjadi jipen keton. 23:12 Oloh je mampagantong arepe akan imparandah, tuntang oloh je mamparandah arepe akan inggatang." 23:13 "Calaka keton kare guru agama tuntang kare oloh Parisi! Keton tukang pura-pura. Keton mahambang oloh uka manjadi anak ungkup ain Hatalla. Keton kabuat dia maku manjadi anak ungkup ain Hatalla, tuntang oloh beken je handak, ihambang keton. 23:14 Calaka keton kare guru agama tuntang kare oloh Parisi: Keton tukang pura-pura. Keton manipu kare balo marampas humae tuntang hapan mangalindong kapapa te keton balakudoa panja-panjang. Jete sababe hukuman akan keton kareh babehat! 23:15 Calaka keton kare guru agama tuntang kare oloh Parisi! Keton tukang pura-pura! Keton haguet keja-kejau dimpah laut, tuntang mangumbang hunjun petak baya awi mimbit ije biti oloh mangat tame agaman keton. Tuntang limbah oloh te tame agaman keton, keton mawi ie jadi bakal naraka ije due kali lipet kapapae bara keton kabuat! 23:16 Calaka keton kare pamimpin ije babute! Keton majar kalotoh, 'Amon oloh basumpah tagal aran Human Tuhan, oloh te dia leket dengan sumpahe; tapi amon ie basumpah tagal amas je huang Human Tuhan, ie leket dengan sumpahe te.' 23:17 Keton toh oloh ije humong tuntang babute! Je kueh je labih mambatang: amas te atawa Human Tuhan je manjadian amas te barasih? 23:18 Keton majar kea jetoh, 'Amon oloh basumpah tagal mesbeh, oloh te dia leket awi sumpahe te; tapi amon ie basumpah tagal parapah intu hunjun mesbeh te, ie leket awi sumpahe te.' 23:19 Lalehan kabute matan keton! Je kueh je labih mambatang? Parapah atawa mesbeh je manjadian parapah te barasih? 23:20 Awi te, amon ije biti oloh basumpah tagal mesbeh, rimae ie basumpah tagal mesbeh, tuntang tagal kare parapah je aton intu hunjue te. 23:21 Tuntang amon ije biti oloh basumpah tagal Human Tuhan jete rimae ie basumpah tagal Human Tuhan te, tuntang tagal Hatalla je melai huang hete. 23:22 Tuntang amon ije biti basumpah tagal sorga, jete rimae ie basumpah tagal padadusan Tuhan, tuntang tagal Hatalla je mondok hunjun padadusae te. 23:23 Calaka keton kare guru agama tuntang kare oloh Parisi! Keton tukang pura-pura. Kare parapah kilau jintan, katumbar tuntang manyan mahi inenga keton bagi sapuluhe akan Tuhan. Padahal kare taloh je mambatang huang kare hukum agama, paribasa kilau: Kabujur, asi, tuntang kaketep, dia keton parabae. Padahal jete sapunae je musti keton malaluse, sambil malalus taloh awang beken kea. 23:24 Keton toh uras pamimpin je babute! Langau tingkep intu taloh ihop keton, inapis keton, padahal onta inelen keton! 23:25 Calaka keton kare guru agama tuntang oloh Parisi! Keton tukang pura-pura! Kare mangkok tuntang piring keton ienyau keton barasi-rasih hila luare, padahal hila huange papa toto awi kare taloh je dinon keton hapan kakaras tuntang kabungu. 23:26 O oloh Parisi je babute! Enyau helo rasi-rasih kare mangkok tuntang piring keton hila huange, mangat hila luare barasih kea! 23:27 Calaka keton kare guru agama tuntang oloh Parisi! Keton tukang pura-pura! Keton kilau kubur je inyapu baputi; bahalap gitan bara luar, tapi intu huange kontep tolang tuntang kakare taloh maram. 23:28 Kilau te kea keton. Oloh mite keton bahalap bara luar; tapi intu huang, keton kontep tanjaro tuntang kare kasalan." 23:29 "Calaka keton kare guru agama tuntang kare oloh Parisi! Keton tukang pura-pura! Keton mamangun kare kubur je bahalap akan kare nabi tuntang makaian kare tugu pangingat akan kare oloh je belom bahalap. 23:30 Tuntang keton hamauh, 'Jaka ikei belom hong jaman tato hiang ikei horan, dia baka ikei omba kare ewen je mampatei kare nabi.' 23:31 Jadi keton mangaku kabuat je keton puna panakan kare oloh je mampatei kare nabi! 23:32 Amon kalote, rajur akae tuntang pajadi akae kare dosa je jari inampara awi kare tato hiang keton te! 23:33 Keton oloh papa tuntang panakan oloh papa! Kilen ampie keton tau manyalamat arep keton bara hukuman intu naraka? 23:34 Hining bua-buah: aku kareh mampait talih keton kare nabi, kare oloh pintar-harati, tuntang kare guru; belahe ewen te kareh impatei keton, tuntang belahe tinai kareh inyampalaki keton. Aton belahe kareh ingapehe keton huang kare huma sombayang, tuntang iharak keton bara lewu ije akan lewu je beken. 23:35 Awi te, keton kareh ihukum tagal pampatei je iawi keton buah kakare oloh je dia basala -- nampara bara pampatei Abel je dia basala, sampai pampatei Sakarias, anak Berekhia, je impatei keton intu helat Human Tuhan dengan mesbeh. 23:36 Percaya bewei: uras kare taloh te kareh inanggong awi kare oloh jaman jetoh!" 23:37 "Yerusalem, Yerusalem! Kare nabi impateim. Kare sarohan Hatalla imantingm hapan batu sampai matei. Jari pire kali aku handak mamumpong kare oloh lewum kilau pehok je mamumpong kare anake hong penda palapase, tapi keton dia maku! 23:38 Tagal te Hatalla dia tinai mampahayak keton. 23:39 Ingat: Nampara bara toh ikau kareh dia mite aku tinai sampai ikau hamauh, 'Imberkat ie je dumah huang aran Tuhan.' "
24:1 Katika Yesus malihi Human Tuhan, kare muride dumah manalih ie tuntang maninjok akan hila pangun Human Tuhan te. 24:2 Yesus hamauh dengan ewen, "En keton mite kare taloh samandiai te? Keleh keton katawan, ije mahin jaton batu hong kare bangunan te kareh je dia bakarak bara ekae. Taloh samandiai te kareh baduroh." 24:3 Limbah te Yesus haguet akan Bukit Batang Undus, tuntang metoh ie mondok, kare muride dumah handak hakotak dengae mangabuat ih. "Sanan akan ikei hamparea kare taloh handiai te kareh manjadi," koan ewen dengae. "Narai kare tanda je mansanan pandumah Bapa hong kalepah kalunen?" 24:4 Yesus tombah, "Keleh keton bajaga, ela sampai keton inanjaro oloh. 24:5 Basa are oloh kareh dumah mahapan arangku tuntang hamauh, 'Aku toh Raja Panyalamat!' Ewen kareh mananjaro are oloh. 24:6 Keton kareh mahining kare auh kalahi tuntang barita perang, tapi ela mikeh. Basa kare taloh te uras manjadi, tapi jete dia mansanan katikae jari kiamat. 24:7 Utus oloh ije kareh hakalahi malawan utus je beken, tuntang negara ije kareh manyarang negara je beken. Hong hete-hete kareh lembut bahaya tapas panginan tuntang petak hagerek. 24:8 Kakare taloh te baya tamparae bewei, kilau kapehe je buah ije biti oloh bawi katika ie handak luas. 24:9 Limbah te keton kareh inawan tuntang inyarah oloh mangat ingapehe tuntang impatei. Hapus kalunen kareh manyingi keton awi keton muridku. 24:10 Hong katika te are oloh kareh mundur kapercayae, tuntang hadawa sama arepe hayak basingi sama arepe. 24:11 Are nabi pananjaro kareh lembut, tuntang mananjaro are oloh. 24:12 Kapapa sasar tayap dia lue-luen sampai are oloh dia olih tinai malalus gawin asi. 24:13 Tapi oloh je tahan sampai kalepahe, kareh inyalamat. 24:14 Tuntang Barita Bahalap tahiu kilen ampie Hatalla marentah, kareh insanan akan hapus kalunen, uka kakare oloh uras mahininge. Limbah te harun dumah andau kiamat." 24:15 "Keton kareh mite 'Kapapa je mampalenyoh', kilau je insanan awi Nabi Daniel, mendeng hong eka je barasih. (Pampingat akan pambasa: Keleh manggau riman auh te!) 24:16 Hong katika te, oloh je aton hong Yudea musti hadari akan kare bukit. 24:17 Oloh je aton intu sapau huma ela mohon mado manduan taloh huang huma. 24:18 Oloh je aton intu tana ela mado buli manduan jubahe. 24:19 Dia laluen kapapae kare andau te akan oloh bawi je batihi, tuntang akan indu je mampatoso anake! 24:20 Keleh balakudoa uka ela sampai keton musti hadari hong wayah pangujan atawa hong andau Sabat! 24:21 Hong kare andau je bakaike-ikeh te kareh lembut kasusah je hai kilau je hindai puji manjadi bara tamparan kalunen sampai katika toh, tuntang dia akan manjadi tinai. 24:22 Jaka Hatalla dia mamandak katikae; maka ije biti mahin jaton oloh je tau salamat. Tapi tagal oloh ungkup ayue, Hatalla mamandak wayah kapehe te. 24:23 Hong katika te amon aton oloh hamauh dengan keton, 'Ite, Raja Panyalamat te aton hetoh!' atawa 'Ie aton intu hete!' -- ela keton percaya oloh te. 24:24 Basa kareh lembut kare panyalamat pananjaro tuntang kare nabi pananjaro. Ewen kareh malalus kare gawi je lala-lalau kahaie, tuntang kare taloh heran hapa mananjaro, amon tau mananjaro ungkup ain Hatalla kea. 24:25 Jadi, keleh mingat! Aku jari mansanae akan keton helo bara kare taloh te manjadi. 24:26 Amon oloh hamauh dengan keton, 'Ite, ie aton hetoh hong padang pasir!' -- ela keton manalih hete. Atawa amon ewen hamauh, 'Ite, ie manyahokan hong kamar hetoh!' -- ela percayae. 24:27 Basa pandumah Anak Olon sama kilau kalawan kilat je mamancar bara hila Timor, tuntang paha-pahai sampai akan hila Barat. 24:28 Hong kueh aton hantu, hete kea aton burung je kuman hantu." 24:29 "Dia tahi limbah kare kasusah kajake wayah te, matanandau kareh manjadi kaput, tuntang bulan jaton tinai kalawae. Kare bintang kareh manjato bara langit, tuntang kare taloh kuasa intu langit kareh manjadi hakangkalut. 24:30 Limbah te tanda Anak Olon kareh gitan intu langit. Hong katika te kare utus oloh hong kalunen kareh manangis. Ewen kareh mite Anak Olon dumah hunjun baunandau dengan kuasae tuntang kahaie je paham. 24:31 Tarompet hai kareh impahiau, tuntang Anak Olon kareh manyoho kare malekat ayue mamumpong ungkupe bara kaepat puting kalunen, bara tapakan langit silae sampai tapakan langit je silae tinai." 24:32 "Keleh manduan ajar bara batang sikon. Amon kare edae jari bahijau tuntang balemo, tuntang nampara manyuloh, keton katawan jete tanda wayah mandang jari tokep. 24:33 Kalote kea amon keton mite kare hal te manjadi, katawan keton jete tandae wayahe jari tokep toto. 24:34 Ingat! Kare taloh te kareh manjadi helo bara kare oloh je belom wayah toh matei lepah. 24:35 Langit tuntang petak kareh lilap, tapi auhku tetep sampai katatahie." 24:36 "Jaton oloh je katawan hamparea andaue tuntang jame, kare malekat hong sorga mahin dia, Anak Hatalla mahin dia, baya Bapa bewei je katawan. 24:37 Amon Anak Olon dumah kareh, jete ampie kilau jaman Noah horan. 24:38 Hong kare andau helo bara danum soho te, kare oloh kuman mihop, tuntang kawin. Kalote raju-rajur sampai akan andau Noah tame akan huang banama. 24:39 Hong wayah danum soho te mantakan ewen samandiai, harue ewen ingarendeng tahiu taloh je kanjerae manjadi. Maka kalote kea ampie kareh amon Anak Olon dumah. 24:40 Hong katika te, due biti oloh je bagawi hong tana: ije biti induan, tuntang ije tinai ilihi. 24:41 Due oloh bawi je metohe manepung gandum: ije kareh induan, tuntang ije tinai ilihi. 24:42 Jadi keleh batawat, basa keton dia katawan hamparea Tuhan kareh dumah. 24:43 Keleh mingat jetoh! Amon oloh tempon huma katawan jam pire maling dumah hamalem, ie dia baka batiroh, uka maling te dia tame akan huang humae. 24:44 Awi te, keton musti tata-tatap dengan arep keton. Karana Anak Olon kareh dumah hong katika je dia olih keton mangatawae." 24:45 Koan Yesus tinai, "Amon kalote, jipen je kueh je baketep tuntang pintar harati? Jete ie je iangkat awi tuan ayue uka mangapala kare jipen awang beken, mangat ie mampakanan ewen puna hong katikae. 24:46 Paham toto kahanjak jipen te amon tuan ayue buli, tuntang manyondau ie metohe malalus kare gawie te. 24:47 Percaya ih, tuan te kareh manenga kapercayae akan jipee te uka ie mahaga ramoe. 24:48 Tapi amon jipen te oloh papa, ie kareh hamauh huang ateie, 24:49 'Tuan ayungku te magon tahi hindai harue buli,' palus ie nampara mamukul kare jipen awang beken, tuntang ie kuman mihop dengan kare oloh pambusau. 24:50 Tapi kareh tuan te buli hong andau tuntang jam je dia ie katawae. 24:51 Maka jipen te kareh injerae sakalepah belai awi tuan te, tuntang iharak akan eka kare oloh haliau. Hete ewen kareh manangis tuntang kapehe."
25:1 "Amon Anak Olon dumah kilau Tuhan, jete ampie sama kilau huang paribasa toh: Sapuluh bawi bujang panggapit panganten genep biti mimbing sumbo batotong, palus haguet manambang panganten hatue. 25:2 Lime biti bara ewen te humong, tuntang lime biti je beken te harati. 25:3 Lime bawi bujang je humong te mimbit sumbo batotong, tapi jaton mimbit minyak bahatae. 25:4 Lime bawi bujang je harati te mimbit sumboe haya-hayak dengan minyak bahatae. 25:5 Panganten hatue te dumah jari sayup, jadi kare bawi bujang te nampara mangantok tuntang tapatiroh. 25:6 Hong bentok alem, harun tarahining auh kariak oloh, 'Panganten hatue dumah! Has tambang ie!' 25:7 Sapuluh bawi bujang te misik tuntang manotong sumboe. 25:8 Kare bawi bujang je humong te hamauh dengan ewen je harati, 'Bagi minyakm isut akan ikei, awi sumbon ikei jari handak belep.' 25:9 'Dia tau!' koan kare bawi bujang je harati te, 'Kareh kakare itah toh uras tapas minyak. Haguet ih keton mamilie hong toko.' 25:10 Maka kare bawi bujang je humong te haguet mamili minyak. Pandehan ewen haguet, te panganten hatue dumah. Lime bawi bujang je jari tatap te tame haya-hayak dengan panganten akan eka pesta, tuntang bauntonggang palus inutup! 25:11 Limbah te, maka bawi bujang awang beken te dumah. Ewen mangkariak, 'Tuan, Tuan, uap bauntonggang akan ikei.' 25:12 Tapi panganten hatue te tombah, 'Aku dia kasene keton!' " 25:13 Palus Yesus mahapus paribasa te kalotoh, "Tagal te keleh rende-rendeng, basa keton dia katawan andaue atawa jame." 25:14 "Amon Anak Olon dumah kilau Tuhan, jete ampie sama kilau huang paribasa toh kea. Ije biti oloh hatue handak haguet akan eka je kejau. Ie mantehau kare jipee palus manyarah ramoe dengan ewen. 25:15 Akan genep bitin jipen te ie manenga manumon ampin kaolih ewen mije-mije. Akan ije biti ie manenga lime koyan duit amas. Akan je beken tinai ie manenga due koyan duit amas. Tuntang akan ije biti tinai ie manenga sakoyan duit amas. Balalu ie haguet. 25:16 Jipen je manarima lime koyan duit amas te balalu tolak badagang, palus mandino ontong lime koyan duit amas kea. 25:17 Kalote kea jipen je manarima due koyan duit amas te mandino ontong due koyan kea. 25:18 Tapi jipen je manarima sakoyan duit amas te haguet mangali rumbak hong petak, palus manyahokan duit tempoe te hete. 25:19 Tahi toto limbah te, harue tuan te buli tinai, tuntang manampara mawi perhitungan dengan ewen. 25:20 Jipen je manarima lime koyan duit amas te dumah, tuntang manyarah akae sapuluh koyan. 'Tuan,' koae, 'Tuan manyarah akangku lime koyan duit amas. Ite, aku jari mandino hasil tuntang ontong lime koyan tinai.' 25:21 'Bahalap gawim,' koan tuan te, 'Ikau toh jipen je bahalap tuntang baketep. Awi tau imercaya dengan taloh je isut, maka aku kareh manenga are kapercaya akam. Keleh tame tuntang hanjak rantang ikau dengangku!' 25:22 Palus jipen je manarima due koyan duit amas te dumah, tuntang hamauh, 'Tuan, Tuan jari manyarah due koyan duit amas akangku. Ite, aku jari mandino hasil tuntang ontong due koyan tinai.' 25:23 'Bahalap gawim te,' koan tuan te, 'ikau jipen je bahalap tuntang baketep. Awi ikau imercaya dengan taloh je isut, maka aku manenga are kapercayangku dengam. Keleh tame tuntang hanjak rantang ikau dengangku!' 25:24 Limbah te jipen je manarima sakoyan duit amas te dumah tuntang hamauh, 'Tuan, aku katawan tuan ije biti oloh je karas. Tuan mamutik bua hong eka je tuan dia mimbule, tuntang manampunan hasil hong eka je tuan dia manawor binyie. 25:25 Aku mikeh, jadi aku haguet manyahokan duit tuan hong penda petak. Toh ie duit tuan te.' 25:26 'Ikau jipen je papa tuntang kadian!' koan tuan te. 'En dia ikau jari katawan je aku toh mamutik bua hong eka je aku dia mimbule, tuntang manduan hasil hong eka je aku dia manawor binyie? 25:27 Amon kalote, sapunae ikau musti mingkes duitku te intu bank, mangat hong katika aku buli, aku tau manarima duitku te dengan anake. 25:28 Tagal te, duan duit te bara ie, tuntang tenga akan oloh je tempon sapuluh koyan duit amas te. 25:29 Karana oloh je jari mandino, kareh inenga labih are tinai tuntang ie kareh mandino labien bara kasukupe. Tapi oloh je dia mandino, isut je aton huang ie mahin kareh induan kea. 25:30 Tuntang jipen je dia baguna te, kanan ih huang kakaput intu luar. Intu hete ie kareh manangis tuntang kapehe!' " 25:31 "Amon Anak Olon dumah kilau Raja impahayak awi kakare malekat ayue, ie kareh mondok intu hunjun padadusae je tinduh tuntang barasih. 25:32 Kare utus oloh kalunen kareh imumpong intu taharepe. Palus ie kareh mamisah ewen te manjadi due kumpulan kilau sakatik mamisah tabiri dengan kambing. 25:33 Kare oloh je malalus kahandak Hatalla kareh imumpong hong hila gantaue, tuntang je beken hila sambile. 25:34 Limbah te Raja te kareh hamauh dengan kare oloh je hila gantaue, 'Kantoh keton je imberkat awi Bapaku. Tame akan huang Karajaan je inatap akan keton bara tamparan kalunen. 25:35 Basa metoh aku balau', keton manenga akangku panginan, tuntang metoh aku teah belai, keton mampihop aku. Aku oloh tamuei, keton manarima aku hong human keton. 25:36 Aku jaton pakaian, keton manenga akangku pakaian. Aku haban, keton mahaga aku. Aku hong penjara keton mandohop aku.' 25:37 Balalu kare oloh te kareh hamauh, 'Tuhan, hamparea ikei puji mite Tuhan balau' palus ikei manenga panginan, atawa teah belai palus ikei manenga Tuhan taloh ihop? 25:38 Hamparea ikei puji mite Tuhan kilau oloh tamuei, palus ikei manarima Tuhan intu human ikei? Tuhan puji jaton pakaian, palus ikei manenga Tuhan pakaian? 25:39 Hamparea ikei puji mite Tuhan haban atawa hong penjara, palus ikei mandohop Tuhan?' 25:40 Raja te kareh tombah, 'Keleh keton katawan: katika keton malalus hal te, aloh dengan ije biti bara kare paharingku je asi-asi te, rimae keton jari malaluse dengangku!' 25:41 Palus Raja te kareh hamauh dengan kare oloh je hila sambile, 'Dari keton bara hetoh, keton je tarasapa! Tame keton akan apui je dia tarabelep, je jari inatap akan Setan tuntang kare malekat ayue! 25:42 Basa hong katika aku balau', keton jaton manenga akangku panginan; hong katika teah belaiku, keton jaton manenga akangku taloh ihop. 25:43 Aku oloh tamuei, keton jaton manarima aku hong human keton. Aku jaton pakaian, keton jaton manenga aku pakaian. Aku haban tuntang huang penjara, keton jaton mahaga aku.' 25:44 Palus ewen akan hamauh dengae, 'Tuhan, hamparea ikei mite Tuhan balau', atawa teah belai, atawa kilau oloh tamuei, atawa jaton pakaian, atawa haban atawa huang penjara, tuntang ikei jaton mandohop Tuhan?' 25:45 Raja te tombah, 'Katawan keton: hong katika keton dia maku mandohop ije biti oloh je asi-asi toh, rimae keton jaton mandohop aku.' 25:46 Maka kare oloh te kareh ihukum hapan hukuman je katatahie, tapi akan kare oloh je malalus kahandak Hatalla kareh mangkeme pambelom je bujur tuntang katatahie."
26:1 Sana Yesus hapus majar taloh samandiai te, ie hamauh dengan kare muride, 26:2 "Keton katawan due andau tinai Andau Pesta Paska, tuntang Anak Olon kareh inyarah uka inyampalaki!" 26:3 Hong katika te kare imam kapala tuntang kare pamimpin Yehudi hapumpong hong istana Imam Hai Kayapas. 26:4 Ewen barunding uka manawan Yesus benye-benyem mangat mampatei ie. 26:5 "Tapi," koan ewen, "ela mawie metoh wayah pesta bele lembut karidu kalahi bentok oloh are." 26:6 Katika Yesus aton hong Betania, intu human Simon je bihin puji buah panyakit kerai je bahaya, 26:7 ije biti oloh bawi dumah manalih Yesus. Ie mimbit kasa pualam, basuang minyak harum je barega. Katika Yesus metoh mondok kuman, oloh bawi te manata minyak harum te akan hunjun takolok Yesus. 26:8 Kare murid Yesus mite taloh je manjadi te ewen palus balait. "En gunae kare taloh toh ihalanganyan?" koan ewen. 26:9 "Minyak harum toh tau injual dengan rega je hai, tuntang duite inenga akan kare oloh je belom susah!" 26:10 Yesus katawan tirok ewen, palus ie hamauh, "Mbuhen keton manyusah oloh bawi toh? Ie malalus taloh gawi je bahalap tuntang je patut inara akangku. 26:11 Oloh je belom susah harajur aton intu marak keton, tapi aku dia harajur hinje keton. 26:12 Awie manata minyak harum te hunjun bitingku, ie manatap aku akan kuburku. 26:13 Percaya ih! Hong hapus kalunen, hong kueh bewei Barita Bahalap ain Hatalla imbarita, gawin oloh bawi toh kareh inyarita kea kilau pangingat akae." 26:14 Balalu ije biti bara due walas murid Yesus te, je bagare Yudas Iskariot, haguet manalih kare imam kapala. 26:15 Ie hamauh dengan ewen, "En taloh je inenga keton akangku amon aku manyarah Yesus akan keton?" Maka ewen mise telo puluh duit perak, palus manenga duit te akae. 26:16 Nampara bara katika te Yudas manggau katika je bahalap uka mandurhaka Yesus. 26:17 Intu andau je solake hong wayah Pesta Rote Dia Iragi, kare murid Yesus dumah manalih ie. Ewen misek, "Hong kueh Bapa handak ikei manatap panginan Paska akan Bapa?" 26:18 Yesus tombah, "Lius talih ije biti oloh hong lewu tuntang sanan akae, 'Koan Bapa Guru, jari sampai katika akangku; aku handak mahaga Paska intu humam haya-hayak dengan kare muridku.' " 26:19 Kare murid Yesus malalus kare taloh je inyoho Yesus ewen. Ewen haguet manatap panginan Paska te. 26:20 Sana hamalem, Yesus dengan duewalas muride mondok kuman. 26:21 Metoh ewen kuman, Yesus hamauh, "Hining toh: ije biti bara keton kareh mandurhaka mawi aku." 26:22 Mahining auh te, kare murid Yesus manjadi kapehe toto ateie. Palus mije-mije ewen te misek dengan Yesus, "Pasti je koan Bapa te beken aku?" 26:23 Yesus tombah, "Oloh je manculop rote huang mangkok haya-hayak dengangku, ie te je mandurhaka mawi aku. 26:24 Punae Anak Olon kareh matei kilau je tarasurat huang Surat Barasih. Tapi calaka oloh je mandurhaka mawi Anak Olon! Labih bahalap jaka oloh te dia puji inakan samasinde!" 26:25 Palus Yudas je mandurhaka te hamauh, "Pasti je koan Bapa te beken aku?" Yesus tombah, "Kalote je koam!" 26:26 Metoh ewen kuman, Yesus manduan rote palus manyewut lakudoa tarimakasih. Limbah te ie mangiwak rote te hapan lengee palus manenga akan kare muride sambil hamauh, "Duan, tuntang kinan; jetoh berengku." 26:27 Limbah te ie manduan ije cangkir anggur palus manarimakasih akan Hatalla. Tinai ie manenga cangkir te akan kare muride, sambil hamauh, "Ihop toh, kakare keton. 26:28 Basa jetoh dahangku je manjadi tanda katoton janjin Hatalla -- daha je inusoh akan kare oloh hapa mampun dosan ewen. 26:29 Percaya bewei, aku dia handak mihop anggur toh tinai sampai katika aku mihop anggur je taheta haya-hayak dengan keton hong Lewu Taheta ain Bapaku." 26:30 Limbah te ewen te manyanyi ije nyanyi tara, ewen palus haguet akan Bukit Batang Undus. 26:31 Palus Yesus hamauh dengan kare muride, "Hong alem toh kea kakare keton kareh hadari malihi aku; basa huang Surat Barasih tarasurat: Hatalla hamauh, 'Aku kareh mampatei sakatik te, tuntang kawan tabirie kareh kasaburan.' 26:32 Tapi limbah aku imbelom haluli, aku kareh haguet mananselo keton manalih Galilea." 26:33 Petrus hamauh dengan Yesus, "Kanduem ih oloh awang beken uras malihi Bapa, aku toh dia samasinde!" 26:34 "Ingat," koan Yesus dengae, "Alem toh kea, helo bara manok manando, hantelo ikau jari milim aku." 26:35 Petrus tombah, "Aloh aku matei hayak Bapa, aku dia baka mansanan aku dia kasene Bapa!" Tuntang uras kare murid awang beken mahin hamauh kalote kea. 26:36 Limbah te Yesus haguet dengan kare muride akan ije eka je bagare Getsemane. Hete ie hamauh dengan ewen, "Keleh mondok hetoh pandehan aku haguet balakudoa." 26:37 Palus ie mimbit Petrus tuntang due anak Sebedeus haguet haya-hayak dengae. Ie nampara kapehe ateie tuntang gogop ampie. 26:38 Ie hamauh dengan kare muride, "Ateiku paham kapehe angate kilau handak matei ih. Keleh keton melai hetoh, tuntang omba bajaga dengangku." 26:39 Limbah te tinai Yesus haguet kakejau isut, palus ie mahingkep akan petak tuntang balakudoa. "Bapa," koae, "amon tau, keleh mangejau bara aku kare kapehe je musti ingkemeku toh. Tapi ela tumon kahandakku, malengkan manumon kahandak Bapa bewei." 26:40 Limbah te Yesus haluli manalih katatelo muride tuntang ite ewen metoh batiroh. Ie hamauh dengan Petrus, "Aloh baya ije jam ih keton batelo dia olih bajaga dengangku? 26:41 Keleh bajaga tuntang balakudoa mangat keton dia buah tingkes. Puna roh keton handak malalus taloh je bujur toto tapi keton dia olih, awi sipat kaolon te balemo." 26:42 Sinde tinai Yesus haguet balakudoa, koae, "Bapa, amon kapehe toh musti buah aku, tuntang dia tau ihakan, keleh kahandak Bapa je manjadi." 26:43 Limbah te Yesus haluli tinai, tuntang mite kare muride magon batiroh awi ewen paham mangantok. 26:44 Sinde tinai Yesus malihi ewen tuntang akan katelo kalie ie balakudoa hayak manyewut auh je sama kilau helo te kea. 26:45 Limbah te ie haluli tinai manalih kare muride tuntang hamauh, "En keton magon batiroh tuntang malayan kaheka? Ite, katika jari sampai Anak Olon inyarah akan kuasan kare oloh badosa. 26:46 Misik, keleh itah haguet. Ite! Oloh je mandurhaka aku jari dumah!" 26:47 Pandehan Yesus magon hakotak, Yudas, ije bara duewalas muride te dumah. Haya-hayak dengae dumah kea kare oloh je mimbit padang tuntang gagada. Ewen te inyoho awi kare imam kapala tuntang kare pamimpin Yehudi. 26:48 Oloh durhaka te jari mansanan akan ewen tanda toh, "Oloh je inyiumku, jete ie oloe. Tawan ie!" 26:49 Kalote ewen sampai hong eka te, Yudas balalu manalih Yesus tuntang hamauh, "Tabe, Pa Guru!" Palus ie manyium Yesus. 26:50 Yesus tombah, "Pahari, akan en pahari dumah akan hetoh?" Limbah te oloh are te manokep balalu manawan Yesus. 26:51 Ije biti bara muride je aton hete dengan Yesus, manyilak padange tuntang mariwis jipen imam hai sampai balumpeng pindinge. 26:52 Yesus hamauh dengan muride te, "Ngumpang haluli padangm, basa oloh samandiai je mahapan padang akan matei awi padang. 26:53 Ikau madoe, aku dia tau balaku dohop dengan Bapaku, tuntang ie balalu mampait akangku labih bara duewalas pasukan tentara malekat? 26:54 Tapi amon kalote, kueh tau manjadi taloh je inujum huang Surat Barasih kilau je puna musti manjadi tumon toh?" 26:55 Palus Yesus hamauh dengan oloh are, "En aku toh oloh papa, sampai keton dumah hayak mimbit padang tuntang gagada mangat manawan aku? Genep andau aku majar huang Human Tuhan tapi keton dia manawan aku! 26:56 Tapi puna jari musti kalote uka manjadi taloh je inyurat awi kare nabi huang Surat Barasih." Limbah te, kakare muride hadari malihi Yesus. 26:57 Kare oloh je manawan Yesus mimbit ie akan human Imam Hai Kayapas. Hong hete kare guru agama tuntang kare pamimpin Yehudi jari hapumpong. 26:58 Petrus manuntut Yesus bara kejau sampai akan baun human imam hai. Palus Petrus tame akan baun huma te, tuntang mondok hinje dengan kare pengawal. Ie handak mangatawan kilen ampie kajarian kare taloh handiai te kareh. 26:59 Kare imam kapala tuntang hapus Pengadilan Agama manggau akal uka mandino saksi tanjaro mangat tau mamutus hukuman matei mawi Yesus. 26:60 Tapi ewen jaton mandino bukti, ije mahin jaton, aloh are oloh je mendeng kilau saksi tanjaro. Kajariae aton due biti oloh je dumah akan baun. 26:61 Ewen hamauh, "Oloh toh hamauh, 'Aku olih manduroh Human Hatalla, tuntang huang telo andau olih mamangue haluli.' " 26:62 Palus imam hai mendeng, tuntang hamauh dengan Yesus, "En ikau dia tombah kare auh dawan oloh je mawi ikau te?" 26:63 Tapi Yesus benyem ih. Sinde tinai imam hai te hamauh dengae, "Tagal aran Hatalla je belom, sanan akan ikei en ikau Raja Panyalamat, Anak Hatalla?" 26:64 Yesus tombah, "Kalote ih koam. Tapi percaya bewei: nampara bara katika toh, keton kareh mite Anak Olon mondok hila gantaun Hatalla Je Pangkahain Kuasae, tuntang dumah hong hunjun baunandau intu langit!" 26:65 Maka imam hai te marabit pakaiae, tuntang hamauh, "Ie mamapa Hatalla! Dia usah hindai saksi. Keton uras jari mahining kabuat kare auh je mamapa Hatalla. 26:66 Toh kilen tirok keton?" Ewen tombah, "Ie basala, tuntang musti matei." 26:67 Palus ewen maluja baun Yesus, tuntang mamukul ie. Aton kea je manampar ie 26:68 tuntang hamauh, "Coba nujum akan ikei, o Raja Panyalamat! Eweh je manampar ikau te?" 26:69 Petrus metoh mondok intu luar, hong baun huma. Ije biti jipen bawi dumah, tuntang hamauh dengan Petrus, "Dia ikau toh je dengan Yesus oloh Galilea te?" 26:70 Tapi Petrus milim arepe intu taharep ewen te samandiai. "Aku dia katawan narai je koam," koan Petrus tombah, 26:71 palus ie manalih bauntonggang pagar handak balua. Metoh te ije biti jipen bawi beken hamauh dengan kare oloh hong hete, "Oloh toh endau mahin haya-hayak dengan Yesus bara Nasaret te." 26:72 Palus Petrus milim tinai, tuntang basumpah. "Puna toto aku dia kasene oloh te!" koan Petrus. 26:73 Dia tahi limbah te, kare oloh je mendeng hete dumah manalih Petrus tuntang hamauh, "Pasti ikau toh aton ije bara kare ewen te. Bara auh kotakm batantu toto jete." 26:74 Balalu Petrus nampara sapa-sapa auhe tuntang hamauh, "Aku dia kasene oloh te!" Hemben te kea manok manando. 26:75 Tuntang Petrus taraingat taloh je puji insanan Yesus akae, koae, "Helo bara manok manando, hantelo ikau jari milim aku." Balalu Petrus balua tuntang manangis side-siden awi kapehen ateie.
27:1 Hayak hanjewu toto, kakare imam kapala tuntang pamimpin Yehudi mamutus uka mampatei Yesus. 27:2 Ewen marantai ie, tuntang mimbit ie, balalu manyarah ie akan Pilatus, gubernur pamarentah Roma. 27:3 Katika Yudas oloh durhaka te mite Yesus jari imutus buah hukum, te ie manyasal. Palus ie malian telo puluh kabawak duit perak te akan kare imam kapala tuntang kare pamimpin Yehudi. 27:4 Ie hamauh, "Aku jari badosa mandurhaka mawi oloh je dia basala, sampai ie ihukum matei!" Tapi ewen tombah, "Narai perlu ikei padulie? Jete urusan ayum!" 27:5 Yudas manjakah duit te akan huang Human Tuhan, palus haguet tuntang manggantong arepe. 27:6 Kare imam kapala manduan duit te tuntang hamauh, "Duit toh duit daha. Manumon hukum agama, duit toh dia tau inamean akan huang eka parapah intu Human Tuhan." 27:7 Maka limbah ewen pakat, ewen mangguna duit te akan mamili petak je inyewut Petak Tukang Balanai. Petak te akan eka kuburan oloh tamuei. 27:8 Maka tagal te sampai andau toh petak te inggare "Petak Daha". 27:9 Awi te, maka manjadi taloh je insanan awi Nabi Yeremia, iete, "Ewen manarima telo puluh duit perak, jete rega je imakat awi utus Israel hapan mambayar akae. 27:10 Tuntang duit te ihapan ewen mamili Petak Tukang Balanai, kilau je irentah Tuhan akangku." 27:11 Katika Yesus manaharep Pilatus, gubernur daerah te, Pilatus misek, "En ikau Raja ain oloh Yehudi?" "Kalote ih koam," koan Yesus tombah. 27:12 Tapi metoh kare imam kapala tuntang kare pamimpin Yehudi mansanan are dawan oloh mawi Yesus, ie dia tombah samasinde. 27:13 Tagal te Pilatus hamauh dengae, "En ikau jaton mahining kakare taloh je indawa ewen mawi ikau?" 27:14 Tapi Yesus isut mahin dia tombah sampai gubernur te hengan toto. 27:15 Hong genep wayah Pesta Paska, bahut gubernur malapas ije biti oloh je buah tawan hong penjara, tumon paintih oloh are. 27:16 Hong katika te aton ije biti oloh tawanan je basewut. Arae te Yesus Barabas. 27:17 Jadi metoh oloh are jari hapumpong, Pilatus misek ewen, "Eweh oloe je eka kahandak keton mangat aku malapase akan keton? Yesus Barabas atawa Yesus je inyewut Kristus?" 27:18 Pilatus hamauh kalote awi ie katawan, kare oloh Yehudi je mimbing kuasa te manyarah Yesus akae awi kahirin atei ewen. 27:19 Metoh Pilatus mondok hong balai pengadilan, sawae mangirim peteh akae, koae, "Ela ikau omba campur pakaran oloh je dia basala te, basa awi ganan ie, aku mandino nupi je papa andau toh." 27:20 Tapi kare imam kapala tuntang kare pamimpin Yehudi magon ih manantiring oloh are te uka balaku dengan Pilatus mangat Barabas ilapas tuntang Yesus ihukum matei. 27:21 Palus gubernur te misek tinai dengan ewen, "Bara due biti oloh te, eweh ie je ingahandak keton mangat aku malapase akan keton?" "Barabas," koan ewen tombah. 27:22 "Amon kalote, kilen gawingku dengan Yesus je inyewut Kristus?" koan Pilatus misek ewen. "Nyampalaki ie!" koan ewen tombah dere-derep. 27:23 "Tapi narai kapapan gawie?" koan Pilatus misek. Palus ewen manyangit haream mangkariak tinai, "Nyampalaki ie!" 27:24 Kajariae Pilatus katawan je ie jaton olih mawi taloh en-en hindai tuntang kare oloh te ampie sasar ridu. Jadi ie manduan danum, palus intu taharep oloh are te ie menyau lengee tuntang hamauh, "Aku dia omba tiwas dengan pampatei oloh toh! Jetoh tanggong jawab keton!" 27:25 Salepah oloh are te tombah, "Iyoh, nauhe ikei tuntang kare anak ikei mananggong hukum tagal pampateie!" 27:26 Palus Pilatus malapas Barabas akan ewen, tuntang manyoho oloh mahewes Yesus hapan cambuk; tuntang manyarah ie uka inyampalaki. 27:27 Limbah te kare prajurit Pilatus mimbit Yesus tame akan istana gubernur, tuntang hapus pasukan rimpo-rimpong mangaliling Yesus. 27:28 Ewen mengkak pakaian Yesus, tuntang mangkepan jubah kawo-kawo warnae intu ie. 27:29 Ewen manampa ije makota bara kare bajakah je haduhi, tuntang mangkepae intu takolok Yesus. Limbah te ewen manjulok ije kadereh sukah hong lengee gantau, palus sontop manyembah intu taharepe, tuntang mureh ie. "Salamat Rajan Oloh Yehudi!" koan ewen. 27:30 Ewen maluja ie, tuntang manduan sukah te palus mahambat ie buah takoloke. 27:31 Limbah ewen mureh ie, ewen mengkak jubah te palus mangkepan haluli pakaian ayue kabuat. Limbah te ie iimbit akan luar uka inyampalaki. 27:32 Hong benteng jalan, ewen hasondau dengan ije biti oloh bara Kirene bagare Simon. Ewen mamaksa oloh te meton sampalakin Yesus. 27:33 Limbah te tinai ewen sampai hong eka je bagare Golgota, rimae "Eka Bangon Takolok". 27:34 Intu hete ewen manenga akan Yesus danum anggur je iewoi dengan peru. Tapi limbah Yesus mangkeme anggur te, ie dia maku mihope. 27:35 Limbah te ewen manyampalaki ie, tuntang ewen habagi pakaiae mahapan tenong. 27:36 Limbah te ewen mondok manjaga ie hong hete. 27:37 Intu hunjun takoloke ewen mangkepan surat tahiu dawan oloh mawi ie, iete: "Jetoh Yesus, Rajan Oloh Yehudi". 27:38 Haya-hayak dengae te ewen kea manyampalaki due biti bandit; ije hila gantaue tuntang ije tinai hila sambile. 27:39 Kare oloh je mahalau hete manggiling takoloke, tuntang manawah Yesus. 27:40 Ewen hamauh, "Ikau je handak manduroh Human Hatalla nah, tuntang mamangue tinai huang telo andau! Amon Ikau Anak Hatalla, mohon ih ikau bara sampalaki kau, tuntang nyalamat arepm!" 27:41 Kalote kea kare imam kapala tuntang kare guru agama dengan kare pamimpin Yehudi halalea Yesus. Ewen hamauh, 27:42 "Ie tau manyalamat oloh beken, padahal arepe kabuat dia olih ie manyalamate! Amon ie Rajan Oloh Israel, toh keleh ie mohon bara sampalaki te, harun ikei handak percaya dengae. 27:43 Ie percaya dengan Hatalla, tuntang manyewut arepe Anak Hatalla. Nah, ayo itah mitee en toh Hatalla maku manyalamat ie." 27:44 Kare bandit je inyampalaki hayak dengae te mahin kalote kea omba mahina ie. 27:45 Katahin telo jam hong bentok andau, hapus daerah te manjadi kaput. 27:46 Pukul telo halemei, Yesus mangkariak hayak hai auhe, "Eli, Eli, lama sabakhtani?" rimae, "O Hatallangku, O Hatallangku, mbuhen ikau malihi aku?" 27:47 Pire-pire oloh hete mahining kariak te, tuntang hamauh, "Ie mantehau Elia!" 27:48 Ije bara ewen te kaje-kajeng haguet manduan kambang karang, tuntang manculope huang anggur masem. Limbah te ie mantejeke intu tapakan dereh kayu, tuntang manjujue manalih biwih Yesus. 27:49 Tapi kare oloh beken hamauh, "Entai, keleh itah mitee en Elia dumah manyalamat ie!" 27:50 Limbah te Yesus mangkariak tinai hayak hai auhe, palus manggeto tahasenge. 27:51 Dinding benang je ingkepan huang Human Tuhan barabit sila due bara hunjun sampai akan pendae, petak hagerek tuntang bukit batu bapusit. 27:52 Kare kubur buap, tuntang are ungkup ain Hatalla je jari matei imbelom haluli. 27:53 Ewen balua bara kare kubur limbah Yesus misik bara pampatei, tuntang ewen tame akan Yerusalem. Tuntang hete are oloh mite ewen. 27:54 Kapala pasukan haya-hayak dengan kare prajurit je metoh manjaga Yesus manjadi mikeh toto awie mite petak hagerek, tuntang kare taloh handiai je manjadi te. Ewen hamauh, "Toto, ie toh Anak Hatalla!" 27:55 Hong hete aton kea are oloh bawi je manampayah bara kejau. Ewen te je jari manuntut Yesus mangat mandohop ie bara metoh hong Galilea. 27:56 Bara kare ewen te aton kea Maria Magdalena, Maria indu Yakobus ewen due Yosep, tuntang indu kare anak Sebedeus. 27:57 Alem te kea maka dumah ije biti oloh tatau bara Arimatea, je bagare Yosep. Ie te kea murid Yesus. 27:58 Ie haguet manalih Pilatus, tuntang balaku hantun Yesus. Palus Pilatus marentah uka hantun Yesus inenga akae. 27:59 Maka Yosep manduan hantu te, tuntang mambungkuse hapan benang baputi bara linen je taheta. 27:60 Palus ie mingkes hantun Yesus intu huang kubur ayue kabuat je inampa intu huang ije bukit batu. Limbah te ie manggaling ije bindang batu hai hapan matep bauntonggang kubur te, palus ie haguet. 27:61 Maria Magdalena tuntang Maria je beken melai mondok hete manaharep kubur te. 27:62 Jajewu andau tinai, hong andau Sabat, kare imam kepala tuntang kare oloh Parisi haguet haya-hayak manaharep Pilatus 27:63 tuntang hamauh, "Tuan, ikei mingat metoh oloh pananjaro te magon belom, ie puji hamauh, 'Limbah telo andau aku kareh misik.' 27:64 Awi te, keleh manyoho oloh je manjaga kubur te manjagae bua-buah sampai andau je kateloe, uka kare muride dia tau manakau hantue palus hamauh dengan kare oloh, je ie jari impisik bara pampatei. Tuntang tanjaro je pangkahai toh kareh labih papa bara je solake." 27:65 "Ain keton aton tentara pangawal," koan Pilatus dengan ewen, "Keleh lius manjaga kubur te sapire kaolih sampai toto aman." 27:66 Palus ewen haguet akan kubur, manyegel batu je manutupe tuntang manyoho tukang jaga melai intu tambuan bauntonggang kubur te, mangat jaton oloh je tau manderoh kubur te.
28:1 Katika andau Sabat jadi mahalau, hong andau Minggo hayak jajewu, Maria Magdalena tuntang Maria je beken te haguet mite kubur te. 28:2 Te petak salenga hagerek paham. Ije biti malekat Tuhan mohon bara sorga palus manggaling batu tutup kubur te, tuntang mondok hunjue. 28:3 Ampin tampayah malekat te mangilat, tuntang pakaiae baputi toto. 28:4 Tentara pengawal je manjaga intu hete takikeh paham sampai ewen hagenjeh, tuntang ampie kilau oloh matei. 28:5 Malekat te hamauh dengan kare oloh bawi te, "Ela mikeh! Aku katawan keton manggau Yesus je jari inyampalaki te. 28:6 Ie jaton intu hetoh. Ie misik kilau je jari insanae bihin. Takan, keleh keton mite ekae ie impeter. 28:7 Toh, lius jele-jeleng, sanan akan muride, 'Ie jari misik, tuntang toh ie jari haguet mananselo keton akan Galilea. Intu hete keton kareh mite ie!' Ingat taloh je jari insanangku akan keton." 28:8 Kare oloh bawi te jele-jeleng malihi kubur te. Marak angat mikeh hayak hanjak ewen dari-dari mangat mansanan hal te akan kare murid Yesus. 28:9 Te salenga Yesus dumah manyondau kare oloh bawi te, tuntang hamauh, "Salamat!" Palus ewen manalih manokep ie, limbah te mamangkut paie tuntang manyembah ie. 28:10 "Ela mikeh," koan Yesus dengan ewen, "lius sanan akan kare paharingku mangat ewen haguet akan Galilea; intu hete ewen kareh mite aku." 28:11 Metoh kare oloh bawi te haguet, pire-pire bara tentara pengawal je manjaga kubur te haluli akan lewu, tuntang malapor akan kare imam kapala taloh handiai je jari manjadi te. 28:12 Kare imam kapala te barunding dengan kare pamimpin Yehudi, palus manenga karean duit akan tentara pangawal te, 28:13 tuntang hamauh, "Keton musti mansanan kalotoh: kare murid Yesus dumah hong hamalem tuntang manakau hantue metoh keton kanjerae batiroh. 28:14 Tuntang amon gubernur mahining hal te, ikau kareh mangatau ie mangat keton dia buah kasusah en-en." 28:15 Maka tentara pangawal te manduan duit te tuntang malaluse kilau je imeteh dengan ewen. Tagal te sarita te magon tayap marak oloh Yehudi sampai akan andau toh. 28:16 Sawalas kare murid Yesus te haguet akan bukit intu Galilea sama kilau je jari inyoho Yesus akan ewen. 28:17 Hong katika ewen mite Yesus hete, ewen sontop manyembah ie. Tapi aton belah ewen te je bembang ateie. 28:18 Yesus manokep ewen tuntang hamauh, "Kakare kuasa hong sorga tuntang hong hunjun petak jari inenga akangku. 28:19 Tagal te lius talih kakare utus oloh hong hapus kalunen, imbit ewen mangat manjadi muridku. Pandoi ewen hayak manyewut aran Bapa, tuntang Anak, tuntang Roh Hatalla. 28:20 Keleh majar ewen manumon kakare taloh je irentahku akan keton. Tuntang ingat aku kareh harajur mampahayak keton sampai kalepah kalunen."
1:1 Jetoh Barita Bahalap tahiu Yesus Kristus, Anak Hatalla. 1:2 Barita Bahalap te manampara sama kilau je inyurat awi Nabi Yesaya, kalotoh, " 'Jetoh ie sarohangku,' koan Hatalla; 'Aku manyoho ie mananselo ikau, mangat ie manatap jalan akam.' 1:3 Aton oloh je mantehau hong padang pasir, 'Keleh manatap jalan akan Tuhan; parata kare jalan je handak ihoroie.' " 1:4 Sama kilau je tarasurat te, kalote kea maka lembut Yohanes hong padang pasir. Ie mampandoi oloh tuntang mansanan barita bara Hatalla. "Keton musti hobah bara kare dosan keton tuntang musti impandoi mangat Hatalla mampun keton," koan Yohanes. 1:5 Kare oloh bara tanah Yudea tuntang lewu Yerusalem uras haguet mahining auh Yohanes. Ewen mangaku kare dosan ewen, tuntang Yohanes mampandoi ewen hong sungei Yordan. 1:6 Yohanes mahapan pakaian bara bulon onta. Peteng kahange bara upak meto, tuntang panginae sangkalap tuntang madu. 1:7 Ie mansanan barita toh, "Limbah aku toh, kareh dumah oloh je labih hai bara aku. Aloh sontop mengkak talin sapatue bewei, mahin aku dia patut. 1:8 Aku mampandoi keton hapan danum, tapi ie kareh mampandoi keton mahapan Roh Hatalla." 1:9 Hong katika te Yesus dumah bara Nasaret intu tanah Yudea, tuntang Yohanes mampandoi ie huang sungei Yordan. 1:10 Sana Yesus lumpat bara sungei te, ie mite langit buap tuntang Roh Hatalla mohon kilau burung dara akan hunjun Yesus. 1:11 Limbah te tarahining auh Hatalla mansanan, "Ikau toh anakku je inyintaku. Ikau je manyanang ateiku." 1:12 Limbah te Roh Hatalla mimbit Yesus akan padang pasir. 1:13 Epat puluh andau katahie ie aton intu hete, iningkes awi setan. Kare meto baliar aton kea hinje dengae intu hete, tuntang kare malekat mandohop ie. 1:14 Limbah Yohanes inamean akan huang penjara, Yesus haguet akan Galilea, tuntang mambarita Barita Bahalap intu hete. 1:15 Koan Yesus, "Wayah Hatalla marentah jari tokep. Keleh keton hobah bara kare dosan keton, tuntang keleh percaya dengan Barita Bahalap je bara Hatalla!" 1:16 Katika Yesus mananjong hong saran Danau Galilea, ie mite due oloh palauk, iete Simon dengan andie Andreas. Ewen metoh te malauk hong danau mahapan jala. 1:17 Yesus hamauh dengan ewen, "Has omba aku. Aku handak majar keton manjala olon." 1:18 Balalu hemben te kea ewen malihi jalae palus omba Yesus. 1:19 Yesus marajur tanjonge palus mite tinai due biti oloh hampahari je beken, iete Yakobus tuntang Yohanes, ewen te anak Sebedeus. Ewen aton huang arut, tuntang metohe mangambuah jalae. 1:20 Yesus balalu mantehau ewen. Tuntang ewen malihi bapae huang arut dengan kare oloh je duan upah dengae. Palus ewen haguet omba Yesus. 1:21 Yesus tuntang kare muride sampai hong lewu Kapernaum. Sana andau Sabat sampai, Yesus tame akan huma sombayang tuntang nampara majar. 1:22 Kare oloh je mahining auhe jungun tagal carae majar. Basa ie majar dengan wibawae, dia kilau kare guru agama. 1:23 Hong katika te ije biti oloh je ingumpang roh papa tame akan huma sombayang, tuntang mangkariak, 1:24 "O Yesus, oloh Nasaret, narai je handak iawim dengan ikei? En ikau dumah handak marusak ikei? Aku katawan eweh ikau: ikau, Sarohan je barasih bara Hatalla!" 1:25 "Suni!" koan Yesus marentah roh te, "Balua ikau bara oloh toh!" 1:26 Maka roh papa te manyangit manggerek oloh te, limbah te mangkariak, balalu balua bara oloh te. 1:27 Kakare oloh paham hengan, sampai ewen hamauh sama arepe, "Hau, narai toh? Ije ajar taheta! Hapan wibawae tuntang kuasae ie marentah kare roh papa balua, tuntang ewen te mamenda ie!" 1:28 Maka barita tahiu Yesus hanjulo tayap akan hapus tanah Galilea. 1:29 Yesus tuntang kare muride malihi huma sombayang te, tuntang haguet akan human Simon ewen due Andreas. Yakobus tuntang Yohanes haguet kea hayak ewen. 1:30 Empo Simon je bawi metohe badarem huang ekae batiroh. Jadi metoh Yesus tuntang kare muride tame akan huang huma te, hal te jari insanan akan Yesus. 1:31 Maka Yesus manalih empo Simon je bawi te, tuntang mimbing lengee, palus mandohop mampahingkat ie. Maka dareme te palus nihau tuntang ie kea manampara mandohop ewen. 1:32 Halemei tinai limbah matanandau belep, kare oloh mimbit kakare oloh je haban tuntang je ingumpang setan manalih Yesus. 1:33 Kare oloh hapus lewu te hakarimpong intu baun huma te. 1:34 Palus Yesus mampakeleh kare oloh je buah sepsimpan ampin panyakit, tuntang kea maharak kare setan. Ie jaton manalua kare setan te hakotak, basa ewen katawan eweh ie te. 1:35 Hanjewu andau ijee tinai, metoh magon hewo-hewok, Yesus misik palus haguet bara huma. Ie haguet akan eka je benyem intu luar lewu, tuntang balakudoa hete. 1:36 Tapi Simon dengan kare kawale haguet manggau ie. 1:37 Tuntang limbah ewen sondau ie, ewen hamauh, "Kare oloh uras manggau Bapa." 1:38 Tapi Yesus tombah, "Has itah marajur jalanan itah akan kare lewu beken tokep lakau hetoh. Aku kea musti bahotbah huang kare lewu te, basa jete kea tintun kahimatku akan hetoh." 1:39 Tagal te Yesus haguet akan hete-hete hong hapus Galilea, tuntang bahotbah hong kare huma sombayang tuntang maharak kare setan. 1:40 Ije biti oloh je buah panyakit kerai je bakaike-ikeh dumah manalih Yesus. Oloh te mandeko utute tuntang hamauh, "Amon Bapa handak, Bapa olih mampakeleh aku." 1:41 Yesus masi mite oloh te. Maka ie manggayap oloh te sambil hamauh, "Aku handak, toh keleh ikau!" 1:42 Hemben te kea panyakite nihau tuntang ie keleh. 1:43 Palus Yesus manyoho ie haguet dengan auh pampingat toh: 1:44 "Awas, ela manyarita akan eweh bewei, tapi lius, talih imam tuntang laku dengae uka ie manukas ikau toto jari keleh. Tagal kakeleh ayum te, keleh ikau manyarah parapahm manumon je irentah awi Moses, kilau bukti akan kare oloh ije ikau toh toto-toto jari keleh." 1:45 Tapi oloh te haguet tuntang jaton tende-tende manyarita taloh je manjadi te hong hete-hete sampai Yesus dia olih gitan tara-tarang tame lewu. Ie baya melai hong luar lewu intu eka je benyem. Tapi oloh harajur ih manalih ie bara hete-hete.
2:1 Pire-pire andau limbah te Yesus haluli akan Kapernaum. Maka puna tayap ih auh barita tahiu ie metohe intu huma. 2:2 Palus are oloh dumah. Ewen hakarimpong intu hete sampai jaton eka hindai. Hong bauntonggang mahin kontep hasengkel awi oloh. Palus Yesus mansanan barita bara Hatalla akan ewen. 2:3 Metoh ie hakotak, te epat biti oloh mimbit ije biti oloh lumpuh manalih Yesus. 2:4 Tapi ganan oloh lalau karee, ewen dia olih manalih manokep ie. Maka ewen mungkar sapau huma pas tandipah eka Yesus te aton. Limbah te ewen muluh oloh je lumpuh te haya-hayak dengan amak ekae menter. 2:5 Katika Yesus mite dia laluen kahain kapercayan ewen, ie hamauh dengan oloh lumpuh te, "O Anakku, kare dosam jari iampun." 2:6 Pire-pire guru agama je aton mondok intu hete misek huang ateie, 2:7 "Bahanyi toto oloh toh hamauh kalote! Ie mahina Hatalla. Eweh je olih mampun dosa beken bara Hatalla?" 2:8 Hemben te kea Yesus katawan tirok ewen. Palus ie hamauh, "Mbuhen keton misek kalote huang atei keton? 2:9 Ije kueh je labih murah: manyewut, 'Dosam jari iampun', atawa manyewut 'Mendeng, gatang amakm tuntang lius mananjong'? 2:10 Tapi toh aku handak mambukti akan keton je hunjun petak toh Anak Olon bara kuasa mampun dosa." Palus Yesus hamauh dengan oloh je lumpuh te, 2:11 "Mendeng, gatang amakm tuntang buli humam!" 2:12 Ie mendeng tuntang bajeleng manduan amake palus balua, inyaksi awi ewen samandiai. Kare oloh te jungun palus manara Hatalla. Koan ewen, "Hindai puji itah mite taloh je manjadi kilau toh!" 2:13 Yesus haluli tinai akan saran Danau Galilea. Are oloh dumah manalih ie, tuntang ie majar ewen. 2:14 Metoh Yesus mananjong hete, ie mite ije biti oloh panagih pajak bagare Lewi, anak Alpeus, mondok hong kantor pajak. "Omba aku ih," koan Yesus dengae. Maka Lewi mendeng tuntang omba Yesus. 2:15 Katika Yesus metohe kuman hong human Lewi, maka are panagih pajak dumah tuntang kare oloh je dia bahalap huang tampayah oloh lewu, omba kuman haya-hayak dengan Yesus tuntang kare muride. Basa are bara kare ewen te je manuntut Yesus. 2:16 Pire-pire guru agama bara baris oloh Parisi mite Yesus kuman haya-hayak dengan kare panagih pajak tuntang kare oloh beken te kea je inyewut oloh dia bahalap. Jadi ewen misek dengan kare murid Yesus, "Mbuhen gurun keton kuman haya-hayak dengan kare panagih pajak tuntang dengan kare oloh je dia bahalap te?" 2:17 Yesus mahining paisek ewen te, palus ie tombah, "Oloh je barigas dia usah manggau dokter; baya oloh je haban ih. Aku toh dumah dia tantai manggau oloh je manyewut arepe jari bahalap, malengkan oloh je inyewut papa." 2:18 Hong sinde katika kare murid Yohanes Pampandoi tuntang kare oloh Parisi metohe puasa. Palus aton oloh dumah manalih Yesus tuntang misek, "Mbuhen murid Yohanes Pampandoi tuntang murid oloh Parisi puasa, tapi murid Bapa dia?" 2:19 Yesus tombah, "Hong pesta kawin, en kare oloh je dumah panggil te dia kuman? Amon panganten hatue te magon aton hinje dengan ewen, batantu ewen kuman. 2:20 Tapi kareh dumah katikae panganten hatue te induan bara ewen. Hong katika te harue ewen dia kuman. 2:21 Jaton puji oloh manumpang baju je kupit mahapan tantanan benang taheta. Basa benang je hapan manumpange te kareh kanjorot palus baju te barabit, sampai kajariae mawi rabite labih hai. 2:22 Kalote kea jaton oloh je manyuang anggur akan huang kambut upak meto je kupit. Basa anggur taheta te kareh mamusit kambut te. Kajariae kadaduee te nihau rusak. Anggur je taheta musti inyuang akan huang kambut je taheta kea!" 2:23 Sinde hong andau Sabat, katika Yesus mahalau ije tana gandum, kare muride manampara mamutik gandum. 2:24 Palus kare oloh Parisi hamauh dengan Yesus, "Mbuhen kare muridm malanggar hukum agaman itah, ewen malalus taloh je ingahana hong andau Sabat?" 2:25-26 Yesus tombah, "En keton hindai puji mambasa taloh je iawi Dawid, katika Abyatar manjadi imam hai. Metoh Dawid tuntang kare oloh ayue balau', tuntang ewen jaton taloh kinae, ewen tame huang Human Tuhan, tuntang kuman rote je jari inenga kilau parapah akan Hatalla. Tuntang rote te inengae kea akan kare oloh ayue. Padahal manumon atoran agaman itah, baya kare imam ih je tau kuman rote te." 2:27 Yesus palus hamauh tinai, "Andau Sabat inampa akan olon; dia ie olon je inampa akan andau Sabat. 2:28 Jadi Anak Olon barakuasa hunjun andau Sabat."
3:1 Yesus haluli tinai akan huma sombayang. Intu hete aton ije biti oloh je lumpuh lengee silae. 3:2 Intu hete kea aton kare oloh je handak manggau kasalan Yesus, mangat tau hapan mangado ie. Jadi ewen tantai manantuani ie en ie handak mampakeleh oloh hong andau Sabat. 3:3 Yesus hamauh dengan oloh je lumpuh lengee silae te, "Kantoh mendeng hetoh, hong baun." 3:4 Palus ie misek dengan kare oloh je aton hete, "Manumon hadat agama, itah tau mawi en hong andau Sabat? Mawi taloh bahalap atawa mawi taloh papa? Manyalamat oloh atawa mampatei?" Ewen uras benyem. 3:5 Marak kasangite Yesus manampayah hakaliling ie tapi ie kapehe kea ateie awi ewen te lalau katekang ateie. Palus ie hamauh dengan oloh te, "Julok lengem." Oloh te manjuju lengee, tuntang lengee te palus keleh. 3:6 Maka kare oloh Parisi malihi huma sombayang te, palus hapakat dengan oloh bara baris Herodes, uka mampatei Yesus. 3:7 Yesus tuntang kare muride haguet mangejau Arepe akan Danau Galilea. Maka are toto oloh bara Galilea je haguet omba Yesus. Are kea je dumah bara Yudea, 3:8 bara Yerusalem, bara tanah Idumea, tuntang bara tanah hong hila timor Yordan, tuntang bara kare lewu hakaliling tokep Tirus tuntang Sidon. Ewen samandiai dumah manalih Yesus, basa ewen mahining tahiu kare taloh je jari iawie. 3:9 Kare oloh te kalote karee, sampai Yesus manyoho kare muride manyadia arut akae, awi mikeh ie te kareh inyeke awi kare oloh te. 3:10 Ie mampakeleh are toto oloh, sampai kakare oloh haban hasengkel sama arepe awie handak manokep Yesus mangat tau manigong ie. 3:11 Tuntang kare oloh je ingumpang roh papa, amon mite ie, palus sontop manyembah intu taharepe tuntang mangkariak, "Ikau toh Anak Hatalla!" 3:12 Tapi Yesus hayak kakarase mangahana kare roh papa te mansanan eweh ie. 3:13 Limbah te tinai Yesus manukat ije bukit, tuntang mantehau kare oloh je eka kahandake. Kare oloh te dumah, 3:14 palus ie mintih duewalas biti bara kare ewen te. Koae, "Aku mintih keton mangat keton mampahayak aku, mangat aku manyoho keton mangabar Barita Bahalap bara Hatalla, 3:15 tuntang keton kareh mandino kuasa uka maharak kare setan." 3:16 Maka aran duewalas kare oloh te iete: Simon (je inyewut kea Petrus), 3:17 Yakobus tuntang paharie Yohanes, ewen te uras anak Sebedeus (ewen te inggare Boanerges rimae "anak Nyaho"), 3:18 Andreas, Pilippus, Bartolomeus, Mateus, Tomas, Yakobus anak Alpeus, Taddeus, Simon je Menteng, 3:19 tuntang Yudas Iskariot je mandurhaka mawi Yesus. 3:20 Limbah te tinai Yesus buli huma. Tapi oloh are dumah tinai hapumpong, sampai Yesus tuntang kare muride dia sampet kuman. 3:21 Kare oloh manyewut, "Ie jari nyanyau!" Tuntang katika keluargae mahining hal te, ewen haguet mangat manduan ie. 3:22 Kare guru agama je dumah bara Yerusalem hamauh, "Ie ingumpang Beelsebul! Kapalan kare setan te je manenga kuasa akae mangat maharak setan." 3:23 Maka Yesus mantehau oloh are te, tuntang manyarita akan ewen pire-pire paribasa. "Kilen ampie tau setan maharak setan?" koan Yesus. 3:24 "Amon ije negara tabagi akan pire-pire baris oloh je hakalahi sama arepe, negara te dia baka tau tahan. 3:25 Tuntang amon huang ije keluarga jaton aton kahinje tuntang kare bitie hamusoh sama arepe, keluarga te akan bakarak. 3:26 Amon huang karajaan Setan lembut kapusit tuntang kalahi, karajaan te dia tahi tuntang pasti kareh lilap. 3:27 Ije biti mahin jaton oloh olih tame akan huang human oloh gancang tuntang marampas ramoe amon ie dia labih helo mamasong oloh gancang te. Limbah te harue ie tau marampas ramoe. 3:28 Keleh keton katawan! Amon oloh mawi dosa tuntang mawi auh papa ie tau iampun. 3:29 Tapi amon ie mawi auh papa malawan Roh Hatalla, ie dia tau iampun! Karana mamapa Hatalla jete dosa je katatahie." 3:30 (Yesus hamauh kalote awi aton oloh je hamauh je Yesus teingumpang roh papa.) 3:31 Limbah te indu tuntang paharin Yesus dumah. Ewen mentai intu luar tuntang manyoho oloh mantehau Yesus. 3:32 Metoh te are oloh kanjerae mondok kaliling Yesus. Ewen hamauh dengae, "Pa, indu tuntang paharin Bapa aton intu luar. Ewen manggau Bapa." 3:33 Yesus tombah, "Eweh induku? Eweh kare paharingku?" 3:34 Palus ie manampayah kare oloh je mondok hakaliling ie balalu hamauh, "Jetoh ie induku tuntang kare paharingku! 3:35 Oloh je malalus kahandak Hatalla, jete paharingku hatue, paharingku bawi, tuntang induku."
4:1 Yesus majar tinai intu saran Danau Galilea. Are toto oloh mangarimpong ie. Tagal te ie haguet mondok huang arut je hunjun danum, tuntang oloh are te mendeng intu saran danau. 4:2 Palus Yesus majar are hal akan ewen mahapan paribasa. Ie majar ewen kalotoh. 4:3 "Hining toh! Aton ije biti oloh pamalan haguet manawor binyi. 4:4 Katika ie kanjerae manawor, maka aton binyi te je manjato intu jalan. Maka burung dumah palus binyi te lepah kinae. 4:5 Aton kea je manjato hong eka je are batu tuntang petake isut. Kare binyi te bajeleng haduring awie tapas petake, 4:6 tapi metoh matanandau jari ambo, kare duringe te nampara balayu limbah te keang tuntang matei awi uhate dia sukup katimbee. 4:7 Aton kea binyi je manjato intu parak ruwut haduhi. Ruwut haduhi te tumbo tuntang mangalambo kare during te sampai dia tau mamua. 4:8 Tapi aton kea binyi je manjato intu petak je basiwuh. Binyi te haduring, balalu manjadi hai palus mamua, aton je telo puluh, aton je jahawen puluh, tuntang aton kea je saratus lipet karee." 4:9 Limbah manyarita paribasa te Yesus hamauh, "Keton aton bara pinding keleh mahining!" 4:10 Katika Yesus kabuate, kare oloh je jari mahining ajare te dumah manalih ie haya-hayak dengan duewalas muride. Ewen balaku ie manarang riman paribasa te. 4:11 Maka Yesus hamauh dengan ewen, "Keton jari mandino panenga uka mangatawan taloh je basilim tahiu kilen ampie Hatalla marentah. Tapi kare oloh luar iajar mahapan paribasa, 4:12 mangat 'Ewen kareh harajur manantuanie tapi dia katawan taloh je manjadi, ewen kareh harajur mahining, tapi dia haratie, jete manjadi uka ewen jaton mitee tuntang haratie tuntang jaton dumah manalih Hatalla uka ewen mandino ampun bara Hatalla.' " 4:13 Limbah te Yesus hamauh dengan ewen, "Amon keton dia harati paribasa te, kilen ampie keton tau harati kare paribasa je beken? 4:14 Panawur binyi te, jete oloh je mangabar barita bara Hatalla. 4:15 Binyi je manjato intu jalan, jete tanding kare oloh je mahining barita tahiu kilen ampie Hatalla marentah. Sana ewen mahininge, setan dumah tuntang manduan taloh je jari inawor huang atei ewen. 4:16 Binyi je manjato hong eka je are batue, jete tanding oloh je mahining barita te, tuntang balalu manarimae dengan sanang atei. 4:17 Tapi barita te dia muhat huang ateie, sampai dia olih tahi. Sana ewen buah kasusah atawa buah kapehe awi oloh ganan kabar te, balalu ewen marisang. 4:18 Binyi je manjato marak ruwut duhi, jete tanding kare oloh je mahining barita te, 4:19 tapi ewen gogop angate tahiu pambelom ewen tuntang mipen handak belom mangat. Kipen belai dengan sepsimpan ampin taloh, tame akan huang atei ewen. Tagal te barita bara Hatalla ingalambon huang atei ewen, sampai ewen dia tau mamua. 4:20 Tuntang binyi je manjato intu petak je basiwuh te, jete tanding oloh je mahining barita te tuntang manarimae, ewen mamua are, aton je telo puluh, aton je jahawen puluh, tuntang aton je saratus lipet hasile." 4:21 Limbah te tinai Yesus hamauh, "En puji oloh manotong sumbo palus manutupe hapan balanai, atawa mingkese hong penda eka batiroh? En dia ie mingkes sumbo te hunjun eka sumbo? 4:22 Jaton taloh basilim je kareh dia gitan; tuntang jaton taloh basilim je kareh dia iungkar. 4:23 Tagal te amon keton aton pinding, keleh mahining!" 4:24 Balalu Yesus hamauh tinai, "Keleh manantuani taloh je ihining keton toh! Takar je ihapan keton akan oloh beken, akan ihapan Hatalla kea akan keton -- tuntang labih are haream tinai. 4:25 Basa akan oloh je jari mandino, kareh inenga labih are tinai, tapi oloh je dia mandino, taloh je isut huang ie mahin kareh induan kea." 4:26 Yesus manontong auh kotake, "Amon Hatalla marentah kilau Raja, jete ampie tau inanding kilau ije biti oloh je manawor binyi huang tanae. 4:27 Hamalem ie batiroh; handau ie misik. Tuntang pandehan te kare binyi te miar haduring tuntang manjadi hai. Tapi oloh te dia katawan, kilen ampin carae kare binyi te haduring tuntang manjadi hai. 4:28 Petak te kabuat je mampalembut hasil: solake patinge, limbah te bungehe, palus buae. 4:29 Tuntang amon gandum te jari masak, maka oloh te manampara manggetem awi jari wayah getem." 4:30 "Amon Hatalla marentah, hapan en itah tau manandinge?" koan Yesus misek tinai. "Sonto je kilen ampie je tau itah mahapae mangat manarange? 4:31 Amon Hatalla marentah, jete ampie kilau paribasa toh: Ije bawak sawi induan awi ije biti oloh palus iimbule huang petak. Bawak sawi iete binyi je pangkakorike huang kalunen toh. 4:32 Tapi amon jari haduring tuntang belom, ie manjadi je pangkahaie bara marak kare taloh imbul. Kare edae paham labat sampai kare burung tau dumah tuntang manampa sarangae hong tandipah ekae je kanjungen." 4:33 Maka kalote Yesus majar oloh hapan are paribasa kilau te, sapire kaolih ewen haratie. 4:34 Yesus harajur mahapan paribasa amon ie majar kare oloh te. Tapi amon ie kabuate dengan kare muride, ie manarang taloh samandiai te akan ewen. 4:35 Hong halemei te kea, Yesus hamauh dengan kare muride, "Has itah balayar dimpah danau akan saran silae." 4:36 Maka kare muride lumpat akan huang arut -- Yesus jari helo aton huang arut te -- tuntang oloh are te ilihi ih hong saran danau. Palus Yesus tuntang kare muride haguet. Kare arut beken aton kea intu hete. 4:37 Dia tahi limbah te dumah riwut paham. Riak nampara manampur arut tuntang maname akan huang sampai arut te karenga kontep awi danum. 4:38 Intu kamburin arut te Yesus metohe batiroh sambil manyandehan takoloke hunjun bantal. Kare muride mampisik ie. Ewen hamauh, "Bapa Guru, en Bapa dia paduli itah toh calaka?" 4:39 Yesus misik, palus malait riwut te manantekas, tuntang hamauh dengan danau, "Benyem, keleh tadoh!" Maka riwut te terai, tuntang danau manjadi tadoh toto. 4:40 Palus Yesus hamauh dengan kare muride, "Mbuhen keton mikeh? Mbuhen keton dia percaya dengangku?" 4:41 Maka ewen palus mikeh tuntang hamauh sama arepe, "Eweh kea sapunae oloh toh, sampai riwut tuntang riak mahin mamenda auhe."
5:1 Limbah te Yesus tuntang kare muride sampai saran dipah Danau Galilea, intu saran Gerasa. 5:2 Sana Yesus lumpat bara arut, ie inalih awi ije biti oloh hatue je balua bara kare rumbak kubur. 5:3 Oloh te inguasa awi kare roh papa tuntang melai intu kare kubur. Ie jari dia olih hindai imasong; aloh mahapan rantai mahin dia olih. 5:4 Aloh kare paie tuntang lengee jari imasong, tapi kare rantai te harajur inggetoe, tuntang sanaman je intu paie te imeleke. Ie te dia lue-luen kagancange sampai ije biti mahin jaton oloh je olih manawae. 5:5 Handau hamalem ie te miar kumbang-kamba intu kubur tuntang intu kare bukit sambil kariak-kariak mampahimang bitie mahapan batu. 5:6 Metoh ie mite Yesus bara keja-kejau, ie dari-dari palus mahingkep intu taharep Yesus. 5:7 Hayak hai auhe ie mangkariak, "Yesus Anak Hatalla, Je Pangkahai! Handak iawim kilen ampie aku toh? Tagal aran Hatalla aku balaku, ela ih mangapehe aku!" 5:8 (Oloh te hamauh kalote awi Yesus hamauh dengae, "Roh papa, baluaikau bara oloh toh!") 5:9 Palus Yesus misek ie, "Eweh aram?" Oloh te tombah, "Arangku 'Legion' -- basa ikei toh are toto!" 5:10 Ie balaku nyame-nyame mangat Yesus dia manyoho kare roh papa te balua bara daerah te. 5:11 Tokep eka te aton are toto bawoi je kanjerae manggau panginae intu biling bukit. 5:12 Kare roh papa te balaku dengan Yesus, "Soho ikei tame akan huang kare bawoi te." 5:13 Tuntang Yesus olih manumoe. Jadi, kare roh papa te balua bara oloh te palus tame akan huang kare bawoi te. Salepah kare kawan bawoi te hadari tuntang manangkero bara saran biling te kangiwa akan huang danau palus leteng -- samandiaie te aton due koyan bawoi. 5:14 Kare oloh je manjaga bawoi te hadari, tuntang mansanan kabar te akan oloh lewu tuntang kare oloh huang kare dukuh hakalilinge. Balalu kare oloh balua mangat mite kare taloh je jari manjadi. 5:15 Ewen dumah manalih Yesus, palus mite oloh je jari iname awi roh papa te nah, metohe mondok hete. Ie jari hapakaian, tuntang tirok itonge kea jari barendeng. Maka ewen samandiai manjadi mikeh. 5:16 Kare oloh je jari manyaksi kabuat kare taloh je manjadi buah oloh te tuntang kare bawoi te, manyarita taloh je jari manjadi. 5:17 Balalu kare oloh lewu hong eka te balaku uka Yesus malihi tanah te. 5:18 Metoh Yesus lumpat akan huang arut, oloh je jari inguasa awi roh papa te nah balaku dengan Yesus uka ie tau omba. 5:19 Tapi Yesus dia hakon, koae, "Buli ih tuntang sanan akan kare tondah paharim taloh je jari iawi Tuhan akam tuntang kakai ampin kataue dengam!" 5:20 Maka oloh te haguet, tuntang manampara manyarita akan kare oloh hong daerah Sapuluh Lewu Hai taloh je jari iawi Yesus dengae. Uras oloh hengan mahininge. 5:21 Yesus haluli tinai akan saran danau dipah silae. Intu saran danau te, are oloh dumah hakarimpong mangaliling Yesus. 5:22 Maka dumah ije biti oloh je bagare Yairus. Ie te ije biti pamimpin huma sombayang intu lewu te. Katika ie mite Yesus, ie manyembah intu taharepe, 5:23 tuntang balaku nyame-nyame, "Pa, anakku je bawi haban paham. Balaku kahiasm dumah uka manggayap ie, mangat ie keleh tuntang dia matei!" 5:24 Maka Yesus haguet hayak dengan Yairus. Are oloh manuntut ie tuntang manyeke ie bara hete-hete oloh dumah. 5:25 Bara marak kare oloh te aton tinai ije biti oloh bawi je jari duewalas nyelo haban baduroh dahae ganan dumah bulae. 5:26 Kare panataue jari lepah akan hapan mambayar kare dokter, tapi jaton aton oloh je olih mampakelehe, malahan kahabae te sasar paham haream. 5:27 Oloh bawi te jari are pahininge tahiu Yesus. Maka hong marak oloh are te ie manokep Yesus bara hila likut, 5:28 awi koae huang ateie, "Asal aku manigong jubahe bewei aku kareh keleh!" 5:29 Ie manigong jubah Yesus, tuntang hemben te kea daha je balua te tende. Ie mangkeme je ie jari keleh. 5:30 Hong katika te kea Yesus mangkeme aton kuasa je balua bara ie. Maka ie tampaliau akan oloh are tuntang misek, "Eweh je manigong jubahku?" 5:31 Kare muride hamauh, "Bapa mitee kabuat aton kalote ampin kare oloh je hasengkel. Tuntang Bapa magon misek, eweh je manigong Bapa?" 5:32 Tapi Yesus tetep mite hakaliling ie uka manggau oloh je jari manigong ie. 5:33 Oloh bawi te je katawan taloh je manjadi buah ie, hayak hagenjeh tuntang kikehe hajarungkup intu taharep Yesus tuntang mangaku kare taloh handiai te. 5:34 Palus Yesus hamauh dengan oloh bawi te, "Anakku, awi ikau percaya dengangku, ikau keleh! Lius dengan salamat. Ikau jari keleh samasinde!" 5:35 Metoh Yesus magon hakotak, pire-pire jipen dumah bara human Yairus. "Anak tuan je bawi jari nihau," koan ewen dengan Yairus. "Dia usah tuan manyusah Bapa Guru hindai." 5:36 Sambil dia mahining taloh je insanan awi oloh te, Yesus hamauh dengan Yairus, "Ela mikeh, percaya ih!" 5:37 Palus Yesus marajur tanjonge, tapi ije biti mahin jaton ie manyoho oloh manuntut ie, beken bara Petrus dengan Yakobus tuntang paharie Yohanes. 5:38 Katika ewen sampai hong human Yairus, Yesus mite ampin oloh puna surak-sirok, tuntang mahining auh tangis tuntang tatum je paham. 5:39 Balalu Yesus tame tuntang hamauh dengan ewen, "Mbuhen kare karidu tuntang tangis toh? Anak te dia matei; ie baya batiroh!" 5:40 Ewen manatawe Yesus. Maka ie manyoho ewen uras balua. Palus ie mimbit indu-bapa anak te tuntang katelo-telo murid tame akan huang kamar anak te. 5:41 Yesus mimbing lengen anak te palus hamauh dengae, "Talita kum," jete rimae, "Anak bawi, aku hamauh dengam: misik!" 5:42 Anak bawi te bajeleng misik, tuntang mananjong. (Umure jari duewalas nyelo.) Kakare oloh je manyaksi kajadian te paham hengan! 5:43 Tapi Yesus dengan kakarase mangahana ewen mansanan hal te akan eweh bewei. Balalu koae, "Tenga panginan akan anak te."
6:1 Bara eka te Yesus buli haya-hayak dengan kare muride akan lewu-humae. 6:2 Hong andau Sabat ie nampara majar hong huma sombayang. Are oloh aton intu hete. Metoh kare oloh te mahining auh ajar Yesus, ewen hengan toto. Ewen hamauh, "Bara kueh oloh toh mandino kakare taloh te? Kapintar-kaharati macam en je aton intu ie toh? Kilen ampie ie olih mawi taloh heran? 6:3 En dia ie toh je tukang kayu te, anak Maria, tuntang paharin Yakobus, Yoses, Yudas tuntang Simon? Ie, kare paharie awang bawi mahin aton melai hetoh kea." Tagal te ewen dia manarima ie. 6:4 Palus Yesus hamauh dengan ewen, "Ije biti nabi, hong kueh-kueh bewei ihormat oloh, tapi intu lewu-human ayue, tuntang bentok kare tundah-paharie tuntang keluargae, ie dia ihormat." 6:5 Intu eka te, ije taloh heran mahin dia Yesus olih mawie, beken bara mampakeleh pire-pire oloh haban awie mingkes lengee akan hunjun ewen. 6:6 Ie hengan ewen te dia percaya. Limbah te Yesus haguet akan kare lewu je hakatokep hete, tuntang majar. 6:7 Ie mantehau duewalas muride palus manyoho ewen haguet badue-badue tuntang manenga kuasa akan ewen hapae maharak kare roh papa. 6:8 Ie majar ewen kalotoh: "Ela keton mimbit taloh en-en huang jalanan keton, beken bara sukah. Ela mimbit panginan atawa kambut sadakah, atawa duit. 6:9 Keleh mahapan sapatu tapi ela mimbit due kalambar baju." 6:10 Ie kea hamauh, "Amon keton tame akan ije huma, keleh melai hete sampai keton malihi lewu te. 6:11 Tapi amon keton sampai ije eka, tuntang oloh hete dia maku manarima tuntang mahining auh keton, lihi ih eka te. Tuntang ngibas kawo bara pain keton kilau pampingat intu taharep ewen!" 6:12 Maka duewalas murid Yesus te haguet. Ewen haguet mangabar barita je olon te musti hobah bara kare dosae. 6:13 Kare murid Yesus te maharak kare setan, mohos undus intu oloh haban tuntang mampakeleh ewen. 6:14 Kare barita tahiu taloh handiai je manjadi te sampai kea akan Raja Herodes, basa aran Yesus jari basewut intu hete-hete. Aton oloh je hamauh, "Yohanes Pampandoi jari belom haluli! Jete sababe ie mandino kuasa malalus taloh heran te." 6:15 Tapi kare oloh awang beken hamauh, "Ie te Elia." Aton tinai je hamauh, "Ie te nabi, sama kilau ije biti nabi jaman horan." 6:16 Katika Herodes mahining hal te, ie hamauh, "Pasti toh, Yohanes Pampandoi je bihin inyohoku manetek takoloke. Toh ie jari belom haluli!" 6:17 Basa helo bara te Herodes manyoho oloh manawan Yohanes, tuntang manameae akan huang penjara. Herodes mawie kalote awi soal Herodias, kabalin paharie kabuat, iete Pilippus. Basa Herodes jari mangawin Herodias, 6:18 tuntang tahiu hal te Yohanes jari dia hakalayan maningak Herodes kalotoh, "Dia tau ikau kawin dengan kabalin paharim te!" 6:19 Jete sababe Herodias handak mawi Yohanes, uka mampatei ie, tapi ie dia tau malalus hal te, awi ie ingahana awi Herodes. 6:20 Basa Herodes jari manyoho oloh manjaga bua-buah kasalamatan ain Yohanes intu penjara, awi ie mikeh dengan Yohanes. Ie katawan Yohanes te ije biti oloh bahalap je inyoho awi Hatalla. Tuntang puna amon Yohanes hakotak, Herodes rajin kea mahininge, aloh ie tau gogop toto awi auh Yohanes te. 6:21 Kajariae Herodias dinon akal huang katika je bahalap metoh andau Herodes ulang tahun. Katika te Herodes mawi pesta akan kakare oloh je bapangkat gantong huang karajaan te, kare perwira tuntang kare bakas oloh lewu hong Galilea. 6:22 Intu pesta te anak bawi bujang ain Herodias manari tuntang tari te paham mampahanjak atei Herodes tuntang kare oloh je dumah hete. Maka Herodes hamauh dengan bawi bujang te, "Ikau handak en, laku ih. Aku kareh handak manenga akam!" 6:23 Palus Herodes hajanji dengan bawi bujang te hapan sumpah. Herodes hamauh, "Narai bewei je ilakum, kareh inengaku, aloh satengah bara karajaangku toh mahin tau!" 6:24 Maka bawi bujang te balua tuntang misek dengan indue, "Umai, en je bahalap aku musti balakue?" Indue tombah, "Laku ih takolok Yohanes Pampandoi." 6:25 Bawi bujang te bajeleng haluli manalih Herodes tuntang hamauh, "Aku balaku takolok Yohanes Pampandoi inenga akangku metoh toh kea intu ije bindang baki!" 6:26 Mahining auh palakue te Herodes paham kapehe ateie. Tapi ie dia olih manolak palakue te awi ie jari sumpah intu taharep kare oloh parawei ayue te. 6:27 Jadi ie balalu marentah ije biti pangawal ayue manduan takolok Yohanes Pampandoi. Maka prajurit te haguet akan penjara, palus manetek takolok Yohanes. 6:28 Limbah te ie mimbit takolok te intu baki tuntang manyarahe akan bawi bujang te. Tuntang bawi bujang te manyarahe tinai akan indue. 6:29 Katika kare murid Yohanes mahining hal te, ewen haguet manduan hantun Yohanes palus mangubure. 6:30 Kare rasul je inyoho awi Yesus te limbah te haluli tinai, tuntang buli manalih Yesus. Ewen mansanan akae taloh samandiai je jari iawi ewen tuntang je iajar ewen. 6:31 Are toto oloh je dumah baganti-bagilir, sampai Yesus dengan kare muride, kuman mahin dia panae. Tagal te Yesus hamauh dengan kare muride, "Has itah haguet akan eka je benyem, eka itah ngabuat arep itah tuntang keton tau malayan hanjulo." 6:32 Maka ewen palus haguet mahapan arut manalih akan eka je benyem. 6:33 Tapi are oloh jari mite ewen malihi eka te, tuntang katawan, eweh ewen te. Jadi bara kakare lewu hong daerah te, kare oloh baradari mahalau jalan hunjun petak mananselo Yesus tuntang kare muride. 6:34 Katika Yesus lumpat bara arut, ie mite oloh are. Ie masi dengan ewen, awi ewen sama kilau tabiri je jaton bara sakatik. Maka ie te nampara majar are hal akan ewen. 6:35 Katika andau jari halemei, kare murid Yesus hamauh dengae, "Andau jari handak hamalem tuntang eka toh kejau bara lewu. 6:36 Labih bahalap Bapa manyoho kare oloh te haguet, mangat ewen tau mamili panginan hong kare lewu je aton lakau tokep hetoh." 6:37 Tapi Yesus tombah, "Keton ih mampakanan ewen." "Bah, en ikei musti haguet mamili rote akan rega due ratus perak hapan mampakanan kare oloh toh?" kakai auh kare murid Yesus te. 6:38 Palus Yesus misek, "Pire rote aton ain keton? Coba ite helo." Limbah ewen mitee, ewen hamauh, "Aton lime rote tuntang due lauk kea." 6:39 Palus Yesus manyoho oloh te samandiai mondok mangawan-mangawan intu hunjun oru je bahijau. 6:40 Kare oloh te mondok mangawan-mangawan. Aton je saratus biti huang ije kakawan, tuntang aton kea lime puluh biti huang ije kakawan. 6:41 Limbah te Yesus manduan lime rote tuntang due lauk te, palus ie mananggera akan langit tuntang manarimakasih akan Hatalla. Limbah te ie mangiwak-mangiwak rote te mahapan lengee akan kare muride uka imbagi akan oloh are te. Tuntang due lauk te imbagi kea akan ewen samandiai. 6:42 Ewen kuman sampai besoh. 6:43 Limbah te kalabien panginan te inampunan awi kare murid Yesus -- karee aton due walas lontong kontep. 6:44 Kakare oloh hatue je kuman rote te aton kurang labih lime koyan biti. 6:45 Limbah te Yesus bajeleng manyoho kare muride haguet mahapan arut mananselo ie haguet akan Betsaida intu saran danau Galilea, pandehan ie manyoho oloh are te buli. 6:46 Limbah ie manyoho oloh te buli, Yesus haguet manalih bukit mangat balakudoa. 6:47 Katika jari hamalem arut ewen murid Yesus te aton hong bentok danau haliai, tapi Yesus magon aton hunjun petak. 6:48 Ie mite ewen te heka toto mambesei arut ewen te awi mambesei manahusong riwut. Tagal te, kurang labih helat pukul telo dengan pukul jahawen hanjewu, ie dumah manalih ewen mananjong hunjun danum. Tuntang ie mananjong tarus kilau jaka ie handak mahalau ewen. 6:49 Metoh ewen mite ie mananjong hunjun danum, ewen manyangka ie te kambe, 6:50 sampai ewen mangkariak awi kikehe. Awi ewen samandiai mite ie tuntang ewen paham tarewen. Tapi Yesus hakotak dengan ewen, "Mente-menteng ih! Aku toh Yesus. Ela mikeh!" 6:51 Palus ie lumpat akan arut ewen, tuntang riwut mahin tadoh kea. Kare murid Yesus hengan toto. 6:52 Taloh heran dengan lime kabawak rote te magon hindai ewen haratie. Bahali akan ewen manarimae. 6:53 Metoh sampai hong saran danau dipah silae, ewen mampatende arute hong saran danau Genesaret. 6:54 Katika ewen lumpat bara arut, kare oloh mite je dumah te Yesus. 6:55 Balalu ewen te dari-daria akan kanih-kate hapus eka hakaliling te, tuntang nampara mimbit kare oloh haban hunjun amak manalih Yesus. Amon ewen mahining Yesus aton hong ije eka, ewen mimbit kare oloh haban te akan hete. 6:56 Hong kueh bewei Yesus dumah, en hong lewu hai, lewu korik, atawa hong dokoh, akan hete kea oloh harajur dumah tuntang mingkes kare oloh haban hong bentok lewu. Palus ewen balaku nyame-nyame uka kare oloh haban te inyoho ih manigong jubah Yesus, aloh buah lawin jubahe barangai. Uras ewen je manigonge te manjadi keleh.
7:1 Ije kakawan oloh Parisi tuntang pire-pire guru agama bara Yerusalem, dumah manalih Yesus. 7:2 Ewen mite pire-pire murid Yesus kuman hapan lengee marak dia barasih manumon cara agama, iete jaton menyau lengee helo bara kuman manumon atoran agama. 7:3 Kare oloh Parisi, uras oloh Yehudi kalote kea, rajin toto manumon kare hadat tato hiang ewen. Ewen dia handak kuman amon hindai menyau lengee manumon kare cara je jari inukas. 7:4 Taloh kinan je imili hong pasar, dia handak ewen kumae amon hindai ienyau helo. Tuntang are atoran beken ain tato hiang ewen je iimbing ewen toto; sampai paribasa atoran menyau galas, mangkok, tuntang kare pakakas bara tambaga. 7:5 Tagal te kare oloh Parisi tuntang guru agama te misek dengan Yesus, "Mbuhen kare muridm te kuman mahapan lenge je dia ienyau? En sababe ewen dia maku manumon hadat tato hiang itah?" 7:6 Yesus tombah, "Keton toh oloh haliau! Buah toto taloh je inujum awi Yesaya tahiu keton, iete, 'Kalotoh auh Hatalla, Kare oloh te baya manyembah aku hapan kare bawak kotake tapi atei ewen kejau bara aku. 7:7 Jaton gunae ewen manyembah aku, basa ewen majar atoran olon kilau jaka jete atoran ayungku!' 7:8 Kare parentah Hatalla dia keton manantuanie, tuntang kare atoran olon ihaga keton bua-buah." 7:9 Palus Yesus hamauh tinai, "Keton apik toto manolak parentah Hatalla mangat tau mandehen ajar ain keton kabuat. 7:10 Moses jari manenga parentah toh, 'Hormat bapam tuntang indum,' tuntang 'Ewe-eweh je mangotok manahiu indu-bapae, musti ihukum matei.' 7:11 Tapi keton majar kalotoh: Amon oloh hamauh dengan oloh bakase, 'Taloh je musti inengaku akan indu-bapaku, jari inyarahku akan Hatalla,' 7:12 maka keton mangahana oloh te bara kapatut gawie mandohop indue-bapae. 7:13 Jadi mahapan ajar keton kabuat je inenga keton akan oloh beken, keton manganan auh Hatalla. Are hindai hal je kilau toh je iawi keton." 7:14 Palus Yesus mantehau oloh are te sinde tinai tuntang hamauh dengan ewen, "Hining toh mangat keton haratie! 7:15 Jaton aton taloh je bara luar tame akan huang oloh je tau mawi oloh te papa. Malahan, taloh je balua bara oloh, jete je mawi ie oloh papa. 7:16 Jadi, amon aton pinding, keleh mahining." 7:17 Katika Yesus malihi oloh are te tuntang tame huma, kare muride misek dengae tahiu riman paribasa te. 7:18 Maka Yesus hamauh dengan ewen, "En keton hindai kea haratie? En keton dia tau haratie taloh je tame akan huang oloh dia tau mawi oloh te papa? 7:19 Basa taloh je tame te dia mahalau atei, tapi mahalau kanai, tuntang limbah te balua tinai." Mahapan kare auh te Yesus mansanan batantu je kare taloh kinan te uras bahalap akan kinan. 7:20 Palus Yesus hamauh tinai, "Taloh je balua bara oloh, jete je mawi ie papa. 7:21 Basa bara huang, iete bara huang atei, lembut kare tirok papa je mawi sabab oloh malalus je harayap, manakau, mamuno, 7:22 habandong, mamikir, mandurhaka, hayak malalus kare taloh je papa, manjadi babungo, dia bahadat, bahiri, gantong ateie tuntang bahali ajare. 7:23 Kakare taloh papa te lembut bara huang, tuntang jete je mawi olon manjadi papa." 7:24 Rahian tinai Yesus malihi eka te, tuntang haguet akan eka tokep lewu Tirus. Ie tame akan huang ije huma tuntang ie dia maku oloh mangatawan ie aton hete. Tapi ie dia olih manyahokan arepe. 7:25 Ije biti ibu, ie aton anake je irasuk setan, mahining tahiu Yesus. Ie dumah manalih Yesus tuntang manyembah intu taharepe, 7:26 sambil balaku mangat Yesus maharak setan bara anake te. Oloh bawi te dia oloh Yehudi, ie inakan hong daerah Poinike intu Siria. 7:27 Yesus hamauh dengae, "Kare anak oloh musti impakanan helo. Dia bahalap manduan panginan bara anak oloh mangat manjakahe akan aso." 7:28 "Tuan," koan oloh bawi te tombah, "Kare aso intu penda meja mahin kuman bara tisan panginan je impanjato awi anak oloh!" 7:29 Palus Yesus hamauh dengae, "Tagal auh tombahm te, buli ih; setan jari balua bara anakm!" 7:30 Maka ibu te buli. Intu humae, ie sondau anake te metoh menter intu ekae batiroh, tuntang setan puna toto-toto jari balua bara anak te. 7:31 Limbah te Yesus malihi daerah Tirus, tuntang marajur jalanae mahalau Sidon akan Danau Galilea. Ie mahoroi jalan mahalau Lewu Sapuluh. 7:32 Intu hete oloh mimbit ije biti oloh bisu badengen manalih ie. Ewen balaku Yesus mina lengee akan hunjun oloh te. 7:33 Yesus mimbit oloh te mangabuat kejau bara oloh are palus mina due tunjoke akan huang kadadue pinding oloh te. Balalu Yesus maluja, tuntang manggayap jelan oloh te. 7:34 Limbah te Yesus mananggera akan langit, palus manahaseng kara-karas tuntang hamauh dengan oloh te, "Epata," jete rimae, "Habangah!" 7:35 Pinding oloh te habangah tuntang jelae manjadi balemo haluli, tuntang ie nampara dia bahali hakotak. 7:36 Palus Yesus mangahana ewen samandiai mansanan hal te akan eweh bewei. Tapi sasar Yesus mangahana, sasar haream ewen mambaritae. 7:37 Tuntang kakare oloh je mahining jete hengan toto. Ewen hamauh, "Taloh samandiai te iawie dengan kahalape! Ie mahin mawi oloh badengen mahining tuntang oloh bisu hakotak!"
8:1 Dia tahi limbah te tinai, aton hindai ije kakawan oloh are dumah hapumpong. Awi ewen jaton aton panginan, Yesus mantehau kare muride tuntang hamauh, 8:2 "Aku masi dengan oloh are toh. Jari telo andau katahie ewen hinje dengangku tuntang toh ewen jaton panginae. 8:3 Amon aku manyoho ewen buli marak kanai buang, ewen kareh tujah benteng jalan. Mahin tinai bara marak ewen te aton je dumah bara eka kejau." 8:4 Kare murid Yesus tombah, "Hong eka je kejau toh, hong kueh oloh tau mandino sukup panginan akan samandiai oloh toh?" 8:5 "Pire kare rote aton dengan keton?" koan Yesus misek. "Uju," koan ewen tombah. 8:6 Maka Yesus manyoho oloh are te mondok intu hunjun petak, palus ie manduan uju rote te tuntang manarimakasih akan Hatalla. Limbah te ie mangiwak-mangiwak rote te hapan lengee tuntang manengae akan kare muride uka imbagi akan kare oloh. Maka kare muride malalus te. 8:7 Ewen aton mimbit pire-pire kongan lauk kea. Yesus manarimakasih akan Hatalla tagal kare lauk te, palus manyoho kare muride mambagi kare lauk te kea. 8:8-9 Ewen kuman sampai besoh -- aton kurang labih epat koyan biti oloh je kuman. Limbah te kare murid Yesus manampunan kalabien panginan -- uju ranjung kontep. Palus Yesus manyoho kare oloh te buli, 8:10 tuntang ie dengan kare muride balalu lumpat arut tuntang haguet akan daerah Dalmanuta. 8:11 Pire-pire oloh Parisi dumah manalih Yesus, tuntang nampara hatakian auh dengae hapan manjabak ie. Ewen balaku Yesus mawi taloh heran kilau tanda je ie te dumah bara Hatalla. 8:12 Yesus barahakayah palus tombah, "En sababe oloh jaman jetoh balaku aku mawi taloh heran? Dia! Aku dia akan manenga taloh heran te akan ewen!" 8:13 Palus Yesus malihi ewen, tuntang lumpat akan huang arut; limbah te haguet akan saran danau dipah silae. 8:14 Kare murid Yesus kalapean mimbit rote. Ewen baya aton mina rote huang arut. 8:15 "Bua-buah keton taharep kare ragin oloh Parisi tuntang ragin Herodes," koan Yesus dengan ewen. 8:16 Maka kare murid Yesus te nampara manahiu hal te. Ewen hamauh, "Ie hamauh kalote, awi itah dia aton rote." 8:17 Yesus katawan taloh je inahiu ewen. Awi te ie misek dengan ewen, "Mbuhen keton manahiu soal jaton rote? Lalehan kadian tirok keton? 8:18 Matan keton aton -- mbuhen dia mite? Ain keton aton pinding -- mbuhen dia mahining? En dia keton mingat 8:19 lime rote je ingiwak-ingiwak akan lime koyan biti oloh? Pire lontong kontep awi kalabien panginan je inampunan keton?" "Duewalas," koan ewen tombah. 8:20 "Tuntang metoh aku mangiwak-mangiwak uju rote akan epat koyan biti oloh," koan Yesus misek tinai, "Pire lontong kalabien panginan je inampunan keton?" "Uju," koan ewen tombah. 8:21 "Nah, en hindai kea keton haratie?" koan Yesus tinai. 8:22 Ewen sampai intu Betsaida. Intu hete oloh mimbit ije biti oloh babute manalih Yesus, tuntang balaku uka ie manggayap oloh babute te mangat mampakeleh ie. 8:23 Maka Yesus mimbing lengen oloh babute te tuntang mangagalan ie balua lewu te. Limbah te Yesus maluja matan oloh te. Ie mina lengee intu matan oloh te palus misek ie, "En toh tau ikau mite taloh en-en?" 8:24 Oloh te manampayah akan hila baun, palus hamauh, "Iyoh. Aku mite oloh tanjo-tanjong; tapi ewen kilau batang kayu ampie." 8:25 Yesus mingkes tinai lengee intu matan oloh te tuntang manyoho ie sapire kaolihe mite. Matae te keleh, tuntang ie mite taloh samandiai te hayak batantu toto ampie. 8:26 Palus Yesus hamauh dengae, "Buli ih, tuntang ela haluli akan lewu te." 8:27 Yesus tuntang kare muride haguet akan kare lewu hakaliling tokep Kaisarea Pilippi. Hong benteng jalan Yesus misek dengan ewen, "Manumon koan oloh, eweh kea aku toh?" 8:28 Ewen tombah, "Aton je manyewut Yohanes Pampandoi; aton kea je manyewut Elia, tuntang je beken tinai manyewut: ije biti bara kare nabi." 8:29 "Tapi manumon koan keton kabuat, aku toh eweh?" koan Yesus misek. Petrus tombah, "Bapa toh Raja Panyalamat!" 8:30 Palus Yesus mampingat ewen, mangat ela mansanan akan eweh bewei tahiu ie. 8:31 Limbah te Yesus nampara majar kare muride tahiu Anak Olon musti buah kapehe, tuntang akan ilawan awi kare pamimpin, kare imam kapala, tuntang kare guru agama. Ie kareh impatei, tapi huang andau je kateloe ie kareh impisik tinai. 8:32 Hapan auh tarang toto Yesus mansanan hal te akan muride. Maka Petrus manjijit Yesus akan sare, tuntang maningak ie. 8:33 Tapi Yesus tampaliau tuntang manampayah kare muride, palus maningak Petrus, "Indah ikau bara hetoh, Paningkes! Tirokm te tirok olon; dia tirok Hatalla!" 8:34 Limbah te Yesus mantehau oloh are je aton hete haya-hayak dengan kare muride. Palus ie hamauh dengan ewen, "Oloh je handak omba aku, musti mangalapean taloh je mambatang akan arepe kabuat, limbah te tinai mananggong sampalakie, tuntang tetep omba aku. 8:35 Basa oloh je handak mahaga pambelome, kareh nihau pambelome. Tapi oloh je nihau pambelome ganan aku tuntang ganan Barita Bahalap bara Hatalla, kareh manyalamat pambelome. 8:36 En kaontonge akan oloh, amon hapus kalunen toh ie tempoe, tapi ie nihau pambelome? 8:37 En tau pambelom te inakiri hapan taloh en-en? 8:38 Amon oloh mahamen mangaku aku tuntang auh ajarku hong wayah durhaka tuntang papa toh, maka Anak Olon kea kareh mahamen mangaku oloh te hong katika ie dumah kareh huang kuasan Bapae, impahayak kare malekat je barasih."
9:1 "Keleh keton katawan!" koan Yesus. "Bara kare keton hetoh aton je dia matei, helo bara Hatalla marentah hapan kuasae!" 9:2 Jahawen andau tinai limbah te Yesus mimbit Petrus dengan Yakobus tuntang paharie Yohanes, mangabuat akan ije bukit je gantong. Intu taharep matan ewen Yesus hobah ampie. 9:3 Pakaiae manjadi baputi mangilat. Jaton ije tukang penatu hong kalunen toh je olih mampukan kilau te kaputie. 9:4 Limbah te tinai telo biti muride te mite Yesus hakotak dengan Elia tuntang Moses. 9:5 Maka Petrus hamauh dengan Yesus, "Pa Guru, mangat toto intu hetoh. Keleh itah mampendeng telo tingkap: ije akan Bapa, ije akan Moses, tuntang ije tinai akan Elia." 9:6 Sapunae Petrus dia katawan taloh je musti ingotake, awi ie dengan due kawale te metoh kapaham kikehe. 9:7 Limbah te baunandau manganjungen ewen tuntang bara baunandau te tarahining auh je hamauh, "Ie toh Anakku je inyintaku. Hining auh ayue!" 9:8 Bajeleng ewen mite hakaliling ewen, tuntang jaton tinai mite eweh bewei intu hete dengan ewen, beken bara Yesus ih. 9:9 Metoh ewen mohon bara bukit te, Yesus mampingat ewen, "Ela mansanan akan eweh bewei taloh je gitan keton nah sahelo bara Anak Olon impisik bara pampatei." 9:10 Ewen manumon auh peteh te, tapi sama arep ewen kabuat ewen nampara manahiu taloh je koan Yesus, "belom haluli bara pampatei". 9:11 Maka ewen misek dengae, "Mbuhen kare guru agama hamauh, je Elia musti dumah labih helo?" 9:12 Yesus tombah, "Elia puna dumah labih helo mangat mamberes kare taloh handiai. Tapi kilen ampie tahiu Anak Olon? En sababe hong Surat Barasih tarasurat je ie akan are ingapehe tuntang ihina oloh? 9:13 Tapi aku hamauh dengan keton: Elia jari dumah, tuntang kare oloh mawi ie mana koan ewen ih. Jete saroroi dengan je jari inyurat huang Surat Barasih tahiu ie." 9:14 Katika Yesus tuntang katatelo muride jari aton haluli tinai dengan kare muride awang beken, ewen mite are oloh intu hete. Pire-pire guru agama metohe hasoal dengan kare murid Yesus te. 9:15 Sana kare oloh te mite Yesus, ewen paham hengan, palus hadari manambang ie. 9:16 "En taloh je inyoal keton dengan kare guru agama te?" koan Yesus misek kare muride. 9:17 Ije bara kare oloh are te tombah, "Bapa Guru, aku mimbit anakku manalih Bapa. Ie te bisu awi iname roh papa. 9:18 Amon roh papa te manyarang ie, bitie ihampas-hampase intu petak, nyamae habure, kasingae mangaret tuntang hapus bitie manjadi kejang. Aku balaku kare murid Bapa maharak roh papa te, tapi ewen dia olih malaluse." 9:19 Maka Yesus hamauh dengan ewen, "Lalehan keton toh! Toto-toto keton toh oloh je dia percaya. Sampai hamparea aku musti melai hinje keton tuntang sabar dengan keton? Imbit anak te akan hetoh!" 9:20 Te ewen mimbit anak te manalih Yesus. Sana roh papa te mite Yesus, ie mawi bitin anak te keje-kejer sampai anak te balihang gulang-galing akan petak. Nyamae habure. 9:21 Palus Yesus misek dengan bapae, "Jari kilen katahie ie kilau toh?" "Bara metoh ie korik!" koan bapae tombah. 9:22 "Jari kinjap roh papa te manggau jalan handak mampatei ie, impalihange akan apui atawa akan huang danum. Tapi amon Bapa olih mandohop, buah Bapa masi ikei tuntang mandohop ikei!" 9:23 "Narai koam? Amon Bapa olih?" koan Yesus tombah. "Taloh handiai te olih, asal oloh percaya!" 9:24 Balalu bapa te mangkariak, "Tuhan, aku percaya tapi kapercayangku tapas. Dohop aku mangat labih percaya tinai!" 9:25 Metoh Yesus mite oloh are nampara dumah hakarimpong, ie manyoho roh papa te haguet. Ie hamauh, "Roh badengen tuntang bisu aku marentah ikau balua bara anak toh tuntang ela samasinde tame tinai intu huang ie!" 9:26 Roh papa te mangkariak, palus mawi bitin anak te keje-kejer, limbah te balua bara anak te. Anak te ampie kilau hantu uras kare oloh hamauh, "Ie jari matei!" 9:27 Tapi Yesus mimbing lengee tuntang mandohop ie hingkat. Anak te palus hingkat. 9:28 Limbah te Yesus intu huma, kare muride dumah mangabuat manalih ie tuntang misek, "En sababe ikei dia olih maharak roh papa te?" 9:29 Yesus tombah, "Roh papa macam te dia olih iharak dengan cara en bewei, beken bara lakudoa." 9:30 Yesus tuntang kare muride malihi eka te tuntang marajur jalanae mahalau Galilea. Yesus dia maku oloh katawan hong kueh ie aton, 9:31 awi ie metoh majar kare muride. "Anak oloh kareh inyarah akan kuasan olon," koan Yesus, "tuntang ie kareh impatei tapi hong andau kateloe ie kareh impisik!" 9:32 Kare muride dia harati taloh je iajar awi Yesus, tapi ewen mikeh misek dengae. 9:33 Ewen sampai intu Kapernaum. Limbah jari intu huma, Yesus misek dengan kare muride, "Keton manahiu en hong benteng jalan endau?" 9:34 Ewen dia tombah awi hong benteng jalan ewen hasoal tahiu eweh je pangkahaie. 9:35 Yesus mondok palus mantehau duewalas muride te. Ie hamauh dengan ewen, "Oloh je handak manjadi nomor ijee, ie musti manjadi je pangkarahiae tuntang manjadi jipen akan oloh samandiai." 9:36 Limbah te Yesus manduan ije biti anak korik, tuntang manyoho anak te mendeng intu taharep ewen samandiai. Yesus mamaluk anak te tuntang hamauh dengan kare muride, 9:37 "Oloh je manarima ije biti anak korik kilau toh tagal aku, rimae ie manarima aku. Tuntang oloh je manarima aku, ie dia manarima aku bewei, tapi manarima kea ie je manyoho aku." 9:38 Palus Yohanes hamauh dengan Yesus, "Pa Guru, ikei mite ije biti oloh maharak setan mahapan aran Bapa. Tuntang ikei mangahana ie awi ie beken bara itah." 9:39 Tapi Yesus hamauh, "Ela mangahana ie, basa jaton ije biti oloh je mawi taloh heran mahapan arangku, balalu tau mamapa aku. 9:40 Basa oloh je dia malawan itah, rimae ie tame pihak itah. 9:41 Keleh ingat! Oloh je manenga danum ihop akan keton awi keton murid Raja Panyalamat, ie kareh pasti mandino upahe." 9:42 "Ewe-eweh je mawi buku sampai ije bara kare oloh je korik toh dia percaya tinai dengangku, labih bahalap amon batu garinda hai imeteng intu uyate, tuntang ie injakah akan huang tasik. 9:43 Amon lengem silae mawi ikau badosa, tetek ih lengem te! Labih bahalap ikau belom dengan Hatalla marak jaton lengem silae bara ikau dengan due lengem tame akan naraka, iete apui je katatahie. 9:44 Hong hete apui dia tau belep, tuntang uret dia tau matei. 9:45 Tuntang amon paim mawi ikau badosa, tetek ih paim te. Labih bahalap ikau belom dengan Hatalla marak jaton paim silae bara ikau dengan kadadue paim inganan akan naraka. 9:46 Hong hete apui dia tau belep tuntang uret dia tau matei. 9:47 Amon matam mawi ikau badosa, karuit ih mate te! Labih bahalap ikau tame Lewu Taheta ain Hatalla marak jaton matam silae, bara ikau dengan kadadue bawak matam inganan akan huang naraka. 9:48 Intu hete apui dia tau belep tuntang uret dia tau matei. 9:49 Genep oloh kareh imparasih hapan apui, kilau parapah te imparasih hapan uyah. 9:50 Uyah te bahalap tapi amon uyah te manjadi batawah, en tau ie ingahing tinai? Keleh keton manjadi kilau uyah -- keleh belom hinje huang kadamai."
10:1 Limbah te tinai Yesus malihi eka te, tuntang haguet akan tanah Yudea tuntang tanah intu silan sungei Yordan. Oloh are dumah tinai hakarimpong mangaliling Yesus. Tuntang kilau bahut kea, Yesus majar ewen. 10:2 Pire-pire oloh Parisi dumah kea mangat manjabak Yesus. Ewen misek, "Manumon hukum agaman itah, en tau oloh manolang sawae?" 10:3 Yesus tombah, "Moses manenga parentah en akan keton?" 10:4 "Moses manyoho ih oloh manolang sawae, asal manyurat surat hatolang helo," koan ewen tombah. 10:5 "Moses manyurat surat parentah te awi keton lalau kahalin ajare," koan Yesus dengan ewen. 10:6 "Tapi hong tamparae, hong katika Hatalla manampa olon, insanan koae, 'Hatalla manjadian ewen hatue tuntang bawi. 10:7 Jete sababe oloh hatue malihi indu-bapae tuntang hinje dengan sawae, 10:8 maka kadaduee te manjadi ije.' Jadi ewen dia hindai due biti, malengkan ije. 10:9 Jete sababe, taloh je jari impahinje Hatalla, dia tau imisah awi olon!" 10:10 Limbah ewen tame huma, kare muride misek dengan Yesus tahiu hal te. 10:11 Yesus hamauh dengan ewen, "Eweh je manolang sawae palus kawin dengan oloh bawi beken, oloh te habandong intu taharep sawae je solake te. 10:12 Kalote kea oloh bawi je manganan banae palus kawin dengan oloh hatue beken, ie kea habandong." 10:13 Aton kare oloh mimbit anak korik manalih Yesus mangat ie manggayap tuntang mamberkat ewen. Tapi kare murid Yesus balait dengan kare oloh te. 10:14 Awi mite hal te, Yesus balait palus ie hamauh dengan kare muride, "Nauhe ih kare anak korik te dumah manalih aku! Ela mangahana ewen, basa kare oloh kilau toh je manjadi anak ungkup ain Hatalla. 10:15 Keleh mingat jetoh! Eweh je dia manaharep Hatalla kilau ije biti anak korik, dia tau manjadi anak ungkup ain Hatalla." 10:16 Limbah hamauh kalote, Yesus mamaluk kare anak korik te, limbah te ie mina lengee akan hunjun ewen mije-mije tuntang mamberkat ewen. 10:17 Metoh Yesus marajur tinai jalanae, ije biti oloh dumah dari-dari manalih Yesus. Oloh te sontop manyembah intu taharep Yesus tuntang misek, "Guru je bahalap, aku musti mawi en mangat olih manarima pambelom je bujur tuntang katatahie?" 10:18 "Mbuhen ikau manyewut aku bahalap?" koan Yesus misek. "Jaton aton oloh je bahalap, beken bara Hatalla kabuat. 10:19 Ikau jari katawan kare parentah Hatalla. 'Ela mampatei oloh, ela habandong, ela manakau, ela mananjaro, ela mamikir oloh, hormat bapam tuntang indum.' " 10:20 "Bapa Guru," koan oloh te, "uras kare parentah te jari inumongku bara metoh aku tabela." 10:21 Yesus mampayah oloh te hayak masi palus hamauh, "Baya batisa ije hindai je baguna akam. Lius, jual salepah ramom; tenga duit regan ramom te akan kare oloh je belom susah, tuntang ikau kareh mandino ramo hong sorga. Limbah te ikau dumah omba aku." 10:22 Awi mahining Yesus hamauh kalote, oloh te basule angate, palus malihi eka te dengan kapehen ateie awi ie paham tatau. 10:23 Maka Yesus manampayah kare muride palus hamauh dengan ewen, "Bahali toto oloh tatau manjadi anak ungkup ain Hatalla!" 10:24 Kare muride hengan mahining auh Yesus te. Tapi Yesus hamauh tinai, "O, anakku, puna bahali mangat tau manjadi anak ungkup ain Hatalla! 10:25 Labih murah ije kongan onta tame rumbak pilus bara ije biti oloh tatau tame Lewu Taheta ain Hatalla." 10:26 Kare auh Yesus te mawi kare muride hengan, sampai ewen misek sama arepe, "Amon kalote, eweh je tau inyalamat?" 10:27 Yesus manampayah ewen tuntang tombah, "Akan olon hal te dia olih, tapi akan Hatalla olih; akan Hatalla kare taloh handiai uras tau manjadi." 10:28 Palus Petrus hamauh, "Ite toh, ikei jari malihi kare taloh handiai mangat omba Bapa." 10:29 Koan Yesus, "Percaya bewei: oloh je jari malihi huma-seroke, atawa paharie je hatue atawa bawi, atawa indue, atawa bapae, atawa anak jariae, atawa tana-nyeloe tagal aku tuntang tagal Barita Bahalap bara Hatalla, 10:30 oloh te kareh manarima labih are hong wayah toh. Ie kareh mandino saratus lipet malabien kare humae, paharie hatue, pahari bawi, indue, anak jariae, tana nyeloe -- tuntang kajake kea. Tuntang kareh hong wayah je akan dumah, oloh te manarima pambelom je bujur tuntang katatahie. 10:31 Tapi are oloh je wayah toh manjadi pangkaheloe kareh manjadi je pangkarahiae tuntang are oloh wayah toh je pangkarahiae kareh manjadi je pangkaheloe." 10:32 Yesus tuntang kare muride metoh hong benteng jalanae manintu Yerusalem. Yesus mananjong intu baun, tuntang kakare muride uras gogop angate. Tuntang kare oloh je manuntut ewen bara likut mahin mangkeme mikeh. Limbah te Yesus mantehau tinai kare muride mangabuat tuntang mansanan akan ewen taloh je kareh manjadi buah ie. 10:33 "Hining toh," koae, "Itah metoh toh tesek itah manintu Yerusalem. Hong hete Anak Olon kareh inyarah akan kare imam kapala tuntang kare guru agama. Ie kareh ihukum matei limbah te inyarah akan kare oloh je dia Yehudi. 10:34 Ewen kareh halalea ie, maluja ie, mangapehe ie, tuntang manyampalaki ie. Tapi hong andau kateloe ie kareh misik." 10:35 Palus Yakobus tuntang Yohanes, ewen te anak Sebedeus, dumah manalih Yesus. "Bapa Guru," koan ewen, "aton ije hal je handak ikei balaku mangat Bapa mawie akan ikei." 10:36 "En je ingahandak keton mangat aku mawie akan keton?" koan Yesus misek. 10:37 Ewen tombah, "Ikei handak mondok ije hila gantau tuntang ije hila sambil Bapa, amon Bapa kareh mondok hunjun padadusan kahaim." 10:38 "Keton dia katawan taloh je ilaku keton," koan Yesus dengan ewen, "En olih keton mihop bara cangkir kajake je kareh iihopku tuntang tame akan huang padang kajake je kareh inameku?" 10:39 "Olih," koan ewen tombah. Maka Yesus hamauh tinai dengan ewen, "Puna toto keton kareh mihop bara sangkir kajake je kareh iihopku, tuntang tame akan huang padang kajake je kareh inameku. 10:40 Tapi tahiu eweh je kareh mondok hila gantau atawa hila sambilku, jete jaton hak ayungku manukase. Hatalla ih je manukase eweh ie je kareh mondok hong kare eka te." 10:41 Metoh sapuluh kare murid Yesus awang beken te mahining hal te, ewen balait dengan Yakobus tuntang Yohanes. 10:42 Jadi Yesus mantehau ewen samandiai palus hamauh, "Keton katawan je kare pamimpin utus je dia mangasene Hatalla, mahenyek rayate. Tuntang kare oloh hai ain ewen te mahapit ewen. 10:43 Tapi keton dia tau kalote! Malahan oloh je mipen manjadi oloh hai hong marak keton, ie musti manjadi jipen keton. 10:44 Tuntang oloh je mipen manjadi je pangkaheloe bara marak keton, musti manjadi jipen oloh samandiai. 10:45 Basa Anak Olon mahin dia dumah uka iayang awi oloh. Ie dumah uka manyang tuntang manyarah hambaruae uka maliwus are oloh." 10:46 Maka ewen sampai hong Yerikho. Tuntang metoh Yesus dengan kare muride hayak oloh are malihi lewu te, ije biti oloh babute metohe mondok manyadakah hong saran jalan. Arae te Bartimeus, anak Timeus. 10:47 Katika ie mahining oloh je mahalau te jete Yesus oloh Nasaret, ie mangkariak, "Yesus, Anak Dawid! Pasi aku!" 10:48 Ie ilait awi are oloh tuntang inyoho oloh ie suni. Tapi ie mangkariak labih hai haream, "Anak Dawid, pasi ah aku!" 10:49 Maka Yesus tende palus hamauh, "Tehau ie." Jadi ewen mantehau oloh babute te. Ewen hamauh dengae, "Benyem ih! Ikau intehau Yesus hingkat!" 10:50 Oloh babute te balalu manjakah jubahe, palus kaje-kajeng mendeng tuntang haguet manalih Yesus. 10:51 "En je ingahandakm mangat aku mawie akam?" koan Yesus misek ie. Oloh babute te tombah, "Pa Guru, aku mipen mangat tau mite." 10:52 "Lius ih," koan Yesus, "awi ikau percaya dengangku, maka ikau keleh." Hemben te kea oloh te tau mite. Palus ie manuntut Yesus hong jalan.
11:1 Katika manokep Yerusalem, ewen sampai hong lewu Betpage tuntang Betania, intu biling Bukit Batang Undus. Intu hete due biti muride inyoho Yesus haguet labih helo. 11:2 "Haguet ih, talih lewu korik je hila baun keton te," koan Yesus dengan ewen. "Sana keton tame lewu te, keton kareh mite ije anak kalidai injarat, je hindai puji oloh manungkange. Engkak jarat kalidai te tuntang imbit akan hetoh. 11:3 Tuntang amon aton oloh je misek dengan keton, mbuhen keton malapas kalidai te, sanan ih, 'Tuhan handak mahapae, tuntang ie bajeleng maliae tinai.' " 11:4 Kadadue murid Yesus te palus haguet, tuntang sondau ije kongan anak kalidai je injarat intu bauntonggang huma hong saran jalan. Maka ewen malapas kalidai te. 11:5 Kare oloh je mendeng hete misek ewen, "Hau, en awi keton? Mbuhen keton malapas anak kalidai te nah?" 11:6 Ewen tombah kilau je jari insanan awi Yesus akan ewen. Maka kare oloh manalua ewen mimbit kalidai te. 11:7 Katika sampai eka Yesus, likut kalidai te ilapik ewen hapan jubah ewen, palus Yesus lumpat hunjue. 11:8 Are oloh mambirang jubahe intu jalan, aton kea je manatai hong bentok jalan kare edan kayu je induan ewen bara tana. 11:9 Kare oloh je mananjong hila baun tuntang kare oloh je manuntut bara hila likut, uras malahap, 11:10 "Tara akan Hatalla! Imberkat ie je dumah hong aran Tuhan! Imberkat pamarentahan ayue je kareh dumah -- iete pamarentahan Dawid tato hiang itah! Tara akan Hatalla hong ngambo!" 11:11 Tepa kajariae Yesus sampai Yerusalem, palus tame akan huang Human Tuhan. Intu hete ie manampayah taloh hakaliling ie. Tapi awi andau jari handak kaput, ie haguet tinai akan Betania haya-hayak dengan duewalas muride. 11:12 Andau jewue tinai, metoh ewen balua bara Betania, Yesus balau'. 11:13 Bara kejau ie mite ije batang ara je labat dawee. Jadi ie haguet akan batang kayu te uka mite mikeh aton buae. Tapi katika ie sampai hong eka batang kayu te, ie jaton sondau en-en, beken bara kare dawen bewei, awi metoh te hindai wayah bua ara. 11:14 Palus Yesus hamauh dengan batang ara te, "Nampara katika toh ije biti mahin jaton oloh je kareh kuman bua bara ikau tinai!" Kare murid Yesus mahining auh te. 11:15 Limbah te ewen sampai hong Yerusalem, tuntang Yesus haguet tinai akan Human Tuhan. Hong hete ie nampara maharak oloh handiai je hajual-habili intu eka te. Ie manambalik kare mejan tukang pahurup duit, tuntang kare bangku ain tukang bajual burung dara. 11:16 Tuntang ije biti mahin jaton je tau ie manyohoe mimbit taloh en bewei mahoroi hila baun Human Tuhan te. 11:17 Limbah te Yesus majar kare oloh hong hete. Ie hamauh, "Huang Surat Barasih aton tarasurat kalotoh: Hatalla hamauh, 'Humangku kareh inyewut huma eka balakudoa akan kakare utus.' Tapi keton mawie manjadi sarangan bigal!" 11:18 Kare imam kapala tuntang kare guru agama mahining auh te. Maka ewen nampara manggau jalan uka mampatei Yesus. Ewen mikeh dengae, awi oloh handiai uras jungun mahining auh ajare. 11:19 Metoh jari tokep sasanja, Yesus tuntang kare muride malihi lewu te. 11:20 Andau ijee tinai hayak hanjewu, katika ewen mahalau batang ara te, ewen mite batang kayu te jari matei sampai akan kare uhate. 11:21 Palus Petrus taraingat dengan taloh je manjadi andau heloe te. Maka Petrus hamauh dengan Yesus, "Bapa Guru, coba ite! Batang ara je inyapa Bapa te jari matei!" 11:22 Yesus tombah, "Percaya ih dengan Hatalla. 11:23 Toto bewei keton tau hamauh dengan bukit toh, 'Hingkat ikau tuntang jakah arepm akan huang tasik!' Maka jete kareh manjadi akan keton; asal keton dia bembang atei, tuntang keton percaya taloh je inyewut keton te kareh toto akan manjadi. 11:24 Tagal te ingat jetoh: Amon keton balakudoa tuntang balaku taloh en-en, percaya ih Hatalla jari manenga akan keton taloh je ilaku keton, maka keton kareh manarimae. 11:25 Tuntang amon keton balakudoa, tapi atei keton dia sanang dengan ije biti oloh, tenga ampun akan oloh te helo, mangat Bapam je huang sorga kea mampun kare dosam. 11:26 Amon keton dia mampun oloh beken, Bapa keton je huang sorga kea dia olih mampun kare dosan keton." 11:27 Maka ewen haluli tinai akan Yerusalem. Tuntang katika Yesus mananjong kumbang-kamba huang Human Tuhan, kare imam kapala, kare guru agama tuntang kare pamimpin Yehudi dumah manalih ie. 11:28 Ewen misek, "Hunjun dasar en ikau malalus kare taloh handiai toh? Eweh je manenga hak te Akam?" 11:29 Yesus tombah, "Aku kea handak misek keton. Keleh keton tombah tuntang aku kareh mansanan akan keton mahapan hak eweh aku malalus kare taloh toh. 11:30 En Yohanes Pampandoi mahapan hak eweh, Hatalla atawa olon?" 11:31 Palus kare imam kapala tuntang kare pamimpin Yehudi nampara barunding sama arep ewen. Ewen hamauh, "Amon itah manyewut, 'Hapan hak Hatalla,' ie kareh hamauh, 'Mbuhen keton dia percaya dengan Yohanes?' 11:32 Tapi bahali kea itah manyewut, 'Mahapan hak olon.' " Basa ewen mikeh dengan oloh are, awi uras oloh manyewut Yohanes te ije biti nabi. 11:33 Jadi, ewen tombah, "Ikei dia katawan." Palus Yesus hamauh dengan ewen, "Amon kalote aku kea mahin dia maku mansanan akan keton hapan hak eweh aku malalus taloh handiai toh."
12:1 Limbah te Yesus nampara hakotak hapan paribasa akan kare imam kapala, kare guru agama tuntang kare pamimpin Yehudi te. Yesus hamauh, "Aton ije biti oloh je mangabun ije kalambar kabun anggur, palus mamagar kalilinge. Limbah te ie mangali petak ekae mahamis bua anggur, palus ie mampendeng ije candi eka oloh manjagae. Limbah te ie mampasewa kabun anggur te akan pire-pire tukang garap palus haguet akan lewu beken. 12:2 Katika jari sampai wayahe mamutik bua anggur, oloh te mampait ije jipee manalih kare tukang garap kabun anggur te, mangat manarima bagin ayue. 12:3 Tapi kare tukang garap te manawan jipen te. Limbah te ewen mamukul ie, palus manyoho ie buli buang. 12:4 Balalu tempon kabun te mangirim tinai ije biti jipee je beken. Tapi kare tukang garap te mamukul kapala jipen te, palus maharak ie hayak papa auhe. 12:5 Tempon kabun anggur te mampait tinai ije biti jipee je beken. Tapi ewen mampatei jipen te. Tuntang kalote raju-rajur ampie ewen mawi kare jipen awang beken kea: aton je imukul tuntang aton kea je impatei. 12:6 Toh eweh tinai je tau impait awi tempon kabun te? Baya tisa ije biti, iete anake kabuat je inyayange. Jadi kajariae ie mampait anake te manalih kare tukang garap te. 'Pasti anakku te ihormat,' koan tiroke. 12:7 Tapi tukang garap te hamauh sama arepe, 'Toh ie ahli waris ayue. Has itah mampatei ie, mangat itah mandino ramo warisae!' 12:8 Maka anak te inawan palus impatei. Hantue inganan ewen akan luar kabun te." 12:9 Palus Yesus misek, "En taloh je handak ilalus awi tempon kabun te? Pasti ie kareh dumah tuntang mampatei kare tukang garap te, palus manyarah kabun te akan kare tukang garap je beken. 12:10 Batantu keton jari mambasa ayat toh huang Surat Barasih, 'Batu je dia ihapan awi kare tukang pangun jari manjadi batu je mambatang. 12:11 Jetoh ie gawin Tuhan; lalehan kahalape!' " 12:12 Maka kare oloh hai utus Yehudi je mahining paribasa te, manyatiar uka manawan Yesus, basa ewen katawan paribasa te inintu akan ewen. Tapi ewen mikeh dengan oloh are. Jadi, ewen haguet malihi Yesus. 12:13 Pire-pire oloh Parisi tuntang pire-pire oloh ain Herodes inyoho manjabak Yesus mahapan kare paisek. 12:14 Ewen dumah manalih Yesus tuntang hamauh, "Bapa Guru, ikei toh katawan Bapa toh jujur tuntang dia paduli tirok eweh bewei. Bapa majar terus-tarang tahiu kahandak Hatalla akan olon, awi Bapa dia mite ampin oloh. Nah, coba ih Bapa mansanan akan ikei, 'Manumon atoran agaman itah, en tau mambayar pajak akan kaisar atawa dia? En itah musti mambayar pajak te atawa dia?' " 12:15 Yesus mangatawan ewen te haliau. Ie tombah, "En bukue keton handak manjabak aku? Coba parahan akangku ije kabintap duit perak." 12:16 Maka ewen manenga akae ije kabintap duit perak. Palus Yesus misek, "Gambar tuntang aran eweh toh?" "Kaisar," koan ewen tombah. 12:17 "Nah, amon kalote," koan Yesus, "tenga akan Kaisar taloh je ain Kaisar, tuntang akan Hatalla taloh je ain Hatalla." Ewen hengan mahining auhe. 12:18 Pire-pire oloh bara baris Saduki dumah manalih Yesus. (Ewen te baris oloh je manyangka oloh matei dia tau belom haluli.) 12:19 "Bapa Guru," koan ewen dengan Yesus, "Moses manyurat hukum toh akan itah: 'Amon ije oloh hatue matei, tuntang ie jaton dinon anak, maka paharie musti kawin dengan baloe te mangat ie manuron panakan oloh je jari matei te.' 12:20 Puji aton uju oloh hampahari. Je tambakase kawin, palus matei jaton dinon anak. 12:21 Limbah te je kaduee kawin dengan baloe te, tapi ie mahin matei jaton dinon anak. Sama kalote kea manjadi dengan paharie je katelo, 12:22 tuntang kalote rai-rait sampai akan je kaujue. Kajariae maka oloh bawi te kabuat matei kea. 12:23 Hong andau oloh matei belom haluli, kabalin eweh oloh bawi te? Basa kauju-ujue te jari kawin dengae!" 12:24 Yesus tombah, "Keton sala toto. Awi keton dia harati auh Surat Barasih atawa kuasan Hatalla. 12:25 Basa hong katika kare oloh matei belom haluli, ewen kareh dia kawin tinai, tapi ewen kareh belom kilau malekat hong sorga. 12:26 Tuntang tahiu oloh matei je belom haluli, en keton hindai puji mambasa huang surat Moses tahiu ruwut duhi je hanyala te? Intu huang kare ayat te inyurat je Hatalla hamauh dengan Moses, 'Aku toh Hatallan Abaraham, Hatallan Isaak tuntang Hatallan Yakob.' 12:27 Hatalla te dia Hatallan oloh matei. Ie Hatallan oloh belom. Keton sala toto!" 12:28 Palus dumah ije biti guru agama manyeneh auh pander Yesus dengan kare oloh bara baris Saduki te. Guru agama te mite je Yesus jari buah toto auhe manombah kare auh oloh te. Maka ie misek dengan Yesus, "Parentah je kueh je paling mambatang bara kare-kare parentah?" 12:29 Yesus tombah, "Parentah je mambatang iete: 'Hining o, utus Israel! Tuhan Hatallan itah, Tuhan te tunggal ije bewei. 12:30 Sinta Tuhan Hatallam hapan salepah ateim, hapan salepah hambaruam, hapan salepah kaharatim tuntang hapan salepah kaabasm.' 12:31 Parentah je kaduee iete: 'Sinta sama arepm kilau ikau sinta arepm kabuat.' Jaton tinai parentah beken je labih mambatang bara kadadue parentah te." 12:32 Palus guru agama te hamauh dengan Yesus, "Buah toto, Bapa Guru! Puna toto taloh je koan Bapa te: Tuhan bewei Hatalla je tunggal, tuntang jaton hindai Hatalla je beken. 12:33 Tuntang oloh musti sinta Hatalla hapan salepah ateie, tuntang hapan salepah kaharatie hayak hapan salepah kaabase. Tuntang ie musti sinta sama arepe kilau arepe kabuat. Jete labih bahalap bara manahor parapah je ingehu tuntang kare parapah beken akan Hatalla." 12:34 Yesus mite ampin guru agama te je jari tombah dengan bahalap toto. Tuntang Yesus hamauh dengae, "Ikau toh dia pire ih hindai tau manjadi anak ungkup ain Hatalla." Limbah te jaton ije biti hindai oloh je bahanyi mawi paisek akan Yesus. 12:35 Pandehan majar hong Human Tuhan, Yesus misek, "Kilen ampie kare guru agama tau manyewut je Raja Panyalamat te panakan Dawid? 12:36 Padahal Dawid kabuat -- awi akae inenga pangarinah bara Hatalla -- hamauh, 'Tuhan hamauh dengan Tuhangku: mondok ikau hila gantaungku sampai aku mawi kare musohm mamenda ikau.' 12:37 Jadi, amon Dawid manyewut Raja Panyalamat te 'Tuhan', kilen ampie tau ie panakan Dawid?" Oloh are je aton huang Human Tuhan te hanjak mahining auh Yesus majar. 12:38 Ie hamauh dengan ewen, "bua-buah keton taharep kare guru agama. Ewen te rajin tanjo-tanjong mahapan jubah panjang tuntang rajin ihormat intu kare pasar. 12:39 Ewen rajin hong eka je tamam intu huma sombayang tuntang intu kare pesta. 12:40 Ewen mamikir kare balo tuntang marampas humae. Tuntang hapae manutup kapapan arep ewen kabuat, ewen balakudoa panja-panjang. Hukuman akan ewen te kareh babehat!" 12:41 Metoh mondok hatandipah dengan patin parapah intu Human Tuhan, Yesus manantuani kare oloh je manamean duite akan huang pati te. Are oloh tatau manamean are duit; 12:42 palus ije biti bawi balo je belom susah dumah kea. Ie manamean due duit tambaga, iete duit korik je korik kea regae. 12:43 Maka Yesus mantehau kare muride palus hamauh dengan ewen, "Tampayah hetoh: balo je belom susah toh manamean akan huang pati te labih are bara je inamean awi kakare oloh beken te. 12:44 Basa ewen uras manamean bara kalabien ramoe. Tapi balo toh aloh ie belom susah toto, ie manenga kakare taloh je aton huang ie -- iete taloh je ihapae belom."
13:1 Katika Yesus malihi Human Tuhan, ije biti bara kare muride hamauh, "Bapa Guru, coba ite ampin kare pangun te. Tampayah kare batue. Dia laluen kahalape!" 13:2 Yesus tombah, "Ikau mite kare pangun je hai-hai te kan? Jaton ije bara kare batu huang pangun te kareh melai hasusun hong ekae. Uras jete kareh baduroh." 13:3 Limbah te Yesus haguet akan Bukit Batang Undus, tuntang mondok intu eka je hataharep dengan Human Tuhan. Palus Petrus, Yakobus, Yohanes tuntang Andreas dumah manalih ie tuntang hakotak dengae kabuat. 13:4 "Coba Bapa mansanan akan ikei," koan ewen dengae, "Hamparea taloh handiai te kareh manjadi? Tuntang en kare tandae je mansanan katikae te jari sampai?" 13:5 "Rende-rendeng," koan Yesus tombah, "ela sampai keton buah tanjaro. 13:6 Are oloh kareh dumah mahapan arangku tuntang hamauh, 'Aku toh ie!' palus mananjaro are oloh. 13:7 Amon keton mahining kare auh perang tuntang kare baritan oloh kalahi, ela mikeh. Kare taloh te musti manjadi, tapi jete dia tau irima je wayahe jari kiamat. 13:8 Utus ije kareh perang malawan utus je beken. Negara ije kareh manyarang negara je beken. Hong hete-hete kareh aton petak hagerek tuntang lau paham. Taloh handiai te harue tamparae bewei, sama kilau kapehe je ingkeme oloh bawi je handak luas. 13:9 Keton musti bua-buah, basa keton kareh inawan tuntang iimbit akan kare pengadilan. Keton kareh injera huang kare huma sombayang. Keton kareh iimbit manaharep kare oloh je mimbing kuasa tuntang kare raja awi keton muridku. Tuntang jete kesempatan akan keton uka manenga kasaksian tahiu aku akan ewen. 13:10 Barita Bahalap bara Hatalla te musti inyiar helo akan kare utus oloh. 13:11 Tuntang amon keton inawan tuntang iimbit akan pengadilan, ela mikeh tahiu taloh je musti ingotak keton. Amon katikae jari sampai akan hakotak, sewut ih taloh je insanan akan keton hong katika te. Basa kare auh je inyewut keton te dia auh keton kabuat, malengkan dumah bara Roh Hatalla. 13:12 Oloh kareh mandurhaka mawi paharie kabuat sampai impatei. Jete kea je akan manjadi buah bapae dengan anake. Kare anak kareh malawan indu-bapae, tuntang manyarah ewen mangat impatei. 13:13 Keton kareh inyingi awi oloh handiai awi keton muridku. Tapi oloh je tahan sampai kalepahe, kareh akan inyalamat." 13:14 "Keton kareh manampayah 'Kapapa je Mampalenyoh' mendeng hong eka je pali akae. (Pampingat akan pambasa: Nirok ih en rimae te!) Hong katika te oloh je aton hong Yudea musti hadari akan bukit. 13:15 Oloh je aton hong hunjun sapau huma ela mohon tuntang tame akan huang huma awi handak manduan taloh en-en. 13:16 Oloh je aton hong tana ela madu manduan jubahe. 13:17 Kare andau te dia laluen kapapae akan oloh bawi je batihi tuntang akan ibu je magon mampatoso anake! 13:18 Balakudoa ih mangat kare taloh te ela manjadi hong wayah ujan. 13:19 Hong kare andau je papa te kareh lembut kasusah je hindai puji manjadi bara metoh Hatalla manjadian kalunen sampai wayah toh, tuntang dia tinai manjadi rahian kareh. 13:20 Paribasae Hatalla dia mamandak wayah te, maka jaton ije biti je tau salamat. Tapi tagal ungkup ayue, Hatalla mamandak katika te. 13:21 Hong katika te amon aton oloh je hamauh dengan keton, 'Ite, Raja Panyalamat te aton intu hetoh!' atawa 'Ite, ie aton intu hete!' ela ih percaya auh oloh te. 13:22 Basa kare panyalamat pananjaro tuntang kare nabi pananjaro kareh dumah. Ewen kareh malalus kare gawi je malabien bara bahut tuntang kare taloh heran hapae mananjaro amon olih, anak ungkup ain Hatalla kea. 13:23 Jadi, rende-rendeng ih! Uras kare taloh te jari insanangku akan keton helo bara taloh te manjadi." 13:24 "Limbah kare wayah kasusah te, matanandau manjadi kaput, tuntang bulan nihau kalawae. 13:25 Kare bintang kareh manjato bara langit, tuntang kare kuasa hong salepah langit tuntang petak manjadi hakangkalut. 13:26 Hong katika te Anak Olon gitan dumah intu baunandau dengan kapaham kuasae tuntang kahaie. 13:27 Ie kareh manyoho kare malekat ayue uka mamumpong ungkup je iintihe bara kaepat puting kalunen, bara kare saran kalunen sampai akan kare saran langit." 13:28 "Keleh manduan ajar bara batang ara. Amon kare patinge jari bahijau tuntang balemo, tuntang nampara manyuloh, keton katawan jete wayah pandang jari tokep. 13:29 Kalote kea amon keton mite kare taloh te manjadi, keton katawan wayah te jari tokep toto. 13:30 Keleh keton katawan! Kare-kare taloh toh kareh manjadi helo bara kare oloh je belom wayah toh uras matei. 13:31 Langit tuntang petak kareh nihau, tapi auhku tetep sampai katatahie." 13:32 "Aloh kalote, ije biti mahin jaton oloh katawan hamparea andaue atawa jame. Kare malekat hong sorga kea dia, tuntang anak mahin dia, baya Bapa bewei je katawan. 13:33 Jadi keton musti bajaga tuntang barendeng, basa keton dia katawan hamparea katikae. 13:34 Jete ampie tau inanding kilau ije biti oloh je malihi humae palus haguet akan eka je kejau. Ie manyoho kare jipee mahaga humae, tuntang manenga gawi akan ewen mije-mije. Akan tukang jaga baun tonggang, ie mameteh uka bajaga bua-buah. 13:35 Tagal te keton musti jaga-jaga, basa keton jaton katawan hamparea tempon huma te dumah haluli -- tau metoh halemei, tau bentok alem, tau hong tampalawei, atawa tau kea hayak andau sawah. 13:36 Amon ie dumah salenga, ela ih sampai ie sondau keton metoh batiroh. 13:37 Taloh je insanangku akan keton toh, kareh handak insanangku kea akan oloh handiai: keleh bajaga!"
14:1 Due andau hindai jete Andau Paska tuntang pesta Rote Je Dia Iragi. Kare imam kapala tuntang kare guru agama kanjerae manggau jalan mangat manawan Yesus suni-suni, tuntang mangat mampatei ie. 14:2 "Tapi ela itah mawie hong pesta", koan ewen, "basa kareh lembut karidu." 14:3 Katika Yesus aton hong Betania, hong human Simon je bihin puji buah panyakit kerai je bahaya, ije biti oloh bawi dumah manalih ie. Ie mimbit ije kasa pualam basuang minyak harum je barega, inampa bara uhat taloh je harum. Katika Yesus metoh mondok kuman, oloh bawi te mamusit kasa te tuntang manata minyak harum te akan hunjun takolok Yesus. 14:4 Pire-pire oloh je aton intu hete balalu balait tuntang hamauh sama arepe, "En gunae minyak harum te ihalanganyan? 14:5 Minyak te tau injual hapan rega labih bara telo ratus duit perak, tuntang duite tau inenga akan oloh je belom susah!" Maka ewen balait dengan oloh bawi te. 14:6 Tapi Yesus hamauh, "Nduem ih ie! Mbuhen keton manyusah ie? Ie malalus taloh je bahalap tuntang inara akangku. 14:7 Oloh je belom susah harajur aton intu marak keton. Genep katika asal keton handak, keton tau mandohop ewen. Tapi aku dia harajur hinje keton. 14:8 Oloh bawi toh jari malalus taloh je tau ie mawie. Ie jari manatap aku hapan minyak harum akan kuburku helo bara katikae. 14:9 Percaya ih! Hong hapus kalunen, hong kueh bewei Barita Bahalap ain Hatalla imbarita, maka gawin oloh bawi toh kareh inyarita kea kilau pangingat dengae." 14:10 Balalu Yudas Iskariot, ije bara duewalas biti kare murid Yesus, haguet manalih kare imam kapala awie madu mandurhaka handak manyarah Yesus akan ewen. 14:11 Ewen hanjak toto mahining auh tawaran te tuntang hajanji uka manenga duit akan Yudas. Maka Yudas manampara manggau katika je buah mangat mandurhaka mawi Yesus. 14:12 Intu andau je solake hong Andau Pesta Rote Je Dia Iragi -- hong katika oloh manyambalih tabirin Paska -- kare murid Yesus misek dengae, "Intu kueh Bapa handak ikei manatap panginan Paska akan Bapa?" 14:13 Maka Yesus manyoho due biti bara ewen, koae, "Lius akan lewu, intu hete ije biti oloh hatue aton mimbit ije kandi basuang danum, kareh hasondau dengan keton. Nuntut ih ie 14:14 akan huma je inamee tuntang sanan akan tempon huma te, 'Bapa Guru misek, hong kueh ekae ie tuntang kare muride tau kuman panginan Paska.' 14:15 Oloh te kareh maninjok akan keton ije kamar je hai. Kamar te jari iator, sukup dengan kare pakakas huange. Natap taloh handiai hete akan itah." 14:16 Balalu due biti murid Yesus te haguet akan lewu. Hong hete ewen sondau uras hakabuah tumon je insanan awi Yesus. Maka ewen balalu manatap panginan Paska. 14:17 Hamalem te tinai, Yesus dumah dengan duewalas muride. 14:18 Tuntang metoh ewen mondok kuman, Yesus hamauh, "Hining toh: ije biti bara marak keton, je metoh toh kuman hayak dengangku kareh mandurhaka mawi aku." 14:19 Mahining auh te, kare murid Yesus manjadi kapehe ateie paham. Palus mije-mije ewen misek Yesus, "Batantu beken aku je koan Bapa te?" 14:20 Yesus tombah, "Ie te ije biti bara duewalas keton toh, je kuman hinje piringe dengangku. 14:21 Punae Anak Olon kareh matei kilau je tarasurat huang Surat Barasih. Tapi calaka toto oloh je mandurhaka mawi Anak Olon te! Labih bahalap akan oloh te jaka ie dia puji inakan samasinde!" 14:22 Katika ewen metoh kuman, Yesus manduan rote tuntang manarimakasih akan Hatalla. Limbah te ie mangiwak rote te hapan lengee, palus manengae akan kare muride sambil hamauh, "Duan tuntang kinan, jetoh bitingku." 14:23 Limbah te ie manduan ije cangkir anggur. Ie balakudoa manarimakasih akan Hatalla, palus manenga cangkir te akan kare muride. Limbah te ewen uras mihop anggur te. 14:24 Limbah te Yesus hamauh, "Jetoh dahangku je mandehen janjin Hatalla, daha je inusoh akan oloh are. 14:25 Percaya ih: aku dia tinai mihop anggur toh, sampai katika aku mihop anggur je taheta haya-hayak dengan keton hong Lewu Taheta ain Bapaku." 14:26 Limbah te ewen manyanyi ije nyanyi tara. Tuntang limbah te ewen haguet akan Bukit Batang Undus. 14:27 Limbah te Yesus hamauh dengan ewen, "Keton samandiai kareh hadari malihi aku. Basa huang Surat Barasih tarasurat, 'Hatalla kareh mampatei sakatike, tuntang kawan tabirie kareh bilang-bilanga.' 14:28 Tapi limbah aku impisik haluli, aku kareh haguet helo akan Galilea." 14:29 "Dia," koan Petrus, "aloh ewen uras malihi Bapa, aku toh samasinde dia." 14:30 "Ingat," koan Yesus, "alem toh kea, helo bara manok manando handue, ikau hantelo milim aku." 14:31 Petrus tombah hayak karugas auhe, "Aloh aku musti matei haya-hayak dengan Bapa, samasinde dia baka aku hamauh aku dia kasene Bapa!" Tuntang kare murid awang beken mahin hamauh kalote kea. 14:32 Ewen sampai hong ije eka je bagare Getsemane, tuntang Yesus hamauh dengan kare muride, "Mondok ih intu hetoh pandehan aku haguet balakudoa." 14:33 Palus Yesus mimbit Petrus, Yakobus tuntang Yohanes haguet haya-hayak dengae. Ie manampara mangkeme kapehen ateie tuntang kagogope. 14:34 "Ateiku paham kapehe," koan Yesus dengan ewen, "angatku bilak handak matei. Keleh keton melai hetoh tuntang bajaga!" 14:35 Yesus haguet akan kakejau isut palus mahingkep akan petak tuntang balakudoa. Huang lakudoae te ie balaku amon tau ie dia usah mangkeme andau kapehe te. 14:36 "Bapa, o Bapa," koae, "jaton ije taloh je mastahel akan Bapa. Indah ih kapehe toh bara aku. Baya ela ih manumon kahandakku, malengkan tumon kahandak Bapa." 14:37 Limbah te Yesus haluli tuntang gitae kare muride metoh batiroh. Ie hamauh dengan Petrus, "Simon, en ikau batiroh? Baya ije jam ih, dia olih ikau bajaga?" 14:38 Balalu Yesus hamauh dengan ewen, "Keleh bajaga tuntang balakudoa mangat dia buah tingkes. Puna roh keton pahias malalus taloh je bujur, tapi keton dia olih mawie awi sipat kalonen te balemo." 14:39 Sinde tinai Yesus haguet balakudoa mahapan auh je sama. 14:40 Ie haluli tinai manalih kare muride tuntang sondau ewen magon batiroh, awi ewen paham mangantok. Maka ewen jaton katawan en je musti insanan ewen akan Yesus. 14:41 Katika hong tingkat je kateloe Yesus haluli manalih ewen, ie hamauh, "En keton magon batiroh malayan kaheka? Sukup ih! Jari sampai katikae Anak Olon inyarah akan lengen kare oloh badosa. 14:42 Has misik, itah haguet. Ite! Oloh je mandurhaka mawi aku jari dumah!" 14:43 Metoh Yesus magon hakotak, Yudas, iete ije biti bara duewalas muride te, dumah. Haya-hayak dengae te kea are oloh je mimbit padang tuntang gagada. Ewen te inyoho awi kare imam kapala, kare guru agama tuntang kare pamimpin Yehudi. 14:44 Je durhaka te jari manampa ije tanda akan ewen. "Oloh je inyiumku," koae dengan ewen, "jete ie oloe. Tawan ie tuntang imbit ie hayak injaga toto-toto." 14:45 Katika Yudas dumah, ie balalu manalih Yesus tuntang hamauh, "Bapa Guru!" limbah te ie manyium Yesus. 14:46 Palus oloh je dumah haya-hayak dengan Yudas te manawan Yesus tuntang mamasong ie. 14:47 Tapi ije biti bara oloh je aton hete manyilak padange tuntang mawi jipen imam hai sampai bakempang pindinge. 14:48 Palus Yesus hamauh dengan ewen, "En aku toh oloh papa, sampai keton dumah mahapan padang tuntang gagada mangat manawan aku? 14:49 Genep andau aku majar hong Human Tuhan intu taharep keton, tuntang keton dia manawan aku. Tapi puna musti jari kalote, uka manjadi taloh je jari tarasurat huang Surat Barasih." 14:50 Kare muride hadari malihi Yesus. 14:51 Ije biti oloh tabela, je baya mahapan ije kalambar benang hapan manutup bitie, manuntut Yesus. Kare oloh handak manawan ie, 14:52 tapi ie mengkak benang te, palus hadari marak halowai. 14:53 Yesus iimbit akan human imam hai. Hong hete uras kare imam kapala, pamimpin Yehudi, tuntang guru agama hapumpong. 14:54 Petrus manuntut Yesus bara kejau sampai tame akan huang baun human imam hai. Intu hete ie mondok mangalasut bitie tokep apui haya-hayak dengan kare pengawal. 14:55 Kare imam kapala tuntang hapus Pengadilan Agama manggau jalan uka mandino bukti hapan manyalan Yesus mangat olih mampanjato hukuman matei buah ie. Tapi ije mahin jaton bukti je olih ewen dinoe. 14:56 Are saksi intehau uka manenga kasaksian tanjaro mawi Yesus, tapi kasaksian ewen te uras hakalawan auhe kasaksian ije bara kasaksian je beken. 14:57 Palus pire-pire saksi mendeng tuntang manyampai saksi tanjaro mawi Yesus je kalotoh auhe, 14:58 "Ikei mahining oloh toh hamauh, 'Aku kareh manduroh Human Tuhan je inampa awi olon toh, tuntang limbah telo andau, aku kareh mamangun tinai je beken je dia ie tampan olon.' " 14:59 Tapi kare kasaksian oloh te sama hakalawan auhe bara ije dengan je beken. 14:60 Maka imam hai mendeng intu taharep ewen samandiai tuntang misek dengan Yesus, "En ikau dia tombah kare dawan oloh je mawi ikau te?" 14:61 Tapi Yesus suni ih. Ie dia tombah samasinde. Palus imam hai te misek sinde tinai dengae, "En ikau Raja Panyalamat, Anak Hatalla je Barasih?" 14:62 "Aku toh ie," koan Yesus tombah, "tuntang keton samandiai kareh mite Anak Olon mondok hila gantaun Hatalla je Pangkahai Kuasae tuntang dumah bara langit huang baunandau!" 14:63 Maka imam hai marabit-marantat pakaiae tuntang hamauh, "Dia usah saksi hindai! 14:64 Keton jari mahining kabuat kare auh ayue je mamapa Hatalla. Toh, en auh tukas keton?" Ewen samandiai manukas je Yesus te basala, tuntang patut ihukum matei. 14:65 Palus pire-pire oloh manampara maluja Yesus, tuntang ewen manutup matae tuntang mamukul ie, palus hamauh, "Coba nujum akan ikei eweh je mamukul ikau?" Kare pengawal te kea omba manampar Yesus. 14:66 Metoh Petrus magon aton hong sarambi huma te, ije biti jipen bawi ain imam hai dumah akan hete. 14:67 Metoh ie mite Petrus mangalasut arepe tokep apui, ie manantuani baun Petrus tuntang hamauh, "Dia ikau toh kea je dengan Yesus oloh Nasaret te?" 14:68 Tapi Petrus milim. "Aku dia katawan tuntang dia harati auhm," koae dengan jipen te. Palus Petrus haguet akan bauntonggang pagar human imam hai te. Metoh te manok manando. 14:69 Jipen bawi te mite Petrus tinai tuntang hamauh tinai dengan kare oloh hete. "Ie puna ije bara kare ewen te!" 14:70 Tapi Petrus milim tinai. Dia tahi limbah te kare oloh intu hete hamauh tinai dengan Petrus, "Pasti ikau toh ije bara kare ewen te, awi ikau bara Galilea!" 14:71 Balalu Petrus nampara sapa-sapa, "Aku dia kasene oloh je koan keton te!" 14:72 Metoh te kea manok manando kadue tingkate. Tuntang Petrus taraingat je Yesus jari hamauh dengae, "Helo bara manok manando kadue tingkate, hantelo ikau jari milim aku." Balalu Petrus manangis side-siden.
15:1 Hayak jajewu haliai, hapus Pengadilan Agama tuntang kare imam kapala, kare pamimpin Yehudi tuntang kare guru agama barunding bajeleng. Ewen mamasong Yesus, limbah te mimbit ie tuntang manyarah ie akan Pilatus. 15:2 Pilatus misek dengan Yesus, "En toto ikau Rajan Oloh Yehudi?" "Kalote koam," koan Yesus. 15:3 Kare imam kapala manyampai are auh dawa mawi Yesus. 15:4 Palus Pilatus misek tinai dengan Yesus, "En ikau dia maku tombah? Coba ite kilen karee auh dawa je inyampai ewen mawi ikau!" 15:5 Tapi Yesus samasinde jaton tombah hindai, sampai Pilatus hengan. 15:6 Sasining Pesta Paska, bahut Pilatus malapas ije biti oloh tahanan manumon paintih oloh are. 15:7 Huang penjara, bara kare oloh je mambarontak je puji mampatei oloh hong wayah karidu-kalahi, aton ije oloh je bagare Barabas arae. 15:8 Oloh are hapumpong tuntang balaku dengan Pilatus uka ie malapas ije biti tahanan kilau bahut. 15:9 Pilatus misek dengan ewen, "En handak keton aku malapas rajan oloh Yehudi te akan keton?" 15:10 Basa Pilatus katawan toto je kare imam kapala manyarah Yesus akae awi kahirin atei ewen. 15:11 Tapi kare imam kapala manantiring oloh are uka balaku Pilatus malapas Barabas akan ewen. 15:12 Maka Pilatus hamauh tinai dengan oloh are te, "Amon kalote, en je musti iawiku dengan oloh je inyewut keton Rajan Oloh Yehudi te?" 15:13 Ewen mangkariak, "Nyampalaki ie!" 15:14 "Tapi en kapapa je iawie?" koan Pilatus misek. Balalu ewen mangkariak sasar hai haream, "Nyampalaki ie!" 15:15 Pilatus nahuang handak mampahanjak oloh are te, maka ie malapas Barabas akan ewen. Limbah te ie manyoho oloh mahewes Yesus hapan cambuk, palus manyarah ie uka inyampalaki. 15:16 Yesus iimbit awi kare prajurit akan balai pengadilan hong istana gubernur. Limbah te salepah pasukan intehau hapumpong. 15:17 Palus ewen mangkepan jubah kawo-kawo intu Yesus, tuntang manampa makota bara kare pating haduhi, limbah te mangkepae intu takolok Yesus. 15:18 Limbah te ewen manyembah ie. "Salamat Rajan oloh Yehudi!" koan ewen. 15:19 Ewen mamukul takolok Yesus hapan sukah, palus ewen maluja ie tuntang sontop manyembah intu taharepe. 15:20 Limbah ewen halalea Yesus, ewen mengkak jubah kawo-kawo te palus mangkepan tinai pakaian ayue kabuat. Limbah te ie iimbit akan luar uka inyampalaki. 15:21 Hong benteng jalan ewen hajajuan ije biti oloh meton sampalakin Yesus. Oloh te tabarong harue bara dokohe handak tame akan lewu. (Aran oloh te Simon, asale bara Kirene -- bapa Aleksander ewen due Rupus.) 15:22 Yesus iimbit akan ije eka je bagare Golgota, rimae "Eka Bangon Takolok". 15:23 Hong hete ewen handak manenga akae anggur je iewoi dengan mur, tapi Yesus dia maku mihop anggur te. 15:24 Limbah te ewen manyampalaki ie, tuntang ewen habagi pakaiae mahapan tenong uka manukas bagin genep biti. 15:25 Yesus inyampalaki hong pukul jalatien hanjewu. 15:26 Intu hunjun sampalaki te ingkepan auh surat tumon auh dawan oloh mawi ie, iete: "Rajan Oloh Yehudi". 15:27 Haya-hayak dengan Yesus te ewen manyampalaki kea due biti bandit; ije biti hila gantaue tuntang ije biti tinai hila sambile. 15:28 Kalote maka manjadi taloh je inyurat huang Surat Barasih, iete: "Ie iitong tame baris kare oloh papa." 15:29 Kare oloh je mahalau hete manggiling takoloke tuntang mahina Yesus. Ewen hamauh, "O, ikau je handak manduroh Human Hatalla tuntang mamangue huang telo andau. 15:30 Coba mohon bara sampalaki te tuntang nyalamat Arepm!" 15:31 Kalote kea kare imam kapala tuntang kare guru agama halalea Yesus. Ewen hamauh sama arepe, "Ie manyalamat oloh beken, tapi dia olih manyalamat Arepe kabuat! 15:32 Amon ie raja Israel, Raja Panyalamat, keleh ie toh mohon bara sampalaki te, uka ikei manyaksie tuntang percaya dengae!" Kare oloh je inyampalaki haya-hayak dengan Yesus te mahin mahina Yesus. 15:33 Hong bentok andau, katahin telo jam, hapus daerah te manjadi kaput. 15:34 Tuntang pukul telo halemei, Yesus mangkariak hayak hai auhe, "Eloi, Eloi, lama sabakhtani?" jete rimae, "O, Hatallangku, O, Hatallangku, mbuhen ikau malihi aku?" 15:35 Pire-pire oloh intu hete mahining kariak te, tuntang hamauh, "Hining ie mantehau Elia!" 15:36 Ije biti bara ewen te kaje-kajeng manduan karang, palus manculop huang anggur masem. Limbah te kambang karang te inyucoke intu tapakan ije dereh kayu, palus manjujue manintu biwih Yesus sambil hamauh, "Entai, keleh itah mitee en Elia dumah mampamohon ie bara sampalaki te." 15:37 Palus Yesus mangkariak, tuntang mahutos. 15:38 Tirai benang je iniring intu huang Human Tuhan barabit sila due bara hunjun akan penda. 15:39 Perwira je mendeng hila baun sampalaki te, mite kilen ampie Yesus mahutos. Perwira te hamauh, "Puna toto oloh toh Anak Hatalla!" 15:40 Intu hete aton kea pire-pire oloh bawi je manampayah taloh samandiai te bara kejau. Bara kare ewen te aton Salome, Maria Magdalena, tuntang Maria indu Yakobus je tabela tuntang Yoses. 15:41 Maka ewen te iete kare oloh bawi je manuntut tuntang mandohop Yesus katika ie aton hong Galilea. Tuntang aton are tinai oloh bawi beken intu hete je jari dumah akan Yerusalem haya-hayak dengan Yesus. 15:42-43 Andau jari nampara hamalem katika Yosep bara Arimatea dumah. Ie te anggota Pengadilan Agama je ihormat oloh. Ie kea omba mentai katika ain Hatalla nampara marentah kilau Raja. Andau te andau oloh manatap arepe (jete andau helo bara andau Sabat). Tagal te Yosep mampahanyi arepe manalih Pilatus tuntang balaku hantun Yesus. 15:44 Pilatus hengan awi mahining Yesus jari mahutos. Jadi ie manyoho oloh mantehau kapala pasukan tuntang misek dengae en Yesus jari tahi mahutos. 15:45 Limbah mahining taloh je insanan awi perwira te, Pilatus manyoho Yosep manduan hantun Yesus. 15:46 Palus Yosep mamili benang baputi bara linen tuntang limbah mampamohon hantun Yesus, ie mambungkuse hapan benang te. Limbah te ie mampeter hantu te intu huang kubur je inampa intu huang bukit batu. Limbah te ie manggaling batu hai manutup bauntonggang kubur te. 15:47 Pandehan te Maria Magdalena tuntang Maria indu Yoses manantuani hong kueh eka Yesus impeter.
16:1 Katika andau Sabat jari mahalau, Maria Magdalena, Maria indu Yakobus tuntang Salome haguet mamili ramon kasai je harum hapan mangasai hantun Yesus. 16:2 Hayak hanjewu toto metoh matanandau lembut, andau je solake huang minggo te, ewen haguet akan kubur. 16:3-4 Hong benteng jalan, ewen hakotak sama arepe, "Eweh je olih mandohop itah manindar batu tutup bauntonggang kubur te?" Basa batu te hai toto. Tapi sana ewen sampai hete ewen mite batu te jari tagaling. 16:5 Palus ewen tame akan huang kubur te. Intu huang je hila gantau, ewen mite ije biti oloh tabela mahapan jubah baputi metohe mondok, tuntang ewen tarewen. 16:6 Oloh tabela te hamauh, "Ela mikeh! Aku katawan keton manggau Yesus oloh Nasaret je jari inyampalaki te. Ie jaton hetoh. Ie jari misik! Ite, toh eka ewen mampeter ie. 16:7 Lius keton, nyampai kabar toh akan kare muride, tatame kea Petrus. Sanan, 'Ie haguet helo akan Galilea. Intu hete keton kareh mite ie, kilau je jari insanae akan keton.' " 16:8 Maka ewen balua bara kubur te palus hadari awie tarewen hayak mikeh. Ewen jaton mansanan akan ewe-eweh bewei awie mikeh. 16:9 Kare oloh bawi te haguet manalih Petrus tuntang kare kawale, palus manyarita hapan auh pandak kare taloh je jari insanan akan ewen awi oloh tabela te. Limbah te, Yesus kabuat mahalau kare muride mambarita bara timor barat taloh je barasih tuntang katatahie tahiu salamat je melai katatahie. Limbah Yesus misik bara pampatei, hong andau Minggo hayak hanjewu, sola-solake ie mamparahan Arepe akan Maria Magdalena. (Bara Maria te Yesus puji maharak uju setan.) 16:10 Maka Maria Magdalena haguet mansanan taloh je manjadi te akan kare sobat Yesus je metohe kapehe ateie tuntang manangis. 16:11 Tapi katika ewen mahining je Yesus te belom, tuntang je Maria kea jari mite ie, ewen dia percaya. 16:12 Limbah te Yesus mamparahan arepe akan due biti muride mahapan cara beken. Hal te manjadi katika ewen due mananjong akan ije lewu. 16:13 Jadi ewen haluli tuntang mansanan hal te akan ewen awang beken. Tapi ewen dia percaya. 16:14 Kajariae, Yesus mamparahan Arepe akan sawalas muride, katika ewen metoh kuman. Ie maningak ewen basa ewen kurang kapercayae tuntang lalau batekang ateie sampai dia percaya dengan kare oloh je jari mite kabuat Yesus te belom. 16:15 Palus Yesus hamauh dengan ewen, "Lius keton akan hapus kalunen tuntang ngabar Barita Bahalap ain Hatalla te akan salepah oloh kalunen. 16:16 Oloh je dia percaya kareh buah hukum. Tapi oloh je percaya tuntang impandoi, kareh inyalamat. 16:17 Kilau tanda tagal kapercayan ewen, maka ewen te kareh maharak setan huang arangku; ewen kareh hakotak hapan kare basa je dia ewen kasenee. 16:18 Amon ewen mimbing handipe atawa mihop pulih, ewen dia baka buah calaka. Amon ewen mingkes lengee intu hunjun oloh haban, kare oloh te kareh manjadi keleh." 16:19 Limbah Tuhan Yesus hakotak dengan ewen, ie inggatang akan sorga. Intu hete ie marentah hinje dengan Hatalla. 16:20 Maka kare muride haguet tuntang manyiar barita bara Hatalla akan hete-hete. Tuntang Tuhan mahin omba bagawi haya-hayak dengan ewen tuntang manenga bukti mahalau kare tanda heran je baritan ewen te puna toto.
1:1 Teopilus je bahalap budi basarae, Jari are oloh je manyurat rinti-rinting tahiu kare taloh je jari manjadi hong marak itah. 1:2 Ewen manyurat tumon kare taloh je inyarita akan itah awi kare oloh je mitee kabuat kare taloh je manjadi te bara tamparae, tuntang limbah te manyiar barita te. 1:3 Limbah aku jari manaliti toto-toto taloh samandiai te bara tamparae, maka aku mangkeme buah kea manyurat ije karinting laporan akan Tuan. 1:4 Aku mawie kalote mangat Tuan katawan taloh je iajar akan Tuan te toto bujur. 1:5 Katika Herodes manjadi raja hong tanah Yudea, aton ije biti imam bagare Sakaria, ie te bara baris kare imam Abia. Kabalie bagare Elisabet, mahin utus imam kea. 1:6 Pambelom due biti oloh ije kabali te puna mampahanjak atei Hatalla. Ewen due te puna mamenda kakare parentah tuntang hukum ain Tuhan hapan sakalepah angat ateie. 1:7 Ewen te jaton anak awi Elisabet te tamanang tuntang ewen due te kea uras jari bakas. 1:8 Hong sinde andau, metoh oloh bara baris Abia mandino gilir malalus gawi huang Human Tuhan, maka Sakaria malalus gawin imam hai te intu taharep Hatalla. 1:9 Tumon bahut, limbah kare imam te batenong, maka Sakaria inunjuk uka tame akan huang Human Tuhan tuntang mamapui garo. 1:10 Pandehan upacara mapui garo te iawi, oloh are balakudoa intu luar. 1:11 Hong katika te malekat Tuhan mamparahan arepe akan Sakaria. Malekat te mendeng hila gantaun meja eka mapui garo te. 1:12 Katika Sakaria mite malekat te, ie gogop hayak mikeh. 1:13 Tapi malekat te hamauh, "Ela mikeh, Sakaria! Hatalla jari mahining lakudoam. Kabalim Elisabet kareh manak hatue. Ikau musti manampa arae Yohanes. 1:14 Ikau kareh akan paham hanjak tuntang are oloh kareh hanja-hanjak amon anak te kareh inakan! 1:15 Ie kareh manjadi oloh hai hong tampayah Tuhan, tuntang ie dia handak mihop anggur atawa taloh ihop je tau mambusau. Bara katikae inakan ie basuang Roh Hatalla. 1:16 Are oloh Israel kareh ingagalae haluli talih Hatalla, Tuhan ewen. 1:17 Ie kareh manjadi sarohan Tuhan je abas tuntang kuasa kilau Elia. Ie kareh mandamai bapa dengan anake, tuntang oloh je baketep kareh ingagalae haluli talih jalan tirok atei je bujur. Kalote ie manatap ije ungkup je jari tatap akan Tuhan." 1:18 "Kilen ampie aku katawan je hal toh akan manjadi?" koan Sakaria misek malekat te. "Aku jari bakas, tuntang kabalingku mahin bakas kea." 1:19 Malekat te tombah, "Aku toh Gabriel. Aku rewar ain Hatalla tuntang ie kea je manyoho aku manyampai barita bahalap toh akam. 1:20 Taloh je insanangku, kareh manjadi hong katikae. Tapi awi ikau dia percaya, ikau kareh dia tau hakotak; ikau kareh bisu sampai taloh je insanangku te manjadi." 1:21 Pandehan te, kare oloh mentai Sakaria. Ewen hengan, mbuhen ie kalote katatahie huang Human Tuhan. 1:22 Tuntang metoh ie balua, ie dia tau hakotak dengan ewen. Ie tarus manenga tanda hapan lengee ih, tuntang tetep bisu. Maka kare oloh mahin katawan je ie te jari mite taloh en-en huang Human Tuhan. 1:23 Limbah lepah kare gawie huang Human Tuhan, Sakaria palus buli akan huma. 1:24 Dia pire katatahie limbah te, kabalie Elisabet te batihi, palus mangurung arepe huang huma lime bulan katatahie. 1:25 Ie hamauh, "Kajariae, Tuhan mandohop aku tuntang mampuas kare kapapangku." 1:26 Katika Elisabet jari batihi jahawen bulan, Hatalla manyoho malekat Gabriel haguet akan Nasaret, ije lewu hong daerah Galilea. 1:27 Gabriel inyoho manalih ije biti oloh bawi bujang je arae Maria. Bawi bujang te jari batunangan dengan oloh je arae Yosep, panakan raja Dawid. 1:28 Malekat dumah manalih Maria tuntang hamauh, "Salamat, ikau je imberkat Tuhan! Tuhan mampahayak ikau!" 1:29 Awi mahining auh malekat te, Maria tarewen sampai ie ise-isek huang ateie en riman auh tabe te. 1:30 Maka malekat te hamauh dengae, "Ela mikeh Maria, basa Hatalla mangilak ikau huang ateie. 1:31 Ikau kareh akan batihi tuntang manak ije biti anak je musti ikau manampa arae Yesus. 1:32 Ie kareh manjadi hai tuntang akan inyewut Anak Hatalla Bara Ngambo. Tuhan Hatalla kareh manjadian ie Raja kilau Raja Dawid, tato hiange. 1:33 Tuntang ie kareh marentah kilau Raja hunjun panakan Yakob sampai katatahie. Karajaan ayue te dia tau lepah." 1:34 "Tapi aku magon bujang," koan Maria dengan malekat te, "kilen ampie hal te tau manjadi?" 1:35 Malekat te tombah, "Roh Hatalla kareh dumah manalih ikau, tuntang kuasan Hatalla kareh handak mangalambo ikau. Tagal te maka anak je akan inakan te kareh inyewut Barasih, Anak Hatalla. 1:36 Ingat: Elisabet paharim te jari batihi jahawen bulan, aloh ie jari bakas tuntang inyewut oloh ie tamanang. 1:37 Basa akan Hatalla jaton taloh je mastahel." 1:38 Palus Maria hamauh, "Aku toh rewar Tuhan; keleh kare taloh te manjadi tumon je jari insanan nah." Palus malekat te haguet malihi Maria. 1:39 Bajeleng limbah te, Maria haguet akan ije lewu hong Yudea intu eka je habukit. 1:40 Ie haguet akan human Sakaria, tuntang metoh ie tame, ie manabe Elisabet. 1:41 Tuntang sana Elisabet mahining taben Maria, anak je huang kanain Elisabet te hagerek. Maka Elisabet inguasa awi Roh Hatalla, 1:42 palus hamauh hai auhe, "Ikau je paham imberkat bara marak kare oloh bawi! Imberkat kea anak je inakan awim te! 1:43 Eweh kea aku toh sampai indu Tuhan dumah manalih aku? 1:44 Sana aku mahining auh tabem, anak je huang kanaingku, hagerek tagal kahanjake. 1:45 Salamat ikau awi ikau percaya taloh je insanan Tuhan akam te kareh manjadi!" 1:46 Maria hamauh, "Ateiku manara Tuhan, 1:47 tuntang hambaruangku paham hanjak basa Hatalla Panyalamatku. 1:48 Ie mingat aku, reware je randah! Nampara bara toh kare utus oloh manyewut salamat akangku. 1:49 Karana Hatalla je paham kuasae malalus kare taloh hai akangku. Barasih aran ayue. 1:50 Turon-manuron Tuhan mina asie akan oloh je mikeh dengae. 1:51 Hapan lengee je kuasa toto ie mamisah-darai oloh balecak, tuntang mangacau kare rencana ewen. 1:52 Kare raja inipas bara padadusae tuntang oloh randah inggatange. 1:53 Oloh balau' imbesohe hapan kare kahalap, oloh tatau iharake buli buang. 1:54 Ie mandohop Israel reware te, manumon janji je iawie dengan tato hiang itah. 1:55 Tuhan dia kalapean janjie, Ateie paham tau dengan Abraham tuntang kare panakan ayue sampai katatahie." 1:56 Kurang labih telo bulan katatahie Maria melai dengan Elisabet, harue ie buli akan humae. 1:57 Maka katikae sampai akan Elisabet uka luas. Ie manak ije biti anak hatue. 1:58 Kare oloh silan humae tuntang kare tundah paharie mahining auh kapaham kataun Tuhan dengan Elisabet, tuntang ewen mahin omba hanjak dengae. 1:59 Metoh awau te umure hanya andau, ewen dumah manyunat ie. Ewen handak manampa aran awau te Sakaria manumon aran bapae, 1:60 tapi indue hamauh, "Ela! Ie musti inampa arae Yohanes." 1:61 "Jaton ije biti kare tundah paharim je kalote arae," koan ewen dengae. 1:62 Balalu ewen mahapan tanda, misek dengan Sakaria eweh aran je handak inenga akan anake te. 1:63 Sakaria balaku ije batu tulis palus manyurat, "arae Yohanes." Ewen uras hengan. 1:64 Hong katika te Sakaria tau hakotak tinai tuntang manara Hatalla. 1:65 Kare oloh silan humae uras mikeh, tuntang barita te tayap akan hapus daerah Yudea je habukit. 1:66 Uras oloh je mahining hal te, misek huang ateie, "Jadi en kah anak te kareh?" Basa Tuhan mampahayak ie. 1:67 Sakaria, bapa anak te inguasa awi Roh Hatalla sampai ie mansanan peteh bara Tuhan. Ie hamauh, 1:68 "Keleh itah manara Tuhan, Hatallan utus Israel! Ie jari dumah mandohop ungkup ayue tuntang maliwus ewen. 1:69 Ie manenga akan itah panyalamat je paham kaabase panakan Dawid, reware te. 1:70 Jaman horan mahalau kare nabi je iintihe, Tuhan jari manenga janjie 1:71 uka manyalamat itah bara musoh itah tuntang bara kuasan kare oloh je manyingi itah. 1:72 Hapae mamparahan kataun ateie dengan tato hiang itah, janjie je barasih te ilaluse. 1:73-74 Ie hamauh dengan Abraham bapa itah, tuntang hajanji uka manyalamat itah bara musoh itah, mangat itah lapas bara kikeh manempo ie 1:75 harajur manempo ie tuntang manyanang ateie hapus umur itah. 1:76 Ikau o, anakku, akan inyewut nabi ain Hatalla je huang ngambo. Ikau inyoho helo hila baun Tuhan uka marintis jalan akae, 1:77 uka mambarita akan ungkup ayue je ewen inyalamat, awi Hatalla jari mampun kare dosan ewen. 1:78 Tuhan itah bahalap ateie hayak panyayang; awi ie manyalamat itah ie dumah. Kilau matanandau lembut hong andau sawah, 1:79 kalote kea ie manenga kalawae akan kakare oloh je belom huang kakaput tuntang huang kikeh. Ie mangagalan itah huang jalan je manintu akan kasanang." 1:80 Anak Sakaria te sasar hai tuntang sasar abas huang roh. Ie melai hong padang pasir, sampai dumah katikae ie mangarinah arepe akan utus Israel.
2:1 Hong katika te kaisar Agustus marentah uka salepah warga negara Karajaan Roma mandaptar arepe akan sensus. 2:2 Sensus je solake toh ilalus metoh Kirenius manjadi gubernur hong daerah Siria. 2:3 Kare oloh hong katika te uras haguet mandaptar arepe akan lewu ayu-ayue. 2:4 Yosep kea mahin haguet bara Nasaret hong Galilea, akan Betlehem hong Yudea, eka Raja Dawid inakan; basa Yosep te panakan Dawid. 2:5 Yosep mandaptar arepe haya-hayak dengan Maria tunangae te, je metoh te batihi. 2:6 Metoh ewen hong Betlehem maka katikae jari sampai akan Maria uka luas. 2:7 Ie manak ije biti anak hatue, iete anak je tambakase. Anak te imbungkuse hapan benang palus iingkese huang dulang; awi ewen jaton dinon huma eka baramalem. 2:8 Hong alem te aton kare sakatik je metohe manjaga kare tabirie hong padang oru intu daerah te. 2:9 Malekat Tuhan salenga mamparahan arepe akan ewen, tuntang kahain Tuhan paha-pahai manyingah ewen, tuntang ewen paham mikeh. 2:10 Tapi malekat te hamauh, "Ela mikeh! Basa aku dumah mimbit barita bahalap akan keton -- barita je paham mampahanjak oloh handiai. 2:11 Andau toh hong lewun Dawid jari inakan Raja Panyalamat keton iete Kristus Tuhan. 2:12 Jetoh ie tandae: keton kareh sondau ije anak awau imbungkus hapan benang, tuntang impeter huang ije dulang." 2:13 Malekat te salenga impahayak awi are malekat beken, je manara Hatalla. Ewen hamauh, 2:14 "Tara akan Hatalla intu langit hong ngambo! tuntang hunjun petak, kasanang akan olon je manyanang atei Tuhan!" 2:15 Limbah kare malekat malihi ewen tuntang haluli akan sorga, kare sakatik te hamauh sama arepe, "Keleh itah akan Betlehem tuntang mite taloh je manjadi te, je insanan Tuhan akan itah." 2:16 Ewen bajeleng haguet, palus manyondau Maria tuntang Yosep, tuntang awau je metoh menter huang dulang. 2:17 Katika kare sakatik te mite awau te, ewen manyarita taloh je insanan kare malekat tahiu awau te. 2:18 Tuntang oloh handiai hengan mahining saritan kare sakatik te. 2:19 Tapi Maria mingkes taloh handiai te huang ateie hayak mangumange. 2:20 Kare sakatik te haluli akan padang oru sambil manara tuntang mampahai Hatalla, tagal taloh handiai je jari ihining tuntang inampayah ewen, hakabuah toto kilau je insanan malekat. 2:21 Limbah umur hanya andau, anak te inyunat. Tuntang ewen manampa arae Yesus, aran je inenga malekat akae helo bara ie inihi indue. 2:22 Maka katikae sampai akan Yosep tuntang Maria uka malalus hadat mamparasih manumon hukum Moses. Jadi, ewen mimbit anak te akan Yerusalem mangat inyarah akan Tuhan. 2:23 Basa huang Hukum Tuhan tarasurat kalotoh, "Gagenep anak hatue je tambakase, musti inyarah akan Tuhan." 2:24 Ewen kea mado maluput parapah iete ije pasang burung kuku atawa ije pasang burung dara tabela, kilau je iatoh huang Hukum Tuhan. 2:25 Hong katika te intu Yerusalem aton ije biti oloh je arae Simeon. Ie te oloh bahalap, je mikeh dengan Hatalla tuntang kanjerae mentai katikae Hatalla manyalamat Israel. Roh Hatalla mampahayak ie, 2:26 tuntang roh Hatalla jari mansanan akae, je ie dia akan matei helo bara mite Raja Panyalamat je injanji Tuhan. 2:27 Impahayak awi Roh Hatalla, Simeon tame akan huang Human Tuhan. Hong katika te Yosep tuntang Maria mimbit Yesus, anak je magon korik te tame uka malalus upacara je irentah hukum agama. 2:28 Maka Simeon manduan anak te tuntang mangkipite, palus manara Hatalla, 2:29 "Toh o Tuhan ikau jari malalus janjim Keleh rewarm toh mahutos dengan kasanang. 2:30 Basa hapan matangku kabuat aku jari mite Panyalamat je bara ikau. 2:31 Panyalamat je jari inatapm akan kare utus oloh: 2:32 Kilau kalawa je mampalawa jalan akan kare utus oloh beken, uka dumah manalih ikau; iete kalawa je mimbit hormat akan utusm Israel." 2:33 Bapa tuntang indu anak te hengan mahining taloh je inyewut Simeon tahiu anak ewen. 2:34 Simeon mamberkat ewen tuntang hakotak dengan Maria, indu anak te, "Anak toh jari iintih awi Hatalla uka mambinasa tuntang uka manyalamat are oloh Israel. Ie kareh manjadi tanda bara Hatalla, je kareh ilawan awi are oloh, 2:35 tuntang awie kalote maka gitan kare taloh huang atei ewen. Kapehen atei kareh manusok ateim kilau padang je banyihi." 2:36 Intu hete aton kea ije biti nabi bawi je bakas toto. Arae te Hana, anak Panuel, bara suku Aser. Limbah uju nyelo kawin, 2:37 Hana manjadi balo, tuntang toh umure hanya puluh epat nyelo. Dia puji ie malihi Human Tuhan. Handau-hamalem ie sombayang akan Hatalla intu hete hapan lakudoa tuntang puasa. 2:38 Pas hong katika te kea ie dumah, palus manara Hatalla tuntang hakotak tahiu anak te dengan kakare oloh je mentai katikae Hatalla mempas Yerusalem. 2:39 Limbah Yosep tuntang Maria malalus taloh handiai manumon Hukum Tuhan, ewen buli akan Nasaret hong Galilea. 2:40 Anak te sasar hai tuntang abas. Ie paham pintar harati tuntang inyayang toto awi Hatalla. 2:41 Genep nyelo oloh bakas ain Yesus haguet akan Yerusalem uka maraya Andau Hai Paska. 2:42 Tuntang katika Yesus umur duewalas nyelo, ewen haguet akan pesta te kilau bahut. 2:43 Limbah pesta te ewen buli, tapi Yesus, anak te, magon melai hong Yerusalem tuntang jaton ingatawan awi indu bapae. 2:44 Ewen manyangka ie omba huang rombongan. Limbah mananjong janda-jandau, harue ewen manggau ie huang marak kare tundah paharie tuntang kare kapatuh ewen. 2:45 Tapi ewen jaton sondau ie, jadi ewen haluli akan Yerusalem manggau ie. 2:46 Limbah telo andau manggau, ewen sondau ie huang Human Tuhan. Ie metohe mondok mahining kare guru agama tuntang mawi kare paisek. 2:47 Kakare oloh je mahining ie uras hengan tagal kare auh tombahe je cerdas te. 2:48 Oloh bakase mahin hengan mite ie. Indue hamauh dengae, "Nak, mbuhen ikau mawie kalotoh dengan ikei? Kue bapam gogop manggau ikau!" 2:49 Yesus tombah, "Mbuhen bapa dengan umai manggau aku? En bapa dengan umai dia katawan je aku musti aton intu huang human Bapaku?" 2:50 Tapi ewen dia harati auh tombah Yesus. 2:51 Limbah te Yesus buli mampahayak ewen akan Nasaret, tuntang manumon auh ewen. Hal te samandiai uras iingkes awi indue huang ateie. 2:52 Yesus sasar mandahang kahaie tuntang sasar mandahang kaharatie, hayak ie inyayang awi Hatalla tuntang awi olon.
3:1 Hong nyelo kalime walas pamarentahan Kaisar Tiberius, Pontius Pilatus manjadi gubernur hong Yudea, tuntang Herodes marentah hong Galilea. Pilippus, paharin Herodes marentah hong wilayah Iturea tuntang Trakonitis, tapi Lisanias marentah hong Abilene. 3:2 Kare oloh je manjadi imam hai iete Hanas tuntang Kayapas. Hong nyelo te Hatalla hamauh dengan Yohanes, anak Sakaria, hong padang pasir. 3:3 Maka Yohanes haguet akan hete-hete hong hapus daerah Sungei Yordan tuntang manyampai barita bara Hatalla. Yohanes mantehau, "Hobah keton bara kare dosan keton, tuntang keton musti impandoi, mangat Hatalla mampun keton." 3:4 Hal te hakabuah dengan auh je tarasurat huang surat Nabi Yesaya: "Aton oloh je teha-tehau intu padang pasir, 'Keleh manatap jalan akan Tuhan, keleh mamparata jalan akae. 3:5 Gagenep datah kareh inimbok, gagenep bukit tuntang lungkoh imparata. Jalan je bolak-belok keleh imbujur tuntang jalan je kumbang-kembut imparata. 3:6 Kare oloh hong hapus kalunen manampayah Hatalla manyalamat olon!' " 3:7 Are oloh dumah manalih Yohanes mangat impandoi. Yohanes hamauh dengan ewen, "Keton toh oloh papa! Eweh je mansanan akan keton je keton tau luput bara hukuman Hatalla je rahian? 3:8 Parahan hapan gawin keton je keton jari hobah bara kare dosan keton! Ela nampara manyewut je Abraham te tato-hiang keton. Ingat: Bara kare batu toh kea Hatalla tau manampa panakan Abraham! 3:9 Kapak jari tatap hapan maneweng batang kayu sampai akan kare parokate. Gagenep upon kayu je dia mampalembut bua je bahalap kareh ineweng tuntang inganan akan apui." 3:10 "Jadi, en taloh je patut ikei mawie?" koan kare oloh misek dengan Yohanes. 3:11 Yohanes tombah, "Oloh je aton due bajue, musti manenga ije akan oloh je jaton bajue; tuntang oloh je aton panginae, musti mambagie." 3:12 Kare panagih pajak kea dumah manalih Yohanes mangat impandoi. Ewen misek, "Bapa Guru, en taloh je musti ikei mawie?" Yohanes tombah, 3:13 "Ela managih malabien bara je jari inukas." 3:14 Aton kea prajurit je misek, "Kilen ampie tahiu ikei? En taloh je musti ikei malaluse?" Yohanes tombah, "Ela mimes eweh bewei tuntang ela marampas duit hapan kare auh dawa je dia toto. Keleh keton mangkeme sukup dengan gajih keton!" 3:15 Hong katika te kare oloh nampara misek, en Yohanes te Raja Panyalamat je jari tahi ientai. 3:16 Jete sababe Yohanes hamauh dengan ewen, "Aku mampandoi keton hapan danum, tapi kareh aton oloh je dumah labih hai bara aku. Mengkak talin sapatue ih aku toh mahin dia patut. Ie kareh mampandoi keton hapan Roh Hatalla tuntang apui. 3:17 Intu lengee aton nyiru je hapae mangiap gandume sampai barasih. Gandum kareh imumponge huang lepau, tapi kare apise kareh inusul hong apui je jaton tarabelep!" 3:18 Kalote Yohanes manasehat kare oloh hapan kare macam cara, hong katika ie mansanan Barita Bahalap. 3:19 Tapi Herodes, oloh je mimbing kuasa hong Galilea, iningak awi Yohanes tagal pangawie dengan Herodias, sawan paharie, tuntang tahiu kare gawi papa beken je jari iawie. 3:20 Tapi Herodes sasa-sasar mandahang haream kapapae awi ie manamean Yohanes akan huang penjara. 3:21 Limbah kakare oloh te impandoi, Yesus impandoi kea. Tuntang metoh ie pandehan balakudoa, langit buap, 3:22 tuntang Roh Hatalla mohon akan hunjun ie kilau burung dara. Palus tarahining auh Hatalla mansanan, "Ikau toh Anakku je inyintaku. Ikau je manyanang ateiku." 3:23 Hong katika Yesus nampara bagawi, umure aton kira-kira telo puluh nyelo. Manumon tirok oloh, ie te anak Yosep, anak Eli, 3:24 anak Matat, anak Lewi, anak Malki, anak Yanai, anak Yosep, 3:25 anak Matatias, anak Amos, anak Naum, anak Esli, anak Naggai, 3:26 anak Maat, anak Matika, anak Simei, anak Yosek, anak Yoda, 3:27 anak Yohanan, anak Resa, anak Serubabel, anak Sealtiel, anak Neri, 3:28 anak Malki, anak Adi, anak Kosam, anak Elmadam, anak Er, 3:29 anak Yosus, anak Elieser, anak Yorim, anak Matat, anak Lewi, 3:30 anak Simeon, anak Yuda, anak Yosep, anak Yonam, anak Elyakim, 3:31 anak Melea, anak Mina, anak Matata, anak Natan, anak Dawid, 3:32 anak Isai, anak Obed, anak Boas, anak Salmon, anak Nahason, 3:33 anak Aminadab, anak Admin, anak Arni, anak Hesron, anak Peres, anak Yuda, 3:34 anak Yakob, anak Isaak, anak Abraham, anak Terah, anak Nahor, 3:35 anak Serug, anak Rehu, anak Peleg, anak Eber, anak Salmon, 3:36 anak Kenan, anak Arpakhsad, anak Sem, anak Noah, anak Lameh, 3:37 anak Metusalah, anak Henoh, anak Yared, anak Mahalaleel, anak Kainan, 3:38 anak Enos, anak Set, anak Adam, anak Hatalla.
4:1 Yesus inguasa awi Roh Hatalla metoh ie malihi Sungei Yordan. Roh Hatalla mangagalan ie akan padang pasir. 4:2 Intu hete ie iningkes awi setan epat puluh andau katatahie. Katahin te, ie jaton kuman taloh en-en. Kajariae ie mangkeme balau'. 4:3 Setan hamauh dengae, "Ikau toh Anak Hatalla kan? Jadi, soho ih batu toh manjadi rote." 4:4 Yesus tombah, "Hong Surat Barasih aton tarasurat, 'Oloh dia tau belom awi rote bewei.' " 4:5 Palus setan mimbit Yesus akan eka je gantong, tuntang huang ije kapijep mate setan mamparahan akae salepah karajaan huang kalunen. 4:6 "Kakare kuasa tuntang panatau toh akan inyarahku akam," koan setan dengan Yesus, "basa taloh handiai te jari inenga akangku tuntang aku tau manengae akan eweh bewei je aku rajin manengae. 4:7 Taloh samandiai te kareh manjadi ayum, amon ikau sontop manyembah aku." 4:8 Yesus tombah, "Huang Surat Barasih aton tarasurat, 'Sembah Tuhan Hatallam tuntang manempo ie bewei.' " 4:9 Palus setan mimbit Yesus akan Yerusalem tuntang mingkes ie intu hunjun babungan Human Tuhan tuntang hamauh dengae, "Ikau Anak Hatalla, kan? Jadi, sewu ih bara hetoh. 4:10 Basa huang Surat Barasih aton tarasurat, 'Hatalla kareh manyoho kare malekat ayue mahaga ikau bua-buah.' 4:11 Tuntang kea, 'Kare malekat kareh manyambut ikau hapan lengee, mangat paim mahin jaton tatigong batu.' " 4:12 Yesus tombah, "Huang Surat Barasih aton inyurat, 'Ela maningkes Tuhan, Hatallam.' " 4:13 Limbah setan jari lepah maningkes Yesus mahapan kare macam cara, ie malihi Yesus tuntang mentai katika je bahalap. 4:14 Limbah te Yesus haluli akan Galilea tuntang ie inguasa awi Roh Hatalla. Kabar tahiu ie tayap akan hapus daerah te. 4:15 Ie majar hong kare huma sombayang, tuntang oloh uras manara ie. 4:16 Yesus haguet tinai akan Nasaret, ekae metoh tabela sampai ie hai. Hong andau Sabat, tumon bahut ie haguet akan huma sombayang. Ie mendeng mangat mambasa Surat Barasih, 4:17 tuntang akae inenga surat Nabi Yesaya. Ie muap balon surat te, palus sondaue ayat kalotoh, 4:18 "Roh Tuhan aton intu aku, basa ie jari mangkat aku uka mansanan Barita Bahalap akan oloh je belom susah. Ie manyoho aku mangat mansanan kaliwus akan oloh je buah tawan tuntang karigas akan oloh babute; uka mambebas oloh je inindih 4:19 tuntang mambarita pandumah andau ain Tuhan manyalamat ungkup ayue." 4:20 Yesus mambalon surat te haluli, tuntang maliae akan petugas, palus mondok. Kakare oloh huang huma sombayang te uras manampayah ie. 4:21 Tuntang Yesus manampara hakotak dengan ewen, kalotoh, "Kare ayat Surat Barasih toh, andau toh jari inggenep katika keton mahininge." 4:22 Kare auh je inyewute bahalap toto, sampai ewen jungun tuntang omba auhe. Ewen hamauh, "En dia ie toh anak Yosep?" 4:23 Maka Yesus hamauh dengan ewen, "Pasti keton kareh mahapan paribasa toh mawi aku, 'Dokter, pakeleh arepm kabuat ih. Taloh heran je ihining ikei iawim hong Kapernaum, keleh ikau mawie kea hong lewu human ayum.' " 4:24 Yesus manuntong auhe, "Ingat, jaton nabi je ihormat hong lewu human ayue kabuat. 4:25 Tapi hining toh: hong jaman Elia, metoh ujan jaton mohon telo nyelo katatahie, palus lembut lau je paham hong hapus petak danum. Hong katika te kare balo hong Israel are. 4:26 Aloh kalote, Hatalla dia manyoho Elia manalih aloh ije bara kare balo te tapi baya manalih ije biti balo hong Sarpat intu daerah Sidon. 4:27 Kalote kea hong jaman nabi Elisa are oloh hong Israel buah panyakit kerai je baka ike-ikeh, tapi ije biti mahin jaton bara ewen te je impakeleh, beken bara Naaman oloh Siria te." 4:28 Kakare oloh huang huma sombayang te balait toto metoh mahining hal te. 4:29 Ewen mendeng palus maharak Yesus balua lewu, tuntang mimbit ie akan biling bukit, eka lewun ewen imangun. Ewen handak mambaring ie akan penda tiwing. 4:30 Tapi Yesus manselat oloh are te palus haguet. 4:31 Limbah te Yesus haguet akan Kapernaum hong Galilea. Intu hete ie majar kare oloh hong andau Sabat. 4:32 Ewen jungun mite ampin carae majar, basa ie hakotak hapan kuasae. 4:33 Intu hete hong huma sombayang aton ije biti oloh je irasuk setan. Oloh te mangkariak, 4:34 "O Yesus, oloh Nasaret, ikau handak mawi en akan ikei? Ikau dumah mangat mambinasa ikei? Aku katawan eweh ikau: ikau Sarohan je barasih bara Hatalla!" 4:35 "Suni!" koan Yesus malait setan te. "Balua bara oloh toh!" Palus setan te mahampas oloh te intu taharep ewen handiai, limbah te balua bara oloh te tuntang dia mangapehe ie. 4:36 Kakare oloh hengan, tuntang hamauh sama arepe, "Dia laluen kare auhe te. Hapan kuasa tuntang kaabas, ie manyoho kare roh papa balua, tuntang ewen balua kea!" 4:37 Maka barita tahiu Yesus te tayap akan hapus wilayah te. 4:38 Yesus malihi huma sombayang te, palus haguet akan human Simon. Empo Simon je bawi metoh badarem, tuntang kare oloh mansanan hal te akan Yesus. 4:39 Yesus manalih eka ibu te batiroh, palus maharak darem te. Darem te nihau, tuntang empo Simon te balalu hingkat tuntang mandohop ewen. 4:40 Metoh matanandau belep, kakare oloh mimbit kare paharie je buah maca-macam ampin panyakit, manalih Yesus. Yesus mingkes lengee hunjun genep bitin ewen tuntang mampakeleh ewen. 4:41 Kare setan mahin balua bara kare oloh, sambil mangkariak, "Ikau toh anak Hatalla!" Tapi Yesus malait ewen tuntang dia manyoho ewen hakotak, basa ewen katawan je ie te Raja Panyalamat. 4:42 Metoh matanandau nampara lembut, Yesus malihi lewu te palus haguet akan eka je benyem. Kare oloh nampara manggau ie, dan katika ewen sondau ie, ewen manggau jalan uka ie ela malihi ewen. 4:43 Tapi Yesus hamauh, "Barita Bahalap tahiu kilen ampie Hatalla marentah musti imbaritaku kea hong kare lewu beken, basa awi te kea Hatalla manyoho aku akan kalunen." 4:44 Tagal te Yesus bahotbah intu kare huma sombayang hong hapus tanah Yudea.
5:1 Hong sinde katika, Yesus mendeng intu saran danau Genesaret. Are oloh hasengkel mangat mahining barita bara Hatalla. 5:2 Yesus mite due arut hong saran danau te; kare oloh palauk jari mohon bara kare arut te tuntang kanjeran ewen marasih jalae. 5:3 Yesus lumpat akan huang ije bara kare arut te, iete arut ain Simon, palus manyoho Simon manjuju arute te mangejaue isut bara saran. Yesus mondok huang arut te tuntang majar oloh are. 5:4 Limbah jari lepah majar, ie hamauh dengan Simon, "Besei arutm akan eka je handalem, tuntang birik jalam mangat dinon lauk." 5:5 "Bapa Guru," koan Simon tombah, "ije ale-alem ikei bagawi manyangite, tapi jaton dinon en-en! Tapi awi Bapa manyoho, ayo ih; aku handak mambirik jala tinai." 5:6 Limbah ewen malaluse, ewen dinon are toto lauk sampai jalan ewen nampara barabit. 5:7 Awi te ewen balaku dohop dengan kare kawal ewen huang arut beken. Kare kawal ewen te dumah palus ewen sama-sama manyuang kadadue arut te kontep dengan lauk sampai kare arut te handak leteng. 5:8 Metoh Simon mite jete, ie sontop manyembah intu taharep Yesus, palus hamauh, "Lihi aku Tuhan! Awi aku oloh badosa!" 5:9 Simon tuntang kare oloh je omba ie hengan mite kare lauk je dinon ewen. 5:10 Kalote kea kare kawal Simon, iete Yakobus tuntang Yohanes, ewen te anak Sebedeus. Yesus hamauh dengan Simon, "Ela mikeh! Nampara bara toh ikau kareh manjadi panjala olon." 5:11 Simon tuntang kare kawale manjijit kare arut te akan saran danum limbah te malihi kare taloh handiai te, palus omba Yesus. 5:12 Hong sinde andau, Yesus aton huang ije lewu. Hong hete aton ije biti oloh hatue je hapus bitie kontep awi panyakit kerai je baka ike-ikeh. Katika ie mite Yesus, ie sontop manyembah intu taharepe sambil balaku, "Pa, amon Bapa handak, Bapa olih mampakeleh aku!" 5:13 Yesus mangarimai oloh te sambil hamauh, "Aku handak, keleh ikau!". Hemben te kea panyakite te nihau. 5:14 Palus Yesus mangahana oloh te manyarita hal te akan eweh bewei, koae, "Haguet talih imam, tuntang laku dengae uka mamasti ikau jari keleh. Palus lius mbayar parapahm kilau je irentah awi Moses, kilau bukti akan kare oloh je ikau toh toto-toto jari keleh." 5:15 Tapi barita tahiu Yesus sasar tayap akan hete-hete, tuntang are oloh dumah uka mahining auhe tuntang mangat panyakit ewen impakeleh. 5:16 Limbah te Yesus haguet balakudoa akan eka je suni. 5:17 Hong sinde andau metoh Yesus majar, aton pire-pire oloh Parisi tuntang kare guru agama mondok hete. Ewen dumah bara Yerusalem, tuntang bara kare lewu hong Galilea tuntang Yudea. Kuasan Tuhan aton huang Yesus hapan mampakeleh kare oloh haban. 5:18 Hong katika te pire-pire oloh dumah mimbit ije biti oloh lumpuh je menter huang ekae batiroh. Ewen manggau akal uka mimbit oloh te akan huang huma mangat tau mingkes ie intu hila baun Yesus. 5:19 Tapi awi oloh lalau are hong hete, ewen dia olih mimbit ie tame. Awi te ewen mimbit ie mandai' hunjun sapau huma. Palus ewen mungkar bindang sapau, tuntang mampamohon ie haya-hayak dengan ekae batiroh intu taharep Yesus hong bentok oloh are te. 5:20 Katika Yesus mite kalote ampin kahain kapercayan ewen, ie hamauh dengan oloh te, "Pahari, dosam jari iampun." 5:21 Kare guru agama tuntang kare oloh Parisi nampara hamauh sama arepe, "Eweh oloh toh je bahanyi mahina Hatalla? Eweh je tau mampun dosa beken bara Hatalla kabuat?" 5:22 Yesus katawan paisek ewen. Jadi ie hamauh, "Mbuhen keton hisek kalote huang atei keton? 5:23 Je kueh labih mangat, manyewut, 'Dosam jari iampun', atawa manyewut, 'Hingkat tuntang mananjong!'? 5:24 Tapi toh aku handak mambukti akan keton je intu hunjun petak toh Anak Olon aton kuasae uka mampun dosa." Palus Yesus hamauh dengan oloh je lumpuh te, "Hingkat, gatang ekam batiroh, tuntang buli ih!" 5:25 Bajeleng oloh te hingkat intu taharep ewen samandiai, palus manggatang ekae batiroh, tuntang buli sambil manara Hatalla. 5:26 Ewen samandiai jungun toto palus manara Hatalla. Tuntang marak angate mikeh, ewen hamauh, "Baka hera-heran toto kajadian je inyaksi itah andau toh!" 5:27 Limbah te Yesus balua tuntang mite ije biti panagih pajak bagare Lewi, metoh mondok huang kantore. Yesus hamauh dengae, "Ayo omba aku." 5:28 Lewi mendeng tuntang malihi taloh handiai, palus omba Yesus. 5:29 Limbah te Lewi mawi pesta huang huma akan Yesus. Are panagih pajak tuntang kare oloh awang beken omba kuman haya-hayak dengan ewen. 5:30 Pire-pire oloh Parisi tuntang kare guru agama mangkeme dia sanang, palus hamauh dengan kare murid Yesus, "Mbuhen keton kuman mihop dengan kare panagih pajak tuntang kare oloh je dia bahalap?" 5:31 Yesus tombah, "Oloh je barigas dia perlu dokter; baya oloh je haban ih. 5:32 Aku dumah dia baya mangat mantehau kare oloh je manyewut arepe bahalap, tapi kare oloh je badosa mangat ewen hobah bara kare dosan ewen." 5:33 Kare oloh hamauh dengan Yesus, "Murid Yohanes tuntang murid oloh Parisi kinjap puasa tuntang balakudoa. Tapi kare muridm kuman mihop." 5:34 Yesus tombah, "En keton tau manyoho kare oloh undangan puasa metoh pesta kawin, katahin panganten hatue magon aton hinje ewen? Pasti dia! 5:35 Tapi kareh akan sampai katikae panganten hatue te induan bara ewen. Hong katika te ewen kareh puasa." 5:36 Palus Yesus manyarita akan ewen paribasa toh, "Jaton oloh manumpang baju je kupit mahapan tantanan benang bara baju je taheta. Basa jete marabit baju je taheta te. Tuntang tinai benang taheta je ihapan manumpang te dia cocok dengan baju je kupit. 5:37 Kalote kea oloh jaton manyuang anggur je taheta akan huang kambut upak meto je usang, karana anggur taheta te kareh mawi kambut te bapusit. Maka anggur te mananya, tuntang kambut te rusak. 5:38 Anggur je taheta musti inyuang akan huang kambut je taheta kea. 5:39 Kalote kea oloh jaton je handak mihop anggur taheta limbah mihop anggur je usang. 'Anggur je usang te mangat,' koae."
6:1 Sinde hong andau Sabat, katika Yesus mahalau ije tana gandum, kare muride mamutik gandum. Ewen mihik gandum te hapan lengee, palus kumae. 6:2 Pire-pire oloh Parisi hamauh, "Mbuhen keton malanggar kare hukum agaman itah awi keton malalus taloh je ingahana hong andau Sabat?" 6:3 Yesus tombah, "En hindai puji keton mambasa taloh je iawi Dawid, katika ie tuntang kare oloh ayue balau'? 6:4 Ie tame akan huang Human Tuhan tuntang manduan rote je jari inyarah akan Hatalla, palus kumae. Limbah te ie manenga kea rote te akan kare oloh ayue. Padahal manumon agaman itah, baya kare imam ih je tau kuman rote te." 6:5 Palus Yesus hamauh, "Anak Olon bara kuasa mahunjun andau Sabat!" 6:6 Sinde hong andau Sabat je beken tinai, Yesus haguet majar hong huma sombayang. Hong hete aton oloh je lumpuh lengee silae. 6:7 Pire-pire guru agama tuntang oloh Parisi handak manggau kasalan Yesus mangat tau mangado ie. Jadi ewen tantai manantuani en ie mampakeleh oloh hong andau Sabat. 6:8 Tapi Yesus katawan tirok ewen. Maka ie hamauh dengan oloh je lumpuh lengee te, "Ayo, mendeng intu baun toh!" Oloh te hingkat palus mendeng hete. 6:9 Limbah te Yesus misek dengan kare oloh je aton hete, "Manumon agama, en je tau iawi hong andau Sabat? Mawi taloh bahalap atawa taloh papa? Manyalamat oloh atawa mawi calaka akan oloh?" 6:10 Yesus manampayah hakaliling manintu ewen samandiai, palus hamauh dengan oloh te, "Tajok lengem." Oloh te mantajok lengee, tuntang lengee te palus keleh. 6:11 Tapi kare guru agama tuntang kare oloh Parisi te balait toto tuntang nampara barunding tahiu taloh je tau ewen mawie malawan Yesus. 6:12 Hong katika te Yesus mandai' ije bukit mangat balakudoa. Intu hete ije ale-alem ie balakudoa intu Hatalla. 6:13 Katika andau jari balawa, ie mantehau kare muride, palus mintih duewalas biti bara ewen. Ie manyewut aran duewalas rasul te. Ewen te: 6:14 Simon (je inyewut kea Petrus), tuntang Andreas paharin Simon; Yakobus tuntang Yohanes, Pilippus tuntang Bartolomeus, 6:15 Mateus tuntang Tomas, Yakobus anak Alpeus, tuntang Simon (je inyewut Menteng), 6:16 Yudas anak Yakobus tuntang Yudas Iskariot je rahian tinai manjadi oloh durhaka. 6:17 Limbah te Yesus mohon bara bukit te haya-hayak dengan kare rasul te, palus tende tuntang mendeng hong ije eka datah. Intu hete aton are toto kare muride je beken tuntang are oloh je dumah bara hete-hete hong hapus Yudea, Yerusalem, tuntang bara lewu Tirus tuntang Sidon je hong saran laut. 6:18 Ewen dumah mangat mahining Yesus, tuntang mangat impakeleh bara kare panyakit ewen. Ewen je irasuk setan dumah kea tuntang impakeleh. 6:19 Kakare oloh manggau jalan mangat manggawil Yesus, basa aton kuasa je balua bara ie je mampakeleh ewen samandiai. 6:20 Yesus manampayah kare muride palus hamauh, "Salamat keton kare oloh je belom susah, karana keton toh anak ungkup ain Hatalla! 6:21 Salamat keton je metoh toh balau'; keton kareh imbesoh! Salamat keton je metoh toh manangis; keton kareh tatawe! 6:22 Salamat keton amon keton inyingi, inolak, ihina tuntang ingarana tagal Anak Olon! 6:23 Karana nabi hong jaman horan iawi oloh kalote kea. Amon hal te manjadi te keleh keton hanja-hanjak tuntang manari dengan kasanang, basa hai upah je inatap akan keton hong sorga. 6:24 Tapi calaka keton je metoh toh tatau; basa keton jari mangkeme kamangat! 6:25 Calaka keton je metoh toh besoh; basa keton kareh balau'! Calaka keton je metoh toh tatawe; basa keton kareh kapehe atei tuntang manangis! 6:26 Calaka keton, amon keton inara awi oloh handiai; basa kalote kea tato hiang keton manara kare nabi pananjaro jaman horan." 6:27 "Tapi akan keton je metoh toh mahining auhku, aku manenga peteh toh: sinta kare musohm, tuntang lalus gawi bahalap akan oloh je manyingi keton. 6:28 Berkat oloh je manyapa keton, tuntang balakudoa akan oloh je papa ateie dengan keton. 6:29 Amon oloh manampar pipim ije, nauhe ie manampar pipim silae tinai. Amon jubahm irampas oloh, tenga kea bajum. 6:30 Amon oloh balaku taloh en-en dengam, tenga jete akae; tuntang amon ramom irampas oloh, ela balaku jete ilian haluli. 6:31 Lalus gawim akan oloh kilau je ingahandak keton oloh malaluse akan keton. 6:32 Amon keton masi kare oloh je masi keton bewei, en rimae? Oloh badosa mahin masi dengan kare oloh je masi ewen! 6:33 Tuntang amon keton malalus gawi bahalap akan oloh je bahalap dengan keton bewei, en aton berkate akan keton? Oloh badosa mahin mawie kalote! 6:34 Tuntang amon keton manjahaman duit baya akan kare oloh je olih mambayare haluli, en aton berkate akan keton? Oloh badosa mahin tau manjahaman duit akan oloh badosa, palus managihe haluli! 6:35 Sabujure dia kalote! Keton musti mambaleh hapan asi dengan musoh keton tuntang malalus gawi bahalap akan ewen. Keton musti manjahaman, tuntang ela maharap uka mandinoe haluli. Amon kalote, maka upah keton kareh hai tuntang keton kareh manjadi anak Hatalla je hong ngambo. Basa Hatalla bahalap ateie dengan kare oloh je dia tau manarimakasih, tuntang dengan oloh je papa kea. 6:36 Keleh keton pamasi kilau Bapa keton kea pamasi!" 6:37 "Ela mahakim oloh beken mangat keton kabuat kea dia ihakim awi Hatalla. Ela mahukum oloh beken, mangat keton kabuat kea dia ihukum Hatalla. Keleh mampun oloh beken, mangat Hatalla kea mampun keton. 6:38 Tenga akan oloh beken mangat Hatalla kea manenga akan keton; keton kareh manarima panenga je are toto je jari inakar kontep akan keton. Basa takar je ihapan keton akan oloh beken, akan ihapan Hatalla kea akan keton." 6:39 Limbah te Yesus manyarita akan ewen paribasa kalotoh, "Amon oloh babute mamimpin oloh babute je beken, pasti kadaduee te manjato akan parit. 6:40 Jaton murid je labih hai bara gurue. Tapi murid je jari mahapus sakolae, kareh manjadi sama kilau gurue. 6:41 Mbuhen keton mite ije kahijir kayu korik hong matan paharim, padahal balok je huang matan keton kabuat dia keton mitee? 6:42 Kilen ampie keton tau hamauh dengan paharin keton, 'O pahari, hetoh aku mampalua hijir kayu korik bara matam te,' padahal huang matan keton kabuat aton balok je dia keton mitee? O oloh haliau! Palua helo balok je aton hong matam kabuat. Limbah te harue keton tau mite tarang tuntang tau mampalua ije kahijir kayu korik bara matan paharim." 6:43 "Batang je subur dia mampalembut bua je papa. Kalote kea batang je dia subur dia mampalembut bua je bahalap. 6:44 Gagenep batang tau ingasene bara buae. Ruwut haduhi dia tau mampalembut bua ara, tuntang bajakah haduhi dia tau mampalua bua anggur. 6:45 Oloh je bahalap mampalua kare taloh je bahalap, awi ateie hakutoh dengan kahalap. Oloh je papa mampalua kare taloh papa, awi ateie kontep kapapa. Basa taloh je inyewut awi nyame, jete je mamurai bara atei." 6:46 "Mbuhen keton mantehau aku, 'Tuhan, Tuhan,' tapi dia malalus taloh je insanangku akan keton? 6:47 Dengan eweh itah tau mananding oloh je dumah manalih aku, tuntang mahining auhku, hayak malaluse? -- Toh keleh aku mansanae akan keton --. 6:48 Ie kilau oloh je metohe mamangun huma mangalie timbe-timben, palus manampa lapike hapan batu. Hong katika aton danum soho tuntang danum sungei malambun huma te, huma te dia olih inggulak, awi jari imangun hunjun lapik je bahalap. 6:49 Tapi oloh je mahining auhku tapi dia malaluse, ie kilau oloh je mamangun huma jaton mahapan lapik. Amon danum soho malambun, huma te bajeleng baduroh; tuntang karusake te paham toto!"
7:1 Limbah lepah mansanan kare taloh te akan oloh are, Yesus haguet akan Kapernaum. 7:2 Hong hete aton perwira Roma je tempon jipen je paham inyayange. Jipen te haban tuntang handak matei. 7:3 Katika perwira te mahining tahiu Yesus, ie manyoho pire-pire pamimpin oloh Yehudi haguet manalih ie uka balaku mangat tau dumah tuntang mampakeleh jipee. 7:4 Katika sampai Yesus, kare oloh te balaku nyame-nyame uka mandohop perwira te. "Perwira toh patut indohop awi Bapa," koan ewen dengan Yesus, 7:5 "awi ie masi utus itah tuntang ie jari mamangun huma sombayang akan ikei." 7:6 Maka Yesus haguet haya-hayak dengan ewen. Katika Yesus handak sampai huma te, perwira te manyoho kare kawale manalih ie mangat mansanan, "Dia usah Bapa heka-heka akan humangku. Aku dia patut manarima Bapa huang humangku. 7:7 Jete bukue aku kabuat dia bahanyi manaharep Bapa. Jadi tenga ih parentah mangat jipengku te keleh. 7:8 Awi aku mahin mamenda parentah oloh je hunjun aku tuntang penda aku aton kea kare prajurit je musti mamenda parentahku. Amon aku manyoho ije biti prajurit, 'Haguet!' maka ie haguet; tuntang amon aku mansanan akan je beken, 'Kahetoh!' ie dumah manalih. Tuntang amon aku marentah jipengku, 'Nguan jetoh!' maka ie malaluse." 7:9 Yesus hengan mahining auh te. Ie tampaliau tuntang hamauh dengan oloh are je omba manuntut ie, "Tamam toto oloh toh. Bara marak oloh Israel mahin hindai puji aku sondau kapercaya je kahain toh!" 7:10 Katika kare oloh je inyoho te haluli akan human perwira te, jipen te jari keleh. 7:11 Dia tahi tinai, Yesus haguet akan lewu Nain. Kare muride tuntang oloh are haguet hayak ie. 7:12 Metoh Yesus sampai eka je tokep bauntonggang lewu, are oloh magah hantu balua lewu. Oloh je matei te anak hatue, anak tunggal ain ije biti balo. Are oloh lewu je mampahayak bawi balo te. 7:13 Katika Tuhan mite oloh bawi te, ie masi dengae palus hamauh, "Ela manangis, bu!" 7:14 Limbah te Yesus manokep eka muloh hantu te tuntang manigonge. Maka oloh je muloh hantu te tende, Yesus hamauh, "O oloh tabela, aku manyoho ikau misik!" 7:15 Oloh tabela je matei te misik, mondok tuntang manampara hakotak. Maka Yesus manyarah ie akan indue. 7:16 Kakare oloh mikeh tuntang manampara manara Hatalla. Ewen hamauh, "Ije biti nabi hai jari lembut hong bentok itah! Hatalla jari dumah uka manyalamat ungkup ayue!" 7:17 Barita tahiu Yesus toh tayap akan hapus Yudea tuntang kare eka hakalilinge. 7:18 Kare murid Yohanes mansanan akan Yohanes kare taloh je manjadi te. Maka Yohanes mantehau due biti muride, 7:19 palus manyoho ewen haguet manalih Tuhan Yesus tuntang misek, "En Bapa toh oloh je akan dumah manumon janjin Hatalla, atawa ikei musti mentai oloh je beken?" 7:20 Kadadue murid Yohanes te haguet manalih Yesus tuntang misek, "Yohanes Pampandoi manyoho ikei misek dengan Bapa, en Bapa toh ie oloh je akan dumah manumon janjin Hatalla, atawa ikei musti mentai oloh beken?" 7:21 Metoh te, Yesus are mampakeleh oloh, tuntang maharak are roh papa hayak mawi are oloh babute tau mite. 7:22 Jadi Yesus tombah, "Buli haluli keton manalih Yohanes tuntang sanan taloh je ihining tuntang je gitan keton: oloh babute tau mite, oloh je lumpuh mananjong, oloh je buah panyakit kerai je baka ike-ikeh keleh, oloh badengen mahining, oloh matei belom haluli tuntang Barita Bahalap bara Hatalla imbarita akan kare oloh je belom susah. 7:23 Salamat oloh je jaton mawi alasan hapae manolak aku." 7:24 Limbah kare utusan Yohanes te haguet, Yesus manampara hakotak dengan oloh are tahiu Yohanes, koae, "Keton haguet akan padang pasir handak mite en? Ije kalambar oru je inarawang riwutkah? 7:25 Keton haguet mangat mite en? Ije biti oloh je hapakaian bahalap? Kare oloh je hapakaian kalote tuntang je belom mangat, melai huang istana! 7:26 Jadi keton dumah mangat mite en? Mangat mite ije biti nabi kah? Toto, labih haream bara ije biti nabi. 7:27 Awi Yohanes te, jete je imaksud huang ayat Surat Barasih toh, 'Jetoh ie sarohangku,' koan Hatalla, 'Aku handak manyoho ie helo bara ikau, mangat ie muap jalan akam!' " 7:28 "Ingat," koan Yesus tinai, "hong kalunen toh jaton puji aton oloh je labih hai bara Yohanes Pampandoi. Tapi oloh je pangkakorike bara anak ungkup ain Hatalla, labih hai bara Yohanes Pampandoi." 7:29 Kakare oloh -- kalote kea panagih pajak -- mahining Yesus mansanan hal te; ewen te iete kare oloh je jari mamenda kare auh tuntutan Hatalla tuntang maku impandoi awi Yohanes. 7:30 Tapi kare oloh Parisi tuntang kare guru agama dia maku manarima rencana Hatalla akan arep ewen kabuat. Ewen dia maku impandoi awi Yohanes. 7:31 Palus Yesus hakotak tinai, koae, "Hapan en aku musti mananding kare oloh jaman jetoh? Kilau en ewen te? 7:32 Ewen kilau kare anak oloh je mondok hong pasar; ije kakawan te hamauh dengan je beken, 'Ikei malagu nyanyi karami akan keton, tapi keton dia maku manari manasai! Ikei manatum, tapi keton dia maku manangis!' 7:33 Yohanes Pampandoi dumah -- ie puasa tuntang jaton mihop anggur -- tuntang keton hamauh, 'Ie irasuk setan!' 7:34 Anak Olon dumah -- ie kuman mihop -- palus keton hamauh, 'Ite oloh te! Babungo, pambusau, kawal panagih pajak tuntang kawal kare oloh badosa.' 7:35 Aloh kalote, kapintar-kaharatin Hatalla gitan bara kare oloh je manarima ie." 7:36 Ije biti oloh Parisi, bagare Simon, marawei Yesus kuman. Yesus haguet akan humae tuntang mondok kuman. 7:37 Hong lewu te aton kea ije biti oloh bawi je belom huang dosa. Katika ie mahining Yesus metohe kuman intu human oloh Parisi te, ie dumah hayak mimbit ije kasa pualam basuang minyak harum. 7:38 Ie mendeng intu hila likut Yesus tokep paie tuntang manangis sambil mambisa pain Yesus hapan danum matae. Limbah te pain Yesus impuase hapan balaue tuntang inyiume tuntang inatae hapan minyak harum. 7:39 Katika oloh Parisi je marawei Yesus mite hal te, ie hamauh huang ateie, "Jaka oloh toh nabi, batantu ie katawan eweh oloh bawi te je manigong ie, tuntang je oloh bawi te belom huang dosa!" 7:40 Palus Yesus hamauh dengan Simon, "Simon, aton taloh je handak insanangku akam." "Yoh, Pa Guru," koan Simon tombah, "sanan ih." 7:41 Yesus hamauh, "Aton due biti oloh je butang dengan oloh je manjahaman duit. Ije biti butang lime ratus duit perak, tuntang ije biti tinai lime puluh duit perak. 7:42 Kadadue oloh te dia olih mamunah utange te, balalu ie mempas ewen bara utang te. Nah, eweh bara kadadue oloh te je labih masi dengan oloh je manjahaman duit te?" 7:43 "Angatku, oloh je paling are utange!" koan Simon tombah. "Tirokm te buah," koan Yesus tinai. 7:44 Palus Yesus manampayah oloh bawi te tuntang hamauh dengan Simon, "Ikau mite oloh bawi toh? Aku dumah akan humam, tuntang ikau jaton manatap danum hapan menyau paingku tapi oloh bawi toh jari menyau paingku hapan danum matae, tuntang mampuase hapan balaue. 7:45 Ikau jaton manambang aku hapan sium, tapi oloh bawi toh jaton tende manyium paingku bara metoh aku dumah akan hetoh. 7:46 Ikau jaton manata minyak akan takolokku, tapi oloh bawi te manata minyak harum intu paingku. 7:47 Toto: asie je hai te mamparahan dosae je are te jari iampun! Amon oloh iampun isut, ie kareh masi isut kea." 7:48 Palus Yesus hamauh dengan oloh bawi te, "Kare dosam jari iampun." 7:49 Kare oloh beken je mondok kuman hayak dengan Yesus nampara hakotak sama arepe, "Eweh oloh toh sampai olih mampun dosa?" 7:50 Tapi Yesus hamauh dengan oloh bawi te, "Awi ikau percaya dengangku, ikau inyalamat. Buli ih dengan kasanang!"
8:1 Dia tahi limbah te, Yesus haguet akan kare lewu tuntang dokoh, uka mansanan Barita Bahalap je Hatalla nampara marentah kilau Raja. Duewalas biti muride omba hayak ie. 8:2 Kalote kea pire-pire oloh bawi je jari impakeleh bara roh papa tuntang bara panyakit. Kare ewen te iete Maria je inyewut Magdalena (uju setan je jari impalua bara ie); 8:3 tuntang Yohana, sawan Kusa, pagawai istana Herodes; Susana, tuntang are tinai oloh bawi beken. Hapan balanja kabuat ewen mandohop Yesus tuntang kare muride. 8:4 Kare oloh dumah bewe-bewei manalih Yesus bara kare-kare lewu. Tuntang metoh jari are oloh hapumpong, Yesus manyarita akan ewen paribasa kalotoh: 8:5 "Ije biti oloh pamalan haguet manawor binyi. Metoh ie manawor, aton binyi je manjato hong jalan. Belahe ihunje oloh tuntang awang beken tinai kinan burung. 8:6 Aton kea je manjato hong eka je are batu. Metoh kare duringe lembut, taloh imbul te balayu awi petake keang. 8:7 Aton kea binyi je manjato intu bentok ruwut haduhi. Ruwut haduhi te belom hinje binyi te, tuntang mangalamboe sampai dia tau mamua. 8:8 Tapi aton tinai binyi je manjato intu petak je subur, palus belom tuntang mampalembut bua saratus kali lipet." Limbah manyarita paribasa te, Yesus hamauh, "Amon aton pinding, keleh mahining!" 8:9 Kare murid Yesus misek dengae riman paribasa te. 8:10 Yesus tombah, "Keton jari inenga asi uka mangatawan taloh basilim tahiu kilen ampie Hatalla marentah kilau Raja. Tapi kare oloh beken iajar hapan paribasa, mangat ewen manantuanie, tapi jaton katawan taloh je manjadi; tuntang ewen mahining, tapi dia haratie." 8:11 "Jetoh ie riman paribasa te: Binyi te iete auh Hatalla. 8:12 Binyi je manjato hong jalan jete tanding kare oloh je mahining auh te. Tapi setan dumah tuntang marampas barita te bara atei ewen, mangat ewen dia percaya tuntang dia inyalamat. 8:13 Binyi je manjato intu eka je habatu, tanding oloh je metoh mahining barita te, manarimae dengan sanang ateie. Tapi kabar te dia muhat huang ateie. Ewen percaya hanjulo ih, tuntang metoh tingkes dumah, ewen mundur. 8:14 Binyi je manjato intu bentok ruwut haduhi tanding oloh je mahining barita te, tapi kakenang tahiu pambelom ewen hayak mipen belom tatau tuntang sanang hong kalunen toh. Uras taloh te mangalambo ewen sampai dia mampalembut bua je masak. 8:15 Binyi je manjato hong petak je subur tanding oloh je mahining barita te, palus mingkese huang ateie je bahalap tuntang bujur. Ewen baketep sampai mampalembut bua." 8:16 "Dia aton oloh je manotong sumbo palus manyangkulepe hapan balanai, atawa mingkese hong penda eka batiroh. Ie akan mina sumbo te intu tantahae, mangat oloh je tame tau mite kalawae. 8:17 Dia aton taloh je basahokan je dia tau gitan; tuntang dia aton taloh basilim je kareh jaton iungkar tuntang ingatawan. 8:18 Awi te nantuani bua-buah taloh je ihining keton. Basa oloh je jari mandino, kareh inenga labih are tinai; tapi oloh je jaton mandino, isut je aton huang ie mahin kareh induan kea." 8:19 Indu tuntang paharin Yesus dumah manalih ie, tapi ewen dia tau sampai ie awi oloh lalau are. 8:20 Maka aton ije biti oloh hamauh dengan Yesus, "Pa, indu tuntang paharin Bapa aton intu luar. Ewen handak hasondau dengan Bapa." 8:21 Tapi Yesus hamauh dengan ewen, "Kare oloh je mahining auh Hatalla tuntang malaluse, ewen te induku tuntang paharingku." 8:22 Hong sinde andau Yesus dengan kare muride lumpat arut. "Has itah haguet akan dipah danau," koan Yesus dengan ewen. Balalu ewen haguet. 8:23 Katika ewen metoh balayar, Yesus tapatiroh. Te salenga riwut hai manampur danau te. Danum nampara tame akan huang arut, sampai mambahaya ewen te samandiai. 8:24 Kare murid Yesus manalih ie tuntang mampisik ie. Ewen hamauh, "Pa Guru, Pa Guru, itah calaka!" Yesus misik palus mangarahang riwut tuntang riak je basiak te. Maka riwut tuntang riak te tende palus danau manjadi tadoh toto. 8:25 Palus Yesus hamauh dengan kare muride, "Mbuhen keton dia percaya dengangku?" Ewen heran tuntang mikeh. Palus ewen hakotak sama arepe, "Eweh sapunae oloh toh sampai riwut tuntang riak irentahe, tuntang auhe mahin inumon!" 8:26 Yesus tuntang kare muride tarus balayar sampai akan daerah Gerasa hong dipah silan Danau Galilea. 8:27 Katika Yesus jari lumpat akan hunjun petak, ie inalih awi ije biti oloh hatue je irasuk setan. Oloh te bara lewu. Ie te jari tahi jaton mahapan pakaian tuntang dia maku melai huma. Ie baya maku melai goha eka kare kubur oloh. 8:28 Metoh ie mite Yesus, ie manambawai palus sontop manyembah manaharep Yesus tuntang mangkariak, "Yesus, Anak Hatalla Je Hong Ngambo! Handak awim kilen ampie aku toh? Aku balaku nyame-nyame ela mangapehe aku!" 8:29 Oloh te hamauh kalote basa Yesus manyoho setan te balua bara ie. Jari kinjap ie inguasa awi setan te, sampai aloh lengee tuntang paie jari imasong hapan rantai tuntang ie injaga toto-toto, mahin olih kea ie manggeto rantai te palus iimbit awi setan akan padang pasir. 8:30 Yesus misek dengan oloh te, "Eweh aram?" "Arangku 'Legion'," koan oloh te tombah -- basa are roh papa je jari tame huang ie. 8:31 Kare roh papa te balaku nyame-nyame mangat Yesus dia maharak ewen akan Tiwing Pampatei. 8:32 Tokep eka te aton are toto bawoi metohe manggau panginae intu kereng bukit. Kare roh papa te balaku nyame-nyame dengan Yesus uka manenga ijin akan ewen tame akan huang kare bawoi te. Tuntang Yesus satuju. 8:33 Maka kare roh papa te balua bara oloh te tuntang tame akan huang kare bawoi te. Palus kare bawoi te hadari tuntang manangkero bara saran kereng akan huang danau, limbah te leteng. 8:34 Kare panjaga bawoi te mite taloh je jari manjadi te. Maka ewen hadari tuntang mansanan barita te akan oloh lewu tuntang hong kare dokoh hakaliling. 8:35 Palus kare oloh balua mite kare taloh je manjadi. Ewen dumah manalih Yesus, tuntang intu hete ewen te sondau oloh je jari lapas bara kare roh papa te metohe mondok tokep pain Yesus. Ie jari hapakaian tuntang tiroke jari barendeng. Ewen palus mikeh. 8:36 Ewen je mite kajadian te manyarita akan kare oloh kilen ampie oloh te impakeleh. 8:37 Balalu oloh hapus daerah Gerasa balaku nyame-nyame uka Yesus malihi eka te, basa ewen uras mikeh toto. Jadi Yesus lumpat arut handak buli. 8:38 Oloh je jari lapas bara setan te balaku dengan Yesus uka ie tau omba. Tapi Yesus manyoho ie haguet, 8:39 koae, "Buli ih tuntang mbarita ih taloh je jari ilalus Hatalla akam." Maka oloh te haguet mansanan akan oloh hapus lewu, taloh je jari iawi Yesus dengae. 8:40 Katika Yesus haluli akan dipah silan danau, ie inambang dengan kahanjak awi oloh are basa ewen jari enta-entai dengae. 8:41 Palus dumah ije biti kapala huma sombayang hong eka te. Arae Yairus. Ie sontop manyembah intu taharep Yesus tuntang balaku nyame-nyame uka Yesus dumah akan humae, 8:42 awi anake je bawi je baya ije-ije te umure duewalas nyelo handak matei. Pandehan Yesus mananjong akan human Yairus, kare oloh manyeke ie bara hakaliling. 8:43 Bara kare oloh te aton tinai ije biti oloh bawi je jari duewalas nyelo buah panyakit baduroh dahae hayak dengan panyakit dumah bulae. Ie jari mampalepah kare ramoe hapae batatamba dengan dokter, tapi jaton je tau mampakelehe. 8:44 Oloh bawi te manokep Yesus bara hila likute, palus manigong tapakan jubahe. Hemben te kea pandarahan oloh bawi te tende. 8:45 Yesus misek, "Eweh je manigong aku?" Kakare oloh milim arepe. Palus Petrus hamauh, "Pa, are toto oloh mangaliling Bapa; ewen manyengkel Bapa!" 8:46 Yesus hamauh, "Tapi aton oloh je manigong aku. Aku katawan jete awi aton kuasa je balua bara aku." 8:47 Oloh bawi te katawan je gawie te jari ingatawan. Jadi ie dumah hayak hagenjeh palus sontop tuntang manyembah intu taharep Yesus. Maka ie manyarita intu taharep oloh samandiai sababe ie manigong Yesus, tuntang panyakite te keleh hemben te kea. 8:48 Yesus hamauh dengae, "Anakku, awi ikau percaya dengangku, maka ikau keleh. Lius dengan salamat." 8:49 Pandehan Yesus magon hakotak, ije biti oloh dumah bara human Yairus. Ie hamauh dengan Yairus, "Anak bawi ain Tuan jari mahutos. Dia usah ih tuan manyusah Bapa Guru hindai." 8:50 Katika Yesus mahining te, ie hamauh dengan Yairus, "Ela mikeh. Percaya bewei tuntang anakm akan keleh." 8:51 Limbah sampai hong human Yairus, Yesus mangahana kare oloh tame hayak ie beken bara Petrus, Yohanes, Yakobus tuntang indu bapa anak te bewei. 8:52 Kakare oloh metohe manangis tuntang manatum tagal pampatei anak te. Tapi Yesus hamauh, "Ela manangis. Anak toh dia matei, ie baya batiroh ih!" 8:53 Ewen manantawe Yesus, basa ewen katawan anak bawi te jari matei. 8:54 Limbah te Yesus mimbing lengen anak te tuntang hamauh, "Misik ih, nak!" 8:55 Hambaruan anak te haluli manalih anak te, tuntang hemben te kea ie hingkat. Limbah te Yesus manyoho ewen manenga panginan akan anak te. 8:56 Oloh bakas anak te hengan toto. Tapi Yesus mangahana ewen mansanan taloh je manjadi te akan eweh bewei.
9:1 Yesus mantehau duewalas muride, palus manenga kuasa akan ewen hapan maharak setan tuntang mampakeleh panyakit. 9:2 Limbah te ie manyoho ewen haguet mampakeleh oloh haban tuntang mambarita kabar tahiu kilen ampie Hatalla marentah kilau Raja. 9:3 "Ela mimbit taloh en-en akan panjalanam," koan Yesus dengan ewen. "Ela mimbit sukah atawa kambut sadakah, atawa panginan, atawa duit, atawa due kalambar pakaian. 9:4 Hong kueh bewei keton inarima oloh, melai ih intu hete sampai keton malihi lewu te. 9:5 Tuntang hong kueh keton dia inarima oloh, maka katika keton malihi lewu te, kibas kawo bara tatap paim, kilau pangingat intu taharep ewen." 9:6 Kare murid Yesus haguet, palus manintu kare lewu uka mansanan Barita Bahalap te tuntang mampakeleh oloh haban hong hete-hete. 9:7 Metoh Herodes je katika te marentah hong Galilea, mahining tahiu kare kajadian te, ie bingung. Basa aton oloh je hamauh, Yohanes Pampandoi jari belom haluli. 9:8 Aton kea je hamauh, Elia jari lembut tinai. Oloh beken tinai hamauh, ije bara kare nabi horan jari belom haluli. 9:9 Herodes hamauh, "Aku jari manyoho oloh manetek takolok Yohanes. Tapi oloh toh, eweh ie sapunae? Are taloh je jari ihiningku tahiu ie." maka Herodes manggau jalan uka tau mite Yesus. 9:10 Kare rasul ain Yesus haluli tuntang manyarita akan Yesus kakare taloh je jari iawi ewen. Yesus mimbit ewen, palus haguet haya-hayak dengan ewen kabuat ih akan lewu Betsaida. 9:11 Katika kare oloh mangatawan hal te, ewen manuntut Yesus. Ie manarima ewen, palus hakotak dengan ewen tahiu kilen ampie Hatalla marentah kilau Raja. Tuntang ie kea mampakeleh kare oloh je perlu inatamba. 9:12 Katika matanandau nampara belep, duewalas murid Yesus dumah manalih ie tuntang hamauh, "Pa, eka toh kejau bara lewu. Labih bahalap Bapa manyoho kare oloh toh haguet, mangat ewen tau manggau panginan tuntang eka manyandehan hong kare lewu tuntang dokoh je hakaliling hetoh." 9:13 Tapi Yesus tombah, "Keton ih mampakanan ewen." Kare murid Yesus hamauh, "Ain ikei baya aton lime rote tuntang due kongan lauk. En ikei musti haguet mamili panginan akan kakare oloh toh?" 9:14 (Aton kurang labih lime koyan oloh hatue intu hete.) Yesus hamauh dengan kare muride, "Soho kare oloh toh mondok hakawan, kurang labih lime puluh biti ije kakawan." 9:15 Kare murid Yesus te malalus kare taloh je insanan Yesus akan ewen. 9:16 Palus Yesus manduan lime rote tuntang due kongan lauk te, limbah te ie tengak mananggera akan langit tuntang manarimakasih akan Hatalla. Limbah te ie mangiwak-mangiwak rote tuntang lauk te hapan lengee palus manenga akan kare muride mangat ewen mambagie akan oloh are te. 9:17 Ewen uras kuman sampai besoh. Palus kare murid Yesus manampunan kalabien panginan te duewalas lontong karee. 9:18 Hong sinde andau, katika Yesus metohe balakudoa kabuate, kare muride dumah manalih ie. Yesus misek dengan ewen, "Manumon koan oloh, aku toh eweh?" 9:19 Ewen tombah, "Aton je manyewut Yohanes Pampandoi. Aton kea je manyewut Elia, awang beken tinai manyewut ije bara kare nabi jaman horan je jari belom haluli." 9:20 "Tapi manumon koan keton kabuat, aku toh eweh?" koan Yesus misek. Petrus tombah, "Bapa toh Raja Panyalamat je injanji Hatalla." 9:21 Palus Yesus hamauh dengan kare muride, "Ela samasinde mansanan hal te akan eweh bewei." 9:22 Yesus kea hamauh, "Anak Olon puna musti manyarenan are kapehe tuntang ilawan awi kare pamimpin tuntang kare imam kapala, tuntang kare guru agama. Ie akan impatei, tapi hong andau je kateloe akan misik tinai." 9:23 Limbah te Yesus hamauh dengan kare oloh je aton hong hete, "Oloh je handak omba aku, musti mangalapean kare kepentingan ayue kabuat, mananggong sampalakie genep andau, tuntang harajur omba aku. 9:24 Basa oloh je handak mahaga pambelome, akan nihau pambelome. Tapi oloh je manyarah pambelome akan kepentingan ayungku, akan manyalamat pambelome. 9:25 En kaontonge akan oloh amon ie tempon hapus kalunen toh tapi ie binasa tuntang nihau pambelome? 9:26 Amon oloh mahamen mangaku aku tuntang auh ajarku, Anak Olon kea mahamen mangaku oloh te hong katika ie dumah kareh dengan kuasae, tuntang dengan kuasan Bapa hayak dengan kuasan kare malekat je barasih! 9:27 Keleh keton katawan: bara kare keton hetoh aton ije dia akan matei helo bara ie mite Hatalla marentah." 9:28 Kurang labih ije minggo limbah Yesus majar kare hal te, ie mimbit Petrus, Yohanes, tuntang Yakobus akan hunjun ije bukit mangat balakudoa. 9:29 Pandehan Yesus balakudoa intu hete, tampayah baue hobah tuntang pakaiae manjadi baputi malinyau. 9:30-31 Te salenga due biti oloh iete Moses tuntang Elia mamparahan arepe mahapan kalawa bara sorga. Ewen hakotak dengan Yesus tahiu pampateie tuntang dia tahi hindai akan ingkemee hong Yerusalem. 9:32 Hong katika te Petrus tuntang kare kawale tapatiroh, tapi misik nantekas, tuntang mite Yesus hasangkowong tuntang due biti oloh te mendeng dengae. 9:33 Metoh due biti oloh te handak malihi Yesus, Petrus hamauh dengan Yesus, "Tuan, mangat toto itah hong hetoh. Keleh itah mampendeng telo tingkap benang: ije akan tuan, ije akan Moses, tuntang ije tinai akan Elia." (Petrus hamauh kalote marak dia ie haratie en taloh je ingotake.) 9:34 Pandehan Petrus magon hakotak, maka dumah ije baunandau, tuntang mangalukop ewen, sampai ewen mikeh. 9:35 Limbah te bara baunandau te tarahining auh je hamauh, "Jetoh ie Anakku je iintihku. Keleh mahining ie!" 9:36 Limbah auh te tende, ewen mite Yesus kabuate hong hete. Kare murid Yesus suni bewei tahiu kakare taloh te, tuntang jaton mansanan akan eweh bewei tahiu taloh je jari gitan ewen. 9:37 Andau jewue tinai Yesus tuntang telo muride mohon bara bukit te, tuntang oloh are dumah manalih Yesus. 9:38 Ije biti oloh hatue bara marak oloh are te mangkariak, "Pa Guru, dohop ih mite anakku -- anakku te tikas ije te ih! 9:39 Amon roh papa mamok ie, ie mangkariak nantekas tuntang bitie kujur-kejer sampai nyamae habure. Roh te harajur mangapehe ie tuntang dia maku balua bara ie! 9:40 Jari aku balaku kare murid Bapa maharak roh te, tapi dia olih ewen." 9:41 Yesus tombah, "Lalehan keton toh! Keton toh toto oloh je nyaleweng tuntang dia percaya! Sampai hamparea aku musti melai hinje keton tuntang sabar dengan keton? Imbit anak te akan hetoh!" 9:42 Pandehan anak te mananjong manalih Yesus, roh papa te marapitan ie tuntang mawi bitie kujur-kejer. Tapi Yesus mangarahang roh te tuntang mampakeleh anak te. Palus anak te inyarah tinai akan bapae. 9:43 Kakare oloh hengan mite kuasan Hatalla je kalote kahaie. Metoh kare oloh magon heran mite kakare taloh je iawie, Yesus hamauh dengan kare muride, 9:44 "Nantuani bua-buah tuntang ela kalapean auhku toh: Anak Olon kareh inyarah akan kuasan kalunen." 9:45 Tapi kare murid Yesus te dia haratie auhe te. Hal te dia insanan akan ewen mangat ewen dia haratie. Tapi ewen mikeh misek hal te dengae. 9:46 Hong marak kare murid Yesus lembut soal tahiu ewen bara ewen je pangkahaie. 9:47 Yesus katawan tirok ewen, awi te ie manduan ije biti anak korik tuntang manyoho anak te mendeng hila balikate. 9:48 Palus ie hamauh dengan kare muride, "Oloh je manarima anak toh tagal aku, rimae manarima aku kea. Tuntang oloh je manarima aku, manarima ie je manyoho aku. Basa oloh je pangkakorike bara marak keton, ie te je pangkahaie!" 9:49 Yohanes hamauh, "Tuan, ikei mite oloh maharak setan mahapan aran Tuan, tuntang ikei mangahana ie, basa ie dia bara pihak itah." 9:50 "Ela mangahana ie," koan Yesus dengan Yohanes tuntang kare murid Yesus awang beken, "basa je dia malawan keton, rimae ie mamihak keton." 9:51 Metoh katikae jari tokep Yesus inggatang akan sorga, ie manukas arepe mangat haguet akan Yerusalem. 9:52 Maka ie manyoho oloh haguet mananselo ie. Kare oloh je inyohoe te haguet, palus tame akan ije lewu hong Samaria uka manatap kare taloh handiai akan Yesus. 9:53 Tapi kare oloh hong lewu te dia maku manarima Yesus, basa gitan toto ie metohe haguet manalih Yerusalem. 9:54 Maka katika murid Yesus, iete Yakobus tuntang Yohanes, katawan tahiu hal te, ewen hamauh, "Tuhan, en Tuhan maku, ikei balaku apui bara langit mangat mambinasa kare oloh toh?" 9:55 Yesus mules, palus malait ewen. 9:56 Limbah te ewen haguet akan lewu je beken. 9:57 Pandehan Yesus tuntang kare muride marajur panjalanae, aton oloh hamauh dengan Yesus, "Pa, aku handak omba Bapa akan kueh bewei!" 9:58 Yesus tombah, "Sarigala aton liange, tuntang burung aton sarangae, tapi Anak Olon jaton aton ekae menter." 9:59 Palus Yesus hamauh dengan oloh je beken, "Has, omba aku." Tapi oloh te hamauh, "Pa, soho aku buli helo mangat mangubur bapaku." 9:60 Yesus tombah, "Nauhe oloh matei mangubur oloh matei ayue kabuat. Tapi ikau, lius, tuntang sanan barita je Hatalla jari nampara marentah." 9:61 Aton kea oloh beken je hamauh, "Pa, aku handak omba Bapa, tapi soho aku buli helo mansanan arepku." 9:62 Yesus hamauh dengan oloh te, "Oloh je jari nampara mambajak petak palus mules akan hila likut, dia patut manjadi anak ungkup ain Hatalla."
10:1 Limbah te Tuhan mintih uju puluh murid tinai, palus manyoho ewen badue-badue mananselo ie akan genep lewu tuntang eka je handak inalihe. 10:2 "Hasil je handak inggetem are," koae dengan ewen, "tapi oloh je manggetem isut. Tagal te laku dengan je tempon tana mangat ie mampait oloh panggawi uka manggetem taloh je imbule. 10:3 Nah, Keleh haguet! Aku manyoho keton kilau tabiri akan marak kare sarigala. 10:4 Ela mimbit dompet atawa kambut sadakah atawa sapatu. Ela tende hong benteng jalan mangat manabe eweh bewei. 10:5 Amon keton tame akan ije huma, sewut labih helo, 'Keleh salamat dumah akan huma toh.' 10:6 Amon hete aton oloh je rajin kadamai maka auh taben keton te kareh melai tetep dengae; amon dia jijit haluli auh taben salamat keton te. 10:7 Keleh melai hong ije huma bewei. Tarima ih taloh je inyarungan oloh akam, basa oloh je bagawi aton hak manarima upahe. Ela pindah-pindah bara ije huma akan huma je beken. 10:8 Amon keton dumah akan ije lewu tuntang hete keton inambang dengan bahalap, kinan ih taloh je inyarungan oloh intu hete. 10:9 Pakeleh kare oloh haban hong lewu te, tuntang sanan akan kare oloh hete, 'Hatalla bajeleng kareh manampara marentah kilau Raja hong bentok keton.' 10:10 Tapi amon keton dumah akan ije lewu tuntang hete keton dia inarima, keleh balua akan jalan tuntang sanan, 10:11 'Kawo hong lewun keton je leket hong pain ikei mahin ingibas ikei kilau pampingat akan keton. Tapi keleh keton katawan katikae jari tokep je Hatalla nampara marentah kilau Raja hong bentok keton!' 10:12 Keleh keton mingat, hong Andau Kiamat, labih gampang Hatalla mampun oloh lewu Sodom bara mampun oloh lewu te!" 10:13 "Calaka ikau Korasim! Tuntang calaka ikau, Betsaida! Jaka kare taloh heran je iawi hong bentok keton jari iawi hong Tirus tuntang Sidon, pasti kare oloh hete jari tahi hobah bara kare dosan ewen, tuntang mangkepan pakaian kapehen atei hayak mingkes kawo hunjun takolok ewen. 10:14 Hong Andau Kiamat, kare oloh Tirus tuntang Sidon kareh labih gampang iampun awi Hatalla bara keton. 10:15 Tuntang keton, Kapernaum! Keton manirok keton kareh inggatang sampai akan sorga? Dia! Keton kareh inganan akan apui naraka haream!" 10:16 Palus Yesus hamauh dengan kare muride, "Oloh je mahining keton, mahining aku. Oloh je manolak keton, manolak aku. Tuntang oloh je manolak aku, manolak kea ie je manyoho aku." 10:17 Uju puluh murid te haluli hayak paham kahanjake. "Tuhan," koan ewen, "kare roh papa mahin mamenda auh ikei gagenep ikei marentah ewen mahapan aran Tuhan!" 10:18 Yesus tombah, "Aku mite setan manjato bara langit kilau kilat. 10:19 Keleh keton katawan! Keton jari inenga kuasa mangat keton tau mahunje handipe tuntang kala hayak mampakalah kare kuasan musoh, tuntang ije mahin jaton taloh je tau mancalaka keton. 10:20 Tapi aloh kalote ela keton hanjak awi kare roh jari mamenda keton. Labih bahalap keton hanjak awi aran keton jari inyurat hong sorga." 10:21 Hong katika te kea, Yesus hanjak awi inguasa Roh Hatalla. Yesus hamauh, "Bapa, Tuhan je tempon langit tuntang petak! Aku manarimakasih akam awi are taloh handiai te inyahokam bara kare oloh pintar tuntang ba-ilmu, tapi ikau mamparahae akan kare oloh je dia sakola. Jete je mampahanjak atei Bapa. 10:22 Kare taloh handiai jari inyarah Bapa akangku. Ije biti mahin jaton oloh je mangasene Anak, beken bara Bapa. Ije biti mahin jaton kea je mangasene Bapa, beken bara Anak; tuntang kare oloh je akae Anak handak mamparahan Bapa." 10:23 Palus Yesus tampaliau akan hila kare muride, limbah te ie kabuat hamauh dengan ewen, "Batuah keton awi keton jari mite taloh je gitan keton wayah toh. 10:24 Basa ingat: Are Nabi tuntang raja mipen mite taloh je gitan keton wayah toh tapi ewen jaton mitee. Ewen mipen mahining taloh je ihining keton wayah toh, tapi ewen jaton mahininge." 10:25 Limbah te ije biti guru agama dumah handak manjabak Yesus. Ie misek, "Bapa Guru, aku musti malalus en mangat mandino pambelom je katatahie?" 10:26 Yesus tombah, "En je tarasurat huang Surat Barasih? Kilen tumon tirok keton tahiu hal te?" 10:27 Oloh te tombah, " 'Sinta Tuhan Hatallam hapan salepah ateim, hapan salepah hambaruam, hapan salepah kaabasm, tuntang hapan salepah kaharatim,' tuntang 'Sinta oloh kilau ikau sinta arepm kabuat.' " 10:28 "Auh tombahm te bujur," koan Yesus, "Lalus jete, maka ikau kareh belom." 10:29 Tapi guru agama te handak mambujur arepe. Ie misek, "Eweh ie oloh je koan Bapa te?" 10:30 Yesus tombah, "Aton ije biti oloh hatue mohon bara Yerusalem akan Yeriko. Hong benteng jalan ie iamok awi parampok, kare ramoe irampas, ie imukul satengah matei, palus ilihi oloh tanga-tangai hong jalan marak kakare himange. 10:31 Aton ije biti imam mananjong kea intu jalan te. Katika ie mite oloh te, ie mahila akan silan jalan palus mananjong tarus. 10:32 Kalote kea dengan ije biti oloh Lewi je mananjong intu hete; katika ie mite oloh te, ie manokepe tuntang mananturee. Tapi ie mahin mahila akan saran jalan palus mananjong tinai. 10:33 Tapi limbah te ije biti oloh Samaria je metoh huang jalanae, mahalau intu hete kea, katika ie mite oloh te, ateie paham masi awi sintae. 10:34 Maka ie manokep oloh te palus marasih kare himange hapan anggur tuntang manatamba hapan minyak, limbah te mambabat kare himang te. Limbah te ie manggatang oloh te akan hunjun kalidaie kabuat, palus mimbite akan ije losmen tuntang mahagae. 10:35 Hong hanjewu andau ijee tinai ie manduan due kabawak duit perak tuntang manenga akan oloh je tempon losmen te hayak hamauh, 'Haga ih ie, tuntang amon aton balanja beken tinai, kareh aku mambayare kea amon aku haluli akan hetoh.' " 10:36 Limbah te Yesus mahapus sarita te mahapan paisek toh, "Bara katatelo oloh te, je kueh manumon tirokm je sinta dengan oloh je irampok te?" 10:37 Guru agama je buah isek te tombah, "Oloh je jari mandohop oloh te." "Nah, lius, tuntang awi kilau te kea!" koan Yesus. 10:38 Limbah te Yesus tuntang kare muride marajur panjalanae, palus sampai huang ije lewu. Intu hete ije biti oloh bawi bagare Marta marawei ie akan humae. 10:39 Marta te aton paharie bawi bagare Maria. Maria toh mondok tokep Tuhan Yesus mahining kare auh ajare. 10:40 Tapi Marta deroh toto dengan gawin taloh humae. Ie manalih Yesus tuntang hamauh, "Tuhan, en Tuhan dia paduli Maria manalua aku bagawi kabuatku ih? Soho ie mandohop aku!" 10:41 "Marta, Marta!" koan Tuhan tombah. "Ikau meles tuntang deroh manirok taloh toh te; 10:42 padahal je mambatang baya ije. Tuntang Maria jari mintih je bahalap, je jaton tau induan bara ie."
11:1 Hong sinde andau Yesus balakudoa hong ije eka. Limbah ie hapus balakudoa, ije bara kare muride hamauh, "Tuhan, coba ajar ikei balakudoa kilau Yohanes majar kare muride balakudoa." 11:2 Maka Yesus hamauh dengan ewen, "Amon keton balakudoa, sewut kalotoh, 'Bapa, ikau bewei Hatalla je tunggal. Buah ikau inyembah tuntang ihormat. 11:3 Tenga ah genep andau Panginan je imerlu ikei. 11:4 Ampun kare dosan ikei, basa ikei mampun gagenep oloh je basala dengan ikei. Tuntang ela manalua ikei nihau kapercaya hong katika ikei buah tingkes.' " 11:5 Yesus hamauh dengan kare muride, "Paribasa ije biti bara keton haguet akan human kawale hong bentok alem, tuntang hamauh, 'O, le, njahaman akangku rote telo kabawak, 11:6 awi aton kawalku hong benteng panjalanae, harue tende intu humangku tuntang aku jaton panginan akae!' 11:7 Paribasa kawal je inalihm te tombah kalotoh, bara huang humae, 'Ela manyusah aku! Bauntonggang jari ingunci tuntang aku dengan kare anakku jari batiroh. Aku dia tau hingkat tuntang manenga taloh en-en akam.' " 11:8 "Jadi kilen ampie?" koan Yesus tinai. "Koangku, Yoh! Aloh ikau te kawale, ie dia maku hingkat tuntang manenga taloh en-en akam. Tapi awi ganan ikau jaton mahamen balaku dengae jua-juan, maka ie kareh hingkat kea tuntang manenga akam taloh je ilakum. 11:9 Jadi, aku hamauh dengam: Laku, maka akam kareh inenga; gau, maka keton kareh mandino; tegah, maka bauntonggang iuap akan keton. 11:10 Karana oloh je balaku kareh manarima; oloh je manggau kareh mandino, tuntang oloh je manegah, akae bauntonggang akan iuap. 11:11 Bara marak keton en aton bapa je manenga handipe akan anake, amon ie balaku lauk? 11:12 Atawa manenga kala amon ie balaku tanteloh? 11:13 Aloh keton oloh papa, keton katawan kea manenga taloh bahalap akan anak keton. Mahin hindai Bapa keton hong sorga! Ie kareh manenga Roh ayue akan ewen je balaku dengae!" 11:14 Hong sinde andau Yesus maharak setan mangat balua bara ije biti oloh bisu. Limbah setan te balua, oloh te nampara hakotak. Are oloh hengan, 11:15 tapi aton je hamauh, "Ie tau maharak setan, awi kuasan Beelsebul, kapala kare setan." 11:16 Aton kea kare oloh beken je handak manjabak Yesus, jadi ewen balaku ie mawi taloh heran kilau tanda je ie te dumah bara Hatalla. 11:17 Tapi Yesus katawan kahandak ewen te. Maka ie hamauh dengan ewen, "Amon ije negara tabagi huang kare baris ije hamusoh, negara te dia baka olih tahan. Tuntang ije keluarga je tapisa-pisah tuntang hamusoh sama arepe, akan baduroh. 11:18 Kalote kea hong karajaan setan; amon ije baris hakalahi dengan baris je beken, karajaan te akan baduroh. Koan keton aku maharak setan hapan kuasan Beelsebul. 11:19 Amon kalote, hapan kuasan eweh kare muridm maharak kare setan te? Kare muridm kabuat je mambukti kasalan keton! 11:20 Tapi aku maharak setan hapan kuasan Hatalla, tuntang jete rimae Hatalla jari nampara marentah hong marak keton. 11:21 Amon ije biti oloh gancang, mahapan sukup simpan sanjata, mahaga huma kabuat, maka kakare ramoe akan salamat. 11:22 Tapi amon ije biti oloh je labih gancang mamok tuntang mampakalah ie, maka oloh je labih gancang te marampas kakare sanjata je iandal awi tempon huma te, palus mambagi-bagi lepah kare ramoe. 11:23 Oloh je dia omba aku, sapunae ie malawan aku, tuntang oloh je dia mandohop aku, sapunae ie marusak gawingku!" 11:24 "Amon roh papa malihi ije biti oloh, roh te mangumbang eka je keang mangat manggau ekae malayan kahekae, tapi ie dia mandinoe. Tagal te ie hamauh, 'Aku handak haluli manalih huma je jari ilihiku!' 11:25 Katika ie sampai hete, ie sondau huma te barasih tuntang iator. 11:26 Palus ie haguet tuntang mimbit uju roh beken je labih papa bara ie. Limbah te ewen tame akan huang oloh te palus melai hete. Tuntang kajariae keadaan oloh te manjadi labih papa bara je solake." 11:27 Limbah Yesus hamauh kalote, ije biti oloh bawi bara oloh are te hamauh dengan Yesus, "Batuah toto oloh bawi je manak tuntang mampatuso ikau!" 11:28 Tapi Yesus tombah, "Labih hanjak hindai oloh je mahining auh Hatalla tuntang malaluse!" 11:29 Pandehan kare oloh mangarimpong Yesus, ie marajur auhe, koae, "Lalehan kapapan oloh jaman jetoh. Ewen balaku ije taloh heran mangat ewen tau percaya dengangku, tapi ije taloh heran mahin dia kareh inenga akan ewen, beken bara taloh heran ain Nabi Yona. 11:30 Sama kilau Nabi Yona manjadi taloh heran akan kare oloh hong lewu Niniwe, kalote kea Anak Olon kareh manjadi ije taloh heran akan kare oloh jaman jetoh. 11:31 Hong Andau Kiamat, Ratu lewu hila Salatan akan hingkat haya-hayak oloh jaman jetoh, tuntang mandawa ewen. Basa, mangat mahining auh ajar Salomo je pintar harati, Ratu te mawi jalanae je kejau toto bara tapakan kalunen. Tapi intu hetoh metoh toh aton oloh je labih hai bara Salomo! 11:32 Hong Andau Kiamat, oloh lewu Niniwe akan hingkat haya-hayak dengan kare oloh jaman jetoh, tuntang mandawa ewen, basa oloh Niniwe te hobah bara kare dosan ewen katika Yona bahotbah akan ewen. Tapi intu hetoh aton je labih hai bara Yona!" 11:33 "Jaton oloh je manotong sumbo palus manyahokae atawa manyangkulepe hapan balanai. Ie akan mingkes sumbo te intu tantahae, mangat oloh je tame mite kalawae. 11:34 Mata jete sumbo akan bereng. Amon matam takining, hapus bitim balawa paha-pahai. Tapi amon matam hawur, hapus bitim manjadi kaput pijem. 11:35 Awi te, bua-buah, ela sampai kalawa je aton huang ikau manjadi kaput. 11:36 Amon hapus bitim balawa, tuntang jaton eka bagian je kaput, maka hapus bitim te balawa paha-pahai kilau inyingah kalawan sumbo." 11:37 Limbah Yesus jari lepah hakotak, ije biti oloh Parisi marawei ie kuman intu humae. Maka Yesus haguet kuman intu hete. 11:38 Oloh Parisi te hengan mite Yesus kuman marak dia menyau lengee helo tumon atoran agama. 11:39 Awi te Tuhan hamauh dengae, "Punae keton kare oloh Parisi bahut marasih mangkok tuntang piring hila luare, tapi huang arep keton kabuat basuang dengan kakaras tuntang kapapa. 11:40 Keton humong! En dia Hatalla je manampa hila luar te, jari manampa hila huange kea? 11:41 Taloh je aton huang mangkok tuntang piring keton te keton musti manenga jete akan kare oloh je belom susah. Hapan cara jete, taloh handiai te akan manjadi barasih akan keton. 11:42 Calaka keton kare oloh Parisi! Hasil taloh imbul keton kilau tanding salasih tuntang lengo tuntang kare rarampah awang beken, ije bagi sapuluhe inenga keton akan Hatalla, tapi kaadilan tuntang asi akan Hatalla jaton keton paduli. Padahal jete je sapunae musti ilalus keton, sambil malalus kare taloh awang beken kea. 11:43 Calaka keton, kare oloh Parisi! Keton rajin eka je ihormat huang huma sombayang, tuntang rajin ihormat intu kare pasar. 11:44 Calaka keton! Keton kilau kubur je jaton bara nisan, je inandik oloh awi oloh dia katawae." 11:45 Ije biti guru agama hamauh dengan Yesus, "Pa Guru, hapan kare auh te, Bapa mahina ikei kea!" 11:46 Yesus tombah, "Calaka keton, kare guru agama! Keton manuntut kare hal je bahali tuntang manenga kare atoran je babehat, tapi keton kabuat isut mahin dia maku mandohop oloh malaluse. 11:47 Calaka keton! Keton mamangun kubur akan kare nabi, je impatei awi tato hiang keton kabuat. 11:48 Jadi keton kabuat mangaku je keton manyatuju taloh je ilalus awi tato hiang keton; basa ewen puna mampatei kare nabi te tuntang keton toh je mampendeng kubure. 11:49 Jete sababe kapintar-kaharatin Hatalla hamauh, 'Aku kareh manyoho manalih ewen kare nabi tuntang kare sarohangku; belahe akan impatei tuntang belahe akan ingapehe!' 11:50 Awi te kare oloh jaman jetoh akan ihukum tagal pampatei je ilalus buah kakare nabi bara metoh kalunen injapa, 11:51 nampara pampatei Abel sampai akan pampatei Sakaria, je manjadi intu helat mesbeh tuntang Human Tuhan. Percaya bewei: Kare oloh jaman jetoh pasti akan ihukum tagal kare taloh handiai te. 11:52 Calaka keton, kare guru agama! Kunci hapan muap bauntonggang pangatawan iingkes huang keton, tapi keton kabuat dia maku tame akan huang uka manggau pangatawan te. Malahan keton mahalang haream kare oloh je manggau jalan handak tame akan huange!" 11:53 Katika Yesus malihi eka te, kare guru agama tuntang kare oloh Parisi paham toto manyalan Yesus. Ewen manampara mamancing ie mangat ie maku hakotak tahiu are hal. 11:54 Tuntang pandehan te ewen manantuani ie titi-titip uka manyingkap taloh en-en je sala inyewute.
12:1 Bakoya-koyan oloh hasengkel sampai aton je mahunje paie. Pandehan kare oloh hakarimpong, Yesus hamauh dengan kare muride, "Bua-buah keton manaharep ragin oloh Parisi, iete kaliau ewen te. 12:2 Jaton taloh je basahokan je kareh dia gitan, tuntang jaton taloh je basilim je kareh dia iungkar. 12:3 Taloh je inyewut keton hong hamalem, kareh ihining hong andau balawa; tuntang taloh je imbisik keton hong pinding oloh huang kamar je batutup, kareh imbarita tayap jaton bara tikas." 12:4 "Keleh mingat, o keton kare sobatku! Ela mikeh dengan ewen je mampatei biti tapi dia olih mawi labih bara te. 12:5 Keleh aku mansanan akan keton eweh je patut ingikeh awi keton. Keleh keton mikeh dengan Hatalla! Basa limbah mampatei, ie kuasa kea manganan oloh akan naraka! Percaya ih, ie te je musti ingikeh awi keton. 12:6 Lime kongan burung ampit tau injual regae hapan due kabawak duit je paling korik. Aloh kalote, ije kongan mahin jaton ingalapean awi Hatalla. 12:7 Balau' hong takolokm mahin jari iise samandiaie, tagal te ela mikeh; keton labih haream regan keton bara kare burung ampit!" 12:8 "Ingat bua-buah: Oloh je mangaku arepe hong bentok oloh je ie muridku, ie kareh ingaku kea awi Anak Olon intu taharep kare malekat Hatalla. 12:9 Tapi oloh je milim arepe intu bentok oloh je ie muridku, ie akan iilim kea awi Anak Olon intu taharep kare malekat Hatalla. 12:10 Amon oloh manyewut taloh en-en malawan Anak Olon, ie tau iampun; tapi amon ie mahina Roh Hatalla, ie dia olih iampun. 12:11 Amon keton iimbit akan kare huma sombayang mangat inyidang intu taharep pamarentah atawa oloh je mimbing kuasa, ela mikeh tahiu kilen ampie keton musti mambela arep keton atawa tahiu taloh je musti ingotak keton. 12:12 Basa taloh je musti ingotak keton te kareh iajar awi Roh Hatalla akan keton hong katikae." 12:13 Ije biti oloh bara kakare oloh te hamauh dengan Yesus, "Bapa Guru, coba Bapa manyoho paharingku manenga akangku bagin ramo ayungku je ilihi bapa ikei." 12:14 Yesus tombah, "Pahari, eweh je mangkat aku manjadi hakim atawa manjadi tukang mambagi warisan akan keton due hampahari?" 12:15 Limbah te dengan kakare oloh je aton hete Yesus hamauh, "Bua-buah tuntang rende-rendeng, ela sampai keton kamaha. Basa pambelom olon dia bahapang dengan panatau, aloh panatau te hatawon." 12:16 Palus Yesus manyarita paribasa toh, "Aton ije biti oloh tatau. Ie aton tempon petak je are mimbit hasil. 12:17 Oloh tatau te nampara manirok huang ateie, 'Jari jaton hindai eka mingkes hasil petakku. En akalku toh?' 12:18 Limbah te ie manirok tinai tuntang hamauh dengan arepe kabuat, 'Nah, aku aton akal; kare gudangku kareh inyohoku oloh mungkare palus aku mamangun je labih hai. Intu hete aku kareh mingkes kakare gandumku hayak dengan kare ramongku awang beken. 12:19 Limbah te aku kareh hamauh dengan arepku kabuat, ikau toh batuah! Uras kare taloh bahalap jari ikau tempoe tuntang dia tau lepah sampai banyelo-nyelo. Toh keleh istirahat ih! Kuman belom tuntang keleh pamangat belaim dengan pambelom aim!' 12:20 Tapi Hatalla hamauh dengae, 'O oloh humong! Alem toh kea ikau kareh matei, jadi eweh kea je tau mandino salepah panataum je jari inampunam akan arepm te?' 12:21 Kalote kajariae akan gagenep oloh je satiar mawi arepe manjadi oloh tatau intu matan Hatalla." 12:22 Palus Yesus hamauh dengan kare muride, "Jete sababe aku hamauh, 'Ela mikeh dengan pambelom keton, iete en taloh je akan indu kinan keton, atawa en taloh je akan ihapan keton.' 12:23 Pambelom toh labih hai bara panginan, tuntang biti labih hai bara pakaian. 12:24 Tampayah keton kare burung kak! Ewen jaton mimbul, jaton manggetem, tuntang jaton kea mingkes gudang atawa lepau. Tapi Hatalla mahaga ewen! Keton toh labih barega bara kare burung! 12:25 Eweh bara marak keton je awi kikehe olih mamanjang umure isut barangai? 12:26 Amon hal je kakorik te bewei mahin dia olih keton malaluse, mbuhen keton mikeh tahiu hal je beken? 12:27 Tampayah keton kilen ampie kare kambang bakung belom; kare kambang te dia bagawi, dia kea manjawet. Tapi Raja Salomo je kalote katataue mahin jaton mahapan pakaian je kahalape kilau ain kare kambang te! 12:28 Oru hong padang belom andau toh tuntang andau jewue tinai lepah inusul. Tapi Hatalla kalote ampie mambungas kare oru te. Mahin hindai keton! Tapi keton tapas kapercaya! 12:29 Jadi ela mikeh tuntang bembang tahiu taloh je akan indu kinan tuntang je akan ihop keton. 12:30 Kare hal je macam te inggoang awi kare oloh je dia mangasene Hatalla. Padahal Bapa keton katawan je keton perlu mahapan kare taloh samandiai te. 12:31 Tapi keton musti manggau jalan uka Hatalla marentah pambelom keton, maka taloh awang beken te kareh inenga Hatalla kea akan keton." 12:32 "Keton je baya isut kare bitin keton, ela mikeh! Basa Bapa keton manenga akan keton berkat bara pamarentahan ayue. 12:33 Jual kare ramon keton tuntang tenga duite akan oloh je belom susah. Tampa akan arep keton dompet je dia tau usang, iete ramo je inyimpan hong sorga. Panatau jete dia tau nihau basa maling dia olih manduae tuntang gagat dia tau marusake. 12:34 Basa hong kueh panatau keton, intu hete kea atei keton!" 12:35 "Rende-rendeng manaharep gagenep hal. Keton musti tatap hapakaian tuntang sumbon keton tetep inotong, 12:36 sama kilau kare oloh je tatap mentai tempoe buli bara pesta kawin. Amon tempoe te haluli tuntang manegah bauntonggang, ewen kareh bajeleng muap bauntonggang. 12:37 Ontong toto akan kare jipen je iyondau metohe mentai hong katika tempoe dumah. Percaya bewei: tempoe te kareh batatap tuntang manyoho kare jipen te mondok, palus mandohop ewen. 12:38 Ontong toto kare jipen te amon tempoe sondau ewen batatap mentai, aloh ie dumah hong bentok alem atawa labih liwat bara te! 12:39 Keleh mingat jetoh! Paribasae tuan huma katawan jam pire maling handak dumah, ie akan manjaga mangat maling dia tame akan huang humae. 12:40 Tagal te keton kea musti batatap basa Anak Olon kareh dumah hong katika je dia ingatawan keton." 12:41 "Tuhan en auh ajar te inintu Tuhan akan ikei atawa akan oloh samandiai?" koan Petrus. 12:42 Tuhan tombah, "Jipen je kueh je baketep tuntang je pintar-harati sampai iangkat awi tempoe manjadi kapala mahunjun kare jipen awang beken mangat ie mampakanan ewen hong katikae? 12:43 Batuah toto jipen te amon tempoe haluli sondau ie metohe malalus gawie! 12:44 Percaya bewei: Tuan te kareh manenga kapercaya akae mahaga kare ramoe. 12:45 Tapi amon jipen te hamauh huang ateie, 'Tempongku magon tahi hindai harue dumah haluli,' palus ie mawi kakare jipen beken tuntang kuman mihop sampai babusau, 12:46 maka tempoe kareh haluli hong andau tuntang jam je dia ie katawae. Tuntang jipen te kareh injara awi tempoe salepah belaie hayak iawie sama kapehee dengan oloh je dia mangasene Hatalla. 12:47 Jipen je katawan kahandak tempoe, tapi dia manatap arepe tuntang dia malalus kahandak tempoe, akan ihewes paham hapan cambuk. 12:48 Tapi jipen je dia katawan kahandak tempoe, limbah te malalus taloh je sala sampai ie musti ihewes hapan cambuk, akan ihewes lowa-lowah bewei. Basa oloh je akae jari inenga are, bara ie akan inuntut are kea. Tuntang oloh je jari are imercaya, bara ie kareh inuntut are kea." 12:49 "Aku dumah uka mawi kare taloh uras bakeho hong hunjun petak toh. Bahalap toto amon apui te jari hanyala! 12:50 Magon aton kapehe je paham je musti aku mahalaue. Tuntang ateiku seke toto helo bara taloh te ilalus. 12:51 En keton manyangka aku dumah uka mimbit kadamai hong kalunen? Dia, jaton kadamai, tapi kalahi. 12:52 Nampara bara katika toh, oloh lime biti huang ije keluarga kareh hakalahi, telo malawan due atawa due malawan telo. 12:53 Bapa oloh kareh malawan anake je hatue tuntang anake je hatue malawan bapae. Indue malawan anake je bawi tuntang anake je bawi malawan indue. Empoe je bawi kareh malawan manantue je bawi tuntang manantu bawi malawan empoe je bawi." 12:54 Yesus hamauh kea dengan oloh are, "Amon keton mite baunandau lembut hong hila barat, keton balalu hamauh, 'Andau handak ujan.' Tuntang puna toto-toto ujan. 12:55 Amon keton mangkeme riwut dumah bara hila salatan, keton hamauh, 'Andau handak mandang.' Tuntang puna toto-toto mandang 12:56 Keton toh oloh je rajin pura-pura! Keton tau mangasene ampin andau awi mite keadaan intu langit tuntang hunjun petak. Mbuhen kare tanda jaman jetoh dia keton tau mangasenee?" 12:57 "Mbuhen keton dia mamutus kabuat taloh je bujur? 12:58 Amon aton oloh mangado keton akan pangadilan, saoli-olih gau jalan uka mahapus perkara te pandehan keton magon hong benteng jalan. Amon dia, ie kareh mimbit keton akan taharep hakim tuntang hakim te kareh manyarah keton akan polisi, tuntang polisi manamean keton akan penjara. 12:59 Percaya bewei! Keton dia tau balua bara penjara te helo bara keton mambayar danda ain keton."
13:1 Hong katika te oloh manyarita akan Yesus tahiu pire-pire oloh Galilea je impatei Pilatus, metoh ewen kanjerae maluput parapahe akan Hatalla. 13:2 Hapan manombah sarita te, Yesus hamauh, "Awi oloh Galilea te impatei kalote, keton mangira jete buktie ewen te labih badosa bara kakare oloh Galilea awang beken? 13:3 Dia samasinde! Tapi keleh mingat: amon keton dia hobah bara kare dosan keton, keton handiai kareh matei kea, sama kilau ewen. 13:4 Kilen ampie kea dengan hanyawalas oloh je matei hong Siloam, katika menara te manjato menyet ewen? Keton mangira jete mamparahan ewen te labih badosa bara kare oloh handiai awang beken je melai hong Yerusalem? 13:5 Dia samasinde! Sinde tinai aku hamauh: Amon keton dia hobah bara dosan keton, keton kareh matei uras kea sama kilau ewen." 13:6 Limbah te Yesus manyarita kare paribasa toh, "Aton ije biti oloh je tempon batang ara hong kabun anggure. Sinde andau ie haguet manggau bua hong batang ara te, tapi ije kabawak bua mahin jaton ie sondaue. 13:7 Maka ie hamauh dengan tukang kabun, 'Ite, jari telo nyelo aku dumah manggau bua ara hong batang ara toh, tapi ije kabawak bua mahin jaton aku sondaue. Teweng ih batang kayu toh! Ie baya mampalepah zat panginan bara petak!' 13:8 Tapi tukang kabun te tombah, 'Nauhe ie belom ije nyelo tinai, Tuan. Aku mancangkul petak hakalilinge tuntang mambuwur pupuk. 13:9 Mikeh ie kareh tau mamua nyelo rahian. Tapi amon dia, tau ih Tuan manyoho oloh manewenge.' " 13:10 Sinde hong andau Sabat, Yesus majar hong ije huma sombayang. 13:11 Intu hete aton oloh bawi je jari hanyawalas nyelo haban, awi aton roh papa huang ie. Oloh bawi te hajongkong tuntang dia olih samasinde mendeng bujur. 13:12 Katika mite ie, ie hamauh hai auhe dengae, "Ibu, ikau bebas bara panyakitm!" 13:13 Palus Yesus mingkes lengee hunjun oloh bawi te, tuntang hong katika te kea ie mendeng bujur palus manara Hatalla. 13:14 Kapala huma sombayang te balait, ganan Yesus mampakeleh oloh hong andau Sabat, tagal te ie hamauh dengan kare oloh, "Aton jahawen andau akan oloh mangat bagawi; keleh dumah hong kare andau te uka impakeleh, ela hong andau Sabat!" 13:15 Tuhan tombah, "Keton toh haliau! Hong andau Sabat uras oloh maliwus sapi atawa kalidaie bara karambang tuntang mimbite balua mangat mampihope. 13:16 Nah, hong hetoh aton ije biti oloh bawi panakan Abraham, je hanya walas nyelo katatahie injarat awi setan. En dia tau ie iliwus bara jarat te hong andau Sabat?" 13:17 Auh tombah Yesus te mawi kare musoh Yesus mahamen toto; tapi kakare oloh awang beken uras hanjak mite kakare taloh heran je iawi Yesus. 13:18 Yesus misek, "Amon Hatalla marentah, kilen ampie keadaae? Dengan en aku tau manandinge? 13:19 Keadaae te sama kilau paribasa toh. Ije kabawak sawi induan awi ije biti oloh palus iimbul hong kabun. Bawak sawi te belom palus manjadi batang kayu, tuntang kare burung palus mawi sarangae intu kare edan kayu te." 13:20 Sinde tinai Yesus misek, "Amon Hatalla marentah, hapan en aku tau mananding ampin keadaae? 13:21 Keadaae sama kilau ragi je induan awi ije biti oloh bawi palus iewoie dengan epat puluh liter tepung, sampai kamer urase." 13:22 Hong benteng jalan akan Yerusalem, Yesus mahalau kare lewu tuntang kare dokoh oloh sambil majar. 13:23 Palus aton oloh misek dengae, "Pa, en baya isut ih oloh je akan inyalamat?" Yesus tombah, 13:24 "Keleh manggau jalan mangat tame mahalau bauntonggang je simit. Basa, ingat! Are oloh je manggau jalan tame tapi jaton olihe. 13:25 Hong katika tempon huma misik tuntang matep bauntonggange keton mendeng intu luar tuntang nampara manegah sambil hamauh, 'Tuan, uap bauntonggang akan ikei!' Tuan te akan tombah, 'Aku dia katawan keton bara kueh!' 13:26 Limbah te keton tombah, 'Ikei jari kuman mihop dengan tuan, tuntang tuan kea jari majar intu kare jalan lewun ikei!' 13:27 Tapi tuan te hamauh tinai, 'Aku dia katawan keton bara kueh. Dari bara hetoh, keton je mawi gawi papa!' 13:28 Katika keton mite Abraham, Isaak tuntang Yakob dengan kakare nabi hanja-hanjak hong lewu taheta ain Hatalla, keton kareh manangis tuntang kapehe awi keton kabuat iharak balua! 13:29 Kare oloh kareh dumah bara hila timor tuntang hila barat, bara utara tuntang salatan, tuntang handak hanja-hanjak huang Lewu Taheta ain Hatalla. 13:30 Puna toto, aton oloh je pangkarahiae kareh manjadi oloh je pangkaheloe, tuntang aton oloh je pangkaheloe je kareh manjadi oloh je pangkarahiae." 13:31 Hong katika te kea aton pire-pire oloh Parisi dumah manalih Yesus tuntang hamauh, "Ela melai intu hetoh! Talih akan eka beken, basa Herodes handak mampatei ikau." 13:32 Yesus tombah, "Lius ih sanan akan oloh je dia baguna te, 'Andau toh tuntang andau jewu aku maharak setan tuntang mampakeleh oloh haban tapi hong andau kateloe, aku handak mahapus kare taloh gawingku.' 13:33 Aloh kalote aku musti marajur kea panjalanangku andau toh, jewu atawa limbah jewu, basa dia bahalap ije biti nabi impatei intu luar Yerusalem. 13:34 Yerusalem, Yerusalem! Kare nabi impateim! Kare sarohan Hatalla imantingm hapan batu sampai matei! Jari pire kali aku handak mamumpong kakare oloh lewum kilau manok pehok mangalindong kare anake hong penda palapase, tapi ikau dia maku! 13:35 Tagal te Hatalla dia hindai mampahayak ikau. Ingat, nampara bara katika toh ikau kareh dia mite aku tinai, sampai ikau hamauh, 'Imberkat ie je dumah huang aran Tuhan.' "
14:1 Sinde hong andau Sabat Yesus haguet kuman intu human ije biti oloh Parisi je basewut. Intu hete oloh manantuani Yesus toto-toto. 14:2 Maka dumah ije biti oloh je buah panyakit kembang pai-lengee manalih Yesus. 14:3 Palus Yesus misek dengan kare guru agama tuntang kare oloh Parisi je aton hete, "Manumon hukum agaman itah, en tau itah mampakeleh oloh haban hong andau Sabat atawa dia?" 14:4 Kare guru agama tuntang kare oloh Parisi te suni ih. Palus Yesus mantehau oloh haban te palus mampakeleh ie, limbah te manyoho ie haguet. 14:5 Limbah te Yesus hamauh dengan kare oloh, "Paribasae ije biti bara kare keton aton tempon ije biti anak atawa ije kongan sapi je manjato akan huang sumur hong andau Sabat, en diakah ie bajeleng manjijit mampalua anak te atawa sapi te huang andau te kea?" 14:6 Tapi ije biti mahin jaton ewen olih tombah auh Yesus tahiu hal te. 14:7 Yesus mite aton kare oloh maja je mintih kare eka je paling bahalap. Tagal te ie manenga ajar toh akan ewen handiai. 14:8 "Amon keton irawei akan pesta kawin, ela dumah palus mondok hong karusi je paling tamam. Basa ela-ela oloh beken je labih tamam bara keton jari irawei kea, 14:9 sampai tempon huma je jari marawei keton due te, tapaksa manalih ikau tuntang hamauh, 'Maap, eka toh jari inatap akan oloh te.' Maka hayak angat mahamen toto ikau tapaksa mondok hong eka je pangkalikute. 14:10 Awi te amon keton irawei, keleh mintih eka je pangkalikute, mangat tempon huma kareh dumah tuntang hamauh dengam, 'O le, ayo mondok hong eka je labih bahalap.' Maka kalote kea keton ihormat intu taharep kakare oloh je irawei awang beken. 14:11 Basa gagenep oloh je manggatang arepe akan imparandah, tapi je mamparandah arepe akan inggatang." 14:12 Palus koan Yesus dengan oloh tempon huma, "Amon ikau marawei oloh akan pesta kuman handau atawa hamalem, ela ikau marawei kawalm atawa paharim, atawa tundah kolam, atawa oloh tatau je hasansila humam. Basa kareh ewen akan marawei ikau kea, tuntang dengan kalote ikau manarima baleh tagal gawim. 14:13 Jadi amon ikau mawi pesta, keleh marawei oloh je belom susah, oloh je cacat, oloh lumpuh tuntang oloh babute. 14:14 Ikau kareh imberkat basa kare oloh te dia baka tau mambaleh kahalap gawim. Kahalap gawim kareh imbaleh awi Hatalla hong katika kare oloh bahalap impisik tinai bara pampatei." 14:15 Metoh ije biti bara kare oloh je kuman haya-hayak hete mahining auh Yesus, ie hamauh, "Ontong toto oloh je kareh kuman hinje dengan Hatalla amon ie dumah kilau Raja!" 14:16 Tapi Yesus hamauh dengan oloh te, "Hong sinde katika, aton ije biti oloh mawi pesta hai tuntang marawei oloh are. 14:17 Katika jari sampai uka pesta inampara, oloh te manyoho jipee haguet manalih kare oloh je irawei tuntang hamauh, 'Keleh dumah, kare taloh samandiai uras jari tatap!' 14:18 Tapi kakare ewen te mije-mije uras balaku maap. Ije solake hamauh dengan jipen te, 'Aku harungku mamili ije kalambar petak tuntang aku perlu haguet mariksae. Jadi maap ih aku' 14:19 Ije beken tinai hamauh, 'Aku harungku mamili lime pasang sapi, tuntang aku handak mancoba kare sapingku te. Maap ih aku.' 14:20 Ije beken tinai hamauh, 'Aku harungku kawin, awi te aku dia tau dumah.' 14:21 Jipen te buli tuntang mansanan hal te akan tempoe. Tempoe te balait toto, tuntang hamauh dengan jipee, 'Jeleng ih haguet akan kare jalan tuntang akan kare tapakan lewu. Imbit akan hetoh kare oloh je belom susah, oloh cacat, oloh babute, tuntang oloh lumpuh.' 14:22 Limbah te jipen te hamauh, 'Tuan, parentah tuan jari ilalusku, tapi eka hetoh magon are.' 14:23 Palus tuan te hamauh, 'Ayo, talih akan kare jalan hai tuntang kare serok lewu, tuntang soho kare oloh dumah mangat humangku kontep. 14:24 Ingat! Ije biti mahin jaton bara kare oloh je jari irawei te kareh mangkeme kamangat panginan hong pesta ayungku toh!' " 14:25 Are oloh omba mananjong mampahayak Yesus. Yesus tampaliau tuntang hamauh dengan ewen, 14:26 "Amon oloh dumah manalih aku, tapi labih sinta indue, bapae, sawae, anak jariae, kare paharie, malahan arepe kabuat, oloh te dia tau manjadi muridku. 14:27 Oloh je dia handak mananggong sampalakie tuntang omba aku, dia tau manjadi muridku. 14:28 Amon ije biti bara keton handak mamangun ije candi, ie musti mondok helo mareken kare ongkose mangat ie katawan en duite sukup atawa dia, hapan mampajadi candi te. 14:29 Basa kareh amon gitan ampie ie dia tau mampajadie, padahal lapike jari inampa, maka kakare oloh je mite gawi te kareh manantawee. 14:30 Ewen kareh hamauh, 'Ceh, oloh te mamangun, tapi dia tau mampajadie!' 14:31 Amon ije biti raja je tempon sapuluh koyan tantara handak parang malawan raja beken je tempon duepuluh koyan tantara, batantu raja te mondok manimbang helo huang ateie en ie sukup kaabase hapae malawan musohe te. 14:32 Amon ie katawan ie te tapas kaabase, batantu metoh musohe te magon kejau, ie kareh mampait sarohae mangat balaku badamai ih." 14:33 Kajariae Yesus hamauh, "Kalote kea dengan keton. Jaton ije biti bara keton tau manjadi muridku, amon ie jaton mangorban taloh samandiai." 14:34 "Uyah te bahalap, tapi amon uyah te batawah, en tau ie ingahing tinai? 14:35 Jaton gunae hindai, akan tana dia baguna akan pupuk mahin dia. Baya inganan bewei. Amon aton pinding keleh mahining!"
15:1 Hong sinde andau, are panagih pajak tuntang kare oloh je inyewut oloh dia bahalap, dumah mahining Yesus. 15:2 Kare oloh Parisi tuntang kare guru agama manampara bakotok. Ewen hamauh, "Ceh, oloh toh manarima kare oloh je dia bahalap tuntang malahan kuman hinje ewen!" 15:3 Tagal te Yesus manyarita akan ewen paribasa toh. 15:4 "Paribasae ije biti bara keton aton tempon saratus kongan tabiri, balalu nihau ije kongan -- en taloh je handak iawie? Pasti ie kareh malihi tabiri je jalatien puluh jalatien kongan te hong padang oru tuntang haguet manggau je nihau te sampai dinon. 15:5 Tuntang amon ie sondau tinai tabiri te, ie paham hanjak sampai tabiri te ietoe hunjun bahae, 15:6 palus mimbite buli. Limbah te ie mantehau kare kawale tuntang kare oloh hasansila humae, tuntang hamauh, 'Has itah hanja-hanjak. Tabiringku je layang jari sondau haluli!' 15:7 Nah, kalote kea hong sorga aton kahanjak je labih hai tagal ije biti oloh badosa je hobah bara tagal jalatien puluh jalatien biti oloh je jari bahalap tuntang dia perlu hobah." 15:8 "Atawa, paribasa ije biti oloh bawi aton mingkes sapuluh duit perak balalu nihau ije -- en taloh je handak iawie? Ie kareh manotong sumboe tuntang mamapas humae sampai ie sondau duit te. 15:9 Katika ie sondau duit te, ie mantehau kare kawale tuntang kare oloh hasansila humae, palus hamauh, 'Aku hanjak toto jari sondau haluli duitku je nihau. Has itah hanja-hanjak!' 15:10 Kalote kea malekat Hatalla hanjak amon aton ije biti oloh papa hobah bara kare dosae. Percaya bewei!" 15:11 Yesus hamauh tinai, "Aton ije biti bapa je tempon due biti anak hatue. 15:12 Je busu hamauh dengae, 'Bapa, tenga akangku metoh toh panatau itah je akan bagin aingku.' Maka bapae mambagi panataue te akan kadadue anak te. 15:13 Pire-pire andau limbah te anak busu te manjual warisan je bagin aie te palus haguet akan eka je kejau. Hong hete ie maroyal kare duite hapae belom rami-rami. 15:14 Katika duite lepah-lingis, maka hong lewu te aton lembut lau je paham, sampai ie nampara susah belom. 15:15 Palus ie haguet bagawi akan ije biti oloh hong lewu te, tuntang oloh te manyoho ie akan tana manjaga bawoie. 15:16 Ganan ie paham balau', mipen toto angate handak manyuang kanaie hapan panginan bawoi te. Aloh kalote, ije biti mahin jaton oloh manenga panginan akae. 15:17 Kajariae ie taraingat tuntang hamauh, 'Kare oloh je bagawi dengan bapaku are toto taloh kinae, tapi aku hetoh handak matei balau'! 15:18 Aku handak haguet manalih bapaku ih, tuntang hamauh dengae: Bapa, aku jari badosa intu taharep Hatalla tuntang taharep Bapa. 15:19 Dia patut tinai aku inyewut anak bapa. Sewut ih aku oloh panggawi ain bapa.' 15:20 Maka ie haguet buli manalih bapae. Magon kejau bara huma, bapae jari mite ie. Hayak dengan kataharue bapae hadari manyondau ie, palus mamalok tuntang manyium ie. 15:21 'Bapa', koan anak te, 'aku jari badosa intu taharep Hatalla tuntang taharep bapa. Dia patut tinai aku inyewut anak bapa.' 15:22 Tapi bapae mantehau kare anak oloh tuntang hamauh, 'Jeleng! duan pakaian je paling bahalap, tuntang kepan intu ie. Kepan tisin intu tunjoke, tuntang sapatu intu paie. 15:23 Limbah te duan anak sapi je paling baseput palus nyambalih! Itah handak kuman tuntang hanja-hanjak. 15:24 Basa anakku toh jari matei, toh belom tinai; ie jari layang, toh sondau haluli.' Palus ewen nampara pesta. 15:25 Pandehan te anak je bakas aton hong tana. Metoh ie buli tuntang sampai hong tokep huma, ie mahining auh musik tuntang oloh manari. 15:26 Ie mantehau ije bara kare jipee, palus misek, 'En awi oloh hong huma?' 15:27 Jipen te tombah, 'Andi tuan jari dumah haluli! Tuntang bapa tuan jari manyoho manyambalih sapi tabela je baseput, basa ie jari dinon haluli anake je dumah dengan salamat!' 15:28 Anak je bakas te sangit toto sampai ie dia maku tame huma. Palus bapae balua tuntang mangatau ie tame. 15:29 Tapi ie hamauh, 'Banyelo-nyelo katatahie aku bagawi mate-matei akan bapa. Dia puji aku malawan parentah bapa. Tuntang en je inenga bapa akangku? Ije kongan kambing mahin hindai puji bapa manenga akangku hapaku pesta dengan kare kawalku! 15:30 Anak bapa te jari mampalepah panatau bapa dengan bawin lontei, tapi sana ie haluli, bapa manyambalih sapi tabela je baseput akae!' 15:31 'O anakku,' koan bapae tombah, 'ikau harajur aton hetoh hinje aku. Kakare taloh je ayungku jete ayum kea. 15:32 Tapi itah musti pesta tuntang hanjak, basa andim te jari matei, tapi toh belom tinai; ie jari layang, tapi toh jari sondau haluli.' "
16:1 Yesus hamauh dengan kare muride, "Aton ije biti oloh tatau. Ie aton tempon ije pagawai keuangan je maurus panataue. Oloh tatau te mandino laporan tahiu kapala pagawai keuangan ayue te je maroyal duite. 16:2 Jadi ie mantehau kapala keuangan te tuntang hamauh, 'En toh taloh je ihiningku tahiu ikau? Toh sarah lepah akangku laporan tahiu gawim maurus panatauku. Ikau dia tau manjadi pagawai keuangan ayungku.' 16:3 Maka pagawai te manirok, 'En je musti iawiku toh? Tuan ayungku toh handak mampaterai aku. Mancangkul, jaton kaabasku; manyadakah, aku mahamen. 16:4 Aton akalku; amon aku jari impaterai, aku musti mahaga are kawalku je maku manarima aku hong human ewen!' 16:5 Jadi pagawai keuangan te mantehau gagenep oloh je butang dengan tuan ayue te. Akan je solake, ie hamauh, 'Pire utangm dengan tuan ayungku?' 16:6 Oloh te tombah, 'Saratus balanai undus.' Pagawai te hamauh dengae, 'Toh surat utangm. Mondok tuntang nyurat bajeleng: lime puluh.' 16:7 Limbah te ie hamauh dengan je kaduee, 'En pahari, pire utangm?' Oloh te tombah, 'Sakoyan karung gandum.' Pagawai keuangan te hamauh dengae, 'Toh surat utangm. Surat: hanya ratus.' 16:8 Maka majikan te manara pagawai keuangan je dia jujur te tagal gawie je pintar te; basa oloh kalunen toh labih pintar mator kare urusan ewen bara kare oloh je belom hong kalawa." 16:9 Palus Yesus hakotak tinai, koae, "Hining toh! Keleh mahapan panatau kalunen toh mangat mandino kawal, uka amon panatau kalunen toh jari dia barega hindai, keton kareh inarima hong eka je katatahie. 16:10 Oloh je tau imercaya huang kare taloh je korik, tau imercaya kea huang taloh je hai. Tapi oloh je dia olih imercaya huang kare taloh korik, dia olih kea imercaya huang kare taloh hai. 16:11 Jadi, amon tahiu panatau kalunen toh keton dia olih imercaya, eweh je maku manenga kapercaya akan keton tahiu panatau roh? 16:12 Tuntang amon tahiu taloh je ain oloh beken, gitan batantu keton dia tau imercaya, eweh tau manenga akan keton taloh je puna ain keton? 16:13 Jaton ije biti oloh tau bagawi akan due tuan; basa ie kareh labih sinta dengan ije bara dengan je beken, atawa ie kareh labih heret dengan ije bara dengan je beken. Kalote kea dengan keton. Keton dia tau bagawi akan Hatalla tuntang akan ramon panatau kea." 16:14 Kare oloh Parisi mahining taloh samandiai je ingotak Yesus. Palus ewen manantawe ie, basa ewen te rajin dengan duit. 16:15 Tapi Yesus hamauh dengan ewen, "Keton toh oloh je bujur ampie intu taharep oloh beken, tapi Hatalla katawan taloh je huang atei keton. Basa taloh je inampayah gantong awi olon, inampayah randah awi Hatalla. 16:16 Hukum je inenga Moses tuntang auh ajar kare nabi, tetep ihapan sampai Yohanes Pampandoi. Bara katika te Barita Bahalap tahiu kilen ampie Hatalla marentah kilau raja tarus insanan. Tuntang oloh hajajuan arepe manjadi anak ungkup ain Hatalla. 16:17 Tapi labih gampang akan langit tuntang kalunen toh nihau bara ije hurup huang Hukum ain Hatalla imbalang. 16:18 Eweh je manganan sawae palus kawin dengan oloh bawi beken, oloh te habandong. Tuntang oloh je kawin dengan oloh bawi beken je jari inganan, ie habandong kea." 16:19 "Aton ije biti oloh tatau. Pakaiae te lara-larang, tuntang pambelome sanang-mangat genep andau. 16:20 Hong bauntonggang humae aton insahan ije biti oloh belom susah je arae Lasarus. Bitie kontep awi buhit. 16:21 Ie mipen handak manyuang kanaie hapan kare tisan panginan je manjato bara mejan oloh tatau te. Aso mahin aton dumah manjelap buhite. 16:22 Limbah te oloh je belom susah te matei palus iimbit awi malekat akan eka ije paham ihormat hila silan Abraham hong sorga. Oloh tatau te matei kea tuntang ingubur. 16:23 Hong lewu liau ie paham kapehee. Tuntang hong katika ie manampayah bara hete akan hunjun, ie mite Abraham intu eka je kejau tuntang Lasarus aton hila balikat Abraham. 16:24 'Bapa Abraham!' koan oloh te mantehau. 'Pasi aku toh. Soho Lasarus manculop tunjoke akan huang danum palus manalih hetoh mambisa jelangku. Aku kapehe toto huang apui toh!' 16:25 Tapi Abraham tombah, 'Ingat anakku: katahin ikau belom ikau jari mandino taloh handiai je bahala-halap, tapi Lasarus mandino taloh je eka kajilek. Toh ie sanang hong hetoh, tuntang ikau kapehe. 16:26 Beken bara te, intu helat itah toh jari inampa tiwing je hai, uka oloh bara hetoh dia tau akan hikau tuntang oloh bara hikau dia tau akan hetoh!' 16:27 'Amon kalote, Pa,' koan oloh tatau te, 'aku balaku nyame-nyame mangat bapa manyoho Lasarus akan human bapaku. 16:28 Hete aton lime paharingku. Nyoho Lasarus mampingat ewen, mangat ewen mahin ela sampai manjato akan eka kapehe toh.' 16:29 Abraham tombah, 'Intu ewen jari aton kare surat ain Moses tuntang surat ain kare nabi! Nauhe ih ewen manumon kare auh je tarasurat huang surat te!' 16:30 Tapi oloh tatau te tombah, 'Jete dia sukup Pa Abraham. Tapi jaka aton oloh matei belom haluli tuntang dumah manalih ewen, ewen akan hobah bara kare dosan ewen.' 16:31 Tapi Abraham hamauh, 'Amon ewen dia paduli parentah Moses tuntang kare nabi, pasti ewen dia baka percaya kea, aloh aton oloh matei belom haluli.' "
17:1 Yesus hamauh dengan kare muride, "Kare taloh je manampa sabab oloh mawi dosa pasti aton. Tapi calaka oloh je mawi sabab te! 17:2 Labih bahalap amon bindang batu hai injarat intu uyate, palus ie impaleteng akan huang tasik bara ie mawi sabab sampai ije biti bara kare oloh je korik toh mawi dosa. 17:3 Tagal te keleh barendeng! Amon paharim mawi dosa, tingak ie. Amon ie manyasal, ampun ih ie. 17:4 Amon ie badosa dengam hangka uju jandau tuntang genep kali ie dumah manalih ikau tuntang hamauh, 'Aku balaku maap,' ampun ih ie." 17:5 Kare rasul hamauh dengan Tuhan Yesus, "Tuhan, paabas kapercayan ikei." 17:6 Tuhan tombah, "Amon huang keton aton kapercaya kahain bawak sawi, keton tau hamauh dengan batang sikon toh, 'Bajawut ikau tuntang belom ih hong tasik,' pasti batang kayu te kareh manumon parentahm." 17:7 "Paribasae ije biti bara keton aton tempon jipen je manaja hong tana atawa manyakatik tabiri. Amon jipen te buli, en ie hamauh dengae, 'Ayo jeleng kuman'? 17:8 Pasti dia! Malahan ie kareh hamauh dengae, 'Natap panginan akangku. Kepan pakaian je barasih tuntang entai aku pandehan aku kuman mihop; limbah te harun ikau tau kuman.' 17:9 Jipen te dia perlu inara karana ie jari mamenda parentah tempoe, kan? 17:10 Kalote kea keton. Amon keton jari malalus kare taloh handiai je irentah akan keton, keleh keton hamauh, 'Ikei toh baya jipen bewei, ikei baya malalus kapatut gawin ikei.' " 17:11 Huang panjalanae akan Yerusalem, Yesus mahalau helat due daerah, Samaria tuntang Galilea. 17:12 Metoh ie tame ije lewu, ie inalih awi sapuluh oloh je buah panyakit kerai je bakaike-ikeh ampie. Ewen mendeng bara kejau 17:13 tuntang mangkariak, "Yesus! Tuan! pasi ikei toh!" 17:14 Katika Yesus mite ewen, ie hamauh, "Lius talih kare imam, laku mangat ewen mariksa bitin keton." Metoh ewen mananjong, salenga nihau panyakit ewen. 17:15 Ije bara ewen te, sana ie mangatawan arepe keleh, ie haluli sambil basasorak manara Hatalla. 17:16 Intu taharep Yesus ie palus sontop manyembah tuntang manyewut tarimakasih akae. Oloh te oloh Samaria. 17:17 Limbah te tinai Yesus hamauh, "En dia sapuluh biti oloh je jari aton impakeleh? Hong kueh ewen jalatien te tinai? 17:18 Mbuhen salenga oloh luar toh ih je haluli manyewut tarimakasih akan Hatalla?" 17:19 Palus Yesus hamauh dengan oloh te, "Hingkat, tuntang lius. Awi ikau percaya dengangku, maka ikau keleh." 17:20 Pire-pire oloh Parisi misek dengan Yesus hamparea Hatalla dumah uka marentah. Yesus tombah, "Pamarentah ain Hatalla dia nampara mahapan kare tanda je tau gitan oloh, 17:21 sampai oloh tau hamauh, 'Ayo ite hetoh, toh ie!' atawa, 'Hong kanih ie!' Basa Hatalla jari nampara marentah hong bentok keton." 17:22 Limbah te Yesus hamauh dengan kare muride, "Katikae kareh sampai keton handak mite jandau barangai bara kare andau ain Anak Olon, tapi keton dia tau mitee. 17:23 Kare oloh kareh hamauh dengan keton, 'Ite, hikau!' atawa, 'Ite, intu hetoh!' Tapi ela ih keton balua manggaue. 17:24 Sama kilau kilat mamancar bara langit, tuntang balawa bara saran silae akan saran silae, kalote kea kareh ampin Anak Olon hong andau ayue. 17:25 Tapi sola-solake ie musti buah are kapehe tuntang dia inarima awi kare oloh jaman jetoh. 17:26 Hong Andau Anak Olon kareh ingarinah, ampie te sama kilau hong jaman Noah horan. 17:27 Oloh kuman mihop, tuntang kawin; kalote raju-rajur sampai Noah tame akan huang banama tuntang danum soho dumah hayak mampatei kare oloh te samandiai. 17:28 Kea kilau hong jaman Lot. Oloh kuman mihop, hajual-habili, malan mawi tana tuntang mamangun huma. 17:29 Tapi katika Lot balua bara Sodom, hong andau te apui tuntang barirang mohon bara langit tuntang mambinasa ewen samandiai. 17:30 Kalote ampie kareh hong andau Anak Olon ingarinah. 17:31 Hong andau te oloh je jari aton intu hunjun sapau humae ela mohon mado manduan kare ramo je huang huma. Kalote kea oloh je metoh hong tana ela haluli akan humae. 17:32 Ingat taloh je jari manjadi dengan sawan Lot! 17:33 Oloh je satiar handak manyalamat pambelome, kareh nihau pambelome. Tapi oloh je nihau pambelome kareh manyalamat pambelome. 17:34 Percaya bewei: Hong alem te, due biti oloh je metohe batiroh intu ije ranjang, ije kareh iimbit tuntang ije tinai ilihi. 17:35 Due biti oloh bawi metohe manggiling gandum, ije akan iimbit tuntang ije tinai ilihi. 17:36 Due biti oloh metohe bagawi hong tana, ije akan induan tuntang ije tinai ilihi." 17:37 Kare murid Yesus misek, "Hong kueh hal te akan manjadi Tuhan?" Yesus tombah, "Hong kueh aton hantu, intu hete aton burung je kuman hantu."
18:1 Limbah te Yesus manyarita ije paribasa hapan majar kare muride uka ewen harajur balakudoa tuntang ela nihau kaharape. 18:2 Yesus hamauh, "Hong ije lewu aton ije hakim je dia mikeh dengan Hatalla, tuntang ie dia paduli eweh bewei. 18:3 Hong lewu te kea aton ije biti oloh bawi balo je manyambulang manalih hakim te balaku mangat perkarae imbela. 'Dohop ih aku manaharep musohku,' koan balo te. 18:4 Pire-pire katahie hakim te dia maku mandohop balo te. Tapi kajariae hakim te manirok, 'Aloh aku dia mikeh dengan Hatalla, tuntang dia paduli dengan eweh bewei, 18:5 tapi awi balo toh harajur manderoh aku, labih bahalap aku mambela perkarae te. Amon dia, ie kareh raju-rajur dumah tuntang manyusah aku.' " 18:6 Palus Tuhan hamauh, "Keleh keton mite taloh je insanan awi hakim je dia bujur te! 18:7 Nah, en Hatalla dia handak mambela perkara ain ungkupe kabuat je mantehau ie handau hamalem? En ie handak malumba-lumbar katikae uka mandohop ewen? 18:8 Percaya bewei: ie kareh bajeleng mandohop huang perkaran ewen! Tapi amon Anak Olon dumah, en magon aton ie sondau oloh je percaya dengae hong hunjun petak?" 18:9 Yesus manyarita kea paribasa toh je inintue akan oloh je manampayah oloh beken randah, tapi percaya arepe kabuat labih bahalap. 18:10 Koan Yesus, "Aton due biti oloh haguet akan Human Tuhan mangat balakudoa. Ije biti te oloh Parisi, tuntang je beken te panagih pajak. 18:11 Oloh Parisi te mendeng mangabuat tuntang balakudoa, 'O Hatalla, aku manyewut tarimakasih akam, basa aku dia kilau oloh beken, je babungo, tulas, atawa pahabandong. Aku manarima kasih awi aku dia kilau panagih pajak te. 18:12 Aku puasa handue ije minggo, tuntang aku manyarah akam sapersapuluh bara kakare hasil je dinongku.' 18:13 Tapi panagih pajak te mendeng bara kakejau tuntang ie malahan jaton bahanyi mananggera akan langit. Sambil mamarut usoke ie hamauh, 'O Hatalla, pasi aku oloh badosa toh!' " 18:14 "Percaya bewei," koan Yesus, "katika buli huma, maka panagih pajak te ih je inarima Hatalla tapi oloh Parisi te dia inarima. Basa gagenep oloh je manggatang arepe akan imparandah; tuntang gagenep oloh je mamparandah arepe akan inggatang." 18:15 Aton kare oloh mimbit are anak korik manalih Yesus mangat ie mimbing tuntang mamberkat ewen. Katika kare murid Yesus mitee, ewen malait kare oloh te. 18:16 Tapi Yesus mantehau kare anak te palus hamauh dengan kare muride, "Nauhe ih kare anak korik te manalih aku! Ela mangahana ewen, basa oloh je kilau toh je manjadi anak ungkup ain Hatalla. 18:17 Ingat! Oloh je dia manaharep Hatalla kilau ije biti anak korik, kareh dia tau manjadi ungkup ain Hatalla." 18:18 Ije biti pamimpin Yehudi misek dengan Yesus, "Pa Guru je bahalap, aku musti malalus en mangat tau manarima pambelom je bujur tuntang katatahie?" 18:19 "Mbuhen ikau manyewut aku bahalap?" koan Yesus misek ie. "Dia aton oloh je bahalap, beken bara Hatalla kabuat. 18:20 Ikau jari katawan kare parentah Hatalla: 'Ela habandong, ela mampatei olon, ela manakau, ela mananjaro, tuntang hormat bapam tuntang indum.' " 18:21 "Uras kare parentah te jari inumongku bara tabela," koan oloh te tombah. 18:22 Mahining auh te Yesus hamauh, "Magon aton ije hal je musti ikau malaluse: Jual kakare ramom, tenga duite akan kare oloh je belom susah, tuntang ikau kareh mandino ramo hong sorga. Limbah te ikau dumah omba aku." 18:23 Tapi metoh oloh te mahining te, ie kapehe ateie awi ie tatau toto. 18:24 Yesus katawan oloh te kapehe ateie. Tagal te ie hamauh, "Bahali toto akan oloh tatau manjadi anak ungkup ain Hatalla! 18:25 Labih gampang ije kongan onta tame rumbak pilus, bara ije biti oloh tatau tame Lewu Taheta ain Hatalla." 18:26 Kare oloh je mahining Yesus hamauh kalote, misek, "Amon kalote, eweh je tau salamat?" 18:27 Yesus tombah, "Taloh je dia mungkin akan olon, mungkin akan Hatalla!" 18:28 Palus Petrus hamauh, "Ite ih! Ikei jari malihi huma serok ikei mangat omba Bapa." 18:29 "Percaya bewei!" koan Yesus. "Oloh je jari malihi humae atawa kabalie, atawa paharie atawa indu bapae atawa anak jariae awie sinta Hatalla, 18:30 oloh te kareh mandino baleh balipe-lipet hong wayah jetoh, tuntang hong wayah je akan dumah akae kareh inenga pambelom je bujur tuntang katatahie." 18:31 Yesus mamumpong duewalas muride mangabuat dengan ewen ih, palus hamauh, "Hining toh! Itah metoh toh manalih Yerusalem. Hong hete kakare taloh je inyurat kare nabi tahiu Anak Olon, kareh manjadi. 18:32 Ie kareh inyarah akan kare oloh je dia Yehudi, je kareh halalea, mahina, tuntang maluja ie. 18:33 Ewen kareh mangapehe tuntang mampatei ie, tapi hong andau je kateloe ie kareh misik." 18:34 Kare murid Yesus jaton harati taloh samandiai te. Riman kare auhe te inyahokan bara ewen. Ewen jaton katawan, tahiu en ie hakotak. 18:35 Katika Yesus handak sampai hong Yeriko, ije biti oloh babute metoh mondok manyadakah intu saran jalan. 18:36 Katika ie mahining oloh are te mahalau, ie misek, "En toh?" 18:37 "Yesus, oloh Nasaret te, mahalau," koan ewen dengae. 18:38 Maka oloh babute te mangkariak, "Yesus, anak Dawid! Pasi aku toh!" 18:39 Kare oloh je hila baun, malait tuntang manyoho ie suni. Tapi ie mangkariak labih hai hindai, "Anak Dawid! Pasi ah aku toh!" 18:40 Yesus tende tuntang manyoho mimbit oloh babute te manalih ie. Katika ie sampai, Yesus misek, 18:41 "En taloh je ingahandakm uka aku mawie akam?" "Tuan," koan oloh te tombah, "aku handak mite." 18:42 Palus Yesus hamauh, "Amon kalote, ite ih! Awi ikau percaya dengangku, ikau keleh." 18:43 Hemben te kea ie tau mite, palus ie omba Yesus sambil manyewut tarimakasih akan Hatalla. Katika oloh are te mite hal te, ewen uras manara Hatalla.
19:1 Katika Yesus sampai hong Yeriko, ie mananjong palus mahoroi lewu te. 19:2 Hong lewu te aton ije biti kapala panagih pajak je tatau, arae Sakeus. 19:3 Ie mipen mite Yesus te, tapi awi oloh lalau are tuntang ie kabuat bitie pandak, maka ie dia olih mite Yesus. 19:4 Jadi, ie hadari mananselo kare oloh, palus mandai' ije batang kayu, mangat olih mite Yesus je hindai isut ih handak mahalau eka te. 19:5 Katika Yesus sampai intu eka batang kayu te, ie manampayah akan hunjun palus hamauh, "Sakeus, mohon bajeleng! Basa aku musti maja humam andau toh." 19:6 Sakeus kaje-kajeng mohon tuntang manambang Yesus dengan kahanjake. 19:7 Kakare oloh je mite hal te nampara bakotok. Ewen hamauh, "Ceh! Ie haguet maja akan human oloh je dia bahalap!" 19:8 Limbah te tinai, intu humae, Sakeus mendeng tuntang hamauh dengan Yesus, "Tuhan, satengah bara ramongku handak inyadakahku akan oloh je belom susah; tuntang eweh bewei je puji aku mamikire kareh imbayarku akae lipet epat karee!" 19:9 Balalu koan Yesus, "Hong andau toh, ikau tuntang hapus keluargam inyalamat awi Hatalla tuntang inenga pambelom je taheta awi ikau kea bara panakan Abraham. 19:10 Anak Olon dumah uka manggau tuntang manyalamat oloh je layang." 19:11 Pandehan oloh magon mahining Yesus hakotak, ie manyarita ije paribasa. Awi metoh te ie jari tokep Yerusalem, tuntang oloh manyangka Hatalla bajeleng akan marentah kilau Raja hong kalunen. 19:12 Yesus hamauh, "Aton ije biti oloh bangsawan je haguet akan lewu kejau uka iangkat manjadi raja, limbah te ie haluli. 19:13 Helo bara haguet, ie mantehau sapuluh jipee, palus manenga akan ewen genep bitie ije kabawak duit amas. 'Keleh keton badagang hapan duit toh katahin aku haguet,' koae dengan ewen. 19:14 Tapi oloh lewun aie te dia rajin dengae. Jadi, limbah ie haguet, ewen mampait utusan uka mansanan, 'Ikei dia maku oloh toh manjadi rajan ikei.' 19:15 Tapi bangsawan te iangkat manjadi raja, limbah te ie buli akan lewu. Bajeleng ie mantehau kare jipee manaharep ie, uka mangatawan kare ontong je jari dinon ewen. 19:16 Jipen ije solake dumah tuntang hamauh, 'Tuan, ije kabawak duit amas je inenga tuan te, jari iawiku manjadi sapuluh kabawak.' 19:17 'Buah te,' koan tuan te, 'ikau jipen je bahalap! Awi huang kare hal je korik ikau tau imercaya, maka aku handak mangkat ikau manjadi oloh je manguasa sapuluh lewu.' 19:18 Jipen je kaduee dumah tuntang hamauh, 'Tuan, ije duit amas je inenga tuan te, jari inyatiarku manjadi lime.' 19:19 Dengan jipen te raja hamauh, 'Ikau kareh manjadi oloh je manguasa lime lewu.' 19:20 Jipen je beken dumah tuntang hamauh, 'Tuan, toh duit tuan; aku mingkese huang saputangan. 19:21 Aku mikeh dengan tuan, basa tuan oloh je karas. Tuan manduan taloh je dia tuan tempoe, tuntang tuan manduan hasil hong eka je dia tuan mimbule.' 19:22 Raja te hamauh dengae, 'Ikau jipen je papa! Tagal kare auhm kabuat aku mahukum ikau. Ikau katawan aku oloh je karas: aku manduan taloh je dia aku tempoe tuntang mandino hasil je aku dia mimbule. 19:23 Amon kalote mbuhen ikau dia manamean duit te akan bank mangat amon aku haluli aku tau manarima duit te dengan anake?' 19:24 Limbah te tinai raja te hamauh dengan kare oloh je mendeng hete, 'Duan duit te bara ie tuntang tenga akan jipen je tempon sapuluh duit amas te.' 19:25 Tapi kare oloh te hamauh, 'Tuan, ayue jari aton sapuluh.' 19:26 Raja te tombah, 'Ingat: oloh je ayue jari aton, akae kareh inenga labih are hindai. Tapi oloh je jaton tempon taloh en-en, taloh je aton huang ie kareh mahin induan tinai bara ie. 19:27 Tuntang toh, imbit ih akan hetoh kare musohku te je dia maku aku manjadi rajan ewen. Patei ewen te samandiai intu taharepku!' " 19:28 Limbah Yesus mansanan taloh samandiai te, ie mananjong hila baun ewen manalih Yerusalem. 19:29 Katika sampai tokep Betpage tuntang Betania hong Bukit Batang Undus, ie manyoho due biti muride haguet helo. 19:30 "Haguet ih akan lewu je hila baun itah te," koan Yesus dengan ewen, "amon keton sampai hete, keton kareh mite ije kongan anak kalidai injarat. Kalidai te hindai puji oloh manongkange. Paliwus kalidai te tuntang imbit akan hetoh. 19:31 Amon oloh misek keton, 'Mbuhen keton maliwus kalidai te?' sanan, 'Tuhan handak mahapae.' " 19:32 Kadadue murid Yesus te haguet tuntang sondau taloh handiai te pas kilau je insanae te. 19:33 Pandehan ewen maliwus anak kalidai te, tempoe hamauh dengan ewen, "Mbuhen keton maliwus kalidai te?" 19:34 Ewen tombah, "Tuhan handak mahapae." 19:35 Palus ewen mimbit anak kalidai te akan Yesus. Limbah te tinai ewen mambirang jubah ewen hong hunjun kalidai te tuntang mandohop Yesus lumpat akan hunjue. 19:36 Metoh ie mahalau sambil manongkang kalidai te, kare oloh mambirang jubahe hong jalan. 19:37 Katika Yesus handak sampai Yerusalem, intu jalan je mohon Bukit Batang Undus, maka muride je are te uras nampara hamauh hai auhe manara Hatalla tuntang manyewut tarimakasih akae tagal kakare taloh heran je jari inyaksi ewen. 19:38 Ewen hamauh hai auhe, "Imberkat Raja je dumah huang aran Tuhan! Kasanang hong sorga tuntang tara akan Hatalla!" 19:39 Pire-pire oloh Parisi bara kare oloh are te hamauh dengan Yesus, "Bapa Guru, soho kare murid Bapa te suni." 19:40 Yesus tombah, "Percaya bewei! Amon ewen suni, maka kare batu toh kareh mangkariak." 19:41 Katika Yesus sasar tokep dengan Yerusalem, tuntang mite lewu te, ie manangis. 19:42 Koae, "Pasim, puna bahalap toto jaka andau toh ikau katawan aton taloh je tau mimbit kadamai! Tapi toh ikau dia tau mitee. 19:43 Sinde katika ikau kareh mangkeme, katika musohm mawi karambang kaliling ikau; ewen kareh mangapong ikau tuntang mahenyek ikau bara hakaliling. 19:44 Ewen kareh mamparotek ikau dengan kakare oloh lewum sampai lepah; tuntang ije batu mahin jaton je tau ewen manaluae hasusun sama arepe huang ekae, basa ikau jaton manantuani katikae hamparea Hatalla dumah mangat manyalamat ikau!" 19:45 Yesus tame Human Tuhan tuntang nampara maharak kare oloh dagang hong hete. 19:46 "Huang Surat Barasih," koae dengan ewen, "tarasurat kalotoh: Hatalla hamauh, 'Humangku kareh manjadi huma eka balakudoa.' Tapi keton mawie manjadi sarangan bigal!" 19:47 Genep andau Yesus majar huang Human Tuhan. Kare imam kapala tuntang kare guru agama, hayak dengan kare pamimpin Yehudi handak mampatei ie, 19:48 tapi ewen jaton sondau jalan uka malalus hal te, basa kakare oloh harajur mahining auhe, awi ewen paham rajin manyeneh kare auhe.
20:1 Hong sinde andau Yesus metohe majar tuntang mambarita Barita Bahalap bara Hatalla akan kare oloh hong Human Tuhan. Kare imam kapala, kare guru agama, hayak dengan kare pamimpin Yehudi, dumah, 20:2 tuntang hamauh dengan Yesus, "Coba sanan akan ikei hunjun dasar en ikau malalus taloh handiai toh? Eweh je manenga hak te akam?" 20:3 Yesus tombah, "Aku handak misek. Coba sanan akangku, 20:4 Yohanes Pampandoi hapan hak eweh? Hatalla atawa olon?" 20:5 Maka ewen nampara barunding, "Amon itah manyewut, 'Mahapan hak Hatalla,' ie kareh hamauh, 'Amon kalote mbuhen keton dia percaya dengae?' 20:6 Tapi amon itah hamauh, 'Mahapan hak olon,' kakare oloh kareh mamanting itah hapan batu, awi ewen percaya Yohanes te ije biti nabi." 20:7 Jadi ewen tombah, "Ikei dia katawan." 20:8 Maka Yesus hamauh dengan ewen, "Amon kalote aku mahin dia handak mansanan akan keton mahapan hak eweh aku malalus taloh samandiai toh." 20:9 Yesus manyarita akan kare oloh te paribasa jetoh, "Aton ije biti oloh je mangabun ije kalambar petak hapan anggur. Ie mampasewa kabun akan pire-pire oloh tukang garap palus haguet akan tanah beken tuntang tahi melai hete. 20:10 Metoh sampai katikae mamutik bua anggur, tempon kabun te manyoho jipee manalih kare oloh tukang garap te mangat manarima bagin aie. Tapi kare oloh tukang garap te mamukul jipen te tuntang manyoho ie buli buang. 20:11 Maka tempon kabun te manyoho tinai ije jipee je beken; tapi jipen jete mahin imukul tuntang ihina awi kare oloh tukang garap te, palus inyohoe buli buang kea. 20:12 Limbah te tinai tempon kabun te manyoho jipee je kateloe. Tapi jipen jete mahin imukul kea awi kare oloh tukang garap te tuntang injakah ewen ie akan luar kabun te. 20:13 Kajariae tempon kabun te hamauh, 'Aku musti malalus en hindai? Aku kareh manyoho anakku kabuat je eka sintangku. Pasti ie kareh ihormat ewen!' 20:14 Tapi katika kare tukang garap te mite anak tempon kabun te, ewen hamauh sama arepe, 'Toh ie ahli warise. Ayo itah mampatei ie, mangat itah mandino warisae.' 20:15 Maka ewen mihir ie akan luar kabun te palus mampatei ie." Palus Yesus misek, "Nah, amon tempon kabun te haluli, en je kareh iawie dengan kare oloh tukang garap te? 20:16 Pasti ie kareh dumah tuntang mampatei oloh tukang garap te, palus manyarah kabun te akan kare oloh tukang garap awang beken." Mahining jete, maka koan kare oloh dengan Yesus, "Dia bakae ah!" 20:17 Yesus manampayah ewen palus hamauh, "Amon kalote, en riman ayat Surat Barasih toh? 'Batu je ihapan awi tukang pangun huma, jari manjadi batu je mambatang.' 20:18 Kakare oloh je manjato intu batu te kareh rotek; tuntang eweh je buah batu te kareh kilau mipis manjadi kawo." 20:19 Kare guru agama tuntang kare imam kapala katawan je paribasa te puna iawi Yesus manintu ewen. Awi te ewen handak manawan ie hemben te kea, tapi ewen mikeh dengan oloh are. 20:20 Jadi ewen manggau katika je buah. Ewen mupah oloh mangat oloh te mawi arepe kilau oloh je tinduh, tuntang manyoho kare oloh te manjabak Yesus dengan kare paisek, mangat ewen tau manyarah ie akan wewenang tuntang kuasan gubernur. 20:21 Maka kare oloh je jari dinon upah te hamauh dengan Yesus, "Pa Guru, ikei katawan kakare taloh je insanan tuntang iajar Bapa te bujur. Ikei katawan Bapa majar bujur tuntang tarang tahiu kahandak Hatalla akan olon, awi Bapa dia mintih ampin oloh. 20:22 Awi te coba Bapa mansanan akan ikei, manumon atoran agaman itah, en tau mambayar pajak akan Kaisar atawa dia?" 20:23 Tapi Yesus katawan akal ewen te. Awi te ie hamauh, 20:24 "Coba parahan akangku ije kabawak duit perak. Gambar tuntang aran eweh toh?" "Kaisar!" koan ewen tombah. 20:25 "Amon kalote," koan Yesus dengan ewen, "tenga akan Kaisar taloh je ain Kaisar tuntang akan Hatalla, taloh je ain Hatalla." 20:26 Batantu toto hong taharep oloh are te, ije mahin jaton taloh sala je tau ewen dinoe intu Yesus. Ewen baya suni bewei tuntang jungun awi auh tombahe te. 20:27 Pire-pire oloh bara baris Saduki dumah manalih Yesus. (Ewen te baris oloh je manirok oloh matei dia tau belom haluli.) Ewen misek dengan Yesus, 20:28 "Bapa Guru, Moses manyurat hukum jetoh akan itah: Amon ije biti oloh hatue matei tuntang ie jaton dinon anak, maka paharie musti kawin dengan baloe mangat manenga panakan akan oloh je jari matei te. 20:29 Puji aton uju biti oloh hampahari. Ije bakas kawin, palus matei jaton dinon anak. 20:30 Limbah te tinai je kaduee kawin dengan baloe te, tapi ie mahin matei jaton mandino anak. 20:31 Hal je kalote manjadi kea dengan paharie je kateloe tuntang rai-rait sampai je kaujue. 20:32 Kajariae oloh bawi te matei kea. 20:33 Hong andau oloh matei belom haluli, en sawan eweh oloh bawi te? Basa kauju-ujue uras jari kawin dengae." 20:34 Yesus tombah, "Kare oloh je belom wayah toh kawin, 20:35 tapi kare oloh je patut impisik limbah ewen matei, tuntang belom hong jaman je akan dumah, ewen dia kawin. 20:36 Keadaan ewen sama kilau malekat, tuntang dia tau matei. Ewen te anak Hatalla, awi ewen jari impisik haluli bara pampatei. 20:37 Moses kabuat mansanan tarang toto je oloh matei kareh imbelom haluli. Huang surate tahiu ruwut je hanyala ie manyewut Tuhan kilau 'Hatallan Abraham, Hatallan Isaak tuntang Hatallan Yakob'. 20:38 Nah, Hatalla te dia ie Hatallan oloh matei! Ie Hatallan kare oloh je belom! Basa akan Hatalla, oloh samandiai uras belom." 20:39 Pire-pire guru agama hamauh, "Auh tombah Bapa Guru bahalap toto." 20:40 Awi te ewen dia bahanyi hindai misek taloh en-en dengan Yesus. 20:41 Yesus misek dengan ewen, "Kilen ampie Raja Panyalamat tau inyewut panakan Dawid? 20:42 Padahal Dawid kabuat hamauh huang surat Masmur, 'Tuhan hamauh dengan Tuhangku: Mondok ikau hila gantaungku, 20:43 sampai aku mawi kare musohm mamenda ikau.' 20:44 Jadi amon Dawid manyewut Raja Panyalamat te 'Tuhan', kilen ampie tau ie te panakan Dawid?" 20:45 Metoh kare oloh mahining Yesus hakotak, ie hamauh dengan kare muride, 20:46 "Bua-buah keton manaharep kare guru agama. Ewen rajin tanjo-tanjong hapan jubah panjang, tuntang rajin ihormat intu kare pasar. Ewen rajin hong kare eka je paham ihormat intu huma sombayang tuntang intu kare pesta. 20:47 Ewen manipu kare balo tuntang marampas humae. Tuntang hapae manutup kapapan ewen te, ewen balakudoa panja-panjang! Hukuman ewen kareh babehat!"
21:1 Hong Human Tuhan, Yesus mite kare oloh tatau manamean duit akan huang patin parapah. 21:2 Ie mite kea ije biti balo je belom susah, manamean due kabawak duit tambaga. 21:3 Palus Yesus hamauh, "Hining toh: balo toh manamean labih are bara kakare oloh awang beken. 21:4 Basa ewen samandiai manamean bara kalabien ramoe. Tapi balo toh aloh ie belom susah, ie manenga kakare je aton huang ie taloh je perlu ihapae akan pambelome." 21:5 Aton kare oloh je hakotak tahiu ampin kahalap Human Tuhan imakaian hapan batu je bahala-halap tuntang hapan kare ramo je inyarah akan Hatalla. Maka Yesus hamauh dengan ewen, 21:6 "Kareh aton katikae, kakare taloh je gitan keton toh akan baduroh; ije batu mahin jaton hetoh je kareh melai hasusun hong ekae!" 21:7 Ewen misek dengan Yesus, "Bapa Guru, hamparea taloh te kareh manjadi? Tuntang en tandae amon katikae jari sampai hal te akan manjadi?" 21:8 Yesus hamauh, "Keleh barendeng, ela sampai keton buah tanjaro. Are oloh kareh dumah tuntang mahapan arangku, tuntang hamauh, 'Aku toh ie!' tuntang 'Jari wayahe.' Tapi ela keton omba ewen. 21:9 Ela kea keton mikeh amon keton mahining barita tahiu parang tuntang pambarontakan. Kakare taloh te musti manjadi helo. Tapi jete dia baarti wayah Kiamat jari sampai." 21:10 Palus Yesus malajur kotake koae, "Utus ije kareh parang malawan utus je beken tuntang negara ije kareh manyarang negara je beken. 21:11 Hong hete-hete kareh lembut petak hagerek je paham, bahaya lau tuntang peres. Kare hal je mawi oloh mangkarieng tuntang mikeh angate kareh manjadi kea hong langit. 21:12 Tapi helo bara taloh handiai te manjadi, keton kareh inawan tuntang ingapehe. Keton kareh iimbit akan pangadilan hong huma sombayang tuntang inamean akan huang penjara. Tuntang keton kareh iirit oloh manaharep kare raja tuntang kare panguasa awi keton muridku. 21:13 Jete katika je bahalap akan keton uka mansanan Barita Bahalap bara Hatalla. 21:14 Keleh keton himat atei je keton dia baka mikeh tahiu taloh je musti inyewut keton hapan mambela arep keton. 21:15 Aku kabuat kareh manenga akan keton kare auh tuntang kapintar-kaharati te, sampai ije biti mahin jaton bara kare musoh keton olih malawan atawa milim taloh je inyewut keton. 21:16 Keton kareh indawa awi indu-bapa keton, awi kare paharin keton, awi kare tundah kolan keton tuntang awi kare kawal keton. Belahe keton kareh impatei awi ewen. 21:17 Keton kareh inyingi awi kakare oloh awi ganan keton jadi muridku. 21:18 Tapi ije kalambar mahin jaton balau' keton nihau bara takolok keton. 21:19 Amon keton tahan tuntang sabar, keton kareh inyalamat." 21:20 "Amon keton mite Yerusalem ingapong tentara, keton kareh katawan lewu te dia tahi hindai handak baduroh. 21:21 Hong katika te oloh je aton intu Yudea musti hadari akan bukit. Ewen je aton hong lewu musti malihi lewu te, tuntang ewen je aton hong luar lewu ela tame lewu. 21:22 Basa kare andau te jete 'Andau Oloh Buah Hukum', uka awi hal te maka manjadi taloh je inyurat huang Surat Barasih. 21:23 Dia lue-luen kapapan kare andau te akan kare oloh bawi je metohe batihi, tuntang ibu je magon mampatuso anak awau! Daerah jetoh kareh mangkeme kasusah je paham hai, tuntang Tuhan kareh mahukum utus jetoh. 21:24 Aton oloh je kareh impatei hapan padang, aton kea je kareh iimbit kilau tawanan akan kare lewun oloh; tuntang kare oloh je dia mangasene Hatalla kareh manandik Yerusalem sampai lepah katika je jari inantu Tuhan akan ewen." 21:25 "Kareh intu matanandau, bulan tuntang kare bintang aton gitan kare tanda. Hong hunjun petak, kare utus oloh kareh mikeh tuntang bingung manaharep auh kanyahai tuntang letus tasik. 21:26 Oloh kareh mikeh sampai handak matei manaharep taloh je kareh manjadi hong hapus kalunen toh, basa kare panguasa hong langit kareh manjadi kusak-kasik. 21:27 Intu katika te Anak Olon kareh dumah hong baunandau huang kuasae tuntang kahaie je paham. 21:28 Amon kare taloh te nampara manjadi, keleh keton hingkat tuntang manggatang takolok keton, basa hanjulo hindai keton akan inyalamat." 21:29 Palus Yesus manyarita akan ewen paribasa jetoh, koae, "Tampayah ampin batang sikon tuntang kare batang kayu awang beken. 21:30 Amon kare sulohe nampara gitan, keton katawan je wayah pandang jari tokep. 21:31 Kalote kea amon keton mite kare taloh je manjadi, keton kareh katawan je Hatalla bajeleng akan marentah kilau Raja. 21:32 Keleh keton katawan! Kare taloh te akan manjadi helo bara kare oloh je belom wayah toh matei lepah. 21:33 Langit tuntang petak kareh lilap, tapi auhku tetep sampai katatahie." 21:34 "Keleh manjaga arep keton, ela sampai keton lalau deroh mawi pesta tuntang mihop danum je tau mambusau, atawa lalau manirok kare soal pambelom keton, sampai keton dia tatap metoh andau te dumah manantekas. 21:35 Basa andau te kareh dumah kilau parangkep akan oloh handiai hong hunjun petak toh. 21:36 Keleh bajaga tuntang balakudoa harajur mangat keton abas manaharep kakare hal je akan manjadi tuntang keton tau manaharep Anak Olon." 21:37 Yesus majar intu Human Tuhan metoh handau, tuntang hamalem ie haguet akan Bukit Batang Undus tuntang melai intu hete. 21:38 Genep hanjewu kakare oloh dumah akan Human Tuhan uka mahining Yesus majar.
22:1 Andau Pesta Rote Je Dia Iragi je inyewut Pesta Paska jari tokep. 22:2 Kare imam kapala tuntang kare guru agama metohe manggau jalan uka mampatei Yesus suni-suni, awi ewen mikeh dengan oloh are. 22:3 Limbah te tinai setan mangumpang Yudas je inyewut kea Iskariot, iete ije biti bara kare duewalas murid Yesus. 22:4 Tagal te Yudas haguet tuntang barunding dengan kare imam kapala tuntang kare kapala pangawal Human Tuhan tuntang kilen ampie ie tau manyarah Yesus akan ewen. 22:5 Ewen hanjak toto tuntang hajanji manenga duit akae. 22:6 Yudas mahin pakat tuntang nampara manggau katika je bahalap uka manyarah Yesus akan ewen, sampai oloh jaton katawae. 22:7 Maka andaue sampai, huang Pesta Rote Je Dia Iragi oloh manyambalih tabiri akan panginan hong pesta Paska. 22:8 Maka Yesus manyoho Petrus tuntang Yohanes, "Lius ih natap panginan Paska akan itah." 22:9 "Hong kueh Bapa handak uka ikei manatape?" koan ewen misek. 22:10 Yesus tombah, "Hong katika keton tame akan lewu, ije biti oloh hatue metohe mimbit ije kandi basuang danum kareh hasondau dengan keton. Nuntut ie akan huma je inamee, 22:11 tuntang sanan akan oloh tempon huma te: Guru hamauh: 'Hong kueh eka akan kare muridku tuntang aku kuman panginan Paska?' 22:12 Tempon huma te kareh maninjok akan keton ije kamar loteng je hai, sukup dengan kare pakakas huange. Natap taloh samandiai te hong hete." 22:13 Maka Petrus tuntang Yohanes haguet, palus sondau taloh handiai te sama kilau je insanan awi Yesus. Maka ewen manatap panginan Paska hete. 22:14 Metoh jari sampai katikae akan kuman panginan Paska te, Yesus mondok haya-hayak dengan kare muride hong eka kuman. 22:15 Palus ie hamauh dengan ewen, "Aku mipen toto kuman panginan Paska toh hayak dengan keton helo bara aku buah kapehe! 22:16 Basa, percaya bewei: aku kareh dia tinai kuman jetoh sampai riman panginan toh ingarinah hong Lewu Taheta ain Hatalla." 22:17 Limbah te Yesus manggatang cangkir anggur, palus balakudoa manarimakasih akan Hatalla, limbah te ie hamauh, "Duan, tuntang mbagi jetoh; 22:18 karana keleh keton katawan: nampara bara katika toh aku kareh dia mihop anggur toh tinai sampai Hatalla marentah hapan salepah kuasae." 22:19 Limbah te Yesus manduan rote. Tuntang limbah manyewut lakudoa tarimakasih, ie mangiwak-mangiwak rote te hapan lengee palus manengae akan ewen, tuntang hamauh, "Jetoh bitingku je inyarah akan keton. Lalus jetoh hapan mingat aku." 22:20 Kalote kea limbah kuman, ie manenga cangkir anggur te akan ewen tuntang hamauh, "Cangkir toh iete janjin Hatalla je taheta, je iawi manjadi sah hapan dahangku -- daha je inusoh akan keton." 22:21 "Tapi ite! Oloh je mandurhaka mawi aku aton intu hetoh hinje aku! 22:22 Anak Olon puna akan matei kilau je jari inukas awi Hatalla; tapi calaka oloh je mandurhaka dengae!" 22:23 Maka ewen nampara hisek sama arepe, eweh bara ewen te je akan malalus hal te. 22:24 Bara marak kare murid Yesus lembut auh je hatakian tahiu eweh bara ewen je musti inyewut paling hai. 22:25 Yesus hamauh dengan ewen, "Kare rajan utus oloh je dia mangasene Hatalla manindas rakyate, tuntang kare oloh je marentah ewen te inyewut 'Pangalindong Rakyat'. 22:26 Tapi keton dia tau kalote. Tapi, oloh je pangkahaie hong marak keton musti manjadi kilau je pangkakorike, tuntang pamimpin musti manjadi kilau ayang. 22:27 Eweh je labih hai: oloh je mondok kuman intu meja, atawa oloh je mandohop ie? Batantu oloh je mondok te. Tapi aku aton hong marak keton kilau ayang. 22:28 Huang kare kasusahku, keton harajur hinje aku. 22:29 Kilau Bapa jari manenga akangku hak uka marentah, kalote aku kareh manenga akan keton hak te. 22:30 Awi kalote keton tau omba hanja-hanjak dengangku hong katika aku manjadi Raja. Tuntang keton kareh mondok hunjun duewalas padadusan uka marentah duewalas utus oloh Israel." 22:31 "Simon, Simon, hining toh! Setan jari dinon ijin uka maningkes keton; mangat mamisah je bahalap bara je papa; sama kilau gandum je bakulap bara upake. 22:32 Tapi aku jari balakudoa akam, Simon, mangat kapercayam dia luntur. Tuntang amon ikau jari haluli manalih aku, ikau musti manenga kaabas akan kare paharim." 22:33 Petrus tombah, "Aku tatap handak tame penjara tuntang matei haya-hayak dengan Tuhan!" 22:34 "Percaya bewei, Petrus," koan Yesus, "helo bara manok manando andau toh, hantelo ikau jari milim aku." 22:35 Limbah te Yesus hamauh dengan ewen, "Bihin katika aku manyoho keton haguet sambil kea mangahana keton mimbit dompet, kantong, atawa sapatu, en aton keton tapas taloh en-en?" "Jaton!" koan ewen tombah. 22:36 "Tapi toh," koan Yesus, "eweh je jaton dompet atawa kantong, musti ie mimbite; tuntang eweh je jaton padange, musti manjual jubahe hapae mamili padang. 22:37 Basa, percaya bewei, ayat Surat Barasih je kalotoh auhe, 'ie inyewut sama kilau oloh papa,' musti manjadi buah aku. Basa taloh je tarasurat huang Surat Barasih tahiu aku kanjerae manjadi metoh toh." 22:38 "Tuhan," koan kare murid Yesus, "ite, intu hetoh aton due padang." "Nauhe ih!" koan Yesus tombah. 22:39 Yesus malihi lewu tuntang kilau bahut ie haguet akan bukit Batang Undus, tuntang kare muride haguet kea dengae. 22:40 Katika sampai intu hete, ie hamauh dengan ewen, "Keleh keton balakudoa mangat keton ela buah tingkes." 22:41 Limbah te tinai ie haguet bakejau isut bara ewen, kurang labih ije kapanting batu, 22:42 palus mandeko utute tuntang balakudoa. "Bapa," koae, "amon tau, ngejau ih bara aku kapehe je musti buah aku toh. Tapi ela manumon kahandakku, malengkan manumon kahandak Bapa bewei." 22:43 Ije biti malekat dumah manalih ie tuntang mampaabas ie. 22:44 Yesus paham kapehe angat huange sampai ie sasar toto-toto balakudoa. Ebese sama kilau daha mahantis akan petak. 22:45 Limbah jari balakudoa, Yesus haluli tinai manalih kare muride. Ie sondau ewen metohe batiroh awi paham pehe ateie. 22:46 Palus ie hamauh dengan ewen, "Mbuhen keton batiroh? Keleh misik tuntang balakudoa mangat keton dia buah tingkes." 22:47 Pandehan Yesus magon hakotak, maka dumah ije rombongan oloh. Ewen imimpin awi Yudas, ije biti bara kare murid Yesus. Limbah te tinai Yudas haguet manalih Yesus palus manyium ie. 22:48 Tapi Yesus hamauh dengae, "Yudas, en mahapan sium ikau handak mandurhaka mawi Anak Olon?" 22:49 Katika kare murid Yesus je aton intu hete mite taloh je handak manjadi, ewen hamauh, "Tuhan, ikei mamok ih hapan padang!" 22:50 Palus ije bara kare ewen mariwis jipen imam hai hapan padang sampai balumpeng pindinge. 22:51 Tapi Yesus hamauh, "Jadi ih!" Palus ie manggayap pinding oloh te tuntang mampakelehe. 22:52 Limbah te tinai Yesus hamauh dengan kare imam kapala tuntang kare perwira pangawal Human Tuhan, hayak kare pamimpin Yehudi je dumah akan hete mangat manawan ie, "En aku toh oloh papa, sampai keton dumah hapan padang tuntang gagada mangat manawan aku? 22:53 Genep andau aku aton hong Human Tuhan, keton jaton manawan aku. Tapi katika toh keton mawie, metoh kuasan kakaput malalus gawie." 22:54 Ewen manawan Yesus tuntang mimbit ie akan human imam hai. Petrus manuntut bara likut. 22:55 Hong bentok halaman huma te apui pehon jari inotong tuntang Petrus haguet mondok dengan kare oloh je mondok mangalilinge. 22:56 Ije bara kare jipen bawi mite Petrus mondok intu saran apui pehon te; palus jipen bawi te manantuani Petrus, limbah te ie hamauh, "Oloh toh kea endau aton haya-hayak dengan Yesus!" 22:57 Tapi Petrus malawan. Ie hamauh, "Aku samasinde jaton kasene oloh te!" 22:58 Hanjulo ih limbah te, ije biti oloh beken mite Petrus tuntang hamauh, "Ikau mahin oloh je omba ewen te!" Tapi Petrus tombah, "Dia, beken aku!" 22:59 Kurang labih ije jam limbah te, ije biti oloh beken tinai hamauh hapan hai auhe, "Puna ie oloh toh murid Yesus, basa ie kea oloh Galilea!" 22:60 Tapi Petrus tombah, "En koam, aku dia katawae!" Hemben te kea, pandehan Petrus magon hakotak, manok manando. 22:61 Yesus palus tampaliau tuntang nampayah Petrus. Palus Petrus taraingat Tuhan jari hamauh dengae, "Helo bara manok manando andau toh, ikau hantelo jari milim aku." 22:62 Maka Petrus balua bara hete tuntang manangis side-siden. 22:63 Kare oloh je manjaga Yesus, mureh tuntang mamukul ie. 22:64 Ewen manutup matae tuntang misek dengae, "Coba ngakira eweh je mamukul ikau?" 22:65 Are hindai kare auh je iawi ewen hapan mahina ie. 22:66 Hanjewu andau tinai, kare pamimpin Yehudi, kare imam kapala, tuntang kare guru agama, hapumpong, palus mimbit Yesus manaharep Majelis Agama ain ewen. 22:67 "Sanan akan ikei," koan ewen dengae, "en ikau toh Raja Panyalamat?" Yesus tombah, "Amon aku mansanan akan keton, mahin keton dia percaya. 22:68 Tuntang amon aku misek keton, mahin keton dia tombah. 22:69 Tapi nampara bara toh, Anak Olon kareh mondok hila gantaun Hatalla je Pangkahain Kuasae." 22:70 Ewen uras hamauh, "Amon kalote, ikau toh anak Hatalla?" Yesus tombah, "Kalote koan keton." 22:71 Maka ewen hamauh, "Dia perlu hindai saksi! Itah uras mahining bara nyaman ayue kabuat!"
23:1 Kakare oloh hong sidang te uras mendeng, palus mimbit Yesus akan taharep Pilatus. 23:2 Intu hete ewen manampara mandawa ie. Ewen hamauh, "Ikei dinon oloh toh mampalayang rakyat. Ie manantiring oloh mangat ela mambayar pajak akan Kaisar, awi koae, ie toh Kristus, ije biti Raja." 23:3 Palus Pilatus misek dengan Yesus, "En toto ikau rajan oloh Yehudi?" Yesus tombah, "Kalote koam." 23:4 Maka koan Pilatus dengan kare imam kapala tuntang kare oloh are te, "Aku jaton sondau kasalan huang oloh toh uka tau mahukum ie." 23:5 Tapi ewen sasar manjuju auhe tinai, "Dengan kare auh ajare, ie manantiring oloh hapus tanah Yudea; nampara solake hong Galilea, tuntang toh jari sampai tinai akan hetoh." 23:6 Katika Pilatus mahining jete, ie misek, "En oloh toh oloh Galilea?" 23:7 Limbah insanan je Yesus te asale bara daerah je aton hong penda kuasan Herodes, Pilatus mampait Yesus manalih Herodes, je metoh te aton kea hong Yerusalem. 23:8 Herodes hanjak toto katika mite Yesus, basa jari tahi ie mahining tahiu ie tuntang mipen handak mite ie. Ie maharap tau manyaksi Yesus mawi taloh heran. 23:9 Awi te Herodes mawi are paisek akae, tapi Yesus dia tombah samasinde. 23:10 Kare imam kapala tuntang kare guru agama manaharep kea intu hete tuntang mandawa Yesus paham toto. 23:11 Herodes dengan kare tantara mureh tuntang mahina Yesus palus makaian ie mahapan pakaian oloh hai, limbah te manyoho ie haluli manalih Pilatus. 23:12 Hong andau te kea Herodes dengan Pilatus, je katahin helo-helo te hamusoh, palus hasobat tinai. 23:13 Pilatus mamumpong kare imam kapala, kare pamimpin tuntang rakyat, 23:14 palus hamauh dengan ewen, "Keton mimbit oloh toh manalih aku tuntang mansanan je ie toh mampalayang kare oloh. Toh intu taharep keton aku jari mariksa ie, tapi ije mahin jaton samasinde kapapa je sondauku kilau je indawa keton mawi ie. 23:15 Herodes mahin manirok kalote kea, basa ie jari mangirim Yesus te haluli akan ikei. Oloh toh ije mahin jaton taloh gawie sampai ie patut ihukum matei. 23:16 Tagal te aku handak mamukul ie hapan cambuk limbah te malapas ie." 23:17 Hong gagenep pesta Paska, Pilatus musti maliwus ije tahanan akan rakyat. 23:18 Kakare oloh je hapumpong intu hete mangkariak, "Patei ie! Palapas Barabas akan ikei!" 23:19 (Barabas ihukum penjara tagal pambarontakan je manjadi hong lewutuntang awie mampatei oloh.) 23:20 Pilatus handak maliwus Yesus, tagal te ie hakotak sinde tinai dengan oloh are te. 23:21 Tapi ewen mangkariak, "Nyampalaki ie! Nyampalaki ie!" 23:22 Palus hong kali je kateloe tinai Pilatus hamauh hai auhe dengan ewen, "Tapi en kasalae? Ije mahin jaton kasalan je inyondauku huang ie sampai ie patut buah hukuman matei! Aku handak mamukul ie hapan cambuk, palus malapas ie." 23:23 Tapi ewen jua-juan mangkariak sakalepah belaie je Yesus te musti inyampalaki. Tuntang auh kariak ewen te puna bahasil. 23:24 Maka Pilatus mawi hukuman matei buah Yesus kilau palakun kare oloh te, 23:25 tuntang maliwus oloh je ilaku ewen, iete oloh je ihukum penjara tagal pambarontakan tuntang awie mampatei oloh. Limbah te ie manyarah Yesus akan ewen mangat ewen mawi ie sakahandak atei ewen. 23:26 Maka ewen palus mimbit Yesus. Hong benteng jalan, ewen hasondau dengan ije biti oloh je bagare Simon, asale bara Kirene, katika te metohe tame lewu. Ewen manawan ie, palus mamaksa ie meton sampalaki te hila likut Yesus. 23:27 Are oloh omba mananjong hila likut Yesus -- bara marak ewen te aton kea kare oloh bawi. Kare oloh bawi te manangis tuntang manatum Yesus. 23:28 Tapi Yesus tampaliau akan hila ewen tuntang hamauh, "Kare bawin oloh Yerusalem! Ela manangis akangku. Keleh manangis akan arep keton kabuat tuntang akan kare anak keton. 23:29 Basa kareh sampai katikae oloh akan hamauh, 'Lalehan katuah kare oloh bawi je tamanang, je dia puji luas tuntang dia puji mampatuso anak awau!' 23:30 Hong katika te oloh kareh hamauh dengan kare bukit, 'Sangkulep ikei!' Tuntang dengan kare lungkoh, 'Nawon ikei!' 23:31 Basa amon dengan kayu je magon belom, oloh jari mawi kilau toh, mahin hindai ewen mawie dengan kayu je jari matei keang!" 23:32 Aton tinai due biti oloh beken -- kadadue ewen te oloh papa -- je iimbit ewen mangat ihukum matei haya-hayak dengan Yesus. 23:33 Katika sampai hong eka je bagare "Bangon Takolok", ewen manyampalaki Yesus tuntang kadadue oloh papa te -- ije hila gantau tuntang ije tinai hila sambil Yesus. 23:34 Palus Yesus balakudoa, "Bapa, ampun ih ewen! Ewen jaton katawan taloh je iawi ewen." Pakaian Yesus imbagi intu hete akan sama arep ewen mahapan tenong. 23:35 Kare oloh mendeng intu hete sambil manampayah tuntang metoh te kare pamimpin Yehudi halalea Yesus sambil hamauh, "Ie jari manyalamat oloh beken; coba toh ie manyalamat arepe kabuat, amon ie puna toto-toto Raja Panyalamat je iintih Hatalla!" 23:36 Kare prajurit mahin mureh ie. Ewen dumah tuntang manenga anggur masem akae 23:37 hayak hamauh, "Amon ikau rajan oloh Yehudi, nyalamat arepm!" 23:38 Intu hila hunjun sampalakin Yesus, inyurat kare auh kalotoh: "Jetoh Rajan Oloh Yehudi." 23:39 Ije bara oloh papa je inyampalaki hete mahina Yesus. Ie hamauh, "Ikau Raja Panyalamat kan? Nah, nyalamat arepm, tuntang ikei!" 23:40 Tapi oloh papa je beken tinai, maningak kawale te, koae, "En ikau dia mikeh dengan Hatalla? Ikau sama-sama ihukum matei kilau ie. 23:41 Baya hukuman kue toh patut ih dengan gawin itah. Tapi ie te samasinde jaton kasalae!" 23:42 Palus ie hamauh, "Yesus, ingat aku amon ikau dumah kilau Raja!" 23:43 "Percaya ih," koan Yesus dengae, "Andau toh ikau aton hinje aku hong Pirdaus." 23:44 Kurang labih pukul due walas bentok andau, matanandau jaton gitan kalawae, tuntang hapus daerah te manjadi kaput toto sampai pukul telo halemei. 23:45 Benang horden je iniring intu Human Tuhan, barabit sila due. 23:46 Palus Yesus mangkariak hapan kanyangit auhe, "Bapa! Huang lengem aku manyarah arepku!" Limbah hamauh kalote, ie palus matei. 23:47 Katika komandan pasukan mite kare taloh je jari manjadi, ie manara Hatalla. Palus ie hamauh, "Toto, ie dia basala!" 23:48 Oloh are je dumah akan hete mangat mitee, ewen mite taloh je manjadi. Ewen uras buli hayak ateie paham manyasal. 23:49 Tuntang kakare oloh je mangasene Yesus, tatamput kea kare oloh bawi je manuntut ie bara Galilea, mendeng bara kejau tuntang mite taloh handiai te. 23:50-51 Aton oloh je bagare Yosep, je asale bara lewu Arimatea hong daerah Yudea. Ie te ije biti oloh bahalap je ihormat oloh, tuntang ie mentai wayahe Hatalla nampara marentah kilau Raja. Aloh ie te anggota Majelis Agama, ie dia omba pakat dengan kaputusan tuntang gawin majelis te. 23:52 Yosep te haguet manalih Pilatus tuntang balaku mangat hantun Yesus inenga akae. 23:53 Limbah te tinai ie mampamohon hantun Yesus bara kayu sampalaki, palus mambungkus ie hapan benang baputi bara linen. Limbah te ie mingkese intu huang kubur je inampa intu huang bukit batu -- kubur te hindai puji ihapan. 23:54 Andau te andau Jumahat; tuntang andau Sabat handak nampara. 23:55 Kare oloh bawi je dumah hayak dengan Yesus bara Galilea manuntut Yosep tuntang mite kubur te. Ewen mite kea kilen ampie hantun Yesus iingkes intu huang kubur. 23:56 Limbah te ewen buli palus manatap kare rarampah tuntang minyak harum hapan maminyak hantun Yesus. Hong andau Sabat ewen tende bagawi uka mamenda hukum agama.
24:1 Hong andau Minggo hayak hanjewu toto, kare oloh bawi te haguet akan kubur mimbit kare rarampah je jari inatap ewen. 24:2 Intu kubur, ewen mite batu tutup kubur te jari tagaling. 24:3 Palus ewen tame akan huang kubur te, tapi ewen jaton mite hantun Tuhan Yesus hete. 24:4 Metoh ewen mendeng hete tuntang bingung manirok hal te, salenga aton due oloh mahapan pakaian mangilat-malinyau mendeng tokep ewen. 24:5 Ewen mikeh toto palus mahukup akan petak, pandehan te due oloh te hamauh dengan ewen, "Mbuhen keton manggau oloh belom hong marak oloh matei? 24:6 Ie jaton hetoh. Ie jari belom! Ingat taloh je jari insanae akan keton metoh ie magon hong Galilea, 24:7 iete 'Anak Olon musti inyarah akan oloh badosa, palus inyampalaki, tuntang hong andau je kateloe ie misik.' " 24:8 Limbah te harue ewen mingat dengan kare auh Yesus. 24:9 Limbah ewen haluli bara kubur te, ewen manyarita kakare taloh je manjadi te akan kare sawalas rasul tuntang kare muride awang beken. 24:10 Kare oloh bawi je mansanan taloh handiai te akan kare murid Yesus, iete: Maria Magdalena, Yohana tuntang Maria indu Yakobus, tinai kare oloh bawi beken je aton haya-hayak dengan ewen. 24:11 Tapi kare rasul te manyangka kare oloh bawi te baya manyarita taloh je mia-mias ih. Ewen dia percaya saritan kare oloh bawi te. 24:12 Tapi Petrus hingkat tuntang hadari akan kubur. Sambil mangketong ie manyengok akan huang, palus mite baya benang baputi ih aton hete. Petrus hengan toto palus buli marak are angat paisek huang ateie tahiu taloh je jari manjadi. 24:13 Hong andau te kea due biti murid Yesus metoh mananjong akan ije lewu je bagare Emaus, kurang labih sawalas kilometer kakejaue bara Yerusalem. 24:14 Sambil mananjong ewen hapander-sarita tahiu kakare taloh je jari manjadi te. 24:15 Metoh ewen pande-pander tuntang mangumang sama arep ewen due, Yesus kabuat dumah tuntang mananjong haya-hayak dengan ewen. 24:16 Ewen mite Yesus tapi aton taloh en-en je mawi ewen dia mangasene ie. 24:17 Palus Yesus hamauh, "En taloh je imander keton hong benteng jalan toh?" Ewen tende marak baun ewen asi-asi ampie. 24:18 Palus ije bara ewen due te je bagare Kleopas, misek dengan Yesus, "En tikas Bapa kabuat ih bara kare oloh luar hong Yerusalem je dia katawan taloh je manjadi hong hete katahin toh?" 24:19 "En taloh je manjadi?" koan Yesus misek. "Taloh je manjadi buah Yesus, oloh bara Nasaret te," koan ewen tombah. "Ie te nabi. Kare auhe tuntang kare gawie paham kuasae -- aloh manumon tampayah Hatalla kalote kea manumon tampayah oloh samandiai. 24:20 Kare imam kapala tuntang kare pamimpin utus oloh itah manyarah ie uka ihukum matei, tuntang ewen manyampalaki ie! 24:21 Padahal ikei maharap, ie te ih je kareh tau maliwus Israel! Tuntang andau toh, andau kateloe limbah taloh te manjadi. 24:22 Tuntang tinai, pire-pire oloh bawi bara marak ikei mawi ikei tarewen. Hayak hanjewu toto ewen akan kubur, 24:23 tapi ewen jaton sondau hantue hete. Palus ewen haluli tuntang mansanan ewen mite malekat, tuntang kare malekat te hamauh je Yesus te belom. 24:24 Pire-pire oloh bara ikei palus haguet akan kubur tuntang sondau taloh samandiai je insanan awi kare oloh bawi te, puna toto kalote, baya ewen dia mite Yesus." 24:25 Palus Yesus hamauh dengan ewen, "Keton puna humong! Keton lalau barimet percaya taloh handiai je jari insanan awi kare nabi! 24:26 En diakah Raja Panyalamat musti labih helo buah kapehe te, harun ie mandino kahaie?" 24:27 Limbah te Yesus manarang akan ewen taloh je inyurat huang sahapus Surat Barasih tahiu ie, nampara bara kare surat Moses sampai surat kare nabi. 24:28 Metoh ewen manokep lewu je inalih ewen, ampin Yesus kilau handak mananjong mahalau ih, 24:29 tapi ewen manahan ie. "Melai hong eka ikei ih," koan ewen dengae, "toh jari handak hamalem tuntang jari nampara kaput kea." Maka Yesus tame uka baramalem hong eka ewen. 24:30 Katika mondok kuman hayak dengan ewen, Yesus manduan rote, manyewut tarimakasih akan Hatalla, mangiwak-mangiwak rote te mahapan lengee, palus manenga akan ewen. 24:31 Limbah te ewen ingarendeng je oloh te Yesus. Tapi ie lilap bara tampayah ewen. 24:32 Koan ewen sama arepe, "En dia atei itah kilau inggerek, metoh ie hakotak dengan itah hong benteng jalan, tuntang manarang Surat Barasih akan itah?" 24:33 Hemben te kea ewen hingkat palus haluli akan Yerusalem. Hong hete ewen sondau sawalas murid Yesus metoh hapumpong haya-hayak. 24:34 Ewen te hamauh, "Puna toto Tuhan jari belom haluli! Ie jari mamparahan arepe akan Simon!" 24:35 Kadadue murid Yesus je harue dumah te palus manyarita panyangkum ewen hong benteng jalan, tuntang kilen ampie ewen mangasene Tuhan metoh ie mangiwak-mangiwak rote. 24:36 Metoh ewen magon hasarita, Yesus kabuat salenga mendeng hong bentok ewen sambil hamauh, "Salamat akan keton!" 24:37 Ewen tarewen tuntang mikeh toto, awi ewen manyangka jete kambe. 24:38 Tapi Yesus hamauh, "Mbuhen keton mikeh? Mbuhen lembut kabembang huang atei keton? 24:39 Ite lengengku tuntang paingku, jetoh puna aku! Gayap tuntang tampayah, basa kambe jaton bara isi tuntang tolang, kilau je gitan keton intu aku." 24:40 Yesus hamauh kalote sambil mamparahan akan ewen lengee tuntang paie. 24:41 Tuntang pandehan ewen magon hindai olih percaya, tagal kahanjak tuntang kahengan ewen je malabien, Yesus misek dengan ewen, "En ain keton aton panginan intu hetoh?" 24:42 Ewen manenga akae ije kasayat goreng lauk. 24:43 Yesus manduan lauk te, palus kumae intu taharep ewen. 24:44 Limbah te ie hamauh dengan ewen, "Jetoh ie kare taloh je jari insanangku akan keton metoh aku magon aton hinje dengan keton: iete gagenep taloh je inyurat tahiu aku huang kare Surat Moses, kare nabi, tuntang Masmur, musti manjadi." 24:45 Limbah te tinai Yesus mukei tirok ewen mangat harati riman auh Surat Barasih. 24:46 Palus ie hamauh dengan ewen, "Huang Surat Barasih aton inyurat tahiu Raja Panyalamat je musti buah kapehe, tuntang musti misik tinai bara pampatei hong andau je kateloe. 24:47 Tuntang tinai huang aran Raja Panyalamat te musti kea imbarita akan kare utus iete oloh kalunen musti hobah tuntang Hatalla mampun dosa. Tuntang barita te musti imbarita nampara bara Yerusalem. 24:48 Maka keton toh manjadi saksi akan kare taloh handiai te. 24:49 Tuntang aku kabuat kareh mampait akan keton taloh je jari injanji awi Bapa. Tapi keton musti tatap mentai hong lewu toh sampai kuasan Hatalla basuang intu keton." 24:50 Limbah te Yesus mimbit ewen akan luar lewu sampai hong Betania. Intu hete ie manggatang lengee palus mamberkat ewen. 24:51 Metoh ie mawie kalote, ie hagatang akan sorga, palus hambilang bara ewen. 24:52 Ewen mandeko utute manyembah ie, limbah te tinai haluli akan Yerusalem hayak atei ewen hanjak toto, 24:53 tuntang raju-rajur manara Hatalla huang Human Tuhan.
1:1 Hong sola-solake, helo bara kalunen injadian, Auh te jari aton. Auh te aton hinje Hatalla tuntang auh te sama dengan Hatalla. 1:2 Bara solake ie hinje Hatalla 1:3 Kare taloh handiai injadian mahalau ie, tuntang bara kare taloh handiai je aton, ije mahin jaton je jari injadian dia mahalau ie. 1:4 Auh te asal pambelom, tuntang pambelom te manenga kalawa akan olon. 1:5 Kalawa te manyingah huang kakaput, tuntang kakaput dia olih mambelepe. 1:6 Maka dumah oloh je inyoho Hatalla, Yohanes arae. 1:7 Ie dumah mambarita tahiu kalawa te, mangat oloh samandiai percaya. 1:8 Ie kabuat beken kalawa te, ie baya mambarita bewei. 1:9 Jete kalawa toto je mampalawa oloh samandiai, dumah akan kalunen. 1:10 Auh te aton hong kalunen, kalunen injadian mahalau ie, tapi kalunen dia mangasene ie. 1:11 Ie dumah akan lewun ayue kabuat tapi utus ayue dia manarima ie. 1:12 Tapi kare oloh je manarima ie tuntang percaya dengae, ewen te mandino hak manjadi anak Hatalla, 1:13 je inakan dia bara olon, basa pambelom je taheta te bara Hatalla asale. 1:14 Auh te jari manjadi olon, ie melai hong marak itah, tuntang itah jari mite kahaie. Kahai te inarima kilau anak tunggal Bapa. Mahalau ie itah mite Hatalla tuntang mite sintae dengan itah. 1:15 Yohanes dumah kilau saksie, ie mambarita: "Jetoh ie je insanangku: ie kareh dumah rahian bara aku, tapi ie labih hai bara aku, basa helo bara aku aton, ie jari aton." 1:16 Ie kontep asi; jaton tikase, ie mamberkat itah. 1:17 Hukum Tuhan inarima itah bara Moses. Tapi asi tuntang kaketep Hatalla imparahan mahalau Yesus Kristus. 1:18 Jaton oloh je puji mite Hatalla, beken bara anak tunggal Bapa, tuntang heret toto dengae je sama dengan Bapa. Ie je mamparahan Bapa akan itah. 1:19 Kare oloh Yehudi je mimbing kuasa hong Yerusalem manyoho kare imam tuntang kare oloh Lewi haguet manalih Yohanes tuntang misek dengae, "Ikau toh eweh?" 1:20 Yohanes mangaku dengan terus-tarang, "Aku dia Raja Panyalamat." 1:21 "Amon kalote, ikau eweh?" koan ewen misek. "En ikau Elia?" "Dia," koan Yohanes tombah. "En ikau Nabi?" koan ewen misek tinai. "Dia," koae tombah. 1:22 "Amon kalote, sanan akan ikei eweh ikau toh," koan ewen, "mangat ikei tau mansanan auh tombah ikei akan oloh je manyoho ikei. Narai auh ayum tahiu arepm kabuat?" 1:23 Yohanes tombah, "Aku toh oloh je insanan awi Nabi Yesaya: 'Oloh je mantehau hong padang pasir: Keleh mamparata jalan akan Tuhan.' " 1:24 Kare oloh je inyoho awi oloh Parisi 1:25 misek, "Amon ikau dia Raja Panyalamat, dia Elia, dia kea Nabi, mbuhen ikau mampandoi?" 1:26 Yohanes tombah, "Aku mampandoi hapan danum. Tapi hong marak keton aton oloh je dia keton kasenee. 1:27 Ie dumah rahian bara aku, tapi aku toh mengkak talin sapatue mahin dia patut intu taharepe." 1:28 Taloh handiai te manjadi hong Betania, silan Sungei Yordan hila timor tuntang eka Yohanes mampandoi. 1:29 Hanjewu tinai Yohanes mite Yesus dumah manalih ie. Palus Yohanes hamauh, "Ite, jete Anak tabirin Hatalla je manganan dosan kalunen. 1:30 Ie toh je koangku akan dumah rahian bara aku, tapi labih hai bara aku, basa helo bara aku inakan, ie jari aton. 1:31 Helo bara te aku jaton katawan eweh ie te. Padahal aku dumah mampandoi hapan danum mangat utus Israel mangasene ie." 1:32 Yohanes kea manenga kasaksian kalotoh, "Aku mite Roh Hatalla mohon sama kilau burung dara je mohon bara langit palus melai hunjun ie. 1:33 Metoh te aku hindai katawan eweh ie. Tapi Hatalla je manyoho aku mampandoi mahapan danum jari hamauh dengangku, 'Amon ikau mite Roh Hatalla mohon, palus melai intu hunjun ije biti oloh, ie te je kareh mampandoi mahapan Roh Hatalla.' 1:34 Aku kabuat jari mitee," koan Yohanes, "tuntang aku manenga kasaksian je ie te Anak Hatalla." 1:35 Hanjewu andau tinai Yohanes aton hong eka te dengan due muride. 1:36 Katika ie mite Yesus mahalau, ie hamauh, "Ite! Jete Anak Tabirin Hatalla." 1:37 Kadadue murid Yohanes mahining kare auh te, palus haguet manuntut Yesus. 1:38 Yesus tampaliau akan likut, tuntang mite ewen metohe manuntut ie. Ie misek. "Keton manggau en?" Ewen tombah, "Rabi, hong kueh Rabi melai?" ('Rabi' te rimae guru.) 1:39 "Has ite ih kabuat," koan Yesus. Ewen haguet hayak dengae tuntang mite hong kueh ie melai. Metoh te pukul epat halemei. Andau te ewen melai dengae. 1:40 Ije bara due biti oloh te jari mahining taloh je inyewut Yohanes tuntang palus haguet omba Yesus, iete Andreas, paharin Simon Petrus. 1:41 Andreas jele-jeleng manggau Simon, paharie te, tuntang hamauh dengae, "Ikei jari hasondau dengan Mesias!" (Mesias te sama rimae dengan Kristus iete: Raja Panyalamat.) 1:42 Andreas magah Simon manalih Yesus. Yesus mananture Simon, palus hamauh, "Ikau Simon, anak Yona. Ikau kareh inggare Kepas." (Kepas sama rimae dengan Petrus, iete: bukit batu.) 1:43 Hanjewu andau tinai Yesus manukas arepe haguet akan Galilea. Ie hasondau dengan Pilippus, tuntang hamauh dengae, "Has omba aku!" 1:44 Pilippus asale bara Betsaida, eka Andreas tuntang Petrus. 1:45 Pilippus hasondau dengan Natanael tuntang hamauh dengae, "Ikei jari hasondau dengan oloh je inyewut awi Moses huang Surat Hukum ain Hatalla, tuntang je imbarita awi kare nabi. Ie te Yesus bara Nasaret, anak Yosep." 1:46 Tapi Natanael tombah, "En mungkin taloh je bahalap te dumah bara Nasaret?" "Has ite kabuat," koan Pilippus. 1:47 Yesus mite Natanael dumah, palus hamauh tahiu ie, "Ite, jete je puna toto oloh Israel. Huang ie jaton je tanjaro." 1:48 "Kilen ampie Bapa mangasene aku?" koan Natanael misek Yesus. Yesus tombah, "Helo bara Pilippus mantehau ikau, aku jari mite ikau hong penda batang ara te." 1:49 "Bapa Guru," koan Natanael, "Bapa toh anak Hatalla! Bapa Rajan utus Israel!" 1:50 Yesus hamauh, "Ikau percaya, baya awi aku mansanan je aku jari mite ikau hong penda batang ara te? Kare taloh je labih hai haream bara te ikau kareh tau mitee!" 1:51 Koan Yesus tinai, "Toto, keleh ikau percaya, ikau kareh mite langit buap, tuntang kare malekat Hatalla mohon mandai' intu anak olon."
2:1 Due andau tinai limbah te aton pesta kawin intu lewu Kana hong Galilea, tuntang indu Yesus aton intu hete. 2:2 Yesus tuntang kare muride irawei kea akan pesta te. 2:3 Katika anggur jari lepah, indue hamauh dengan Yesus, "Ewen lepah anggur." 2:4 Yesus tombah, "Ela manyoho aku. Hindai sampai katikae aku mamparahan arepku." 2:5 Tapi indu Yesus hamauh dengan kare anak oloh, "Lalus ih narai taloh je inyohoe keton." 2:6 Hong hete aton jahawen balanai je inatap hapan bapenyau manumon hadat oloh Yehudi. Gagenep balanai te huange kurang labih aton saratus liter. 2:7 Yesus hamauh dengan kare anak oloh te, "Suang kare balanai te hapan danum." Maka ewen manyuange sampai kontep. 2:8 Palus Yesus hamauh dengan ewen, "Nah, imbit isut danum te akan pamimpin pesta." Ewen mimbit danum te akan pamimpin pesta, 2:9 tuntang ie manyurup danum je jari hobah manjadi anggur. (Ie dia katawan bara kueh anggur te, baya kare anak oloh je manyuang danum te ih je katawae.) Maka pamimpin pesta te mantehau panganten hatue, 2:10 palus hamauh dengae, "Bahut, oloh labih helo manyarungan anggur je paling bahalap tuntang amon kare tamu jari peda mihop, harun manyarungan anggur biasa. Tapi pahari sampai toh mingkes anggur je paling bahalap!" 2:11 Maka jete taloh heran je solake ilalus Yesus. Ie malalus jete intu Kana hong Galilea. Mahapan tanda te ie mamparahan kahaie. Maka kare muride percaya dengae. 2:12 Limbah te tinai Yesus haguet akan Kapernaum haya-hayak dengan indue, kare paharie tuntang kare muride. Ewen melai hete pire-pire andau katahie. 2:13 Metoh Andau Pesta Paska Yehudi jari tokep, Yesus haguet akan Yerusalem. 2:14 Intu Human Tuhan hong Yerusalem ie sondau kare oloh panjual sapi, tabiri, tuntang burung dara; tuntang kea kare oloh je manakiri duit, mondok intu hete. 2:15 Yesus manampa ije cambuk bara tali palus maharak uras kare meto te, aloh tabiri atawa sapi, bara huang Human Tuhan. Kare meja ain oloh je manakiri duit inambalike sampai kare duit ewen kasaburan akan hete-hete. 2:16 Palus ie hamauh dengan oloh je bajual burung dara, "Gatang urase bara hetoh. Ela mawi Human Bapaku manjadi eka badagang!" 2:17 Maka kare murid taraingat dengan auh Surat Barasih kalotoh, "Sintangku dengan Humam, o Hatalla, mangalasut ateiku." 2:18 Kare panguasa Yehudi manantang Yesus, koan ewen, "Coba mawi taloh heran akan ikei, je mansanan ikau aton hak mawi taloh kilau toh." 2:19 Yesus tombah, "Nderep ih Huma toh, tuntang huang telo andau aku kareh mamangue haluli." 2:20 Palus ewen hamauh, "Epat puluh jahawen nyelo katahie oloh mamangun Human Hatalla toh. Tuntang ikau handak mamangue haluli huang telo andau?" 2:21 Tapi Human Hatalla je koan Yesus iete bitin ayue kabuat. 2:22 Jadi limbah te tinai, sana Yesus impisik bara pampatei kare muride taraingat Yesus puji mansanan hal te akan ewen. Maka ewen balalu percaya dengan taloh je inyurat huang Surat Barasih tuntang dengan taloh je insanan awi Yesus. 2:23 Pandehan Yesus aton hong Yerusalem, hong wayah Pesta Paska, are oloh percaya dengae tagal kare taloh heran je iawie. 2:24 Tapi Yesus kabuat dia percaya dengan ewen, awi ie mangasene oloh samandiai. 2:25 Oloh dia usah manenga katarangan akae tahiu eweh bewei, awi ie katawan kabuat taloh je aton huang atei olon.
3:1 Aton ije biti tokoh agama bara marak oloh Parisi je bagare Nikodemus. 3:2 Sinde hong hamalem ie dumah manalih Yesus tuntang hamauh, "Bapa Guru, ikei katawan Bapa inyoho awi Hatalla. Basa ije biti mahin jaton oloh tau mawi kare taloh heran kilau je iawi Bapa, amon Hatalla dia mampahayak ie." 3:3 Yesus tombah, "Percaya ih ije biti mahin jaton oloh tau manjadi anak ungkup ain Hatalla, amon ie dia inakan haluli." 3:4 "Dia badai' oloh bakas tau inakan haluli," koan Nikodemus dengan Yesus, "En tau ie tame haluli akan kanain indue tuntang inakan haluli?" 3:5 Yesus tombah, "Toto haliai auhku toh: amon oloh dia inakan hapan danum tuntang hapan Roh Hatalla, oloh te dia tau manjadi anak ungkup ain Hatalla. 3:6 Olon secara biti-bereng inakan awi oloh bakase, tapi secara roh inakan awi Roh Hatalla. 3:7 Ela hengan amon aku hamauh, keton samandiai musti inakan haluli. 3:8 Riwut manampur tumon kanahuange; itah mahining auhe, tapi dia katawan bara kueh pandumahe tuntang akan kueh pangguete. Kalote kea dengan oloh je inakan awi Roh Hatalla." 3:9 "Kilen ampie jete tau manjadi?" koan Nikodemus misek. 3:10 Yesus tombah, "Ikau toh Guru hong Israel; dia badai' ikau dia katawan? 3:11 Percaya ih: ikei hakotak baya tahiu taloh je ingatawan ikei, tuntang ikei manenga kasaksian baya tahiu taloh je jari gitan ikei; tapi keton dia maku manarima kasaksian ikei. 3:12 Keton dia percaya amon aku manyarita akan keton tahiu kare hal ain kalunen toh; kilen ampie keton tau percaya, amon aku manyarita akan keton tahiu kare hal bara sorga? 3:13 Jaton ije biti oloh puji mandai' akan sorga, beken bara ie je mohon akan kalunen, ie te Anak Olon. 3:14 Sama kilau Moses manggatang handipe tambaga intu tapakan kayu hong padang pasir, kalote kea Anak Olon musti inggatang, 3:15 mangat kakare oloh je percaya dengae mandino pambelom je bujur tuntang katatahie." 3:16 Karana kalote Hatalla sinta dengan olon hong kalunen toh, sampai ie manenga anake je tunggal, uka gagenep oloh je percaya dengae dia binasa, tapi mandino pambelom je bujur tuntang katatahie. 3:17 Basa Hatalla manyoho Anake dia uka mahakim kalunen toh, tapi uka manyalamate. 3:18 Oloh je percaya dengae dia ihukum. Tapi oloh je dia percaya jari buah hukum awi Hatalla, awi ie dia percaya dengan Anak Hatalla je tunggal. 3:19 Ie inuntut hagalang hal jetoh: Kalawa te jari dumah akan kalunen, tapi olon labih marajin kakaput bara kalawa, awi gawin ewen papa. 3:20 Gagenep oloh je mawi kapapa, basingi kalawa; ie dia maku dumah manalih kalawa, mangat gawie je papa te dia gitan. 3:21 Tapi oloh je malalus kahandak Hatalla, dumah manalih kalawa uka manjadi batantu taloh je ilaluse te jete manumon kahandak Hatalla. 3:22 Limbah te Yesus dengan kare muride haguet akan Yudea. Ie melai hete pire-pire katika katahie dengan ewen tuntang mampandoi. 3:23-24 Hong katika te Yohanes hindai tame penjara. Ie mampandoi intu Ainon, dia kejau bara Salem, awi intu hete are danum. Kare oloh dumah manalih ie, tuntang ie mampandoi ewen. 3:25 Pire-pire murid Yohanes nampara hakaridu dengan oloh Yehudi tahiu atoran gawi mamparasih. 3:26 Ewen haguet manalih Yohanes, tuntang hamauh, "Pa Guru, en bapa magon mingat oloh je dengan bapa hong silan Sungei Yordan te, je ininjok bapa akan ikei bihin? Ie wayah toh mampandoi kea, tuntang kare oloh uras haguet manalih ie!" 3:27 Yohanes tombah, "Olon jaton tau mandino taloh en-en amon dia inenga Hatalla akae. 3:28 Keton kabuat jari mahining aku hamauh, 'Aku toh beken Raja Panyalamat. Aku inyoho helo bara ie.' 3:29 Panganten bawi jete ain panganten hatue. Sobat panganten hatue te baya mendeng hila balikate tuntang manyeneh, tuntang ie hanjak amon mahining auh panganten hatue. Kalote kea dengangku. Toh aku hanjak toto. 3:30 Ie te musti sasar mambatang, tuntang aku sasar dia mambatang." 3:31 Je dumah bara ngambo mahunjun taloh samandiai. Je dumah bara kalunen tame baris oloh kalunen, tuntang hakotak tahiu kare hal kalunen. Ie je dumah bara ngambo mahunjun taloh samandiai. 3:32 Ie hakotak tahiu taloh je jari gitae tuntang jari ihininge, tapi ije biti mahin jaton oloh percaya dengan auh kasaksiae. 3:33 Oloh je percaya dengan kasaksiae te, mangaku Hatalla toto. 3:34 Karana oloh je inyoho Hatalla, manyampai kare auh Hatalla, basa Roh Hatalla jari inenga lepah akae. 3:35 Bapa sinta Anak tuntang jari manyarah salepah kuasae akae. 3:36 Oloh je percaya dengan Anak te, kareh mandino pambelom je bujur tuntang katatahie. Tapi oloh je dia mamenda Anak te jaton mandino pambelom. Ie ihukum Hatalla sampai katatahie.
4:1 Kare oloh Parisi mahining je Yesus mandino tuntang mampandoi labih are murid bara Yohanes. 4:2 (Sapunae Yesus kabuat dia mampandoi malengkan kare muride bewei.) 4:3 Katika Yesus katawan kare oloh Parisi jari mahining tahiu hal te, ie haguet bara Yudea haluli akan Galilea. 4:4 Hong panjalanae te ie musti mahalau Samaria. 4:5 Maka Yesus sampai intu ije lewu hong Samaria je bagare Sikar, dia kejau bara petak je horan inenga Yakob akan anake Yosep. 4:6 Intu hete aton sumur Yakob. Yesus heka toto tagal panjalanae, awi te ie mondok intu saran sumur. Metoh te kurang labih pukul duewalas bentok andau. 4:7-8 Tuntang kare murid Yesus jari haguet akan lewu mangat mamili panginan. Limbah te tinai ije biti bawin oloh Samaria dumah masip danum. Yesus hamauh dengae, "Bu, tau aku balaku danum?" 4:9 Bawin Samaria te tombah, "Tuan oloh Yehudi, aku oloh Samaria; mbuhen Tuan balaku danum dengangku?" (Basa kare oloh Yehudi jaton kajentae dengan oloh Samaria.) 4:10 Yesus tombah, "Jaka ikau katawan panengan Hatalla tuntang eweh je balaku danum ihop dengam, pasti ikau kabuat je balaku danum ihop dengae, tuntang Ie akan manenga akam danum pambelom." 4:11 Koan oloh bawi te, "Ain Tuan jaton timba, tuntang sumur toh handalem toto. Bara kueh Tuan mandino danum pambelom? 4:12 Yakob, tato hiang ikei, manenga sumur toh akan ikei. Ie kabuat masip danum ihop bara hetoh; kalote kea kare anak jariae tuntang kare meto je imbelome. En Tuan manyangka Tuan labih hai bara Yakob?" 4:13 "Oloh je mihop danum toh kareh teah belaie tinai," koan Yesus, 4:14 "tapi oloh je mihop danum je inengaku te, dia tau teah belaie tinai sampai katatahie. Karana danum je inengaku te kareh manjadi tahasak danum huang arepe je mamancar balua tuntang manenga akae pambelom je bujur tuntang katatahie." 4:15 Koan oloh bawi te, "Tuan, tenga akangku danum te, mangat aku dia teah belaiku tinai; tuntang dia usah haluli akan hetoh mangat masip danum." 4:16 "Lius, tehau kabalim, palus haluli akan hetoh," koan Yesus. 4:17 "Aku jaton banangku," koan oloh bawi te. "Puna toto auhm te," koan Yesus. 4:18 "Basa ikau jari kawin hangkalime tuntang oloh hatue je belom hinje ikau metoh toh jete dia ie kabalim." 4:19 "Toh aku katawan Tuan toh nabi," koan oloh bawi te. 4:20 "Tato hiang ikei manyembah Hatalla hong bukit toh, tapi koan utus Tuan, baya hong Yerusalem bewei eka oloh manyembah Hatalla." 4:21 "Percaya ih", koan Yesus dengae, "sinde katika oloh kareh manyembah Bapa, dia tinai hong Bukit toh, tuntang dia kea hong Yerusalem. 4:22 Keton oloh Samaria manyembah taloh je dia keton kasenee, tapi ikei oloh Yehudi manyembah ie je kasenan ikei, awi kasalamatan te dumah bara oloh Yehudi. 4:23 Tapi katikae kareh dumah, malahan jari dumah metoh toh, iete hapan kuasan Roh Hatalla oloh manyembah Bapa huang kabujur. Ewen kareh manyembah mahapan cara je ingahandak Bapa. 4:24 Basa Hatalla te Roh, tuntang baya dengan Roh Hatalla, kare oloh tau manyembah Bapa tumon ampin katotoe." 4:25 Oloh bawi te hamauh dengan Yesus, "Aku katawan Raja Panyalamat (je inyewut Kristus) akan dumah. Amon ie dumah, ie akan mansanan kakare taloh handiai akan itah." 4:26 "Aku toh ie," koan Yesus, "Aku je metoh toh hakotak dengam." 4:27 Hong katika te murid Yesus haluli. Ewen hengan mite Yesus hakotak dengan ije biti oloh bawi. Tapi ije biti mahin jaton bara ewen te je misek dengan oloh bawi te, "Ibu perlu en?" atawa misek dengan Yesus, "Mbuhen bapa hakotak dengan oloh bawi te?" 4:28 Maka oloh bawi te malihi balanaie intu hete palus hadari akan lewu tuntang hamauh dengan kare oloh hong hete, 4:29 "Has ite oloh je mansanan akangku kare taloh handiai je puji aku mawie. En mungkinkah ie te Raja Panyalamat?" 4:30 Maka kare oloh te malihi lewu palus haguet manalih Yesus. 4:31 Pandehan te kare muride mimbit Yesus kuman. "Bapa Guru," koan ewen, "has itah kuman." 4:32 Tapi Yesus tombah, "Ayungku aton panginan je dia keton katawae." 4:33 Maka kare muride nampara hisek sama arepe, "En aton oloh je mimbit panginan akae?" 4:34 Palus Yesus hamauh, "Panginangku iete malalus kahandak ayue je manyoho aku, tuntang mampajadi gawi je inyarahe akangku. 4:35 Keton hamauh, 'Epat bulan hindai wayah getem.' Tapi aku hamauh dengan keton: Tampayah kare tana je jari lenda-lendang, jari tatap uka inggetem! 4:36 Oloh je manggetem jari nampara manarima upahe tuntang mamumpong hasil akan pambelom je bujur tuntang katatahie. Maka oloh je manawor tuntang je manggetem tau haya-hayak hanjak. 4:37 Toto kea auh paribasa toh, 'Aton oloh je mimbul, oloh beken je manggetem.' 4:38 Aku manyoho keton haguet manggetem hong tana je keton dia manguae; oloh beken jari bagawi hete tuntang keton manarima kaontongan bara gawin ewen." 4:39 Are oloh Samaria hong lewu te percaya dengan Yesus, awi oloh bawi te hamauh, 'Ie mansanan akangku kare taloh handiai je puji aku mawie.' 4:40 Maka katika oloh Samaria te hasondau dengan Yesus, ewen balaku nyame-nyame uka ie melai dengan ewen. Jadi Yesus melai hong hete due andau katahie. 4:41 Limbah te labih are hindai oloh percaya dengan Yesus tagal taloh je iajare kabuat akan ewen. 4:42 Ewen hamauh dengan oloh bawi te, "Toh ikei percaya, dia hindai tagal taloh je insanan akan ikei, tapi awi ikei kabuat jari mahining ie, tuntang katawan je ie te puna Panyalamat kalunen." 4:43 Limbah due andau melai hong Sikar, Yesus haguet akan Galilea. 4:44 Yesus kabuat jari hamauh, "Ije biti nabi dia ihormat intu lewun ayue kabuat." 4:45 Tapi katika ie sampai hong Galilea, kare oloh hong hete manambang ie dengan sanang atei, awi ewen aton hong Yerusalem metoh Andau Pesta Paska, tuntang jari mite taloh handiai je iawi Yesus. 4:46 Balalu Yesus haluli akan Kana hong Galilea, ekae puji mobah danum manjadi anggur. Hong lewu te aton ije biti pagawai istana; anake metoh haban hong Kapernaum. 4:47 Katika ie mahining Yesus dumah bara Yudea akan Galilea, ie haguet manalih Yesus tuntang balaku Yesus dumah akan Kapernaum mangat mampakeleh anake je handak matei. 4:48 Yesus hamauh dengan pagawai istana te, "Jaka keton dia mite kare taloh heran, dia keton percaya." 4:49 "Tuan," koan pagawai istana te tombah, "Jeleng dumah helo bara anakku matei." 4:50 Koan Yesus dengae, "Haguet ih anakm te keleh." Oloh te percaya dengan auh Yesus, palus ie haguet. 4:51 Hong benteng jalan, kare jipee dumah manalih ie tuntang mangabar, "Anak Tuan jari keleh." 4:52 Palus ie misek dengan ewen pukul pire anak te nampara keleh. Ewen tombah, "Andau male kurang labih pukul ije bentok andau dareme nihau." 4:53 Palus bapa anak te taraingat je intu katika te kea Yesus hamauh dengae, "Anakm te keleh." Maka ie tuntang hapus keluargae percaya dengan Yesus. 4:54 Maka jete taloh heran je kaduee je iawi Yesus hong Galilea limbah ie dumah bara Yudea.
5:1 Limbah te aton pesta ain oloh Yehudi, maka Yesus haguet akan Yerusalem. 5:2 Hong Yerusalem tokep "Bauntonggang Tabiri" aton ije talaga, je huang basa Ibrani inggare Betesda. Intu hete aton lime laladang. 5:3 Hong kare laladang te are oloh haban menter; aton je babute, aton je batimpang, tuntang aton je lumpuh. Ewen uras mentai danum hong talaga te hariak. 5:4 Basa aton katikae malekat Tuhan mohon akan talaga te tuntang mariak danume. Tuntang oloh haban je pangkasolake tame akan huang talaga te metoh danume hariak, tau keleh bara panyakit en bewei je buah ie. 5:5 Hong eka te aton ije oloh hatue je jari haban telo puluh hanya nyelo katahie. 5:6 Yesus mite ie menter intu hete tuntang katawan je ie jari tahi toto haban; maka Yesus misek ie, "En ikau maku keleh?" 5:7 Oloh haban te tombah, "Bapa, jaton oloh hong hetoh je tau mampasewu aku akan talaga te katika danume hariak. Tuntang pandehan aku manalih talaga oloh beken jari sewu helo bara aku." 5:8 Maka Yesus hamauh dengae, "Hingkat ih, gatang amakm tuntang haguet mananjong." 5:9 Hemben te kea oloh te keleh. Ie manggatang amake tuntang mananjong. Hal te manjadi hong andau Sabat. 5:10 Tagal te kare panguasa Yehudi hamauh dengan oloh je harue keleh te, "Andau toh andau Sabat. Ikau dia tau manggatang amakm." 5:11 Tapi oloh te tombah, "Oloh je mampakeleh aku endau manyoho aku manggatang amakku tuntang mananjong." 5:12 "Eweh ie je manyoho ikau manggatang amakm tuntang mananjong?" koan ewen misek. 5:13 Tapi oloh je jari keleh te dia katawan eweh oloh te, basa Yesus jari jaton hong marak oloh are te. 5:14 Limbah te tinai Yesus hasondau dengan oloh te hong Human Tuhan, tuntang hamauh dengae, "Toh ikau jari keleh. Ela ih badosa tinai mangat dia buah taloh je labih papa." 5:15 Maka oloh te haguet palus mansanan akan kare panguasa Yehudi je Yesus te je jari mampakeleh ie. 5:16 Tuntang tagal te ewen manggau jalan uka mangapehe Yesus, basa ie mampakeleh oloh hong andau Sabat. 5:17 Tapi Yesus hamauh dengan ewen, "Bapaku harajur bagawi sampai wayah toh, tuntang aku mahin bagawi kea." 5:18 Kare auh te mawi kare panguasa Yehudi sasar manggau akal uka mampatei ie. Ewen mawie kalote, dia baya awi ie malanggar atoran agama tahiu Andau Sabat, tapi awi ie kea hamauh je Hatalla te Bapae; rimae ie manyama arepe dengan Hatalla. 5:19 Yesus tombah kare oloh te kalotoh, "Percaya bewei, Anak jaton tau malalus taloh en-en hapan kuasae kabuat. Ie baya malalus taloh je gitae ilalus awi Bapae. Karana taloh je ilalus awi Bapa, jete kea je ilalus awi Anak. 5:20 Basa Bapa sinta Anak tuntang mamparahan akae kakare taloh je iawie kabuat. Bapa handak mamparahan akae gawi je labih hai haream sampai keton hengan. 5:21 Bapa te mambelom oloh matei tuntang manenga akan ewen pambelom je bujur tuntang katatahie; kalote kea Anak manenga pambelom je katatahie akan oloh je akae te ie handak manenga pambelom. 5:22 Bapa kabuat dia mahakim eweh bewei. Salepah kuasae hapan mahakim jari inyarahe akan Anake. 5:23 Bapa malalus jete mangat oloh samandiai mahormat Anak kilau ewen mahormat Bapa. Oloh je dia mahormat Anak dia kea mahormat Bapa je manyoho Anak. 5:24 Toto haliai kare auhku toh: Oloh je manantuani kare auhku, tuntang percaya dengae je manyoho aku, oloh te mandino pambelom je bujur tuntang katatahie. Ie dia akan ihukum; ie jari liwus bara pampatei tuntang mandino pambelom. 5:25 Percaya ih: Kareh dumah katikae -- toh mahin jari sampai katikae -- oloh matei kareh mahining auh Anak Hatalla. Tuntang oloh je mahining jete kareh belom. 5:26 Sama kilau Bapa kabuat batang pambelom, ie manjadian Anake batang pambelom kea. 5:27 Ie jari manenga akan Anake hak mangat mahakim, awi ie Anak Olon. 5:28 Ela keton hengan mahining hal toh, karana katikae kareh dumah kakare oloh je jari matei mahining auhe, 5:29 palus balua bara kubur. Oloh je jari malalus gawi bahalap kareh misik tuntang belom. Tapi oloh je jari malalus gawi papa kareh misik tuntang ihukum." 5:30 "Aku jaton tau malalus taloh en-en awi kahandakku kabuat. Aku baya mahakim tumon je inyoho Hatalla. Tuntang kaputusan je iawiku te bujur, awi aku dia manumon kahandakku kabuat, malengkan kahandak Bapa je manyoho aku. 5:31 Paribasa aku manenga kasaksian tahiu arepku kabuat, maka kasaksian te dia tau imercaya. 5:32 Tapi aton oloh beken je manenga kasaksian tahiu aku tuntang aku katawan kasaksian tahiu aku, tuntang aku katawan je kasaksian ayue te toto. 5:33 Keton jari manyoho oloh manalih Yohanes, tuntang ie jari manenga kasaksian je toto tahiu aku. 5:34 Aku mansanan hal toh dia awi aku manggau kasaksian bara olon, tapi mangat keton inyalamat. 5:35 Yohanes te kilau sumbo je hanyala tuntang mampamancar kalawa. Pandehan katika toh keton hanjak manarima kalawa te. 5:36 Tapi kasaksian ayungku labih hai bara kasaksian Yohanes. Taloh je iawiku wayah toh, iete gawi je inyoho Bapa aku mawie, jete mambukti je Bapa jari manyoho aku. 5:37 Tuntang Bapa je manyoho aku, manenga kea kasaksian tahiu aku. Keton hindai puji mahining auhe atawa mite ampie. 5:38 Kare auhe jaton melai hong atei keton awi keton dia percaya dengangku je inyohoe. 5:39 Keton bajar tahiu Surat Barasih awi keton manyangka hapan cara jete keton tau mandino pambelom je bujur tuntang katatahie. Tuntang Surat Barasih te kabuat manenga kasaksian tahiu aku. 5:40 Tapi keton dia maku dumah manalih aku mangat mandino pambelom je katatahie. 5:41 Aku dia manggau tara bara oloh kalunen. 5:42 Aku kasene keton. Aku katawan keton dia sinta Hatalla huang atei keton. 5:43 Aku dumah mahapan kuasan Bapaku, tapi keton dia manarima aku. Tapi amon oloh beken dumah dengan kuasae kabuat, keton maku manarima ie. 5:44 Kilen ampie keton tau percaya, amon keton manggau tara bara sama arep keton, tuntang dia manggau jalan mandino tara bara Hatalla je Tunggal? 5:45 Ela manyangka aku kareh manyalan keton intu taharep Bapa. Je kareh manyalan keton iete Moses, ie je iharap keton. 5:46 Paribasae keton percaya dengan Moses, keton kea handak percaya dengangku, basa ie manyurat tahiu aku. 5:47 Tapi amon keton dia percaya dengan taloh je inyurat Moses, kilen ampie keton tau percaya dengan taloh je insanangku?"
6:1 Pire-pire katika limbah te tinai Yesus haguet dimpah akan silan Danau Galilea, je inyewut kea Danau Tiberias. 6:2 Sana sampai hong hete, are oloh manuntut ie awi ewen jari mite kare taloh heran je iawie iete mampakeleh kare oloh haban. 6:3 Yesus mandai' akan hunjun bukit, palus mondok hete dengan kare muride. 6:4 Hong katika te, Andau Pesta Paska Yehudi jari tokep. 6:5 Katika Yesus manampayah hakaliling, ie mite oloh mero-merong dumah manalih ie. Maka ie hamauh dengan Pilippus, "Hong kueh itah mamili panginan mangat kakare oloh toh tau kuman?" 6:6 (Yesus jari katawan taloh je handak ilaluse, tapi ie hamauh kaloteawi ie handak mancoba Pilippus.) 6:7 Pilippus tombah, "Rote barega due ratus duit perak dia baka sukup akan oloh kare toh, aloh genep biti baya dinon isut barangai." 6:8 Ije murid Yesus je beken, iete Andreas, paharin Simon Petrus, hamauh, 6:9 "Hong hetoh aton anak hatue dengan lime rote tuntang due kongan lauk. Tapi en rimae jete akan oloh je kare toh?" 6:10 "Soho kare oloh mondok," koan Yesus. Hong eka te aton are oru, jadi kare oloh te mondok intu oru -- samandiaie aton kurang labih lime koyan biti oloh hatue. 6:11 Limbah te tinai Yesus manduan rote te, palus manyewut tarima kasih akan Hatalla. Limbah te ie mambagi rote te akan oloh are. Limbah te tinai ie mambagi lauk te, tuntang ewen kuman sampai besoh toto. 6:12 Limbah oloh samandiai te kuman sampai besoh, Yesus hamauh dengan kare muride, "Nampunan kalabien panginan te; ela sampai aton je hayang." 6:13 Palus ewen manampunan duewalas lontong kontep kalabien panginan bara lime rote je kinan awi oloh are te. 6:14 Katika oloh are mite taloh heran je iawi Yesus, ewen hamauh, "Toto, jetoh nabi je iharap dumah akan kalunen!" 6:15 Yesus katawan ewen dumah handak mamaksa ie manjadi rajan ewen. Tagal te ie mangejau arepe haguet akan daerah je habukit. 6:16 Metoh andau nampara hamalem, kare murid Yesus mohon akan danau. 6:17 Palus ewen lumpat arut dimpah danau te manalih Kapernaum. Andau jari kaput, tapi Yesus hindai kea dumah manalih ewen. 6:18 Pandehan te danum nampara hariak awi riwut paham. 6:19 Limbah balayar kurang labih lime atawa jahawen kilometer, ewen mite Yesus dumah manalih arut hayak mananjong hunjun danum. Ewen mikeh toto. 6:20 Tapi Yesus hamauh dengan ewen, "Ela mikeh, jetoh aku!" 6:21 Palus dengan hanjak atei ewen manarima ie akan huang arut, tuntang metoh te kea arut ewen sampai eka je inalih. 6:22 Hanjewu andau tinai oloh are je magon melai intu dipah danau, mangatawan hong hete endau baya aton ije arut ih. Ewen katawan kare murid Yesus jari haguet mahapan arut te, tapi Yesus dia omba. 6:23 Limbah te tinai pire-pire arut bara lewu Tiberias dumah tuntang tende tokep eka oloh are te kuman rote limbah Tuhan manyewut tarimakasih. 6:24 Katika oloh are te mite Yesus tuntang kare muride jaton hete, ewen kea lumpat akan arut te tuntang haguet akan Kapernaum manggau Yesus. 6:25 Katika kare oloh hasondau dengan Yesus hong silan danau, ewen misek ie, "Bapa Guru, hamparea Bapa sampai intu hetoh?" 6:26 Yesus tombah, "Puna toto keton jari manggau aku dia ie awi keton jari harati riman kare taloh heran je iawiku, tapi awi keton jari kuman besoh. 6:27 Ela keton bagawi mangat mandino panginan je tau lepah tuntang babasi. Keleh keton bagawi uka mandino panginan je dia tau babasi tuntang je manenga pambelom je katatahie. Panginan te kareh inenga awi Anak Olon akan keton, ie jari iangkat awi Hatalla Bapa." 6:28 Palus ewen misek dengae, "En je musti iawi ikei mangat malalus kahandak Hatalla?" 6:29 Yesus tombah, "Jetoh ie je ingahandak Hatalla bara keton: percaya dengae je inyoho Hatalla." 6:30 "Amon kalote," koan ewen "en buktie je tau Bapa manengae mangat ikei mitee tuntang percaya dengan Bapa? En je tau Bapa mawie? 6:31 Tato hiang ikei kuman manhu hong padang pasir, kilau je tarasurat hong Surat Barasih, 'Ie manenga akan ewen panginan rote bara sorga.' " 6:32 Palus Yesus hamauh dengan ewen, "Percaya ih: Beken Moses, malengkan Bapaku je jari manenga akan keton rote je puna toto bara sorga. 6:33 Basa rote je inenga Hatalla jete je puna mohon bara sorga tuntang manenga pambelom akan oloh hong kalunen." 6:34 "Bapa," koan ewen, "tenga harajur akan ikei rote te." 6:35 "Aku toh rote je manenga pambelom," koan Yesus dengan ewen. "Oloh je manalih aku dia akan balau' tinai sampai katatahie. Tuntang oloh je percaya dengangku, dia akan teah belaie tinai sampai katatahie." 6:36 "Tapi kilau je insanangku akan keton, aloh keton jari mite aku, keton mahin dia percaya. 6:37 Kakare oloh je inenga Bapa akangku kareh dumah manalih aku. Aku dia manolak eweh bewei je manalih aku. 6:38 Basa aku mohon bara sorga dia uka malalus kahandakku kabuat, malengkan kahandak ayue je manyoho aku. 6:39 Tuntang jetoh ie kahandak ayue je manyoho aku: uka bara kare oloh samandiai je inengae Akangku, ije mahin jaton nihau; tapi uka aku mampisik ewen hong Andau Kiamat. 6:40 Puna jetoh ie kahandak Bapaku: uka oloh samandiai je mite Anak, tuntang percaya dengae mandino pambelom je katatahie, tuntang aku mambelom ewen tinai hong Andau Kiamat." 6:41 Kare oloh Yehudi nampara bakotok dengan Yesus, awi ie hamauh: "Aku toh rote je mohon bara sorga." 6:42 Ewen hamauh, "En dia ie toh Yesus, anak Yosep? Ikei kasene indu-bapae! Kilen ampie ie tau hamauh ie mohon bara sorga?" 6:43 Palus Yesus hamauh dengan ewen, "Ela bakotok. 6:44 Ije biti mahin jaton oloh tau dumah manalih aku, amon Bapa je manyoho aku, dia mimbit ie manalih aku; tuntang ewen je dumah, kareh impisik hong Andau Kiamat. 6:45 Huang surat kare Nabi tarasurat kalotoh, 'Kakare oloh kareh iajar awi Hatalla.' Jadi oloh samandiai je mahining Bapa tuntang mandino ajar bara ie, dumah manalih aku. 6:46 Jete dia tau irima kilau oloh jari puji mite Bapa. Baya ie je dumah bara Bapa, ie te je jari mite Bapa. 6:47 Keleh keton katawan: Oloh je percaya, madino pambelom je bujur tuntang katatahie. 6:48 Aku toh rote je manenga pambelom. 6:49 Tato hiang keton kuman manhu hong padang pasir tuntang ewen matei kea. 6:50 Tapi dia kalote dengan rote je mohon bara sorga; oloh je kuman rote te dia akan matei. 6:51 Aku toh rote je mohon bara sorga -- rote je manenga pambelom. Oloh je kuman rote toh akan belom katatahie. Rote je inengaku akan pambelom olon hong kalunen, jete isingku." 6:52 Mahining jete kare oloh Yehudi hakaridu sama arepe. "Kilen ampie oloh toh tau manenga isie akan itah mangat kumae?" koan ewen. 6:53 Palus Yesus hamauh dengan ewen, "Percaya ih: Amon keton dia kuman isin Anak Olon tuntang mihop dahae, keton kareh dia toto-toto belom. 6:54 Olon je kuman isingku tuntang mihop dahangku mandino pambelom je bujur tuntang katatahie tuntang aku mampisik ie hong Andau Kiamat. 6:55 Basa isingku puna panginan, tuntang dahangku te puna taloh ihop. 6:56 Oloh je kuman isingku tuntang mihop dahangku, tetep hinje dengangku, tuntang aku hinje ie. 6:57 Bapa je belom te, manyoho aku tuntang aku mahin belom awi Bapa. Kalote kea oloh je kuman isingku kareh belom awiku. 6:58 Jetoh ie rote je mohon bara sorga: dia ie rote kilau je kinan awi tato hiang keton. Basa limbah kuman rote jete, ewen matei kea. Tapi oloh je kuman rote jetoh kareh belom sampai katatahie." 6:59 Taloh samandiai te isanan awi Yesus katika ie majar hong huma sombayang intu Kapernaum. 6:60 Limbah mahining kare auh Yesus te, are bara marak kare muride hamauh, "Auh ajar toh lalau babehat. Eweh je olih manarima!" 6:61 Yesus kabuat katawan je muride mangomel tahiu hal te. Maka ie hamauh, "En keton tersinggung tagal kare auh te? 6:62 Kilen ampie kajariae amon kareh keton mite Anak Olon mandai' haluli akan eka je solake? 6:63 Je mawi oloh belom iete Roh Hatalla. Kaabas olon jaton gunae. Kare auh je insanangku akan keton toh jetoh kare auh Hatalla tuntang kare auh je manenga pambelom. 6:64 Tapi aton kea bara keton je dia percaya." (Yesus jari katawan bara solake kare oloh je dia maku percaya, tuntang oloh je handak mandurhaka mawi ie.) 6:65 Palus Yesus hamauh tinai, "Jete sababe aku mansanan akan keton ije biti mahin jaton oloh dumah manalih aku, amon Bapa dia manengae akangku." 6:66 Nampara bara katika te are muride malihi ie, tuntang dia maku omba ie tinai. 6:67 Palus Yesus misek dengan duewalas muride, "En keton handak malihi aku kea?" 6:68 "Tuhan," koan Simon Petrus dengae, "ikei haguet manalih eweh? Auh Tuhan manenga pambelom je bujur tuntang katatahie. 6:69 Ikei jari percaya tuntang yakin je Tuhan bewei utusan je barasih bara Hatalla." 6:70 Yesus tombah, "En diakah aku je mintih keton duewalas biti? Tapi ije bara keton te setan!" 6:71 Oloh je koan Yesus te iete Yudas anak Simon Iskariot. Basa aloh Yudas te ije biti bara duewalas murid Yesus, ie akan mandurhaka mawi Yesus.
7:1 Limbah te Yesus haguet akan hete-hete hong Galilea. Ie dia maku akan daerah Yudea basa kare panguasa Yehudi hong hete handak mampatei ie. 7:2 Hong katika te Andau Pesta Tingkap Dawen jari tokep. 7:3 Maka kare paharin Yesus hamauh dengae, "Lihi ih eka toh tuntang haguet akan Yudea, mangat kare muridm tau mite kea taloh gawim. 7:4 Dia aton oloh je handak manyahokan taloh je iawie, amon ie handak manjadi oloh basewut. Amon ikau malalus kare taloh macam te, hapus kalunen musti katawae!" 7:5 (Basa kare paharie kabuat mahin dia percaya dengae.) 7:6 "Hindai katikae akangku," koan Yesus dengan ewen, "tapi akan keton, genep katika tau. 7:7 Kalunen toh dia mungkin manyingi keton. Tapi aku puna inyingi oloh kalunen, awi aku harajur mansanan akan kalunen je gawie te papa. 7:8 Haguet ih kabuat keton akan pesta te. Aku dia haguet awi hindai katikae akangku." 7:9 Kakai auh Yesus dengan kare paharie, tuntang ie mahin melai hong Galilea. 7:10 Limbah kare paharie haguet akan pesta te, Yesus haguet suni-suni kabuate, jaton oloh katawae. 7:11 Katahin pesta te, kare panguasa Yehudi manggau ie tuntang hisek, "Hong kueh ie?" 7:12 Are oloh nampara bisik-bisika tahiu ie. Aton je hamauh, "Ie oloh bahalap." Aton kea je hamauh, "Dia! Ie mampalayang oloh are." 7:13 Tapi ije biti mahin jaton oloh bahanyi hakotak tara-tarang tahiu ie awi ewen mikeh dengan kare panguasa Yehudi. 7:14 Hong bentok pesta oloh are te, Yesus tame akan huang Human Tuhan, palus nampara majar. 7:15 Kare panguasa Yehudi hengan toto tuntang hamauh, "Kilen ampie oloh toh tau are pangatawae, padahal ie dia puji sakola?" 7:16 Yesus tombah, "Taloh je iajarku toh dia bara aku tapi auh ajar bara ie je manyoho aku. 7:17 Oloh je handak manumon kahandak Hatalla, akan mangatawan en auh ajarku te pandumahe bara Hatalla atawa bara arepku kabuat. 7:18 Oloh je manenga auh ajar ayue kabuat, ie manggau hormat akan arepe kabuat. Tapi oloh je manggau hormat akan oloh je manyoho ie, oloh te jujur, jaton tanjaro huang ie. 7:19 En dia Moses jari manenga kare parentah Hatalla akan keton? Tapi hong marak keton aton oloh je manumon kare parentah te. Mbuhen keton handak mampatei aku?" 7:20 Oloh are te tombah, "Ikau gila! Eweh je handak mampatei ikau?" 7:21 Yesus tombah, "Baya ije ih gawi je ilalusku hong andau Sabat, tuntang keton hengan. 7:22 Moses manenga akan keton atoran uka basunat -- aloh asal sunat te sapunae dia bara Moses, tapi bara kare tato hiang itah helo bara Moses. Tagal te, hong andau Sabat kea keton mahin manyunat oloh. 7:23 Amon keton malalus jete uka ela keton malanggar atoran Moses tahiu sunat, mbuhen keton balait dengangku awiku mampakeleh hapus bitin oloh hong andau Sabat? 7:24 Ela mahakim oloh hagalang taloh je gitan, tapi hunjun galang kaadilan." 7:25 Limbah te tinai aton pire-pire oloh Yerusalem hamauh, "En dia jetoh oloe te je inggau uka impatei? 7:26 Tampayah ie hakotak mana koae ih hong bentok umum, tuntang jaton oloh je hakotak mawi auh en-en dengae! En kare panguasa itah mungkin jari mangatawan je ie toh Raja Panyalamat? 7:27 Tapi amon Raja Panyalamat te dumah, jaton ije oloh katawan bara kueh asale! Padahal itah katawan bara kueh asale oloh toh." 7:28 Limbah te, metoh Yesus majar hong Human Tuhan, ie mangkariak hai auhe, "Jadi keton katawan eweh aku toh, tuntang bara kueh asalku? Aku dumah dia awi kahandakku kabuat. Aku inyoho awie je bara hak manyoho aku, tuntang ie tau imercaya. Tapi keton dia mangasene ie. 7:29 Aku mangasene ie, karana asalku bara ie, tuntang ie te je manyoho aku." 7:30 Hong katika te ewen handak manawan Yesus, tapi jaton je bahanyi mimbing ie, awi katikae hindai sampai. 7:31 Are bara kare oloh te nampara percaya dengae, tuntang hamauh, "Amon Raja Panyalamat te dumah, en tau ie manguan labih are taloh heran bara je iawi oloh toh?" 7:32 Kare oloh Parisi mahining kilen ampie oloh te bisik-bisika tahiu Yesus. Tagal te, haya-hayak dengan kare imam kapala, ewen manyoho pire-pire pangawal Human Tuhan haguet manawan Yesus. 7:33 Yesus hamauh dengan oloh are huang Human Tuhan, "Baya hanjulo ih hindai aku aton hinje keton. Limbah te aku akan haluli manalih ie je manyoho aku. 7:34 Keton kareh manggau aku, tapi dia tau sondau aku; awi keton dia tau sampai akan ekaku melai." 7:35 Palus kare panguasa Yehudi te hamauh sama arepe, "Oloh toh handak haguet akan kueh sampai itah dia tau manyondau ie? En ie handak haguet manalih kare oloh Yehudi je melai hong luar negeri hong marak oloh Yunani, tuntang majar oloh Yunani? 7:36 Narai riman auhe je itah kareh manggau ie tapi dia tau sondau ie tuntang dia tau manalih ekae melai?" 7:37 Hong andau je pangkarahiae lawin pesta te, iete andau je paling mambatang, Yesus mendeng hong Human Tuhan palus mangkariak, "Oloh je teah belaie keleh dumah manalih aku tuntang mihop. 7:38 Tahiu oloh je percaya dengangku, tarasurat huang Surat Barasih, 'Bara huang atei mahasor kare tahasak danum je manenga pambelom.' " 7:39 (Yesus hakotak tahiu Roh Hatalla, je akan inarima awi oloh jepercaya dengae. Basa hong katika te Roh Hatalla hindai inenga; awi Yesus hindai impahai dengan pampateie.) 7:40 Are oloh je mahining taloh je insanan Yesus, tuntang bara ewen te aton je hamauh, "Oloh toh pasti Nabi te!" 7:41 Oloh je beken hamauh, "Jetoh ie Raja Panyalamat!" Tapi aton kea je hamauh, "Ah, dia badai' Raja Panyalamat dumah bara Galilea? 7:42 Huang Surat Barasih tarasurat je Raja Panyalamat te panakan Dawid tuntang akan dumah bara Betlehem, iete lewu-human Dawid." 7:43 Kajariae kare oloh nampara hatakian auh tahiu Yesus. 7:44 Aton je handak manawan ie, tapi ije biti mahin jaton je manokepe. 7:45 Katika kare pangawal Human Tuhan dumah haluli limbah ewen inyoho haguet manawan Yesus, kare imam kapala tuntang kare oloh Parisi te misek dengan ewen, "Mbuhen keton dia mimbit ie akan hetoh?" 7:46 Kare pangawal te tombah, "Wah, hindai aton oloh hakotak sama kilau ie!" 7:47 "En keton kea jari impalayang awie?" koan kare oloh Parisi te. 7:48 "En aton bara kare panguasa itah atawa oloh Parisi je percaya dengae? 7:49 Tapi oloh are toh dia mangasene hukum Moses, tuntang aloh kilen ampie kea ewen te jari tarasapa." 7:50 Ije bara kare oloh Parisi te iete Nikodemus je puji dumah manalih Yesus. Nikodemus hamauh dengan kare oloh Parisi awang beken, 7:51 "Manumon hukum, oloh dia tau ihukum helo bara perkarae te ihining tuntang gawie te iriksa." 7:52 "En ikau kea bara Galilea?" koan ewen tombah, "Riksa ih Surat Barasih! Ikau kareh mitee je asal nabi te dia bara Galilea!" 7:53 Limbah te uras oloh buli akan huma.
8:1 Tapi Yesus haguet akan Bukit Batang Undus. 8:2 Andau ije tinai hayak hanjewu ie haguet akan Human Tuhan, tuntang are oloh dumah manalih ie. Yesus mondok, palus nampara majar ewen. 8:3 Metoh te kare guru agama tuntang kare oloh Parisi mimbit manalih ie ije biti oloh bawi je tarasondau habandong. Ewen manyoho oloh bawi te mendeng hong bentok, 8:4 palus hamauh dengan Yesus, "Bapa Guru, oloh bawi toh tarasondau ikei metohe habandong. 8:5 Huang Hukum Moses aton atoran je oloh bawi kilau toh musti imanting hapan batu sampai matei. Toh kilen angat tirok bapa?" 8:6 Ewen misek kalote hapan manjabak ie, mangat ewen tau manyalan ie. Tapi Yesus sontop ih, tuntang manyurat intu petak hapan tunjoke. 8:7 Metoh ewen jajuan auh ewen dengae, ie manggatang baue tuntang hamauh dengan ewen, "Oloh je jaton badosa bara marak keton, takan ih ie je pangkaheloe mamanting batu mawi oloh bawi te." 8:8 Limbah te Yesus sontop haluli tuntang manyurat tinai intu petak. 8:9 Limbah mahining Yesus hamauh kalote, mije-mije ewen te haguet malihi eka te, nampara bara je tambakase. Kajariae Yesus melai kabuate intu hete dengan oloh bawi je magon mendeng hong ekae. 8:10 Palus Yesus manggatang baue tuntang hamauh dengan oloh bawi te, "Hong kueh ewen handiai te? En jaton oloh je mahukum ikau?" 8:11 "Jaton, pa," koae tombah. "Buah ih," koan Yesus, "Aku mahin dia mahukum ikau. Toh haguet ih, ela mawi dosa tinai." 8:12 Yesus hakotak tinai dengan oloh are, "Aku toh kalawan kalunen. Oloh je omba aku dia olih mananjong hong kakaput, tapi mandino kalawan pambelom." 8:13 "Toh ikau manenga kasaksian tahiu arepm kabuat," koan kare oloh Parisi te dengae, "Kasaksiam te dia toto." 8:14 Yesus tombah, "Aloh aku manenga kasaksian tahiu arepku kabuat, kasaksiangku te toto; awi aku katawan bara kueh pandumahku tuntang akan kueh pangguetku. Keton jaton katawan bara kueh pandumahku tuntang akan kueh pangguetku. 8:15 Keton mahakim oloh hapan cara ain olon; aku jaton mahakim eweh bewei. 8:16 Tapi paribasa aku mahakim oloh, maka perkara je imutusku te bujur, awi aku dia kabuatku; Bapa je manyoho aku aton hinje aku. 8:17 Intu huang Hukum Moses aton tarasurat kalotoh: Kasaksian je toto iete kasaksian bara due biti oloh. 8:18 Je manenga kasaksian tahiu aku aton due -- aku tuntang Bapa je manyoho aku." 8:19 "Bapam te huang kueh?" koan ewen. Yesus tombah, "Aloh aku, aloh Bapa, keton dia kasenee. Paribasae keton kasene aku, pasti keton mangasene kea Bapaku." 8:20 Taloh handiai te insanan Yesus katika ie metoh majar hong Human Tuhan tokep kare patin duit parapah. Tapi ije biti mahin jaton oloh je manawan ie, awi katikae hindai sampai. 8:21 Yesus hamauh tinai dengan ewen, "Aku toh handak haguet, tuntang keton kareh manggau aku, tapi keton kareh matei huang dosan keton. Eka je inggoangku, dia keton tau manalihe." 8:22 Maka kare panguasa Yehudi hamauh, "Tau kea ie handak mampatei arepe, basa ie hamauh, 'Eka je inggoangku, keton dia tau manalihe.' " 8:23 Palus Yesus hamauh dengan ewen, "Keton dumah bara ngiwa; tapi aku dumah bara ngambo. Keton bara kalunen; aku dia bara kalunen. 8:24 Jete sababe aku hamauh dengan keton, je keton kareh matei huang kare dosan keton. Tuntang puna keton akan matei huang kare dosan keton, amon dia percaya je 'Aku toh ie je inyewut AKU ATON'." 8:25 "Ikau eweh sapunae?" koan ewen misek. Yesus tombah, "Akan en hakotak tinai dengan keton! 8:26 Magon are hal tahiu keton je handak isanangku tuntang ihakimku. Tapi ie je manyoho aku tau imercaya. Tuntang aku mansanan akan kalunen taloh je ihiningku bara ie." 8:27 Ewen dia haratie je ie te metoh te hakotak dengan ewen tahiu Bapa. 8:28 Tagal te Yesus hamauh dengan ewen, "Kareh amon keton jari mampagantong Anak Olon, keton akan katawan je 'Aku toh ie je inyewut AKU ATON', tuntang keton akan katawan, ije mahin jaton taloh je iawiku te bara arepku kabuat. Aku baya mansanan taloh je iajar Bapa akangku. 8:29 Tuntang ie je manyoho aku aton hinje aku. Ie dia puji manalua aku kabuatku, awi aku harajur malalus taloh je manyanang ateie. 8:30 Limbah Yesus mansanan taloh samandiai te, are oloh percaya dengae. 8:31 Limbah te tinai Yesus hamauh dengan kare oloh Yehudi je jari percaya dengae, "Amon keton belom manumon auh ajarku, keton toto-toto muridku, 8:32 maka keton akan mangasene Hatalla je toto, tuntang tagal te keton kareh mardeka." 8:33 "Ikei toh panakan Abraham," koan ewen. Hindai puji ikei jadi jipen eweh bewei! En riman auhm manyewut, 'Keton kareh mardeka'?" 8:34 "Puna toto auhku toh," koan Yesus dengan ewen. "Oloh je mawi dosa, ie te jipen dosa. 8:35 Tuntang ije biti jipen jaton dinon eka je tetep huang keluarga, tapi anak mandino eka sampai katatahie huang keluarga. 8:36 Tagal te, amon Anak te mamardeka keton maka keton toto-toto mardeka. 8:37 Puna aku katawan keton toh panakan Abraham. Tapi keton handak mampatei aku awi keton dia maku manarima auh ajarku. 8:38 Taloh je gitangku intu Bapaku, jete kea je insanangku. Tapi keton malalus taloh je iajar bapa keton akan keton." 8:39 Ewen tombah, "Bapa ikei Abraham." "Paribasa keton puna toto anak Abraham," koan Yesus, "pasti keton malalus taloh je ilalus awi Abraham. 8:40 Aku manyampai akan keton katoto je ihiningku bara Hatalla. Tapi keton handak mampatei aku. Abraham dia mawie kilau te! 8:41 Keton malalus kare taloh je ilalus awi bapa keton kabuat." Koan ewen tombah, "Ikei toh dia ie anak sarau. Bapa ikei baya ije bewei, iete Hatalla kabuat." 8:42 Palus Yesus hamauh dengan ewen, "Jaka Hatalla te bapa keton, keton kareh sinta aku, awi aku dumah bara Hatalla. Aku dumah dia mahapan kahandakku kabuat, tapi ie je manyoho aku. 8:43 En sababe keton dia harati taloh je isanangku? Awi keton dia mahining auh ajarku. 8:44 Setan te bapa keton, tuntang keton handak manumon kahandak bapa keton. Bara solake setan te puna pamuno. Ie dia puji omba huang katoto, awi huang ie jaton katoto. Amon ie mananjaro jete patut ih akae, basa sipat ayue puna jari kalote. Ie pananjaro tuntang asal kakare tanjaro. 8:45 Tapi aku toh mansanan katoto, tuntang tagal te kea keton dia percaya dengangku. 8:46 Eweh bara keton je tau mambuktie je huang aku toh aton dosa? Amon aku mansanan katoto, mbuhen keton dia percaya dengangku? 8:47 Oloh je asale bara Hatalla, mahining auh Hatalla. Tapi keton dia bara Hatalla, jete sababe keton dia maku mahining." 8:48 Kare oloh Yehudi te tombah auh Yesus, "En dia toto auh ikei je ikau toh oloh Samaria je ingumpang setan?" 8:49 Yesus tombah, "Aku dia ingumpang setan. Aku mahormat Bapaku, tapi keton mahina aku. 8:50 Aku dia manggau hormat akan arepku kabuat. Aton Ije je manyatiar hormat akangku, tuntang ie te je mahakim. 8:51 Toto haliai auhku toh, oloh je manumon auhku, sampai katatahie ie kareh dia akan matei." 8:52 Palus kare oloh Yehudi te hamauh dengan Yesus, "Toh ikei katawan je ikau toh toto-toto ingumpang setan! Abraham kabuat jari matei, kalote kea kakare nabi. Tapi ikau hamauh, 'Oloh je manumon auhku, sampai katatahie dia akan matei.' 8:53 Amon Abraham kabuat jari matei, tuntang uras kare nabi kea jari matei, ikau toh eweh? dia badai' ikau toh labih hai bara bapa ikei Abraham!" 8:54 Yesus tombah, "Jaka aku manggau hormat akan arepku kabuat, jete hormat je jaton rimae. Je mahormat aku ie te Bapa je koan keton Hatallan keton, 8:55 padahal keton dia mangasene ie. Tapi aku mangasene ie. Jaka aku hamauh aku dia kasene ie, maka aku oloh pananjaro, sama kilau keton. Aku kasene ie tuntang manumon auhe. 8:56 Bapa keton Abraham hanjak toto jaka ie mite andau pambelom ayungku. Ie jari mitee tuntang ie hanjak!" 8:57 Palus kare oloh Yehudi hamauh dengan Yesus, "Umurm hindai sampai lime puluh nyelo, tuntang ikau jari mite Abraham?" 8:58 Yesus tombah, "Toto aku hamauh dengan keton: helo bara Abraham inakan, aku jari aton." 8:59 Palus kare oloh Yehudi te manduan batu handak mamedak ie; tapi Yesus manyahokan arepe, palus haguet malihi Human Tuhan.
9:1 Katika Yesus mananjong, ie mite oloh je babute bara metoh ie inakan. 9:2 Kare murid Yesus hamauh dengan Yesus, "Bapa Guru, mbuhen oloh toh inakan babute? En toh awi ie kabuat je badosa atawa awi indu-bapae je badosa?" 9:3 Yesus tombah, "Ie babute dia awi dosae kabuat atawa dosan oloh bakase, tapi uka oloh tau mite kuasan Hatalla bagawi huang ie. 9:4 Katahin andau balawa, itah musti malalus gawin aie je manyoho aku. Hamalem kareh dumah, tuntang jaton ije biti oloh je tau bagawi. 9:5 Katahin aku hong kalunen, aku toh kalawan kalunen." 9:6 Limbah ie hamauh kalote Yesus maluja akan petak, tuntang mudak lujae te hapan petak. Limbah ie mohos petak intu matan oloh te, 9:7 palus ie hamauh dengae, "Lius, enyau baum hong Talaga Siloam." (Siloam te rimae 'Inyoho'.) Maka oloh te haguet marasih baue. Metoh ie haluli, ie jari tau mite. 9:8 Kare oloh hasansila humae tuntang kare oloh je solake mite ie manyadakah, uras hamauh, "En dia ie toh oloh je bahut mondok manyadakah?" 9:9 Aton je hamauh, "Puna ie." Tapi aton kea je hamauh, "Beken, ie baya mirip kilau oloh te." Tapi oloh te kabuat hamauh, "Aku toh ie." 9:10 "Kilen ampie sampai ikau jari tau mite?" koan ewen misek ie. 9:11 Ie tombah, "Oloh je bagare Yesus te manampa petak kisak isut, palus mohose intu matangku tuntang hamauh, 'Lius enyau baum intu Talaga Siloam,' Palus aku haguet. Tuntang katika aku menyau baungku, aku tau mite." 9:12 "Hong kueh oloh te?" koan ewen misek. "Tawae," koae tombah. 9:13-14 Andau metoh Yesus mudak petak hapan lujae te uka mawi oloh babute te tau mite, jete hong andau Sabat. Maka oloh je solake babute te iimbit manalih kare oloh Parisi. 9:15 Ewen kea misek dengae kilen ampie ie salenga tau mite. Ie tombah, "Ie mohos petak kisak intu matangku, palus aku menyaue tuntang aku tau mite." 9:16 Pire-pire bara kare oloh Parisi te hamauh, "Dia mungkin oloh je mawie te asale bara Hatalla, basa ie dia paduli andau Sabat." Tapi oloh beken hamauh, "Dia mungkin oloh je badosa malalus kare taloh heran kilau toh?" Palus lembut auh karidu hong marak ewen. 9:17 Maka kare oloh Parisi te misek tinai dengan oloh te, "Kilen tumon tirokm tahiu ie je mawi ikau tau mite te?" "Ie te nabi," koan oloh te. 9:18 Tapi kare pamimpin Yehudi te dia maku percaya je oloh te puna babute solake tuntang toh tau mite. Tagal te ewen mantehau oloh bakase, 9:19 tuntang misek, "En toto jetoh anak keton je koan keton babute metoh inakan? Kilen ampie ie salenga tau mite wayah toh?" 9:20 Indu-bapa oloh te tombah, "Jetoh puna anak ikei; tuntang ie puna babute bara metoh inakan. 9:21 Tapi ikei dia katawan kilen ampie ie salenga tau mite wayah toh. Tuntang eweh je mawi ie tau mite, jete mahin ikei dia katawae isek ih dengae, ie jari sukup kabakase; ie tau tombah kabuat." 9:22 Oloh bakas oloh te hamauh kalote awi ewen mikeh dengan kare pamimpin Yehudi; awi ewen jari pakat, uka oloh je mangaku Yesus kilau Raja Panyalamat, dia tau hindai tame huma sombayang. 9:23 Jete sababe indu-bapa oloh te hamauh, "Ie jari sukup kabakase; isek ih dengae." 9:24 Palus ewen mantehau tinai oloh je solake babute te, tuntang hamauh dengae, "Keleh ikau sumpah je ikau mansanan auh je bujur. Ikei katawan oloh te oloh badosa." 9:25 "En ie badosa atawa dia," koan oloh te tombah, "aku dia katawan. Tapi aku katawan baya ije hal ih; bihin aku babute, toh aku tau mite." 9:26 Palus ewen hamauh tinai dengae, "En je iawie dengam? Kilen ampie ie mawi ikau tau mite?" 9:27 Oloh te tombah, "Jari inyaritaku akan keton, tapi keton dia maku mahining. Mbuhen keton handak mahining tinai? Mungkin keton toh handak manjadi murid ayue kea?" 9:28 Palus ewen mamapa ie tuntang hamauh, "Ikau kau je jadi muride; ikei dia! Ikei murid Moses. 9:29 Ikei katawan Hatalla jari hakotak dengan Moses. Tapi tahiu oloh te, ikei dia katawan bara kueh asale." 9:30 Oloh te tombah, "Heran toto sampai keton toh dia katawan bara kueh asale, padahal ie jari mawi aku tau mite. 9:31 Itah katawan Hatalla te dia mahining auh oloh badosa, tapi mahining auh oloh je mahormat Hatalla tuntang malalus kahandake. 9:32 Bara tamparan kalunen hindai puji itah mahining oloh manatamba matan oloh babute bara metoh ie inakan salenga tau mite. 9:33 Amon oloh te dia bara Hatalla, ie dia mungkin tau mawi taloh en-en." 9:34 Ewen tombah, "Hah? Ikau kontep dosa bara metoh ikau inakan, ikau handak majar ikei?" Maka bara katika te ie ingahana tame akan huma sombayang. 9:35 Yesus mahining je ewen te jari mangahana oloh te tame huma sombayang tinai. Ie manggau oloh te palus hamauh dengae, "En ikau percaya dengan Anak Olon?" 9:36 Oloh te tombah, "Eweh ie, tuan? Dohop sanan akangku mangat aku percaya dengae." 9:37 "Ikau jari mite ie," koan Yesus tombah. "Ie te oloh je metoh toh hakotak dengam." 9:38 "Aku percaya, Tuhan," koan oloh te palus sontop manyembah intu taharep Yesus. 9:39 Yesus hamauh, "Aku dumah akan kalunen toh uka mahakim; mangat oloh je babute tau mite, tuntang oloh je tau mite, manjadi babute." 9:40 Pire-pire oloh Parisi je aton intu hete mahining Yesus hakotak kalote, palus ewen misek dengae, "En koam ikei toh babute kea?" 9:41 Yesus tombah, "Jaka keton babute, keton dia badosa. Tapi awi keton hamauh 'Ikei tau mite,' jete rimae keton magon badosa."
10:1 "Toto haliai auh toh: Oloh je tame akan huang karambang tabiri mandai' pagar tuntang dia mahalau bauntonggang, tapi mandai' mahalau jalan beken, oloh te panakau tuntang parampok. 10:2 Tapi oloh je tau mahalau bauntonggang, ie te sakatik tabiri. 10:3 Oloh je manjaga karambang muap bauntonggang akae, tuntang kare tabirie manalih ie hong katika ie mantehau ewen dengan aran ewen mije-mije tuntang mangagalan ewen balua. 10:4 Limbah kare tabiri te iimbite balua, sakatik te mananjong hila baun, tuntang kare tabiri te manuntut ie basa ewen mangasene auhe. 10:5 Ewen dia maku manuntut oloh beken, ewen akan hadari haream bara oloh te, awi ewen dia kasene auhe." 10:6 Yesus manyarita paribasa te tapi ewen dia harati taloh je koae te. 10:7 Maka Yesus hamauh sinde tinai, "Puna toto auhku toh: aku toh bauntonggang akan tabiri. 10:8 Kare oloh je dumah helo bara aku, uras panakau tuntang parampok, tapi kare tabiri dia mahining auh ewen. 10:9 Aku toh bauntonggang. Eweh je tame mahalau aku, akan salamat; ie tame-balua tuntang mandino panginan. 10:10 Panakau dumah baya handak manakau, handak mampatei tuntang handak marusak. Tapi aku dumah mangat oloh mandino pambelom -- pambelom je hakutoh karee. 10:11 Aku toh Sakatik je bahalap. Sakatik je bahalap manenga hambaruae akan kare tabirie. 10:12 Oloh je bagawi manduan upah ie dia sakatik tuntang dia kea ie tempon kare tabiri te, ie kareh hadari malihi kare tabiri te amon ie mite meto basiak dumah. Maka kare tabiri te kareh inangkarap tuntang kasaburan awi meto te. 10:13 Oloh upahan te hadari, awi ie bagawi baya manduan upah. Ie dia paduli kare tabiri te. 10:14-15 Aku toh Sakatik je bahalap. Sama kilau Bapa mangasene aku tuntang aku mangasene Bapa, kalote kea aku mangasene kare tabiringku tuntang ewen kea mangasene aku. Aku manyarah hambaruangku akan ewen. 10:16 Magon aton tabiri beken ayungku kea, tapi jaton tame kawan tabiri toh. Ewen te musti imbitku kea tuntang ewen kareh mahining auhku. Ewen samandiai akan manjadi ije kakawan dengan ije Sakatik. 10:17 Bapa sinta aku awi aku manyarah hambaruangku, uka manarimae haluli. 10:18 Ije biti mahin jaton oloh je tau manduae bara aku. Aku manyarahe awi kahandakku kabuat. Aku bara kuasa uka manyarahe tuntang bara kuasa manduae haluli. Jete gawi je inarimaku bara Bapa." 10:19 Awi Yesus hakotak kalote, kare oloh Yehudi nampara hakaridu. 10:20 Are ewen je hamauh, "Ie kau ingumpang setan! Ie gila! Kanduen keton mahining auhe?" 10:21 Tapi aton kea ewen je hamauh, "Oloh je ingumpang setan dia hakotak kalote! En tau setan mawi oloh babute tau mite?" 10:22 Hong Yerusalem, kare oloh metoh mahaga Pesta Hai Tame Human Tuhan. Metoh te wayah sadingen. 10:23 Yesus metohe mananjong hong Palataran Salomo hong Human Tuhan, 10:24 katika kare oloh Yehudi dumah hapumpong mangaliling Yesus. Ewen hamauh, "Sampai hamparea ikau toh mawi ikei bembang? Sanan ih terus-tarang, jaka ikau toh puna toto-toto Raja Panyalamat." 10:25 Yesus tombah, "Jadi insanangku akan keton, tapi keton dia percaya. Kare gawi je ilalusku huang aran Bapaku, manenga bukti tahiu aku. 10:26 Keton dia percaya awi keton dia tame kawan tabiringku. 10:27 Kare tabiringku mahining auhku. Aku kasene ewen, tuntang ewen manuntut aku. 10:28 Aku manenga akan ewen pambelom je bujur tuntang katatahie, tuntang sampai katatahie ewen kareh dia binasa. Ije biti mahin jaton oloh tau marampas ewen bara lengengku. 10:29 Bapaku, je jari manenga ewen akangku, malabien bara kare taloh samandiai. Tuntang ije biti mahin jaton oloh tau marampas ewen bara lengen Bapa. 10:30 Aku tuntang Bapa te ije." 10:31 Palus kare oloh Yehudi manduan batu tinai handak mamedak Yesus. 10:32 Tapi Yesus hamauh dengan ewen, "Keton jari mite aku malalus are gawi bahalap je inyoho awi Bapaku. Bara kare gawi te, je kueh je mawi keton handak mamedak aku?" 10:33 Kare oloh Yehudi te tombah, "Dia tagal kare gawim je bahalap te ikei handak mamedak ikau hapan batu, tapi awi ikau mamapa Hatalla. Ikau ije biti olon, handak manjadian arepm kilau Hatalla." 10:34 Palus Yesus tombah, "En dia huang Buku Hukum ain keton tarasurat: Hatalla hamauh, 'Keton toh hatalla'? 10:35 Itah katawan, taloh je inyurat huang Surat Barasih ihapan akan katatahie. Jadi amon Hatalla manggare kare oloh je manarima auhe te 'hatalla', 10:36 mbuhen keton manyewut aku mamapa Hatalla awiku hamauh Aku Anak Hatalla? Padahal aku iintih awi Bapa tuntang inyoho akan kalunen. 10:37 Amon aku dia malalus gawi je inyoho Bapaku, ela percaya dengangku. 10:38 Tapi awiku malaluse, percaya ih dengan taloh je iawiku te, aloh keton dia maku percaya dengangku. Maka kalote keton katawan tuntang harati je Bapa tetep hinje dengangku, tuntang aku tetep hinje dengan Bapa." 10:39 Ewen manggau jalan tinai handak manawan Yesus, tapi ie lapas bara ewen. 10:40 Yesus haluli tinai akan dipah Silan Sungei Yordan, eka Yohanes bihin puji mampandoi oloh, palus melai intu hete. 10:41 Are oloh dumah manalih ie. Ewen hamauh, "Yohanes dia mawi kare taloh heran, tapi taloh handiai je insanae tahiu oloh toh uras toto." 10:42 Palus are oloh intu hete percaya dengan Yesus.
11:1 Ije biti oloh je bagare Lasarus melai hong Betania hinje dengan paharie Maria tuntang Marta. 11:2 Maria te oloh bawi je manata minyak harum intu pain Tuhan, tuntang mampuase hapan balaue. Sinde katika Lasarus haban. 11:3 Paharie, ewen due te, mangabar hal te akan Yesus, "Tuhan, paharin ikei je inyinta Tuhan te haban." 11:4 Katika Yesus mahining barita te, ie hamauh, "Panyakit toh dia baka mawi pampatei. Jetoh manjadi uka Hatalla impahai tuntang mangat awi te Anak Hatalla kea impahai." 11:5 Yesus sinta Marta, Maria tuntang Lasarus. 11:6 Tapi katika Yesus mandino kabar tahiu Lasarus je haban, ie tantai ihate ih melai intu ekae due andau tinai. 11:7 Limbah te harue ie hamauh dengan kare muride, "Has itah haluli akan Yudea." 11:8 Ewen tombah, "Bapa Guru, harue ih kare oloh Yehudi handak mamanting Bapa hapan batu tuntang Bapa handak haluli akan kanih?" 11:9 "En huang ije andau dia aton due walas jam?" koan Yesus. "Oloh je mananjong metoh handau, ie dia balawo awi ie mite kalawan kalunen toh. 11:10 Tapi oloh je mananjong hamalem, ie balawo awi jaton kalawa huang ie." 11:11 Kakai auh Yesus. Limbah te ie hamauh tinai, "Paharin itah Lasarus jari batiroh, tapi aku handak haguet mampisik ie." 11:12 Kare murid Yesus hamauh, "Tuhan, amon Lasarus batiroh, ie kareh keleh." 11:13 Je koan Yesus te, iete Lasarus jari matei. Tapi ewen manyangka je koan Yesus te Lasarus puna batiroh kilau bahut. 11:14 Tagal te Yesus hamauh dengan ewen terus-tarang, "Lasarus jari matei. 11:15 Tapi aku hanjak kea aku jaton hong kanih, basa labih bahalap akan keton, uka keton tau percaya. Has toh itah haguet manalih Lasarus." 11:16 Tomas je inyewut "Hatatup" hamauh dengan kare kawale murid Yesus, "Has itah omba, nauhe itah matei hayak ie!" 11:17 Katika Yesus sampai hong eka te, Lasarus jari epat andau katahie ingubur. 11:18 Betania tokep Yerusalem, kurang labih telo kilometer kakejaue. 11:19 Are oloh Yehudi jari dumah manyengok Marta tuntang Maria uka mampong ewen tagal pampatei paharie te. 11:20 Katika Marta mahining Yesus dumah, ie balua uka manambang Yesus, tuntang Maria melai intu huma. 11:21 Koan Marta dengan Yesus, "Tuhan, jakae ih metoh te Tuhan aton intu hetoh, pasti paharingku dia matei. 11:22 Tapi aloh kalote, tawangku ih je Hatalla te toh kea handak manenga en bewei je ilaku Tuhan dengae." 11:23 "Paharim kareh belom haluli," koan Yesus dengan Marta. 11:24 Marta tombah, "Katawangku Lasarus kareh belom haluli amon oloh matei impisik hong Andau Kiamat." 11:25 "Aku toh je manenga pambelom tuntang mampisik oloh matei," koan Yesus dengan Marta. "Oloh je percaya dengangku kareh belom, aloh ie jari matei. 11:26 Tuntang oloh belom je percaya dengangku, sampai katatahie ie dia matei tinai. En percaya ikau dengan hal toh?" 11:27 "Tuhan," koan Marta tombah, "aku percaya Tuhan Anak Hatalla, Raja Panyalamat je dumah akan kalunen toh." 11:28 Limbah Marta hamauh kalote, ie haguet mantehau Maria, paharie te tuntang habisik dengae, "Bapa Guru aton intu hetoh; ie misek tahiu ikau." 11:29 Mahining kalote, Maria jele-jeleng hingkat palus haguet manyondau Yesus. 11:30 Metoh te Yesus hindai tame akan lewu. Ie magon hong ekae katika Marta manyondau ie. 11:31 Kare oloh Yehudi je metohe mampong Maria hong huma, mite Maria hingkat tuntang jele-jeleng balua; jadi ewen haguet manuntut ie, awi ewen manyangka ie haguet akan kubur handak manangis. 11:32 Metoh Maria intu eka Yesus nah tuntang mite ie, Maria mandeko utute hila baun Yesus tuntang hamauh, "Tuhan, jakae ih metoh te Tuhan aton hetoh, pasti paharingku dia matei." 11:33 Katika Yesus mite Maria manangis, tuntang kare oloh Yehudi je dumah hayak dengan Maria te manangis kea, ateie kapehe, tuntang gitan ampie puna masi toto. 11:34 Maka ie misek dengan ewen, "En hong kueh keton mangubur ie?" "Kahetoh Tuhan mitee," koan ewen. 11:35 Palus Yesus manangis. 11:36 Maka kare oloh Yehudi te hamauh, "Ite, dia laluen sintae dengan Lasarus!" 11:37 Tapi bara marak ewen te aton je hamauh, "Ie mawi oloh babute tau mite, mbuhen ie dia tau manahan uka Lasarus ela matei?" 11:38 Yesus paham masi tinai, palus ie haguet akan kubur. Kubur te aton intu ije goha je inutup hapan batu hai. 11:39 "Nindar batu te," koan Yesus. Marta, paharin oloh je matei te tombah, "Tapi Tuhan, ie jari epat andau ingubur. Batantu jadi ewau maram!" 11:40 Yesus hamauh dengan Marta, "En dia jari insanangku akam: amon ikau percaya, ikau kareh mite dia laluen kahain kuasan Hatalla!" 11:41 Maka ewen manindar batu te. Limbah te Yesus mananggera akan langit tuntang hamauh, "Tarimakasih Bapa, ikau jari mahining auhku. 11:42 Aku katawan ikau harajur mahining auhku, tapi aku mansanan jetoh, akan kare oloh je aton intu hetoh; mangat ewen percaya je ikau puna manyoho aku." 11:43 Limbah hamauh kalote, Yesus mangkariak hai auhe, "Lasarus, balua!" 11:44 Maka oloh je jari matei te palus balua. Lengee tuntang paie magon imbungkus hapan benang, tuntang baue inutup hapan benang tutup bau. "Engkak benang te mangat ie tau mananjong," koan Yesus dengan kare oloh intu hete. 11:45 Are bara kare oloh Yehudi je dumah manyengok Maria, percaya dengan Yesus metoh ewen mite kajadian te. 11:46 Tapi pire-pire bara ewen haguet manalih oloh Parisi tuntang mansanan taloh je jari iawi Yesus. 11:47 Tagal te kare oloh Parisi tuntang kare imam kapala mawi rapat dengan Majelis Agama. Ewen hamauh, "Itah musti mawi en? Oloh toh are mawi taloh heran! 11:48 Amon itah manalua ie harajur kalotoh, uras oloh kareh percaya dengae. Tuntang kajariae oloh bara pamarentah Roma kareh dumah mamparamok Human Tuhan tuntang hapus utus itah!" 11:49 Ije biti bara ewen je bagare Kayapas, imam hai hong nyelo te, hamauh, "Keton jaton katawan taloh en-en. 11:50 En keton dia katawan, iete tagal rakyat, labih bahalap ije biti oloh matei bara hapus utus toh lenyoh?" 11:51 Sapunae, Kayapas hamauh kalote, dia bara tirok ayue kabuat. Tapi kilau imam hai nyelo te ie manujum iete Yesus kareh matei akan utus oloh Yehudi. 11:52 Tuntang dia akan oloh Yehudi bewei, tapi uka mamumpong tuntang mampahinje kare anak Hatalla je kasaburan. 11:53 Nampara bara andau te kare panguasa Yehudi pakat uka mampatei Yesus. 11:54 Tagal te Yesus dia hindai lembut hong bentok oloh are intu marak oloh Yehudi. Ie malihi Yudea, palus haguet akan lewu je bagare Epraim tokep padang pasir. Intu hete ie melai hinje dengan muride. 11:55 Hong katika te, Andau Pesta Paska Yehudi jari tokep. Are oloh bara kare lewu hete-hete jari haguet akan Yerusalem uka malalus gawi mamparasih arepe manumon atoran agama, helo bara pesta te. 11:56 Ewen manggau Yesus, tuntang metoh hapumpong hong Human Tuhan, ewen hamauh sama arepe, "Kilen ampie koan tirok keton? Mungkin ie dia dumah manalih pesta toh." 11:57 Ewen hamauh kalote basa kare imam kapala tuntang kare oloh Parisi jari mampalua parentah, iete oloh je mangatawan eka Yesus, musti mansanae, uka ie tau inawan.
12:1 Jahawen andau helo bara Andau Pesta Paska, Yesus haguet akan Betania. Hong eka te aton Lasarus je jari imbelom bara pampatei. 12:2 Intu hete Yesus inyarungan awi ewen, tuntang Marta mandohop. Lasarus tuntang kare oloh je dumah mondok kuman haya-hayak dengan Yesus. 12:3 Limbah te Maria dumah dengan kurang-labih satengah liter minyak harum narwastu je larang toto. Ie manata minyak te intu pain Yesus, palus mampuase hapan balaue. Hapus huma manjadi harum awi ewau minyak te. 12:4 Tapi Yudas Iskariot, ije biti bara murid Yesus -- je limbah te mandurhaka mawi ie -- hamauh, 12:5 "Mbuhen minyak harum te dia injual ih hapan rega telo ratus duit perak, tuntang duite inenga akan oloh je belom susah?" 12:6 Yudas hamauh kalote dia tagal awie manirok oloh je belom susah, tapi awi ie panakau. Ie kinjap manduan duit bara kas ewen handiai je iingkes dengae. 12:7 Tapi Yesus hamauh, "Nauhe ih oloh bawi te! Ie mawi jetoh akan andau mangubur aku. 12:8 Oloh je belom susah harajur aton marak keton, tapi aku toh dia." 12:9 Are oloh Yehudi mahining je Yesus te aton hong Betania, jadi ewen haguet akan hete. Ewen haguet dia baya tagal Yesus, tapi kea awi ewen handak mite Lasarus je jari imbelome bara pampatei. 12:10 Jete sababe kare imam kapala handak mampatei Lasarus kea; 12:11 awi ie mawi sabab are oloh Yehudi malihi ewen tuntang percaya dengan Yesus. 12:12 Andau jewue tinai oloh are je dumah uka maraya pesta Paska mahining Yesus aton hong benteng panjalanae manalih Yerusalem. 12:13 Maka ewen manduan kare palapah korma palus haguet manambang ie, sambil basasorak, "Tara akan Hatalla! Imberkat ie je dumah hong aran Tuhan. Imberkat ie Raja Israel!" 12:14 Yesus dinon ije kalidai tabela, tuntang ie manongkange. Maka manjadi auh je tarasurat huang Surat Barasih: 12:15 "Ela mikeh, kota Sion! Ite toh Rajam dumah, manongkang ije kongan kalidai tabela!" 12:16 Hong katika te kare murid Yesus hindai haratie taloh handiai je manjadi te. Tapi limbah Yesus impahai tagal pampateie, harue ewen taraingat iete taloh je iawi kare oloh dengae jari tarasurat huang Surat Barasih tahiu ie. 12:17 Kare oloh je aton metoh Yesus mantehau Lasarus balua bara kubur tuntang mambelom ie bara pampatei, harajur manenga kasaksian tahiu hal te. 12:18 Jete sababe oloh are te haguet manalih Yesus awi ewen mahining puna ie te je jari mawi taloh heran te. 12:19 Maka kare oloh Parisi hamauh sama arepe, "Itah jaton olih mawi taloh en-en! Ite ih, hapus kalunen uras omba ie!" 12:20 Bara marak kare oloh je haguet akan Yerusalem uka sombayang hong pesta te, aton kea pire-pire oloh Yunani. 12:21 Ewen dumah manalih Pilippus tuntang hamauh, "Pahari, amon tau, ikei handak hasondau dengan Yesus." (Pilippus te asale bara Betsaida hong Galilea.) 12:22 Maka Pilippus haguet mansanan hal te akan Andreas, limbah te ewen due manyampai hal te akan Yesus. 12:23 Yesus hamauh dengan ewen, "Jari sampai katikae Anak Olon impahai. 12:24 Puna toto auhku toh: Amon ije kabawak gandum dia iimbul akan huang petak tuntang matei, ie tetep ije kabawak. Tapi amon bawak gandum te matei, maka ie palus mahasil are gandum. 12:25 Oloh je sinta pambelome kareh nihau pambelome. Tapi oloh je basingi pambelome hong kalunen toh, kareh mahaga jete uka ie belom bujur tuntang katatahie. 12:26 Oloh je handak manempo aku musti omba aku; mangat jipengku tau hinje aku hong kueh aku aton. Oloh je mandohop aku akan ihormat awi Bapaku." 12:27 "Ateiku gogop; en je musti insanangku toh? En musti aku mansanan, 'Bapa, lapas aku bara katika jetoh'? Tapi puna uka aku mangkeme wayah kapehe jetoh aku toh dumah. 12:28 Bapa, Aram puna hai!" Maka tarahining auh bara langit mansanan, "Aku jari mampahai jete, tuntang aku handak mampahai jete tinai." 12:29 Oloh are je aton hete mahining auh te. Ewen hamauh, "Jete nyaho!" Tapi aton kea oloh je hamauh, "Beken! Malekat hakotak dengae!" 12:30 Palus Yesus hamauh dengan ewen, "Auh te tarahining, jete dia akangku, tapi akan keton. 12:31 Toh katikae jari sampai uka kalunen ihakim; metoh toh panguasa kalunen toh imbaring. 12:32 Tapi aku toh, amon aku jari inggatang hong hunjun petak, aku kareh manduan kakare oloh ayungku." 12:33 Ie hamauh kalote uka mamparahan kilen ampin carae ie akan matei. 12:34 Oloh are te hamauh dengae, "Manumon Surat Hukum ain ikei, Raja Panyalamat akan belom katatahie. Kilen ampie ikau tau hamauh je Anak Olon musti inggatang intu hunjun petak? Eweh Anak Olon te?" 12:35 Yesus tombah, "Baya hanjulo bewei kalawa te aton hong marak keton. Jadi, keleh keton mananjong katahin kalawa te magon aton, uka keton ela buah kakaput. Oloh je mananjong huang kakaput, dia katawan akan kueh tintun pangguete. 12:36 Percaya ih dengan kalawa te, katahin kalawa te magon aton intu keton, mangat keton manjadi anak kalawa." Limbah Yesus hakotak kalote, ie haguet bara hete tuntang dia maku mamparahan arepe akan ewen. 12:37 Aloh jari are taloh heran iawi Yesus intu taharep ewen, ewen dia percaya dengae. 12:38 Maka manjadi taloh je isanan Nabi Yesaya, "Tuhan, eweh je percaya dengan barita je insanan ikei? Akan eweh kuasan Tuhan imparahan?" 12:39 Jete bukue ewen dia percaya, basa Yesaya jari hamauh kea, "Hatalla hamauh, 12:40 'Aku mambute matan ewen, mawi ewen batekang ateie; mangat matan ewen ela mite, tirok ewen dia harati. Mangat ewen dia haluli manalih aku, palus aku mampakeleh ewen.' " 12:41 Yesaya hamauh kalote basa ie jari mite kahain Yesus, tuntang hakotak tahiu ie. 12:42 Aloh kalote, mahin are oloh, tuntang kea bara marak panguasa Yehudi percaya dengan Yesus. Tapi ewen dia bahanyi mangaku hal te terus-tarang, awi ewen mikeh, ela-ela oloh Parisi kareh mangahana ewen tame huma sombayang. 12:43 Ewen rajin mandino tara bara oloh labih bara penghargaan Hatalla. 12:44 Palus Yesus mangkariak, "Oloh je percaya dengangku, ie dia percaya dengangku, tapi percaya dengae je manyoho aku. 12:45 Tuntang oloh je mite aku, mite kea ie je manyoho aku. 12:46 Aku dumah akan kalunen toh kilau kalawa, uka kakare oloh je percaya dengangku dia melai huang kakaput. 12:47 Oloh je mahining auh ajarku, tapi dia manumoe -- dia ie aku je mahukum ie. Basa aku dumah dia tantai mahakim kalunen toh, tapi uka manyalamate. 12:48 Oloh je manolak aku tuntang dia mahining auhku, jari aton oloh je mahakim ie. Auh je insanangku, jete je kareh mahakim ie hong Andau Kiamat. 12:49 Basa aku hakotak dia tahiu kahandak ayungku kabuat; Bapa je manyoho aku, ie te je jari marentah aku tahiu taloh je insanangku tuntang inyampaiku. 12:50 Tuntang aku katawan je parentah ayue te manenga pambelom je bujur tuntang katatahie. Maka aku mansanan sama kilau je iajar Bapa akangku."
13:1 Sinde andau sahelo bara Andau Pesta Paska, Yesus katawan jete katikae jari sampai akae malihi kalunen toh uka haluli manalih Bapae. Ie sinta kare oloh ayue hong kalunen, tuntang ie tetep sinta ewen sampai kalepahe. 13:2 Yesus tuntang kare muride metohe kuman hamalem. Setan jari manamean kahandake huang atei Yudas Iskariot uka ie mandurhaka mawi Yesus. 13:3 Yesus katawan je Bapa jari manyarah salepah kuasa akae. Ie katawan kea je ie dumah bara Hatalla tuntang akan haluli manalih Hatalla. 13:4 Tagal te ie mendeng mengkak jubahe, tuntang mameteng handuk intu kahange. 13:5 Limbah te ie manusoh danum akan huang baskom, palus nampara menyau kare pain muride tuntang mampuas jete hapan handuk je imeteng intu kahange. 13:6 Maka ie sampai akan Simon Petrus, je hamauh, "Tuhan, lalehan Tuhan je menyau paingku?" 13:7 Yesus tombah, "Metoh toh ikau dia harati taloh je iawiku toh, tapi kareh ikau tau haratie." 13:8 "Ela Tuhan," koan Petrus dengan Yesus, "ela haliai Tuhan menyau paingku!" Tapi Yesus tombah, "Amon aku dia menyau ikau, maka ikau jaton hubungam dengangku." 13:9 Simon Petrus hamauh, "Amon kalote, Tuhan, ela baya paingku tapi lengengku tuntang takolokku kea!" 13:10 "Oloh je mandoi, jari barasih urase," koan Yesus dengan Petrus. "Ie dia usah imparasih tinai; beken bara paie. Keton toh jari barasih, tapi dia urase." 13:11 (Yesus jari katawan eweh je akan mandurhaka mawi ie. Jete bukue iehamauh, "keton toh jari barasih, tapi dia urase.") 13:12 Limbah Yesus menyau pain ewen, ie mangkepan jubahe haluli tuntang mondok tinai. Palus ie hamauh dengan ewen, "En haratin keton taloh je harue nah aku mawie akan keton? 13:13 Keton mantehau aku Guru tuntang Tuhan. Tuntang puna kalote. 13:14 Amon aku kilau Tuhan tuntang Gurun keton menyau pain keton, keton patut kea hapenyau pai sama arep keton. 13:15 Aku manenga sonto toh akan keton mangat keton malalus taloh je jari iawiku akan keton. 13:16 Toto haliai auhku toh: Ije biti rewar dia labih hai bara tempoe, tuntang ije biti rewar dia labih hai bara oloh je manyoho ie. 13:17 Amon keton jari katawan taloh handiai toh, salamat keton amon keton malaluse. 13:18 Taloh je isanangku toh dia ie tahiu keton samandiai. Aku katawan ewe-eweh je jari iintih. Tapi jari aton tarasurat huang Surat Barasih, musti manjadi, iete 'Oloh je kuman hayak dengangku, akan malawan aku.' 13:19 Hal toh insanangku akan keton metoh toh, helo bara hal te manjadi, mangat amon hal te kareh manjadi, keton kareh percaya aku toh ie je inyewut AKU ATON. 13:20 Toto haliai auhku toh: Oloh je manarima ie je inyohoku, oloh te manarima aku. Tuntang oloh je manarima aku, manarima ie je manyoho aku." 13:21 Limbah Yesus hamauh kalote, ie mangkeme paham manyengkel angat ateie. Palus ie mansanan, "Puna toto auhku toh: Ije biti bara marak keton kareh mandurhaka mawi aku." 13:22 Kare muride hatampayah sama arepe hayak hengan toto awi dia katawan eweh je koae te. 13:23 Murid je inyinta Yesus mondok hila silan ie. 13:24 Simon Petrus manenga tanda akae, uka ie misek dengan Yesus eweh je koae te. 13:25 Maka murid te manokep Yesus tuntang misek, "Eweh ie Tuhan?" 13:26 Yesus tombah, "Oloh je inengaku akae rote je inculopku huang mangkok, jete ie oloe." Maka Yesus manduan ije kahiris rote, manculop jete akan huang mangkok; palus manenga jete akan Yudas anak Simon Iskariot. 13:27 Sana limbah Yudas manarima rote te, maka setan tame akan huang ateie. Palus Yesus hamauh dengae, "Lalus bajeleng taloh je handak iawim." 13:28 Ije biti mahin jaton bara ewen je mondok kuman hete harati mbuhen Yesus hamauh kalote dengan Yudas. 13:29 Aton je manyangka Yesus manyoho Yudas mamili taloh en-en je akan ihapan huang pesta te, atawa manenga isut duit akan oloh je belom susah -- basa Yudas te mimbing duit kas ewen. 13:30 Limbah Yudas manarima rote te, ie palus balua. Andau jari hamalem. 13:31 Limbah Yudas haguet, Yesus hamauh, "Toh Anak Olon impahai, tuntang Hatalla impahai mahalau ie. 13:32 Amon Hatalla impahai mahalau ie, ie kea kareh impahai Hatalla mahalau arepe kabuat. Tuntang Hatalla kareh mampahai ie bajeleng. 13:33 O keton kare anakku, aku dia akan melai hinje keton hindai. Keton kareh manggau aku, tapi kilau je jari insanangku akan kare panguasa Yehudi, kalote kea aku mansanae akan keton; eka je inalihku, dia keton tau manalihe. 13:34 Parentah taheta inengaku akan keton: Keleh keton hasinta sama arep keton. Kilau aku jari sinta keton, kalote kea keton musti hasinta sama arep keton. 13:35 Amon keton hasinta sama arep keton, oloh handiai kareh katawan je keton toh muridku." 13:36 "Tuhan, Tuhan handak haguet akan kueh?" koan Simon Petrus misek Yesus. Yesus tombah, "Metoh toh ikau dia tau omba akan eka je inalihku. Rahian ikau kareh omba aku." 13:37 "Tuhan mbuhen aku dia tau omba Tuhan metoh toh?" koan Petrus misek tinai. "Aku rajin matei akan Tuhan!" 13:38 Yesus tombah, "En toto ikau rajin matei tagal aku? Keleh ikau katawan, kareh, helo bara manok manando, ikau jari hantelo kali hamauh je ikau dia mangasene aku!"
14:1 "Ela atei keton gogop," koan Yesus dengan ewen. "Percaya ih dengan Hatalla, tuntang percaya ih dengangku kea. 14:2 Hong human Bapaku are eka melai. Aku haguet akan kanih uka manatap eka akan keton. Aku dia handak hamauh kalote dengan keton, jaka puna dia kalote. 14:3 Limbah aku haguet manatap eka akan keton, aku kareh haluli manduan keton, uka hong kueh aku aton, hete kea keton aton. 14:4 Keton katawan jalan akan eka je inalihku." 14:5 Palus Tomas hamauh dengan Yesus, "Tuhan, ikei dia katawan akan kueh Tuhan haguet, kilen ampie ikei katawan jalae?" 14:6 Yesus tombah, "Aku toh jalan hapan mangasene Hatalla tuntang mandino pambelom. Ije biti mahin jaton oloh tau dumah manalih Bapa, amon dia mahalau aku. 14:7 Jaka keton mangasene aku, pasti keton kareh mangasene Bapaku kea. Metoh toh keton jari kasene ie, tuntang jari mite ie." 14:8 Maka Pilippus hamauh dengan Yesus, "Tuhan, parahan Bapa te akan ikei, mangat ikei salawah angat ikei." 14:9 Tapi Yesus tombah, "Jari kalote katahie aku hinje keton, tuntang hindai kea keton kasene aku, Pilippus? Oloh je jari mite aku, jari mite Bapa. Kilen ampie ikau tau hamauh, 'Parahan Bapa te akan ikei'? 14:10 Pilippus! En ikau dia percaya, je aku toh hinje dengan Bapa tuntang Bapa hinje dengangku? Taloh je insanangku akam, aku dia mansanae bara arepku kabuat. Bapa je harajur hinje dengangku, ie te je mawi taloh samandiai te. 14:11 Keleh ikau percaya je aku toh ije dengan Bapa tuntang Bapa te ije dengangku. Atawa sadia-diae, ikau percaya ih tagal kare taloh je jari iawiku. 14:12 Toto haliai auhku toh: Oloh je percaya dengangku, kareh malalus taloh je jari iawiku -- malahan ie kareh malalus taloh je labih hai haream -- awi aku haguet manalih Bapa. 14:13 Tuntang taloh je ilaku keton huang arangku, jete kareh ilalusku akan keton, uka Bapa impahai mahalau Anak. 14:14 En bewei taloh je ilaku keton huang arangku, akan ilalusku." 14:15 "Amon keton sinta aku, keton kareh malalus kare parentahku. 14:16 Aku handak balaku dengan Bapa, tuntang ie kareh manengae akan keton Pandohop je beken, je kareh melai hinje keton sampai katatahie. 14:17 Iete Roh Hatalla je handak mangarinah katoto tahiu Hatalla. Kalunen dia tau manarima ie, awi kalunen jaton mite tuntang jaton mangasene ie. Tapi keton mangasene ie, awi ie melai hinje keton tuntang kareh hinje dengan keton. 14:18 Aku dia handak malihi keton kilau anak nule. Aku akan haluli tinai manalih keton. 14:19 Baya hanjulo hindai kalunen dia akan mite aku tinai. Tapi keton kareh mite aku. Tuntang awi aku belom, keton mahin kareh belom kea. 14:20 Amon andaue sampai, keton kareh katawan je aku toh ije dengan Bapa, keton hinje dengangku tuntang aku hinje keton. 14:21 Oloh je manarima kare parentahku tuntang malaluse, oloh te je sinta aku. Bapaku akan sinta kare oloh je sinta aku. Aku kea akan sinta oloh te tuntang mamparahan arepku akae." 14:22 Yudas (beken Yudas Iskariot) misek dengan Yesus, "Tuhan mbuhen Tuhan maku mangarinah arep akan ikei tapi dia akan kalunen?" 14:23 Yesus tombah, "Oloh je sinta aku, kareh manumon auh ajarku. Bapaku handak sinta ie, Bapa tuntang aku kareh dumah manalih ie tuntang melai hinje ie. 14:24 Oloh je dia sinta aku, dia manumon auh ajarku. Auh ajar je ihining keton te, dia bara aku, tapi bara Bapa je manyoho aku. 14:25 Taloh handiai te insanangku akan keton sarai' aku magon hinje keton. 14:26 Tapi Roh Hatalla, Pandohop je akan inyoho Bapa huang arangku, ie te je kareh majar keton taloh handiai tuntang mampingat keton tahiu taloh handiai je jari insanangku akan keton. 14:27 Kahanjak impelaiku akan keton. Kahanjak ayungku kabuat je inengaku akan keton. Taloh je inengaku te dia kilau je inenga kalunen akan keton. Ela gogop, ela mikeh. 14:28 Keton jari mahining aku hamauh, 'Aku akan haguet, tapi aku kareh dumah haluli manalih keton'. Amon keton sinta aku, keton tau hanjak aku haguet manalih Bapa, basa Bapa labih hai bara aku. 14:29 Aku mansanan jete akan keton metoh toh, helo bara taloh handiai te manjadi, mangat kareh, amon taloh te manjadi, keton tau percaya. 14:30 Aku dia handak hakotak labih are hindai dengan keton, awi katikae jari sampai panguasa kalunen toh dumah. Tapi ie jaton kuasae mahunjun aku. 14:31 Tapi taloh samandiai te musti manjadi uka kalunen mangatawan je aku sinta Bapa tuntang aku malalus taloh handiai je irentah Bapa akangku. Nah, keleh itah haguet bara hetoh."
15:1 Koan Yesus tinai, "Aku toh upon anggur je bujur, tuntang Bapaku te tukang kabun. 15:2 Gagenep edan huang aku je dia mamua, ineteke, tuntang gagenep edan je mamua ingurang kare dawee tuntang irasihe mangat labih are buae. 15:3 Keton jari barasih tagal auh ajar je inengaku akan keton. 15:4 Keleh keton tetep hinje dengangku tuntang aku mahin tetep hinje keton. Edan kabuat dia tau mamua amon ie dia tetep intu upoe. Kalote kea keton baya tau mamua, amon keton tetep hinje dengangku. 15:5 Aku toh upon anggur, tuntang keton toh kare edae. Oloh ije tetep hinje dengangku tuntang aku hinje ie, ie kareh mamua are; basa amon aku jaton, keton dia tau mawi taloh en-en. 15:6 Oloh je dia tetep hinje dengangku, kareh inganan kilau edan palus keang. Kare edan je kilau te kareh imumpong tuntang inganan akan huang apui, palus inusul. 15:7 Amon keton tetep hinje dengangku tuntang auh ajarku melai huang atei keton, laku ih dengan Bapa taloh je ingahandak keton; palakun keton te kareh inenga. 15:8 Amon keton mamua are, Bapaku impahai; tuntang awi kalote, keton toto-toto manjadi muridku. 15:9 Kilau Bapa sinta aku, kalote kea aku sinta keton. Keleh keton tetep belom kilau oloh je inyintaku. 15:10 Amon keton malalus kare parentahku, keton tetep heret dengan sintangku sama kilau aku heret dengan sintan Bapa awiku malalus kare parentahe. 15:11 Taloh handiai toh insanangku akan keton, mangat kahanjakku aton huang atei keton, tuntang kahanjak keton manjadi tinduh barasih. 15:12 Parentahku iete: Keleh keton hasinta sama arep keton, sama kilau aku sinta keton. 15:13 Oloh je paling sinta dengan sobate, oloh te je manenga pambelome akan ewen. 15:14 Kare sobatku iete keton toh, amon keton malalus kare taloh je irentahku akan keton. 15:15 Aku dia hindai manyewut keton rewar karana rewar jaton katawan taloh je iawi tempoe. Aku mantehau keton sobat, karana taloh handiai je ihiningku bara Bapa, jari insanangku akan keton. 15:16 Dia ie keton je mintih aku. Aku toh je mintih keton, tuntang manyoho keton haguet mangat mamua are -- iete kare bua je dia tau binasa. Maka Bapa kareh manenga akan keton en bewei je ilaku keton dengae huang arangku. 15:17 Jetoh ie parentahku akan keton: Keleh keton hasinta sama arep keton." 15:18 "Amon kalunen basingi keton, ingat je aku toh jari labih helo inyingi awi kalunen. 15:19 Jaka ih keton toh ain kalunen, keton kareh inyinta awi kalunen kilau oloh ayue. Tapi aku jari mintih keton bara kalunen toh, jadi keton dia hindai ain kalunen. Jete sababe kalunen basingi dengan keton. 15:20 Ingat taloh je jari insanangku akan keton, 'Rewar dia labih hai bara tempoe.' Amon ewen jari mangapehe aku, ewen kareh mangapehe keton kea. Amon ewen manumon auh ajarku, ewen kareh manumon auh ajar keton kea. 15:21 Taloh handiai te kareh iawi ewen akan keton, awi keton muridku, awi ewen dia mangasene ie je manyoho aku. 15:22 Jaka aku dia dumah tuntang jaton mansanan taloh handiai te akan ewen, ewen dia badosa. Tapi toh ewen jaton alasan hindai akan dosan ewen. 15:23 Oloh je basingi aku, basingi bapaku. 15:24 Jakae hong bentok ewen aku dia malalus kare taloh je hindai puji ilalus awi oloh beken, ewen dia badosa. Tapi toh ewen jari mite taloh je ilalusku, tuntang ewen basingi dengangku kalote kea dengan Bapaku. 15:25 Tapi puna musti manjadi kilau te mangat manjadi taloh je tarasurat huang Surat Hukum ewen, iete: 'Ewen basingi aku jaton bara buku sababe.' 15:26 Aku kareh manyoho manalih keton, Pandohop je asale bara Bapa, iete Roh je kareh mamparahan katoto tahiu Hatalla. Amon ie dumah, ie kareh manenga kasaksian tahiu aku. 15:27 Tuntang keton kea musti manenga kasaksian tahiu aku, awi keton jari hinje aku bara solake.
16:1 Kare taloh handiai te insanangku akan keton mangat keton dia layau. 16:2 Keton kareh impalua oloh bara kare huma sombayang. Tuntang katikae kareh dumah, oloh je mampatei keton manyangka arepe manempo Hatalla. 16:3 Ewen manguan taloh te mawi keton awi ewen hindai kasene Bapa tuntang aku kea. 16:4 Tapi aku toh mansanan jete akan keton, mangat amon jete kareh manjadi, keton tau mingat je aku toh jari mansanan jete akan keton." "Aku dia mansanan hal toh akan keton bara solake, awi aku magon aton hinje keton. 16:5 Tapi toh aku handak haguet manalih ie je manyoho aku; tuntang ije biti mahin jaton bara keton misek akan kueh aku haguet. 16:6 Toh atei keton manjadi pehe, awi aku mansanan hal te akan keton. 16:7 Tapi aku mansanan akan keton taloh je toto: labih bahalap akan keton amon aku haguet; basa amon aku dia haguet, pandohop te dia kareh dumah manalih keton. Tapi amon aku haguet, aku kareh manyoho ie manalih keton. 16:8 Amon ie dumah, ie kareh mamparahan akan kalunen narai riman dosa, tahiu taloh je toto, tuntang tahiu hukum Hatalla. 16:9 Ie kareh mamparahan amon oloh dia percaya dengangku jete dosa; 16:10 auhku toh toto, awi aku haguet manalih Bapa tuntang keton dia kareh mite aku tinai; 16:11 tuntang Hatalla jari nampara mahukum, basa panguasa kalunen jetoh jari buah hukum. 16:12 Magon are taloh je handak insanangku akan keton, tapi metoh toh keton hindai olih manarimae. 16:13 Tapi amon Roh te dumah, ie te je mamparahan katoto tahiu Hatalla, keton kareh ingagalan awie uka mangasene kakare katoto. Ie dia handak hakotak bara arepe kabuat tapi mansanan taloh je jari ihininge, tuntang ie kareh mansanan akan keton taloh je kareh manjadi rahian andau. 16:14 Ie kareh mampahai aku, basa taloh je inyampaie akan keton, inarimae bara aku. 16:15 Taloh handiai je aton intu Bapa jete ayungku. Jete bukue aku hamauh, taloh je inyampai Roh akan keton, inarimae bara aku." 16:16 "Baya hanjulo keton dia akan mite aku tinai, tuntang hanjulo tinai keton akan mite aku." 16:17 Pire-pire murid Yesus nampara hisek sama arepe, "En Koae je hamauh dengan itah: 'Baya hanjulo hindai keton dia tinai mite aku, tuntang tinai hanjulo hindai keton akan mite aku'? En je koae dengan itah: 'Aku haguet manalih Bapa'?" 16:18 Ewen bajuju misek, "Narai rimae je 'hanjulo' te? Itah dia haratie ie hakotak tahiu en!" 16:19 Yesus katawan ewen handak misek dengae. Maka ie hamauh, "Endau koangku, 'Baya hanjulo hindai, keton kareh dia mite aku, tuntang kea hanjulo tinai keton kareh mite aku'. En jete je iisek keton sama arep keton? 16:20 Percaya ih, keton kareh manangis tuntang manatum, tapi kalunen kareh hanjak. Keton kareh kapehe atei, tapi kasusah keton te kareh hobah manjadi kahanjak. 16:21 Amon ije biti oloh bawi handak luas, ie susah, awi katikae jari sampai ie buah kapehe. Tapi sana anake inakan oloh bawi te kalapean kapehee awi ie hanjak tagal ije biti awau inakan akan kalunen. 16:22 Kalote kea dengan keton: Toh keton kapehe atei, tapi aku kareh hasondau tinai dengan keton, maka atei keton kareh hanjak; tuntang ije biti mahin jaton oloh je tau manduan kahanjak te bara atei keton. 16:23 Hong andau te, keton dia akan misek taloh en-en hindai dengangku. Percaya ih: en bewei taloh je ilaku keton dengan Bapa huang arangku, jete kareh inenga Bapa akan keton. 16:24 Sampai katika toh keton hindai balaku taloh en-en huang arangku. Laku, maka keton akan manarimae, mangat kahanjak keton tinduh barasih." 16:25 "Taloh handiai toh insanangku akan keton hapan paribasa. Tapi kareh dumah katikae, aku dia mahapan paribasa hindai, tapi hakotak terus-tarang akan keton tahiu Bapa. 16:26 Hong katika te keton kareh balaku dengan Bapa huang arangku; keleh keton katawan, aku kareh dia balaku bara Bapa akan keton, 16:27 awi Bapa kabuat sinta keton. Ie sinta keton awi keton sinta aku tuntang percaya je aku toh dumah bara Hatalla. 16:28 Asalku puna bara Bapa, tuntang jari dumah akan kalunen. Tapi toh aku malihi kalunen mangat haluli manalih Bapa." 16:29 Palus kare murid Yesus hamauh dengae, "Toh Tuhan hakotak terus-tarang tuntang dia mahapan paribasa, 16:30 tuntang ikei katawan je Tuhan mangatawan taloh handiai. Ije biti mahin dia usah oloh misek taloh en-en dengan Tuhan. Tagal te ikei percaya Tuhan dumah bara Hatalla." 16:31 Yesus tombah auh ewen, "Jadi percayakah keton toh? 16:32 Ingat! Katikae kareh dumah, malah jari dumah, keton kareh manjadi kasaburan. Keton kareh buli mije-mije manalih human keton tuntang malihi aku kabuat. Tapi aku dia kabuat basa Bapa aton hinje aku. 16:33 Taloh handiai toh insanangku mangat keton mandino kahanjak awi keton hinje dengangku. Hong kalunen keton kareh buah kapehe. Tapi keleh keton tabah! Aku jari mampakalah kalunen!"
17:1 Limbah hamauh kalote, Yesus mananggera akan langit tuntang hamauh, "Bapa, toh jari sampai katikae. Keleh mampahai Anakm, mangat Anakm kea mampahai Bapae. 17:2 Bapa jari manenga kuasa akan Anak mahunjun kakare oloh hapus kalunen, mangat ie manenga pambelom je bujur tuntang katatahie akan kare oloh je inenga Bapa akae. 17:3 Jetoh pambelom je bujur tuntang katatahie; uka oloh je mangasene Bapa je tunggal tuntang toto, tuntang mangasene Yesus Kristus je inyoho Bapa. 17:4 Aku jari mampahai Bapa hunjun petak toh awiku mahapus gawi je inyoho Bapa aku mawie. 17:5 Bapa! keleh toh mampahai aku intu taharepm mahapan kahai je aton intu aku metoh aku hinje dengan Bapa helo bara kalunen toh injadian. 17:6 Aku jari mamparahan Bapa akan kare oloh hong kalunen toh kilau je jari inenga bapa akangku. Ewen toh ain Bapa, tuntang Bapa jari manenga ewen te akangku. Ewen jari manumon auh Bapa. 17:7 Toh ewen katawan, taloh handiai je inenga Bapa akangku jete asale bara Bapa. 17:8 Akan ewen jari inyampaiku auh je inenga Bapa akangku; tuntang ewen jari manarimae. Ewen katawan je aku toh puna toto-toto dumah bara Bapa tuntang ewen percaya Bapa bewei je manyoho aku. 17:9 Aku balakudoa akan ewen. Aku dia balakudoa akan kalunen tapi akan kare oloh je jari inenga Bapa akangku, basa ewen te ain Bapa. 17:10 Kare taloh je ayungku jete ayun Bapa kea; tuntang taloh handiai je ayun Bapa jete ayungku kea. Aku impahai hong marak ewen. 17:11 Toh aku dumah manalih Bapa. Aku dia tinai melai hong kalunen; tapi ewen aton hong kalunen. Bapa je barasih! Jaga ewen hapan kuasan Aram, iete Aran je jari inenga Bapa akangku -- mangat ewen manjadi ije, sama kilau Bapa tuntang aku kea ije. 17:12 Katahin aku magon hinje ewen, aku jari manjaga ewen hapan kuasan aran Bapa -- aran je jari inenga Bapa akangku. Aku jari manjaga ewen tuntang ije biti mahin jaton bara ewen je nihau, beken bara ie je puna jari musti nihau; uka tagal jete maka manjadi taloh je tarasurat huang Surat Barasih. 17:13 Toh aku dumah manalih Bapa. Taloh handiai toh insanangku pandehan aku magon huang kalunen; uka ewen hapan sakalepahe mangkeme kahanjakku. 17:14 Aku jari manyampai akan ewen auh Bapa, tuntang kalunen basingi dengan ewen, awi ewen dia ain kalunen, sama kilau aku kea dia ain kalunen. 17:15 Aku dia balaku uka Bapa manduan ewen bara kalunen toh, tapi aku balaku uka Bapa manjaga ewen bara taloh je papa. 17:16 Sama kilau aku dia ain kalunen, ewen mahin dia ain kalunen. 17:17 Keleh ewen manjadi ain Bapa kabuat mahalau katoto: auh Bapa jete katoto. 17:18 Kilau Bapa jari manyoho aku akan kalunen, kalote kea aku manyoho ewen akan kalunen. 17:19 Akan gunan ewen, aku manyarah arepku kilau je ain Bapa kabuat, mangat ewen kea manjadi ain Bapa mahalau katoto. 17:20 Dia baya akan ewen toh bewei aku balakudoa. Aku balakudoa kea akan kare oloh je kareh percaya dengangku tagal kasaksian ewen toh. 17:21 Aku balaku, Bapa, uka ewen samandiai manjadi ije, kilau Bapa ije dengangku, tuntang aku dengan Bapa. Keleh ewen manjadi ije dengan itah uka kalunen percaya je Bapa te je manyoho aku. 17:22 Aku jari manenga akan ewen kahai je inenga Bapa akangku, mangat ewen manjadi ije, sama kilau itah kea ije; 17:23 Aku dengan ewen, tuntang Bapa dengangku; mangat ewen toto-toto ije. Maka kalunen kareh katawan Bapa te je manyoho aku, tuntang mangatawan Bapa sinta ewen kilau Bapa sinta aku. 17:24 Bapa, aku handak uka ewen, je inenga Bapa akangku, aton hinje aku hong kueh aku aton, mangat ewen mite kahaingku; iete kahai je inenga Bapa akangku, awi Bapa sinta aku helo bara kalunen injadian. 17:25 Bapa je bujur! Kalunen dia mangasene Bapa, tapi aku mangasene Bapa; tuntang kare oloh toh katawan je Bapa manyoho aku. 17:26 Aku jari mamparahan aran Bapa akan ewen; tuntang aku kareh mawie tinai kalote, uka sintan Bapa dengangku tetep intu huang atei ewen tuntang aku hinje dengan ewen."
18:1 Limbah Yesus balakudoa kalote, ie dengan kare muride haguet akan dipah silan Sungei Kidron. Hong hete aton ije taman, tuntang Yesus dengan kare muride tame akan taman te. 18:2 Yudas je mandurhaka te, katawan eka te; awi Yesus jari kinjap hapumpong hete dengan kare muride. 18:3 Maka Yudas haguet akan eka te hayak mimbit ije pasukan tantara Roma tuntang pire-pire pangawal Human Tuhan je inyoho kare imam kapala tuntang kare oloh Parisi. Ewen mimbit sanjata, lantera tuntang sulok. 18:4 Yesus katawan taloh handiai je akan manjadi buah ie. Maka ie manokep kare oloh te tuntang misek, "Keton manggau eweh?" 18:5 "Yesus oloh Nasaret," koan ewen tombah. "Aku toh ie," koan Yesus. Yudas je mandurhaka mendeng intu hete dengan ewen. 18:6 Metoh Yesus hamauh dengan ewen, "Aku toh ie," ewen uras mundur palus balongkang. 18:7 Sinde tinai Yesus misek dengan ewen, "Keton manggau eweh?" "Yesus oloh Nasaret," koan ewen tombah. 18:8 "Jari insanangku aku toh ie," koan Yesus. "Tuntang amon puna aku je inggau keton, nauhe ewen awang beken toh haguet." 18:9 (Awie hamauh kalote, maka manjadi taloh je jari insanan Yesus helote: "Bapa, bara kare oloh je jari inenga Bapa akangku, ije biti mahin jaton je nihau.") 18:10 Simon Petrus je mimbit ije kabilap padang, manyilak padange palus manejep jipen imam hai sampai balumpeng pinding gantaue. Aran jipen te Malkus. 18:11 Maka Yesus hamauh dengan Petrus, "Namean haluli padangm akan huang ekae! En ikau manirok aku dia kareh mihop cangkir kajake je inenga Bapa akangku?" 18:12 Palus kare prajurit Roma dengan komandan ewen tuntang kare pangawal Yehudi manawan tuntang mamasong Yesus. 18:13 Sola-solake ewen mimbit Yesus manaharep Hanas, empo Kayapas je hatue. Kayapas te imam hai hong nyelo te. 18:14 Ie te je jari manasehat oloh Yehudi uka labih bahalap ije biti oloh matei akan salepah utus. 18:15 Simon Petrus tuntang ije biti murid beken manuntut Yesus. Murid je beken te kasenan awi imam hai; jadi ie omba tame haya-hayak dengan Yesus akan halaman human imam hai, 18:16 tapi Petrus mentai intu luar hong bauntonggang. Limbah te tinai murid je beken te haguet akan luar tuntang hakotak dengan jipen bawi je manjaga bauntonggang, palus mimbit Petrus tame akan huang. 18:17 Jipen bawi panjaga bauntonggang te hamauh dengan Petrus, "Hau, en ikau dia ije biti bara kare murid oloh te?" "Beken," koan Petrus tombah. 18:18 Hong katika te hawa sadingen, jadi kare jipen tuntang pangawal jari mambelom apui habarah tuntang ewen mandang intu hete. Petrus haguet akan hete tuntang mendeng hayak mandang dengan ewen. 18:19 Imam hai misek Yesus tahiu kare muride tuntang tahiu auh ajare. 18:20 Yesus tombah, "Aku harajur hakotak terus-tarang hong taharep oloh are. Aku harajur majar huang kare huma sombayang tuntang intu Human Hatalla, eka oloh Yehudi bahut hapumpong. Dia puji aku mansanan taloh en-en sahoka-hokan. 18:21 Jadi mbuhen Tuan misek aku? Isek ih dengan ewen je jari mahining aku majar. Pasti ewen katawan taloh je insanangku." 18:22 Metoh Yesus hakotak kalote, ije biti bara pangawal intu hete manampar ie tuntang hamauh, "Bahanyi toto ikau hamauh kalote dengan imam hai!" 18:23 Yesus tombah, "Amon aku mansanan taloh je sala, sanan hetoh narai kasalae! Tapi amon taloh je insanangku te puna toto, mbuhen ikau manampar aku?" 18:24 Limbah te tinai Hanas manyoho oloh mimbit Yesus marak lengee imasong akan Imam Hai Kayapas. 18:25 Simon Petrus magon kea mandang arepe intu hete. Kare oloh hamauh dengae, "En ikau dia murid oloh te kea?" Tapi Petrus milim, koae, "Beken!" 18:26 Ije biti oloh ain imam hai, iete jalahan oloh je balumpeng pindinge awi Petrus, hamauh, "En dia aku jari mite ikau hong taman te haya-hayak dengae?" 18:27 Palus Petrus milim tinai, "Dia," -- tuntang pas hong katika te manok manando. 18:28 Hayak hanjewu toto ewen mimbit Yesus bara human Kayapas akan istana gubernur. Kare oloh Yehudi kabuat dia tame akan huang istana, mangat ewen dia inyewut pali secara agama, awi ewen handak omba kuman panginan Paska. 18:29 Tagal te Pilatus haguet akan luar manalih ewen tuntang misek, "En auh kadun keton mawi oloh toh?" 18:30 Ewen tombah, "Jaka ie dia basala, dia baka ikei mimbit ie manalih Bapa Gubernur." 18:31 Pilatus hamauh dengan ewen, "Duan ih ie tuntang mutus ih perkarae manumon hukum ain keton kabuat!" Tapi kare oloh Yehudi te tombah, "Ikei dia tau mamutus oloh akan impatei!" 18:32 (Jetoh manjadi uka ilalus taloh je insanan Yesus tahiu carae ieakan matei.) 18:33 Pilatus tame tinai akan istana tuntang mantehau Yesus, palus misek, "En ikau toh rajan oloh Yehudi?" 18:34 Yesus tombah, "En paisek toh bara ikau kabuat atawa aton oloh beken je jari mansanan akam tahiu aku?" 18:35 Pilatus tombah, "En aku toh oloh Yehudi? Je manyarah ikau akangku iete utus ayum kabuat tuntang kare imam kapala. En taloh je jari iawim?" 18:36 Yesus hamauh, "Karajaan ayungku dia bara kalunen toh. Jaka karajaangku te bara kalunen toh, kare oloh ayungku kareh kalahi uka aku dia inyarah akan kare panguasa Yehudi. Tapi karajaangku puna dia bara kalunen toh!" 18:37 Maka Pilatus misek dengae, "Amon kalote, ikau toh raja?" Yesus tombah, "Ikau manyewut je aku toh raja. Aku inakan tuntang dumah akan kalunen akan ije kahimat, iete manenga kasaksian tahiu katoto. Oloh samandiai je bara katoto te mahining auhku." 18:38 Pilatus misek dengae, "Katoto te en rimae?" Palus Pilatus balua tinai bara istana tuntang hamauh dengan kare oloh Yehudi, "Ije mahin jaton aku sondau kasalan huang ie. 18:39 Tapi manumon hadat keton, aku harajur malapas ije biti oloh bara tahanan hong andau Pesta Paska. En keton handak mangat aku malapas rajan oloh Yehudi te akan keton?" 18:40 Ewen tombah dere-derep hayak mangkariak, "Dia, ela ie, tapi Barabas!" (Barabas te ije biti parampok.)
19:1 Limbah te tinai Pilatus tame palus manyoho oloh mahewes Yesus hapan cambuk. 19:2 Kare prajurit manampa ije makota bara duhin kare edan, palus mangkepae intu hunjun takolok Yesus. Limbah te ewen makaian ie hapan jubah je warnae kawo-kawo, 19:3 palus lulang luli dumah manalih ie tuntang hamauh, "Panjang umur rajan oloh Yehudi!" Limbah te ewen manampar ie. 19:4 Limbah te Pilatus balua sinde tinai tuntang hamauh dengan oloh are te, "Ite! Aku mimbit ie balua manalih keton, uka keton katawan je ije mahin jaton kasalan inyondauku huang ie." 19:5 Maka Yesus balua sambil mahapan makota duhi tuntang jubah kawo-kawo. Pilatus hamauh dengan ewen, "Ite oloh te." 19:6 Katika kare imam kapala tuntang kare pangawal te mite Yesus, ewen mangkariak, "Nyampalaki ie! Nyampalaki ie!" Pilatus hamauh dengan ewen, "Duan ie, nyampalaki ie awi keton kabuat ih, ije mahin jaton kasalan je sondauku intu ie." 19:7 Kare oloh Yehudi te tombah, "Manumon hukum ikei, ie musti ihukum matei awi ie mangaku arepe Anak Hatalla." 19:8 Katika Pilatus mahining ewen hamauh kalote, ie labih mikeh haream. 19:9 Maka ie tame haluli akan huang istana tuntang limbah Yesus iimbit tame, Pilatus misek dengae, "Ikau asalm bara kueh?" Tapi Yesus dia tombah. 19:10 Jadi Pilatus hamauh tinai, "Ikau dia handak hakotak dengangku. Keleh ikau katawan, aku aton kuasangku mambebas ikau, tuntang kuasa manyampalaki ikau!" 19:11 Yesus tombah, "Amon Hatalla dia manenga kuasa te akam, ikau samasinde jaton kuasam mahunjun aku. Tagal te oloh je manyarah aku akam, labih hai dosae bara ikau." 19:12 Katika Pilatus mahining jete, ie manggau jalan uka malapas Yesus. Tapi kare oloh Yehudi dere-derep mangkariak, "Amon tuan mempas ie, tuan dia hindai kawal Kaisar! Oloh je mangaku arepe raja, ie te musoh Kaisar!" 19:13 Katika Pilatus mahining kare auh te, ie mimbit Yesus akan luar palus mondok intu karusi pangadilan hong eka je bagare Laseh Batu. (Hong basa Ibrani arae te Gabata.) 19:14 Katika te jari tokep pukul duewalas bentok andau, jete andau helo bara Andau Pesta Paska. Pilatus hamauh dengan kare oloh te, "Jetoh rajan keton!" 19:15 Ewen dere-derep mangkariak, "Patei ie! Patei ie! Nyampalaki ie!" Pilatus misek, "En musti aku toh manyampalaki rajan keton?" Kare imam kapala tombah, "Tikas Kaisar kabuat ih rajan ikei!" 19:16 Maka Pilatus manyarah Yesus akan ewen uka inyampalaki. Ewen manduan Yesus, palus mimbit ie haguet. 19:17 Yesus balua hayak meton sampalakie kabuat akan eka je bagare "Eka Bangon Takolok". (Hong basa Ibrani inyewut Golgota). 19:18 Intu hete ie inyampalaki. Haya-hayak dengae aton due biti oloh beken je inyampalaki: ije biti hong sambile, ije tinai hila gantaue tuntang Yesus hong bentok. 19:19 Intu kayu sampalakin Yesus, Pilatus manyoho oloh mangkepan papan basurat: "Yesus bara Nasaret, Rajan oloh Yehudi". 19:20 Are oloh Yehudi mambasa surat te, awi eka Yesus inyampalaki te dia kejau bara lewu. Surat te huang basa Ibrani, Latin, tuntang Yunani. 19:21 Kare imam kapala hamauh dengan Pilatus, "Ela manyurat 'Rajan oloh Yehudi', tapi keleh manyurat 'Oloh toh hamauh, aku Rajan oloh Yehudi.' " 19:22 Tapi Pilatus tombah, "Taloh je inyuratku, tetep tarasurat." 19:23 Limbah kare prajurit te manyampalaki Yesus, ewen manduan pakaiae. Pakaian te imbagi epat: genep biti mandino ije bagian. Ewen manduan jubahe kea. Jubah te jaton bajahit -- baya inantang bara hunjun sampai kapenda. 19:24 Kare prajurit te hamauh sama arepe, "Ela itah manetek mambagi jubah toh. Keleh itah batenong mangat manukas eweh je tau mandinoe." Hal te manjadi uka tulus auh je tarasurat huang Surat Barasih, iete: "Ewen habagi pakaiangku, tuntang batenong akan jubahku." Tuntang kare prajurit te puna mawie kalote. 19:25 Hong tokep sampalakin Yesus mendeng indu Yesus, paharin indue je bawi, Maria sawan Kleopas, tuntang Maria Magdalena. 19:26 Katika Yesus mite indue tuntang murid je inyintae aton mendeng hete, ie hamauh dengan indue, "Ibu, te anakm." 19:27 Limbah te Yesus hamauh dengan kare muride te, "Te indu keton." Bara katika te kare murid te manarima indu Yesus uka melai intu humae. 19:28 Yesus katawan taloh samandiai toh jari lepah manjadi, tuntang uka taloh je tarasurat huang Surat Barasih tau manjadi, ie hamauh, "Aku teah belaiku." 19:29 Intu hete aton ije mangkok kontep inyuang hapan danum anggur je masem. Maka ije kambang karang inculop akan huang danum anggur te, tuntang inyucuk intu ije tantahan hisop, palus injuju akan biwih Yesus. 19:30 Yesus manyurup danum te palus hamauh, "Jari genep!" Palus ie manyontop takoloke balalu mahutos. 19:31 Kare panguasa Yehudi dia maku hantun kare oloh je inyampalaki te tetep melai intu kayu sampalaki hong andau Sabat, mahin haream Sabat sinde toh Andau Hai je patut ihaga barasih. Karana andau metoh Yesus inyampalaki buah andau helo bara Sabat te, maka kare oloh Yehudi balaku permisi dengan Pilatus uka mamelek kare pain oloh je jari inyampalaki tuntang mampamohon kare hantu te bara kayu sampalaki. 19:32 Maka kare prajurit te haguet tuntang mamelek labih helo pain due oloh je inyampalaki hayak Yesus. 19:33 Katika ewen sampai akan gilir ain Yesus, ewen mite ie jari mahutos. Jadi ewen dia mamelek paie. 19:34 Tapi ije biti bara kare prajurit te mamuno penda usok Yesus hapan lunju; tuntang hemben te kea balua daha tuntang danum. 19:35 Oloh je mite kabuat kajadian te, ie te je mansanan hal te mangat keton percaya. Tuntang kasaksiae te toto, tuntang ie katawan jete toto. 19:36 Hal te manjadi uka ilalus taloh je tarasurat huang Surat Barasih, iete, "Ije mahin jaton bara kare tolange kareh imelek." 19:37 Huang Surat Barasih kea tarasurat, "Ewen kareh manampayah ie je jari imuno ewen". 19:38 Limbah te tinai Yosep oloh Arimatea balaku permisi dengan Pilatus uka manduan hantun Yesus. (Yosep jete murid ain Yesus je omba ie suni-suni, awi ie mikeh dengan kare panguasa Yehudi.) Pilatus manenga ijin akae, maka ie haguet manduan hantun Yesus. 19:39 Nikodemus je bihin puji manalih Yesus metoh hamalem, haguet kea hayak Yosep. Nikodemus mimbit rarampah iete mur tuntang garo -- samandiai taloh je iimbite te aton kurang labih telo puluh kilogram karee. 19:40 Kadadue oloh te manduan hantun Yesus palus mambungkuse hapan benang haya-hayak dengan rarampah je harum te manumon hadat mangubur ain oloh Yehudi. 19:41 Intu eka Yesus inyampalaki aton ije taman. Intu huang taman te aton ije kubur taheta, je hindai puji hapan mangubur oloh. 19:42 Awi kubur te tokep, tuntang andau Sabat jari nampara, maka ewen mangubur Yesus intu hete.
20:1 Hong andau Minggo hanjewu, katika taloh magon kaput, Maria Magdalena haguet akan kubur. Ie mite batu tutup kubur te jari tatindar bara rumbak kubur te. 20:2 Maka ie hadari manggau Simon Petrus tuntang murid je inyinta Yesus, tuntang hamauh dengan ewen, "Tuhan jari induan bara kubur, tuntang aku dia katawan hong kueh oloh mingkes ie." 20:3 Palus Petrus tuntang murid beken te haguet akan kubur. 20:4 Ewen due te hadari, tapi murid je beken labih capat bara Petrus, tuntang ie helo sampai intu kubur. 20:5 Ie manangkilik akan huang kubur tuntang mite benang halelek intu hete, tapi ie dia tame. 20:6 Simon Petrus manuntut bara likut, palus balalu tame akan huang kubur te. Ie mite benang halelek intu hete, 20:7 tapi benang je imeteng intu takolok Yesus jaton tokep hete malengkan imbalon beken ekae. 20:8 Limbah te tinai murid je labih helo sampai akan kubur te, tame kea. Ie mitee tuntang percaya. 20:9 (Sampai hong katika te ewen hindai harati taloh je tarasurat huangSurat Barasih je ie misik bara pampatei.) 20:10 Limbah te kare murid Yesus te buli. 20:11 Maria Magdalena mendeng intu baun kubur sambil manangis. Sambil manangis ie manangkilik akan huang kubur. 20:12 Palus mite due malekat hapakaian baputi. Ewen te mondok intu awan eka hantun Yesus, ije biti intu hila takoloke, tuntang je beken tinai intu hila paie. 20:13 Kare malekat te misek, "Ibu, mbuhen ibu manangis?" Maria tombah, "Tuhangku jari induan, tuntang aku dia katawan hong kueh oloh mingkes ie." 20:14 Limbah hamauh kalote, ie tampaliau akan likut tuntang mite Yesus mendeng intu hete. Tapi ie dia katawan je ie te Yesus. 20:15 Yesus misek dengae, "Ibu mbuhen manangis, ibu manggau eweh?" Maria manyangka ie te tukang kabun, jadi ie hamauh, "Pa, amon bapa je mindah ie bara hetoh, dohop sanan akangku hong kueh bapa mingkes ie, mangat aku tau manduae." 20:16 Yesus hamauh mite "Maria!" Maria tampaliau dengan Yesus palus hamauh hong basa Ibrani, "Rabuni!" (Rimae "Guru".) 20:17 "Ela mimbing aku," koan Yesus dengae, "awi aku hindai manalih Bapa. Tapi haguet, talih kare paharingku, tuntang sanan akan ewen je aku toh mandai' manalih Bapaku tuntang Bapa keton, Hatallangku tuntang Hatallan keton." 20:18 Maka Maria haguet mansanan akan kare murid Yesus je ie jari mite Tuhan tuntang Tuhan jari mansanan taloh handiai te akae. 20:19 Hong andau Minggo te kea, katika jari hamalem, kare murid Yesus hapumpong hong ije huma dengan kare bauntonggang ingunci, awi ewen mikeh dengan kare panguasa Yehudi. Maka Yesus salenga dumah nantekas tuntang mendeng intu bentok ewen tuntang hamauh, "Salamat akan keton." 20:20 Limbah hamauh kalote, ie mamparahan akan ewen lengee tuntang penda usoke. Hong katika mite Tuhan, ewen hanjak toto. 20:21 Palus Yesus hamauh sinde tinai dengan ewen, "Salamat akan keton. Kilau Bapa manyoho aku, kalote aku manyoho keton." 20:22 Palus ie mahimon tahasenge akan ewen tuntang hamauh, "Tarima toh Roh Hatalla. 20:23 Amon keton mampun dosan oloh, maka Hatalla kea mampun jete. Amon keton dia mampun dosan oloh, Hatalla kea dia mampun jete." 20:24 Tomas (Je inyewut "Hatatup"), ije biti bara duewalas murid Yesus, jaton hinje ewen awang beken metoh Yesus dumah. 20:25 Maka kare murid je beken hamauh dengan Tomas, "Ikei jari mite Tuhan!" Tapi Tomas tombah, "Amon aku hindai mite awan paku intu lengee, hindai majok tunjokku akan huang kare awan himang awi paku te tuntang hindai mingkes lengengku intu penda usoke, samasinde aku dia maku percaya." 20:26 Ije minggo tinai limbah te kare murid Yesus aton tinai hong eka te, tuntang Tomas aton kea dumah. Uras kare bauntonggang ingunci. Tapi Yesus dumah tuntang mendeng intu bentok ewen, palus hamauh, "Salamat akan keton." 20:27 Limbah te tinai Yesus hamauh dengan Tomas, "Ite lengengku, tuntang ajok tunjokm akan hetoh. Julok lengem tuntang ingkes intu penda usokku. Ela bembang tinai, tapi keleh percaya ih!" 20:28 Tomas hamauh dengan Yesus, "Tuhangku tuntang Hatallangku!" 20:29 Maka Yesus hamauh dengae, "Ikau percaya awi ikau jari mite aku. Salamat oloh je percaya aloh ie dia mite aku!" 20:30 Magon are tinai kare taloh heran beken je iawi Yesus intu taharep kare muride, tapi jaton inyurat huang surat toh. 20:31 Tapi taloh samandiai toh inyurat, uka keton percaya je Yesus te Raja Panyalamat, anak Hatalla, tuntang awi percaya huang ie keton mandino pambelom.
21:1 Limbah te Yesus mamparahan arepe sinde tinai intu Danau Tiberias akan kare muride. Hal te manjadi kalotoh: 21:2 Sinde andau Simon Petrus, Tomas je inyewut "Hatatup", Natanael bara Kana hong Galilea, ewen te anak Sebedeus tuntang due murid Yesus je beken, metohe hapumpong. 21:3 Koan Simon Petrus dengan je beken, "Aku handak haguet malauk." "Ikei omba," koan ewen dengae. Maka ewen haguet hapan arut. Tapi ije alem te ewen jaton dinon taloh en-en. 21:4 Katika matanandau nampara lembut, Yesus mendeng intu saran pantai, tapi ewen dia katawan jete Yesus. 21:5 Yesus hamauh dengan ewen, "O anak oloh, en ain keton aton lauk?" "Jaton," koan ewen tombah. 21:6 Yesus hamauh dengan ewen, "Birik jalan keton akan hila gantaun arut, kareh keton tau dinon lauk." Palus ewen mambirik jala te, tapi dia olih manjijite awi paham kare lauk intu huange. 21:7 Murid je inyinta Yesus hamauh dengan Petrus, "Jete Tuhan!" Katika Simon Petrus mahining jete Tuhan, ie mangkepan bajue (awi ie dia habaju) palus sewu akan danum. 21:8 Kare murid je beken manuntut ie hapan arut akan hunjun petak, palus manjijit jala je kontep awi lauk. Ewen dia pire kakejaue bara saran, kurang labih saratus meter ih. 21:9 Katika ewen mohon bara arut, ewen mite aton barah apui intu hete dengan lauk intu hunjue tuntang rote. 21:10 Yesus hamauh dengan ewen, "Coba imbit akan hetoh belahe lauk je harun keton dinoe." 21:11 Simon Petrus lumpat akan arut, palus manjijit jalae akan hunjun petak. Jalae te kontep awi lauk je hai-hai, samandiaie aton saratus lime puluh telo kongan. Tapi aloh lauk kare te, jalan ewen dia barabit. 21:12 Yesus hamauh dengan ewen, "Ayo itah kuman." Jaton ije biti bara kare muride bahanyi misek, "Bapa toh eweh?" Basa ewen te katawan je ie te Tuhan. 21:13 Limbah te tinai Yesus manokep ewen, manduan rote te, tuntang manenga te akan ewen. Ie mawie kalote kea dengan lauk te. 21:14 Jete kali je kateloe Yesus mamparahan arepe akan kare muride limbah ie impisik bara pampatei. 21:15 Limbah ewen kuman, Yesus hamauh dengan Simon Petrus, "Simon anak Yona, en ikau sinta aku labih bara ewen toh sinta aku?" "Iyoh, Tuhan," koan Petrus, "Tuhan katawan aku sinta Tuhan." Yesus hamauh dengae, "Keleh ikau mahaga kare anak tabiringku." 21:16 Tingkat je kaduee tinai Yesus misek dengae, "Simon anak Yona, en ikau sinta aku?" "Iyoh, Tuhan," koan Petrus tombah, "Tuhan katawan aku sinta Tuhan." Yesus hamauh dengae, "Keleh ikau mahaga kare tabiringku." 21:17 Tingkat je kateloe tinai Yesus misek dengae, "Simon anak Yona, en ikau sinta aku?" Petrus manjadi kapehe ateie awi Yesus misek dengae sampai telo kali. Maka Petrus tombah tinai, "Tuhan, Tuhan katawan taloh handiai. Tuhan katawan aku sinta Tuhan!" Palus Yesus hamauh dengae, "Keleh ikau mahaga kare tabiringku. 21:18 Toto haliai auhku toh: Metoh ikau magon tabela, ikau kabuat mameteng kahangm, tuntang haguet akan kueh bewei ikau handak. Tapi kareh amon ikau jari bakas, ikau manjulok lengem, tuntang oloh beken je mameteng ikau tuntang mimbit ikau akan eka je ikau dia handak manalihe." 21:19 (Hapan kare auh te Yesus mansanan kilen ampie Petrus kareh akan matei uka Hatalla impahai.) Limbah te Yesus hamauh dengan Petrus, "Has omba aku!" 21:20 Metoh Petrus tampaliau, ie mite intu hila likute murid je inyinta Yesus. (Ie te je mondok tokep Yesus metoh kuman tuntang misek dengae, "Tuhan, eweh je akan mandurhaka mawi Tuhan?") 21:21 Sana mite ie, Petrus misek dengan Yesus, "Tuhan, kilen ampie tahiu ie toh?" 21:22 Yesus tombah, "Paribasa aku handak ie tetep belom sampai aku dumah, jete dia urusan ayum. Tapi ikau keleh omba aku!" 21:23 Maka baritae manjadi tayap hong marak kare murid Yesus je murid te dia akan matei. Padahal Yesus dia manyewut murid te dia akan matei, malengkan: "paribasa aku handak ie tetep belom sampai aku dumah, jete dia urusan ayum." 21:24 Yohanes je manenga kasaksian tahiu kare kajadian toh. Ie kea je jari manyurate, tuntang itah katawan taloh je insanae te puna toto. 21:25 Magon are hal beken tinai je ilalus awi Yesus. Paribasa taloh handiai te inyurat mije-mije, angatku dia sukup eka hong hapus kalunen toh uka manyuang kakare buku je handak inyurat te.
1:1 Teopilus je bahalap atei, Intu suratku je solake jari inarangku taloh handiai je ilalus tuntang iajar awi Yesus bara metoh ie nampara gawie, 1:2 sampai andau ie inggatang akan sorga. Hapan kuasan Roh Hatalla ie manenga kare nasehat akan kare rasul ayue je jari iintihe. 1:3 Limbah ie mentai katahin epat puluh andau ie kinjap mamparahan arepe mahapan cara je batantu haliai akan kare rasul te je ie toto-toto belom. Ewen mite ie, tuntang ie hakotak dengan ewen tahiu kilen ampie Hatalla marentah kilau Raja. 1:4 Tuntang metoh ie hinje dengan ewen, ie manenga parentah toh akan ewen, "Ela haguet bara Yerusalem. Entai intu hete sampai Bapa manenga taloh je injanjie, iete taloh je jari insanangku akan keton bihin. 1:5 Basa Yohanes mampandoi hapan danum, tapi pire-pire andau tinai keton kareh impandoi hapan Roh Hatalla." 1:6 Katika kare rasul te hapumpong haya-hayak dengan Yesus, ewen misek dengae, "Tuhan, en metoh toh kea Tuhan handak mampendeng haluli Pamarentahan utus Israel?" 1:7 Yesus tombah, "Bapaku kabuat je manukas andau tuntang katikae. Jete dia usah keton katawae, awi jete hak Bapa. 1:8 Tapi keton kareh mandino kuasa, amon Roh Hatalla jari dumah manalih keton. Tuntang keton kareh manjadi saksi akangku hong Yerusalem, intu hapus daerah Yudea, intu Samaria, tuntang sampai tapakan kalunen." 1:9 Limbah Yesus hamauh kalote, ie hagatang akan sorga intu baun matan ewen, tuntang baunandau manutup ie bara tampayah ewen. 1:10 Pandehan ewen magon mananggera akan langit, katika Yesus hagatang, salenga aton due biti oloh hapakaian baputi mendeng hila silan ewen. 1:11 "O, kare oloh Galilea," koan kadadue oloh te, "mbuhen keton mendeng ih intu hikau mananggera akan langit? Yesus, je gitan keton hagatang akan sorga te intu taharep keton, kareh haluli tinai kilau te kea sama kilau je gitan keton nah." 1:12 Rahian tinai kare rasul te haluli akan Yerusalem bara Bukit Batang Undus. Eka bukit te aton kurang labih ije kilometer kakejaue bara Yerusalem. 1:13 Intu Yerusalem ewen haguet akan huma eka ewen manyandehan, palus mandai' akan kamar je hila hunjun. Kare rasul te iete Petrus tuntang Yohanes, Yakobus tuntang Andreas, Pilippus tuntang Tomas, Bartolomeus tuntang Mateus, Yakobus anak Alpeus, Simon Ije Menteng tuntang Yudas anak Yakobus; 1:14 ewen samandiai harajur hinje ateie hapumpong balakudoa. Ewen balakudoa haya-hayak dengan kare oloh bawi kilau Maria indu Yesus, tuntang dengan kare paharin Yesus. 1:15 Hong sinde andau, katika ewen metoh hapumpong -- aton kurang labih saratus due puluh biti oloh je dumah -- Petrus mendeng handak hakotak. Ie hamauh, 1:16 "O kare pahari! Taloh je tarasurat huang Surat Barasih, jete musti manjadi. Horan mahalau Dawid, Roh Hatalla jari manujum tahiu Yudas, pamimpin kare oloh je manawan Yesus te. 1:17 Yudas te aton ije biti bara itah, tuntang ie jari iintih kea uka omba bagawi haya-hayak dengan itah." 1:18 (Yudas toh jari mandino petak akan kubure bara upah kadurhakaeje papa. Ie manjato tuntang matei, kanaie babindai sampai taloh je huang kanaie balua lepah. 1:19 Kare oloh je melai hong Yerusalem uras katawan tahiu hal te. Jete sababe huang basan ewen, ewen manyewut petak te Akeldama, je rimae 'Petak Daha'.) 1:20 "Karana huang Surat Mazmur aton tarasurat kalotoh, 'Keleh ekae melai te manjadi suni benyem; ije mahin ela aton oloh melai huange.' Aton kea tarasurat kalotoh, 'Keleh ekae mondok te induan awi oloh beken.' 1:21-22 Tagal te, musti aton ije biti oloh je puji omba itah manjadi saksi tahiu Tuhan Yesus je jari belom haluli bara pampatei. Oloh te musti aton ije biti bara kare oloh je harajur haya-hayak dengan itah katahin itah omba Yesus akan hete-hete, bara metoh Yohanes nampara mampandoi sampai katika Yesus mandai' akan sorga bara bentok itah." 1:23 Maka kare oloh je dumah intu hete mausul due biti, iete Yosep je inyewut kea Barsabas (ie inyewut Yustus kea), tuntang Matias. 1:24-25 Palus ewen balakudoa. Ewen hamauh, "Tuhan, ikau katawan atei oloh samandiai. Yudas jari manjato bara pangkate kilau rasul tuntang jari matei. Jadi keleh mamparahan akan ikei eweh bara due biti oloh toh je iintih Tuhan uka akae inenga gawi te mangganti Yudas." 1:26 Limbah te kadadue aran oloh te inenong, maka tenong te manjato akan Matias. Jadi ie iangkat manjadi rasul omba haya-hayak dengan sawalas rasul je beken te.
2:1 Katika andau Pentakosta jari sampai, maka kakare oloh percaya hapumpong hong ije eka. 2:2 Salenga tarahining auh bara langit kilau riwut manampur paham. Huma eka kare oloh te mondok uras kontep awi auh te. 2:3 Palus ewen mite kare jela kilau apui hanyala malayap akan hete-hete tuntang tingkep intu genep bitin ewen. 2:4 Ewen uras inguasa awi Roh Hatalla, tuntang nampara hakotak mahapan kare macam basa beken. Ewen hakotak manumon taloh je insanan Roh te akan ewen uka ewen mangotake. 2:5 Hong katika te are oloh Yehudi, bara kare tanah hong hapus kalunen, melai hong Yerusalem. Ewen te kare oloh je toto-toto mamenda Hatalla. 2:6 Katika auh te tarahining, are toto oloh dumah mangarimponge. Ewen uras tarewen mahining kare oloh percaya te hakotak hong basan ewen kabuat. 2:7 Marak angat ewen hengan tuntang mangkeme mangat, ewen hamauh, "En dia kare oloh je hakotak toh uras oloh Galilea? 2:8 Kilen ampie tau manjadi sampai itah mahining ewen hakotak mahapan basa bara lewun itah kabuat-kabuat? 2:9 Itah toh bara Partia, Media, Elam; bara Mesopotamia, Yudea tuntang Kapadokia; bara Pontus tuntang Asia, 2:10 bara Prigia tuntang Pampilia, bara Misir tuntang kare daerah Libia tokep Kirene; aton bara itah je dumah bara Roma, 2:11 aton kare oloh Yehudi tuntang aton kea kare oloh utus beken je jari tame agama Yehudi; aton kea je dumah bara Kreta tuntang Arab. Itah uras mahining ewen hakotak huang basan itah kabuat-kabuat tahiu kare taloh heran je ilalus Hatalla!" 2:12 Sambil hengan tuntang mangkeme bakarinah, ewen samandiai hisek sama arepe, "En riman taloh toh?" 2:13 Tapi aton kea oloh je hababaka. Ewen hamauh, "Ceh, kare oloh te baya babusau ih!" 2:14 Palus Petrus mendeng haya-hayak dengan sawalas rasul je beken, limbah te ie hakotak dengan oloh are te. Hapan auh je hai, ie hamauh, "O kare pahari, kare oloh Yehudi tuntang oloh samandiai je melai hong Yerusalem! Hining toh bua-buah, awi hal toh perlu aku manarange akan keton. 2:15 Kare oloh toh dia oloh babusau, kilau je inyangka keton; basa toh harue pukul jalatien hanjewu. 2:16 Tapi hal toh jari insanan awi Hatalla mahalau nabi Yoel: 2:17 Hatalla hamauh, 'Hong lawin jaman aku kareh manusoh Rohku akan oloh samandiai. Kare anak keton je hatue tuntang kare anak keton je bawi kareh mansanan akan keton kare taloh je insanangku akan ewen. Kare anak tabela ain keton kareh mite kare taloh je imparahangku akan ewen. Kare oloh bakas keton kareh nupi tahiu nupi je insanangku akan ewen. 2:18 Akan kare jipengku kea -- aloh hatue atawa bawi --, handak inusohku Rohku hong kare andau te. Ewen kareh mansanan kare taloh je insanangku akan ewen. 2:19 Aku kareh mawi kare taloh heran hong ngambo intu langit, tuntang kare taloh je dia puji bahut intu ngiwa hunjun petak toh; kareh aton daha tuntang apui, paus tuntang asep. 2:20 Matanandau kareh manjadi kaput, bulan manjadi bahandang kilau daha helo bara andau ain Tuhan, andau je hai tuntang barasih te dumah. 2:21 Hong katika te, oloh je mantehau Tuhan akan inyalamat.' 2:22 Kare paharingku oloh Israel samandiai! Hining toh taloh je insanangku toh: Yesus oloh Nasaret te jari inenga tugas awi Hatalla akan pahari. Jete gitan batantu toto huang kare taloh heran tuntang kare taloh je dia puji bahut ilalus awi Hatalla hong marak keton mahalau Yesus te. Pahari handiai jari katawan taloh samandiai te. 2:23 Hasaroroi dengan rencana ayue kabuat, Hatalla mamutus uka manyarah Yesus akan keton. Tuntang katika ie inyarah, keton mampatei ie awi keton manalua kare oloh papa manyampalaki ie. 2:24 Tapi Hatalla mambelom ie tinai bara marak kare oloh matei. Ie inelen awi pampatei, tapi Hatalla malapas ie, basa dia baka olih ie harajur inguasa awi pampatei. 2:25 Tahiu Yesus toh Dawid puji hamauh, 'Aku mite Tuhan harajur intu hila baungku; ie mampahayak aku mangat aku dia iongge awi taloh en-en. 2:26 Tagal te ateiku hanjak rantang, nyamangku manyewut kare auh tara: tuntang bitingku akan mentai dengan damai intu huang kubur. 2:27 Basa ikau dia manalua hambaruangku melai huang lewu liau. Ikau dia manalua rewarm je beken je baketep te lenyoh tuntang lepah. 2:28 Ikau jari mamparahan akangku jalan je manintu pambelom je tinduh. Kahanjakku kontep huang aku karana ikau aton hinje dengangku.' 2:29 Pahari samandiai, aku balaku paramisi uka hakotak terus-tarang tahiu Dawid, bapa tato hiang itah te. Ie jari matei tuntang jari ingubur kea; kubur ayue te magon aton intu bentok itah sampai katika toh. 2:30 Hatalla jari hajanji dengan Dawid, hapan sumpah, iete, ije biti bara panakan ayue kareh iangkat awi Hatalla manjadi Raja. Awi Dawid katawan tahiu janji te tuntang awi ie ije biti nabi kea, 2:31 ie katawan kea taloh je kareh ilalus awi Hatalla. Jadi ie jari manujum iete Raja Panyalamat je injanji awi Hatalla, kareh belom haluli bara pampatei. Dawid hamauh, 'Ie dia inalua melai intu huang lewun kare oloh matei; bitie kareh dia manjadi lenyoh tuntang lepah.' 2:32 Yesus te je imbelom haluli bara pampatei awi Hatalla. Ikei handiai uras jari manyaksi kabuat hal te. 2:33 Ie inggatang akan eka je gantong tuntang inenga kuasa awi Hatalla, hayak manarima Roh Hatalla je jari injanji awi Bapa. Tuntang taloh handiai je ihining tuntang gitan keton metoh toh jete ie Roh te je inusohe akan ikei. 2:34 Dawid kabuat jaton mandai' akan sorga, tapi Dawid jari hamauh, 'Tuhan hamauh dengan Tuhangku: 2:35 Mondok ikau hila gantaungku, sampai aku mawi kare musohm mamenda ikau!' 2:36 Jete sababe kakare oloh Israel musti katawan toto-toto tahiu Yesus je inyampalaki keton te, Yesus te kea je jari injadian awi Hatalla manjadi Tuhan tuntang Raja Panyalamat!" 2:37 Katika kare oloh te mahining hal te, atei ewen paham inggerek. Palus ewen misek dengan Petrus tuntang kare rasul je beken te, "Pahari handiai, en je musti iawi ikei?" 2:38 Petrus tombah, "Keleh keton hobah bara kare dosan keton. Tuntang keleh genep bitin keton impandoi huang aran Yesus Kristus, mangat kare dosan keton iampun. Maka kare pahari kareh manarima panengan Roh Hatalla bara Hatalla. 2:39 Basa taloh je injanji awi Hatalla te aton akan keton tuntang akan panakan keton tuntang kea akan kare oloh je melai hong kare eka je kejau -- iete oloh samandiai je intehau awi Hatalla Tuhan itah uka dumah manalih ie." 2:40 Kalote ampie Petrus manarang akan ewen. Tuntang hapan are auh beken kea ie manenga tirok akan ewen uka ewen malapas arepe bara utus je papa toh je akan ihukum awi Hatalla. 2:41 Are oloh percaya dengan taloh je insanan awi Petrus, palus ewen impandoi. Maka jumlah oloh percaya hong andau te mandahang tinai dengan telo koyan biti. 2:42 Dengan kaketepe ewen bajar harajur dengan kare rasul tuntang harajur pumpong haya-hayak. Ewen kuman haya-hayak tuntang balakudoa haya-hayak. 2:43 Are toto taloh heran je ilalus awi kare rasul te sampai kare oloh jungun tuntang mikeh. 2:44 Kare oloh percaya te samandiai harajur hinje ateie tuntang kare taloh je ain ewen, ihapan ewen sama-sama. 2:45 Ewen manjual kare ramo tuntang panatau ewen palus mambagi duit huang marak arep ewen manumon ampin katapas genep bitie. 2:46 Genep andau ewen musti hapumpong huang Human Tuhan: tuntang kuman haya-hayak, dengan kahanjak tuntang karandah atei intu kare human ewen. 2:47 Ewen harajur manara Hatalla tuntang oloh samandiai rajin dengan ewen. Genep andau jumlah ewen te harajur mandahang awi Tuhan manenga akan ewen kare oloh je jari inyalamat.
3:1 Sinde andau Petrus dengan Yohanes haguet akan Human Tuhan pukul telo halemei, iete katika akan balakudoa. 3:2 Intu hete aton bauntonggang je inyewut "Bauntonggang Kahalap". Intu hete kea aton oloh hatue je lumpuh bara metoh inakan. Genep andau oloh te iimbit akan hete mangat ie manyadakah dengan kare oloh je tame akan Human Tuhan. 3:3 Katika oloh te mite Petrus tuntang Yohanes tame akan Human Tuhan, ie balaku sadakah dengan ewen. 3:4 Maka ewen mananture ie, limbah te Petrus hamauh, "Tampayah ikei!" 3:5 Palus oloh te manantuani ewen hayak maharap uka mandino taloh en-en bara ewen. 3:6 Tapi Petrus hamauh dengae, "Aku jaton baduit samasinde. Tapi taloh je aton huang aku jete je handak inengaku akam: Hapan kuasan Yesus Kristus oloh Nasaret te, keleh ikau mananjong!" 3:7 Palus Petrus mimbing lenge gantau ain oloh lumpuh te tuntang mandohop ie hingkat. Hemben te kea pain oloh te tuntang buku lalinge manjadi gancang. 3:8 Palus ie manangkajok mendeng, tuntang nampara mananjong akan kanih-kate. Limbah te tinai ie tame akan Human Tuhan haya-hayak dengan Petrus tuntang Yohanes, sambil mananjong tuntang manangkajok tuntang manara Hatalla. 3:9 Kakare oloh mite ie mananjong tuntang manara Hatalla. 3:10 Palus ewen mangatawan je ie te tukang sadakah je bahut mondok intu "Bauntonggang Kahalap" hong Human Tuhan. Ewen hengan toto tuntang jungun mite taloh je manjadi akae. 3:11 Oloh te palus manuntut Petrus tuntang Yohanes. Tuntang metoh ewen batelo sampai intu tambiran je inyewut "Tambiran Salomo", kakare oloh dumah mangarimpong ewen awi hengan. 3:12 Katika Petrus mite kare oloh te, ie hamauh dengan ewen, "O kare oloh Israel, mbuhen kare pahari hengan dengan hal toh? Mbuhen kare pahari manampayah ikei tarus? En kare pahari manyangka oloh toh tau mananjong awi aton kuasa huang ikei atawa awi ikei mamenda Hatalla? 3:13 Hatalla je inyembah awi Abraham, Isaak, Yakob, Hatallan tato-hiang itah, Hatalla te jari mampahai Reware, iete Yesus. Yesus te je inyarah kare pahari akan pihak panguasa, tuntang je ilawan awi kare pahari intu taharep Pilatus, katika Pilatus handak malapas ie. 3:14 Ie te barasih tuntang bahalap, tapi kare pahari malawan ie tuntang hajajuan uka Pilatus malapas ije biti oloh pamuno akan kare pahari. 3:15 Kare pahari mampatei ie, padahal ie te haream ije batang pambelom akan oloh samandiai. Tuntang Hatalla jari mambelom ie tinai bara pampatei. Ikei jari manyaksi kabuat hal te. 3:16 Kuasa bara aran Yesus te je mawi oloh lumpuh toh manjadi abas. Taloh je gitan tuntang inyaksi kare pahari toh, jari manjadi kapercaya huang arae. Basa awi percaya dengan Yesus maka oloh toh jari keleh haluli intu taharep kare pahari handiai. 3:17 Pahari samandiai! Toh aku katawan taloh je iawi kare pahari tuntang kare pamimpin pahari dengan Yesus, hal te jari iawi pahari awi pahari jaton katawan taloh je iawi pahari metoh te. 3:18 Tagal te maka manjadi kea taloh je jari insanan awi Hatalla horan mahalau kare nabi ayue, iete Raja Panyalamat je injanji te musti buah kapehe. 3:19 Tuntang tagal te kare pahari, keleh hobah bara kare dosan pahari tuntang haluli manalih Hatalla, mangat ie mampuas pahari bara kare dosan pahari. 3:20 Tuhan kareh dumah manalih pahari tuntang pahari kareh mangkeme karigas huang roh. Tuntang Tuhan kareh manyoho Yesus dumah manalih pahari, karana ie jari inantu awi Hatalla manjadi Raja Panyalamat akan pahari. 3:21 Ie musti melai huang sorga sampai Hatalla manjadian taloh handiai te taheta kilau je insanan awi Hatalla mahalau kare nabi ayue hong jaman horan. 3:22 Moses puji hamauh, 'Hatalla Tuhan keton kareh manyoho ije biti Nabi bara utus ain keton kabuat, manalih keton, kilau ie manyoho aku. Keton musti mahining taloh samandiai je insanan awi Nabi te akan keton. 3:23 Oloh je dia paduli taloh je insanan awi Nabi te, oloh te kareh inganan bara ungkup ain Hatalla tuntang imbinasa.' 3:24 Kare nabi je puji manyampai barita bara Hatalla, nampara bara nabi Samuel tuntang kare nabi je beken je dumah rahian, uras ewen te mambarita tahiu jaman jetoh. 3:25 Kare janji bara Hatalla je inyampai awi kare nabi aton akan kare pahari. Huang janji je inampa Hatalla dengan tato hiang pahari, Hatalla hamauh dengan Abraham kalotoh, 'Bara panakam aku kareh mamberkat kakare utus oloh hong kalunen.' Janji te akan pahari kea. 3:26 Jete bukue Hatalla mintih reware, palus manyoho ie dumah manalih kare pahari labih helo, mangat ie mamberkat pahari. Cara je ihapae mamberkat iete dengan manjadian kare pahari samandiai hobah bara cara belom pahari je papa."
4:1 Metoh Petrus tuntang Yohanes magon hakotak dengan kare oloh te, kare imam kapala tuntang kapala pangawal Human Tuhan hayak dengan kare oloh Saduki dumah manalih Petrus tuntang Yohanes. 4:2 Ewen balait awi Petrus tuntang Yohanes mansanan akan kare oloh, je Yesus te jari belom haluli bara pampatei. Tuntang jete mambukti je oloh matei kareh belom haluli. 4:3 Maka ewen manawan kadadue rasul te palus manamean ewen akan huang penjara. Tuntang awi andau jari hamalem, maka Petrus tuntang Yohanes inahan intu hete sampai andau jewue tinai. 4:4 Tapi kare oloh je jari mahining auh ajar kare rasul te, are je percaya. Maka jumlah ewen te mandahang sampai manjadi kurang labih lime koyan biti. 4:5 Andau jewue tinai kare tokoh Majelis Agama, kare pamimpin Yehudi tuntang kare guru agama hapumpong intu Yerusalem. 4:6 Ewen hasondau dengan Imam Hai Hanas, tuntang Kayapas, Yohanes, Aleksander, tuntang oloh handiai je bara baris imam hai te. 4:7 Petrus tuntang Yohanes iimbit manaharep ewen, palus ewen misek, "Kilen ampie carae keton mampakeleh oloh lumpuh te? Hapan kaabas en atawa hapan kuasa bara eweh keton malalus te?" 4:8 Petrus je inguasa awi Roh Hatalla, tombah, "O kare tuan pamimpin utus tuntang kare tuan anggota Majelis! 4:9 Andau toh ikei inyidang awi malalus gawi bahalap uka mandohop ije biti oloh lumpuh, tuntang awi kare tuan handak katawan kilen ampie oloh te impakeleh. 4:10 Nah, kare tuan handiai musti katawan tuntang hapus utus Israel mahin musti katawan je oloh toh mendeng hetoh metoh biti-berenge barigas intu taharep kare tuan, tagal kaabas tuntang kuasa bara Yesus Kristus oloh Nasaret te. Kare tuan jari manyampalaki Yesus te, tapi Hatalla jari mambelom ie haluli. 4:11 Yesus toh je imaksud awi ayat jetoh huang Surat Barasih, 'Batu je inganan awi kare keton tukang bangunan, jete manjadi batu je paling mambatang.' 4:12 Mahalau Yesus bewei oloh inyalamat. Basa hong hapus kalunen bara marak olon jaton ije biti je jari mandino kuasa bara Hatalla uka manyalamat itah." 4:13 Kare anggota sidang Pangadilan te hengan mite kamenteng Petrus tuntang Yohanes. Mahin hindai metoh ewen katawan je kadadue rasul te uras oloh biasa je jaton sakolae. Balalu ewen katawan kadadue rasul te iete kare oloh je omba Yesus. 4:14 Tapi ewen dia tau hamauh en-en, awi oloh je jari impakeleh te aton mendeng intu hete intu taharep ewen haya-hayak dengan Petrus tuntang Yohanes. 4:15 Maka ewen manyoho kadadue rasul te balua bara kamar sidang, limbah te ewen barunding. 4:16 Ewen hamauh, "En taloh je iawi itah akan kare oloh toh? Uras oloh je melai hong Yerusalem jari katawan tahiu taloh heran je dia puji helo toh, je ilalus awi ewen due. Itah dia olih malawan jete. 4:17 Tapi uka hal toh ela tayap sasar kejau hindai hong marak kare oloh, keleh itah mampingat ewen due hapan auh karas uka ewen samasinde dia tau tinai hakotak dengan eweh bewei hayak mahapan aran Yesus." 4:18 Maka ewen mantehau kadadue rasul te tame haluli tuntang mansanan akan ewen samasinde dia tau hindai manyewut atawa majar mahapan aran Yesus. 4:19 Tapi Petrus tuntang Yohanes tombah, "Keleh keton manirok kabuat en je buah intu taharep Hatalla: manumon parentah kare tuan atawa manumon parentah Hatalla. 4:20 Basa ikei dia tau tende hakotak tahiu taloh je gitan tuntang ihining ikei kabuat." 4:21 Kare anggota sidang te jaton dinon alasan en-en hapan ewen mahukum Petrus tuntang Yohanes. Jadi ewen mampingat kadadue rasul te, palus malapas kadadue ewen te, awi oloh handiai uras manara Hatalla tagal kajadian te. 4:22 Oloh je mangkeme karigas je baka hera-heran te jari epat puluh nyelo umure. 4:23 Limbah Petrus tuntang Yohanes ilapas, ewen haluli manalih kare kawal ewen tuntang manyarita taloh handiai je insanan awi kare imam kapala tuntang kare pamimpin Yehudi te akan ewen. 4:24 Limbah kare kawal ewen te mahining jete, ewen haya-hayak hinje ateie balakudoa akan Hatalla. Ewen hamauh, "Tuhan, ikau ih je manjadian langit tuntang petak tuntang tasik dengan kare taloh huange. 4:25 Hapan Rohm ikau puji hakotak dengan tato hiang ikei, Dawid, iete rewarm; ikau hamauh, 'Mbuhen kare oloh je dia mangasene Tuhan, balait; mbuhen kare utus oloh mawi rencana je dia baguna? 4:26 Kare raja hong kalunen tatap handak parang, tuntang kare pamimpin bulat ateie malawan Tuhan tuntang Raja Panyalamat.' 4:27 Basa Herodes tuntang Pontius Pilatus jari hapumpong dengan kare oloh je dia kasene Tuhan tuntang dengan kare oloh Israel intu lewu toh. Ewen hapumpong uka malawan Yesus Rewarm je baketep ateie te, je jari iangkatm manjadi Raja Panyalamat. 4:28 Ewen bulat ateie uka malalus kare taloh handiai, je jari inukas bara solake taloh te akan manjadi. Tuntang ikau manukas jete huang kuasa tuntang kahandak ayum kabuat. 4:29 Toh, Tuhan, tampayah kilen ampie ewen mampingat ikei. Tuntang soho ikei, kare jipem toh, mansanan barita aim te hayak jaton mikeh. 4:30 Tenga pandohop aim mangat oloh haban impakeleh tuntang kare taloh heran hayak kare taloh je dia puji helo manjadi mahalau kuasa tuntang kaabas huang aran Yesus, Reware je barasih te." 4:31 Limbah ewen jari hapus balakudoa, eka ewen hapumpong te hongge. Ewen samandiai inguasa awi Roh Hatalla, tuntang nampara hakotak huang kahanyie je toto tahiu barita bara Hatalla. 4:32 Kakare oloh je jari percaya te belom hinje ateie tuntang tirok ateie. Jaton ije biti bara ewen te je mitong kare ramoe kilau ayue kabuat. Kare taloh handiai je ain ewen, ewen mahapae sama-sama. 4:33 Hapan kuasa je hai, kare rasul te manenga kasaksian je Yesus te jari belom haluli. Maka Hatalla mamberkat ewen paham. 4:34 Tuntang ije biti mahin jaton bara ewen te je katapasan taloh en-en. Basa ewen je aton tempon petak atawa huma, jari manjual petake atawa humae te; balalu duit bara regan ramoe te imbit ewen 4:35 tuntang ewen manyarahe akan kare rasul. Limbah te duite imbagi akan genep biti je puna toto-toto tapas. 4:36-37 Kalote kea dengan Yosep. Ie kea jari manjual petak ayue, palus duit regan petak te imbite tuntang inyarahe akan kare rasul. Yosep toh ije biti oloh panakan Lewi bara Siprus; kare rasul manyewut ie kea Barnabas (je rimae Pamampong).
5:1 Tapi aton ije biti oloh hatue bagare Ananias. Ie dengan kabalie je bagare Sapira, jari kea manjual ije kalambar petak ain ewen. 5:2 Duit bara regan petak te belahe inyangkae akan arepe kabuat tuntang je beken tinai inyarahe akan kare rasul. Gawie kalote te ingatawan awi kabalie. 5:3 Maka Petrus hamauh dengae, "Ananias, mbuhen ikau manalua setan manguasa ateim, sampai ikau mananjaro Roh Hatalla, awim suni-suni manahan akan arepm kabuat je bagian bara duit regan kare petak te? 5:4 Petak te puna ayum helo bara ikau manjuale. Tuntang limbah petak te injual, duite magon ayum kea. Jadi mbuhen aton kahimat huang ateim uka mawi taloh kilau te? Ikau dia mananjaro olon tapi Hatalla!" 5:5 Sana Ananias mahining kare auh te, ie balihang palus matei. Kakare oloh je mahining tahiu kajadian te manjadi mikeh. 5:6 Maka kare oloh tabela dumah mambungkus hantun Ananias, palus mimbite akan luar uka mangubure. 5:7 Kurang labih telo jam limbah te kabalie tame. Ie dia katawan taloh je harue manjadi. 5:8 Petrus hamauh dengae, "Coba sanan akangku: En petak je injual keton due kabalim te, tikas kare toh ih regae?" "Toto, jete ih regae," koan sawan Ananias tombah. 5:9 Palus Petrus hamauh dengae, "Mbuhen ikau tuntang kabalim pakat uka maningkes Roh Tuhan? Hining toh! Kare oloh je mangubur kabalim jari haluli. Ewen akan mimbit ikau balua kea." 5:10 Hemben te kea sawan Ananias te balihang tuntang matei intu taharep Petrus. Tuntang metoh kare oloh tabela te tame, ewen sondau ie jari matei. Palus ewen mimbit hantue akan luar tuntang mangubur ie hila silan eka kabalie. 5:11 Maka uras kare oloh percaya te tuntang kare oloh je beken je mahining tahiu kajadian te, manjadi mikeh. 5:12 Tagal gawin kare rasul maka are taloh heran tuntang kare hal je luar biasa manjadi hong marak oloh are. Dengan bulat ateie oloh percaya te uras hapumpong intu Tambiran Salomo hong Human Tuhan. 5:13 Tuntang oloh luar jaton je bahanyi dumah hapumpong dengan kare oloh percaya te. Tapi kare oloh percaya te paham ihormat awi oloh are. 5:14 Tuntang sasar tahi sasar are oloh je percaya dengan Tuhan, aloh hatue kalote kea oloh bawi. 5:15 Kalote ampie taloh je manjadi, sampai kare oloh haban iingkes hunjun ekae batiroh atawa amak, palus iimbit akan jalan, uka ewen paling isut tau takana kangkalingen Petrus, amon Petrus mahalau intu hete. 5:16 Maka kare oloh dumah-dumaha bara kare lewu hakaliling Yerusalem. Ewen mimbit kare oloh haban tuntang je irasok awi roh papa. Tuntang kare oloh te samandiai impakeleh. 5:17 Kajariae imam hai tuntang kare oloh ayue iete kare oloh golongan Saduki nampara mawi tindakan awi kahirin atei ewen. 5:18 Kare rasul inawan, palus inamean akan huang penjara umum. 5:19 Tapi hamalem te, ije biti malekat Tuhan muap kare bauntonggang penjara palus mimbit kare rasul te balua. Malekat te hamauh dengan kare rasul te, 5:20 "Keleh keton haguet tuntang mendeng intu Human Tuhan tuntang sanan akan kare oloh tahiu pambelom je taheta toh." 5:21 Maka kare rasul te balalu manumon peteh malekat te. Hayak hanjewu ewen haguet akan Human Tuhan tuntang nampara majar intu hete. Pandehan te imam hai tuntang kare oloh ayue dumah, palus mawi sidang majelis dengan kare pamimpin Yehudi. Limbah te tinai ewen manyoho oloh haguet manduan kare rasul te bara penjara uka iimbit manaharep ewen. 5:22 Tapi katika kare oloh je inyoho te sampai intu penjara, ewen jaton sondau kare rasul intu hete. Jadi ewen haluli, palus mansanan hal te akan majelis. 5:23 "Katika ikei sampai hong penjara," koan ewen dengan majelis, "bauntonggang penjara te bakunci bua-buah, tuntang kare pagawaie metohe bajaga intu bauntonggang. Tapi katika ikei muap bauntonggang te, ije mahin jaton ikei sondau oloh intu huange." 5:24 Katika perwira pangawal Human Tuhan tuntang kare imam kapala mahining laporan te, ewen bingung tahiu kare rasul te tuntang mikeh dengan taloh je tau manjadi te. 5:25 Rahian tinai dumah ije biti oloh hatue mimbit barita kalotoh, "Hining toh! Kare oloh je inahan awi kare tuan hong penjara te, metoh toh ewen majar oloh are hong Human Tuhan!" 5:26 Maka perwira pangawal Human Tuhan te haya-hayak dengan kare pagawai ayue, haguet manduan kare rasul te haluli. Tapi dia mahapan kakaras, awi ewen mikeh dengan oloh are; ela-ela oloh are te kareh mamanting ewen hapan batu. 5:27 Kare rasul te iimbit tame manaharep majelis. Palus imam hai mariksa ewen. 5:28 Ie hamauh, "Ikei jari mangahana keton uka ela majar tahiu oloh te. Tapi toh tau keton mitee taloh je iawi keton! Keton manyiar auh ajar keton hong hapus Yerusalem, tuntang keton handak madawa ikei haream manyewut ikei toh je mawi sabab oloh te impatei." 5:29 Petrus tuntang kare rasul je beken tombah, "Ikei musti manumon kahandak Hatalla tuntang dia manumon kahandak olon. 5:30 Yesus, je inyampalaki keton te, jari imbelom haluli bara pampatei awi Hatallan tato hiang itah. 5:31 Tuntang Hatalla jari manenga akae eka mondok tuntang kuasa je gantong kilau pamimpin tuntang Panyalamat; uka utus Israel inenga katika mangat hobah bara kare dosae tuntang mandino ampun dosa. 5:32 Katika toh aton kare saksi tahiu taloh samandiai te -- ikei tuntang kea Roh Hatalla je inenga awi Hatalla akan kare oloh je manumon parentahe." 5:33 Katika kare anggota majelis agama mahining jete ewen balait toto sampai ewen pakat uka mampatei kare rasul te. 5:34 Tapi bara kare anggota majelis te aton ije biti oloh Parisi bagare Gamaliel. Ie te guru agama je paham ihormat awi oloh samandiai. Ie mendeng palus manyoho oloh mimbit kare rasul te balua hanjulo. 5:35 Limbah te ie hamauh dengan majelis agama te, "Pahari handiai kare oloh Israel! Keleh inirok bua-buah tahiu kare taloh je handak ilalus awi kare pahari dengan kare oloh toh. 5:36 Basa horan puji lembut Teudas, je manyewut arepe oloh hai, sampai kurang labih epat ratus biti oloh omba ie. Tapi ie impatei tuntang kare oloh ayue kasaburan, tuntang gawie te lilap. 5:37 Limbah te tinai, hong katika aton sensus, lembut tinai Yudas, oloh bara Galilea. Ganan pangaruh ayue, are kea oloh je omba ie. Tapi ie kea imuno, tuntang uras kare oloh ayue pisah darai. 5:38 Jadi dengan kajadian jetoh maka nasehat ayungku kalotoh: ela ih mawi taloh en-en taharep kare oloh toh, nalua ih ewen. Basa amon ajar tuntang gawin ewen toh bara olon, maka ajar toh tuntang gawin ewen te kareh lilap. 5:39 Tapi amon jete dumah bara Hatalla, maka kare pahari dia olih mampakalah ewen. Ela-ela kareh pahari malawan Hatalla haream." Nasehat Gamaliel te inarima awi Majelis. 5:40 Maka kare rasul te intehau, palus ihewes hapan cambuk, limbah te ingahana majar tinai tahiu Yesus. Tuntang harun ewen ilapas. 5:41 Kare rasul te malihi majelis agama dengan kahanjak basa Hatalla jari maanggap ewen patut uka mandino hinaan tagal Yesus. 5:42 Tuntang genep andau hong Human Tuhan tuntang intu kare human oloh, ewen harajur majar tuntang mambarita Barita Bahalap tahiu Yesus iete Raja Panyalamat je injanji te.
6:1 Kare murid Yesus sasar tahi sasar are. Hong katika te kare murid Yehudi je mahapan basa Yunani, mangkeme dia sanang dengan kare murid je asale asli Yehudi. Oloh Yehudi je mahapan basa Yunani te hamauh, "Kare oloh bawi balon ikei jaton dinon pambagian bara bantuan balanja genep andau je imbagi akan kare oloh." 6:2 Tagal te kaduewalas rasul te mamumpong kare oloh percaya tuntang hamauh dengan ewen, "Dia bahalap amon ikei tende mambarita auh Hatalla, awi ikei musti maurus kare soal panginan. 6:3 Jadi, keleh kare pahari mintih bara marak kare pahari uju biti oloh je basewut bahalap tuntang inguasa awi Roh Hatalla tuntang pintar-harati, je tau ikei manyohoe maurus kare soal toh; 6:4 basa ikei baya handak balakudoa tuntang mambarita auh Hatalla bewei." 6:5 Oloh handiai te pakat manarima auh bara kare rasul te. Palus ewen mintih Stepanus, ije biti oloh je percaya toto dengan Yesus tuntang inguasa awi Roh Hatalla. Taintih kea: Pilippus, Prokhorus, Nikanor, Timon, Parmenas tuntang Nikolaus bara Antiokhia; ie dia oloh Yehudi, tapi ie jari tame agama Yehudi. 6:6 Kauju oloh te iusul awi kare rasul, palus kare rasul te balakudoa tuntang balaku berkat Tuhan akan ewen. 6:7 Maka kalote barita bara Hatalla tayap tuntang kare murid Yesus hong Yerusalem kea sasar mandahang karee. Tuntang are hindai kare imam je percaya dengan Yesus. 6:8 Stepanus paham imberkat awi Hatalla, sampai ie mawi are taloh heran tuntang kare taloh je dia puji helo hong marak kare oloh. 6:9 Tapi aton kare oloh je malawan ie; ewen te kare anggota huma sombayang je inyewut Huma Sombayang Kare Oloh Mardeka. Kare anggota huma sombayang te iete kare oloh Yehudi bara Kirene tuntang Aleksandria. Ewen dengan kare oloh Yehudi bara Kilikia tuntang Asia hatakian auh dengan Stepanus. 6:10 Tapi ewen dia olih manangkis kare taloh je inyewut awi Stepanus, awi Roh Hatalla jari manenga akae kapintar-kaharati hapae hakotak. 6:11 Tagal te ewen manyogok pire-pire oloh uka ewen hamauh, "Ikei mahining oloh te mahina Moses tuntang Hatalla!" 6:12 Maka kalote ewen manantiring kare oloh tuntang kare pamimpin Yehudi, tuntang kare guru agama. Balalu ewen haguet manawan Stepanus, palus ewen mimbit ie manaharep Majelis Agama. 6:13 Tuntang ewen mimbit kea kare saksi je manenga kare katarangan je dia toto tahiu Stepanus. Kare saksi te hamauh, "Oloh toh harajur mahina Human Tuhan je barasih tuntang mahina kare parentah Hatalla je inyampai awi Moses. 6:14 Ikei jari mahining ie hamauh, je Yesus bara Nasaret te akan manduroh Human Tuhan, palus mobah kare hadat je inuron Moses akan itah!" 6:15 Kakare oloh je dumah huang sidang majelis agama te mananture Stepanus. Tuntang hong katika te baun Stepanus gitan kilau baun malekat.
7:1 Imam hai misek dengan Stepanus, "En kare taloh handiai je insanan awi kare oloh te toto?" 7:2 Stepanus tombah, "Kare pahari handiai tuntang kare bapa-bapa! Toh keleh hining auhku! Helo bara tato hiang itah Abraham pindah akan Haran hong katika te magon melai intu Mesopotamia, Hatalla je hai te dumah manalih ie 7:3 tuntang hamauh, 'Keleh ikau malihi lewum tuntang kare tundah-paharim. Keleh haguet akan lewu je kareh inunjokku akam.' 7:4 Maka Abraham haguet malihi lewu Kasdim, palus pindah akan Haran. Limbah bapa Abraham matei, Hatalla manyoho Abraham pindah akan daerah toh je eka kare pahari tuntang kare bapa melai wayah toh. 7:5 Hong katika te isut mahin jaton bara daerah toh je jari inenga Hatalla akan Abraham uka ie tau mawarise; kalombah lokap mahin jaton jari inenga akae. Tapi Hatalla hajanji ie kareh manenga jete akan Abraham uka Abraham tuntang panakan ayue tau mawaris jete. Metoh te Abraham jaton dinon anak. 7:6 Tapi kalotoh Hatalla jari hamauh dengae, 'Panakam kareh melai kilau oloh tamuei hong lewun oloh beken. Kare oloh hong daerah te manjajah ewen tuntang tulas toto dengan ewen sampai epat ratus nyelo katahie. 7:7 Tapi aku kareh mahukum utus oloh je mawi ewen kilau jipen,' koan Hatalla, 'tuntang ewen kareh balua bara lewu te tuntang akan manyembah aku hong daerah jetoh.' 7:8 Limbah hamauh kalote peteng janji te indehen awi Hatalla hapan gawin sunat. Maka limbah Isaak, anak Abraham te inakan, Abraham manyunat ie metoh umure hanya andau. Limbah te Isaak manyunat kea anake, iete Yakob. Tuntang Yakob tinai manyunat kea due walas kare anake, iete je manjadi kare tato hiang utus oloh Yehudi. 7:9 Kare tato hiang itah te bahiri dengan Yosep, sampai ewen manjual ie manjadi jipen intu Misir. Tapi Hatalla mampahayak ie, 7:10 tuntang malapas ie bara kare kasusahe. Hatalla manenga akae kapintar tuntang kaharati katika ie manaharep Parao raja Misir, sampai Parao mangkat ie manjadi Gubernur daerah Misir tuntang kapala istana Parao. 7:11 Limbah te dumah wayah lau je hai hong hapus tanah Misir tuntang Kanaan sampai oloh susah toto. Tato hiang itah jaton olih mandino panginan. 7:12 Maka katika Yakob mahining intu Misir aton gandum, ie manyoho kare anake, iete tato hiang itah, manalih hete. Jete pangkasolake ewen akan hete. 7:13 Katika ewen haguet akan tingkat je kaduee, Yosep mansanan akan kare paharie je ie te Yosep. Katika te harue raja Misir katawan keluarga Yosep. 7:14 Limbah te tinai Yosep mampait kabar akan bapae, iete Yakob, balaku dengae uka ie dengan kare keluargae samandiai pindah akan Misir -- kare ewen te samandiai aton uju puluh lime biti. 7:15 Maka Yakob pindah akan Misir tuntang intu hete ie dengan tato hiang itah melai. 7:16 Rahian tinai hantun ewen iimbit akan Sikhem tuntang ingubur hong kuburan je jari imili hapan kare duit awi Abraham bara oloh Hemor intu Sikhem. 7:17 Katika jari tokep wayahe janjin Hatalla akan Abraham te tulus, utus itah hong Misir jari sasar are. 7:18 Kajariae ije biti raja beken je dia mangasene Yosep, marentah hong Misir. 7:19 Raja te hapakoae ih dengan utus itah tuntang tulas dengan tato hiang itah. Ie mamaksa ewen manganan kare anak awau ewen je harue inakan uka inalua tuntang matei. 7:20 Intu wayah te Moses inakan; iete anak awau je bakena toto. Telo bulan katahie ie ihaga intu human bapae, 7:21 tuntang limbah te ie inganan. Putri ain Raja Parao manduan ie, palus mahaga ie kilau anak ayue kabuat. 7:22 Kakare macam ilmu utus oloh Misir iajar akae tuntang ie manjadi oloh je bara kuasa huang kotak tuntang gawie. 7:23 Katika umur Moses epat puluh nyelo maka lembut tirok huang ateie uka haguet mite ampin utus ayue oloh Israel. 7:24 Palus ie mite ije biti bara ewen ingapehe awi ije biti oloh Misir; maka ie mandohop oloh je ingapehe te tuntang mampatei oloh Misir te. 7:25 Moses manyangka utus ayue tau harati je ie te ihapan awi Hatalla uka mambebas ewen. Tapi rahian tinai gitan je ewen te dia haratie. 7:26 Andau jewue tinai ie mite due biti oloh Israel hakalahi, palus ie manggau jalan uka mandamai ewen. Ie hamauh, 'Pahari handiai, keton toh hampahari. Mbuhen keton kalahi?' 7:27 Tapi oloh je mawi kawale te manggian Moses akan sare palus hamauh, 'Eweh mangkat ikau manjadi pamimpin tuntang hakim akan ikei? 7:28 En ikau handak mampatei aku kea kilau ikau mampatei oloh Misir te male?' 7:29 Katika Moses mahining taloh je insanan awi oloh te, Moses hadari bara Misir palus melai intu daerah Midian. Intu hete ie mandino due anak. 7:30 Epat puluh nyelo limbah te ije biti malekat dumah manalih Moses hong padang pasir tokep Bukit Sinai. Malekat te dumah huang apui intu rowut je hanyala. 7:31 Moses hengan mite hal te, sampai ie haguet manalihe toke-tokep uka mangatawan en taloh te. Palus ie mahining auh Tuhan hamauh, 7:32 'Aku toh Hatallan tato hiang keton; aku toh Hatallan Abraham, Isaak, tuntang Yakob.' Moses hagenjeh awi kikehe sampai dia bahanyi tinai manampayah akan eka rowut te. 7:33 Limbah te Tuhan hamauh tinai, 'Engkak sandal je ihapam te, awi petak je ekam mendeng te jete petak je barasih. 7:34 Aku jari mite tuntang manantuani ampin kapehen oloh ayungku hong Misir. Aku jari mahining tarahing ewen tuntang aku mohon uka maliwus ewen. Toh, kahetoh ikau! Aku handak manyoho ikau akan Misir.' 7:35 Maka Moses jetoh je dia ingaku awi utus Israel tuntang je inolak hapan auh kalotoh, 'Eweh je jari mangkat ikau manjadi pamimpin tuntang hakim akan ikei?' Tapi ie te je inyoho Hatalla uka manjadi pamimpin tuntang panyalamat, awi pandohop bara malekat je dumah manalih ie intu rowut je hanyala te. 7:36 Moses te kea je mamimpin utus Israel balua bara Misir awie manampa kare taloh heran tuntang kare taloh je dia puji bahut hong Misir, hong Tasik Raruju tuntang hong padang pasir katahin epat puluh nyelo. 7:37 Moses jete kea je hamauh dengan utus Israel, 'Hatalla handak manenga akan keton ije biti nabi je iintih bara marak keton kabuat, sama kilau ie mintih aku.' 7:38 Moses te kea je aton hong marak oloh Israel hong padang pasir, manjadi oloh helat akan malekat je hakotak dengae intu Bukit Sinai dengan tato hiang itah. Ie kea je manarima bara Hatalla barita je belom mangat inyampai akan itah. 7:39 Tapi aloh kalote tato hiang itah dia maku mamenda ie. Ewen manolak ie tuntang mipen haluli akan Misir. 7:40 Ewen hamauh dengan Harun, 'Nampa ih kare dewa akan ikei, mangat kare dewa te mamimpin ikei. Basa ikei jari dia katawan hindai taloh je manjadi buah Moses te je mimbit ikei balua bara Misir!' 7:41 Palus hong katika te ewen manampa ije hampatong anak sapi, limbah te ewen maluput parapah akan hampatong te tuntang mawi pesta hapan manyembah taloh je inampa awi ewen kabuat. 7:42 Maka Hatalla malihi ewen tuntang manalua ewen manyembah kare bintang intu langit. Jete hasaroroi dengan taloh je tarasurat huang surat kare nabi. Iete kalotoh, 'O kare oloh Israel! Dia ie akangku keton manyamabalih tuntang mampatei meto katahin epat puluh nyelo hong padang pasir. 7:43 Pasah taloh ain Molok je imbit keton haya-hayak dengan hampatong meto je indewa keton, iete Rempan; Jete ie hampatong je inampa keton akan indu sembah. Tagal te aku kareh manganan keton sampai keja-kejau akan silan tanah Babilon.' 7:44 Tingkap benang eka Hatalla dumah manalih olon aton intu tato hiang itah hong padang pasir. Tingkap benang te inampa awi parentah Hatalla akan Moses tuntang manumon sonto je imparahan Hatalla akan Moses. 7:45 Limbah te tinai tingkap benang te harajur iimbit awi tato hiang itah sampai katika ewen dengan Yosua haguet marabut daerah itah toh bara kuasan kare utus oloh je iharak Hatalla intu taharep ewen. Tingkap benang te aton intu hete sampai jaman raja Dawid. 7:46 Dawid mampahanjak atei Hatalla tuntang balaku dengae uka manyoho manampa ije huma akan Hatalla je inyembah Yakob te. 7:47 Tapi Salomo je mampendeng huma te akan Hatalla. 7:48 Tapi Hatalla je pangkahai dia melai intu huang huma je inampa awi olon; basa intu huang surat nabi tarasurat kalotoh, 7:49 'Langit iete padadusangku, tuntang petak galang paingku. Human en je handak impendeng keton akangku? Intu kueh ekaku malayan kahekaku? 7:50 En dia aku kabuat je manjadian taloh handiai?' Kalote auh Hatalla. 7:51 Lalehan katekang atei kare pahari tuntang kalote kahalin keton mamenda Hatalla! Kare pahari sama kilau tato hiang pahari; harajur malawan Roh Hatalla! Pinding pahari badengen dengan auh Hatalla! 7:52 En aton nabi je ingapehe awi tato hiang pahari? Ewen mampatei kare sarohan Hatalla je horan jari mansanan iete Rewar Hatalla Ije Bujur te kareh dumah. Tuntang toh kare pahari mandurhaka tuntang mampatei Rewar Hatalla te. 7:53 Kare malekat jari manyampai kare parentah Hatalla akan kare pahari, tapi kare pahari dia manumoe!" 7:54 Sana kare anggota majelis te mahining taloh handiai je insanan awi Stepanus, ewen kapehe ateie tuntang balait toto dengae. 7:55 Tapi Stepanus je inguasa awi Roh Hatalla, manampayah akan langit. Ie mite kahain Hatalla tuntang Yesus mendeng intu eka ije bara kuasa hila gataun Hatalla. 7:56 "Ite," koan Stepanus, "aku mite sorga buap tuntang Anak Olon mendeng hila gantaun Hatalla!" 7:57 Kare anggota majelis te manutup pinding ewen sambil mangkariak, palus haya-hayak ewen mamok Stepanus. 7:58 Ewen mihir ie akan luar lewu limbah te mamanting ie hapan batu. Kare oloh je manyaksi kajadian te mampelai pakaian ewen intu ije biti oloh tabela je bagare Saulus. 7:59 Pandehan ewen mamanting Stepanus, Stepanus mangkariak, "Tuhan Yesus, tarima rohku!" 7:60 Palus ie mandeko utute sontop tuntang mangkariak dengan hai auhe, "Tuhan, ela ah mananggong dosa toh akan ewen!" Limbah hamauh kalote, ie palus matei.
8:1 Tuntang Saulus hanjak kea tagal pampatei te. Andau te kea ungkup hong Yerusalem nampara ingapehe. Kakare oloh percaya, kacuali kare rasul, kasaburan akan hapus daerah Yudea tuntang Samaria. 8:2 Kare oloh je mikeh dengan Hatalla mangubur Stepanus tuntang manatum ie dengan kapehen atei ewen. 8:3 Tapi Saulus jua-juan kea manggau jalan mancalaka ungkup. Ie haguet manalih genep huma tuntang mihir kare oloh percaya akan luar, palus manamean ewen akan huang penjara. 8:4 Kare oloh percaya je jari kasaburan te mambarita Barita Bahalap bara Hatalla te akan hete-hete. 8:5 Pilippus haguet akan lewu Samaria tuntang mambarita akan kare oloh intu hete tahiu Raja Panyalamat je injanji Hatalla. 8:6 Katika kare oloh mahining Pilippus hakotak tuntang ewen mite kare taloh heran je iawie, are bara ewen je manantuani taloh je insanan awi Pilippus. 8:7 Basa kare roh papa jari balua hayak mangkariak bara kare oloh je irasok setan. Kare oloh lumpuh tuntang batimpang mahin are je impakeleh. 8:8 Maka kare oloh hong lewu Samaria te hanjak toto. 8:9 Hong lewu te aton ije biti oloh hatue bagare Simon, je jari pire-pire katahie mawi oloh Samaria marajin kare ilmu sihir ayue. Ie mansanan akan kare oloh je ie te oloh je labih tamam bara oloh beken. 8:10 Maka kakare oloh hong lewu te bara kare ampin tingkat pambelome manantuani ie. "Oloh toh aton kuasa bara Hatalla je inyewut kilau 'Kuasa hai' te," koan ewen. 8:11 Jari tahi toto ie mampalemo oloh hapan kakuatan sihire sampai ewen paham manantuani ie. 8:12 Tapi Pilippus mambarita akan ewen tahiu Barita Bahalap tahiu kilen ampie Hatalla mampendeng pamarentahan ayue, tuntang tahiu Yesus Kristus, Raja Panyalamat te. Maka ewen percaya dengan barita je inyampai Pilippus, palus ewen impandoi -- aloh oloh hatue, kalote kea oloh bawi. 8:13 Simon kabuat mahin percaya. Tuntang limbah impandoi, ie harajur omba Pilippus. Kare taloh heran je manjadi, mawi Simon baka hera-heran. 8:14 Kare rasul hong Yerusalem mahining je kare oloh Samaria jari manarima auh Hatalla. Tagal te ewen manyoho Petrus tuntang Yohanes haguet akan hete. 8:15 Katika Petrus tuntang Yohanes sampai hete, ewen balakudoa akan kare oloh Samaria te mangat ewen mandino Roh Hatalla. 8:16 Basa Roh Hatalla hindai dumah manguasa aloh ije biti bara ewen te; ewen harun impandoi baya huang aran Yesus Kristus bewei. 8:17 Palus Petrus tuntang Yohanes mina lengen ewen akan hunjun kare oloh Samaria te; maka ewen manarima Roh Hatalla. 8:18 Simon puna mite lengen kare rasul te iingkes akan hunjun kare oloh te, Roh Hatalla inenga akan kare oloh te. Tagal te Simon mimbit duit manalih Petrus tuntang Yohanes, 8:19 balalu hamauh, "Tenga akangku kuasa te kea mangat amon lengengku iingkes intu eweh bewei, oloh te kareh manarima Roh Hatalla." 8:20 Tapi Petrus tombah, "Dia kanduengku ikau dengan duitm! Ikau manyangka panengan Hatalla tau imili hapan duit? 8:21 Ikau jaton bara hak uka omba intu huang gawin ikei, basa ateim dia bujur intu taharep Hatalla. 8:22 Tagal te lihi ih kahandakm je papa te, tuntang laku dengan Tuhan mangat ie mampun tirokm je papa te. 8:23 Basa aku katawan ikau kontep awi kahirin atei tuntang injipen awi kapapa." 8:24 Palus Simon hamauh dengan Petrus tuntang Yohanes, "Dohop balaku dengan Tuhan uka jaton ije taloh je koan keton te manjadi buah aku." 8:25 Limbah ewen manenga kasaksian tuntang mambarita auh Tuhan, Petrus tuntang Yohanes haluli akan Yerusalem, tuntang hong panjalanae ewen mangabar Barita Bahalap intu kare-kare lewu hong Samaria. 8:26 Ije biti malekat Tuhan hamauh dengan Pilippus, "Ayo haguet! Lius ikau akan hila salatan akan jalan je tembus bara Yerusalem akan Gasa." Jalan te benyem. 8:27-28 Maka Pilippus balalu haguet. Hong katika te aton ije biti pagawai istana Etiopia je metoh hong panjalanae buli akan lewue. Oloh te ije biti pagawai hai je mimbing tanggong jawab dengan kakare panatau ain Kandake, Ratu hong lewu Etiopia. Oloh te jari haguet akan Yerusalem uka sombayang manyembah Hatalla tuntang metoh te ie buli mahapan karetae. Pandehan ie mondok huang karetae te, ie mambasa Surat Nabi Yesaya. 8:29 Roh Hatalla hamauh dengan Pilippus, "Talih manokep kareta te." 8:30 Maka Pilippus haguet manokep kareta te, palus ie mahining oloh te mambasa Surat Yesaya. Pilippus misek dengae, "En tuan harati taloh je imbasa tuan te?" 8:31 Oloh te tombah, "Kilen ampingku haratie, amon jaton oloh je manarang akangku?" Palus ie mimbit Pilippus mandai' akan kareta tuntang mondok hayak dengae. 8:32 Kalotoh auh ayat je imbasae te, "Ie kilau tabiri je iimbit uka inyambalih, kilau anak tabiri je dia mahiau metoh bulue inggunting, kalote ie jaton mampalua auh samasinde. 8:33 Ie ihina tuntang iawi oloh dengan dia bujur. Hambaruae induan bara hunjun petak sampai ije biti mahin jaton oloh je tau manyarita tahiu panakae." 8:34 Pagawai hai bara Etiopia te hamauh dengan Pilippus, "Coba sanan akangku, eweh je imaksud awi nabi toh? En arepe kabuat atawa oloh beken?" 8:35 Maka Pilippus palus manampara hakotak; ie mahapan kare ayat te kilau tamparan uka mambarita Barita Bahalap tahiu Yesus akan pagawai hai te. 8:36 Hong benteng jalan, ewen sampai intu ije eka je hadanum. Pagawai te hamauh, "Ite hete aton danum! En hindai je magon tapas hapan mampandoi aku?" 8:37 Pilippus hamauh, "Amon tuan percaya hapan salepah atei, tuan tau impandoi." "Aku percaya Yesus Kristus te Anak Hatalla," koan pagawai hai bara Etiopia te. 8:38 Palus ie manyoho karetae tende; limbah te ewen due, Pilippus tuntang pagawai te, mohon akan huang danum tuntang Pilippus mampandoi ie. 8:39 Katika ewen lembut, Roh Hatalla manduan Pilippus bara hete. Pagawai hai bara Etiopia te jaton mite ie tinai. Dengan kahanjake pagawai hai te marajur panjalanae. 8:40 Maka salenga ih Pilippus jari aton intu Asdod. Tuntang katika ie marajur panjalanae, ie mangabar Barita Bahalap tahiu Yesus hong kakare lewu sampai ie dumah hong Kaisarea.
9:1 Pandehan te Saulus harajur kea handak mampikeh tuntang mampatei kare murid Tuhan Yesus. Ie haguet manalih imam hai, 9:2 tuntang balaku surat kuasa uka manalih kare pamimpin huma sombayang ain oloh Yehudi hong Damaskus, mangat amon ie sondau kare oloh je percaya dengan Yesus intu hete, ie tau manawan ewen tuntang mimbit ewen akan Yerusalem. 9:3 Metoh ie manalih Damaskus, katika jari tokep dengan lewu te, maka salenga ije kalawa bara langit mamancar mangaliling Saulus. 9:4 Ie balungkang akan petak palus mahining ije auh hamauh dengae, "Saulus, Saulus! En sababe ikau mangapehe aku?" 9:5 "Eweh ikau, Tuan?" koan Saulus misek. Auh te tombah, "Aku toh Yesus, je ingapehem. 9:6 Tapi toh keleh ikau hingkat tuntang tame akan lewu. Intu hete kareh insanan oloh akam taloh je patut iawim." 9:7 Kare oloh je omba haya-hayak dengan Saulus tarewen sampai dia olih hamauh; basa ewen mahining auh te tapi ije biti oloh mahin jaton ewen mitee. 9:8 Balalu Saulus mendeng tuntang mamparenang matae tapi matae jari jaton olih mite taloh en-en hindai. Jadi ewen mimbing lengee tuntang oloh mangagalan ie tame akan Damaskus. 9:9 Telo andau katahie ie jaton tau mite tuntang katahin te ie jaton kuman atawa mihop samasinde. 9:10 Hong Damaskus aton ije biti murid Tuhan Yesus bagare Ananias. Huang ije taloh tampayah, Tuhan hakotak dengae. Tuhan hamauh, "Ananias!" Ananias tombah, "Aku, Tuhan." 9:11 Palus Tuhan hamauh, "Ayo haguet metoh toh. Talih human Yudas hong Jalan Bujur. Isek intu hete oloh je arae Saulus asale bara lewu Tarsus. Oloh te metohe balakudoa, 9:12 tuntang huang ije taloh tampayah ie mite ije biti oloh hatue, arae Ananias, dumah manalih ie tuntang mina lengee hunjun ie mangat ie tau mite taloh tinai." 9:13 Ananias tombah, "Tuhan, are taloh je jari ihiningku tahiu oloh toh bara oloh beken, je mambatang tahiu kare kapehe je iawie akan ungkup ayum hong Yerusalem. 9:14 Tuntang toh ie jari dumah akan hetoh mahapan ijin bara kare imam kapala uka manawan kakare oloh je percaya dengam." 9:15 Tapi Tuhan hamauh dengan Ananias, "Haguet ih! Basa aku jari mintih ie uka mandohop aku, mangat ie mambarita tahiu aku akan kare utus beken je dia baagama Yehudi tuntang akan kare raja tuntang akan ungkup Israel kea. 9:16 Tuntang aku kabuat kareh mamparahan akae kare kapehe je musti ingkemee tagal aku." 9:17 Maka Ananias balalu haguet akan huma te tuntang mina lengee intu hunjun Saulus. "Pahari Saulus," koan Ananias, "Tuhan Yesus je gitan pahari hong benteng jalan katika pahari miar akan hetoh, ie te je manyoho aku dumah mangat pahari tau mite tinai tuntang inguasa awi Roh Hatalla." 9:18 Hemben te kea taloh je kilau tisik lauk balekak bara matan Saulus tuntang ie tau mite tinai. Maka ie palus hingkat, balalu impandoi. 9:19 Tuntang limbah kuman, ie manjadi barigas haluli. Saulus melai hong Damaskus dengan kare murid Yesus pire-pire andau katahie. 9:20 Ie balalu haguet akan kare huma sombayang tuntang nampara mambarita je Yesus te Anak Hatalla. 9:21 Kakare oloh hengan mahining Saulus. Ewen hamauh, "En dia ie toh je jari mampatei kare oloh je percaya dengan Yesus hong Yerusalem? Ie dumah akan hetoh puna tantai manawan tuntang mimbit ewen akan kare imam kapala!" 9:22 Tapi Saulus sasar hai pangaruhe. Kare bukti je insanan tahiu Yesus mandehen oloh mangat toto percaya je Yesus te Raja Panyalamat, sampai kare oloh Yehudi je melai intu Damaskus dia olih hindai malawae. 9:23 Limbah mahalau pire-pire katika katahie kare oloh Yehudi pakat uka mampatei Saulus. 9:24 Tapi rencana ewen te ingatawan sampai ie. Handau hamalem ewen mentai hong bauntonggang lewu uka mampatei ie. 9:25 Tapi hong sinde alem, kare murid Saulus manduan Saulus, palus mampamohon ie huang karanjang mahalau dinding lewu. 9:26 Saulus haguet akan Yerusalem, tuntang intu hete ie manggau jalan uka tau hinje dengan kare murid Yesus. Tapi ewen mikeh dengae, basa ewen dia percaya je ie jari toto-toto manjadi murid Yesus. 9:27 Rahian tinai Barnabas dumah manalih ie, palus mimbit ie akan kare rasul. Barnabas manyarita akan ewen tahiu ampin Saulus mite Tuhan hong benteng jalan tuntang kilen ampie Tuhan hakotak dengae. Barnabas mansanan kea tahiu ampin kahanyin Saulus majar hong Damaskus mahapan aran Yesus. 9:28 Tagal te Saulus melai dengan ewen tuntang bahotbah dengan kahanyie hong hapus Yerusalem mahapan aran Tuhan. 9:29 Ie hakotak tuntang hagalagai kea dengan kare oloh Yehudi je hakotak mahapan basa Yunani. Tapi ewen manggau akal handak mampatei ie. 9:30 Katika kare oloh percaya je beken te katawan tahiu hal te, ewen mimbit Saulus akan Kaisarea, limbah te mampait ie akan Tarsus. 9:31 Maka ungkup hong hapus Yudea, Galilea tuntang Samaria manjadi damai. Tuntang mahapan pandohop bara Roh Hatalla, kare ungkup te sasar dehen tuntang sasar are, awi ewen belom huang kikeh dengan Tuhan. 9:32 Petrus haguet akan hete-hete maja kare ungkup. Hong sinde andau ie maja ungkup Tuhan je melai hong Lida. 9:33 Intu hete ie hasondau dengan ije biti oloh hatue bagare Eneas, je lumpuh tuntang jari hanya nyelo katahie jaton hingka-hingkat bara ekae batiroh. 9:34 Petrus hamauh dengan Eneas, "Eneas, Yesus Kristus mampakeleh ikau. Hingkat tuntang rasih ekam batiroh." Hemben te kea Eneas hingkat. 9:35 Kakare oloh lewu Lida tuntang Saron mite Eneas, palus ewen samandiai percaya dengan Tuhan. 9:36 Intu Yope aton ije biti oloh bawi je bagare Tabita. Ie te oloh Yunani je percaya dengan Yesus. (Arae huang basa Yunani iete Dorkas rimae te bajang.) Ie harajur malalus kare taloh bahalap tuntang mandohop kare oloh je belom susah. 9:37 Hong katika te ie haban palus malihi kalunen. Limbah hantue impandoi, ie iingkes oloh intu kamar hunjun. 9:38 Yope te dia pire kakejaue bara Lida. Jadi katika kare murid Yesus hong Yope mahining Petrus aton intu Lida, ewen manyoho due biti oloh haguet manalih Petrus dengan peteh toh, "Jele-jeleng ih dumah akan hetoh." 9:39 Petrus balalu hingkat palus omba ewen. Sana sampai hete ie iimbit akan kamar je hunjun. Kakare balo je aton hete mangarimpong Petrus sambil manangis tuntang mamparahan akae kare baju tuntang kare jubah je injahit awi Dorkas akan ewen metoh ie magon belom. 9:40 Petrus manyoho ewen uras balua, palus ie sontop mandeko utute balakudoa. Limbah te ie manaharep hantun Dorkas tuntang hamauh, "Tabita, misik!" Maka Dorkas marenang matae, tuntang katika ie mite Petrus, ie mondok. 9:41 Palus Petrus mimbing lengee tuntang madohop mampendeng ie. Rahian tinai Petrus mantehau kare oloh percaya intu hete haya-hayak dengan kare balo te, palus manyarah Dorkas je belom te akan ewen. 9:42 Kabar tahiu kajadian te tayap akan hapus lewu Yope, sampai are oloh percaya dengan Yesus kilau Raja Panyalamat ewen. 9:43 Petrus melai intu hete pire-pire andau tinai hong human ije biti tukang upak meto je bagare Simon.
10:1 Intu Kaisarea aton ije biti oloh hatue bagare Kornelius. Ie te ije biti kapten "Pasukan Italia". 10:2 Ie oloh je mikeh dengan Hatalla tuntang hapus keluargae sombayang manyembah Hatalla. Ie are mandohop kare oloh Yehudi je belom susah, tuntang ie harajur balakudoa dengan Hatalla. 10:3 Hong sinde andau kurang labih pukul telo halemei ie mite batantu huang tampayahe, ije malekat Hatalla dumah tuntang mantehau ie, "Kornelius!" 10:4 Kornelius mananture malekat te dengan kikehe palus hamauh, "Aton en tuan?" Malekat te tombah, "Lakudoam tuntang kataum jari inarima awi Hatalla tuntang Hatalla mingat ikau. 10:5 Toh soho oloh akan Yope mantehau Simon je bagare Simon Petrus. 10:6 Ie melai manyandehan intu human ije biti tukang upak meto bagare Simon, je melai intu saran tasik." 10:7 Limbah malekat je hakotak dengan Kornelius te haguet, Kornelius mantehau due biti anak oloh ayue intu humae tuntang ije biti tentara pangawal ayue je barasih ateie. 10:8 Kornelius manyarita akan ewen taloh je jari manjadi, palus manyoho ewen akan Yope. 10:9 Andau jewue tinai metoh ewen magon huang panjalanae tuntang handak sampai Yope, Petrus mandai' akan hunjun huma uka balakudoa. 10:10 Palus ie balau' tuntang handak kuman. Pandehan oloh manatap panginan, ie mite ije taloh tampayah. 10:11 Ie mite langit buap tuntang taloh je kilau benang lombah impamohon akan hunjun petak inggayong intu epat putinge. 10:12 Intu huange aton sukup macam kare meto je hapai' epat, kare meto je manggayar tuntang kare burung baliar. 10:13 Palus aton auh je hakotak dengae, "Petrus, misik! Samabalih tuntang kinan!" 10:14 Petrus tombah, "Dia, Tuhan! Hindai puji aku kuman taloh je pali atawa papa." 10:15 Tapi auh Tuhan te hamauh tinai dengae, "Taloh je jari imparasih awi Hatalla, ela ikau manyewut jete pali." 10:16 Taloh tampayahe te lulang-luli telo kali, limbah te benang te hagatang akan sorga. 10:17 Petrus bingung manirok en riman taloh je gitae te. Pandehan Petrus manirok hal te, kare oloh je inyoho awi Kornelius jari sondau human Simon tuntang ewen jari aton intu bauntonggang. 10:18 Palus ewen mantehau oloh tuntang misek, "En intu hetoh aton oloh tamuei melai manyandehan je arae Simon Petrus?" 10:19 Pandehan Petrus magon manggau riman tampayahe te, Roh Hatalla hamauh dengae, "O Petrus, aton telo biti oloh dumah manggau ikau. 10:20 Ayo bajeleng mohon akan penda tuntang ela bembang omba ewen, basa aku toh je manyoho ewen." 10:21 Maka Petrus mohon akan penda tuntang hamauh dengan kare oloh te, "Aku toh ie je inggau awi kare pahari. Mbuhen keton dumah?" 10:22 Ewen tombah, "Kapten Kornelius manyoho ikei akan hetoh. Ie te ije biti oloh bahalap tuntang mikeh dengan Hatalla tuntang paham ihormat kakare oloh Yehudi. Ije biti malekat Hatalla manyoho ie balaku tuan dumah akan humae basa kilau inenga tumon lakudoae, ie inyoho mahining taloh je insanan tuan akae." 10:23 Maka Petrus manyoho ewen tame uka melai manyandehan hete. Andau jewue tinai Petrus hingkat tuntang haguet haya-hayak dengan ewen. Pire-pire oloh percaya bara Yope mahin omba kea. 10:24 Ije andau limbah te ewen sampai hong Kaisarea. Intu hete ewen jari ientai awi Kornelius dengan kare paharie tuntang kare sobate je jari iraweie. 10:25 Katika Petrus sampai, Kornelius haguet manambang ie tuntang sontop manyembah intu taharepe. 10:26 Tapi Petrus mandohop ie mendeng palus hamauh, "Mendeng! Aku kabuat mahin olon kea." 10:27 Sambil hakotak dengan Kornelius, Petrus tame akan huang huma. Intu hete ie mite are oloh jari hapumpong. 10:28 Palus ie hamauh dengan ewen, "Pahari handiai katawan kabuat je oloh Yehudi te ingahana awi agamae maja atawa mawi hubungan dengan kare oloh utus beken. Tapi Hatalla jari mansanan akangku je aku dia tau manyewut oloh beken pali atawa papa. 10:29 Jete sababe katika tuan balaku aku dumah, aku dia kaberatan dumah. Jadi toh aku handak katawan mbuhen tuan balaku aku dumah." 10:30 Kornelius tombah, "Telo andau jari mahalau, katika kurang labih kilau toh, aku metoh balakudoa intu huma pukul telo halemei. Maka salenga ije biti oloh hatue mendeng hila baungku. Pakaian oloh te mangilat. 10:31 Ie hamauh, 'Kornelius! Hatalla jari manarima lakudoam tuntang mingat kare kahalap ateim. 10:32 Jadi soho oloh akan Yope mantehau oloh je bagare Simon Petrus. Ie aton manyandehan hong human ije biti tukang upak meto je bagare Simon; huma te intu saran tasik.' 10:33 Jete bukue aku bajeleng manyoho oloh haguet mantehau tuan. Tuntang tuan paham bahalap atei sampai dumah akan hetoh. Toh ikei samandiai hapumpong intu taharep Hatalla uka mahining taloh handiai je inyoho Hatalla tuan mansanae akan ikei." 10:34 Palus Petrus hamauh, "Toh aku toto-toto mangatawan je Hatalla te sama ampin kataue dengan oloh samandiai. 10:35 Oloh je mikeh Hatalla tuntang malalus taloh je bujur, oloh te inarima awi Hatalla, dia ie paduli oloh te bara utus je kueh. 10:36 Pahari samandiai jari katawan auh barita je inyampai Hatalla akan utus Israel. Barita te iete tahiu Barita Bahalap kadamai mahalau Yesus Kristus, ie te Tuhan oloh samandiai. 10:37 Keton katawan en je jari manjadi hong hapus daerah Yudea, iete nampara bara Galilea limbah pampandoi je ilalus awi Yohanes. 10:38 Keton katawan je Hatalla jari mintih Yesus oloh Nasaret te tuntang manenga akae Roh Hatalla tuntang kuasa. Keton katawan kea je Yesus te haguet akan hete-hete uka malalus kahalap; ie mampakeleh oloh samandiai je inguasa awi setan, basa Hatalla mampahayak ie. 10:39 Ikei toh ie kare oloh je jari mitee kabuat taloh handiai je ilaluse hong daerah oloh Yehudi hong Yerusalem. Aloh kalote ewen manyampalaki tuntang mampatei ie. 10:40 Tapi hong andau je kateloe Hatalla mambelom ie tinai bara pampatei tuntang mamparahan ie akan olon; 10:41 dia akan oloh samandiai, malengkan baya akan ikei je jari iintih Hatalla labih helo uka manjadi saksi akae: Ikei kuman tuntang mihop dengae limbah ie belom haluli bara pampatei. 10:42 Tuntang ie manyoho ikei mansanan Barita Bahalap te akan kare oloh tuntang manenga kasaksian je ie te iangkat awi Hatalla manjadi Hakim akan kare oloh je magon belom tuntang kare oloh je jari matei. 10:43 Uras kare nabi hakotak tahiu ie. Ewen mansanan tahiu oloh samandiai je percaya dengan Yesus, dosae kareh iampun mahapan kuasa bara Yesus." 10:44 Metoh Petrus magon hakotak, Roh Hatalla mohon tuntang manguasa oloh samandiai je mahining barita te. 10:45 Kare oloh Yehudi je percaya dengan Yesus tuntang omba mampahayak Petrus bara Yope, uras hengan mite Hatalla manenga kea Roh ayue akan kare oloh utus beken je dia Yehudi. 10:46 Basa ewen mahining kare oloh te hakotak hong kare basa tuntang manara kahain Hatalla. Palus Petrus hamauh, 10:47 "Coba ite, kare oloh toh jari mandino Roh Hatalla kilau itah. Jadi en tau oloh mahambang ewen mangat impandoi hapan danum?" 10:48 Maka Petrus manyoho ewen impandoi huang aran Yesus Kristus. Limbah te ewen balaku uka Petrus melai dengan ewen pire-pire andau katahie.
11:1 Kare rasul tuntang kare oloh percaya hong hapus daerah Yudea mahining kea kare oloh percaya je dia bara agama Yehudi mahin jari manarima auh Hatalla. 11:2 Rahian tinai katika Petrus haguet akan Yerusalem, kare oloh Yehudi je jari percaya te, manyalan Petrus. 11:3 Ewen hamauh, "Mbuhen ikau haguet akan kare human oloh je hindai basunat? Ikau omba kuman haream dengan ewen!" 11:4 Tagal te Petrus manarang akan ewen taloh handiai je jari manjadi, nampara bara tamparae. Petrus hamauh, 11:5 "Aku metoh balakudoa hong lewu Yope, palus aku mite ije taloh tampayah. Aku mite aton ije taloh je kilau ije kalambar benang lombah impamohon bara langit, gayo-gayong intu epat putinge, limbah te tende hila balikatku. 11:6 Katika aku mananture akan huange, aku mite kare meto hapai' epat, kare meto baliar, kare meto je manggayar tuntang kare burung baliar. 11:7 Palus aku mahining ije auh hamauh dengangku, 'Ayo misik, Petrus! Sambalih jete tuntang kinan!' 11:8 Tapi aku tombah, 'Dia, Tuhan! Hindai puji aku kuman panginan je pali tuntang papa.' 11:9 Tapi auh te hakotak tinai bara langit, 'Taloh je jari imparasih awi Hatalla ela ikau manyewut jete pali.' 11:10 Aku mite taloh te sampai telo kali tuntang kajariae taloh samandiai te hagatang haluli akan sorga. 11:11 Pas huang katika te kea telo biti oloh Kaisarea, je inyoho manalih aku, sampai intu huma ekaku manyandehan. 11:12 Palus Roh Hatalla manyoho aku haguet omba ewen hayak ela bembang. Jahawen pahari toh mahin omba dengangku akan Kaisarea, tuntang ikei handiai tame akan huang human Kornelius. 11:13 Rahian tinai Kornelius manyarita akan ikei kilen ampie ie mite ije malekat mendeng intu humae tuntang hamauh, 'Soho oloh akan Yope mantehau ije biti oloh hatue je bagare Simon Petrus. 11:14 Ie kareh mansanan akam barita je manyalamat ikau tuntang keluargam.' 11:15 Tuntang hong katika aku nampara hakotak kalote," kalote auh Petrus manontong saritae, "Roh Hatalla dumah akan hunjun ewen, sama kilau je manjadi buah itah bihin huang tamparae. 11:16 Palus aku taraingat, Tuhan puji hamauh, 'Yohanes mampandoi hapan danum, tapi keton akan impandoi hapan Roh Hatalla.' 11:17 Jadi batantu Hatalla kea manenga akan kare oloh je dia bara agama Yehudi te, panenga je sama kilau inengae akan itah katika itah percaya dengan Tuhan Yesus Kristus. Tagal te, kueh aku tau mangahana Hatalla!" 11:18 Limbah mahining jete, ewen dia manyalan hindai. Palus ewen manara Hatalla. Ewen hamauh, "Amon kalote, kare oloh je dia Yehudi mahin inenga kesempatan uka hobah bara kare dosae tuntang mangkeme pambelom je bujur!" 11:19 Limbah Stepanus impatei, kare oloh je percaya dengan Yesus nampara inggau oloh, sampai ewen kasaburan akan hete-hete. Aton je hadari akan Poinike, tuntang aton kea je sampai akan Siprus tuntang Antiokhia. Ewen mangabar barita bara Hatalla akan kare oloh Yehudi bewei. 11:20 Tapi pire-pire biti bara ewen, je asale bara Siprus tuntang Kirene, haguet akan Antiokhia tuntang mangabar Barita Bahalap tahiu Yesus te akan kare oloh je dia bara agama Yehudi kea. 11:21 Kuasan Tuhan aton intu ewen sampai are oloh manjadi percaya tuntang manyarah arepe akan Tuhan. 11:22 Kare sarita tahiu kajadian toh sampai kea akan ungkup intu Yerusalem. Maka ewen manyoho Barnabas akan Antiokhia. 11:23 Tuntang katika Barnabas sampai intu hete, tuntang mite kilen ampie Hatalla mamberkat kare oloh te, ie hanjak toto. Palus ie balaku mangat ewen toto-toto baketep dengan Tuhan hapan salepah atei. 11:24 Barnabas toh oloh je bahalap ateie tuntang inguasa awi Roh Hatalla hayak percaya toto dengan Tuhan sampai are oloh omba Tuhan. 11:25 Limbah te Barnabas haguet akan Tarsus manggau Saulus. 11:26 Limbah hasondau dengan Saulus, ie mimbit Saulus akan Antiokhia tuntang ije nyelo bulat ewen hinje dengan ungkup intu hete sambil majar are oloh. Intu Antiokhia te kare oloh percaya dengan Yesus te je panyolake inyewut oloh Kristen. 11:27 Hong katika te aton pire-pire nabi dumah bara Yerusalem akan Antiokhia. 11:28 Bara marak ewen te aton ije biti je bagare Agabus. Awi sohon Roh Hatalla ie manujum iete hong hapus kalunen akan dumah wayah lau je paham. (Tuntang hal te puna manjadi kea katika Kaisar Klaudius marentah.) 11:29 Maka kakare murid Yesus te pakat uka mampait sumbangan akan kare pahari je melai hong Yudea; genep biti mampait sumbangan manumon kaolihe. 11:30 Gawi pakat te ilalus kea, palus Barnabas tuntang Saulus inyoho uka magah sumbangan te akan kare pamimpin ungkup.
12:1 Kurang labih katika te kea Raja Herodes nampara mangapehe kare anak ungkup. 12:2 Awi parentah ayue, Yakobus paharin Yohanes, impatei hapan padang. 12:3 Katika Herodes mite taloh gawie te mampahanjak atei oloh Yehudi, ie mawi taloh je kilau te tinai; ie manyoho oloh manawan Petrus kea. Hal te manjadi hong Andau Pesta Rote Dia Iragi. 12:4 Limbah inawan, Petrus inamean akan huang penjara. Epat kawan tentara inyoho uka manjaga Petrus intu hete -- hong ije kakawan aton epat biti tentara. Limbah pesta Paska hapus, harue Herodes handak mamutus perkaran Petrus hong bentok oloh are. 12:5 Jadi Petrus inahan huang penjara; tapi kare anak ungkup harajur balakudoa ih hapan katoton ateie dengan Tuhan akan Petrus. 12:6 Hong alem helo bara Herodes mimbit Petrus akan bentok oloh are, Petrus batiroh helat due pangawal. Ie injarat hapan due pasong. Intu bauntonggang penjara, kare pangawal beken kea kanjerae manjaga penjara. 12:7 Te salenga malekat Tuhan mendeng intu hete tuntang ije kalawa manyingah huang kamar penjara te. Malekat te manggulak Petrus sampai ie misik. Palus malekat te hamauh, "Ayo bajeleng misik!" Hemben te kea rantai sanaman manjato bara lengen Petrus. 12:8 Limbah te malekat te hamauh, "Kepan pakaiam tuntang njarat talin sapatum." Maka Petrus balalu mangkepan pakaiae tuntang manjarat talin sapatue. Limbah te malekat te hamauh tinai, "Kepan jubahm tuntang nuntut aku." 12:9 Maka Petrus manuntut malekat te balua bara penjara. Tapi Petrus dia katawan taloh je iawi malekat te jete taloh je puna toto-toto manjadi. Petrus manyangka jete baya taloh tampayahe bewei. 12:10 Katika ewen jari mahalau eka oloh jaga je solake tuntang je kaduee, ewen sampai akan bauntonggang sanaman je palus manintu lewu. Bauntonggang te buap kabuate, palus ewen balua tuntang mananjong mahalau ije jalan korik. Intu hete salenga malekat te malihi Petrus. 12:11 Limbah te harue Petrus barendeng palus mangatawan taloh je jari manjadi buah ie, palus ie hamauh, "Toh aku katawan je Tuhan toto-toto manyoho malekat ayue uka maliwus aku bara kuasan Herodes tuntang bara taloh handiai je akan iawi utus oloh Yehudi dengangku." 12:12 Limbah ie mangatawan toto taloh te, Petrus haguet akan human Maria, indu Yohanes je inyewut kea Markus. Intu hete are oloh hapumpong tuntang balakudoa. 12:13 Petrus manegah bauntonggang luar, palus ije biti jipen bawi bagare Rode, dumah uka muap bauntonggang. 12:14 Balalu ie mangasene auh Petrus. Tagal kahanjake, ie jele-jeleng tame haluli marak bauntonggang hindai iuap. Palus ie mansanan akan kare oloh intu hete, Petrus aton intu luar. 12:15 "Gila ikau!" koan ewen. Tapi Rode jua-juan manyewut jete puna toto Petrus. Maka ewen hamauh, "Jete malekat ayue!" 12:16 Pandehan te Petrus jua-juan kea manegah bauntonggang. Maka katika ewen muap bauntonggang, tuntang mite Petrus, ewen hengan toto. 12:17 Petrus manenga tanda hapan lengee uka ewen suni, limbah te ie manyarita kilen ampie Tuhan mimbit ie balua bara penjara. Palus ie hamauh, "Sanan hal toh akan Yakobus tuntang kare pahari je beken kea." Limbah te Petrus malihi eka te tuntang haguet akan eka beken. 12:18 Andau jewue maka lembut karidu hong marak kare tentara pangawal. Ewen gogop toto tagal taloh je jari manjadi buah Petrus. 12:19 Palus Herodes manyoho oloh manggau Petrus, tapi ewen jaton olih sondau ie. Jadi Herodes marentah uka kare pangawal te iisek palus impatei. Limbah te Herodes haguet bara Yudea tuntang melai pire-pire katahie intu Kaisarea. 12:20 Herodes balait toto dengan kare oloh Tirus tuntang Sidon. Tagal te ewen haya-hayak manalih manaharep ie. Sola-solake ewen mangatau Blastus, je mangapala istana Herodes, sampai ie omba mamihak ewen. Limbah ewen haguet manaharep Herodes, palus balaku badamai, basa lewun ewen te bahapang dengan panginan bara lewun Herodes. 12:21 Hong sinde andau je jari inukas, Herodes mahapan pakaian kahaie palus mondok intu karusi karajaan tuntang nampara pidato intu taharep rakyat. 12:22 Rakyat je mahining auh te mangkariak, "Jetoh auh dewa, dia auh olon!" 12:23 Hemben te kea malekat Tuhan manampar Herodes, awi ie dia mahormat Hatalla. Herodes kinan awi handalai palus matei. 12:24 Maka auh Hatalla sasar tayap tuntang sasar dehen. 12:25 Limbah Barnabas tuntang Saulus mampajadi gawin ewen, ewen haluli bara Yerusalem hayak mimbit Yohanes Markus dengan ewen.
13:1 Intu huang ungkup Antiokhia aton kare nabi tuntang kare guru, iete Barnabas, Simon je inggare Bilem, Lukius bara Kirene, Menahem je belom bara korik sampai hai hinje raja Herodes, tuntang Saulus. 13:2 Katika ewen metoh sombayang manyembah Tuhan tuntang puasa, Roh Hatalla hamauh dengan ewen, "Intih akangku Barnabas tuntang Saulus uka ewen malalus gawi je jari inatap akan ewen." 13:3 Limbah puasa tuntang balakudoa ewen mina lengen ewen hunjun Barnabas tuntang Saulus palus manyoho ewen haguet. 13:4 Basa inyoho awi Roh Hatalla, Barnabas tuntang Saulus haguet akan Seleukia. Bara hete ewen balayar akan pulau Siprus. 13:5 Katika sampai hong Salamis, ewen mambarita auh Hatalla hong kare huma sombayang Yehudi. Yohanes Markus mandohop ewen huang jalanan ewen. 13:6 Hapus pulau te ingumbang ewen sampai Papos. Intu hete ewen hasondau dengan oloh Yehudi bagare Bar Yesus. Ie te tukang sihir je mangaku arepe nabi. 13:7 Sergius Paulus, gubernur pulau te hasobat toto dengan tukang sihir te. Gubernur te iete ije biti oloh pintar harati. Ie mantehau Barnabas tuntang Saulus basa ie mipen handak mahining auh Hatalla. 13:8 Tapi Barnabas tuntang Saulus inantang awi Elimas tukang sihir te, awi Elimas (Jete arae huang basa Yunani) manggau jalan uka gubernur te ela sampai percaya dengan Yesus. 13:9 Tapi Saulus -- je inyewut kea Paulus -- inguasa awi Roh Hatalla, sampai ie manampayah tukang sihir te, 13:10 palus hamauh, "O kapala tanjaro, anak kapapa! Ikau musoh kare taloh bahalap. Mbuhen ikau dia maku terai marusak rencana Hatalla uka manyalamat olon? 13:11 Ite toh, Tuhan kareh mahukum ikau! Ikau kareh manjadi babute, sampai ikau dia tau mite kalawan matanandau hindai katahin ije katika." Hemben te kea Elimas mangkeme aton ambun je babilem manutup matae sampai ie mananjong gaya-gayap manggau oloh uka mangagalan ie. 13:12 Katika gubernur te mite taloh je jari manjadi, ie percaya dengan Yesus; awi ie jungun toto tagal auh ajar tahiu Tuhan. 13:13 Bara Papos, Paulus tuntang kare kawale balayar akan Perga hong Pampilia. Intu hete Yohanes Markus malihi ewen, palus haluli akan Yerusalem. 13:14 Bara Perga ewen marajur jalanae akan Antiokhia hong Pisidia, limbah te hong andau Sabat ewen haguet tuntang mondok huang huma sombayang. 13:15 Limbah Surat Moses tuntang Surat Kare Nabi imbasa, kare pamimpin huma sombayang te manyoho oloh misek dengan Paulus tuntang kare kawale, "Pahari handiai, amon ain pahari aton ije auh nasehat akan kare oloh toh, takan ih manyampai auh nasehat te." 13:16 Maka Paulus mendeng palus manenga tanda hapan lengee, limbah te ie hamauh, "Paharingku handiai utus Israel tuntang kare pahari handiai je beken kea hetoh je mamenda Hatalla! Keleh hining auhku: 13:17 Hatalla ain utus Israel jari mintih tato hiang itah, tuntang manjadian utus toh utus je hai metoh ewen manamuei hong tanah Misir. Limbah te, hapan kuasae je hai, Hatalla mimbit ewen balua bara Misir. 13:18 Ie sabar ateie manaharep ampin kare tingkah ewen hong padang pasir epat puluh nyelo katahie. 13:19 Uju utus oloh impalomose hong daerah Kanaan uka mambagi-bagi daerah te akan utus Israel mangat daerah te manjadi daerah ain ewen. 13:20 Taloh samandiai te manjadi epat ratus lime puluh nyelo katahie. Limbah ewen mambagi daerah Kanaan te, Hatalla manenga akan ewen kare hakim. Hakim je pangkarahiae iete nabi Samuel. 13:21 Rahian tinai ewen balaku ije biti raja. Hatalla manenga akan ewen Saul anak Kis bara suku Benyamin uka manjadi rajan ewen epat puluh nyelo katahie. 13:22 Limbah Hatalla manindar ie bara kadudukae, Hatalla mangkat tinai Dawid manjadi rajan ewen. Tuntang toh ie taloh je insanan Hatalla tahiu Dawid, 'Aku jari mandino Dawid anak Isai te ije biti oloh je manyanang ateiku. Ie te oloh je malalus kahandakku.' 13:23 Bara panakan Dawid te Hatalla manatap akan utus Israel ije Raja Panyalamat, kilau je jari injanjie. Tuntang Yesus te ie Raja Panyalamat te. 13:24 Helo bara Yesus nampara malalus gawie, Yohanes jari mantehau kare oloh Israel uka hobah bara dosan ewen tuntang impandoi. 13:25 Tuntang katika gawie tokep hapus Yohanes hamauh dengan kare oloh, 'Eweh kea aku toh manumon koan keton? Aku toh dia ie oloh je ientai keton. Ingat oloh te kareh dumah limbah aku; aku toh, aloh mengkak talin sapatue mahin jaton patut akae.' 13:26 Pahari handiai panakan Abraham, tuntang kare pahari handiai je beken intu hetoh je mamenda Hatalla! Hatalla jari mampait akan itah barita salamat te; 13:27 basa kare oloh je melai hong Yerusalem tuntang kare pamimpin ewen dia mangatawan ie te je bagare panyalamat te. Ewen dia harati auh ajar kare nabi je imbasa genep andau Sabat, sampai ewen mahukum Yesus. Tapi tagal ewen mawi taloh je macam te, maka tagal ewen te kea taloh je inujum awi kare nabi manjadi tulus. 13:28 Aloh ewen dia olih sondau taloh en-en je tau mawi ie ihukum hapan pampatei, mahin kea ewen balaku dengan Pilatus uka ie impatei. 13:29 Tuntang limbah ewen jari mahapus kare taloh gawin ewen mawi ie kilau je jari inyurat huang Surat Barasih, ewen mampamohon hantue bara kayu sampalaki, palus mingkes ie huang kubur. 13:30 Tapi Hatalla mambelom ie haluli bara pampatei. 13:31 Limbah te pire-pire andau katahie ie mamparahan arepe akan kare oloh je jari dumah hayak dengae bara Galilea akan Yerusalem. Ewen te je wayah toh manjadi saksi tahiu ie akan utus Israel. 13:32 Jadi toh, ikei manyampai Barita Bahalap te akan keton: Taloh je jari injanji Hatalla akan tato-hiang itah, 13:33 jete jari ilalus intu itah awie mambelom Yesus haluli bara pampatei. Basa huang Mazmur je kadue aton tarasurat, 'Ikau toh anakku, hong andau toh aku manjadi Bapam.' 13:34 Hatalla jari mambelom ie haluli bara pampatei. Toh ie dia mangkeme pampatei tinai intu huang kubur, tahiu hal te Hatalla hamauh, 'aku kareh manenga akam janji je barasih, je pasti kareh inggenep, je jari injanjiku akan Dawid.' 13:35 Kalote kea hong ayat beken inyewut, 'Ikau kareh dia manalua rewarm je baketep te maram huang kubur.' 13:36 Dawid jari matei tuntang ingubur kea hinje dengan tato-hiange, limbah ie malalus kare taloh je inyoho Hatalla ie mawie. Hantun Dawid mahin jari lenyoh lepah urase. 13:37 Tapi Yesus, je imbelom haluli awi Hatalla bara pampatei, Yesus te dia lenyoh lepah. 13:38-39 Tagal te pahari handiai, keton musti katawan iete mahalau Yesus toh barita ampun dosa insanan akan keton; keton musti katawan iete gagenep oloh je percaya dengae, iliwus bara kare dosae je dia olih impuas mahalau kare parentah Hatalla je inyampai awi Moses. 13:40 Jete sababe keton musti manantuani bua-buah ela sampai buah kare keton taloh je insanan awi kare nabi, 13:41 'Nantuani bua-buah, o kare keton je rajin mahina! Keton kareh hengan, palus matei! Basa hong jaman jetoh aku kanjerangku malalus taloh je dia keton handak percayae, aloh aton oloh manarange akan keton.' " 13:42 Katika Paulus tuntang Barnabas malihi huma sombayang te, kare oloh intu huma sombayang te balaku ewen haluli tinai huang andau Sabat je rahian, uka manarang labih are tahiu kare hal te. 13:43 Limbah kare oloh balua bara huma sombayang te, Paulus tuntang Barnabas inuntut awi are oloh Yehudi tuntang oloh utus beken je jari tame agama Yehudi. Maka kare rasul te manasehat ewen harajur harap dengan asin Hatalla. 13:44 Hong andau Sabat je rahian tinai, bilak uras oloh hong lewu te dumah mahining auh Tuhan. 13:45 Katika kare oloh Yehudi mite kare oloh are te, ewen bahiri toto ateie. Ewen mahina Paulus tuntang malawan taloh handiai je insanae. 13:46 Tapi Paulus tuntang Barnabas sasar bahanyi haream hakotak terus-tarang. Ewen hamauh, "Auh Hatalla puna musti inyampai helo akan keton. Tapi awi keton dia maku manarimae, keton jari manukas kabuat keton dia patut manarima pambelom je bujur tuntang katatahie. Tuntang toh ikei malihi keton tuntang manalih utus beken. 13:47 Basa jetoh parentah Tuhan akan ikei; Tuhan hamauh, 'Aku jari manukas keton manjadi kalawa akan kare utus beken je dia Yehudi, mangat keton mimbit salamat akan hapus kalunen.' " 13:48 Katika kare utus beken je dia Yehudi mahining jete, ewen hanjak toto, palus manara auh Tuhan. Tuntang kare oloh je jari inukas awi Hatalla uka mandino pambelom je bujur tuntang katatahie, maka kare oloh te palus percaya. 13:49 Maka auh Tuhan tayap akan hete-hete hong hapus daerah te. 13:50 Tapi kare oloh hai hong lewu te tuntang kare oloh bawi bara utus gantong je mikeh dengan Hatalla, buah pangaruh awi kare oloh Yehudi. Ewen mampalembut kamusoh dengan Paulus tuntang Barnabas, tuntang maharak ewen due bara daerah te. 13:51 Maka kare rasul te mangibas kawo bara pain ewen intu taharep kare oloh te kilau pampingat, palus haguet akan Ikonium. 13:52 Kare murid hong Antiokhia paham hanjak tuntang inguasa awi Roh Hatalla.
14:1 Paulus tuntang Barnabas buah hal je sama kilau te kea hong Ikonium. Ewen haguet kea akan huma sombayang Yehudi tuntang hakotak intu hete kalote ampie sampai are oloh Yehudi tuntang oloh je dia Yehudi percaya dengan Yesus. 14:2 Tapi kare oloh Yehudi je dia maku percaya, mampangaruh kare oloh je dia Yehudi, sampai mawi ewen manyingi kare oloh je percaya dengan Yesus. 14:3 Tagal te Paulus tuntang Barnabas melai tahi intu hete. Tuntang dengan kahanyie ewen hakotak tahiu Tuhan. Maka Tuhan kea mawi bukti je manoto barita ain ewen tahiu asie te; ie manenga kuasa akan ewen uka malalus kare taloh heran tuntang kare hal je dia puji helo. 14:4 Tapi oloh lewu te hakalawan sama arepe; aton je omba pihak oloh Yehudi tapi aton kea je omba pihak kare rasul te. 14:5 Palus kare oloh Yehudi tuntang kare pamimpin ewen haya-hayak dengan kare oloh je dia Yehudi pakat uka mangapehe tuntang mamanting kare rasul te hapan batu. 14:6 Tapi kare rasul te mangatawan hal te, palus ewen mangejau arepe akan Listra tuntang Derbe, iete kare lewu hong Liakonia, tuntang akan daerah hakaliling hete. 14:7 Intu hete ewen mambarita tinai Barita Bahalap te. 14:8 Hong Listra aton ije biti oloh hatue je lumpuh paie bara metoh ie inakan, sampai ie dia puji tau mananjong, awi paie paham balemo. 14:9 Oloh te mondok intu hete mahining Paulus hakotak. Paulus mite je oloh te percaya tuntang tagal te ie tau impakeleh. Maka Paulus manampayah ie 14:10 tuntang hapan auh hai Paulus hamauh, "Keleh ikau mendeng!" Oloh te manangkajok mendeng palus mananjong. 14:11 Katika oloh are mite taloh je jari ilalus awi Paulus, ewen mangkariak huang basa Liakonia, "Kare dewa jari mohon akan kalunen hapan bitin olon." 14:12 Palus ewen manggare Barnabas te Zeus, tuntang Paulus inggare ewen Hermes, basa ie te je hakotak. 14:13 Imam dewa Zeus, je aton humae intu baun lewu, dumah mimbit kare sapi hatuee tuntang kare kambang akan bauntonggang lewu. Ie handak omba dengan oloh are maluput parapahe akan kare rasul te. 14:14 Katika Barnabas tuntang Paulus mahining taloh je handak ilalus awi oloh are te, ewen marabit pakaiae sambil hadari akan bentok oloh are te, palus mangkariak, 14:15 "Hau, mbuhen keton malalus taloh toh? Ikei toh olon kea sama kilau pahari. Ikei aton intu hetoh uka mangabar Barita Bahalap akan keton uka keton malihi kare taloh je dia baguna toh tuntang dumah manalih Hatalla je belom, je manjapa langit tuntang petak, tuntang tasik tuntang kare taloh je aton intu huange. 14:16 Hong katika je halau Hatalla manalua kare utus oloh belom manumon kahandak ewen kabuat-kabuat. 14:17 Tapi ie dia kalapean manenga bukti tahiu arepe, iete malalus taloh bahalap. Ie manenga akan keton ujan bara langit tuntang hasil petak intu wayahe. Ie manenga panginan akan keton tuntang manyanang atei keton." 14:18 Tapi mahapan kare auh te mahin bahali kea kare rasul te mambalang kare oloh te maluput parapah akan ewen. 14:19 Pire-pire oloh Yehudi je dumah akan Listra bara Antiokhia hong Pisidia tuntang Ikonium, manantiring oloh are te sampai oloh te mamihak ewen. Ewen mamanting Paulus hapan batu, limbah te mihir ie balua lewu. Ewen manyangka ie jari matei. 14:20 Tapi katika kare oloh je percaya intu hete mendeng mangaliling ie, ie hingkat tuntang tame haluli akan lewu. Andau jewue ie haguet akan Derbe haya-hayak dengan Barnabas. 14:21 Intu Derbe, Paulus tuntang Barnabas mangabar Barita Bahalap te tuntang are oloh manjadi percaya dengan Yesus. Limbah te ewen haluli akan Listra, limbah te akan Ikonium, palus akan Antiokhia hong Pisidia. 14:22 Hong kare lewu te ewen mampaabas atei kare murid Yesus tuntang manasehat kare muride uka tetep percaya dengan Yesus. "Itah musti buah kapehe helo, harun itah tau mangkeme kahanjak hong Lewu Taheta ain Hatalla," kalote auh kare rasul te majar kare murid Yesus hong kare lewu te. 14:23 Tuntang intu genep ungkup, Paulus tuntang Barnabas mangkat kare pamimpin akan kare ungkup te. Palus hapan lakudoa tuntang puasa, ewen manyarah kare pamimpin te akan Tuhan je imercaya awi ewen te. 14:24 Limbah te Paulus tuntang Barnabas marajur jalanae mahalau daerah Pisidia tuntang sampai akan Pampilia. 14:25 Tuntang limbah ewen mambarita auh Hatalla intu Perga, ewen haguet akan Atalia. 14:26 Bara hete ewen balayar haluli akan Antiokhia. Jete ie lewu eka ewen bihin inyarah akan asin Hatalla, uka ewen malalus gawi je wayah toh ewen jari mahapuse. 14:27 Katika sampai hong Antiokhia, ewen mamumpong kare oloh bara ungkup te, palus manyarita taloh handiai te je jari ilalus awi Hatalla mahalau ewen. Ewen manyarita kea tahiu ampin Hatalla muap jalan uka kare oloh je dia Yehudi percaya dengan Yesus. 14:28 Hong lewu te Paulus tuntang Barnabas melai tahi kea dengan kare oloh percaya.
15:1 Pire-pire oloh Yudea dumah akan Antiokhia tuntang majar kare oloh percaya hong Antiokhia te, koae, amon ewen dia inyunat manumon hukum Moses, ewen dia tau inyalamat. 15:2 Paulus tuntang Barnabas paham malawan auh tirok kare oloh te. Kajariae inukas uka Paulus tuntang Barnabas dengan pire-pire oloh beken bara Antiokhia haguet akan Yerusalem uka manahiu hal te dengan kare rasul tuntang kare pamimpin intu hete. 15:3 Ungkup hong Antiokhia magah ewen sampai akan luar lewu, limbah te ewen haguet mahalau Poinike tuntang Samaria. Intu hete ewen manyarita kilen ampie kare oloh je dia Yehudi jari manyarah arepe akan Hatalla. Barita te paham mampahanjak kare oloh je percaya hong eka te. 15:4 Katika ewen sampai hong Yerusalem, ewen inambang dengan bahalap awi ungkup, awi kare rasul tuntang kare pamimpin. Palus ewen manyarita akan kare oloh te tahiu taloh handiai je jari ilalus Hatalla mahalau ewen. 15:5 Tapi pire-pire oloh bara golongan Parisi je jari percaya, mendeng tuntang hamauh, "Kare oloh utus beken je jari percaya te musti inyunat tuntang inyoho manumon hukum Moses." 15:6 Palus kare rasul tuntang pamimpin hapumpong uka manahiu hal te. 15:7 Tahi toto ewen hapander. Kajariae Petrus mendeng tuntang hamauh, "Pahari handiai! Keton kabuat katawan, pire-pire katika je halau Hatalla mintih aku bara marak keton uka mansanan Barita Bahalap te akan kare oloh je dia Yehudi mangat ewen kea mahining tuntang percaya. 15:8 Tuntang Hatalla je mangasene atei olon jari mamparahan je ie manarima ewen; ie mamparahan hal te awi ie manenga akan ewen Roh Hatalla sama kilau je jari inenga akan itah kea. 15:9 Hatalla dia mangabeken itah dengan ewen. Ie mamparasih atei ewen, awi ewen percaya. 15:10 Nah, en sababe keton handak malawan Hatalla toh awi keton manenga parentah je babehat akan kare murid toh, padahal tato-hiang itah tuntang itah kabuat mahin dia olih malaluse? 15:11 Dia! Itah percaya tuntang inyalamat awi asin Tuhan Yesus; kalote kea ewen." 15:12 Maka oloh handiai je hapumpong hete benyem. Limbah te ewen mahining auh Barnabas tuntang Paulus je manyarita haluli kakare taloh heran tuntang kare taloh je dia puji manjadi helo je jari ilalus awi Hatalla mahalau ewen hong marak kare oloh utus beken je dia Yehudi. 15:13 Limbah ewen jari mahapus kotake, Yakobus hamauh, "Pahari handiai! Coba hining auhku. 15:14 Simon harue ih manarang kilen ampie solake Hatalla manantuani kare oloh je dia Yehudi, dengan maksud uka mintih bara marak kare oloh je beken je kareh manjadi ungkup ayue, 15:15 jete hakabuah dengan je jari inujum awi kare nabi. Basa aton tarasurat kalotoh, 15:16 'Limbah te aku akan dumah tinai,' koan Tuhan, 'Aku kareh mamangun haluli human Dawid je jari baduroh, tuntang mangambuah kadurohe te, palus mampendenge haluli; 15:17 uka oloh samandiai je batisa te manggau Tuhan, haya-hayak dengan utus oloh handiai je dia Yehudi je jari intehauku uka manjadi oloh ayungku.' Kalote auh Tuhan, 15:18 je jari mansanan hal te bara jaman horan." 15:19 "Jadi manumon tirok ayungku," koan Yakobus, "itah dia tau manyusah kare oloh je dia Yehudi je manyarah arepe akan Hatalla. 15:20 Tapi itah musti manampa surat akan ewen tuntang manasehat ewen uka ewen ela kuman panginan je jari inyarungan akan taloh, atawa kuman isin meto je matei inyekak, atawa kuman daha. Tuntang kea uka ewen mangejau arepe bara kare gawi harayap. 15:21 Basa hukum Moses jari bara horan imbasa hong genep andau Sabat intu kare huma sombayang, tuntang imbarita hong kare lewu." 15:22 Kare rasul tuntang kare pamimpin, haya-hayak dengan kare hapus anak ungkup te mamutus handak mintih pire-pire biti bara marak ewen je kareh inyoho manalih Antiokhia haya-hayak dengan Paulus tuntang Barnabas. Maka ewen mintih Silas tuntang Yudas je inyewut kea Barsabas. Kadadue oloh toh uras oloh je basewut hong marak kare oloh percaya hong Yerusalem. 15:23 Haya-hayak dengan kare oloh sarohan te ewen mampait kea ije kalambar surat je auh intu huange te kalotoh, "Akan kare pahari samandiai je asale bara utus beken je dia Yehudi, je melai hong Antiokhia, Siria tuntang Kilikia. Tabe bara ikei, kare rasul tuntang kare pamimpin, iete kare paharin keton. 15:24 Ikei jari mahining je aton pire-pire oloh bara marak ikei je jari haguet manalih keton tuntang mahancur hayak mambingung keton hapan auh ajar ewen. Padahal ikei dia manyoho ewen malalus hal te. 15:25 Jete sababe ikei jari barunding tuntang ikei samandiai pakat uka mintih pire-pire biti tuntang manyoho ewen manalih keton. Ewen kareh haguet haya-hayak dengan pahari Barnabas tuntang Paulus je inyinta ikei. 15:26 Kadadue oloh toh uras oloh je jari mayarah pambelome tagal Tuhan itah Yesus Kristus. 15:27 Jadi, ikei manyoho Yudas tuntang Silas manalih kare pahari. Ewen kabuat ih kareh manyampai akan keton hapan auh barita je tarasurat huang surat toh kea. 15:28 Roh Hatalla jari manyoho -- tuntang ikei samandiai kea pakat -- uka keton ela mananggong kare taloh je babehat bara kare kapatut gawi je perlu toh: 15:29 ela kuman panginan je jari inyarah akan taloh; ela kuman daha, ela kuman isin meto je matei inyekak, tuntang keleh mangejau arep bara kare taloh harayap. Amon keton mangejau arep bara kare hal te, keton jari malalus taloh bahalap. Tikas te, salamat!" 15:30 Limbah mansanan permisi, ewen je inyoho te haguet akan Antiokhia. Hong hete ewen mantehau hapus anak ungkup hapumpong palus manyampai surat te. 15:31 Katika kare anak ungkup te mambasa surat te, ewen hanjak toto dengan auh surat te je mampahanjak atei ewen. 15:32 Yudas tuntang Silas te uras nabi kea, tahi ewen te hakotak dengan kare pahari oloh percaya hong Antiokhia te uka manenga auh je mampamenteng atei ewen. 15:33 Limbah Yudas tuntang Silas melai hete pire-pire katahie, kare oloh percaya hong Antiokhia te mampait ewen haluli tuntang manyoho ewen manyampai tabe akan kare oloh je manyoho ewen. 15:34 Tapi Silas manukas uka tetep melai hong Antiokhia. 15:35 Paulus tuntang Barnabas kea melai pire-pire katahie hong Antiokhia. Hong hete ewen majar tuntang mambarita auh Tuhan haya-hayak dengan oloh are je beken. 15:36 Dia tahi limbah te Paulus hamauh dengan Barnabas, "Has itah haluli manyengok kare pahari je percaya dengan Yesus hong kakare lewu eka itah jari mambarita auh Tuhan; mangat itah mite kilen ampie kaadaan ewen." 15:37 Barnabas mipen mimbit Yohanes Markus, 15:38 tapi Paulus mangkeme dia bahalap mimbit Markus, je dia maku bagawi pakat dengan ewen tuntang jari malihi ewen hong Pampilia. 15:39 Maka Paulus tuntang Barnabas paham hakaridu sampai kajariae ewen hapisah: Barnabas mimbit Markus tuntang balayar dengae akan Siprus. 15:40 Paulus mimbit Silas haguet dengae limbah kare pahari intu Antiokhia te manyarah ewen akan asin Tuhan. 15:41 Ewen kea mangaliling Siria tuntang Kilikia; intu hete ewen mampaabas kare ungkup.
16:1 Paulus marajur panjalanae akan Derbe, limbah te akan Listra. Intu hete aton ije biti murid Yesus je bagare Timoteus. Indue oloh Yehudi, je percaya dengan Yesus; tapi bapae oloh Yunani. 16:2 Bara marak kare oloh percaya je melai hong Listra tuntang Ikonium, Timoteus ingasene puna ie oloh bahalap. 16:3 Paulus handak mangat Timoteus omba ie; tagal te ie manyunat Timoteus. Ie malalus jete awi kare oloh Yehudi hong daerah te uras katawan je bapa Timoteus te oloh Yunani. 16:4 Hong genep lewu je inalih ewen, ewen manyampai akan kare oloh percaya kare kaputusan je jari inukas awi kare rasul tuntang kare pamimpin hong Yerusalem, ewen manasehat kare pahari je jari percaya uka manumon kare atoran te. 16:5 Maka kare ungkup te sasar dehen kapercayae, tuntang genep andau sasar mandahang karee. 16:6 Roh Hatalla dia manyoho Paulus tuntang Silas mambarita auh Hatalla hong propinsi Asia. Jadi jalanan ewen te irajur akan Prigia tuntang Galatia. 16:7 Katika sampai hong helat watas dengan Misia, ewen mancoba tame akan propinsi Bitinia, tapi Roh Yesus mangahana ewen akan hete. 16:8 jadi ewen manyaroroi Misia tuntang balalu akan Troas. 16:9 Alem te tinai hong Troas, Paulus mite ije taloh tampayah. Hong tampayahe te ie mite ije biti oloh Makedonia mendeng intu hila baue hayak balaku nyame-nyame uka ie haguet akan Makedonia mangat mandohop ewen. 16:10 Limbah Paulus mite taloh tampayah te, ikei balalu tata-tatap uka haguet akan Makedonia. Basa huang kapercaya, ikei marima Hatalla manyoho ikei mansanan Barita Bahalap te akan kare oloh hong hete. 16:11 Ikei malihi Troas tuntang balalu balayar akan Samotrake, tuntang andau jewue akan Neapolis. 16:12 Bara hete ikei akan Pilippi, ije lewu hong wilayah je pangkasolake hong Makedonia. Pilippi te jajahan karajaan Roma. Intu hete ikei melai pire-pire andau. 16:13 Hong andau Sabat ikei haguet akan saran sungei intu luar bauntonggang lewu, awi ikei mangkeme intu hete aton eka sombayang akan oloh Yehudi. Palus ikei mondok tuntang pande-pander dengan kare oloh bawi je hapumpong hong eka te. 16:14 Ije bara ewen te tukang jual benang ungu, arae Lidia, asale bara Tiatira. Ie sinta Hatalla, maka Tuhan manggerek ateie sampai ie manarima taloh je iajar Paulus. 16:15 Lidia tuntang kare oloh hapus humae impandoi, ie marawei ikei. Ie hamauh, "Amon puna pahari mangkeme aku puna toto-toto jari percaya dengan Yesus, has keleh manyandehan intu humangku." Palus ie hajajuan ikei uka manumon auh palakue. 16:16 Hong sinde andau katika ikei haguet akan eka balakudoa, ikei hasondau dengan ije biti oloh bawi; ie te jipen. Oloh bawi te inguasa awi roh setan je tau manujum kare kajadian je akan manjadi rahian andau. Awie manujum nasib oloh, oloh te mimbit are ontong akan tempoe. 16:17 Oloh bawi te manuntut Paulus tuntang ikei kea, hayak teha-tehau, "Kare oloh toh jipen Hatalla je pangkahai! Ewen dumah uka mansanan akan kare pahari kilen ampie cara keton tau salamat!" 16:18 Pire-pire andau katahie oloh bawi te harajur teha-tehau kilau te. Paulus balalu nihau kasabare, sampai ie tampaliau palus hamauh dengan roh te, "Huang aran Tuhan Yesus Kristus aku manyoho ikau balua bara oloh bawi toh!" Hemben te kea roh te malihi oloh bawi te. 16:19 Katika kare tempoe mangkeme ewen jaton jalan hindai uka dinon duit, ewen manawan Paulus tuntang Silas, palus mihir ewen due akan alun-alun manaharep oloh je berwajib. 16:20 Ewen mimbit Paulus dengan Silas manaharep kare pejabat pamarentah Roma, limbah te hamauh, "Oloh toh oloh Yehudi. Ewen manderoh hong lewun itah. 16:21 Ewen manantiring oloh uka malalus hadat je hakalawan dengan kare atoran ain itah oloh Roma. Itah dia olih manarima atawa manumon hadat jete!" 16:22 Oloh are mahin omba mamok Paulus tuntang Silas; tuntang kare pejabat pamarentah marabit pakaian bara bitin kadadue rasul te palus manyoho oloh mahewes ewen due hapan cambuk. 16:23 Limbah ewen ihewes paham, ewen inamean akan huang penjara. Kapala penjara inyoho uka manjaga ewen toto-toto. 16:24 Tagal parentah te, kapala penjara te manahan ewen intu kamar penjara je paling huang, tuntang mamangkur pain ewen hapan balok. 16:25 Kurang labih bentok alem Paulus tuntang Silas metoh balakudoa tuntang manyanyi nyanyi tara akan Hatalla. Kare oloh tahanan je beken mahin manyeneh ewen manyanyi. 16:26 Maka petak manantekas hagerek paham sampai laseh penda penjara te mahin hongge. Uras bauntonggang penjara te buap tuntang kare rantai je hapan mamasong kare oloh tahanan mahin bengkak. 16:27 Kapala penjara te misik tarewen. Katika ie mite kare bauntonggang penjara te buap, ie manyilak padang handak mampatei arepe awi ie manyangka kare oloh tahanan te jari uras hadari. 16:28 Tapi Paulus mangkariak salepah angate, "Ela mampatei arepm! Ikei magon aton intu hetoh!" 16:29 Kapala penjara te balaku sumbo palus hadari akan huang, tuntang hayak hagenjeh ie hajarungkup intu taharep Paulus tuntang Silas. 16:30 Limbah te ie mimbit ewen balua tuntang hamauh, "O kare tuan, en je musti iawiku mangat aku inyalamat?" 16:31 Paulus tuntang Silas tombah, "Keleh percaya dengan Tuhan Yesus! Ikau kareh salamat -- ikau tuntang kakare oloh je intu humam!" 16:32 Palus Paulus tuntang Silas manarang auh Tuhan akan kapala penjara te tuntang akan oloh handiai je aton intu humae. 16:33 Hong bentok alem te kea kapala penjara te mimbit ewen palus marasih kare himang ewen. Maka ie tuntang oloh handiai je intu humae balalu impandoi. 16:34 Limbah te ie mimbit Paulus tuntang Silas akan humae tuntang manyarungan panginan akan ewen. Ie tuntang hapus keluargae hanjak toto basa ewen toh percaya dengan Hatalla. 16:35 Hanjewu jewue tinai, kare pejabat pamarentah Roma manyoho Polisi akan penjara uka manyampai parentah mangat Paulus tuntang Silas ilapas. 16:36 Kapala penjara te mansanan hal te akan Paulus. Ie hamauh, "O kare Tuan, kare pejabat pamarentah jari manenga parentah uka malapas kare tuan. Toh tuan-tuan tau buli, Salamat jalan!" 16:37 Tapi Paulus hamauh dengan kare petugas polisi te, "Ikei warga negara Roma. Jaton mahalau sidang, ikei jari ihewes hapan cambuk intu bentok umum tuntang inamean akan huang penjara. Tuntang toh ewen manyoho ikei haguet suni-suni? Ikei dia maku! Soho kare pejabat pamarentah te dumah akan hetoh malapas ikei." 16:38 Kare kepala polisi te malapor hal te akan kare pejabat pamarentah Roma. Katika kare pejabat te mahining Paulus ewen due Silas te warga negara Roma, ewen manjadi mikeh. 16:39 Palus ewen haguet balaku maap dengan Paulus tuntang Silas, limbah te magah ewen due balua bara penjara, hayak balaku uka ewen haguet bara lewu te. 16:40 Paulus tuntang Silas malihi penjara te palus haguet akan human Lidia. Limbah hasondau dengan kare oloh percaya hong hete, tuntang manenga semangat akan ewen, Paulus tuntang Silas haguet.
17:1 Paulus tuntang Silas marajur jalanan ewen mahalau Ampipolis tuntang Apolonia palus sampai hong Tesalonika. Intu hete aton huma sombayang oloh Yehudi. 17:2 Maka Paulus haguet kea akan huma sombayang te kilau gawie bahut amon aton huma sombayang oloh Yehudi -- palus hapander-sarita dengan kare oloh intu hete tahiu kare ayat Surat Barasih. Ie mawie kalote huang telo andau Sabat rai-rait. 17:3 Hagalang kare ayat Surat Barasih te ie manarang tuntang mambuktie iete Raja panyalamat je injanji Hatalla perlu buah kapehe tuntang belom haluli bara pampatei. "Yesus je imbaritaku akan keton, ie te Raja Panyalamat je injanji," koan Paulus. 17:4 Pire-pire oloh manjadi percaya tuntang palus omba Paulus tuntang Silas; kalote kea kare oloh Yunani are toto, tuntang oloh je mikeh dengan Hatalla, tuntang are tinai oloh bawi je basewut. 17:5 Tapi kare oloh Yehudi bahiri ateie. Ewen mantehau kare oloh je dia baramana lakau jalan tuntang mamumpong ewen mawi karidu. Palus ewen manderoh oloh lewu tuntang mamok human ije biti oloh percaya bagare Yason uka manggau Paulus tuntang Silas, basa ewen handak mimbit Paulus tuntang Silas balua manaharep oloh are. 17:6 Tapi katika ewen jaton sondau Paulus tuntang Silas, ewen mihir Yason tuntang pire-pire oloh percaya je beken uka manaharep kare pejabat je mimbing kuasa hong lewu te. Ewen mangkariak, "Kare oloh toh mangacau hong hete-hete! Toh, lewun itah mahin inalih ewen, 17:7 tuntang Yason jari manarima ewen huang humae. Ewen uras malanggar kare parentah je inatap awi Kaisar Roma, awi ewen manyewut tege hindai raja beken je bagare Yesus." 17:8 Hapan kare auh te ewen mawi kare oloh are tuntang kare panguasa lewu te manjadi geger. 17:9 Palus kare panguasa te manyoho Yason tuntang kare oloh percaya je beken te mambayar duit jaminan. Limbah te harun ewen ilapas. 17:10 Alem te kare oloh percaya hong lewu te manyoho Paulus tuntang Silas haguet akan Berea. Sana sampai hete, Paulus tuntang Silas haguet akan huma sombayang Yehudi. 17:11 Kare oloh hong Berea labih murah harati bara kare oloh hong Tesalonika. Dengan kahanjak atei ewen mahining barita tahiu Yesus, tuntang genep andau ewen mariksa Surat Barasih uka mangatawan en auh ajar Paulus te toto bujur. 17:12 Are bara kare ewen te percaya dengan Yesus, tuntang dia isut kea kare oloh Yunani je basewut percaya; aloh bawi atawa hatue. 17:13 Katika kare oloh Yehudi hong Tesalonika mahining Paulus mambarita kea auh Hatalla hong Berea, ewen dumah kea akan Berea tuntang manantiring hayak mawi kare oloh intu hete manjadi gogop. 17:14 Maka bajeleng kare pahari hong Berea te magah Paulus akan pantai, tapi Silas tuntang Timoteus tetep melai huang lewu te. 17:15 Limbah magah Paulus sampai akan Atena, kare pahari te haluli akan Berea hayak mimbit peteh bara Paulus uka Silas tuntang Timoteus manuntut ie bajeleng. 17:16 Pandehan Paulus mentai Silas tuntang Timoteus hong Atena, ateie kapehe mite lewu te kontep awi kare hampatong dewa. 17:17 Tagal te hong huma sombayang, Paulus hapander-sarita dengan kare oloh Yehudi tuntang kare oloh je beken je manyembah Hatalla hong hete. Kalote kea hong kare pasar genep andau ie hapander-sarita dengan gagenep oloh je aton intu hete. 17:18 Kare guru bara aliran Epikorus tuntang aliran Stoa hasoal kea dengae. Pire-pire bara ewen hamauh, "En oloh toh? Pangatawae baya isut, tapi ie are nyamae!" Pire-pire oloh je beken hamauh, "Ampie ie te mambarita tahiu kare dewa bara utus beken." Ewen hamauh kalote awi Paulus hakotak tahiu Yesus tuntang tahiu oloh je belom haluli limbah matei. 17:19 Palus ewen mimbit Paulus akan pumpong hong Bukit Areopagus. Intu hete ewen hamauh dengae, "Ikei handak katawan auh ajar taheta je imbaritam te. 17:20 Basa ikau mansanan kare hal te je beken auhe huang pinding ikei. Awi te ikei handak katawan rimae." 17:21 (Kakare oloh hong Atena tuntang kare oloh tamuei je melai intuhete rajin toto mahapan katika ewen mangat mahining tuntang hakotak tahiu kare taloh je taheta.) 17:22 Katika Paulus mendeng intu taharep kare oloh je hapumpong intu Areopagus te, Paulus hamauh, "O kare oloh Atena! Huang kakare hal gitangku keton toh puna baagama toto. 17:23 Basa katika aku tanjo-tanjong kaliling lewun keton tuntang manantuani kare eka keton sombayang, aku mite kea ije eka maluput parapah; intu eka te tarasurat, 'Akan Hatalla Je Dia Kasenan.' Nah, Hatalla je inyembah keton tapi dia keton kasenee, jete ie je imbaritaku akan keton. 17:24 Hatalla je manjadian kalunen toh dengan kare taloh huange, jete Tuhan je mahunjun langit tuntang petak. Ie dia melai intu huang kare human dewa je inampa awi olon. 17:25 Dia kea ie manggau pandohop oloh kalunen, basa ie te je manenga pambelom tuntang tahaseng tuntang kare taloh handiai akan olon. 17:26 Bara ije biti olon ie manampa kare utus oloh tuntang manyoho ewen melai hong hapus kalunen. Ie kea je manukase bara solake, hamparea tuntang hong kueh ewen tau belom. 17:27 Hatalla malalus jete mangat ewen manggau ie. Mudah-mudahan ewen tau sondau ie katika ewen manggau ie. Tapi sapunae Hatalla te dia kejau bara genep bitin itah. 17:28 Kilau koan oloh bahut, 'Itah belom tuntang miar tuntang aton hong kalunen toh awi kuasan ayue.' Sama ih dengan je insanan awi kare tukang panyair ain keton. Koan ewen, 'Itah samandiai toh uras anak ayue.' 17:29 Nah, awi itah toh uras anak Hatalla, itah dia tau manirok Hatalla sama kilau hampatong amas atawa perak atawa batu je inampa awi olon. 17:30 Jaman kahumong itah je helo te jari ingalapean awi Hatalla, tapi toh ie manyoho oloh handiai hong hapus kalunen toh hobah bara kare dosan ewen. 17:31 Basa ie jari manukas ije katika uka mamutus perkaran oloh hapus kalunen toh dengan adil. Gawi te akan ilalus awi ije biti oloh je jari iintih Hatalla akan hal te. Tuntang mangat oloh handiai percaya dengan hal te, Hatalla jari mambelom haluli oloh te bara pampatei!" 17:32 Katika kare oloh te mahining tahiu pambelom haluli limbah pampatei, aton bara ewen je manantawe Paulus. Aton kea je hamauh, "Ikei mipen pahari hakotak hindai tahiu hal te." 17:33 Palus Paulus malihi pumpong te. 17:34 Tapi aton bara ewen je omba pihak Paulus tuntang percaya dengan Yesus, paribasae: Dionisius anggota majelis Areopagus, tuntang ije biti oloh bawi bagare Damaris, tuntang pire-pire oloh beken tinai.
18:1 Limbah te Paulus malihi Atena tuntang haguet akan Korintus. 18:2 Intu hete ie hasondau dengan ije biti oloh Yehudi bagare Akwila, asale bara Pontus. Akwila harue kea dumah bara Italia dengan kabalie Priskila. Ewen dumah akan Korintus awi Kaisar Klaudius jari manyoho kakare oloh Yehudi balua bara Roma. Paulus haguet manalih maja ewen due, 18:3 palus melai intu hete dengan ewen tuntang bagawi hinje dengan ewen, awi gawin satiar ewen te sama dengan Paulus, iete manampa tingkap benang. 18:4 Tapi hong genep andau Sabat Paulus haguet hapander-hasarita huang huma sombayang mangat kare oloh Yehudi tuntang kare oloh Yunani tau percaya dengan Yesus. 18:5 Limbah Silas tuntang Timoteus dumah bara Makedonia, Paulus mangguna kare katikae hapan mangabar barita bara Hatalla akan kare oloh Yehudi iete Yesus te Raja Panyalamat je injanji awi Hatalla. 18:6 Tapi awi kare oloh harajur malawan tuntang manida, maka Paulus mangibas kawo bara pakaiae kilau tanda uka mampingat ewen tahiu kasalan ewen. Ie hamauh, "Amon keton calaka, jete kasalan keton kabuat! Aku lapas tangan! Nampara bara wayah toh aku manalih oloh je dia Yehudi." 18:7 Palus Paulus malihi ewen tuntang haguet melai intu huma je hila silan huma sombayang te. Huma te human oloh je dia Yehudi, tapi oloh te manyembah Hatalla. Aran oloh te Titus Yustus. 18:8 Tapi Krispus kapala huma sombayang te tuntang hapus keluargae percaya dengan Tuhan Yesus. Tuntang are kare oloh Korintus je beken mahining barita je inyampai awi Paulus, tuntang ewen percaya dengan Yesus palus impandoi. 18:9 Sinde hong hamalem, hong ije taloh tampayah, Tuhan hamauh dengan Paulus, "Ela mikeh! Hakotak ih tarus tuntang ela suni. 18:10 Basa aku mampahayak ikau. Ije biti mahin jaton oloh tau malalus kapapa mawi ikau, awi are oloh hong lewu toh jari manjadi oloh Ayungku." 18:11 Tagal te Paulus melai hong Korintus ije satengah nyelo katahie tuntang majar auh Hatalla akan ewen. 18:12 Katika Galio manjadi gubernur Akhaya, kare oloh Yehudi bulat malawan Paulus tuntang mimbit ie akan pangadilan. 18:13 Ewen mangado ie kalotoh auhe, "Oloh toh manantiring oloh are uka manyembah Hatalla mahapan cara je hakalawan dengan hukum Moses!" 18:14 Sana Paulus handak tombah, Galio jari hamauh dengan kare oloh Yehudi, "O kare oloh Yehudi! Amon taloh je ingado keton toh tahiu gawi papa atawa gawi malanggar, puna patut ih aku sabar mahining auh kadon keton toh. 18:15 Tapi toh, jetoh kalahin kotak pander tahiu kare aran tuntang kare atoran ain keton kabuat! Jadi keton ih mauruse sampai lepah. Aku kaberatan mamutus kare perkara je macam toh!" 18:16 Palus Galio maharak ewen balua. 18:17 Maka ewen manawan Sostenes, kapala huma sombayang te, tuntang mamukul ie intu taharep meja pangadilan. Tapi Galio dia paduli hal te. 18:18 Limbah te Paulus magon tahi melai hong Korintus. Rahian tinai ie manyewut salamat melai akan kare oloh percaya hong hete, palus balayar dengan Priskila tuntang Akwila akan Siria. Hong Kengkrea, Paulus manggunting balaue je jari inaluae manjadi panjang awi hajate dengan Tuhan. 18:19 Katika sampai hong Epesus, Paulus malihi Priskila tuntang Akwila, palus tame akan huma sombayang tuntang hapander-sarita dengan kare oloh intu hete. 18:20 Ewen balaku uka ie melai labih tahi hindai dengan ewen, tapi ie dia maku. 18:21 Aloh kalote, katika handak haguet, ie hamauh, "Amon Hatalla manyoho, aku handak haluli tinai akan hetoh." Limbah hamauh kalote, ie haguet bara Epesus. 18:22 Limbah mohon intu Kaisarea, ie haguet akan Yerusalem uka manabe kare ungkup intu hete, palus miar akan Antiokhia. 18:23 Limbah pire-pire katahie melai intu hete, ie haguet tinai manalih maja daerah Galatia tuntang Prigia uka mampaabas kapercayan kare oloh Kristen. 18:24 Pandehan te, dumah ije biti oloh Yehudi bara Aleksandria, arae Apolos. Ie pintar hakotak tuntang harati toto tahiu auh huang Surat Barasih, 18:25 tuntang jari iajar uka mangasene auh ajar tahiu Yesus. Maka hapan kahandak je hai ie majar dengan titip tahiu Yesus, aloh ie baya harue mangasene pampandoi Yohanes bewei. 18:26 Dengan kahanyie Apolos nampara hakotak hong huma sombayang tuntang katika Priskila tuntang Akwila mahining auh ajare, ewen mimbit ie akan huma. Intu hete ewen manarang akae je labih kana hindai tahiu rencana ain Hatalla uka manyalamat olon mahalau Yesus. 18:27 Rahian tinai Apolos handak haguet akan Akhaya. Maka kare oloh je percaya dengan Yesus hong Epesus manyurat akan kare pahari, oloh percaya kea hong Akhaya mangat ewen tau manarima Apolos. Tuntang katika Apolos sampai hong Akhaya, maka gitan toto pandohop ayue paham baguna akan kare oloh je awi asin Hatalla jari percaya dengan Yesus. 18:28 Basa impahayak awi pangaruhe je paham, Apolos mampakalah kare oloh Yehudi huang kare soal-jawab intu bentok umum. Tuntang ie mambuktie mahapan kare ayat bara Surat Barasih tahiu Yesus Raja Panyalamat je injanji.
19:1 Pandehan Apolos aton hong Korintus, Paulus metohe mangumbang pedalaman daerah te palus sampai hong Epesus. Intu hete ie hasondau dengan pire-pire oloh je jari percaya dengan Yesus. 19:2 Ie misek dengan ewen, "En jari kare pahari manarima Roh Hatalla katika keton percaya dengan Yesus?" Ewen tombah, "Hindai. Mahining tahiu Roh Hatalla te mahin hindai puji." 19:3 "Amon kalote, hapan pampandoi en keton impandoi?" koan Paulus misek. "Hapan pampandoi Yohanes," koan ewen tombah. 19:4 Palus Paulus hamauh, "Yohanes mampandoi oloh uka mamparahan je oloh te jari hobah bara kare dosae. Tapi hemben te kea Yohanes mansanan akan kare oloh Israel iete ewen te musti percaya dengan oloh je kareh dumah rahian bara ie, ie te Yesus." 19:5 Katika ewen mahining jete, ewen impandoi huang aran Yesus. 19:6 Tuntang katika Paulus mina lengee intu hunjun ewen, Roh Hatalla manguasa ewen, palus ewen nampara hakotak hong kare basa je aneh hayak manyampai barita bara Hatalla. 19:7 Jumlah ewen te samandiai aton kurang labih due walas biti. 19:8 Katahin telo bulan Paulus harajur hakotak huang kahanyie dengan kare oloh hong huma sombayang tuntang hapander-sarita dengan ewen uka mayakin ewen tahiu kilen ampie Hatalla marentah kilau Raja. 19:9 Tapi pire-pire bara kare oloh te batekang ateie tuntang dia maku percaya. Intu taharep oloh handiai je hapumpong hete ewen manida auh ajar tahiu rencana Hatalla uka manyalamat olon mahalau Yesus. Tagal te Paulus malihi ewen palus haguet dengan kare murid Yesus akan eka kuliah Tiranus. Intu hete genep andau ie mawi tanya-jawab dengan kare oloh. 19:10 Katahin due nyelo ie malalus hal te raju-rajur sampai kakare oloh je melai hong propinsi Asia, aloh oloh Yehudi atawa oloh utus beken, rata mahining auh Tuhan. 19:11 Hatalla manampa taloh heran je luar biasa mahalau Paulus. 19:12 Amon oloh mimbit saputangan atawa benang peteng kahang je puji ihapan Paulus palus oloh mahapan jete akan oloh haban, maka panyakit ewen te nihau tuntang roh setan mahin balua bara ewen. 19:13 Aton pire-pire dukun Yehudi je haguet akan hete-hete, maharak roh papa bara kare oloh. Kare dukun te mancoba kea mahapan aran Tuhan Yesus uka maharak kare roh setan te, "Huang aran Yesus je imbarita awi Paulus te, aku maharak keton!" 19:14 Aton uju anak hatue ain ije biti imam kapala, bagare Skewa, je mawi taloh kilau te. 19:15 Tapi roh setan te hamauh dengan ewen, "Aku kasene Yesus tuntang Paulus mahin kasenangku, tapi keton toh eweh?" 19:16 Palus oloh je irasuk setan te manangkero tuntang manangkarap ewen hayak basiak toto ampie sampai ewen hadari bara huma te marak bahimang tuntang halowai, awi pakaian ewen irabit bara bitin ewen. 19:17 Kakare oloh Yehudi tuntang utus oloh beken je melai intu Epesus mahining tahiu kajadian te, palus ewen manjadi mikeh. Maka aran Tuhan Yesus sasar inara oloh. 19:18 Are oloh je jari percaya dengan Yesus dumah mangaku hong taharep oloh are tahiu kare gawin ewen hong katika je jari halau. 19:19 Tuntang ewen je mawi kare kaji, mamumpong kare buku kajin ewen tuntang mamapui jete intu taharep oloh are. Regan kare buku te amon injumlah samandiaie aton kurang labih lime puluh koyan duit perak. 19:20 Hapan cara je tamam kalote auh Tuhan sasar tayap tuntang pangaruhe sasar dehen. 19:21 Limbah kare kajadian te, Paulus manukas uka haguet akan Makedonia tuntang Akhaya palus miar akan Yerusalem. "Limbah akan hete," koan Paulus, "aku musti haguet akan Roma kea." 19:22 Maka ie manyoho due biti bara kare oloh je melai dengae, ie te Timoteus tuntang Erastus uka haguet akan Makedonia pandehan ie melai pire-pire katahie hindai hong propinsi Asia. 19:23 Kurang labih hong katika te maka lembut karidu je paham hong Epesus tagal auh ajar tahiu Yesus. 19:24 Basa hong lewu te aton ije biti tukang perak je bagare Demetrius je manampa pasah dewa Artemis. Satiar oloh te mimbit hasil je hai akan kare gawie. 19:25 Tagal te ie mamumpong kare oloh je bagawi akae sama-sama dengan kare panggawi tukang perak je beken te, palus ie hamauh, "Pahari handiai! Pahari katawan itah mandino hasil bara gawi toh. 19:26 Nah, toh pahari jari mite tuntang mahining kabuat taloh je iawi oloh je bagare Paulus te. Ie mansanan kare dewa je inampa awi olon, samasinde dia dewa. Tuntang ie jari bahasil mimbit are oloh percaya dengan auh ajare, dia baya intu Epesus toh bewei, tapi handak hapus daerah Asia toh kea. 19:27 Bahayae toh iete satiar itah toh kareh mandino aran je dia bahalap. Tuntang dia baya jete, tapi human dewa Artemis kea kareh inawah oloh tuntang kahaie irusak oloh; padahal ie te dewa je inyembah awi oloh handiai hong Asia tuntang hapus kalunen!" 19:28 Sana kare oloh te mahining jete, atei ewen manjadi balasut, palus ewen mangkariak, "Belom ikau Artemis, dewa bawi ain oloh Epesus!" 19:29 Maka karidu te miar sampai akan hapus lewu. Limbah te kare kawan parusoh te manawan Gayus tuntang Aristarkhus, iete kare oloh Makedonia je omba mandengan Paulus huang jalanae, palus mihir ewen akan lapangan lewu te. 19:30 Paulus handak tame manalih ewen tapi kare oloh je percaya dengan Yesus hong hete mangahana ie. 19:31 Pire-pire oloh hai propinsi Asia te je hasobat dengan Paulus, mahin manyoho kea oloh uka mansanan akan Paulus mangat ela ie mamparahan arepe intu lapangan te. 19:32 Pandehan te kare oloh je hapumpong hong lapangan te manjadi rusoh. Aton je mangkariak kalotoh, aton je mangkariak kalote, basa tapa-are bara ewen te dia katawan akan en ewen te hapumpong hete. 19:33 Belahe bara ewen te manyangka Aleksander je mawi buku sabab te, basa ie je inggian akan baun oloh Yehudi. Maka Aleksander manenga tanda hapan lengee balaku katika uka mambela arepe hong taharep kare oloh te. 19:34 Tapi sana ewen mite ie te oloh Yehudi, dere-derep ewen te mangkariak hai auhe, "Belom ikau Artemis, dewa bawi ain oloh Epesus!" 19:35 Kajariae sekretaris lewu te olih kea mampasuni oloh are te. Ie hamauh, "Oloh lewu Epesus! Genep biti uras katawan je Epesus toh lewu je mahaga human dewa Artemis tuntang batu keramat je manjato bara langit. 19:36 Ije biti mahin jaton oloh je tau mambantah hal te. Tagal te keleh itah benyem tuntang ela malalus taloh hapan cara je kamaha. 19:37 Kare oloh toh iimbit keton akan hetoh dia tagal awi ewen jari marampok human dewa atawa awi ewen jari mahina dewan itah. 19:38 Amon Demetrius tuntang kare oloh je bagawi akae te aton taloh je handak ingadoe mawi oloh, keleh ewen mimbit perkara te akan pangadilan. Pangadilan puna tatap-sadia akan hal te tuntang kare pejabat pamarentah mahin harajur aton. 19:39 Tapi amon magon aton hindai taloh beken je ingahandak keton, jete musti impahapus huang rapat umum je sah. 19:40 Basa taloh je manjadi hong andau toh tau mawi bahaya akan itah. Itah tau indawa oloh mawi pamberontakan, awi itah jaton bara buku sabab tau mambujur arep itah tahiu karidu toh." 19:41 Limbah mansanan auh te samandiai, sekretaris lewu te manyoho oloh are te buli.
20:1 Limbah kaadaan hong Epesus te benyem haluli, Paulus mamumpong ungkup tuntang manenga semangat akan ewen. Limbah te ie manyewut salamat melai palus marajur jalanae akan Makedonia. 20:2 Ie manalih kare daerah Makedonia tuntang are manenga nasehat akan kare oloh je percaya dengan Yesus hong hete mangat manenga semangat akan ewen. Limbah te ie haguet akan Yunani. 20:3 Telo bulan katahie ie melai intu hete. Palus katika ie metoh manatap arepe handak balayar akan Siria, aton kabar oloh Yunani handak mampatei ie. Tagal te ie mamutus uka haluli mahalau Makedonia. 20:4 Sopater anak Pirus asal bara Berea haguet haya-hayak dengae; kalote kea Aristarkhus tuntang Sekundus oloh Tesalonika, tuntang Gayus oloh Derbe. Tuntang kea Timoteus, Tikhikus tuntang Tropimus, kare oloh bara Propinsi Asia. 20:5 Ewen helo bara ikei palus mentai ikei hong Troas. 20:6 Limbah Pesta Rote Dia Iragi, ikei balayar malihi Pilippi. Lime andau limbah te ikei hapumpong tinai dengan ewen hong Troas. Intu hete ikei melai ije minggo katahie. 20:7 Alem minggo ikei hapumpong uka kuman haya-hayak sama kilau oloh hampahari. Paulus pande-pander dengan kare oloh, basa andau jewue tinai ie handak haguet. Sampai bentok alem Paulus magon kea hakotak. 20:8 Hong kamar huma susun je hunjun ikei hapumpong te, aton are sumbo. 20:9 Ije biti pemuda bagare Eutikhus mondok intu baunsengok. Awi Paulus jaton tende-tende kea hakotak, pemuda te palus mangantok toto sampai ie tapatiroh hong baunsengok te, palus manjato akan penda bara susun je kateloe. Metoh ewen manggatang ie, ie matei. 20:10 Tapi Paulus mohon akan penda mampalihang arepe hunjun pemuda te tuntang mamalok ie. Paulus hamauh, "Ela mikeh, ie magon belom!" 20:11 Rahian tinai Paulus mambagi rote tuntang kuman haya-hayak. Limbah tahi hakotak dengan kare oloh sampai hanjewu, Paulus haguet. 20:12 Kare oloh mimbit pemuda te buli belom akan humae. Ewen paham hanjak tuntang paham iampong. 20:13 Ikei haguet akan kapal palus balayar helo akan Asos uka manduan Paulus akan kapal hete. Ie jari mator kalote awi ie akan hete mahalau jalan hunjun petak. 20:14 Limbah hasondau hong Asos, Paulus bajeleng lumpat kapal palus ikei balayar akan Mitilene. 20:15 Bara hete ikei balayar tinai, tuntang andau jewue ikei sampai hong eka je hatandipah dengan Khios. Limbah andau jewue tinai ikei sampai intu Samos tuntang ije andau limbah te hong Miletus. 20:16 Paulus jari manukas uka dia tende hong Epesus, mangat ela manganan katika hong daerah Asia. Saoli-olih ie handak bajeleng sampai hong Yerusalem hong andau Pesta Pentakosta. 20:17 Bara Miletus Paulus mampait kabar akan Epesus uka balaku kare pamimpin ungkup hete mangat manyondau ie. 20:18 Katika ewen sampai, Paulus hamauh dengan ewen, "Pahari handiai katawan kilen ampie aku belom katahin toh hong marak keton bara andau je solake aku sampai hong Asia. 20:19 Dengan karandah atei tuntang hapan kare danum mata aku bagawi akan Tuhan hong marak kare kapehe je buah aku awi rencana papa ain are oloh Yehudi. 20:20 Pahari katawan je aku dia langkamen mansanan akan keton taloh je baguna akan keton. Aku majar keton huang kare pumpong oloh are tuntang huang kare huma. 20:21 Aloh akan kare oloh Yehudi kalote kea akan kare oloh utus beken aku harajur manenga pampingat uka ewen hobah bara kare dosan ewen tuntang dumah manalih Hatalla, tuntang percaya dengan Tuhan Yesus. 20:22 Toh, awi handak manumon parentah Roh Hatalla, aku haguet akan Yerusalem. Tuntang aku dia katawan en taloh je akan manjadi buah aku hong hete. 20:23 Aku baya katawan hong genep lewu, Roh Hatalla jari tarang batantu mansanan akangku, iete aku kareh tame penjara tuntang akan buah kapehe. 20:24 Tapi aku dia paduli dengan pambelom ayungku toh asal aku tau mahapus gawi je imercaya Tuhan Yesus akangku tuntang asal aku baketep sampai hong lawin pambelomku mangat mangabar Barita Bahalap te tahiu asin Hatalla. 20:25 Aku jari maja manalih kare pahari handiai tuntang jari mambarita kea tahiu kilen ampie Hatalla marentah kilau raja. Toh aku mangkeme dia akan hasondau tinai dengan kare pahari. 20:26 Tagal te aku tukas toto angatku hamauh dengan keton hong andau toh iete amon aton ije biti kareh binasa, jete dia sala aku. 20:27 Dia puji aku hadari bara gawingku uka manarang akan keton kakare rencana ain Hatalla. 20:28 Keleh keton manjaga arep tuntang manjaga kea hapus ungkup je jari inyarah awi Roh Hatalla akan keton uka keton manjagae; basa keton jari iangkat manjadi pangawas akan ungkup te. Keleh keton manjaga ungkup Hatalla te kilau sakatik manjaga tabirie, awi Hatalla jari manjadian ungkup te manjadi ayue kabuat mahalau pampatei Anake kabuat. 20:29 Limbah pangguetku toh pasti kareh dumah kare meto je basiak akan bentok keton. Tuntang kare oloh je injaga keton te manjadi panginan kare meto basiak te. 20:30 Malahan marak kare pahari kabuat mahin kareh lembut kare oloh je mangabar Barita je dia bujur. Ewen mawie kalote uka kare oloh je jari percaya dengan Yesus manjadi layau omba ewen. 20:31 Tagal te rende-rendeng keton! Ingat, telo nyelo katahie hapan are danum mata, handau hamalem aku dia puji tende majar genep bitin keton. 20:32 Toh aku manyarah keton akan Hatalla mangat ie je mahaga keton tuntang mangat keton mimbing barita asin Hatalla. Hatalla tempon kuasa uka mampaabas keton tuntang manenga akan keton kare berkat je jari inatape akan hapus ungkup ayue. 20:33 Hindai puji aku mipen duit atawa pakaian bara eweh bewei. 20:34 Pahari kabuat katawan hapan kaabasku kabuat bagawi hapaku manutup kare kaperluan ayungku tuntang kare kawalku je omba aku. 20:35 Hong kakare perkara aku jari manenga sonto akan keton iete awiku paham bagawi kilau toh, itah musti mandohop oloh je dia abas. Karana itah musti mingat kare taloh je jari insanan Tuhan Yesus kabuat, 'Labih mangat manenga bara manarima.' " 20:36 Limbah Paulus jari lepah hakotak, ie mandeko utute hayak dengan ewen samandiai palus balakudoa. 20:37 Ewen uras manangis sambil mamangkut Paulus tuntang manyewut salamat jalan. 20:38 Ewen kapehe atei je mambatang awi Paulus hamauh ewen dia akan mite ie tinai. Palus ewen magah ie sampai akan kapal.
21:1 Ikei balaku permisi dengan kare pamimpin ungkup Epesus te, limbah te ikei malihi ewen. Palus ikei balayar langsung akan pulau Kos; tuntang andau jewue tinai ikei sampai hong pulau Rodos. Bara hete ikei balayar tarus akan palabohan Patara. 21:2 Intu Patara ikei dinon kapal je handak akan Poinike. Maka ikei lumpat kapal te palus haguet 21:3 tuntang balayar sampai ikei mite pulau Siprus hila silan ikei; tapi ikei balayar tarus manintu Siria. Ikei lumpat hong Tirus, basa intu hete kapal je impahayak ikei te handak mungkar puate. 21:4 Intu eka te ikei haguet maja manalih kare oloh je percaya dengan Yesus, palus melai dengan ewen katahin ije minggo. Awi pansanan bara Roh Hatalla ewen manasehat Paulus uka ela haguet akan Yerusalem. 21:5 Tapi sana katika akan ikei jari lepah melai intu hete, ikei malihi ewen tuntang marajur jalanan ikei. Ewen samandiai haya-hayak dengan kare anak-sawae magah ikei sampai akan luar lewu. Intu hete hong saran pantai, ikei samandiai mandeko utut tuntang balakudoa. 21:6 Limbah te ikei hatabe, palus ikei lumpat kapal tuntang ewen mahin buli akan humae. 21:7 Ikei balayar tinai bara Tirus sampai akan Ptolemais. Intu hete ikei haguet maja manalih kare pahari je percaya uka manabe ewen, palus melai jandau dengan ewen. 21:8 Andau jewue ikei batolak tinai, palus sampai hong Kaisarea. Intu hete ikei haguet manalih pambarita je bagare Pilippus, palus melai intu humae. Ie te ije biti bara uju ewen je iintih hong Yerusalem. 21:9 Epat biti anak bawi ayue te jari mandino panenga bara Hatalla uka mangabar barita bara Hatalla. 21:10 Limbah pire-pire katahie ikei intu hete, maka dumah bara Yudea ije biti nabi je bagare Agabus. 21:11 Ie dumah manalih ikei palus manduan peteng kahang Paulus. Mahapan peteng kahang te ie mameteng paie tuntang lengee kabuat palus hamauh, "Jetoh auh je insanan awi Roh Hatalla: Oloh je tempon peteng kahang toh kareh imeteng kilau toh hong Yerusalem awi oloh Yehudi tuntang inyarah akan kare oloh je dia Yehudi." 21:12 Katika ikei mahining jete, ikei tuntang kakare pahari je melai hong Kaisarea te balaku nyame-nyame dengan Paulus uka ie ela haguet akan Yerusalem. 21:13 Tapi ie hamauh, "En gunae pahari manangis kalotoh sampai mawi ateiku lenyoh? Aku jari tatap dia baya uka inawan hong kanih, tapi tatap sadia kea aloh sampai matei tagal Tuhan Yesus." 21:14 Paulus dia maku mahining auh ikei, maka ikei terai mangahana ie. "Keleh kahandak Tuhan bewei je manjadi," koan ikei. 21:15 Limbah melai intu hete pire-pire katahie, ikei manatap kare ramon ikei, palus haguet akan Yerusalem. 21:16 Pire-pire pahari bara Kaisarea haguet kea haya-hayak dengan ikei mangat magah ikei akan human Manason, basa intu huma te ih ikei akan manyandehan. (Manason te ije biti oloh Siprus je jari tahi manjadi murid Yesus.) 21:17 Katika ikei sampai hong Yerusalem, kare pahari intu hete manambang ikei dengan sanang atei. 21:18 Andau jewue Paulus haguet haya-hayak dengan ikei maja manalih Yakobus; kakare pamimpin ungkup aton intu hete kea. 21:19 Limbah tabe dengan ewen, Paulus manyarita akan ewen taloh handiai je jari ilalus Hatalla mahalau ie hong marak kare oloh je dia Yehudi. 21:20 Limbah mahining saritan Paulus te, ewen samandiai manara Hatalla. Limbah te ewen hamauh dengan Paulus, "Pahari Paulus! Pahari pasti katawan je jari aton bakoya-koyan oloh Yehudi je percaya dengan Yesus. Ewen handiai te iete kare oloh je baketep mamenda atoran Moses. 21:21 Pahari manasehat ewen mangat ewen dia manyunat kare anak ewen atawa manumon kare hadat Yehudi. 21:22 Toh kare oloh Yehudi je percaya te batantu kareh mahining pahari jari aton intu hetoh. Jadi, toh kilen ampie? 21:23 Je bahalap iete keleh pahari manumon nasehat ikei. Aton epat biti oloh intu hetoh je jari manampa janji dengan Tuhan. 21:24 Nah, keleh pahari haguet manampa gawi marasih arep haya-hayak dengan ewen, tuntang mananggong ongkos ewen mangat balau ewen kea inggunting. Dengan kalote kareh gitan awi oloh samandiai taloh je ihining ewen tahiu pahari dia toto, basa pahari kabuat kea manumon atoran Moses. 21:25 Tapi tahiu oloh je beken Yehudi je jari percaya dengan Yesus, ikei jari mampait surat akan ewen tahiu rencana ikei iete: ewen dia tau kuman panginan je jari iluput akan taloh, dia tau kuman daha, atawa kuman meto je matei inyekak; tuntang dia tau mawi kare gawi je harayap." 21:26 Maka Paulus haguet dengan epat biti oloh te palus bagawi marasih arep haya-hayak dengan ewen andau jewue tinai. Limbah te ewen tame akan Human Tuhan mangat mansanan pire andau hindai harue gawi marasih te hapus tuntang parapah akan genep bitin ewen te iluput. 21:27 Amon katika uju andau te jari lepah, pire-pire oloh Yehudi bara Asia mite Paulus hong Human Tuhan. Palus ewen manantiring oloh are, limbah te ewen manekap Paulus 21:28 sambil mangkariak, "O, Oloh Israel, dohop! Toh ie oloh je haguet akan hete-hete majar oloh handiai malawan utus Israel, malawan atoran Moses tuntang malawan Human Tuhan toh. Tuntang toh ie malahan mimbit kare oloh je dia Yehudi mangat tame akan huang Human Tuhan tuntang mamapa eka je barasih toh!" 21:29 (Ewen hakotak kalote awi ewen jari mite Tropimus oloh Epesus tehong lewu haya-hayak dengan Paulus; tuntang ewen manyangka Paulus jari mimbit ie akan huang Human Tuhan.) 21:30 Hapus lewu manjadi rusoh tuntang kakare oloh dari-daria hakarimpong. Ewen manokep Paulus tuntang mihir ie balua bara Human Tuhan. Hemben te kea bauntonggang Human Tuhan iatep. 21:31 Metoh kare parusoh te handak mampatei Paulus, oloh mansanan akan komandan pasukan Roma hapus lewu rusoh. 21:32 Balalu komandan te manduan pire-pire perwira tuntang prajurit palus bajeleng haguet dengan ewen akan eka je ridu te. Katika oloh are te mite komandan te dengan pasukae, ewen tende mawi Paulus. 21:33 Komandan te manalih Paulus palus manokep Paulus, tuntang manyoho oloh marantai ie. Limbah te komandan te misek tahiu Paulus te tuntang en je jari iawie. 21:34 Belahe kare oloh te tombah kalotoh tuntang belahe tinai tombah kalote. Kaadaan te paham rusoh sampai komandan te dia tau mangatawan en sapunae taloh je jari manjadi. Tagal te ie marentah oloh uka mimbit Paulus akan markas. 21:35 Katika ewen mimbit ie sampai tangga, kare parusoh te mamok manyangit toto sampai Paulus musti inggatang awi kare prajurit. 21:36 Kare parusoh te manuntut ewen bara hila likut sambil mangkariak, "Patei ie!" 21:37 Sana ie handak tame akan huang markas, Paulus hamauh dengan komandan te, "Tau aku hakotak hanjulo dengan tuan?" "En ikau tau basa Yunani?" koan komandan te misek. 21:38 "Amon kalote ikau beken oloh Misir je andau te mawi pamberontakan palus mimbit epat koyan biti parusoh je mahapan senjata tame akan padang pasir?" 21:39 Paulus tombah, "Aku oloh Yehudi; aku oloh penduduk lewu Tarsus, lewu je mambatang hong Kilikia. Aku balaku permisi handak hakotak dengan kare oloh te." 21:40 Maka limbah Paulus inenga katika hakotak, Paulus mendeng intu tangga, palus manenga tanda hapan lengee. Oloh samandiai balalu benyem. Limbah te Paulus hakotak dengan ewen hapan basa Ibrani, Paulus hamauh,
22:1 "Bapa-bapa tuntang kare pahari handiai! Aku handak manyampai pambelaan ayungku akan keton. Coba hining!" 22:2 Katika ewen mahining Paulus hakotak hapan basa Ibrani, ewen manjadi labih benyem hindai. Maka Paulus marajur auhe. 22:3 "Aku oloh Yehudi," koan Paulus. "Aku inakan hong Tarsus hong lewu Kilikia, tapi aku bara kakorikku melai hetoh hong Yerusalem tuntang indidik toto-toto awi Gamaliel, guru hai te, tahiu atoran je inenga Moses akan tato hiang itah. Sama kilau kare pahari handiai intu hetoh andau toh, aku mahin paham bagawi akan Hatalla. 22:4 Aku mangapehe sampai mampatei kare murid je omba auh ajar taheta te. Ewen samandiai bawi hatue inawangku tuntang inameangku akan huang penjara. 22:5 Imam hai kabuat tuntang hapus Majelis Agama tau manenga kasaksian je aku toh dia mananjaro. Basa ewen te je jari manenga akangku surat pengantar je ialamat akan kare oloh Yehudi hong Damaskus. Hapan surat te aku tau manawan intu hete kare oloh je percaya dengan auh ajar te, tuntang mimbit ewen akan Yerusalem mangat ihukum." 22:6 "Katika aku metoh hong jalan tuntang handak sampai Damaskus, hong bentok andau, kalawa je tarang toto salenga mamancar bara langit hakaliling aku. 22:7 Aku balongkang akan petak palus aku mahining ije auh hamauh dengangku, 'Saulus, Saulus! Mbuhen ikau mangapehe aku?' 22:8 Palus aku misek, 'Eweh ikau, Tuhan?' 'Aku toh Yesus oloh Nasaret te je ingapehem,' koae tombah. 22:9 Kare oloh je aton intu hete je haya-hayak dengangku, mite kea kalawa te, tapi ewen dia mahining auh je hakotak dengangku. 22:10 Palus aku misek tinai, 'En je musti iawiku Tuhan?' Tuhan tombah, 'Hingkat ikau, tuntang tame akan Damaskus. Intu hete kareh tau insanan akam tahiu taloh handiai je ingahandak Hatalla ikau mawie.' 22:11 Aku manjadi babute tagal kalawa je manyilau te. Jadi kare kawalku mangagalan aku tame akan Damaskus. 22:12 Intu hete aton ije biti oloh bagare Ananias. Ie te ije biti oloh barasih je baketep malalus hukum Moses. Kakare oloh Yehudi je melai hong Damaskus paham mahormat ie. 22:13 Ie dumah manyengok aku, palus mendeng habambai dengangku tuntang hamauh, 'Pahari Saulus, keleh toh ikau mite haluli!' Hemben te kea aku manggatang baungku, palus mite ie. 22:14 Limbah te ie hamauh dengangku, 'Hatalla tato hiang itah jari mintih ikau mangatawan kahandake, tuntang mite Yesus, Ije Bujur te, ije malalus kahandak Hatalla hayak mahining auh Yesus kabuat. 22:15 Ikau kareh manjadi saksi uka mambarita akan oloh handiai taloh je jari gitam tuntang ihiningm. 22:16 Toh ela hindai mentai tahi-tahi. Keleh hingkat tuntang sarah arepm uka impandoi. Keleh ikau mantehau Tuhan mangat ikau lapas bara kare dosam.' " 22:17 "Aku haluli akan Yerusalem, tuntang katika aku metoh balakudoa hong Human Tuhan, aku inguasa awi Roh Hatalla. 22:18 Aku mite Tuhan; ie hamauh dengangku, 'Jeleng haguet bara Yerusalem, basa kare oloh intu hetoh dia handak manarima kasaksiam tahiu aku.' 22:19 Aku hamauh, 'Tuhan, ewen katawan toto je aku jari tame akan kare huma sombayang uka manawan ewen tuntang mawi mangapehe kare oloh je percaya dengam. 22:20 Kalote kea katika saksim Stepanus impatei, aku kabuat aton intu hete tuntang mangahandak pampatei te. Malahan aku manjaga kare pakaian oloh je mampatei ie.' 22:21 Tapi Tuhan hamauh tinai dengangku, 'Haguet ih, basa aku kareh manyoho ikau haguet akan eka je kejau manalih kare oloh je dia Yehudi.' " 22:22 Kare oloh magon manyeneh Paulus hakotak, tapi hong kalimat je pangkarahiae ewen mangkariak sakalepah belaie, "Patei oloh je kilau kau. Ie dia patut belom!" 22:23 Sambil mangkariak ewen mangibas jubah ewen, tuntang manawor kawo. 22:24 Maka komandan pasukan Roma te manyoho uka Paulus iimbit akan markas mangat ie iriksa intu hete hapan kakaras uka mangatawan en sababe kare oloh Yehudi mangkariak kalote taharep ie. 22:25 Tapi katika Paulus jari imasong tuntang ihewes hapan cambuk, Paulus hamauh dengan perwira je mendeng intu hete, "En puna tau mahewes ije biti warga karajaan Roma hapan cambuk helo bara ie imbit akan pengadilan?" 22:26 Mahining jete perwira te haguet manalih komandan pasukan tuntang hamauh, "En toh je akan iawi bapa? Oloh te warga negara Roma!" 22:27 Maka komandan te haguet manalih Paulus tuntang misek, "Coba sanan, en ikau toh warga negara Roma!" "Iyoh," koan Paulus, "aku warga negara Roma." 22:28 Komandan te hamauh tinai, "Aku manjadi warga negara Roma awiku are toto mambayar!" Paulus tombah, "Tapi aku inakan kilau warga negara Roma." 22:29 Hemben te kea kare anggota tentara je handak mariksa Paulus te mundur tuntang komandan te mahin mikeh awi ie jari mamasong Paulus, padahal Paulus warga negara Roma. 22:30 Komandan pasukan Roma te handak toto mangatawan en sapunae je mawi kare oloh Yehudi manyalan Paulus. Tagal te andau jewue ie mantehau kare imam kapala tuntang Majelis Agama uka hapumpong. Palus Paulus ilapas bara pasonge, limbah te iimbit manaharep ewen samandiai.
23:1 Paulus mananture kare anggota Majelis te palus hamauh, "Pahari handiai! Sampai andau toh aku dia mangkeme basala dengan Hatalla intu atei huangku tahiu pambelom ayungku." 23:2 Metoh Paulus hamauh kalote, Imam Hai Ananias manyoho oloh je mendeng hila balikat Paulus manampar nyaman Paulus. 23:3 Maka Paulus hamauh dengan imam hai te, "Hatalla pasti manampar ikau, oloh haliau je pura-pura barasih! Ikau mondok intu hete mahakim aku manumon hukum Moses, padahal ikau kabuat malanggar hukum te awim manyoho oloh manampar aku!" 23:4 Kare oloh je hila silan Paulus hamauh dengan Paulus, "Ikau mahina imam hai ain Hatalla!" 23:5 Paulus tombah, "Oh, aku dia katawan pahari handiai, je ie te imam hai. Punae huang Surat Barasih aton tarasurat, 'Ela ikau mahina pamimpin utus ayum.' " 23:6 Paulus mite aton belahe bara kare anggota majelis te oloh bara golongan Saduki tuntang belahe tinai oloh bara golongan Parisi. Tagal te ie hamauh dengan majelis te, "Pahari handiai! Aku toh ije biti oloh Parisi, panakan Parisi. Aku inyidang intu hetoh awi aku percaya oloh matei tau belom haluli." 23:7 Katika hamauh kalote, kare oloh Parisi tuntang kare oloh Saduki te nampara hakalawan sama arepe, sampai sidang te bapusit manjadi due golongan. 23:8 (Basa kare oloh Saduki percaya oloh matei dia tau belom haluli,malekat jaton, tuntang kare roh mahin jaton kea; padahal oloh Parisi percaya taloh te samandiai.) 23:9 Maka lembut karidu je paham. Pire-pire oloh Parisi je manjadi guru agama mendeng tuntang malawan toto-toto. Ewen hamauh, "Manumon tirok ikei oloh toh isut mahin jaton kasalae! Mikeh puna aton roh atawa malekat je hakotak dengae!" 23:10 Kalahi manjadi paham toto sampai komandan te mikeh ela-ela Paulus kareh ingarobut awi ewen. Jadi ie manyoho pasukan ayue haguet manduan Paulus bara bentok oloh are te tuntang mimbit ie akan markas. 23:11 Alem je rahian tinai Tuhan Yesus mendeng intu silan Paulus tuntang hamauh, "Paabas ateim! Ikau jari manenga kasaksian tahiu aku hong Yerusalem. Ikau kareh musti manenga kasaksian te kea hong Roma." 23:12 Hayak hanjewu andau ijee tinai, kare oloh Yehudi nampara mawi pakat. Ewen hasumpah dia kuman mihop helo bara ewen mampatei Paulus. 23:13 Labih bara epat puluh biti kare oloh je mawi pakat papa kalote. 23:14 Ewen haguet manalih kare imam kapala tuntang kare pamimpin Yehudi hayak hamauh, "Ikei jari hasumpah haya-hayak, dia handak kuman atawa mihop taloh en-en amon ikei hindai mampatei Paulus. 23:15 Nah, toh kare pahari tuntang anggota Majelis Agama keleh mampait surat akan komandan pasukan Roma te uka balaku ie mimbit Paulus haluli manaharep keton, kila-kilau jaka keton handak mariksa perkarae te labih titip hindai. Tuntang ikei tatap sadia uka mampatei ie helo bara ie sampai hetoh." 23:16 Tapi aken Paulus, (anak betaue) mahining auh rencana pakat papa te. Maka ie haguet akan markas tuntang mansanan hal te akan Paulus. 23:17 Paulus palus mantehau ije biti perwira tuntang hamauh dengae, "Imbit anak tabela toh akan komandan; ie aton taloh je handak ilapore akae." 23:18 Perwira te mimbit anak tabela te manalih komandan tuntang hamauh, "Paulus, oloh tahanan te, mantehau aku tuntang balaku aku mimbit anak tabela toh manalih bapa; ie aton taloh je handak ilapore." 23:19 Komandan te mimbing lengen anak te, palus mimbit ie mangabuat akan silae tuntang misek, "Ikau handak mansanan en akangku?" 23:20 Anak tabela te tombah, "Kare oloh Yehudi jari pakat uka balaku Tuan mimbit Paulus manaharep Majelis Agama andau jewu, kila-kilau ewen handak mariksa tinai perkara te labih titip. 23:21 Tapi ela tuan manumon palakun ewen te, basa aton labih bara epat puluh biti oloh je manyahokan uka mimpa ie hong jalan. Ewen uras jari hasumpah dia handak kuman tuntang mihop amon ewen hindai mampatei Paulus. Metoh toh ewen mahin jari tatap; baya mentai pandumah bara Tuan bewei." 23:22 Komandan te hamauh, "Ela mansanan akan eweh bewei je ikau jari malapor taloh toh akangku." Palus ie manyoho anak tabela te buli. 23:23 Limbah te komandan te mantehau due biti perwira, palus ie hamauh dengan ewen, "Nyadia due ratus prajurit dengan uju puluh tentara manungkang kuda tuntang due ratus tentara mahapan lunju uka haguet pukul jalatien hamalem toh kea akan Kaisarea. 23:24 Nyadia kea kuda uka inongkang awi Paulus tuntang imbit ie dengan salamat sampai akan Gubernur Peliks." 23:25 Palus komandan te manampa surat je kalotoh auhe, 23:26 "Gubernur Peliks je paham ihormat. Tabe bara Klaudius Lisias! 23:27 Oloh toh jari inawan awi kare oloh Yehudi tuntang karenga ewen mampatei ie jaka aku dia dumah mahapan pasukan tuntang manyalamat ie; basa aku mahining ie toh warga negara Roma. 23:28 Awi aku mipen handak mangatawan en sapunae kasalan je indawa ewen mawi ie, maka aku mimbit ie manalih Majelis Agama ain ewen. 23:29 Ternyata ie jaton mawi taloh en-en je mawi ie patut ihukum matei atawa inamean akan penjara. Kalahin ewen te baya kapaut tahiu kare hukum agaman ewen kabuat. 23:30 Limbah te aton oloh mansanan akangku tege rencana papa kare oloh Yehudi mawi ie. Jadi aku balalu mampait ie manalih Tuan Gubernur. Tuntang aku jari manyoho kare oloh je mandawa ie uka mimbit pangaduan ewen mawi ie manalih Tuan." 23:31 Maka kare anggota tentara te malalus tugas ewen. Ewen manduan Paulus mimbit ie alem te sampai Antipatris. 23:32 Andau jewue ewen manolak pasukan bakuda te marajur panjalanae dengan Paulus, tuntang ewen kabuat haluli akan markas. 23:33 Katika pasukan bakuda te sampai hong Kaisarea, ewen manyampai surat te akan Gubernur, palus manyarah Paulus akae. 23:34 Limbah Gubernur mambasa surat te, ie misek dengan Paulus bara kueh asale. Katika ie katawan Paulus te bara Kilikia, 23:35 ie hamauh, "Iyoh! Aku akan mariksa perkaram, amon kare oloh je mangado ikau jari sampai intu hetoh." Palus ie marentah uka Paulus inahan huang istana Herodes.
24:1 Lime andau limbah te, Imam hai Ananias tuntang kare pamimpin Yehudi haguet akan Kaisarea hayak dengan ije biti pengacara je bagare Tertulus. Ewen manaharep Gubernur Peliks tuntang manyampai pangaduan ewen mawi Paulus. 24:2 Katika Tertulus intehau akan baun, ie mandawa Paulus kilau toh, "Tuan Gubernur je paham ihormat! Hong penda pimpinan Tuan lewun ikei damai. Tuntang tagal kapintar-kaharatin Tuan kea are kahalap je jari ilalus akan utus ikei. 24:3 Kare taloh handiai te harajur inarima ikei hapan tarima kasih tuntang irega ikei paham hong kueh bewei. 24:4 Tapi mangat ela manganan are katika ain Tuan, aku balaku Tuan pahias mahining pangaduan ikei je pandak toh. 24:5 Oloh toh marusoh tuntang bahaya. Hong kue-kueh ie mawi karidu marak kare oloh Yehudi tuntang ie jadi pamimpin gerakan ain oloh Nasaret. 24:6 Ie kea jari mancoba mamapa human Tuhan, tapi ikei manawan ie. Kahandak ikei uka manyidang ie manumon hukum agaman ikei kabuat. 24:7 Tapi komandan Lisias marampas ie bara ikei, 24:8 tuntang marentah uka kare oloh je mangado ie manaharep Tuan. Amon Tuan mariksa oloh te, Tuan kabuat kareh mahining bara ie katoton kare taloh handiai je ingado ikei toh mawi ie." 24:9 Kare oloh Yehudi je intu hete omba kea mandawa Paulus tuntang manoto uras kakare taloh je insanan Tertulus. 24:10 Palus gubernur te manenga tanda akan Paulus uka ie tau hakotak. Maka Paulus hamauh, "Aku katawan Tuan jari manjadi hakim akan daerah toh banyelo-nyelo katahie. Tagal te aku mangkeme hanjak manyampai auh mambela arepku toh intu taharep Tuan. 24:11 Tuan tau mariksa kabuat, dia labih bara due walas andau je jari halau aku haguet akan Yerusalem uka sombayang. 24:12 Tuntang dia puji kare oloh Yehudi te sondau aku hakalawan dengan eweh bewei atawa mamumpong oloh uka mawi karidu aloh hong human Tuhan atawa hong kare huma sombayang atawa hong kueh bewei intu lewu te. 24:13 Jaton kea ewen tau mambukti kare auh dawan ewen je inyampai ewen akan Tuan mawi aku. 24:14 Puna aku musti mangaku dengan Tuan je aku toh manyembah Hatallan tato hiang ikei manumon auh ajar Yesus je inyewut ewen sala. Tapi aku magon percaya dengan taloh handiai je inyurat huang Surat Moses tuntang Surat Kare Nabi. 24:15 Sama kilau ewen, aku kea mina kaharap dengan Hatalla iete oloh handiai uras akan belom haluli limbah pampatei -- kare oloh bahalap, tuntang kare oloh papa! 24:16 Jete sababe aku harajur manun arepku bua-buah uka atei huangku barasih intu taharep Hatalla tuntang barasih intu taharep olon. 24:17 Limbah pire-pire nyelo jaton melai hong Yerusalem, aku haluli akan hete uka mimbit bantuan duit akan utus ayungku tuntang uka maluput parapah akan Hatalla. 24:18 Metoh aku malalus jete ewen sondau aku hong Human Tuhan limbah aku mahapus gawingku mamparasih arepku. Dia aton oloh are je mampahayak aku, tuntang jaton kea karidu intu hete hong katika te. 24:19 Baya aton pire-pire oloh Yehudi intu hete bara propinsi Asia. Ewen te je sapunae musti aton intu hetoh uka manyampai kadon ewen akan Tuan, amon aton taloh je ingado ewen mawi aku. 24:20 Atawa takan ih kare oloh toh kabuat mansanan narai kapapa je sondau ewen intu aku hong taharep Majelis Agama. 24:21 Ewen baya sondau ije kalimat ih je inyewut intu taharep ewen, kalimat te kalotoh: aku inyidang andau toh awi aku percaya kare oloh matei kareh belom haluli." 24:22 Balalu Peliks je jari are mangatawan tahiu auh ajar Yesus, mahapus sidang perkara te. "Aku akan mamutus perkara toh," koae, "amon komandan Lisias jari dumah." 24:23 Palus ie marentah perwira je mimbing tanggong jawab huang hal Paulus te, uka tetep manahan Paulus, tapi manenga isut kalonggaran akae tuntang manenga ijin akan kare kawale manenga akae taloh je ingkeme perlu akae. 24:24 Pire-pire andau tinai Peliks dumah, impahayak awi kabalie je bagare Drusila; ie te ije biti oloh Yehudi. Balalu Peliks manyoho oloh manduan Paulus, limbah te Peliks mahining Paulus hakotak tahiu kapercaya dengan Yesus Kristus. 24:25 Tapi katika Paulus marajur kotake tahiu kabujur atei tuntang manahan kipen tuntang tahiu hukum hong Andau Kiamat, Peliks manjadi mikeh palus hamauh, "Ikau tau haguet metoh toh. Aku handak mantehau ikau tinai amon aton katikaku." 24:26 Pandehan te Peliks maharap akan mandino duit bara Paulus. Jete bukue ie lulang-luli manyoho oloh manduan Paulus uka hakotak dengae. 24:27 Limbah due nyelo, Portius Pertus mangganti Peliks sampai manjadi gubernur. Tuntang awi Peliks handak manduan atei kare oloh Yehudi, ie manalua Paulus melai hong penjara.
25:1 Telo andau limbah Pestus sampai hong tanah te, ie haguet bara Kaisarea akan Yerusalem. 25:2 Intu hete kare imam kapala tuntang kare pamimpin Yehudi manyampai akae auh kadon ewen mawi Paulus. Ewen bajuju mangatau Pestus 25:3 uka awi kahalap ateie dengan ewen, ie maku manyoho oloh mimbit Paulus akan Yerusalem; basa ewen jari pakat uka mampatei ie hong benteng jalan. 25:4 Tapi Pestus tombah, "Paulus metoh toh inahan hong Kaisarea; tuntang dia tahi hindai aku mahin akan kanih. 25:5 Jadi, keleh kare oloh je basewut hong marak keton haguet haya-hayak dengangku akan Kaisarea tuntang mawi perkara huang kanih, amon puna ie jari mawi taloh sala." 25:6 Limbah melai hong Yerusalem kurang labih hanya atawa sapuluh andau tinai Pestus haluli akan Kaisarea. Andau jewue ie mawi sidang pangadilan tuntang marentah uka Paulus iimbit manaharep. 25:7 Katika Paulus sampai, kare oloh Yehudi je jari dumah bara Yerusalem mendeng hong kalilinge tuntang manyampai kare auh dawa je babehat mawi ie. Tapi ewen dia tau mambukti kare auh dawan ewen te. 25:8 Hong pambelaan ayue Paulus hamauh, "Aku jaton mawi taloh je sala taharep Human Tuhan atawa taharep hukum Moses atawa taharep Kaisar Roma." 25:9 Tapi Pestus handak manduan atei oloh Yehudi. Maka ie misek dengan Paulus, "En maku ikau akan Yerusalem mangat inyidang hong kanih intu taharepku tahiu kare dawan ewen te?" 25:10 Paulus tombah, "Aku metoh toh mendeng intu taharep pangadilan Kaisar Roma; tuntang hong hete ih aku musti inyidang. Tuan kabuat katawan je aku dia basala taharep oloh Yehudi. 25:11 Amon aku jari malanggar hukum tuntang mawi taloh je patut ihukum matei, aku pahias matei. Tapi amon kare dawan ewen dia toto, ije biti mahin jaton oloh tau manyarah aku akan ewen. Aku balaku inyidang hong pangadilan Kaisar!" 25:12 Limbah barunding dengan kare panasehat ayue, Pestus hamauh, "Ikau balaku inyidang hong pangadilan Kaisar, jadi ikau musti haguet manaharep Kaisar." 25:13 Dia pire-pire katahie tinai, Raja Agripa tuntang Bernike dumah akan Kaisarea uka manabe manyalamat Pestus. 25:14 Limbah pire-pire andau ewen aton intu hete, Pestus manarang perkaran Paulus akan Raja Agripa. Pestus hamauh, "Intu hetoh aton ije biti tahanan je ilihi awi Peliks. 25:15 Katika aku aton hong Yerusalem, kare imam kapala tuntang kare pamimpin Yehudi manyampai kadon ewen mawi oloh te tuntang balaku aku uka mamutus mahukum ie. 25:16 Tapi koangku tombah, oloh Roma dia tau manyarah kalote bewei ije biti oloh je kana dawa uka ihukum, amon oloh je buah dawa te hindai hataharep dengan kare oloh je mandawa ie, tuntang akae inenga katika uka mambela arepe. 25:17 Jadi, katika ewen dumah akan hetoh, aku dia mentai tahi-tahi. Andau jewue aku balalu mawi sidang pangadilan tuntang marentah uka oloh te iimbit manaharep. 25:18 Katika kare oloh je mandawa ie mendeng mayampai auh kadon ewen, ewen jaton manyampai auh dawa je papa kilau je ingiraku ewen handak manyampaie. 25:19 Ewen baya hakabeken auh tiroke tahiu agaman ewen kabuat tuntang tahiu ije biti oloh je bagare Yesus. Oloh te jari matei tapi Paulus bajuju manyewut oloh te belom. 25:20 Awi aku bingung kilen ampie aku tau mandino kare katarangan tahiu kare perkara te, aku misek dengan Paulus en ie maku haguet akan Yerusalem tuntang inyidang intu hete akan perkara te. 25:21 Tapi Paulus balaku naik banding; ie balaku mangat ie tetep melai intu tahanan sampai perkarae imutus awi Kaisar. Tagal te aku marentah uka ie inahan magon sampai aku aton katikaku mampait ie akan Kaisar." 25:22 Palus Agripa hamauh dengan Pestus, "Aku kabuat mahin handak mahining oloh te." "Jewu Tuan tau mahining ie," koan Pestus tombah. 25:23 Andau jewue Agripa tuntang Bernike dumah hapan upacara hai. Ewen tame eka sidang haya-hayak dengan kare pembesar angkatan bersenjata tuntang kare oloh je basewut hong lewu te. Awi parentah Pestus, Paulus iimbit tame. 25:24 Palus Pestus hamauh, "Raja Agripa tuntang kare oloh handiai je aton dumah! Oloh toh jari ingado akangku awi salepah utus oloh Yehudi, je aton hong Yerusalem tuntang je aton hong hetoh. Ewen manuntut hayak mangkariak je ie toh dia patut inalua belom. 25:25 Tapi ije mahin jaton aku sondau taloh gawie je mawi ie tau ihukum matei. Tuntang basa ie kabuat jari balaku perkarae inyidang hong pangadilan Kaisar, aku jari mamutus uka mampait ie akan Kaisar. 25:26 Tapi aku hindai mandino katarangan je batantu bara ie uka tau inyurat huang suratku akan Kaisar. Jete bukue aku mimbit ie hataharep dengan kare tuan samandiai je mambatang dengan Je Paham Ihormat Tuan Raja Agripa! Kahandakku iete uka limbah gawin itah mariksa ie toh, aku tau dinon taloh en-en je tau inyurat. 25:27 Basa manumon pangkemeku, dia lalau buah mampait ije biti oloh tahanan kalote bewei tapi jaton mansanan kare kasalan je indawa oloh mawi ie."
26:1 Agripa hamauh dengan Paulus, "Akam inenga katika uka hakotak mambela arepm." Maka Paulus manggatang lengee palus manyampai auh pambelaae kalotoh, 26:2 "Je Paham Ihormat Tuan Raja Agripa! Aku mangkeme ontong toto tau manyampai pambelaan akan arepku, pas intu taharep Tuan Raja tahiu kakare pangadoan je inyampai awi kare oloh Yehudi mawi aku; 26:3 Je mambatang basa Tuan Raja katawan toto kakare hadat dasar tuntang kare hal ain oloh Yehudi. Tagal te aku balaku Tuan Raja mahining katarangan ayungku hapan kasabar. 26:4 Kakare oloh Yehudi katawan kilen ampie aku belom bara metoh aku tabela. Ewen katawan bara katika aku manjadi oloh tabela, aku jari belom hong marak utus ayungku kabuat hong Yerusalem. 26:5 Jari tahi ewen katawan tahiu aku. Tuntang amon ewen handak, ewen tau manenga kasaksian je bara solake aku jari belom kilau oloh Parisi awiku manumon kare atoran je paling karas huang agaman ikei. 26:6 Tuntang toh aku mendeng intu hetoh uka inyidang awi aku percaya janji je inampa Hatalla dengan kare tato hiang ikei. 26:7 Janji te je ihara-harap awi due walas suku utus oloh Israel, sampai ewen manyembah Hatalla handau hamalem. Tuntang puna awi aku percaya dengan janji te, tuan raja je ihormat, aku inyalan awi kare oloh Yehudi. 26:8 Mbuhen kare paharingku oloh Yehudi dia olih percaya Hatalla tau mambelom haluli oloh matei? 26:9 Solake bihin aku kabuat mahin manirok, je aku musti malalus kare taloh handiai uka malawan Yesus bara Nasaret te. 26:10 Tuntang puna jete ih je iawiku hong Yerusalem. Hapan surat kuasa bara kare imam kapala, aku jari manamean akan huang penjara are oloh je baketep dengan Hatalla. Aku mahin omba kea pakat uka ewen ihukum matei. 26:11 Kinjap kea aku mangapehe ewen hong kare huma sombayang, uka mamaksa ewen mundur bara taloh je imercaya ewen te. Angat ateiku puna ombet ih mawi ewen te, sampai akan kare lewu beken mahin aku haguet uka manggoang ewen intu hete." 26:12 "Akan maksud jete aku mimbit surat kuasa bara kare imam kapala tuntang haguet akan Damaskus. 26:13 Tuntang metoh aku hong benteng jalan, katika bentok andau, o Tuan Raja Je Ihormat, aku mite ije kalawa bara langit je labih balawa bara matanandau. Kalawa te mamancar hakaliling aku tuntang hakaliling kare oloh je mananjong haya-hayak dengangku. 26:14 Ikei samandiai balongkang akan petak. Palus aku mahining auh je hamauh dengangku huang basa Ibrani, 'Saulus, Saulus! Mbuhen ikau bajuju mangapehe aku? Ikau akan mangkeme kapehe kabuat, amon ikau bajuju malawan pimpinan ayue je manjadi Tuan ayum.' 26:15 Maka aku hamauh, 'Eweh ikau Tuan?' tuntang Tuhan tombah, 'Aku toh Yesus je ingapehem. 26:16 Keleh hingkat tuntang mendeng! Aku mamparahan arepku akam awiku handak mangkat ikau manjadi saksi ayungku. Ikau musti mambarita akan oloh beken taloh je jari gitam andau toh tahiu aku tuntang tahiu taloh je imparahangku kareh akam hong katika je rahian. 26:17 Aku akan malapas ikau bara utus Israel tuntang bara kare utus beken je dia Yehudi. Aku kareh manyoho ikau haguet manalih ewen, 26:18 uka mamparenang matan ewen, mangat ewen balua bara kakaput tuntang tame akan huang kalawa; mangat ewen lapas bara pangaruh Setan, palus inguasa awi Hatalla. Maka awi percaya dengangku kare dosan ewen kareh iampun tuntang ewen kareh manjadi anak ungkup ain Hatalla je iintih.' " 26:19 "Tagal te Tuan Raja Agripa, aku harajur manggau jalan manumon kahandak taloh je gitangku je jari inarimaku bara Hatalla te. 26:20 Hapan auh terus-tarang ih aku mansanan akan kare oloh je ewen musti hobah bara kare dosan ewen tuntang manyarah arep ewen akan Hatalla hayak mamparahan huang pambelom ewen je ewen jari hobah bara kare dosan ewen. Aku mambarita hal te nampara bara Damaskus, limbah te hong Yerusalem tuntang hong hapus Yudea tuntang hong marak kare oloh je dia Yehudi. 26:21 Maka tagal te kea kare oloh Yehudi manawan aku hong Human Tuhan tuntang manggau jalan handak mampatei aku. 26:22 Tapi sampai katika toh aku ingalindong awi Hatalla, sampai aku tau mendeng intu hetoh uka manenga kasaksian ayungku akan oloh handiai -- hai atawa korik. Taloh je insanangku toh jaton beken bara taloh je jari inujum awi kare nabi tuntang Moses; 26:23 iete Raja Panyalamat je injanji Hatalla te musti buah kapehe, tuntang manjadi oloh je solake belom haluli limbah pampatei; uka hapan jete ie tau mambarita kalawa -- iete salamat -- aloh akan kare oloh Yehudi atawa akan kare oloh je dia Yehudi." 26:24 Metoh Paulus manyampai auh pambelae te, Pestus mangkariak, "Ikau jadi gila Paulus! Ilmu ayum je are te jari mawi ikau gila!" 26:25 Tapi Paulus tombah, "Aku dia gila, Tuan je ihormat. Kare auh je impaluaku te toto tuntang balua bara tirok je barendeng. 26:26 Tuan Raja Agripa kabuat katawan toto tahiu kare hal te. Jete bukue aku bahanyi hakotak intu taharep Tuan Raja terus tarang. Aku percaya ije mahin jaton bara kare hal te je hindai ingatawan awi raja, awi kakare hal te jari manjadi hong kare eka je dia basilim. 26:27 Tuan Raja Agripa Je Ihormat, en Tuan Raja percaya dengan taloh je insanan awi kare nabi? Angatku Tuan Raja percaya!" 26:28 Palus Agripa hamauh dengan Paulus, "Ikau mangira murah manun aku manjadi oloh Kristen hong katika je pandak toh?" 26:29 "Hong katika je pandak atawa hong katika je panjang," koan Paulus tombah, "aku balakudoa dengan Hatalla uka Tuan Raja tuntang kare Tuan samandiai je mahining auhku andau toh tau manjadi kilau aku -- kacuali pasong toh, punae!" 26:30 Kajariae Tuan Raja, gubernur tuntang Bernike, tuntang ewen handiai je beken mendeng. 26:31 Limbah jari intu luar, ewen hamauh sama arepe, "Oloh toh jaton mawi taloh en-en je patut ihukum matei atawa inamean akan penjara." 26:32 Palus Agripa hamauh dengan Pestus, "Oloh toh jari tau ilapas, jaka ie dia manuntut perkarae inyidang hong pangadilan Kaisar."
27:1 Limbah imutus, je ikei musti balayar akan Italia, Paulus tuntang pire-pire oloh tahanan je beken inyarah akan Yulius, perwira pasukan tentara Roma je inyewut "Resimen Kaisar". 27:2 Ikei lumpat akan kapal je dumah bara Adramitium, limbah te haguet hapan kapal te je jari tatap balayar akan kare palabohan hong propinsi Asia. Aristarkhus, ije biti oloh Makedonia je dumah bara Tesalonika, balayar kea haya-hayak dengan ikei. 27:3 Andau jewue ikei sampai hong Sidon. Paulus te iurus dengan bahalap toto awi Yulius. Ie tau maja kare kawale mangat ewen tau manenga akae kare taloh je perlu akae. 27:4 Bara hete ikei marajur pelayaran ikei. Awi kius riwut hakalawan tintue dengan kapal, ikei balayar manyaroroi saran pantai pulau Siprus je bakalindong isut bara riwut. 27:5 Limbah te ikei dimpah laut je hataharep dengan Kilikia tuntang Pampilia palus sampai intu Mira hong tanah Likia. 27:6 Intu hete perwira te dinon ije kapal bara Aleksandria je handak balayar akan Italia. Maka ie mamindah ikei akan kapal te. 27:7 Pire-pire andau katahie ikei balayar barangkah toto, tuntang kajariae hajajuae ih ikei sampai hong lewu Knidus. Rahian tinai awi riwut magon papa, ikei dia olih marajur jalanan balayar te akan tintue je solake. Maka ikei balayar akan salatan pulau Kreta mahalau Tanjong Salmone mangat intu hete ikei ingalindong awi riwut. 27:8 Ikei balayar manyaroroi saran pantai pulau te marak paham kahalie sampai kajariae ikei sampai hong ije eka je bagare Palabohan Bahalap, dia pire kakejaue bara lewu Lasea. 27:9 Hong katika te, Andau Pesta Kadamai ain oloh Yehudi jari mahalau. Jari are katika ikei je nihau, sampai katika uka balayar dengan aman jaton hindai. Tagal te Paulus manenga nasehat akan ewen kalotoh, 27:10 "Pahari handiai, manumon tirok ayungku, bahaya toto itah toh balayar tarus. Itah akan buah karugi hai, dia baya akan puat tuntang akan kapal itah bewei, tapi arep itah mahin tau nihau." 27:11 Tapi perwira te labih percaya dengan jurumudi tuntang kapten kapal bara dengan kare auh Paulus. 27:12 Palabohan intu hete puna dia bahalap akan kare kapal melai hete hong wayah sadingen. Awi te tapa-are oloh kapal pakat uka balayar tinai malihi palabohan te basa ewen handak manggau jalan manyampai Peniks tuntang melai intu hete katahin wayah sadingen. Peniks te palabohan hong Kreta je manaharep barat daya tuntang barat laut. 27:13 Hong katika te riwut salatan kiu-kius lowah. Maka oloh kapal manyangka ewen jari olih balayar tinai. Jadi ewen maggatang sauh palus balayar manyaroroi pantai pulau Kreta. 27:14 Tapi dia tahi tinai riwut barat -- iete riwut je inyewut riwut Timor Laut -- manampur bara hila hunjun petak, 27:15 tuntang manampur kapal ikei. Awi kapal dia mungkin balayar tarus malawan riwut, maka ikei jaton katawan auh tuntang manalua ih kapal bahantong inamput riwut. 27:16 Ikei bakalindong isut, katika ikei mahalau hila salatan pulau Klauda je korik te. Intu hete dengan kahalie ikei olih manguasa sekoci kapal ikei. 27:17 Limbah sekoci te impalumpat akan kapal, kapal te kabuat indehen hapan tali je imeteng mambilit kapal te. Awi mikeh sangkarah hong busong Sirtis je teah, layar impamohon palus kapal inalua mampahayak riwut. 27:18 Riwut tarus mamok, sampai andau jewue puat kapal nampara inganan akan laut. 27:19 Andau jewue tinai kare oloh kapal te manganan tinai kare pakakas kapal akan laut hapan lengen ewen kabuat. 27:20 Pire-pire andau katahie ikei jaton mite matanandau tuntang bintang, tuntang riwut mahin raju-rajur mamok. Kajariae nihau kaharap ikei mangat tau salamat. 27:21 Pire-pire katahie kare oloh te dia kuman. Maka Paulus mendeng hong bentok ewen palus hamauh, "Pahari handiai! Jaka keton jari manumon nasehatku tuntang dia balayar bara Kreta, itah dia buah kakare karusak tuntang karugi toh. 27:22 Tapi toh mahin aku paham balaku uka keton ela korik atei. Jaton ije bara pahari je akan matei; itah baya akan nihau kapal toh ih. 27:23 Basa alem ndau, malekat Hatalla je inyembahku, iete Hatalla je tempon aku, dumah manalih aku. 27:24 Malekat te hamauh, 'Ela mikeh Paulus! Basa ikau akan manaharep Kaisar. Tuntang tagal kahalap atei Hatalla dengam, kakare oloh je balayar dengam kareh salamat tagal ikau.' 27:25 Awi te, pahari handiai, ela pahari korik atei! Basa aku percaya dengan Hatalla, iete, taloh handiai akan manjadi sama kilau je jari insanae akangku. 27:26 Tapi kareh itah akan sangkarah hong pantai ije pulau." 27:27 Hong alem je kaepat-walas ikei magon lapu-laput intu tasik Adria. Kurang labih bentok alem oloh kapal mangkeme kapal metohe manokep saran petak. 27:28 Jadi ewen muloh tali hapan batu mangat maukur kandalem laut. Ternyata kandalem eka te handak sampai epat puluh meter. Dia tahi limbah te ewen maukure tinai, tuntang mandino kandalem laut hong eka te tokep telo puluh meter. 27:29 Ewen mikeh kapal tau sangkarah hong batu karang, jadi ewen mampamohon epat kabawak sauh bara hila likut kapal, palus maharap mudahan jele-jeleng hanjewu. 27:30 Kare oloh kapal mancoba benye-benyem handak mandari arepe bara kapal te. Ewen mampamohon sekoci akan danum kilau jaka ewen handak mampamohon sauh bara hila baun kapal. 27:31 Tapi Paulus hamauh dengan perwira tuntang kare prajurit je intu huang kapal te, "Amon kare oloh pagawai toh dia melai intu kapal, kare pahari samandiai uras dia tau salamat." 27:32 Tagal te kare prajurit te manetek talin sekoci te, sampai sekoci te bahantong. 27:33 Helo bara matan andau lembut, Paulus manenga tirok uka ewen handiai uras kuman. Paulus hamauh, "Jari epat walas andau katahie kare pahari uras mentai marak kikeh tuntang jaton kuman taloh en-en. 27:34 Aku mausul keleh kuman isut. Jete bahalap akan keton, mangat keton abas tinai. Basa pahari handiai uras akan salamat tuntang jaton tapas taloh en-en." 27:35 Limbah ie hamauh kalote, Paulus manduan rote palus manarimakasih akan Tuhan intu taharep ewen samandiai. Limbah ie mambagi rote te, ie balalu kuman. 27:36 Maka ewen haluli barigas tuntang omba kuman kea. 27:37 Oloh handiai je aton hong kapal te aton due ratus uju puluh jahawen biti. 27:38 Limbah ewen uras rata kuman manumon kasukupe, ewen manjakah puat gandum akan laut mangat kapal manjadi mahian. 27:39 Metoh andau jari balawa pagawai kapal mite saran petak, tapi ewen jaton katawan hong kueh eka te. Ewen mite ije telok dengan saran pantai. Jadi ewen handak mampatende kapal intu hete jaka tau. 27:40 Maka kare talin sauh te inalua ih leteng akan tasik. Hayak te kea ewen mengkak tali je injarat hong kamburi. Limbah te ewen mampandai' layar hila baun kapal mangat riwut mahimon kapal te miar manalih pantai. 27:41 Tapi kapal te sangkarah awi busong. Hila haluan kapal sangkarah tuntang dia hagerek, tapi hila kamburie hancur inampor galombang je karas. 27:42 Kare prajurit hong kapal te handak mampatei kakare oloh tahanan, awi ewen mikeh ela-ela kareh aton je hanangoi akan saran tuntang hadari. 27:43 Tapi perwira te mangahana kahandak ewen te awi ie handak manyalamat Paulus. Ie manyoho kakare oloh je tau hanangoi sewu helo tuntang hanangoi akan saran pantai; 27:44 kare oloh je beken musti manuntut hayak bahapang hapan kare papan atawa kare kiwak kapal te. Dengan jalan kalote ikei handiai salamat sampai akan saran.
28:1 Limbah sampai saran dengan salamat, harue ikei katawan aran pulau te Malta. 28:2 Oloh hong pulau te paham bajenta dengan ikei. Ewen manambang ikei samandiai dengan bahalap tuntang mambelom apui akan ikei awi wayah ujan jari sampai tuntang udara mahin sadingen. 28:3 Paulus mamumpong kayu tuntang mina kare kayu te intu hunjun apui. Pandehan ie mawie, ije kongan handipe balua awi kalasut apui palus manotok lengee. 28:4 Ganan oloh pulau te mite handipe te ginta-gintang intu lengen Paulus, ewen hamauh sama arep ewen, "Oloh toh musti oloh pamuno, basa aloh ie lapas bara bahaya laut, Dewa kabujur dia manalua ie belom." 28:5 Tapi Paulus mambirik handipe te akan huang apui tuntang isut mahin jaton ie mangkeme kapehe. 28:6 Ewen manirok dia tahi hindai lengen Paulus akan kembang atawa Paulus akan balongkang matei manantekas. Tapi limbah mentai pire-pire katahie tuntang jaton kea taloh je malabien ampie manjadi buah Paulus, tirok ewen hobah tinai palus ewen manyewut Paulus te Dewa. 28:7 Dia kejau bara eka te aton petak ain Publius, oloh je paling papa hong pulau te. Dengan bahalap ie manambang ikei kilau tamu ayue katahin telo andau. 28:8 Hong katika te bapae metoh haban, buah darem tuntang disentri. Paulus haguet manyengok bapae je haban te palus balakudoa tuntang mina lengee hunjun ie sampai ie keleh. 28:9 Tagal kajadian te maka kakare oloh haban hong pulau te dumah manalih Paulus, tuntang ewen tau keleh. 28:10 Ewen manyarah akan ikei are panenga, tuntang katika ikei handak balayar, ewen mimbit akan kapal taloh handiai je imerlu ikei hong panjalanan ikei. 28:11 Limbah telo bulan intu hete, ikei haguet bara pulau te mandai' ije kapal bara Aleksandria je katahin wayah sadingen tende manyandehan hong pulau te. Kapal te mahapan lambang "Dewa hatatup Kastor tuntang Poluks". 28:12 Ikei tende hong lewu Sirakusa tuntang melai intu hete telo andau. 28:13 Bara hete ikei balayar manyaroroi pantai sampai lewu Regium. Andau jewue riwut nampara manampur bara hila salatan, awi te due andau katahie ikei sampai hong lewu Putioli. 28:14 Intu hete ikei hasondau dengan pire-pire oloh je percaya dengan Yesus, tuntang tagal parawei ewen ikei melai eka ewen katahin ije minggo. Palus ukei haguet akan Roma. 28:15 Kare pahari hong Roma je percaya dengan Yesus mahining barita tahiu ikei, sampai ewen manalih Pasar Apius tuntang Pasanggarahan Telo mangat manambang ikei. Katika Paulus hasondau dengan ewen, ie manyewut tarima kasih akan Hatalla tuntang ateie manjadi salawah. 28:16 Metoh sampai hong Roma, Paulus tau melai kabuate hayak ingawal awi ije biti prajurit. 28:17 Limbah telo andau, Paulus mantehau kare oloh Yehudi je basewut hong eka te. Tuntang limbah ewen hapumpong, ie hamauh dengan ewen, "Pahari handiai! Aku jaton basala en-en dengan utus itah, atawa malanggar kare hadat kabiasaan je inarima itah bara tato hiang itah. Aloh kalote aku inawan hong Yerusalem tuntang inyarah akan kare oloh Roma. 28:18 Limbah perkara ayungku iriksa, ewen handak malapas aku, awi ternyata ije mahin jaton kasalan je iawiku sampai patut ihukum hapan hukuman matei. 28:19 Tapi awi kare oloh Yehudi malawan, aku tapaksa manuntut perkara ayungku inyidang hong pangadilan Kaisar Roma. Aku malalus jete dia jaka awiku aton taloh je handak ingadoku mawi utus ayungku kabuat. 28:20 Tuntang jete bukue aku balaku hasondau dengan keton mangat tau hapander-sarita dengan keton; basa aku imasong puna tagal Panyalamat je ientai awi utus Israel." 28:21 Palus ewen hamauh dengae, "Ije kalambar surat mahin dia aton ikei tarimae bara Yudea tahiu pahari. Tuntang ije mahin jaton pahari bara kanih je dumah mimbit kabar tahiu pahari atawa manahiu taloh je papa mawi pahari. 28:22 Tapi ikei mipen kea mahining tahiu kapercayan pahari, basa ikei uras jari mahining oloh manyalan auh ajar je ain pahari te." 28:23 Maka ewen tuntang Paulus manukas ije andau uka hasondau. Hong andau te are oloh dumah akan eka Paulus melai. Bara hanjewu sampai halemei Paulus manarang tuntang mambarita akan ewen barita tahiu kilen ampie Hatalla marentah kilau raja. Awie mahapan kare ayat bara surat Moses tuntang Surat Kare Nabi, Paulus manggau jalan mangat ewen percaya dengan Yesus. 28:24 Aton je percaya dengan taloh je insanan Paulus, tapi aton kea je dia percaya. 28:25 Marak angat pendirian je hakalawan, ewen malihi eka te, limbah Paulus mansanan akan ewen je kalotoh auhe, "Puna pas toto taloh je insanan awi Roh Hatalla mahalau Nabi Yesaya akan tato hiang keton! 28:26 Hatalla hamauh, 'Lius ih sanan akan utus jetoh: keton kareh harajur mahining tapi dia harati; keton kareh harajur manampayah tapi jaton katawan taloh je akan manjadi. 28:27 Basa tirok pikir utus jetoh jari manjadi tumpul. pinding ewen jari badengen tuntang matan ewen jari ingambutepe. Jete manjadi uka matan ewen ela mite, pinding ewen dia mahining, tirok ewen dia harati, tuntang dia haluli manalih aku, palus aku akan mampakeleh ewen.' " 28:28 Kajariae Paulus hamauh, "Pahari handiai musti katawan iete, kabar tahiu salamat je bara Hatalla toh jari imbarita akan kare utus beken je dia Yehudi. Ewen jari manumuoe!" 28:29 Limbah Paulus hamauh kalote, kare oloh Yehudi te malihi eka te sambil hakalawan sama arep ewen. 28:30 Due nyelo katahie Paulus melai intu Roma, hong huma je inyewae kabuat. Ie hanjak manarima oloh handiai je dumah manalih ie. 28:31 Tuntang dengan kahanyie ie mambarita akan ewen tahiu kilen ampie Hatalla marentah kilau raja tuntang tahiu Tuhan Yesus Kristus. Paulus malalus jete dengan bebas, jaton oloh je mahambang ie.
1:1 Pahari handiai hong Roma je inyinta Hatalla tuntang je jari intehau awi Hatalla uka manjadi oloh ayue. Hatalla jari mintih tuntang mangkat aku uka tantai mambarita Barita Bahalap bara Hatalla. 1:2 Barita Bahalap te jari injanji awi Hatalla hong jaman horan mahalau kare nabi ayue tuntang jari inyurat huang Surat Barasih. 1:3 Barita Bahalap te tahiu Anak Hatalla, Tuhan itah Yesus Kristus. Secara olon ie te panakan Dawid, 1:4 tapi secara hatalla ie te puna toto Anak Hatalla. Jete gitan batantu awi kuasa je dia puji helo mahalau kamisike bara pampatei. 1:5 Mahalau ie kea Hatalla manenga akangku asi manjadi rasul, uka aku -- mangat mahormat Kristus -- mangagalan kare oloh bara kakare bangsa uka percaya tuntang baketep. 1:6 Je imaksudku dengan kare bangsa iete keton je aton hong Roma; keton mahin jari intehau uka manjadi ungkup Yesus Kristus. 1:7 Jete bukue aku manyurat akan keton. Keleh Hatalla Bapa itah tuntang Tuhan Yesus Kristus manenga berkat tuntang kadamai akan keton. 1:8 Mahalau Yesus Kristus, helo-helo aku manyewut tarima kasih akan Hatalla tagal kare Pahari handiai; basa oloh hapus kalunen jari mahining je keton jari percaya toto dengan Kristus. 1:9 Aku harajur mingat keton amon aku balakudoa. Hatalla saksie taloh je insanangku akan keton toh toto. Iete Hatalla je inempoku hapan salepah ateiku awiku mangabar Barita Bahalap tahiu Anake. 1:10 Aku balaku nyame-nyame dengan Hatalla, mudahan ie handak manyoho aku metoh toh maja manalih keton. 1:11 Basa aku mipen toto hasondau dengan keton mangat aku tau mambagi akan keton panenga bara Roh Hatalla hapan mampaabas keton. 1:12 Maksudku iete awi itah jari sama-sama percaya dengan Yesus Kristus, maka itah tau habagi kaabas akan sama arep. 1:13 Pahari handiai! Aku handak mangat keton katawan jari kinjap aku bara kahandak uka maja manalih keton tapi harajur aton bewei halangae. Aku mipen uka hong marak keton kea gawingku aton hasile sama kilau hasil gawingku je jari aton hong marak kare oloh je dia Yehudi hong kare eka beken. 1:14 Basa ayungku aton gawi je musti ilalusku akan kakare bangsa: Akan oloh bangsawan tuntang jipen, oloh je jari aton pendidikae tuntang je hindai aton pendidikae. 1:15 Jete bukue aku handak toto mangabar Barita Bahalap te akan keton je melai hong Roma kea. 1:16 Aku percaya toto dengan Barita Bahalap te, awi barita te jete kuasa bara Hatalla uka manyalamat oloh handiai je percaya; je mambatang akan oloh Yehudi, tuntang akan bangsa beken kea. 1:17 Basa hapan Barita Bahalap te Hatalla mamparahan kilen ampien carae hubungan olon dengan Hatalla tau ingambuah haluli; carae te iete mahapan kapercaya dengan Hatalla, bara tamparae sampai kahapuse. Jete sama kilau je tarasurat huang Surat Barasih, "Oloh je percaya dengan Hatalla sampai hubungan ayue dengan Hatalla manjadi bahalap haluli, oloh te akan belom!" 1:18 Bara sorga Hatalla mamparahan kalaite dengan kakare dosa tuntang kapapan olon, basa kapapa mahambang olon mangasene auh ajar je toto tahiu Hatalla. 1:19 Taloh je tau ingatawan oloh tahiu Hatalla jari tarang huang pangingat atei olon, basa Hatalla kabuat jari mangarinah jete akan olon. 1:20 Bara katika Hatalla manjapa kalunen, kare sipat Hatalla je dia gitan, iete ampin lagun ayue kilau Hatalla tuntang kuasa je katatahie, jari olih olon haratie mahalau taloh handiai je jari injapae. Jadi oloh samasinde jaton bara alasan hapae mambujur arepe. 1:21 Olon mangasene Hatalla, tapi olon dia mahormat ie kilau Hatalla tuntang dia kea manarimakasih akae. Huang katambalike olon manirok taloh je mia-mias; atei ewen manjadi kaput. 1:22 Ewen mangkeme arepe pintar-harati, padahal ewen humong. 1:23 Dia ie Hatalla je katatahie je inyembah ewen malengkan kare hampatong je inampa manyonto ampin taloh-belom je tau matei; iete olon, burung, meto je hapai' epat, tuntang meto je manggayar. 1:24 Tagal te Hatalla manalua ewen inguasa awi kipen atei ewen uka mawi taloh je harayap, sampai ewen malalus kare taloh je papa dengan sama arepe. 1:25 Hatalla je bujur, ingganti ewen hapan taloh je dia bujur. Ewen dia mayembah tuntang manempo ie je manjapa taloh handiai malengkan taloh je injapa. Padahal ie je manjapa te je ihormat-inara sampai katatahie! Amen. 1:26 Awi olon malalus taloh je kilau te, maka Hatalla manalua ewen manumon angat kipen ewen je randah. Kare oloh bawi ain ewen dia hindai mangguna kipen ewen dengan oloh hatue kilau je puna kapatute, malengkan mangguna kipen ewen te dengan sama bawi. 1:27 Oloh hatue mahin kalote kea; ewen dia hindai manumon cara je patut mawi hubungan dengan oloh bawi, malengkan manganji arepe dengan sama hatue. Oloh hatue malalus taloh je mampahawen dengan sama hatue, sampai ewen manarima baleh je ombet akae dengan gawin ewen je papa te. 1:28 Awi olon mangkeme dia perlu mangasene Hatalla, maka Hatalla manalua tirok ewen manjadi rusak, sampai ewen malalus kare taloh je dia tau ewen malaluse. 1:29 Atei ewen kontep dengan taloh handiai je papa, je dia bujur; kontep awi kakoho, kapapa tuntang kahiri; kontep awi kipen handak mampatei, kalahi, manipu tuntang mingkes kasingi. Ewen rajin manahiu oloh beken, 1:30 rajin mamapa aran oloh beken; ewen te bajoho tuntang kurang ajar, basingi dengan Hatalla tuntang rajin layau kotake. Ewen apik manggau cara taheta uka mawi kapapa. Ewen rajin malawan oloh bakas; 1:31 ewen dia maku harati auh oloh beken; ewen dia baketep tuntang tulas dengan sama arepe. 1:32 Ewen katawan, huang hukum Hatalla, oloh je malalus taloh handiai te patut ihukum matei. Aloh kalote kare hal te iawi ewen kea; tuntang ewen rajin haream amon oloh beken mawie kalote kea.
2:1 Tagal te pahari handiai, eweh kea pahari sampai pahari handak manyalan oloh beken? Pahari dia olih en-en akan mambela arep! Basa amon pahari manyalan oloh beken padahal pahari kabuat je malalus gawi je sama kilau ewen, maka pahari mawi hukuman buah arep pahari kea. 2:2 Itah katawan amon Hatalla mahukum oloh je mawi gawi kilau te, kaputusan Hatalla te bujur. 2:3 Tapi keton, pahari handiai, keton kabuat kea malalus kare taloh je indawa keton mawi oloh beken! Tuntang keton manyangka keton olih lapas bara hukuman Hatalla? 2:4 Atawa keton maanggap enteng atei Hatalla je pamasi tuntang kasabare je paham hai te? Pasti keton katawan je Hatalla mamparahan kahalap ateie awi ie handak uka keton hobah bara kare dosan keton. 2:5 Tapi keton batekang atei keton tuntang dia maku hobah. Tagal te keton kabuat ih je mawi hukuman akan arep keton sasar babehat hong Andau Kiamat, amon Hatalla mamparahan kalaite tuntang manukas hukuman. 2:6 Awi Hatalla handak mambaleh genep bitin oloh tumon kare gawie. 2:7 Hatalla manenga pambelom je bujur tuntang katatahie akan ewen je baketep toto malalus kahalap uka mandino taloh je tinduh, je paham ihormat tuntang je katatahie. 2:8 Tapi kare oloh je manirok arepe kabuat tuntang dia maku mamenda Hatalla, tapi manumon taloh je papa, kare oloh te kareh buah kalait Hatalla je paham. 2:9 Gagenep oloh je rajin mawi kapapa kareh buah kapehe tuntang kajake; oloh Yehudi helo, limbah te kare bangsa beken. 2:10 Tapi oloh samandiai je rajin malalus kahalap kareh mandino katinduh tuntang hormat tuntang salamat bara Hatalla; oloh Yehudi helo, limbah te kare oloh bangsa beken. 2:11 Basa Hatalla mawi gawie sama akan oloh handiai. 2:12 Kare bangsa beken badosa marak jaton katawan hukum agama ain oloh Yehudi. Jadi ewen ihukum luar bara hukum te. Tapi kare oloh Yehudi badosa limbah mangatawan hukum te; tagal te ewen inuntut kea hagalang hukum te. 2:13 Basa oloh bahalap haluli dengan Hatalla, dia awi oloh te jari mangatawan hukum agama ain oloh Yehudi, malengkan awi ie malalus taloh je tarasurat huang hukum te. 2:14 Kare oloh bangsa beken dia mangatawan hukum agama ain oloh Yehudi. Tapi amon awi kahandak ewen kabuat ewen malalus taloh je irentah awi hukum te, atei ewen kabuat manjadi hukum akan ewen, aloh ewen dia mangatawan hukum agama ain oloh Yehudi. 2:15 Hadat dasar ewen mamparahan taloh je irentah awi hukum te tarasurat intu huang atei ewen. Pangingat atei ewen mahin mambukti hal te, basa ewen kabuat kanateke inyalan tuntang kanateke imbujur awi tirok ewen. 2:16 Kalote kea akan manjadi kareh hong andau je jari inukas te. Hong andau te -- manumon Barita Bahalap je jari imbaritaku -- mahalau Yesus Kristus, Hatalla kareh mahakim kare taloh je basilim je aton huang atei tuntang tirok oloh handiai. 2:17 Tapi toh kilen auhe tahiu kare pahari kabuat? Pahari mangaku arep oloh Yehudi? Pahari bahapang dengan hukum agama Yehudi tuntang pahari mangekeme tamam tagal hubungan pahari dengan Hatalla. 2:18 Pahari mandino kare tanda bara hukum te sampai pahari mangatawan kare kahandak Hatalla tuntang tau manukas je kueh taloh je bahalap. 2:19 Pahari percaya je pahari te pamimpin oloh je babute tuntang kalawa akan ewen je melai huang kakaput; 2:20 Pahari manjadi tukang didik akan kare oloh je randah hadat dasare, tuntang manjadi guru akan kakare oloh je humong. Pahari percaya je huang hukum oloh Yehudi, pahari mandino kakare macam pangatawan tuntang auh ajar je bujur. 2:21 Pahari majar oloh beken; nah, mbuhen pahari dia majar arep kabuat? Pahari majar uka oloh ela manakau, padahal pahari kabuat manakau! 2:22 Pahari majar oloh uka ela habandong, padahal pahari kabuat habandong! Pahari basingi dengan kare hampatong dewa, padahal pahari kabuat manduan kare ramon sarahan bara kare pasah taloh. 2:23 Pahari mangkeme tamam awi pahari aton mina hukum Moses, padahal pahari mahina Hatalla awi dia manumon hukum ayue. 2:24 Huang Surat Barasih tarasurat kalotoh, "Tagal keton, o kare oloh Yehudi, maka aran Hatalla manjadi papa hong marak kare bangsa beken." 2:25 Amon pahari baketep mamenda hukum agama Yehudi, maka sunat pahari aton kea gunae. Tapi amon pahari dia tau mamenda kare auh je irentah huang hukum te, maka sunat pahari jaton baguna samasinde. 2:26 Amon ije biti oloh je dia Yehudi dia inyunat, mamenda hukum agama Yehudi, en dia Hatalla maanggap ie kilau oloh je jari inyunat? 2:27 Tuntang kare oloh je dia inyunat te kareh manyalan pahari oloh Yehudi, basa pahari mina hukum agama Yehudi tuntang inyunat, tapi pahari malanggar hukum te. Ewen dia inyunat, tapi ewen haream je mamenda hukum agama Yehudi. 2:28 Basa oloh Yehudi je bujur dia ie oloh je baya arae bewei Yehudi; tuntang oloh je toto-toto inyunat dia ie oloh je inyunat baya auh sewute bewei. 2:29 Tapi oloh Yehudi je bujur iete oloh je ateie basuang hambaruan Yehudi; tuntang sunat je bujur iete sunat hong atei je iawi Roh Hatalla, dia je inyunat huang buku. Oloh je kilau te mandino tara bara Hatalla, tapi dia bara olon.
3:1 Amon kalote, en kaontonge manjadi oloh Yehudi? Tuntang en gunae manumon atoran sunat? 3:2 Batantu are gunae! Je mambatang, awi puna akan oloh Yehudi Hatalla mingkes kare auh Hatalla. 3:3 Tapi kilen ampie amon aton belahe oloh Yehudi je dia baketep? En tagal te Hatalla manjadi dia baketep atei? 3:4 Batantu dia! Basa tarang batantu Hatalla te harajur bujur, aloh kea genep oloh te pananjaro. Huang Surat Barasih tarasurat, "Keleh ikau mangatawan bujur taloh je ingotakm, tuntang ikau manang metoh ikau ihakim." 3:5 Tapi amon kaadilan Hatalla manjadi sasar bakarinah awi itah malalus taloh je dia bujur, en taloh je handak ingotak itah? En Hatalla te dia adil amon ie mahukum itah? (Auh paisek toh puna buah manumon cara kaolon.) 3:6 Dia haliai! Basa amon Hatalla dia adil, kilen ampie ie tau mahakim kalunen toh? 3:7 Tapi amon tagal gawi je dia bujur, taloh je bujur tahiu Hatalla sasar hanjuju sampai ie inara, mbuhen oloh je nguan gawi papa te magon inyalan kilau oloh badosa? 3:8 Tuntang mbuhen itah dia tau hamauh, "Keleh itah mawi kapapa mangat lembut kahalap?" Puna aton kare oloh je mahina aku awi koae aku jari hamauh kalote. Kare oloh je kilau te patut ih ihukum awi Hatalla. 3:9 Nah, en ije biti oloh Yehudi labih bahalap bara bangsa beken? Dia samasinde! Aku jari mansanan aloh oloh Yehudi kalote kea oloh bangsa beken, uras jari inguasa awi dosa. 3:10 Kilau je tarasurat huang Surat Barasih, "Ije mahin jaton oloh je bujur, 3:11 Ije mahin jaton oloh je harati, tuntang ije mahin jaton oloh je manyembah Hatalla. 3:12 Oloh samandiai jari mangejau arepe bara Hatalla; ewen samandiai jari layang. Ije biti mahin jaton je malalus taloh je bujur; ije biti mahin jaton! 3:13 Balengkong ewen kilau kubur je habangah. Tirok pikir ewen mahasor bara jelan ewen, tuntang totok biwih ewen manyambur auh papa mawi oloh beken, kilau wisan handipe. 3:14 Nyaman ewen kontep awi sapa tuntang auh kotok mawi oloh. 3:15 Tanjong ewen balias kilau handak mangapehe tuntang mampatei oloh. 3:16 Kalenyoh tuntang kasusah inawor ewen hete-hete. 3:17 Matan ewen babute tahiu jalan pambelom je damai-sanang, 3:18 tuntang dia mahormat Hatalla." 3:19 Toh itah katawan iete kakare taloh je tarasurat huang hukum agama Yehudi, jete akan kare oloh je aton hong penda parentah hukum te. Maka kalote ije biti mahin jaton oloh je tau manenga alasan en-en hindai tuntang hapus kalunen tau inuntut awi Hatalla. 3:20 Basa ije biti mahin jaton oloh olih hakabuah dengan Hatalla awi oloh te malalus kare taloh je aton huang hukum agama. Katambalike, hukum agama te baya mamparahan akan olon je olon te badosa. 3:21 Tapi toh Hatalla jari mamparahan jalan kilen ampie oloh tau hakabuah tinai dengae; tuntang cara jete jaton hubungae dengan hukum agama Yehudi. Kare surat Moses tuntang surat kare nabi puna mangarinah hal te, 3:22 iete Hatalla mawi olon hakabuah dengae, baya amon oloh percaya dengan Yesus Kristus. Hatalla mawi jete akan oloh handiai je percaya dengan Kristus; basa jaton kabekee: 3:23 Oloh handiai jari badosa tuntang kejau bara Hatalla je handak manyalamat ewen. 3:24 Baya asin Hatalla bewei je inengae kakai bewei, hubungan olon dengan Hatalla manjadi bahalap haluli; carae iete: olon ilapas awi Kristus Yesus. 3:25 Hatalla mangorban Kristus Yesus uka awi pampateie te olon insanan lapas bara kasalan amon ewen percaya dengae. Hatalla mawie kalote uka mamparahan kaadilan ayue. Basa hong wayah je jari halau Hatalla jari mawi arepe sabar dengan kare dosan olon, sampai ie jaton mahukum ewen. 3:26 Tapi toh ie manduan tindakan malawan dosa uka mamparahan kaadilan ayue. Dengan cara te ie mamparahan arepe puna bujur; tuntang gagenep oloh je percaya dengan Yesus, iawie kilau oloh je jari hakabuah haluli dengan Hatalla. 3:27 Tagal te jaton hindai alasan akan itah uka mampatamam arep itah. Mbuhen kalote? En awi itah malalus taloh je aton huang hukum agama Yehudi? Dia. Tapi awi itah percaya. 3:28 Basa kasimpulae te kalotoh: oloh, manjadi hakabuah haluli dengan Hatalla, dia awi ie malalus taloh je aton huang hukum agama Yehudi, malengkan awi ie percaya dengan Yesus Kristus. 3:29 Atawa Hatalla te Hatallan oloh Yehudi bewei? En dia ie Hatallan kare bangsa beken kea? Iyoh, puna ie Hatallan bangsa beken kea! 3:30 Basa Hatalla te baya ije. Ie ih je mawi kare oloh Yehudi olih hakabuah haluli dengan Hatalla awi ewen percaya. Tuntang ie kea ih je mawi kare bangsa beken olih hakabuah haluli dengan Hatalla; jete kea mahin awi ewen percaya. 3:31 En rimae jetoh awi itah percaya dengan Kristus itah balalu manganan hukum agama Yehudi? Dia sama sinde! Tagal kapercayan itah te, jete haream je mawi itah marega hukum te.
4:1 Amon kalote, en koan itah tahiu Abraham, tato hiang itah te? Kilen ampie panyangkom ayue? 4:2 Amon kare taloh je ilaluse mimbit Hatalla manarima ie kilau oloh je manyanang atei Hatalla, maka aton kea alasan akae uka mampatamam arepe. Tapi ie dia tau tama-tamam intu taharep Hatalla. 4:3 Huang Surat Barasih tarasurat, "Abraham percaya dengan Hatalla, tuntang tagal kapercayae te ie inarima Hatalla kilau oloh je manyanang atei Hatalla." 4:4 Oloh je bagawi manarima gajih; tuntang gajihe te ianggap kilau ije panenga basa jete hak ayue. 4:5 Tapi aton oloh je dia bahapang dengan usahae kabuat; ie manyarah arepe akan Hatalla je mansanan oloh badosa lapas bara kasalan. Hunjun galang kapercaya te Hatalla manarima oloh te manjadi oloh je manyanang atei Hatalla. 4:6 Kalote kea ih manumon tirok pikir Dawid; jete bukue ie manyampai auh salamat akan oloh je jari inarima awi Hatalla kilau oloh je manyanang ateie, aloh Hatalla dia manampayah kare gawin oloh te. Dawid hamauh kalotoh, 4:7 "Salamat oloh je kare kasalae iampun tuntang kare kasalae jari ingubur awi Hatalla! 4:8 Salamat oloh je kare dosae jaton inuntut awi Tuhan!" 4:9 En auh salamat jetoh baya inyampai manintu kare oloh je manumon atoran sunat bewei? Atawa akan kare oloh je dia manumon atoran sunat kea? Jari insanan ikei bara solake, iete Abraham inarima awi Hatalla awi ie manyanang atei Hatalla, awi Abraham percaya dengan Hatalla. 4:10 Nah, hamparea Hatalla mangarinah hal te? Helo bara Abraham inyunat atawa limbahe? Puna helo bara ie inyunat, dia ie limbahe. 4:11 Ie inyunat rahian, tuntang sunat ayue te baya kilau tanda je Hatalla jari manarima ie kilau oloh je mampahanjak atei Hatalla awi ie percaya dengan Hatalla. Ie inarima awi Hatalla metoh ie magon hindai manumon atoran sunat. Tuntang Abraham manjadi bapa manumon cara roh akan oloh handiai je percaya dengan Hatalla, tuntang je tagal te jari inarima awi Hatalla kilau oloh je manyanang ateie, aloh ewen dia manumon atoran sunat. 4:12 Abraham kea kilau bapa rohani akan kare oloh je omba atoran sunat. Ie bapa rohani ewen dia baya awi ewen omba atoran sunat, tapi awi ewen kea belom hong kapercaya dengan Hatalla, sama kilau Abraham hong katika ie hindai belom omba atoran sunat. 4:13 Hatalla hajanji dengan Abraham tuntang dengan panakae, iete Abraham akan manjadi oloh je tempon kalunen toh. Hatalla hajanji kalote dia awi Abraham taat dengan hukum agama Yehudi, tapi awi ie percaya dengan Hatalla, awi ie manyanang atei Hatalla. 4:14 Basa amon baya kare oloh je taat dengan kare hukum agama Yehudi bewei je manarima taloh je injanji awi Hatalla, maka kapercaya dengan Hatalla jaton baguna samasinde, tuntang janjin Hatalla mahin dia baguna samasinde. 4:15 Hukum agama Yehudi mampalembut hukum Hatalla. Tapi amon hukum jaton, maka kalangkah mahin jaton kea. 4:16 Jadi janjin Hatalla te inggalang awi kapercaya dengan Hatalla. Jete manjadi jaminan akan kakare panakan Abraham iete janji te inenga akan ewen kilau ije panenga je inenga bewei bara Hatalla; dia baya akan ewen je taat dengan hukum agama Yehudi bewei, tapi kea akan ewen je percaya dengan Hatalla sama kilau Abraham percaya dengae. Basa Abraham te bapa itah samandiai secara roh. 4:17 Basa Hatalla hamauh kalotoh dengan Abraham, "Aku jari manjadian ikau manjadi bapa akan kare bangsa." Kalote Hatalla manenga janji te akan Abraham. Tuntang Abraham percaya dengae. Ie te Hatalla je mambelom oloh matei; ie te kea Hatalla je hapan auhe bewei mawi taloh je dia puji aton manjadi aton. 4:18 Abraham tetep kea percaya tuntang tetep harap aloh kaharap jari jaton hindai. Tagal te ie manjadi bapa ain are bangsa. Kilau je tarasurat huang Surat Barasih, "Panakam akan manjadi are toto." 4:19 Abraham katika te katawan je ie dia olih hindai manurun panakae awi bitie jari dia olih en-en, awi umure jari tokep saratus nyelo, indahang tinai Sarah kabalie te tamanang. Mahin kapercayan Abraham jaton tendur. 4:20 Ie tetep percaya tuntang dia bembang dengan janjin Hatalla. Kapercayae manjadi sasar dehen haream, sampai ie manara-mahormat Hatalla. 4:21 Ie percaya toto je Hatalla tau malalus taloh je jari injanji Hatalla akae. 4:22 Jete bukue Abraham inarima awi Hatalla awi ie manyanang atei Hatalla. 4:23 Auh kotak, "Inarima awi ie manyanang atei Hatalla" inyurat dia baya akan Abraham kabuate bewei, 4:24 tapi akan itah kea. Itah kea akan inarima awi itah mampahanjak atei Hatalla, basa itah percaya dengan Hatalla je mambelom Yesus, Tuhan itah, bara pampatei. 4:25 Yesus te jari inyarah uka impatei tagal kare dosan itah; palus ie imbelom haluli awi Hatalla uka itah hakabuah tinai dengan Hatalla.
5:1 Toh itah jari hakabuah tinai dengan Hatalla, awi itah percaya. Tuntang tagal te itah belom huang kadamai dengan Hatalla mahalau Tuhan itah Yesus Kristus. 5:2 Awi itah percaya dengan Yesus, maka ie mampaolih itah belom huang sintan Hatalla, tuntang hapan sinta te ih itah belom wayah toh. Tagal te itah hanjak atei mingkes kaharap te, iete itah akan mangkeme salamat je inenga Hatalla! 5:3 Tuntang labih bara te, itah kea hanjak huang kajake, basa itah katawan kajake te mawi oloh manjadi baketep, 5:4 tuntang kaketep tau mawi oloh tahan huang tingkes; maka jete je mampalembut kaharap. 5:5 Kaharap je kilau toh dia tau mangacewa itah, basa itah jari inyuang awi Hatalla hapan sintae. Hatalla malalus jete hapan Roh ayue, je jari inengae akan itah. 5:6 Katika itah nihau kaharap, Kristus matei akan itah hong katika je patut je inantu awi Hatalla; padahal itah toh puna oloh je kejau bara Hatalla. 5:7 Akan oloh je bujur mahin bahali oloh handak matei. Tapi akan oloh je bahalap, mikeh aton kea oloh je bahanyi matei. 5:8 Tapi Hatalla mamparahan sintae akan itah katika Kristus matei akan itah metoh itah magon oloh badosa. 5:9 Toh itah jari hakabuah haluli dengan Hatalla mahalau pampatei Kristus; tagal te pasti itah kareh inyalamat kea bara kalait Hatalla awi Kristus. 5:10 Amon hong wayah itah hamusoh dengan Hatalla itah indamai dengae mahalau pampatei Anake, mahin hindai limbah toh hubungan itah dengan Hatalla bahalap tinai, batantu itah kareh inyalamat kea mahalau pambelom Kristus. 5:11 Tuntang labih bara te, itah mahin hanjak kea tagal kahalap Hatalla mahalau Tuhan itah Yesus Kristus. Basa mahalau Kristus, toh itah mangkeme kamangat hubungan itah je bahalap te dengan Hatalla. 5:12 Dosa tame akan huang kalunen mahalau ije biti oloh, tuntang bara dosa te lembut pampatei. Kajariae, pampatei tayap akan hapus oloh kalunen, basa oloh handiai jari badosa. 5:13 Helo bara hukum agama Yehudi inenga, dosa jari aton huang kalunen. Tapi dosa dia inuntut, awi jaton hukum je tau ilanggar. 5:14 Aloh kalote, bara jaman Adam sampai hong jaman Moses, pampatei manguasa salepah oloh kalunen. Malahan kare oloh je jaton mawi kalangkah kilau je iawi Adam, kare oloh te mahin omba inguasa awi pampatei. Adam jete gambar ayue je akan dumah rahian. 5:15 Tapi ewen due te dia sama; basa panengan Hatalla labih hai haream amon inanding dengan kalangkah je iawi Adam. Kalangkah ije biti olon mawi oloh are matei. Dia laluen kalabien kahain asin Hatalla tuntang panengan Hatalla je inengae mahalau kahalap atei ije biti oloh, iete Yesus Kristus. 5:16 Panengan Hatalla labih kejau kahaie bara dosan ije biti oloh te. Basa limbah ije biti oloh mawi kalangkah, maka balua auh hukuman, iete "basala". Tapi limbah are oloh mawi dosa maka dumah panenga bara Hatalla je mansanan, "dia basala". 5:17 Tagal kalangkah ije biti oloh, pampatei palus tayap akan hete-hete mahalau ije biti oloh te. Dia laluen kalabien kahaie hindai kajarian taloh je ilalus awi ije biti oloh beken, iete Yesus Kristus. Mahalau ie, Hatalla malimpar sintae akan are toto oloh tuntang inenga kakai bewei sampai mampaolih ewen hakabuah tinai dengan Hatalla; ewen aton barakuasa hong kalunen toh mahalau Kristus. 5:18 Jadi, sama kilau kalangkah ije biti oloh kajariae mawi oloh hapus kalunen ihukum, kalote kea gawin ije biti oloh je manumon kahandak Hatalla, kajariae mawi oloh handiai lapas bara kasalan tuntang mandino pambelom. 5:19 Tuntang ganan ije biti oloh je dia taat te mawi are oloh manjadi oloh badosa, kalote kea tagal ije biti oloh je taat dengan Hatalla maka are oloh olih hakabuah tinai dengan Hatalla. 5:20 Je manenga hukum agama Yehudi iete Hatalla kabuat. Tapi sasar oloh mawi usaha mamenda hukum te, sasar kea ewen malanggar tuntang mawi dosa taharep Hatalla. Tapi sasar olon mawi dosa, Hatalla sasar kea sinta ewen. 5:21 Nah, itah musti matei awi itah mawi dosa. Tapi Hatalla sinta itah tuntang manenga jalan akan itah uka hakabuah tinai dengae. Tuntang awi hubungan itah dengan Hatalla jari bahalap tinai, ie kea manenga pambelom je bujur tuntang katatahie akan itah mahalau Yesus Kristus Tuhan itah.
6:1 Amon kalote, en taloh je koan itah? En itah musti jua-juan mawi dosa mangat Hatalla sasar sinta itah? 6:2 Batantu dia! Dosa dia hindai bara kuasa hunjun itah, jadi, kueh tau itah raju-rajur belom sambil mawi dosa? 6:3 En kare pahari katawan hong katika itah impandoi, itah impahinje dengan Kristus Yesus? Jetoh rimae itah impahinje dengae huang pampateie. 6:4 Hapan pampandoi te, itah ingubur hayak dengan Kristus tuntang omba matei haya-hayak dengae, mangat sama kilau Kristus imbelom bara pampatei awi kuasan Bapa je tinduh-barasih, kalote kea itah tau mahoroi ije pambelom je taheta. 6:5 Amon itah jari manjadi ije dengan Kristus awi itah omba matei hayak dengae, itah kareh manjadi ije dengae kea awi itah omba imbelom haluli kilau ie. 6:6 Itah mangatawan je sipat itah je usang kilau olon jari impatei haya-hayak dengan Kristus hong kayu sampalaki mangat kuasan sipat itah je badosa te impalenyoh; maka kalote itah dia hindai manjadi jipen dosa. 6:7 Basa amon ije biti oloh matei, oloh te ilapas bara kuasan dosa. 6:8 Amon itah jari matei hayak dengan Kristus, itah percaya itah kea akan belom hayak dengae. 6:9 Basa itah katawan Kristus jari imbelom bara pampatei tuntang ie dia akan matei hindai, pampatei jari jaton hindai kuasae hunjun ie. 6:10 Pampatei je ingkeme Kristus iete pampatei akan dosa. Jete jari manjadi sinde bewei akan sampai katatahie. Tuntang pambelom je ihoroi wayah toh jete pambelom akan Hatalla. 6:11 Keton musti kea maanggap arep keton matei akan dosa, tapi belom hong hubungan je tokep dengan Hatalla mahalau Kristus Yesus. 6:12 Ela tinai manalua dosa manguasa pambelom keton hong kalunen toh, uka pahari ela manumon kahandak pahari je papa. 6:13 Ela kea pahari manyarah ramon bitin pahari akan kuasan dosa uka ingguna akan kahandak je papa. Tapi sarah bitin pahari akan Hatalla kilau oloh je jari iindah bara pampatei akan pambelom. Sarah arep keton lepa-lepah akan Hatalla mangat ihapan akan malalus kahandak Hatalla. 6:14 Dosa dia tau manguasa keton, basa keton dia hindai belom penda hukum agama Yehudi tapi penda sintan Hatalla. 6:15 Toh, en je hindai? En tau itah badosa basa itah dia hindai penda kuasan hukum agama Yehudi, malengkan penda kuasan sintan Hatalla? Dia samasinde! 6:16 En keton katawan amon keton manyarah arep keton akan ije biti oloh uka malalus kahandake maka keton jadi jipen oloh je inumon keton auhe te -- en te jipen dosa je mimbit keton akan pampatei, atawa jipen je taat dengan Hatalla, tuntang tagal te hakabuah haluli dengan Hatalla. 6:17 Tapi tarima kasih akan Hatalla! Basa bihin keton manjadi jipen dosa, tapi toh keton hapan sakalepah atei mamenda auh ajar je bujur je jari inenga akan keton. 6:18 Keton jari ilapas bara dosa, tuntang toh manjadi jipen akan kahandak Hatalla. 6:19 Awi kaharatin keton magon balemo, aku mahapan paribasa jipen uka labih murah akan keton haratie. Bihin keton manyarah arep keton lepah kilau jipen akan kare taloh je papa akan kare kahandak je papa. Kalote kea metoh toh keleh keton manyarah arep keton lepah kilau jipen akan kahandak Hatalla iete tantai akan kare kahandak Hatalla. 6:20 Katika keton injipen awi dosa, keton dia inguasa awi kahandak Hatalla. 6:21 Hong katika te en ontong je inarima keton bara kare taloh je wayah toh keton mahamen malaluse? Kare taloh gawi te baya mimbit pampatei! 6:22 Tapi toh keton jari ilapas bara dosa, tuntang manjadi jipen Hatalla. Kaontong keton iete belom baya akan Hatalla tuntang hal te mimbit pambelom je bujur tuntang katatahie. 6:23 Basa pampatei jete upah dosa; tapi pambelom je bujur tuntang katatahie hinje Kristus Yesus Tuhan itah jete panenga je inenga Hatalla kalote bewei.
7:1 Pahari handiai! Pahari handiai jari mangasene hukum. Jadi, keton katawan je kuasan hukum te mahunjun oloh, jete manjadi baya katahin oloh te magon belom. 7:2 Ije biti oloh bawi je aton banae, paribasae, leket dengan banae awi hukum katahin banae magon belom. Amon banae matei, sawae te lapas bara hukum je mameteng ie dengan kabalie. 7:3 Amon oloh bawi te belom dengan oloh hatue beken katika banae magon belom, maka oloh bawi te inyewut habandong. Tapi amon banae matei, maka manumon cara hukum, oloh bawi te jari bebas. Tuntang amon ie kawin tinai dengan ije biti oloh hatue beken, maka ie dia habandong. 7:4 Kalote kea hal je buah keton paharingku. Taharep hukum agama Yehudi keton jari matei, awi keton jari impahinje dengan bereng Kristus tuntang manjadi oloh ayue je jari imbelom haluli bara pampatei. Ie imbelom bara pampatei mangat itah manjadi baguna akan Hatalla huang pambelom itah. 7:5 Basa bihin itah belom manumon kare sipat olon. Hong katika te kare kahandak je badosa, je lembut awi aton hukum agama, marentah huang arep itah. Jete bukue itah malalus kare hal je kajariae akan pampatei. 7:6 Tapi toh itah dia hindai injarat huang hukum agama Yehudi. Itah jari matei taharep hukum je bihin manguasa itah. Itah dia hindai manempo dengan cara je usang, manumon hukum je inyurat. Toh itah manempo manumon cara je taheta je imparahan awi Roh Hatalla akan itah. 7:7 Amon kalote en taloh je koan itah? En hukum agama Yehudi te papa? Batantu dia! Tapi hukum jete je majar aku mangasene dosa. Aku dia tau katawan en rimae je bakoho te, jaka dia hukum agama je manyewut "Ela bakoho." 7:8 Mahalau hukum agama, dosa sampet mampalembut kakare macam kipen je bakoho huang ateiku; basa amon hukum agama jaton, maka dosa mahin matei. 7:9 Bihin aku mahin belom dia mahapan hukum agama. Tapi katika hukum agama lembut, dosa nampara belom 7:10 tuntang aku matei. Maka hukum agama te je solake ingahandak uka manenga pambelom, salenga mimbit pampatei haream akangku. 7:11 Awi mahalau hukum agama te, dosa sampet manipu tuntang mampatei aku. 7:12 Hukum agama asale bara Hatalla, tuntang gagenep parentah huang hukum te pandumahe bara Hatalla, jadi adil tuntang bahalap. 7:13 Nah, en jete rimae je bahalap te mampadumah pampatei akangku? Batantu dia! Dosa te je mampadumah pampatei te. Awi mahapan je bahalap, dosa mimbit pampatei akangku, basa kare sipat dosa gitan tarang batantu. Mahalau kare parentah Hatalla, maka gitan toto kapaham kapapan dosa. 7:14 Itah katawan hukum agama Yehudi asale bara Roh Hatalla; tapi aku toh oloh je balemo. Aku jari injual uka manjadi jipen dosa. 7:15 Basa aku kabuat dia harati taloh gawingku. Kare taloh je handak iawiku, jete dia aku mawie; tapi kare taloh je inyingiku, jete haream je iawiku. 7:16 Nah, amon aku malalus taloh je hakalawan dengan kahandakku, jete rimae aku mangaku hukum agama Yehudi te bahalap. 7:17 Jadi, sapunae dia ie aku hindai je malalus jete, malengkan dosa je manguasa aku. 7:18 Aku katawan ije mahin jaton taloh je bahalap huang arepku; iete intu huang lagun ayungku kilau olon. Basa aton kahandak huang aku uka malalus kahalap, tapi aku dia olih malaluse. 7:19 Aku jaton malalus taloh bahalap je handak ilalusku; katambalike aku malalus kare taloh je papa, je aku dia handak malaluse. 7:20 Amon aku malalus kare taloh je aku dia handak malaluse, jete rimae dia ie aku je malalus kare hal te malengkan dosa je manguasa aku. 7:21 Jadi, aku manduan kasimpulan iete hukum jetoh je manguasa taloh handiai: iete amon aku handak malalus taloh je bahalap, maka baya taloh je papa ih je lembut huang aku. 7:22 Huang ateiku aku rajin dengan hukum Hatalla, 7:23 tapi aku katawan je huang arepku aton tinai hukum beken je mimbing taloh handiai -- iete hukum je hakalawan dengan hukum je inarima awi tirok ateiku. Jete bukue aku leket intu hukum dosa je mimbing taloh handiai huang arepku. 7:24-25 Nah, ampin arepku toh iete kalotoh: aku baketep mamenda hukum Hatalla mahapan tirok ateiku, tapi hapan sipat kaolon ayungku aku manyarah dengan dosa. Lalehan kacalakae aku toh! Eweh handak manyalamat aku bara bitingku toh je mimbit aku akan pampatei? Tarima kasih akan Hatalla! Ie handak manyalamat aku mahalau Yesus Kristus.
8:1 Toh jaton hindai hukuman akan ewen je belom hinje dengan Kristus Yesus. 8:2 Basa hukum Roh Hatalla je mawi itah belom hinje dengan Kristus Yesus jari malapas aku bara hukum je mawi sabab aku badosa tuntang buah pampatei. 8:3 Taloh je dia tau ilalus awi hukum agama, awi itah oloh balemo, jete jari ilalus awi Hatalla. Hatalla mampakalah kuasan dosa huang sipat olon awie mampait Anake kabuat, je dumah dengan ampie sama kilau olon je badosa, uka manganan dosa. 8:4 Hatalla malalus jete uka kahandake je ingarinah huang hukum agama Yehudi te tau ilalus huang arep itah je belom manumon Roh Hatalla tuntang dia manumon sipat olon. 8:5 Kare oloh je belom manumon sipat olon, harajur manirok taloh je ingahandak awi sipat olon. Tapi kare oloh je belom manumon Roh Hatalla, harajur manirok kare taloh je ingahandak awi Roh Hatalla. 8:6 Amon tirok keton inguasa awi sipat olon, maka kajariae keton buah pampatei. Tapi amon tirok keton inguasa awi Roh Hatalla, maka kajariae keton belom tuntang hakabuah dengan Hatalla. 8:7 Oloh je tiroke inguasa awi sipat kaolon, oloh te hamusoh dengan Hatalla; basa oloh te dia tunduk dengan hukum Hatalla; tuntang puna ie dia tau tunduk dengan hukum Hatalla. 8:8 Kare oloh je belom manumon sipat olon, dia tau manyanang atei Hatalla. 8:9 Tapi keton dia belom manumon sipat olon. Keton manumon Roh Hatalla -- asal bewei, Roh Hatalla puna toto-toto manguasa taloh handiai huang arep keton. Oloh je dia bara Roh Kristus, oloh te dia ie ain Kristus. 8:10 Tapi amon Kristus belom huang bitin keton, maka aloh bitin keton akan matei awi dosa, tapi Roh Hatalla manenga pambelom akan keton, basa hubungan keton dengan Hatalla jari bahalap. 8:11 Amon Roh Hatalla, je mambelom Kristus bara pampatei, belom huang keton, maka ie je mambelom Kristus bara pampatei te, kareh mambelom kea bitin keton je tau matei te. Ie malalus jete hapan Roh ayue je belom huang keton. 8:12 Jete sababe pahari handiai, itah aton tanggong jawab; tapi dia tanggong jawab dengan sipat olon; itah dia usah manumon kahandake. 8:13 Karana amon keton belom manumon sipat olon, maka keton akan matei; tapi amon hapan kuasan Roh Hatalla, keton harajur mampatei kare gawin keton je badosa, maka keton kareh belom. 8:14 Kare oloh je ingagalan awi Roh Hatalla, ewen te anak Hatalla. 8:15 Basa Roh je inenga Hatalla akan keton, dia mawi keton manjadi jipen sampai keton belom huang kikeh. Tapi Roh Hatalla te manjadian keton jadi anak Hatalla. Tuntang hapan kuasan Roh Hatalla te itah mantehau Hatalla te "Bapa, o Bapaku!" 8:16 Roh Hatalla haya-hayak dengan roh itah mansanan je itah toh anak Hatalla. 8:17 Nah, amon itah anak Hatalla maka itah kea jadi ahli waris ayue je kareh manarima kare berkat je inatap Hatalla akan kare anake. Haya-hayak dengan Kristus itah kareh manarima taloh je jari inatap Hatalla akae; basa amon itah buah kapehe hayak dengan Kristus, itah kareh impahai kea hayak dengae. 8:18 Kakare kajake je ingkeme itah wayah toh, manumon tirok ayungku, dia olih inanding samasinde dengan katinduh-kahai je imparahae akan itah. 8:19 Salepah langit tuntang petak mentai dengan kataharue amon sampai katikae Hatalla mangarinah kare anake. 8:20 Basa langit tuntang petak jari inalua sampai manjadi rebuk, dia awi kahandake kabuat tapi awi Hatalla manaluae kalote. Aloh kalote, magon aton kea kaharap toh: 8:21 hong sinde katika langit tuntang petak kareh iliwus bara kuasa je handak mampalenyohe tuntang kareh omba mardeka tuntang impahai haya-hayak dengan kare anak Hatalla. 8:22 Itah katawan sampai katika toh salepah langit tuntang petak manarahing awi buah kapehe sama kilau ije biti ibu je kapehe metoh luas awau. 8:23 Tuntang dia baya salepah langit tuntang petak bewei je manarahing; itah kabuat mahin manarahing huang atei itah. Itah jari manarima Roh Hatalla kilau panengan Hatalla ije mambatang, tapi itah magon kea mentai Hatalla maliwus itah samandiai tuntang manjadian itah jadi anak ayue. 8:24 Karana awi kaharap, itah inyalamat. Tapi amon taloh je iharap te jari gitan itah, maka jete dia ie kaharap hindai. Basa eweh je magon maharap taloh je jari gitae? 8:25 Tapi amon itah maharap taloh je hindai itah mitee, maka itah mentai jete dengan sabar. 8:26 Kalote kea Roh Hatalla dumah mandohop itah amon itah balemo. Basa itah dia katawan kilen ampie itah musti balakudoa; Roh te kabuat manaharep Hatalla uka balaku akan itah hapan kataharu je paham handalem sampai dia olih insanan. 8:27 Maka Hatalla je mangatawan taloh je huang atei olon, mangasene kahandak Roh te; basa Roh te balaku dengan Hatalla akan ungkup Hatalla, tuntang hasaroroi dengan kahandak Hatalla. 8:28 Itah katawan Hatalla mator taloh handiai, sampai mampalembut taloh bahalap akan kare oloh je sinta ie tuntang je intehaue hasaroroi dengan rencana ayue. 8:29 Ewen je jari iintih awi Hatalla, jari kea inukas bara solake uka manjadi sama ampie kilau dengan Anake, iete Yesus Kristus. Maka dengan kalote anak te manjadi je Tambakase bara kare paharie. 8:30 Kalote Hatalla mantehau ewen je inukase labih helo; tuntang ewen je intehau te, iawie uka hakabuah haluli dengae. Tuntang ewen je hakabuah haluli dengan Hatalla, omba huang pambelom ain Hatalla kabuat. 8:31 Toh, en je koan itah tahiu kare taloh handiai te? Amon Hatalla omba pihak itah, eweh je olih malawan itah? 8:32 Anake kabuat dia ie manyayange, malengkan inyarahe akan gunan itah samandiai; en ie dia handak manenga akan itah kare taloh awang beken kea? 8:33 Eweh je tau manyalan itah ungkup je iintih Hatalla, amon Hatalla kabuat je mansanan itah toh dia basala? 8:34 En aton oloh je handak manyalan itah? Kristus Yesus kareh je mambela itah! Ie te je jari matei, ie te haream je jari imbelom tinai bara pampatei tuntang aton hinje Hatalla hong eka je bakuasa. 8:35 En aton oloh je tau mangahana Kristus sinta itah? En tau kasusah mangahana ie, atawa kajake, atawa kapehe, atawa lau, atawa kasusah belom, atawa bahaya, atawa kea pampatei? 8:36 Huang Surat Barasih tarasurat kalotoh, "Hapus andau ikei belom huang bahaya pampatei tagal ikau. Ikei iawi oloh kilau tabiri je handak inyambalih." 8:37 Dia! Huang kare taloh handiai te itah haream je mandino kamanang je tinduh-barasih awi ie je sinta itah! 8:38 Basa aku percaya toto iete hong hapus kalunen toh, aloh pampatei atawa pambelom, aloh malekat atawa panguasa, aloh kare ancaman je wayah toh atawa ancaman je akan dumah atawa kare kuasa je beken; 8:39 aloh kare taloh intu langit, atawa kare taloh je intu penda petak atawa en bewei, jaton olih mangahana Hatalla sinta itah, sama kilau je jari imparahae mahalau Kristus Yesus, Tuhan itah.
9:1 Taloh je akan insanangku toh jete toto awi aku oloh ain Kristus. Aku dia mananjaro. Pangingat atei ayungku je ingagalan awi Hatalla mayakin aku kea je auhku te toto. 9:2 Ateiku paham kapehe tuntang susah 9:3 tagal kare paharingku je sama bangsae dengangku. Basa tagal ewen, aku kabuat hakon buah sapa awi Hatalla tuntang imisah bara Kristus. 9:4 Ewen te ungkup je iintih tuntang Hatalla manjadian ewen anak ayue kabuat, tuntang mamparahan kuasae akan ewen. Ie manampa janji dengan ewen tuntang manenga akan ewen hukum agama. Hatalla mansanan akan ewen kilen ampie ewen musti manyembah Hatalla tuntang ewen jari manarima kea kare janjie. 9:5 Ewen te panakan bara tato hiang itah. Manumon cara olon, Kristus kea puna asale bara bangsa ewen. Ie labih gantong bara taloh handiai. Tara akan Hatalla sampai katatahie! Amen. 9:6 Aku dia handak mansanan je janjin Hatalla jari dia ihapan hindai tapi dia urase oloh Israel te ungkup je iintih awi Hatalla. 9:7 Dia urase panakan Abraham te anak Hatalla. Basa Hatalla hamauh dengan Abraham, "Baya panakan Isaak bewei je akan inyewut panakam." 9:8 Jete rimae panakan Abraham je manjadi anak Hatalla, jete baya panakae je inakan tagal janjin Hatalla; tuntang dia uras panakan ayue. 9:9 Basa janjin Hatalla te kalotoh, "Hong katika je jari inukas, aku kareh haluli, tuntang Sarah kareh mandino ije biti anak hatue." 9:10 Tuntang jetoh kea: Rebeka manak due biti anak hatue bara ije bapa, iete Isaak tato hiang itah. 9:11 Helo bara kadadue anak te inakan, Hatalla jari manukas paintih ayue palus sampai akan katika je rahian. Paintih Hatalla te dia bahapang dengan taloh je ilalus oloh, tapi awi kahandak Hatalla kabuat. Basa katika due anak hatue ain Rebeka te hindai tau malalus taloh je bahalap atawa papa, 9:12 Hatalla jari mansanan akan Rebeka, "Ije bakas kareh mamenda je tabela." 9:13 Huang Surat Barasih aton tarasurat, Hatalla hamauh kalotoh, "Yakob inyintaku, tapi Esau inyingiku." 9:14 Toh, en kabulat auh itah? En Hatalla te dia adil? Batantu haliai Hatalla te adil. 9:15 Basa Hatalla hamauh dengan Moses, "Aku kareh mamparahan asi akan oloh je aku handak mamparahan asi, tuntang aku handak mamparahan sinta akan oloh je aku handak mamparahan sinta." 9:16 Jadi katukas atei Hatalla te dia bahapang dengan kahandak olon atawa gawin olon, tapi awi kahalap atei Hatalla kabuat dengan oloh je iintihe te. 9:17 Basa hong Surat Barasih tarasurat, "Hatalla hamauh dengan Raja Misir, 'Aku mangkat ikau manjadi raja, awi aku handak, uka mahapan ikau, aku mamparahan kuasangku tuntang mawi arangku manjadi basewut hong hapus kalunen.' " 9:18 Jadi Hatalla masi dengan olon amon Hatalla mangahandak kalote. Tuntang Hatalla mawi oloh manjadi badungil, amon Hatalla mangahandak kalote kea. 9:19 Nah, Pahari akan hamauh dengangku. "Amon kalote, mbuhen Hatalla magon handak manyalan olon? En diakah ije mahin jaton oloh je olih mangahana kahandak Hatalla?" 9:20 Tapi, Pahari! Pahari baya olon bewei. Tuntang pahari dia tau bahanyi-hanyi manyoal Hatalla! En tau pot kambang misek dengan oloh je manampa ie, "Mbuhen ikau manampa aku kilau toh?" 9:21 En diakah oloh je manampa pot kambang aton hak manampa petak liat te sakahandak ateie? Bara ije kakumpal petak liat, oloh te aton hak manampa due pot kambang: ije te bahalap, je beken te dia lalau bahalap. 9:22 Kalote kea dengan oloh je inampa Hatalla. Ie bara kahandak uka mampalua kasangite tuntang mamparahan kuasae. Tapi ie sabar dengan ewen je musti ihukum tagal gawin ewen je mawi ie balait. 9:23 Hatalla kea bara kahandak uka mamparahan akan itah kasanang je hakotoh je imparahae akan itah je inyintae. Itah jari inatape uka manarima kasanang te. 9:24 Itah toh jari intehaue, dia baya bara bangsa Yehudi, tapi bara kare bangsa beken kea. 9:25 Basa huang surat Nabi Hosea, Hatalla hamauh, "Kare oloh je dia ungkup Ayungku, kareh inyewut 'Ungkup Ayungku'. Bangsa je dia inyintaku, kareh inyewut 'Je inyintaku'. 9:26 Tuntang hong kueh aton insanan akan oloh, 'Keton beken ungkup Ayungku,' Intu hete kare oloh te akan inyewut anak Hatalla je belom." 9:27 Nabi Yesaya dengan tukas auhe hamauh tahiu Israel, "Aloh oloh Israel kilau pasir hong tasik karee, baya isut bewei je akan inyalamat; 9:28 Basa Tuhan bajeleng handak mahukum kare taloh handiai hong hapus kalunen." 9:29 Yesaya hamauh kea kalotoh, "Paribasa Hatalla je Pangkahain Kuasae te dia mampelai turonae akan itah, pasti kajarian itah handiai jari sama kilau Sodom tuntang Gomora." 9:30 Jadi, auh kasimpulae kalotoh: kare bangsa beken je dia Yehudi: dia manggau jalan mawi hubungan manjadi bahalap haluli dengan Hatalla. Tapi awi ewen percaya, maka Hatalla mawi hubungan ewen dengae manjadi bahalap haluli. 9:31 Huang katambalike, kare oloh Yehudi harajur mawi usaha uka mamenda hukum mangat hubungan ewen dengan Hatalla manjadi bahalap haluli. Tapi ewen sasar dia bahasil haream. 9:32 En sababe ewen dia bahasil? Awi ewen malalus hal te dia mahalau kapercaya dengan Hatalla, malengkan dengan usaha ewen kabuat. Maka ewen lawo tantarang buah "Batu Panantarang". 9:33 Tahiu batu te huang Surat barasih aton tarasurat kalotoh, "Ite toh: Hong Sion jari iingkesku ije batu je kareh mawi oloh tantarang; ie te batu hai je kareh mawi oloh balawo; Tapi oloh je percaya dengae kareh dia manyasal."
10:1 Pahari handiai! Aku handak toto mangat bangsa ayungku inyalamat. Tuntang aku balakudoa toto-toto intu Hatalla akan ewen. 10:2 Aku bahanyi hamauh je ewen te rajin toto manempo Hatalla. Tapi karajin ewen te jaton inggalang awi pangatawan je bara Hatalla. 10:3 Ewen jaton mangatawan carae Hatalla manampa hubungan olon manjadi bahalap haluli dengae. Tuntang awi ewen handak manumon cara ain ewen kabuat, maka ewen dia tunduk dengan cara je inunjok awi Hatalla. 10:4 Hukum agama jari ilalus awi Kristus. Jadi genep oloh je percaya dengan Kristus, hubungae dengan Hatalla manjadi bahalap haluli. 10:5 Moses manyurat, oloh je bahalap hubungae dengan Hatalla hunjun galang hukum agama, oloh te kareh belom awi taat dengan hukum agama te. 10:6 Tapi tahiu carae oloh mangambuah hubungae dengan Hatalla, Surat Barasih mansanan kalotoh, "Dia usah ih ikau hamauh huang ateim, 'Eweh je handak mandai' akan sorga?' (rimae mimbit Kristus mohon), 10:7 atawa 'Eweh je handak mohon manalih lewun oloh matei?' (rimae manggatang Kristus mandai' bara pampatei)." 10:8 Jete rimae kalotoh, "Barita bara Hatalla te tokep toto dengan keton; intu nyaman keton tuntang huang atei keton." Jete barita je inyiar ikei; barita, je oloh musti percaya dengan Yesus Kristus. 10:9 Basa amon pahari mangaku hapan nyame je "Yesus te Tuhan", tuntang pahari percaya huang atei iete Hatalla jari mambelom Yesus bara pampatei, maka pahari akan salamat. 10:10 Basa oloh je percaya te, percaya hapan ateie, sampai Hatalla manarima ie kilau oloh je bahalap hubungae dengan Hatalla. Tuntang hapan nyamae oloh mangaku, sampai ie inyalamat. 10:11 Intu huang Surat Barasih tarasurat, "Oloh je percaya kareh dia impahawen." 10:12 Hal te manjadi buah oloh handiai, basa akan oloh Yehudi dengan akan oloh bangsa beken hal te jaton kabekee. Hatalla je tunggal te, ie te Tuhan akan oloh handiai. Ie manenga berkat je hakotoh akan oloh handiai je balaku dohop dengae. 10:13 Huang Surat Barasih tarasurat, "Oloh handiai je mantehau Tuhan, kareh salamat." 10:14 Tapi kilen ampie ewen tau mantehau Tuhan amon ewen hindai percaya? Tuntang kilen ampie ewen tau percaya dengan Tuhan amon ewen hindai mahining tahiu ie? Tuntang kea kilen ampie ewen tau mahining tahiu Tuhan, amon jaton oloh je mambaritae? 10:15 Tuntang kilen ampie oloh tau mimbit barita te amon ewen dia inyoho? Huang Surat Barasih inyurat kalotoh, "Lalehan kahalape pandumah kare oloh je mimbit Barita Bahalap bara Hatalla!" 10:16 Tapi dia uras oloh manarima Barita Bahalap te. Basa Yesaya hamauh, "Tuhan, eweh kea je percaya dengan barita ain ikei?" 10:17 Awi mahining barita maka kare oloh manjadi percaya, tuntang barita tau ihining, awi aton oloh je mambarita tahiu Kristus. 10:18 Tapi aku misek: En ewen te puna hindai mahining barita te? Pasti jadi! Basa huang Surat Barasih tarasurat kalotoh, "Auh ewen jari kumbang hong hapus kalunen, kare auh ewen jari sampai akan tapakan kalunen." 10:19 Aku misek tinai: En bangsa Israel hindai mangatawan jete? Nauhe Moses ih je pangkaheloe tombah auh paisek te. Moses hamauh, "Kalotoh auh Hatalla, 'Aku kareh mawi keton bahiri dengan bangsa beken je dia tame ungkup tuntang aku kareh mawi keton balait dengan bangsa beken je humong.' " 10:20 Yesaya labih bahanyi hindai. Ie hamauh, "Kalotoh auh Hatalla, 'Kare oloh je dia manggau aku, jari sondau aku; tuntang aku mamparahan arepku akan ewen je jaton misek tahiu aku.' " 10:21 Tapi tahiu bangsa Israel Yesaya hamauh, "Kalotoh auh Hatalla, 'Hapus andau aku manjulok lengengku akan bangsa je badungil tuntang dia taat.' "
11:1 Aku misek: En Hatalla jari manganan ungkup ayue kabuat? Batantu dia! Aku kabuat ije biti oloh Israel panakan Abraham bara hamputan Benyamin. 11:2 Dia! Hatalla dia manganan ungkup ayue je jari iintihe bara solake. Kare pahari katawan kare taloh je tarasurat huang Surat Barasih tahiu Elia, katika ie mangado hal Israel akan Hatalla. Elia hamauh, 11:3 "Tuhan, kare oloh jari mampatei kare nabi ayum tuntang mampalenyoh kare eka maluput parapah akam. Baya batisa aku kabuat ih tuntang ewen handak mampatei aku kea." 11:4 En auh tombah Hatalla akan Elia? Hatalla tombah, "Aku jari mampelai akan arepku uju koyan biti oloh. Ewen hindai puji manyembah dewa Baal." 11:5 Kalote kea katika toh: Aton isut kare oloh je jari iintih tagal asie. 11:6 Ie mintih ewen awi asie tapi dia awi gawin ewen. Basa amon paintih Hatalla te awi gawin olon, maka asin Hatalla te dia hindai asi je bujur. 11:7 Jadi, kilen ampie toh? Ungkup Israel dia dinon taloh je inggau ewen. Oloh je mandinoe baya isut biti bewei je jari iintih Hatalla. Je beken uras manjadi oloh badungil taharep pantehau Hatalla. 11:8 Basa huang Surat Barasih inyurat kalotoh, "Hatalla mawi tirok tuntang atei ewen manjadi badungil; tuntang sampai katika toh matan ewen jaton tau mite tuntang pinding ewen jaton tau mahining." 11:9 Dawid hamauh kea, "Nauhe kare pesta ain ewen te manjadi parangkep akan ewen kabuat, tuntang manjadi rumbak, eka ewen manjato tuntang hancur! 11:10 Keleh tampayah matan ewen manjadi kaput mangat ewen dia tau mite; tuntang atei ewen manjadi bingkok sampai katatahie." 11:11 Aku misek tinai: Katika oloh Yehudi lawo, en taloh te manjadi mangat ewen lenyoh? Dia samasinde! Tapi awi ewen badosa, maka utus oloh beken haream je inyalamat, sampai mawi atei oloh Yehudi bahiri dengan utus oloh beken te. 11:12 Awi utus oloh Yehudi basala tuntang dia manumon kahandak Hatalla, maka kare utus oloh beken imberkat Hatalla. Indahang tinai amon hubungan utus oloh Yehudi dengan Hatalla manjadi bahalap haluli; batantu labih hai tinai berkat je handak inenga Hatalla! 11:13 Tapi toh keleh aku hakotak dengan kare pahari je dia Yehudi! Katahin toh, kilau rasul akan kare utus oloh je dia Yehudi, aku paham toto mampatamam gawingku. 11:14 Aku harap aku tau mampalembut kahirin atei intu utus oloh ayungku kabuat, mangat mahapan jalan jete aku tau manyalamat belahe bara ewen te. 11:15 Awi ewen inolak Hatalla, maka hubungan kalunen toh dengan Hatalla manjadi bahalap haluli; mahin tinai amon ewen inarima Hatalla! Batantu jete sama rimae kilau oloh matei belom haluli! 11:16 Amon ije kakiwak rote je solake inenga akan Hatalla, jete rimae rote ije kabawak te lepah inenga akan Hatalla kea. Tuntang amon uhat batang kayu te Hatalla je tempoe, jete rimae edae te mahin ayue kea. 11:17 Belahe bara edan batang zaitun -- iete kare oloh Yehudi -- jari ingarat. Tuntang huang awan karat te incangkok edan batang zaitun bara himba, ie te kare pahari je dia Yehudi. Pahari incangkok intu hete uka pahari mangkeme kamangat kare taloh handiai bara pambelom rohani ain kare oloh Yehudi. 11:18 Tagal te ela ih keton manawah ewen je jari ingarat kilau edan te. Keton musti mingat je keton baya edan bewei. Tuntang edan dia manenga panginan akan uhat, tapi uhat je manenga panginan akan edan. 11:19 Tapi pahari handak hamauh, "Iyoh, tapi kare edan te inetek mangat aku tau incangkok intu batang kayu te!" 11:20 Jete puna toto. Tapi ewen inganan awi ewen dia percaya, tapi pahari inarima awi pahari percaya. Jadi tagal jete ela pahari manjadi gantong atei: tapi keleh pahari mangkeme mikeh haream. 11:21 Basa amon Hatalla dia mangkeme sayang manganan oloh Yehudi je kilau edan je asli te, ela manyangka ie mangkeme sayang manganan pahari! 11:22 Jadi intu hetoh itah mite kapaham kahalap Hatalla tuntang ie kea dia lue-luen kakarase. Ie puna karas toto dengan ewen je mawi dosa, tapi ie bahalap ateie dengan pahari -- asal pahari tetep belom dengan kahalap. Amon dia maka pahari kea tau inganan. 11:23 Tuntang tahiu kare oloh Yehudi te, amon ewen terai mawi arepe je dia percaya, maka ewen kareh inarima haluli; basa Hatalla aton kuasae uka manarima ewen haluli. 11:24 Pahari je asale dia bara bangsa Yehudi, sama kilau edan batang zaitun bara parak kayu. Nah, amon Pahari hakalawan dengan sipat pahari, tau incangkok intu batang zaitun je asli, mahin tinai kare oloh Yehudi je inanding dengan kare edan batang zaitun asli te. Batantu labih murah tinai akan Hatalla mangat halalian ewen intu batang zaitun ain ewen kabuat. 11:25 Pahari handiai! Aku harap keton ela mangkeme jari mangatawan taloh handiai. Basa aton ije hal je ingahandak awi Hatalla, tapi je hindai ingatawan awi olon. Tuntang aku handak keton mangatawan jete; iete: belahe oloh Yehudi te batekang ateie, tapi dasar ewen te manjadi kalote baya sampai jumlah kare oloh je dia Yehudi je dumah manalih Hatalla jari sukup. 11:26 Kalote maka kakare oloh Yehudi kareh salamat. Basa intu huang Surat Barasih inyurat kalotoh, "Raja Panyalamat kareh dumah bara Sion; ie handak mampuas kare kapapa bara panakan Yakob. 11:27 Aku kareh mandehen janji toh dengan ewen hong katika aku mampun kare dosan ewen." 11:28 Awi oloh Yehudi dia maku manarima Barita Bahalap bara Hatalla, maka ewen manjadi musoh Hatalla; tuntang jete manjadi kaontong akan kare pahari je dia Yehudi. Tapi awi paintih Hatalla, maka kare oloh Yehudi te tetep inyinta awi Hatalla tagal tato hiang ewen. 11:29 Basa amon Hatalla mintih oloh tuntang mamberkat oloh te, Hatalla dia puji mambalang taloh je jari iawie te. 11:30 Bihin keton dia taat dengan Hatalla. Tapi Hatalla jari mansanan je keton lapas bara kasalan, awi kare oloh Yehudi dia taat. 11:31 Kalote kea dengan kare oloh Yehudi te. Hong katika toh ewen dia taat dengan Hatalla, mangat keton tau inyewut lapas bara kasalan. Tapi kareh ewen kea akan inyewut lapas bara kasalan. 11:32 Basa Hatalla jari manalua salepah ungkup oloh kalunen inguasa awi kadungil, mangat ie tau mamparahan asie-sintae dengan ewen samandiai. 11:33 Toto tamam katatau Hatalla! Toto hai kapintar-kaharatie tuntang pangatawae! Eweh je tau manantuani kare taloh je inukase? Eweh je tau harati cara je hapae malalus gawie? 11:34 Huang Surat Barasih tarasurat kalotoh, "Eweh je mangatawan tirok-atei Tuhan? Eweh je tau manenga nasehat akae? 11:35 Eweh je puji manenga taloh en-en akan Tuhan sampai ie tau manuntut balehe?" 11:36 Hatalla je manjapa kare taloh handiai. Asal taloh handiai uras bara Hatalla tuntang uras akan Hatalla. Tara akan Hatalla sampai katatahie! Amen.
12:1 Pahari handiai! Hatalla paham bahalap dengan itah. Jete sababe aku balaku nyame-nyame mangat keton manyarah arep keton kilau parapah je belom baya akan Hatalla bewei tuntang je manyanang ateie. Gawin sombayangm akan Hatalla puna patut kilau te. 12:2 Ela manumon ampin kare hadat oloh kalunen toh. Keleh Hatalla manguan keton manjadi oloh taheta, mangat keton hobah. Awi kalote keton olih mangatawan kahandak Hatalla -- iete taloh je bahalap tuntang je manyanang ateie tuntang je tinduh-barasih. 12:3 Hatalla jari manenga asi akangku. Jete bukue aku manasehat kare Pahari handiai: Ela mangkeme arep labih gantong bara je kapunae. Keleh keton manilai ampin arep keton hapan karandah atei; genep biti manilai arepe manumon kaolihe je inenga Hatalla akae awi ie percaya dengan Yesus. 12:4 Bitin itah toh aton are bagiae. Genep bagian aton gawin ayue kabuat-kabuat. 12:5 Kalote kea dengan itah. Aloh itah handiai toh are, tapi itah toh kilau ije biti awi itah ije huang Kristus. Tuntang genep bitin itah hinje dengan sama arep itah kilau kare bagian bara ije biti. 12:6 Genep bitin itah mandino panenga hapan malalus hakabeken gawi. Kare panenga te inenga awi Hatalla akan itah manumon asie. Awi te itah musti mahapan kare panenga te. Oloh je aton panenga hapae mambarita kabar bara Hatalla, musti mambarita kabar bara Hatalla te manumon kataun ayue. 12:7 Oloh je aton panenga hapan mandohop oloh beken, musti toto-toto mandohop oloh beken. Oloh je aton panenga hapan majar, musti majar toto-toto. 12:8 Oloh je aton panenga hapan mangarasan oloh beken, musti toto-toto manenga semangat akan oloh beken. Oloh je aton panenga uka tau manenga taloh en-en akan oloh beken, musti malalus jete hapan kajentan ateie tumon kapatute. Oloh je aton panenga hapan mamimpin, musti toto-toto mamimpin. Oloh je aton panenga hapan mamparahan gawin sinta akan oloh beken, musti malalus jete dengan sanang atei. 12:9 Keleh masi oloh dengan katoton atei. Keleh manyingi taloh papa, tuntang keleh mimbing taloh je bahalap. 12:10 Keleh kare pahari hasinta sama arep hapan kaheret atei sama kilau oloh hampahari hong ije kahuma, tuntang keleh keton hasanselo mahormat sama arep keton. 12:11 Keleh bagawi hapan kahias. Ela bakulas. Keleh bagawi akan Tuhan hapan karajin bara Roh Hatalla. 12:12 Keleh pahari barakaharap dengan Tuhan tuntang hanjak, keleh sabar huang kasusah, tuntang baketep huang lakudoa. 12:13 Keleh mandohop kare oloh Kristen je beken sampai sukup kaperluae tuntang keleh manarima kare pahari je sama huang kapercaya, tarima ewen intu human keton dengan sanang atei aloh pahari dia kasene ewen. 12:14 Keleh balaku dengan Hatalla uka ie mamberkat kare oloh je tulas dengan keton. Iyoh, keleh balaku Hatalla mamberkat ewen, ela manyapa. 12:15 Keleh hanjak dengan kare oloh je hanjak, tuntang manangis dengan ewen je manangis. 12:16 Keleh belom rukun sama arep keton. Ela mamparahan ampin kagantong atei, tapi manyama arep keton dengan oloh je randah pondoke. Ela maanggap arep labih pintar bara je kapunae. 12:17 Amon oloh papa gawie dengan keton, ela mambaleh hapan kapapa. Lalus taloh je bahalap hong tampayah oloh handiai. 12:18 Bara hila keton, keleh manggau jalan saoli-olih uka belom damai dengan oloh samandiai. 12:19 Pahari handiai! Ela samasinde mambaleh kasingin atei, nauhe Hatalla ih je mahukum. Basa huang Surat Barasih aton tarasurat, "Aku toh je mambaleh. Aku toh je mahukum, koan Tuhan." 12:20 Amon musoh keton balau', keleh manenga akae panginan; tuntang amon ie teah belaie, tenga akae danum ihop. Basa awi gawin keton kalote, keton tau mawi ie paham mahamen. 12:21 Ela manalua arep keton impakalah awi taloh papa, tapi keleh pahari mampakalah kapapa mahapan kahalap.
13:1 Genep oloh musti taat dengan pamarentah, awi dia aton pamarentah je dia mandino kuasa bara Hatalla. Tuntang pamarentah je aton wayah toh, malalus kuasa awi parentah Hatalla. 13:2 Jete bukue oloh je malawan pamarentah sama ih kilau malawan taloh je inukas awi Hatalla. Tuntang oloh je mawie kalote kareh manarima hukuman. 13:3 Basa oloh je mawi kahalap, dia usah mikeh dengan pamarentah. Baya oloh je mawi taloh papa je musti mikeh. Amon pahari handak uka pahari dia mangkeme mikeh dengan pamarentah, pahari musti mawi kahalap, maka pahari akan inara. 13:4 Basa pamarentah te jipen Hatalla je bagawi akan kahalap keton. Tapi amon pahari malalus kapapa, puna pahari musti mikeh dengae, basa dia hayang bewei ie mimbing kuasa uka mahukum oloh. Ie te jipen Hatalla, je mimbit hukuman Hatalla mawi kare oloh je malalus kapapa. 13:5 Jete bukue pahari musti taat dengan pamarentah -- dia baya awi pahari dia handak buah hukum, tapi kea awi pangingat atei pahari. 13:6 Jete kea sababe mbuhen pahari mambayar pajak, basa pamarentah te pagawai Hatalla je tantai malalus gawi je inukas akae. 13:7 Jadi keleh pahari mambayar akan pamarentah taloh je musti imbayar akae. Keleh mambayar pajak, amon pahari musti mambayar pajak; tuntang keleh pahari mambayar cukai amon cukai musti imbayar. Keleh marega ewen je musti irega tuntang mahormat ewen je musti ihormat. 13:8 Ela butang taloh en-en dengan eweh bewei, kacuali butang asi dengan sama arep. Basa oloh je hasi sama arepe, oloh te jari malalus kakare hukum Moses. 13:9 Basa hukum agama Yehudi, iete ela habandong, ela mampatei, ela mipen manduan taloh je ain oloh beken; uras kare hukum te haya-hayak dengan kare hukum awang beken, jari imbulat manjadi ije hukum bewei, iete, "Keleh sinta sama arepm kilau ikau sinta arepm kabuat." 13:10 Oloh je sinta oloh beken, dia mungkin malalus kapapa mawi oloh te. Jadi oloh je masi dengan sama arepe jete oloh je jari manggenep kakare syarat hukum agama. 13:11 Beken bara taloh handiai te keton katawan je hong katika toh aton katika akan keton uka misik bara tiroh. Basa katikae akan itah inyalamat jari sasar tokep wayah toh bara metoh itah harun nampara percaya. 13:12 Alem jari handak mahalau; tuntang dia tahi hindai andau balawa. Jadi, keleh itah terai malalus kare gawin kakaput. Itah musti manatap arep itah mahapan senjata kalawa. 13:13 Itah musti malalus kare taloh je ihormat kilau je tau ilalus oloh metoh andau balawa; ela pesta barami malabien tikase, ela babusau. Ela mawi karayap, atawa dia bahadat. Ela hakalahi, atawa bahiri. 13:14 Keleh Tuhan Yesus Kristus bewei je manukas taloh je musti ilalus keton. Tuntang ela manumon hadat oloh badosa je baya handak malalus kipee.
14:1 Oloh je langena kapercayae keleh inarima dengan bahalap hong marak keton. Ela hakalawan dengan kare auh ayue. 14:2 Aton oloh je mangkeme ie te tau kuman en bewei. Tapi aton oloh beken je balemo kapercayae; ie mangkeme ie baya tau kuman kare sayur bewei. 14:3 Oloh je kuman en bewei ela ie maanggap randah oloh je mintih panginan je ingahandake bewei; tuntang oloh je mintih panginan, ela kea manyalan oloh je kuman kare taloh handiai, basa Hatalla jari manarima ie. 14:4 Eweh kea pahari te sampai pahari musti mahakim jipen oloh beken? En jipen te manjato atawa mendeng, jete urusan ain tempoe. Tuntang amon jipen te mendeng bujur, jete awi Tuhan olih mampendeng ie bujur. 14:5 Aton oloh je mangkeme andau ije labih mambatang bara kare andau je beken, tapi oloh beken tinai mangkeme kare-kare andau te sama ih. Jadi, keleh genep bitin oloh manukas akan arepe kabuat. 14:6 Oloh je mangkeme kare andau je inantu te mambatang, oloh te mawie kalote awi ie mahormat Tuhan. Oloh je kuman sepsimpan taloh kinan, ie mawie kalote awi mahormat Tuhan, awi ie manarimakasih akan Hatalla tagal panginan te. Kalote kea oloh je baya kuman panginan je iintih bewei; oloh te mahormat Tuhan tuntang manarimakasih akan Hatalla. 14:7 Ije biti mahin jaton bara itah je belom akan arepe kabuat; tuntang ije biti mahin jaton bara itah je matei akan arepe kabuat. 14:8 Amon itah belom, itah belom akan Tuhan. Tuntang amon itah matei, itah kea matei akan Tuhan. Jadi, belom atawa matei, itah toh ain Tuhan. 14:9 Kristus jari matei tuntang belom tinai. Jete sababe ie manjadi Tuhan akan kare oloh belom tuntang akan kare oloh je jari matei kea. 14:10 Jadi, Pahari samandiai! Akan en keton manyalan paharin keton je sama-sama ije kapercaya? Tuntang akan en Pahari maanggap ie randah? Itah samandiai kareh manaharep Hatalla mangat ihakim. 14:11 Huang Surat Barasih aton inyurat, "Toto haliai," koan Tuhan, "gagenep oloh kareh mahingkep manyembah aku intu taharepku; tuntang genep bitin oloh kareh mangaku je aku toh Hatalla." 14:12 Jadi genep bitin itah musti mananggong kajarian kare gawin itah akan Hatalla. 14:13 Awi te ela itah manyalan sama arep itah. Tapi keleh manggau jalan uka keton ela mawi taloh je tau maningkes atawa mampalayang paharin keton je sama kapercayae. 14:14 Awi kahinjengku dengan Tuhan Yesus aku yakin jaton taloh je pali; tapi hal te pali akan ije oloh, amon oloh te maanggap jete pali. 14:15 Tapi amon pahari kuman taloh en-en sampai awi jete ije biti pahari je percaya kapehe ateie, maka pahari jari malalus jete dia tagal sinta. Amon Kristus matei akan ije biti oloh, maka ela manalua oloh te rusak awi taloh je kinan pahari. 14:16 Tagal te amon aton taloh je bahalap huang keton, ela manalua oloh beken maanggap jete dia bahalap. 14:17 Basa amon Hatalla marentah pambelom ije biti oloh, en je tau ie kumae atawa mihope, jete dia ie taloh je mambatang. Je mambatang iete oloh te manumon kahandak Hatalla, ateie sanang tuntang manarima kahanjak je inenga Roh Hatalla akae. 14:18 Oloh je manempo Kristus tumon te, oloh te manyanang atei Hatalla, tuntang irega awi kare oloh beken. 14:19 Tagal te tintun kahandak itah musti harajur uka mampalembut kare taloh je mimbit kadamai tuntang mandohop sama arep itah. 14:20 Ela, tagal soal panginan, pahari marusak taloh je jari ilalus Hatalla. Kakare panginan puna buah akan indu kinan; tapi amon taloh je kinan pahari te mawi sabab oloh beken badosa, maka pahari basala. 14:21 Labih bahalap dia usah kuman isin meto atawa mihop anggur atawa malalus taloh en bewei amon hal te manjadi sabab ije biti pahari je percaya manjadi badosa. 14:22 Taloh je imercaya pahari te, keleh pahari malalus jete intu taharep Hatalla bewei akan arep pahari kabuat. Oloh je jaton alasan uka mangkeme basala dengan taloh je ingkemee bujur, oloh te salamat. 14:23 Tapi oloh je mangkeme bembang kuman taloh en-en, tapi rahian kuman jete kea, oloh te inyalan awi Hatalla; basa oloh te dia malalus jete manumon kapercayae tahiu taloh je bujur tuntang je sala. Tuntang en bewei je ilalus oloh dia awi kapercaya jete dosa.
15:1 Itah je buju-bujur percaya dengan taloh je imercaya itah, keleh sabar dengan kare kaberatan ewen je balemo kapercayae. Ela itah handak manyanang arep itah kabuat bewei. 15:2 Tapi genep bitin itah musti manyanang atei kare paharin itah akan indu kahalap ewen, mangat kapercaya sasar mandahang. 15:3 Basa Kristus mahin jaton manirok kasanang akan arepe kabuat. Huang Surat Barasih tarasurat kalotoh, "Kakare auh je mamapa keton jari buah aku." 15:4 Kakare taloh je tarasurat huang Surat Barasih jete hapan majar itah. Basa auh ajar je inarima itah bara Surat Barasih mawi itah baketep tuntang abas sampai itah tau manaharep Hatalla. 15:5 Keleh Hatalla te je manenga kaketep atei tuntang ampong akan olon, mandohop keton uka keton belom dengan hinje atei, manumon sonto ain Kristus Yesus. 15:6 Huang kahinjen atei pahari handiai tau haya-hayak manarima Hatalla, Bapa Tuhan itah Yesus Kristus. 15:7 Tagal te keleh kare pahari manarima sama arep dengan sanang atei sama kilau Kristus kea manarima keton uka manara Hatalla. 15:8 Basa, keleh mingat, Kristus jari manyang oloh Yehudi uka mamparahan je Hatalla te puna toto malalus kare janjie dengan tato hiang itah. 15:9 Yesus kea manjadian utus oloh beken uka manara Hatalla tagal kahalap ateie dengan ewen. Huang Surat Barasih tarasurat kalotoh, "Tagal te aku handak manara ikau intu bentok kare utus oloh, aku kareh manyanyi tara akan aram." 15:10 Aton kea tarasurat kalotoh, "Keleh keton hanjak dengan ungkup ain Hatalla je iintih, o kare utus oloh!" 15:11 Tuntang jetoh kea, "Tara Hatalla ain kare utus oloh samandiai, keleh oloh handiai manara ie!" 15:12 Tuntang jetoh je insanan awi Yesaya, "Bara panakan Isai kareh lembut ije biti je tau marentah kare utus oloh; dengae te kea kare utus oloh te bara kaharap." 15:13 Hatalla te eka kaharap keton. Keleh ie manyuang atei keton hapan kakare kahanjak tuntang kadamai awi keton percaya dengae, uka awi kuasan Roh Hatalla keton sasar harap dengan Hatalla. 15:14 Paharingku samandiai! Aku percaya are toto taloh je bahalap intu keton. Keton mahin mangatawan kare taloh handiai tuntang tau majar sama arep keton kea. 15:15 Tapi tahiu pire-pire hal, aku mampingat keton hapan katukas auhku huang surat toh, awi Hatalla jari manenga akangku gawi te. 15:16 Ie jari manampa aku manjadi jipen Kristus Yesus uka inyoho akan kare utus oloh je dia Yehudi. Tuntang aku malaluse kilau imam, je mambarita Barita Bahalap bara Hatalla, mangat kare oloh je dia Yehudi manjadi kilau parapah akan Hatalla je tau inarima awie. Keleh Roh Hatalla manampa ewen manjadi ije parapah je mambatang akan Hatalla. 15:17 Jadi, awi aku jari ije dengan Kristus Yesus, maka aku tau mangkeme tamam tagal gawingku je akan Hatalla. 15:18 Aku bahanyi hakotak kalote baya tahiu taloh je jari ilalus Kristus mahalau aku je mawi kare oloh je dia Yehudi taat dengan Hatalla. Aku malalus jete hapan kare kotak tuntang hapan gawi, 15:19 je impahayak awi kare taloh heran tuntang taloh je dia puji helo; uras taloh te manjadi awi kuasan Roh Hatalla. Barita Bahalap tahiu Kristus jari imbaritaku lepah akan kare oloh, nampara bara Yerusalem sampai akan Ilirikum. 15:20 Kahimat ateiku iete mangabar Barita Bahalap bara Hatalla hong kare eka intu kueh oloh hindai mahining tahiu Kristus. Awi aku dia handak mamangun gawi hunjun galang je iingkes oloh beken. 15:21 Huang Surat Barasih tarasurat, "Kare oloh je hindai puji manarima barita tahiu ie, kareh mite; tuntang ewen je hindai puji mahining, kareh harati." 15:22 Jete bukue aku jari kinjap ihambang uka maja manalih keton. 15:23 Tapi toh gawingku hong kare eka te jari hapus. Banyelo-nyelo katahie aku handak manalih keton. 15:24 Kareh amon aku mahalau lewun keton intu panjalanangku akan Spanyol, aku harap tau hasondau dengan keton tuntang hanjak hanjulo dengan keton. Limbah te aku harap keton tau mandohop aku akan jalanangku manalih Spanyol te. 15:25 Tapi toh aku handak akan Yerusalem uka mimbit bantuan akan ungkup ain Hatalla intu hete. 15:26 Basa kare ungkup hong Makedonia tuntang Akhaya jari pakat uka manenga sumbangan akan kare pahari je belom susah intu marak ungkup ain Hatalla hong Yerusalem. 15:27 Dengan sanang atei ewen manukas uka malalus jete. Puna dengan katotoe ewen patut mandohop kare pahari je belom susah hong Yerusalem te; basa puna bara kare oloh Yehudi kea ih kare oloh je dia Yehudi te jari manarima kare berkat bara Hatalla. Jadi, kare oloh je dia Yehudi te patut kea mandohop kare oloh Yehudi dengan kare berkat ramon kalunen. 15:28 Amon aku jari lepah mahapus gawingku toh, tuntang manyarah akan ewen hong Yerusalem sumbangan je jari inampunan te, maka aku kareh haguet manalih Spanyol mahalau lewun keton. 15:29 Amon aku dumah manalih keton, pasti aku dumah dengan are berkat bara Kristus akan keton. 15:30 Tagal Tuhan itah Yesus Kristus, tuntang tagal asi je inenga Roh Hatalla, aku balaku nyame-nyame dengan keton, keleh keton omba balakudoa toto-toto hayak dengangku akan Hatalla tagal aku. 15:31 Keleh balakudoa mangat Hatalla malapas aku bara lengen kare oloh je dia percaya hong Yudea, tuntang mangat gawingku tau mimbit sumbangan akan Yerusalem inarima dengan sanang atei awi ungkup Hatalla intu hete. 15:32 Maka kalote, amon ingahandak Hatalla, aku tau dumah manalih keton dengan sanang atei. Tuntang aku kareh mangkeme iampong hong marak keton. 15:33 Keleh Hatalla, je manenga kasanang akan olon, mampahayak pahari handiai. Amen.
16:1 Aku handak keton kasene dengan paharin itah, Febe. Ie mandohop ungkup hong Kengkrea. 16:2 Tarima ie kilau ije biti oloh bara ungkup Tuhan. Puna kalote kare oloh je percaya dengan Hatalla musti hatarima sama arepe. Dohop ie, amon ie balaku pandohop bara keton, awi ie kabuat jari mandohop are oloh -- tatame aku kea. 16:3 Keleh manyampai tabengku akan Priskila tuntang Akwila, kare kawalku je sama-sama bagawi akan Kristus. 16:4 Ewen karenga matei awie handak manyalamat aku. Aku batarimakasih dengan ewen -- tuntang dia ie aku bewei, tapi uras ungkup kare utus oloh beken je dia Yehudi kea manarimakasih dengan ewen. 16:5 Nyampai kea tabengku akan ungkup je hapumpong intu human ewen. Tabe akan Epainetos je inyintaku. Ie te oloh je sola-solake hong Asia je percaya dengan Kristus. 16:6 Tabengku kea akan Maria. Ie jari bagawi kalote kapahame akan keton. 16:7 Nyampai kea tabengku akan Andronikus tuntang Yonias. Ewen te ije suku dengangku tuntang puji tame penjara haya-hayak dengangku. Helo bara aku percaya dengan Kristus, ewen jari labih helo percaya. Ewen te basewut hong marak kare rasul. 16:8 Tabe akan Amplias, je inyintaku basa ie jari sama-sama dengangku hinje dengan Tuhan. 16:9 Nyampai tabengku akan Urbanus, kawal itah je bagawi haya-hayak dengan itah akan Kristus. Hormatku kea akan Stakhis je inyintaku. 16:10 Tabe akan Apeles. Kaketep ateie dengan Kristus jari gitan buktie. Tabe kea akan keluarga Aristobulus, 16:11 tuntang akan Herodion. Ie te ije suku dengangku. Tabe kea akan kare pahari je sama huang kapercaya huang keluarga Narkisus. 16:12 Tabengku akan Tripena tuntang Triposa je bagawi paham manyang Tuhan, tuntang akan Persis je inyintaku. Ie kea jari bagawi paham akan Tuhan. 16:13 Tabe akan Rupus tuntang indue, je akangku kilau induku kabuat. Rupus te oloh paintih Tuhan je paham inara. 16:14 Nyampai tabengku akan Asinkritus, Plegon, Hermes, Patrobas, Hermas, tuntang pahari handiai je sama kapercaya je aton dengan ewen. 16:15 Tabe akan Pilologus tuntang Yulia; akan Nereus tuntang paharie je bawi; akan Olimpas tuntang akan kakare oloh percaya je aton sama-sama dengan ewen. 16:16 Keleh hatabe dengan kaheret atei kilau oloh hampahari sama-sama Kristen. Kakare ungkup Kristus manyampai taben ewen akan kare pahari handiai. 16:17 Pahari handiai! Aku balaku nyame-nyame: bua-buah ih dengan kare oloh je mampalembut kapusit tuntang manderoh kapercayan oloh dengan Tuhan. Hal te hakalawan dengan taloh je jari iajar akan keton. Ngejau arep keton bara kare oloh kilau te. 16:18 Basa kare oloh je mawi taloh kalote dia bagawi akan Kristus Tuhan itah, malengkan uka maluput angat kipen atei ewen kabuat. Dengan kataun ampie tuntang kare auh je manis, ewen mamikir kare oloh je dia katawan taloh en-en. 16:19 Kakare oloh uras jari katawan kaketep atei keton dengan auh ajar tahiu Barita Bahalap je bara Hatalla. Tuntang aku hanjak tagal hal te tahiu keton. Aku handak uka keton pintar-harati hong kare taloh je bahalap, tuntang humong hong kare taloh je papa. 16:20 Hatalla je manenga kadamai akan olon, kareh bajeleng mingkes setan penda kuasan keton tuntang mamparotek ie. Keleh kare pahari harajur imberkat awi Yesus Kristus Tuhan itah! 16:21 Timoteus, kawalku, manyampai tabe akan keton. Kalote kea Lukius, Yanson tuntang Sosipatrus, ewen te ije suku dengangku. 16:22 Je manyurat surat toh iete aku, Tertius. Kilau oloh hampahari aku manyewut tabe salamat akan keton. 16:23 Gayus mangirim tabe akan keton. Aku melai baramalem intu humae tuntang ungkup ikei kea sombayang intu hete. Erastus, kapala keuangan lewu, mangirim tabe akan keton. Kalote kea paharin itah Kwartus. 16:24 Keleh Tuhan itah Yesus Kristus mamberkat pahari handiai. Amen. 16:25 Tara akan Hatalla! Ie je kuasa mampaabas kapercayan pahari handiai hatontong dengan Barita Bahalap bara Hatalla je jari imbaritaku tahiu Yesus Kristus. Aku mangabar barita te sama kilau je imparahan awi Hatalla; iete tahiu rencana Hatalla je jari baratu-ratus nyelo katahie jaton oloh katawae. 16:26 Tapi toh, tagal parentah Hatalla je katatahie, rencana te jari imparahan tuntang insanan akan kare utus oloh samandiai mahalau kare surat nabi, uka ewen handiai percaya tuntang taat dengan Hatalla. 16:27 Ie te Hatalla je tunggal, ie je paham kapintar-kaharatie. Keleh ie inggatang ganto-gantong sampai katatahie mahalau Yesus Kristus! Amen. Hormat bara ikei, Paulus, rewar Kristus Yesus
1:1-3 Pahari handiai ungkup Hatalla hong Korintus! Pahari jari intehau awi Hatalla uka manjadi ungkup ayue awi pahari puna ain Kristus Yesus, haya-hayak dengan oloh handiai hong kueh bewei eka oloh je manyembah Tuhan itah Yesus Kristus, iete Tuhan ewen tuntang Tuhan itah kea. Aku Paulus, tuntang paharin itah Sostenes, maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton. Aku manyurat surat toh kilau rasul Kristus Yesus, je iangkat awi Hatalla kabuat tuntang tagal kahandak ayue kea. 1:4 Aku harajur manarimakasih akan Hatalla tahiu keton, awi keton jari manarima asi bara Hatalla mahalau Kristus Yesus. 1:5 Awi keton jari manjadi oloh ain Kristus, maka pambelom keton tatau huang kakare hal. Pangatawan keton tahiu taloh handiai paham handalem, tuntang keton pintar majar pangatawan te. 1:6 Jete mamparahan je barita tahiu Kristus jari melai dehen huang atei keton, 1:7 sampai ije mahin jaton keton tapas berkat, pandehan keton mentai Tuhan itah Yesus Kristus dumah tuntang gitan awi oloh handiai. 1:8 Kristus kabuat kareh manjamin keton sampai kalepahe; uka hong andau ie dumah haluli, keton inyondau jaton bara kapapa. 1:9 Hatalla puna toto tau imercaya. Ie te Hatalla je jari mantehau keton uka manjadi ije dengan Anake, iete Yesus Kristus Tuhan itah. 1:10 Pahari handiai! Huang aran Tuhan itah Yesus Kristus, aku balaku uka keton handiai pakat ije atei; uka ela aton kapusit hong marak keton. Keleh keton hinje bulat, hinje tirok atei. 1:11 Basa kare oloh bara keluarga Kolos mansanan akangku je keton hakalawan sama arep keton. 1:12 Je imaksudku iete hong marak keton aton belahe hamauh, "Aku omba Paulus," aton kea je hamauh, "Aku omba Apolos," je beken hamauh, "Aku omba Petrus," je beken tinai hamauh, "Aku omba Kristus." 1:13 Dia mungkin Kristus te imbagi-bagi! Paulus dia matei inyampalaki akan keton! Keton mahin dia impandoi uka manjadi oloh ain Paulus. 1:14 Ontong, ije biti mahin jaton aku mampandoi keton, beken bara Krispus tuntang Gayus. 1:15 Ela sampai aton ije biti hamauh je aku jari mampandoi ie mangat manjadi oloh ayungku. 1:16 (O, iyoh! Stepanus tuntang keluargae, puna aku je mampandoi ewen.Tapi beken bara te, manumon pangingatku, jaton hindai oloh beken je impandoiku.) 1:17 Kristus manyoho aku dia uka mampandoi oloh, malengkan uka mangabar Barita Bahalap bara Hatalla; tuntang aku malalus jete mahin dia mahapan kataungku hakotak tumon cara olon, mangat kuasan pampatei Kristus intu kayu sampalaki te dia hayang. 1:18 Basa akan kare oloh je manintu kabinasa, barita tahiu pampatei Kristus hong sampalaki te kilau taloh je tanjaro. Tapi akan itah je inyalamat awi Hatalla, barita te kilau mamparahan ampin Hatalla mansanan kuasae. 1:19 Huang Surat Barasih Hatalla hamauh, "Kapintar-kaharatin oloh pintar kareh irusakku, tuntang kaharatin kare oloh je gantong pangatawae kareh impanihauku." 1:20 Nah, en gunae kare oloh pintar te? En gunae ewen je gantong pangatawae? En gunae kare tukang pikir ain kalunen toh? Hatalla jari mamparahan je kapintar-kaharatin kalunen jetoh puna kahumong bewei! 1:21 Basa aloh kilen ampie kapintar olon, dia olih mangasene Hatalla mahapan kapintar ayue kabuat. Tapi awi Hatalla puna pintar-harati maka ie pahias manyalamat kare oloh je percaya dengae mahalau barita je insanan ikei je ianggap kahumong awi oloh kalunen. 1:22 Oloh Yehudi manggau taloh heran akan bukti, tuntang oloh Yunani manggau kapintar-kaharatin kalunen jetoh. 1:23 Tapi itah toh baya mambarita Kristus je matei intu kayu sampalaki. Barita te mangapehe atei oloh Yehudi, tuntang ianggap tanjaro awi kare oloh je dia Yehudi. Tuntang oloh je dia Yehudi maanggap jete kilau kahumong. 1:24 Tapi akan kare oloh je jari intehau awi Hatalla en ie oloh Yehudi atawa dia oloh Yehudi -- barita te kilau mamparahan cara Hatalla mansanan kuasae tuntang kapintar-kaharatie. 1:25 Basa taloh je humong ampie intu Hatalla, jete labih pintar-harati bara kapintar-kaharatin olon; tuntang taloh je ampie balemo intu Hatalla, jete labih dehen bara kaabas olon. 1:26 Pahari handiai! Coba ingat kilen ampie keadaan keton metoh Hatalla mantehau keton. Baya isut bewei bara keton je pintar-harati, je bara kuasa, atawa mondok intu pangkat gantong manumon tampayah olon. 1:27 Basa Hatalla puna tantai ihate mintih oloh je ianggap humong awi kalunen toh, mangat kare oloh pintar manjadi mahamen. Tuntang Hatalla mintih kea oloh je ianggap balemo awi kalunen jetoh, mangat kare oloh je menteng tuntang mamut manjadi mahamen. 1:28 Hatalla mintih oloh je ianggap randah, hina, tuntang oloh je ianggap jaton rimae haream awi kalunen jetoh, mangat Hatalla marusak taloh je ianggap tamam awi kalunen. 1:29 Awi kalote maka ije biti mahin jaton oloh tau mampatamam arepe intu taharep Hatalla. 1:30 Hatalla kabuat je mawie mangat pahari manjadi ije dengan Kristus. Mahalau Kristus, itah inampa manjadi pintar-harati. Tuntang mahalau ie kea Hatalla manampa itah manjadi bahalap haluli dengae, manampa itah manjadi ungkup ayue je barasih tuntang ie mempas itah. 1:31 Jadi, kilau je tarasurat huang Surat Barasih, "Oloh je handak tama-tamam, keleh ie tamam angate tagal taloh je ilalus Tuhan."
2:1 Pahari handiai! Katika aku dumah manalih keton tuntang mambarita akan keton tahiu rencana Hatalla je hindai ingatawan awi kalunen, aku dia mahapan kapintar-kaharatin kalunen toh atawa hakotak mahapan auh je tama-tamam. 2:2 Basa aku jari tukas angat ateiku katahin aku aton hinje keton, aku dia handak mansanan taloh en-en, beken bara tahiu Yesus Kristus; je mambatang tahiu ie jari matei intu kayu sampalaki. 2:3 Katika aku aton hinje keton aku balemo tuntang hagenjeh awi kikeh. 2:4 Barita je inyampaiku akan keton dia aku manyampaie hapan kare auh je manis-menyak manumon kapintar-kaharatin olon. Aku manyampai jete hapan cara je mambukti je Roh Hatalla te aton kuasae. 2:5 Aku mawie kalote, uka kapercayan keton dengan Kristus dia hagalang kapintar-kaharatin olon, malengkan hagalang kuasan Hatalla. 2:6 Aloh kalote, bara marak kare oloh je pambelom rohe jari batue', aku puna hakotak tahiu kapintar-kaharati. Tapi kapintar-kaharati jetoh dia ie kapintar-kaharatin kalunen, atawa kapintar-kaharatin kare panguasa jaman jetoh, je kuasae te kareh lilap. 2:7 Kapintar-kaharati je handak insanangku iete kapintar-kaharati bara Hatalla. Kapintar-kaharati te dia ingatawan awi kalunen, tapi Hatalla jari manatape akan kasanang itah helo bara kalunen toh injapa. 2:8 Ije biti mahin jaton bara kare panguasa jaman jetoh je katawan tahiu kapintar-kaharati te. Basa, paribasae ewen jari mangatawan, batantu ewen dia handak manyampalaki Tuhan je paham kahaie te. 2:9 Hakalawan dengan jete, sama kilau je tarasurat huang Surat Barasih, "Taloh je dia puji inampayah atawa ihining awi olon, tuntang dia puji kea lembut huang tirok olon, jete je inatap awi Hatalla akan kare oloh je sinta ie." 2:10 Tapi Hatalla jari mamparahan jete akan itah mahalau Roh ayue. Roh Hatalla te manantuani kare taloh handiai, sampai akan kare rencana Hatalla je paling basilim haream. 2:11 Basa je mangatawan taloh huang atei ije biti olon iete roh oloh te kabuat, en dia kalote? Kalote kea tahiu Hatalla. Je mangatawan taloh huang atei Hatalla iete baya Roh Hatalla kabuat! 2:12 Tuntang akan itah dia inenga roh kalunen jetoh, malengkan Roh Hatalla, mangat itah mangatawan taloh handiai je jari inenga Hatalla akan itah. 2:13 Tagal te, amon ikei manarang kare taloh tahiu Hatalla akan kare oloh je aton Roh Hatalla huang ie, ikei dia mansanan jete manumon kapintar-kaharatin olon, malengkan manumon ajar ain Roh Hatalla. 2:14 Oloh je jaton Roh Hatalla huang ie, dia tau manarima taloh je imparahan awi Roh te. Basa akan oloh te, kare taloh te kilau kahumong bewei. Oloh te dia haratie, awi kare hal te baya tau oloh haratie hapan cara roh. 2:15 Oloh je aton Roh Hatalla huang ie, tau manarima taloh handiai, tapi ije biti mahin jaton oloh beken je tau manarima ie. 2:16 Huang Surat Barasih tarasurat, "Eweh je katawan tirok Tuhan? Tuntang eweh je tau manasehat ie?" Itah toh ih je tempon tirok-atei je sama dengan Kristus!
3:1 O keton, sapunae aku dia olih hakotak dengan keton kilau dengan kare oloh je aton Roh Hatalla huang ie. Aku baya tau hakotak dengan keton kilau dengan oloh je magon belom manumon kipen oloh kalunen; sama kilau dengan oloh je magon awau huang kapercayae dengan Kristus. 3:2 Bihin aku tau manenga akan keton panginan awau, dia panginan oloh bakas; basa keton hindai sukup kaabas keton akan jete. Tapi aloh metoh toh mahin keton hindai olih akan jete, 3:3 awi keton magon belom hapan dasar cara olon. Basa amon keton magon bahiri tuntang kalahi sama arep keton, en jete dia mamparahan ampin keton je magon belom manumon dasar olon, kilau kare oloh je dia mangasene Hatalla? 3:4 Amon keton hamauh, "Aku omba Paulus," tuntang je beken hamauh, "Aku omba Apolos," en jete dia mamparahan ampin sipat pahari je sama kilau kare oloh kalunen? 3:5 Sapunae eweh kea Apolos te? Tuntang eweh Paulus? Ikei toh baya kare ayang Hatalla, je jari mangagalan keton uka percaya dengan Kristus. Ikei baya malalus kare gawi je inyoho Tuhan akan ikei. 3:6 Aku mimbule tuntang Apolos manatae hapan danum tapi Hatalla kabuat ih je mawi taloh imbul te belom. 3:7 Jadi je mambatang iete Hatalla, awi ie je mambelome. Je mimbul tuntang je manatae hapan danum dia mambatang; 3:8 kadadue ewen te sama pangkate. Genep biti akan manarima upah manumon kahekae. 3:9 Ikei toh kare oloh je sama-sama bagawi akan Hatalla; tuntang keton kilau tana ain Tuhan, Hatalla. Kare pahari sama kilau huma hai ain Hatalla kea. 3:10 Hapan kapintar je inenga Hatalla, aku kilau tukang pangun huma jari manampa dasar akan pangun huma te, tuntang oloh beken mamangun huma hunjun dasar te. Genep bitin oloh musti manantuani bua-buah kilen ampie ie mamangun intu hunjun dasar te. 3:11 Basa Hatalla kabuat jari manenga Yesus Kristus kilau dasar je tonggal akan pangun huma te; jaton dasar je beken. 3:12 Aton oloh je mamangun hunjun dasar te mahapan amas, aton je mahapan perak, aton je mahapan batu permata, aton kea kayu, oru keang atawa kea tampilai. 3:13 Gawin genep bitin oloh kareh akan gitan hong katika Kristus dumah haluli. Basa hong andau te apui kareh mawi gawin genep bitin oloh manjadi gitan. Apui kareh mauji tuntang manukas kakorik tuntang kahain regan gawi te. 3:14 Amon huma je impendeng oloh hunjun dasar te tahan apui, oloh te kareh manarima hadiahe. 3:15 Tapi amon gawin oloh te bakeho, ie kareh rugi; ie kabuat kareh salamat tapi sama kilau oloh je balua bulu-bulus mahalau apui. 3:16 En pahari katawan je pahari toh Human Hatalla? Tuntang Roh Hatalla te melai huang keton? 3:17 Amon aton oloh je marusak Human Hatalla, Hatalla mahin kareh marusak oloh te. Basa Human Hatalla te imbaris baya akan Hatalla bewei, tuntang keton toh huma te. 3:18 Ije biti mahin ela aton oloh je mananjaro arepe kabuat. Amon aton oloh bara marak keton mangkeme arepe pintar-harati manumon tampayah kalunen jetoh, oloh te musti manjadi humong, uka ie toto-toto manjadi pintar-harati. 3:19 Basa oloh je pintar-harati manumon tampayah kalunen, jete oloh je humong intu tampayah Hatalla. Huang Surat Barasih tarasurat, "Hatalla manjabak kare oloh pintar-harati huang kapintar ewen kabuat." 3:20 Aton kea auh tarasurat kalotoh, "Tuhan katawan je kare tirok oloh je pintar-harati jete uras dia baguna." 3:21 Tagal te, ela sampai aton oloh je lalau mampatamam olon, basa kare taloh handiai uras jari inenga mangat manjadi waris ain keton: 3:22 Paulus, Apolos, Petrus, kalunen jetoh, pambelom tuntang pampatei, jaman jetoh atawa jaman je kareh dumah, taloh handiai te uras ain keton. 3:23 Tuntang keton toh ain Kristus, tuntang Kristus ain Hatalla.
4:1 Anggap ih ikei toh kare jipen Kristus je batanggong jawab mambarita kare rencana Hatalla je hindai ingatawan awi kalunen. 4:2 Taloh je mambatang je inuntut bara jipen te iete musti baketep dengan tempoe. 4:3 Akangku kabuat, dia manjadi soal en bewei je inirok keton -- atawa inirok eweh bewei -- tahiu aku. Malah taloh je inirokku tahiu arepku kabuat mahin jaton manjadi soal. 4:4 Aku dia mangkeme basala huang hal en bewei, tapi jete dia manjadi bukti je aku puna dia basala. Tuhan kabuat je manukas en aku basala atawa dia. 4:5 Tagal te, awi katikae hindai sampai, ela keton helo-helo manyewut aton oloh je basala atawa dia. Entai ih sampai Tuhan dumah kareh. Ie ih je kareh mukei kare rahasia je basilim huang kakaput. Ie te je kareh mungkar kakare kahandak je basahokan huang atei olon. Hong katika te harun genep bitin oloh tau manarima tara je patut ie manarimae bara Hatalla. 4:6 Pahari handiai! Tagal keton, aku jari mangkepan kare taloh te intu Apolos tuntang akan arepku kabuat. Kahandakku mangat bara sonto ain ikei te keton tau bajar riman auh toh, "Keleh keton mimbing atoran je aton." Awi kalote, ije biti mahin jaton bara keton je tau tara-tara dengan ije biti oloh palus mamparandah oloh ije beken. 4:7 Eweh je manjadian pahari labih bara oloh beken? En dia kare taloh handiai inarima pahari bara Hatalla? Jadi, mbuhen keton mampatamam arep keton, kila-kilau jaka taloh je aton intu pahari te dia inenga akan keton? 4:8 Puna bujur keton dia perlu taloh en-en hindai. Keton jari tatau! Keton jari manjadi raja! Tapi ikei dia. Bahalap toto jaka keton puna toto-toto manjadi raja, mangat ikei tau omba marentah hayak dengan keton. 4:9 Manumon tirok ayungku, ikei toh rasul, jari injadian awi Hatalla kilau tontonan intu taharep kare oloh kalunen tuntang kare malekat. Ikei kilau kare oloh randah je ihukum matei awi kalunen. 4:10 Tagal Kristus ikei toh oloh je humong, tuntang keton oloh Kristen je pintar! Ikei oloh je balemo, keton oloh je abas! Ikei ihalalea oloh, tapi keton inara oloh! 4:11 Sampai katika toh ikei mangkeme balau' tuntang teah belai; pakaian ikei baya je aton leket intu biti ih; ikei ingapehe awi oloh; ikei jaton eka ikei tau melai manetep; 4:12 ikei mahampas uhat-tolang mangat manggau rajaki. Amon ikei inyapa, ikei mambaleh hapan berkat; amon ikei ingapehe, ikei sabar; 4:13 amon oloh mamapa ikei, ikei mambaleh hapan auh je mangat. Ikei dia labih bara rotik kalunen toh; sampai katika toh ikei magon ianggap kilau kapapan kalunen. 4:14 Aku manyurat surat toh akan keton dia jaka awiku handak mampahawen keton, tapi awiku handak manasehat keton kilau anak ayungku kabuat. 4:15 Basa aku toh je manjadi bapa keton, aloh mungkin kilau oloh Kristen, ain keton jari aton sapuloh koyan guru. Huang pambelom keton kilau kare oloh je hinje dengan Kristus, aku toh manjadi bapa keton, awi aku je mimbit Barita Bahalap tahiu Kristus akan keton. 4:16 Awi te aku paham balaku mangat keton manumon sonto ayungku. 4:17 Akan hal te aku jari manyoho Timoteus manalih keton. Kilau murid ain Kristus, ie sama kilau anak ayungku kabuat je inyintaku. Ie te anak je tau imercaya. Ie kareh handak mampingat keton tahiu cara belom je ilalusku limbah aku percaya dengan Kristus, iete cara belom je iajarku hong genep ungkup hong kueh bewei. 4:18 Aton pire-pire biti bara marak keton manjadi oloh bajoho, awi ewen manyangka aku dia akan dumah manalih keton. 4:19 Tapi amon Tuhan manyoho, maka dia tahi hindai aku dumah kea manalih keton. Kareh hong katika te aku handak mite kea taloh je tau ilalus awi kare oloh je balecak te; dia baya auh huang totok ewen bewei. 4:20 Basa amon Hatalla marentah pambelom oloh, hal te gitan buktie huang pambelom oloh te, dia ie awi kare auh kotake. 4:21 Jadi keleh keton mintih taloh je keton labih rajin! En keton handak aku dumah mangat majar keton hapan auh karas atawa aku dumah majar keton hapan auh balemo tuntang hapan sinta-asi?
5:1 Sapunae aku jari manarima laporan bara oloh marak keton tahiu gawin karayap je malabien; Aton bara kare pahari je habandong dengan indu tirie. Kare oloh je dia mangasene Tuhan mahin dia malalus taloh je kilau te! 5:2 Aloh kalote, pahari magon gantong atei. Padahal sapunae pahari te musti kapehe atei, tuntang mampalua oloh je mawi gawi macam te bara marak keton. 5:3-4 Secara kaolon aku toh kejau bara keton, tapi secara hambaruan aku aton intu bentok keton. Jadi ampin gawingku kilau jaka aku aton hong bentok keton, "Huang aran Tuhan Yesus Kristus aku mansanan oloh je jari malalus gawi je kalote kapapae, musti ihukum!" Amon keton hapumpong keleh keton maanggap aku aton hong marak keton, tuntang mahapan kuasan Tuhan itah Yesus, 5:5 keton musti manyarah oloh te akan setan mangat bitin oloh te rusak tuntang awi kalote hambaruae inyalamat katika Tuhan dumah haluli. 5:6 Dia patut keton mangkeme tamam. Mungkin keton jari katawan paribasa toh, "Ragi je isut mawi hapus adonan manjadi kembang!" 5:7 Keleh keton manganan helo ragi je usang te, iete ragin dosa, mangat keton manjadi sama kilau tepung wadai je jari iewoi, barasih bara ragin dosa je usang, tuntang aku katawan je keton puna kilau te. Basa pesta Paska ain itah jari tatap, karana Yesus je manjadi kilau tabirin Paska ain itah, jari inyarah. 5:8 Jadi, keleh itah maraya pesta ain itah te hapan rote je dia iragi, iete rote je manjadi tanda katinduh tuntang taloh handiai je manyanang atei Hatalla. Ela itah maraya pesta Paska te mahapan rote je ingoan hapan ragi usang, iete ragin dosa tuntang kapapa. 5:9 Huang suratku je helo, aku mansanan akan keton mangat ela keton marampi oloh parayap. 5:10 Taloh je koangku toh dia ie oloh parayap atawa bakoho atawa pananjaro atawa panyembah dewa je samasinde dia mangasene Hatalla. Dia! Aku dia manahiu ewen te; basa amon keton musti mangejau arep keton bara ewen, batantu keleh keton balua samasinde bara kalunen toh. 5:11 Je inahiuku toh iete, ela keton marampi arep keton dengan oloh je mangaku arepe oloh Kristen, tapi oloh te parayap, atawa bakoho, panyembah dewa, atawa rajin mamapa oloh beken, atawa pambusau, atawa panakau. Mondok kuman hinje ewen te mahin ela! 5:12-13 Puna toto, urusan ayungku dia handak mahakim oloh je dia Kristen. Hatalla kabuat ih je mahakim ewen. Tapi tahiu kare anak ungkup keton, en dia keton kabuat ih je mahakim ewen? Huang Surat Barasih aton tarasurat, "Keleh keton maharak oloh papa bara marak keton."
6:1 Mbuhen aton oloh bara keton je bahanyi haguet manalih hakim je dia mangasene Hatalla, uka mangadu paharie je sama kapercayae amon ie hakapaut dengan paharie te? Mbuhen ie dia balaku ungkup Hatalla mahapus perkara te? 6:2 En keton dia katawan je ungkup ain Hatalla kareh mahakim kalunen toh? Jadi, amon keton puna akan mahakim kalunen toh, en keton dia olih mahapus kare perkara pengadilan je dia badai' rimae? 6:3 En keton dia katawan je itah kareh mahakim kare malekat? Labi-labih hindai kare perkara pambelom genep andau! 6:4 Maka amon lembut kare perkara kilau te, en keton manyarah jete akan kare oloh je jaton kadudukae huang ungkup? 6:5 Mampahawen toto! Batantu intu marak keton aton oloh je sukup kapintar kaharatie uka mahapus kare kapaut kabantah hong marak kare pahari je sama-sama Kristen! 6:6 Tapi ampie aton ije biti oloh Kristen haguet manalih oloh je dia Kristen uka mangadu perkarae dengan paharie je Kristen! 6:7 Kare kapaut je aton hong marak keton jari sukup mambukti je keton kalah. Awi te labih bahalap keton inyalan atawa imparugi. 6:8 Tapi keton kabuat haream je mawi taloh je dia bujur akan oloh beken. Keton kabuat kea je mamparugi oloh beken. Tuntang keton malalus jete malahan akan kare pahari je sama kapercayae! 6:9 En pahari katawan kare pahari je dia manumon kahandak Hatalla te, dia tau manjadi anak ungkup ain Hatalla? Ela buah tanjaro! Kare oloh je mawi karayap, kare oloh je manyembah hampatong dewa, je habandong, je mawi kare taloh je mampahawen dengan oloh je sama ramon kahawee, 6:10 je panakau, je bakoho, je pambusau, je rajin mamapa oloh beken, tuntang je mimes oloh beken -- uras oloh je kilau te dia tau manjadi anak ungkup ain Hatalla. 6:11 Pire-pire bara keton bihin puna kilau te hadat dasare. Tapi toh keton inyewut barasih bara dosa. Keton jari manjadi ahli waris ain Hatalla je barasih. Keton jari hakabuah haluli dengan Hatalla, awi keton percaya dengan Tuhan Yesus Kristus tuntang tagal kuasan Roh bara Hatallan itah. 6:12 Aton oloh je hamauh, koae, gagenep oloh tau malalus en bewei, tapi akangku dia uras taloh te baguna. Jadi aloh aku tau mawi en bewei, tapi aku dia handak manalua arepku inguasa awi en bewei. 6:13 Aton kea oloh je hamauh koae panginan te akan kanai', tuntang kanai' inatap akan panginan. Tapi kadadue te kareh inganan awi Hatalla. Bitin olon dia tau ihapan mangat mawi taloh je harayap, tapi baya hapan manempo Tuhan. Tuntang Tuhan kareh mahaga bitin oloh te. 6:14 Hatalla jari mambelom Tuhan Yesus bara pampatei, kalote kea Hatalla kareh mambelom itah hapan kuasae. 6:15 Pahari handiai katawan biti-bereng keton jete bagian biti-bereng ain Kristus. Jadi, en tau aku manduan ije bagian bara biti-bereng Kristus palus mawie manjadi bagian biti-bereng lontei? Dia samasinde! 6:16 Atawa mungkin keton hindai katawan, oloh je hinje dengan ije biti lontei, manjadi ije dengan lontei te? Basa huang Surat Barasih tarasurat, "Kadaduee te manjadi ije." 6:17 Tapi oloh je mampahinje arepe dengan Tuhan, maka Roh Tuhan dengan roh oloh te manjadi ije. 6:18 Keleh mangejau arep keton bara kare gawin karayap. Basa kakare dosa beken je iawi oloh, jete manjadi intu luar biti-bereng oloh te. Tapi oloh je mawi gawi karayap, rimae ie mawi dosa dengan biti-bereng ayue kabuat. 6:19 Keton musti katawan je biti-bereng keton jete eka Roh Hatalla melai. Roh te melai intu huang keton. Tuntang Hatalla kabuat je manenga Roh te akan keton. Bitin keton te dia ie keton tempoe. Hatalla je tempon jete. 6:20 Hatalla jari mamili keton tuntang jari mambayare punah. Tagal te, keleh mahapan biti-bereng keton bua-buah ampie mangat Hatalla ihormat-inara.
7:1 Toh aku handak hakotak tahiu perkara je inyewut keton huang surat keton. Amon ije biti oloh hatue dia kawin, jete bahalap. 7:2 Tapi uka ie dia tagoda ateie handak mawi kare taloh je dia patut, labih bahalap genep bitin oloh hatue aton sawae kabuat tuntang genep bitin oloh bawi aton banae kabuat. 7:3 Oloh hatue musti malalus kapatut gawie kilau ije biti oloh je aton sawae, tuntang oloh bawi musti malalus kapatut gawie kilau ije biti oloh bawi je aton banae; genep biti malalus kapatut gawie dengan kabalie. 7:4 Oloh bawi jaton kuasae dengan bitin ayue kabuat; je kuasa dengan bitin ayue iete banae. Kalote kea oloh hatue jaton kuasae dengan bitin ayue kabuat; je aton kuasae dengan bitin ayue iete sawae. 7:5 Ela keton mangejau arep keton bara kabalin keton. Tapi tau kea amon hanjulo asal jete puna jari imakat awi keton due. Awi kalote genep bitin keton tau balakudoa kabuat kabuat tuntang jaton inderoh. Tapi limbah te keleh keton haluli tinai manokep kabalin keton. Amon dia kalote, maka keton kareh tau manumon auh roh papa, awi keton jaton kaabas manyarenan kipen keton. 7:6 Aku mansanan jetoh dia kilau parentah, tapi kilau nasehat. 7:7 Sapunae aku labih rajin jaka oloh uras tau sama kilau aku. Tapi genep biti jari mandino panenga je inukas awi Hatalla. Ije biti aton panenga kalotoh, je beken tinai aton panenga kalote. 7:8 Akan kare oloh je hindai kawin tuntang akan kare oloh bawi je jari balo, aku manasehat kalotoh: labih bahalap ewen te tetep belom kabuat kilau aku. 7:9 Tapi amon pahari dia olih manyarenan kipen, pahari keleh kawin. Basa labih bahalap pahari kawin bara manyarenan kipen je mangambuar. 7:10 Akan ewen je jari kawin, aku marentah kalotoh: (Sapunae dia ie aku je manenga parentah toh tapi Tuhan.) Ije biti oloh bawi je jari kawin ela malihi banae. 7:11 Tapi amon ie jari malihie, ie musti tetep dia babane, atawa ie haluli dengan banae. Tuntang ije biti oloh hatue dia tau manganan sawae. 7:12 Akan ewen je beken, aku manasehat kalotoh: -- Jetoh nasehat ayungku kabuat, dia ain Tuhan -- amon ije biti oloh Kristen kawin dengan ije biti oloh bawi je dia percaya dengan Kristus, tuntang sawae te handak belom hinje dengae, oloh te dia tau manganan sawae. 7:13 Tuntang amon ije biti bawin oloh Kristen kawin dengan ije biti oloh je dia percaya dengan Kristus, tuntang banae te handak belom hinje dengae, maka oloh bawi te dia tau manganan banae. 7:14 Basa banae je dia percaya te inarima uka manjadi ungkup ain Hatalla tagal pangawie dengan sawae je jari manjadi oloh ain Hatalla. Kalote kea sawan oloh je dia percaya inarima uka manjadi anak ungkup ain Hatalla, tagal pangawie dengan banae je jari manjadi oloh ain Hatalla. Amon dia kalote, kare anak ewen batantu kilau kare anak oloh kapir, padahal kare anak ewen te ianggap kilau anak ungkup ain Hatalla. 7:15 Tapi amon oloh je dia percaya te malihi sawae atawa banae je Kristen, ela manahan ie. Huang hal toh pahari bawi atawa pahari hatue te bebas, basa Hatalla handak uka pahari belom huang kadamai. 7:16 Basa pahari kilau oloh bawi -- je jari percaya dengan Tuhan -- kilen ampie pahari tau katawan dengan pasti je pahari dia tau manyalamat banan pahari? Kalote kea pahari kilau ije biti oloh hatue Kristen, kilen ampie pahari tau katawan dengan pasti je pahari dia olih manyalamat kabalin pahari? 7:17 Keleh genep biti mator pambelom ayue manumon atoh bara Tuhan sama kilau je jari inukas awi Hatalla akae katika Hatalla mantehau ie uka percaya dengae. Jete atoran je iajarku hong genep ungkup. 7:18 Paribasae, amon aton ije biti oloh jari inyunat katika ie manarima pantehau Hatalla, maka ela oloh te manggau jalan manganan kare tanda sunat te. Kalote kea amon aton ije biti oloh je hindai inyunat katika ie manarima pantehau Hatalla, ela oloh te balaku inyunat. 7:19 Basa en oloh manumon atawa dia manumon atoran sunat, sama-sama jaton en-en rimae. Je mambatang iete genep biti manumon kare parentah Hatalla. 7:20 Keleh genep biti tetep belom huang keadaan kilau metoh ie manarima pantehau bara Hatalla. 7:21 Amon hong katika pahari intehau, pahari kilau ije biti jipen, dia usah ih pahari heka-heka manirok hal te. Tapi kareh amon pahari mandino katika uka tau bebas, keleh manduan kesempatan jete. 7:22 Basa ije biti jipen je jari percaya dengan Tuhan, ie te oloh ain Tuhan je bebas. Tuntang ije biti oloh bebas je jari percaya dengan Tuhan, ie te jipen Kristus. 7:23 Hatalla jari mamili pahari tuntang jari punah regae. Tagal te, ela pahari manyarah arep uka manjadi jipen olon. 7:24 Jadi, pahari handiai, aloh kilen ampie keadaan keton metoh keton intehau, keleh pahari tetep belom kalote hinje dengan Tuhan. 7:25 Toh tahiu kare oloh je hindai kawin. Tahiu hal te aku jaton manarima parentah en-en bara Tuhan. Tapi kilau oloh je tagal asin Tuhan patut imercaya, aku handak manenga nasehat bewei. 7:26 Awi mingat kare kasusah je mamok wayah toh, aku mangkeme labih bahalap amon oloh tetep belom kilau je ie aton ampie wayah toh. 7:27 Amon ije biti Pahari aton sawae, ela ie manggau jalan mangat lapas bara sawae te. Amon ije biti pahari hindai aton sawae, dia usah ie manggau oloh bawi akan sawae. 7:28 Amon Pahari jari kawin, jete dia ie dosa. Kalote kea amon ije biti oloh bawi bujang kawin, ie dia badosa. Baya ewen je kawin te kareh manaharep are kasusah. Tuntang aku handak kare pahari luput bara kare kasusah te. 7:29 Maksud ayungku kalotoh, pahari handiai: katika dia are hindai akan itah. Nampara bara toh, genep oloh je jari kawin dengan oloh bawi, keleh belom kilau jaka ie hindai kawin; 7:30 oloh je manangis, keleh belom kilau jaka ie dia kapehe atei; oloh je tatawe, kilau jaka ie dia hanjak; oloh je jari mamili, kilau jaka ie jaton mingkes taloh en-en, 7:31 tuntang oloh je maurus kare hal hong kalunen, keleh belom kilau jaka ie dia inderoh awi kare hal te. Basa dia tahi hindai kalunen jetoh, tumon keadaae wayah toh, akan lilap! 7:32 Aku handak uka pahari lapas bara kasusah. Oloh je dia kawin dengan oloh bawi, ie handak mambulat tiroke dengan kare hal tahiu Tuhan awi ie handak manyanang atei Tuhan. 7:33 Tapi oloh hatue je jari kawin, rajin manirok kare hal hong kalunen jetoh, awi ie handak manyanang atei sawae; 7:34 kajariae tiroke tabagi-bagi. Ije biti oloh bawi je dia kawin, atawa ije biti anak bawi bujang, are manirok kare hal tahiu Tuhan, awi ie mipen uka biti-bereng tuntang hambaruae manjadi ain Tuhan. Tapi oloh bawi je jari kawin, mambulat tiroke akan kare hal kalunen jetoh, awi ie mipen manyanang atei banae. 7:35 Aku manyurat taloh handiai toh akan kahalap keton kabuat, dia awiku handak mangahana keton mangoan taloh toh te. Je handak inggauku baya uka pahari malalus taloh je bujur tuntang patut, tuntang uka pahari tau bulat tirok akan Tuhan. 7:36 Amon ije biti oloh mangkeme dia malalus kapatute dengan tunangae, amon ie dia olih manyarenan kipee, tuntang ie mangkeme perlu kawin dengan oloh bawi bujang te, keleh ie malalus taloh je ingkemee bahalap. Ie dia badosa, amon ewen kawin. 7:37 Tapi amon ije biti oloh jari manukas huang ateie uka dia kawin dengan tunangae tuntang tukas ateie te dia imaksa, maka taloh je ilaluse te bahalap, asal ie olih malalus jete. 7:38 Jadi, oloh je kawin gawie te bahalap, tuntang oloh je dia kawin gawie te labih bahalap hindai. 7:39 Ije biti oloh bawi je jari kawin, ie heret dengan banae baya katahin banae te belom. Amon banae jari matei, oloh bawi te bebas kawin tinai dengan oloh je eka kanahuange; asal pangawin te pangawin Kristen. 7:40 Aloh kalote, ie kareh labih ontong amon ie dia kawin tinai. Jete tirok ayungku kabuat, tapi aku mangkeme taloh je inyewutku te impahayak awi kuasan Roh Hatalla.
8:1 Toh tahiu panginan je inenga manjadi parapah akan dewa. Puna toto kilau koan oloh, "Itah handiai uras jari pintar." Tapi kapintar tau mawi oloh jadi balecak, tapi sinta mampahalap tirok-atei oloh. 8:2 Oloh je manyangka ie are pangatawae, sapunae oloh te hindai mangatawan taloh en-en sampai handalem toto. 8:3 Tapi oloh je toto-toto sinta Hatalla, maka Hatalla handak mangasene ie. 8:4 Tuntang hal oloh kuman panginan je jari inyarah akan dewa, itah katawan hampatong-dewa te mamparahan taloh je jaton en-en ih. Tuntang itah katawan kea Hatalla baya ije; jaton je beken. 8:5 Puna are kea taloh je inyewut kambe atawa tuhan; aloh je aton intu langit atawa je aton hunjun petak. 8:6 Tapi akan itah, Hatalla te baya ije. Iete Bapa je manjapa taloh handiai. Baya akae bewei itah belom. Tuntang Tuhan baya ije kea, iete Yesus Kristus. Mahalau ie taloh handiai injapa, tuntang tagal ie kea itah belom. 8:7 Aloh kalote, dia uras oloh mangatawan hal te. Belahe bihin aton oloh je manyembah dewa. Tagal te, toh ewen mahin mangkeme panginan je jari inyarah akan hampatong-dewa, jete panginan dewa. Maka amon ewen kuman panginan te, ewen mangkeme badosa; awi kapercayan ewen hindai dehen. 8:8 Sapunae panginan te kabuat dia mawi hubungan itah dengan Tuhan labih tokep. Amon itah kuman panginan te, itah dia mandino ontong en-en. Katambalike, amon itah dia kuman panginan te, itah mahin jaton rugi en-en. 8:9 Tapi bua-buah! Ela jete mawi buku sabab sampai oloh beken manjadi badosa -- awi kapercayae hindai dehen -- karana pahari bebas malalus taloh en bewei. 8:10 Maksudku kalotoh: Paribasae pahari, je kapercayae jari dehen, salenga mondok kuman panginan bara ancak taloh. Gawin pahari je kuman panginan ancak te gitan awi ije biti oloh beken. Amon kapercayan oloh beken te dia dehen, en jete dia mawi oloh te bahanyi kuman panginan je jari inenga akan hampatong dewa te? 8:11 Tuntang tagal te maka kapercayan pahari mawi oloh je dia dehen kapercayae te manjadi layang. Padahal Kristus matei akan oloh te kea. 8:12 Tuntang amon pahari mawi kasalan kilau te dengan kare pahari je Kristen -- iete pahari marusak kapercayan ewen je balemo -- maka pahari badosa dengan Kristus. 8:13 Jete bukue, amon panginan mawi sabab paharingku badosa, maka aku samasinde dia handak kuman daging te tinai. Basa ela-ela paharingku te badosa tagal aku.
9:1 En aku toh dia oloh bebas? En aku toh dia rasul? En aku toh hindai puji mite Yesus, Tuhan itah? En keton toh dia hasil gawingku akan Tuhan? 9:2 Paribasa kare oloh beken dia handak mangaku aku kilau rasul, paling dia, keton je mangaku jete! Basa pambelom keton kilau oloh Kristen jete buktie je aku toh rasul. 9:3 Amon oloh manyalan aku, aku tau tombah kalotoh: 9:4 En aku jaton hak manarima panginan tuntang taloh ihop bara gawingku? 9:5 En aku jaton hak mimbit ije biti kabalingku oloh Kristen haya-hayak dengangku huang panjalanangku, kilau je iawi kare paharin Tuhan Yesus tuntang kare rasul beken, tatamput kea Petrus? 9:6 Atawa baya Barnabas tuntang aku bewei je musti manggau taloh kinan kabuat? 9:7 Jaton tantara je musti maongkos arepe kabuat huang angkatan perang! Jaton kea oloh pamalan je mimbul anggur intu kabun ayue palus dia kuman hasil anggur bara kabun te! Jaton kea sakatik je mahaga tabiri palus dia mihop susu bara kare tabiri te! 9:8 Aku mansanan jete dia awi ganan kebiasaan je ingkeme genep andau, tapi awi Surat Barasih mansanan hal te kea. 9:9 Intu Surat Moses tarasurat, "Sapi je ihapan mihik gandum, nyamae ela imbangus." En taloh je inantuani Hatalla te sapi? 9:10 Atawa jete kilau tanding akan itah? Puna jete inyurat akan itah. Basa oloh je manggawi tana tuntang oloh je marasih gandume puna buah ih ie bagawi sambil maharap uka manarima bagi bara hasil gawie. 9:11 Ikei jari manawor binyi roh huang pambelom keton. Maka amon ikei manggetem kare berkat ramon kalunen bara keton, en jete rimae ikei manuntut lalau karee bara keton? 9:12 Amon kare oloh beken aton hak maharap jete bara keton, en hak ikei dia labih hindai bara ewen te? Tapi aku hindai mangguna hak te. Katambalike aku labih rajin mananggong kare taloh handiai bara aku mampalembut taloh je mahambang Barita Bahalap inyiar tahiu Kristus. 9:13 Pahari batantu katawan tahiu oloh je bagawi intu huang Human Hatalla manarima panginan ewen bara Human Hatalla. Tuntang kare oloh je maurus eka maluput parapah mandino bagi parapah je inyarah intu hete. 9:14 Kalote kea Tuhan jari manukas iete oloh je mambarita Barita Bahalap te musti mandino taloh kinae bara gawie mambarita te. 9:15 Tapi ije mahin hindai puji aku mahapan bara kare hak te. Tuntang aku manyurat jetoh dia kea awi aku handak mangat kare hal te ilalus metoh toh kea akangku. Labih bahalap aku matei bara aku nihau taloh je eka kahanjakku te. 9:16 Basa, amon jete baya mambarita Barita Bahalap bara Hatalla, maka aku jaton hak tau tama-tamam, awi Hatalla jari marentah aku uka malaluse. Maka calaka aku, amon aku dia mambarita Barita Bahalap te! 9:17 Paribasa aku malalus gawi te awi kanahuang ayungku kabuat, maka aku tau maharap mangat mandino upah. Tapi aku mambarita Barita Bahalap te puna awi aku inyoho. Aku inyoho awi Hatalla uka malalus jete. 9:18 Amon kalote, en upahku? Upahku iete: aku tau mambarita Barita Bahalap te hayak jaton mambehat ije biti oloh kea, awi aku dia manuntut kare hak ayungku kilau pambarita Barita Bahalap te. 9:19 Aku toh dia jipen eweh bewei; aku bebas. Aloh kalote, aku jari manjadian arepku toh jipen kare oloh handiai. Aku malalus jete mangat aku tau mimbit sapire karee oloh je olihku dinoe akan Kristus. 9:20 Akan oloh Yehudi, aku mawi arepku kilau oloh Yehudi, mangat aku tau dinon oloh Yehudi akan Kristus. Taharep kare oloh je belom manumon hukum Moses, aku mawi arepku kilau jaka aku heret dengan hukum te, aloh aku sapunae dia leket dengan hukum te. Aku malalus jete mangat aku tau manjijit ewen manjadi oloh ain Kristus. 9:21 Taharep oloh je dia Yehudi, aku mawi arepku kilau ije biti oloh je dia Yehudi, je belom intu luar hukum Moses. Aku malalus jete mangat aku tau manjijit ewen manjadi oloh ain Kristus. Tapi jete dia baarti aku dia taat dengan kare parentah Hatalla; sapunae aku inguasa awi kare parentah Kristus. 9:22 Hong marak kare oloh je kapercayae dia dehen, aku mahin mawi arepku kilau ije biti oloh je kapercayae dia dehen mangat aku tau manjijit ewen manjadi oloh ain Kristus. Jadi, hapan auh pandak, aku manjadi kilau oloh handiai akan oloh handiai mangat hapan jalan je kilen ampie kea aku tau manyalamat belahe ewen te. 9:23 Uras jete ilalusku akan Barita Bahalap bara Hatalla te, mangat aku kea tau tamput dinon berkat. 9:24 Pahari batantu katawan amon oloh hasalanja hadari maka oloh uras omba hadari, tapi baya ije biti ih je dinon hadiah. Tagal te keleh hadari kalote sampai pahari dinon hadiah. 9:25 Genep oloh je metoh huang latihan, manyarenan kanahuange bara taloh handiai. Ie malalus jete awi ie handak uka ie inyaling oloh hapan kambang kamanang, iete kambang je bajeleng akan balayu. Tapi itah toh manahan arep huang kare taloh handiai awi itah handak inyaling huang rantai kambang je dia akan balayu. 9:26 Jete bukue aku hadari manintu taloh je batantu. Kilau huang pertandingan tinju, aku dia manampar barangai ampie. 9:27 Aku manalua bitingku imukul manyangit sampai aku olih manyarenae. Aku puna mawie kalote, awi aku dia hakon amon kajariae kareh aku je jari mimbit oloh beken huang pertandingan te, salenga aku kabuat je dia inarima.
10:1 Pahari handiai! Keleh pahari mingat taloh je manjadi buah tato hiang itah katika ewen omba manuntut Moses. Ewen uras ingalindong awi baunandau, tuntang dimpah Tasik Bahandang dengan salamat. 10:2 Mangat tau manjadi oloh ain Moses, ewen samandiai impandoi huang baunandau tuntang huang tasik te. 10:3 Ewen samandiai kuman panginan rohani je sama, 10:4 tuntang mihop danum rohani je sama. Ewen samandiai mihop bara bukit batu rohani je mampahayak ewen; bukit batu te iete Kristus kabuat. 10:5 Aloh kalote, Hatalla dia sanang dengan ewen tuntang jete bukue kare hantun ewen hakalampah hong padang pasir. 10:6 Taloh handiai te manjadi sonto akan itah, uka mampingat itah mangat ela mipen kare hal je papa kilau ewen. 10:7 Tuntang kea mangat itah ela manyembah hampatong dewa kilau je iawi ewen belahe. Huang Surat Barasih tarasurat, "Maka bangsa te nampara kuman mihop, tuntang manari uka manyembah hampatong dewa." 10:8 Itah dia tau malalus kare hal je harayap kilau je ilalus awi belahe ewen te. Basa, due puluh telo koyan biti bara ewen te matei huang ije andau awi mawi taloh te. 10:9 Itah dia tau maningkes Tuhan sama kilau je ilalus awi belahe ewen te horan, sampai ewen matei inotok handipe tada. 10:10 Itah dia tau kea bakotok; sama kilau je iawi belahe ewen te horan, sampai ewen impatei awi Malekat Pampatei. 10:11 Kakare hal te manjadi buah ewen, mangat jadi sonto akan kare oloh beken. Tuntang taloh handiai te tarasurat kea uka manjadi pangingat akan itah. Basa itah wayah toh belom hong lawin jaman. 10:12 Oloh je manyangka arepe mendeng segah, keleh rende-rendeng; ela sampai balongkang. 10:13 Genep tingkes je buah pahari jete tingkes je puna kinjap buah oloh kalunen. Tapi Hatalla baketep dengan janjie. Ie dia handak manalua pahari iningkes labih bara kaolih pahari. Hong katika pahari buah tingkes, ie kareh manenga jalan akan keton uka manjadi abas mangat pahari tahan manyarenae. 10:14 Tagal te, pahari handiai je inyintaku, keleh keton manyingi hampatong dewa. 10:15 Aku hakotak dengan keton sama kilau dengan oloh je pintar-harati. Keleh keton kabuat manimbang auhku toh. 10:16 Hong katika itah mihop anggur sambil manarimakasih akan Hatalla, en dia jete mamparahan je itah toh hinje dengan Kristus huang pampateie? Tuntang katika itah mambagi rote akan kinan itah haya-hayak, en dia jete mamparahan je itah hinje dengan bitin Kristus? 10:17 Awi baya aton ije rote, tuntang itah handiai kuman bara rote jete kea, maka bitin itah je are toh manjadi kilau ije biti. 10:18 Coba tampayah kare oloh Yehudi. Ewen te kuman panginan je iluput intu hunjun eka parapah, jete kare oloh je bulat-hinje dengan eka te. 10:19 En riman auhku te? En hampatong dewa atawa panginan je inyarah akan hampatong-dewa te jaton rimae samasinde? 10:20 Dia! Maksudku iete taloh je inyarah intu eka parapah akan hampatong dewa jete dia ie inyarah akan Hatalla, malengkan akan kare setan. Tuntang aku dia handak keton hinje dengan setan. 10:21 Keton dia tau mihop bara huang cangkir anggur Tuhan, tuntang hemben te kea bara cangkir anggur setan kea. Keton dia tau kuman hong meja ain Tuhan tuntang hong meja ain roh papa kea. 10:22 Atawa itah handak mawi Tuhan bahiri ateie? En itah toh labih abas bara Tuhan? 10:23 Koan oloh, "Itah tau ih mawi taloh en bewei je ingahandak itah." Toto! Tapi dia uras taloh je ingahandak itah te baguna. "Itah tau mawi en bewei je ingahandak itah" -- tapi dia urase je ingahandak itah te mampamaju pambelom itah. 10:24 Ela aton ije biti oloh je manggau jalan handak mandohop arepe kabuat. Genep bitin oloh musti manggau jalan akan mandohop oloh beken. 10:25 Keton tau ih kuman en bewei je injual oloh hong pasar daging. Dia usah keton manantuanie helo, aloh aton kabehat huang ateim. 10:26 Basa huang Surat Barasih tarasurat, "Petak toh dengan kare taloh awang huange jete ain Tuhan." 10:27 Amon aton oloh je dia Kristen marawei keton kuman, tuntang keton manarima parawei te, kinan ih en je inyarungan oloh akan keton. Dia usah keton manantuanie bara kueh pandumahe panginan te, uka jaton kare kabehat huang pangingat atei keton. 10:28 Tapi amon aton oloh hamauh dengan keton, "Panginan toh jari inyarah akan hampatong dewa," ela keton kuman panginan te, awi keton mite kepentingan oloh je hamauh te tuntang awi pangingat atei. 10:29 Maksudku dia ie pangingat atei keton, tapi pangingat atei oloh te. Mungkin aton oloh je misek, "Bah, mbuhen hak kebebasangku inantikas awi pangingat atei oloh beken? 10:30 Amon aku kuman panginan sambil manarimakasih akan Hatalla, mbuhen oloh musti manyalan aku tagal panginan te, maka aku jari manarimakasih intu Hatalla akan jete?" 10:31 En bewei taloh je iawi pahari -- en pahari kuman atawa mihop lalus taloh handiai te hapan manara Hatalla. 10:32 Keleh keton belom tumon kapatute sampai pahari dia mawi sabab oloh beken badosa; antah ewen te oloh Yehudi atawa dia Yehudi, atawa ungkup ain Hatalla. 10:33 Keleh belom kilau aku. Aku manggau jalan uka manyanang atei oloh handiai huang kare taloh handiai, jaton manirok gunae akan arepku kabuat. Tintun kanahuangku baya ije, iete uka oloh handiai tau inyalamat.
11:1 Keleh keton manyonto aku sama kilau aku kea manyonto Kristus. 11:2 Aku manara keton awi keton harajur mingat aku tuntang manumon auh ajar je inengaku akan keton. 11:3 Tapi aku handak uka keton mangatawan ije hal hindai, iete je manjadi kapala akan genep oloh hatue iete Kristus; je manjadi kapala akan sawae iete banae, tuntang je manjadi kapala akan Kristus iete Hatalla. 11:4 Amon ije biti oloh hatue metoh ie balakudoa atawae metoh ie manyampai barita bara Hatalla intu taharep oloh are, ie mahapan tutup takolok, maka oloh te mahina Kristus. 11:5 Tuntang amon ije biti oloh bawi metoh ie balakudoa atawa metoh ie manyampai barita bara Hatalla intu taharep oloh are ie dia mahapan tutup takolok, maka oloh bawi te mahina banae je manjadi kapala akae. Jete sama rimae kilau takolok oloh bawi te jari incukur. 11:6 Basa amon ije biti oloh bawi dia handak mahapan tutup takolok, labih bahalap balaue te inggunting. Tapi amon ije biti oloh bawi incukur takoloke atawa inggunting balaue, maka jete penghinaan akae. Tagal te labih bahalap ie mahapan tutup takolok. 11:7 Oloh hatue dia usah mahapan tutup takolok, awi ie manyaramin ampin Hatalla tuntang kahain Hatalla. Tapi oloh bawi manyaramin kahain oloh hatue, 11:8 basa oloh hatue dia injadian bara oloh bawi, tapi oloh bawi te je injadian bara oloh hatue. 11:9 Oloh hatue dia kea injadian akan gunan oloh bawi, tapi oloh bawi injadian akan gunan oloh hatue. 11:10 Tagal te uka manyanang kare malekat, ije biti oloh bawi musti mahapan tutup takolok kilau tanda je ie te penda kuasan banae. 11:11 Aloh kalote, huang pambelom itah kilau oloh Kristen, oloh bawi dia mendeng kabuate, lapas bara oloh hatue, tuntang oloh hatue dia mendeng kabuate, lapas bara oloh bawi. 11:12 Basa oloh bawi je solake injadian bara oloh hatue, tapi limbah te oloh hatue inakan bara oloh bawi; tuntang taloh handiai asale bara Hatalla. 11:13 Coba kare pahari kabuat manimbang hal toh: en bahalap ije biti oloh bawi je balakudoa akan Hatalla intu taharep oloh are, dia mahapan tutup takolok? 11:14 Tumon hadat helo, keton jari iajar, amon oloh hatue je habalau panjang, jete taloh je kurang patut. 11:15 Tapi amon oloh bawi, balau' inenga akae hapan manutup takoloke tuntang balau panjang jete eka karajie. 11:16 Nah, amon aton oloh je handak hakalawan tahiu hal toh, maka ije ih taloh je tau aku mansanae iete aloh itah toh kalote kea kare ungkup Hatalla je beken, uras mahapan hadat jete huang ungkup; beken bara te jaton. 11:17 Tahiu jetoh tinai, aku dia manara keton. Pumpong sombayang keton dia mampalua hasil je bahalap, malengkan hasil je dia bahalap. 11:18 Ije pangkasolake aku mahining huang kare pumpong keton aton kare golongan je hakalawan sama arepe. Tuntang aku mangkeme kabar te aton katotoe. 11:19 Puna ampie ih amon aton lembut kapusit hong marak keton, uka gitan kareh eweh oloh Kristen je bujur toto. 11:20 Tapi katika keton hapumpong, taloh je iawi keton te dia ie Panginan ain Tuhan. 11:21 Awi metoh keton kuman, genep bitin keton hatakian manduan panginan ayu-ayue, sampai aton oloh je jaton mandino taloh en-en, marak awang beken malahan babusau haream. 11:22 Mbuhen kalote? En pahari jaton huma? Pahari tau kuman mihop intu hete! Atawa pahari handak mahina ungkup ain Hatalla tuntang mampahawen kare oloh je belom susah? En taloh je musti ingotakku akan keton? En aku musti manara keton? Dia! Aku dia handak samasinde manara keton. 11:23 Basa taloh je iajarku akan keton, jete inarimaku bara Tuhan kabuat: iete hong alem katika Yesus, Tuhan itah indurhaka oloh, ie manduan rote, 11:24 tuntang limbah te manyewut tarimakasih akan Hatalla tagal rote te, ie mangiwak-mangiwak rote te hapan lengee, palus hamauh, "Jetoh bitingku je inyarah akan keton. Lalus jetoh hapan mingat aku." 11:25 Kalote kea limbah jadi kuman, ie manduan cangkir anggur palus hamauh, "Anggur jetoh iete janjin Hatalla je taheta, iresmi huang dahangku. Gagenep keton mihop jetoh, lalus jete hapan mingat aku." 11:26 Puna gagenep keton kuman rote tuntang mihop anggur jetoh, keton mambarita pampatei Tuhan, sampai ie dumah. 11:27 Tagal te, oloh je kuman rote ain Tuhan atawa mihop anggur ain Tuhan hapan cara je dia patut, oloh te badosa taharep Tuhan je jari mangorban bitie tuntang dahae. 11:28 Jadi, genep bitin oloh musti mariksa arepe helo, harun ie tau kuman rote tuntang mihop anggur te. 11:29 Basa amon oloh kuman rote tuntang mihop anggur sambil jaton paduli panginan te aton hubungae dengan Tuhan, oloh te kuman tuntang mihop baya manarima hukuman Hatalla akan arepe kabuat. 11:30 Jete sababe are oloh bara marak keton je haban tuntang balemo, tuntang are kea je matei. 11:31 Tapi amon itah mariksa arep itah labih helo, itah kareh dia buah hukuman Hatalla. 11:32 Tapi amon itah ihukum Hatalla, ie kareh mawi itah hapan cambuk, uka itah ela buah hukum haya-hayak dengan kalunen toh. 11:33 Tagal te pahari handiai, amon keton hapumpong tuntang kuman Panginan ain Tuhan, keton musti hatunggu sama arep keton. 11:34 Amon aton keton je balau', ie musti kuman helo intu huma. Amon keton mawi hal toh, kare pumpong sombayang keton kareh dia mampadumah hukuman bara Hatalla akan keton. Tahiu kare hal je beken, kareh aku manarange akan keton, amon aku kareh dumah.
12:1 Toh tahiu kare panenga je inenga Roh Hatalla. Tahiu jete, aku handak uka kare pahari mangatawan je katotoe. 12:2 Amon keton mingat katika keton hindai mangasene Tuhan, keton tapangaruh mado omba hampatong dewa je bisu. 12:3 Keton musti katawan iete oloh je ingagalan awi Roh Hatalla dia tau hamauh, "Tarasapa Yesus!" Kalote kea oloh jaton tau manyewut, "Yesus te Tuhan!" amon oloh te dia ingagalan awi Roh Hatalla. 12:4 Aton pire-pire macam panenga bara Roh Hatalla, tapi samandiai te inenga awi Roh ije te kea ih. 12:5 Aton pire-pire macam gawi hapan melayani Tuhan, tapi Tuhan je inyembah te, Tuhan ije jete kea! 12:6 Aton are cara malalus gawi ain Tuhan, tapi je manenga kaabas akan genep bitin oloh hapan malalus jete baya Hatalla ije te kea. 12:7 Akan kahalap itah samandiai, Roh Hatalla bagawi huang genep bitin oloh kabuat-kabuat. 12:8 Akan oloh ije, Roh te manenga kaolih uka hakotak hayak dengan pangaruhe. Akan je beken Roh jete kea manenga kaolih uka manarang tahiu Hatalla. 12:9 Roh jete kea manenga akan oloh ije, kaolih je malabien uka percaya dengan Kristus; tuntang akan ije beken tinai Roh te manenga kuasa uka mampakeleh oloh. 12:10 Akan ije oloh inengae kuasa uka mawi taloh heran tuntang akan je beken inengae kaolih uka mansanan kare rencana Hatalla. Akan je beken tinai Roh Hatalla manenga kaolih uka mangasene panenga je bara Roh Hatalla tuntang je dia bara Hatalla. Aton oloh je inenga kaolih uka hakotak hapan are macam bahasa je bakahera-heran, tuntang aton kea je inenga kaolih uka manarang riman kare bahasa te. 12:11 Taloh samandiai te inguan awi Roh ije te kea; genep bitin oloh inenga kaolih je hakabeken ampie manumon kanahuang Roh te kabuat. 12:12 Kristus te kilau bitin oloh; biti te ije, tapi aton are bagiae. Uras bagian te, aloh are, tapi kilau ije biti. 12:13 Kalote kea itah samandiai, aloh oloh Yehudi atawa dia oloh Yehudi, kare jipen atawa kare tempoe; itah samandiai uras impandoi awi Roh jete kea, mangat itah manjadi ije huang bitin Kristus te. Itah samandiai kea mangkeme inyuang awi Roh ije te. 12:14 Basa intu biti te dia baya aton ije bagian tapi are bagiae. 12:15 Amon pai' hamauh, "Aku dia lenge, awi te aku dia tame bagian intu biti," jete rimae dia awi pai' te dia bagian bara biti. 12:16 Tuntang amon pinding hamauh, "Awi aku dia mate, maka aku dia tame bagian intu biti," jete rimae dia awi pinding te dia tame bagian intu biti. 12:17 Paribasae hapus biti te manjadi mate urase, kilen ampie biti te tau mahining? Atawa amon hapus biti te manjadi pinding urase, kilen ampie biti tau mangkeme ewau? 12:18 Itah mite Hatalla jari mingkes kare bagian te intu biti. Genep bagian iingkes intu ekae awi Hatalla manumon kanahuange. 12:19 Amon samandiaie baya ije bagian bewei, kueh tau ie inyewut biti? 12:20 Jadi bagiae puna are tapi biti baya ije. 12:21 Tagal te, mate dia tau hamauh dengan lenge, "Aku dia perlu dengam!" atawa takolok hamauh dengan pai', "Aku dia perlu dengam!" 12:22 Tapi katambalike kare bagian biti te je ianggap balemo, imerlu itah toto; 12:23 tuntang kare bagian je ianggap itah dia lalau barega, puna jete haream bagian je labih are regae akan itah. Kare bagian biti je ampie dia bahalap, itah malah labih marajie. 12:24 Kare bagian biti je bahalap ampie, dia itah lalau perlu dengae. Hatalla jari manyusun bitin itah tumon puna ampie sampai kare bagian je dia lalau barega tau itah mampalabih regae. 12:25 Maka kalote biti te dia tabagi-bagi; genep bagian sama marega bagian je beken. 12:26 Amon ije bagian kapehe, bagian je beken uras kapehe kea; amon ije bagian inara, bagian je beken uras omba hanjak. 12:27 Pahari handiai kilau oloh ije iete bitin Kristus tuntang keton genep biti puna bagian bara biti jete. 12:28 Kalote kea intu huang ungkup, Hatalla jari manukas eka tuntang are ampin macam oloh: Je solake kare rasul; je kaduee kare nabi, kateloe kare guru, limbah te ewen je mawi kare taloh heran, tuntang tinai ewen je mandino panenga uka mampakeleh oloh, atawa uka mandohop oloh beken, atawa uka mamimpin, atawa uka hakotak dengan sepsimpan bahasa je bakahera-heran. 12:29 Dia urase ewen te rasul, atawa nabi, atawa guru. Dia urase aton kuasa hapae mawi taloh heran, 12:30 atawa hapae mampakeleh oloh, atawa hapae hakotak hapan sepsimpan bahasa je bakahera-heran, atawa hapae manyalinan kare bahasa te. 12:31 Tagal te, keleh keton toto-toto manggau jalan uka mandino kare panenga je paling mambatang. Tapi hetoh aku mamparahan akan keton jalan je pangkahalape.
13:1 Aloh aku hakotak hapan sepsimpan bahasa ain oloh kalunen, atawa bahasa malekat haream, tapi aku dia sinta kare oloh beken, maka kare kotakku te baya auh je hai tapi jaton rimae. 13:2 Aloh aku tau manyampai barita bara Hatalla, tuntang harati kakare hal je handalem, tuntang katawan kare taloh handiai hayak paham percaya dengan Hatalla sampai olih mamindah bukit, tapi amon aku jaton sinta dengan kare oloh beken, maka aku jaton rimae en-en! 13:3 Aloh aku mambagi kare ramongku hapan manenga sadakah akan kare oloh je belom susah, tuntang aku manyarah arepku akan indu parapah, tapi aku jaton sinta dengan kare oloh beken, maka taloh handiai te jaton gunae samasinde. 13:4 Sinta te sabar tuntang bahalap atei. Ie dia ingalasut awi kahirin atei, dia basasumbar, dia balecak. 13:5 Ie dia gantong ateie, dia kasar, dia mamaksa oloh beken uka manumon kanahuang ayue kabuat, dia kea murah tersinggung, tuntang dia mingkes kasingi huang ateie. 13:6 Sinta te dia rajin gawi papa, ie baya rajin dengan taloh bahalap. 13:7 Ie olih manyarenan kare taloh handiai tuntang handak percaya dengan taloh je pangkahalape akan oloh handiai; huang keadaan en bewei, sinta te dia puji nihau kaharape tuntang sabar mentai kare taloh handiai. 13:8 Jaton puji manjadi akan oloh mangat terai sinta sama arepe. Metoh toh aton oloh je pintar manyampai barita bara Hatalla, tapi rahian kareh ie terai manyampai barita te. Metoh toh aton oloh je pintar hakotak huang sepsimpan bahasa je bakahera-heran, tapi rahian kareh ie akan terai hakotak huang kare bahasa te. Metoh toh aton oloh je mangatawan are hal, tapi rahian kareh taloh je ingatawan ewen te akan ingalapean. 13:9 Basa, pangatawan itah tuntang kaolih itah manyampai barita bara Hatalla, magon hindai tinduh-barasih. 13:10 Rahian kareh akan sampai katikae Hatalla mawi taloh handiai te tinduh-barasih, tuntang je dia tinduh-barasih te akan nihau. 13:11 Metoh aku magon anak korik, aku hakotak kilau anak korik, pangkemeku sama kilau anak korik tuntang aku manirok sama kilau anak korik. Toh aku jari bakas; kelakuangku je kilau anak korik te jari inganangku. 13:12 Taloh je gitan itah wayah toh jete sama kilau bayangan je hawor intu saramin. Tapi rahian kareh itah akan mite balalu tarang. Toh aku hindai katawan taloh handiai, tapi rahian kareh aku akan katawan taloh handiai sama kilau Hatalla mangatawan taloh handiai tahiu arepku. 13:13 Jadi, akan katika toh aton telo hal je musti tetep itah malaluse: percaya, bara kaharap tuntang hasinta sama arep. Je paling mambatang bara katateloe te iete masi tuntang sinta dengan sama arep itah oloh kalunen.
14:1 Keleh keton manggau jalan uka sinta kare oloh beken. Tuntang keleh manggau jalan kea uka manarima kare panenga je inenga awi Roh Hatalla, ije mambatang toto kaolih uka manyampai kare rencana Hatalla akan olon. 14:2 Oloh ije hakotak huang bahasa je bakahera-heran, oloh te dia hakotak dengan olon; ie hakotak dengan Hatalla. Jaton oloh je harati taloh je ingotake, awi Roh Hatalla te je mawi ie mangotak kare hal je baya ingatawan awi Hatalla. 14:3 Tapi oloh je manyampai barita bara Hatalla, jete inyampaie akan olon; hapan mampaabas ewen, uka manenga semangat akan ewen tuntang hapan mampong ewen. 14:4 Oloh je hakotak hapan bahasa je bakahera-heran baya mampaabas arepe kabuat bewei, tapi oloh je manyampai barita bara Hatalla mandohop uka ungkup manjadi maju. 14:5 Dia laluen kahalape jaka pahari handiai tau hakotak hapan sepsimpan bahasa je bakahera-heran. Tapi je pangkahalape iete amon pahari tau mambarita kare rencana ain Hatalla. Basa oloh je manyampai barita bara Hatalla, labih hai bara oloh je hakotak hapan sepsimpan bahasa je bakahera-heran; kacuali jaka oloh je hakotak hapan bahasa je bakahera-heran te tau manarang taloh je ingotake te uka hapus ungkup dinon gunae. 14:6 Paribasae jaka aku dumah manalih keton tuntang aku hakotak huang sepsimpan bahasa je bakahera-heran, en gunae jete akan keton? Isut mahin jaton gunae! Beken soale jaka aku mamparahan taloh en-en bara Hatalla, atawa aku manarang taloh en-en tahiu Hatalla, atawa aku manyampai barita bara Hatalla, atawa aku majar. 14:7 Kare alat musik je jaton tahasenge, kilau suling tuntang kacapi paribasae, amon kare nadae dia impahiau tarang auhe, kilen ampie oloh katawan aran lagu je impahiaue te? 14:8 Ije sonto je beken tinai: Amon tarompet te impahiau barangai auhe, eweh je handak tatap tolak perang? 14:9 Kalote kea dengan kaolih keton hakotak hapan sepsimpan bahasa je bakahera-heran. Amon mahapan kaolih jete pahari hakotak mahapan auh je dia tarang, ije biti mahin jaton oloh je tau harati taloh je ingotak pahari te. Kare auh keton te akan nihau hayang bewei. 14:10 Hong kalunen toh aton sakean kare bahasa, tapi jaton ije bara kare bahasa te je jaton rimae. 14:11 Tapi amon aku dia harati bahasa je ingotak oloh, maka oloh je hakotak hapan bahasa te kilau oloh asing akangku; kalote kea aku dengae. 14:12 Tahiu keton kabuat, katawangku keton nahuang toto mandino kare panenga bara Roh Hatalla. Tapi je mambatang haliai, keton musti manggau jalan uka mahapan kare kaolih keton mandohop mangat ungkup tau maju. 14:13 Jete sababe oloh je hakotak hapan bahasa je bakahera-heran, musti balaku bara Hatalla uka ie inenga kea kaolih hapan manarang taloh je ingotake te. 14:14 Basa amon aku balakudoa hapan bahasa je bakahera-heran, rohku kea balakudoa, tapi tirokku dia bagawi. 14:15 Jadi, en je musti iawiku? Jetoh ie je handak iawiku: Aku handak balakudoa hapan rohku, tapi aku handak balakudoa kea hapan tirokku. Aku handak manyanyi hapan rohku, tapi aku handak manyanyi kea hapan tirokku. 14:16 Basa amon pahari manyewut tarimakasih akan Hatalla hapan roh bewei, tuntang aton oloh beken je dia harati bahasa je bakahera-heran je bara Hatalla te, maka oloh te dia tau hamauh, "Aku satuju" dengan lakudoa tarimakasih ayum te; awi ie dia katawan taloh je ingotak pahari. 14:17 Aloh lakudoa tarimakasih akan Tuhan te bahalap toto, tapi lakudoa te jaton gunae samasinde akan oloh beken. 14:18 Aku manarimakasih akan Hatalla awi aku kabuat tau hakotak huang sepsimpan bahasa je bakahera-heran labih bara kare pahari handiai. 14:19 Tapi, huang kare pumpong sombayang, aku labih rajin mahapan lime bawak kotak je tau oloh haratie bara aku mahapan bakoya-koyan bawak kotak huang bahasa je bakahera-heran. Aku labih rajin kalote mangat aku tau majar oloh. 14:20 Pahari handiai! Ela manirok kilau anak korik. Huang hal kapapa, keleh keton tetep kilau anak korik. Tapi huang tirok atei, keleh keton manjadi oloh je jari bakas. 14:21 Huang Surat Barasih tarasurat kalotoh, "Tuhan hamauh, 'Mahalau kare oloh je hakotak mahapan bahasa je bakahera-heran, aku handak hakotak dengan ungkup toh. Mahalau kare oloh tamuei haream, aku handak hakotak dengan ungkup ayungku; aloh kalote, ewen dia handak mahining auhku.' " 14:22 Jadi panenga mangat hakotak hapan sepsimpan bahasa je bakahera-heran jete kilau tanda akan oloh je dia percaya, dia ie akan oloh je percaya. Tuntang panenga uka mansanan rencana ain Hatalla akan olon, jete tanda akan oloh je percaya, tapi dia akan oloh je dia percaya. 14:23 Tagal te, umpama huang sombayang ungkup, hapus ungkup hakotak huang sepsimpan bahasa je bakahera-heran, palus dumah pire-pire oloh luar, atawa kare oloh je dia Kristen, batantu kare oloh te kareh manyangka keton jari gila urase! 14:24 Tapi amon pahari samandiai manyampai barita bara Hatalla, palus dumah ije biti oloh je dia Kristen atawa oloh luar, maka kare hal je imbarita awi pahari te uras tau manunjuk kare dosan oloh te tuntang mawi ie mingat dengan kare dosae. 14:25 Kare hal je basilim huang ateie kareh imparahan, sampai ie handak mamparandah arepe palus manyembah Hatalla. Ie kareh mangaku Hatalla te puna toto aton hong bentok keton. 14:26 Jadi, pahari handiai, en rimae taloh samandiai te? Amon keton hapumpong mangat manyembah Tuhan, aton je manyanyi, aton je majar, aton je mansanan taloh en-en bara Hatalla, aton je hakotak huang bahasa je bakahera-heran, tuntang aton je manarang taloh je ingotak te. Tapi taloh handiai te musti ilalus akan hapan majar tuntang akan kahalap keton samandiai. 14:27 Amon aton je handak hakotak huang bahasa je bakahera-heran, keleh badue' atawa batelo ih bagilir hakotak. Tuntang musti aton je manarang taloh je inyewut awi oloh je hakotak te. 14:28 Amon jaton oloh je tau manarange, maka kare oloh je hakotak huang bahasa je bakahera-heran te musti suni huang pumpong te. Keleh ewen hakotak huang atei ewen bewei dengan Hatalla. 14:29 Due atawa telo biti oloh je tempon barita bara Hatalla, musti manyampai barita te tuntang oloh beken manimbang taloh je insanan te. 14:30 Tapi paribasae amon barita bara Hatalla dumah manalih ije biti oloh beken je mondok hong pumpong te, maka oloh je hakotak te musti tende. 14:31 Hapan cara je kalote, kare pahari samandiai, mije-mije tau manyampai barita bara Hatalla; uka samandiaie tau mandino ajar tuntang sasar percaya. 14:32 Panenga bara Roh uka manyampai barita bara Hatalla tau ingamburi awi oloh je manyampai barita te. 14:33 Hatalla te Hatalla je rajin dengan taloh je iator; ie dia Hatalla je rajin dengan taloh je hakangkalut. Kilau je manjadi huang kakare ungkup Hatalla, 14:34 oloh bawi musti suni hong katika pumpong ungkup. Ewen dia tau hakotak. Ewen dia tau mimbing pimpinan; jete puna hakabuah dengan hukum agama. 14:35 Amon ewen handak mangatawan taloh en-en, ewen musti misek jete dengan kabalin ewen huang huma. Paham mampahawen toto amon oloh bawi hakotak huang pumpong ungkup. 14:36 En auh Hatalla dumah bara keton? Atawa baya akan keton bewei auh te inyampai? 14:37 Amon aton oloh je mangkeme mandino panenga uka manyampai barita bara Hatalla, atawa ie mandino panenga je beken bara Roh Hatalla, oloh te musti mingat taloh je inyuratku toh, jetoh parentah bara Tuhan. 14:38 Tapi amon aton oloh je dia manarima jetoh, ela paduli dengae. 14:39 Tagal te pahari handiai, keleh manggau jalan uka manyampai barita bara Hatalla, tapi ela mangahana oloh je handak hakotak huang macam-macam bahasa je bakahera-heran. 14:40 Tapi taloh handiai te musti ilalus dengan bahalap tuntang baatoran.
15:1 Tuntang toh, pahari handiai, aku handak uka keton mingat tinai tahiu Barita Bahalap bara Hatalla je imbaritaku bihin akan keton. Keton manarimae, tuntang percaya dengan Kristus tagal Barita Bahalap te. 15:2 Amon keton mimbing dehe-dehen taloh je jari imbaritaku te, maka Barita Bahalap te manyalamat keton; kacuali amon keton percaya tapi dia haratie. 15:3 Taloh je inyampaiku akan kare Pahari jete jari inarimaku kea. Je mambatang, kilau je jari inyurat huang Surat Barasih, aku manyampai akan keton iete Kristus matei akan kare dosan itah; 15:4 Ie ingubur, tapi rahian tinai imbelom haluli hong andau je kateloe. Jete kea tarasurat huang Surat Barasih. 15:5 Aku mansanan kea akan keton tahiu Kristus je imbelom haluli te mamparahan arepe kea akan Petrus, tuntang rahian tinai akan due walas rasul. 15:6 Limbah te ie mamparahan arepe tinai akan labih bara lime ratus biti oloh ayue sinde haya-hayak. Tapaare bara kare oloh te magon belom wayah toh, baya pire-pire biti ih je jari matei. 15:7 Limbah te ie mamparahan arepe kea akan Yakobus tuntang limbah te akan kakare rasul. 15:8 Limbah te Kristus mamparahan arepe akangku -- aku kilau ije anak awau je inakan dia manumon katikae! 15:9 Aku toh rasul Tuhan je paling randah. Aku dia patut inyewut rasul, awi aku jari mangapehe ungkup ain Hatalla. 15:10 Tapi awi asin Hatalla, aku manjadi sama ampingku kilau je aton wayah toh. Tuntang dia hayang kea Hatalla mampun aku. Malahan aku haream je labih karas bagawi bara kare rasul je beken. Tapi manumon katotoe, jete dia awi gawin ayungku; jete baya gawin Hatalla je masi aku tuntang je mampahayak aku huang gawingku. 15:11 Jadi bara eweh bewei keton manarima Barita Bahalap te -- en te bara aku atawa bara kare rasul beken -- jete dia manjadi soal. Je mambatang ikei mansanan Barita Bahalap te tuntang pahari percaya. 15:12 Amon taloh je imbarita ikei tahiu Kristus je jari imbelom haluli bara pampatei, mbuhen aton oloh bara keton je manyewut oloh matei dia akan imbelom haluli? 15:13 Amon toto oloh matei dia akan imbelom haluli, jete rimae Kristus dia kea imbelom haluli bara pampatei. 15:14 Tuntang paribasae toto Kristus dia imbelom haluli bara pampatei, maka jaton gunae ikei mambarita taloh en-en tuntang jaton gunae kea keton percaya, basa kapercayan keton te jaton bara dasar samasinde. 15:15 Labih bara te, bakarinah toto je ikei toh mansanan auh tanjaro tahiu Hatalla awi ikei jari mambarita Hatalla jari mambelom Kristus haluli bara pampatei, padahal Hatalla dia mambelom ie haluli -- amon puna toto oloh matei dia imbelom haluli bara pampatei. 15:16 Basa amon oloh matei dia imbelom haluli, maka Kristus kea dia imbelom haluli bara pampatei. 15:17 Tuntang amon Kristus dia imbelom haluli maka kapercayan keton baya nupi bewei; jete rimae keton magon melai huang dosa tuntang kaharap keton jaton samasinde. 15:18 Tinai, rimae oloh Kristen je jari matei, jaton kea kaharap ewen. 15:19 Amon kaharap itah dengan Kristus baya hanjulo metoh itah belom hong kalunen toh bewei, maka bara kare ungkup oloh hong kalunen toh, maka itah toh oloh je paling basial! 15:20 Tapi manumon katotoe Kristus jari imbelom haluli bara pampatei. Jetoh jaminan akan kare oloh je jari matei tau belom haluli. 15:21 Basa pampatei tame akan kalunen mahalau ije biti oloh, kalote kea pambelom haluli bara pampatei inenga akan olon mahalau ije biti oloh kea. 15:22 Sama kilau oloh hapus kalunen matei awie impahinje dengan Adam, kalote kea ewen te samandiai kareh uras imbelom, awi ewen uras impahinje dengan Kristus. 15:23 Tapi genep bitin oloh kareh imbelom manumon gilirae: sola-solake Kristus; limbah te hong katika ie dumah haluli, giliran kare oloh je manjadi oloh ain Kristus. 15:24 Limbah te harue Kiamat. Hong katika te Kristus kareh mampakalah kare pamarentah, kakare kuasa tuntang kekuatan; palus ie kareh manyarah kuasae kilau Raja, akan Hatalla, Bapa itah. 15:25 Kristus musti marentah harajur sampai Hatalla mampakalah kakare musoh Kristus palus mamenda Kristus. 15:26 Musoh je pangkarahiae je impakalah iete pampatei. 15:27 Huang Surat Barasih tarasurat kalotoh, "Hatalla jari mawi taloh handiai mangat mamenda ie." Batantu taloh je inyewut dengan "taloh handiai" te dia buah Hatalla kabuat, je manampa taloh handiai te tuntang haya-hayak dengan Kristus. 15:28 Tapi limbah kare taloh handiai lepah uras mamenda parentah Kristus, maka ie kabuat, je Anak Hatalla, akan mamparundok arepe dengan Hatalla je jari mawi taloh handiai te mamenda ie. Maka Hatalla kabuat kareh marentah taloh samandiai. 15:29 Amon oloh matei dia imbelom haluli, mbuhen aton oloh je impandoi akan oloh matei? Akan en ewen mawi taloh te? Amon puna toto oloh matei dia akan imbelom haluli, akan en ewen mawi hal te? 15:30 Tuntang akan en kea ikei hakon manaharep bahaya genep katika? 15:31 Pahari handiai! Genep andau aku manyarenan kapehe awi aku hanjak angatku dengan pambelom keton awi keton jari percaya dengan Kristus Yesus, Tuhan itah. 15:32 Amon jete baya bara tampayah oloh bewei, en kaontonge akangku mate-matei kilau malawan kare meto basiak hong lewu toh, intu Epesus? Amon puna oloh matei dia imbelom haluli, nah, labih bahalap itah manumon auh paribasa toh: "Has itah kuman mihop tuntang hanja-hanjak, basa andau jewu itah toh akan matei." 15:33 Ela buah tanjaro! Pergaulan je papa marusak hadat je bahalap. 15:34 Toh keleh barendeng tuntang ela hindai mawi dosa. Sapunae keton patut mahamen, basa hong marak keton aton oloh je hindai mangasene Hatalla. 15:35 Mungkin aton je misek, "Kilen ampie oloh matei imbelom haluli? Biti je kilen ampie je inenga akan ewen, limbah ewen imbelom haluli?" 15:36 Humong toto! Amon pahari mimbul binyi intu petak, binyi te dia akan belom, amon binyi te hindai matei helo. 15:37 Tuntang binyi je iimbul pahari intu petak te -- mungkin binyin gandum atawa binyi beken -- jete bawak binyi bewei, dia ie uras taloh imbul je akan belom kareh. 15:38 Hatalla kabuat je manampa ampin tampan binyi te manumon je patut hong tampayah ayue akan taloh imbul te. Akan genep macam binyi, Hatalla mawi tampan ayue mije-mije. 15:39 Bitin kare taloh belom je aton tahasenge dia sama ampin tampae. Kalunen aton macam ampin tampan bitie, kare meto beken tinai ampin tampan bitie, kare burung beken tinai ampin bitie, tuntang kare lauk beken tinai macam bitie. 15:40 Kalote kea dengan kare taloh je aton intu langit tuntang kare taloh je aton hunjun petak. Kare taloh je aton intu langit mije-mije sama aton kahalape kabuat, tuntang kare taloh je hunjun petak mahin kalote kea. 15:41 Kahalap matanandau beken bara kahalap bulan. Kare bintang aton kahalap ayue kabuat. Malahan kare bintang te mije-mije hakabeken tinai ampin kahalape. 15:42 Kalote ampie kareh dengan kare oloh matei je imbelom haluli. Bitie je ingubur te jete biti je tau maram, tapi biti je imbelom, jete biti je dia tau rusak. 15:43 Katika biti te ingubur, biti te maram tuntang balemo; tapi katika ie imbelom haluli, jete biti je bahalap tuntang dehen. 15:44 Hong katika ingubur, bitie te bitin kalunen; tapi limbah ie belom haluli, maka bitie te biti je inenga awi Roh Hatalla. Aton biti je bara kalunen, aton kea biti je bara Hatalla. 15:45 Huang Surat Barasih tarasurat kalotoh, "Oloh je solake, iete Adam, manjadi taloh je belom," tapi Adam je pangkarahiae jete Roh je manenga pambelom. 15:46 Je labih helo dumah iete biti, dia ie roh. Roh dumah rahian. 15:47 Adam je solake inampa bara petak, tapi Adam je kaduee asale bara sorga. 15:48 Kare oloh kalunen toh sama kilau Adam je solake, je inampa bara petak, tapi kare oloh sorga sama kilau ie je dumah bara sorga. 15:49 Sama kilau itah toh je kilau Adam inampa bara petak, maka kareh itah akan manjadi sama kilau ie je bara sorga te. 15:50 Pahari handiai! Maksudku iete kalotoh: biti je inampa bara daha tuntang isi, dia tau tame Lewu Taheta ain Hatalla; tuntang biti je tau matei dia tau bunggut. 15:51 Keleh manantuani rahasia toh: Dia uras itah akan matei, tapi itah handiai uras akan iobah. 15:52 Hal te akan manjadi salenga hong ije kapijep mate, hong katika tarompet impahiau pangkalepahe. Basa katika auh tarompet te ihining, kare oloh matei akan imbelom haluli dengan biti je bunggut toto, tuntang itah samandiai akan iobah. 15:53 Bitin itah je tau matei toh musti ingganti hapan biti je dia tau matei, tuntang biti je bara kalunen musti ingganti hapan biti je bara sorga. 15:54 Amon biti je tau matei ingganti hapan biti je dia tau matei, tuntang biti je bara kalunen jari ingganti hapan biti je bara sorga, hong katika te harue manjadi taloh je inyurat huang Surat Barasih, "Pampatei jari mahalau; kamanang jari sampai!" 15:55 "O pampatei, hong kueh kamanangm? O pampatei hong kueh katadam?" 15:56 Katadan pampatei iete dosa, tuntang dosa malalus gawie mahalau hukum agama. 15:57 Tapi tarimakasih akan Hatalla; ie manenga akan itah kamanang mahalau Yesus Kristus Tuhan itah! 15:58 Tagal te pahari handiai je inyintaku, keleh keton abas tuntang dehen. Keleh bagawi harajur akan Tuhan dengan katoton atei, basa keton katawan taloh handiai je ilalus keton akan Tuhan, dia tau jaton gunae.
16:1 Toh tahiu duit je handak inyumbang keton akan pahari je sama Kristen, aku manenga tirok uka keton malaluse manumon sonto je iawiku akan kare ungkup hong Galatia. 16:2 Genep andau Minggo, keleh pahari samandiai mambagi duit tumon ampin pandinon genep biti. Ingkes duit te sampai aku dumah, mangat huang katika te dia usah hindai imumpong. 16:3 Kareh amon aku sampai, aku handak manyoho kare oloh je jari imakat awi keton. Aku manenga akan ewen surat pengantar, mangat ewen mimbit duit sumbangan te akan Yerusalem. 16:4 Tuntang amon ampie bahalap, aku haguet kea dengan ewen, aku omba haguet haya-hayak dengan ewen. 16:5 Aku handak maja-manalih keton limbah mahalau Makedonia, awi aku aton kanahuangku mahalau hete. 16:6 Tau kea aku melai hanjulo dengan keton, mungkin katahin wayah sadingen. Limbah te keton tau mandohop aku marajur panjalanangku akan eka beken tinai. 16:7 Aku dia handak maja keton baya tende bewei. Amon Tuhan manyoho, aku handak melai tahi kea dengan keton. 16:8 Pandehan te aku handak melai hong lewu toh, lewu Epesus, sampai andau Pentakosta. 16:9 Are katika je baguna intu hetoh akan malalus kare gawi, aloh are kea oloh je malawan. 16:10 Amon Timoteus dumah, tambang ie bua-buah mangat ie mangkeme hanjak dengan keton, awi ie sama kilau aku kea bagawi akan Tuhan. 16:11 Ela sampai aton oloh je manaha gampang ie. Dohop ie mangat ie tau marajur panjalanae haluli manalih aku dengan salamat, awi aku mentai pandumahe haya-hayak dengan kare pahari je beken. 16:12 Tahiu paharin itah Apolos, jari pire-pire kali aku manenga tirok akae mangat ie haya-hayak dengan pahari je beken haguet manalih keton. Tapi ie hindai mangkeme yakin je ie musti haguet metoh toh. Tapi amon aton katikae kareh, batantu ie akan dumah. 16:13 Keleh keton barendeng tuntang segah huang pambelom keton kilau oloh Kristen. Keleh keton bahanyi tuntang manjadi abas. 16:14 Taloh handiai je ilalus keton, keleh keton malaluse dengan sinta. 16:15 Pahari batantu kasene Stepanus dengan keluargae; ewen te oloh je pangkasolake manjadi oloh Kristen hong Akhaya. Ewen hapan salepah ateie bagawi baya akan mahaga ungkup Hatalla. 16:16 Aku manenga tirok dengan katotoe uka keton manumon pimpinan kare oloh je kilau te, hayak kare oloh je beken je bagawi tuntang melayani haya-hayak dengan ewen. 16:17 Aku hanjak tagal pandumah Stepanus, Portunatus tuntang Akhaikus. Akangku ewen te sama kilau gantin keton. 16:18 Ewen jari mawi ateiku hanjak, sama kilau ewen manyanang atei keton. Kare oloh je kalote patut ihormat. 16:19 Kare ungkup hong Asia manyampai tabe akan keton. Akwila tuntang Priskila dengan ungkup je hapumpong intu human ewen mahin mampait tabe je mangalasut kilau taben oloh Kristen. 16:20 Uras kare pahari intu hetoh manyampai tabe akan keton. Keleh keton hatabe huang sinta manumon cara je sama kilau pahari Kristen. 16:21 Aku mandahang hetoh tabe je inyuratku kabuat: Tabe bara aku, Paulus. 16:22 Oloh je dia sinta Tuhan, keleh ie ihukum Hatalla! Maranatha -- Tuhan keleh bajeleng dumah! 16:23 Keleh Tuhan Yesus mamberkat pahari. 16:24 Impahayak sinta akan pahari handiai je jari percaya huang Kristus Yesus. Hormat ikei, Paulus
1:1 Pahari handiai ungkup Hatalla hong Korintus tuntang hapus jalahan ain Hatalla hong salepah lewu Akhaya. Aku, Paulus, rasul Kristus Yesus, je iangkat awi kanahuang Hatalla, haya-hayak dengan paharin itah Timoteus, 1:2 maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton. 1:3 Tara akan Hatalla, Bapa Tuhan itah Yesus Kristus. Ie Bapa je paham kahalap ateie tuntang ie Hatalla je mandehen pambelom hambaruan oloh kalunen. 1:4 Ie mandehen atei-huang ikei hong gagenep kapehe je ingkeme ikei, uka hapan kaabas je inarima ikei bara Hatalla te, ikei kea tau mandehen atei-huang oloh handiai je buah kasusah. 1:5 Kare kapehe je ingkeme Kristus jari are ingkeme ikei kea. Tuntang mahalau Kristus kea, atei-huang ikei paham indehen. 1:6 Amon ikei mangkeme kasusah, jete akan hapan mampaabas atei-huang keton, akan kasalamat keton. Amon atei-huang ikei impaabas, maka keton kea omba impaabas sampai keton manjadi tahan manaharep kare kasusah-kapehe kilau je ingkeme ikei kea. 1:7 Ikei harajur percaya tuntang dia puji bembang tahiu pahari, awi ikei katawan keton omba mangkeme kapehe je ingkeme ikei. Tuntang tagal te keton omba kea impaabas haya-hayak dengan ikei. 1:8 Pahari handiai! Ikei handak uka keton katawan tahiu kasusah-kapehe je ingkeme ikei hong Asia. Kasusah-kapehe je inanggong ikei te mahenyek ikei lalau babehat, sampai ikei dia maharap akan belom hindai; 1:9 angate sama kilau jari buah hukum matei ih. Tapi hal te manjadi, mangat ikei ela bahapang dengan kaabas arep ikei kabuat, tapi dengan Hatalla je mambelom oloh matei. 1:10 Ie te je jari manyalamat ikei bara bahaya pampatei je hai te. Tuntang ie te kea je kareh manyalamat ikei hong kare andau rahian, awi puna dengae ikei harap. 1:11 Ikei percaya iete hapan kare lakudoan keton akan ikei, Hatalla kareh manyalamat ikei tinai bara bahaya. Hatalla pahias mamberkat ikei kilau baleh tagal kare lakudoa akan ikei, tuntang tagal te are oloh kareh manyewut tarimakasih akan Hatalla. 1:12 Ikei mangkeme hanjak, awi atei-huang ikei mawi ikei percaya tahiu pambelom ikei huang kalunen toh -- je mambatang hubungan ikei dengan pahari -- jari ilalus ikei dengan kabujur tuntang karasih atei. Ikei malalus jete, dia mahapan kapintar-kaharatin olon, tapi hapan kaolih je inenga Hatalla akan ikei. 1:13-14 Taloh je inyurat ikei akan keton jete baya tahiu kare taloh je tau keton mambasae tuntang haratie. Metoh toh keton hindai olih lepa-lepah harati auh ikei, tapi kareh aku harap keton akan toto-toto harati auh ikei. Awi kalote, hong katika Tuhan Yesus dumah kareh, keton mangkeme andal tagal ikei, kilau ikei kea andal angat ikei tagal keton. 1:15 Tagal kapercaya jete maka aku sola-solake marancana uka maja manalih keton mangat keton mandino berkat due kali lipet. 1:16 Aku aton kanahuangku uka manalih keton huang panjalanangku akan Makedonia tuntang tende tinai intu eka keton huang panjalanangku buli, mangat keton tau mandohop aku marajur panjalanangku akan Yudea. 1:17 Tapi aku jari mobah kanahuangku te; nah, en jete mamparahan ampin katukas ateiku dia segah? Metoh manampa rencana, en aku manampae manumon kanahuang ayungku kabuat, limbah manyewut "Iyoh", limbah te "Dia" tinai? 1:18 Tagal aran Hatalla je tau imercaya, janjingku dengan pahari jaton "Iyoh" tuntang "Dia". 1:19 Basa Yesus Kristus, anak Hatalla, je imbarita akan keton awi Silas, Timoteus, tuntang awiku kabuat dia ie oloh je "Iyoh" tuntang "Dia". Tapi jete kilau auh tombah "Iyoh" bara Hatalla. 1:20 Basa mahalau ie Hatalla jari manyewut "Iyoh" dengan kare janjie handiai. Hagalang auh jete itah manyewut "Amen" akan Hatalla tagal Yesus Kristus. Ikei mawie kalote mangat Hatalla ihormat inara. 1:21 Hatalla kabuat ih je mawi itah tau segah huang kahinje dengan Kristus; ie kea je tantai mintih itah akan arepe kabuat. 1:22 Akan jete Hatalla jari manyegel itah manjadi oloh ayue tuntang manenga Roh ayue huang atei itah kilau jaminan je ie kareh manenga akan itah taloh handiai je injanjie. 1:23 Hatalla saksi ayungku -- basa ie katawan taloh huang ateiku -- je aku balang haguet akan Korintus, awi aku dia handak mangapehe atei keton. 1:24 Aku dia mamaksa keton dengan taloh je musti imercaya awi keton, awi keton jari percaya toto dengan Kristus. Aku baya sama-sama bagawi dengan keton mangat keton sanang.
2:1 Tagal te aku jari manduan kaputusan uka dia dumah tinai manalih keton amon baya mawi keton kapehe atei. 2:2 Basa amon aku mangapehe atei keton, eweh hindai je tau mampong aku, beken bara kare oloh te je jari kapehe ateie awiku? 2:3 Jete bukue aku manyurat surat toh akan keton. Aku dia handak manalih keton, palus ingapehe ateiku awi keton padahal keton te je kapunae musti mampahanjak aku. Basa aku yakin amon aku hanjak, maka pahari samandiai hanjak kea. 2:4 Aku manyurat akan keton marak ateiku kapehe tuntang babehat hayak mampalua are danum mate. Kanahuangku dia uka keton manjadi kapehe atei, tapi mangat keton mangatawan je aku paham sinta keton. 2:5 Amon aton oloh je mawi kapehen atei, maka hal te dia ie mawie akangku, malengkan akan Pahari samandiai atawa akan belahe bara kare pahari. Aku hamauh, "belahe bara kare pahari" awi aku dia handak lalau karas dengae. 2:6 Akan oloh je kilau te, hukuman je inenga akae awi tapaare bitin kare pahari, jari sukup. 2:7 Toh keton musti mampun ie tuntang manenga kahanjak tinai akae mangat ie dia lalau pehe ateie sampai nihau kaharap. 2:8 Tagal te aku balaku, uka keton mamparahan tinai akae je keton toto-toto sinta ie. 2:9 Aku manyurat surat toh akan keton hapaku mauji keton en keton handak manumon kare nasehat bara aku. 2:10 Amon keton mampun oloh je jari mawi kasalan dengan keton maka aku kea mampun oloh te. Basa taloh je jari iampun -- amon puna aton taloh je perlu iampun -- aku mampun jete intu taharep Kristus akan kahalap keton. 2:11 Aku mawi jete uka setan ela sampet manguasa itah; awi itah katawan kare rencanae. 2:12 Hong katika aku sampai intu Troas awiku handak mambarita Barita Bahalap tahiu Kristus, Tuhan jari muap jalan akangku uka bagawi hong eka te. 2:13 Tapi aku gogop angatku awi jaton hasondau dengan paharin itah Titus intu hete. Maka aku balaku permisi dengan kare oloh hong eka te palus haguet akan Makedonia. 2:14 Tapi tarimakasih akan Hatalla! Ie harajur mamimpin itah uka omba barisan kamanang ain Kristus awi ikei belom bulat hinje dengae. Hatalla mahapan ikei mangat barita tahiu Kristus kilau taloh je mangat ewaue nampaur akan hete-hete. 2:15-16 Basa ikei toh kilau garo je mangat ewaue, je imapui awi Kristus akan Hatalla. Akan kare oloh je tantai manalih kabinasa, ikei toh kilau ewau taloh je baka matei akan pampatei; tapi akan kare oloh je manintu salamat, ikei toh kilau taloh je mangat ewaue je mimbit pambelom. Nah, eweh je olih malalus gawi toh? 2:17 Ikei dia sama kilau oloh are je mawi barita bara Hatalla kilau ramon dagang bewei. Kare tintun kahimat ikei barasih, awi ikei inyoho awi Hatalla. Tuntang Hatalla kabuat mite je ikei manyampai barita te kilau kare rewar Kristus.
3:1 En toh ampie kilau jaka ikei tama-tamam dengan arep ikei tinai? Atawa tau kea kila-kilau ampie ikei toh manggau surat katamam akan keton, atawa bara keton, sama kilau je inggau awi kare oloh beken? 3:2 Surat katamam ain ikei iete pahari kabuat, je inyurat huang atei ikei tuntang tau ingatawan tuntang imbasa awi genep bitin oloh. 3:3 Ewen kabuat tau mitee je pahari toh kilau surat je inyurat Kristus, je impait mahalau ikei. Surat te dia inyurat hapan dawat, tapi hapan Roh Hatalla je belom; dia kea intu hunjun batu tulis, tapi intu atei olon. 3:4 Ikei hamauh kalote awi ikei percaya dengan Hatalla mahalau Kristus. 3:5 Ikei jaton aton sabab en-en uka manyewut arep ikei olih malalus gawi toh, tapi Hatalla je manenga kaolih te akan ikei. 3:6 Ie te je mawi ikei olih manjadi sarohan akan ije janji je taheta; janji je bahapang dengan Roh Hatalla, dia dengan hukum je inyurat. Basa taloh je inyurat te mimbit pampatei, tapi Roh Hatalla te mimbit pambelom. 3:7 Hong katika janji je mimbit pampatei te inampa tuntang imahat intu batu, kalawa bara Hatalla manyingah paha-pahai intu baun Moses. Kalawa te paham tarang sampai bangsa oloh Israel dia olih manampayah baun Moses, aloh kalawa intu baue te jari nampara kawus hong katika te. Nah, amon tampan janji je mimbit pampatei te iresmi hapan katarang je kalote kahaie, 3:8 batantu tampan janji je inenga awi Roh Hatalla, iresmi labih tarang hindai. 3:9 Amon janji je mahukum oloh te kalote katarange, batantu labih tarang hindai ampin janji je mimbit oloh olih inarima tuntang inyalamat awi Hatalla. 3:10 Tau itah manyewute, taloh je tarang bihin, jadi dia tarang hindai awi katarang taloh je wayah toh. 3:11 Amon taloh je olih tahan hanjulo, kalote ampin katarange, batantu taloh je katatahie labih tarang hindai. 3:12 Awi ikei aton kaharap kilau te, maka ikei bahanyi hakotak kalote. 3:13 Ikei dia sama kilau Moses je manutup baue hapan sandurong uka bangsa Israel dia mite kalawan Tuhan belep tuntang nihau bara baue. 3:14 Tirok ewen jari tatutup. Tuntang sampai andau toh mahin tirok ewen magon tatutup sandurong katika ewen mambasa kare surat tahiu janji je solake te. Sandurong te baya tau iukei amon oloh hinje dengan Kristus. 3:15 Wayah toh mahin, amon ewen mambasa kare surat Moses, sandurong te mahin manutup tirok ewen. 3:16 Tapi amon ije biti oloh dumah manaharep Tuhan, sandurong te kea intapei bara baun oloh te. 3:17 Nah, Tuhan je koan ikei toh iete Roh. Tuntang hong kueh Roh Tuhan aton, intu hete kea aton kamardekaan. 3:18 Toh baun itah handiai jaton inutup awi sandurong, tuntang itah mamantul katarang kalawa ain Tuhan Yesus. Tuntang awi te itah harajur iobah manjadi sama kilau ie; sasar tahi itah sasar manjadi tarang. Katarang jete bara Roh, tuntang Roh te jete Tuhan.
4:1 Ikei malalus gawi toh tagal asin Hatalla. Jete sababe ikei dia bageto kaharap. 4:2 Ikei dia mahapan kare cara kakaput je mampahawen. Ikei dia nahuang bagawi mahapan tanjaro atawa manambalik auh Hatalla. Ikei bagawi akan Hatalla mahapan atei je barasih manumon kanahuange. Awi te, ikei maharap oloh samandiai marega ikei tumon kahalape intu huang atei ewen. 4:3 Amon Barita Bahalap je imbarita ikei te magon hindai kea oloh haratie, maka kare oloh je akan manalih kabinasa bewei je dia haratie. 4:4 Dewa papa je manguasa kalunen toh manutup tirok atei kare oloh je dia percaya te. Ie te je mahambang ewen te mangat ewen dia mite kalawa bara Barita Bahalap te tahiu kahain Kristus, je puna kilau gambar Hatalla. 4:5 Barita je inyampai ikei te dia ie barita tahiu arep ikei kabuat. Barita te jete barita tahiu Yesus Kristus; je ie te Tuhan; tuntang ikei toh kare rewar ayue tagal ie. 4:6 Hatalla je hamauh, "Keleh kalawa lembut bara huang kakaput," Hatalla jete kea je mampalembut kalawa te huang atei itah, mangat tirok atei itah manjadi tarang uka mangasene katarang Hatalla je manyingah baun Kristus. 4:7 Tapi panatau roh je bahalap te iimbit ikei huang arep ikei je dia barega toh je inampa bara petak. Awi kalote maka bakarinah kahain kuasa te aton intu Hatalla tuntang dia intu ikei. 4:8 Ikei iamok bara hete-hete tapi dia hapit. Ikei bembang, tapi dia bageto kaharap. 4:9 Are oloh je manyingi ikei, tapi ikei dia puji miar kabuat. Tuntang aloh ikei kinjap imukul sampai balongkang, tapi ikei dia matei. 4:10 Harajur ih ikei mangkeme pampatei Kristus hong bitin ikei, uka pambelom ayue kea tau gitan intu bitin ikei. 4:11 Katahin ikei belom, ikei harajur iancam awi pampatei tagal Kristus, mangat awi jete pambelom Yesus kea tau gitan hong bitin ikei je pandehan toh. 4:12 Jetoh rimae je intu bitin ikei gawin pampatei kanjerae miar, tapi ikei hanjak awi pambelom kanjerae bagawi hong bitin keton. 4:13 Huang Surat Barasih aton auh toh, "Aku percaya, jete sababe aku hakotak." Nah, hapan kahias kapercaya je kalote kea, ikei hakotak awi ikei percaya. 4:14 Ikei percaya Hatalla je jari mambelom Tuhan haluli, handak mambelom ikei kea dengan Yesus, tuntang mimbit keton tuntang ikei manaharep ie. 4:15 Kare taloh samandiai te uras akan kepentingan keton. Basa sasar are oloh mangkeme asin Hatalla, sasar are kea lakudoa tarimakasih je inyampai akan Hatalla; awi kalote Hatalla ihormat-impahai. 4:16 Jete sababe ikei dia bageto kaharap. Aloh huang luare ikei sasar rusak ampie, tapi atei-huang ikei manjadi taheta genep andau. 4:17 Tuntang kasusah je dia sapire toh, je ingkeme ikei pandehan, kareh akan mahasil ije kasanang je dia tarasanan tuntang katatahie akan ikei. Kasanang te kejau kahaie amon inanding dengan kasusah te kabuat. 4:18 Basa ikei dia baya manampayah bara kare taloh je gitan, tapi taloh je dia gitan. Je gitan te baya tahan hanjulo, tapi je dia gitan te eter sampai katatahie.
5:1 Basa ikei katawan, amon huma -- iete biti -- je ielai itah hong kalunen toh ingarak, Hatalla kareh manyadia akan itah ije huma huang sorga, je inampa awi Hatalla kabuat tuntang je tahan sampai katatahie. 5:2 Intu huang huma je wayah toh, itah manarahing awi itah taharu toto melai intu human itah je huang sorga te. 5:3 Huma jete iete bitin itah je taheta. 5:4 Katahin itah melai intu huang huma je bara kalunen toh, itah manarahing awi tanggongan itah babehat. Dia ie awi itah mipen handak lapas bara bitin itah je bara kalunen toh, tapi awi itah mipen mangkepan biti je bara sorga te, mangat bitin itah je tau matei toh inguasa awi biti je belom. 5:5 Je manatap itah akan jete iete Hatalla kabuat, tuntang ie manenga Roh ayue akan itah kilau ije jaminan. 5:6 Tagal te atei ikei harajur mangkeme abas. Ikei kilau katawan je katahin ikei melai intu huang bitin ikei toh, ikei kejau bara huma je akan ielai ikei hinje Tuhan. 5:7 Awi ikei belom hunjun galang kapercaya dengan Kristus, dia ie hagalang taloh je tau inampayah, 5:8 jete bukue atei ikei tanggar. Ikei labih rajin lapas bara bitin ikei toh, mangat tau melai hinje Tuhan. 5:9 Tagal te ikei manggau jalan toto-toto uka manyanang atei Tuhan aloh metoh ikei aton intu huang human ikei hetoh, atawa hong kanih. 5:10 Basa pasti itah samandiai kareh iimbit manaharep pengadilan Kristus, tuntang genep biti kareh mandino baleh je padan dengan gawie hong kalunen toh -- gawi bahalap atawa papa. 5:11 Ikei katawan en rimae mikeh dengan Tuhan; jete sababe ikei manggau jalan mangat oloh tau percaya dengan ikei. Hatalla mangasene ikei sakalepah kandaleme, tuntang aku harap keton mahin mangasene ikei huang atei keton. 5:12 Hapan jetoh ikei dia balaku uka keton manara ikei. Ikei baya handak manenga ije galang je bahalap akan keton mangat tau mangkeme hanjak dengan ikei, uka keton katawan kilen ampie keton musti tombah auh kare oloh je manampayah ampin oloh hila luar bewei tapi dia manampayah sipat oloh te. 5:13 Amon ampin ikei puna jadi gila, jete awi akan kepentingan Hatalla. Tuntang amon ampin ikei barendeng, jete akan kepentingan keton. 5:14 Sintan Kristus ih je manguasa ikei; tuntang ikei katawan amon ije biti oloh jari matei akan oloh samandiai, maka jete rimae oloh handiai kea jari matei. 5:15 Kristus matei akan oloh handiai, mangat kare oloh je belom, dia hindai belom akan arepe kabuat, malengkan akan Kristus je jari matei tuntang imbelom haluli akan kepentingan ewen. 5:16 Tagal te, ikei dia hindai manilai oloh manumon ukuran olon. Puna ikei puji manilai Kristus bara tampayah olon, tapi toh dia hindai. 5:17 Oloh je jari hinje dengan Kristus, manjadi oloh je taheta samasinde. Je usang jari jaton hindai -- taloh handiai uras manjadi taheta. 5:18 Taloh handiai te uras inaheta awi Roh Hatalla. Mahalau Kristus Hatalla mangambuah itah haluli dengae, palus manyoho itah uka mimbit oloh beken mangat tau hakabuah kea dengan Hatalla. 5:19 Ikei mambarita iete mahalau Kristus, Hatalla mangambuah olon dengan arepe. Hatalla malalus jete sambil jaton manuntut kare kasalan je jari ilalus oloh kalunen intu taharepe. Tuntang ikei jari inyoho Hatalla uka mangabar barita te. 5:20 Jadi ikei toh puna kare utusan Kristus. Mahalau ikei Hatalla kabuat je manyampai petehe. Huang aran Kristus ikei balaku nyame-nyame, keleh manyambut gawin lengen Hatalla je olih mimbit keton hakabuah dengae. 5:21 Kristus dia badosa, tapi Hatalla mawi ie mananggong dosan itah, mangat itah hakabuah haluli dengan Hatalla awi itah ije dengan Kristus.
6:1 Awi ikei toh bagawi sama-sama dengan Hatalla, maka ikei balaku nyame-nyame ela keton dia marega kahalap atei Hatalla te. 6:2 Huang Surat Barasih Hatalla hamauh, "Hong katika je buah, aku jari mahining ikau, tuntang hong andau salamat, aku jari mandohop ikau." Ingat bua-buah! Wayah jetoh ie katika je buah te. Katika jetoh ie andaue uka itah inyalamat. 6:3 Ikei jaton mawi taloh en-en je mawi oloh manjadi badosa. Jadi, ije biti mahin jaton oloh je tau manyalan gawin ikei. 6:4 Tapi huang kare gawin ikei, ikei mamparahan arep ikei kilau kare jipen Hatalla. Kakare macam kasusah kajake jari inyarenan ikei dengan sabar: 6:5 ikei ingapehe, inamean akan penjara, iamok oloh are; ikei bagawi paham, kinjap dia batiroh tuntang kinjap kea jaton panginan. 6:6 Hapan kabujur atei, kapintar-kaharati, sabar tuntang bahalap atei, ikei mamparahan je ikei toh rewar Hatalla. Tuntang kea awi ikei bahapang dengan pandohop Roh Hatalla, tuntang hapan sinta je bujur, 6:7 hayak sambil mansanan barita je bara Hatalla, tuntang hapan kuasa bara Hatalla, ikei mamparahan je ikei toh rewar Hatalla. Ikei bahimbing dengan kanahuang Hatalla kilau sanjatan ikei hapan manyarang atawa hapan mangalindong arep. 6:8 Ikei ihormat, tapi ihina kea; inara, tuntang imapa kea. Aloh ikei bujur, ikei indawa oloh pananjaro. 6:9 Ikei ianggap oloh je dia basewut, tapi oloh handiai mangasene ikei. Ikei inyangka matei, tapi ampie ikei magon belom. Aloh ikei ingapehe, ikei dia matei. 6:10 Aloh atei ikei ingapehe, tapi ikei harajur hanjak kea. Ampin ikei kilau oloh belom susah, tapi ikei mawi oloh are manjadi tatau. Ampin ikei kilau jaton taloh en-en, tapi sapunae ikei tempon kare taloh handiai. 6:11 Pahari handiai je inyinta hong Korintus! Ikei jari hakotak terus-tarang dengan pahari. Kakare taloh huang atei ikei jari impalua kea. 6:12 Atei ikei iuap hai-hai akan keton, baya keton ih je manutup atei keton akan ikei. 6:13 Toh keleh aku hakotak kilau dengan kare anak ayungku kabuat. Keleh keton muap atei keton akan ikei. 6:14 Ela handak pakat dengan tirok sala ain oloh je dia percaya dengan Yesus; jete dia buah. Kueh tau oloh je malalus kanahuang Hatalla hapakat dengan oloh je malawan Hatalla! Dia mungkin kalawa hinje dengan kakaput. 6:15 Dia mungkin Kristus pakat dengan setan. En kasamae oloh Kristen dengan oloh je dia Kristen? 6:16 En hubungan human Hatalla dengan human dewa? Itah toh human Hatalla, iete Hatalla je belom. Hatalla kabuat hamauh, "Aku kareh melai intu bentok ewen, tuntang belom hinje dengan ewen. Aku kareh manjadi Hatallan ewen, tuntang ewen kareh manjadi ungkup ayungku. 6:17 Tagal te, keleh malihi kare oloh je dia mangasene Hatalla te, tuntang misah arep keton bara ewen. Ela mawi hubungan samasinde dengan taloh je papa, maka aku kareh manarima keton. 6:18 Aku kareh manjadi Bapa keton, tuntang keton kareh manjadi anakku, kalote koan Tuhan je Pangkahai Kuasae."
7:1 Pahari handiai je inyinta! Kakare janji te uras manintu itah. Awi te keleh itah marasih arep itah bara taloh handiai je mamapa biti tuntang hambaruan itah. Keleh itah mikeh dengan Hatalla mangat itah dengan tinduh-barasih tau belom baya akae bewei. 7:2 Tarima ih ikei huang atei keton. Ikei dia basala dengan eweh bewei, tuntang jaton kea ikei puji mamparugi oloh. Ikei samasinde jaton manduan kaontong bara eweh bewei. 7:3 Aku hamauh kalote dia awiku handak manyalan keton. Basa, sama kilau je jari insanangku bihin, ikei paham sinta keton, tuntang ikei toh kawal keton bara belom sampai matei. 7:4 Aku percaya lepah dengan keton. Tuntang aku mangkeme tamam toto dengan keton! Aloh ikei mangkeme are kasusah, ateiku paham iampong tagal keton. Ateiku paham hanjak! 7:5 Katika ikei sampai hong Makedonia, mahin ikei dia sampet malayan kaheka ikei. Bara kare lapak pambelom ikei mandino kasusah; bara pihak beken lembut kalahi, bara huang atei ikei kabuat lembut kikeh. 7:6 Tapi tarimakasih, Hatalla harajur mandehen atei oloh je bageto kaharap; ie mampamangat atei ikei dengan pandumah Titus. 7:7 Atei ikei iampong dia baya awi Titus dumah, tapi awi ie kea mansanan kilen ampie atei ayue iampong awi keton. Ie mansanan akan ikei je keton taharu toto nahuang hasondau dengangku; je keton manyasal tagal gawin keton bihin tuntang toh pahias mambela aku. Hal te mawi aku labih hanjak hindai. 7:8 Aloh suratku mawi atei keton kapehe, aku dia manyasal manyurat surat jete. Punae, katika aku katawan je suratku te mawi keton kapehe atei -- aloh kapehen atei keton te baya hanjulo -- aku puna manyasal kea. 7:9 Tapi toh aku sanang -- dia ie awi atei keton pehe, tapi awi kapehen atei keton te mobah hadat keton. Puna Hatalla je mangahandak keton mangkeme kapehen atei je kilau te. Jadi, ikei dia mamparugi keton. 7:10 Basa kapehen atei je ingahandak awi Hatalla kilau te mimbit kahobah atei je manyalamat. Tuntang oloh dia akan manyasal tagal hal te. Tapi kapehen atei je bara kalunen toh jete kapehe je mimbit pampatei. 7:11 Coba keton manantuani en gunae akan keton bara kapehen atei je hakabuah dengan kanahuang Hatalla! Gunae iete keton toto-toto manggau jalan uka mamparasih taloh je keroh! Keton manjadi oloh je basingi dengan dosa, keton mikeh, keton taharu, keton manjadi oloh je pahias atei, keton pahias mahukum oloh je basala! Hong kakare soal toh keton jari mamparahan je keton dia basala. 7:12 Jadi, aloh aku jari manyurat surat te, aku manyurat dia tagal oloh je basala te. Dia kea tagal oloh je buah kapehe awi kasalan te. Aku manyurat surat te uka intu taharep Hatalla, keton mangatawan kabuat kapaham keton manenga perhatian akan ikei. 7:13 Jete sababe atei ikei iampong. Tuntang dia baya iampong, labi-labih hindai ikei impahanjak awi mite kahanjak atei Titus; ateie iampong awi pahari handiai. 7:14 Aku puna jari mampatamam keton dengae. Ontong, keton dia mampahawen aku. Kare taloh je puji aku mansanae akan keton jete uras toto. Kalote kea taloh je impatamam ikei tahiu keton akan Titus ampie toto kea. 7:15 Toh ie sasar sinta keton, awi ie mingat kilen ampie pahari samandiai handak manumon pimpinan ayue tuntang kilen ampie keton manarima ie dengan hormat tuntang panumon. 7:16 Aku sanang toto, awi keton tau imercaya huang kakare hal.
8:1 Pahari handiai, ikei handak mangat keton katawan kea tahiu kilen ampin kahalap Hatalla dengan kare ungkup hong Makedonia. 8:2 Ewen jari iuji hapan kare kasusah je babehat. Tapi marak kare kasusah te, ewen hanjak tuntang manenga sumbangan uka mandohop oloh beken, aloh ewen belom susah toto. 8:3 Aku tau manyewut dengan pasti toto je ewen te manenga manumon kaolih ewen, malahan labih. Marak jaton oloh manyoho ewen, 8:4 ewen balaku nyame-nyame dengan ikei amon tau ewen mandohop manenga sumbangan akan ungkup Hatalla hong Yudea. 8:5 Ewen manenga kejau kalabiee bara je iharap ikei. Ewen te solake manyarah arepe akan Tuhan, limbah te akan ikei kea, tumon kanahuang Hatalla. 8:6 Jete sababe ikei paham mamakat Titus -- je manampara gawi toh -- mangat ie manontong gawi je bahalap toh hong marak keton kea. 8:7 Huang kare-kare hal keton aton kalabien keton: keton labien huang kapercaya, huang mamparahan kare tirok, huang hal pangatawan, huang kare-kare macam gawi, tuntang huang sintan keton dengan ikei. Tagal te, keleh keton kea labien huang gawi je bahalap toh. 8:8 Aku dia manyoho jete kilau ije parentah, tapi awiku mansanan kapaham gawin oloh beken mandohop sama arepe, aku kea handak katawan hong kueh sintan keton. 8:9 Basa keton mangatawan toto je itah paham inyinta awi Yesus Kristus Tuhan itah. Ie tatau, tapi ie mawi arepe manjadi oloh je belom susah tagal kepentingan keton, uka hapan kasusahe te, keton manjadi tatau. 8:10 Manumon tirok ayungku, puna buah ih keton mahapus taloh je jari inampara keton nyelo male. Basa keton toh je sola-solake manirok tuntang manampara gawi toh. 8:11 Nah, toh keleh keton manontonge manumon kaolih keton. Keleh keton pahias uka mahapus gawi te, kilau bihin keton pahias marancanae. 8:12 Amon keton rajin manenga, maka Hatalla kareh manarima panengan keton te hagalang taloh je aton intu keton, dia ie hagalang taloh je jaton intu keton. 8:13-14 Aku samasinde jaton kanahuangku mado mempas oloh beken bara tanggong jawab, tuntang mambehat keton. Tapi awi keton wayah toh aton huang kasukup, maka puna patut ih keton mandohop huang katapas ewen. Kareh amon keton huang katapas, tuntang ewen ampie saraba sukup, maka ewen kareh mandohop keton. Awi kalote, kadaduee sama-sama indohop. 8:15 Huang Surat Barasih tarasurat, "Oloh je are pandinoe, jaton kalabiee, tuntang oloh je isut pandinoe, jaton katapase." 8:16 Angat ikei paham manarimakasih akan Hatalla awi ie jari mawi Titus pahias kilau ikei uka mandohop keton! 8:17 Basa Titus te dia baya rajin manumon palakun ikei, tapi ie kea pahias toto handak mandohop keton sampai hapan kanahuang ayue kabuat ie manukas uka haguet manalih keton. 8:18 Ikei mampait kea hayak dengae ije biti pahari je paham ihormat hong kare-kare ungkup tagal gawie mambarita Barita Bahalap bara Hatalla. 8:19 Beken bara te oloh je jari iintih kea tuntang inukas awi kakare ungkup uka mampahayak ikei huang jalanan ikei. Basa ikei handak mawi jalanan uka manyampai sumbangan te, mangat Tuhan impahai tuntang mangat keton mite je ikei rajin mandohop. 8:20 Ikei paham batawat mangat ela aton oloh je manyalan ikei tahiu gawi manyampai sumbangan je paham hai toh. 8:21 Ikei handak malaluse dengan kabujur atei dia baya intu taharep Tuhan, tapi intu taharep olon kea. 8:22 Haya-hayak dengan Titus tuntang pahari jete, ikei mampait kea ije pahari beken. Ikei jari kinjap mauji ie tuntang ampie ie harajur rajin mandohop. Tuntang toh, ie labih rajin mandohop keton awi ie aton kaharape je hai dengan keton. 8:23 Tahiu Titus, ie te kawalku bagawi, je bagawi dengangku uka mandohop keton. Tuntang tahiu kadadue pahari te, je haguet hayak ie, ewen te nah oloh je inyoho awi kare ungkup tuntang manjadi oloh andal akan Kristus. 8:24 Ikei maharap keton mamparahan sintan keton dengan ewen, mangat ungkup samandiai katawan je keton sinta ewen tuntang taloh je iandal ikei tahiu keton te puna toto.
9:1 Sapunae dia usah hindai aku manyurat akan keton tahiu bantuan je jari impait akan ungkup Hatalla hong Yudea. 9:2 Aku katawan keton rajin mandohop, tuntang aku jari mansanan angat kahanjakku tahiu keton akan kare oloh hong Makedonia. Aku mansanan akan ewen iete, bara nyelo male kare pahari hong Akhaya jari tatap manenga sumbangan. Tuntang karajin keton jari mangalasut kea angat karajin tapaare bara kare bitin ewen. 9:3 Toh aku manyoho Titus tuntang kadadue pahari te manalih keton mangat taloh je paham iandal ikei tahiu keton ela sampai manjadi taloh je hayang bewei. Jadi keleh keton tatap, awi aku jari mansanan akan ewen je keton jari tatap akan hal te. 9:4 Aku mikeh, tau aton kare oloh Makedonia je omba haya-hayak dengangku kareh katika aku manalih keton. Tuntang amon ewen mite keton hindai tatap, bah, mahamen toto ikei kareh, awi ikei jari mansanan ikei percaya toto dengan keton! Tuntang keton kabuat mahin tau mahamen kea. 9:5 Awi te aku mangkeme perlu toto manyoho ewen te helo manalih keton, mangat maurus panenga je injanji keton te. Aku mawie kalote mangat kareh amon aku dumah, panengan keton te jari tatap. Awi kalote, maka bakarinah ampin panengan keton je inenga dengan sanang atei, tuntang dia awi imaksa. 9:6 Keleh mingat! Oloh je manawor binyi misut-misut kareh manggetem isut kea hasile. Tapi oloh je manawor binyi are-are, kareh mandino are kea hasile. 9:7 Gagenep oloh musti manenga dengan kahias ateie. Ela ie manenga awi kanyasale awi imaksa, basa Hatalla masi dengan oloh je manenga dengan sanang ateie. 9:8 Hatalla aton kuasae manenga akan keton je hakotoh karee, mangat keton harajur mandino taloh je imerlu keton; malahan keton tau dinon malabien haream karee mangat malalus gawi bahalap tuntang baamal. 9:9 Huang Surat Barasih aton inyurat kalotoh auhe tahiu Hatalla, "Hapan kajentae ie manenga akan oloh je belom susah; kahalap ateie sampai katatahie." 9:10 Hatalla je manatap binyi akan oloh je mimbul tuntang panginan akan itah. Ie kea nahuang manatap tuntang mandahang taloh je inawor keton, mangat hasil kahalap atei keton mandahang kea. 9:11 Awi kalote keton kareh saraba sukup hong kakare hal sampai keton tau harajur manenga hapan kajentan atei. Tuntang kare panengan keton je imbagi ikei, mawi oloh are manarimakasih akan Hatalla. 9:12 Basa gawi bahalap je ilalus keton toh dia baya akan manyukup katapas ungkup Hatalla bewei, tapi mawi oloh beken kea manarimakasih akan Hatalla. 9:13 Tuntang bara gawi bahalap je imparahan keton te, are oloh Kristen hong Yudea kareh manara Hatalla awi mite kaketep atei keton dengan Barita Bahalap tahiu Kristus je inuntut keton te. Tuntang tinai, ewen manara Hatalla, awi kajentan atei keton je mambagi akan ewen tuntang akan kare oloh beken kea kare taloh je aton intu keton. 9:14 Ewen kea balakudoa akan keton hapan sinta tuntang asi awi Hatalla paham bahalap atei dengan keton. 9:15 Keleh keton manarimakasih akan Hatalla tagal panengae je hakotoh te!
10:1 Toh aku, Paulus, aton taloh je handak insanangku akan keton. Aku toh, manumon koan oloh, balemo amon hataharep dengan keton, tapi bahanyi amon hakangkejau. Nah, tagal kalemo tuntang kahalap atei Kristus, 10:2 aku balaku nyame-nyame ela mawi aku terpaksa kasar dengan keton amon aku dumah kareh. Basa aton tirokku uka manindak tegas kare oloh je manyewut ikei bagawi akan kare kepentingan kalunen. 10:3 Ikei puna magon belom huang kalunen, tapi ikei bagawi dia akan kepentingan kalunen. 10:4 Kare sanjata je ihapan ikei huang gawin kalahi toh dia ie sanjata ain kalunen toh, tapi kare sanjata ain Hatalla je bara kuasa. Hapan sanjata te ikei mampahancur kare kubu; ikei manangkis kare perdebatan oloh 10:5 tuntang mampalongkang kare kota kasombong je imangun hapan malawan pangatawan tahiu Hatalla. Ikei manawan kare tirok oloh tuntang mawi ewen marup mamenda Kristus. 10:6 Tuntang amon keton jari taat hapan salepah atei, ikei tatap uka mahukum oloh handiai je dia taat. 10:7 Keleh keton mangatawan keadaan je sabujure. Amon oloh yakin ie te oloh ain Kristus, keleh ie mampingat arepe kabuat tuntang mangatawan je ikei kea oloh ain Kristus sama kilau ie. 10:8 Aku dia mahamen amon aku musti labih are mampatamam kuasa je jari inenga Tuhan akan ikei, basa kuasa te inenga akan hapan mampamaju keton tapi dia hapan mampanjato keton. 10:9 Aku dia handak keton mangkeme aku mampikeh keton mahapan kare suratku. 10:10 Oloh hamauh, "Kare surat Paulus te karas tuntang bapangaruh, tapi amon ie kabuat aton intu marak itah, ie balemo tuntang kare auhe jaton rimae en-en!" 10:11 Keleh oloh je kilau te mangatawan amon ikei aton intu bentok keton, gawin ikei pas sama kilau je inyurat ikei huang kare surat ikei. 10:12 Batantu kea ikei puna dia bahanyi mananding atawa manyama arep ikei dengan kare oloh je maanggap arepe gantong. Lalehan kahumong ewen! Ewen manampa ukuran kabuat tuntang manilai arep ewen mahapan ukuran te. 10:13 Ikei dia kalote. Amon ikei tama-tamam dengan arep ikei, ikei dia malabien bara tikase. Ikei melai hong watas gawi je jari inantu awi Hatalla akan ikei. Tuntang keton kea tame huang watas te. 10:14 Jadi, metoh ikei manalih keton tuntang mimbit Barita Bahalap tahiu Kristus akan keton, ikei puna dia balua bara watas gawin ikei. 10:15 Ikei dia manara arep tagal gawin oloh beken je aton intu luar watas je inantu awi Hatalla akan ikei. Tapi ikei tetep huang watas je inantu awi Hatalla akan ikei tuntang maharap keton sasar percaya dengan Kristus, uka ikei tau malalus gawi je labih hai hong marak keton. 10:16 Awi kalote ikei tau mangabar kea Barita Bahalap te hong kare lewu beken sambil dia usah ikei musti mampatamam arep ikei tagal gawi je jari ilalus hong watas gawin oloh beken. 10:17 Huang Surat Barasih tarasurat, "Oloh je handak tama-tamam tagal taloh en-en, keleh ie tama-tamam tagal taloh je jari ilalus awi Tuhan." 10:18 Basa oloh je inara jete oloh je inara awi Tuhan, dia ie oloh je manara arepe kabuat.
11:1 Nauhe aku mawi arepku kilau oloh humong isut. Tau ih hirahe? 11:2 Aku taharu dengan keton, kilau Hatalla kabuat mahin taharu dengan keton. Keton kilau ije biti oloh bawi bujang je magon barasih je jari injanjiku uka ingawin dengan ije biti oloh hatue, iete Kristus. 11:3 Tapi aku mikeh tirok keton inggoda mangat dia baketep tinai dengan Kristus, sama kilau Hawa bihin kea inggoda awi kapintar handipe te. 11:4 Basa ampie keton sanang ih manarima oloh je dumah manalih keton tuntang majar tahiu Yesus je beken -- beken bara Yesus je insanan ikei akan keton. Tuntang keton handak kea manarima roh tuntang "Barita Bahalap" je beken samasinde bara Roh Hatalla tuntang Barita Bahalap je puji keton manarimae bara ikei. 11:5 Aku samasinde dia mangkeme randah bara "kare rasul" je malabien te! 11:6 Mungkin aku tapas kapintarku hakotak, tapi tahiu pangatawan, aku toh dia ie oloh humong. Jete jari imparahan ikei akan keton huang kakare hal. 11:7 Katika aku mangabar Barita Bahalap bara Hatalla akan keton, isut mahin jaton aku balaku keton maongkos aku; tuntang awi jete aku mawi arepku manjadi randah. Aku malalus jete awiku handak manggatang keton. En jetekah je manjadi kasalan ayungku taharep keton? 11:8 Hong katika aku melayani keton, ongkosku inenga awi ungkup beken. Tau aku manyewute, aku mamparugi kare ungkup beken mangat tau mandohop keton. 11:9 Amon hong katika te aku tapas, ije biti mahin jaton bara keton je puji aku manyusahe. Uras taloh je imerluku inatap awi kare pahari je dumah bara Makedonia. Aku manjaga bua-buah mangat aku dia manyusah keton huang hal en bewei, tuntang aku handak harajur manjaga keton uka jete tetep kilau te. 11:10 Katamam angatku toh jaton tau inganan hong kueh bewei hong hapus tanah Akhaya, awi auh ajar Kristus je bujur aton intu aku. 11:11 Mbuhen aku hamauh kalote? En aku dia sinta keton? Hatalla katawan aku sinta keton! 11:12 Taloh je iawiku wayah toh handak iawiku tarus mangat "kare rasul" awang beken te jaton alasan hapae mampatamam arepe tuntang manyewut ewen te bagawi sama kilau ikei. 11:13 Kare oloh je kilau te puna rasul tanjaro. Ewen te bagawi mamikir oloh beken awie mawi arepe pura-pura kilau kare oloh ain Kristus. 11:14 Dia heran amon ewen mawie kalote, basa setan kabuat mahin mawi arepe pura-pura kilau malekat kalawa! 11:15 Jadi, dia itah heran amon kare jipen setan te pura-pura kilau jipen je malalus kahandak Hatalla. Kajariae ewen kea kareh manarima baleh je padan dengan kare gawin ewen. 11:16 Aku manangkalulie sinde tinai: Ela sampai aton oloh je maanggap aku humong. Tapi amon keton manaha aku kalote, nauhe ih je humong toh mampatamam arepku isut. 11:17 Hong hetoh aku handak manyewut katamamku, tapi dia ie Tuhan je manyoho aku mansanan jete. Huang hal toh aku puna toto-toto hakotak kilau oloh je humong. 11:18 Puna are oloh je mangkeme tamam dengan kare hal kalunen, jadi aku handak tama-tamam kea. 11:19 Dengan sanang atei keton tau sabar dengan oloh je humong awi keton mangkeme arep keton paham pintar! 11:20 Amon aton oloh je mahajipen keton, inalua keton ih; kalote kea amon aton oloh je mimes tuntang manduan kaontong bara keton, atawa mangkeme arepe labih gantong bara keton tuntang bahanyi manampar keton. 11:21 Aku mahamen angatku mangaku je ikei lalau balemo gawin ikei kilau te. Tapi amon oloh bahanyi mampatamam taloh en-en, aku mahin bahanyi kea! (Aku hakotak kilau oloh humong.) 11:22 En ewen te oloh Ibrani? Aku kea mahin oloh Ibrani. En ewen te oloh Israel? Aku mahin oloh Israel kea. Ewen te panakan Abraham? Aku mahin kalote kea! 11:23 Ewen te kare jipen Kristus? Kila-kilau auhe aku toh jari lepah akalku, tapi aku puna jipen je labih bahalap bara kakare ewen te! Aku bagawi labih paham, aku labih kinjap inamean huang penjara, aku labih are ingapehe tuntang kinjap handak matei. 11:24 Jari hangkalime aku ingapehe awi oloh Yehudi hapan cambuk telo puluh jalatien kali. 11:25 Telo kali aku buah cambuk awi kare oloh Roma; puji kea aku imanting hapan batu. Telo kali aku kahem kapal intu tasik, tuntang sinde aku hantong-hamba intu tasik due puluh epat jam katahie. 11:26 Kinjap aku mawi jalanan je paham bahaya; buah bahaya danum soho; bahaya parampok, bahaya bara oloh Yehudi atawa bangsa beken, bahaya hong lewu, bahaya hong luar lewu, bahaya intu tasik, tuntang bahaya bara kare oloh je manyewut arepe kilau pahari sama Kristen padahal beken. 11:27 Aku jari bagawi mate-matei: kinjap dia batiroh, dia kuman, dia mihop, kinjap belom asi-asi marak kanai' balau', buah sadingen awi tapas pakaian tuntang jaton eka melai. 11:28 Beken bara kare taloh handiai te, genep andau aku mangenang kea ampin kakare ungkup. 11:29 Amon aton je balemo maka aku mangkeme balemo kea. Amon aton je manjato huang dosa, ateiku omba lenyoh. 11:30 Nah, amon aku musti mampatamam taloh en-en, maka aku mampatamam taloh je mamparahan kalemoku. 11:31 Hatalla, Bapa Tuhan Yesus katawan je aku dia mananjaro. Keleh tara akan arae sampai katatahie. 11:32 Metoh aku aton hong Damaskus, gubernur je mimbing kuasa intu hete penda parentah raja Aretas, manyoho tantara je manjaga bauntonggang lewu te uka manawan aku. 11:33 Tapi hapan ije karanjang aku iuloh akan penda mahalau ije rumbak intu dinding batu. Kalote aku lapas bara lengen gubernur te.
12:1 Puna jaton kaontonge mawi arep tama-tamam. Tapi aku handak kea mampatamam kare hal je imparahan Hatalla akangku huang auh atawa huang tampayah. 12:2 Aku mangasene oloh Kristen je epat walas nyelo je jari halau inggatang akan eka je pangkagantonge hong sorga. (Aku dia katawan en bitie puna buju-bujur tagatang atawa jete baya ije tampayah -- Hatalla ih je katawan.) 12:3-4 Aku manangkalulie sinde tinai: aku katawan je oloh toh inggatang akan Pirdaus. (Aku dia katawan en bitie buju-bujur tagatang atawa jete baya tampayah -- Hatalla ih je katawae.) Hong kanih oloh te mahining kare hal je dia olih ingasene awi oloh tuntang dia kea olon inyoho uka mangotake. 12:5 Tahiu oloh je handak impatamamku, dia ie tahiu arepku kabuat. Tahiu bitin ayungku, baya kare hal je mamparahan kalemoku te ih je handak impatamamku. 12:6 Jaka aku mipen kea mampatamam taloh en-en, aku dia maku manjadi oloh pangamburau je hakotak bewei; aku handak mansanan taloh je toto. Tapi aku manahan arepku, mangat jaton oloh maanggap aku labih bara kilau je gitae aku malaluse atawa taloh je ihininge aku manyewute. 12:7 Tapi mangat aku ela lalau sombong tagal kare taloh je malabien bara helo te, akangku inenga ije macam panyakit hong bitingku je kilau alat ain setan. Panyakit te inenga uka mamukul aku mangat aku dia sombong. 12:8 Hantelo kali aku balakudoa akan Tuhan mangat panyakit te induan bara aku. 12:9 Tapi Tuhan tombah, "Aku sinta ikau tuntang jete jari sukup akam; basa kuasangku paham hai amon ikau huang kalemo." Jete sababe aku labih sanang mampatamam kare kalemon ayungku, basa amon aku balemo, maka hong katika te kea aku mangkeme Kristus manganjungen aku hapan kaabase. 12:10 Jadi aku hanjak dengan kare kalemon ayungku. Aku kea hanjak amon tagal Kristus aku imapa, aku buah kajake, inggoang oloh tuntang aku buah kasusah. Basa metoh aku balemo, maka metoh te kea aku abas. 12:11 Puna toto aku jari mawi arepku sama kilau oloh humong -- tapi puna keton je mawi aku kilau te. Manumon kapunae, keton musti manara aku. Basa aloh aku jaton harati taloh en-en, aku samasinde dia kalah manaharep "kare rasul" je labih tamam te! 12:12 Kare taloh heran tuntang kare hal je dia puji helo dengan kare gawi hai je jari imparahan huang kasabar akan keton uka mambuktie je aku toh ije biti rasul. 12:13 Huang hal en aku kurang manantuani keton amon inanding dengan kare ungkup je beken? Baya ije ih je katawangku iete: aku dia puji manyusah keton uka manenga ongkos akangku. Ampun ih aku tagal kasalangku te! 12:14 Toh jari kali je kateloe aku manatap arepku uka maja manalih keton. Tuntang aku dia handak manyusah keton, basa taloh je ingahandakku dia ie ramon keton, malengkan bitin keton. Basa dia ie anak korik je musti manggau ongkos akan oloh bakas, tapi oloh bakas te je musti manggau ongkos akan kare anake. 12:15 Tagal te, dengan sanang atei aku rajin mangorban kare taloh handiai akan keton, malahan bitingku kabuat. Amon kalote ampingku sinta keton, en patut amon keton dia sinta aku? 12:16 Nah, keton satuju je aku dia puji manyusah keton. Tapi magon aton oloh je manyewut aku toh haliau; awi koae, aku mandino ontong bara keton awiku mamikir keton. 12:17 Dia mungkin! En mahalau kare oloh je impaitku manalih keton te aku manduan kaontong bara keton? 12:18 Aku jari manyoho Titus haguet manalih keton, tuntang aku manyoho pahari oloh Kristen je beken te haguet haya-hayak dengae. En Titus manduan kaontong bara keton? Tapi ikei due bagawi dengan tintun kanahuang je sama tuntang mawi taloh hapan kare cara je sama! 12:19 Tau kea keton mangira ikei katahin toh manggau jalan mambela arep ikei intu taharep keton? Keton sala toto! Hatalla mangatawan taloh handiai je insanan ikei te jete uras tumon kanahuang Kristus. Tuntang taloh handiai je ilalus ikei te jete akan indu kahalap pambelom roh keton. 12:20 Aku mikeh amon aku manalih keton kareh, aku mite keton dia kilau je iharapku, tuntang keton kareh mite aku dia kilau tumon je iharap keton. Ela-ela kareh aton oloh je hakalahi hakahiri, ateie balasut, manirok kepentingan arepe kabuat, hapapa kolae, rajin mahasut, balecak tuntang mangacau. 12:21 Aku meles, mikeh kareh amon aku dumah, Hatallangku akan mamparandah aku intu taharep keton, tuntang aku kareh manangis basa bihin, are bara keton je badosa, dia hobah tuntang dia terai malalus kare gawi je harayap, papa tuntang dia patut.
13:1 Jetoh ie kali je kateloe aku dumah manalih keton. Huang Surat Barasih tarasurat, "Gagenep perkara musti inyaksi awi due atawa telo biti oloh, uka perkara te dehen." 13:2 Kare oloh je mawi dosa hong katika je jari halau tuntang kakare oloh beken, jari impingatku labih helo katika aku manalih keton hong kali je kaduee. Toh, pandehan aku dengan keton hakangkejau, aku mampingat tinai, amon aku dumah tinai, jaton ije biti bara ewen je lapas bara hukum. 13:3 Maka keton kareh mandino kakare bukti je inggau keton iete Kristus puna toto hakotak mahalau aku. Amon Kristus manindak keton, ie manindak dia lowa-lowah, tapi ie mamparahan kuasae marak keton. 13:4 Punae metoh ie inyampalaki, ie belom, tapi toh ie belom awi kuasan Hatalla. Ikei kea balemo hong pambelom ikei je hinje dengan Kristus, tapi amon manaharep keton, ikei kea abas hayak dengan Kristus awi kuasan Hatalla. 13:5 Coba keton mariksa arep keton kabuat en keton toto-toto belom tumon kapercaya dengan Kristus! Pasti keton mangatawan je Kristus Yesus aton huang keton! -- beken soale amon puna keton dia toto-toto percaya. 13:6 Aku harap pahari mangatawan je ikei toh dia ie oloh je jari kalah. 13:7 Ikei balakudoa intu Hatalla, keleh ie mandohop keton uka dia mawi taloh sala. Jete dia ie hapan ikei mamparahan je ikei toh puna apik malalus gawi, tapi uka keton malalus taloh je ingahandak Hatalla aloh ampie ikei gagal, dia men ih! 13:8 Basa ikei dia tau mawi taloh je hakalawan dengan kabujur; ikei musti manumon taloh je bujur. 13:9 Ikei sanang amon ikei balemo, tuntang keton abas. Ikei balakudoa kea mangat keton manjadi tinduh-barasih. 13:10 Jete sababe aku manyurat surat toh hong katika aku hindai aton hong marak keton. Awi kalote, amon aku dumah kareh, dia usah karas aku manindak keton mahapan kuasa je inenga Hatalla akangku. Kuasa te inenga akan kahalap keton dia akan hapan marusak. 13:11 Kajariae, pahari handiai, keleh keton hanjak, tuntang keleh manggau jalan uka manjadi tinduh-barasih. Tarima kare auh nasehatku. Keleh keton hinje atei tuntang belom hakabuah dengan sama arep. Hatalla je tempon sinta tuntang damai te mampahayak keton samandiai. 13:12 Keleh keton hatabe sama arep keton huang kaheret atei kilau oloh Kristen. Hapus ungkup Hatalla mampait tabe akan keton. 13:13 Tuhan Yesus Kristus mamberkat keton, Hatalla sinta keton, Roh Hatalla mampahayak keton handiai! Hormat ikei, Paulus
1:1-3 Kare pahari intu ungkup hong wilayah Galatia, aku, Paulus, tuntang kakare pahari oloh Kristen je omba hayak aku, maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton. Aku manjadi rasul dia mahalau olon atawa tagal iangkat awi olon, malengkan awi Yesus Kristus tuntang Hatalla Bapa itah je jari mambelom ie haluli bara pampatei. 1:4 Awi mamenda kahandak Hatalla Bapa itah, Kristus manyarah arepe manjadi parapah akan kare dosan itah, uka itah inyalamat bara wayah je papa toh. 1:5 Keleh tara akan Hatalla sampai katatahie! Amen. 1:6 Aku hengan tahiu kare pahari! Keton intehau Hatalla awi asin Kristus, tapi toh keton kalote kajelenge manalikut Hatalla tuntang omba manumon "barita bahalap" je beken bara Barita Bahalap je bara Hatalla. 1:7 Sapunae jaton aton "barita bahalap je beken". Baya aton kare oloh je mambarita akan keton "barita bahalap" tahiu Kristus inambalik ewen upoe akan lawie sampai manderoh keton. 1:8 Oloh je mansanan "barita bahalap" je beken bara Barita Bahalap je jari imbarita ikei, keleh ie ihukum awi Hatalla -- aloh ie te ikei kabuat atawa malekat bara sorga! 1:9 Ikei jari mansanae bihin, toh aku mansanae sinde tinai: Oloh je mansanan akan keton "barita bahalap" je beken bara Barita Bahalap je jari inarima keton bara ikei, keleh Hatalla mahukum oloh te. 1:10 En awi jete kila-kilau ampie aku maharap uka ingaku awi olon? Dia samasinde! Aku baya maharap pangakuan bara Hatalla. En aku manggau jalan uka manduan atei olon mangat aku irajin awi oloh? Amon aku magon mawie kalote, aku dia ie rewar Kristus. 1:11 Pahari handiai musti katawan Barita Bahalap je imbaritaku te asale dia bara olon. 1:12 Aku dia manarima barita te bara olon, tuntang ije mahin jaton oloh je majar aku tahiu jete. Yesus Kristus kabuat je mamparahan isin Barita Bahalap te akangku. 1:13 Batantu keton jari mahining tahiu pambelom ayungku bihin kilau ije biti oloh je bara agama Yehudi. Keton katawan aku paham toto mamusoh ungkup Hatalla tuntang kilen ampin kakarase aku manggau jalan mamparusak ewen. 1:14 Huang hal malalus agama Yehudi, aku malabien bara kare oloh Yehudi je beken je hapantar dengangku. Aku pahias toto huang kare hal je hatontong dengan kare hadat tato hiang itah. 1:15 Tapi awi kahalap atei Hatalla, ie mintih aku helo bara aku inakan tuntang mantehau aku uka melayani ie. 1:16 Hatalla mamparahan Anake akangku uka aku tau mambarita Barita Bahalap tahiu Anak te akan kare oloh Yehudi. Hong katika te aku haguet dia manalih eweh bewei uka balaku nasehat. 1:17 Dia kea aku haguet manalih kare oloh hong Yerusalem je labih helo bara aku manjadi rasul. Tapi aku haguet akan tanah Arab, palus bara hete haluli tinai akan Damaskus. 1:18 Telo nyelo limbah te, aku haguet akan Yerusalem mangat kasene dengan Petrus. Aku melai dengae baya lime walas andau katahie. 1:19 Aku dia hasondau dengan kare rasul je beken, baya dengan Yakobus, paharin Tuhan. 1:20 Taloh je inyuratku toh, puna toto. Hatalla katawan aku dia mananjaro! 1:21 Limbah te aku haguet akan kare daerah hong Siria tuntang Kilikia. 1:22 Sampai hong katika te kare ungkup oloh Kristen hong Yudea magon hindai kasene aku secara langsung. 1:23 Ewen baya mahining auh oloh, "Oloh je mangapehe ikei bihin, wayah toh mambarita kapercaya je handak impalumate bihin." 1:24 Maka ewen manara Hatalla tagal aku.
2:1 Epatwalas nyelo limbah te, aku haluli akan Yerusalem dengan Barnabas, hayak mimbit Titus kea. 2:2 Aku haguet akan Yerusalem awi Hatalla jari mansanan akangku aku musti haguet. Tuntang huang pumpong je tantai iawi akan te dengan kare pamimpin intu hete, aku manarang Barita Bahalap je imbaritaku akan kare oloh je dia Yehudi. Basa aku dia handak gawingku je bihin tuntang je wayah toh kea, palus hayang. 2:3 Titus, je mampahayak aku, ie te oloh Yunani, tapi ie dia imaksa manumon atoran sunat, 2:4 aloh aton kare oloh je manun hal te. Ewen te kare oloh je tame taka-takau marak itah tuntang manyamar kilau pahari. Ewen tame suni-suni awie mado manyalidik kabebasan itah je aton awi itah bulat hinje dengan Kristus Yesus. Ewen handak mimbit itah haluli akan ampin itah je solake bihin kilau jipen, 2:5 tapi ikei isut mahin dia handak manyarah dengan ewen, awi ikei handak manjaga uka Barita Bahalap te tetep barasih akan keton. 2:6 Aloh kalote, jaton aton kare hal je taheta je inuntut bara aku awi kare oloh je ianggap basewut -- akangku jaton kabekee en ewen te basewut atawa dia, basa Hatalla dia manampayah ampin oloh. 2:7 Tapi kare oloh je ianggap basewut te mangaku Hatalla jari manyoho aku uka mambarita Barita Bahalap akan kare oloh je dia Yehudi, sama kilau ie jari manyoho Petrus uka mambarita Barita Bahalap te akan oloh Yehudi. 2:8 Basa Hatalla je manenga kaolih akan Petrus mangat tau manjadi rasul akan oloh Yehudi, manenga kea kaolih akangku mangat tau manjadi rasul akan oloh je dia Yehudi. 2:9 Yakobus, Petrus tuntang Yohanes, je ampie manjadi pamimpin ungkup, mangaku je Hatalla jari manenga akangku gawi je beken ampie toh. Maka ewen hatabe dengan Barnabas tuntang dengangku kilau tanda hasobat. Palus ewen tuntang ikei kea pakat mangat ikei bagawi hong marak kare utus oloh je dia Yehudi, tuntang ewen hong marak oloh Yehudi. 2:10 Baya ije ih palakun ewen dengan ikei iete uka ikei manantuani oloh je belom susah. Tuntang aku puna rajin malalus hal te. 2:11 Katika Petrus dumah hong Antiokhia, aku tara-tarang malawan ie basa cara gawie sala. 2:12 Sola-solake ie mondok kuman haya-hayak dengan kare pahari je dia Yehudi. Tapi limbah kare oloh utusan ain Yakobus dumah, ie mangejau arepe bara kare pahari je dia Yehudi tuntang dia maku hindai kuman hayak dengan ewen, awi mikeh dengan kare oloh je mangahandak kakare oloh uras inyunat. 2:13 Kare pahari Yehudi awang beken omba kea gawin Petrus je haliau sampai Barnabas mahin buah pangaruh omba gawi je kilau te. 2:14 Sana aku mite cara gawin ewen te dia cocok dengan katoton Barita Bahalap te, aku hamauh dengan Petrus intu taharep kare oloh je aton hete, "Amon pahari kilau ije biti oloh Yehudi jari belom kilau oloh je dia Yehudi, mbuhen toh pahari handak mamaksa kare oloh beken mangat belom kilau oloh Yehudi?" 2:15 Punae amon manumon jereh, ikei toh oloh Yehudi tuntang dia ie "oloh je dia Yehudi je badosa". 2:16 Aloh kalote ikei katawan oloh tau hakabuah haluli dengan Hatalla baya awi kapercayae dengan Yesus Kristus, tuntang dia awi ie malalus hukum agama. Ikei kabuat mahin percaya dengan Yesus Kristus, uka ikei hakabuah dengan Hatalla mahalau kapercayan ikei te, dia awi ikei malalus hukum agama. Basa awi malalus hukum agama, ije mahin jaton oloh tau hakabuah haluli dengan Hatalla. 2:17 Ikei manggau jalan uka tau hakabuah haluli dengan Hatalla mahalau kahinjen pambelom dengan Kristus. Tapi amon limbah malalus taloh te, ampin ikei magon "oloh badosa" kea sama kilau kare oloh je dia Yehudi, en rimae jete? En Kristus te je mawi ikei badosa? Batantu dia! 2:18 Amon aku nampara tinai mampendeng atoran hukum agama je jari irusakku, maka jete tandae aku jari manjadi oloh je malanggar hukum. 2:19 Tapi aku jari matei intu taharep hukum agama -- impatei awi hukum te kabuat -- mangat aku tau belom akan Hatalla. Aku jari inyampalaki hayak Kristus. 2:20 Toh dia ie aku hindai je belom, tapi Kristus je belom huang bitingku. Pambelom jetoh je ingkemeku metoh toh, jete pambelom awi kapercaya dengan Anak Hatalla je sinta aku tuntang je jari manyarah arepe akangku. 2:21 Aku dia manaha gampang asin Hatalla. Amon hubungan oloh dengan Hatalla manjadi bahalap haluli awie malalus hukum agama, jete rimae pampatei Kristus jaton gunae!
3:1 Pahari handiai oloh Galatia! Keton humong toto! En keton toh jari kana pangaruh eweh? Pampatei Kristus hong kayu sampalaki jari inarangku tarang toto akan keton! 3:2 Coba sanan akangku ije hal jetoh: En keton jari manarima Roh Hatalla awi keton malalus hukum agama, atawa awi keton mahining Barita Bahalap bara Hatalla tuntang percaya dengan Kristus? 3:3 Mbuhen keton humong kalote? Keton jari nampara pambelom taheta huang Roh Hatalla, toh lalehan keton handak manggoang katinduh-karasih hapan kaabas keton kabuat? 3:4 En jaton gunae-kah taloh je jari iawi keton te? Lalehan kajaton gunae! 3:5 Hatalla manenga Roh ayue akan keton tuntang mawi kare taloh heran hong marak keton. En Hatalla mawie kalote awi keton malalus hukum agama atawa awi keton mahining Barita Bahalap te tuntang percaya dengan Kristus? 3:6 Jete sama kilau je tarasurat huang Surat Barasih tahiu Abraham -- kalotoh, "Abraham percaya dengan Hatalla, tuntang awi kapercayae te ie inarima awi Hatalla kilau oloh je mampahanjak atei Hatalla." 3:7 Jadi keleh keton mingat, oloh je puna toto panakan Abraham iete oloh je percaya dengan Hatalla. 3:8 Surat Barasih jari manampayah bara helo je Hatalla nguan kare oloh je dia Yehudi mules haluli manalih Hatalla, asal ewen percaya dengae. Barita Bahalap te imbarita labih helo akan Abraham hapan janji jetoh, "Mahalau ikau, Hatalla kareh mamberkat hapus ungkup oloh kalunen." 3:9 Awi Abraham percaya maka ie imberkat. Kalote kea oloh handiai je percaya, akan imberkat haya-hayak dengan Abraham. 3:10 Kare oloh je bahapang dengan hukum agama, uras belom penda sapa. Basa huang Surat Barasih tarasurat, "Oloh je dia baketep malalus taloh je inyurat huang Surat Hukum Agama, inyapa Hatalla!" 3:11 Ije biti mahin jaton oloh je bahalap haluli manalih Hatalla awie malalus hukum agama. Hal te jari insanan huang Surat Barasih, "Baya oloh je percaya dengan Hatalla sampai hubungae dengan Hatalla manjadi bahalap haluli, kareh belom!" 3:12 Tapi hukum agama dia inggalang awi kapercaya. Huang Surat Barasih tarasurat tahiu oloh je malalus hukum agama, akan belom awi hukum te. 3:13 Tapi Kristus maliwus itah bara sapa ain hukum agama. Ie mawi jete awie manalua arepe tarasapa tagal itah. Basa huang Surat Barasih tarasurat, "Tarasapa ie je matei inggantung intu tihang kayu." 3:14 Kristus malalus jete mangat berkat je injanji akan Abraham inenga kea akan kare oloh je dia Yehudi. Awi kalote itah je percaya dengan Hatalla, mahin tau manarima Roh je injanji Hatalla te. 3:15 Pahari handiai! Keleh aku mahapan sonto bara pangalaman manda-mandau. Amon oloh manampa ije peteng janji tuntang janji te jadi indehen, maka ije biti mahin jaton oloh tau mambalang janji te, atawa mandahang taloh en-en intu hete. 3:16 Kare janjin Hatalla inampa awi Hatalla akan Abraham tuntang akan oloh panakan Abraham. Huang Surat Barasih jaton inyurat, "tuntang akan kare oloh panakan Abraham" je rimae are oloh. Je tarasurat intu hete iete, "tuntang akan oloh panakan ayum", rimae ije biti bewei, iete Kristus. 3:17 Je handak insanangku intu hetoh iete: janjin Hatalla jari inampa tuntang jari dehen bara solake. Hukum agama je inampa epat ratus telo puluh nyelo limbah te jaton tau mambalang jete atawa manganan janjin Hatalla te. 3:18 Basa amon panengan Hatalla bahapang dengan hukum agama, maka jete dia ie panenga je injanji Hatalla hindai. Puna awi Hatalla jari manjanji jete dengan Abraham, maka Hatalla manenga jete akae. 3:19 Amon kalote, akan en hukum agama te inenga? Auh tombahe iete hukum agama te indahang hapan mamparahan kasalan olon. Hukum agama te baya ihapan sampai pandumah ije biti panakan Abraham, je insanan huang janjin Hatalla akan Abraham. Hukum agama te inyampai awi kare malekat mahalau ije biti oloh helat. 3:20 Nah, musti aton due baris oloh, harue tau mahapan ije biti oloh helat. Tapi Hatalla dia mahapan ije biti oloh helat, awi ie kabuat malaluse. 3:21 En rimae jete hukum agama hakalawan dengan janjin Hatalla? Batantu dia! Basa amon hukum agama inenga hapan manenga pambelom akan olon, maka olon tau hakabuah dengan Hatalla mahalau hukum agama. 3:22 Tapi huang Surat Barasih tarasurat hapus ungkup oloh kalunen melai hong penda kuasan dosa. Tagal te, panenga je injanji hagalang kapercaya dengan Yesus Kristus inenga akan oloh je percaya. 3:23 Helo bara katika itah percaya dengan Kristus, itah injaga toto-toto awi hukum agama; itah sama kilau ingarambang sampai kapercaya te imparahan. 3:24 Awi kalote, hukum agama manjadi kilau pangawas itah sampai Kristus dumah uka mawi itah hakabuah haluli dengan Hatalla awi itah percaya dengan Kristus. 3:25 Toh, awi katikae jari sampai akan oloh tau percaya dengan Kristus, maka itah dia hindai irentah awi hukum agama. 3:26 Awi keton percaya dengan Kristus Yesus, maka keton hinje dengae; tuntang awi keton manjadi anak Hatalla. 3:27 Keton handiai uras jari impandoi huang aran Kristus, jadi keton manarima akan arep keton kare sipat ain Kristus kabuat. 3:28 Huang hal toh maka jaton hindai kabekee oloh Yehudi dengan oloh je dia Yehudi, jipen dengan oloh mardeka, oloh hatue dengan oloh bawi. Pahari handiai uras manjadi ije tagal Kristus. 3:29 Amon keton oloh ain Kristus, maka keton oloh panakan Abraham. Tuntang keton kareh manarima taloh je injanji Hatalla.
4:1-2 Tapi aku perlu manepas auhku: amon ije ahli waris magon penda umur, musti aton oloh je mangawas ie tuntang maurus kare taloh je mambatang akae sampai ie ombet umure manumon je inukas awi bapae. Ie iawi kilau ije biti jipen, aloh ie sapunae tempon kare ramo te. 4:3 Kalote kea dengan itah: katahin itah hindai sukup kabakas, itah ihajipen awi kare roh je manguasa kalunen jetoh. 4:4 Tapi huang katika je buah, Hatalla manyoho Anake akan kalunen. Anake te inakan awi ije biti oloh bawi tuntang belom penda kuasan hukum agama. 4:5 Awi kalote ie mambebas kare oloh je belom hong penda kuasan hukum agama; mangat itah kea tau manjadi anak Hatalla. 4:6 Awi keton toh anak Hatalla, maka Hatalla manyoho Roh Anake tame akan huang atei pahari tuntang ateiku, iete Roh je mantehau, "Bapa, o Bapaku." 4:7 Jadi, keton dia hindai jipen, tapi anak. Tuntang awi keton toh anak Hatalla, maka Hatalla manenga akan keton kare taloh handiai je inatape akan kare anake. 4:8 Bihin keton dia mangasene Hatalla, jete sababe keton manjadi jipen ain kare kuasa je ianggap kilau hatalla tapi sapunae jete dia ie Hatalla samasinde. 4:9 Tapi toh keton mangasene Hatalla, atawa labih buah hindai, Hatalla mangasene keton. Nah, mbuhen keton handak haluli tinai manalih kare roh kalunen jetoh, je balemo tuntang susah? Mbuhen keton handak injipen tinai awi kare roh te? 4:10 Keton maraya kare andau, kare bulan, tuntang kare nyelo. 4:11 Aku meles angatku ela-ela kare kahekaku akan keton te hayang bewei. 4:12 Pahari handiai! Aku balaku toto-toto uka keton manjadi sama kilau aku. Basa aku kea jari manjadi sama kilau keton. Keton jaton malalus taloh je sala intu taharepku. 4:13 Batantu keton magon mingat taloh je mawi sabab solake mbuhen aku mangabar Barita Bahalap te akan keton. Sababe iete awi aku buah kahaban. 4:14 Hong katika te keton jaton mangkeme bajilek dengangku, aloh ampin bitingku kilau ije tingkes hai akan keton. Malahan keton manarima aku sama kilau manambang malekat Hatalla atawa sama kilau manambang Kristus Yesus kabuat. 4:15 Keton paham hanjak hong katika te. Tapi toh, hong kueh kahanjak te? Aku katawan hong katika te keton pahias mangaruit matan keton kabuat uka manengae akangku, jaka tau keton mawie kalote. 4:16 En keton wayah toh jari maanggap aku kilau musoh, awi aku mansanan taloh je bujur akan keton? 4:17 Kare oloh beken te hapan sakalepah angate manggau keton, tapi kare maksud ewen te dia bahalap. Ewen baya handak manggeto hubungan keton dengan ikei, mangat keton omba ewen hapan sakalepah angat atei keton. 4:18 Puna bahalap mahapan sakalepah atei huang kare hal je bahalap, asal harajur kalote tuntang ela baya amon aku aton hinje dengan keton. 4:19 O keton, anakku je inyinta! Metoh toh aku kapehe tinai tagal keton. Aku kapehe sama kilau ije biti ibu je kapehe metoh luas. Aku kareh harajur kapehe, amon kare sipat Kristus hindai muhat huang bitin keton! 4:20 Aku mipen toto handak melai hong bentok keton metoh toh, mangat aku tau hakotak dengan keton hapan auh je beken, awi aku jari dia katawan handak malalus en hindai akan keton! 4:21 Kare pahari je handak belom hong penda kuasan hukum agama, keleh mahining auhku! Aku handak mambarita akan keton taloh je sapunae tarasurat huang Surat Hukum Moses. 4:22 Intu hete tarasurat tahiu Abraham aton dinon due anak: ije anake te baindu dengan jipen, tuntang ije biti tinai baindu dengan ije biti oloh mardeka. 4:23 Anak je baindu dengan jipen, inakan kilau bahut manumon kahandak olon. Tapi anak je indue te oloh mardeka, inakan tagal janjin Hatalla. 4:24 Jetoh tau ihapan kilau paribasa. Due biti oloh bawi te iete paribasa tahiu due janji: janji je solake te asale bara Bukit Sinai -- jete Hagar; kare anake inakan kilau jipen. 4:25 Jadi, Hagar te jete Bukit Sinai hong tanah Arab. Jete tanding lewu Yerusalem dengan salepah huange je wayah toh manjadi jipen. 4:26 Tapi Yerusalem je huang sorga te jete Yerusalem je mardeka, tuntang ie te indu itah. 4:27 Basa huang Surat Barasih tarasurat, "Keleh ikau hanjak o oloh bawi tamanang, je dia puji luas! keleh hanjak tuntang basasorak o keton je dia puji mangkeme kapehen oloh manak! Basa oloh bawi je ilihi banae kareh mandino labih are anak bara oloh bawi je belom hinje banae." 4:28 Pahari handiai! Keton toh anak Hatalla je inakan tagal janjin Hatalla; keton sama kilau Isaak. 4:29 Hong katika te anak je inakan manumon kahandak olon, mangapehe anak je inakan awi kahandak Roh Hatalla. Kalote kea wayah toh. 4:30 Tapi en taloh je inyurat huang Surat Barasih? Intu hete tarasurat kalotoh: "Harak jipen bawi te hayak dengan anake, basa anak bara bawin jipen te dia tau manjadi ahli waris hayak dengan anak ain oloh bawi mardeka te." 4:31 Jadi, Pahari handiai, itah toh dia ie anak bawin jipen; itah toh anak ain bawin oloh mardeka.
5:1 Metoh toh itah mardeka, awi Kristus jari mambebas itah! Tagal te imbing dehe-dehen kamardekan keton te, tuntang ela hakon ihajipen tinai. 5:2 Ingat, amon keton balaku inyunat, jete rimae Kristus jaton aton gunae hindai akan keton. Je mansanan jetoh iete aku kabuat, Paulus. 5:3 Sinde tinai aku manenga pampingat akan oloh je balaku inyunat, ie musti malalus salepah hukum agama! 5:4 Amon keton manggau jalan handak hakabuah dengan Hatalla mahalau hukum agama, jete rimae hubungan keton dengan Kristus jari bageto. Awi kalote keton belom hong luar bara watas asin Hatalla. 5:5 Tapi akan ikei, ikei harap hapan pandohop Roh Hatalla tuntang hagalang kapercayan ikei dengan Kristus, Hatalla mampaolih ikei hakabuah dengae. 5:6 Basa amon itah jari hinje dengan Kristus Yesus, hal manumon atawa dia manumon atoran sunat dia manjadi soal hindai. Je mambatang itah baya percaya dengan Kristus, tuntang jete gitan huang sintan itah dengan oloh beken. 5:7 Bihin keton miar bujur dengan bahalap! Toh mbuhen keton jaton taat hindai dengan kahandak Hatalla? Eweh je jari malacok keton? 5:8 Je mawi jete pasti dia ie Hatalla je jari mantehau keton! 5:9 "Ragi je isut akan mangamer salepah tepung wadai," koan oloh. 5:10 Aloh kalote aku magon percaya je keton dia akan mimbing auh oloh beken, awi itah jari ije huang Kristus. Tuntang aku yakin eweh bewei je mangacau tirok keton, kareh ihukum awi Hatalla. 5:11 Tahiu aku, pahari handiai, mbuhen aku harajur ingalahi awiku magon mambarita je sunat te dia baguna? Awi amon aku mambarita kilau te, maka kahandalem barita sampalaki te jaton mampalembut soal en-en. 5:12 Labih bahalap oloh je manderoh tirok keton te langsung ih balua samasinde bara ungkup! 5:13 Pahari jari intehau uka manjadi oloh mardeka. Tapi ela mahapan kamardeka te akan malalus taloh je ingahandak keton raju-rajur. Tapi keton musti hasinta tuntang hadohop sama arep keton. 5:14 Salepah hukum agama imbulat huang parentah ije toh, "Keleh ikau sinta sama arepm sama kilau ikau sinta arepm kabuat." 5:15 Tapi amon keton hakakas-hakaramak, bua-buah keton, kareh keton sama-sama lenyoh. 5:16 Maksudku kalotoh: Keleh Roh Hatalla mangagalan keton tuntang ela belom manumon sipat kipen olon. 5:17 Basa kahandak olon hakalawan dengan kahandak Roh Hatalla, tuntang kahandak Roh Hatalla hakalawan dengan kahandak olon. Kadaduee te hakalawan, sampai keton jaton tau malalus taloh je ingahandak keton. 5:18 Tapi amon Roh Hatalla mamimpin keton, maka keton dia inguasa awi hukum agama. 5:19 Kipen sipat kaolon gitan huang gawi je harayap, papa tuntang jaton patut; 5:20 manyembah dewa tuntang kare kaji lampah; huang kamusoh, hakalahi, kahiri-kabehu, murah balait, tuntang mingat arep kabuat; kapusit tuntang pihak-mamihak, 5:21 hayak kahirin atei, barami-rami babusau, pesta-mamesta tuntang kakai tinai. Tagal taloh samandiai te aku mampingat keton toh kilau aku bihin mampingat keton kea, iete oloh je malalus kare hal je kilau te dia tau manjadi anak ungkup ain Hatalla. 5:22 Tapi kare oloh je imimpin awi Roh Hatalla, iete: Ewen te hasinta sama arepe, ewen hanja-hanjak, ewen mandino kadamai, ewen sabar tuntang bajenta ateie, ewen buah ampie dengan oloh beken, ewen baketep, 5:23 ewen randah ateie, tuntang harajur olih mahaga arepe. Dia aton hukum agama je mangahana kare hal je kilau te. 5:24 Kare oloh je jari manjadi oloh ain Kristus Yesus, oloh te jari mampatei sipat kaoloe hayak dengan kare belai tuntang kipee. 5:25 Roh Hatalla jari manenga akan itah pambelom je taheta; tagal te ie kea je musti manguasa pambelom itah. 5:26 Dia tau itah manjadi bajoho, tuntang mangapehe atei sama arep itah, tuntang hakahiri sama arep.
6:1 Pahari handiai! Amon aton oloh je tarasondau mawi dosa, keleh keton, je belom manumon Roh Hatalla, mangagalan oloh te haluli akan jalan je bujur. Tapi keton musti malalus jete hapan kalemo tuntang jaga ela sampai keton kea buah tingkes. 6:2 Keleh keton hadohop sama arep keton meton kare tanggungan, uka tagal te keton mamenda parentah Kristus. 6:3 Amon aton oloh je mangkeme arepe mambatang, padahal dia, oloh te mananjaro arepe kabuat. 6:4 Genep biti musti mariksa arepe en hadat ayue te bahalap atawa dia. Amon bahalap, ie tau mangkeme tamam tagal jete. Tapi dia usah ie mambandinge dengan taloh je ilalus awi oloh beken. 6:5 Basa genep biti musti meton tanggung jawab ayue kabuat. 6:6 Oloh je manarima auh ajar Kristus, keleh ie mambagi dengan gurue kakare taloh bahalap je aton intu ie. 6:7 Ela buah tipu. Hatalla dia tau iureh! Taloh je iimbul oloh, jete kea kareh je inggeteme. 6:8 Amon oloh mimbul manumon sipat kaolon, ie kareh manggetem pampatei bara sipat jete. Tapi amon ie mimbul manumon pimpinan Roh Hatalla, ie kareh manggetem pambelom je bujur tuntang katatahie bara Roh Hatalla. 6:9 Tagal te ela itah peda malalus kare taloh je bahalap; basa amon itah dia terai malalus kare taloh te, rahian jeha itah akan manggetem hasile. 6:10 Jadi, katahin aton katika akan itah, keleh itah mawi gawi bahalap akan oloh handiai, je mambatang akan kare paharin itah je sama kapercayae. 6:11 Keleh manantuani bua-buah bagian jetoh je inyuratku kabuat hapan hurup je hai-hai. 6:12 Kare oloh je handak manggatang arepe hapan kare taloh je gitan, ewen te je manggau akal mamaksa keton manumon atoran sunat. Tapi ewen malalus jete baya uka ewen dia ingapehe awi oloh Yehudi tagal sampalakin Kristus. 6:13 Kare oloh je omba manumon atoran sunat mahin dia olihe malalus hukum agama. Tapi ewen mangahandak keton inyunat mangat ewen tau tama-tamam awi keton mamenda atoran te. 6:14 Tapi aku jaton samasinde mampatamam taloh en-en, beken bara Tuhan itah Yesus Kristus je jari matei intu kayu sampalaki. Basa awi ie jari matei intu kayu samapalaki te, maka kalunen jaton rimae hindai akangku. Tuntang taharep kalunen jetoh, aku mahin kila-kilau jari matei. 6:15 Inyunat atawa dia inyunat, jete dia mambatang. Je mambatang iete manjadi oloh je taheta. 6:16 Akan kare oloh je belom hapan tirok jete, tuntang kalote kea akan hapus ungkup Hatalla, aku maharap Hatalla handak manenga kasanang tuntang asie. 6:17 Tuntang tinai, ije biti mahin ela aton oloh je manyusah aku tinai, basa intu bitingku aton kare bukti je aku toh oloh ain Yesus. 6:18 Keleh Tuhan itah Yesus Kristus harajur mamberkat pahari handiai. Hormat ikei, Paulus
1:1 Ungkup Hatalla hong Epesus, je baketep dengan Kristus Yesus! 1:2 Aku, Paulus, rasul Kristus Yesus tagal kahandak Hatalla, maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton. 1:3 Tara akan Hatalla, Bapa Tuhan itah Yesus Kristus! Ie mamberkat itah hapan kakare berkat roh intu huang sorga, awi itah hinje dengan Kristus. 1:4 Helo bara kalunen toh injapa, Hatalla jari mintih itah mahalau Kristus uka itah manjadi oloh ayue bewei tuntang jaton bara kasalan intu taharepe. Awi sintan Hatalla, 1:5 maka ie jari manukas bara helo mahalau Yesus Kristus, ie handak mangkat itah manjadi anak ayue kabuat. Tuntang puna jete je handak ilaluse. 1:6 Tara akan Hatalla je pangkahai, basa mahalau Anake je inyintae ie paham masi itah. 1:7 Basa, tagal pampatei Kristus itah ilapas awi Hatalla, jete rimae ie jari mampun itah bara kare dosan itah. 1:8 Ie malalus jete awi ie paham masi itah, tuntang asie te imparahae lepah akan itah hapan salepah kapintar-kaharati. 1:9 Manumon kahandak ayue kabuat, Hatalla mansanan akan itah rahasia rancanae; ie jari mamutus rancanae te akan impahapus mahalau Kristus. 1:10 Rancanae te iete uka kakare taloh handiai, aloh je huang sorga kalote kea je hunjun petak, manjadi ije dengan Kristus kilau kapala. Tuntang hal te akan impajadi lepah awi Hatalla amon katikae jari sampai. 1:11 Hatalla malalus taloh handiai manumon kahandake tuntang kaputusan ayue kabuat. Bara solake ie jari mintih itah awi ie handak mangat itah manjadi ungkup ayue awi itah ije dengan Kristus. 1:12 Itah je bara solake harap dengan Kristus, keleh itah manara Hatalla tagal kahaie! 1:13 Keton mahin jari manjadi ungkup ain Hatalla katika keton mahining peteh Hatalla, iete Barita Bahalap je mimbit salamat akan keton. Keton percaya dengan Yesus Kristus, tagal te Hatalla manenga tanda akan keton manjadi oloh ayue, iete Roh je injanjie. 1:14 Roh jete manjadi jaminan iete itah akan manarima taloh je jari injanji Hatalla akan ungkup ayue. Jete mawi itah percaya je Hatalla kareh maliwus ungkup ayue. Tara akan Hatalla tagal kahaie! 1:15 Tagal te, bara katika aku mahining keton percaya dengan Tuhan Yesus, tuntang keton sinta dengan hapus ungkup ain Hatalla, 1:16 aku jaton hakalayan manarimakasih akan Hatalla tahiu keton. Harajur aku manyewut aran keton amon aku balakudoa. 1:17 Aku balaku mangat Hatalla Tuhan itah Yesus Kristus, Bapa je pangkahai, manenga Roh ayue akan keton. Roh te kareh tau manjadian keton pintar-harati, tuntang handak mamparahan Hatalla akan keton sampai keton mangasene ie. 1:18 Aku balaku uka Hatalla muap tirok keton sampai manjadi balawa; mangat keton harati taloh je tau iharap keton bara Hatalla je mantehau keton. Tinai mangat keton katawan dia lue-luen kare berkat je bahalap je inatap Hatalla akan ungkup ayue; 1:19 tuntang dia lue-luen kapaham Hatalla bagawi hapan salepah kuasae huang itah je percaya. Kuasan Hatalla te sama kilau kuasa je jaton tanding-tampengae 1:20 je ihapan katika ie mambelom Kristus haluli bara pampatei tuntang manenga akae pangkat je gantong haliai haya-hayak dengan Hatalla hong sorga. 1:21 Pangkat Kristus te kejau kagantonge bara kakare pangkat huang pamarentah, bara kare panguasa, bara kakare pamimpin, bara kakare tuan tuntang eweh bewei je jari mandino pangkat gantong; en ie te oloh je belom wayah toh atawa je belom hong wayah je rahian. 1:22 Hatalla jari mampakalah kare taloh samandiai te penda kuasan Kristus, tuntang ie manenga Kristus akan ungkup kilau kapala akan kakare taloh handiai. 1:23 Ungkup te bitin Kristus, ininduh awie je maninduh taloh handiai hong kueh bewei.
2:1 Bihin keton matei secara roh awi keton badosa tuntang malanggar kare parentah Hatalla. 2:2 Hong katika te keton manumon ampin hadat kalunen jetoh; rimae keton mamenda kare taloh je mimbing kuasa intu langit iete roh je manguasa atei kare oloh je dia taat dengan Hatalla. 2:3 Bihin itah samandiai kea sama kilau ewen; itah belom manumon hadat itah olon, tuntang malalus taloh je manyanang biti tuntang tirok itah. Hong katika te itah toh oloh je buah kalait Hatalla kea, sama kilau oloh beken. 2:4 Tapi dia lue-luen kahain sintan atei Hatalla! Kalote kapahame ie sinta itah, 2:5 sampai hong katika itah magon matei secara roh tagal kare kasalan itah, ie mambelom itah haluli haya-hayak dengan Kristus. Jadi, baya awi kahalap atei Hatalla, keton inyalamat awie. 2:6 Awi itah hinje dengan Kristus Yesus, Hatalla mambelom itah haluli haya-hayak dengae, mangat itah marentah kea haya-hayak dengae huang sorga. 2:7 Hatalla malalus hal te mangat hong wayah je rahian, olon tau mite kapaham kahain sintan Hatalla. Sinta te imparahan Hatalla mahalau kahalap ateie dengan itah mahalau Kristus Yesus. 2:8-9 Hatalla sinta keton, jete bukue ie manyalamat keton awi keton percaya dengan Yesus. Kasalamat keton te dia ie hasil gawin keton kabuat. Jete baya panengan Hatalla. Jadi, ije biti mahin jaton oloh je tau mampatamam arepe tahiu hal te. 2:10 Itah toh inampa awi Hatalla, tuntang mahalau Kristus Yesus, Hatalla manampa itah uka itah malalus kare taloh je bahalap je jari inatape akan itah. 2:11 Pahari handiai je dia Yehudi! Keleh keton mingat ampin keton bihin: Keton inyewut "oloh je dia inyunat", awi oloh Yehudi je mangaku arepe inyunat (rimae je jari mandino tanda je inampa olon intu bitin ewen). 2:12 Hong katika te keton dia hinje dengan Kristus, keton metoh te oloh tamuei je dia tame ungkup je iintih Hatalla. Keton dia tame huang peteng janji je inampa Hatalla dengan ungkup ayue. Keton belom huang kalunen toh jaton huang kaharap tuntang jaton huang Hatalla. 2:13 Tapi toh, awi keton jari hinje dengan Kristus Yesus, keton je bihin kejau, jari impatokep awi pampatei Kristus. 2:14 Basa Kristus kabuat je manjadi pandamai itah. Ie mampahinje kare oloh Yehudi tuntang kare oloh je dia Yehudi manjadi ije utus oloh. Dinding pamisah je mahelat ewen, iete kamusoh, jari impalenyoh awi Kristus awie manyarah arepe kabuat uka impatei. 2:15 Hukum agama Yehudi dengan kare parentah tuntang kare atoran ayue impahapus awi Kristus mangat due utus oloh te manjadi ije jalahan oloh taheta, je hinje dengae. Hapan cara jete Yesus manampa kadamai. 2:16 Tagal pampateie hong kayu sampalaki Kristus mampahinje due utus oloh te, tuntang mandamai ewen dengan Hatalla, sampai kamusoh ewen te nihau. 2:17 Jete bukue Kristus dumah uka mangabar Barita Bahalap tahiu kadamai te akan keton; iete akan keton oloh je dia Yehudi je bihin kejau bara Hatalla, tuntang akan oloh Yehudi je tokep dengan Hatalla. 2:18 Mahalau Kristus, itah handiai -- aloh oloh Yehudi atawa dia Yehudi -- tau manokep Bapa awi Roh Hatalla ije te. 2:19 Awi te, keton dia hindai tatame oloh tamuei atawa oloh luar. Toh keton aton hinje dengan ungkup ain Hatalla. Keton toh anggota keluarga ain Hatalla. 2:20 Keton kea imangun intu hunjun galang je inyimpan awi kare rasul tuntang kare nabi, tuntang Kristus kilau batu je mambatang. 2:21 Ie te je manyusun hapus pangun te manjadi Human Hatalla je barasih baya akan Tuhan bewei. 2:22 Awi keton belom hinje dengan Kristus, keton kea kanjerae imangun hayak dengan kare oloh beken manjadi ije huma akan Hatalla; intu hete Hatalla melai dengan Roh ayue.
3:1 Jete bukue aku, Paulus, inamean akan penjara tagal Kristus Yesus akan kepentingan keton je dia Yehudi. 3:2 Batantu keton jari mahining iete Hatalla, awi kahalap ateie, jari manenga akangku gawi toh akan kepentingan keton. 3:3 Hatalla mukei rahasia rencanae tuntang mansanan jete akangku. (Tahiu hal toh jari inyuratku intu hunjun dengan ringkas, 3:4 tuntang amon keton mambasae, keton tau harati rahasia tahiu Kristus sama kilau aku kea haratie.) 3:5 Bihin rahasia te dia puji insanan akan olon, tapi Roh Hatalla jari mamparahan akan kare rasul tuntang kare nabi. 3:6 Rahasia te kalotoh: Mahalau Barita Bahalap te, oloh je dia Yehudi omba mangkeme kare berkat Hatalla je horan baya inatap akan oloh Yehudi. Kare oloh je dia Yehudi jari manjadi anggota ain biti ije te kea, tuntang omba manarima taloh je injanji Hatalla mahalau Kristus Yesus. 3:7 Hatalla manenga akangku panenga -- iete gawi -- uka mangabar Barita Bahalap te. Aku manarima panenga te mahalau kuasan Hatalla je bagawi huang aku. 3:8 Hong marak hapus ungkup Hatalla, aku toh je paling papa. Tapi Hatalla manenga akangku panenga toh: gawi uka mangabar akan kare oloh je dia Yehudi Barita Bahalap tahiu panatau Kristus je jaton tau lepah; 3:9 tuntang kea uka mahalau aku oloh handiai katawan kilen ampie Hatalla, Je Manjapa langit tuntang petak toh, malalus rencanae je bara horan basahokan akan kalunen. 3:10 Kahandak Hatalla iete uka toh, mahalau ungkup, kakare taloh je mimbing kuasa hong langit katawan kapintar-kaharatin Hatalla huang kakare macam ampin tampae. 3:11 Hatalla malalus jete hasaroroi dengan rencanae je katatahie, je ilaluse mahalau Kristus Yesus Tuhan itah. 3:12 Awi percaya dengan Kristus tuntang awi hinje dengae, itah mandino kamardeka mangat manokep Hatalla hapan sakalepah kapercayan itah. 3:13 Awi te, palakungku iete: ela mikeh tahiu kapehe je inyarenangku tagal keton, basa taloh handiai te uras akan kahalap keton. 3:14 Awi jete kea aku mandeko ututku intu taharep Bapa. 3:15 Bara ie kea genep keluarga hong sorga tuntang hunjun petak manarima Arae. 3:16 Aku balakudoa keleh Hatalla je pangkahaie pahias mampaabas atei keton hapan Roh ayue. 3:17 Keleh awi kapercayan keton dengan Kristus, Kristus melai huang atei keton, tuntang pambelom keton inggalang tuntang inguasa awi sinta. 3:18 Aku balakudoa keleh jaka haya-hayak dengan kakare ungkup ain Hatalla, keton tau marima lalehan kalombah tuntang kapanjang hayak kagantong tuntang kandalem sintan Kristus, 3:19 je mahapan akal olon dia olih irima salepah kahandalem hapan tirok oloh. Keleh keton mangasene sintan Kristus te, sampai keton inyuang awi sipat Hatalla je tinduh-barasih. 3:20 Hapan kuasan Hatalla je bagawi huang itah, Hatalla tau malalus taloh je labih are bara je olih itah balakue atawa maniroke. 3:21 Keleh Hatalla impahai turon-manuron huang ungkup, mahalau Kristus Yesus. Tara akan Hatalla sampai katatahie! Amen.
4:1 Jete bukue aku -- oloh tahanan, je inahan awiku melayani Tuhan -- balaku toto-toto dengan keton: keleh keton belom tumon pangkat keton kilau oloh je jari intehau Hatalla. 4:2 Keleh keton harajur randah atei, balemo, tuntang sabar. Parahan sintan keton awi keton mandohop sama arep keton. 4:3 Keleh keton manggau akal toto-toto uka belom huang kadamai mangat mahaga kahinje je injapa awi Roh Hatalla. 4:4 Biti baya aton ije, tuntang Roh ije. Kalote kea keton intehau akan ije kaharap jete kea. 4:5 Tuhan baya aton ije, kapercaya ije, pampandoi ije, 4:6 tuntang ije Hatalla je manjadi Bapa oloh handiai. Ie te Tuhan langit tuntang petak, je bagawi mahalau taloh handiai tuntang bara kuasa huang taloh handiai. 4:7 Genep bitin itah manarima ije panenga manumon taloh je inenga Kristus. 4:8 Huang Surat Barasih tarasurat, "Katika ie mandai' akan eka je gantong, ie mimbit are tawanan; tuntang ie manenga kare panenga akan olon." 4:9 Nah, amon inyewut "Ie mandai'" rimae solake ie jari mohon sampai akan eka je pangkarandahe hong kalunen toh. 4:10 Tuntang ie je jari mohon te, ie te kea je mandai' sampai akan eka je labih gantong haream bara kare langit sampai hapus taloh handiai je injapae basuang dengan pandumahe. 4:11 Ie kea je "manenga kare panenga akan olon"; akan belahe ie manenga pangkat rasul, akan je beken pangkat nabi, pangabar Barita Bahalap, pahaga ungkup tuntang kare guru. 4:12 Jete ilaluse uka ungkup Hatalla uras iharagapan mangat tau melayani Tuhan tuntang manjadi bitin Kristus. 4:13 Awi kalote itah handiai manjadi ije huang kapercaya jete kea tuntang kaharati je sama tahiu Anak Hatalla. Tuntang itah manjadi oloh bakas je sasar tinduh-barasih kilau Kristus. 4:14 Maka itah dia manjadi kilau anak korik hindai je murah hanyut awi dehes sepsimpan kare ajar ain kare oloh je apik manirok. Ewen mampalayang oloh hapan tanjaron ewen. 4:15 Dia! Tapi itah musti mamparahan kare taloh je bujur tuntang atei je kontep asi, sampai huang kakare hal itah sasar tahi sasar manjadi tinduh-barasih kilau Kristus, je manjadi kapalan itah. 4:16 Penda pimpinan ayue, kakare anggota biti tau inyusun-iator, tuntang je inontong awi kare sapan tolang kabuat-kabuat. Tuntang amon genep anggota te bagawi manumon kapunae, maka hapus biti te kareh belom manjadi batue' tuntang abas mahalau sinta. 4:17 Awi te tagal aran Tuhan, jetoh taloh je handak insanangku tuntang katukas auhku: ela hindai belom sama kilau oloh je dia mangasene Hatalla, tuntang manirok taloh je mia-mias. 4:18 Tirok ewen jari kaput. Ewen dia mangasene pambelom je inenga Hatalla, awi ewen samasinde jaton bara pangatawan en-en tahiu Hatalla. Ewen kalote, awi ewen batekang ateie. 4:19 Ewen jari jaton mangkeme kahawen hindai, sampai ewen manumon kakare kipen ewen, tuntang belom harayap sakahandak ateie. 4:20 Tapi Kristus je kasenan keton, dia kalote! 4:21 Keton jari mahining tahiu ie! Tuntang kilau oloh ayue, keton jari iajar kea tahiu kare sipat Hatalla je aton intu ie! 4:22 Tagal te engkak kaolon je usang tuntang cara belom je usang je irusak awi kare kahandak je mampalayang. 4:23 Keleh atei tuntang tirok keton inaheta lepa-lepah. 4:24 Keleh keton belom kilau olon taheta je injapa manumon sonto ain Hatalla; iete sipat je buah, bujur tuntang barasih. 4:25 Tagal te pahari, ela hindai mananjaro. Keleh lagon keton buah sama arep keton, awi itah handiai sama-sama anggota bitin Kristus. 4:26 Amon keton balait, ela manaluae sampai kalait te mawi keton badosa. Ela balait hapus andau, 4:27 mangat setan jaton mandino kesempatan. 4:28 Oloh je patuh manakau keleh terai manakau. Tapi ie musti bagawi mangat dinon rajaki dengan bujur-buah tuntang tau mandohop oloh je katapasan. 4:29 Amon keton hakotak ela mahapan kare auh je papa. Keleh mahapan auh je mampamangat tuntang manenga pandohop akan oloh beken. Kare auh kilau te akan mimbit kahalap akan kare oloh je mahininge. 4:30 Ela mangapehe atei Roh Hatalla. Keton jari inenga cap hapan Roh, manjadi oloh ain Hatalla. Roh te kea kilau jaminan je Andau Kaliwus te dumah akan keton. 4:31 Kanan kare angat kapehen atei, kasingi tuntang kalait. Ela hindai meha-mehang tuntang manyapa. Ela hindai aton angat kasingi atawa pangkeme beken je kilau te. 4:32 Tapi keleh keton bahalap atei tuntang pamasi sama arep keton, tuntang hampun sama kilau Hatalla kea mampun keton mahalau Kristus.
5:1 Keton toh anak Hatalla je inyinta, awi te keton musti manggau jalan uka manumon sonto bara Hatalla. 5:2 Pambelom keton keleh inyuang awi asi, sama kilau Kristus kea masi itah. Ie mangorban arepe akan itah, kilau ije parapah je mangat ewaue tuntang manyanang atei Hatalla. 5:3 Keton toh ungkup ain Hatalla. Awi te, kare gawi je harayap tuntang je dia sanonoh, atawa kabungo dia patut aton intu marak keton. Ela sampai oloh beken tau manampa alasan uka manyewut keton mawi kare taloh je kilau te. 5:4 Dia patut kea katon manyewut kare auh je papa, je harayap tuntang je dia pantas. Tapi keleh keton manarimakasih akan Hatalla. 5:5 Tampayah bua-buah: oloh je mawi karayap, atawa dia sanonoh, atawa kea kabungo (gawi kilau te sama ih kilau manyembah dewa), oloh te dia tau manjadi anggota ungkup je irentah awi Kristus tuntang Hatalla. 5:6 Ela keton buah tanjaro awi kare pander hayang. Basa kare hal te je mampalembut kalait Hatalla dengan kare oloh je dia mamenda ie. 5:7 Jadi, ela keton hapakat samasinde dengan kare oloh je macam te. 5:8 Keton kabuat bihin melai huang kakaput. Toh keton manjadi ungkup Tuhan, jadi keton melai huang kalawa. Tagal te keton musti melai huang kalawa. 5:9 Basa bara kalawa te lembut kakare macam gawi je bahalap, bujur tuntang tinduh intu tampayah Hatalla. 5:10 Keleh keton manggau jalan mangat mangasene taloh je manyanang atei Tuhan. 5:11 Ela malalus kare gawi je dia baguna je ilalus awi kare oloh je belom huang kakaput. Tapi keleh keton manampalak kare taloh macam te. 5:12 (Basa kare hal je ilalus ewen suni-suni te, mamandere mahinmampahawen.) 5:13 Taloh handiai je inyingah huang kalawa, akan gitan tarang. 5:14 Basa taloh handiai je tau inampayah dengan tarang, jete balawa. Maka jete sababe oloh manyewut, "Misik, o ikau bara tiroh, tuntang hingkat bara pampatei! Kristus kareh balawa paha-pahai hunjun ikau." 5:15 Awi te, riksa bua-buah cara keton belom. Ela belom sama kilau oloh humong; keleh belom kilau kare oloh je harati. 5:16 Keleh mangguna toto-toto genep katika je aton ain keton, awi wayah toh wayah je papa. 5:17 Ela humong, tapi keleh manantuani taloh je ingahandak Tuhan. 5:18 Ela keton babusau awi anggur, basa jete kareh marusak keton. Tapi keleh keton inguasa awi Roh Hatalla. 5:19 Keleh keton mahapan kare auh bara Masmur, nyanyi tara tuntang lago nyanyin ungkup huang kare kotak pander keton. Keleh keton mahapan kahanjak atei manyanyi tara akan Tuhan. 5:20 Tahiu taloh en bewei keleh keton manyewut tarimakasih akan Hatalla Bapa, huang aran Yesus Kristus Tuhan itah. 5:21 Mangat mahormat Kristus, keleh keton mamenda sama arep keton. 5:22 Oloh bawi je kawin keleh ie mamenda banae, sama kilau dengan Tuhan. 5:23 Basa oloh hatue manjadi kapala akan sawae, sama kilau Kristus kea manjadi kapala akan ungkup tuntang ie kabuat kea Raja Panyalamat akan ungkup je manjadi bitin ayue. 5:24 Sama kilau ungkup kea tundok dengan Kristus, kalote kea huang kakare hal sawae musti tundok dengan banae. 5:25 Oloh hatue keleh sinta sawae sama kilau Kristus sinta ungkup ayue hayak mangorban arepe akan ungkup te. 5:26 Kristus malalus jete uka ie tau marasih ungkup te hapan auh ajare tuntang mahalau danum pampandoi, mangat limbah te ie tau manyarahe tinai akan Hatalla. 5:27 Tagal kalote Kristus mampendeng ungkup te huang kahai tuntang tinduh intu taharepe, jaton cacat atawa kasalae en-en. 5:28 Kalote kea oloh hatue musti sinta sawae sama kilau ie sinta bitin ayue kabuat. Oloh je sinta sawae rimae ie sinta arepe kabuat. 5:29 (Jaton puji oloh je basingi dengan bitin ayue kabuat. Tapi iemahaga tuntang manjagae sama kilau Kristus kea mahaga ungkup ayue. 5:30 Itah katawan jete, awi itah toh anggota bitin Kristus.) 5:31 Huang Surat Barasih tarasurat, "Awi te ije biti oloh hatue kareh malihi indu-bapae mangat hinje dengan sawae, tuntang ewen due kareh manjadi ije." 5:32 Ayat jete aton rimae je handalem. Tuntang aku marima jete huang hubungan Kristus dengan ungkup. 5:33 Tapi ayat jete aton hubungae kea dengan keton: Keleh genep oloh hatue sinta sawae sama kilau ie sinta arepe kabuat tuntang keleh genep oloh bawi manggau akal uka mahormat banae.
6:1 O anak oloh! Kilau oloh ain Kristus, keleh mamenda oloh bakas keton karana jete je patut ilalus. 6:2 "Hormat bapam tuntang indum" jete parentah je solake bara Hatalla hapan janji, 6:3 iete: "Mangat ikau sanang tuntang panjang umurm hong kalunen". 6:4 Pahari handiai je manjadi bapa! Ela mawi kare anak keton kalote ampie sampai ewen balait. Tapi keleh keton mampahai ewen hapan atoran tuntang ajar bara Tuhan. 6:5 Pahari handiai je manjadi jipen! Keleh manumon parentah tuan keton je hong kalunen toh. Lalus jete hayak angat hormat tuntang panumon hayak hapan kahias kilau jaka keton malalus jete akan Kristus kabuat. 6:6 Ela keton malaluse baya metoh keton iator, baya handak mandino tara bara olon. Tapi keleh keton malaluse kilau jipen Kristus je manumon kahandak Hatalla hapan salepah atei. 6:7 Gawi je ilalus keton kilau jipen te keleh keton malaluse dengan kahanjak atei kilau jaka keton melayani Tuhan, tapi dia akan olon. 6:8 Keleh mingat, genep oloh, aloh jipen atawa oloh mardeka, kareh mandino baleh bara Tuhan tagal kare taloh bahalap je iawie. 6:9 Pahari handiai je manjadi tuan! Keleh keton mawie kalote kea dengan kare jipen keton. Ela hindai mahapan kare ancaman. Ingat, keton tuntang kare jipen te, sama-sama mamenda ije tuan, iete Tuhan je huang sorga. Ie dia mintih ampin olon. 6:10 Kalepahe haliai, keleh keton manjadi abas hapan kaabas je dinon keton bara kuasan Tuhan, awi keton ije dengae. 6:11 Keleh mahapan salepah pakakas perang je inenga Hatalla akan keton, mangat keton olih tahan malawan kare tirok papa ain setan. 6:12 Basa itah dia kalahi malawan olon, tapi malawan kaabas roh papa je manguasa langit. 6:13 Tagal te, toh keleh mahapan salepah pakakas perang bara Hatalla, mangat hong andau je papa keton olih malawan kare musoh je manyarang. Tuntang mangat limbah keton hakalahi sampai kalepahe keton magon menteng bahanyi. 6:14 Keleh keton bajaga tuntang batawat. Keleh mangkepan kaketep dengan Hatalla kilau peteng kahang, tuntang kabujur atei kilau baju sanaman. 6:15 Keleh kahias mangabar Barita Bahalap te je mimbit kasanang manjadi sapatun keton. 6:16 Sining katika keleh mahapan kapercaya dengan Tuhan kilau talawang; hapan kapercaya jete keton tau mambelep kakare isin panah apui bara taloh papa. 6:17 Keleh manduan salamat kilau tanggoi waja, tuntang auh Hatalla kilau padang bara Roh Hatalla. 6:18 Keleh malalus taloh handiai te sambil balakudoa mangat balaku dohop dengan Hatalla. Hong genep katika je buah, keleh balakudoa mangat Roh Hatalla mamimpin keton. Keleh keton harajur batawat tuntang ela manyarah. Keleh balakudoa harajur akan hapus ungkup Hatalla. 6:19 Tuntang keleh balakudoa akangku kea, mangat hong katika aku hakotak, Hatalla manenga akangku kare auh je buah. Tuntang mangat aku tau menteng ureh pangkemeku mansanan rahasia Barita Bahalap te. 6:20 Tagal Barita Bahalap te kea, aku manjadi ije biti sarohan tuntang metoh toh aton huang penjara. Keleh balakudoa mangat aku bahanyi hakotak tahiu Barita Bahalap te, kilau je tumon kapatute aku hakotak. 6:21 Tikhikus, paharin itah tuntang pelayan itah je baketep huang gawin Tuhan, kareh mansanan akan keton taloh handiai tahiu aku, mangat keton katawan tahiu keadaan ayungku tuntang gawingku. 6:22 Jete sababe aku manyoho ie manalih keton uka mansanan keadaan ikei akan keton handiai, hapan mampahai atei keton. 6:23 Keleh Hatalla Bapa, tuntang Tuhan Yesus Kristus mampahinje hapus ungkup uka bulat tuntang hasinta hayak tetep percaya dengan Kristus. 6:24 Keleh Hatalla mamberkat pahari handiai je sinta Tuhan itah Yesus Kristus hapan sinta je dia tau belep. Hormat ikei, Paulus
1:1 O pahari ungkup Hatalla samandiai je melai hong Pilippi, tuntang je jari hinje dengan Kristus Yesus. Tuntang kea kare pahari je mamimpin tuntang mandohop ungkup! Aku, Paulus, dengan Timoteus, kare rewar Kristus Yesus, 1:2 maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton. 1:3 Gagenep aku mingat keton, aku manyewut tarimakasih akan Hatalla. 1:4 Tuntang gagenep kali aku balakudoa akan pahari samandiai, aku balakudoa dengan sanang atei. 1:5 Aku manarimakasih akan Hatalla awi bara andau je solake sampai toh, keton jari mandohop aku mangabar Barita Bahalap ain Hatalla. 1:6 Hatalla kabuat je manampara gawi bahalap te akan keton, tuntang aku percaya ie kareh marajur gawi te sampai kahapuse hong Andau Kristus Yesus dumah haluli. 1:7 Puna buah toto akangku awi aton pangkemeku je macam te dengan keton, awi pahari samandiai harajur tokep hong ateiku. Tuntang kea awi keton haya-hayak dengangku omba manarima panenga je inenga Hatalla akangku; aloh metoh toh pandehan aku hong penjara atawa intu katika aku aton intu luar mangat mambela tuntang mandehen auh Barita Bahalap te. 1:8 Hatalla katawan aku taharu toto dengan keton awi angat sinta je paham huang Kristus Yesus kabuat. 1:9 Jetoh ie lakudoangku akan keton: Keleh keton sasar sinta Hatalla tuntang sinta sama arep keton tuntang harajur mandahang huang pangatawan je buah tuntang panampayah je harati. 1:10 Awi kalote keton tau mintih taloh je pangkahalape, tuntang pambelom keton tau barasih bara kasalan atawa bara auh dawa en bewei huang andau Kristus dumah haluli. 1:11 Pambelom keton kareh tau manjadi tatau dengan gawi je puna bahalap toto je baya tau ihasil awi Yesus Kristus kabuat; maka Hatalla kareh impahai tuntang inara. 1:12 Aku handak mangat keton mangatawan, kare hal je jari manjadi buah aku te mawi sabab oloh sasar are mahining tuntang percaya dengan Barita Bahalap te. 1:13 Kajariae, uras pangawal istana tuntang kare oloh beken hong lewu toh uras katawan je aku inamean akan huang penjara awi aku melayani Kristus. 1:14 Awi aku inamean akan penjara, jete mawi sabab oloh Kristen hong lewu toh manjadi labih percaya hindai dengan Tuhan, sampai ewen sasar bahanyi mambarita peteh Hatalla sambil jaton mike-mikeh. 1:15 Puna aton pire-pire oloh marak ewen je mambarita Kristus awi kahirin ateie tuntang handak hasoal, tapi aton kea oloh je beken mambarita Kristus dengan kahias atei je barasih. 1:16 Kare oloh toh malalus jete awi ewen sinta Hatalla tuntang sinta aku, basa ewen katawan Hatalla jari manyoho aku mangat mandehen Barita Bahalap te. 1:17 Tapi aton oloh beken je mambarita tahiu Kristus awi hapan kahandak je dia bahalap; ewen mambarita akan kepentingan arep ewen kabuat. Dengan cara te ewen maharap uka tau mawi aku labih susah hindai huang penjara. 1:18 Tapi dia en-en ih! Basa aloh kilen ampie kea, taloh je ilalus hapan kahandak je barasih atawa hapan kahandak je sala, aran Kristus mahin imbarita kea; jadi aku hanjak. Tuntang aku tetep mangkeme kalote. 1:19 basa aku katawan tagal kare lakudoan keton tuntang awi pandohop bara Roh Yesus Kristus, aku kareh iliwus. 1:20 Taloh je ingahandak tuntang iharapku toto iete uka ela samasinde aku gagal huang gawingku. Tapi aku harap uka genep katika, je mambatang toto wayah toh, aku tau menteng salepah bereng tuntang hambaruangku aloh aku belom atawa matei -- aran Kristus impahai. 1:21 Basa akangku, tintun pambelomku baya Kristus bewei! Tuntang matei jete ontong. 1:22 Tapi amon hapan pambelom hong kalunen toh, aku tau malalus gawi je labih baguna, maka aku dia katawan gawi je kueh je musti iintihku. Aku injijit bara due pihak. 1:23 Aku mipen toto malihi kalunen toh mangat tau haguet palus melai omba Kristus, basa jete ih je pangkahalape; 1:24 tapi awi baguna akan keton, labih bahalap amon aku melai hong kalunen. 1:25 Aku percaya tahiu hal te. Jete sababe aku katawan aku kareh tetep melai dengan pahari samandiai, mangat tau mandohop keton manjadi sasar sanang huang kapercaya dengan Tuhan. 1:26 Tagal te, amon aku kareh haluli manalih keton, keton je jari hinje dengan Yesus Kristus kareh mandino labih are hindai alasan mangat tau mangkeme anda-andal tagal aku. 1:27 Nah, je mambatang metoh toh iete keton belom hakabuah tumon taloh je inuntut awi Barita Bahalap tahiu Kristus te. Awi kalote, en aku tau hasondau dengan keton atawa dia, aku kareh mahining keton bulat segah tuntang sama-sama berjuang akan ije tujuan bewei tuntang ije kahandak; iete akan kapercaya je hakabuah dengan Barita Bahalap ain Hatalla te. 1:28 Keleh keton harajur bahanyi; ela mikeh manaharep kare oloh je malawan keton. Awi kalote keton kareh tau maninjok baun ewen awie kalah, tuntang keton kareh manang, basa Hatalla kabuat je manenga kamanang akan keton. 1:29 Basa Hatalla jari manyarah panenga akan keton dia baya mangat percaya dengan Kristus, tapi kea uka manyarenan kapehe akan Kristus. 1:30 Toh keton kea omba dengangku huang perjuangan te; iete je puji keton mite aku memperjuange bara bihin sampai toh, kilau je wayah toh jari ihining keton.
2:1 Keton abas, awi keton hinje dengan Kristus. Tuntang keton iampong awi Kristus sinta keton! Keton ingagalan Roh Hatalla, tuntang keton kea sinta sama arep keton tuntang mina sinta akan sama arep keton. 2:2 Nah, coba keton buju-bujur manyanang ateiku hapan kare hal toh: keleh belom hinje huang sinta je sama, hapan tirok je sama tuntang tintun kahandak je sama. 2:3 Ela malalus taloh en-en akan kapentingan arep kabuat, atawa handak mampatamam arep. Tapi keleh keton genep biti dengan randah atei maanggap oloh beken labih bahalap bara arep kabuat. 2:4 Keleh manantuani kapentingan oloh beken; ela baya kapentingan arep kabuat. 2:5 Keleh atei keton sama kilau Yesus Kristus: 2:6 Hong kapunae ie te sama dengan Hatalla, tapi ie dia mangkeme kahatallae te musti impertahan awie. 2:7 Tapi ie malekak taloh handiai te palus manjadi sama kilau ije biti rewar. Ie manjadi sama kilau olon, tuntang ampie belom sama kilau olon. 2:8 Ie mamparandah arepe, tuntang belom kete-ketep dengan Hatalla sampai matei -- iete matei hong kayu sampalaki. 2:9 Tagal te Hatalla manggatang ie salepah kagantonge, hayak manenga akae kuasa je labih hai bara kakare kuasa awang beken. 2:10 Maka uka mahormat Yesus, salepah kawan taloh belom hong sorga, tuntang hunjun petak, tuntang je hong penda petak, kareh manyembah ie. 2:11 Ewen samandiai kareh mangaku Yesus Kristus te Tuhan: awi kalote Hatalla Bapa impahai. 2:12 Tagal te, pahari handiai je inyinta, sama kilau keton mamenda aku katika aku aton hong marak keton, maka labi-labih katika toh metoh aku kejau, keleh keton kete-ketep hindai dengangku. Keton jari inyalamat awi Hatalla, jadi keleh tarus manggau jalan mangat kasanang keton manjadi tinduh-barasih. Lalus jete dengan hormat tuntang kaketep dengan Hatalla, 2:13 karana Hatalla kabuat je bagawi hong keton mangat keton pahias tuntang mangat olih manyanang atei Hatalla. 2:14 Lalus kare taloh handiai hayak dia bakotok tuntang dia hakalawan. 2:15-16 Awi kalote keton mamparahan arep keton puna anak Hatalla je jaton bara kasalan, je belom dengan kabujur tuntang bujur atei hong marak oloh papa tuntang badosa. Tuntang hong katika keton manyampai akan ewen barita je mimbit pambelom, keleh keton manjadi oloh je sama kilau kalawa je paha-pahai mampalawa kalunen. Amon keton belom sama kilau te, kareh aton alasan akangku mangkeme tamam tahiu keton hong katika Yesus Kristus dumah haluli. Jete buktie perjuangan ayungku dia hayang tuntang gawingku te aton hasile. 2:17 Tau kea aku toh kareh impatei tuntang dahangku manjadi parapah je inusoh hunjun taloh je iluput keton akan Hatalla kilau tanda keton puna percaya dengae. Amon jete puna musti kalote, aku manarimakasih tagal hal te tuntang omba hanjak dengan keton. 2:18 Kalote kea keleh keton mangkeme hanjak tuntang omba hanjak dengangku. 2:19 Hapan pandohop Tuhan Yesus, aku percaya tau bajeleng manyoho Timoteus manalih keton, mangat aku tau iampong awi barita tahiu keton. 2:20 Baya Timoteus kabuat ih oloh je sama ateie dengangku, tuntang buju-bujur manirok kasanang keton. 2:21 Oloh awang beken te baya maurus kepentingan arepe kabuat ih, dia kepentingan Yesus Kristus. 2:22 Keton kabuat jari mite buktie Timoteus te puna baguna. Ie jari bagawi paham mampahayak aku uka mambarita Barita Bahalap bara Hatalla. Ikei badue sama kilau bapa dengan anak ih. 2:23 Tagal te, dia tahi limbah aku mangatawan kilen ampie kajarian perkara ayungku kareh, aku handak mampait ie manalih keton. 2:24 Hapan pandohop Tuhan, aku percaya aku kabuat mahin dia tahi hindai handak maja keton kea. 2:25 Tahiu paharin itah Epaproditus je impait keton uka mandohop aku, aku mangkeme perlu uka manyoho ie haluli manalih keton. Ie jari mampahayak aku huang gawi tuntang perjuangan ayungku. 2:26 Ie taharu toto dengan pahari samandiai, tuntang ie gelisah awi keton jari mandino barita ie haban. 2:27 Puna toto ie haban sampai handak matei. Tapi Hatalla masi dengae; tuntang dia baya dengae bewei, tapi dengangku kea, mangat ela aku manjadi labih kapehe atei hindai. 2:28 Jete sababe aku sasar hai hindai kahandakku uka manyoho ie haluli manalih keton, uka keton hanjak tinai amon keton hansondau dengae tuntang ateiku kea manjadi sanang. 2:29 Jadi, keleh tarima ie hapan kakare kasanang atei kilau ije biti pahari je sama kapercayae. Keleh marega oloh handiai sama kilau ie. 2:30 Akan gawin Kristus karenga ih ie matei; ie dia manyayang hambaruae uka mandohop aku tagal aran keton.
3:1 Kajariae, paharingku samandiai, keleh keton hanjak awi keton jari hinje dengan Tuhan. Aku dia mangkeme babehat manangkaluli taloh je jari inyuratku akan keton bihin; awi hal te bahalap akan kasalamat keton. 3:2 Keleh bua-buah manaharep kare oloh je malalus kare taloh papa iete kare oloh je patut inyewut 'aso'. Ewen te hajajuan mangat kare oloh uras inyunat. 3:3 Padahal itah toh oloh je jari manarima sunat je bujur, ewen te dia. Itah manyembah Hatalla ingagalan Roh Hatalla kabuat, tuntang itah manarimakasih awi itah belom hinje dengan Kristus Yesus. Itah dia bahapang dengan kare upacara je gitan hila luar bewei. 3:4 Sapunae aku tau ih bahapang dengan kare upacara te. Basa amon aton oloh je mangkeme ie aton alasan uka bahapang dengan upacara je gitan bara hila luar, mahin hindai aku. 3:5 Aku inyunat katika umurku hanya andau. Aku inakan kilau ije biti oloh Israel, bara suku Benyamin; aku oloh Ibrani tulen. Huang hal mamenda kare hukum agama Yehudi, aku toh oloh golongan Parisi. 3:6 Aku malah paham karajingku sampai aku mangapehe ungkup. Amon inilai manumon hukum agama Yehudi, aku toh oloh bahalap je jaton bara kapapa. 3:7 Tapi tagal Kristus, maka taloh handiai je bihin ianggapku kilau taloh je manenga kaontong, toh menjadi taloh je mamparugi. 3:8 Dia baya kare hal jete; tapi kare taloh handiai mahin ianggapku uras mamparugi ih. Taloh je aton huang aku wayah toh je labih barega: iete mangasene Kristus Yesus, Tuhan ayungku. Tagal Kristus, maka aku jari malekak taloh handiai. Aku maanggap taloh handiai te uras kilau rotik ih, mangat aku tau mandino Kristus, 3:9 tuntang toto-toto hinje dengae. Hubungan je bahalap dengan Hatalla dia hindai aku manggaue kabuat mahalau jalan mamenda kare hukum agama. Toh aku aton hubungan je bahalap dengan Hatalla te, awi aku percaya dengan Kristus. Jadi, hubungan je bahalap te pandumahe bara Hatalla, tuntang hagalang kapercaya dengan Kristus. 3:10 Ije ih taloh je ingahandakku iete uka aku mangasene Kristus, tuntang mangkeme kuasa je mambelom ie bara pampatei. Aku mipen omba buah kapehe dengae tuntang manjadi sama kilau ie huang hal pampateie. 3:11 Tuntang aku harap aku kabuat kareh imbelom haluli bara pampatei. 3:12 Aku dia manyewut aku jari bahasil, atawa jari manjadi tinduh-barasih. Tapi aku harajur manggoang panenga je inatap awi Kristus Yesus. Akan te kea ie jari manduan aku tuntang manjadian aku oloh ayue. 3:13 Puna batantu kea, pahari handiai, sapunae aku dia mangkeme aku jari bahasil manduan hadiah te. Tapi aton ije hal je handak iawiku, iete aku mangalapean taloh je hila likutku tuntang manggau jalan toto-toto mangoang taloh je hila baungku. 3:14 Jete sababe aku harajur hadari manintu taloh je eka kahapuse uka mandino kamanang, iete belom hong sorga; akan jete Hatalla mantehau itah mahalau Kristus Yesus. 3:15 Itah handiai je jari bakas secara roh, keleh manjadi kalote. Tapi amon aton oloh hong marak keton je manirok beken bara te, maka Hatalla kareh manarang jete akan keton. 3:16 Aloh kalote keleh keton manantuani hal jetoh: Itah musti tetep belom manumon atoran je jari inumon itah sampai katika toh. 3:17 Pahari handiai keleh manumon sonto bara aku. Ikei jari manenga sonto je bujur, tagal te tampayah bua-buah kare oloh je manumon sonto bara ikei te. 3:18 Aku jari kinjap mansanan akan keton, tuntang toh aku manangkalulie tinai hayak manangis, iete are toto oloh je belom marusak riman pampatei Kristus intu kayu sampalaki. 3:19 Lawin pambelom kare oloh je kilau te kareh iete kahancuran, awi dewa ain ewen iete kipen isin ewen kabuat. Kare hal je mampahawen, ewen malah mampatamame; awi ewen baya manirok kare taloh je eka karajin kalunen jetoh bewei. 3:20 Tapi itah toh oloh ain karajaan sorga. Bara hete kea Raja Panyalamat itah, Tuhan Yesus Kristus akan dumah. Ie te je ientai itah hayak angat kataharu. 3:21 Bitin itah je belemo tuntang tau lenyoh toh, kareh iobah awi Kristus manjadi sama kilau bitie kabuat je paham kahalape. Ie tau malalus jete awi ayue aton kuasa hapan mamparundok kare taloh handiai.
4:1 Tagal te pahari handiai je inyinta, keleh keton belom kilau te hayak toto-toto percaya dengan Tuhan. Ateiku taharu dengan keton! Keton ih je eka kaandal ateiku je tau mawi aku hanjak. 4:2 Pahari Ewudia tuntang pahari Sintike! Aku balaku nyame-nyame uka pahari hinje bulat atei kilau oloh je sama kapercayae. 4:3 Akan kare kawalku je baketep dengangku, aku balaku kea mangat pahari mandohop kadadue oloh bawi te. Ewen jari bagawi paham omba aku mangat mangabar Barita Bahalap bara Hatalla; sama kilau Klemen tuntang kakare oloh beken te je bagawi omba aku. Kare aran ewen te aton huang Surat ain Oloh Belom. 4:4 Keleh keton harajur hanjak awi keton jari belom hinje dengan Tuhan. Sinde tinai aku hamauh: keleh keton hanjak! 4:5 Keleh oloh handiai tau mite ampin lagon keton je bahalap atei. Basa dia tahi hindai Tuhan akan dumah. 4:6 Ela keton mikeh tahiu taloh en bewei. Huang kare taloh handiai, keleh balakudoa tuntang nyampai palakun keton akan Hatalla. Keleh sanan harajur akan Hatalla taloh je imerlu keton hayak manyewut tarimakasih. 4:7 Maka kasanang bara Hatalla je manangkalau batas kaharatin itah, akan manjaga atei tuntang tirok keton je jari hinje dengan Kristus Yesus. 4:8 Kajariae, pahari handiai, suang kare tirok keton hapan kare taloh je barega, je patut inara, iete kare taloh je bujur, je ihormat, je adil, barasih, manis tuntang bahalap. 4:9 Lalus taloh je iajar akan keton tuntang je inarima keton bara aku; aloh bara kare auhku atawa bara kare gawingku. Hatalla te upon kasanang, kareh mampahayak keton. 4:10 Huang pambelomku je hinje dengan Tuhan, aku mangkeme sanang toto, awi limbah kalote katahie, toh keton olih tinai manirok keadaan ayungku. Maksudku dia ie awi keton jari kalapean aku, keton puna manantuani aku, tapi keton jaton sampet mamparahan jete. 4:11 Aku mansanan hal toh dia ie awiku tapas, basa aku jari bajar mangkeme sukup dengan taloh je aton. 4:12 Aku jari harajur mangkeme belom saraba tapas, tuntang kea belom huang kalabien. Aku jari mangasene rahasiae uka manaharep taloh je kilen ampie kea; aloh huang keadaan tatau atawa keadaan susah, aloh huang keadaan aton atawa huang keadaan tapas. 4:13 Hapan kuasa je inega Kristus akangku, aku aton kaabas uka manaharep kare macam ampin taloh je aton. 4:14 Tapi keton jari mandohop aku huang kasusahku; tuntang taloh je ilalus keton te puna bahalap. 4:15 Pahari handiai oloh Pilippi! Keton kabuat katawan toto katika aku malihi Makedonia bihin, metoh pangkasolake haliai aku mangabar Barita Bahalap te, tikas keton ih ungkup je mandohop aku; tikas keton ih je omba mangkeme ontong rugi haya-hayak dengangku. 4:16 Katika aku huang Tesalonika tuntang perlu pandohop, jari labih bara sinde keton mampait pandohop akangku. 4:17 Jete dia baarti aku baya handak manarima panenga. Taloh je ingahandakku iete uka aku tau mite kare hasil je mandahang kaontong akan keton. 4:18 Aku jari manarima taloh samandiai te -- malah labih bara sukup! Kakare panenga je impait keton akangku, jari inarimaku bara Epaproditus. Toh kare taloh je imerluku jari aton intu aku. Kare panengan keton te sama kilau parapah je mangat ewaue je inyarah akan Hatalla tuntang inarima awi Hatalla dengan sanang atei. 4:19 Hatalla je inyembahku, je hakotoh dengan katatau huang Kristus Yesus, kareh manyukup kare taloh je imerlu keton. 4:20 Tara akan Hatalla Bapa itah sampai katatahie! Amen. 4:21 Keleh manyampai tabengku akan hapus ungkup Hatalla je hinje dengan Kristus Yesus. Tuntang tarima kea tabe bara kare pahari je aton omba aku intu hetoh. 4:22 Hapus ungkup Hatalla hong lewu toh, je mambatang ewen je bara istana Kaisar, mampait tabe akan keton. 4:23 Keleh Tuhan Yesus Kristus mamberkat pahari samandiai. Hormat ikei, Paulus tuntang Timoteus
1:1-2 Kare pahari handiai, ungkup ain Hatalla hong Kolose je baketep atei hinje dengan Kristus! Kilau rasul Kristus Yesus -- tagal pangkat je inenga Hatalla -- aku Paulus, haya-hayak dengan paharin itah Timoteus, maharap keleh Hatalla Bapa itah manenga berkat tuntang kasanang akan keton. 1:3-4 Ikei jari mahining je keton jari percaya dengan Yesus Kristus tuntang keton sinta dengan ungkup ain Hatalla. Jete bukue katika ikei balakudoa akan keton, ikei harajur manyewut tarimakasih akan Hatalla, Bapa Tuhan itah Yesus Kristus. 1:5 Keton percaya tuntang keton sinta awi keton harap dengan taloh je inatap huang sorga awi Hatalla akan keton. Keton jari mahining tahiu hal te, katika Barita Bahalap je bujur inyampai akan keton. 1:6 Barita bara Hatalla te tayap akan hapus kalunen, tuntang pambelom oloh harajur imberkat tagal barita te, sama kilau pambelom keton imberkat bara katika keton mahining tahiu asin Hatalla tuntang toto-toto mahagae. 1:7 Hal te inyampai akan Pahari mahalau Epapras, kawal ikei bagawi je inyinta. Ie te oloh panggawi ain Kristus je baketep bagawi akan kepentingan itah. 1:8 Bara ie ikei mahining je hapan kuasan Roh Hatalla keton tau hasinta sama arep keton. 1:9 Jete bukue ikei harajur balakudoa akan keton sana ikei mahining tahiu keton. Ikei balaku dengan Hatalla mangat Roh Hatalla manenga akan keton kapintar-kaharati tuntang pangasene sampai keton mangatawan taloh je ingahandak Hatalla dengan tinduh-barasih. 1:10 Dengan kalote keton tau belom manumon kahandak Hatalla, tuntang harajur manyanang ateie, sampai huang kare taloh handiai keton tau mampalembut kare taloh je bahalap. Tuntang pangatawan keton tahiu Hatalla mahin sasar mandahang kea. 1:11 Keleh mahapan kuasa bara Hatalla je pangkahai te, keton impaabas sampai keton olih manyarenan kakare kapehe dengan sabar tuntang dengan sanang atei 1:12 tuntang sambil manyewut tarimakasih akan Bapa. Basa Bapa te je mangilak uka keton manarima taloh je inatap Hatalla akan oloh ayue huang karajaan ayue je tarang kalawae. 1:13 Ie jari maliwus itah bara kuasan kakaput tuntang mindah itah akan karajaan Anake je inyintae. 1:14 Tagal Anake te itah iliwus; rimae, kare dosan itah jari iampun. 1:15 Kristus te gambar Hatalla. Hatalla je dia gitan tau gitan huang Kristus. Kristus te Anak je tambakase, labih mambatang bara kare taloh handiai je injapa Hatalla. 1:16 Basa mahalau ie Hatalla manjapa kare taloh handiai hong sorga tuntang hunjun petak, kare taloh handiai je gitan tuntang je dia gitan, tatamput kea kare roh je mimbing kuasa tuntang marentah. Langit tuntang petak dengan kare taloh huange uras injapa mahalau Kristus tuntang akan Kristus. 1:17 Helo bara kare taloh handiai aton, Kristus jari aton. Maka awi Kristus kea maka kare taloh handiai te aton hong ekae kabuat-kabuat. 1:18 Ie te takolok ain bitie, iete ungkup, awi ie te upon pambelom ain ungkup te. Ie te Anak je tambakase, je pangkasolake imbelom bara pampatei, mangat ie bewei je paling mambatang bara kakare taloh samandiai. 1:19 Hatalla kabuat je handak uka kare taloh handiai je aton huang bitin Hatalla, lepah uras aton kea huang bitin Anake. 1:20 Tuntang mahalau Anak te kea Hatalla manukas uka taloh handiai hakabuah tinai dengae -- taloh handiai je hunjun petak tuntang je huang sorga. Hatalla malalus jete mahalau pampatei Anake hong kayu sampalaki. 1:21 Bihin keton kejau bara Hatalla. Keton manyingi ie hapan ampin lagon pambelom keton tuntang tirok keton je papa. 1:22 Tapi toh, awi pampatei Anake, Hatalla manun keton hakabuah tinai dengae. Hapan cara jete keton tau iimbit manaharep Hatalla huang katinduh, karasih, tuntang jaton kasalan. 1:23 Tapi batantu keton musti baketep percaya tuntang mendeng segah huang kapercayan keton. Ela sampai keton malekak kaharap je jari inenga akan keton katika keton manarima Barita Bahalap bara Hatalla. Barita te jari insanan akan genep bitin oloh hong hapus kalunen. Tuntang akan jete kea aku, Paulus, manjadi pelayan. 1:24 Toh aku hanjak mangkeme kapehe akan kepentingan keton. Basa hapan kapehen bitingku, aku manyukup kare kapehe je magon musti ingkeme awi Kristus akan ungkup ayue, iete bitin ayue. 1:25 Hatalla manyoho aku manjadi pelayan ungkup ayue akan kepentingan keton. Aku musti manyampai barita bara Hatalla, lepa-lepah; 1:26 iete barita je katahin baratu-ratus nyelo je jari halau iingkes awi Hatalla akan kare oloh samandiai, tapi toh imparahan akan ungkup ayue. 1:27 Akan ungkup ayue te Hatalla handak mamparahan lalehan kahalap tuntang kahaie barita te akan hapus ungkup oloh kalunen. Barita je iingkes te iete: Kristus aton huang arep keton, jete rimae keton kareh omba mangkeme kahain Hatalla. 1:28 Kristus te je imbarita ikei akan genep bitin oloh. Ikei mampingat tuntang majar ewen handiai mahapan kapintar-kaharati. Kahandak ikei iete mangat ikei tau mimbit genep bitin oloh manalih Hatalla, kilau oloh je jari batue' huang hal rohani, awi ikei jari ije dengan Kristus. 1:29 Mangat kahandak te tau sampai, maka aku bagawi paham. Aku berjuang hapan salepah kaabas je inenga Kristus akangku tuntang je bagawi huang aku hapan salepah kuasae.
2:1 Aku handak uka keton mangatawan kilen ampie kapahame aku bagawi akan keton tuntang akan ewen je intu Laodikea tuntang ewen handiai je dia mangasene aku secara pribadi. 2:2 Taloh handiai toh ilalusku mangat atei ewen manjadi abas tuntang ewen hasinta sama arepe sampai ewen bulat hinje. Awi kalote ewen toto-toto harati tuntang percaya hayak mangasene rahasian Hatalla, iete Kristus kabuat. 2:3 Kristus te mambuka kare kapintar-kaharati tuntang pangatawan Hatalla je horan basilim. 2:4 Aku mansanan hal toh mangat keton ela inanjaro awi eweh bewei je auhe manis-menyak dengan keton. 2:5 Basa aloh aku kejau bara keton, anggap ih aku toh aton hong marak keton. Tuntang aku hanjak mite keton bulat atei tuntang kapercayan keton dehen dengan Kristus. 2:6 Pahari handiai jari manarima Kristus Yesus kilau Tuhan. Tagal te keleh keton belom hinje dengae, 2:7 tuntang muhat huang ie. Keleh keton mampendeng pambelom keton mahapan Kristus kilau galange. Keleh keton sasar percaya dengan Kristus, manumon taloh je jari iajarku akan keton. Tuntang keleh atei keton ingalasut hapan auh tarimakasih. 2:8 Keleh keton mahaga arep keton bua-buah, ela sampai aton oloh je maningkes keton hapan kare kaji-patua ain oloh je dia baguna, tapi baya mampalayang. Kare kaji-patua te dia bara Kristus, malengkan bara tirok olon bewei tuntang bara kare roh panguasa ain kalunen. 2:9 Basa salepah tampan bitin Hatalla melai huang Kristus, iete huang kaoloe. 2:10 Tuntang awi keton belom hinje dengan Kristus, akan keton kea inenga pambelom je sukup-simpan. Basa Kristus te manjadi Kapala mahunjun kare roh je mimbing kuasa tuntang je marentah. 2:11 Awi hinje dengan Kristus, keton jari inyunat, dia mahapan sunat je inampa awi olon, malengkan awi sunat je inampa awi Kristus, je maliwus keton bara kuasan taloh je badosa. 2:12 Basa hong katika keton impandoi, keton ingubur haya-hayak dengan Kristus; tuntang hapan pampandoi jete kea, keton omba imbelom haluli haya-hayak dengan Kristus awi keton percaya dengan kuasan Hatalla je jari mambelom Kristus bara pampatei. 2:13 Bihin, keton jari matei secara roh awi keton badosa, tuntang awi keton dia inyunat secara kaolon. Tapi toh Hatalla mambelom keton haya-hayak dengan Kristus. Hatalla jari mampun kare dosan itah, 2:14 tuntang mambalang surat utang itah, je mampikeh itah mahapan kare syarat je babehat. Awie manyampalaki surat te intu kayu sampalaki, Hatalla mangabus kakare auh dawa je mawi itah. 2:15 Intu kayu sampalaki te Kristus mawi kare roh je marentah tuntang je mimbing kuasa, manjadi nihau kaabase. Ewen manjadi akan indu tampayah oloh are hong katika Kristus mihir ewen kilau oloh tawanan huang barisan kamanang ayue. 2:16 Tagal te ela manalua oloh manyalan keton tahiu taloh kinan atawa taloh ihop, atawa tahiu kare andau hai agama, atawa kare andau hai hong bulan taheta, atawa tahiu andau Sabat. 2:17 Kakare taloh te baya kangkalingen kare taloh je kareh dumah, tapi huang kanyataae kare taloh te iete Kristus! 2:18 Ela keton manalua arep keton imparugi awi oloh je pura-pura mamparandah arepe tuntang je manyembah kare malekat. Oloh te balecak awi kare tirok je mangalunen tuntang mampatamam kare taloh tampayahe je basilim, 2:19 sampai oloh te dia hindai bahimbing dengan Kristus je manjadi kapala. Hong penda pimpinan Kristus, salepah biti ihaga tuntang impahinje hapan kare sahepan tulange, hayak belom manumon kahandak Hatalla. 2:20 Keton jari matei haya-hayak dengan Kristus, tuntang jari iliwus bara kare roh je mimbing kuasa hong hapus kalunen toh. Nah mbuhen keton belom kilau oloh je magon inguasa awi kalunen toh? Mbuhen keton tundok dengan kare atoran kilau toh, 2:21 "Ela mimbing jetoh", "Ela mangkeme jete", "Ela manigong jetoh"? 2:22 Kakare atoran te uras manahiu kare hal je limbah ihapan palus dia ingguna hindai. Kare atoran tuntang kare ajar jete baya inampa awi olon. 2:23 Taloh te, ampie puna kilau kapintar-kaharati, awi koae mangat oloh manyembah malekat, mamparandah arep tuntang mangapehe arep; tapi taloh handiai te dia baguna hapan mangamburi kipen olon.
3:1 Keton jari imbelom haluli haya-hayak dengan Kristus. Awi te keton musti manggau jalan uka mandino kare taloh je huang sorga, eka Kristus marentah haya-hayak dengan Hatalla. 3:2 Keleh mansahan kare tirok keton akan kare taloh intu kanih, ela intu kare taloh je hong kalunen. 3:3 Awi keton jari matei, tuntang pambelom keton basahokan dengan Kristus huang Hatalla. 3:4 Nah, batang pambelom keton je bujur iete Kristus tuntang amon ie kareh gitan, keton kea tau maju akan baun haya-hayak dengae huang kahaie! 3:5 Tagal te, keleh mampatei kare kipen kalunen je mamparise keton, kilau karayap, kare hal je dia sanonoh, kalasut kipen, kipen je papa, tuntang kabungo (basa kabungo jete sama kilau manyembah dewa). 3:6 Kare taloh je kilau te uras mampalembut kalait Hatalla akan kare oloh je dia mamenda ie. 3:7 Bihin keton kabuat mahin manumon kare kipen te, metoh keton inguasa awie. 3:8 Tapi toh keleh keton manganan kare taloh je papa bara arep keton: ela hindai balait atawa mamok atawa mingkes angat kasingi dengan oloh beken. Ela samasinde balua bara nyaman keton kare auh sapa atawa kotak je papa. 3:9 Ela hatanjaro sama arep keton, basa pambelom je usang dengan kare sipate jari ilekak keton. 3:10 Keton wayah toh jari mandino pambelom je taheta. Keton toh oloh je taheta, je kanjerae inaheta raju-rajur awi je manjapae, iete Hatalla, manumon tamunan ayue kabuat. Kahandake iete mangat keton mangasene Hatalla dengan tinduh-barasih. 3:11 Kajariae maka palus nihau kapisah je aton marak oloh Yehudi dengan oloh je dia Yehudi, oloh je basunat, dengan oloh je dia basunat; jaton hindai kabekee akan oloh tamuei dengan akan oloh je dia bahadat, atawa jipen dengan oloh je mardeka, basa Kristus iete kare taloh handiai tuntang ie hinje dengan kakare taloh te! 3:12 Pahari handiai, keton toh ungkup ain Hatalla. Hatalla masi keton tuntang mintih keton uka manjadi oloh jalahan ayue. Jete bukue keton musti mamparahan sinta tuntang asi, keton musti bahalap atei, randah atei, balemo-luwah, tuntang tahan manyarenan kapehe. 3:13 Keton musti sabar dengan sama arep keton, tuntang tau mampun amon aton oloh je mingkes kasingi dengan kolae. Dengan sanang atei Tuhan handak mampun keton, jadi keton kea musti handak mampun sama arep keton. 3:14 Tuntang je paling mambatang iete: keton musti hasinta sama arep keton basa sinta te je mampahinje-mambulat kare pahari samandiai sampai keton manjadi tinduh-barasih. 3:15 Keleh kare taloh je imutus keton imutus hapan kadamai je inenga Kristus huang atei keton. Basa Hatalla mantehau keton uka manjadi anggota bara biti ije, mangat keton belom huang kadamai ain Kristus te. Keleh keton manyewut auh tarimakasih. 3:16 Kare auh ajar Kristus je kontep berkat te keleh jete misap huang atei keton. Keleh keton hajar tuntang hatenga nasehat hapan salepah kapintar-kaharatin keton. Keleh manyanyi masmur tuntang nyanyi tara tuntang kare nyanyin ungkup; keleh manyanyi akan Hatalla hapan angat tarimakasih huang atei keton. 3:17 Kare taloh handiai je ilalus tuntang ingotak keton, keleh jete ilalus tuntang ingotak tagal aran Tuhan Yesus. Keleh manarimakasih akan Hatalla Bapa tagal taloh je ilalus Yesus akan keton. 3:18 Pahari handiai je manjadi sawan oloh hatue! Keleh keton manumon auh banan keton, basa jete kapatut hadat keton kilau oloh Kristen. 3:19 Pahari handiai je manjadi banan oloh bawi! Keleh keton sinta sawan keton. Ela kasar dengan ewen. 3:20 O kare anak oloh! Kilau oloh Kristen maka kapatut keton iete harajur manumon kare auh indu-bapa keton, karana jete je manyanang atei Hatalla. 3:21 Pahari handiai je manjadi bapa! Ela mangapehe atei anak keton sampai ewen manjadi nihau kaharape. 3:22 Pahari handiai je manjadi jipen! Huang taloh handiai, keleh keton manumon kare auh tempon keton hong kalunen toh. Ela keton manumon baya metoh ewen manantuani keton awi keton handak balaku tara. Keleh manumon auh ewen hapan atei je barasih, awi keton mahormat Tuhan. 3:23 Gawi en bewei je inenga akan keton, keleh keton malaluse hapan salepah atei keton, ampin keton kila-kilau handak melayani Tuhan, tuntang dia melayani olon. 3:24 Keleh mingat keton kareh manarima upah bara Tuhan. Taloh je inatap Tuhan akan ungkup ayue, jete kea je handak inengae akan keton. Basa tempon keton je sapunae ilayani keton iete Kristus kabuat. 3:25 Tuntang eweh bewei je mawi kasalan, kareh mananggong kare kasalan te; basa Tuhan dia mintih ampin oloh.
4:1 Pahari handiai je manjadi tuan! Keleh keton manaharep kare jipen keton dengan bujur tuntang buah. Keleh mingat, ain keton mahin aton ije biti Tuan huang sorga. 4:2 Keleh keton balakudoa harajur tuntang batawat, sambil manarimakasih akan Hatalla. 4:3 Keleh balakudoa akan ikei mangat Hatalla manenga akan ikei katika je bahalap uka manawor barita tahiu rahasia ain Kristus. Tagal hal te kea maka aku metoh toh aton huang penjara. 4:4 Keleh balakudoa mangat aku tau manarang rahasia te lepa-lepah manumon kapunae. 4:5 Tahiu hubungan keton dengan kare oloh je dia percaya, keleh keton belom pintar-harati tuntang mangguna kare katika je aton dengan bahalap. 4:6 Keleh kare taloh je inyewut keton harajur mampamangat tuntang mampahanjak oloh. Keleh keton katawan kilen ampie kapatut keton tombah kare auh paisek oloh dengan keton. 4:7 Tikhikus, paharin itah je inyinta, kareh mansanan akan keton taloh handiai tahiu aku. Ie baketep bagawi akan Tuhan haya-hayak dengan ikei. 4:8 Aku mampait ie akan keton awiku handak uka keton mangatawan keadaan ikei tuntang keton iampong. 4:9 Onesimus akan haguet haya-hayak dengan Tikhikus; ie te ije biti oloh bara marak keton. Ie oloh je baketep tuntang ikei sinta ie. Ewen due Tikhikus kareh mansanan akan keton taloh handiai je manjadi intu ekaku toh. 4:10 Aristarkhus, je aton hong penjara haya-hayak dengangku, mampait tabe akan keton. Kalote kea Markus, paharin Barnabas ije tato. (Akan keton jari impait barita uka manambang ie amon ie dumah manalih keton.) 4:11 Tinai tabe bara Yesus je bagare Yustus kea. Bara kare oloh Yehudi je jari percaya dengan Tuhan Yesus, baya ewen telo ih metoh toh je bagawi dengangku uka malalus gawi bara Hatalla. Ewen puna toto-toto mandohop aku. 4:12 Tabe bara Epapras. Ie te kea asale oloh bara baris keton. Ie rewar Kristus Yesus, je harajur balakudoa kete-ketep akan keton. Ie balaku nyame-nyame dengan Hatalla mangat kapercayan keton impaabas tuntang keton toto-toto dehen, mangat hapan katinduh-karasih keton toto-toto mamenda kahandak Hatalla. 4:13 Aku manyaksi kabuat ie jari bagawi paham akan keton tuntang akan kare oloh je hong Laodikea tuntang Hierapolis. 4:14 Dokter Lukas je inyinta itah, tuntang Demas mampait tabe akan keton. 4:15 Keleh manyampai taben ikei akan kare paharin itah oloh Kristen hong Laodikea; akan Nimpa kea, tuntang akan ungkup je pumpong sombayang intu humae. 4:16 Limbah surat toh imbasa akan keton, keleh manggau jalan uka jete imbasa kea akan ungkup je huang Laodikea, kalote kea keton kabuat musti mambasa surat je kareh impait bara Laodikea akan keton. 4:17 Tuntang keleh mansanan akan Arkhipus, "Keleh mahapus gawi je inenga akan keton hapan melayani Tuhan." 4:18 Tabe bara aku Paulus. Ela kalapean je aku magon aton hong penjara! Aku kabuat je manyurat bagian toh. Keleh Tuhan mamberkat keton. Hormat ikei, Paulus
1:1 Pahari handiai ungkup hong Tesalonika, je manjadi ungkup Hatalla Bapa tuntang Tuhan Yesus Kristus: Ikei, iete Paulus, Silas tuntang Timoteus maharap keleh Hatalla, manenga berkat tuntang kasanang akan keton. 1:2-3 Ikei harajur manarimakasih akan Hatalla tagal pahari samandiai. Gagenep ikei balakudoa intu Hatalla tuntang Bapa itah, ikei harajur balakudoa akan keton. Ikei mingat kilen ampie keton mamparahan kapercayan keton dengan Kristus huang gawin keton, kilen ampie keton sinta oloh beken sampai pahias melayani ewen, tuntang kilen ampie keton harap hayak dehen huang Tuhan itah Yesus Kristus. 1:4 Pahari handiai, ikei katawan Hatalla sinta keton tuntang jari mintih keton manjadi oloh ayue bewei. 1:5 Basa ikei manyampai Barita Bahalap akan keton dia hapan kare auh bewei tapi kea hapan kuasa tuntang hapan Roh Hatalla. Tuntang ikei percaya toto dengan katoton Barita Bahalap te. Keton katawan kilen ampie ikei belom akan kapentingan keton katika ikei aton hong marak keton. 1:6 Keton manumon sonto bara ikei tuntang sonto bara Tuhan. Aloh keton buah kapehe paham, keton manarima dengan kahanjak barita je ingabar ikei akan keton. Kahanjak te inenga awi Roh Hatalla. 1:7 Tagal jete keton manjadi sonto akan kakare oloh Kristen je hong Makedonia tuntang Akhaya. 1:8 Basa nampara bara keton, barita tahiu Tuhan jari tayap sampai akan Makedonia tuntang Akhaya. Tuntang dia baya jete bewei; barita tahiu kilen ampie keton percaya dengan Hatalla jari sampai akan hete-hete, sampai ikei dia perlu hindai mansanan taloh en-en. 1:9 Kakare oloh te hakotak tahiu kilen ampie keton manarima ikei katika ikei bihin dumah manalih keton. Ewen mamander tahiu kilen ampie keton malekak kare dewa tuntang baya manalih ije Hatalla je belom mangat manyembah ie. 1:10 Ewen mamander kea tahiu kilen ampie keton mentai pandumah Anak Hatalla bara sorga, iete Yesus, je jari imbelom awi Hatalla bara pampatei. Yesus jete kea je manyalamat itah bara kalait Hatalla je akan dumah.
2:1 Pahari handiai! Keton kabuat katawan pandumah ikei manalih keton dia hayang. 2:2 Keton katawan helo bara ikei dumah manalih keton hong Tesalonika, ikei jari ingapehe tuntang ihina hong Pilippi. Tapi aloh are oloh malawan ikei, Hatallan itah jari manenga kamenteng akan ikei mangat mangabar akan keton Barita Bahalap je asale bara ie. 2:3 Auh ajar ikei akan keton jete dia sala; tuntang dia kea awi maksud je dia barasih atawa handak manipu. 2:4 Dia! Ikei dia hakotak mangat manyanang atei oloh, malengkan uka manyanang atei Hatalla, je mariksa atei ikei. Basa Hatalla maanggap ikei patut mangabar Barita Bahalap te. 2:5 Keton kabuat katawan ikei dia puji mahapan auh manis atawa mananjaro keton mangat manyahokan kare maksud je babungo. Hatalla jadi saksie! 2:6 Ikei dia kea manyatiar uka manggau tara bara oloh -- aloh bara keton kalote kea bara oloh beken. Sapunae kilau rasul Kristus, ikei tau ih manuntut taloh en-en bara keton. 2:7 Tapi ampin ikei balemo-lowah metoh aton hong bentok keton, kilau ije biti ibu je halaluan kare kawan anake. 2:8 Awi sintan ikei, ikei tatap sadia manenga akan keton dia baya Barita Bahalap je bara Hatalla te, tapi pambelom ikei mahin kea. Basa ikei paham sinta keton! 2:9 Batantu keton magon mingat kilen ampin kakarase ikei satiar tuntang mahampas uhat-tolang ikei. Handau hamalem ikei bagawi mangat ikei dia manyusah ije biti kea bara keton katika ikei mangabar Barita Bahalap je bara Hatalla te akan keton. 2:10 Ikei belom barasih, bujur tuntang jaton kapapae dengan keton je jari percaya dengan Kristus. Keton toh kare saksin ikei, kalote kea Hatalla. 2:11 Keton katawan ikei halaluan kare keton mije-mije sama kilau ije biti bapa halaluan kare anake. 2:12 Ikei manasehat keton, ikei manantiring keton tuntang ikei hajajuan keton mangat keton maharagapan ampin pambelom keton sampai manyanang atei Hatalla. Basa Hatalla jari mantehau keton uka manjadi oloh bara Lewu Taheta ain Hatalla tuntang mangkeme kahaie. 2:13 Aton ije hal beken tinai je mawi ikei harajur manarimakasih akan Hatalla. Hal te iete, metoh ikei manyampai barita bara Hatalla akan keton, keton mahining tuntang manarima barita te dia ie kilau barita bara olon, tapi kilau barita je toto-toto bara Hatalla. Ie te je metoh kanjerae bagawi huang keton je percaya dengan Kristus. 2:14 Pahari handiai, taloh je buah keton jari kea buah kare ungkup Hatalla hong Yudea je manjadi oloh ain Yesus Kristus. Keton mangkeme kapehe bara utus keton kabuat, sama kilau je ingkeme awi kare ungkup Hatalla hong Yudea te bara kare oloh Yehudi. 2:15 Ewen te je jari mampatei Tuhan Yesus tuntang kare nabi, tuntang mangapehe ikei. Ewen mamusoh oloh handiai, tuntang Hatalla samasinde dia sanang dengan ewen. 2:16 Malahan ewen mahambang ikei mambarita akan kare utus oloh je dia Yehudi barita je tau manyalamat kare utus oloh te. Awi kalote kare oloh Yehudi te harajur mandahang kare dosan ewen sampai sukup karee. Tuntang toh kajariae ewen buah kalait Hatalla! 2:17 Tapi pahari handiai, bara katika ikei hapisah hanjulo dengan keton -- hapisah hong mate tapi dia hong atei -- ikei sasar taharo dengan keton tuntang toto-toto manggau jalan mangat hasondau tinai dengan keton! 2:18 Kahandak ikei mado haguet manalih keton; tuntang aku, Paulus, jari mancoba labih bara sinde kali, tapi setan mahambang ikei. 2:19 Puna keton ih kaharap tuntang kahanjak ikei. Basa kareh amon Tuhan Yesus dumah, tuntang itah manaharep ie, maka keton ih je iandal ikei! 2:20 Puna keton ih je eka kaandal tuntang kahanjak ikei.
3:1 Kajariae kataharon ikei dia tarasarenan hindai. Awi te ikei manirok labih bahalap ikei ilihi kabuat ikei ih hong Atena, 3:2 pandehan ikei mampait paharin itah Timoteus. Ie ije biti pelayan Hatalla je bagawi dengan ikei uka mambarita Barita Bahalap tahiu Kristus. Ikei mampait Timoteus akan keton mangat ie mampaabas keton tuntang manantiring keton uka labih percaya hindai dengan Kristus. 3:3 Awi kalote ije biti mahin jaton bara keton je undur tagal kare kapehen itah toh. Keton kabuat katawan kare kapehe te jari inamean huang rencana Hatalla akan itah. 3:4 Katika ikei magon hinje keton, helo-helo ikei jari mansanan akan keton, itah kareh buah kapehe. Tuntang jete puna toto-toto jari manjadi; keton kabuat mangatawan jete. 3:5 Jete bukue aku mampait Timoteus, awi aku mipen toto mangatawan kilen ampie kamiar keton huang hal kapercaya dengan Kristus. Aku meles mikeh setan bahasil manggoda keton sampai kakare kaheka ikei manjadi hayang. 3:6 Toh Timoteus jari haluli tuntang jari manyampai akan ikei barita je mampahanjak tahiu ampin kapercayan keton dengan Kristus tuntang keton hasinta sama arep keton. Ie mansanan akan ikei keton harajur mangenang taloh je bahalap tahiu ikei hong atei keton. Tuntang keton mipen hasondau dengan ikei, sama kilau ikei kea mahin mipen hasondau dengan keton. 3:7 Jete sababe pahari handiai, hong kare kasusah tuntang kapehen ikei, ikei iampong tagal barita tahiu keton. Kapercayan keton dengan Kristus mampahai atei ikei, 3:8 sampai toh ikei mangkeme toto-toto belom, asal keton tetep mendeng segah, ije dengan Tuhan. 3:9 Hai toto angat tarimakasih ikei dengan Hatalla tagal kakare kahanjak je ingkeme ikei intu taharep ie tagal keton. 3:10 Handau hamalem ikei balaku dengae hapan katoton atei, mangat ikei tau hasondau kabuat dengan keton uka manyukup taloh je imerlu keton mangat percaya dengan Kristus tumon kapatute. 3:11 Keleh Hatalla Bapa itah kabuat, tuntang Tuhan itah Yesus mamparata jalan akan ikei mangat hasondau dengan keton! 3:12 Keleh Tuhan manun keton uka sasar hasinta sama arep keton tuntang sasar sinta oloh handiai, sampai sintan keton te dahang-dahanga, sama kilau sintan ikei dengan keton. 3:13 Awi kalote Tuhan kareh mampaabas atei keton, sampai keton barasih tuntang jaton kasalae intu taharep Hatalla Bapa itah, katika Tuhan itah Yesus dumah hayak dengan kakare oloh ayue.
4:1 Kajariae pahari handiai, ikei jari manenga sonto akan keton tahiu ampin kapatut keton belom uka manyanang atei Hatalla. Puna keton jari belom kilau te. Tapi toh, tagal kuasan Tuhan Yesus, ikei balaku toto dengan keton tuntang hajajuan keton uka keton labih rajin hindai huang hal te! 4:2 Basa keton jari mangatawan kare nasehat je jari inenga ikei akan keton tagal kuasan Tuhan Yesus. 4:3 Kahandak Hatalla te kalotoh: Uka keton belom akae bewei, barasih, mangejau kakare gawi je harayap. 4:4 Gagenep oloh hatue hong marak keton patut katawan kilen ampie belom dengan sawae hapan cara manyanang atei Hatalla tuntang olon. 4:5 Ela manumon angat kipen belai, kilau je ilalus awi kare oloh je dia mangasene Hatalla. 4:6 Huang hal je kilau te, ije biti mahin ela aton oloh mawi kasalan dengan paharie, atawa manipu ie. Bihin ikei jari paham mampingat keton, Tuhan kareh mahukum kare oloh je malalus kare kasalan je kilau te. 4:7 Hatalla mantehau itah, dia uka itah belom harayap, tapi uka itah belom hapan cara je manyanang atei ayue. 4:8 Oloh je manolak auh ajar toh, dia ie manolak olon, tapi manolak Hatalla je manenga Roh ayue je barasih akan keton. 4:9 Dia usah hindai ikei manyurat akan keton tahiu ampin kapatut keton sinta kare pahari je sama kapercayae. Keton kabuat jari iajar awi Hatalla uka sinta sama arep keton. 4:10 Tuntang hal toh jari imparahan keton akan kare pahari je sama kapercayae dengan keton hong hapus Makedonia. Tapi, pahari handiai, ikei balaku toto, uka pambelom keton labih bahalap hindai. 4:11 Keleh manggau jalan uka keton belom huang kadamai tuntang dia omba campur dengan soal oloh beken. Keleh keton bagawi manggau rajakin keton kabuat, kilau je bihin ikei puji mansanae akan keton. 4:12 Amon keton belom kalote, keton dia bahapang dengan eweh bewei, tuntang kare oloh je dia percaya dengan Kristus, kareh mahormat keton. 4:13 Pahari handiai, ikei handak uka keton mangatawan taloh je katotoe tahiu kare oloh je jari matei; mangat keton dia kapehe atei kilau kare oloh beken je jaton mingkes kaharap. 4:14 Itah percaya Yesus jari matei tuntang belom haluli, jete sababe itah percaya kea Hatalla kareh mambelom haluli oloh handiai je percaya dengan Yesus tuntang jari matei, uka ewen belom hinje dengae. 4:15 Tahiu hal te, jete auh ajar ain Tuhan je handak inyampai ikei akan keton: Hong katika Tuhan Yesus dumah, itah je magon belom dia akan mananselo kare oloh je jari matei labih helo. 4:16 Kare malekat hai te kareh mantehau hai auhe tuntang tarompet ain Hatalla impahiau kilau tanda parentah. Palus Tuhan Yesus kabuat kareh mohon bara sorga, tuntang kakare oloh Kristen je jari matei kareh imbelom labih helo. 4:17 Limbah te, itah je magon belom katika te kareh inggatang haya-hayak dengan ewen akan kare baun andau mangat hasondau dengan Tuhan hong langit. Palus itah melai dengan Tuhan sampai katatahie. 4:18 Tagal te, keleh keton mampaabas atei sama arep keton mahapan kare auh kotak toh.
5:1 Pahari handiai, dia usah ikei manyurat akan keton hamparea katikae je pas kare hal te akan manjadi. 5:2 Basa keton kabuat katawan batantu Andau pandumah Tuhan te akan sampai kilau maling dumah hong hamalem. 5:3 Amon oloh hamauh, "Taloh handiai aman tuntang damai," maka hong katika jete ie ewen kareh salenga buah karusak, tuntang ije biti mahin jaton je tau liwus. Hal te akan manjadi manantekas, sama kilau kapehen oloh manak je buah oloh bawi je handak luas. 5:4 Tapi keton dia ie oloh je belom huang kakaput, sampai andau jete manarewen keton sama kilau pandumah maling. 5:5 Pahari samandiai toh oloh je belom huang kalawa; keton toh oloh ain kalawa je balawa. Itah toh dia ie oloh je belom huang kakaput, atawa oloh je melai huang kakaput alem. 5:6 Awi te itah dia tau mado tiro-tiroh bewei sama kilau oloh beken. Itah musti batawat tuntang tirok itah musti balawa. 5:7 Hong hamalem oloh batiroh, tuntang hong hamalem kea oloh manjadi babusau. 5:8 Tapi itah toh oloh je belom huang andau je balawa; awi te tirok itah musti balawa. Itah musti tetep percaya dengan Tuhan tuntang sinta kare oloh beken hayak harap huang kapercaya je Hatalla kareh manyalamat itah. Jete senjata je mangalindong itah huang kalahin itah malawan kakaput. 5:9 Hatalla mintih itah dia uka ihukum, tapi uka inyalamat mahalau Tuhan itah Yesus Kristus. 5:10 Ie matei akan itah uka hong katika ie dumah kareh -- en itah belom atawa matei itah tau belom hinje dengae. 5:11 Tagal te keleh keton tetep hatantiring tuntang mampaabas sama arep keton, sama kilau je ilalus keton wayah toh. 5:12 Pahari handiai, ikei balaku toto-toto uka keton mahormat kare oloh je bagawi hong marak keton; iete ewen je jari iintih awi Tuhan mangat mamimpin tuntang manasehat keton. 5:13 Keleh keton manun ewen hapan salepah hormat tuntang hapan sinta asi awi mingat taloh je ilalus ewen. Keleh harajur belom huang kadamai. 5:14 Ikei balaku kea, pahari handiai, tingak bua-buah oloh je dia maku bagawi; keleh mandehen atei oloh je mikeh; dohop oloh je perlu indohop tuntang keleh sabar taharep oloh samandiai. 5:15 Keleh manjaga uka ela aton oloh je mambaleh kapapa hapan kapapa. Keleh harajur mawi gawi bahalap, dengan sama arep keton tuntang akan oloh handiai. 5:16 Keleh keton harajur hanjak, 5:17 tuntang keleh balakudoa harajur. 5:18 Huang kare taloh samandiai keleh keton manarimakasih, basa jete je ingahandak Hatalla bara keton, kilau oloh je belom hinje dengan Kristus Yesus. 5:19 Ela keton manahan Roh Hatalla. 5:20 Ela manaha gampang kare barita je inenga awi Roh Hatalla. 5:21 Kakare taloh handiai keleh incoba, tuntang je bahalap musti inumon. 5:22 Keleh mangejau arep keton bara sepsimpan ampin kapapa. 5:23 Keleh Hatalla kabuat je manenga kasanang akan itah, manun keton manjadi oloh je toto-toto belom tantai akan Hatalla. Keleh Hatalla manjaga arep keton lepa-lepah, aloh roh, hambaruan tuntang bitin keton, sampai jaton aton kasalae hong katika Tuhan itah Yesus Kristus dumah haluli. 5:24 Hatalla, je jari mantehau keton, keleh ie malalus hal te basa ie baketep. 5:25 Keleh balakudoa akan ikei, Pahari handiai! 5:26 Keleh keton handiai hatabe sama arep keton huang kaheret atei kilau oloh hampahari je sama Kristen. 5:27 Tagal kuasa bara Tuhan, aku balaku toto-toto uka keton mambasa surat toh akan kare pahari handiai je sama kapercayae. 5:28 Keleh Tuhan itah Yesus Kristus memberkat keton. Hormat ikei, Paulus
1:1 Pahari handiai ungkup hong Tesalonika, je manjadi ungkup ain Hatalla Bapa itah tuntang Tuhan Yesus Kristus! Ikei, iete Paulus, Silas tuntang Timoteus 1:2 maharap keleh Hatalla Bapa tuntang Tuhan itah Yesus Kristus manenga berkat tuntang kasanang akan keton. 1:3 Pahari handiai, ikei patut harajur manyewut tarimakasih akan Hatalla tagal keton. Ikei puna patut malalus taloh je kilau te, awi keton sasar percaya dengan Kristus, tuntang keton sasar sinta dengan sama arep keton. 1:4 Jete bukue ikei hakotak tahiu keton gagenep kali maja kare ungkup ain Hatalla. Hayak tama-tamam angat ikei manyarita kapercayan keton je segah dengan Kristus katika keton aton huang kapehe tuntang kajake je buah keton. 1:5 Tuntang hong hetoh gitan Hatalla adil toto mahakim oloh: Keton jari manyarenan kapehe tagal Lewu Taheta ain Hatalla, tuntang tagal te keton kareh ianggap patut mangat tame hete. 1:6 Ie kareh malalus taloh je adil, tuntang handak mambaleh hapan kapehe akan oloh je mawi keton kapehe. 1:7 Tuntang akan keton je wayah toh buah kapehe -- kalote kea akan ikei -- Hatalla kareh manenga kalapang hong andau Tuhan Yesus mohon bara sorga tuntang mamparahan arepe dengan kare malekat ayue je bara kuasa 1:8 tuntang hapan apui je lenda-lendang. Ie mohon uka mahukum kare oloh je dia mangasene Hatalla tuntang dia belom manumon auh Barita Bahalap tahiu Yesus Tuhan itah. 1:9 Kare oloh te kareh manarima hukum kabinasa sampai katatahie, inganan balua bara marak oloh ain Tuhan tuntang bara kuasae je hai; 1:10 taloh samandiai te kareh manjadi hong andau ie akan dumah uka ie impahai awi ungkup ayue tuntang uka ihormat awi oloh handiai je percaya. Keton kareh mahin melai hong marak ungkup ain Hatalla te, awi keton jari percaya dengan barita je inyampai ikei akan keton. 1:11 Jete sababe ikei harajur balakudoa akan keton. Ikei balakudoa mangat Hatalla manun keton manjadi oloh je patut uka belom manumon kahandak ayue; maka akan jete ie mantehau keton. Keleh Hatalla, hapan kuasae, manggenep kahandak keton uka malalus kahalap, tuntang maninduh-mamparasih kakare gawi je ilalus keton awi keton percaya dengan Kristus. 1:12 Awi kalote Tuhan itah Yesus impahai awi keton, tuntang Yesus kea mampahai keton tagal kahalap atei Hatallan itah tuntang Tuhan Yesus Kristus.
2:1 Tahiu pandumah Tuhan itah Yesus Kristus, tuntang tahiu ie mamumpong itah uka melai hinje ie, jetoh ih je ilakuku toto-toto dengan keton: 2:2 Ela murah bingung atawa gogop tagal barita tahiu andau Tuhan Yesus dumah haluli jari sampai. Mungkin barita te asale bara ije tujum, atawa bara auh ajar oloh; atawa tau kea aton oloh je hamauh je ikei puji manyurat kilau te hong ije bara kare surat ikei. 2:3 Tapi aloh kilen-kilen kea, ela manalua oloh mananjaro keton. Basa helo bara andau te sampai, hal jetoh labih helo musti manjadi: Are oloh kareh mundur bara kapercayae, milim Kristus; tuntang oloh papa je jari inukas akan tame naraka, kareh mamparahan arepe. 2:4 Hayak dengan kajohoe ie kareh malawan tuntang mampagantong arepe mahunjun kakare taloh je inyembah oloh kalunen, atawa kakare dewa je ianggap Hatalla awi oloh kalunen. Ie kea kareh mahin mondok intu Human Hatalla tuntang mansanan je ie te Hatalla. 2:5 Keleh mingat je aku puji mansanan taloh samandiai te metoh aku aton hinje keton. 2:6 Tuntang keton katawan taloh je wayah toh magon mahambang mangat taloh handiai te ela manjadi. Kareh hong andau je jari inukas awi Hatalla, Oloh Papa te akan lembut. 2:7 Kakuatan je malalus kapapa te benye-benyem jari nampara bagawi, tapi magon inaha-nahan. Kareh amon taloh je manahan te jadi inyare, 2:8 harue Oloh Papa te gitan. Maka amon Tuhan Yesus dumah, ie kareh mampatei Oloh Papa te mahapan tahaseng bara nyamae, tuntang mambinasa ie hapan kamanang pandumahe. 2:9 Oloh Papa te kareh lembut dengan kuasa je hai bara setan. Ie kareh mawi sepsimpan ampin taloh heran tuntang kare hal je dia puji helo hapan salepah tanjaroe. 2:10 Ie kareh mahapan kare tipu tuntang tirok je papa uka mampalayang kare oloh je akan manalih kabinasa. Ewen kareh imbinasa awi ewen manolak tuntang dia rajin dengan barita je bujur bara Hatalla je tau manyalamat ewen. 2:11 Jete bukue Hatalla mampadumah akan ewen ije kuasa je mampalayang, sampai ewen percaya dengan taloh je dia bujur. 2:12 Kajariae, kakare oloh je rajin dengan dosa tuntang dia percaya dengan taloh je bujur te, kareh ihukum. 2:13 Pahari handiai je inyinta Tuhan! Ikei musti harajur manyewut tarimakasih akan Hatalla tahiu keton, awi bara tamparae Hatalla jari mintih keton uka inyalamat. Hal te manjadi awi taloh je ilalus Roh Hatalla akan keton uka keton manjadi ungkup ain Hatalla je barasih tuntang awi keton percaya dengan barita je bujur bara Hatalla. 2:14 Tagal jete Hatalla mantehau keton akan Barita Bahalap je imbarita ikei akan keton. Hatalla mantehau keton, awi ie handak uka keton omba mangkeme kahain Tuhan itah Yesus Kristus. 2:15 Awi jete, pahari handiai, keleh mendeng segah tuntang imbing harajur kare ajar je jari inenga ikei akan keton, kilau je insanan ikei hapan nyaman ikei tuntang surat ikei. 2:16-17 Keleh Tuhan itah Yesus Kristus kabuat, tuntang Hatalla Bapa itah mampong tuntang mampaabas atei keton, mangat keton tau malalus tuntang mambarita taloh je bahalap. Basa Hatalla sinta itah, tuntang tagal kahalap ateie ie manenga akan itah kamenteng je toto, hayak maharap taloh je bahalap.
3:1 Kajariae, pahari handiai, keleh balakudoa akan ikei. Keleh balakudoa mangat barita ain Tuhan tau harajur ingabar bajeleng akan hete-hete tuntang inarima dengan bahalap, sama kilau je jari manjadi intu keton bihin. 3:2 Keleh balakudoa kea uka Hatalla manyalamat ikei bara kare oloh je haliau tuntang papa. Basa dia urase oloh kareh percaya dengan barita ain Tuhan te. 3:3 Tapi Tuhan te baketep. Ie kareh mampaabas keton tuntang mangalindong keton bara Taloh Papa. 3:4 Tuntang ikei percaya lepah dengan Tuhan tahiu keton, je keton wayah toh malalus tuntang harajur malalus tinai taloh je inyoho ikei keton. 3:5 Keleh Tuhan mangagalan keton mangat labih harati, je Hatalla sinta keton tuntang manenga atei je sabar akan keton. 3:6 Pahari handiai, tagal kuasan Tuhan Yesus Kristus, ikei manyoho keton uka mangejau arep keton bara kare pahari je belom kadian, tuntang je dia manumon kare ajar je inenga ikei akan ewen. 3:7 Keton kabuat katawan je keton harajur manumon sonto bara pambelom ikei. Ikei dia kadian katika ikei aton hong marak keton. 3:8 Ikei jaton kuman panginan oloh je dia ikei mambayare. Tapi handau hamalem ikei bagawi mahampas uhat-tolang ikei mangat ikei dia manyusah eweh bewei bara keton. 3:9 Ikei malalus jete dia awi ikei jaton hak manuntut uka keton mandohop ikei, tapi awi ikei handak manjadi sonto akan keton. 3:10 Katika ikei magon aton hong bentok keton, ikei manenga kare atoran toh, "Oloh je dia handak bagawi, dia tau kuman." 3:11 Ikei mansanan hal toh awi ikei mahining aton kare oloh hong marak keton je belom huang kakulas. Ewen jaton malalus taloh en-en, baya rajin omba campur huang urusan oloh beken. 3:12 Huang aran Tuhan Yesus Kristus ikei manyoho oloh te tuntang mampingat, uka ewen bagawi bujur-buah tuntang manggau balanjan ewen kabuat. 3:13 Tapi keton ela peda malalus taloh bahalap. 3:14 Mungkin kareh aton oloh je dia maku manumon taloh je insanan ikei huang surat toh. Keleh batawat manaharep oloh je kilau te tuntang ela bergaul dengae mangat ie mahamen. 3:15 Tapi ela mawi ie kilau musoh, keleh manasehat ie ih kilau ije biti pahari. 3:16 Tuhan te upon kasanang-kamangat itah handiai. Keleh ie harajur manenga akan keton kasanang-kamangat huang kakare hal. Keleh Tuhan mampahayak Pahari samandiai. 3:17 Tabe bara aku, Paulus. Aku kabuat je manyurat bagian jetoh. Jetoh ie tanda je inampaku hong kakare suratku. 3:18 Keleh Tuhan itah Yesus Kristus mamberkat pahari samandiai. Hormat ikei, Paulus
1:1-2 Timoteus, anakku je bujur huang Tuhan! Surat toh bara aku, Paulus, rasul Yesus Kristus tagal parentah Hatalla, Panyalamat itah tuntang tagal parentah Kristus Yesus, kaharap itah. Keleh Hatalla Bapa tuntang Tuhan itah Yesus Kristus manenga berkat, asi tuntang kasanang akam. 1:3 Aku handak uka ikau tetep melai hong Epesus kilau je jari inukasku akam katika aku haguet akan Makedonia. Basa, intu Epesus aton pire-pire oloh je mambarita auh ajar je dia bujur, tuntang ikau musti mambalang kare gawin ewen. 1:4 Sanan akan ewen uka ela hindai manantuani kare sarita horan tuntang kare kesah huroi-rinting je jaton tikase. Taloh handiai te baya mampalembut kalahi bewei, tuntang dia mampamaju rencana Hatalla je tau ingasene mahalau kapercaya dengae. 1:5 Tintun nasehat ayungku te iete uka oloh tau mandino atei je barasih tuntang tirok atei je tinduh hayak toto-toto percaya dengan Tuhan, tuntang tagal te ewen tau sinta sama arepe. 1:6 Aton belahe oloh je jaton belom kalote hindai, tuntang layang hong kare auh soal-jawab je jaton gunae. 1:7 Ewen handak manjadi kare guru agama padahal ewen kabuat dia harati kare auh je ingotak ewen atawa kare hal je insanan tuntang imercaya ewen. 1:8 Itah katawan hukum agama te bahalap, amon ingguna tumon kapatute. 1:9 Batantu oloh musti mingat iete hukum te inampa dia akan oloh bahalap, malengkan akan kare oloh je malanggar hukum, oloh papa, oloh badungil, akan oloh badosa, oloh je dia baagama, oloh ain kalunen, akan oloh je mamuno indu bapae, tuntang kakare oloh je rajin mamuno, 1:10 akan kare oloh je harayap, homoseks, penculik, pananjaro; je hakalawan dengan auh ajar je bujur. 1:11 Auh ajar te aton huang Barita Bahalap je imercaya akangku mangat aku mangabare, iete Barita Bahalap bara Hatalla je hai tuntang patut inara. 1:12 Aku manyewut tarimakasih akan Kristus Yesus Tuhan itah. Ie jari manenga kaabas akangku mangat manyang ie, tuntang ie maanggap aku puna patut akan gawi te, 1:13 aloh bihin aku mandurhaka tuntang mangapehe tuntang mahina ie. Tapi Hatalla masi aku awi hong katika te aku hindai percaya, jadi aku dia katawan taloh je iawiku. 1:14 Tuntang Tuhan itah manenga haream akangku kotoh asi. Ie manenga akangku kataun uka percaya dengae tuntang sinta dengan oloh samandiai. Kataun jete inenga akan itah samandiai je jari hinje dengan Yesus Kristus. 1:15 Toto haliai auh toh -- basa jete patut inarima tuntang imercaya sakalepahe --: "Kristus Yesus dumah akan kalunen toh uka manyalamat oloh badosa." Tuntang aku toh oloh badosa je paling papa. 1:16 Tapi malahan awi te Hatalla masi aku uka Kristus Yesus tau mamparahan salepah kasabare dengangku, oloh je paling badosa toh. Tuntang jetoh manjadi ije sonto akan oloh samandiai je kareh handak percaya dengae tuntang mandino pambelom je bujur tuntang katatahie. 1:17 Hatalla, Rajan kare wayah, patut ihormat tuntang inara harajur, basa ie te katatahie, je dia gitan tuntang je Tunggal. Amen! 1:18 Anakku Timoteus! Gawi toh imercayaku akam, awi mingat peteh Hatalla je inyampai awi kare nabi hong ungkup tahiu ikau. Keleh peteh te manjadi bahata akam hong perjuangan je bahalap. 1:19 Keleh berjuang sambil mimbing kapercaya je bujur tuntang hapan tirok atei je barasih. Aton oloh je dia paduli auh hong pangingat ateie, sampai kapercayan ewen te hancur. 1:20 Bara ewen te aton Himeneus tuntang Aleksander. Kadadue oloh te jari ihukumku awiku manyarah ewen akan setan, mangat ewen bajar uka terai mamapa Hatalla.
2:1 Je mambatang, aku balaku toto-toto mangat auh palaku, sombayang tuntang lakudoan asi dengan auh tarimakasih inyampai manintu Hatalla akan oloh samandiai; 2:2 akan kare raja tuntang oloh handiai je mimbing kuasa. Keleh balaku uka itah tau belom damai tuntang sanang dengan Hatalla hapan ampin kalakuan itah je patut. 2:3 Jete je bahalap tuntang manyanang atei Hatalla, panyalamat itah. 2:4 Ie handak uka oloh handiai inyalamat tuntang mangatawan taloh je bujur. 2:5 Karana, baya aton ije Hatalla, tuntang baya aton ije oloh helat je manjadi tatean Hatalla dengan olon iete Yesus Kristus. 2:6 Ie te ije biti oloh je jari manyarah arepe uka maliwus oloh samandiai bara kare dosan ewen. Hapan jete Hatalla manunjuk katika je buah, basa ie handak uka kakare oloh uras inyalamat. 2:7 Tuntang jete sababe aku inyoho haguet manalih kare oloh je dia Yehudi uka mangabar akan ewen barita tahiu kapercaya je bujur. Taloh je insanangku toh puna toto, aku dia mananjaro. 2:8 Aku balaku uka hong kueh bewei oloh hatue balakudoa dengan atei je barasih, ela hapan kalait atawa kalahi. 2:9 Keleh kare oloh bawi makaian arepe dengan sederhana tuntang mahapan pakaian je bahadat. Ela mahapan tampan balau je malabien ampie atawa kare perhiasan amas atawa mutiara, atawa pakaian je barega. 2:10 Tapi keleh oloh bawi makaian arepe hapan kare gawi je bahalap sama kilau kapatut ain oloh bawi je manyembah Hatalla. 2:11 Oloh bawi musti bajar mambenyem arepe tuntang mantuh. 2:12 Aku dia mambujur oloh bawi majar atawa marentah oloh hatue; ewen musti benyem. 2:13 Basa oloh je solake injapa iete Adam limbah te harue Hawa. 2:14 Tuntang oloh je buah tipu sampai malanggar parentah Hatalla, dia ie Adam, malengkan Hawa. 2:15 Aloh kalote, oloh bawi akan salamat awie luas anake, hapan karandah ateie tetep percaya dengan Kristus tuntang tetep sinta oloh beken hayak belom baya akan Hatalla bewei.
3:1 Puna buah toto auh toh, "Oloh je handak manjadi paling bakas huang ungkup, oloh te mipen dengan gawi je paham barega." 3:2 Ije biti tambakas ungkup musti oloh je jaton kasalae, sawae baya ije, tau manahan arepe, pintar-harati, tuntang baatoran; ie rajin manarima oloh intu humae, tuntang tau majar oloh; 3:3 ie dia oloh pambusau, atawa je rajin hakalahi. Tapi ie oloh je balemo lowah tuntang rajin badamai. Dia tau ie lalau rajin dengan duit. 3:4 Ie musti tau mator huma seroke dengan bahalap, tuntang mandidik kare anak jariae uka ewen taat tuntang hormat dengae. 3:5 Basa amon oloh dia tau mator huma seroke kabuat, kilen ampie ie tau mator ungkup Hatalla? 3:6 Oloh je harue Kristen, dia tau manjadi tambakas ungkup, basa kareh ie manjadi balecak palus tarasapa kilau setan horan. 3:7 Ie musti oloh je bahalap arae hong masarakat; basa amon dia kalote, maka ie akan ihina oloh, sampai ie tau buah jabak setan. 3:8 Diakon ain ungkup te keleh oloh je bahalap tuntang bujur ateie; dia ie oloh je bakoho dengan duit atawa lalau are mihop anggur. 3:9 Ewen musti mimbing dehe-dehen hapan atei je barasih kare auh ajar kapercayan oloh Kristen je jari ingarinah awi Hatalla. 3:10 Keleh ewen te iuji helo, tuntang amon taragitan ewen te jaton kasalae, harue ewen tau mandohop hong ungkup. 3:11 Sawan ewen kea musti oloh je bahalap, dia tau ewen te rajin mamander manahiu taloh je baya auh pahining bewei. Ewen musti tau manyarenan arepe tuntang bujur ateie hong taloh handiai. 3:12 Diakon ain ungkup te musti baya aton ije ih sawae. Ie musti mator kare anak jariae tuntang huma seroke dengan bahalap. 3:13 Kare oloh je mandohop dengan bahalap huang ungkup, akan ihormat tuntang ewen manjadi sasar bahanyi hakotak tahiu kapercayan ewen dengan Kristus. 3:14 Aku maharap dia tahi hindai aku akan maja manalih keton. Aloh kalote, surat toh inyuratku kea akan keton, 3:15 mangat amon aku liwat dumah, ikau jari katawan kilen ampie itah patut belom kilau jalahan ain Hatalla, iete ungkup Hatalla je belom. Ungkup jetoh je kilau tihang je mandehen tuntang manahan kare ajar je bujur bara Hatalla. 3:16 Ije biti mahin jaton oloh je tau malawan, kapaham kahain rahasia ain agaman itah: Ie mamparahan arepe hong ampin oloh, tuntang insanan bujur awi Roh Hatalla, hayak inampayah awi kare malekat. Barita ayue te habambalang intu marak kare utus oloh. tuntang ie manjadi eka kapercayan oloh hapus kalunen tuntang impandai' akan sorga.
4:1 Hapan auh je tukas toto Roh Hatalla mansanan: hong kare katika je rahian, oloh belahe akan mundur, milim Kristus. Ewen akan mamenda kare roh palayang tuntang manumon kare ajar ain dewa, 4:2 je inyampai awi kare oloh haliau je pananjaro. Tirok atei kare oloh te jari kaput. 4:3 Ewen majar oloh uka dia kawin tuntang dia kuman pire-pire panginan je inukas ewen. Padahal panginan te inampa awi Hatalla akan kinan hayak manyewut tarimakasih akae bara kare oloh je jari percaya dengan Kristus tuntang jari mangasene auh ajar je bujur bara Hatalla. 4:4 Taloh handiai inampa awi Hatalla te uras bahalap, tuntang ije mahin jaton taloh je musti ianggap pali amon jari inarima hapan auh tarimakasih akan Hatalla. 4:5 Basa panginan te manjadi dia pali awi berkat bara Hatalla tuntang lakudoa. 4:6 Amon ikau majar taloh handiai te akan kare pahari je sama hong kapercaya, ikau akan manjadi rewar Kristus Yesus je bagawi dengan bahalap. Tuntang ikau akan harajur mamupuk atei huangm hapan auh Hatalla je imercaya itah, tuntang hapan kare auh ajar je bujur je jari inumom katahin toh. 4:7 Keleh mangejau arepm bara kare sarita tahiu taloh je dia baguna. Keleh ikau malatih arepm akan pambelom je mimbit ikau manyembah Hatalla. 4:8 Latihan biti-bereng baya isut ih gunae, tapi latihan roh baguna hong kare hal, awi jete manenga janji akan pambelom wayah toh tuntang wayah je rahian. 4:9 Hal te toto tuntang patut inarima hayak imercaya sakalepahe. 4:10 Jete sababe itah berjuang tuntang bagawi paham, basa itah harap lepah dengan Hatalla je belom; iete panyalamat oloh handiai, je mambatang haliai akan kare oloh je percaya. 4:11 Keleh majar kare taloh samandiai te tuntang soho kare oloh uka manumoe. 4:12 Ije biti mahin ela ikau manalua oloh maanggap ikau randah awi ikau magon tabela. Tapi keleh ikau manjadi sonto akan kare oloh percaya hong kotak panderm tuntang hadatm, hong cara ikau masi oloh tuntang percaya dengan Yesus Kristus, tuntang pambelom ayum je tinduh-barasih. 4:13 Pandehan toh, sampai aku dumah kareh, ikau musti toto-toto mambasa Surat Barasih akan kare oloh, tuntang manantiring hayak majar ewen. 4:14 Ela ikau laya mahapan panenga bara Roh Hatalla je inenga akam katika kare pamimpin ungkup mingkes lengee hunjun takolokm, tuntang kare nabi manyampai peteh Hatalla tahiu ikau. 4:15 Keleh malalus kare taloh handiai te hapan katoton atei mangat oloh handiai mite ampin kamaju pambelom ayum. 4:16 Keleh rende-rendeng dengan arepm tuntang rende-rendeng kea dengan auh ajarm. Keleh ikau baketep malalus taloh handiai te, basa tagal jete ikau akan manyalamat arepm kabuat tuntang kare oloh je mahining auhm.
5:1 Ela ikau balait hapan auh karas dengan oloh je labih bakas bara ikau tapi keleh ikau mimbit ie mahining kare auhm kilau jaka ikau bapae. Keleh ikau mawi kare oloh tabela kilau paharim, 5:2 tuntang kare oloh bawi awang bakas jete kilau indum. Kare oloh bawi awang tabela keleh ikau mawie kilau betaum hapan ampin hadat ije barasih. 5:3 Keleh mahormat kare bawi balo ije toto-toto belom kabuate. 5:4 Tapi amon ije biti oloh bawi balo aton anake atawa esoe, maka ewen te je musti inenga helo pengertian basa ewen patut manantuani kare kola jalahan ewen, tuntang mambaleh kataun oloh bakas tuntang tambi-bue ewen. Basa hal jete manyanang atei Hatalla. 5:5 Oloh bawi balo je toto-toto mangabuat, tuntang jaton samasinde oloh je tau mahaga ie, oloh te baya harap dengan Hatalla. Handau hamalem ie harajur balakudoa dengan Hatalla mangat balaku pandohop bara ie. 5:6 Tapi balo je rajin belom rami-rami, ie te jari matei aloh ie magon belom. 5:7 Keleh manyampai kare auh nasehat toh akan ewen, mangat ewen belom jaton bara kasalan. 5:8 Tapi amon aton oloh je dia mahaga tundah paharie, mahin hindai keluarga ayue kabuat, oloh te hakalawan dengan kapercayae; ie labih papa bara oloh je dia percaya. 5:9 Oloh bawi balo je olih manumon kare atoran hong hetoh, ie tau inamean intu daptar kare balo: umure musti dia kurang bara jahawen puluh nyelo, helo bara te ie baya sinde kawin, 5:10 ingatawan kilau oloh bawi je malalus kare taloh je bahalap, kilau paribasae: jari mahaga anake sampai hai dengan bahalap, rajin manarima kare oloh je baramalem intu humae, melayani kare oloh percaya, mandohop kare oloh je susah, tuntang toto-toto malalus sepsimpan kare gawi je bahalap. 5:11 Ela manamean kare oloh bawi balo je magon tabela akan hong daptar te. Basa amon kipen ewen manjadi paham, ewen mado handak kawin tinai, tuntang malihi Kristus. 5:12 Maka ewen te basala awie mungkir janji je jari inenga ewen akae. 5:13 Tuntang tinai ie hakakanan katikae awie tame balua human oloh. Tuntang je labih papa hindai, iete ewen majar arepe mamapa aran oloh beken tuntang omba urusan oloh hayak mangotak kare taloh je dia patut ingotak. 5:14 Jete bukue aku handak mangat kare oloh bawi balo tabela kawin tinai, mandino anak tuntang mahaga huma-seroke, mangat kare musoh itah jaton mandino katika uka mamapa aran itah. 5:15 Basa aton kare oloh bawi balo je jari layang omba dewa. 5:16 Tapi amon ije biti oloh bawi Kristen aton hong keluargae je jari manjadi balo, ie musti mandohop kare balo te. Ela manalua sampai ungkup je mananggong ewen. Awi kalote maka ungkup tau mandohop kare balo je samasinde jaton kare tundah paharie. 5:17 Pamimpin ungkup je malalus gawie dengan bahalap, patut inenga penghargaan due kali lipet, je mambatang toto ewen je rajin manarang auh Hatalla tuntang majar. 5:18 Basa hong Surat Barasih tarasurat, "Sapi je mihik gandum uka malapas bawak gandum bara tundoe, ela imbangus nyamae", tuntang kea, "Oloh je bagawi, aton hak manarima upahe". 5:19 Ela ih manarima auh dawa mawi ije biti pamimpin ungkup, kecuali amon indehen awi due saksi atawa labih. 5:20 Oloh je mawi dosa, keleh iningak impuji intu taharep hapus ungkup, mangat oloh beken manjadi mikeh. 5:21 Hong taharep Hatalla, Yesus Kristus, tuntang kare malekat je iintih, aku balaku nyame-nyame uka ikau manumon kare nasehat toh hayak jaton angat dawa mawi eweh bewei, tuntang jaton mamihak-mihak. 5:22 Ela lalau bajeleng mandanan lenge hunjun ije biti oloh hapam maresmi mangkat ie manjadi rewar Tuhan. Amon oloh beken badosa, ela omba tame huang dosa te. Keleh mahaga arepm mangat tetep barasih. 5:23 Ela hindai baya mihop danum bewei; ihop kea anggur isut hapan mandohop gawin gambuhm, basa ikau kinjap haba-haban. 5:24 Dosan oloh belahe helo bara imbit akan perkara, jari gitan tarang batantu. Tapi dosan oloh beken harun tau ingatawan limbah te. 5:25 Kalote kea kare gawi bahalap langsung gitan. Tuntang je dia murah gitan, mahin dia tau harajur basahokan.
6:1 Kare oloh Kristen je manjadi jipen, keleh maanggap iete tempon ewen te patut ihormat, uka oloh dia tau mamapa aran Hatalla atawa auh ajar ain itah. 6:2 Kare jipen je manempo oloh je Kristen, dia tau manaha gampang tempoe, awi ewen sama-sama oloh Kristen. Malahan ewen musti melayani tempoe te labih bahalap hindai, basa tempoe je ilayan hong kahalap te sama-sama oloh percaya je inyinta. Taloh handiai toh keleh iajar tuntang inasehat awim. 6:3 Ewe-eweh je majar auh je beken bara jete tuntang dia hasaroroi dengan ajar je bujur bara Tuhan itah Yesus Kristus, tuntang dengan auh ajar agaman itah, 6:4 oloh te bajoho tuntang dia katawan taloh en-en! Panyakit ayue iete rajin hasoal tuntang hagalanggang tahiu kare bawak kotak sampai mampalembut kahirin atei, kapusit, auh mangarana, kameles je dia bahalap, 6:5 tuntang kalahi je jaton katawan tikase. Jalan tirok kare oloh te jari patep tuntang dia bujur hindai. Ewen manyangka ewen tau manjadi oloh tatau bara agama. 6:6 Agama puna manenga katuah je hai, amon oloh ombet huange dengan taloh je aton intu ie. 6:7 Basa ije mahin jaton taloh je tau itah mimbite akan kalunen toh, tuntang ije mahin jaton kea taloh je tau itah mimbite balua! 6:8 Jadi, amon aton panginan tuntang pakaian, jete jari sukup. 6:9 Tapi oloh je mipen manjadi tatau, ie inggoda tuntang injarat awi sepsimpan kare kipen kahumong tuntang je marusak. Kare kipen mawi oloh manjadi hancur tuntang calaka. 6:10 Basa awi sinta dengan duit, lembut kakare taloh papa. Aton oloh belahe je manggoang duit sampai dia hindai manumon auh ajar ain oloh Kristen, palus ewen are buah kapehe je mampalenyoh atei ewen. 6:11 Tapi ikau toh oloh ain Hatalla, jadi ikau musti mangejau arepm bara kakare taloh te. Keleh manggau jalan mangat manjadi oloh je bujur hong matan Hatalla, je manempo Hatalla, percaya dengan Kristus, sinta dengan sama arepe, tahan huang kajake, tuntang belom balemo-lamah ampin dasare. 6:12 Keleh bausaha toto-toto uka belom kilau oloh Kristen mangat ikau mandino panengan pambelom je bujur tuntang katatahie. Basa akan jete Hatalla mantehau ikau katika ikau mangaku intu taharep oloh are je ikau percaya dengan Kristus. 6:13 Tuntang toh, intu taharep Hatalla je manenga hambaruan akan kakare taloh handiai, tuntang intu taharep Kristus Yesus je manenga kasaksian je bujur akan Pontius Pilatus, aku balaku jetoh dengam: 6:14 Keleh mamenda kakare parentah te hapan katinduh tuntang jaton kasalae sampai hong andau Tuhan itah Yesus Kristus dumah haluli. 6:15 Pandumah ayue kareh inantu hong katika je buah awi Hatalla kabuat. Baya ie kabuat ih je mimbing kuasa; ie hai, Rajan kare raja, tuntang Tuhan kare tuan. 6:16 Tikas ie ih je dia olih inguasa awi pampatei; ie belom hong kalawa je dia olih inokep awi eweh bawei. Ije biti mahin jaton oloh je puji mite ie, atawa olih mite ie. Akae hormat tuntang kuasa sampai katatahie! Amen. 6:17 Akan kare oloh je tatau hong kalunen toh, keleh ikau balaku uka ewen ela balecak tuntang ela maharap dengan kare ramo je dia bunggut -- kilau dengan panatau. Ewen musti harap dengan Hatalla je manenga taloh handiai akan itah dengan hakotoh karee uka itah mangkeme kamangate. 6:18 Keleh balaku dengan ewen uka mamparahan gawi bahalap, uka are malalus kare hal je bahalap, bajenta tuntang rajin manenga. 6:19 Awi kalote ewen mamumpong ramo je manjadi modal je bahalap akan wayah je rahian. Tuntang hapan jete ewen akan mandino pambelom je katatahie, iete pambelom je bujur. 6:20 Taloh je jari imercayaku akam, haga jete bua-buah, Timoteus! Keleh mahakan bara kare kotak je dia baguna tuntang kare soal-jawab tahiu kare taloh je secara keliru inyewut oloh "Pangatawan". 6:21 Basa aton kare oloh je mansanan ewen mingkes pangatawan te, sampai mahiwang bara kare ajar ain oloh Kristen je imercaya ewen solake bihin. Keleh Tuhan mamberkat Pahari samandiai. Hormat ikei, Paulus
1:1-2 Timoteus, anakku je inyinta! Aku, Paulus, manyurat surat toh akam, tuntang maharap keleh Hatalla Bapa tuntang Tuhan itah Kristus Yesus manenga berkat, asi tuntang kasanang akam. Tagal kahandak Hatalla, aku iangkat manjadi rasul Kristus Yesus tuntang inyoho uka mambarita tahiu pambelom je injanji Hatalla. Pambelom te inarima itah tagal kahinjen itah dengan Kristus Yesus. 1:3 Aku manyewut tarimakasih akan Hatalla je jari iayangku hapan atei-huangku je barasih kilau je ilalus awi tato hiangku horan. Aku harajur manyewut tarimakasih genep katika aku mingat ikau hong lakudoangku, aloh handau atawa hamalem. 1:4 Aku mingat tahiu kapehen ateim. Jete sababe aku mipen toto hasondau dengam mangat aku tau toto-toto hanjak. 1:5 Aku mingat tahiu kapercayam je toto-toto dengan Kristus, sama kilau kapercayan tambim Lois tuntang indum Eunike. Tuntang aku percaya ikau mahin percaya kilau te. 1:6 Tagal te aku mampingat ikau uka mambelom panenga je inenga Hatalla akam hong katika aku mina lengengku hunjun ikau. 1:7 Basa Roh je inenga Hatalla akan itah, dia ie Roh je mampikeh itah. Tapi Roh Hatalla te manjadian itah mangat abas, kontep asi tuntang olih manyarenan arep. 1:8 Tagal te ela mahamen manenga kesaksian tahiu Tuhan itah, tuntang ela kea mahamen tahiu aku, je inamean akan huang penjara tagal ie. Tapi keleh ikau hapan kaabas bara Hatalla, omba mangkeme kapehe tagal Barita Bahalap te. 1:9 Hatalla manyalamat itah tuntang mantehau itah uka manjadi ungkup ayue bewei. Ie malalus jete dia hagalang gawi je jari iawi itah, malengkan hagalang rencana ayue kabuat tuntang asie. Ie manenga akan itah asie mahalau Kristus Yesus helo bara kalunen toh injapa. 1:10 Tuntang toh, Hatalla mamparahan asie te akan itah hong pandumah Raja Panyalamat itah Kristus Yesus. Yesus mampakalah kuasan pampatei tuntang mimbit pambelom je katatahie mahalau Barita Bahalap te. 1:11 Maka uka mangabar Barita Bahalap te, Hatalla mangkat aku manjadi rasul tuntang guru. 1:12 Jete sababe aku buah kare kapehe toh, tapi aku tetep percaya, basa aku katawan toto eweh je imercayaku te. Aku percaya dengan taloh je jari inyarahe akangku hong kapercaya, ie olih kea mahagae sampai hong Andau Kiamat. 1:13 Keleh toto-toto manumon auh ajar je bujur je jari inengaku akam. Tuntang keleh ikau tetep mimbing kapercaya tuntang sinta je jari inenga akan itah tagal kahinjen itah dengan Kristus Yesus. 1:14 Hapan pandohop bara Roh Hatalla je belom huang itah, keleh ikau mahaga bua-buah kare taloh barega je jari imercayaku akam. 1:15 Ikau katawan je oloh handiai hong wilayah Asia jari malihi aku, tatame kea Pigelus tuntang Hermogenes. 1:16 Tapi keluarga Onesiporus jari pire-pire kali mampahanjak ateiku. Keleh Tuhan pahias mamparahan sinta asi akan ewen. Aloh aku melai huang penjara, Onesiporus dia mahamen dengan ampin nasibku te. 1:17 Sana sampai hong Roma, ie balalu miar manggau aku sampai ie hasondau dengangku. 1:18 Tuntang ikau katawan hong Epesus ie are toto mandohop aku. Keleh Tuhan mamparahan sinta asi akae hong andau Tuhan mangadili salepah utus oloh kalunen.
2:1 Timoteus anakku! Keleh ikau manjadi abas awi asi je inenga akan itah, awi itah hinje dengan Kristus Yesus. 2:2 Auh ajar je bihin jari ihiningm bara aku hong bentok oloh are, keleh ikau manyarahe akan oloh beken je tau imercaya tuntang je tau majar oloh beken. 2:3 Kilau prajurit ain Kristus je baketep, ikau musti omba mangkeme kapehe. 2:4 Ije biti prajurit je magon malalus gawie, ie dia manderoh arepe kabuat dengan kare urusan ayue kabuat, basa ie mipen manyanang atei panglima ayue. 2:5 Ije biti olahragawan dia olih manjadi juara huang ije pertandingan, amon dia mamenda kare peraturan. 2:6 Oloh pamalan je jari bagawi paham, ie kea je pangkasolake mandino hak manduan hasil taloh imbule. 2:7 Keleh ikau manirok taloh je insanangku te awi Tuhan akan manenga akam kaolih mangat harati kare taloh handiai. 2:8 Keleh ikau mingat jetoh: Barita Bahalap je ingabarku jete barita tahiu Yesus Kristus, panakan Dawid; iete Kristus je jari belom haluli bara pampatei. 2:9 Awi aku mangabar Barita Bahalap te, maka aku buah kapehe; malah sampai irantai kilau ije biti oloh papa. Tapi auh Hatalla dia tau irantai. 2:10 Jete sababe aku sabar mananggong taloh handiai te akan kepentingan kare oloh je jari iintih Hatalla, mangat ewen kea mandino salamat je inenga mahalau Kristus Yesus, tuntang je mampahayak kahaie je katatahie. 2:11 Toto haliai auh toh, "Amon itah jari matei hayak ie, itah akan belom kea hayak ie. 2:12 Amon itah tetep tahan manyarenan, itah akan marentah kea hayak ie. Amon itah milim ie, ie kea kareh milim itah. 2:13 Amon itah dia baketep, ie harajur baketep basa ie dia tau hakalawan dengan arepe kabuat." 2:14 Keleh ikau mampingat kare oloh handiai tahiu taloh handiai toh. Intu taharep Hatalla, tenga nasehat akan ewen uka ela hasoal-jawab tahiu kare istilah. Jete jaton gunae, malahan baya manderoh kare oloh je mahininge. 2:15 Keleh ikau toto-toto manggau jalan mangat ingaku awi Hatalla kilau oloh je patut bagawi akae. Keleh manggau jalan uka ikau dia mahamen tahiu gawim, malengkan majar dengan buah kare auh ajar je puna toto bara Hatalla. 2:16 Keleh mangejau arepm bara kare pander sarita je jaton gunae tuntang je mahina Hatalla. Kare pander sarita je kilau te baya mawi oloh sasar papa. 2:17 Auh ajar kare oloh te manggayar kilau panyakit kangker je ganas. Bara ewen te aton Himeneus tuntang Piletus. 2:18 Ewen jari mahiwang bara auh ajar je bujur, tuntang manderoh kapercayan oloh belahe. Ewen mansanan iete kamisik bara pampatei te jari manjadi. 2:19 Tapi galang je dehen je inampa awi Hatalla dia olih iongge. Intu hunjue te tarasurat, "Tuhan mangasene kare oloh ayue", tuntang "Oloh je manyewut arepe ain Tuhan, oloh te musti terai mawi kare gawi sala". 2:20 Hong huma je hai aton are macam parabot. Aton je inampa bara perak atawa amas, tapi aton kea je bara kayu atawa petak. Aton je ihapan akan kaperluan istimewa, tuntang aton kea je ihapan akan kaperluan biasa. 2:21 Oloh je mamparasih arepe bara taloh handiai je papa, oloh te kareh ihapan akan kaperluan je istimewa. Ie manjadi oloh je tantai tuntang baguna akan tempoe. Ie inatap akan ihapan huang gagenep gawi je bahalap. 2:22 Keleh mangejau arepm bara kare taloh je eka karajin oloh tabela. Keleh manggau jalan akan arepm uka belom manumon kahandak Hatalla, baketep dengan auh ajare tuntang sinta sama arep, tuntang mingkes kadamai hong atei. Keleh ikau belom kilau te hinje dengan ewen je mantehau balaku dohop dengan Tuhan hapan atei je barasih. 2:23 Ela omba huang soal-jawab kare oloh humong je jaton katawan taloh en-en. Ikau katawan je taloh handiai te baya mampalembut kalahi. 2:24 Oloh je bagawi akan Tuhan dia patut hakalahi; ie musti bajenta majar kare oloh hapan kahalap tuntang kasabar. 2:25 Ie musti mahapan kalemo majar kare oloh je rajin malawan; keleh Hatalla manenga katika akan kare oloh te mangat hobah bara kare dosan ewen tuntang mangasene auh ajar je bujur. 2:26 Awi kalote ewen manjadi barendeng haluli, tuntang lapas bara jarat setan je jari manawan ewen tuntang mamaksa ewen omba manumon kahandak ayue.
3:1 Keleh mingat jetoh: Hong kare andau je pangkarahiae kareh are kasusah. 3:2 Oloh kareh manggau taloh akan kepentingan arepe kabuat, manjadi oloh mata duitan, balecak tuntang rajin layau pandere. Ewen rajin mahina oloh, malawan oloh bakas, dia kasene auh tarimakasih, tuntang manyingi kare hal rohani. 3:3 Ewen dia sinta sama arepe, dia rajin mampun oloh, ewen rajin mamapa aran oloh beken, rajin mahapan kakaras, ewen jaton masi, tuntang dia marajin kahalap. 3:4 Ewen rajin mandurhaka, gantong ateie tuntang dia panjang tiroke. Ewen labih rajin dengan kasanang kalunen bara manumon kahandak Hatalla. 3:5 Aloh secara luar ewen rajin malalus gawin agama, tapi ewen manolak taloh je mambatang huang agama te kabuat. Keleh mangejau arepm bara kare oloh je kilau te. 3:6 Aton bara ewen je jari suni-suni tame kare human oloh, palus manantiring kare oloh bawi je balemo kapercayae, je are toto dosae tuntang inguasa awi kare macam kipen. 3:7 Kare oloh bawi te jua-juan balaku iajar, tapi dia puji tau mandino auh ajar je bujur tahiu Hatalla. 3:8 Sama kilau Yanes tuntang Yamres horan je malawan Moses, kalote kea kare oloh te malawan auh ajar ain Hatalla. Tirok ewen jari rusak, tuntang kapercayan ewen jari sangkarah. 3:9 Tapi ewen dia baka tau mandino taloh en-en, basa kahumong ewen kareh ingatawan awi oloh handiai, sama kilau je buah Yanes tuntang Yamres kea. 3:10 Tapi ikau jari manumon kare auh ajar ayungku, kare hadat dasarku, tuntang tintun pambelom ayungku. Ikau jari mite kabuat kilen ampie aku toto-toto percaya dengan Yesus Kristus tuntang sinta kare oloh. Ikau kea katawan kasabar tuntang katanggar ateiku. 3:11 Ikau jari mite aku ingapehe tuntang manyarenan kapehe. Ikau katawan taloh handiai je buah aku intu Antiokhia, intu Ikonium, tuntang intu Listra; tuntang ikau katawan taloh handiai je inyarenangku. Tapi Tuhan manyalamat aku bara kare taloh handiai te. 3:12 Oloh handiai je handak belom manempo tuntang belom hinje dengan Kristus Yesus, puna akan ingapehe, 3:13 pandehan te kare oloh papa tuntang kare oloh panipu kareh sasar papa. Ewen manipu oloh beken padahal ewen kabuat buah tipu kea. 3:14 Tapi tahiu ikau, Timoteus, keleh ikau tetep mimbing kare auh ajar je bujur je jari iajarku akam tuntang kakare taloh je imercayam; basa ikau katawan eweh kare gurum. 3:15 Ikau musti mingat je bara korik ikau jari mangasene Surat Barasih. Surat Barasih te tau manenga akam kaharati uka mandino salamat mahalau kapercaya dengan Kristus Yesus. 3:16 Taloh handiai je tarasurat hong Surat Barasih, uras impalembut bara Hatalla tuntang baguna hapan majar taloh je bujur, hapan maningak tuntang mangambuah taloh je sala, tuntang hapan majar oloh mangat belom tumon kahandak Hatalla. 3:17 Hapan Surat Barasih te oloh je manyang Hatalla tau impahata hapan katinduh-karasih akan kakare macam gawi je bahalap.
4:1 Kristus Yesus kareh dumah tinai akan kalunen toh uka manyidang kare oloh je belom tuntang je matei; tuntang ie kareh dumah uka marentah kilau Raja. Tagal te aku balaku nyame-nyame dengam intu taharep Hatalla tuntang Kristus Yesus: 4:2 Keleh ikau mambarita kabar bara Hatalla te, keleh ikau harajur impahata sukup mangat oloh mahininge, en ewen handak mahininge atawa dia. Keleh ikau manggau akal mangat oloh percaya, mamparahan kasalan oloh, tuntang manantiring ewen. Keleh majar oloh hapan salepah kasabarm. 4:3 Basa katikae kareh sampai oloh dia handak hindai manarima auh ajar je bujur. Tapi ewen kareh manumon kahandak ewen kabuat, tuntang mamumpong kare guru uka iajar hapan kare hal je mangat auhe amon ihining awi pinding ewen. 4:4 Ewen kareh matep pinding ewen taharep taloh je bujur tuntang ewen manenan pindinge akan kare saritan oloh bakas helo. 4:5 Aloh kalote, ikau musti manahan arepm hong kare perkara en bewei. Keleh sabar manyarenan kapehe, keleh lalus gawim kilau pangabar Barita Bahalap te tuntang lalus kapatut gawim hapan salepah kataum ikau kilau pandohop ain Hatalla. 4:6 Tahiu bitin aingku, jari sampai katikae aku handak matei kilau parapah je iluput akan Hatalla. Hanjulo hindai aku kareh malihi kalunen toh. 4:7 Aku jari omba oloh hasalanja hapan salepah kataungku, tuntang jari sampai tapakan garis. Aku harajur baketep dengan Kristus sampai kalepahe. 4:8 Tuntang toh hadiah kamanang mentai aku. Hong andau kiamat, Tuhan, Hakim je bujur te kareh manyarah hadiah te akangku, basa aku belom huang Hatalla. Tuntang dia ie aku bewei je manarima hadiah te, tapi oloh handiai kea je mentai pandumah Tuhan dengan kataharo je paham. 4:9 Keleh manggau jalan uka sapire kaolihm bajeleng dumah manalih aku, 4:10 basa Demas jari malihi aku awi sintae dengan kalunen jetoh. Ie jari haguet akan Tesalonika. Kreskes jari haguet akan Galatia, tuntang Titus akan Dalmatia. 4:11 Baya Lukas ih je melai dengangku. Keleh manambang Markus tuntang imbit ie omba hayak dengam, awi ie jari mandohop hong gawingku. 4:12 Aku jari manyoho Tikhikus haguet akan Epesus. 4:13 Amon ikau dumah, imbit mantel je impelaiku hong Troas intu human Karpus. Imbit kea kare buku ayungku, je mambatang kare buku je inampa bara karatas upak meto. 4:14 Aleksander, tukang tambaga te, jari mawi kare gawi je papa toto akangku. Tuhan kareh mambaleh mawi ie manumon gawie. 4:15 Ikau kabuat musti bua-buah taharep ie basa ie paham malawan barita ain itah. 4:16 Katika pangkasolake haliai aku maju mawi pambelaan ayungku, ije biti mahin jaton oloh je mampahayak aku; ewen uras malihi aku. Keleh jaka Hatalla dia manyalan ewen hong hal jetoh! 4:17 Tapi Tuhan mampahayak aku. Ie manenga kaabas sampai aku olih mangabar salepah Barita Bahalap te, uka ihining awi oloh handiai je dia Yehudi. Tuntang aku lapas bara bahaya pampatei. 4:18 Puna Tuhan kareh maliwus aku bara gagenep gawi je papa mawi aku. Ie kareh mimbit aku dengan salamat akan huang karajaan ayue hong sorga. Keleh ie impahai sampai katatahie! Amen. 4:19 Tabengku akan Priskila tuntang Akwila tuntang akan keluarga Onesiporus. 4:20 Erastus melai intu Korintus, tuntang Tropimus jari ilihiku metoh ie haban hong Miletus. 4:21 Saoli-olih ikau manggau jalan uka dumah helo bara wayah sadingen. Ebulus, Pudes, Linus, tuntang Klaudia mampait taben ewen akam; kalote kea kakare pahari beken je sama kapercayae dengan itah. 4:22 Keleh Tuhan mampahayak ikau. Keleh Tuhan mamberkat kare Pahari! Hormat ikei, Paulus
1:1 Anakku Titus! Aku, Paulus manampa surat toh kilau rewar Hatalla tuntang rasul Yesus Kristus. Aku iintih tuntang inyoho uka mandohop kare oloh je iintih Hatalla mangat kapercayan ewen indehen. Aku musti kea manyang ewen uka mangasene auh ajar je bujur je iajar awi agaman itah. 1:2 Auh ajar te hagalang kaharap je itah akan manarima pambelom je bujur tuntang katatahie. Hatalla jari manjanji pambelom te helo bara tamparan jaman -- tuntang Hatalla dia tau mananjaro. 1:3 Hong katika je buah, Hatalla mamparahan janjie te huang petehe. Peteh te jari impelaie dengangku tuntang aku mambarita jete tagal parentah Hatalla Panyalamat itah. 1:4 Titus, ikau toh toto-toto anakku, basa ikau tuntang aku jari sama percaya dengan Kristus. Aku harap keleh Hatalla Bapa tuntang Kristus Yesus Raja Panyalamat ain itah, manenga berkat tuntang kasanang akam. 1:5 Aku malihi ikau hong Kreta mangat ikau tau maurus kare hal je magon perlu iator. Tinai, mangat ikau mangkat kare pamimpin ungkup hong genep lewu. Tuntang keleh mingat kare nasehat toh: 1:6 Bahalap amon ije biti pamimpin ungkup te jaton bara kasalan; ie baya aton ije sawae; kare anake uras jari percaya dengan Kristus tuntang kare anak te dia nakal kilau anak je dia tau iator. 1:7 Oloh je mahaga ungkup iete oloh je maurus gawin Hatalla, ie jaton bara kasalan. Ie dia tau gantong ateie atawa palait, atawa pambusau, atawa rajin hakalahi, atawa harajur manirok duit. 1:8 Ie musti hanjak manarima oloh intu humae, rajin dengan kare taloh bahalap, tau manahan arepe, bujur ateie, barasih tuntang bahadat. 1:9 Ie musti dehe-dehen mimbing ajar je jari impelai akae, sama kilau je jari iajar kea akae. Awi kalote ie olih manenga nasehat akan oloh hagalang auh ajar je bujur, tuntang mansanan kasalan kare oloh je malawan ie. 1:10 Basa are oloh je rajin malawan, je mambatang kare oloh je solake agama Yehudi, ewen manipu oloh beken hapan tanjaron ewen. 1:11 Kare oloh je kilau te musti inutup nyamae; basa ewen manderoh are keluarga hapan kare auh ajar je mia-mias. Ewen malalus jete baya awi handak manggau ontong je dia pantas! 1:12 Puji ije biti nabi ain ewen kabuat, je solake bara Kreta kea, hamauh, "Kare oloh Kreta harajur mananjaro, tuntang sama kilau meto basiak je babungo tuntang kadian." 1:13 Punae, taloh je koan nabi te bujur. Jete sababe ikau musti maningak ewen hapan katukas auhm uka ewen tetep bahimbing dengan auh ajar je bujur 1:14 tuntang dia hindai bahimbing dengan kare sarita tampan oloh Yehudi atawa kare atoran je inampa awi kare oloh je manolak auh ajar je bujur te. 1:15 Kare taloh handiai te uras barasih akan oloh je barasih. Tapi akan kare oloh je tiroke papa tuntang dia percaya, jaton aton taloh je barasih, awi tirok-pikir tuntang atei-huang ewen jari papa! 1:16 Ewen mansanan ewen te mangasene Hatalla, padahal gawin ewen hakalawan dengan auhe. Ewen te bakajile-jilek, tuntang ewen dia maku manumon: ewen te oloh je dia olihe malalus taloh je bahalap.
2:1 Tapi ikau, Titus, keleh ikau majar auh ajar je buah. 2:2 Tenga nasehat akan kare oloh hatue je bakas, mangat ewen manahan arepe, pintar-harati tuntang belom kilau oloh je patut ihormat. Ewen musti kea mimbing ajar je bujur ain Hatalla, sinta oloh mahapan sinta je tinduh-barasih tuntang tahan manyarenan kapehe. 2:3 Kalote kea keleh ikau manenga nasehat akan kare oloh bawi je bakas uka hadat dasar ewen hakabuah dengan taloh je patut akan oloh je belom akan Hatalla. Ewen dia tau mamapa oloh beken, tuntang dia tau bela-belai mihop sampai babusau. Ewen musti majar kare taloh je bahalap, 2:4 mangat awi te ewen tau mandidik kare oloh bawi tabela uka tau sinta banae tuntang kare anake, 2:5 manjadi pintar-harati, belom barasih tuntang manjadi kabalin oloh je bahalap je mamenda banae. Awi tagal jete maka oloh jaton tau mamapa barita bara Hatalla. 2:6 Kalote kea, keleh ikau manasehat kare oloh tabela mangat ewen manjadi pintar-harati. 2:7 Hong kakare hal, keleh ikau manjadi sonto akan hadat dasar oloh je bahalap. Amon ikau majar oloh, ikau musti jujur tuntang hapan toto-toto ateim. 2:8 Keleh mahapan kare kotak je mangandung kapintar-kaharati, je dia tau oloh mamapae, mangat kare musohm mahamen awi jaton kare hal papa je tau ewen manahiue mawi itah. 2:9 Kare jipen musti mamenda tempoe, tuntang manyanang ateie hong kare taloh handiai. Ewen dia tau malawan, 2:10 atawa manakau. Keleh ewen mamparahan ampin ewen kilau oloh je bahalap tuntang baketep, mangat hapan gawin ewen kalote oloh manara ajar tahiu Hatalla, Panyalamat itah. 2:11 Basa Hatalla jari mamparahan asie uka manyalamat hapus ungkup oloh kalunen. 2:12 Asin Hatalla te majar itah uka terai belom hakalawan dengan kahandak Hatalla tuntang dia manumon kipen kalunen. Itah iajar uka belom hong kalunen toh hayak tau manyarenan tingkes, bujur tuntang baketep dengan Hatalla. 2:13 Katika toh itah mentai Andau je iharap te; hong Andau te kalunen kareh mite kahain Yesus Kristus, iete Hatalla Pangkahai tuntang Raja Panyalamat ain itah. 2:14 Ie jari manyarah arepe kilau parapah tagal itah uka maliwus itah bara kare kapapa, tuntang manampa itah manjadi ungkup je lapas bara dosa tuntang je manjadi oloh ayue, tuntang je rajin malalus kahalap. 2:15 Keleh majar taloh handiai te, tuntang keleh maningak kare oloh je mahining auhm hapan salepah kataum. Ela sampai aton oloh je maanggap ikau randah.
3:1 Keleh mingat anggota kare ungkup ayum mangat ewen mamenda kare pamimpin tuntang oloh je mimbing kuasa, hayak taat tuntang tatap sadia malalus gagenep hal je bahalap. 3:2 Sanan akan ewen uka ela mamapa oloh atawa hasoal-jawab dengan eweh bewei, tapi keleh bajenta dengan oloh. Keleh ampin ewen harajur balemo lowah dengan oloh samandiai. 3:3 Basa bihin itah kabuat kea mahin humong, layau tuntang jaton mamenda oloh. Itah ihajipen awi kare macam kipen tuntang kahandak; itah belom dengan kare kahandak papa tuntang kahiri, hayak hakasingi dengan sama arep. 3:4 Tapi Hatalla, Panyalamat itah mamparahan sintae tuntang kahalap ateie akan itah. 3:5 Ie manyalamat itah, dia awi itah jari malalus taloh bahalap, tapi awi ie kabuat masi itah. Ie manyalamat itah mahalau Roh Barasih, je manenga akan itah pambelom taheta tuntang inakan taheta awi ie jari menyau-mamparasih itah. 3:6 Hatalla manosoh Roh ayue akan itah mahalau Yesus Kristus, Raja Panyalamat ain itah, 3:7 mangat tagal asin Yesus, itah hakabuah tinai dengan Hatalla tuntang itah mandino pambelom je bujur tuntang katatahie je iharap itah te. 3:8 Auh jetoh toto haliai. Kahandakku uka ikau mambehat kare hal jetoh, mangat kare oloh je percaya dengan Hatalla toto-toto manggau jalan uka malalus kare gawi je bahalap tuntang baguna akan oloh handiai. 3:9 Keleh mangejau kare soal-jawab ije dia baguna, kare saritan horoi-rinting, kotak-pander je hakalawan tuntang kalahi tahiu hukum agama. Taloh handiai te jaton gunae tuntang jaton kaontonge. 3:10 Oloh je mawi sabab kapusit huang ungkup, keleh iningak sinde atawa handue awim; limbah te ela hindai manggapi ie. 3:11 Ikau katawan oloh je macam te badungil tuntang kare dosae mambukti ie te oloh basala. 3:12 Sana limbah aku manyoho Artemas atawa Tikhikus manalih ikau, keleh manggau jalan uka saoli-olih bajeleng dumah manalih aku hong Nikopolis, basa aku aton kanahuangku melai intu hete katahin wayah sadingen. 3:13 Keleh toto-toto manggau jalan uka mandohop Senas, ahli hukum te, tuntang Apolos, uka ewen tau haguet tuntang jaton tapas taloh en-en. 3:14 Kare oloh ain itah musti bajar malalus kare hal je bahalap uka tau dinon kare taloh je paham inggau; ela sampai ewen belom jaton baguna. 3:15 Kakare pahari je aton omba aku, mampait tabe akam. Keleh manyampai kea tabe toh akan kare kawal itah je sama hong kapercaya. Keleh Tuhan mamberkat Pahari handiai. Hormat ikei, Paulus
1:1 Pahari Pilemon, sobat tuntang kawal ikei huang gawi! Aku, Paulus, ije biti oloh tahanan tagal Kristus Yesus, hayak dengan paharin itah Timoteus, manyurat surat toh akam 1:2 tuntang akan ungkup je hapumpong intu humam; tinai akan paharin itah Apia tuntang kawal itah hong gawin pambelom Arkhipus. 1:3 Ikei harap keleh Hatalla Bapa itah tuntang Tuhan Yesus Kristus manenga berkat tuntang kasanang akam. 1:4 Gagenep katika aku balakudoa, aku manyewut aran pahari tuntang manyewut tarimakasih akan Hatalla. 1:5 Basa aku jari mahining pahari toto-toto percaya dengan Tuhan Yesus tuntang sinta dengan kakare oloh ain Hatalla. 1:6 Aku balakudoa keleh itah kilau kare oloh je hampahari tuntang huang ije kapercaya, mampalua hasil je labih hai gunae mahunjun kakare berkat je dinon itah awi itah hinje dengan Kristus. 1:7 Pahari Pilemon, sintam dengan salepah ungkup ain Hatalla jari mampahanjak aku tuntang manenga dorongan akangku! Hapus ungkup ain Hatalla impahanjak tagal pahari. 1:8 Tagal te, kilau ije biti pahari huang ije kapercaya, aku tau ih marentah pahari uka malalus taloh je musti ilalus awi pahari. 1:9 Tapi awi aku masi dengan pahari, aku baya balaku ih. Aku toh ije biti oloh bakas tuntang metoh toh inahan huang penjara tagal Kristus Yesus. 1:10 Aku, Paulus, handak manyampai auh palakungku dengan pahari tahiu Onesimus, anakku huang Kristus. Basa huang penjara toh aku jari manjadi bapae secara roh. 1:11 Bihin ie jaton baguna akam, tapi toh ie baguna, dia baya akam bewei, tapi akangku kea. 1:12 Toh oloh je inyintaku te impaitku haluli akam. 1:13 Sapunae aku mipen handak manahan ie omba aku kilau gantin bitim, mangat ie tau madohop aku, katahin aku inahan huang penjara toh awiku mambarita Barita Bahalap ain Hatalla. 1:14 Tapi aku dia handak malalus taloh en-en amon pahari hindai manenga persetujuan. Aku labih rajin amon pahari malaluse hapan kahias atei kabuat; aku dia handak mamaksa pahari. 1:15 Mungkin Onesimus hapisah dengan pahari hanjulo mangat pahari tau manarima ie tinai sampai katatahie. 1:16 Metoh toh ie dia baya ije biti jipen akan pahari; ie toh labih bara te. Ie toh ije biti paharin itah sama oloh Kristen je inyinta. Ie baguna toto akangku, labih hindai akam! Batantu ie baguna toto kilau jipen atawa kilau ije biti pahari huang Tuhan. 1:17 Tagal te, keleh pahari maanggap aku kilau kawal je sama Kristen, keleh tarima ih Onesimus te haluli sama kilau pahari manarima aku ih. 1:18 Amon ie basala atawa butang dengam, nauhe aku mananggong taloh samandiai te. 1:19 Nah, keleh aku kabuat manyurat jete intu hetoh: Aku Paulus, akan mambayar punah taloh samandiai te. (Batantu dia usah aku manahiue tinai je pahari kabuat aton butang dengangku iete pambelom je taheta kilau oloh Kristen.) 1:20 Tagal te huang aran Tuhan keleh dohop ih aku, keleh mampahanjak ateiku kilau pahari huang Kristus. 1:21 Aku manyurat surat toh awi aku percaya pahari handak malalus taloh je ilakuku. Aku katawan pahari kea handak malalus taloh je labih bara te. 1:22 Pandehan te, dohop manatap kamar akangku intu humam, awi aku harap Hatalla manarima kare lakudoan kare pahari samandiai tuntang mimbit aku haluli manalih keton. 1:23 Epapras, je aton huang penjara hayak dengangku tagal Kristus, mampait tabe akam. 1:24 Keleh ikau manarima kea tabe bara kare kawalku: Markus, Aristarkhus, Demas tuntang Lukas. 1:25 Keleh Tuhan Yesus Kristus mamberkat keton. Hormat ikei, Paulus
1:1 Hong jaman horan Hatalla kinjap hakotak dengan tato hiang itah mahalau kare nabi hapan are macam cara. 1:2 Tapi hong jaman je rahian toh ie hakotak dengan itah mahalau anake. Mahalau anake te Hatalla manjapa langit tuntang petak. Tuntang Hatalla jari manukas Anake te kea je aton hak akae manjadi tempon kare taloh handiai. 1:3 Ie te kea je mampamancar kahain Hatalla je paham katarange; ie te kea gambar Hatalla kabuat je gitan batantu. Ie te kea je mahaga langit tuntang petak toh hapan auh ayue je paham kuasae. Limbah ie mawi oloh olih iampun bara kare dosae, ie mondok hunjun padadosan pamarentah hong sorga hinje Hatalla, Tempon kuasa je pangkagantonge. 1:4 Anake te mandino pangkat je kejau kagantonge bara malekat, tuntang aran je inenga Hatalla akae mahin labih paham ihormat bara aran je inenga akan malekat. 1:5 Dia puji Hatalla hamauh dengan malekat je kalotoh auhe, "Ikau toh Anakku; hong andau toh aku manak ikau." Tahiu malekat je kueh bewei, dia puji kea Hatalla hamauh kalotoh, "Aku kareh manjadi Bapae, tuntang ie kareh manjadi Anakku." 1:6 Tapi katika Hatalla manyoho Anake je tambakase akan kalunen toh, Hatalla hamauh kalotoh, "Kakare malekat Hatalla musti manyembah Anak te." 1:7 Tahiu kare malekat, Hatalla hamauh kalotoh, "Hatalla mawi kare malekat ayue manjadi riwut, tuntang kare jipee manjadi nyalan apui." 1:8 Tapi dengan Anak te Hatalla hamauh, "Padadosan ayum, o Hatalla, bunggut sampai katatahie! Pamarentah ayum jete pamarentah je bujur. 1:9 Ikau rajin dengan taloh je bujur tuntang basingi dengan je sala; jete sababe, Hatallam, mintih ikau tuntang manenga akam hormat je mimbit kahanjak, malabien bara kare kawalm." 1:10 Hatalla hamauh kea, "Ikau, Tuhan, bara tamparae manjapa petak, tuntang ikau kabuat manampa langit. 1:11 Kare taloh handiai te kareh nihau, tuntang manjadi usang kilau pakaian; tapi ikau dia tau hobah. 1:12 Hapus langit tuntang petak toh kareh ilipet awim kilau baju, tuntang handak inggantim hapan je beken. Tapi ikau dia tau hobah, tuntang pambelom ayum dia tau lepah." 1:13 Dengan ije biti malekat mahin jaton puji Hatalla hamauh kalotoh, "Mondok ikau intu hila gantaungku, sampai kare musohm tundok dengam." 1:14 Amon kalote, eweh sapunae kare malekat te? Ewen te kare roh je manempo Hatalla, tuntang inyoho Hatalla uka mandohop kare oloh je kareh manarima salamat.
2:1 Jete sababe itah musti toto-toto tinai mimbing kare auh ajar je jari ihining itah, mangat itah dia malihi kapercayan itah. 2:2 Kare peteh je inyampai awi kare malekat akan tato hiang itah jari tarang bujur toto, tuntang oloh je dia manumon atawa mamenda jete mandino hukum je ombet akae. 2:3 Mahin tinai dengan kasalamat je labih tamam bara kare hukum te! Amon itah dia manantuani kasalamatan te, batantu itah dia tau lapas bara hukum. Basa Tuhan kabuat je sola-solake mansanan kasalamatan te, tuntang oloh je sola-solake mahining te jari mambukti katoton taloh te akan itah. 2:4 Beken bara te Hatalla omba mandehen kasaksian kare oloh te awie mawi sepsimpan taloh heran tuntang kare taloh je dia puji bahut hayak mambagi akan oloh kare panenga bara Roh Hatalla manumon kahandak ayue kabuat. 2:5 Kare malekat dia mandino kuasa bara Hatalla mangat marentah kalunen taheta je akan dumah, iete kalunen je inahiu itah metoh toh. 2:6 Tapi hong Surat Barasih aton tarasurat kalotoh, "En kea olon te, o Hatalla, sampai ikau handak mingat ie? Olon te baya olon bewei, tapi ikau manantuani ie! 2:7 Hong katika je pandak ikau manjadian ie labih randah isut bara malekat. Ikau manenga akae pangkat je gantong tuntang paham ihormat 2:8 hayak mangkat ie manjadi panguasa mahunjun kare taloh handiai." Nah, amon insanan Hatalla mangkat olon manjadi "panguasa mahunjun kare taloh handiai", jete rimae ije mahin jaton taloh je dia hong kuasan olon. Aloh kalote, metoh toh itah jaton mitee olon te bara kuasa mahunjun kare taloh handiai. 2:9 Tapi itah jari mite Yesus mimbing kuasa! Ie injadian isut labih randah bara malekat, mangat tagal kahalap atei Hatalla ie tau matei akan salepah ungkup oloh kalunen. Toh itah mite, akae jari inenga pangkat je tinduh-barasih tuntang paham ihormat awi ie jari manyarenan kapehe sampai matei. 2:10 Puna patut kea Hatalla -- je manjapa taloh handiai akan tintun kahimat ayue kabuat -- mangkat Yesus jadi panyalamat je tinduh barasih mahalau kapehe. Hapan jete Hatalla tau manantiring are oloh mangat ie tau impahai haya-hayak dengan Yesus. Basa ie te je mambuka jalan akan ewen mangat inyalamat. 2:11 Yesus marasih oloh bara kare dosae; tuntang ie je mamparasih, dengan ewen je imparasih te, sama-sama bara ije Bapa. Jete sababe Yesus dia mahamen mangaku ewen te kilau paharie. 2:12 Yesus hamauh dengan Hatalla, "Aku kareh mambarita akan kare paharingku tahiu ikau. Aku kareh manara aram hong kare pumpong ewen." 2:13 Yesus hamauh kea, "Aku kareh mingkes kaharapku intu Hatalla." Tuntang ie hamauh kea, "Toh ie aku, hinje dengan kare anak je jari inenga Hatalla akangku." 2:14 Awi kare oloh je inyewute anak te, oloh kalunen je tau matei, maka Yesus kabuat manjadi sama dengan ewen tuntang belom kilau ampin olon. Ie mawie kalote mangat tagal pampateie te ie tau mampalomos setan je bara kuasa hong pampatei. 2:15 Hapan cara jete ie malapas kare oloh je hapus umure injipen awi kikeh dengan pampatei. 2:16 Maka tarang gitan je indohop te dia malekat, malengkan panakan Abraham. 2:17 Jete rimae ie musti manjadi sama dengan kare paharie hong kakare hal. Tuntang tagal te ie tau manjadi Imam Hai je baketep tuntang pamasi. Tagal gawie te dosan olon tau iampun. 2:18 Tuntang awi ie kabuat puji manyarenan kapehe tuntang iningkes, maka ie tau mandohop oloh je buah tingkes, basa ie kabuat puji iningkes tuntang manyarenan kapehe.
3:1 Pahari handiai oloh Kristen je jari intehau awi Hatalla! Coba inirok handale-ndalem tahiu Yesus toh! Hatalla manyoho ie dumah tantai uka manjadi Imam Hai hong agaman itah. 3:2 Ie baketep dengan Hatalla je jari mintih ie akan gawi te, sama kea kilau Moses horan baketep malalus gawie intu Human Hatalla. 3:3 Tapi Yesus patut mandino hormat je labih hai bara Moses. Basa oloh je mamangun huma musti mandino hormat labih hai bara huma te kabuat. 3:4 Genep huma puna aton oloh je mamangue, tapi je mamangun taloh handiai jete Hatalla kabuat. 3:5 Moses baketep kilau jipen intu huang Human Hatalla tuntang manyampai kare hal je akan insanan awi Hatalla hong wayah je akan dumah rahian. 3:6 Tapi Kristus baketep kilau Anak je aton tanggong jawab dengan Human Hatalla. Tuntang itah toh Human Hatalla, asal atei itah tetep balasut tuntang tetep percaya uka mandino taloh je iharap itah. 3:7 Awi te, kilau koan Roh Hatalla, "Amon hong andau toh keton mahining auh Hatalla, 3:8 ela keton badungil kilau tato hiang keton, katika ewen malawan Hatalla, tuntang maningkes Hatalla hong padang pasir. 3:9 'Intu hete tato hiang keton maningkes aku, tuntang mauji aku,' koan Hatalla, 'padahal ewen jari mite gawingku epat puluh nyelo katahie.' 3:10 Jete sababe aku balait dengan ewen tuntang hamauh, 'Harajur ewen dia baketep, tuntang bantus mamenda kare parentahku.' 3:11 Aku balait tuntang basumpah, 'Ewen kareh jaton tau tame hong lewu te mangat mandino andau malayan hinje aku.' " 3:12 Pahari handiai, keleh bua-buah keton ela sampai aton oloh hong marak keton je ateie paham papa tuntang jaton percaya, sampai ie manalikut tuntang mangejau arepe bara Hatalla je belom! 3:13 Jadi, mangat ela sampai aton oloh je marak keton buah tipu awi dosa sampai malawan Hatalla, keleh keton manenga nasehat akan sama arep keton genep andau katahin itah belom hong jaman je inyewut "Andau toh" hong Surat Barasih. 3:14 Itah handiai uras kawal ain Kristus hong ije perjuangan, asal itah sampai kalepahe mimbing dehe-dehen kapercaya je ain itah bara tamparae. 3:15 Jetoh ie auh je tarasurat hong Surat Barasih, "Amon hong andau toh keton mahining auh Hatalla, ela keton badungil kilau tato hiang keton, katika ewen malawan intu taharep Hatalla." 3:16 Nah, eweh kea kare oloh te je mahining auh Hatalla palus malawan intu taharepe? Jete ie oloh handiai je imimpin awi Moses balua bara Misir. 3:17 Tuntang awi eweh Hatalla balait epat puluh nyelo katahie? En dia taharep ewen je badosa tuntang matei intu padang pasir? 3:18 Katika Hatalla basumpah kalotoh, "Ewen kareh dia tau tame hong lewu te mangat mandino andau malayan hinje aku" -- eweh tinai jete je koan Hatalla te? Oloh je koan Hatalla te iete kare oloh je malawan intu taharep Hatalla, en dia kalote? 3:19 Metoh toh itah harati je ewen te dia tau tame, awi ewen dia percaya dengan Hatalla.
4:1 Nah, janjin Hatalla magon injalan, tuntang itah kareh mandino andau malayan je injanjie te. Jadi, keleh itah barendeng mangat jaton oloh hong marak keton je ampie dia mangkeme andau malayan je injanjie te. 4:2 Basa Barita Bahalap te jari imbarita akan itah sama kilau akan ewen. Tapi akan ewen, barita te jaton ganae. Basa katika ewen mahininge ewen dia percaya. 4:3 Tapi itah je percaya, manarima andau malayan je injanji Hatalla te. Jete hakabuah dengan auh je insanan Hatalla kalotoh, "Aku balait tuntang hasumpah, 'Ewen kareh jaton tau tame mangat mandino andau malayan hinje aku.' " Hatalla hamauh kalote aloh gawie jari hapus hong katika ie manjapa kalunen jetoh. 4:4 Basa tahiu andau kaujue, aton tarasurat huang Surat Barasih kalotoh. "Hong andau kauju Hatalla malayan bara kakare taloh gawie." 4:5 Tahiu hal te inyurat tinai kalotoh, "Ewen kareh jaton tau tame hong lewu te mangat mandino andau malayan hinje aku." 4:6 Jadi ewen je sola-solake mahining kabar tahiu Barita Bahalap te, jaton manarima andau malayan te awi dia percaya. Amon kalote maka tarang batantu aton kare oloh beken je tau manarima andau malayan te. 4:7 Basa Hatalla jari manukas ije andau je beken tinai, je inyewut "Andau toh". Banyelo-nyelo tinai limbah te Hatalla hakotak tahiu hal te mahalau Dawid, hong ayat je inyewut nah, "Amon hong andau toh keton mahining auh Hatalla, ela keton malawan". 4:8 Jaka paribasae Yosua jari manenga akan kare oloh te andau malayan je injanji Hatalla, maka Hatalla dia handak hakotak tinai tahiu ije andau je beken. 4:9 Jadi, akan ungkup Hatalla magon aton janji uka malayan sama kilau Hatalla kea malayan hong andau kaujue te. 4:10 Basa oloh je mandino andau malayan je injanji Hatalla akae te, kareh malayan kea bara kare taloh gawie, sama kilau Hatalla. 4:11 Tagal te, keleh itah toto-toto manggau jalan uka mandino andau malayan je injanji Hatalla te. Ela sampai aton ije biti bara itah gagal kilau ewen horan, awie dia percaya dengan Hatalla. 4:12 Auh Hatalla jete auh je belom tuntang dehen; labih banyihi bara padang je hasansila isie. Auh te manusuk timben sampai akan helat hambaruan dengan roh; sampai akan helat kare sapan tulang tuntang ontek tulang, sampai olih mangatawan kakejau kandalem tirok tuntang kahandak atei olon. 4:13 Ije mahin jaton taloh belom je basahokan bara tampayah Hatalla, kare taloh handiai uras bukei tuntang habangah intu taharepe. Tuntang itah musti mamparahan tanggong jawab itah intu taharepe. 4:14 Jete sababe itah musti dehe-dehen mimbing kakun kapercayan itah. Basa ain itah aton Imam Hai je toto hai, je jari tame sampai intu taharep Hatalla -- iete Yesus Anak Hatalla. 4:15 Imam Hai ain itah te dia ie imam je dia olih omba mangkeme kare kalemon itah. Tapi ie jari iningkes hong kakare hal, sama kilau itah kabuat; baya ie jaton mawi dosa. 4:16 Awi te, keleh itah hapan salepah kamenteng itah manaharep Hatalla je marentah hapan kahalap ateie. Hatalla kareh masi itah tuntang mamberkat itah mangat itah mandino pandohop hong katikae je buah.
5:1 Gagenep imam hai iintih bara marak ungkup, tuntang iangkat uka manempo Hatalla kilau wakil ain ewen. Gawin ayue iete manyarah akan Hatalla kare panenga tuntang kare parapah akan ampun dosa. 5:2 Imam hai te kabuat balemo hong are hal, tuntang tagal te ie tau balemo lowah ampin kasabare dengan kare oloh je jaton katawan taloh en-en tuntang je layang jalae. 5:3 Tuntang awi ie kabuat balemo, maka ie musti maluput parapah, dia baya awi kare dosan ungkup, tapi awi kare dosan ayue kabuat. 5:4 Ije biti mahin jaton oloh je mangkat arepe kabuat manjadi imam hai. Oloh manjadi imam hai amon Hatalla mantehau ie akan gawi te -- kilau Harun. 5:5 Kalote kea Kristus. Ie dia mangkat arepe kabuat manjadi Imam Hai. Hatalla kabuat je mangkat ie. Hatalla hamauh dengae, "Ikau toh Anakku; hong andau toh aku manjadi Bapam." 5:6 Hong eka beken Hatalla hamauh kea, "Ikau toh imam je katatahie, kilau imam Melkisedek." 5:7 Katika Yesus belom hong kalunen toh, ie balakudoa tuntang balaku hapan auh kariak tuntang tangis dengan Hatalla, je olih manyalamat ie bara pampatei. Tuntang awi ie tundok dengan Hatalla hapan salepah hormat, maka auh ayue ihining. 5:8 Yesus te Anak Hatalla, tapi aloh kalote, ie bajar uka manjadi taat mahalau kapehe. 5:9 Maka limbah ie manjadi panyalamat je tinduh-barasih, ie manjadi upon salamat je katatahie akan oloh je taat dengae, 5:10 tuntang Hatalla kea mamparahan ie kilau Imam Hai, sama kilau imam Melkisedek! 5:11 Tahiu pangkat Yesus kilau Imam Hai, are taloh je handak insanangku akan keton, tapi bahali manarange awi keton lalau barangkah haratie. 5:12 Sapunae katikae akan keton jari sampai uka manjadi guru, tapi ampie keton magon perlu bajar bara oloh beken tahiu kare batang ajar ain Hatalla. Keton hindai olih manarima panginan je batekang; keton musti magon mihop susu ih. 5:13 Oloh je magon mihop susu, rimae ie magon awau; ie hindai aton pangatawae tahiu taloh je bujur dengan taloh je sala. 5:14 Panginan je batekang jete akan oloh bakas je awi pangatawae, jari tau mangabeken taloh je bahalap dengan taloh je papa.
6:1 Tagal te, keleh itah labih maju akan kare auh ajar je labih kejau tahiu pambelom je batue, ain oloh Kristen, tuntang ela baya manantuani kare batang ajar je solake hong agaman itah. Ela itah manangkaluli tinai batang ajar tahiu auh uka oloh terai malalus kare hal je dia baguna tuntang musti percaya dengan Hatalla, 6:2 atawa batang ajar tahiu pampandoi atawa tahiu mingkes lenge intu hunjun oloh je belom haluli limbah matei atawa hukum je katatahie. 6:3 Amon Hatalla manyoho, keleh itah maju akan kare ajar je labih maju! 6:4 Basa kare oloh je jari undur, dia olih ingagalan tinai. Ewen bihin jari melai hong kalawa ain Hatalla, tuntang jari mangkeme panengan ayue. Ewen jari kea omba inguasa awi Roh Hatalla. 6:5 Bara panyangkum ewen, ewen katawan auh Hatalla je bahalap, tuntang ewen jari mangkeme kare panenga je kontep dengan kuasa hong jaman je kareh dumah rahian. 6:6 Tapi limbah te ewen mundur! Kueh olih ewen te ingagalan haluli mangat hobah tinai bara kare dosan ewen. Basa ewen te manyampalaki tinai Anak Hatalla tuntang mahina ie intu taharep oloh are. 6:7 Petak je minyop danum ujan je kinjap manata hunjue, palus mampalembut kare taloh imbul je baguna akan oloh je mangaboe, petak te imberkat Hatalla. 6:8 Tapi amon petak te mampalembut kare tingen tuntang kare ruwut je haduhi, maka petak te jaton gunae tuntang kareh akan inyapa awi Hatalla tuntang kajariae lepah inusul. 6:9 Tapi pahari handiai je inyinta, aloh ikei hamauh kalote, ikei magon percaya ih dengan keton. Ikei percaya keton jari manarima taloh je bahalap haream, iete kare berkat je manjadi bagian salamat ain keton. 6:10 Hatalla te dia ie Hatalla je dia adil. Ie dia mangalapean taloh je inggawi keton akae, tuntang sinta je imparahan keton akae katika keton mandohop kare pahari je sama kapercayae dengan itah, bihin tuntang katika toh. 6:11 Ikei mipen toto mangat genep bitin keton harajur ingarasan sampai sakalepahe, mangat keton mandino taloh je iharap keton te. 6:12 Ikei dia maku keton manjadi kadian. Tapi ikei handak uka keton belom sama kilau kare oloh je jari manarima taloh je injanji Hatalla, awie percaya dengae tuntang awie mentai dengan sabar. 6:13 Katika Hatalla hajanji dengan Abraham, ie hasumpah uka malalus taloh je jari injanjie te. Tuntang awi jaton je labih gantong bara Hatalla maka ie basumpah hong aran ayue kabuat. 6:14 Ie hamauh, "Aku hajanji uka mamberkat ikau tuntang mawi panakam manjadi are." 6:15 Abraham mentai dengan sabar, maka ie manarima taloh je injanji Hatalla akae. 6:16 Amon oloh basumpah, ie basumpah hapan aran oloh beken je gantong bara ie, maka sumpah te mampahapus kare perkara. 6:17 Hatalla handak manukas akan kare oloh je manarima janjie, ie dia handak mobah rencanae. Jete sababe ie mandahang sumpah hong janjie te. 6:18 Due hal te dia tau hobah: Hatalla dia mungkin mananjaro tahiu janji tuntang sumpahe. Tagal te, itah je jari bakalindong intu Hatalla, inantiring toto-toto uka mimbing dehe-dehen intu kaharap je iampar hong baun itah. 6:19 Kaharap itah te sama kilau sauh je inangkelem handalem toto tuntang kilau eka bahimbing je dehen tuntang taloh je mangat akan pambelom itah. Kaharap jete manembus dinding benang intu kamar je paham barasih hong human Tuhan huang sorga. 6:20 Yesus jari marintis jalan akan itah manalih eka te, tuntang jari tame akan hete manjadi Imam Hai ain itah sampai katatahie, sama kilau Imam Melkisedek.
7:1 Melkisedek te, iete raja bara Salem tuntang imam hai ain Hatalla je gantong haliai. Katika Abraham buli limbah maasang kare raja, Melkisedek dumah manambang ie tuntang mamberkat ie. 7:2 Maka Abraham manenga akan Melkisedek ije per sapuluh bara kare taloh je iasange te. (Aran Melkisedek te rimae, je mambatang "Raja Kaadilan"; tuntang awi ie raja bara Salem, maka arae te irima kea "Rajan Kasanang".) 7:3 Tahiu Melkisedek toh, hong kueh bewei jaton katarangan je manyewut ie te aton bapae atawa indue atawa tato hiange; jaton kea katarangan tahiu ie inakan, atawa pampateie. Ie sama kilau Anak Hatalla; ie te imam je katatahie. 7:4 Jadi, intu hetoh itah mitee kapaham kahain Melkisedek toh; ie kalote kahaie sampai Abraham, tato hiang utus itah, manenga akae ije per sapuluh bara kare taloh je dinoe hong perang asang te. 7:5 Hong hukum agama ain oloh Yehudi, aton inukas uka kare imam panakan Lewi musti mamupo ije per sapuluh bara hasil je dinon utus oloh Israel, iete kare paharin ewen kabuat, aloh ewen te sama-sama panakan Abraham. 7:6 Melkisedek te dia ie panakan oloh Lewi, tapi ie manarima kea ije per sepuluh bara kare taloh je iasang Abraham, tuntang kea mamberkat Abraham je puna jari manarima kare janjin Hatalla. 7:7 Puna dia tau itah mambantahe, oloh je imberkat te labih randah bara oloh je mamberkat ie. 7:8 Kare imam je manarima bagian ije per sapuluh te, jete oloh je tau matei. Tapi manumon Surat Barasih, Melkisedek je manarima panenga ije per sapuluh te, jete oloh je tetep belom. 7:9 Tau inyewut, iete Lewi -- je panakan ayue te mandino ije per sapuluh bagian bara ungkup oloh Israel -- mambayar kea bagian te mahalau Abraham, metoh Abraham mambayare akan Melkisedek. 7:10 Aloh Lewi hindai inakan, tapi tau inyewut ie jari aton intu huang bereng tato hiange Abraham, metoh Melkisedek hasondau dengan Abraham. 7:11 Penda pimpinan kare imam Lewi, hukum agama Yehudi inenga akan utus Israel. Basa kare imam Lewi horan te dia tau malalus dengan tinduh-barasih taloh je musti ie malaluse, maka musti aton imam beken, iete je sama kilau imam Melkisedek, tuntang beken bara golongan imam Harun hindai! 7:12 Nah, amon pangkat kare imam te hobah, hukum agama Yehudi kea musti hobah. 7:13 Je inahiu intu hetoh iete Tuhan itah: ie bara suku beken, tuntang ije biti mahin hindai puji oloh bara suku ayue je bagawi kilau imam. 7:14 Kakare oloh mangatawan Tuhan itah te asale bara suku Yuda; tuntang Moses dia puji manyewut suku jete metoh ie hakotak tahiu kare imam. 7:15 Hal je inahiu hetoh labih tarang hindai, sana ije biti imam beken je sama kilau Melkisedek, lembut. 7:16 Ie iangkat manjadi imam, dia hagalang kare atoran oloh kalunen, malengkan hagalang pambelom ayue je mimbing kuasa tuntang je jaton tikase. 7:17 Basa huang Surat Barasih insanan, "Ikau toh imam je katatahie, sama kilau imam Melkisedek." 7:18 Jadi toh, atoran je helo te jari inyare awi dia dehen tuntang dia baguna. 7:19 Hukum agama ain oloh Yehudi jaton olih mawi taloh en-en manjadi buah tuntang barasih. Jete sababe itah hong katika toh inenga ije kaharap je labih bahalap; hapan jete itah tau manokep Hatalla. 7:20 Tuntang tinai, taloh samandiai te impahata hapan sumpah bara Hatalla. Jaton sumpah je sama kilau te hong katika kare imam awang beken te iangkat. 7:21 Tapi Yesus iangkat manjadi imam hapan sumpah, katika Hatalla hamauh dengae, "Tuhan jari basumpah, tuntang ie dia handak mobah auhe, 'Ikau toh imam sampai katatahie.' " 7:22 Awi te kea Yesus manjadi jaminan akan janji je labih bahalap. 7:23 Aton ije hal: Kare imam awang beken te are bitie, basa genep bitin ewen te matei sampai dia tau manontong taloh gawie. 7:24 Tapi Yesus belom sampai katatahie, jadi pangkat ayue kilau imam te jaton mindah akan oloh beken. 7:25 Tagal te sampai katatahie Yesus tau manyalamat kare oloh je dumah manalih Hatalla mahalau ie, awi ie belom sampai katatahie uka manyampai auh laku dengan Hatalla akan kare oloh te. 7:26 Jadi, Yesus te Imam Hai je imerlu itah. Ie barasih; intu ie jaton tarasondau kasalan atawa dosa en bewei. Ie imisah bara oloh beken je badosa, tuntang impandai' sampai akan eka je labih gantong bara kakare langit. 7:27 Ie dia sama kilau kakare imam hai awang beken te, je genep andau musti labih helo maluput parapah akan kare dosan ewen kabuat, limbah te harun akan kare dosan ungkup. Yesus maluput parapah baya sinde bewei sampai katatahie, katika ie manyarah arepe kabuat manjadi parapah. 7:28 Hukum agama ain oloh Yehudi mangkat oloh je dia barasih manjadi imam hai. Tapi rahian limbah hukum te Hatalla manampa janji hapan sumpah ie mangkat Anak je manjadi Panyalamat te, kilau Imam Hai je tinduh-barasih sampai katatahie.
8:1 Upon kare taloh je inyarita toh iete: Ain itah aton Imam Hai je sama kilau te, je mondok marentah hinje Hatalla je Pangkahai hong sorga. 8:2 Ie malalus gawie kilau Imam Hai huang kamar je barasih haliai, iete hong tingkap benang Tuhan je toto, je imangun awi Tuhan, dia awi olon. 8:3 Gagenep imam hai te iangkat uka maluput parapah atawa panenga akan Hatalla. Kalote kea Imam Hai ain itah; ayue musti aton taloh je ilupute. 8:4 Paribasae ie aton hong kalunen toh, ie dia akan manjadi imam, basa jari aton imam je jari maluput parapah je musti ilalus tumon hukum agama Yehudi. 8:5 Gawi je ilalus oloh je manjadi imam te sapunae baya ije gambaran tuntang bayangan bara taloh je aton hong sorga. Jete jari insanan awi Hatalla akan Moses horan, katika Moses handak mampendeng Tingkap Benang Tuhan. Hatalla hamauh kalotoh dengan Moses, "Ingat! Taloh handiai te musti ikau manampae manumon sonto je imparahan akam intu hunjun bukit." 8:6 Tapi toh Yesus mandino gawin imam je kejau katinduh-karasihe bara je ilalus awi kare imam te. Basa janji je inampa akan Hatalla dengan olon, jete janji je labih bahalap awi hagalang janji akan kare taloh je labih bahalap. 8:7 Paribasae jaton taloh je tapas hong janji je solake, maka dia usah aton janji je kaduee. 8:8 Tapi Hatalla jari sondau kasalan intu ungkup ayue, sampai Hatalla hamauh, "Ingat, katikae kareh dumah, aku kareh manampa janji je taheta dengan utus Israel, tuntang dengan utus Yuda. 8:9 Dia kilau janji je iawiku dengan tato hiang ewen katika aku magah ewen balua bara lewu Misir. Ewen jaton baketep dengan janji je iawiku akan ewen; maka jete sababe aku dia paduli ewen. 8:10 Tapi toh, jetoh ie janji je handak iawiku dengan utus Israel hong kare andau je akan dumah rahian, koan Tuhan: aku handak mingkes parentahku intu huang tirok ewen, tuntang manyurat jete huang atei ewen. Aku handak manjadi Hatallan ewen, tuntang ewen kareh manjadi ungkup ayungku. 8:11 Ewen dia perlu majar akan sama arep ewen, atawa mansanan akan paharie, 'Keleh mangasene Tuhan.' Basa ewen handiai, hai korik, kareh mangasene aku. 8:12 Aku kareh mampun kare kasalan ewen, tuntang dia mingat hindai kare dosan ewen." 8:13 Awie mansanan ije janji je taheta, Hatalla manampa janji je solake te manjadi usang tuntang bakas; tuntang taloh je jari bakas, kareh bajeleng kea lilap.
9:1 Hong janji ije solake aton kare atoran sombayang, tuntang aton kea eka sombayang tampan olon. 9:2 Ije tingkap benang impendeng je hong hila baue te inyewut Kamar Barasih. Intu hete aton tantahan akan sumbo, tuntang aton kea meja dengan rote je inyarah akan Hatalla. 9:3 Intu huange te tinai, iete intu hila likut dinding benang je kaduee, aton kamar je inyewut Kamar Je Paham Barasih. 9:4 Intu huang kamar te aton mesbeh je inampa bara amas akan hapan mamapui manyan, tuntang aton ije Pati Janji je lepah ingalukop hapan amas. Intu huang pati te aton mangkok amas je basuang manhu, sukah Harun je jari manyalundik, tuntang due bindang batu je basurat sapuluh parentah Hatalla intu hunjue. 9:5 Intu hunjun batu te aton due Kerob, taloh belom je mahapan palapas, jete kilau tanda Hatalla aton hete. Palapas kadadue taloh belom te habirang intu hunjun tutup pati te, jete eka ampun dosa. Tapi taloh samandiai te dia olih inarang titip-tarah hong katika toh. 9:6 Kalote ampie taloh handiai te iator. Genep andau kare imam tame akan huang hila baun tingkap benang te uka malalus gawin ewen. 9:7 Ije tame akan hila je pangkahuange haliai intu tingkap benang te baya imam hai ih. Ie malalus jete baya sinde ije nyelo. Jete ilaluse hayak mimbit daha uka inyarah akan Hatalla tagal kare dosan ayue kabuat tuntang kare dosa je iawi kare ungkup ayue tapi jaton ingatawan awi ewen. 9:8 Hapan atoran te, Roh Hatalla mamparahan batantu, iete katahin tingkap benang hila baun te magon mendeng, maka jalan tame akan huang Kamar Je Paham Barasih te hindai buap. 9:9 Jetoh tanda jaman wayah toh; rimae, kare parapah tuntang kare meto sambalih je iluput akan Hatalla, jaton olih mamparasih tirok atei oloh je mimbit parapah. 9:10 Basa kare atoran sombayang te baya hatontong dengan taloh kinan, taloh ihop, tuntang are ampin macam gawi mamparasih. Kakare taloh te uras atoran je gitan hila luar bewei je ihapan pandehan sampai katikae Hatalla manahetae. 9:11 Tapi Kristus jari dumah kilau Imam Hai ain kare taloh je bahalap je jari aton. Tingkap Benang Tuhan je ekae malalus gawie kilau Imam Hai jete tingkap benang je labih hai tuntang labih barasih. Jete dia ie inampa awi olon; rimae asale dia bara kalunen je injapa toh. 9:12 Kristus tame Kamar Je Paham Barasih huang tingkap benang te baya sinde bewei sampai katatahie. Hong katika te ie dia mimbit dahan kambing hatuee atawa dahan anak sapi akan indu parapahe; ie mimbit dahan ayue kabuat, tuntang hapan jete ie mempas itah sampai katatahie. 9:13 Dahan kambing tuntang sapi hatuee dengan kawan anak sapi je imapui, akan hapan mambirik kare oloh je dia barasih manumon atoran agama mangat ewen manjadi barasih. Nah, amon daha tuntang kawo te tau mamparasih kare oloh je dia barasih te, 9:14 mahin hindai dahan Kristus! Mahalau Roh je katatahie, Kristus manyarah arepe kabuat akan Hatalla kilau parapah je tinduh-barasih. Dahae te mamparasih tirok atei itah bara gawin agama je dia baguna, mangat itah tau manyang Hatalla je belom. 9:15 Jete sababe Kristus manjadi oloh helat akan janji je taheta, mangat oloh je jari intehau awi Hatalla tau manarima kare berkat katatahie je jari injanji awi Hatalla. Kakare taloh te tau manjadi awi jari aton je matei, iete Kristus; tuntang pampatei ayue te maliwus oloh bara kasalan je ilalus ewen katika janji je solake magon ihapan. 9:16 Amon aton surat warisan, musti aton kea buktie, iete oloh je manampa surat te jari matei. 9:17 Basa surat warisan dia tau hapan amon oloh je manampae magon belom. Kareh surat te tau hapan limbah oloh te jari matei. 9:18 Tagal te janji je solake mahin musti indehen mahapan daha. 9:19 Sola-solake Moses manyampai kakare parentah Hatalla akan utus Israel. Limbah te Moses manduan dahan anak sapi tuntang dahan kambing hatuee, palus manyampure hapan danum, limbah te mambirike intu Surat Kare Parentah ain Hatalla tuntang intu hapus utus oloh Israel mahapan tampung dawen hisop tuntang bulun tabiri je bahandang toto. 9:20 Sambil malalus jete Moses hamauh, "Jetoh ie daha je mandehen janjin Hatalla je musti imenda keton." 9:21 Limbah te hapan cara jete kea, Moses mambirik kea daha te intu Tingkap Benang Tuhan tuntang intu kakare pakakas je ihapan hong sombayang. 9:22 Puna manumon hukum agama Yehudi, handak uras kare taloh handiai te imparasih hapan daha; tuntang dosa baya tau iampun amon aton daha je inusoh. 9:23 Hapan cara je kilau te maka kare ramo je manamunan kare taloh hong sorga, patut imparasih. Tapi akan taloh je hong sorga te kabuat perlu pampatei je labih bahalap. 9:24 Basa Kristus dia tame akan Kamar Barasih tampan olon, je baya manamunan Kamar Barasih je toto. Kristus tame akan sorga kabuat; katika toh ie intu hete manaharep Hatalla akan kepentingan itah. 9:25 Imam hai ain oloh Yehudi genep nyelo tame akan Kamar Je Paham Barasih intu huang Human Tuhan sambil mimbit daha bara ije kongan meto. Tapi Kristus dia usah lulang-luli tame uka manyarah arepe. 9:26 Basa amon kalote, jete rimae ie jari lulang-luli buah kapehe nampara bara kalunen toh injapa. Tapi ternyata, hong jaman je rahian toh, ie dumah baya sinde ih mangat mampuas dosa hapan pampatei ayue kabuat. 9:27 Hatalla jari manukas kalunen musti matei sinde bewei tuntang limbah te iimbit manaharep hakim awi Hatalla. 9:28 Kalote kea Kristus inyarah sinde bewei kilau parapah hapan mampuas dosan are oloh. Ie kareh dumah tinai akan je kadue kalie, dia awi mangat mampalepah soal dosa, tapi uka manyalamat kare oloh je mentai pandumahe.
10:1 Hukum agama Yehudi baya mamparahan gambar je kabus tahiu kare taloh bahalap je kareh dumah rahian tuntang jete dia ie gambar taloh je bujur. Dia mungkin hukum te tau maninduh-mamparasih oloh je dumah manyembah Hatalla sambil manyarah panenga, aloh genep nyelo harajur inyarah panenga je sama kilau te. 10:2 Paribasae kare oloh je manyembah Hatalla te toto-toto jari imparasih bara dosae, batantu ewen jaton tinai mangkeme arepe badosa, tuntang parapah dia usah inyarah tinai. 10:3 Tapi ternyata kare parapah je inyarah genep nyelo te malahan mamparendeng oloh dengan kare dosae, 10:4 basa dahan sapi tuntang dahan kambing hatuee puna dia tau mampuas dosa. 10:5 Jete sababe katika Yesus tame akan kalunen toh, ie hamauh dengan Hatalla, "Ikau dia mangahandak parapah tuntang panenga; tapi ikau jari manatap bitim akangku. 10:6 Ikau dia rajin dengan parapah je imapui atawa parapah akan ampun dosa. 10:7 Palus aku hamauh, 'Hetoh aku, o Hatalla! Aku dumah malalus kahandakm, sama kilau je tarasurat tahiu arepku hong Surat Barasih.' " 10:8 Sola-solake Kristus hamauh, "Ikau dia mangahandak panenga atawa parapah; ikau dia marajin meto je inyambalih je imapui kilau parapah akan ampun dosa." Kristus hamauh kalote, aloh kakare panenga te inyarah manumon hukum agama Yehudi. 10:9 Limbah te Kristus hamauh, "O Hatalla! Toh aku dumah uka malalus kahandakm." Jadi Hatalla mampahapus kare parapah je usang te, tuntang manggantie hapan parapah Kristus. 10:10 Yesus Kristus jari malalus kare taloh je ingahandak Hatalla tuntang manyarah arepe kilau parapah. Hapan parapah te, je ilalus sinde bewei sampai akan katatahie, itah samandiai imparasih bara dosa. 10:11 Genep imam Yehudi malalus gawie kilau imam genep andau, tuntang ie ulang-ulang maluput parapah jete kea. Tapi kare parapah panenga te jaton olih mampuas dosa. 10:12 Tapi Kristus, baya manyarah ije parapah akan ampun dosa, tuntang parapah te tau ihapan akan sampai katatahie. Limbah manyarah parapah te, Kristus mondok hila gantaun Hatalla tuntang marentah haya-hayak dengae. 10:13 Tuntang toh Kristus mentai sampai Hatalla mawi kare musohe tundok dengae. 10:14 Jadi hapan ije parapah, Kristus maninduh kare oloh je jari imparasih bara dosa. 10:15 Tahiu hal te Roh Hatalla manenga kea kasaksian akan itah. Roh Hatalla hamauh, 10:16 " 'Jetoh janji je handak inampaku dengan ewen hong kare andau je rahian,' koan Tuhan, 'aku kareh mingkes kare parentahku huang atei ewen, tuntang manyurate hong tirok ewen.' " 10:17 Hatalla kea hamauh, "Aku kareh mangalapean kare dosa tuntang kare kapapan ewen." 10:18 Jadi, kare dosa tuntang kare kapapa te jari iampun, maka dia usah tinai inyarah parapah akan ampun dosa. 10:19 Nah, Pahari handiai, tagal pampatei te toh itah bahanyi tame Kamar Je Paham Barasih. 10:20 Yesus jari manampa ije jalan taheta akan itah, iete jalan je manenga pambelom. Jalan te mahalau benang helat, iete bitin Kristus kabuat. 10:21 Tuntang toh itah mandino ije biti imam je hai, je mimbing tanggong jawab dengan Human Hatalla. 10:22 Tagal te, keleh itah manokep Hatalla hapan atei je barasih tuntang kapercaya je dehen; hapan atei je jari imparasih bara angat basala, tuntang dengan biti je jari imparasih hapan danum je takining. 10:23 Keleh itah dehe-dehen mimbing kaharap je ingaku itah, basa Hatalla tau imercaya tuntang ie kareh malalus janjie. 10:24 Tuntang keleh itah manantuani sama arep itah, mangat itah tau hatantiring hasinta sama arep tuntang malalus kare taloh bahalap. 10:25 Keleh itah harajur haya-hayak pumpong, tuntang ela laya kilau oloh beken. Justru itah haream je musti labih baketep hakarasan, basa itah katawan dia tahi hindai Tuhan kareh dumah. 10:26 Basa amon barita je bujur ain Hatalla jari imbarita akan itah, tapi itah harajur tantai ihat itah mawi dosa, maka jaton tinai parapah hapan mampuas dosan itah. 10:27 Maka taloh je inaharep itah iete tikas manaharep hakim ain Hatalla ih tuntang apui kalaite kareh mangeho lepah kare oloh je malawan ie! 10:28 Oloh je dia taat dengan parentah je inenga Moses, ihukum matei jaton ampun, limbah inyaksi awi due telo biti oloh, ie tabukti basala. 10:29 Paham babehat parentah je kareh musti buah oloh je manandik Anak Hatalla, hukuman akae pasti labih babehat. Oloh te maanggap hina dahan janji ain Hatalla, iete pampatei Kristus je mamparasih ie bara dosa. Ie manenga Roh je manenga asi. 10:30 Itah katawan eweh ie je hamauh, "Aku kareh mambaleh! Aku kareh mahukum!" tuntang je hamauh, "Tuhan kareh mahakim ungkup ayue." 10:31 Lalau bakaike-ikeh toto amon itah manjato intu lengen Hatalla Ije Belom! 10:32 Keleh keton mingat pahari handiai ampin keadaan keton hong katika je jari mahalau. Hong katika te, limbah kalawan Hatalla mampalawa keton, keton manyarenan are kapehe; tapi keton tetep hakalahi hapan kamenteng keton. 10:33 Aton katikae keton ihina tuntang iawi oloh barangai ampie hong bentok oloh are. Aton kea katikae keton omba manyarenan kapehe hayak dengan ewen je iawi oloh kilau te, 10:34 tuntang keton omba mangkeme kapehen atei oloh je huang penjara. Tuntang katika kare taloh ain keton uras irampas oloh, keton manarima jete dengan sanang atei, awi keton katawan ain keton magon aton taloh je labih bahalap, je bunggut sampai katatahie. 10:35 Tagal te, ela bageto kaharap, basa amon keton tetep percaya, maka akan te aton upah je hai! 10:36 Keton patut sabar mangat katon tau malalus kahandak Hatalla tuntang tagal jete keton tau manarima taloh je injanjie. 10:37 Basa hong Surat Barasih tarasurat, "Baya hanjulo bewei hindai, maka ie je akan dumah te, kareh dumah bajeleng; ie dia akan landa-landar dengan pandumahe. 10:38 Tuntang ungkup ayungku je bujur kareh percaya tuntang belom; tapi amon aton bara marak ewen je undur, maka aku dia tau sanang dengae." 10:39 Itah toh dia ie ungkup je undur tuntang layang. Tapi itah toh ungkup je percaya dengan Hatalla tuntang je inyalamat.
11:1 Mimbing kapercaya jete rimae toto-toto yakin dengan kare hal je iharap, rimae aton kaharap je terus dengan kare taloh je gitan. 11:2 Awi ewen aton kapercayae, maka kare oloh katika horan eka karajin Hatalla. 11:3 Awi kapercaya, maka itah harati langit tuntang petak toh injapa awi auh Hatalla; jadi, taloh je tau gitan, jete manjadi bara taloh je dia tau gitan. 11:4 Awi kapercayae, maka Abel manyarah akan Hatalla parapah je labih bahalap bara ain Kain. Awi kapercayae te, Abel inarima awi Hatalla kilau oloh je bahalap, basa gitan ampie Hatalla manarima parapah je inenga te. Abel jari matei, tapi tagal kapercayae te, maka ie magon hakotak sampai katika toh. 11:5 Awi kapercayae, maka Henokh dia matei, tapi inggatang tuntang iimbit manalih Hatalla. Ije biti mahin jaton oloh olih sondau ie, awi ie jari inggatang awi Hatalla. Huang Surat Barasih tarasurat iete Henokh inggatang, ie manyanang atei Hatalla. 11:6 Amon kapercaya jaton, ije mahin jaton oloh tau manyanang atei Hatalla. Basa oloh je dumah manalih Hatalla musti percaya je Hatalla te aton, tuntang Hatalla manenga baleh akan oloh je manggau ie. 11:7 Awi kapercayae, maka Hatalla mansanan akan Noah tahiu kare taloh je kareh manjadi andau rahian, je dia tau gitan awie. Noah mamenda auh Hatalla sampai ie manampa ije kapal je kajariae manyalamat ie tuntang dengan keluargae. Awi kalote, kalunen ihukum, tapi awi kapercayae, Noah kabuat imparahan awi Hatalla kilau oloh bahalap. 11:8 Awi kapercayae, maka Abraham mamenda auh Hatalla katika mantehau ie tuntang manyoho ie haguet akan lewu je injanji Hatalla akae. Palus Abraham haguet tuntang dia katawan akan kueh tintun pangguete. 11:9 Awi kapercayae maka Abraham melai kilau oloh tamuei hong lewu je injanji Hatalla akae. Abraham melai hete intu huang tingkap benang. Kalote kea Isaak tuntang Yakob je manarima janji je kalote kea bara Hatalla. 11:10 Basa Abraham puna mentai lewu je irencana tuntang imangun awi Hatalla hapan galang je dehen. 11:11 Awi kapercayae maka Abraham tau mandino panakae bara Sarah, aloh Abraham jari bakas toto, tuntang Sarah kabuat tamanang. Abraham percaya je Hatalla kareh malalus janjie. 11:12 Aloh hong katika te Abraham te sama kilau oloh je jari matei bitie, tapi ie mandino are panakae, je dia taraise karee -- sama kilau kare bintang hong langit tuntang baras intu saran tasik. 11:13 Kakare oloh te tetep percaya sampai matei. Ewen jaton manarima kare taloh je injanji Hatalla, tapi baya mite tuntang manambange bara kejau. Tuntang awi te ewen mansanan je ewen te baya oloh luar je manamuei hong kalunen toh. 11:14 Oloh je mangaku arepe kalote jete tandae je batantu ewen te manggau lewu je kareh manjadi petak danum ayue. 11:15 Ewen dia tinai manirok lewu je jari ilihi ewen te. Basa amon kalote, maka jari are toto katika akan ewen mangat haluli akan lewu te. 11:16 Tapi ampie, ewen taharo dengan ije lewu je labih bahalap, iete je hong sorga. Jete sababe Hatalla dia mahamen amon ewen mantehau ie Hatallan ewen, basa Hatalla jari manatap ije lewu akan ewen. 11:17 Awi kapercayae kea, maka Abraham manenga Isaak manjadi parapah metoh ie iningkes Hatalla. Akan Abraham kea Hatalla manenga janjie, tapi Abraham pahias manyarah anake je baya tikas ije te. 11:18 Hatalla jari hamauh dengan Abraham, "Mahalau Isaak toh kea ikau kareh mandino panakan je injanjiku akam." 11:19 Abraham percaya Hatalla olih mambelom haluli Isaak bara pampatei -- jadi, tau inyewut, Abraham jari manarima haluli Isaak bara pampatei. 11:20 Awi kapercayae, maka Isaak manjanji kare berkat akan Yakob tuntang Esau akan wayah je inaharep rahian. 11:21 Awi kapercayae, maka helo bara ie matei, Yakob manenga kare berkate akan kare anak Yosep -- awie basingguh intu takolok sukahe tuntang manyembah Hatalla. 11:22 Awi kapercayae, maka Yosep -- katika ie handak matei -- hakotak tahiu oloh Israel balua bara Misir, tuntang mampelai peteh tahiu taloh je musti ilalus dengan kare tulange. 11:23 Awi kapercayae, maka oloh bakas ain Moses manyahokan ie telo bulan katahie limbah ie inakan. Gitan ewen ie te ije biti anak je bahalap, tuntang ewen dia mikeh malawan parentah raja. 11:24 Awi kapercayae, maka Moses sana ie jari hai, dia maku inyewut anak putri raja Misir. 11:25 Ie labih rajin manyarenan kapehe hinje dengan ungkup ain Hatalla bara mangkeme kasanang kamangat pambelom je badosa je baya hanjulo. 11:26 Moses mangkeme labih kejau kahain regae amon mandino taloh je hina tagal Raja Panyalamat je injanji Hatalla te bara mandino salepah ramo lewu Misir, awi Moses maharap upah hong andau je rahian. 11:27 Awi kapercayae, maka Moses malihi tanah Misir marak jaton kikehe dengan kalait raja. Moses miar manintu eka je inalihe kila-kilau ie jari mite Hatalla je dia gitan te. 11:28 Awi kapercayae, maka Moses mahaga Paska tuntang marentah uka intu bauntonggang human oloh Israel iohos daha mangat Malekat Pampatei dia mampatei kare anak temei ain ewen. 11:29 Awi kapercayae, maka kare oloh Israel olih dimpah Tasik Bahandang, ampin ewen kila-kilau mananjong hunjun petak teah, tapi oloh Misir inelen awi tasik te, katika ewen mancoba dimpah kea. 11:30 Awi kapercayae, kare oloh Israel mawi kare dinding batu Yerikho baduroh limbah ewen mangalilinge katahin uju andau. 11:31 Awi kapercayae kea, maka Rahab oloh bawi lontei te dia tamput matei hayak dengan kare oloh je malawan Hatalla; awi ie mahapan kajentae manarima kare oloh kalati ain oloh Israel. 11:32 Nah, aku tau ih jua-juan hakotak, tapi katika dia sukup akangku. Awi aku magon hindai manyewut Gideon, Barak, Simson, Yepta, Dawid, Samuel tuntang kare nabi. 11:33 Awi kapercayae, maka ewen jari mampakalah kare karajaan. Ewen malalus taloh je bujur, sampai ewen manarima taloh je injanji Hatalla. Ewen mangop kare nyaman singa, 11:34 mambelep apui je hagandang, lapas bara tewek padang. Ewen balemo, tapi manjadi abas; ewen menteng hong perang sampai mampakalah kare tentara utus beken. 11:35 Awi kapercayae, maka kare oloh bawi mandino haluli kare oloh ayue je jari matei. Aton kea je pahias ingapehe sampai matei, tuntang dia hakon iliwus, awie handak imbelom haluli akan ije pambelom je labih bahalap. 11:36 Aton je ihababaka, ihewes hapan cambuk, imasung hapan rantai tuntang je inamean akan huang penjara. 11:37 Ewen imanting hapan batu sampai matei, aton je inetek hapan garagaji tuntang impatei hapan padang. Ewen manamuei hapan pakaian bara upak tabiri atawa upak kambing; ewen belom susah, ingapehe tuntang injake. 11:38 Kalunen toh dia ie eka je patut akan ewen. Ewen manamuei hong padang pasir tuntang hong kare bukit, hayak melai hong kare goha tuntang hong kare lowang petak. 11:39 Dia laluen kahain kamanang je dinon awi oloh samandiai te tagal kapercayan ewen! Tapi ewen jaton manarima taloh je injanji Hatalla, 11:40 awi ain Hatalla aton taloh beken je labih bahalap je handak iatohe akan itah. Taloh je iatohe te iete baya awi ewen hinje itah, maka ewen kareh manjadi tinduh-barasih.
12:1 Nah, tahiu arep itah kabuat, hakaliling itah aton are toto saksi! Tagal te, keleh itah manganan taloh handiai je mambehat itah tuntang dosa je harajur leket intu itah. Tuntang keleh itah baketep omba hasalanja manaharep taloh je aton hila baun itah. 12:2 Keleh itah manampayah teneh manintu Yesus, basa ie te je mampisik kapercayan itah tuntang mahagae bara tamparae sampai kalepahe. Yesus tahan manyarenan kapehe hong kayu sampalaki! Jaton ie paduli je matei hong kayu sampalaki te puna taloh je mampahawen. Ie baya mingat tahiu kahanjak je kareh ingkemee rahian andau. Toh ie mondok hila gantaun padadosan Hatalla tuntang marentah hayak dengae. 12:3 Coba itah maniroke kilen ampie kapehen Yesus manaharep kare oloh badosa je kalote kapahame malawan ie! Awi te ela ih korik atei tuntang bageto kaharap. 12:4 Basa hong gawin keton hakalahi malawan dosa, keton hindai puji hakalahi sampai batosoh dahan keton. 12:5 Tuntang ela mangalapean nasehat Hatalla toh, je inenga akan keton kilau anak ayue: "O anakku, tampayah bua-buah auh ajar Tuhan, tuntang ela korik atei amon ie malait keton. 12:6 Basa Tuhan majar gagenep oloh je inyintae, tuntang ie mahewes gagenep oloh je ingakue kilau anake." 12:7 Keleh keton tarima hewes bara Hatalla kilau ajar bara ije biti bapa. Basa en puji ije biti anak dia ihukum awi bapae? 12:8 Amon keton dia omba buah hukum sama kilau kakare anake je beken toh rimae keton dia ie anak ije sah, tapi anak ije dia sah. 12:9 Itah aton bapa itah hong kalunen. Ie majar itah, tuntang itah mahormat ie. Nah, mahin tinai dengan Bapa itah secara roh hong sorga, batantu itah musti labih tinai mamenda ie uka itah belom. 12:10 Oloh bakas itah hong kalunen majar itah baya hong katika je hanjulo, manumon taloh je ingkeme ewen bahalap. Tapi Hatalla majar itah akan kahalap itah kabuat, mangat itah tau manjadi barasih hayak dengae. 12:11 Punae hong katika itah iajar, hukum te dia manyanang atei itah, tapi baya mangapehe atei ih. Tapi rahian limbah te, akan itah je jari iajar, hukum te mimbit itah belom manumon kahandak Hatalla, tuntang mampalembut pangkeme je sanang intu itah. 12:12 Tagal te, paabas lengem je balemo tuntang ututm je hagenjeh te! 12:13 Keleh harajur mananjong hong jalan je rata, mangat paim je balemo te dia talucek, tapi malah manjadi keleh. 12:14 Keleh manggau jalan mangat tau belom damai dengan oloh handiai. Keleh manggau jalan kea uka belom barasih, baya akan Tuhan. Basa jaton ije biti oloh tau mite Tuhan amon ie dia belom kilau te. 12:15 Keleh manjaga ela sampai aton ije biti balua bara baris kahalap atei Hatalla, uka ela aton je manjadi sama kilau batang kayu je baipu intu bentok keton sampai mampalembut kalahi tuntang karusak akan are oloh awi ipu te. 12:16 Keleh manjaga ela aton je belom harayap atawa jaton marega pambelom secara roh, sama kilau je ilalus awi Esau. Ie manjual hak ayue kilau anak bakas, baya awi mipen ije mangkok panginan. 12:17 Keton katawan rahian tinai Esau mipen mandino berkat te bara bapae, tapi ie dia inarima. Basa aloh hapan tangis ie manggau jalan uka mangambuah kasalae, katika akae jaton tinai. 12:18 Kare pahari kareh dia manaharep taloh je sama kilau je inaharep awi utus Israel horan. Ewen manaharep taloh je tau inggayap, iete Bukit Sinai dengan apuie je hagandang; ewen manaharep taloh je kaput-pijem tuntang riwut barat; 12:19 ewen manaharep auh tarompet, tuntang auh je paham hai. Katika kare oloh Israel mahining auh te, ewen balaku nyame-nyame uka auh te dia hakotak tinai dengan ewen. 12:20 Awi ewen dia tahan mahining parentah je inyampai awi auh te. Basa auh te hamauh, "Oloh handiai je manigong bukit toh, dia paduli en ie meto atawa eweh bewei, musti imanting hapan batu sampai matei." 12:21 Taloh je gitan awi oloh Israel te tamam toto ampie sampai Moses hamauh, "Aku mikeh tuntang hagenjeh!" 12:22 Tapi keton jari dumah akan Bukit Sion tuntang lewun Hatalla je belom, iete Yerusalem je hong sorga dengan kare malekat ayue je bakoya-koyan. 12:23 Keton omba manyangkum ije pumpong je rami -- pumpong kare anak tambakas ain Hatalla, je arae inyurat hong sorga. Keton dumah manaharep Hatalla, Hakim ain oloh hapus kalunen. Keton manaharep kare roh oloh bahalap, je jari inampa tinduh-barasih. 12:24 Keton dumah manaharep Yesus, oloh helat akan janji je taheta te; keton manaharep birik daha je mananggong kare hal je labih bahalap bara je inanggong awi dahan Abel. 12:25 Tagal te keleh bua-buah ela sampai keton dia maku mahining auh ayue je hakotak te. Ewen je dia maku mahining auhe je dumah akan kalunen tuntang manyampai barita bara Hatalla, jaton olih mandari arepe. Mahin tinai itah toh je mahining auh ayue je hakotak bara sorga! Amon itah dia maku mahining auhe, itah dia baka tau lapas! 12:26 Hong katika te auh ayue manggeger kalunen. Tapi toh ie hajanji, "Sinde tinai, aku dia baya manggeger kalunen bewei tapi langit kea." 12:27 Auh kotak "sinde tinai" jete manintu hapus kalunen je jari injapa akan induroh tuntang inyare, mangat je batisa te baya taloh je dia tau baduroh. 12:28 Tagal te, keleh itah manyewut tarimakasih akan Hatalla, awi itah manarima ije karajaan je dia tau induroh bara ie. Keleh itah manarimakasih tuntang manyembah Hatalla hapan hormat tuntang kikeh, manumon cara je ingahandak awie kabuat. 12:29 Basa Hatallan itah sama kilau apui je mangeho.
13:1 Keleh keton tetep hasinta sama arep keton sama kilau kare oloh Kristen je hampahari. 13:2 Ela bantus manarima hong human keton oloh je hindai keton kasenee. Basa puji oloh, awie malalus kalote, dia ie katawae salenga ie manarima malekat intu humae. 13:3 Ingat kare oloh je huang penjara, kila-kilau jaka keton kea aton huang penjara hinje ewen. Tuntang kare oloh je iawi oloh barangai ampie, keleh keton mingat ewen kila-kilau jaka keton kea iawi kilau te. 13:4 Oloh handiai musti mamparahan hadat je hormat tahiu pangawin, jete sababe keleh kare kabalin oloh bawi hatue baketep dengan sama arepe. Oloh je harayap tuntang habandong kareh iimbit awi Hatalla manaharep hakim. 13:5 Ela pambelom keton inguasa awi sinta dengan duit, tapi keleh keton ombet angat keton dengan taloh je aton intu keton. Basa Hatalla jari hamauh, "Aku dia handak manalua ikau atawa malihi ikau." 13:6 Tagal te itah bahanyi hamauh, "Tuhan te Pandohopku, aku jaton mikeh. Narai taloh je tau iawi oloh dengangku?" 13:7 Ela kalapean dengan kare pamimpin keton je manyampai auh Hatalla akan keton. Tampayah kilen ampie ewen belom tuntang kilen ampie ewen matei, tuntang keleh manyonto kapercayan ewen. 13:8 Yesus Kristus tetep sama, aloh bihin, metoh toh, tuntang sampai katatahie. 13:9 Ela manalua kare macam ajar je mia-mias mampalayang keton. Atei itah musti impaabas awi kahalap atei Hatalla, jete ih je bahalap; ela tagal kare atoran tahiu panginan. Kare oloh je horan mamenda kare atoran te jaton mandino taloh en-en akan arep ewen. 13:10 Ain itah aton ije mesbeh hapan manyarah parapah akan Hatalla. Tuntang kare imam je nguan gawie intu huang Tingkap Benang Tuhan, ewen jaton hak kuman parapah je aton hunjun mesbeh te. 13:11 Dahan meto je inyarah kilau parapah akan ampun dosa, iimbit awi imam hai akan Kamar Je Paham Barasih, tapi hantun meto te kabuat ingeho intu luar bara eka tingkap benang. 13:12 Jete sababe Yesus kea matei intu luar bauntonggang lewu mangat marasih ungkup ayue bara dosa hapan dahan ayue kabuat. 13:13 Tagal te, keleh itah haguet manalih ie hong hila luar tingkap benang tuntang omba mangkeme karandah hayak dengae. 13:14 Basa hong hunjun petak toh jaton eka melai je katatahie akan itah; itah mentai eka melai je kareh dumah rahian. 13:15 Tagal te hajamban Yesus, keleh itah harajur manara Hatalla; jete kilau parapah tarimakasih itah akae, je inyarah itah mahapan auh totok biwih itah uka manara arae. 13:16 Ela kalapean malalus gawi bahalap tuntang hadohop sama arep, basa jete ie kare parapah je manyanang atei Hatalla. 13:17 Keleh manumon parentah kare pamimpin keton, tuntang mamenda ewen. Basa ewen harajur manantuani hambaruan keton, tuntang ewen musti aton tanggong jawab dengan Hatalla. Amon keton mamenda ewen, ewen tau bagawi dengan sanang atei; amon dia, maka ewen akan bagawi marak kapehen ateie, tuntang jete dia manenga ontong akan keton. 13:18 Keleh harajur balakudoa akan ikei. Ikei percaya je atei-huang ikei puna barasih, basa huang kakare hal ikei harajur handak malalus taloh je bujur. 13:19 Aku tantai handak balaku nyame-nyame, uka keton balakudoa akangku mangat Hatalla bajeleng mimbit aku haluli manalih keton. 13:20 Hatalla jari mambelom Tuhan itah Yesus bara pampatei. Tagal pampateie te ie toh manjadi Sakatik Hai akan itah, iete kare tabirin ayue. Pampateie te kea mandehen janji je katatahie je inampa Hatalla dengan itah. 13:21 Keleh Hatalla je upon kasanang te maharagapan keton hapan kakare taloh handiai awang bahalap je imerlu keton hapan malalus kahandak ayue. Keleh hajamban Yesus Kristus, Hatalla malalus gawie intu itah taloh je ingahandake. Keleh Kristus inara sampai katatahie! Amen. 13:22 Aku balaku mangat keton manantuani kare nasehatku toh dengan sabar, basa suratku toh dia lalau panjang. 13:23 Keleh keton katawan je paharin itah Timoteus jari ilapas bara penjara. Amon ie jari akan eka toh, aku mimbit ie amon aku maja keton kareh. 13:24 Keleh manyampai taben ikei akan kakare pamimpin keton tuntang akan salepah ungkup ain Hatalla. Keleh manarima kea tabe bara kare pahari hong Italia. 13:25 Keleh Tuhan mamberkat Pahari samandiai.
1:1 Pahari handiai ungkup Hatalla je kasaburan hong hapus kalunen! Tabe bara aku, Yakobus, rewar Hatalla tuntang rewar Tuhan Yesus Kristus. 1:2 Pahari handiai! Amon keton mangkeme kare macam tingkes, keleh keton mangkeme ontong. 1:3 Basa keton katawan, amon keton tetep percaya dengan Tuhan hong katika keton buah tingkes, kajariae iete: keton manjadi oloh je tanggar atei. 1:4 Keleh manjaga mangat atei keton sasar tanggar sampai keton toto-toto manjadi tinduh-barasih tuntang jaton tapas taloh en-en. 1:5 Amon aton ije biti bara keton je tapas kapintar-kaharatie, keleh ie balaku jete dengan Hatalla, maka Hatalla kareh manenga kapintar-kaharati akae; basa akan gagenep biti, Hatalla manenga hapan kahias ateie tuntang hapan sintae tuntang asie. 1:6 Tapi oloh je balaku, musti percaya; ie dia tau bembang ateie. Basa oloh je bembang ateie sama kilau riak intu tasik je inamput riwut kanih kate. 1:7-8 Oloh je kilau te dia tetep tiroke; ie dia tau manduan kaputusan hong kare taloh je iawie. Tagal te, dia usah kea ie maharap uka mandino taloh en-en bara Tuhan. 1:9 Oloh Kristen je belom susah keleh mangkeme hanjak amon Hatalla manggatang ie. 1:10 Tuntang oloh Kristen je tatau keleh mangkeme hanjak kea, amon Hatalla mamparandah ie. Basa oloh tatau akan lilap kilau kambang oru. 1:11 Katika matanandau lembut hayak kalasut pandange, maka oru te akan manjadi balayu sampai kambange te baduroh tuntang kahalape palus nihau. Kalote kea dengan oloh tatau; ie akan lenyoh benteng katika ie malalus usahae. 1:12 Salamat oloh je tanggar ateie hong katika ie buah tingkes. Basa limbah ie bahasil manyarenan huang tingkes te, ie kareh manarima upahe, iete pambelom je injanji Hatalla akan kare oloh je sinta Hatalla. 1:13 Amon aton oloh je iningkes awi tingkes je kilau te, ela ih ie hamauh, "Tingkes toh dumah bara Hatalla," basa Hatalla dia tau inggoda awi taloh papa tuntang dia kea manggoda eweh bewei. 1:14 Tapi oloh tau buah tingkes amon ie injijit tuntang injarat awi kipee kabuat je papa. 1:15 Limbah te, amon kipen je papa te inumon, maka dosa lembut; tuntang amon dosa jari masak, kajariae oloh buah pampatei. 1:16 Ela keton buah tanjaro, o kare pahari je inyinta! 1:17 Gagenep panenga je bahalap tuntang berkat je tinduh-barasih jete dumah bara sorga, impamohon awi Hatalla, je manjapa salepah kalawa intu langit. Iete Hatalla je dia hobah, tuntang dia kea mampalembut kakaput en bewei. 1:18 Awi kanahuang ayue kabuat ie mawi itah manjadi anak ayue mahalau kare auh ayue je bujur. Ie malalus jete mangat itah mandino eka je mambatang hong marak kare taloh belom je injapae. 1:19 Pahari handiai je inyinta, keleh manantuani hal toh bua-buah! Buah gagenep oloh bajeleng mahining tapi barangkah hakotak tuntang barangkah balait. 1:20 Oloh je balait dia tau malalus taloh bahalap je manyanang atei Hatalla. 1:21 Tagal te, kanan kare hadat je papa tuntang dia bahalap. Keleh manarima hapan karandah atei auh je inawur awi Hatalla hong atei keton, basa auh te aton bara kaabas hapan manyalamat keton. 1:22 Keleh keton malalus taloh je insanan awi Hatalla, ela baya mahining bewei, sampai awi te keton mananjaro arep keton kabuat. 1:23 Oloh je mahining auh Hatalla, tapi dia malaluse jete sama kilau oloh je manaharep saramin manampayah baun ayue kabuat. 1:24 Limbah ie manantuanie bua-buah, ie palus haguet hayak kalapean kilen ampin baue te. 1:25 Auh hukum ain Hatalla te tinduh-barasih tuntang bara kaabas akan mawi oloh kalunen mardeka. Tuntang oloh je rajin manyalidik tuntang manantuani hukum te bua-buah hayak malalus kare hukum te, oloh te kareh imberkat Hatalla huang kare hal je ilaluse. 1:26 Amon aton oloh je mangkeme arepe baketep huang agama, tapi ie dia mahaga nyamae, maka ie mananjaro arepe kabuat: gawie akan sombayang mahin jaton gunae. 1:27 Kaheret je tinduh-barasih dengan agama manumon tampayah Hatalla Bapa iete: mandohop kare anak nole tuntang kare balo je buah kasusah, tuntang mahaga arepe kabuat mangat dia irusak awi kalunen jetoh.
2:1 Pahari handiai! Kilau oloh percaya dengan Tuhan Yesus Kristus, Tuhan Je Pangkahai, ela keton mangabeken ampin oloh tumon ampie je gitan hila luar. 2:2 Basa amon aton oloh tatau je mahapan tisin amas tuntang pakaiae bahalap dumah manalih pumpong keton balalu dumah kea ije biti oloh susah je mahapan pakaian risai-rewei, 2:3 maka keton labih mahormat oloh je hapakaian bahalap te. Keton hamauh dengae, "Keleh Tuan mondok hong karusi je bahalap toh." Tapi dengan oloh je belom susah keton hamauh, "Kan kanih, mendeng hete," atawa "Mondok hong laseh hetoh." 2:4 Awi keton kalote, keton mangabeken ampin oloh hong marak keton tuntang manilai oloh hapan tirok je papa. 2:5 Ingat, pahari je inyinta! Oloh je ingira susah hong kalunen toh, iintih Hatalla mangat manjadi oloh je tatau hong kapercaya. Kare oloh te akan manjadi anggota ungkup Hatalla sama kilau je injanji Hatalla akan oloh je sinta ie. 2:6 Tapi keton toh malahan mahina oloh je belom susah, padahal oloh tatau te je mahenyek keton tuntang mihir keton akan pengadilan! 2:7 Ewen te jari mahina aran je paham ihormat je dinon keton bara Hatalla! 2:8 Keton malalus taloh je bujur, amon keton malalus hukum Karajaan tumon auh je aton hong Surat Barasih toh, "Sinta sama arep keton sama kilau keton sinta arep keton kabuat." 2:9 Tapi amon keton mangabeken-mangabeken ampin oloh mahapan kare hal je gitan, keton mawi dosa, tuntang hukum Hatalla mansanan keton te oloh je malanggar hukum. 2:10 Oloh je malanggar ije hukum bara kare hukum Hatalla, rimae ie malanggar salepah hukum te. 2:11 Basa oloh je hamauh, "Ela habandong," ie kea je hamauh, "Ela mampatei oloh." Jadi, amon keton dia habandong, tapi mampatei oloh, maka keton malanggar hukum kea. 2:12 Keleh keton hakotak tuntang malalus gawi sama kilau oloh je handak iimbit manaharep hakim manumon hukum Hatalla je mawi oloh kalunen manjadi mardeka. 2:13 Basa Hatalla dia akan mamparahan asie dengan oloh je dia mangasene asi. Tapi sinta asi labih dehen bara sinta hukum! 2:14 Pahari handiai! En gunae oloh hamauh, "Aku oloh je percaya", amon ie dia mambuktie hapan gawie? En tau kapercaya kilau te manyalamat ie? 2:15 Paribasa aton ije pahari je perlu dengan pakaian tuntang dia sukup panginan akan kinae genep andau. 2:16 En gunae keton hamauh dengae, "Salamat mahapan pakaian je balasut tuntang salamat kuman!" -- amon keton dia manenga akae taloh je perlu hapae belom? 2:17 Kalote kea dengan kapercaya, amon dia imbukti hapan gawi, maka kapercaya te jaton gunae. 2:18 Mungkin aton oloh je hamauh, "Aton oloh je bahapang dengan kapercayae tuntang aton kea belahe je bahapang dengan gawie." Aku akan tombah, "Parahan akangku kilen ampie oloh tau mingkes kapercaya sambil jaton gawie tuntang aku akan mamparahan hapan gawingku je aku toh aton kapercayangku." 2:19 En keton dia percaya je Hatalla te baya ije? Nah, kare setan mahin percaya tuntang ewen hagenjeh mikeh! 2:20 Keton humong toto! En perlu mambuktie akan keton je jaton baguna mimbing kapercaya tapi jaton gawie? 2:21 Ite ih Abraham tato hiang itah. Ie inarima bahala-halap awi Hatalla tagal gawie, iete hong katika ie manyarah Isaak, anake te, akan Hatalla hunjun mesbeh. 2:22 Intu hetoh tarang batantu je percaya te musti imparahan hapan gawi mangat manjadi tinduh-barasih. 2:23 Jete hakabuah dengan auh ayat Surat Barasih toh, "Abraham percaya dengan Hatalla, tuntang awi kapercayae te Hatalla manarima ie kilau oloh je malalus kahandak Hatalla." Jete sababe Abraham inyewut, "Sobat Hatalla". 2:24 Toh jadi tarang, oloh inarima dengan bahalap awi Hatalla tagal taloh je ilalus awi oloh te, tuntang dia baya awi kapercayae bewei. 2:25 Ite kea intu Rahab, oloh bawi lontei te. Ie inarima awi Hatalla tagal gawie, iete katika ie manarima hong humae kare oloh pangalati utus Israel tuntang mandohop ewen mandari arep ewen mahalau jalan beken. 2:26 Nah, sama kilau biti je jaton roh, jete biti je matei, kalote kea kapercaya je jaton gawie, jete kapercaya je matei.
3:1 Pahari handiai! Ela lalau are bitin keton je handak manjadi guru. Keton katawan itah je manjadi guru te akan mananggong hukum je labih babehat bara oloh beken. 3:2 Itah samandiai uras mawi kasalan. Tapi oloh je dia puji mawi kasalan hapan kare auhe, jete oloh je tinduh-barasih, je tau toto mahaga arepe. 3:3 Amon itah mangkepan peteng tali nyaman kuda mangat ie manumon kahandak itah, maka itah tau mangamburi hapus bitin kuda te. 3:4 Tau kea induan kapal akan indu sonto. Aloh kapal te taloh je kalote kahaie tuntang imbit awi riwut je paham, tapi ie ingamburi awi pahipit je korik toto, manumon kahandak tukang kamburi. 3:5 Kalote kea dengan jelan itah; aloh jelan itah te korik, tapi ie tau manyombong arepe tahiu kare hal je hai. Tau inirok kea kapaham kalombah himba je tau ingeho awi apui je korik toto! 3:6 Jela sama dengan apui. Intu bitin itah, ie sama kilau asal kare taloh papa je tau manatai kapapa akan hapus bitin itah. Hapan apui je induan bara naraka, ie mangeho hapus pambelom itah. 3:7 Kakare macam meto basiak, burung, meto je manyalantar tuntang lauk tau impalinek, tuntang jari kea impalinek awi olon. 3:8 Tapi jelan kalunen dia olih impalinek awi eweh bewei. Jela te papa tuntang dia olih inguasa; kontep awi pulih je mampatei. 3:9 Itah mangguna jete hapan manyewut tarimakasih akan Tuhan tuntang Bapa itah, tapi hapan jete kea itah manyapa sama arep itah olon, je jari injapa awi Hatalla manamunan ampin Hatalla. 3:10 Bara nyame jete kea auh tarimakasih tuntang kea kare auh sapa. Sapunae dia tau kalote! 3:11 En aton tahasak danum je mampalua danum batawah tuntang danum bapait bara tahasak jete kea? 3:12 Pahari handiai, batang ara dia tau mampalembut bua sikon, tuntang upon anggur dia tau mampalembut bua ara. Tahasak danum je bakahing dia tau kea mampalua danum batawah. 3:13 Amon aton oloh hong marak keton je pintar-harati tuntang bahalap ateie, keleh ie mamparahan jete hapan pambelom je bahalap tuntang malalus kare hal je bahalap je impahayak awi karandah atei tuntang kapintar kaharati. 3:14 Tapi amon keton pangabeho, pehe atei, tuntang manirok kare taloh handiai akan arep kabuat, ela keton tama-tamam dengan kapintar-kaharati je kilau te, basa tagal jete keton mamalsu barita je bujur bara Hatalla. 3:15 Kapintar kaharati je macam te dia ie lembut bara sorga. Ie lembut bara kalunen, bara kipen kalunen, tuntang bara setan! 3:16 Hong kueh aton kahiri tuntang sipat je mingat arep kabuat, hong hete kea aton karidu tuntang sepsimpan kare gawi je papa. 3:17 Tapi oloh je mingkes kapintar kaharati je bara sorga, sola-solake iete oloh je barasih, limbah te ie rajin damai, bajenta, tuntang panumon. Ie kontep dengan sinta-asi tuntang mampalua kare gawi je bahalap. Ie dia mamihak tuntang dia pura-pura. 3:18 Kahalap te puna bua bara paung kadamai je inawur awi oloh je sinta kadamai!
4:1 Bara kueh tamparae kare kalahi kajama hong marak keton? En te dia manampara bara kare kipen keton je harajur hakalawan hong atei keton mangat mandino kamangat kalunen? 4:2 Keton mipen, tapi jaton mandino, palus keton handak mampatei! Keton pahias, tapi jaton mandino taloh je inggau keton, palus keton hasoal tuntang hakalahi. Keton jaton mandino taloh en-en, awi keton dia balaku dengan Hatalla. 4:3 Tuntang aloh keton jari balakue, dia baka keton mandinoe, awi kahimat palakun keton te sala; taloh je ilaku keton te baya akan kamangat arep keton kabuat. 4:4 Keton oloh je dia baketep atei keton! En keton katawan amon keton hinje dengan kalunen, maka keton hamusoh dengan Hatalla? 4:5 Ela tirok keton sala amon Surat Barasih mansanan, "Huang bitin itah Hatalla mingkes Roh je paham hai kahandake." 4:6 Aloh kalote, sintan Hatalla je inengae akan itah labih hai hindai kaabase bara kahandak roh itah te. Jete bukue huang Surat Barasih inyurat kea, "Hatalla malawan oloh je gantong ateie, tapi sinta oloh je randah ateie." 4:7 Tagal te keleh mamenda Hatalla, tuntang buah malawan setan, maka setan kareh hadari bara keton. 4:8 Keleh manokep Hatalla, tuntang Hatalla kea kareh manokep keton. Keleh marasih lengen keton, keton je badosa! Tuntang keleh mamparasih atei keton sampai hagining, keton je rambang ateie! 4:9 Keleh keton toto-toto manyasal tuntang manangis hayak manatum; keleh tatawen keton manjadi tangis tuntang kahanjak keton manjadi kapehen atei! 4:10 Keleh keton mamparandah arep keton intu taharep Tuhan, maka Tuhan kareh manggatang keton. 4:11 Pahari handiai, ela hatida atawa hakasalan sama arep keton. Oloh je manida atawa manyalan paharie je sama-sama Kristen, ie mamapa tuntang manyalan parentah Hatalla. Tuntang amon keton manyalan parentah Hatalla, jete rimae keton dia manumon kare parentah te, tapi keton manjadi hakim. 4:12 Padahal baya aton ije je aton hak manenga parentah akan kalunen tuntang mahakim kalunen. Ie te Hatalla je kuasa manyalamat tuntang mambinasa. Jadi, eweh kea keton, sampai keton bahanyi manyalan sama arep keton oloh kalunen? 4:13 Kare Pahari je hamauh, "Andau toh atawa andau jewu ikei handak haguet akan lewu anu tuntang melai hete ije nyelo katahie mangat badagang tuntang manggau duit," -- keleh mahining auh nasehatku toh. 4:14 Taloh je manjadi hong pambelom keton jewu, keton kabuat dia katawan! Keton baya kilau asep je gitan hanjulo, limbah te nihau lilap. 4:15 Sapunae keleh keton hamauh kalotoh, "Amon Tuhan manyoho, ikei akan belom tuntang malalus taloh toh tuntang taloh te." 4:16 Tapi toh keton balecak tuntang tamam pander. Kakare kotak je tama-tamam kilau te uras sala. 4:17 Tagal te, oloh je katawan taloh bahalap je musti ilaluse tapi dia ie malaluse, oloh te badosa.
5:1 Pahari handiai, keton je tatau! Hining nasehatku. Keleh keton manangis tuntang manatum basa keton kareh mangkeme kasusah-kapehe. 5:2 Panatau keton kareh maram. Pakaian keton jari kinan buhei. 5:3 Amas tuntang perak ain keton jari inumbo tagar; tagar te kareh manjadi saksi malawan keton tuntang kilau apui ie kareh kuman lepah bitin keton. Keton jari manawon panatau tokep wayah je pangkalepahe toh. 5:4 Keton dia mambayar upah akan kare oloh je bagawi hong tanan keton. Toh hining auh tarahing ewen! Kare oloh je mamumpong hasil tanan keton, mangkariak balaku dohop tuntang kariak ewen jari sampai akan pinding Hatalla, Tuhan je Pangkahai Kuasae. 5:5 Keton jari belom tatau sanang tuntang mangkeme kamangat hong kalunen toh. Kila-kilau keton kanjeran mampaseput arep akan andau manyambalih. 5:6 Keton mahukum tuntang mampatei kare oloh je jaton basala, tuntang ewen dia malawan keton. 5:7 Tagal te, keleh sabar pahari handiai, sampai Tuhan dumah. Keleh keton manampayah ampin kasabar ije biti oloh pamalan je mentai tanae sampai mampalembut hasil je barega akae. Hapan kasabare ie mentai ujan hong wayah dawen kayu baduroh tuntang ujan hong wayah dawen manyuloh. 5:8 Keleh keton sabar kea tuntang segah atei, basa andau pandumah Tuhan jari tokep. 5:9 Ela bakotok tuntang ela manyalan sama arep keton, mangat keton dia ihukum awi Hatalla. Ingat! Hakim jari tokep, tatap handak dumah. 5:10 Pahari handiai! Keleh mingat kare nabi je hakotak hong aran Tuhan. Ewen sabar tuntang tahan manyarenan kasusah kajake. Jadi, keleh manduan ewen te manjadi sonto. 5:11 Ewen te inyewut oloh je sanang awi ewen segah ateie. Keton jari mahining kasabar Yob, tuntang keton katawan kilen ampie kajariae Tuhan mamberkat ie. Basa Tuhan te paham pamasi tuntang bahalap ateie. 5:12 Je mambatang haliai iete: ela keton sumpah mahapan aran langit atawa petak atawa mahapan aran en bewei. Keleh keton hamauh "Iyoh" amon kahandak keton puna iyoh, tuntang "Dia" amon kahandak keton puna dia; mangat keton dia ihukum awi Hatalla. 5:13 Amon aton oloh bara marak keton je metoh buah kasusah, keleh ie balakudoa. Amon aton je hanjak, keleh ie manyanyi manara Hatalla. 5:14 Amon aton je haban, keleh ie mantehau kare pamimpin ungkup. Tuntang keleh kare pamimpin te balakudoa akan oloh je haban te tuntang mohos undus intu oloh te hong aran Tuhan. 5:15 Asal lakudoan ewen te toto-toto inyampai hapan kapercaya, Tuhan kareh mampakeleh oloh haban te, tuntang mampun kare dosa je jari iawie te. 5:16 Tagal te, keleh keton sama mangaku kasalan tuntang balakudoa akan sama arep keton mangat keton impakeleh. Lakudoan oloh je manumon kahandak Hatalla, hai toto kuasae. 5:17 Elia te sama kalunen kea kilau itah. Ie balakudoa toto-toto mangat ujan dia dumah, maka ujan palus jaton dumah katahin telo satengah nyelo. 5:18 Limbah ie balakudoa tinai, palus langit mampamohon ujan sampai petak kea mampalembut hasil. 5:19 Pahari handiai! Amon aton oloh bara marak keton je dia hindai manumon ajar ain Hatalla, palus aton ije oloh beken je olih mimbit oloh te haluli manalih Hatalla, 5:20 keleh mingat auh ayat toh; Oloh je mimbit oloh badosa hobah bara jalae je sala, oloh te manyalamat hambaruan oloh je badosa te bara pampatei tuntang mawi are dosa tau iampun. Hormat ikei, Yakobus
1:1-2 Pahari handiai ungkup je iintih Hatalla, je manamuei kasaburan hong tanah Pontus, Galatia, Kapadokia, Asia, tuntang Betinia! Aku, Petrus, rasul Yesus Kristus, maharap keleh Hatalla manenga berkat tuntang kasanang je hakutoh akan keton je. Keton iintih awi Hatalla, saroroi dengan rencana Hatalla Bapa. Tuntang Roh Hatalla jari manjadian keton manjadi ungkup je barasih, baya akan Hatalla, mangat keton mamenda Yesus Kristus tuntang imparasih awi dahae. 1:3 Keleh itah manarimakasih akan Hatalla, Bapa Tuhan itah Yesus Kristus! Ie paham masi itah, jete sababe ie manenga akan itah pambelom je taheta, awie mambelom haluli Yesus Kristus bara pampatei. Jetoh manenga akan itah kaharap je dehen. 1:4 Itah maharap mangat itah mandino kare berkat je inatap Hatalla akan ungkup ayue, iete kare berkat je iingkes hong sorga, sampai dia tau rusak, atawa luntur atawa maram. 1:5 Taloh handiai te uras akan keton, awi keton percaya dengan Hatalla. Maka keton ihaga hapan kuasan Hatalla mangat keton manarima salamat je tantai imparahan hong wayah je pangkalepahe kareh. 1:6 Tagal te keleh keton hanjak atei, aloh metoh toh hong katika je hanjulo keton musti mangkeme pehe atei awi keton buah are macam tingkes. 1:7 Riman tingkes te iete uka mite buktie en keton toto-toto percaya dengan Tuhan atawa dia. Amas je tau rusak mahin iuji hapan apui. Nah, kapercayan keton te labih barega bara amas, jadi musti iuji kea mangat manjadi dehen. Tuntang tagal jete keton kareh inara tuntang ihormat palus impahai hong andau Yesus Kristus dumah tinai. 1:8 Keton sinta ie aloh bihin keton dia mite ie. Tuntang keton percaya dengae aloh hong katika toh keton jaton mite ie. Jete sababe keton hanjak, tuntang mangkeme kahanjak je hai tuntang jaton tarasanan. 1:9 Awi kahimat kapercayan keton sampai, iete salamat akan hambaruan keton. 1:10 Salamat jetoh je iriksa tuntang inantuani awi kare nabi, tuntang ewen manujum tahiu berkat je inenga Hatalla akan keton. 1:11 Ewen manantuani kilen ampie tuntang hamparea taloh te kareh manjadi, je ingahandak awi Roh Kristus je aton huang arep ewen. Hong katika te Roh ayue te manujum akan ewen tahiu kare kasusah-kajake je musti ingkeme awi Kristus tuntang tahiu kahaie je akan dumah limbah te. 1:12 Akan kare nabi te Hatalla mansanan taloh je ilalus ewen te dia baya akan gunan ewen kabuat, tapi akan keton; iete kare taloh je tarang auhe ihining keton wayah toh bara pambarita Barita Bahalap tahiu Yesus Kristus. Ewen manyampai kare hal te akan keton mahapan kuasan Roh Hatalla je impait awie bara sorga. Kare malekat mahin mipen kea mangatawan kabar je imbarita ewen te. 1:13 Tagal te, keleh keton tatap sadia. Keleh barendeng tuntang keleh lepa-lepah kaharap dengan berkat je handak inenga akan keton hong katika Yesus Kristus dumah kareh. 1:14 Keleh mamenda Hatalla, tuntang ela belom manumon kahandak keton kilau horan, metoh keton magon hindai kasene Hatalla. 1:15 Tapi keleh keton barasih intu huang kakare hal je ilalus keton sama kilau Hatalla je mantehau keton te barasih. 1:16 Hong Surat Barasih aton tarasurat, "Keleh keton barasih, basa aku toh barasih." 1:17 Keton manyewut Hatalla te Bapa katika keton balakudoa dengae. Nah, Hatalla te je mahakim kalunen sama kabehate dengan gawin genep bitin oloh dia mite ampin oloe. Tagal te katahin keton magon aton hong kalunen toh, keleh keton mampahai Hatalla hong pambelom keton. 1:18 Keton katawan taloh je jari imbayar hapan mambebas keton bara pambelom je hayang je iwaris awi tato hiang keton. Tewuse te dia ie mahapan taloh je tau rusak kilau perak atawa amas, 1:19 tapi mahapan taloh je paham barega; iete bitin Kristus kabuat, je jari iluput kilau parapah tabiri je tinduh akan Hatalla. 1:20 Kristus iintih awi Hatalla helo bara kalunen toh injapa. Tuntang hong kare andau je pangkarahiae hong jaman jetoh, ie dumah akan kalunen mangat keton inyalamat. 1:21 Mahalau ie keton percaya dengan Hatalla je jari mambelom ie haluli bara pampatei tuntang mampahai ie. Jadi, Keleh Hatalla ih je imercaya keton tuntang Hatalla te kea eka keton mina kare kaharap keton. 1:22 Awi keton mamenda ajar ain Hatalla, maka keton mamparasih arep keton tuntang keton sinta kare oloh je sama kapercayae dengan keton secara bujur buah. Tagal te keleh keton hasinta sama arep keton salepah atei keton. 1:23 Basa mahalau auh Hatalla je belom tuntang je katatahie te, keton inampa manjadi kalunen taheta je dia inakan bara olon, malengkan bara Bapa je katatahie. 1:24 Hong Surat Barasih tarasurat kalotoh, "Salepah utus oloh kalunen kilau oru, tuntang kakare kahaie kilau kambang oru. Oru balayu, kambange mahin baduroh; 1:25 tapi auh Tuhan tetep sampai katatahie." Auh te Barita Bahalap je jari imbarita akan keton.
2:1 Tagal te, kanan bara arep keton kakare taloh je papa; ela hindai mananjaro tuntang ela ampin keton pura-pura. Ela bahiri atei tuntang ela mahina oloh beken. 2:2 Keleh keton manjadi sama kilau awau je harue inakan, harajur manggau danum toso ain roh je tinduh. Hapan te keton kareh sasar hai tuntang inyalamat. 2:3 Huang Surat Barasih inyurat kalotoh, "Keton jari mangkeme kabuat, kakai kahalap ampin Tuhan te." 2:4 Tagal te, keleh dumah manalih Tuhan. Ie kilau batu je belom, batu je inganan awi olon awi ianggap dia baguna; tapi ie te je iintih awi Hatalla kilau batu je barega. 2:5 Keton toh sama kilau kare batu je belom. Tagal te keleh keton rajin uka ihapan mamangun human Hatalla je secara roh. Awi kalote keton manjadi imam je belom tantai akan Hatalla tuntang je mahalau Yesus Kristus manenga akan Hatalla parapah roh je manyanang atei Hatalla. 2:6 Basa hong Surat Barasih tarasurat kalotoh, "Aku jari mintih ije batu barega, je iingkesku hong Sion kilau batu je mambatang toto; tuntang oloh je percaya dengae dia akan kapehe ateie." 2:7 Batu te paham barega akan keton je percaya. Tapi akan kare oloh je dia percaya, maka manjadi kare auh ayat Surat Barasih kalotoh, "Batu je dia hapan awi kare tukang pangun te jete je manjadi batu je mambatang toto," 2:8 tuntang "Jete kea batu je mawi oloh tantarang, batu je mawi ewen balongkang." Ewen tantarang awi ewen dia percaya dengan auh Hatalla. Kalote ampie jari inukas awi Hatalla tahiu ewen. 2:9 Tapi keton toh utus oloh je iintih, kare imam je mandohop raja, utus oloh barasih, je ain Hatalla bewei, ungkup ain Hatalla kabuat. Hatalla mantehau keton tuntang mintih keton balua bara kakaput uka tame akan huang kalawa je tarang haliai, awi ie nahuang mangat keton manawur barita tahiu kare gawi je luar biasa. 2:10 Bihin keton dia ie ungkup ain Hatalla, tapi toh keton ungkup ain Hatalla. Bihin keton jaton mandino asin Hatalla, tapi toh keton mandino sintae asie. 2:11 Pahari handiai je inyinta! Keton toh oloh luar tuntang manamuei hong kalunen toh. Tagal te aku balaku nyame-nyame uka keton ela manumon kipen belai oloh kalunen je harajur hakalawan dengan hambaruan. 2:12 Hadat keton hong marak oloh je hindai kasene Tuhan keleh bahala-halap, mangat amon ewen mamapa keton kilau oloh papa, mahin ewen musti mangaku gawin keton je bahalap, sampai ewen kareh handak manara Hatalla hong andau pandumah ayue. 2:13 Tagal aran Tuhan, keleh keton tundok dengan oloh je marentah kalunen: aloh dengan kaisar je mimbing kuasa je mambatang toto, 2:14 kalote kea dengan Gubernur je inunjuk awi kaisar uka mahukum oloh je mawi taloh sala tuntang mahormat oloh je mawi taloh bahalap. 2:15 Basa Hatalla te mangahandak uka hapan kare gawin keton je bahalap keton mangop kare nyaman oloh je humong kotake. 2:16 Keleh keton belom kilau oloh mardeka, tapi ela mahapan kamardekaan te hapan manyahokan kapapa, tapi keleh belom kilau rewar Hatalla. 2:17 Keleh mahormat oloh samandiai, keleh keton hasinta dengan kare paharin keton je sama Kristen. Keleh keton mikeh dengan Hatalla, tuntang keleh mahormat Kaisar. 2:18 Pahari handiai je manjadi jipen, keleh mamenda auh tuan keton hapan salepah hormat keton dengae; dia baya dengan ewen je bahalap ateie tuntang bajenta, tapi dengan ewen je karas auhe kea. 2:19 Hatalla kareh mamberkat keton, amon awi keton mingat kahandak Hatalla, keton sabar manyarenan kapehe tagal gawin oloh je dia bujur. 2:20 Basa en kaontonge akan keton amon keton sabar manyarenan kapehe je patut inanggong keton awi kasalan keton? Tapi amon keton sabar manyarenan kapehe je buah keton awi keton malalus taloh je bujur, maka Hatalla kareh mamberkat keton. 2:21 Akan jete Hatalla mantehau keton. Basa Kristus kabuat jari buah kapehe akan keton kilau sonto, mangat keton manuntut awan paie. 2:22 Ie dia puji mawi dosa, tuntang ije biti mahin dia puji oloh mahining ie mananjaro. 2:23 Katika oloh mamapa ie mahapan auh je papa bahalap, ie jaton mambaleh mahapan auh je papa. Katika ie buah kapehe, ie dia mawi auh handak mambaleh; ie baya manyarah taloh je buah ie te akan Hatalla, Hakim je bujur te. 2:24 Kristus kabuat meton kare dosan itah intu kayu sampalaki, mangat itah lapas bara kuasan dosa, tuntang belom manumon kahandak Hatalla. Kare himang Kristus te ih je mampakeleh keton. 2:25 Bihin keton sama kilau tabiri je layang, tapi toh keton jari iimbit haluli mangat omba Sakatik Je Mahaga hambaruan keton.
3:1 Kalote kea keton, kare sawan oloh, musti mamenda banan keton mangat amon aton bara kare ewen te je dia percaya dengan barita bara Hatalla, maka ampin lagon keton tau mawi ewen manjadi oloh percaya. Tuntang dia usah keton mansanan taloh en-en akan ewen, 3:2 awi ewen mite ampin hadat keton je tinduh tuntang barasih. 3:3 Ela kahalap keton baya gitan intu luar bewei, paribasa awi keton mampahalap balau atawa mahapan hiasan, atawa mahapan kare pakaian je hai regae. 3:4 Tapi keleh kahalap keton te lembut bara huang atei keton, hadat dasar je balemo tuntang sanai; jete kahalap je bunggut tuntang paham barega manumon tampayah Hatalla. 3:5 Hapan cara jete kare oloh bawi je baagama hong jaman horan, ewen je harap dengan Hatalla te mampahalap arepe awie mamenda banae. 3:6 Sarah mahin kalote kea, ie mamenda Abraham tuntang mantehau ie tuan. Wayah toh kare pahari toh uras anak Sarah, asal keton malalus kare taloh bahalap tuntang dia mikeh dengan eweh bewei. 3:7 Tuntang keton kare banan oloh kea, keleh keton belom hapan salepah kaharatin keton dengan sawan keton, tuntang hapan karendeng je ewen te jalahan oloh kalunen je balemo. Keleh manun ewen dengan hormat, basa ewen te kareh manarima asi je belom bara Hatalla kilau je inarima keton kea. Keleh malalus taloh te, mangat jaton oloh je mahambang lakudoan keton. 3:8 Katatepae iete: Keleh kare pahari hapakat hinje auh tirok tuntang pangkeme. Keleh keton hasinta sama arep keton sama kilau kare oloh je hampahari. Tuntang keleh keton hasinta sama arep keton tuntang ampin dasar keton mamparahan karandah atei keton. 3:9 Ela mambaleh kapapa hapan kapapa, atawa sapa hapan sapa; tapi keleh mambaleh jete dengan balaku berkat bara Hatalla. Basa Hatalla tantai matehau keton mangat keton manarima berkat bara ie. 3:10 Hong Surat Barasih tarasurat kalotoh, "Oloh je handak mangkeme kamangat pambelom tuntang handak mangkeme kare andau je bahalap, ie musti mahaga totoke mangat ela mangotak kare taloh je papa tuntang dia manyewut kare auh tanjaro. 3:11 Ie musti mangejau arep bara taloh je papa tapi malalus taloh je bahalap; keleh ie toto-toto manggau jalae mangat mandino kadamai. 3:12 Basa Tuhan harajur manantuani kare oloh je manumon kahandake, tuntang Tuhan harajur mahining kare lakudoan ewen; tapi Tuhan malawan kare oloh je malalus kapapa." 3:13 Eweh kea je handak mawi kapapa dengan keton, amon keton rajin mawi taloh bahalap? 3:14 Tapi aloh keton musti buah kapehe awi keton malalus kare taloh bahalap, keton ontong! Ela mikeh dengan eweh bewei, tuntang ela atei keton meles. 3:15 Tapi huang atei keton, keleh keton manenga hormat baya akan Kristus awi puna tagal pangkat ayue kilau Tuhan. Tuntang keleh keton harajur tatap sadia tombah kare auh paisek oloh tahiu kaharap je aton huang keton. 3:16 Tapi keleh keton malalus taloh te hapan kalemo tuntang hormat. Tuntang keleh atei-huang keton barasih, mangat amon oloh mamapa keton awi keton belom bahalap kilau murid Kristus, maka oloh je mamapa keton te palus mahamen kabuat. 3:17 Labih bahalap keton buah kapehe awi malalus taloh bahalap -- amon jete puna kahandak Hatalla -- bara keton buah kapehe awi malalus taloh papa. 3:18 Basa Kristus kabuat matei baya sinde bewei, palus akan katatahie tagal dosan kalunen -- ije biti oloh jaton bara kasalan, matei akan oloh je sala. Kristus malalus jete mangat ie tau mangagalan keton manalih Hatalla. Ie matei secara biti-bereng, tapi imbelom tinai secara roh. 3:19 Hapan roh ayue te kea ie mambarita kabar bara Hatalla akan roh je huang penjara: 3:20 iete kare roh oloh je dia manumon kahandak Hatalla hong jaman Noah. Hong katika te Hatalla mentai dengan sabar katahin Noah manampa kapale. Baya kare oloh je aton intu kapal bewei -- hanya biti samandiaie -- je inyalamat bara danum soho te. 3:21 Nah, taloh je manjadi te manjadi paribasa akan pampandoi je manyalamat keton katika toh. Pampandoi jetoh dia ie gawin sombayang hapan mamparasih biti bara kare kapapan like, tapi kilau janjin keton dengan Hatalla, lembut bara atei je bahalap. Pampandoi jete manyalamat keton karana Yesus Kristus jari belom haluli bara pampatei, 3:22 tuntang jari mandai' akan sorga. Toh ie mimbing kuasa hinje dengan Hatalla tuntang marentah kakare malekat, kakare panguasa tuntang kakare taloh je kuasa.
4:1 Awi Kristus jari buah kapehe secara biti bereng, keton kea musti mampaabas arep keton hapan tirok je sama kilau te. Basa oloh je buah kapehe secara biti bereng, dia hindai mawi dosa. 4:2 Tagal te, keleh keton belom katahin tisan andau pambelom keton hong kalunen toh manumon kahandak Hatalla, tuntang dia manumon kipen kalunen. 4:3 Hong katika je mahalau, keton jari sukup katahie malalus taloh je eka karajin kare oloh je dia mangasene Tuhan. Keton belom dia bahalap. Keton manumon angat kipen keton, mambusau arep, pesta-barami, mihop tuntang manyembah dewa je bakajile-jilek. 4:4 Toh oloh je dia mangasene Tuhan, heran awi keton dia omba belom kilau ewen, je mangkeme kamangat dosa jaton bara tikas. Jete sababe ewen te mahina keton. 4:5 Tapi kareh ewen musti meton tanggung jawab manaharep Hatalla je jari tatap uka mahakim oloh belom tuntang oloh matei. 4:6 Jete sababe Barita Bahalap jari insanan kea akan kare oloh matei. Rimae, iete uka ewen je jari ihakim tumon ampin biti-bereng -- sama kilau kare oloh je ihakim -- tau belom tumon ampin roh, iete manumon kahandak Hatalla. 4:7 Taloh handiai jari tokep wayah kahapuse, tagal te keleh keton mahaga arep keton tuntang barendeng, mangat keton tau balakudoa. 4:8 Je paham mambatang haliai, iete keleh keton toto-toto hasinta sama arep keton, basa awi malalus sinta, keton mampun are dosa. 4:9 Keleh keton hasambut sama arep keton huang gagenep human keton, hapan kahias atei. 4:10 Genep bitin keton jari manarima kare panenga je hakabeken ampie bara Hatalla. Tagal te kilau oloh bahalap je halaluan kare panengan Hatalla te, keleh keton mangguna kataun keton te akan gunan arep keton samandiai. 4:11 Oloh je manyampai barita, keleh ie manyampai barita bara Hatalla; oloh je manyang oloh beken, keleh ie manyang hapan kaabas bara Hatalla, uka huang kakare hal Hatalla tau imapahai mahalau Yesus Kristus. Ie te je kuasa tuntang patut impahai sampai katatahie. Amen. 4:12 Pahari handiai je inyinta! Katika toh keton paham manyarenan kapehe awi keton buah tingkes. Tapi ela keton heran, kila-kilau aton taloh je dia puji bahut buah keton. 4:13 Tapi keleh keton sanang haream awi keton omba manyarenan kapehe hayak dengan Kristus. Maka kareh amon kahain Kristus imparahan, keton tau hanjak rantang. 4:14 Ontong keton amon keton ihina oloh awi keton murid Kristus. Rimae, intu keton te aton Roh je tinduh barasih, iete Roh Hatalla. 4:15 Ije mahin ela aton bara keton je buah kapehe awi ie oloh pamuno, atawa panakau, atawa oloh papa, atawa awi ie omba campur urusan oloh beken. 4:16 Tapi amon keton buah kapehe awi keton oloh Kristen, ela mahamen tagal hal te. Keleh manarimakasih akan Hatalla, awi keton mimbit aran Kristus. 4:17 Katikae jari sampai, Hatalla mahakim kalunen. Tuntang ungkup ain Hatalla kabuat je kareh ihakim labih helo. Nah, amon Hatalla kareh manampara dengan itah, kilen ampie kajariae kareh dengan kare oloh je dia percaya dengan Barita Bahalap bara Hatalla te? 4:18 Huang Surat Barasih inyurat kalotoh, "Amon kare oloh bahalap mahin jari bahali inyalamat, kilen hindai taloh je manjadi akan kare oloh badosa je dia mangasene Tuhan!" 4:19 Awi te, amon aton kare oloh je manyarenan kapehe tagal Hatalla, tuntang ie mangahandak kalote, keleh kare oloh te belom bujur tuntang manenga lepah kaharape tuntang kapercayae dengan Je Manjapa ie. Hatalla kareh harajur malalus kare janjie.
5:1 Aku balaku uka kare pamimpin ungkup keton pahias manantuani auhku. Aku manyurat jetoh kilau ije biti bara kare pamimpin tuntang kilau oloh je jari puji manyaksi kabuat kapehen Kristus tuntang je kareh omba kea impahai amon kahain Kristus impahai akan oloh kalunen. Aku balaku nyame-nyame 5:2 uka keton manyakatik kawan tabiri je inyarah Hatalla akan keton. Keleh manyakatik ewen dengan sanang atei sama kilau je ingahandak awi Hatalla, tuntang ela mahapan kabehat atei. Ela kea malalus gawin keton hapan manggau ontong, malengkan awi keton toto-toto handak mahaga. 5:3 Ela malalus taloh kilau oloh je mimbing kuasa taharep kare ewen je inyarah akan keton, tapi keleh keton manjadi sonto akan ewen. 5:4 Tuntang hong katika Sakatik Hai te dumah kareh, keton kareh manarima makota je mahalendang je dia tau kusam pahalendange. 5:5 Kalote kea pahari, kare oloh tabela. Keleh mamenda kare oloh je bakas. Pahari handiai musti mamparandah arep tuntang mandohop sama arep keton hapan karandah atei. Basa huang Surat Barasih tarasurat kalotoh, "Hatalla malawan oloh je bajoho, tapi sinta oloh je randah atei." 5:6 Tagal te, keleh mamparandah arep keton hong penda lengen Hatalla je kuasa, mangat ie manggatang keton amon sampai katikae. 5:7 Keleh manyarah kakare kagogop-kakenang atei keton akan Hatalla, basa ie manantuani keton. 5:8 Keleh keton barendeng tuntang bajaga! Basa setan te musoh keton. Ie sama kilau singa mananjong kanih-kate mangaruntong manggau taloh kinae. 5:9 Keleh malawan ie hapan kapercaya je dehen, basa keton katawan kare paharin itah awang beken je sama-sama Kristen hong hapus kalunen kea buah kapehe kilau keton. 5:10 Tapi limbah keton buah kapehe hanjulo, Hatalla kabuat kareh manjadian keton manjadi oloh je tinduh barasih. Ie kareh mampendeng hayak mampaabas keton palus mandehen keton. Awi ie te Hatalla je paham bahalap ateie, je jari mantehau keton mangat omba mangkeme kahaie je katatahie mahalau Kristus. 5:11 Ie te je kuasa sampai katatahie! Amen. 5:12 Suratku je pandak toh inyuratku akan keton dengan pandohop Silas, je ianggapku ije biti pahari Kristen je baketep. Aku mipen manantiring keton tuntang mampalembut kapercaya intu keton tahiu taloh je inyuratku toh basa jetoh barita je toto tahiu asin Hatalla. Keleh keton mimbing asi te dehe-dehen. 5:13 Kare kawal itah ungkup hong Babilon je iintih kea awi Hatalla, mampait tabe akan keton; kalote kea anakku Markus je inyinta. 5:14 Kaleh keton hatabe sama arep keton hapan salepah sinta kilau pahari sama-sama oloh Kristen. Keleh Tuhan manenga kasanang akan pahari samandiai je manjadi oloh ain Kristus. Hormat ikei, Petrus
1:1 Pahari handiai je toto-toto percaya sama kilau ikei! Yesus Kristus, iete Hatalla tuntang Raja Panyalamat itah, jari manenga kapercaya te akan itah, awi ie malalus taloh je buah. Surat toh bara Simon Petrus, ije biti rewar tuntang rasul ain Yesus Kristus. 1:2 Keleh Hatalla manenga berkat tuntang kasanang je hakutoh akan keton, awi keton mangasene Hatalla tuntang Yesus, Tuhan itah. 1:3 Hatalla jari mahapan kuasan kahatallae uka manenga akan itah kare taloh handiai je inggau itah mangat belom manyembah ie. Ie malalus jete mahalau taloh je ingatawan itah tahiu Yesus Kristus, je jari mantehau itah uka mangkeme kahaie tuntang kahalape. 1:4 Hapan cara jete Hatalla manenga akan itah kare berkat barega tuntang je manangkalau kahalape je jari injanjie. Hapan kare berkat te keton tau lapas bara kare kipen papa je marusak kalunen jetoh, tuntang keton manarima sipat kahatalla. 1:5 Tagal te, keleh manggau jalan toto-toto uka keton tetep percaya dengan Kristus tuntang kapercayan keton te indehen awi pambelom je bahalap. Hayak dengan pambelom je bahalap, keton perlu manjadi oloh je aton pangatawan, 1:6 tuntang hayak dengan pangatawan, keton musti kea tau mahaga arep. Tuntang beken bara mahaga arep keleh keton kea mahaga arep mangat sabar manaharep taloh handiai. Hayak dengan kasabar manaharep taloh handiai, keton musti kea belom manumon kahandak Hatalla. 1:7 Tuntang belom manumon kahandak Hatalla musti kea inyuang hapan sinta asi dengan kare pahari je sama hong kapercaya. Tuntang tinai keleh sinta asi ain keton dengan kare pahari je sama hong kapercaya te indahang hapan sinta dengan oloh handiai. 1:8 Kare sipat je kilau te uras perlu akan keton. Amon kare sipat jete are intu keton, keton tau manjadi oloh je rajin tuntang bahasil, tuntang tau mangasene Yesus Kristus Tuhan itah dengan labih bahalap hindai. 1:9 Tapi kare oloh je jaton tempon kare sipat jete, panampayahe simit; ie dia tau mite tuntang ie kalapean je kare dosae je jari halau te jari imparasih. 1:10 Tagal te, pahari handiai, keleh keton labih pahias hindai manggau jalan uka Hatalla mandehen keton je jari intehaue tuntang iintihe. Amon keton malalus hal te, maka keton kareh dia mundur bara kapercayan keton. 1:11 Awi kalote keton kareh inenga salepah hak uka tame Karajaan je katatahie ain Tuhan tuntang Raja Panyalamat itah Yesus Kristus. 1:12 Tagal te, aku harajur mampingat keton tahiu hal te, aloh keton jari mangatawan tuntang percaya toto dengan auh ajar ain Hatalla je jari inarima keton te. 1:13 Katahin aku magon belom, aku mangkeme patut mampingat keton tahiu hal te. 1:14 Basa aku katawan dia tahi hindai aku malihi kalunen toh, awi Tuhan itah Yesus Kristus jari mansanan tarang akangku tahiu hal te. 1:15 Maka aku kareh manggau jalan uka aloh limbah aku jari matei, keton harajur mingat haluli kakare taloh te. 1:16 Hong katika ikei mansanan akan keton kapaham ampin kahain pandumah Tuhan itah Yesus Kristus, ikei dia bahapang dengan kare sarita tampan oloh kalunen. Kahain Kristus te jari gitan ikei hapan matan ikei kabuat. 1:17 Ikei aton intu hete katika ie ihormat tuntang impahai awi Hatalla Bapa. Katika te tarahining auh bara ie je Barasih Haliai, je hamauh dengae, "Ikau toh anakku je inyintaku. Ie manyanang ateiku!" 1:18 Ikei kabuat mahining auh te lembut bara sorga katika ikei aton hayak dengae intu hunjun bukit je barasih te. 1:19 Jete sababe ikei labih percaya hindai dengan peteh Hatalla je imbarita awi kare nabi. Keleh keton manantuani auh peteh toh, basa peteh te sama kilau sumbo je paha-pahai hong eka je kaput sampai andau tokep balawa, tuntang katarang bintang sawah hanyala huang atei keton. 1:20 Je mambatang haliai keleh keton mingat jetoh: Peteh hatalla je inyampai awi kare nabi dia tau irima manumon tirok kabuat. 1:21 Basa dia puji peteh ain Hatalla te imbarita baya awi kahandak oloh kalunen. Tapi Roh Hatalla manguasa oloh uka manyampai peteh bara Hatalla kabuat.
2:1 Hong katika je halau hong marak ungkup ain Hatalla jari lembut kare nabi pananjaro. Kalote kea intu marak keton kareh lembut kare guru pananjaro. Ewen kareh manamean kare auh ajar je dia bujur, je mawi oloh binasa. Tuntang ewen kareh milim Panguasa je jari mambebas ewen. Awi kalote ewen mampalembut kabinasa akan arep ewen kabuat, je akan bajeleng buah ewen. 2:2 Aloh kalote, are oloh kareh omba manuntut cara belom ain guru pananjaro te je inguasa awi angat kipen ewen. Tuntang gawin kare guru te mawi are oloh mahina Jalan Bujur je manalih Hatalla. 2:3 Awi ewen hasilo, maka kare guru pananjaro te kareh manyarita akan keton taloh je ingarang ewen kabuat mangat mandino ontong bara keton. Tapi hakim hapan mahukum ewen te jari tahi inatap, tuntang kabinasa je jari inukas akan ewen toh puna jari mentai ewen. 2:4 Kare malekat je badosa mahin dia Hatalla malapas bara hukum, malengkan inganan akan huang naraka. Ewen inamean akan huang tiwing je kaput uka inahan intu hete sampai Andau Pengadilan. 2:5 Kalote kea dengan kalunen hong jaman horan, Hatalla dia malapas ie bara hukuman. Hatalla mampadumah danum soho akan lewun kare oloh papa hong katika te. Baya Noah dengan uju biti oloh beken te ih je inyalamat, awi Noah mansanan barita tahiu pambelom je manyanang atei Hatalla. 2:6 Kalote kea tahiu lewu Sodom tuntang Gomora: Hatalla mambinasa kare lewu te hapan apui mangat manjadi sonto tahiu taloh je kareh manjadi mawi kare oloh papa. 2:7 Tapi Lot inyalamat, awi ie manumon kahandak Hatalla; ie buah kapehe paham ganan hadat dasar je dia sanonoh ain kare oloh papa. 2:8 Hong marak kare oloh je kilau te Lot je oloh bahalap te belom manyarenan kapehen atei, basa genep andau ie mite tuntang mahining kare gawin ewen je papa. 2:9 Jadi, Tuhan katawan kilen ampie manyalamat kare oloh je manumon kahandak ayue katika ewen manaharep kare tingkes. Tuntang Tuhan katawan kilen ampie manahan kare oloh papa uka ingapehe hong Andau Pengadilan, 2:10 je mambatang haliai kare oloh je manumon angat kare kipen ewen je papa tuntang je mahina kuasan Hatalla. Kakai ampie kahanyi tuntang kalecak kare guru pananjaro te sampai ewen dia mikeh mahina kare taloh belom je barasih hong sorga! 2:11 Aloh kare malekat je labih abas tuntang labih kuasa bara kare guru pananjaro te, jaton bahanyi mandawa kare taloh belom je barasih te mahapan kare auh je mahina intu taharep Tuhan. 2:12 Tapi kare guru te, dia lue-luen! Ewen sama kilau meto je inakan tantai akan indu impatei ih. Ewen jaton mahapan tirok, tapi bagawi mahapan pangkeme bewei, sampai sampai kare hal je dia ewen haratie inyarang ewen hapan kare auh je mahina. Tagal te awi gawin ewen te kabuat, ewen kareh binasa sama kilau kare meto basiak. 2:13 Kilau akan baleh kapehe je lembut awi ewen te, ewen kareh buah kasusah kapehe je paham. Akan ewen, taloh je manyanang atei iete malalus taloh en bewei metoh andau balawa hapan maluput angat kipen isin ewen. Amon ewen mondok hinje keton hong pesta kuman, ampin tingkah ewen mawi itah bajilek awi ewen babusau awi angat kipee. 2:14 Ewen jaton peda mawi dosa, tuntang je eka karajin ewen iete manampayah oloh bawi lontei. Tuntang je harue percaya tuntang magon tapas kadehen kapercayae, palus omba layau. Atei ewen jari patuh dengan kakoho. Ewen te oloh je tarasapa! 2:15 Awi ewen dia maku manumon jalan je bujur, maka ewen layang. Ewen manduan jalan je ihoroi awi Bileam anak Beor horan. Bileam toh mipen toto mandino duit bara gawie je papa. 2:16 Tapi ie paham impingat tagal kapapae te, katika kalidai ayue hakotak hapan auh kalunen. Maka nabi te imaksa uka ie terai nguan gawie je gila te. 2:17 Kare guru pananjaro te jete sama kilau tahasak danum je keang tuntang sama kilau asep je inamput riwut barat. Hatalla jari manatap akan ewen ije eka je kaput toto. 2:18 Ewen manguan kare auh je tama-tamam tuntang hayang; angat kipen je harayap ihapan ewen uka mampalawu kare oloh je harue lapas bara marak oloh je belom layau. 2:19 Kare guru pananjaro te manjanji kamardekaan akan kare oloh te, padahal ewen kabuat ihajipen awi kare hadat je marusak kalunen. Basa amon oloh impakalah awi ije taloh, maka ie te jipen taloh je mampakalah ie te. 2:20 Oloh je mangasene Tuhan tuntang Panyalamat itah Yesus Kristus jari lapas bara kare kuasan kalunen je marusak olon. Tapi amon rahian ie injarat tinai sampai impakalah awi kare kuasa te, maka kajariae ampin oloh te labih papa bara solake. 2:21 Labih bahalap kare oloh je macam te dia puji mangasene jalan je bujur ain Hatalla, basa ewen mangasene jete, tapi limbah te dia maku manumon kare parentah je inenga Hatalla akan ewen. 2:22 Taloh je ilalus ewen te jete bukti akan katoton auh paribasa toh, "Aso te kareh kuman haluli taloh je jari iutae," tuntang "Bawoi je jari impandoi, kareh haluli mambaring arepe intu kalabangan."
3:1 Paharingku samandiai je inyinta! Jetoh surat ayungku je kaduee akan keton. Intu huang kadadue surat toh, aku manggau jalan mambelom kare tirok je barasih intu keton. 3:2 Aku balaku uka keton mingat kare auh je horan inasanan awi kare nabi ain Hatalla, tuntang parentah ain Tuhan, Raja Panyalamat, je inyampai akan keton mahalau kare rasul. 3:3 Je mambatang haliai, keton musti katawan hong kare andau pangkarahiae, kareh dumah kare oloh je belom inguasa awi angat kipen ewen kabuat. Ewen kareh hababaka keton 3:4 hapan auh kalotoh, "Koan keton Tuhan bajanji akan dumah! Toh kueh ie? Kare tato hiang itah jari matei, tapi taloh handiai sama ih ampie kilau bara metoh langit petak injapa!" 3:5 Ewen te tantai ihate dia handak mangaku je horan Hatalla manjapa langit tuntang petak hapan auhe. Petak toh injapae bara danum, tuntang dengan danum; 3:6 tuntang hapan danum kea -- iete bara danum soho -- kalunen jaman horan te imbinasa. 3:7 Tapi langit tuntang taloh je aton wayah toh, ihaga awi auh Hatalla te kea mangat kareh imbinasa tinai hapan apui. Toh langit tuntang petak magon ihaga sampai katika andau kare oloh papa ihukum tuntang imbinasa. 3:8 Tapi paharingku samandiai, ela ih keton mangalapean ije hal toh: baya huang tampayah Tuhan, ije andau dia beken bara sakoyan nyelo -- kadaduee te akae sama ih. 3:9 Tuhan dia kalapean manenga taloh je injanjie, aloh aton oloh je manyangka kalote. Tapi ie sabar dengan keton, ije biti mahin dia ie handak uka binasa. Kahandake te uka oloh samandiai uras hobah bara kare dosae. 3:10 Tapi Andau pandumah Tuhan te sama kilau maling. Hong andau te langit kareh lilap awi auh nyaho, tuntang kare taloh hong langit kareh lepah bakeho, tuntang petak dengan kare taloh huange kareh lilap. 3:11 Basa kare taloh handiai te kareh lenyoh kalote, kilen ampie kapatut keton belom? Keton musti belom barasih tuntang baya akan Hatalla, 3:12 katahin keton mentai tuntang mangenang pandumah Andau ain Hatalla. Hong Andau te langit kareh lepah bakeho, tuntang tagal kalasute, maka kare taloh hong langit kareh lenyoh. 3:13 Tapi itah mentai taloh je jari injanji Hatalla, iete langit je taheta tuntang petak je taheta, je intu hete aton kabujur-katetek. 3:14 Tagal te pahari handiai je inyinta, pandehan keton mentai Andau te, keleh manggau jalan toto-toto uka belom barasih tuntang jaton bara kasalan intu taharep Hatalla. Tuntang haga pambelom je bahalap dengan Hatalla. 3:15 Anggap ih kasabar Tuhan itah te kilau ije katika je inenga akan keton mangat keton tau salamat. Paulus, paharin itah je inyinta, jari manyurat kalote akan keton. Ie manyurat jete hapan kapintar-kaharati je inenga Hatalla akae. 3:16 Hong kakare surate, Paulus harajur manyurat tahiu hal te. Puna aton pire-pire hal je bahali itah haratie hong kare surate te. Tuntang bagian jete je inumbak-nambalik awi kare oloh je dia katawan en-en tuntang je dia dehen kapercayae. Hal te dia ie taloh heran, awi kare bagian beken hong Surat Barasih iawi ewen macam te kea. Taloh je ilalus ewen te kajariae mawi kahancur akan ewen kabuat. 3:17 Tapi keton, pahari handiai je inyinta, keton jari katawan tahiu hal te. Tagal te keleh barendeng, ela sampai keton omba hanyut akan huang kalayau kare oloh durhaka sampai keton lawo bara eka keton mendeng je segah. 3:18 Keleh keton sasar mangkeme asin Tuhan Yesus Kristus, Tuhan tuntang Raja Panyalamat ain itah, tuntang keleh keton kea sasar mangasene ie. Tara hormat akae, toh tuntang palus katatahie! Amen. Hormat ikei, Paulus
1:1 Surat jetoh basuang Auh je manenga pambelom, iete Auh je jari aton bara tamparae. Ikei jari mahining Auh te, tuntang jari mitee hapan matan ikei kabuat. Ikei jari manampayah ie tuntang jari mimbing ie mahapan lengen ikei. 1:2 Katika pambelom te imparahan, ikei mite ie. Jete sababe ikei manenga kasaksian tahiu ie. Ikei mambarita akan keton tahiu pambelom je bujur tuntang katatahie, je aton dengan Bapa, tuntang je jari imparahae akan ikei. 1:3 Taloh je jari gitan tuntang ihining ikei, jete kea je imbarita ikei akan keton, mangat keton tuntang ikei kea sama-sama belom hinje dengan Bapa tuntang dengan Anake Yesus Kristus. 1:4 Ikei manyurat surat toh mangat atei itah toto-toto hanjak. 1:5 Jetoh barita je jari ihining ikei bara Anake tuntang je inyampai ikei akan keton: Hatalla te kalawa, tuntang huang ie kakaput jaton samasinde. 1:6 Amon itah hakotak je itah belom hinje dengae, padahal itah belom huang kakaput, maka itah mananjaro mahapan auh itah tuntang mahapan gawin itah. 1:7 Tapi amon itah belom huang kalawa sama kilau Hatalla te aton hong kalawa, maka itah belom heret, hinje dengan sama arep itah, tuntang dahan Yesus, Anake, mamparasih itah bara kare dosa. 1:8 Amon itah hamauh itah dia badosa, itah mananjaro arep itah kabuat; tuntang Hatalla jaton hong atei itah. 1:9 Tapi amon itah mangaku kare dosan itah intu Hatalla, ie kareh malalus janjie tuntang mawi taloh je bujur. Ie kareh mampun kare dosan itah tuntang mamparasih itah bara kare gawin itah je sala. 1:10 Tapi amon itah hamauh itah dia badosa, maka itah kilau oloh je maanggap Hatalla te pananjaro tuntang itah jaton mingkes auh Hatalla huang atei itah.
2:1 O anakku samandiai! Aku manyurat jetoh akan keton mangat keton dia mawi dosa. Tapi amon aton oloh je mawi dosa, maka ain itah aton ije pandohop, iete Yesus Kristus je adil te; ie kareh balaku akan itah intu taharep Bapa. 2:2 Mahalau Yesus Kristus te ih kare dosan itah iampun. Tuntang dia ie dosan itah bewei, tapi dosan salepah kalunen kea. 2:3 Amon itah rajin manumon kare parentah Hatalla, jete tandae itah mangasene Hatalla. 2:4 Oloh je hamauh, "Aku mangasene Hatalla," tapi dia manumon kare parentah ayue, oloh te pananjaro, tuntang Hatalla jaton huang ateie. 2:5 Tapi oloh je manumon auh Hatalla, oloh te sinta Hatalla dengan tinduh-barasih. Jete tandae itah belom hinje dengan Hatalla. 2:6 Eweh je hamauh ie belom hinje dengan Hatalla, ie musti manuntut awan jalan ain Kristus. 2:7 Pahari handiai je inyinta! Taloh je inyuratku toh dia ie parentah je taheta. Jetoh parentah je jari tahi inyampai akan keton bara metoh keton manampara percaya dengan Kristus; iete barita bara Hatalla je jari ihining keton bihin. 2:8 Aloh kalote, parentah je inyuratku toh taheta kea; awi kabujur tuntang katotoe ie tau inampayah hong bitin Kristus tuntang huang arep keton. Basa kakaput sasar nihau tuntang kalawa je toto jari gitan kalawae. 2:9 Oloh je hamauh ie aton hong kalawa tapi oloh te magon basingi paharie, sampai toh oloh te magon hong kakaput. 2:10 Oloh je sinta paharie oloh te belom hong kalawa sampai jaton taloh en-en intu oloh te je tau mawi oloh beken manjato hong dosa. 2:11 Tapi oloh je basingi dengan paharie, ie aton hong kakaput. Ie mananjong huang kakaput, tuntang jaton katawan akan kueh tintun tanjonge, basa kakaput te mawi ie dia tau mite. 2:12 Aku manyurat akan keton, kare anakku, awi dosan keton jari iampun tagal Kristus. 2:13 Aku manyurat akan keton, kare bapa, basa keton mangasene ie je jari aton bara tamparae. Aku manyurat akan keton, kare oloh tabela, awi keton jari mampakalah Taloh Papa. 2:14 Aku manyurat akan keton, kare anak oloh, awi keton mangasene Hatalla Bapa. Aku manyurat akan keton, kare Bapa, awi keton mangasene Auh je jari aton bara tamparae. Aku manyurat akan keton, kare oloh tabela, awi keton abas. Auh bawak kotak ain Hatalla aton huang atei keton, tuntang keton jari mampakalah Taloh Papa. 2:15 Ela sinta kalunen jetoh atawa en bewei je aton hong kalunen toh. Amon keton sinta kalunen keton dia sinta Bapa. 2:16 Kare taloh samandiai je aton hong kalunen toh -- je ingipen awi sipat olon je badosa, je inampayah balalu ingahandak tuntang je impatamam -- kakare taloh te dia dumah bara Bapa tapi bara kalunen. 2:17 Kalunen tuntang kare taloh awang huange je eka kipen oloh kalunen, sasar lilap. Tapi oloh je manumon kahandak Hatalla, tetep belom sampai katatahie. 2:18 Anakku samandiai, kalepah kalunen jari tokep! Helo bihin jari insanan akan keton, iete, Musoh Kristus kareh dumah; tuntang toh jari lembut are oloh je malawan Kristus. Jete tandae wayah kalepahe jari tokep. 2:19 Kare Musoh Kristus te iete kare oloh je jari malihi itah, awi ewen te sapunae dia ie oloh itah. Jaka ewen te oloh itah, batantu ewen tetep hinje itah. Tapi ewen malihi itah, mangat tarang batantu toto, ije mahin jaton bara ewen te je toto-toto tame baris itah. 2:20 Tapi keton jari manarima Roh Hatalla je impamohon awi Yesus Kristus tuntang jete sababe keton uras mangasene ajar je bujur. 2:21 Jadi aku manyurat jetoh akan keton dia awi keton dia mangasene ajar je bujur, tapi awi keton katawan haream, tuntang keton kea katawan je huang ajar je bujur te jaton tanjaro. 2:22 Oloh je mananjaro jete oloh je hamauh koae, Yesus te dia ie Raja Panyalamat je injanji Hatalla. Oloh te Musoh Kristus; ie dia mangaku Bapa atawa Anak kea. 2:23 Oloh je dia mangaku Anak, rimae dia mangaku Bapa kea. Tuntang oloh je mangaku Anak, rimae manarima Bapa kea. 2:24 Tagal te barita je jari ihining keton bara metoh keton nampara percaya keleh keton mahagae bua-buah huang atei keton. Amon keton manantuani barita te bua-buah keton kareh belom hinje dengan Anak tuntang dengan Bapa. 2:25 Tuntang jetoh ie je injanji Kristus kabuat akan itah: pambelom je bujur tuntang katatahie. 2:26 Aku manyurat jetoh akan keton tahiu kare oloh je manggau jalan mananjaro keton. 2:27 Tapi tahiu keton kabuat, Kristus jari mampamohon Roh ayue akan keton. Tuntang katahin Roh te aton intu keton, dia usah oloh beken majar keton. Basa Roh te majar keton tahiu taloh handiai; tuntang taloh je iajar awie te bujur toto, dia tanjaro. Awi te, keleh keton manumon taloh je iajar awi Roh te, tuntang keleh keton tetep belom hinje dengan Kristus. 2:28 Jadi, anakku samandiai, keleh tetep belom hinje dengan Kristus, mangat kareh hong katika ie dumah, itah manaharep ie hapan salepah kamenteng, tuntang itah dia manyahokan arep itah awi itah mahamen. 2:29 Keton jari katawan Kristus te belom harajur manumon kahandak Hatalla. Awi te keton musti katawan kea je gagenep oloh je belom manumon kahandak Hatalla, ie te anak Hatalla.
3:1 Keleh mite kapaham Hatalla sinta itah, sampai itah inarima kilau anak ayue. Tuntang puna kare itah toh uras anak Hatalla. Jete bukue kalunen je papa toh dia mangasene itah, awi kalunen dia mangasene Hatalla. 3:2 Pahari handiai je inyinta! Wayah toh, itah toh anak Hatalla, tapi ampin itah rahian kareh dia lalau tarang. Tapi itah katawan amon Kristus dumah, itah kareh manjadi sama kilau ie, awi itah kareh mite ie tumon ampin ayue je kapunae. 3:3 Oloh handiai je aton mingkes kaharap jete intu taharep Kristus, mahaga arepe mangat toto-toto barasih, barasih bara dosa sama kilau Kristus kea barasih. 3:4 Oloh je mawi dosa, malangkah parentah Hatalla; basa dosa te puna kalangkah taharep parentah Hatalla. 3:5 Keton katawan je Kristus dumah uka mampuas kare dosan olon, tuntang intu ie dia aton dosa. 3:6 Kare oloh je belom hinje dengan Kristus, dia olih raju-rajur mawi dosa. Oloh je harajur mawi dosa, dia puji mite Kristus atawa mangasene ie. 3:7 Anakku samandiai, ela keton manalua oloh eweh bewei, mampalayang keton. Oloh je malalus kahandak Hatalla jete anak Hatalla sama kilau Kristus te Anak Hatalla. 3:8 Tapi oloh je raju-rajur mawi dosa jete anak setan, basa setan te badosa bara tamparae. Akan jete Anak Hatalla dumah iete uka mampalomos gawin setan. 3:9 Oloh je jari manjadi Anak Hatalla, dia raju-rajur mawi dosa, awi sipat Hatalla kabuat aton intu ie. Tuntang awi Hatalla te Bapae, maka ie dia tau raju-rajur mawi dosa. 3:10 Jetoh ie kabekee, anak Hatalla dengan anak setan: ewe-eweh je dia handak malalus kahandak Hatalla, atawa dia sinta paharie, ie te dia anak Hatalla. 3:11 Bara tamparae barita jetoh jari inyampai akan keton: Itah musti hasinta sama arep itah. 3:12 Ela itah kilau Kain, je manjadi anak setan tuntang mampatei paharie kabuat. En bukue Kain mampatei paharie? Awi kare taloh je ilaluse te sala, tapi kare taloh je ilalus paharie te bujur. 3:13 Tagal te, Paharingku samandiai, ela heran amon kare oloh kalunen toh basingi dengan keton. 3:14 Itah katawan, itah jari balua bara pampatei, tuntang mindah akan pambelom. Itah katawan jete, awi itah sinta sama arep itah kilau oloh hampahari. Oloh je dia sinta, rimae oloh te magon inguasa awi pampatei. 3:15 Oloh je basingi paharie ie te pamuno, tuntang keton katawan, oloh pamuno te jaton dinon pambelom je bujur tuntang katatahie. 3:16 Hapan jalan jetoh itah mangatawan kilen ampie itah hasinta sama arep itah: Kristus jari manyarah pambelome akan itah. Tagal te, itah kea musti manyarah pambelom itah akan kare paharin itah! 3:17 Amon oloh je are ramoe mite paharie huang katapas, tapi dia maku mandohop paharie te, kilen ampie oloh te tau manyewut arepe sinta Hatalla? 3:18 O kare anakku! Ela keton sinta baya huang totok biwih atawa baya kotak bewei. Keleh itah sinta hapan sinta je bujur, je imbukti hapan gawin itah. 3:19 Hapan cara kalote itah katawan itah toh puna bujur anak Hatalla, tuntang atei itah tau sanang intu taharep Hatalla. 3:20 Itah katawan amon atei itah mandawa itah, pangatawan Hatalla te labih hai bara pangatawan atei itah, tuntang ie katawan taloh handiai. 3:21 Jadi, o Paharingku je inyinta, amon atei itah dia manyalan itah, itah tau manaharep Hatalla hayak dia mikeh. 3:22 Tuntang taloh je ilaku itah dengae, itah tau mandinoe, awi itah manumon kare parentahe tuntang manyanang ateie. 3:23 Taloh je irentahe akan itah iete: Itah musti percaya dengan Anak ayue, iete Yesus Kristus, tuntang itah musti hasinta sama arep itah, kilau je jari inyoho Kristus akan itah. 3:24 Oloh handiai je manumon kare parentah Hatalla, belom hinje dengan Hatalla, tuntang Hatalla hinje dengan ewen. Tuntang itah katawan je Hatalla belom hinje dengan itah, awi ie jari manenga Roh ayue akan itah.
4:1 Pahari samandiai je inyinta! Ela percaya dengan kakare oloh je mangaku arepe aton Roh Hatalla huang ie, tapi keleh mauji helo ewen te mangat katawan en roh je aton hong ewen te dinon ewen bara Hatalla atawa dia. Basa are nabi pananjaro jari hapampayap akan hete-hete. 4:2 Kalotoh carae mangat keton katawan en jete Roh Hatalla atawa dia: Oloh je mangaku Yesus Kristus dumah akan kalunen kilau olon huang oloh te aton Roh je dumah bara Hatalla. 4:3 Tapi oloh je dia mangaku hal te tahiu Yesus, Roh Hatalla jaton intu oloh te. Ain oloh te baya aton roh je hamusoh dengan Kristus. Pahari jari mahining iete, roh te kareh dumah, tuntang toh ie jari aton huang kalunen toh. 4:4 Tapi o anakku samandiai, keton toh oloh ain Hatalla. Keton jari mampakalah kare nabi pananjaro, awi Roh je aton intu keton te labih hai kuasae bara kare roh je aton hong kare oloh je ain kalunen toh. 4:5 Kare nabi pananjaro te hakotak tahiu kare hal kalunen, tuntang kalunen mahining auh ewen, awi ewen oloh ain kalunen. 4:6 Tapi itah toh anak ain Hatalla; dan oloh je mangasene Hatalla, mahining auh itah kea. Oloh je dia ie ain Hatalla, dia mahining auh itah. Kalote ih carae itah mangasene Roh je manenga ajar je bujur, tuntang roh je mampalayang. 4:7 Pahari handiai je inyinta! Keleh itah hasinta sama arep itah, awi sinta te lembut bara Hatalla. Oloh je sinta, jete anak Hatalla tuntang ie mangasene Hatalla. 4:8 Oloh je dia sinta, dia mangasene Hatalla; awi Hatalla te sinta. 4:9 Hatalla mansanan, ie sinta itah hayak manyoho Anake je tonggal akan kalunen mangat itah mandino pambelom mahalau Anake te. 4:10 Jetoh ie sinta te: Dia ie itah je jari sinta Hatalla, tapi Hatalla je sinta itah tuntang manyoho Anake mangat mahalau ie itah mandino ampun bara kare dosan itah. 4:11 Pahari handiai je inyinta, amon kalote ampie Hatalla sinta itah, itah kea musti hasinta sama arep itah. 4:12 Ije biti mahin jaton oloh je puji mite Hatalla, tapi amon itah hasinta sama arep itah, Hatalla aton hinje itah tuntang sintae te manjadi hong genep bitin itah. 4:13 Awi Hatalla jari manenga akan itah Roh ayue, maka itah katawan itah jari belom hinje dengan Hatalla, tuntang Hatalla belom hinje dengan itah. 4:14 Ikei kabuat jari mite Anak Hatalla, tuntang mambarita tahiu je inyoho awi Bapa uka manjadi Raja Panyalamat kalunen toh. 4:15 Ewe-eweh je mangaku Yesus te Anak Hatalla, Hatalla belom hinje dengan oloh te tuntang oloh te mahin belom hinje dengan Hatalla. 4:16 Itah kabuat katawan tuntang percaya tahiu sintan Hatalla dengan itah. Hatalla te sinta. Oloh je pambelome inguasa awi sinta, oloh te hinje dengan Hatalla, tuntang Hatalla hinje dengae. 4:17 Sinta te ininduh huang itah, mangat itah mandino kamenteng hong Andau Pengadilan. Itah mandino kamenteng awi pambelom itah hong kalunen toh sama kilau pambelom Kristus. 4:18 Oloh je mangkeme sintan Hatalla, dia mangkeme kikeh; basa sinta je tinduh-barasih manganan lepah kakare angat kikeh. Jadi tarang kea, oloh handiai tau mangkeme sintan Hatalla je tinduh-barasih amon oloh te mikeh manaharep Andau Pengadilan. 4:19 Itah sinta, awi Hatalla jari labih helo sinta itah. 4:20 Amon aton oloh hamauh, "Aku sinta Hatalla," tapi ie dia sinta paharie, oloh te pananjaro. Basa oloh je dia sinta paharie je gitae, dia mungkin ie tau sinta Hatalla je dia ie mitee. 4:21 Tagal te, jetoh ie parentah je inenga Kristus akan itah: ewe-eweh je sinta Hatalla, musti sinta paharie kea.
5:1 Oloh je percaya je Yesus te Raja Panyalamat je injanji Hatalla, oloh te anak Hatalla. Oloh je sinta ije biti bapa, ie sinta anake kea. 5:2 Hapan jalan jetoh itah katawan itah toh sinta kare anak Hatalla: Itah sinta Hatalla tuntang manumon kare parentahe. 5:3 Basa, sinta Hatalla rimae manumon kare parentahe. Tuntang kare parentah ayue te dia babehat akan itah, 5:4 awi gagenep anak Hatalla olih mampakalah kalunen je papa toh. Tuntang itah mampakalah kalunen hapan kapercayan itah. 5:5 Eweh je olih mampakalah kalunen? Baya oloh je percaya Yesus te Anak Hatalla. 5:6 Yesus Kristus ih je dumah akan kalunen dengan danum pampandoi tuntang dengan dahan pampateie. Ie dumah dia baya dengan danum bewei, tapi dengan danum tuntang daha. Tuntang Roh Hatalla kabuat manenga kasaksian je auh te puna toto, basa Roh Hatalla dia puji mananjaro. 5:7 Aton telo saksi: 5:8 Roh Hatalla, danum tuntang daha -- katelo-teloe te manenga kasaksian je sama. 5:9 Itah percaya dengan kasaksian olon, tapi kasaksian Hatalla labih dehen hindai. Tuntang jete kasaksian je jari inenga Hatalla akan Anake. 5:10 Tagal te, oloh je percaya dengan Anak Hatalla, jari manarima kasaksian te huang ateie; tapi oloh je dia percaya Hatalla, jari mangira kila-kilau Hatalla te pananjaro, awi ie dia percaya taloh je insanan Hatalla tahiu anake. 5:11 Jetoh ie kasaksian te: Hatalla jari manenga akan itah pambelom je bujur tuntang katatahie, tuntang Anake jete tahasak pambelom te. 5:12 Oloh je tempon Anak Hatalla, tempon pambelom te; tuntang oloh je jaton tempon ie, jaton tempon pambelom te. 5:13 Aku manyurat akan keton je percaya dengan Anak Hatalla, uka keton katawan, ain keton aton pambelom je bujur tuntang katatahie. 5:14 Tuntang itah bahanyi manaharep Hatalla, awi itah percaya, ie manarima lakudoan itah, amon itah balaku taloh je hakabuah dengan kahandak ayue. 5:15 Awi itah katawan ie mahining auh itah amon itah balakudoa dengae, maka itah katawan kea ie manenga akan itah taloh je ilaku itah dengae. 5:16 Amon itah mite ije biti paharin itah je sama Kristen mawi dosa je dia mimbit oloh te nihau pambelom je bujur tuntang katatahie, keleh keton balakudoa dengan Hatalla; tuntang Hatalla kareh manenga pambelom te akae. Hal toh puna buah ewen je dosae dia mawi ewen tau nihau pambelom te. Tapi aton dosa je mawi oloh tau nihau pambelom te. Tahiu jete aku dia hamauh uka keton musti balakudoa intu Hatalla. 5:17 Kakare gawi je sala jete uras dosa, tapi aton dosa je dia mawi oloh tau nihau pambelom je bujur tuntang katatahie te. 5:18 Itah katawan oloh handiai je manjadi Anak Hatalla, dia raju-rajur mawi dosa, awi Anak Hatalla mangalindong ie, tuntang Taloh Papa dia olih nguan taloh en-en mawi ie. 5:19 Itah katawan itah toh oloh ain Hatalla, aloh hapus kalunen toh penda kuasan Taloh Papa. 5:20 Itah katawan Anak Hatalla jari dumah tuntang jari manenga kaharati akan itah, mangat itah mangasene Hatalla je bujur. Itah belom hinje dengan Hatalla je bujur tuntang belom hinje dengan Anake Yesus Kristus. Jetoh ie Hatalla je bujur, tuntang jetoh ie pambelom je bujur tuntang katatahie. 5:21 Anakku samandiai, keleh mangejau arep keton bara kare dewa!
1:1 Surat toh bara aku, pamimpin ungkup, akan ije Ibu je iintih awi Hatalla, tuntang akan kare anak Ibu je toto-toto inyintaku. Dia baya aku, tapi oloh samandiai je mangasene Hatalla je bujur, sinta keton kea. 1:2 Basa Hatalla melai huang atei itah, tuntang tantai harajur hinje itah sampai katatahie. 1:3 Keleh berkat inenga akan itah, asi tuntang kasanang ain Hatalla Bapa, tuntang Yesus Kristus Anak Bapa te. Keleh taloh samandiai te ihaga itah hapan atei je tinduh-barasih tuntang hapan sinta. 1:4 Aku hanjak toto mangatawan awi aton kare Ibu je belom manumon auh ajar Hatalla, sama kilau je irentah Hatalla Bapa akan itah. 1:5 Awi te, Ibu, aku balaku nyame-nyame uka itah handiai hasinta sama arep. Taloh je insanangku toh dia ie parentah je taheta; parentah toh jari inenga akan itah bara metoh solake itah percaya. 1:6 Hasinta te rimae belom manumon parentah Hatalla. Tuntang parentah je jari ihining keton bara solake iete keton musti belom hasinta sama arep keton. 1:7 Are oloh pananjaro jari tayap akan hapus kalunen. Ewen te kare oloh je dia mangaku Yesus Kristus dumah akan kalunen kilau ije biti olon. Oloh je kilau te pananjaro, tuntang musoh Kristus. 1:8 Tagal te, haga arep keton, ela sampai nihau bara keton taloh je jari inggau ikei akan keton. Keleh manggau jalan uka keton manarima salepah upah keton bara Hatalla. 1:9 Oloh je dia mahaga ajar Kristus, tapi mahiwang bara taloh je iajar awi Kristus, ain oloh te jaton Hatalla. Oloh je tetep huang ajar Kristus, rimae ain oloh te aton Hatalla Bapa tuntang Anak. 1:10 Tagal te, amon aton oloh dumah tuntang mambarita akan keton auh ajar je dia iajar awi Kristus, ela manarima oloh te intu human keton, atawa hatabe dengae. 1:11 Basa oloh je manabe oloh kilau te, omba kea sama kilau oloh te malalus gawi je papa. 1:12 Are toto taloh je patut handak insanangku akan keton, tapi angate labih bahalap ela mahalau surat. Aku harap uka tau maja manalih tuntang hakotak kabuat dengan keton, mangat atei itah toto-toto hanjak. 1:13 Kare anak ain paharin Ibu je bawi, pahari je iintih kea awi Hatalla, mampait tabe akan Ibu.
1:1 Pahari Gayus je inyinta! Aku, pamimpin ungkup, je toto-toto sinta ikau, 1:2 balakudoa balaku karigas akan pahari tuntang taloh samandiai uras bahalap kea dengam, sama kilau hambaruam te bahalap kea. 1:3 Aku hanjak toto katika pire-pire pahari oloh Kristen dumah tuntang mansanan akangku ampin kapaham kaketep pahari dengan Hatalla je bujur, basa puna pahari harajur belom manumon auh ajar ain Hatalla. 1:4 Jaton taloh je labih mampahanjak aku, beken bara mahining tahiu kare anakku je belom manumon auh ajar ain Hatalla. 1:5 Paharingku! Kalote ampin kaketep pahari huang gawi je ilalus pahari akan kare oloh itah sama Kristen; malahan oloh Kristen je hindai pahari kasenee mahin indohop awi pahari. 1:6 Ewen jari mansanan akan ungkup hong eka ikei tahiu sintan pahari. Keleh mandohop uka tau marajur jalanan ewen awi tagal hal te je tau manyanang atei Hatalla, 1:7 basa huang jalanan ewen mandohop Kristus, ewen jaton manarima pandohop en-en bara kare oloh je dia mangasene Hatalla. 1:8 Tagal te itah kare oloh Kristen, musti mandohop kare paharin itah sama-sama Kristen je kilau te, mangat itah tau omba huang gawin ewen uka mambarita auh ajar je bujur ain Hatalla. 1:9 Aku jari manyurat ije surat pandak akan ungkup, tapi Diotrepes je manjadi pamimpin huang ungkup, dia maku manumon auhku. 1:10 Kareh amon aku dumah, aku mungkar kare taloh handiai je jari ilaluse, iete tahiu kare taloh papa tuntang tanjaro je insanae tahiu ikei! Tapi taloh handiai te hindai sukup akae. Katika kare pahari sama-sama Kristen dumah, ie dia maku manarima ewen. Malah ie mangahana kare oloh je handak manarima kare pahari te, tuntang ie manyoho kare oloh te balua bara ungkup! 1:11 Pahari je inyinta, ela manyonto taloh je papa. Keleh manyonto je bahalap. Oloh je malalus kahalap, ie oloh ain Hatalla. Tuntang oloh je malalus kapapa hindai mangasene Hatalla. 1:12 Oloh handiai manara Demetrius. Hatalla mahin manara ie. Ikei kea manara ie, tuntang pahari katawan taloh je insanan ikei toh tau imercaya. 1:13 Are toto taloh je handak insanangku akam, tapi angate labih bahalap ela mahalau surat. 1:14 Aku harap dia tahi hindai aku hasondau dengam, tuntang itah handak hakotak hataharep. 1:15 Keleh Tuhan mamberkat pahari. Kare kawal ayum hong ekaku hetoh mampait tabe akam. Keleh manyampai tabengku akan kakare kawal itah mije-mije.
1:1 Pahari handiai je jari intehau tuntang je paham inyinta awi Hatalla Bapa, tuntang ihaga awi Yesus Kristus. Kilau rewar Yesus Kristus, aku -- Yudas -- paharin Yakobus, 1:2 manaharep: Keleh Hatalla manenga berkat, asi tuntang kasanang je hakutoh akan keton. 1:3 Pahari handiai je inyinta! Angatku puna handak toto manyurat akan keton tahiu kasalamat je jari sama ingkeme awi itah. Tapi toh aku mangkeme kilau inyoho uka manasehat keton hapan surat toh mangat keton harajur miar malawan akan kapercaya je jari sinde inenga Hatalla palus katatahie akan ungkup ayue. 1:4 Basa itah dia katawan, aton pire-pire oloh je benye-benyem tame manyangkelat itah. Ewen te oloh je durhaka je manantowang-manambalik barita tahiu asin Hatallan itah, awi ewen manggau katika mangat mameda angat kipen belai ewen. Tuntang ewen manolak Yesus Kristus, Panguasa tuntang Tuhan itah je tonggal. Bara horan hukuman ewen jari inujum huang Surat Barasih. 1:5 Taloh handiai te uras jari ingatawan keton. Tapi aku handak mampingat keton tahiu ampin Tuhan manyalamat utus Israel bara Misir, tapi limbah te ie mambinasa kare oloh je dia percaya bara marak ewen te. 1:6 Ingat kare malekat je lalau malabien mahapan kuasae, sampai ewen haguet malihi eka ewen melai. Hatalla mamasong kare malekat te hapan rantai je katatahie, huang penda eka je kaput pijem. Intu hete ewen inahan harajur sampai hukuman buah ewen hong Andau je paham hai te kareh. 1:7 Ingat kea lewu Sodom tuntang Gomora tuntang kare lewu je hakaliling, je intu hete oloh lewu mawi kare hal je sama dengan taloh je iawi kare malekat te. Ewen mawi kare taloh je harayap tuntang papa, sampai ewen ingapehe hapan apui je katatahie, mangat manjadi pampingat akan oloh handiai. 1:8 Kalote kea kare oloh je panupi sampai ewen mawi dosa taharep bitin ewen kabuat. Ewen manampayah kuasan Hatalla te randah tuntang mahina kare kawan taloh belom je tinduh-barasih hong sorga. 1:9 Mikhael kabuat, je mangapala kare kawan malekat, dia puji mawi taloh kilau te. Katika ie hakalahi dengan setan metoh kalahi tahiu eweh je kareh mandino hantun Moses, Mikhael dia bahanyi mahakim setan mahapan kare auh je papa. Mikhael baya hamauh, "Tuhan kareh malait ikau!" 1:10 Tapi hapan kare auh je mamapa, kare oloh te manyarang kare taloh handiai je dia ewen haratie. Ewen sama kilau kare meto je jaton tirok-akale, je mangatawan kare taloh hapan pangkeme bewei. Tapi kare taloh te haream je mawi ewen manjadi lenyoh. 1:11 Calaka ewen te! Ewen jari manuntut jalan je jari ihoroi awi Kain. Mandino duit, ewen mampanjato erepe akan tiwing kalayau, sama kilau Bileam. Tuntang ewen kea lenyoh awi ewen melawan kilau Korah. 1:12 Katika keton manampa pesta, ampin hadat dasar oloh te bakajile-jilek intu marak keton. Awi ewen kuman babungo, dia mahamen, tuntang baya mingat arepe kabuat. Ewen sama kilau baunandau ije inamput riwut, tapi jaton mampamohon ujan. Ewen kea sama kilau batang kayu ije jaton mampalembut bua aloh hong wayah bua mamua; kilau kare batang kayu ije jari injawut uhate tuntang jari matei samasinde. 1:13 Sama kilau riak ije basiak hong tasik mampalampang bure, kalote kea ewen mambure kare gawi ije mampahawen. Ewen te sama kilau kare meto ije manasaran petak danum tuntang ije jari inatap ekae awi Hatalla intu huang eka je kaput pijem palus katatahie. 1:14 Henokh, turonan kauju bara Adam, horan puji manujum tahiu kare oloh te. Henokh hamauh "Ite, Tuhan handak dumah hayak dengan bakoya-koyan malekat ayue ije barasih 1:15 uka mahakim oloh handiai. Tuhan kareh mahukum kare oloh papa tagal kare gawin ewen je dia mangasene ie. Tuntang ie kareh mahukum kare oloh badosa tuntang durhaka tagal kakare auh ewen je mahina." 1:16 Kare oloh te harajur bakotok tuntang manyalan oloh bewe-bewei. Ewen belom manumon kare kipen ewen je badosa. Ewen manara arep ewen kabuat, tuntang manjelap oloh beken mangat mandino ontong. 1:17 Tapi Paharingku samandiai je inyinta, keleh mingat kare taloh je horan insanan awi kare rasul Tuhan itah Yesus Kristus. 1:18 Jari bara horan ih ewen mansanan akan keton iete helo isut bara kalepah kalunen kareh lembut kare oloh je handak hababaka keton, iete kare oloh je belom manumon kare kipen ewen je badosa. 1:19 Ewen te je mawi oloh dia tau hinje. Ewen dia inguasa awi Roh Hatalla tapi inguasa awi kare kipen je manumon sipat oloh kalunen. 1:20 Tapi keton, paharingku samandiai keleh ngagalan pambelom keton hagalang kapercaya dengan Yesus Kristus. Kapercayan keton te paham barasih. Tagal te keleh balakudoa mahapan kuasan Roh Hatalla, 1:21 tuntang keleh belom harajur hong kangkalingen sintan Hatalla katahin keton mentai asin Yesus Kristus Tuhan itah, je manenga akan keton pambelom je bujur tuntang katatahie. 1:22 Taharep kare oloh je bembang ateie, keleh keton mamparahan asi tuntang sinta. 1:23 Keleh manjijit oloh bara huang apui mangat manyalamat ewen. Taharep kare oloh beken keleh keton mamparahan sinta asi impahayak pangkeme mikeh, tapi keleh manyingi pakaian ewen je jari halike awi kipen ewen je badosa. 1:24 Hatalla je olih mahaga uka keton dia manjato, tuntang je olih mimbit keton akan eka je barasih tuntang bungas dengan kahanjak je jaton katapase, 1:25 ie bewei Hatalla je tonggal, Panyalamat itah mahalau Yesus Kristus Tuhan itah. Ie te Hatalla je pangkahai, je barasih haliai, kuasa tuntang bapangaruh bara horan sampai toh tuntang palus katatahie! Amen.
1:1 Huang surat toh inyurat taloh je ingarinah awi Yesus Kristus tahiu kare perkara je akan manjadi. Hatalla mansanan akan Kristus mangat ie mamparahan jete akan kare rewar Hatalla taloh je akan bajeleng manjadi. Kristus manyoho malekat ayue manalih Yohanes, reware te, uka mansanan kare perkara te akae. 1:2 Maka Yohanes kea manyarita lepah taloh handiai je gitae te; tuntang hetoh ie mansanan tahiu peteh Hatalla je indehen awi Yesus Kristus mahalau kasaksian ayue. 1:3 Salamat oloh je mambasa tuntang oloh je mahining auh tujum surat toh hayak manumon kare taloh je inyurat intu huange. Basa dia tahi hindai taloh samandiai toh kareh manjadi. 1:4 Pahari handiai je aton intu uju ungkup hong Asia! Aku, Yohanes, maharap Hatalla manenga akan keton berkat tuntang kasanang bara Hatalla iete ie Je Aton, Je Jari Aton, tuntang Je Harajur Aton -- tuntang kea bara uju roh je aton intu taharep padadosan Hatalla, 1:5 tuntang bara Yesus Kristus, saksi je baketep. Ie te je pangkaheloe imbelom haluli bara pampatei tuntang ie te je mimbing kuasa mahunjun kare rajan kalunen. Yesus sinta itah, tuntang hapan pampateie ie maliwus itah bara kare dosan itah, 1:6 tuntang manampa itah manjadi ije jalahan kare imam, je manempo Hatalla, Bapa ayue. Yesus Kristus te je hai tuntang kuasa sampai katatahie. Amen! 1:7 Ite, ie dumah ingalukup baunandau! Oloh samandiai kareh mite ie, kalote kea ewen je jari manyodok ie. Kakare utus oloh hong kalunen kareh manangis manatum tagal ie. Iyoh, auh toh toto haliai! Amen! 1:8 "Aku toh je tamparae tuntang kahapuse," koan Tuhan Hatalla, Ije Aton, tuntang Je Harajur Aton, Je Paham Kuasae. 1:9 Aku toh Yohanes, paharin keton je sama buah kapehe kilau keton, kilau je ingkeme awi gagenep oloh ain Kristus. Itah sabar manyarenan kepehe kilau ungkup ayue. Aku inganan akan pulau Patmos awiku mambarita peteh bara Hatalla, je indehen awi Yesus mahalau kasaksian ayue. 1:10 Hong andau Tuhan, aku inguasa awi Roh Hatalla, palus aku mahining auh je paham hai -- kilau auh tarompet -- hakotak intu hila likutku. 1:11 Auh te hamauh, "Surat taloh ije gitam, tuntang pait surat te akan uju ungkup toh: Epesus, Smirna, Pergamus, Tiatira, Sardis, Piladelpia, tuntang Laodikea." 1:12 Aku tampaliau akan likut uka mite eweh je hakotak dengangku te. Palus aku mite uju tantahan sumbo je inampa bara amas. 1:13 Intu bentok kare pain tantahan sumbo te aton mendeng ije biti oloh je ampie kilau olon. Ie mahapan jubah je kapanjange te sampai paie. Intu usoke ingkepae tutup usok bara amas. 1:14 Balaue baputi sama kilau bulun tabiri, malenak kilau kapas. Matae ganda-gandang kilau apui; 1:15 paie mamancar kilau pancar tambaga je ininih. Auhe goho-gohop kilau letus danum soho je manangkero bara ngambo. 1:16 Lengee hila gantaue mimbing uju bintang, tuntang bara nyamae balua ije kabilap padang banyihi hasansila isie. Baue tarang mamancar kilau matanandau metoh bentok andau. 1:17 Katika aku manampayah ie, aku balongkang mahingkep intu taharepe sama kilau oloh matei. Tapi ie mingkes lenge gantaue intu aku palus hamauh, "Ela mikeh! Aku toh ije tamparae tuntang kahapuse. 1:18 Aku toh ie je belom! Aku jari matei, tapi ite, aku belom palus katatahie. Aku aton kuasa hunjun pampatei, tuntang kuasa mahunjun lewun oloh matei. 1:19 Tagal te, keleh ikau manyurat kare taloh je gitam, iete kare taloh je aton katika toh, tuntang kare taloh je akan manjadi rahian kareh. 1:20 Toh ie taloh basilim ain uju bintang je gitam intu hila lenge gantaungku, tuntang ain uju tantahan sumbo bara amas te: Uju bintang te kare malekat ain uju ungkup, tuntang uju tantahan sumbo te jete uju ungkup te."
2:1 "Akan malekat ungkup hong Epesus, keleh manyurat kalotoh: Jetoh peteh bara ie je mimbing uju bintang intu lenge gantaue, tuntang mananjong marak uju tantahan sumbo amas te. 2:2 Aku katawan taloh je iawi keton: Keton bagawi paham tuntang keton sabar toto. Aku katawan keton dia handak bajenta dengan oloh papa. Tuntang kare oloh je mangaku arepe rasul padahal dia rasul, jari iuji keton, tuntang keton katawan kea ewen te pananjaro. 2:3 Keton sabar manyarenan kapehe tagal aku, tuntang keton dia bageto kaharap. 2:4 Tapi toh kabehat auhku dengan keton: Awi keton dia sinta aku tinai kilau solak tamparae. 2:5 Tagal te, keleh mingat kilen kahandaleme keton jari manjato! Keleh hobah bara kare dosan keton, tuntang lalus taloh je jari ilalus keton bara tamparae. Amon dia, maka aku kareh dumah, manalih keton tuntang manjawut tantahan sumbon keton bara ekae. 2:6 Tapi aton taloh je bahalap intu keton, iete: Keton dia rajin dengan gawin kare oloh ain Nikolaus, je aku dia rajin kea. 2:7 Eweh je tau mahining, keleh ie manantuani taloh je insanan Roh Hatalla akan kare ungkup! Oloh je manang kareh inyohoku kuman bua bara batang pambelom je aton hong pambulan ain Hatalla." 2:8 "Akan malekat ungkup hong Smirna, keleh manyurat kalotoh: Jetoh peteh bara ie je tamparae tuntang kahapuse -- je jari matei tuntang belom haluli. 2:9 Aku katawan kare kasusah keton; aku katawan keton belom susah tapi sapunae keton balom tatau! Aku katawan kare auh papa je inampa oloh mawi keton awi kare oloh je mangaku arepe Yehudi, padahal ewen te ungkup ain setan! 2:10 Ela mikeh dengan kapehe je dia tahi hindai kareh ingkeme keton. Ingat, setan kareh manamean keton belahe akan huang penjara mangat keton iningkes. Keton kareh buah kapehe sapuluh andau katahie. Keleh keton manumon kare auhku sampai matei, maka aku manenga akan keton pambelom je bujur tuntang katatahie kilau panenga tagal kamanang. 2:11 Eweh je tau mahining, keleh ie manantuani taloh je insanan Roh Hatalla akan kare ungkup! Oloh je manang samasinde jaton mangkeme kapehe en-en awi pampatei je kaduee." 2:12 "Akan malekat ungkup hong Pergamus, keleh manyurat kalotoh: Jetoh peteh bara je mimbing padang banyihi hansansila isie. 2:13 Aku katawan eka keton melai, iete hong eka setan manjadi raja. Keton baketep dengangku. Aloh metoh Antipas, saksingku je bujur te, impatei intu taharep keton hong human setan, keton kareh milim je keton percaya dengangku. 2:14 Aloh kalote aton pire-pire hal je aku dia sanang dengan keton: aton oloh belahe bara marak keton je manumon taloh je iajar awi Bileam. Bileam majar Balak kilen ampie mampalawu utus Israel akan huang dosa; awie manantiring ewen kuman panginan je jari inenga akan dewa tuntang malalus kare taloh harayap. 2:15 Kalote kea aton bara marak keton oloh je bahimbing dengan auh ajar oloh ain Nikolaus. 2:16 Tagal te, keleh hobah bara kare dosan keton! Amon dia, hanjulo hindai aku kareh dumah manalih keton tuntang mamarang kare oloh te hapan padang je aton intu nyamangku. 2:17 Eweh je tau mahining, keleh manantuani taloh je insanan awi Roh Hatalla akan kare ungkup! Oloh je manang, kareh inyohoku kuman manhu je basilim te, tuntang genep bitie kareh manarima bara aku ije batu baputi. Intu batu te tarasurat ije aran taheta, je jaton ingatawan awi eweh bewei, beken bara oloh je manarimae." 2:18 "Akan malekat ungkup hong Tiatira, keleh manyurat kalotoh: Jetoh peteh bara Anak Hatalla, je nyalan matae ganda-gandang kilau apui, tuntang paie tarang mamancar kilau tambaga je ininih. 2:19 Aku uras katawan taloh je iawi keton -- Aku katawan keton hasinta sama arep keton, keton baketep, keton panggawi, tuntang keton sabar manyarenan kapehe. Aku katawan keton wayah toh bagawi labih are bara helo. 2:20 Tapi toh kabehat auhku dengan keton: Keton bajenta dengan Isebel, oloh bawi te je mangaku arepe sarohan Hatalla. Jari are rewarku je inipue tuntang iajare mawi gawi harayap tuntang uka kuman panginan je jari inyarah akan dewa. 2:21 Aku jari manenga akae katika uka hobah bara kare dosae, tapi ie dia maku terai malalus kare gawi harayap te. 2:22 Ingat! Aku kareh mahampas ie sampai haban hong ekae batiroh. Intu hete ie tuntang kare oloh je habandong dengae kareh mangkeme kapehe toto. Taloh handiai te kareh ilalusku katika toh -- amon ewen dia terai malalus kare taloh je papa dengae. 2:23 Kare oloh ayue kareh impateiku kea uka kakare ungkup katawan tuntang haratie aku toh ie je mangatawan kare tirok atei olon. Keton kareh imbalehku manumon gawin keton genep biti. 2:24 Tapi keton awang beken intu Tiatira dia omba ajar papa te tuntang dia bajar bara kare ajar ain setan. Aku mansanan aku kareh dia mandahang tanggongan keton je babehat. 2:25 Tapi sampai katika aku dumah kareh, keleh keton tetep manumon taloh je jari aton intu keton. 2:26-27 Oloh je manang, tuntang je jari sampai kalepahe harajur malalus taloh je eka kahandakku, kareh inengaku kuasa sama kilau je inarimaku bara Bapaku. Ewen kareh manarima kuasa bara aku uka marentah kare utus oloh hapan tongkeh sanaman, tuntang uka mamparotek kare utus te sama kilau kandi petak. 2:28 Ewen kareh mandino bintang timur bara aku. 2:29 Eweh je tau mahining, keleh ie manantuani taloh je insanan awi Roh Hatalla akan kare ungkup!"
3:1 "Akan malekat ungkup hong Sardis, keleh manyurat kalotoh: Jetoh peteh bara ie je tempon uju roh bara Hatalla tuntang uju bintang te. Aku katawan taloh je iawi keton. Koan oloh, keton belom, tapi sapunae keton matei! 3:2 Tagal te, keleh misik, tuntang mandehen taloh je magon aton intu keton helo bara ie matei samasinde. Basa aku sondau taloh je ilalus keton te, ije mahin jaton je tinduh-barasih intu taharep Hatalla. 3:3 Jadi, keleh mingat tinai taloh je jari iajar akan keton bihin tuntang taloh je jari ihining keton. Keleh malalus jete tuntang hobah bara kare dosan keton. Amon keton dia misik, aku kareh dumah manalih keton kilau maling; tuntang keton dia katawan hamparea aku dumah. 3:4 Tapi bara marak keton je hong Sardis magon aton oloh je mahaga pakaiae tetep barasih. Ewen te kareh mananjong haya-hayak dengangku hapan pakaian baputi, awi ewen patut kalote. 3:5 Akan ewen je manang kareh ingkepan jubah baputi. Aran ewen dia ingabus bara Surat Oloh Belom. Tuntang intu taharep Bapaku tuntang kare malekat ayue aku kareh mangaku ewen te oloh ayungku. 3:6 Eweh je mahining keleh ie manantuani taloh je insanan awi Roh Hatalla akan kare ungkup!" 3:7 "Akan malekat ungkup hong Piladelpia, keleh manyurat kalotoh: Jetoh peteh bara ie je barasih tuntang bujur haliai. Ie te malekat je mimbing kunci ain Dawid; amon ie mukeie, ije biti mahin jaton oloh tau matepe, tuntang amon ie matepe, ije biti mahin jaton oloh tau mukeie. 3:8 Aku katawan taloh je iawi keton. Aku katawan kaabas keton dia sapire; keton jari manumon auh ajarku tuntang baketep dengangku. Akan keton jari iuapku ije bauntonggang, je jaton tau iatep awi eweh bewei. 3:9 Keleh mingat jetoh: Kare oloh je manjadi jalahan setan te, uras pananjaro je mangaku arepe Yehudi padahal beken, kareh iawiku sampai ewen manyembah intu taharep keton. Tuntang ewen kareh katawan je aku sinta keton. 3:10 Awi keton jari mamenda parentahku uka baketep, maka aku kareh mangalindong keton bara wayah kapehe je buah hapus kalunen. Hal te kareh manjadi uka maningkes oloh handiai hong kalunen. 3:11 Aku bajeleng dumah! Haga bua-buah taloh je intu keton, mangat ije biti mahin jaton oloh je tau marampas panenga kamanang ain keton. 3:12 Oloh je manang, kareh iawiku manjadi tihang hong huma barasih ain Hatallangku, tuntang ie kareh melai hong eka te palus katatahie. Aran Hatallangku, tuntang aran lewun Hatallangku -- iete Yerusalem taheta je kareh mohon bara sorga, bara Hatallangku -- kareh inyuratku intu bitin oloh te. Tuntang arangku je taheta kareh inyuratku kea intu bitie. 3:13 Eweh je tau mahining, keleh ie manantuani taloh je insanan awi Roh Hatalla akan kare ungkup!" 3:14 "Akan malekat ungkup hong Laodikea, keleh manyurat kalotoh: Jetoh peteh bara Amen te, saksi je baketep tuntang bujur, upon taloh handiai je injapa awi Hatalla. 3:15 Aku katawan taloh je iawi keton; aku katawan keton dia sadingen tuntang dia kea balasut. Sapunae keton salahimbal bara due te! 3:16 Tapi keton lasu-lasut kuku; dia balasut, dia kea sadingen. Jete sababe keton kareh ilujaku balua bara nyamangku. 3:17 Keton hamauh, 'Ikei tatau tuntang uras sukup; ikei jaton tapas taloh en-en.' Tapi keton dia katawan dia lue-luen kapehe tuntang kapasi ampin keton! Keton belom susah, halowai tuntang babute. 3:18 Tagal te aku manasehat keton mangat mamili amas dengangku, iete amas je tulen, mangat keton manjadi tatau. Keleh mamili kea dengangku pakaian baputi mangat keton hapakaian tuntang manutup ampin keton je halowai tuntang mampahawen. Tuntang keleh mamili kea tatamba mangat iohos intu matan keton mangat keton tau mite. 3:19 Kare oloh je inyintaku, jete je iningakku tuntang injaraku. Tagal te, keleh keton balasut atei tuntang hobah bara kare dosan keton. 3:20 Ite! Aku mendeng intu bauntonggang tuntang manegah. Amon aton oloh je mahining auhku, tuntang mukei bauntonggang, aku kareh tame manyondau ie; aku kareh kuman hinje ie tuntang ie akan kuman hinje aku. 3:21 Oloh je manang, kareh inyohoku mondok dengangku hunjun padadosangku, sama kilau aku kabuat mahin jari manang toh mondok dengan Bapa hunjun padadosae. 3:22 Eweh je tau mahining, keleh ie manantuani taloh je insanan awi Roh Hatalla akan kare ungkup!"
4:1 Limbah te aton taloh je gitangku tinai. Aku mite ije bauntonggang buap hong sorga. Limbah te aku mahining tinai auh je solake jari hakotak dengangku kilau tarompet. Auh te hamauh, "Has, mandai' akan hetoh. Aku handak mamparahan akam taloh je akan manjadi rahian kareh." 4:2 Balalu ih aku inguasa awi Roh Hatalla. Palus aku mite hong sorga aton ije padadosan, tuntang aton ije biti oloh mondok intu padadosan te. 4:3 Baun oloh te balawa hasangkowong kilau kalawan batu akik tuntang batu delima. Ije liu bawarna jamrud mangalingkar padadosan te. 4:4 Hapamunter hakaliling padadosan te aton due puluh epat padadosan je beken. Intu hete aton mondok due puluh epat pamimpin je hapakaian baputi, tuntang mahapan makota amas. 4:5 Bara padadosan te balua pancar kilat tuntang balua auh nyaho je hagalagar. Tuntang intu taharep padadosan te aton uju sahewan je hanyala; jete ie uju Roh Hatalla. 4:6 Intu padadosan te aton kea taloh ije ampie kilau laut kaca, takining kilau kristal. Intu hakaliling padadosan, hong genep sarae, aton epat taloh belom je hila baue tuntang hila likute kontep awi mate. 4:7 Taloh belom je solake sama ampie kilau singa. Ije kaduee, sama kilau sapi hatuee. Ije kateloe ampin baue kilau baun olon. Ije kaepate, ampie sama kilau burung rajawali kanjerae tarawang. 4:8 Kaepa-epat taloh belom te, genep bitie aton jahawen palapase, tuntang hakalilinge tuntang hila huange kontep awi mate. Handau hamalem kare taloh belom te dia hakalayan manyanyi, "Barasih, barasih, barasih Tuhan, Hatalla je pangkahai kuasae; je aton, je jari aton, tuntang je kareh aton tinai." 4:9 Kaepa-epat taloh belom te manyanyi nyanyi tara, hormat tuntang tarima kasih akae je mondok hunjun padadosan te, ie te ie je belom sampai katatahie. Tuntang katika kare taloh belom te manyanyi, 4:10 kadue puluh epat pamimpin te mahingkep intu taharep oloh je mondok hunjun padadosan te, palus manyembah ie je belom katatahie. Limbah te ewen manjakah kare makota ain ewen akan baun padadosan te sambil hamauh, 4:11 "O Tuhan, o Hatallan ikei! Ikau bewei je patut mandino tara, hormat tuntang kuasa. Awi ikau je manjapa kare taloh handiai, tuntang tagal kahandak ayum kea kare taloh handiai te jari manjadi tuntang belom."
5:1 Limbah te aku mite ije kabalon surat intu lengen oloh je mondok hunjun padadosan te. Balon surat te kontep inyurat hasansila tuntang inyegel hapan uju segel. 5:2 Palus aku mite ije biti malekat je abas hamauh dengan auh je hai koae, "Eweh je patut muap kare segel toh tuntang mukei surat toh?" 5:3 Tapi aloh hong sorga kalote kea hunjun petak, atawa hong penda petak mahin jaton kea oloh je olih mukei surat te, tuntang manampayah huange. 5:4 Maka aku manangis side-siden awi ije biti mahin jaton oloh je patut mukei surat te tuntang manampayah huange. 5:5 Balalu ije biti bara kare pamimpin te hamauh dengangku, "Ela manangis! Ite! Singa bara utus Yehuda, panakan Dawid je hai, jari manang. Ie olih muap segel tuntang mukei surat te." 5:6 Limbah te aku mite ije kongan Anak Tabiri intu bentok padadosan te, ingaliling awi epat taloh belom tuntang kakare pamimpin te. Anak Tabiri te kilau je inyambalih. Ayue aton uju tanduk uju mate: iete uju roh bara Hatalla je inyoho akan hapus kalunen. 5:7 Limbah te Anak Tabiri te akan baun tuntang manduan balon surat te bara lengen oloh je mondok hunjun padadosan. 5:8 Pandehan Anak Tabiri te mawie kalote, maka epat taloh belom tuntang due puluh epat pamimpin te uras mahingkep manyembah intu taharepe. Genep bitin ewen te mimbing kacapi tuntang mangkok amas je basuang garo, iete kare lakudoan ungkup Hatalla. 5:9 Ewen manyanyi ije nyanyi taheta: "Ikau patut manduan surat te tuntang mukei kare segel te. Basa ikau jari impatei, tuntang tagal pampateim, kalunen bara kare utus oloh, bahasa, negara, tuntang utus jari imili awim akan Hatalla. 5:10 Ewen jari iawim manjadi utus kare imam, uka ewen mandohop Hatallan itah, tuntang marentah hunjun petak." 5:11 Limbah te aku manampayah tinai, aku mahining auh malekat je bakoya-koyan tuntang bajuta-juta karee. Ewen mendeng mangaliling padadosan, kaepat taloh belom tuntang kare pamimpin te. 5:12 Tuntang ewen manyanyi hapan auh je hai, "Anak Tabiri je jari inyambalih te, patut manarima kuasa, panatau, kapintar-kaharati tuntang kaabas; ie patut ihormat, impahai tuntang inara!" 5:13 Palus aku mahining kakare taloh belom intu langit, intu hunjun petak, intu penda petak tuntang huang tasik -- kakare taloh belom hong langit tuntang hong hapus penda langit toh -- manyanyi, "Ie je mondok hunjun padadosan, tuntang Anak Tabiri te, inara tuntang ihormat, hai tuntang kuasa palus katatahie!" 5:14 Maka epat taloh belom te tumbah, "Amen!" Tuntang kare pamimpin te kea mahin mahingkep tuntang manyembah.
6:1 Limbah te aku mite Anak Tabiri te mukei segel je solake bara uju segel te. Palus aku mahining auh ije biti bara ewen epat taloh belom te hamauh, "Kahetoh!" Auhe hamauh te kilau auh nyaho. 6:2 Maka aku mite, palus aton ije kongan kuda baputi. Oloh je manungkang kuda te mimbing ije anak panah, tuntang ije makota inenga akae. Ie miar kilau ije biti pangkalima hai je handak manang perang. 6:3 Limbah te Anak Tabiri te muap segel je kaduee, tuntang aku mite taloh belom je kaduee hamauh, "Kahetoh!" 6:4 Palus ije kongan kuda je beken balua tinai. Kuda te bahandang warnae. Oloh je manungkang kuda te inenga kuasa uka mampalembut perang hong hunjun petak, mangat kalunen hapatei sama arepe. Maka akae inenga ije kabilap padang hai. 6:5 Palus Anak Tabiri te mamusit segel je kateloe. Tuntang aku mahining taloh belom je kateloe hamauh, "Kahetoh!" Aku mite, lembut ije kongan kuda babilem. Oloh je manungkange mimbing ije pasang timbangan intu lengee. 6:6 Tuntang aku mahining taloh je auhe kilau auh je mantehau bara marak taloh belom te. Auh te hamauh, "Ije liter gandum je bahalap, regae sama kilau upah oloh bagawi jandau, tuntang telo liter jagung tingkat je beken regae sama kilau upah oloh bagawi jandau kea. Tapi ela marusak kare batang sikon tuntang kabun anggur!" 6:7 Limbah te Anak Tabiri te mukei segel je kaepate. Tuntang aku mahining taloh belom je kaepate hamauh, "Kahetoh!" 6:8 Aku mite palus lembut ije kongan kuda ampin warnae kalas. Oloh je manungkange te bagare Pampatei. Bara hila likute, ie inuntut awi Lewun Pampatei. Kuasa inenga akan ewen uka marentah saperepat bagian kalunen toh, mangat ewen tau mampatei mahapan perang, wayah lau, kare ganan panyakit tuntang kare meto basiak. 6:9 Limbah te Anak Tabiri te mukei segel je kalimee. Maka aku mite hong penda mesbeh aton kare roh oloh je impatei karana ewen manyampai peteh Hatalla mahapan kasaksian ewen. 6:10 Ewen mangkariak hapan auh je hai, "O Tuhan je Paham Kuasa, je barasih tuntang bujur! Kilen katahie hindai harun ikau mahukum oloh kalunen awi ewen mampatei ikei?" 6:11 Akan genep bitin ewen te inenga ije kalambar jubah baputi. Palus ewen inyoho mentai hanjulo hindai sampai kare kawal tuntang paharin ewen saperjuangan je imapatei kilau ewen jadi sukup karee. 6:12 Palus aku mite Anak Tabiri te mukei segel je kajahawen. Te petak palus hagerek paham. Matanandau manjadi babilem sama kilau benang babilem je kasar, tuntang bulan manjadi bahandang sama kilau daha. 6:13 Kare bintang baduroh bara langit akan hunjun petak sama kilau bua ara je manta baduroh bara batange katika inggerek awi riwut barat. 6:14 Langit nihau imbalon kilau karatas, kakare bukit tuntang pulau tatindar bara ekae. 6:15 Palus kare raja hong kalunen, kare oloh hai, kare pangkalima, kare oloh tatau tuntang kare oloh kuasa, tuntang kare oloh awang beken, aloh oloh je jipen atawa oloh mardeka, uras manyahokan arepe hong kare goha tuntang intu helat kare batun bukit. 6:16 Dengan kare bukit tuntang dengan kare batu te ewen mangkariak, "Enyet ikei, sahokan ikei bara tampayah oloh te je mondok hunjun padadosan, tuntang bara kalait Anak Tabiri te! 6:17 Andau je paham kahaie jari sampai, toh ewen mamparahan kalait ewen, tuntang ije biti mahin jaton oloh je olih tahan manaharep ewen!"
7:1 Limbah te, aku mite epat biti malekat mendeng intu epat puting kalunen. Ewen manahan kaepat riwut hong kalunen mangat jaton riwut je manampur hunjun petak atawa intu tasik, atawa intu kare batang kayu. 7:2 Palus aku mite ije biti malekat je beken lembut bara hila timur. Ie mimbit segel ain Hatalla je belom. Hapan auh je hai malekat te matehau kaepat malekat je jari mandino kuasa bara Hatalla uka marusak petak tuntang tasik. 7:3 Malekat te hamauh, "Ela helo marusak petak atawa tasik, atawa kare batang kayu amon ikei hindai mangkepan tanda segel intu lingkau kare rewar Hatallan itah." 7:4 Palus insanan akangku aton 144.000 biti oloh je inanda hapan segel ain Hatalla intu lingkau ewen. Kare oloh te induan bara duewalas utus Israel; 7:5 bara genep utus 12.000 biti. Iete bara utus: Yehuda, Roben, Gad, 7:6 Aser, Naptali, Manase, 7:7 Simeon, Lewi, Isaskar, 7:8 Sebulon, Yosep, tuntang Benyamin. 7:9 Limbah te aku mite tinai, palus taragitan kawan oloh kalunen je dia taraise karee -- ije biti mahin jaton oloh tau mise karee. Ewen te iete kare oloh bara genep utus, suku, negara, tuntang bahasa. Sambil mangkepan jubah je uras baputi tuntang sambil mimbing kare palapah palma, kare oloh are te mendeng manaharep padadosan tuntang manaharep Anak Tabiri te. 7:10 Palus hapan hai auh ewen mantehau, "Eka salamat itah te dumah bara Hatallan itah, je mondok hunjun padadosan tuntang bara Anak Tabiri te!" 7:11 Kakare malekat mendeng mangaliling padadosan te tuntang kare pamimpin dengan epat taloh belom te. Kare malekat te mahingkep hila baun padadosan palus manyembah Hatalla. 7:12 Ewen hamauh hai auhe, "Amen! Tara akan Hatallan itah je hai tuntang eka kapintar-kaharati. Kare auh tara, tarimakasih tuntang hormat patut inawon akae. Ie kuasa tuntang abas palus katatahie! Amen." 7:13 Ije biti bara kare pamimpin te misek dengangku, "Eweh kare oloh je mahapan jubah baputi te, tuntang bara kueh ewen te dumah?" 7:14 "Aku dia katawan, Tuan. Tuan kabuat je katawan," koangku tombah. Maka ie hamauh dengangku, "Jetoh ie kare oloh je jari salamat limbah mahalau wayah kapehe je paham. Ewen jari menyau jubah ewen tuntang mawie manjadi baputi hapan dahan Anak Tabiri te. 7:15 Jete sababe ewen mendeng manaharep padadosan Hatalla, tuntang manyembah ie handau hamalem intu huang Human Hatalla. Tuntang ie je mondok hunjun padadosan te kareh melai hinje ewen mangat mangalindong ewen. 7:16 Ewen dia akan mangkeme balau', atawa teah belai hindai; matanandau atawa pandang andau dia hindai mampalupak ewen, 7:17 awi Anak Tabiri je mondok intu bentok padadosan te kareh manjadi sakatik ewen. Ie kareh magah ewen akan tahasak danum je manenga pambelom. Tuntang Hatalla kareh mampuas kakare danum matan ewen."
8:1 Katika Anak Tabiri te mukei segel je kaujue, sorga manjadi benyem kurang labih katahin satengah jam. 8:2 Palus aku mite uju malekat je mendeng intu taharep Hatalla, tuntang ewen inenga uju kabawak tarompet. 8:3 Malekat je beken, mimbit ije dadupa amas, dumah tuntang mendeng intu baun mesbeh. Akae inenga are toto garo mangat imbuwur intu kare lakudoa ain salepah ungkup ain Hatalla tuntang uka inyarah intu mesbeh amas je aton hila baun padadosan. 8:4 Haya-hayak dengan kare lakudoan kare ungkup ain Hatalla, asep dadupa je hanyala te mangangkewul mandai' bara lengen malekat je mendeng intu taharep Hatalla te. 8:5 Palus malekat te manduan dadupa te, tuntang manyuange hapan apui bara mesbeh, palus manjakahe akan hunjun petak. Maka nyaho mahin mangguruh tuntang kilat sir-sar manyambar, tuntang petak kea hagerek. 8:6 Limbah te, uju malekat je mimbing uju tarompet te manatap arepe handak mampahiau tarompet te. 8:7 Malekat je solake mampahiau tarompete, palus ujan es tuntang apui hewoi daha baduroh paham akan hunjun petak. Sapertelo petak lepah bakeho; kalote kea sapertelo bara kare batang kayu tuntang gagenep oru je belom bahijau. 8:8 Palus malekat je kaduee mampahiau tarompete, palus aton taloh je hai toto gitan sama kilau bukit je hagandang kilau apui je injakah akan huang tasik. Sapertelo tasik te hobah manjadi daha. 8:9 Tuntang sapertelo bara kare taloh belom hong tasik te uras matei; kalote kea sapertelo bara kare kapal lepah lumat. 8:10 Limbah te malekat je kateloe mampahiau tarompete, maka ije bintang hai, je hagandang manyala kilau sahewan, manjato bara langit, palus manempak sapertelo bara kare batang danum tuntang tahasak sungei. 8:11 (Aran bintang te "Kapait".) Maka sapertelo bara danum te manjadi bapait, tuntang are oloh matei awie mihop danum je jari bapait te. 8:12 Palus malekat je kaepate mampahiau tarompete. Balalu sapertelo matanandau te, tuntang sapertelo bulan tuntang sapertelo bara kare bintang uras buah karusak sampai sapertelo bara kaabas kalawa ain ewen te nihau. Tinai sapertelo andau jaton balawa, kalote kea sapertelo bara hamalem. 8:13 Palus aku mite, hayak mahining ije burung rajawali je metohe tarawang gantong hong langit, mangkariak, "Calaka! Calaka! Calaka toto oloh handiai hong hunjun petak amon ewen mahining katatelo malekat awang beken te kareh mampahiau tarompete!"
9:1 Palus malekat je kalimee mampahiau tarompete, tuntang aku mite ije bintang manjato bara langit akan hunjun petak. Akan bintang te inenga kunci liang pampatei. 9:2 Maka bintang te mukei liang pampatei te, palus asep balua bara huange sama kilau asep bara dapur je hai. Matanandau tuntang langit manjadi kaput awi asep bara liang pampatei. 9:3 Palus bara huang asep te balua kare sangkalap je mohon bara hunjun petak. Kare sangkalap te inenga kuasa sama kilau je inenga akan kala. 9:4 Ewen te ingahana marusak oru, atawa kare batang kayu, atawa kare taloh awang beken. Ewen baya tau mawi kare oloh je intu lingkaue jaton tanda segel bara Hatalla. 9:5 Kare sangkalap te dia inyoho mampatei kare oloh te, tapi baya mangapehe ewen sampai lime bulan. Angat karah ganan kapehe je iawi kare sangkalap te sama kilau angat karah pepet kala. 9:6 Katahin lime bulan te kare oloh te mipen toto handak matei, tapi ewen dia tau matei; ewen mipen matei tapi pampatei kejau bara ewen. 9:7 Ampin sangkalap te sama kilau kuda je tatap handak perang. Intu kare takolok sangkalap te aton taloh je ampie sama kilau makota amas. Baun ewen sama kilau baun kalunen. 9:8 Balau ewen sama kilau balau oloh bawi, tuntang kasingan ewen sama kilau kasingan singa. 9:9 Usok ewen inutup hapan taloh je sama kilau baju sanaman. Auh palapas ewen sama kilau auh kare kareta kuda je are toto kawae je kanjerae mamok hong perang hai. 9:10 Ewen te aton ikohe tuntang tau mamepet sama kilau kala. Tuntang intu ikoh ewen te aton kaabas hapae mangapehe kalunen lime bulan katahie. 9:11 Ain ewen aton raja je marentah ewen, tuntang raja te iete malekat je mimbing kuasa hunjun kare taloh hong liang pampatei. Arae huang basa Ibrani iete Abadon; tuntang hong basa Yunani inyewut Apolion (rimae "Parusak"). 9:12 Calaka je pangkasolake jari mahalau. Limbah te aton due calaka hindai je musti dumah. 9:13 Limbah te malekat je kajahawen mampahiau tarompete. Maka aku mahining auh lembut bara epat puting mesbeh amas je aton intu taharep Hatalla. 9:14 Auh te hamauh dengan malekat je kajahawen te, "Keleh malapas kaepat malekat je injarat intu sungei Euprat te!" 9:15 Kaepat malekat te palus ilapas. Ewen te puna tantai inatap jame, andaue, bulae, tuntang nyeloe uka mampatei sapertelo bara salepah utus oloh kalunen. 9:16 Akangku insanan jumlah pasukan je manungkang kuda te aton due ratus juta karee. 9:17 Tuntang huang panggitangku aku mite kare kuda te tuntang kare oloh je manungkange. Kare oloh je manungkange te uras mahapan baju sanaman je warnae bahandang hanyala, bahijau sama kilau batu nilam, tuntang bahenda kilau barirang. Takolok kare kuda te sama kilau takolok singa, tuntang bara nyamae balua apui, asep tuntang barirang. 9:18 Sapertelo bara utus oloh kalunen matei awi telo macam calaka te; iete apui, asep tuntang barirang je balua bara kare nyaman kuda te. 9:19 Kaabas kare kuda te aton intu nyamae tuntang kea intu ikohe. Kare ikohe te sama kilau handipe hatakolok. Hapan ikohe kare kuda te mangapehe oloh kalunen. 9:20 Tapi tisan kare utus oloh kalunen je dia matei awi kare taloh calaka te, mahin dia kea ewen hobah bara kare gawin ewen kabuat. Ewen dia tende manyembah kare setan, tuntang kare hampatung amas, perak tambaga, batu tuntang kayu je dia tau mite tuntang mahining, atawa mananjong. 9:21 Ewen dia kea malihi kare gawin ewen je papa, iete pamuno, kaji patua, gawi harayap tuntang manakau.
10:1 Palus aku mite ije malekat je paham gagah mohon bara sorga. Ie habungkus baunandau, tuntang ije liu malingkar takoloke. Baue mamancar kilau matanandau, tuntang paie sama kilau tihang apui. 10:2 Intu lengee aton ije balon surat korik je habirang. Paie hila gantaue bahunje intu tasik, paie hila sambil bahunje hunjun petak. 10:3 Palus ie mantehau hai auhe kilau auh kare singa mangaruntong. Limbah malekat te mantehau, maka uju nyaho manimbale hapan auh je guru-guruh. 10:4 Sana uju nyaho te mahiau, aku handak manyurate, tapi aku mahining auh bara sorga hamauh, "Keleh ikau milim taloh je insanan awi nyaho te; ela manyurat jete!" 10:5 Palus gitangku malekat je bahunje intu tasik tuntang intu petak te manggatang lenge gantaue akan langit. 10:6 Ie sumpah huang aran Hatalla je belom sampai katatahie, je manjapa langit, petak tuntang tasik dengan kakare taloh handiai je aton intu huange. Malekat te hamauh, "Katikae dia tau iundur hindai! 10:7 Tapi metoh malekat je kaujue mampahiau tarompete, Hatalla handak malalus rencanae je basilim te, sama kilau je jari imbaritae akan kare rewar ayue, iete kare nabi." 10:8 Limbah te auh jari ihiningku bara sorga te, hakotak tinai dengangku. Ie hamauh, "Lius, duan balon surat je habirang intu lengen malekat je bahunje intu tasik tuntang hunjun petak te." 10:9 Maka aku lius kea manalih malekat te tuntang balaku uka ie manenga balon surat korik te akangku. Ie hamauh, "Duan tuntang kinan jetoh. Intu huang kanaim jete kareh manjadi bapait, tapi intu nyamam ie manis kilau mado." 10:10 Aku manduan balon surat korik te bara lengee palus kumae. Intu nyamangku angate kilau mado, tapi limbah aku manelee, huang kanaingku jete manjadi bapait. 10:11 Limbah te ie manyoho aku, "Naburan sinde tinai barita ain Hatalla tahiu kare utus oloh, kare negara, kare bahasa, tuntang kare raja."
11:1 Limbah te akangku inenga ije kadereh kayu je kilau tongkeh hapa mukur, palus aku inyoho, "Lius ukur Human Hatalla tuntang mesbeh. Ise pire kare oloh sombayang intu huange. 11:2 Tapi ela mukur petak je hila luar Human Hatalla te, basa bagian jete jari inyarah akan kare oloh je dia mangasene Tuhan. Ewen kareh mahunje manandik lewu je barasih te epat puluh due bulan katahie. 11:3 Aku kareh manyoho due biti saksingku je mahapan pakaian kapehen atei, tuntang ewen kareh manyampai auh barita bara Hatalla 1260 andau katahie." 11:4 Due saksi te iete due batang sikon tuntang due tantahan sumbo je aton intu taharep Tuhan langit tuntang petak. 11:5 Amon oloh mancoba malalus taloh en-en je dia bahalap mawi ewen, maka bara nyaman ewen kareh balua apui je mambinasa kare musoh ewen. Hapan cara kalote, kakare oloh je handak mangapehe ewen kareh matei. 11:6 Ewen bara kuasa manyoho mangat andau dia ujan katahin ewen mansanan barita bara Hatalla. Ewen aton kuasae mahunjun danum kea, uka mobah danum manjadi daha. Tuntang ewen kea aton kuasae mamukul petak mampalembut sepsimpan ampin kabinasa, hamparea bewei ewen handak malaluse. 11:7 Limbah ewen jari lepah mangabar barita ain ewen te, te meto je balua bara liang pampatei te kareh malawan ewen. 11:8 Tuntang hantun ewen kareh lantong-lantonga intu jalan lewu hai, hong eka Tuhan ewen te inyampalaki. Aran galar lewu hai te iete Sodom atawa Misir. 11:9 Kare oloh bara kakare negara, suku utus oloh tuntang bahasa kareh mite hantun ewen katahin telo satengah andau, tuntang ie dia manyoho kare hantu te ingubur. 11:10 Kakare oloh kalunen kareh hanjak tagal pampatei kadue saksi te. Ewen kareh pesta tuntang hatakiri panenga akan sama arepe awi due biti nabi te jari mimbit are kapehe akan oloh handiai intu hunjun petak. 11:11 Limbah telo satengah andau, te dumah tahaseng pambelom bara Hatalla tuntang tame tinai akan due biti nabi te. Palus ewen ndue te harikas mendeng sampai oloh handiai je mite ewen te uras mikeh toto. 11:12 Limbah te due biti nabi te mahining auh hai mantehau ewen bara sorga, "Ayo, lumpat akan hetoh!" Balalu intu taharep kare musoh ewen, ewen palus mandai' akan sorga, imbungkus awi baunandau. 11:13 Maka hong katika te petak salenga hagerek paham toto. Sapersapuluh bagian lewu te hancur, tuntang uju koyan biti oloh matei awi petak hagerek te. Kare oloh beken palus mikeh paham, balalu ewen manara kahain Hatalla hong sorga. 11:14 Calaka je kaduee te jari mahalau. Tapi ite! Calaka je kateloe hanjulo tinai kareh dumah. 11:15 Palus malekat kaujue mampahiau tarompete, maka hong sorga tarahining kare auh je paham hai, "Kuasa hapan marentah kalunen toh aton huang lengen Tuhan itah tuntang Raja Panyalamat je injanjie. Ie kareh marentah palus katatahie!" 11:16 Maka due puluh epat pamimpin je mondok hong padadosae intu taharep Hatalla, mahingkep tuntang manyembah Hatalla. 11:17 Ewen hamauh, "Tuhan, Hatalla je paham kuasae, Je Aton tuntang Je Jari Aton! Ikei manarimakasih akam basa ikau jari mahapan kuasam je hai, tuntang jari manampara marentah! 11:18 Kare oloh je dia mangasene Tuhan, mamok awi jari sampai katikae ikau mamparahan kalaitm, tuntang jari sampai kea andaue ikau mahakim kare oloh matei. Toh jari sampai wayahe uka manenga upah akan kare rewarm, kare nabi, tuntang akan hapus ungkup ayum, iete oloh handiai je manyembah ikau, oloh korik atawa oloh hai. Toh ie wayahe uka mampalumat kare oloh je mampalenyoh kalunen!" 11:19 Maka Human Hatalla hong sorga palus buap, tuntang Patin Janji intu huange te balalu gitan. Maka kilat palus sir-sar manyambar, auh nyaho haguruh tuntang mangaruntong, hayak petak hagerek tuntang ujan es labat.
12:1 Palus taragitan intu langit, ije taloh heran tuntang je luar biasa. Ije biti oloh bawi mangkepan matanandau akan pakaiae, kanjerae mendeng hunjun bulan. Intu takoloke aton ije makota iete bara duewalas bintang. 12:2 Oloh bawi te batihi, tuntang awi jari sampai katikae luas, maka ie mangkariak awi paham kapehe. 12:3 Palus taragitan tinai intu langit ije taloh heran. Aton ije kongan naga bahandang je hai toto tuntang uju takoloke dengan tanduke sapuluh. Genep takoloke mahapan ije makota. 12:4 Hapan ikohe ie mihir sapertelo bara kare bintang hong langit tuntang manjakahe akan hunjun petak. Naga te mendeng intu taharep oloh bawi je handak luas te awie handak manelen anake, sana inakan. 12:5 Palus oloh bawi te luas ije biti anak hatue je kareh marentah salepah utus oloh hapan tongkeh sanaman. Tapi anak te irampas bara oloh bawi te, palus iimbit manalih Hatalla tuntang akan hila baun padadosae. 12:6 Maka oloh bawi te hadari akan padang pasir, akan eka je jari inatap awi Hatalla akae. Hong eka te ie ihaga 1260 andau katahie. 12:7 Palus hong sorga lembut perang kalahi. Mikhael dengan kare malekat ayue hamok malawan naga te. Tuntang naga te kea, indohop awi kawan malekat ayue, malawan Mikhael. 12:8 Tapi naga te kalah. Ie tuntang kare malekat ayue dia inyoho tinai melai huang sorga. 12:9 Naga hai te inganan akan luar! Ie te handipe bakas je bagare setan atawa Roh Papa, je manipu hapus kalunen. Ie inganan akan hunjun petak dengan kare malekat ayue. 12:10 Palus aku mahining auh je hai hong sorga hamauh, "Katika toh ie Hatalla manyalamat ungkup ayue! Katika toh Hatalla mamparahan kuasae kilau Raja! Katika toh Raja Panyalamat je injanji te kea mamparahan kuasae! Basa ie je jari mandawa kare paharin itah handau hamalem intu taharep Hatalla, jari impalua bara sorga. 12:11 Kare paharin itah jari mampakalah ie hapan dahan Anak Tabiri te, tuntang hapan barita je bujur bara Hatalla je imbarita awi ewen. Ewen pahias manyarah pambelom ewen sampai matei. 12:12 Tagal te, keleh sorga tuntang kare taloh handiai awang huange, hanjak rantang! Tapi kalunen tuntang tasik toh calaka, basa setan jari mohon manalih keton marak paham balait, awi ie katawan katikae baya batisa isut ih hindai." 12:13 Katika naga te katawan je ie jari inganan akan petak, ie nampara manggoang oloh bawi je jari luas anak hatue te. 12:14 Tapi akan oloh bawi te aton inenga due palapas burung rajawali je hai, mangat ie tarawang akan ekae hong padang pasir, intu hete ie kareh ihaga telo satengah nyelo katahie, uka mahakan bara naga je mado mawi. 12:15 Maka naga te manyambur are toto danum bara huang nyamae manintu oloh bawi te mangat mampahantung ie. 12:16 Tapi petak mandohop oloh bawi te; petak mukei nyamae palus manelen danum je balua bara nyaman naga te. 12:17 Naga te balait toto dengan oloh bawi te, sampai ie mawi oloh beken jalahan ain oloh bawi te kea, iete oloh handiai je mamenda kare parentah Hatalla, tuntang je baketep manenga kasaksian tahiu Yesus tuntang kuasae. 12:18 Palus naga te mendeng intu saran tasik.
13:1 Limbah te aku mite ije kongan meto lembut bara tasik. Ie te hatanduk sapuluh tuntang uju takoloke. Intu gagenep tanduke aton uju makota, tuntang intu gagenep takoloke aton inyurat aran je mamapa Hatalla. 13:2 Meto je gitangku te ampie sama kilau haramaung edan, tuntang paie sama kilau pain bahuang, tuntang samunyunge sama kilau samunyung singa. Palus naga manenga kaabas ayue akan meto te, tuntang padadosae, tuntang kuasae je hai. 13:3 Ije bara takolok meto te ampie kilau bahimang hai toto, tapi himang te jari keleh. Salepah kalunen omba manuntut meto te hayak mangkeme bakahera-heran. 13:4 Tuntang ewen manyembah naga te kea awi ie jari manenga kuasae akan meto te. Tuntang ewen manyembah meto te kea. Ewen hamauh, "Jaton aton je sama dengan meto jetoh! Jaton aton je olih hakalahi malawan ie!" 13:5 Meto te inalua uka tantai manyewut kare taloh je paham bajoho tuntang mahina Hatalla, ie dia ingahana marentah epat puluh due bulan katahie. 13:6 Palus ie nampara mahina Hatalla, tuntang aran Hatalla. Kalote kea eka Hatalla melai, tuntang taloh handiai je melai hong sorga kea mahin ihinae. 13:7 Ie tau kea malawan ungkup ain Hatalla hayak mampakalah ewen. Tuntang kuasa mahunjun kare suku, negara, bahasa, tuntang utus oloh inenga akae. 13:8 Meto te kareh inyembah awi oloh handiai je belom hong kalunen, tapi dia inyembah awi kare oloh je arae jari inyurat helo bara kalunen injapa, intu huang surat oloh belom ain Anak Tabiri je jari inyambalih. 13:9 Tagal te, amon keton olih mahining, keleh mahining barita toh: 13:10 "Oloh je musti inawan, pasti kareh inawan. Tuntang oloh je musti impatei hapan padang, pasti kareh imapatei hapan padang. Jete sababe ungkup ain Hatalla musti sabar tuntang baketep." 13:11 Palus aku mite ije kongan meto beken lembut bara penda petak. Ayue te aton due tanduk sama kilau tanduk anak tabiri. Auhe sama kilau auh naga. 13:12 Intu hila baun meto je solake te ie mahapan kuasa je hai dinoe bara meto te kea. Salepah petak tuntang kakare taloh handiai je melai hunjue, imaksa manyembah meto je solake te, ie bahimang hai tapi jari keleh. 13:13 Meto je kaduee te manampa kare taloh heran je hai. Intu taharep oloh handiai ie mawi apui mohon bara langit akan hunjun petak. 13:14 Tuntang oloh handiai je belom hunjun petak uras inanjaroe hapan kare taloh heran je tau ie mawie intu taharep meto je solake te. Tuntang ewen samandiai inyohoe mampendeng ije hampatung meto te je jari bahimang awi padang, tapi tetep belom. 13:15 Meto je kaduee toh inyoho manenga tahaseng akan hampatung te, sampai hampatung te tau hakotak tuntang mampatei oloh handiai je dia handak manyembah ie. 13:16 Oloh handiai, hai korik, je tatau tuntang je susah, jipen tuntang oloh mardeka, imaksa awi meto te uka manarima tanda intu lenge gantaun ewen atawa intu lingkau ewen. 13:17 Ije mahin jaton oloh je tau mamili atawa manjual taloh en-en, amon ayue jaton tanda te, iete aran meto te kabuat, atawa angka je mamparahan aran te. 13:18 Hetoh perlu aton pangatawan. Oloh je pintar-harati tau mise riman angka ain meto te, awi angka te jete aran ije biti olon. Angka te iete 666.
14:1 Limbah te aku mite, palus mamala Anak Tabiri te mendeng intu hunjun Bukit Sion. Hayak dengae aton 144.000 biti oloh je intu lingkau genep bitie aton tarasurat arae tuntang aran Bapae. 14:2 Palus aku mahining auh bara langit letu-letus sama kilau danum soho manjato tuntang sama kilau auh garuntong nyaho je paham. Auh te tarahining kilau auh musik ain kare tukang main kacapi je kanjerae mangacapi. 14:3 Intu taharep padadosan tuntang epat taloh belom dengan kare pamimpin intu hakaliling padadosan te, 144.000 biti oloh manyanyi ije nyanyi taheta. Nyanyi te dia tau iajar awi eweh bewei beken bara ewen je 144.000 biti te je jari iliwus bara hunjun petak. 14:4 Ewen te oloh je tinduh kilau oloh bawi bujang, awi ewen jaton puji hinje dengan oloh bawi. Ewen manuntut Anak Tabiri te akan kueh bewei ie haguet. Bara marak kakare utus oloh kalunen, ewen te ih je jari ilapas kilau parapah je pangkasolake akan Hatalla tuntang akan Anak Tabiri. 14:5 Ewen dia puji mananjaro; tuntang isut mahin jaton kasalan intu ewen. 14:6 Palus aku mite ije biti malekat beken je tarawang gantong intu langit. Malekat te mimbit kabar tahiu Barita Bahalap je katatahie uka inyampai akan olon hong kalunen iete akan kakare utus, utus oloh, bahasa tuntang negara. 14:7 Malekat te mantehau hapan auh je hai toto, "Buah mikeh Hatalla, tuntang keleh manara kahaie! Basa katikae jari sampai Hatalla mahakim olon. Keleh manyembah ie je manjapa langit, petak, tasik tuntang kakare tahasak danum!" 14:8 Malekat je kaduee manuntut malekat je solake sambil hamauh, "Jari manjato! Lewu Babel je hai jari manjato! Ie jari mawi kakare utus oloh babusau dengan anggur -- iete anggur kipen karayape!" 14:9 Ije biti malekat je kateloe manuntut due malekat te, sambil mantehau hapan auh je hai toto, "Oloh je manyembah meto te dengan hampatunge, tuntang je mandino tanda ain meto te intu lingkaue atawa intu lengee, 14:10 oloh te kareh mihop anggur ain Hatalla, iete anggur kalait je jari inusoh akan huang sarangae, isut mahin jaton katapase. Oloh handiai te kareh ingapehe huang apui tuntang barirang intu taharep kare malekat je barasih tuntang intu taharep Anak Tabiri te. 14:11 Asep apui je mangapehe kare oloh te kareh mangangkewul harajur palus katatahie. Ewen te ingapehe raju-rajur handau hamalem, iete ewen je manyembah meto te tuntang hampatunge, oloh handiai je mandino tanda aran meto te." 14:12 Huang hal toh ungkup ain Hatalla je baketep manumon kare parentah Hatalla tuntang baketep dengan Yesus, buah ewen te segah ateie. 14:13 Palus aku mahining auh bara sorga hamauh, "Surat jetoh: Manampara bara katika toh, salamat kare oloh je matei metoh ie bagawi akan Tuhan!" "Bujur!" koan Roh Hatalla tombah. "Ewen kareh terai bagawi babehat basa hasil gawin ewen kareh harajur mampahayak ewen." 14:14 Limbah te aku mite, palus lembut ije baunandau baputi. Intu hunjun baunandau te mondok ije biti je ampie sama kilau olon. Intu takoloke aton ije makota amas, tuntang intu lengee aton ije arit je banyihi. 14:15 Limbah te ije biti malekat beken balua bara Human Hatalla. Hapan auh je hai toto, ie mantehau oloh je mondok hunjun baunandau te, "Keleh mariwis aritm te tuntang getem metoh toh kea, basa katikae jari sampai uka manggetem; kalunen jari masak uka inggetem!" 14:16 Palus oloh je mondok hunjun baunandau te mariwis arite akan hunjun petak maka kalunen palus inggetem. 14:17 Limbah te aku mite ije biti malekat beken tinai balua bara Human Hatalla hong sorga. Ie kea mahin mimbing ije arit je banyihi. 14:18 Limbah te, ije biti malekat beken, je kuasa mahunjun apui, dumah bara mesbeh. Hapan auh je hai toto ie mantehau malekat je mimbing arit banyihi te, "Keleh mariwis aritm te tuntang tetek kare bua anggur hunjun petak, awi kare buae te jari masak!" 14:19 Maka malekat te mariwis arite akan hunjun petak tuntang mandarap kare bua anggur bara batange, palus manjakahe akan huang eka mahamis anggur, iete eka kalait Hatalla je hasep. 14:20 Kare bua anggur te ihamis intu luar lewu, tuntang bara sarangan eka mahamis te balua daha mahasor kilau batang danum kapanjange telo ratus kilo meter tuntang kandaleme due meter.
15:1 Limbah te intu langit aku mite taloh je dia lue-luen katamame. Aton uju malekat dengan uju calaka je pangkarahiae je pangkalepahe Hatalla manusoh kalaite. 15:2 Limbah te aku mite taloh je ampie sama kilau laut kaca hewoi dengan apui. Aku mite kea kare oloh je jari manang mawi meto te tuntang hampatunge, tuntang mawi kare oloh je arae inanda hapan angka. Kare oloh je manang te mendeng intu saran laut kaca sambil mimbing kacapi je inenga awi Hatalla akan ewen. 15:3 Tuntang ewen manyanyi nyanyin Moses, rewar Hatalla, tuntang nyanyin Anak Tabiri. Kalotoh auhe, "Tuhan, Hatalla je Paham Kuasae, lalehan kahaie tuntang kaherae kare gawim! Raja mahunjun kakare utus, lalehan kabujur tuntang katotoe kare taloh je iawim! 15:4 Eweh je dia mikeh dengam, Tuhan? Eweh je dia maku mambarita kahaim? Ikau bewei je barasih. Kakare utus oloh kareh dumah manyembah ikau karana kakare taloh je iawim te bujur jari inampayah awi oloh handiai." 15:5 Limbah te aku mite Human Hatalla huang sorga buap, tuntang Tingkap Tuhan aton intu huange. 15:6 Palus uju malekat tuntang uju calaka te balua bara Human Hatalla. Pakaian ewen bara benang lena je barasih tuntang mangilat. Tuntang ewen mahapan tutup usok je inampa bara amas. 15:7 Limbah te ije bara epat taloh belom te, manenga akan uju malekat te, uju sarangan amas je kontep basuang kalait Hatalla, -- Hatalla je belom palus katatahie. 15:8 Maka human Hatalla te kontep awi asep kahain Hatalla tuntang kuasae. Tuntang katahin uju calaka je iimbit awi uju malekat te hindai terai, ije biti mahin jaton oloh je tau tame akan huang human Hatalla.
16:1 Palus aku mahining auh hai bara Human Hatalla hamauh dengan uju malekat te, "Lius tuntang tusuh uju sarangan kalait Hatalla te akan hunjun petak!" 16:2 Malekat je solake palus haguet tuntang manusoh taloh huang sarangan te akan kalunen. Maka lembut kare baloyong paham tuntang manungut toto mawi oloh handiai je aton tanda ain meto te, tuntang mawi kare oloh je manyembah hampatunge. 16:3 Limbah te malekat je kaduee manusoh taloh huang sarangan te akan tasik. Maka danum tasik palus manjadi sama kilau dahan oloh matei, tuntang kare taloh je belom hong tasik palus matei. 16:4 Limbah te malekat je kateloe manusoh taloh huang sarangan te akan sungei tuntang akan kare batang danum, maka danume lepah uras manjadi daha. 16:5 Aku mahining malekat je kuasa hunjun danum hamauh, "Hukuman je iawim te puna bujur, o Je Barasih, Hatalla je aton, tuntang je jari aton! 16:6 Ewen jari manusoh dahan ungkup ain Hatalla tuntang dahan kare nabi; toh ikau mawi ewen mangat mihop daha. Jete puna patut akan ewen!" 16:7 Palus aku mahining auh bara mesbeh hamauh, "Tuhan, Hatalla Pangkahai Kuasae, buah tuntang bujur kare hukuman je iawim!" 16:8 Limbah te malekat je kaepat manusoh taloh huang sarangan te akan matanandau, maka matanandau kea inyoho uka mangeho oloh kalunen hapan kalasute je paham te. 16:9 Oloh kalunen ingeho awi kakaras lasute, tuntang ewen manyapa aran Hatalla, je kuasa mahunjun kare calaka te. Aloh kalote, ewen dia maku hobah bara dosan ewen tuntang dia maku manara kahain Hatalla. 16:10 Palus malekat je kalimee manusoh taloh huang sarangan te akan padadosan meto te. Maka hapus karajaan meto te manjadi kaput tuntang oloh kalunen mamangkit jelae awi kapehee. 16:11 Palus ewen manyapa Hatalla hong sorga awi ewen paham kapehe tuntang awi kare luyong ewen. Tapi dia kea ewen hobah bara kare gawin ewen je papa. 16:12 Limbah te malekat je kajahawee manusoh taloh huang sarangan te akan huang sungei Euprat je hai te. Maka sungei hai te teah sampai kare raja bara hila timor tau mananjong mahoroi hete. 16:13 Palus aku mite telo roh papa je ampie sama kilau bakatak. Gagenep bakatak te balua mije-mije bara nyaman naga, nyaman meto, tuntang bara nyaman nabi pananjaro. 16:14 Jete ie kare roh papa je mawi kare taloh heran. Katatelo roh te haguet manalih kakare raja hong hapus kalunen tuntang mamumpong ewen uka haguet perang hong andau je hai, iete andau ain Hatalla je Pangkahain Kuasae. 16:15 "Hining toh! Aku dumah sama kilau maling! Salamat oloh je tetep bajaga tuntang mahaga pakaiae, maka ie kareh dia mananjong halowai tuntang mahamen intu taharep oloh are!" 16:16 Limbah te kare roh te mamumpong kare raja te huang ije eka je hong basa Ibrani inyewut Harmagedon. 16:17 Limbah te malekat je kaujue manusoh taloh huang sarangan te akan udara. Palus tarahining auh je hai toto bara padadosan hong Human Hatalla, hamauh, "Jari hapus!" 16:18 Te palus kilat sir-sar manyambar tuntang auh nyaho mangguruh tuntang mangaruntong, hayak petak hagerek paham toto. Dia puji petak hagerek kilau te bara tamparan kalunen injapa. Jetoh ie petak hagerek je pangkapahame! 16:19 Lewu hai te bapusit manjadi telo bagian, tuntang kare lewu hong hapus kalunen manjadi lenyoh. Palus Hatalla taraingat tahiu Babel je hai te. Maka Hatalla mampihop ie hapan danum anggur bara sarangan anggur ain Hatalla -- iete anggur kalait je paham mangambuar. 16:20 Uras kare pulau lilap, tuntang kare bukit nihau kea. 16:21 Ujan es hai, ehate lime puluh kilogram ije kabawak, manjato bara langit manempak kare oloh. Maka ewen manyapa Hatalla tagal calaka ujan es je paham te.
17:1 Limbah te ije bara uju malekat je mimbing uju sarangan te dumah manalih aku tuntang hamauh, "Kahetoh, aku handak mamparahan akam kilen ampie lontei je hai te kareh ihukum, iete lewu hai te je imangun intu tokep kare batang danum. 17:2 Kare rajan kalunen habandong dengae, tuntang oloh kalunen manjadi babusau awi mihop anggur karayap te." 17:3 Palus Roh Hatalla manguasa aku, tuntang malekat te mimbit aku akan padang pasir. Intu hete aku mite ije biti oloh bawi mondok intu hunjun ije kongan meto je warnae bahandang batue', tuntang je hasurat lepah hapan kare aran je mamapa Hatalla. Meto te aton sapuluh takoloke tuntang sapuluh tanduke. 17:4 Oloh bawi te mahapan baju je warnae kawo-kawo tuntang bahandang batue', hayak ihias hapan kare hiasan amas, kare permata, tuntang mutiara. Intu lengee ie mimbing ije mangkok amas je kontep awi kare taloh papa tuntang taloh je bahaya, hasil bara gawin karayape. 17:5 Intu lingkaue aton tarasurat ije aran je basilim rimae. Aran te iete "Babel Je Hai, indu kakare lontei tuntang oloh durhaka hong kalunen." 17:6 Palus aku mite oloh bawi te babusau awi dahan ungkup ain Hatalla tuntang awi dahan kare oloh je impatei tagal kaketep ewen dengan Yesus. Katika aku mite oloh bawi te, aku manjadi hengan toto. 17:7 Palus malekat te hamauh dengangku, "Narai bukue ikau hengan toto? Toh aku mansanan akam taloh basilim ain oloh bawi te tuntang taloh basilim ain meto je inungkange, iete meto je uju takoloke tuntang uju tanduke. 17:8 Meto te bihin puji belom, tapi toh ie dia belom hindai. Dia tahi hindai ie kareh balua bara liang pampatei tuntang manalih kabinasa. Kare oloh je belom hong kalunen, je arae jaton tarasurat huang Surat Oloh Belom helo bara kalunen injapa kareh hengan mite meto te. Basa meto te bihin puji belom. Toh ie dia belom hindai tapi ie kareh lembut haluli. 17:9 Hong hal toh oloh perlu aton kaharati tuntang pangatawan. Uju takolok te iete uju bukit; iete kare bukit eka oloh bawi te mondok. Tuntang uju takolok te kea jete uju raja: 17:10 lime bara ewen te jari manjato, ije magon marentah, tuntang ije tinai hindai dumah. 17:11 Tuntang meto je bihin puji belom, tapi toh dia belom hindai, jete rajan kakaput. Ie te puna ije bara kare raja te kea, je wayah toh puna manalih kabinasa. 17:12 Sapuluh tanduk je gitam te jete sapuluh raja je hindai manampara marentah. Tapi ewen kareh inenga kuasa uka marentah kilau raja omba meto te ije jam katahie. 17:13 Sapuluh raja toh uras sama kahimate; ewen uras manyarah kaabas tuntang kuasan ewen akan meto te. 17:14 Ewen akan kalahi malawan Anak Tabiri te. Tapi Anak Tabiri te dengan kare oloh ayue je baketep dengae je jari intehau tuntang iintih te, kareh mampakalah kare raja te, awi ie te Tuhan kare tuan, tuntang Rajan kare raja." 17:15 Malekat te hamauh kea, "Danum je gitam te, eka lontei te mondok, jete kare utus oloh, kare rakyat, negara tuntang kare bahasa. 17:16 Sapuluh tanduk je gitam tuntang meto te kareh manyingi lontei te. Ewen kareh marampas taloh handiai je aton ayue, tuntang mampalowai ie. Ewen kareh kuman isie tuntang mambinasa ie hapan apui. 17:17 Basa Hatalla jari maggerek atei ewen uka malalus rencana Hatalla. Hatalla mawi ewen pakat uka manyarah kuasan ewen akan meto te, mangat meto te marentah sampai manjadi taloh je insanan awi Hatalla. 17:18 Oloh bawi je gitam te jete lewu hai, je marentah kare raja hong kalunen."
18:1 Limbah te aku mite ije biti malekat beken mohon bara sorga. Ayue aton kuasa je hai, tuntang awi kalawae hapus petak manjadi tarang. 18:2 Hapan auh hai, ie hamauh, "Jari manjato! Babel hai jari manjato! Toh ie manjadi eka kare setan tuntang kare roh papa. Intu hete kare macam burung je injilek tuntang dia oloh marajie, aton belom. 18:3 Basa kare utus oloh jari mihop anggur kipen karayape te. Kare rajan kalunen habandong dengae, tuntang kare oloh dagang hunjun petak manjadi tatau awi kipee je jaton tarasarenan te." 18:4 Palus aku mahining auh beken bara sorga hamauh, "Has balua, ungkup ayungku! Balua bara huange! Ela keton manumon kare dosae, tuntang omba mananggung hukumae! 18:5 Basa dosae jari hatawon sampai akan langit, tuntang Hatalla mingat kapapae. 18:6 Keleh keton mawi ie sama kilau ie mawi keton; baleh akae due kali lipet akan taloh handiai je jari iawie. Suang akan huang mangkok ayue hapan taloh ihop je due kali kaharie bara taloh ihop je puji inatape akan keton. 18:7 Tenga akae kapehe tuntang kapehen atei je sama karee dengan kahai tuntang panatau je inengae akan arepe kabuat. Basa ie harajur kea hamauh dengan arepe, 'Aku toh ratu je marentah! Aku dia balo; aku dia baka mangkeme kapehen atei!' 18:8 Tagal jete kea, maka huang ije andau bewei ie kareh buah calaka -- panyakit, kapehen atei, tuntang lau. Tuntang ie kareh ingeho awi apui, awi kuasan Hatalla je mahakim ie te." 18:9 Kare rajan kalunen je omba huang gawin karayap tuntang kipen oloh bawi te kareh manangis tuntang manatum lewu te katika ewen mite asep mangangkewul bara apui je mangeho te. 18:10 Ewen kareh mendeng bara kejau basa ewen kareh mikeh buah kapehee. Ewen hamauh, "Hakayah, lalehan calaka lewu je basewut batarong toh -- lewu Babel je dehen! Huang ije jam bewei hukuman akam jari mawi ikau!" 18:11 Kare oloh dagang hong hunjun petak mahin manangis tuntang kapehe atei tagal oloh bawi te, awi ije mahin jaton hindai oloh je mamili kare taloh dagang ewen. 18:12 Dia aton oloh je mamili amas, perak, batu barega tuntang mutiara ain ewen; kalote kea benang lena, benang ungu, sutra, tuntang benang bahandang batue'; kare macam kayu je jarang tau dinon, kare ramo bara gading tuntang kayu je lara-larang regae, tambaga, sanaman, tuntang batu marmar; 18:13 upak kayu manis, rarampah, santagi, minyak mur tuntang manyan; anggur tuntang undus, tepung tuntang gandum; sapi tuntang tabiri, kuda tuntang kareta, kare jipen, sampai akan hambaruan olon. 18:14 Kare oloh dagang hamauh dengan oloh bawi te, "Taloh handiai je handak induam akam te jari jaton hindai, kakare panatau tuntang katamam ayum jari nihau. Ikau jaton bakal manyondau jete tinai!" 18:15 Kare oloh dagang je jari tatau awie badagang hong lewu te kareh mendeng bara kejau, awi ewen mikeh buah kapehee. Ewen kareh manangis tuntang buah kapehen atei, 18:16 palus hamauh, "Hakayah, lalehan calaka mawi lewu je batarong hayak basewut toh! Bahut ie mahapan pakaian lena, benang ungu tuntang benang bahandang batue'; bahut ie kontep awi perhiasan amas, batu barega tuntang mutiara! 18:17 Tapi huang ije jam bewei, ie jari nihau kare panataue te!" Kakare juragan kapal, panumpang, tuntang anak buah kapal, dengan kakare oloh je satiar intu laut, uras mendeng bara kejau. 18:18 Tuntang mangkariak hong katika ewen mite asep mangangkewul bara apui je mangeho lewu te. Ewen hamauh, "Dia puji aton lewu beken sama kilau lewu je hai toh!" 18:19 Maka ewen manawur kawo hunjun takolok ewen kilau tanda kapehen atei, palus manangis tuntang jua-juan mangkariak, "Hakayah, lalehan calaka lewu je hai toh! Tapi huang ije jam bewei, taloh samandiai jari nihau bara ie!" 18:20 O sorga, keleh ikau hanjak rantang tagal kalenyoh lewu te! O ungkup ain Hatalla, kare rasul, tuntang kare nabi, hanjak rantang keton! Basa Hatalla jari mahukum ie kilau baleh akan taloh je ilaluse mawi keton! 18:21 Limbah te, ije biti malekat je paham abas manggatang ije batu -- kahain batu gilingan je hai -- palus manjakahe akan huang tasik sambil hamauh, "Kalotoh ampie lewu Babel je basewut te kareh injakahe tuntang inempak sampai dia tau oloh sondaue tinai. 18:22 Auh musik ain tukang kacapi, tukang nyanyi, tukang suling, tuntang tukang mahimon tarompet, dia tau mahiau tinai intu ekam! Tuntang ije biti mahin jaton oloh pintar je tau inyondau intu hete, tuntang auh batu gilingan mahin jaton ihining tinai. 18:23 Kalawan sumbom mahin jaton oloh mitee tinai intu ekam; tuntang intu hete jaton kea oloh mahining auh karami pesta kawin. Kare oloh dagang iete kare oloh je paling basewut hong hunjun petak, tuntang dengan kare kaji lampah ayum te ikau mananjaro kare utus oloh hong kalunen!" 18:24 Babel ihukum awi hong lewu te jari tarasondau dahan kare nabi, dahan ungkup Hatalla -- hapan auh pandak dahan oloh handiai je jari impatei hong hunjun petak.
19:1 Limbah te aku mahining auh je sama kilau auh guruh oloh are bara sorga je teha-tehau, "Tara Hatalla! Hatallan itah jete Hatalla je manyalamat; ie te Hatalla je hai tuntang bara kuasa! 19:2 Ie mahakim hapan kabujur-katetek tuntang kapintar-kaharati! Ie jari malalus hukum te mawi lontei hai, je marusak kalunen hapan karayape. Hatalla jari mahukum lontei te, basa ie mampatei kare rewar Hatalla." 19:3 Palus auh oloh are te mangkariak tinai, "Tara hatalla! Asep apui je mangeho lewu hai te kareh mangangkewul harajur!" 19:4 Maka due puluh epat pamimpin tuntang epat taloh belom je intu kaliling padadosan te mahingkep tuntang manyembah Hatalla je mondok hunjun padadosan. Ewen hamauh, "Amen! Tara Hatalla!" 19:5 Palus tarahining auh bara padadosan te hamauh, "Tara Hatalla, o kakare rewar Hatalla, tuntang oloh handiai -- hai korik -- je manyembah Hatalla!" 19:6 Limbah aku mahining auh taloh je sama kilau auh ije kakawan oloh je are toto, auh sama kilau galombang je letu-letus tuntang kilau auh nyaho je mangaruntong. Aku mahining ewen hamauh, "Tara Hatalla! Basa Tuhan, Hatallan itah je Paham Kuasae te toh marentah! 19:7 Keleh itah hanjak rantang; keleh itah manara kahaie! Basa andau pesta kawin ayue je bagare Anak Tabiri te jari sampai, tuntang panganten jari tatap uka ingawin. 19:8 Pakaian lena je mangilat jari inenga akae mangat ihapae." (Pakaian lena iete kare gawi bahalap je ilalus awi ungkup Hatalla.) 19:9 Palus malekat hamauh dengangku, "Surat jetoh: 'Salamat oloh je irawei akan pesta kawin Anak Tabiri te.' " Limbah te malekat te mandahang auhe tinai, "Jetoh ie barita je toto bara Hatalla." 19:10 Aku mahingkep intu taharep malekat te handak manyembah ie, tapi ie hamauh dengangku, "Ela! Ela manyembah aku, keleh manyembah Hatalla! Basa aku kea jipen sama kilau ikau tuntang kilau kare paharim je dehen mimbing auh saksin ewen tahiu Yesus!" Basa auh saksi ain Yesus te je manarang atei oloh je manujum. 19:11 Limbah te aku mite sorga buap, palus mite ije kongan kuda baputi. Oloh je manungkange te arae Je Baketep tuntang Je Bujur. Ie bujur amon mamutus hukum tuntang huang kalahi je ilaluse. 19:12 Matae sama kilau nyalan apui tuntang intu takoloke ie mahapan makota. Intu bitie aton tarasurat aran; tuntang baya ie kabuat ih je mangatawan aran te. 19:13 Jubah je ihapae jari inculop huang daha. Tuntang ie inyewut "Auh Hatalla". 19:14 Kare tantara sorga manuntut ie manungkang kuda baputi, tuntang hapakaian lena je baputi lentah. 19:15 Bara nyamae balua ije kabilap padang je banyihi tuntang hapan padang te ie kareh mampakalah kare utus oloh, tuntang ie kareh marentah ewen hapan tongkeh sanaman. Ie kareh mahamis anggur hong eka sarangan mahamis anggur kalait Hatalla je Pangkahai Kuasae. 19:16 Intu jubahe tuntang intu sapake aton tarasurat aran toh, "Rajan kare raja, tuntang Tuhan kare tuan." 19:17 Palus aku mite ije biti malekat mendeng hunjun matanandau. Hapan auh hai ie mantehau kare burung je tarawang intu langit, "Keleh hapumpong kahetoh manalih pesta hai ain Hatalla! 19:18 Kahetoh kuman isin kare raja, isin kare pangkalima, tuntang isin kare oloh menteng; kahetoh kuman isin kare oloh je manungkang kuda dengan isin kudae tuntang isin kare salepah utus oloh kalunen, hai-korik, jipen atawa oloh mardeka!" 19:19 Limbah te aku mite meto te, tuntang kare raja hunjun petak dengan kare kawan tantara ain ewen, hapumpong mangat kalahi malawan ie je manungkang kuda baputi te tuntang kare tantara ayue. 19:20 Maka meto te buah tawan haya-hayak dengan nabi pananjaro je jari mawi kare taloh heran intu taharep meto te. (Hapan kare taloh heran te meto te manipu kare oloh je jaton tempon tanda ain meto te, tuntang kare oloh je manyembah hampatung meto te.) Palus meto te tuntang nabi pananjaro te injakah belo-belom akan huang tasik apui je manyala hagandang awi barirang. 19:21 Tuntang kawan tantara ain ewen te impatei hapan padang je balua bara nyaman oloh je manungkang kuda baputi te. Maka kare burung mahin dumah tuntang manyangit kuman isin ewen je impatei te.
20:1 Limbah te aku mite ije biti malekat mohon bara sorga. Intu lengee ie mimbing kunci lowang pampatei tuntang ije pasong hai. 20:2 Palus ie manawan naga, naga bakas te, -- iete setan atawa Roh Papa te -- tuntang mamasong ie katahin sakoyan nyelo. 20:3 Limbah malekat te manjakah naga te akan huang lowang pampatei, balalu mangunci lowang te hapan segel mangat naga te dia tau tinai mananjaro kare utus oloh helo bara sakoyan nyelo te hapus. Limbah te ie musti malapase tinai hanjulo. 20:4 Balalu aku mite kare padadusan, tuntang kare oloh je mondok hunjue te inenga kuasa uka mamutus perkara. Aku mite kea kare hambaruan oloh je jari inetek takoloke awi ewen manyaksi tahiu Yesus, tuntang mambarita auh peteh bara Hatalla. Kare oloh te dia manyembah meto, atawa hampatunge. Dia kea ewen puji manarima tanda bara meto te intu lingkau atawa intu lengen ewen. Maka ewen belom haluli tuntang marentah kilau raja haya-hayak dengan Kristus katahin sakoyan nyelo. 20:5 Jetoh ie tingkat je solake oloh matei imbelom haluli. (Tapi kare oloh matei awang beken te dia imbelom haluli katahin sakoyan nyelo te.) 20:6 Salamat kare oloh je omba imbelom haluli hong katika je solake te. Ewen te patut manjadi oloh ain Hatalla. Pampatei je ambal duee dia aton kuasae mawi ewen. Ewen kareh manjadi oloh imam Hatalla tuntang kare imam Kristus; tuntang ewen kareh marentah hayak dengae sakoyan nyelo katahie. 20:7 Limbah wayah sakoyan nyelo te hapus, setan kareh ilapas bara ekae ingurung, 20:8 tuntang ie kareh haguet mananjaro kare utus oloh je kasaburan hong hapus kalunen, iete Gog tuntang Magog. Setan mamumpong ewen mangat hakalahi, ewen te paham toto karee, sama kilau pasir hong tasik. 20:9 Maka ewen te kasaburan hong hapus kalunen, palus mangapong eka tingkap ain ungkup Hatalla tuntang lewu je inyinta Hatalla. Tapi apui mohon bara langit tuntang mambinasa ewen. 20:10 Limbah te setan je manipu ewen, injakah akan huang tasik apui tuntang barirang. Intu hete eka meto tuntang nabi pananjaro te bihin jari injakah. Ewen kareh ingapehe handau hamalem palus katatahie. 20:11 Limbah te aku mite ije padadosan baputi je hai tuntang oloh je mondok hunjue. Langit tuntang petak lilap bara hila baue, sampai jaton gitan hindai. 20:12 Tuntang aku mite kare oloh matei, hai, korik, mendeng intu taharep padadosan te. Maka kare surat mahin iukei. Palus ije surat je beken iukei iete Surat ain Oloh Belom. Limbah te hukuman ilalus akan oloh matei, mambaleh akan ewen tumon ampin gawin ewen kilau je inyurat huang kare surat te. 20:13 Palus tasik manyarah kare oloh matei je aton intu huange. Pampatei tuntang Lewun Pampatei mahin manyarah kare oloh matei je aton intu ie. Tuntang kare oloh matei te samandiai ihukum manumon kare taloh gawie. 20:14 Limbah te Pampatei tuntang Lewun Pampatei injakah akan huang tasik apui. (Tasik apui toh iete pampatei je kaduee.) 20:15 Kare oloh je jaton inyurat arae huang Surat ain Oloh Belom, inganan akan huang tasik apui.
21:1 Palus aku mite langit je taheta tuntang petak je taheta. Langit je solake tuntang petak je solake mahin nihau, tuntang tasik lilap. 21:2 Maka aku mite lewu barasih te, iete Yerusalem je taheta, mohon bara sorga, bara Hatalla. Lewu te jari inatap sama kilau ije biti panganten bawi je imakaian uka manyondau panganten je hatue. 21:3 Palus aku mahining auh bara padadusan te mantehau hai auhe, "Toh, eka Hatalla melai hinje dengan olon! Ie kareh belom hinje ewen, tuntang ewen kareh manjadi ungkup ayue. Hatalla kabuat kareh hinje ewen tuntang manjadi Hatallan ewen. 21:4 Ie kareh mampuas kare danum matan ewen. Pampatei jari jaton tinai; kapehen atei, tangis atawa kapehe mahin jaton kea. Kare taloh je usang jari lilap." 21:5 Palus ie je mondok hunjun padadosan te hamauh, "Toh aku manampa taloh handiai taheta!" ie hamauh kea dengangku, "Surat jetoh, basa kare auh toh toto bujur tuntang tau imercaya." 21:6 Palus ie hamauh, "Jari hapus! Aku toh je solake tuntang je pangkalepahe; aku toh Tuhan bara tamparae sampai kahapuse. Gagenep oloh je teah belaie, kareh inenga danum ihop bara tahasak danum je mimbit pambelom. Ie dia usah mambayar taloh en-en. 21:7 Kare oloh je manang akan mandino kare taloh te bara aku. Aku kareh manjadi Hatallae, tuntang ewen manjadi anakku. 21:8 Tapi oloh pamikeh, oloh je tulas hadate, oloh durhaka, oloh pamuno, oloh pahabandong, oloh pangaji, oloh panyembah dewa, tuntang kakare oloh pananjaro, kareh inganan akan tasik apui tuntang barirang je hanyala, iete pampatei tingkat je kaduee." 21:9 Ije biti bara kare uju malekat je jari mimbing sarangan calaka je pangkarahiae te dumah manalih aku tuntang hamauh, "Kahetoh! Aku handak mamparahan akam Panganten, iete sawan Anak Tabiri." 21:10 Maka Roh Hatalla manguasa aku, tuntang malekat te mimbit aku akan hunjun bukit je gantong toto. Ie mamparahan akangku Yerusalem, lewu barasih te, lewu te mohon bara sorga, bara Hatalla, 21:11 huang kahalap tuntang kahain Hatalla. Lewu te mangilat kilau batu barega sama kilau batu biduri pandan je takining kilau kristal. 21:12 Dinding batu hakalilinge gantong hayak hai, mahapan duewalas bauntonggang hai, tuntang injaga awi duewalas malekat. Intu kare bauntonggang hai te inyurat aran duewalas kare hamputan oloh Israel. 21:13 Telo bauntonggang aton epat eka taharepe: telo akan hila timur, telo akan hila salatan, telo akan hila utara, telo akan hila barat. 21:14 Dinding lewu te imangun hunjun duewalas galang batu. Intu gagenep galang batu te inyurat aran duewalas kare rasul Anak Tabiri te. 21:15 Ain malekat je hakotak dengangku te aton sukah amas je hapan mukur lewu te, kare bauntonggang tuntang dindinge. 21:16 Lewu te lapak epat tampae -- kapanjange sama dengan kalombahe. Maka malekat te mukur lewu te hapan sukah ukur; ingatawan kapanjange te 2400 kilometer; kalombahe tuntang kagantonge sama kilau kapanjange. 21:17 Katika malekat te mukur dindinge, palus ingatawan kagantong dinding te jahawen puluh meter. Ukuran je hapan awie te jete ukuran je ihapan awi olon. 21:18 Dinding lewu te inampa bara batu biduri pandan, lewu te kabuat bara amas terus, takining kilau kaca. 21:19 Kare tilap batu galang lewu te ihias hapan are macam batu barega. Galang batu je solake inampa bara batu biduri pandan, je kaduee bara batu nilam, je kateloe bara batu akik baputi, je kaepate bara batu jamrud, 21:20 je kalime bara batu unam, je kajahawee bara batu akik bahandang atawa delima, je kaujue bara batu ratna cempaka, je kahanyae bara batu pirus, je kajalatien bara batu topas atawa yakut bahenda, je kasapuluh bara batu akik bahijau, je kasawalas bara batu pusparagam atawa lasuardi, tuntang je kaduewalas bara batu kacubung. 21:21 Kaduewalas bauntonggang lewu te inampa bara duewalas mutiara, genep bauntonggang inampa bara ije mutiara. Jalan hong lewu te inampa bara amas terus, takining kilau kaca mangilat. 21:22 Aku jaton mite Human Hatalla hong lewu te, awi Human Hatalla te iete Tuhan kabuat, Hatalla Je Pangkahai Kuasae, tuntang Anak Tabiri te. 21:23 Lewu te dia usah impalawa hapan matanandau atawa bulan, awi kahain Hatalla jari mampalawa jete, tuntang Anak Tabiri te sumboe. 21:24 Kare utus oloh kalunen kareh mananjong huang kalawa te, tuntang kare raja mahin kareh mimbit panatau ewen akan huang lewu te. 21:25 Kare bauntonggang lewu te puna habangah hapus andau; dia usah inutup, awi alem jaton intu hete. 21:26 Kahai, hormat tuntang panatau kare utus oloh kalunen kareh iimbit manalih lewu te. 21:27 Tapi oloh je malalus kare taloh je bakajile-jilek, atawa oloh je pananjaro -- pandak auh taloh je papa, samasinde dia tau tame akan huang lewu te. Je tau tame akan huange, iete oloh je arae jari inyurat huang Surat ain Oloh Belom, surat ain Anak Tabiri te.
22:1 Malekat te kea maninjok akangku sungei je danume manenga pambelom. Sungei te hapamancar sama kilau kristal tuntang mahasor bara padadosan Hatalla tuntang Anak Tabiri, 22:2 palus akan benteng jalan lewu te. Intu saran sungei hasansila te aton batang kayu upon pambelom, je mamua hangka duewalas genep nyelo, iete sinde ije bulan. Dawee te ingguna oloh hapan mampakeleh kare oloh kalunen. 22:3 Intu huang lewu te ije mahin jaton taloh je tau buah sapa awi Hatalla. Padadosan Hatalla tuntang Anak Tabiri te aton huang lewu te. Kare rewar ayue kareh manyembah ie, 22:4 tuntang mite ampin tampayahe. Arae te kareh inyurat intu lingkau ewen. 22:5 Ewen dia usah mahapan sumbo atawa kalawan matanandau, awi intu hete alem jaton hindai, tuntang Tuhan Hatalla kabuat kareh mampalawa ewen. Maka ewen kareh marentah kilau raja palus katatahie. 22:6 Palus malekat te hamauh dengangku, "Kare auh toh bujur toto tuntang tau imercaya. Tuhan Hatalla je manenga Roh ayue akan kare nabi, jari manyoho malekat ayue uka mamparahan akan kare reware taloh je bajeleng kareh manjadi." 22:7 "Keleh manantuani jetoh!" koan Yesus, "Aku kareh bajeleng dumah. Salamat oloh je manumon kare auh tujum huang surat toh!" 22:8 Aku Yohanes jari mahining tuntang mite taloh handiai toh. Limbah aku lepah mahining tuntang mitee, aku mahingkep intu taharep malekat je jari mamparahan taloh handiai te akangku, tuntang aku handak manyembah ie, 22:9 tapi ie hamauh dengangku, "Ela! Ela manyembah aku! Keleh manyembah Hatalla! Basa aku rewar sama kilau ikau, tuntang sama kilau paharim, kare nabi tuntang oloh handiai je manumon kare peteh huang surat toh!" 22:10 Palus ie hamauh tinai, "Ela milim kare auh tujum huang surat toh, awi katikae jari tokep taloh handiai toh kareh manjadi. 22:11 Oloh papa, nauhe ie jua-juan mawi kapapa; oloh je injilek nauhe ih ie manyarenan arepe; oloh je manumon kahandak Hatalla, nauhe ie harajur manumon kahandak Hatalla, tuntang oloh je belom baya akan Hatalla, nauhe ie harajur belom baya tantai akan Hatalla." 22:12 "Keleh manantuani jetoh!" koan Yesus, "Dia tahi hindai aku kareh mimbit upah hapan mamaleh gawin genep oloh je ombet akan taloh je awie. 22:13 Aku toh je solake tuntang je pangkarahiae; aku toh Tuhan je Tamparae sampai Kahapuse." 22:14 Salamat oloh je mampukan jubahe sampai barasih sampai ewen aton hak akae kuman bua bara batang pambelom tuntang tame akan huang lewu te mahalau bauntonggange. 22:15 Tapi kare oloh je malalus kare taloh je papa, je mahapan kare kaji, kare oloh je malalus gawi harayap, je mamuno, je manyembah dewa, tuntang kare oloh pananjaro, aloh hapan kotake atawa hapan gawie, kakare oloh te ekae aton hong luar lewu te. 22:16 "Aku, Yesus, jari mampait malekat ayungku akan keton uka ie mansanan kare hal toh akan kare ungkup. Aku toh panakan Dawid; aku toh bintang timor je balawa te." 22:17 Roh Hatalla tuntang Panganten Bawi hamauh, "Kahetoh!" Gagenep oloh je mahining jetoh musti kea hamauh, "Kahetoh!" Eweh je teah belaie, keleh dumah! Tuntang eweh je handak, keleh ie manduan danum je mimbit pambelom te dengan dia usah mambayar taloh en-en. 22:18 Akan gagenep oloh je mahining kare auh tujum huang surat toh, aku Yohanes, mampingat jetoh: amon oloh mandahang kare taloh en-en intu kare auh tujum toh, maka Hatalla kareh mandahang hukuman mawi oloh te hapan kare calaka je inyurat huang surat toh. 22:19 Tapi amon oloh mangurang taloh en-en bara kare auh tujum toh, maka Hatalla kea kareh mangurang bagie je insanan huang surat toh -- iete bagie huang batang pambelom tuntang huang lewu barasih te. 22:20 Ie je manyampai kakare barita toh hamauh, "Toto, aku kareh dumah bajeleng!" Amen! Keleh dumah, o Tuhan Yesus! 22:21 Keleh Tuhan Yesus manenga berkat ayue akan salepah ungkup ain Hatalla!