1:1 No so Daroma Li fatua lõ muwõwõi gulidanõ. Fao khõ Lowalangi Daroma Li andrõ, ba Taroma Li no Lowalangi. 2 Fatua lõ hadõi ulidanõ no so Daroma Li andrõ si fao khõ Lowalangi. 3 Iwõwõi hadia ia fefu Lowalangi faoma Taroma Li andrõ. Ma'ifu lõ hadõi ba gulidanõ andre niwõwõi baero-Nia. 4 Taroma Li andrõ zame'e fa'auri, ba fa'auri andrõ zame'e haga ba niha. 5 Lõ mamalõ muhaga zi haga andrõ bakha ba zogõmigõmi, ba tebai itayaigõ haga andrõ sogõmigõmi. 6 So niha nifatenge Lowalangi ba wangombakha haga andrõ ba niha. Yohane dõinia. 7 So ia ba wangombakha turia andrõ ba niha fefu, ena'õ mamati ira ba haga andrõ. 8 Tohare ia ba wangombakha haga andrõ; ba tenga haga ia. 9 Haga sindruhundruhu haga andrõ -- haga si mõi ba gulidanõ ba wohagaini fefu niha. 10 No so ba gulidanõ Daroma Li andrõ. Ba hewa'ae Ifazõkhi gulidanõ Lowalangi andre si fao Taroma Li, ba lõ sa'atõ aboto ba dõdõ niha gulidanõ Ia. 11 Mõi Ia ba mbanua-Nia, ba hiza lõ latema Ia. 12 Ba so õsa zanema Ya'ia ba mamati ira khõ-Nia. Ya'ira andrõ zi tobali ono Lowalangi. 13 Tobali ira ono Lowalangi tenga bõrõ wa'atumbura ma zui bõrõ nga'õtõ wa'aniha, ha bõrõ me Lowalangi samõsa zombali'õ ya'ira ono-Nia. 14 No tobali niha Daroma Li andrõ, ba no I'iagõ gotaluada. No ta'ila lakhõmi-Nia, lakhõmi nitema-Nia fa'a'ono Lowalangi si ha sambua. Bõrõ ba khõ-Nia I'oroma'õ samõsa Ia Lowalangi, awõ wa'omasi-Nia khõda. 15 Yohane zamaduhu'õ Ya'ia. Mu'ao Yohane imane, "Da'e Ia zi no uwa'õ tohare dania Ia furigu; ba hiza, abõlõ ebua Ia moroi khõgu, bõrõ me no so Ia fatua lõ si tumbu ndra'o." 16 No fondrege wa'omasi-Nia ita, ba lõ mo'aetufa Ifahowu'õ ita. 17 Ba khõ Moze Ibe'e khõda goroisa-Nia Lowalangi, ba hiza, khõ Yesu Keriso I'oroma'õ samõsa Ia Lowalangi awõ wa'omasi-Nia ita. 18 Samõsa lõ sangila Lowalangi, ba ono Lowalangi si ha sambua andrõ zi fao khõ Lowalangi, sahatõ sibai khõ Nama, Ya'ia zangoroma'õ Lowalangi khõda. 19 Ira samatõrõ moroi ba niha Yahudi, ya'ia ndra ere awõ moroi ba mado Lewi, lafatenge khõ Yohane ba wanofu khõnia, "Haniha ndra'ugõ?" 20 Lõ ibini'õ da'õ Yohane. Ifaduhu'õ imane, "Tenga ya'o Razo Sangorifi andrõ nifabu'u Lowalangi." 21 Lamane wanofu, "Na si manõ, haniha ndra'ugõ andre? Hadia Elia ndra'ugõ?" Imane Yohane, "Tenga." Lamane zui wanofu, "Hadia Sama'ele'õ andrõ ndra'ugõ?" Itema li imane, "Tenga gõi." 22 Lamane, "Na si manõ ombakha'õ khõma haniha ndra'ugõ andre, bõrõ me ma'ombakha'õ wanema li niha samatenge ya'aga ba da'e. Hadia niwa'õu sanandrõsa ba khõmõ andre?" 23 Ihalõ moroi ba mbuku Yesaya sama'ele'õ wanemania li imane, "Ya'odo andre, 'Li niha si'ao ba danõ si mate: Mifadaya lala khõ Zo'aya!' " 24 Niha sanofu andre tengetenge ndra Farizai'o. 25 Lamane wanofu khõ Yohane, "Na tenga Razo Sangorifi nifabu'u Lowalangi ndra'ugõ, tenga Elia, tenga gõi Sama'ele'õ andrõ, hana wa õbayagõ idanõ niha?" 26 Itema li Yohane imane, "Ubayagõ niha faoma idanõ. Ba hiza ba gotaluami so niha si lõ mi'ila. 27 Furigu tohare Ia, ba tenga sinangea na'i ndra'o we'amõi enoni samokai bõbõ mbadagahe-Nia." 28 Alua fefu da'õ ba Mbetania, tanõ ba gatumbukha Nungo Nidanõ Yoridano nahia Yohane wamayagõ idanõ niha. 29 Mahemolu da'õ i'ila Yohane I'ondrasi ia Yesu. Imane Yohane, "Mifaigi! Da'õ nono mbiribiri khõ Lowalangi nibe'e ba wangeheta horõ nõsi gulidanõ! 30 Ya'ia andrõ niwa'õgu si tohare dania furigu ba hiza abõlõ ebua Ia moroi khõgu; bõrõ me no ofõna so Ia fatua lõ si tumbu ndra'odo. 31 Lõ u'ila Ia andrõ ba mbõrõta, ba hiza so ndra'o ba wamayagõ idanõ ena'õ aboto ba dõdõ niha Gizera'eli Ia." 32 Da'e wamaduhu'õ Yohane sanandrõsa khõ-Nia, "U'ila Geheha Lowalangi si so moroi yawa ba mbanua hulõ marafadi, si mõi khõ-Nia. 33 Me inõtõ da'õ lõ u'ila haniha Ia; ba hiza Ifarou ndra'o Lowalangi wombayagõ Ya'ia idanõ, awõ wa Imane khõgu, 'Na õ'ila Geheha Lowalangi si mõi ba niha ba torõi khõ-Nia Geheha andrõ, Ya'ia andrõ dania zombayagõ faoma Eheha Lowalangi.' 34 Imane Yohane, 'Sindruhundruhu no u'ila da'õ ba sindruhu Ono Lowalangi Ia; ya faduhu dõdõmi!' " 35 Mahemolu da'õ, so zui Yohane ba nahia andrõ awõ nifahaõnia darua. 36 Me i'ila Itõrõ Yesu, imane, "Mifaigi! Da'õ Nono Mbiribiri Lowalangi." 37 Me larongo nifahaõ Yohane andrõ si darua niwa'õnia, maoso ira la'o'õ Yesu. 38 Ifaigi furi Yesu, ba I'ila wa la'o'õ Ia. Imane Yesu, "Hadia ni'aluimi?" Lamane wanema li, "Hezo nahia-U omo, Rabi?" ('Rabi' eluahania guru.) 39 Imane Yesu, "Mi'aine mifaigi samõsa." Fao ira khõ-Nia ba la'ila hezo nahia-Nia omo. Torõi ira khõ-Nia ba zi ma'õkhõ andrõ. Mato bõzi õfa tanõ owi me inõtõ da'õ. 40 Samõsa ba gotalua zi darua andrõ, zi no mamondrongo niwa'õ Yohane si no fao khõ Yesu ya'ia Gandrea, talifusõ Zimoni Fetero. 41 I'alio'õ Andrea wangalui Simoni, talifusõnia, ba imane khõnia, "No falukha ndra'aga Mesia, Razo Sangorifi andrõ nifabu'u Lowalangi!" (Mesia, eluahania Keriso ba li Yunani.) 42 Aefa da'õ ifasao Andrea Zimoni khõ Yesu. Itõngõ Zimoni andrõ Yesu, ba Imane, "Simoni ndra'ugõ, ono Yohane. Tebe'e tõiu dania Kefa." (Kefa ba li Heberai'o, ba ba li Yunani tetõtõi Simoni, eluahania gowe.) 43 Mahemolu da'õ numalõ ba Galilea Yesu. Falukha Ia khõ Wilifo, ba Imane khõnia, "Tabu o'õ Ndra'o!" 44 Moroi ba mbanua Mbetisa'ida Wilifo, banua ndra Andrea ba Fetero gõi. 45 Falukha Wilifo khõ Natanaeli ba imane khõnia, "No falukha ndra'aga ba nahia nitõtõi Moze bakha ba mbuku Huku Lowalangi, awõ nitõtõi ndra sama'ele'õ. Ya'ia Yesu ono Yosefo moroi ba Nazareta." 46 Imane wanema li Natanaeli, "Hadia tesõndra zi sõkhi moroi ba Nazareta?" Itema li Filifo, "Aine ae'e faigi." 47 I'ila Yesu i'ondrasi Ia Natanaeli, Imane Yesu sanandrõsa khõnia, "Da'e zindruhu niha Gizera'eli, lõ falimosa khõnia!" 48 Isofu Natanaeli khõ Yesu, "He moroi wa Õ'ila zanandrõsa khõgu?" Imane wanema li, Yesu, "Fatua lõ ikaoni ndra'ugõ Filifo, me so ndra'ugõ barõ ara andrõ, no U'ila ndra'ugõ." 49 Imane Natanaeli, "He Amagu Guru, Ono Lowalangi Ndra'ugõ! Razo niha Gizera'eli Ndra'ugõ!" 50 Aefa da'õ Imane khõnia Yesu, "Hadia faduhu dõdõu me Uwa'õ no U'ila ndra'ugõ ba narõ geu ara andrõ? Õ'ila dania ngawalõ zabõlõ ebua moroi ba da'õ!" 51 Ba Imane khõnia Yesu, "Ya faduhu dõdõmi, mi'ila dania teboka mbanua si yawa, manõrõnõrõ mala'ika khõ Nono Niha nifatenge Lowalangi."

2:1 Dua ngaluo aefa da'õ so walõwa ba Kana ba mbanua Galilea. So nina Yesu ba da'õ. 2 Ba no lakaoni gõi Yesu awõ ndra nifahaõ-Nia ba da'õ. 3 Me no ahori fefu nagu, imane ina-Nia khõ Yesu, "No ahori khõra nagu." 4 Itema li Yesu, "He Ina, bõi o'ou Ndra'odo. Lõ inõtõ khõ-Gu nasa wamalua hadia ia." 5 Imane ina Yesu khõ ndra sohalõwõ ba da'õ, "Na Iwa'õ khõmi hadia ia, mi'o'õ." 6 So ba da'õ õnõ rumbi nahia nidanõ si no muhenagõ, soguna ba wanasai botora molo'õ amakhoita agama niha Yahudi. Dozi rumbi andrõ tola mufo'õsi idanõ walu ngafulu irugi otu lite. 7 Imane Yesu khõ ndra sohalõwõ andrõ, "Mifo'õsi rumbi andrõ faoma idanõ." Ba lafo'õsi rumbi fefu faoma idanõ. 8 Imane khõra Yesu, "Mihalõ nidanõ da'õ iada'e ba mi'ohe khõ zatua sombambaya halõwõ." Ba la'ohe nidanõ andrõ khõ zatua sombambaya halõwõ, 9 itandra nidanõ da'õ satua sangai halõwõ, si no tobali agu. (Lõ aboto ba dõdõnia heza moroi nagu andrõ, bõrõ me ha samo'õsi idanõ rumbi zangila.) Ikaoni zatua sangai halõwõ marafule, 10 imane khõnia, "Si to'õlõnia agu si sõkhi mube'e si fõfõna, ba na no oya nibadu dome, awena mube'e nagu si to'õlõ. No õ'irõ'õ nagu sabõlõ sõkhi ba awena õbe'e iada'e!" 11 Da'õ zahõlihõli dõdõ si fõfõna nifalua Yesu. Ba Ifalua da'õ ba mbanua Kana ba danõ Galilea. Ba zahõlihõli dõdõ andrõ Iforoma'õ lakhõmi-Nia Yesu. Ba mamati ndra nifahaõ-Nia khõ-Nia. 12 Aefa da'õ numalõ Yesu, ina-Nia, talifusõ-Nia awõ ndra nifahaõ-Nia we'amõi ba Gafana'uma ba torõi ira ba da'õ mato ha'uga ngaluo. 13 Numalõ Yesu ba Yeruzalema, me no ahatõ Gowasa Fasa niha Yahudi. 14 Ba Nomo Zo'aya ba Yeruzalema Isõndra Yesu zamawa sawi, biribiri awõ marafadi; awõ zanukari kefe no dumadao ba da'õ. 15 Ifazõkhi mbõzibõzi moroi ba zinali, ba Ifofanõ gurifõ andrõ moroi ba Nomo Zo'aya, biribiri awõ zawi. Ibalia'õ meza zanukari kefe irege oi muzawili gefe khõra. 16 Imane ba zamawa marafadi andrõ, "Fazawa fefu wofo andre. Bõi mibali'õ nahia waniaga Nomo Nama-Gu!" 17 Itõrõ tõdõ ndra nifahaõ-Nia ayati Mbuku Ni'amoni'õ andre, "Fa'omasigu Nomo-Mõ, he Lowalangi, hulõ holahola galitõ si manga hadia ia." 18 Lalawa Yesu ira salawa niha Yahudi faoma fehede safõkhõ. Lamane, "Tandraigõ fazõkhi dandra sahõlihõli dõdõ sangoroma wa sinangea Õlau zi mane da'e!" 19 Itema li Yesu, "Midudugõ Nomo Lowalangi andre, ba Ufuli Ufasindro ba zi tõlu ngaluo." 20 Lamane, "Õfa wulu fakhe wa'ara lafazõkhi Nomo Zo'aya andre, ba Õfazõkhi ba zi tõlu ngaluo?" 21 Nomo Zo'aya niwa'õ Yesu ya'ia mboto-Nia samõsa. 22 Ba me ifuli auri Yesu moroi ba wa'amate, itõrõ tõdõ ndra nifahaõ-Nia wa no Iwa'õ zi manõ. Ba faduhu dõdõra ba zi no musura ba Mbuku Ni'amoni'õ, awõ ba zi no Iwa'õ Yesu. 23 Me so Yesu ba Yeruzalema me inõtõ Gowasa Fasa, ato niha si faduhu tõdõ khõ-Nia bõrõ zagahõlihõli dõdõ nilau-Nia. 24 Ba lõ faduhu dõdõ Yesu khõra me I'ila zi so ba dõdõ niha. 25 Lõ moguna mu'ombakha khõ-Nia zanandrõsa ba zi samõsamõsa niha, me oi I'ila samõsa hadia zi so bakha ba dõdõ niha.

3:1 So samõsa Warizai'o sotõi Nikodemo. Salawa ba niha Yehuda ia. 2 Ba zi bongi mõi ia i'ondrasi Yesu ba imane, "He Amagu Guru, aboto ba dõdõma wa guru Ndra'ugõ nifatenge Lowalangi. Bõrõ, samõsa lõ si tola mamazõkhi sagahõlihõli dõdõ si mane nilau-Mõ, na lõ fao khõnia Lowalangi." 3 Itema li Yesu, "Tõngõni: samõsa lõ si tola tobali ono mbanua amatõrõwa Lowalangi, na lõ tumbu mangawuli niha andrõ." 4 Imane Nikodemo khõ Yesu, "Hewisa wa tola tumbu mangawuli niha si no atua, hadia tola ifuli ia ba dalu ninania ena'õ tumbu mangawuli?" 5 Itema li Yesu, "Sindruhundruhu niwa'õ-Gu khõu: Na lõ tumbu mangawuli niha moroi ba nidanõ ba moroi ba Geheha Lowalangi, tebai tobali ono mbanua amatõrõwa Lowalangi niha andrõ. 6 Ba mboto wa'aniha tumbu ita moroi khõ ndra satuada, ba hiza na dali wa'a'eheha, tumbu ita moroi khõ Geheha Lowalangi moroi ba zorugo. 7 Bõi ahõli dõdõu na Uwa'õ: fefu ita lõ tola lõ'õ tumbu mangawuli. 8 Isawa zomasi ia angi andrõ; tarongo hõngõhõngõnia, ba hiza lõ ta'ila he moroi ba he numalõ ia. Si manõ gõi niha si tumbu moroi ba Geheha Lowalangi." 9 Isofu Nikodemo imane, "Hewisa wa tola alua da'õ?" 10 Itema li Yesu, "Guru ndra'ugõ ba gotalua niha Gizera'eli, hewisa wa lõ õ'ila da'õ? 11 Ya faduhu dõdõu: hadia zaboto ba dõdõma da'õ ni'ombakha'õma, ba hadia ni'ilama da'õ nifaduhu'õma, ba lõ sa'atõ mitema wangombakhama. 12 Lõ faduhu dõdõmi khõ-Gu, na U'ombakha'õ zanandrõsa ba gulidanõ andre; hewisa wa tola faduhu dõdõmi khõ-Gu, na U'ombakha'õ khõmi zanandrõsa ba zorugo? 13 Samõsa lõ si no mõi ba zorugo, ba hiza so zoroi zorugo si no mõi ba gulidanõ, ya'ia Nono Niha nifatenge Lowalangi. 14 Hulõ gulõ nituwu Moze yawa ba dõla geu ba danõ si mate, si manõ gõi wanuwu yawa Ono Niha nifatenge Lowalangi, 15 ena'õ lasõndra wa'auri sindruhundruhu dozi samati khõ-Nia." 16 Si manõ wa'omasi Lowalangi nõsi gulidanõ andre, irege Ifatenge nono-Nia si ha sambua, ena'õ lõ tekiko dozi samati khõ-Nia, lasõndra wa'auri sindruhu ba si lõ aetu. 17 Tobali sangorifi ulidanõ nifatenge-Nia andrõ ba tenga sanguhuku ulidanõ. 18 Lõ Ihuku Lowalangi zamati khõ nono-Nia andrõ. Ba no Ihuku Lowalangi niha si lõ mamati khõ Nono-Nia andrõ si ha sambua. 19 Da'a danedane wanguhuku andrõ: No mõi ba gulidanõ haga andrõ, ba hiza abõlõ la'omasi'õ zogõmigõmi niha moroi ba haga, bõrõ me si lõ sõkhi nilaura. 20 Lõ la'omasi'õ haga dozi niha solau si lõ sõkhi; lõ omasi i'ondrasi haga, bõrõ me ata'u ia na oroma nilaunia si lõ sõkhi andrõ. 21 Niha solau somasi Lowalangi, zangondrasi haga; ena'õ oroma wa si faudu ba zomasi Lowalangi nilaunia. 22 Aefa da'õ numalõ ba danõ Yudea Yesu awõ ndra nifahaõ-Nia. Mato ha'uga ngaluo torõi ira ba da'õ ba labayagõ idanõ niha. 23 Lõ nasa mube'e ba gurunga Yohane me inõtõ da'õ. Ibayagõ idanõ niha ba Gaino, lõ arõu i'otarai Zalima, bõrõ me oya nidanõ ba da'õ. La'ondrasi ia niha, ba ibayagõ idanõ ira. 25 Faguagua õsa nifahaõ Yohane ba niha Yahudi sanandrõsa ba gamakhoita wangehao andrõ molo'õ agama niha Yahudi. 26 La'ondrasi Yohane, lamane khõnia, "He Guru, hadia lõ olifu'õ niha andrõ si fao khõu yefo Nungo Nidanõ Yoridano, nituturumõ khõma? Mamayagõ idanõ gõi Ia, ba fefu niha la'ondrasi Ia!" 27 Itema li Yohane, imane, "Lõ hadia ia ba niha, na tenga nibe'e Lowalangi da'õ khõnia. 28 No mirongo niwa'õgu, 'Tenga Razo Sangorifi nifabu'u Lowalangi andrõ ndra'odo. Samokai lala ndra'o nifadaridari'õ fõna-Nia.' 29 Marafule zokhõ ni'owalu andrõ. Ha si mõi awõ samondrongo zi fahuwu khõ marafule andrõ, ba no somuso tõdõ ia na irongo wehede marafule andrõ. Si manõ gõi ndra'odo. Sindruhundruhu no somuso tõdõ ndra'o. 30 Manõi wa'ebua-Nia ba lõ tola lõ'õ awuwu ndra'o." 31 Tõra moroi ba niha bõ'õ fefu zoroi moroi yawa. Niha gulidanõ zi otarai gulidanõ andre, ba lahuhuo'õ zanandrõsa ba gulidanõ. Ba tõra moroi ba niha fefu zi otarai moroi yawa andrõ! 32 Iwa'õ fefu zi no Irongo ba si no I'ila, ba hiza samõsa lõ si faduhu tõdõ ba duria niwa'õ-Nia. 33 Si faduhu tõdõ ba niwa'õ-Nia andrõ zamaduhu'õ wa sindruhu Lowalangi andrõ. 34 Niha nifatenge Lowalangi zolohe Turia soroi Lowalangi, bõrõ khõ-Nia no Ibe'e fefu Eheha Lowalangi. 35 I'omasi'õ Nono-Nia Ama, ba no Ibe'e fefu hadia ia ba danga-Nia. 36 Samati khõ Nono andrõ, zi falukha fa'auri sindruhu ba si lõ aetu. Lõ falukha wa'auri sindruhu ba si lõ aetu niha si lõ mamati khõ Nono andrõ, ba lõ mamalõ wõnu Lowalangi khõnia.

4:1 Ba larongo ira Farizai'o wa abõlõ ato nibayagõ Yesu idanõ moroi khõ Yohane. ( 2 Sindruhunia samalua famayagõ idanõ tenga Yesu, hiza i ira nifahaõ-Nia.) 3 Me I'ila Yesu wa no larongo da'õ ira Farizai'o, numalõ Ia ba Yudea, ba mangawuli ba Galilea. 4 Ba wofanõ-Nia andrõ Itõrõ Zamaria. 5 Irugi zi sambua banua sotõi Sikhara Yesu ba danõ Zamaria, lõ arõu i'otarai danõ andrõ nibe'e Yakobo khõ nononia Yosefo. 6 So mba'a Yakobo ba da'õ. Bõrõ wa'erege dõdõ Yesu wofanõ, mõi Ia dumadao ba zinga mba'a andrõ. Mato laluo me inõtõ da'õ, 7 no numalõ ndra nifahaõ Yesu ba fasa mõi mowõli gõ. Tohare samõsa ndra alawe Zamaria wana'u idanõ. Imane khõnia Yesu, "He Ina, hadia tola U'andrõ be'e õ-Gu nidanõ?" 9 Itema li ira alawe Zamaria andrõ, imane, "Niha Yahudi Ndra'ugõ Ama; ba niha Zamaria ndra'odo; hana wa Õ'andrõ khõgu nidanõ?" (Bõrõ me lõ amakhaita ba lõ fariawõ niha Yahudi faoma niha Zamaria.) 10 Imane Yesu, "Na aboto ba dõdõu mbuala Lowalangi ba na õ'ila haniha zangandrõ khõu idanõ, ba ya'ugõ na'i zangandrõ khõ-Nia idanõ, ba Ibe'e khõu nidanõ aurifa." 11 Imane ira alawe andrõ, "He Ama, lõ khõ-U timba, ba wa'abakha mba'a andre. Hezo moroi Õhalõ nidanõ aurifa andrõ? 12 Tuama Yakobo zame'e khõma ba'a andre. Moroi ba mba'a andre ihalõ gõnia idanõ; awõ ndraononia awõ gurifõnia. Hadia, abõlõ ebua ndra'ugõ moroi khõ duama Yakobo andrõ?" 13 Imane Yesu, "Ifuli owõkhi dõdõ niha fefu samadu idanõ andre, 14 ba samadu idanõ nibe'e-Gu khõnia lõ isõndra wa'owõkhi dõdõ irugi zi lõ aetu. Bõrõ me idanõ andrõ nibe'e-Gu khõnia tobali umbu nidanõ sangele ba same'e fa'auri sindruhu ba si lõ aetu!" 15 Imane ira alawe andrõ, "He Ama, be'e khõgu nidanõ andrõ ena'õ lõ owõkhi sa'ae dõdõgu; ba lõ moguna mõi ndra'o ba da'e ba wangai idanõ." 16 Imane khõnia Yesu, "Ae'e kaoni wo'omou, ba fuli'õ ba da'e." 17 Itema li ira alawe andrõ imane, "Lõ hadõi fo'omogu." Imane Yesu, "Sindruhu niwa'õu, wa lõ fo'omou, 18 bõrõ me no dalima ndra matua sangowalu khõu, ba ira matua si fao khõu iada'e tenga fo'omou sindruhunia. Tobali, sindruhu hadia niwa'õmõ andrõ." 19 Imane ira alawe andrõ, "Awena aboto ba dõdõgu wa sama'ele'õ ndra'ugõ. 20 Lafosumange Lowalangi ira satuama ba hili andre, ba ya'ami niha Yehuda zanguma'õ wa ha ba Yeruzalema nahia wamosumange Lowalangi." 21 Imane Yesu khõnia, "Ya faduhu dõdõu talifusõ, so ginõtõ dania tenga ba hili andre lafosumange Lowalangi ba tenga gõi ba Yeruzalema. 22 Mifosumange Lowalangi si lõ mi'ila ya'ami niha Zamaria, ba ma'ila nifosumangema ya'aga niha Yahudi, bõrõ me so wangorifi moroi ba niha Yahudi. 23 So dania ginõtõnia, ba no irugi inõtõ andrõ, wa moroi ba wa'abõlõ Geheha Lowalangi, dozi niha lafosumange Nama, Lowalangi satulõ, si mane nidõnadõna Nama. 24 Lowalangi andrõ ba no Eheha, ba ha moroi ba wa'abõlõ Geheha Lowalangi tola lafosumange Nama molo'õ fetaro-Nia." 25 Imane ira alawe andrõ khõ Yesu, "Aboto ba dõdõgu wa tohare dania Razo Sangorifi (nifabu'u Lowalangi, nifotõi Keriso). Na tohare Ia, I'ombakha'õ khõda fefu hadia ia." 26 Imane Yesu, "Ya'odo andre Ia si fahuhuo khõu." 27 Me inõtõ da'õ mangawuli ndra nifahaõ Yesu. Ahõli dõdõra me fahuhuo Yesu ba ndra alawe andrõ. Samõsa lõ hadõi ba gotaluara sanofu khõ ndra alawe, "Hadia zomasi'õ talifusõ?" ma zui lasofu khõ Yesu, "Hana wa fahuhuo Ndra'ugõ ba ndra alawe andre, Ama?" 28 Aefa da'õ irõi zirege nidanõ khõnia ira alawe ba da'õ ba fagohi ia numalõ ba mbanua ba wangombakha ba niha si so ba fasa, 29 "Mitabu, mifaigi niha sangombakha khõgu fefu hadia gamuatagu. Ba dõdõgu, te Ya'ia andrõ Razo Sangorifi si no Ifabu'u Lowalangi!" 30 Larõi mbanua niha andrõ numalõ ira khõ Yesu. 31 Gasagasa da'õ lakaoni manga Yesu ira nifahaõ-Nia. Lamane, "He Guru, lau manga!" 32 Itema li Yesu, "So gõ khõ-Gu ba lõ mi'ila hadia gõ andrõ." 33 Faoma lasofu khõ nawõra ira nifahaõ andrõ, "Hadia so zolohe õ-Nia?" 34 Imane Yesu, "Folo'õ somasi zamatenge Ya'o da'õ gõ-Gu, awõ wangasiwai halõwõ nibe'e-Nia khõ-Gu. 35 Mimane wanguma'õ, 'õfa wawa tõ, awena bawa wamasi.' Ba hiza Uwa'õ khõmi: Mihaogõ wamaigi nowi. No asoso ba no tola nibasi! 36 Latema mbua gõlõra samasi andrõ; i'owuloi mbua wangahalõ soguna ba wa'auri sindruhundruhu. Omuso dõdõ zanaru ba he samasi. 37 Sindruhu gamaedola andre, 'Samõsa zananõ ba samõsa zamasi.' 38 Ufatenge ami wamasi ba nowi si tenga ni'ohalõwõgõimi; no mohalõwõ niha bõ'õ ba da'õ, ba mitema mbua wohalõwõra." 39 Ato zowanua ba Zamaria si faduhu tõdõ khõ Yesu, me imane ira alawe andrõ, "I'ombakha'õ khõgu hadia ia fefu zi no ufalua." 40 Ba me falukha niha Zamaria andrõ khõ Yesu la'andrõ khõ-Nia ena'õ torõi Ia khõra. Torõi Yesu ba da'õ dua ngaluo wa'ara. 41 Ba ato nasa niha si faduhu tõdõ khõ Yesu ba ngawalõ nifahaõ-Nia khõra. 42 Lamane ba ndra alawe andrõ, "Faduhu dõdõma iada'e tenga ha bõrõ ni'ombakha'õu khõma, hiza bõrõ me no marongo samõsa, ba aboto ba dõdõma wa sindruhu sangorifi õsi gulidanõ andre Ia." 43 Me no torõi Yesu ba mbanua Zikhara dua ngaluo, numalõ Ia ba Galilea. 44 No Iwa'õ samõsa Yesu, "Lõ lafosumange zama'ele'õ ba mbanuania samõsa." 45 Me Irugi Galilea, latema'õ Ia niha sato si fao fa'omuso dõdõ. Bõrõ, me so Ia ba Gowasa Fasa ba Yeruzalema, ba no la'ila hadia nilau-Nia me inõtõ da'õ. 46 Mangawuli Yesu ba Kana ba danõ Galilea, ba nahia si no irai Ibali'õ agu nidanõ. So samõsa zohalõwõ ba nomo Razo. Mofõkhõ nononia ba Gafana'uma. 47 Me irongo no mangawuli Yesu moroi ba Yudea numalõ ba Galilea, mõi ia khõ Yesu. I'andrõ khõ Yesu ena'õ Ifadõhõ nononia andrõ sarakhagõ mate. 48 Isofu Yesu ba zohalõwõ ba nomo Razo andrõ, Imane, "Na lõ ni'ilau zahõlihõli dõdõ, lõ faduhu dõdõu." 49 Imane sohalõwõ ba nomo Razo andrõ, "He So'aya alio'õ we'amõi fatua lõ mate nonogu andrõ." 50 Imane Yesu, "Ofanõ manõ, no auri nonomõ andrõ." Mamati niha andrõ ba niwa'õ Yesu, andrõ ilau mofanõ. 51 Ba dalu lala wangawuli ba nomo, falukha ia zohalõwõ khõnia ba lamane, "No auri nonomõ!" 52 Isofu ha'uga bõzi me ibõrõtaigõ dõhõ nononia andrõ. Lamane, "Menewi, aefa laluo (mato bõzi satu) alõ wa'aukhunia." 53 Itõrõ tõdõ nama nono andrõ wa me inõtõ da'õ Imane Yesu khõnia, "No auri nonou." Ba mamati ia khõ Yesu awõ zi sambua omo ya'ira. 54 Da'õ zahõli dõdõ si mendrua nilau Yesu ba Galilea me no tohare Ia moroi ba Yudea.

5:1 Bõrõ me so Gowasa ba niha Yahudi, numalõ Yesu ba Yeruzalema. 2 Ba so mbawa Yeruzalema ba zinga "Mbawa Gõli Mbiribiri". Lafotõi mbawa andrõ Betesa ba li Heberai'o. So lima ngawua nose'ose ba zi fasui mbawa andrõ. 3 Ato zofõkhõ ba nose'ose andrõ: sau'a, sakelakela, sombuyumbuyu. [Labalobaloi na mukiba nidanõ ba mbawa. 4 Bõrõ me itaria mõi mala'ika ba mbawa andrõ ba wamakiba idanõ. Haniha zofõkhõ si fõfõna mõi ba mbawa, dõhõ wõkhõnia, gofu hadia ia wõkhõ andrõ.] 5 Ba da'õ so zofõkhõ si no tõlu ngafulu a walu fakhe wa'ara. 6 I'ila Yesu no tolea niha andrõ ba da'õ, ba aboto ba dõdõ-Nia wa no ara sibai wõkhõnia; andrõ Imane khõnia Yesu, "Hadia omasi'õ dõhõ wõkhõu?" 7 Itema li sofõkhõ andrõ imane, "He Ama, lõ khõgu niha solohe ya'o ba mbawa na inõtõ mukiba, no lahulõ ndra'o niha bõ'õ we'amõi bakha ba mbawa." 8 Imane Yesu khõnia, "Faoso, fazawa gasomõ ba owaõwaõ." 9 I'anema'õ dõhõ niha andrõ. Ifazawa gasonia ba mowaõwaõ ia. Alua da'õ me luo Sabato. 10 Lamane ira salawa niha Yahudi ba niha andrõ sawena dõhõ, "Luo Sabato ma'õkhõ. Tebai õfazawa gasou bõrõ me lõ faudu ba gamakhoita agama." 11 Itema li niha andrõ imane, "Samadõhõ ya'odo andrõ mege zango'ou ya'o imane, 'Fazawa gasomõ ba owaõwaõ.' " 12 Lamane wanofu, "Haniha zango'ou ya'ugõ wamazawa kasomõ awõ wowaõwaõ?" 13 Ba hiza lõ i'ila haniha da'õ niha sawena dõhõ andrõ. Bõrõ me ato niha ba da'õ ba no Ifasoli Ia Yesu ba gotalua niha sondrõi nahia andrõ. 14 Falukha Yesu ba niha andrõ bakha ba Nomo Zo'aya. Imane khõnia Yesu, "Iada'e no dõhõ ndra'ugõ; angenanõ fa bõi õfazõkhi horõ sa'ae. Bõrõ na õlau horõ gõna ndra'ugõ sabõlõ afõkhõ moroi andre." 15 Mangawuli niha andrõ ba i'ombakha'õ khõ ndra salawa niha Yahudi wa Yesu zamadõhõ ya'ia. 16 Bõrõ da'õ ibõrõtaigõ la'alui lala ira salawa niha Yehuda ba wamunu Yesu, me no Ifadõhõ niha ba luo Sabato. 17 Ba hiza Imane khõra Yesu, "Lõ mo'aetufa mohalõwõ nama-Gu; ba Ya'o ba mohalõwõ gõi." 18 Bõrõ wehede Yesu andrõ wa la'alui lala nasa ira salawa niha Yahudi ba wamunu Ya'ia. Lalau zi manõ tenga ha bõrõ me Ifadõhõ niha ba luo Sabato; no bõrõ gõi me Imane Ama-Nia Lowalangi; hulõ na Ifagõlõgõlõ Ia khõ Lowalangi. 19 Imane wanguma'õ Yesu ba niha andrõ, "Mihaogõ wanõngõni: Tebai Ilau zomasi Ia Ono andrõ. Ilau hadia ni'ila-Nia Ilau Ama-Nia. Bõrõ me hadia nilau Nama da'õ gõi nilau Nono andrõ. 20 I'omasi'õ sibai Nono-Nia Ama andrõ. I'ombakha'õ khõ Nono-Nia fefu halõwõ-Nia. Mendrua manõ I'oroma'õ khõ Nono-Nia halõwõ sabõlõ ebua ena'õ ahõlihõli fefu dõdõmi. 21 Isusugi zi no mate Ama, ba Ibe'e khõra wa'auri sindruhu ba si lõ aetu; si manõ gõi Nono, I'amualagõ wa'auri si lõ aetu ba zomasi fa'auri. 22 Lõ Ihuku niha Ama. Bõrõ me no Ibe'e kuaso ba danga Nono-Nia ba wangetu'õ huku. 23 Ilau fefu da'õ Ama ena'õ lafosumange Nono si mane famosumange Ama. 24 Sindruhu niwa'õ-Gu khõmi: Isõndra wa'auri sindruhu niha sanõngõni fehede-Gu ba mamati Ia ba zamatenge Ya'o. Lõ tehuku ia; aefa ia moroi ba wa'amate ba isõndra wa'auri. 25 Ya faduhu dõdõmi: So ginõtõ dania -- ba no irugi inõtõ andrõ -- larongo li Nono Lowalangi niha si no mate. Ba samondrongo fehede Nono andrõ zauri. 26 Ibe'e wa'auri ba niha fefu Ama andrõ; si manõ gõi wa no Ibali'õ umbu wa'auri Nononia andrõ Ama same'e fa'auri ba niha fefu ba gulidanõ! 27 No Ibe'e kuaso khõ Nono andrõ ba wangetu'õ huku, bõrõ me Ono Niha Ia. 28 Bõi tokea ami wamondrongo da'e bõrõ me so ginõtõnia dania larongo wehede-Nia niha si no mate bakha ba lewatõ. 29 Larõi lewatõ andrõ. Ba fefu niha solau si sõkhi tefaoso ira ena'õ auri. Ba fefu zolau si lõ sõkhi tefaoso ena'õ tehuku." 30 "Lõ U'ila Ufalua hadia ia na ha moroi ba zomasi Ndra'o. U'etu'õ huku molo'õ ni'oroi'õ Lowalangi khõ-Gu. Bõrõ da'õ atulõ gangetula-Gu, bõrõ me lõ U'odaligõ zomasi dõdõ-Gu. U'o'õ zomasi Nama samatenge Ya'o. 31 Na Ya'odo samõsa zame'e famaduhu'õ sanandrõsa khõ-Gu, lõ latema wamaduhu'õ-Gu andrõ. 32 Ba so niha bõ'õ samaduhu'õ Ya'o, ba U'ila wa sindruhu wamaduhu'õnia andrõ. 33 No mifatenge niha khõ Yohane ba no ibe'e Yohane wamaduhu'õ sindruhu sanandrõsa khõ-Gu. 34 U'ombakha'õ da'õ fefu, tenga bõrõ wa moguna khõ-Gu wamaduhu'õ niha, ha ena'õ te'orifi ami. 35 Hulõ wandru si holahola ba sohaga Yohane. Ba zi lõ ara sibai isului ami ba omasi ami da'õ. 36 Ba so khõ-Gu wamaduhu'õ sabõlõ ebua moroi ba wamaduhu'õ Yohane. U'ohalõwõgõi halõwõ nibe'e Nama khõ-Gu -- ya'ia halõwõ nihalõ-Gu iada'e -- da'õ zamaduhu'õ wa nifatenge Nama ndra'o. 37 Ba Ama si no mamatenge Ya'o andrõ zamaduhu'õ Ya'o. Lõ irai mirongo wehede Nama andrõ, ba lõ irai mi'ila zikhala-Nia. 38 Lõ ba dõdõmi wehede-Nia, bõrõ me lõ faduhu dõdõmi ba Niha nifatenge-Nia. 39 Mi'alu'alui ba Mbuku Ni'amoni'õ, bõrõ me miwalinga so khõmi ba da'õ wa'auri si lõ aetu ba wangalui ba zura andrõ. No Ifaduhu'õ Ndra'o Buku Ni'amoni'õ andrõ! 40 Ba hiza, lõ mi'ondrasi Ndra'o ba wanõndra fa'auri sindruhu ba si lõ aetu. 41 Lõ U'alui zumange nibe'e niha. 42 Aboto ba dõdõ-Gu ami. Lõ ba dõdõmi fangomasi'õ Lowalangi. 43 So Ndra'o awõ wa'abõlõ moroi khõ Namagu, ba lõ mitema Ndra'o. Ba na niha bõ'õ zi so ba wa'abõlõnia samõsa, mitema ia. 44 Tebai faduhu dõdõmi, bõrõ me sangalui sumange niha ami, ba lõ mi'alui zumange nibe'e Lowalangi andrõ si ha sambua. 45 Bõi miwalinga U'angadugõ ami khõ Nama-Gu. Moze zangadugõ ya'ami dania -- bõrõ me Moze nitõtõnami ba da'õ. 46 Na sindruhundruhu faduhu dõdõmi khõ Moze, tatu faduhu dõdõmi khõ-Gu gõi, bõrõ me no ifaduhu'õ ndra'o Moze ba zurania. 47 Ba hiza, na lõ faduhu dõdõmi ba nisura Moze, hewisa wa faduhu dõdõmi ba niwa'õ-Gu?"

6:11 Me no aefa da'õ mangawuli Yesu yefo Mbawa Galilea (nifotõi gõi Bawa Diberia). 2 Ato niha solo'õ Ya'ia bõrõ me no la'ila nilau-Nia ba wamadõhõ niha sofõkhõ. 3 Numalõ yawa ba hili Yesu, dumadao Ia ba da'õ awõ ndra nifahaõ-Nia. 4 Me inõtõ da'õ no ahatõ Gowasa Fasa ba niha Yahudi. 5 Me Ifakhõlõ ia Yesu I'ila ato niha sangondrasi Ya'ia. Andrõ Imane khõ Wilifo, "Hezo tola ta'õli gõ ena'õ tola manga ndra niha andre fefu?" ( 6 Imanõ wehede Yesu bõrõ me omasi Ia itandraigõ Wilifo; bano I'ila samõsa hadia nifalua-Nia.) 7 Imane Filifo, "Ambõ zi dua ngaotu ribu rufia fowõli õ niha sato andre, hewa'ae ha ma'ifu ero samõsa." 8 Imane Andrea, talifusõ Zimoni Fetero, samõsa ba gotalua ndra nifahaõ Yesu, 9 "So ndraono ba da'e si so lima ngawua roti ba dua gi'a. Ba hadia gunania da'õ ba niha sato andre?" 10 Imane Yesu khõ ndra nifahaõ-Nia, "Mifedadao niha sato andrõ." Ba nahia andrõ oya ndru'u, ba dumadao ira yawa ba dete ndru'u fa'ato fefu mato lima ribu ndra matua. 11 Aefa da'õ Ihalõ roti Yesu, I'aohasi gõlõ Lowalangi. Aefa da'õ Ibagibagi roti andrõ ba niha sato si so ba da'õ. Si manõ gõi Ilau ba gi'a andrõ. Manga niha sato fefu irege abuso. 12 Me no abuso ira wemanga, Imane Yesu khõ ndra nifahaõ-Nia, "Mi'owuloi zi torõi gõ andrõ, bõi so zi tetibo." 13 So felendrua ragaraga afõnu tõ zi tõra gõ niha sato soroi roti si lima ngawua andrõ, me no la'owuloi ira nifahaõ-Nia. 14 Me la'ila niha sato zahõli dõdõ andrõ nilau Yesu, lamane, "Sindruhundruhu, Sama'ele'õ niha andrõ, si tohare dania ba gulidanõ!" 15 Aefa da'õ lafaso Yesu we'amõi Razora. I'ila Yesu gera'era dõdõra andrõ, bõrõ da'õ numalõ Ia ba hili ba zi lõ nihaniha. 16 Me no ibõrõtaigõ bongi, numalõ ba mbawa ndra nifahaõ Yesu. 17 Mõi ira yawa ba dundraha ba wangõtõ bawa numalõ ba Gafana'uma. Me no irugi bongi, lõ si mõi nasa khõra Yesu. 18 Gasagasa da'õ, so nangi sabõlõbõlõ ba mobade mbawa. 19 No moloyo ndra nifahaõ Yesu mato õfa irugi lima kilomete; i'anema'õ la'ila Yesu mowaõwaõ ba dete nidanõ wangondrasi tundraha. Ata'u sibai ira. 20 Imane khõra Yesu, "Bõi mi'ata'ufi, Ya'odo da'e!" 21 Latema'õ Ia yawa ba dundraha, ba hiza, ba ginõtõ da'õ gõi larugi zawatõra. 22 Mahemolu õ, la'ila niha sato si so yefo mbawa wa ha sara dundraha mege ba da'õ. La'ila wa no ofõna ladaridari ira nifahaõ Yesu, ba lõ si fao Yesu khõ ndra nifahaõ-Nia andrõ. 23 Tohare dundraha tanõ bõ'õ moroi ba Diberia ba manao ira ba nahia wemanga niha sato roti me no aefa I'aohasi gõlõ Lowalangi Yesu. 24 Me la'ila niha sato lõ Yesu awõ nifahaõ-Nia ba da'õ, ba mõi ira yawa ba dundraha, numalõ ira ba Gafana'uma ba wangalui Yesu. 25 Me falukha niha sato andrõ khõ Yesu yefo mbawa, lasofu khõ-Nia lamane, "He Guru, hamega Õrugi da'e?" 26 Itema li Yesu Imane, "Sindruhundruhu niwa'õ-Gu khõmi: Mi'alui ndra'o tenga bõrõ wa no aboto ba dõdõmi zahõlihõli dõdõ nilau-Gu, ha bõrõ me no abuso ami roti. 27 Bõi mi'eregesi tõdõ wangalui õ si tola ahori ba obou. Mi'ohalõwõ wangalui õ si lõ obou ba same'e fa'auri si ndruhu. Ibe'e khõmi dania gõ andrõ Ono Niha nifatenge Lowalangi; bõrõ me no Ibe'e khõ-Nia wa'abõlõ Ama Lowalangi andrõ." 28 Aefa da'õ lasofu khõ-Nia, "Hadia nilauma ena'õ tola mababaya halõwõ Lowalangi?" 29 Itema li Yesu, "Da'e zomasi Lowalangi milau khõ-Nia: Mi'amati khõ-Nia nifatenge Lowalangi andrõ." 30 Lamane, "Na si manõ, hadia so zahõlihõli dõdõ nilau Guru khõma ena'õ ma'ila ba faduhu dõdõma khõ-U? Tandraigõ foroma'õ hadia zi tola Õfalua! 31 La'a mana ira tuama ba danõ si mate. No tesura ba Mbuku Ni'amoni'õ, 'Ibe'e õra roti moroi si yawa ba zorugo.' " 32 Imane khõra Yesu, "Sindruhu niwa'õ-Gu khõmi: Tenga roti soroi zorugo nibe'e Moze andrõ; roti nibe'e Namagu khõmi da'õ zindruhunia roti soroi zorugo. 33 Bõrõ me roti nibe'e Lowalangi, Ya'ia zi mõi tou moroi ba zorugo ba same'e fa'auri sindruhu ba si lõ aetu ba gulidanõ andre." 34 Lamane, "He Ama, bõi bulõ'õ wame'e õma roti andrõ." 35 Imane khõra Yesu, "Ya'odo roti fangorifi andrõ. Si mõi khõ-Gu lõ isõndra olofo. Ba si faduhu tõdõ khõ-Gu lõ sa'ae dania owõkhi dõdõ. 36 No Uwa'õ khõmi wa no mi'ila Ndra'o, ba lõ manõ faduhu dõdõmi. 37 Fefu niha nibe'e Nama khõ-Gu la'ondrasi Ndra'o. Lõ Utimba niha si mõi khõ-Gu. 38 Mõi Ndra'o tou moroi ba zorugo, wamalua somasi Ia samatenge Ya'o, tenga somasi Ndra'o samõsa. 39 Da'e zomasi zamatenge Ya'odo andrõ: ena'õ samõsa bõi taya niha nibe'e-Nia khõ-Gu; ena'õ U'orifi ira mangawuli ba luo safuria. 40 Bõrõ me da'e zomasi Namagu: Fefu niha si no mangila Ono andrõ ba si faduhu tõdõ khõ-Nia, lasõndra wa'auri sindruhu ba si lõ aetu, ba U'orifi ira mangawuli ba Ngaluo Safuria." 41 Ibõrõtaigõ mukõkõkõkõ niha Yahudi khõ Yesu bõrõ me Imane: "Roti soroi zorugo Ndra'odo andre." 42 Lamane, "Hadia tenga Yesu niha andre, ono Yosefo? Ma'ila nama awõ nina-Nia! Hewisa wa Imane moroi ba zorugo tohare Ia?" 43 Imane khõra Yesu, "Bõi mi'okõkõkõkõ. 44 Samõsa lõ si mõi khõ-Gu niha na tenga Ama, samatenge Ya'odo andrõ zamatenge ya'ira khõ-Gu; ba U'orifi ira dania ba Luo Safuria. 45 No tesura ba zura ndra Sama'ele'õ si mane: 'Ifahaõ fefu niha Lowalangi.' Tobali fefu niha samondrondrongo fehede Nama andrõ ba si mõi nifahaõ-Nia, da'õ zi mõi mangondrasi Ya'odo. 46 Ba tenga da'õ geluaha wa so niha si no mangila Ama. Ha Ya'ia andrõ si otarai Lowalangi zangila Ama andrõ. 47 Mitõngõni: Si faduhu tõdõ khõ-Gu zanõndra fa'auri sindruhu ba si lõ aetu dania. 48 Ya'odo roti same'e fa'auri. 49 La'a mana ira tuami, ba danõ si mate, ba hiza mate ira sa'atõ. 50 Fabõ'õ sibai roti soroi zorugo andrõ; si manga roti andrõ lõ mate dania. 51 Ya'odo roti soroi zorugo -- roti same'e fa'auri. Si manga roti andrõ auri irugi zi lõ aetu. Botogu roti andrõ nibe'e-Gu. Ululu mboto-Gu, ena'õ te'orifi gulidanõ." 52 Fehede Yesu andrõ zamobõrõ faguaguasa ba gotalua ndra niha Yahudi. Lamane, "Hewisa Ibe'e ni'ada mboto-Nia niha andre?" 53 Imane khõra Yesu, "Mihaogõ wanõngõni: Lõ misõndra wa'auri ba khõmi na lõ mi'a mboto Nono Niha nifatenge Lowalangi andrõ ba na lõ mibadu ndro-Nia. 54 Si manga boto-Gu ba samadu do-Gu, zanõndra fa'auri sindruhu ba si lõ aetu. Da'õ ni'orifi-Gu na Luo Safuria. 55 Bõrõ me boto-Gu andre gõ sindruhu ba do-Gu zindruhu nibadu. 56 Niha si manga boto-Gu ba samadu do-Gu, ahatõ ia khõ-Gu ba ahatõ Ndra'o khõnia. 57 Ama sauri andrõ zamatenge Ya'o ba auri Ndra'o khõ-Nia. Si manõ gõi niha si manga boto-Gu, auri ia moroi khõ-Gu. 58 Da'e roti andre soroi zorugo: lõ fagõlõ roti andre si mane ni'a ndra tuami. Hewa'ae no la'a roti andrõ, mate sa'atõ ira. Ba si manga roti andre auri irugi zi lõ aetu." 59 Iwa'õ da'õ fefu Yesu, me mamahaõ Ia ba gosali ba Gafana'uma. 60 Ato ndra nifahaõ Yesu samondrongo fehede Yesu andrõ. Lamane, "Abe'e sibai wamahaõ andre. Hezo wa tola latema niha!" 61 Hewa'ae samõsa lõ sangombakha, I'ila Yesu wa mukõkõkõkõ ndra nifahaõ bõrõ da'õ. Andrõ wa Imane khõra, "Hadia, lõ omasi ami wamahaõ andre? 62 Hewisa dania na mi'ila mangawuli ba nahia-Nia mbõrõta Nono Niha nifatenge Lowalangi andrõ? 63 Eheha Lowalangi zombali'õ auri niha. Lõ guna wa'abõlõ niha. Fehede andrõ niwa'õ-Gu no fehede Geheha Lowalangi ba fehede same'e fa'auri. 64 Ba hiza, so gõi ba gotaluami zi lõ faduhu tõdõ." (No I'ila ba wamõbõrõ Yesu haniha zi lõ omasi faduhu tõdõ ba haniha zi manga mbõli-Nia.) 65 Imane nasa Yesu, "Da'õ mbõrõ wa U'ombakha'õ khõmi wa samõsa lõ si mõi khõ-Gu natenga Ama andrõ zame'e fa'abõlõ khõnia we'amõi khõ-Gu." 66 I'otarai da'õ ato zondrõi Ya'ia si faofao khõ-Nia mege, lõ omasi ira sa'ae wolo'õ Ya'ia. 67 Isofu Yesu khõ ndra nifahaõ-Nia si felendrua, "Hadia lõ'õ gõi omasi ami mirõi Ndra'o?" 68 Imane Simoni Fetero khõ-Nia, "He So'aya, ha'õkhõ mõi ndra'aga? Ha fehede Zo'aya zame'e fa'auri sindruhu ba si lõ aetu. 69 Na faduhu dõdõma ba mamatiga wa Ya'ugõ Zo'aya dengetenge ni'amoni'õ andrõ soroi Lowalangi." 70 Itema lira Yesu Imane, "Hadia tenga Ya'odo zangobini ya'ami si felendrua andre? Ba hiza, samõsa ba gotaluami gafõkha!" 71 Niwa'õ Yesu andrõ ya'ia Yuda ono Zimoni banua Gariota. Bõrõ me hewa'ae samõsa moroi ba gotalua ndra nifahaõ Yesu Yuda, ba hiza omasi ia tobali si manga mbõli Yesu.

7:1 Me no aefa da'õ Idõrõdõrõi Galilea Yesu. Lõ omasi Ia numalõ ba danõ Yudea bõrõ me edõna labunu Ia ira salawa niha Yahudi. 2 Me luo da'õ no ahatõ Gowasa Nose Mbulu Geu ba niha Yehuda. 3 Lamane khõ Yesu ira talifusõ-Nia, "Rõi nahia andre ae'e ba Yudea, ena'õ la'ila halõwõ-U ira nifahaõ-Mõ. 4 Lõ samini'õ nilaunia, na omasi ia teturia. Na Õlau halõwõ si mane da'õ, ba lõ tola lõ'õ la'ila ba zi sagõrõ ulidanõ!" ( 5 Bõrõ me lõ faduhu gõi dõdõ ndra talifusõ-Nia khõ-Nia.) 6 Imane khõra Yesu, "Lõ inõtõ khõ-Gu, ba hiza, ba khõmi ba tola manõ gofu hawa'ara. 7 Lõ la'afõkhõi tõdõ ami niha gulidanõ andre. Ba hiza lafõkhõi tõdõ Ndra'o me lõ aetu Uwa'õ ba gulidanõ andre wa si lõ sõkhi nilaunia. 8 Mi'ae'e manõ ba Gowasa andrõ. Lõ mõi Ndra'o bõrõ tenga inõtõ khõ-Gu." 9 Si manõ niwa'õ Yesu khõ ndra talifusõ-Nia, ba torõi Ia ba Galilea. 10 Me no numalõ ndra talifusõ-Nia ba Gowasa andrõ, mõi Yesu ha Ya'ia samõsa lõ sangila. 11 La'alui Yesu ira salawa niha Yahudi ba Gowasa andrõ ba lasofu lamane, "Heza so Ia?" 12 Faoma fangõngõngõngõ niha sato sanandrõsa khõ-Nia. So zanguma'õ Niha si sõkhi Ia andrõ: "So gõi zanguma'õ. Lõ'õ! Samaelungu Ia!" 13 Samõsa lõ si lõ ata'u wamatunõ sanandrõsa khõ-Nia fõna niha bõrõ me ata'u ira ndra salawa niha Yahudi. 14 Ba dalu Gowasa, mõi Yesu bakha ba Nomo Zo'aya, Ibõrõtaigõ mamahaõ. 15 Ahõli dõdõ ndra salawa niha Yahudi. Lamane, "Hewisa wa I'ila zoya ngawalõ niha andre, hewa'ae lõ irai sekola Ia?" 16 Itema li Yesu Imane, "Tenga moroi khõ-Gu hadia ia nifahaõ-Gu, no famahaõ Lowalangi samatenge Ya'o. 17 Niha samalua somasi Lowalangi, da'õ zangila wa famahaõ-Gu andre moroi khõ Lowalangi, tenga somasi dõdõ-Gu manõ. 18 Niha sanguma'õ somasi dõdõnia, omasi nifosumange niha andrõ. Ba hiza sangalui sumange khõ zamatenge ya'ia, da'õ niha satulõ tõdõ: lõ falimosa ba niha si manõ. 19 Hadia, tenga Moze zame'e oroisa Lowalangi khõmi? Samõsa lõ ba gotaluami solo'õ. Hana wa omasi ami mibunu Ndra'odo?" 20 Latema li-Nia niha sato, lamane, "Te owõhõ'õ! Haniha zomasi mamunu Ya'ugõ?" 21 Itema li Yesu imane, "Ha sambalõ halõwõ nihalõ-Gu, ba ahõli dõdõmi. 22 No ibe'e goroisa khõmi Moze ba miboto ndraonomi. Bõrõ da'õ miboto niha, hewa'ae ba luo Sabato. Sindruhunia tenga Moze zi fõfõna mamoto niha, no ira tuada sauri fatua lõ Moze. 23 Na miboto niha ba luo Sabato ena'õ lõ misawõ goroisa Moze, hana wa mofõnu ami khõ-Gu na Ufadõhõ niha ba luo Sabato? 24 Bõi mihuku niha ha ba zoroma ba hõrõ, mihuku niha ba wa'atulõ ba ba wa'aduhu." 25 So õsa niha Yeruzalema sanguma'õ, "Hadia, tenga da'e niha ni'alu'alui andrõ ena'õ labunu? 26 Mifaigi! Fahuhuo Ia fõna niha sato ba samõsa lõ sanegu Ya'ia! Hadia, no aboto ba dõdõ ndra salawada wa Ya'ia Razo Sangorifi andrõ nifabu'u Lowalangi? 27 Na tohare Razo Sangorifi andrõ nifabu'u Lowalangi, samõsa lõ sangila hezo moroi Ia! Ba hiza, ta'ila hezo moroi niha andre." 28 Me mamahaõ Yesu bakha ba Nomo Zo'aya, Isofu Yesu ebua li-Nia, "Hadia sindruhundruhu mi'ila haniha Ndra'odo andre ba hezo moroi Ndra'o? Tenga ba zomasi dõdõ-Gu so Ndra'o. Sindruhu zamatenge Ya'odo andrõ, ba lõ mi'ila Ia. 29 U'ila Ia, bõrõ me moroi khõ-Nia Ndra'odo ba Ya'ia zamatenge Ya'o." 30 Omasi sibai niha sato andrõ wondra'u Yesu, ba hiza samõsa lõ sombambaya Ya'ia bõrõ me tenga nasa inõtõ-Nia. 31 Baero da'õ, ato gõi ba gotalua niha sato si faduhu tõdõ khõ-Nia, lamane, "Na tohare Razo Sangorifi nifabu'u Lowalangi andrõ, hadia abõlõ oya ilau zahõli dõdõ moroi ba nilau niha andre?" 32 Larongo ira Farizai'o wangõngõsa niha sato sanandrõsa khõ Yesu. Bõrõ da'õ, si fao ira ere sebua lafatenge zanaro ba Nomo Zo'aya ba wondra'u Yesu. 33 Imane Yesu, "Ba zi lõ arara fao Ndra'o khõmi. Aefa da'õ mangawuli Ndra'o khõ zamatenge Ya'o. 34 Mi'alui dania Ndra'odo, ba lõ misõndra; bõrõ me tebai mõi ami ba zi so Ya'o." 35 Faoma lamane khõ nawõra ira salawa niha Yahudi andrõ, "Heza numalõ niha andre, irege tebai tasõndra Ia? Hadia numalõ Ia ba niha Yahudi si so ba danõ sarõu ba gotalua niha Yunani, ba mamahaõ Ia khõ ndra niha Yunani andrõ? 36 Hadia geluaha wa Imane, 'Mi'alui dania Ndra'o ba lõ misõndra, ba tebai mõi ami ba nahia si so Ya'o.' " 37 Ngaluo sebua, ngaluo ba gafuriata ba gowasa andrõ. Me luo da'õ muzizio Yesu ba mu'ao Ia ebua li-Nia Imane, "Ya mõi khõ-Gu zowõkhi tõdõ ba wamadu idanõ. 38 No tesura bakha ba Mbuku Ni'amoni'õ si mane da'e: 'Moroi ba dõdõ niha samati khõ-Gu, mangumbu nidanõ aurifa.' " ( 39 Eheha Lowalangi niwa'õ Yesu, nibe'e-Nia dania ba zamati khõ-Nia. Bõrõ me inõtõ da'õ lõ nasa mube'e; bõrõ me lõ nasa mufolakhõmi Yesu.) 40 Ato niha samondrongo niwa'õ Yesu. Ba so ba gotaluara zanguma'õ, "Lõ tola lõ'õ sama'ele'õ niha andre!" 41 So danõ bõ'õ zanguma'õ, "Razo Sangorifi nifabu'u Lowalangi Ia andre!" Ba so zanguma'õ, "Ae, hewisa wa moroi ba Galilea tohare Razo Sangorifi? 42 Bakha ba Mbuku Ni'amoni'õ no tesura wa Razo Sangorifi andrõ tohare dania ba nga'õtõ Dawido ba tumbu ba Mbetilekhema, banua Dawido." 43 Ibõrõtaigõ fakara niha sato andrõ sanandrõsa khõ Yesu. 44 So zomasi mondra'u Ya'ia, ba hiza samõsa lõ sombambaya Ya'ia. 45 Mangawuli ndra sanaro ba Nomo Zo'aya nifatenge ndra ere sebua awõ ndra Farizai'o ba wondra'u Yesu. Lamane ira ere sebua awõ ndra Farizai'o khõ ndra sanaro andrõ, "Hana wa lõ mi'ohe Ia ba da'e?" 46 Lamane ira sanaro andrõ, "Lõ irai so niha si fahuhuo si mane da'õ!" 47 Lamane ira Farizai'o, "E, hadia no gõna ami famaelungu-Nia gõi?" 48 "Hadia so ba gotalua ndra salawa niha Yehuda awõ ndra Farizai'o zi faduhu tõdõ khõ-Nia? 49 Ba hiza niha sato andre, lõ aboto ba dõdõra huku Moze, ba hewa'ae si manõ ba si falukha fangelifi ira." 50 Ba gotalua ndra Farizai'o so zi no irai mõi khõ Yesu me bongi; Nikodemo dõi niha andrõ. Imane Nikodemo khõ ndra Farizai'o tanõ bõ'õ andrõ, 51 "Molo'õ huku agama khõda, tebai tehuku zi samõsa niha fatua lõ tarongo golalõwania, ba fatua lõ tafareso hadia zi no ifalua." 52 Latema li lamane, "E, hadia moroi ba Galilea ndra'ugõ?" Fareso Mbuku Ni'amoni'õ: "Lõ hadõi sama'ele'õ moroi ba Galilea!" [ 53 Aefa da'õ, mangawuli fefu niha ba nomora.

8:1 Ba hiza numalõ Yesu ba Hili Zaitu. 2 Mahemolu da'õ ba zahulõ wongi mõi Ia ba Nomo Zo'aya, ba ato niha sangondrasi Ya'ia. Mudadao niha sato andrõ, ba mamahaõ Yesu khõra. 3 Gasagasa da'õ, tohare ndra Samahaõ ba Agama awõ ndra Farizai'o, la'ohe khõ-Nia samõsa ndra alawe sohorõ. Lafezizio ndra alawe andrõ ba gotalua, 4 aefa da'õ lamane khõ Yesu, "He Ama guru, no masõndra wohorõ ndra alawe andre. 5 Ba Huku Moze sanandrõsa ba goroisa Lowalangi, no ibe'e gamakhoita Moze ena'õ ira alawe si mane da'õ nitebu kara irege mate. Hewisa gera'era-U ba zi mane Ama?" 6 Lamanõ wanofu ba wamesu li-Nia, ena'õ lasõndra golalõwa-Nia. Ba hiza, no Ifatugu manõ Ia Yesu, ba Isura faoma turu-Nia tou danõ. 7 Ba me lahõtõi wanofu, Ifaõga hõgõ-Nia ba Imane khõra, "Haniha ba gotaluami zi lõ olalõwa, akha i'ofõnai'õ ia wanebu ira alawe faoma kara." 8 Ifuli Ifatugu Ia Yesu ba Isura tou danõ. 9 Me larongo niwa'õ Yesu andrõ, Ibõrõtaigõ lazarazara wondrõi nahia andrõ, i'otarai zatua. Ba gafuriata ha tõ Yesu zi so ba da'õ awõ ndra alawe andrõ si zizio ba da'õ. 10 Muzizio Yesu ba Imane ba ndra alawe andrõ, "Heza so fefu ira? Hadia lõ sanguhuku ya'ugõ?" 11 Imane, "Lõ'õ Ama." Imane Yesu, "Lau, Ya'odo gõi ba lõ Uhuku ndra'ugõ. Ofanõ iada'e, ba bõi lau horõ sa'ae."] 12 Fahuhuo zui khõra Yesu. Imane Yesu, "Ya'odo haga gulidanõ. Dozi solo'õ Ya'o ba lõ mowaõwaõ ba zogõmigõmi, me la'okhõgõ haga wa'auri." 13 Lamane khõ-Nia ira Farizai'o, "Õfaduhu'õ samõsa Ndra'ugõ iada'e, Ama. Lõ atulõ wamaduhu'õ-Mõ andrõ!" 14 Itema li Yesu Imane, "Hewa'ae Ube'e wamaduhu'õ sanandrõsa khõ-Gu samõsa, ba hiza sindruhu wamaduhu'õ-Gu andrõ; bõrõ me U'ila heza moroi Ndra'o ba heza numalõ-Do Lõ mi'ila hezo moroi Ndra'o ba heza numalõ Ndra'o. 15 Mihuku niha molo'õ fa'aniha, ba hiza samõsa lõ nihuku-Gu niha. 16 Ba na Uhuku niha, atulõ wanguhuku-Gu andrõ, bõrõ me tenga ha Ya'odo; fao khõ-Gu Nama andrõ samatenge Ya'o. 17 No tesura bakha ba huku agama khõmi; famaduhu'õ zi darua niha zindruhu. 18 Darua zamaduhu'õ Ya'o -- Ya'o samõsa ba Ama andrõ samatenge Ya'o." 19 Lamane, "Hezo Nama-Mõ andrõ?" Itema li Yesu, "Lõ mi'ila Ndra'odo. Ba lõ'õ gõi mi'ila Nama-Gu. Na mi'ila Ndra'o, mi'ila gõi Nama-Gu." 20 Iwa'õ fefu da'õ Yesu me mamahaõ Ia ba Nomo Zo'aya ahatõ ba nahia weti game'ela khõ Lowalangi. Ba samõsa lõ sondra'u Ya'ia, bõrõ me lõ irugi na inõtõ-Nia. 21 Ifuli Imane Yesu khõra, "Mofanõ Ndra'o, ba mi'alui Ndra'o dania, ba hiza mate ami dania ba horõmi. Tebai mõi ami ba zi mõi Ndra'o." 22 Lamane ira salawa niha Yahudi, "Te Ibunu Ia, bõrõ me imane, 'Ba zi mõi ndra'o, tebai mõi ami.' " 23 Imane khõra Yesu, "Moroi tou so ami; ba moroi yawa so Ndra'o. Moroi ba gulidanõ ami; ba hiza Ya'o tenga moroi ba gulidanõ. 24 Da'õ mbõrõ wa Umane khõmi mate dania ami ba horõmi. Ba sindruhu dania mate ami ba horõmi, na lõ faduhu dõdõmi wa 'Ya'odo andre Ia nifotõi YA'ODO SI SO'." 25 Lasofu lamane, "Haniha zindruhunia Ndra'ugõ andre?" Itema li Yesu Imane, "Hadia guna fahuhuo Ndra'o khõmi! 26 Oya zomasi Ndra'o Uwa'õ khõmi ba wangotu'õ. Ba hiza U'ombakha'õ ba gulidanõ hadia nirongo-Gu khõ zamatenge Ya'o -- bõrõ me satulõ Ia." 27 Lõ aboto ba dõdõra wa fahuhuo Ia sanandrõsa khõ Nama. 28 Bõrõ da'õ Imane Yesu khõra, "Dania na no miforõfa Nono Niha andrõ nifatenge Lowalangi, awena aboto ba dõdõmi wa 'Ya'odo, nifotõi YA'O SI SO andrõ', ba ginõtõ da'õ mi'ila wa lõ hadõi nilau-Gu ba zomasi Ndra'o manõ. Nifahaõ Nama andrõ khõ-Gu niwa'õ-Gu. 29 Ba samatenge Ya'odo andrõ ba faofao Ia khõ-Gu. Lõ irai Irõi Ndra'o bõrõ me somasi Ia nilau-Gu." 30 Me no aefa Iwa'õ da'õ Yesu, ato niha si faduhu tõdõ khõ-Nia. 31 Aefa da'õ Imane Yesu ba niha Yahudi si faduhu tõdõ khõ-Nia, "Na lõ farõi ami ba wamahaõ-Gu, ba sindruhundruhu nifahaõ-Gu ami, 32 ba awena aboto ba dõdõmi Lowalangi sindruhu andrõ, ba wa falukha ami wangefa." 33 Lamane, "Nga'õtõ Gaberahamo ndra'aga. Lõ irai mõi ndra'aga sawuyu niha! Hadia gohitõ dõdõ-U wa Õmane, 'Te'efa'õ dania ami'?" 34 Imane khõra Yesu, "Mitõngõni, fefu niha samazõkhi horõ no sawuyu horõ. 35 Tenga si ogõtõ'õ yomo ba nomo zawuyu; ha sindruhu nono zangahono yomo ba nomo. 36 Na I'efa'õ ami Ono andrõ awena sindruhundruhu aefa. 37 Aboto ba dõdõ-Gu wa nga'õtõ Gaberahamo ami. Ba hiza, omasi ami mibunu Ndra'o bõrõ me lõ omasi mitema wamahaõ-Gu. 38 Uwa'õ hadia ni'oroma'õ Nama khõ-Gu; ba milau hadia ni'o'ou namami khõmi." 39 Lamane wanema li, "Aberahamo namama." Imane Yesu, "Na sindruhu ono Gaberahamo ami, ba mifalua hadia nilau Gaberahamo. 40 Sindruhu andrõ nirongo-Gu khõ Lowalangi U'ombakha'õ khõmi, ba hiza mibunu na'i Ndra'o. Lõ ilau zi manõ Aberahamo! 41 Milau hadia ia nilau namami andrõ." Latema li ira niha Yahudi, "Tenga ono horõ ndra'aga. Ha samõsa namama ya'ia Lowalangi." 42 Aefa da'õ Imane khõra Yesu, "Na sindruhu Amami Lowalangi andrõ, mi'omasi'õ Ndra'o, bõrõ me sindruhu moroi khõ Lowalangi Ndra'odo. Tenga ba zomasi dõdõ-Gu so Ndra'o. Ya'ia zamatenge Ya'o. 43 Hana wa lõ aboto ba dõdõmi niwa'õ-Gu? Bõrõ me lõ omasi ami mifondrondrongo wamahaõ-Gu. 44 Ono namami ami, ya'ia Gafõkha andrõ. Andrõ wa mi'o'õ zomasi namami. No i'otarai mbõrõta, samunu niha Gafõkha andrõ. Tenga si fao khõ Lowalangi ia, bõrõ me lõ si sõkhi ba dõdõnia. Si falimo Gafõkha bõrõ me da'õ zomasi ia. Lõ siduhu ba dõdõnia ba fefu waya no moroi khõnia. 45 Bõrõ me sanandrõsa khõ Lowalangi ni'ombakha'õ-Gu khõmi, da'õ mbõrõ wa lõ faduhu dõdõmi khõ-Gu. 46 Haniha ba gotaluami zi tola mamaduhu'õ wa so zambalõ horõ khõ-Gu? Ba na U'ombakha'õ sanandrõsa khõ Lowalangi, hana wa lõ faduhu dõdõmi? 47 Niha soroi Lowalangi, da'õ zamondrondrongo li Lowalangi. Ba hiza, tenga moroi khõ Lowalangi ami, da'õ mbõrõ wa lõ omasi ami wamondrondrongo." 48 Latema li Yesu ira niha Yahudi, "Hadia tenga ya'ia niwa'õma? Ya'ugõ andre niha Zamaria nira'u mbekhu." 49 Itema li Yesu, "Tenga nira'u mbekhu Ndra'odo. Ufosumange Nama-Gu, ba ya'ami ba mi'o'aya Ndra'odo. 50 Tenga sangalui sumange khõ-Gu samõsa Ndra'odo. So zangalui ena'õ lafosumange Ndra'o, Ya'ia andrõ zanguhuku. 51 Mihaogõ wanõngõni: niha solo'õ li-Gu, ba lõ manõ i'ila wa'amate irugi zi lõ aetu." 52 Aefa da'õ lamane khõ Yesu ira niha Yahudi andrõ, "Ma'ila iada'e wa sindruhu nira'u mbekhu Ndra'ugõ! No mate Gaberahamo, ba si manõ gõi ndra sama'ele'õ. Ba hiza Õmane, 'Niha solo'õ li-Gu, lõ mate dania irugi zi lõ aetu.' 53 Na no mate Gaberahamo, awõ ndra sama'ele'õ, haniha Ndra'ugõ andre? Hewisa wa abõlõ ebua Ndra'ugõ moroi khõ namama Aberahamo!" 54 Itema li Yesu Imane, "Na Usuno Ndra'o samõsa, lõ eluaha wanuno-Gu andrõ. Ama-Gu zanuno Ya'o niwa'õmi Lowalangimi, 55 ba hiza lõ'õ sa mi'ila Ia. U'ila Ia. Na Umane lõ U'ila Ia ba falimo Ndra'o, si mane ya'ami. U'ila Ia ba U'o'õ li-Nia. 56 Wa'omuso dõdõ namami Aberahamo andrõ na i'ila luo khõ-Gu. Omuso dõdõnia, me no i'ila!" 57 Imane ira niha Yahudi andrõ khõ Yesu, "Lõ irugi lima wulu fakhe ndrõfi-U, ba hadia no õ'ila Gaberahamo?" 58 Itema li Yesu, "Sindruhu niwa'õ-Gu khõmi: no so Ndra'odo, fatua lõ si tumbu Gaberahamo." 59 Maoso niha Yahudi lahalõ gara ba wanebu Yesu; ba hiza, Ibini'õ Ia Yesu, ba Irõi Nomo Zo'aya andrõ.

9:1 Me mowaõwaõ Yesu I'ila niha sau'a i'otarai wa'atumbunia. 2 Lasofu khõ Yesu ira nifahaõ-Nia, "He Samahaõ, hana wa au'a niha andrõ i'oroi ba wa'atumbu? Hadia, bõrõ horõnia ma zui bõrõ horõ zatuania?" 3 Itema li Yesu, "Tenga bõrõ horõnia wa au'a ia ba tenga gõi bõrõ horõ ndra satuania. Au'a ia ena'õ la'ila niha wa'abõlõ Lowalangi khõnia. 4 Andrõ fatua moluo, da tahalõ halõwõ zamatenge Ya'o. Bõrõ me lõ ara tõ bongi, ba samõsa lõ si tola mohalõwõ sa'ae. 5 Ya'odo haga gulidanõ fatua so Ndra'o ba gulidanõ andre." 6 Me no aefa Iwa'õ da'õ Yesu, mangendrilo Ia tou ba danõ Ifaruka dambu ba gilo andrõ. Aefa da'õ Igule'õ danõ sabasõ ilo ba hõrõ niha andrõ, 7 Imane khõnia, "Ae'e, sasai mbawau ba mbawa Ziloa." (Siloa eluahania 'Tefatenge'.) Numalõ niha andrõ ba wanasai bawania. Me mangawuli ia, izumagõ tola i'ila niha. 8 Si fahatõ omo khõnia awõ niha si no mangila ya'ia wangandrõngandrõ buala, lamane, "Hadia tenga niha si dadao wangandrõngandrõ buala ia andre?" 9 So zanguma'õ, "Ya'ia." Ba so gõi zanguma'õ, "Tenga, si fakhilikhili khõnia da'õ." Ba hiza imane niha andrõ, "Ya'odo da'õ." 10 Lasofu khõnia, "Hewisa wa tola õfuli õ'ila niha." 11 Imane wanema li, "Niha sotõi Yesu zame'e ma'ifu tambu, ba Igule'õ ba hõrõgu ba Imane, 'Ae'e sasai mbawau ba mbawa Ziloa.' Andrõ wa mõi ndra'o. Ba me usasai mbawagu, tola u'ila niha." 12 Lasofu lamane, "Hezo niha da'õ?" Imane, "Lõ u'ila." 13 La'ohe niha andrõ khõ ndra Farizai'o. 14 Luo Sabato me luo Ibasõi danõ andrõ faoma ilo-Nia Yesu ba wamadõhõ hõrõ niha andrõ. 15 Lafuli lasofu ba niha da'õ hewisa wa tola dõhõ hõrõnia. Itema li niha da'õ, "Ilau dambu sombuyu ba hõrõgu, aefa da'õ usasai hõrõgu, ba ufuli u'ila niha." 16 Lamane õsa ira Farizai'o andrõ, "Lõ duhu wa moroi ba Lowalangi niha samalua da'e, bõrõ me Isawõ gamakhoita agama ba luo Sabato." Lamane tanõ bõ'õ, "Hezo wa tola Ifalua zahõlihõli dõdõ andre, niha si so horõ?" No fabõ'õ zinõndra niha andrõ. 17 Lafuli lasofu ba niha andrõ, lamane, "Fanguma'õu, Ya'ia zamadõhõ wa tola õ'ila niha? Na si manõ hewisa gera'erau khõ-Nia?" Imane niha andrõ, "Sama'ele'õ Ia." 18 Ba hiza lõ faduhu dõdõ niha Yahudi wa sau'a mbõrõta niha andrõ ba iada'e no i'ila niha. Lõ faduhu dõdõra fatua lõ lakaoni zatua niha andrõ, 19 ba wanofu, "Hadia sindruhu no sau'a i'otarai ba wa'atumbu nonomõ andre? Hewisa wa tola i'ila niha mangawuli iada'e?" 20 Latema li satua niha andrõ, "Sindruhu onoma da'e; ba no sau'a ia i'otarai wa'atumbu. 21 Ba hewisa wa tola i'ila niha iada'e, lõ aboto ba dõdõma. Ba haniha zamadõhõ hõrõnia lõ ma'ila. Misofu manõ khõnia. No satua sa'ae ia, ba no tola itema li samõsa." 22 Lamanõ ira satua niha andrõ bõrõ me ata'u ira ndra salawa niha Yahudi; bõrõ me no mamagõlõ ndra salawa niha Yehuda, wa laheta moroi ba gosali niha so'akui wa Razo Sangorifi nifabu'u Lowalangi Yesu andrõ. 23 Da'õ mbõrõ wa lamane ira satua niha andrõ, "No satua ia; misofu khõnia." 24 Lakaoni zui niha sau'a ba mbõrõta andrõ, ba lamane khõnia, "Ae ba hõlu wa õwa'õ zindruhu. Ma'ila wa niha andrõ no niha si so horõ." 25 Imane niha andrõ, "Hadia si so horõ ia ma lõ'õ, lõ aboto ba dõdõgu. Sambua ni'ilagu; wa sau'a ndra'o mbõrõta, ba iada'e ba no u'ila niha." 26 Lafuli lamane zui khõnia, "Hadia nilau-Nia khõu? Hewisa wamadõhõ-Nia hõrõu?" 27 Imane niha andrõ, "No u'ombakha'õ khõmi, ba hiza lõ omasi ami mifondrondrongo. Hana nasa wa manofu ami? Hadia omasi ami gõi tobali nifahaõ-Nia?" 28 Mofõnu ira khõnia ba lamane, "Ya'ugõ nifahaõ-Nia, tenga ya'aga! Nifahaõ Moze ndra'aga. 29 Sanandrõsa khõ Moze aboto ba dõdõma wa no fahuhuo khõnia Lowalangi. Ba niha andrõ, lõ na'i ma'ila heza moroi Ia." 30 Itema li niha andrõ imane, "Ae, ahõli dõdõda wa lõ mi'ila heza moroi niha andrõ, hewa'ae no Ifadõhõ hõrõgu. 31 Aboto ba dõdõda wa lõ ifondrondrongo Lowalangi ba niha si so horõ. Ha samosumange Lowalangi nifondrondrongonia li, ba samalua somasi Lowalangi. 32 I'otarai mbõrõta gulidanõ, lõ irai terongo so niha sau'a i'otarai wa'atumbunia, si tola mangila niha mangawuli. 33 Na tenga moroi khõ Lowalangi niha andrõ, tebai Ilau zi manõ." 34 Latema linia ira salawa niha Yehuda, lamane, "Niha si so horõ ndra'ugõ i'otarai narõ gaheu numalõ ba galizuzumõ, i'otarai wa'atumbumõ, hewisa wa'õfahaõ ndra'aga?" Lafofanõ ia ba i'otarai da'õ latenawa ia we'amõi ba gosali andrõ. 35 Irongo Yesu wa no lafofanõ niha andrõ moroi ba gosali. Me falukha Yesu ba niha andrõ, Imane khõnia Yesu, "Hadia, faduhu dõdõu khõ Nono Niha nifatenge Lowalangi?" 36 Itema li niha andrõ, imane, "Ha niha Ia, Ama? Ombakha'õ khõgu ena'õ tola faduhu dõdõgu khõ-Nia!" 37 Itema li Yesu, "No õ'ila Ia. Ya'ia zi fahuhuo khõu iada'e." 38 Imane niha andrõ, "Faduhu dõdõgu, So'aya." Mangalulu ia fõna Yesu. 39 Imane Yesu, "Mõi Ndra'o ba gulidanõ andre ba wamatõrõ fanguhuku; ena'õ la'ila niha sau'a, ba tobali au'a zangila niha." 40 So õsa ndra Farizai'o samondrongo niwa'õ Yesu andrõ, lamane wanofu khõ-Nia, "Hadia Õwa'õ tõdõu sau'a ndra'aga gõi?" 41 Itema li Yesu, Imane, "Na sau'a ami, ba tenga si so horõ ami. Ba hiza bõrõ me mimane, 'Ma'ila niha,' eluahania si so horõ ami nasa."

10:1 "Sindruhu niwa'õ-Gu khõmi: Niha si mõi bakha ba kandra mbiribiri, sanawõ ba'aba'a, si lõ manõrõ bawa ndruhõ, no sanagõ ba samara'u. 2 Niha sanõrõ bawa ndruhõ, da'õ gubalo mbiribiri. 3 Ibokai mbawa ndruhõ sanaro khõ gubalo andrõ, ba larongo li gubalo na ikaoni mbiribirinia molo'õ tõira; aefa da'õ i'ohe ira baero. 4 Me no aefa i'ohe baero mbiribiri andrõ, mowaõwaõ ia fõna, ba la'o'õ ia biribiri moroi furi, bõrõ me latõngõni linia. 5 Lõ omasi ira la'o'õ niha bõ'õ, lalau na'i moloi bõrõ me no la'ila linia." 6 Lõ aboto ba dõdõ niha samondrongo dumaduma nidunõdunõ Yesu andrõ. 7 Ifuli Imane Yesu, "Sindruhu Niwa'õ-Gu andre: Ya'odo mbawa ndruhõ ba mbiribiri andrõ. 8 Si tohare fõna-Gu ba sanagõ ba samara'u, ba lõ lafondrondrongo lira biribiri. 9 Ya'odo mbawa ndruhõ. Auri zanõrõ Ya'o; isõndra gõ na mõi ia bakha, ba he na mõi ia baero. 10 So zanagõ, ha ba wamunu awõ wamakiko. Andrõ wa so Ndra'o ena'õ lasõndra wa'auri solo'õ li-Gu ba fahõna khõra. 11 Ya'odo gubalo si sõkhi. Itehegõ mate ia fõna mbiribiri kubalo si sõkhi. 12 Enoni nibu'a gazi, tenga kubalo ia, ba tenga gõi sokhõ biribiri. Na i'ila tohare nasu gatua, ilau moloi ba irõi mbiribiri andrõ, ba ira'u mbiribiri andrõ asu gatua ba ifazawili. 13 Moloi genoni nigazi andrõ bõrõ me mohalõwõ ia bõrõ gazi; lõ ba dõdõnia mbiribiri andrõ. 14 Ya'odo gubalo si sõkhi. Si mane fangila nama Ya'o awõ wangila-Gu Ama, si manõ gõi wangila-Gu biribiri-Gu ba la'ila gõi Ndra'o. Utehegõ noso-Gu khõra. 16 So nasa mbiribiri khõ-Gu tanõ bõ'õ, tenga si fao ba ngawawa andre. U'ohe ira gõi ba lafondrondrongo li-Gu. Tobali ha sambua ngawawa ira ba ha samõsa gubalo. 17 I'omasi'õ Ndra'o Ama bõrõ me Utehegõ noso-Gu ena'õ tola Utema ia mangawuli. 18 Samõsa lõ si tola morabu noso andrõ moroi khõ-Gu. Ba hiza ba wa'aohagõlõ Utehegõ noso-Gu. Tola Ube'e ba tola Utema mangawuli. Da'õ halõwõ niwa'õ Nama khõ-Gu." 19 Ibõrõtaigõ fasoso niha Yahudi, me Imanõ wehede Yesu. 20 Ato zanguma'õ, "No ira'u Ia bekhu! No owõhõ Ia! Hadia guna mifondrondrongo khõ-Nia?" 21 So gõi niha tanõ bõ'õ sanguma'õ, "Tenga si manõ huhuo niha nira'u mbekhu! Heza tola ibali'õ sangila niha zau'a bekhu?" 22 So niha sato ba Yeruzalema ba wangamoni'õ Omo Zo'aya. Bawa deu me inõtõ da'õ. 23 Mowaõwaõ Yesu ba golayama Zalomo ba Nomo Zo'aya, 24 me lafasui Yesu ira salawa niha Yahudi, lamane, "Hawa'ara nasa Õbe'e aombõ dõdõma? Ombakha'õ khõma, na sindruhu Razo Sangorifi andrõ nifabu'u Lowalangi Ndra'ugõ." 25 Itema li Yesu, "No Uwa'õ khõmi, ba hiza lõ faduhu dõdõmi. Halõwõ andrõ nihalõ-Gu ba dõi nama-Gu, zamaduhu'õ sanandrõsa khõ-Gu. 26 Lõ faduhu dõdõmi bõrõ me tenga biribiri-Gu ami. 27 Larongo li-Gu biribiri-Gu. U'ila ira, ba la'o'õ Ndra'o. 28 Ube'e khõra wa'auri sindruhu ba si lõ tebulõ. Lõ matemate ira, ba samõsa lõ si tola manõbi ya'ira moroi ba wondrorogõ-Gu. 29 Abõlõ ebua moroi ba hadia ia fefu nama-Gu, same'e ya'ira khõ-Gu. Ba samõsa lõ si tola morabu ya'ira moroi ba wondrorogõ Nama. 30 Ha sambua Ndra'aga Nama." 31 Aefa da'õ lahalõ gara ira salawa niha Yahudi ba wanebu Yesu. 32 Ba hiza Imane khõra Yesu, "No mi'ila Ulau halõwõ si sõkhi, ni'o'ou Nama Ya'o famalua; heza moroi ba halõwõ andrõ zi tobali bõrõ wa mitebu Ndra'o?" 33 Latema li ira salawa niha Yahudi, "Matebu Ndra'ugõ kara tenga bõrõ halõwõ si sõkhi andrõ, hiza bõrõ Õ'o'aya Lowalangi! Niha Ndra'ugõ andre ba Õfaduhu'õ wa Lowalangi Ndra'ugõ!" 34 Imane wanema li Yesu, "Hadia, tenga no so ba zura huku agama khõmi: Imane Lowalangi, 'lowalangi ndra'ugõ'? 35 Ba fefu ita tafaduhu'õ wa lõ tewu'ai nisura ba Mbuku Ni'amoni'õ andrõ. Na ba zanema Taroma Li Lowalangi andrõ, ikaoni Lowalangi khõra 'lowalangi', 36 hana wa miwa'õ sango'aya Lowalangi Ndra'o me Uwa'õ ono Lowalangi Ndra'odo? No nifili Nama Ndra'o nifatenge ba gulidanõ. 37 Na lõ Ufalua halõwõ Nama, tatu lõ faduhu dõdõmi khõ-Gu. 38 Ba hiza, no Uhalõ halõwõ Nama, hewa'ae lõ faduhu dõdõmi khõ-Gu, si lõ'õ lõ'õnia faduhu dõdõmi ba nilau-Gu, ena'õ aboto ba dõdõmi wa ha sambua Ndra'aga Nama, Ya'ia ba khõ-Gu, ba Ya'o ba khõ-Nia." 39 Latandraigõ zui wondra'u Yesu, ba hiza aefa Ia ba dangara. 40 Numalõ yefo Nungo Nidanõ Yoridano Yesu, ba nahia Yohane wamayagõ idanõ no, ba torõi Ia ba da'õ. 41 Ato niha sangondrasi Ya'ia. Lamane, "Lõ ilau zahõli dõdõ Yohane, ba hiza fefu niwa'õnia sanandrõsa ba Niha andre, no sindruhu." 42 Ato niha si faduhu tõdõ khõ Yesu ba da'õ.

11:1 So niha sofõkhõ, sotõi Lazaro. Ba Mbetania torõi ia, ba mbanua ndra Maria ba Marata, si fatalifusõ. 2 Maria andrõ zamaduwa fanikha samohua ba gahe Yesu, ba solosi faoma bunia. Lazaro sofõkhõ andrõ no talifusõnia. 3 Lafa'ohe'õ duria khõ Yesu si fatalifusõ andrõ, lamane, "He So'aya, mofõkhõ nawõ Zo'aya ni'omasi'õ andrõ." 4 Me Irongo duria andrõ Yesu, Imane, "Tenga solohe ba wa'amate wõkhõnia andrõ. Mofõkhõ Lazaro ena'õ tefolakhõmi Lowalangi; ba ena'õ bõrõ da'õ tola tefosumange Nono Lowalangi." 5 I'omasi'õ Yesu ndra Marata ba ira talifusõnia. 6 Ba hiza me Irongo duria wa mofõkhõ Lazaro, I'odõdõgõ torõi nasa Yesu dua ngaluo tõ ba da'õ, 7 Aefa da'õ awena muhede Ia khõ ndra nifahaõ-Nia Imane, "Mitabu tafuli ita ba Yudea." 8 Lamane ira nifahaõ-Nia, "He Guru, awena na'i latebu kara Ndra'ugõ ena'õ ira niha Yahudi, ba iada'e omasi mangawuli'Õ ba da'õ?" 9 Imane wanema li Yesu, "Hadia tenga felendrua za zi ma'õkhõ?" Na mowaõwaõ niha ba zi ma'õkhõ lõ manendre gahenia, bõrõ me i'ila haga gulidanõ andre. 10 Ba na mowaõwaõ niha ba zi bongi, manukõu ia bõrõ me lõ haga khõnia. 11 Si manõ wehede Yesu. Aefa da'õ ifuli Imane, "No mõrõ nawõda Lazaro, ba hiza mõi Ndra'o wanusugi ya'ia." 12 Lamane ira nifahaõ Yesu, "He So'aya, na si mõrõ Lazaro, dõhõ ia dania." 13 Edõna Iwa'õ Yesu sindruhunia wa no mate Lazaro. Ba hiza, lawalinga da'õ gohitõ dõdõ Yesu wa sindruhundruhu no mõrõ Lazaro. 14 Andrõ I'osindruhugõ wangombakha khõra Yesu Imane, "No mate Lazaro. 15 Ba hiza moguna khõmi fefu da'õ, andrõ wa omuso dõdõ-Gu wa lõ Ya'o ba da'õ, ena'õ faduhu dõdõmi. Mitabu we'amõi khõ Lazaro." 16 Toma andrõ nifotõi "Si Faero" imane ba nawõnia nifahaõ, "Mitabu we'amõi, ena'õ mate dania ita awõ-Nia!" 17 Me irugi nahia andrõ Yesu, no õfa ngaluo me no lako'o Lazaro. 18 Fa'arõu gotaluara Mbetania ba Yeruzalema lõ tõra moroi ba zi tõlu kilomete. 19 Ato niha Yahudi sangondrasi Maria ba Marata ba wondrara tõdõra bõrõ wa'amate Lazaro talifusõra matua andrõ. 20 Me irongo Marata tohare Yesu, numalõ ia baero wamaondragõ Ya'ia, ba torõi bakha ba nomo Maria. 21 Aefa da'õ imane Marata khõ Yesu, "He So'aya, na so Zo'aya ba da'e, ba lõ mate dalifusõgu! 22 Ba hewa'ae si manõ, aboto ba dõdõgu na so ni'andrõ Zo'aya khõ Lowalangi iada'e, Ibe'e khõ Zo'aya Lowalangi." 23 Imane Yesu khõ Marata, "Auri dania mangawuli dalifusõmõ." 24 Imane wanema li Marata, "Aboto ba dõdõgu wa ifuli auri dania Lazaro na inõtõ tesusugi niha si no mate ba Luo Safuria." 25 Imane Yesu khõ Marata, "Ya'odo zanusugi niha, ba Ya'odo zame'e fa'auri ba niha. Auri dania zamati khõ-Gu hewa'ae mate ia. 26 Niha sauri ba samati khõ-Gu, lõ mate irugi zi lõ aetu. Hadia faduhu dõdõu ba da'õ?" 27 Itema li Marata, "He So'aya, faduhu dõdõgu wa Ya'ugõ Zo'aya Nono Lowalangi, Razo Sangorifi nifatenge tou ba gulidanõ andre." 28 Me no aefa iwa'õ da'õ Marata, mõi ia mukaoni Maria talifusõnia ba ingõngõgõ khõnia imane, "No so ba da'e Guru; isofu ndra'ugõ." 29 Me irongo da'õ Maria i'alio'õ maoso ia wamalukhaisi Yesu. 30 Me inõtõ da'õ, lõ si mõi ba mbanua nasa Yesu. Ba nahia si falukha Ia khõ Marata so Ia. 31 La'ila, maoso Maria ira niha Yahudi sondrara tõdõnia, ba nomo, numalõ ia baero; mõi ira la'o'õ ia bõrõ me lawalinga numalõ ia ba lewatõ ba ilau me'e ba da'õ. 32 Me irugi Maria nahia si so Yesu ba me i'ila Yesu, mangalulu ia fõna Yesu ba imane, "He So'aya, na so ndra'ugõ ena'õ ba da'e, ba lõ mate dalifusõgu!" 33 Ahakhõ sibai dõdõ Yesu me I'ila me'e Maria awõ niha Yahudi si fao khõ Maria. 34 Isofu khõra Imane, "Hezo miko'o ia?" Lamane wanema li, "He So'aya, tabu ae'e faigi." 35 Ilau me'e Yesu. 36 Lamane ira niha Yahudi, "Faigi, fondrege wa'omasi-Nia Lazaro!" 37 Ba so õsa ba gotaluara zanguma'õ, "Tola i'ila niha sau'a Ibe'e, hana wa tebai Itaha ena'õ bõi mate Lazaro?" 38 Si fao fa'alangu dõdõ numalõ Yesu ba lewatõ. Hulõ dõgi nari hili lewatõ andrõ, nibalugõ faoma kara sebua. 39 Imane Yesu, "Miheta gara andrõ." Itema li Yesu Marata talifusõ zi mate andrõ imane, "Hiza So'aya, no õfa ngaluo no lako'o ia. Te no abõu sa'ae!" 40 Imane Yesu khõ Marata, "Tenga no Uwa'õ khõu: Na mamati ndra'ugõ tola õ'ila lakhõmi Lowalangi!" 41 Ba laheta gara andrõ. Ifaõga hõrõ-Nia Yesu miyawa ba mbanua ba Imane, "U'andrõ saohagõlõ khõ-U, Ama, bõrõ me no Õfondrondrongo gangandrõwa-Gu. 42 U'ila wa lõ mamalõ Õfondrondrongo gangandrõwa-Gu, ba hiza Uwa'õ da'e bõrõ niha sato andre; ena'õ faduhu dõdõra wa no Ya'ugõ zamatenge Ya'o." 43 Me no aefa Iwa'õ da'õ Yesu, mu'ao Ia ebua li-Nia Imane, "He Lazaro, ae baero!" 44 Mõi baero niha si no mate andrõ. No te'olohuni muko gahe awõ dangania, ba bawania no mubalugõ faoma muko. Imane Yesu ba niha si so ba da'õ, "Mibokai muko andrõ khõnia, ba mi'efa'õ ia." 45 Ato niha Yahudi sangondrasi Maria, faduhu dõdõra khõ Yesu me la'ila zalua andrõ. 46 Ba hiza so gõi ba gotaluara zangawuli khõ ndra Farizai'o ba wangombakha hadia ia zi no Ifalua Yesu andrõ. 47 Bõrõ da'õ lalau rafe ira Farizai'o awõ ndra ere sebua si fao sanguhuku ba Agama. Lamane, "Hadia nilauda? Oya Ilau zahõli dõdõ niha andre! 48 Na tatehegõ manõ khõ-Nia zi manõ, faduhu dõdõ niha fefu khõ-Nia. Ba gafuriata tohare zalawa Romawi ba lafakiko Nomo Zo'aya awõ fefu soida!" 49 Samõsa ba gotaluara Gayafa, si tobali Ere Sebua ba ndrõfi andrõ, sanguma'õ, "Lõ mi'ila hadia ia. 50 Hadia lõ aboto ba dõdõmi wa bõrõ niha sato, abõlõ sõkhi mate zi samõsa moroi na fefu soi tekiko?" 51 Iwa'õ wehede andrõ Kayafa, sindruhunia tenga moroi ba gera'erania samõsa. Ba hiza ba wa'a'erenia ba ndrõfi andrõ no ifa'ele'õ wa mate dania Yesu soguna ba niha Yahudi. 52 Ba tenga ha ba niha Yahudi, ba ndraono Lowalangi si zawili gofu heza ni'osambua'õ dania gõi. 53 I'otarai ngaluo andrõ mamagõlõ ndra salawa niha Yahudi ba wamunu Yesu. 54 Bõrõ da'õ lõ sa'ae I'oroma'õ Ia Yesu ba Yudea. Irõi Yudea, numalõ Ia ba mbanua sotõi Eferai ahatõ ba danõ si mate. Torõi Ia ba da'õ awõ ndra nifahaõ-Nia. 55 Me inõtõ da'õ no ahatõ Gowasa Fasa ba niha Yahudi. Ato niha mbanua si numalõ ba Yeruzalema ba wamalua amakhoita fangehao fatua lõ Owasa. 56 Me so ira ba Nomo Zo'aya, la'alu'alui Yesu. Faoma lasofu khõ nawõra, "Hewisa dõdõu? Tatu lõ mõi Ia ba gowasa andre!" 57 No labe'e wareta ira ere sebua awõ ndra Farizai'o, ena'õ la'ombakha'õ hezo so Yesu na so zangila, ena'õ tola lara'u Yesu.

12:1 Õnõ ngaluo fatua lõ irugi Gowasa Fasa, numalõ Yesu ba Mbetania. Ba nahia andrõ mate Lazaro ba ifuli I'orifi mangawuli Yesu. 2 Labe'e gõ-Nia ba da'õ, Marata zama'anõ gõ, ba fao Lazaro awõ-Nia wemanga. 3 Aefa da'õ tohare Maria. So khõ-Nia mato matonga kilo wanikha samohua sebua sibai bõli. Ifaduwa wanikha andrõ ba gahe Yesu. Aefa da'õ i'osi gahe Yesu faoma bunia. Anõnõ zi sambua omo andrõ hua wanikha samohua. 4 Yuda banua Gariota, samõsa ba gotalua nifahaõ Yesu -- ba si manga mbõlinia dania -- imane, 5 "Hana wa lõ la'amawa wanikha samohua andrõ, ba tola mobõli tõlu ngaotu rufia firõ, ba labe'e mbõlinia ba niha si numana?" 6 Imanõ wanguma'õ Yuda tenga bõrõ wa'ahakhõ dõdõnia zi numana, no bõrõ me sanagõnagõ ia. Asese ihalõ gefera fefu ni'irõ'õra khõnia. 7 Ba hiza Imane Yesu, "Bõi mitegu ndra alawe andrõ ba wanikha samohua andrõ khõnia! Ilau da'e ba wama'anõ fogo'o Ya'o. 8 Lõ mamalõmalõ ba gotaluami zi numana, ba tenga si'ogõtõ'õ Ndra'o ba gotaluami." 9 Ato niha Yahudi si numalõ ba Mbetania me larongo so Yesu ba da'õ. Tenga ha bõrõ Yesu wa numalõ ira ba da'õ, hiza omasi ira gõi wamaigi Lazaro si no I'orifi mangawuli Yesu. 10 Da'õ mbõrõ wa omasi labunu gõi Lazaro ira ere sebua; 11 ha bõrõ ia wa ato niha Yahudi sondrõi samatõrõ ya'ira ba faduhu dõdõra khõ Yesu. 12 Mahemolu da'õ larongo niha sato si tohare ba Gowasa Fasa wa so ba dalu lala Yesu numalõ ba Yeruzalema. 13 Oi zara lahalõ mbulu nohi wamaondragõ Ya'ia. Mu'ao ira lamane, "Nisuno Lowalangi! Ya'ahowu Ia si so ba dõi Zo'aya! Ya'ahowu Razo niha Gizera'eli!" 14 Me inõtõ da'õ I'okudo sara nono galide nisõndra-Nia. Faudu da'õ ba zi no tesura ba Mbuku Ni'amoni'õ: 15 "Bõi ata'ufi ya'ugõ banua Ziona! Faigi, tohare Razou, I'okudo sara nono galide!" 16 Me inõtõ da'õ lõ aboto ba dõdõ ndra nifahaõ Yesu geluaha fefu da'õ. Ba me no aefa tefolakhõmi Yesu, me no aefa teforõfa ba te'orifi Ia mangawuli, awena itõrõ tõdõra wa no tesura ba Mbuku Ni'amoni'õ sanandrõsa khõ-Nia, awõ wa no lalau khõ-Nia da'õ fefu. 17 Niha si so me Ikaoni baero Lazaro moroi ba lewatõ awõ wa I'orifi mangawuli, lõ aetu latutunõ ba niha bõ'õ da'õ. 18 Da'õ mbõrõ wa ato niha sangondrasi Yesu bõrõ me no larongo Ifalua zahõli dõdõ andrõ. 19 Faoma lamane khõ nawõra ira Farizai'o, "Hadia nisõndrada! Faigi atõ, mõi khõ-Nia fefu zi sagõrõ ulidanõ!" 20 Ba gotalua niha sato si mõi mangalulu ba ginõtõ gowasa, so õsa niha Yunani. 21 La'ondrasi Wilifo ba lamane, "He talifusõ, na tola omasiga falukha khõ Yesu." (Banua Mbetisa'ida Wilifo ba Galilea.) 22 Mõi Wilifo wangombakha da'õ khõ Gandrea, aefa da'õ mõi ira darua ira wangombakha khõ Yesu. 23 Imane khõra Yesu, "No irugi inõtõ tefolakhõmi Nono Niha nifatenge Lowalangi. 24 Mihaogõ wanõngõni. Na lõ mutaru zi sambua ulitõ ba danõ, ba na lõ obou, lõ tebulõ ha sambua tanõmõ ia. Ba na obou danõmõ andrõ, awena tesõndra mbua soya. 25 Sangomasi'õ fa'aurinia ba gulidanõ andre, da'õ zi lõ manõndra fa'auri sindruhu ba si lõ aetu. Ba niha si lõ ba dõdõ fa'aurinia ba gulidanõ andre, da'õ dania zanõndra fa'auri sindruhu ba si lõ aetu. 26 Si mõi enoni-Gu, lõ tola lõ'õ i'o'õ Ndra'o; ena'õ ba zi so Ndra'o so genoni-Gu. Ifosumange Amagu zi mõi enoni-Gu." 27 "Abu dõdõ-Gu; hadia niwa'õ-Gu iada'e? Hadia Umane, 'He Ama, bõi tehegõ Utõrõ wamakao andre'? Ba hiza ba wanõrõ famakao andrõ so Ndra'o. 28 He, Ama folakhõmi dõi-Mõ!" Ba terongo li moroi ba mbanua sanguma'õ, "No Ufolakhõmi Ia, ba Ufuli Ufolakhõmi dania." 29 Larongo li andrõ niha sato si so ba da'õ. Lamane, "Ugu'ugu mbanua da'õ!" Ba so gõi zanguma'õ, "Tenga! Muhede khõ-Nia mala'ika!" 30 Imane khõra Yesu, "Tenga soguna khõ-Gu wa terongo li andrõ, no soguna khõmi. 31 Iada'e no irugi inõtõ tehuku gulidanõ; te'alani zalawa gulidanõ andrõ iada'e. 32 Na no dania te'alawa'õ Ndra'o yawa ba danõ, Udõnisi khõ-Gu fefu niha." 33 Imanõ wanguma'õ hewisa dania waõwaõ wamorõfa Ya'ia. 34 Lamane khõ-Nia niha sato, "Molo'õ huku agama, auri Razo Sangorifi nifabu'u andrõ irugi zi lõ aetu. Hana wa Õwa'õ te'alawai'õ ba dete danõ Nono Niha nifatenge Lowalangi andrõ? Haniha Nono Niha nifatenge Lowalangi andrõ?" 35 Imane wanema li Yesu, "Ha ba zi lõ arara so haga andrõ ba gotaluami. Tobali mitohugõ wofanõmi fatua so haga, ena'õ lõ gõna ami fa'ogõmi. Lõ i'ila heza numalõ ia niha sowaõwaõ ba dalu zogõmigõmi. 36 Mi'amati ba haga andrõ fatua so Ia khõmi, ena'õ tobali iraono haga ami." Me no aefa Iwa'õ da'õ Yesu, mofanõ Ia moroi ba da'õ ba lõ Iforoma'õ Ia khõra. 37 Oya zahõli dõdõ nilau Yesu fõnara. Ba hewa'ae si manõ lõ sa'atõ faduhu dõdõra khõ-Nia. 38 Ba zi manõ alua niwa'õ Yesaya sama'ele'õ. Da'e niwa'õnia, "He So'aya, haniha zi faduhu tõdõ ba duria khõma? Ha'õkhõ teforoma'õ wa'abõlõ Lowalangi?" 39 Da'õ mbõrõ wa tebai faduhu dõdõra, bõrõ me no imane gõi Yesaya, "Imane Lowalangi, 40 'Ufobalunõ hõrõra, ba U'ogõmigõmisi gera'erara; irege lõ mangila hõrõra, ba lõ teboka gera'erara. Ena'õ lõ mangawuli ira khõ-Gu, fa bõi Ufadõhõ ira.' " 41 Imanõ wehede Yesaya sanandrõsa khõ Yesu bõrõ me no i'ila lakhõmi Yesu. 42 Ba hewa'ae si manõ, ato gõi ndra salawa niha Yahudi zi faduhu tõdõ khõ Yesu. Ba hiza aiwõ ira wangombakha da'õ, bõrõ me ata'u ira na laheta moroi ba gosali ira, ira Farizai'o. 43 Abõlõ omasi ira zumange nibe'e niha moroi ba zumange soroi Lowalangi. 44 Mu'ao Yesu Imane, "Si faduhu tõdõ khõ-Gu, tenga ha khõ-Gu faduhu dõdõnia, no khõ zamatenge Ya'odo andrõ gõi. 45 Ba sangila Ya'o, no i'ila Nama samatenge Ya'o. 46 Hulõ haga we'amõi-Gu ba gulidanõ, ena'õ lõ torõi ba zogõmigõmi niha si faduhu tõdõ khõ-Gu. 47 Samondrondrongo famahaõ-Gu, ba si lõ molo'õ -- tenga Ya'o zanguhuku ya'ia. Bõrõ me tenga ba wanguhuku ulidanõ andre so Ndra'o, no ba wangorifi ya'ia. 48 So dania zanguhuku niha si lõ omasi manema Ya'o ba si lõ molo'õ taroma li-Gu. Turia nifa'ema-Gu andrõ, da'õ zi tobali sanguhuku ya'ia ba Luo Safuria! 49 Sindruhu da'õ! Bõrõ me lõ irai muhede Ndra'o ba zomasi dõdõ-Gu; Ama samatenge Ya'o, zangombakha khõ-Gu hadia niwa'õ-Gu ba hadia ni'ombakha'õ-Gu. 50 Ba aboto ba dõdõ-Gu wa oroisa-Nia andrõ zame'e fa'auri sindruhu ba si lõ aetu. Hadia niwa'õ-Gu no ni'o'ou Nama Ndra'o wanguma'õ."

13:1 Ma'õkhõ tõ lõ Owasa Fasa, aboto ba dõdõ Yesu wa no irugi inõtõ Irõi gulidanõ andre mangawuli Ia khõ Nama-Nia. No I'omasi'õ niha gulidanõ andre, ba irugi ba gafuriata I'omasi'õ ira nasa. 2 Manga ba zi bongi Yesu awõ ndra nifahaõ-Nia. No ifatumbu'õ Afõkha ba dõdõ Yuda, banua Gariota wemanga mbõli Yesu. 3 Aboto ba dõdõ Yesu wa no Ibe'e khõ-Nia fefu kuaso Ama-Nia. Aboto gõi ba dõdõ-Nia wa moroi khõ Lowalangi Ia ba mangawuli Ia khõ Lowalangi dania. 4 Bõrõ da'õ Ilau muzizio ba zinga meza, Ibokai mbaru-Nia sebua, Ibõbõ lembe lõwilõwi-Nia. 5 Ifaduwa yawa ba garawa nidanõ, ibõrõtaigõ Isasai gahe ndra nifahaõ-Nia ba I'otufoi faoma lembe si so ba lõwilõwi-Nia. 6 Me Irugi Zimoni, imane khõ-Nia Simoni, "He So'aya, hadia lõ tola lõ'õ Ya'ugõ zanasai ahegu?" 7 Itema li Yesu, "Lõ aboto ba dõdõu iada'e hadia nilau-Gu andre, ba aboto ba dõdõu dania." 8 Imane Fetero khõ Yesu, "Bõi, So'aya. Bõi Ya'ugõ zanasai ahegu!" Imane Yesu khõ-Nia, "Na lõ Usasai gaheu, ba tebai mõi ndra'ugõ nifahaõ-Gu sa'ae." 9 Imane wanema li Fetero, "Na si manõ So'aya, bõi ha ahegu sasai, fao gõi danga awõ hõgõgu!" 10 Imane Yesu khõ Wetero, "No tehaogõ mboto niha si no mondri. Lõ moguna tesasai ia sa'ae; ha ahenia zoguna nisasai. No muhaogõ ami andre, ba hiza lõ fefu manõ." ( 11 Aboto ba dõdõ Yesu haniha zi manga mbõli-Nia. Da'õ mbõrõ wa Imane, "No muhaogõ ami andre, ba hiza lõ fefu manõ.") 12 Me no aefa Isasai gahera Yesu, ifuli Ifake mangawuli mbaru-Nia sebua, ba mudadao Ia. Aefa da'õ Imane khõra, "Hadia aboto ba dõdõmi hadia nilau-Gu khõmi andrõ mege? 13 Mikaoni khõ-Gu Guru ba So'aya. Sindruhu da'õ: bõrõ me Guru Ndra'o ba So'aya. 14 Na Ya'odo Guru ba So'aya, no usasai gahemi, lõ tola lõ'õ faoma misasai gahe nawõmi. 15 Ube'e dumaduma andre khõmi fefu, ena'õ gõi milau si mane nilau-Gu khõmi. 16 Mihaogõ wanõngõni: Lõ ebua zawuyu moroi khõ zokhõ ya'ia; ba lõ ebua nifatenge moroi ba zamatenge. 17 No aboto ba dõdõmi da'õ iada'e; na milau da'õ, ba sohahau tõdõ ami sindruhundruhu. 18 Tenga ha khõmi fefu niwa'õ-Gu andre. Aboto ba dõdõ-Gu hanihaniha zi no Utuyu. Ba hiza hadia zi no tesura ba Mbuku Ni'amoni'õ lõ tola lõ'õ alua; da'e nisura andrõ, 'Si fao wemanga awõ-Gu da'õ zolawa Ya'o dania.' 19 U'ombakha'õ iada'e khõmi fatua lõ salua, ena'õ na no alua dania, faduhu dania dõdõmi wa Ya'odo andre Ia nifotõi YA'ODO SI SO. 20 Mihaogõ wanõngõni: Sanema niha nifatenge-Gu ba no itema Ndra'o. Ba haniha zanema Ya'o, no itema Lowalangi samatenge Ya'o." 21 Aefa Iwa'õ da'õ Yesu, ba alangu dõdõ-Nia. Imane wanguma'õ, "Sindruhu niwa'õ-Gu khõmi: Samõsa ba gotaluami zi manga mbõli-Gu dania." 22 Faoma lafaigi nawõra ira nifahaõ Yesu ba oi zara manimba dõdõra. Lõ aboto ba dõdõra haniha niwa'õ-Nia andrõ. 23 Samõsa ba gotalua nifahaõ ni'omasi'õ Yesu no dumadao ba zinga-Nia. 24 Ibe'e dandra khõnia Fetero, ena'õ isofu khõ Yesu haniha niwa'õ-Nia andrõ. 25 Ifahatõ ia khõ Yesu nifahaõ andrõ, isofu imane, "Haniha ia andrõ, So'aya?" 26 Itema li Yesu Imane, "U'ungugõ roti andrõ bakha ba mako, ba Ube'e ba niha. Niha nibe'e-Gu roti andrõ da'õ ia." Ihalõ roti Yesu, I'ungugõ bakha ba mako; aefa da'õ Ibe'e khõ Yuda banua Gariota. 27 Me itema sibai roti andrõ Yuda, mõi khõnia Gafõkha. Imane khõnia Yesu, "Alio'õ falua hadia zomasi'õ õlau!" 28 Samõsa lõ ba gotaluara si dadao manga ba da'õ zangila hana wa Iwa'õ da'õ Yesu khõ Yuda. 29 So zanguma'õ, Ifatenge Yuda Yesu wowõli hadia ia zoguna ba gowasa andrõ, ma zui I'o'ou Yuda Yesu wame'e kefe ba niha si numana -- bõrõ me Yuda zololohe kefe khõra. 30 I'anema'õ mõi baero Yuda me no aefa itema roti andrõ. No bongi sa'ae me inõtõ da'õ. 31 Me no aefa mofanõ Yuda moroi ba da'õ, Imane Yesu, "Tefolakhõmi Nono Niha nifatenge Lowalangi iada'e. Ba moroi khõ-Nia tefolakhõmi gõi Lowalangi. 32 Na tefolakhõmi Lowalangi ba khõ-Nia, tefolakhõmi gõi Ia ba khõ Lowalangi. Ifalua da'õ Lowalangi ba zi lõ ara tõ. 33 He iraono-Gu, lõ ara tõ so Ndra'odo khõmi. Mi'alui dania Ndra'o, ba hiza si mane niwa'õ-Gu ba niha Yahudi, si manõ gõi Uwa'õ khõmi: ba zi mõi Ndra'o, tebai mõi ami ba da'õ dania. 34 Mitema goroisa si bohou moroi khõ-Gu: mifaoma mi'omasi'õ nawõmi. Si mane fa'omasi-Gu ami, si manõ gõi ami mifaoma mi'omasi'õ nawõmi. 35 Na faoma mi'omasi'õ nawõmi, la'ila fefu niha wa nifahaõ-Gu ami." 36 Isofu Simoni Fetero khõ Yesu, imane, "He So'aya heza numalõ'õ?" Itema li Yesu, "Mõi Ndra'o ba zi sambua nahia, ba tebai mi'o'õ Ndra'o ba nahia andrõ. Ba hiza õ'o'õ sa'atõ dania Ndra'o." 37 Isofu zui Fetero, "He So'aya, hana wa tebai u'o'õ Ndra'ugõ iada'e. Utehegõ mate ndra'o khõ Zo'aya!" 38 Itema li Yesu, "Hadia, sindruhundruhu õtehegõ mate ndra'ugõ khõ-Gu? Haogõ fondrondrongo; fatua lõ miwo manu dania, no medõlu kali õfaduhu'õ lõ õ'ila Ndra'odo!"

14:1 Imane khõra Yesu, "Bõi mibusi dõdõmi. Mi'amati khõ Lowalangi, ba mi'amati gõi khõ-Gu. 2 Oya nahia ba nomo Nama-Gu. Udaridari ba da'õ wangõhõnagõ nahia khõmi. Lõ Uwa'õ khõmi natenga si manõ ena'õ. 3 Na no aefa Uhenagõ nahia khõmi, mangawuli Ndra'o wamaondragõ ya'ami; ena'õ gofu heza so Ndra'o ba da'õ gõi so ami. 4 Mi'ila lala ba nahia andrõ si mõi Ndra'o." 5 Imane Toma khõ Yesu, "He So'aya, lõ ma'ila heza mõi Ndra'ugõ, hewisa wa ma'ila lala we'amõi ba da'õ?" 6 Itema li Yesu Imane, "Ya'odo lala ba wangi'ila Lowalangi, ba ba wanõndra fa'auri. Lõ hadõi si tola mõi khõ Nama na lõ itõrõ Ndra'odo. 7 Na aboto ba dõdõmi Ndra'o, ba aboto gõi ba dõdõmi Nama-Gu. I'otarai iada'e no aboto ba dõdõmi Ia, ba no mi'ila Ia." 8 Imane Filifo khõ Yesu, "He So'aya, oroma'õ khõma Nama andrõ, ena'õ ahono dõdõma." 9 Ba itema li Yesu Imane, "No hawa'ara faofao Ndra'o khõmi fefu, ba hadia lõ saboto ba dõdõu Ndra'o, he Filifo? Si no mangila Ya'odo, da'õ gõi zangila Ama. Hewisa nasa wa õwa'õ, 'Foroma'õ khõma Nama andrõ?' 10 He Filifo! Hadia lõ faduhu dõdõu, wa ha sambua Ndra'o khõ Nama, ba wa ha sambua Nama ba khõ-Gu? Fefu niwa'õ-Gu andre khõmi, tenga nilau dõdõ-Gu. Ama andrõ, sangiangõ Ya'o, da'õ zangohalõwõgõigõ fefu da'e. 11 Ya faduhu dõdõmi wa no sambua Ndra'o khõ Nama, ba sambua Nama ba khõ-Gu. Ba silõ'õlõ'õnia ba ya faduhu dõdõmi ba zi no Ufalua. 12 Sindruhundruhu U'ombakha'õ khõmi: Niha sindruhundruhu mamati khõ-Gu, tola ilau fefu zi no Ulau andrõ, -- ma na'i tola ilau zabõlõ ebua moroi ba da'õ -- bõrõ me mõi Ndra'o khõ Nama. 13 Ba gofu hadia ni'andrõmi ba dõi-Gu, Ufalua khõmi, ena'õ tefolakhõmi Nama andrõ bõrõ Nono. 14 Mi'andrõ hadia ia ba dõi-Gu; ba Ube'e khõmi fefu da'õ." 15 "Na mi'omasi'õ Ndra'o, ba mi'o'õ fefu goroisa-Gu. 16 U'andrõ dania khõ Nama samõsa Zanolo tanõ bõ'õ, ya'ia Geheha Lowalangi. Torõi Ia ba gotaluami. 17 Ya'ia andrõ ba no Eheha Lowalangi, sangombakha fa'atulõ Lowalangi. Lõ itema ulidanõ Geheha Lowalangi andrõ, bõrõ me lõ la'ila Ia ba lõ aboto ba dõdõra. Ba hiza, aboto ba dõdõmi Ia, bõrõ me lõ mamalõ auri ba so Ia ba gotaluami. 18 Lõ Urõi manõ ami ha ya'ami. Mangawuli Ndra'o dania khõmi. 19 Ba zi lõ ara tõ lõ la'ila Ndra'o niha gulidanõ, ba hiza ya'ami dania zangila Ya'o; ba bõrõ me auri Ndra'o, auri gõi dania ami. 20 Na no irugi ginõtõ andrõ dania mi'ila wa ha sambua Ndra'aga Nama-Gu, ba ha sambua ami khõ-Gu, ba Ya'odo gõi ha sambua khõmi. 21 No sangomasi'õ Ya'o zanema ba solo'õ oroisa-Gu. I'omasi'õ Amagu zangomasi'õ Ya'o. Ba U'omasi'õ gõi niha da'õ, awõ wa U'ombakha'õ khõnia haniha Ndra'odo andre." 22 Yuda (si tenga banua Gariota) zanofu khõ Yesu imane, "He So'aya, hana wa khõma Õforoma'õ Ndra'ugõ ba tenga ba niha gulidanõ?" 23 Itema li Yesu Imane, "I'o'õ goroisa-Gu niha sangomasi'õ Ya'o. Ba I'omasi'õ Ama-Gu niha si manõ. Mõi Nama-Gu ba mõi Ndra'o ba niha andrõ ba torõi Ndra'aga khõnia. 24 Lõ i'o'õ goroisa-Gu niha si lõ mangomasi'õ Ya'o. Oroisa andrõ nirongomi tenga moroi khõ-Gu, no oroisa Nama-Gu, samatenge Ya'o. 25 Fefu da'õ U'ombakha'õ khõmi fatua so Ndra'o ba gotaluami. 26 Ba samahaõ fefu hadia ia khõmi ya'ia Geheha Lowalangi. Ya'ia andrõ Zanolo nifatenge Nama ba dõi-Gu. Sanolo andrõ zamasugi ba dõdõmi fefu hadia ia zi no U'ombakha'õ khõmi. 27 Urõi khõmi wa'ohahau dõdõ. Fa'ohahau dõdõ soroi Ndra'o Ube'e khõmi. Tenga si mane fa'ohahau dõdõ nibe'e gulidanõ wa'ohahau dõdõ nibe'e-Gu khõmi. Bõi mibusi dõdõmi; bõi ata'u ami. 28 No mirongo me Umane, 'Mofanõ Ndra'o ba hiza mangawuli-Do dania khõmi.' Na mi'omasi'õ Ndra'o, ba omuso dõdõmi na numalõ Ndra'o khõ Nama, bõrõ abõlõ ebua Nama moroi khõ-Gu. 29 U'ombakha'õ da'õ khõmi iada'e, fatua lõ salua, ena'õ faduhu dõdõmi dania na no alua. 30 Lõ U'anau'õ wehede khõmi, bõrõ me no tohare zalawa gulidanõ andre. Ba hiza tenga barõ mbawania Ndra'o. 31 Ba ena'õ aboto ba dõdõ niha gulidanõ, wa U'omasi'õ Nama, da'õ mbõrõ wa Ulau hadia niwa'õ Nama khõ-Gu famalua. Lau, mitabu, taheta ita ba da'e."

15:1 Imane Yesu, "Ya'odo dõla nagu sindruhu, ba Ama-Gu zohalõwõ ba kabu. 2 I'ewa dozi ndraha si so khõ-Gu si lõ mowua; ba dozi daha sowua, Ihaogõ ena'õ itugu oya mbuania. 3 Si no muhaogõ ami bõrõ daroma li andrõ nibe'e-Gu khõmi. 4 Ena'õ si lõ tebulõ wa ha sambua ami ba khõ-Gu ba si manõ gõi Ndra'odo ba khõmi. Tebai mowua ndraha andrõ ha ya'ia. Awena tola mowua ndraha, na auri ia ba dõla. Si manõ gõi ami. Awena tola mowua ami na aro ami ba khõ-Gu. 5 Ya'odo dõla nagu ba daha ami. Saro ba wahasambua khõ-Gu ba si manõ gõi Ndra'o khõnia, da'õ zoya bua; bõrõ tebai milau hadia ia na lõ Ya'o. 6 Niha si lõ aro wahasambuania ba khõ-Gu, tetibo'õ si mane daha, ba tobali dania okõli. La'owuloi ndraha si manõ ba lafazaumba bakha ba galitõ, aefa da'õ latunu. 7 Na lõ mamalõ ami khõ-Gu ba mofa'auri wamahaõ-Gu bakha ba dõdõmi, tola mi'andrõ hadia zomasi ami; ba tebe'e khõmi ni'andrõmi andrõ. 8 Tefolakhõmi Nama-Gu na oya mbuami; ba da'õ mi'oroma'õ wa sindruhu nifahaõ-Gu ami. 9 U'omasi'õ ami si mane fangomasi'õ Nama Ya'o. Ya lõ mamalõ ami ba wa'omasi-Gu andrõ. 10 Na mi'o'õ goroisa-Gu, ba lõ farõi ba wa'omasi-Gu, si mane fa lõ faroi-Gu ba wa'omasi Nama-Gu, me U'o'õ goroisa-Nia. 11 U'ombakha'õ da'e khõmi fefu ena'õ fao ami ba wa'omuso dõdõ-Gu; ba ena'õ mo'ahonoa wa'omuso dõdõmi. 12 Da'e goroisa-Gu: mifaoma mi'omasi'õ nawõmi, si mane fangomasi'õ-Gu ami. 13 Niha sabõlõ mangomasi'õ awõ, ya'ia zanehegõ fa'aurinia khõ nawõnia andrõ. 14 Awõgu ami, na mi'o'õ hadia ni'oroi'õ-Gu khõmi. 15 Lõ Ukaoni khõmi sawuyu sa'ae, bõrõ me lõ i'ila sawuyu hadia nilau zokhõ ya'ia. Ukaoni ami, bõrõ me fefu nirongogu moroi khõ Nama-Gu no U'ombakha'õ khõmi. 16 Tenga ya'ami zanuyu Ya'o. Ya'odo zanutuyu ya'ami, ba Ufatenge ami ena'õ oya mbuami -- ya'ia mbua si lõ obou. Ba Ibe'e khõmi Ama hadia ni'andrõmi ba dõi-Gu. 17 Da'e goroisa-Gu khõmi: mifaoma mi'omasi'õ nawõmi." 18 "Na fatiu dõdõ niha gulidanõ khõmi, mitõrõ tõdõmi, wa no ofõna fatiu dõdõ niha gulidanõ khõ-Gu. 19 Na niha gulidanõ ami, ba i'omasi'õ ami ulidanõ hulõ dana khõnia ami. Ba hiza no Utuyu ami moroi ba gulidanõ andre, tobali tenga sa'ae niha gulidanõ ami. Da'õ mbõrõ wa fatiu dõdõ niha gulidanõ khõmi. 20 Mitõrõ tõdõmi hadia niwa'õ-Gu khõmi, 'Lõ abõlõ ebua zawuyu moroi khõ zokhõ ya'ia.' Na no lafakao Ndra'o, lafakao ami gõi dania. Na la'o'õ wamahaõ-Gu, la'o'õ gõi wamahaõmi dania. 21 Lalau fefu hadia ia khõmi bõrõ me tana khõ-Gu ami; ba bõrõ me la'ila zamatenge Ya'o. 22 Na lõ ena'õ irai mõi Ndra'o ba na lõ irai U'ombakha'õ fefu da'õ khõra, lõ tebe'e salara ena'õ. Ba hiza lõ tahi khõra ba horõra andrõ. 23 Si fatiu tõdõ khõ-Gu, fatiu gõi dõdõnia khõ Nama-Gu. 24 No Ufalua khõra zi tebai ifalua niha bõ'õ. Na lõ Ufalua ena'õ fefu da'õ khõra, aheta gesuanõ khõra. Ba hiza iada'e no la'ila fefu da'õ, ba fatiu dõdõra khõ-Gu ba he khõ Nama-Gu. 25 Alua zi manõ ena'õ itõrõ nisura ba mbuku Ni'amoni'õ, 'Fatiu dõdõra khõ-Gu lõ bõrõbõrõ.' 26 Eheha Lowalangi zangombakha somasi Lowalangi, ya'ia Zanolo nifatenge-Gu dania moroi khõ Nama samaduhu'õ Ya'odo khõmi. 27 Ba hiza lõ tola lõ'õ mifaduhu'õ Ndra'o, bõrõ me no fao ami khõ-Gu i'otarai wamõbõrõ.

16:1 U'ombakha'õ khõmi fefu da'õ fabõi farõi ami. 2 Labe'e baero ami moroi ba nomo wangandrõ. Ba so ginõtõ dania wa niha samunu ya'ami andrõ lawa'õ tõdõra enoni Lowalangi ira, bõrõ me no labunu ami. 3 Lalau da'õ bõrõ me lõ saboto ba dõdõra Nama-Gu ba lõ saboto ba dõdõra Ndra'o. 4 Ba hiza U'ombakha'õ khõmi da'õ iada'e, ena'õ na lalau khõmi da'õ, itõrõ tõdõmi dania wa no U'ombakha'õ ia khõmi." "Tenga i'otarai wamõbõrõ U'ombakha'õ da'õ khõmi, bõrõ me faofao ami nasa khõ-Gu. 5 Ba hiza iada'e numalõ-Do khõ zamatenge Ya'o; ba hewa'ae si manõ samõsa lõ ba gotaluami zanofu heza numalõ'õ Ama? 6 Tobali abu dõdõmi iada'e, bõrõ me no U'ombakha'õ khõmi. 7 Sindruhu niwa'õ-Gu khõmi: abõlõ sõkhi ba khõmi, na mofanõ Ndra'odo; bõrõ na lõ mofanõ Ndra'o, lõ mõi khõmi Zanolo andrõ. Ba na mofanõ-Do, Ufatenge Ia khõmi. 8 Ba na tohare Ia, I'otu'õ niha gulidanõ dania wa no fasala wangerangerara sanandrõsa ba horõ; awõ wangerangerara sanandrõsa ba zomasi Lowalangi, awõ huku soroi Lowalangi. 9 Fangerangerara sanandrõsa ba horõ no fasala bõrõ me lõ faduhu dõdõra khõ-Gu. 10 Fasala gõi wangerangerara sanandrõsa ba zomasi Lowalangi, bõrõ me numalõ Ndra'o khõ Nama ba lõ mi'ila-Do sa'ae. 11 No fasala gõi wangerangerara sanandrõsa ba huku soroi Lowalangi bõrõ me no te'etu'õ huku khõ ndra salawa ba gulidanõ andre! 12 Oya nasa zomasi-Do Uwa'õ khõmi, ba hiza ambõ nasa fa'abõlõmi wanema iada'e. 13 Ba hiza, na tohare Geheha Lowalangi sangombakha haniha Lowalangi andrõ, I'ohe ami ba wa'aboto ba dõdõ Lowalangi fefu. Lõ Iwa'õ zomasi dõdõ-Nia; hadia nirongo-Nia da'õ niwa'õ-Nia. Ba I'ombakha'õ khõmi fefu hadia zalua dania. 14 Ifolakhõmi Ndra'o, bõrõ me Ihalõ hadia ia zomasi Ndra'o Uwa'õ, ba aefa da'õ I'ombakha'õ khõmi. 15 No khõ-Gu fefu hadia ia zi so khõ Nama. Da'õ wa Umane, Ihalõ moroi khõ-Gu hadia nibe'e-Gu khõnia Eheha andrõ, ba aefa da'õ I'ombakha'õ khõmi." 16 "Ma'ifu tõ ba lõ mi'ila Ndra'o sa'ae, ba lõ ara aefa da'õ zui ifuli mi'ila Ndra'o." 17 So õsa ndra nifahaõ Yesu si faoma manofu khõ nawõra, "Hadia geluaha fefu da'e? Imane: 'Ma'ifu tõ ba lõ mi'ila Ndra'o, ba lõ ara aefa da'õ ifuli mi'ila Ndra'o dania.' Imane zui: 'Bõrõ me numalõ Ndra'o khõ Nama.' " 18 Hadia gohitõ dõdõ-Nia wanguma'õ, "Ma'ifu tõ? Lõ aboto ba dõdõma hadia niwa'õ-Nia!" 19 I'ila Yesu wa omasi ira manofu khõ-Nia. Bõrõ da'õ Imane khõra, "Umane, ma'ifu tõ ba lõ mi'ila Ndra'odo, 'Ba lõ ara aefa da'õ zui ifuli mi'ila Ndra'odo.' Hadia da'õ zi tobali si nofumi khõ nawõmi? 20 Sindruhu niwa'õ-Gu khõmi: me'e ami dania ba mange'esi; ba omuso dõdõ niha gulidanõ. Abu dõdõmi dania, ba hiza fa'abu dõdõmi andrõ tobali fa'omuso dõdõ dania. 21 Na lõ ara tõ madono ndra alawe, ba abu dõdõnia, bõrõ me no inõtõnia wa'abu dõdõ. Ba na no tumbu nononia, olifu ndra alawe andrõ wa'abu dõdõnia; tobali somuso tõdõ ia, bõrõ samõsa ndraono sawuyu no tumbu ba gulidanõ. 22 Si manõ gõi ami: abu dõdõmi iada'e, ba na falukha zui Ndra'o khõmi dania, omuso dõdõmi; ba samõsa lõ si tola mangeheta fa'omuso dõdõmi andrõ. 23 Na no irugi ngaluo andrõ, lõ sa'ae misofu hadia ia khõ-Gu. Ya faduhu dõdõmi: Hadia manõ ni'andrõmi khõ Nama ba dõi-Gu, ibe'e khõmi Ama dania. 24 Irugi da'e lõ hadõi ni'andrõmi ba zi fao dõdõ-Gu. Bõi mifamalõ wangandrõ, ba mitema dania, ena'õ sindruhundruhu somuso tõdõ ami." 25 "Uwa'õ khõmi da'e faoma amaedola. Ba hiza so ginõtõnia dania, lõ U'oguna'õ gamaedola na fahuhuo Ndra'o khõmi. Lõ Ubini'õ wangombakha sanandrõsa khõ Nama. 26 Ba ginõtõ da'õ mi'andrõ dania khõ Nama ba dõi-Gu; ba lõ Uwa'õ wa Ya'o zangandrõ khõ Nama soguna khõmi, 27 bõrõ me I'omasi'õ ami Ama. I'omasi'õ ami bõrõ me mi'omasi'õ Ndra'o, awõ wa faduhu dõdõmi wa moroi khõ Nama Ndra'odo. 28 Sindruhu moroi khõ Nama Ndra'o, ba no mõi Ndra'o ba gulidanõ. Ba hiza iada'e Urõi gulidanõ ba mangawuli Ndra'o khõ Nama." 29 Aefa da'õ lamane khõ Yesu ira nifahaõ-Nia, "Lõ tobini wahuhuosa-U iada'e, Ama; lõ Õ'oguna'õ gamaedola. 30 Aboto ba dõdõma iada'e wa oi Õ'ila fefu hadia ia; ba lõ moguna lasofu khõ-U hadia ia Ama. Bõrõ da'õ faduhu dõdõma wa moroi khõ Lowalangi Ndra'ugõ." 31 Imane khõra Yesu, "Tenga awena faduhu dõdõmi iada'e? 32 Mitõrõ tõdõmi da'e: so ginõtõnia dania, ba no irugi inõtõ andrõ, tefazawili ami. Mangawuli ami ba nonomi zamõsana, ba mirõi Ndra'o ha tõ Ya'oya'o. Ba hiza, tenga ha Ya'o, bõrõ me fao khõ-Gu Nama. 33 Uwa'õ fefu khõmi da'e ena'õ misõndra wa'ohahau dõdõ bõrõ me ha sambua ami khõ-Gu. Lafakao ami dania niha gulidanõ. Ba mitaha dõdõmi! No Ulawa niha gulidanõ andre!"

17:1 Me no aefa fahuhuo Yesu, Ifaõga hõrõ-Nia miyawa ba mbanua ba Imane, "He Ama, no irugi inõtõnia iada'e. Folakhõmi Nono-U, ena'õ Ifolakhõmi Ndra'ugõ Ono-U gõi. 2 No Õbe'e ba danga Nono wa'abõlõ ba zi sagõrõ ulidanõ, ena'õ Ibe'e wa'auri sindruhundruhu Ono andrõ ba niha nitou'õ ba danga-Nia. 3 Da'e wa'auri sindruhundruhu; ena'õ aboto ba dõdõra Nama, Lowalangi sindruhu, ba aboto ba dõdõra Yesu, Razo Sangorifi nifatenge Nama. 4 No Ufolakhõmi Nama ba gulidanõ andre; ba no U'asiwai halõwõ nibe'e khõ-Gu. 5 He Ama! Folakhõmi Ndra'o iada'e faoma lakhõmi andrõ nirasoi-Gu ba zi fao Ama, fatua lõ muwõwõi gulidanõ andre. 6 No Ufa'ele'õ Nama ba niha gulidanõ andre si no Õtou'õ ba danga-Gu Ama. No okhõta Nama ira, ba no Ibe'e ira khõ-Gu Ama. No la'o'õ wamahaõ Nama. Ba no aboto ba dõdõra iada'e wa fefu nibe'e Nama khõ-Gu no moroi khõ Nama da'õ. 7 Ba no aboto ba dõdõra iada'e wa fefu nibe'e-Mõ khõ-Gu no moroi khõ-U da'õ. 8 No Ufa'ema khõra duria nibe'e Nama khõ-Gu; ba no latema. Aboto sibai ba dõdõra wa moroi khõ-U Ndra'odo awõ wa Ama zamatenge Ya'o. 9 Mangandrõ Ndra'o salahira. Lõ mangandrõ-Do salahi niha gulidanõ andre; mangandrõ Ndra'o ha ba niha nitou'õ ba danga-Gu, bõrõ tana khõ-Gu ira. 10 Fefu zi so khõ-Gu no khõ Nama gõi; ba fefu zi so khõ Nama no khõ-Gu. Tefolakhõmi Ndra'o ba khõra. 11 Mõido khõ Nama iada'e. Lõ torõi Ndra'o sa'ae ba gulidanõ; ba hiza so ira nasa ba gulidanõ. He Ama ni'amoni'õ! Rorogõ ira faoma fa'abõlõ-U, ya'ia wa'abõlõ si no Ibe'e Ama khõ-Gu, ena'õ ha sambua ira, si mane Ama si ha sambua ba khõ-Gu. 12 Me so Ndra'o khõra, no Urorogõ ira faoma fa'abõlõ dõi Nama, -- tõi nibe'e Nama khõ-Gu. No Urorogõ ira nitou'õ ba danga-Gu, ba samõsa lõ si taya ya'ira, baero ndra si no lõ tola lõ elungu; ena'õ alua zi no tesura ba Mbuku Ni'amoni'õ. 13 Iada'e numalõ Ndra'o khõ nama. U'ombakha'õ da'õ fatua so Ndra'o ba gulidanõ; ena'õ sindruhundruhu larasoi wa'omuso dõdõ-Gu. 14 No Ufa'ema khõra wamahaõ Nama, ba fatiu dõdõ niha gulidanõ khõra, bõrõ me tenga tana khõ gulidanõ ira, si mane Ya'o gõi si tenga tana khõ gulidanõ. 15 Lõ U'andrõ ena'õ Õheta ira moroi ba gulidanõ andre, hiza angandrõwa-Gu ena'õ Õrorogõ ira moroi ba danga Gafõkha andrõ. 16 Tenga tana khõ gulidanõ Ndra'o, si mane ya'ira gõi tenga khõ gulidanõ. 17 Faoma fa'aduhu-Mõ Ama, oniagõ ira tana khõ-U; Taroma Li-Mõ zindruhu. 18 Si mane famatenge Nama Ya'o ba gulidanõ; si manõ gõi Ufatenge ira ba gulidanõ. 19 Soguna khõra wa ha khõ Nama Utou'õ Ndra'o, ena'õ sindruhundruhu tobali ira niha nituyu tana khõ Nama. 20 Tenga ha khõra andre mangandrõ Ndra'o. Mangandrõ-Do gõi salahi niha sedõna faduhu dõdõ moroi ba halõwõ famaduhu'õ turia somuso dõdõ andrõ. 21 U'andrõ khõ Nama, ena'õ ha sambua ira, si mane fa ha sambua Nama khõ-Gu ba ha sambua Ndra'o khõ Nama. Ena'õ ha sambua ira fa tola faduhu dõdõ niha gulidanõ wa Ama zamatenge Ya'o. 22 No Ufolakhõmi ira faoma lakhõmi andrõ nibe'e Nama khõ-Gu, ena'õ ha sambua ira ba da'õ, si mane Ama si ha sambua khõ-Gu; 23 si manõ gõi Ndra'odo khõra, ba ha gõi sambua Nama ba khõ-Gu. Bõrõ da'õ aboto ba dõdõ niha gulidanõ andre wa Ama zamatenge Ya'o, awõ wa Õ'omasi'õ ira Ama, si mane fa'omasi-U Ndra'o. 24 He Ama! No Õbe'e ba danga-Gu ira. Omasido na fao ira ba nahia si so Ya'o, ena'õ la'ila lakhõmi-Gu; ya'ia lakhõmi nibe'e Nama khõ-Gu, bõrõ me I'omasi'õ Ndra'o Ama fatua lõ muwõwõi gulidanõ andre. 25 He Ama satulõ! Lõ aboto ba dõdõ niha gulidanõ Nama; ba hiza aboto ba dõdõ-Gu Nama; ba aboto ba dõdõ niha andre wa Ama zamatenge Ya'o. 26 No U'ombakha'õ Nama khõra; ba lõ aetu Ulau zi manõ, ena'õ la'ila gõi wa'omasi Nama ndra'o ba tobali ha sambua Ndra'o khõra."

18:1 Me no aefa mangandrõ Yesu khõ Lowalangi, mofanõ Ia awõ ndra nifahaõ-Nia, la'õtõ mbombo Kidorona. Ba so kabu ba da'õ. Numalõ Yesu awõ ndra nifahaõ-Nia ba kabu andrõ. 2 I'ila Yuda si manga mbõli nahia andrõ, bõrõ me asese so Yesu ba da'õ awõ nifahaõ-Nia. 3 Numalõ gõi Yuda ba da'õ. I'ohe zaradadu awõ zanaro ba Nomo Zo'aya nifatenge ndra ere sebua awõ ndra Farizai'o. La'ohe wandru ba sulu awõ wangõna. 4 I'ila Yesu hadia zedõna alua khõ-Nia. I'ondrasi ndra niha andrõ ba Imane khõra, "Haniha ni'aluimi?" 5 Lamane, "Yesu andrõ, banua Nazareta." Imane khõra Yesu, "Ya'odo da'õ." No muzizio gõi Yuda si manga mbõli andrõ awõra ba da'õ. 6 Me Imane Yesu, "Ya'odo da'õ," awuwu ira furi ba oi alau tou ba danõ. 7 Ifuli zui Isofu khõra Yesu Imane, "Haniha ni'aluimi?" Lamane wanema li, "Yesu andrõ, banua Nazareta." 8 Imane Yesu, "No nasa Uwa'õ Ya'odo da'õ. Ba na sindruhu Ya'o ni'aluimi, akha mofanõ zato andre." ( 9 Ba zi manõ, alua zi no tohõna muwa'õ, imane: "He Ama, samõsa lõ si taya niha nibe'eu ba danga-Gu.") 10 So sara wõda khõ Zimoni Fetero me luo da'õ. Isõbi wõda andrõ ba ihare'õ khõ zawuyu gere sebua irege aetu dalinga kambõlõ. Malikho dõi zawuyu andrõ. 11 Imane khõ Wetero Yesu, "Fuli saembugõ wõda andrõ! Hadia, ba dõdõu lõ omasi-Do Utaõgõ wamakao andrõ nibe'e Nama khõ-Gu?" 12 Lara'u Yesu ira saradadu awõ gomandra ba ira sanaro andrõ niha Yahudi. 13 Si fõfõna la'ohe Yesu khõ Hanasi, ama matua Gayafa. Ere sebua Gayafa ba ginõtõ andrõ. 14 Ya'ia zo'amenesi niha Yahudi wa abõlõ sõkhi ha samõsa zi mate salahi zato moroi na tekiko zi sambua soi. 15 La'o'õ Yesu ira Simoni awõ nifahaõ bõ'õ si samõsa. Ba i'ila ere sebua nifahaõ si samõsa andrõ; andrõ lõ fao ia we'amõi ba golayama nomo gere sebua, 16 ibaloi Fetero baero ba mbawa ndruhõ. Numalõ baero nifahaõ ni'ila gere sebua, fahuhuo ia ba ndra alawe sanaro bawa ndruhõ, ba aefa da'õ i'ohe Wetero si bakha. 17 Muhede ndra alawe sanaro bawa ndruhõ andrõ khõ Wetero imane, "He, hadia tenga ya'ugõ samõsa ba gotalua nifahaõ-Nia gõi?" Imane Fetero, "Tenga." 18 No lahaogõ galitõ ira sawuyu awõ ndra sanaro, ba lalau moleu ba zi fasui alitõ andrõ, bõrõ me okafu hao danõ me inõtõ da'õ. So Wetero ba da'õ woleu ba gotaluara. 19 Ibe'e wanofu ere sebua khõ Yesu sanandrõsa ba nifahaõ-Nia awõ wamahaõ-Nia. 20 Itema li Yesu Imane, "Lõ aetu fahuhuo Ndra'o fõna niha sato. Mamahaõ Ndra'o ba nomo wangandrõ awõ ba nahia gowuloa niha Yahudi. Lõ irai Ubini'õ wanguma'õ hadia ia. 21 Hana wa õsofu khõ-Gu? Sofu khõra si no mamondrongo famahaõ-Gu. Sofu khõra hadia zi no Uwa'õ khõra lõ tola lõ'õ la'ila." 22 Me Imanõ wehede Yesu, samõsa zanaro ba da'õ zamalisi Ya'ia, sanguma'õ, "Ha lõ barani Ndra'ugõ wehede si manõ khõ gere sebua!" 23 Itema li Yesu, "Na no Uwa'õ hadia ia zi fatimba, ombakha'õ hadia zi fatimba andrõ! Ba hiza sindruhu niwa'õ-Gu andrõ, ba hana wa õfalisi Ndra'o?" 24 Aefa da'õ ifatenge niha Hanasi wolohe Yesu khõ Gere Sebua Kayafa, no la bõbõ danga-Nia. 25 No muzizio ba da'õ nasa Wetero woleu ya'ia. Lasofu khõnia niha lamane, "Hadia, tenga ya'ugõ gõi samõsa ba gotalua nifahaõ niha andrõ?" Itimbagõ Fetero. Imane, "Tenga!" 26 Samõsa ba gotalua zawuyu gere sebua andrõ, si fahatõ khõ zawuyu andrõ ni'ewa Wetero talinga, imane, "Hadia, tenga ya'ugõ ni'ilagu zi fao khõ-Nia ba kabu andrõ?" 27 Imane zui Fetero, "Tenga," -- ba faudu sibai ba ginõtõ da'õ miwo manu. 28 Meno aefa da'õ la'ohe Yesu ba nomo gubernur. Ahulõ sibai wongi me inõtõ da'õ. Lõ mõi bakha ba nomo gubernur ndra niha Yahudi. Ena'õ lõ ta'unõ ira molo'õ agama, bõrõ me fao ira wemanga Gõ Fasa. 29 Bõrõ da'õ mõi baero Wilato wanofu khõra imane, "Hadia wangadumi ba niha da'e?" 30 Lamane, "Lõ ma'ohe Ia khõ Gubernur na lõ olalõwa-Nia." 31 Imane Filato khõra, "Mihalõ Ia, mifareso ba mi'etu'õ huku khõ-Nia molo'õ huku agama ba khõmi!" Ba hiza lamane niha Yahudi, "No tetenawa ndra'aga wame'e huku famunu ba niha." ( 32 Alua zi mane faudu ba zi no Iwa'õ Yesu, sanandrõsa ba wa'amate-Nia.) 33 Ifuli mõi bakha ba nomo Wilato ba ikaoni Yesu. Aefa da'õ isofu khõ Yesu imane, "Hadia Ya'ugõ andre Razo niha Yahudi?" 34 Imane wanema li Yesu, "Hadia fanofumõ samõsa da'e Tuha, ma so niha bõ'õ zi no mangombakha khõu sanandrõsa khõ-Gu?" 35 Itema li Filato imane, "Hadia niha Yahudi ndra'odo? Soi-Mõ samõsa awõ ndra ere sebua zame'e Ya'ugõ ba danga-Gu. Hadia zi no Õlau?" 36 Imane Yesu, "Tenga famatõrõ ba gulidanõ andre wamatõrõ-Gu. Na famatõrõ gulidanõ wamatõrõ-Gu, ba molawa niha si fao khõ-Gu ena'õ fabõi tebe'e Ndra'o ba danga niha Yahudi. Ba hiza sindruhu tenga soroi gulidanõ wamatõrõwa-Gu!" 37 Isofu khõnia Filato imane, "Na si manõ hadia sindruhu razo Ndra'ugõ?" Itema li Yesu imane, "Ya'ugõ zanguma'õ wa razo Ndra'odo. Ha sambalõ gohitõ dõdõ wa tumbu ba mõi Ndra'o ba gulidanõ andre, ya'ia, ba wamaduhu'õ sindruhu andrõ. Niha soroi zindruhu andrõ, zamondrondrongo khõ-Gu." 38 Isofu khõnia Filato imane, "Hadia zindruhu andrõ?" Ba mõi baero zui Wilato, imane ba niha Yahudi, "Lõ nisõndragu olalõwa-Nia. 39 Ba hiza molo'õ si to'õlõ u'efa'õ samõsa niha nikuru ba Ngaluo Gowasa Fasa. Hadia, omasi ami u'efa'õ razo niha Yahudi andrõ khõmi?" 40 Latema linia mu'ao ira lamane, "Bõi! Bõi efa'õ Ia! Efa'õ Mbaraba!" (Baraba no samõsa sorabu.)

19:1 Aefa da'õ ifahalõ'õ Yesu Filato ba ifabõzi'õ. 2 Lafazõkhi dakula wa'arazo moroi ba ndroi ira saradadu si so ba da'õ, aefa da'õ labe'e ba hõgõ Yesu. Aefa da'õ lafonukha Yesu faoma baru sobowo doru, 3 la'ondrasi Ia ba lamane, "Ya'ahowu razo niha Yahudi!" Aefa da'õ latafari Ia. 4 Numalõ baero zui Wilato ba imane ba niha sato andrõ, "Ya'e, mifaigi! U'ohe baero Ia iada'e, ena'õ aboto ba dõdõmi wa lõ nisõndra-Gu olalõwa-Nia." 5 Numalõ baero Yesu, no Ifake dakula wa'arazo moroi ba ndroi awõ mbaru sobowo doru andrõ. Imane khõra Filato, "Mifaigi! Ya'e nihania!" 6 Mu'ao ndra ere sebua awõ ndra sanaro me la'ila Yesu, lamane, "Forõfa Ia! Forõfa Ia!" Imane khõra Filato, "Mihalõ Ia ba miforõfa manõ. Ma'ifu lõ nisõndra-Gu olalõwa-Nia." 7 Latema li ira niha Yahudi, "Molo'õ huku si so khõma, nihuku famunu Ia bõrõ me Iwa'õ Ono Lowalangi Ia." 8 Me irongo da'õ Filato abõlõbõlõ nasa wa'ata'unia. 9 Andrõ mõi ia bakha ba nomo ba isofu khõ Yesu imane, "Hezo moroi Ndra'ugõ?" Ba lõ Itema li Yesu. 10 Imane khõnia Filato, "Hadia lõ omasi Ndra'ugõ fahuhuo khõgu? Tõngõni, he! So kuaso khõgu wangefa'õ Ya'ugõ, ba so gõi kuaso khõgu wamorõfa Ya'ugõ!" 11 Itema li Yesu Imane, "Na tenga nibe'e Lowalangi khõu kuaso andrõ, ba ma'ifu lõ kuasou khõ-Gu. Bõrõ da'õ niha same'e Ya'o ba dangau abõlõ ebua horõra moroi khõu." 12 Me irongo da'õ Filato, i'alui lala wangefa'õ Yesu. Ba hiza mu'ao'ao niha Yahudi lamane, "Na õ'efa'õ Ia, tenga awõ Kaizaro ndra'ugõ! Niha sanguma'õ razo ia, no si fa'udu khõ Kaizaro!" 13 Me irongo da'õ Filato, i'ohe baero Yesu, aefa da'õ ilau mudadao ba gurusi wanguhuku sotõi Nibale kara. (Ba li Heberai'o lafotõi Gabata.) 14 Me inõtõ da'õ no arakha laluo; ba tebõrõtaigõ Gowasa Fasa ba zi tanõ owi. Imane Filato ba niha Yehuda, "Ya'e razomi!" 15 Mu'ao ira lamane, "Nibunu Ia! Nibunu Ia! Forõfa Ia!" Imane Filato, "Hadia omasi ami miforõfa Razomi?" Latema li ira ere sebua lamane, "Ha Kaizaro Razo khõma!" 16 Ba ibe'e Yesu ba dangara Filato ena'õ laforõfa. Lahalõ Yesu ba mofanõ ira. 17 La'ohe baero Yesu, I'osa'õ samõsa rõfa-Nia numalõ ba nahia sotõi "Sole Hõgõ". (Lafotõi Gologota ba li Heberai'o.) 18 Ba da'õ laforõfa Ia. So darua danõ bõ'õ awõ-Nia; samõsa ba gambera, samõsa ba gambõlõ ba Yesu ba gotalua. 19 Ba rõfa Yesu, ifawa'õgõ Filato ena'õ lasura, lamane: "Yesu moroi ba Nazareta, Razo Niha Yahudi". 20 Ato niha Yahudi sombaso nisura andrõ, bõrõ me lõ arõu nahia wamorõfa Yesu moroi ba mbanua. Tesura wehede andrõ ba rõfa Yesu ba li Heberai'o, ba li Latina, awõ ba li Yunani. 21 Lamane khõ Wilato ira ere sebua awõ niha Yahudi, "Bõi sura 'Razo niha Yahudi', õmane wanura, 'Imane niha andre, Razo niha Yahudi Ndra'o.' " 22 Itema li Filato imane, "Tebai tebulõ hadia zi no usura!" 23 Me no aefa laforõfa Yesu ira saradadu, lahalõ nukha-Nia. Labagi õfa nukha andrõ: dozi ira manema zamõsana. Lahalõ gõi mbaru-Nia sebua. Lõ tagutagu mbaru sebua andrõ -- nisoso i'otarai moroi yawa numalõ mitou. 24 Faoma lamane khõ nawõra ira saradadu andrõ, "Bõi tataba mbaru sebua andre. Da talau fadahõdahõ wangahonogõi haniha zanõndra baru sebua andre." Alua zi manõ ena'õ itõrõ nisura bakha ba Mbuku Ni'amoni'õ, sanguma'õ: "Labagibagi khõra nukhagu, ba lalau fadahõdahõ ba mbarugu sebua." No lafalua ira saradadu zi manõ. 25 Ba zinga rõfa Yesu no muzizio nina Yesu, talifusõ nina-Nia ira alawe Maria fo'omo Kelofasi, awõ Maria Magadala. 26 Ifaigi nina-Nia Yesu ba no gõi muzizio nifahaõ-Nia ni'omasi'õ ba da'õ. Imane Yesu khõ nina-Nia, "He Ina, faigi, hiza nonou." 27 Aefa da'õ imane Yesu khõ nifahaõ andrõ, "Faigi, hiza ninau." I'otarai da'õ, torõi nina Yesu ba nomo nifahaõ andrõ. 28 Aefa da'õ aboto ba dõdõ Yesu wa no awai fefu hadia ia; faudu ba nisura bakha ba Mbuku Ni'amoni'õ, si lõ tola lõ'õ alua, imane, "Owõkhi dõdõ-Gu." 29 So ba da'õ mako safõnu agu saisõ. La'ungugõ mbunga kara ba nagu andrõ, ba latuwu ba mbalõ geu. La'oro'õ mbunga kara andrõ ba mbewe Yesu. 30 Itandra nagu andrõ ba Imane, "No awai!" Ileagõ hõgõ-Nia ba aetu noso. 31 Luo zumaha me luo da'õ, inõtõ wangõhõna ba Gowasa Fasa. Lõ omasi niha Yahudi na torõi mboto niha niforõfa andrõ irugi luo Sabato. Bõrõ me ngaluo sebua luo Sabato. La'andrõ niha Yahudi khõ Wilato ena'õ itehegõ khõra lafatõ gahe niforõfa andrõ ba labe'e tou moroi ba rõfa. 32 Maoso ndra saradadu lafatõ gahe si fõfõna, aefa da'õ ganete da'õ, darua manõ nawõ Yesu niforõfa. 33 Ba me larugi nahia Yesu, la'ila wa no mate Ia. Andrõ lõ lafatõ gahe-Nia. 34 Lahandro ngai Yesu faoma toho saradadu andrõ; mõi baero ndro si faruka idanõ moroi ba ngai-Nia. 35 Niha sangila ngawalõ zalua andrõ zangombakha fefu da'e, ena'õ faduhu dõdõmi. Ba sindruhu niwa'õnia; i'ila wa sindruhu da'õ. 36 Alua zi manõ ena'õ itõrõ niwa'õ ba Mbuku Ni'amoni'õ, ya'ia wa, "Ma'ifu lõ tõla-Nia nifatõ". 37 No tesura gõi bakha ba Mbuku Ni'amoni'õ, si mane: "Lafaigi Ia niha samahõ Ya'ia." 38 Aefa da'õ i'andrõ Yosefo soroi mbanua Garimatea andrõ khõ Wilato ena'õ itehegõ khõnia wanga'i boto Yesu. (Solo'õ khõ Yesu Yosefo andrõ ba zi lõ oroma, bõrõ me ata'u ia ndra salawa niha Yahudi.) Itehegõ khõnia Filato, mõi Yosefo wanga'i boto Yesu. 39 Mõi gõi Nikodemo fao khõ Yosefo. Ya'ia andrõ zi no irai mõi khõ Yesu ba zi bongi. I'ohe gemuri awõ gaharu Nikodemo. Fa'oya fefu mato tõlu ngafulu kilo wa'oya. 40 Darua ira lahalõ mboto Yesu ba la'olohuni faoma muko ba lalau zamohua molo'õ hada wogo'o niha ba niha Yahudi. 41 So sambua kabu ba nahia wamorõfa Yesu andrõ. Ba kabu andrõ so lewatõ si bohou, si lõ irai mu'oguna'õ wogo'o niha. 42 Me ahatõ lewatõ andrõ awõ wa no ahatõ luo Sabato, andrõ wa labe'e mboto Yesu ba lewatõ andrõ.

20:1 Sahulõ sibai wongi hari Migu, me ogõmi na, numalõ ba lewatõ Maria Magadala. I'ila ba da'õ lagõlagõ lewatõ no tefagaõlõ moroi ba mbawa lewatõ. 2 Fagohi ia wangalui Simoni Fetero awõ nifahaõ tanõ bõ'õ ni'omasi'õ Yesu, imane khõra, "No lahalõ niha mboto Yesu; lõ ma'ila heza labe'e iada'e!" 3 I'anema'õ numalõ Wetero awõ nifahaõ bõ'õ andrõ ba lewatõ. 4 Lalau fagohi darua ira, ba hiza abõlõ alio nifahaõ bõ'õ andrõ moroi khõ Wetero; ofõna ia irugi lewatõ moroi khõ Wetero. 5 Me ifaigi bakha lewatõ, i'ila muko si so ba da'õ, ba hiza lõ mõi sa ia bakha. 6 Aefa da'õ tohare Zimoni Fetero moroi furi, idõlõ bakha ba lewatõ andrõ. Ba i'ila nukha muko si so ba da'õ, 7 ba muko bõbõ hõgõ Yesu lõ hadõi ba da'õ. No tefazaumba muko andrõ. 8 Aefa da'õ mõi gõi bakha ba lewatõ nifahaõ si'ofõna mondrugi no mege. I'ila gõi fefu da'õ ba faduhu dõdõnia. ( 9 Irugi ginõtõ andrõ lõ nasa saboto ba dõdõra nisura ba Mbuku Ni'amoni'õ wa ifuli auri Ia moroi ba wa'amate.) 10 Aefa da'õ mangawuli ndra nifahaõ Yesu andrõ. 11 Ilau me'e Maria ba zinga lewatõ andrõ. Ba fatua ilau me'e, ifaõndrõ ia ba ifaigi bakha ba lewatõ, 12 ba i'ila darua mala'ika sobaru safusi. No dumadao mala'ika andrõ ba nahia mboto Yesu mege. Si samõsa dumadao ba gamaudu hõgõ, ba si samõsa tõ dumadao ba gamaudu gahe. 13 Lasofu ira mala'ika andrõ khõ Maria, "He Ina, hana wa me'e ndra'ugõ?" Itema li Maria imane, "No lahalõ niha Zo'aya ya'o, ba lõ u'ila heza labe'e Ia!" 14 Me no aefa iwa'õ da'õ Maria ifaigi furi ba i'ila Yesu no muzizio ba da'õ. Ba hiza lõ aboto ba dõdõnia wa Yesu da'õ. 15 Isofu khõnia Yesu Imane, "He Ina, hana wa me'e ndra'ugõ? Haniha ni'aluimõ Ina?" Iwalinga tuka kabu niha andrõ Maria. Andrõ imane Maria, "He Ama, na no õfawu'a Ia moroi ba da'e, ombakha'õ khõgu heza õbe'e Ia. Mõi ndra'o dania wanga'i Ya'ia." 16 Imane Yesu khõ Maria, "He Maria!" Ifaigi Yesu Maria ba imane ba li Heberai'o, "Rabuni!" (Eluahania "Guru".) 17 Imane Yesu khõ Maria, "Bõi babaya Ndra'o. Bõrõ me lõ si mõi Ndra'o khõ nama. Ae'e khõ ndra talifusõ-Gu ba ombakha'õ khõra, õmane. Mõi Ndra'o khõ Nama-Gu ba amami gõi; khõ Lowalangi-Gu ba Lowalangimi gõi." 18 Numalõ Maria wangombakha khõ ndra nifahaõ Yesu wa no i'ila Zo'aya awõ wa no Iwa'õ fefu da'õ khõnia So'aya. 19 Me luo Migu andrõ gõi, me bongi, no so ndra nifahaõ Yesu ba zi sambua omo si no mukusi fefu mbawa ndruhõ; bõrõ me ata'u ira ndra salawa niha Yahudi. I'anema'õ tohare Yesu ba muzizio Ia ba gotaluara, ba Imane, "Ya'ohahau dõdõmi!" 20 Me no aefa Iwa'õ da'õ, Iforoma'õ khõra danga awõ dõla nosu-Nia. Ba omuso sibai dõdõra me la'ila Zo'aya. 21 Ifuli Imane khõra Yesu, "Ya'ohahau dõdõmi! Si mane famatenge Nama Ya'o, si manõ gõi dania wamatenge-Gu ami." 22 Me no aefa Iwa'õ da'õ Ihehaini ira hanuhanu-Nia ba Imane khõra, "Mitema Geheha Lowalangi. 23 Na so ni'efa'õmi horõ, ba I'efa'õ da'õ Lowalangi. Ba na so zi lõ mi'efa'õ horõ, ba lõ gõi I'efa'õ da'õ Lowalangi." 24 Toma (nifotõi si "Faero") samõsa ba gotalua nifahaõ Yesu. Lõ hadõi Toma me mõi Yesu khõ ndra nifahaõ-Nia. 25 La'ombakha'õ khõ Toma ira nifahaõ tanõ bõ'õ lamane, "No ma'ila Zo'aya!" Itema li Toma imane, "Na lõ ni'ilagu lahe gosõ'osõ ba danga-Nia ba na lõ ubabaya ngai-Nia, ba lõ faduhu dõdõgu." 26 Ba fitu bongi aefa da'õ, so ndra nifahaõ Yesu ba nomo andrõ, ba so gõi Doma ba da'õ. No muduhõ fefu mbawa ndruhõ. Ba i'anema'õ tohare Yesu ba muzizio Ia ba gotaluara, Imane, "Ya'ohahau dõdõmi!" 27 Aefa da'õ Imane Yesu khõ Doma, "Be'e dangau ba da'e, ba faigi danga-Gu. Oro'õ dangau ba babaya ngai-Gu. Bõi mangiwa sa'ae dõdõu. Ya faduhu dõdõu sa'ae!" 28 Imane Toma khõ Yesu, "So'aya ya'o! Ba Lowalangigu!" 29 Imane Yesu khõnia, "Hadia faduhu dõdõu bõrõ me no õ'ila Ndra'o? Ya'ahowu niha si faduhu tõdõ khõ-Gu, hewa'ae lõ i'ila Ndra'o!" 30 Wa oya nasa zahõlihõli dõdõ nilau Yesu fõna ndra nifahaõ-Nia, ba hiza lõ musura fefu zahõlihõli dõdõ andrõ bakha ba zura andre. 31 Musura fefu da'e ena'õ faduhu dõdõmi wa Yesu andrõ no Razo Sangorifi nifabu'u Lowalangi, Ya'ia andrõ Nono Lowalangi. Ba wa'afaduhu dõdõ khõ-Nia misõndra wa'auri ba wa'abõlõ-Nia.

21:1 Aefa da'õ ifuli Iforoma'õ Ia Yesu samuza tõ khõ ndra nifahaõ-Nia ba mbawa Diberia. Si mane wangoroma'õ-Nia Ya'ia: 2 Samuza ma'õkhõ owulo ndra Simoni Fetero ba Toma nifotõi si Faero, ba Natanaeli moroi ba Kana ba danõ Galilea, iraono Zebedai'o, awõ darua tõ nifahaõ Yesu tanõ bõ'õ. 3 Imane Simoni Fetero ba danõ bõ'õ andrõ, "Mõi ndra'o manga'i i'a." Lamane tanõ bõ'õ khõnia, "Fao gõi ndra'aga." Mofanõ ira, momõi yawa ba dundraha. Ba hiza sara wongi lõ ahulu ira, sara i'a lõ lasõndra. 4 Me ibõrõtaigõ tumbu luo, tohare Yesu, no Ilau muzizio ba gawu; ba hiza lõ la'ila wa Yesu da'õ. 5 Imane khõra Yesu, "He iraono, hadia so khõmi gi'a?" Latema li, lamane, "Lõ'õ." 6 Imane khõra Yesu, "Milau ndrialami tanõ ba gambõlõ dundraha, ba misõndra dania gi'a." Lalau ndrialara ba nidanõ, ba hiza tebai ira wondrõni mangawuli bõrõ wa'oya gi'a bakha ba ndriala. 7 Imane nifahaõ ni'omasi'õ Yesu andrõ khõ Wetero, "Hiza Zo'aya!" Me irongo Fetero wanguma'õ, "Hiza Zo'aya!", i'anema'õ ifake mbarunia sebua mangawuli (bõrõ me no iheta mbaru sebua andrõ khõnia) ifazaumba ia bakha ba nidanõ. 8 La'o'õ ia ira nifahaõ bõ'õ faoma tundraha numalõ ba danõ, awõ wa ladõni ndriala andrõ safõnu i'a. Lõ arõu i'otarai danõ so ira, ha mato otu mete. 9 Me mõi ira tou moroi ba dundraha, la'ila galitõ awõ gi'a yawa; ba so gõi roti ba da'õ. 10 Imane khõra Yesu, "Mi'ohe ba da'e mato ha'uga rozi gi'a nisõndrami." 11 Numalõ ba dundraha Zimoni, ba idõni ndriala yawa ba danõ. Afõnu ndriala andrõ i'a segesolo; otu a lima wulu a tõlu rozi wa'oya fefu. Ba hewa'ae oya gi'a andrõ, ba lõ asika ndriala. 12 Imane khõra Yesu, "Mi'aine manga ita." Ba samõsa lõ si barani ba gotalua ndra nifahaõ wanofu khõ-Nia, "Haniha Ndra'ugõ andre, Ama?" Bõrõ me no la'ila Ia wa So'aya. 13 Ihatõ'õ Ia khõra Yesu ba Ihalõ roti andrõ, ba Ibe'e khõra. Si manõ gõi wolau-Nia ba gi'a andrõ. 14 Da'e zi medõlu kali I'oroma'õ Ia Yesu khõ ndra nifahaõ-Nia me no auri Ia mangawuli moroi ba wa'amate. 15 Me no aefa manga ira, Imane Yesu khõ Zimoni Fetero, "He Simoni ono Yohane, hadia abõlõ omasi ndra'ugõ Ndra'o moroi ba niha andre?" Itema li Fetero imane, "Ya'ia, So'aya. Õ'ila wa u'omasi'õ Ndra'ugõ." Imane khõnia Yesu, "Kubaloi mbiribiri-Gu." 16 Ifuli Isofu khõnia Yesu no mendrua kali, "He Simoni ono Yohane, hadia õ'omasi'õ Ndra'o?" Imane Fetero, "Ya'ia So'aya. Õ'ila wa u'omasi'õ Ndra'ugõ." Imane khõnia Yesu, "Kubaloi mbiribiri-Gu." 17 Ba zi medõlu kali Isofu khõnia Yesu, "He Simoni ono Yohane, hadia omasi'õ Ndra'o?" Ifuli zui itema li Fetero, "He So'aya, no Õ'ila fefu hadia ia. Õ'ila wa u'omasi'õ Ndra'ugõ!" Imane Yesu khõ Wetero, "Kubaloi mbiribiri-Gu. 18 Sindruhundruhu niwa'õ-Gu khõu: Me ono matua na ndra'ugõ, ba ya'ugõ zama'anõ ya'ugõ ba numalõ ndra'ugõ ba zomasi'õ. Ba hiza na no atua ndra'ugõ dania, ba õ'oro'õ dangau wangandrõ tolo ba niha bõ'õ wama'anõ ya'ugõ ba ba wolohe ya'ugõ ba nahia si lõ omasi'õ." 19 (Faoma fehede andrõ I'oroma'õ Yesu hewisa wa'amate Wetero dania ba wamolakhõmi Lowalangi.) Aefa da'õ Imane Yesu khõ Wetero, "Tabu o'õ Ndra'o!" 20 Me ifakhõlõ ia Fetero, i'ila moroi furi nifahaõ ni'omasi'õ Yesu. (Ya'ia andrõ zi dadao ba zinga Yesu me manga ira, sanofu khõ Yesu, "He So'aya, haniha zi manga mbõli Zo'aya?") 21 Me i'ila nifahaõ andrõ Fetero, isofu Fetero khõ Yesu, "He So'aya, hewisa dania niha andre?" 22 Itema li Yesu Imane, "Na omasido auri ia irugi mangawuli Ndra'o, hana õhalõ fõkhõ hõgõu da'õ. O'õ manõ Ndra'odo!" 23 Tobali tehõngõ duria ba gotalua ndra nifahaõ Yesu wa lõ mate dania nifahaõ andrõ. Ba hiza sindruhunia tenga da'õ niwa'õ Yesu wa lõ mate dania nifahaõ andrõ; Da'e niwa'õ Yesu: "Na omasido auri ia irugi mangawuli Ndra'o, hana wa õhalõ fõkhõ hõgõu!" 24 Nifahaõ andrõ zamaduhu'õ fefu salua andrõ. Ya'ia gõi zanura. Ba aboto ba dõdõda wa sindruhu niwa'õnia andrõ. 25 Oya nasa ngawalõ nilau Yesu. Ba na muzarazara fanura, uwa'õ tõdõgu ambõ zi sagõrõ ulidanõ andre nahia mbukubuku nisura andrõ.