1 A Tekoi a di mla ngar ngii er uchei er a lobeob a beluulchad; ng ulebengkel a Dios el di osisiu ngii ma Dios. 2 Ser a kot el uchul e a Tekoi a ulebengkel a Dios. 3 Ng uleak ngii e a Dios a riruul a bek el tekoi. Ng dimlak a ngerang el obeob el dimlak loeak ngii. 4 Ngii el Tekoi a uchelel a klengar, e ngii el klengar a ngiluu a llomes el mer a re chad. 5 Me ngii el llomes a dmiich er a ilkolk, e a ilkolk a dirkak lokodir a kerdel ngiil llomes. 6 A Dios a ulderchii oderchelel, el ngklel ngii el chad a Johanes, 7 me ng mlei el ouchais er a re chad er a chisel ngiil llomes, me le rokui el rongesii ngiil klumech e bo loumera er ngiil llomes. 8 A Johanes a diak el ngii a llomes, ng di mlei el ouchais a chisel a llomes. 9 Tiaikid a meral ngiil llomes, el llomes el mer a beluulchad e dmiich el mor a rokui el chad. 10 A Tekoi a mlar a beluulchad, e a Dios a ulekiu ngii el mebii a beluulchad, e ngdi beluulchad a dimlak bo lodengelii. 11 Ng mlei el mlor a meral belual, e ngdi re chedal a dimlak el sorir el nguu. 12 E ngdi ngar ngii a re bebil el mle sorir el nguu e mlo oumera er ngii, misei e ng milsterir a llemeltir el mo ngelekel a Dios. 13 Ng dimlak bo le ngelekel a Dios el oeak a cheroll er a klechad, el okiu a uldedelid el rasech, e te mlo ngelekel el Dios a rirelleterir el mo ngelekel. 14 Ngiil Tekoi a mlo chad, e kiliei er a delongeled el kmal mle chubechubchad e kmal mle chad er a klemerang. Kede milsa klebkellel, el klebkall el mlar a Chedam el mor a di tal Ngelekel. 15 A Johanes a uluuchais a chisel. Ng uleldiu el kmo, “Ngkaikid ngikel kuluuchais a chisel er ser a kdu el kmo, ‘Ng oeak uriul er ngak el mei, e ngdi kuk ngarbab er ngak, ele uchei er a kmechell e ngii a di mla ngar ngii.’” 16 Ng okiu a klou el klechubechub er ngii e di blechoel el omekngeltengat er kid el rokui. 17 A Dios a milskid a Llach el okiu a Moses, e ngdi krasia ma klemerang a ngar a Jesus Kristus el mei. 18 Ng dirkak a chad el mesa Dios; ng di ngikel di tal Ngelekel el ngar bita er a Chedam, a mla ochotii er kid a Dios. 19 A re mengeteklir a re chad er a Judea el mlar a Jerusalem a uldercheterir a re bebil prist ma re chad er a kleblillel a Levi el mo oker er a Johanes el kmo, “Kau ke techang?” 20 Ma Johanes a dimlak lomart er ngii e bai mle bleketakl el melekoi el kmo, “Ngak a diak Mesias.” 21 Me toker er ngii el kmo, “A le ua isei, e ke techang? Kau ke Elias?” Ma Johanes a dmu el kmo, “Ng diak, ngak a diak Elias.” Me toker el kmo, “Kau ke ngii el Profet?” Me ng dmu el kmo, “Ng diak.” 22 Me te dmu el kmo, “Mada msbedemam el kmo ke techang. Ng kiram el mo onger er tirkel uleldurech er kemam. Me ng ngera ke dmung el ochotau el kmo ke techang?” 23 Ma Johanes a millekoi a le dilu Profet Isaia el kmo, “Ngak a ngerel ngikel oldiu er a ked el kmo, ‘Mlemeltii a rael el bo loeak ngii a Rubak!’” 24 Me tir el oderuchel el luleldurech er tir a re Farisi 25 okere er a Johanes el kmo, “A lsekum ng diak ke Mesias, el diak mElias, el diak mngii el profet, e ngera uchul me ke melecholb er a re chad?” 26 Ma Johanes a dilu el kmo, “Ngak a melecholb er a re chad el olab a ralm, e ngdi ngar ngii a dechor er a delongeliu el diak modengelii. 27 Ngii oeak uriul er ngak el mei, e ngdi ngak a diak kungil el mo kirel a mengedoked a surel oecherel.” 28 A ikal rokui el tekoi a dilubech er a Bethania er sel mo bedul ongos er a Omoachel Jordan, el le mlar ngii a Johanes e melecholb er a re chad. 29 E a bo le kukuk e a Johanes a mesenge Jesus el merael el mor ngii me ng dmu el kmo, “Ngkekid a Ngelekel a Sib er a Dios el melubet a kngtil a beluulchad! 30 Ngkaikid ngikel kullekoi er ngii er ser a kdu el kmo, ‘Ng ngar ngii a chad el oeak uriul er ngak el mei, el kuk ngarbab er ngak, ele uchei er a kmechell e ngii a di mla ngar ngii.’ 31 Ng dimlak kudengelii el kmo ng techang, ak di mlei el melecholb el oba ralm el kirel el olecholt er ngii el mor a re chad er a Israel.” 32 A Johanes a ullecholt el kmo, “Ak milsa Chedaol Reng el ua teletelel a belochel el mlar a eanged el me metengel er ngii. 33 Ng dirrek el dimlak bo kudengei el kmo ngkaikid, ngdi Dios, el ulderchak el mo melecholb er a re chad el olab a ralm a dilu er ngak el kmo, ‘Ngikel chad el bo mesa Chedaol Reng el mo metengel er ngii, ngikei a mo melecholb er a re chad el oba Chedaol Reng.’” 34 A Johanes a dilu el kmo, “Ak mla mesang, ma kuuchais el kmo ingii a Ngelekel a Dios.” 35 A bo le kukuk e a Johanes a dirrek el dilechor el obengterir a re teru er a rultirakl er ngii 36 e mesa Jesus el mo engelakl me ng dmu el kmo, “Ngkekid a Ngelekel a Sib er a Dios!” 37 Me tirkal terung el ulebengkel a Johanes a rirengesii er a lolekoi me te mlo oltirakl er a Jesus. 38 Ma Jesus er a le beltii, e ng milseterir el okiuellel me ng uleker el kmo, “Ng ngera kom osiik er ngii?” Me te dilu el kmo, “Rabi, (el belkul a kmo “Sensei”) ke kie er ker?” 39 Me ng dula er tir el kmo, “Mei me mesang.” Ng mle bekord el eual klok er a cheldecheos me tulebengkel el mo mesa le kiei er ngii, e ulebengkel el mo kebesengei. 40 A tar tirkel terul chad a Andreas el tar a Simon Petrus. 41 Me ng di mle mereched el mo sikii a tar ngii er a Simon e ouchais er ngii el kmo, “Aki mla metik er a Mesias.” (A belkul tial tekoi a kmo “Kristus.”) 42 E sola me ng chilteklii a Simon el mor a Jesus. Ma Jesus a ulengengii e dmu el kmo, “Kau a Simon el ngelekel a Johanes. A ngklem a mo Sefas.” (Tia di osisiu ngii ma Petrus el belkul a kmo “risois.”) 43 A bo le kukuk e a Jesus a mirrael el mor a Galilea. Ng miltik er a Filip me ng dmu er ngii el kmo, “Mei me dedak el merael!” 44 (A Filip a chad er a Bethsaida, e tia dirrek el belual a Andreas ma Petrus.) 45 A Filip a miltik er a Nathanael me ng uluuchais er ngii el kmo, “Aki mla metik er ngikel lulluches a chisel a Moses er a babier er a Llach ma re profet me te dirrek el milluches a chisel. Ngika Jesus el ngelekel a Josef er a Nasareth.” 46 Ma Nathanael a uleker el kmo, “Ng ngeral klungiaol a ngar ngii er a Nasareth?” Ma Filip a dilu el kmo, “Ka mei me mesang.” 47 Ma Jesus a milsa Nathanael el merael el mor ngii me ng melekoi el kirel el kmo, “Ngike meral chad er a Israel, el diak a telingaol er a rengul!” 48 Ma Nathanael a uleker er ngii el kmo, “Ke mlekera e mo medengelkak?” Ma Jesus a dilu er ngii el kmo, “Uchei er a lokedongau a Filip e ngak a milsekau er ser cho mngar eungel a kerrekar el fig.” 49 Ma Nathanael a dilu el kmo, “Sensei, kau a Ngelekel a Dios! Kau a King er a Israel!” 50 Ma Jesus a dilu el kmo, “Kau koumerang ele ngak el dilu er kau el kmo ak milsekau er cho mngar eungel a kerrekar el fig? Ke mo omes a lmuut el mengasireng el tekoi er tial bla mosang!” 51 E dilu er tir el kmo, “Ak meral melekoi el kmo, kom mo mesa eanged el blok e a re anghel er a Dios a mo ngmasech e me metengel er a Ngelekel a Chad.”
1 Erul klebesei er uriul er itiang e ng mlar ngii a merengel a chebechiil er a beluu er a Kana er a Galilea. Ma delal a Jesus a mlar isei, 2 e a Jesus ma rubengkel a dirrek el lulengemedaol er tir el mor a merengel a chebechiil. 3 Ng mlo diak a bilong ma delal a Jesus a dilu er ngii el kmo, “Ng mla mo diak a bilong er tir.” 4 Ma Jesus a dilu er ngii el kmo, “Ngera me ke mengesang er ngak el kirel tiang? Ng dirkak bo le belsechel el kuruul a ngerang.” 5 Itia e a delal a Jesus a dula er a re mesiou el kmo, “A ikel bo ledu er kemiu cho bo mruul.” 6 A re chad er a Judea a mlar ngii a llecherir el kirel omengikiid er tir, me ng mlar ngii er isei a kllolem el bekai el rruul er a bad el chimo er ngii a 20 el mor 30 el kalong a ultikllel. 7 Ma Jesus a dilu er a re mesiou el kmo, “Mokeek a ikal bekai er a ralm.” Me te milekeek el mor a tkul, 8 e ngii a dmu er tir el kmo, “Ka bo mnga sesei er a ralm el mo msa ngikel oungerachel er tial merengel a chebechiil.” Me te ngila ralm el mla obult el mo bilong 9 el mo msang, me ng milengarm. Ng dimlak lodengei el kmo ng mlar ker el mei ngii el bilong (ngdi tirkel mesiou el millecheseb ngii el ralm a mle medengei); me ngii el chad a milekedongii ngikel mlar ngii a merengel a chebechielel 10 e dmu er ngii el kmo, “A re bek el chad a di ma omuchel el otebedii sel kot el ungil bilong, e uriul er a bla le mechetelaol a re chad, e toltobed ku ikel diak el sal ungil. Ngdi kau a ulematek er sel kot el ungil bilong el mer chelechang!” 11 Tial kot el mengasireng el tekoi a le rirellii a Jesus er a beluu er a Kana er a Galilea; ng ulechotii a klebkellel er isei, ma rubengkel a mlo oumera er ngii. 12 A uriul er itiang e ng dilak ngii ma delal, ma re tar ngii, ma rubengkel el mor a Kapernaum e kiliei er ngii el telal klebesei. 13 Tia er a bo lekeed a Chedaol Sils er a Baskua er a re chad er a Judea, e a Jesus a mlor a Jerusalem. 14 Ng miltik er a re chad el olterau er a Templo a kerbou, ma sib, ma belochel, ma re ngar a tebelir el merukem a udoud. 15 Me ng rirellii a ekil el mo chelebed e ulebang el oltobed a rokui el charm el mlar a Templo, el sib ma kerbou; e militech a tebelir a re merukem a udoud e mriid a ududir; 16 e dmu er a rulterau a belochel el kmo, “Mnga ikal otobed er tiang! Lak moruul er a blil a Demak el mo blil a makit!” 17 Ma rubengkel a liltkii a lolekoi er ngii a Chedaol Llechukl el kmo, “A bltkil a renguk el kirel a blim e Dios a ua ngau el kmard er a renguk el soal el mekodkak.” 18 Tirkel mengeteklir a re chad er a Judea a uleker er ngii el kmo, “Ng ngeral mengasireng el tekoi a sebechem el rullii el ochotii er kemam el kmo kau a kirem el meruul a ikel cho moruul?” 19 Ma Jesus a dilu er tir el kmo, “Mongkengkii tial Templo, e kluut el mekedecherur er a di chelsel edel klebesei.” 20 Me tuleker er ngii el kmo, “Ke lmuut el mekedecherur er a di chelsel edel klebesei? Tial Templo a mle 46 el rak el lomekedechor er ngii!” 21 A Jesus a millekoi er a templo el bedengel. 22 Misei e ser a le bekiis er a kodall, e a rubengkel a liletkii tial le dillii er tir, me te mlo oumera Chedaol Llechukl ma tekingel a Jesus. 23 A Jesus er ser a le ngar a Jerusalem er a belsechel a Chedaol el Sils er a Baskua, e te betok el chad a mlo oumera er ngii er ser a le ues a ikel mengasireng el tekoi el le riruul. 24 E ngdi Jesus a dimlak le chitii el mo chederdall er a re chad, ele ng mle medenge blekerdelir a rokui el chad. 25 Ng dimlak lousbech er a tar a chad el ouchais er ngii, ele ng di mle ngii el medengei el kmo ng ngera ngar a rengrir.
1 Ng mlar ngii a tal mengeteklir a re chad er a Judea el Nikodemus a ngklel, el mle chad er a cheldebechel er a re Farisi. 2 A tal kesus e ng mlor a Jesus e dmu er ngii el kmo, “Rabi, aki medengei el kmo kau a sensei el mlar a Dios el mei. Ng diak a chad el sebechel el remuul a ikel moruul el mengasireng el tekoi a lak le Dios obengkel.” 3 Ma Jesus a dilu el kmo, “Ak meral melekoi er kau el kmo, a chad a lak lluut el mechell e ng diak el sebechel el mesa Rengedel a Dios.” 4 Ma Nikodemus a uleker el kmo, “Ng mekera e sebechel a mla mo klou el chad el lmuut el mechell? Ng diak el sebechel el soiseb er a delel a delal e lluut el mechell!” 5 Ma Jesus a dilu el kmo, “Ak meral melekoi er kau el kmo, a chad a lak le mechell er a ralm ma Chedaol Reng e ng diak el sebechel el soiseb er a Rengedel a Dios. 6 A klengar er a klechad a ngar a chedam ma chedil el mei e ngdi klengar er a reng a ngar a Chedaol Reng el mei. 7 Lak le mechas a rengum er sel kdillii er kau el kmo ng kiriu el rokui el lmuut el mo mechell. 8 A eolt a melokou er sel soal ngar ngii me korrenges er a rrekel, e ngdi diak modengei el kmo ng mlar ker el mei ma lechub e ng mor ker. Ngikel mechell er a Chedaol Reng a ua ise blekerdelel.” 9 Ma Nikodemus a uleker el kmo, “Tiang mekera e sebechel el mo ua isei?” 10 Ma Jesus a dilu el kmo, “Kau ke ngarbab el sensei er a Israel e diak modengelii tiang? 11 Ak meral melekoi er kau el kmo, aki mengedecheduch a ikel kim modengei el tekoi e ouchais a ikel bla kimues, e ngdi diak a tar kemiu el oumera tekingam. 12 Ng diak moumera er ngak a kungedecheduch er kau a tekoi er tial beluulchad; e mekera e mo oumera er ngak a bo kungedecheduch er kau a tekoi er a eanged? 13 Ng dirkak a chad el ngmasech el mor a eanged, ngdi tal Ngelekel a Chad, el ngikel mlar a eanged el mei.” 14 A Ngelekel a Chad a kirel mo mekider, el di ua Moses er ser a le kiderii a bersoech el deel er a ked, 15 me tirkel rokui el mo oumera er ngii a mo oba diak a ulebengelel klengar. 16 Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel. 17 Ele Dios a dimlak loldurech er a Ngelekel el me omals er a beluulchad, e ng bai mlei el me olsobel er a beluulchad. 18 Me ngikel oumera er a Ngalek a diak lobals; ngdi ngikel diak loumerang a mla obals, ele uchul e ng diak loumera er a di tal Ngelekel a Dios. 19 A kerrekeriil a ultuil er tial tekoi el kmo, a llomes a mla mei er a beluulchad, e ngdi re chad a kuk sorir a ilkolk er a llomes, ele ngii el mekngit omerellir. 20 Ngikel meruul a mekngit el tekoi a chetil a llomes me ng diak le bor a llomes, ele ng chetil a bo lecholt a mekngit el omerellel. 21 Ngdi ngikel meruul a melemalt er medal a Dios a mer a llomes ma llomes a ochotii el kmo a omerellel a oltirakl a tekingel a Dios. 22 Uriul er itiang e a Jesus ma rubengkel a mlor a beluu er a Judea; ng ulebengterir el ngar sei el telkib e millecholb er a re chad. 23 A Johanes a dirrek el millecholb er a re chad er a Anon, el di kmeed er a Salim, ele ng mle betok a ralm er ngii. A re chad a mlor ngii me ng millecholb er tir. 24 (Tia mle uchei er a le siseb er a kelebus a Johanes.) 25 A re bebil er a rubengkel a Johanes ma tal chad er a Judea a mlo kaititekangel el kirel a tekoi er omengikiid. 26 Me te mlor a Johanes e dmu er ngii el kmo, “Sensei, ke dirk melatk er ngikel chad el muluuchais a chisel, el ulebengkem er sel mo bedul ongos er a Omoachel Jordan? Chelechang e ng melecholb er a re chad, ma re bek el chad a di mocha er ngii!” 27 Ma Johanes a dmu el kmo, “A chad a diak el sebechel el mor ngii a ngera er ngii a lak el Dios a nguu el msang. 28 Kemiu a sioning er ngak er ser a kdu el kmo, ‘Ngak a diak Mesias, ak di mlodurech el oeak uchei er ngii el mei.’ 29 A redil el mo bechiil a mor ngikel sechal el mo bechil; ngdi sechelil ngikel mo bechiil el chad a ungil a rengul sel le dechor e lorrenges er a ngerel a sechelil. Me ngak a ua isei el mla mo cherrungel a deuil a renguk. 30 Ngii a kirel el mengal mo merael a chisel e ngak a mo diak a remenges a chisek.” 31 Ngikel ngar bab el mei a ngarbab er a rokui el chad. Ngikel ngar a chutem el mei a chad er a chutem me ng mengedecheduch a tekoi er a chutem, ngdi ngikel ngar a eanged el mei a ngarbab er a rokui el chad. 32 Ng mengedecheduch a lulemes ma lulerrenges, e ngdi diak a chad el mo olab a tekingel. 33 Ngdi ngikel mo olab a tekingel a ochotii el kmo a Dios a melekoi a klemerang. 34 Ngikel lulderchii a Dios a mengedecheduch a tekingel a Dios, ele Dios a msa Chedaol Reng er ngii el diak lolengesonges. 35 A Chedam a betik a rengul er a Ngalek me ng mla msa rokui el tekoi me ng mo chederdellel. 36 Ngikel oumera er a Ngalek oba diak a ulebengelel klengar; e ngikel diak lorrenges er a Ngalek a diak loba klengar; ng bai di mo obals er a Dios el diak a ulebengelel.
1 A re Farisi a rirenges el kmo a Jesus a beteknga re chedal e mla tochelbeterir a re kuk betok el chad er a lullecholb er tir a Johanes. 2 (Ngdi Jesus a dimlak a tal chad el le techelbii; a rubengkel a millecholb er a re chad.) 3 Me ser a le renges a ikal tekingir a re chad, e ng tilobed er a Judea e lmuut el mor a Galilea; 4 ma omerolel el mong e ng mle kirel el okiu a Samaria. 5 Ser a le ngar a Samaria e ng mlor a beluu el Sikar a ngklel, el dimlak le cheroid er sel sers el le ngiluu a Jakob el msa ngelekel er a Josef. 6 E a chido er a Jakob a mlar isei ma Jesus a mle mesaul a bedengel er omerael me ng mlo dengchokl er bita er ngii. Seikid e ng bekord sueleb a sils. 7 A tal redil er a Samaria a mlo mela ralm ma Jesus a dilu er ngii el kmo, “Beskak a bebil er a ralm me kulim.” 8 (E a rubengkel a mla merael el mor a chelsel a beluu el mo omechar a kall.) 9 Me ngii el redil a dilu el kmo, “Kau a chad er a Judea me ngak a chad er a Samaria, ng mekera e sebechem el olengit a imelem er ngak?” (A re chad er a Judea a diak lousbech a osisiu el kob ma belatong el bla lousbech a re chad er a Samaria.) 10 Ma Jesus a dilu el kmo, “Chomko ke medengelii sel lomeskid a Dios e medengelii ngikel olengit a ilumel er kau, e ke bai olengit er ngii me ng meskau a ralm el omekngar.” 11 Me ngii el redil a dilu el kmo, “Rubak ng kor a diak a baket el mobang me tial chido dmolech. Ke mo melai er ker a ralm el omekngar? 12 A uchelam er a Jakob a milskemam tial chido; e ngii ma re ngelekel ma betok el delebechel el chermel a millim er ngii. Kau ke kmo ke kuk ngarbab er a Jakob?” 13 Ma Jesus a dilu er ngii el kmo, “Ngikel melim er tial ralm a lmuut el mo meched a rengul, 14 e ngdi ngikel melim er sel ralm el bo kbsang a kmal diak lluut el mo meched a rengul. Sel ralm el bo kumsang a mo ngar a chelsel el ua madedok el mo omsa ralm el omekngar e msa diak a ulebengelel el klengar.” 15 Me ngiil redil a dilu el kmo, “Rubak, beskak ngii el ralm! A cho beskak e ng mo diak lluut el mo meched a renguk, e mo diak be kulai a ralm er tiang.” 16 Ma Jesus a dilu er ngii el kmo, “Morael el mo okerir a bechim e mluut el mei.” 17 Me ng dilu el kmo, “Ngak a diak a bechik.” Ma Jesus a dilu el kmo, “Ng meral tekoi cho mdu el kmo ng diak a bechim. 18 Ng mla mo teim el chad cho bo becherir, e ngikel mobengkel kiei er chelechang a diak le meral bechim. Ng meral tekoi a ikel bla mdu er ngak.” 19 Me ngiil redil a dula el kmo, “Rubak, ak umtab el kmo ke profet. 20 A ruchelek el chad er a Samaria a milengull el meluluuch er a Dios er tial rois, e ngdi kemiu a re chad er a Judea a kmo ng kiram el mengull el meluluuch er a Dios er a Jerusalem.” 21 Ma Jesus a dmu er ngii el kmo, “Moumera ikal kulekoi el kmo a tar a klebesei e a re chad a mo mengull el meluluuch er a Chedam el ka le ngar tial rois ma lechub e le ngar a Jerusalem. 22 Kemiu a re chad er a Samaria a diak modengelii cho mongull el meluluuch er ngii; ngdi kemam a re chad er a Judea a medengelii a kim mongull el meluluuch er ngii, ele osobel a mei el okiu a re chad er a Judea. 23 Ngdi ng mor ngii a belsechel, el ngii el belsechel a ngar ngii er tiang er chelechang el re chad a mo meral mengull el meluluuch er a Chedam el oba Reng er a Dios, ele Chedam a soal a le ua isei el mengull el meluluuch er ngii. 24 A Dios a Reng, me ng di Reng er ngii a lokiu ngii e ng mo sebechir a re chad el meral mengull el meluluuch er ngii.” 25 Me ngii el redil a dilu er ngii el kmo, “Ak medengei el kmo a Mesias a mei, me sel le mei, e ng mo ouchais er kid a bek el tekoi.” 26 Ma Jesus a dilu el kmo, “Ngak el mengedecheduch er kau a ngii el Mesias.” 27 Tiaikid e a rubengkel a Jesus a luuta el mei, me ng kmal mlo mechas a rengrir er ngii er a le betik er ngii el mengedecheduch er a redil. Ngdi dimlak a tar tir el oker er ngii el redil el kmo, “Kau ng ngera soam?” ma lechub e luleker er a Jesus el kmo, “Ngera uchul me ke mengedecheduch er ngii?” 28 Itia e ngikal redil a milechere olmelel e lmuut el merael el mor a beluu e melekoi er a re chad el kmo, 29 “Ka mei me bo mesa tal chad el mla dmu er ngak a bek el tekoi el kurruul. Ng kol locha ngii a Mesias?” 30 Me te tilobed er a beluu el mor a Jesus. 31 E tiaikid e a rubengkel a Jesus a ullengit er ngii el kmo, “Sensei, momengur!” 32 Ngdi ngii a dilu el kmo, “Ng ngar ngii a kall el kungang el diak modengei.” 33 Ma rubengkel a mocha kakerker el kmo, “Ng kol ngar ngii a mla msa kelel?” 34 Ma Jesus a dilu er tir el kmo, “A kall el kunga er ngii a sel kutireklii a soal ngikel ulderchak e krekir sel ureor el le bilskak. 35 Ngar ngii er omelekingiu el kmo, ‘Ng dirk medechel eual buil e ng mochu belsechel omeridm.’ Ngdi ngak a dmu er kemiu el kmo, bo mungil el mes a ikel sers; a dellomel a mla mo meduch el mla mo kirel el doridm! 36 A chad el meridm er a sim a nguu omeksullel e chemudel a dellomel el kirel a diak a ulebengelel klengar; me ng ua isei el ngikel melalem ma meridm a dul dmeu a rengrir. 37 Ele ng mera sel omelekoi el kmo, A tar a chad a melalem, e a kuk tang a meridm.’ 38 Ak uldurech er kemiu el mo meridm er a sers el diak a ureriu er ngii; te ngodech el chad a uluureor er ngii, e kemiu a mo melai a redechel a meringel el urerir.” 39 Te betok el chad er a Samaria a mlo oumera er a Jesus ele ngii el redil a dilu el kmo, “Ng mla dmu er ngak a bek el tekoi el kurruul.” 40 Ma re chad er a Samaria er a le bor a Jesus, e te kmal ullengit er ngii me le kiei el obengterir, me ng kiliei el erul klebesei. 41 A re lmuut el betok el chad a mlo oumerang el tekingel a uchul, 42 me te dilu er ngii el redil el kmo, “Chelechang e aki mla mo oumerang el diak le ikel mullekoi a uchul, aki bai mla rongesii maki mocha medengei el kmo ngii a meral Osobel er a beluulchad.” 43 A bocha le merek erul klebesei e a Jesus a mirrael el mor a Galilea. 44 Ngdi mle ngii el melekoi el kmo, “A profet a diak lechat er ngii er a belual.” 45 Me ser a le bor a Galilea e a re chad er isei a mle sorir, ele ser a le bor a Chedaol Sils er a Baskua er a Jerusalem e te miles a ikel bek el le riruul. 46 A Jesus a liluut el mor a Kana er a Galilea el sel le mlar ngii e mult a ralm el mo bilong. E a tal ofiser er a kabelment el mlar isei a mlar ngii a ngelekel el silecher el ngar a Kapernaum. 47 Me ser a le renges el kmo a Jesus a mlar a Judea el mor a Galilea, e ng mlong e ullengit er ngii me le bor a Kapernaum e lomekungil er a ngelekel el sechal el medkung. 48 Ma Jesus a dilu er ngii el kmo, “Ng diak a tar kemiu el mo oumerang a lak momes a mengasireng el tekoi ma kuk ngodech el tekoi.” 49 Me ngii el ofiser a dmu el kmo, “Rubak, mei er uchei er a le mad a ngelekek.” 50 Ma Jesus a dilu er ngii el kmo, “Morael el mong, e a ngelekem a diak le mad!” Me ngii el chad a uluumera tekingel a Jesus me ng mirrael. 51 Me ng dirk ngar omerolel el mo remei e a re mesiungel a ulsiueklii e ouchais er ngii el kmo, “A ngelekem a sobelang!” 52 Me ng uleker er tir er a taem er a lorael el mo mesisiich a ngelekel, me te dilu el kmo, “Ng mle tal klok er chelii er a chodechosong e ng mlo diak a kleldelel.” 53 Me tiaikid e a demal ngii el buik a lotka el kmo ng kmal seikid el osisiu el taem er a ledu er ngii a Jesus el kmo, “A ngelekem a diak le mad!” Seikid e ngii ma telungalek er ngii el rokir a mlo oumera er a Jesus. 54 Tia mong me ng ongeru er a mengasireng el tekoi el le rirellii a Jesus er a Galilea er ser a le ngar a Judea el mong.
1 A uriul er itiang e a Jesus a mlor a Jerusalem el mor a chedaol el sils er a re chad er a Judea. 2 E mlar ngii a diosech el Bethesda ngklel er a Hebru, el mlar bita er a sisebellel a sib er a Jerusalem, el mlar ngii a kleim el olengrull er ngii. 3 Ma re betok el smecher el meiko, ma re chitechut ocherir, ma re mechitechetong er a rakt a milechiuaiu er a ikel olengrull e mengiil er a ralm sel bo longitengtik. 4 Ele ng ngar ngii a belsechel e a anghel er a Rubak a mo metengel er ngii el diosech el chodermotii, me ngikel smecher el kot el mor a chelsel ngii el diosech er uriul er a le mechederemaot, ngikei a mo ungil er a rektel. 5 E mlar ngii a tal chad el ngar isei el mocha 38 el rak el le secher. 6 Ma Jesus er a lesang el mechiuaiu er sei e ng mle medengei el kmo ngii el chad a meketeketang el le secher; me ng uleker er ngii el kmo, “Ng soam el mo ungil er a rektem?” 7 Me ngii el chad a dilu el kmo, “Rubak, sel le mechederemaot a ralm e ng diak a ngoikak el mor a chelsel a diosech. Sel kulasem el leko kmochung, e a tar a chad a kuk ma mong.” 8 Ma Jesus a dula er ngii el kmo, “Bekiis el ngma berum e morael.” 9 Me ng di mle mereched el mekiis ngiil chad el ngma berul e merolang. E tial sils a mle Ulengull el Sils, 10 ma re mengeteklir a re chad er a Judea a dilu er ngii el chad el mlo ungil er a rektel el kmo, “Ng Ulengull el Sils, me ng omtok er a Llach er kid a cho molab a berum el merael.” 11 Me ng dilu el kmo, “Ngikel chad el ulemekungil er ngak a dilu er ngak mak ngma beruk el merael.” 12 Me tuleker er ngii el kmo, “Ng techa dilu er kau me ke meruul er choua isel tekoi?” 13 Ngdi ngii el chad el mlo ungil er a rektel a dimlak lodengelii el chad a Jesus, e mle klou a seked er isei, ma Jesus a mla oibngii el merael. 14 E a uriul e a Jesus a miltik er ngii er a Templo me ng dilu er ngii el kmo, “Chelechang e ke mla mo ungil me lak mluut el mo meruul a mekngit; ele cho bong, e a klou el mekngit ekor kau.” 15 Itia e ngii el chad a tilobed e mlo ouchais er a re mengeteklir a re chad er a Judea el kmo ng Jesus a ulemekungil er ngii. 16 Mitia e te mocha omekcharm er a Jesus ele ng rirellii tial tekoi er a Ulengull el Sils. 17 Ma Jesus a dilu er tir el kmo, “A Demak a blechoel el di oureor, me ngak ma kdirrek el kirek el oureor.” 18 Tial le dillii el tekoi a rirelleterir a re mengeteklir a re chad er a Judea el mengal mo sorir el omekoad er ngii; ele ng diak di le tilemellii a llechul a Ulengull el Sils e le merekong; ng bai dirrek el dilu el kmo a Dios a Demal ma le ua isei e ng meruul er ngii el mo osisiu ngii ma Dios. 19 Seikid e a Jesus a dilu er tir el kmo, “Ng meral tekoi a ikal kulekoi er kemiu el kmo, a Ngalek a diak a ngeral sebechel el di ngii el meruul er ngii; ngdi meruul a ikel lomes er a Demal el meruul. A ikel loruul a Chedam a dirrek el loruul a Ngalek. 20 A Chedam a betik a rengul er a ngalek me ng olecholt er a Ngalek a ikel rokui el loruul. A Chedam a mo ocholt er ngii a bo loruul el tekoi el kuk meklou er tiang, me ng mo mechas a rengmiu. 21 A Chedam olekiis er a re chad er a kodall e omesterir a klengar, me ng dirrek a Ngalek el mo ua ingii el omesterir a klengar tirkel mo ungil er a rengul. 22 A Chedam a diak loukerrekeriil er a ngii di le chad. Ng mla msa Ngalek a ngerachel el oukerrekeriil, 23 ma rokui el chad bo longull er a Ngalek el di ua longull er a Chedam. Ngikel diak longull er a Ngalek a diak longull er a Chedam el ngikel ulderchii a ngalek. 24 “Ng meral tekoi a ikal kulekoi er kemiu, ngikel orrenges a tekingek e oumerang er ngikel ulderchak a oba diak a ulebengelel klengar. Ng diak bo le mukerrekeriil, ele ng mla engelakl er a kodall el mor a klengar. 25 Ng meral tekoi a ikal kulekoi er kemiu el kmo, ng mor ngii a belsechel, el ngii el belsechel a mla mei, el tirkel mla mad a mo rongesii a ngerel a Ngelekel a Dios, e tirkel mo rongesii a lmuut el mo chad. 26 A Chedam a uchul a klengar, me ng mla rullii a Ngalek el mo uchul a klengar el di ua ingii. 27 E mla msa Ngalek a ngerachel el oukerrekeriil, ele uchul e ngii el Ngelekel a Chad. 28 Lak le mechas a rengmiu er tiang, e a belsechel a mei el tirkel rokui el mla mad a mo rongesii a ngerel 29 me te mo tuobed er a debellir; e tirkel mirruul a ungil a mo mekiis el mo nguu a klengar, e tirkel mirruul a mekngit a mo mekiis el mo medebeakl. 30 “Ng diak a ngeral sebechek el meruul er ngii el oba di klisichek; ngdi sel ledu er ngak a Dios e ak uukerrekeriil, me ng melemalt a kerrekerilek, ele ng diak kulasem el meruul er sel di soak, e ak bai meruul er a soal ngikel ulderchak. 31 “A lsekum a ochotek a di kirek, e a kulekoi a diak le meral ocholt. 32 E ngdi ng ngar ngii a tar a chad el olecholt el kirek, e ngak a medengei el kmo a lolekoi el kirek a klemerang. 33 A Johanes el ngikel muleldurech er a rudercheliu el mor ngii, a milengedecheduch a tekoi el kirel a klemerang. 34 Ngak a diak kuusbech er a chad el olecholt er ngak; ak di melekoi er tial tekoi me bo le sebechiu el mo suobel. 35 A Johanes a ua olbidel el kilard e medidiich a kerdel, me ng mle ungil a rengmiu er a llemesel el di mle tedeb. 36 Ngak a ngar ngii olecholt er ngak el kuk ngarbab er sel ocholt el lullecholt er ngii a Johanes, a ikel le bilskak a Demak el ureor mak meruul, a ikei a smodak, e ochotak el kmo ak mlodurech er a Chedam. 37 Ma Chedam el ulderchak a dirrek el olecholt er ngak. Kemiu a dirkak mrengesii a ngerel el ka bla mesa medal, 38 ma lechub e molab a tekingel er a rengmiu, ele kemiu el diak moumerang er ngikel lulderchii. 39 Kom mesuub a Chedaol Llechukl ele kom omdasu el kmo kom metik er a diak a ulebengelel klengar er a chelsel. E a ikal Chedaol Llechukl a ouchais a chisek! 40 Ng diak el somiu el mer ngak me bo mnguu a klengar. 41 “Ngak a diak kusiik odengesir a re chad. 42 Ak medengei el kmo kemiu kom ua ngeral chad, e dirrek el medengei el kmo ng diak a bltikerreng er a rengmiu el kirel a Dios. 43 Ak mlei el oba klisiich er omerreder er a Demak, e ngdi dimlak el somiu ngak; e ngdi le ngar ngii a mei el oba di klisichel er omerreder, e ng mo somiu. 44 Kemiu a di somiu el kaiuedanges, e bai diak molasem el mo modanges er ngikel di ngii el tang a Dios; ma le ua isei, e ng diak el sebechiu el mo oumerang er ngak. 45 Kele molatk el kmo ak mo oltutakl er kemiu er a Demak. A Moses, el ngikel ngar ngii omeltkiu er ngii a mo oltutakl er kemiu. 46 Chomko kom meral mlo oumera ikel lullekoi a Moses, e kom dirrek el oumera er ngak, ele Moses a milluches a chisek. 47 Ngdi chelechang el diak moumera ikel lulluches, e ng dirrek el diak el sebechiu el mo oumera ikel kulekoi.”
1 Uriul er itiang e a Jesus a mlo imuul er a bital Daob er a Galilea, el dirrek el lomekedong er ngii el kmo Daob er a Tiberias. 2 A klou el seked a uleltirakl er ngii ele te miles a mengasireng el tekoi el le riruul el omekungil er a re smecher. 3 Ma Jesus a mlo ngmasech er a bukl e mlo dengchokl el obengterir a rubengkel. 4 Seikid e ng kmeda belsechel a Chedaol Sils er a Baskua. 5 A Jesus a ulemerk er osengel e milsa klou el seked el merael el mer ngii, me ng uleker er a Filip el kmo, “Ngar ker a sebeched el mo omechar a kall er ngii el mo omeka er tirkal rokui el chad?” 6 (Tia lullekoi er ngii el di mengarm er a Filip; e ngdi ngii a mle medengei a ikel bo loruul.) 7 Ma Filip a dilu el kmo, “Ng kuk mo betok er 200 el udoud el silber a bo dengai el mechar a blauang, e te di mo ngar a dertelkib.” 8 Ma kuk tar a rubengkel, el Andreas el tar a Simon Petrus, a dilu el kmo, 9 “Ng ngar ngii a buik el ngar tiang el olab a kleim el blauang ma erul ngikel. Ngdi ikei a kmal ngesonges er tirkal rokui el chad.” 10 Ma Jesus a dula er tir el kmo, “Mdu er a re chad me bo le dengchokl.” Ng mle betok a chudel er isei ma rokui el chad a mlo dengchokl. Ng mlar ngii a bekord el 5 ,000 el sechal. 11 Ma Jesus a ngilai ngii el blauang, e mirreng a sulel a Dios, e ng merous el mor a re chad el dilengchokl. Ng dirrek el mle ua ise ngikel, me te rokui el milengang el mor a ikel sorir. 12 Ser a le medngesa el rokui, e ng dilu er a rubengkel el kmo, “Mchudel a der; ng diak a di telkib el de chitii.” 13 Me te chiludel el rokui e milekeek a truich ma erul sualo el derengel a ikel kleim el blauang el lulenga re chad. 14 Ma re chad er a lesa tial mengasireng el tekoi el le rirellii a Jesus, e te dilu el kmo, “Ng ulterekokl el ngkaikid ngii el Profet el mle kirel el mei er a beluulchad!” 15 E a Jesus a mlo medengei el kmo te mochu orreked er ngii e orrimel er ngii el mo king; me ng liluut el ngoseklii e mlo ngmasech er a bukl el di mle ngii el tang. 16 Ma bocha le kebesengei e a rubengkel a Jesus a mlo metengel er a daob, 17 e doiderekl er a bos, e mo imuul er a daob el mirrael el bedul a Kapernaum. Ng mlo milkolk e a Jesus a dirrek el dirkak le bong. 18 E sola e mlor ngii a mesisiich el eolt el milechereuii a daob. 19 A rubengkel a Jesus a mileius el bekord edei ma lechub e ng eual mael, e mesa Jesus el merael er bebul a daob, e olekeed el mor ngii el bos, me te kmal mlo medakt. 20 Ma Jesus a dilu er tir el kmo, “Ng ngak, me lak kom medakt!” 21 Itia e ng mlo ungil a rengrir el otekir er a bos, e di mle mereched a bos er tir el mor sel beluu el lullatk el mor ngii. 22 E a bo le kukuk e tial seked er a re chad el di kiliei er a bitang a ulemtab el kmo ng di mle tal bos a ngar sei. Te mle medengei el kmo a Jesus a dimlak lobengterir a rubengkel el merael, ele ng di mle tir el tang er a lorael. 23 Ngdi mlar ngii a kuk bebil er a bos er a Tiberias el mlor sel tkul a daob el kmeed er sel le mlar ngii a re betok el chad e menga blauang el lurreng a saul a Rubak e mesterir. 24 Ma re chad er a bo lodengei el kmo a Jesus ma rubengkel a mle dibus, e te ngilasech er a ikel bos e merael el mor a Kapernaum el osiik er a Jesus. 25 A re chad er a bo le iuul e le betik er a Jesus er sel bitang e tuleker er ngii el kmo, “Sensei, ke mler tiang er oingerang?” 26 Ma Jesus a dilu el kmo, “Ng meral tekoi a ikal kulekoi er kemiu, kemiu a diak mosiik er ngak ele kom mlo ungil medengei a mengasireng el tekoi el kriruul, kom bai osiik er ngak ele kom milenga blauang el kmal mlo medinges. 27 Lak moureor el kirel a metemall el kall; e bai moureor el kirel a kall el di ngar ngii el diak a ulebengelel. Ngii el kall a bo lomeskemiu a Ngelekel a Chad, ele Dios el Chedam a mla tutkii el mo kirel ngii el tekoi.” 28 Itia e tuleker er ngii el kmo, “Ng mekera e mo sebecham el remuul a soal a Dios?” 29 Ma Jesus a dilu el kmo, “A Dios a soal cho bo moumerang er ngikel lulderchii.” 30 Me te dilu el kmo, “Ng ngeral mengasireng el tekoi cho bo mruul maki mes e mo oumera er kau? Ng ngera ke mo remuul? 31 A rucheled a milenga mana er a ked el di ua ikel lolekoi a Chedaol Llechukl el kmo, ‘Ng milsterir a blauang er a eanged me te mengang.’” 32 Ma Jesus a dilu el kmo, “Ng meral tekoi a ikal kulekoi er kemiu. A le bilskemiu a Moses a diak le blauang er a eanged; ele ng Demak ngikel omeskemiu a meral blauang er a eanged. 33 A blauang el lomeskemiu a Dios a ngikel mlar a eanged el me metengel e omsa beluulchad a klengar.” 34 Me te dilu er ngii el kmo, “Rubak, di blechoel el omeskemam ngii el blauang.” 35 Ma Jesus a dilu er tir el kmo, “Ngak a blauang er a klengar. Ngikel mer ngak a kmal diak bo le sengerenger; me ngikel oumera er ngak a kmal diak bo le meched a rengul. 36 Ngdi kdilu er kemiu el kmo, kom mla mesekak e diak bo moumerang. 37 Tirkel rokui el le beskak a Demak a mer ngak. Ngak a kmal diak bo kuldik er a ngii di le chad a le mer ngak, 38 ele ngak a mlar a eanged el mei el diak be kuruul a soak, e ak bai meruul a soal ngikel ulderchak. 39 E a soal ngikel ulderchak a kmo, lak kuridii a tar tirkel le bilskak, e bai bo kukiseterir el rokui er a kodall el mor a klengar er sel uriul sils. 40 A Demak a soal a rokui el chad el mesa Ngalek e mo oumera er ngii me bo le nguu a diak a ulebengelel klengar. E ngak bo kukiseterir er a kodall er sel uriul sils.” 41 Ma re chad a mocha mengeremrum er ngii ele ngii el dilu el kmo, “Ngak a blauang el mlar a eanged el mei.” 42 Te millekoi el kmo, “Ngika Jesus el ngelekel a Josef, ada ng diak? Kede medengelii a demal ma delal. Ngera me ng ua isei, e chelechang e ng melekoi el kmo ng mlar a eanged el mei?” 43 Ma Jesus a dilu el kmo, “Le mereko omengeremrum er a delongeliu. 44 Ng diak a chad el sebechel el mer ngak a lak le Chedam el ngikel ulderchak a mekrolii el mer ngak; e ngak a mo okisii er a kodall er sel uriul sils. 45 A re profet a milluches el kmo, A Dios a mo olisechakl er a re bek el chad.’ Ma ngii di le chad el rongesii a Chedam e mesuub er ngii a mer ngak. 46 Ng dirkak a chad el mesa Chedam; ngdi ngikel mlar a Dios el mei a di ngii el tang a mla mesa Chedam. 47 Ng meral tekoi a ikal kulekoi er kemiu el kmo, ngikel oumera er ngak oba diak a ulebengelel klengar. 48 Ngak a blauang er a klengar. 49 A rucheliu a milenga mana er a ked, e ngdi te di mlad. 50 Ngdi ngikel mo menga er ngii el blauang er a klengar el mlar a eanged el mei a diak bo le mad. 51 Ngak ngii el blauang er a klengar el mlar a eanged el mei. Me ngikel menga er ngii el blauang a mo ngar el diak a ulebengelel. A blauang el bo kbsang a techel a bedengek, el kumsa beluulchad me bo le nguu a klengar.” 52 Tia milechelii a meringel el klaititekangel er a delongelir a re chad, me tuleker el kmo, “Ngikal chad ng mekera e meskid a techel a bedengel me kede menga er ngii?” 53 Ma Jesus a dilu er tir el kmo, “Ng meral tekoi a kulekoi er kemiu, a lsekum ng diak monga er a techel a bedengel a Ngelekel a Chad e diak molim er a rsechel, e ng diak le bor ngii a meral klengar er kemiu. 54 Ngikel menga er a techel a bedengek e melim er a rsechek a oba diak a ulebengelel klengar, me ngak a mo okisii er a kodall er sel uriul sils. 55 Ele techel a bedengek a meral kall; ma rsechek a meral ilumel. 56 Ngikel menga er a techel a bedengek e melim er a rsechek a kiei el ngar ngak, me ngak a kiei el ngar ngii. 57 A di ngar el Chedam a ulderchak, me ng ngii a uchul e ak dirrek el di ngar. Me ng ua isei el ngikel menga er ngak me ng dirrek el mo ngar el ngak a uchul. 58 Tiaikid ngii el blauang el mlar a eanged el mei; ng diak le ua sel blauang el lulenga er ngii a rucheliu, e uriul e te mlad. Ngikel menga er tial blauang a mo ngar el diak a ulebengelel.” 59 A Jesus a millekoi a ikang er a lolisechakl er a blil ongdibel er a Kapernaum. 60 A re betok er a re chad el uleltirakl er ngii a rirenges a lolekoi me te dilu el kmo, “Tia kmal meringel el osisechakl. Ng techa sebechel el orrenges er ngii?” 61 Ng dimlak a mo ouchais er a Jesus, e ngdi ngii a mle medengei el kmo tirkel uleltirakl er ngii a mengeremrum el kirel ngii el tekoi me ng dilu er tir el kmo, “Tia ng choitechut a rengmiu? 62 Chomko kom mo mesa Ngelekel a Chad el lmuut el mor sel le mlar ngii er a ngar a mong, e ng kol mo ua ngera blekerdeliu? 63 A Reng er a Dios a omekngar; e a klisichel a chad a diak a ngeral le rellii. A ikal tekoi el bla kdu er kemiu a ngar ngii er ngii omekngar el Reng er a Dios. 64 E ngdi re bebil er kemiu a diak loumerang.” (Ng di mle uchelel e a Jesus a medengelterir a re diak bo loumerang me ngikel mo olterau er ngii.) 65 Me ng liluut el melekoi el kmo, “Tiaikid a mle uchul mak millekoi er kemiu el kmo ng diak a chad el sebechel el mer ngak a lak le Chedam a rullii el mo sebechel el mer ngak.” 66 Tiaikid a mle uchul e a re betok el chad el uleltirakl er a Jesus a mlo cheroid er ngii e dimlekea le sorir el lmuut el mo obengkel. 67 Me ng uleker er a re truich ma teru el obengkel el kmo, “E kemiu, ng dirrek el mla mo somiu el merael?” 68 Ma Simon Petrus a dilu el kmo, “Rubak, ng techa ki bor ngii? Kau olab a tekoi er a diak a ulebengelel klengar. 69 Aki mocha oumerang e mocha medengei el kmo kau Ingii el Chedaol el mlar a Dios el mei.” 70 Ma Jesus a dilu el kmo, “Ng dimlak kulilt er kemiu el truich ma terung? E ngdi tar kemiu a diabelong!” 71 Ng millekoi el kirel a Judas el ngelekel a Simon Iskariot. Ele Judas a mle tar a re truich ma terung el obengkel a Jesus, e ngdi mlo olterau er ngii.
1 Uriul er itiang, e a Jesus a di mlar a beluu er a Galilea, e dimlak el soal el mor a Judea ele tirkel mengeteklir a re chad er a Judea a mlo sorir el omekoad er ngii. 2 Tiaikid e ng kmeda Chedaol Sils er a Delidui, 3 ma re tar a Jesus a millekoi er ngii el kmo, “Morael el mor a Judea, me tirkel oltirakl er kau bo lomes a ikel tekoi el moruul. 4 Ng diak a chad el omart a loruul a lsekum ng soal a re chad a bo lodengelii. Me chelecha el moruul a ikal tekoi, e berekii a chisem er a beluulchad el rokir.” 5 (A re tar ngii me ng dimlak loumera er ngii.) 6 Ma Jesus a dilu er tir el kmo, “Ng dirkak bo le kirek el mong. Ngdi kemiu a di sebechiu el mor a bek el taem. 7 A beluulchad a diak el sebechel el mo ouketui er kemiu, e ngdi ngak a louketui er ngak, ele kdi melekoi er ngii el kmo ng mekngit omerellel. 8 Morael el mor a chedaol el sils. Ngak a diak kbor tial chedaol sils, ele ng dirkak bo le kirek el mong.” 9 A ika le dilung e sola e di kiliei er a Galilea. 10 Ma re tar a Jesus a mirrael el mor a chedaol sils, e uriul e a Jesus a dirrek el mlong, e ngdi dimlak lolecholt er ngii er a re chad. 11 A re mengeteklir a re chad er a Judea a ulsiik er ngii er sel chedaol sils. Tuleker el kmo, “Ng ngar ker?” 12 Ng mlar ngii a klou el klakelulau er a chelsel a seked el kirel a Jesus. A re bebil er a re chad a melekoi el kmo, “Ngike ungil chad,” e a re kuk bebil a kmo, “Ng diak lungil chad. Ngike mengebelung er a re chad.” 13 E ngdi dimlak a chad el klou a ngerel el ouchais a chisel a Jesus, ele te mle medakt er a re mengeteklir a re chad er a Judea. 14 Tial le bochu er a melengel ongdibel er a chedaol sils, e a Jesus a mlor a Templo e mocha olisechakl. 15 Ma re mengeteklir a re chad er a Judea a kmal mlo mechas a rengrir e dmu el kmo, “Ngikal chad el dirkak a tal le bor a skuul, ng milekera e mo medengei a kmal betok el tekoi?” 16 Ma Jesus a dilu el kmo, “A ikel kullisechakl a diak di losisecheklek; ng bai osisecheklel a Dios, el ngikel ulderchak. 17 Ngikel soal el meruul a soal a Dios a mo medengei el kmo a ikel tekoi el kulisechakl ng ngar a Dios el mei ma lechub e ak mengedecheduch el oba di klisichek. 18 A chad el mengedecheduch el oba di klisichel a soal a re chad a bo lechat er ngii. E ngdi ngikel soal a bo lechat er ngikel ulderchii a melemalt omerellel, me ng diak a cheleblad er a rengul. 19 A Moses ng dimlak le beskemiu a Llach? Ngdi diak a tar kemiu el uleltirakl ngii el Llach. Ngera uchul me kom melasem el omekoad er ngak?” 20 Ma re chad a dilu el kmo, “Kau a telechull er a mekngit el chelid! Ng techa melasem el omekoad er kau?” 21 Ma Jesus a dilu el kmo, “Ng di mle tal mengasireng el tekoi ak rellii, e ng mo mechas a rengmiu el rokui. 22 A Moses a uleldurech er kemiu el omotk olangch er a re ngelekiu el sechal (e tial omeruul a diak le Moses a milechelii; ng bai tirkel ucheliu er a ngar a mong er ngii a milechelii), me kom omotk olangch er a ngalek el sechal er a Ulengull el Sils. 23 A lsekum kom melemolem a Llechul a Moses me kom omotk er a ngalek el sechal er a Ulengull el Sils, e ngera uchul me ng kesib a rengmiu er ngak ak umekungil er a chad er a rektel a le Ulengull el Sils? 24 Lak momdasu a tekoi el okiu a ikel di moues er a mad, e bai lultuil er a meral tekoi.” 25 A re bebil chad er a Jerusalem a uleker el kmo, “Ng diak le ngkaikid ngikel chad el lolasem el omekoad er ngii a re mengeteklel a beluu? 26 Ka mesang, ng di chemolt el mengedecheduch er a re chad e tir a diak a ngeral ledung! A re mengeteklel a beluu a locha mocha medengei el kmo ng meral Mesias. 27 Ngdi Mesias a le mei, e ng diak a medengei el kmo ng mlar ker el mei. E kid el rokui a medengelii a le mlar ngii ngikal chad el mei.” 28 Me ser a lolisechakl a Jesus er a Templo e ng mle klou a ngerel el melekoi el kmo, “Kom meral medengelkak e medengelii ak mlar ngii el mei? Ngak a mlei el diak kuba di klisichek. Ng meral ngar ngii a ulderchak. E kemiu a diak modengelii, 29 ngdi ngak a medengelii, ele ng ulderchak mak mlar ngii el mei.” 30 Itia e te mocha melasem el omdechem er ngii, e ngdi dimlak a chad el orekedii, ele ng dirkak le mei a belsechel. 31 E ngdi te betok el chad er a chelsel a seked a uluumerang er ngii me te dilu el kmo, “Sel le mei a Mesias e ng kuk mo betok el mengasireng el tekoi a leruul er a ikal loruul ngikal chad?” 32 A re Farisi a rirenges a ikal tekoi el ble le kakelulau a re chad el kirel a Jesus, me tir ma re bderrir a re prist a uldercheterir a re mengkar er a Templo el mo omdechem er ngii. 33 Ma Jesus a dilu el kmo, “Ak dirk obengkemiu el telkib e sola e merolu el mor ngikel ulderchak. 34 Kom mo osiik er ngak, e diak ko betik er ngak, ele ng diak el sebechiu el mor sel kbor ngii.” 35 Ma re mengeteklir a re chad er a Judea a mle kakerker el kmo, “Ngika ng locha merolu el mor ker me ng mo diak de betik er ngii? Ng locha mor a ikel le kiei er ngii a re chedad el belurir a re chad er a Gris, e mo olisechakl er a re chad er a Gris? 36 Ng melekoi el kmo kede mo osiik er ngii e diak de betik er ngii, e dmu el kmo ng diak el sebeched el mor sel le bor ngii. Ng ngera belkul a ikal tekingel?” 37 Sel ulebongel sils er a chedaol sils el ngii a kmal klou a belkul, e a Jesus a mlo dechor e klou a ngerel el melekoi el kmo, “Ngikel meched a rengul le mer ngak e lolim. 38 Ng di ua ikel lolekoi a Chedaol Llechukl el kmo, ‘Ngikel oumera er ngak, a mo omaoch er a rengul el me tuobed a ua omoachel el ralm er a klengar.’” 39 Tia lullekoi er ngii a Jesus el melutk er a Chedaol Reng el bo lolai er ngii tirkel mlo oumera er ngii. Seikid e a Chedaol Reng a dirkak le mei ele Jesus a dirkak le ngasech el mo nguu a klebkellel er a Dios. 40 A re bebil er a re chad er a chelsel ngii el seked er a le rengesii el melekoi a ikang e te dilu el kmo, “Ngikal chad a meral ngii a Profet!” 41 Ma re bebil a dilu el kmo, “Ng ngii a Mesias!” Ngdi re kuk bebil a dilu el kmo, “A Mesias a diak le ngar a Galilea el mei! 42 A Chedaol Llechukl a melekoi el kmo a Mesias a mo uldidellel a rsechel a King David me ng mo mechell er a Bethlehem, el sel beluu el le kiliei er ngii a David.” 43 Itia e ng ulebii a seked el Jesus a uchul. 44 A re bebil er a re chad a mlo sorir el omdechem er ngii, e ngdi dimlak orekedii. 45 Ma lleta el mei a re bulis, e a re bderrir a re prist ma re Farisi a uleker er tir el kmo, “Ngera uchul me ng dimlak mnguu el mei?” 46 Ma re bulis a dilu el kmo, “Ng dirkak a chad el mengedecheduch el ua ingikal chad!” 47 Ma re Farisi a dilu el kmo, “Ng dirrek el mla chodeng a rengmiu? 48 Ng ngar ngii a mengeteklir a re chad ma lechub e ng Farisi el modengelii el mla mo oumera er ngii? 49 Tirkal betok el chad a diak lodenge Llechul a Moses, me te mo medebeakl er a Dios!” 50 A Nikodemus, el mlo omes er a Jesus er a tar a klebesei, a mle tar tirkel Farisi el mlar isei, me ng dilu er tirkel bebil er ngii el kmo, 51 “A doltirakl a Llechud e ng diak el sebeched el omals er a chad er uchei er a derenges omesodel e bo dodengei a le tilemall.” 52 Me te dilu el kmo, “Each, kau, ke dirrek el chad er a Galilea? Bo mosiik er ngii er a Chedaol Llechukl me bo modengei el kmo ng diak a profet el ngar a Galilea el mei.”
1 Itia e a re chad a mlo kairirei, e ngdi Jesus a mlor a Rois er Olib. 2 E a bo le kukuk e ng ulemkokl el mor a Templo, ma re chad a mlo kldibel er ngii me ng mlo dengchokl e mocha olisechakl er tir. 3 E a re sensei er a Llach ma re Farisi a uleba tal redil el mong el le biltik er ngii el ngar a laokreng, me te ngiluu el mong el mekedecherur er mederir a rokui el chad, 4 e dmu er a Jesus el kmo, “Sensei, ngikal redil aki biltik er ngii el ngar a laokreng. 5 A Moses a melekoi el ngar a Llechud el kmo a ua isei el redil a kirel el obetech er a bad el mad. E kau, ke kmo ngerang?” 6 A ika lullekoi el omedikl er a Jesus me bo le sebechir el otuteklii. Ngdi ngii a mlo terrob e oba chimal el meluches er a chutem. 7 E tir a diak lorael e di oker er ngii, me ng tometial mo dechor e dmu er tir el kmo, “Ngikel diak a kngtil er kemiu le kot el ometech.” 8 E sola e liluut el mo terrob e meluches er a chutem. 9 Ser a le renges a ikal tekoi, e te rokui el mirrael, el uluuderta er tir el tuobed, el ulemuchel er a re meklou el chad. Ng di mlo Jesus a medechel, me ngii el redil el dirk mle dechor er isei. 10 Ma Jesus a tilemetii el mo dechor e uleker er ngii el redil el kmo, “Te ngar ker tirkel chad? Ng dimlak a kiei er tir el mo omals er kau?” 11 Me ng dilu el kmo, “Ng diak e Rubang.” Ma Jesus a dilu el kmo, “Me ngak me ng diak bo kumals er kau. Morael, ngdi kele mluut el mor a klengit.” 12 A Jesus a liluut el mengedecheduch er a re Farisi el kmo, “Ngak a llomes er a beluulchad. Ngikel oltirakl er ngak a mo oba llomes er a klengar me ng kmal diak bo lorael er a ilkolk.” 13 Ma re Farisi a dilu er ngii el kmo, “Chelecha e ke di kau el olecholt er kau, me ng diak le merang cho molekoi.” 14 Ma Jesus a dilu el kmo, “Ng diak, a di le ngak el olecholt er ngak, me ng di merang a kulekoi, ele kmedengelii ak blar ngii el mei e medengelii ak bor ngii. Kemiu a diak modengelii ak mlar ngii el mei ma lechub e modengelii ak bor ngii. 15 Kemiu oba klechad e oukerrekeriil; e ngak a diak kuukerrekeriil er a re chad. 16 E ngdi chomko kuukerrekeriil, e ng klemerang a kerrekerilek, ele ng diak di le ngak el tang el oukerrekeriil. A Chedam el uleldurech er ngak a obengkek el oukerrekeriil. 17 Ng llechukl er a Llach er kemiu el kmo sel bo le ta tekingir a re teru el ocholt, e ng merang a lolekoi. 18 Ng di ngak el olecholt er ngak, ma Chedam el uleldurech er ngak me ng dirrek el olecholt er ngak.” 19 Me tuleker er ngii el kmo, “Ng ngar ker a Demam?” Ma Jesus a dilu el kmo, “Kemiu a diak modengelkak el ka modengelii a Demak. Chomko kom medengelkak, e kom dirrek el medengelii a Demak.” 20 A ikal rokui a lullekoi a Jesus er ser a lolisechakl er a Templo, er sel le ngar ngii a blil a tenget er ngii. E dimlak a tal chad el ulemdechem er ngii, ele ng dirkak le me belsechel. 21 Me ng liluut a Jesus el melekoi er tir el kmo, “Ak mo merael el mor cheroid me kom mo osiik er ngak, e ngdi kom di mo mad er a chelsel a kngtmiu. Ng diak el sebechiu el mor sel kbor ngii.” 22 Ma re mengeteklir a re chad er a Judea a dilu el kmo, “Ng melekoi el kmo ng diak el sebeched el mor sel le bor ngii. Ng belkul a kmo ng di ngii el mo omekoad er ngii?” 23 Ma Jesus a dilu el kmo, “Kemiu a chad er a beluulchad me kom mlar iou el mei, ngak a mlar bab el mei. Kom mlar tial beluulchad el mei, e ngdi ngak a dimlak kngar tial beluulchad el mei. 24 Seikid ia uchul mak millekoi er kemiu el kmo kom mo mad er a chelsel a kngtmiu. A lsekum ng diak moumerang el kmo, ‘Ngak a Ngak.’ e kom mo mad er a chelsel a kngtmiu.” 25 Me tuleker er ngii el kmo, “E kau ke techang?” Ma Jesus a dilu el kmo, “A ikel kdilu er kemiu er a kot el uchul a ikeikid. 26 Ng betok a tekoi el kulekoi el kiriu, e betok a kumals er kemiu er ngii; e ngdi ngikel ulderchak a merang a lolekoi, mak di mo ouchais er a beluulchad a ikel krirenges er ngii.” 27 Ng dimlak lomtab el kmo a Jesus a milengedecheduch er tir a chisel a Chedam. 28 Me ng dilu er tir el kmo, “Sel cho mkiderii a Ngelekel a Chad, e kom mo medengei el kmo ‘Ngak a Ngak’; e seikid e kom mo medengei el kmo ng diak a ngeral kuruul el oba di klisichek, ak bai di melekoi a ikel lulsisecheklak a Chedam el melekoi. 29 E ngikel ulderchak obengkek, el dirkak le chitak me di le ngak el tang, ele kblechoel el meruul a ungil er a rengul.” 30 A re betok el chad el rirengesii a Jesus er a lolekoi a ikel tekoi a mlo oumera er ngii. 31 Ma Jesus a dilu er tirkel mlo oumera er ngii el kmo, “A lsekum kom mo oltirakl osisecheklek, e kom meral obengkek; 32 me kom mo medengelii a klemerang, ma klemerang a ngubetemiu el mo diak msibai.” 33 Me te dilu el kmo, “Kemam a ngelekel a Abraham. Ng dirkak a tal chad el ousibai er kemam. Ngera belkul sel cho mdillii el kmo, ‘Kom mo mengubet el mo diak msibai’?” 34 Ma Jesus a dilu er tir el kmo, “Ng meral tekoi a ikal kulekoi er kemiu, a chad el di mor a klengit a cheldereder er a ngelbesel a rengul el mo meruul a klengit. 35 A sibai a diak di le chad er a telungalek el diak a ulebengelel, e ngdi ngalek a di blechoel el ngalek er a blai. 36 Ma lsekum a Ngalek a rullemiu el mo mimokl, e kom meral mo mimokl. 37 Ak medengelkemiu el kmo kom ngelekel a Abraham; e ngdi kemiu a melasem el omekoad er ngak, ele ng diak el somiu osisecheklek. 38 Ngak ouchais a ikel lulecholt er ngak a Demak, me kemiu a kuk ouchais a ikel le dilu er kemiu a demmiu.” 39 Me te dilu er ngii el kmo, “Kemam a ngelekel a Abraham.” Ma Jesus a dilu el kmo, “Chomko kom meral ngelekel a Abraham, e kom meruul a ua ikel lurruul. 40 A ikel bek el bla kruul a di ouchais er sel klemerang el krirengesii er a Dios, e kemiu a bai melasem el omekoad er ngak. A Abraham a dimlak le ua ise omerellel! 41 A omerelliu a di ua omerellel a demmiu.” Me te dula el kmo, “Kemam a meral ngelekel a Dios el diak kim ngalek er a chereomel. Ng di ngii el tang a Demmam e diak a ngodech.” 42 Ma Jesus a dilu el kmo, “Chomko kom meral ngelekel a Dios, e ng betik a rengmiu er ngak, ele ngak a mlar a Dios el mei ma uchul e a kngar tia er chelechang. Ng diak di ble le ngak el mei, ng bai ngii a ulderchak el mei. 43 Ngera me ng diak bo modengei a ikal kulekoi? A uchul e ng diak el sebechiu el mtekangel a rengmiu el remenges a tekingek. 44 Kemiu a ngelekel a demmiu er a Diabelong, me ng somiu el oltirakl a ikel soal a demmiu. Ser a ngar a mong el mei e ng omekoad er a re chad e dirkak a tal le bor a klemerang, ele ng diak a klemerang er ngii. Me sel lomulak, e ng meruul er sel meral teletelel, ele ng bulak e demal a bek el blulak. 45 Ngdi ngak a merang a ikel kulekoi, misei a uchul e ng diak moumera er ngak. 46 Ng techa er kemiu a sebechel el tutkii a kngtik? A lsekum ng mera kulekoi, e ngera me ng diak moumera er ngak? 47 Ngikel ngar a Dios el mei orrenges a tekingel a Dios. E ngdi kemiu a dimlak mngar a Dios el mei, ma uchul e ng chetimiu el orrenges.” 48 Me te dilu er a Jesus el kmo, “Ng diak le merang a ikel kim dilu er kau el kmo ke chad er a Samaria e ngar ngii er kau a mekngit el chelid?” 49 Ma Jesus a dilu el kmo, “Ngak a diak a mekngit el chelid er ngak. Ngak a mengull er a Demak, e ngdi kemiu a diak mongull er ngak. 50 Ngak a diak el soak a longull er ngak a re chad. Ng ngar ngii a kirel el longull er ngii a re chad e ngii oukerrekeriil el kirek. 51 Ng meral tekoi a ikal kulekoi er kemiu el kmo, ngikel olab osisecheklek a kmal diak bo le mad.” 52 Me te dilu er ngii el kmo, “Chelechang e aki mocha medengei el kmo ng meral ngar ngii er kau a mekngit el chelid! A Abraham a mlad, ma re profet me te mlad, e kau a melekoi el kmo ngikel olab osisecheklem a kmal diak bo le mad. 53 A demmam er a Abraham a mlad; kau komdasu el kmo ke kuk ngarbab er a Abraham? A re profet me te dirrek el mlad; e kau omdasu el kmo ke techang?” 54 Ma Jesus a dilu el kmo, “Chomko ng di ngak el mengull er ngak, e ng diak a belkul el omengull. A Demak, el ngikel molekoi er ngii el kmo ng Dios er kemiu a mengull er ngak. 55 Ng dirkak bo modengelii, e ngdi ngak a medengelii. Chomko kmelekoi el kmo ng diak kudengelii, e ak mo bulak el ua ikemiu el bulak. Ngak a medengelii e olab a tekingel. 56 A demmiu er a Abraham a mle dmeu a rengul el mo mesa belsechel ak mer ngii. Ng milsang me ng mlo ungil a rengul.” 57 Me te dmu er ngii el kmo, “Ng dirkak bo le 50 a rekim, e mla mesa Abraham?” 58 Ma Jesus a dilu el kmo, “Ng meral tekoi a ikal kulekoi er kemiu el kmo, ‘Ng Ngak.’ a mlar ngii er uchei er a le mechell a Abraham.” 59 Itia e te mocha mela bad el mo ometech er ngii, e ngdi Jesus a milertii e tilobed er a Templo el merael.
1 Me tia er a lorael a Jesus e ng milsa tal chad el mlechell el meiko. 2 Ma rubengkel a uleker er ngii el kmo, “Sensei, ng kngtil techa uchul me ng mlechell el meiko? Ng kngtil, ma lechub, e ng kngtil a demal ma delal?” 3 Ma Jesus a dilu el kmo, “Ng diak le kngtil el ka le kngtil a demal ma delal. A uchul me ng meiko a bai kirel me bo lecholt a klisichel a Dios el oureor er ngii. 4 Chelechal dirk le mellomes e ng kired el meruul a urerel ngikel ulderchak; ele bo le klebesei, e ng mo diak a chad el sebechel el oureor. 5 Chelechal kngar a beluulchad, e ak llomes er a beluulchad.” 6 Ser a bo le merek el mengedecheduch a Jesus, e ng tilbar a chutem e kitir a chutem er a tub e nguu el chotoem a medal ngiil chad 7 e dmu er ngii el kmo, “Morael el mo tochelbii a medam er a diosech er a Siloam.” (A belkul tial ngakl a kmo “Mlodurech.”) Me ng mirrael ngii el chad el mo tochelbii a medal e lmuut el mei el mla mo omes. 8 Mitia e tirkal ble le kaiuekeed a blirir ma re chad el milsang er a ngar a mong el di olengetngit a ngera er a re chad a uleker el kmo, “Ngika ng diak le ngikel chad el di mle blechoel el dengchokl e olengit a ngera er a re chad?” 9 Ma re bebil er a re chad a dilu el kmo, “Choi, ng ngii,” ngdi re kuk bebil a dilu el kmo, “Ng diak, ng di ua ingii e ngdi diak le ngii.” Me ngii el chad a dula el kmo, “Ng ngak ingii.” 10 Me tuleker er ngii el kmo, “Ng mlekera e mo sebechem el omes?” 11 Me ng dilu el kmo, “A tal chad el Jesus a ngklel a riruul a chutem e ngmai el chotoem er a medak e dmu er ngak mak mo tochelbii a medak er a Siloam. Mak mlong e ser a ktechelbii a medak, e ng di mlo sebechek el omes.” 12 Me tuleker el kmo, “Ng ngar ker?” Me ng dilu el kmo, “Ng ngaukai.” 13 Itia e te ngoura ngii el chad el mle meiko el mor a re Farisi. 14 Ng mle Ulengull el Sils er ser a leruul a chutem a Jesus e lomekungil er ngii el chad. 15 Ma re Farisi a liluut el oker er ngii el chad el kmo ng mlekera e mo omes. Me ng uluuchais er tir el kmo, “Ng chiltoem a medak er a chutem e ak mo tochelbii a medak, me ng mlo sebechek el omes.” 16 Ma re bebil er a re Farisi a dilu el kmo, “Ngikal chad a kmal dimlak le ngar a Dios el mei, ele ng diak loltirakl er a llechul a Ulengull el Sils.” Ngdi re kuk bebil a dilu el kmo, “A mekngit el chad ng sebechel el remuul a ua ikal mengasireng el tekoi?” Me tulebii el mo kakeakl. 17 Mitia e a re Farisi a liluut el oker er ngii el chad el kmo, “Ke melekoi el kmo ng ulemekungil er kau, me ng ngera ke dmu el kirel?” Me ngii el chad a dilu el kmo, “Ng profet.” 18 Ngdi re mengeteklir a re chad er a Judea a mle chetirir el mo oumerang el kmo ng mle meiko e mocha sebechel el omes, me tulleker er a demal ma delal el mei 19 e oker er tir el kmo, “Ngika ng ngelekiu? Kom melekoi el kmo ng mlechell el meiko e mekera e chelechang e ng mla mo sebechel el omes?” 20 Ma demal ma delal a dilu el kmo, “Aki medengelii el kmo ng ngelekam e medengei el kmo ng mlechell el meiko. 21 Ngdi diak kimodengei el kmo ng mlekera e mocha sebechel el omes, el ka kimodengelii a chad el ulemekungil er ngii. Moker er ngii e ng mla mo klou el chad me ng sebechel el di ngii el mesaod er ngii!” 22 A demal ma delal a millekoi el ua isei ele te mle medakt er a re chad er a Judea, ele te tilbir el kmo a ngii di le chad el melekoi el kmo ng oumerang el kmo a Jesus a Mesias a mo modik er a blil ongdibel. 23 Seikid a uchul ma demal ma delal a dilu el kmo, “Ng mla mo klou el chad me moker er ngii!” 24 Me te luuta el okerir ngii el mle meiko e dmu er ngii el kmo, “Mrellii a telbiil el ngar medal a Dios el kmo ke di mo melekoi a klemerang! Kemam a medengei el kmo ngikel chad el ulemekungil er kau a mekngit el chad.” 25 Me ngiil chad a dilu el kmo, “Ng diak kudengei el kmo ng mekngit el chad, ng diak. Ngdi tal tekoi a kudengelii el kmo ak mle meiko, e chelechang e ak mla mo omes.” 26 Me toker er ngii el kmo, “Ng mlekera er kau? Ng mlekera er a lomekungil er kau?” 27 Me ng dilu el kmo, “Ak kor a mla ouchais er kemiu e dimlak el somiu el orrenges. Ngera me ng somiu el lmuut el orrenges a chisel? Ng locha dirrek el mla mo somiu el mo obengkel.” 28 Me te milengerar er ngii e kmo, “Ng bai kau a chedal ngii el chad; ele kemam a chedal a Moses. 29 Kemam a medengei el kmo a Dios a milengedecheduch er a Moses, e ngdi ngikal chad a diak kimodengelii el kmo ng mlar ker el mei!” 30 Me ngiil chad a dmu el kmo, “Ng kor a ngodech el tekoi a cho molekoi! Ng diak modengelii a le mlar ngii el mei, e ngdi ngii a mla rullak el mo diak kmeiko! 31 Kid a medengei el kmo a Dios a diak lorrenges er a re mekngit el chad, e ng bai orrenges er a re chad el mengull er ngii e meruul a ikel soal. 32 Ser a le kot el omuchel a beluulchad er mer chelechang e ng dirkak a chad el de renges a chisel el ulemekungil er a mlechell el meiko. 33 Me ngikal chad a lemlak le ngar a Dios el mei, e ng diak a ngeral sebechel el rullii.” 34 Me te dilu el kmo, “Kau a mlechell e mukeroul er a klengit. Ke melasem el olisechakl er kemam?” E uldikii er a blil ongdibel. 35 Ma Jesus er a le renges el kmo te mla odikii ngii el chad er a blil ongdibel, e ng silikii e oker er ngii el kmo, “Kau koumera er a Ngelekel a Chad?” 36 Me ngii el chad a dilu el kmo, “Rubak, ka mochotii el kmo ng techang, me bo le sebechek el oumera er ngii!” 37 Ma Jesus a dilu er ngii el kmo, “Ke mla mesang, e ngii a mengedecheduch er kau er chelechang.” 38 Me ngiil chad a dilu el kmo, “Rubak, ak uumerang!” e mlo outubuach er medal a Jesus. 39 Ma Jesus a dilu el kmo, “Ak mlei er tial beluulchad el me oukerrekeriil, ma re meiko bo lomes me tirkel omes bo le meiko.” 40 A re bebil er a re Farisi a le dilak er isei me te rirengesii er a lolekoi a ikal tekoi me tuleker er ngii el kmo, “Kau ke kmo kemam a dirrek el meiko?” 41 Ma Jesus a dilu el kmo, “Chomko kom mle meiko, e sola e ng diak a kngtmiu; ngdi chelechal mdu el kmo ng sebechiu el omes, e ng dirk medechel a kngtmiu.”
1 A Jesus a dilu el kmo, “A kulekoi er kemiu a meral tekoi. A chad el diak bo le siseb er a tuangel er a blil a sib e mo oleong er a ngodech el siseball, a merechorech. 2 Ngikel mo tmuu el okiu a tuangel a mengkerengel a sib. 3 Ma mengkerengel a tuangel a mo nguu a chesimer el kirel, ma sib a mo rongesii a ngerel sel lomekedong a ngklel e le chetakl el mo tuobed. 4 Sel lengai el otobed e ng mo oeak uchei er ngii e a sib a oltirakl er ngii ele ng medengelii a ngerel. 5 Ng mo chemiis er a ngodech el chad e diak loltirakl er ngii, ele ng diak lodengelii a ngerel.” 6 Tial okesiu a luluuchais er ngii er tir a Jesus, e ngdi tir a dimlak bo lodengelii a belkul. 7 Me ng liluut a Jesus el kmo, “A kulekoi er kemiu a meral tekoi. Ngak a tuangel el bo le siseb er ngii a sib. 8 Tirkel rokui el uleak uchei er ngak el mei a merechorech, ma sib a dimlak lorrenges er tir. 9 Ngak a tuangel. Ngikel me soiseb el okiu ngak a mo suobel; ng me tmuu e mo tuobed e mo metik a kelel. 10 A merechorech a le mei e ng di merechorech, e omekoad e melemall. Ngak a mlei el kirel me bo mnguu a klengar, el diak olengesonges er ngii el klengar. 11 “Ngak a ungil mengkerengel a sib, el di ungil er a renguk el mo mad el kirel a sib. 12 A uduudel chad, el diak le mengkerengel a sib, ma ka loucharm a sib sel lesa lbolb, e ng chemoit a sib e chemiis, ma lbolb a mei el mdechem a sib e toreklii a delebechel. 13 A uduudel chad a chemiis ele ngii el di mengereker, e diak le meral omekerreu a sib. 14 - 15 Ngak a ungil mengkerengel a sib. Ak medenge sib me ngii a medengelkak, el di ua Chedam el medengelkak me ngak a medengelii a Chedam. Ng di ungil er a renguk el mo mad el kirel a sib. 16 Ng ngar ngii a kuk bebil er a chermek el sib el diak le ngar tial blil a sib er chelechang. Ng dirrek el kirek el mo ngmai el mei; me ng mo orrenges er a ngerek, me ng di mo tal delebechel el obengkel a tal mengkerengel a sib. 17 “A Chedam a betik a rengul er ngak, ele ng di ungil er a renguk el mo odersii a klengar er ngak, me bo le sebechek el lmuut el nguu. 18 Ng diak a nguu er ngak a klengar er ngak. Ng di ngak el soak el oldars er ngii. Ng sebechek el odersii, e sebechek el lmuut el nguu. Tiaikid a luleldurech er ngak a Demak el me meruul er ngii.” 19 A ikal tekoi a mlo uchul e a re chad a liluut el obii. 20 Te betok er tir a dilu el kmo, “Ngika ngar ngii a mekngit el chelid er ngii! Ngika kebelung! Ngera me kom orrenges er ngii?” 21 Ngdi re bebil a dilu el kmo, “A chad el teluchel er a mekngit el chelid a diak el sebechel mengedecheduch el ua isei! Ng mekera mekngit el chelid e meruul er a re meiko el mo omes?” 22 A Chedaol Sils er a Omengedaol er a Templo a lurruul er ngii er a Jerusalem er a belsechel a kerrasem. 23 Ma Jesus a mirrorael er a Beranda er a Salomon er a Templo, 24 e a re chad a mlo kldibel el iliuekl er ngii e oker el kmo, “Kau ke di omekerrau a rengmam el mo oingerang? Di bleketakl el ouchais er kemam a klemerang. Kau ke Mesias?” 25 Ma Jesus a dilu el kmo, “Ak mla ouchais er kemiu, ngdi diak el somiu el oumera er ngak. A ureor el kuruul el oba klisichel a Demak a mengedecheduch el kirek; 26 ngdi kemiu a diak bo moumerang, ele ng diak msib er ngak. 27 A sib er ngak orrenges er a ngerek, me ngak a medengei, me ng oltirakl er ngak. 28 Ak umsang a diak a ulebengelel klengar, me ng kmal diak bo le mad. Ng diak a chad el sebechel el merober er ngak. 29 A Chedam el ngikel ngilai el meskak a ngarbab er a bek el tekoi, me ng diak a chad el sebechel el merober er a ulekerreuil a Chedam. 30 Ngak ma Chedam a di tang.” 31 Itia e a re chad a luuta el smasou a bad el mo ometech er ngii. 32 Ma Jesus a dula er tir el kmo, “Ng betok el ungil ureor a bla kruul er medemiu el ngii a le bilskak a Chedam mak meruul; ng ngera er ngii a mo uchul e ng somiu el ometech er ngak?” 33 Me te dmu el kmo, “Ng diak lungil el omeruul a uchul me le somam el ometech er kau, ng otuub a uchul e ng somam el ometech er kau! Ke di chad, e meruul er kau el leko ke Dios!” 34 Ma Jesus a dula el kmo, “Ng llechukl er a Llach er kemiu el kmo a Dios a dmu el kmo, ‘Kemiu a chelid.’ 35 Kid a medengei el kmo a lolekoi a Chedaol Llechukl a di merang el diak a ulebengelel; ma Dios a ulemekedong er tirkel ngila tekingel el kmo te chelid. 36 E ngak, a le ngileltak a Chedam e oderchak el mer a beluulchad. E kemiu a mekera e melekoi er ngak el kmo ak ultuub er a Dios? 37 A lsekum ng diak kuruul a soal a Demak, e lak moumera er ngak. 38 Ngdi lsekum ak meruul a soal, e a lak moumera er ngak, e ngii di moumera urerek, me bo modengei el kmo a Chedam a ngar ngak me ngak a ngar a Chedam.” 39 Me te liluut el leko tomdechem er a Jesus, e ngii a ngmoech er a delongelir el merael. 40 Itia e a Jesus a liluut el mo imuul er a bita er Omoachel Jordan er sel le mlar ngii a Johanes e melecholb er a re chad; ma Jesus a mlong e kiliei er isei. 41 Te betok el chad a mlor ngii, e a omelekingir a kmo, “A Johanes a dimlak loruul a mengasireng el tekoi, ngdi ikel bek el le dilung el kirel ngikal chad a meral tekoi.” 42 Me te betok el chad er isei a mlo oumera er a Jesus.
1 A tal chad el Lasarus a ngklel el kiliei er a Bethania a mlo smecher. A Bethania a sel beluu el le kiliei er ngii a Maria ma tar ngii er a Martha. 2 (Ngkaikid el Maria ngikel chililt ochil a Jesus er a ungil a bul chilt e mesuld el olab a chiul; e a Lasarus el ochedal a silecher.) 3 Me tir el odos a milsumech el mor a Jesus el kmo, “Rubak, a betik er a rengum el sechelim a smecher.” 4 Me ser a le renges a Jesus e ng dilu el kmo, “A mo ulebongel er tial secher a diak le kodellel a Lasarus; tiang a mo uchul a klebkellel a Dios, e dirrek el mo oeak ngii e a Ngelekel a Dios a mukebkall.” 5 A Jesus a mle betik a rengul er a Martha, ma merrengel, ma Lasarus. 6 Ngdi ser a le renges a chisel a Lasarus el kmo ng smecher, e ng di kiliei er sel le mlar ngii el lmuut el ngma erul klebesei. 7 E sola e dula er a rubengkel el kmo, “Mei me deluut el mor a Judea.” 8 Ma rubengkel a dilu el kmo, “Sensei, ng kor a dirk kesai el klebesei er a mla memong e a re chad er sei a mlo sorir el ometech er kau, e chelechang e ke melatk a lmuut el mong?” 9 Ma Jesus a dilu el kmo, “A tal sils a ngar ngii a truich ma erul sikang er ngii, ada ng diak? Ng ua isei me ngikel merael er a cheldecheos a diak le mesibas, ele ng omes er a llomes er tial beluulchad. 10 Ngdi lsekum ng merael sel le milkolk, e ng mesibas, ele ng diak a llomes.” 11 A ika le dilu Jesus e dirrek el dilu el kmo, “A sechelid er a Lasarus a mla mo mechiuaiu, ngdi ngak a mong el mo okisii.” 12 Ma rubengkel a dilu el kmo, “A le mechiuaiu e Rubak, e ng mo ungil er a rektel.” 13 A belkul a tekingel a Jesus a kmo a Lasarus a mla mad, e ngdi tir a ulemdasu el kmo ng millekoi er a meral cheliuaiu. 14 Me ng mocha bleketakl a Jesus el ouchais er tir el kmo, “A Lasarus a mla mad, 15 ngdi kemiu a uchul e ng ungil a renguk ele ng dimlak kubengkel, me bo moumerang. Mei me dorael el mor sel le ngar ngii.” 16 Ma Thomas (el lomekedong er ngii el kmo Kebtot), a dula er tirkal ledak el obengkel a Jesus el kmo, “Mei el rokui me dobengkel a Sensei el mong, me dedak el mo mad!” 17 Ser a le bo Jesus e ng mlo medengei el kmo ng mla mo chuib eual klebesei er a bo le deklii a Lasarus. 18 A Bethania a telkib el olengesonges er erul mael a cherridel er a Jerusalem, 19 me te betok el chad er a Judea a mlo omes er a Martha ma Maria e mengelaod er tir el kirel a kodellel a ochederir. 20 Ma Martha er a le renges el kmo a Jesus a mochang, e ng tilobed el mo olsiuekl er ngii, e ngdi Maria a di mlar a blai. 21 Ma Martha dilu er a Jesus el kmo, “Chomko ke mlar tiang e Rubang, e ng dimlak le mad ochedak! 22 Ngdi ngak a medengei el kmo a Dios me ng di mo meskau a ikel cho bo molengit er ngii er chelechang.” 23 Ma Jesus a dilu er ngii el kmo, “A ochedam a lmuut el mo chad.” 24 Ma Martha a dilu el kmo, “Ak medengei el kmo ng lmuut el mo chad er sel ulebongel sils.” 25 Ma Jesus a dula er ngii el kmo, “Ngak a okiis er a kodall e klengar. Ngikel oumera er ngak a le mad, e ng dirrek el di ngar, 26 me ngikel dirk chad e oumera er ngak a kmal diak le mad. Koumera er tial tekoi?” 27 Me ng dilu el kmo, “Choi e Rubang! Ngak oumera el kmo kau a Mesias, el Ngelekel a Dios, el mle kirem el mei er a beluulchad.” 28 Ngdi mlo merek el mengedecheduch a Martha e merael el mo oleker er a merrengel er a Maria e kekerel melekoi er ngii el kmo, “A Sensei a ngar tiang e oker er kau.” 29 Me ser a le renges a Maria e ng milekiis el orreched el mo olsiuekl er ngii. 30 A Jesus a dirk mlar sel blo le kaisiuekl er ngii ngii ma Martha e dirkak bo le siseb er a beluu. 31 Ma re chad el mlar a blai el obengkel a Maria el mengelaod er ngii a uleltirakl er ngii er ser a lesa el mekiis el orreched el mo tuobed. Tulemdasu el kmo ng mor a debull el mo lmangel. 32 Ma Maria er a le bor tial le mlar ngii a Jesus, e ng mlo terrob er ochil e dmu el kmo, “Rubak, chomko ke mlar tiang e ng dimlak le mad ochedak!” 33 A Jesus er a lesa el lmangel, me tirkal chad el obengkel me dilerrek el lmangel, e ng kmal mlo imis el mekngit a rengul. 34 Me ng uleker er tir el kmo, “Kom mlo doklii er ker?” Me te dilu el kmo, “Rubak, mei me bo mesang.” 35 Ma Jesus a lilangel. 36 Ma re chad a dula el kmo, “Mesal meral betik a rengul er ngii!” 37 E a re bebil a millekoi el kmo, “Ngika ng dimlak le rellii a meiko el mo omes? Ng dimlak el sebechel el orekedii a Lasarus me lak le mad?” 38 Ng liluut el kmal mlo mekngit a rengul a Jesus, e mirrael el mor a debull el ii el ngar ngii a bad el ngar medal. 39 Ma Jesus a dilu el kmo, “Mnguu sel bad el choridii!” Ma Martha, el ochedal ngikal mlad el chad a dmu el kmo, “Rubak, ng mla mor ngii a bul. Ng mla mo eual klebesei er a le medakl!” 40 Ma Jesus a dilu er ngii el kmo, “Ng dimlak kdu er kau el kmo cho moumera e ke mo mesa klebkellel a Dios?” 41 Me te mocha nguu ngii el bad el choridii. E a Jesus a mo dmangesbab e dmu el kmo, “Ak mereng a sulem e Chedam, ele korrenges er ngak. 42 Ak medengei el kmo ke di blechoel el orrenges er ngak, ngdi tia kulekoi er ngii el kirir tirkal chad el ngar tiang, me bo loumerang el kmo kulderchak.” 43 Ng dilu ikal mo merek, e mle klou a ngerel el omekedong el kmo, “Lasarus, be mtobed!” 44 Me ng mle tuobed el bliull a chimal ma ochil er a mamed, ma kuk tar a mamed omail er a medal. Ma Jesus a dilu er tir el kmo, “Mkedekedii e bechere me lorael.” 45 A re betok el chad el mle oldingel er a Maria, a milsa sel le rirellii a Jesus me te mlo oumera er ngii. 46 E ngdi re bebil er tir a liluut el mor a re Farisi e ouchais er tir er a le rirellii a Jesus. 47 Ma re Farisi ma re bderrir a re prist a mlo kldibel el obengterir a re chedal Olbiil e dmu el kmo, “Kede mekerang? Ka mues a ikal rokui el mengasireng el tekoi el loruul ngikal chad! 48 A de bechere me di le ua isei, e a rokui el chad a mo oumera er ngii, ma re merreder er a Rom a mei el torudii a Templo er kid ma beluad!” 49 Ma tar tir el Kaifas a ngklel el mle Ngarbab el Prist er isel rak a dmu el kmo, “Kemiu a diak a ngeral modengei! 50 Ng diak modengei el kmo ng bai ungil a le mad a di tal chad el kirir a re chad, er a le metemall a beluu el rokir?” 51 Tia diak di ble le ngii el melekoi er ngii; seikid el rak e ng mle Ngarbab el Prist me ng ulemlaoch el kmo a Jesus a di kmedung e ng mo mad el kirir a re chad er a Judea, 52 el diak di le kirir e le merekong; ng dirrek el mo kirir a rokui el berriid el chedal a Dios el oldak er tir el mo tal chelechad. 53 Seikid el sils el mong e a re mengeteklir a re chad er a Judea a ulsiik a rolel e omekoad er a Jesus. 54 Ma Jesus a mlo diak lecholt el merael er a chelsel a Judea, e bai tilobed el mor a Efraim el beluu el ngar bita er a ked, me ng kiliei er isei ngii ma rubengkel. 55 E olekeda belsechel a Chedaol Sils er a Baskua, ma re betok el chad er a ikel mekekerel beluu a mlor a Jerusalem el mo mengedmokl a tekoi el kirel omengikiid er uchei er a chedaol sils. 56 Tulsiik er a Jesus er ser a le kldibel er a Templo, e kakerker el kmo, “Ng ngera kom omdasu? Ngike locha kmal diak le mei er tial chedaol sils?” 57 A re bderrir a re prist ma re Farisi a mla otobed a tekingir el kmo ngikel medengelii a le ngar ngii a Jesus, a kirel el ouchais me bo le sebechir el mo mdechemii.
1 Ng medechel elolem el klebesei e ng mo Baskua, e a Jesus a mlor a Bethania el mlor a blil a Lasarus, el ngikel lulekisii er a kodall. 2 Te mirruul er a blengur er ngii, ma Martha a ullengeseu el merous a kall, e a Lasarus a mle teloi er a re dengchokl er a tebel el obengkel a Jesus. 3 E a Maria a ngiluu a chimo el butiliang el meringel a cheral e ungil a bul chilt el rruul er a diak lurrechomel el nard, e ulitelii el rokir er ochil a Jesus, e ullab a chiul el mesuld. A ungil bul ngii el chilt a di mlo mengetelakl er a blai el rokir. 4 Ma Judas Iskariot, el tar a rubengkel a Jesus, el ngikel mo olterau er ngii a dilu el kmo, 5 “Ngera uchul me tial chilt a dimlak le moterau el kirel a 300 el silber el udoud e dengai el mesterir a re mechebuul?” 6 A uchul me ng millekoi el ua isei a diak le meral omekerreu er a re mechebuul, e ng bai merechorech. Ng uleba blil a udoud me ng di ngar sel soal er ngii. 7 Ngdi Jesus a dilu el kmo, “Bo becherei! Sel le rirellii a dima mengedmokl er ngak el kirel sel bo kmedakl. 8 A re mechebuul a di blechoel el obengkemiu, e ngdi ngak a diak di kblechoel el obengkemiu.” 9 A re betok el chad a rirenges el kmo a Jesus a ngar a Bethania, me te mlong el diak di le Jesus a uchul, e ng dirrek el mle sorir el omes er a Lasarus el lulekisii a Jesus er a kodall. 10 Ma re bderrir a re prist a dirrek el mlo osiik a cheldechulel e lokodir a Lasarus, 11 ele ng ngii a uchul e a re betok el chad er a Judea a mla choititerir e mo oumerang er a Jesus. 12 A bo le kukuk e a klou el seked el mlor a Chedaol Sils er a Baskua a rirenges el kmo a Jesus a mocha er a Jerusalem. 13 Me te ngila kor a dui e tuobed el mo olsiuekl er ngii, e oldiu el kmo, “Odanges le bor a Dios! A Dios lomekngeltengat er a King er a Israel!” 14 A Jesus a miltik er a charm el donkey me ng ngilasech er ngii el mong el di ua ikel lolekoi a Chedaol Llechukl el kmo, 15 “Lak medakt, kau el beluu er a Sidon! A king er kau a mermang, el ngar a ngeasek el donkey.” 16 Seikid e a rubengkel a Jesus a dimlak lodengei a ikang; e ngdi ser a le ngasech a Jesus el mor a klebkellel, e te mlo medengei el kmo a ikel lurruul el mor ngii a uleltaut a lolekoi a Chedaol Llechukl. 17 A re chad el ulebengkel a Jesus er a lokedongii a Lasarus er a debull e lokisii er a kodall a uluuchais a ikel tekoi el dilubech. 18 Seikid a uchul ma re betok el chad a mlo olsiuekl er ngii, ele te rirenges el kmo ng rirellii tial mengasireng el tekoi. 19 Mitia e a re Farisi a mocha katekoi el kmo, “Ka mesang, ng dikea ngeral sebeched el rullii! A beluulchad el rokir a mocha oltirakl er ngii!” 20 A re bebil chad er a Gris a ulebengterir tirkel mlor a Jerusalem el mo mengull el meluluuch er a Dios er a le ngar ngii a chedaol sils. 21 Te mlor a Filip (el chad er a Bethsaida er a Galilea) e dilu el kmo, “A rrach, kemam a somam el omes er a Jesus.” 22 Ma Filip a mlo subedii a Andreas, e te dilak el terung el mo subedii a Jesus. 23 Ma Jesus a dilu er tir el kmo, “Chelechang e ng mla mo belsechel el bo le nguu a klou el klebkall a Ngelekel a Chad. 24 A kulekoi er kemiu a meral tekoi. A chimol tane a di chimong a lsekum ng diak le bor a chutem me le mad. E a lsekum ng mad, e seikid e ng mekdubech a betok el rodech. 25 Ngikel betik a rengul er a klengar er ngii a mo oridii; e ngikel chetil a klengar er ngii er tial beluulchad a mo kudmeklii el kirel a diak a ulebengelel klengar. 26 Ngikel soal el mesiou er ngak a kirel el oltirakl er ngak, misei e a mesiungek a mo obengkek el ngar sel kngar ngii. E a Demak a mo mengull er ngikel mesiou er ngak. 27 “Chelechang e ng ouedikel a renguk. Ng ngera ungil bo kdung? Ng ungil a kdu el kmo, ‘Chedam, lak bechikak me bo ksiseb er tial belsechel a ringel’? Ngdi tiaikid a uchul e ak mlei! 28 Chedam, mkebkellii a ngklem!” Itia e a ngor a mlar a eanged e melekoi el kmo, “Ak mla kobkellii e lmuut el mo kobkellii.” 29 Ma seked el dilechor er bita er ngii a rirengesii ngii el ngor; ma re bebil er tir a melekoi el kmo ng derumk, e a re kuk bebil a kmo, “Ng anghel a milengedecheduch er ngii!” 30 Ma Jesus a dilu er tir el kmo, “Ng dimlak le ngak a uchul e tial ngor lulengedecheduch, e ng bai kemiu a uchul e ng milengedecheduch. 31 Ng mla mo belsechel el le mukerrekeriil tial beluulchad; chelechang e a merreder er tial beluulchad a mo moiis. 32 Sel kmekider er bebul a chutem, e ak mo ngoititerir a rokui el chad el mer ngak.” 33 (Ser a lolekoi er tiang e ng ulemeketakl er a blekerdelel a kodall el bo lecharm er ngii.) 34 Ma seked a dilu el kmo, “A Llach er kid ouchais er kid el kmo a Mesias a di ngar el mo cherechar. E kau a ngera me ke melekoi el kmo a Ngelekel a Chad a kirel el mo mekider? Ng techa ngii el Ngelekel a Chad?” 35 Ma Jesus a dilu el kmo, “A llomes a mo ngar a delongeliu el dirk lmuut el telkib. Molemolem er omeroliu er chelechal dirk le mellomes, me lak bo milkolk er a melengel a rael; ele ngikel merael er a ilkolk a diak lodengelii a le bor ngii. 36 Moumera er a llomes er chelechal dirk mobang, me bo mchad er a llomes.” Ng di dilu ika Jesus, e merael el mo mertii er tir. 37 A ikal rokui el mengasireng el tekoi a lurruul a Jesus er mederir, ngdi tir a dimlak loumera er ngii, 38 me ng mo tmaut a tekingel a Profet Isaia el kmo, “Rubak,ng techa mlo oumerang a tekoi el kimullekoi? Ng techa lulechotii a klisichel a Rubak el mor ngii?” 39 Seikid e ng dimlak el sebechir el mo oumerang ele Isaia a dirrek el dilu el kmo, 40 “A Dios a mla remuul a mederir el mo meiko e mla chosimer a uldesuir, ma mederir lak lomes, ma uldesuir lak bo lodengei, me lak lobult el mor a Dios, me lomekungil er tir.” 41 A ika lullekoi a Isaia ele ng milsa klebkellel a Jesus me ng uluuchais a chisel. 42 Me ng ua isei, e ngdi te betok el mengeteklir a re chad er a Judea a mlo oumera er a Jesus, te di mle medakt er a re Farisi me ng dimlak le bleketakl el ouchais, me lak bo le modik er a blil ongdibel. 43 Ng mle sorir el meruul a chisir er a re chad el kuk ngar uchei er a loruul a chisir er medal a Dios. 44 A Jesus a mle klou a ngerel el melekoi el kmo, “Ngikel oumera er ngak a diak di loumera er ngak e ng dirrek el oumera er ngikel ulderchak. 45 Me ngikel mesekak a dirrek el mesa ngikel ulderchak. 46 Ngak a mlei el llomes er a beluulchad, me ngikel oumera er ngak a diak di le ngar a chelsel a ilkolk. 47 Ngikel orrenges a tekingek e diak loltirakl, a diak kuukerrekeriil er ngii. Ngak a mlei el diak kuukerrekeriil er a beluulchad, e ak bai mle olsobel er ngii. 48 Ngikel chetil ngak e diak bo lolab a tekingek a ngar ngii a mo oukerrekeriil er ngii. A ikal tekoi el bla kdung a mo oukerrekeriil er ngii er sel uriul sils! 49 Ma ika merang, ele ng dimlak kungedecheduch el di oba klisichek, ng bai Chedam el ngikel uleldurech er ngak a mla dmu er ngak a ikel kirek el melekoi. 50 Me ngak a medengei el kmo a tekingel a mesterir a re chad a diak a ulebengelel klengar. Misei e a ikel kulekoi, a bla ledu er ngak a Chedam mak melekoi.”
1 Sel sils er uchei er a Baskua e a Jesus a mlo medengei el kmo ng mla mo belsechel el le tobed er tial beluulchad el mor a Chedam. Ng di mle blechoel el betik a rengul er a re chedal er tial beluulchad, me ng mle betik a rengul er tir el mor a ulebongel. 2 A Jesus ma rubengkel a ulemesoil. E a Diabelong a mla loia er a rengul a Judas, el ngelekel a Simon Iskariot a uldasu el mo olterau er a Jesus. 3 A Jesus a mle medengei el kmo a Chedam a mla msa cherrungel el klisiich; ng dirrek el mle medengei el kmo ng mlar a Dios el mei me ng lmuut el mor a Dios. 4 Me ng milekiis er a tebel el nguu a ikrel a bilel el mecherei, e lochetii a taor er a chelechedal. 5 E sola e uleitel a ralm er a kanadarai e mocha merisu ocherir a rubengkel e mesuld el oba tial taor el ngar a chelechedal. 6 E a le bocha er a Simon Petrus e ng dmu er ngii el kmo, “Kau ke merisu ochik e Rubang?” 7 Ma Jesus a dilu er ngii el kmo, “Ng diak modengei a belkul a ikel kuruul er chelechang, e ngdi uriul e ke mo medengei.” 8 Ma Petrus a dilu el kmo, “Ng kmal diak morisu ochik!” Ma Jesus a ulenger el kmo, “A lak krisu ochim, e ng mo diak mtar a obengkek.” 9 Me ng dula Simon Petrus el kmo, “Rubak, a le ua isei, e lak di lochik cho morisu! Dirrek el mrisu a chimak ma bdeluk!” 10 Ma Jesus a dmu el kmo, “A chad el mla melechong a mla mo beches me ng diak lluut el melechong, ng bai di merisu ochil. Kemiu el rokui a klikiid, ngdi tar kemiu a diak le klikiid.” 11 (A Jesus a mle medengei el kmo ng techa mo olterau er ngii a uchul me ng millekoi el kmo, “Kemiu el rokui a klikiid, ngdi tar kemiu a diak le klikiid”) 12 Ma le mereko Jesus el merisu ocherir, e ng ultungii a ikrel a bilel e lmuut el mo dengchokl. Ng uleker el kmo, “Kom mlo medengelii a kurruul er ngii el ekor kemiu? 13 Kom omekedong er ngak el kmo Sensei e Rubak, e di ungil ele kmeral Sensei e Rubak. 14 Mak Rubak er kemiu e ksensei er kemiu, e bla krisu ochemiu e ng kiriu el mo kerisu uach. 15 Ak mla rullii a kerbai el kiriu, me ng kiriu el mo meruul er sel bla krellii el ekor kemiu. 16 A kulekoi er kemiu a meral tekoi. Ng diak a sibai el ngarbab er a mastang er ngii, el diak a oderuchel el ngarbab er ngikel oldurech er ngii. 17 Chelechal bocha modengelii tial klemerang, e ng kmal ungil cho bo moruul er ngii! 18 “Ng diak kulekoi er kemiu el rokui. Ak medengelterir a kullilt er tir. Ngdi Chedaol Llechukl a kirel el mo tmaut a ikel lolekoi el kmo, ‘Ngikel chad el kulemeka er ngii a obelta el me omtok er ngak.’ 19 Ak di ma ouchais er kemiu er tial tekoi er uchei er a le bor ngii, me sel le bor ngii, e bo moumerang el kmo ‘Ngak a Ngak.’ 20 A kulekoi er kemiu a meral tekoi. Ngikel nguu ngikel kuderchii a dirrek el ngoikak; me ngikel ngoikak a nguu ngikel ulderchak.” 21 A Jesus er a ledu ikal tekoi, e ng kmal mlo ouedikel a rengul me ng di mle bleketakl el kmo, “A kulekoi er kemiu a meral tekoi. A tar kemiu a mo olterau er ngak.” 22 Ma rubengkel a mlo kasoues, e kmal rrau ku rengrir el kmo ng techa lolekoi er ngii. 23 E a tar a rubengkel, el betik er a rengul a Jesus, a kiliei er bita er ngii. 24 Ma Simon Petrus a ullechau er ngii e kmo, “Ka mkerir el kmo ng techa lolekoi er ngii.” 25 Me ngii el obengkel a Jesus a ullekeed el mor a Jesus e oker el kmo, “Ng techa e Rubang?” 26 Ma Jesus a dilu el kmo, “Ngikel chad el bo kberechii a blauang e nguu el msang, ngkeikid.” E sola e ngiluu a telkib er a blauang el merechii, e nguu el msa Judas, el ngelekel a Simon Iskariot. 27 Me ser a le nguu ngiil blauang a Judas, e a Satan a siliseb er ngii. Ma Jesus a dilu er ngii el kmo, “Morchedau el remuul a ikel kirem el meruul!” 28 Ng dimlak a tar tirkel mlar a tebel el mlo medengei el kmo ngera ma Jesus a millekoi er ngii el ua isei. 29 A Judas a uluungerachel er a blil a udoud, ma re bebil er a rubengkel a Jesus a ulemdasu el kmo ng millekoi er ngii me bo lochar a lousbech er a chedaol sils, ma lechub e le mlar ngii a bo lomesterir a re mechebuul. 30 Ma Judas a ngiluu ngii el blauang e di tilobed. Seikid e ng klebesei. 31 Me tia er a lorael a Judas e a Jesus a dmu el kmo, “Chelechang e ng chemota klebkellel a Ngelekel a Chad; ng chemota klebkellel a Dios el okiu ngii. 32 A lsekum a klebkellel a Dios a chemotang el okiu ngii, e sola e a Dios a mo ochotii a klebkellel a Ngelekel a Chad el ngar a chelsel, el di kmedu e ng mo ochotii. 33 Rengelekei, ng di kedeb ku temek el obengkemiu. Kom mo osiik er ngak; ngdi kdu er kemiu a ua ikel kdilu er a re mengeteklir a re chad er a Judea el kmo, ‘Ng diak el sebechiu el mor sel kbor ngii.’ 34 Mak meskemiu a beches el llach el kmo, bo mkaubltikerreng. Ng kiriu el kaubltikerreng el ua ngak a kuubltikerreng el ekor kemiu. 35 Cho bo mkaubltikerreng, e a rokui el chad a mo medengei el kmo kom obengkek.” 36 A Simon Petrus a uleker er ngii el kmo, “Ke mor ker e Rubang?” Ma Jesus a dilu el kmo, “Chelechang e ng diak el sebechem el obengkek el mor sel kbor ngii, ngdi uriul e ke mo oltirakl er ngak.” 37 Ma Petrus a uleker el kmo, “Ngera uchul, e Rubang, me ng diak el sebechek el obengkem er chelechang? Ngak a kldmokl el mo mad el kirem!” 38 Ma Jesus a dilu el kmo, “Kau ke meral kldmokl el mo mad el kirek? Ak melekoi er kau a meral tekoi. Uchei er a lorros a malk e ng mo edei el moumededenger er ngak.”
1 A Jesus a dilu er tir el kmo, “Lak louedikel a rengmiu. Moumera er a Dios, e dirrek el moumera er ngak. 2 A blil a Demak a betok a delemerab er ngii, mak mong el mo mengedmokl er cho bor ngii. Chomko ng diak le merang e ng diak kulekoi er kemiu a ikang. 3 E a uriul er a kkedmeklii sel cho bor ngii, e ak lmuut el me ngoikemiu el mo obengkek, me kom mo obengkek er sel kngar ngii. 4 E kemiu a medengelii a rael el mor sel kbor ngii.” 5 Ma Thomas a dmu er ngii el kmo, “Rubak, ng diak kimodengelii cho bor ngii, e mekera e mo medengelii a rael el mong?” 6 Ma Jesus a dula er ngii el kmo, “Ngak a rael, e klemerang, e klengar; ng diak a chad el mor a Chedam, a lak lokiu ngak.” 7 E dilu er tir el kmo, “Chelechal bla bo modengelkak, e kom dirrek el mo medengelii a Chedam, me kom mo medengelii er chelechal mong ele kom mla mesang.” 8 Ma Filip a dilu er ngii el kmo, “Rubak, mochotii er kemam a Chedam me bo lungil a rengmam.” 9 Ma Jesus a dilu el kmo, “Ng mla mo meketeket el kubengkemiu el rokui, e kau a dirkak bo modengelkak e Filip? Ngikel mla mesekak a mla mesa Chedam. Ngera uchul me ke dmu el kmo, ‘Mochotii er kemam a Chedam’? 10 Filip, kau ng diak moumera el kmo ngak a ngar a Chedam ma Chedam a ngar ngak?” E sola e dilu er a rubengkel el kmo, “A ikel tekoi el kullekoi er kemiu a diak le tekingek. A Chedam el ngar a chelsek a meruul er a urerel. 11 Moumera er ngak a kulekoi er kemiu el kmo ngak a ngar a Chedam ma Chedam a ngar ngak. E a lak moumera er tiang, e bo lokiu a ikel kuruul el tekoi e bo moumerang. 12 A kulekoi er ngii er kemiu a meral tekoi. Ngikel oumera er ngak a mo meruul a ikel kuruul; ng bai mo meruul a kuk meklou er a ikang, ele ngak a merael el mor a Chedam. 13 Mak mo remuul a ngii di le ngerang el molengit el oba ngklek, me bo lecholt a klebkellel a Chedam el okiu a Ngalek. 14 Cho molengit a ngii di le ngerang el oba ngklek, e ak mo meskemiu. 15 “A le betik a rengmiu er ngak, e kom mo olab a llechuk. 16 Ak mo olengit er a Chedam me ng mo meskemiu a tar a mo Olengeseu er kemiu, el mo kiei el obengkemiu el diak a ulebengelel. 17 Ngii a Chedaol Reng, el mo olecholt a klemerang el kirel a Dios. A beluulchad a diak el sebechel el nguu, ele ng diak el sebechel el mesang, el ka bo lodengelii. Ngdi kemiu a medengelii, ele ng kiei el obengkemiu e ngar a chelsiu. 18 “A bo kurael, e ng diak di bo le kemiu el tang; ak mo lmuut el mei. 19 Ngdi kmedu e a beluulchad a mo diak lesekak, ngdi kemiu a mo mesekak, ele ngak a di ngar me kemiu me kom dirrek el mo ngar. 20 Sel le mei sel sils, e kom mo medengei el kmo ngak a ngar a Chedam me kemiu a ngar ngak el di ua ngak el ngar kemiu. 21 “Ngikel ngma llechuk e otirakl, ngikei a betik a rengul er ngak. A Demak a mo betik a rengul er ngii e mo ochotak er ngii.” 22 Ma Judas (el kuk tar a chad, el diak el Judas Iskariot) a dilu el kmo, “Rubak, ke mekera e mo ochotau er kemam, e diak mochotau er a beluulchad?” 23 Ma Jesus a dilu er ngii el kmo, “Ngikel betik a rengul er ngak a mo oltirakl osisecheklek. A Demak a mo betik a rengul er ngii, e ngak ma Demak a mor ngii maki kiei el obengkel. 24 Ngikel diak le betik a rengul er ngak a diak loltirakl osisecheklek. E a osisechakl el bla mrenges a diak losisecheklek; ng bai osisecheklel a Chedam el ngikel ulderchak. 25 “Ak dima ouchais er kemiu a ikang er chelechal dirk kubengkemiu. 26 Ngikel Olengeseu, el Chedaol Reng, el bo loderchii a Chedam el mei el oba ngklek, a mo osisecheklemiu er a rokui el tekoi e mo omeklatk er kemiu er a ikel bek el bla kdu er kemiu. 27 “A budech a bo kbeskemiu. Ng budech er ngak a kumeskemiu. E a kumeskemiu e ng diak kua beluulchad a lomeskemiu. Lak louedikel a rengmiu, e lak kom medakt. 28 Kom rirengesak er a kdu er kemiu el kmo, Ak merael, e ak di mo e lmuut el mei.’ A le betik a rengmiu er ngak, e ng bai ungil a rengmiu a kurael el mor a Chedam; ele ngii a kuk ngarbab er ngak. 29 A ika di ba kulekoi er kemiu er uchei er a le bor ngii, me sel le bor ngii, e kom mo oumerang. 30 Ng dikea le sebechek el melekoi er kemiu a lmuut el bebil er a tekoi, ele merreder er tial beluulchad a merekung. Ngii a diak a klisichel er ngak, 31 ngdi beluulchad a kirel mo medengei el kmo ng betik a renguk er a Chedam, ma uchul mak meruul a ikel ledu er ngak a Chedam. “Mei me dorael el choridid er tiang.
1 “Ngak a meral dellomel el bilong, e a Demak a chad er a sers. 2 A bek el rachel el ngar ngak el diak lourodech a lolai el mengeroid, e a ikel ourodech a longimd me ng meloseb e mengal mo bekerredechel. 3 Kemiu a mla mo klikiid el oeak osisechakl el bla kbeskemiu. 4 Di bereked er ngak, me ngak di kbereked er kemiu. A rachel el diak le bereked er a chelechedal a bilong, a diak el sebechel el di ngii el mo ourodech. Me kemiu me ng ua isei el lak bereked er ngak e ng diak el sebechiu el mo ourodech. 5 “Ngak a dellomel el bilong me kemiu a rachel. Ngikel bereked er ngak me ngak a bereked er ngii a mo bekerredechel; ng diak a ngerang el sebechiu el rullii a lak ko bereked er ngak. 6 Ngikel diak le bereked er ngak, a mo mechoit el ua tar a rachel me ng mo merat; e a ua isel rachel a mo mengai el mo medul er a ngau. 7 A lsekum ko bereked er ngak ma tekingek a ngar a chelsiu, e a ngii di le ngeral somiu me kom olengit er ngii, a cho bo mnguu. 8 Sel bo bekerredechel e ng mukebkall a Demak; e tiaikid a rolel e kom mo obengkek. 9 Ng betik a renguk er kemiu el ua Chedam el betik a rengul er ngak; di mngar a chelsel a bltikerreng er ngak. 10 A cho moltirakl a tekingek, e kom di mo ngar a chelsel a bltikerreng er ngak, el di ua ingak el oltirakl a tekingel a Demak mak di ngar a chelsel a bltkil a rengul. 11 “A ika kulekoi er kemiu ma deurreng er ngak le bor a chelsiu, me bo le cherrungel a deurreng er kemiu. 12 Tiakid a llechuk el kmo, bo mkaubltikerreng, el di ua ingak el betik a renguk er kemiu. 13 A kot el ngarbab el bltikerreng a sel le mad a chad el kirir a re sechelil. 14 E kemiu a sechelik a lsekum kom meruul a ikel kdu er kemiu. 15 Ng dikea kdu el kmo kemiu a mesiou, ele mesiou a diak lodengei a ikel loruul a mastang er ngii. Ak bai melekoi er kemiu el kmo kom sechelik, ele kmla ouchais er kemiu a bek el tekoi el krirenges er a Demak. 16 Kemiu a dimlak molilt er ngak; e ng bai ngak a millilt er kemiu e millutk er kemiu me bong el mo ourodech er a rodech el diak bo le metemall. Ma Chedam bo le beskemiu a ikel molengit er ngii el oba ngklek. 17 Mada tiakid a llechuk el ekor kemiu, bo mkaubltikerreng. 18 “A lsekum a beluulchad ouketui er kemiu, e lak mobes el kmo ng dimla ouketui er ngak. 19 Chomko kom chedal a beluulchad, e a beluulchad a betik a rengul er kemiu el chedal. Ak millilt er kemiu el otebedemiu er tial beluulchad, me ng dikea mchedal; misei a uchul e a beluulchad ouketui er kemiu. 20 Molatk a ikel kdilu er kemiu el kmo, ‘Ng diak a sibai el ngarbab er a mastang er ngii.’ A lsekum tuleldechelakl er ngak, e te dirrek el mo oldechelakl er kemiu; ma lsekum tuleltirakl osisecheklek, e te dirrek el mo oltirakl osisechekliu. 21 Ngdi ikal rokui a bo loruul el ekor kemiu ele kemiu el chedak; e tir a diak lodengelii ngikel uleldurech er ngak. 22 Chomko ng dimlak kmei e kungedecheduch er tir e ng diak le kngterir; e ngdi chelechang, e ng dikea omesodir el kirel a kngterir. 23 Ngikel ouketui er ngak a dirrek el ouketui er a Demak. 24 Chomko ng dimlak kruul er a delongelir a ikel dirkak a chad el remuul, e ng diak a kngterir; e ngdi chelechang, e te mla mes ak riruul, e ouketui er ngak ma Demak. 25 Ngdi tiang a mle kirel mo ua isei me bo letaut a ikel llechukl er a Llach er tir el kmo, ‘Ng di dimlak a uchul e touketui er ngak.’ 26 “A Olengeseu, el Chedaol Reng a ngar a Chedam el mei, el mo olecholt a klemerang el kirel a Dios. Ak mo oderchii el ngar a Chedam el mer kemiu, me ng mo ouchais a chisek. 27 Me kemiu me kom dirrek el mo ouchais a chisek ele kom ulebengkek er a kot el uchul el mer chelechang.
1 “A ika di ba kulekoi er kemiu, me lak bo lak moumera er ngak. 2 Kom mo modik er a blil ongdibel, e mor ngii a belsechel e a re chad a mo omdasu el kmo a lomekoad er kemiu e te mengebkall er a Dios. 3 A ika bo loruul a re chad el ekor kemiu ele ng diak lodengelii a Chedam e dirrek el diak lodengelkak. 4 Ngdi ika di ba kulekoi er kemiu, me sel bo loruul, e kom mo lmatk a ikel bla kdu er kemiu. “A ikal tekoi a dimlak kulekoi er kemiu er a kot el uchul, ele ngak el ulebengkemiu. 5 Ngdi chelechang e ak mor ngikel ulderchak, ngdi diak a tar kemiu el oker er a kbor ngii. 6 Ak mla ouchais er kemiu me ng mocha mekngit a rengmiu. 7 Ngdi kulekoi er ngii er kemiu a meral tekoi. Ng bai ungil er kemiu a kurael, ele lak kurael, e ngikel Olengeseu a diak le mer kemiu. Ngdi lsekum ak merael, e ak mo oderchii el mer kemiu. 8 Me sel le mei, e ng mo olecholt er a re chad er a beluulchad el kmo te cheleuid el kirel a klengit ma llemalt ma kerrekerilel a Dios. 9 Te cheleuid el kirel a klengit ele tir el diak loumera er ngak; 10 e cheleuid el kirel a llemalt ele ngak el mor a Chedam me ng mo diak mesekak; 11 e cheleuid el kirel a kerrekeriil, ele merreder er tial beluulchad a mla mukerrekeriil. 12 “Ng dirk betok a kirek el melekoi er kemiu, ngdi ng kmal mo betok me ng diak bo modengei. 13 Me ng di sel le mei a Chedaol Reng, el ngikel olecholt a klemerang el kirel a Dios, e ng mo omekrael er kemiu el mo medengei a rokui el klemerang. Ng diak bo longedecheduch el oba di klisichel, ngdi mo melekoi a ikel lorrenges e mo subedemiu er a ikel tekoi el mor ngii. 14 Ng mo mengebkall er ngak, ele ng mo ngmai a ikel kulekoi e ouchais er kemiu. 15 A ikel rokui el lolab a Demak a kloklek; seikid a uchul mak dilu el kmo a Chedaol Reng a mo ngmai a ikel kbsang e ouchais er kemiu. 16 “Ng di kmedung e ng mo diak mesekak, e diak bo le meketeket e kom lmuut el mo mesekak.” 17 Ma re bebil er a rubengkel a mocha kakerker er a delongelir el kmo, “Tiang ngera belkul el lolekoi er ngii? Ng melekoi er kid el kmo ng di kmedung e ng mo diak desang, e diak bo le meketeket e kede lmuut el mo mesang; e dirrek el melekoi el kmo, ‘Ele ngak el merael el mor a Chedam.’ 18 Ngera ng melekoi er ngii a ledu el kmo ‘Ng di kmedung’? Ng diak dodengelii a belkul tial lolekoi er ngii!” 19 A Jesus a mle medengei el kmo ng sorir el oker er ngii, me ng dilu er tir el kmo, “Ak dilu el kmo, ‘Ng di kmedung e ng mo diak mesekak.’ Tiaikid cho mkakerker er ngii er a delongeliu? 20 A kulekoi er ngii er kemiu a meral tekoi. Kom mo lmangel e mengebechub, e a beluulchad a mo ungil a rengul; ng mo mekngit a rengmiu, ngdi kngtil a rengmiu a mo obult el mo deurreng. 21 A redil sel bochu lomechell, e ng mekngit a rengul ele ng mocha belsechel a ringel; ngdi sel le mechell a ngalek, e ng obes er a rengelel, ele ng dmeu a rengul er a ngalek el mla mechell el mer a beluulchad. 22 Me ng ua isei el kiriu. Chelechang e ng mekngit a rengmiu, ngdi kede lmuut el mo kasoues, me ng kmal mo dmeu a rengmiu, el ngii el deuil a rengmiu a diak a sebechel el choridii er kemiu. 23 “A le mei sel sils, e ng diak a ngeral molengit er ngak. A kulekoi er kemiu a meral tekoi, a Chedam a mo meskemiu a ngii di le ngerang el molengit er ngii el oba ngklek. 24 Ng me lmuut er chelechang e ng dirkak a ngeral molengit el oba ngklek. Molengit me bo mngai ongtmiu me lesal mo dmeu a rengmiu. 25 “A ika kullekoi er kemiu el di ullab a belkul a tekoi. Ngdi ng mo e mo diak kulab a belkul a tekoi el mengedecheduch, e bai di mo bleketakl el ouchais er kemiu a tekoi el kirel a Chedam. 26 Sel sils a le mei, e kom mo oba ngklek el olengit er ngii; ng diak kdu el kmo ak mo olengit er ngii el kiriu, 27 ele Chedam a betik a rengul er kemiu. A uchul me ng betik a rengul er kemiu, kemiu el betik a rengmiu er ngak e dirrek el oumera el kmo ak mlar a Dios el mei. 28 Ak mlar a Chedam el mer a beluulchad; me chelechang e ak tuobed er a beluulchad el mor a Chedam.” 29 Itia e a rubengkel a dilu er ngii el kmo, “Kau tial di bleketakl el mengedecheduch el diak mousbech a belkul a tekoi. 30 Aki mla mo medengei el kmo ke di medengei a rokui el tekoi. Ke medengei a ker er uchei er a loker er kau a ngii di le chad. Tiaikid a uchul e aki oumera el kmo ke mlar a Dios el mei.” 31 Ma Jesus a dilu er tir el kmo, “Kom oumera er chelechang? 32 Ng merma sel belsechel el kmal kmedang, el bo mobriid el rokui el mo chemur a rekeblimiu, e choitak me ng di mo ngak el tang. Ngdi diak di bo le ngak el tang, ele Chedam a obengkek. 33 Tia kulekoi er ngii er kemiu me bo mngar a budech cho mobengkek. A beluulchad a mo omekcharm er kemiu. Ngdi lak kom medakt, e ak mla mo mesisiich er a beluulchad!”
1 A Jesus er a bo le merek el mengedecheduch, e ng mlo dmangesbab el bedul a eanged e dmu el kmo, “Chedam, ng mla mei sel belsechel. Mkebkellii a Ngelekem, ma Ngelekem le kebkellau. 2 Ke milsa klisiich el mengedereder er a rokui el chad, me bo le besterir a diak a ulebengelel klengar tirkel rokui el multerkeklterir er ngii. 3 A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei. 4 Ak mla ochotii a klebkellem er a beluulchad e mla rokir sel ureor el mulderchak el me meruul er ngii. 5 Chedam, chelechang e beskak a klebkall er tilechang el cho mngar ngii, el osisiu el klebkall el kulebang e obengkem er uche er a lobeob a beluulchad. 6 “Ak mla ochotau er tirkel mngilititerir er a beluulchad el multerkeklterir er ngak. Te mle chedam me ke mla oterkeklterir er ngak. Tullab a tekingem 7 me chelechang e te medengei el kmo a ikel bek el cho bilskak a ngar kau el mei. 8 A tekoi el cho bilskak a bla kbesterir, me te ngiluu; te medengei el kmo ak meral mlar kau el mei, e oumera el kmo kau a ulderchak el mei. 9 “Ak meluluuch el kirir. Ng diak kululuuch el kirel a beluulchad, ak bai meluluuch el kirir tirkel multerkeklterir er ngak ele te chedam. 10 A rokui el ngar ngii er ngak a kloklem, ma rokui el ngar ngii er kau a kloklek; a klebkellek a mo chemolt el okiu tir. 11 Chelechang e ak ekor kau me ng mo diak kngar a beluulchad, ngdi tir a dirk ngar a beluulchad. Chedaol Chedam, mongkar er tir el oba klisichel a ngklem, ngii el ngklem el bilskak, me di bo le tang el ua kau me ngak el di tang. 12 Ser a kubengterir, e ak mle kerekikl er tir el oba klisichel a ngklem el bilskak. Ak milsebechakl er tir me ng dimlak a tar tir el remiid; ngdi tal ngikel chad el kirel mo remiid a ririid, me bo letaut a Chedaol Llechukl. 13 Chelechang e ak ekor kau, mak dmu ikal tekoi er chelechal dirk kngar a beluulchad me lesal mo dmeu a rengrir el ua ingak el kmal dmeu a renguk. 14 A tekingem a bla kbesterir ma beluulchad ouketui er tir, ele tir el diak le ua re chad er a beluulchad, el di ua ingak el diak ua re chad er a beluulchad. 15 Ng diak kulengit er kau me moltobed er tir er a beluulchad, ak bai olengit er kau me mongkar er tir er ngikel Mekngit. 16 Ngak a diak kua re chad er a beluulchad, me tir me te ua ingak el diak le ua re chad er a beluulchad. 17 Mongedaol er tir el mo chedam el okiu a klemerang; a tekingem a klemerang. 18 Ak uleldurech er tir el mor a beluulchad, el di ua ser cho moldurech er ngak el mer a beluulchad. 19 Ng tir a uchul e ak uldersak el ekor kau, me tir me te dirrek el meral modars el ekor kau el okiu a klemerang. 20 “Ng diak di kululuuch el kirir e le merekong, ak dirrek el meluluuch el kirir tirkel mo oumera er ngak el tekingir a uchul. 21 Ak ulengit el kmo bo le ta rengrir el rokui. Chedam, bo lobengked el di ua ikau el obengkek me ngak a obengkem. Bo le ta rengrir me bo loumera beluulchad el kmo kulderchak el mei. 22 Ak milsterir osisiu el klebkall el bilskak, me bo le ta rengrir el di ua ikau me ngak el ta rengud, ma kulekoi er ngii a kmo, 23 ngak a obengterir me kau a obengkek, me bo le meral ta rengrir, ma beluulchad bo lodengei el kmo kulderchak e betik a rengum er tir el di ua bltkil a rengum er ngak. 24 “Chedam, ke ngilititerir el meskak, me ng soak a bo lobengkek el ngar sel kngar ngii, me bo lesa sel klebkellek el bilskak; ele ng mle betik a rengum er ngak er uchei er a lobeob a beluulchad. 25 Melemalt el Chedam, a beluulchad a diak lodengelkau, ngdi ngak a medengelkau, me tirkang a medengei el kmo kau a ulderchak el mei. 26 Ak mla ochotau er tir e mo melemolem el olecholt er kau er tir, me bo le betik a rengrir er a re chad el ua ikau el betik a rengum er ngak, me ngak mak dirrek el obengterir.”
1 Ser a bo le merek a Jesus el meluluuch, e ngii ma rubengkel a mlo imuul er Omoachel Kidron el mor a tal sers. 2 E a Judas, el ngikel olterau er a Jesus, a mle medengelii ngii el sers, ele Jesus ma rubengkel a mle mekudem el mo kldibel er ngii. 3 Ma Judas a chilteklii a cheldebechel er a re soldau er a Rom, ma re bebil er a re mengkar er a Templo el luleldurech er tir a re bderrir a re prist ma re Farisi e ngilititerir el mor ngii el sers. Te mle kldmokl er a klekedall er a mekemad e ullab a olbidel ma tuich. 4 E a Jesus a mle medengei el kmo te mo mekera er ngii, me ng ngileriakl el mo bedul tir e oker er tir el kmo, “Ng techa cho mosiik er ngii?” 5 Me te dilu el kmo, “Ng Jesus er a Nasareth.” Me ng dilu el kmo, “Ngak tiang.” A Judas, el ngikel olterau er a Jesus a ulebengterir el dechor. 6 Ser a ledu er tir a Jesus el kmo, “Ngak tiang,” e tulebetetelluut el moubuu er a chutem. 7 Me ng liluut el oker er tir a Jesus el kmo, “Ng techa cho mosiik er ngii?” Me te dilu el kmo, “Ng Jesus er a Nasareth.” 8 Ma Jesus a dilu el kmo, “Ak mla dmu er kemiu el kmo ngak tiang. A lsekum kom osiik er ngak, e bechititerir tirkal bebil er a re chad me lorael.” 9 Tia lullekoi er ngii me bo letaut a ikel le dilung el kmo, “Chedam, ng dimlak a tar tirkel multerkeklterir er ngak el kurridii.” 10 E a Simon Petrus a uleba saider, me ng ultebedii el melobech el kimdii a kadekmel a dingal a sibil a Ngarbab el Prist. A ngklel ngiil sibai a Malkus. 11 Ma Jesus a dilu er a Petrus el kmo, “Motungii a saider er kau er a blil! Komdasu el kmo ng diak bo kulim er sel kob er a ringel el lomeskak a Demak?” 12 Itia e a re soldau er a Rom ma mengeteklir, ma re bulis el chad er a Judea a ngiluu a Jesus, e rirengedii 13 e mle kot el nguu el mor a Anas. Ngika mle demal a bechil a Kaifas, el ngii a mle Ngarbab el Prist er seikid el rak. 14 A Kaifas a ngikel millekoi er a re mengeteklir a re chad er a Judea el kmo ng bai ungil a di tal chad a bo le mad el kirir a re bek el chad. 15 A Simon Petrus me ngikel tar a rubengkel a Jesus a uleltirakl er a Jesus. Ngikel tar a rubengkel a Jesus a ble lodengelii a Ngarbab el Prist, me ng ulebengkel a Jesus el mor a mekesekesel a blil a Ngarbab el Prist, 16 e a Petrus a di mlar rikl el mlar bita er a siseball. Mitia e ngikel tar a rubengkel a Jesus el mle kaodengei ngii ma Ngarbab el Prist a liluut el mo tuobed, e milengedecheduch er a kekerel redil el ngar a siseball, e ngiluu a Petrus el otungii. 17 E ngii el redil el ngar a siseball a dilu er a Petrus el kmo, “Kau ng diak mtar a rubengkel ngikel chad?” Ma Petrus a dilu el kmo, “Ng diak, ng diak ktar tir.” 18 Ng mle klou a kelekolt ma re mesiou ma re mengkar er a Templo a ngilai a sumi e chilemlii a ngau e mlo iliuekl er ngii el meseb a ngau. Ma Petrus a mlong me ng obengterir el dechor e meseb er a ngau. 19 A Ngarbab el Prist a uleker er a Jesus el kirir a rubengkel ma kirel osisecheklel. 20 Ma Jesus a dilu el kmo, “Ak di mle blechoel el bleketakl el mengedecheduch er a re bek el chad; ma rokui el osisecheklek a kullisechakl er a blil ongdibel ma Templo el ble le kldibel er ngii a re bek el chad. Ng kmal dimlak a berrotel el cheldechedechak. 21 Ngera me kom oker er ngak? Moker er a re chad el ulerrenges er ngak. Moker er tir a ikel kdilu er tir. Te medengei a kullekoi.” 22 Ma le dela ika Jesus, e a tar a re mengkar er a Templo el mlar sei a chilsuerngii e dmu el kmo, “Ng ua ise ngerem el mor a Ngarbab el Prist?” 23 Ma Jesus a dilu er ngii el kmo, “A le ngar ngii a cheleuid el kdillii, e mochotii er a rokui el chad el ngar tiang. Ngdi le melemalt a kullekoi, e ngera me ke mengelebed er ngak?” 24 Itia e ng di mle rrengodel e a Anas a dilu me te nguu el mor a Kaifas el Ngarbab el Prist. 25 E a Petrus a dirk mle dechor el meseb er a ngau. Ma re bebil er a re chad a dilu er ngii el kmo, “Kau ng diak mtar a rubengkel ngikel chad?” Ma Petrus a uluumededenger er ngiil tekoi, e dilu el kmo, “Ng diak, ng diak ktar tir.” 26 Ma tar a re sibil a Ngarbab el Prist, el chedal ngikel chad el le dilebesii a dingal a Petrus a uleker el kmo, “Kau ng dimlak kisekau el obengkel er sel sers?” 27 Me ng liluut a Petrus el dmu el kmo, “Ng diak,” e tiaikid e ngii a merros a malk. 28 E a dirk tutau e te ngiluu a Jesus er a blil a Kaifas e nguu el mor a blil a kabernor. A re mengeteklir a re chad er a Judea a dimlak bo le siseb er a blai, ele ng dimlak le sorir el mukidokel, ele te millatk a mor a blengur er a Baskua. 29 Ma Pilatus a mlo tuobed e oker er tir el kmo, “Ng ngera ultutekliu el kirel ngikal chad?” 30 Me te dmu el kmo, “A lemlak a le tilemellii, e ng dimlak kim oba el mer kau.” 31 Ma Pilatus a dilu er tir el kmo, “Mada mnguu el ekong e moukerrekeriil er ngii el oltirakl a llechemiu.” Me te dilu el kmo, “Ng diak el subed er kemam el omekoad er a chad.” 32 (Tia mlo ua isei el mo oltaut a le dilu Jesus er ser a lolecholt er a teletelel a kodall el bo le mad er ngii.) 33 A Pilatus a liluut el mo tmuu er a blai e okerir a Jesus el mong, e oker er ngii el kmo, “Kau ke king er a re chad er a Judea?” 34 Ma Jesus a dilu el kmo, “Tia ng di kerim ma lechub e te ngar ngii a re chad el mla ouchais a chisek er kau?” 35 Ma Pilatus a dilu el kmo, “Cho momdasu er ngak e ak chad er a Judea? Te chedam ma re bderrir a re prist a ulebekau el mer ngak. Ngera ke mla rullii?” 36 Ma Jesus a dilu el kmo, “A rengedek a diak le renged er tial beluulchad; ele chomko ng renged er tial beluulchad, e a re chedak a mo oumekemad me ng diak bo kmengai el mor a re mengeteklir a re chad er a Judea. Ngdi rengedek a diak le renged er tial beluulchad!” 37 Ma Pilatus a uleker er ngii el kmo, “A le ua isei, e kau ke king?” Ma Jesus a dilu el kmo, “Ke mla dulii er a ngerem el kmo, ngak a king. A uchul mak mlechell el mer tial beluulchad, a mlei el me ouchais er a klemerang. Tirkel chedal ngii el klemerang orrenges er ngak.” 38 Ma Pilatus a uleker el kmo, “Me ng ngera klemerang?” Itia e a Pilatus a liluut el tuobed el mor a mederir a re chad e dmu er tir el kmo, “Ng diak kbetik er a mo uchul e lobals. 39 Ngdi doltirakl a siukang er kemiu, e ak di blechoel el melubet er a tar a kelebus el chad sel le Baskua. Ng somiu a kngebetii el meskemiu a king er a re chad er a Judea?” 40 Me tuleldiu er ngii el kmo, “Ng diak, lak molubet er ngii. Kemam a somam a Barabas!” (A Barabas a mle bekeu el merechorech.)
1 Mitia e a Pilatus a dilu er a re soldau er a Rom me te nguu a Jesus el mo cholebedii. 2 E a re soldau a chilusii a besichel a bdelul el tochedulik e nguu el loia er a bdelul, e sola e milii er a smiich el bekerkard el ikrel a bail 3 e mor ngii me te dmu el kmo, “Aki ouetkeu er kau el King er a re chad er a Judea!” E mo mengelebed er ngii. 4 Ma Pilatus a liluut el mo tuobed e mengedecheduch er a seked el kmo, “Ak mo otebedii el mer tiang me bo modengei el kmo ng diak el sebechek el metik er a ngii di le ngerang el mo uchul e ng obals.” 5 Me ng mlo tuobed a Jesus el belsiochel a bdelul er a tochedulik e bliull er a smiich el bekerkard el ikrel a bail. E a Pilatus a dilu er tir el kmo, “Ngkaikid ngii el chad!” 6 Ma re bderrir a re prist ma re mengkar er a Templo er a lesang, e tuleldiu el kmo, “Bo le medeel er a kerus! Bo le medeel er a kerus!” Ma Pilatus a dilu er tir el kmo, “Mada di le kemiu el nguu el mo dmelii er a kerus. Ng diak kbetik er a mo uchul e ng obals.” 7 Me tial seked a dilu el kmo, “Ng ngar ngii er a llechemam a melekoi el kmo ng kirel el mo mad, ele ng di ngii el melekoi el kmo ng Ngelekel a Dios.” 8 Tia er a le renges a ika Pilatus e ng mengal mlo medakt. 9 Me ng mlo tmuu er a blai e oker er a Jesus el kmo, “Kau ke mlar ker el mei?” E ngdi Jesus a di liluk. 10 Ma Pilatus a dilu er ngii el kmo, “Ng diak cho molekoi er ngak? Lak mobes el kmo ngak a ngar ngii a klisichek el ngubetau e dirrek el ngar ngii a klisichek el mo mengerus er kau.” 11 Ma Jesus a dilu el kmo, “A lemlak le beskau a klisiich a Dios e ng diak a klisichem er ngak. Me ngikel chad el ngilikak el mer kau a lmuut el klou a telemellel er kau.” 12 A Pilatus er a le renges a ikang, e ng ulsiik a rolel e melubet er a Jesus. Ngdi seked a uleldiu el mor ngii el kmo, “Kau cho mngebetii, e ng diak msechelil a merreder er a Rom! A chad el di ngii el kmo ng king a omtok er a merreder er a Rom!” 13 Ma Pilatus er a le renges ngii el tekoi, e ng ngiluu a Jesus el mor rikl e mo dengchokl er a kingall er a kerrekeriil el ngar sel “Cheldukl Bad” a ngklel. (A le Hebru e ng “Gabbatha.”) 14 Tia mochu sueleb er sel sils er uchei er a Baskua. Ma Pilatus a dilu er a re chad el kmo, “Ngkakid a king er kemiu!” 15 Me tuleldiu el mor ngii el kmo, “Mokodir! Mokodir! Bo le medeel er a kerus!” Ma Pilatus a uleker er tir el kmo, “Ng somiu a king er kemiu a bo le medeel er a kerus?” Ma re bderrir a re prist a dilu el kmo, “Ng di tal Kaiser a king er kemam!” 16 Itia e a Pilatus a milecherei a Jesus me te nguu el mo meleel er ngii er a kerus. Ma re soldau a ngiluu a Jesus el mocha oungerachel er ngii. 17 Ng tilobed el mengol er a kerus er ngii el mor a lomekedo er ngii el chutem el kmo, “Blil Omilel a Bedul.” (A le Hebru e ng Golgatha.” 18 Me te dilelii er a kerus er isei, e dirrek el dilelterir er a kerus a re teru er a re chad, ma Jesus a mlar a belngel e tir a ngar a bita ma bitang. 19 E a Pilatus a lilechesii a tar a tekoi e dilu me te loia er bebul a kerus. Ng mle llechukl el kmo, “Jesus er a Nasareth, el King er a re chad er a Judea.” 20 Te betok el chad a chiliuii, ele sel le meldeel er a kerus er ngii a Jesus a dimlak le cheroid er a beluu. Sel le lilechesii a mle llechukl er a Hebru, ma Latin, ma Grik. 21 Ma re bderrir a re prist a dilu er a Pilatus el kmo, “Lak moluches er ngii el kmo, ‘King er a re chad er a Judea’, e bai mlechesii el kmo ‘Ngikal chad a millekoi el kmo ngak a king er a re chad er a Judea.’” 22 Ma Pilatus a dilu el kmo, “A ikel bla kluches a di medechel el ua isei.” 23 A re soldau er a bo le merek el meleel er a Jesus er a kerus, e te ngiluu a bilel el mei e mingii el mo eual bliongel, me te mlo chemur a blingelir er ngii. Te dirrek el ngiluu sel ikrel a bilel el di chelaus er bab el mor iou e diak a rresmelel. 24 Te mle katekoi el kmo, “Mei me lak dosodel er ngii, bai bo de kengmors el osiik er a mo nguu.” Te mle ua isei el oltaut a Chedaol Llechukl el kmo, “Te milii a bilek er a delongelir e mlo kengmors er a ikrel a bilek.” A ikakid a lurruul a re soldau. 25 A delal a Jesus, ma tar ngii, ma Maria el bechil a Klopas, ma Maria Magdalene, a dilechor er bita er a kerus er a Jesus. 26 Ma Jesus a milsa delal me ngikel kmal betik er a rengul el tar a rubengkel me ng dilu er a delal el kmo, “Ngika ngelekem.” 27 E sola e dmu er ngikel kmal betik er a rengul el kmo, “Ngika delam.” Me ng di mle seikid e ng nguu a delal a Jesus el mor a blil me ng kiei el obengkel. 28 A Jesus a mle medengei el kmo ng mocha merek a bek el tekoi, me ng uleltaut er a Chedaol Llechukl er a ledu el kmo, “Ng meched a renguk.” 29 E mlar ngii a delluchel el belatong er sei el mle mui er a beot a cheral el bilong, me te dillechii a sponge er ngii e nguu el loia er a chelechedal a hisob e odersii el mor a ngerel. 30 Ma Jesus er a lengim ngii el bilong e ng dilu el kmo, “Ng mla mecherrungel a rokui el tekoi!” E sola e childir a chiklel e suebek a telil. 31 E a re mengeteklir a re chad er a Judea a mlo olengit er a Pilatus me le kengei er tir el mo chuam ocherir tirkel chad el ngar a kerus e lotengelterir. Ng mle Sils er a Omengedmeklel a Chedaol Sils ma uchul me tullengit er tial tekoi, ele ng dimlak le sorir a le medechel a cheklechir er a kerus er a Ulengull el Sils, ele isel Ulengull el Sils a kmal mle chedaol. 32 Ma re soldau a mlor tirkel meldeel er a kerus er bita er a Jesus me te chuam ochil a tang e kuk mor ngikel tang me te chuam ochil. 33 Ngdi tia er a le bor a Jesus, e te milsa el mla mad me ng dimlak longam ochil. 34 Ngdi tar a re soldau a ngiluu a biskelengel el rusur a kekengel a Jesus, me ng di tilobed er ngii a rasech ma ralm. 35 (Ngikel milsa tiang a ouchais er ngii, me mdirrek el mo oumerang. Ng merang a ikel lolekoi, e dirrek el medengei el kmo ng melekoi a klemerang.) 36 Tia merruul el ua isei el oltaut a lolekoi a Chedaol Llechukl el kmo, “Ng diak a tal chiuesel el mo mecham.” 37 A kuk tar a tekoi er a Chedaol Llechukl a kmo, “A re chad a mo mesa ngikel le rirsur.” 38 Tiaikid e a Josef el chad er a Arimathea a mlo olengit er a Pilatus me bo le sebechel el nguu a bedengel a Jesus. (A Josef a di mle berrotel el oltirakl er a Jesus, ele ng mle medakt er a re mengeteklir a re chad er a Judea.) A Pilatus a kilengei er ngii me ng mlong me ng nguu a cheklechel a Jesus. 39 Ma Nikodemus, el kot e ng mlo omes er a Jesus er a klebesei, a dirrek el ulebengkel a Josef el mong. Ng ullab a bekord el 100 el bond el urrechomel el mir ma aloes. 40 Me tir el terul chad a ngiluu a bedengel a Jesus e milii er a becheleleu el mamed el ngar ngii a ungil a bul chilt er ngii el oltirakl er a blekerdelir a re chad er a Judea a lolakl er a re chad. 41 Sel le mlad er ngii a Jesus a mlar ngii a sers er ngii, e mlar ngii a beches el debull er ngii el dirkak a chad el medakl er ngii. 42 Te ngiluu a bedengel a Jesus el mo loia er ngii ele ng di mle kmeed, e mle sel sils er uchei er a Ulengull el Sils.
1 A tutau er a Sunday er a dirk le mesesilkolk, e a Maria Magdalene a mlor a debull e milsa sel bad el mlar a medal a debull el mla mengai el mo cheroid. 2 Me ng rirurt el mor a Simon Petrus me ngikel tar a obengkel a Jesus, el kmal betik er a rengul, e dmu er tir el kmo, “A Rubak a bla le nguu el choridii er a debull, e diak ki modengelii a blo llia er ngii!” 3 Ma Petrus me ngikel tar a obengkel a Jesus a mlor a debull. 4 Te rirurt el terung e ngikel tar a obengkel a Jesus a mle bekerurt el remurt me ng ulechetir a Petrus el ma mor a debull. 5 Ng dimlak bo le siseb, ngdi mle ultom el omes e miles a mamed. 6 E a Simon Petrus a uleak ullel el mei el di mlei el mo soiseb er a debull. Ng miles a ikel mamed el ble le bliull er ngii el medechel 7 me sel mamed el mle bilel a bdelul a Jesus. Ng dimlak luldak er a ikel bebil er a mamed e bai mle iluil el ileakl. 8 Itia e ngikel kuk tar a obengkel a Jesus el di mla mor a debull, a dirrek el mlo soiseb; ng miles me ng mlo oumerang. 9 (Ng dirkak bo lodengei a lolekoi a Chedaol Llechukl el kmo ng kirel el mo mokiis er a kodall.) 10 Itia e tirkal obengkel a Jesus a merola el mo remei. 11 A Maria a dilechor er a ikrel a debull el lmangel. Me ng lmangel e mo terrob el omes er a chelsel a debull 12 e meseterir a re terul anghel el bliull er a becheleleu el bail e dengchokl er sel le mlar ngii a bedengel a Jesus, el tar tir a ngar a le mlar ngii a bdelul ma tang a ngar a le mlar ngii ochil. 13 Me tuleker er ngii el kmo, “Kel dil, ngera me ke lmangel?” Me ng dilu el kmo, “Te mla nguu a Rubak er ngak, e diak kudengelii a blo llia er ngii!” 14 E a le beltii e ng mesa Jesus el dechor, e ngdi dimlak lodengei el kmo ng Jesus. 15 Ma Jesus a uleker er ngii el kmo, “Ngera me ke lmangel e kel dil? Ng techa cho mosiik er ngii?” E a Maria a rengul ng chad er a sers me ng dilu er ngii el kmo, “Kel chad, a lsekum ke ngiluu, e msbedak er cho blo mlia er ngii me bo knguu.” 16 Ma Jesus a dilu er ngii el kmo, “Maria!” Me ng ulebult el bedul ngii e melekoi a Hebru el kmo “Raboni!” (el belkul a kmo “Sensei.”) 17 Ma Jesus a dilu er ngii el kmo, “Lak morreked er ngak, e ng dirkak bo kngasech el mor a Chedam. Bai morael el mor a rubengkek me msbedeterir el kmo ak lmuut el mor a Demak, el Demerir, e Dios er ngak el dirrek el Dios er tir.” 18 Ma Maria Magdalene a mirrael el mo ouchais er a rubengkel a Jesus el kmo ng mla mesa Rubak e uluuchais er tir a ikel le dilu er ngii. 19 Ng mle kebesengei er sel kot el sils er uriul er a Ulengull el Sils e a rubengkel a Jesus a mle kldibel el di chelseches a chesmerir, ele te mle medakt er a re mengeteklir a re chad er a Judea. E sola e a Jesus a mlong el mo dechor er a delongelir e dmu el kmo, “A budech lekor kemiu.” 20 Ng dillii tiang, e ulecholt er tir a chimal ma kekengel. Ma rubengkel a Jesus a kmal mlo dmeu a rengrir er a lesa Rubak. 21 Ma Jesus a liluut el dmu er tir el kmo, “A budech lekor kemiu. Ak mo oldurech er kemiu el di ua Chedam el ulderchak el mei.” 22 E sola e millokou el mo bedul tir e dmu el kmo, “Mnguu a Chedaol Reng. 23 A lsekum kom ousubes a kngterir a re chad, e ng musubes; ngdi lsekum ng diak mousubes a kngterir, e ng diak le musubes.” 24 A Thomas el tar a re truich ma terung el obengkel a Jesus (el lomekedong er ngii el kmo Kebtot), a dimlak le teloi er tir er ser a le bo Jesus. 25 Me tirkel bebil a uluuchais er ngii el kmo, “Aki mla mesa Rubak!” E a Thomas a dilu er tir el kmo, “A lak kues e krutech a ikel ultil a deel er a chimal, e kutungii a chimak er a kekengel e ng diak bo kuumerang.” 26 Ng mlo chuib a tal sandei e a rubengkel a Jesus a mlar a chelsel a blai el kldibel e a Thomas a ulebengterir. A chesimer a mle chelseches, e a Jesus a di mlong el mo dechor er a delongelir e dmu el kmo, “A budech lekor kemiu.” 27 E sola e dmu er a Thomas el kmo, “Mlia cheldngelel a chimam er tiang, e mues a chimak; e modersii a chimam el mer a kekengek. Mei me lak lak moumerang, e bai bo moumerang!” 28 Ma Thomas a dula er ngii el kmo, “Rubak er ngak e Dios er ngak!” 29 Ma Jesus a dilu er ngii el kmo, “Koumerang ele kau el omes er ngak? Te ngeltengat tirkel diak lesekak e oumerang!” 30 A Jesus a riruul a lmuut el betok el mengasireng el tekoi er mederir a rubengkel el diak el llechukl er tial babier. 31 Ngdi ikang a melluches me bo moumerang el kmo a Jesus a Mesias, el Ngelekel a Dios, me cho moumerang er ngii e kom nguu a klengar.
1 Uriul er itiang, e a Jesus a liluut el mo chemolt er a rubengkel er a Daob er a Tiberias. Tiakid a chisel er a le bong. 2 Ng dilak a Simon Petrus, ma Thomas (el Kebtot), ma Nathanael (el chad er a Kana er a Galilea), ma re ngelekel a Sebedeus, ma re lmuut el teru er a rubengkel a Jesus, 3 e a Simon Petrus a dmu er tir el kmo, “Ngak a mochu er a chei.” Me te dilu er ngii el kmo, “Aki obengkem.” Me te ngilasech er a bos el merael, e mle tal kesus el le ngar a chei e di dimlak a tal chelderir. 4 E a le ngesecha sils, e a Jesus a dilechor er a tkul a daob, e ngdi rubengkel a dimlak lodengei el kmo ng ngii. 5 Me ng uleker er tir el kmo, “Eoch, ng diak a cheldmiu?” Me te dilu el kmo, “Ng kmal diak a di tal cheldmam.” 6 Me ng dilu er tir el kmo, “Motengelii a uuked er a mo bedul a kadikm er a bos e ng mor ngii a mor a uuked.” Me tultengelii a uuked e mlo diak el sebechir el mdeir ngii el uuked er a ildisel a ngikel. 7 Me ngikal obengkel a Jesus, el betik er a rengul a dmu er a Petrus el kmo, “Ngike Rubak!” A Petrus a dimlak lungil el bliull, me ser a le renges el kmo ng Rubak e ng lilia ikrel a bilel e mo suchesokl er a daob. 8 Tirkal bebil er a rubengkel a Jesus a di mlar a bos e mengurs er a uuked el mui er a ngikel el oba el mor a beluu. Ng dimlak lesal cheroid er a beluu; ng locha di mle 100 el yard a cherridir er a beluu. 9 E a bocha lekerd er a beluu e te miles a blauang ma ngeuil a sumi el ngar ngii a ngikel er ngii. 10 Ma Jesus a dilu er tir el kmo, “Mnga bebil er a cheldmiu el mei.” 11 Ma Simon Petrus a mocha er a bos el kursii a uuked el mui er a meklou el ngikel el mer a klechutem. Ng kmal mle betok ngii el ngikel ele ng mle 153 a ildisel, e ngdi dimlak le metat a uuked. 12 E a Jesus a dula er tir el kmo, “Me momengur.” Ng dimlak a tar a rubengkel el sebechel el oker er ngii el kmo, “Kau ke techang?” ele te mle medengei el kmo ng Rubak. 13 Ma Jesus a mocha ngma blauang ma ngikel el mesterir me te mengang. 14 Tia ia mong me ng ongede er a bo lecholt a Jesus er a rubengkel er uriul er a le bekiis er a kodall. 15 Ma bocha le merek el omengur e a Jesus a uleker er a Simon Petrus el kmo, “Simon el ngelekel a Johanes, a bltkil a rengum er ngak ng kuk ngar uchei er a bltkil a rengrir tirkang er ngak?” Me ng dilu el kmo, “Ochoi e Rubang. Ke medengei el kmo ng betik a renguk er kau.” Ma Jesus a dilu er ngii el kmo, “Momecheliu a chermek el ngelekel a sib.” 16 Ng luuta Jesus el mo me ng ongerul loker er ngii el kmo, “Simon el ngelekel a Johanes, ng betik a rengum er ngak?” Me ng dilu el kmo, “Ochoi e Rubang. Ke medengei el kmo ng betik a renguk er kau.” Ma Jesus a dilu er ngii el kmo, “Momecheliu a chermek el sib.” 17 Ng liluut a Jesus el oker er ngii el mo me ng ongedel loker er ngii el kmo, “Simon el ngelekel a Johanes, ng betik a rengum er ngak?” Itia e a Petrus a mekngte rengul ele ng mocha edei el loker er ngii a Jesus el kmo, “Ng betik a rengum er ngak?” me ng dilu er ngii el kmo, “Rubak, kau a medenge rokui el tekoi; ke medengei el kmo ng betik a renguk er kau!” Ma Jesus a dilu er ngii el kmo, “Momecheliu a chermek el sib. 18 A kulekoi er kau a meral tekoi. Ser cho mngeasek, e ke di kudmeklau e merael el mor sel soam el mor ngii; e ngdi sel mchudelang, e ke mo merk a chimam e a kuk tar a chad a mo rongedau e ngoikau el mor a diak el soam el mor ngii.” 19 (Tia lullekoi er ngii a Jesus el olecholt er a mo blekerdelel a kodellel a Petrus el bo le kebkellii a Dios er ngii.) E sola e a Jesus a dilu er ngii el kmo, “Moltirakl er ngak!” 20 A Petrus er a le beltii e ng milsa ngikel kuk tar a rubengkel a Jesus, el kmal betik er a rengul, el mle ultuil er ngii er a le ngar a blengur e uleker er ngii el kmo, “Rubak, ng techa mo olterau er kau?” 21 A Petrus er a lesang, e ng uleker er a Jesus el kmo, “Rubak, e ngikal chad a mekerang?” 22 Ma Jesus a dilu er ngii el kmo, “A le soak a di le chad el mor sel kluut el mei, e ng ngera kirem er ngii? Kau moltirakl er ngak!” 23 Me ng uleberk a chais er a delongelir a rubengkel a Jesus el kmo a leko ngkaikid el tar a rubengkel a Jesus a diak bo le mad. Ngdi Jesus a dimlak ledu el kmo ng diak bo le mad; ng dilu el kmo, “A le soak a di le chad el mor sel kluut el mei, e ng ngera kirem er ngii?” 24 Ngkaikid ngii el tar a rubengkel a Jesus el melekoi a ikal tekoi, e dirrek el liluches; me kede medengei el kmo ng meral tekoi a lolekoi. 25 Ng lmuut el betok el tekoi a le riruul a Jesus. E ngdi chomko kede mo oudertal meluches, e a kumdasu e tial beluulchad el rokir a mo kekerei el diak el sebechel el tokau a ikel rokui el babier el mo meluches.