Kua riro mai te Tuatua 'ei tangata
1 I vai ana te Tuatua i muatangāna, i te Atua ra 'oki te Tuatua, ē ko te Atua 'oki te Tuatua. 2 I te Atua ra 'oki aia i muatangāna. 3 Nā roto mai i aia te au mea kātoatoa; kāre 'ua tēta'i mea tei 'anga'ia, tei kore i 'anga'ia e ia. 4 Tei roto i aia te ora, ē taua ora ra tō te tangata ia mārama; 5 ē i kakā mai ana te mārama ki te pōiri, kāre rā te pōiri i 'āriki atu i te reira. 6 Tēta'i tangata ra tei tonokia mei kō mai i te Atua ra, ko Ioane te ingoa. 7 I 'aere mai aia 'ei kite, 'ei 'akakite'anga i taua mārama ra kia 'akarongo te tangata kātoatoa nā roto i aia. 8 Kāre rā aia i taua mārama ra, inārā, i 'aere mai aia 'ei 'akakite'anga i taua mārama ra. 9 Ko te mārama mou ra ko tei 'akamārama mai i te tangata kātoatoa, tei 'aere mai nei ki roto i te ao nei. 10 I te ao nei te Tuatua, ē nāna i 'anga i tēianei ao; kāre rā tō te ao i nakiro i aia. 11 I 'aere mai nei aia ki ōna ra, kāre rā tōna au tangata tikāi i 'āriki atu i aia. 12 Inārā, ko te aronga katoa rā i 'āriki atu i aia, i 'ō maira aia i te tika ki a rātou kia riro rātou 'ei tamariki nā te Atua, koia 'oki te aronga i 'irinaki i tōna ingoa; 13 ko te aronga rā i 'ānau ra, kāre i tō te toto, kāre 'oki i tō te 'inangaro o te kōpapa, kāre 'oki i tō te 'inangaro o te tangata, i tō te Atua rā. 14 I riro mai nei te Tuatua 'ei tangata, ē kua pū'ākapa mai ki ō mātou nei; kua kite ake nei mātou i tōna kakā, koia 'oki, te kakā e tau i te Tamaiti 'ānau ta'i a te Metua ra. Kua kī aia i te aro'a 'ua ē te tuatua mou ra. 15 Nōna tā Ioane i 'akaāri mai ē i 'akakite ra, ka nā kō mai ei ra ē, “Ko tēia 'oki tāku i karanga ra, ‘Ko te 'aere mai i muringa a'o i āku nei, kua riro aia tei mua i āku; ko mua 'oki aia i āku.’ ” 16 Ē nō tōna ra kī i rauka ai i a tātou katoa te aro'a 'ua ē te aro'a 'ua. 17 Nā Mōse 'oki i tuku mai i te Ture, kāreka te aro'a 'ua ē te tuatua mou, nā Iēsū Mesia ia. 18 Kāre 'ua tēta'i tangata i kite i te Atua; ko te Tamaiti 'ānau ta'i i runga i te umauma o te Metua ra, ko ia tei 'akakite mai i aia.
Te ako'anga a Ioane Bāpetīto
19 Tēia tā Ioane 'akakite'anga i te tono'anga mai te Ngāti Iūda i tēta'i kau ta'unga ra ē tēta'i aronga Ngāti Levi nō Iērūsalēma mai, e ui ki aia ē, “Ko 'ai koe?” 20 Ē kua 'a'aki atura aia, kāre rava i 'u'una. Tēia tāna i 'a'aki, “Kāre au i te Mesia.” 21 Ē kua ui maira rātou ki aia, “Ko 'ai 'oki? Ko Ēlia āinei koe?” Kua pa'u atura aia, “Kāre au.” “Ko taua peroveta ra āinei koe?” Kua pa'u atura aia, “Kāre.” 22 Kua tuatua maira rātou ki aia, “Ko 'ai koe? 'Akakite mai 'ei tuatua'anga nā mātou ki te aronga i tono mai i a mātou. 'E a'a 'ua tā'au tuatua i a koe 'ua'orāi?” 23 Kua karanga atura aia, “Ko te reo au nō tēta'i e kāpiki 'aere i te mēdēbara ra ē, ‘Ka 'akatika 'ua i te mataara o te 'Atu, mei tei karanga'ia mai e Īsaia peroveta ra.’ ” 24 Nō te au Phārīsea 'oki taua aronga i tonokia maira. 25 Kua ui maira rātou ki aia, nā kō maira, “'E a'a 'oki koe i bāpetīto ei, mei te mea ē, kāre koe i te Mesia, kāre katoa 'oki ko Ēlia, ē kāre 'oki taua peroveta ra?” 26-27 Kua pa'u atura a Ioane, nā kō atura, “Tē bāpetīto nei au ki te vai; tē tū nei rā i rotopū i a kōtou tēta'i tei 'aere mai i muringa a'o i āku, kāre kōtou i kite i aia, kāre ia au e tau kia tatara i te 'ītiki i tōna tāmaka.” 28 Tēia au mea nei kua tupu ki Bētānia i tērā pae mai i Iōrīdāna, i reira a Ioane i te bāpetīto'anga.
Te Punua Māmoe a te Atua
29 E ao akera, kite atura a Ioane i a Iēsū i te 'aere'anga mai ki aia ra, ē kua nā kō akera, “Ka 'ākara na i te Punua Māmoe a te Atua, ko tei 'apai kē atu i te 'ara a tō te ao nei! 30 Ko ia 'oki tēia tāku i karanga ra ē, ‘Tē 'aere mai nei tēta'i tangata i muringa a'o i āku nei, ē kua riro aia ki mua i āku; ko mua rāi 'oki aia i āku.’ 31 Kāreka au, kāre au i nakiro i aia. Kia 'akaāri'ia rā aia ki tō Īserā'ela, ko te tumu ia i 'aere mai ei au e bāpetīto ki te vai nei.” 32 Kua 'akakite atura 'oki a Ioane, nā kō atura, “'Ākara atura au i te Vaerua i te 'eke'anga mai mei te rangi mai, mei te kūkupa ra te tū, ē kua no'o i'ora ki runga a'o i aia. 33 Kāre rā au i nakiro i aia, inārā, ko tei tono mai i āku e bāpetīto ki te vai nei, ko ia tei karanga mai ki āku nei ē, ‘Ko tā'au e 'ākara i te Vaerua i te 'eke'anga mai ki runga a'o ē te no'o'anga katoa ki runga a'o i aia, koia ia, te ka bāpetīto ki te Vaerua Tapu.’ 34 Kite atura 'oki au, ē 'akakite atura 'oki au ē, ko te Tamaiti tēia nā te Atua.”
Te au pipi mua a Iēsū
35 Ē e ao 'aka'ou akera, tē tū 'ua ra a Ioane ē ngā pipi tokorua āna ra, 36 e kite atura aia i a Iēsū i te 'aere'anga mai nā reira, kua nā kō akera, “Ka 'ākara na i te Punua Māmoe a te Atua.” 37 E 'akarongo akera aua ngā pipi ra i aia i te tuatua'anga, kua āru atura rāua i a Iēsū. 38 Kua anga maira a Iēsū ki muri ē kite maira i a rāua i te āru'anga mai, kua ui maira ki a rāua, “'E a'a tā kōrua e kimi nei?” Kua pa'u atura rāua ki aia, “E Rabi (tēia 'oki te 'akatau'anga, e te pū'āpi'i), e no'o koe ki 'ea?” 39 Kua tuatua maira aia ki a rāua, “Ka 'aere mai, ka 'ākara.” Āru atura rāua i aia, ē kite atura i te ngā'i i no'o ei aia, ē no'o atura ki ōna i taua rā ra. Kua tae pa'a ki te ora 'ā i te a'ia'i. 40 Ko Ānēderea, te teina o Simona Pētero ra, tēta'i o aua tangata tokorua tei 'akarongo i te tuatua a Ioane ra, e āru atura i a Iēsū. 41 Ē ko ia tei kimi mua i tōna 'ua'orāi tuakana i a Simona, ē kua karanga atura ki aia, “Kua kite i a māua te Mesia.” (Tēia 'oki te 'akatau'anga, tei 'Akatā'inu'ia.) 42 Ē kua arataki maira aia i a Simona ki a Iēsū. Ē kia 'ākara akera a Iēsū i aia ra, kua nā kō atura, “Ko Simona koe, ko te tamaiti a Ioane; ka tapa'ia koe ē, ko Kepha” (tei 'akatau'ia ko Pētero).
Tō Iēsū kāpiki'anga i a Philipa ē Nātanāela
43 Ē e ao akera, kua manako akera a Iēsū, ka 'aere atu aia ki roto i a Galilea. Kua 'ārāvei akera aia i a Philipa, ē kua karanga atura ki aia, “Ka āru mai i āku.” 44 Nō Betesaida a Philipa, nō te 'ōire o Ānēderea ē Pētero. 45 E kimi akera 'oki a Philipa i a Nātanāela, kua karanga atura ki aia, “Kua kitea e mātou tā Mōse i tātā ki roto i te Puka o te Ture ē tā te au peroveta i tuatua, ko ia, ko Iēsū nō Nāzarēta, te tamaiti a Iōsēpha.” 46 Ē kua tuatua maira a Nātanāela ki aia, “'E mea meitaki āinei tō Nāzarēta mai?” Kua pa'u atura a Philipa ki aia, “Ka 'aere mai, ka 'ākara.” 47 Kua kite atura a Iēsū i a Nātanāela i te 'aere'anga mai ki aia, ē kua tuatua i'ora i aia, “Ka 'ākara na i te Ngāti Īserā'ela tikāi. Kāre 'ua 'e pikika'a ō roto i aia.” 48 Kua tuatua maira a Nātanāela ki aia, “Nō 'ea tō'ou nakiro i āku?” Kua pa'u atura a Iēsū, nā kō atura, “'Ōu a Philipa i kāpiki atu ei i a koe, 'ākara atura au i a koe i raro ake i te pū suke.” 49 Kua pa'u maira a Nātanāela ki aia, nā kō maira, “E Rabi, ko te Tamaiti koe a te Atua. Ko te Ariki koe o Īserā'ela!” 50 Kua pa'u atura a Iēsū ki aia, nā kō atura, “Nō te mea ē i karanga atu au ki a koe na ē, ‘Tē 'ākara atura au i a koe i raro ake i te pū suke ra’, i 'irinaki ei koe? 'E meangiti tēnā i tā'au ka kite ā muri nei.” 51 Ē kua karanga atura aia, “Koia mou tāku e karanga atu ki a kōtou na, mei tēianei ka kite kōtou i te rangi i te mavete'anga, ē te au 'āngela a te Atua i te kake'anga atu ē te 'eke'anga mai ki runga a'o i te Tamaiti a te Tangata nei.”
Te 'akaipoipo'anga i Kana ra
1 E tae akera ki te toru o te rā, 'e 'akaipoipo'anga tei rave'ia i Kana i Galilea ra, ē tei reira katoa te metua va'ine o Iēsū ra. 2 Kua pati katoa'ia mai rāi a Iēsū ē āna pipi ki te 'akaipoipo'anga ra. 3 E pou akera te uaina, kua tuatua maira te metua va'ine o Iēsū ki aia ra, “Kāre ā rātou uaina.” 4 Kua karanga atura a Iēsū ki aia, “'E a'a rā te reira ki a tāua, e mā'ine? Kāre tōku tuātau i tae mai ake.” 5 Kua karanga atura tōna metua va'ine ki te au raverave ra, “Ko tāna 'ua atu ka tuatua mai ki a kōtou na, e rave kōtou.” 6 Tē tū 'ua ra i reira ngā 'āriki vai toka e ono nō te peu tāmā'anga a te Ngāti Iūda, ē ka ō mei te ta'i 'ānere litera i te 'āriki 'okota'i. 7 Kua karanga atura a Iēsū ki a rātou, “Ka 'akakī ana i te au 'āriki ki te vai.” Kua 'akakī i'ora rātou i te reira e tae 'ua atura ki te ni'a. 8 Ē kua karanga atura aia ki a rātou, “Ka kapu ana i tēianei, ka 'apai atu ei ki te 'aka'aere o te 'ōro'a nei.” Kua 'apai atura rātou. 9 Ē kia tongi akera rā te 'aka'aere o te 'ōro'a ra i te vai i riro mai 'ei uaina ra, ē kāre 'oki aia i kite ē nō 'ea mai. (Kāreka te au raverave i kapu mai i te vai ra, kua kite rātou.) Kua kāpiki atura taua 'aka'aere o te 'ōro'a ra i te tāne 'ōu ra, 10 ē kua nā kō atura ki aia, “E nā mua ana te tangata kātoatoa i te tuku mai i te uaina meitaki; ē kia roa tō rātou inu'anga, ko te mea kino mai ia i reira. Kua tāpū rā koe i te uaina meitaki ki tēia noa ai.” 11 Ko te 'akamata'anga tēia o te au 'akairo i rave'ia e Iēsū i Kana i Galilea ra. Kua 'akaāri mai te reira i tōna kakā, ē kua 'irinaki tāna au pipi i aia. 12 I muri ake i tēia, kua 'aere atura a Iēsū ki Kāperenāuma, ko ia ma tōna metua va'ine, tōna au taeake, ē tāna au pipi. Kāre rā aia i roa ana i te no'o'anga ki reira.
Tō Iēsū tāmā'anga i te 'iero
13 Tē vaitata maira te 'Ōro'a Pāsa a te Ngāti Iūda ra, ē kua 'aere atura a Iēsū ki Iērūsalēma. 14 Ē kua kitea'ia e ia e no'ono'o ra i roto i te 'iero te aronga e 'oko'oko ra i te puakatoro, te māmoe ē te kūkupa, ē te aronga 'oko'oko moni katoa ra. 15 Kua 'anga i'ora aia i te taura rikiriki 'ei uēpu pāpā, ē kua tuaru atura i te kātoatoa rava ki va'o i te 'iero ra, ma te māmoe ē te puakatoro; ē kua ringiringi atura i te moni a te aronga 'oko'oko moni ra, ē kua tātaka'uri 'aere i tā rātou au kaingākai ra; 16 ē kua nā kō atura ki te aronga e 'oko'oko ra i te kūkupa ra, “'Apaina kē'ia atu tēia au mea mei konei atu! 'Eia'a e 'akariro i te 'are o taku Metua ra 'ei 'are 'oko'oko'anga 'apinga ra.” 17 Kua ma'ara akera i tāna au pipi ē, kua tātā'ia ē, “Kua 'ope pou roa tōku māro'iro'i nō te meitaki o tō'ou na 'are.” 18 Kua ui maira te Ngāti Iūda, ē kua nā kō maira ki aia, “'E a'a tā'au e 'akaāri mai nei ki a mātou, i a koe e rave nei i tēia au mea?” 19 Kua pa'u atura a Iēsū ki a rātou, “Ka vāvā'i ana i tēianei nao, i roto i ngā rā e toru ka tū 'aka'ou ia i āku.” 20 Kua nā kō maira te Ngāti Iūda i reira, “E 'ā nga'uru mā ono mata'iti o tēianei nao i te 'akatū'ia'anga, ē ka tū 'aka'ou ia i a koe i roto i ngā rā e toru?” 21 Inārā, ko te nao o tōna kōpapa tāna i tuatua ra. 22 Ē kia tū 'aka'ou maira aia mei te mate maira, kua ma'ara akera i tāna au pipi ē, i tuatua ana 'oki aia i te reira ki a rātou ra, ē kua 'irinaki akera rātou i te tuatua i tātā'ia ra ē te tuatua i karanga'ia e Iēsū ra.
Tō Iēsū nakiro i te tū tangata
23 Ē i a Iēsū i Iērūsalēma i te 'Ōro'a Pāsa ra, 'e mānganui tei 'irinaki i tōna ingoa, i te kite'anga i te au 'akairo tāna i rave ra. 24 Kāre rā a Iēsū 'ua'orāi i 'irinaki atu i a rātou, nō te mea, kua kite aia i a rātou kātoatoa; 25 ē nō te mea katoa 'oki ē, kāre aia e umuumu atu ana i tēta'i 'ua atu kia 'akaāri i te tū tangata. Kua nakiro 'oki aia ē, 'e a'a tō roto i te tangata.
Ko Iēsū rāua ko Nīkōdemo
1 Tē no'o ra tēta'i tangata nō te au Phārīsea, ko Nīkōdemo te ingoa, 'e tūtara aia nō te Ngāti Iūda, 2 ko tei 'aere mai ki a Iēsū i te pō ra ē kua tuatua maira ki aia, “E Rabi, kua nakiro mātou ē, 'e Pū'āpi'i koe nō kō mai i te Atua ra, nō te mea, kāre rava e rauka i tēta'i 'ua atu tangata i te rave i tēianei au 'akairo tā'au e rave nei, māri rā tei aia te Atua.” 3 Kua pa'u atura a Iēsū, nā kō atura ki aia, “Koia mou tāku e karanga atu ki a koe, kia kore tēta'i 'ua atu tangata e 'ānau 'aka'ou'ia ra, kāre e rauka i aia i te kite i te bāsileia o te Atua.” 4 Kua ui maira a Nīkōdemo ki aia, “'Akapē'ea e rauka ai i te tangata kia 'ānau'ia mē pakari aia? Ka rauka āinei i aia i te ō 'aka'ou ki roto i te kōpū o te metua va'ine, e 'ānau mai ei?” 5 Kua pa'u atura a Iēsū, “Koia mou tāku e karanga atu ki a koe, kia kore tēta'i 'ua atu i 'ānau'ia mai mei roto mai i te vai ē te Vaerua, kāre e rauka i aia i te tomo ki roto i te bāsileia o te Atua. 6 Ko tei 'ānau'ia mai mei roto mai i te kōpapa, 'e kōpapa ia; ko tei 'ānau'ia mai rā mei roto mai i te Vaerua, 'e vaerua ia. 7 'Eia'a koe e ūmere, ko au i karanga atu ki a koe ē, ‘kia 'ānau 'aka'ou'ia kōtou e tikāi.’ 8 Tē 'arara 'ua nei te matangi ki te ngā'i tāna e 'inangaro, ē tē 'akarongo nei kōtou i tōna 'aruru, inārā, kāre koe i kite i te ngā'i nō reira mai 'aia ra ē te ngā'i e 'aere'ia atu e ia ra. Pērā katoa te tangata tātakita'i tei 'ānau'ia mai mei roto mai i te Vaerua.” 9 Kua ui maira a Nīkōdemo ki aia, nā kō maira, “'Akapē'ea e rauka ai i taua au mea kia tupu?” 10 Kua pa'u atura a Iēsū, nā kō atura ki aia, “Ko te pū'āpi'i koe a tō Īserā'ela, ē kāre koe i kite i tēianei au mea? 11 Koia mou tāku e karanga atu ki a koe, ko tā mātou i kite ra, tā mātou ia e tuatua nei ē tā mātou i 'ākara ra, tā mātou ia e 'akakite nei, kāre rā kōtou e 'āriki mai i tā mātou 'akakite'anga. 12 Mē kore kōtou e 'irinaki i te au mea nō tēianei ao tāku e tuatua atu nei ki a kōtou, 'akapē'ea e 'irinaki ei kōtou kia tuatua atu au ki a kōtou i te au mea nō te rangi? 13 Kāre rava tēta'i 'ua atu tangata i kake atu ki runga i te rangi, māri rā ko tei 'eke mai mei runga mai i te rangi ra, ko te Tamaiti a te Tangata nei. 14 “Ē mei a Mōse i 'akateitei i te 'ōvī i te mēdēbara ra, kia pērā katoa te Tamaiti a te Tangata nei i te 'akateitei'ia e tikāi, 15 kia rauka mai i te tangata tātakita'i tei 'irinaki i aia te ora mutukore. 16 “Kua aro'a mai 'oki te Atua i te ao nei kua tae roa mai ki te 'ōronga'anga mai i tāna Tamaiti 'ānau ta'i, kia kore e mate te tangata tātakita'i tei 'irinaki i aia, kia rauka rā i aia te ora mutukore. 17 Nō te mea, kāre te Atua i tono mai i tāna Tamaiti ki te ao nei kia 'akavā mai i te ao nei, kia 'akaora'ia rā te ao nei e ia. 18 Ko tei 'irinaki i aia ra, kāre ia e 'akavā'ia; ko tei kore rā i 'irinaki i aia, kua 'akavā takere'ia, nō te mea, kāre aia i 'irinaki i te ingoa o te Tamaiti 'ānau ta'i a te Atua ra. 19 Tēia 'oki taua 'akavā'anga ra: ko te mārama kua tae mai ki te ao nei, inārā 'e ma'ata atu tō te tangata 'inangaro i te pōiri i tō te mārama, nō te mea, tē kino 'ua ra tā rātou au 'anga'anga. 20 Nō te mea, ko tēta'i 'ua atu tangata tei rave i te kino ra, kua mākitakita anake ia i te mārama, ē kāre aia e 'aere mai ki te mārama kia kore tāna au 'anga'anga e kitea'ia. 21 Ko tei 'ākono rā i te tuatua mou ra, ka 'aere mai aia ki te mārama kia 'akaāri'ia tāna 'anga'anga tei rave'ia nō te Atua.”
Ko Iēsū rāua ko Ioane
22 Ē i muri akera, 'aere atura a Iēsū ma tāna au pipi ki te 'enua ko Iūdea, no'o atura i reira ma rātou katoa, e bāpetīto i'ora. 23 Tē bāpetīto katoa ra 'oki a Ioane i Aino, i vaitata 'ua i Sālima, nō te mea, 'e ma'ata te vai i reira. Ē kua 'aere 'ua maira te tangata ē kua bāpetīto'ia 'ua i'ora. 24 Kāre 'oki a Ioane i tīria'ia ake ki roto i te 'are 'āuri. 25 Kua tupu te mārō'anga i rotopū i te au pipi a Ioane ē tēta'i Ngāti Iūda nō runga i te peu tāmā'anga. 26 Ē kua 'aere atura rātou ki a Ioane ē kua karanga atura ki aia, “E Rabi, te tangata i no'o kōrua i tērā pae i Iōrīdāna ra, ko tā'au i 'akakite ra, inā, tē bāpetīto 'ua ra aia ē tē 'aere 'ua nei te kātoatoa ki aia.” 27 Kua pa'u maira a Ioane, nā kō maira, “Kāre e rauka i te tangata i te 'āriki atu i tēta'i 'ua atu mea, māri rā ko tei 'ōronga'ia mai ki aia nō te rangi maira. 28 Ko kōtou 'ua'orāi tei riro 'ei au kite nōku, kua tuatua au ē, ‘Kāre au i te Mesia, ko au rā tei tonokia mai nā mua i aia.’ 29 Ko te tāne 'ōu ra, te tangata ia nāna te va'ine; ko te 'oa rā o taua tāne 'ōu ra, ko tē no'o 'ua i te pae ē tē 'akarongo 'ua ki aia, 'e rekareka ma'ata tōna i te reo o te tāne 'ōu ra. Tēia tōku rekareka'anga kua 'aka'ope'ia. 30 Kia tupu aia ki te ma'ata, kia iti mai au ra.”
Ko ia tei 'aere mai nō te rangi mai
31 Ko tei 'aere mai mei runga maira, i runga ake aia i te tangata kātoatoa. Ko ia mei roto mai i te 'enua nei ra, nō te 'enua nei aia, ē tē tuatua nei aia ra nō te 'enua nei rāi. Ko tei 'aere mai mei te rangi mai, i runga ake aia i te tangata kātoatoa. 32 Tē 'akakite nei aia i tāna i 'ākara ē tāna i 'akarongo ra; kāre rā 'e tangata e 'āriki mai i tāna 'akakite'anga. 33 Ko tei 'āriki mai rā i tāna 'akakite'anga, kua 'akapāpū mai aia ē, 'e tuatua mou tā te Atua. 34 Ko tā te Atua 'oki i tono maira, ko tā te Atua tuatua tāna e tuatua ra, nō te mea, kua 'ōronga mai te Atua i tōna Vaerua ma te kenakore. 35 Tē 'akaperepere nei te Metua i te Tamaiti, ē kua tuku 'ua mai i te au mea katoa ki roto i tōna rima. 36 Ko tei 'irinaki i te Tamaiti ra, 'e ora mutukore tōna; ko tei kore i 'irinaki i te Tamaiti ra, kāre aia e kite i te ora; tē no'o ra rāi 'oki te riri o te Atua i runga i aia.
Ko Iēsū ē te va'ine Sāmāria
1 E nakiro akera a Iēsū ē, kua 'akarongo te au Phārīsea ē, 'e ma'ata atu tāna i 'akariro 'ei pipi ē i bāpetīto katoa ra i tā Ioane. 2 Kāre rā ko Iēsū 'ua'orāi tei bāpetīto, ko tāna au pipi rā. 3 Kua 'akaruke i'ora aia i a Iūdea, 'aere 'aka'ou atura ki Galilea. 4 Ē kua nā Sāmāria atu aia i te 'aere'anga e tikāi. 5 E tae atura aia ki tēta'i 'ōire i Sāmāria, ko Sīkara te ingoa, tei vaitata atu ki te potonga 'enua tā Iākōba i 'ōronga atu nō tāna tamaiti, nō Iōsēpha. 6 Ē tei reira te ruāvai a Iākōba ra. E ro'iro'i akera a Iēsū i te 'aere'anga, no'o 'ua i'ora ki te pae o taua ruāvai ra i te avatea pū 'aere ra. 7 Kua 'aere maira tēta'i va'ine Sāmāria e 'uti i te vai. Kua pati atura a Iēsū ki aia, “Ka 'ō mai ana kia inu au.” 8 Kua topa atura 'oki tāna au pipi ki roto i te 'ōire, e 'oko i te kai. 9 Kua tuatua maira taua va'ine Sāmāria ra ki aia, “'E a'a koe, te Ngāti Iūda na, i pati mai ei ki āku, te va'ine Sāmāria nei, i te vai kia inu?” Kāre 'oki te Ngāti Iūda e piri meitaki ana ki tō Sāmāria. 10 Kua pa'u atura a Iēsū ki aia, nā kō atura, “Nāringa koe i nakiro i tā te Atua 'apinga aro'a ra, ē ko 'ai te tangata e pati atu nei ki a koe ē, ‘'Ō mai i te vai kia inu au,’ ka pati atu koe ki aia i reira, ē nāna e 'ō mai i te vai ora nā'au.” 11 Kua tuatua maira taua va'ine ra ki aia, “E te 'Atu, kāre ā'au kākapu vai, ē 'e 'ō'onu tēia rua nei; mei 'ea mai i reira tā'au vai ora? 12 'E ma'ata atu āinei koe i tō mātou metua i a Iākōba ko tei 'ōronga mai i tēianei ruāvai nō mātou, ē kua inu aia 'ua'orāi mei roto mai i tēianei ruāvai, ē tāna au tamariki, ē tāna au 'ānana manu?” 13 Kua pa'u atura a Iēsū, nā kō atura ki aia, “Ko tēta'i 'ua atu tangata e inu i tēnā na vai, ka kakī 'aka'ou ia; 14 inārā, ko te ka inu i te vai e 'ōronga'ia atu e au nei, kāre rava atura e kakī 'aka'ou. Ka riro rā taua vai ra e 'ōronga'ia atu e au nāna ra 'ei punāvai i roto i aia, ē ka riro i te pu'ipu'i'anga e tae 'ua atu ki te ora mutukore ra.” 15 Kua tuatua maira taua va'ine ra ki aia, “E te 'Atu, ka 'ō mai ana i taua vai ra nāku kia kore au e kakī 'aka'ou, ē kia kore e 'oki 'aka'ou mai ki konei e 'uti.” 16 Kua karanga atura a Iēsū ki aia, “Ka 'aere, ka kāpiki i tō tāne, ka 'oki mai ei ki konei.” 17 Kua pa'u maira taua va'ine ra, nā kō maira, “Kāre āku tāne.” Kua karanga atura a Iēsū ki aia, “Kua tano koe e tuatua maira ē, kāre ā'au tāne. 18 Ko te tika rā, e tokorima ake nei 'oki ā'au tāne, ē ko tēnā na tā'au e no'o ana, kāre ia i te tāne nā'au. 'E tuatua mou tā'au i tuatua mai.” 19 Kua tuatua maira taua va'ine ra ki aia, “E te 'Atu, tē kite nei au ē, 'e peroveta koe. 20 I 'akamori ana tō mātou 'ui metua ki runga i tēianei maunga, ē tē karanga nei kōtou ē, tei Iērūsalēma te ngā'i mou nō te 'akamori e tikāi.” 21 Kua karanga atura a Iēsū ki aia, “E mā'ine, ka 'irinaki mai i āku, tē vaitata maira te ora ē kāre kōtou e 'akamori i te Metua i tēianei maunga, ē kāre rāi 'oki i Iērūsalēma. 22 Kāre kōtou i kite i tā kōtou e 'akamori nei, tē kite nei rā mātou i tā mātou e 'akamori nei, nō te Ngāti Iūda 'oki te rāvenga ora. 23 Inārā, tē vaitata maira te ora, ē ko tēianei rāi 'oki taua ora ra e 'akamori ei te aronga 'akamori tikāi ra i te Metua ma te Vaerua ē te tuatua mou, nō te mea, ko te tū tangata 'akamori ia tā te Metua e kimi ra. 24 'E Vaerua te Atua, ē te aronga e 'akamori i aia ra, kia 'akamori rātou ma te Vaerua ē te tuatua mou e tikāi.” 25 Kua tuatua maira taua va'ine ra ki aia, “Kua kite au ē, tē 'aere maira te Mesia (ko tei karanga'ia ē, tei 'Akatā'inu'ia). Ē kia 'aere mai aia ra, nāna e 'akakite mai ki a tātou i te au mea rava rāi.” 26 Kua karanga atura a Iēsū ki aia, “Ko au ia e tuatua atu nei ki a koe na.” 27 Ē i reira te tae'anga mai o tāna au pipi, vā 'ua akera rātou, ko ia i kārangaranga atu ki taua va'ine ra. Kāre 'ua atu rā tēta'i i karanga atu ē, “'E a'a tā'au e kimi ana?” mē kāre ra, “'E a'a koe i kārangaranga atu ei ki aia?” 28 Vai'o 'ua i'ora taua va'ine ra i tāna 'āriki vai, 'aere atura ki roto i te 'ōire, e 'akakite 'aere atura ki te tangata, 29 “Ka 'aere mai, ka 'ākara i te tangata i 'akakite mai ki āku i te au mea katoa tāku i rave ana. Kāre āinei ko tērā ake te Mesia?” 30 'Aere atura rātou ki a Iēsū ra mei roto atu i taua 'ōire ra. 31 I taua vā ra, kua pati ana tāna au pipi ki a Iēsū, nā kō atura, “E Rabi, ka kai.” 32 Inārā, kua tuatua maira aia ki a rātou, “'E kai tāku ka kai tei kore roa kōtou i kite.” 33 Kua tuatua i'ora te au pipi ki a rātou 'ua'orāi, “'E tangata āinei tēta'i i 'apai mai i te kai nāna?” 34 Kua tuatua maira a Iēsū ki a rātou, “Tēia tāku kai, ko te 'ākono i te anoano o tei tono mai i āku ra ma te 'akaoti i tāna 'anga'anga. 35 Kāre āinei kōtou i karanga ē, ‘E 'ā marama toe e mou ei’? E karanga atu au ki a kōtou na, ka nānā ana i tō kōtou mata, ka 'ākara i te au koro ra; kua teatea ia i tēianei, kua mou. 36 Te tangata kokoti ra, tē ko'i ra aia i tāna tūtaki ē tē 'akaputu ra i te 'ua meitaki nō te ora mutukore. Kia rekareka kāpipiti, te tangata rūrū ē te tangata kokoti. 37 Ē pērā 'oki, kua tupu i'o nei te mānga tuatua ra ē, ‘Nā tēta'i e rūrū, ē nā tēta'i kē e kokoti.’ 38 E tono au i a kōtou 'ei kokoti i tei kore i 'anga'anga'ia e kōtou na. Nā ēta'i kē i 'anga'anga, ē tē 'akaō 'ua atu nei kōtou ki roto i tā rātou 'anga'anga.” 39 'E mānganui te tangata Sāmāria mei roto mai i taua 'ōire ra tei 'irinaki i a Iēsū, nō te tuatua tā taua va'ine ra i 'akakitekite, “Kua 'akaāri mai aia i te au mea katoa tāku i rave ra.” 40 Ē kia 'aere mai tō Sāmāria ki aia ra, kua pati maira rātou i a Iēsū e no'o ki ō rātou ra. Ē kua no'o i'ora aia i reira e rua rā. 41 'E mānganui 'ua atu tei 'irinaki i a Iēsū nō tāna 'ua'orāi tuatua. 42 Ē kua tuatua akera rātou ki taua va'ine ra, “Kāre mātou i 'irinaki i aia nō te tuatua ā'au i tuatua maira, nō te mea rā ē, kua 'akarongo ake nei rāi mātou i aia, ē kua nakiro atura mātou ē, ko te 'Akaora mou tēia o te ao nei.”
Kua 'akaora a Iēsū i te tamaiti a tēta'i rangatira
43 I muri ake i te rua o te rā, 'aere kē atura a Iēsū mei reira mai ki Galilea. 44 I 'akakite ana a Iēsū 'ua'orāi ē, kāre te peroveta e 'akangāteitei'ia mai i roto i tōna 'ua'orāi 'enua. 45 I reira, kia tae atura aia ki Galilea, 'āriki maira tō Galilea i aia. I 'ākara na 'oki rātou i te rāvenga tini tāna i rave i te 'ōro'a i Iērūsalēma ra; nō te mea, i 'aere katoa na rātou ki taua 'Ōro'a ra. 46 I reira, kua 'aere 'aka'ou atura a Iēsū ki Kana i Galilea, i te ngā'i tāna i 'akariro i te vai 'ei uaina ra. Ē tei reira tēta'i tangata rangatira tē mate ra tāna tamaiti i te maki i Kāperenāuma. 47 'Akarongo akera aia ē, kua tae mai a Iēsū ki Galilea mei Iūdea mai, 'aere atura aia ki aia ra, e pati atura ki aia, kia 'aere mai aia e 'akaora i tāna tamaiti; kua vaitata 'oki aia i te mate. 48 Kua tuatua maira a Iēsū ki aia, “Kia kore kōtou e 'ākara i te 'akairo ma te au mea ūmere ra, kāre 'ua kōtou e 'irinaki.” 49 Kua karanga atura taua tangata ra, “E taku 'Atu, ka 'aere mai i mua ake ka mate ei taku tamaiti.” 50 Kua tuatua maira a Iēsū ki aia, “Ka 'aere, kua ora tō tamaiti.” Kua 'irinaki atura taua tangata ra i te tuatua tā Iēsū i 'akakite maira, e 'aere atura. 51 I aia e 'oki atura ki raro, 'ārāvei maira tōna au tāvini i aia, ē kua tuatua maira, “Kua ora tā'au tamaiti.” 52 Kua ui atura aia i te ora i 'āmarū mai ei aia. Ē kua pa'u maira rātou ki aia, “I nana'i i te ora ta'i i peke ei te vera.” 53 I reira te metua i nakiro ei ē, ko te ora tikāi ia i tuatua mai ei a Iēsū ē, “Kua ora tō tamaiti.” E 'irinaki atura aia ē tōna ngutu'are tangata katoa ra. 54 Ko te rua ia i te 'akairo tā Iēsū i rave i aia i 'oki mai ki Galilea nō Iūdea mai.
Te 'akaora'anga maki i te vai pā'ī
1 Ē i muri akera, 'e 'ōro'a tēta'i nā te Ngāti Iūda, ē kua 'aere atura a Iēsū ki Iērūsalēma. 2 Ē tei Iērūsalēma tēta'i vai pā'ī i te Ngūtupa Māmoe, tei tapa'ia tōna ingoa i roto i te reo 'Ēbera ē, ko Beteseda; e rima ōna ngā'i tāmarumaru. 3 'E mānganui te au makimaki e tākotokoto ana ki roto i ēia nei ngā'i: te matapō, te pirikoki ē te ngūngū. 5 Ē tei reira tēta'i tangata, e toru nga'uru mā varu ōna mata'iti i te mate'anga i te maki. 6 I te kite'anga a Iēsū i aia e takoto 'ua ra, ē tōna nakiro ē kua roa tōna maki'anga, kua ui atura a Iēsū ki aia, “Tē 'inangaro na koe kia ora koe?” 7 Kua pa'u maira te tangata makimaki ki aia, “E te 'Atu, kāre 'ua ōku tangata 'ei tuku i āku ki raro i te vai mē ngarepu ana te vai; i āku e 'aere atura, kua riro atu tēta'i i te nā mua i āku.” 8 Kua karanga atura a Iēsū ki aia, “E tū, e rave i tō'ou ro'i, e 'aere!” 9 I taua 'ati'anga rāi, ora tākiri akera taua tangata ra, ē kua rave atura i tōna ro'i, e 'aere atura. 'E Sābati 'oki taua rā ra. 10 Ē nō reira, kua tuatua maira te Ngāti Iūda ki taua tangata i 'akaora'ia ra, “'E Sābati tēia; kāre e tau i te Ture kia 'apai koe i tō ro'i.” 11 Kua pa'u atura aia ki a rātou, “Nā tei 'akaora mai i āku i tuatua mai ki āku ē, ‘E rave i tō'ou ro'i, e 'aere.’ ” 12 Kua ui maira rātou ki aia, “Ko 'ai ia tangata i tuatua mai ki a koe ē, ‘E rave i tō'ou ro'i, e 'aere?’ ” 13 Kāre 'ua rā te tangata i 'akaora'ia i kite, nō te mea, kua ngaro kē a Iēsū. 'E mānganui 'oki te tangata i taua ngā'i ra. 14 Ē muri akera, kua kite atura a Iēsū i aia i roto i te 'iero, ē kua karanga atura ki aia, “Inā, kua ora koe. Auraka e 'ara 'aka'ou kia kore koe e roko'ia e tēta'i kino ma'ata atu.” 15 Kua 'aere atura taua tangata ra, e 'akakite atura ki te Ngāti Iūda ē, ko Iēsū tei 'akaora i aia. 16 Ē tēia 'oki te tumu kua tākinga kino maira te Ngāti Iūda i a Iēsū: kua rave aia i taua mea ra i te Sābati. 17 Kua karanga atura a Iēsū ki a rātou, “Tē 'anga'anga nei rāi tōku Metua ē tēia noa ai, ē ka 'anga'anga katoa rāi au.” 18 Ē nō reira, kua ma'ata rava maira tō te Ngāti Iūda kimi'anga i te tāmate i a Iēsū, kāre anake nō te mea ē, kua 'a'ati aia i te ture o te Sābati, nō te mea katoa rā ē, kua karanga aia ē, ko te Atua tōna Metua tikāi, ē kua 'aka'āite aia i aia 'ua'orāi ki te Atua.
Te mana o te Tamaiti
19 Kua tuatua atura a Iēsū ki te Ngāti Iūda, nā kō atura, “Koia mou tāku e karanga atu ki a kōtou na, kāre e tika i te Tamaiti i te rave i tēta'i 'ua atu 'anga'anga ko ia anake 'ua, māri 'ua ko tāna i 'ākara i te Metua i te rave'anga; nō te mea, ko tā te Metua e rave ra, ko tā te Tamaiti katoa ia e rave. 20 Tē 'akaperepere nei 'oki te Metua i te Tamaiti ē tē 'akaāri mai nei aia ki te Tamaiti i te au mea rava rāi tāna e rave ra. Ē ka 'akaāri katoa mai te Metua ki tāna Tamaiti i ēta'i 'anga'anga ma'ata atu i ēia mea nei kia ūmeremere kōtou. 21 Mei te Metua ra e 'akatū mai i tei mate ra ki runga ē e 'ōronga mai i te ora, koia katoa 'oki te Tamaiti i te 'ōronga'anga mai i te ora ki tāna e anoano ra. 22 Kāre 'oki te Metua e 'akavā i tēta'i 'ua atu tangata; kua tuku mai rā aia i te tika'anga ki te Tamaiti kia 'akavā aia i te au mea kātoatoa, 23 kia 'akangāteitei te tangata rava rāi i te Tamaiti mei tā rātou e 'akangāteitei i te Metua ra. Ko tei kore e 'akangāteitei i te Tamaiti ra, kāre katoa aia e 'akangāteitei i te Metua tei tono mai i aia ra. 24 “Koia mou tāku e karanga atu ki a kōtou na, ko tei 'akarongo i tāku tuatua ē kua 'irinaki aia i tei tono mai i āku nei, 'e ora mutukore tōna. Kāre aia e 'akavā'ia, nō te mea, kua 'aere 'oki aia mei te mate ki te ora. 25 Koia mou tāku e karanga atu ki a kōtou na ē, 'e vaitata te tuātau ē tēia 'oki taua tuātau ra e 'akarongo ei tei mate i te reo o te Tamaiti a te Atua; ē ko rātou tei 'akarongo ra ka ora ia. 26 Mei te Metua 'oki 'e ora tōna i roto i aia 'ua'orāi, kua 'ōronga katoa mai aia ki te Tamaiti 'ei ora tōna i roto i aia 'ua'orāi. 27 Ē kua 'ōronga mai aia ki aia i te mana kia rave i te 'akavā'anga ra, nō te mea ē, ko te Tamaiti aia a te Tangata. 28 Auraka e pō'itirere i tēia mea nei; tē vaitata mai nei 'oki te tuātau e 'akarongo 'ei te aronga kātoatoa i roto i te au mēnema i tōna reo, 29 ē ka 'aere mai rātou ki va'o. Ko tei rave ana i te meitaki ra, ka tū'aka'ou rātou kia ora; ko tei rave ana i te kino ra, ka tū'aka'ou rātou kia 'akavā'ia.
Te au kite o Iēsū
30 “Kāre 'ua 'e mea e rauka i āku i te rave ē ko au anake rāi: tē 'akavā 'ua nei au mei tāku e 'akarongo mei kō mai i te Metua ra; ē e tau 'oki tāku 'akavā'anga, nō te mea, kāre 'oki au e kimi ana i tōku 'ua'orāi anoano, ko te anoano rā o tei tono mai i āku nei. 31 “Mē ka riro au 'ei kite nōku 'ua'orāi, kāre ia 'e tika tāku 'akakite'anga. 32 Tē vai ra tēta'i kē tei riro mai 'ei kite nōku, ē kua mārama au ē, 'e tika tāna 'akakite'anga mai i āku ra. 33 Ko kōtou tei tono i te karere ki a Ioane ra, ē kua 'akakite mai aia i te tuatua mou. 34 Kāre te 'akakite'anga tāku e 'āriki ē nō kō mai ia i te tangata ra. Tē karanga atu nei rā au i tēia mea nei kia rauka i a kōtou te ora. 35 Ko Ioane, 'e lāmepa mura ra aia ē te kakā, ē kua 'inangaro atura kōtou kia rekareka rāi kōtou nō tēta'i tuātau poto 'ua ki roto i tōna mārama. 36 Inārā, ko tāku 'akakite'anga 'e ma'ata atu ia i tā Ioane; nō te mea, ko te au 'anga'anga tā te Metua i 'ō mai ki āku kia rave au, ko te au 'anga'anga rāi ia tāku e rave nei, ē nā rātou e 'akakite mai i āku ē, nā te Metua au i tono mai. 37 Ko te Metua 'oki tei tono mai i āku nei, ko ia rāi tei 'akakite mai i āku nei. Kāre ake rāi kōtou i rongo 'ua ake i tōna reo, ē kāre rāi i 'ākara ake i tōna tū. 38 Kāre 'oki tāna tuatua i vai tāmou ki roto i a kōtou, nō te mea, kāre kōtou e 'irinaki ana i tāna i tono maira. 39 Tē kimikimi mārie nei kōtou ki roto i te au tuatua i tātā'ia ra, nō te mea, tē manako ra kōtou ē, nā te reira e rauka ai i a kōtou te ora mutukore. Ē nā rātou rāi te 'akakite'anga mai i āku nei. 40 Ē kāre 'ua rāi kōtou e 'inangaro roa ana i te 'aere mai ki āku nei kia rauka i a kōtou te ora. 41 “Kāre au e 'āriki i te 'akangāteitei'anga nō kō mai i te tangata. 42 Kua kite rā au i a kōtou, ē kua kite 'oki au ē, kāre rava ō kōtou 'inangaro i te Atua i roto i a kōtou na. 43 I 'aere mai nei au ma te ingoa o tōku Metua, ē kāre kōtou i 'ō'ō mai i āku nei. Mē ka 'aere mai rā tēta'i kē ma tōna 'ua'orāi ingoa, ka 'ō'ō mai kōtou i aia. 44 Ka 'akapē'ea kōtou e 'irinaki ei, mē tē 'āriki nei kōtou i te 'akangāteitei'anga a tēta'i ki tēta'i, ē kāre kōtou e umuumu ana kia rauka mai te 'akangāteitei'anga mei kō mai i te Atua 'okota'i anake ra? 45 'Eia'a kōtou e manako ē, ka 'aka'apa au i a kōtou i mua i te aroaro o te Metua. Nā Mōse tā kōtou e 'irinaki ana, nāna te 'aka'apa'anga mai i a kōtou. 46 Nāringa 'oki kōtou i 'irinaki i a Mōse, kua 'irinaki katoa mai kōtou i āku nei, nō te mea, kua tātā aia i te tuatua nōku nei. 47 Mē kāre rā kōtou e 'irinaki i tāna i tātā ra, ka 'akapē'ea kōtou e 'irinaki mai ei i tāku nei au tuatua?”
Te 'āngai'anga a Iēsū i te rima tauatini tangata
1 Ē muri akera, 'aere atura a Iēsū ki tērā pae i te roto i Galilea, koia 'oki te roto i Tībēria ra. 2 'E urupū tangata ma'ata 'oki tei āru mai i aia, nō te mea, kua kite rātou i te au 'akairo tāna i rave ki te aronga makimaki ra. 3 'Aere atura a Iēsū ki runga i te maunga, no'o i'ora ki raro ma tāna au pipi. 4 Kua vaitata te Pāsa, ko te 'ōro'a ma'ata ia a te Ngāti Iūda ra. 5 Kua nānā akera a Iēsū i ōna mata ki runga ē i te 'ākara'anga aia ē, 'e urupū tangata ma'ata tei 'aere mai ki aia ra, kua ui atura aia ki a Philipa, “'Ei 'ea tātou ka 'oko ei i te mānga 'ei kai nā tēianei aronga?” 6 Kua tuatua a Iēsū i te reira 'ei tīmata'anga i aia, nō te mea, kua kite aia 'ua'orāi i tāna rāvenga. 7 Kua pa'u maira a Philipa, “Kia pou e rua 'ua atu 'ānere i te moni 'ārio 'ei 'oko i te mānga, kāre 'ua e rava kia takita'i potonga rikiriki i te tangata 'okota'i.” 8 Kua tuatua maira ki aia tēta'i pipi āna ra, ko Ānēderea, te teina o Simona Pētero, 9 “Tērā ake tēta'i tamaiti, e rima āna taupūpū varāoa kērite ē e rua 'oki ika rikiriki. 'E a'a rā te reira e rava ai i tēianei aronga ma'ata?” 10 Kua karanga atura a Iēsū, “Ka 'akano'ono'o 'aere ana i te au tangata ki raro.” 'E ma'ata 'oki te matie i taua ngā'i ra. Kua no'ono'o i'ora te au tangata ki raro. E rima pa'a tauatini kia tatau. 11 Kua rave akera a Iēsū i te au taupūpū varāoa, 'akameitaki atura, ē tu'a atura nā taua aronga i no'o ki raro ra; pērā katoa i ngā ika rikiriki kia tau i tā rātou i 'inangaro. 12 Kia pangia rava akera rātou, kua karanga atura a Iēsū ki tāna au pipi, “Ka 'akaputuputu ana i te toengā kai ra kia kore tēta'i mea e kaimoumou'ia.” 13 Kua 'akaputuputu i'ora rātou ē kua 'akakī akera i e ta'i nga'uru mā rua tāpora i te au potopotonga o aua taupūpū varāoa kērite e rima i toe mai i taua aronga i kai ra. 14 I te kite'anga aua tangata ra i te 'akairo tā Iēsū i rave ra, kua nā kō akera, “Ko te peroveta mou tēia, ko te ka 'aere mai ki te ao nei.” 15 Kua nakiro a Iēsū i tō rātou manako, ka 'aere mai e kave atu i aia ka 'akaariki, 'akaātea 'aka'ou atura aia ki runga i te maunga, ko ia anake ra.
'Aere i'ora a Iēsū nā runga i te vai
16 E a'ia'i akera, 'aere atura tā Iēsū au pipi ki ta'atai, 17 kake atura ki runga i tēta'i poti ē 'akatere atura ki tērā pae o te roto ki Kāperenāuma. Kua pōiri rava, kāre ake rāi a Iēsū i tae mai ake ki a rātou. 18 Kua 'arara mai tēta'i matangi pakari ē kua ngaru 'aere te tai. 19 Kua 'oe 'ua atura rātou mei te toru ki te 'ā maire te mamao, kite atura rātou i a Iēsū i te 'aere 'ua'anga nā runga i te kare, e vaitata maira aia ki te poti. Ē kua mataku akera rātou. 20 I reira kua tuatua atura aia ki a rātou, “Ko au tēia, auraka e mataku.” 21 Kua 'inangaro i'ora rātou i te 'apai atu i aia ki roto i te poti. Kua tae atura te poti i reira rāi ki te 'enua tā rātou e 'akatere atura.
Tē kimi nei te au tangata i a Iēsū
22 E ao akera, ko te urupū tangata i topa i te pae roto ra, kua kite rātou ē, kāre 'e poti kē atu i reira, māri rā taua poti 'okota'i ra, ē kāre a Iēsū i 'aere ana ki runga i te reira ma tāna au pipi ra. Ko tāna au pipi anake 'ua tei 'aere kē atu. 23 Ē tēta'i au poti kē nō Tībēria maira, kua tāpae mai e vaitata 'oki ki te ngā'i tā rātou i kaikai i te varāoa tā te 'Atu i 'akameitaki ana. 24 Ē kia kite atura taua urupū tangata ra ē, kāre a Iēsū i reira, ē kāre katoa tāna au pipi, kua kake atura rātou ki runga i taua au poti ra, ē 'aere atura ki Kāperenāuma i te kimi'anga i a Iēsū.
Ko Iēsū te kai o te ora
25 Ē kia kitea'ia atura a Iēsū 'e taua urupū tangata ra i tērā pae o te roto ra, kua ui atura rātou ki aia, “E Rabi, i nā'ea mai koe ki konei?” 26 Kua pa'u maira a Iēsū ki a rātou, nā kō maira, “Koia mou tāku e karanga atu ki a kōtou na, tē kimi mai nei kōtou i āku, kāre nō te mea ē, kua kite kōtou i te au 'akairo, nō te mea rā ē, kua kai kōtou i te varāoa ē kua pangia akera. 27 Auraka e 'anga'anga nō te kai pē 'ua, nō te kai rā tei tinamou ra e tae 'ua atu ki te ora mutukore. Ko te kai 'oki ia tā te Tamaiti a te Tangata ka 'ōronga atu ki a kōtou, nō te mea, kua 'akamana 'oki te Atua Metua i te Tamaiti a te Tangata nei.” 28 Kua ui atura rātou ki aia, “'E a'a tā mātou ka rave kia 'ākono mātou i te 'anga'anga a te Atua?” 29 Kua pa'u maira a Iēsū ki a rātou, nā kō maira, “Tēia te 'anga'anga a te Atua, e 'irinaki kōtou i aia tāna i tono maira.” 30 Kua tuatua atura rātou ki aia, “'E a'a te 'akairo tā'au e rave nei? 31 I kaikai ana tō tātou 'ai metua i te māna i te mēdēbara ra, mei tei tātā'ia ra ē, ‘I 'ō mai ana aia i te kai nō te rangi mai nā rātou 'ei kaikai'anga.’ ” 32 Kua pa'u maira a Iēsū ki a rātou, “Koia mou tāku e karanga atu ki a kōtou na, kāre a Mōse i 'ōronga mai i te kai nō te rangi mai ki a kōtou. Nā taku Metua rā e 'ōronga mai ana i te kai tikāi nō te rangi mai nā kōtou, 33 nō te mea, ko te kai a te Atua, ko te kai ia tei 'eke mai nei nō te rangi mai ē tē 'ōronga mai nei i te ora nō tō te ao.” 34 Kua pati atura rātou ki aia, “E te 'Atu, e 'ōronga mai i taua kai ra nā mātou i te au tuātau kātoatoa.” 35 Kua tuatua maira a Iēsū ki a rātou, “Ko au te kai o te ora. Ko tē 'aere mai ki āku nei, kāre rava aia e pongi, ē ko tē 'irinaki mai i āku nei, kāre rava aia e kakī vai 'aka'ou. 36 Inārā, kua 'akakite atuna 'oki au ki a kōtou ē, noa atu ē kua 'ākara mai kōtou i āku, kāre rāi kōtou e 'irinaki mai ana. 37 Ko te au mea kātoatoa tā te Metua e 'ōronga mai nei nōku ra ka tae mai ia ki āku nei, ē kāre rava au e tuaru atu i te ka 'aere mai ki āku nei. 38 Kāre 'oki au i 'eke mai mei te rangi mai kia 'ākono i tōku 'ua'orāi anoano, i te anoano rā o tei tono mai i āku nei. 39 Tēia 'oki te anoano o tei tono mai i āku nei, kia kore au e ngere i tēta'i i tāna i 'ōronga mai nōku ra, kia 'akatū rā au i aia i te rā 'openga ra. 40 Nō te mea, ko tēia te anoano o taku Metua: ko tēta'i 'ua atu tē 'ākara mai nei i te Tamaiti ra ē tē 'irinaki mai nei i aia ra, 'ei ora mutukore tōna, ē ka 'akatū au i aia i te rā 'openga ra.” 41 Kua tarotaro i'ora te Ngāti Iūda i aia nō tāna tuatua ē, “Ko au te kai tei 'eke mai mei te rangi mai.” 42 Ē kua tuatua akera rātou, “Kāre āinei tēia ko Iēsū, te tamaiti a Iōsēpha ra, tei kite 'oki tātou i tōna metua tāne ē te metua va'ine ra? 'E a'a i reira aia i tuatua mai ē, ‘I 'eke mai nei au mei te rangi mai?’ ” 43 Kua tuatua maira a Iēsū ki a rātou, nā kō maira, “Auraka kōtou e tarotaro i ō kōtou na. 44 Kāre e rauka i tēta'i 'ua atu tangata i te 'aere mai ki āku nei, māri rā kia 'akatae'ia mai aia e te Metua tei tono mai i āku nei, ē ka 'akatū au i aia i te rā 'openga ra. 45 Kua tātā'ia 'oki i roto i te au peroveta ra ē, ‘Ka 'ope tākiri rātou i te 'āpi'i'ia e te Atua.’ Ko tei 'akarongo mai i te Metua ē tei 'āpi'i'ia mai e ia, ko ia te ka 'aere mai ki āku nei. 46 Kāre rā 'e tangata i kite ana i te Metua; ko ia rā nō kō mai i te Atua ra, ko ia anake tei kite ana i te Metua. 47 Koia mou tāku e karanga atu ki a kōtou na, ko tei 'irinaki, 'e ora mutukore tōna. 48 Ko au te kai o te ora. 49 I kai ana tō kōtou 'ui metua i te māna i te mēdēbara ra, ē mate atura. 50 Ko te kai tēia tei 'eke mai mei te rangi mai kia kaikai te tangata ē kāre rava e mate. 51 Ko au te kai ora, ko tei 'eke mai mei te rangi mai; ko tēta'i 'ua tangata te ka kai i tēianei kai, ka ora aia e tuātau 'ua atu. Ko te kai tāku e 'ōronga atu, ko tōku kōpapa ia 'ei ora nō tō te ao.” 52 Kua taumārō anake i'ora te Ngāti Iūda, rātou rātou 'ua'orāi, nā kō akera, “'E a'a e tikāi i tēianei tangata kia 'ōronga mai ki a mātou i tōna kōpapa 'ei kai?” 53 Kua tuatua maira a Iēsū ki a rātou, “Koia mou tāku e karanga atu ki a kōtou na, kia kore kōtou e kai i te kōpapa o te Tamaiti a te Tangata nei ē e inu 'oki i tōna toto, kāre ia 'e ora i roto i a kōtou. 54 Ko te ka kai i tōku kōpapa ē te ka inu i tōku toto, 'e ora mutukore tōna ē ka 'akatū au i aia i te rā 'openga ra. 55 Nō te mea, 'e kai tikāi tōku kōpapa ē 'e vai inu tikāi tōku toto. 56 Ko te ka kai i tōku kōpapa ē te ka inu i tōku toto, ka no'o ia i roto i āku ē ko au i roto i aia. 57 Mei te Metua ora ra i tono mai i āku nei ē tē ora nei 'oki au i te Metua ra, pērā katoa tēta'i 'ua atu tangata te ka kai i āku nei, ka ora ia i āku. 58 Ko te kai tēia tei 'eke mai mei te rangi mai, kāre rā mei tā te 'ui metua i kai ana ē mate atura; ko te tangata e kai nei i tēianei kai, ka ora aia e tuātau 'ua atu.” 59 Ko tēia tā Iēsū tuatua i tōna 'āpi'i'anga i roto i te sūnago i Kāperenāuma ra.
Te tuatua o te ora mutukore
60 'E mānganui te au pipi a Iēsū tei 'akarongo i tāna tuatua i nā kō mai ē, “'E tuatua rikarika tēia. Ka tika i a 'ai i te 'āriki mai?” 61 Tē nakiro a Iēsū i roto i aia 'ua'orāi ē, tē tarotaro ra tāna au pipi i te reira. Ē kua tuatua maira aia ki a rātou, “Tē maitu na kōtou i te reira? 62 Ka 'akapē'ea i reira kōtou mē ka 'ākara kōtou i te Tamaiti a te Tangata nei i te kake'anga ki runga ki te ngā'i tāna i no'o ana i muatangāna? 63 Ko te Vaerua ko te tumu ia o te ora, kāre ō te kōpapa 'e pu'apinga. Te tuatua tāku i karanga atu ki a kōtou na, 'e vaerua ia ē te ora. 64 Kāre rā tēta'i pāpāki o kōtou na i 'irinaki.” Kua nakiro 'oki a Iēsū mei muatangāna mai rāi ē, ko 'ai te aronga kāre i 'irinaki, ē ko 'ai te tangata te ka tuku pikika'a i aia ra. 65 Nō reira kua karanga atura aia ē, “Kua 'akakite atu au ki a kōtou ē, kāre e tika i tēta'i 'ua atu tangata i te 'aere mai ki āku nei, kia kore e 'ōronga'ia mai taua tika ra e taku Metua.” 66 Nō reira, 'e mānganui tāna au pipi i 'akaruke atu i aia ē kāre i āru 'aka'ou mai i aia ra. 67 Ē kua tuatua maira a Iēsū ki te ta'i nga'uru mā rua ra, “Ka 'inangaro katoa āinei kōtou i te 'aere atu?” 68 Kua pa'u atura a Simona Pētero ki aia, “E te 'Atu, ka 'aere mātou ki a 'ai ra? Tei a koe te tuatua o te ora mutukore ra. 69 Tē 'irinaki ake nei mātou ē tē nakiro nei 'oki mātou ē, ko koe te Mea Tapu a te Atua ra.” 70 Kua tuatua maira a Iēsū ki a rātou, “Kāre āina kua 'iki au i a kōtou te tino nga'uru mā rua ra? Ko tēta'i rā i ō kōtou nei, 'e tiāporo ia.” 71 Ko Iūda Ikariota a Simona tāna i tuatua ra, nō te mea, ko ia tēta'i o te ta'i nga'uru mā rua ra, ka riro atu ei i te tuku pikika'a atu i aia ra.
Ko Iēsū ē tōna au taeake
1 Ē muri akera, kua 'ā'āere i'ora a Iēsū i Galilea, kāre 'oki aia i anoano i te 'ā'āere i Iūdea, nō te mea, ko te 'akakoro'anga o te Ngāti Iūda e tā i aia. 2 Tē vaitata ra te 'Ōro'a Pātia Pū'ākapa a te Ngāti Iūda. 3 Kua tuatua maira tōna au taeake ki aia, “Ka 'akaruke mai koe mei konei ē e 'aere atu ki Iūdea, kia kite katoa tā'au au pipi i te 'anga'anga tini tā'au e rave nei. 4 Nō te mea, kāre tēta'i tangata e kimi ra i te rongo ra e rave pōiri 'ua i te 'anga'anga. Mei tā'au e rave nei i tēia tū 'anga'anga, e 'akaāri atu i a koe 'ua'orāi ki tō te ao nei.” 5 Kāre ake rāi 'oki tōna au taeake i 'irinaki ake i aia. 6 Kua karanga atura a Iēsū ki a rātou, “Kāre ake rāi i tae mai te ora e tau ei i āku. Ka tau rā te au ora katoa i a kōtou. 7 Kāre e tika i tō te ao nei i te mākitakita mai i a kōtou. Tē mākitakita mai nei rā aia i āku, i te mea ē, tē 'akakite 'ua atu nei au ē, kua kino tāna au 'anga'anga. 8 E 'aere atu kōtou ki te 'ōro'a, kāre au e 'aere atu ki tēia 'ōro'a, nō te mea, kāre i tae mai ake te ora e tau ei i āku.” 9 E oti akera taua tuatua ra, no'o 'ua i'ora aia i Galilea.
Ko Iēsū i te 'Ōro'a Pātia Pū'ākapa
10 Kia riro atura tōna au taeake ki te 'ōro'a ra, kua 'aere katoa atura a Iēsū 'ua'orāi, kāre rā i te tū 'akakitekite, i te tū pōiri 'ua rā. 11 Kua kimi atura te Ngāti Iūda i aia i taua 'ōro'a ra, nā kō akera, “Tei 'ea aia na?” 12 'E ma'ata rava akera te tarotaro'anga a te urupū tangata i aia. I karanga atura tēta'i pāpāki ē, “'E tangata meitaki aia.” Ko tēta'i pāpāki rā, nā kō atura, “Kāre, tē arataki kē 'ua nei aia i te urupū tangata.” 13 Kāre rā 'e tangata i tuatua 'akakite 'ua i aia nō te mataku 'oki i te Ngāti Iūda. 14 E tae akera ki rotopū i taua 'ōro'a ra, 'aere atura a Iēsū ki roto i te 'iero, 'āpi'i atura. 15 Kua vā 'ua i'ora te Ngāti Iūda, nā kō akera, “Nō 'ea mai te kite o tēianei tangata, kāre 'oki aia i 'āpi'i'ia?” 16 Kua pa'u atura a Iēsū ki a rātou, nā kō atura, “Ko tāku 'āpi'i'anga, kāre e nāku 'ua'orāi ia, nāna rā nā tei tono mai i āku nei. 17 Ko tei 'inangaro i te 'ākono i tōna anoano, ka kite aia ē, mē nō kō mai āina tēia 'āpi'i'anga i te Atua, mē nāku 'ua'orāi āina. 18 Ko tei tuatua i tōna 'ua'orāi mana, tē kimi ra aia i tōna 'ua'orāi kakā; ko tei kimi rā i te kakā o tei tono mai i aia ra, 'e tuatua mou tāna, ē kāre 'ua 'e tuatua tikakore i roto i aia ra. 19 Kāre āinei nā Mōse i tuku mai i te Ture nā kōtou? Ē kāre rava tēta'i i ō kōtou nei i 'ākono i te Ture. 'E a'a kōtou e 'akakoro nei i te tā mai i āku?” 20 Kua pa'u maira te au tangata, “'E dēmoni tō'ou. Ko 'ai tē 'akakoro nei e tā i a koe?” 21 Kua pa'u atura a Iēsū ki a rātou, nā kō atura, “'Okota'i 'ua 'anga'anga tāku i rave, ē tē ūmere nei kōtou kātoatoa. 22 Nā Mōse i tuku mai i te peritome'anga ki a kōtou (kāre rā nā Mōse tikāi te reira, nā te 'ui tupuna rā) ē tē mātau nei kōtou i te peritome i te tangata i te rā Sābati. 23 Mē tē 'āriki nei te tangata i te peritome'anga i te rā Sābati kia kore e 'a'ati'ia te Ture a Mōse, tē riri mai āinei kōtou i āku, nō te mea, kua 'akaora rava au i tēta'i tangata i te rā Sābati? 24 Auraka e 'akavā 'ua i te tū i va'o ake, ka 'akapāpū rā kia tika tā kōtou 'akavā'anga.”
Ko tēianei tangata āinei te Mesia?
25 Ē kua karanga atura ēta'i o te au tangata nō Iērūsalēma, “Kāre āinei tēia te tangata tā rātou e 'akakoro nei e tā? 26 Ē inā, tē tuatua 'ua mai nei aia i mua i te kātoatoa, ē kāre tākiri rātou e tuatua atu ki aia. Kua 'akatika āinei pa'a te au tūtara ē, ko ia tikāi te Mesia? 27 Inārā, tē kite nei tātou ē, nō 'ea mai aia. Kia tae mai rā te Mesia, kāre 'e tangata e kite ē nō 'ea mai aia.” 28 Kua kāpiki 'ua atura a Iēsū i te 'āpi'i'anga i roto i te 'iero ra, nā kō atura, “Tē kite nei kōtou i āku, ē tē kite nei kōtou ē, nō 'ea mai au. Kāre au i 'aere 'ua mai, kāreka 'e tika rāi tōna tei tono mai i āku nei, ē kāre kōtou i kite i aia. 29 Ko au rā, kua kite au i aia, nō te mea, nō kō mai au i aia ra, ē nāna 'oki i tono mai i āku nei.” 30 Kua 'akakoro atura rātou e 'opu i aia, inārā, kāre 'e tangata i mou i aia, nō te mea, kāre tōna ora i tae mai ake. 31 'E mānganui nō roto mai i taua urupū tangata ra i 'irinaki i aia, ē kua nā kō atura, “Kia tae mai te Mesia, 'e ma'ata atu āinei tāna au 'akairo ka rave i tā tēianei tangata i rave?”
Kua tonokia ēta'i tiaki e 'opu i a Iēsū
32 Kua rongo akera te au Phārīsea ē, tē 'akapērā ra te urupū tangata i te kō'umu'umu i a Iēsū ra. Ē kua tono atura te kau ta'unga nunui ē te au Phārīsea i ēta'i tiaki o te 'iero ra e 'opu i aia. 33 Kua tuatua atura a Iēsū, “'E tuātau poto 'ua te toe o tōku no'ono'o'anga i ō kōtou nei ē tē 'aere atu nei au ki aia i tei tono mai i āku nei. 34 Ka kimi mai kōtou i āku, ē kāre au e kitea'ia mai e kōtou. Ē kāre e rauka i a kōtou i te 'aere ki te ngā'i tei no'o'ia e au ra.” 35 Kua tuatua i'ora te Ngāti Iūda, rātou rātou 'ua'orāi, “Ka 'aere tēianei tangata ki 'ea, kia kore aia e kitea'ia e tātou nei? Ka 'aere āinei aia ki te aronga i pue'urikiriki ki ō te Eleni ra, ē ka 'āpi'i atu ei i te Eleni? 36 'E a'a tēianei tuatua tāna i karanga mai nei ē, ‘Ka kimi mai kōtou i āku, ē kāre au e kitea'ia mai e kōtou; ē kāre e rauka i a kōtou i te 'aere ki te ngā'i tei no'o'ia e au ra?’ ”
Te vai ora
37 I te rā 'openga, koia 'oki te rā ma'ata tikāi o taua 'ōro'a ra, kua tū akera a Iēsū, kua kāpiki atura, nā kō atura, “Te tangata e kakī vai ra, ka 'aere mai aia ki āku nei e inu ei. 38 Te tangata e 'irinaki mai ki āku nei, ka ta'e mai te vai ora nō roto mai i tōna ngākau, mei tei 'akakite'ia mai e te tuatua i tātā'ia ra.” 39 Kua tuatua a Iēsū i te reira nō runga i te Vaerua tā te aronga i 'irinaki i aia ra ē ka 'āriki mai. Kāre 'oki te Vaerua i tae mai ake, nō te mea, kāre a Iēsū i 'akakakā'ia ake.
Kua mavete te 'iti tangata
40 Kua karanga atura tēta'i pae o te urupū tangata tei 'akarongo ana i taua tuatua ra, “Ko te peroveta mou rāi tēia.” 41 Kua nā kō atura tēta'i pae, “Ko te Mesia tēia.” Ko tēta'i pae rā i ui mai ē, “Ka 'aere mai āina te Mesia nō Galilea mai? 42 Kāre āinei i nā kō te tuatua i tātā'ia ra ē, nō te 'uānga o Dāvida te Mesia, ē ka 'aere mai aia nō Bētelehēma mai, te 'ōire i no'o ana a Dāvida?” 43 Ē kua tupu i'ora te mavete'anga i rotopū i te au tangata i a Iēsū. 44 Kua 'inangaro tēta'i pae o rātou i te 'opu i aia, inārā, kāre tēta'i 'ua atu tangata i mou i aia.
Te 'irinakikore o te au tūtara
45 Kua 'oki atura taua aronga tiaki o te 'iero ra ki te kau ta'unga nunui ē te au Phārīsea ra, tei ui atura ki a rātou, “'E a'a kōtou i kore ei i arataki mai i a Iēsū?” 46 Kua pa'u atura taua au tiaki ra, “Kāre tākiri tēta'i tangata i tuatua ana mei tērā te tū.” 47 Kua ui atura te au Phārīsea ki a rātou, “Kua vāvare katoa āinei kōtou? 48 Kua 'irinaki āinei tēta'i o te au tūtara, mē kāre, tēta'i o te au Phārīsea i aia? 49 Ko tēianei urupū tangata rā, tei kore i kite i te Ture, kua tauma'a'ia.” 50 Ko tēta'i rā nō rātou 'ua'orāi, ko Nīkōdemo ko tei 'aere mai ki a Iēsū i mua ake, kua ui atura ki a rātou, 51 “Ka 'akavā āinei tā tātou Ture i te tangata kia kore i 'akarongo'ia nā mua ake, ē kia kitea ē 'e a'a tāna e rave nei?” 52 Kua pa'u atura rātou ki aia, nā kō atura, “Ko koe katoa āinei nō Galilea mai? Ka kimi ana, ē ka kite koe ē, kāre rava 'e peroveta e 'aere mai ana nō Galilea mai.”
Te va'ine tei 'opu'ia i roto i te 'akaturi'anga
53 'Aere 'ua atura te tangata katoa ki tōna ngutu'are, ki tōna ngutu'are.
1 Ko Iēsū rā, kua 'aere atura aia ki te Maunga ra o te Ōlive. 2 Ē i te pōpongi roa ra, 'oki 'aka'ou maira aia ki roto i te 'iero ra. Kua 'aere kātoatoa maira te tangata ki aia, ē kua no'o i'ora aia ki raro, 'āpi'i atura i a rātou. 3 Kua arataki maira te au Pū'āpi'i Ture ē te au Phārīsea i tēta'i va'ine tei 'opu'ia i roto i te 'akaturi'anga, ē kua tuku atura rātou i aia ki rotopū. 4 Kua tuatua maira rātou ki a Iēsū, “E te Pū'āpi'i, ko tēia va'ine nei kua 'opu'ia i te taime tikāi o te 'akaturi'anga. 5 Kua 'akaue mai a Mōse ki a mātou i roto i te Ture ē, kia pē'i'ia tēia tū va'ine ki te toka kia mate. 'E a'a tā'au tuatua?” 6 I pērā mai rātou i te tīmata i aia kia rauka i a rātou tēta'i rāvenga 'ei 'aka'apa i aia. Kua piko i'ora a Iēsū ki raro, kua tātā i'ora ki runga i te one ki tōna rima. 7 Nō tō rātou tāmou'anga i te uiui ki aia, kua no'otū i'ora aia ē kua tuatua atura ki a rātou, “Ko te tangata 'arakore i roto i a kōtou na, ko ia te mua i te pē'i i tēia va'ine ki te toka.” 8 Kua piko 'aka'ou i'ora aia ki raro e tātā i'ora ki runga i te one. 9 I te 'akarongo'anga rātou i te reira, kua 'akaruke takita'i atura rātou, ko te aronga pakari nā mua. Ē te toe ko Iēsū anake ē taua va'ine ra i te tū 'ua'anga i reira. 10 Kua no'otū akera a Iēsū ē kua ui atura ki aia, “E mā'ine, tei 'ea rātou? Kāre āinei tēta'i o rātou i 'akautunga mai i a koe?” 11 Kua pa'u atura aia, “Kāre tākiri, e te 'Atu.” Kua tuatua atura a Iēsū ki aia, “Kāre katoa au e 'akautunga i a koe. Ka 'aere, auraka rā e 'ara 'aka'ou.”
Ko Iēsū te mārama o tēianei ao
12 Kua tuatua 'aka'ou atura a Iēsū ki te au Phārīsea, nā kō atura, “Ko au te mārama o tēianei ao. Ko tei āru mai i āku nei, kāre aia e 'ā'āere 'ua nā roto i te pōiri, ka rauka rā i aia te mārama o te ora.” 13 Kua pa'u maira te au Phārīsea ki aia, “Tē 'akakite nei koe i a koe 'ua'orāi; kāre tā'au 'akakite'anga e tau kia 'āriki'ia mai.” 14 Kua pa'u atura a Iēsū, “Mei te mea ē, tē 'akakite nei au i āku 'ua'orāi, e tau rāi tāku 'akakite'anga kia 'āriki'ia mai, nō te mea, kua kite au ē, nō 'ea mai au nei, ē kua kite au ē, tē 'aere nei au ki 'ea. Ko kōtou rā, kāre kōtou i kite ē, nō 'ea mai au nei, ē kāre katoa kōtou i kite ē, tē 'aere nei au ki 'ea. 15 Tē 'akavā nei kōtou mei tā te tangata te tū, ko au rā, kāre au e 'akavā i tēta'i. 16 Ē mei te mea ra ē, tē 'akavā nei au, ka tika rāi tāku 'akavā'anga, nō te mea, kāre 'oki ē ko au anake 'ua, ko māua rā e te Metua katoa 'oki ko tei tono mai i āku nei. 17 Kua tātā katoa'ia 'oki ki roto i tā kōtou Ture ra ē, ‘Ko te 'akakite'anga mai o ngā tangata e rua, 'e tuatua mou ia.’ 18 Ko au 'oki tēta'i tei 'akakite i āku 'ua'orāi, ē ko te Metua tei tono mai i āku nei, tei 'akakite katoa mai i āku 'ua'orāi nei.” 19 Kua ui maira rātou ki aia, “Tei 'ea tō'ou Metua?” Kua pa'u atura a Iēsū, “Kāre kōtou i kite i āku ē kāre katoa i tōku Metua. Nāringa kōtou i kite mai i āku ra, kua kite katoa i a kōtou i tōku Metua.” 20 I vaitata ki te pi'a 'ātinga taua tuatua'anga ra a Iēsū i tōna 'āpi'i'anga i roto i te 'iero ra. Ē kāre rava 'e tangata i 'opu atu i aia, nō te mea, kāre tōna ora i tae mai ake.
Kāre e tika i a kōtou i te 'aere ki te ngā'i tāku e 'aere atu
21 Kua tuatua 'aka'ou atura a Iēsū ki a rātou, “Tē 'aere kē nei au, ē ka kimi mai kōtou i āku ē ka mate kōtou ma tā kōtou au 'ara. Te ngā'i tāku e 'aere atu nei, kāre e tika i a kōtou i te tae ake.” 22 Kua nā kō akera te Ngāti Iūda, “Ka tā āinei aia i aia 'ua'orāi, i te mea ē, kua tuatua mai aia ē, ‘Ko te ngā'i tāku e 'aere atu nei, kāre e tika i a kōtou i te 'aere ake’?” 23 Kua pa'u atura aia ki a rātou, “Nō raro nei kōtou, nō runga mai au; nō tēianei ao kōtou, kāre au nō tēianei ao. 24 I karanga atu ei au ki a kōtou ē, ka mate kōtou ma tā kōtou au 'ara. Ē ka mate rāi kōtou ma tā kōtou au 'ara, ē kia kore kōtou e 'irinaki ē, KO AU RĀI IA E VAI NEI.” 25 Kua ui maira rātou ki aia, “Ko 'ai 'oki koe na?” Kua pa'u atura a Iēsū kia rātou, “Ko tāku 'oki i karanga atu ki a kōtou mei muatangāna mai. 26 'E ma'ata rāi 'oki te au mea tāku e tuatua ē tāku e 'akavā nō kōtou e tikāi. Ko tei tono mai i āku nei rā 'e tuatua mou tāna, ē tē 'akakite 'ua nei au ki tō te ao nei i te au mea tāku i 'akarongo mei kō i aia ra.” 27 Kāre rātou i nakiro ē ko te Metua tāna i tuatua ra. 28 Nō reira, kua karanga atura a Iēsū ki a rātou, “Kia 'akateitei'ia e kōtou te Tamaiti a te Tangata nei, i reira kōtou e kite ei ē, KO AU RĀI IA E VAI NEI; ē e kite katoa kōtou ē, kāre rava au e rave i tēta'i mea ē ko au anake 'ua, inārā, tē tuatua nei au mei tā te Metua i 'āpi'i mai i āku nei. 29 Ko tei tono mai i āku nei, tei āku nei rāi aia; ē kāre aia i 'akaruke 'ua mai i āku nei ko au anake 'ua, nō te mea, tē rave 'ua nei au i te au mea e mareka ai aia.” 30 Kia 'akapērā atura aia i te tuatua'anga, 'e ma'ata te au tangata tei 'irinaki i aia ra.
Ko te tū tangata rangatira ē te tū tangata tuika'a
31 Kua karanga atura a Iēsū ki te Ngāti Iūda tei 'irinaki mai i aia ra ē, “Mē tāpū mārie kōtou i tāku nei tuatua, 'e pipi tikāi kōtou nāku i reira, 32 ē ka kite kōtou i te tuatua mou; ē nā te tuatua mou kōtou e 'akarangatira.” 33 Kua tuatua maira rātou ki aia, “'E 'uānga mātou nā Āberahāma, ē kāre rava mātou i riro ana 'ei tuika'a i ēta'i kē. 'E a'a i'ora koe i tuatua mai ei ē, ‘ka 'akarangatira'ia kōtou’?” 34 Kua pa'u atura a Iēsū ki a rātou, “Koia mou tāku e karanga atu ki a kōtou na, ko tēta'i 'ua atu tangata tei rave i te 'ara, 'e tuika'a aia nō te 'ara. 35 Kāre te tuika'a e no'o tinamou i roto i te ngutu'are. Ko te tamaiti rā, ka no'o tinamou aia i reira. 36 Mē nā te Tamaiti kōtou e 'akarangatira, 'e aronga rangatira tikāi kōtou i reira. 37 Kua kite au ē, 'e 'uānga kōtou nā Āberahāma; inārā, tē 'akakoro mai nei kōtou i te tā mai i āku, nō te mea, kāre taku tuatua i 'āriki'ia mai e kōtou. 38 Ko au, tē tuatua nei au i tāku i 'ākara i kō i tāku Metua ra; ko kōtou rā, tē 'ākono nei kōtou i tā kōtou i 'akarongo mai mei kō mai i tō kōtou metua ra.” 39 Kua pa'u maira rātou ki aia, nā kō maira, “Ko Āberahāma tō mātou metua.” Kua pa'u atura a Iēsū ki a rātou, “Nāringa kōtou 'e tamariki nā Āberahāma, kua rave kōtou i tā Āberahāma i rave. 40 Mei tēia te tū, tē 'akakoro nei kōtou i te tā mai i āku, ko te tangata tei 'akakite atu ki a kōtou i te tuatua mou tāku i 'akarongo mai ana mei kō mai i te Atua ra. Kāre rava a Āberahāma i 'akapērā. 41 Tē rave nei rā kōtou i te 'anga'anga a tō kōtou metua.” Kua tuatua maira rātou ki aia, “Kāre mātou i 'ānau'ia mai nā roto i te 'akaturi. 'Okota'i rāi o mātou Metua, ko te Atua.” 42 Kua pa'u atura a Iēsū ki a rātou, “Nāringa ko te Atua tō kōtou Metua, kua 'inangaro mai kōtou i āku, nō te mea, nō kō mai rāi au i te Atua ra, ē i 'aere mai au ki konei. Kāre 'oki au i 'aere 'ua mai nō tōku 'ua'orāi anoano, nāna 'oki au i tono mai. 43 'E a'a kōtou i kore ei i mārama i tāku nei tuatua? Nō te mea, kāre e rauka i a kōtou kia 'akarongo mai i tāku nei tuatua. 44 Ko tō kōtou metua ko te Tiāporo ia, ē ko te au 'akakoro'anga o tō kōtou metua ko tā kōtou ia i 'inangaro i te rave. 'E tā tangata 'oki aia mei muatangāna mai rāi. Kāre aia e tāpū mārie i te tuatua mou, nō te mea, kāre 'oki 'e tuatua mou i roto i aia ra. Mē tē pikika'a nei aia, tē tuatua nei aia mei tei tau i tōna 'ua'orāi tū tikāi. 'E pikika'a 'oki aia, ē te metua 'oki aia nō te au tuatua pikika'a. 45 Ko au rā, tē 'akakite nei au i te tuatua mou, ē kāre kōtou i 'irinaki mai i āku nei. 46 Ko 'ai i ō kōtou na e 'aka'apa mai nei i āku nei nō te 'ara? Mē tē 'akakite nei au i te tuatua mou, 'e a'a kōtou i kore ei i 'irinaki mai i āku nei? 47 Mē nō te Atua aia ra, ka 'akarongo mai aia i te au tuatua a te Atua. Ko te tumu i kore ei kōtou i 'akarongo mai, kāre 'oki kōtou ē nō te Atua ra.”
Ko Iēsū ē Āberahāma
48 Kua tuatua maira te Ngāti Iūda ki a Iēsū, nā kō maira, “Kāre āinei kua tau tā mātou tuatua'anga ē, 'e tangata Sāmāria koe, ē 'e dēmoni 'oki tō'ou?” 49 Kua pa'u atura a Iēsū, “Kāre ōku 'e dēmoni; inārā, tē 'akangāteitei atu nei au i taku Metua, ē tē 'akakino mai nei kōtou i āku. 50 Kāre 'oki au i kimi i tōku 'ua'orāi kakā. Tē vai nei rā tēta'i tei kimi i te reira, ē ko ia te 'akavā ra. 51 Koia mou tāku e karanga atu ki a kōtou na, ko tei 'ākono i tāku nei tuatua, kāre rava aia e kite i te mate e tuātau 'ua atu.” 52 Kua tuatua maira te Ngāti Iūda ki aia, “I tēianei, kua mārama mātou ē, 'e dēmoni tikāi tō'ou. Kua mate 'oki a Āberahāma ē te au peroveta, ē tē tuatua mai nei koe ē, ‘Ko tei 'ākono i tāku nei tuatua, kāre rava aia e kite i te mate e tuātau 'ua atu.’ 53 'E ma'ata atu āinei koe i tō mātou metua ko Āberahāma tei mate ra? Ē kua mate katoa te au peroveta. Ko 'ai 'oki koe i tō'ou na manako'anga?” 54 Kua pa'u atura a Iēsū, “Kia 'akakakā au i āku 'ua'orāi, 'e pu'apingakore nōku te reira. Ko tei 'akakakā mai nei rā i āku, ko taku Metua ia, ko tā kōtou e tuatua nei ē, 'e Atua aia nō kōtou. 55 Kāre rava kōtou i kite ana i aia. Ko au rā, tē kite nei au i aia. Mē tē tuatua nei au ē, kāre au e kite nei i aia, ka riro au mei a kōtou na, koia 'oki, 'e tangata pikika'a. Tē kite nei rāi au i aia ē tē 'ākono nei au i tāna tuatua. 56 I rekareka ana 'oki tō kōtou metua ko Āberahāma, nō te mea, ka kite aia i tōku tuātau; kua kite atura aia, ē kua mareka rava atura.” 57 Kua tuatua maira te Ngāti Iūda ki aia, “Kāre ake rāi i tae ake ki te rima nga'uru'anga o tō'ou mata'iti ē kua kite mata āinei koe i a Āberahāma?” 58 Kua tuatua atura a Iēsū kia rātou, “Koia mou tāku e karanga atu ki a kōtou na, 'ōu a Āberahāma i 'ānau'ia mai ei, ‘TĒ VAI NEI AU.’ ” 59 Kua rave i'ora rātou i te toka 'ei pē'i atu i aia, kua 'akangaro i'ora rā a Iēsū i aia, 'aere atura ki va'o mai i te 'iero ra.
Tē 'akaora'ia nei te tangata i 'ānau matapō'ia mai
1 Ē tē 'aere 'ua ra a Iēsū ra, kite atura aia i tēta'i tangata, 'e matapō mei te 'ānau'anga mai, 2 ē kua ui maira tāna au pipi ki aia, nā kō maira, “E Rabi, nā 'ai i 'ara ai, nā tēia tangata nei, mē kāre, nā tōna ngā metua āinei, i 'ānau matapō'ia mai ei aia?” 3 Kua pa'u atura a Iēsū, “Kāre aia i 'ara, kāre katoa tōna ngā metua; inārā, i 'ānau matapō'ia mai aia kia 'akaāri'ia mai te 'anga'anga mana a te Atua i roto i aia. 4 Kia rave tātou i te au 'anga'anga a tei tono mai i āku nei e tikāi, koi vai ake te ao. Ka tae mai te pō kāre roa e rauka i tēta'i 'ua atu tangata i te 'anga'anga i reira. 5 I tōku no'o'anga i te ao nei, ko au rāi te mārama o tēia ao nei.” 6 I muri ake i taua tuatua'anga ra, kua tūtu'a i'ora a Iēsū ki raro i te one, ma'ani atura i te vari ki te 'uāvare, ē kua parai atura i te vari ki te mata o te tangata matapō ra, 7 ē kua karanga atura ki aia, “Ka 'aere, ka 'ōrei i roto i te vai pā'ī i Sīloama” (tei 'akatau'ia, Tonokia.) Kua 'aere atura taua matapō ra, 'ōrei i'ora, ē kua 'oki maira aia, ē kua kite ōna mata. 8 Nō reira te au tangata tupu ē te aronga tei mātau i te kite i aia i te patipati'anga i mua ana, i ui atu ei ra ē, “Kāre āinei tēia te tangata i no'o 'ua ma te patipati?” 9 Kua tuatua maira ēta'i aronga, “Ko ia rāi tēia.” Kua nā kō mai rā tēta'i pae, “Kāre ia, mei aia rā tōna tū.” Kua karanga maira taua tangata 'ua'orāi ra ē, “Ko au rāi ia.” 10 Kua ui atura rātou ki aia, “I 'akapē'ea i pu'era ai ō'ou mata?” 11 Kua pa'u maira aia, “Ko taua tangata ra, ko Iēsū tōna ingoa, nāna i ma'ani i te vari ē te parai ki ōku mata, ē kua nā kō maira ki āku, ‘Ka 'aere ki Sīloama e 'ōrei.’ Kua 'aere atura au, 'ōrei i'ora, ē kite atura ōku mata.” 12 Ē kua ui atura rātou ki aia, “Tei 'ea taua tangata ra?” Kua pa'u maira aia, “Kāre 'ua au i kite.”
Tē uiui nei te au Phārīsea i te 'akaora'anga'ia
13 Kua arataki atura rātou i te tangata tei matapō i mua ana ki te au Phārīsea ra. 14 'E Sābati 'oki taua rā ra i ma'ani ei a Iēsū i te vari ē i 'akapu'era ai i ōna mata. 15 Kua ui 'aka'ou maira te au Phārīsea ra ki aia ē, i 'akapē'ea ōna mata i kite ei. Kua pa'u atura aia ki a rātou ē, “Kua tuku mai aia i te vari ki runga i ōku mata, 'ōrei i'ora au, ē tē kite nei ōku mata.” 16 Kua nā kō akera ēta'i o te au Phārīsea, “Kāre tērā tangata i tō te Atua, kāre 'oki aia i 'ākono i te Sābati.” Kua nā kō akera ēta'i o rātou, “'E a'a e tikāi i tēta'i tangata 'ara kia rave i te au 'akairo mei tēianei te tū?” 'E mavete'anga i'ora tei tupu i rotopū i a rātou. 17 Kua ui 'aka'ou maira rātou ki taua matapō ra, “'E a'a tā'au tuatua i aia? Kua 'akapu'era 'oki aia i ō'ou mata.” Kua pa'u atura aia, “'E peroveta rāi aia.” 18 Kāre rā te Ngāti Iūda i 'āriki ē, i matapō ana taua tangata ra ē kua pu'era ōna mata, māri 'ua, kia tiki rātou i ngā metua o te tangata i pu'era te mata ra. 19 Ē kua ui atura ki a rāua, nā kō atura ē, “Ko tēia āinei tā kōrua tamaiti, tā kōrua i tuatua mai ē, kua 'ānau matapō'ia mai aia? 'E a'a 'oki ōna mata e kite nei i tēianei?” 20 Kua pa'u maira ngā metua nōna ra, nā kō maira, “Kua pāpū i a māua ē, nā māua rāi tēianei tamaiti, ē kua 'ānau matapō'ia mai aia. 21 'Akapē'ea rā ōna mata i kite i tēianei, kāre māua i kite, ē kāre katoa māua i kite ē, nā 'ai i 'akapu'era i ōna mata. E ui atu kōtou ki aia, kua pakari 'oki aia, nāna 'ua'orāi e tuatua mai.” 22 I 'akapērā tōna ngā metua i te tuatua'anga nō te mataku i te Ngāti Iūda, nō te mea, kua 'akakite takere'ia e te Ngāti Iūda ē, ka tukuna'ia ki va'o i te sūnago tēta'i 'ua atu tangata e 'a'aki ē, ko Iēsū te Mesia. 23 Nō reira i tuatua mai ei tōna ngā metua ra ē, “Ka ui atu ki aia, kua pakari 'oki aia.” 24 Kua tiki 'aka'ou atura rātou i te tangata tei matapō ana ē kua tuatua atura ki aia, “E 'akakakā i te Atua; kua kite 'oki mātou ē, 'e tangata 'ara tērā tangata.” 25 Kua pa'u maira aia, “Kāre au i kite ē, mē 'e tangata 'ara āina aia. 'Okota'i rā mea tāku i kite, koia 'oki, i matapō ana au, ē tē kite nei ōku mata i tēianei.” 26 Kua ui i'ora rātou ki aia, “I a'a mai aia ki a koe? I 'akapē'ea aia i te 'akapu'era'anga i ō'ou mata?” 27 Kua pa'u atura aia ki a rātou, “Kua 'akakite takere atu au ki a kōtou, kāre rā kōtou i 'akarongo mai. 'E a'a kōtou i 'inangaro ei i te 'akarongo 'aka'ou mai? Ka 'inangaro katoa āinei kōtou kia riro mai 'ei au pipi nāna?” 28 Kua 'akakino maira rātou i aia, nā kō maira, “Ko koe tāna pipi. Ko mātou rā 'e au pipi nā Mōse. 29 Tē kite nei mātou ē, kua tuatua mai te Atua ki a Mōse; ko tērā tangata rā, kāre mātou i kite ē, nō 'ea mai aia.” 30 Kua pa'u atura taua tangata ra, nā kō atura, “Tēia 'oki te mea ūmere. Kua 'akapu'era aia i ōku nei mata, ē kāre kōtou i kite ē, nō 'ea mai aia. 31 Kua kite 'oki tātou ē, kāre te Atua e 'akarongo mai i te aronga 'ara; inārā, kia 'akamori tēta'i tangata i te Atua ē kia 'ākono aia i tōna anoano, ka 'akarongo mai te Atua i aia. 32 Mei te 'akamata'anga mai o te 'enua nei, kāre tākiri i rongo'ia mai ē, nā tēta'i 'ua atu tangata i 'akapu'era i te mata o tēta'i tangata 'ānau matapō'ia mai. 33 Nāringa tēianei tangata ē kāre nō kō mai i te Atua, kāre āna e rauka i te rave.” 34 Kua tuatua maira rātou ki aia, nā kō maira, “I 'ānau rava'ia mai koe ma te 'ara, ē tē tīmata mai āinei koe i te 'āpi'i mai i a mātou?” Ē kua tuaru atura rātou i aia ki va'o i te sūnago ra.
Te tū matapō vaerua
35 Kua rongo akera a Iēsū ē, kua tuaru atu te au Phārīsea i te tangata matapō i 'akaora'ia ki va'o; ē i tōna 'ārāvei'anga i aia, kua ui maira a Iēsū ki aia, “Tē 'irinaki āinei koe i te Tamaiti a te Tangata?” 36 Kua pa'u atura aia, nā kō atura, “E te 'Atu ē, ē ko 'ai aia kia 'irinaki atu au i aia?” 37 Kua karanga maira a Iēsū ki aia, “Kua 'ākara 'oki koe i aia; ko tē tuatua atu nei ki a koe ra, ko ia ia.” 38 Ē kua tuatua i'ora taua tangata ra, “Tē 'irinaki nei au, e te 'Atu ē.” Ē kua tīpapa i'ora aia ki raro ki mua i a Iēsū. 39 Kua tuatua i'ora a Iēsū ē, “I 'aere mai nei au ki te ao nei nō te 'akavā'anga, kia rauka i te aronga tei kore e 'ākara mai nei i te 'ākara, ē kia riro rāi 'ei matapō te aronga tei 'ākara mai nei.” 40 Kua 'akarongo mai ēta'i o te au Phārīsea i vaitata ki aia i te reira, ē kua nā kō maira ki aia, “'E matapō katoa āinei mātou?” 41 Kua pa'u atura a Iēsū ki a rātou, “Nāringa kōtou 'e au matapō ra, kāre ia ā kōtou 'ara; nō tā kōtou rā tuatua'anga mai ē, ‘Tē kite nei mātou’, tē tinamou ra rāi tā kōtou 'ara.”
Te parabole o te tiaki māmoe
1 Kua tuatua atura a Iēsū, “Koia mou tāku e karanga atu ki a kōtou na, ko te tangata tei kore e nā te ngūtupa i te tomo ki roto i te koro o te māmoe ra, ko tei kake rā nā runga i tēta'i mataara kē, 'e tangata keiā aia ē te noni. 2 Ko te tangata rā tei tomo nā te ngūtupa ra, ko ia te tiaki nō te māmoe. 3 E 'e'eu mai te tiaki pā i te ngūtupa ki aia ra; ē ka 'akarongo mai te māmoe i tōna reo, ē ka kāpiki aia i tāna 'ua'orāi māmoe ma te tā'iku atu i tō rātou ingoa, ē e arataki mai aia i a rātou ki va'o. 4 Mē pou tāna 'ua'orāi māmoe i te 'aere mai ki va'o, ka nā mua aia i a rātou i te 'aere ē ka āru mai te māmoe i aia, nō te mea, kua kite 'oki rātou i tōna reo. 5 Kāre rā rātou i āru i tēta'i tangata kē, ka 'oro kē rā rātou, nō te mea, kāre rātou i kite i te reo o te au tangata kē.” 6 Ko tēia te parabole tā Iēsū i taki ki a rātou, kāre rā rātou i mārama i tāna i tuatua ki a rātou.
Ko Iēsū te tiaki māmoe meitaki
7 Kua tuatua 'aka'ou atura a Iēsū ki a rātou, “Koia mou tāku e karanga atu ki a kōtou na, ko au te ngūtupa nō te au māmoe. 8 Ko rātou rava rāi tei 'aere mai nā mua ake i āku, 'e aronga keiā rātou ē te noni, ē kāre 'oki te māmoe i 'akarongo atu i a rātou. 9 Ko au te ngūtupa. Ko tēta'i 'ua atu te ka nā kō nei mai i āku nei i te tomo, 'e rāvenga ora tōna. Ka 'aere 'ua aia ki roto ē ki va'o, ē ka kitea 'oki te ngā'i i tupu ei te kai. 10 I 'aere 'ua mai te tangata keiā nō te keiā, te tā ē te 'akapou; i 'aere mai nei rā au kia rauka i a rātou te ora, ē kia meitaki rava atu tō rātou ora. 11 “Ko au te tiaki māmoe meitaki ra. Ka 'ōronga te tiaki māmoe meitaki i tōna 'ua'orāi ora nō te au māmoe. 12 Ko te tangata tūtaki'ia rā, kia kite aia i te luko i te 'aere'anga mai, 'akaruke maira i te māmoe, 'oro kē atura, nō te mea, kāre aia i te tiaki māmoe, ē kāre katoa 'oki ē nāna 'ua'orāi te māmoe. Ē kua noni i'ora te luko ē kua 'akapue'urikiriki atura i a rātou. 13 I 'oro kē ei aia, nō te mea, 'e tangata tūtaki 'ua'ia aia ē kāre i ma'ara 'ua atu i te māmoe. 14 Ko au te tiaki māmoe meitaki ra; kua kite au i tāku 'ua'orāi, ē ko tāku 'ua'orāi kua kite katoa mai rātou i āku, 15 mei te Metua i kite mai i āku nei ē ko au i kite katoa i te Metua ra, ē e 'ōronga 'oki au i tōku ora nō te māmoe. 16 'E māmoe kē atu rāi tāku kāre nō tēianei koro, e arataki katoa atu au i a rātou e tikāi, ē ka 'akarongo mai rātou i tōku reo, kia 'okota'i 'oki 'ānana, 'okota'i 'oki tiaki. 17 “Ko te tumu 'oki tēia i 'akaperepere mai ei tōku Metua i āku, nō te mea, ko au tei 'ōronga i tōku ora kia rauka 'aka'ou i āku te reira. 18 Kāre rava tēta'i e riro i te 'apai kē i te reira mei āku atu nei; nāku 'ua'orāi rā e 'ōronga 'ua atu. 'E mana tōku kia 'ōronga atu i tōku ora, ē 'e mana katoa 'oki tōku kia rave 'aka'ou mai. Ko tēia te 'akaue'anga tāku i 'āriki mai mei kō mai i taku Metua ra.” 19 'E mavete'anga i'ora tei tupu 'aka'ou i rotopū i te Ngāti Iūda i taua tuatua ra. 20 'E mānganui o rātou i tuatua ra ē, “Kua nēneva aia, ē 'e dēmoni tōna. 'E a'a kōtou i 'akarongo atu ei i aia?” 21 Kua nā kō rā tēta'i pae, “Kāre tēianei tuatua i tā te tangata uru'ia e te dēmoni. Ka tika āinei i tēta'i dēmoni i te 'akapu'era i te mata o te aronga matapō?”
Te kōpae'anga'ia a Iēsū
22 I reira i Iērūsalēma, te 'Ōro'a 'Akatapu 'Aka'ōu'anga i te 'iero, 'e tuātau anu 'oki. 23 Ē tē 'ā'āere 'ua ra a Iēsū i roto i te Poretito o Sōlomona i roto i te 'iero ra. 24 Kua 'akapini akera te Ngāti Iūda i aia ē kua tuatua maira ki aia, “Mei te a'a rā te roa o tō mātou nei 'ēkōkō'anga? Mei te mea ē ko koe te Mesia, e 'akakite pū tikāi mai ki a mātou.” 25 Kua pa'u atura a Iēsū ki a rātou, “Kua 'akakite atu ana 'oki au ki a kōtou, kāre rā kōtou i 'āriki mai. Ko te au 'anga'anga tāku i rave i te ingoa o taku Metua, ko rātou tē 'akakite mai i āku nei; 26 inārā, kāre kōtou i 'āriki mai, nō te mea, kāre 'oki kōtou i te māmoe nāku. 27 Ko tāku au māmoe, ka 'akarongo mai rātou i tōku reo, ē kua kite 'oki au i a rātou, ē ka āru mai 'oki rātou i āku, 28 ē nāku e 'ōronga atu ki a rātou i te ora mutukore. Kāre 'oki rātou e mate e tuātau 'ua atu, ē kāre rava tēta'i 'ua atu tangata e 'apai kē atu i a rātou mei roto mai i tōku rima. 29 Ko taku Metua, ko tei 'ōronga mai i a rātou ki āku nei, 'e ma'ata atu aia i te au mea rava rāi, ē kāre 'oki e rauka i tēta'i tangata i te 'apai kē atu i a rātou mei roto mai i te rima o taku Metua ra. 30 Ko au ē te Metua, 'e 'okota'i 'oki māua.” 31 Kua rave 'aka'ou i'ora te Ngāti Iūda i te toka e pē'i i aia. 32 Kua karanga atura a Iēsū ki a rātou, “'E mānganui 'oki te au 'anga'anga meitaki tāku i 'akaāri ki a kōtou mei kō mai i te Metua ra. Nō tē'ea i a rātou ka pē'i mai ei kōtou i āku ki te toka?” 33 Kua pa'u maira te Ngāti Iūda ki aia, nā kō maira, “Kāre ē nō tēta'i 'anga'anga meitaki ka pē'i atu ei mātou i a koe ki te toka, nō te 'akakino Atua rā, nō te mea, 'e tangata 'ua rāi koe, ē kua 'akariro koe i a koe 'ua'orāi 'ei Atua.” 34 Kua karanga atura a Iēsū ki a rātou, “Kāre āinei kua tātā'ia i roto i tā kōtou Ture ra ē, ‘I tuatua ana au ē, 'e au atua kōtou’? 35 Mei te mea ē, kua karanga te Atua ē, 'e au atua rātou, ko te aronga tei tuatua atu'ia e te tuatua a te Atua ra, ē kāre 'oki e rauka i te 'akaruke i tei tātā'ia ra, 36 nō te a'a kōtou i 'akakite mai ei ē, kua 'akakino Atua aia tā te Metua i 'akatapu ē i tono mai ki roto i tēianei ao, nō te mea, ko au i karanga ē, ‘Ko au te Tamaiti a te Atua’? 37 Mei te mea ē, kāre au e rave nei i te 'anga'anga a taku Metua ra, auraka e 'irinaki mai i āku. 38 Mē tē rave nei rā au i te reira, ē kāre kōtou e 'irinaki mai i āku, e 'irinaki rā i te au 'anga'anga kia mārama kōtou ē kia kite kōtou ē, tei roto te Metua i āku ē tei roto au i te Metua.” 39 Kua 'inangaro 'aka'ou atura rātou i te 'opu i aia; inārā, kua ngaro kē atura aia i tō rātou rima. 40 'Aere 'aka'ou atura a Iēsū ki tērā pae o Iōrīdāna ki te ngā'i tei reira a Ioane i bāpetīto ana i mua ana, no'o atura ki reira. 41 Ē, 'e mānganui te tangata tei 'aere mai ki aia ra. Ē kua tuatua atura rātou, “Kāre rava 'oki a Ioane i rave i te 'akairo; kāreka te au tuatua katoa tā Ioane i tuatua nō runga i tēianei tangata, 'e tuatua mou anake ia.” 42 Ē 'e mānganui 'oki i te reira ngā'i tei 'irinaki i aia.
Te matenga o Lāzaro
1 Kua maki tēta'i tangata, ko Lāzaro nō Bētānia, te 'ōire o Māria ē tōna tuakana ko Māreta ra. 2 Ko Māria tei 'akamā'inu ana i te 'Atu ki te manongi ē tei tāmarō ana i tōna vaevae ki tōna rauru; ē ko tōna tungāne ko Lāzaro i maki ra. 3 Kua tono atura ngā tua'ine i te karere ki a Iēsū, 'ei 'akakite atu ki aia ē, “E te 'Atu, inā, kua maki te tangata tā'au i 'akaperepere mai.” 4 I te 'akarongo'anga a Iēsū i te reira, kua nā kō akera, “Ko tērā maki, kāre tōna 'openga i te mate, ko te kakā rā o te Atua kia 'akakakā'ia te Tamaiti a te Atua nā roto i te reira.” 5 Kua 'akaperepere 'oki a Iēsū i a Māreta ē tōna teina, ē i a Lāzaro 'oki. 6 Kia 'akarongo mai a Iēsū ē, kua maki a Lāzaro, kua no'o 'aka'ou atura aia i te ngā'i tei reira aia e rua rāi rā. 7 Ē muri akera, kua karanga atura aia ki te au pipi, “Ka 'aere tātou ki Iūdea.” 8 Kua tuatua maira te au pipi ki aia, “E Rabi, i 'akakoro ake nei te Ngāti Iūda i te pē'i i a koe ki te toka, ē tē 'oki 'aka'ou nei koe ki reira?” 9 Kua pa'u atura a Iēsū, “Kāre āinei e ta'i nga'uru mā rua ora i te ao? Kia 'ā'āere te tangata i te ao ra, kāre aia e tūrori; kua kite 'oki aia i te mārama nō tēianei ao. 10 Kia 'ā'āere rā te tangata i te pō, ka tūrori aia; kāre 'oki te mārama i roto i aia.” 11 I muri ake i tāna tuatua'anga i te reira, kua 'akakite atura aia ki a rātou, “Ko Lāzaro tō tātou 'oa, kua moe aia; inārā, ka 'aere au e 'akaara i aia.” 12 Kua tuatua maira te au pipi ki aia, “E te 'Atu, mē tē moe nei aia, ka ora aia.” 13 I tuatua ra 'oki a Iēsū nō tō Lāzaro mate'anga, kua manako rā rātou ē, tē tuatua ra aia nō te 'akangāro'i'anga o te moe. 14 I reira, kua 'akakite pū tikāi a Iēsū ki a rātou, “Kua mate tikāi a Lāzaro. 15 Ē nō kōtou 'oki tē rekareka nei au ē kāre au i reira, kia 'irinaki 'oki kōtou. Ē tēianei, ka taki'aere tātou ki aia.” 16 Kua tuatua akera a Toma, ko tei tapa'ia ē ko Dīdimo ra, ki tōna au taeake pipi ra, “E taki'aere tātou kia mate tātou ma ia katoa.”
Ko Iēsū te tū'aka'ou'anga ē te ora
17 I tōna tae'anga atu ki Bētānia, kua kite akera a Iēsū ē, e 'ā roa rā a Lāzaro i roto i te mēnema. 18 'E vaitata 'ua 'oki a Bētānia ki Iērūsalēma, mei te rua maire te mamao. 19 'E mānganui te Ngāti Iūda i 'aere mai ki a Māreta rāua ko Māria kia 'akapūma'ana atu rātou i a rāua i tō rāua tungāne ra. 20 Rongo akera a Māreta ē, tē 'aere mai nei a Iēsū, 'aere atura aia e 'ārāvei atu i aia. Ko Māria rā, kua no'o 'ua mai aia ki roto i te 'are. 21 Kua karanga atura a Māreta ki a Iēsū, “E te 'Atu, nāringa koe i konei, kāre e mate tōku tungāne. 22 Inārā, tē kite nei rāi au i tēianei ē, ko tā'au e pati atu ki te Atua ra, nā te Atua ia e 'ō mai nā'au.” 23 Kua tuatua maira a Iēsū ki aia, “Ka tū'aka'ou mai tō tungāne.” 24 Kua karanga atura a Māreta ki aia, “Kua kite au ē, ka tū'aka'ou mai aia i te tū'aka'ou'anga i te rā 'openga ra.” 25 Kua tuatua maira a Iēsū ki aia, “Ko au te tū'aka'ou'anga ē te ora; ko te tangata e 'irinaki mai i āku nei, noa atu ē tē mate nei aia, ka ora rāi aia. 26 Ē te tangata rava rāi e ora nei ē tē 'irinaki mai nei i āku nei, kāre ia e mate e tuātau 'ua atu. Kua 'āriki āinei koe i te reira?” 27 Kua pa'u atura aia, “Āe, e te 'Atu, tē 'irinaki nei au ē ko koe te Mesia, te Tamaiti a te Atua, te ka 'aere mai ki te ao nei.”
Te auē nei a Iēsū
28 E oti akera tā Māreta tuatua'anga i te reira, kua 'aere atura aia e kāpiki i'ora i tōna teina, ko Māria, i te nā kō'anga atu ki aia anake 'ua ē, “Tērā ake te Pū'āpi'i, ē tē kāpiki mai nei aia i a koe.” 29 Kia 'akarongo aia, kua tū viviki akera aia ki runga, ē 'aere atura ki a Iēsū. 30 Kāre a Iēsū i tae mai ake ki roto i te 'ōire, tei te ngā'i rāi aia i 'ārāvei atu ei a Māreta i aia ra. 31 Ko te Ngāti Iūda tei no'o katoa i roto i te 'are i te 'akapūma'ana i aia, kia kite rātou ē kua tū viviki a Māria ki runga, ē kua 'aere atura ki va'o, kua āru atura rātou i aia ma te manako ē, tē 'aere nei aia ki te mēnema e auē ei ki reira. 32 Ē kia tae atu a Māria ki te ngā'i tei reira a Iēsū ra ē kite atura i aia, kua tīpapa i'ora ki tōna pae vaevae, nā kō atura ki aia, “E te 'Atu, nāringa koe i konei, kāre e mate tōku tungāne.” 33 Kia kite rā a Iēsū i aia i te auē'anga, ē te Ngāti Iūda i 'aere katoa maira i te auē'anga, kua taitaiā atura ā roto i tōna ngākau, ē kua ngunguru i'ora aia, 34 ē kua ui atura, “Tei 'ea aia i te vai'o'anga'ia e kōtou?” Kua pa'u maira rātou, “E te 'Atu, e 'aere mai e 'ākara.” 35 Auē i'ora a Iēsū. 36 Kua tuatua i'ora te Ngāti Iūda, “Inā, te tū o tōna 'akaperepere i a Lāzaro.” 37 Kua nā kō akera rā tēta'i pae o rātou, “Ko te tangata nāna i 'akapu'era i te mata o te tangata matapō ra, kāre āinei āna rāvenga kia kore tēia tangata nei e mate?”
Te 'akatū nei a Iēsū i a Lāzaro
38 Kua ngunguru 'aka'ou i'ora a Iēsū i roto i aia, e tae atura ki te mēnema. 'E ana te reira ē kua tukuna'ia tēta'i toka ki mua a'o. 39 Kua karanga atura a Iēsū, “E 'akaātea i te toka!” Kua tuatua maira a Māreta, te tua'ine a taua tangata mate ra, “E te 'Atu, kua 'aunga i tēnā na, nō te mea, ko te rā 'ā 'oki tēia.” 40 Kua karanga atura a Iēsū ki aia, “Kāre āinei au i 'akakite atu ki a koe ē, kia 'irinaki koe, ka kite koe i te kakā o te Atua?” 41 Kua 'akaātea atura rātou i te toka. Kua nānā akera a Iēsū i tōna mata ki runga, ē nā kō atura, “E taku Metua, tē 'akameitaki atu nei au i a koe, ko koe i 'akarongo mai i āku nei. 42 Ko au, kua kite au ē, tē 'akarongo 'ua mai nei rāi koe i āku. Kua tuatua rā au i tēia tuatua nō te urupū tangata tei tōpiri mai ki āku, kia 'irinaki rātou ē, nā'au au i tono mai.” 43 E oti akera taua tuatua nāna ra, kua kāpiki atura aia ma te reo ma'ata ē, “E Lāzaro, 'aere mai ki va'o!” 44 Kua 'aere maira taua tangata i mate ra ki va'o; kua tākaikai'ia ōna vaevae ē ōna rima, ē kua va'ī'ia 'oki te mata ki tēta'i kāka'u. Kua karanga atura a Iēsū ki a rātou, “Ka tatara mai i aia, ē e tuku atu i aia kia 'aere ana.”
Te kotikoti'anga kupenga i te tā i a Iēsū
45 Ē nō reira, 'e mānganui te Ngāti Iūda tei 'aere mai ana ki a Māria ē i 'ākara i tā Iēsū i rave ra, kua 'irinaki atura rātou i aia. 46 Ko tēta'i pae rā o rātou i 'aere atu ia ki te au Phārīsea, ē kua 'akakite atura ki a rātou i tā Iēsū i rave ra. 47 Kua 'akaputuputu maira te kau ta'unga nunui ra ē te au Phārīsea i te Sūnēderi, ē kua ui atura, “Tē a'a 'ua nei tātou? 'E mānganui 'oki te au 'akairo tā tērā tangata e rave nei. 48 Mē ka 'akatika 'ua tātou kia pērā aia, ka 'irinaki te kātoatoa i aia, ē ka 'aere mai tō Rōma ē ka rave atu i tō tātou nei ngā'i ē tō tātou nei 'iti tangata katoa.” 49 Kua tuatua atura ki a rātou tēta'i o rātou, ko Kaiāpha, ko te Ta'unga Ma'ata 'oki ia i te reira mata'iti, “Ko kōtou, kua kitekore kōtou. 50 Kāre kōtou e ma'ara ē, 'e ngari ake i a kōtou kia mate 'e 'okota'i 'ua tangata nō te 'iti tangata, ē kia kore e ngaro tō te 'enua katoa.” 51 Kāre aia i 'akapērā ē nō roto mai i aia 'ua'orāi, i 'akapērā rā aia, nō te mea, ko ia te Ta'unga Ma'ata o taua mata'iti ra, ē kua toto'u atura ē, ka mate a Iēsū nō tōna 'iti tangata, 52 ē kāre nō tōna 'iti tangata anake 'ua ra, kia 'akaputuputu katoa mai rā aia ki te ngā'i 'okota'i i te tamariki a te Atua i pue'urikiriki ra. 53 Ē mei taua rā mai rāi i kotikoti kupenga ai rātou e tā i aia. 54 Kāre rāi a Iēsū i 'ā'āere 'akakite pū 'ua ki ō te Ngāti Iūda ra, kua 'aere atura aia mei te reira ngā'i ki tēta'i tu'anga 'enua ra i vaitata ki te mēdēbara ra, ki tēta'i 'ōire ko Ēpheraima te ingoa, ē kua no'o atura aia ki reira ma tāna au pipi. 55 Kua vaitata te Pāsa a te Ngāti Iūda ra, ē 'e mānganui 'oki tō taua tu'anga 'enua ra i 'aere atu ki Iērūsalēma i mua ake i te Pāsa ra kia tāmā i a rātou. 56 Kua uiui i'ora rātou i a Iēsū, ē kua nā kō akera rātou rātou 'ua'orāi i a rātou e tū 'ua i roto i te 'iero ra, “'E a'a tō kōtou manako? Kāre aia e 'aere mai ki tēianei 'ōro'a?” 57 Kua 'akaue 'oki te kau ta'unga nunui ra ē te au Phārīsea ē, mē kite tēta'i tangata ē tei 'ea aia, kia 'akakite mai aia i te reira, kia 'opu mai 'oki rātou i aia.
Tō Iēsū 'akamā'inu'anga'ia i Bētānia
1 E ono rā i mua ake i te Pāsa, kua 'aere maira a Iēsū ki Bētānia, te ngā'i i no'o'ia e Lāzaro, te tangata tā Iēsū i 'akatū ana mei te mate maira. 2 Kua 'ākonokono i'ora rātou i tēta'i kaingākai nā Iēsū i reira; ko Māreta tei raverave; ē ko Lāzaro katoa tēta'i i taua kaingākai ra. 3 Kua rave akera a Māria i te 'āpa litera manongi nārito, 'e mea 'oko ma'ata, kua 'akamā'inu i'ora i te vaevae o Iēsū, ē tāmarō atura i te vaevae o Iēsū ki tōna 'ua'orāi rauru. Kī akera te 'are i te kakara o taua manongi ra. 4 Kua nā kō akera tēta'i pipi nāna ra, ko Iūda Ikariota, ko te ka tuku pikika'a i aia ra, 5 “'E a'a tēianei manongi i kore ei e 'oko'ia kia rauka mai e toru 'ānere moni 'ārio, ē ka 'apai atu ei i te reira nā te aronga puta'ua?” 6 Kua tuatua aia i te reira, kāre ē nō tōna ma'ara i te aronga puta'ua, nō te mea rā ē 'e keikeiā aia. Kua mou 'oki aia i te pūtē moni, ē kua rave kē 'ua ana 'oki i tei tuku'ia ki roto ra. 7 Kua nā kō atura a Iēsū, “'Eia'a e tāmanamanatā atu i aia; kua mou mārie 'oki aia i te reira nō te rā o tōku nei tanumanga. 8 Ka no'o 'ua mai rāi 'oki te aronga puta'ua ki ō kōtou nei; ko au rā, kāre au e no'o 'ua mai ki ō kōtou nei.”
Te kotikoti'anga kupenga i te tāmate i a Lāzaro
9 E kite akera tēta'i urupū ma'ata o te Ngāti Iūda ra ē, tei Bētānia a Iēsū, kua 'aere maira rātou, kāre ē nō Iēsū anake 'ua, kia 'ākara katoa rā rātou i a Lāzaro tā Iēsū i 'akatū mei te mate maira. 10 Nō reira, kua kotikoti kupenga te kau ta'unga nunui kia tāmate katoa i a Lāzaro, 11 nō te mea, nōna 'oki 'e mānganui te Ngāti Iūda i 'akaruke mai i a rātou ē i 'irinaki ei i a Iēsū.
Tō Iēsū tomo'anga pāpānunui ki roto i a Iērūsalēma
12 E ao akera, kua 'akarongo te urupū ma'ata tei 'aere mai ki te 'ōro'a ra ē, tē 'aere mai nei a Iēsū ki Iērūsalēma, 13 ē kua rave akera rātou i te kīkau nū tāmara, 'aere atura e 'ārāvei atu i aia, ē kua kāpiki nui atura, “Hōsāna! Kia 'akameitaki'ia aia ko tē 'aere mai nei ma te ingoa o te 'Atu, ko te Ariki nō Īserā'ela!” 14 E kite akera a Iēsū i tēta'i punua 'āsini, no'o i'ora ki runga a'o, mei tei tātā'ia ra ē, 15 “Auraka e mataku, e te tamā'ine a Siona, inā, tē 'aere mai nei tō ariki, tē no'o ra ki runga i te punua 'āsini.” 16 Kāre 'oki tāna au pipi i nakiro vave ana i taua tuatua ra; inārā, kia 'akakakā'ia atura a Iēsū, kua ma'ara akera i a rātou ē, kua tātā'ia tēianei tuatua nōna ē kua 'akapērā 'oki rātou i aia. 17 Kua 'akakitekite 'aere ana te au tangata tei no'o vaitata ana ki a Iēsū i tōna kāpiki'anga i a Lāzaro kia 'aere mai ki va'o i te mēnema ra i tōna 'akatū'anga i aia mei te mate maira. 18 Ko tēia te tumu i 'ārāvei atu ei te urupū ma'ata i aia, koia 'oki, kua 'akarongo rātou i aua 'akairo ra tāna i rave. 19 Kua tuatua i'ora te au Phārīsea ra rātou rātou 'ua'orāi, “Tē kite nei tātou ē, kāre tākiri tātou e tere ana ki mua; inā, kua āru atu tō te ao katoa nei i aia.”
Ēta'i tangata Eleni tei kimi i a Iēsū
20 Ko ēta'i o te aronga i 'aere mai e 'akamori ki taua 'ōro'a ra, 'e Eleni rātou. 21 Kua 'aere maira rātou ki a Philipa, nō Betesaida i Galilea 'oki aia, ē kua nā kō maira ki aia, “E tama, tē 'inangaro nei mātou i te 'ārāvei i a Iēsū.” 22 'Aere atura a Philipa e 'akakite atura ki a Ānēderea; 'aere atura a Ānēderea rāua ko Philipa e 'akakite atu ki a Iēsū. 23 Kua karanga atura a Iēsū, nā kō atura, “Kua tae ki te tuātau e 'akakakā'ia ai te Tamaiti a te Tangata nei. 24 Koia mou tāku e karanga atu ki a kōtou na, kia kore e topa tēta'i 'ua sītona ki roto i te one e mate atura, ka vai ta'i 'ua ia; kia mate rā, 'e mānganui te 'ua te ka rauka mai. 25 Ko tei 'inangaro i tōna ora, ka ngere ia i te reira, ē ko tei mākitakita ra i tōna ora i roto i tēianei ao, ka tāpū mārie aia i te reira nō te ora mutukore. 26 Mē tē tāvini nei tēta'i i āku nei, kia āru katoa mai aia i āku e tikāi. Ē te ngā'i tāku e no'o ra, 'ei reira katoa ia taku tāvini. Mē tē tāvini nei tēta'i tangata i āku nei, nā te Metua aia e 'akangāteitei mai.”
Tē tuatua nei a Iēsū nō tōna matenga
27 “I tēianei tē taitaiā nei tōku vaerua. 'E a'a rā tāku ka tuatua? ‘E taku Metua, ka 'akaora mai i āku mei roto mai i tēianei ora?’ Kāre, nō te mea, ko tēia tikāi 'oki te tumu i tae mai ei au ki tēianei ora. 28 E taku Metua, e 'akakakā i tō'ou ingoa.” I reira, 'e reo tei tae mai mei te rangi mai, “Kua 'akakakā ana au, ē ka 'akakakā 'aka'ou rāi au i te reira!” 29 Ko te tangata i te tū 'ua'anga i vaitata ē te 'akarongo'anga, kua nā kō akera ē, “Kua māngūngū.” Kua nā kō akera rā tēta'i pae, “'E 'āngela tei tuatua mai ki aia.” 30 Kua karanga atura a Iēsū, nā kō atura, “Kāre ē nōku i tae mai ei tēianei reo, nō kōtou rā. 31 I tēianei rāi te 'akavā'anga o tēianei ao; ē i tēianei rāi 'oki e 'uri'ia atu ei ki va'o te ariki o tēianei ao. 32 Kāreka au nei, mē 'akateitei'ia au ki runga mei konei atu i te 'enua nei, ka tō'ia mai e au te tangata kātoatoa ki āku nei.” 33 I tuatua ai aia i tēianei au tuatua 'ei 'akaāri i te tū o te matenga ka mate ei aia. 34 Kua tuatua maira te au tangata ki aia, “Kua 'akarongo mātou nā roto mai i te Ture ra ē, ka no'o 'ua mai rāi te Mesia e tuātau 'ua atu. 'E a'a koe i tuatua mai ei ē, kia 'akateitei'ia te Tamaiti a te Tangata ki runga e tikāi? Ko 'ai 'oki tēianei Tamaiti a te Tangata?” 35 Kua pa'u atura a Iēsū ki a rātou, “Tei rotopū i a kōtou nei te mārama e roa iti 'ua ake. Ka 'ā'āere, koi vai ake te mārama ki a kōtou na, ko te roko'ia ā'ea kōtou e te pōiri. Ko tei 'ā'āere 'ua 'oki nā roto i te pōiri ra, kāre aia e kite i tōna 'aerenga. 36 Koi vai ake te mārama ki a kōtou na, e 'irinaki i taua mārama ra kia riro 'oki kōtou 'ei au tamariki nō te mārama.”
Te tū 'irinakikore o te tangata
E oti akera tā Iēsū tuatua'anga i te reira, 'akaruke maira aia i te Ngāti Iūda e no'o pōiri atura. 37 Noa atu 'oki ē, 'e mānganui tāna 'akairo i rave ki mua i tō rātou aroaro, kāre rāi rātou i 'irinaki atu i aia; 38 kia tupu 'oki tei tuatua'ia e Īsaia peroveta, i te nā kō'anga mai ē, “E te 'Atu, ko 'ai tei 'irinaki i tā mātou nei tuatua? Ē ko 'ai tei 'akaāri'ia ana te mana o te 'Atu?” 39 Nō tēia tumu 'oki i kore ei i rauka i a rātou i te 'irinaki, kua tuatua 'aka'ou ana 'oki a Īsaia ē, 40 “Kua 'akapōiri ana 'oki te Atua i tō rātou mata, ē kua 'akamārōki'aki'a 'oki i tō rātou ngākau, ko te 'ākara ā'ea 'oki tō rātou mata, ē ko te nakiro ā'ea 'oki rātou, ē ko te 'āriu mai ā'ea 'oki rātou ki āku, ē ka 'akaora atu au i a rātou.” 41 I pērā mai 'oki a Īsaia i te tuatua'anga, nō te mea, kua 'ākara aia i te kakā o te 'Atu ē kua tuatua mai i te reira. 42 'E mānganui rāi 'oki te au tūtara tei 'irinaki i a Iēsū, inārā, kāre rātou i 'a'aki 'ua nō te au Phārīsea 'oki, ko te tukuna'ia ā'ea rātou ki va'o i te sūnago ra. 43 Kua ma'ata atu 'oki tō rātou 'inangaro i te kakā nō kō mai i te tangata i te kakā nō kō mai i te Atua.
Tē 'akavā nei tā Iēsū au tuatua
44 Kua 'akateitei atura a Iēsū i tōna reo, nā kō atura, “Ko tei 'irinaki mai i āku nei, kāre ē ko au tāna e 'irinaki nei, ko ia rā tei tono mai i āku nei. 45 Ko tei 'ākara mai i āku nei, kua 'ākara aia i aia tei tono mai i āku nei. 46 Ko au te mārama tei 'aere mai ki te ao nei, kia kore tēta'i 'ua atu tangata tei 'irinaki mai i āku nei e no'o 'ua ki roto i te pōiri. 47 Ko tēta'i 'ua atu tei 'akarongo mai i tāku nei au tuatua ē kāre i 'ākono i te reira, kāre au e 'akavā i aia, nō te mea, kāre 'oki au i 'aere mai e 'akavā i tō te ao, e 'akaora rā i tō te ao. 48 Ko tei kōpae mai i āku nei ē kāre i 'āriki mai i tāku nei au tuatua, 'e 'akavā rāi tōna. Nā te tuatua 'oki tāku i 'akakite atu e 'akavā i aia kia tae ki te rā 'openga ra. 49 Ko au, kāre au e tuatua nei i tāku 'ua'orāi. Nā te Metua rā tei tono mai i āku nei, nāna i 'ōronga mai ki āku nei i te au 'akaue'anga tāku ka tuatua ē tāku ka 'akakite. 50 Ē kua nakiro au ē, ko tāna 'akaue'anga 'e ora mutukore ia. Ko tāku e tuatua nei, tē tuatua nei au mei tā taku Metua i tuatua mai ki āku nei.”
Tē 'ōrei nei a Iēsū i te vaevae o tāna au pipi
1 'Ōu te 'Ōro'a Pāsa ra, kua nakiro a Iēsū ē, kua tae mai tōna tuātau kia 'aere atu aia mei tēianei ao ki te Metua ra. Kua aro'a atu aia i tōna tangata i te ao nei, ē kua 'aere 'ua atura tōna aro'a i a rātou e tae 'ua atu ki te 'openga ra. 2 Tē kaikai ra rātou, ē i 'akatupu takere ana a Sātani i te manako ki roto i a Iūda Ikariota a Simona kia tuku pikika'a i a Iēsū. 3 Kua nakiro a Iēsū ē, kua tuku mai te Metua i te au mea rava rāi ki roto i tōna rima, ē kua 'aere mai aia nō kō mai i te Atua ē tē 'oki atu nei rāi aia ki te Atua. 4 Kua tū akera a Iēsū ki runga mei taua kaingākai ra, ē kiriti akera i tōna kāka'u pū; kua rave i'ora aia i tēta'i kāka'u 'ōrei e tātua atura i aia. 5 I reira, kua riringi atu aia i te vai ki roto i tēta'i punupā ē e 'akamata atura i te 'ōrei i te vaevae o te au pipi, ē i tāmarō i te reira ki te kāka'u 'ōrei i tātua'ia e ia ra. 6 E tae atura aia ki a Pētero ra, kua ui maira a Pētero ki aia, “E te 'Atu, ko koe āinei te ka 'ōrei mai i taku vaevae?” 7 Kua pa'u atura a Iēsū ki aia, nā kō atura, “I tēnā na, kāre koe i mārama i tāku e rave nei, ka mārama rā koe ā muri atu.” 8 Kua tuatua maira a Pētero ki aia, “Auraka rava koe e 'ōrei i taku vaevae e tuātau 'ua atu.” Kua karanga atura a Iēsū ki aia, “Kia kore au e 'ōrei i a koe na, kāre rava ā'au tu'anga i āku nei.” 9 Kua tuatua akera a Simona Pētero ki aia, “E te 'Atu, 'eia'a ko taku vaevae anake 'ua, ko tōku rima katoa rā, ē ko tōku ūpoko katoa 'oki.” 10 Kua karanga atura a Iēsū ki aia, “Ko tei pā'ī ra, kāre 'e tumu kia 'ōrei aia, māri rā i tōna vaevae anake 'ua ra. Kua mā 'oki tōna kōpapa katoa. Ē kua mā rāi 'oki kōtou kātoatoa, kāre rā tēta'i o kōtou.” 11 Kua nakiro 'oki aia ē, ko 'ai te ka tuku pikika'a atu i aia ra. Nō reira i karanga atu ei aia ē, kāre kōtou i 'ope i te mā. 12 Kia oti akera aia i te 'ōrei i tō rātou vaevae, kua kāka'u 'aka'ou i'ora i tōna kāka'u, e no'o 'aka'ou atura ki raro i te kaingākai ra. Kua ui atura aia ki a rātou, “Tē mārama āinei kōtou i tāku i rave ki a kōtou na? 13 Tē karanga nei kōtou ē, ko au te Pū'āpi'i ē te 'Atu. Kua tika rāi tā kōtou tuatua, nō te mea, ko au nei 'oki ia. 14 Ē tēianei, mei āku nei, tō kōtou 'Atu ē te Pū'āpi'i, i 'ōrei ana i tō kōtou vaevae, kia 'ōrei katoa kōtou i te vaevae o tēta'i ē tēta'i e tikāi. 15 Nō te mea, kua tuku atu ana 'oki au i tēta'i 'ākara'anga ki a kōtou na, kia rave rāi kōtou mei tāku i rave atu ki a kōtou na. 16 Koia mou tāku e karanga atu ki a kōtou na, kāre te tāvini i ma'ata atu i tōna pū, ē kāre katoa te karere i ma'ata atu i tei tono atu i aia ra. 17 Mē kite kōtou i tēianei au mea, 'e ao rāi tō kōtou kia 'ākono katoa kōtou i te reira. 18 “Kāre au e tuatua nei nō kōtou rava rāi; kua kite 'oki au i tāku i 'iki. Ka tupu rā te tuatua i tātā'ia ra ē, ‘Ko tei kai kāpipiti māua i te varāoa, kua 'akateitei aia i tōna po'o vaevae ki āku nei.’ 19 Tē 'akakite atu nei au i te reira i tēianei i mua ake ka tupu ei, mē tupu rā kia 'irinaki kōtou ē, KO AU RĀI IA E VAI NEI. 20 Koia mou tāku e karanga atu ki a kōtou na, ko tei 'āriki mai i tāku e tono atu, kua 'āriki katoa mai aia i āku; ē ko tei 'āriki mai i āku ra, kua 'āriki katoa mai aia i a i tei tono mai i āku nei.”
Tē toto'u nei a Iēsū i tōna tuku pikika'a'anga'ia
21 E oti akera a Iēsū i te tuatua i te reira, kua taitaiā atura tōna ngākau ē kua 'akakite atura aia, nā kō atura, “Koia mou tāku e karanga atu ki a kōtou na, ka riro tēta'i o kōtou na i te tuku pikika'a atu i āku nei.” 22 Kua 'ākara akera te au pipi, rātou rātou 'ua'orāi ma te uiui i roto i a rātou ē, “Ko 'ai tāna e tuatua mai nei?” 23 Ko tēta'i o te au pipi, ko ia tei 'akaperepere'ia e Iēsū ra, kua no'o vaitata roa ki a Iēsū i te kaingākai ra. 24 Kua tūngou maira a Simona Pētero ki aia kia ui atu ē, ko 'ai tāna i tuatua maira. 25 Kua neke vaitata atu taua pipi ra ki a Iēsū, ē kua ui atura, “E te 'Atu, ko 'ai ia?” 26 Kua pa'u maira a Iēsū, “Ko te tangata te ka 'ōronga'ia atu te potonga varāoa te ka tūto'u'ia e au ra.” Kua rave i'ora aia i te potonga varāoa, tūto'u i'ora, e 'ōronga atura ki a Iūda Ikariota a Simona ra. 27 Ē i muri ake i te rave'anga i te potonga varāoa, kua tomo maira a Sātani ki roto i aia. Kua karanga atura a Iēsū ki aia, “Ko tā'au ka rave, ka rave viviki!” 28 Kāre rava rā tēta'i i taua kaingākai ra i mārama ē, 'e a'a te tumu i tuatua atu ei a Iēsū i te reira ki aia. 29 Kua manako 'oki tēta'i pae ē, kua karanga atu a Iēsū ki aia ē, kia 'oko mai i tei umuumu'ia nō taua 'ōro'a ra, mē kāre, kia 'apai atu aia i tēta'i mea nā te aronga puta'ua, nō te mea, tei a Iūda 'oki te pūtē moni. 30 Kua kai i'ora a Iūda i te potonga varāoa, 'aere atura ki va'o i reira rāi. Kua pō 'oki.
Te 'akaue'anga 'ōu
31 Ē kia riro atu a Iūda ra, kua karanga atura a Iēsū, “Kua 'akakakā'ia te Tamaiti a te Tangata i tēianei, ē kua 'akakakā'ia te Atua i roto i aia. 32 Mē kua 'akakakā'ia te Atua i roto i te Tamaiti a te Tangata nei, ka 'akakakā katoa te Atua i te Tamaiti i roto i aia 'ua'orāi, ē ka 'akakakā atu i aia i tēianei rāi. 33 E aku au tamariki ē, 'e poto 'ua tōku no'o'anga ki ō kōtou nei. Ka kimi mai kōtou i āku, ē i tēianei, tē karanga katoa nei au ki a kōtou mei tāku i karanga atu ki te Ngāti Iūda ra ē, ‘Te ngā'i tāku e 'aere atu nei, kāre e rauka i a kōtou kia tae atu ki reira.’ 34 Tē tuku atu nei au i te 'akaue'anga 'ōu ki a kōtou: E aro'a atu kōtou tēta'i ki tēta'i. Mei āku 'oki i aro'a atu i a kōtou na, e aro'a katoa atu kōtou tēta'i ki tēta'i. 35 Ko te mea 'oki tēia e kite ei te tangata rava rāi ē, 'e pipi kōtou nāku, kia aro'a atu kōtou tēta'i ki tēta'i.”
Tē toto'u nei a Iēsū i tā Pētero 'u'una'anga i a Iēsū
36 Kua ui maira a Simona Pētero ki a Iēsū, “E te 'Atu, ka 'aere koe ki 'ea?” Kua pa'u atura a Iēsū, “Te ngā'i tāku e 'aere nei, kāre e rauka i a koe kia āru mai i tēianei, ka āru mai rā koe ā muri atu.” 37 Kua tuatua maira a Pētero ki aia, “E te 'Atu, 'e a'a e kore ei e rauka i āku kia āru atu i a koe i tēianei? Ka tuku atu au i tōku ora'anga nō'ou.” 38 Kua karanga atura a Iēsū ki aia, “Ka tuku āinei koe i tō'ou ora'anga nōku? Koia mou tāku e karanga atu ki a koe na, kāre te moa e kākaoa, ka tūtoru ō'ou 'u'una'anga i āku.”
Ko Iēsū te mataara ki te Metua
1 “Auraka e taitaiā tō kōtou ngākau. E 'irinaki ki te Atua, e 'irinaki katoa mai ki āku. 2 'E mānganui te ngā'i no'o'anga i roto i te 'are o taku Metua ra. Nāringa kāre i pērā, kua karanga atu āinei au ki a kōtou ē, ka 'aere au e 'akate'ate'amamao i tēta'i ngā'i nō kōtou? 3 Ē, mē 'aere atu au e 'akate'ate'amamao i tēta'i ngā'i nō kōtou, ka 'oki mai au e arataki i a kōtou ki āku ra, kia no'o katoa kōtou i te ngā'i e no'o'ia e au. 4 Ē tē kite nei kōtou i te mataara ki te ngā'i tāku e 'aere nei.” 5 Kua tuatua maira a Toma ki aia, “E te 'Atu, kāre mātou i kite i te ngā'i tā'au e 'aere nei; 'e a'a 'oki mātou e kite ei i te mataara?” 6 Kua karanga atura a Iēsū, “Ko au te mataara ē te tuatua mou ē te ora. Kāre 'ua 'e tangata e tae atu ki te Metua, māri rā nā roto mai i āku. 7 Nāringa kōtou i kite i āku ra, kua kite katoa kōtou i taku Metua; mei tēianei atu tē kite nei 'oki kōtou i aia, ē tē 'ākara nei kōtou i aia.” 8 Kua tuatua maira a Philipa ki aia, “E te 'Atu, e 'akaāri mai i te Metua ki a mātou; kua rava 'ua ia i a mātou.” 9 Kua pa'u atura a Iēsū ki aia, “E Philipa ē, 'e roa tikāi tōku no'o'anga ki ō kōtou nei, ē kāre ake rāi koe i kite mai i āku? Ko tei 'ākara mai i āku nei, kua 'ākara ia i te Metua. 'E a'a 'oki koe i tuatua mai ei ē, ‘E 'akaāri mai i te Metua ki a mātou’? 10 Kāre āinei koe i 'irinaki ē, tei roto au i te Metua ē tei roto te Metua i āku? Te au tuatua tāku e karanga atu ki a kōtou, kāre ia i tāku 'ua'orāi. Nā te Metua rā tei no'o i roto i āku nei, e rave nei i tāna au 'anga'anga. 11 Tei roto au i te Metua, ē tei roto katoa te Metua i āku nei. Ka 'irinaki mai i tēia tuatua'anga nāku, mē kāre rā, ka 'irinaki nō taua au 'anga'anga ra. 12 Koia mou tāku e karanga atu ki a kōtou na, ko tē 'irinaki mai i āku nei, ka rave katoa aia i te au 'anga'anga tāku e rave nei. 'E ma'ata 'ua atu rāi tāna e rave i tēia, nō te mea, ka 'aere atu au ki taku Metua ra. 13 Ko tā kōtou e pati ma tōku nei ingoa, nāku ia e rave, kia 'akakakā'ia te Metua i roto i te Tamaiti. 14 Mē ka pati mai kōtou ki āku i tēta'i mea ma tōku nei ingoa, nāku e rave i te reira.”
Te tuatua nō te Vaerua
15 “Mē tē 'inangaro mai nei kōtou i āku, ka 'ākono kōtou i tāku ra au 'akaue'anga. 16 Ē nāku e pati atu ki te Metua ra, ē nāna e 'ōronga mai i tēta'i tauturu kē ki a kōtou kia no'o ki ō kōtou nei e tuātau 'ua atu. 17 Ko te Vaerua o te tuatua mou ia. Kāre tō te ao nei e rauka i te 'āriki i aia, nō te mea, kāre tō te ao nei e 'ākara i aia, ē kāre 'oki e kite i aia. Ko kōtou rā, tē kite nei kōtou i aia, nō te mea, tē no'o nei aia ki ō kōtou nei, ē tei roto 'oki aia i a kōtou. 18 “Kāre au e vai'o matiroeroe 'ua i a kōtou. Ka 'aere mai au ki a kōtou. 19 Ē kia roa iti ake, kāre 'ua tō te ao nei e 'ākara 'aka'ou mai i āku; ko kōtou rā, ka 'ākara mai kōtou i āku, nō te mea, tē ora nei au ē ka ora katoa kōtou. 20 I taua rā ra ka nakiro kōtou ē, tei roto au i taku Metua, ē tei roto 'oki kōtou i āku ra, ē tei roto 'oki au i a kōtou. 21 “Ko te tangata tei aia tāku au 'akaue'anga ē tei 'ākono i te reira, ko ia tē 'inangaro maira i āku nei. Ē, ko tei 'inangaro mai i āku ra, ka 'akaperepere'ia mai aia e taku Metua, ē ka 'akaperepere katoa au i aia, ē ka 'akaāri atu au i āku 'ua'orāi ki aia.” 22 Kua tuatua maira a Iūda (kāre a Ikariota ra) ki aia, “E te 'Atu, 'e a'a te tumu ka 'akaāri mai ei koe i a koe 'ua'orāi ki a mātou nei, ē kāre ki tō te ao?” 23 Kua pa'u atura a Iēsū, nā kō atura ki aia, “Mē 'inangaro tēta'i tangata i āku ra, ka 'ākono aia i tāku tuatua. Ē ka 'akaperepere mai 'oki taku Metua i aia ra, ē ka tae atu māua ki aia ra, ē ka no'o ki ōna ra. 24 Ko tei kore i 'inangaro mai i āku nei, kāre ia i 'ākono i tāku tuatua. Ē te tuatua tā kōtou e 'akarongo mai nei, kāre ia nāku, nā te Metua rā tei tono mai i āku nei. 25 “I tuatua au i te reira ki a kōtou i tōku no'o'anga ki ō kōtou nei. 26 Nā te Tauturu, koia 'oki te Vaerua Tapu, tā te Metua e tono mai i tōku nei ingoa, nāna e 'āpi'i mai i a kōtou i te au mea rava rāi, ē e 'akama'ara i a kōtou i te au mea rava rāi tāku i karanga atu ki a kōtou na. 27 “'E 'au tāku e vai'o ki a kōtou nei; ko tāku nei 'au tāku e 'ōronga atu nō kōtou. Kāre au e 'ōronga atu nō kōtou mei tā tō te ao e 'ōronga atu. Auraka e taitaiā tō kōtou ngākau; auraka 'oki e mataku. 28 Kua 'akarongo mai kōtou i tāku i karanga atu ki a kōtou ē, ‘Tē 'aere atu nei au, ē ka 'oki mai au ki a kōtou nei.’ Nāringa kōtou ē kua 'inangaro mai i āku, kua rekareka i a kōtou i tōku 'aerenga ki te Metua; 'e ma'ata atu 'oki te Metua i āku. 29 Kua 'akakite atu au i te reira ki a kōtou i tēianei, i mua ake ka tupu ei, kia 'irinaki 'oki kōtou mē tupu ra. 30 Kāre au e tuatua ma'ata 'aka'ou ki a kōtou, nō te mea, tē 'aere mai nei te ariki o tēianei ao, ē kāre rā ōna mana i runga i āku nei; 31 inārā, kia kite tō te ao nei ē, tē 'inangaro nei au i te Metua ē tē rave nei au mei tā taku Metua i 'akaue mai ki āku nei. “Ka tū, ka 'aere tātou mei konei atu.”
Ko Iēsū te vine mou
1 “Ko au te vine mou, ē ko taku Metua te tanu kai. 2 Te au rārā 'uakore katoa i roto i āku nei, nāna ia e tīpū kē, ē te au rārā 'ua katoa nāna ia e tope kia mā, kia ma'ata 'ua atu te 'ua. 3 Kua tāmā takere'ia 'oki kōtou nō te tuatua tāku i 'akakite atu ana ki a kōtou. 4 Ko kōtou ka tōpiri mai ki āku nei, ē ko au, ka tōpiri atu au ki a kōtou. Mē kore te rārā e tōpiri ki te vine ra, kāre e rauka kia 'ua mai aia ra, pērā katoa kōtou mē kore kōtou e tōpiri mai ki āku nei. 5 “Ko au te vine, ko kōtou te au rārā. Ko tei tōpiri mai ki āku nei ē ko au ki aia, ko ia te ka 'ua ma'ata; mē takakē rā kōtou mei āku nei, kāre rava 'e mea e rauka i a kōtou i te rave. 6 Ko te tangata tei kore e tōpiri mai ki āku nei, mei te rārā 'akaātea'ia aia ra, ē marō atura; ē ka 'akaputuputu'ia 'oki, titiri'ia atura ki roto i te a'i, pou atura i te kā. 7 Mē tōpiri mai kōtou ki āku nei, ē tāku nei au tuatua i te vai mārie'anga ki roto i a kōtou na, e pati 'ua kōtou i tā kōtou e 'inangaro ra, ē ka 'ōronga'ia mai 'oki ki a kōtou. 8 E 'akakakā'ia 'oki taku Metua mē ma'ata tō kōtou 'ua'anga, nō te mea 'oki, 'e pipi kōtou nāku. 9 Mei taku Metua i 'akaperepere mai i āku nei, kua 'akaperepere katoa atu 'oki au i a kōtou na; kia vai mārie kōtou ma te 'akaperepere'ia atu e au. 10 Ka vai rāi kōtou ma te 'akaperepere'ia atu e au mē 'ākono kōtou i tāku au 'akaue'anga, mei āku 'oki i 'ākono i te au 'akaue'anga a taku Metua ra, ē kua vai rāi au ma te 'akaperepere'ia mai e ia. 11 “Kua tuatua 'oki au i tēianei au mea ki a kōtou na, kia vai rāi tōku mareka'anga i roto i a kōtou, ē kia kore e 'ope tō kōtou mareka'anga. 12 Tēia tāku 'akaue'anga: ka 'akaperepere kōtou tēta'i ki tēta'i, mei āku i 'akaperepere atu i a kōtou. 13 Ko tēia te 'akaperepere ma'ata rava atu: kia tuku tēta'i tangata i tōna ora'anga nō tōna au 'oa. 14 Ko kōtou tōku au 'oa mē 'ākono kōtou i tāku i 'akaue atu ki a kōtou na. 15 Kāre au e tā'iku 'aka'ou i a kōtou ē, 'e au tāvini, nō te mea, kāre te tāvini e kite ē, 'e a'a tā tōna pū e rave ra; inārā, kua tā'iku ana au i a kōtou ē 'e au 'oa, nō te mea, kua 'akakite atu au ki a kōtou i te au mea katoa tāku i 'akarongo mei kō mai i taku Metua ra. 16 Kāre 'oki ko kōtou tei 'iki mai i āku, ko au rā tei 'iki i a kōtou, ē tei 'akataka i a kōtou kia 'aere ē kia 'ua, ē kia tinamou rāi tā kōtou 'ua. 'Ei reira, tā kōtou e pati atu ki te Metua ra i roto i tōku ingoa, nāna ia e 'ōronga mai ki a kōtou. 17 Ko tēia tāku e 'akaue atu ki a kōtou: e 'akaperepere kōtou tēta'i ki tēta'i.
Te mākitakita'anga o tō te ao
18 “Mē mākitakita mai tō te ao i a kōtou, kia ma'ara i a kōtou ē, kua mākitakita mai ana rātou i āku i mua ake i a kōtou. 19 Nāringa kōtou nō tēianei ao, kua 'inangaro mai tō tēianei ao i tōna 'ua'orāi. Kāre 'oki kōtou nō tēianei ao, ē nāku i 'iki i a kōtou nō roto mai i te ao nei, ko te tumu ia i mākitakita mai ei tō te ao nei i a kōtou. 20 Ka 'akama'ara rā i te tuatua tāku i 'akakite atu ki a kōtou, ‘Kāre te tāvini i ma'ata atu i tōna pū.’ Mē kua tākinokino mai rātou i āku, ka tākinokino katoa rātou i a kōtou; mē kua 'ākono rātou i tāku tuatua, ka 'ākono katoa rātou i tā kōtou. 21 Ka pērā katoa mai rātou i a kōtou nō tōku nei ingoa, nō te mea, kāre rātou i kite i aia i tei tono mai i āku nei. 22 Nāringa kāre au i 'aere mai e tuatua atu ki a rātou, kāre ia ā rātou 'ara; i tēianei rā, kāre rātou e ti'amā i tā rātou au 'ara. 23 Ko tei mākitakita mai i āku nei, kua mākitakita katoa ia i taku Metua ra. 24 Nāringa kāre au i rave i te au 'anga'anga i rotopū i a rātou tei kore i rave'ia 'e tēta'i tangata kē, kāre ia ā rātou 'ara; i tēianei rā, kua 'ākara ana rātou, ē kua mākitakita mai rātou i āku ē taku Metua katoa 'oki. 25 Kua tupu i reira te tuatua i tātā'ia i roto i tā rātou Ture ra ē, ‘I mākitakita 'ua mai rātou i āku ma te tumukore.’ 26 “Kia tae mai rā te Tauturu, tāku ka tono mai ki a kōtou mei kō mai i te Metua ra, ko te Vaerua o te tuatua mou ra, nō kō mai 'oki aia i te Metua ra, nāna au e 'akakite mai. 27 Ē e riro kōtou katoa 'ei au kite nōku, nō te mea, tei tōku pae kōtou mei te 'akamata'anga mai rāi.
1 “Kua tuatua atu au i tēia au mea ki a kōtou kia kore e ngaro tō kōtou 'irinaki'anga. 2 Ka tuku 'oki rātou i a kōtou ki va'o i tō rātou au sūnago ra; ē ka tae mai te tuātau ka manako tēta'i 'ua atu tangata te ka tā i a kōtou ē, kua tāvini aia i te Atua. 3 Ka pērā mai rātou, nō te mea, kāre rātou i kite i te Metua, ē kāre katoa i āku nei. 4 Kua tuatua atu au i tēia au mea ki a kōtou, kia ma'ara i a kōtou, mē tae mai ki taua tuātau ra ē, kua 'akakite atu ana au i te reira ki a kōtou.
Te 'anga'anga a te Vaerua Tapu
“Kāre au i 'akakite atu i tēia au mea mei te 'akamata'anga mai, nō te mea, tei ō kōtou rāi au. 5 Tē 'aere nei rā au i tēianei ki aia tei tono mai i āku nei ra, ē kāre tēta'i o kōtou e ui mai ki āku ē, ‘Ka 'aere koe ki 'ea?’ 6 Tē kī nei rā tō kōtou ngākau i te taitaiā, nō te mea, kua tuatua atu ana au ki a kōtou i tēia au mea nei. 7 Inārā, tē tuatua nei au i te tuatua mou ki a kōtou: 'e ngari ake rāi kōtou ē, ko au tē 'aere kē nei; nō te mea, kia kore au e 'aere kē atu, kāre e riro mai te Tauturu ki a kōtou nei; kia 'aere kē atu rā au, nāku ia e tono mai i aia ki a kōtou nei. 8 Ē mē tae mai aia, nāna ia e 'akapāpū ki tō te ao i tā rātou au 'ara, ē e 'akapāpū katoa aia i tō rātou tārevakē nā runga i te tuatua tika ē te 'akavā'anga: 9 ko te 'ara rā, ko rātou kāre i 'irinaki mai i āku ra; 10 ko te tuatua tika rā, nō te mea, tē 'aere nei au ki tāku Metua ra, ē kāre kōtou e 'ākara 'aka'ou mai i āku; 11 ko te 'akavā'anga rā, nō te mea, kua 'akavā'ia 'oki te ariki o tēianei ao. 12 “'E mānganui rāi te au tuatua tāku e 'akakite atu ki a kōtou e tikāi, inārā, e teima'a roa ki a kōtou i tēianei. 13 Mē tae mai rā aia, ko ia te Vaerua o te tuatua mou ra, nāna ia e arataki i a kōtou ki te tuatua mou kātoatoa. Kāre 'oki tāna tuatua e riro ē nāna 'ua'orāi, ko tāna rā e 'akarongo ra, ko tāna ia e tuatua mai, ē nāna 'oki e 'akakite mai ki a kōtou i te ka tupu ra. 14 Ka 'akakakā mai aia i āku, nō te mea, e rave mai aia i tāku ra ē e 'akakite atu ki a kōtou. 15 Ko te au mea katoa o taku Metua ra, nāku ia. Nō reira i karanga atu ei au ē, tē rave nei aia i tāku ra ē e 'akakite atu ei ki a kōtou na.
Te tūmatetenga ka riro 'ei rekareka
16 “Kia roa iti ake, kāre atura kōtou e 'ākara mai i āku, ē kia roa iti 'aka'ou akera, ka 'ākara mai kōtou i āku.” 17 Kua kārangaranga atura ēta'i pipi āna ki a rātou 'ua'orāi, “'E a'a tēia tāna e tuatua mai nei ki a tātou ē, ‘Kia roa iti ake, kāre atura kōtou e 'ākara mai i āku, ē kia roa iti 'aka'ou akera, ka 'ākara mai kōtou i āku’? Ē tēta'i katoa, ‘Nō te mea, tē 'aere nei au ki taku Metua ra’?” 18 I tuatua ai 'oki rātou ē, “'E a'a tērā ‘roa iti ake’ tāna i tā'iku mai nei? Kāre tātou i mārama i tāna tuatua.” 19 Kua nakiro i'ora a Iēsū ē, tē 'inangaro ra rātou i te uiui mai ki aia, ē kua tuatua atura aia ki a rātou ē, “Tē uiui 'ua na kōtou i a kōtou 'ua'orāi i tāku tuatua'anga ē, ‘Kia roa iti ake, kāre atura kōtou e 'ākara mai i āku, ē kia roa iti 'aka'ou akera, ka 'ākara mai kōtou i āku’? 20 Koia mou tāku e karanga atu ki a kōtou na, ka auē kōtou ē ka mi'i 'oki, ko tō te ao rā ka rekareka ia. Ka tūmatetenga kōtou, ka riro rā tō kōtou tūmatetenga 'ei rekareka. 21 'E mamae te va'ine kia roko'ia e te 'ānau ra, nō te mea, kua tae ki tōna tuātau. Kia 'ānau'ia rā te tamaiti, kāre te va'ine e manako 'aka'ou i tōna tūmatetenga nō te rekareka 'oki, nō te mea, i 'ānau'ia mai tēta'i tangata ki te ao nei. 22 Ko kōtou, ka tūmatetenga kōtou i tēianei. Ka kite 'aka'ou rā au i a kōtou, ē ka rekareka tō kōtou ngākau, ē kāre rava tō kōtou rekareka e riro i a ēta'i kē. 23 “Ē kia tae ki taua rā ra, kāre kōtou e ui 'aka'ou mai ki āku i tēta'i mea. Koia mou tāku e karanga atu ki a kōtou na, ka 'ōronga mai te Metua ki a kōtou i tēta'i 'ua atu mea tā kōtou e pati ki aia ma tōku nei ingoa. 24 Kāre rāi kōtou i pati ake i tēta'i 'apinga ma tōku nei ingoa ē tēia noa ai. E pati ē ka rauka ia i a kōtou kia kore 'oki e 'ope tō kōtou rekareka'anga.
Te 'autū i runga i tō te ao
25 “Kua tuatua ana au ki a kōtou i taua au mea ra nā roto i te au 'aka'āite'anga ra. Ka tae mai te tuātau kāre au e tuatua 'aka'ou ki a kōtou nā roto i te au 'aka'āite'anga, ka 'akakite pū 'ua atu rā au ki a kōtou i taku Metua ra. 26 Ē kia tae ki taua rā ra, e pati atu ei kōtou ma tōku nei ingoa; ē kāre au e tuatua ki a kōtou ē, ka pati au ki taku Metua nō kōtou. 27 Nā te Metua 'ua'orāi 'oki e 'akaperepere mai i a kōtou, ko kōtou i 'akaperepere mai i āku nei ē i 'irinaki mai ē, mei kō mai au i te Atua ra. 28 Mei kō mai au i te Metua, ē i 'aere mai ei au ki te ao nei, tē 'akaruke nei au i te ao nei ē tē 'oki nei au ki te Metua ra.” 29 Kua tuatua maira tāna au pipi, “Inā, tē tuatua pū 'ua mai nei koe i tēianei, ē kāre koe e tuatua 'aka'ou ana nā roto i te au 'aka'āite'anga. 30 Kua mārama mātou i tēianei ē, tē kite nei koe i te au mea kātoatoa, ē kāre koe e umuumu i tēta'i 'ua atu tangata kia ui atu i te ui'anga ki a koe. Ko te tumu 'oki tēia i 'irinaki ei mātou ē, mei kō mai koe i te Atua ra.” 31 Kua pa'u atura a Iēsū ki a rātou, “Kua 'irinaki āinei kōtou i tēianei? 32 Inā, ka tae mai te tuātau ē kua tae mai 'oki ki taua tuātau ra, e pue'urikiriki kē atu ei kōtou, ko te tangata tātakita'i ki tōna 'ua'orāi kāinga, ē ka 'akaruke mai 'oki kōtou i āku, ko au anake 'ua. Kāre rā ko au anake 'ua, nō te mea, tei āku nei 'oki te Metua. 33 I tuatua atu au i tēia au mea ki a kōtou kia rauka i a kōtou te 'au i roto i āku nei. Ka manamanatā 'oki kōtou i roto i tēianei ao. Ka 'akamāro'iro'i rā, kua 'autū au i runga i tō tēianei ao.”
Tē pure nei a Iēsū nō tāna au pipi
1 E oti akera a Iēsū i tēianei au tuatua'anga, kua nānā akera aia i ōna mata ki te rangi, nā kō atura, “E taku Metua, kua tae ki te tuātau. E 'akakakā mai koe i tā'au na Tamaiti, kia 'akakakā katoa 'oki te Tamaiti i a koe. 2 Ē mei a koe i 'ōronga mai ki aia i te mana ki runga i te au tangata katoa nei, kia 'ōronga katoa aia i te ora mutukore ki te tangata kātoatoa tā'au i 'ōronga mai ki aia ra. 3 Ko tēia 'oki te ora mutukore: kia kite rātou i a koe, te Atua mou 'okota'i ra, ē i a Iēsū Mesia tā'au i tono maira. 4 Nāku i 'akakakā i a koe i te ao nei nā roto i te 'akaoti'anga i te 'anga'anga tā'au i 'ō mai ki āku e rave ra. 5 Ē i tēianei e 'akakakā mai koe i āku, e taku Metua ē, ki mua i tō'ou na aroaro, ki te kakā nōku tikāi i mua i a koe, 'ōu 'ua ake nei te ao. 6 “Kua 'akakite atu au i tō'ou ingoa ki te au tangata o tēianei ao tā'au i 'ōronga mai nōku ra. Nō'ou ana 'oki rātou, ē nā'au 'oki rātou i 'ō mai nōku, ē kua 'ākono rātou i tā'au na tuatua. 7 Kua mārama 'oki rātou i tēianei ē, mei kō mai i a koe na te au mea kātoatoa tā'au i 'ōronga mai ki āku nei; 8 nō te mea, nāku i tuku atu ki a rātou i te au tuatua tā'au i 'ōronga mai ki āku nei, ē kua 'āriki rātou i te reira. Ē kua mārama tikāi rātou ē, mei kō mai au i a koe na, ē tē 'āriki nei rātou ē, nā'au au i tono mai. 9 “Tē pure nei au nō rātou; kāre au e pure nō tō te ao nei, nō rātou rā tā'au i 'ōronga mai nōku ra, nō te mea, nō'ou 'oki rātou. 10 Tōku katoa ra, nō'ou ia; ē tō'ou ra, nōku ia. Ē kua 'akakakā'ia 'oki au nā roto i a rātou ra. 11 Kāre au e no'o 'aka'ou i te ao nei, ko rātou rā, tē no'o nei rātou i te ao nei; ē ko au, tē 'aere atu nei au ki a koe. E te Metua Tapu ē, e pāruru i a rātou ki te mana o tō'ou ingoa, te ingoa tā'au i 'ōronga mai nōku ra, kia 'okota'i rātou mei a tāua nei rāi. 12 I tōku no'o'anga ki ō rātou ra, nāku i pāruru i a rātou ki te mana o te ingoa tā'au i 'ōronga mai nōku ra. Ē nāku i tiaki i a rātou, ē kāre rava tēta'i o rātou i ngaro, māri rā, ko te tamaiti o te mate ra, kia tupu 'oki tei tātā'ia ra. 13 Tē 'aere atu nei au ki a koe i tēianei, ē tē tuatua nei au i tēia au mea nei, koi vai ake au i te ao nei, kia tae tōku rekareka'anga i roto i a rātou ki te 'openga tikāi. 14 Kua tuku atu ana au i tā'au karere ki a rātou; ē kua mākitakita tō te ao nei i a rātou, nō te mea, kāre rātou ē nō tō te ao nei, mei āku nei rāi 'oki ē kāre nō te ao nei. 15 Kāre au e pure ki a koe ē, kia 'apai kē atu koe i a rātou mei roto mai i te ao nei, kia pāruru rā koe i a rātou mei te Mea Kino ra. 16 Kāre rātou nō te ao nei, mei āku nei rāi 'oki ē kāre nō te ao nei. 17 E 'akatapu i a rātou ki te tuatua mou; ko tā'au tuatua 'oki 'e tuatua mou ia. 18 Mei a koe i tono mai i āku ki roto i te ao nei, kua tono katoa 'oki au i a rātou ki roto i te ao nei. 19 Ē tē 'akatapu nei au i āku 'ua'orāi nō rātou, kia 'akatapu katoa'ia rāi 'oki rātou. 20 “Kāre 'oki au e pure nō rātou anake 'ua, nō rātou katoa rā te ka 'irinaki mai i āku nei nā roto i tā rātou 'āpi'i'anga, 21 kia riro rātou katoa 'ei 'okota'i, mei a koe, e taku Metua, i roto i āku nei, ē mei āku 'oki i roto i a koe na, kia pērā katoa rātou i roto i a tāua, kia 'āriki tō te ao nei ē, nā'au au i tono mai. 22 Kua 'ōronga atu au ki a rātou i te kakā tā'au i 'ō mai nōku ra, kia riro rātou 'ei 'okota'i, mei a tāua e 'okota'i nei. 23 Ko au i roto i a rātou ē ko koe i roto i āku. Kia riro katoa 'oki rātou 'ei 'okota'i meitaki rava ē kia mārama tō te ao nei ē, nā'au au i tono mai ē nā'au i 'akaperepere mai i a rātou, mei a koe i 'akaperepere mai i āku nei. 24 “E taku Metua, tē anoano atu nei au kia no'o katoa rātou tā'au i 'ōronga mai nōku ra i te ngā'i tāku e no'o ra, ko rātou 'oki ē ko au katoa, kia 'ākara mai rātou i tōku kakā, tā'au i 'ō mai nōku ra, nō te mea, kua 'akaperepere mai koe i āku, 'ōu te ao nei i 'anga'ia ai. 25 E taku Metua tuatua tika ē, noa atu ē kāre tō te ao nei i kite i a koe, kua kite rā au i a koe, ē kua mārama 'oki rātou ē, nā'au au i tono mai. 26 Kua 'akakite atu au, ē ka 'akakite 'aka'ou rāi au ki a rātou i tō'ou ingoa, kia vai i roto i a rātou te 'akaperepere tā'au i 'akaperepere mai i āku ra, ē i roto au 'ua'orāi i a rātou.”
Tē 'opu'ia nei a Iēsū
1 Kia oti tā Iēsū tuatua'anga i tēianei au tuatua, 'aere atura aia ma tāna au pipi ki tērā tua o te ō ko Kīderōna. Tei reira 'oki tēta'i koro, ē kua tomo atura aia ē tāna au pipi ki roto. 2 Ko Iūda, tei tuku pikika'a i a Iēsū, kua kite katoa aia i taua ngā'i ra, nō te mea, kua mātau 'oki a Iēsū i te 'aere ki reira ma tāna au pipi. 3 Kua rave a Iūda i tēta'i pupu va'e'au ē ēta'i tiaki o te 'iero mei kō mai i te kau ta'unga nunui ē te au Phārīsea ra, kua 'aere maira ma te mōrī ē te rama, ē te tā'onga tamaki katoa ki reira. 4 Kua nakiro 'oki a Iēsū i te au mea kātoatoa e roko'ia mai ei aia ra, 'aere atura ki a rātou e ui atura, “Ko 'ai tā kōtou e kimi na?” 5 Kua pa'u maira rātou ki aia, “Ko Iēsū o Nāzarēta ra.” Kua karanga atura a Iēsū ki a rātou, “Ko au nei ia.” Ko Iūda tei tuku pikika'a i aia ra, tei a rātou katoa ia. 6 Tei te tuatua'anga a Iēsū ki a rātou ē, “Ko au nei ia,” kua 'oki i'ora rātou ki muri ē 'inga ki raro i te one. 7 Kua ui 'aka'ou atura a Iēsū ki a rātou, “Ko 'ai tā kōtou e kimi na?” Kua pa'u maira rātou, “Ko Iēsū o Nāzarēta ra.” 8 Kua karanga atura a Iēsū, “Kua 'akakite atu au ki a kōtou ē, ko au tēia. Mē tē kimi nei kōtou i āku, ka tuku atu i a rātou kia 'aere.” 9 Kua pērā aia kia tupu tāna i 'akakite ra ē, “Ko rātou tā'au i 'ō mai nōku ra, kāre rava e 'okota'i o rātou i ngaro.” 10 'E koke tā Simona Pētero; kua unu'i akera, tāpotu atura i te tāvini o te Ta'unga Ma'ata ra e motu kē atura tōna taringa katau. Te ingoa o taua tāvini ra ko Malako. 11 Kua karanga atura a Iēsū ki a Pētero, “Ka momono ana i tā'au koke ki roto i te va'ī. Ko te kapu tā taku Metua i 'ō mai nāku ra, kia kore āinei au e inu?”
Tē tū nei a Iēsū ki mua i a Ana
12 Kua 'opu maira te pupu va'e'au ē tō rātou rangatira ē te au tiaki Ngāti Iūda o te 'iero ra i a Iēsū, tāpeka i'ora i aia, 13 ē kua arataki atura i aia nā mua ki a Ana ra; ko te metua 'ōngai aia nō Kaiāpha, te Ta'unga Ma'ata o te reira mata'iti. 14 Ko Kaiāpha 'oki tei 'akamārama atu ana i te Ngāti Iūda ra ē, 'e ngari ake kia mate 'e 'okota'i 'ua tangata nō te 'iti tangata.
Tō Pētero 'u'una'anga i a Iēsū
15 Kua āru atura a Simona Pētero ē tēta'i pipi kē i a Iēsū. Kua mātau 'oki taua pipi ra ki te Ta'unga Ma'ata, e tomo atura ki roto i te koro o te Ta'unga Ma'ata ra ē Iēsū katoa 'oki, 16 kāreka ko Pētero, kua tū 'ua maira aia ki va'o i te pae ngūtupa ra. Kua 'oki maira taua pipi kē ra tei mātau ki te Ta'unga Ma'ata ra ki va'o, ē kua tuatua atura ki te tamā'ine tiaki ngūtupa ra, ē kua arataki atura i a Pētero ki roto. 17 Kua ui maira taua tamā'ine tiaki ngūtupa ra ki a Pētero, “Kāre āinei ē ko koe tēta'i o te au pipi a tēianei tangata?” Kua pa'u atura aia, “Kāre ko au.” 18 Kua ta'u te au tāvini ē te aronga tiaki o te 'iero ra i te a'i, nō te mea, kua anu, ē kua tū rātou i te pae ē te tāmā'ana'ana ra i a rātou. Kua tū katoa a Pētero i ō rātou, ē tē tāma'ana ra rāi i aia 'ua'orāi.
Tō te Ta'unga Ma'ata uiui'anga i a Iēsū
19 Kua ui maira te Ta'unga Ma'ata ki a Iēsū nō runga i tāna au pipi ē tāna 'āpi'i'anga. 20 Kua pa'u atura a Iēsū ki aia, “I tuatua 'akakite 'ua ana rāi au ki tō te ao nei. I 'āpi'i 'ua ana rāi au i roto i te au sūnago ra, ē i roto i te 'iero ra, te ngā'i putuputu'anga o te Ngāti Iūda kātoatoa. Kāre rava au i tuatua ana i te ngā'i ngaro. 21 'E a'a i reira ka ui mai ei koe ki āku? Ka ui atuna ki te aronga i 'akarongo mai ana i āku nō runga i tāku tuatua ki a rātou, kua kite 'oki rātou i tāku i tuatua ana.” 22 I tō Iēsū tuatua'anga i tēianei, ko tēta'i o te aronga tiaki o te 'iero tei tū vaitata a'o 'ua ra, kua papaki atura i a Iēsū ki tōna kapu rima, nā kō maira, “E 'akapērā āinei koe i te pa'u'anga ki te Ta'unga Ma'ata ra?” 23 Kua karanga atura a Iēsū ki aia, “Mē kua tārevakē tāku tuatua'anga, ka 'akakite 'ua mai ana i te tārevakē; mē kua tika rā, 'e a'a koe i papaki mai ei i āku?” 24 Kua tuku atura a Ana i a Iēsū ma te rī katoa ki a Kaiāpha, te Ta'unga Ma'ata ra.
Tō Pētero 'u'una 'aka'ou'anga i a Iēsū
25 I tō Simona Pētero tū 'ua'anga ē te tāmā'ana'ana'anga i aia, kua ui maira rātou ki aia, “Kāre āinei ē, ko koe katoa tēta'i o tāna au pipi?” Kua 'u'una atura aia, nā kō atura, “Kāre ko au.” 26 Ko tēta'i o te au tāvini o te Ta'unga Ma'ata ra, 'e taeake 'oki nō te tangata tei tīpū'ia ana e Pētero te taringa, kua ui maira ki a Pētero, “Kāre āinei au i kite ana i a koe i roto i te koro ma ia katoa ra?” 27 Kua 'u'una 'aka'ou i'ora a Pētero, ē i taua 'ati'anga rāi, kua kākaoa te moa.
Tē tū nei a Iēsū ki mua i a Pilato
28 I te pōpongi roa, kua arataki atura rātou i a Iēsū mei a Kaiāpha mai ki te 'are o te tūtara. Kāre rātou i tomo ki roto i te 'are o te tūtara, ko te vi'ivi'i ā'ea 'oki rātou, kia tau rā rātou i te kai i te Pāsa ra. 29 Kua 'aere maira a Pilato ki va'o ki a rātou ra, ē kua tuatua maira, “'E a'a tā kōtou 'aka'apa'anga i tēianei tangata?” 30 Kua karanga atura rātou ki aia, “Nāringa tēianei tangata kāre i rave i te 'anga'anga kino, kāre mātou e tuku mai i aia ki a koe.” 31 Kua tuatua maira a Pilato ki a rātou, “Ka 'apai kōtou i aia ē ka 'akavā atu i aia kia tau ki tā kōtou ture.” Kua karanga atura te Ngāti Iūda ki aia, “Kāre 'oki te ture e 'akatika i a mātou kia tāmate i te tangata.” 32 I pērā 'oki e tupu ei te tuatua tā Iēsū i 'akakite ana nō runga i te tū o te matenga ka mate ei aia. 33 Kua 'oki 'aka'ou atura a Pilato ki roto i te 'are o te tūtara ra, ē kua kāpiki atura i a Iēsū, ē kua ui atura ki aia, “Ko koe āinei te ariki o te Ngāti Iūda?” 34 Kua pa'u maira a Iēsū, “Nā'au 'ua'orāi āinei tēnā na tuatua, mē nā ēta'i kē āinei i tuatua atu ki a koe i āku nei?” 35 Kua karanga atura a Pilato, “'E Ngāti Iūda āinei au? Nā tō'ou 'ua'orāi 'iti tangata ē te kau ta'unga nunui ra i tuku mai i a koe ki āku nei. 'E a'a tā'au i rave?” 36 Kua pa'u maira a Iēsū, “Kāre tōku bāsileia ē nō tēianei ao; nāringa nō tēianei ao 'oki tōku bāsileia, kua tamaki atu tōku au tāvini kia kore au e tuku'ia ki te Ngāti Iūda ra. Ko tōku bāsileia rā kāre ia nō tō konei.” 37 Kua tuatua atura a Pilato ki aia, “'E ariki āinei koe?” Kua pa'u maira a Iēsū, “Tē tika ra tā'au e tuatua ana ē, 'e ariki rāi au. Ko tēia 'oki te tumu i 'ānau'ia mai ei au, ē ko tēia katoa 'oki te tumu i 'aere mai ei au ki te ao nei, kia 'akakite i te tuatua mou. Ko tēta'i 'ua atu tangata tei piri ki te tuatua mou ra, ka 'akarongo mai ia i tōku reo.” 38 Kua tuatua atura a Pilato ki aia, “Ko te tuatua mou ra, 'e a'a te reira?”
Tē 'akautunga'ia nei a Iēsū ki te mate
I muri ake i tāna tuatua'anga i te reira, kua 'aere 'aka'ou maira a Pilato ki va'o ki te Ngāti Iūda ra, ē kua tuatua maira ki a rātou, “Kāre 'ua 'e kino e kitea'ia e au i roto i aia. 39 Inārā, 'e peu tā kōtou kia tuku atu au i tēta'i tangata ki a kōtou i te Pāsa ra. Ka 'inangaro āinei kōtou kia tuku atu au ki a kōtou i te Ariki o te Ngāti Iūda?” 40 Kua kāpiki nui atura rā rātou ki aia, “Auraka ko tēianei tangata, ko Bāraba rā.” 'E tangata keikeiā 'oki a Bāraba.
1 I reira, kua rave i'ora a Pilato i a Iēsū ē pāpā atura i aia. 2 Kua 'iri i'ora te au va'e'au i tēta'i 'ei nō roto mai i te rākau taratara, ē kua tuku atura ki runga a'o i tōna ūpoko, ē kua 'akakāka'u atura i aia ki te kāka'u muramura. 3 Kua 'akavaitata atura rātou ki aia, nā kō atura, “Kia orana, e te ariki o te Ngāti Iūda!” Ē kua papaki i'ora rātou i aia ki tō rātou kapu rima. 4 Kua 'aere 'aka'ou maira a Pilato ki va'o, ē kua tuatua maira ki te Ngāti Iūda ra, “Inā, tē arataki mai nei au i aia ki va'o ki a kōtou na kia kite kōtou ē, kāre 'ua 'e kino i kitea'ia e au i roto i aia.” 5 Kua 'aere maira 'oki a Iēsū ki va'o i 'aka'ei'ia ki te 'ei rākau taratara, ē i 'akakāka'u'ia ki te kāka'u muramura, ē kua nā kō akera a Pilato ki a rātou ē, “Inā, tēia taua tangata nei!” 6 Ē kia 'ākara atura te kau ta'unga nunui ma te aronga tiaki o te 'iero ra i a Iēsū, kua kāpiki nui atura rātou i te nā kō'anga ē, “Ka 'akasātauro atu! Ka 'akasātauro atu!” Kua karanga maira a Pilato ki a rātou, “Nā kōtou 'ua'orāi e rave i aia, ē e 'akasātauro atu i aia, nō te mea, kāre 'ua 'e kino i kitea'ia e au i roto i aia.” 7 Kua pa'u atura te Ngāti Iūda ki aia, “'E ture tā mātou, ē tē 'akaue nei taua ture ra kia mate aia e tikāi, nō te mea, kua 'akariro aia i aia 'ua'orāi 'ei Tamaiti nā te Atua.” 8 I tō Pilato 'akarongo'anga i taua tuatua ra, kua ma'ata 'ua atu i'ora tōna mataku, 9 ē kua 'oki 'aka'ou atura aia ki roto i te 'are o te tūtara, ē kua ui atura ki a Iēsū, “Nō 'ea mai koe?” Kāre rā a Iēsū i pa'u mai i aia. 10 Kua karanga atura a Pilato ki aia, “Kāre āinei koe e pa'u mai i āku? Kāre āinei koe i kite ē, tei āku te tika i te tuku atu i a koe, ē tei āku katoa te tika i te 'akasātauro i a koe?” 11 Kua tuatua maira a Iēsū ki aia, “Kāre tākiri ō'ou tika'anga i runga i āku, nāringa kāre i 'ōronga'ia mai ki a koe nō runga maira. Nō reira, 'e ma'ata atu te 'ara a te tangata tei tuku mai i āku ki a koe na.” 12 Mei taua 'ati'anga mai rāi, kua kimikimi 'ua maira a Pilato i te rāvenga nō te tuku atu i a Iēsū. Kua kāpiki nui atura rā te Ngāti Iūda, nā kō atura, “Mē ka tuku koe i tēnā na tangata, kāre koe e piri ana ki a Kaisara. Ko tēta'i 'ua atu 'oki tei 'akariro i aia 'ua'orāi 'ei ariki, kua pāto'i aia i a Kaisara.” 13 I tō Pilato 'akarongo'anga i taua au tuatua ra, kua arataki maira aia i a Iēsū ki va'o, ē kua no'o i'ora ki runga i te no'o'anga 'akavā i te ngā'i e karanga'ia ra ē, 'e Ngā'i Patu'ia (ko Gābata i te reo 'Ēbera ra). 14 'E rā 'akate'ate'amamao'anga 'oki ia o te Pāsa ra, mei te ora ono pa'a. Ē kua tuatua maira a Pilato ki te Ngāti Iūda, “Inā, tēia tō kōtou ariki.” 15 Kua kāpiki nui maira rātou, “E 'apai kē atu i aia! E 'apai kē atu! E 'akasātauro atu i aia!” Kua ui maira a Pilato ki a rātou, “Ka 'akasātauro atu āinei au i tō kōtou ariki?” Kua pa'u atura te kau ta'unga nunui ra, “Kāre ō mātou ariki, māri rā ko Kaisara.” 16 I reira, kua tuku atura a Pilato i a Iēsū ki a rātou kia 'akasātauro'ia.
Te 'akasātauro'anga'ia a Iēsū
Kua rave i'ora te au va'e'au i a Iēsū. 17 Nā Iēsū 'ua'orāi i 'apai i te sātauro, ē kua 'aere atura aia ki te ngā'i tei karanga'ia ē, Te Ngā'i Katu Tangata, i te reo 'Ēbera ko Golagota ia. 18 Kua 'akasātauro i'ora rātou i aia i te reira ngā'i, ē pērā katoa 'oki 'e tokorua tangata kē ra, 'okota'i i tēta'i pae ē 'okota'i 'oki i tēta'i pae, ē ko Iēsū i rotopū. 19 Kua tātā 'oki a Pilato i tēta'i 'akakite'anga ē kua tuku i'ora ki runga i te sātauro; kua tātā'ia 'oki, “Ko Iēsū o Nāzarēta, te Ariki o te Ngāti Iūda.” 20 Kua tatau i'ora te Ngāti Iūda 'e mānganui i taua 'akakite'anga ra, nō te mea, ko te ngā'i i 'akasātauro'ia a Iēsū ra kua vaitata 'oki ki te 'ōire, ē kua tātā'ia 'oki taua 'akakite'anga ra i roto i te reo 'Ēbera, te Eleni ē te Latino. 21 Ē kua karanga atura te kau ta'unga nunui o te Ngāti Iūda ra ki a Pilato, “Auraka e tātā ē, ‘Ko te Ariki o te Ngāti Iūda’; māri rā ē, ‘Kua karanga aia ē, ko au te Ariki o te Ngāti Iūda.’ ” 22 Kua pa'u maira a Pilato, “Ko tei tātā'ia e au ra, kua tātā'ia ia e au.” 23 Oti akera tā te au va'e'au 'akasātauro'anga i a Iēsū, kua rave i'ora rātou i ōna kāka'u ra, kua tu'a atura e 'ā tu'anga; 'okota'i va'e'au 'okota'i tu'anga; toe i'ora ko te pereue ra. Kāre 'e tui'anga o taua pereue ra, i raranga tāpini rava'ia mei runga ki raro. 24 Kua tuatua i'ora rātou rātou 'ua'orāi, “Auraka tātou e 'ae'ae i te reira, ka tuku kērero rā kia kitea ē, nā 'ai te reira.” I pērā 'oki rātou kia tupu te tuatua i tātā'ia ra ē, “Kua tu'a i'ora rātou i ōku kāka'u nō rātou, ē kua tuku kērero 'oki rātou i tōku pereue.” I pērā atura 'oki te au va'e'au ra. 25 I te pae o te sātauro o Iēsū ra, kua tū 'ua i'ora tōna metua va'ine, ē te taeake o tōna metua va'ine, ko Māria te va'ine a Kelopa ra, ē ko Māria i Māgadala ra. 26 I tō Iēsū kite'anga i te metua va'ine ē te pipi 'akaperepere nāna ra i te tū 'ua'anga i te reira ngā'i, kua karanga atura aia ki tōna metua va'ine, “E ma'ine, inā, tēnā tō tamaiti.” 27 I reira, kua karanga atura aia ki taua pipi ra, “Inā, tēnā tō metua va'ine.” Ē mei taua ora maira, kua arataki atura taua pipi ra i aia ki roto i tōna 'ua'orāi ngutu'are.
Te matenga o Iēsū
28 Ē muri akera, kua nakiro 'oki a Iēsū ē, kua 'ope te au mea rava rāi i te tupu, ē kua nā kō akera, “Kua kakī vai au.” I pērā 'oki aia kia tupu te tuatua i tātā'ia ra. 29 'E 'āriki tēta'i i reira kua kī i te vinika. Kua tuku atura rātou i tēta'i rimu kī i te vinika ki runga i tēta'i rārā 'īsopa, ē 'apai atura ki tōna va'a. 30 Ē kia inu akera a Iēsū i taua vinika ra, kua tuatua akera aia, “Kua oti.” Kua tākupe i'ora tōna ūpoko ki raro, e tuku atura i tōna vaerua.
Te kō'anga'ia te kaokao o Iēsū
31 Nō te mea ē, 'e rā 'akate'ate'amamao'anga taua rā ra, kua pati atura te Ngāti Iūda ki a Pilato kia 'a'ati'ia te vaevae o ngā tangata i 'akasātauro'ia, ē kia 'apai kē'ia atu rātou, kia kore 'oki e 'akaruke'ia te au kōpapa i runga i te sātauro i te Sābati, nō te mea, 'e rā ma'ata 'oki taua rā Sābati ra. 32 Kua 'aere maira te au va'e'au, kua 'a'ati i'ora i te vaevae o tēta'i ē tō tēta'i 'oki ko tei 'akasātauro katoa'ia ra. 33 Kia tae rā rātou ki a Iēsū ra, e nakiro akera ē kua mate aia, kāre rā rātou i 'a'ati i ōna vaevae, 34 inārā, kua kō atura tēta'i o te au va'e'au ra i tōna kaokao ki te kōrare, ē ta'e 'ua maira te toto ē te vai. 35 Ē ko te tangata tei kite ana, kua 'akakite aia i te reira ē, 'e tuatua mou 'oki tāna 'akakite'anga. Tē kite nei aia ē, tē tuatua nei aia i te tuatua mou ra kia 'irinaki kōtou. 36 Kua tupu 'oki taua au mea ra, kia tika te tuatua i tātā'ia ra ē, “Auraka roa tēta'i ivi ōna kia 'a'ati'ia.” 37 Ē pērā katoa tēta'i tuatua i tātā'ia ra ē, “Ka 'ākara rātou ki tā rātou i kō ra.”
Te tanumanga o Iēsū
38 Ē muri akera, kua pati atura a Iōsēpha nō Ārīmātea ki a Pilato ra kia 'apai kē atu aia i te kōpapa o Iēsū. 'E pipi 'oki aia nā Iēsū, i mou pōiri 'ua rā nō te mataku i te Ngāti Iūda ra. Kua 'akatika maira a Pilato, ē kua 'aere atura aia e 'apai kē atura i te kōpapa o Iēsū. 39 Ē kua 'aere katoa atura a Nīkōdemo, ko tei 'ārāvei ana i a Iēsū ra i tēta'i pō i mua ana, ē tē 'apai ra aia i te manongi ē te 'āloe tei oti i te kā'iro'ia, mei te 'okota'i 'ānere pa'a paunu. 40 Kua rave atura rātou i te kōpapa o Iēsū, 'opa i'ora ki te kāka'u va'ī ma te rākau kakara katoa ra, ko tā te Ngāti Iūda 'oki ia peu kia tanu ra. 41 I te ngā'i i 'akasātauro'ia ai a Iēsū ra, tei reira tēta'i koro, ē tei roto i taua koro ra tēta'i mēnema 'ōu, kāre rava 'oki 'e tangata i vai'o'ia ake ki roto. 42 Kua tuku atura rātou i a Iēsū ki reira, nō te mea, 'e rā 'akate'ate'amamao'anga 'oki nō te Ngāti Iūda taua rā ra, ē e vaitata 'ua 'oki taua mēnema ra.
Tō Iēsū tū 'aka'ou'anga
1 I te rā mua o te 'ebedoma i te 'ākirāta, tē pōiri ra rāi, kua 'aere atura a Māria i Māgadala ki te mēnema ē kua kite akera ē, kua 'apai kē'ia te toka mei te mēnema maira. 2 Kua 'oro atura aia e tae atura ki a Simona Pētero ē taua pipi ra tei 'akaperepere'ia e Iēsū, ē kua tuatua atura ki a rāua, “Kua 'apai kē rātou i te 'Atu nō roto mai i te mēnema, ē kāre mātou i kite i te ngā'i i vai'o ei rātou i aia.” 3 'Aere atura a Pētero rāua ko taua pipi ra ki va'o, ē 'aere tika atura ki te mēnema ra. 4 Kua 'oro kāpipiti atura rāua; kua viviki atura taua pipi ra i te 'oro'anga i a Pētero, ē kua tae atura nā mua ki te mēnema ra, 5 ē i te piko'anga ki raro, kite atura i te kāka'u va'ī i te vai 'ua'anga. Inārā, kāre aia i tomo ki roto. 6 Kua 'aere maira a Simona Pētero i muringa a'o i aia ra, e tomo atura ki roto i te mēnema ra; kite atura aia i te kāka'u va'ī i te vai 'ua'anga 7 ē te kāka'u 'ōrei, tei va'ī ana i tōna ūpoko ra, kāre ia i vai'o'ia ki te au kāka'u va'ī, i kōkopi'ia rā ē kua vai'o'ia ki tēta'i ngā'i kē. 8 I reira, kua tomo katoa taua pipi ra tei tae atu nā mua ki te mēnema ra ki roto; kite atura ia ē 'irinaki atura. 9 Kāre ake rāi rātou i nakiro i te tuatua i tātā'ia ra ē, kia 'akatū'ia maira aia mei te mate maira e tikāi. 10 'Oki 'aka'ou atura ngā pipi ki tō rāua ngā'i ra.
Tē 'akaāri nei a Iēsū i aia 'ua'orāi ki a Māria i Māgadala
11 Kua tū 'ua rā a Māria i va'o i vaitata a'o i te mēnema ra, tē auē 'ua ra. I tōna auē'anga, kua piko i'ora aia ki raro ma te 'ākara ki roto i te mēnema ra, 12 kite atura i e tokorua 'āngela ma te kāka'u teatea i te no'o'anga i te ngā'i i vai'o'ia ai te kōpapa o Iēsū, tēta'i i te pae o te ūpoko, ē tēta'i i te pae o te vaevae. 13 Ē kua ui maira rāua ki aia, “E mā'ine, 'e a'a koe i auē ei?” Kua pa'u atura aia ki a rāua, “Kua 'apai kē atu 'oki rātou i tōku 'Atu, ē kāre au i kite i te ngā'i i vai'o atu ei rātou i aia.” 14 I te pērā'anga aia kua anga atura aia ki muri, ē kite atura i a Iēsū i te tū 'ua'anga, kāre rā aia i nakiro ē ko Iēsū tērā. 15 Ē kua ui maira a Iēsū ki aia, “E mā'ine, 'e a'a koe i auē ei? Ko 'ai tā'au e kimi na?” Kua manako akera a Māria ē, ko te tangata tanu kai ia, ē kua tuatua atura ki aia, “E tama, mē ko koe tei 'apai kē atu i aia, e 'akakite mai ki āku i te ngā'i i vai'o ei koe i aia, ē nāku e tiki atu i aia.” 16 Kua tuatua maira a Iēsū ki aia, “E Māria!” Kua 'uri atura a Māria ki aia, nā kō atura i roto i te reo 'Ēbera, “Rāboni!”, koia 'oki, e te Pū'āpi'i. 17 Kua tuatua maira a Iēsū ki aia, “Auraka koe e mou mai i āku, nō te mea, kāre au i 'aere ake ki runga ki tōku Metua ra. E 'aere rā koe ki tōku au taeake ra ē e 'akakite ki a rātou ē, tē 'aere nei au ki tōku Metua ra ē ki tō kōtou Metua ra, ki tōku Atua ē ki tō kōtou Atua ra.” 18 Kua 'aere atura a Māria i Māgadala ra ki te au pipi ma te 'akakite atu ki a rātou ē, “Kua kite ana au i te 'Atu, ē nāna i tuatua mai i tēia au mea nei ki āku.”
Tē 'akaāri nei a Iēsū i aia 'ua'orāi ki tāna au pipi
19 Ē i te a'ia'i o taua rā mua o te 'ebedoma ra, kua tōpiri'ia te au ngūtupa o te ngā'i tei reira te au pipi, nō te mataku 'oki i te Ngāti Iūda ra. Ē kua 'aere maira a Iēsū ē kua tū i'ora i rotopū i a rātou, ē kua nā kō maira ki a rātou, “'Ei a kōtou te 'au.” 20 Ē i tōna tuatua'anga mai i te reira, kua 'akaāri maira aia i ōna rima ē tōna kaokao ki a rātou. Mareka rava akera te au pipi i te kite'anga i te 'Atu. 21 Kua tuatua 'aka'ou maira a Iēsū ki a rātou, “'Ei a kōtou te 'au. Mei te Metua 'oki i tono mai i āku nei, tē tono katoa atu nei au i a kōtou.” 22 I aia i 'akapērā ra, kua 'akapuangi maira aia i te a'o ki runga i a rātou, nā kō maira, “E 'āriki maina i te Vaerua Tapu. 23 Mē 'akakore kōtou i te au 'ara a tēta'i 'ua atu tangata, kua 'akakore'ia ia; mē ka vai'o kōtou i te reira, kua vai'o'ia ia.”
Ko Iēsū rāua ko Toma
24 Ē tēta'i o te ta'i nga'uru mā rua ra ko Toma tei tapa'ia i a Dīdimo ra, kāre aia i reira i tae mai ei a Iēsū ra. 25 Kua karanga atura te au pipi ki aia ē, “Kua kite ake nei mātou i te 'Atu!” Kua tuatua maira aia ki a rātou, “Kia kore au e kite i te 'akairo o te puta naero i roto i ōna rima, ē e tuku i tōku maikao rima ki roto i taua puta ra, ē kia kore au e tuku katoa i tōku rima ki roto i tōna kaokao ra, kāre au e 'irinaki i te reira.” 26 E pō varu akera, tei roto 'aka'ou akera te au pipi i te 'are, ē ko Toma katoa tēta'i i ō rātou ra. Kua 'aere maira a Iēsū, noa atu 'oki ē, kua tōpiri'ia te au ngūtupa, ē kua tū 'ua maira aia i rotopū i a rātou ra, ē kua nā kō maira, “'Ei a kōtou te 'au.” 27 Ē kua tuatua maira aia ki a Toma i reira, “Tuku mai i tō'ou maikao rima ki konei, ē e 'ākara mai i ōku rima; e 'akatika mai i tō'ou rima ē e tuku mai ki roto i tōku kaokao. Auraka koe e 'irinakikore, e 'irinaki rā.” 28 Kua tuatua atura a Toma ki aia, “E taku 'Atu ē taku Atua!” 29 Kua karanga maira a Iēsū, “Kua 'irinaki āinei koe, nō te mea, kua 'ākara mai koe i āku nei? 'E ao tō rātou tei 'irinaki, noa atu ē kāre rātou i 'ākara ana.”
Te 'akakoro'anga o tēianei puka
30 'E mānganui 'ua atu rāi te au 'akairo tā Iēsū i rave i mua i te aroaro o tāna au pipi ē tei kore i tātā'ia ki roto i tēianei puka. 31 Ko tēia au mea rā i tātā'ia ra kia 'irinaki kōtou ē, ko Iēsū te Mesia, te Tamaiti a te Atua, ē kia rauka mai 'oki i a kōtou te ora i roto i tōna ingoa nā roto i te 'irinaki'anga.
Tē 'akaāri nei a Iēsū i aia 'ua'orāi ki e toko'itu pipi
1 Ē muri akera, kua 'akaāri 'aka'ou maira a Iēsū i aia 'ua'orāi ki te au pipi i te pae roto i Tībēria ra. Ē i pērā 'oki aia i te 'akaāri'anga mai i aia. 2 Tei reira 'oki a Simona Pētero, a Toma, ko tei tapa'ia i a Dīdimo ra, a Nātanāela mei Kana i Galilea ra, ē ngā tamariki a Zebedaio ra, ē ko tēta'i tokorua pipi kē a Iēsū ra. 3 Kua karanga atura a Simona Pētero ki a rātou, “Ka 'aere au ka tautai.” Kua tuatua maira rātou ki aia, “Ka āru katoa atu mātou i a koe.” 'Aere atura rātou ē kake atura ki runga i te poti; kāre tākiri rā ā rātou ika i rauka mai i taua pō ra. 4 Ē i te pōpongi metua ra, kua tū 'ua maira a Iēsū i ta'atai; kāre rā te au pipi i kite ē ko Iēsū tērā. 5 Kua ui maira a Iēsū ki a rātou, “E aku tamariki, 'e ika tā kōtou?” Kua pa'u atura rātou ki aia, “Kāre.” 6 Kua karanga maira aia ki a rātou, “Ka tuku i te kupenga ki te pae katau o te poti ē ka rauka tā kōtou.” Kua tuku atura rātou, ē kāre 'ua atura i maranga mai i a rātou i te kika ki roto i te poti nō te ma'ata o te ika. 7 Kua karanga atura taua pipi ra tei 'akaperepere'ia e Iēsū ra ki a Pētero, “Ko te 'Atu tērā!” I tō Simona Pētero 'akarongo'anga ē, “Ko te 'Atu tērā,” kua 'a'ao i'ora aia i tōna kāka'u, tāna i kiriti ana, ē kua rere atura ki roto i te tai. 8 Kua 'aere maira te au pipi nā runga i te poti ma te totō i te kupenga tei kī i te ika; kāre 'oki rātou i mamao mei uta mai, mei te toru 'ānere pa'a tapuae te mamao. 9 E tae maira rātou ki uta, kite atura rātou i tēta'i a'i ē te ika i runga, ē te varāoa 'oki. 10 Kua karanga maira a Iēsū ki a rātou, “Ka 'apai mai ana i ēta'i o te au ika tei rauka mai nei i a kōtou.” 11 'Aere atura a Simona Pētero ki runga i te poti, kika maira i te kupenga ki uta. Kua kī i te ika mama'ata: 'okota'i 'ānere ē rima nga'uru mā toru. Noa atu 'oki ē kua ma'ata roa te ika, kāre rā te kupenga i nga'ae. 12 Kua karanga maira a Iēsū ki a rātou ē, “'Aere mai e kai.” Ē kāre rava tēta'i pipi i tae i te ui atu ki aia ē, “Ko ai koe?” Kua nakiro 'oki rā rātou ē, ko te 'Atu ia. 13 Kua 'aere maira a Iēsū, rave i'ora i te varāoa e tuku maira ki a rātou ra, ē pērā katoa 'oki i te ika. 14 Ko te toru 'oki tēia i tō Iēsū 'akaāri'anga mai i aia 'ua'orāi ki te au pipi i muri ake i tōna tū'anga mai mei te mate maira.
Ko Iēsū rāua ko Pētero
15 E oti akera tā rātou kaikai'anga, kua ui maira a Iēsū ki a Simona Pētero, “E Simona, te tamaiti a Ioane ē, 'e ma'ata āinei tō'ou 'inangaro mai i āku i tō rātou?” Kua pa'u atura a Pētero ki aia, “Āe, e te 'Atu, kua kite koe ē, tē 'inangaro atu nei au i a koe.” Kua karanga maira a Iēsū ki aia, “Ka 'āngai i tāku au punua māmoe.” 16 Kua ui 'aka'ou maira a Iēsū ki aia, ko te tūrua 'oki tēia, “E Simona, te tamaiti a Ioane ē, tē 'inangaro mai āinei koe i āku?” Kua pa'u atura a Pētero ki aia, “Āe, e te 'Atu, kua kite koe ē, tē 'inangaro atu nei au i a koe.” Kua karanga maira a Iēsū ki aia, “Ka tiaki i tāku au māmoe.” 17 Kua ui 'aka'ou maira a Iēsū ki aia, ko te tūtoru 'oki ia, “E Simona, te tamaiti a Ioane ē, tē 'inangaro mai āinei koe i āku?” Kua auē i'ora a Pētero, nō te mea, ko te toru tēia o te ui'anga'ia mai ki aia ē, “Tē 'inangaro mai āinei koe i āku?” Kua pa'u atura aia ki a Iēsū, “E te 'Atu, kua nakiro koe i te au mea kātoatoa; kua nakiro rāi koe ē, tē 'inangaro atu nei au i a koe.” Kua karanga maira a Iēsū ki aia, “Ka 'āngai i tāku au māmoe. 18 Koia mou tāku e karanga atu ki a koe na, i tō'ou 'ōu'anga, kua tātua ana koe i a koe 'ua'orāi, ē kua 'ā'āere 'ua ana koe ki tā'au ngā'i i 'inangaro ra. Kia rua'ine rā koe, ka 'akatika koe i ō'ou rima, ē nā tēta'i kē e tāpeka i a koe, ē e 'apai atu ei i a koe ki te ngā'i 'inangarokore'ia e koe ra.” 19 I pērā a Iēsū i te tuatua'anga 'ei 'akaāri'anga atu i te tū o tō Pētero mate'anga te ka 'akakakā i te Atua. Ē i muri akera, kua tuatua maira a Iēsū ki aia, “Ka āru mai koe i āku.” Ko Iēsū ē te pipi 'akaperepere'ia 20 Kua anga atura a Pētero ki muri ē kite atura i taua pipi ra i te āru'anga mai, koia 'oki tei 'akaperepere'ia e Iēsū ra, ko tei no'o vaitata roa 'oki ki te pae o Iēsū i te kaingākai ra, ē ko tei ui atu ē, “E te 'Atu, ko 'ai te ka tuku pikika'a atu i a koe?” 21 I tō Pētero kite'anga atu i aia, kua ui atura aia ki a Iēsū, “E te 'Atu, ka 'akapē'ea tēia tangata?” 22 Kua pa'u maira a Iēsū ki aia, “Mei te mea ē, tē anoano nei au i te vao'o ora 'ua i aia kia tae 'ua mai au ra, 'e a'a tā'au i te reira? Ko koe rā, ka āru mai koe i āku!” 23 Tupu atura tēia rongo ra ki rotopū i te au taeake ra ē, kāre tēianei pipi e kite i te mate. Kāre rā a Iēsū i karanga ē, “Kāre aia e kite i te mate,” kua nā kō rā ē, “Mei te mea ē, tē anoano nei au i te vao'o ora 'ua i aia kia tae 'ua mai au ra, 'e a'a tā'au i te reira?” 24 Ko tēia 'oki taua pipi ra tei 'akakite i tēia au mea, ē ko tei tātā i tēia au mea nei. Kua kite 'oki mātou ē, 'e tuatua mou tikāi tāna 'akakite'anga.
Te 'akaoti'anga
25 'E mānganui 'ua atu rāi 'oki te au mea tā Iēsū i rave. Nāringa i 'ope kātoatoa i te tātā'ia, tē manako nei au ē, kāre e ō mai ki roto i te ao katoa nei te au puka te ka tātā'ia.