1 Pado mulone ade Firman; Firman'o besamo-samo ngen Allah ngen Firman'o adeba Allah. 2 Si padomulone besamo-samo Allah. 3 Kute sesuatau jenijai ngen Si coa gen Si coa ade suatu kulo de sudo jijai kunei kute de sudo jenijai. 4 Lem Si ade idup ngen idup'o adeba te'ang manusio. 5 Te'ang'o becahayo lem kelem ngen kelem'o coa nguasone. 6 Tekoba suang tun de nutus Allah, genne Yohanes. 7 Si teko sebagoi saksai utuk jijai saksai tetang te'ang'o, supayo liwet si kute tun jijai pecayo. 8 Si iso te'ang'o, tapi si harus jijai saksai tetang te'ang'o. 9 Te'ang de sesungguak'ne, de tem'ang tiep tun, dong teko lem dunio. 10 Firman bi ade neak lem dunio ngen dunio jenijai liwet Si, tapi dunio coa kemnal Si. 11 Si teko ngen temuan-Ne, tapi tun-tun temuan-Ne o coa temimo Si. 12 Tapi kute tun de temimo Si neleine kuaso supayo jijai anok-anok Allah, ade ba tobo'o de pecayo lem gen-Ne. 13 Tun-tun de laherne iso kunei daleak atau kunei kelok jasmani iso kulo ngen kelok suang semanei, seluyen kunei Allah. 14 Firman'o bi jijai manusio, ngen tinggea neak antaro ite, ngen ite bi kemliak kemulioan-Ne adeba kemulioan de nelei ngen Si sebagoi Anok tunggea Bapa, penuak anugrah ngen de benea. 15 Yohanes saksai tetang Si ngen menggang, nadeak-Ne: "Dioba Si, de uku maksud ketiko uku madeak: sesudo'o kunei uku bakea teko Si de sudo demute uku, sebab Si biade ayok Uku." 16 Kerno kunei kepenuhan-Ne ite kute bi tenimo anugrah demi anugrah. 17 Sebab Hukum Taurat nelei liwet Musa. Tapi anugrah ngen benea teko liwet Yesus Kristus. 18 Coa suang tun de perneak kemliak Allah; tapi anok Tunggea Allah, de ade neak das balung Bapa, Siba de madeak-Ne. 19 Dioba saksai Yohanes ketiko tun Yahudi kunei Yerusalem mutus kekedau imem ngen tun-tun Lewi ngen si utuk temanye si, "Api Ko?" 20 Yohanes ngakau ngen coa ngike, nadeakne, "Uku iso Rajo Penyelamat." 21 Lajau tobo'o betanye ngen si, "Amen awei'o api? Jano ko Elia?" Yohanes jemawab, "Iso!" Tobo'o betanye igai, "Jano Ko bakea nebai de bakea teko?" Si kulo jemawab, "Iso!" 22 Kerno'o nadeak tobo'o ngen Si, "Api ko? Sebab keme harus melei jawaban ngen tobo'o de mutus keme. Jano nadeaknu tetang dirainu suang?" 23 Yohanes jemawab, "Uku ba sa'ei tun de menggang neak benei libea: Neluusba dalen Tuhan! Awei de nadeak Nebai Yesaya." 24 Neak antaro tun-tun de nutus'o ade kekedau tun Farisi. 25 Tobo'o betanye ngen Yohanes, nadeakne, "Amen awei yo, getai Ko membaptis, amen Ko iso Rajo Penyelamat, iso Elia, ngen iso nebai de bakea teko?" 26 Yohanes jemawab tobo'o, "Uku membaptis ngen bioa. Tapi neak tengeak-tengeak udi je Si de coa udi namen. 27 Si de teko sesudo uku. Mukok tilai sepatu-Ne bae uku coa patas." 28 Hal'o tejijai neak Betania de neak dipoa Bioa Yordan, penan Yohanes membaptis. 29 Bilai menne Yohanes kemliak Yesus teko. Yohanes madeak, "Keliak ba Anok Bebirai Allah de mapus duso dunio. 30 Siba de uku maksud ketiko uku madeak: Sesudo'o bakea teko suang tun de sudo demute uku, sebab Si bi ade ayok Uku. 31 Uku suang bel'o coa namen Si, tapi utuk'o ba uku teko membaptis ngen bioa supayo Si nyato ngen Israel." 32 Sesudo'o Yohanes besaksai, nadeakne, "Uku bi kemliak Roh Allah tu'un, kunei lenget awei burung daro, ngen tinggea neak das-Ne. 33 Waktau'o kulo uku coa kemnal Si. Tapi Si, de nutus uku utuk membaptis ngen bioa, sudo berfirman ngen uku, 'Amen ko kemliak Roh'o tu'un moi das suang tun ngen tinggea neak das-Ne, Siba de bakea membaptis ngen Roh Sucai.' 34 Uku bi kemliak-Ne ngen melei saksai: Si yo ba Anok Allah." 35 Bilai menne Yohanes je neak di igai ngen duai tun penotoane. 36 Ketiko si kemliak Yesus liwet, si madeak, "Keliakba, do'o Anok Domba Allah!" 37 Keduai penotoa'o temi'uk jano de nadeak ne'o, lajau tobo'o temotoa Yesus. 38 Yesus kemliak moi belakang. Si kemliak, bahwo tobo'o temotoa Si lajau madeak ngen tobo'o. Yesus betanye "Jano de udi mesoa?" Jawab tobo'o, "Rabi (Tai ne: Gu'au), neak ipe Ko tinggea?" 39 Si madeak ngen tobo'o, "Maroba, ngen udi bakea kemliak ne." Tobo'o pulo teko ngen kemliak neak ipe Si tinggea. Bilai'o tobo'o tinggea besamo-samo ngen Si; waktau'o kiro-kiro jam pat. 40 Saleak suang kunei keduaine de temi'uk kecek Yohanes lajau temotoa Yesus adeba Andreas, pasuak Simon Petrus. 41 Andreas mulo-mulo magea Simon, pasuakne. Andreas madeak Simon, "Keme sudo temau Rajo Penyelamat." (Taine: Kristus.) 42 Andreas mbin Simon ngen Yesus. Yesus kemliak si ngen madeak, "Ko Simon, anok Yona Ko bakea nelei gen Kefas." (Kefas serai ngen Petrus, taine: tebo butau.) 43 Bilai menne Yesus mutus utuk berakat moi Galilea. Si temau ngen Filipus, ngen madeak ngen si, "Totoaba Uku!" 44 Filipus asalne kunei Betsaida, penan tinggea Andreas ngen Petrus. 45 Filipus magea Natanael ngen madeak ngen si, "Keme bi temau Si, de nadeak Musa ngen Kiteb Taurat ngen tobo nebai. Siba Yesus, anok Yusuf kunei Nazaret." 46 Nadeak Natanael ngen si, "Maso sesuatau de baik teko kunei Nazaret?" Nadeak Filipus ngen si, "Maro ngen keliak ba suang!" 47 Yesus kemliak Natanael teko ngen Si, lajau madeak tetang Si, "Keliak, dioba suang tun Israel sejati; coa ade kepalsuan lemne!" 48 Nadeak Natanael ngen Si, "Awei ipe Bapa kemnal uku?" Jawab Yesus ngen si, "Ayok Filipus manggea ko, Uku bi kemliak ko neak beak pun ara." 49 Nadeak Natanael ngen Si, "Rabi, Ko Anok Allah, Ko Rajo Tun Israel!" 50 Yesus madeak, "Jano kerno Uku madeak ngen udi: Uku kemliak ko neak beak pun ara, mako ko pecayo? Ko bakea kemliak hal-hal de lebiak lai kunei'o!" 51 Lajau nadeak Yesus ngen ne, "Uku madeak ngen ko, sesungguakne ko bakea kemliak lenget tukok ngen malaikat-malaikat Allah kenek tu'un ngen Anok Manusio."
1 Duai bilai sesudo'o ade de nikeak neak Kana de neak Galilea, ngen indok Yesus ade neak di. 2 Yesus ngen penotoa-penotoa-Ne nundang kulo neak penan nikeak'o. 3 Ketiko neak pesta'o ku'ang anggur, indok Yesus madeak ngen Yesus, "Tobo'o ku'ang anggur." 4 Madeak Yesus ngen indok ne, "Lok jano indok ngen Uku? Waktau Ku ati sapei." 5 Tapi indok Yesus madeak ngen pelayan-pelayan, "Jano de nadeak-Ne ngen udi, kenrejo ba do'o!" 6 Neak di ade num tong de sendio utuk mpuk penotoa adat tun Yahudi. Tiep tong'o si'ingne sotos liter. 7 Yesus madeak ngen pelayan-pelayan'o, "Si'ing ba tong-tong'o penuak ngen bioa." Tobo'o semi'ingne sapei penuak. 8 Lajau nadeak Yesus ngen tobo'o, "Uyo cidokba ngen mbin ba ngen pemipin pesta." Lajau tobo'o mbinne. 9 Pemipin pesta'o kemcep bioa de sudo bubeak jijai anggur'o. (Si coa namen kunei ipe tekone anggur'o tapi tobo pelayan-pelayan namen.) Pemipin pesta'o menok sematen, 10 ngen madeak ngen si, "Tiep tun midang anggur de baik dute ngen sesudo tun pues menem, baru de ku'ang baik. Tapi ko ma'ik anggur de baik sapei uyo!" 11 Hal'o nea Yesus neak Kana de neak Galilea, sebagoi de pertamo kunei. Mujizat-mujizat-Ne ngen'o bi melei bukti kemulioan-Ne. Penotoa-penotoa-Ne pecayo ngen-Si. 12 Sesudo'o Yesus lalau moi Kapernaum, besamo-samo ngen indok-Ne ngen pasuak-pasuak-Ne ngen panotoa-penotoa-Ne. Ngen tobo'o tinggea neak di kedau bilai bae. 13 Ketiko Bilai Rayo Paskah tun Yahudi bi pa'ok, Yesus berakat moi Yerusalem. 14 Neak latet Bait Allah kenliak-Ne pedagang-pedagang sapai, bebirai, burung daro, ngen tukang tukar caci temot neak di. 15 Yesus menea cambuk kunei tilai lajau musir kute benatang kunei Bait Allah baik sapai, bebirai. Mija-mija penan tukar caci genulekne. 16 Yesus madeak ngen pedagang-pedagang burung daro'o, "Mok kutene yo kunei piyo. Jibeak udi menea Umeak Bapa-Ku ijai penan jagea!" 17 Lajau tinget ba penotoa-penotoa-Ne, bahwo ade tetulis, "Cito Uku utuk umeak-Nu bakea mbem atei-Ku." 18 Tobo penguaso Yahudi temtang Yesus, nadeakne, "Tando jano de dapet udi temunjuk ngen keme, bahwo Ko berhok menea awei yo?" 19 Yesus jemawab, "Nubuakba Bait Sucai yo, ngen lem telau bilai Uku bakea temgokne igai!" 20 Lajau madeak tun Yahudi ngen Si, "Pat puluak enum taun tun temgok Bait Sucai yo. Ngen Ko dapet temgokne cuma lem telau bilai?" 21 Tapi de maksud-Ne ngen Bait Sucai adeba awok-Ne suang. 22 Kerno'o sesudo Si idup igai kunei antaro tun matei, penotoa-penotoa-Ne tinget bahwo hal'o de nadeak-Ne, ngen tobo'o kulo pecayo ngen Kiteb Sucai ngen kecek de sudo nadeak Yesus. 23 Sementaro Si neak Yerusalem selamo Bilai Rayo Paskah, dau tun pecayo lem gen-Ne, kerno tobo'o bi kemliak tando-tando mujizat de nadeak-Ne. 24 Tapi Yesus suang coa pecayo tobo'o, kerno Si kemnal kute tobo'o. 25 Coa perlu suang tun bersaksai ngen-Si tetang manusio, sebab Si namen jano de ade neak lem atei manusio.
1 Ade suang tun Farisi gen-Ne Nikodemus, suang pemipin agamo Yahudi. 2 Si teko pado waktau kelemen ngen Yesus ngen madeak, "Rabi, keme namen, bahwo Ko teko sebagoi gu'au de nutus Allah; sebab coa ade suang tun de dapet menea mujizat-mujizat de Ko nea'o, amen Allah coa semertonu." 3 Yesus jemawab, "Sesungguakne Uku madeak ngen udi amen suang tun coa laher igai, si coa dapet jijai anggota umat Allah." 4 Nadeak nikodemus, "Awei ipe mukin suang tun laher, amen si bi tuai? Jano dapet si masuk igai moi lem rahim indokne ngen laher igai?" 5 Jawab Yesus, "Sesungguakne Uku madeak ngen ko: amen suang tun coa laher kunei bioa ngen Roh, si coa dapet jijai anggota umat Allah. 6 Jano de laher seca'o jasmani sifetne jasmani, ngen jano de laher kunei Roh, sifetne rohani. 7 Jibeakba ko heran, kerno Uku madeak ngen ko, 'Ko harus laher igai.' 8 Ibut bertiup moi ipe si lok, ngen ko temi'uk saei ne. Tapi ite coa namen kunei ipe si teko ataumoi ipe si lalau. Awei'o ba halne ngen tiep-tiep tun de laher kunei Roh Allah." 9 Nikodemus madeak ngen-Si, "Awei ipe mukin hal'o tejijai?" 10 Jawab Yesus, "Ko gu'au tun Israel, maso ko coa ngertai hal-hal'o? 11 Sesungguakne Uku madeak ngen ko, keme miling tetang jano de keme namen ngen be saksai tetang jano de keme kemliak, tapi udi coa temimo saksai keme. 12 Udi coa pecayo, waktau Uku miling ngen udi tetang hal-hal duniawi, awei ipe udi bakea pecayo, amen Uku miling ngen udi tetang hal-hal sorgawi? 13 Coa ade suang tun de sudo kenek moi surgo seluyen Si de sudo tu'un kunei surgo, adeba Anok Manusia. 14 Serai awei Musa kemnek dung tembaga pado de pun kiyeu neak benei libea, awei yo kulo Anok Manusio harus nelkat, 15 supayo tiep tun de pecayo ngen Si coa benaso, meluyen dapet idup de kekal." 16 Kerno kembiak lai kasiak Allah bakea dunio yo, sehinggo Si bi melei karunio Anok-Ne de tunggea, supayo tiep tun de pecayo ngen-Si coa benaso, tapi dapet idup de kekal. 17 Sebab Allah mutus Anok-Ne moi lem dunio iso utuk makim dunio, tapi utuk semlamatne. 18 Api bae de pecayo ngen-Si, si coa bakea nukum. Api bae de coa pecayo, si bi ade neak hukuman, sebab si coa pecayo ngen Anok Tunggea Allah. 19 Dioba hukuman'o: Te'ang bi teko lem dunio, tapi manusio lebiak galok kelem kunei pado te'ang, sebab plep tobo'o kidek. 20 Sebab api bae de menea kidek, jengik te'ang ngen coa teko ngen te'ang'o, kunyau plepne de kidek'o coa keten. 21 Tapi api bae de menea de baik, Si teko ngen te'ang, kunyau jijai nyato bahwo plepne sesuoi ngen Allah. 22 Sesudo'o Yesus lalau ngen penotoa-penotoa-Ne moi taneak Yudea ngen Si tinggea neak di besamo-samo tobo'o ngen membaptis. 23 Tapi Yohanes kulo membaptis, kulo neak Ainon pa'ok Salim, sebab neak di dau bioa. Ngen tun-tun teko neak di utuk di baptis. 24 Sebab pado waktau'o Yohanes ati nasuk moi lem penjara. 25 Lajau timboa ba selisiak neak antaro penotoa-penotoa Yohanes ngen suang tun Yahudi tetang upacara semucai dirai. 26 Lajau tobo'o teko ngen Yohanes ngen madeak, "Rabi, tun de besamo-samo ngen Ko neak dipoa Bioa Yordan, uyo gidong membaptis. Ko kulo melei saksai tetang tun'o. Uyo kute tun teko ngen-Si." 27 Jawab Yohanes, "Coa ade suang tun de dapet mok sesuatau bagiak dirai ne, amen coa nlei karunia ngen si kunei surgo. 28 Udi suang dapet saksai, bahwo Uku bi madeak, 'Uku iso Rajo Penyelamat, tapi Uku nutus utuk demute-Ne.' 29 De temuan ngenyan selawei, adeba maten semanei; tapi kuat maten semanei, de je neak pa'ok Si ngen de temi'uk ne, kembiak riang temi'uk suaro maten semanei'o. Do'o ba keriang ku, ngen uyo keriang ku'o penuak. 30 Si harus tambeak lai, tapi uku harus tambeak titik." 31 Api de teko kunei das adeba neak das kutene; api de asalne kunei bumai, adeba kunei bumai ngen miling tetang hal-hal neak bumai. Api de teko kunei surgo ade ba neak das kutene. 32 Si saksai tetang jano de kemliak-Ne ngen de temi'uk-Ne, tapi coa suang tun de temimo saksai-Ne o. 33 Api de mimo saksai-Ne o, si ngakau bahwo Allah adeba benea. 34 Sebab api de nutus Allah, Siba de senapei Firman Allah, kerno Allah melei karunio Roh-Ne ngen ade batas. 35 Bapa kemasiak anok ngen bi semereak kute sesuatau ngen Si. 36 Api bae de pecayo ngen Anok, si dapet idup de kekal. Tapi api bae de coa taat ngen Anok si coa bakea kemliak idup, meluyen murko Allah tep tinggea neak dasne.
1 Yesus namen, bahwo tun-tun Farisi bi temi'uk, bahwo Si membaptis lebiak dau panotoa kunei pado Yohanes. ( 2 Kunyau Yesus suang coa membaptis, meluyen penotoa-penotoa-Ne.) 3 Si kulo teminggea Yudea ngen belek igai moi Galilea. 4 Si harus liwet daerah Samaria. 5 Lajau sapei ba Si neak do kota Samaria, genne Sikhar pa'ok taneak de nelei Yakub bel'o ngen anok ne, Yusuf. 6 Neak di ade sumua Yakub. Yesus kembiak litok kerno pemaneu, sebab'o Si temot neak biding sumua'o. Bilai kiro-kiro jam duai belas kebilai. 7 Lajau teko suang selawei Samaria lok nimbo bioa. Nadeak Yesus ngen si, "Keleiba Uku menem!" 8 Sebab penotoa-penotoa-Ne bi lalau moi kota mukua kembuk. 9 Nadeak selawei Samaria o ngen Si, "Maso ko, suang tun Yahudi, minoi bioa ngenku, suang tun Samaria?" (Sebab tun Yahudi coa bekuat ngen tun Samaria.) 10 Jawab Yesus ngen si, "Amen ko namen tetang karunio Allah ngen api Si de madeak ngen ko, 'Melei ba Uku menem!' Paset ko bi minoi ngen-Si ngen Si bi melei ngen ko bioa idup." 11 Nadeak selawei'o ngen Si, "Tuan, Ko coa temuan timbo ngen sumua yo kembiak lem; kunei ipe Ko dapet bioa idup'o? 12 Jano Ko lebiak lai kunei bapok leluhur keme Yakub, de melei sumua yo ngen keme ngen de sudo menem suang kunei lemne, si beserto anok-anokne ngen ternok ne?" 13 Jawab Yesus, "Api bae de menem bioa yo, si bakea haus igai, 14 Tapi api bae de menem bioa de bakea Uku melei, si coa bakea haus utuk seke'anne. Sebelekne bioa de bakea Uku melei, bakea jijai matai bioa neak lem dirai ne, de terus bae kemluea bioa sapei pado idup de kekal." 15 Nadeak selawei'o, "Tuan, neleiba uku bioa'o, supayo uku coa haus ngen coa teko igai miyo utuk tenimbo bioa." 16 Nadeak Yesus, "Lalau ba, menok ba sematennu ngen teko miyo." 17 Nadeak selawei'o, "uku coa temuan sematen." Madeak Yesus, "Tepat nadeaknu, bahwo ko coa temuan sematen. 18 Sebab ko bi temuan lemo sematen ngen de ade uyo ngenko, isoba sematenko. Lem hal yo ko bi madeak benea." 19 Nadeak selawei'o, "Tuan, nyato uyo ngen uku, bahwo ko suang nebai. 20 Ninik puyang keme sembeak neak das tebo yo, tapi ko madeak bahwo, Yerusalem ba penan tun nyembeak." 21 Nadeak Yesus, "Pecayoba ngen Uku, hoi indok, saatne bakea sapei, bahwo udi bakea nyembeak Bapa iso neak tebo yo ngen iso kulo neak Yerusalem. 22 Udi nyembeak jano de coa udi namen, keme nyembeak jano de keme namen, sebab keselamatan teko kunei bangso Yahudi. 23 Tapi saatne bakea teko ngen sudo sapei uyo, bahwo penyembeak-penyembeak benea; bakea menyembeak Bapa lem Roh ngen de benea; sebab Bapa mesoa tun-tun de nyembeak Si seca'o awei yo. 24 Allah'o Roh ngen api bae de nyembeak Si, harus nyembeak lem Roh ngen de benea." 25 Jawab selawei'o, "Uku namen, bahwo Rajo Penyelamat de senbut kulo Kristus, bakea teko. Amen Si teko, Si bakea meriteak kute sesuatau ngen keme." 26 Nadeak Yesus, "Ukuba Si, de gidong miling ngen ko." 27 Pado waktau'o teko penotoa-penotoa-Ne ngen tobo'o indeak, bahwo Si dong miling ngen suang selawei, tapi coa suang tun de betanye, "Jano de ko madeak ngen Si?" 28 Selawei'o teminggea emberne neak di lajau lalau moi kota ngen cemrito ngen tun-tun neak di, 29 "Maro, Keliakba tun de madeak ngen uku kute sesuatu de sudo uku menea. Mukin Si'o Kristus?" 30 Mako tun-tun'o lalau moi luea kota lajau teko ngen Yesus. 31 Sementaro penotoa-penotoa-Ne majok Si, nadeakne, "Rabi, mbukba!" 32 Tapi, Si madeak ngen tobo'o, "Ngen Uku ade kembuk de coa ko namen." 33 Kerno'o penotoa-penotoa'o madeak do ngen de luyenne, "Jano ade tun de ngembin sesuatau ngen Si utuk nembuk?" 34 Nadeak Yesus ngen tobo'o, "Kembuk-Ku adeba menea kelokne de mutus Uku ngen semelesei kerjo-Ne. 35 Udi madeak, 'Pat bulen igai sapei ba musim panen.' Tapi Uku madeak ngen udi, 'Keliak ba sekelilingnu ngen denong ba kebun-kebun de sudo nguning ngen mesok utuk panen.' 36 Uyo kulo tukang panen bi temimo upeakne ngen si melungguk buak utuk idup de kekal, sehinggo tukang tanem ngen tukang panen samo-samo riang. 37 Beneaba pribahasa yo, 'De do temanem ngen de luyen panen.' 38 Uku mutus udi utuk manen jano de coa udi usaho; tun-tun luyen berusaho ngen udi teko mopoa asea usaho tobo'o." 39 Dau tun Samaria kunei kuta pecayo ngen Si kerno selawei'o besaksai, "Si madeak ngen uku kute sesuatau de sudo uku menea." 40 Ketiko tun-tun Samaria o sapei ngen Yesus, tobo'o minoi ngen Si, supayo Si tinggea ngen tobo'o. Si kulo tinggea neak di duai bilai ke'anne. 41 Kerno kecek Ne, lebiak dau igai tun de pecayo. 42 Tobo'o madeak ngen selawei'o, "Keme pecayo, tapi iso igai kerno jano de ko nadeak, sebab keme suang bi temi'uk Si ngen keme namen, bahwo Siba benea-benea Juru Selamat dunio." 43 Sesudo duai bilai Yesus berakat kunei di moi Galilea, 44 sebab Yesus suang bi saksai bahwo, suang nebai coa tun mego neak negraine suang. 45 Sesudo Si sapei neak Galilea, tun-tun Galilea senambut Si, kerno tobo'o bi kemliak kute sesuatau de kenerjo-Ne neak Yerusalem pado pesta'o, sebab tobo'o suang milau moi pesta'o. 46 Sesudo'o Yesus belek igai moi Kana neak Galilea, neak ipe Si bel'o menea bioa jijai anggur. Neak Kapernaum ade suang pegawai istana, anok semaneine dong bolon. 47 Ketiko si temi'uk bahwo Yesus bi teko kunei Yudea moi Galilea, lalau ba si ngen Si lajau mino, supayo Si teko ngen kema'en anok ne, sebab anokne gesea matei. 48 Nadeak Yesus ngen si, "Amen udi coa kemliak tando ngen mujizat, udi coa pecayo." 49 Pegawai istana'o madeak ngen Si, "Tuan, tekoba ayok anok ku matei." 50 Nadeak Yesus ngen si, "Lalauba, anoknu idup!" Tun'o pecayo ngen kecek Yesus ngen si, lajau lalau. 51 Ketiko si masiak neak tengeak dalen pelayan-pelayanne bi teko ngen Si ngen bito, bahwo anokne idup. 52 Si betanye ngen tobo'o jam kedau anokne muloi ka'en. Jawab tobo'o, "Bilai lebeak jam satu dememne ka'en." 53 Bak'o kulo tinget, bahwo pado waktau'o ba Yesus madeak ngen si, "Anoknu idup." Lajau si ngen kute keluargone pecayo. 54 Do'oba tando keduai de nea Yesus ketiko Si belek kunei Yudea moi Galilea.
1 Sesudo'o ade bilai rayo tun Yahudi, ngen Yesus berakat moi Yerusalem. 2 Neak Yerusalem pa'ok Pintu Gerbang Bebirai ade do kulam, de lem bahaso Ibrani senbut ngen Betesda; ade lemo pematangne. 3 Neak pematang-pematang'o tegulek tun dau de bolon: tun-tun sutai, tun-tun ciket ngen tun-tun pakuak.Tobo'o mbot unyak bioa kulam'o. 4 Sebab sewaktau-waktau tu'un malaikat Tuhan moi kulam o ngen mengunyak bioa o; api bae de dute masuk moi lemne sesudo unyak bioa'o, jijai kaen, jano bae olonne . 5 Neak di ade suang tun de sudo telau puluak delapen taun ke'anne bolon. 6 Ketiko Yesus kemliak tun'o gulek neak di ngen kerno Si namen, bahwo bi'an lem keadaan o, madeak ba Si ngen si, "Ko lok ka'en?" 7 Jawab tun bolon o ngen Si, "Tuan, coa ade tun de mbin uku moi lem kulam o ketiko bioane muloi unyak, ngen sementaro uku lalau moi kulam o, tun luyen sudo tu'un lebiak dute." 8 Nadeak Yesus, "Kelongon ba, naket tikeanu ngen paneu ba." 9 Pado waktau o kulo ka'en ba tun o lajau si naket tikeane ngen paneu. Tapi bilai o bilai Sabat. 10 Kerno o tobo penguaso Yahudi madeak ngen tun de tembei ka'en o, "Bilai yo bilai Sabat ngen ko coa buliak maket tikeanu." 11 Tapi Si jemawab, "Tun de sudo kema'en uku, Si de madeak ngen uku: Naketba tikeanu ngen paneuba." 12 Tobo'o batanye ngen si, "Api tun o de madeak ngen udi: Naketba tikeanu ngen paneu ba?" 13 Tapi tun de tembei ka'en o coa namen api tun o, sebab Yesus sudo nyep neak tengeak-tengeak tun dau neak penan o. 14 Sesudo o Yesus temau ngen si lem Bait Allah lajau madeak ngen si, "Tinget udi bi ka'en. Jibeak menea duso igai, supayo jibeak terjijai de lebiak kidek igai ngen udi." 15 Tun o keluea, lajau cemrito ngen tobo penguaso Yahudi, bahwo Yesus ba de sudo kema'en si. 16 Kerno o, tobo penguaso Yahudi berusaho semaro Yesus, kerno Si menea hal-hal o pado bilai Sabat. 17 Tapi Si madeak ngen tobo'o, "Bapa-Ku kerjo sapei uyo, mako Uku kerjo kulo." 18 Sebab o tobo penguaso Yahudi tambeak berusaho utuk munuak Si, iso bae kerno Si melanggea peraturan Sabat, tapi pulo kerno Si madeak bahwo Allah adeba Bapa-Ne suang. Ngen awei yo si semrai dirai-Ne ngen Allah. 19 Mako Yesus jemawab tobo'o, nadeak-Ne, "Sesungguakne Uku madeak ngen udi, Anok coa dapet kemerjo sesuatau kunei dirai-Ne suang, amen Si coa dapet kemliak Bapa kemerjone. Sebab, jano de kenerjo Bapa, kenerjo Anok. 20 Sebab Bapa kemasiak Anok ngen Si temunjuk ngen Si kute sesuatau de kenerjo-Ne suang, bahkan Si bakea tenunjuk ngen Si kerjo de lebiak lai igai kunei kerjo o, sehinggo udi jijai sele. 21 Sebab serai awei Bapa midup igai tun-tun matei, awei yo kulo Anok midup igai api bae de kelok Ne. 22 Bapa coa mukum api bae, seluyen bi semereak ukuman o kutene ngen Anok, 23 supayo kute tun mego Anok awei tobo'o mego Bapa. Api bae coa mego Anok, si kulo coa mego Bapa, de mutus Si. 24 Sesungguakne Uku madeak ngen ko, 'Api bae bi temi'uk kecek Ku ngen pecayo ngen Si de mutus Uku, si temuan idup de kekal ngen coa milem nukum, sebab si sudo baliak kunei lem maut moi lem idup.' 25 Uku madeak ngen udi, 'Sesungguakne waktaune bakea sapei ngen sudo sapei, bahwo tun-tun matei bakea temi'uk sa'ei Anok Allah, ngen tobo'o de temi'ukne, bakea idup.' 26 Sebab serai awei Bapa temuan idup lem dirai-Ne suang, awei yo kulo nelei-Ne Anok temuan idup lem dirai-Ne suang. 27 Si bi melei kuaso ngen Si utuk mukum, kerno Si adeba Anok Manusio. 28 Jibeak ba udi sele ngen hal o, sebab waktaune bakea sapei, bahwo kute tun de neak lem kubua bakea temi'uk sa'ei-Ne. 29 Ngen tobo'o de menea baik bakea keluea ngen idup igai utuk idup de kekal. Tapi tobo'o de menea kidek bakea idup igai utuk nukum." 30 "Uku coa dapet menea jano bae kunei dirai-Ku suang. Uku mukum sesuoi ngen jano de Uku temi'uk. Ngen ukuman-Ku adea, sebab Uku coa temotoa kelok-Ku suang, seluyen kelok-Ne de mutus Uku. 31 Amen Uku besaksai tetang dirai-Ku suang, mako saksai-Ku coa benea. 32 Ade de luyen besaksai tetang Uku ngen Uku namen, bahwo saksai de nelei-Ne tetang Uku adeba benea. 33 Ko bi mbo utusan ngen Yohanes ngen si bi saksai tetang sebenea ne. 34 Tapi Uku coa perlu saksai kunei manusio, tapi Uku madeak hal yo, supayo udi selamat. 35 Yohanes adeba awei lapu de idup ngen becahayo ngen ko cuma lok midep seketiko bae cahayone o. 36 Tapi Uku temuan suatu saksai de lebiak peting kunei saksai Yohanes, adeba kute kerjo de senereak Bapa ngen Uku, supayo Uku kemerjo ne. Kerjo o kulo de kenerjo-Ku uyo, ngen do o ba de melei saksai tetang Uku, bahwo Bapa de mutus Uku. 37 Bapa de mutus Uku, Siba de sudo melei saksai tetang Uku. Ko coa perneak temi'uk sa'ei-Ne, rupe-Ne coa perneak udi kemliak. 38 Firman-Ne coa tetep neak lem dirainu, sebab ko coa pecayo ngen-Si de nutus-Ne. 39 Udi semlidik Kiteb Sucai, sebab udi sako bahwo neak lem-Ne udi temau idup de kekal. Tapi kunyau Kiteb Sucai o melei saksai tetang Uku. 40 Ko coa lok teko ngen Uku utuk dapet idup o. 41 Uku coa perlu nujai kunei manusio. 42 Tapi tetang udi, memang Uku namen neak lem ateinu udi coa temuan kasiak te'adep Allah. 43 Uku teko lem gen Bapa-Ku ngen udi coa temimo Uku. Amen tun luyen teko das genne suang, udi bakea temimo si. 44 Awei ipe ko dapet pecayo, amen udi de temimo hormat suang tun kunei de luyen, ngen coa mesoa hormat de teko kunei Allah de Esa? 45 Jibeak udi sako bahwo Uku bakea mukum udi neak adep Bapa. De mukum udi adeba Musa, ngen si ko mpek harapan. 46 Amen udi pecayo ngen Musa, tau udi bakea pecayo kulo ngen Uku, sebab si bi sudo temulis tetang Uku. 47 Tapi amen udi coa pecayo ngen jano de tenulisne, awei ipe udi bakea pecayo ngen jano de Uku madeak?"
1 Sesudo o Yesus berakat moi dipoa Daneu Galilea, de senbut kulo Daneu Tiberias. 2 Tun dau beroron temotoa Si, kerno tobo'o kemliak mujizat-mujizat de neane te'adep tun-tun bolon. 3 Lajau Yesus kenek moi das tebo ngen temot neak di ngen penotoa-penotoa-Ne. 4 Ngen Paskah, bilai rayo tun Yahudi, bi pa'ok. 5 Ketiko Yesus demnong sekeliling Ne, ngen kemliak bahwo tun dau beroron teko ngen Si, madeak ba Si ngen Filipus, "Neak ipe ite dapet mukua kembuk, supayo tobo'o dapet mukmei?" 6 Hal'o de nadeak-Ne utuk cenubo Filipus, sebab Si suang namen jano de lok nea-Ne. 7 Jawab Filipus, "Ruti gone duai otos dinar coa bakea cukup utuk tobo'o, debat bae masing-masing dapet degit." 8 Saleak suang kunei panotoa-penotoa-Ne adeba Andreas, pasuak Simon Petrus, madeak ngen-Si, 9 "Neak yo ade suang anok, de temuan lemo ruti jelai ngen duai kan. Tapi jano taine o utuk tun de kembiak dau yo?" 10 Nadeak Yesus, "Meluakba tun-tun o temot." Ade kulo neak penan o dau dukut. Lajau temot ba tun-tun o, kiro-kiro lemo ribau semanei kedaune. 11 Lajau Yesus mok ruti o, mucep syukur ngen magiakne ngen tobo'o de temot neak di, awei o kulo nea-Ne ngen kan-kan o, kekedau de tobo'o kelok. 12 Sesudo tobo'o mbuk sapei kenyang, Si madeak ngen penotoa-penotoa-Ne, "Lungguk ba ti'eak-ti'eak de blebiak supayo coa ade de tekuang." 13 Tobo'o melungguk ne, ngen semi'ing duai belas bokoa penuak ti'eak-ti'eak ruti sesudo nembuk tun dau. 14 Ketiko tun tun o kemliak tando mukzijat de sudo nea Ne, tobo'o madeak, "Si yo benea-benea nebai de bakea teko moi lem dunio." 15 Kerno Yesus namen, bahwo tobo'o lok teko ngen lok mbin Si ngen pakso utuk jemijai Si Rajo, Si nyikir igai moi tebo, suang dirai. 16 Ketiko bilai muloi kelemen, penotoa-penotoa Yesus lalau moi daneu, lajau kenek moi biduk. 17 Ngen nyebe'ang moi Kapernaum. Bilai sudo kelem Yesus ati kulo teko temau tobo'o. 18 Sementaro'o laut begelumbang kerno tiupan ibut de'es. 19 Sesudo tobo'o kemayuak kiro-kiro lemo ngen enum kilo meter uak ne, tobo'o kemliak Yesus paneu neak bioa magea biduk o. Mako tobo'o saben. 20 Tapi Yesus madeak ngen tobo'o, "Dio ba Uku, jibeak saben!" 21 Tobo'o lok kemnek Si moi lem biduk, ngen seketiko o kulo biduk o sapei neak patai de tobo'o tenujau. 22 Pado menne tun dau, de masiak tinggea neak dipoa, kemliak bahwo neak di coa ade biduk seluyen de do nano ngen bahwo Yesus coa milau kemnek moi biduk o besamo-samo ngen panotoa-penotoa-Ne, ngen bahwo penotoa-penotoa-Ne bae de berakat. 23 Sementaro o kekedau biduk luyen teko kunei Tiberias pa'ok moi penan tobo'o mbuk ruti, sesudo Tuhan mucep syukur dasne. 24 Ketiko tun dau kemliak, bahwo Yesus coa ade neak di ngen penotoa-penotoa-Ne kulo coa, tobo'o kenek moi biduk-biduk o lajau berakat moi Kapernaum utuk mesoa Yesus. 25 Ketiko tun dau temau Yesus neak dipoa laut o, tobo'o madeak ngen Yesus, "Rabi, tengen Ko sapei neak yo?" 26 Yesus jemawab, "Sesungguakne Uku madeak ngen udi, udi mesoa Uku iso kerno udi bi kemliak mujizat-mujizat, tapi kerno ko bi mbuk ruti o sapei kenyang. 27 Bekerjoba, iso utuk kembuk de dapet benaso, tapi utuk kembuk de beta'en sapei ngen idup de kekal, de bakea nelei Anok Manusio ngen udi; sebab Siba de sudo nsah ngen Allah Bapa." 28 Lajau nadeak tobo'o ngen-Si, "Jano de harus keme menea, supayo keme kemerjo kerjo-kerjo de kenlok Allah?" 29 Jawab Yesus, "Dioba kerjo de kenlok Allah, adeba lok ba udi pecayo ngen-Si de sudo nutus Allah." 30 Tobo'o madeak ngen-Si, "Tando jano de Ko menea, supayo keme dapet kemliakne ngen pecayo ngen Ko? Jano de Ko kenerjo? 31 Ninik puyang keme bi sudo mbuk manna neak Benei Libea, awei ade tetulis: Tobo'o neleine mbuk ruti kunei surgo." 32 Lajau nadeak Yesus ngen tobo'o, "Sesungguakne Uku madeak ngen udi, iso Musa, seluyen Bapa-Ku de melei udi ruti kunei surgo ngen ko. 33 Kerno ruti de kunei Allah ade ba ruti de tu'un kunei surgo ngen de melei idup ngen dunio." 34 Mako nadeak tobo'o ngen Si, "Tuan, keleiba keme ruti o terus." 35 Nadeak Yesus ngen tobo'o, "Ukuba ruti de melei idup; api bae de teko ngen Uku, si coa bakea perneak nyemen igai, ngen api bae de pecayo ngen Uku, si coa bakea perneak haus igai. 36 Tapi Uku bi madeak ngen udi: sesungguakne udi bi kemliak Uku, tapi udi coa pecayo. 37 Kute de bi melei Bapa ngen Uku bakea teko ngen Uku, ngen api bae de teko ngen Uku, si coa bakea Uku muang. 38 Sebab Uku bi tu'un kunei surgo iso utuk menea kelok-Ku, seluyen kelok Si de sudo mutus Uku. 39 Dioba kelok Si de sudo mutus Uku: adeba supayo kunai kute de sudo neleine ngen Uku jibeak ade de nyep, tapi supayo Uku midup igai pado Bilai Kiamat. 40 Sebab dioba kelok Bapa-Ku: Adeba supayo tiep tun de kemliak Anok ngen de pecayo ngen-Si dapet idup de kekal, ngen supayo Uku midup igai pado Bilai Kiamat." 41 Lajau ngerunyam ba tun Yahudi tetang Si, kerno Si bi madeak, "Ukuba ruti de sudo tu'un kunei surgo." 42 Nadeak tobo'o, "Iso Si yo Yesus, Anok Yusuf. Indok bak-Ne ite namen? Awei ipe Si dapet madeak: Uku bi tu'un kunei surgo?" 43 Jawab Yesus, "Jibeak udi gerunyam. 44 Coa ade suang tun de dapet teko ngen Uku, amen si coa tenarik Bapa de mutus Uku, ngen si bakea Uku midup igai pado Bilai Kiamat. 45 Ade tetulis lem Kiteb Nebai-nebai: Tobo'o kute bakea najea ngen Allah. Ngen tiep tun, de sudo temi'uk ngen belajea kunei Bapa, teko ngen Uku. 46 Hal'o coa berartai, bahwo ade tun de sudo kemliak Bapa. Cuma Si de teko kunei Allah, Siba de sudo kemliak Bapa. 47 Uku madeak ngen udi: Sesungguakne api bae de pecayo, si temuan idup de kekal. 48 Ukuba ruti idup. 49 Ninik puyangnu bi mbuk manna neak benea libea ngen tobo'o de bi matei. 50 Dio ba ruti de tu'un kunei surgo: Api bae de mbuk kunei ne, si coa bakea matei. 51 Uku ba ruti de melei idup de sudo tu'un kunei surgo. Amen suang tun mbuk ruti yo, si bakea idup seka'en ne, ngen ruti de bakea Uku melei o adeba daging-Ku, de bakea uku melei utuk idup dunio." 52 Tun-tun Yahudi kulo betekea antaro sesamo tobo'o ngen madeak, "Awei ipe Si yo dapet melei dagingne ngen ite utuk nembuk." 53 Mako nadeak Yesus ngen tobo'o, "Uku nadeak ngen udi, sesungguakne amen udi coa mbuk daging Anok Manusio ngen menem daleak-Ne, udi coa temuan idup neak lem dirainu. 54 Api de mbuk daging-Ku ngen mbuk daleak Ku, si temuan idup de kekal ngen Uku bakea midupne pado Bilai Kiamat. 55 Sebab daging-Ku adeba benea-benea kembuk ngen daleak-Ku adeba benea-benea menem. 56 Tun de mbuk daging-Ku ngen menem daleak-Ku, tep jijai do ngen Uku, ngen Uku ngen si. 57 Bapa de idup o, mutus Uku ngen Uku kulo idup kunei Bapa. Awei o kulo tun de mbuk daging-Ku bakea idup kunei Uku. 58 Dioba ruti de tu'un kunei surgo: iso ruti awei de nembuk ninik puyangnu. Kerno sesudo mbuk ruti o, tobo'o matei kulo. Tapi tun de mbuk ruti yo bakea idup selamo-lamone." 59 Kutene yo nadeak Yesus neak Kapernaum ketiko Si majea neak Umeak Semyang. 60 Sesudo'o temi'uk kutene o dau kunei penotoa-penotoa Yesus de madeak, "Ajaran yo kembiak saro, api de sanggup temi'ukne?" 61 Yesus de neak lem atei-Ne namen bahwo penotoa-penotoa-Ne ngerunyam tetang hal o, nadeak ngen tobo'o, "Jano ajaran-ajaran o seminggung ko? 62 Awei ipe amen udi kemliak Anok Manusio kenek moi penan neak ipe Si ayokne ade?" 63 Roh Allah de melei idup, daging samo sekilai coa beguno. Kecek-kecek de Uku madeak ngen udi adeba roh ngen idup. 64 Tapi neak antaro udi ade de coa pecayo." (Sebab Yesus namen kunei semulo, api de coa pecayo ngen api de bakea semreak Si.) 65 Lajau Si madeak, "Sebab o bi Uku madeak ngen udi: coa ade suang kulo de dapet teko ngen Uku, amen Bapa coa melei karunione ngen si." 66 Muloi saat o dau penotoa-Ne mondor dirai ngen coa igai temotoa Si 67 Lajau nadeak Yesus ngen keduai belas penotoa-Ne, "Jano udi coa lok lalau kulo?" 68 Jawab Simon Petrus ngen-Si, "Tuhan, ngen api keme bakea lalau? Kecek-Nu adeba kecek idup de kekal. 69 Ngen keme bi pecayo ngen namen bahwo Ko ba de sucai kunei Allah." 70 Jawab Yesus ngen tobo'o, "Uku suang de sudo miliak udi de duai belas yo. Tapi suang neak antaro udi adeba Iblis." 71 De Yesus maksud adeba Yudas anok Simon Iskariot. Sebab siba de bakea semreak Yesus, kunyau Yudas adeba suang neak antaro keduai belas penotoa o.
1 Sesudo'o Yesus paneu keliling Galilea, sebab Si coa lok tep tinggea neak Yudea, kerno neak yo tun-tun Yahudi berusaho utuk munuak-Ne. 2 Waktau o sudo pa'ok Bilai Rayo tun Yahudi, adeba Bilai Rayo Pondok Dawen. 3 Lajau madeak pasuak-pasuak Yesus ngen-Si, "Berakatba kunei yo ngen lalau moi Yudea, supayo penotoa-penotoa-Nu kulo kemliak plep de Ko menea. 4 Sebab coa suang tun menea sesuaktau neak penan tebunyin, amen si lok ngakau neak muko umum. Amen Ko menea hal-hal de awei yo, kentenba dirai-Nu ngen dunio." ( 5 Sebab pasuak-pasuak-Ne suang coa pecayo ngen-Si.) 6 Lajau jawab Yesus ngen tobo'o, "Waktau Uku ati sapei, tapi bagiak ko bogoa ade waktau. 7 Dunio coa dapet jengik ngen udi, tapi si jengik Uku, sebab Uku saksai tetang si bahwo kerjo-kerjone kidek. 8 Lalauba udi moi pesta o. Uku coa lalau moi mindi, kerno waktau Uku ati sapei." 9 Awei yo ba nadeak-Ne ngen tobo'o, ngen Si kulo tinggea neak Galilea. 10 Sesudo pasuak-pasuak-Ne lalau moi pesta o, Si kulo lalau moi mindi, seca'o dediem ngen coa ade tun de namen. 11 Tobo penguaso Yahudi mesoa Si neak pesta o ngen madeak, "Neak ipe Si?" 12 Neak antaro tun dau teti'uk dau bisik tetang Si. Ade de madeak, "Si tun baik." Tapi ade kulo de madeak, "Coa! Si jemijai tun dau limau." 13 Coa suang kulo de binai madeak seca'o tete'ang tetang Si kerno saben te'adep tobo penguaso Yahudi. 14 Tengeak-tengeak pesta, Yesus masuk moi lem Umeak Tuhan, lajau muloi majea. 15 Tobo penguaso Yahudi meding selle ngen madeak, "Awei ipe tun yo temuan pengetahuan awei yo ngen coa belajea?" 16 Jawab Yesus, "Ajaran-Ku coa be'asal kunei dirai-Ku suang, tapi kunei si de bi mutus Uku. 17 Api bae lok menea kelok-Ne, si bakea namen jano Ajaran-Ku yo berasal kunei Allah, jano Uku madeak kunei dirai-Ku suang. 18 Api bae gi madeak kunei diraine suang, Si mesoa hormat bagiak dirai-Ne suang. Tapi api bae de mesoa hormat bagiak si de mutusne, si benea ngen coa ade de coa benea ngen Si. 19 Musa de bi melei ukum agamo Yahudi ngen ko? Tapi coa suang tun neak antaro udi de menea ukum agamo Yahudi o. Getai udi berusaho munuak Uku?" 20 Tun dau o jemawab, "Ko pasuk semat! Api de berusaho munuak Ko?" 21 Jawab Yesus, "Cuma do plep de Uku menea, udi kute bi selle. 22 Jijai, Musa temtep supayo udi sunat -- sebeneane sunat o iso kunei Musa, tapi kunei ninik puyang ite ngen ko semunat tun pado bilai Sabat! 23 Amen suang tun temimo sunat pado bilai Sabat, supayo ukum Musa jibeak nelanggea, getai udi mengiak ngen Uku, kerno Uku kema'en kute awok suang tun pado bilai Sabat. 24 Jibeakba mukum temurut jano de keten, tapi mukum ba ngen adea." 25 Sesudo'o kekedau tun Yerusalem madeak, "Iso dio tun de nesoa utuk nunuak? 26 Tapi keliakba, Si miling leluaso, ngen tobo'o coa madeak jejano ngen-Si. Mukin pemipin ite benea-benea bi namen bahwo Si adeba Kristus Rajo Penyelamat? 27 Tapi tetang tun yo ite namen kunei ipe asal-Ne, sebelekne tengen Kristus teko, coa ade suang tun de namen kunei ipe asal-Ne." 28 Waktau Yesus ngajea neak Bait Allah, Si menggang, "Memang Uku udi namen ngen udi namen kunei ipe asal-Ku; tapi Uku teko iso das kelok-Ku suang, tapi Uku nutus ngen Si de benea de coa udi namen. 29 Uku namen Si, sebab Uku teko kunei Si, ngen Siba de mutus Uku." 30 Tobo'o berusaho temakep Si, tapi coa ade suang tun de binai gemindoa Si, sebab waktaune ati sapei. 31 Tapi neak antaro tun dau o ade dau de pecayo ngen-Si ngen tobo'o madeak, "Amen Kristus teko, mukin Si bakea menea lebiak dau tando mujizat kunei de sudo nea-Ne yo?" 32 Tun-tun Farisi temi'uk tun dau misik hal-hal o tetang Si, ngen kerno o imem-imem kepalo ngen tun-tun Farisi meluak tukang jago Bait Allah utuk temakep-Ne. 33 Lajau padeak Yesus, "Tinggea didik waktaune Uku ade sesamo udi ngen sesudo'o Uku bakea lalau ngen Si de sudo mutus Uku. 34 Udi bakea mesoa Uku, tapi coa bakea temau Uku; sebab udi coa dapet teko moi penan neak ipe Uku berade." 35 Kerno o, tobo penguaso Yahudi o madeak suang tun ngen de luyen ne, "Moi ipe Si bakea lalau, sehinggo ite coa dapet temau ngen Si? Jano si be niat lok lalau ngen tun-tun Yahudi de tinggea neak ratau, neak antaro tun Yunani, utuk majea tun Yunani? 36 Jano tai kecek de nadeak-Ne yo: Udi bakea mesoa Uku, tapi udi coa bakea temau Uku, ngen: Udi coa dapet teko moi penan neak ipe Uku berade?" 37 Pado bilai akhir kunei perayaan'o, adeba bilai de paling peting, Yesus je neak Umeak Tuhan ngen menggang, "Api bae de aus, lok ba si teko ngen Uku ngen menem! 38 Api bae de pecayo ngen Uku, awei de nadeak ngen Kiteb Sucai, 'Kunei lem ateine bakea ngalua aliran-aliran bioa idup.' " ( 39 De taine adeba Roh de bakea tenimo ngen tobo'o de pecayo ngen Si; kerno Yesus ati mulio.) 40 Kekedau tun neak antaro dau tun, de temi'uk kecek-kecek o, madeak, "Si yo benea-benea nebai de bakea teko." 41 De luyen madeak, "Si yo Rajo Penyelamat."Tapi de luyen igai madeak, "Iso, Rajo Penyelamat coa teko kunei Galilea! 42 Iso kiteb Sucai madeak, bahwo Rajo Penyelamat berasal kunei royot Daud ngen kunei sadei Betlehem, penan Daud bel'o tinggea?" 43 Lajau timboa ba belawen neak antaro tun dau kerno Si. 44 Kekedau tun neak antaro tobo'o lok temakep Si, tapi coa ade suang tun de binai gemindoa-Ne. 45 Sesudo penjago-penjago o belek ngen imem-imem kepalo ngen tun-tun Farisi, de madeak ngen tobo'o, "Getai udi coa mbin-Ne?" 46 Jawab penjago-penjago o, "Ati perneak suang kulo madeak awei tun o!" 47 Lajau jawab tun-tun Farisi o ngen tobo'o, "Jano udi kulo limau? 48 Ade coa suang tun neak antatro pemipin-pemipin de pecayo ngen Si, jano suang neak antaro tun-tun Farisi? 49 Tapi tun dau yo de coa kemnal ukum agamo Yahudi, tekutukba tobo'o!" 50 Nikodemus, suang kunei tobo'o, de bel'o teko ngen Si, madeak ngen tobo'o, 51 "Temurut ukum, suang tun coa buliak nukum ayok pekarone teni'uk ngen ayok tun namen jano de sudo nea-Ne?" 52 Jawab tobo'o, "Jano ko kulo tun Galilea? Senlidikba Kiteb Sucai ngen bakea namen bahwo coa ade nebai de teko kunei Galilea." 53 Lajau tobo'o belek moi umeakne sesuang.
1 Tapi Yesus lalau moi Tebo Zaitun. 2 Pepueng nien Si ade igai neak Umeak Tuhan, ngen kute rakyat teko ngen-Ne. Si temot ngen ngajea tobo'o. 3 Lajau gu'au-gu'au agamo ngen tun-tun Farisi mbin ngen-Si suang selawei de gidong menea zinah. 4 Tobo'o mpek selawei o neak tengeak-tengeak lajau madeak ngen Yesus, "Rabi, selawei yo tetakep waktau si gidong menea zinah. 5 Musa lem ukum agamo Yahudi meriteak ite utuk meluk selawei-selawei de awei yo ngen butau. Awei ipe pedapet-Nu tetang hal o?" 6 Tobo'o madeak hal o utuk cemubo Si, supayo tobo'o dapet sesuaktau utuk semaleak-Ne.Lajau Yesus mukuk awok-Ne lajau nulis ngen jiai-Ne neak pitok. 7 Waktau tobo'o bogoa betanye ngen Si, Si kulo je lajau madeak ngen tobo'o, "Api bae neak antaro udi coa beduso, kelokba si de deno melluk butau ngen selawei o." 8 Lajau Si mukuk awokne igai ngen nulis neak pitok. 9 Tapi sesudo tobo'o temi'uk kecek o, lalauba tobo'o sesuang, muloi kunei de tuai. Akherne tinggea ba Yesus suang dirai ngen selawei o de tep neak penanne. 10 Lajau Yesus je ngen madeak ngen si, "Hoi selawei, neak ipe tobo'o?Coa ade suang tun de mukum ko?" 11 Jawabne, "Coa ade, Tuhan." Lajau nadeak Yesus, "Uku kulo coa mukum ko, jibeak menea duso igai muloi kunei uyo." 12 Yesus madeak igai ngen tobo'o, "Uku ba te'ang dunio. Api bae de temotoa Uku, si coa bakea paneu lem kelem, tapi si bakea temuan te'ang dunio." 13 Lajau nadeak tun-tun Farisi ngen Si, "Ko besaksai tetang dirai-Nu, Ko besaksai coa benea." 14 Jawab Yesus, "Uku besaksai tetang dirai-Ku suang, tapi saksai-Ku o benea, sebab Uku namen, kunei ipe Uku teko ngen moi ipe Uku lalau. Udi coa namen kunei ipe Uku teko ngen moi ipe Uku lalau. 15 Udi mukum temurut ukuran manusio, Uku coa mukum suang tun. 16 Ngen kunyau Uku mukum, ukuman-Ku o benea, sebab Uku coa suang dirai, tapi Uku sesamo ngen Bapa de mutus Uku. 17 Lem kiteb agamo tun Yahudi ade tetulis bahwo saksai duai tun adeba sah. 18 Uku ba de besaksai tetang dirai-Ku suang ngen kulo Bapa, de mutus Uku, besaksai tetang Uku." 19 Lajau nadeak tobo'o ngen Si, "Neak ipe Bapa-Nu?" Jawab Yesus, "Baik Uku jano Bapa-Ku coa udi namen. Sekirone udi namen Uku, udi namen kulo Bapa-Ku." 20 Kecek-kecek o de nadeak Yesus pa'ok kutak-kutak caci, waktau Si majea neak lem Umeak Tuhan. Tapi Coa suang tun de temakep Si, kerno waktaune ati sapei. 21 Lajau Yesus madeak igai ngen tobo'o, "Uku bakea lalau, ngen udi mesoa Uku tapi udi bakea matei lem dusonu. Moi penan Uku lalau, coa mukin udi teko." 22 Kerno o padeak tobo penguaso Yahudi o, "Jano si lok beladeu mako de nadeak-Ne: 'Moi penan uku lalau, coa mukin udi teko?' " 23 Lajau si madeak ngen tobo'o, "Udi berasal kunei beak, Uku kunei das. Udi kunei dunio yo; Uku iso kunei dunio yo. 24 Kerno o nano Uku madeak ngen udi, bahwo udi bakea matei lem dusonu. Sebab amen udi coa pecayo bahwo 'Uku ba Si, udi bakea matei lem dusonu'." 25 Lajau padeak tobo'o ngen-Si, "Api Ko?" Jawab Yesus ngen tobo'o, "Jano de sudo Uku madeak ngen udi kunei ke'an yo? 26 Dau de arus Uku madeak ngen Kumakim tetang udi. Tapi Si de mutus Uku, adeba benea. Ngen jano de Kutemi'uk kunei Si, do'o ba de Uku madeak ngen dunio." 27 Tobo'o coa ngertai bahwo Si miling ngen tobo'o tetang Bapa. 28 Mako padeak Yesus, "Amen udi bi melekat Anok Manusio, tembei ba udi namen bahwo, 'Uku ba Si, bahwo Uku coa menea jejano kunei dirai-Ku suang, tapi Uku miling tetang hal-hal, Uku madeak jano de majea Bapa ngen Uku.' 29 Si, de sudo mutus Uku, semerto Uku. Si coa perneak teminggea Uku suang, sebab Uku bogoa menea jano de semnang atei-Ne." 30 Sesudo Yesus madeak kutene o, dau tun-tun Yahudi de sudo pecayo ngen Si. 31 Lajau padeak-Ne ngen tun-tun Yahudi de sudo pecayo ngen Si, "Amen udi idup temurut Firman-Ku, udi benea-benea penotoa-Ku. 32 Ngen udi bakea namen kebenea ngen kebenea o bakea mbebas udi." 33 Jawab tobo'o, "Keme adeba royot Abraham ngen coa perneak jijai pelayan api bae. Awei Ko dapet madeak: 'Udi bakea mbebas'?" 34 Padeak Yesus ngen tobo'o, "Sesungguakne Uku madeak ngen udi, tiep tun de menea duso, adeba hamba duso. 35 Hamba coa temuan penan lem umeak seke'anne. 36 Jijai, amen Anok o mbebas udi, udi kulo benea-benea mbebas." 37 Uku namen bahwo udi adeba royot Abraham, tapi udi berusaho munuak Uku kerno Firman-Ku coa dapet penan neak lem udi. 38 Jano de Uku kemliak ngen Bapa-Ku, do'o ba de Uku madeak. Awei o kulo udi menea tetang jano de udi temi'uk kunei Bapa-Nu." 39 Jawab tobo'o ngen Si, "Bak keme adeba Abraham." Padeak Yesus ngen tobo'o, "Amen sekirone udi anok-anok Abraham, udi kemerjo de kenerjo Abraham. 40 Tapi uyo udi berusaho munuak Uku, suang tun de madeak de benea ngen udi, adeba de benea Uku temi'uk kunei Allah; kerjo de awei yo coa kenerjo ngen Abraham. 41 Udi kemerjo kerjo baknu suang." Jawab tobo'o, "Keme coa laher kunei nga'em. Bak keme do, adeba Allah." 42 Nadeak Yesus ngen tobo'o, "Amen Allah adeba Baknu, udi bakea kemasiak Uku. Sebab Uku teko kunei Allah ngen uyo uku ade neak yo. Uku coa teko ngen kelok-Ku suang, tapi Siba mutus Uku. 43 Jano sebabne udi coa ngertai bahaso-Ku?Sebab udi coa dapet temakep firman-Ku. 44 Udi berasal kunei baknu, adeba Iblis, ngen udi lok menea kenlok baknu. Si adeba tukang munuak manusio kunei ke'an yo ngen coa idup lem de kebenea, kerno neak lemne coa ade kebenea. Amen si miling coa benea, si miling kunei diraine suang. Sebab si adeba tukang ngike ngen bak tukang ngike. 45 Tapi kerno Uku madeak de benea ngen udi, udi coa pecayo ngen Uku. 46 Api neak antaro udi de melei bukti bahwo Uku menea duso? Amen Uku madeak de benea, getai udi coa pecayo ngen Uku? 47 Api bae berasal kunei Allah, si temi'uk firman Allah. Do'o ba sebabne udi coa temi'ukne, kerno udi coa berasal kunei Allah." 48 Tobo penguaso Yahudi jemawab Yesus, "Jano ba benea amen keme madeak bahwo Ko tun Samaria ngen pasuk semat?" 49 Jawab Yesus, "Uku coa pasuk semat. Tapi Uku mego Bapa-Ku ngen udi coa mego Uku. 50 Uku coa mesoa hormat bagiak-Ku. Ade do de mesoane ngen Si kulo de mukum. 51 Sesungguakne Uku madeak ngen udi: Api bae temotoa firman-Ku, si coa bakea meding maut sapei keke'anne." 52 Nadeak tun-tun Yahudi ngen Si, "Uyo keme namen bahwo Ko pasuk semat. Sebab Abraham sudo matei ngen awei yo kulo nebai-nebai. Tapi Ko madeak, 'Api bae de temotoa firman-Ku, si coa bakea meding maut sapei keke'anne.' 53 Jano Ko lebiak lai kunei bak ite Abraham, de sudo matei, nebai-nebai kulo bi matei ngen api Ko semrai dirai-Nu?" 54 Jawab Yesus, "Amen Uku de mulio dirai-Ku suang, mako kemulio-Ku o didik kulo coa gen taine. Bapa-Ku ba de mulio Uku, tetang api udi madeak: Si adeba Allah keme, 55 pado hal udi coa kemnal Si. Tapi Uku kemnal Si. Amen Uku madeak: Uku coa kemnal Si, mako Uku adeba tukang ngike, serai awei udi, tapi Uku kemnal Si ngen Uku temotoa firman-Ne. 56 Abraham baknu beriang bahwo si bakea kemliak bilai-Ku ngen si bi kemliakne ngen si besukocito." 57 Lajau nadeak tobo penguaso Yahudi o ngen Si, "Omor-Nu ati lemo puluak taun ngen Ko bi kemliak Abraham?" 58 Nadeak Yesus ngen tobo'o, "Sesungguakne Uku madeak ngen udi, ayok Abraham ade, Uku bi ade." 59 Lajau tobo'o mok butau utuk meluk Si; tapi Yesus nyep ngen teminggea Umeak Tuhan.
1 Waktau Yesus gidong liwet, Si kemliak suang tun sutai. 2 Penotoa-penotoa-Ne betanye ngen Si, "Rabi, api de menea duso, tun yo suang jano tun tuaine, sehinggo si laher sutai?" 3 Jawab Yesus, "Iso si ngen iso kulo tun tuaine, tapi supayo tun nam kemliak kuaso Allah bekerjo neak lem diraine. 4 Ite arus kemerjo kerjo Si de mutus Uku, selamo masiak kebilai; bakea teko kelemen neak ipe coa ade suang tun de dapet bekerjo. 5 Seke'an Uku neak lem dunio, Uku ba te'ang dunio." 6 Sesudo Si madeak kutene o, Si temkek moi taneak, ngen menea luluk ngen tekek o, lajau melomokne pado matai tun sutai nano. 7 Ngen madeak ngen si: "Lalau ba, mpuk ba awoknu lem Kulam Siloam." (Siloam taine, 'De nutus'.) Mako lalau ba tun o, si mpuk awokne. Lajau belek ngen mataine sudo dapet ngeliak igai. 8 Tapi tetanggo-tetanggone ngen tobo'o, de bel o kemnalne awei pengemis, madeak, "Iso si yo, de bogoa temot ngen ngemis?" 9 Ade de madeak, "Benea, siba dio." Ade kulo de madeak, "Iso, tapi si serai ngen tun o." Tun de sutai'o madeak, "Benea, uku ba si." 10 Lajau padeak tobo'o ngen si, "Awei ipe matainu pacok ngeliak?" 11 Jawabne, "Tun de sembut Yesus o menea luluk, melomokne neak mataiku ngen madeak ngen uku: Lalauba moi Siloam ngen mpukba awoknu. Lajau uku lalau ngen sesudo uku mpuk awokku, uku dapet ngeliak." 12 Lajau tobo'o madeak ngen si, "Neak ipe Si?" Jawabne, "Uku coa namen." 13 Lajau tobo'o mbin tun de nanone sutai o ngen tun-tun Farisi. 14 Waktau Yesus menea luluk ngen menea tun sutai o pacok ngeliak, adeba bilai Sabat. 15 Kerno o tun-tun Farisi betanye igai ngen si, awei ipe mataine pacok ngeliak. Jawabne, "Si melomok luluk neak mataiku, lajau uku mpuk diraiku, ngen uyo pacok ngeliak." 16 Lajau padeak pa'o tun-tun Farisi o, "Tun yo coa teko kunei Allah, sebab si coa dulai bilai Sabat." Tapi de luyen madeak, "Awei ipe suang tun beduso dapet menea tando mujizat de awei yo?" Lajau timboa ba selisiak neak antaro tobo'o. 17 Padeak tobo'o igai ngen tun sutai o, "Jano padeaknu tetang Si, kerno Si de menea ko pacok ngeliak?" Jawabne, "Si suang nebai." 18 Tapi tobo penguaso Yahudi o coa pecayo, bahwo nanone si sutai ngen tembei dapet ngeliak igai, sapei tobo'o menok tun tuai ne. 19 Ngen betanye ngen tobo'o, "Dio anoknu, de udi madeak bahwo si laher sutai? Amen awei'o awei ipe si uyo dapet ngeliak?" 20 Jawab tun tuaine, "De keme namen adeba bahwo si yo anok keme ngen kunei laher sutai. 21 Awei ipe si uyo pacok ngeliak, keme coa namen, api de menea mataine pacok ngeliak, keme coa namen kulo. Tanye ngen si, si bi lai, si bakea miling utuk diraine suang." 22 Tun tuaine madeak awei yo, kerno tobo'o saben ngen tun-tun Yahudi, sebab tobo penguaso Yahudi o bi sepakat bahwo tiep tun de makau si awei Rajo Penyelamat, coa buliak igai masuk umeak semyang. 23 Do'o ba sebabne tun tuaine madeak, "Si bi lai, tanye ba ngen si suang." 24 Lajau tobo'o menok utuk keduai kilaine tun de nanone sutai'o. Tobo'o madeak ngen Si, "Nadeakba de benea neak adep Allah; keme namen bahwo tun o tun beduso." 25 Jawabne, "Jano tun o tun beduso, Uku coa namen. Tapi do hal uku namen, adeba bahwo Uku nanone sutai, ngen uyo pacok ngeliak." 26 Padeak tobo'o ngen Si, "Jano de nea-Ne ngen udi? Awei ipe Si menea matainu de pacok ngeliak?" 27 Jawabne ngen tobo'o, "Sudo uku madeak ngen udi ngen udi coa temi'uk, getai udi lok temi'ukne igai? Mukin udi lok jijai penotoa-Ne kulo?" 28 Samo mino tobo'o madeak ngen si, "Ko penotoa tun o, tapi keme penotoa-penotoa Musa. 29 Keme namen bahwo Allah bi melei firman ngen Musa, tapi tetang si o keme coa namen kunei ipe Si teko." 30 Jawab tun o ngen tobo'o, "Selle kulo bahwo udi coa namen kunei ipe Si teko, gidong Si bi menea matai ku dapet ngeliak igai. 31 Ite namen bahwo Allah coa temi'uk tun-tun beduso, tapi tun-tun malim ngen menea kelok-Ne. 32 Kunei bel'o sapei uyo coa perneak temi'uk bahwo ade tun de menea tun sutai kunei laher dapet ngeliak. 33 Amen tun yo coa teko kunei Allah, Si coa dapet menea jejano." 34 Jawab tobo'o ngen Si, "Ko yo laher samo sekilai lem duso ngen Ko lok majea keme?" Lajau tobo'o musir si moi luea. 35 Yesus temi'uk bahwo si bi musir moi luea ngen tobo'o. Sesudo'o Si temau ngenne ngen madeak, "Pecayoba ko ngen Anok Manusio?" 36 Jawabne, "Api si, Tuan? Supayo uku pecayo ngen-Si." 37 Padeak Yesus ngen si, "Ko iso bae kemliak Si; tapi Si de gidong miling ngen ko, Siba do'o!" 38 Padeakne, "Uku pecayo, Tuhan!" Lajau si sujud nyembeak-Ne. 39 Lajau padeak Yesus, "Uku teko moi lem dunio utuk mukum, supayo tun sutai dapet ngeliak, ngen tun de ngeliak jijai sutai." 40 Kecek-kecek o teni'uk ngen kekedau tun Farisi de ade neak di. Tobo'o madeak ngen Si, "Jano keme kulo sutai?" 41 Jawab Yesus ngen tobo'o, "Sekirone udi sutai, udi coa beduso. Tapi kerno udi madeak: 'Keme kemliak,' mako tep ba dusonu."
1 "Sesungguakne Uku madeak ngen udi: Api de masuk moi lem ke'ung bebirai coa liwet bang tapi kenek kunei penan luyen. Si adeba tukang maling ngen perapok: 2 Tapi api de masuk liwet bang, si adeba gembala de baik. 3 Tukang jago ke'ung mukok bang utukne ngen bebirai temi'uk sa'eine ngen si menok bebiraine suang temurut genne ngen mi'ingne moi luea. 4 Amen kute bebiraine bi mbinne moi luea, si paneu neak adep tobo'o ngen bebirai o temotoa-Ne, kerno tobo'o namen sa'ei ne. 5 Tapi tobo'o coa bakea lok temotoa tun luyen, tapi tobo'o bakea lalau kunei tun o, kerno coa kemnal sa'ei ne." 6 Yesus madeak perumpamo yo ngen tobo'o, tapi tobo'o coa ngertai jano maksudne Si madeak awei yo ngen tobo'o. 7 Kerno o Yesus madeak igai, "Sesungguakne Uku madeak ngen udi; Ukuba bang kunei bebirai o. 8 Kute tun de teko ayok Uku, adeba tukang maling ngen perapok, ngen bebirai o coa temi'uk tobo'o. 9 Uku ba bang. Api bae de masuk liwet Uku, si bakea semlamat ngen si bakea masuk ngen keluea temau padang dukut. 10 Tukang maling teko utuk maling ngen munuak ngen musak. Uku teko, supayo tobo'o temuan idup -- idup de belebiak. 11 Uku ba gembala de baik. Gembala de baik melei nyabaine utuk bebirai ne. 12 Tun upeak de iso gembala, ngen de iso temuan bebirai o suang, waktau kemliak srigala teko. Teminggea bebirai o lajau melilai, sehinggo srigala o temkem ngen cem'ei bebirai o. 13 Si melilai kerno si suang tun upeak ngen coa dulai bebirai o. 14 Uku ba gembala de baik ngen Uku namen bebirai-Ku ngen bebirai-Ku namen ngen Uku. 15 Serai awei Bak namen ngen Uku ngen Uku namen ngen Bak, Uku melei nyabai-Ku utuk bebirai-Ku. 16 Tapi Uku kulo temuan bebirai de luyen de iso kunei ke'ung yo. Bebirai o arus napeak kulo ngen tobo'o bakea temi'uk sa'ei-Ku ngen tobo'o bakea jijai do klopok ngen do gembala. 17 Bak kemasiak Uku, kerno Uku melei nyabai-Ku supayo Uku temimone igai. 18 Coa suang tun mokne kunei Uku, seluyen Uku meleine temurut kelok-Ku suang. Uku bekuaso meleine ngen bekuaso mokne igai. Dio ba periteak de Uku temimo kunei Bapa-Ku." 19 Kerno Yesus madeak awei o, tun-tun Yahudi muloi betekea, dau neak antaro tobo'o madeak, 20 "Si pasuk semat ngen gilo; getai udi temi'uk Si?" 21 De luyen madeak, "Do'o iso kecek tun de pasuk semat. Jano nam semat menea tun sutai pacok ngeliak?" 22 Coa an sesudo o sapei ba Bilai Rayo Meresmi Bait Allah neak Yerusalem; waktau o musim sengok. 23 Yesus rundo neak Bait Allah, neak Berendo Solomo. 24 Lajau tun-tun Yahudi gemlung Yesus ngen madeak ngen Si, "Kedau ke'an igai Ko munyau keme ragau-ragau? Amen Ko Rajo Penyelamat, nadeakba de benea ngen keme." 25 Yesus jemawab tobo'o, "Uku bi madeakne ngen udi, tapi udi coa pecayo. Kerjo de Uku menea lem gen Bak-Ku, do'o ba de melei saksai tetang Uku. 26 Tapi udi coa pecayo kerno udi coa temasuk bebirai-Ku. 27 Bebirai-Ku temi'uk sa'ei-Ku ngen Uku namen tobo'o ngen tobo'o temotoa Uku. 28 Uku melei idup de kekal ngen tobo'o ngen coa bakea benaso sapei seke'anne ngen coa suang tun mok tobo'o kunei tangen-Ku. 29 Bak-Ku, de melei tobo'o ngen Uku, lebiak lai kunei api bae, ngen coa suang tun dapet mok tobo'o kunei tangen Bak. 30 Uku ngen Bak adeba do." 31 Debat igai tun-tun Yahudi mok butau utuk meluk Yesus. 32 Padeak Yesus ngen tobo'o, "Dau kerjo de baik de be'asal kunei Bak-Ku de Uku kemten ngen udi. Kerjo de ipe neak antarone de sembab udi lok meluk Uku?" 33 Jawab tun-tun Yahudi o, "Iso kerno kerjo-Nu de baik o keme lok meluk Ko ngen butau, tapi kerno Ko mino Allah. Ko suang manusio, lok jemijai dirai-Nu Allah." 34 Nadeak Yesus ngen tobo'o, "Iso ba ade tetulis lem Kiteb Tauratnu: Uku bi befirman, 'Ko adeba aIlah'? 35 Amen tobo'o, ngen api firman o senapei, de senbut AIlah dong Kiteb Sucai coa dapet buye. 36 Masiak udi madeak ngen Si de senucai ngen Bak ngen de sudo nutus-Ne moi lem dunio. Ko mino Allah! Kerno Uku bi madeak: Uku anok Allah? 37 Amen Uku coa menea kerjo Bak-Ku, jibeak ba pecayo ngen Uku. 38 Tapi amen Uku kemerjone ngen udi coa lok pecayo ngen Uku, pecayoba ngen kerjo-kerjo o. Supayo udi buliak namen ngen ngertai bahwo Bak neak lem Uku ngen Uku neak lem Bak." 39 Debat igai tobo'o cemubo makep Si, tapi Si lolos kunei tangen tobo'o. 40 Sesudo Yesus lalau igai moi dipoa Bioa Yordan, moi penan Yohanes baptis bel'o, lajau Si tinggea neak di. 41 Dau tun teko ngen Si ngen madeak, "Yohanes coa menea do tando mujizat, tapi kute de perneak de nadeak Yohanes tetang tun yo memang benea." 42 Lajau dau tun neak di pecayo ngen Si.
1 Ade suang tun de dong bolon, genne Lazarus, kunei Betania, sadei Maria ngen pasuakne, Marta. 2 Maria adeba selawei de melomok minyok um neak kekea Tuhan, menut ngen bukne; Lazarus de bolon o adeba pasuakne. 3 Keduai selawei o kulo kemirim bito ngen Yesus, "Tuhan, pasuak keme de Tuhan kasiak o bolon." 4 Tapi waktau Yesus temi'uk bito o, Si madeak, "Olon o coa bakea menea Lazarus jijai matei, tapi bakea tejijai kemulian Allah, supayo liwet olon o anok Allah de mulio." 5 Yesus kemasiak Marta, Maria ngen Lazarus. 6 Tapi sesudo teni'uk-Ne bahwo Lazarus bolon, Si sengajo tinggea duai bilai igai neak penan Si ade. 7 Tapi sesudo o Si madeak ngen penotoa-penotoa-Ne, "Maro ite belek igai moi Yudea." 8 Penotoa-penotoa o madeak ngen Si, "Rabi, tembei yo ba tun-tun Yahudi cemubo meluk Ko, masiak lok Ko belek moi mindi?" 9 Jawab Yesus, "Iso ba ade duai belas jam lem de bilai? Api de paneu tengeak bilai, kekeane coa tatuk, kerno si kemliak te'ang dunio yo. 10 Tapi amen suang tun paneu uak malem, kekeane tatuk, kerno coa ade te'ang lem dirai-Ne." 11 Awei yo ba kecek-Ne, ngen sesudo o Si madeak ngen tobo'o, "Lazarus pasuak ite, bi tidua, tapi Uku lalau moi mindi utuk geminggut si kunei tiduane." 12 Lajau padeak penotoa-penotoa o ngen-Si, "Tuhan, amen si tetidua, si bakea ka'en." 13 Tapi sebeneane Yesus miling tetang mateine Lazarus, tapi udi sako tobo'o Yesus miling tetang tidua biaso. 14 Kerno o, Yesus madeak ngen sebeneane, "Lazarus bi matei. 15 Tapi Uku sukocito, Uku coa ade waktau o, sebab awei yo lebiak baik utuknu, supayo ko dapet pecayo. Maroba ite lalau uyo ngen si." 16 Lajau Tomas de senbut "Didimus", madeak ngen kekuatne, adeba penotoa-penotoa Yesus de luyen, "Maroba ite lalau kulo utuk matei serpok ngen Si." 17 Ketiko Yesus sapei, Lazarus bi pat bilai ke'anne kenubua. 18 Betania pa'ok Yerusalem kekiro telau kilometer uakne. 19 Dau tun Yahudi bi teko ngen Marta ngen Maria utuk mibur tobo'o kerno pasuakne matei. 20 Ketiko Marta temi'uk bahwo Yesus teko, si lalau magea-Ne. Tapi maria tinggea neak dasei. 21 Lajau padeak Marta ngen Yesus, "Tuhan, sekirone Ko ade neak yo, pasuakku paset coa matei. 22 Tapi uyo uku namen bahwo Allah bakea melei ngen Ko kute de Ko minoi ngen-Si." 23 Padeak Yesus ngen Marta, "Pasuaknu bakea idup igai." 24 Padeak Marta ngen-Si, "Uku namen bahwo si bakea idup igai pado waktau tun-tun idup igai pado Bilai Kiamat." 25 Jawab Yesus, "Uku ba de melei idup ngen midup igai tun matei. Api bae de pecayo ngen Uku, si bakea idup kunyau si bi matei. 26 Ngen tiep tun de idup ngen de pecayo ngen Uku, cao bakea matei seke'anne. Pecayo ko bakea hal yo?" 27 Jawab Marta, "Au, Tuhan, uku pecayo, bahwo Ko ba Rajo Penyelamat, Anok Allah, de bakea teko moi lem dunio yo." 28 Sesudo madeak awei yo si lalau menok pasuakne Maria, ngen misik ngen si, "Gu'au ade neak di ngen Si menok ko." 29 Temi'uk do'o, Maria segro je lajau lalau magea Yesus. 30 Tapi waktau o Yesus ati sapei neak sadei o. Si masiak ade neak penan Marta temau Si. 31 Ketiko tun-tun Yahudi de serpok ngen Maria neak umeak o utuk miburne, kemliak bahwo Maria segro je ngen lalau moi luea, tobo'o temotoa si, kerno tobo'o sako bahwo si lalau moi kubua utuk ngindoi neak di. 32 Sapeine Maria neak penan Yesus ade ngen kemliak Si, sujudba si neak adep kekea-Ne ngen madeak ngen-Si, "Tuhan, sekirone Ko ade neak yo, pasuakku paset coa matei." 33 Ketiko Yesus kemliak Maria ngindoi, ngen kulo tun-tun Yahudi de teko serpok si, mako ibo ba atei-Ne. Si kembiak ibo ngen madeak, 34 "Neak ipe udi gemuling si?" Jawab tobo'o, "Tuhan, maroba ngen keliakba!" 35 Lajau ngindoi ba Yesus. 36 Padeak tun-tun Yahudi, "Keliakba, Si sungguak kemasiakne!" 37 Tapi kekedau tun neak antarone madeak, "Si de menea matai tun sutai o pacok ngeliak. Getai Si coa nam menea supayo Lazarus coa matei?" 38 Yesus kembiak ibo igai, lajau lalau moi kubua o. Kubua o adeba do guo de tenutup ngen butau lai. 39 Padeak Yesus, "Naket butau o!" Marta, pasuak tun de ninggea o, madeak ngen-Si, "Tuhan, si sudo kembon, sebab sudo pat bilai si matei." 40 Jawab Yesus, "Iso sudo Uku madeak ngen udi: Amen ko pecayo ko bakea kemliak kemulian Allah?" 41 Tobo'o maket butau o. Lajau Yesus nanggeak moi das ngen madeak, "Bak, Uku mucep syukur ngen Ko, kerno Ko bi temi'uk Uku. 42 Uku namen bahwo Ko bogoa temi'uk Uku, tapi kerno tun dau de je neak yo gemlung Uku, Uku madeakne, supayo tobo'o pecayo bahwo Ko ba de sudo mutus Uku." 43 Sesudo madeak awei yo, menggang ba Si ngen sa'ei lek, "Lazarus maroba keluea!" 44 Tun de sudo matei o keluea. Kekea ngen tangenne masiak tepeket ngen kain kepan ngen papeane tetutup ngen kain peluh. Nadeak Yesus ngen tobo'o, "Nukok ba kain-kain o ngen kunyau ba si lalau." 45 Dau neak antaro tun-tun Yahudi de teko semulau Maria, pecayo ngen Yesus waktau tobo'o kemliak kejijai o. 46 Tapi kekedau neak antaro tobo'o lalau ngen tun-tun Farisi ngen cemrito ngen tobo'o, jano de nea Yesus o. 47 Lajau imem-imem kepalo ngen tun-tun Farisi menok Mahkamah Agamo utuk bekopoa ngen tobo'o madeak, "Jano de arus ite menea? Sebab tun o menea dau mujizat. 48 Amen ite munyau Si, mako kute tun bakea pecayo ngen-Si, tun-tun Roma bakea teko ngen bakea merapok Penan Sucai ite serto bangso ite!" 49 Tapi saleak suang neak antaro tobo'o, adeba Kayafas, imem lai pado taun o. Si madeak ngen tobo'o, "Ko coa namen jejano. 50 Udi coa tobat, bahwo lebiak beguno utuknu, amen do tun matei utuk bangso ite kunei kute bangso ite yo ajua." 51 Hal o de nadeakne iso kunei diraine suang. Tapi awei imem lai pado taun o madeak bahwo Yesus bakea matei utuk bangso o. 52 Iso utuk bangso o bae tapi kulo utuk kemopoa ngen menea jijai do anok-anok Allah de cibea. 53 Muloi bilai o tobo'o sepakat utuk munuak Yesus. 54 Kerno o Yesus coa timboa igai neak muko umum neak antaro tun-tun Yahudi, tapi Si berakat kunei di moi daerah pa'ok benei libea, moi do kota genne Efraim. Si tinggea sesamo penotoa-penotoa-Ne neak di. 55 Pado waktau o bilai rayo Paskah tun Yahudi bi pa'ok ngen dau tun kunei negrai o berakat moi Yerusalem utuk semucai dirai ayok Paskah o. 56 Tobo'o mesoa Yesus ngen samo je neak lem Umeak Tuhan, tobo'o madeak suang ngen de luyen, "Awei ipe pedapetnu? Bakea teko kulo Si moi pesta?" 57 Sementaro o imem-imem kepalo ngen tun-tun Farisi bi melei periteak supayo tiep tun de namen neak ipe Si ade melei namenne, kunyau tobo'o dapet temakep Si.
1 Num Bilai ayok Paskah, Yesus teko moi Betania, penan tinggea Lazarus de nidup igai ngen Yesus kunei antaro tun matei. 2 Neak di Yesus jenamau Marta melayan. Lazarus ngen tamu-tamu temot mukmei serpok ngen Yesus. 3 Lajau Maria mok tengeak liter minyok Narwastu asli de la'ang nien. Lajau si me'eng minyok moi kekea Yesus. Lajau Maria menut ngen bukne. Kute umeak o mbonne um kerno minyok um o. 4 Tapi Yudas Iskariot, suang kunei penotoa Yesus, de bakea semreak Si, madeak, 5 "Getai minyok narwastu yo coa jenuo telau otos pirok ngen cacine nelei ngen tun-tun peset?" 6 Hal o de nadeak iso kerno si dulai tun-tun peset, tapi kerno si suang tukang maling; si galok mok caci de naik lem kas de negongne. 7 Lajau nadeak Yesus, "Kunyauba si menea hal youtuk minget bilai ngubua-Ku. 8 Kerno tun-tun peset bogoa ade pado udi, tapi Uku coa bakea bogoa sesamo udi." 9 Dau tun Yahudi temi'uk bahwo Yesus ade neak Betania ngen tobo'o teko iso kerno Yesus. Tapi kulo utuk kemliak Lazarus, de sudo nidupne igai kunei antaro tun matei. 10 Lajau imem-imem kepalo rencano utuk munuak Lazarus kulo; 11 kerno dau tun Yahudi teminggea tobo'o ngen pecayo ngen Yesus sesudo namen cerito Lazarus. 12 Menne tun dau de sudo teko utuk merayo Pesta Paskah temi'uk bahwo Yesus dong neak tengeak dalen lalau moi Yerusalem. 13 Tobo'o mok dawen-dawen palem, lajau lalau semambut Si samo menggang, "Hosana! Tepujaiba Si de teko lem gen Tuhan, Rajo Israel!" 14 Yesus temau dikup keledai uai lajau Si kenek moi dasne. Awei ade tetulis, 15 "Jibeak saben, hoi putri Sion! Keliakba, Rajonu teko, temot neak das dikup anok keledai!" 16 Memulo penotoa-penotoa Yesus coa ngertai ngen hal o. Tapi sesudo Yesus de mulio sesudo idup igai, tingget ba tobo'o bahwo ayat o tetang Si, bahwo tobo'o bi meneane kulo utuk Si. 17 Tun-tun de ade pado waktau Yesus menok Lazarus keluea kunei kubua ngen midupne igai kunei matei, melei saksai tetang hal o. 18 Do'o sebabne tun dau o lalau ngen Yesus sebab tobo'o temi'uk bahwo Siba de sudo menea mujizat o. 19 Lajau madeak tun-tun Farisi suang ngen de luyenne, "Ko kemliak suang bahwo udi samo sekilai coa berasea, keliakba, kute dunio teko temotoa Si." 20 Neak antaro tobo'o de lalau utuk semyang pado Bilai Rayo Paskah o, ade kekedau tun Yunani. 21 Tun-tun o lalau ngen Filipus, de berasal kunei Betsaida neak Galilea, lajau madeak ngen si, "Tuan, keme lok temau ngen Yesus." 22 Filipus lalau melei namen ngen Andreas; lajau Andreas ngen Filipus semapei ngen Yesus. 23 Nadeak Yesus ngen tobo'o, "Bi sapei waktaune Anok Manusio de mulio. 24 Sesungguakne Uku madeak ngen ko: Amen soa gendum coa cucia moi lem taneak ngen matei, si bakea tep sebagoi soa gendum. Tapi amen soa gendum matei, baru si bakea masea dau gendum. 25 Api bae de cito nyabaine, si bakea nyep nyabaine. Tapi api bae de jengik ngen nyabaine neak dunio yo, si bakea miarone utuk idup de kekal. 26 Api bae de mlayan Uku, si arus temotoa Uku, neak ipe Uku ade, neak di kulo pelayan-Ku ade. Api bae de mlayan Uku, si bakeane hormat Bak-Ku. 27 Atei-Ku temes, "Jano de arus Uku madeak uyo? Jano arus Uku madeak, 'Bak, senlamat ba Uku kunei saat yo'? Tapi waktau meding saro dioba Uku teko. 28 Bak, de mulio ba gen-Nu!" Lajau temi'uk sa'ei kunei surgo, "Uku bi mulione ngen Uku bakea mulione igai!" 29 Tun dau de je neak di ngen temi'ukne madeak, bahwo do'o sa'ei gutua. Ade kulo de madeak, "Suang malaikat bi miling ngen Si!" 30 Jawab Yesus, "Saei o bi teni'uk iso kerno Uku, tapi kerno udi. 31 Uyo bi sapei waktaune dunio yo nakim, uyo kulo penguaso dunio yo bakea neluk moi luea. 32 Tapi Uku yo, amen Uku bi nelekat das bumai, Uku bakea majok kute tun teko ngen Uku." 33 Si madeak awei o utuk melei namen awei ipe ca'one Si bakea matei. 34 Lajau jawab tun dau o, "Keme bi temi'uk kunei ukum agamo Yahudi bahwo Rajo Penyelamat tep idup seke'anne. Awei ipe mukin Ko madeak bahwo Anok Manusio arus nelkat? Api Anok Manusio o?" 35 Nadeak Yesus ngen tobo'o, "Cuma didik igai waktaune te'ang ade neak antaro udi. Jijai paneu ba seke'an te'ang o masiak ade, ngen udi kunyau udi jibeak teninggang kelem. Tun de paneu neak lem kelem coa namen moi ipe si lalau. 36 Pecayoba ngen te'ang o, seke'an te'ang o ade ngen udi, kunyau udi jijai anok-anok te'ang." 36 Sesudo madeak awei yo, Yesus lalau sebunyin kunei antaro tobo'o. 37 Kunyau Yesus menea kembiak dau mujizat neak adep matai tobo'o, tapi tobo'o coa pecayo ngen-Si. 38 Supayo genepba firman de senapei Nebai Yesaya: "Tuhan, api de pecayo ngen bito keme? Ngen api kuaso Tuhan kemten?" 39 Kerno do'oba tobo'o coa dapet pecayo, sebab Yesaya bi madeak kulo. 40 "Si bi semutai matai ngen temlo atei tobo'o, supayo tobo'o coa kemliak ngen matai, ngen coa ngertai. Supayo tobo'o coa belek ngen Uku, sehinggo Uku kema'en tobo'o." 41 Yesaya madeak awei'o, kerno si bi kemliak kemulioan-Ne ngen bi madeak tetang Si. 42 Tapi dau kulo neak antaro pemipin Yahudi de pecayo ngen Si. Tapi kerno tun-tun Farisi tobo'o coa makau terus te'ang, supayo tobo'o jibeak senikir. 43 Tobo'o lebiak galok dapet pujai manusio kunei hormat Allah. 44 Lajau Yesus menggang, "Api bae de pecayo ngen Uku, si iso pecayo ngen Uku, tapi ngen Si de sudo mutus Uku. 45 Api bae de kemliak Uku, si kemliak Si, de bi sudo mutus Uku. 46 Uku bi teko moi lem dunio awei te'ang, supayo tiep tun de pecayo ngen Uku jibeak tinggea neak lem kelem. 47 Amen suang tun temi'uk kecek-Ku, tapi coa kemerjone, Uku coa mukumne. Sebab Uku teko iso utuk mukum dunio, tapi utuk semlamat si. 48 Api bae de coa temimo Uku, ngen coa temimo kecek-Ku, bi ade de mukumne. Adeba firman de bakea mukumne pado Bilai Kiamat. 49 Sebab Uku madeak iso kunei dirai-Ku suang, tapi Bak, de mutus Uku, Siba de meriteak Uku utuk madeak jano de arus Uku madeak ngen Ko. 50 Uku namen bahwo periteak-Ne o adeba idup de kekal. Kerno o jano de arus Uku madeak, Uku semapei awei ipe de najea Bak ngen-Ku."
1 Ayok bilai rayo Paskah muloi, Yesus bi namen bahwo waktau-Ne bi sapei utuk lalau kunei dunio yo ngen Bak. Si kemasiak tun-tun milik-Ne de neak dunio yo, si mengasiak tobo'o sapei moi sudone. 2 Ketiko tobo'o dong mukmei sesamo, Iblis bi misik rencano lem atei Yudas Iskariot, anok Simon, utuk mianat Yesus. 3 Yesus namen bahwo Bak bi semreak kutene ngen Si bahwo Si teko kunei Allah ngen bakea belek ngen Allah. 4 Lajau klongon ba Yesus ngen temanggea jubah-Ne. Si mok delam bea kain lenan ngen meket-Ne moi pinggang-Ne. 5 Sesudo'o Si me'eng bioa moi lem do reseng ngen muloi mpuk kekea penotoa-penotoa-Ne lajau melapne ngen kain de tepeket neak pinggang-Ne o. 6 Lajau sapei ba Si ngen Simon Petrus. Nadeak Petrus ngen Si, "Tuhan, Ko lok mpuk kekeaku?" 7 Jawab Yesus ngen si, "Jano de Uku menea, ko coa namen uyo, tapi be ko bakea ngertai." 8 Nadeak Petrus ngen Si, "Ko coa bakea mpuk kekea ku sapei seke'anne." Jawab Yesus, "Amen Uku coa mpuk kekeanu, ko coa dapet bagiak lem Uku." 9 Nadeak Simon Petrus ngen-Si, "Tuhan, jibaek kekeaku bae, tapi tangen ngen ulauku kulo!" 10 Nadeak Yesus ngen Petrus, "Api bae de sudo mendai, si jibeak mpuk dirai igai tapi mpuk kekea ne, udi bi bersih, tapi coa kutene." ( 11 Sebab Si namen, api de bakea semreak Si. Kerno o Si madeak, "Coa kute udi bersih.") 12 Sesudo Si mpuk kekea tobo'o, Si makei keracok-Ne ngen belek moi penan-Ne. Lajau Si madeak ngen tobo'o, "Ngertai udi jano de sudo Uku menea ngen udi? 13 Ko madeak Uku Gu'au ngen Tuhan, keceknu o tepat, sebab memang Uku ba Gu'au ngen Tuhan. 14 Amen Uku, Tuhan ngen Gu'aunu, mpuk kekeanu, mako udi wajib saling mpuk kekeanu. 15 Sebab Uku bi melei teladan ngen udi, supayo udi kulo menea serai awei de sudo Uku menea ngen udi. 16 Sesungguakne Uku madeak ngen udi: Suang pelayan coa ba lebiak lekat kunei Tuan ne, suang utusan coa lebiak lai kunei pado de mutusne. 17 Amen udi namen kutene yo, mako riang ba udi, amen udi menea ne. 18 Iso tetang udi kute Uku madeak. Uku namen, api de sudo Uku piliak. Tapi jano de tenulis neak lem Alkitab harus tejijai, 'Tun de mbuk besamo Uku, bakea melawen Uku.' 19 Uku madeakne ngen udi uyo kulo ayok hal o tejijai, supayo amen hal o tejijai, udi pecayo bahwo Uku ba Si. 20 Sesungguakne Uku madeak ngen udi: Api bae de temimo tun de nutus-Ku, si temimo Uku, si temimone de mutus Uku." 21 Sesudo Yesus madeak awei o, Si jijai ibo, lajau besaksai, "Sesungguakne Uku madeak ngen udi, saleak suang neak antaro udi, bakea semreak Uku." 22 Penotoa-penotoa o samo-samo kemliak suang ngen de luyen, tobo'o ragau api de maksud-Ne. 23 Saleak suang neak antaro penotoa Yesus, adeba penotoa de kemasiak-Ne, nyandea pa'ok-Ne, depeak kanen-Ne. 24 Simon Petrus melei isyarat ngen penotoa-penotoa'o supayo si betanye ngen Yesus api de maksudne. 25 Lajau penotoa de temot pa'ok Yesus o jemling, betanye ngen Si, "Tuhan, api do'o?" 26 Jawab Yesus, "Siba de bakea Uku melei ruti, sesudo uku cemlupne." Sesudo madeak awei o Si cemlup ruti o, lajau mok ngen meleine ngen Yudas, anok Simon Iskariot. 27 Sesudo Yudas temimo ruti o, si pasuk semat. Lajau Yesus madeak ngen si, "Jano de ko lok menea, menea ba segro." 28 Tapi coa ade suang kulo kunei antaro tobo'o de temot mukmei o ngertai getai Yesus madeak o ngen Yudas. 29 Kerno Yudas megong kutak, ade de sako bahwo Yesus meluak si temukua bae utuk pesta o, melei jano bae ngen tun peset. 30 Sesudo temimo ruti o, Yudas segro lalau, pado waktau o bilai bi kelmen. 31 Sesudo Yudas lalau, madeakba Yesus, "Uyo Anok Manusio nujai ngen Allah kulo nujai lem Si. 32 Amen Allah nujai lem Si, Allah bakea de mulio-Ne kulo lem dirai-Ne ngen bakea mulio Si ngen segro. 33 Hoi anok-anok-Ku, Uku coa bakea tinggea an igai ngen udi. Udi bakea mesoa Uku, awei de sudo Uku madeak ngen tun-tun Yahudi. Moi penan Uku lalau, coa mukin udi teko, awei'o kulo uyo Uku madeakne ngen udi kulo. 34 Uku melei priteak blau ngen udi, adeba supayo udi saling mengasiak, serai awei Uku kemasiak udi, awei'o kulo udi arus saling kemasiak. 35 Amen udi saling mengasiak mako kute tun bakea namen bahwo ko adeba penotoa-penotoa-Ku." 36 Simon Petrus madeak ngen Yesus, "Tuhan, moi ipe Ko lalau?" Jawab Yesus, "Moi penan Uku lalau, ko coa dapet temotoa Uku uyo, tapi be ko bakea temotoa Uku." 37 Nadeak Petrus ngen Si, "Tuhan, getai Uku coa dapet temotoa Ko uyo? Uku bakea melei nyabaiku utuk-Nu!" 38 Jawab Yesus, "Nyabainu bakea ko melei utuk-Ku? Sesungguakne Uku madeak ngen udi: Ayok monok bekokok, ko bi muker Uku telau kilai."
1 Yesus madeak ngen tobo'o, "Jibeak liseak ateinu; pecayoba ngen Allah, pecayoba kulo ngen Uku. 2 Neak umeak Bak-Ku dau penan tinggea. Amen coa awei ipe, paset uku madeakne ngen ko. Sebab Uku lalau moi di utuk semiyap penan utuknu. 3 Amen Uku lalau moi di ngen bi semiyap penan utuknu. Uku bakea teko igai mbin udi moi penan-Ku, supayo neak penan Uku ade, udi kulo ade. 4 Moi ipe Uku lalau, udi namen dalen moi mindi." 5 Nadeak Tomas ngen Yesus, "Tuhan, keme coa namen moi ipe Ko lalau; awei ipe keme namen dalen moi mindi?" 6 Nadeak Yesus ngen Si, "Uku ba dalen utuk kemnal Allah ngen dapet idup. Coa ade suang de teko ngen Bak, amen coa liwet Uku. 7 Sekirone udi namen ngen Uku, paset udi kulo namen ngen Bak-Ku. Uyo udi namen ngen Si, udi bi kemliak Si." 8 Nadeak Filipus ngen Yesus, "Tuhan, kentenba Bak o ngen keme, do'o bi cukup utuk keme." 9 Nadeak Yesus ngen Si, "Bi an Uku sesamo udi, Filipus, tapi ko coa namen ngen Uku? Api bae de sudo kemliak Uku, si bi kemliak Bak. Awei ipe ko madeak: 'Kenten ba Bak o ngen keme'! 10 Coa pecayo ko bahwo Uku lem Bak ngen Bak lem Uku? Jano de Uku madeak ngen udi, coa Uku madeak kunei dirai-Ku suang, tapi Bak, de tinggea lem Uku, Siba de menea kerjo-kerjo-Ne. 11 Pecayoba ngen-Ku bahwo Uku lem Bak ngen Bak lem Uku; pecayoba kerno kerjo-kerjo o suang. 12 Sesungguakne Uku madeak ngen udi: Api bae de pecayo ngen Uku, si bakea menea kulo kerjo-kerjo de Uku menea, bahkan kerjo-kerjo de lebiak lai kunei o. Sebab Uku lalau ngen Bak. 13 Jano bae de udi minoi lem gen-Ku, Uku bakea kemerjone, supayo Bak nujai lem Anok. 14 Amen udi minoi sesuaktau ngen Uku lem gen-Ku, Uku bakea kemerjone." 15 "Amen udi kemasiak Uku, udi bakea temotoa kute periteak-Ku. 16 Uku bakea minoi ngen Bak. Si bakea melei ngen udi Penolong de luyen, supayo si semerto udi seke'anne. 17 Si'oba Roh kebenea. Dunio coa dapet temimo Si, sebab dunio coa kemliak Si ngen coa namen ngen Si. Tapi udi namen ngen Si, sebab Si semerto udi, bakea diem neak lem udi. 18 Uku coa bakea teminggea udi awei Yatim Piatu. Uku teko igai ngen udi. 19 Tegoa igai dunio coa bakea kemliak Uku, tapi udi bakea kemliak Uku sebab Uku idup ngen udi kulo bakea idup. 20 Pado waktau'oba udi bakea namen bahwo Uku lem Bak-Ku ngen udi neak lem Uku ngen Uku lem udi. 21 Api bae de megong periteak-Ku ngen kemerjone, siba de kemasiak Uku! Api bae de kemasiak Uku, si bakea kenasiak Bak-Ku ngen Uku kulo bakea kemasiak si ngen bakea melei namen dirai-Ku ngen si." 22 Yudas, de iso Iskariot, madeak ngen Si, "Tuhan, jano sebabne mako Ko lok kemten dirai-Nu ngen keme, iso ngen dunio?" 23 Jawab Yesus, "Amen suang mengasiak Uku, si bakea temotoa firman-Ku ngen Bak-Ku bakea mengasiak si. Keme bakea teko ngen si ngen tinggea sesamo ngen si. 24 Api bae de coa mengasiak Uku, si coa temotoa firman-Ku. Firman de udi temi'uk iso kunei Uku, tapi kunei Bak de mutus Uku. 25 Kutene o Uku madeak ngen udi, semasiak Uku ade sesamo ngen udi. 26 Tapi penulung, adeba Roh Sucai, de bakea nutus Bapa lem gen-Ku. Siba de bakea ngajea kute sesuaktau ngen udi ngen bakea minget udi kute de sudo Uku madeak ngen udi. 27 Damoi sejahtera Uku melei utuk udi. Damoi sejahtera-Ku Uku melei ngen udi, jano de Uku melei coa awei de nelei kunei dunio ngen udi. Jibeak ba liseak ngen saben atei nu. 28 Udi bi temi'uk bahwo Uku bi madeak ngen udi: 'Uku lalau, tapi Uku teko igai ngen udi.' Sekirone udi mengasiak Uku, udi bakea riang kerno Uku lalau ngen Bapa-Ku, sebab Bapa lebiak lai kunei Uku. 29 Uyo kulo Uku madeakne ngen udi ayok hal o tejijai, supayo udi pecayo, amen hal o tejijai. 30 Coa dau igai Uku madeak ngen udi, sebab penguaso dunio yo teko, si coa kuaso didik kulo das dirai-Ku. 31 Tapi dunio arus namen bahwo Uku mengasiak Bapa ngen bahwo Uku kemerjo kutene awei de neriteak Bapa ngen Uku. Klongon ba, maroba ite lalau kunei piyo."
1 "Ukuba pokok anggur de benea ngen Bapa-Ku ba temuanne. 2 Tiep dan pado-Ku de coa bebuak, tentok-Ne ngen tiep dan de bebuak, nersi-Ne, supayo si lebiak dau buakne. 3 Udi memang bi bersih kerno firman de sudo Uku madeak ngen udi. 4 Tinggea ba neak lem Uku ngen Uku neak lem udi. Serai awei dan coa dapet bebuak kunei diraine suang, amen si coa tinggea neak punne. Awei o kulo udi, udi coa bebuak, amen udi coa tinggea lem Uku. 5 Uku ba pun anggur ngen ko ba dan-danne. Api bae de tinggea lem Uku ngen Uku lem si, si bebuak dau, sebab neak luea Uku udi coa dapet menea jejano. 6 Api de coa tinggea lem Uku, si nuang moi luea awei dan jijai ke'ing, sesudo'o tun melunggukne nuang moi lem opoi lajau nembem. 7 Amen udi tinggea lem Uku ngen firman-Ku tinggea lem udi, minoi ba ngen Bapa jano bae de udi kenlok, ngen udi bakea temimone. 8 Lem hal yo ba Bapa-Ku nujai, adeba amen udi bebuak dau ngen awei'o udi adeba penotoa-penotoa-Ku." 9 "Awei Bapa bi mengasiak Uku, awei o kulo uku bi mengasiak udi; tinggea ba udi lem kasiak-Ku o. 10 Amen udi temotoa periteak-Ku, udi bakea tinggea neak lem kasiak-Ku, awei Uku temotoa periteak Bapa-Ku ngen tinggea neak lem kasiak-Ne. 11 Kutene o Uku nadeak ngen udi, supayo suko cito-Ku ade neak lem udi ngen suko cito-Nu jijai penuak. 12 Dio ba periteak-Ku, adeba supayo udi saling mengasiak, awei Uku bi mengasiak udi. 13 Kasiak de lebiak lai adeba kasiak kunei suang tun de melei nyabaine utuk kuatne. 14 Udi adeba kuat-Ku, amen udi menea jano de Uku periteak ngen udi. 15 Uku coa madeak udi igai pelayan, sebab pelayan coa namen jano de nea tuanne, tapi Uku madeak udi kuat, kerno Uku bi melei namen ngen udi kute de sudo Uku temi'uk kunei Bapa-Ku. 16 Iso udi de miliak Uku, tapi Uku ba de miliak udi, Uku bi temtep udi, supayo udi lalau ngen asea buak de dau, supayo jano de udi minoi ngen Bapa lem gen-Ku neleine ngen udi. 17 Dio ba periteak-Ku ngen udi: Kasiak ba suang do ngen de luyen." 18 "Amen dunio jengik ngen udi, ingetba bahwo si bi lebiak denno jengik Uku kunei pado ko. 19 Sekirone udi kunei dunio, pasetba dunio mengasiak udi awei milikne. Tapi kerno udi iso kunei dunio, tapi Uku bi miliak udi kunei dunio, sebab do'o ba dunio jengik ngen udi. 20 Tinget ba jano de sudo Uku madeak ngen udi: 'Suang pelayan coa ba lebiak lekat kunei tuanne.' Amen tobo'o bi temotoa firman-Ku, tobo'o kulo bakea temotoa keceknu. 21 Tapi kutene o bakea tobo'o menea te'adep udi kerno gen-Ku, sebab tobo'o coa namen Si desudo mutus Uku. 22 Sekirone Uku coa teko ngen coa madeak ngen tobo'o, tobo'o paset coa beduso. Tapi uyo tobo'o coa temuan alasan utuk duso tobo'o! 23 Api bae de jengik ngen Uku, si jengik kulo ngen Bapa-Ku 24 Sekirone Uku coa menea neak tengeak-tengeak tobo'o kerjo-kerjo de coa perneak nea tun luyen, tobo'o paset coa beduso. Tapi uyo kunyau tobo'o bi kemliak kutene o, tobo'o jengik ngen Uku kulo ngen Bapa-Ku. 25 Tapi firman de tetulis lem ukum agamo Yahudi tobo'o arus tejijai: 'Tobo'o jengik ngen Uku ngen coa ade alasan.' 26 Uku bakea mutus ngenko penulung de asalne kunei Bapa. Adeba Roh bakea madeak kebenea tetang Allah. Amen Si teko, Si bakea saksai tetang Uku. 27 Tapi udi kulo arus saksai, kerno udi kunei dutene sesamo ngen Uku.
1 Kutene yo Uku madeak ngen udi, supayo udi jibeak coa temimo Uku. 2 Udi bakea kenucea, bakea teko waktaune bahwo tiep tun de munuak udi bakea sako bahwo si males jaso ngen Allah. 3 Tobo'o bakea menea awei yo, kerno tobo'o coa namen baik Bapa kulo Uku. 4 Tapi kutene yo Uku madeak ngen udi supayo amen sapei waktaune udi tinget bahwo Uku bi madeakne ngen udi." 4 "Hal yo coa Uku madeak ngen udi kunei bel'o, kerno seke'an yo Uku masiak sesamo ngen udi. 5 Tapi uyo Uku lalau ngen Si de sudo mutus Uku, coa ade suang kulo neak antaro udi de betanye ngen-Ku: Moi ipe Ko lalau? 6 Tapi kerno Uku madeak hal o ngen udi mako ateinu ibo. 7 Tapi benea de Uku madeak yo ngen udi: Lebiak beguno utuk udi, amen Uku lalau. Sebab amen Uku coa lalau, penulung o coa bakea teko ngen udi, tapi amen Uku lalau, Uku bakea mutus Si ngen ko. 8 Amen Si teko, Si bakea menea tun insaf kunei duso, kebenea ngen kunei ukuman Allah. 9 Penulung'o bakea madeak bahwo coa pecayo ngen-Ku adeba duso; 10 bahwo Uku benea, kerno Uku lalau ngen Bapa ngen udi coa bakea kemliak Uku igai; 11 bahwo Allah sudo muloi mukum, sebab penguaso dunio yo bi nukum. 12 Masiak dau hal de arus Uku madeak ngen udi, tapi uyo udi ati dapet temimone. 13 Tapi amen Si teko, adeba Roh kebenea, Si bakea mipin udi neak lem kute kebenea. Si coa bakea madeak kunei dirai-Ne suang, tapi kute sesuaktau de teni'ukne do'o ba de bakea nadeak-Ne ngen Si bakea melei namen ngen udi hal-hal de bakea teko. 14 Si bakea mulio Uku, sebab Si bakea melei namen ngen udi jano de tenimone kunei Uku. 15 Kute sesuaktau de Bapa temuan adeba Uku temuan. Do'o sebabne Uku madeak; Si bakea melei namen ngen udi jano de tenimo-Ne kunei-Ku." 16 "Tegoa igai, udi coa kemliak Uku igai ngen kulo tegoa igai, udi bakea kemliak Uku." 17 Temi'uk o kekedau kunei penotoa-penotoa-Ne madeak suang ngen de luyen, "Jano taine Si madeak ngen ite: 'Tegoa igai, udi coa kemliak Uku ngen kulo tegoa igai, udi bakea kemliak Uku'? Ngen: 'Uku lalau ngen Bapa'?" 18 Lajau padeak tobo'o, "Jano taine Si madeak: 'Tegoa igai'? Ite coa namen jano maksud-Ne!" 19 Yesus namen bahwo tobo'o lok betanye sesuaktau ngen Si, lajau Si madeak ngen tobo'o, "Nano Uku madeak, 'Tinggea tegoa igai bae udi coa kemliak Uku, ngen kulo tinggea tegoa igai udi bakea kemliak Uku.' Do'oba de udi madeak? 20 Sesungguakne Uku madeak ngen udi: Udi bakea ngindoi ngen ngibo, tapi dunio bakea riang; udi bakea ibo, tapi ibonu bakea bubeak jijai riang. 21 Amen Suang selawei ibo pado waktau si melaher, tapi sesudo'o si melaher anokne, si coa tinget igai ngen derito ne, kerno keriang bahwo suang manusio bi laher neak dunio. 22 Awei'o kulo udi uyo payeak atei, tapi Uku bakea kemliak udi igai ngen ateinu bakea riang, coa ade suang kulo de dapet mbut keriang nu'o kunei udi. 23 Pado bilai o udi coa bakea temanye jejano ngen Uku. Sesungguakne Uku madeak ngen udi: Kute sesuaktau de udi minoi ngen Bapa lem gen-Ku bakea nelei-Ne. 24 Sapei uyo udi ati minoi sesuaktau lem gen-Ku. Minoiba, mako udi bakea temimo, supayo penuakba sukocitonu." 25 "Kutene yo Uku madeak ngen udi ngen kiasan. Bakea sapei waktaune Uku coa igai madeak ngen udi ngen kiasan, tapi terus te'ang melei namen tetang Bapa. 26 Pado bilai o udi bakea bedu'o lem gen-Ku. Uku coa bakea minoi kunei Bapa utuk udi, 27 sebab Bapa suang mengasiak udi, kerno udi bi mengasiak Uku ngen pecayo bahwo Uku teko kunei Allah. 28 Uku teko kunei Bapa ngen Uku teko moi lem dunio. Uku teminggea dunio kulo ngen lalau ngen Bapa." 29 Nadeak penotoa-penotoa-Ne, "Keliak, uyo Ko terus te'ang madeak ngen ko coa makei kiasan. 30 Uyo keme namen, bahwo Ko namen kute sesuaktau. Ngen coa perlu tun betanye ngen udi. Kerno o keme pecayo bahwo Ko teko kunei Allah." 31 Jawab Yesus ngen tobo'o, "Pecayo udi uyo? 32 Keliak, waktaune bakea teko, bahkan bi teko, ketiko udi bakea cen'ei sesuang neak penanne suang ngen udi teminggea Uku suang dirai. Tapi Uku coa suang dirai sebab Bapa semerto Uku. 33 Kutene o Uku madeak ngen udi, supayo udi dapet damoi sejahtera lem Uku. Neak dunio udi bakea saro. Tapi kenuetba ateinu! Uku bi maleak dunio!"
1 Sesudo Awei yo, Yesus nanggeak moi lenget ngen madeak, "Bapa, bi sapei waktau ne; de mulio ba Anok-Nu, supayo Anok-Nu de mulio Ko. 2 Serai awei Ko bi melei ngen Si kuaso das kute de idup, awei yo kulo Si bakea melei idup de kekal ngen kute de sudo Ko melei ngen Si. 3 Dio ba idup de kekal, adeba bahwo tobo'o kemnal Bapa, dedone Allah de benea, ngen kemnal Yesus Kristus de sudo nutus Bapa. 4 Uku bi mulio Ko neak bumai ngen semlesei kerjo de Ko melei ngen-Ku utuk uku meneane. 5 Uyo, au Bapa, mulio ba Uku neak hadirat-Nu suang ngen kemulioan de Uku temuan neak hadirat-Nu ayok dunio ade. 6 Uku bi kemnal Bapa ngen kute tun de Ko melei ngen-Ku kunei dunio. Tobo'o adeba Bapa temuan. Bapa bi melei tobo'o ngen-Ku ngen tobo'o bi temotoa firman-Nu. 7 Uyo tobo'o namen bahwo kute de Ko melei ngen-Ku o berasal kunei Bapa. 8 Sebab kute firman de Ko semapei ngen Uku bi Uku semapei, ngen tobo'o bi temimo-Ne. Tobo'o bebenea namen bahwo Uku teko kunei Ko ngen tobo'o pecayo bahwo Ko ba de sudo mutus Uku. 9 Uku bedu'o utuk tobo'o. Iso utuk dunio Uku bedu'o, tapi utuk tobo'o, de sudo Ko melei ngen-Ku, sebab tobo'o adeba Ko temuan. 10 Kute Uku temuan adeba Bapa temuan ngen Ko temuan adeba Uku temuan, ngen Uku bi de mulio neak lem tobo'o. 11 Uku coa ade igai neak lem dunio, tapi tobo'o masiak ade neak lem dunio, Uku teko ngen Ko. Au Bapa de sucai, jagoba tobo'o lem gen-Nu, adeba gen-Nu de sudo Ko melei ngen-Ku, supayo tobo'o jijai do serai awei ite. 12 Sekean Uku sesamo tobo'o, Uku miaro tobo'o lem gen-Nu de sudo Ko melei ngen-Ku; Uku jemago tobo'o ngen coa ade suang kulo kunei tobo'o de nyep seluyen si desudo se'arusne nyep, supayo tejijaiba de tenulis lem Kiteb Sucai. 13 Tapi uyo Uku teko ngen Ko ngen Uku madeak kutene yo sementaro Uku masiak ade neak lem dunio, supayo penuak ba suko cito-Ku neak lem dirai tobo'o. 14 Uku bi melei firman-Nu ngen tobo'o ngen dunio jengik ngen tobo'o, kerno tobo'o iso kunei dunio, serai awei Uku iso kunei dunio. 15 Uku coa minoi, supayo Ko mok tobo'o kunei dunio, tapi supayo Ko jemago tobo'o kunei de kidek. 16 Tobo'o iso kunei dunio, serai awei Uku iso kunei dunio. 17 Senucai ba tobo'o lem kebenea; firman-Nu o ba kebenea. 18 Serai awei Bapa bi mutus Uku moi lem dunio, awei'o kulo Uku bi mutus tobo'o moi lem dunio. 19 Ngen Uku semucai dirai-Ku utuk tobo'o, supayo tobo'o kulo senucai lem kebenea. 20 Iso utuk tobo'o bae Uku bedu'o, tapi kulo utuk tun-tun de pecayo ngen-Ku liwet saksai tobo'o. 21 Supayo tobo'o kute jijai do, serai awei Ko, au Bapa, neak lem ite, supayo dunio pecayo bahwo Ko ba de sudo mutus Uku. 22 Uku bi melei ngen tobo'o kemulio de Ko melei ngen-Ku, supayo tobo'o jijai do, serai awei Ite adeba do. 23 Uku neak lem tobo'o ngen Ko neak lem Uku supayo tobo'o bebenea jijai do, supayo dunio namen bahwo Ko de mutus Uku ngen Ko mengasiak tobo'o, serai awei Ko mengasiak Uku. 24 Au Bapa, Uku lok supayo, neak ipe bae Uku ade, tobo'o kulo ade sesamo ngen Uku, tobo'o de sudo Ko melei ngen-Ku, supayo tobo'o kemliak kemulio-Ku de sudo Ko melei ngen-Ku, sebab Ko bi mengasiak Uku ayok dunio jenijai. 25 Au Bapa de adea, memang dunio coa kemnal Ko, tapi Uku kemnal Ko, tobo'o namen bahwo Ko ba de sudo mutus Uku. 26 Uku bi melei namen ngen Ko, tobo'o ngen Uku bakea melei namenne, supayo kasiak de Ko melei ngen Uku ade neak lem tobo'o ngen Uku neak lem tobo'o."
1 Sesudo Yesus madeak kutene o kelueaba Si kunei di sesamo-samo ngen penotoa-Ne ngen tobo'o lalau moi dipoa Bioa Kidron. Neak di ade do taman ngen Si masuk moi taman o besamo-samo ngen penotoa-penotoa-Ne. 2 Yudas, de mianat Yesus, namen kulo penan o, kerno Yesus awit kopoa neak di ngen penotoa-penotoa-Ne. 3 Lajau teko ba Yudas kulo moi di ngen pasukan tentra Romawi ngen penjago-penjago Umeak Tuhan de neluak ngen imem-imem kepalo ngen tun-tun Farisi. Tobo'o mbin senatai, lapu ngen obor. 4 Yesus namen kute de bakea tejijai ngen dirai-Ne. Si ma'ok tun-tun o ngen madeak ngen tobo'o, "Api de udi mesoa?" 5 Jawab tobo'o, "Yesus kunei Nazaret." Nadeak-Ne ngen tobo'o, "Uku ba Si." Yudas de mianat Si je kulo neak di besamo-samo tobo'o. 6 Waktau Si madeak ngen tobo'o, "Uku ba Si," mondorba tobo'o ngen Us moi pitok. 7 Lajau Si betanye igai ngen tobo'o, "Api de udi mesoa?" Nadeak tobo'o, "Yesus kunei Nazaret." 8 Jawab Yesus, "Bi Uku madeak ngen udi, Uku ba Si. Amen Uku de udi mesoa, kunyau ba tobo'o lalau." ( 9 Awei yo kenlokne supayo tejijai ba firman de sudo nadeak-Ne, "Kunei tobo'o de Ko semreak ngen-Ku coa suang kulo de Uku munyau benaso.") 10 Lajau Simon Petrus, de mbin pedang, mekot pedang o, nabeakne ngen hambo Imem Lai ngen mutus ti'uk kanenne. Gen hambo o Malkhus. 11 Nadeak Yesus ngen Petrus, "Seno'ong pedangnu o; iso Uku arus menem derito de nelei Bapa ngen-Ku?" 12 Lajau pasukan prajurit serto perwirane ngen penjago-penjago de neluak tun Yahudi o temakep Yesus ngen meket Si. 13 Mulo-mulo tobo'o mbinne ngen Hanas adeba setuang Kayafas de pado taun o jijai Imem Lai. 14 Kayafas ba de melei nasihat ngen tobo pemuko Yahudi, "Lebiak beguno amen suang tun matei utuk kute bangso." 15 Simon Petrus ngen suang penotoa luyen temotoa Yesus. Penotoa o kemnal Imem Lai ngen si masuk sesamo-samo ngen Yesus moi latet Istana Imem Lai, 16 tapi Petrus tinggea neak luea pa'ok bang. Penotoa de luyen, de kemnal Imem Lai, belek moi luea, miling selawei penjago bang lajau mbin Petrus masuk. 17 Nadeak pelayan selawei penjago bang ngen Petrus, "Iso Ko kulo penotoa tun o?" Jawab Petrus, "Iso!" 18 Sementaro o pelayan-pelayan ngen penjago-penjago Umeak Allah bi midup opoi a'ang, sebab udaro sengok waktau o, ngen tobo'o je bediang neak di, Petrus kulo je bediang sesamo ngen tobo'o. 19 Sesudo'o muloi ba Imem Lai temanye Yesus tetang penotoa-penotoa-Ne ngen ajaran-Ne. 20 Jawab Yesus ngen si, "Uku miling terus te'ang ngen dunio. Uku bogoa ngajea neak umeak-umeak semyang ngen neak Umeak Allah, penan kute tun Yahudi bekopoa. Uku coa perneak miling bebunyin. 21 Getai ko temnai Uku? Temnai ba ngen tobo'o, de sudo temi'uk jano de Uku madeak ngen tobo'o; sungguak, tobo'o namen jano de sudo Uku madeak." 22 Waktau Si madeak hal o, suang penjago de je neak di, tempok papea-Ne samo madeak, "Awei'o jawab-Nu ngen Imem Lai?" 23 Jawab Yesus ngen si, "Amen kecek-Ku o saleak, madeakba saleakne, tapi amen kecek-Ku o benea, getai ko tempok Uku?" 24 Lajau Hanas kemirim Si lem keadaan tepeket ngen Imem Lai Kayafas. 25 Simon Petrus masiak je ngen bediang. Nadeak tun-tun neak di ngen si, "Iso ko kulo saleak suang penotoa-Ne?" Petrus menyangkalne, nadeakne, "Iso!" 26 Padeak suang pelayan Imem Lai, suang keluargo kunei pelayan de ti'ukne notong Petrus, "Iso uku kemliak ko neak taman o sesamo ngen Si?" 27 Petrus kulo menyangkal igai ngen waktau o kulo bekokokba monok. 28 Sesudo o, tobo'o mbin Yesus kunei Kayafas moi istana gubernur. Waktau'o bilai masiak pueng. Tobo'o suang coa masuk moi istana gubernur'o, supayo jibeak jijai najis, sebab tobo'o lok mbuk Paskah. 29 Sebab o Pilatus keluea magea tobo'o ngen madeak, "Jano tuduak udi te'adep tun yo?" 30 Jawab tobo'o ngen Si, "Amen Si suang penjahat, keme coa semreakne ngen udi!" 31 Nadeak Pilatus ngen tobo'o, "Mokba Si ngen mukumba Si temurut ukum agamo Yahudi o, nadeakne, 'Keme coa buliak mukum matei suang tun.' " ( 32 Awei yo ba kelokne supayo tejijai firman Yesus, de nadeakne utuk madeak awei ipe ca'one Si bakea matei.) 33 Pilatus masuk igai moi lem istana gubernur, lajau menok Yesus ngen betanye, "Jano Ko Rajo tun Yahudi?" 34 Jawab Yesus, "Jano ko nadeak hal o kunei ateinu suang, jano tun luyen de madeak ngen ko tetang Uku?" 35 Nadeak Pilatus, "Jano uku suang Yahudi? Bangso-Nu suang ngen imem-imem kepalo de sudo semreak Ko ngen uku, jano de sudo Ko menea?" 36 Jawab Yesus, "Kerajaan-Ku iso kunei dunio yo. Amen Kerajaan-Ku kunei dunio yo, paset pelayan-pelayan-Ku bi melawen, supayo Uku jibeak semreak ngen tun Yahudi. Tapi Kerajaan-Ku iso kunei dunio yo!" 37 Lajau nadeak Pilatus ngen Si, "Jijai Ko adeba rajo?" Jawab Yesus, "Ko madeak bahwo Uku adeba rajo. Utuk do'o ba Uku laher ngen utuk do'o ba Uku teko moi lem dunio yo, supayo Uku melei saksai tetang de benea. Tiep tun de berasal kunei de benea temi'uk sa'ei-Ku." 38 Nadeak Pilatus ngen Si, "Jano de benea o?" 38 Sesudo madeak awei yo, Pilatus keluea igai magea tun-tun Yahudi ngen madeak ngen tobo'o, "Uku coa dapet saleak jano bae kunei Si. 39 Tapi pado udi ade kebiasoan bahwo pado Bilai Paskah Uku mbebas suang utuknu. Lok udi, supayo Uku mbebas rajo tun Yahudi utuknu?" 40 Tobo'o menggang kulo, "Jibeak Si, tapi Barabas!" (Barabas adeba suang perapok.)
1 Lajau Pilatus mok Yesus ngen meluak tun melipai. 2 Prajurit-prajurit menea do Mahkota tebok ngen mpekne neak das ulau Yesus. Tobo'o mpek jubah ungu ngen Si. 3 Samo maju moi adep tobo'o madeak, "Salam, hoi rajo tun Yahudi!" Lajau tobo'o tempok papea-Ne. 4 Pilatus keluea igai ngen madeak ngen tobo'o, "Kemliakba, uku mbin Si keluea ngen udi, supayo udi namen bahwo Uku coa dapet saleak jano bae ngen Si." 5 Lajau Yesus keluea, makei mahkota tebok ngen makei jubah ungu. Pilatus madeak ngen tobo'o, "Kemliakba tun'o!" 6 Waktau imem-imem kepalo ngen penjago-penjago o kemliak Si, menggang ba tobo'o, "Senalibba Si, senalibba Si!" Nadeak Pilatus ngen tobo'o, "Mok Si ngenko bae de senalibne; sebab uku coa dapet saleak jano bae kunei Si." 7 Jawab tun-tun Yahudi o ngen si, "Keme temuan ukum ngen temurut ukum Si harus matei, sebab Si manggep dirai-Ne awei Anok Allah." 8 Waktau Pilatus temi'uk kecek o si betambeak saben, 9 lajau si masuk igai moi lem istana gubernur, madeak ngen Yesus, "Kunei ipe asal-Nu? Tapi Yesus coa melei jawab ngen si. 10 Kerno o, nadeak Pilatus ngen Si, "Ko coa lok miling ngen uku? Coa ko namen bahwo Uku bekuaso utuk mbebas Ko, ngen bekuaso kulo utuk semalib Ko?" 11 Yesus jemawab, "Ko coa temuan kuaso jano bae te'adep Uku, amen kuaso o coa nelei ngen ko kunei das. Sebab'o Si de semreak Uku ngen-Ko lebiak lai duso ne." 12 Ketiko Pilatus berusaho utuk mbebas Si, tapi tun-tun Yahudi menggang, "Amen ko mbebas Si, ko isoba kuat Kaisar. Tiep tun de manggap diraine awei rajo, si melawen Kaisar." 13 Waktau Pilatus temi'uk kecek o, si meluak mbin Yesus keluea, si temot das kersai pengadilan, neak penan genne Litostrotos, lem bahaso Ibrani Gabata (Tai ne: Kea butau). 14 Bilai o bilai persiapan Paskah, kekiro jam duai belas. Nadeak Pilatus ngen tun-tun Yahudi o, "Kemliakba rajonu!" 15 Lajau menggangba tobo'o, "Nunuak Si! Nunuak Si! Senalib Si!" Nadeak Pilatus ngen tobo'o, "Arus uku semalib rajonu?" Jawab imem-imem kepalo, "Keme coa temuan rajo seluyen Kaisar!" 16 Akherne Pilatus semreak Yesus ngen tobo'o utuk senalib, lajau tobo'o temimo Yesus. 17 Samo mikut salib-Ne Si lalau moi luea neak penan de genne "Penan Tengkorak". (Lem bahaso Ibrani: Golgota.) 18 Neak di tobo'o semalib Si. Sesamo ngen Si senalib kulo duai tun luyen, do depeak kideu, do depeak kanen, Yesus neak tengeak-tengeak. 19 Pilatus meluak mpek kulo tulisan neak das kieu salib o, sa'eine, "Yesus Tun Nazaret, Rajo Tun Yahudi." 20 Dau tun Yahudi de mbaco tulisan o, sebab penan Yesus senalib ade pa'ok kota. Ngen tulisan o tenulis lem bahaso Ibrani, bahaso Latin, ngen bahaso Yunani. 21 Lajau nadeak imem-imem kepalo tun Yahudi ngen Pilatus, "Jibeak Ko temulis, 'Rajo tun Yahudi', tapi, 'Si madeak, 'Uku adeba Rajo tun Yahudi.' " 22 Jawab Pilatus, "Jano de Uku temulis, tep tetulis." 23 Sesudo prajurit-prajurit o semalib Yesus, tobo'o mok keracok-Ne lajau magiakne jijai pat bagiak--ngen jubah-Ne kulo tobo'o mok. Jubah o coa ade pendet, senulam kunei das moi beak. 24 Kerno o tobo'o madeak suang ngen de luyen, "Jibeakba ite magiakne jijai kekedau lambea, tapi baikba ite muang undian utuk tentau api de dapetne." Awei yo ba kelokne supayo tejijai de ade tenulis lem Kiteb Sucai: "Tobo'o magiak keracok-Ku neak antaro tobo'o ngen tobo'o muang undian das jubah-Ku." Hal o bi nea prajurit-prajurit o. 25 Pa'ok salib Yesus je indok-Ne ngen pasuak indok-Ne, Maria, ngenyan Klopas ngen Maria Magdalena. 26 Waktau Yesus kemliak indok-Ne ngen penotoa-Ne de kemasiak-Ne neak depeakne, madeakba Si ngen indok-Ne, "Indok, dioba, anoknu!" 27 Sesudo'o nadeak-Ne ngen penotoa-Ne, "Dioba indoknu!" Waktau o kulo penotoa o temimo si neak lem umeakne. 28 Sesudo'o, kerno Yesus namen bahwo kute sesuaktau bi selsei, madeak ba Si -- supayo tejijai de tenulis lem Kiteb Sucai --: "Uku aus!" 29 Neak di ade do makuk penuak ngen anggur pi'iak. Tobo'o cemlup busa moi lem anggur pi'iak, lajau busa'o neket moi ujung buluak ngen nunjuak moi bibia Yesus. 30 Sesudo Yesus menem anggur pi'iak'o madeakba Si, "Sudo selsei." Lajau Si temunduk ulau-Ne ngen semreak nyabai-Ne. 31 Kerno bilai o bilai persiapan supayo pado bilai Sabat mayit-mayit o coa tegatung neak kieu salib -- sebab Sabat o bilai rayo -- mako teko ba tobo pemuko Yahudi ngen Pilatus minoi ngen si supayo kekea tun-tun o natiak ngen mayit-mayitne tenu'un. 32 Lajau tekoba prajurit-prajurit matiak kekea tun-tun de dute ngen kekea tun de luyen de senalib sesamo Yesus. 33 Tapi waktau tobo'o sapei ngen Yesus ngen kemliak bahwo Si bi matei, tobo'o coa matiak kekea-Ne. 34 Tapi suang kunei antaro prajurit o temikem lambung-Ne ngen tumbak, segro ngeluea daleak ngen bioa. 35 Tun de kemliak suang hal o de besaksai ngen saksaine benea, ngen si namen bahwo si madeak de benea, supayo udi kulo pecayo. 36 Sebab hal o tejijai, supayo tejijai de tenulis lem Kiteb Sucai, "Coa ade telan-Ne de bakea patiak." 37 Ade kulo ayat de luyen madeak, "Tobo'o bakea kemliak de sudo tobo'o tikem." 38 Sesudo'o Yusuf kunei Arimatea minoi ngen Pilatus, supayo si neluak temu'un mayit Yesus. (Yusuf adeba penotoa Yesus, tapi bebunyin kerno saben ngen tobo penguaso Yahudi.) Pilatus kemabul kinoine o. Lajau tekoba si ngen temu'un mayit o. 39 Nikodemus kulo teko moi mindi. Siba de dute teko pado bilai kelmen ngen Yesus. Si mbin capuran minyok mur ngen minyok ka'es, kekiro telau puluak kilogram benekne. 40 Tobo'o mok mayit Yesus, kempanne ngen kain kaci ngen mpek minyok um temurut adat tun Yahudi amen kemubua mayit. 41 Pa'ok penan Yesus senalib ade do taman ngen lem taman o ade suaktau kubua belau de neak lemne ati perneak kemubua suang tun. 42 Kerno bilai o bilai persiapan tun Yahudi, gidong kubua o coa uak pekne, mako tobo'o mpek mayit Yesus neak di.
1 Pado bilai dedute minggau o, kekabuk nien waktau bilai masiak kelem, lalau ba Maria Magdalena moi kubua. Si kemliak bahwo butau penutupne bi kesia kunei lubang kubua. 2 Si melilai magea Simon Petrus ngen penotoa de luyen, de kenasiak Yesus. Maria madeak ngen tobo'o, "Tuhan bi nemok tun kunei kubuane ngen keme coa namen neak ipe Si nepek." 3 Lajau berakatba Petrus ngen penotoa de luyen o moi kubua. 4 Keduaine melilai sesamo, tapi penotoa de luyen o melilai lebiak gacang kunei Petrus sehinggo lebiak dute sapei neak kubua. 5 Si cungok moi lem, ngen kemliak kain kefan ade neak pitok, tapi si coa masuk. 6 Sesudo'o tekoba Simon Petrus kulo semsung si ngen masuk moi lem kubua o. Si kemliak kain kefan ade neak pitok, 7 gidong kain kaci de nanone ade neak ulau Yesus coa ade pa'ok kain kefan'o, tapi telipet dewek neak penan de luyen. 8 Sesudo'o, masukba kulo penotoa de luyen, de lebiak dute sapei neak kubua o ngen si kemliakne ngen pecayo. ( 9 Sebab seke'an o tobo'o ati ngertai isai Kiteb Sucai de madeak, bahwo Si arus idup igai kunei antaro tun matei.) 10 Lajau belekba penotoa-penotoa'o moi umeak. 11 Tapi Maria je neak luea kubua o ngen ngindoi. Samo ngindoi si cemungok moi lem kubua o, 12 ngen ketenba ngen si duai malaikat makei keracok putiak. De do temot neak depeak ulau ngen de luyen neak depeak kekea neak penan mayit Yesus tegulek. 13 Nadeak malaikat-malaikat o ngen si, "Indok, getai ko ngindoi?" Jawab Maria ngen tobo'o, "Tuhanku bi mok tun ngen uku coa namen neak ipe Si nepekne." 14 Sesudo madeak awei o si kemliak moi belakang ngen kemliak Yesus je neak di. Tapi si coa namen bahwo do'o adeba Yesus. 15 Nadeak Yesus ngen si, "Indok, getai ko ngindoi? Api de ko mesoa?" Maria sako tun o penjago taman, lajau madeak ngen-Si, "Tuan, amen tuan de mok Si, nadeakba ngen uku, neak ipe tuan mpek-Ne, supayo uku dapet mok-Ne." 16 Nadeak Yesus ngen si, "Maria!" Maria jemling ngen madeak ngen-Si lem bahaso Ibrani, "Rabuni!" (Taine "Gu'au".) 17 Nadeak Yesus ngen si, "Jibeakba ko megong Uku, sebab Uku ati kenek ngen Bapa. Tapi lalau ba ngen pasuak-pasuak-Ku ngen nadeakba ngen tobo'o bahwo uyo Uku bakea lalau ngen Bapa-Ku ngen Bapa-Nu, Allah-Ku ngen Allahnu." 18 Maria Magdalena lalau ngen madeak ngen penotoa-penotoa, "Uku bi kemliak Tuhan!" Ngen kulo bahwo Si de madeak hal-hal o ngen si. 19 Waktau bilai bi kelemen pado bilai pertamo minggau o kopoaba penotoa-penotoa Yesus neak do penan ngen bang-bang de tekucai kerno tobo'o saben ngen tobo penguaso Yahudi. Pado waktau o tekoba Yesus ngen je neak tengeak-tengeak tobo'o ngen madeak, "Damoi sejahtera utuk udi!" 20 Sesudo madeak awei o, Si kemten tangen-Ne ngen lambung-Ne ngen tobo'o. Penotoa-penotoa o riang waktau tobo'o kemliak Tuhan. 21 Lajau nadeak Yesus debat igai, "Damoi sejahtera utuk udi! Serai awei Bapa mutus Uku, awei o kulo uyo Uku mutus ko." 22 Sesudo madeak awei o, Si kembus tobo'o ngen madeak, "Temimo ba Roh Sucai. 23 Amen udi mapun duso tun, dusone napun, amen udi madeak duso tun ade, dusone tep ade." 24 Tapi Tomas, saleak suang keduai belas penotoa o, de senbut Didimus, coa ade sesamo tobo'o, ketiko Yesus teko neak di. 25 Jijai, nadeak penotoa-penotoa de luyen o ngen si, "Keme bi kemliak Tuhan!" Tapi tomas madeak ngen tobo'o, "Ayok uku kemliak kes pasok pado tangen-Ne ngen ayok uku mpek ji'aiku moi lem kes pasok o ngen mpek tangenku moi lambung-Ne, debat bae uku coa pecayo." 26 Lapen bilai sesudo'o penotoa-penotoa Yesus ade igai lem umeak o ngen Tomas sesamo ngen tobo'o. Sementaro bang-bang tekucai, Yesus teko ngen je neak tengeak-tengeak tobo'o ngen madeak, "Damoi sejahtera utuk udi!" 27 Sesudo'o Si madeak ngen tomas, "Kemliakba ji'ainu neak yo ngen kemliakba tangen-Ku, muluaba tangennu ngen mpekba moi lambung-Ku ngen jibeak ko coa pecayo igai, tapi pecayoba!" 28 Tomas jemawab Si, "Au Tuhanku ngen Allahku!" 29 Nadeak Yesus ngen si, "Kerno ko bi kemliak Uku, mako ko pecayo. Bahagiaba tobo'o de coa kemliak, tapi pecayo!" 30 Memang masiak dau tando mujizat luyen de nea Yesus neak adep matai penotoa-penotoa-Ne, de coa cenatet lem kiteb yo. 31 Tapi hal-hal yo bi cenatet, supayo udi pecayo bahwo Yesusba Rajo Penyelamat, Anok Allah, ngen supayo kerno pecayo, udi dapet idup lem gen-Ne.
1 Sesudo'o Yesus kemten dirai igai ngen penotoa-penotoa-Ne neak patoi Daneu Tiberias ngen Si kemten dirai awei berikut. 2 Neak patoi o kopoa Simon Petrus, Tomas de senbut Didimus, Natanael kunei Kana de neak Galilea, anok-anok Zebedeus ngen duai tun penotoa-Ne de luyen. 3 Nadeak Simon Petrus ngen tobo'o, "Uku lalau temakep kan." Nadeak tobo'o ngen si, "Keme lalau kulo ngen ko." Tobo'o berakat lajau kenek moi biduk, tapi kelmen o tobo'o coa temakep jejano. 4 Ketiko bilai muloi pueng, Yesus je neak patoi, tapi penotoa-penotoa o coa namen bahwo do'o adeba Yesus. 5 Nadeak Yesus ngen tobo'o, "Hoi anok-anok, jano udi temuan kan?" Jawab tobo'o, "Coa." 6 Lajau nadeak Yesus ngen tobo'o, "Mambuaba jalainu neak depeak kanen biduk, mako udi bakea dapet kan." Tobo'o kulo mambua jalai o ngen tobo'o coa dapet temarikne igai kerno daune kan. 7 Lajau penotoa de kemasiak Yesus o madeak ngen Petrus, "Do'o Tuhan." Ketiko Petrus temi'uk bahwo do'o adeba Tuhan, mako si makei keracokne, sebab si coa makei bajau, lajau tejun moi lem daneu. 8 Sesudo'o penotoa-penotoa de luyen teko kak biduk kerno tobo'o coa uak kunei da'et, cuma kekiro sotos meter bae ngen tobo'o temarik jalai de penuak kan o. 9 Waktau tobo'o sapei neak da'et, tobo'o kemliak opoi aang neak dasne ade kan ngen ruti. 10 Nadeak Yesus ngen tobo'o, "Mbin ba kekedau kan de tembei bae udi makep o!" 11 Simon Petrus kenek moi biduk lajau temarik jalai o moi da'et, penuak kan-kan lai: sotos lemo puluak telau likup dau ne, kunyau kedau o, jalai o coa ca'ik. 12 Nadeak Yesus ngen tobo'o, "Maroba ngen sarapanba." Coa ade neak antaro penotoa-penotoa o de binai betanye ngen-Si, "Api Ko?" Sebab tobo'o namen bahwo Si adeba Tuhan. 13 Yesus maju moi muko, mok ruti ngen meleine ngen tobo'o, kan o kulo. 14 Do'o ba ketelau kilaine Yesus kemten dirai ngen penotoa-penotoa-Ne sesudo Si idup igai kunei antaro tun matei. 15 Sesudo sarapan Yesus madeak ngen Simon Petrus, "Simon, anok Yona, jano ko mengasiak Uku lebiak kunei tobo'o mengasiak Uku?" Jawab Petrus ngen si, "Benea Tuhan, 'Ko namen bahwo uku mengasiak Ko.' " Nadeak Yesus ngen si, "Gembalaba bebirai-Ku." 16 Nadeak Yesus igai ngen si utuk keduai kilaine, "Simon, anok Yona, jano ko mengasiak Uku?" Jawab Petrus ngen Si, "Benea Tuhan, Ko namen, bahwo uku mengasiak Ko." Nadeak Yesus ngen si, "Gembalaba bebirai-Ku." 17 Nadeak Yesus ngen si utuk ketelau kilaine, "Simon, anok Yona, jano Ko mengasiak Uku?" Petrus kulo meding ibo kerno Yesus madeak utuk ketelau kilaine, "Jano ko mengasiak Uku?" Ngen si madeak ngen-Si, "Tuhan, Ko namen kute sesuaktau. Ko namen, bahwo uku mengasiak Ko." Nadeak Yesus ngen si, "Meliaroba bebirai-Ku. 18 Sesungguakne Uku madeak ngen udi: Waktau ko masiak uai ko meket pinggangnu suang ngen paneu moi ipe bae ko kenlok, tapi amen ko bi tuai, ko bakea mulua tangennu ngen tun luyen bakea meket ko ngen mbin ko moi penan de coa ko kenlok." 19 (Hal yo de nadeak Yesus utuk madeak awei ipe Petrus bakea matei be utuk mulio Allah.) Sesudo madeak awei o Yesus madeak ngen Petrus, "Milauba Uku." 20 Waktau Petrus jemling, si kemliak bahwo penotoa de kenasiak Yesus gidong temotoa, adeba penotoa de pado waktau tobo'o gidong mukmei serpok temot pa'ok Yesus ngen de madeak, "Tuhan, api si de bakea semreak Ko?" 21 Ketiko Petrus kemliak penotoa'o, si madeak ngen Yesus, "Tuhan, awei ipe ngen si yo?" 22 Jawab Yesus, "Amen Uku kemlok, supayo si tinggea idup sapei Uku teko, do'o iso urusannu. Tapi ko: Milauba Uku!" 23 Lajau tesebeaba bito neak antaro pasuak-pasuak o bahwo penotoa o coa bakea matei. Tapi Yesus coa madeak ngen Petrus bahwo penotoa o coa bakea matei, tapi, "Amen Uku kemlok supayo si tinggea idup sapei Uku teko, do'o iso urusannu." 24 Siba penotoa de saksai tetang kutene yo ngen de sudo tenulisne ngen ite namen, bahwo saksaine o benea. 25 Masiak dau igai hal-hal luyen de nea ngen Yesus. Tapi amen kutene o arus tenulis dedo, Uku peker dunio yo coa dapet muet kute kiteb de arus tenulis o.