Safeyoka Bible - Gospel of John

Olo Hungkuno Wopɨngo loso Joun mtɨ'mokumentisofoho.

Olo Hungkuno Sɨmo'mjofoho.

Jisas ahwomomne'no nto sɨmentiso sohonta soswo mofonepo sikɨsɨti-foua (64) nto uyakolo'mentisopo Joun Jisasɨye inomokomoyo sohwo olo iyoswo loso mtɨ'mokumentisofoho. Sɨmo'mo olo Joun lohwo sohwo Joun A'amumo Mijo Kiyoma'mojo sohwoe inomokomoyo hweho. Tɨfi Jisasɨye inomokomoyo imo'nɨmentisofoho. Olo iyoswo loso Matɨyu, Mak, Lukɨja mtɨ'mokumentohofo pa'nyo'maho. O'o, nom'ne kengofoho. Hwapɨngoso ole: Matɨyu'nji Lukɨ'nji siko iyoswo mtɨ'mokiyoso Jisasɨye hofiyakwosa mta'ni imentisiyefoho. Joun sohwo mtɨ'mokumentisoso olenoho. Sɨmo'mo ne'mo nakwoe hwaho'nji yo'mayo so'nji ane sohonta Kɨlais, Anɨtuye Hungkuno sohwo, kako Anɨtu'nji humamentisofoho. Kako songo ne'no humawo'nɨngkiso hweho. (Oso hiso Joun sohe engo 1 honɨngkano we'e 1-2. Osopo weho.) Olo iyoswo hiloso Joun peho'ne mtɨ'mokumentisoto. Joun sohe engo 20 honɨngkano we'e 31 osopo Joun kako olo iyoswo hilo mtɨ'mokonto ole lɨmento: Ngko olo iyoswo mtɨ'mokohe loso'no sekwo Jisas Kɨlaisɨmo sɨmeho hi'ntnnono uyɨmno. Kako Anɨtuye Hwomu Ne hweho. Sekwo sɨmeho hi'ntnnono uyɨfijo'manji songo ne'no humayo'neso wotɨpemantɨfeho. Joun mtɨ'mokumentiso hungkuno hwapɨngo neso osohopeho. Oso'no iyoswo hiloso nakumo huno nafohotofo'neso olenoho. Joun mtɨ'mokumentiso iyoswo hiloso Jisas sohwo Anɨtuye Hwomu Ne hweho syafɨsyɨku'ntnne'ento mtɨ'mokumentisofoho. I oso'no nakwo iyoswo homo lomo atofo lɨhwasi Jisas sohwo Anɨtuye Hwomu Ne hweho lɨhwasi nakwo kakimo tɨfi unɨngkohwano.

Songo ne'no humayo hwapɨngo sohwo a'amu imo'nɨmentisofoho.

1-2 Sɨmo'mo ne'mo nakwoe hwaho'nji yo'mayo so'nji ane sohonta Kɨlais, Anɨtuye hungkuno sohwo kako Anɨtu'nji humamentisofoho. Kako songo ne'no humawo'nɨngkiso hweho. Kako huhwo Anɨtuyoho. 3 Anɨtu kakoe hungkuno sohwo'nji kako yo'mayo yo'mayo hopi'nonohinoso mtɨ'mokumentisofoho. Yo'mayo yo'mayoso nom'ne hwapɨngo mta'ango'maho. O'o, kako'nohini yo'mayoso hwapɨngo hweho. 4 Kɨlais kako songo ne'no humayo hwapɨngo sohwo kako songo humayo honɨngkano nejapmmentiso so'no kako nakwoe pomponaho hweho. 5 Oso pomponaho huhwo sohwo kako nakwo a'amu hopi'nonohino sɨkwo'mjoho'mo humentanɨngkuhwaso hn'nɨmo lonasiyo'ne hweho. Oso sɨkwo'mjoho hiso pomponaho huhwo sohumo mifehu'mokonasyonehoho. O'o, oso pomponaho huhwo sohwo ne'no nolɨwo'nɨngkuhwonefoho. 6 Anɨtu kako hwe fihumo uhwatɨmentiso sohwo kakoe yofeso Jounɨyoho. 7 Joun kako oso pomponaho hiso'ne a'amu hopi'nonohino somo ujo'ne pmmentiso hweho. A'amu hopi'nonohinoso oso hungkuno homo somo upa'nɨngkuji sɨmeho hi'ntnnono uyɨfitnne'ento pmmentisofoho. 8 Joun huhwo sohwo kako pomponaho hwo'maho. O'o, Anɨtu kako oso pomponaho hiso'no a'amu somo utɨhwayo'ne Jounɨmo uhwatɨmentisofoho. 9 Pomponaho ne hiso kako a'amu hopi'nonohino hn'nɨmo honɨngkano netɨhwayo'ne lonasiyo'nefoho. Oseso Joun kako nohumentanɨngki oso pomponaho ne sohwo imo'nonto kako a'amumo honɨngkano wopɨngo utɨhwayo hweho. 10 Anɨtu kakoe hungkuno sohwo'nji olo hwaho loso mtɨ'mokumentiso sohwo olopo nopahonɨngki a'amu olo hwaho loponjoso kakimo yofe muhwo'mmentohofofoho. O'o, muhwoso'njo yontɨfi monje yahumentohofofoho. 11 Kako kakoe hwapɨngopo i'mofɨwahonɨngki kakoe temtitofo a'amu Jutaso hofɨko kakimo sɨmeho muyo'njo yontɨfi hwotoho hmmentohofofoho. 12 I oso'no a'amu fehohnjo sohwa hofɨko Kɨlaisɨmo yofe uhwofontɨfi kakoe hungkunomo sɨmeho hi'ntnnono uyɨmentohofofoho. I a'amu hopi'nonohinoso hofɨko Kɨlaisɨmo sɨmeho unyo somo Kɨlais kako kakoe yokumpohn'nyo uyɨmentiso so'no Anɨtuye a'amu ne umokumentisofoho. 13 Moya'mi sofa hofɨko mehomi aswo mawo'nɨngkohofo hopaso a'amu Anɨtuye mehomi mmo'nɨfitnnehofo. O'o, a'amufe yokumpohn'nyo mta'ni u, a'amufe huno mta'ni a'amu Anɨtuye mehomi ne imo'nyoso mmo'nɨfitnnefoho. O'o, Anɨtu kako huno ole syafɨhu'mento, A'amuso nje hwomumo sɨmeho uyɨkujo'manji hofɨko nje mehomi ne imo'nɨfitnnefoho. Ose syafɨhu'mentisofoho. 14 Anɨtuye hungkuno hweho lɨwo'nɨngkuhwone sohwo kako a'amu imo'nonto Kɨlais huhwo sohwo nakwo'njo ajwo lopo humamentisofoho. Nohumanto kako a'amu hn'nɨmo wopɨngo'nohini nalohofonto kako hungkuno ne'njo'nohini lonetɨhwamentiso hweho. Nakwo a'amu fehohnjo hn'nwi nakwo Kɨlaisɨye yokumpohn'nyo engo somo uhwonontani kakoe yofe engo uhwo'mentɨhwonefoho. Oso yofe engoso yokumpohn'nyo engoso Anɨtu kakoe Hwomumo uyahonɨngki uhwonontani Anɨtuye Hwomu anga'nohino hweho uhwo'mentɨhwonefoho. 15 Joun kako i'mofaponto Kɨlais huhwo sohumne'no lɨjwao'mentisofoho. Ole lɨjwao'mento, Olo hwe lohumne'no ole nto selɨmentohefoho. Ngko sɨmo'mo sekumo nto se'ma'mentohefoho. Tɨfi hwe nom'ne sohwo nose'mahwosi kako nje yofe engomo woniyakolo'montonoho. Hwapɨngoso ngko nje na'u aswo monɨmaso sohonta kako songo humamojo hweho. Kakoe yofe engoso ngkimo noniyakolofonefoho. 16 Kako nakumo wopɨngo nalohofoso hwapɨngo hweho. Oso'no nakwo wonyo'nohino ko hn'nɨmo kakoe wopɨngo'nohinoso nakumo wopɨngo ne'no ne'no nalohofɨwo'nɨngkiso hweho. 17 Hohonta Anɨtu kako neyakwo Mousesɨmo kakoe honɨngkano hungkuno uyɨmentisofoho. Oso honɨngkano hungkuno homo somo a'amu nto'no minɨngkammentohofoso hofɨko tohino engo tɨpema'mentohofofoho. I oso'no olohonta Jisas Kɨlais kako none'mahonɨngki kako honɨngkano neso nonetɨhwanto kako nakwoe wonyo somjo tohino nomanto kako wopɨngo'nohini nalohofɨwo'nɨngkiso hweho. 18 Nakwo a'amu hwahoponjo hn'nwi nakwo Anɨtumo muhwonyo'ne'nwoho. I oso'no Anɨtuye Hwomu Anga'nohino sohwo kanɨngkwohwo'nji nohumanji kako Anɨtuye yahino ne so'no nakumo netɨhwawo'nɨngkiso hweho.

Joun A'amumo Mijo Kiyoma'mojo sohwo, kako hungkuno lɨmentisofoho.

19 A'amu Jutafe hwe engo Jelusalem humamotofo sohwa hofɨko a'amu fihwamo Jounɨmne'no uhwatɨmentohofofoho. Oso a'amu huhwo sohwa hofɨko tajo ango syoho'njo sohwanji a'amu tajo ango syoho'njo sohwamo enjwa'mo syoho yɨwo'nɨngkohofo oso huhwo sohwa Lifaiyoho lɨwo'nɨngkohofo, oso hwanji hofɨko Jounɨmo nu'mantɨfi ulohonɨmentohofi, Kɨko tɨhwosilo. Anɨtu kako kuhwosopo'mentiso sohwosilaho. 20 Ose ulohonɨngkahonɨngkofi Joun kako hungkunoso hiyaso ho'nahumentiso'maho. O'o, kako yolohoso ole ulɨmento. Oso hwe Anɨtu a'amu Juta sohwona'nɨmo nefo'mayo'ne nɨhwosopo'mentiso sohwonɨ'maho. Ngko Kɨlaisɨnɨ'maho. 21 Ose ulahonɨngki hofɨko ulɨmentohofi, I ose'manji kɨko tɨhwosilo. Kɨko neyakwo Ilaija kulaho. O'o, Ilaijanɨ'maho. Ose ulahonɨngki apa'no ulɨmentohofi, I kɨko oso hwe engo sohumo Anɨtu hungkuno uyahonɨngkuhwosi wonalɨmonte'no hontohumalohwone sohwosilaho. Ose ulahonɨngkahonɨngkofi ulɨmento, O'o, ngko osoho hwo'nɨ'maho. 22 Ose ulahonɨngki hofɨko ulɨmentohofi, I kɨko tɨhwosilo. Noho fonaso. Oso a'amu nonehwatɨmalofo sohwamo kikine'no pehofo ulanehwono. Kɨko kikine'no pehofo hnnalokuno. 23 Ose ulahonɨngkofi ulɨmento, Hohonta Aisaiya sohumo Anɨtu hungkuno uyahonɨngki lɨmojo sohwo ole lɨmento, Hwaho a'amu mohumunyo sopo mampaho engo oleso noho'nonefoho. Nakwoe Hwe Engo sohwo wone'ma'montonoho. Kakine'no honɨngkano nto'no hmmopmno.Oso hungkuno honɨngkano imofo'ne sohune'no Aisaiya hohonta lɨmentisoso ngkine'no lɨmentisofoho. Joun ose lɨmentisofoho. 24 Oso a'amu Jounɨmo hungkuno ulohonɨmentohofo huhwo sohwamo a'amu Falisi sohwa lɨhwatɨmentohofofoho. 25 Hofɨko Jounɨmo nom'ne hungkuno ulɨmentohofi, Anɨtu a'amu fihumo nefo'mayo'ne uhwosopo'mentiso Kɨlais sohwo kɨko oso hwosɨ'maho. Kɨko Ilaija ki'maho. Kɨko oso hwe engo sohumo Anɨtu hungkuno uyahonɨngkuhwosi wonalɨmonte'ne hontohumalohwone sohwosɨ'maho. Ose'manji kɨko hwe moya'mi somo mijo peho'ne kiyomalokuno. 26 Ose ulohonɨngkahonɨngkofi Joun ulɨmento, Ngko a'amu somo mijo'nohini kiyomawo'nɨngkohono. I oso'no hwe fihwo kako sekwo'njo ajwo lopo humaso sohune'no sekwo huno maseyo hweho. 27 Ngko sɨmo'mo se'ma'mentohefoho. Oso hwe tɨfinjo yofe engo'njo sohwo kako nje yofe somo yakolo'nnyo hweho. Ngko hwe wonyo sohwo'ni oso hwe yofe engo'njo yokintahoponjo sohwoe yo'mayo momayo ulohofiyo'nohino hwo'nyoho. Joun ose ulonto kakoe yofe somo monje yahinɨmentisofoho. 28 Joun kako oso Mijo Joutan hopo sopo a'amu mijo kiyoma'mojo sopo oso hungkuno hiso ulɨmentisofoho.

Jisas kako Anɨtuye Yahu ‘Sipsip’ Pa'nyo hweho.

29 Mo'nɨngkanta Joun kako uhwonɨngkisoso Jisas kako nto pahonɨngki uhwononto a'amu kako'njoponjo somo ulɨmento, Sekwo uhwonɨmno. Olo hwe lohwo Anɨtuye Yahu Sipsip Pa'nyo hweho. Hwapɨngoso kako nakwo hwe moya'mi hwahoponjo hn'nwiye yahino wonyo somjo tohino mayo'ne poyo imo'nyo'ne hweho. 30 Olo hwe lohumne'no ngko ole nto selɨmalefoho. Ngko sɨmo'mo sekumo nto se'ma'mentohefoho. Tɨfi hwe nom'ne sohwo nose'mahwosi kako ngkimo woniyakolo'montonoho. Hwapɨngoso ngko nje na'u aswo monɨmaso sohonta kako songo humamojo hweho. Kakoe yofe engoso ngkimo noniyakolofonefoho. Ose nto selɨmalefoho. 31 Hohonta olo hwe Anɨtu nakwoe hwahopo nefo'mayo'ne uhwatɨmentiso lohumo ngko huhwo'ni yofe mɨhwo'mmalefoho. I oso'no kakoe honɨngkano ito'no esyohumayo so'no ngko a'amu Juta somo mijo kiyomawo'nɨngkohe hwo'nyoho. Oso'no olo hwe lohwo i'mofapɨhwoso'no hofɨko kakimo yofe uhwofantɨfeho. Hofɨkimo itɨhwayo'ne hwo'nyoho. Ose ulɨmentisofoho. 32 Joun kako uhwonɨmentiso so'no oso a'amu huhwo sohwamo ole ulɨmento, Ngko nuhwononji ole uhwonɨmalefoho. Anɨtuye ango ahwomo mta'ni kakoe Towahuno Wopɨngo yɨhufo ntolofiyo pa'nyoso noponto olo hwe lohumo nto kehumahoho. 33 Oso hohosohonta ngko oso hwe huhwo sohumne'no huno manimmasofoho. I oso'no Anɨtu kako a'amumo mijo kiyomayo'ne lonɨhwatɨmentiso sohwo ole ntɨmento, Hwangku kɨko Anɨtuye Towahuno Wopɨngo ahwomo mta'ango nopɨhwosi hwe fihumo kehumaso sohumo uhwonɨngkohoji kɨko huno ole wakiyono. Kɨko a'amumo mijo kiyomam'ntnno hopaso oso hwe huhwo sohwo kako nje Towahuno a'amumo uhula'mo'montonoho. 34 Ose ntɨmentiso so'no olohonta ngko nuhwononji ole selalokweno. Olo hwe lohwo kako Anɨtuye Hwomu hweho. Joun ose ulɨmentisofoho.

Jisas kako'ne inomokomoyo sɨmo'mjo osofosofahu'nohino sohwamo ma'mentisofoho.

35-36 Mo'nɨngkanta Jounjanji kakoe inomokomoyo hufa'u sohwa'u'nji nohumantɨfi Jisasɨmo uhwonɨmentohofofoho. Jisas kako hano emoyontanɨngki Joun kakoe inomokomoyo sohwa'umo ole ulɨmento, Siko uhwoninyo. Oso hwe sohwo kako Anɨtuye Yahu Sipsip Pa'nyo sohwo a'amufe wonyo somjo tohino mayo'ne poyo imo'nyo'ne hweho. 37 Joun ose ulahonɨngki siko oso hungkunoso upa'nonji Jisasɨmo tɨfi inɨngkamentisiyefoho. 38 Jisas kako ikinjaofonto uhwonɨngkisoso siko nto inɨngkopahonɨngki uhwononto ulɨmento, Siko peho'no wotɨpeenji hwahusilo. Ose ulohonɨngkahonɨngki siko ulɨmentisiyo, Hwe Engofo, kɨko Anɨtuye hungkuno nalɨwo'nɨngkino sohwosi, kɨko ango ntɨpo humawo'nɨngkino hwosilo. 39 Ose ulahonɨngki Jisas ulɨmento, Siko uhwonanji'manji e'wano. Noho fɨpinyo. Ose ulonto Jisas kako sikimo ipemotowahonɨngki siko Jisas humawo'nɨngkiso ango somo uhwonɨmentisiyoso osopo kako'nji humamentisiyefoho. Hwapɨngoso mofehi'nyo akupo'nyo (4 kɨlouk) sɨkuno so'njoho. 40 Oso hwe hufa'u sohwa'u Jounɨye hungkunomo upa'nonji Jisasɨmo inɨngkawomentisiyo sohwa'u anga'nohino sohwo kakoe yofeso Entɨluyoho. Saimoun Pitafe konɨngkwa'wehweho. Nom'nihwo ngko Joun'ni olo hungkuno loso mtɨ'mokalokweno. 41 Entɨlu kako komo'no nowento kola'wehwo Saimounɨmo tɨpɨhwononto ulɨmento, Nakwo oso hwe Anɨtu nefo'mayo'ne uhwosopo'mentiso sohumo nto tɨpɨhwonɨngkuhwono. Kako Kɨlaisɨyoho. 42 Entɨlu ose ulonto kako Saimounɨmo Jisasɨyepono ipemotowahonɨngki Jisas kako nuhwononto Saimounɨmo ulɨmento, Kɨko Saimoun sohwosi Jounɨye hwomu hwosoho. Yofe songo womeekilɨmo. Sifas kiyoho. Ose ulɨmentisofoho. Oso Juta sohwafe hungkuno Sifasɨyoho Ngkɨlik hungkunoso ole Pitafoho. Hungkuno hwapɨngo neso sojo hweho.

Jisas kako Filipɨ'nji Notaniyelɨ'njimo nnɨngkapinyo ulɨmentisofoho.

43 Mo'nɨngkanta Jisas kako hwaho Ngkaliline'no wamonto kako Filipɨmo uswo'nonto ulɨmento, Kɨko ngkimo nnɨngkape. 44 Filip kakoe pone Mpetɨsaitanta'ango hweho. Oso ango hopo sopo siko'nɨkwa'i Entɨlu'nji Saimoun'nji humamojiyoponoho. 45 Filip kako Notaniyelɨmo tɨpɨhwononto ulɨmento, Oyomo. Hohonta Mouses kako Anɨtuye honɨngkano hungkuno mtɨ'mokonto kako hwe fihwo Anɨtu nefo'mayo'ne uhwosopo'mentiso so'no mtɨ'mokumentisofoho. A'amu Anɨtu hungkuno uyahonɨngki lɨmotofo sohwantnne'no olo hwe huhwo sohumne'no ifalifaliyo mtɨ'mokumentohofofoho. Oso hwe huhwo sohumo ngko nto tɨpɨhwonɨngkohono. Kako Jisas sohwo pone Nasaletnnta'ango hweho. Jousepɨye hwomu hweho. Oyomo. Uhwonayo. 46 Ose ulahonɨngki Notaniyel ulɨmento, O'o, a'amu Nasalet sohwa wopɨngo hwa'maho. Hwe wopɨngo oso ango sopo nta'ni pipi imo'noneto. Ose ulahonɨngki Filip ulɨmento, Oyomo. Hungkuno nehopi kilalokweno. Kɨko uhwonae. 47 Notaniyel kako Jisasɨyepono pontahonɨngki Jisas kakimo uhwononto nom'ne a'amu somo kakine'no ulɨmento, Sekwo oso hwe sopalokunjo sohumo uhwonɨmno. Oso a'amu Isɨlael sohwo wopɨngo'nohini hweho. Kako hwasyo honɨngkanoso ane hweho. 48 Jisas ose ulahonɨngki Notaniyel kako nupa'nonto Jisasɨmo ulohonɨmento, Kɨko ngkine'no huno pipi kiyahonɨngki nohonɨma'nɨngkohino. Ose ulohonɨngkahonɨngki Jisas ulɨmento, Jɨje angomo'mo kɨko iyo fisayo pmpongo somo nohumentanɨngkini Filip kako mokohonontanɨngki ngko kaki'no kohonɨma'nɨngkohefoho. 49 Ose ulahonɨngki Notaniyel ulɨmento, Nje Lontɨhwayo sohwosi, hungkuno lonetɨhwayo sohwosi, kɨko Anɨtuye Hwomu hwosoho. Kɨko nakwo Isɨlael sohwona'niye Hwe Engo Ne hwosoho. 50 Ose ulahonɨngki Jisas ulɨmento, Kɨko fisayo pmpongo somo nohumentanɨngkini kohononji kilohe so'no kɨko sɨmeho hi'ntnnono ntapohino so'no hwangku yo'mayo wonyoangkafo a'amu miyɨwo'nɨngkiyohofoso ngko i'me'no kɨko uhwonɨmonnoho. 51 Ose ulonto a'amu hopi'nonohino somo ulɨmento, Hungkuno nehopi selalokweno. Ahwomo nohwosompo'nawehwosi Anɨtuye a'amu ahwomomjo sohwa Ngko A'amufe Hwomu nɨhwosopo'mentiso sohwo'niyepono nopɨkuji nosɨkuji yontanɨngkuji sekwo uhwonɨfitnnefoho. Ose ulɨmentisofoho.

Ango Kana sopo hwe fihwo kako ape ma'mentisofoho.

1-2 Sɨkuno hufa'u sɨhune memjaofahonɨngki oso hwaho Ngkalili ango Kana sopo hwe fihwo kako ape mayo'ne sɨkuno somo kakoe a'amu uhu'mokufitnne'ento joho ulɨmentisofoho. Oso ape mayo'ne ango homo somo Jisasɨye kona'wohi humamentisofoho. Jisas kako'nji kakoe inomokomoyo sohwanji hofɨko'nji uhu'mokumentohofofoho. 3 Oso hopo sopo a'amu pi'nɨngo engo uhu'mokumentohofoso hofɨko oso ape mayo somjo ipisayo mijo pompenjiyo wainɨso moi'wo nto naofahonɨngkofi Jisasɨye kona'wohi Jisasɨmo ulɨmento, Hofɨkoe mijoso moi'wonoho. 4 Ose ulahonɨngki Jisas ulɨmento, Na'u, kɨko ngkimo peho'no ntohino. Nje yokumpohn'nyo a'amu somo ujo ehontojwasiyo'ne sɨkunoso mmo'nyofoho. 5 Ose ulahonɨngki kona'wohi oso a'amu ango homo somjo syoho ulohofiyo sohwamo ulɨmento, Jisas kako sekumo yo'mayo peho peho'ne selɨhwoso'no u, sekwo haloho'no fiyɨmno. Ose ulɨmentisofoho. 6 Oso ango hopo sopo hwakwontoho engo aho fehohnta'ni hopi'nono nom'ne mta'ni anga'nohino wo'nnyoponoho. Oso hwakwontoho engo hiso a'amu Jutaso hofɨkoe yahinoso ole aho mijo yatɨjuyo'ne hungkuno wo'nnyofoho. Oso hiso olenoho. Nakwo oso honɨngkano hungkuno homo somo ito'no inɨngkowalokuhwone so'no nakwo hn'nwi honɨngkano wonyo ane'nwoho. Ose syafɨhu'mentohofofoho. Oso'no hwakwontoho mijo ihm'mofahinyoso oso ango homo somo wo'nnyoponoho. Oso hwakwontoho mɨkunɨmposofoho. 7 Jisas kako syoho ulohofiyo sohwamo ulɨmento, Sekwo hwakwontoho somo mijo mangonepo fihm'mopmno. Ose ulahonɨngki a'amu huhwo sohwa hofɨko mijo mangonepo ihm'mo'mentohofofoho. 8 Moi'wo ihm'mofahonɨngkofi Jisas ulɨmento nosisyasyɨkuji nomotakuji oso wosopayo mokosyohumayo nongkumo uyɨmno. Ose ulahonɨngki hofɨko sohumemotamentohofofoho. 9 Oso hwe engo wosopayo mokosyohumayo sohwo oso mijo hiso munɨngkonɨmentisoso mijo me'wampe'njo wain munɨngkonɨmentisofoho. Oso hiso hwapɨngo so'no kako huno mummentisofoho. Oseso oso syoho ulohofiyo sohwa hofɨko ahu'mo mijo ihm'mo'mentohofo so'no huno umentisofoho. Oseso oso hwe engo wosopayo mokosyohumayo sohwo kako oso hwe ape mayo'ne sohune'no joho ulɨmentisofoho. 10 Oseso olo hwe engo sohwo ape mayo sohumo ulɨmento, A'amu hofɨko wopayo engo iloho yanɨwo'nɨngkohofo sohwa hofɨko a'amu hopi'nonohino somo mijo me'wampe'njo wainɨso kaki'no uyɨkuji hwangku hofɨko oso mijoso sɨmeho uhnnɨngkuhwoso'no oso mijo wain wonyo we'eso tɨfi wanɨfe. I oso'no kɨko oso yahinoso momahoyohino. O'o, kɨko mijo me'wampe'njo wonyoangkafoso nowentanɨngki sɨmo'mo mijo wonyo we'e motapohinoso nto nɨngkuhwonefoho. I moi'wo nontani humentanɨngkuhwoni kɨko mijo wonyoangkafo me'wampe'njo motaponji nejapohino. Ose ulɨmentisofoho. 11 Oso syoho sɨmo'mjo Jisas imentiso pa'nyoso a'amu hwahoponjo sohwa mifitnnefoho. Oso syoho sɨmo'mjo hiso Jisas kako hwaho Ngkalili anga Kana hopo sopo imentisofoho. Oseso Jisas kakoe yokumpohn'nyo so'nji kakoe yofe engo'nji a'amu somo ujo ehontojwahumentisofoho. Jisas kakoe inomokomoyo sohwa oso homo somo uhwonontɨfi hofɨko Jisasɨmo sɨmeho hi'ntnnono umentohofofoho. 12 Oso hiso moi'wo imo'nɨngkahonɨngki Jisas ango Koponeyam sopone'no homnɨngkwa'wehwosanji kona'wohijanji kakoe inomokomoyo sohwanji womentohofofoho. Osopo sɨkuno fehohnjo somo humamentohofofoho.

Jisas Anɨtuye tajo ango engo somo a'amu mpe yontanɨngkofo sohwafe yo'mayo yo'mayo wae yao'mentisofoho.

13 Oso Anɨtu A'amu Isɨlael somo Uyakolo'mentiso somne'ne Syafɨsiyo sɨkuno engo lɨwo'nɨngkohofoso mofonepo umo'nɨmonto yahonɨngki Jisas kako ango Jelusalem sopone'no sɨmentisofoho. 14 Osopo i'mofawento kako tajo ango angiyoho'mo uhwonɨmentisoso yahu mpulɨmokau sipsipɨ'nji yɨhufo oso hu'mesyontanɨngkofi uhwonɨmentisofoho. Oso'nji a'amu ahu'mo hamniyoho uyontɨfi nom'ne hamniyoho kengoso asomo ikuwolo'mokomayo yontɨfi hofɨkoe ijempoho sopo nohumentanɨngkofi uhwonɨmentisofoho. 15 Jisas oso homo somo nuhwononto yahino wonyofoho lonto impe nomanto nopopojonto sipsipɨ'nji mpulɨmokau oso'nji mofonjiyohoto'mɨhwatɨ'mentisofoho. Nom'ne a'amu hamniyoho ikuwolo'mokomayo syoho'njo sohwafe hamniyohoso iwonto'meeofonto ijempoho so'nji fonjojohoku'meeo'mentisofoho. 16 Ose yonto Jisas oso a'amu yɨhufomne'no hamniyoho a'amu mta'ni mawo'nɨngkohofo sohwamo ulɨmento, Sekwoe yɨhufo nomafɨkuji mpanɨmno. Sekwo olo nje Mpohwoe ango loso sekwoe ho'yango ango imofo'ne'maho. Mpanɨmno. Ose ulɨmentisofoho. 17 Hwangku sohonta Jisas ose imentiso so'no kakoe inomokomoyo sohwa hofɨko huno ikwesyafɨhu'mentohofo sohonta hungkuno anga'no Ntefit Jisasɨmne'no mtɨ'mokumentiso Anɨtuye hungkunomo wo'nnyo so'ne'no syafɨhu'mentohofofoho. Hungkuno hiso olenoho. Ngko olene'no nɨmo'nɨngkohoho. Jɨje ango kiho ane wopɨngo'nohini wentɨhwone so'no nɨmo'nɨngkohoho. Oso hiso'no ngko yokumpohn'nyo kemokosyohumameso'no wonyo nɨmokufitnnefoho. Inomokomoyo sohwa oso hungkuno homo somne'no huno syafɨhu'mentohofofoho. 18 Jisas kako yo'mayo yo'mayo Anɨtuye ango mta'ni wae yao'mentiso somo a'amu Juta sohwafe hwe engo sohwa uhwonontɨfi sɨmeho tohino umnɨngkahonɨngki Jisasɨmo ulɨmentohofi, Olo hiloso tɨhwo kilisomo yohinoto. Kɨko yo'mayo wonyoangkafo nakwo miyɨwo'nɨngkuhwoneso uyɨmne'no'manji u, nakwo huno wonayono. Olo yokumpohn'nyo loso Anɨtu mta'ni ma'masofoho huno wonaimontonoho. 19 Ose ulahonɨngkofi Jisas ulɨmento, Olo'nohini wosetɨhwamonne'no yohono. Sekwo olo Anɨtuye ango lomo wae yaopijo'manji sɨkuno hufa'u sɨhune memjaofɨhwoso'no ngko apa'no ango hiso nulɨko'mnefoho. 20 Ose ulahonɨngki a'amu Juta sohwa ulɨmentohofi, Olo ango syoho ne'no yontanɨngkuhwoni soswo fouti-sikɨs (46) neyakolo'mentisofoho. I oso'no kɨko sɨkuno hufa'u sɨhune memjaofɨhwoso'no kɨko apa'no mojoso hopolaho. Awonoho. Kɨko hopo'maho. Ose ulɨmentohofofoho. 21 I oso'no oso ango hiso'no Jisas ulɨmentisoso kakoe a'apahomne'no pahnnɨmo hungkuno hnnɨmentisofoho. 22 Hwangku sohonta Jisas kako poyo imo'nɨngkahonɨngki Anɨtu apa'no songo ulɨka'mentiso sohonta Jisasɨye inomokomoyo sohwona'ni olo hungkuno Jisas nalɨmentiso somne'no huno ikwesyafɨsyontani yo'mayo hungkuno Anɨtuye iyoswo somo a'amu mtɨ'mokumentohofo so'nji yo'mayo hungkuno Jisas nalɨmentiso somne'no sɨmeho hi'ntnnonohino umentɨhwonefoho.

Jisas kako a'amu hopi'nonohinofe yahino so'nji huno so'ntnne'no huno uyɨmentisofoho.

23 Oso Anɨtu A'amu Isɨlael somo Uyakolo'mentiso somne'ne Syafɨsiyo sɨkuno engo somo hofɨko elɨjwonontanɨngkofi Jisas kako ango Jelusalem sopo nohumentanɨngki a'amu pi'nɨngo sohwa uhwonɨmentohofoso Jisas yo'mayo wonyoangkafo a'amu miyɨwo'nɨngkiyohofoso yontanɨngki uhwonontɨfi ole hnnɨmentohofi, Olo hwe lohwo Anɨtu mta'ango ne hweho. 24 Ose ko hnnɨngkahonɨngkofi Jisas kako huno ole syafɨhu'mento, A'amu fehohnjoso hofɨko sɨmeho hi'ntnnono nehopi montape'njo yalokwofo. Ose syafɨhu'mentisofoho. 25 Hwapɨngoso Jisas kako a'amu hopi'nonohino sofe sɨmeho ne mo'mo huno unyo hweho. A'amufe yahino somne'no nom'nihwa Jisasɨmo mulɨfitnnefoho. O'o, kako a'amufe huno ikwesyafɨsyɨwo'nɨngkohofo so'no kako huno unyo hweho. Oseso hofɨko olo hwe lohwo Anɨtu mta'ango ne hweho, ko hnnɨngkahonɨngkofi Jisas kako sɨmonyo miyofoho. Hwapɨngoso hofɨko huno ukwesyafɨsyontɨfeho unɨngkanɨngki kako tɨmo'nohini uhwonɨmentisofoho.

Jisas kako Nikoutemosɨ'nji hungkuno hnnɨmentisiyefoho.

1 Hwe fihwo kakoe yofe Nikoutemos kako a'amu Falisi sohwafe honɨngkanomo inɨngkamojo hweho. Kako a'amu Jutafe hwe engo hweho. 2 Sɨkuno fihumo sɨkwo'miyomo Nikoutemos kako Jisasɨmo nu'manto ulɨmento, Nje Lontɨhwayo sohwosi, Anɨtu kako kikimo kakoe hungkuno lonetɨhwayo'ne lokuhwatɨmentiso hwosoho. Oso hiso'no nakwo huno nayohoho. Anɨtu kako kɨko'nji mohumayontentesi kɨko yo'mayo wonyoangkafo a'amu miyɨwo'nɨngkiyohofoso miyohotnnesohilo. O'o, Anɨtu kɨko'nji humaho. 3 Ose ulahonɨngki Jisas ulɨmento, Hungkuno nɨhu'no nehopi wakilɨmonne'no yohono. Kɨko upa'nyo. A'amu fihwo kona'wohi aswo ma'mentiso hopaso kako songo apa'no mmo'no so'manji kako Mpohwo Anɨtumo enjwa'mo humayo somo motɨpɨhwononefoho. 4 Ose ulahonɨngki Nikoutemos ulɨmento, I, a'amu fihwo kako a'mane nto imo'nnyo sohwo kako apa'no songo imo'nyoso pipilo. Kako kona'wohiye aswo mo'mo swomnawesoso apa'no aswo mayoso pipilo. Oso'no kɨko filontɨhwaho. 5-6 Ose ulahonɨngki Jisas ulɨmento, Hwe fihwo kona'wohi aswo mayo sohonta kako a'apaho'njo imo'nnyo hweho. I oso hwe huhwo sohumo Anɨtuye Towahuno Wopɨngo ehuhnnamo'nnyo sohwo kako towahuno songo'njo hweho. Kako a'amu songo pa'nyo imo'nnyo hweho. Hungkuno nehopi wakilɨmne'no yohono. A'amu mijo'nji towahuno'nji songo mumokoso sohwo kako Anɨtumo enjwa'mo humayoso motɨpɨhwononefoho. 7 Kɨko songo apa'no hmmo'nyo kilohe so'no yomo yohotoho. 8 Ihwoni. Ifofoso kakoe yahinomnohini inɨngkawowo'nɨngkisofoho. Oso ifofo huhwo sohwo kengo kengo no'meemo mjɨmɨwowo'nɨngkohoho. Kɨko ifofo neso muhwonhnnehino. O'o, mo'mayo'nohini uhwonɨhwajɨwo'nɨngkino. Ifofo hiso ntɨ'mta'ni i'mofapinyoto. Ntonte ehusasyɨwo'nɨngkohoho. O'o, kɨko huno makiyonehoho. Oso hopaso Anɨtuye Towahuno sohwo kako a'amu fihumo songo apa'no umokiyoso pipi imo'noneto. O'o, kɨko huno makiyofoho. 9 Ose ulahonɨngki Nikoutemos Jisasɨmo ulɨmento, Olo ntohino loso pipi i'mofaponeto. 10 Ose ulahonɨngki Jisas ulɨmento, Kɨko a'amu Juta somo Anɨtuye hungkuno lutɨhwayo yofe engo'njo sohwosi olo hungkuno losomne'no kɨko huno nto'no mehohosakisiyotaho. 11 Hungkuno nehopi kilalokweno. A'amumo hungkuno lutɨhwawo'nɨngkuhwone hn'nwi nakwo yo'mayo huno nayo so'nji yo'mayo tɨmo uhwonyo so'ntnne'no ulɨwo'nɨngkuhwone hwona'nyoho. I oso'no a'amu Jutaso yo'mayo hungkuno ulontane somo sɨmeho muyo'njo yontɨfi hohujo ikinjaofalokwofo. 12 I ngko yo'mayo olo hwaho loponjo i'mofopalokunjo so'no selahonɨngko sekwo oso hungkuno homo somo sɨmeho hi'ntnnono muyo'njo yalokwofo'manji ngko yo'mayo yo'mayo ahwomomjo i'mofopalokunjo so'no selɨ'me'no sekwo huno pipi waseimontolo. 13 A'amu hwahoponjo fihwo kako ahwomomo masiyofoho. Oso'no a'amu tɨhwo waselɨmontolo. Ngko yo'mayo yo'mayo ahwomo somjo wojoso uhwonɨngkohono eso tɨhwo waselɨmontolo. Osenoho esofo. O'o, awonoho. Ngko'nohini A'amufe Hwomu sohwo'ni ahwomomo humanji pmmentohe hwo'nyoho. 14 Hohonta neyakwosa sohwa hwaho wonyo a'amu mohumunyopo nohumentanɨngkofi Mouses kako homa huyo'mango mtɨ'mokonto tokemo montitofosyahonɨngki a'amuso oso homa somo uhwonontɨfi Anɨtuye yofe ho'noma'mentohofoso songo humamentohofofoho. Oso pa'nyoso hwangku ngko A'amufe Hwomu sohwo'nɨmo iyo hwojiyahofɨku'nnyo sopo fonjinto'ofanɨhufitnnefoho. 15 A'amu hopi'nonohinoso ngkimo sɨmeho hi'ntnnono ntapɨfijoso hofɨko songo wopɨngo ne'no nohumantokutnnefoho. 16 Ose ulɨkwato lohofonto ulɨmento, Anɨtu kakoe Hwomu nɨhu'no anga'nohino sohwo'ni humaleno. I oso'no Anɨtu kako sekwo a'amu hwahoponjo hopi'nonohino sokune'no sɨmeho mɨkunɨmposo sejapmmentiso so'no kako ngkimo sekuyepono lonuhwatɨmentisofoho. Oseso a'amu ngkimo sɨmeho hi'ntnnono ntapɨfijoso hofɨko hofɨkoe wonyomne'no tohino mayo'ne'maho. O'o, hofɨko songo ne'no engolopohamo humayo'nefoho. 17 Anɨtu kako ngkine'no ole mosyanɨfɨsiyo'njo yonto olo hwaho lopone'no lonɨhwatɨmentono. Nje Hwomu sohwo kako a'amufe honɨngkano wonyo'ne tohino engo uhumnɨmontonoho. Oso hunoso mosyanɨfɨsiyo'njo imentisofoho. O'o, a'amu hofɨkoe honɨngkano wonyo somo humentanɨngkuji hofɨkoe wonyomjo tohino mafɨkutnnehonto kako hofɨkimo isɨhutofomayo'ne ngkimo lonɨhwatɨmentiso hwo'nyoho. 18 A'amu ngkimo sɨmeho hi'ntnnono ntapinyoso hofɨko tohino hofɨkoe wonyomne'no mayo'ne'maho. I oso'no a'amu ngkimo tɨfi monnɨngkape'njo yontoso sohwo kakoe tohinoso mayo'ne hweho. Hwapɨngoso kako Anɨtuye Hwomu Anga'nohino sohwo'nne'no sɨmeho hi'ntnnono montapmmojo hweho. 19 Oso tohino mayo hwapɨngoso olenoho. Pomponaho honɨngkano wopɨngo wonyoangkafo somo utɨhwayo'ne nto pmmentisofoho. I oso'no a'amu fehohnjo hofɨkoe honɨngkano wonyo so'nji hwahoponjo yahino wonyo so'ntnne'no umo'nɨngkahonjoso ole lɨwo'nɨngkohofofoho. Nakwo pomponaho somo inɨngkayoso nakwolaho. O'o, sɨkwo'mjoho'mo wohumentɨhwano lontɨfi iwo'nɨngkohofofoho. 20 A'amu honɨngkano wonyomo aho yokumpohn'nyo kemokosyohumalofoso hofɨko pomponaho hiso'no mangohwa imo'nɨwo'nɨngkohofofoho. Hofɨkoe yahino wonyoso pomponaho'njo sopo a'amu uhwonɨfitnnohontɨfi pomponaho so'no i'waho yontɨfi sɨkwo'mjoho'mo humawo'nɨngkohofofoho. 21 I oso'no a'amu Anɨtuye honɨngkanomo tɨfi nehopi'nohini inɨngkuwalokwofoso hofɨko pomponaho hopo sopo nto i'mofapontɨfi osopo humolawotofo. Hofɨko oso pomponaho sopo nohumentanɨngkofi a'amu hofɨkoe yahino so'nji yo'mayo syoho iwo'nɨngkohofo so'ntnne'no uhwonontɨfi Anɨtuye yokumpohn'nyo'nji yalokwofo hnnɨmentohofofoho. Jisas ose ulɨmentisofoho.

Joun kako a'amumo mijo kiyoma'mojo sohwo kako Jisasɨye hwapɨngo ne so'no lɨjwao'mentisofoho.

22 Oso hohosohonta Jisas kakoe inomokomoyo sohwona'nnonji nakwo oso hwaho Jutiya sopone'no umentɨhwonefoho. Oso hopo sopo Jisas nakwo'nji nohumentani nakwo hwe moya'mi somo mijo kiyoma'mentɨhwonefoho. 23 Joun kako pone Ainoun Salimmjo mofone sopo humanto kako huhwo a'amu somo mijo kiyoma'mentisofoho. Oso ango hopo sopo mijo engoso hi'njoponoho. A'amu sohwa kakimo u'mahonɨngkofi kako mijo kiyoma'mentisofoho. 24 Oso hohosohonta hwe engo hwaho mokosyohumayo sohwo Helout kako Jounɨmo impo'ango somo impe mintofasiyofoho. 25 Sɨkuno fihwi Joun kakoe inomokomoyo sohwanji pone Ainoun nohumentanɨngkofi a'amu Juta anga'nohino sohwo hofɨkimo u'manto a'amu Jutafe honɨngkano wopɨngo imokinyo'ne yo'mayoso mijo yatɨku'nyo yahino so'no yoka hungkuno hosi Jounɨye inomokomoyo sohwanji hnnɨmentohofofoho. 26 Oseso Jounɨye inomokomoyo sohwa hofɨko Jounɨmo u'mantɨfi ulɨmentohofi, Nakwoe lonetɨhwayo sohwosi, kɨko upa'nyo. Oso hwe Mijo Joutan nongkihnta'ni kɨko'nji humamentiso sohune'no kɨko kakine'no hungkuno lɨjwao'mentohino sohwo kako huhwo a'amumo mijo kiyomalofoho. Oso'no a'amu hopi'nonohinoso kakiyepono walokwofo. 27 Ose ulahonɨngkofi Joun ulɨmento, Anɨtu ahwomomo humaso sohwo kako a'amu anga'no anga'nohino somo hofɨkoe syohoso muyo'njo yontentesi hofɨko syoho ane'njo'nesohilo. A'amu Jisasɨyepono walokwofo so'no nakwo huno nayohoho. Anɨtu kako Jisasɨmo oso syoho hiso uyɨmentisofoho. 28 Olo hungkuno hohonta selɨmentohe loso nto upa'nɨmentohofo, Ngko Kɨlais oso hwe Anɨtu nakwoe hwahopo a'amumo ufo'mayo'ne lɨhwajone sohwonɨ'maho. O'o, a'amu oso hwe huhwo sohwoepono ufitnne honɨngkanoso ito'no esyohumayo'neso Anɨtu lonɨhwatɨmentiso hwo'nyoho. 29 Ose ulonto pahnnɨmo hungkuno ulɨmento, Hwe fihwo kako ape songo maso sohonta apesi kakoe hwehwoepono uhwoso'no oso hwe huhwo sohwoe a'amuso hofɨko kakine'no sɨmeho wopɨngo wonyoangkafo umo'nɨmontonoho. Oso pa'nyoso ngko Jisasɨye a'amu sohwo'ni uhwonɨngkoheso a'amu pi'nɨngo Jisasɨyepono walokwofo so'no uhwononji nje sɨmeho wopɨngo wonyoangkafo nto nɨmo'nɨmaho. 30 Jisasɨye yofeso engo imo'nonefoho. Ngko kakimo enjwa'mo humahonɨ'mo nje yofeso monje wantoho'montonoho. 31 Ose ulɨkwato lohofonto ole ulɨmento, Hwe ahwomo mta'ango sohwo kako nakwo a'amu hwahoponjo hopi'nonohino hn'nɨmo yakolo'nnyo hweho. A'amu olo hwaho loponta'angoso olo hwaho loponefoho. Hofɨko yo'mayo olo hwaho loponjo so'no lɨwo'nɨngkohofofoho. Hwe ahwomo mta'ango sohwo kakoe yofe engoso yo'mayo hwahoponjo somo hwofilo'nnyo hweho. 32 Oso hwe huhwo sohwo kako yo'mayo yahino wopɨngo kanɨngkwohwoe ango wopɨngo sopo uhwonɨmentiso so'nji yo'mayo upa'nɨmentiso so'ntnne'no lonetɨhwawo'nɨngkiso hweho. I oso'no a'amu fehohnjo sohwa oso hungkuno lonetɨhwawo'nɨngkiso homo somo nupa'nontɨfi aho yokumpohn'nyo mokemokosyohumayo'njo iwo'nɨngkohofofoho. 33 A'amu oso hungkuno homo somo aho yokumpohn'nyo kemokosyohumunyo sohwo kako hungkuno homo somo sɨmeho uyonto Anɨtu kako nehopeho linyo hweho. 34 Oso a'amu nakwoe hwaho lopone'no Anɨtu lɨhwatɨmentiso sohwo kako Anɨtuye hungkuno nalɨwo'nɨngkiso hweho. Hwapɨngoso Anɨtuye Towahuno Wopɨngo sohwo oso hwe huhwo sohumo ifehu'mokahumentisofoho. 35 Mpohwo Anɨtu kako kakoe Hwomu huhwo sohumo sɨmeho uyonto yo'mayo hopi'nonohinoso kakimo enjwa'mo ho'nahumentisofoho. 36 A'amu fihwo kako Anɨtuye Hwomu sohumo sɨmeho hi'ntnnono uyoso sohwo kako songo ne'no wonyoangkafo humayo'ne hweho. I a'amu Anɨtuye Hwomu sohwoe hungkunomo tɨfi minɨngkayo'njoso hofɨko Anɨtumo enjwa'mo humayo somo motɨpɨhwonɨfitnnefoho. O'o, hofɨkoe wonyomne'no tohino mayo'nefoho. Hofɨkine'no Anɨtuye sɨmeho tohino uhmnonefoho. Joun ose ulɨmentisofoho.

Jisasɨ'nji a'mu Someliyanta'ango si'nji hungkuno hnnɨmentisiyefoho.

1 Oso hohosohonta a'amu Falisi sohwa hofɨko olo hungkuno upa'nɨmentohofi, A'amu pi'nɨngo engo Jisasɨye inomokomoyo imo'nɨngkahonɨngkofi Jisas hofɨkimo mijo kiyoma'mentisofoho. Oso inomokomoyo huhwo sohwa Jounɨye inomokomoyo sohwamo yakolo'nnyo hwafoho. Ose upa'nɨmentohofofoho. 2 Ose ko upa'nɨmentohofoso Jisas huhwo kako a'amu somo mijo makiyomaso'njo hweho. O'o, kakoe inomokomoyo sohwona'ni a'amu somo mijo kiyoma'mentɨhwonefoho. 3 Oso hungkuno homo somo a'amu Falisi sohwa upa'nɨmentohofo so'no Jisas kako huno uyahonɨngki kako oso hwaho Jutiya hopo sopo ulɨko'manto kako hwaho Ngkaliline'no wawomne'no yohono lɨmentisofoho. 4 Ose lonto kako honɨngkano somo nowento kako hwaho Someliya sopoe umentisofoho. 5 Oso hopo sopo nowento kako ango Saika sopo i'mofamentisofoho. Oso ango hiso hohonta Jekoup kako kakoe hwomu Jousepɨmo hwaho umentisoso mofoneponoho. 6 Oso hopo sopo mijimo Jekoup nɨhu'no hohonta ijɨmentisoso wo'nnyoponoho. Jisas kako osopo hano nowento oso mijimo'njo hopo sopo mofehi'nyo mijiyo kwa'ofiyo ne lopo lohofontanɨngki (12 kɨlouk somo) Jisas kakoe a'apaho usijo'no oso hopo sopo humamentisofoho. 7 A'mu Someliyanta'angosi mijo u'monto pmmentisofoho. Oso a'mu hisi nopahonɨngki Jisas ulɨmento, Mijo ntape. Ngko wanɨmo. Ose ulɨmentisofoho. 8 Jisas kakoe inomokomoyo sohwona'ni nakwo wosopayo mpe uyontane'no ango ne sopo nto umentɨhwoneponoho. 9 Jisas kako'nohini nohumentanɨngki oso a'mu Someliyanta'angosi Jisasɨmo ulɨmento, Kɨko a'amu Juta hwosoho. Ngko Someliya a'mu'nyoho. Oso'no kɨko mijo ntape. Ngko wanɨmo eso peho'no ntohino. Ose ulɨmentisofoho. Hwapɨngoso a'amu Juta so'nji a'amu Someliya so'nji hofɨko hungkuno molanɨmotofofoho. Jomo mu'ma'nyo'njo imotofofoho. 10 Jisas kako oso a'mu simo ulɨmento, Anɨtu kako a'amumo yo'mayo wopɨngoso uyone so'ntnne'no, Ngko mijo ntape. Wanɨmo kiloheso sohwo'nnontnne'no kɨko huno nto'no kiyontentesi kɨko ngkimo mijo'no jomo ntohojo'no ngko mijo songo ne'no humayo'ne kijapm'mnesohilo. 11 Ose ulahonɨngki a'musi ulɨmento, Hwe Engofo, kɨko mijo ifanyoso ane hwosoho. Olo mijimo loso kengo mo'mta'angofoho. Oseso oso mijo songo ne'no humayoso ntɨ'mta'ni woma'monnto. 12 Neyakwo Jekoup sohwo kako nakumo kakoe mehomi sohwanjimo olo mijimo loso nejapmmentisofoho. Jekoup kako'nji kakoe mehomi sohwanji hofɨkoe yahu'nji olo mijimo lomta'ni hohonta nɨmotofofoho. Oseso nakwo jɨje mijoso peho'no womantantoho. Jɨje yofe engoso neyakwo Jekoup sohwoe yofe engo somo yakolo'nnyo hwosilaho. 13 Ose ulahonɨngkahonɨngki Jisas ulɨmento, A'amu olo mijo loso nɨwo'nɨngkohofoso hofɨko nom'ne sɨkunomo mijo'ne apa'no umo'nɨmontonoho. 14 I oso'no a'amu fihwo kako olo mijo uyɨme loso noso'manji kako apa'no mijo'no mumo'nonehoho. O'o, olo mijo uyɨme loso nonɨngkuhwosi kakoe sɨmeho mo'mo mijolɨmo hopa imo'nɨngkuhwoso'no oso mijo hiso ne'no swapɨwo'nɨngkuhwosi kakoe songo ne'no humayoso ne'nohino hweho. 15 Ose ulahonɨngki a'musi ulɨmento, Hwe Engofo, oso mijo hiso ngkimo ntape. Oseso hwangku ngko mijo'no mijoho mape'nɨmnehono. Oseso ngko olo mijo hiloso apa'no mifapmnehono. 16 Ose ulahonɨngki Jisas ulɨmento, Kɨko jɨje angopo nowehoji jɨje hwehumo utɨmahoji olopo asomo fɨpe. 17 Ose ulahonɨngki a'musi ulɨmento, Ngko hwehwo ani'nyoho. Ose ulahonɨngki Jisas ulɨmento, Ou, kɨko hwehwo ani'nyoho ntohinoso nɨhu'no nehopi lohino. 18 Kɨko hohonta hwehwa aho hopi'nonohino sohwamo uma'nɨmentohino kiyoho. I, olo hwe lohwo olohonta kɨko'njo humasiyoso jɨje hwehwo'maho. Oso jɨje hungkuno nehopi lohino. 19 Ose ulahonɨngki a'musi yomo yonto ulɨmento, Hwe Engofo, ngko kikine'no huno niyohoho. Kikimo Anɨtu hungkuno kijopahonɨngki lɨmotnno hwosoho. 20 Nakwo a'amu Someliya hn'nwiye neyakwosa hofɨko olo hwofɨki'nyo lopo Anɨtuye yofe ho'nomayo'ne uhu'mokumotofofoho. I oso'no sekwo a'amu Juta soku ole lɨwo'nɨngkohofi, A'amu hopi'nono ango Jelusalem soponohini Anɨtuye yofe ho'nomayo'ne uhu'mokukuno. 21 Ose ulahonɨngki Jisas ulɨmento, A'mu losi, nje hungkuno ne somo kɨko sɨmeho hi'ntnnono uyo. Sɨkuno fihwi umo'nɨmonto yalokunjo somo sekwo olo hwofɨki'nyo lopo Mpohwoe yofe ho'nomayo'ne muhu'mokufitnnehofo. I a'amu ango Jelusalem hopo oso hiso'ne muhu'mokufitnnehofo. O'o, a'amu ango'meemjoso hofɨkoe hwapɨngopo Anɨtuye yofe ho'nomayo'ne uhu'mokantɨfeho. 22 I oso'no sekwo a'amu Someliya soku sekwo Mpohwoe yofe ho'nomayo'ne hwapɨngo neso huno maseyofoho. Nakwo a'amu Juta hn'nwi nakwo Anɨtuye yofe ho'nomawo'nɨngkuhwone ne sohumo nakwo huno nayohoho. Hwapɨngoso nakwo a'amu Juta hn'nɨmta'ni Anɨtu kako hwe fihumo uhwosopeehonɨngki oso hwe huhwo sohwo kako a'amufe wonyomjo tohino somo isɨhutofomayo'ne hweho. Oso'no hwapɨngo neso huno nayohoho. 23 Oso sɨkuno hiso umo'nɨmonte'no kilohe hiso olohonta nto i'mofapohoho. A'amu fihwo kako ngko Anɨtuye yofe woho'noma'mo nehopi loso sohwo kako ole uyɨmontonoho. Kako Anɨtuye Towahuno'nji nohumahwosi Towahuno huhwo sohwo Anɨtuye yofe ho'nomayo'ne honɨngkano neso utɨhwahonɨngkuhwosi oso hwo inɨngkohwoso'no kako Anɨtuye yofe nehopi woho'noma'montonoho. Nje Mpohwo kako a'amu oso yahino so'njo somne'no umo'nɨngkohoho. 24 Anɨtu kako Towahuno hweho. Oso'no a'amu Anɨtuye yofe woho'noma'mo loso sohwo kako Anɨtuye Towahuno'nji nohumahwosi kako honɨngkano nto'nohinomo unɨngkamontonoho. Oso yahinoso Anɨtuye yofe ho'nomayo'ne nefoho. 25 Ose ulahonɨngki a'musi ulɨmento, Ngko huno ole niyohoho. Anɨtu kako ole nalɨmento, Ngko sekumo sefo'mayo'ne uhwosopo'mentohe sohumo sekuyepono uhwatɨmonnoho. Oso a'amu huhwo sohumne'no Kɨlaisɨyoho lɨwo'nɨngkuhwonefoho. Kako nopɨhwoso'no kako yo'mayo yo'mayo so'no wolonetɨhwamontonoho. 26 Ose ulahonɨngki Jisas ulɨmento, Olo ngko olo huhwo'nyoho. Ngko kɨko'nji hungkuno lalokuhwoyosofo. Ose ulɨmentisofoho. 27 Ose ulɨkwato lohofahonɨngki Jisasɨye inomokomoyo sohwona'ni u'mentani uhwonɨmentɨhwoneso Jisas oso a'musi'nji hungkuno hnnontanɨngki uhwonontani yomo yontani nakwo huno pi'nɨngo syafɨhu'mentɨhwonefoho. I oso'no nakwo a'mu simo ole mujofoho. Kɨko peho'no kumo'nɨngkohoho. I Jisasɨmo ole mujofoho. A'mu simo peho'no ulalokuno. O'o, ose mujofoho. 28 Oseso a'musi kako kakoe mijɨpo'nyoso nulɨko'manto kakoe angopono asomo umentisofoho. I'mofawento a'amu hopi'nonohino somo ulɨmento, 29 Sekwo nopɨkuji olo hwe lohwo uhwonɨmno. Kako yo'mayo yo'mayo ngko hohonta imote so'no ntohoho. Oso hwe Anɨtu uhwatɨmnoho nalɨmentiso Kɨlais sohwolɨkeno. 30 Ose ulahonɨngki hofɨko hofɨkoe angopo ulɨko'mantɨfi Jisasɨmo uhwonano lontɨfi pmmentohofofoho. 31 Oso hohosohonta Jisasɨye inomokomoyo sohwona'ni Jisasɨmo ulɨmentɨhwoni, Nakwoe Lonetɨhwayo sohwosi, kɨko wopayo'ne mijoho kiyonoho. Wopayo hmnyo. 32 Ose ulahonɨngkuhwoni Jisas nalɨmento, Ngko wosopayo sekwo huno maseyoso ngko hi'njo hwo'nyoho. 33 Ose nelahonɨngki inomokomoyo sohwona'ni ole hnnɨmentɨhwoni, A'amu fihwo kako Jisasɨmo wopayo nto uyisohwolɨkeno. 34 Ose syofɨsyahonɨngkɨhwoni Jisas nalɨmento, Nje wosopayoso olenoho. Nje Mpohwo nɨhwatɨmentiso sohwoe hunomo tɨfi inɨngkayo'ne syohoso nje wosopayofoho. Oso syoho hiso wesojwao'monnoho. Oso syohoso wosopayo pa'nyo yokumpohn'nyo ntapɨwo'nɨngkisofoho. 35 Ose nalonto ole nalɨmento, Sekwo ole lɨwo'nɨngkohofi, Hamno osofosofahu'no neyakolofɨhwoso'no wosopayo toyo ihwoso'no womantanoho. Ose lɨwo'nɨngkohofo kuyoho. I oso'no ngko ole selalokweno. Sekwo wosopayo somo fe'nɨhwonɨmno. Toyo nto imaho. 36 I oso wosopayo selalokweso a'amumne'no selalokweno. Wopayo toyoso a'amu hofɨko nje hungkunomo upa'nɨngkuji sɨmeho komo'no wontapɨfe ntnne'no selalokweno. Hwe fihwo kako wosopayo hujo sohwo tɨfi no'mo kako wopayo toyo emahwoso'no oso wosopayo hiso kakoe ho'yango pa'nyofoho. Oso hopaso a'amu Anɨtuye hungkuno nom'ne a'amumo ulɨwo'nɨngkohofoso hofɨkoe ho'yangoso olenoho. Hofɨkoe hungkunomo nom'ne a'amu upa'nɨngkuji Anɨtumo sɨmeho uyɨfijo'manji oso a'amu hiso hofɨkoe ho'yangofoho. Hofɨko oso ho'yango hiso'nji engolopohamo nohumantokutnnefoho. Oseso oso wosopayo hulɨwo'nɨngkiso so'nji kakoe a'amu wopayo toyo emawo'nɨngkohofo so'nji hofɨko sɨmonyo afa'no afa'no uyantɨfeho. 37 Oseso oso hungkuno lɨwo'nɨngkohofo loso nehopeho. Hwe fihwo kako wopuyo hulahonɨngki nom'nihwo wosopayo toyoso emawo'nɨngkisofoho. Ose lɨwo'nɨngkohofofoho. 38 Sekwo wopuyo ko mahulɨmmalofoso sekwo wopayo toyo femapmno selohe so'no sekwo a'amu nom'ne sofe syoho yokumpohn'nyo imalofo somta'ni wopayo toyo emalokwofo. Sɨmo'mo a'amu nom'neso hofɨko Anɨtuye hungkuno nom'ne a'amumo lutɨhwawo'nɨngkohofo so'no sekwo oso a'amu hisomo nje hungkuno ulɨkujo'no hofɨko nje a'amu ne umo'nantɨfeho. Oso hiso'no sekwo wopayo toyo pa'nyo emalokwofo. Jisas ose ulɨmentisofoho. 39 Oso a'musi Jisasɨ'nji hungkuno hnnɨmentisiyosi kako a'amu Someliya somo kako yo'mayo yo'mayo ngko hohonta imote so'no ntohoho ulɨmentiso so'no a'amu pi'nɨngo engoso Jisasɨmo sɨmeho hi'ntnnono uyɨmentohofofoho. 40 Oso a'amu hiso Jisasɨ'njopo i'mofapontɨfi Jisasɨmo hungkuno yokumpohn'nyo ulɨmentohofi, Kɨko nakwo'njo lopo fosyohumaho. Ose ulahonɨngkofi Jisas hofɨko'nji sɨkuno hufa'u humamentisofoho. 41 Osopo nohumentanɨngki a'amu pi'nɨngo engoso kakoe hungkunomo haloho upa'nontɨfi sɨmeho hi'ntnnono umentohofofoho. 42 Hofɨko sɨmeho hi'ntnnono uyontɨfi hofɨko oso a'mu simo ulɨmentohofi, Sɨmo'mo jɨje hungkunomo upo'nontani nakwo huno ole syafɨhu'malohwoni, Olo hwe lohwo hungkuno ne'njo hweho. I oso'no olohonta kakinta'ni kakoe hungkuno neso nakwo huno ole nayohoho. Olo hwe lohwo kako a'amu hwahoponjo hn'nwiye wonyo somjo tohino somta'ni isɨhutofonemayo'ne hweho. Huno ose nayohoho. Ose ulɨmentohofofoho.

Jisas kako hwe yofe engo hwaho mokosyohumayo sohwoe syoho ulohofiyo sohwoe hwomumo wopɨngo umokumentisofoho.

43 Oso sɨkuno hufa'u sohwa'u moi'wo imo'nɨngkahonɨngki Jisas oso ango hopo sopo nulɨko'manto Ngkalilino umentisofoho. 44 Nom'ne sohonta Jisas olo hungkuno loso lɨmentisofoho. A'amu fihumo Anɨtu hungkuno uyahonɨngki lɨmojo sohwo kako kakoe hwapɨngo sopo yofe engo ane hweho. Ose lɨmentisofoho. 45 I oso'no Jisas kako kakoe hwapɨngopo Ngkalili i'mofopahonɨngki a'amu hopo soponjoso hofɨko Jisas pmmentiso so'no sɨmonyo imentohofofoho. Hwapɨngoso hofɨko hi ango Jelusalem Sɨkuno Engo iyoho humayo uhwonyo somo sɨmentohofofoho. Osopo nohumantɨfi yo'mayo wonyoangkafo a'amu miyɨwo'nɨngkiyohofo Jisas yahonɨngki uhwonɨmentohofofoho. 46-47 Oso hwaho Ngkalili ango we'e Kana osopo Jisas asomo umentisofoho. Nom'ne sɨkuno somo oso ango hopo sopo Jisas humamentiso sohonta kako hungkuno lahonɨngki ahu'mo mijoso ipisayo mijo pompenjiyo wain imo'nɨmentisofoho. Jisas kako oso ango Kana sopo nohumentanɨngki hwe nom'ne ango Koponeyam humamojo sohwo kako Jisas hwaho Jutiya sopo nta'ni hwaho Ngkaliline'no sopalofoho upa'nɨmentisofoho. Oso hwe huhwo sohwo kako hwe engo hwaho mokosyohumayo sohwoe syoho fehohnjo somo mokosyohumamojo hweho. Kakoe hwomu mnokino engo tɨpema'mentisofoho. Oso'no hwe huhwo sohwo ango Kana sopo nowento Jisasɨmo tɨpɨhwononto hungkuno yokumpohn'nyo ulɨmento, Nje hwomu kako poyo wape'nɨmonte'no mofoneponoho. Oso'no kɨko ngko'nji ango Koponeyam nowehwasi nje hwomumo wopɨngo nɨmokiyo. 48 Ose ulahonɨngki Jisas ulɨmento, Ngko yo'mayo wonyoangkafo a'amu miyɨwo'nɨngkiyohofoso miyome'manji sekwo ngkine'no masemo'nyo'njo kuyoho, sɨmeho hi'ntnnono montape'njo hwasoho. 49 Ose ulahonɨngki oso hwe engo sohwoe syoho ulohofiyo sohwo ulɨmento, Hwe Engofo, kɨko komo'no fɨpe. Nje hwomu poyo pe'noloho. 50 Ose ulahonɨngki Jisas ulɨmento, Kɨko jɨje angopono asomo fɨwe. Jɨje hwomu sohwo wopɨngo wohumamontonoho. Ose ulahonɨngki oso hwe huhwo sohwo kako Jisasɨye hungkunomo sɨmeho hi'ntnnono uyonto kakoe ango pone'no asomo umentisofoho. 51 Nowentanɨngki kakoe syoho ulohofiyo sohwa honɨngkanopo uswo'nontɨfi ulɨmentohofi, Jɨje hwomu sohwo wopɨngo humaho. 52 Ose ulahonɨngkofi kako ulohonɨmento, Nje hwomu sohwo wopɨngo mofehi'nyo ntisohumo imo'nɨmaho. Ose ulahonɨngki hofɨko ulɨmentohofi, Fosi mofehi'nyo soumjiyo sohonta kakoe a'apaho tohohmtnnoso moi'wo imo'nɨngkahonɨngki wopɨngo humaho. 53 Ose ulahonɨngkofi kanɨngkwohwo huno ole uyɨmento, Fosi mofehi'nyo soumjiyo sohonta Jisas kakimo ulɨmento, Jɨje hwomu wopɨngo wahumamontonoho. Ose ikwesyafɨsyonto kako kakoe a'amu hopi'nonohino sonji Jisasɨmo sɨmeho hi'ntnnono umentohofofoho. 54 Oso wonyoangkafoso a'amu miyɨwo'nɨngkiyohofoso Jisas hwaho Ngkalili sopo imentisoso sɨmo'mo ahu'mo mijomo wain imo'nɨmentisofoho. Osofepo hwomu mnokino'njo sohumo wopɨngo umokumentisofoho.

Jisas kako mijo ayo we'e Mpetesɨta sopo hwe mnokino'njo sohumo wopɨngo umokumentisofoho.

1 Oso moi'wo imo'nɨngkahonɨngki a'amu Jutafe Sɨkuno Engo iyoho humayo'ne i'mofopahonɨngki Jisas Jelusalemne'no sɨmentisofoho. 2 Oso ango Jelusalem sokilojo kuso anga'no yahu sipsipmnefoho lɨmotofofoho. Oso hopo sopo mijo ayo we'e wo'nnyoponoho. A'amu Jutafe hungkuno ole Mpetesɨta. Oso hopo sopo ango aho anga'no hopi'nono swoho ane iku'yo'nohinomo'nnyoso loho'nnyoponoho. 3 Oso ango hopo sopo a'amu pi'nɨngo engo mnokino'njoso humamotofofoho. Fehohnjoso tɨmpi'nyo fehohnjo sɨfe wonyo'njo fehohnjo a'apaho poyo pe'nnyo'njo oso a'amuso humamotofofoho. Hofɨko oso mijo ayo we'e huhwo sohwo songo songo iyo'ne hontohumamotofofoho. 4 Hwapɨngoso sɨkuno fehohnjo Anɨtuye a'amu ahwomomjo fihwo noponto mijo ajwomo'mo songo songo imokahonɨngki uhwonontɨfi a'amu mnokino'njo sohwo kako oso mijo somo sɨmo'mo ho'nɨma'mentiso osohwo kakoe mnokinoso moi'wo imo'nɨmentisofoho. 5 Oso hopo sopo hwe mnokino'njo fihwo nohumentanɨngki soswo teti-et (38) uyakolo'mojo hweho. 6 Jisas noponto oso hwe huhwo sohwo fosyowentanɨngki uhwononto huno ole umento, olo hwe lohwo mnokino hohonta umojo hweho. Ose syafɨsyonto ulɨmento, Kɨko nje a'apaho wopɨngo wanɨmo'nono lakinɨngkohoho. 7 Ose ulohonɨngkahonɨngki a'amu mnokino'njo sohwo ulɨmento, Ou, hwe engofo, oso mijo songo songo yahonjo sohonta ngko a'amu nontomafɨkuji mijomo menɨhumajone a'amuso ane hwo'nyoho. Ngko waho'nu'mo'mo ko lontnneso nom'ne a'amuso niyakolofɨwo'nɨngkohofo hwo'nyoho. 8 Ose ulahonɨngki Jisas ulɨmento, kɨko nolɨkafohoji jɨje ife ho'yango yo'mayoso hu'memahoji hano mpano. 9 Ose ulahonɨngki nɨhu'no komo'no oso hwe sohwoe a'apaho wopɨngo imo'nɨngkahonɨngki kako nolɨkafonto kakoe ife yo'mayoso nohu'memanto kako hano umentisofoho. Oso sɨkuno hiso sɨkuno iyoho humayomnoho. 10 Oseso a'amu Jutafe hwe engo sohwa hofɨko oso hwe wopɨngo umokumentiso sohumo ulɨmentohofi, Olo sɨkuno loso iyoho humayo'nefoho. Jɨje ife yo'mayoso mokoho'nawe'ne sɨkuno m'maho. Kɨko nakwoe honɨngkano hungkunomo mtɨhupeelokuno. 11 Ose ulahonɨngkofi kako ole ulɨmento, Oso hwe kako wopɨngo nɨmokonto ntohoho, Kɨko nolɨkafohoji jɨje ife yo'mayoso hu'memahoji hano mpano. Ose ntiso'nefoho. 12 Ose ulahonɨngki hofɨko ulohonɨmentohofi, Tɨhwoe a'amuhwo kilisoto. Jɨje ife yo'mayoso mahoji mpano eso. 13 Ose ulahonɨngkofi oso hwe wopɨngo imo'nɨmentiso sohwo kako Jisas kakoe yofeso huno muyo hweho. Hwapɨngoso oso hopo sopo Jisas kako oso hwe huhwo sohumo wopɨngo umokonto a'amu pi'nɨngo engo somo uhwononto kako komo'no ulɨko'ma'mentisofoho. 14 Hwangku sohonta Jisas kako oso hwe huhwo sohumo Anɨtuye tajo ango engo somo tɨpɨhwononto ulɨmento, Kɨko upa'nyo. Wopɨngo nto imo'nɨngkino hwosoho. I kɨko honɨngkano wonyoso apa'no yohotoho. Nom'ne tango engo mɨkunɨmposo ku'manoho. 15 Ose ulahonɨngki oso hwe huhwo sohwo kako nowento a'amu Jutafe hwe engo sohwamo ulɨmento, Oso hwe ngkimo wopɨngo nɨmokumaso sohwo Jisasɨyoho. Ose ulɨmentisofoho. 16 Oso hohosohonta a'amu Jutaso hofɨko Jisasɨmne'no wonyo ulohofano lontɨfi oso hiso'no hungkuno loma'mentohofofoho. Hwapɨngoso Jisas kako oso hwe wopɨngo umokumentisoso sɨkuno iyoho humayo somo imentisofoho. 17 Hofɨko Jisasɨmo yoka hungkuno ulahonɨngkofi Jisas ulɨmento, I nje Mpohwo kako sɨkuno huhwo huhwi a'amumo wopɨngo'nohini ne'no ulohofɨwo'nɨngkiso hweho. Kako usijo'no mofosyohumayo hweho. Oso pa'nyo sɨkuno huhwo huhwi ngko huhwo'ni a'amumo wopɨngo ulohofɨwo'nɨngkohe hwo'nyoho. Ose ulɨmentisofoho. 18 Jisas ose ulɨmentiso so'no a'amu Jutaso hofɨko Jisasɨmo wofonjosyano lontɨfi imentohofofoho. Hwapɨngoso hofɨko huno ole syafɨhu'mentohofi, Jisas kako sɨkuno iyoho humayo somo syoho iwo'nɨngkiso hweho. Oso'nohini'maho. O'o, kako Anɨtu nje Mpohweho naliso'manji kako huno ole syofɨsyalofoho. Ngko Anɨtu'nji afa hwo'nyoho. Ose syafɨsyontɨfi hofɨko Jisasɨmo wofonjosyano lontɨfi imentohofofoho.

Anɨtuye Hwomu sohwo kakoe syoho iyo so'ne kako yokumpohn'nyo hi'njo hweho.

19 Jisas a'amu Juta huhwa sohwamo ulɨmento, Hungkuno nehopi'nohini waselɨmonne'no yohono. Ngko Anɨtuye Hwomu sohwo'ni nje huno mta'ni ngko yo'mayoso siki mimnehono. O'o, yo'mayo nje Mpohwo yalokunjo somo uhwononji ngko yalokweno. Yo'mayo Mpohwo yonteso Hwomu sohwo kako iwo'nɨngkohoho. 20 Nje Mpohwo kako sɨmeho engo mɨkunɨmposo Ngkimo ntapɨwo'nɨngkiso so'no kako yo'mayo hopi'nonohino yalokusoso ntɨhwawo'nɨngkisofoho. Oseso yo'mayo ntɨwo'nɨngkisoso ngko yalokweno. Olo syoho we'e imale somo sekwo tɨmo uhwonɨmalofo sohwasi hwangku Anɨtu kako syoho engo olo syoho we'e homo lomo hwofilo'nnyoso ntapɨhwoso'no sekwo uhwonɨngkuji sekwo yomo uyantɨfeho. 21 Mpohwo kako a'amu poyo pe'nyo somo ulɨkafonte sohwo songo apa'no umokuwo'nɨngkiso hweho. Oseso Ngko huhwo'ni a'amu fehohnjo poyo pe'nyo somo ulɨka'mo lɨmeso i ulɨka'monnoho. 22 Olohonta Mpohwo Anɨtu kako a'amufe honɨngkano somne'no wopɨngofoho wonyofoho mujo hweho. O'o, kako oso syoho hiso kakoe Hwomu sohwo'nɨmo ntapmmentisofoho. 23 Oseso hwe moya'mi hopi'nonohinoso hofɨko Mpohwoe yofe ho'nomawo'nɨngkohofo hopaso hofɨko kakoe Hwomu sohwo'niye yofe hi ho'nonɨmapitnne'ento syoho hiso ntapmmentisofoho. I oso'no a'amu nje yofe moho'nonɨmayo'njo hwo'manji hofɨko nje Mpohwo nɨhwatɨmentiso sohwoe yofe hi moho'nomayo'njofoho. 24 Ose ulɨkwato lohofonto ole ulɨmento, Ngko nehopi'nohino waselɨmonne'no yohono. A'amu hofɨko nje hungkunomo upa'nɨngkuji Anɨtu nɨhwatɨmentiso sohumo sɨmeho hi'ntnnono uyɨkuji hofɨko songo ne'no wopɨngo humayo'ne hi'njofoho. Hwangku hofɨkoe yahino somne'no hungkuno ikwolofo angkuhwafo sopo m'mofapitnnefoho. Hofɨko poyo pe'nyo yahino somo hwotoho fentɨfi songo ne'no humayo yahinoso nto tɨpema'mentohofofoho. 25 Hungkuno nehopi'nohini selalokweno. Oso sɨkuno u'mofapmmonto imentiso sohwi nto i'mofapohoho. Oso'no olohonta a'amu poyo pe'nɨmentohofoso hofɨko Anɨtuye Hwomu sohwo'niye mango mta'ni nje hungkuno upo'nantɨfeho. Oso a'amu hiso oso hungkuno homo somo sɨmeho uyɨkuji'manji hofɨko songo ne'no nohumantokutnnefoho. 26 Nje Mpohwo kako songo humayo hwapɨngo sohwo kako kakoe Hwomu sohwo'nnonji songo fosyohumayo'ne hwapɨngo nɨmokumentisofoho. 27 Oseso Anɨtu kakoe Hwomu sohwo'nɨmo oso syoho a'amufe yahino somne'no wopɨngofoho wonyofoho ujoso ntapmmentisofoho. Hwapɨngoso Ngko A'amufe Hwomu nɨhwosopo'mentiso hwo'nyoho. 28 Sekwo olo hungkuno lomne'no yomo ikutoho. Hwangku nom'ne sɨkuno imo'nyo sohwi i'mofapɨhwoso'no a'amu poyo nto pe'nontɨfi pi'nɨmomo wotofoso hofɨko nje mampaho wonupo'nantɨfeho. 29 Hofɨko nupa'nɨngkuji apa'no songo wolɨkofantɨfeho. A'amu yahino wopɨngo imotofoso songo ne'no nohumantokutnnefoho. A'amu yahino wonyo imotofoso tohino engo tɨpemapitnnefoho.

Anɨtu kako kakoe hwomufe hwapɨngo so'no ujo ehontojwahumentisofoho.

30 Ngko a'amufe yahino somne'no yano milofɨhwajiyo syoho imeso nje huno mta'ni mimnehono. O'o, ngko nje Mpohwoe hungkunomo upa'nɨ'mo osomnohini ngko tɨfi inɨngka'mo ngko a'amumo yano milofɨhwajiyoso nto'nohino uyɨmonnoho. Hwapɨngoso ngko nje huno mta'ni uyɨmonji'maho. O'o, nɨhwatɨmentiso sohwo yo'mayo umo'nososo uyɨmonnoho. 31 Ngko sekumo ngkine'no hungkuno selɨ'me'no sekwo huno ole wosyofɨsyantɨfeho. Kakoe hungkuno nehopitɨkeno. Hwasyo kolalofoho. Ose wosyofɨsyantɨfeho. 32 I oso'no nom'nihwo nje Mpohwo oso hungkuno ngkine'no selokweso kako huhwo nje hwapɨngo so'no setɨhwalofoho. Oso ngkine'no setɨhwalokusoso ngko huno niyohoho, nehopeho. 33 I nom'ne hungkuno upa'nyo. Oso hwe Joun A'amumo Mijo Kiyoma'mojo sohwoe hungkunomo sekwo upo'nane'entɨfi kakiyepono sekwoe a'amumo uhwatɨmentohofofoho. Oso hwe huhwo'nji nje hwapɨngo so'no hungkuno nehopi nto selɨmojofoho. 34 Ngko hwaho loponjo hwe sohwoe hungkuno ngkine'no nje hwapɨngo so'no selɨmentiso so'no ngko huno pi'nɨngo maniyantofiyoho. I oso'no sekwo ngkimo sɨmeho ntapɨfitnne'no sekwoe wonyomjo tohino somta'ni isɨhutofosemayo'ne Jounɨye hungkunoso huno sefohotofo'ne selalokweno. 35 Joun sohwo kako sikiloho hopo imo'nonto sekumne'no pomponaho losesiyo'ne hweho. Sekwo kakoe pomponahopo we'enepi wohumano lontɨfi sɨmonyo imentohofofoho. 36 I oso'no olohonta nom'ne wopɨngo Jounɨmo hwofilo'nnyoso nje hwapɨngo so'no losetɨhwalofoho. Oso hiso nje syoho wopɨngo Mpohwo ntapmmentiso a'amu miyɨwo'nɨngkiyohofoso yalokweno. Oso syoho hiso sekwo uhwonɨngkuji nje hwapɨngo so'no huno waseyono. Mpohwo Anɨtu lɨhwatɨmentiso hweho waseyono. 37 Nje Mpohwo nɨhwatɨmentiso sohwo sekwo kakimo muhwonyo'njo ko yontɨfi kakoe mampaho somo mupa'nyo'njo ko yahonɨngkofi kako huhwo nje hwapɨngo so'no nto setɨhwamentisofoho. 38 Kakoe hungkunoso sekwoe sɨmeho mo'mo maseuyoho. Hwapɨngoso sekwo Anɨtu nɨhwatɨmentiso sohwo'nɨmo sɨmeho hi'ntnnono montape kuyoho. 39 Sekwo huno ole syofɨsyalokwofo. Nakwo Anɨtuye hungkunomo sɨkuno huhwo huhwi atofo lɨwo'nasoso nakwo songo ne'no humayo'ne wotɨpemantanoho. Ose syafɨsyontɨfi sekwo oso hungkuno homo somo hafɨhafe tɨpewo'nɨngkohofofoho. I oso'no oso hungkuno hiso nje hwapɨngo so'no ko lɨjwaofɨwo'nɨngkisoso 40 sekwo ngko songo ne'no wonyoangkafo humayo hwapɨngo sohwo'nɨmo nɨ'mayo so'no nakwolaho lɨwo'nɨngkohofofoho. Oso'no sekwo songo ne'no humayoso matɨpmmopiyo hwasoho. 41 Olo hungkuno loso sekwo nje yofe woho'nonɨmantɨfe'no maselalokuyohono. 42 O'o, ngko sekwoe yahino somne'no huno niyohoho. Sekwo Anɨtumne'no Nakwolaho lalokwofo. 43 Ngko nje Mpohwoe yokumpohn'nyo'nji noponji se'ma'mentoheso, Ngko Anɨtu mta'ango hwo'nyoho selɨmentohefoho. I oso'no sekwo nje hungkunomo moho'nonɨmaso hwasoho. I hwe nom'nehwo kakoe huno mta'ni se'mahwosi kakoe yokumpohn'nyo'nji yo'mayoso ihwoso'no sekwo kakoe hungkunomo woho'nomantɨfeho. 44 Sekwo sekwoe yofe ho'noma'nɨwo'nɨngkohofofoho. I oso'no sekwo sekwoe yahino somne'no Anɨtu kako huno pipi kuyalofoho eso huno mosyafɨsiyo'njo liyalokwofo. O'o, kakoe syohofoho lalokwofo. Oso hiso'no sekwo Anɨtu ne anga'nohino sohumo sɨmeho hi'ntnnono muyɨfitnnehofo. 45 Tɨfi no'mo sekwoe honɨngkano somne'no hungkuno ikwolofo'ne sopo ngko nje Mpohumo sekumne'no mulɨmnehono. O'o, Mouses sekwoe hungkuno ikwolofo'ne sopo sekwoe wonyo somne'no Mpohumo ulonefoho. Hwapɨngoso sekwo huno ole syofɨsyalokwofo. Nakwo Mousesɨye honɨngkano hungkunomo ito'no inɨngkowalokuhwono. Oso'no nakwo songo ne'no wonyoangkafo humayo so'no wotɨpemantanoho. Ose syofɨsyalokwofo. 46 I oso'no sekwo Mousesɨye hungkunomo sɨmeho hi'ntnnono nehopi uyontɨfijontentesi sekwo nje hungkuno homo somo sɨmeho hi'ntnnono nontapɨkutnnesohilo. Hwapɨngoso Mouses kako ngkine'no hungkuno mtɨ'mokumentisofoho. 47 Oso hungkuno Mouses ifalifaliyo mtɨtmokumentiso somo sekwo nto'no minɨngkayo hwasɨ'manji sekwo nje hungkunomo sɨmeho hi'ntnnono pipi wotɨpeentɨfito. Awonoho. Jisas ose ulɨmentisofoho.

Jisas kako a'amu ‘faif tausen’ (5000) somo wosopayo uyɨmentisofoho.

1 Oso hohosohonta Jisas kako mijo ayo Ngkalili nongkihnta'ni wako'mentisofoho. Oso mijo ayo yofe nom'neso Taipeliyasɨyoho. 2 Osopo Jisas nowahonɨngki hwe moya'mi pi'nɨngo engoso Jisasɨmo tɨfi inɨngkapmmentohofofoho. Hwapɨngoso yo'mayo wonyoangkafo a'amu miyɨwo'nɨngkiyohofoso Jisas yahonɨngki uhwonɨmentohofofoho. A'amu mnokino'njo pi'nɨngo somo Jisas kako wopɨngo umokahonɨngki uhwonontɨfi inɨngkapmmentohofofoho. 3 Jisasɨ'nji kakoe inomokomoyo sohwona'nnonji nakwo oso hopo sopo hwofɨki'nyo we'e sopo kotosontani osopo humamentɨhwonefoho. 4 Oso a'amu Jutafe Anɨtu A'amu Isɨlael somo Uyakolo'mentiso somne'ne Syafɨsiyo Sɨkuno Engo sohwi we'enepi umo'nɨmonte'no imentisofoho. 5 Jisas oso hwofɨki'nyo hopo sopo nohumanto tɨmo fe'nɨhwonɨmentisoso hwe moya'mi pi'nɨngo engoso Jisasɨyepono sapontanɨngkofi uhwononto kako Filipɨmo ulɨmento, Olo hwe moya'mi lomne'no nakwo wosopayo mpe mtɨ'mta'ni yanehwono. 6 Oso hungkuno hiso Jisas Filipɨmo ko ulɨmentisoso Jisas kako yo'mayo yone so'no huno nto syafɨhu'mentisofoho. I oso'no kako Filipɨye hunomo yamofo uloho'mo lonto oso hungkunoso ulohonɨmentisofoho. 7 Jisas ose ulahonɨngki Filip kako ulɨmento, I, nakwo hamniyoho syoho iyo sɨkuno tu hantɨlet (200) memjaofoso hi'njo'ntontentesi nakwo wosopayo mpe yɨhwasi a'amu fehohnjo sohwa wopayo we'e'nohini nɨngkuji a'amu fehohnjoso manyo'njo ikutnnesohilo. 8 Ose ulahonɨngki Jisasɨye inomokomoyo nom'ne sohwo kakoe yofe Entɨlu, Saimoun Pitafe konɨngkwa'wehwo sohwo Jisasɨmo ulɨmento, 9 Olo hwomu lohwo kakoe wosopayo aho fehohnjo hopi'nonohino so'nji inanɨku kempinjo hufa'uyo so'nji mokosyohumunyo hweho. I oso'no olo a'amu pi'nɨngo engo lomne'no wopayo loso pipi uyanehwono. O'o, hopo'maho. 10 Ose ulahonɨngki Jisas kakoe inomokomoyo sohwona'nɨmo nalɨmento, Sekwo hwe moya'mi somo ampo fosyohumamno ulɨmno. Ose nalɨmentisofoho. Oso hopo sopo hoja pi'nɨngo'njoponoho. A'amu hiso hojapo nohumantɨfi hwe'nohino sohwa faif tausen (5 ,000) humamentohofofoho. Moya'mi sofamo atofo majofoho. 11 Ose humentanɨngkofi Jisas kako oso wosopayo hiso nomanto Anɨtumo isamoyoka ulonto oso a'amu hwe moya'mi hopi'nonohino somo yano ulofimentisofoho. Ose uyonto kako inanɨku kempinjo hufa'uyo so'nji yano ulofimentisofoho. Oso wosopayo so'nji inanɨku so'nji uyahonɨngki a'amu hofɨko nonontɨfi sɨmeho uhnnɨmentisofoho. 12 Hofɨko wosopayoso nto nɨngkahonɨngkofi Jisas kakoe inomokomoyo sohwona'nɨmo nalɨmento, Sekwo oso wosopayo nonontɨfi nilɨfeefohofoso apa'no mɨhu'mokumno. Fehohnjo siki wehwoloho. 13 Ose nelahonɨngki oso wosopayo aho fehohnjo hopi'nonohino somta'nɨngo nilɨfee'mentohofoso sohwo ho'yo aho hopi'nonohino sɨfe mta'ni hufa'uyo somo mehu'mee'mmentɨhwonefoho. 14 Oso wonyoangkafo a'amu miyɨwo'nɨngkiyohofoso Jisas imentiso so'no hwe moya'mi hofɨko nuhwonontɨfi ole hnnɨmentohofi, Oso hwe sohumo Anɨtu hungkuno uyahonɨngki nalone'no hontohumalohwoneso olo huhweho. Ose hnnɨmentohofofoho. 15 Ose hnnontanɨngkofi Jisas kako huno uyɨmento, Hofɨko ngkimo aho yokumpohn'nyo nɨkekuji hofɨkoe hwe engomo menɨhumatɨpitnnoho lonto kako'nohini hwofɨki'nyopono kotasɨmentisofoho.

Jisas kako mijo ayo sopo hano emoimentisofoho.

16 Sɨkuno'nji Jisas kakoe inomokomoyo sohwona'ni nakwo mijo ayo momɨngo so'mne'no womentɨhwonefoho. 17 Osopo nohumentani Jisasɨmne'no wonyopi hontohumentani nakwo yofayokinomo kotasontani nakwo oso mijo ayo sopo Koponeyamne'no woka'mentɨhwonefoho. Nowekontanɨngkuhwoni ajwopo sɨkuno nto meehonɨngki Jisas nakumo komo'no mone'ma'mmentisofoho. 18 Oso hohosohonta ifofo engo yahonɨngki mijo songo songo engo yonto mijo engo imentisofoho. 19 Inomokomoyo sohwona'ni nakwo mijopo ne'no jonjempo jonjempe mjɨmɨwako'mentɨhwoneso nakwo mijo ajwopo ne'no humentani uhwonɨmentɨhwoneso Jisas kako mijo ayo yofayokino'njo sopo hano nowentanɨngki uhwonɨmentɨhwonefoho. Ose uhwonontani iyoho engo nanɨmentisofoho. 20 I oso'no Jisas nakumo nalɨmento, Ngkonoho. Sekwo iyoho senɨngkuhwoloho. 21 Ose nelahonɨngki nakwo utɨmano lontani imentɨhwoneso kako nakwo'njo ajwomo'mo humahonɨngki yofayokino hiso nakwo wowantani humiyɨhwone sopone'no komo'no umentisofoho.

Hwe moya'mi hofɨko Jisasɨmne'no hafɨhafe tɨpmmentohofofoho.

22 Mo'nɨngkanta hwe moya'mi mijo ayo momɨngo nongkihnta'ni humamentohofoso Jisasɨmo uhwonano lontɨfi hnnɨmentohofi, Fosi yofayokino anga'no wentono. I, oso homo somo kakoe inomokomoyo sohwanohini kotasɨmalofofoho. Jisasɨ'nji'maho hofɨko'nohini kotasontɨfi humpo'malofofoho. Ose hnnɨmentohofofoho. 23 Oso hopo sopo Jisas kako wosopayo'no Anɨtumo isamoyoka ulonto a'amu homo somo yano ulofimentiso hopo sopo a'amuso nohumantɨfi uhwonɨmentohofoso yofayokino fiso Taipeliyasnta'ango i'mofopahonɨngki uhwonontɨfi 24 Jisasɨ'nji kakoe inomokomoyo sohwona'nnonji mohumunyo uhwonontɨfi hofɨko Jisasɨmo wotɨpemano lontɨfi yofayokinomo kotasontɨfi Koponeyamne'no wako'mentohofofoho.

Jisas ole lɨmento, Ngko songo ne'no humayo'ne wosopayo hwo'nyoho.

25 Nowakentɨfi mijo ayo nongkihnta'ni Jisasɨmo nto tɨpɨhwonɨmentohofo sohonta Jisasɨmo ulɨmentohofi, Nakwoe Lonetɨhwayo sohwosi, kɨko olopo ne'no ntohonta pmmahnno hwosilo. 26 Ose ulahonɨngkofi kako ulɨmento, Hungkuno nehopi waselɨmonne'no yohono. Fosi ngko syoho wonyoangkafo a'amu miyɨwo'nɨngkiyohofo imale so'no sekwo nje hwapɨngo neso huno ehohosasesiyo'neso montɨpeentɨkuyohofo. O'o, ngko wosopayo sejapmmale so'no apa'no wonejapono lontɨfi ntopeentɨkwofo. 27 Ose ulonto ulɨmento, Sekwo wosopayo piso imo'nyo'ne syoho tohohmtnno'njo ikutoho. O'o, oso wosopayo songo ne'no humayo'ne so'no syoho tohohmtnno'njo fiyɨkuno. Oso wosopayo hiso piso miyonehoho. Oso wosopayo hiso Ngko A'amufe Hwomu sohwo'ni wosejapmmonnoho. Ngko Anɨtuye yokumpohn'nyo'nji yo'mayo wonyoangkafo a'amu miyɨwo'nɨngkiyohofo yalokwe so'no Anɨtu kako ngkine'no ole setɨhwalofoho, Ngko songo ne'no humayo'ne hwapɨngo hwo'nyoho. 28 Ose ulahonɨngki hofɨko Jisasɨmo ulɨmentohofi, Nakwo pipi ihwasi yanehwono Anɨtuye syohosofo. 29 Ose ulahonɨngkofi Jisas ulɨmento, Sekwo Anɨtuye sɨmeho wopɨngo umokano lɨfijo'manji sekwo olo syoho sejapmmentisoso fiyɨkuno. Sekwo oso hwe Anɨtu sekuyepono nɨhwatɨmentiso sohwo'nɨmo sɨmeho hi'ntnnono ntapmno. 30 Ose ulahonɨngki ulɨmentohofi, I kɨko nom'ne wopɨngo wonyoangkafo a'amu miyɨwo'nɨngkiyohofoso yohojo'no'manji ou, nakwo ole wosyokufɨsyantanoho. Anɨtu kuhwotɨmentiso nehwosoho. Ose wosyokufɨsyantanoho. Oso'no pipi ihnnehino. 31 Neyakwosa sohwa a'amu mohumunyo sopo hofɨko nohumantɨfi hofɨko wosopayo ahwomo mta'nɨngoso (mona) nɨmotofofoho. A'amu Anɨtuye hungkuno mtɨ'mokumentohofo sohwa ole mtɨ'mokumentohofi, Kako wosopayo ahwomo mta'angoso a'amumo uyɨmojofoho. Ose mtɨ'mokumentohofofoho. 32 Ose ulahonɨngkofi Jisas ulɨmento, Hungkuno nehopi'nohino waselɨmonne'no yohono. Mouses kako oso wosopayo ahwomo mta'angoso muyɨmmojofoho. O'o, nje Mpohwo uyɨmojo hweho. I olohonta kako ahwomo mta'ango wosopayo neso wosejapmmonte'no yalofoho. 33 Oso wosopayo neso a'amufoho. Anɨtu kako ahwomo mta'ni hwaho lopo uhwatɨmentiso sohwo kako hwe moya'mi hopi'nonohino somo songo ne'no humayo'ne unyo hweho. 34 Ose ulahonɨngki ulɨmentohofi, Hwe engofo, oso wosopayo neso sɨkuno huhwo huhwi engolopohamo kɨko fonejapohoho. 35 Ose ulahonɨngkofi Jisas hofɨkimo ulɨmento, Ngko songo ne'no humayo'ne wosopayo ne hwo'nyoho. A'amu hwahoponjo wosopayo nɨwo'nɨngkohofoso hofɨko mijoho apa'no uyɨmontonoho. I oso'no a'amu ngkimo nɨ'masoso mijoho apa'no muyonefoho. A'amu ngkimo sɨmeho hi'ntnnono ntapososo kako mijo'ne apa'no mumo'nonehoho. 36 I oso'no nje hwapɨngo ne so'no nto setɨhwamalefoho. Sekwo ngkimo ko nohonontɨfi sɨmeho hi'ntnnono mantape'njo imalofofoho. 37 A'amu fehohnjoso Anɨtu ngkimo ntapmmentisoso hofɨko ngkine'no wonnɨngkopantɨfeho. Oso a'amu homo somne'no wae meeo'mnehono. Ngkilaho mulɨmnehono. 38 Hwapɨngoso ngko ahwomo mta'ni pmmentoheso nje huno mta'ni pmmentohe hwonɨ'maho. O'o, Anɨtu nɨhwatɨmentiso sohwoe hunomnohini inɨngkayo'ne pmmentohe hwo'nyoho. 39 Anɨtu kako nɨhwatɨmentiso sohwo ole'ne'no umo'nɨngkohoho. Hwe moya'mi hopi'nonohinoso Anɨtu ngkimo nto ntapmmentiso kalohi ngko anga'no musɨkwajɨmnehono. O'o, ngko hofɨkimo aho yokumpohn'nyo kemokosyohumantɨ'meso hwangku no'mo sɨkuno ae'uyo somo ngko hofɨkimo nulɨkahm'me'no hofɨko songo ne'no nohumantokutnnefoho. 40 Ou, olo so'no Mpohwo kako umo'nɨngkohoho. Hwe moya'mi hopi'nonohino Kakoe Hwomu sohwo'nɨmo nohonɨngkuji nje hwapɨngo ne so'no sɨmeho hi'ntnnono ntapɨfijo'manji hofɨko songo ne'no humayo'neso nomafɨkujo'no sɨkuno ae'uyo somo ngko hofɨkimo songo nulɨka'mnefoho. Ose ulɨmentisofoho. 41 Jisas kako ngko wosopayo ne ahwomo mta'ango hwo'nyoho ulɨmentiso so'no hofɨko hofɨkoe sɨmeho wonyo umo'nɨngkahonɨngki Jisasɨmne'no sitofo hungkuno hnnɨmentohofofoho. 42 Ole hnnɨmentohofi, Pipineto. Olo hwe lohwo kako Jousepɨye hwomu Jisasɨyoho. Kanɨngkwohwo'ya'une'no nakwo huno nayohoho. Ngko ahwomo mta'ni pmmentohe hwo'nyoho eso hwasyoso peho'no nelalofoho. 43 Ose hnnɨngkahonɨngkofi Jisas ulɨmento, Sekwo ngkine'no sitofo hungkuno hofiyoka peho'no hnnalokwofo. 44 A'amu fihwo kako ngkimo tɨfi nnɨngkaposo sohwo kakoe huno mta'ni monɨ'manehoho. O'o, nje Mpohwo ngkimo nɨhwatɨmentiso sohwo kako a'amu sohumo ngkiyepono mikinjɨhwajiyoso kako ngkimo wonɨ'ma'montonoho. Oseso oso hwe ngkiyepono Anɨtu lɨhwajoso sohumo ngko sɨkuno ae'uyo somo ulɨka'mnefoho. 45 A'amu Anɨtu hungkuno uyahonɨngki lɨmotofo sohwa ole mtɨ'mokumentohofi, Hwe moya'mi hopi'nonohino somo Anɨtu kako hofɨkimo huno uyo'ne itɨhwanefoho. Ose mtɨ'mokumentohofofoho. A'amu hopi'nono Anɨtuye hungkuno upa'nɨngkuji kakine'no huno nto'no syafɨsyɨkujo'no hofɨko ngkimo wonɨ'mantɨfeho. 46 I a'amu hopi'nonohinoso hofɨko nje Mpohwo Anɨtu sohumo muhwonyo'njofoho. O'o, ngko'nohini Mpohwo'nji humunyo sohwo'nnohini kakimo uhwononji kakoe pone somta'ni pmmentohe hwo'nyoho. 47 Hungkuno nehopi'nohini selalokweno. A'amu ngkimo sɨmeho hi'ntnnono ntaposo sohwo kako songo ne'no humayo'neso hi'njo hweho. 48 Ou, ngko songo ne'no humayo'ne wosopayo hwo'nyoho. 49 I seyakwosa sohwa hofɨko oso hwaho a'amu mohumunyo sopo nohumantɨfi wosopayo ahwomo mta'ni (mona) nɨmotofo sohwa hofɨko hohonta nto pe'nɨmentohofofoho. 50 I oso'no oso wosopayo ne ahwomo mta'ni a'amu nosohwo'manji kako songo ne'no nohumantɨhwone hweho. 51 Ngko oso wosopayo ne songo ne'no humayo'ne sohwo'ni ngko ahwomomo ulɨko'manji pmmentohe hwo'nyoho. Oseso a'amu fihwo kako oso wosopayo neso noso'manji kako songo ne'no humantɨhwonefoho. Oso wosopayo so'ne'no ngko sekumo selalokweso nje a'apahomne'no selalokweno. Hwapɨngoso ngko a'amu hwahoponjo somne'no poyo imo'nɨ'me'no a'amu ngkine'no sɨmeho ntapɨfijo'manji hofɨko songo ne'no nohumantokutnnefoho. 52 Ose ulahonɨngki a'amu Juta hofɨko yoka hungkuno engo loma'mentohofofoho. Ole hnnɨmentohofi, Olo hwe lohwo kakoe a'apaho nejapososo pipi nanehwono. 53 Ose ulahonɨngki Jisas ulɨmento, Ngko hungkuno nehopi selalokweno. Sekwo nje a'apaho so'nji nje honɨyo so'nji manɨfijo'manji sekwo songo ne'no humayoso motɨpɨhwonɨfitnnefoho. 54 A'amu nje a'apaho so'nji nje honɨyo so'nji nnososo kako songo ne'no humayo'neso hi'njofoho. Oso sɨkuno ae'uyo somo oso a'amu homo somo ulɨka'mnefoho. 55 Hwapɨngoso nje a'apahoso wopayo ne pa'nyofoho. Nje honɨyoso mijo ne pa'nyofoho. 56 A'amu kako nje a'apaho so'nji nje honɨyo so'nji nnososo ngko kakimo humahm'me'no kako ngkimo wonɨhumamontonoho. Oso a'amu hiso kako nje hungkunomo aho yokumpohn'nyo kemokosyohumunyofoho. 57 Nje Mpohwo songo ne'no humaso sohwo kako nɨhwatɨmentiso so'no ngko nje Mpohwoe yokumpohn'nyo so'nji songo humaleno. Oso pa'nyoso a'amu fihwo kako sɨkuno huhwo huhwi wosopayo'nji mijo'nji nɨwo'nɨngkiso hopaso kako ngkine'no sɨkuno huhwo huhwi huno syanɨfɨsyɨwo'nɨngkuhwoso'manji kako nje yokumpohn'nyo nomahwosi songo wohumamontonoho. 58 Olo wosopayo ahwomo mta'ango lohwo'ni oso wosopayo seyakwosa sohwa hofɨko a'amu mohumunyo sopo nɨmotofo pa'nyo hwo'nɨ'maho. O'o, oso wosopayo hiso mantɨfi nontɨfeso hofɨko poyo nape'nɨmotofofoho. I oso'no olo wosopayo lohwo'nɨmo a'amu fihwo nnososo kako songo ne'no nohumantɨhwonefoho. 59 Jisas kako oso ango Koponeyammjo tajo ango somo humanto oso hungkuno hiso lutɨhwamentisofoho.

Jisas kako songo ne'no humayo'ne hungkuno hwapɨngo hweho.

60 Oso hungkuno homo somo Jisasɨye inomokomoyo pi'nɨngo sohwona'ni nupo'nontani fehohnjoso hnnɨmentohofi, Olo hungkuno loso tango we'e'njo hwo'maho. Hungkuno hwapɨngo neso nakwo huno monayohiyohoho. Haloho tɨhwo upo'monteto. 61 Jisas kakoe inomokomoyo fehohnjoso oso hungkuno mjahnnɨmentohofoso Jisas kakimo ko mulahonɨngkofi kako oso hiso'no huno uyahonɨngki hofɨkimo ulɨmento, Olo hungkuno ngko seloheso sekwoe hunomo wonyo lasemokohoho. Sekwo ngkimo wonɨhwotɨ'mofantɨfetaho. 62 I ngko A'amufe Hwomu sohwo'ni ngko nje ango ne sopone'no asomo sɨme sohonta sekwo ngkimo nonohonɨfitnne'manji sekwo huno pipi seyoneto. 63 Anɨtuye Towahuno sohwo kako'nohini songo ne'no humayo'neso hwapɨngo hweho. Sekwo oso hwe huhwo sohumta'ni womantɨfeho. Sekwoe a'apahomjo yokumpohn'nyo mosefo'manehoho. O'o, a'amu Anɨtuye Towahuno momaso'njo sohwo kako songo ne'no humayoso motɨpemanehoho. I oso'no sekwo Anɨtuye Towahuno mayo so'no nto selohefoho. Nje hungkunomo inɨngkafijoso sekwo songo ne'no humafitnnefoho. 64 A'amu fehohnjo sekwo'njo ajwo so'mo humalofoso hofɨko ngkine'no sɨmeho hi'ntnnono montape'njo yalokwofo. Ose nalɨmentisofoho. Hwapɨngoso sɨmo'mta'ango Jisas kako oso a'amu kakimo sɨmeho hi'ntnnono muyɨfitnne somne'no kako huno nto syafɨhu'mentisofoho. Oso'nji kako oso a'amu kakine'no tokoyo'ofo ulohofone sohune'no huno umentisofoho. 65 Jisas a'amu huhwo sohwamo nom'ne hungkuno ulɨmento, Sekwo fehohnjo soku ngkimo sɨmeho montape'njo yalokwofo so'no ngko olo hungkuno hiloso nto seloheso olenoho. Nje Mpohwo kako a'amu somo momikinjosehwajiyo'njo yoso'manji sekwo ngkiyepono mapofitnnehofo. 66 Oso hungkuno hiso Jisas kako ulahonɨngki kakoe inomokomoyo pi'nɨngoso kakimo uhwatɨ'mofontɨfi humpo'mentohofofoho. Hofɨko kako'nji hano apa'no memayofoho. Nɨhu'nahone uhwatɨ'mo'mentohofofoho. 67 Oseso Jisas kako kakoe inomokomoyo aho hopi'nono sɨfe mta'ni hufa'uyo sohwona'nɨmo nalɨmento, Sekwo huhwasi wonɨhwotɨ'mofantɨfetaho. 68 Ose nelohonɨngkahonɨngki, Saimoun Pita ulɨmento, Hwe Engofo, Nakwo tɨhwoepono humpeenehwono. O'o, kɨko'nohini songo ne'no humayo'ne hungkunoso hi'njo hwosoho. 69 Jɨje hungkuno homo somo sɨmeho hi'ntnnono kijopalokuhwono. Nakwo huno ole nayohoho. Kɨko Anɨtuye hwomu ne sohwosi wopɨngo'nohini hwosoho. 70 Ose ulahonɨngki Jisas nalɨmento, Nje inomokomoyo aho hopi'nono sɨfe mta'ni hufa'uyo sohwasi ngko sehwosopo'mentohe hwasoho. I oso'no ngko sehononji anga'nohino sohwosi towahuno wonyo Seten mta'angoso hi'njo hwosoho. Ose nalɨmentisofoho. 71 Oso hungkuno Jisas nalɨmentisoso kako Jutas, Saimoun Isɨkaliyoutɨye hwomumne'no nalɨmentisofoho. Hwapɨngoso Jutas huhwo sohwo kako Jisasɨye inomokomoyo ko inomokomojo sohwo kako aku ikinji ehumanto Jisasɨmne'no tokoyo'ofo uloho'mentisofoho.

Jisas kakoe homnɨngkwa'wehwosa Jisasɨmo sɨmeho hi'ntnnono muyɨmmentohofofoho.

1 Oso hohosohonta Jisas kako hwaho Ngkalili sopo nowento hano emoimentisofoho. A'amu Jutafe hwe engo sohwa Jisasɨmo wofonjosyano lontɨfi yahonɨngkofi kako hwaho Jutiya sopo hano memoyo'njo imentisofoho. 2 Oso a'amu Jutaso hofɨkoe sɨkuno iyoho humayo nom'ne engoso mofonepo umo'nɨmonto imentisofoho. Oso sɨkuno hiso a'amu Jutafe hofiyakwosa hofɨko hwapɨfe ango molontɨfi humamotofo sohonta Anɨtu hofɨkimo hofiyo mokosyohumamojo so'no huno syafɨsiyo'ne sɨkunofoho. 3 Oseso Jisas kakoe homnɨngkwa'wehwosa kakimo sitofo hungkuno ulɨmentohofi, Kɨko olo hwaho Ngkalili lopo sopo nohumahotoho. O'o, kɨko hwaho Jutiya'ne'no sohoji osopo yo'mayo wonyoangkafo a'amu miyɨwo'nɨngkiyohofoso kɨko yohojo'no a'amu pi'nɨngoso kikimo kohonɨngkuji jɨje yofe engo umo'nɨmontonoho. 4 Kɨko yofe engo woma'mo lohojɨ'manji olo hiyaso lo'mo peho'no humahnno. Kɨko yofe engo ne hi'njo hwosɨ'manji kɨko yo'mayo wonyoangkafoso a'amu hopi'nonohino somo fitɨhwaho. Ose ulɨmentohofofoho. 5 Hwapɨngoso homnɨngkwa'wehwosa huhwanji Jisasɨmo sɨmeho hi'ntnnono mummentohofofoho. 6 Jisas hofɨkimo ulɨmento, Ngko ango Jelusalemne'no utɨhwa'nyopo sɨmne sɨkunoso m'mofapefoho. I sekwo yo'mayoso uyano lɨkujɨ'manji sekwo a'amu hwahoponjo soku sɨkuno engolopohamo sekwoe sɨkunofoho. 7 Olo hwaho loponjo hwe moya'mi hopi'nonohinoso hofɨko sekumne'no sɨmeho tohino mosejopalokuyohofo. O'o, sɨmeho tohino ngkimnohini ntopantokwofo. Hwapɨngoso yo'mayo yahino wonyo hofɨko iwo'nɨngkohofo so'no ngko lɨjwaofɨwo'nɨngkohe so'no sɨmeho tohino ntapɨwo'nɨngkohofofoho. 8 Nje nɨngkwahwoso sohwasi sekwo nosɨkuji sekwo oso sɨkuno iyoho humayo engo somo fisɨhwonamno. I, ngko oso sɨkuno iyoho humayo engo somo mosɨhwonamnehono. Nje sɨkuno ngko siyo'neso nto'no mmo'nyofoho. 9 Jisas kako ose ulonto oso hwaho Ngkalili sopo humamentisofoho.

Jisas kako oso Sɨkuno Engo hofiyakwosa hwapɨfe ango molɨmentohofo somo sɨhwojamentisofoho.

10 Jisas homnɨngkwa'wehwosa sohwa hofɨko oso Sɨkuno Engo somne'no sɨkwato lohofahonɨngkofi Jisas kako huhwo sɨmentisofoho. I oso'no kako utɨhwa'nyopo sɨmentiso'maho. O'o, hiyaso'mo sɨmentisofoho. 11 A'amu Jutafe hwe engo sohwa hofɨko oso Sɨkuno Engo somo humawo'nɨngkohofo sopo humantɨfi Jisasɨmne'no hafɨhafe tɨpentɨfi a'amu somo ulohonɨmentohofi, Jisas kako ntɨ'mo humaho. 12 Hwe moya'mi pi'nɨngo engoso hofɨko mtitofo mtitofo syohumolawentɨfi a'amu fehohnjoso ole lɨmentohofi, Jisas kako wopɨngo hweho. A'amu fehohnjoso ole lɨmentohofi, Jisas kako a'amumo hwasyo hungkuno lɨku'mofɨwo'nɨngkiso hweho. Ose lɨmentohofofoho. 13 I oso'no a'amu hopi'nonohino hofɨko hwe engo sohwamne'no iyoho unɨngkahonɨngki hofɨko hungkuno utɨhwa'nyopo mahnnɨmentohofofoho. 14 Oso Sɨkuno Engo iyoho humayo ajwo sopo Jisas kako Anɨtuye tajo ango engo somo noswonto a'amu somo utɨhwa'nyopo hungkuno loma'mentisofoho. 15 A'amu Jutafe hwe engo sohwa hofɨko Jisasɨye hungkunomo upo'nantɨfi yomo yontɨfi ole hnnɨmentohofi, Olo hwe lohwo kako huno engo loso ntɨ'mta'ni tɨpema'masoto. Kako nakwoe sɨkule ango hungkuno atofo lutɨhwawo'nɨngkuhwone somo masyuyo hweho. 16 Ose hnnɨngkahonɨngkofi Jisas kako hofɨkimo ulɨmento, Olo hungkuno selalokwe loso nje huno mta'ango moselalokuyohono. O'o, Anɨtu kako ngkimo nɨhwatɨmentiso sohwo ntahonɨngki selalokweno. 17 A'amu fihwo kako Anɨtuye hungkunomo unɨngkamo loso sohwo kako olo nje hungkuno lomne'no kako huno ole uyono. Hungkuno loso kakoe huno mta'nɨngo'maho. O'o, Anɨtuye huno mta'nɨngofoho. Kako huno ose uyono. 18 Hwe fihwo kako kakoe huno mta'ni yo'mayo loso yoso sohwo kako yofe engo woma'mo lɨhwosi walɨmontonoho. I a'amu fihwo kako oso a'amu lɨhwatɨmentiso sohwoe yofe engoso sekwo noho'nomapitnne'ento selalokuso'manji kako hwasyo hungkuno moselalofiyoho. Honɨngkano wonyo ane hweho. 19 Jisas ose ulonto ole ulɨmento, Hohonta Mouses kako seyakwosamo Anɨtuye honɨngkano hungkuno uyɨmentisofoho. I oso'no sekwo hopi'nonohino soku oso honɨngkano hungkuno somo hwotoho fentɨfi nto'no minɨngkayo'njo imotofokuyoho. Sekwo ose imentohofo so'no sekwo ngkimo peho'no wofonjonisyantɨfe'no yalokwofo. 20 Ose ulahonɨngki hwe moya'mi hopi'nonohinoso hofɨko Jisasɨmo ulɨmentohofi, Kikimo tɨhwo wofonjakohumontolo. Awonoho. Kɨko towahuno wonyo Seten mta'angoso hi'njo hwosoho. 21-23 Hofɨko ose ulahonɨngkofi Jisas ulɨmento, Sɨkuno iyoho humayo fihumo ngko hwe mnokino'njo sohumo wopɨngo umokumentohe so'no sekwo sɨmeho tohino ntapɨwo'nɨngkohofofoho. I oso'no sekwo soku sɨkuno iyoho humayo somo syoho iwo'nɨngkohofokuyoho. Seyakwo Mouses sohwo honɨngkano hungkuno ole sejapmmento, Sekwo sɨkuno aho fehohnjo hopi'nonohino aho nom'ne mta'ni hufa'u memjaofɨhwoso'no mo'nɨngkanta hwomu milongo sohwamo a'apaho somo sɨhu fɨkolopmno. I Mouses oso hungkuno somne'no hwapɨngo hwo'maho. O'o, seyakwosa mta'angofoho. I oso'no oso sɨkunoso memjaofɨhwoso'no sɨkuno iyoho humayo so'manji sekwo oso sɨkuno somo syoho iwo'nɨngkohofɨhwasoho. Sekwo oso ko iwo'nɨngkohofo so'no ngko hwe sohumo wopɨngo umokumentohe oso sɨkuno somo sekwo ngkine'no sɨmeho tohino peho'ne ntopantokwofo. 24 Sekwo yo'mayo yahino somo uhwonɨngkuji wonyofoho eso komo'no lɨkutoho. O'o, sekwo sɨmo'mo hwapɨngo ne so'no huno nto'no ikwesyafɨsyɨkuji sekwoe hunoso yano nto'no mpopmno. Ose ikujo'no sekwo yahino wonyo so'nji wopɨngo so'nji huno nto'no wotɨpemantɨfeho. Ose ulɨmentisofoho.

A'amu fehohnjoso hofɨko ole lɨmentohofi, Olo hwe lohwo Anɨtu lɨhwatɨmentiso lohwolɨkeno.

25 Hwe moya'mi fehohnjo Jelusalem sopo humamotofoso ole hnnɨmentohofi, Olo hwe lohumo a'amu hwe engo sohwa wofonjosyano lontɨfi iwo'nɨngkohofo lohwolaho. 26 I uhwonɨmno. Kako utɨhwa'nyopo lohofonto kakoe hungkuno lontanɨngki hofɨko yoka hungkuno mulalokuyohofo. I nakwoe hwe engo sohwa hofɨko olo hwe lohumne'no Anɨtu uhwatɨmentiso hweho ose kosyofɨsyalokwofo. 27 Ose hnnontɨfi nom'niso ole hnnɨmentohofi, I oso'no olo hwe lohwoe hwaho loponjo ango ne so'no nakwo huno nayohoho. Oso hwe Anɨtu uhwatɨmonnoho nalɨmentiso so'no kako i'mofape sohonta kakoe hwapɨngo so'no nakwo huno nto'no monayonefoho. Ose hnnɨmentohofofoho. 28 Jisas kako Anɨtuye ango engo somo ajwo'mo nohumanto a'amu somo mango engo ulɨmento, Sekwo ngkine'no huno seyohoho. I sekwo nje ango sopone'no huno moi'wonoho. I oso'no nje hwapɨngo neso nje Mpohwo ngkimo nɨhwatɨmentiso sohune'no sekwo huno nto'no maseyohiyohoho. Ngko nje huno mta'ni pmmentohe hwonɨ'maho. O'o, nje Mpohwo kako nɨhwatɨmentiso sohwo kako yo'mayo yahino ne so'no hwapɨngo hweho. I sekwo kakimo huno ito'no maseyokuyoho. 29 Ngko'nohini kakine'no huno moi'wonoho. Hwapɨngoso ngko kako'nji nohumentai kako huhwo ngkimo lonɨhwatɨmentiso so'no pmmentohe hwo'nyoho. 30 Ose ulahonɨngki hofɨko kakimo impe untofantɨfi ko imentohofoso a'amu fihwo kakimo aho mokisahumentisofoho. Hwapɨngoso Jisas kakoe sɨkunoso mmo'nyofoho. 31 Hwe moya'mi pi'nɨngoso hofɨko Jisasɨmo sɨmeho hi'ntnnono uyontɨfi ole hnnɨmentohofi, Oso hwe sohumo Anɨtu uhwatɨmentiso sohwo nopɨhwoso'no kako olo hwe lohwoe yokumpohn'nyo somo uyakolo'montolaho. O'o, awonoho. Olo hwe oloho hweho. Ose hnnontɨfi tɨfi inɨngkamentohofofoho.

A'amu itokuso'njo sohwamo Jisasɨmo impe intofo'ne lɨhwatɨmentohofofoho.

32 A'amu Falisi sohwa oso hungkuno a'amu Jisasɨmne'no hnnɨmentohofo homo somo upa'nontɨfi hofɨko'nji a'amu tajo ango syoho'njo yofe engo'njo sohwantnne'no hofɨko Anɨtuye ango engo somjo a'amu hwapɨfe tɨfo'njo sohwamo Jisasɨmo impe intofo'ne lɨhwatɨmentohofofoho. 33 Lɨhwatɨmentohofo so'no Jisas kako huno uyahonɨngki kako a'amu kako'njoponjo somo ulɨmento, Sɨkuno we'enehwo ngko sekwo'nji wosɨmonnoho. Nohumahm'mo ngko nɨhwatɨmentiso sohwoepono asomo wawomonnoho. 34 Oso hohosohonta sekwo ngkine'no hafɨhafe ko tɨpɨfijoso manohonɨfitnnehofo. Hwapɨngoso oso ango ngko nu'mo humame sopo sekwo monɨ'mapitnnefoho. 35 Ose ulahonɨngki a'amu Juta sohwafe hwe engo sohwa ole hnnɨmentohofi, Oseso olo hwe lohwo kako ntente we sopo uhwonantanto nakwo huno uhwonyosofo. Kako a'amu Ngkɨlik sohwafe hwaho sopo nowehwosi a'amu Juta oso hopo sopo humawo'nɨngkohofo so'nji a'amu temtitofo kengo Ngkɨlik so'njimo kakoe hungkunoso wolutɨhwamtolɨkeno. 36 Ole nalohi, Sekwo ngkine'no hafɨhafe ko tɨpɨfijoso manohonɨfitnnehofo. Ose nalonto ole nalohi, Sekwo ango ngko humame sopo sekwo monɨ'mapitnnefoho. Oso hungkuno nalisoso hwapɨngo neso pehomto. Ose hnnɨmentohofofoho.

Mijo songo ne'no humayo'ne hungkunofoho.

37 Oso sɨkuno nɨhu'no engo iyoho humayo ae'uyo sohonta Jisas nolɨkafonto mango engo ole ulɨmento, A'amu mijo'no umo'noso sohwo kako ngkiyepono nopɨhwosi ngkinta'ni wannono. 38 A'amu Anɨtuye hungkuno mtɨ'mokumentohofo sohwa ole mtɨ'mokumentohofi, A'amu ngkine'no sɨmeho hi'ntnnono ntaposo sohwo kakoe sɨmeho so'mo mijolɨmo hopa imo'nɨngkuhwosi oso mijo songo ne'no humayo'neso hano loho'nawo'nnyofoho. Ose mtɨ'mokumentohofofoho. 39 Mijo'no Jisas ulɨmentisoso Anɨtuye Towahuno Wopɨngo somne'no ulɨmentisofoho. A'amu sɨmeho hi'ntnnono unyo sohwa hofɨko Anɨtuye Towahuno mapitnne'no ulɨmentisofoho. I oso'no Jisas kakoe yofe engo so'nji kakoe yokumpohn'nyo hwofilo'nnyo so'nji momaso'njo oso'no Anɨtu kakoe Towahuno a'amu homo somo muyo'njo imentisofoho.

Hwe moya'mi sofanji ajwopo hotito'mentohofofoho.

40 Hwe moya'mi fehohnjo sofanji Jisasɨye hungkuno upa'nontɨfi ole hnnɨmentohofi, Ou, nehopeho. Oso hwe sohumo Anɨtu hungkuno uyahonɨngki nalone sohune'no hontohumawo'nɨngkuhwoneso olo huhweho. 41 Ose hnnɨngkahonɨngkofi nom'ne a'amuso ole hnnɨmentohofi, Olo Kɨlaisɨyoho. Anɨtu kako ahwomo mta'ni uhwatɨmentiso hweho. Ose lahonɨngkofi nom'neso ole hnnɨmentohofi, O'o, Kɨlais kako hwaho Ngkalili sopo m'mofaponehoho. 42 I a'amu Anɨtuye hungkuno mtɨ'mokumentohofo sohwa olo hiso'no yoloho mtɨ'mokumentohofofoho. Kɨlais kako hwe engo Ntefitɨye temtitofo i'mofapɨhwosi oso ango Mpetɨlehem Ntefit humamojo hopo sopo u'mofapmmontonoho. Olo hwe lohwo kako Ngkalili sopo i'mofapmmentisofoho. Oso huno hwasyo syafɨhu'mentohofofoho. 43 Oseso a'amu Jisasɨmne'no huno kengo kengo syafɨsyontɨfi hwe moya'mi hofɨko Jisasɨmne'no hotito'mentohofofoho. 44 A'amu fehohnjo sohwa hofɨko Jisasɨmo impe untofosyano lontɨfi ko imentohofoso a'amu fihwo Jisasɨmo aho mokisahumentisofoho.

A'amu Jutafe hwe engo sohwa hofɨko Jisasɨmo sɨmeho hi'ntnnono muyo'njo imentohofofoho.

45 Oseso a'amu hwapɨfe tɨfo'njo sohwa hofɨko a'amu Falisi sohwanji a'amu tajo ango syoho'njo yofe engo'njo sohwafe pone'no asomo nopahonɨngkofi hwe engo sohwa yoka ulɨmentohofi, Sekwo Jisasɨmo impe mintokwape pipi yohofo. 46 Ose ulahonɨngkofi hwapɨfe tɨfo'njo sohwa ulɨmentohofi, Jisas kako hungkuno wonyoangkafo lisoso nakwo hungkuno oso pa'nyoso nakwo mupa'nɨngkohoyɨhwono. 47 Ose ulahonɨngkofi a'amu Falisi sohwa ulɨmentohofi, I sekwo huhwahnnji Jisasɨmo sɨmeho uyahonɨngkofi hwasyo honɨngkanomo ipesemotasewesotaho. 48 I nakwo hwe engo sohwona'nnonji a'amu Falisi sohwona'nnontnne hwe fihwo kako Jisasɨmo sɨmeho hi'ntnnono unyo sohumo lɨhwonalokwofo. Nɨhu'no awonoho. 49 Olo a'amulo Jisasɨmo sɨmeho uyalokwofo sohwa hofɨko Mousesiye honɨngkano hungkuno somo huno muyofoho. Oso'no Anɨtu a'amu homo somo tohino uyɨmontonoho. Oso hwasyo hungkuno ulɨmentohofofoho. 50 Nikoutimos kako hohonta Jisasɨmo u'ma'mentiso sohwo kako huhwo a'amu Falisi hweho. Kako hofɨko'nji nohumanto ulɨmento, 51 Nakwoe honɨngkano hungkunoso ole nalɨwo'nɨngkisotaho. A'amufe hungkuno mupa'nyo'mta'ni tohino siki uyo. Ose nalɨwo'nɨngkisotaho. O'o, sɨmo'mo kakoe hungkuno yoloho neso upa'nɨngkuhwasi yo'mayo iwo'nɨngkiso so'no huno nto'no nayɨhwaso'no u, osohonta kako'ne hungkuno nano womtitofantanoho. 52 Ose ulahonɨngki hofɨko ulɨmentohofi, I kɨko huhwo hnnonji Ngkalili nta'ango hwosilaho. Anɨtuye hungkunomo atofo fiso. Atofo lohoji olo so'no huno wotɨpema'monnoho. A'amu Anɨtu hungkuno uyɨhwoso'no nalone sohwo hwaho Ngkalili sopo m'mofaponehoho. Oseso kɨko huno wotɨpema'monnoho. 53 Ose ulahonɨngkofi hofɨko hofɨkoe angopono humpo'mentohofofoho.

A'mu hwa'nte siye hungkunofoho.

1 Oso sɨkwo'miyo somo Jisas kako hwofɨki'nyo Oulif sopo sɨmentisofoho. 2 Mo'nɨngka sohonta imɨngo'nji Jisas apa'no Anɨtuye tajo ango engo somo asomo noponto sɨmentisofoho. Hwe moya'mi hopi'nonohino Jisasɨmo u'mahonɨngkofi Jisas kako ampo nohumanto kakoe hungkunoso lutɨhwamentisofoho. 3 Ose lutɨhwentanɨngki a'amu honɨngkano hungkuno lutɨhwamotofo sohwanji a'amu Falisi sohwanji hofɨko ape hwa'ntesimo ipemotasontɨfi Jisasɨ'njo ajwopo uhumatɨmentohofofoho. Oso apesi kako nom'ne hwe'nji saho fosyowentanɨngki hwe engo sohwa uhwonɨmentohofofoho. 4 Oseso hofɨko Jisasɨmo ulɨmentohofi, Nakwoe Lonetɨhwayo sohwosi, olo ape losi hufo yontanɨngki uhwonɨmalohwoniyoho. 5 Mousesɨye honɨngkano hungkunoso ole nalɨmento, Hwoya'mi yahino wonyo'njo ose somo sojo mehwasi wofonjosyano. Ose nalɨmentisofoho. I oso'no kɨko huno pipi kiyohoho. Pipi yanehwono. 6 Hofɨko Jisasɨye hunomo yamofo ulohofo'ne oso ulohonɨmentohofofoho. Huno ole syafɨhu'mentohofi, Jisas kako Mousesɨye honɨngkano hungkunomo mtɨhupe so'manji nom'ne hungkuno kengo naloso'manji nakwo kakimo impe untofantanoho. Ose syofɨsyahonɨngki Jisas kako ingku'nohumanto kako kakoe ajo'miyo'nji hwahomo ifalifaliyo mtɨ'mokumentisofoho. 7 Hofɨko Jisasɨmo ne'no ne'no ulohonɨngkahonɨngkofi Jisas kako nolɨkafonto ulɨmento, A'amu fihwo honɨngkano wonyo nɨhu'no aneso sekwo'njo ajwo lopo sojo sɨmo'mjoso a'mu simo woho'namofono. 8 Ose ulonto kako apa'no ingku'nohumu lohofonto hwahomo apa'no ajo'miyo'nji ifalifaliyo mtɨ'mokumentisofoho. 9 Hofɨko Jisasɨye hungkunomo upa'nontɨfi a'amu anga'no anga'no hotahumentohofofoho. Hwe yofe engo'njo sohwa sɨmo'mo hotoswopahonɨngkofi hwe nom'ne sohwa hofɨko tɨfi hotahumentohofofoho. A'amu hopi'nonohinoso Jisasɨmo ulɨko'mahonɨngkofi Jisas kako'nohini nohumentanɨngki oso a'musi kako Jisasɨye sɨmanopo ne'no loho'mentisofoho. 10 Jisas nolɨkafonto a'mu simo ulɨmento, Olo a'mu losi, a'amuso ntɨ'mo humalofo. A'amu anga'nohinoso kikimo poyo wokumokano makiloho liyohofo. 11 Jisas ose ulahonɨngki a'musi ulɨmento, Hwe Engofo, a'amu ose manjofoho. Hopi'nono nto humpehofo. Ose ulahonɨngki Jisas ulɨmento, Ngko huhwo'ni poyo makumokohoyohono. Kɨko nowehoji oso wonyo hiso apa'no iyo'eno. O'o, honɨngkano wopɨngo'nohini fiyohoho. Ose ulɨmentisofoho.

Jisas olo hwaho lopone pomponaho hweho.

12 Jisas a'amu somo hungkuno apa'no ulɨmento, Ngko olo hwaho lopone pomponaho hwo'nyoho. A'amu ngkimo tɨfi nnɨngkaposo sohwo kako sɨkwo'mjoho'mo memoyonehoho. O'o, kako songo ne'no humayo'ne pomponaho hi'njo hweho. 13 Ose ulahonɨngki a'amu Falisi sohwa ulɨmentohofi, Kɨko kikine'no hnnɨwo'nɨngkino hwosoho. Oseso nakwo huno monayohoyohoho. Jɨje hungkuno nehopitɨkeno, hwasyotɨkeno. Nakwo huno monayohoyohoho. 14 Ose ulahonɨngkofi Jisas ulɨmento, Ngko ngkine'no hnnalokweno. I oso'no nje hungkuno ne'njofoho. Hwapɨngoso ngko nje hwapɨngo ne pmmentohe sopono huno niyohoho. Oso'no ngko ango nosɨmne sopone'no huno niyohoho. I oso'no sekwo nje hwapɨngo ne sopono huno maseyohoyohoho. Ngko hano umne sopone'no sekwo huno maseyohoyohoho. 15 Sekwo a'amu hwahoponjofe yahinomo yano ilofɨwo'ningkohofɨhwasoho. I ngko a'amufe yahino somo oso hopa yano milofɨwo'nɨngkiyohe hwo'nyoho. 16 I oso'no ngko nom'ne a'amumne'no yano ilo'me'manji ngko nto'nohino ulo'mnoho. Hwapɨngoso ngko'nohinɨ'maho. O'o, nje Mpohwo nɨhwatɨmentiso sohwo'nji nohumentai yalokuhwoyo. 17 Sekwoe honɨngkano hungkuno somo ole wo'nnyofoho. A'amu hufa'u hwa'u hungkuno afa'nohini lisoso nakwo huno ole wonayono, Sikoe hungkunoso ne'njofoho. Ose wo'nnyofoho. 18 Ngko ngkine'no hungkuno hnnɨwo'nɨngkohefoho. I nje Mpohwo nɨhwatɨmentiso sohwo kako huhwo nje hwapɨngo so'no lɨwo'nɨngkiso hweho. 19 Ose ulahonɨngki hofɨko ulɨmentohofi, Jɨje Mpohwo ntɨ'mo humaho. Ose ulohonɨngkahonɨngkofi Jisas ulɨmento, Sekwo ngkine'no huno nto'no mosyafɨsiyo'njohwasi kalohi sekwo nje Mpohwo huhune'no huno mosyafɨsiyo hwasoho. Sekwo ngkine'no huno nto'no seinyohwasɨ'manji ou sekwo nje Mpohwo huhune'no huno nto'no waseyɨmontonoho. 20 Oso hungkuno hiso Jisas kako Anɨtuye tajo ango engo hamniyoho'njo ango ajwo sopo lohofonto hwe moya'mi somo hungkuno lutɨhwamentisofoho. Kako utɨhwa'nyopo ko humentanɨngki a'amu kakimo impe mintafe'njo imentohofofoho. Hwapɨngoso kakoe sɨkuno poyo imo'nyo'ne sɨkunoso mmo'nyofoho.

Ngko ume sopo sekwo mafitnne hwasoho. Jisas ose ulɨmentisofoho.

21 Jisas kako nom'ne hungkuno apa'no ulɨmento, Ngko ume sohonta sekwo ngkine'no hafɨhafe wonyopi wonyopi wotɨpeentɨfeho. Sekwo sekwoe honɨngkano wonyo somo poyo nope'nɨngkuji sekwoe wonyo somjo tohino somo ne'no humantokutnnefoho. Oso'no sekwo ngkimo monɨ'mapitnnehofo. 22 Ose ulahonɨngki a'amu Juta sohwa hnnɨmentohofi, Oso hungkuno nelalokunjoso hwapɨngo neso pehoto. Ole nelalofoho. Oso ango ngko u'mo humame sopo sekwo mafitnnehofo. Pipineto. Kako kakimo wofonjahinɨmtolɨkeno. 23 Ose hnnɨngkahonɨngkofi Jisas ulɨmento, Sekwo enjwa'mta'ango kuyoho. Ngko yokintahoponta'ango hwo'nyoho. Sekwo olo hwaho loponta'ango kuyoho. Ngko ahwomo mta'ango hwo'nyoho. 24 Oso'no ngko ole nto selohefoho. Sekwo poyo pe'nɨngkuji sekwoe wonyoso wawo'montonoho. Mpohwo kako ngkimo nɨhwatɨmentiso so'no sekwo sɨmeho hi'ntnnono montape'njo ifijo'manji sekwoe wonyoso wawo'montonoho. 25 Ose ulahonɨngki hofɨko ulɨmentohofi, Kɨko tɨhwosilo. Ose ulohonɨngkahonɨngkofi Jisas ulɨmento, Ngko oso hwe so hwo'nyoho. Sɨmo'mo nto selɨmentohe so hwo'nyoho. 26 I sekwoe yahino wonyo somne'no hungkuno pi'nɨngo hi'njo hwo'nyoho. I oso'no hwangku oso yahino somne'no hungkuno yano selofimnefoho. I olohonta yo'mayo nɨhwatɨmentiso sohwo ntɨmentiso so'nohini waselɨmonne'no yohono. Kakoe yahinoso ne'njo hweho. 27 Jisas ose ulahonɨngki hofɨko Jisas Anɨtumne'no hofɨkimo ulɨmentiso so'no huno muyo'njo imentisofoho. 28 Oseso Jisas hofɨkimo ulɨmento, Hwangku sekwo ngko A'amufe Hwomu sohwo'ni fonjanɨsyɨkuji oso hohosohonta sekwo ngkine'no huno ole seyonefoho. U, oso hwe Anɨtu uhwatɨmentiso sohweho. Sekwo huno ose wotɨpemantɨfeho. Ngko nje huno mta'ni yo'mayo syohoso imentohe'maho. O'o, yo'mayo hungkuno nje Mpohwo ntɨmentiso so'nohini selɨmentohefoho. 29 Mpohwo kako nɨhwotɨmentiso sohwo kako ngko'nji humaho. Yo'mayo iwo'nɨngkoheso Mpohwo kakoe sɨmeho wopɨngo umokiyo'ne iwo'nɨngkohe hwo'nyoho. Kako monɨsɨkwajonehoho. 30 Ose ulahonɨngki hwe moya'mi pi'nɨngo engoso oso hungkunoso upa'nontɨfi Jisasɨmo sɨmeho hi'ntnnono umentohofofoho.

Hungkuno neso sekumo wopɨngo wasemokumontonoho.

31 A'amu Juta fehohnjoso Jisasɨmo sɨmeho hi'ntnnono umentohofo somo Jisas ole ulɨmento, Sekwo sɨmeho nehopi ntapɨkujo'no sekwo nje hungkunomo tɨfi nehopi inɨngkafijo ku'manji sekwo nje inomokomoyo ne kuyoho. 32 Nje hungkuno nehopi somo huno seyoso'manji oso hungkuno hiso sekwoe yahino wonyoso kilo'mokomokosyehumamojo somta'ni usɨhutofosema'montonoho. 33 Ose ulahonɨngki hofɨko Jisasɨmo ulɨmentohofi, Nakwoe neyakwo Apɨloham sohwoe imu hwona'nyoho. Nom'nihwo nakumo ntohonta kilo'mokomokonesyohumamojoto. Awonoho. Oso'no kɨko peho'no nalohino, Nje hungkunoso sekumo usɨhutofasema'montonoho. Pipineto. 34 Ose ulahonɨngkofi Jisas ulɨmento, Hungkuno nehopi'nohini waselɨmonne'no yohono. A'amu hopi'nonohino honɨngkano wonyo'njo somo oso honɨngkano wonyo hiso hofɨkimo kilo'mokomokosyohumamojofoho. Oso'no oso a'amu hiso hofɨko oso honɨngkano wonyo sohwoe syoho ulohofiyo pa'nyofoho. 35 A'amu syoho ulohofiyo sohwo kako kakwo'yohwoe syohoso ulohofisoso kakoe hwe engo'njo nɨhu'nahone humayo'ne hwo'maho. O'o, kako syoho ulohofiyo'nohino hweho. I oso'no hwe engo sohwoe hwomu sohwo'nohini engolopohamo humawo'nɨngkohoho. 36 Oso'no Anɨtuye Hwomu sohwo'ni ngko sekumo honɨngkano wonyo somta'ni isɨhutofasema'meso nom'nihwo sekumo mokilo'mokomokosesyohumanehoho. O'o, nɨhu'no awonoho. Nje a'amu ne nto imo'nɨngkohofo. 37 Sekwo Apɨlohamɨye imu sohwona'nyoho lɨwo'nɨngkohofo so'no ngko huno niyohoho. Apɨloham sohwo kako Anɨtuye a'amu ne hweho. I oso'no nje hungkuno so'no nakwolaho lontɨfeso sekwo ngkimo wofonjonɨsyantɨfe'no yalokwofo so'no sekwo Apɨlohamɨye imu ne hwasɨ'maho. 38 Ngko nje Mpohwo'nji nohumanji yo'mayo ntahonɨngki losetɨhwawo'nɨngkohe hwo'nyoho. I oso'no sekwo sekwoe senɨngkwohwo ne sohwoe yahino somo nomantɨfi yalokwofo.

Senɨngkwohwo sohwo Setenɨyoho. Jisas a'amu Juta somo ose ulɨmentisofoho.

39 Jisas ose ulahonɨngki hofɨko ulɨmentohofi, Nakwoe mpohwo sohwo Apɨlohamɨyoho. Ose ulahonɨngkofi Jisas ulɨmento, I sekwo Apɨlohamɨye imu ne hwasɨ'manji sekwo Apɨloham imojo yahinoso sekwo ikutnnesohilo. 40 Yo'mayo hungkuno nehopi Anɨtu ntahonɨngki ngko selɨwo'nɨngkohe hwo'nyoho. Oso hungkuno homo somo sekwo nakwolaho lontɨfi wofonjonisyatɨfe'no yalokwofo. Apɨloham kako a'amumo wofonjahumonto miyommentisofoho. 41 O'o, sekwo sekwoe senɨngkwohwo ne sohwoe yahinomo inɨngkowalokwofo.Ose ulahonɨngki ulɨmentohofi, Nena'wohisi hwa'nyo yonto nakumo tɨpenema'mentiso hwonanɨ'maho. Nanɨngkwohwo anga'nohino sohwo Anɨtuyoho. 42 Ose ulahonɨngkofi Jisas ulɨmento, Sekwo Anɨtu senɨngkwohwo ntentesi sekwo ngkimo sɨmeho ntapɨkutnnesohilo. Hwapɨngoso ngko Anɨtu'nji nofosyohumanji pmmentohe hwo'nyoho. Nje huno mta'ni pmmentohe hwonɨ'maho. O'o, Anɨtu kako nɨhwojahonɨngki pmmentohe hwo'nyoho. 43 Sekwo nje hungkunomo huno nto'no mosyafɨsiyo'njo peho'neto. Hwapɨngoso sekwo nje hungkunomo upa'nontɨfeso nakwolaho lontɨfeso haloho maposo'njo hwasoho. 44 Sekwoe senɨngkwohwo sohwo Setenɨyoho. Sekwo yokumpohn'nyo yoho'nontɨfi sekwoe senɨngkwohwoe yahinomo tɨfi inɨngkowalokwofo. Kako sɨmo'mta'ango a'amumo wofonjahumo lɨmojo hweho. Kako hungkuno ne'njo somno ngkilaho lɨmojo hweho. Hwapɨngoso yahino neso kakoe sɨmeho mo'mo momnauyoho. Kako hwasyo hungkuno'nohini lɨmojo hweho. Kako yo'mayo hwasyo hungkunoso hwapɨngo hweho. 45 I ngko sekumo hungkuno nehopi ko selahonɨngko sekwo nje hungkuno homo somo sɨmeho hi'ntnnono montopalokuyohofo. 46 Ngko honɨngkano wonyo yoheso'no tɨhwo wantɨmontolo. Awonoho. I oso'no ngko hungkuno nehopi'nohini selɨwo'nɨngkohe'manji sekwo nje hungkunomo sɨmeho hi'ntnnono montape'njo peho'ne yalokwofo. 47 Anɨtuye mehomi ne sohwa hofɨko Anɨtuye hungkunomo haloho pewo'nɨngkohofofoho. I sekwo Anɨtuye mehomi hwasɨ'maho. Oso'no sekwo kakoe hungkunomo haloho maposo'njo hwasoho. Jisas ose ulɨmentisofoho.

Jisas ulɨmento, Apɨloham mmo'nyo sohonta ngko ne'no humamote hwo'nyoho.

48 Ose ulahonɨngki a'amu Jutafe hwe engo sohwa Jisasɨmo sitofo ulɨmentohofi, Ihwoni, nakwo kikine'no hungkuno nehopi lɨwo'nɨngkuhwono. Kɨko a'amu Someliya pa'nyo hwosoho. Kɨko mewoso hwosoho. Setenɨye towahuno wonyoso kikimo ehuhnnakumo'nyo hwosoho. Nehopi lɨwo'nɨngkuhwono. 49 Ose ulahonɨngkofi Jisas ulɨmento, Ngko towahuno wonyo ane hwo'nyoho. O'o, ngko nje Mpohwoe yofe engo ho'nomalokweno. I sekwo nje yofemo hwotoho nɨfeentokwofo. 50 Nje yofe ho'noma'nyo'ne ngko syoho miyalokuyohono. O'o, Anɨtu kako nje yofe engo umokumontonoho. I a'amu yo'mayo wonyo ngkine'no huno syafɨsyɨwo'nɨngkohofo so'no Anɨtu kako tohino yano ulofiyonefoho. 51 Hungkuno nehopi'nohini waselɨmonne'no yohono. A'amu fihwo nje hungkunomo nto'no inɨngkaweso'manji kako poyo mape'nyo'njo songo ne'no nohumantɨhwone hweho. 52 Ose ulahonɨngki a'amu Jutaso Jisasɨmo ulɨmentohofi, Ihwoni, kɨko towahuno wonyoso nehopi hi'njo hwosoho. Apɨloham kako poyo pe'nɨmentiso hweho. I a'amu Anɨtu hungkuno uyahonɨngki lɨmotofo huhwanji pe'nɨmentohofofoho. I oso'no oleso peho'no lalokuno. A'amu fihwo nje hungkunomo nto'no inɨngkaweso'manji kako poyo mape'nyo'njo songo ne'no nohumantɨhwone hweho. Oso hiso peho'no lohino. 53 Kɨko neyakwo Apɨloham poyo pe'nɨmentiso sohumo yakolo'nnyo hwosilaho. I kɨko oso a'amu Anɨtu hungkuno uyahonɨngki lontɨfi pe'nɨmentohofo sohwamo uyakolo'nnyo hwosilaho. Kɨko tɨhwo pa'nyo umo'nɨmonji lalokuno. 54 Ose ulahonɨngkofi Jisas ulɨmento, I ngko nje yofe engo imokinantɨ'mtentesi nje yofeso engo'maho we'e'nohinesohilo. I oso'no sekwo nanɨngkwohwo Anɨtuyoho lɨwo'nɨngkohofo sohwo kako nje yofe engo nɨmokalofoho. 55 I oso'no sekwo Anɨtu ne sohumo huno maseyo hwasoho. Ngko kakine'no huno niyohoho. Ngko ole lontɨ'mtentesi, Ngko Anɨtu sohumo huno maniyohoyohoho. Ngko ose lontɨ'mtentesi ngko sekwo hopa hwasyo hungkuno'njo hwo'nnesohilo. I oso'no ngko Anɨtu ne sohumo huno niyahonɨngki kakoe hungkunomo tɨfi inɨngkowalokweno. 56 Senɨngkwohwo Apɨloham sohwo kako Anɨtuye hungkunomo haloho po'mentiso so'no kako ngko olo hwaho lopo pmne'no huno uyahonɨngki so'no kako ngkimo tɨmo nehopi nohonɨmentisofoho. Oso'no kako ngkine'no sɨmonyo imentisofoho. 57 Ose ulahonɨngki a'amu Jutaso ulɨmentohofi, Soswo fifɨti (50) mokiyakolofe hwosoho. Kɨko Apɨlohammo tɨmo uhwonɨmentohino hwosilaho. Hungkuno hwasyo lalokuno. 58 Ose ulahonɨngkofi Jisas ulɨmento, Hungkuno nehopi waselɨmonne'no yohono. Apɨloham kako mmo'nyo sohonta ngko humamote hwo'nyoho. Ose ulɨmentisofoho. 59 Oseso hofɨko sojo nomantɨfi Jisasɨmo wofonjosyano lontɨfi ko imentohofoso Jisas kako a'amu pi'nɨngo engo'njo so'mo hiyaso ifohuni ifohuni lohofonto mempono swapmmentisofoho.

Jisas kako hwe tɨmpi'nyo sohumo wopɨngo umokumentisofoho.

1 Jisas kako hano emoyonto hwe tɨmpi'nyo fihumo uhwonɨmentisofoho. Oso hwe huhwo sohwo kona'wohi aswo mayoso tɨmpi'nyo humoma'mentisofoho. 2 Jisas oso hwe huhwo sohumo uhwonɨngkahonɨngki Jisasɨye inomokomoyo sohwona'ni kakimo ulohonɨmentɨhwoni, Nakwoe Lonetɨhwayo sohwosi, oso hwe sohwo tɨmpi'nyoso peho'ne imo'nnyoto. Kako honɨngkano wonyo imofonto imo'nɨmentisotaho. Kanɨngkwohwo'ya'u honɨngkano wonyo imo'mentisiyomo imo'nnyotaho. 3 Inomokomoyo sohwona'ni ose ulahonɨngkuhwoni Jisas nalɨmento, O'o, olo hwe lohwoe tɨmpi'nyo imo'nyo hwapɨngoso kakoe honɨngkano wonyo mta'ango'maho. Kanɨngkwohwo'ya'uye honɨngkano wonyo mta'ango'maho. O'o, olo tɨmpi'nyo imo'nyo hwapɨngoso Anɨtu kako olo hwe lohumo kakoe yokumpohn'nyo utɨhwa'nyopo uyɨmo lɨmentisofoho. 4 Ose ulonto kako pahnnɨmo hungkuno ole ulɨmento, Mofehi'nyo ne'no lohofontanɨngkuhwosi nakwo yo'mayo syoho Anɨtu ngkimo nɨhwatɨmentiso sohwo nejapmmentisoso komo'no uyano. Sɨkuno mehwoso'no nakwo syoho miyanehwono. 5 Ngko olo hwaho lopo nohumentanɨ'mo olo hwaho loponjo pomponaho pa'nyo hwo'nyoho. 6 Ose nalonto kako hwaho we'eso nomanto memijo hwahomo uyatɨ'mofonto yoko'nyo imokonto tɨmpi'nyo sohwoe tɨmopo uloho'mentisofoho. 7 Ose ulohofonto ulɨmento, Kɨko nowehoji oso mijo ayo Silouam soponjo somo mijo fiyoma'nyo. Ose ulɨmentisofoho. Oso mijo yofe Silouamɨyoso hwapɨngoso olenoho, Lɨhwajiyofe'nefoho. Oseso oso hwe huhwo sohwo kako mijopo nowento mijomo yoma'nonto asomo nosaponto kako tɨmo wopɨngo honɨmentisofoho. 8 Hohonta oso hwe huhwo sohwo kako tɨmpi'nyo nohumanto honɨngkano momɨngo sopo nohumentanɨngki a'amu nopasontɨfi nopawentɨfi yontanɨngkofi kako hofɨkinta'ni hamniyoho yo'mayo so'no jomo ulɨmojo hweho. Oso a'amu huhwo sohwanji oso a'amu hwe tɨmpi'nyo sohwo kakoe ango afaponta'ango sohwanji hofɨko hnnɨmentohofi, Pipilo. Olo hwe lohwo kako honɨngkano lopo nofosyohumanto nakumo hamniyoho yo'mayo so'no jomo nalɨwo'nɨngkiso lohwolaho. 9 Ose hnnɨngkahonɨngkofi a'amu fehohnjoso ole lɨmentohofi, Ou, olo hwe lohwo sohwo olo huhweho. I nom'nihwo ole lɨmentohofi, O'o, awonoho. Oso hwe huhwo sohwo pa'nyo hwolɨkeno. Ose lahonɨngkofi oso hwe tɨmpi'nyo wopɨngo umokumentiso huhwo sohwo ole ulɨmento, Ngko olo huhwo'nyoho. 10 Ose ulahonɨngki hofɨko ulɨmentohofi, Jɨje tɨmo wopɨngo kumo'nɨngkisoso pipi yohinoto. 11 Ose ulohonɨngkahonɨngkofi kako ulɨmento, Oso hwe Jisasɨyoho lɨwo'nɨngkohofo sohwo kako hwaho'nji memijo'nji iwolo'mokonto kako nje tɨmopo ntohofisofoho. Kako nantohofonto ntohi. Kɨko nowehoji mijo ayo Silouam mta'ni mijo fiyoma'nyo. Ose ntahonɨngki ngko nowenji mijo yoma'nɨngkoheso nje tɨmo wopɨngo nɨmo'nɨngkohoho. Tɨmo yo'mayo somo uhwonɨngkohono. 12 Ose ulahonɨngki hofɨko ulɨmentohofi, Oso hwe huhwo sohwo ntɨ'mo humaho. Ose ulahonɨngkofi kako ulɨmento, Kakoe humayo sopone'no ngko huno maniyohoyohoho. 13 Ose ulahonɨngki hofɨko oso hwe tɨmpi'nyo emmojo sohumo a'amu Falisi sohwafepono ipemotamentohofofoho. 14 Hwapɨngoso oso sɨkuno somo Jisas kako oso hwaho memijo'nji iwolo'mokonto hwe sohwoe tɨmo wopɨngo umokumentisoso sɨkuno iyoho humayo somnoho. 15 Hofɨkoe ango sopo i'mofapontɨfi hofɨko kakimo apa'no ulohonɨmentohofi, Jɨje tɨmo wopɨngo imo'nyoso pipi yonji honɨmahnnoto. Ose ulahonɨngkofi kako ulɨmento, Kako hwaho yoko'nyoso nomanto nje tɨmopo ntohofahonɨngki ngko mijo yoma'nɨmaleso ngko tɨmo honɨmalefoho. Ose ulɨmentisofoho. 16 A'amu Falisi fehohnjo sohwa ole lɨmentohofi, Oso Jisas huhwo sohwo kako sɨkuno iyoho humayo somo syoho iwo'nɨngkiso so'no nakwo huno ole nayohoho. Kako Anɨtu mta'ango hwo'maho. Ose lahonɨngkofi nom'nihwa ulɨmentohofi, I kako nakwoe honɨngkano wonyo'mta'ango hwo'manji kako olo wonyoangkafo nakwo miyɨwo'nɨngkuhwone loso pipi imasoto. Ose lontɨfi hofɨko hwasyopo hotitofontɨfi yoka hungkuno hnnɨmentohofofoho. 17 Oseso a'amu Falisi sohwa hofɨko oso hwe huhwo sohumo apa'no ulohonɨmentohofi, Oso hwe jɨje tɨmo wopɨngo kumokumaso sohumne'no kɨko huno pipi kiyohoho. Ose ulohonɨngkahonɨngkofi kako ulɨmento, Oso hwe huhwo sohumo Anɨtu hungkuno uyahonɨngki nalɨwo'nɨngkiso hweho. Ose ulɨmentisofoho. 18 Oso a'amu Jutafe hwe engo sohwa hofɨko oso hwe tɨmpi'nyo emmojo sohwoe hungkunomo sɨmeho hi'ntnnono mummentohofo so'no hofɨko huno ole syafɨhu'mentohofi, Olo hwe lohwo kako tɨmpi'nyo memmojo hweho. O'o, nom'ni hweho. Ose syafɨsyontɨfi kanɨngkwohwo'ya'umne'no joho ulɨmentohofofoho. 19 Joho ulontɨfi ulɨmentohofi, Oloso sikoe hwomutaho. Kona'wohi aswo ma'mentiso sohonta tɨmpi'nyo ma'mentiso hwo'manji i olohonta kakoe tɨmo wopɨngo pipi imo'nɨngkohoho. 20 Ose ulohonɨngkahonɨngkofi kanɨngkwohwo'ya'u siko ulɨmentisiyo, Nekwo huno ole eyohoho. Oloso nekwoe hwomu hweho. Kona'wohi aswo ma'mentiso sohonta kako tɨmpi'nyo ma'mentiso hweho. Oso'ntnne nekwo huno eyohoho. 21 I oso'no olohonta kako tɨmo pipi yonto honɨngkohoho. Oso'no nekwo huno meyohoyohoho. I oso a'amu kakoe tɨmo wopɨngo umokumaso sohune'no oso'ntnne nekwo huno meyohoyohoho. I sekwo nekwoe hwomu sohumo ulohonɨmno. Kako engo nto imo'nɨmentono. Kako kakine'no sekumo hungkuno waselono. 22 Oso hungkuno kanɨngkwohwo'ya'u ulɨmentisiyo hwapɨngoso hofɨko Jutafe hwe engo sohwamne'no iyoho unɨmentisofoho. Hwapɨngoso oso hwe engo sohwa olo hungkuno nto kotɨku'mentohofo, A'amu fihwo kako Jisasɨmne'no kako Kɨlaisɨyoho. Anɨtu uhwatɨmentiso hweho lɨjwaofoso'manji hofɨko oso a'amu huhwo sohumo tajo ango mta'ni wae yaopitnnefoho. 23 Oso hungkuno nto kotɨku'mentohofo so'no kanɨngkwohwo'ya'u ulɨmentisiyo, Nekwoe hwomu engo nto imo'nɨmentiso hweho. Kakimo ulohonɨmno. 24 Ose ulɨmentisiyo so'no hwe engo sohwa hofɨko oso hwe tɨmpi'nyo emmojo sohune'no apa'no joho ulontɨfi ulɨmentohofi, Olo wonyoangkafo imo'nɨmaso so'no kɨko Anɨtuye yofe'nohini foho'nomaho. Jisasɨye yofe noho'nomahotoho. Kako hwe honɨngkano wonyo'njo hweho. 25 Ose ulahonɨngkofi kako ulɨmento, Jisas kako honɨngkano wonyo'njo hwolɨkeno. Ngko huno maniyohoyohoho. I oso'no ngko olo'nohini huno niyohoho. Hohonta ngko tɨmpi'nyo humamote hwo'nyoho. Olohonta ngko tɨmo nto'no honalokweno. 26 Ose ulahonɨngki hofɨko ulɨmentohofi, Kako kikimo pipi kiloho'masoto. Kako jɨje tɨmo wopɨngo pipi kumokumasoto. 27 Ose ulahonɨngkofi ulɨmento, Oso hungkuno hiso ngko nto selɨmalefoho. Sekwo nje hungkunomo haloho maposo'njo imalofɨhwasoho. Sekwo apa'no upo'nantɨfi'no lolalokwofo. Sekwo kakoe inomokomoyo umo'nantɨfi'no lolalokwofo. 28 Ose ulahonɨngki hofɨko hungkuno wonyo ulɨmentohofi, Kɨko kɨko'nohini kakoe inomokomoyo hwosoho. I oso'no nakwo Mousesɨye inomokomoyo hwona'nyoho. 29 Anɨtu kako Mousesɨmo hungkuno ulɨmentiso so'no nakwo huno nayohoho. I oso'no olo Jisas lohwo kako ntɨ'mo i'mofapmmentiso hwolo. Nakwo huno monayohoyohoho. 30 Ose ulahonɨngkofi kako pisopisaho lonto ulɨmento, Oso hwe sohwo kako nje tɨmo wopɨngo nɨmokumaso lohune'no sekwo kakoe hwapɨngo i'mofapmmentiso so'no sekwo huno maseyoho hwasoho. 31 I olo so'no nakwo huno nayohoho. Anɨtu kako a'amu honɨngkano wonyo'njo sohwafe hungkunoso mupo'nalofiyoho. I oso'no a'amu fihwo kako Anɨtumo hwomtame ulofɨwo'nɨngkiso sohwo kako Anɨtuye hungkunomo tɨfi inɨngkayo so'no kako Anɨtuye sɨmeho wopɨngo imokuwo'nɨngkiso osohumo Anɨtu kakoe hungkunomo haloho upo'nalofoho. 32 Sɨmo'mta'ango sɨkuno memjao'moponto mpoyo olo pa'nyoso mawo'nnyoponoho. Hwe fihwo kona'wohi ma'mentiso sohonta tɨmpi'nyo meesyoso sohwoe tɨmoso hwangku hwe nom'nihwo wopɨngo umokonefoho eso mupa'nyofoho. 33 I Anɨtu oso hwe huhwo sohumo mɨhwatɨmentiso'manji kako oso wonyoangkafo ntoho'masoso miyɨhwonesohilo. 34 Ose ulahonɨngki hofɨko ulɨmentohofi, Kɨko tohwo'nanjwo mehomi hwosoho. Nɨhu'no wonyo hwosoho. Kɨko Anɨtuye hungkuno wolonetɨhwamonntaho. Mpano. Ose yokumpohn'nyo ulontɨfi kakimo wae yao'mentohofofoho.

A'amu sɨmeho hi'ntnnono ane sohwo tɨmpi'nyo hwafoho.

35 Oso hwe tɨmpi'nyo emmojo sohumo hwe engo sohwa tajo ango somta'ni wae yao'mentohofo so'no Jisas upa'nonto oso hwe sohumne'no tɨpɨhwononto ulɨmento, Kɨko A'amufe Hwomu sohumo sɨmeho hi'ntnnono luyalokuno. 36 Ose ulahonɨngki ulɨmento, U, Hwe Engofo, oso A'amufe Hwomu sohwo tɨhwolo. Kɨko yoloho ntohojo'no ngko kakimo sɨmeho hi'ntnnono uyɨmonnoho. 37 Ose ulahonɨngki Jisas ulɨmento, Kɨko nto nohonɨngkohino. Ngko olo huhwo'ni kilalokweno. 38 Ose ulahonɨngki kako Jisasɨmo ulɨmento, Hwe Engofo, ngko sɨmeho hi'ntnnono kijopalokweno. Ose ulonto kako hwomtame ehumanto Jisasɨye yofe ho'noma'mentisofoho. 39 Oseso Jisas nohumanto a'amu hopi'nonohino somo ulɨmento, Ngko olo hwaho lopo pmmentoheso a'amu olo hwaho loponjofe yahino somo yano ilofo'ne pmmentohe hwo'nyoho. Oseso a'amu Anɨtuye yahino yo'mayo so'no nto tɨpema'mentɨhwone so'no nakwo huno hwapɨngo'njɨ'nwoho. Nom'ne huno songo tɨpemayo'ne syoho engo peho'ne yanehwono. Nakwo tɨmpi'nyo'nɨ'maho. Ose lɨwo'nɨngkohofoso hofɨko tɨmpi'nyo hwafoho. Hofɨkoe tɨmpi'nyo hisomo ujo wehontojwahumonji pmmentohono. I a'amu Anɨtuye yahino yo'mayo so'no nakwo huno'njɨ'maho lontɨfe oso a'amu hofɨko tɨmpi'nyo pa'nyo ko huhwo hofɨko huno wopɨngo tɨpemayo'ne syoho engo yalokwofo. I ngko honɨngkano ito'nohino somo hofɨkimo utɨhwamonji pmmentoho so'no hofɨko huno wopɨngo tɨpemayo'ne syoho engo yalokwofo so'no hofɨko tɨmo honyofoho. 40 Ose ulahonɨngkofi a'amu Falisi fehohnjo sohwa Jisasɨ'njo mofonepo humamentohofo sohwa oso hungkuno hisomo upa'nontɨfi Jisasɨmo ulɨmentohofi, Nakwo sohwona'ni tɨmpi'nyo hwona'ntaho. Ose lolalokuno. 41 Ose ulahonɨngkofi Jisas ulɨmento, Sekwo ole lontɨfijontentesi, Nakwo Anɨtumne'no huno nto'nohino nainyo hwona'nɨ'maho. O'o, nakwo a'amu tɨmpi'nyo pa'nyo hwona'nyoho. Ose lontɨfijontentesi sekwo sekwoe honɨngkano wonyo somne'no tohino momapitnnesohilo. I oso'no sekwo ole lalokwofo. Nakwo Anɨtuye yahino somne'no huno hwapɨngo'njo hwona'nyoho. Nakwo tɨmo honyo hwona'nyoho. Oseso sekwoe honɨngkano wonyo somne'no tohino nomapitnne hwasoho. Ose ulɨmentisofoho.

Yahu ‘sipsip’ ɨlojo'ne pahnnɨmo hungkunofoho.

1 Jisas nohumanto ulɨmento, Ngko hungkuno nehopi'nohini waselɨmonne'no yohono. A'amu fihwo kako yahwolojo kuso sopo masyuyo'njo sohwo kako nom'nepo kotasyɨhwosi swoso sohwo kako hufo'ne hweho. 2 Oso yahu kakwo'yohwo ne sohwo kako kuso ne sopo syuwo'nɨngkiso hweho. 3 A'amu kuso sopo mokosyohumawo'nɨngkiso sohwo kakwo'yohwo ne sohumo uhwonɨngkuhwosi wohwosampo'montonoho. Kakwo'yohwo nosyuhwosi yahu mehomi hopi'nonohinoso hofɨkoe yofe anga'no anga'no ulɨhwoso'no kakwo'yohwo sohwoe mampaho upa'nɨngkuji kakwo'yohwo sohumo tɨfi unɨngkoswantɨfeho. 4 Kakwo'yohwo sohwo yahu somo mempono ipemotaswonto kako sɨmo'mo upeehonɨngkuhwosi yahuso kakoe mampahomo upa'nɨngkuji tɨfi unɨngkowantɨfeho. 5 Yahu hiso hofɨko a'amu nom'nehumo minɨngkafitnnehofo. Hwapɨngoso hofɨko mampaho nom'ne kengo upa'nɨngkuji hiyaso'mo wowantɨfeho. 6 Jisas oso pahnnɨmo hungkuno ko ulahonɨngki a'amuso hofɨko hwapɨngo ne so'no huno mosyafɨsiyo'njo imentohofofoho.

Jisas kako yahu mehomimo mokosyohumayo wopɨngo hweho.

7 Oseso Jisas kako hungkuno homo somjo yolohoso ulɨmento, Ngko hungkuno nehopi'nohini waselɨmonne'no yohono. Ngko yahu mehomife hoku'yo hwo'nyoho. 8 A'amu ngko m'mofape sohontajo i'mofapmmentohofoso hofɨko hufo'ne i'mofapmmentohofofoho. I oso'no nje yahu mehomi neso osohwafe mampaho somo haloho maposo'njofoho. 9 Ngko Jisas sohwo'ni hoku'yo hwo'nyoho. A'amu ngkimo nu'manto kako hoku'yo sohwo'nɨmo noswahonɨngki ngko oso a'amu somo wopɨngo nomokosyohumahm'me'no kako wopɨngo ne'no nohumantɨhwonefoho. Oso a'amu somo kakoe wonyo somjo tohino somta'ni usɨhutofoma'monnoho. Oseso oso a'amuso kako nosyuhwosi noswapɨhwosi ihwosi wosopayo wanɨmontonoho. 10 A'amu hufo'nohinoso hofɨko siki mapɨfitnnehofo. O'o, hofɨko yahu hufo ikuji wofonjosyantɨfe'nofoho. Nɨhu'no wonyo umokantɨfe. I oso'no ngko nje yahu mehomi somo songo ne'no humayoso uyɨmonji pmmentohe hwo'nyoho. Yo'mayo tango nje mehomi somo ko u'masoso hofɨko nje ahomo humawo'nɨngkohofo so'no hofɨko sɨmeho wopɨngo engo yamo'nnyofoho. 11 Ngko yahu mehomi mokosyohumayo wopɨngo hwo'nyoho. A'amu yahu mehomi mokosyohumayo wopɨngo sohwo huno ole syafɨsyɨwo'nɨngkiso, Nje mehomi poyo nope'nɨfitnnoho lonji ngko hofɨkimo ufo'mayo'ne wape'nɨmonnoho. 12 A'amu hamniyoho syoho'nohini iwo'nɨngkiso sohwo kako yahu somo nomokosyohumentanɨngki sikijo nopahonɨngki a'amu huhwo sohwo kako hiyaso lɨ'mofɨwo'nɨngkiso hweho. Hwapɨngoso kako yahu mokosyohumayo hwapɨngo hwo'maho. Kakwo'yohwo hwo'maho. Oso'no sikisɨwojo sohwo kako yahu somo toho lofototo'meefahonɨngki yahuso hiyaso humpewo'nɨngkohofofoho. 13 Hwapɨngoso oso a'amu huhwo sohwo kako hamniyoho'nohini syoho iwo'nɨngkiso hweho. Kako yahu somne'no huno mosyafɨsiyo'nji iwo'nɨngkiso hweho. 14-15 Ngko yahu mehomi mokosyohumayo wopɨngo hwo'nyoho. Nje Mpohwo kako ngkine'no huno uyalokunjoso ngko kakine'no huno nɨyohoho. Oso pa'nyoso ngko nje mehomi ne somne'no huno nto'no niyohoho. Hofɨko ngkimo huno nto'no uyohoho. Nje mehomi somo ufo'mayo'ne ngko poyo wape'nɨmonnoho. 16 Nje mehomi fehohnjoso olo tojo somo mohumunyoponoho. Oso hiso'nji ngko utɨma'mo hofɨko nje mampaho somo haloho wopeentɨfeho. Oseso oso yahu nom'ne so'nji nem'no afa'no umo'nantɨfeho. Hofɨkoe mokosyohumayo sohwo kenga'nohino hwo'nyoho. 17 Ngko nje yahu mehomi somne'no poyo pe'nɨ'mo ngko apa'no songo wolɨka'monnoho. Ose yalokwe so'no nje Mpohwo kako sɨmeho engo ntopalofoho. 18 A'amu fihwo kakoe huno mta'ni mofonjonɨsyanehoho. O'o, ngko nje mehomi lomo ufo'mayo'ne poyo wape'nɨmonne'no yohono lɨmentohe so'no hofɨko ngkimo wofonjonɨsyantɨfeho. Nje Mpohwo kako olo hilo so'no ntonto kakoe yokumpohn'nyo ntapmmentiso so'no ngko poyo pe'nyo'neso yokumpohn'nyo hi'njo hwo'nyoho. Ngko apa'no songo lɨkafo'neso yokumpohn'nyo hi'njo hwo'nyoho. 19 Ose ulahonɨngki a'amu Jutaso oso hungkuno homo somo upa'nontɨfi apa'no hotito'mentohofofoho. 20 A'amu fehohnjo pi'nɨngoso ole hnnɨmentohofi, Towahuno wonyoso kakimo ehuhnnamofiso'no kako ilohofalofoho. Kakoe hungkunomo peho'no upo'nalokwofo. 21 I oso'no a'amu fehohnjoso ole hnnɨmentohofi, Olo hungkuno Jisas liso loso a'amu towahuno wonyo'njo oso hwa mta'ango'maho. U, towahuno wonyoso hofɨko a'amu tɨmpi'nyo somo wopɨngo umokumontolaho. Awonoho. Ose hnnɨmentohofofoho.

A'amu Jutafe hwe engo sohwa hofɨko Jisasɨmne'no mangohwa imo'nɨmentohofofoho.

22 Oso ango Jelusalem sopo nom'ne Sɨkuno Engo iyoho humayo'ne i'mofapmmentisofoho. Oso Sɨkuno Engoso hofɨko hohonta Anɨtuye tajo ango engo somo hano hwosayo'ne huno syafɨsiyo'nefoho. Oso hohosohonta kwongkwongonjohontanoho. 23 Jisas kako osopo nohumanto kako tajo ango engo somjo mempo ango hiso Soulomounɨyefoho lɨwo'nɨngkohofofoho. 24 Jisas osopo hano emoyontanɨngki a'amu Jutafe hwe engo sohwa hofɨko Jisasɨmo ehofo'mokomantɨfi ulɨmentohofi, Nakwo jɨje hwapɨngo so'no huno akwe'no syafɨsyɨhwoneso yolohoso ntohonta wonalɨmonnto. Anɨtu ngko hwe uhwatɨmonnoho nalɨmentiso sohwosilaho. Yoloho fonaso. 25 Ose ulahonɨngkofi Jisas ulɨmento, Yolohoso nto selɨmentohefoho. I oso'no sekwo nje hungkuno homo somo sɨmeho hi'ntnnono montape'njo hwasoho. Yo'mayo syoho wopɨngo nje Mpohwoe yokumpohn'nyo so'nji iwo'nɨngkohe somo sekwo nuhwonɨngkuji Anɨtu uhwatɨmentiso lohweho lɨkutnnesohilo. 26 I oso'no sekwo nje yahu mehomi hwasɨ'maho. Oso'no sekwo ngkimo sɨmeho hi'ntnnono montape'njo hwasoho. 27 Nje yahu mehomiso hofɨko nje mampaho nupa'nontɨfeso ngko hofɨkine'no huno niyahonɨngki hofɨko ngkimo tɨfi nnɨngkapɨwo'nɨngkohofofoho. 28 Nje mehomi homo somo ngko songo ne'no humayoso uyɨmentohefoho. Oso'no hofɨko tɨkanomo mafitnnefoho. O'o, a'amu fihwo nje aho somta'ni nje mehomi hisomo wae meenɨmofonefoho. 29 Hwapɨngoso mehomi hiso nje Mpohwo Anɨtu sohwo kako ngkimo ntapmmentisofoho. Mpohwo kakoe yokumpohn'nyoso yo'mayo somo hwofilo'nnyo hweho. Oso'no a'amu fihwo kako oso mehomi homo somo Mpohwoe aho somta'ni wae meeofonefoho. 30 Ngko huhwo'ni nje Mpohwo'nji afa hwo'nyoho. 31 Ose ulahonɨngki a'amu Jutafe hwe engo sohwa hofɨko Jisasɨmo wofonjosyano lontɨfi sojo ma'mentohofofoho. 32 Sojo nomahonɨngkofi Jisas ulɨmento, Nje Mpohwoe yokumpohn'nyo so'nji ngko syoho wopɨngo pi'nɨngo iwo'nɨngkohe somo sekwo uhwonɨwo'nɨngkohofo so'no syoho ntisomne'no wofonjonɨsyantɨfe'no yohofo. 33 Ose ulahonɨngkahonɨngki hofɨko ulɨmentohofi, Nakwo jɨje syoho wopɨngo so'ne wofonjokisyantane'no miyalokuyɨhwono. O'o, kɨko Anɨtune'no sitofo ulalokuno so'no nakwo wofonjokisyantanoho. Kɨko a'amu olo hwaho lopo nta'nɨngo hwosoho. I oso'no kɨko ole nalohino, Ngko Anɨtu hwo'nyoho nalohino hwosoho. 34 Ose ulahonɨngki Jisas ulɨmento, Sekwoe honɨngkano hungkuno somo anɨtu kako nom'ne hwe engo sohwamne'no ole ulɨmento, Sekwo anɨtu hwasoho. 35 I nakwo huno ole nayohoho. Anɨtuye hungkunoso ne'njofoho. Oseso Anɨtu kako oso a'amu kakoe hungkuno uyɨmentiso huhwo sohwamo sekwo anɨtu hwasoho ulɨmentisoso hungkuno nehopeho. 36 I oso'no ngko Anɨtu nɨhwatɨmentiso sohwo'ni ngko Anɨtuye hwomu hwo'nyoho selɨmentohe so'no sekwo Anɨtumo sitofo ulalokuno eso peho'ne ntantɨkwofo. 37 Sekwo soku, ngko nje Mpohwoe syoho miyo nohonɨngkujɨ'manji sekwo ngkimo sɨmeho hi'ntnnono montape'njo uyantɨfeho. 38 I oso'no ngko nje Mpohwo Anɨtuye syoho yalokweno. Oseso nje hungkuno selalokwe losomo sekwo ngkine'no sɨmeho hi'ntnnono montape'njo ifijo'manji yo'mayo syoho wonyoangkafo a'amu miyɨwo'nɨngkiyohofoso ngko i'me'no oso syoho homo somo nohonɨngkuji oso syoho imesomo sɨmeho hi'ntnnono uyɨfitnnefoho. Ose ifijo'manji sekwo huno wopɨngo ole wosyofɨsyantɨfeho. Ngko'nji nje Mpohwo'nji siko afafoho. Ngko huhwo'nne'no Anɨtuyoho wosyonɨfɨsyantɨfeho. Mpohwo ngkimo nɨhumaho. Ngko Mpohumo humaleno. 39 Ose ulahonɨngki hofɨko Jisasɨmo impe untofano lontɨfi ko imentohofoso Jisas kako hofɨkimo ulɨko'manto umentisofoho. 40 Jisas kako asomo wento Mijo Joutan nongkihnta'ni wako'mentisofoho. Joun kako hohonta syoho yonto a'amumo mijo kiyoma'mojo sopo ki'mofamentisofoho. Kako noki'mofawento osopo humamentisofoho. 41 Osopo Jisas kako nohumentanɨngki hwe moya'mi pi'nɨngo engo hofɨko kakimo u'mantɨfi hnnɨmentohofi, Joun kako yo'mayo wonyoangkafo a'amu miyɨwo'nɨngkiyohofoso miyo'njo hweho. I oso'no yo'mayo hungkuno olo hwe lohune'no nalɨmentisoso ne imo'nɨngkohoho. 42 Ose hnnontɨfi hwe moya'mi pi'nɨngo engoso hofɨko oso hiso'no Jisasɨmo sɨmeho hi'ntnnono umentohofofoho.

Lasalos kako poyo pe'nɨmentisofoho.

1 Hwe fihwo kakoe yofe Lasalos. Kako ango Mpetani sopo nohumanto mnokino engo tɨpema'mentisofoho. Oso ango hopo sopo Maliya'nji Mota'nji siko'nopee'i sikoe angoponoho. 2 Oso a'mu Maliya hisi kako tɨfi no'mo nakwoe hwe engo Jisasɨye sɨfemo hwonemijo usisyonto kakoe mijiyo sawemo so'nji sosayo usɨpo'mentisofoho. Oso hwe Lasalos kako mnokino'njo sohwo kako Maliyafe konɨngkwa'wehweho. 3 Oseso Lasalos kako mnokino tɨpemahonɨngki kaisifa'u siko Jisasɨmne'no hungkuno ole lɨhwatɨmentisi, Hwe Engofo, jɨje nɨngkwahwo Lasalos sohwo mnokino'njo hweho. Ose lɨhwatɨmentisiyefoho. 4 Lɨhwojahonɨngki Jisas kako hungkuno homo somo nupa'nonto a'amu somo ulɨmento, Olo mnokino loso nɨhu'nahone poyo pe'nyo'ne'maho. O'o, Anɨtuye yokumpohn'nyoso utɨhwa'nyopo uhwonyo'nefoho. Anɨtuye Hwomu sohwo'ni yofe engo mayo'nefoho. Ose ulɨmentisofoho. 5 Jisas kako Mota'nji konampi Maliya'nji Lasalosɨjontnne'no sɨmeho engo uyɨmentisofoho. 6 Jisas kako Lasalos mnokino'njo hweho ko upa'nonto kako oso ango humamentiso sopo nom'ne sɨkuno hufa'u humamentisofoho. 7 Sɨkuno hufa'u memjaofahonɨngki Jisas kakoe inomokomoyo sohwona'nɨmo nalɨmento, Nakwo hwaho Jutiya Lasalosɨye ango sopo asomo wosɨhwano. 8 Ose nelahonɨngki kakoe inomokomoyo sohwona'ni ulɨmentɨhwoni, Nakwoe Lonetɨhwayo sohwosi, a'amu Jutiya soponjo hwe engo sohwa hofɨko kikimo sojo wokufonjantɨfi imalofo sopone'no kɨko asomo wosɨhwantane'no lonalohino. 9 Ose ulahonɨngkuhwoni Jisas kako pahnnɨmo hungkuno kakoe sɨkuno syoho iyo'ne ole nalɨmento, Mofehi'nyo lonto pomponaho yonte sopo a'amu hofɨko hano emoyɨkujoso mopɨwahupitnnehofo. Hwapɨngoso hofɨko olo hwaho loponjo pomponaho somo yo'mayo yo'mayo uhwonalokwofo. 10 I oso'no a'amu hofɨko sɨkwo'mjoho'mo hano emoyontɨfi hofɨko pɨwasyɨwo'nɨngkohofofoho. Hwapɨngoso pomponaho anefoho. Oseso nje syohomne'no Anɨtu pomponaho ntopalokuso somo sɨmeso mopɨwahu'mnehono. 11 Ose nalonto tɨfi ole nalɨmento, Sekwo upa'nɨmno. Nakwoe a'amu Lasalos sohwo saho nto fosyawentono. I oso'no ngko nu'mo kakimo ulɨkofamne hwo'nyoho. 12 Ose nelahonɨngki kakoe inomokomoyo sohwona'ni ulɨmentɨhwoni, Hwe Engofo, kako saho nehopi fosyaweso'manji kako wopɨngo umo'nɨmontonoho. Ose ulɨmentɨhwonefoho. 13 Jisas kako Lasalos poyo nto pe'nɨmaho huno ose ko uyahonɨngki saho fosyaweho nalɨmentiso so'no inomokomoyo sohwona'ni nakwo nakwoe hunoso ole syafɨhu'mentɨhwoni, Lasalos sohwo kako saho nehopi fosyowentanɨngki nalohoho syafɨhu'mentɨhwonefoho. 14 Oso'no Jisas kako yoloho ole nalɨmento, Lasalos sohwo poyo nto pe'nɨmaho. 15 I sekwo ngkimo sɨmeho hi'ntnnono ntapɨfitnne'nji Lasalos kako poyo pe'nɨmaso sopo ngko mohumayoso wopɨngofoho nnɨngkohoho. I oso'no olohonta kako poyo pe'nɨmaso sopone'no wosɨhwano. 16 Ose nelahonɨngki Toumas hufa'u mehomi imo'nɨmentiso sohwo kako nom'ne inomokomoyo sohwona'nɨmo nalɨmento, Nakwo hwaho Jutiya sopo a'amu Jisasɨmo sojo'nji wofonjosyano lontɨfi yalokwofo sopono noho wosɨhwano. Nakwo Jisasɨ'nji poyo umo'nano. Ose nelahonɨngki nakwo Jisasɨ'nji sɨmentɨhwonefoho.

A'amu poyo pe'nyo somo apa'no ulɨkafɨhwosi songo ne'no humayo'ne hwapɨngo sohwo Jisasɨyoho.

17 Oseso Jisas kako ango Mpetani sopo sɨ'mofonto kako honɨngkanopo lohofahonɨngki a'amuso hofɨko ulɨmentohofi, Lasalosɨye pijafoso sokimomo ne'no nowentanɨngki sɨkuno osofosofahu'no memjao'masofoho. Ose ulɨmentohofofoho. 18 Oso ango Mpetani sopo ango Jelusalem mofoneponoho. Honɨngkanoso sawemopo'maho, hufa'u sɨhune kiloumitaponoho. 19 A'amu Juta pi'nɨngoso ango Jelusalem mta'angoso hofɨko Mota'nji Maliya'njiyepono konɨngkwa'wehwo pe'nɨmentiso so'no hofɨko sikoe sɨmeho wopɨngo umo'nyo'ne humotaho'ne womentohofofoho. 20 Mota kako hungkuno ole upa'nɨmento, Jisas ntopohoho. Ose upa'nonto komo'no nowento Jisasɨmo honɨngkanopo uswo'nɨngkahonɨngki Maliya kako angomo humohumantisofoho. 21 Mota Jisasɨmo uswo'nonto Jisasɨmo ulɨmento, Hwe Engofo, kɨko olopo humantontentesi nje nɨngkwahwo poyo mape'nɨngkuhwonesohilo. 22 I oso'no ngko huno niyohoho. Kɨko yo'mayo so'no Anɨtumo jomo ulisoso kako yo'mayo kɨko ihnneso wokijapmmontonoho huno niyohoho. 23 Ose ulahonɨngki Jisas ulɨmento, Oso'no jɨje nɨngkwahwo apa'no songo wolɨka'montonoho. 24 Ose ulahonɨngki Mota ulɨmento, Ngko huno ole niyohoho, Sɨkuno ae'uyo somo a'amu lɨkapijo sohonta Lasalos huhwo nolɨkafone hweho. 25 Ose ulahonɨngki Jisas ulɨmento, Ngko a'amumo apa'no songo ulɨkafo so'nji songo ne'no humayo so'nji ngko hwapɨngo hwo'nyoho. A'amu ngkimo sɨmeho hi'ntnnono ntapinyoso kako poyo ko pe'noso sohwo kako songo ne'no wohumamontonoho. 26 A'amu hofɨko olo hwaho lopo songo humalofoso hofɨko ngkimo sɨmeho hi'ntnnono ntapɨfijo'manji hofɨko poyo mape'nɨfitnnehofo. Olo hungkuno kilalokwe losomo sɨmeho hi'ntnnono luyalokuno. 27 Ose ulahonɨngki Mota kako Jisasɨmo ulɨmento, Ou Hwe Engofo, kɨko Kɨlais sohwosi, Anɨtu kako olo hwaho lopone'no hwe fihwo sefo'mayo'ne uhwosopo'monnoho nalɨmentiso sohwohnne'no ngko kikine'no sɨmeho hi'ntnnono kijahopohono. Kɨko Anɨtuye Hwomu Kɨlais hwosoho.

Jisas kako humotaho lɨmentisofoho

28 Mota ose ulonto kakoe angopo asomo nowento konampi Maliyamo joho ulahonɨngki Maliya kakimo u'mahonɨngki Mota hofiyoka ulɨmento, Nekwoe Letɨhwayo sohwo kako noponto kikine'no joho kilalofoho. 29 Maliya ose upa'nonto komo'no mokolɨkapo lohofonto Jisasɨyepono umentisofoho. 30 Jisas kako ango ne sopo m'mofapmmentisofoho. O'o, Mota uswo'nɨmentiso sopo humohumantisofoho. 31 A'amu Jutaso hofɨko Maliya'nji ango'mo nohumantɨfi Maliyamo sɨmeho tango uyoso'no kako'nji humohumantohofoso hofɨko kakimo uhwonɨngkohofoso kako komo'no lɨkafonto mempono nto poswahonɨngki uhwonontɨfi hofɨko kakimo uhwonontɨfi hofɨko huno ole syafɨhu'mentohofi, Kako konɨngkwa'wehwoe pijafo ho'nahumalofo sopono humotaho walɨmonjitɨkeno ose syafɨhu'mentohofofoho. 32 Maliya kako Jisas humentahonjo so'mne'no wento Jisasɨmo uhwononto kako Jisasɨye sɨfɨki'nyo'mo hwomtame ehumanto ulɨmento, Hwe Engofo, kɨko olopo humantontentesi nje nɨngkwahwo sohwo poyo mape'nɨngkuhwonesohilo. 33 Jisas kako Maliya humotaho lontanɨngki uhwononto uhwonɨngkisoso a'amu Juta kako'nji humahwofoso humotaho nto mjolɨmɨwahonɨngkofi uhwononto kako kakoe sɨmeho tango uyahonɨngki 34 ulɨmento, Sekwo ntɨ'mo ho'nahumalofo. Ose ulohonɨngkahonɨngki ulɨmentohofi, Hwe Engofo, kɨko nopohoji uhwonae. 35 Ose ulahonɨngkofi Jisas kako humotaho lɨmentisofoho. 36 A'amu Juta fehohnjoso Jisas kako huhwo humotaho lontanɨngki uhwonontɨfi hnnɨmentohofi, Ihwoni, kako Lasalos sohumo sɨmeho mɨkunɨmposo uyɨmojo hweho. 37 I a'amu nom'nihwa ole hnnɨmentohofi, Olo hwe lohwo kako a'amu tɨmpi'nyo somo wopɨngo umokumentiso hopaso kako Lasalosɨmo ufo'mantontentesi Lasalos kako poyo mape'nɨngkuhwonesohilo. Sitofo hungkuno ose hnnɨmentohofofoho.

Jisas kako Lasalosɨmo apa'no songo ulɨka'mentisofoho.

38 Oseso Jisas kako sɨmeho tango engo apa'no uyahonɨngki Lasalosɨye pijafo ho'nahumentohofo sopo umentisofoho. Oso hopo sopo Lasalosɨye pijafo ho'nahumentohofo sokimo hoku'yo sopo sojo ewafo engoso nomantɨfi pɨjwahu'mentohofofoho. 39 Jisas oso hopo sopo nohumanto ulɨmento, Olo sojo pɨjwohumalofo loso wae feeopmno. Ose ulahonɨngki hwe poyo pe'nɨmentiso sohwoe konanisi Mota ulɨmento, Hwe Engofo, kakoe pijafo ho'nahumalohwoneso oso sɨkuno osofosofahu'no nto memjao'masoso kakoe pijafoso pisakino'njofoho. 40 Ose ulahonɨngki Jisas ulɨmento, Olohonta nto kilohefoho. Kɨko ngkine'no sɨmeho hi'ntnnono ntapiso'manji kɨko Anɨtuye yokumpohn'nyoso uhwonɨmonnoho. Ose nto kilohefoho. 41 Motamo ose ulahonɨngki hofɨko sojo ewafo engo mehwosompeehumentohofofoho. Nomehwosompesyahonɨngkofi Jisas kako ahwomomo uhwononto a'amu kakoe mampaho upa'nyo'ne ole ulɨmento, Nje Mpohwo sohwosi kɨko nje hungkunomo haloho nɨpewo'nɨngkino sohwohnne'no ngko isamoyoka kilalokweno. 42 Ngko huno niyohoho. Kɨko engolopohamo nje hungkuno jomo kilɨwo'nɨngkohe somo nupa'nɨwo'nɨngkino hwosoho. I oso'no olo a'amu oloponjo lohokwofo lohwa kɨko ngkimo olo hwaho lopone'no nɨhwatɨmentohino so'no sɨmeho hi'ntnnono uyɨfitnne'enji kilalokweno. 43 Ose ulɨkwato lohofonto joho mohm'no ulɨmento, Lasalos kɨko noho fusyape. 44 Ose ulahonɨngki a'amu poyo pe'nyo sohwo nolɨkafonto swapmmentisofoho. Kakoe sɨfe aho hwapɨfe nano popojontɨfi kakoe sɨmo'mango hi hwapɨfe ifohumpeehumentohofo sohwo hi'nji swopahonɨngki Jisas ulɨmento, Yo'mayoso misɨhuto'meefɨkujo'no wopaweno. Ose ulahonɨngki hofɨko kakoe hungkunomo inɨngkamentohofofoho.

Hwe yofe engo'njo sohwa hofɨko Jisasɨmo fonjosyane'entɨfi hungkuno nano mtito'mentohofofoho.

45 A'amu Juta hwe moya'mi pi'nɨngo fehohnjoso Maliya'nji humamentohofoso Jisas kako oso hiso imentiso somo uhwonontɨfi hofɨko kakimo sɨmeho hi'ntnnono uyɨmentohofofoho. 46 I oso'no a'amu fehohnjo sohwa hofɨko a'amu Falisi sohwafe angopono asomo nowentɨfi yo'mayo Jisas imentiso so'no a'amu Falisi sohwamo tokoyo'ofo imentohofofoho. 47 Ose yahonɨngkofi a'amu Falisi sohwanji a'amu yofe engo'njo tajo ango syoho'njo sohwanji hofɨko a'amu kaunɨsol syoho'njo sohwamo uswo'nontɨfi hnnɨmentohofi, Nakwo pipi yanehwono. Olo hwe lohwo yo'mayo wonyoangkafo a'amu miyɨwo'nɨngkiyohofoso yalofoho. Pipi pɨjwaofanehwono. 48 Nakwo kakoe yahino losomo mopɨjwaofe'manji a'amu hopi'nonohinoso hofɨko kakimo sɨmeho hi'ntnnono uyɨkuji kakimo tɨfi inɨngkafitnnoho. Ose ikujo'no'manji a'amu Loum nakwoe hwaho nemokosyohumawo'nɨngkohofo sohwa nonahonɨngkuji huno ole wosyofɨsyantɨfeho. A'amu Juta hofɨko nakwoe hungkunomo enjwa'mo mohumunyofoho. Ose syafɨsyɨkuji hofɨko nakwoe tajo ango engo somo wonyo umokantɨfeho. Nakwo a'amu Juta hopi'nonohino hn'nɨmo wonyo wonemokantɨfeho. 49 Ose hnnontɨfi hwe fihwo hofɨko'nji humamentiso sohwo kakoe yofeso Kaiyofasɨyoho. Oso soswo somo a'amu tajo ango syoho'njo sohwamo umokosyohumayo'ne hweho. Kaiyofas huhwo sohwo kako nolɨkafonto ulɨmento, Sekwo huno mosyafɨsiyo'njo liyalokwofo. 50 Sekwo olo a'amu losoku huno'maso kuyoho. Nakwo a'amu Juta hopi'nonohino hn'nɨmo a'amu Loum sohwa wonyo peho'no wonemokantɨfito. O'o, yahino ito'nohinoso olenoho. Olo hwe anga'nohino lohwo kako hwe moya'mi hopi'nonohino somne'no ufo'mayo'ne poyo wape'nono. 51 Oso hungkuno ulɨmentisoso kakoe huno mta'ango'maho. O'o, Kaiyofas kako oso soswo somo a'amu tajo ango syoho so'no yofe engo ma'mentiso so'no Anɨtu oso huno hiso uyɨmentisofoho. Oso'no kako Jisas a'amu Juta somne'no ufo'mayo'ne poyo umo'nɨmontonoho eso ulɨmentisofoho. Ose ko ulɨmentisoso oso hungkuno Kaiyofas ulɨmentisoso a'amu ango'meemjo somne'no ufo'mayo'ne Jisas poyo imo'none so'no huno muyo hweho. 52 O'o, Anɨtu kakoe mehomi ango'meemjo hn'nwi temtitofo anga'nohino hopa imo'nɨfitnne'no pe'none'ento Anɨtu oso hunoso Kaiyofasɨmo uyahonɨngki ulɨmentisofoho. 53 Oso a'amu huhwo sohwa Kaiyofas ulɨmentiso sɨkuno somta'ni oso hungkuno Jisasɨmo fonjasiyo'ne hungkuno loma'mentohofofoho. 54 Oseso Jisas kako oso hwaho Jutiya sopo a'amu Jutafe tɨmo sopo hano memmentisofoho. O'o, kako oso hwaho hopo sopo ulɨko'manto kako nom'ne ango Efɨlaim sopone'no kakoe inomokomoyo sohwona'nnonji umentɨhwonefoho. Oso ango Efɨlaim a'amu mohumunyo mofone sopo molinyoponoho. Oso ango hopo sopo kakoe inomokomoyo sohwona'nnonji humamentɨhwonefoho. 55 Oso hohosohonta a'amu Jutafe Anɨtu A'amu Isɨlael somo Uyakolo'mentiso somne'ne Syafɨsiyo Sɨkuno Engof mofonepo umo'nɨmonto imentisofoho. Oso'no oso Sɨkuno Engo mmo'nyo sohonta a'amu ango'meemjoso ango Jelusalemne'no wopayo engo nyo'ne hofɨko hofɨkoe honɨngkano hungkuno ito'no inɨngkayo so'no hofɨkoe he yo'mayo mijo yojujosyɨhwasi nto'no wehumano lontɨfi ole syafɨhu'mentohofi, Nakwo ose ihwasɨ'manji nakwoe honɨngkano kiho'maso umo'nantanoho. Ose syafɨsyontɨfi sɨmentohofofoho. 56 Hofɨko nosɨ'mofontɨfi Jisasɨmne'no tɨpeentɨfi tajo ango engo somo uhu'mokontɨfi hofɨko ole hnnɨmentohofi, Olo Sɨkuno Engo lomne'no Jisas kako wosapmmontolɨkeno. Ose hnnɨmentohofofoho. 57 Hwapɨngoso a'amu Falisi sohwanji hwe engo sohwanji hofɨko a'amu hisomo hungkuno yokumpohn'nyo ole lontɨfi, Sekwo Jisas humentahonɨngkuhwosi uhwonɨngkuji nowenetɨmapɨkujo'no nakwo huhwo sohumo impe untofano. Ose ulɨmentohofofoho.

Maliya kako Jisasɨye sɨfemo hwone mijo sohumentisofoho.

1 Oso Anɨtu A'amu Isɨlael somo Uyakolo'mentiso somne'ne Syafɨsiyo sɨkuno engo mmo'nyo aho fehohnjo hopi'nono nom'ni mta'ni anga'no nowentanɨngki Jisas kako ango Mpetani sopo umentisofoho. Oso ango hopo sopo Lasalos kako poyo pe'nɨngkahonɨngki Jisas kako ulɨka'mentiso sopono umentisofoho. 2 Oso ango Mpetani hopo sopo i'mofɨwahonɨngki Jisasɨmne'no wosopayo engo iloho yontɨfi Mota kako wosopayo iku'yopo polofosyalokumpento hu'mmentisofoho. Jisasɨ'nji a'amu nom'ne so'nji Lasalos kako huhwo'nji hofɨko nohumantɨfi wopayo nɨmentohofofoho. 3 Oso hohosohonta Maliya kako hwone mijo hamniyoho engo mpe imentisoso nomanto Jisasɨye sɨfemo sisyonto kakoe mijiyo sawemo so'nji sɨfemo sosayo usɨpo'mentisofoho. Oso hwone mijo sohwoe akino wopɨngoso ango homo somo ehuhnnaloho'mentisofoho. 4 Jisasɨye inomokomoyo fihwo kakoe yofe Jutas Isɨkaliyout kako Jisasɨmo fonjasiyo'ne tokoyo'ofo iyo'ne sohwo oso homo somo uhwononto ulɨmento, 5 Oso mijo wonyoangkafoso kako peho'no sisyohoho. Olo mijo hiloso nom'ne a'amuso mpe yontɨfijontentesi hamniyoho mɨkunɨmposo a'amu hamniyoho syoho'njo sohwo soswo anga'nohino somjo hamniyoho hopi'nono nejapɨkuji nakwo a'amu umofonyo iwo'nɨngkohofo somo uyɨhwanesohilo. 6 Ose ulɨmentisoso kako a'amu umofonyo iwo'nɨngkohofo somne'no huno nehopi syafɨsyonto ulɨmentiso'maho. O'o, kako hamniyoho hufo imojo so'no ulɨmentisofoho. Jisasɨ'nji kakoe inomokomoyo sohwona'nnonji nakwo hano emoyontanɨngkukwone Jutas Isɨkaliyout sohwo kako nakwoe hamniyoho ipofo mokosyohumante somta'ni hufo imojo hweho. 7 Oseso Jisas ulɨmento, Olo a'musi kako olo ntohofiso loso'no kakoe syohofoho. Sekwo tɨmo'nohino uhwontohumamno. Kako hwone mijo hiloso nomokosyohumentanɨngkuhwosi. Ngko poyo imo'nɨme sohonta nje pijafomo nto'no enɨsyohumaniyoho. 8 I a'amu umofonyo iwo'nɨngkohofoso sekwo'nji engolopohamo ne'no humawo'nɨngkohofofoho. I oso'no ngko sekwo'nji humaleso sɨkuno moi'wo we'enepi umo'nɨmontonoho. Oso'no a'amu ngkimo wopɨngo ntohofo'ne sɨkuno pi'nɨngo mauyoho.

A'amu tajo ango syoho'njo sohwa hofɨko Lasalosɨmo fonjosyane'entɨfi hungkuno nano mtito'mentohofofoho.

9 A'amu Juta hwe moya'mi pi'nɨngoso Jisas ango Mpetani sopo humaho upa'nontɨfi oso pone'no womentohofofoho. Hofɨko Jisasɨmnenohini uhwonantɨfi womentohofo'maho. O'o, Jisas kako Lasalos poyo pe'nɨmentiso sohumo ulɨka'mentiso sohwo huhwo'njimo uhwonano lontɨfi womentohofofoho. 10 Oso a'amu tajo ango syoho'njo sohwa hofɨko oso hiso uhwonontɨfi hofɨko Jisasɨmne'nohini mtito'mentohofo'maho. O'o, Lasalos huhwo'njimo fonjosiyo'ne mtito'mentohofofoho. 11 Hwapɨngoso a'amu Juta hwe moya'mi pi'nɨngoso hofɨko Lasalosɨmne'no huno pi'nɨngo syafɨsyontɨfi a'amu tajo ango syoho'njo sohwamo ulɨko'mantɨfi Jisasɨmo sɨmeho hi'ntnnono uyɨmentohofofoho.

Jisas kako ango Jelusalem sopone'no hwe yofe engo'njo pa'nyo imo'nonto humentisofoho.

12 Oso ango Jelusalem hwe moya'mi pi'nɨngo engoso oso Anɨtu A'amu Isɨlael somo Uyakolo'mentiso somne'ne Syafɨsiyo Sɨkuno Engo somo uhwonano lontɨfi sɨmentohofofoho. Oso hopo sopo nohumantɨfi upa'nɨmentohofoso Jisas kako mo'nɨngkanta Jelusalemne'no wapmmontonoho upa'nɨmentohofofoho. 13 Oseso hofɨko yo'mayo wokoso wopɨngo wopɨngoso nomotawentɨfi Jisasɨmne'no honɨngkanopo hontohumamentohofofoho. Nohontohumantɨfi Jisasɨmne'no joho ole lɨmentohofi, Anɨtumo isamoyoka ulano. Kako wopɨngo'nohino hweho. Olo hwe lohumo nakwoe Hwe Engo Anɨtu sohwo nakwoe hwahopone'no uhwatɨmentiso hweho. Kakoe yofe woho'nomano. Nakwo a'amu Isɨlael hn'nwiye hwe yofe engo'njo nakumo nemokosyohumayo'ne hweho. Ose lɨmentohofofoho. 14 Jisas kako yahu osyuyo toungki anga'no notɨpemanto yahu sohwoe hohujopo kehumanto sɨmentisofoho. Oso hiso'no ifalifaliyo ole wo'nnyofoho. 15 Sekwo a'amu ango Saiyon sopo humalofo soku sekwo iyoho senɨngkuhwoloho. Uhwonɨmno. Sekwoe Hwe Engo sohwo kako ntosapohoho. Kako yahu toungkipo nokehumanto sopalofoho. Oso ifalifaliyo hohonta mtɨ'mokumentohofofoho. 16 Oso hohosohonta Jisasɨye inomokomoyo sohwona'ni nakwo oso hungkuno ifalifaliyo mtɨ'mokumentohofo so'no huno monayo hwona'nyoho. I oso'no tɨfi no'mo Jisas kako ahwomomo sɨmentiso sohonta nakwo oso ifalifaliyo hiso'no huno syafɨhu'mentɨhwoni yo'mayo wopɨngoso Jisasɨmne'no oso sɨkuno homo somo a'amu uloho'mentohofo so'no huno ikwesyafɨhu'mentɨhwonefoho. 17 Hohonta Lasalos poyo pe'nonto kakoe pijafoso pi'nɨmomo wo'mentiso sohonta a'amu Juta pi'nɨngo engoso Jisasɨ'nji humamentohofofoho. Jisas kako Lasalosɨmo joho ulonto nulɨkofahonjoso hofɨko uhwonɨmentohofofoho. Oso a'amu huhwo sohwa hofɨko nom'ne a'amu pi'nɨngo'njo sopo Jisas kako yo'mayo imentiso so'no lutɨhwamentohofofoho. 18 Oseso hwe moya'mi pi'nɨngo engoso yo'mayo wonyoangkafo Jisas imentiso so'no upa'nontɨfi oso a'amu hiso Jisasɨmo honɨngkanopo uswo'nɨmentohofofoho. 19 Uswo'nɨngkahonɨngkofi a'amu Falisi sohwa hofɨko nuhwonontɨfi sɨmeho tango uyahonɨngki ole hnnɨmentohofi, Ihwoni, a'amuso hofɨko nakumne'no huno mosyonefɨsyalokuyohofo. O'o, a'amu ango'meemjo hopi'nonohinoso hofɨko nakumo nosɨkwojonaofontɨfi Jisasɨmnohini inomokoho'nawotofo. Ose hnnɨmentohofofoho.

A'amu Ngkɨlik fehohnjo sohwa hofɨko Jisasɨmo uhwonano lontɨfi imentohofofoho.

20 A'amu pi'nɨngo engoso sɨkuno iyoho humayo engoso uhwonano lontɨfi ango Jelusalemne'no Anɨtuye yofe ho'nomayo'ne sɨmentohofofoho. A'amu Juta'nohini'maho. O'o, a'amu Ngkɨlik fehohnjo hi'nji sɨmentohofofoho. 21 Oso a'amu Ngkɨlik huhwo sohwa hofɨko Filipɨmo u'mantɨfi ulɨmentohofi, Hwe engofo, nakwo Jisasɨmo uhwonano lontani sahopɨhwone hwona'nyoho. Ose ulɨmentohofofoho. Filip huhwo sohwo kako hwaho Ngkalili ango Mpetɨsaita mta'ango hweho. 22 Filip kako hofɨkoe hungkuno hiso upa'nonto nowento Entɨlumo ulahonɨngki siko Jisasɨmo u'manji oso hungkuno hiso ulɨmentisiyefoho. 23 Jisas kako sikimo ulɨmento, Ngko A'amufe Hwomu sohwo'ni poyo imo'nɨ'mo apa'no songo lɨkahm'mo nje yofe engo mayo'ne sɨkunoso mofonepo nto i'mofapohoho. 24 Ose ulɨkwato lohofonto kako poyo imo'nyo'ne pahnnɨmo hungkuno ole ulɨmento, Hwe fihwo kako hamoyo mofososo hami hiso siki wehwosi piso nɨhu'nahone uyɨmontonoho. I oso'no hwe fihwo kako hami mofososo hami hiso piso ihwoso'no nom'ne tɨmo sahopɨhwosi ne pi'nɨngo umo'montonoho. 25 Oso pa'nyoso a'amu fihwo kako kakine'nohini huno syafɨhu'nonto kakoe yofe'nohini ho'noma'nɨwo'nɨngkiso sohwo kakoe humayoso aho yokumpohn'nyo kemokosyohumanto poyo pe'nɨngkuhwosi tohino engo nomane hweho. I oso'no hwe nom'nihwo kako kakine'no huno mosyafɨhu'nyo'njo yonto nom'ne a'amu somne'no ufo'mawo'nyo'ne'nohini syafɨsyɨwo'nɨngkiso sohwo kako poyo pe'nɨngkuhwosi songo ne'no wonyoangkafo humayo'neso notɨpemane hweho. 26 Oso a'amu Ngkɨlik huhwo sohwa hofɨko nje inomokomoyo umo'nano lɨfijo'manji siko nuhusɨsi hofɨkimo ole ulinyo. Hofɨko ngkimo wonnɨngkopantɨfi'manji oyonɨmno lalofoho ulinyo. A'amu nje syoho ntohofiyoso hofɨko ngkimo tɨfi nnɨngkapɨwo'nɨngkohofofoho. Oseso ngko nje syoho ntohofiyoso ngko humame sopo hofɨko wohumapɨfe. Nje syoho ntohofiyo ne somo Mpohwo Anɨtu sohwo kako hofɨkimo uhwonɨngkuhwosi kako hofɨkoe yofeso woho'noma'montonoho. Ose ulɨmentisofoho.

Hofɨko A'amufe Hwomu sohumo woho'nomapɨfe.

27 Jisas kako nohumanto ulɨmento, Nje sɨmeho tango mɨkunɨmposo niyohoho. Ngko Mpohumo jomo pehofo ulɨmnehono. Nje Mpohwo sohwosi olo tango engo ngkimo wonɨ'ma'monto iso losomo kɨko wae yanɨmotnnehino. Ose ulɨmnehono. O'o, olo tango hiloso ngko mayo'ne pmmentohono. 28 Oso hiso'no ngko nje Mpohumo hungkuno ole ulɨmo, Mpohwo sohwosi olo a'amu hopi'nonohino loso hofɨko jɨje yofe engo wojo so'no huno uyone'no yo'mayo wonyoso hofɨko ngkimo ntapɨfijo'manji noho wontapɨfe.Jisas ose ulahonɨngki mampaho ahwomo mta'ango ole ho'nɨmento, Ngko oso hwaho sopone'no kuhwotɨmentohe sohonta a'amuso nje yokumpohn'nyo engo somo uhwonontɨfi nje yofe ho'nonɨma'mentohofofoho. I kɨko poyo imo'nɨngkohojo'no ngko apa'no songo kilɨka'me sohonta hofɨko nje yokumpohn'nyomo apa'no uhwonɨngkuji nje yofe apa'no noho'nonɨmapitnnefoho. 29 Ose ho'nɨngkahonɨngki hwe moya'mi kako'njo mofonepo humohumantohofoso oso mampaho hiso upa'nontɨfi a'amu fehohnjoso ole hnnɨmentohofi, Ahwomo yoka ho'nɨngkohoho. A'amu fehohnjoso ole hnnɨmentohofi, A'amu ahwomomjo sohwo kakimo hungkuno ulohoho. 30 Ose hnnɨngkahonɨngkofi Jisas hofɨkimo ulɨmento, Olo mampaho ho'nɨngkiso loso ngko upa'nyo'ne ho'nɨngkiso'maho. O'o, sekwo upa'nyo'ne ho'nɨngkisofoho. 31 Oso'no olohonta Anɨtu kako yo'mayo yahino wonyo a'amu hwahoponjo yɨwo'nɨngkohofo so'no yano ulofihwoso'no hofɨko hofɨkoe wonyo somjo tohino mayo'nefoho. Olohonta Anɨtu kako hwe wonyo Seten olo hwaho mokosyohumaso sohwoe yokumpohn'nyoso wae weeo'montonoho. 32 Ngko olo hwaho lopo nohumentanɨ'mo a'amu hofɨko ngkimo iyo hwojiyahofɨku'nnyo yokintaho sopo monɨhumatɨpijo sohonta ngko a'amumo wohu'mema'monnoho. 33 Oso hungkuno ulɨmentisoso a'amu somo ngko poyo imo'nɨmne'no honɨngkano umofɨtɨhwamo lonto kako oso hungkunoso ulɨmentisofoho. 34 A'amu huhwo sohwa upa'nontɨfi Jisasɨmo ulɨmentohofi, Kɨko poyo umo'nɨmonnoho lalohino. Nakumo Anɨtuye hungkuno ole nalɨmento, Oso hwe Anɨtu a'amu ufo'mayo'ne uhwosopo'mentiso sohwo kako songo ne'no nohumantɨhwone hweho. I oso'no kɨko A'amufe Hwomu sohwosɨ'manji iyo hwojiyahofɨku'nnyo sopo womonɨhumojantɨfeho eso peho'no lohino. Oso A'amufe Hwomuso tɨhwolo. 35 Ose ulahonɨngkofi Jisas kako pomponaho pa'nyohwo kakine'no pahnnɨmo hungkuno ole ulɨmento, Sekwo olopo nohumentanɨngkuji pomponaho we'enehwo sekwo'njo lopo wolasehumontonoho. Nolasesyɨhwoso'no sɨkuno wammontonoho. Oseso pomponaho lasesyohwoso'no pomponahopo fosyohumamno. Sɨkuno semenoho. A'amu sɨkwo'mjoho'mjo hano wentoso sohwo kakoe humayoso ntontelo. Awonoho. Huno muyo hweho. 36 I ngko pomponaho sohwo'ni sekwo'njopo nohumentanɨ'mo sekwo sɨmeho hi'ntnnono ntapmno. Sekwo nje hungkunomo tɨfi nnɨngkapɨfijo'manji ngko sekwoe pomponaho sohwo'niye mehomi umo'nantɨfeho. Ose ulɨkwato lohofonto Jisas kako hofɨkimo ulɨko'manto hiyaso humamentisofoho.

A'amu Juta hwe moya'mi pi'nɨngoso Jisasɨmo sɨmeho hi'ntnnono muyo'njo imentohofofoho.

37 Jisas kako yo'mayo wonyoangkafo a'amu miyɨwo'nɨngkiyohofoso ko yahonɨngki a'amu Juta pi'nɨngoso sɨmeho hi'ntnnono muyɨmmentohofofoho. 38 Oseso oso hungkuno hohonta Aisaiya sohumo Anɨtu uyahonɨngki lɨmojo sohwo mtɨ'mokumentisoso ne imo'nɨmentisofoho. Hungkuno hiso olenoho. Hwe Engofo, nakwoe hungkuno somo sɨmeho hi'ntnnono tɨhwo wonejapmmontolo. Yo'mayo wonyoangkafo a'amu miyɨwo'nɨngkiyohofoso Hwe Engo ihwoso'no ne'njofoho eso tɨhwo wonalɨmontolo.Aisaiya hohonta ose mtɨ'mokumentisofoho. 39 Oseso a'amuso hofɨko Jisasɨmo sɨmeho hi'ntnnono uyoso hopo'maho. Olo hiloso hwapɨngo so'no Aisaiya kako hungkuno nom'ne mtɨ'mokumentisoso olenoho. 40 Anɨtu kako a'amuso nohonɨfitnnoho syafɨsyonto hofɨkoe tɨmo upijiyo'mentisofoho. Anɨtu ngkine'no huno nto'no ikwesyafɨhupitnnoho syafɨsyonto hofɨkoe hunoso hwayohosile umasimentisofoho. Anɨtu ose uloho'mentiso so'no hofɨko hofɨkoe honɨngkano wonyo somta'ni ikinjaofɨkuji ngkiyepono pontɨfijontentesi ngko hofɨkimo wopɨngo umoku'mnesohilo. 41 Aisaiya hohonta kako wojo hopa uhwonɨmentisoso Kɨlaisiye yokumpohn'nyo so'nji kakoe yofe engo so'nji uhwononto kako oso hungkunoso Kɨlaisɨmne'no lɨmentono. 42 A'amu Jutafe hwe engo pi'nɨngo sohwa hofɨko Jisasɨmne'no sɨmeho hi'ntnnono ko uyahonɨngkofi hofɨko a'amu Falisi sohwamne'no iyoho unɨngkahonɨngki hofɨko Jisasɨmne'no hungkuno yolohoso molɨjwaofe'njo imentohofofoho. Hwapɨngoso ole syafɨhu'mentohofi, A'amu Falisi sohwa hofɨko nakumo Anɨtuye tajo ango somta'ni wae enamopitnnoho lontɨfi molɨjwaofe'njo imentohofofoho. 43 Anɨtu hofɨkine'no yo'mayo so'no huno syafɨsyonte so'no hofɨko huno mosyafɨhu'mmentohofofoho. O'o, a'amu hwahoponjoso hofɨkine'no yo'mayo so'no huno syafɨsyontɨfe so osomnohini syafɨsyontɨfi inɨngkamentohofofoho.

Jisas kako a'amu hopi'nonohinofe yahino somo yano ilofo'ne hungkunofoho.

44 Jisas kako hungkuno yokumpohn'nyo ole ulɨmento, A'amu fihwo sɨmeho hi'ntnnono ntopantokunjo sohwo kako ngkine'nohino montopantofiyoho. O'o, kako nje Mpohwo olo hwaho lopone'no lonɨhwatɨmentiso osohwo huhwo'ntnne'no ntopantofoho. 45 A'amu ngkimo tɨmo nohonantokunjo sohwo kako ngkimnohino monehonantofiyoho. O'o, kako nje Mpohwo ngkimo nɨhwatɨmentiso oso hwo huhwo'njimo ehonalofoho. 46 Ngko olo hwaho loponjo pomponaho sohwo'ni a'amu ngkimo sɨmeho hi'ntnnono ntapɨfijo'manji hofɨko sɨkwo'mjoho'mo mohumafitnne so'no pmmentohe hwo'nyoho. 47 A'amu fihwo kako nje hungkunomo haloho ko upa'nɨngkuhwosi hungkuno homo somo tɨfi minɨngkayo'njo sohumo ngko kakoe yahino somne'no tohino muyɨmnehono. O'o, ngko a'amufe yahino somne'no tohino yano uyo'ne pmmentohe hwonɨ'maho. Ngko a'amufe wonyomjo tohino mta'ni isɨhutofomayo'no pmmentohe hwo'nyoho. 48 I a'amu ngkimo hwotoho nifekuji nje hungkunomo tɨfi minɨngkayo'njoso hofɨko hofɨkimo hofɨkoe yahino wonyo somne'no tohino yano ulofiyo sohwo hi'njofoho. Oso sɨkuno ae'uyo somo yo'mayo hungkuno nto lɨjwasemo'mentohe hiso hofɨkoe yahino wonyo somne'no tohino yano ulofiyonefoho. 49 Hwapɨngoso yo'mayo hungkuno selɨwo'nɨngkoheso nje huno mta'ango'maho. O'o, nje Mpohwo kako nɨhwatɨmentiso sohwo kako yo'mayo hungkuno hopi'nonohinoso lɨjwasemofo'ne ntahonɨngki selalokweno. 50 Ngko huno ole niyohi, A'amu nje Mpohwoe hungkunomo tɨfi inɨngkaweso sohwo kako songo ne'no humantɨhwone hweho. Oseso yo'mayo hungkuno hopi'nonohinoso Mpohwo ntɨwo'nɨngkisoso ngko sekumo nto'nohini selalokweno.

Jisas kakoe inomokomoyo sohwafe sɨfemo mijo yoma'mentisofoho.

1 Oso Anɨtu A'amu Isɨlael somo Uyakolo'mentiso somne'ne Syafɨsiyo sɨkuno engo iyoho humayo'ne no'no mo'nɨngka imo'none sohonta Jisas kako huno ole uyɨmento, Mo'nɨngka ngko olo hwaho lopo ulɨko'mahm'mo nje Mpohwoe angopono wasɨmne hwo'nyoho. Ose huno umentisofoho. Olo hwaho loponjo hwe moya'mi kakine'no hitoho ulofɨwo'nɨngkohofo somo Jisas kako hitoho mɨkunɨmposo ulo'mentisofoho. Kako kakoe a'amu ne somne'no hitoho ne'no ulofontanɨngki kakoe poyo imo'nyo sɨkunoso i'mofapmmentisofoho. 2 Jisasɨ'nji kakoe inomokomoyo sohwona'nnonji nohumentani sɨkuno'nji wopayo nontanɨngkuhwoni Seten kako Jutas Isɨkaliyout Saimounɨye hwomu sohumo olo hunolo nto uyɨmento, Kɨko Jisasɨmne'no tokoyo'ofo uyɨmonji yalokunoso olohonta olo sɨkwo'miyo lomo noho fiyo. Oso hunoso Seten umentisofoho. 3 Oso hohosohonta Jisas kako huno ole uyɨmento, Anɨtu kako yo'mayo hopi'nonohinoso ngkimo enjwa'mo nto ho'nanɨhumasofoho. Huno nom'ne olo so'nji huno uyɨmento, Nje Mpohwo kako olo hwaho lopo nɨhwatɨmentiso sohwo'ni ngko apa'no kakiyepono asomo nosɨmnefoho. Huno ose uyɨmentisofoho. 4 Oseso Jisas kako wopayo fehohnjo moi'wo manyohwo kako nolɨkafonto kakoe nem'no manji'mofo wae yaofonto kako sosayo sɨpo'nyo nomanto kakoe sɨmehopo nano mtitofahinɨmentisofoho. 5 Ose mtitofahinonto kako mijo nomanto noswanopo sisasyonto kako kakoe inomokomoyo sohwona'niye sɨfemo mijo yonema'mentisofoho. Ose yonemanto kakoe sosayo sɨpo'nyo kakoe sɨmehopo mtitofahinɨmentiso so'nji sosayo nasɨpo'mentisofoho. 6 Oseso Jisas kako Saimoun Pitamo u'mahonɨngki Pita ulɨmento, Hwe Engofo, kɨko nje sɨfemo mijo uyonɨma'monntaho. 7 Ose ulohonɨngkahonɨngki Jisas ulɨmento, Olohonta olo kilohofalokwe loso kɨko huno makiyohoyohoho. I oso'no hwangku kɨko huno wakiyɨmontonoho. 8 Ose ulahonɨngki Pita ulɨmento, Nje sɨfeso mijo niyanɨmahotoho. Nɨhu'no ngkilaho. Ose ulahonɨngki Jisas ulɨmento, Ngko jɨje sɨfemo mijo miyokumaso'manji kɨko ngko'nji mohumayo'ne hwosoho. Kɨko nje syoho mantohofiyo'ne hwosoho. 9 Ose ulahonɨngki Saimoun Pita komo'no ulɨmento, Hwe Engofo, ose'manji nje sɨfemnohini yonɨmahotoho. O'o, nje aho mnokino hopi'nonohino lomo fiyonɨmaho. 10 Ose ulahonɨngki Jisas ulɨmento, A'amu fihwo kakoe a'apaho hi'nji mijo nto yomo'nɨngkiso sohwo kako kiho ane imo'nyo so'no syoho engo'njo hwo'maho. O'o, kakoe sɨfemnohini mijo yomo'nɨngkuhwosi kiho ane'njo wohumamontonoho. Olo ango lomo humalohwone sohwasi anga'nohinohwo kiho'njohwo humaho. Nom'ne sohwasi kiho ane hwasoho. Ose ulɨmentisofoho. 11 Hwapɨngoso Jisas kako Jutas kakine'no tokoyo'ofo yone sohune'no huno uyahonɨngki, Anga'nohinohwo kiho'njohwo humaho eso ulɨmentisofoho. 12 Oseso Jisas hofɨkoe sɨfemo mijo moi'wo esojwamofonto kakoe nem'nomanji'mofo apa'no yonto nakwo'nji apa'no ampo humamentisofoho. Nohumanto nalɨmento, Ngko sekwoe sɨfemo mijo yosemahe so'no huno ito'no nto laseyohoho. 13 Ose ulonto ulɨmento, Sekwo ngkine'no Hungkuno Mesyolonetɨhwayo hwosoho. Nakwoe Hwe Engo hwosoho ntɨwo'nɨngkohofɨhwasoho. Oso hungkuno ntɨwo'nɨngkohofoso nto'nohinoho. Ngko huhwo'ne osenohinoho. 14 Ngko sekwoe hwe engo sohwo'ni sekumo hungkuno meselutɨhwayo sohwo'ni ngko sekwoe sɨfemo mijo yosemahono. Sekwo nakwo hwe engo hwona'nyoho lɨkuji nom'ne a'amu sofe sɨfemo mijo miyomapitnnoho lonji selohofohono. Oseso sekwo sohwasi sekwo nom'ni hwafe sɨfemo mijo yɨmaofɨkujo'no hofɨko sekwoe sɨfemo uyosemapɨfe. 15 Olo selohofohe yahino loso nto setɨhwaheso sekwo nom'ni hwamo ose ulohopmno. 16 Ose ulonto ole ulɨmento, Ngko hungkuno nehopi'nohini waselɨmonne'no yohono. Upa'nɨmno. A'amu fihwa hofɨko nom'nihwoe syoho ulohofiyɨwo'nɨngkohofo sohwa hofɨko hofɨkoe hwe engomo muyakolopitnne hwafoho. A'amu fihwa hungkuno motawowo'nɨngkohofo sohwa hofɨko a'amu lɨhwatɨmentiso sohumo muyakolopitnne hwafoho. 17 Ngko sekwoe hwe engo sohwo'ni ngko olo hiloso selohofohe so'no sekwo olo hungkuno selalokwe hwapɨngoso huno waseyono. Sekwo nom'ne hwamo ulohofoso ngko selohofohe hopaso ifijo'manji sekwo sɨmeho wopɨngo wasemo'nɨmontonoho. 18 Ose ulonto ole ulɨmento, Olo hungkuno selalokwe loso sekwo hopi'nonohino sohwahnne'maho. Ngko sehwosopo'mentohe sohwahnne'no sekwoe yahino humayo so'no ngko huno niyohoho. I oso'no Anɨtuye hungkuno a'amu mtɨ'mokumentohofoso ne umo'nɨmontonoho. Hungkuno anga'nohinoso olenoho. Hwe fihwo ngko'nji wosopayo nososohwo kako ngkine'no hohujo ikinjanɨmofɨhwosi nje mangohwo umo'nɨmontonoho. Ifalifaliyo ose mtɨ'mokumentohofofoho. 19 Oso hungkuno hiso ne imo'noso sohonta'ne'no selalokweno. Ne imo'nɨngkuhwoso'no sekwo huno ole wosyonɨfɨsyantɨfeho. Jisas kako ne'njo hweho. Ose wosyonɨfɨsyantɨfeho. 20 Ngko hungkuno nehopi waselɨmonne'no yohono. Ngko a'amu fihumo uhwojahonɨ'mo a'amuso osohumo utɨmafɨkuji wopɨngo ulohopɨfijo'manji hofɨko ngko huhwo'nɨmo ntɨmafɨkuji wopɨngo wontohofantɨfeho. A'amu ngkimo ntɨmalokwofo sohwa hofɨko nje Mpohwo Anɨtu huhumo utɨmalokwofo. Ose nalɨmentisofoho.

Jutas kako Jisasɨmo mango hwafe ahomo ho'nahumentiso so'ne hungkunofoho.

21 Oso hohosohonta Jisas kako hi tango mɨkunɨmposo uyahonɨngki kako hungkuno yolohoso ole lɨjwao'mento, Hungkuno nehopi waselɨmonne'no yohono. Hwe fihwo kako olo ango lomo sekwo'nji humaso sohwo kako mango sohwafe ahomo woho'nanɨhumonte hweho. 22 Ose nelahonɨngki kakoe inomokomoyo anga'no anga'nohino sohwona'ni honɨngkonontani tɨhune'no kalohoho huno syafɨhu'mentɨhwonefoho. 23 Ngko Joun olo hungkuno ifalifaliyo mtɨ'mokalokwe sohwo'ni Jisas kako ngkimo sɨmeho engo ntapɨwo'nɨngkiso so'no ngko Jisasɨ'nji afapo humohumantohe hwo'nyoho. 24 Oseso Saimoun Pita kako ngko Joun'ni uhwonyo'ne aho songo songo yahonɨngki ngko kakimo uhwonɨngkahonɨngko Pita ole ntɨmento, Kɨko Jisasɨmo ulohonyo. Tɨhune'no kolalofoho. 25 Ose ntahonɨngki ngko Jisasɨmo ikinjamo lohofonji ulɨmentoho, Hwe Engofo, kɨko tɨhune'no lalokuno. 26 Ose ulahonɨngko Jisas nalɨmento, Ngko wosopayo kutnnyoso mijomo yomahm'mo a'amu fihumo uyɨmonnoho. Oso huhweho. Jisas ose nalonto kako wosopayo kutnnyoso mijo yomanto Jutas, Saimoun Isɨkaliyoutɨye hwomumo uyɨmentisofoho. 27 Ose uyahonɨngki Jutas nɨmentisofoho. Oso hohosohonta Seten kako Jutasɨmo ehuhnnao'mentisofoho. Jisas Jutasɨmo ulɨmento, Kɨko yo'mayo umonji yohinoso olohonta komo'no fiyo. 28 Oso hungkuno Jisas Jutasɨmo ulɨmentisoso kakoe inomokomoyo sohwona'ni osopo humohumantɨhwone sohwona'ni hwapɨngo neso huno monayo hwona'nyoho. 29 O'o, fehohnjo sohwona'ni nakwo Jutas nakwoe hamniyoho ipofo mokosyohumawo'nɨngkiso so'no huno ole syafɨhu'mentɨhwoni, Jisas kako oso Sɨkuno Engo iyoho humayo so'ne yo'mayo mpe-e'ne lɨhwatɨmentiso so'no syafɨhu'mentɨhwonefoho. Fehohnjo sohwona'ni huno ole syafɨhu'mentɨhwoni, Jisas kako a'amu umofonyo iyo somo hamniyoho uyo'no lɨhwajɨmentiso so'no syafɨhu'mentɨhwonefoho. 30 Jutas kako oso wosopayo nomanonto mempono komo'no humentisofoho. Noswonto uhwonɨmentisoso sɨkuno nto mjao'mentisoso uhwonɨmentisofoho.

Jisas kako honɨngkano hungkuno songo so'no kakoe inomokomoyo sohwamo lutɨhwamentisofoho.

31 Jutas kako syukwato lohofahonɨngki Jisas kakoe inomokomoyo nom'ne sohwona'nɨmo nalɨmento, Olohonta A'amufe Hwomu sohwo'niye yofe engo utɨhwa'nyopo u'mofapmmontonoho. Oso hiso'no Anɨtuye yokumpohn'nyo engo somo a'amu tɨmo uhwonɨngkuji hofɨko kakoe yofe engo woho'nomantɨfeho. 32 Ngko nje Mpohwoe yofe engo imoku'me'no Mpohumo kakoe yofe engoso kakoe Hwomu sohwo'nɨmo komo'no wontapmmontonoho. 33 Ose nelɨkwato lohofonto ole nalɨmento, Nje mehomi sohwasi ngko sekwo'nji we'enepi nohumahm'mo woselɨko'ma'monnoho. Oso hohosohonta sekwo ngkine'no hafɨhafe wonyopi wotɨpeentɨfeho. Ngko a'amu Juta sohwamo hungkuno nto ulɨmaleso olohonta sekwo huhwahnnonji selalokweno. Ngko ume sopo sekwo olohonta ngkimo monɨ'mapitnnohofo. 34 Oseso ngko honɨngkano hungkuno songo sejopalokweno. Sekwo sekwoe a'amu somne'no sɨmeho wosema'nono. Ngko sekumo sɨmeho sejopalokwe pa'nyoso sekwo sekwoe a'amu somo sɨmeho uyɨmno. 35 Sekwo oso hopa a'amu somo sɨmeho uyɨkujo'no nom'ne a'amuso sehonɨngkuji ole waselɨfe, Jisasɨye inomokomoyo hwasoho. Ose woselantɨfeho.

Jisas kako Pita kakine'no hohujo ikinjɨmofone so'no ulɨmentisofoho.

36 Saimoun Pita kako Jisasɨmo ulɨmento, Hwe Engofo kɨko ntɨ'mne hwosilo. Ose ulohonɨngkahonɨngki Jisas ulɨmento, Ngko ume sopone'no kɨko olohonta mannɨngkapihnnohino. I oso'no hwangku sohonta kɨko ngkimo nɨ'matnne hwosoho. 37 Ose ulahonɨngki Pita ulɨmento, Hwe Engofo, olohonta ngko kikimo mokinɨngkapeso pipine'elo. A'amu sohwa hofɨko kikimo fonjakohufijo'manji hofɨko ngkimo fonjanisiyoso wopɨngofoho. Ngko kikimo kufo'mayo'ne pe'nɨmeso wopɨngofoho. Wape'nɨmo. 38 Ose ulahonɨngki Jisas ulɨmento, Kɨko ngkimo nɨfo'mayo'ne wape'nɨmo lalohino. Hungkuno nehopi'nohini wakilɨmonne'no yohono. Olohonta tosɨka yoka maho'nyo sohonta kɨko mango hufa'u sɨhune ole walɨmonnoho, Ngko Jisas sohune'no huno maniyo hwo'nyoho. A'amu somo ose ulɨmonnoho. Jisas Pitamo ose ulɨmentisofoho.

Jisas sohwo kako Mpohwo Anɨtumo u'mayo'ne honɨngkano hweho.

1 Jisas kakoe inomokomoyo sohwona'nnonji nohumentani nakumo nalɨmento, Sekwo sekwoe sɨmeho wonyo semo'nɨngkuhwoloho. O'o, sekwo Anɨtumo sɨmeho hi'ntnnono ne'no uyɨmno. Oso'no sekwo ngko huhwo'nɨmo sɨmeho hi'ntnnono ntapmno. 2 Nje Mpohwoe angoso sohe pi'nɨngo'njoponoho. Oso hungkuno hiso ne ane'njontentesi ngko sekumo hohonta selɨ'mnesohilo. Ngko sekwoe ango ito'no wesyohumamne hwo'nyoho. 3 Ngko sekwoe ango ito'no yasesɨ'mo ngko sekumo setɨmayo'ne asomo wapmne hwo'nyoho. Oso'no sekwo ngko'njo afa nohopo humentɨhwanefoho. 4 Ngko sɨmne honɨngkano somne'no sekwo huno seyohoho. 5 Ose nelahonɨngki Toumas ulɨmento, Hwe Engofo, kɨko ntɨ'mne hwosilo. Nakwo huno monayohoyohoho. Nakwo oso honɨngkano somne'no hunoso pipi ihwasi syofɨsyanehwono. 6 Ose ulahonɨngki Jisas ulɨmento, Ngko sohwo'ni Mpohumo u'mayo'ne honɨngkano hwo'nyoho. Ngko hungkuno nehopi'nohino hwapɨngo hwo'nyoho. Ngko songo ne'no humayo'ne hwapɨngo hwo'nyoho. A'amu fihwo kako Anɨtumo u'mayo'ne honɨngkano nom'neso mauyoho. O'o, ngko'nohini Mpohumo u'mayo'ne honɨngkano hwapɨngo hwo'nyoho. 7 Sekwo nje hwapɨngo ne so'no huno nto'no seyontentesi sekwo nje Mpohwo huhune'no huno seyɨhwonesohilo. Olohonta sekwo Anɨtune'no huno nto seyohoho. Sekwo kakimo nto uhwonɨngkohofo. Sekwo ngkimo nohonɨngkohofo so'no sekwo Anɨtu huhumo uhwonontɨfi kakine'no huno nto'no seyohoho. 8 Ose ulahonɨngki Filip ulɨmento, Hwe Engofo, kɨko Mpohumo fonetɨhwaho. Nonetɨhwahojo'no nakwo sɨmeho wopɨngo wonamo'nɨmontonoho. 9 Ose ulahonɨngki Jisas kako ulɨmento, Filip ngko sekwo'nji sɨkuno pi'nɨngo engo nto humantohe hwo'nyoho. I osomo kɨko ngkine'no huno ito'no makiyo'njo hwosilaho. A'amu ngkimo nohonɨwo'nɨngkiso sohwo kako nje Mpohwo Anɨtumo uhwonalofoho. Oso'no pipine'no lohino. Kɨko Mpohumo fonetɨhwaho lohinosofo. 10 Kɨko ole losyofɨsyalokuno. Jisasɨ'nji kanɨngkwohwo'nji siko afa'maho. O'o, Jisas kako kengo hweho. Kanɨngkwohwo kengo hweho. Ose losyofɨsyalokuno. Hungkuno ngko sekumo selinyoso nje huno mta'ango'maho. O'o, Mpohwo Anɨtu kako ngkimo humaso sohwo kako yo'mayo syoho iwo'nɨngkohoho. 11 Sekwo olo hungkuno homo somo sɨmeho hi'ntnnono uyɨmno. Ngko nje Mpohumo humaleno. Mpohwo kako ngkimo humaho. Oso hungkuno homo somo sɨmeho hi'ntnnono muyo'manji i yo'mayo syoho wonyoangkafo a'amu miyɨwo'nɨngkiyohofo iwo'nɨngkohe so'no sekwo huno ikwesyafɨsyɨkuji sekwo sɨmeho hi'ntnnono ntapmno. 12 Hungkuno nehopi'nohino waselɨmonne'no yohono. A'amu ngkimo sɨmeho hi'ntnnono ntaposo sohwo yo'mayo syoho ngko iwo'nɨngkoheso kako uyɨmontonoho. Ou, ngko nje Mpohwoepono sɨme sohonta oso a'amu huhwo sohwo kako olopo nohumahwosi yo'mayo syoho ngko imentohe somo kako niyakolofososo ngko ufo'ma'monnoho. 13 Hwapɨngoso ole, sekwo nje Mpohumo yo'mayo so'no jomo ulɨkuji nje yofe lɨfijoso ngko yo'mayoso wosejapmmonnoho. Ngko yo'mayo sekumo sejapm'me'no nje Mpohwoe yofe sekwo noho'nomafɨkujo'no kakoe yofe engoso umo'nɨmontonoho. 14 Sekwo nje Mpohumo nje yofe ulɨfijoso ngko yo'mayo imneso'no jomo ntɨkujo'no ngko uyɨmonnoho.

Jisas kakoe Towahuno Wopɨngo somo uhwajone'no hungkuno ulɨmentisofoho.

15 Sekwo ngkimo sɨmeho nehopi ntapɨfijo'manji ou, sekwo nje hungkuno hopi'nonohino somo haloho pekuji ito'no wonnɨngkopantɨfeho. 16 Ngko Mpohumo jomo ulɨ'me'no kako nom'nihwo sekumo Yokumpohn'nyo Sesofitofosyohumayo'nehwo wosejapmmontonoho. Oso huhwo sohwo kako sekwo'nji engolopohamo ne'nohini wofosyohumentɨhwantɨfe hweho. 17 Anɨtu kakoe Towahuno sohumo sekuyepono uhwajɨhwoso'no Towahuno huhwo sohwo kako hungkuno nehopi'nohini wasetɨhwamontonoho. I oso'no a'amu hwahoponjo yahino somo inɨngkuwalokwofoso hofɨko oso Towahuno huhwo sohumo momaso'njofoho. Hwapɨngoso hofɨko kakimo tɨmo muhwonyo'njo ikuji hofɨko kakine'no huno muyofoho. I oso'no sekwo kakine'no huno seyohoho. Hwapɨngoso olohonta kako sekwo'nji humaho. Hwangku kako sekwoe sɨmeho mo'mo wohumamontonoho. 18 Ngko sehwotɨ'mo'me sohonta Anɨtuye Towahuno sohwo sekwo'nji humaso so'no sekwo sɨkumehomi pa'nyo mohumafitnnehofo. O'o, ngko sekuyepono asomo wapmmonnoho. 19 We'enepi olo hwaho loponjo a'amuso hofɨko ngkimo apa'no manohonɨfitnnefoho. I oso'no sekwo wonohonantɨfeho. Ngko songo ne'no humayo'ne hwapɨngo sohwo'ni kalohi sekwo hoku songo ne'no wohumantɨfeho. 20 Ngko nje Mpohwoepono sehwotɨ'mo'me sohonta sekwo huno ole waseyono. Ngko nje Mpohumo humaleno. Sekwo ngkimo wofosyonohumantɨfeho. Ngko sekumo wosefosyohumamonnoho. 21 A'amu fihwo kako nje hungkunomo haloho pehwosi hungkuno homo somo ito'no tɨfi inɨngkaweso sohwo kako ngkimo sɨmeho nehopi ntopalofoho. A'amu ngkimo sɨmeho ntapɨwo'nɨngkiso osohumo nje Mpohwo kako sɨmeho uyalofoho. Ngko huhwo'ni oso huhwo sohumo sɨmeho uyɨ'mo ngko kakimo utɨhwa'nyopo ikinɨ'me'no kako ngkimo wonohonɨmontonoho. Jisas ose ulɨmentisofoho. 22 Jisasɨye inomokomoyo nom'ne sohwo kakoe yofe Jutasɨyoho. Osohwo kako Jutas Isɨkaliyoutɨ'maho. O'o, nom'ne hweho. Oso Jutas huhwo sohwo kako nohumanto Jisasɨmo ulɨmento, Hwe Engofo, kɨko nakwo sohwona'nɨmo ne'mahoji hwe moya'mi hwahoponjoso makohonyo'njo iyoso pipilo. 23 Ose ulohonɨngkahonɨngki Jisas ulɨmento, A'amu ngkimo sɨmeho nehopi ntaposo'manji kako nje hungkunomo ito'no wonnɨngkamontonoho. Oso hwe huhwo sohumo nje Mpohwo Anɨtu kakine'no umo'nɨmontonoho. Nekwo'montosa'i oso hwe huhwo sohumo u'mehwasi kako'nji engolopohamo ne'no wohumantanoho. 24 A'amu nje hungkunomo tɨfi ito'no minɨngkayo'njo sohwo kako ngkimo sɨmeho hi'ntnnono mantapɨwo'nɨngkiso hweho. Olo hungkuno selalokwe loso nje huno mta'ango'maho. O'o, nje Mpohwo nɨhwatɨmentiso sohwoe hungkuno ntapmmentisoso selalokweno. 25 Ngko sekwo'nji nohumanji hungkuno loso selalokweno. 26 I oso'no ngko sekumo sehwotɨ'mo'me'no nje Mpohwo kako kakoe Towahuno Wopɨngo sohwo ngkimo niyohope'ne sekumo Yokumpohn'nyo Sosofitofosyohumayo'ne sekuyepono uhwatɨmontonoho. Anɨtuye Towahuno Wopɨngo huhwo sohwo kako sekwo'nji nohumahwosi sekumo yo'mayo so'no hofiyo wolosetɨhwamontonoho. Kako sekwoe hunomo huno sefohotofɨhwoso'no yo'mayo hungkuno selɨmentoheso huno ikwesyafɨsyɨkuji huno waseyɨmontonoho. 27 Ngko sekumo sehwotɨ'mofalokwe so'no ngko nje sɨmeho wopɨngo'nji sɨmeho pompenjiyo'nji sejopalokweno. Hwe moya'mi hwahoponjo sofe sɨmeho pompenjiyoso sɨmeho wopɨngoso iyoswo ilo'molajo iwo'nɨngkisoso pa'nyo'njofoho. I nje sɨmeho wopɨngo nje sɨmeho pompenjiyoso oso pa'nyo'maho. O'o, hwahoponjo somo yakolo'nnyofoho. Oseso yo'mayo tango se'mahwoso'no sekwo yomo ikuji iyoho senɨngkuhwoloho. 28 Oso hungkuno selohe loso sekwo apa'no huno fɨkwesyafɨhupmno. Ngko Mpohwoepono nosɨ'mo sekuyepono asomo wapmmonnoho. Sekwo ngkimo sɨmeho nehopi ntape'manji ngko nje Mpohwoe ango wonyoangkafo sopo nosɨ'me'no sekwo sɨmeho wopɨngo wasemo'nɨmontonoho. Hwapɨngoso Mpohwo Anɨtu kako ngkimo hwofilo'nnyo hweho. 29 Yo'mayo hiso mmo'nontanɨngki selalokweno. Oso'no hwangku sohonta yo'mayo selohe so'no i'mofapɨhwoso'no sekwo osomo uhwonɨngkuji sekwo ngkimo sɨmeho hi'ntnnono ntapɨfitnne'no selalokweno. 30 Nje sɨkuno sekwo'nji hungkuno jo'neso mofo nto imo'nɨmaho. Hwapɨngoso Seten hwe wonyo olo hwaho loponjo yahinomo mokosyohumawo'nɨngkiso sohwo kako wonyo ntohofo'neso nto i'mofapohoho. I oso'no kakoe yokumpohn'nyoso ngkimo moniyakolofonehoho. Seten ngkimo moniyokolofontanɨngkuhwosi ngko poyo wape'nɨmonnoho. 31 Hwapɨngoso hwe moya'mi hopi'nonohinoso hofɨko ngko nje Mpohumo sɨmeho engo uyalokwe so'no huno tɨpemayo'ne ngko oso hungkuno Mpohwo ntapmmentiso somo ito'no tɨfi unɨngkamonnoho. Yo'mayo tango ko nɨ'mahonɨngkuhwosi ngko ne'no unɨngkamonnoho. Ose nalonto nalɨmento, Filɨkapmno. Wohwano. Ose nalɨmentisofoho.

Jisas kako ‘wain’ iyo hwapɨngo ne hweho.

1 Jisas kako kakoe inomokomoyo sohwona'nɨmo pahnnɨmo hungkuno ole nalɨmento, Ngko iyo hwapɨngo ne hwo'nyoho. Nje Mpohwo iyo uyo syoho sohwo'nɨmo mokosyonɨhumunyo hweho. 2 Nje iyopamo ne minto'nyoso Mpohwo kako nolofehwosi wae weeo'mtonoho. Iyopamo ne into'nnyo hopi'nonohinoso kako nofasyɨhwosi pamo ne'njoso wawo'montonoho. Hwapɨngoso ipisayo engo into'nɨngkuhwosi ne engo imo'nyo'nefoho. 3 Oso pa'nyoso sekwo nje apamo sohwasi sekwo nje hungkunomo ito'no inɨngkowalokwofo so'no oso hungkuno hiso yo'mayo yahino wonyo imotofo somo wae esemofalofoho. Sekwo kiho'maso'njo humalofo. 4 Sekwo ngkimo fosyonɨhumamno. Ngko sekumo wofosyosehumamonnoho. Iyopamo fihwo kako iyo ne hwapɨngo somta'ni nosanjɨhwosi pɨwasyososo kako ipisayo neso minto'nonehoho. Oso pa'nyoso sekwo ngkimo monɨfohi'nyo'manji sekwo huhwasi ipisayo neso minto'nyo'ne hwasoho. 5 Ngko iyo hwapɨngo ne hwo'nyoho. Sekwo nje apamo hwasoho. A'amu fihwo ngkimo fosyonɨhumaso sohwo ngko kakimo wofosyohumamonnoho. Oso'no kako ipisayo ne engo'njo hweho. Sekwo ngkimo nɨsɨkwatɨfijo'manji sekwo yo'mayo neso mifitnne hwasoho. 6 A'amu fihwo kako ngkimo nɨsɨkwatnnyo sohwo a'amu iyopamo yofoho inyoso wae yaofontɨfi tohomo ho'naefɨwo'nɨngkohofo hopaso nje Mpohwo kako hwe huhwo sohumo wae yaofonefoho. 7 Sekwo ngkimo nonɨhumafɨkuji sekwo nje hungkunomo aho yokumpohn'nyo kemokosyohumafɨkujo'manji yo'mayo so'no semo'nɨngkuhwoso'no ngkimo jomo ntɨfijoso yo'mayoso sekumo wose'ma'montonoho. 8 Sekwo ose ifijo'manji sekwo nje inomokomoyo ne imo'nɨngkuji sekwo ipisayo ne engo'njo imo'nɨfitnne hwasoho. Oseso a'amu hofɨko Anɨtu kako sekumo hofiyo semokosyohumentanɨngkuhwosi sehonɨngkuji hofɨko nje Mpohwoe yofe engo noho'nomapitnnefoho. 9 Nje Mpohwo kako ngkimo sɨmeho engo ntapɨwo'nɨngkiso hopaso ngko sekumo sɨmeho sejopalokweno. Oseso sekwo nohumafɨkuji ngko hitoho engo sejopalokwe so'no huno syafɨsyɨkuji yo'mayoso ifitnne so'no sekwo Anɨtumne'no yokumpohn'nyo fiyoho'nɨmno. 10 Ngko nje Mpohwoe hungkunomo tɨfi ito'no inɨngkawowo'nɨngkohe so'no ngko huno niyohi, nje Mpohwo hitoho engo ntopalofoho. Oso pa'nyoso sekwo nje hungkunomo tɨfi ito'no inɨngkafijo'manji sekwo huno ole waseyono. Jisas kako hitoho engo nejopalofoho. 11 Olo hungkuno selalokwe loso nje sɨmonyo iyoso sekwoe sɨmeho mo'mo wasewenonji selalokweno. Oso sɨmonyo iyoso sɨmeho mo'mo engo mɨkunɨmposo wasemo'nɨngkuhwono. 12 Jisas ose nalonto nalɨmento, Sekwo olo hungkuno losomo tɨfi ito'no finɨngkamno. Ngko sekumo sɨmeho sejopalokwe hopaso sekwo nom'ne a'amu somo ose uyɨmno. 13 A'amu fihwo kako kakoe a'amu somo sɨmeho uyɨhwoso so'no kako a'amu hisofe mango sohwamo ole ulɨmontonoho. Olo a'amu lomo sekwo nusɨhutofɨkuji ngkimnohini fonjanɨhumno. Ose loso sohwo kako kakoe a'amu hisomo sɨmeho uyoso yakolo'nnyo hweho. 14 Sekwo sohwasi nje hungkunomo tɨfi ito'no nnɨngkapɨfijo'manji sekwo nje a'amu ne hwasoho. 15 Syoho ulohofiyo sohumo kakoe hwe engo sohwo kako yo'mayo so'no yoloho mujo'njo hweho. O'o, syoho ulohofiyo sohwo kako syoho'nohini inyo hweho. I ngko olohonta nje syoho ntohofiyo hwasoho eso apa'no maselɨmnehono. O'o, yo'mayo hungkuno nje Mpohwo ntɨmentiso so'no ngko yolohoso nto selɨmalefoho. Oso'no olohonta nje a'amu hwasoho selalokweno. 16 Sekwo ngkimo sɨmo'mo nakwoe Hwe Engo'ne hwehontɨfi nɨhwosopo'mentohofɨhwonɨ'maho. O'o, ngko sɨmo'mo sekumo nje a'amu ne imo'nyo'ne sehwosopo'mentohe hwasoho. Sekwo ipisayo ne into'nyo'ne sehwosopo'mentohe hwasoho. Oseso olo syoho sejopalokwe loso sekwo yahonɨngkuji a'amu pi'nɨngoso nje hungkuno nupa'nɨngkuji tɨfi nnɨngkapɨfijoso nakwo'nji ne'no nohumantokutnnefoho. Oseso sekwoe syohoso ne imo'nɨngkuhwoso'no ne'no nowentɨhwonefoho. Sekwo ose ifijo'manji sekwo nje Mpohumo nje yofe ulɨkuji yo'mayo so'no jomo ulɨfijoso kako wosejapmmontonoho. 17 Oseso ngko olo hungkuno loso apa'no yokumpohn'nyo selalokweno. Sekwo a'amu somo sɨmeho nehopi uyɨmno.

A'amu hwahoponjo sohwa hofɨko Jisasɨye inomokomoyo sohwamne'no mangohwa imo'nɨfitnne so'ne hungkunofoho.

18 Hwe moya'mi hwahoponjo yahinomo tɨfi inɨngkowalokwofoso hofɨko sekwoe mangohwa imo'nɨfijo'manji sekwo huno ole waseyono, Sɨmo'mo ngkine'no mangohwa imo'nɨmalofofoho. 19 Sekwo olo hwaho loponjo yahinomo tɨfi inɨngkafijontentesi u, a'amu hwaho loponjoso sekumo nakwoe a'amu hwasoho selɨfijoso sɨmeho sejapɨkutnnesohilo. I oso'no sekwo olo hwaho loponjo a'amu hwasɨ'maho. O'o, ngko olo hwaho loponjo yahino somne'no i'waho ito'no ehumayo'ne so'no sehwosopo'mentohefoho. Oseso hwe moya'mi hwahoponjoso hofɨko sekwoe mango hwafoho. 20 Olo hungkuno nto selohe loso huno ito'no fɨsyafɨhupmno. A'amu syoho ulohofiyo sohwoe yofe engoso kakoe hwe engo sohwoe yofe engomo muyakolofonehoho. Oso hiso'no sekwo inɨngo seyɨhwoloho. Ngko sekwoe hwe engo sohwo'nɨmo a'amu hwahoponjoso wonyo ntohofɨwo'nɨngkohofo hopaso hofɨko sekumo woselohofantɨfeho. I hofɨko nje hungkunomo haloho nɨpopijo'manji hofɨko sekwoe hungkunomo haloho wosepeentɨfeho. 21 A'amu hwahoponjoso hofɨko Anɨtu nɨhwatɨmentiso so'no huno muyofoho. Oso'no sekwo ngkimo tɨfi nnɨngkapɨwo'nɨngkohofo so'no hofɨko yo'mayo wonyoso woselohofantɨfeho. 22 Ose nalonto nalɨmento, Ngko olo hwaho lopo mape'njo ntentesi nje hungkuno hofɨkimo mulontɨ'mtentesi hofɨkoe honɨngkano wonyo somne'no hofɨko tohino engo momafɨkutnnesohilo. I oso'no nje hungkunomo nto ko upa'nɨmotofoso hungkuno homo somo sɨmeho muyofoho. Oso'no sɨkuno ae'uyo somo ngko wonyo hwasoho ulɨ'me'no hofɨko mampi'nyo ifitnnefoho. 23 A'amu nje mangohwo imo'noso sohwo kako nje Mpohwo huhune'no mangohwo osenohini umo'nɨmonte hweho. 24 Yo'mayo syoho wonyoangkafo a'amuso hofɨko miyɨwo'nɨngkiyohofoso ngko hofɨko'njopo itɨhwamentohefoho. Oso syoho hiso ngko miyo'njo yontɨ'mtentesi hofɨkoe wonyo honɨngkano somne'no tohino engo momafɨkutnnesohilo. I oso'no olohonta oso syoho wopɨngo imentohe somo hofɨko tɨmo uhwonontɨfi hofɨko ngkine'no nakwolaho ntɨmentohofoso hofɨko ngko'nji nje Mpohwo huhwo'njiye mangohwa imo'nɨmentohofofoho. 25 Oseso hofɨkoe yahino homo somne'no oso Anɨtuye hungkuno anga'no mtɨ'mokinyoso ne imo'nalofoho. Oso hungkunoso olenoho. Ngko hofɨkimo wonyo ko mulohofahonɨngko hofɨko ngkine'no siki mangohwa imo'nnyofoho. 26 Ose nalonto nalɨmento, Ngko nje Mpohwoe pone'no nosɨ'mo Anɨtuye Towahuno yokumpohn'nyo sosofitofosyosehumayo'ne sohumo ngko sekuyepono wolɨhwatɨmonnoho. Oso Towahuno huhwo sohwo kako hungkuno ne'njo hweho. Kako Mpohwo'nji fosyohumawo'nɨngkiso sohwo kako sekuyepono wapmmontonoho. Kako nopɨhwosi ngkine'no hungkuno wolɨjwasemo'montonoho. 27 I sekwo ngko'nji nje syoho ema'mentohe sohonta humamotohwone so'no sekwo huhwahnnonji a'amu hopi'nonohino somo yo'mayo upa'nontɨfi uhwonontɨfeso filutɨhwafɨkuno.

1 Ngko sehwotɨ'mo'me sohonta sekwo ngkine'no hohujo ikinjanɨmopitnnohonji yo'mayo yolohoso lɨjwosemofalokweno. 2 Hwangku sekumo a'amu Jutafe tajo ango somta'ni wae wesemofantɨfeho. I tɨfi no'mo a'amu fehohnjoso hofɨko sekumo fonjasesyɨkujo'no hofɨko huno hwasyo ole wosyofɨsyantɨfeho, Nakwo Anɨtuye syoho wopɨngo ulohofiyɨwo'nɨngkuhwone so'no olo hwe lohumo wofonjosyano. Hwasyo ose wosyofɨsyantɨfeho. 3 Hwapɨngoso hofɨko nje Mpohwo'nji ngko huhwo'nnontnne'no huno nto'no muyofoho. 4 Tɨfi no'mo olo yo'mayo loso i'mofaposo sohonta hungkuno ngko sekumo lɨjwosemofalokwe loso'no sekwo apa'no huno ikwesyafɨhupitnne'enji selalokweno.

Anɨtuye Towahuno Wopɨngo sohwo kakoe syoho iyo'ne hungkunofoho.

Hohonta ngko sekwo'nji humamote sohonta ngko yo'mayo hilo so'no maselɨmmotefoho. 5 I oso'no olohonta Anɨtu kako ngkimo sekwoe ango lopone'no nɨhwatɨmentiso sohwoepono asomo wasɨ'mne hwo'nyoho. Ngko wasɨ'mne hwo'nyoho ko selahonɨngko sekwo ngkimo peho'ne nehwotɨ'mofalokuno eso mantohonyofoho. 6 I olohonta ngko wasehwotɨ'mo'mne'no yohono selohe so'no sekwo sekwoe sɨmeho tango seyohoho. 7 I oso'no ngko hungkuno nehopi'nohino waselɨmonne'no yohono. Ngko sekumo sefo'mayo'ne wasɨmonne'no yohono. Ngko sekumo masehwotɨ'mofe'njo'manji Towahuno sekumo yokumpohn'nyo sosofitofosesyohumayo'ne sohwo mose'manehoho. I oso'no ngko sɨme'manji ngko Anɨtuye Towahuno huhwo sohumo sekuyepono walɨhwatɨmonnoho. 8 Kako nopɨhwosi syoho hufa'u sɨhune yone hweho. Sɨmo'mo kako a'amufe yahino wonyo ujo ehontojwasyɨhwoso'no hofɨko yofe uhwopitnnefoho. Nom'ne syohoso kako honɨngkano ito'nohinoso utɨhwamontonoho. Nom'neso a'amu yahino wonyo somne'no tohino mayo'ne Anɨtu kako yano ulofiyone so'ntnne'no ulɨmontonoho. 9 Hofɨkoe yahino wonyo hwapɨngo so'no Anɨtuye Towahuno sohwo ole utɨhwamontonoho. Hofɨko ngkine'no sɨmeho hi'ntnnono montapmmotofo so'no honɨngkano wonyoso hi'njofoho. 10 Anɨtuye Towahuno sohwo kako honɨngkano wopɨngo ito'nohino so'no ole utɨhwamontonoho. Ngko honɨngkano homo somo into'nohino imote so'no nje Mpohwo kako ngkimo asomo ntɨmanefoho. Oseso sekwo olopo apa'no manohonɨfitnnefoho. 11 Anɨtuye Towahuno sohwo kako a'amufe yahino wonyo somne'no yano ulofiyone so'no ole utɨhwamontonoho. Anɨtu kako hwe wonyo Seten olo hwaho loponjo a'amu mokosyohumawo'nɨngkiso sohumo yano nto ulofimentiso so'no a'amu Setenɨmo inɨngkowalokwofo so'ntnne'no yano ulofiyɨhwoso'no hofɨko tohino engo nomapitnnefoho. Ose utɨhwamontonoho. 12 Ose nalonto nalɨmento, Ngko sekumo hungkuno pi'nɨngo engo waselɨmonji ko yoheso sekwo oso hungkuno selɨme somo huno seyone so'no hopoenohino hwasɨ'maho. O'o, hopi'nono selɨ'me'no sekwoe sɨmeho tango engo seyonoho. 13 I oso'no hwangku Anɨtuye Towahuno hungkuno nehopi'nohino sejo'ne sohwo kako nopɨhwoso'no kako sekwo'nji humahwosi kako yo'mayo hungkuno hopi'nonohino ne somne'no nto'no womikinjosehwatɨmontonoho. Kako kakoe huno mta'ni syofɨsyɨhwasi waselɨmonto'maho. O'o, yo'mayo hungkuno kako nupa'nɨwo'nɨngkiso so'no waselɨmontonoho. Oso'nji yo'mayo tɨfi no'mo imo'none so'ntnne'no waselɨmontonoho. 14 Kako nje hungkuno selɨmentoheso nomahwosi sekumo selɨhwoso'no yoloho neso lɨjwasemofɨhwoso'no sekwo huno nto'no waseimontonoho. Oso'no kako nje yofe engo so'no wosetɨhwamontonoho. 15 Yo'mayo nje Mpohwo mokosyohumasoso njefoho. Oso'no hungkuno nto seloheso ngko apa'no waselɨmonnoho. Anɨtuye Towahuno sohwo kako nje yo'mayo hungkunoso nomahwosi oso hiso'no wolosetɨhwamontonoho.

Sɨmeho tango seyontososo iwolo'mo lohofɨkuji apa'no sɨmonyo uyantɨfeho.

16 Sekwo we'enepi ngkimo manohonyo'njo uyantɨfeho. I oso'no sekwo we'enehwo humafɨkuji hwangku sohonta ngkimo nonohonɨfitnnefoho. 17 Ose nelahonɨngki kakoe inomokomoyo fehohnjo sohwona'ni ole hnnɨmentɨhwoni, Oso hungkuno nalisoso hwapɨngo neso peho'neto. Ole nalohi, We'enepi sekwo ngkimo monohonɨfitnnehofo. I oso'no we'enehwo nohumafɨkuji ngkimo apa'no nohonɨfitnnefoho. I nom'ne nalisoso ole, Ngko nje Mpohwoe pone hwo'nyoho. Ose nalisofoho. 18 Oso we'enehwo nalisoso peho'ne nalohoho. Yoloho neso nakwo huno monayohoyohoho. 19 Ose hnnontani nakwo Jisasɨmo ko mujo'njo yahonɨngkuhwoni Jisas nakwoe huno so'no huno uyahonɨngki nakumo nalɨmento, Sekwo olo hungkuno ngko selohe loso'no peho'ne hnnalokwofo. Ngko ole selohono. We'enepi sekwo ngkimo manohonɨfitnnehofo. We'enehwo humafɨkuji apa'no ngkimo wonohonantɨfeho. Ose selohono. 20 Ngko hungkuno nehopi'nohino waselɨmonne'no yohono. We'enepi yo'mayo tango nɨ'mane so'no a'amu hwahoponjo pi'nɨngo engoso hofɨko sɨmonyo yontanɨngkuji sekwo sohwasi humotaho engo lɨkuji sɨmeho tango waseyɨmontonoho. I oso'no sekwoe sɨmeho tango seyontososo iwolo'mo lohofɨkuji sekwo sɨmonyo engo uyantɨfeho. 21 Ose nalonto kako pahnnɨmo hungkuno ole nalɨmento, Olo selalokwe loso a'mu fisi kako mehomi aswo mayo pa'nyofoho. A'mu fisi kako aswo toho'ne yonto sɨmeho tohino umnonte so'no kakoe sɨmeho wopɨngo mmo'nyofoho. I oso'no kakoe mehomi aswo mahwosi kako oso tohino engo so'no inɨngo mofɨhwosi sɨmonyo uyɨmontonoho. 22 Oso mehomi aswo mawo'nɨngkohofo pa'nyoso sekwoe sɨmeho tango'nji humalofo. Oso'no hwangku sohonta ngko apa'no sehonɨ'me'no sekwo sɨmonyo engo apa'no uyantɨfeho. Oso sɨmonyo iyo homo somo wae yaofo'ne a'amu fihwo mohumuyohoho. O'o, awonoho. Sɨmonyo iyoso ne'no nowentɨhwonefoho. 23 Oso sɨkuno homo somo sekwo ngkimo yo'mayo yo'mayo so'no mantɨfitnnefoho. O'o, ngko hungkuno nehopi'nohini waselɨmonne'no yohono. Sekwo nje Mpohumo yo'mayo yo'mayo so'no jomo ulɨkuji nje yofe'nji ulɨfijo so'no kako ngkine'no syanɨfɨsyɨhwosi yo'mayo yo'mayoso wosejapmmontonoho. 24 Hohonta oso hopaso sekwo mimmotofɨhwasoho. O'o, nje yofeso Mpohumo mulɨmmotofo soku olohonta sekwo Mpohumo nje yofe'nji jomo ulɨfijoso yo'mayoso wosejapmmontonoho. Oseso sekwo sɨmonyo nehopi'nohini uyantɨfeho.

Jisas kako olo hwaho loponjo yahino somo yakolo'nnyo hweho.

25 Ngko yo'mayo yo'mayo so'no pahnnɨmo hungkuno selɨwo'nɨngkohefoho. I tɨfi no'mo ngko pahnnɨmo hungkunoso maselɨmnehono. O'o, ngko nje Mpohumne'no hungkuno yoloho'nohini wolɨjwasemo'monnoho. 26 Oso hohosohonta sekwo yo'mayo so'no Anɨtumne'no jomo ulɨfijo sohonta ngko ajwo sopo sekumo sefo'mayo'ne mohumamnehono. O'o, sekwo Mpohumo nje yofe ulɨfijoso kako yo'mayo so'no wosejapmmontonoho. 27 Hwapɨngoso sekwo ngkimo sɨmeho hi'ntnnono ntapontɨfe sohwahnne'no Anɨtu nɨhwatɨmentiso so'no huno seinyo sohwahnne'no Anɨtu kako sɨmeho sejopalofoho. Kako sekwoe hungkunomo wosepa'nɨmontonoho. 28 Ou nehopi. Hohonta Mpohwo kako nɨhwatɨmentiso sohwo'ni olo hwaho lopono pmmentohe hwo'nyoho. I olohonta ngko olo hwaho lopo sehwotɨ'mohm'mo nje Mpohwoepono asomo wasɨmne hwo'nyoho. 29 Ose nelahonɨngki kakoe inomokomoyo sohwona'ni ulɨmentɨhwoni, Ihwoni. Olohonta kɨko pahnnɨmo hungkuno monalohoyohino. O'o, hungkuno yoloho'nohini nalohino. 30 Oso'no nakwo yo'mayo so'no huno nayohoho. Kɨko huno hwapɨngo'njo hwosoho. Nom'ne a'amu hofɨko huno'nohini syofɨsyantɨfeso hofɨkoe huno hiso kɨko huno kinyo hwosoho. Oso'no nakwo olo hilo so'no sɨmeho hi'ntnnono uyalokuhwono. Kɨko Anɨtu mta'ango nehopi'nohino hwosoho. 31 Ose ulahonɨngkuhwoni Jisas nalɨmento Olohonta sekwo ngkine'no sɨmeho hi'ntnnono nehopi lontopantɨkwofo. 32 Upa'nɨmno. Sekumo tango se'mayo'ne sɨkunoso we'enepi umo'nɨmonte'no yohoho. I nto i'mofapohoho. Oso'no hofɨko ngkimo nɨkekujo'no sekwo ngkimo nɨhwotɨ'mofɨkuji sekwo anga'no anga'no sekwoe ango'mne'no esesamo wohumpeentɨfeho. Oso'no sekwo ngkimo nɨhwotɨ'mofɨkujo'no ngko'nohini nje mango sohwanji wohumamonnoho. I oso'no ngko'nohinɨ'maho. O'o, Mpohwo kako huhwo ngko'nji wohumamontonoho. 33 Yo'mayo tango se'mayo so'no ngko olo hungkuno hiloso selalokweno. Tango hiso se'mahonɨngkuhwosi sekwo ngkine'no ole wosyonɨfɨsyantɨfeho. Ngko Jisasɨmo ufohi'nonji kako'nji humalohwono. Ose syanɨfɨsyɨkuji sekwo sɨmeho wopɨngo'nji wohumantɨfeho. Sekwo olo hwaho lopo nohumentanɨngkuji yo'mayo tango wonyoso woselohofantɨfeho. I oso'no sekwo yokumpohn'nyo lohofɨkuji sɨmonyo fiyɨmno. Hwapɨngoso ngko olo hwaho loponjo yahino somo hwotoho fenji nto uyakolo'maleno. Ose nalɨmentisofoho.

Jisas kakoe inomokomoyo sohwamne'no Anɨtu ufo'mane'ento jomo ulɨmentisofoho.

1 Jisas kako oso hungkuno inomokomoyo sohwona'nɨmo nalonto kako ahwomomo tɨmo uhwononto kanɨngkwohumo jomo ulɨmento, Mpohwo, nje sɨkuno nto i'mofapohoho. Olo a'amu lohwamo nje yofe engoso utɨhwaho. Oseso kɨko utɨhwahojo'no ngko jɨje hwomu sohwo'nne'no yofe engo nɨhwofɨkujo'no hofɨko jɨje yofe woho'nomantɨfeho. 2 Kɨko a'amu hopi'nonohino somo ngkimo enjwa'mo uhumatɨ'mentohinofoho. Kɨko a'amu fehohnjo ntapmmentohinoso kako songo ne'no humayoso yano uyɨne'enji ntapmmentohinofoho. 3 Songo ne'no humayo'neso olenoho. A'amu hiso hofɨko nekwo'montosa'ine'no yofe ole wehwofantɨfeho. Kɨko'nohini Anɨtu nehwosoho wokuhwofantɨfeho. Ngko Jisas Kɨlais sohwo'nne'no ole wonɨhwofantɨfeho. Nakwoe hwaho lopone'no Anɨtu uhwatɨmentiso hweho. Ose wonɨhwofantɨfeho. Yofe ose nɨhwofɨkuji hofɨko wopɨngo'nohini humafɨkuji songo ne'no humantokutnnefoho. 4 Ngko olo hwaho lopo nohumanji jɨje yofe engoso jɨje yokumpohn'nyo engoso nto utɨhwamalefoho. Yo'mayo syoho ntapmmentohinoso ngko moi'wo nto esojwao'malefoho. 5 U, Mpohwo hohonta olo hwaho loso nekwo mamtɨ'mokiyo sohonta ngko kɨko'nji nohumanji ngko yo'mayo yokumpohn'nyo mokosyohumunyo hwo'nyoho. Ngko kɨko'nji humanji mokosyohumamote pa'nyoso oso yofe engo so'nji yokumpohn'nyo engo so'nji kɨko ngkimo asomo ntape. 6 Olo hwe lohwa hwaho loponjo ntapmmentohino lohwa ngko hofɨkimo kikine'no lutɨhwamale so'no hofɨko kikine'no yofe kɨhwofalokwofo. Jɨje a'amu huhwo sohwa kɨko ngkimo ntopahonɨngkini hofɨko jɨje hungkunomo haloho pentɨfi aho yokumpohn'nyo kemokosyohumantɨfi tɨfi inɨngkopalokwofo. 7 Oso a'amu kɨko ntapmmentohinoso yo'mayo hungkuno ulahonɨngko hofɨko huno ole syafɨhu'mentohofi, Olo hwe lohwoe hungkunoso Anɨtu mta'angofoho. Huno ose unyofoho. 8 Yo'mayo hungkuno kɨko ngkimo ntapmmentohinoso ngko lutɨhwahonɨngko hofɨko sɨmeho hi'ntnnono uyontɨfi huno ole uyalofoho. Hohonta ngko kɨko'nji humanji kɨko olo hwaho lopone'no nɨhwatɨmentohinofoho. Oso hungkuno somo hofɨko sɨmeho hi'ntnnono uyalokwofo. 9 Olo a'amu huhwo lohwamne'no jomo wakilɨmonne'no yohono. A'amu nom'ne olo hwaho loponjo somne'no mokilalokuyohono. O'o, olo a'amu kɨko ngkimo ntapmmentohino lohwamne'no jomo kilalokweno. Jɨje a'amu hwafoho. 10 Hwe moya'mi hopi'nonohinoso nje hungkunomo tɨfi inɨngkawowo'nɨngkohofoso kɨko'ne mehomifoho. Jɨje mehomi huhwo sohwa ngko huhwo'nnonji nekwoe mehomifoho. Hofɨko nje yofe engo ho'nomalokwofo. Nje yo'mayo yo'mayo hopi'nonohinoso jɨjefoho. Jɨje yo'mayo yo'mayo hopi'nonohinoso njefoho. 11 Ngko kikiyepono wosapmmo lɨ'mo hofɨkimo uhwatɨ'mo'monnoho. Olo hwaho lopo hofɨko'nohini wohumantɨfeho. Oso'no nje Mpohwo wopɨngo'nohino sohwosi olo a'amu lohwa hofɨko ngkimo sɨmeho ntapɨfitnne'enji uhwosopo'mentohino loso yo'mayo yahino wonyo somo uyakolopitnne so'no kɨko jɨje yokumpohn'nyo engo so'nji ufo'mahoji umokosyohumaho. Kɨko ngko'nji sɨmeho afa inɨmotohwoyo hopaso hofɨko sɨmeho afa unɨfe. 12 Ngko hofɨko'nji nohumanji oso yokumpohn'nyo kɨko ngkimo ntapmmentohino so'nji ngko hofɨkimo wopɨngo umokosyohumamote so'no anga'no ngkine'no hohujo nɨhu'nahone mikinjanɨmofefoho. O'o, ntapmmentohino hopi'nonohino sohwa wopɨngo nnɨngkopalokwofo. A'amu anga'nohino sohumne'no a'amu Anɨtuye hungkuno mtɨ'mokumentohofoso ne imo'none hopaso kako anga'nohino sohwo tɨkanomo wene sohwo pɨwahu'mentisofoho. 13 Olohonta olo a'amu lohwamo uhwotɨ'mahm'mo kikiyepono wosapmmonnoho. Ngko hofɨko'nji olopo nohumanji yo'mayo hungkuno hofɨkoe sɨmeho wopɨngo umo'none'enji kilalokwe so'no nje sɨmeho wopɨngo nɨmo'nɨwo'nɨngkiso hopaso engo womantɨfeho. 14 Jɨje hungkunoso olo a'amu lohwamo nto umotefoho. A'amu hwe moya'mi olo hwaho loponjoso hofɨkoe mangohwa imo'nɨmentohofofoho. Hwapɨngoso ngko hopa hofɨko olo hwaho loponjo yo'mayo somo minɨngkayo'njo hwafoho. 15 Ngko hofɨko'nji yanɨmofo'ne makilohoyohono. O'o, ole kilalokweno. Hofɨko olo hwaho lopo nohumentanɨngkuji oso hwe wonyo Seten kako a'amu lohwamo wonyo umokonohonji kɨko hofɨkimo hofiyo mokosyohumane'enji kilalokweno. 16 Ngko olo hwaho loponjo yahinomo inɨngkunyo hwonɨ'maho. Oso pa'nyoso hofɨko huhwanji olo hwaho loponjo yahinomo inɨngkunyohwa'maho. 17 Mpohwo jɨje hungkunoso hungkuno ne'njofoho. Oso hungkuno hiso olo a'amu lohwamo kɨko itɨhwahonɨngkiji hofɨko hofɨkoe huno ehohosasyɨhwoso'no hofɨko yo'mayo yahino wonyomo ulɨko'mafɨkuji jɨje yahino wopɨngo'nohini ikuji jɨje a'amu ne wopɨngo umo'nantɨfeho. 18 Hohonta kɨko ngkimo nɨhwojahonɨngkini ngko a'amu olo hwaho loponjo lohwanjo ajwo'mo humamotefoho. Oso pa'nyoso ngko olo a'amu lohwamo hwe moya'mi hwahoponjo lohwanjo ajwo'mo wohumafenji hofɨkimo uhwojalokweno. 19 Ngko kɨko'nji nohumahm'mo olo syoho sɨmo'mjolo uyɨmonne'no yohono a'amu lohwa hofɨko jɨje hungkuno so'ne huno ufohotofohojo'no hofɨko jɨje yahino wopɨngo mayo'ne ufo'ma'mne'no yohono. Oseso hofɨko jɨje a'amu ne wopɨngo umo'nantɨfeho. 20 Ose ulonto ole ulɨmento, Olo a'amu lohwamnohini mokosyohumaho eso makilɨmnehono. O'o, hwe moya'mi nom'neso hofɨko olohwafe hungkunomo haloho upa'nɨngkuji ngkimo sɨmeho hi'ntnnono ntapɨfijo somo kɨko hofiyo mokosyohumaho kilalokweno. 21 Ngko ole'no nɨmo'nɨngkohoho. Hwe moya'mi hopi'nono nekumo sɨmeho ejapɨkuji hofɨko nekwo hopa sɨmeho hunoso afa'njo umo'nantɨfeho. Mpohwo, kɨko ngkimo nɨhumahnno. Ngko kikimo kuhumaleno. Oso hopaso hofɨko nekumo ehumayo so'no nɨmo'nɨngkohoho. Hofɨko ose ehumafɨkujo'no a'amu hwahoponjoso hofɨkoe yahino wopɨngo somo uhwonɨngkuji ole wosyofɨsyantɨfeho. Ou, Anɨtu kako Jisas Kɨlais sohumo nakwoe hwaho lopo uhwatɨmentiso sohweho lɨkuji ngkine'no sɨmeho wontɨpantɨfeho. 22 Jɨje yokumpohn'nyo kɨko ntapmmentohinoso ngko hofɨkimo uyɨmaleno. Oseso ole'no nɨmo'nɨngkohoho. Nekwo sɨmeho afa inontai humalohwoyo hopaso hofɨko sɨmeho afa'njo umo'nantɨfeho. 23 Jɨje hungkuno lontnneso nje sɨmehomo mnawojo hopaso nje hungkuno hofɨkoe sɨmehomo ose mnaweho. Oseso hofɨko sɨmeho afa inɨngkuji wopɨngo humafitnne so'no nɨmo'nɨngkohoho. Oseso a'amu hwahoponjoso hofɨkoe humayo somo uhwonɨngkuji ole wohnnantɨfeho. Anɨtu kako Jisasɨmo nakwoe hwaho lopone'no nehopi uhwatɨmentiso hweho. Anɨtu Jisasɨmo sɨmeho uyɨwo'nɨngkiso hopaso kako olo a'amu lomo sɨmeho uyalofoho. 24 Ose ulonto ulɨmento, Mpohwo, ole'no nɨmo'nɨngkohoho. Hwe moya'mi kɨko ntapmmentohino hopi'nonohinoso hofɨko ngko'njopo wohumantɨfeho. Olo hwaho loso nekwo mamtɨ'mokiyo sohonta kɨko sɨmeho ntaponji jɨje yofe engoso jɨje yokumpohn'nyo engo ntapmmentohinofoho. Olo a'amu lohwa hofɨko oso yofe engo so'nji yokumpohn'nyo engo so'nji ntapmmentohino somo uhwonɨfitnne so'no nɨmo'nɨngkohoho. 25 Ou Mpohwo, kɨko yo'mayo yahino ito'nohino iwo'nɨngkino sohwosimo olo hwaho loponjo a'amulo kikimo huno muyofoho. I oso'no ngko kikine'no huno niyohoho. Olo a'amu ngko'njo lopo humalofoso hofɨko kɨko ngkimo nɨhwatɨmentohino sohwo'nne'no huno unyofoho. 26 Jɨje yahino yo'mayo so'no hofɨkimo nto utɨhwamaleso ngko ne'no utɨhwahm'mnefoho. Oseso kɨko sɨmeho engo ntopantokuno hopaso hofɨko sɨmeho engo unantɨfeho. Ngko hofɨkimo humahm'me'no kikimta'angoso hofɨko sɨmeho ose unantɨfeho. Jisas kako Anɨtumo ose ulɨmentisofoho.

Jutas kako Jisasɨmne'no mango sohwamo tokoyo'ofo imentisofoho.

1 Jisas kako Anɨtumo ose ulahonɨngki kako kakoe inomokomoyo sohwona'ni nakwo oso hopo sopo ulɨko'mentani mijo we'e Kitɨlon wekentani nongkihnta'ni iyo uyo syoho sopo umentɨhwonefoho. 2 Jutas kako Jisasɨmne'no tokoyo'ofo yone sohwo kako oso iyo uyo syoho sopone'no huno unyo hweho. Hwapɨngoso sɨkuno pi'nɨngo engo somo Jisas kakoe inomokomoyo sohwona'nnonji oso hopo sopo ne'no umotohwonefoho. 3 Hwe yofe engo tajo ango syoho'njo sohwanji a'amu Falisi sohwanji hofɨko a'amu hwapɨfe tɨfo'njo sohwanji a'amu itokuso'njo sohwanji Jutasɨ'nji uhwojahonɨngkofi Jutas kako oso iyo uyo syoho hopo sopone'no ipemotawomentisofoho. Hofɨko kwefoho'nji sikiloho'nji yo'mayo ikujoho so'nji motapmmentohofofoho. 4 Jisas kako kakine'no yo'mayo u'mane so'no sɨmo'mo huno nto unyo sohwo humentanjopo a'amu sohwamo nuhwonɨtɨmanto ulɨmento, Sekwo tɨhune'no tɨpeelokwofo. 5 Ose ulohonɨngkahonɨngki hofɨko ulɨmentohofi, Nakwo Jisas Nasalet mta'ango sohune'no tɨpeelokuhwono. Ose ulahonɨngkofi Jisas ulɨmento, Ngko olo huhwo'nyoho. Ose ulɨmentisofoho. Jutas oso a'amu Jisasɨmne'no tokoyo'ofo yone sohwo oso a'amu huhwo sohwanji humohumantisofoho. 6 Jisas kako olo huhwo'nyoho ulɨmentiso so'no hofɨko iyoho yontɨfi hohokuhano asohosile we'enepi wentɨfi hwahopo pɨwahu'mentohofofoho. 7 Oseso Jisas kako apa'no ulɨmento, Sekwo tɨhune'no tɨpeelokwofo. Ose ulahonɨngki hofɨko ulɨmentohofi, Jisas Nasaletnnta'ango sohune'nefoho. 8 Ose ulahonɨngkofi Jisas ulɨmento, Nto selohefoho. Ngko olo huhwo'nyoho. Sekwo ngkimo wantɨmantɨfi pohofɨhwasi'manji nje inomokomoyo lohwamo tɨmo'nohini fohonɨhwatɨmno. Hofɨko wahumpopɨfe. Jisas ose ulɨmentisofoho. 9 Sɨmo'mjo Jisas kanɨngkwohumo ole nto ulɨmento, Oso a'amu ntapmmentohino sohwamo ngko mokosyohumamote so'no anga'no ngkine'no hohujo nɨhu'nahone mikinjanɨmofefoho. Oso hungkuno ulɨmentiso so'no huno ikwesyafɨsyonto wahumpopɨfe ulɨmentisofoho. Oso hohosohonta oso hungkuno kakoe inomokomoyo sohwamne'no ulɨmentisoso ne imo'nɨmentisofoho. 10 Saimoun Pita kako nohumanto hwakuhwajo iwosɨpema'nonto a'amu fihwoe haloho angahohnjo somo loku'mentisofoho. Lojwahonɨngki halohoso pɨwahu'mentisofoho. Oso hwe huhwo sohwo kako a'amu yofe engo'njo tajo ango syoho'njo sohwoe syoho ulohofiyo hweho. Kakoe yofeso Malɨkos. 11 Pita ose yahonɨngki Jisas ulɨmento, Jɨje hwakuhwajoso asoso'mo fotofahinyo. Kɨko huno pipi kiyalofoho. Yo'mayo tango nje Mpohwo, Nje hwomu womano, lɨmentisoso ngko woma'mo. Oso'no hwakuhwajoso fotofahinyo.

Hofɨko Jisasɨmo Anasɨyepono ipemotamentohofofoho.

12 Oseso oso a'amu itokuso'njo sohwanji a'amu Jutafe hwapɨfe tɨfo'njo sohwanji hofɨkoe hwe engo sohwanji hofɨko Jisasɨmo aho kentɨfi kakimo impe intokwomentohofofoho. 13 Sɨmo'mo hofɨko Anasɨyeono motawomentohofofoho. Anas huhwo sohwo kako Kaiyofasɨye kanengkwohweho. Kaiyofas sohwo kako oso soswo somo a'amu tajo ango syoho'njo so'no yofe engo ma'mentisofoho. 14 Oso Kaiyofas huhwo sohwo kako a'amu Juta somo ole ulɨmento, Yahino ito'nohinoso olenoho. Olo hwe anga'nohino lohwo kako hwe moya'mi hopi'nonohino somne'no ufo'mayo'ne poyo wape'nono. Ose nto ulɨmentisofoho.

Pita ulɨmento, Ngko Jisasɨmne'no huno maniyohoyohoho lɨmentisofoho.

15 A'amu sohwa hofɨko Jisasɨmo ipemotosontanɨngkofo somo Saimoun Pita'nji ngko Joun'nnonji nekwo Jisasɨmo inɨngkasɨmentɨhwoyofoho. Oso hwe yofe engo'njo tajo ango syoho'njo sohwo kako ngkine'no huno uyo so'no ngko Jisasɨ'nji oso hwe yofe engo'njo sohwoe tojo somo humentohefoho. 16 I oso'no Pita kako mempo hohnta'ni hoku'yo sopo fosyohumamentisofoho. Oseso ngko hwe yofe engo'njo huno ninyo sohwo'ni ngko a'mu hoku'yo mokosyohumayo simo Pitamo ipemotasyuyo'ne ulɨmentohefoho. Oso a'mu hisi Pitamo ipemotaswonto 17 Pitamo ulɨmento, U, kɨko huhwosi olo hwe lohwoe inomokomoyo hwosilɨkeno. Ose ulahonɨngki Pita ulɨmento, Awonoho. Ngko'maho. Ose ulɨmentisofoho. 18 Oso ango soponjo syoho ulohofiyo so'nji a'amu hwapɨfe tɨfo'njo sohwanji kwongkwongo usahonɨngki toho intofontɨfi a'apaho toho imokinɨmentohofofoho. Pita huhwo'nji hofɨko'nji nolohofontɨfi a'apaho toho imokinɨmentohofofoho.

Hwe yofe engo'njo tajo ango syoho'njo sohwo Jisasɨmo hungkuno ulohonɨmentisofoho.

19 Hwe yofe engo'njo tajo ango syoho'njo sohwo kako Jisasɨye inomokomoyo sohwantnne'no yo'mayo hungkuno Jisas hofɨkimo lutɨhwawo'nɨngkiso so'ntnne'no Jisasɨmo ulohonɨmentisofoho. 20 Oseso Jisas ulɨmento, Ngko hwe moya'mi hopi'nonohino somo utɨhwa'nyoponohini lutɨhwawo'nɨngkohe hwo'nyoho. Engolopohamo ngko Anɨtuye tajo ango engo'njo soponjo tajo ango we'eso a'amu Juta uhu'mokuwo'nɨngkohofo sopo nje yo'mayo hungkunoso lutɨhwamentohefoho. Ngko hungkuno hiyaso'mo majofoho. 21 Oso'no kɨko ngkimo peho'no ntohonantokuno. Kɨko oso a'amu nje hungkuno upa'nɨwo'nɨngkohofo somo ulohonyo. Oso hungkuno ngko lɨwo'nɨngkoheso hofɨko huno moi'wo'nnyofoho. 22 Ose ulahonɨngki hwe hwapɨfe tɨfo'njo fihwo kako Jisasɨ'njopo lohofonto Jisasɨye manjijohopo hwanɨngo fonjonto ulɨmento, Kɨko olo hwe yofe engo'njo lohumo hungkuno oso pa'nyoso nulohotoho. Ito'nohini uso. 23 Ose ulahonɨngki Jisas ulɨmento, Ngko hungkuno wonyo ulohe so'no lanɨfonjohino. I ngko hungkuno wonyo ulohe'manji kɨko olo a'amu lohwamo uso. I ngko hungkuno nehopi ulohe'manji peho'ne nɨfonjohino. Ose ulɨmentisofoho. 24 Oseso oso impe Jisasɨmo into'mentohofoso Jisas into'nowentanɨngki Anas kako oso hungkuno Jisasɨmo ulohonɨmentiso sohwo kako Kaiyofas hwe yofe engo'njo tajo ango syoho'njo sohwoepono lɨhwatɨmentisofoho.

Pita apa'no Jisasɨmne'no ngko huno maniyohoyohoho ulɨmentisofoho.

25 Saimoun Pita a'amu'nji lohofonto a'apaho toho imokinontanɨngki a'amu huhwo sohwo ulɨmentohofi, Kɨko huhwosi kakoe inomokomoyo hwosilɨkeno. Ose ulahonɨngkofi Pita hwasyo hungkuno ulɨmento, Awonoho. Ngko kakoe inomokomoyo hwonɨ'maho. 26 Ose ulahonɨngki oso hwe yofe engo'njo sohwoe syoho ulohofiyo nom'ne sohwo kako oso a'amu Pita kako haloho lojwao'mentiso sohwoe a'amu sohwo kako Pitamo ulɨmento, Ou, nehopi. Kɨko Jisasɨ'nji oso iyo uyo syoho sopo nohumentanɨngkini ngko kohonɨngkohe hwosoho. 27 Ose ulahonɨngki Pita apa'no ulɨmento, Awonoho. Ngko osoho hwonɨ'maho. Ose ulahonɨngki yɨhufo tosɨka yokaso oso hohosohonta ho'nɨmentisofoho.

Hofɨko Jisasɨmo Pailotɨyepono ipemotasɨmentohofofoho.

28 A'amu sohwa hofɨko Kaiyofas nta'ni Jisasɨmo utɨmantɨfi oso hwe engo a'amu Loum mta'ango sofe hwe engo hwaho mokosyohumayo sohwoe ango engo sopone'no imɨngo ne hosɨwo hosɨwe iyo so'nji Jisasɨmo ipemotamentohofofoho. Oso a'amu huhwo sohwa hofɨko hofɨkoe Anɨtu Kako A'amu Isɨlael somo Uyakolo'mentiso somne'ne Syafɨsiyo Sɨkuno Engo iyoho humayo somne'no nto'no esyohumayo'ne hofɨkoe he a'apaho yo'mayoso mijo nto yatɨku'mentohofofoho. Oso'no hofɨko huno ole syafɨhu'mentohofi, A'amu Loum nakwoe yahinomo minɨngkayo'njo sohwafe angomo nakwo syukwato lohofɨhwosi kiho'njo imo'nɨngkuhwasi nakwo elɨjwanyo engo sopo wopayo monanehwono. Ose syafɨsyontɨfi mempo hohnta'ni humamentohofofoho. 29 Oseso oso hopo sopo nohumentanɨngkofi Pailot mempono noswaponto ulɨmento, Sekwo olo hwe lohumo olo hungkuno nto'no mɨhwajiyo ango lopone'no peho'no ipemotapohofɨhwolo. Peho wonyo imaso'neto. 30 Ose ulahonɨngki hofɨko ulɨmentohofi, Olo hwe lohwo kako yahino wonyo miyo'njo yontentesi nakwo olo ango lopo kikiyepono mipemotapɨhwonesohilo. 31 Ose ulahonɨngkofi Pailot ulɨmento, Sekwo a'amu Juta soku sekwoe honɨngkano hungkuno somne'no huno syafɨsyɨkuji kakoe hungkunoso nto'no mɨhwatɨmno. Ose ulahonɨngki a'amu sohwa ulɨmentohofi, Sekwo a'amu Loum sohwasi nakwo a'amumo fonjasiyo'no honɨngkano somo pɨjwonaofɨwo'nɨngkohofofoho. Ose ulɨmentohofofoho. 32 Hohonta Jisas kako kakoe a'amu somne'no kako poyo imo'none so'no lutɨhwamentiso sohonta kako a'amu Loum sohwa a'amumo iyo hwojiyafɨku'nnyo sopo fonjinto'ofahumotofo hopaso wape'nɨmontonoho nalɨmentisofoho. Oso hohosohonta oso hungkunoso ne umo'nɨmonte'no yohoho. 33 Oseso Pailot kako ango engo somo apa'no swonto Jisasɨmne'no joho lɨtɨmanto ulɨmento, Kɨko a'amu Jutafe Hwe Engo hofɨkoe hwaho mokosyohumayo'ne hwosilaho. 34 Ose ulahonɨngki Jisas ulɨmento, Oso hungkuno ntohinoso jɨje huno mta'ni lantohino. I a'amu Jutaso hofɨko kilɨmalofoyoho kantohino. 35 Ose ulahonɨngki Pailot ulɨmento, Ngko a'amu Juta hwo'ntaho. Jɨje temtitofo Juta sohwanji hwe yofe engo'njo tajo ango syoho'njo sohwanji hofɨko ngkiyepono kumotapohofo. Kɨko peho imahnno'neto. 36 Ose ulahonɨngki Jisas ulɨmento, Ngko a'amumo mokosyohumayoso olo hwaho lopo'maho. O'o, ngko olo hwaho loponjo a'amumo mokosyohumayo'ne hwo'ntontosi nje inomokomoyo sohwa hofɨko a'amu Juta sohwanji fongki'nɨfijoso a'amu Juta sohwa monɨmafɨkutnnesohilo. I oso'no ngko a'amumo mokosyohumayo kɨko pa'nyo hwonɨ'maho. 37 Ose ulahonɨngki Pailot ulɨmento, Ose'manji kɨko hwe engo a'amumo mokosyohumayo hwosoho. Ose ulahonɨngki Jisas ulɨmento, Kɨko hwe engo a'amumo mokosyohumayo hwosoho ntohinoso hungkuno nto'nohinoho. Ngko olo hwaho lopo imo'nɨmentoheso syoho anga'nohino hungkuno nehopi'nohino lɨjwaofo'neso imo'nɨmentohe hwo'nyoho. A'amu hofɨko hungkuno nehopi'nohino umo'nɨwo'nɨngkisoso nje hungkunomo haloho pewo'nɨngkohofofoho. 38 Ose ulahonɨngki Pailot ulɨmento, A'amu hungkuno ne so'no huno unyoso tɨhwolo. Ose ulɨmentisofoho.

Pailot kako Jisasɨmo iyo hwojiyafɨku'nnyo somo fonjinto'ofasiyo'ne lɨmentisofoho.

Pailot ose ulonto kako mempono a'amu Jutafepono apa'no noswonto ulɨmento, Ngko olo hwe lohwo kakoe yahino wonyoso motɨpɨhwonɨngkiyohono. 39 I oso'no sekwoe yahinoso ole wo'nnyofoho. Anɨtu A'amu Isɨlael somo Uyakolo'mentiso somne'no Syafɨsiyo Sɨkuno Engo iyoho humayo somo sekwoe a'amu anga'no impo'ango mta'ni isɨhutofomayo'ne jomo ntɨwo'nɨngkohofɨhwasoho. Oseso ngko sekwo a'amu Juta sokuye olo hwe engo lohumo usɨhutofonehwajono lasemo'nɨngkohoho. 40 Ose ulahonɨngki hofɨko mango engo mohm'no ulɨmentohofi, Olo hwe lohumo nusɨhutofohotoho. O'o, kɨko Mpolapas sohumo usɨhutofo. Mohm'no ose ulɨmentohofofoho. Mpolapas huhwo sohwo kako a'amumo fonjasyonto a'amufe yo'mayoso hufo ma'mojo hweho. Hwe wonyo hweho.

1 Oseso Pailot kako Jisasɨmo utɨmanto kakoe a'amu itokuso'njo sohwamo impe'nji fongkupmno, ulɨmentisofoho. 2 Hofɨko Jisasɨmo nofonjontɨfi impe yongo'njoso nokikisontɨfi hnnɨmentohofi olo hwe yofe engo'njo hwaho mokosyohumayo sohwo mnokino'manji'mofo pa'nyofoho. Ose lontɨfi Jisasɨye mnokinopo monji'mofahumentohofofoho. Ose yontɨfi hofɨko manji'mofo sawemo miyo'nohinoso a'amu hwaho mokosyohumayo yofe engo'njo sohwa iwo'nɨngkohofo hopaso Jisasɨmo uloho'mentohofofoho. 3 Ose ulohofontɨfi kakimo u'mantɨfi sitofo ulontɨfi ulɨmentohofi, Ou, Hwe Engo sohwosi, kɨko a'amu Juta somo mokosyohumawo'nɨngkino sohwosilaho. Ose ulontɨfi kakoe manjijohopo fongku'mentohofofoho. 4 Osohonta Pailot apa'no mempono noswaponto a'amu Juta somo ulɨmento, Ihwoni. Ngko mempone'no ipemotoswapmme sohwo sekwo huno waseyono. Kako wonyo honɨngkano ane hweho. 5 Ose ulahonɨngki Jisas kako mempono swapmmentisofoho. Oso mnokino manji'mofo yongo'njo mtɨ'mokumentohofoso Jisasɨye mnokinopo monjimofahumentohofofoho. Oso manji'mofo miyo'nohinoso hi'njo hweho. Jisas osopo nohumentanɨngki Pailot a'amu somo ulɨmento, Ihwoni, olo hwe lohumo uhwonɨmno. 6 Ose ulahonɨngki a'amu yofe engo'njo tajo ango syoho'njo sohwanji a'amu hwapɨfe tɨfo'njo sohwanji hofɨko Jisasɨmo uhwonontɨfi joho mohm'no ulɨmentohofi, Iyomo fonjinto'ofahumno. Iyomo fonjinto'ofahumno. Ose ulahonɨngkofi Pailot ulɨmento, Olo hwe lohwoe honɨngkano wonyoso ngko motɨpɨhwonyo'njo yohono. Sekwo soku utɨmafɨkuji iyomo fonjinto'ofahumno. 7 Ose ulahonɨngki a'amuso ulɨmentohofi, Olo hwe lohwo kako Anɨtumne'no sitofo nalɨmentisofoho. Ngko Anɨtuye Hwomu hwo'nyoho nalɨmentisofoho. Oso'no nakwoe honɨngkano hungkuno olo yahino loso'no wape'nono nalɨwo'nɨngkohoho. 8 Pailot oso hungkuno homo somo upa'nonto iyoho engo mɨkunɨmposo unɨmentisofoho. 9 Pailot oso ango engo somo apa'no noswonto Jisasɨmo ulɨmento, Kɨko ntɨ'mta'ni pmmentohino hwosilo. Ose ulahonɨngki Jisas oso hungkuno ulɨmentiso somo asomo mujo'njo yahonɨngki 10 Pailot ulɨmento, Pipilo. Kɨko ngkimo hungkuno manjoso mampi'nyo peho'no humahnno. Ngko kikimo kisɨhutofo'ne yokumpohn'nyoso hi'njo hwo'nyoho. I ngko kikimo iyomo fonjinto'ofakisiyo'ne yokumpohn'nyoso hi'njo hwo'nyoho. Oso'no kɨko huno makiyoho liyohoho. 11 Ose ulahonɨngki Jisas ulɨmento, Oso yokumpohn'nyo engo mokosyohumahnnoso Anɨtu ahwomomo humaso sohwo kako kikimo mokijape'njo yontentesi kɨko ngkimo wonyo mantohofohotnnesohilo. Oso a'amu ngkimo jɨje ahomo ho'nanɨhumalofo sohwa hofɨkoe wonyoso jɨje wonyo somo yakolo'nnyofoho. Hofɨkoe wonyoso mɨkunɨmposofoho. 12 Pailot kako Jisasɨye hungkunomo upa'nonto Jisasɨmo usɨhuto'mo lonto huno pi'nɨngo engo syafɨhu'mentisofoho. A'amu Juta sohwa oso hiso'no upa'nontɨfi hofɨko Pailotɨmo mango engo ulɨmentohofi, Kɨko olo hwe lohumo isɨhutofɨhwaji so'manji kɨko Sisa hwe yofe engo hwofilo'nnyo sohwoe a'amu hwosɨ'maho. A'amu fihwo ngko a'amumo mokosyohumayo hwo'nyoho lɨwo'nɨngkiso sohwo kako Sisafe mango hweho. 13 Pailot kako oso hungkuno homo somo upa'nonto kako Jisasɨmo mempono ipemotoswapmmentisofoho. Noswaponto Pailot kako hungkuno nto'no mɨhwajiyo'ne epohumayo sopo ampo humamentisofoho. Oso hopo sopo yofe ole lɨmotofofoho, Sokumnangoponoho. A'amu Hipɨluso oso hiso'no hofɨkoe hungkunoso ole lɨmotofofoho, Ngkapatofoho lɨmotofofoho. 14 Oso hohosohonta a'amu Jutafe Anɨtu A'amu Isɨlael somo Uyakolo'mentiso somne'ne Syafɨsiyo Sɨkuno Engo iyoho mo'nɨngkanta humayo'ne yo'mayo ito'no esyohumayo'ne sɨkunomnoho. Oso homo somo mofehi'nyo ajwo kuntoliyopo posahonɨngki Pailot a'amu Juta somo ulɨmento, Olo hwe lohwo sekumo semokosyohumayo'ne hwe engo hweho. Sekwo uhwonɨmno. 15 Ose ulahonɨngki hofɨko joho mohm'no ulɨmentohofi, Wayo yafɨkuji fonjahumno. Iyomo fonjinto'ofahumno. Ose ulahonɨngkofi Pailot ulɨmento, Ngko sekwoe hwe engo sohumo iyomo wofonjinto'ofahumonntaho. Ose imne'no lasemo'nɨngkohoho. Ose ulahonɨngki a'amu yofe engo'njo tajo ango syoho'njo sohwa ulɨmentohofi, Olo hwe lohwo nakwoe hwe engo hwo'maho. Nakwoe hwe engo anga'nohino sohwo Sisafoho. 16 Ose ulahonɨngkofi Pailot kako Jisasɨmo iyomo fonjinto'ofasiyo'ne a'amu huhwo sohwafe ahomo ho'nahumentisofoho.

Hofɨko Jisasɨmo iyo hwojiyafɨku'nnyopo fonjinto'ofahumentohofofoho.

17 Oseso Jisasɨmo utɨmantɨfi iyo hwojiyafɨku'nnyoso nomantɨfi kakwo'yohumo utofimentohofofoho. Jisas kako itokwawento ango Jelusalem ulɨko'mantɨfi A'momnokinoponoho lɨwo'nɨngkohofo sopono kotasɨmentohofofoho. Hipɨlu hungkunoso oso hopo sopone'no ole lɨwo'nɨngkohofo Ngkoulɨkotanoho lɨwo'nɨngkohofofoho. 18 Oso hopo sopo hofɨko Jisasɨmo iyo hwojiyafɨku'nnyo sopo fonjinto'ofahumentohofofoho. Oso Jisasɨ'njo sopo hwe hufa'u sohwa'u yohosi yohosɨnta'ni fonjinto'ofasyontɨfi Jisas ajwo'mo fonjinto'ofahumentohofofoho. 19 Pailot kako iyoswo nomanto Jisasɨye mijo kwa'ofiyo tokwajo nohonje sopo mtɨ'mokohofojahumentisofoho. Oso hungkuno hiso olenoho. JISAS NASALET NTA'ANGO SOHWO A'AMU JUTAFE HWE ENGO HWEHO. Ose mtɨ'mokumentisofoho. 20 Jisasɨmo fonjinto'ofahumentohofo hopo sopo ango Jelusalem mofoneponoho. Oseso a'amu Juta pi'nɨngoso nosapontɨfi oso iyoswo mtɨ'mokohofojahumentiso homo somo atofo lɨmentohofofoho. Oso hungkuno hiso Pailot kako hungkuno hufa'u sɨhune'njo mtɨ'mokumentisofoho. A'amu Jutafe hungkuno'nji a'amu Ngkɨlikɨfe hungkuno'nji a'amu Loumɨfe hungkuno'nji mtɨ'mokohofojahumentisofoho. 21 Oseso a'amu yofe engo'njo tajo ango syoho'njo sohwa hofɨko oso iyoswomo uhwonontɨfi Pailotɨmo ulɨmentohofi, A'amu Jutafe Hwe Engo hweho mtɨ'mokinyoso hwasyofoho. Ole mtɨ'mojo. Olo hwe lohwo ngko a'amu Jutafe hwe engo hwo'nyoho lɨmojo hweho. Ose mtɨ'mojo. 22 Ose ulahonɨngkofi Pailot ulɨmento, Hungkuno mtɨ'mokohe loso olo hungkuno lo'nohini waweno. Ose ulɨmentisofoho. 23 A'amu itokuso'njo osofosofahu'nohino sohwa hofɨko Jisasɨmo iyo hwojiyafɨku'nnyo sopo nto fonjinto'ofasyontɨfi hofɨko kakoe manji'mofo yo'mayo so'nji nomantɨfi yano ilofoso osofosofahu'no ilo'mentohofofoho. A'amu anga'no anga'nohino sohwamnefoho. I kakoe nem'no manji'mofoso ufohotofoso ane'njo uhwonontɨfi 24 ole hnnɨmentohofi, Oloso nosɨsɨmpehwaloho. O'o nakwo syohi'nyo ihwasi a'amu neyakolofoso sohwo kako olo hiloso hi'nji woma'monte hweho. Ose imentohofoso Anɨtuye hungkuno a'amu mtɨ'mokumentohofoso ne imo'nɨmentisofoho. Hungkuno hiso olenoho. A'amu nje hwapɨfe yo'mayoso yano ilofontɨfi hu'mema'mentohofofoho. Nje manji'mofo so'no hofɨko syohi'nyo yontɨfi uyakolo'mentiso sohwo ma'mentisofoho. Oso a'amu itokuso'njo sohwa oso hiso imentohofofoho. 25 Oso Jisasɨye iyo hwojiyafɨku'nnyo'njo mofone sopo Jisasɨye kona'wohi'nji konosɨma'nji Kɨloupasɨye ape Maliya'nji nom'ne Maliya ango Makɨtola nta'angosɨ'nji humamentohofofoho. Oso moya'mi hofosofa Jisasɨye iyo hwojiyafɨku'nnyo'njo tɨfo ne sopo loho'mentohofofoho. 26 Ngko Joun Jisasɨye a'amu sohwo'nnonji Jisasɨye kona'wohi'nji afapo lohofontanɨngkuhwoi Jisas ehononto elɨmento, Na'uyo oso hwe sohwo jɨje hwomu hweho. 27 Ose ulonto ntɨmento, Olosi jɨje na'uyoho. Ose ntahonɨngki oso sɨkuno somo ngko Jisasɨye kona'wohihn'ni nje angomo mokosyohumamotefoho.

Jisas kako poyo imo'nɨmentisofoho.

28-29 Ose imo'nɨmentiso sohonta Jisas kako huno ole umento, Nje yo'mayo syohoso moi'wonoho. Ose syafɨsyonto ole ulɨmento, Ngko mijo'no nɨmo'nɨngkohoho. Ose ulɨmentisofoho. Ahwonte anga'no ipisayo mijo yokumpoyn'nyo mangkinyo'njo oso hopo sopo nowentanɨngki hofɨko hwapɨfe pa'nyo we'eso mijo homo somo yomantɨfi tokemo popojontɨfi noho'nomantɨfi Jisasɨye mangomo uyɨmentohofofoho. Ose imentohofo sohonta oso hungkuno Ntefit Jisasɨmne'no hohonta mtɨ'mokumentisoso ne imo'nɨmentisofoho. Mtɨ'mokinyoso olenoho. Ngko mijo'no nɨmo'nɨngkoho. 30 Ose ulahonɨngki Jisas mijo hiso nononto lɨmento, Nje syoho imoteso moi'wonoho. Ose ulonto kakoe mnokino iwa'wo'mentisofoho. Osohonta kakoe huyo'mango Anɨtuye pone'no uhwatɨmentisofoho.

A'amu itokuso'njo fihwo kako Jisasɨmo hosɨmno hupepo honje hmmentisofoho.

31 Oso hohosohonta a'amu Jutaso hofɨkoe Sɨkuno Engo iyoho humayo so'ne yo'mayo nto'no esyohumayo'ne sɨkunomnoho. Oseso a'amu Juta sohwa ole syafɨhu'mentohofi, Nakwoe Sɨkuno Engo iyoho humayo somo iyo hwojiyafɨku'nnyo sopo a'amufe pijafo ne'no weso nakwolaho lontɨfi hofɨko Pailotɨmo a'amu huhwo sohwa poyo komo'no pe'nyo'ne hungkuno ole ulɨmentohofi, Kɨko jɨje a'amu itokuso'njo sohwamo ulahonɨngkohoji hofɨko a'amu iyoponjo sohwafe sɨfe kutɨkujo lohofɨkuji hwahopo womeho'nahufe. 32 Ose ulahonɨngkofi Pailot hungkuno ose ulahonɨngki a'amu itokuso'njo sohwa hofɨko oso hwe hufa'u Jisasɨ'njo sopo yohosi yohohnta'ni fonjinto'ofahumentohofo sohwa'uye sɨfemo kutɨkujo loho'mentohofofoho. 33 Nokujontɨfi Jisasɨmo u'mantɨfi kako poyo nto imo'nɨmentiso uhwonɨmentohofofoho. Ose uhwonontɨfi Jisasɨye sɨfemo makujiyo'njo imentohofofoho. 34 I oso'no a'amu itokuso'njo fihwo kako Jisasɨmo hosɨmno hupepo honje hmmentisoso honɨyo'nji mijo'nji usɨhuma'mentisofoho. 35 Ngko Joun sohwo'ni yo'mayo imo'nɨmentiso somo uhwonɨmentohefoho. Hwasyo hungkuno moselalokuyohono. Yo'mayo uhwonɨmentoheso yo'mayo upa'nɨmentoheso olo iyoswo lomo ifalifaliyo mtɨ'mokalokweno. Sekwo hungkuno homo somo sɨmeho hi'ntnnono uyɨfitnne'enji mtɨ'mokalokweno. 36 Yo'mayo uhwonɨmentoheso imo'nɨngkahonɨngki Anɨtuye hungkuno mtɨ'mokumentohofoso ne imo'nɨmentisofoho. Hungkuno anga'no mtɨ'mokumentohofoso olenoho. Hofɨko kakoe yokinoso makujiyofoho. 37 Nom'ne hungkuno mtɨ'mokumentohofoso olenoho. Oso hwe sohumo hofɨko hosɨmno hmmentohofo sohumo uhwonantɨfeho.Hungkuno mtɨ'mokumentohofo hiso oso sɨkuno homo somo ne imo'nɨmentisofoho.

Hofɨko Jisasɨye pijafoso sokimomo ho'nahumentohofofoho.

38 Oso hiso moi'wo imo'nɨngkahonɨngki Jousep ango Alimateyanta'ango sohwo kako Pailotɨmo u'ma'mentisofoho. Jousep huhwo sohwo kako Jisasɨmne'no sɨmeho ko uyonto kako a'amu Jutafe hwe engo somne'no iyoho unɨngkahonɨngki kako sɨmeho hi'ntnnono unyo hungkuno so'no molɨjwafe'njo imentiso hweho. Jousep huhwo sohwo kako Pailotɨmo u'manto ulɨmento, Ngko Jisasɨye pijafoso woma'monne'no yohono. Ose ulahonɨngki Pailot eno ulahonɨngki Jousep Jisasɨye pijafoso iyopo nta'ni ma'mentisofoho. 39 Jousep kako'nohinɨ'maho. O'o, Nikoutemos kako hohonta Jisasɨmo sɨkwo'miyomo u'ma'mentiso sohwo'nji siko Jisasɨye pijafo ma'mentisiyefoho. Nikoutemos huhwo sohwo kako iyo mijo akino wopɨngo'njo so'nji iyoswo akino wopɨngo'njo so'nji pijafo somo ho'nasyiyo'ne pi'nɨngo engo motapmmentisofoho. Kakoe tangoso teti-foua (34) kiloufoho. 40 A'amu Jutaso hofɨko a'amu poyo pe'nyofe pijafoso ijopijisasyiyo'ne esyohumamotofo hopaso siko Jisasɨye pijafo so'nji yo'mayo akino wopɨngo'njo so'nji hwapɨfemo popoku'mentisiyefoho. 41 Jisasɨmo iyopo fonjinto'ofahumentohofo mofone sopo iyo uyo syoho wo'nnyoponoho. Oso hopo sopo a'amu hofɨko sokimo songo a'amufe pijafo ho'nasiyo'ne'entɨfi mtɨ'mokumentohofofoho. Hofɨko oso sokimo homo somo nom'ne a'mopijafoso moho'nasiyoponoho. 42 Oso sɨkuno yo'mayo nto'no esyohumayo'ne sɨkuno moi'wo imo'nyo'ne mofone sopone'no hofɨko Jisasɨye pijafoso ikanopo momotawe'njo yontɨfi oso sokimo mofone soponjo somo ho'nahumentisiyefoho.

Jisas kako pi'nɨmo nta'ni songo lɨka'mentisofoho.

1 Sante imɨngo ne'nji sɨkwo'mjoho so'mo Maliya ango Makɨtolanta'angosi kako nolɨkafonto Jisasɨmo ho'nahumentohofo sopone'no uhwonɨmentisoso pi'nɨmomjo sojoso hwosampo'nnyo uhwonɨmentisofoho. 2 Ose uhwononto kako hano kunto kunto'no nowento Saimoun Pita'nji ngko Joun'nnonjimo tɨpehonɨma'nonto elɨmento, Nakwoe Hwe Engo sohumo sokimo mta'ni wae yao'malofofoho. Hofɨko ntɨ'mo koho'nahumalofo. Ngko huno maniyohoyohoho. 3 Ose elahonɨngki Pita'nji nekwo sokimo somne'no hano kunto kunto'no nowentai 4 ngko Pitamo uyakolofonji ngko sɨmo'mo sokimo somo i'mofapmmentohefoho. 5 Ngko i'mofaponji iku'nɨhwonɨngkoheso hwapɨfe yo'mayoso ko uhwononji ngko masyuyo'njo imentohefoho. 6 Saimoun Pita kako tɨfi nɨmjɨmentiso sohwo kako sokimo ne mo'mo humentisofoho. Noswonto uhwonɨmentisoso hwapɨfe'nohini nowentanɨngki uhwonɨmentisofoho. 7 Oso hwapɨfe nom'neso Jisasɨye mnokinomo popoku'mentisiyoso nom'nepo ku'mokahinyo nowentanɨngki uhwonɨmentisofoho. 8 Ngko sɨmo'mo sokimomo i'mofapmmentohe huhwo'ni noswonji yo'mayo somo uhwononji Jisas kako lɨkafone so'no ngko sɨmeho hi'ntnnono uyɨmentohefoho. 9 Hohonta sohonta nakwo Anɨtuye hungkuno mtɨ'mokumentohofo so'no yofe muhwofe'njo imentɨhwonefoho. Hungkuno mtɨ'mokumentohofoso Jisas kako poyo imo'nɨngkuhwosi apa'no songo lɨkafone'no mtɨ'mokumentohofofoho. 10 Oso hohosohonta yo'mayoso nuhwonontai oso hungkuno homo somo sɨmeho hi'ntnnono uyontai nekwoe a'amu'njopo asomo umentɨhwayofoho.

Maliya ango Makɨtolanta'angosi Jisasɨmo uhwonɨmentisofoho.

11 Osohonta Maliya kako sokimo'njo mofone sopo lohofonto humotaho lɨmentisofoho. Humotaho lonto iku'nɨhwonɨmentisoso sokimo ajwomo'mo 12 a'amu ahwomo mta'ango nehm'no manji'mofo sawemo halojo'njo sohwa'u uhwonɨmentisofoho. Siko Jisasɨye pijafo ho'nahumentohofo sopo nohumanji anga'no kako mnokino hohnta'ni humentanɨngki nom'nihwo sɨfe hohnta'ni humentanɨngki uhwonɨmentisofoho. 13 Siko Maliyamo ulɨmentisiyo, A'mu losiyo, kɨko humotaho peho'no lalokuno. Ose ulahonɨngki Maliya ulɨmento, Hofɨko nje Hwe Engo sohwoe pijafoso wae yanɨmo'malofo'no ntɨ'mo koho'nahumalofo lonji lotɨpeelokweno. 14 Ose ulonto Maliya ikinjaofonto uhwonɨmentisoso Jisasɨmo ko uhwononto kako Jisas sohumo yofe mɨhwofe'njo imentisofoho. 15 Jisas Maliyamo ulɨmento, A'mu losiyo, kɨko humotaho peho'no lalokuno. Hafɨhafe tɨhune'no tɨpeelokuno. Ose ulahonɨngki Maliya ole syafɨhu'mento, Olo hwe lohwo kako iyo uyo syoho losomo mokosyohumawo'nɨngkiso hweho. Ose syafɨsyonto ulɨmento, Hwe engofo, kɨko kakoe pijafoso nomanji kengopo ho'nahumahnno'manji ngkimo njo. Ngko nomahm'mo womotawomo. 16 Ose ulahonɨngki Jisas kakoe yofe ulɨmento, Maliya. Ose ulahonɨngki Maliya ikinji lohofonto Jisasɨmo yofe uhwo'mentisofoho. Uhwofonto Jutafe hungkuno ulɨmento, Lapounai. Nakwoe hungkunoso ole: Lontɨhwayo hwosoho. 17 Ose ulahonɨngki Jisas ulɨmento, Kɨko ngkimo aho nonɨpmmakohotoho. O'o, ngko nje Mpohwoepono masileno. Kɨko nuhuji nje a'amu sohwamo ole uso, Ngko nje Mpohwoepono wasɨmne hwo'nyoho. Nje Mpohwo sohwo sekwo huhwa hnnonjiye Mpohweho. Nje Anɨtu sohwo sekwo huhwa hnnonjiye Anɨtuyoho. Ose uso. 18 Ose ulahonɨngki Maliya ango Makɨtolanta'angosi nowento Jisasɨye inomokomoyo sohwona'nɨmo tɨpenahononto nalɨmento, Ngko nakwoe Hwe Engo sohumo nto uhwonɨngkohono. Ose ulonto kako yo'mayo hungkuno Jisas ulɨmentiso so'nji nalɨmentisofoho.

Inomokomoyo sohwa Jisasɨmo uhwonɨmentohofofoho.

19 Oso sɨkuno Sante somo mofehi'nyo nto ikwo'mokumentiso so'nji Jisasɨye inomokomoyo sohwona'ni nakwo a'amu Juta somne'no iyoho nenɨngkahonɨngki nakwo oso ango humamentɨhwone homo somo hoku'yo yokumpohn'nyo pɨjwasyontani humohumantɨhwonefoho. Nohumentanɨngkuhwoni Jisas kako nakwo'njo ajwo lopo nta'ni imo'nomanto nalɨmento, Nɨngkwahwosafo, sekwo iyoho senɨngkuhwoloho. Sɨmeho wopɨngo'nji fosyohumamno. 20 Ose nalonto kako kakoe ahomjo ime so'nji hupeponjo ime so'nji netɨhwamentisofoho. Nakwo nakwoe Hwe Engo Jisas sohumo uhwonontani sɨmonyo engo imentɨhwonefoho. 21 Jisas nom'ne hungkuno nalɨmento, Sekwo sɨmeho wopɨngo'nji fosyohumamno. Nje Mpohwo ngkimo nɨhwatɨmentiso hopaso ngko sekumo wosehwatɨmonnoho. 22 Ose nalonto kako kakoe mammtnno nafohusonto nalɨmento, Sekwo Anɨtuye Towahuno Wopɨngo'nohinoso sekwoe sɨmeho mo'mo wehuhnnosemafono. 23 Sekwo nom'ne a'amufe wonyoso wae yamopijoso oso wonyo hiso moi'wo umo'nɨmontonoho. Sɨmeho mo'mo momnɨwenehoho. I sekwo nom'ne a'amufe wonyoso wae mumopijo'manji oso wonyo hiso sɨmeho mo'mo ne'no wamnɨwo'montonoho.

Toumas kako Jisasɨmo uhwonɨmentisofoho.

24 Jisas kakoe inomokomoyo sohwona'nɨmo ne'ma'mentiso sohonta Toumas sohwo kako mohumunyoponoho. Oso hwe huhwo sohune nom'ne yofeso olenoho. Ntitimosɨyoho. Hufa'u mehomi hweho. 25 Oseso inomokomoyo nom'ne sohwona'ni Toumasɨmo ulɨmentɨhwoni, Nakwo nakwoe Hwe Engo songo lɨka'maso sohumo nto uhwonɨmalohwone hwona'nyoho. Kako songo humaho. Ose ulahonɨngkuhwoni Toumas nalɨmento, Ngko Jisasɨye ahomjo ime so'nji kakoe hupeponjo ime so'nji uhwonɨ'mo ngko ime homo somo nupm'moku'mo ngko kakimo sɨmeho hi'ntnnono uyɨmonnoho. Ngko kakimo muhwonyo'manji sekwo hwasyo ntohofo waselɨmonnoho. Ose nalɨmentisofoho. 26 Tɨfi sohonta sɨkuno aho fehohnjo hopi'nono nom'ne mta'ni hufa'u sɨhune memjaofahonɨngki Jisasɨye inomokomoyo sohwona'ni nakwo angomo nohumentanɨngkuhwoni Toumas huhwo nakwo'nji humamentisofoho. Nakwo hoku'yo yokumpohn'nyo pɨjwasyontani nohumentanɨngkuhwoni Jisas nakwo'njo ajwo lo'mta'ni imo'noma lohofonto nakumo nalɨmento, Sekwo sɨmeho wopɨngo'nohino hwasi fohumamno. 27 Ose nalonto kako Toumasɨmo ulɨmento, Toumas, kɨko olopo fɨpe. Nje ahomjo ime somo nohonɨngkohoji nɨpm'mojo. Nje hupeponjo imesomo jɨje aho motapohoji nɨpm'mojo. Ngkonoho. Kɨko sɨmeho hi'ntnnono ntapmmotnnoso noho'naofohotoho. O'o, sɨmeho hi'ntnnono yokumpohn'nyo'nohini ntape. 28 Ose ulahonɨngki Toumas ulɨmento, Ou, ngko kikine'no huno niyohoho. Kɨko nje Hwe Engo hwosoho. Kɨko nje Anɨtu kiyoho. 29 Ose ulahonɨngki Jisas ulɨmento, Kɨko ngkimo nohonɨngkino so'no sɨmeho hi'ntnnono ntopahino. A'amu hofɨko ngkimo manohonyo'njo ko yontɨfi sɨmeho hi'ntnnono ntopalokwofoso hofɨko sɨmonyo engo uyantɨfeho. Ose ulɨmentisofoho.

Olo hungkuno Joun mtɨ'mokumentiso loso hwapɨngoso peho'neto. Hungkuno hwapɨngoso olenoho.

30 Jisas kako nakwo inomokomoyo sohwona'nnonji nohumanto yo'mayo wonyoangkafo a'amu miyɨwo'nɨngkiyohofoso pi'nɨngo engo imentiso so'no hungkuno we'e'maho. Ngko hungkuno fehohnjoso olo iyoswo lomo mamtɨ'mokiyo'njo imentohefoho. 31 I oso'no ngko olo iyoswo mtɨ'mokohe loso'no sekwo Jisas Kɨlaisɨmo sɨmeho hi'ntnnono uyɨmno. Kako Anɨtuye Hwomu Ne hweho. Sekwo sɨmeho hi'ntnnono uyɨfijo'manji songo ne'no humayo'neso wotɨpemantɨfeho.

Inomokomoyo aho fehohnjo hopi'nono nom'ne mta'ni hufa'u sohwa Jisasɨmo uhwonɨmentohofofoho.

1 Hwangku sohonta Jisas kako apa'no kakoe inomokomoyo sohwona'nɨmo mijo ayo Taipeliyas sopo nohumentanɨngkuhwoni ne'ma'mentisofoho. Kako ne'ma'mentisoso olenoho. 2 Nakwo a'amu aho fehohnjo hopi'nonohino nom'ne mta'ni anga'no sohwona'ni oso hopo sopo humamentɨhwoneso olenoho. Saimoun Pita'nji Toumas a'amu hufa'u mehomi sohwo'nji Notaniyel hwaho Ngkalili ango Kananta'ango sohwo'nji nekwo Sepetiye hwomu sohwoya'inonji inomokomoyo nom'ne sohwa'u'nji nakwo hwona'ni osopo humamentɨhwonefoho. 3 Nohumentanɨngkuhwoni Pita kako nalɨmento, Ngko inanɨku ufomeemonne hwo'nyoho. Ose nelahonɨngki nakwo ulɨmentɨhwoni, Nakwo huhwona'nnonji wohwano. Ose ulontani nowentani yofayokinomo nokotosontani oso sɨkwo'miyo sohumo inanɨku ufomeeno lontani wonyopi imentɨhwoneso inanɨku mɨfammentɨhwonefoho. 4 Mofehi'nyo wosɨ'mofapmmonto yahonjo so'nji Jisas kako mitɨmomɨngo sopo lohofontanɨngki inomokomoyo sohwona'ni kakimo yofe muhwo'mmentɨhwonefoho. 5 Oseso Jisas nalɨmento, Oso a'amu sohwasi, sekwo inanɨku hi'njo hwasilaho. Ose nelahonɨngki nakwo ulɨmentɨhwoni, Ane hwona'nyoho. 6 Ose ulahonɨngkuhwoni kako nalɨmento, Sekwo inanɨku ifamiyo ho'yo yofayokino anga sohohnta'ni ho'naopijoso inanɨku ufomeentɨfeho. Ose nelahonɨngki nakwo inanɨku ho'yo ho'nao'mentihwoneso inanɨku we'e pi'nɨngo ifammentɨhwone'maho. Inanɨku pi'nɨngo engo inanɨku ifamiyo ho'yo somo pohumpotahumentiso so'no nakwo yokino wemano lontani ko imentɨhwoneso wonyopi imentɨhwonefoho. 7 Ngko Joun'ni ose uhwononji Pitamo ulɨmentoho, Nakwoe Hwe Engo hweho. Ose ulahonɨngko Pita kakoe syoho somne'no kakoe manji'mofo yojasyonto humohumantiso sohwo nje hungkunomo upa'nonto kako kakoe manji'mofo komo'no miyonto Jisasɨmo komo'no u'ma'mo lonto mijomo hwofitohm'mo'mentisofoho. 8 Nakwo inomokomoyo nom'ne sohwona'ni yofayokino somo ne'no nohumentani inanɨku ifamiyo ho'yoso husɨmpemotowentani ifohohosahumentɨhwonefoho. Nakwo ikanopo nta'ni husɨmpemotamentɨhwone'maho. O'o, mofone sopo nta'ni (nainti, 90 , mita) husɨmpemotapmmentɨhwonefoho. 9 Nakwo ifohohososyontani uhwonɨmentɨhwoneso tɨkwolojo'nohini imnontanɨngki uhwonontani oso hopo sopo wopayo'nji inanɨku'nji wentanɨngki uhwonɨmentɨhwonefoho. 10 Ose uhwonɨngkahonɨngkuhwoni Jisas nalɨmento, Sekwo inanɨku olohonta ifomahofoso fehohnjoso nɨmotapmno. 11 Ose nelahonɨngki Saimoun Pita kako yofayokinopo nokotasonto inanɨku ifamiyo ho'yoso momɨngo sopone'no husɨmpemotapmmentisofoho. Inanɨku engo'nohinoso wan hantɨlet fifɨti-tɨli (153) ko mnawo'nnyo so'no inanɨku ifamiyo ho'yoso mamtɨhupo'mmentisofoho. 12 Jisas kako nalɨmento, Sekwo nopɨkuji wosopayo hmnɨmno. Ose nelahonɨngki a'amu anga'no anga'no Jisasɨmo tɨhwosilo mulɨmmentɨhwonefoho. O'o, nakwo hopi'nonohino sohwona'ni Jisas nakwoe Hwe Engo sohune'no yofe uhwo'mentɨhwonefoho. 13 Jisas kako wosopayo'nji inanɨku'nji nomanto nakumo nejapmmentisofoho. 14 Jisas poyo imo'nonto apa'no songo lɨka'mentiso somta'angoso kakoe inomokomoyo sohwona'nɨmo osohonta nakumo ne'mayoso hufa'u sɨhune imo'nɨmentisofoho.

Jisas kako Pitamo syoho uyɨmentisofoho.

15 Nakwo wosopayo moi'wo nontani humentanɨngkuhwoni Jisas kako Saimoun Pitamo ulɨmento, Saimoun Jounɨye hwomu sohwosi, kɨko olo nom'ne lohwafe sɨmeho ntopantokwofo somo uyakolofonji sɨmeho yokumpohn'nyo engo lontopantokuno. Ose ulahonɨngki Pita ulɨmento, Ou, Hwe engofo kɨko huno kiyohoho. Ngko jɨje a'amu ne hwo'nyoho. Ose ulahonɨngki Jisas ulɨmento, Kɨko nje yahu mehomi somo wopayo nuyo. 16 Jisas kako Pitamo ulohonyoso hufa'u umo'nononto ulɨmento, Saimoun, Jounɨye hwomu sohwosi, kɨko ngkine'no sɨmeho kumo'nalofoho. Ose ulahonɨngki Pita ulɨmento, Ou, Hwe Engofo, kɨko huno kiyohoho. Ngko jɨje a'amu nehopi'nohino hwo'nyoho. Ose ulahonɨngki Jisas ulɨmento, Nje yahu mehomi somo wopayo nuyo. 17 Jisas kako Pitamo ulohonyoso hufa'u sɨhune umo'nononto ulɨmento, Saimoun, Jounɨye hwomu sohwosi, Kɨko nje a'amu nehopi'nohinohwosi limo'nalokuno. Ose ulahonɨngki Pita kako sɨmeho tango uyahonɨngki kako huno syafɨhu'mentono. Kako hungkuno hufa'u sɨhune hiloso peho'no ntohonɨwo'nantofoho. Ose syafɨsyonto kako Jisasɨmo ulɨmento, Hwe Engofo, kɨko yo'mayo hopi'nonohino nje sɨmehomo mnawojo so'no huno kiyohoho. Ngko jɨje a'amu nehopi'nohini hwo'nyoho. Kɨko huno kiyohoho. Ose ulahonɨngki Jisas Pitamo ulɨmento, Kɨko nje yahu mehomi somo wosopayo uyohoji hofiyo mokosyohumaho. 18 Ngko hungkuno nehopi'nohino wakilɨmonne'no yohono. Kɨko hwe songo nohumanji kɨko jɨje huno mta'ni wemoimo lontnne somne'no ahuloho hwapɨfe yo'mayoso ito'no yonji umotnno hwosoho. I oso'no hwangku kɨko a'mane imo'njo sohonta kɨko jɨje aho yɨhusosyohumentanɨngkiji a'amuso kikimo ahuloho kumtitofɨkuji kɨko ango ngkilaho kinoso sopone'no wokumotowantɨfeho. 19 Jisas ulɨmentisoso yoloho neso olenoho. Pita kako tɨfi poyo pe'none so'no ulɨmentisofoho. Hwangku sohonta a'amu hofɨko Pitamo fonjahufijo sohonta Pita kako Anɨtuye hungkunomo yokumpohn'nyo kemokosyohumamojo so'no a'amu nom'nihwa Pitamne'no syafɨsyɨkuji hofɨko Anɨtuye yofe ho'nomapitnnefoho. Jisas Pitamo oso hiso'no utɨhwanto ulɨmento, Kɨko ngkimo nnɨngkape.

Jisas kako Joun sohwo'nne'no hungkuno lɨmentisofoho.

20 Jisas ose ulahonɨngki Pita kako ikinjamo lohofonto ngko Joun'ni kakoe hohujo hohnta'ni lohofontanɨngko nohonɨmentisofoho. Ngko sohwo'ni hohonta nakwo wopayo nontani ngko Jisasɨye huyo ne'mo nohumanji ulɨmentoho, Kikine'no tokoyo'ofo tɨhwo kilohofalofoho. 21 Ngko oso huhwo sohwo'nɨmo Pita nonohononto Jisasɨmo ulɨmento, Hwe Engofo oso hwe huhwo sohumo pipi uloho'noneto. 22 Ose ulahonɨngki Jisas ulɨmento, Oso huhwo sohwo ngko asomo pmme sohonta kako songo ne'no humaso'manji oso jɨje syoho'maho. O'o, nje syohofoho. Kɨko ngkimo tɨfinohini nnɨngkape. 23 Jisas ose ulɨmentiso so'no inomokomoyo nom'ne sohwa huno ole syafɨhu'mentohofi, Oso inomokomoyo sohwo kako mape'nonehoho syafɨsyahonɨngkofi hungkuno hiso nonje nonje mjaho'nɨmɨmentisofoho. I oso'no Jisas kako ose malɨmmentisofoho. O'o, ole'nohini lɨmento, Oso hwe sohwo ngko asomo pmme sohonta kako songo ne'no humaso'manji oso jɨje syoho'maho. O'o, nje syohofoho. Ose ulɨmentisofoho. 24 Oso inomokomoyo huhwo sohwo ngkonoho. Ngko yo'mayo yo'mayo homo somne'no uhwononji hungkuno lɨjwasemofonji ifalifaliyo mtɨ'mokalokweno. Oseso sekwo nuhwonɨngkuji huno waseyono. Joun yo'mayo somo uhwonɨmentiso so'no mtɨ'mokumentisoso nakwo huno nayohoho. Hungkuno ne'njofoho nayohoho. Sekwo huno ose waseyono. 25 Yo'mayo yo'mayo hopi'nonohinoso Jisas imentisoso nowentanɨngki ngko fehohnjo'nohini semtɨ'mokiyalokweno. I a'amu fihwo kako yo'mayo hopi'nonohino Jisas imentiso so'no wamtɨ'mokumo lɨhwosi ko yososo olo hwaho lopo nakwo humalohwone ayo'mo yo'mayo iyoswo hu'meesyiyo'neso hopa'maho. Nɨhu'no awonoho. Ngko Joun'ni nje hungkunoso osohopeho.