Yohanes 1

1 Momonanyo, ma'isa pe'e dunia pinotimbali, Potatae nu Tumpu Allah polo-polo'mo daagi'. Potatae nu Tumpu sa'a-sa'angu'mo tiba Tumpu ka' Potatae nu Tumpu sumo-sumomo Tumpu. 2 Salatanmo pe'e imoona Ia sa'a-sa'angu'mo tiba Tumpu. 3 Iwi-iwi' na anu pinotimbali nolengkat mae hi Ia, ka' iwi-iwi' na anu daagi', madi' ko sa'angu' pe'e na anu pinotimbali de misa' Ia. 4 Potatae nu Tumpu aijo' pu'un nu kantumuu'an, ka' kantumuu'an monjingkai mian. 5 Jingka aijo' monjingkai kapintungan, ka' kapintungan madi' moko poho' ia. 6 Tinoka na mian anu sinai mae nu Tumpu, sanggonyo i Yohanes. 7 Ia toka mombebakon jingka aijo', da iwi-iwi' na mian palesaya. 8 Ia misa' jingka ai-aijo', ia ola mombebakon. 9 Jingka totu-totu'u anu monjingkai iwi-iwi' na mian, tinokamo i dunia. 10 Potatae nu Tumpu daagi'mo i dunia, dunia pinotimbali nu potatae-Nyo, panyo dunia madi' monsumbu' Ia. 11 Ia tinoka i posi lipu'-Nyo panyo bansa-Nyo madi' montalima Ia. 12 Panyo daagi' ahi' ko anu montalima Ia, ka' palesaya hi Ia; aha binee'an-Nyo hak timbali Anak nu Tumpu, 13 anu i hampeakon misa' nolengkat mae i mian, kalana tumuu' bu'ou aijo' lengkat mae hi Tumpu na pinolengkatannyo. 14 Potatae nu Tumpu tinimbalimo mian, Ia jinojoongmo aiya hi kita, ka' kita nontoamo katalasanggoan-Nyo. Katalasanggoan-Nyo tinalimanyomo salaku anak sa'a-sa'angu'nyo nu Tuuma. Kalana Ia, sahingga kita nontoamo Tumpu ka' kalibosan-Nyo hi kita. 15 I Yohanes tinoka salaku sakisi-Nyo, ia mompolele: "Aiyamo Ia na anu titinaloakonku: Ia toka lebe tongkoimihi, aku na moona toka, panyo lebe talasanggo molingkudui aku, kalana ma'isa pe'e ko akunyo, Ia polo-polo'mo daagi'." 16 Ia saja' mongkalibosi; madi' ko kamingkotannyo, Ia mombalakati kita. 17 Atulan nu Tumpu otalimanto hi Musa. Panyo liibos ka' kanonongan nu Tumpu pinonyata'-Nyomo hi Yesus Kristus. 18 Madi' ko anu toho'mo nontoa Tumpu, de misa' anak nu Tuuma anu samba-sambatumo, anu pokakana tiba Tuuma ka' anu mompahakona hondo Ia. Ia na anu momponyata' Tuuma hi kita. 19 To mia-mian Yahudi anu ko kuasa i Yerusalem nompokau to ima-imam ka' to mia-mian nu Lewi namba hi Yohanes, ka' nompokilawa hi ia, "Beleyum aiya ihe?" 20 I Yohanes nangaku sahondo-hondonyo, "Aku misa' Tomundo anu Momposalamat." 21 "Desumo aitu, beleyum ihe?" pinokilawa nu aha. "Pa' beleyum i Elia?" "Misa'," na koonyo i Yohanes. "Pa' beleyum Te Nabi?" pinokilawa nu aha mule'. "Misa'," na koonyo. 22 "Desumo aitu, taloakon mae hi kami ihe na beleyum aiya," na koonyo nu aha, "da ko pontaami mami hi to mia-mian anu nompokau mae kami. Apaa na kooyum mongkona butongum?" 23 I Yohanes nontaami, "Akumo na ia anu titinaloakon i Nabi Yesaya: 'Mian anu noloboo' i padang bone': Pohata na jalan da bau kajalanan nu Tumpu.' " 24 To mia-mian anu sinai nu mian Farisi, 25 nompokilawa, "De beleyum misa' Tomundo anu Momposalamat, misa' i Elia, misa' mule' Te Nabi, kadaka' beleyum mompalamandikan?" 26 I Yohanes nontaami, "Aku mompalamandikan nu uee. Panyo itina' hi komiu daagi' ko mian anu madi' osumbu' komiu. 27 Aku tinoka momona, Ia imihije, panyo mombukai pomputi nu sapatu-Nyo pe'e, aku madi' pantas." 28 Iwi-iwi' aijo' tinimbali i Betania, sasu kabete'an nu Kaunyo Yordan tampat i Yohanes nompalamandikan. 29 Dodododopnyo, i Yohanes nontoa i Yesus namba mae hi ia. Lantas i Yohanes notatae, "Toa, aijo'mo na Anak Domba nu Tumpu Allah anu mongalini dosa' nu dunia. 30 Iamo na anu titinaloakonku aku na moona toka ia imihije, panyo Ia na lebe daka' molingkudui aku, kalana ma'isa pe'e aku i hampe, Ia polo-polo'mo daagi'. 31 Ma'isa pe'e Ia tinoka, aku madi' monsumbu' pa' ihe na Ia aitu. Padahan aku tinokamo nompalamandikan nu uee da bansa Israel monsumbu' Ia." 32 I Yohanes suele nompoto'imo anu sinakisiannyo aiya, "Aku nontoa Roh nu Tumpu nintatau' sumo tomonsi' malapati', lengkat mae i langit ka' nanintengke' i buan-Nyo. 33 Tempo'nyo aitu ma'isa sinumbu'ku pa' ihe na Ia. Panyo Tumpu Allah na nompokau aku mompalamandikan nu uee notataemo hi belengku, 'De beleyum montoa Roh nu Tumpu mintatau', lantas manintengke' i buan nu sala'samian, Iamo na saidi' mae mompalamandikan nu Roh nu Tumpu.' 34 Pinositoang-Kumo," na koonyo i Yohanes, "ka' aku nompoto'imo anu sinakisiankumo saba' Iamo na Anak nu Tumpu." 35 Dodododopnyo i Yohanes po'ule' mule' daagi' i tampat aijo' tiba ua'aha na anu saja' mombatuki ia. 36 Salatan tinoanyo na i Yesus notulu, ia notatae, "Toa! Aijo'mo na Anak Domba nu Tumpu." 37 Ua-ua'aha na anu saja' mombatuki Yohanes nohongo potatae aijo', lantas nambamo nombatuki Yesus. 38 I Yesus nosiloi i hiku ka' nontoa aha aitu mae hau-haunyo mombatuki Ia. Ia nompokilawa, "Komiu molio apaa?" Tinaaman nu aha, "Gulu', iyamae na jojoongan i Gulu'?" (Sanggo 'Rabi' alati'nyo Gulu'.) 39 "Imbo' posi toa," tukoonyo i Yesus. Aha namba tiba Ia ka' nontoa iya na kajojoongan-Nyo. Tempo'nyo aijo' jam opatmo mamaalom. Sinaa aijo' aha jinojoongmo hingga-hinggat tiba Ia. 40 Sala'samian anu ua'aha noho-nohongomo apaa na anu tinaloakon i Yohanes, ka' ilapas aitu nambamo mombatuki Yesus, aijo'mo i Andreas, utus i Simon Petrus. 41 Lia-lia' na i Andreas nolio i Simon utusnyo ka' notatae hi ia, "Kami siningkabotmo i Mesias!" (Mesias pokakanamo i Kristus, aijo'mo: Tomundo anu Momposalamat.) 42 I Andreas nolaya' i Simon namba hi Yesus. I Yesus nondin i Simon, lantas notatae, "Beleyum i Simon anak i Yona. Beleyum osanggohije i Kefas." (Kefas pokakanamo i Petrus, alati'nyo: bungkut nu batu.) 43 Dodododopnyo i Yesus nompatikolomo namba i Galilea. Ia siningkabot ka' i Filipus, ka' notatae hi ia, "Imbo' batuki na Aku!" 44 I Filipus mian anu nolengkat mae i Betsaida, aijo'mo jojoongan i Andreas ka' i Petrus. 45 I Filipus siningkabot tiba i Natanael ka' notatae hi ia, "Kami siningkabotmo mian anu sisinanggo i Musa i uno nu kitab Atulan nu Tumpu ka' anu bibinebakonmo nu to nabi-nabi. Aijo'mo Ia i Yesus anu lengkat mae i Nazaret, anak i Yusuf." 46 Panyo i Natanael nontaami, "Toho' mule' anu ma'ima' molengkat mae i Nazaret?" "Imbo' posi toa," na koonyo i Filipus. 47 I Yesus nontoa i Natanael tinoka, lantas notatae mongkona ia, "Toa, aijo' mian nu Israel totu-totu'u. Madi' ko baleko'nyo hi ia." 48 "Mosia na Kita Tuuma nonsumbu' aku?" pinokilawa i Netanael hi Yesus. I Yesus nontaami, "Ma'isa pe'e i Filipus nolaga beleyum, tinoang-Kumo na beleyum i patu nu kau' ara aijo'." 49 "Kita Tuumangku Gulu'," na koonyo i Natanael, "Kita Tuuma Anak nu Tumpu! Kitamo Tuuma na Tomundo bansa nu Israel!" 50 I Yesus notatae, "Beleyum palesaya, ola kalana Aku nontaloakonmo tukoongku Aku nontoamo beleyum i patu nu kau' ara aijo'? Ha-han anu lebe daka' molingkudui aitu nutoaje!" 51 Koonyo i Yesus mule', "Totu'u, palesayamo, beleyum montoaje langit tontuhea', ka' to mala-malaikat nu Tumpu moliba' mintau' hi Anak nu Mian."

Yohanes 2

1 Kino uwansinaanyo daagi' ko bau-bauon po'osoan i kota Kana i tano' nu Galilea, ka' tina i Yesus daagi' i kiijo' mae. 2 I Yesus tiba anu saja' mombatuki Ia suele tinaang da mamba i bau-bauon aijo'. 3 Salatan anggur ningkotmo, tina-Nyo notataemo hi Yesus, "Aha kinamingkotanmo i anggur." 4 I Yesus nontaami, "Kita tina boli mompokau Aku. Ma'isa toka na tempo'nyo Aku momponyata' butong-Ku." 5 Panyo tina i Yesus notatae hi to posa-posaihon, "Baumo pa' apaa na anu tinaloakon-Nyo hi komiu." 6 I kiijo' daagi' ko gumbang anom anu pinosadia bau kapalaluan pindudu'an susumo kabiasa'an adat nu Yahudi. Gumbang haha aijo' sa'angu' isinyo kila-kila sa'atu na liter. 7 I Yesus notatae hi to posa-posaihon haha aijo', "Isii na gumbang haha aijo' nu uee." Aha nongisi sampe nobuke'. 8 Lantas i Yesus notatae hi aha, "Uuka ala na uee atina' sangkiding ka' boa hi tumpu nu bau-bauon." Aha nomboa uee aijo' hi tumpu nu bau-bauon. 9 Ka' ia nonginummo uee anu tinimbalimo anggur. (Madi' sinumbu'nyo na anggur aijo' pa' nolengkat mae iya ola to posa-posaihon anu nolambe' uee aijo', banggan aha na monsumbu'.) Lantas tumpu nu bau-bauon aijo' nongohani boting mo'ane, 10 lantas notatae hi ia, "Biasanyo opo'inum pe'e nu mian na anggur anu ma'i-ma'ima' momonanyo, ka' de to mia-mian anu tinaang ma'osamo na monginum, atina'je ka' anggur anu biasamo. Panyo kita utus monguna' anggur anu ma'ima' hondo sampe uuka aiya!" 11 Aijo'mo na anu okabangangi momonanyo binau i Yesus. Binaunyo na aijo' i Kana i tano' nu Galilea. Tiba tanda aijo' Ia nompotoamo katalasanggoan-Nyo. Sahingga anu saja' mombatuki Ia, pinalesayamo hi Ia. 12 Lapas aijo' i Yesus nambamo i Kapernaum tiba tina-Nyo, to utu-utus-Nyo, ka' anu saja' mombatuki Ia. Aha jinojoong kiijo' mae tino pia-piansinaamo na kopinnyo. 13 Tempo'nyo Sinaa Daka' Paskah nu Yahudi malia'mo toka, i Yesus namba i Yerusalem. 14 I Laigan nu Tumpu i Yerusalem, Ia nontokai anu saja' mompobaluk sapi', domba tiba tomonsi' malapati'; ka' anu saja' montolosi doi sinumuhang i kiijo'. 15 I Yesus nombau sa'angu' na pompohos, te kahohon na binau lantas nonsia'i binatang haha aijo', te domba ka' sapi' lengkat i uno nu Laigan nu Tumpu. Santo meja-meja' nu anu saja' montolosi doi pinosungkehet-Nyo, sahingga doi nu aha notatabumo noyaya. 16 Lantas Ia notatae hi anu mobaluk tomonsi' malapati', "Hangkat na aiya iwi-iwi'. Boli opotimbali na Laigan nu Tuumang-Ku tampat badagangan!" 17 Sahingga anu saja' mombatuki Ia tinonginau'mo i ayat nu Kitab nu Tumpu sumo uuka, "Mongka'ima'i Laigan-To, o Tumpu, talalo saja' Ku inau' i kinyonyoang-Ku." 18 To mia-mian anu mongkuasai Yahudi nonggagakon i Yesus, koonyo nu aha, "Soba pombau anu okabangangi salaku tanda hi kami, momponyata' taalu' Beleyum ko hak mombau sumo aiya." 19 I Yesus nontaami, "Hobo'akon na Laigan aiya, ka' i uno nu tolun sinaa po'ule'je Ku potinjo." 20 Lantas aha notatae, "Patompulu' anom na taun na kopinnyo nompotinjo Laigan nu Tumpu aiya. Ka' Beleyum na mongka' oho' po'ule' mompotinjo na ola tolun sinaa?" 21 Panyo Laigan nu Tumpu anu pinatuan nu potatae i Yesus aijo'mo butong-Nyo. 22 Jadi, lapas aijo' salatan i Yesus po'ule'mo pinotumuu' lengkat i kinasilakaan-Nyo, tinonginau'je na anu saja' mombatuki Ia saba' han aijo' toho'mo tinaloakon-Nyo. Sahingga aha pinalesayamo hi apaa na anu tinulis i uno nu Kitab nu Tumpu, ka' apaa na anu tinaloakonmo i Yesus. 23 Hau-haunyo i Yesus kiijo' i Yerusalem tempo'nyo Molame'akon Paskah, da'isan na mian pinalesaya hi Ia kalana nombaumo anu okabangangi. 24 Panyo i Yesus madi' mompalesaya aha, kalana Nusumbu' na mian iwi-iwi'. 25 Madi' pilenje mian mombee'i katalangan hi Ia mongkona mian pa' ihe, kalana nu posi sumbu' pa' apaa na i uno nu kinyonyoa nu mian.

Yohanes 3

1 Daagi' ko samian anu pande i agama gampanyo nu aha mian Farisi, sanggonyo i Nikodemus. 2 Ia tinoka pihi-pihi hi Yesus ka' notatae, "Tuumangku Gulu', osumbu' mami na Kita Tuuma sinai mae nu Tumpu. Kalana madi' ko samian anu moko ala mombau anu okabangangi susumo anu binau nu Kita Tuuma, de Tumpu madi' montombaya'i ia." 3 I Yesus nontaami, "Palesayamo, madi' ko samian pe'e timbali minsoop anu palesayamo hi Tumpu, de madi' ia po'ule' ohampeakon." 4 "Te toho' mian anu motu'amo po'ule' ohampeakon," koonyo i Nikodemus hi Yesus. "Te ia moko ala po'ule' minsoop i uno nu kompong nu tinanyo ka' po'ule' ohampeakon?" 5 I Yesus nontaami, "Totu-totu'u na potataeng-Ku aiya: de mian madi' ohampeakon nu uee ka' mule' nu Roh nu Tumpu, mian aijo' madi' timbali mian anu palesayamo hi Tumpu. 6 Butong nu mian susumo aiya anu kantoan, ohampeakon nu tu'a nyonyo, panyo palesaya hi Tumpu ohampeakon nu Roh nu Tumpu Allah. 7 Boli bangang de Ku taloakon: komiu iwi-iwi' tionyo po'ule' ohampeakon. 8 Mombun lumap pa' moya na nu kahanda'i; ohongonto na onyi'nyo, panyo madi' osumbu'to pa' iyamae na pinolengkatannyo, ka' pa' moya na kalambanannyo. Sumo aijo'mo na anu ohampeakon nu Roh nu Tumpu." 9 "Mosia na anu sumo aijo' timbali?" pinokilawa i Nikodemus. 10 I Yesus nontaami, "Beleyum gulu' nu Israel; ka' kadaka' madi' nusumbu'? 11 Palesayamo: kami monsisik ola apaa na anu osumbu' mami, ka' kami timbali sakisi ola apaa na anu tinoamo mami; panyo komiu madi' mongka'oho' montalima anu sinakisian mami. 12 Komiu madi' palesaya de aku monsisikakon hi komiu mongkona ha-han anu i dunia aiya; mosia na komiu timbali palesaya, de aku monsisikakon hi komiu ha-han mongkona suluga'? 13 Ma'isa toho' ko samian pe'e anu noliba'mo i suluga', ola ahi' Ia anu nintatau' i Dunia aijo'mo Anak nu Mian. 14 Susumo i Musa noliba'akon ulo tambaga i sangkau na kau' bololang i padang bolaa, sumo aitu mule' Anak nu Mian tionyo oliba'akon, 15 da iwi-iwi' na mian anu palesaya hi Ia mohumpak kantumuu'an talakana' ka' toka sidu-sidutu'." 16 Kalana sumo aitu na Tumpu mongkalibosi mian i dunia aiya, sahingga Ia nombee' Anak-Nyo samba-sambatunyo da ihehe na mian anu palesaya hi Ia madi' mohumpak ka'idekan, panyo mohumpak kantumuu'an talakana' ka' sampe toka sidu-sidutu'. 17 Kalana Tumpu nompokau mae Anak-Nyo misa' da mohukum dunia aiya, panyo da momposalamat. 18 Mian anu palesaya hi Ia madi' o hukum. Panyo anu madi' palesaya polo'mo i hukum nu Tumpu, kalana ia madi' palesaya hi Anak nu Tumpu anu sa'a-sa'angu'nyo. 19 Ia otuntut kalana han aiya: Jingka aijo' tinokamo i dunia, panyo mian madi' mongka'ima'i jingka, ola lebe mongka'ima'i pintung kalana apaa na anu nubau nu aha ma'idek. 20 Batu-batu mian anu mombau anu ma'idek, mongka'ideki jingka; ia madi' mongka'oho' toka i jingka, da anu ma'idek nunu bau nu aha boli kantoan. 21 Panyo mian anu mombau pongka'oho' nu Tumpu, toka i jingka da kantoan apaa na anu binaunyo memang mombatuki pongka'oho' nu Tumpu. 22 Lapas aijo' i Yesus tiba anu saja' mombatuki Ia nambamo i Yudea. Ia jinojoong mae kiijo' tino pia-piam pahu na kopinnyo tiba aha ka' nompalamandikan. 23 - 24 Tempo'nyo aitu i Yohanes ma'isa ninsoop i talungku'. Ia nompalamandikan i lipu' Ainon, madi' majo'on lengkat i Salim, kalana i kiijo' mae manjoo' na uee. To mia-mian tinoka hi ia, ka' pinalamandikannyo na aha. 25 Toto sangga'at anu saja' mombatuki Yohanes, nontampu'unimo pinainggaga tiba mian nu Yahudi mongkona atulan nu mompobelesi' butong. 26 Aha namba hi Yohanes ka' notatae, "Kita Tuumangku Gulu', ugaat daagi' osumbu' nu kita Tuuma na mian anu nojajalan tiba kita Tuuma i santoa nu Kaunyo Yordan aijo', anu pipinotiju' nu kita Tuuma hi kami u'utu mae? Ia tempo' uuka singkona mompalamandikan ka' iwi-iwi' na mian namba hi Ia!" 27 I Yohanes nontaami, "Mian madi' moko ala montumpui apa-apaa, de madi' nubee' nu Tumpu hi ia. 28 Posi komiu nohongomo aku notatae, 'Aku misa' Tomundo anu Momposalamat. Aku sinai mamba momona, Ia imihije.' 29 Boting boune tumpunyo boting mo'ane. Bela' nu boting mo'ane aijo' ola tuminjo monsangalui ka' mohongo, ka' ia sanang de mohongo potatae nu boting mo'ane. Sumo aitumo na aku. Uuka aku sanang hondo. 30 Ia na anu tionyo mompaka penting, ka' aku na anu komadi-madi'nyomo penting." 31 Anu toka lengkat mae kiita' i bawo molingkudui iwi-iwi'. Anu toka lengkat mae i dunia minsoop mian nu dunia, ka' motatae mongkona ha-han nu dunia. Ia anu toka lengkat mae kiita' i bawo molingkudui iwi-iwi'. 32 Ia notatae mongkona apaa na anu tinoamo ka' anu ihongo-Nyomo, panyo madi' ko samian pe'e palesaya hi anu sinakisian-Nyomo. 33 Mian anu palesaya hi anu sinakisian-Nyomo aijo', mongakui saba' Tumpu aijo' totu'u. 34 Kalana mian anu sinai nu Tumpu mompotokakon potatae nu Tumpu, kalana Roh nu Tumpu binee'mo hi Ia iwi-iwi'. 35 Tuuma mongkalibosi Anak-Nyo, ka' nombee'mo iwi-iwi' na kuasa hi Ia. 36 Mian anu palesaya hi Anak aijo' tionyo mohumpak kantumuu'an talakana' ka' toka sidu-sidutu'. Panyo mian anu madi' montapali Anak aijo', madi' mohumpak kantumuu'an. Ia ohukum nu Tumpu sidu-sidutu'.

Yohanes 4

1 To mia-mian nu Farisi nohongo i Yesus nohumpak ka' nompalamandikan lebe da'isan molingkudui anu mombatuki Yohanes. ( 2 Sabenannyo i Yesus madi' nompalamandikan, panyo ola ahi' anu saja' mombatuki Ia.) 3 Salatan sinumbu'mo i Yesus na to mia-mian nu Farisi nohongomo lele aijo', Ia namba nompala'i Yudea ninsusule' i Galilea. 4 Ia namba aijo' Ia tionyo motulu i Samaria. 5 Sahingga tinoka na i Yesus i sa'angu' na kota nu Samaria sanggonyo Sikhar, madi' majo'on lengkat i tano' anu tempo'nyo naipuan mae binee' i Yakub hi Yusuf anaknyo. 6 I kiijo' daagi' ko bubung i Yakub. I Yesus nalawemo hondo kalana i lumajang, kalana aitu Ia sinumuhang i sohipi' nu bubung. Tempo'nyo aijo' kila-kila jam sampulu'mo ka' ohua' sonsu'unmo na sinaa. 7 - 8 Ka' anu saja' mombatuki Yesus nambamo i kota mongoli anu okaan. Lantas tinoka na boune nu Samaria montauk uee. I Yesus notatae hi ia, "Kita tina, de timbali Aku mompoita monginum?" 9 Boune nu Samaria aijo' nontaami, "Kita Tuan mian nu Yahudi, aku mian nu Samaria; kadaka' kita Tuan mompoita monginum hi belengku?" (Kalana to mia-mian nu Yahudi madi' mompahasumbu' tiba mian nu Samaria.) 10 I Yesus nontaami, "De beleyum monsumbu' apaa na anu nubee' nu Tumpu ka' ihe na mompoita monginum hi beleyum tantu beleyum na momoita monginum hi Ia, ka' Ia tionyo mombee'i beleyum uee kantumuu'an." 11 Koonyo nu boune aijo', "Kita Tuan madi' ko pontauk, ka' bubung aiya maleeng hondo. Lengkat mae iya na pohumpakan i Tuan uee kantumuu'an? 12 I Yakub, tuuma nu mompolee' mami, na nombee' bubung aiya hi kami. Ia mongala uee anu o inum i aiya; sumo aitu mule' na to ana-anaknyo tiba to bina-binatang potuu'onnyo. Te osangkanto Tuan, i Tuan lebe daka' molingkudui Yakub?" 13 "Mian anu monginum uee aiya saidi' mae po'ule' megot," na koonyo i Yesus, 14 "panyo mian anu monginum uee anu Ku bee', madi'mo daagi' megot sidu-sidutu'. Kalana uee anu Ku bee' aijo' timbalimo mata nu uee i uno nu butongnyo anu mo'ili mosabat ka' mombee'i ia kantumuu'an talakana' sampe toka sidu-sidutu'." 15 Koonyo nu boune aijo', "Tuan, bee'i mae na aku uee aijo', da aku madi'mo po'ule' megot; ka' madi'mo pilenje minsusule' mae i aiya mongala uee." 16 "Lako', laga mae na langkai'um, lantas pinsusule' mae aiya," na koonyo i Yesus. 17 "Aku madi' ko langkai'," na koonyo nu boune aijo'. "Memang totu'u na kooyum," tukoonyo i Yesus. 18 "Kalana beleyum no'osoa pinilimanmo, ka' mo'ane anu tumuu' tua-tuang uuka misa' langkai'um." 19 "Uuka aiya kusumbu' kita Tuan samian na Nabi," na koonyo nu boune aijo'. 20 "Mompolee' mami monsombah Tumpu i bungkutnyo aiya, panyo bansanto Tuan montaloakon ola i Yerusalem na tampatnyo mian monsombah Tumpu." 21 "Palesayamo," na koonyo i Yesus hi ia, "tokaje na tempo'nyo mian monsombah Tuuma, misa'mo i bungkutnyo aiya, ka' misa' mule' i Yerusalem. 22 Komiu mian nu Samaria monsombah anu madi' osumbu' miu, panyo kami mian nu Yahudi monsombah Ia anu osumbu' mami, kalana kasalamatan toka lengkat mae hi mian nu Yahudi. 23 Panyo tokaje na tempo'nyo, ka' memang tinokamo kalana Roh-je nu Tumpu na mongkuasai sahingga to mia-mian monsombah Tuuma salaku Tumpu anu totu-totu'u susumo anu nunu kahanda'i nu Tuuma. 24 Kalana Tumpu aijo' Roh, ka' ola kalana kuasa nu Roh nu Tumpu, to mia-mian moko ala monsombah Tuuma susumo daagi' ko Ianyo." 25 Boune aijo' notatae hi Yesus, "Kusumbu' Tomundo anu Momposalamat (anu osanggohi Kristus) tokaje mae. De Ia tokamo iwi-iwi' na apa-apaa nu poto'ije hi kita." 26 "Akumo na Ia," koonyo i Yesus, "Akumo na anu aiya hau-haunyo motatae tiba beleyum." 27 Tempo'nyo aitu anu saja' mombatuki Yesus ninsusule'mo. Aha binangang nontoa i Yesus basisik tiba samian na boune. Panyo madi' ko samian pe'e anu aijo' hi aha nompokilawa hi boune aijo', "Kita tina palalu apaa?" kabai anu nompokilawa hi Yesus, "Ka' kadaka' kita Tuuma basisik tiba boune aijo'?" 28 Saba' pinala'ian nu boune aijo' na gumbangnyo i kiijo', lantas nopadeka' namba i kota ka' notatae hi to mia-mian anu i kiijo' mae, 29 "Imbo', mamba toa na mian anu nompoto'i hi belengku iwi-iwi' na anu toho'mo binaungku. Ugaat Iamo ai-aijo' na Tomundo anu Momposalamat?" 30 Saba' mian haha aijo' nompala'i kota ka' namba hi Yesus. 31 Hau-haunyo aijo' anu saja' mombatuki Ia nompasomo i Yesus mongkaan, "Kita Tuumangku Gulu'," na koonyo nu aha, "imbo' da mongkaan." 32 Panyo i Yesus nontaami, "Daagi' ko anu okaan hi beleng-Ku anu madi' osumbu' miu." 33 Sahingga anu saja' mombatuki Ia nontampu'unimo nompaha poki-pokilawa, "Te ko anu nomboai mae anu okaan hi Ia?" 34 Lantas i Yesus notatae, "Anu Ku kaan aijo'mo mombatuki pongka'oho'-Nyo anu nonsai mae Aku, ka' mompotimbali kalaja anu binee'-Nyo hi beleng-Ku. 35 Komiu motatae, 'Daagi' opat na bitu'on pompadakanmo.' Panyo Aku motatae hi komiu: Tanggalakon na to ale-ale' singkapmo kinangkinian me montanda'i o padak! 36 Mian anu mompadak montampu'unimo montalima tamboonyo, ka' molimu' hasinnyo da bau kantumuu'an anu talakana' sampe toka sidu-sidutu'. Sahingga mian anu montugan tiba mian anu mompadak timbali mongoa'i kasanangan hingga-hinggat. 37 Ande-andeon aiya totu'u suele, 'Samian na motugan, mian sangga'at na mompadak.' 38 Aku monsai komiu mamba mompadak i ale' anu madi' kinalaja miu; mian sangga'at nokalajamo kiijo' mae, lantas komiu na montalima ka'untungannyo i kalaja nu aha." 39 Da'isan na mian nu Samaria anu jojoong i kota aijo' pinalesayamo hi Yesus, kalana boune aijo' notatae, "Ia nontaloakonmo hi belengku iwi-iwi' na anu toho'mo binaungku." 40 Saba' tempo'nyo mian nu Samaria haha aijo' siningkabotmo tiba i Yesus, pagala kinakase nu aha, da Ia jojoong tiba aha. Jadi i Yesus jinojoong i kiijo' inguansinaa na kopinnyo. 41 Lapas aitu nompaka panjoo'mo na mian palesaya hi Yesus kalana nohongomo apaa na anu pinogulu'-Nyo hi aha. 42 Aha notatae hi boune aijo', "Kami palesayamo uuka aiya, misa' ola kalana apaa na anu tinaloakonmo nu beleyum hi kami, panyo kalana posi ihongomo mami na Ia, ka' nonsumbu'mo taalu' memang Ia anu Momposalamat dunia." 43 Lapas inguansinaa na jinojoong i Sikhar, i Yesus nambamo i Galilea. 44 Posi i Yesus nontaloakonmo, "Samian na nabi madi' o'adati i posi kampungnyo." 45 Panyo tempo'nyo Ia tinoka i Galilea, mian haha i kiijo' mae sanang na kinyonyoa nolabot Ia, kalana aha kiijo'mo i Yerusalem kakona i Sinaa nu Lamean Daka' Paskah, ka' toho'mo nontoa na iwi-iwi' apaa na anu binau i Yesus. 46 Lapas aijo' i Yesus ninsusule'mo i Kana i tano' nu Galilea, kiijo' mae Ia toho'mo nongabali' uee tinimbali anggur. I kota kiijo' daagi' ko samian anu ko pangkat bakalaja i pamalentah, anaknyo hau-haunyo masakit kiijo' i Kapernaum. 47 Salatan ihongonyo na i Yesus tinokamo i Galilea, lengkat mae i Yudea, ia inamba hi Yesus ka' nompoita da i Yesus toka mae i Kapernaum mompa'alinakon anaknyo anu kiniboli' sinilakamo. 48 I Yesus notatae hi anu ko pangkat mokalaja i pamalentah aijo', "De komiu madi' montoa anu okabangangi, komiu madi' palesaya." 49 "Tuan," tinaaman nu anu ko pangkat mokalaja i pamalentah aijo', "palia' mae toka da ma'isa pe'e anakku silaka." 50 Koonyo i Yesus hi ia, "Lako'mo, anakum na'alinmo." Mian aijo' palesaya i potatae i Yesus, lantas ia nambamo. 51 I tonga' nu jalan, to posa-posaihon tinokamo hi ia, ka' nompoto'i, "Anak i Tuan na'alinmo." 52 Lantas pinokilawanyo hi aha, jam sangkuka na anak aijo' nontampu'unimo ma'alin. Aha nontaami, "Nabongi kila-kila jam sambatu sonsu'un na sinaa, panasnyo na'alinmo." 53 Lantas tuuma nu anak aijo' tinonginau'mo saba' tempo'mo ai-aijo' na i Yesus notatae hi ia, "Anakum ma'alinmo." Sahingga ia ka' iwi-iwi' na anu sampoto utusannyo pinalesayamo hi Yesus. 54 Aijo'mo na anu okabangangi ko ohua'nyo anu binau i Yesus i Galilea salatan Ia tinokamo lengkat mae i Yudea.

Yohanes 5

1 Lapas aijo' daagi' ko lamean nu Yahudi, sahingga i Yesus nambamo i Yerusalem. 2 I Yerusalem koko "Sabatan nu Domba," daagi' ko sa'angu' na talaga de i basa' nu Ibrani osanggohi Betesda. I kiijo' daagi' ko lambingnyo olima'. 3 I lambingnyo haha aijo' da'isan na mian masakit sika-sika male'; daagi' ko anu mapisok, daagi' ko anu pengko', daagi' ko anu kapi'. Aha iwi-iwi' montanda'i uee nu talaga aijo', mokokembong. 4 Kalana toto minsan malaikat nu Tumpu mintatau' i talaga aijo' ka' mongkembong ueenyo. Ka' mian masakit anu momona makakiop i talaga aijo' de ueenyo mokokembongmo tionyo ma'alin mau mule' panyakit apaa na o'oa'i. 5 I Tampat aijo' daagi' ko samian na mo'ane anu masakit tolumpulu'mo ka' ualu' na taun na kopinnyo. 6 I Yesus nontoa ia male-male' aijo' mae, ka' Nusumbu' ia pininmo hondo na nasakit; lantas i Yesus nompokilawa hi ia, "Beleyum mongka'oho' ma'alin?" 7 Mian masakit aijo' nontaami, "Kita Tuumangku, madi' ko mian aiya anu montaka' aku mokiijo' mongkiobakon i talaga, de ueenyo mokokembongmo. Ka' hau-haunyo aku mokiijo' i talaga, mian sangga'at polo'mo i moona na makakiop." 8 Saba' i Yesus notatae hi ia, "Bulamo, hangkat na ampasum ka' lajangmo." 9 Tempo' aitu lajangmo na'alin na mian aijo'. I hangkatnyo na ampasnyo ka' i lumajang. Han aijo' tinimbali kakona i sinaa nu Sabat. 10 Kalana aijo' anu mongkuasai Yahudi notatae hi mian anu sala'je na'alin aijo'. "Sinaa aiya sinaa nu Sabat. Beleyum madi' timbalimo hangkat ampasum." 11 Panyo mian aijo' nontaami, "Mian anu nompa'alinmo aku u'uka na nompokau aku noki hangkat ampasku ka' lumajang." 12 "Ihe na nompokau beleyum mohangkat ampasum ka' lumajang?" pinokilawa nu aha. 13 Panyo mian anu na'alinmo aijo' madi' monsumbu' pa' ihe na Ia, kalana i Yesus madi'mo tinoa i totonga' nu mian da'isan aijo'. 14 Lapas aijo' i Yesus siningkabotmo tiba mian aijo' i uno nu Laigan nu Tumpu, ka' notatae hi ia, "Uuka aiya beleyum ma'alinmo. Bolimo po'ule' baladosa' da boli mongoa'i anu lebe ma'idek." 15 Lantas inamba na mian aijo' ka' nompoto'i hi anu mongkuasai Yahudi, tukoonyo i Yesus na nompa'alin ia. 16 Ka' kalana aijo' aha nontampu'unimo monguesani Yesus, kalana Ia nompa'alin i sinaa nu Sabat. 17 Panyo i Yesus notatae hi aha, "Tuumang-Ku saja' bakalaja toka-toka tempo' uuka, ka' Aku mule' suele mokalaja." 18 Potatae aijo' nombau aha anu mongkuasai Yahudi lebe molio jalan da mompatei Ia. Aha mombau sumo aijo', misa' ola kalana Ia molanggai atulan nu agama mongkona sinaa nu Sabat, panyo mule' kalana Ia notatae tukoonyo Tumpu aijo' Tuuma-Nyo; alati'nyo Ia mompokakanakon Tumpu tiba butong-Nyo. 19 I Yesus nontaami mian haha aijo' sumo uuka, "Palesayamo, Anak madi' moko ala mombau apa-apaa de ola posi kuasanyo. Ia ola mombau apaa na anu tinoa-Nyomo binau nu Tuuma-Nyo. Kalana apaa na anu binaumo nu Tuuma, aijo'mo suele na nubau nu Anak. 20 Kalana Tuuma mongkalibosi Anak, ka' mompotiju' hi Ia iwi-iwi' apaa na anu pinosi bau-Nyomo. Aitu pe'e Tuuma mompotiju'je hi Ia ha-han anu lebe daka' mule', sahingga komiu bangang. 21 Tuuma aijo' po'ule' mompotumuu' mian mate, ka' mombee'i aha kantumuu'an anu talakana' ka' toka sidu-sidutu'; sumo aitu mule' Anak mombee'i kantumuu'an sidu-sidutu' hi mian anu nuka'oho' Nubee'i kantumuu'an. 22 Posi Tuuma pe'e madi'mo momputusi hukuman mau mule' pa' hi he. Iwi-iwi' na kuasa momputusi hukuman binee'nyomo hi Anak-Nyo. 23 Nubau nu Tuuma sumo aijo' da iwi-iwi' na mian mongadati Anak sumo aha mongadati Tuuma. Mian anu madi' mongadati Anak, madi' suele mongadati Tuuma anu nonsai mae Anak. 24 Totu-totu'u hondo na anu Kutaloakon aiya; mian anu mongintomakon potataeng-Ku, ka' palesaya hi Ia anu nonsai mae Aku, ko kantumuu'an anu talakana' ka' toka sidu-sidutu'. Ia madi' o hukum, ia nolapasmo lengkat i kapatean ka' nohumpakmo kantumuu'an. 25 Palesayamo: Tokaje na tempo'nyo -- aitu pe'e tinokamo na tempo'nyo -- mian mate mohongo potatae nu Anak nu Tumpu. Ka' mian anu mohongo Ia tumuu'. 26 Sumo Tuuma pinolengkatan nu kantumuu'an, Ia suele mompotimbali Anak-Nyo polengkatan nu kantumuu'an. 27 Ia nombee'mo hi Anak-Nyo hak momputusi hukuman, kalana Ia Anak nu Mian. 28 Boli komiu bangang na mohongo han aiya, kalana tokaje na tempo'nyo saba' iwi-iwi' na mian anu natemo mohongo potatae-Nyo, 29 lantas mosabat lengkat mae i pinolamunan. Mian anu nombaumo anu ma'ima', saidi' mae po'ule' mobula da tumuu'. Panyo mian anu nombaumo anu ma'idek, saidi' mae po'ule' tumuu' da o hukum." 30 "Aku madi' moko ala mombau apa-apaa de ola posi pongka'oho'-Ku. Aku ola momputusi hukuman sumo anu pinalentahkonmo nu Tumpu. Ka' kaputusan-Ku adin, kalana Aku madi' mombatuki posi pongka'oho'-Ku, panyo o ala i pongka'oho' nu Tuuma anu nonsai mae Aku. 31 De Aku mombee'i katalangan mongkona posi butong-Ku, katalangan aijo' madi' timbali opalesaya. 32 Panyo daagi' ko mian sangga'at anu nombee'i katalangan mongkona Aku, ka' Kusumbu' na anu tinalangkannyo aijo' totu'u. 33 Komiu nonsaimo mian namba hi Yohanes, ka' ia nombee'imo katalangan anu totu'u mongkona Aku. 34 Han aijo' pinoto'ing-Ku, misa' kalana Aku mompalalui katalangan lengkat hi mian, panyo da komiu oposalamat. 35 I Yohanes aijo' sumo sulu' anu moak ka' monjingkai. Madi' pin na komiu sanang montalima jingkanyo aijo'. 36 Panyo anu tinalangkan-Ku lebe daka' molingkudui anu tinalangkan i Yohanes. Apaa na anu Kubau uuka aiya, aijo'mo na kalaja anu pinokauhakon nu Tuuma hi beleng-Ku, bau pomponyata' saba' Tuuma nompokaumo mae Aku. 37 Ka' Tuuma anu nonsai mae Aku, suele mombee'imo katalangan mongkona Aku. Komiu ma'isa toho' nohongo potatae-Nyo kabai nontoa butong-Nyo. 38 Potatae-Nyo madi' una-una' i uno nu kinyonyoaum kalana komiu madi' palesaya hi beleng-Ku anu sinai-Nyo mae. 39 Komiu mompakalioi Kitab nu Tumpu kalana monsangka au'aitu desumo aijo' komiu ko kantumuu'anmo anu talakana' ka' toka sidu-sidutu'. Ka' posi Kitab nu Tumpu aijo' nombee'imo katalangan mongkona Aku. 40 Panyo komiu madi' mongka'oho' toka hi beleng-Ku da mohumpak kantumuu'an sidu-sidutu'. 41 Aku madi' molio da o puji' nu mian. 42 Kusumbu' na komiu. Kusumbu' na komiu madi' mongkalibosi Tumpu i uno nu kinyonyoaum. 43 Aku tinoka kalana kuasa nu Tuumang-Ku, panyo komiu madi' montalima Aku. Panyo de mian sangga'at na toka posi kuasanyo, komiu mongka'oho' montalima ia. 44 Mosia na komiu timbali palesaya, de komiu molio da o puji' nu bubu komiu ka' madi' bala usaha molio pompuji' anu lengkat mae hi Tumpu, anu ola-olamo Ia na Tumpu? 45 Boli monsangka Aku mompisala'i komiu i ahop nu Tuuma. Ola ahi' anu mompisala'i komiu, aijo'mo i Musa, ia na anu otaha'imani miu. 46 De komiu palesaya hi Musa. Komiu tantu palesaya hi beleng-Ku. Kalana mongkonamo Aku na tinulisnyo. 47 Panyo de komiu madi' palesaya hi anu tinulis i Musa, mosia na komiu timbali palesaya hi anu Ku taloakon?"

Yohanes 6

1 Madi' pinin ilapas aijo', i Yesus nambamo i santoa nu Dowiwi Galilea, anu biasa osanggohi Dowiwi Tiberias. 2 Salatan tinokamo i kiijo' da'isan na mian nombatukimo Ia, kalana aha nontoamo anu okabangangi binau-Nyo, i nompa'alin to mia-mian masakit. 3 I Yesus nindako nokiita' i bungkutnyo, lantas sinumuhang i kiita' mae tiba anu saja' mombatuki Ia. 4 Tempo'nyo aitu ohanimo na Sinaa Daka' nu Paskah Yahudi. 5 Salatan i Yesus nontoa titikub, Ia nontoa mian nomomuyutmo mae toka hi Ia. Sahingga Ia notatae hi Filipus, "Iyamae na timbali pongolianto anu okaan da iwi-iwi' na mian aiya timbali mongkaan?" ( 6 Sinumbu'mo i Yesus apaa na anu ka'oho' Nubau, panyo Ia notatae sumo aijo' kalana Ia mongka'oho' monguji' i Filipus.) 7 I Filipus nontaami, "Roti anu olinyo ola ua'atu na doi salaka madi' mompoosampa' obagi-bagi hi mian haha aiya, mau mule' toto samian ola mohumpak sangkiding." 8 Daagi' ko samian anu saja' mombatuki Yesus sangga'at, aijo'mo i Andreas, utus i Simon Petrus, notatae, 9 "I aiya daagi' ko anak mo'ane, ko rotinyo olima' ka' uambatu na ikan. Panyo apaa na alati'nyo aijo' toka hi mian anu sumo aiya na ko da'isannyo?" 10 "Pokau na mian haha aijo' sumuhang," koonyo i Yesus. I tampat aijo' manjoo' na hemput, jadi mian haha aijo' sinumuhangmo i hemput -- iwi-iwi' daagi' kila-kila olima' na madala na mian, to momo'ane. 11 Lapas aijo' i Yesus nongala roti aijo' lantas nompoita talima kaseh hi Tumpu. Lapas aijo' binagi-bagiakonnyomo na roti aijo' hi mian da'isan. Lapas aijo' mule' Ia nombagi-bagiakonmo ikan aijo', sampe na'osa na aha nongkaan. 12 Salatan iwi-iwi' nobosumo na nongkaan, i Yesus notatae hi anu saja' mombatuki Ia, "Limu' na labi nu anu kinaan haha aijo'; boli sampe ola o idei." 13 Lantas ilimu' nu aha sampulu' ka' ohua' na kalanjang nobuke', labinyo nu anu olima' na roti kinaan nu mian da'isan aijo'. 14 Salatan tinoa nu mian da'isan na anu okabangangi binau i Yesus, aha notataemo, "Totu'u aiyamo na Nabi anu ota-otanda'i toka i dunia!" 15 Nusumbu' i Yesus na aha toka mompakisa Ia da timbalimo tomundo nu aha. Aijo' na sababnyo Ia inamba nompalaiyakon butong-Nyo i bungkutnyo. 16 Salatan sinaa montampu'unimo malom, anu saja' mombatuki Yesus nintudunmo nokaiyong i dowiwi. 17 Lantas aha sinumake'mo i duangan motaapmo i dowiwi aijo' mokiijo' i Kapernaum. Sinaa i nalomo, panyo i Yesus ma'isa pe'e tinoka hi aha. 18 Hau-haunyo aijo' dowiwi montampu'unimo bokolon kalana mombun makansang hondo. 19 Tonga-tonga'mo aha talabut kila-kila olima' kabai anommo na kilo meter, aha nontoamo i Yesus monsolok mae duangan lumajang i bawo nu uee. Aha nabuhukmo hondo. 20 Panyo i Yesus notatae hi aha, "Boli mabuhuk, Aku na aiya!" 21 Lantas sinanangmo na kinyonyoa nu aha nontalima Ia i uno nu duangan, ka' tempo'nyo aijo' mule' duangan nu aha tinokamo i tampat anu o panjolongi. 22 Dodododopnyo mian da'isan anu daagi' kiijo' i santoa nu dowiwi monsumbu' tukoonyo u'uka ola sa'angu' na duangan aijo' mae. Nusumbu' nu aha anu saja' mombatuki Yesus nambamo sinumake' i duangan aijo', padahan i Yesus madi' nombatuk. 23 Lapas aijo' daagi' ko to pia-piangkuka na duangan lengkat mae i kota Tiberias tinoka nadaduak koko tampat nu mian da'isan aijo' nongkaan roti salatan ilapas na Tumpu nompoita talima kaseh. 24 Salatan mian da'isan aijo' nontoa taalu' i Yesus ka' anu saja' mombatuki Ia madi' ko anu i kiijo', aha suele sinumake' i duangan haha aijo' ka' inamba i Kapernaum molio i Yesus. 25 Tempo'nyo mian haha aijo' siningkabotmo tiba i Yesus i santoa nu dowiwi, aha nompokilawa hi ia, "Kita Tuumangku Gulu', naipian mae na Kita Tuuma tinoka i aiya?" 26 I Yesus nontaami, "Totu'u, komiu molio Aku, misa' kalana komiu nonsumbu'mo alati'nyo nu anu okabangangi binaung-Ku, panyo kalana komiu nobosumo na nongkaan. 27 Boli mokalaja de ola da mohumpak anu okaan anu timbali mingkot ka' mawa'i. Bakalaja da pohumpakan anu okaan, anu madi' toho' mawa'i ka' anu mombee'i kantumuu'an anu talakana' ka' sampe toka sidu-sidutu'. Anu okaan aijo' nubee'je nu Anak Mian hi beleyum, kalana Ia i hangkatmo nu Tumpu, Tuuman-To." 28 Lantas pinokilawa nu aha hi Ia, "Apaa na anu tionyo obau mami da montuluti pongka'oho' nu Tumpu?" 29 I Yesus nontaami, "Aiya na anu nukahanda'i nu Tumpu hi komiu: Palesayamo hi Ia anu sinai mae nu Tumpu." 30 "Desumo aitu," koonyo nu aha, "bukuti' apaa na anu timbali obee'to nu kita Tuuma da kami nontoa ka' palesaya hi kita Tuuma? Apaa na anu obaunto kita Tuuma? 31 Mompolee' mami mongkaan manna i padang bolaa sumo anu tinulis i uno nu Kitab nu Tumpu, 'Ia nompokaan aha roti lengkat mae i suluga'.' " 32 Lantas i Yesus notatae hi aha, "Palesayamo: Misa' i Musa, panyo Tuumang-Kumo na anu nombee'i komiu roti anu sahondo-hondonyo lengkat mae i suluga'. 33 Kalana roti anu binee' nu Tumpu aijo'mo ia anu nintatau' lengkat mae i suluga' ka' mombee'i kantumuu'an hi mian i dunia." 34 "Kita Tuuma," na koonyo nu aha, "saja' obee'i mae na kami roti aijo'." 35 "Akumo na roti anu mombee'i kantumuu'an," tukoonyo i Yesus hi aha. "Mian anu toka hi beleng-Ku madi'mo mompo'ule' mo'ohop sidu-sidutu'. Ka' anu palesaya hi beleng-Ku madi'mo mompo'ule' megot sidu-sidutu'. 36 Panyo sumo anu tinaloakon-Kumo hi beleyum, mau mule' komiu nontoamo Aku, komiu madi' palesaya. 37 Iwi-iwi' mian anu binee'mo nu Tuuma hi beleng-Ku, toka hi beleng-Ku. Madi' Aku mongkangkang mau pe'e ihe na anu toka hi beleng-Ku. 38 Kalana Aku nintatau' mae lengkat i suluga', misa' mombau anu posi pongka'oho'ku, panyo pongka'oho'-Nyo nu anu nonsai mae Aku. 39 Ka' aiya na kahanda'-Nyo nu anu nonsai mae Aku: Da iwi-iwi' na mian anu binee'mo hi beleng-Ku, madi' ko samian pe'e na molapus; panyo da po'ule' Kupotumuu' na aha i Sinaa Kakiamatan. 40 Memang aiyamo na nuka'ima'i nu Tuumang-Ku: Da iwi-iwi' na anu montoa Anak ka' palesaya hi Ia ko kantumuu'an anu talakana' toka sidu-sidutu', ka' po'ule' Kupotumuu' i Sinaa Kakiamatan." 41 To mia-mian nu Yahudi nontampu'unimo mompisala'i Yesus, kalana Ia notatae: "Aku roti anu nintau' mae lengkat i suluga'." 42 Aha notatae, "Te misa' aiya i Yesus, anak i Yusuf? Osumbu' mami na tina ka' tuuma-Nyo! Te mosia ka' Ia timbali motatae tukoonyo, Ia nintatau' mae lengkat i suluga'?" 43 Lantas i Yesus notatae hi aha, "Boli mompisala'i. 44 Madi' ko samian pe'e moko ala toka hi beleng-Ku, de Tuuma anu nonsai mae Aku madi' nomboa mae ia hi beleng-Ku; ka' ihe na toka po'ule' Kupotumuu' i Sinaa Kakiamatan. 45 I Uno nu Kitab nu to Nabi-nabi tinulis sumo uuka, 'Iwi-iwi' na mian nu pogulu' nu Tumpu.' Jadi iwi-iwi' na mian anu mohongo Tuuma ka' balagulu' hi Ia, toka mae hi beleng-Ku. 46 Aijo' misa' alati'nyo au'aitu daagi' ko mian anu nontoamo Tuuma. Ola Ia anu tinoka lengkat mae hi Tumpu na anu nontoamo Tuuma. 47 Osumbu'mo: Mian anu palesaya na ko kantumuu'an anu talakana' toka sidu-sidutu'. 48 Akumo na roti anu mombee'i kantumuu'an. 49 Mompolee' miu nongkaan manna i padang bolaa, ka' aha i natemo ahi'. 50 Panyo madi' sumo aijo' na roti anu nintatau' mae lengkat i suluga'; mian anu mongkaan roti aijo' madi' mate. 51 Akumo na roti nintatau' mae lengkat i suluga' -- roti anu mombee'i kantumuu'an. Mian anu mongkaan roti aiya tumuu' sidu-sidutu'. Roti anu Kubee' da bau kantumuu'an nu mian i dunia aijo'mo butong-Ku." 52 Nohongo aijo', to mia-mian nu Yahudi pinainggagamo samian ka' samian. "Mosia na mian aiya timbali mombee' butong-Nyo hi kita da okaan?" tukoonyo nu aha. 53 Lantas i Yesus notatae hi aha, "Palesayamo: De komiu madi' mongkaan butong Anak nu Mian ka' monginum baso'-Nyo, komiu totu-totu'u madi' tumuu'. 54 Mian anu mongkaan butong-Ku ka' monginum baso'-Ku ko kantumuu'an talakana' ka' toka sidu-sidutu', ka' po'ule' Ku potumuu' i Sinaa Kakiamatan. 55 Kalana butong-Ku totu-totu'u anu okaan, ka' baso'-Ku totu-totu'u anu o inum. 56 Mian anu mongkaan butong-Ku ka' monginum baso'-Ku tataap mosa'angu' tiba Aku, ka' Aku tiba ia. 57 Tuuma anu tumuu' aijo' nonsai mae Aku, ka' Aku mule' tinumuu' kalana i Tuuma. Sumo aitu mule' na mian anu mongkaan butong-Ku, tumuu' kalana Aku. 58 Aiyamo na roti anu nintatau' mae lengkat i suluga': misa' roti sumo anu kinaan nu mompolee' miu. Kalana noko kaan roti aijo', aha i natemo. Panyo mian anu mongkaan roti aiya, tumuu' sampe toka sidu-sidutu'." 59 Iwi-iwi' aijo' tinaloakon i Yesus tempo'nyo Ia nompogulu' i uno nu laigan pogalejaan i Kapernaum. 60 Noko hongo potatae i Yesus aijo', da'isan na anu saja' mombatuki Ia nontaloakonmo, "Pokinde' aiya talalo maboat. Ihe na moko ala montalima!" 61 Nusumbu' i Yesus na anu saja' mombatuki Ia mososon mongkona han aijo'. Sahingga Ia notatae, "Te komiu mongkakulangakonmo potataengku aijo'? 62 Pa' mosia na katimbaliannyo saidi' mae de komiu montoamo Anak nu Mian moliba'mo minsusule' i tampat pinolengkatan-Nyo mae? 63 Anu nompotimbali mian tumuu' aijo'mo Roh nu Tumpu. Kahosonan nu mian madi' ko kaliangannyo. Potatae anu Ku taloakon hi komiu aiya, aijo'mo na potatae nu Roh nu Tumpu ka' potatae anu mombee'i kantumuu'an. 64 Panyo daagi' mule' ko anu aiya hi komiu na madi' palesaya." (Sinumbu'mo i Yesus salatanmo pe'e imoonanyo ihehe na anu madi' mongka'oho' palesaya, ka' ihe na anu mongkabisa'i Ia.) 65 Lantas i Yesus po'ule' notatae, "Aijo' na sababnyo Ku poto'i hi komiu, saba' madi' ko samian pe'e moko ala toka hi beleng-Ku de madi' nupobee' nu Tuuma." 66 Lengkat pe'e tempo' aijo' manjoo' na anu saja' mombatuki Ia nompala'imo Ia, ka' madi'mo nongka'oho' po'ule' mombatuki Ia. 67 Lantas i Yesus nompokilawa hi sampulu' ka' ohua' na anu saja' mombatuki Ia, "Pa' komiu suele mompala'imo Aku?" 68 "Kita Tumpu," na koonyo i Simon Petrus hi Ia, "Hi ihe na kalambanan mami? Potatae nu Kita Tumpu mombee'i kantumuu'an anu talakana' ka' toka sidu-sidutu'. 69 Kami pinalesayamo totu-totu'u, kalana i Tumpumo na anu susi' sinai mae lengkat hi Tumpu." 70 I Yesus nontaami, "Te misa' Aku na nompile'i komiu sampulu' ohua' na mian aiya? Panyo samian anu aiya hi komiu te roh anu ma'idek!" 71 Anu nunu patui nu potatae i Yesus, aijo'mo i Yudas anak i Simon Iskariot. Kalana mau mule' i Yudas minsoop sala' samian anu sampulu' ka' ohua' na anu saja' mombatuki Yesus, ia na mongkabisa'i Yesus.

Yohanes 7

1 Lapas aijo' i Yesus nambamo noyaya i Galilea. Ia madi' mongka'oho' mamba i tano' nu Yudea kalana anu mongkuasai Yahudi i kiijo' mae kahanda'mo mompatei Ia. 2 Tempo'nyo aitu ohanimo na lamean Sinaa Daka' Pondok Daun. 3 Sahingga to utu-utus i Yesus notatae hi Ia, "Pala'imo na tampat aiya ka' lako'mo i Yudea, da anu saja' mombatuki Beleyum timbali ahi' montoa kalajaum. 4 Madi' ko mian anu mompohowini apaa na anu binaunyo, de ia mongka'oho' da talasanggo. De Beleyum mombau ha-han anu sumo aijo', songko-songko na dunia tantu tionyo monsumbu'!" ( 5 Kalana posi to Utu-utus-Nyo pe'e madi' palesaya hi Ia.) 6 "Ma'isa pe'e tempo'nyo kona hi beleng-Ku," koo-Nyo i Yesus hi aha, "panyo komiu, yaya na tempo' timbali. 7 Dunia aiya madi' toho' mongka'ideki komiu. Panyo Aku memang nu ka'ideki nu dunia, kalana Aku saja' montaloakon i dunia kalakuannyo aijo' ma'idek. 8 Posi lako'mo na komiu i lamean aijo'. Aku madi' mamba kalana misa' pe'e tempo'nyo kona hi beleng-Ku." 9 Sumo aijo' na koonyo i Yesus hi to Utu-utus-Nyo, ka' Ia mule' jinojoongmo kiijo' i Galilea. 10 Salatan to Utu-utusnyo inambamo i lamean aijo', hoko-hokot na i Yesus namba posi sausa'nyo madi' sinumbu' nu mian. 11 Tempo'nyo nu lamean aijo', anu mongkuasai Yahudi saja' molio Ia ka' saja' moleleki, "Iyamae na Ia?" 12 Da'isan na mian lewa'mo mongoyongakon Ia. Daagi' ko anu motatae, "Ia mian ma'ima'." Daagi' mule' ko anu motatae, "Madi'! Ia monsaduakon pikilan nu mian da'isan timbali ponga'." 13 Panyo madi' ko samian pe'e na baani motatae i aho-ahop mongkona Ia, kalana aha mabuhuk hi anu mongkuasai Yahudi. 14 Hau-haunyo lamean, i Yesus ninsoopmo i uno nu Laigan nu Tumpu, lantas nontampu'uni nompogulu'. 15 Anu mongkuasai Yahudi binangang hondo ka' notatae, "Mosia na mian aiya ka' manjoo' na anu nusumbu', padahan Ia madi' toho' nosikolah?" 16 I Yesus nontaami, "Anu Ku pogulu' aiya misa' pangajalan-Ku, panyo pangajalan-Nyo anu nonsai mae Aku. 17 Mian anu montuluti pongka'oho' nu Tumpu, monsumbu' pa' pangajalan-Ku lengkat mae hi Tumpu kabai posi lengkat mae hi beleng-Ku. 18 Mian anu mombee' posi pangajalannyo, molio da o'adati na butongnyo. Panyo mian anu molio da o'adati na anu nonsai mae Ia, mian aijo' hodi' madi' baleko' na ia. 19 Te misa' i Musa nombee'imo pale-palentah nu Tumpu hi beleyum? Panyo itina' hi komiu madi' ko anu mombatuki pale-palentah haha aijo'. Ka' kadaka' komiu kahanda'mo mompatei Aku?" 20 Mian da'isan aijo' nontaami, "Beleyum motutuang! Ihe na kahanda'mo mompatei Beleyum?" 21 I Yesus nontaami, "Ola sa'angu' na kalaja anu binaung-Kumo i sinaa nu Sabat, ka' binangang na komiu. 22 I Musa nombee'i komiu atulan da o sunat -- mau mule' sunat aijo' sabenannyo misa' nolengkat mae hi Musa, panyo lengkat mae hi to tutuuma nu nompolee' ma'isa pe'e kino i Musanyo. Kalana aijo', mau mule' i sinaa nu Sabat komiu mongka'oho' monsunat mian. 23 De komiu mombau anu sumo aijo' da boli molanggai atulan i Musa mongkona sunat, kadaka' komiu motambuha' hi beleng-Ku kalana nompa'alin butong nu mian songko-songko i sinaa nu Sabat? 24 Boli mompisala'i mian ola kalana mompintongi anu otoa, panyo kalana mompintongi ka'adilan." 25 Lapas aijo' daagi' ko to pia-piangkuka na mian nu Yerusalem notatae, "Te misa' aiyamo na mian anu oli-olio da o patei? 26 Toamo, Ia motatae lamba-lamba i ahop nu mian da'isan, ka' madi' ko anu montaloakon apa-apaa hi Ia! Ugaat anu mongkuasai kita nonsumbu'mo saba' aiyamo na Ia Tomundo anu Momposalamat? 27 Panyo de Tomundo anu Momposalamat aijo' toka, madi' ko samian pe'e monsumbu' pa' iyamae na pinolengkatan-Nyo! Padahan osumbu'to iyamae na pinolengkatan nu mian aiya." 28 Lapas aijo' hau-haunyo i Yesus mompogulu' i uno nu Laigan nu Tumpu, Ia noloboo'mo notatae daka-daka', "Jadi osumbu'mo miu ihe na Aku aiya, ka' lengkat mae iya na pinolengkatan-Ku? Aku tinoka misa' posi pongka'oho'-Ku. Aku sinai mae nu Ia anu ko hak monsai mae Aku, ka' Ia timbali opalesaya. Panyo komiu madi' monsumbu' Ia. 29 Aku monsumbu' Ia, kalana Aku nolengkat mae hi Ia, ka' Iamo na nonsai mae Aku." 30 Tempo'nyo aitu aha kahanda'mo mohakop i Yesus, panyo madi' ko anu baani montongi Ia, kalana ma'isa pe'e tinoka na tempo'nyo. 31 Da'isan na mian anu i kiijo' montampu'unimo palesaya hi Ia, ka' notatae, "De Tomundo anu Momposalamat aijo' tokamo, ugaat Ia na timbali mombau lebe manjoo' na anu okabangangi molingkudui mian aiya?" 32 To mia-mian nu Farisi nohongomo mosia na mian da'isan haha aijo' mompaha oyo-oyong mongkona i Yesus. Kalana aitu, hingga-hinggat tiba to kapa-kapala nu imam, aha nonsaimo to pia-piangkuka ponjagai Laigan nu Tumpu mamba mohakop i Yesus. 33 I Yesus notatae hi mian da'isan i uno nu Laigan nu Tumpu, "Me sasaingoni' uuka, Aku daagi' hingga-hinggat tiba komiu. Lapas aijo' Aku minsusule'mo hi anu nonsai mae Aku. 34 Komiu molioje Aku, panyo madi' opoko humpak na Aku; kalana komiu madi' moko ala toka i tampat kajojoongan-Ku." 35 Lantas anu mongkuasai Yahudi notataemo samian ka' samian, "Mian aiya kahanda'mo mamba moya sahingga madi' opoko humpakto na Ia? Te Ia kahanda'mo mamba hi to mia-mian Yahudi anu jojoong i sambiha' nu lipu' santano'an i totonga' nu mian Yunani ka' mompogulu' mian nu Yunani? 36 Apaa na poso' nu potatae tukoo-Nyo kita molioje Ia, panyo madi' opoko ala ohumpak ka' mule' kita madi' moko ala montoka tampat kajojoongan-Nyo?" 37 I sinaa kamingkotannyomo nu lamean aijo', aijo'mo sinaa anu talalo hondo penting, i Yesus tinuminjomo i Laigan nu Tumpu ka' notatae daka-daka', "Mian anu megot toka mae hi beleng-Ku da monginum. 38 Mongkona mian anu palesayamo hi beleng-Ku tinulismo i uno nu Kitab nu Tumpu. 'Lengkat i kinyonyoa mo'ili na uee anu mombee'i kantumuu'an.' " ( 39 I Yesus binasisik mongkona Roh nu Tumpu, anu saidi' mae nu talimaje nu to mia-mian anu palesayamo hi Ia. Kalana tempo' aitu Roh nu Tumpu ma'isa binee'; kalana i Yesus ma'isa pinopodaka' i uno nu kasilakan-Nyo.) 40 Da'isan na mian anu nohongo apaa na anu tinaloakonmo i Yesus, ka' i totonga' nu aha daagi'mo ko anu notatae, "Mian aiya matantumo Nabi!" 41 Sangga'at notatae, "Aiyamo na Tomundo anu Momposalamat!" Panyo daagi' mule' ko anu notatae, "Ha, te toho' Tomundo anu Momposalamat toka lengkat mae i Galilea? 42 I uno nu Kitab nu Tumpu tinulis, 'Tomundo anu Momposalamat te lee' mae i Daud, ka' anu toka lengkat mae i Betlehem, aijo'mo kampung kajojoongan i Daud.' " 43 Ahennyo to mia-mian montampu'unimo pinainggaga mongkona i Yesus. 44 Daagi' ko anu mompai hakopmo Ia, panyo madi' ko samian pe'e na moko toongi Ia. 45 Tempo'nyo anu monjagai Laigan nu Tumpu sina-sinai mamba mohakop i Yesus ninsusule'mo mae, to kapa-kapala nu imam tiba to mia-mian Farisi nompokilawamo hi aha, "Ka' kadaka' komiu madi' nomboa mae Ia?" 46 Anu monja-monjagai aijo' nontaami, "Bee', ma'isa toho' ko mian anu notatae sumo Ia!" 47 "Pa' komiu suele pinotimbali-Nyomo ponga'?" koonyo nu to mia-mian nu Farisi aijo'. 48 "Te daagi' ko anu mongkuasai mae kita kabai mian nu Farisi anu pinalesayamo hi Ia? 49 Panyo mian da'isan aiya, aha madi' monsumbu' atulan i Musa, ka' mau mule' mosia aha kinutukanmo." 50 Sala'samian anu kiijo' i mian nu Farisi, aijo'mo i Nikodemus anu toho'mo tinoka hi Yesus. I Nikodemus notatae hi to mia-mian nu Farisi sangga'at, 51 "Koonyo nu Atulan, batu-batu mian madi' timbali o hukum de ma'isa pe'e palakalanyo ohongo, ka' anu binaunyomo o palesa." 52 "Te beleyum suele lengkat mae i Galilea?" tinaaman nu aha. "Soba palesaya na Kitab nu Tumpu! Beleyum montoaje saba' madi' ko Nabi anu molengkat mae i Galilea!" 53 Lapas aijo', iwi-iwi' na mian ninsusule'mo i laigan.

Yohanes 8

1 Panyo i Yesus nambamo nokiita' i Bungkut nu Zaitun. 2 Dodododopnyo subu-subu Ia namba mule' i Laigan nu Tumpu, ka' da'isan na mian tinokamo hi Ia. I Yesus sinumuhang, lantas nontampu'unimo nompogulu' aha. 3 Hau-haunyo aijo' to gulu-gulu' agama ka' to mia-mian nu Farisi nomboamo mae hi Ia samian na boune anu tinokaan masala'. Aha nonsai boune aijo' tinuminjo i totonga', 4 lantas notatae hi Yesus, "Kita Tuumangku Gulu', boune aiya tinokaan hau-haunyo masala'. 5 I Uno nu Atulan i Musa daagi' ko atulan, saba' boune anu susumo aiya tionyo opahambunu'akon nu batu sampe mate. Desumo aiya mosia na pikilanto nu Kita Tuuma?" 6 Aha nompokilawa sumo aijo' da monsobai Ia, da timbali na aha mompisala'i Ia. Panyo i Yesus ola dinumuku ka' lima-Nyo nontulis i tano'. 7 Salatan aha saja'mo nompokau, Ia tinolo dingang, ka' notatae, hi aha, "Mian anu madi' baladosa' atina' hi komiu, ia na moona mombunu'akon batu hi boune aijo'." 8 Lapas aijo' i Yesus po'ule' dinumuku i tano' ka' po'ule' nontulis. 9 Salatan nohongo i Yesus nontaloakon sumo aijo', i nambamo na aha nompala'i tampat aijo' toto samian lengkat pe'e i anu lebe motu'amo. Ahennyo i Yesus me sausa'nyo i kiijo' tiba boune anu daagi' tinjo-tinjo i katinjoannyo. 10 Lantas i Yesus tinolo dingang ka' notatae hi boune aijo', "Iyamo na aha iwi-iwi'? Madi' ko anu nohukum beleyum?" 11 "Madi', Kita Tuuma," na koonyo. "Ma'ima'mo," na koonyo i Yesus, "Aku suele madi' mohukum beleyum. Uuka aiya lako'mo ka' bolimo mombau dosa' mule'." 12 I Yesus binasisik mule' hi mian da'isan tukoo-Nyo, "Akumo na jingka nu dunia. Mian anu mombatuki Aku, madi' lumajang i pintung, panyo mohumpak jingka kantumuu'an." 13 "Uuka Beleyum mombee'i katalangan mongkona posi butongum," koonyo nu to mia-mian Farisi haha aijo' hi Ia, "Katalangan-Um madi' totu'u." 14 I Yesus nontaami, "Mau mule' Aku mombee'i katalangan mongkona posi butong-Ku, katalangan-Ku aijo' totu'u; kalana Ku sumbu' na pinolengkatan-Ku mae ka' moya na kalambanan-Ku. Komiu madi' monsumbu' lengkat mae iya na Aku tinoka ka' moya na Aku mamba. 15 Komiu momputusi palakala nu mian sumo baunyo nu mian momputusi; Aku madi' momputusi palakala nu samian pe'e. 16 Panyo de Aku momputusi palakala nu mian, pomputusing-Ku aijo' adin, kalana Aku madi' ola posi sausa': Tuuma anu nonsai mae Aku mo'imboa tiba Aku. 17 I uno nu Atulan i Musa tinulis sumo uuka: Katalangan anu totu'u aijo'mo katalangan anu ua'aha na mian. 18 Anu mombee'i katalangan mongkona butong-Ku ua'aha -- Aku ka' Tuuma anu nonsai mae Aku." 19 "Tuuma-Um aijo' iyamae?" na koonyo nu aha. I Yesus nontaami, "Komiu madi' monsumbu' Aku, sumo aitu mule' Tuumang-Ku. De komiu monsumbu' Aku, tantu komiu suele monsumbu' Tuumang-Ku." 20 Iwi-iwi' aijo' tinaloakon i Yesus tempo'nyo aitu Ia hau-haunyo nompogulu' i Laigan nu Tumpu, koko tampat nu doi anu o sombahkon. Panyo madi' ko samian pe'e na anu mohakop Ia, kalana misa' pe'e toka na tempo'nyo. 21 I Yesus notatae mule' hi aha, "Aku mambaje, ka' komiu molioje Aku, panyo komiu mateje i uno nu dosa' miu. I tampat kalambanan-Ku madi' opoko toka miu." 22 Saba' anu mongkuasai Yahudi notatae, "Ugaat Ia mongka'oho'mo minoo', kalana Ia nontaloakonmo, 'I tampat kalambanan-Ku madi' opoko toka miu.' " 23 Lantas i Yesus notatae hi aha, "Komiu lengkat mae i aluknyo; panyo Aku lengkat mae i bawo. Komiu lengkat mae i dunia; Aku misa' lengkat mae i dunia. 24 Mokonyo aijo', Aku notatae hi komiu tukoong-Ku, komiu mateje i uno nu dosa-dosa' miu. Ka' memang mateje i uno nu dosa-dosa' miu, de madi' mompalesaya 'Akumo na Ia, anu osa-osanggohi AKU DAAGI'.' " 25 "Ihe ahi' totu-totu'u na beleyum?" pinokilawa nu aha. I Yesus nontaami, "Te daagi' bau apaa na basisik tiba komiu! 26 Daagi' manjoo' na anu mongkona komiu, anu Ku paisisikakon ka' Ku pisala'i. Panyo Ia anu nonsai mae Aku timbali o palesaya. Ka' Aku nompoto'imo i dunia apaa na anu ihongong-Ku lengkat mae hi Ia." 27 Aha madi' mangalati', saba' Ia hau-haunyomo motatae hi aha mongkona Tuuma. 28 Kalana aijo' i Yesus notatae hi aha, "Saidi' mae de komiu mohangkatmo tangka-tangkas Anak nu Mian, osumbu'je miu 'Akumo aiya na Ia anu osa-osanggohi AKU DAAGI'', ka' osumbu'je miu saba' madi' ko sa'angu' pe'e na anu Kubau lengkat i posi butong-Ku. Aku ola montaloakon apaa na anu pinogulu'mo nu Tuuma hi beleng-Ku. 29 Ka' Ia anu nonsai mae Aku daagi' poja-pojajalan tiba Aku. Ia madi' toho' mompojohok Aku sausa', kalana Aku saja' mombau apaa na anu momposanang kinyonyoa-Nyo." 30 Pinoko taloakon i Yesus na iwi-iwi' aijo', da'isan na mian pinalesayamo hi Ia. 31 Lapas aitu i Yesus notataemo hi to mia-mian Yahudi anu pinalesayamo hi Ia, "De komiu tumuu' mombatuki pokinde'-Ku, komiu totu-totu'u anu saja' mombatuki Aku. 32 Sahingga komiu monsumbu' Tumpu anu totu'u, ka' kalana aijo' komiu o pobebasje." 33 "Kami aiya lee' i Abraham," na koonyo nu aha, "Ma'isa toho' kami binotuanan pa' ihe! Apaa na poso'nyo nu potatae-Um, 'Komiu o pobebasje'?" 34 "Totu'u hondo na potataeng-Ku aiya," koonyo i Yesus hi aha, "Mian anu mombau dosa', atina' botuan nu dosa'. 35 Ka' samian na botuan madi' ko tampat anu tataap i uno nu sampoto utusan, sadaang anak na ko tampat ahi' sidu-sidutu' hi sampoto utusan. 36 Kalana aijo', de Anak mompobebas komiu, komiu totu-totu'u bebas. 37 Memang Kusumbu' komiu aiya lee' i Abraham. Panyo komiu kahanda' mompatei Aku, kalana komiu madi' montalima pokinde'-Ku. 38 Apaa na anu tinoang-Kumo hi Tuumang-Ku, aijo'mo na anu Ku taloakon. Sadaang komiu mombau apaa na anu pinogulu'akon nu tuuma miu hi komiu." 39 Aha nontaami, "Tuuma mami aijo'mo i Abraham." "De totu-totu'u komiu anak i Abraham," na koo-Nyo i Yesus, "tantu komiu mombau apaa na anu binau i Abraham. 40 Aku mompotokakon hi komiu kahondoan anu ihongong-Kumo lengkat mae hi Tumpu, panyo komiu kahanda'mo mompatei Aku. I Abraham madi' nombau sumo aijo'! 41 Komiu mombau apaa na anu binau nu posi tuuma miu." Tinaaman nu aha, "Kami misa' ana-anak bule. Tuuma mami ola sa'angu', aijo'mo samata-mata Tumpu." 42 Lantas i Yesus notatae hi aha, "De Tumpu aijo' Tuumaum, komiu tionyo mongkalibosi Aku, kalana Aku tinoka mae lengkat hi Tumpu. Aku madi' tinoka kalana posi pongka'oho'ku, panyo Ia anu nonsai mae Aku. 43 Apaa na sababnyo komiu madi' mangalati' hi anu Ku taloakon? Kalana komiu madi' moko ala mombatuki ajalan-Ku. 44 Ibilis na tuuma miu, ka' komiu mongka'oho'mo mombatuki kahanda' nu tuuma miu. Lengkat pe'e imoonanyo Ibilis aijo' saja'mo nompatei. Ia madi' toho' mosambiha' i kahondoan, kalana madi' ko kahondoan hi ia. De ia baleko', aijo' pantas, kalana sumo aijo'mo na sipatnyo. Ia baleko' ka' pinolengkatan nu leko'. 45 Panyo Aku montaeakon kahondoan, ka' kalana aijo' komiu madi' palesaya hi beleng-Ku. 46 Ihe na anu atina' hi komiu moko ponyata' daagi' ko dosa' hi beleng-Ku? De Aku montaeakon kahondoan, kadaka' komiu madi' palesaya hi beleng-Ku? 47 Mian anu nolengkat mae hi Tumpu, mohongo potatae nu Tumpu. Panyo komiu misa' lengkat mae hi Tumpu, mokonyo aijo' komiu madi' mongka'oho' mohongo." 48 To mia-mian nu Yahudi aijo' nontaami, i Yesus, "Te misa' totu'u na potatae mami, Beleyum mian nu Samaria anu pininsoopanmo nu setan?" 49 I Yesus nontaami, "Aku madi' pininsoopan nu setan. Aku mongadati Tuumang-Ku, panyo komiu mompopo'ise' Aku. 50 Aku madi' molio da o'adati na posi butong-Ku. Daagi' ko samian anu mongusahakon da o'adati na Aku, ka' Iamo na momputusi anu sala'. 51 Totu'u hondo na potataeng-Ku aiya, mian anu mombatuki potataeng-Ku, sidu-sidutu' madi' mate." 52 Lantas to mia-mian nu Yahudi aijo' notatae hi Yesus, "Uuka sinumbu'mo mami, Beleyum aiya totu-totu'u pininsoopanmo nu setan! I Abraham pe'e natemo, sumo aitu na nabi iwi-iwi'. Panyo Beleyum motatae, 'Mian anu mombatuki potataeng-Ku, sidu-sidutu' madi' mate.' 53 De i Abraham pe'e i natemo ka' to nabi-nabi iwi-iwi' suele i natemo, Beleyum aiya ihe? Te Beleyum mule' na lebe daka'molingkudui tuuma mami i Abraham!" 54 I Yesus nontaami, "De Aku molio da o'adati na butong-Ku, pongadati aijo' madi' ko kaliangannyo! Anu mongadati Aku aijo'mo Tuumang-Ku anu osa-osanggohi Tumpu, 55 padahan komiu madi' monsumbu' Ia. Panyo Aku monsumbu' Ia. De Aku motatae Aku madi' monsumbu' Ia, tantu Aku samian na anu baleko' pokakana sumo komiu. Aku monsumbu' Ia ka' mohongo-hongo potatae-Nyo. 56 Tuumaum i Abraham sanang hondo kalana ia montoaje sinaa anu tinantukanmo hi beleng-Ku. Ia nontoamo ka' ia sinanangmo!" 57 Lantas to mia-mian nu Yahudi notatae hi Yesus, "Umun Nu Beleyum ma'isa pe'e limampulu' na taun, ka' Beleyum nontoamo i Abraham?" 58 I Yesus nontaami, "Totu'u na anu Ku taloakon hi komiu: ma'isa pe'e i hampe na i Abraham, Aku polo-polo'mo daagi'." 59 Lantas to mia-mian nu Yahudi aijo' nontoluk batu bau pombunu'-Nyo; panyo i Yesus naninsulukmo, lantas nambamo nompala'i Laigan nu Tumpu.

Yohanes 9

1 Tempo'nyo i Yesus i lumajang, Ia nontoamo mian anu mapisok salatanmo pe'e i hampe. 2 Anu saja' mombatuki Yesus nompokilawamo hi Yesus, "Kita Tuumangku Gulu', kadaka' na mian aiya i hampeakon mapisok? Ugaat kalana ia na baladosa' kabai kalana tina tuumanyo na baladosa'?" 3 I Yesus nontaami, "Ia mapisok misa' kalana dosa'nyo, kabai dosa' nu tu'anyonyo, panyo da mian montoa kuasa nu Tumpu anu nokalaja i uno nu butongnyo. 4 De daagi' ko sinaa, kita tionyo mombau hia-Nyo nu anu nonsai mae Aku. De malom tokamo, samian pe'e madi'mo moko ala mokalaja. 5 De Aku daagi' i dunia aiya, Akumo na jingka nu dunia aiya." 6 Noko potatae sumo aijo', i Yesus nintupe' i tano', ka' ginalo'-Nyo na tupe' tiba tano'. Lapas aijo' pinokelakonnyomo hi mata nu mian aijo', lantas notataemo hi Ia, 7 "Lako'mo baso'i na ohupum i Talaga Siloam." (Siloam alati'nyo, 'Sinai'.) Sahingga mian aijo' inamba nompi ohupi ohupnyo. Salatan ia ninsusule'mo mae, ia noko alamo nontoa. 8 Sampo ohani laigannyo tiba to mia-mian anu daagi' nontoa ia napisok lewa' ba'ita', iwi-iwi' notatae, "Te misa' ia aiya mian anu ola saja' sumuhang ka' lewa' ba'ita'?" 9 Daagi' ko anu notatae, "Memang ia." Panyo daagi' mule' ko anu notatae, "Misa' ia, ola monsasuhi sumo mian aijo'." Panyo posi mian aijo' na notatae, "Akumo na ia." 10 "Mosia na tinimbali sampe beleyum noko ala nontoa?" na koonyo nu aha hi ia. 11 Ia nontaami, "Mian anu sanggonyo i Yesus aijo' na nombau ise-ise' na hensek, lantas nongkelakon i matangku ka' notatae, 'Lako'mo pi'ohupi na ohupum i Talaga Siloam.' Lantas aku inamba. Ka' salatan pini ohupankumo na ohupku, aku noko alamo nontoa." 12 "Iyamo na mian aijo'?" pinokilawa nu aha. Ia nontaami, "Beilako'." 13 - 14 Sinaa aijo' sinaa nu Sabat tempo'nyo i Yesus nonggalo' tano' ka' tupe'-Nyo pompotimbali mian mapisok aijo' da timbali montoa. Sahingga mian anu u'ukanyo mapisok binoa hi to mia-mian nu Farisi. 15 Aha suele nompokilawa hi ia, mosia ka' ia timbali noko ala nontoa. Ia nontaami, "Ia nongkelakon hensek i matangku, lantas pini ohupanku sahingga aku noko alamo nontoa." 16 To pia-pingkuka na mian nu Farisi haha aijo' notatae, "Madi' bisa mian anu nombau aiya nolengkat mae hi Tumpu, kalana Ia madi' mompajuli sinaa nu Sabat." Panyo mian sangga'at notatae, "Iya na timbali mian anu baladosa' mombau anu okabangangi sumo aiya?" Lantas tinimbali painggagaan hi posi-posi aha. 17 Sahingga nompokilawa mule' hi mian aijo' na to mia-mian nu Farisi, "Mosia na hi beleyum pikilan mongkona Ia anu nompotimbalimo beleyum noko ala nontoa?" "Ia nabi," na koonyo nu mian aijo'. 18 Panyo to pola-polaya' nu Yahudi aijo' madi' mongka'oho' palesaya, de mian aijo' salatan pe'e imoonanyo memang mapisok, ka' uuka timbalimo noko ala nontoa. Kalana aijo' aha nolaga tu'anyonyo, 19 ka' nompokilawa, "Totu'u aiya anakum anu kokooyum i hampe mae mapisok? Mosia ka' ia noko alamo nontoa uuka?" 20 Tina Tuuma nu mian aijo' nontaami, "Memang aiya anak mami; ka' ia memang mapisok salatanmo pe'e i hampe. 21 Panyo nosia na ia ka' noko alamo nontoa uuka aiya, kami madi' monsumbu'. Ka' ihe na nompotimbali ia noko alamo nontoa aijo', kami mule' madi' monsumbu'. Pokilawamo hi ia, ia tu'amo; nu posi taamije." 22 Tina Tuuma nu mian aijo' notatae sumo aijo', kalana aha mabuhuk hi to pola-polaya' nu Yahudi; kalana aha aijo' sinambukumo, tukoonyo mian anu mongakui Yesus Tomundo anu Momposalamat, madi'mo daagi' timbali minsoop i laigan pogalejaan. 23 Mokonyo aijo' tina tuuma nu mian aijo' notatae, "Ia tu'amo; pokilawamo hi ia." 24 Lantas aha po'ule' nolaga mian anu u'ukanyo mapisok aijo' ka' notatae hi ia, "Basumpa' da beleyum motatae anu sahondo-hondonyo. Osumbu' mami mian aijo' mian baladosa'." 25 "Pa' Ia baladosa' kabai madi'," tinaaman nu mian aijo', "aku madi' monsumbu'. Panyo sa'angu' na han kusumbu'; u'utu mae aku mapisok, uuka aiya aku nontoamo." 26 Lantas aha po'ule' mule' notatae, hi ia, "Apaa na binau-Nyo hi beleyum? Mosia na Ia nompotimbali beleyum da nontoa?" 27 Mian aijo' nontaami, "Noko sisikkumo hi komiu, panyo komiu madi' mongka'oho' mohongo. Kadaka' komiu po'ule' mule' mongka'oho' mohongo? Ugaat komiu kahanda' suele da timbali anu saja' mombatuki Ia?" 28 Lantas ingudulan nu aha na ia ka' notatae, "Oko na anu saja' mombatuki Ia; kami misa'! Kami anu mombatuki i Musa. 29 Osumbu' mami saba' Tumpu notataemo hi Musa. Panyo mongkona mian aijo', madi' osumbu' mami pa' iyamae na pinoleng katan-Nyo." 30 Mian aijo' nontaami, "Madi' minsoop i akan de madi' osumbu' miu na pinolengkatan-Nyo, sadaang Ia nompotimbalimo aku da noko ala nontoa. 31 Osumbu'to saba' Tumpu madi' mohongo mian baladosa', panyo mian anu mongangga'i Tumpu, ka' mombau pongka'oho'-Nyo. 32 Salatanmo pe'e dunia ma'isa toha kinahongoan; daagi' ko mian nompotimbali mian anu i hampe mapisok noko ala nontoa. 33 De misa' mian aijo' lengkat mae hi Tumpu, Ia madi' moko ala mombau apa-apaa." 34 Tinaaman nu aha, "Apaa? Beleyum anu nobuke'mo nu dosa' salatanmo pe'e i hampe, beleyumo na mongka'oho' mompogulu' kami?" Sahingga lengkat i aitu ia tinewa'mo minsoop i laigan pogalejaan. 35 I Yesus nohongo aha nonsabatakonmo mian aijo' i laigan pogalejaan. I lionyo na mian aijo' ka' notatae hi ia, "Pa' nu palesaya na Anak nu Mian?" 36 Mian aijo' nontaami, "Ihe na Ia, Tuan? Tulungi poto'iakon da aku palesayamo hi Ia." 37 "Beleyum nontoamo Ia," tinaaman i Yesus, "Iamo na anu u'uka aiya hau-haunyo basisik tiba beleyum." 38 "Aku palesaya, Tumpu," koonyo nu mian aijo', lantas nonsombah i ahop hi Yesus. 39 I Yesus notatae, "Aku toka i dunia aiya kahanda' momputusimo da mian anu mapisok timbali montoa, ka' anu moko ala montoa timbalimo mapisok." 40 To pia-piangkuka mian nu Farisi anu daagi' kiijo' nohongomo i Yesus notatae sumo aijo', lantas aha nompokilawamo hi Ia, "Pongka'oho'-Um da kami suele aiya mapisok?" 41 I Yesus nontaami, "De komiu mapisok, komiu madi' baladosa'. Panyo kalana komiu notataemo, 'Kami nontoamo,' aijo' alati'nyo, komiu daagi' baladosa'."

Yohanes 10

1 "Totu'u hondo na potataeng-Ku aiya: Mian anu minsoop i pangkun nu domba malaluan i pagan, ka' madi' montulu sabatan, panyo moliba' montulu jalan sangga'at, mian aijo' anu mombuling ka' mule' ia tololang. 2 Panyo anu minsoop montulu sabatan, ia polaya' domba. 3 Pontamongi pangkun mombukai tumban de ia minsoop ka' to domba-domba mombatuki potataenyo de ia molaga sanggonyo toto sa'angu' ka' montuntuni aha mosabat. 4 Salatan domba-domba aijo' osabatakonmo, anu molaya' aijo' lumajang i moona ka' domba-domba haha aijo' mombatuki ia, kalana nusumbu' nu aha na potataenyo. 5 Aha madi' mongka'oho' mombatuki mian sangga'at, panyo ola ahi' malai nu pala'i na mian aijo', kalana madi' nusumbu' na potataenyo." 6 I Yesus nonsisik kantuang aijo', panyo aha madi' mangalati' pa' apaa na anu Nu palui. 7 Lantas i Yesus po'ule' mule' notatae minsan, "Totu'u na potataeng-Ku aiya: Akumo na sabatan pinsoopan nu domba. 8 Iwi-iwi' anu tinoka ma'isa pe'e kino Akunyo, aijo' anu buling tiba tololang, panyo domba-domba madi' mohongo potatae nu aha. 9 Akumo na sabatan. Ihe na minsoop montulu Aku salamat; ia mosabat minsoop ka' mohumpak kaanon. 10 Anu buling toka ola da mombuling, da mompatei tiba mongidei. Panyo Aku toka da mian mohumpak kantumuu'an -- tumuu' molabi-labi. 11 Aku polaya' anu manonong. Polaya' anu manonong mombee' nyawanyo kalana monsawani domba-dombanyo. 12 Mian anu mongala tambo anu misa' polaya', ka' misa' tumpu nu domba-domba aijo', saidi' mae malai mompala'i domba-domba de ia montoa serigala toka mae. Te domba-domba haha aijo' nu sa'u ka' nuposungkehet nu serigala. 13 Mian anu mongala tambo aijo' malai, kalana ia mokalaja ola kalana tambo. Ia madi' mompajuli domba-domba haha aijo'. 14 - 15 Akumo na polaya' anu manonong. Susumo Tuuma monsumbu' Aku, ka' Aku monsumbu' Tuuma, sumo aitumo mule' Aku monsumbu' domba-dombang-Ku ka' aha suele monsumbu' Aku. Aku mombee' nyawang-Ku, kalana monsawani aha. 16 Daagi' mule' ko domba-domba sangga'at aijo' suele anung-Ku, panyo madi' pinosoop i pahasan nu domba haha aiya. Aha suele tionyo Kuboa, ka' aha mule' tionyo mohongo potataeng-Ku. Aha iwi-iwi' tionyo timbali sampahas ka' sa'angu' na polaya'. 17 Tuuma mongkalibosi Aku kalana Aku nombee'mo nyawang-Ku, panyo po'ule'je o talima. 18 Madi' ko samian pe'e moko ala mongala aiya hi beleng-Ku. Aku nombee' posi pongka'oho'-Ku. Aku ko kuasa mombee', ka' ko kuasa po'ule' mongala. Aijo'mo na palentah anu ingalang-Ku hi Tuumang-Ku." 19 Kalana i Yesus notatae sumo aijo', to mia-mian nu Yahudi nontampu'unimo pinainggaga. 20 Da'isan na anu notatae, "Ia pininsoopanmo nu setan! Ia motutuang! Bau apaa na komiu mohongo Ia?" 21 Panyo daagi' mule' ko anu notatae, "Mian anu pininsoopanmo nu setan, madi' basisik sumo aijo'! Timbali na setan moko potimbali mian mapisok timbali montoa?" 22 I Yerusalem to mia-mian hau-haunyo molame'akon Sinaa Daka' Nomposawe'i Laigan nu Tumpu. Tempo'nyo aitu, tempo' nu bakin. 23 I Yesus hau-haunyo i lumajang i Lambing i Salomo i uno nu Laigan nu Tumpu, 24 salatan to mia-mian nu Yahudi tinoka sinilimu'mo titikub hi Yesus. Aha notataemo, "Ipian na kopinnyo Beleyum mompopilaya kami bata-bata? Taloakonmo mae sahondo-hondonyo, de Beleyum totu'u Tomundo' anu Momposalamat." 25 I Yesus nontaami, "Tinaloakon-Kumo hi komiu, panyo komiu madi' palesaya. Te kalaja anu Kubau kalana sanggo nu Tuumang-Ku, mompobukuti' mongkona Aku. 26 Komiu madi' palesaya, kalana komiu madi' pinosoop i domba-dombang-Ku. 27 Domba-dombang-Ku mohongo potataeng-Ku. Aku monsumbu' aha, ka' aha nombatukimo Aku. 28 Aku mombee'i aha kantumuu'an kopian ka' toka sidu-sidutu', ka' sidu-sidutu' aha madi' silaka. Madi' ko samian pe'e mongagoi aha i limang-Ku. 29 Tuumang-Ku anu nombee'mo aha hi beleng-Ku molingkudui iwi-iwi'. Ka' madi' ko samian pe'e moko agoi aha lengkat i lima nu Tuuma. 30 Aku tiba Tuuma sa'a-sa'angu'nyomo." 31 Lantas to mia-mian nu Yahudi po'ule'mo nongala batu bau pombunu' i Yesus. 32 Panyo i Yesus notatae hi aha, "Komiu nontoamo Aku nombau manjoo' na hia anu ma'ima', anu pinalentahkon nu Tuuma hi beleng-Ku. Iwi-iwi' na hia aijo', iya na anu monsaduakon komiu mongka'oho'mo mombunu' Aku nu batu?" 33 To mia-mian nu Yahudi aijo' nontaami, "Misa' kalana hia-Um anu toto ima-ima' aijo' na monsaduakon kami kahanda'mo mombunu' Beleyum nu batu, panyo kalana Beleyum mompisala'i Tumpu. Beleyum mian mompai potimbalimo butong-Um sumo Tumpu." 34 Lantas i Yesus nontaami, "Te misa' i uno nu Kitab nu Atulanum tinulis: Tumpu notatae, 'Te beleyum tumpu?' 35 Osumbu'to apaa na anu tinulis i uno nu Kitab nu Tumpu opake sidu-sidutu'. Jadi de Tumpu monsanggohi 'tumpu' hi to mia-mian anu montalima potatae-Nyo, 36 ka' kadaka' komiu montaloakon Aku mompopo'ise' Tumpu, kalana notataemo Aku Anak nu Tumpu? Padahan Aku pinile'anmo nu Tuuma, ka' sinaimo mae mamba i dunia. 37 De Aku madi' mombau hia anu pinalentahkon nu Tuuma, boli opalesaya na Aku. 38 Panyo kalana Aku mombau palentah-Nyo, opalesaya apaa na anu Kubau aijo', mau mule' komiu madi' mongka'oho' palesaya hi beleng-Ku. Atina'je ka' osumbu' miu, ka' mangalati' taalu' Tuuma tataap mosa'angu' tiba Aku, ka' Aku tataap mosa'angu' tiba Tuuma." 39 Aha po'ule' mule' batanga' mohakop i Yesus, panyo Ia ma'isa pinoko hakop nu aha. 40 I Yesus ninsusule' i santoa nu Kaunyo nu Yordan, i tampat i Yohanes naipuan mae nompalamandikan, lantas jinojoong mae kiijo'. 41 Da'isan na mian tinoka hi Ia. Aha notatae, "I Yohanes madi' mombau anu okabangangi, panyo iwi-iwi' tinaloakonnyomo mongkona mian aiya totu'u." 42 Lantas da'isan na mian anu kiijo' mae pinalesaya hi Yesus.

Yohanes 11

1 Samian anu sanggonyo i Lazarus jojoong i Betania tiba utusnyo i Maria ka' i Marta. 2 I Maria aijo'mo boune anu nondudu'akon minya-minya' manohong i tengke i Tumpu ka' nonsapui nu ubaknyo. Daagi' kino santempo'an i Lazarus nasakitmo. 3 Ua-ua'aha na utusnyo nompolelemo hi Yesus, "Tumpu, utus kami anu oka-okalibosi nu kita Tumpu aijo' nasakitmo." 4 Salatan i Yesus nohongo lele aijo', Ia notatae, "Panyakit aiya madi' mule' monsaduakon kasilaka'an. Aiya timbali da Tumpu Allah opopodaka', da kalana jalan anu sumo aijo' Anak nu Tumpu Allah singkona opopodaka'." 5 I Yesus mongkalibosi i Marta, i Maria ka' i Lazarus. 6 Panyo salatan i Yesus nohongo lele i Lazarus masakit, Ia nontotonggolakon jinojoong i kajojoongan-Nyo daagi' inguansinaa. 7 Lapas aijo' Ia notataeje hi anu saja' mombatuki Ia, "Imbo' kita minsusule'mo mamba i Yudea." 8 Aha nontaami, "Kita Tuumangku Gulu', sala'je na to mia-mian nu Yahudi kahanda' mompahambunu'akon Kita Tuuma nu batu, ka' aiya Kita Tuuma mongka'oho' mule' minsusule' mokiijo' mae?" 9 "Te misa'o sinaa kopiinnyo sampulu' ka' ohua' na jam?" na koonyo i Yesus. "Mian anu lumajang sinaa, madi' tosumpun kalana nutoa na jingka nu dunia aiya. 10 Panyo mian anu lumajang i pihi, tosumpun, kalana madi' ko jingka hi ia." 11 Sumo aijo' na koonyo i Yesus. Lapas aijo' Ia notatae mule', "Bela'to i Lazarus i hoyotmo, panyo mambaje Ku bulaakon na ia." 12 Anu saja' mombatuki Yesus notatae, "Tumpu, de i Lazarus hoyot, saidi' ia tionyo ma'alin." 13 Pato' nu potatae i Yesus aijo', i Lazarus natemo. Panyo aha monsangka pato' nu potatae i Yesus aijo' i Lazarus ola i hoyot. 14 Kalana aijo' i Yesus notatae hi aha sahondo-hondonyo, "I Lazarus i natemo. 15 Panyo Aku mule' sanang, kalana madi' kino Akunyo kiijo' mae, kalana lebee ma'ima' hi komiu da komiu timbali palesaya. Imbo'mo da kita mamba uuka hi Lazarus." 16 I Tomas anu osa-osanggohi "Hapi" notatae hi to sanga-sangalu nu anu mombatuki Yesus, "Imbo' da obatukinto, pojohokmo da kita mate hingga-hinggat tiba Ia!" 17 Salatan i Yesus tinokamo i tampat aijo', i Lazarus patonsinaamo na kopiinnyo i lamun. 18 Betania madi' majo'on lengkat i Yerusalem kila-kila totolu' na kilo meter na kojo'onnyo. 19 Da'isan na mian nu Yahudi tinoka hi Marta ka' hi Maria mongindeko' aha, kalana utus nu aha sinilakamo. 20 Salatan i Marta nohongo i Yesus tinokamo, ia nosabat nompolabot i Yesus, panyo i Maria jinojoong i laigan. 21 Koonyo i Marta hi Yesus, "Tumpu, de kita Tumpu daagi' i uuka tempo'nyo aitu, tantu utusku madi' sinilaka. 22 Mau mule' sumo aitu kusumbu', uuka aiya Tumpu mombee' mau mule' pa' apaa na opoita nu kita Tumpu hi Ia." 23 "Utusum po'ule' tumuu'," koo-Nyo i Yesus hi Marta. 24 I Marta nontaami, "Kusumbu' i Lazarus po'ule'je tumuu' de mian mate po'ule'mo opotumuu' i Sinaa Kakiamatan." 25 "Akumo na mombee'i kantumuu'an ka' po'ule' mompotumuu' mian mate," koo-Nyo i Yesus hi Marta, "Mian anu palesaya hi beleng-Ku po'ule' tumuu' mau mule' ia natemo. 26 Ka' mian tumuu' anu palesaya hi beleng-Ku sidu-sidutu' madi' mate. Nupalesaya na anu sumo aijo'?" 27 "Tumpu," tinaaman i Marta, "Ku palesaya, i Tumpu Anak nu Tumpu, Tomundo' anu Momposalamat anu saidi' mae toka i dunia aiya." 28 Noko potatae na i Marta sumo aijo', ia inamba nolaga i Maria utusnyo ka' no'oyong hi ia, "Tuumanto i Gulu' daagi' ko anu uutu; Ia nompokilawa beleyum." 29 Nohongo aijo', i Maria lia-lia' nobula, lantas namba nonsingkaboti Yesus. 30 Tempo'nyo aitu i Yesus ma'isa ninsoop i kampung. Ia daagi' i tampat hai Marta nononsingkaboti. 31 To mia-mian nu Yahudi hau-haunyo mongindeko' i Maria kiijo' i laigan, nontoa i Maria nobula ka' lia-lia' nosabat; saba' aha nambamo nombatuki ia, kalana aha monsangka ia mamba i kubun humaang. 32 Salatan i Maria tinoka i tampat i Yesus ka' nontoa Ia, dinumaladupumo na i Maria i ahop-Nyo ka' notatae, "Tumpu, de kita Tumpu daagi' i uuka tempo'nyo aitu, tantu utusku madi' sinilaka." 33 Salatan i Yesus nontoa i Maria humaang, ka' to mia-mian nu Yahudi anu nojajaalan mae tiba i Maria aijo' singkona humaang, kinyonyoa-Nyo noliibosmo, ka' Ia tinongkoliibosonmo hondo na tinoa. 34 Lantas pinokilawa-Nyo hi aha, "Iyamae na pinolamunan miu ia?" "Imbo', toa Tumpu," tinaaman nu aha. 35 Lantas i Yesus i humangmo. 36 Sahingga to mia-mian nu Yahudi aijo' notatae, "Toa, paya'ii' na liibos-Nyo hi Lazarus!" 37 Panyo daagi' ko anu aijo' hi aha notatae, "Ia nompotimbali momian mapisok nontoa, kadaka' Ia madi' noko ala nontewa' da i Lazarus boli sinilaka." 38 I Yesus po'ule' mule' tinongkoliboson, lantas namba i pinolamunan. Lamunan aitu sa'angu' na liang anu okulubi nu batu daka'. 39 "Hangkat na batu aijo'," koo-Nyo i Yesus. I Marta, utus nu mian anu sinilaka aijo' nontaami, "Panyo Tumpu, ia patonsinaamo na i lamun. Tantu nabusikmo!" 40 I Yesus notatae hi Marta, "Te misa' tinaloakon-Kumo hi beleyum: De beleyum palesaya, nu toaje palias na kodaka'nyo na kuasa nu Tumpu!" 41 Sahingga i hangkat nu aha na batu aijo'. Lapas aijo' i Yesus nontihanga langit ka' notatae, "Talima kaseh Tuuma, kalana kita nohongomo Aku. 42 Kusumbu' Kita saja' mohongo Aku, panyo Ku taloakon na aiya kona hi to mia-mian anu aiya; da aha palesaya saba' Kitamo na nonsai mae Aku." 43 Noko taloakon aijo', i Yesus notataemo daka-daka', "Lazarus, posabat!" 44 Lantas nosabat na mian anu sinilakamo aijo'. Lima ka' tengkenyo daagi' hau-haunyo binalunan nu hude pinonsaput, ka' i ohupnyo kuku-kukub na hude pinongkukubi ohup. "Bukai na hude pinonsaput da ia moko ala lumajang," koo-Nyo i Yesus hi to mia-mian anu i kiijo'. 45 Da'isan na to mia-mian nu Yahudi anu toka mompaha pia i Maria, pinalesayamo hi Yesus salatan aha nontoa apaa na anu tinimbali aijo'. 46 Panyo to pia-piangkuka na aha i kiijo' i namba hi mian nu Farisi mompoto'i apaa na anu binaumo i Yesus. 47 Kalana aijo' to mia-mian nu Farisi tiba to Kapala-kapala nu imam nombau sale' tiba Mian Kopian Daka' nu Agama. Aha notatae, "Apaa na tionyo obaunto? Mian aijo' mombau manjoo' na anu okabangangi! 48 De kita ola mompopilaya saja' sumo aitu-Nyo, iwi-iwi' na mian palesayamo hi Ia. Ka' ahennyo anu mongkuasai Roma toka mongidei Laigan nu Tumpu ka' iwi-iwi' na bansanto!" 49 Samian anu kiijo' hi aha sanggonyo i Kayafas, imam daka' i taun aijo' notatae, "Komiu madi' ko anu opisumbu-sumbu'. 50 Te komiu madi' sinsumbu', monginau' kapentingan nu mian daisan, sahanyo samian na mate ka' de mule' iwi-iwi' na bansa mohopu'?" 51 Sabenannyo i Kayafas nontaloakon sumo aijo' misa' kalana posi pikilannyo. Panyo salaku imam daka' i taun aitu ia nompoto'imo anu saidi' mae timbali, aijo'mo i Yesus silaka bau kapentingan nu bansa Yahudi. 52 Ka' misa' ola bau kapentingan nu bansa Yahudi, panyo mule' da molimu' ka' momposa'angu' ana-anak nu Tumpu anu noga'aga'atmo. 53 Sinaa aitu na nontampu'uni, aha anu mongkuasai Yahudi sinangaja'mo mompatei Yesus. 54 Kalana aijo' i Yesus madi'mo lewa' manintoa hi mian da'isan nu aha mian Yahudi. Pinala'iannyo na Yudea ka' i namba i kota' sanggonyo Efraim koko pandang bolaa. I kiijo' mae Ia jinojoongmo hingga-hinggat tiba anu aja' mombatuki Ia. 55 Tempo'nyo aitu ohanimo na Sinaa Daka' Paskah Yahudi. Da'isan na mian nolengkat mae i kampung ise' nambamo i Yerusalem mombau adat mombaso'i butong da ma'isa pe'e lamean aijo' toka. 56 Aha nolio i Yesus, ka' tempo'nyo sinilimu' i Laigan nu Tumpu, aha notatae samian ka' samian, "Mosia na pikilan miu? Ugaat Ia madi' toka i lamean aiya." 57 Aha nontaloakon sumo aijo' kalana to kapala-kapala nu imam tiba to mia-mian nu Farisi nompalentahkonmo da ihe na mian anu monsumbu' iyana kajojoongan i Yesus, tionyo mompoto'i mae da Ia o hakopmo.

Yohanes 12

1 Daagi' anon sinaa tokaje na Sinaa Daka' Lamean nu Paskah i Yesus nambamo i Betania. I kiijo' mae jinojoong na i Lazarus anu sini-sinilakamo po'ule' pinotumuu' i Yesus. 2 Kiijo' mae i Yesus pinokaan nu aha, i Marta na nongatuni. I Lazarus tiba anu pinasoo sinumuhang nongkaan hingga-hinggat tiba i Yesus. 3 Lapas aitu i Maria nomboa mae kila-kila mintonga' na liter minya-minya' manohong narwastu, lampa-lampa anu manohong na binau ka' mahan hondo na olinyo. Ia nondudu'akon minya-minya' aijo' i tengke i Yesus, ka' sinapuannyo nu ubaknyo. Sinongko nu nohong na laigan aijo', kalana minya-minya' aijo'. 4 Panyo i Yudas Iskariot, sala'samian anu saja' mombatuki Yesus -- anu saidi' mae nonggeguani Ia -- notatae, 5 "Kadaka' minya-minya' manohongo aijo' madi' sahanyo pinobaluk, olinyo tolu'atu na doi salaka, ka' doinyo binee' hi mian kasiasi?" 6 I Yudas notatae sumo aijo' misa' kalana monginau' mian kasiasi, panyo kalana ia pambuling. Ia toto minsan mongala doi anu olimu' nu aha ka' o'una' hi ia. 7 Panyo i Yesus notatae, "Pobee' na boune aijo'! Ia mombau aiya baumo sinaa poliwangi Aku. 8 Mian kasiasi saja' aiya hi komiu, panyo Aku madi'." 9 Da'isan na mian nu Yahudi anu nohongo taalu' i Yesus kiijo' i Betania, sahingga aha namba nokiijo'. Aha namba misa' ola kalana i Yesus, panyo mule' kalana aha kahanda' montoa i Lazarus anu sini-sinilakamo po'ule'mo pinotumuu'. 10 Aijo' na sababnyo to kapala-kapala nu imam kahanda' mompatei i Lazarus suele. 11 Kalana ia na nonsabapi da'isan na mian nu Yahudi nosabatmo hi aha ka' nompalesaya i Yesus. 12 Dodododopnyo mian da'isan anu tinokamo molame'akon Paskah nohongo i Yesus hau-haunyo utumae laja-lajang mokiijo'mo i Yerusalem. 13 Aha nongala te hoon nu palem ka' namba nolabot Ia, baloo nontaligalai, "Puji'mo na Tumpu! Balakatiakon na ia anu toka momboa sanggo nu Tumpu. Balakatiakon na Tomundo' nu Israel!" 14 I Yesus nohumpak sa'angu' na keledai bata'nyo, ka' sinake'annyo. Sahingga tinimbalimo na anu tinulis i uno nu Kitab nu Tumpu: 15 "Boli mabuhuk, langkoyang nu Sion! Toa na Tomundo'um tinokamo, monsake'i sa'angu' na keledai bata'nyo!" 16 Tempo'nyo aitu anu mombatuki Yesus ma'isa nonsumbu' iwi-iwi' aijo'. Panyo salatan i Yesus pinopodaka'mo i kasilakaan-Nyo, atina'je na aha tinonginau' taalu' anu binau nu to mia-mian hi Ia, tinulismo i uno nu Kitab nu Tumpu mongkona Ia. 17 To mia-mian anu tinoka tempo'nyo i Yesus nolaga i Lazarus posabat mae lengkat i lamunan ka' po'ule' nompotumuu' lengkat i kasilakaan, baloo nombee'i katalangan mongkona han aijo'. 18 Aijo' na sababnyo mian da'isan aijo' namba hi Yesus, kalana aha nohongo taalu' Iamo na nombau anu okabangangi aijo'. 19 Sahingga to mia-mian Farisi notatae samian ka' samian, "Kita madi' moko ala mombau apa-apaa! Toamo ahi', songko-songko na dunia mamba mombatuki Ia!" 20 To mia-mian anu namba nokiijo' i Yerusalem mogaleja tempo'nyo nu lamean aijo', daagi' ko to pia-piangkuka mian nu Yunani. 21 Aha tinoka hi Filipus ka' notatae, "Kita utus, de timbali kami mongka'oho' singkabot tiba i Yesus." (I Filipus nolengkat mae i Betsaida i Galilea.) 22 Atina' ka' i Filipus namba nompoto'i hi Andreas, ka' ilapas aitu ua-ua'aha nompotokakonmo hi Yesus. 23 I Yesus notatae hi aha, "Tempo'nyomo Anak nu Mian opopodaka'. 24 Totu'u hondo na potataeng-Ku aiya: De sambatu na gandum madi' o tugan i uno nu tano' ka' mate, ia tataap samba-sambatunyo. Panyo de batu nu gandum aijo' mate, atina'je ka' mohasinakon manjoo' na gandum. 25 Mian anu mongkalibosi kantumuu'annyo, saidi' mae molapus na kantumuu'annyo. Panyo mian anu mongka'ideki kantumuu'annyo i dunia aiya, tionyo mompokopiani da tumuu' kopian ka' da' toka sidu-sidutu'. 26 Mian anu mongka'oho' mohongo Aku, tionyo mombatuki Aku; da posaihon-Ku mo'imboa ka' Aku i tampat kajojoongan-Ku. Mian anu mohongo Aku, nu angga'i nu Tuumang-Ku." 27 "Kinyonyoang-Ku meat; apaa na anu tionyo Ku taloakon uuka? Pa' tionyo Ku taloakon, 'Tuuma, opimpaliakon na Aku uuka aiya?' Panyo kalana da mongoa'i sakisa aiya, mokonyo aitu Aku tinoka. 28 Tuuma popodaka' na sanggon-To!" Lantas i hongo na potatae lengkat i langit nontaloakon, "Pinopodaka'-Kumo, na sanggo-Nyo ka' po'ule'je Ku popodaka' na Ia." 29 Mian da'isan anu i kiijo' nohongo potatae aijo'. Aha nontaloakon, "Aijo' gohung!" Panyo daagi' mule' ko anu notatae, "Misa'! Malaekat na notatae hi Ia!" 30 Lantas i Yesus notatae hi aha, "Potatae aijo' i hongo, misa' ola da bau kapentingan-Ku, panyo da bau kapentingan miu. 31 Uuka aiya tempo'nyomo na dunia oputusi na palakalanyo; uuka aiya anu mongkuasai dunia aiya otua'akonmo. 32 Panyo Aku aiya, de Aku ohangkatmo tangka-tangkas i bawo nu dunia aiya, aha iwi-iwi' na mian Ku pahaboamo hi beleng-Ku." 33 Ia nontaloakon sumo aitu mompotiju' mosia na balu-balu'nyo de Ia silakamo. 34 Mian da'isan aijo' notatae hi Ia, "De koonyo nu Kitab nu Atulan mami, Tomundo' anu Momposalamat tumuu' sidu-sidutu'. Mosia ka' Beleyum timbali montaloakon Anak nu Mian tionyo ohangkat tangka-tangkas i bawo nu dunia? Ihe na Anak nu Mian aijo'?" 35 I Yesus nontaami, "Ola sasaingoni' na jingka aijo' daagi' aiya hi komiu. Jadi, lajangmo da tempo' u'uka komiu daagi' ko jingka, da komiu boli nukona nu kapintungan. Mian anu lumajang i uno nu pintung, madi' nusumbu' pa' iyana kalambanannyo. 36 Palesayamo i jingka aijo', de jingka aijo' hau-haunyo daagi' hi belemiu, o usahakon da komiu timbali ana-anak nu jingka." Noko taloakon na i Yesus sumo aijo', Ia nambamo nompala'i tampat aijo' ka' madi'mo mongka'oho' manintoa hi aha. 37 Mau mule' manjoo'mo na anu okabangangi binau i Yesus i ahop nu aha, aha madi' palesaya hi Ia. 38 Sahingga tinimbalimo apaa na anu tinaloakonmo i Nabi Yesaya, "Tumpu, ihemo na palesaya i lele anu opo lele mami? Hi ihena pompotoaan kuasa nu Tumpu?" 39 Mokonyo aijo' aha madi' palesaya, kalana i Yesaya notataemo suele, "Tumpu notatae, 40 'Ku popisok na mata nu aha, mombau aha mokuut na kinyonyoa; da mata nu aha boli montoa, pikilan nu aha boli monsumbu'. Da aha boli minsusule' mae hi beleng-Ku, lantas Ku po'alinmo na aha.' " 41 I Yesus notatae sumo aijo' kalana ia nontoamo kadaka'an i Yesus, ka' nonsisikmo mongkona Ia. 42 Mau mule' sumo aitu, da'isan na mian, tiba sangga'at na anu mongkuasai Yahudi pinalesayamo hi Yesus. Panyo aha aijo' palesaya nu pohowini nu aha, kalana aha mabuhuk boli-boli mian nu Farisi madi' mompobee' aha minsoop i Laigan Pogalejaan. 43 Aha lebee mongka'ima'i nu puji' nu mian molingkudui pongangga'i nu Tumpu. 44 Lantas i Yesus notatae daka-daka', "Mian anu palesaya hi beleng-Ku, misa' palesaya hi beleng-Ku, panyo hi Ia anu nonsai mae Aku. 45 Ka' mian anu montoa aku, montoa ia anu nonsai mae aku. 46 Aku toka i dunia aiya sumo jingka, da iwi-iwi' na mian anu palesaya hi beleng-Ku boli jojoong i uno nu pintung. 47 Mian anu mohongo apaa na anu Kupogulu', panyo madi' mombatuki -- misa' Aku na mohukum ia. Kalana Aku toka misa' momputusi palakala nu dunia aiya, panyo da momposalamat. 48 Mian anu madi' montalima Aku ka' madi' mohongo potataeng-Ku, daagi'mo ko anu momputusi palakalanyo. Potatae anu Ku potokakon, aijo'mo na anu momputusi palakala i Sinaa Kakiamatan. 49 Kalana Aku madi' motatae lengkat i posi pongka'oho'-Ku; Tuuma anu nonsai mae Aku, iamo na nompalentakon hi belengku apaa na anu tionyo Ku taloakon ka' Ku potoka. 50 Ka' Kusumbu' saba' palentah-Nyo aijo' mombee'i kantumuu'an kopian ka' toka sidu-sidutu'. Jadi Aku mompotokakon sumo anu pinogulu'mo nu Tuuma hi belengku."

Yohanes 13

1 Daagi' sansinaa tokaje na Sinaa Daka' nu Paskah, sinumbu'mo i Yesus taalu' tempo'nyo tokamo Ia mompala'imo dunia aiya minsusule'mo hi Tuuma-Nyo. Ia mongkalibosi to mia-mian anu tinimbalimo anu-Nyo i dunia, ka' Ia saja' mongkalibosi aha toka-toka i ka'ahenan-Nyo. 2 I Yesus tiba anu saja' mombatuki Ia hau-haunyo mongkaan malom. Ibilis nomposoopmo tanga'an i uno nu kinyonyoa i Yudas anak i Simon Iskariot da monguwesani Yesus. 3 Sinumbu'mo i Yesus na Tuumanyo nombee'mo iwi-iwi' na kuasa hi Ia. Nusumbu' suele na Ia, lengkat mae hi Tumpu, ka' po'ule' minsusule' hi Tumpu. 4 Mokonyo aijo' Ia tinuminjo nongukat jubah-Nyo ka' nompobutu' handu i kompong-Nyo. 5 Lapas aijo' Ia nolana' uee i loyang, ka' nontampu'uni nombaso'i tengke nu anu saja' mombatuki Ia, ka' nongambu'i nu handuk anu butu-butu i kompong-Nyo. 6 Salatan tinoka na Ia hi Simon Petrus anu notatae, "Tumpu, te toho' kita Tumpu na mombaso'i tengkengku?" 7 I Yesus nontaami, "Uuka aiya beleyum madi' monsumbu' apaa na Kubau aiya, panyo beleyum mangalati'je saidi' mae." 8 "Boli, Tumpu," na koonyo i Petrus hi Yesus, "Boli hondo-hondo kita Tumpu mombaso'i tengkengku!" Panyo i Yesus nontaami, "De Aku madi' mombaso'i beleyum, beleyum madi' mompahasumbu' tiba Aku." 9 I Simon Petrus notatae, "Desumo aitu, kita Tumpu, boli ola tengkengku, panyo lima tiba ubaku suele!" 10 "Mian anu nindi'mo binalasinmo songko-songko," koonyo i Yesus hi Petrus. "Ia madi'mo palalu po'ule' obaso'i; boli mompiakon tengkenyo. Aha binalasinmo, panyo madi' iwi-iwi'mo." ( 11 Sinumbu'mo i Yesus ihena monguwesani Ia. Mokonyo aijo' Ia notatae, "Komiu aiya binalasinmo, panyo madi' iwi-iwi'mo.") 12 Noko baso'i na i Yesus tengke nu aha, Ia po'ule'mo nompusok jubah-Nyo ka' po'ule'mo sinumuhang. Lantas Ia notataemo hi aha, "Osumbu' miu pa' apaa na anu sala'je binaung-Ku hi komiu? 13 Komiu molaga Aku Gulu' ka' Tumpu. Memang ahi' sumo aijo'. 14 De Aku sumo Tumpu ka' Gulu'um mombaso'i tengke miu, komiu suele ahi' mompaha baso-baso'i tengke. 15 Aku mombee'i sonto' aiya hi komiu, da komiu suele mombau apaa na anu binaung-Kumo hi komiu. 16 Totu-totu'u hondo na potataeng-Ku aiya: Samian na posaihon madi' lebe daka' molingkudui tuannyo, ka' samian na posaihon madi' lebe daka' molingkudui anu nonsai. 17 De osumbu'mo miu iwi-iwi' aiya, bilahi na komiu de mombau. 18 Apaa na anu Kutaloakon aiya misa' mongkona komiu iwi-iwi'. Kusumbu' ihe-he na anu pinile'an-Kumo. Panyo apaa na anu tinulismo i uno nu Kitab nu Tumpu tionyo timbali, aijo'mo, 'Mian anu mongkaan hingga-hinggat tiba Aku na saidi' mae mongewa Aku.' 19 Han aijo' Ku poto'i hi komiu uuka aiya da ma'isa pe'e timbali, da de han aijo' timbalimo saidi' mae, komiu palesayaje taalu' Akumo na Ia anu osa-osanggohi AKU DAAGI'. 20 Totu-totu'u hondo na potataeng-Ku aiya: Ihena montalima mian anu Kusa-kusai, montalima Aku. Ka' ihe na montalima Aku, montalima Ia anu nonsai mae Aku." 21 Noko taloakon na i Yesus sumo aijo', Ia tinongkoliibosonmo hondo, lantas tinaloakon-Nyo, "Totu'u hondo na potataeng-Ku aiya: Sala'samian aiya hi komiu na monguwesani Aku." 22 Anu saja' mombatuki Ia nompaha didinmo samian ka' samian ka' binangang hondo kalana madi' osumbu' pa' ihe na anu kokoonyo aijo'. 23 Anu saja' mombatuki nunu kalibosi Yesus suha-suhang i sohipi' i Yesus. 24 I Simon Petrus nongkija-kijapi ia, da nu pokilawa hi Yesus pa' ihe na anu kokoonyo aijo'. 25 Saba' anu saja' mombatuki aijo' ningkikiijo' hi Yesus, ka' nompokilawa, "Ihe na ia, Tumpu?" 26 I Yesus nontaami, "Mian anu Kubee'i roti anu Kulo-kulobong i mangko', aijo'mo na ia." Lantas i Yesus nongala sampuge na roti i lobongnyo i mangko'; lantas nombee' hi Yudas anak i Simon Iskariot. 27 Lia-lia' salatan i Yudas nontalimamo roti aijo', Ibilis ninsoopmo i kinyonyoanyo. Lantas i Yesus notatae hi ia, "Donganmo bau pa' apaa na anu kahanda' nu bau." 28 Madi' ko samian pe'e hi aha anu suha-suhang mongkaan i kiijo' nonsumbu' kadaka' i Yesus nontaeakon sumo aijo' hi Yudas. 29 Daagi' ko anu monsangka i Yesus nompokau i Yudas mongoli apa-apaa anu opalalui i bau-bauon aitu, kabai mombee'i doi sangkiding hi mian kasiasi -- kalana i Yudas pontoongi doi anu nulimu' nu aha. 30 Salatan i Yudas nontalima roti aijo', ia lau-laus nosabat. Sinaa i nalomo. 31 Pinalus na i Yudas, i Yesus notatae, "Uuka Anak nu Mian opopodaka'mo, ka' suele Tumpu opopodaka' kalana Ia. 32 De Tumpu opopodaka' kalana Ia, Ia suele opopodaka' nu Tumpu kalana apaa na anu timbalimo i butong-Nyo. Ka' memang Tumpu malia-lia'mo na mompopodaka' Ia. 33 To ana-anak-Ku, Aku madi'mo daagi' piin na jojoong tiba miu. Olioje komiu na Aku, panyo sumo anu tinaloakon-Kumo hi anu mongkuasai Yahudi, sumo aitu suele na Ku taloakon hi komiu; i tampat kalambanan-Ku madi' opoko toka miu. 34 Palentah bu'ou Kubee' hi komiu: Pompaha kali-kalibosi samian ka' samian. Sumo Aku mongkalibosi komiu, sumo aijo' suele na komiu tionyo mompaha kali-kalibosi. 35 De komiu mompaha kali-kalibosi, atina'je ka' nusumbu' nu mian iwi-iwi', taalu' komiu anu saja' mombatuki Aku." 36 "Tumpu, Tumpu moyamo?" pinokilawa i Simon Petrus hi Yesus. Tinaaman i Yesus, "Iyaa na kalamabanan-Ku madi' nu poko batuki uuka aiya. Saidi' mae nubatukije na Aku." 37 "Tumpu, kadaka' aku madi' moko batuki kita Tumpu uuka aiya?" po'ule' pinokilawa i Petrus mule'. "Aku sanang na mate kalana kita Tumpu!" 38 Tinaaman i Yesus, "Totu-totu'u sanang na beleyum mate kalana Aku? Da nusumbu', ma'isa pe'e manuk mintutuhu' saidi' beleyum polo'mo pintolun na motatae tukooyum, beleyum madi' monsumbu' Aku!"

Yohanes 14

1 "Boli kinyonyoaum susa'," koonyo i Yesus hi aha. "Palesaya hi Tumpu, ka' palesaya suele na Aku. 2 I laigan nu Tuumang-Ku daagi' manjoo' na tampat kajojoongan. Aku mamba mokiita' montoukai tampat miu. Aku madi' motatae sumo aijo' hi komiu, de aijo' madi' sumo aitu. 3 De lapasmo na Aku mamba montoukai tampat miu, Aku po'ule'je mae minsusule' ka' molabot komiu, da iyana kajojoongan-Ku, i kiijo' suele na kajojoongan miu. 4 Mamba i tampat kalajangan-Ku osumbu' miu na jalannyo." 5 Lantas i Tomas notatae hi Yesus, "Tumpu, kami madi' monsumbu' iya na kalambanan i Tumpu, mosia na osumbu' mami na jalannyo?" 6 I Yesus nontaami, "Akumo na jalan da osumbu' na Tumpu Allah, ka' pohumpakan kantumuu'an. Madi' ko samian pe'e moko ala toka hi Tuuma, de madi' montului Aku. 7 De osumbu'mo miu na Aku, tantu osumbu'mo miu suele na Tuumang-Ku. Uuka komiu monsumbu'mo Ia, ka' nontoamo Ia." 8 Sahingga i Filipus notatae hi Yesus, "Tumpu potiju'akon mae na Tuuma hi kami, da kami sanang." 9 Panyo i Yesus nontaami, "Sumo u'ukamo na kinopiinnyo Aku no'imboa tiba komiu, ka' madi' mule' beleyum monsumbu' Aku, Filipus? Mian anu nontoamo Aku, nontoamo Tuuma. Mosia ka' beleyum timbali notaloakon, 'Potiju'akon mae na Tuuma hi kami'? 10 Filipus! Te madi' nu palesaya, na Aku mosa'angu' tiba Tuuma, ka' Tuuma mosa'angu' tiba Aku? Apaa na anu Ku taloakon hi beleyum, misa' ku taloakon lengkat hi posi butongku. Tuuma anu tataap mosa'angu' tiba Aku. Iamo na anu nombau iwi-iwi' aijo'. 11 Palesayamo hi beleng-Ku, saba' Aku mosa'angu' tiba Tuuma, ka' Tuuma mosa'angu' tiba Aku. Kabai mau mule' mosia, palesayamo kalana apaa na anu tinaloakon-Kumo. 12 Totu'u hondo na potataeng-Ku aiya: Mian anu palesaya hi beleng-Ku tionyo mombau apaa na anu binaung-Kumo, -- aitu pe'e ia tionyo mombau anu lebe daka' mule' -- kalana aku mamba hi Tuuma. 13 Ka' mau mule' pa' apaa na o poita miu de momboa sanggong-Ku, aijo' tionyo Kubee' bau bagi nu belemiu, da kalana anak, Tuuma opopodaka'. 14 Mau mule' apaa na o poita miu de momboa sanggong-Ku tionyo kubee'." 15 "De komiu mongkalibosi Aku, komiu tionyo monjalanakon to pale-palentah-ngKu. 16 Ku poitaje hi Tuuma, da Ia tionyo mombee'i komiu Pontulungi sangga'at, anu jojoong hingga-hinggat ka' komiu sidu-sidutu'. 17 Ia aijo' Roh nu Tumpu anu momponyata' kahondoan mongkona Tumpu. Dunia madi' montalima Ia kalana madi' montoa ka' madi' monsumbu' Ia. Panyo komiu monsumbu' Ia, kalana Ia jojoong hingga-hinggat ka' komiu, ka' mosa'angu' tiba komiu. 18 Komiu Ku pala'i sausa' sumo anu unon tina tuuma. Aku minsusule'je mae hi komiu. 19 Me sasaingoni' dunia madi'mo montoa Aku. Panyo komiu montoaje Aku. Ka' kalana Aku tumuu', komiu suele tumuu'. 20 De tokamo na sinaa aitu, osumbu'je miu taalu' Aku mosa'angu' tiba Tuuma, komiu mosa'angu' ka' Aku, ka' Aku mosa'angu' tiba komiu. 21 Mian anu montalima to pale-palentah-ngKu ka' mombau, iamo na anu mongkalibosi Aku. Tuumang-Ku mongkalibosi mian anu mongkalibosi Aku. Aku mule' mongkalibosi mian aijo' ka' mompotoa butong-Ku hi ia." 22 I Yudas, (misa' i Yudas Iskariot) nompokilawa i Yesus, "Tumpu, kadaka' i Tumpu mompotoa mo butong hi kami, ka' misa' hi dunia?" 23 I Yesus nontaami, "Mian anu mongkalibosi Aku, tionyo mombatuki pangajalan-Ku. Tuumang-Ku mongkalibosije ia. Tuuma ka' Aku tokaje hi ia ka' jojoong hingga-hinggat ka' ia. 24 Mian anu madi' mongkalibosi Aku, madi' mombatuki pangajalan-Ku. Pangajalan anu ohongo miu aijo', misa' lengkat hi beleng-Ku, panyo lengkat mae hi Tuuma anu nonsai mae Aku. 25 Iwi-iwi' aijo' Ku taloakon hi komiu hau-haunyo Aku daagi' galu-galum hi komiu. 26 Panyo Roh nu Tumpu, pontulungi anu nupokauje mae nu Tuuma kalana sanggongku, iamo na anu mompogulu' komiu iwi-iwi, ka' mompotuka' komiu iwi-iwi' anu pinoto'iyakonkumo hi komiu. 27 Kabilahian Kupo'una' hi komiu. Posi Kabilahian-Ku na Kubee' hi komiu. Anu kubee' aijo' misa' sumo anu binee' nu dunia hi komiu. Boli susa', boli mabuhuk. 28 Komiu nohongomo Aku notatae, 'Aku mambamo, panyo Aku po'ule'je minsusule' mae hi komiu'. De komiu mongkalibosi Aku, komiu sanang na Aku mamba hi Tuuma, kalana Tuuma lebe daka' molingkudui Aku. 29 Ku poto'i na aijo' hi komiu uuka aiya, da ma'isa pe'e iwi-iwi' timbali, da de timbali saidi' mae, komiu palesayamo. 30 Aku madi'mo daagi' basisik lebe manjoo' tiba komiu, kalana tempo'nyomo na kuasa nu dunia aiya toka. Panyo ia madi' mongkuasai butong-Ku. 31 Panyo iwi-iwi' aijo' tionyo timbali da nu sumbu' nu dunia, taalu' Aku mongkalibosi Tuuma ka' mombau iwi-iwi' anu pinalentakon nu Tuuma hi beleng-Ku. Yoh, imbo' da kita mambamo lengkat i aiya."

Yohanes 15

1 Koonyo i Yesus mule', "Aku kau' anggur anu totu-totu'unyo, ka' Tuumang-Ku aijo' na tumpu nu ale'. 2 To panga-panga' anu hi beleng-Ku anu madi' mimbua' nu tutu'akon-Nyo, ka' to panga-panga' anu mimbua' nuga'ai na hoon-Nyo ka' nu tetep da lebe mahampe na bua'nyo. 3 Komiu binalasinmo, kalana pokinde' anu binee'-Ku hi komiu. 4 Tataap mosa'angu' tiba aku, ka' Aku mule' tataap mosa'angu' tiba komiu. Posi panga' madi' moko pimbua', beilako' de ia tataap i kau'nyo. Sumo aitumo na komiu moko ala mimbua', de saja' mosa'angu' tiba Aku. 5 Akumo na kau' anggur, ka' komiu na to panga-panga'nyo. Mian anu saja' mosa'angu' tiba Aku, ka' Aku tiba ia, tionyo mimbua' mahampe; kalana de madi' tiba Aku, komiu madi' moko bau apa-apaa. 6 Mian anu madi' saja' mosa'angu' tiba Aku, o'alin sumo panga', lantas timbali manggas. To panga-panga' susumo aijo' olimu' ka' olumbu'akon mokiijo' i uno nu apu. 7 De komiu saja' mosa'angu' tiba Aku, ka' pangajalan-Ku maninguna' i kinyonyoaum, poita hi Tuuma mau mule' apaa na o kahanda'i miu; anu opoita miu atina' tantu obee'. 8 De komiu mimbua' manjoo', Tuumang-Ku opopodaka'; ka' desumo aitu komiu totu-totu'u timbali anu saja' mombatuki Aku. 9 Susumo Tuuma mongkalibosi Aku. Sumo aitumo na Aku mongkalibosi komiu. Tionyo komiu saja' tumuu' sumo mian anu Ku kalibosi. 10 De komiu monjalanakon iwi-iwi' na palentah-ngKu, komiu saja' montuluti pongkalibosing-Ku, pokakana sumo Aku saja' montuluti pongkalibosi nu Tuuma, kalana monjalanakon palentah-Nyo iwi-iwi'. 11 Iwi-iwi' aiya Ku poto'i hi komiu, da kalame'an-Ku itina' i kinyonyoaum, ka' kalame'anum timbali ma'ima'. 12 Aiya na palentah-ngKu: Kalibosi na samian ka' samian, pokakana sumo Aku mongkalibosi komiu. 13 Mian anu talalo mongkalisi to bela-bela'nyo, aijo' mian anu mombee' tinuu'nyo kalana kapentingan nu aha. 14 Komiu atina'mo na to bela-bela'-Ku, de komiu mombau apaa na anu pinalentahkon-Kumo hi komiu. 15 Komiu madi'mo Ku laga botuan, kalana botuan madi' monsumbu' apaa na anu hau-haunyo nubau nu tuannyo. Komiu Ku laga bela' kalana iwi-iwi' na anu i hongong-Ku lengkat mae hi Tuuma, pinoto'ingkumo hi komiu. 16 Misa' komiu na nompile'i Aku. Aku na nompile'i komiu, ka' nompokau komiu mamba da mimbua' mahampe -- bua-bua' anu madi' ko kapa'idekannyo. Sahingga nubee'je i Tuuma hi komiu mau mule' apaa na anu opoita miu hi Ia de mompake sanggong-Ku. 17 Aiyamo na palentah-ngKu hi komiu. Pompaha kali-kalibosi samian ka' samian." 18 "De dunia mongka'ideki komiu, o'inau' taalu' Aku polo'mo momoonanyo kina'idekan nu dunia. 19 De komiu dunia na tumpunyo, komiu nukalibosi nu dunia, kalana ia na tumpunyo. Panyo Aku nompile'imo komiu lengkat i dunia aiya, sahingga komiu misa'mo anu nu dunia. Mokonyo aitu dunia mongka'ideki komiu. 20 O'inau' apaa na anu tinaloakonKumo hi komiu, 'Botuan madi' lebee daka' molingkudui tuannyo.' De aha monsakisamo Aku, aha mule' monsakisa suele komiu. De aha mombatuki pangajalan-Ku, aha suele mombatuki pangajalanum. 21 Iwi-iwi' aijo' saidi' mae nubau nu aha hi komiu, kalana komiu anu saja' mombatuki Aku, kalana aha madi' monsumbu' Ia anu nonsai mae Aku. 22 De Aku madi' tinoka ka' madi' nontaloakon iwi-iwi' aijo' hi aha, aha madi' baladosa'. Panyo uuka aha madi'mo daagi' ko pintoongan molio kahondoan i dosa' nu aha. 23 Mian anu mongka'ideki mae Aku, mongka'ideki Tuumang-Ku. 24 De aijo' hi aha, Aku madi' nombau ha-han anu ma'isa toho' binau nu mian sangga'at, aha madi' baladosa'. Panyo u'uka aha nontoamo apaa na anu binaung-Ku, ka' aha nongka'idekimo Aku tiba Tuumang-Ku. 25 Panyo memang sumo aitumo, da timbali apaa na anu tinulis i uno nu Kitab nu Atulan nu aha, aijo'mo: 'Aha mongka'ideki Aku, mau madi' ko sababnyo.' 26 Ku pokauje mamba hi komiu, pontulungi anu nolengkat mae hi Tuuma. Iamo na Roh anu mompoto'i kahondoan mongkona Tumpu. De Ia toka, Ia mombee'i katalangan mongkona Aku. 27 Ka' komiu suele tionyo mombee'i katalangan mongkona Aku, kalana komiu no'imboamo ka' Aku salatanmo pe'e imomoonanyo.

Yohanes 16

1 Iwi-iwi' aijo' Ku sisikakon hi komiu, da komiu boli tolo ule' i kapalesaya'an. 2 Komiu osabatakon i laigan anu saja-saja' pogalejaan. Ka' tokaje na tempo'nyo saba' mian anu mompatei komiu tukoonyo ia mombau anu nu palentahkon nu Tumpu. 3 Aha mombau sumo aijo' hi komiu kalana aha ma'isa monsumbu' Tuuma tiba suele Aku. 4 Panyo uuka-Ku taloakon na aijo' hi belemiu, da de aijo' saidi' mae timbalimo, komiu tonginau'mo saba' polo'mo pinoto'ingku hi komiu." "Han aiya madi' pinoto'ing-Ku hi komiu imoonanyo pe'e, kalana Aku daagi' saja' mo'imboa ka' komiu. 5 Panyo u'uka Aku mambamo hi Ia anu nonsai mae Aku; ka' madi' ko samian pe'e anu atina' hi komiu na mompokilawa moya na kalambanan-Ku. 6 Uuka ola o kinyonyoaum timbalimo susa' kalana Aku nontaloakonmo aijo' hi beleyum. 7 Panyo Aku montaloakon anu totu'u hi beleyum: Da bau ka'ima'an nu belemiu, lebe ma'ima' Aku mamba; kalana de Aku madi' mamba, Pontulungi aijo' madi' koko toka hi belemiu. Panyo de aku mambamo kusaije mae na Ia hi beleyum. 8 De Ia tokamo Nu ponyata'je i dunia na pangalati'an nu dosa' anu sahondo-hondonyo, ka'pohukum nu Tumpu. 9 Nu ponyata'je tukoonyo de madi' palesaya hi beleng-Ku aijo' dosa'; 10 saba' Aku totu'u, kalana Aku mambamo hi Tuuma, ka' komiu madi'mo daagi' nontoa Aku mule'; 11 ka' Tumpu momtampu'unimo mohukum, kalana anu mongkuasai dunia aiya i hukummo. 12 Daagi' manjoo' na anu ka'oho' Ku taloakon hi beleyum, panyo uuka aiya komiu ma'isa moko ala montalima. 13 Panyo de Roh aijo' tokamo, aijo'mo Ia na momponyata' katotu'uan mongkona Tumpu, komiu nu potiju'je da monsumbu' iwi-iwi' anu totu'u. Ia madi' monsisik posi butong-Nyo, panyo montaeakon apaa na anu i hongo-Nyomo, ka' nu poto'ije hi komiu apaa na anu timbali i sinaimihi mae. 14 Ia na mompopodaka' Aku, kalana apaa na anu Nu potoka hi komiu, tinalima-Nyo lengkat hi beleng-Ku. 15 Iwi-iwi' anu daagi' hi Tuuma, aijo' anung-Ku. Mokonyo aijo', Aku motatae, apaa na anu nupotoka nu Roh hi komiu, tinalima-Nyo lengkat hi beleng-Ku." 16 "Me sasaingoni' komiu madi'mo daagi' montoa Aku. Ka' mule' me sasaingoni komiu po'ule'je montoa Aku." 17 To pia-piangkuka na anu saja' mombatuki Yesus nontampu' unimo mompaha poki-pokilawa hi samian ka' samian, "Pa' mosia na koonyo, Ia notatae hi kita: 'Me sasaingoni' komiu madi'mo daagi' montoa Aku, ka' mule' me sasaingoni' komiu po'ule'je montoa Aku'? Pa' mosia mule' na koonyo: 'Aku mamba hi Tuuma'?" 18 Saja'mo pino ileekan nu aha, "Apaa na alati'nyo nu potatae, 'me sasaingoni''? Kita madi' monsumbu' pa' apaa na tinaloakon-Nyo!" 19 Nusumbu' i Yesus na aha kahanda'mo mompokilawa hi Ia. Jadi Ia notatae, "Uuka tinaloakon-Ku, 'Me sasaingoni' komiu madi'mo montoa Aku, ka' mule' me sasaingoni' komiu po'ule'je montoa Aku.' Aijo'mo na lewa' opo ileeki' nu bubuu' komiu? 20 Palesayamo, komiu humaangje ka' montando'i, panyo dunia ola lame'. Komiu susa' na kinyonyoa, panyo kasusa'anum aijo' timbalije kalame'an. 21 De samian na boune ohanimo na mohampeakon, ia susa' kalana tempo'nyomo na ia mongoa'i sansala. Panyo salatan anaknyo i hampemo, nukolilimimo nu boune aijo' na sansala anu ingoa'annyo, kalana lame' samian na bungamea' i hampemo i dunia. 22 Sumo aitu mule' na komiu: Uuka komiu susa' na kinyonyoa, panyo Aku singkabotje mule' tiba komiu, sahingga kinyonyoaum po'ule'je lame'; ka' madi' ko samian pe'e na moko ala kalame'an aijo' i kinyonyoaum. 23 I sinaa aitu, komiu madi'mo daagi' mompokilawa apa-apaa hi beleng-Ku. Palesayamo: Mau mule' apaa na opoita miu hi Tuuma de momboa sanggong-Ku, aijo' nubee' nu Tuuma hi beleyum. 24 Sampe tempo' uuka komiu ma'isa toho' nompoita apa-apaa momboa sanggong-Ku. Poitamo, komiu tionyo mohumpak, da kalame'an miu ma'ima'." 25 "Iwi-iwi' aiya Ku taloakon hi beleyum nu ande-andeon. Panyo tokaje mae na tempo'nyo Aku madi'mo daagi' mompake ande-andeon, panyo osisikmo nasa-nasa hi beleyum mongkona Tuuma. 26 Tempo'je aitu na komiu mompoita hi Tuuma momboa sanggong-Ku; da osumbu', Aku madi'mo mompoita hi Tuuma bau kapalaluan miu. 27 Kalana posimo Tuuma na mongkalibosi komiu. Ia mongkalibosi komiu, kalana komiu mongkalibosi Aku, ka' palesaya saba' Aku lengkat mae hi Tumpu. 28 Memang Aku nolengkat mae hi Tuuma, ka' tinokamo i uno nu dunia. Panyo uuka Ku pala'imo na dunia minsusule'mo hi Tuuma." 29 Lantas anu saja' mombatuki Yesus notatae hi Ia, "Uuka Tumpu basisik nu ponasamo, ka' madi'mo mombau ande-andeon, 30 ka' osumbu' mami te Tumpu monsumbu' iwi-iwi'. Madi' pilenje samian mompokilawa apa-apaa hi Tumpu. Kalana aijo' opalesaya mami Tumpu nolengkat mae hi Tumpu." 31 I Yesus nontaami, aha, "Jadi palesayamo na komiu uuka? 32 O'inau'! Tempo'nyo tokaje mae, aitu pe'e tinokamo, komiu oposungkehetmo. Komiu minsusule' i posi laigan ka' mompala'i Aku sausa'. Panyo Aku madi' posi sausa', kalana Tuuma na mosangalu ka' Aku. 33 Iwi-iwi' aiya Ku taloakon da komiu mohumpak ka' ima'an, kalana mosa'angu' tiba Aku. I dunia komiu sansala, panyo potataap na kinyonyoa miu! Ihungku'ankumo na dunia!"

Yohanes 17

1 Noko potatae sumo aijo', i Yesus nontihanga langit ka' notatae, "Kita Tuuma, u'uka aiya tinokamo na tempo'nyo. Popodaka'mo na Anak-To, da Anak-To suele mompodaka' kita Tuuma. 2 Kita Tuuma nombee'mo kuasa mompalentah iwi-iwi' na mian hi Anak, da Ia mombee'i kantumuu'an kopian ka' toka sidu-sidutu' hi iwi-iwi' na mian anu binee'mo nu Tuuma hi Ia. 3 Aiyamo na kantumuu'an kopian ka' toka sidu-sidutu'; da mian monsumbu' kita Tuuma, ola sa'a-sa'angu'nyomo na Tumpu anu totu'u, ka' monsumbu' i Yesus Kristus anu sinai mae nu kita Tuuma. 4 Aku nompopodaka'mo kita Tuuma i bawo nu dunia aiya, kalana nompotimbalimo hia nu kita Tuuma anu pinokauhakonto hi beleng-Ku. 5 Kita Tuuma! Popodaka'mo na Aku u'uka aiya hi kita Tuuma nu kadaka'an anu daagi' hi beleng-Ku, ka' hi kita Tuuma, ma'isa pe'e dunia aiya pinotimbali. 6 Aku nomposumbu'mo kita Tuuma hi to mia-mian i dunia aiya anu binee'mo nu kita Tuuma hi beleng-Ku. Aha, kita Tuuma na tumpunyo, ka' kita Tuuma nombee'mo aha hi beleng-Ku. Aha nohongo-hongomo potatae nu kita Tuuma. 7 Uuka aiya nusumbu' nu aha, taalu' iwi-iwi' anu binee' nu kita Tuuma hi beleng-Ku no lengkat mae hi kita Tuuma. 8 Pinoto'ingkumo hi aha na potatae nu kita Tuuma anu binee'mo hi beleng-Ku; ka' tinalimanyomo nu aha. Sinumbu'mo nu aha taalu' Aku tinoka mae totu-totu'u lengkat hi kita Tuuma ka' aha nompalesayamo taalu' kita Tuuma na nonsai mae Aku. 9 Aku mondo'akon aha. Aku madi' mondo'akon dunia, panyo ola to mia-mian anu binee'mo nu kita Tuuma hi beleng-Ku, kalana aha i Tuuma na tumpunyo. 10 Iwi-iwi' na anung-Ku, i Tuuma suele na tumpunyo; ka' iwi-iwi' na anu nu kita Tuuma, Aku suele na tumpunyo. Aku opopodaka' aijo' hi aha. 11 Uuka aiya Aku toka hi kita Tuuma. Aku madi'mo daagi' jojoong i dunia; panyo aha daagi' i dunia. Kita Tuuma anu Susi'! Potuu'akon na aha nu kuasa, nu sanggonto Tuuma, aijo'mo sanggo anu binee'mo nu kita Tuuma hi beleng-Ku -- da aha timbali mosa'angu', pokakana sumo kita Tuuma ka' Aku suele sa'a-sa'angu'. 12 Tempo'nyo Aku daagi' tiba aha, pinotuu'kumo na aha nu kuasa nu sanggonto Tuuma -- sanggo anu binee' nu kita Tuuma hi beleng-Ku. Aku nompotuu'mo aha, ka' madi' ko samian pe'e nolapus, boli mompiakon ia anu memang nukonamo na molapus; da kalana aijo' ganaapmo na anu tinulis i Kitab nu Tumpu. 13 Uuka aiya Aku toka hi Tuuma. Iwi-iwi' aiya Ku taloakon hau-haunyo Aku daagi' i dunia; da aha mongoa'i totu-totu'u kalame'an-Ku. 14 Aku nompoto'iakonmo hi aha potatae nu kita Tuuma, ka' dunia nongka'idekimo aha, kalana aha misa' anu nu dunia, pokakana sumo Aku suele misa' anu nu dunia. 15 Madi' Ku poita da kita Tuuma mongala aha i dunia aiya, panyo Ku poita da kita Tuuma mompimpaliakon aha i Anu Ma'idek. 16 Sumo lapangnyo Aku misa' anu nu dunia aha mule' suele misa anu nu Dunia. 17 Potimbali na aha matungka' kita Tuuma na tumpunyo, aijo' nyata' i kahondoan; potatae nu kita Tuuma aijo'mo na kahondoan. 18 Sumo kita Tuuma nonsaimo Aku mamba i dunia, sumo aitumo suele na aku monsai aha mamba i dunia. 19 Bau kapalaluan nu aha, Aku mombee' butong-Ku da osumbu' ahi', taalu' kita Tuuma na tumpunyo, da aha suele timbali matungka' kita Tuuma na tumpunyo, aijo' nyata' i hahan anu hondo. 20 Misa' ola aha aiya na Kudo'akon. Aku suele mondo'akon to mia-mian anu saidi' mae palesaya hi beleng-Ku, kalana montoamo hahan anu aiya hi aha. 21 Ku poita kita Tuuma, da aha iwi-iwi' timbali mosa'angu', susumo kita Tuuma mosa'angu' tiba Aku, ka' Aku tiba kita Tuuma. O'amalakon da aha timbali mosa'angu' tiba Kita, da dunia palesaya taalu' kita Tuuma na nonsai mae Aku. 22 Aku nombee'imo aha kadaka'an anu binee' nu kita Tuuma hi beleng-Ku, da aha timbali mosa'angu' pokakana sumo kita suele sa'a-sa'angu'. 23 Aku tiba aha, ka' kita Tuuma tiba Aku, da aha totu-totu'u sa'a-sa'angu'. Sahingga dunia monsumbu' taalu' kita Tuuma na nonsai mae Aku, ka' taalu' kita Tuuma mongkalibosi aha, sumo kita Tuuma mongkalibosi Aku. 24 Kita Tuuma, Ku kahanda'i da aha anu binee'mo nu kita Tuuma hi beleng-Ku mogalum ka' Aku i tampat kajojoongan-Ku, da aha montoa kadaka'an-Ku; aijo'mo kadaka'an anu binee' nu kita Tuuma hi beleng-Ku, kalana kita Tuuma mongkalibosi Aku ma'isa pe'e dunia aiya pinotimbali. 25 Kita Tuuma anu adin! Dunia madi' monsumbu' kita Tuuma, panyo Aku monsumbu' kita Tuuma; ka' mian haha aiya monsumbu' taalu' kita Tuuma na nonsai mae Aku. 26 Aku nompoto'imo sanggo nu kita Tuuma hi aha; ka' saja' Kubau sumo aitu, da liibos nu kita Tuuma hi beleng-Ku tataap i uno nu kinyonyoa nu aha, ka' Aku mosa'angu' tiba aha."

Yohanes 18

1 Noko binalado'a na i Yesus sumo aijo', Ia tiba anu saja' mombatuki Ia nambamo nokiijo' i santoa nu Kaunyo Kidron. I kiijo' daagi' ko sa'angu' na taman. Ka' i Yesus tiba anu saja' mombatuki Ia ninsoopmo i tampat aijo'. 2 I Yudas anu uwe-uwesan aijo' monsumbu' tampat aijo'; kalana i Yesus toho'mo sinilimu' i kiijo' tiba anu saja' mombatuki Ia. 3 Saba' i Yudas namba i tampat aijo' nomboa sanggombu na suludadu Romawi tiba to pia-piangkuka na ponjaga Laigan nu Tumpu anu pinokau nu kapala nu ima-imam tiba to mia-mian Farisi. Aha nomboa toongon pimuhuk, sulu', tiba potong. 4 Sinumbu'mo i Yesus iwi-iwi' apaa na anu timbali saidi' mae i butong-Nyo. Jadi Ia nongohani mian haha aijo' ka' nompokilawa, "Komiu molio ihe?" 5 "I Yesus, mian nu Nazaret," na koonyo nu aha. "Akumo na Ia," koonyo i Yesus. I Yudas uwe-uwesan tinjo-tinjo i kiijo' tiba aha. 6 Tempo'nyo i Yesus notatae hi aha, "Akumo na Ia," aha iwi-iwi' nambasule'mo ka' tinolubuk i tano'. 7 Po'ule' mule' pinokilawa i Yesus hi aha, "Ihe na olio miu?" "I Yesus, mian nu Nazaret," na koonyo nu aha. 8 "Tinaloakonkumo, Akumo na Ia," na koonyo i Yesus. "Ka' de Aku na memang olio miu, yo bakas da sangga'at aiya mambamo." ( 9 Salatan tinaloakon sumo aijo', tinimbalimo apaa na anu tinaloakonmo i Yesus u'utu mae: "Kita Tuuma, to mia-mian anu binee'mo nu kita Tuuma hi beleng-Ku, madi' ko samian pe'e na nolapus.") 10 I Simon Petrus anu nomboa mae samata na bajak, nongkeatmo ka' nontabasmo samian na posaihon nu imam daka', sahingga nosamping na bihingnyo koanan. Sanggo nu posaihon aijo' i Malkus. 11 Sahingga i Yesus notatae hi Petrus, "Po'ule' posalung na bajakum i guma'nyo! Pa' koyum o Aku madi' sida monginum galas kasansala'an anu binee' nu aha Tuuma hi beleng-Ku?" 12 Lantas to sulu-suludadu Romawi tiba kamundannyo, ka' ponjaga-ponjaga nu Yahudi nohakopmo ka' nompungu i Yesus. 13 Momoona binoa nu aha na i Yesus mangadap hi Hanas monian i Kayafas. I Kayafas aijo' imam daka' i taun aijo'. 14 Ka' iamo na nompokinde'i anu mongkuasai Yahudi, tukoonyo lebee ma'ima' samian na mate bau pontokong iwi-iwi' na bansa. 15 I Simon Petrus tiba samian na anu saja' mombatuki sangga'at nombatukimo i Yesus. Anu saja' mombatuki sangga'at aiya nusumbu' i imam daka'; jadi ia ninsoop hingga-hinggat tiba i Yesus i popasan nu laigan imam daka, 16 panyo i Petrus nontanda'i i sambiha'nyo nu tumban. Lantas anu saja' mombatuki ia sangga'at nosabat ka' binasisik tiba posaihon boune anu montaamongi sabatan, lantas nomboa i Petrus ninsoop i unonyo. 17 Posaihon boune pontaamongi sabatan aijo' notatae hi Petrus, "Hee, te misa' beleyum suele sala'samian anu saja' mombatuki mian aijo'?" "Misa'," na koonyo i Petrus. 18 Tempo'nyo aitu tempo' nu bakin, sahingga to posa-posaihon ka' ponjaga-ponjaga nomposuunimo apu da mingoba ka' aha minjohu i kiijo'. I Petrus nokiijo' ka' tinuminjo, minjohu hingga-hinggat tiba aha. 19 Imam daka' nompokilawa hi Yesus mongkona anu saja' mombatuki Ia, ka' mongkona pangajalan-Nyo. 20 I Yesus nontaami, "Aku saja' basisik sahondo-hondonyo i ahop nu mian da'isan. Aku saja' mompogulu' i to lai-laigan Pogalejaan ka' i Laigan nu Tumpu, tampat nu mian Yahudi biasanyo silimu'. Madi' toho' Aku montaloakon apa-apaa maninsuluk. 21 Jadi kadaka' kita Tuan mompokilawa Aku? Pokilawa hi aha anu nohongomo Aku nompogulu'. Tantu nusumbu' nu aha apaa na anu tinaloakon-Ku." 22 Salatan i Yesus nontaloakonmo sumo aijo', sala'samian ponjaga i kiijo' nohapa'mo Ia ka' notatae, "Baani hondo na Oko notatae sumo atina' hi imam daka'!" 23 I Yesus nontaami, "De Aku nontaloakon apa-apaa anu madi' totu'u, poto'i mae aiya apaa na anu sinala'! Panyo de anu Ku taloakon aijo' memang totu'u, kadaka' beleyum mohapa' Aku?" 24 Lapas aijo' i Hanas nompokaumo mian momboa i Yesus hau-haunyo pinungu nu lante' nokiijo' hi Imam Daka' i Kayafas. 25 I Simon Petrus daagi' aijo' tinjo-tinjo minjohu. To mia-mian notatae hi ia, "Te misa' beleyum suele anu saja' mombatuki mian aijo'?" Panyo i Petrus nombahakon, koonyo, "Misa'!" 26 Samian na posaihon nu imam daka', aijo'mo julu mae nu mian anu bihingnyo sinandingakon i Petrus notatae, "Te misa' aku nontoa beleyum i tampat sisinu'anan kau' bunga-bunga anu lewa-lewa' basanaangan no'imboa tiba Ia?" 27 Lantas i Petrus po'ule' nombahakon, "Madi'," -- ka' madi' sala' tempo'nyo aitu manuk nintutuhu'mo. 28 Subu-subu hondo aha nomboa i Yesus lengkat mae laigan i Kayafas namba i laigan nu gubernur. To mia-mian nu Yahudi madi' ninsoop i uno nu laigan daka', da aha madi' mahenyu susumo koonyo nu agama, kalana aha kahanda'mo mongkaan kaanon nu Paskah. 29 Kalana aitu i Pilatus nosabat nokiijo' hi aha ka' nompokilawa, "Apaa na kasala'annyo sahingga komiu mongkalakmo mae mian aiya?" 30 Aha nontaami, "De Ia madi' ko sala'nyo, kami madi' nomboa mae Ia hi kita Tuumangku Gubernur." 31 I Pilatus notatae hi aha, "Alamo na Ia ka' putusimo na palakala-Nyo, susumo koonyo nu posi atulan miu!" Panyo to mia-mian nu Yahudi aijo' nontaami, "Kami madi' timbali mohukum mate mian." ( 32 Aiya timbali da ganapmo apaa na anu tinaloakon i Yesus mongkona bau-baunyo Ia silaka.) 33 I Pilatus po'ule' ninsoop i laigan ka' nolaga i Yesus, lantas nompokilawa, "Pa' totu'u Beleyum Tomundo' nu mian Yahudi?" 34 I Yesus nontaami, "Pa' posi pikilanum na mompokilawa aiya kabai mian sangga'at anu nompoto'imo hi beleyum mongkona Aku?" 35 I Pilatus nontaami, "Te aku aiya mian nu Yahudi? Anu nomboa mae Beleyum hi belengku, posi sangko bansa-Um tiba to kapa-kapala nu imam. Apa na anu binaumo nu Beleyum?" 36 I Yesus notatae, "Kalaja'an-Ku misa' lengkat i dunia aiya. Maluannyo kalaja'an-Ku lengkat i dunia aiya, to mia-mian-Ku tantu tionyo montinjohi da Aku boli obee' hi anu mongkuasai Yahudi. Panyo memang kalaja'an-Ku misa' lengkat i dunia aiya!" 37 Lantas i Pilatus nompokilawamo hi Ia, "Desumo aitu Beleyum tomundo'?" I Yesus nontaami, "Beleyum notatae, Aku aiya tomundo'! Aku i hampe ka' tinoka i dunia daagi' ko sa'angu' na kahanda' aijo'mo mombee'i katalangan mongkona kahondoan. Mian anu lengkat mae i kahondoan aijo' mohongo Aku." 38 I Pilatus nompokilawa hi Ia, "Apaa na poso'nyo nu kahondoan?" Lantas i Pilatus po'ule' nosabat lengkat i laigan aijo' ka' notatae hi to mia-mian nu Yahudi, "Aku madi' nohumpak sa'angu' pe'e na kasala'an hi Ia. 39 Panyo anu biasa hi komiu, aku saja' molapasakon samian na anu o talungku' i Sinaa Daka' Paskah. Mongka'oho' na komiu da ku polapasmo na tomundo' nu Yahudi da komiu sanangmo?" 40 Aha nontaami molo-moloboo', "Madi', boli na Ia, panyo i Barabas!" (I Barabas mian anu saja' batololang.)

Yohanes 19

1 Lapas aijo' i Pilatus ninsoop lantas nompokau mian nompohos i Yesus. 2 To sulu-suludadu nomboa sa'angu' na makota kandang anu kohii'nyo, lantas nomposoku' aita' i ubak i Yesus. Lapas aijo' aha nompopusokmo hi Ia juba' buhitnyo mingkamumu', 3 lantas saja'mo aha nokiijo' hi Ia motatae, "Higahi na tomundo mian nu Yahudi." Lapas aijo' nuhapa-hapa'mo nu aha na Ia. 4 Lapas aijo' i Pilatus po'ule' mule' nosabat ka' notatae hi mian da'isan aijo', "Toa! Aku nonsabatakonmo i sambiha'-Nyo hi komiu, da osumbu' miu aku madi' nohumpak sa'angu' pe'e na kasala'an hi Ia." 5 Lantas i Yesus nosabat soku-soku na makota ko hii'nyo ka' juba' kamumu'. I Pilatus notatae hi aha, "Toa na mian aiya." 6 Salatan to kapa-kapala nu imam, ka' ponjaga-ponjaga aijo' nontoa i Yesus, aha noloboo'mo, "Salibmo na Ia! Salibmo na Ia!" I Pilatus notatae hi aha, "Ala na Ia, ka' komiumo na mosi salib, aku madi' nohumpak sa'angu' pe'e na kasala'an hi Ia." 7 To mia-mian nu Yahudi aijo' nontaami, "De pongka'oho' nu atulan mami, Ia tionyo o hukum mate, kalana Ia mangaku butong-Nyo Anak nu Tumpu." 8 Salatan i Pilatus nohongo potatae nu aha sumo aijo', ia nompaka pabuhukmo mule'. 9 Sahingga ia po'ule' ninsoop i laigan daka', ka' salatan i Yesus pinosoopmo, i Pilatus nompokilawamo hi Ia, "Beleyum nolengkat mae iya?" Panyo i Yesus madi' nontaami. 10 Sahingga i Pilatus po'ule' notatae, "Beleyum madi' mongka'oho' motatae hi belengku? Da osumbu' aku ko kuasa mompobebas Beleyum ka' kuasa monsalib Beleyum!" 11 I Yesus nontaami, "De Tumpu madi' nombee' kuasa aijo' hi beleyum, beleyum madi' hondo moko kuasai beleng-Ku. Mokonyo aitu mian anu nomboa mae Aku hi beleyum, lebe daka' na dosa'nyo molabii beleyum." 12 Salatan i Pilatus nohongomo aijo', ia nompai usahakonmo da o polapasmo na i Yesus. Panyo to mia-mian nu Yahudi nolo-noloboo'mo, "De Kita Tuan mompobebas Ia, Kita Tuan misa' sangalu i Kaisar! Mian anu mangaku butongnyo tomundo, ia bali' i Kaisar!" 13 Salatan i Pilatus nohongo potatae haha aijo', ia nomboamo i Yesus nosabat, lantas sinumuhangmo i kadela pomputusian palakala i tampat sanggonyo Salo Batu. (I uno nu sisik nu Ibrani sanggonyo Gabata.) 14 Tempo'nyo aitu malia'mo sonsu'un na sinaa, ma'isa pe'e Sinaa Daka' nu Paskah. I Pilatus notatae hi to mia-mian haha aijo', "Aiyamo na tomundo miu!" 15 Aha nolo-noloboo'mo, "Pateimo na Ia! Pateimo na Ia! Salibmo na Ia!" I Pilatus nompokilawa, "Tionyo ku salibmo na tomundo miu?" To kapa-kapala nu imam nontaami, "Samata-mata i Kaisar na tomundo mami!" 16 Lantas i Pilatus nombee' i Yesus hi aha da o salibmo. Aha nongala i Yesus, lantas nambamo nomboa Ia. 17 I Yesus nosabat nosi simbu salib-Nyo nokiita' i tampat sanggonyo, "Tampat nu Popoke'." (I uno nu sisik nu Ibrani o sanggohi Golgota.) 18 I kiita' mae na Ia sinalib. Hingga-hinggat tiba Ia daagi' ko ua'aha na mian sangga'at sinalib; samian i sasu kowi, ka' samian i sasu koanan, ka' i Yesus i totonga'nyo. 19 I kau' salib i Yesus, i Pilatus nompokau mompokona tulisan aiya: "Yesus lengkat mae i Nazaret, Tomundo Mian nu Yahudi." 20 Da'isan na mian nu Yahudi nombasa'mo tulisan aijo', kalana tampat i Yesus aijo' sinalib madi' majo'on lengkat i kota. Tulisan aijo' tinulis nu sisik nu Ibrani, Latin, tiba Yunani. 21 To kapa-kapala nu imam notatae hi Pilatus, "Boli montulis 'Tomundo nu Mian Yahudi', panyo o tulis, 'Mian aiya notatae, Aku Tomundo nu Mian Yahudi.' " 22 Panyo i Pilatus nontaami, "Anu tinuliskumo, tataap o potulis." 23 Ilapas na suludadu haha aijo' nonsalib i Yesus, aha nongalamo baju'-Nyo. Baju'nyo aijo' binagi opat: toto samian nohumpak sambahagian. Aha nongala mule' juba'-Nyo. Juba' aijo' madi' ko ka'utannyo -- tinonun lengkat mae bawo toka-toka i aluknyo. 24 To sulu-suludadu notatae hi samian ka' samian, "Boli o botu-botu'to na juba' aiya. Imbo' da o bagi mompake onde, bau pompotantu ihe na timbali mohumpak." Han aijo' sinumo aitu da timbali apaa na anu tinulismo i uno nu Kitab nu Tumpu aijo'mo: "Aha mombagi-bagi baju'-Ku, ka' nompake onde na nombagi juba'-Ku." Ka' memang suludadu haha aijo' nombaumo sumo aijo'. 25 Koko salib i Yesus, tinuminjomo na tina i Yesus, utus boune nu tina-Nyo, ka' i Maria bengkele' i Klopas, tiba i Maria Magdalena. 26 Salatan i Yesus nontoa tina-Nyo tiba anu saja' mombatuki nu Nu kalibosi tinjo-tinjo i kiijo', Ia notataemo hi tina-Nyo, "Kita Tina, aijo' na anak nu Kita Tina." 27 Lapas aijo' i Yesus notataemo hi anu saja' mombatuki Ia aijo', "Aijo' tinaum." Nolengkat pe'e i aijo' anu saja' mombatuki aijo' nompoboamo tina i Yesus da jojoongmo i laigannyo. 28 Sinumbu'mo i Yesus uuka aiya iwi-iwi' ilapasmo, ka' da apaa na tinulismo i uno nu Kitab nu Tumpu aijo' sidamo, Ia notataemo, "Aku negotmo." 29 I kiijo' daagi' ko sa'angu' na mangko' ingisian nu uee nu anggur nobuke' panyo malosing. Lantas sa'angu' na bunga karang i lobong i uno nu uee anggur aijo', ka' sinusukakon i sangkolong na hisop, 30 I Yesus nontumi' uee nu anggur aijo' lantas notataemo, "I lapasmo!" Balo Ia tinompalupek na ubak-Nyo ka' sinilaka. 31 Anu mongkuasai Yahudi madi' mongka'oho' bangke' nu to mia-mian mate anu sinalib aijo' tataap kala-kalayo' i kau' salib i Sinaa nu Sabat, pakalaus uuka aiya Sabat aijo' Sinaa Daka' anu samata-mata aijo' na anu o lame'akon. Kalana i Yesus sinalib kinona ma'isa pe'e Sinaa nu Sabat aijo', to mia-mian nu Yahudi nomoita hi Pilatus da opobee' mompato'akon tengke nu aha anu sinalibmo ka' montau'akon bangke'nyo haha aijo' i kau' salib. 32 Lantas suludadu haha aijo' inamba ka' nompato'i lebe i moona tengke nu ua'aha anu sinalib hingga-hinggat i Yesus. 33 Salatan aha tinokamo hi Yesus, tinoa nu aha Ia i natemo. Sahingga aha madi'mo nompato'i tengke-Nyo. 34 Panyo sihung i Yesus sinusuk nu talombo' nu sala'samian suludadu haha aijo'; balo nosabat na baso' tiba uee. 35 Mian anu nositoa bauon aijo', iamo na nompoto'i han aijo' da komiu suele palesaya. Ka' anu sinakisiannyo aijo' totu'u, ka' nu sumbu' saba' aijo' memang totu'u. 36 Han aijo' timbali da sampa' na anu tinulis i uno nu Kitab nu Tumpu, aijo'mo "Madi' ko sa'angu' pe'e na buku-Nyo na o pato'akon." 37 I uno nu Kitab nu Tumpu tinulis, "Aha montanggalakonje Ia anu sisinusuk nu aha." 38 Lapas aijo' i Yusuf lengkat mae i Arimatea nomoita de timbali hi Pilatus, da mongala bangke' i Yesus. (I Yusuf anu aja' mombatuki Yesus, panyo matikohowini kalana ia mabuhuk hi anu mongkuasai Yahudi.) I Pilatus nompobee' ia, jadi ia namba nongala bangke' i Yesus. 39 I Nikodemus anu toho' tinoka u'utu mae hi Yesus pihi-pihi, namba suele hingga-hinggat tiba i Yusuf. I Nikodemus nomboa lampa-lampa te mur tiba gaharu -- iwi-iwi' kila-kila tolumpulu' na kilogram na konjoo'nyo. 40 Ua-ua'aha na mian aijo' nongala bangke' i Yesus ka' sinaputnyo na butong-Nyo nu hude ponsaput tiba lampa-lampa manohong aijo' sumo adat molamun nu aha mian Yahudi. 41 Tampat i Yesus sinalib aijo' daagi' ko sa'angu' na tampat sinu'anan kau' ka' bunga-bunga lewa' basanangan. I uno nu tampat basanangan aijo' daagi' ko sa'angu' na polamunan bu'ou anu ma'isa toho' pinolamunan mian. 42 Kalana lamunan aijo' ohani ka' sinaa nu Sabat malia'mo montampu'uni, ilamunmo nu aha na i Yesus i kiijo'.

Yohanes 20

1 Subu-subu i sinaa nu duminggu daagi' pintung, i Maria Magdalena namba i pinolamunan. Tinoanyo na batu pinongkulubi tinondedensu'mo lengkat i bolo' nu pinolamunan aijo'. 2 Sahingga ia nopadeka' nolio i Simon Petrus ka' anu saja' mombatuki nunu kalibosi Yesus, ka' notatae hi aha, "Tumpu ingalamo aijo' mae i pinolamunan, madi' kusumbu' pa' iya na pinonguna'an-Nyo." 3 Lantas i Petrus ka' sangga'at anu saja' mombatuki aijo' nambamo i pinolamunan. 4 Ua-ua'aha nopadeka', panyo sangga'at anu saja' mombatuki aijo' na lebe nalia' noliu-liu i Petrus, ia na tinoka momona i pinolamunan. 5 Ia nolenga nokaiyong i uno nu pinolamunan, nontoa hude pinonsaput timpa-timpas i kiijo', panyo ia madi' ninsoop. 6 I Simon Petrus nontuloi' lengkat mae mihi, lantas lau-laus ninsoop i uno nu pinolamunan aijo'. Tinoanyo na hude pinonsaput timpa-timpas i kiijo'. 7 Panyo hude anu pinosegot i ubak i Yesus madi'mo ko anu kiijo' oha-ohani, panyo kumu-kumun nanintademo. 8 Lapas aijo' anu saja' mombatuki tino-tinoka tinongkoi moona i pinolamunan ninsoop suele. Ia nontoa ka' pinalesayamo. ( 9 Sangkutnyo tinoka tempo' aitu aha ma'isa nonsumbu' pa' apaa na anu tinulis i uno nu Kitab nu Tumpu tukoonyo Ia tionyo silaka, panyo po'ule' opotumuu'.) 10 Lapas aitu anu saja' mombatuki Yesus aijo' ninsusule'mo. 11 I Maria Magdalena tinuminjo i ahop nu pinolamunan ka' i humaang. Hau-haunyo humaang ia nolenga nokaiyong i pinolamunan. 12 Lantas nontoa ua'aha na malaikat nibaju' mopute'. Aha aijo' sinumuhang i tampat anu pinonguna'an bangke' i Yesus samian sasu ubak, ka' sangga'atnyo i sasu tengke. 13 To mala-malaikat haha aijo' nompokilawa, "Kita Tina, kadaka' humaang?" I Maria nontaami, "Tumpungku ingalamo, ka' madi' ku sumbu' pa' iya na pinonguna'an Ia." 14 Noko potatae sumo aijo', ia nosiloi i hiku ka' nontoa i Yesus tinuminjo i kiijo'. Panyo madi' sinumbu'nyo taalu' aijo' i Yesus. 15 I Yesus nompokilawa hi ia, "Kita Tina, kadaka' humaang? Kita Tina molio ihe?" I Maria nonsangka aijo' topo bau ale', sahingga ia notatae, "Kita Tuuma, de kita Tuuma na nolalin Ia lengkat i aiya, tulungi poto'iakon mae hi belengku iya na pinonguna'an nu Kita Tuuma Ia, da ku ala na ia." 16 I Yesus notatae hi ia, "Maria!" I Maria nosiloi hi Yesus, lantas notatae i sisik nu Ibrani, "Rabuni!" (Alati'nyo "Gulu'".) 17 "Boli o toongi na Aku," koonyo i Yesus hi ia, "kalana Aku ma'isa noliba' namba hi Tuuma. Panyo lako'mo hi to utu-utus-Ku, ka' poto'iakon hi aha, taalu' uuka aiya Aku moliba'mo mamba hi Tuumang-Ku, ka' Tuumaum Tumpung-Ku, ka' Tumpuum." 18 Sahingga i Maria namba nompoto'i hi anu saja' mombatuki Yesus, tukoonyo ia nontoamo i Tumpu, tiba mule' i Tumpu nontaloakonmo iwi-iwi' aijo' hi ia. 19 Sinaa nu duminggu suele aijo' salatan i nalomo, anu saja' mombatuki Yesus sinilimu'mo i sa'angu' na laigan, panyo tumban kaho kinunsi, kalana aha mabuhuk hi anu mongkuasai Yahudi. Monti-montiik i Yesus tinokamo ka' tinuminjo i pohintonga'an nu aha ka' notatae, "Tabea', kasalamatan tinokamo hi komiu." 20 Noko potatae sumo aijo', Ia nompotoa hi aha lima ka' sihung-Nyo. Tempo'nyo nontoa i Tumpu, aha ilame'mo hondo. 21 Lantas i Yesus po'ule' notatae hi aha, "Tabea' kasalamatan tinokamo hi komiu. Sumo i Tuuma nonsai mae Aku, sumo aitu suele na aku monsai komiu." 22 Lantas Ia nompuuhakon sawo-Nyo hi aha ka' notatae, "Talimamo na Roh nu Tumpu. 23 De komiu mongampuni dosa' nu toto samian, Tumpu suele mongampuni ia. De komiu madi' mongampuni dosa' nu toto samian, Tumpu suele madi' mongampuni ia." 24 I Tomas, (anu osanggohi "Hapi"), sala'samian anu sampu-sampulu' ka' ohua' na anu saja' mombatuki Yesus, madi' kino ianyo hingga-hinggat tiba sangga'at tempo'nyo i Yesus tinoka. 25 Sahingga anu saja' mombatuki Yesus sangga'at notatae hi Tomas, "Kami nontoamo i Tumpu!" Panyo i Tomas nontaami, "De ma'isa ku toa na pinompaku'an lima-Nyo, ma'isa ku susukakon na bua' nu limangku i anu bine-binelan nu paku aijo', ka' ma'isa ku susuk nu limangku na sihung-Nyo, madi' hondo aku mongka'oho' palesaya." 26 Ilapas sinaduminggu anu saja' mombatuki Yesus po'ule' mule' nokiijo' i tampat aitu, ka' kino i Tomasmo. Iwi-iwi' na tumban ginunsing. Panyo i Yesus tinoka ka' tinuminjo i totonga' nu aha lantas notatae, "Tabea' kasalamatan tinokamo hi komiu." 27 Lapas aijo' koo-Nyo i Yesus hi Tomas, "Toa na limang-Ku, ka' posusuk na bua' nu limaum i aiya. Tajuakon mae na limaum ka' posusuk i sihung-Ku. Boli daagi' bata-bata, panyo palesayamo!" 28 I Tomas notatae hi Yesus, "Tumpungku ka' Tumpu Allah-ngku!" 29 Sahingga i Yesus notatae hi ia, "Te misa' o beleyum palesayamo kalana nontoamo Aku? Higahi na mian anu palesaya mau mule' madi' montoa Aku." 30 Daagi' manjoo' na anu okabangangi sangga'at, anu binaumo i Yesus i ahop nu anu saja' mombatuki Ia, panyo madi' tinulis i uno nu Kitab aiya. 31 Panyo iwi-iwi' aiya tinulis, da komiu palesaya taalu' i Yesus aijo' Tomundo anu Momposalamat, Anak nu Tumpu, ka' kalana palesaya hi Ia, komiu mohumpakmo kantumuu'an.

Yohanes 21

1 Lapas aijo' i Yesus po'ule' mule' nompotoa butongnyo i Dowiwi Tiberias hi anu saja' mombatuki Ia. Sumo uuka na jinadi: 2 Ko sansinaan i Simon Petrus, i Tomas anu osanggohi Hapi, i Natanael lengkat mae i Kana i tano' Galilea, ana-anak i Zebedeus, ka' ua'aha na anu saja' mombatuki Yesus sangga'at hau-haunyo sinilimu'mo. 3 Koonyo i Simon Petrus hi sangga'at, "Aku ka'oho' mamba mompagala ikan." "Kami mombatuk," na koonyo nu aha hi ia. Aha namba sinumake' i duangan. Panyo sinampahu aitu aha madi' nohumpak apa-apaa. 4 Salatan sinaa nontampu'unimo mae bete', i Yesus tinuminjo i biwi nu bone', panyo madi' sinumbu' nu aha taalu' aijo' i Yesus. 5 I Yesus notatae hi aha, "Ana-anak, pa' komiu ko ikan?" "I madi'," na koonyo nu aha. 6 I Yesus notatae hi aha, "Sambuangakon na buani' miu sasu koanan nu duangan da komiu mohumpak ikan." Balo buani' aijo' sinambuangakon nu aha. Panyo madi'mo pinoko hela' nu aha kalana manjoo' hondo na ikan i unonyo. 7 Anu saja' mombatuki nunu kalibosi i Yesus notatae hi Petrus, "Aijo'mo na Tumpu!" Salatan i Simon Petrus nohongo taalu' aijo' i Tumpu, ia nompusok baju'nyo (kalana ia madi' nimbaju') balo nalalumpat nokaiyong i uee. 8 Anu saja' mombatuki sangga'at binabosemo nokiijo' i katano'an, ka' nohela' buani' nobuke'mo nu ikan. Aha madi' talalo majo'on lengkat i katano'an, kila-kila ola sa'atu na meter. 9 Salatan aha nilalobosmo mae lengkat i duangan, aha nontoa daagi' ko oba nu apu kiijo' mae ka' ikan aita' i bawonyo ka' roti. 10 I Yesus notatae hi aha, "Soba boamae na ikan to pia-piambatu anu sala'je binuani miu." 11 I Simon Petrus nasasawe' i duangan balo nohela' buani'nyo nokiijo' i katano'an. Buani' aijo' nobuke' nu ikan to daka-daka'; iwi-iwi' sa'atu limampulu' na angu'annyo. Panyo mau mule' sumo aijo' na konjoo'nyo, buani'nyo madi' nobeak. 12 I Yesus notatae hi aha, "Imbo' da mongkaan." Madi' ko samian pe'e na anu saja' mombatuki Ia baani mompokilawa, "Ihe na Kita Tuuma?" Kalana nusumbu' nu aha Ia aijo' Tumpu. 13 Lapas aijo' i Yesus nongohani aha, ingalanyo na roti aijo' ka' binee'nyo hi aha. Sumo aitu mule' na Ia nombee' ikan aijo'. 14 Aiyamo na ko pintolunnyo i Yesus nompotoa butongnyo hi anu saja' mombatuki Ia, salatan Ia po'ule'mo tinumuu' lengkat i kasilakan-Nyo. 15 Noko kaan na aha, i Yesus notataemo hi Simon Petrus, "Simon anak i Yona, apaa beleyum lebe mongkalibosi Aku, molingkudui pongkalibosi nu aha aiya hi beleng-Ku?" "Totu'u, Kita Tumpu," tinaaman i Petrus. "Nu sumbu' nu Kita Tumpu na aku mongkalibosi Kita Tumpu." I Yesus notatae hi ia, "Palakaiyakon na to ana-anak nu dombang-Ku." 16 Kopinduannyo i Yesus nompokilawa hi ia, "Simon anak i Yona, apaa beleyum mongkalibosi Aku?" "Totu'u, Kita Tumpu," tinaaman i Petrus. "Nu sumbu' nu Kita Tumpu na aku mongkalibosi Kita Tumpu." I Yesus notatae hi ia, "Palakaiyakon na to domba-dombang-Ku." 17 Kopintolunnyo i Yesus nompokilawa hi ia, "Simon anak i Yona, apaa beleyum mongkalibosi Aku?" I Petrus tinongkolibosonmo, kalana i Yesus nompokilawa hi ia sampe pinintolunmo. Sahingga i Petrus po'ule' nontaami, "Kita Tumpu, Kita Tumpu na monsumbu' iwi-iwi'. Nu sumbu' nu Kita Tumpu na aku mongkalibosi Kita Tumpu!" Lantas i Yesus notatae hi ia, "Palakaiyakon na domba-dombangku. 18 Totu'u hondo na potataeng-Ku aiya: Tempo'nyo beleyum daagi' olitau, posi beleyum na mombutu' kompongum, ka' mamba pa' moya na nu kahanda'i. Panyo de beleyum langkai'mo, beleyum montajuakonmo limaum, ka' mian sangga'at na mompungu beleyum, ka' momboa beleyum hi anu madi' nu ka'ima'i na kalambanan." 19 (Tiba potatae aijo' i Yesus nompoto'imo mosia na i Petrus silaka saidi' mae mompopodaka' Tumpu.) Lapas aijo' i Yesus notatae hi Petrus, "Batuki mae na Aku!" 20 Salatan i Petrus nosiloi, ia nontoa i hikunyo anu saja' mombatuki nunu kalibosi Yesus. (Iamo na anu sinumuhang oha-ohani Yesus tempo'nyo nongkaan, ka' anu nompokilawa hi Ia, "Ihe na saidi' mae monguwesani Tumpu?") 21 Nontoa ia, i Petrus nompokilawa hi Yesus, "Kita Tumpu, mosia na mian aiya?" 22 I Yesus nontaami, "Maluannyo Ku kahanda'i ia satumuu'nyo sampe Aku toka, aijo' misa' ponsumbu'anum. Panyo beleyum batuki mae na Aku!" 23 Sahingga tinogilele hi anu saja' mombatuki Yesus, au' aitu anu saja' mombatuk madi' silaka. Padahan i Yesus madi' nontaloakon anu saja' mombatuki aijo' madi' silaka. Ola ahi', "Maluannyo Ku kahanda'i ia satumuu'nyo sampe Aku toka, aijo' misa' ponsumbu'anum." 24 Anu saja' mombatuki aijo' na mombee'i katalangan apaa na anu tinimbalimo aiya. Iamo ahi' na nontulis. Ka' osumbu'to saba' apaa na anu tinaloakonnyomo aijo' totu'u. 25 Daagi' manjoo' na han sangga'at anu binau i Yesus. Maluannyo iwi-iwi' aijo' o tulis toto sa'angu', ku gantang madi' sampa' na tampat i dunia aiya anu moko ala mongisi kitab anu o tulis aijo'.