Usa la nga Tinubod para han sala

Namatay hi Cristo makausa ngan para han ngatanan tungod han mga sala ... usa nga maupay nga tawo para han mga makasasala. 1 Pedro 3:18
Sugad han paghigugma ni Cristo ha aton, ngan iginhatag an iya kinabuhi tungod ha aton, sugad hin mahamot nga halad nga nakakalipay han Dyos. Efeso 5:2
Nag-antos hi Cristo ngahaw tungod ha iyo ... Waray hiya makasala ngan waray gud hiya magbuwa. Han pagpakaraota ha iya waray hiya bumulos; han pag-antos niya waray hiya manarhog, kundi naglaom la hiya han Dyos, an matadong nga Maghurukom. Didto ha kros an aton mga sala gindara ni Cristo ha iya lawas, basi mamatay kita dida han sala ngan mabuhi kita nga matadong. Pinaagi han iya mga kasamdan nagkauupay kamo. Sugad kamo hin nagkawawara nga mga karnero; kundi yana iginbalik na kamo hin pagsunod han Magmarangno ngan Magbarantay han iyo mga kalag. 1 Pedro 2:21-25

Lisa la nga dalan

Nagsiring hi Jesus, "Amo ako an dalan, an kamatuoran, ngan an kinabuhi; waray makakadto han Amay kon diri pinaagi ha akon." Juan 14:6
Hiaagian an katalwasan pinaagi gud la ha iya. Kay ha bug-os nga kalibutan waray lain nga ngaran nga iginhatag han Dyos ha mga tawo, nga sadang makatalwas ha aton. Buhat 4:12
An ngatanan nga natoo ha iya pasasayloon han ira mga sala pinaagi han gahom han iya ngaran. Buhat 10:43
"Diri na gud ako manunomdom han ira mga sala ngan magraot nga mga binuhatan." Sanglit kon ginpasaylo na ini nga mga sala, diri na kinahanglan in halad pagkuha hin mga sala. Hebreo 10:17-18

Usa la nga Makakag-usa han Dyos ngan han tawo

Kay uusa la an Dyos, ngan uusa la an makakag-usa han Dyos ngan han mga tawo; amo ini hi Cristo Jesus nga nagtubyan han iya kalugaringon hin pagtubos han ngatanan nga mga tawo. 1 Timoteo 2:5-6
Hi Cristo amo an naghimo hin bag-o nga ginsaaran basi adton mga gintawag ... kumarawat han dayon nga mga kaupayan nga iginsaad han Dyos. Kundi kinmadto hiya ha langit, ug yana aadto hiya ha atubangan han Dyos tungod ha aton. Waray sumulod hi Cristo paghalad hin makadamo han iya kalugaringon, kay kon sugad, makakadamo daw hiya pag-aantos tikang han paghimoa han kalibutan. Lugod, yana nga hirani na matapos an panahon, nagpakita hiya makausa gudia ngan para han ngatanan pagkuha han sala pinaagi han paghalad han iya kalugaringon. Kinahanglan mamatay an tagsa-tagsa makausa, ngan katapos hini paghukman hiya han Dyos. Ha amo man nga kahimtang, iginhalad hi Cristo makausa pagkuha han mga sala han kadam-an. Magpapakita liwat hiya hin ikaduha diri na tungod han sala, kundi pagtalwas na hadton mga naghuhulat ha iya. Hebreo 9:15, 24-28
Nalinisan kita ngatanan han sala pinaagi han paghalad niya han iya kalugaringon nga lawas makausa ngan para han ngatanan. An kada padi nagtutuman han iya buruhaton kada adiaw, ngan naghahalad makadamo han amo la gihapon nga mga tinubod nga halad. Kundi ini nga mga tinubod nga halad diri makakakuha hin mga sala. Kundi naghalad hi Cristo hin usa la nga tinubod nga unong para han mga sala, usa nga maupay nga halad ha katayonan Katapos linmingkod hiya ha tuo han Dyos ... Pinaagi hin usa la nga paghalad hin unong ginhingpit niya ha kadayonan adton mga nalinisan han sala. Hebreo 10:10-12, 14

Hi Cristo an Hingpit nga Padi

Buhi hin kadayonan hi Jesus, ngan an iya buruhaton hin pagkapadi waray itubyan ha iba. Sanglit nakakahimo hiya, yana ngan ha gihapon, pagtalwas hadton nadangop han Dyos pinaagi ha iya, kay buhi hiya ha kadayonan hin pangamuyo sa Dyos tungod ha ira. Hi Jesus an Labaw nga Padi nga nakakatuman han aton mga kinahanglan. Baraan hiya, waray sayop o sala dida ha iya; ilinain hiya tikang han mga makasasala ngan ginbayaw labaw pa han kalangitan. Lain hiya han iba nga Labaw nga kapadian; diri kinahanglan maghalad hiya adiaw-adlaw, syahan, para han iya mga sala, ngan kahuman para han mga sala han mga tawo. Naghalad hiya hin usa nga halad, makausa la ngan para han ngatanan, han paghalad niya han iya kalugaringon. Hebreo 7:24-27
Amo ini an amon karuyag sidngon: may-ada kita sugad hini nga Labaw nga Padi nga nalingkod ha tuo han trono han Dyos didto ha langit. Hebreo 8:1
Sanglit kapti naton hin maupay an aton pagtoo, kay hi Jesus nga Anak han Dyos, an aton gilalabawi nga padi, aadto na ha atubangan han Dyos. Napaid han aton kamaluya ini nga aton gilalabawi nga padi, kay ginsulay liwat hiya ha ngatanan nga paagi, sugad ha aton, kundi waray hiya makasala. Sanglit pagmadasigon ngan dangop kita han trono han Dyos, diin aadto an grasya basi karawaton naton an kaluoy ngan hiagian naton an grasya nga makakabulig ha panahon han aton pagkinahanglan. Hebreo 4:14-16
Sanglit yana diri na paghuhukman ha karat-an adton mga nahiusa na kan Cristo Jesus. Roma 8:1
Ano pa man an aton masisiring mahitungod hini ngatanan? Kon naugop ha aton an Dyos, hin-o pa man in matipa ha aton? Waray ngani niya pugngi an iya kalugaringon nga Anak, kundi iginhalad hiya niya para ha aton ngatanan! Iginhatag ngani niya ha aton an iya Anak — diri ba niya liwat ihahatag ha aton an ngatanan nga mga butang? Hin-o man in masumbong kontra han pinili nga mga tawo han Dyos? An Dyos ngahaw an naghukom nga diri hira salaan! Hin-o man ngay-an an maghuhukom ha ira ha karat-an? Roma 8:31-34