/1 Lohon surate ini kai maanung Hengetang makagelliu pebawiahe, ku kai Hengetang naung seng tebe ene rokeng bou tetae; Sembeng kinaringihi kami ringangu sembeng kinasilom matang kami hala; I kami e seng nakasahidi, ringangu sem bou nikahegong limang kami. Pia pebawiahe e niapakalahe, ute i kami mamben nakasilo; Hakiu ene i kami makasahiding ene; I kami e mehabare si kamene habaru pebawiahe tutune ringangu kakale, ku pebawiahe e kai naung dingangi Amang, ku sembem bou nipakalahe si kami. Apang ku seng kinasilong kami ringangu kinaringihi kami e, ene malaing ilehabari kami e si kamene, tadeau i kamene ringangi kami e makahengang mangalen mebiahe masembau dingang'i Amang dingangu Ahus'E i Yesus Kristus. I kami e namohe u ini e medeau i kite e kahenga-hengang masuku u raluase. Kai ini e habare kinaringihi kami wou Ahus'E ringangu ilehabari kami e si kamene: Duata e kai tualage, ku mang tawe marendunge sarang kadidi-didi si Sie. Kereu i kite meberau i kite mebiahe masembau dingange, kuteu i kite kawe mebiahe suralungu kararendunge ute i kite e kawe mekekonti su wawera ore lai su kakanoa. Arawe kereu i kite mebebiahe suralungu tualage kereewe Mawu Ruata e kawe suralungu tualage, ute i kite e mebebiahebe makakauhe maghaghighile sembau su waline mase rahan Yesus Ahuse e namuresiwe si kite bou rosa e. Mageng i kite meberau i kite tawe dosang kite e, ute i kite kai mangakale batangeng i kite; Ku Mawu e tawe die suralungu naungi kite. Arawe kereu i kite mengakuwen dosang kite su tengon Duata e, ute i Sie sarung mapakasehu u kedon'E ringangu mekoabe apang ku adile; I Sie sarungbe mengampung dosang kite dingangu mamuresi si kite bou patiku kakanoa i kite nesala. Kamageng i kite meberau i kite tawe nempedosa, ute i kite kai tabidau manompolu Mawu e kai makonti ringangu i kite e tawe mendareso u hengetangu Mawu e suralungu naung i kite.

/2 Manga anaku ikekendage! Ia e namohe u ini si kamene, tadeau i kamene kumbahangbe mempedosa; Arawe kamageng pia u mempedosa e, ute i kite kai pia tumatatawange sengkatau, i Sie kai i Yesus Kristus ku adile e, i Sie sarung mekaliomaneng baugi kite su tengon Amang.