1:1 Lvq penembvqne sendvqman dunie tecipteang, Manik nike sampun araq. Manik nike araq bareng Allah, dait Manik nike Allah. 2 Lvman penembvqne Ie araq bareng Allah. 3 Selapuqne tejariang siq Ie, dait lvman selapuq saq araq, ndvq araq sopoq juaq saq tejariang, lamun nvnten siq Ie. 4 Lvq dalem-Ne araq idup, dait idup nike terang manusie. 5 Terang nike besinar lvq tengaq peteng, dait peteng nike ndvq bau nguasein terang nike. 6 Rauh dengan saq teutus siq Allah, aranne Yahya. 7 Ie rauh jari saksi mengenai terang nike, advq langan ie selapuq dengan jari percaye. 8 Ie ndvqne terang nike, laguq ie harus besaksi mengenai terang nike. 9 Terang saq sejati, saq menahin selapuq manusie, kenyeke rauh ojok dunie. 10 Ie araq lvq dunie, malahan dunie tecipteang siq Ie, laguq dunie ndvq kenal kance Ie. 11 Ie rauh ojok dowv-Ne mvsaq laguq ie pade ndvq nerimaq Ie. 12 Laguq tipaq dengan-dengan saq nerimaq Ie, Ie icanin dengan-dengan nike kuase jari bije-bije dowvn Allah, ie pade saq percaye lvq pesvngan-Ne. 13 Ie pade tebijeang ndvqne lvman daraq atao kemvlvq manusie, ndvq vndah lvman kemvlvq dengan mame, laguq lvman Allah. 14 Manik nike sampun jari manusie, beterus Ie araq lvq antare ite, dait ite sampun serioq kemuliean-Ne, kemuliean saq teicanin tipaq Ie sebagv Bije Nunggal saq asalne lvman Bapa, penoq rahmat dait kebenaran. 15 Yahya rauh jari saksi-Ne, ie beriteang: "Niki Ie saq tiang maksut: Ie saq rauh mudian lvman tiang belvqan lvman tiang, svngaq Ie sampun araq sendvqman tiang araq." 16 Svngaq lvman kesempurnean-Ne, ite selapuq sampun nerimaq rahmat demi rahmat. 17 Hukum Taurat ite terimaq lvman Musa. Laguq rahmat dait kebenaran rauh langan Deside Isa Almasih. 18 Ndvq araq saq sampun serioq Allah, laguq Bije Nunggal saq asalne lvman Bapa, saq araq lvq iwean Bapa. Ie saq nyatayang Bapa tipaq ite. 19 Niki kesaksian Yahya sewaktu pare penguase Yahudi lvq Yerusalem suruq imam-imam dait dengan-dengan Lewi lumbar beketuan ojok Yahya, "Sai pelungguh niki?" 20 Yahya ngaku secare terus-terang, "Tiang niki nvnten Almasih." 21 "Lamun maraq nike, pelungguh sai?" Ie pade beketuan. "Napi pelungguh Elia?" "Nvnten," jawab Yahya. "Napi pelungguh nabi saq gen rauh?" "Nvnten," jawab Yahya. 22 Ie pade bebase, "Lamun maraq nike, silaq badaq tiang pade sai pelungguh niki?" Advq tiang pade bau nyampvang jawaban tipaq dengan-dengan saq ngutus tiang pade. Menurut pelungguh sai setetune pelungguh niki?" 23 Jawab Yahya, "Tiang niki dengan saq bekuih-kuih lvq padang gurun, 'Rateang langan Tuhan.' Maraq saq sampun tesampvang siq Nabi Yesaya." 24 Lvq antare dengan-dengan saq teutus araq dengan Parisi, 25 ie pade beketuan, "Lamun pelungguh nvnten Almasih, nvnten Elia, nvnten vndah nabi saq gen rauh, kembvq pelungguh baptis dengan?" 26 Jawab Yahya, "Tiang baptis dengan kadu aiq. Laguq lvq tengaq-tengaq side pade araq Dengan saq nvnten side pade kenal. 27 Ie rauh mudian lvman tiang, laguq jari lekaq tali sepatu-Ne doang tiang ndvq patut." 28 Selapuqne nike telaksane lvq Betania, lvq itoqan Kokoq Yordan taoq Yahya baptis dengan. 29 Lvq jelo jemaqne, Yahya serioq Deside Isa rauh tipaq ie. Terus Yahya bebase, "Pade serioq Anak Dombe Allah saq ngapus dose dunie. 30 Ie saq tiang maksut sewaktu tiang nyampvang: Mudian lvman tiang gen rauh sopoq dengan saq belvqan lvman tiang, svngaq Ie sampun araq sendvqman tiang. 31 Sendvqmanne, tiang ndvq nenaoq sai Ie nike. Laguq jari hal nike tiang dateng dait baptis dengan kadu aiq, advq Ie tenyatayang tipaq bangse Israel." 32 Yahya vndah ngebvng kesaksian niki, "Tiang serioq Roh Allah turun lvman langit maraq ruen kedit dare, beterus meneng lvq atas-Ne. 33 Lvq waktu nike tiang ndvqman nenaoq sai Ie. Laguq Allah saq manikang tiang baptis dengan kadu aiq sampun bemanik lvq tiang, 'Lamun side serioq Roh Allah turun, beterus meneng lvq atas sopoq dengan, Ie saq gen baptis dengan kadu Roh Suci.' 34 Tiang sampun serioq mvsaq," basen Yahya, "dait tiang ngebvng kesaksian bahwe Ie Bije saq asalne lvman Allah." 35 Lvq jelo jemaqne Yahya araq lvq taoq nike malik kance due pengiringne. 36 Sewaktu ie serioq Deside Isa bemargi, ie bebase, "Silaq pade serioq! Nike Anak Dombe Allah." 37 Kedue pengiring nike dengah basen Yahya, beterus lumbar ngiring Deside Isa. 38 Deside Isa ngvngat andang mudi, dait cingakin ie pade kenyeke turut Ie. Deside Isa beketuan, "Napi saq side pade boyaq?" Jawab ie pade, "Rabi (artine: Guru), lvq mbv Pelungguh meneng?" 39 "Silaq serioq mvsaq," manik Deside Isa. Ie pade lumbar kance Deside Isa dait serioq lvq mbv gedvng-Ne. Waktu nike jam empat kebian. Jelo nike ie pade ndot ngiring Deside Isa. 40 Salaq sopoq lvman kedue dengan saq sampun dengahang napi saq tesampvang Yahya, beterus lumbar ngiring Deside Isa, aranne Andreas, semetonne Simon Petrus. 41 Becat-becat Andreas boyaq Simon, semetonne, dait bebase lvq ie, "Tiang pade sampun bedait kance Mesias!" (Mesias pade artine kance Almasih.) 42 Andreas ngatong Simon ojok Deside Isa. Deside Isa merhatiang Simon, terus bemanik, "Side Simon, bije Yahya. Side gen tearanin Kepas (artine: Petrus)." 43 Lvq jelo jemaqne Deside Isa mutusang gen lumbar ojok Galilea. Ie bedait kance Pilipus, dait bemanik lvq ie, "Silaq turut Tiang!" 44 Pilipus asalne lvman Betsaida, taoqne ndot Andreas dait Petrus. 45 Pilipus bedait kance Natanael dait bebase lvq ie, "Tiang pade sampun ndait Dengan saq tesebut siq Musa lvq dalem Kitab Suci Taurat, dait saq teberiteang siq nabi-nabi. Ie Deside Isa bije Yusup lvman Nazaret." 46 Laguq jawab Natanael, "Segerah iniq hal saq solah dateng lvman Nazaret?" "Silaq serioq mvsaq!" basen Pilipus. 47 Deside Isa cingakin Natanael dateng, terus bemanik mengenai ie, "Serioq niki dengan Israel sejati. Ndvq araq saq palsu lvq ie." 48 Natanael metakvn lvq Deside Isa, "Berembv Pelungguh iniq wikanang tiang?" Jawab Deside Isa, "Sendvqman Pilipus ngempoh side, Tiang sampun serioq side lvq bawaq lolo are nike." 49 "Bapaq Guru," basen Natanael, "Pelungguh tetu-tetu Bije saq asalne lvman Allah! Pelungguh Raje dengan Israel!" 50 Deside Isa bemanik, "Side percaye, cume lantaran Tiang badaq bahwe Tiang sampun serioq side lvq bawaq lolo are nike? Hal-hal saq jaoq belvqan lvman nike gen side serioq!" 51 Deside Isa bemanik vndah, "Tiang badaq side, side gen serioq langit kebukaq, dait malavkat-malavkat Allah turun-tavk ojok Bije Manusie."

2:1 Due jelo sesampun nike araq gawv ngawinang lvq kote Kana, lvq Galilea, dait mamiq bini Deside Isa araq lvq derike. 2 Deside Isa kance pengiring-pengiring-Ne tepesilaq vndah lvq gawv ngawinang nike. 3 Sewaktu ie pade kurangan aiq anggur, mamiq bini-Ne bebase lvq Deside Isa, "Aiq anggur ie pade sampun bis." 4 Jawab Deside Isa, "Inaq napi saq side kayunang lvq Tiang? Ndvqman waktune Tiang nyatayang diriq." 5 Laguq mamiq bini Deside Isa bebase lvq pelayan-pelayan, "Laksaneang napi saq Ie manikang lvq side." 6 Lvq derike araq enem gentong saq tesadangang jari bisoq nav menurut adat Yahudi. Gentong nike sopoq-sopoq isine kire-kire satus liter. 7 Manik Deside Isa lvq pelayan-pelayan nike, "Isiqang gentong-gentong nike." Ie pade isiq gentong-gentong nike jangke penoq. 8 Beterus Deside Isa bemanik lvq ie pade, "Mangkin bait aiq nike sekediq dait atong ojok ketue saq ngatur gawv." Ie pade jauq aiq nike ojok ketue. 9 Terus ketue nike rasaq aiq saq sampun jari anggur nike. (Ie ndvq nenaoq lvman mbv anggur nike, cume pelayan-pelayan saq ngisiq aiq doang saq nenaoq.) Beterus ketue nike ngerapetin pengantvn mame, 10 terus bebase lvq ie, "Biasene dengan nyugulang anggur saq paling maiq juluan dait lamun selapuq temuv sampun puas nginem baruq anggur saq biase. Laguq side nyimpen anggur saq paling solah jangke mangkin!" 11 Nike keajaipan penembvq saq tepiaq siq Deside Isa. Ie ngelaksaneang nike lvq Kana lvq Galilea. Siq tande nike Ie nyatayang kemuliean-Ne. Make pengiring-pengiring-Ne percaye lvq Ie. 12 Sesampun nike Deside Isa lumbar ojok Kapernaum bareng-bareng kance mamiq bini-Ne, sanak-sanak-Ne dait pengiring-pengiring-Ne. Ie pade mererepan lvq derike pire jelo ngonvqne. 13 Sewaktu sampun rapet Hari Raye Paskah Yahudi, Deside Isa lumbar ojok Yerusalem. 14 Lvq Gedvng Allah lvq Yerusalem, dait-Ne dengan-dengan saq jual sampi, dombe, kedit dare; dait vndah tukang tukah kvpvng tokol lvq derike. 15 Deside Isa piaq pecut lvman tali, beterus siuh-Ne selapuq sampi dait dombe nike lvman dalem Gedvng Allah. Balik-belah-Ne mvje-mvje saq tekadu taoq nukahang kvpvng jangke selapuq kvpvng ie pade begelanyatan. 16 Beterus Deside Isa bemanik lvq dagang kedit dare nike, "Jauq selapuqne niki. Ndaq jariang Gedvng Bapa Tiang taoq bedagang!" 17 Beterus pengiring-pengiring-Ne inget bahwe araq tetulis, "Rase kasih Tiang lvq Gedvng Deside, nguasein atvn Tiang." 18 Pare penguase Yahudi nantang Deside Isa, basen ie pade, "Silaq miaq keajaipan jari tande lvq tiang pade bahwe Pelungguh berhak ngelaksaneang maraq niki." 19 Jawab Deside Isa, "Runtuhang Gedvng Allah niki, dait dalem telu jelo Tiang bau penganjeng malik." 20 Terus ie pade bebase, "Teperluang waktu petang dase enem taun jari penganjeng Gedvng Allah niki, laguq Pelungguh gen penganjeng malik dalem telu jelo?" 21 Laguq Gedvng Allah saq temaksut siq Deside Isa nike, rage-Ne mvsaq. 22 Beterus sesampun Deside Isa idup lvman ninggal, pengiring-pengiring-Ne inget bahwe hal nike sampun Ie manikang. Make ie pade percaye napi saq tetulis lvq Kitab Suci dait napi saq temanikang siq Deside Isa. 23 Deside Isa araq lvq Yerusalem sengonvq Perayaan Paskah, luwvq dengan percaye lvq Ie lantaran keajaipan-keajaipan saq Ie piaq. 24 Laguq Deside Isa mvsaq nvnten percayeang diriq-Ne lvq ie pade, svngaq Ie kenal selapuq dengan. 25 Ndvq perlu dengan ngebvng kesaksian tipaq Ie mengenai sai juaq, svngaq Ie mvsaq wikan napi saq araq lvq dalem angen manusie.

3:1 Araq sopoq ahli Taurat lvman golongan dengan Parisi aranne Nikodemus. 2 Lvq sopoq kelem ie parek ojok Deside Isa, dait matur, "Bapaq Guru, tiang pade nenaoq Pelungguh teutus siq Allah. Svngaq nvnten araq sopoq dengan juaq saq bau miaq keajaipan maraq Pelungguh, lamun Allah nvnten bareng ie." 3 Jawab Deside Isa, "Tiang badaq side: Setetune ndvq araq sopoq manusie saq bau serioq Kerajaan Allah lamun ie ndvq tebijeang malik." 4 Jawab Nikodemus tipaq Deside Isa, "Segerah dengan saq sampun toaq tebijeang malik? Napi ie iniq tame malik lvq dalem tian inaqne beterus tebijeang malik?" 5 Jawab Deside Isa, "Tiang badaq side, setetune lamun dengan ndvq tebijeang lvman aiq dait lvman Roh Allah, dengan nike ndvq gen bau tame Kerajaan Allah. 6 Manusie secare jasmani tebijeang siq dengan toaqne, laguq secare rohani tebijeang lvman Roh Allah. 7 Ndaq bengaq lantaran Tiang badaq side: Side selapuq harus tebijeang malik. 8 Angin lalo ojok mbv ie mvlv; ite dengah suarene, laguq ndvq nenaoq lvman mbv datengne dait ojok mbv aningne. Maraq nike vndah dengan saq tebijeang lvman Roh Allah." 9 Nikodemus metakvn, "Berembv nike iniq telaksane?" 10 Jawab Deside Isa, "Side guru lvq Israel; segerah side ndvq nenaoq hal-hal nike? 11 Tiang badaq side: Setetune tiang pade nyampvang mengenai napi saq tiang pade taoq, dait tiang pade ngebvng kesaksian mengenai napi saq sampun tiang pade serioq; laguq side pade ndvq mvlv nerimaq kesaksian tiang pade. 12 Side pade ndvq percaye lamun Tiang nyeriteang side mengenai hal-hal lvman dunie niki; berembv side pade bau percaye, lamun Tiang nyeriteang side hal-hal mengenai sorge? 13 Ndvq araq sopoq dengan juaq saq sampun tavk ojok sorge, kecuali Ie saq turun ojok dunie, nike Bije Manusie. 14 Pade maraq Musa saq tavkang ulah tembage lvq sopoq kayuq lvq padang gurun, maraq nike vndah Bije Manusie harus tetavkang, 15 advq selapuq dengan saq percaye lvq Ie mauq idup sejati dait kekel. 16 Svngaq belvq gati kasih Allah tipaq manusie lvq dunie niki, jangke Ie ngicanin Bije-Ne saq nunggal, advq sebilang dengan saq percaye lvq Ie ndvqne binase, laguq mauq idup sejati dait kekel. 17 Svngaq Allah ngutus Bije-Ne nvnten jari hakimin dunie niki, laguq advq langan Ie, dunie niki teselametang. 18 Dengan saq percaye lvq Ie ndvq gen tehukum. Laguq dengan saq ndvq percaye sampun tehukum siq Allah, svngaq ie ndvq percaye lvq dalem pesvngan Bije Nunggal saq asalne lvman Allah. 19 Hukuman nike: Cahaye nike sampun rauh ojok dunie, laguq manusie demenan peteng ketimbang menah, svngaq perbuatan-perbuatan ie pade jahat. 20 Sebilang dengan saq gawvq jahat, meriq lvq cahaye; ie ndvq mvlv dateng lvq cahaye nike, advq perbuatanne saq jahat ndvq penggitan. 21 Laguq dengan saq ngelaksaneang napi saq kenaq, dateng tipaq cahaye nike advqne jari nyate bahwe napi saq ie laksaneang sesuai pekayunan Allah." 22 Sesampun nike Deside Isa dait pengiring-pengiring-Ne lumbar ojok Yudea. Lvq derike Ie mererepan pire jelo ngonvqne teiring siq ie pade sambil baptis dengan saq betobat. 23 Waktu nike Yahya ndvqman tame bui. Ie baptis dengan lvq Ainon, ndvqne jaoq lvman Salim, svngaq lvq derike luwvq aiq. Dengan-dengan pade dateng ojok derike terus Yahya, baptis dengan-dengan nike. 25 Terus pengiring-pengiring Yahya mulai pade betungkasan kance dengan Yahudi mengenai aturan penyucian. 26 Ie pade lumbar ojok Yahya, dait bebase, "Paq Guru, napi pelungguh masih iling lvq dengan saq bareng kance pelungguh lvq itoqan Kokoq Yordan nike saq piranan sampun pelungguh ceriteang tiang pade? Ie vndah baptis dengan, dait selapuq dengan lumbar ojok Ie!" 27 Jawab Yahya, "Ndvq araq sopoq dengan juaq saq bau nerimaq napi-napi lamun ie nvnten teicanin siq Allah. 28 Side pade sampun dengah raos tiang, 'Tiang ndvqne Mesias saq tesebut vndah Almasih. Tiang teutus senjuluq Ie.' 29 Pengantvn nine nike vpvne pengantvn mame. Sahabat pengantvn mame nike cume nganjeng lvq dvkvtne dait dengahang, dait ie besukecite lamun dengah suare pengantvn mame. Maraq nike vndah tiang. Mangkin tiang seneng gati. 30 Ie harus sayan belvq, laguq tiang harus sayan kodvq." 31 Sai saq rauh lvman atas ngelebihin selapuqne; sai saq asalne lvman dunie, ie manusie warge dunie dait ngeraos mengenai hal-hal lvq dunie. Sai saq rauh lvman sorge ngelebihin selapuqne. 32 Ie bebaos mengenai napi saq sampun Ie cingakin dait Ie pirengang, laguq ndvq araq sopoq dengan juaq saq percaye lvq kesaksian-Ne. 33 Dengan saq percaye lvq kesaksian-Ne nike, ngakuq bahwe Allah kenaq. 34 Svngaq dengan saq teutus siq Allah nyampvang Manik Allah, svngaq nvnten araq tutuqne Allah ngicanin Roh-Ne. 35 Bapa ngasihin Bije, dait sampun nyerahang selapuq kuase lvq Ie. 36 Dengan saq percaye lvq Bije nike gen mauq idup sejati dait kekel. Laguq dengan saq ndvq taat lvq Bije nike ndvqne mauq idup. Ie tehukum siq Allah selavq-lavqne.

4:1 Sewaktu Deside Isa wikan bahwe dengan-dengan Parisi sampun dengah, bahwe Ie luwvqan mauq pengiring dait baptis pengiring ketimbang Yahya, ( 2 timaq Deside Isa mvsaq nvnten baptis dengan, laguq pengiring-pengiring-Ne doang,) 3 Ie lumbar lvman Yudea tulak malik ojok Galilea. 4 Lvq dalem pemargian-Ne nike, Ie harus liwatin davrah Samaria. 5 Beterus Deside Isa rauh lvq sopoq kote lvq Samaria aranne Sikar, ndvqne jaoq lvman tanaq saq lavq Yakub icanin tipaq Yusup, bijene. 6 Lvq derike araq lingkoq Yakub. Deside Isa lelah gati lantaran pemargian nike, keranaq nike Ie melinggih lvq sedin lingkoq. Waktu nike kire-kire jam due olas tengari. 7 Waktu nike pengiring-pengiring Deside Isa sampun lumbar ojok kote beli keloran. Beterus araq dengan nine Samaria dateng nimbaq aiq. Deside Isa bemanik lvq ie, "Inaq, bau Tiang tunas aiq inem." 9 Jawab dengan nine Samaria nike, "Bapaq dengan Yahudi, tiang dengan Samaria; kembvq Pelungguh tunas nginem lvq tiang?" (Svngaq dengan-dengan Yahudi ndvq araq hubungan kance dengan Samaria.) 10 Jawab Deside Isa, "Lamun side nenaoq paice Allah dait sai saq tunas aiq inem lvq side, pasti side mvsaq gen tunas aiq inem lvq Ie, dait Ie gen bvng side aiq idup." 11 Basen dengan nine nike, "Pelungguh nvnten bedowv timbaq, dait lingkoq niki dalem gati. Lvman mbv Pelungguh mauq aiq idup nike? 12 Yakub, bapaq leluhur tiang pade, ngicanin tiang pade lingkoq niki. Dait ie mvsaq bait aiq inemne lvman deriki; maraq nike vndah bije-bijene lantong selapuq binatang saq ie anyam. Napi Pelungguh paran Pelungguh belvqan kance Yakub?" 13 Deside Isa bemanik, "Dengan saq nginem aiq niki gen bedak malik, 14 laguq dengan saq nginem aiq saq gen Tiang bvng, ndvqne gen bedak malik selavq-lavqne. Svngaq aiq saq gen Tiang bvng nike gen jari pengembulan aiq lvq dalem diriqne saq gen terus ngvlvk jangke dateng idup sejati dait kekel." 15 Basen dengan nine nike, "Bapaq, icanin tiang aiq nike, advq tiang ndvq bedak malik; dait ndvq perlu tulak ojok deriki bait aiq." 16 "Silaq lumbar, empoh semamende, terus tulak malik ojok deriki," manik Deside Isa. 17 "Tiang ndvq bedowv semame," basen dengan nine nike. "Mule kenaq basende," manik Deside Isa. 18 "Svngaq side sampun merariq lime kali, dait dengan mame saq idup bareng side mangkin ndvqne semamende." 19 "Taoq tiang mangkin bahwe Pelungguh niki nabi," basen dengan nine nike. 20 "Leluhur tiang pade nyembah Allah lvq atas gunung niki, laguq bangse Pelungguh bebase bahwe cume lvq Yerusalem doang taoq dengan nyembah Allah." 21 "Pade percaye," manik Deside Isa lvq ie, "sopoq waktu dengan gen nyembah Bapa, ndvqne lvq gunung niki malik, dait ndvqne vndah lvq Yerusalem. 22 Side pade dengan Samaria nyembah saq ndvq side pade kenal, laguq tiang pade dengan Yahudi nyembah Ie saq tiang pade kenal, svngaq keselametan dateng lvman dengan Yahudi. 23 Laguq gen dateng waktune dait mangkin sampun dateng, bahwe penyembah-penyembah saq kenaq gen nyembah Bapa lvq dalem roh dait kebenaran; svngaq Bapa kayunang penyembah-penyembah maraq nike. 24 Allah nike Roh dait sai-sai nyembah Ie, harus nyembah Ie lvq dalem roh dait kebenaran." 25 Dengan nine nike matur lvq Deside Isa, "Tiang nenaoq bahwe Mesias (saq tesebut Almasih) gen rauh. Lamun Ie rauh, Ie gen nyampvang selapuq hal tipaq ite." 26 Manik Deside Isa lvq ie, "Tiang niki Ie, saq mangkin kenyeke ngeraos kance side." 27 Lvq waktu nike pengiring-pengiring Deside Isa tulak. Ie pade bengaq serioq Deside Isa bebaos kance dengan nine nike. Laguq ndvq araq sopoq dengan juaq lvman ie pade saq beketuan lvq dengan nine nike, "Napi kemvlvqde?" atao saq metakvn lvq Deside Isa, "Kembvq Pelungguh bebaos kance dengan nine nike?" 28 Dengan nine nike bilin pendaiqne terus pelai ojok kote dait badaq dengan-dengan lvq derike, 29 "Silaq pade serioq, lvq derike araq sopoq dengan saq badaq tiang selapuq hal saq sampun tiang piaq. Sang Ie Almasih?" 30 Beterus dengan-dengan nike vndah bilin kote dait lumbar ojok Deside Isa. 31 Lvq waktu nike pengiring-pengiring-Ne pesilaq Deside Isa medaran. Ie pade matur, "Bapaq Guru, silaq medaran." 32 Laguq jawab Deside Isa, "Lvq Tiang araq keloran saq side pade ndvq taoq." 33 Beterus pengiring-pengiring-Ne mulai saling ketuan, "Napi araq dengan atongang Ie keloran?" 34 Beterus Deside Isa bemanik, "Keloran Tiang nike, ngelaksaneang pekayunan Ie saq ngutus Tiang, dait nutuqang karye saq teserahang ojok Tiang. 35 Basen side pade, 'Karing empat bulan musim mataq.' Laguq Tiang badaq side: Silaq serioq lendang-lendang saq sampun kuning, siep tepataq! 36 Dengan saq mataq sampun mulai nerimaq upaqne dait ngumpulang hasil jari idup sejati dait kekel. Jari, dengan saq nalet dait dengan saq mataq kanggo bareng beseneng-seneng. 37 Sesenggak niki kenaq vndah, 'Saq sopoq nalet, saq lain mataq.' 38 Tiang suruq side pade lumbar mataq lvq taoq saq side pade ndvq uwah betaletan; dengan lain sampun begawvan lvq derike, dait side pade nerimaq bati lvman pegawvan ie pade." 39 Luwvq dengan Samaria lvq kote nike percaye lvq Deside Isa, lantaran raos dengan nine nike, "Ie badaq tiang selapuq hal saq sampun tiang piaq." 40 Sewaktu dengan-dengan Samaria bedait kance Deside Isa, sanget siq ie pade tunas advq Deside Isa meneng kance ie pade. Jari Deside Isa meneng lvq derike due jelo ngonvqne. 41 Beterus sayan luwvq malik dengan saq percaye lvq Deside Isa lantaran ie pade dengah mvsaq pengajahan-Ne. 42 Ie pade bebase lvq dengan nine nike, "Tiang pade percaye mangkin, ndvqne lantaran napi saq side ucapang lvq tiang pade, laguq lantaran tiang pade sampun dengah mvsaq dait nenaoq bahwe Ie mule tetu Juruselamet dunie." 43 Sesampun due jelo lvq Sikar, Deside Isa lumbar ojok Galilea. 44 Deside Isa mvsaq sampun bemanik, "Sopoq nabi ndvq tehormatin lvq negerine mvsaq." 45 Laguq sewaktu Ie rauh lvq Galilea, dengan-dengan lvq derike seneng nyambut Ie, svngaq ie pade araq lvq Yerusalem sewaktu Hari Raye Paskah, dait sampun serioq selapuq saq telaksaneang siq Deside Isa. 46 Beterus Deside Isa tulak ojok Kana lvq Galilea, lvq taoq nike Ie sampun miaq aiq jari anggur. Lvq kote nike araq sopoq pegawv istane, bijene kenyeke sakit lvq Kapernaum. 47 Sewaktu ie dengah bahwe Deside Isa sampun rauh lvq Galilea lvman Yudea, ie lumbar ojok Deside Isa dait tunas advq Deside Isa rauh ojok Kapernaum jari nyelahang bijene saq gen milinang. 48 Manik Deside Isa lvq pegawv istane nike, "Lamun side pade ndvq serioq keajaipan-keajaipan, side pade ndvq percaye." 49 "Junjungan Saq Mulie," jawab pegawv istane nike, "tunas gelisan rauh sendvqman anak tiang milinang." 50 Manik Deside Isa lvq ie, "Silaq lumbar, bijende selah!" Dengan nike percaye lvq manik Deside Isa, terus ie lumbar. 51 Lvq tengaq langan, pelayan-pelayanne dateng tipaq ie jauq kabar, "Bije pelungguh sampun selah." 52 Beterus ie beketuan lvq ie pade, "Jam pire kanak nike mulai selah?" Jawab ie pade, "Rubin, kire-kire jam sekvq tengari panasne telang." 53 Beterus bapaq kanak nike inget bahwe lvq waktu nike Deside Isa bemanik lvq ie, "Anakde selah." Terus ie dait selapuq keluargene percaye lvq Deside Isa. 54 Nike keajaipan saq kedue saq tepiaq siq Deside Isa lvq Galilea sesampun Ie rauh lvman Yudea.

5:1 Sesampun nike araq perayaan Yahudi, make Deside Isa lumbar ojok Yerusalem. 2 Lvq Yerusalem dvkvt Jebak Dombe araq sopoq telage, dalem base Ibrani tearanin Betesda. Lvq derike araq lime sesangkok. 3 Lvq sesangkok-sesangkok nike luwvq dengan sakit tetindoqang, araq saq bute, araq saq dvmpang, dait araq vndah saq kvpaq. [Ie pade selapuq ngantih aiq telage nike beumbak-umbak. 4 Svngaq sewaktu-waktu malavkat Tuhan turun ojok telage nike terus miaq aiqne jari beumbak-umbak. Dengan sakit saq penembvq tame lvq dalem telage nike sewaktu aiqne beumbak-umbak, gen selah, napi juaq penyakitne.] 5 Lvq taoq nike araq sopoq dengan mame saq sampun telung dase baluq taun ngonvqne sakit. 6 Deside Isa cingakin ie tindoq lvq derike, dait wikanang-Ne bahwe ie ngonvq gati sakit; make Deside Isa bemanik lvq ie, "Mvlv side teselahang?" 7 Dengan sakit nike bejawab, "Guru, nvnten araq dengan saq tamaq tiang ojok dalem telage sewaktu aiqne beumbak-umbak. Baruq tiang mvlv tame, sampun araq dengan lain saq juluan tame." 8 Beterus Deside Isa lvq ie, "Silaq ures, angkat tipahde, terus lampaq." 9 Lvq waktu nike vndah ie langsung selah. Ie ngangkat tipahne terus lampaq. Hal nike telaksane lvq jelo Sabat. 10 Keranaq nike penguase-penguase Yahudi bebase lvq dengan saq baruq teselahang nike, "Jelo niki jelo Sabat. Ndvq kanggo side ngangkat tipahde." 11 Laguq jawab dengan nike, "Dengan saq nyelahang tiang, Ie saq suruq tiang ngangkat tipah tiang terus lampaq." 12 Ie pade beketuan, "Sai dengan nike saq suruq side ngangkat tipahde terus lampaq?" 13 Laguq dengan saq sampun selah nike ndvq nenaoq sai dengan nike, svngaq Deside Isa sampun telang lvq tengaq dengan luwvq nike. 14 Beterus Deside Isa bedait kance dengan nike lvq dalem Gedvng Allah, dait bemanik lvq ie, "Mangkin side sampun selah, ndaq gawvq dose malik, advq side ndvq ndait saq lengvan malik." 15 Beterus dengan nike lumbar, dait nyampvang ojok pare penguase Yahudi bahwe Deside Isa saq nyelahang ie. 16 Dait nike lantaranne, ie pade mulai berusahe nganiaye Deside Isa svngaq Ie nyelahang dengan lvq jelo Sabat. 17 Laguq Deside Isa bemanik lvq ie pade, "Bapa Tiang terus bekarye jangke mangkin, maraq nike vndah Tiang terus bekarye." 18 Nike penguase-penguase Yahudi jari sayan berusahe gen nyematvq Ie. Ie pade piaq maraq nike, ndvqne cume lantaran Deside Isa ngelanggar aturan agame mengenai jelo Sabat, laguq vndah lantaran Ie badaqang bahwe Allah nike Bapa-Ne; artine Ie padeang diriq-Ne kance Allah. 19 Deside Isa jawab ie pade maraq niki, "Tiang badaq side, setetune Bije ndvqne tao ngelaksaneang napi-napi lvman diriq-Ne mvsaq. Ie cume ngelaksaneang napi saq Ie cingakin telaksaneang siq Bapa-Ne. Svngaq napi saq telaksaneang siq Bapa, nike vndah saq telaksaneang siq Bije. 20 Svngaq Bapa ngasihin Bije-Ne dait nyatayang tipaq Bije nike selapuq saq Ie laksaneang mvsaq. Malahan Bapa gen nyatayang tipaq Bije nike karye-karye saq belvqan malik, jangke side pade jari bengaq. 21 Bapa nike nguresang dengan ninggal, dait ngidupang ie pade, maraq nike vndah Bije ngidupang sai saq Ie kayunang. 22 Bapa mvsaq nvnten hakimin sai juaq. Selapuq kekuasean jari hakimin sai juaq sampun teserahang tipaq Bije. 23 Bapa ngelaksaneang hal nike advq selapuq dengan hormatin Bije maraq ie pade hormatin Bapa. Dengan saq ndvq hormatin Bije artine ie vndah ndvq hormatin Bapa saq ngutus Ie. 24 Tiang badaq side: Setetune dengan saq dengah Tiang, dait percaye lvq Bapa saq ngutus Tiang, ie gen mauq idup sejati dait kekel, dait ie ndvq gen tehukum; ie sampun ngalih lvman ninggal ojok dalem idup. 25 Tiang badaq side: Setetune gen dateng waktune -- malahan sampun dateng waktune -- dengan ninggal gen dengah suare Bije saq asalne lvman Allah. Dait dengan saq dedengah gen idup. 26 Pade maraq Bapa saq jari sumber idup, make Bapa jariang Bije nike vndah sumber idup. 27 Bapa sampun ngicanin Bije-Ne kuase jari hakimin sai juaq, svngaq Ie Bije Manusie. 28 Ndaq side pade bengaq dengah hal niki, svngaq gen dateng waktune bahwe selapuq dengan saq sampun ninggal dengah suare-Ne, 29 dait ie pade saq gawvq solah gen sugul dait idup malik jari mauq idup saq kekel, laguq ie pade saq sampun gawvq jahat gen teidupang malik jari tehukum." 30 "Tiang ndvq tao ngelaksaneang napi-napi lvman diriq Tiang mvsaq, Tiang cume ngakimin sesuai napi saq Tiang dengah. Dait penghakiman Tiang adil, svngaq Tiang ndvq turut kemvlvq Tiang mvsaq, laguq pekayunan Bapa saq ngutus Tiang. 31 Lamun Tiang ngebvng kesaksian mengenai diriq Tiang mvsaq, kesaksian nike ndvq bau tesaduq. 32 Laguq araq dengan lain saq ngebvng kesaksian mengenai Tiang, dait Tiang nenaoq bahwe kesaksian-Ne nike kenaq. 33 Side pade sampun ngirim utusan ojok Yahya, dait Yahya sampun ngebvng kesaksian mengenai kebenaran. 34 Hal niki Tiang sampvang, ndvqne lantaran Tiang merluang saksi lvman manusie, laguq advq side pade teselametang. 35 Yahya nike maraq dilah saq nyale dait becahaye. Semendaq doang side pade seneng nerimaq cahayene nike. 36 Laguq kesaksian Tiang pentingan lvman kesaksian Yahya. Napi saq mangkin Tiang laksaneang, niki karye saq tetugasang siq Bapa tipaq Tiang, jari bukti bahwe Bapa sampun ngutus Tiang. 37 Dait Bapa saq ngutus Tiang vndah ngebvng kesaksian mengenai Tiang. Side pade ndvq uwah dengah manik-Ne atao serioq rue-Ne. 38 Selapuq manik-Ne ndvq side pade simpen lvq dalem atvnde, svngaq side pade ndvq percaye lvq Tiang saq Ie utus. 39 Side pade berajah Kitab Suci svngaq side paran siq care nike side bedowv idup sejati dait kekel. Dait Kitab Suci vndah ngebvng kesaksian mengenai Tiang. 40 Laguq side pade ndvq mvlv dateng ojok Tiang advq side pade mauq idup. 41 Tiang ndvq boyaq pujian lvman manusie. 42 Tiang kenal side pade. Tiang nenaoq side pade ndvq ngasihin Allah dalem atvnde. 43 Tiang dateng dalem pesvngan Bapa Tiang, laguq side pade ndvq nerimaq Tiang. Laguq lamun dengan lain saq dateng dalem pesvnganne mvsaq, side pade mvlv nerimaq ie. 44 Berembv side pade bau percaye, lamun side pade boyaq pujian lvman sepade manusie, dait ndvq berusahe boyaq pujian lvman Allah saq Esa? 45 Ndaq paran Tiang gen tuduh side pade lvq arepan Bapa. Malahan Musa saq side pade harepang, ie saq tuduh side pade. 46 Seandvne side pade percaye lvq Musa, side pade gen percaye lvq Tiang, svngaq Musa saq nulis mengenai Tiang. 47 Laguq lamun side pade ndvq percaye lvq napi saq tetulis siq Musa, berembv side pade bau percaye lvq napi saq Tiang sampvang?"

6:1 Sesampun nike Deside Isa lumbar ojok itoqan Danao Galilea, saq tesebut vndah Danao Tiberias. 2 Sesampun rauh lvq derike, luwvq dengan ngiring Deside Isa, svngaq ie pade sampun serioq muqjizat-muqjizat saq tepiaq siq Deside Isa sewaktu Ie nyelahang dengan sakit. 3 Deside Isa tavk ojok atas gunung, terus melinggih lvq derike teiring siq pengiring-pengiring-Ne. 4 Lvq waktu nike Hari Raye Paskah dengan Yahudi sampun rapet. 5 Waktu Deside Isa cingakin lvq sekelining-Ne, Ie cingakin dengan luwvq dateng tipaq Ie. Beterus manik Deside Isa lvq Pilipus, "Lvq mbv taoqte beli keloran, advq selapuq dengan niki mauq ngelor?" ( 6 Setetune Deside Isa sampun wikan napi saq harus Ie laksaneang, laguq Ie bemanik maraq nike jari nguji Pilipus.) 7 Jawab Pilipus, "Ruti saq beraji satak kvpvng perak ndvqne cukup umaq dengan-dengan niki, timaq sebilang dengan cume mauq pade sekediq." 8 Salaq sopoq pengiring Deside Isa saq lain aranne Andreas, semeton Simon Petrus matur, 9 "Lvq deriki araq kanak mame bedowv lime ruti dait due empaq. Laguq napi artine lvq dengan saq luwvqne maraq niki?" 10 Manik Deside Isa, "Suruq dengan-dengan nike tokol." Lvq taoq nike luwvq pupaq, make dengan-dengan nike tokol lvq pupaq -- selapuqne kire-kire lime iyu dengan mame. 11 Beterus Deside Isa bait ruti nike, dait ngucap syukur tipaq Allah. Sesampun nike bagi-bagiang-Ne ruti nike ojok dengan luwvq. Terus Ie bagi empaq nike, dait ie pade ngelor jangke puas. 12 Sesampun selapuqne bekelor jangke besuh, Deside Isa bemanik tipaq pengiring-pengiring-Ne, "Kumpulang salo keloran nike; ndaq jangke araq saq tetetvh." 13 Terus ie pade kumpulang due olas bakaq penoq salo keloran lvman lime ruti saq tekelorang siq dengan luwvq nike. 14 Sewaktu dengan luwvq serioq keajaipan saq tepiaq siq Deside Isa, ie pade bebase, "Mule tetu, niki Nabi saq gen rauh ojok dunie!" 15 Deside Isa wikan ie pade mvlv dateng jari paksaq Ie jari raje ie pade. Keranaq nike Deside Isa lumbar nyingkir ojok gunung mvsaq-mvsaq. 16 Sesampun serep jelo, pengiring-pengiring Deside Isa turun ojok danao. 17 Beterus ie pade tavk perau mbelat danao nike lumbar ojok Kapernaum. Waktu nike sampun peteng laguq Deside Isa ndvqman vndah rauh tipaq ie pade, 18 sedeng umbak lvq danao mulai belvq svngaq keras angin. 19 Sesampun belayar kire-kire lime atao enem kilomvter, ie pade serioq Deside Isa rauh ojok perau bemargi lvq atas aiq. Ie pade takut gati. 20 Laguq manik Deside Isa lvq ie pade, "Niki Tiang, ndaq takut!" 21 Make seneng gati angen ie pade terus pesilaq Deside Isa tavk ojok dalem perau. Dait waktu nike vndah perau ie pade dateng lvq taoq saq ie pade laiq. 22 Lvq jelo jemaqne dengan luwvq saq masih ndot lvq itoqan danao, sadar bahwe sendvqmanne cume araq sopoq perau lvq derike. Ie pade nenaoq bahwe pengiring-pengiring Deside Isa sampun berangkat kadu perau nike, laguq Deside Isa nvnten milu. 23 Beterus perau-perau lvman kote Tiberias dateng dait belabuh lvq dvkvt taoq nike, taoq dengan luwvq ngelorang ruti sesampun Junjungan Saq Mulie ngucapang syukur. 24 Sewaktu dengan luwvq nike serioq bahwe Deside Isa dait pengiring-pengiring-Ne ndvq araq lvq derike, ie pade tavk perau-perau nike dait lumbar ojok Kapernaum boyaq Deside Isa. 25 Sewaktu dengan-dengan nike bedait kance Deside Isa lvq itoqan danao, ie pade metakvn lvq Deside Isa, "Bapaq Guru, piran Pelungguh rauh lvq deriki?" 26 Jawab Deside Isa, "Tiang badaq side, setetune side pade boyaq Tiang ndvqne lantaran side pade sampun ngerti napi maksut keajaipan-keajaipan saq Tiang piaq, laguq lantaran side pade sampun bekelor jangke besuh. 27 Ndaq begawvan jari mauq keloran saq iniq bis dait svde. Laguq side pade harus begawvan jari mauq keloran saq bau tahen jangke dateng idup sejati dait kekel, saq gen teicanin siq Bije Manusie, svngaq Ie sampun tesahang siq Allah Bapa." 28 Beterus ie pade metakvn lvq Deside Isa, "Napi saq harus tiang pade piaq advq tiang pade ngelaksaneang karye saq tekayunang siq Allah?" 29 Jawab Deside Isa, "Niki karye saq tekayunang siq Allah: Side pade harus percaye lvq Ie saq teutus siq Allah." 30 Beterus ie pade matur, "Lamun maraq nike, bukti napi saq gen Pelungguh icanin advq tiang pade serioq dait percaye lvq Pelungguh? Napi saq Pelungguh gen laksaneang? 31 Leluhur tiang pade ngelorang manna lvq padang gurun, maraq tetulis lvq Kitab Suci, 'Allah ngicanin ie pade kelorang ruti lvman sorge.' " 32 Terus Deside Isa bemanik lvq ie pade, "Tiang badaq side: Setetune ndvqne Musa, laguq Bapa Tiang saq ngicanin side ruti saq setetune lvman sorge. 33 Svngaq ruti saq teicanin siq Allah nike Ie saq turun lvman sorge dait ngicanin idup tipaq manusie lvq dunie." 34 Terus ie pade matur, "Junjungan Saq Mulie, tunas tetep icanin tiang pade ruti nike." 35 Manik Deside Isa lvq ie pade, "Tiang niki ruti saq ngebvng idup, dengan saq dateng tipaq Tiang, ndvqne gen lapah malik. Dait dengan saq percaye lvq Tiang ndvqne gen bedak malik." 36 "Laguq maraq saq sampun Tiang sampvang lvq side: Timaq side pade sampun serioq Tiang, side pade ndvq percaye. 37 Selapuq saq Bapa icanin tipaq Tiang gen dateng tipaq Tiang dait sai-sai saq dateng tipaq Tiang ndvq uwah Tiang tolaq. 38 Svngaq Tiang turun lvman sorge, ndvq jari ngelaksaneang kemvlvq Tiang mvsaq, laguq pekayunan Ie saq ngutus Tiang. 39 Dait niki pekayunan Ie saq ngutus Tiang: Advq selapuq saq sampun Ie icanin tipaq Tiang, ndvq araq saq telang; laguq advq Tiang idupang malik lvq ahir jaman. 40 Mule maraq niki pekayunan Bapa Tiang: Advq selapuq saq serioq Bije dait percaye lvq Ie, bedowv idup sejati dait kekel, dait Tiang idupang malik lvq ahir jaman." 41 Dengan-dengan Yahudi mulai ngomvh lvq Deside Isa, lantaran Ie bemanik: "Tiang ruti saq turun lvman sorge." 42 Ie pade bebase, "Tekan Ie niki Isa, bije Yusup? Tiang pade kenal inaq amaq-Ne! Berembv Ie bau paran diriq-Ne, "Ie turun lvman sorge?" 43 Beterus Deside Isa bemanik lvq ie pade, "Ndaq ngomvh! 44 Ndvq araq sopoq dengan juaq saq bau dateng ojok Tiang, lamun Bapa saq ngutus Tiang, nvnten gadingang ie tipaq Tiang; dait sai saq dateng, gen Tiang idupang lvq ahir jaman. 45 Lvq dalem Kitab Nabi-nabi tetulis maraq niki: 'Selapuq dengan gen teajah siq Allah.' Jari, selapuq dengan saq dengahang Bapa dait berajah lvman Ie, dateng ojok Tiang. 46 Nike ndvqne berarti bahwe araq dengan saq sampun serioq Bapa. Cume Ie saq rauh lvman Allah, sampun cingakin Bapa. 47 Tiang badaq side: Setetune dengan saq percaye, bedowv idup sejati dait kekel. 48 Tiang niki ruti saq ngebvng idup. 49 Leluhurde kelorang manna lvq padang gurun dait ie pade ninggal vndah. 50 Laguq ndvqne maraq nike ruti saq turun lvman sorge; dengan saq ngelorang ruti nike ndvqne gen ninggal. 51 Tiang niki ruti saq turun lvman sorge -- ruti saq ngebvng idup. Dengan saq ngelorang ruti niki gen idup selavq-lavqne. Ruti saq gen Tiang bvng jari kehidupan manusie lvq dunie, nike ragen Tiang." 52 Dengahne manik Deside Isa maraq nike, dengan-dengan Yahudi betungkasan sopoq kance lainne, basen ie pade, "Berembv Dengan niki ngicanin ite rage-Ne jari tekelorang?" 53 Beterus Deside Isa bemanik lvq ie pade, "Tiang badaq side: Setetune lamun side pade ndvq ngelorang rage Bije Manusie dait nginem daraq-Ne, side pade ndvq bedowv idup lvq dalem diriqde. 54 Dengan saq ngelorang ragen Tiang dait nginem daraq Tiang bedowv idup sejati dait kekel, dait Tiang gen idupang ie lvq ahir jaman. 55 Svngaq ragen Tiang tetu-tetu keloran dait daraq Tiang tetu-tetu ineman. 56 Dengan saq ngelorang ragen Tiang dait nginem daraq Tiang, ie araq lvq dalem Tiang, dait Tiang araq lvq dalem ie. 57 Pade maraq Bapa saq idup ngutus Tiang, dait Tiang vndah idup lvman Bapa, maraq nike vndah halne sai-sai saq kelorang ragen Tiang gen idup lvman Tiang. 58 Niki ruti saq sampun turun lvman sorge: Ndvqne maraq ruti saq tekelorang siq leluhurde. Svngaq sesampun ie pade ngelorang ruti nike, ie pade ninggal vndah. Laguq dengan saq ngelorang ruti niki gen idup selavq-lavqne." 59 Selapuqne nike temanikang siq Deside Isa sewaktu Ie ngajahang lvq balv ibadah lvq Kapernaum. 60 Sesampun dengah manik Deside Isa nike, luwvq lvq antare pengiring-pengiring-Ne matur, "Perajahan niki keras, sai saq sanggup dengahang perajahan niki?" 61 Deside Isa wikan bahwe pengiring-pengiring-Ne ngerumun mengenai hal nike. Make Ie bemanik, "Napi perajahan nike miaq side bimbang? 62 Berembv jarine vraq lamun side pade serioq Bije Manusie tavk gen tulak ojok taoq-Ne semule? 63 Roh saq ngicanin idup, awak manusie tetu-tetu ndvqne araq manpaatne. Perajahan-perajahan saq Tiang sampvang lvq side nike roh dait idup. 64 Laguq lvq antare side pade araq saq ndvq percaye." (Deside Isa sampun wikan lvman penembvqne sai-sai saq ndvq mvlv percaye, dait sai saq gen behianat lvq Ie.) 65 Terus Deside Isa bemanik malik, "Keranaq nike Tiang badaq side bahwe ndvq araq sopoq dengan juaq bau dateng ojok Tiang, lamun Bapa nvnten ngicanin ie paice." 66 Mulai waktu nike luwvq pengiring-Ne ngundurang diriq, dait ndvq ngiring Ie malik. 67 Beterus Deside Isa beketuan lvq kedue olas pengiring-Ne, "Napi side pade vndah mvlv bilin Tiang?" 68 Simon Petrus matur lvq Deside Isa, "Junjungan Saq Mulie, sai saq gen tiang pade laiq? Pelungguh doang saq bedowv idup sejati dait kekel. 69 Tiang pade sampun percaye dait yakin bahwe Pelungguh Saq Suci lvman Allah." 70 Jawab Deside Isa, "Tekan Tiang mvsaq saq pilvq side pade, saq due olas dengan niki? Laguq salaq sopoq lvq antare side nike Belis!" 71 Saq temaksut siq Deside Isa nike, Yudas bije Simon Iskariot. Svngaq timaq Yudas jari salaq sopoq lvman kedue olas pengiring-Ne, ie gen behianat lvq Deside Isa.

7:1 Sesampun nike Deside Isa bemargi lvq selapuq davrah Galilea. Ie nvnten kayun ojok davrah Yudea, svngaq dengan-dengan Yahudi lvq derike beniat nyematvq Ie. 2 Waktu nike sampun rapet Hari Raye Pondok Daun. 3 Sanak-sanak Deside Isa matur lvq Deside Isa, "Silaq bilin taoq niki, terus lumbar ojok Yudea, advq pengiring-pengiring Pelungguh bau serioq karye Pelungguh. 4 Ndvq araq dengan saq gen seboq napi saq ie piaq, lamun ie mvlv jari kesohor. Lamun Pelungguh ngelaksaneang hal-hal maraq nike, silaq Pelungguh nyatayang diriq tipaq dunie!" ( 5 Svngaq sanak-sanak-Ne vndah nvnten percaye lvq Ie.) 6 Beterus Deside Isa bemanik lvq ie pade, "Mangkin ndvqman waktu Tiang, laguq bagi side pade tetep araq waktu. 7 Dunie niki ndvqne mungkin meriq lvq side pade. Laguq Tiang mule temeriq siq dunie, svngaq Tiang tetep ngebvng kesaksian mengenai dunie bahwe perbuatan-perbuatanne jahat. 8 Silaq side pade lumbar ojok perayaan nike. Tiang ndvq gen lalo, svngaq mule ndvqman waktu Tiang." 9 Maraq nike manik Deside Isa lvq sanak-sanak-Ne, beterus Ie meneng lvq Galilea. 10 Sesampun sanak-sanak-Ne lumbar ojok perayaan nike, meneng-meneng Deside Isa lumbar ndvq tetaoq siq dengan. 11 Sengonvq perayaan nike, penguase-penguase Yahudi boyaq Deside Isa dait beketuan-tuan, "Lvq mbv Ie?" 12 Luwvq dengan mulai bepvsvq-pvsvq ngeraosang Deside Isa. Araq saq bebase, "Ie dengan solah." Araq vndah saq bebase, "Nvnten! Ie nyesatang dengan luwvq." 13 Laguq ndvq araq sopoq dengan juaq saq bani bebase terang-terangan ngeraosang Ie, svngaq ie pade takut lvq dengan-dengan Yahudi. 14 Lvq waktu perayaan nike kenyeke telaksaneang, Deside Isa tame ojok Gedvng Allah, terus mulai ngajahang. 15 Dengan-dengan Yahudi bengaq gati, dait bebase, "Berembv dengan niki bedowv penenaoq maraq nike, padahal Ie ndvq uwah berajah?" 16 Deside Isa bemanik, "Saq Tiang ajahang niki, ndvqne perajahan lvman Tiang, laguq perajahan lvman Ie saq ngutus Tiang. 17 Dengan saq mvlv turut pekayunan Allah gen nenaoq napi pengajahan Tiang asalne lvman Allah atao lvman Tiang mvsaq. 18 Dengan saq ngajahang perajahanne mvsaq boyaq kehormatan jari diriqne mvsaq. Laguq dengan saq boyaq kehormatan jari Ie saq ngutus ie, dengan nike kenaq, ndvq araq kesalaqan lvq ie. 19 Tekan Musa sampun nyampvang Hukum Taurat tipaq side. Laguq lvq antare side pade ndvq araq saq mvlv taat lvq Hukum Taurat nike. Kembvq side pade mvlv matvq Tiang?" 20 Jawab dengan luwvq nike, "Side siq tekuasein siq svtan! Sai saq mvlv matvq Side?" 21 Jawab Deside Isa, "Cume sopoq muqjizat saq Tiang piaq, dait side pade bengaq. 22 Musa ngicanin side pade aturan besunat -- timaq setetune sunat nike asalne ndvqne lvman Musa, laguq lvman bapaq-bapaq leluhur sendvqman Musa -- dait side pade sunat dengan lvq jelo Sabat. 23 Lamun hal nike side pade laksaneang advq ndvq teparan ngelanggar aturan Musa mengenai sunat, kembvq side pade gedek lvq Tiang lantaran nyelahang selapuq awak sopoq dengan lvq jelo Sabat? 24 Ndaq hakimin dengan siq napi saq penggitan, laguq pade hakimin secare adil." 25 Beterus pire dengan penduduk kote Yerusalem bebase, "Tekan Ie niki saq teboyaq-boyaq gen tematvq? 26 Pade serioq, Ie bvbas bebaos lvq julun dengan luwvq, dait ndvq araq saq bebase napi-napi lvq Ie! Sang penguase-penguasente sampun sadar bahwe Ie niki Almasih? 27 Laguq lamun Almasih nike rauh, ndvq araq sopoq dengan juaq saq nenaoq lvman mbv asal-Ne. Padahal ite nenaoq lvman mbv asal-Ne." 28 Waktu Deside Isa kenyeke ngajahang lvq dalem Gedvng Allah, Ie bemanik siq suare saq belvq, "Mule side pade nenaoq sai Tiang niki dait lvman mbv asal Tiang. Tiang dateng ndvqne siq kemvlvq Tiang mvsaq. Tiang teutus siq Ie saq kenaq saq ndvq side pade kenal. 29 Tiang kenal kance Ie svngaq Tiang asalne lvman Ie, dait Ie saq ngutus Tiang." 30 Lvq waktu nike ie pade berusahe bau Deside Isa, laguq ndvq araq saq bani negel Ie, svngaq ndvqman waktune. 31 Luwvq lvq antare dengan-dengan nike mulai percaye lvq Deside Isa, dait bebase, "Lamun Almasih nike rauh, napi Ie bau ngelaksaneang luwvqan keajaipan ketimbang Dengan niki?" 32 Dengan-dengan Parisi dengah berembv dengan luwvq nike bepvsvq-pvsvq raosang Deside Isa. Keranaq nike bareng-bareng kance imam-imam kepale, ie pade ngutus pire pengawal Gedvng Allah lumbar bau Deside Isa. 33 Deside Isa bemanik, "Cume karing seberaq doang Tiang masih bareng kance side pade. Sesampun nike Tiang gen tulak ojok Ie saq ngutus Tiang. 34 Side pade gen boyaq Tiang, laguq ndvq ndait Tiang; svngaq side pade ndvq bau dateng ojok taoq lvq mbv Tiang araq." 35 Beterus dengan-dengan Yahudi nike bebase sopoq kance saq lainne, "Dengan niki gen lumbar ojok mbv, sehingge ite ndvq gen bau ndait Ie? Napi Ie gen lumbar ojok dengan-dengan Yahudi saq ndot lvq perantoan lvq antare dengan Yunani, dait ngajahang dengan Yunani? 36 Napi maksut-Ne bebaos bahwe ite gen boyaq Ie laguq ite ndvq bau bedait kance Ie dait ite ndvq bau dateng lvq mbv taoq-Ne araq?" 37 Lvq jelo penutuq perayaan nike, jelo saq paling penting, Deside Isa ngadeg beterus bemanik siq suare saq belvq, "Dengan saq bedak, harus dateng ojok Tiang dait nginem! 38 Sai-sai saq percaye lvq Tiang, maraq tetulis lvq dalem Kitab Suci: 'Lvman dalem atvne gen ngvlvk vlvkan-vlvkan aiq idup.' " ( 39 Deside Isa bemanik mengenai Roh Allah, saq gen teterimaq siq dengan-dengan saq percaye lvq Ie. Svngaq waktu nike Roh Allah ndvqman teicanin; svngaq Deside Isa ndvqman temulieang.) 40 Luwvq dengan dengahang napi saq tebaosang siq Deside Isa, dait lvq antare ie pade araq saq bebase, "Dengan niki pasti Nabi saq gen rauh!" 41 Saq lain bebase, "Ie niki Almasih!" Laguq araq vndah saq bebase, "Nvnten, Almasih nvnten rauh lvman Galilea! 42 Dalem Kitab Suci tetulis bahwe Almasih nike keturunan Daud dait gen rauh lvman Betlehem, dvse asalne Daud." 43 Ahirne dengan-dengan mulai betungkasan mengenai Deside Isa. 44 Araq saq mvlv bau Ie, laguq ndvq sopoq dengan juaq saq bani negel Ie. 45 Sewaktu pengawal-pengawal Gedvng Allah saq teutus jari bau Deside Isa tulak malik, imam-imam kepale dait dengan-dengan Parisi beketuan lvq ie pade, "Kembvq side ndvq jauq Ie ojok deriki?" 46 Jawab pengawal-pengawal nike, "Ndvq uwah araq dengan saq bebaos maraq Ie!" 47 "Napi side pade vndah tesesatang siq Ie?" basen dengan-dengan Parisi nike. 48 "Napi araq penguase-penguasente atao dengan Parisi saq percaye lvq Ie? 49 Laguq dengan luwvq niki, ie pade ndvq ngerti Hukum Taurat, ie pade sampun tekutuk." 50 Salaq sopoq lvq antare dengan Parisi nike, aranne Nikodemus saq sampun parek ojok Deside Isa. Nikodemus bebase tipaq dengan-dengan Parisi saq lain, 51 "Menurut Hukum Taurat, sopoq dengan ndvq kanggo tehukum sendvqman pelekarene tedengah dait perbuatanne teperiksaq." 52 Jawab ie pade, "Napi side vndah lvman Galilea? Silaq periksaq Kitab Suci dait side gen nenaoq bahwe ndvq araq nabi saq rauh lvman Galilea!" [ 53 Sesampun nike selapuq dengan ulvq ojok balvne.

8:1 Laguq Deside Isa lumbar ojok Bukit Zaitun. 2 Jemaq kelvmaqne Deside Isa lumbar malik ojok Gedvng Allah, dait luwvq dengan parek tipaq Ie. Deside Isa melinggih dait ngajah ie pade. 3 Waktu nike ahli-ahli Taurat dait dengan-dengan Parisi parek tipaq Deside Isa jauq sopoq dengan nine saq kendaitan bezinah. Ie pade suruq dengan nine nike nganjeng lvq tengaq-tengaq, 4 beterus matur lvq Deside Isa, "Bapaq Guru, dengan nine niki kendaitan kenyeke bezinah. 5 Lvq dalem Hukum Taurat araq aturan bahwe dengan nine maraq nike harus tepelvwas siq batu jangke matv. Mangkin berembv pendapet Pelungguh?" 6 Ie pade metakvn maraq nike jari boyaq kesalaqan Deside Isa, advqne bau nyalahang Ie. Laguq Deside Isa nunduk doang dait nulis lvq tanaq siq nyari-Ne. 7 Sewaktu ie pade terus matur, Deside Isa ngangkat sirah-Ne dait bemanik lvq ie pade, "Dengan saq ndvq bedowv dose lvq antare side pade, alurang ie saq penembvq melvwasang batu tipaq dengan nine nike." 8 Sesampun nike Deside Isa nunduk malik dait nulis malik lvq tanaq. 9 Sesampun ie pade dengah manik Deside Isa nike, ie pade lumbar bilin taoq nike, sopoq-sopoq mulai lvman saq paling toaq. Ahirne karing Deside Isa kance dengan nine nike doang saq masih tetep nganjeng lvq derike. 10 Beterus Deside Isa ngadeg dait bemanik tipaq ie, "Inaq, lvq mbv ie pade? Ndvq araq saq mvlv hukum side?" 11 "Ndvq araq Junjungan Saq Mulie," jawabne. Terus manik Deside Isa, "Tiang vndah ndvq gen hukum side. Mangkin silaq side lumbar! Ndaq piaq dose malik."] 12 Deside Isa bemanik malik lvq dengan luwvq, manik-Ne, "Tiang niki terang dunie; sai-sai saq turut Tiang, ie ndvq gen lampaq lvq dalem peteng, laguq ie gen bedowv cahaye kehidupan." 13 Dengan-dengan Parisi matur tipaq Deside Isa, "Mangkin Pelungguh icanin kesaksian mengenai diriq Pelungguh mvsaq. Kesaksian Pelungguh nike nvnten kenaq." 14 Jawab Deside Isa, "Timaq Tiang nyampvang kesaksian mengenai diriq Tiang, kesaksian Tiang nike kenaq; svngaq Tiang nenaoq lvman mbv Tiang dateng, dait ojok mbv lain Tiang. Side pade ndvq nenaoq lvman mbv Tiang dateng, dait ojok mbv lain Tiang. 15 Side pade hakimin dengan kadu care manusie; Tiang ndvq hakimin sopoq dengan juaq. 16 Laguq lamun Tiang hakimin dengan, keputusan Tiang nike adil, svngaq Tiang ndvq mvsaq-mvsaq; Bapa saq ngutus Tiang araq bareng Tiang. 17 Lvq dalem Hukum Taurat tetulis maraq niki: Kesaksian saq kenaq nike kesaksian lvman due dengan. 18 Saq nyampvang kesaksian mengenai Tiang, araq due -- Tiang, dait Bapa, saq ngutus Tiang." 19 "Bapa Pelungguh nike lvq mbv?" basen ie pade. Jawab Deside Isa, "Side pade ndvq kenal kance Tiang dait Bapa Tiang. Seandvne side pade kenal kance Tiang, pasti side pade kenal kance Bapa Tiang vndah." 20 Selapuq nike temanikang siq Deside Isa sewaktu Ie ngajahang lvq Gedvng Allah lvq dvkvt kotaq-kotaq kvpvng persembahan. Laguq ndvq araq sopoq dengan juaq saq bau Deside Isa, svngaq mule ndvqman waktune. 21 Deside Isa bemanik malik tipaq ie pade, "Tiang gen lalo, dait side pade gen boyaq Tiang, laguq side pade gen matv dalem dosende. Ojok taoq saq Tiang laiq nike side pade ndvq gen bau dateng." 22 Beterus dengan-dengan Yahudi nike bebase, "Sang Ie gen matvq diriq, svngaq Ie bemanik, 'Ojok mbv lain Tiang, side pade ndvq bau dateng.' " 23 Beterus Deside Isa bemanik tipaq ie pade, "Side pade dateng lvman bawaq; laguq Tiang dateng lvman atas. Side pade lvman dunie; Tiang ndvq lvman dunie. 24 Keranaq nike Tiang badaq side pade, bahwe side pade gen matv dalem dose-dosende. Dait mule side pade gen matv dalem dose-dosende, lamun ndvq percaye bahwe 'Tiang niki Ie'." 25 Ie pade metakvn, "Sai Pelungguh setetune?" Jawab Deside Isa, "Napi manpaatne ngeraos malik kance side pade? 26 Masih luwvq hal mengenai side pade saq gen Tiang sampvang dait Tiang hakimin. Laguq Ie saq ngutus Tiang bau tepercaye. Dait Tiang nyampvang ojok dunie napi saq Tiang dengah lvman Ie." 27 Ie pade ndvq ngerti bahwe Ie kenyeke bebaos lvq ie pade mengenai Bapa. 28 Keranaq nike Deside Isa bemanik malik tipaq ie pade, "~Eraq lamun side pade sampun agungang Bije Manusie, side pade gen nenaoq bahwe 'Tiang niki Ie', dait side pade vndah gen nenaoq bahwe ndvq araq sopoq juaq saq Tiang laksaneang lvman diriq Tiang mvsaq. Tiang cume nyampvang napi saq temanikang siq Bapa lvq Tiang. 29 Dait Ie saq ngutus Tiang araq bareng Tiang. Ie nvnten menengang Tiang mvsaq-mvsaq, svngaq Tiang tetep ngelaksaneang napi saq nyenengang Ie." 30 Sesampun Deside Isa jelasang hal nike, luwvq dengan percaye lvq Ie. 31 Beterus Deside Isa bemanik lvq dengan-dengan Yahudi saq sampun percaye lvq Ie, "Lamun side pade tetep idup menurut manik Tiang, side pade tetu-tetu jari pengiring Tiang, 32 make side pade gen nenaoq kebenaran, dait kebenaran nike gen bvbasang side pade." 33 Ie pade matur lvq Deside Isa, "Tiang pade niki keturunan Ibrahim, ndvq uwah tiang jari hambe sai-sai! Napi maksut Pelungguh bemanik, 'Side pade gen tebvbasang'?" 34 Manik Deside Isa, "Tiang badaq side: Setetune dengan saq gawvq dose, ie jari hambe dose. 35 Dait hambe nike ndvq bedowv taoq saq tetep lvq dalem keluarge, laguq bije bedowv taoq selavq-lavqne lvq dalem keluarge. 36 Keranaq nike lamun Bije bvbasang side pade, make side gen tetu-tetu bvbas. 37 Mule Tiang nenaoq bahwe side pade keturunan Ibrahim. Laguq side pade mvlv nyematvq Tiang, svngaq side pade ndvq mvlv nerimaq manik Tiang. 38 Napi saq Tiang serioq lvq Bapa Tiang, nike saq Tiang sampvang. Laguq side pade miaq napi saq teajahang siq bapaqde lvq side pade." 39 Jawab ie pade, "Bapaq tiang pade Ibrahim." Jawab Deside Isa, "Lamun mule side pade tetu-tetu bije Ibrahim, pasti side pade ngelaksaneang napi saq telaksaneang siq Ibrahim. 40 Tiang nyampvang lvq side pade kebenaran saq Tiang dengah lvman Allah, laguq side pade mvlv nyematvq Tiang. Pegawvan saq maraq nike ndvqne tegawvq siq Ibrahim! 41 Side pade laksaneang napi saq telaksaneang siq bapaqde mvsaq." Jawab ie pade, "Tiang pade ndvq anak-anak haram. Bapa tiang pade cume sopoq, nike Allah." 42 Beterus manik Deside Isa lvq ie pade, "Seandvne Allah nike jari Bapa side pade make side pade pasti gen ngasihin Tiang, svngaq Tiang dateng lvman Allah. Tiang ndvq dateng siq kemvlvq Tiang mvsaq, laguq Ie saq ngutus Tiang. 43 Kembvq side pade ndvq ngerti napi saq Tiang sampvang? Svngaq side pade ndvq tahen dengahang manik Tiang. 44 Belis nike saq jari bapaqde, dait side pade mvlv turut kemvlvq bapaqde. Lvman penembvqne Belis nike tukang nyematvq. Ie ndvq uwah bvle kebenaran, svngaq ndvq araq kebenaran lvq dalem diriqne. Lamun ie beduste nike hal saq biase, svngaq mule nike sipatne. Ie mule penduste dait sumber segale macem duste. 45 Laguq Tiang nyampvang kebenaran, dait nike lantaranne side pade ndvq percaye lvq Tiang. 46 Sai lvq antare side selapuq saq bau buktiang bahwe Tiang bedose? Lamun Tiang nyampvang kebenaran, kembvq side ndvq percaye lvq Tiang? 47 Dengan saq asalne lvman Allah, dengah Manik Allah. Side ndvq dengah svngaq asalde ndvq lvman Allah." 48 Jawab dengan-dengan Yahudi nike lvq Deside Isa, "Tekan kenaq atur tiang pade bahwe Pelungguh dengan Samaria saq tekuasein siq svtan?" 49 Jawab Deside Isa, "Tiang ndvq tekuasein siq svtan. Tiang hormatin Bapa Tiang, laguq side pade hine Tiang. 50 Tiang ndvq boyaq kehormatan jari diriq Tiang mvsaq. Araq sopoq saq ngusaheang kehormatan Tiang, dait Ie saq gen hakimin manusie. 51 Setetune kenaq manik Tiang niki, dengan saq turut manik Tiang, ie ndvq gen ngalamin maut selavq-lavqne." 52 Beterus dengan-dengan Yahudi nike matur lvq Deside Isa, "Mangkin tiang pade nenaoq bahwe Pelungguh mule tetu-tetu tekuasein siq svtan! Ibrahim mvsaq sampun ninggal, maraq nike vndah selapuq nabi, laguq Pelungguh bemanik bahwe, 'Selapuq dengan saq turut manik Pelungguh ndvq gen ngalamin maut selavq-lavqne.' 53 Lamun Ibrahim mvsaq sampun ninggal, dait nabi-nabi vndah selapuqne sampun ninggal, Pelungguh niki sai? Segerah Pelungguh belvqan lvman bapaq tiang pade Ibrahim!" 54 Jawab Deside Isa, "Lamun Tiang boyaq kehormatan jari diriq Tiang mvsaq, kehormatan nike ndvq araq artine. Bapa Tiang saq mulieang Tiang. Side pade bebase bahwe Ie nike Allah side, 55 padahal side pade ndvq kenal kance Ie, laguq Tiang kenal kance Ie. Dait lamun Tiang badaq bahwe Tiang ndvq kenal kance Ie, make Tiang penduste, pade maraq side pade. Laguq Tiang kenal kance Ie dait Tiang taat lvq manik-Ne. 56 Ibrahim, bapaqde tetu-tetu seneng gati bahwe ie sampun serioq jelo Tiang. Ie sampun serioq, dait ie besukecite!" 57 Beterus dengan-dengan Yahudi matur lvq Deside Isa, "Umur Pelungguh ndvqman araq svket taun, laguq Pelungguh sampun serioq Ibrahim?" 58 Jawab Deside Isa, "Tiang badaq side, bahwe setetune sendvqman Ibrahim tebijeang, Tiang sampun araq." 59 Beterus dengan-dengan Yahudi nike bait batu gen melvwas Ie; laguq Deside Isa nyeboq, beterus Ie lumbar bilin Gedvng Allah.

9:1 Sewaktu Deside Isa bemargi, Ie cingakin dengan bute lvman tebijeang. 2 Pengiring-pengiring Deside Isa metakvn lvq Deside Isa, "Bapaq Guru, kembvq dengan niki tebijeang bute? Napi lantaran ie mvsaq bedose atao lantaran inaq amaqne bedose?" 3 Jawab Deside Isa, "Ie bute ndvq lantaran dosene mvsaq atao dengan toaqne, laguq advq dengan bau serioq kuase Allah bekarye dalem diriqne. 4 Kedung masih tengari, ite harus ngelaksaneang karye Allah saq ngutus Tiang. Kelem gen dateng, dait ndvq araq sopoq dengan juaq saq bau begawvan. 5 Semasih Tiang lvq dunie niki, Tiang niki cahaye dunie." 6 Sesampun bemanik maraq nike Deside Isa beludah ojok tanaq, dait ngaduk ludah-Ne nike kance tanaq. Beterus Ie ngolvsang lvq penenteng dengan nike, 7 beterus bemanik lvq ie, "Silaq lumbar persiq muende lvq Telage Siloam." (Siloam artine 'Saq Teutus'.) Make dengan nike lumbar persiq muene. Sewaktu ie tulak, ie sampun tao nyerioq. 8 Tetangge-tetanggene dait dengan-dengan saq sendvqmanne serioq ie mekir, selapuqne bebase, "Ndvq napi dengan niki saq biase tokol mekir?" 9 Araq saq bebase, "Mule ie." Laguq araq vndah saq bebase, "Ndvqne ie, ie cume berambis ruene maraq dengan nike." Laguq dengan nike mvsaq bebase, "Tiang uwah dengan bute nike." 10 "Berembv ceritene jangke side tao nyerioq?" basen ie pade lvq dengan nike. 11 Jawabne, "Dengan saq bepesvngan Deside Isa nike saq miaq reraok, terus ngolvsang lvq maten tiang dait bemanik, 'Silaq lumbar persiq muende lvq Telage Siloam.' Beterus tiang lalo. Dait sewaktu tiang persiq muen tiang, tiang tao nyerioq." 12 Ie pade beketuan, "Lvq mbv dengan nike?" Terus ie bejawab, "Mindah tiang." 13 Jelo nike jelo Sabat waktu Deside Isa ngaduk tanaq siq ludah-Ne jari miaq dengan bute nike tao nyerioq. Make dengan saq sendvqmanne bute nike tejauq ojok dengan-dengan Parisi. 15 Ie pade vndah beketuan lvq dengan nike berembv ie tao nyerioq. Jawab dengan nike, "Ie ngolvsang reraok lvq maten tiang, beterus tiang persiq dait tiang tao nyerioq." 16 Pire dengan lvq antare dengan-dengan Parisi nike bebase, "Ndvqne mungkin dengan saq ngelaksaneang niki asalne lvman Allah, svngaq Ie ndvq hormatin jelo Sabat." Laguq dengan lain bebase, "Ndvqne mungkin dengan bedose miaq keajaipan-keajaipan maraq niki?" Beterus araq bvde pendapet antare ie pade. 17 Make dengan-dengan Parisi nike beketuan malik lvq dengan nike, "Napi pendapet side lvq Ie saq miaq side jangke tao nyerioq?" "Ie nabi," jawab dengan nike. 18 Laguq pare pemimpin Yahudi nike ndvq mvlv percaye bahwe dengan nike mule bute sendvqmanne dait mangkin tao nyerioq. Keranaq nike ie pade ngempoh dengan toaqne, 19 dait beketuan, "Napi tetu ie anak side, saq side paran teanakang bute? Berembv ie tao nyerioq mangkin?" 20 Jawab inaq amaq dengan nike, "Mule ie niki anak tiang pade; dait mule ie bute lvman teanakang. 21 Laguq berembv ie tao nyerioq mangkin, mindah tiang. Dait sai saq miaq ie tao nyerioq, nike vndah mindah tiang. Ketuanang doang lvq ie, ie sampun belvq; ie tao jawab mvsaq." 22 Inaq amaq dengan nike bebase maraq nike svngaq ie pade takut lvq dengan-dengan Yahudi; svngaq ie pade sampun sepakat, bahwe dengan saq ngakuq Deside Isa nike Almasih, ndvqne kanggo malik tame balv ibadah. 23 Keranaq nike inaq amaq dengan nike bebase, "Ie sampun belvq; ketuan doang lvq ie." 24 Beterus ie pade ngempoh malik dengan saq sendvqmanne bute nike, dait bebase lvq ie, "Sampvang saq kenaq lvq arepan Allah! Tiang pade nenaoq dengan nike dengan bedose." 25 Jawab dengan nike, "Napi Ie bedose atao ndvq, mindah tiang. Laguq sopoq hal saq tiang taoq; lavq tiang bute, mangkin tiang nyerioq." 26 Beterus ie pade bebase malik lvq dengan nike, "Ie kumbvqang side? Berembv entane Ie piaq side tao nyerioq." 27 Jawab dengan nike, "Sampun tiang ceriteang lvq pelungguh, laguq pelungguh sami nvnten kayun pirengang. Kembvq pelungguh sami kayun pirengang malik? Sang pelungguh sami kayun jari pengiring-pengiring-Ne vndah?" 28 Beterus ie pade sumpaq ie dait bebase, "Side pengiring-Ne; tiang pade ndvq! Tiang pade pengiring Musa. 29 Tiang pade nenaoq bahwe Allah sampun bemanik lvq Musa. Laguq mengenai dengan nike, tiang pade ndvq nenaoq lvman mbv asal-Ne." 30 Jawab dengan nike, "Segerah pelungguh sami nvnten wikan lvman mbv asal-Ne, padahal Ie sampun miaq tiang tao nyerioq. 31 Ite nenaoq bahwe Allah nvnten gen mirengang dengan bedose, laguq dengan saq solvh dait ngelaksaneang pekayunan-Ne. 32 Lvman penembvq dunie niki araq, ndvq uwah tedengah bahwe araq dengan miaq dengan saq teanakang bute tao nyerioq. 33 Lamun dengan nike nvnten lvman Allah, Ie nvnten gen bau ngelaksaneang napi-napi." 34 Jawab ie pade, "Napi? Side saq penoq dose lvman teanakang, side mvlv ngajah tiang pade?" Make mulai waktu nike ie tebalaq tame ojok balv ibadah. 35 Deside Isa pireng bahwe ie pade sampun sediq dengan nike lvman balv ibadah. Deside Isa boyaq dengan nike beterus bemanik lvq ie, "Napi side percaye lvq Bije Manusie?" 36 Jawab dengan nike, "Sai Ie, Junjungan Saq Mulie? Tunas manikang advq tiang percaye lvq Ie." 37 "Side sampun serioq Ie," jawab Deside Isa. "Ie saq mangkin niki kenyeke bebaos kance side." 38 "Tiang percaye, Junjungan Saq Mulie," basen dengan nike, beterus sujut lvq arepan Deside Isa. 39 Manik Deside Isa, "Tiang dateng ojok dunie niki jari ngakimin; advq dengan saq bute tao nyerioq, dait dengan saq tao nyerioq, jari bute." 40 Pire dengan Parisi saq araq lvq derike dengah Deside Isa bemanik maraq nike, beterus ie pade metakvn lvq Ie, "Maksut Pelungguh tiang pade vndah bute?" 41 Jawab Deside Isa, "Seandvne side pade bute, side pade ndvq bedose. Laguq lantaran side pade bebase, 'Tiang pade nyerioq,' nike artine side pade masih bedose."

10:1 "Tiang badaq side: Setetune dengan saq tame ojok baren dombe liwat lambah, dait ndvq liwat lawang, dengan nike maling dait perampok. 2 Laguq dengan saq tame liwat lawang, ie pengarat dombe nike. 3 Penjage bare bukaqang ie lawang, dait dombe-dombe turut suarene sewaktu ie ngempoh aranne sopoq-sopoq, dait ie pade tedvndvn ojok luah. 4 Sesampun dombe-dombe nike tejauq ojok luah, pengarat nike lampaq lvq julu, dait dombe-dombe nike turut ie svngaq ie pade tandaq suarene. 5 Dombe-dombe nike ndvqne mvlv turut dengan lain, malahan gen pelai lvman dengan nike, svngaq ndvqne tandaq suarene." 6 Deside Isa nyeriteang perumpamean nike, laguq ie pade ndvq ngerti napi maksut-Ne. 7 Beterus Deside Isa bemanik karing sekali, "Tiang badaq side setetune Tiang niki lawang umaq dombe nike. 8 Selapuq saq dateng sendvqman Tiang, nike maling dait perampok, dait dombe-dombe ndvq mvlv dengahang suare ie pade. 9 Tiang niki lawang. Sai-sai tame langan Tiang gen selamet; ie sugul tame dait mauq keloran. 10 Maling dateng cume jari memaling, nyematvq dait jari nyenyvdaq. Laguq Tiang dateng advq manusie mauq idup -- idup belimpah-limpah. 11 Tiang niki pengarat saq solah. Pengarat saq solah nyerahang nyawene umaq dombe-dombene. 12 Dengan saq teupaq dait saq ndvq pengarat dait ndvqne vndah vpvn dowv dombe-dombe nike, gen pelai bilin dombe-dombe lamun ie serioq serigale dateng. Make dombe-dombe nike gen tecakrah dait tepiaq buyar siq serigale nike. 13 Dengan saq teupaq nike pelai, svngaq ie begawvan jari boyaq upaq. Ie ndvq ngerunguq dombe-dombe nike. 14 Tiang niki pengarat saq solah. Pade maraq Bapa kenal kance Tiang dait Tiang kenal kance Bapa, maraq nike vndah Tiang kenal dombe-dombe Tiang dait ie pade vndah kenal Tiang. Tiang nyerahang nyawe Tiang umaq ie pade. 16 Masih araq dombe-dombe lain saq jari dowvn Tiang vndah, laguq ndvq tame itungan dombe-dombe saq luwvq niki. Ie pade vndah harus Tiang jauq dait ie pade gen dengahang suare Tiang. Ie pade selapuq gen jari sopoq kumpulan siq sopoq pengarat. 17 Bapa ngasihin Tiang lantaran Tiang nyerahang nyawe Tiang jari bait ie malik. 18 Ndvq araq sopoq dengan juaq saq bau bait ie lvman Tiang. Tiang nyerahang ie siq kemvlvq Tiang mvsaq. Tiang bekuase nyerahang ie, dait bekuase bait ie malik. Nike tugas saq Tiang terimaq lvman Bapa Tiang." 19 Lantaran Deside Isa bemanik maraq nike, dengan-dengan Yahudi mulai betungkasan. 20 Luwvq saq bebase, "Ie tekuasein siq svtan! Ie jogang! Kembvq side pade dengah Ie?" 21 Laguq araq vndah saq bebase, "Dengan saq tekuasein siq svtan ndvq ngeraos maraq nike! Napi bau svtan piaq dengan bute tao nyerioq?" 22 Lvq Yerusalem dengan-dengan kenyeke ngerayeang Hari Raye Peresmian Gedvng Allah. Waktu nike musim telih. 23 Deside Isa kenyeke bemargi lvq Sesangkok Sulaiman lvq dalem Gedvng Allah, 24 sewaktu dengan-dengan Yahudi dateng bekumpul lvq sekelining Deside Isa. Ie pade matur, "Jangke piran Pelungguh alurang tiang pade bimbang? Manikang secare terus terang, lamun Pelungguh tetu-tetu Almasih." 25 Jawab Deside Isa, "Sampun Tiang badaq side, laguq side pade ndvq percaye. Karye-karye saq Tiang laksaneang dalem pesvngan Bapa Tiang, nike ngebvng bukti mengenai Tiang. 26 Side pade ndvq percaye svngaq side pade ndvq tame itungan dombe-dombe Tiang. 27 Dombe-dombe Tiang dengahang suare Tiang. Tiang kenal ie pade, dait ie pade turut Tiang. 28 Tiang ngebvng idup sejati dait kekel tipaq ie pade dait ie pade pasti ndvq gen binase selavq-lavqne. Ndvq araq sopoq dengan juaq saq bau ngerampas ie pade lvman imen Tiang. 29 Bapa Tiang, saq sampun ngicanin ie pade lvq Tiang, belvqan lvman selapuqne. Dait ndvq sopoq dengan juaq bau ngerampas ie pade lvman Bapa. 30 Tiang dait Bapa sopoq." 31 Beterus dengan-dengan Yahudi bait malik batu jari melvwas Deside Isa. 32 Laguq manik Deside Isa lvq ie pade, "Side pade sampun serioq Tiang ngelaksaneang luwvq karye saq solah, saq tetugasang siq Bapa lvq Tiang. Saq mbv lvq antare karye nike saq jari penyebap side pade mvlv melvwas Tiang?" 33 Jawab dengan-dengan Yahudi nike, "Nvnten lantaran karye-karye Pelungguh saq solah nike tiang pade mvlv melvwas Pelungguh kadu batu, laguq lantaran Pelungguh menghine Allah. Pelungguh manusie biase, laguq padeang diriq kance Allah?" 34 Beterus jawab Deside Isa, "Tekan araq tetulis lvq dalem Kitab Suci Taurat, Allah bemanik, 'Side pade dvwe'? 35 Jari, lamun ie pade tesebut dvwe lantaran Manik Allah tesampvang tipaq ie pade -- padahal Kitab Suci ndvqne bau tebatalang --, 36 napi masih side pade bebase tipaq Ie saq tesuciang dait teutus ojok dunie siq Bapa: Side menghine Allah! Svngaq Tiang sampun bemanik, "Tiang Bije saq asalne lvman Allah? 37 Lamun Tiang ndvq ngelaksaneang karye-karye Bapa Tiang, ndaq percaye lvq Tiang. 38 Laguq lantaran Tiang ngelaksaneang hal nike, pade percaye lvq napi saq Tiang laksaneang nike, timaq side pade ndvq mvlv percaye lvq Tiang. Advq side pade nenaoq dait ngerti bahwe Bapa lvq dalem Tiang, dait Tiang lvq dalem Bapa." 39 Ie pade berusahe malik bau Deside Isa, laguq Deside Isa luput lvman ie pade. 40 Deside Isa tulak ojok itoqan Kokoq Yordan, lvq taoq Yahya lavq baptis dengan, terus meneng lvq derike. 41 Luwvq dengan parek ojok Deside Isa. Ie pade matur, "Yahya nvnten ngelaksaneang keajaipan-keajaipan, laguq selapuq saq ie sampvang mengenai dengan niki mule kenaq." 42 Beterus luwvq dengan lvq derike percaye lvq Deside Isa.

11:1 Araq sopoq dengan aranne Lazarus ndot lvq Betania bareng-bareng kance semetonne Mariam dait Marta. 2 Mariam nike dengan nine saq nolvngang minyak sengvh lvq cokor Junjungan Saq Mulie, dait osokne siq bulune. Lvq sopoq waktu Lazarus sakit. 3 Deduaq semetonne suruq dengan nyampvang kabar niki tipaq Deside Isa, "Junjungan Saq Mulie, dengan saq Pelungguh kasihin nike kenyeke sakit." 4 Sewaktu Deside Isa pireng kabar nike, Ie bemanik, "Penyakit niki ndvq gen miaq ie ninggal. Niki telaksane advq Allah temulieang dait siq care nike Bije saq asalne lvman Allah vndah temulieang." 5 Deside Isa ngasihin Marta, Mariam dait Lazarus. 6 Laguq waktu Deside Isa mauq berite bahwe Lazarus sakit, Ie sediah mererepan lvq taoqne due jelo malik. 7 Sesampun nike baruq Deside Isa bemanik lvq pengiring-pengiring-Ne, "Silaq ite tulak ojok Yudea." 8 Jawab ie pade, "Bapaq Guru, baruq gati dengan-dengan Yahudi mvlv melvwas Pelungguh kadu batu dait mangkin Pelungguh kayun tulak ojok derike?" 9 Manik Deside Isa, "Tekan kenjelo ngonvqne due olas jam? Dengan saq lampaq lvq waktu kenjelo, ndvq gen kedantuk svngaq ie serioq cahaye dunie niki. 10 Laguq dengan saq lampaq lvq kekelem kedantuk, svngaq ndvq araq cahaye lvq ie." 11 Maraq nike manik Deside Isa. Beterus Ie bemanik malik, "Sahabatte Lazarus tindoq, laguq Tiang gen lalo nguresang ie." 12 Pengiring-pengiring Deside Isa matur, "Junjungan Saq Mulie, lamun Lazarus tindoq, laun ie gen selah." 13 Maksut Deside Isa nike bahwe Lazarus sampun ninggal. Laguq ie pade paran Deside Isa bemanik bahwe Lazarus tindoq biase. 14 Keranaq nike Deside Isa bemanik secare terus-terang tipaq ie pade, "Lazarus sampun ninggal. 15 Laguq Tiang seneng vndah svngaq Tiang ndvq araq lvq derike, svngaq solahan umaq side pade advq side pade iniq percaye. Mangkin silaq ite lumbar ojok Lazarus." 16 Tomas saq tesebut, "Didimus" bebase lvq batur-baturne saq pade-pade pengiring Deside Isa, "Silaq ite milu, alur ite ninggal bareng Ie." 17 Sewaktu Deside Isa rauh lvq taoq nike, Lazarus sampun empat jelo ngonvqne tekubur. 18 Betania nike rapet lvman Yerusalem, kire-kire telu kilomvter jaoqne. 19 Luwvq dengan Yahudi dateng ojok Marta dait Mariam jari hibur angen ie pade svngaq semetonne ninggal. 20 Sewaktu Marta dengah bahwe Deside Isa rauh, ie sugul jari nyambut Deside Isa, laguq Mariam ndot lvq balv. 21 Marta matur lvq Deside Isa, "Junjungan Saq Mulie, lamun waktu nike Pelungguh araq lvq deriki, pasti semeton tiang ndvq milinang. 22 Timaq maraq nike tiang nenaoq bahwe mangkin niki vndah Allah gen ngicanin napi juaq saq Pelungguh tunas lvq Ie." 23 Manik Deside Isa tipaq Marta, "Semetonde gen idup malik." 24 Jawab Marta, "Tiang nenaoq Lazarus gen idup malik lamun dengan ninggal teidupang lvq ahir jaman." 25 "Tiang saq ngebvng idup dait ngidupang dengan ninggal." Manik Deside Isa tipaq Marta, "Dengan saq percaye lvq Tiang gen idup, timaq ie sampun ninggal. 26 Dait dengan idup saq percaye lvq Tiang, ndvq gen binase selavq-lavqne. Napi side percaye lvq hal nike?" 27 Jawab Marta, "Junjungan Saq Mulie, tiang percaye Pelungguh niki Almasih, Bije saq asalne lvman Allah, saq gen rauh ojok dalem dunie niki." 28 Sesampun Marta bebase maraq nike, ie lumbar ngempoh Mariam, semetonne dait bepvsvq lvq ie, "Bapaq Guru araq lvq deriki; Ie ketuanang side." 29 Dengah hal nike, Mariam becat-becat ures, terus lumbar ojok Deside Isa. 30 Waktu nike, Deside Isa ndvqman tame ojok dvse. Ie masih lvq taoq Marta bedait kance Ie. 31 Dengan-dengan Yahudi saq kenyeke hibur angen Mariam lvq balv, serioq Mariam becat-becat ures dait sugul; terus ie pade lumbar turut ie, svngaq ie pade paran Mariam lumbar nangis ojok kubur. 32 Sewaktu Mariam dateng lvq taoq Deside Isa dait serioq Ie, Mariam sujut lvq arepan-Ne dait matur, "Junjungan Saq Mulie, lamun Pelungguh araq lvq deriki waktu nike, pasti semeton tiang ndvq milinang." 33 Sewaktu Deside Isa cingakin Mariam nangis, dait dengan-dengan Yahudi saq dateng bareng Mariam nike vndah nangis, Deside Isa sedih gati. 34 Make Deside Isa beketuan tipaq ie pade, "Lvq mbv side pade nguburang ie?" "Silaq Junjungan Saq Mulie cingakin," jawab ie pade. 35 Beterus Deside Isa besermin. 36 Make dengan-dengan Yahudi nike bebase, "Serioq, belvq gati kasih-Ne lvq Lazarus!" 37 Laguq araq lvq antare ie pade saq bebase, "Ie piaq dengan bute tao nyerioq, kembvq Ie ndvq bau segah advq Lazarus ndvq milinang?" 38 Deside Isa asvq malik, beterus lumbar ojok kubur. Kubur nike sopoq goe saq teimpet kadu batu belvq. 39 "Alih batu nike," manik Deside Isa. Jawab Marta semeton dengan saq ninggal nike, "Junjungan Saq Mulie, ie sampun empat jelo tekubur. Pasti sampun bais!" 40 Deside Isa bemanik lvq Marta, "Tekan sampun Tiang badaq side: Lamun side percaye, side gen serioq kemuliean Allah!" 41 Make ie pade alih batu nike. Beterus Deside Isa nengadah andang langit dait bemanik, "Ya Bapa, Tiang ngucapang syukur tipaq Deside, svngaq Deside sampun mirengang Tiang. 42 Tiang nenaoq bahwe Deside tetep mirengang Tiang, laguq Tiang matur maraq niki, lantaran dengan-dengan saq araq lvq deriki; advq ie pade percaye bahwe Deside saq ngutus Tiang." 43 Sesampun bemanik maraq nike, Deside Isa bemanik siq suare saq belvq, "Lazarus, sugul!" 44 Make dengan saq sampun ninggal nike sugul. Ime dait navne masih tebungkus siq kain putvq, dait muene masih tetutup siq kain penutup mue. Terus manik Deside Isa tipaq dengan-dengan lvq derike, "Lekaq kain-kain nike advq ie ndvq kelalah lampaq." 45 Luwvq dengan-dengan Yahudi saq dateng jangoq Mariam, percaye lvq Deside Isa sesampun serioq peristiwe nike. 46 Laguq pire dengan lvq antare ie pade lumbar ojok dengan Parisi dait ngelaporang napi saq sampun telaksaneang siq Deside Isa. 47 Keranaq nike dengan-dengan Parisi dait imam-imam kepale ngaraqang sangkep bareng Mahkamah Agame. Ie pade bebase, "Napi saq harus ite piaq? Dengan niki luwvq piaq keajaipan! 48 Lamun ite tetep ngalurang Ie maraq niki selapuq dengan gen percaye lvq Ie! Dait ahirne dengan-dengan Roma gen dateng dait ngancurang Gedvng Allah lantong selapuq bangsente!" 49 Salaq sopoq lvman ie pade saq aranne Kayapas, Imam Agung lvq taun nike, bebase, "Side pade ndvq nenaoq napi-napi. 50 Napi side pade ndvq sadar bahwe demi rakyat, solahan sopoq dengan ninggal ketimbang selapuq bangse ancur?" 51 Setetune Kayapas bebase maraq nike, ndvq lvman pikiranne mvsaq. Laguq sebagv Imam Agung lvq taun nike ie benubuat bahwe Deside Isa gen ninggal umaq bangse Yahudi. 52 Dait ndvq umaq bangse Yahudi doang, laguq vndah jari ngumpulang dait pesopoq bije-bije dowvn Allah saq sampun bepencar-pencar. 53 Mulai jelo nike pare penguase Yahudi besekongkol jari nyematvq Deside Isa. 54 Keranaq nike Deside Isa nvnten nyatayang diriq-Ne lvq julun dengan luwvq lvq kalangan dengan Yahudi. Deside Isa bilin Yudea, beterus lumbar ojok kote saq aranne Epraim dvkvt padang gurun. Lvq taoq nike Ie meneng bareng pengiring-pengiring-Ne. 55 Waktu nike sampun rapet Hari Raye Paskah Yahudi. Luwvq dengan lvman dvse-dvse sampun lumbar ojok Yerusalem jari ngelaksaneang upacare mersiq diriq sendvqman perayaan nike. 56 Ie pade boyaq Deside Isa, dait sewaktu bekumpul lvq Gedvng Allah, ie pade bebase sopoq kance saq lainne, "Berembv pendapet side? Sang Ie ndvq dateng lvq perayaan niki." 57 Ie pade bebase maraq nike svngaq imam-imam kepale dait dengan-dengan Parisi sampun nyugulang prvntah bahwe dengan saq nenaoq lvq mbv Deside Isa araq, harus ngelaporang advq Ie tebau.

12:1 Enem jelo sendvqman Hari Raye Paskah, Deside Isa lumbar ojok Betania. Lazarus saq sampun teidupang siq Deside Isa lvman tengaq-tengaq dengan ninggal, ndot lvq taoq nike. 2 Lvq derike Deside Isa tejamu siq ie pade dait Marta vndah milu nulung ie pade. Lazarus dait temuv-temuv bareng melinggih medaran kance Deside Isa. 3 Beterus dateng Mariam, jauq kire-kire setenge liter minyak sengvh narwastu saq mahel gati. Ie nolvngang minyak nike lvq cokor Deside Isa, dait osokne kadu bulune. Selapuq balv nike jari sengvh siq ambu minyak nike. 4 Laguq Yudas Iskariot, salaq sopoq pengiring Deside Isa -- saq selanjutne behianat lvq Ie -- bebase, 5 "Kembvq minyak sengvh nike ndvq tejual doang siq aji telu ratus kvpvng perak, dait kvpvngne tesedekahang tipaq dengan miskin?" 6 Yudas bebase maraq nike ndvqne lantaran ie merhatiang dengan miskin, laguq lantaran ie pemalingan. Ie kereng bait kvpvng kas saq tesimpen lvq ie. 7 Laguq Deside Isa bemanik, "Alurang dengan nine nike! Ie ngelaksaneang hal niki jari jelo pemakaman Tiang. 8 Dengan miskin tetep araq lvq antare side pade, laguq Tiang ndvq." 9 Luwvq dengan Yahudi dengah bahwe Deside Isa araq lvq Betania, jari ie pade lumbar ojok derike. Ie pade lumbar ndvq cume lantaran Deside Isa, laguq vndah ie pade mvlv serioq Lazarus saq sampun teidupang siq Deside Isa lvman tengaq-tengaq dengan ninggal. 10 Keranaq nike imam-imam kepale vndah mvlv nyematvq Lazarus; 11 svngaq ie jari penyebap luwvq dengan Yahudi bilin ie pade dait percaye lvq Deside Isa. 12 Lvq jelo jemaqne, dengan luwvq saq sampun dateng jari ngerayeang Paskah dengah bahwe Deside Isa kenyeke dalem pemargian ojok Yerusalem. 13 Ie pade bait daun-daun palem beterus lumbar nyambut Ie, sambil besurak-surakan, "Hosana! Teberkahin Ie saq rauh dalem pesvngan Tuhan, Raje Israel!" 14 Deside Isa ndait sopoq bagal saq masih odaq, terus Ie tavk lvq atasne. Make telaksane saq tetulis dalem Kitab Suci: 15 "Ndaq takut, putri Sion! Pade serioq Rajende rauh, nunggang sopoq bagal saq masih odaq!" 16 Waktu nike pengiring-pengiring Deside Isa ndvqman ngerti selapuqne nike. Laguq sesampun Deside Isa temulieang, baruq ie pade inget bahwe selapuq saq telaksane lvq Deside Isa nike sampun tetulis lvq Kitab Suci, maraq nike vndah selapuq hal saq sampun ie pade laksaneang tipaq Deside Isa. 17 Dengan-dengan saq araq waktu Deside Isa ngemanikang Lazarus sugul lvman kubur dait ngidupang ie lvman ninggal, terus ngebvng kesaksian mengenai hal nike. 18 Keranaq nike dengan luwvq nike lumbar ojok Deside Isa svngaq ie pade dengah bahwe Deside Isa saq miaq keajaipan nike. 19 Make dengan-dengan Parisi bebase sopoq kance saq lainne, "Ite ndvq bau piaq napi-napi! Silaq serioq, seantvro dunie lumbar turut Ie!" 20 Lvq antare dengan-dengan saq lumbar ibadah ojok Yerusalem waktu perayaan nike araq vndah pire dengan Yunani. 21 Ie pade dateng ojok Pilipus dait bebase, "Paq, lamun bau tiang pade melvt bedait kance Deside Isa." (Pilipus asalne lvman Betsaida lvq Galilea.) 22 Beterus Pilipus lumbar nyampvang hal nike tipaq Andreas, deduaqne nyampvang tipaq Deside Isa. 23 Deside Isa bemanik lvq ie pade, "Sampun waktune Bije Manusie temulieang. 24 Tiang badaq side: Setetune lamun setolang gandum ndvq tetalet lvq dalem tanaq dait matv, ie gen tetep araq setolang. Laguq lamun tolang gandum nike matv, baruq ie bau ngasilang luwvq gandum. 25 Dengan saq tunah nyawene gen kvlangan nyawene. Laguq dengan saq meriq lvq nyawene lvq dunie niki, gen meliharaq ie jari idup sejati dait kekel. 26 Dengan saq mvlv ngelayanin Tiang harus turut Tiang, dait lvq mbv Tiang araq lvq derike vndah pelayan Tiang araq. Dengan saq ngelayanin Tiang gen tehormatin siq Bapa Tiang." 27 "Angen Tiang kuatir; napi saq harus Tiang ucapang mangkin? Napi Tiang harus ngucapang, 'Bapa, selametang Tiang mulai mangkin?' Laguq malahan Tiang dateng jari ngalamin penderitean niki. 28 Bapa, mulieang pesvngan Deside!" Make kedengahan suare lvman langit, "Tiang sampun mulieang Ie, dait Tiang gen mulieang Ie malik." 29 Dengan luwvq saq araq lvq derike dengah suare nike. Ie pade bebase, "Nike guntur!" Laguq araq vndah saq bebase, "Ndvq ie! Malavkat bebaos lvq Ie!" 30 Beterus Deside Isa bemanik lvq ie pade, "Suare nike kedengahan, ndvq jari kepentingan Tiang, laguq jari kepentingan side. 31 Mangkin sampun waktune dunie tehakimin; mangkin penguase dunie niki gen tetetvh ojok luah. 32 Laguq Tiang niki, lamun Tiang tetavkang lvman gumi, Tiang gen antuq selapuq dengan dateng ojok Tiang." 33 Deside Isa bemanik maraq nike jari nyatayang berembv entane Ie gen ninggal. 34 Dengan luwvq nike bebase lvq Ie, "Menurut Hukum Taurat tiang pade, Almasih gen idup selavq-lavqne. Berembv Pelungguh bau bebaos bahwe Bije Manusie harus tetavkang lvman gumi? Sai Bije Manusie nike?" 35 Jawab Deside Isa, "Cume semendaq doang terang nike araq lvq antare side pade. Jari, pade lampaq semasih terang nike araq, advq peteng nike ndaq nguasein side pade. Dengan saq lampaq lvq tengaq peteng ndvqne taoq ojok mbv aningne. 36 Pade percaye lvq terang nike, semasih terang nike araq lvq side, advq side pade jari bije-bije terang." Sesampun bemanik maraq nike, Deside Isa lumbar nyeboq lvman ie pade. 37 Timaq sampun luwvq keajaipan saq tepiaq siq Deside Isa lvq julu ie pade, ie pade ndvq percaye lvq Deside Isa. 38 Siq care nike telaksane napi saq tesampvang siq nabi Yesaya, "Tuhan, sai saq percaye lvq berite tiang pade? Lvq sai kuase Tuhan tenyatayang?" 39 Keranaq nike ie pade ndvq iniq percaye, svngaq Yesaya sampun bebase vndah, 40 "Ie sampun buteang penenteng dait miaq atv ie pade jari pagah; advq ie pade ndaq serioq siq penenteng, dait pikiran ie pade ngerti, terus betobat, sehingge Tiang nyelahang ie pade." 41 Yesaya bebase maraq nike svngaq ie sampun serioq kemuliean Deside Isa, dait bebase mengenai Ie. 42 Timaq maraq nike, malahan luwvq dengan lvq antare penguase Yahudi percaye lvq Deside Isa. Laguq ie pade ndvq bani akuq nike secare terus terang, svngaq ie pade takut ndaq-ndaq dengan Parisi ndvq ngijinang ie pade tame balv ibadah. 43 Ie pade demenan mauq pujian lvman manusie ketimbang pujian lvman Allah. 44 Beterus Deside Isa bemanik siq suare saq belvq, "Dengan saq percaye lvq Tiang, ndvq lvq Tiang ie percaye, laguq lvq Ie saq ngutus Tiang. 45 Dait dengan saq serioq Tiang, serioq Ie saq ngutus Tiang. 46 Tiang dateng ojok dunie jari terang, advq selapuq dengan saq percaye lvq Tiang ndaq ndot lvq dalem peteng. 47 Dengan saq dengahang pengajahan Tiang, laguq ndvq taat -- ndvqne Tiang saq hukum ie. Svngaq Tiang dateng ndvq jari hakimin dunie niki, laguq jari nyelametang ie. 48 Dengan saq nolaq Tiang dait ndvq dengahang manik Tiang, sampun araq saq hakimin ie. Manik saq Tiang sampvang, nike saq gen hakimin ie lvq ahir jaman. 49 Svngaq Tiang ndvq bemanik lvman kemvlvq Tiang mvsaq; Bapa saq ngutus Tiang, Ie saq prvntah Tiang napi saq harus Tiang ucapang dait Tiang sampvang. 50 Dait Tiang nenaoq bahwe prvntah-Ne nike ngicanin idup sejati dait kekel. Make Tiang nyampvang maraq saq teajahang Bapa lvq Tiang."

13:1 Sejelo sendvqman Hari Raye Paskah, Deside Isa wikan bahwe sampun waktune Ie bilin dunie niki jari tulak tipaq Bapa-Ne. Ie ngasihin dengan-dengan saq jari dowv-Ne lvq dunie, dait Ie tetep ngasihin ie pade jangke penutuq. 2 Sewaktu Deside Isa dait pengiring-pengiring-Ne kenyeke medaran, Belis sampun tamaqang niat lvq dalem atv Yudas bije Simon Iskariot jari behianat lvq Deside Isa. 3 Deside Isa wikan bahwe Bapa sampun nyerahang selapuq kekuasean tipaq Ie. Ie wikan vndah bahwe Ie rauh lvman Allah dait gen tulak tipaq Allah. 4 Keranaq nike Ie ngadeg, lekaq jubah-Ne terus bebet-Ne kain lvnen lvq kvng-Ne. 5 Sesampun nike, Ie isiq aiq ojok dalem tepaq, beterus mulai bisoq navn pengiring-pengiring-Ne dait lapne kadu kain lvnen saq tebebet lvq kvng-Ne nike. 6 Sewaktu giliran navn Simon Petrus tebisoq, ie matur lvq Deside Isa, "Junjungan Saq Mulie, Pelungguh gen bisoq navn tiang?" 7 Jawab Deside Isa, "Mangkin side ndvq ngerti napi saq Tiang laksaneang niki, laguq vraq side gen ngerti." 8 Jawab Petrus lvq Deside Isa, "Junjungan Saq Mulie, sampunang gati Junjungan Saq Mulie bisoq navn tiang!" Laguq jawab Deside Isa, "Lamun Tiang ndvq bisoq navnde, side ndvq mauq bagian bareng Tiang." 9 Simon Petrus matur, "Lamun maraq nike, Junjungan Saq Mulie, sampunang cume navn tiang laguq ime dait ulu tiang vndah!" 10 Manik Deside Isa lvq Petrus, "Dengan saq sampun mandiq, sampun bersi selapuqne Ie ndvq perlu tepersiq malik; kecuali navne. Side pade sampun bersi, laguq ndvq selapuqne." ( 11 Deside Isa sampun wikan sai saq gen behianat lvq Ie. Keranaq nike Ie bemanik, "Side pade sampun bersi, laguq ndvq selapuqne.") 12 Sesampun Deside Isa bisoq navn ie pade, Ie kadu malik jubah-Ne dait melinggih. Terus Deside Isa bemanik lvq ie pade, "Napi side pade ngerti saq Tiang laksaneang lvq side? 13 Side pade ngempoh Tiang Guru dait Junjungan Saq Mulie. Dait mule maraq nike setetune. 14 Lamun Tiang jari Junjungan Saq Mulie dait Gurunde sampun bisoq navn side, side pade wajib vndah saling bisoqang nav. 15 Tiang ngebvng teladan niki lvq side pade, advq side pade laksaneang vndah napi saq sampun Tiang laksaneang lvq side. 16 Mule kenaq manik Tiang niki: Sopoq hambe ndvqne belvqan lvman majikanne, dait sopoq utusan ndvqne belvqan lvman saq ngutus ie. 17 Lamun side pade sampun nenaoq selapuqne niki, side pade gen bahagie lamun ngelaksaneang hal nike. 18 Napi saq Tiang sampvang niki ndvqne mengenai side pade selapuq. Tiang nenaoq sai-sai saq sampun Tiang pilvq. Laguq napi saq tetulis dalem Kitab Suci, harus telaksane, 'Dengan saq iring Tiang medaran, gen ngelawan Tiang.' 19 Hal nike mangkin Tiang sampvang lvq side pade, sendvqman telaksane, advq lamun laun hal nike telaksane, side pade gen percaye bahwe Tiang niki Ie. 20 Setetune kenaq manik Tiang niki: Sai nerimaq dengan saq Tiang utus, ie nerimaq Tiang. Dait sai saq nerimaq Tiang, nerimaq Ie saq ngutus Tiang." 21 Sesampun Deside Isa bemanik maraq nike, Ie jari asvq gati. Beterus Ie bemanik, "Tiang badaq side, setetune salaq sopoq lvq antare side pade gen behianat lvq Tiang." 22 Pengiring-pengiring-Ne saling vngat sopoq kance saq lain dait jari bingung, svngaq ie pade ndvq nenaoq sai saq temaksut siq Deside Isa. 23 Salaq sopoq pengiring saq tekasihin siq Deside Isa tokol lvq dvkvt Deside Isa. 24 Simon Petrus ngebvng isarat lvq ie advq ie metakvn lvq Deside Isa sai saq temaksut nike. 25 Beterus pengiring Deside Isa nike ngerapetin Deside Isa, dait metakvn, "Junjungan Saq Mulie, sai dengan nike?" 26 Jawab Deside Isa, "Dengan saq Tiang bvng ruti sesampun Tiang telep ruti nike ojok dalem jembung, ie dengan saq Tiang maksut." Make Deside Isa bait sepeleng ruti, telepangne ojok dalem jembung; beterus icanin-Ne tipaq Yudas, bije Simon Iskariot. 27 Sesampun Yudas nerimaq ruti nike, Belis tame ojok dalem atvne. Beterus Deside Isa bemanik lvq ie, "Becat laksaneang napi saq mvlv side laksaneang." 28 Ndvq araq sopoq dengan juaq lvq antare ie pade saq tokol bekelor lvq derike ngerti kembvq Deside Isa bemanik maraq nike lvq Yudas. 29 Araq saq paran bahwe Deside Isa manikang Yudas beli napi-napi saq teperluang lvq perayaan nike, atao ngicanin kvpvng tipaq dengan miskin -- svngaq Yudas nike jari bendahare lvq antare ie pade. 30 Sesampun Yudas nerimaq ruti nike, ie langsung sugul. Waktu nike sampun peteng. 31 Sesampun Yudas lumbar, Deside Isa bemanik, "Mangkin Bije Manusie temulieang dait Allah temulieang langan Ie. 32 Lamun Allah temulieang langan Ie, Ie vndah gen temulieang siq Allah langan diriq-Ne. Malahan Allah gelis gen ngemulieang Ie. 33 Bije-bije Tiang, Tiang ndvq gen ngonvq malik ndot kance side pade. Side pade gen boyaq Tiang, laguq maraq saq sampun Tiang badaq lvq dengan-dengan Yahudi, maraq nike vndah Tiang badaq side pade; ojok taoq saq Tiang laiq, side pade ndvq bau dateng. 34 Tiang ngebvng prvntah baru lvq side: Pade kasihin sopoq kance saq lain. Pade maraq Tiang ngasihin side pade, maraq nike vndah side pade harus saling kasihin. 35 Lamun side pade saling kasihin, selapuq dengan gen nenaoq bahwe side pade pengiring-pengiring Tiang." 36 Simon Petrus metakvn lvq Deside Isa, "Junjungan Saq Mulie, Pelungguh gen lumbar ojok mbv?" Jawab Deside Isa, "Ojok mbv lain Tiang, side ndvq bau milu mangkin. Side gen turut Tiang vraq." 37 Petrus metakvn malik, "Junjungan Saq Mulie, kembvq tiang nvnten bau turut Pelungguh mangkin? Tiang rvde matv demi Pelungguh!" 38 Jawab Deside Isa, "Napi tetu side rvde matv demi Tiang? Tiang badaq side pacu-pacu, laun sendvqman manuk ngungkung, side sampun telu kali tilas Tiang!"

14:1 "Ndaq osah angende," manik Deside Isa lvq ie pade. "Pade percaye lvq Allah dait pade percaye lvq Tiang vndah. 2 Lvq gedvng Bapa Tiang araq luwvq taoq ndot. Tiang lalo ojok derike jari nyedieang side pade taoq. Tiang ndvq gen badaq side maraq nike, lamun ndvqne tetu maraq nike. 3 Sesampun Tiang lalo nyedieang taoq umaq side pade, Tiang gen tulak dait tutut side pade, advq lvq mbv Tiang araq, lvq derike vndah side pade araq. 4 Ojok taoq saq Tiang laiq side pade nenaoq langanne." 5 Beterus Tomas matur lvq Deside Isa, "Junjungan Saq Mulie, tiang pade ndvq nenaoq ojok mbv Pelungguh lumbar, berembv tiang pade nenaoq langanne?" 6 Jawab Deside Isa, "Tiang niki langan dait kebenaran dait idup. Ndvq araq sopoq dengan juaq saq bau parek tipaq Bapa lamun ndvq langan Tiang. 7 Lamun side pade kenal Tiang, pasti side pade gen kenal vndah Bapa Tiang. Mangkin side pade sampun kenal Ie, dait sampun serioq Ie!" 8 Beterus Pilipus matur lvq Deside Isa, "Junjungan Saq Mulie, nyatayang Bapa lvq tiang pade, advq tiang pade puas." 9 Laguq jawab Deside Isa, "Sampun bvgaq ngonvqne Tiang bareng kance side pade, laguq ndvqman vndah side kenal Tiang, Pilipus? Dengan saq sampun serioq Tiang, sampun serioq Bapa, berembv side iniq bebase, 'Silaq nyatayang Bapa lvq tiang pade'? 10 Pilipus! Napi side ndvq percaye, bahwe Tiang lvq dalem Bapa, dait Bapa lvq dalem Tiang? Napi saq Tiang sampvang lvq side, ndvq Tiang sampvang lvman diriq Tiang mvsaq. Bapa saq tetep lvq dalem Tiang, Ie saq ngelaksaneang selapuqne nike. 11 Pade percaye lvq Tiang, bahwe Tiang niki lvq dalem Bapa, dait Bapa lvq dalem Tiang, atao paling ndvq pade percaye lvq napi saq sampun Tiang laksaneang. 12 Tiang badaq side: Setetune dengan saq percaye lvq Tiang, gen ngelaksaneang napi saq sampun Tiang laksaneang -- malahan ie gen ngelaksaneang saq belvqan malik -- svngaq Tiang lalo tipaq Bapa. 13 Dait napi-napi saq side pade tunas kadu aran Tiang, gen Tiang laksaneang, advq Bapa temulieang langan Bije. 14 Napi-napi saq side pade tunas kadu aran Tiang, gen Tiang laksaneang." 15 "Lamun side pade ngasihin Tiang, side pade gen ngelaksaneang prvntah-prvntah Tiang. 16 Tiang gen tunas lvq Bapa, dait Ie gen ngicanin side Penulung lain, saq gen bareng side pade selavq-lavqne. 17 Ie nike Roh Kebenaran. Dunie ndvq iniq nerimaq Ie, svngaq dunie ndvqne serioq Ie dait ndvqne kenal Ie. Laguq side kenal Ie, svngaq Ie araq bareng side pade dait gen ndot kance side pade. 18 Side pade ndvq gen Tiang bilin jari anak iwoq. Tiang gen tulak tipaq side. 19 Karing semendaq dunie ndvq gen serioq Tiang malik. Laguq side pade gen serioq Tiang. Dait lantaran Tiang idup, side pade gen idup vndah. 20 Lamun sampun dateng jelo nike, side pade gen nenaoq bahwe Tiang lvq dalem Bapa, side pade lvq dalem Tiang, dait Tiang vndah lvq dalem side pade. 21 Dengan saq taat lvq prvntah-prvntah Tiang dait ngelaksaneang prvntah-prvntah nike, ie saq ngasihin Tiang. Bapa Tiang gen ngasihin dengan saq ngasihin Tiang, dait Tiang vndah gen ngasihin dengan nike, dait nyatayang diriq Tiang lvq ie." 22 Yudas (saq ndvqne Iskariot) metakvn lvq Deside Isa, "Junjungan Saq Mulie, kembvq Pelungguh kayun nyatayang diriq tipaq tiang pade dait nvnten tipaq dunie?" 23 Jawab Deside Isa, "Dengan saq ngasihin Tiang, gen turut manik Tiang. Bapa Tiang gen ngasihin ie. Bapa dait Tiang gen rauh tipaq ie dait ndot bareng ie. 24 Dengan saq ndvq ngasihin Tiang, ndvq turut manik Tiang. Manik saq side pade dengah nike, ndvq lvman Tiang, laguq lvman Bapa saq ngutus Tiang. 25 Selapuqne nike Tiang sampvang lvq side semasih Tiang araq bareng kance side pade. 26 Laguq Roh Suci, Penulung saq gen teutus Bapa kadu aran Tiang, Ie saq gen ngajah side pade selapuqne dait ngingetang side pade lvq napi saq sampun Tiang sampvang tipaq side pade. 27 Damv sejahtere Tiang advqang umaq side pade. Damv sejahtere Tiang, Tiang bvng lvq side pade, dait napi saq Tiang bvng ndvq maraq saq tebvng siq dunie tipaq side. Ndaq osah dait takut. 28 Side pade sampun dengahang Tiang bemanik, 'Tiang gen lalo, laguq Tiang gen dateng malik ojok side.' Lamun side pade ngasihin Tiang, side pade gen besukecite lantaran Tiang lalo tipaq Bapa, svngaq Bapa belvqan lvman Tiang. 29 Mangkin Tiang badaq hal nike lvq side, sendvqman selapuqne telaksane, advq lamun vraq hal nike telaksane, side pade gen percaye. 30 Tiang ndvq gen badaq side padu luwvqan malik, svngaq sampun waktune penguase dunie niki dateng. Laguq ie ndvq bedowv kuase napi-napi lvq diriq Tiang. 31 Timaqne maraq nike, advq dunie niki nenaoq bahwe Tiang ngasihin Bapa, make Tiang ngelaksaneang selapuq saq teprvntahang siq Bapa tipaq Tiang. Pade ures, silaq ite lumbar lvman deriki."

15:1 Deside Isa bemanik malik, "Tiang lolo anggur saq sejati, dait Bapa Tiang nike penggarapne. 2 Sebilang pvmpang saq araq lvq Tiang saq ndvq bebuaq, peleng-Ne dait sebilang pvmpang saq bebuaq tekurangin daunne dait persiq-Ne advq luwvqan malik buaqne. 3 Side pade sampun bersi lantaran manik saq Tiang sampvang lvq side pade. 4 Tetep ndot lvq dalem Tiang dait Tiang vndah tetep ndot lvq dalem side pade. Pade maraq pvmpang ndvqne iniq bebuaq lvman diriqne mvsaq, kecuali lamun ie tetep lvq lolone. Maraq nike vndah halne side pade ndvq gen bebuaq, lamun side pade ndvq ndot lvq dalem Tiang. 5 Tiang niki lolo anggur, dait side pade pvmpang-pvmpangne. Dengan saq tetep ndot lvq dalem Tiang, dait Tiang lvq dalem ie, ie bebuaq luwvq; svngaq lamun ndvq lvq dalem Tiang, side ndvq tao piaq napi-napi. 6 Dengan saq ndvq tetep ndot lvq dalem Tiang, gen tetetvh maraq pvmpang, beterus jari gero. Pvmpang-pvmpang saq maraq nike gen tekumpulang dait tetetvh ojok dalem api, beterus tesedut. 7 Lamun side pade ndot lvq dalem Tiang dait manik Tiang ndot lvq dalem side, pade tunas napi juaq saq side mvlv, dait side gen nerimaq ie. 8 Lamun side pade bebuaq luwvq, Bapa Tiang temulieang; dait siq care nike side tetu-tetu pengiring Tiang. 9 Maraq Bapa ngasihin Tiang, maraq nike vndah Tiang ngasihin side pade, pade ndot lvq dalem kasih Tiang nike. 10 Lamun side pade turut prvntah-prvntah Tiang, side pade gen ndot lvq dalem kasih Tiang, pade maraq Tiang sampun turut prvntah-prvntah Bapa Tiang dait ndot lvq dalem kasih-Ne. 11 Selapuqne niki Tiang sampvang tipaq side pade, advq sukecite Tiang araq lvq dalem atvnde, dait sukecitende jari sempurne. 12 Niki prvntah Tiang: Pade kasihin sopoq kance saq lain, pade maraq Tiang ngasihin side pade. 13 Ndvq araq kasih saq belvqan lvman kasih sopoq dengan saq rvde nyerahang nyawene umaq sahabat-sahabatne. 14 Side pade sahabat-sahabat Tiang lamun side pade ngelaksaneang napi saq Tiang prvntahang tipaq side pade. 15 Side pade ndvq Tiang sebut hambe malik, svngaq hambe ndvq nenaoq napi saq tepiaq siq majikanne. Side pade Tiang sebut sahabat, svngaq selapuq saq Tiang dengah lvman Bapa Tiang, sampun Tiang sampvang lvq side pade. 16 Ndvq side pade saq milvq Tiang. Laguq Tiang saq milvq side pade dait Tiang sampun netepang side pade lumbar dait ngasilang buaq dait buaqde nike ndvq iniq binase, advq napi saq side tunas tipaq Bapa kadu aran Tiang, icanin-Ne tipaq side. 17 Niki prvntah Tiang lvq side: Pade kasihin sopoq kance saq lain." 18 "Lamun dunie meriq lvq side pade, pade inget bahwe Tiang sampun juluan temeriq siq dunie. 19 Seandvne side pade lvman dunie side pade gen tekasihin siq dunie jari dowvne. Laguq Tiang sampun pilvq side pade lvman dunie niki, jari side pade ndvqne malik dowvn dunie. Keranaq nike dunie meriq lvq side pade. 20 Pade inget napi saq sampun Tiang sampvang lvq side pade, 'Hambe ndvqne belvqan lvman majikanne.' Lamun ie pade sampun nganiaye Tiang, make ie gen nganiaye side pade. Lamun ie pade turut manik Tiang, make ie pade vndah gen turut basen side pade. 21 Laguq selapuqne nike gen ie pade laksaneang lvq side pade lantaran aran Tiang, svngaq ie pade ndvq kenal Allah saq sampun ngutus Tiang. 22 Seandvne Tiang ndvq dateng dait ndvq nyampvang lvq ie pade, make ie pade ndvq bedose. Laguq mangkin ie pade ndvq bedowv alasan malik siq dose ie pade. 23 Dengan saq meriq lvq Tiang, ie vndah meriq lvq Bapa Tiang. 24 Seandvne Tiang ndvq ngelaksaneang karye lvq tengaq-tengaq ie pade maraq saq ndvq uwah telaksaneang siq dengan lain, pasti ie pade ndvq bedose. Laguq mangkin timaq ie pade sampun serioq selapuqne nike, tetep doang ie pade meriq lvq Tiang dait Bapa Tiang. 25 Laguq manik saq sampun araq tetulis lvq dalem Kitab Suci Taurat ie pade harus telaksane, 'Ie pade ndvq bedowv alasan napi-napi ie meriq lvq Tiang.' 26 Tiang gen ngutus tipaq side Penulung saq asalne lvman Bapa, nike Roh Kebenaran saq dateng lvman Bapa. Lamun Roh nike dateng, Ie gen besaksi mengenai Tiang. 27 Dait side pade vndah harus besaksi mengenai Tiang, svngaq side pade sampun bareng kance Tiang lvman penembvqne.

16:1 Selapuqne nike Tiang sampvang lvq side pade, advq side pade ndvq murtat. 2 Side pade gen tesugulang lvman balv-balv ibadah. Dait gen dateng waktune bahwe dengan saq nyematvq side pade gen paran diriqne ngabdi lvq Allah. 3 Ie pade laksaneang hal nike lvq side, svngaq ie pade ndvqman kenal Bapa dait Tiang. 4 Laguq mangkin Tiang sampvang hal nike lvq side, advq vraq lamun hal nike telaksane, side pade inget bahwe sampun Tiang sampvang tipaq side pade." "Hal niki ndvq Tiang sampvang lvq side pade lvman penembvqne, svngaq Tiang masih araq bareng kance side pade. 5 Laguq mangkin Tiang gen lalo ojok Ie saq ngutus Tiang; dait ndvq sopoq dengan juaq lvq antare side pade saq beketuan ojok mbv lain Tiang. 6 Malahan mangkin side pade asvq, lantaran Tiang sampvang hal nike lvq side pade. 7 Laguq Tiang sampvang hal saq kenaq lvq side pade: Solahan umaq side pade lamun Tiang lalo; svngaq lamun Tiang ndvq lalo, Penulung nike ndvq gen dateng ojok side pade. Laguq lamun Tiang lalo, Tiang gen ngutus Penulung nike ojok side pade. 8 Lamun Penulung nike dateng, Ie gen nyatayang tipaq dunie mengenai dose, mengenai kebenaran, dait mengenai penghakiman. 9 Mengenai dose, svngaq ie pade tetep ndvq percaye lvq Tiang; 10 mengenai kebenaran, svngaq Tiang lalo ojok Bapa dait side pade ndvq gen serioq Tiang malik; 11 mengenai penghakiman, svngaq penguase dunie niki sampun tehukum. 12 Luwvq malik saq mvlv Tiang sampvang tipaq side, laguq mangkin niki side ndvqman sanggup nerimaq hal nike. 13 Laguq lamun Roh nike dateng, nike Roh kebenaran, Ie gen bimbing side pade jari nenaoq selapuq saq kenaq; svngaq Ie ndvq gen bemanik lvman diriq-Ne mvsaq, laguq selapuq hal saq Ie pireng, nike saq gen Ie sampvang dait Ie gen beriteang tipaq side hal-hal saq gen dateng. 14 Ie gen mulieang Tiang, svngaq napi saq Ie sampvang tipaq side pade Ie terimaq lvman Tiang. 15 Selapuq saq araq lvq Bapa nike dowvn Tiang. Keranaq nike, Tiang badaq bahwe napi saq tesampvang siq Roh tipaq side pade, Ie terimaq lvman Tiang." 16 "Karing semendaq side pade ndvq gen serioq Tiang malik, dait karing semendaq vndah side pade gen serioq Tiang." 17 Pire dengan pengiring Deside Isa saling ketuan sopoq kance saq lainne, "Napi maksutne Ie bemanik lvq ite: 'Karing semendaq side pade ndvq gen serioq Tiang, dait karing semendaq vndah side pade gen serioq Tiang'? Napi vndah maksut-Ne bemanik, 'Tiang gen parek ojok Bapa'?" 18 Ie pade beketuan terus, "Napi artine, 'semendaq'? Ite ndvq ngerti Ie bebaos mengenai napi!" 19 Deside Isa wikan bahwe ie pade mvlv metakvn lvq Ie, make Ie bemanik, "Baruq Tiang sampvang, 'Karing semendaq doang side pade ndvq gen serioq Tiang, dait karing semendaq vndah side pade gen serioq Tiang.' Napi nike saq jari persoalan lvq antare side pade? 20 Setetune Tiang badaq side, side pade gen nangis dait asvq, laguq dunie gen gembire. Side pade gen susah, laguq kesusahande nike gen berobah jari sukecite. 21 Lamun sopoq dengan nine gen nganak, ie susah svngaq mule sampun wayene ie menderite. Laguq sesampun anakne sugul, ie lupaq lvq penderiteanne lantaran cemohne bahwe sopoq manusie sampun teanakang ojok dalem dunie. 22 Maraq nike vndah side pade: Mangkin side pade susah, laguq Tiang gen bedait malik kance side pade, make angende gen jari sukecite; dait ndvq araq sopoq dengan juaq saq bau bait sukecite nike lvman atvnde. 23 Lvq jelo nike, side pade ndvq gen beketuan napi-napi malik lvq Tiang. Tiang badaq side: Setetune napi doang saq side pade tunas lvq Bapa kadu aran Tiang, nike gen tekabulang siq Bapa. 24 Jangke mangkin niki side pade ndvqman tunas napi-napi kadu aran Tiang. Pade tunas, make side pade gen nerimaq, advq sukecitende jari sempurne." 25 "Selapuqne niki Tiang sampvang lvq side pade kadu perumpamean. Laguq gen dateng waktune, Tiang ndvq gen kadu perumpamean malik, laguq gen nyampvang secare terus-terang lvq side pade mengenai Bapa. 26 Lvq waktu nike side pade gen bedo'e tipaq Bapa kadu aran Tiang. Dait ndvq Tiang badaq side, bahwe Tiang gen tunasang side pade lvq Bapa, 27 svngaq Bapa mvsaq ngasihin side pade. Ie ngasihin side pade lantaran side pade ngasihin Tiang, dait percaye bahwe Tiang dateng lvman Allah. 28 Mule Tiang asalne lvman Bapa, dait sampun dateng ojok dalem dunie. Laguq mangkin Tiang bilin dunie jari tulak ojok Bapa." 29 Beterus pengiring-pengiring Deside Isa matur lvq Deside Isa, "Mangkin niki Junjungan Saq Mulie bemanik secare terus-terang, nvnten kadu perumpamean, 30 dait tiang pade nenaoq bahwe Junjungan Saq Mulie wikan selapuqne. Nvnten araq sopoq dengan juaq saq perlu ketuanang napi-napi tipaq Junjungan Saq Mulie. Keranaq nike tiang pade percaye bahwe Pelungguh rauh lvman Allah." 31 Jawab Deside Isa tipaq ie pade, "Jari, napi side pade percaye mangkin? 32 Inget! Waktune gen dateng, malahan sampun dateng, side pade gen bekelin sopoq kance saq lain. Side pade gen ulvq ojok balvnde mvsaq dait bilin Tiang mvsaq-mvsaq. Laguq Tiang ndvq mvsaq-mvsaq svngaq Bapa araq bareng Tiang. 33 Selapuqne niki Tiang sampvang advq side pade mauq damv sejahtere lvq dalem Tiang. Lvq dunie niki side pade gen menderite. Laguq teguqang atvnde! Tiang sampun ngalahang dunie!"

17:1 Sesampun bemanik maraq nike, Deside Isa bedo'e andang langit, "Bapa, mangkin sampun dateng waktune. Mulieang Bije Deside advq Bije Deside vndah mulieang Deside. 2 Deside sampun ngicanin tipaq Bije Deside kuase tipaq selapuq umat manusie, advq Ie ngicanin idup sejati dait kekel tipaq selapuq dengan saq Deside icanin tipaq Ie. 3 Niki idup sejati dait kekel; bahwe dengan kenal kance Deside, jari sopoq-sopoqne Allah saq kenaq, dait kenal kance Deside Isa Almasih saq sampun Deside utus. 4 Tiang sampun mulieang Deside lvq gumi siq care nyelesvang karye saq Deside serahang tipaq Tiang jari Tiang laksaneang. 5 Keranaq nike, Bapa, mangkin mulieang Tiang bareng-bareng kance Deside siq kemuliean saq sampun jari dowvn Tiang dait dowvn Deside sendvqman dunie niki tecipteang. 6 Tiang sampun nyatayang pesvngan Deside tipaq dengan-dengan lvq dunie saq sampun Deside icanin tipaq Tiang. Ie pade nike jari dowvn Deside, dait Deside sampun ngicanin ie pade tipaq Tiang dait ie pade sampun turut manik Deside. 7 Mangkin ie pade nenaoq bahwe selapuq saq Deside icanin tipaq Tiang asalne lvman Deside. 8 Sampun Tiang sampvang tipaq ie pade manik saq Deside icanin tipaq Tiang; dait ie pade sampun nerimaq manik nike. Ie pade nenaoq bahwe Tiang tetu-tetu dateng lvman Deside dait ie pade percaye bahwe Deside saq ngutus Tiang. 9 Tiang do'eang ie pade. Tiang nvnten do'eang dunie laguq jari dengan-dengan saq sampun Deside icanin tipaq Tiang, svngaq ie pade dowvn Deside. 10 Selapuq saq jari dowvn Tiang, jari dowvn Deside vndah. Dait selapuq dowvn Deside jari dowvn Tiang vndah. Tiang temulieang lvq antare ie pade. 11 Mangkin Tiang parek ojok Deside. Tiang nvnten ndot malik lvq dunie; laguq ie pade araq lvq dunie. Bapa, saq suci! Jagaq ie pade siq kekuasean pesvngan Deside, nike pesvngan saq sampun Deside icanin tipaq Tiang -- advq ie pade jari sopoq, pade maraq Deside kance Tiang vndah sopoq. 12 Lvq waktu Tiang masih bareng kance ie pade, Tiang sampun jagaq ie pade siq kuase pesvngan Deside -- pesvngan saq Deside icanin tipaq Tiang. Tiang sampun jagaq ie pade, dait nvnten araq sopoq juaq lvman ie pade saq binase; kecuali ie saq mule sampun tetentuang binase. Advq siq care nike telaksane napi saq tetulis lvq Kitab Suci. 13 Mangkin Tiang parek ojok Deside. Selapuqne niki Tiang sampvang semasih Tiang araq lvq dunie; advqne penoq sukecite Tiang lvq dalem ie pade. 14 Tiang sampun sampvang lvq ie pade selapuq manik Deside, dait dunie meriq lvq ie pade, svngaq ie pade nvnten dowvn dunie, pade maraq Tiang vndah nvnten dowvn dunie. 15 Tiang nvnten tunas advq Deside bait ie pade lvman dunie niki, laguq Tiang tunas advq Deside jagaq ie pade lvman saq jahat. 16 Pade maraq Tiang ndvqne lvman dunie, ie pade vndah ndvqne lvman dunie. 17 Suciang ie pade dalem kebenaran; manik Deside nike kebenaran. 18 Maraq Deside sampun ngutus Tiang ojok dunie, maraq nike vndah Tiang ngutus ie pade ojok dunie; 19 dait Tiang suciang diriq Tiang umaq ie pade, advq ie pade vndah tesuciang dalem kebenaran. 20 Nvnten ie pade doang saq Tiang do'eang, laguq Tiang vndah do'eang dengan-dengan saq percaye lvq Tiang siq kesaksian ie pade niki; 21 advq ie pade selapuq jari sopoq, pade maraq Deside lvq dalem Tiang, dait Tiang lvq dalem Deside, advq ie pade vndah lvq dalem Ite, advq dunie percaye, bahwe Deside saq sampun ngutus Tiang. 22 Tiang sampun ngicanin ie pade kemuliean saq Deside icanin lvq Tiang, advq ie pade jari sopoq, pade maraq Ite vndah sopoq; 23 Tiang lvq dalem ie pade, dait Deside lvq dalem Tiang; advq ie pade sempurne jari sopoq, advq dunie nenaoq bahwe Deside saq sampun ngutus Tiang, dait Deside ngasihin ie pade, pade maraq Deside ngasihin Tiang. 24 Bapa, Tiang melvt advq lvq mbv juaq Tiang araq, ie pade vndah araq bareng kance Tiang, ie pade saq sampun Deside icanin tipaq Tiang, advq ie pade serioq kemuliean Tiang saq sampun Deside icanin tipaq Tiang, svngaq Deside sampun ngasihin Tiang sendvqman dunie tecipteang. 25 Bapa saq adil! Mule dunie nvnten kenal kance Deside, laguq Tiang kenal kance Deside; dait ie pade niki nenaoq, bahwe Deside saq sampun ngutus Tiang, 26 dait Tiang sampun nyatayang pesvngan Deside tipaq ie pade; dait Tiang gen laksaneang hal nike, advq kasih Deside lvq Tiang tetep lvq dalem atv ie pade dait Tiang lvq dalem ie pade."

18:1 Sesampun Deside Isa bedo'e maraq nike, Ie kance pengiring-pengiring-Ne lumbar ojok itoqan Kokoq Kidron. Lvq derike araq sopoq taman, dait Deside Isa kance pengiring-pengiring-Ne tame ojok taman nike. 2 Taman nike sampun tetaoq siq Yudas saq behianat lvq Deside Isa; svngaq Deside Isa kance pengiring-pengiring-Ne rimpes bekumpul lvq derike. 3 Make Yudas lumbar ojok taoq nike. Jauqne sepasukan tentere Romawi kance pengawal-pengawal Gedvng Allah saq tesuruq siq imam-imam kepale dait dengan-dengan Parisi. Ie pade jauq gegaman, dilah dait obor. 4 Deside Isa wikan selapuq saq gen telaksane tipaq diriq-Ne. Jari Ie ngerapetin dengan-dengan nike, dait beketuan, "Sai saq side pade boyaq?" 5 "Deside Isa, dengan Nazaret," jawab ie pade. "Tiang niki Ie," jawab Deside Isa. Yudas penghianat nganjeng kance ie pade lvq derike. 6 Sewaktu Deside Isa bemanik lvq ie pade, "Tiang niki Ie," ie pade selapuq surut mudi dait rebaq ojok tanaq. 7 Deside Isa beketuan malik lvq ie pade, "Sai saq side pade boyaq?" "Deside Isa dengan Nazaret," jawab ie pade. 8 "Sampun Tiang badaq side, Tiang niki Ie," manik Deside Isa. "Dait lamun mule Tiang saq side pade boyaq, alurang dengan saq lain nike lumbar." ( 9 Siq manik-Ne nike, make telaksane napi saq sampun temanikang siq Deside Isa sendvqmanne: "Bapa, lvman dengan-dengan saq Bapa icanin tipaq Tiang, nvnten sopoq dengan juaq saq binase.") 10 Simon Petrus saq jauq klvwang, nyervt klvwangne terus ngerantek pelayan Imam Agung jangke pegat kentokne saq kanan. Aran pelayan nike Malkus. 11 Beterus Deside Isa bemanik tipaq Petrus, "Tamaqang malik klvwangde ojok sarungne! Napi side paran Tiang ndvq gen nginem cawan penderitean saq teicanin siq Bapa tipaq Tiang?" 12 Beterus prajurit-prajurit Romawi bareng komendanne dait pengawal-pengawal Yahudi bau dait svkoq Deside Isa. 13 Penembvqne ie pade jauq Deside Isa ojok Hanas, mentoaqne Kayapas. Lvq waktu nike Kayapas jari Imam Agung. 14 Kayapas nike saq sampun ngebvng nasvhat lvq pare penguase Yahudi bahwe solahan sopoq dengan ninggal umaq selapuq bangse. 15 Simon Petrus dait sopoq pengiring saq lain ngiring Deside Isa. Pengiring saq lain niki sampun kenal kance Imam Agung. Keranaq nike, ie tame bareng kance Deside Isa ojok lelvah gedvng Imam Agung, 16 laguq Petrus ngantih lvq luah, lvq jebak. Beterus pengiring saq lain nike sugul, dait ngeraos kance pelayan nine saq jagaq lawang, beterus jauqne Petrus tame ojok dalem. 17 Pelayan nine saq jagaq lawang nike bebase lvq Petrus, "Tekan side vndah salaq sopoq pengiring dengan nike?" "Ndvq," jawab Petrus. 18 Waktu nike kenyeke telih gati, jari pelayan-pelayan kance pengawal-pengawal penyalaq api kadu areng dait ie pade mindu lvq derike. Petrus vndah lumbar ojok derike dait milu mindu lvq api bareng ie pade. 19 Imam Agung metakvn lvq Deside Isa mengenai pengiring-pengiring-Ne dait mengenai perajahan-Ne. 20 Jawab Deside Isa, "Tiang tetep nyampvang secare terus terang lvq julun dengan luwvq. Tiang tetep ngajahang lvq balv-balv ibadah dait Gedvng Allah, taoq dengan Yahudi biasene bekumpul. Tiang ndvq uwah nyatayang napi-napi secare nyeboq-nyeboq. 21 Jari, kembvq pelungguh beketuan lvq Tiang? Silaq beketuan lvq dengan-dengan saq sampun dengahang pengajahan Tiang. Pasti ie pade nenaoq napi saq Tiang ajahang." 22 Sewaktu Deside Isa bemanik maraq nike, salaq sopoq pengawal lvq derike tempvlvk Deside Isa dait bebase, "Bani gati Side bebase maraq nike tipaq Imam Agung!" 23 Jawab Deside Isa, "Lamun Tiang ngucapang hal saq salaq, nyatayang lvq deriki napi kesalaqanne! Laguq lamun napi saq Tiang ucapang nike kenaq, kembvq side tempvlvk Tiang?" 24 Beterus Hanas suruq dengan jauq Deside Isa saq sampun tesvkoq nike ojok Imam Agung Kayapas. 25 Simon Petrus masih nganjeng mindu lvq derike. Dengan-dengan bebase lvq ie, "Tekan side vndah salaq sopoq pengiring-Ne?" Laguq Petrus nilas, "Ndvq!" 26 Sopoq pelayan Imam Agung, keluarge lvman dengan saq kentokne terantek siq Petrus, bebase, "Tekan onvq tiang serioq side lvq taman bareng kance Ie?" 27 Beterus Petrus nilas malik, "Ndvq," -- dait tepat lvq waktu nike manuk ngungkung. 28 Kelvmaq gati ie pade jauq Deside Isa lvman gedvng Kayapas ojok istane gubernur. Dengan-dengan Yahudi ndvq tame ojok dalem istane, advq ie pade ndvq jari najis menurut aturan agame, svngaq ie pade mvlv ngelorang keloran Paskah. 29 Keranaq nike Pilatus sugul dait beketuan lvq ie pade, "Napi tuduhan side pade tipaq dengan niki?" 30 Jawab ie pade, "Lamun Ie ndvq salaq, tiang pade ndvq gen jauq Ie ojok pelungguh." 31 Beterus basen Pilatus lvq ie pade, "Silaq bait dait adilin Ie menurut hukumde mvsaq!" Laguq jawab dengan-dengan Yahudi nike, "Tiang pade ndvq kanggo nyematvq dengan." ( 32 Siq care nike, make telaksane napi saq sampun temanikang siq Deside Isa mengenai berembv entane Ie gen ninggal.) 33 Pilatus tame malik ojok dalem istane, dait ngempoh Deside Isa, terus ie metakvn, "Napi tetu Pelungguh raje dengan Yahudi?" 34 Jawab Deside Isa, "Napi saq pelungguh ketuanang niki mule asalne lvman pelungguh mvsaq atao araq dengan lain saq badaq pelungguh mengenai Tiang?" 35 Jawab Pilatus, "Napi tiang niki dengan Yahudi? Saq nyerahang Pelungguh ojok tiang niki bangse Pelungguh mvsaq dait imam-imam kepale. Setetune napi saq Pelungguh sampun piaq?" 36 Jawab Deside Isa, "Kerajaan Tiang ndvq lvman dunie niki. Seandvne kerajaan Tiang lvman dunie niki, pengiring-pengiring Tiang gen bejuang advq Tiang ndvq teserahang ojok penguase Yahudi. Laguq mule kerajaan Tiang nike ndvq lvman dunie niki!" 37 Beterus Pilatus metakvn lvq Deside Isa, "Jari, Pelungguh niki Raje?" Jawab Deside Isa, "Pelungguh bebase bahwe Tiang niki Raje. Tiang tebijeang dait dateng ojok dunie niki siq sopoq maksut, ngebvng kesaksian mengenai kebenaran. Dengan saq asalne lvman kebenaran nike ie gen dengahang Tiang." 38 Pilatus metakvn malik lvq Deside Isa, "Napi artine kebenaran nike?" Sesampun nike Pilatus sugul malik lvman istane dait bebase lvq dengan-dengan Yahudi, "Tiang ndvq ndait sopoq juaq kesalaqan lvq Ie. 39 Laguq menurut adat saq biase, tiang harus bvbasang sopoq tahenan lvq Hari Raye Paskah. Napi side pade mvlv lamun tiang bvbasang Raje dengan Yahudi nike tipaq side pade?" 40 Ie pade bejawab nyurak-nyurak, "Sampunang Ie, laguq Barabas!" (Barabas nike tukang rampok.)

19:1 Beterus Pilatus tame dait suruq dengan mecut Deside Isa. 2 Prajurit-prajurit miaq sopoq mahkote lvman pvmpang-pvmpang beduwi, terus kaduangne lvq sirah Deside Isa. Sesampun nike ie pade kaduang Deside Isa jubah warne lempok lomaq, 3 terus sambil maju ojok julu ie pade bebase, "Idup raje dengan Yahudi!" Beterus ie pade tempvlvk Deside Isa. 4 Sesampun nike Pilatus sugul malik dait bebase tipaq dengan luwvq nike, "Pade serioq! Tiang jauq Ie sugul ojok side pade, advq side pade nenaoq tiang ndvq ndait sopoq juaq kesalaqan lvq Ie." 5 Make Deside Isa sugul dait kadu mahkote duwi dait jubah lempok lomaq. Pilatus bebase tipaq ie pade, "Serioq dengan niki." 6 Sewaktu imam-imam kepale dait pengawal-pengawal nike serioq Deside Isa, ie pade nyurak, "Pakuq Ie lvq kayuq salib! Pakuq Ie lvq kayuq salib!" Pilatus bebase tipaq ie pade, "Bait Ie, dait pakuq Ie lvq kayuq salib, svngaq tiang ndvq ndait sopoq juaq kesalaqan lvq Ie." 7 Jawab dengan-dengan Yahudi nike, "Tiang pade bedowv hukum dait menurut hukum nike Ie harus matv, svngaq Ie ngaku diriq-Ne Bije saq asalne lvman Allah." 8 Sewaktu Pilatus pirengang ie pade bebase maraq nike, ie sayan takut malik. 9 Beterus ie tame malik ojok dalem istane, dait sesampun Deside Isa tejauq tame, ie metakvn lvq Deside Isa, "Lvman mbv asal Pelungguh?" Laguq Deside Isa nvnten bejawab. 10 Make Pilatus metakvn malik, "Pelungguh nvnten kayun bebaos kance tiang? Advq Pelungguh wikan, tiang bedowv kuase bvbasang Pelungguh, dait kuase jari pakuq Pelungguh lvq kayuq salib!" 11 Jawab Deside Isa, "Lamun Allah nvnten ngicanin kuase nike tipaq pelungguh, pelungguh ndvq bedowv kuase napi-napi tipaq Tiang. Keranaq nike dengan saq nyerahang Tiang tipaq pelungguh, belvqan dosene lvman pelungguh." 12 Sewaktu Pilatus pirengang hal nike, ie berusahe bvbasang Deside Isa. Laguq dengan-dengan Yahudi nyurak-nyurak, "Lamun pelungguh bvbasang Ie, pelungguh nvnten sahabat Kaisar, dengan saq ngaku diriqne jari raje, ie ngelawan Kaisar!" 13 Sewaktu Pilatus pirengang ucapan-ucapan nike, ie jauq Deside Isa ojok luah terus melinggih lvq kursi pengadilan lvq taoq saq aranne Litostrotos. (Lvq dalem base Ibrani aranne Gabata.) 14 Waktu nike gen jam due olas tengari, jelo sendvqman Hari Raye Paskah. Pilatus bebase tipaq dengan-dengan nike, "Niki raje side pade!" 15 Ie pade nyurak-nyurak, "Matvq Ie! Matvq Ie! Pakuq Ie lvq kayuq salib!" Pilatus beketuan malik, "Napi rajende harus tiang pakuq lvq kayuq salib?" Jawab imam-imam kepale, "Cume Kaisar sopoq-sopoqne raje tiang pade!" 16 Beterus Pilatus nyerahang Deside Isa tipaq ie pade jari tepakuq lvq kayuq salib. Ie pade bait Deside Isa, terus jauq Ie lumbar. 17 Deside Isa sugul sambil ngelvmbah kayuq salib-Ne ojok taoq saq aranne "Taoq Jerangkong". (Lvq dalem base Ibrani tesebut, Golgota.) 18 Lvq derike Ie tepakuq lvq kayuq salib. Bareng-bareng kance Ie araq vndah due dengan lain saq tepakuq lvq kayuq salib; sopoq lvq sedi kiri, sopoqne malik lvq sedi kanan, dait Deside Isa lvq tengaq-tengaq. 19 Lvq kayuq salib Deside Isa, Pilatus suruq dengan pasang tulisan niki: "Isa lvman Nazaret, Raje Dengan Yahudi". 20 Luwvq dengan Yahudi bace tulisan nike, svngaq taoq Deside Isa tepakuq lvq kayuq salib nike ndvqne jaoq lvman kote. Tulisan nike kadu base Ibrani, Latin, dait Yunani. 21 Imam-imam kepale matur lvq Pilatus, "Sampunang tulis 'Raje dengan Yahudi', laguq tulis maraq niki, 'Dengan niki bebase, Tiang Raje dengan Yahudi.' " 22 Laguq jawab Pilatus, "Saq sampun tiang tulis, tetep tetulis." 23 Sesampun prajurit-prajurit nike pakuq Deside Isa lvq kayuq salib, ie pade bait kuace-Ne. Kuace nike tebagi empat: Sebilang dengan mauq sopoq bagian. Ie pade bait vndah jubah-Ne. Jubah nike ndvq araq jaitanne -- tesvsvk lvman atas jangke dateng bawaq. 24 Prajurit-prajurit nike bebase sopoq kance saq lain, "Ndaq ite peleng-peleng jubah niki. Silaq ite piaq undian jari nentuang sai saq mauq jubah nike." Siq care nike make telaksane napi saq tetulis dalem Kitab Suci: "Ie pade bagi-bagi kelambi Tiang, dait piaq undian jari mauq jubah Tiang." Hal nike saq telaksaneang siq prajurit-prajurit nike. 25 Lvq dvkvt kayuq salib Deside Isa, nganjeng mamiq bini-Ne, sanak mamiq bini-Ne, aranne Mariam senine Klopas, dait Mariam Magdalena. 26 Sewaktu Deside Isa cingakin mamiq bini-Ne dait pengiring-Ne saq Ie kasihin nganjeng lvq derike, Ie bemanik lvq mamiq bini-Ne, "Inaq, niki bijende." 27 Beterus Deside Isa bemanik tipaq pengiring-Ne nike, "Nike mamiq bini side." Mulai waktu nike pengiring-Ne nike nerimaq mamiq bini Deside Isa meneng lvq balvne. 28 Deside Isa wikan bahwe mangkin selapuqne sampun selesv, dait napi saq tetulis dalem Kitab Suci advq telaksane. Ie bemanik, "Tiang bedak." 29 Lvq derike araq sopoq jembung penoq siq aiq anggur saq pedis. Beterus ie pade celep sopoq bunge karang lvq aiq anggur nike, terus tancepne lvq hisop dait jonjongne ojok cangkem Deside Isa. 30 Sesampun Deside Isa inem anggur saq pedis nike, Ie bemanik, "Sampun selesv!" Beterus Ie nundukang sirah-Ne dait nyerahang nyawe-Ne. 31 Pare penguase Yahudi ndvq mvlv mayit dengan-dengan saq tepakuq lvq kayuq salib nike tetep begantung lvq kayuq salib lvq jelo Sabat, svngaq jelo Sabat nike Hari Raye saq husus. Svngaq jelo sewaktu Deside Isa tepakuq lvq kayuq salib nike tepat sejelo sendvqman jelo Sabat nike, dengan-dengan Yahudi tunas ijin lvq Pilatus jari molakang nav dengan-dengan saq sampun tepakuq lvq kayuq salib dait nurunang mayit-mayit nike lvman kayuq salib. 32 Make, prajurit-prajurit nike lumbar dait molakang juluan nav kedue dengan saq tepakuq lvq kayuq salib bareng Deside Isa. 33 Laguq sewaktu ie pade dateng lvq arepan Deside Isa, ie pade serioq Deside Isa sampun ninggal. Make ie pade ndvq molakang cokor-Ne. 34 Laguq salaq sopoq lvman prajurit nike galah woteng Deside Isa kadu tumbak; dait waktu nike vndah sugul daraq dait aiq. 35 Dengan saq serioq mvsaq peristiwe nike, ie saq nyeriteang hal nike, advq side pade vndah percaye. Dait kesaksianne nike kenaq, dait ie nenaoq bahwe nike kenaq. 36 Hal nike telaksane advqne genep napi saq tetulis dalem Kitab Suci, "Ndvq sopoq juaq tolang-Ne gen tepolakang." 37 Lvq dalem Kitab Suci vndah tetulis: "Ie pade gen perhatiang Ie saq sampun ie pade galah." 38 Sesampun nike Yusup lvman Arimatea tunas ijin lvq Pilatus jari bait jenazah Deside Isa. (Yusup nike pengiring Deside Isa laguq secare nyeboq-nyeboq, svngaq ie takut lvq penguase-penguase Yahudi.) Pilatus ngicanin ijin tipaq ie, jari ie lumbar bait jenazah Deside Isa. 39 Nikodemus, saq piranan sampun parek tipaq Deside Isa lvq kekelem, lumbar vndah bareng kance Yusup. Nikodemus jauq ramuan mur dait garu -- selapuqne kire-kire telung dase kilo luwvqne. 40 Kedue dengan nike bait jenazah Deside Isa, terus bungkusne kadu kain lvnen saq putvq bareng-bareng kance ramuan sengvh menurut adat penguburan dengan Yahudi. 41 Lvq taoq Deside Isa tepakuq lvq kayuq salib araq sopoq taman. Lvq dalem taman nike araq sopoq kuburan baru, saq ndvqman tekadu nguburang dengan. 42 Lantaran kuburan nike rapet, dait jelo nike jelo persiepan sendvqman jelo Sabat, ie pade makamang Deside Isa lvq derike.

20:1 Lvq jelo Ahad kelvmaq, waktu masih peteng, Mariam Magdalena lumbar ojok makam. Ie serioq batu pengimpetne nike sampun tealih lvman loang makam nike. 2 Ie pelai boyaq Simon Petrus dait pengiring saq tekasihin siq Deside Isa, terus bebase lvq ie pade, "Junjungan Saq Mulie sampun tebait lvman makam, dait tiang ndvq nenaoq lvq mbv Ie tetoloq." 3 Beterus Petrus dait pengiring saq lain nike lumbar ojok makam. 4 Deduaqne pelai, laguq pengiring saq lain nike becatan lvman Petrus, dait ie juluan dateng lvq makam. 5 Ie nidok ojok dalem makam dait serioqne kain putvq nike araq lvq derike, laguq ie ndvq tame. 6 Simon Petrus vndah dateng terutuk ie, dait tame ojok dalem makam nike. Ie serioq kain putvq araq lvq derike, 7 laguq kain saq tetaliq lvq sirah Deside Isa ndvq araq lvq dvkvtne laguq sampun belekut lvq taoq saq lain. 8 Beterus pengiring saq juluan dateng lvq makam, tame vndah. Ie serioq dait percaye. ( 9 Jangke lvq waktu nike ie pade ndvqman ngerti napi saq tetulis lvq dalem Kitab Suci bahwe Ie harus idup malik lvman ninggal.) 10 Sesampun nike kedue pengiring Deside Isa nike ulvq ojok balvne. 11 Mariam Magdalena nganjeng lvq julu makam sambil nangis. Sewaktu ie kenyeke nangis, ie nidok ojok dalem makam, 12 terus serioq due malavkat bekelambi putvq. Ie pade melinggih lvq onos taoq Deside Isa tesarvang, saq sopoq lvq bagian sirah, dait saq sopoqne malik lvq bagian cokor. 13 Malavkat-malavkat nike beketuan, "Kembvq side nangis, inaq?" Jawab Mariam, "Junjungan tiang Saq Mulie sampun tebait, dait tiang ndvq nenaoq lvq mbv Ie tetoloq." 14 Sesampun bebase maraq nike, ie ngvngat andang mudi, dait serioq Deside Isa ngadeg lvq derike. Laguq ie ndvq tandaq bahwe nike Deside Isa. 15 Deside Isa bemanik lvq ie, "Inaq, kembvq side nangis? Sai saq side boyaq?" Mariam paran nike tukang kebon, jari ie bebase, "Paq, lamun Side saq jauq Ie lvman deriki, tulung badaq tiang lvq mbv Side toloq Ie, advq tiang bau bait Ie." 16 Deside Isa bemanik lvq ie, "Mariam!" Mariam ngvngat andang Deside Isa, beterus matur kadu base Ibrani, "Rabuni!" (Saq artine, "Guru".) 17 "Ndaq demak Tiang," manik Deside Isa lvq ie, "svngaq Tiang ndvqman lalo ojok Bapa. Laguq silaq lumbar tipaq sanak-sanak Tiang, dait sampvang tipaq ie pade bahwe mangkin Tiang lalo ojok Bapa Tiang dait Bapa side vndah, Allah Tiang dait Allah side." 18 Terus Mariam lumbar nyampvang tipaq pengiring-pengiring Deside Isa bahwe ie sampun serioq Junjungan Saq Mulie, dait Junjungan Saq Mulie sampun manikang selapuqne nike lvq ie. 19 Lvq jelo Ahad nike vndah, sesampun kekelem, pengiring-pengiring Deside Isa bekumpul lvq sopoq balv saq lawang-lawangne telenting, svngaq ie pade takut lvq dengan-dengan Yahudi. Selung-selung Deside Isa rauh dait ngadeg lvq tengaq-tengaq ie pade, dait bemanik, "Damv sejahtere umaq side pade." 20 Sesampun bemanik maraq nike, Ie metitoqang gading dait woteng-Ne lvq ie pade. Sewaktu ie pade serioq Junjungan Saq Mulie, ie pade cemoh gati. 21 Beterus karing sekali Deside Isa bemanik lvq ie pade, "Damv sejahtere umaq side pade! Maraq Bapa ngutus Tiang, maraq nike vndah Tiang ngutus side pade." 22 Beterus Ie niupang embok-Ne lvq ie pade dait bemanik, "Terimaq niki Roh Suci. 23 Lamun side pade ngampunin dose dengan, Allah vndah ngampunin dengan nike. Lamun side pade ndvq ngampunin dose dengan, Allah vndah ndvq ngampunin dengan nike." 24 Tomas (saq tesebut Didimus), salaq sopoq lvman due olas pengiring Deside Isa, ndvq araq lvq taoq nike waktu Deside Isa rauh. 25 Make pengiring-pengiring Deside Isa saq lain bebase lvq Tomas, "Tiang pade sampun serioq Junjungan Saq Mulie!" Laguq jawab Tomas, "Lamun tiang ndvqman serioq onos paku lvq gading-Ne, dait ndvqman jujuq siq ranggot tiang ojok onos paku nike dait ndvqman noloq ime tiang lvq woteng-Ne, make tiang ndvqman mvlv percaye." 26 Baluq jelo sesampun nike pengiring-pengiring Deside Isa araq malik lvq dalem balv nike dait Tomas bareng-bareng kance ie pade. Selapuq lawang telenting. Laguq Deside Isa rauh dait ngadeg lvq tengaq-tengaq ie pade, terus bemanik, "Damv sejahtere umaq side pade." 27 Beterus Ie bemanik lvq Tomas, "Toloq ranggotde lvq deriki dait serioq imen Tiang, ulurang imende dait toloq lvq woteng Tiang. Ndaq ragu-ragu malik, laguq percaye!" 28 Tomas matur lvq Deside Isa, "Ya, Tuhan tiang dait Allah tiang!" 29 Beterus Deside Isa bemanik lvq ie, "Lantaran side sampun serioq Tiang, make side percaye. Bahagie ie pade saq ndvq serioq, laguq percaye." 30 Masih luwvq malik keajaipan-keajaipan lain saq tepiaq siq Deside Isa lvq julu pengiring-pengiring-Ne, laguq ndvq tetulis lvq dalem kitab niki. 31 Laguq selapuqne niki tetulis, advq side pade percaye bahwe Deside Isa nike Mesias, Bije saq asalne lvman Allah, dait advq siq percaye, side pade nerimaq idup dalem pesvngan-Ne.

21:1 Sesampun nike karing sekali Deside Isa nyatayang diriq lvq pengiring-pengiring-Ne lvq Danao Tiberias. Maraq niki kejarianne: 2 Lvq sopoq jelo Simon Petrus, Tomas saq tesebut Didimus, Natanael lvman Kana lvq Galilea, bije-bije Zebedeus, dait due pengiring Deside Isa saq lainne, kenyeke bekumpul. 3 Basen Simon Petrus lvq ie pade, "Tiang mvlv lalo bau empaq." "Tiang pade milu," basen ie pade lvq Petrus. Beterus ie pade lumbar tavk perau. Laguq sekeleman nike ie pade ndvq bau napi-napi. 4 Sewaktu tiwoq jelo, Deside Isa ngadeg lvq pesisi, laguq ie pade ndvq tandaq bahwe nike Deside Isa. 5 Deside Isa bemanik lvq ie pade, "Kanak-kanak, napi side pade bedowv empaq?" "Nvnten," jawab ie pade. 6 Deside Isa bemanik lvq ie pade, "Saut jaringde ojok sedi kanan perau, laun side pade gen mauq empaq." Terus ie pade saut jaringne, laguq ie pade ndvq bau antuq malik lantaran luwvq gati empaq lvq dalemne. 7 Pengiring saq tekasihin siq Deside Isa bebadaq lvq Petrus, "Nike Junjungan Saq Mulie!" Sewaktu Simon Petrus dengah bahwe nike Junjungan Saq Mulie, ie kadu kelambine, svngaq ie ndvq kadu kelambi, terus nimproh ojok aiq. 8 Pengiring-pengiring saq lain dateng kadu perau, svngaq ie pade ndvq jaoq lvman darat, cume kire-kire satus mvter doang dait ie pade antuq jaringne saq penoq siq empaq nike. 9 Sewaktu ie pade turun lvman perau, ie pade serioq araq barak api areng lvq derike dait empaq lvq atasne kance ruti. 10 Deside Isa bemanik lvq ie pade, "Jauq ojok deriki pire empaq saq baruq side pade bau." 11 Simon Petrus tavk ojok perau, terus antuq jaringne ojok darat. Jaring nike penoq siq empaq saq belvq-belvq: Selapuqne araq karobelah telu luwvqne. Dait timaq luwvqne maraq nike, jaringne ndvq sovk. 12 Deside Isa bemanik lvq ie pade, "Silaq bekelor." Ndvq araq sopoq dengan juaq lvman pengiring-pengiring-Ne saq bani metakvn, "Pelungguh sai?" Svngaq ie pade nenaoq bahwe Ie Junjungan Saq Mulie. 13 Beterus Deside Isa ngerapetin ie pade dait bait ruti nike dait ngicanin ie pade, maraq nike vndah empaq nike. 14 Niki ketelu kaline Deside Isa nyatayang diriq-Ne lvq pengiring-pengiring-Ne sesampun Ie idup malik lvman ninggal. 15 Sesampun ie pade bekelor, Deside Isa bemanik lvq Simon Petrus, "Simon bije Yahya, napi side lebih ngasihin Tiang lebihan lvman ie pade?" "Nggih, Junjungan Saq Mulie," jawab Petrus, "Pelungguh wikan tiang ngasihin Pelungguh." Deside Isa bemanik lvq ie, "Peliharaq dombe-dombe Tiang!" 16 Saq kedue kaline Deside Isa bemanik lvq ie, "Simon bije Yahya, napi side ngasihin Tiang?" "Nggih, Junjungan Saq Mulie," jawab Petrus, "Pelungguh wikan tiang ngasihin Pelungguh." Deside Isa bemanik lvq ie, "Peliharaq dombe-dombe Tiang." 17 Saq ketelu kaline Deside Isa bemanik lvq ie, "Simon bije Yahya, napi side ngasihin Tiang?" Petrus jari asvq svngaq Deside Isa bemanik lvq ie jangke telu kali. Make Petrus bejawab malik, "Junjungan Saq Mulie, Pelungguh wikan selapuq-lapuqne. Pelungguh wikan tiang ngasihin Pelungguh!" Beterus manik Deside Isa lvq ie, "Peliharaq dombe-dombe Tiang. 18 Tiang badaq side: Setetune sewaktu side masih bajang, side taliq kvngde mvsaq dait lampaq ojok mbv doang side mvlv, laguq lamun side sampun toaq, side gen ngulurang imende dait dengan lain gen naliq side dait jauq side ojok taoq saq side ndvq mvlv." 19 (Siq ucapan-ucapan nike, Deside Isa nyatayang berembv Petrus gen ninggal vraq jari mulieang Allah.) Sesampun nike Deside Isa bemanik lvq Petrus, "Turut Tiang!" 20 Sewaktu Petrus ngvngat, ie serioq bahwe pengiring saq tekasihin siq Deside Isa milu vndah. (Ie saq tokol dvkvt Deside Isa sewaktu medaran dait saq metakvn lvq Deside Isa, "Junjungan Saq Mulie, sai saq gen behianat lvq Pelungguh?") 21 Sewaktu serioq ie, Petrus metakvn lvq Deside Isa, "Junjungan Saq Mulie, berembv lvq dengan niki?" 22 Jawab Deside Isa, "Seandvne Tiang mvlv ie tetep idup jangke Tiang dateng, nike ndvqne urusande. Laguq side, turut Tiang!" 23 Make nyebar kabar lvq antare pengiring-pengiring Deside Isa bahwe pengiring nike ndvq gen ninggal. Padahal Deside Isa nvnten bemanik bahwe pengiring nike ndvq gen ninggal, laguq: "Seandvne Tiang mvlv ie tetep idup jangke Tiang dateng, nike ndvqne urusande." 24 Pengiring nike saq ngebvng kesaksian mengenai peristiwe-peristiwe niki. Ie vndah saq sampun nulis hal niki. Dait ite nenaoq bahwe napi saq tesampvang nike kenaq. 25 Masih luwvq hal lain saq telaksaneang siq Deside Isa. Lamun selapuqne nike tetulis sopoq-sopoq, perasaq tiang ndvq araq taoq saq cukup lvq seantvro gumi jari noloq selapuq kitab saq tetulis nike.