The New Testament of our Lord and Saviour Jesus Christ

Matthew 1

1 Niki silsilah Deside Isa Almasih, keturunan Daud, keturunan Ibrahim. 2 Ibrahim, Ishak, Yakub, Yehuda dait sanak-sanakne, Peres dait Zerah (inaq ie pade aranne Tamar), Hezron, Ram, Aminadab, Nahason, Salmon, Boas (aran inaqne Rahab), Obed (aran inaqne Rut), Isai, dait Raje Daud. 6 Lẽman Daud jangke dateng jaman bangse Israel tetetẽh ojok Babel tecatet aran-aran dengan niki: Sulaiman (mamiq binine onos sebiniqan Uria), Rehabeam, Abia, Asa, Yosapat, Yoram, Uzia, Yotam, Ahas, Hizkia, Manasye, Amon, Yosia, Yekonya dait sanak-sanakne. 12 Lẽman jaman bangse Israel tetetẽh ojok Babel jangke Deside Isa tebijeang tecatet aran-aran dengan niki: Yekonya, Sealtiel, Zerubabel, Abihud, Elyakim, Azur, Zadok, Akim, Eliud, Eleazar, Matan, Yakub, Yusup semamene Mariam. Dait Mariam nike saq bijeang Deside Isa saq tesebut Almasih. 17 Jari, lẽman Ibrahim jangke Daud, selapuqne araq empat olas keturunan, dait lẽman Daud jangke jaman bangse Israel tetetẽh ojok Babel, araq empat olas keturunan ẽndah, dait lẽman jaman bangse Israel tetetẽh ojok Babel jangke Almasih tebijeang araq empat olas keturunan. 18 Maraq niki riwayat kelahiran Deside Isa Almasih: Sewaktu Mariam, mamiq bini Deside Isa masih betunangan kance Yusup, ternyate Mariam sampun betian siq kuase Roh Suci sendẽqman ie pade merariq. 19 Sẽngaq Yusup tunangan Mariam nike, dengan saq tulus angenne dait ndẽq mẽlẽ miaq Mariam ilaq lẽq julu dengan luwẽq, ie beniat putus betunangan kance Mariam secare tedoq-tedoq. 20 Sewaktu Yusup masih mikirang hal nike, Yusup ngimpi. Dalem impine nike, Yusup serioq sopoq malaẽkat Tuhan saq bemanik tipaq ie, "Yusup, keturunan Daud, ndaq takut bait Mariam jari seninende; sẽngaq kanak saq tepetianang siq Mariam nike asalne lẽman Roh Suci. 21 Mariam gen bijeang kanak mame, terus kanak nike harus side aranin Isa, sẽngaq Ie saq gen nyelametang umat-Ne lẽman dose-dose ie pade." 22 Selapuqne nike telaksane adẽqne genep napi saq temanikang siq Tuhan langan nabi-Ne, 23 "Setetune, sopoq dedare genten gen betian dait bijeang sopoq kanak mame. Kanak nike gen tearanin Imanuel." (Imanuel nike base Ibrani saq artine, "Allah araq bareng ite".) 24 Sesampun Yusup ures, ie ngelaksaneang napi saq temanikang siq malaẽkat Tuhan nike tipaq ie. Ie nikah kance Mariam. 25 Laguq ndẽq bareng mesarẽ kance Mariam jangke Mariam bijeang Kanak nike. Dait sesampun Kanak nike tebijeang, Yusup aranin Ie Isa.

Matthew 2

1 Sesampun Deside Isa tebijeang lẽq kote Betlehem lẽq negeri Yudea, lẽq jaman Raje Herodes, dateng dengan-dengan ahli ilmu bintang lẽman Timuq ojok Yerusalem. 2 Ie pade beketuan lẽq embẽ-embẽ, "Lẽq mbẽ Ie, Almasih, raje dengan Yahudi saq baruq tebijeang nike? Tiang pade serioq bintang-Ne tiwoq lẽq sedi timuq, dait tiang pade dateng jari nyembah Ie." 3 Sewaktu Raje Herodes pirengang berite nike, ie tinjot gati, maraq nike ẽndah selapuq dengan lẽq Yerusalem. 4 Make kumpulangne selapuq imam kepale dait ahli-ahli Taurat bangse Yahudi. Terus Raje Herodes beketuan lẽq ie pade, "Lẽq mbẽ Almasih gen tebijeang?" 5 Jawab ie pade, "Lẽq kote Betlehem, lẽq negeri Yudea. Sẽngaq maraq niki araq tetulis siq sopoq nabi, 6 'Hai Betlehem, lẽq negeri Yehuda, side ndẽq saq paling kodẽq lẽq antare ie pade saq mrẽntah Yehuda. Sẽngaq lẽman side gen dateng sopoq pemimpin saq gen mimpin umat Tiang Israel.' " 7 Sesampun nerimaq penjelasan nike, Herodes secare tedoq-tedoq ngempoh ahli-ahli bintang lẽman Timuq nike, dait secare teliti gati Herodes beketuan lẽq ie pade, piran bintang nike mulai penggitan. 8 Sesampun nike ie pade teprẽntah siq Herodes ojok Betlehem, siq pesen niki, "Lumbar dait selidik pacu-pacu hal-hal mengenai Kanak nike. Lamun side pade sampun bedait kance Ie, sampẽang hal nike tipaq tiang, adẽq tiang ẽndah dateng nyembah Ie." 9 Beterus ie pade lumbar. Ie pade serioq malik bintang saq sampun ie pade serioq sendẽqmanne lẽq sedi timuq. Ie pade cemoh gati serioq bintang nike! Bintang nike terus lampaq senjuluq ie pade, terus ndot tepat lẽq atas taoq Kanak nike. 11 Ie pade tame ojok dalem balẽ nike dait serioqne Kanak nike kance Mariam, mamiq bini-Ne. Ie pade sujut nyembah Kanak nike, dait bukaq tangkaq dowẽne, terus ngaturang lẽq Ie, emas, menyan dait mur. 12 Allah peringet ie pade langan ngimpi adẽq ie pade ndẽq tulak ojok Herodes. Jari ie pade ulẽq ojok negerine liwat langan saq lain. 13 Sesampun ahli-ahli bintang nike lumbar, malaẽkat Tuhan rauh ojok Yusup lẽq dalem impi. Malaẽkat nike bemanik, "Herodes beniat boyaq Kanak nike jari nyematẽq Ie, keranaq nike becat ures, jauq Kanak nike dait mamiq bini-Ne beterus pelai ojok Mesir. Ndot lẽq taoq nike jangke Tiang dateng badaq side malik." 14 Yusup ures, dait kelem nike juaq ie jauq Kanak nike dait mamiq bini-Ne ngalih ojok Mesir. 15 Ie pade ndot lẽq derike jangke Herodes ninggal. Siq care nike telaksane selapuq saq temanikang siq Tuhan langan nabi-Ne, "Tiang ngemanikang Bije Tiang lẽman Mesir." 16 Sewaktu Herodes wikan bahwe ie sampun teakalang siq ahli-ahli bintang lẽman negeri timuq nike, Herodes jari menggah gati. Beterus prẽntahangne nyematẽq selapuq kanak-kanak mame saq beumur lẽq bawaq due taun saq araq lẽq Betlehem dait sekiterne. Hal nike sesuai keterangan saq ie terimaq lẽman ahli-ahli bintang, mengenai piran waktune bintang nike penggitan. 17 Siq care nike telaksane napi saq sampun tesampẽang siq Nabi Yeremia, 18 "Lẽq Rama kedengahan suare tangisan, dait suare dengan ngerung ẽroq asẽq. Rahel tangis bije-bijene; ie ndẽq mẽlẽ tehibur sẽngaq bije-bijene sampun ndẽq araq." 19 Sesampun Herodes ninggal, sewaktu Yusup masih araq lẽq Mesir, sopoq malaẽkat Tuhan rauh malik ojok Yusup lẽq dalem impi. 20 Malaẽkat nike bemanik, "Dengan-dengan saq beniat nyematẽq Kanak nike sampun ninggal. Keranaq nike ures, jauq Kanak nike dait mamiq bini-Ne tulak ojok Israel." 21 Beterus Yusup ures, dait jauqne Kanak nike kance mamiq bini-Ne tulak ojok wilayah Israel. 22 Laguq sesampun tedengah siq Yusup bahwe Arkelaus, bije Herodes sampun jari raje lẽq negeri Yudea gentiq bapaqne, Yusup ndẽq bani lumbar ojok derike. Sesampun teican petunjuk langan impi, ie lumbar ojok daẽrah Galilea. 23 Lẽq derike ie ndot lẽq sopoq kote aranne Nazaret. Siq care nike telaksane napi saq tesampẽang siq nabi-nabi mengenai Kanak nike: "Ie gen tesebut Dengan Nazaret."

Matthew 3

1 Lẽq waktu nike rauh Yahya Pembaptis lẽq padang gurun lẽq Yudea dait mulai behotbah. 2 "Pade tobat lẽman dose-dosende, sẽngaq Kerajaan Sorge sampun rapet!" 3 Yahya niki saq temaksut siq Nabi Yesaya sewaktu ie nyampẽang niki, "Araq dengan saq bekuih-kuih lẽq padang gurun, 'Pade siepang langan umaq Tuhan; dait rateang langan umaq Ie.' " 4 Yahya ngengadu jubah saq tepiaq lẽman bulu onte dait sabukne tepiaq lẽman lẽndong. Keloranne balang dait madulani gawah. 5 Luwẽq dengan dateng ojok Yahya, araq dengan-dengan saq dateng lẽman Yerusalem, lẽman selapuq daẽrah Yudea, dait lẽman selapuq daẽrah sekiter Kokoq Yordan. 6 Ie pade ngaku dose-dosene, beterus ie pade tebaptis siq Yahya lẽq Kokoq Yordan. 7 Luwẽq ẽndah dengan Saduki dait Parisi dateng mẽlẽ tebaptis siq Yahya. Laguq sewaktu ie serioq dengan-dengan nike dateng, Yahya bebase lẽq ie pade, "Hai, side dengan jahat! Sai saq badaq bahwe side bau selamet lẽman hukuman Allah saq gen dateng? 8 Nyatayang siq perbuatande bahwe side sampun betobat lẽman dose-dosende. 9 Ndaq paran, bahwe side bau bebase dalem angende: Ibrahim nike bapaq tiang pade! Tiang badaq side: Lẽman batu-batu niki ẽndah Allah sanggup miaqang Ibrahim keturunan! 10 Kandik sampun tesadangang jari ngerebaq lolo jangke akah-akahne. Sebilang lolo saq ndẽq ngasilang buaq saq solah, gen terebaq dait tetetẽh ojok dalem api. 11 Tiang baptis side kadu aiq jari tande bahwe side sampun betobat lẽman dose-dosende. Laguq Ie saq gen rauh pungkuran lẽman tiang, gen baptis side kadu Roh Suci dait api. Kuase-Ne belẽqan lẽman tiang. Jari jauq sepatu-Ne doang tiang ndẽq patut. 12 Lẽq gading-Ne araq klẽong jari nampiq selapuq gandum-Ne jangke bersi; selapuq gandumne gen Ie kumpulang lẽq dalem lumbung, laguq selapuq gambasne gen Ie tunuq lẽq dalem api saq ndẽq iniq pedaq." 13 Beterus Deside Isa rauh lẽman Galilea ojok Kokoq Yordan gen bedait kance Yahya jari tebaptis siq ie. 14 Laguq Yahya berusahe nolaq napi saq Deside Isa kayunang. Yahya matur lẽq Deside Isa, "Tiang niki saq sepatutne tebaptis siq Pelungguh, mangkin malahan Pelungguh saq rauh ojok tiang." 15 Laguq jawab Deside Isa, "Alurang hal nike telaksane, sẽngaq siq care nike ite ngelaksaneang selapuq saq tekayunang siq Allah." Beterus Yahya baptis Deside Isa. 16 Sesampun tebaptis, Deside Isa sugul lẽman aiq kokoq nike. Selung-selung langit kebukaq, beterus Deside Isa cingakin Roh Allah turun ojok atas-Ne maraq ruen kedit dare. 17 Beterus kedengahan suare lẽman sorge, "Niki Bije Tiang saq Tiang kasihin, Ie nyenengang Tiang."

Matthew 4

1 Sesampun nike Deside Isa tebimbing siq Roh Allah ojok padang gurun jari tecobe siq Belis. 2 Petang dase jelo petang dase kelem Deside Isa puase beterus Ie beridap seduk. 3 Beterus Belis dateng dait matur, "Lamun Pelungguh Bije saq asalne lẽman Allah, cobaq prẽntahang batu-batu niki jari ruti." 4 Jawab Deside Isa, "Araq tetulis lẽq dalem Kitab Suci bahwe: Manusie ndẽqne idup lẽman ruti doang, laguq ẽndah lẽman sebilang manik saq temanikang siq Allah." 5 Sesampun nike, Deside Isa tebimbing siq Belis ojok kote suci Yerusalem, terus toloqne Deside Isa lẽq atas buwung Gedẽng Allah. 6 Beterus Belis matur lẽq Deside Isa, "Lamun Pelungguh Bije saq asalne lẽman Allah, cobaq Pelungguh nimproh ojok bawaq. Sẽngaq araq tetulis lẽq dalem Kitab Suci bahwe, 'Allah gen mrẽntahang malaẽkat-malaẽkat-Ne ngelindungin Pelungguh, ie pade gen sangklap Pelungguh siq imene, adẽq cokor Pelungguh nẽnten kedantuk lẽq batu.' " 7 Jawab Deside Isa, "Laguq lẽq dalem Kitab Suci tetulis ẽndah, 'Ndaq side cobe Tuhan Allah side!' " 8 Beterus jauqne malik Deside Isa ojok atas sopoq gunung saq atas gati, dait petitoqangne tipaq Deside Isa selapuq kerajaan lẽq dunie dait selapuq kesugihanne. 9 Belis nike matur lẽq Deside Isa, "Selapuqne niki gen tiang serahang tipaq Pelungguh lamun Pelungguh sujut nyembah tiang." 10 Jawab Deside Isa, "Nyedi hai Belis! Lẽq Kitab Suci araq tetulis: Pade sembah Tuhan Allahde dait tipaq Ie doang side beribadah!" 11 Ahirne Belis nike bilin Deside Isa, beterus malaẽkat-malaẽkat rauh ngelayanin Ie. 12 Sewaktu Deside Isa mirengang kabar bahwe Yahya tetamaq ojok bui, Ie nyingkir ojok Galilea. 13 Deside Isa lumbar lẽman Nazaret beterus meneng lẽq Kapernaum, lẽq sedin Danao Galilea lẽq daẽrah Zebulon dait Naptali. 14 Sẽngaq Deside Isa ngelaksaneang hal nike, make telaksane napi saq tesampẽang siq Nabi Yesaya: 15 "Tanaq Zebulon dait tanaq Naptali, langan ojok segare, daẽrah itoqan Kokoq Yordan, Galilea, wilayahne bangse-bangse lain! 16 Bangse saq endot lẽq dalem peteng, sampun serioq Terang saq menah tandur! Tipaq saq endot lẽq negeri saq tekudung siq peteng maut sampun tiwoq Terang!" 17 Mulai lẽman waktu nike Deside Isa behotbah, "Pade tobat lẽman dose-dosende, sẽngaq Kerajaan Sorge sampun rapet!" 18 Sewaktu Deside Isa bemargi lẽq sedin Danao Galilea, Ie cingakin due dengan besemetonan, Simon (saq tesebut ẽndah Petrus) dait adiqne aranne Andreas. Ie pade kenyeke bau empaq Kadu jaring lẽq danao nike. 19 Deside Isa bemanik lẽq ie pade, "Silaq turut Tiang, Tiang gen jariang side pade penjaring manusie." 20 Langsung deduaqne bilin jaringne terus ngiring Deside Isa. 21 Deside Isa terus bemargi, dait cingakin ẽndah due dengan besemetonan saq lain, aranne Yakub dait Yahya bije Zebedeus. Ie pade kenyeke ngeremaq jaringne kance amaqne lẽq dalem perau. Ie pade temanikang ẽndah siq Deside Isa, 22 langsung ie pade bilin perau dait amaqne terus ngiring Deside Isa. 23 Lẽq Galilea Deside Isa bemargi ojok selapuq wilayah negeri; Ie ngajahang lẽq balẽ-balẽ ibadah dait nyampẽang Kabar Solah mengenai Kerajaan Allah. Deside Isa nyelahang dengan-dengan saq ngidap segale macem penyakit dait saq awakne cacat. 24 Kabar mengenai Deside Isa nike nyebar lẽq selapuq daẽrah Siria, sehingge luwẽq dengan dateng ojok Ie jauq dengan-dengan saq ngidap segale macem penyakit dait saq susah. Dengan-dengan saq tekuasein siq roh jahat, saq sakit mopok, dait saq kẽpaq, selapuqne teselahang siq Deside Isa. 25 Luwẽq gati dengan saq ngiring Deside Isa lẽq waktu nike. Araq saq dateng lẽman Galilea dait lẽman Dekapolis, lẽman Yerusalem, lẽman Yudea, dait lẽman itoqan Kokoq Yordan.

Matthew 5

1 Sewaktu Deside Isa cingakin dengan luwẽq nike, Ie taẽk ojok atas bukit. Sesampun Ie melinggih, pengiring-pengiring-Ne parek ojok Ie, 2 beterus Ie mulai bebaos dait ngajah ie pade: 3 "Bahagie dengan saq miskin lẽq arepan Allah; sẽngaq ie pade saq dowẽang Kerajaan Sorge! 4 Bahagie dengan saq sedih angenne; sẽngaq ie pade gen tehibur. 5 Bahagie dengan saq lemah lembut; sẽngaq ie pade gen dowẽang gumi! 6 Bahagie dengan saq tetu-tetu melẽt ngelaksaneang kebenaran; sẽngaq ie pade gen tepuasang! 7 Bahagie dengan saq murah atẽ; sẽngaq ie pade gen nerimaq kemurahan! 8 Bahagie dengan saq suci atẽne; sẽngaq ie pade gen serioq Allah. 9 Bahagie dengan saq jauq damẽ; sẽngaq ie pade gen tesebut bije-bije dowẽn Allah! 10 Bahagie dengan saq teaniaye lantaran kebenaran, sẽngaq ie pade saq dowẽang Kerajaan Sorge! 11 Bahagie side pade, lamun lantaran Tiang side pade tecele dait teaniaye, dait tepitnah. 12 Besukecite dait gembire, sẽngaq upaqde belẽq lẽq sorge, sẽngaq maraq nike ẽndah sampun teaniaye nabi-nabi saq sendẽqman side." 13 "Side pade sie dunie. Lamun sie jari tawah, napi bau ie tepaẽqang malik? Ndẽq araq manpaatne malik, ie gen tetetẽh dait teicaq-icaq siq dengan. 14 Side pade terang dunie. Kote saq araq lẽq atas bukit, ndẽq bau teseboq. 15 Ndẽq araq dengan saq nyalaqang dilah, terus kudungne dilah nike siq tepaq. Malahan ie gen toloq dilah nike lẽq naẽ dilah, adẽqne bau ngebẽng cahaye tipaq sebilang dengan lẽq dalem balẽ. 16 Maraq nike ẽndah cahayende harus besinar lẽq julu dengan, adẽq ie pade serioq perbuatan-perbuatande saq solah, terus ie pade mulieang Bapa side lẽq sorge." 17 "Ndaq beranggepan bahwe Tiang dateng jari ngapus Hukum Taurat dait kitab nabi-nabi. Tiang dateng ndẽqne jari ngapus hukum nike, laguq jari genepang hukum nike. 18 Setetune Tiang badaq side! Sengonẽq langit dait gumi masih araq, timaq sopoq hurup atao titik saq paling kodẽq lẽq dalem hukum nike ndẽq gen teapus lamun selapuqne ndẽqman telaksane! 19 Keranaq nike, sai-sai saq ngelanggar salaq sopoq lẽman prẽntah-prẽntah nike, timaq nike bagian saq paling kodẽq, dait ngajah dengan lain ngelaksaneang saq maraq nike ẽndah, ie gen araq lẽq taoq saq paling bawaq lẽq dalem Kerajaan Sorge. Laguq sai-sai saq taat ngelaksaneang dait ngajahang selapuq prẽntah-prẽntah Hukum Taurat, ie gen araq lẽq taoq saq paling atas lẽq dalem Kerajaan Sorge. 20 Make Tiang badaq side: Lamun idupde dalem beragame ndẽqne solahan lẽman ahli-ahli Taurat atao dengan Parisi, setetune side ndẽq bau tame lẽq dalem Kerajaan Sorge!" 21 "Side sampun dengah manik saq tesampẽang langan leluhurte: Ndaq nyematẽq; sai-sai saq nyematẽq harus tehukum. 22 Laguq Tiang badaq side, sebilang dengan saq gedek lẽq semetonne harus tehukum; sai juaq saq bebase lẽq semetonne: Kapir! Harus teadilin lẽq julu Mahkamah Agame. Dait sai-sai saq bebase "Jahil", harus tetetẽh ojok dalem api nerake. 23 Keranaq nike, lamun side kenyeke ngaturang persembahan lẽq atas mẽje taoq kurban, terus inget bahwe araq dengan saq sakit atẽ lẽq side, 24 side harus bilin juluq persembahande nike lẽq julu mẽje taoq kurban, terus lumbar bedamẽ kance dengan nike, terus tulak malik ngaturang persembahande nike. 25 Seandẽne araq dengan ngelaporang side ojok pengadilan, usaheang juluq bedamẽ kance ie sengonẽq side masih bareng kance ie lẽq tengaq langan, adẽq musuhde nike ndẽq nyerahang side ojok hakim, saq gen nyerahang side ojok petugas, terus petugas nike gen tamaq side ojok dalem bui. 26 Tiang badaq side: Setetune side ndẽq gen sugul lẽman bui sendẽqman side bayah utangde jangke lunas." 27 "Side pade nenaoq bahwe araq Manik Allah maraq niki: Ndaq bezinah. 28 Laguq mangkin Tiang badaq side: Sai-sai saq serioq dengan nine siq napsu birahine, artine dengan nike sampun bezinah kance dengan nine nike lẽq dalem angenne. 29 Lamun penentengde saq kanan jari penyebap side bedose, luit dait tetẽh penenteng nike! Solahan side kẽlangan salaq sopoq bagian lẽman awakde ketimbang selapuq awakde tetetẽh ojok api nerake. 30 Lamun ime kanande jari penyebap side bedose, peleng dait tetẽh ime nike! Solahan side kẽlangan imende setowẽq ketimbang selapuq awakde tetamaq ojok api nerake." 31 "Araq ẽndah Manik Allah maraq niki: Sebilang dengan saq sẽang seninene harus ngebẽng ie surat sẽang. 32 Laguq mangkin Tiang badaq side: Sebilang dengan saq sẽang seninene kecuali lantaran zinah, ie jariang seninene bezinah; dait sai saq merariq kance dengan nine saq tesẽang nike, ie gawẽq zinah." 33 "Side pade sampun nenaoq ẽndah bahwe lẽman jaman leluhurte sampun araq pengajahan saq maraq niki: Ndaq besumpah palsu, laguq tegel sumpahde lẽq arepan Tuhan. 34 Laguq mangkin Tiang badaq side: Ndaq gati side besumpah demi langit, sẽngaq langit nike tahte Allah, 35 atao demi gumi, sẽngaq gumi apah cokor-Ne; atao demi Yerusalem, sẽngaq nike kote Raje Agung. 36 Ndaq ẽndah besumpah demi ulunde, sẽngaq side ndẽq tao miaq bulunde jari putẽq atao bideng timaq cume sopoq uwat bulu. 37 Lamun enggih, badaq enggih, lamun ndẽq badaq ndẽq. Napi saq lebih lẽman nike asalne lẽman Belis." 38 "Side pade ẽndah sampun nenaoq bahwe araq pengajahan maraq niki: Penenteng gentiq penenteng, gigi gentiq gigi. 39 Laguq mangkin Tiang badaq side: Ndaq bales dendem lẽq dengan saq sampun gawẽq jahat lẽq side. Malahan, lamun dengan nempẽlẽk sangkẽpde saq kanan, bẽng ie ẽndah nempẽlẽk sangkẽpde saq kiri. 40 Dait lamun dengan ngelaporang side ojok hakim sẽngaq melẽtang kelambinde, bẽng ie ẽndah jubahde. 41 Dait sai juaq saq paksaq side lampaq jaoqne sopoq kilomẽter, lampaq kance ie due kilomẽter. 42 Lamun araq dengan saq nunas lẽq side, bẽng ie. Dait ndaq nolaq dengan saq mẽlẽ nyinggaq lẽq side." 43 "Sampun ẽndah side pade nenaoq pengajahan maraq niki: Kasihin batur-baturde dait meriq lẽq musuh-musuhde. 44 Laguq mangkin Tiang badaq side: Kasihin musuh-musuhde dait do'eang dengan saq nganiaye side pade, 45 sẽngaq siq care nike side pade jari bije-bije Bapa side saq lẽq sorge, saq tiwoqang jelo tipaq dengan saq solah dait tipaq dengan saq jahat. Allah nurunang ujan tipaq dengan saq kenaq perbuatanne dait tipaq dengan saq jahat. 46 Sẽngaq lamun side ngasihin dengan saq ngasihin side doang, napi saq gen jari upaqde? Tekan penagih pajek ẽndah ngelaksaneang hal maraq nike. 47 Dait lamun side pade ngucapang salam cume tipaq batur-baturde doang, napi istimẽwene? Dengan-dengan saq ndẽq kenal Allah ẽndah ngelaksaneang hal nike! 48 Keranaq nike side harus sempurne, pade maraq Bapa side lẽq sorge nike sempurne."

Matthew 6

1 "Pade inget solah-solah, ndaq side ngelaksaneang ibadahde lẽq julun dengan siq maksut adẽq teserioq siq ie pade. Lamun side pade maraq nike, side pade ndẽq gen teican upaq siq Bapa side lẽq sorge. 2 Jari, lamun side besedekah ojok dengan miskin, ndaq belẽq-belẽqang hal nike maraq saq tepiaq siq dengan munapik. Ie pade demen ngelaksaneang hal nike lẽq dalem balẽ ibadah dait lẽq rurung-rurung belẽq adẽqne teajum siq dengan. Pade inget, ie pade sampun nerimaq upaqne. 3 Laguq lamun side pade ngebẽng sedekah, bẽng secare tedoq-tedoq, adẽq ndẽq araq saq nenaoq. 4 Alurang perbuatande nike ndẽq tetaoq siq sai juaq, kecuali Bapa side saq lẽq sorge. Ie cingakin perbuatan side saq ndẽq teserioq siq dengan, dait gen ngicanin upaq tipaq side pade." 5 "Lamun side pade bedo'e, ndaq bedo'e maraq dengan munapik. Ie pade demen bedo'e nganjeng lẽq balẽ ibadah dait lẽq perempatan adẽqne teserioq siq dengan. Tiang badaq side, nike upaq saq sampun ie pade terimaq. 6 Laguq lamun side pade bedo'e, tame ojok kamar dait impet lawangne, terus bedo'e tipaq Bapa side saq ndẽq penggitan nike, make Bapa side saq cingakin perbuatande saq ndẽq tetaoq siq dengan gen ngicanin upaq lẽq side. 7 Lamun side pade bedo'e, ndaq bẽlo-bẽlo maraq dengan saq ndẽq kenal Allah. Ie pade paran bahwe napi saq ie pade tunas nike gen tepirengang lantaran do'e ie pade saq bẽlo nike. 8 Ndaq maraq ie pade. Bapa side sampun wikan napi saq side pade perluang, sendẽqman side pade tunas. 9 Jari, bedo'e maraq niki: 'Bapa tiang pade saq araq lẽq sorge, tesuciang pesẽngan Deside. 10 Rauhang Kerajaan Deside, jariang pekayunan Deside lẽq gumi maraq lẽq sorge. 11 Lẽq jelo niki icanin tiang pade keloran saq tiang pade perluang. 12 Ampunin tiang pade lẽman salaq tiang pade, maraq tiang pade sampun ngampunin dengan saq salaq tipaq tiang pade; 13 dait sampunang gadingang tiang pade ojok dalem cobe, laguq bẽbasang tiang pade lẽman kuase saq jahat. Sẽngaq Deside ẽpẽn dowẽ Kerajaan dait kuase dait kemuliean jangke selaẽq-laẽqne. Amin.' 14 Sẽngaq lamun side pade ngampunin dengan saq salaq lẽq side pade, make Bapa side lẽq sorge ẽndah gen ngampunin kesalaqande. 15 Laguq lamun side pade ndẽq ngampunin salaq dengan lain, Bapa side saq lẽq sorge ẽndah ndẽq gen ngampunin kesalaqande." 16 "Lamun side pade puase, ndaq petitoqang ruende saq susah, maraq dengan munapik. Ie pade salin sebengne adẽq selapuq dengan nenaoq bahwe ie pade puase. Pade inget, nike upaq saq ie pade sampun terimaq. 17 Laguq lamun side pade puase, beseraup dait sisir bulunde, 18 adẽq ndẽq araq saq nenaoq bahwe side pade puase, kecuali Bapa side saq ndẽq penggitan nike doang. Ie cingakin perbuatande saq ndẽq penggitan nike dait gen ngicanin upaq tipaq side pade." 19 "Ndaq ngumpulang harte umaq diriqde lẽq gumi; lẽq gumi temerẽnẽ dait karat gen nyenyẽdaq dait maling gen dateng paling harte nike. 20 Laguq, kumpulang harte umaq diriqde lẽq sorge; lẽq sorge temerẽnẽ dait karat ndẽq gen nyenyẽdaq dait maling ndẽq dateng paling harte nike. 21 Sẽngaq lẽq mbẽ hartende araq, lẽq derike ẽndah angende!" 22 "Penenteng nike dilah lẽq awak. Lamun penentengde solah, selapuq awakde jari terang. 23 Laguq lamun penentengde jahat, selapuq awakde jari peteng dedet. Jari lamun terang saq araq lẽq dalem diriqde nike peteng, berembẽ peteng dedetne peteng nike!" 24 "Ndẽq araq sopoq dengan juaq saq bau begawẽan lẽq due majikan. Sẽngaq lamun maraq nike ie gen meriq lẽq saq sopoq dait ngasihin saq lain, atao ie gen setie lẽq saq sopoq dait ndẽq gen merhatiang saq lain. Maraq nike ẽndah halne side pade; side pade ndẽq bau begawẽan tipaq Allah dait tipaq dowẽ bande ẽndah. 25 Keranaq nike Tiang badaq side pade: Ndaq side pade kuatir mengenai idupde, napi saq gen side pade kelor atao inem, atao napi saq gen side pade kadu. Tekan idup nike pentingan lẽman keloran dait awak pentingan lẽman kelambi? 26 Pade serioq kedit lẽq langit. Ie pade ndẽq uwah sawur binẽq, ndẽq uwah mataq dait ndẽq uwah ẽndah ngumpulang hasil taletanne lẽq dalem lumbung, laguq Bapa side saq lẽq sorge peliharaq ie pade. Tekan side pade jaoq belẽqan ajine ketimbang kedit? 27 Sai lẽq antare side pade siq kuatirne bau ngeromboq umurne timaqne sekediq? 28 Kembẽq side pade kuatir mengenai kelambinde? Perhatiang berembẽ kembang bakung saq tiwoq lẽq lendang. Kembang-kembang nike ndẽq uwah begawẽan dait ndẽq uwah nyẽsẽk; 29 laguq Tiang badaq side: Nabi Sulaiman timaq ie sugih gati, ndẽq ngengadu kelambi saq solahne maraq kembang-kembang nike! 30 Pupaq lẽq lendang tiwoq jelo niki dait lẽmaq tesedut jangke bis. Laguq Allah payas pupaq nike solah gati. Lebih-lebih side pade! Laguq side pade kurang percaye! 31 Keranaq nike, ndaq side pade kuatir dait bebase, 'Napi saq gen ite kelor?' atao 'Napi saq gen ite inem?' atao 'Napi saq gen ite kadu?' 32 Selapuq nike teboyaq siq bangse-bangse saq ndẽq kenal kance Allah. Padahal napi saq side pade perluang lẽq dalem idupde, selapuqne nike sampun tewikanang siq Bapa side pade. 33 Laguq boyaq juluq Kerajaan Allah dait kebenaranne, make selapuq saq lain ẽndah gen teromboqang tipaq side pade siq Allah. 34 Keranaq nike, ndaq kuatir mengenai jelo saq lẽmaq. Sẽngaq jelo saq lẽmaq araq kesusahanne mẽsaq. Jari, kesusahan sejelo cukup jari sejelo."

Matthew 7

1 "Ndaq side pade hakimin dengan lain, adẽq side pade ndẽq tehakimin siq Allah. 2 Sẽngaq berembẽ entande hakimin dengan lain, maraq nike ẽndah Allah gen hakimin side pade. Ukuran saq side pade kadu lẽq dengan lain, nike ẽndah gen tekadu siq Allah lẽq side pade. 3 Kembẽq side pade pedasang bubuk kayuq lẽq dalem penenteng semetonde, padahal balok lẽq dalem penentengde, ndẽq side pade perhatiang? 4 Berembẽ side pade bau bebase lẽq semetonde, 'Alurang tiang sugulang bubuk kayuq saq araq lẽq penentengde,' padahal lẽq dalem penentengde mẽsaq araq balok? 5 Hai dengan munapik! Sugulang juluq balok lẽman penentengde mẽsaq, baruq side bau pedas serioq dait bau nyugulang bubuk kayuq lẽman penenteng semetonde. 6 Ndaq ngebẽng barang saq suci tipaq acong, dait ndaq side saut mutiarende tipaq bawi, adẽq ndaq ie icaq-icaq kadu naẽne terus ie bebalik garang side." 7 "Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang. 8 Sẽngaq dengan saq nunas gen nerimaq; dengan saq boyaq gen mauq; dait dengan saq ngetok lawang, gen tebukaqang lawang. 9 Lẽq antare side pade napi araq bapaq saq ngebẽng batu lẽq bijene, lamun ie ngẽndẽng ruti? 10 Atao ngebẽng ulah lamun ie ngẽndẽng empaq? 11 Jari, lamun side pade saq jahat, tao ngebẽng saq bagus lẽq bije-bijende. Lebih-lebih Bapa side pade lẽq sorge! Ie lebihan malik gen ngicanin saq bagus tipaq sebilang dengan saq nunas lẽq Ie. 12 Perlakuang dengan lain maraq side pade mẽlẽ teperlakuang siq ie pade. Nike intine selapuq Hukum Taurat dait kitab nabi-nabi." 13 "Silaq tame lẽman lawang saq supit, sẽngaq lawang dait langan saq nuju ojok nerake nike belẽq dait gamber, dait luwẽq dengan saq tame liwat derike. 14 Laguq mule supit dait sengke lawang dait langan saq jauq dengan tipaq idup nike. Dait cume sekediq dengan saq ndait lawang dait langan nike." 15 "Onyaq-onyaq tipaq nabi-nabi palsu. Ie pade dateng tipaq side pade nyamar maraq dombe, laguq ie pade setetune maraq serigale saq buas. 16 Side pade gen kenal ie pade lẽman hasil perbuatanne. Bebenes bedui ndẽq nyugulang buaq anggur, dait pupaq bedui ndẽq ngasilang buaq are. 17 Lẽman lolo saq solah tehasilang buaq saq solah. Dait lẽman lolo saq ndẽq solah tehasilang buaq saq ndẽq solah. 18 Lolo saq solah ndẽq bau ngasilang buaq saq lengẽ, dait lolo saq ndẽq solah ndẽq bau ngasilang buaq saq solah. 19 Sebilang lolo saq ndẽq ngasilang buaq saq solah, terebaq dait tesedut. 20 Maraq nike ẽndah halne nabi-nabi palsu. Side pade gen kenal ie pade lẽman hasil perbuatanne." 21 "Ndẽqne sebilang dengan saq ngempoh Tiang, 'Junjungan Saq Mulie, Junjungan Saq Mulie,' saq gen tame ojok dalem Kerajaan Sorge, laguq cume dengan-dengan saq ngelaksaneang pekayunan Bapa Tiang lẽq sorge. 22 Lẽq jelo kiamat, luwẽq dengan gen bebase lẽq Tiang, 'Junjungan Saq Mulie, Junjungan Saq Mulie, tekan siq pesẽngan Pelungguh tiang pade sampun benubuat, siq pesẽngan Pelungguh tiang pade sampun sediq roh-roh jahat dait siq pesẽngan Pelungguh ẽndah tiang pade ngaraqang luwẽq muqjizat?' 23 Laguq Tiang gen jawab ie pade, 'Tiang ndẽq uwah kenal kance side pade. Nyedi lẽman taoq niki! Side pade saq gawẽq jahat!' " 24 "Dengan saq dengah manik Tiang niki dait ngelaksaneang hal nike, dengan nike pade maraq dengan bijaksane saq penganjeng balẽne lẽq atas batu. 25 Lẽq waktu turun ujan, dait aiq belabur dateng terus angin belẽq timpe balẽ nike, balẽ nike ndẽq ruk sẽngaq tepenganjeng lẽq atas batu. 26 Dait dengan saq dengah manik Tiang niki laguq ie ndẽq ngelaksaneang hal nike, dengan nike pade maraq dengan saq bodo, saq penganjeng balẽne lẽq atas gerẽs. 27 Lẽq waktu turun ujan, dait aiq belabur dateng terus angin belẽq timpe balẽ nike, balẽ nike gen ruk dait luwẽq gati sẽdene!" 28 Ahirne Deside Isa selesẽ ngajahang, dait dengan-dengan saq araq lẽq derike takjub gati dengah pengajahan-Ne, 29 sẽngaq Ie ngajah ie pade siq wibawe, ndẽq maraq ahli-ahli Taurat ie pade.

Matthew 8

1 Deside Isa turun lẽman bukit, dait luwẽq dengan ngiring Ie. 2 Lẽq waktu nike, dateng sopoq dengan saq sakit kuste. Ie sujut lẽq arepan Deside Isa, dait matur, "Paq, lamun Pelungguh kayun, Pelungguh bau nyelahang tiang." 3 Deside Isa jamah dengan nike, dait bemanik, "Tiang mẽlẽ, mangkin side selah!" Langsung waktu nike ẽndah penyakit dengan nike telang. 4 Beterus manik Deside Isa lẽq ie, "Inget, ndaq side tuturang hal nike lẽq sai-sai. Laguq silaq lumbar ojok imam, dait tunas ie pastiang bahwe side sampun selah. Sesampun nike, aturang kurban saq teprẽntahang siq Musa, jari bukti lẽq dengan-dengan bahwe side tetu-tetu sampun selah!" 5 Sewaktu Deside Isa tame ojok kote Kapernaum, sopoq prewire parek tipaq Deside Isa dait nunas tulung, 6 "Paq," atur prewire nike, "pelayan tiang sakit lẽq balẽ. Ie kẽpaq dait tindoq lẽq petindoqanne dait menderite gati." 7 Manik Deside Isa, "Tiang gen dateng nyelahang ie." 8 Laguq prewire nike matur, "Paq, tiang nẽnten patut nerimaq Pelungguh lẽq balẽn tiang. Silaq Pelungguh manikang sopoq ucapan doang, laun pelayan tiang nike gen selah. 9 Sẽngaq tiang ẽndah bedowẽ atasan dait tiang harus taat lẽq ie. Dait lẽq bawaq tiang ẽndah araq prajurit-prajurit saq harus taat lẽq prẽntah tiang. Lamun tiang suruq sopoq prajurit, 'Lalo!' ie pasti lalo. Dait lamun tiang suruq saq lain, 'Dateng!' ie pasti dateng; dait lamun tiang prẽntah pelayan tiang, 'Laksaneang!' pasti ie laksaneang." 10 Sesampun Deside Isa pirengang basen prewire nike, Deside Isa bengaq gati. Beterus Deside Isa bemanik lẽq dengan-dengan saq kenyeke ngiring Ie, "Tiang badaq side, iman sebelẽq niki ndẽq uwah Tiang ndait lẽq antare dengan Israel timaqne sopoq juaq! 11 Tiang badaq side, luwẽq dengan gen dateng lẽman Timuq dait Bat jari besukecite bareng-bareng kance Ibrahim, Ishak dait Yakub lẽq dalem Kerajaan Sorge. 12 Padahal dengan-dengan Yahudi saq seharusne jari bije-bije Kerajaan gen tetetẽh ojok taoq saq peteng dedet, lẽq derike ie pade gen nangis dait menderite." 13 Beterus manik Deside Isa lẽq prewire nike, "Silaq side ulẽq, napi saq side percaye nike gen telaksane." Dait waktu nike ẽndah, pelayanne nike selah. 14 Deside Isa lumbar ojok gedẽng Petrus. Lẽq derike Deside Isa cingakin mentoaq nine Petrus kenyeke mesarẽ lantaran sakit telih panas. 15 Deside Isa negel imene, terus panasne telang. Beterus ie ures dait mulai ngelayanin Deside Isa. 16 Lẽq waktu serep jelo, luwẽq dengan saq tekuasein siq roh jahat tejauq ojok Deside Isa. Dait siq sopoq manik doang, Deside Isa sediq roh-roh jahat nike dait selapuq dengan saq sakit ẽndah teselahang. 17 Selapuqne nike telaksaneang siq Deside Isa, dait siq care nike telaksane napi saq sampun tesampẽang siq Nabi Yesaya, "Ie nanggung penderiteante, dait nyelahang penyakitte." 18 Araq luwẽq gati dengan lẽq sekelining Deside Isa. Sewaktu Deside Isa cingakin ie pade selapuqne, Deside Isa ngemanikang pengiring-Ne belayar ojok itoqan danao. 19 Beterus sopoq ahli Taurat parek ojok Deside Isa, dait matur, "Paq Guru, tiang mẽlẽ ngiring Pelungguh ojok mbẽ juaq Pelungguh lumbar!" 20 Jawab Deside Isa, "Serigale bedowẽ loang, dait kedit bedowẽ kesebu, laguq Bije Manusie ndẽq bedowẽ taoq begẽlaq." 21 Beterus sopoq pengiring-Ne saq lain ẽndah matur, "Junjungan Saq Mulie, ijinang tiang ulẽq juluq nguburang amaq tiang." 22 Laguq jawab Deside Isa, "Silaq turut Tiang, alurang dengan-dengan ninggal nguburang dengan-dengan ninggal ie pade." 23 Deside Isa taẽk ojok perau dait pengiring-pengiring-Ne milu ngiring Ie. 24 Selung-selung dateng angin pusut saq belẽq gati ojok danao nike, sehingge perau nike teampes siq umbak. Waktu nike Deside Isa kenyeke merem. 25 Make pengiring-pengiring-Ne dateng ojok Deside Isa dait tangiang Ie. "Junjungan Saq Mulie! Tulung! Ite gen celake!" 26 "Kembẽq side pade takut?" manik Deside Isa. "Side pade kurang percaye lẽq Tiang!" Beterus Deside Isa ngadeg, dait semprak angin dait danao nike, make danao nike jari tenang gati. 27 Pengiring-pengiring-Ne bengaq. Ie pade bebase sopoq kance saq lainne, "Dengan napi Deside Isa niki jangke angin dait umbak ẽndah taat lẽq Ie!" 28 Sesampun Deside Isa rauh lẽq itoqan danao, lẽq daẽrah dengan Gadara, araq due dengan saq tekuasein siq roh jahat parek ojok Deside Isa. Ie pade bahaye gati sehingge ndẽq araq dengan saq bani liwat lẽq derike. 29 Ie pade sugul lẽman goe-goe lẽq kuburan dait bekuih, "Bije saq asalne lẽman Allah! Gen Pelungguh kumbẽqang tiang niki? Napi Pelungguh gen siksaq tiang pade timaq ndẽqman waktune?" 30 Ndẽq jaoq lẽman derike, araq luwẽq gati bawi saq kenyeke boyaq kakenan. 31 Roh-roh jahat nike tunas lẽq Deside Isa, "Lamun Pelungguh gen ngemanikang tiang pade sugul lẽman dengan niki, prẽntahang tiang pade tame ojok dalem bawi-bawi nike." 32 "Nyedi!" manik Deside Isa. Roh-roh jahat nike sugul lẽman kedue dengan nike, dait tame ojok bawi-bawi nike. Beterus bawi-bawi nike pelai dait nimproh lẽman sedin jurang ojok dalem danao, dait selapuq bawi nike matẽ ketelep. 33 Penjage-penjage bawi nike pelai ojok kote, nuturang selapuq peristiwe nike dait napi saq sampun telaksane lẽq due dengan saq tekuasein siq roh jahat nike. 34 Ahirne selapuq dengan lẽq kote nike lumbar ojok Deside Isa. Sanget siqne tunas siq ie pade adẽq Deside Isa lumbar bilin daẽrah ie pade.

Matthew 9

1 Deside Isa taẽk ojok dalem perau, beterus mbelat danao tulak ojok kote asal-Ne. 2 Lẽq derike araq dengan saq parek tipaq Deside Isa jauq sopoq dengan kẽpaq saq tetindoqang lẽq tipah. Sewaktu Deside Isa cingakin iman dengan-dengan nike, Ie bemanik lẽq dengan kẽpaq nike, "Teguqang angende, anak Tiang, dose-dosende sampun teampunin." 3 Ahli-ahli Taurat saq araq lẽq derike bebase dalem angenne, "Dengan niki menghine Allah!" 4 Deside Isa wikan napi saq tepikirang siq dengan-dengan nike, jari Ie bemanik, "Kembẽq pikirande jahat maraq nike? 5 Mbẽ saq molahan ngucapang: 'Dosende sampun teampunin', atao ngucapang: 'Ures dait lampaq?' 6 Laguq adẽq side pade nenaoq bahwe lẽq dunie niki Bije Manusie bedowẽ kuase ngampunin dose." Terus manik Deside Isa lẽq dengan kẽpaq nike, "Ures, terus lampaq!" 7 Dengan kẽpaq nike ures, terus ulẽq ojok balẽne. 8 Sewaktu dengan-dengan nyaksiang peristiwe nike ie pade takut dait mulieang Allah. Sẽngaq Allah sampun ngicanin kuase saq belẽq gati tipaq manusie. 9 Beterus Deside Isa bilin taoq nike. Sewaktu bemargi, Ie cingakin sopoq penagih pajek aranne Matius, kenyeke tokol lẽq taoqne begawẽan. Deside Isa bemanik lẽq ie, "Silaq turut Tiang!" Terus Matius nganjeng dait ngiring Deside Isa. 10 Waktu Deside Isa kenyeke medaran lẽq gedẽng Matius, dateng luwẽq penagih pajek dait dengan-dengan bedose, milu medaran kance Deside Isa dait pengiring-pengiring-Ne. 11 Araq dengan-dengan Parisi saq serioq hal nike. Dait ie pade beketuan lẽq pengiring-pengiring Deside Isa, "Kembẽq gurunde bareng medaran kance penagih pajek dait dengan bedose?" 12 Deside Isa pirengang napi saq teketuanang siq dengan Parisi nike, terus jawab Deside Isa, "Dengan saq sẽhat ndẽq merluang tabib, cume dengan saq sakit doang. 13 Silaq lumbar dait perajahin napi artine ayat Kitab Suci niki: 'Tiang mẽlẽ belas kasihan, ndẽqne kurban binatang'. Sẽngaq Tiang dateng ndẽqne jari ngempoh dengan-dengan saq nganggep diriqne sampun kenaq, laguq dengan-dengan saq bedose." 14 Sesampun nike, pengiring-pengiring Yahya parek metakẽn tipaq Deside Isa, "Kembẽq tiang pade dait dengan-dengan Parisi puase, laguq pengiring-pengiring Pelungguh nẽnten?" 15 Jawab Deside Isa lẽq ie pade, "Segerah temuẽ-temuẽ lẽq gawẽ ngawinang asẽq angenne lamun pengantẽn mame masih araq bareng ie pade? Pasti ndẽq! Laguq gen dateng waktune pengantẽn mame nike gen tebait lẽman ie pade. Lẽq waktu nike baruq ie pade puase. 16 Ndẽq araq dengan nampel kelambi saq sampun lotoh kadu bakal saq masih baru. Sẽngaq bakal saq jari penampel nike gen keset, dait gen miaq sayan belẽq roẽk kelambi nike. 17 Maraq nike ẽndah ndẽq araq dengan saq ngisiq anggur saq masih baru lẽq dalem kantong lẽndong saq sampun lebung. Sẽngaq kantong nike gen bedah dait sẽde, terus aiq anggur nike gen tumpah. Anggur saq masih baru harus teisiq lẽq dalem kantong saq baru ẽndah, adẽq deduaqne tetep solah." 18 Lẽq waktu Deside Isa bebaos kance pengiring-pengiring Yahya, parek sopoq kepale balẽ ibadah. Ie sujut lẽq arepan Deside Isa terus matur, "Anak tiang saq nine baruq gati milinang. Laguq tunas Pelungguh rauh dait jamah ie, make ie gen idup malik." 19 Deside Isa ngadeg teiring siq pengiring-pengiring-Ne terus lumbar kance dengan nike. 20 Lẽq tengaq langan araq sopoq dengan nine saq sakit pendarahan sampun due olas taun ngonẽqne, ngerapetin Deside Isa lẽman mudi. Pikirne, "Asal tiang kintur jubah-Ne, tiang gen selah." Beterus ie kintur poton jubah Deside Isa. 22 Waktu nike ẽndah Deside Isa nyereminang andang mudi dait cingakin dengan nine nike beterus bemanik, "Teguqang angende, anak Tiang, imande sampun miaq side selah!" Lẽq waktu nike ẽndah dengan nine nike selah. 23 Beterus Deside Isa rauh lẽq gedẽng kepale balẽ ibadah nike. Sewaktu Deside Isa cingakin dengan-dengan saq nabuh gending kematẽan dait luwẽq dengan uyut lẽq derike, 24 Deside Isa bemanik lẽq ie pade, "Sugul side pade selapuq! Kanak niki ndẽq milinang, ie cume tindoq." Deside Isa tekelelẽqang siq ie pade selapuq. 25 Sesampun dengan-dengan nike sugul, Deside Isa tame ojok dalem kamar kanak nike, dait negel imene. Beterus langsung kanak nine nike ures. 26 Kabar nike jari nyebar ojok selapuq daẽrah nike. 27 Deside Isa lumbar lẽman taoq nike. Lẽq tengaq langan araq due dengan bute milu ngiring Deside Isa. Ie pade bekuih-kuih, "Keturunan Daud! Periakang tiang pade!" 28 Sesampun Deside Isa tame ojok dalem gedẽng, kedue dengan bute nike parek ojok Deside Isa. Deside Isa bemanik lẽq ie pade, "Napi side pade percaye bahwe Tiang bau nyelahang side pade?" "Percaye Junjungan Saq Mulie!" Jawab ie pade. 29 Beterus Deside Isa jamah penenteng ie pade dait bemanik, "Lantaran imande, make telaksane napi saq side pade harepang." 30 Make ie pade tao nyerioq. Ie pade tepajar siq Deside Isa adẽqne ndẽq bebadaq lẽq sai-sai mengenai hal nike. 31 Laguq ie pade lumbar dait nyiarang kabar mengenai Deside Isa ojok selapuq daẽrah nike. 32 Baruq gati kedue dengan bute nike lumbar, sopoq dengan pakoq saq tekuasein siq roh jahat tejauq parek tipaq Deside Isa. 33 Deside Isa sediq roh jahat nike dait lẽq waktu nike ẽndah dengan nike tao ngeraos malik. Dengan luwẽq nike bengaq, dait bebase, "Ndẽq uwah tiang pade serioq peristiwe saq maraq niki lẽq Israel!" 34 Laguq dengan-dengan Parisi bebase, "Datune sẽtan saq ngebẽng Ie kuase jari sediq sẽtan-sẽtan nike." 35 Beterus Deside Isa lumbar lẽman sopoq kote ojok kote saq lain dait lẽman sopoq kampung ojok kampung saq lain; Ie ngajahang lẽq balẽ-balẽ ibadah dait nyampẽang Kabar Solah mengenai Kerajaan Sorge. Deside Isa nyelahang dengan-dengan saq ngidap segale macem penyakit dait saq awakne cacat. 36 Sewaktu Deside Isa cingakin dengan luwẽq nike, Ie jari periak lẽq ie pade, sẽngaq ie pade lelah dait ndẽq araq saq perhatiang, maraq dombe saq ndẽq bedowẽ pengarat. 37 Beterus Deside Isa bemanik lẽq pengiring-pengiring-Ne, "Saq tepataq mule luwẽq, laguq tukang pataqne cume sekediq. 38 Keranaq nike tunas lẽq ~Epẽne adẽq Ie ngirim tukang pataq jari mataq."

Matthew 10

1 Lẽq sopoq jelo, Deside Isa ngemanikang kedue olas pengiring-Ne bekumpul. Beterus Deside Isa ngicanin kuase tipaq ie pade jari sediq roh-roh jahat dait nyelahang segale macem penyakit dait segale macem awak saq cacat. 2 Aran kedue olas rasul nike: Penembẽq Simon (saq tesebut Petrus) dait Andreas semetonne, terus Yakub dait Yahya semetonne, ie pade bije-bije Zebedeus. 3 Beterus Pilipus dait Bartolomeus, Tomas dait Matius penagih pajek nike, Yakub bije Alpeus, dait Tadeus; 4 dait saq penutuq Simon dengan Zelot dait Yudas Iskariot saq behianat lẽq Deside Isa. 5 Kedue olas rasul nike teutus siq Deside Isa, dait ie pade tepesen: "Ndaq lumbar ojok daẽrah dengan bangse-bangse lain atao ojok kote-kote dengan Samaria. 6 Laguq lumbar ojok dengan-dengan Israel, terutame tipaq dengan-dengan saq sesat. 7 Sampẽang lẽq ie pade bahwe Kerajaan Sorge sampun rapet. 8 Selahang dengan-dengan saq sakit; idupang dengan-dengan saq ninggal; selahang dengan-dengan saq sakit kuste, sediq sẽtan-sẽtan. Side pade sampun nerimaq selapuqne nike secare cume-cume. Jari, bẽng ẽndah secare cume-cume. 9 Ndaq jauq kẽpẽng emas, kẽpẽng perak atao kẽpẽng tembage. 10 Ndaq ẽndah jauq takaq sangu atao due lembar kelambi lẽq kelampande, atao sepatu atao jauq tunjang. Sẽngaq dengan saq begawẽan berhak nerimaq upaqne. 11 Lamun side pade tame ojok kote atao kampung, boyaq dengan saq mẽlẽ nerimaq side. Ndot kance ie jangke side pade berangkat malik. 12 Sewaktu side pade tame ojok sopoq balẽ, ucapang salam tipaq ie pade. 13 Lamun dengan-dengan lẽq balẽ nike nerimaq side pade, alurang salam side nike tetep lẽq ie pade. Laguq lamun ie pade ndẽq mẽlẽ nerimaq side pade, bait malik salamde nike. 14 Lamun araq balẽ atao kote saq ndẽq mẽlẽ nerimaq side pade atao ndẽq mẽlẽ dengah side pade, bilin taoq nike, dait kerapang kerepuk lẽman naẽnde. 15 Tiang badaq side: Lẽq jelo Penghakiman dengan-dengan kote Sodom dait Gomora gen molahan teampunin siq Allah ketimbang dengan-dengan lẽq kote nike!" 16 "Perhatiang niki: Tiang ngutus side pade maraq dombe ojok tengaq-tengaq serigale, keranaq nike side pade harus ceket maraq ulah dait tulus maraq kedit dare. 17 Laguq tetep waspade lẽq selapuq dengan, sẽngaq araq saq gen nyerahang side pade ojok mahkamah agame, dait side pade gen tepecut lẽq balẽ-balẽ ibadah. 18 Side pade gen tejauq ojok arepan penguase-penguase dait raje-raje sẽngaq side pade jari pengiring Tiang. Nike jari kesempatan side pade ngebẽng kesaksian mengenai Tiang lẽq ie pade dait dengan-dengan saq ndẽq kenal Allah. 19 Laguq lamun side pade tejauq jari teadilin, ndaq kuatir mengenai napi saq harus side pade ucapang, atao berembẽ entane side pade harus ngeraos. Sẽngaq lẽq waktu nike ẽndah side pade gen tebadaq napi saq harus side pade ucapang. 20 Sẽngaq saq bebaos lẽq waktu nike ndẽqne side pade laguq Roh Bapa side saq araq lẽq dalem diriqde. 21 Gen araq dengan saq nyerahang semetonne mẽsaq jari tematẽq. Dait hal nike gen telaksane ẽndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematẽq. 22 Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang. 23 Lamun side pade teaniaye lẽq sopoq kote, pelai ojok kote saq lain. Tiang badaq side pade: Sendẽqman side pade tutuq datengin selapuq kote-kote Israel, Bije Manusie sampun rauh. 24 Sopoq murit ndẽqne belẽqan lẽman gurune, atao sopoq hambe ndẽqne belẽqan lẽman majikanne. 25 Lamun murit sampun jari maraq gurune, nike sampun cukup, dait sopoq hambe sampun pade maraq majikanne. Lamun kepale keluarge sampun tesebut Beelzebul, lebihan malik selapuq dengan saq araq lẽq balẽne. Ie pade gen tesebut saq lengẽan malik!" 26 "Ndaq takut lẽq manusie. Ndẽq araq saq teseboq, saq ndẽq gen penggitan, dait ndẽq araq saq terahasieang saq ndẽq gen tebungkar. 27 Napi saq Tiang sampẽang tipaq side lẽq taoq saq peteng, harus side pade sampẽang malik lẽq taoq saq menah. Dait napi saq tepẽsẽqang lẽq kentokde, umumang hal nike belẽq-belẽq! 28 Ndaq takut lẽq ie pade saq bau nyematẽq awak, laguq ndẽq bekuase nyematẽq jiwe. Takut tipaq Allah saq bekuase binaseang awak dait jiwe lẽq dalem api nerake. 29 Due kedit perit tejual ajine sopoq kẽpẽng saq paling kodẽq. Timaqne maraq nike ndẽq araq sopoq juaq saq geriq ojok tanaq lamun ndẽq tekayunang siq Bapa lẽq sorge. 30 Luwẽqne bulu lẽq ulunde ẽndah sampun terẽkẽng selapuqne siq Allah. 31 Keranaq nike, ndaq takut! Side pade jaoq belẽqan ajine tebanding kedit-kedit perit nike!" 32 "Sai-sai saq ngakuq lẽq julun dengan luwẽq bahwe ie pengiring Tiang, Tiang ẽndah gen ngakuq ie lẽq arepan Bapa Tiang lẽq sorge. 33 Laguq sai-sai saq nilas lẽq julun dengan luwẽq bahwe ie pengiring Tiang, Tiang ẽndah gen tilas ie lẽq arepan Bapa Tiang lẽq sorge." 34 "Ndaq paran bahwe Tiang jauq perdamẽan ojok dunie niki. Tiang ndẽq jauq perdamẽan laguq perlawanan. 35 Tiang dateng jari penyebap kanak mame ngelawan bapaqne, kanak nine ngelawan inaqne, dait menantu saq nine ngelawan mentoaqne saq nine. 36 Anggote keluarge mẽsaq gen jari musuhne. 37 Dengan saq belẽqan kasihne tipaq amaqne atao inaqne ketimbang tipaq Tiang, ndẽqne patut jari pengiring Tiang. Maraq nike ẽndah dengan saq ngasihin bijene saq nine atao bijene saq mame lebihan lẽman Tiang. 38 Dengan saq ndẽq mẽlẽ ngelẽmbah salibne dait ngiring Tiang ndẽq patut jari pengiring Tiang. 39 Dengan saq pertahenang nyawene, ie gen kẽlangan nyawene, laguq dengan saq kẽlangan nyawene lantaran setie lẽq Tiang, gen mauq idupne." 40 "Dengan saq nerimaq side pade, nerimaq Tiang ẽndah. Dait dengan saq nerimaq Tiang, nerimaq Ie saq ngutus Tiang. 41 Dengan saq nerimaq nabi lantaran ie nabi, gen nerimaq upaq nabi. Dait sai saq nerimaq sopoq dengan saq solah lantaran ie solah gen nerimaq upaq saq solah. 42 Sai-sai saq ngebẽng nginem, timaq cume aiq nyet doang tipaq salaq sopoq lẽman dengan-dengan hine niki, lantaran ie pengiring Tiang, percaye bahwe ie pasti gen nerimaq upaqne!"

Matthew 11

1 Sesampun Deside Isa ngican petunjuk-petunjuk tipaq kedue olas pengiring-Ne, Ie bilin taoq nike. Ie lumbar ngajahang dait nyampẽang Kabar Solah lẽq kote-kote saq rapet lẽman derike. 2 Yahya Pembaptis saq waktu nike kenyeke araq lẽq bui pireng kabar mengenai karye Almasih. Beterus utusne pengiring-pengiringne lumbar metakẽn tipaq Deside Isa, 3 "Napi Pelungguh dengan saq gen rauh menurut janji Allah, atao tiang pade harus ngantih dengan saq lainan?" 4 Jawab Deside Isa, "Tulak tipaq Yahya dait badaq napi saq sampun side pade dengah dait serioq: 5 Dengan bute tao nyerioq, dengan kẽpaq tao lampaq, dengan kuste teselahang, dengan kedok tao dengah, dengan ninggal teidupang malik dait Kabar Solah lẽman Allah tesampẽang ojok dengan-dengan miskin. 6 Bahagie dengan saq ndẽq ragu-ragu lẽq Tiang!" 7 Sesampun utusan-utusan Yahya nike lumbar, Deside Isa mulai bebaos lẽq dengan luwẽq mengenai Yahya, manik-Ne, "Side pade lumbar ojok padang gurun jari serioq napi? Terẽng buloq saq tetiup siq angin? 8 Atao side pade lumbar jari serioq napi? Dengan saq bekelambi solah? Dengan-dengan saq bekelambi solah ndot lẽq istane! 9 Jari, kembẽq side pade lumbar? Jari serioq nabi? Tetu, malahan ie lebih lẽman nabi. 10 Sẽngaq Yahya nike saq temaksut lẽq dalem ayat Kitab Suci niki: 'Serioq, Tiang suruq utusan Tiang, juluan lẽman Deside, ie gen nyiepang Deside langan.' 11 Tiang badaq side: Setetune lẽq antare ie pade saq tebijeang siq dengan nine ndẽq uwah araq sopoq dengan saq belẽqan lẽman Yahya Pembaptis, laguq saq paling kodẽq lẽq dalem Kerajaan Sorge belẽqan lẽman Yahya. 12 Mulai lẽman Yahya dateng jangke mangkin niki, Kerajaan Sorge tetentang siq dengan-dengan saq berusahe nguasein siq care kekerasan. 13 Jangke waktune Yahya nike dateng, selapuq Hukum Taurat dait kitab nabi-nabi benubuat mengenai hal-hal saq harus telaksane. 14 Dait lamun side pade mẽlẽ percaye, Yahya nike Elia saq sampun tenubuatang kedatenganne. 15 Sai bedowẽ kentok, harus ie dengahang! 16 Siq napi harus Tiang bandingang dengan-dengan lẽq jaman niki? Ie pade maraq kanak-kanak saq tokol-tokol lẽq peken. Sopoq kelompoq bekuih tipaq kelompoq saq lain, 17 'Tiang pade nyanyiang side pade lagu gembire, laguq side pade ndẽq mẽlẽ ngigel! Tiang pade nyanyiang lagu sedih, dait side pade ndẽq mẽlẽ nangis!' 18 Lantaran Yahya dateng -- ie puase dait ndẽq nginem anggur; dait dengan-dengan bebase, 'ie tekuasein siq sẽtan.' 19 Mangkin Bije Manusie, rauh -- Ie medaran dait nginem; beterus dengan-dengan bebase, 'Serioq dengan nike! Melak, tukang bowos, batur penagih pajek dait batur dengan-dengan bedose.' Laguq hikmat Allah terbukti kenaq langan perbuatan-perbuatanne." 20 Beterus Deside Isa mulai ngewade kote-kote, timaq lẽq derike Ie paling luwẽq miaq muqjizat. Sẽngaq dengan-dengan lẽq kote-kote nike ndẽq mẽlẽ betobat lẽman dose-dose ie pade. 21 "Celake side kote Korazim! Dait celake ẽndah side kote Betsaida! Seandẽne muqjizat-muqjizat saq tepiaq lẽq taoqde nike sampun tepiaq lẽq Tirus dait Sidon, pasti dengan-dengan lẽq derike sampun ngonẽq betobat lẽman dose-dosene dait ngengadu kelambi dukecite dait toloq awu-awu lẽq atas ulune. 22 Tiang badaq side, lẽq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade! 23 Dait side, Kapernaum! Napi side gen teatasang jangke ojok langit? Ndẽq! Malahan side gen tetetẽh ojok dunie dengan matẽ! Sẽngaq seandẽne muqjizat-muqjizat saq tepiaq lẽq tengaq-tengaq side sampun telaksane lẽq Sodom, Sodom nike masih araq jangke mangkin! 24 Keranaq nike Tiang badaq side, lẽq jelo Kiamat, dengan Sodom gen molahan teampunin siq Allah ketimbang side pade!" 25 Lẽq waktu nike Deside Isa bedo'e, "Bapa, Tuhan saq nguasein langit dait gumi! Tiang besyukur tipaq Deside sẽngaq selapuqne nike Deside rahasieang lẽman dengan-dengan saq bijaksane dait pinter. Laguq Deside nyatayang tipaq dengan-dengan saq biase-biase. 26 Hal nike saq nyenengang Deside." 27 Beterus Deside Isa bemanik, "Selapuqne sampun teserahang lẽq Tiang siq Bapa. Ndẽq araq sopoq dengan juaq saq kenal Bije, selain Bapa. Ndẽq araq ẽndah saq kenal Bapa selain Bije, dait dengan-dengan tipaq sai Bije nike ngenalang Bapa. 28 Silaq dateng ojok Tiang selapuqde saq lelah dait saq bedowẽ bandean berat; Tiang gen bẽng kelepasan tipaq side. 29 Pade turut selapuq prẽntah Tiang, dait berajah lẽman Tiang. Sẽngaq Tiang niki lemah lembut dait rendah atẽ, make jiwende gen mauq ketenangan. 30 Sẽngaq prẽntah-prẽntah Tiang nike miaq seneng dait bandean Tiang nike ẽndah dẽang."

Matthew 12

1 Lẽq sopoq jelo, waktu nike jelo Sabat, Deside Isa kance pengiring-pengiring-Ne bemargi lẽq lendang gandum. Sambil bemargi pengiring-pengiring-Ne pade bau gandum, terus kelorne sẽngaq ie pade lapah. 2 Sewaktu dengan-dengan Parisi serioq hal nike, ie pade matur lẽq Deside Isa, "Cobaq serioq, pengiring-pengiring Pelungguh ngelanggar Hukum Taurat ite, ie pade ngelaksaneang hal saq ndẽq kanggo telaksaneang lẽq jelo Sabat." 3 Jawab Deside Isa lẽq ie pade, "Napi side pade ndẽq uwah bace mengenai napi saq telaksaneang siq Daud sewaktu ie dait dengan-dengan saq bareng kance ie lapah? 4 Daud tame ojok dalem Gedẽng Allah dait kelorang ruti saq sampun teaturang tipaq Allah. Padahal Daud atao dengan-dengan saq ngiring ie ndẽq kanggo kelorang ruti nike, kecuali imam-imam. 5 Atao napi ndẽq uwah side pade bace lẽq dalem Kitab Suci Taurat bahwe sebilang jelo Sabat, imam-imam saq betugas lẽq Gedẽng Allah ndẽq tesalaqang timaq ie ngelanggar aturan jelo Sabat? 6 Tiang badaq side: Setetune lẽq deriki araq saq belẽqan lẽman Gedẽng Allah. 7 Lẽq dalem Kitab Suci araq tetulis: Tiang mẽlẽ belas kasihan, ndẽqne kurban binatang. Lamun side tetu-tetu ngerti maksut Tiang niki, side pade pasti ndẽq gen nyalahang dengan-dengan saq ndẽq salaq. 8 Sẽngaq, Bije Manusie nike Penguase jelo Sabat." 9 Beterus Deside Isa bilin taoq nike, dait lumbar ojok balẽ ibadah. 10 Lẽq derike araq dengan saq imene matẽ setowẽq. Araq dengan-dengan lẽq derike saq mẽlẽ boyaq-boyaq kesalaqan adẽqne bau nyalahang Deside Isa. Ie pade metakẽn lẽq Deside Isa, "Kanggo napi nẽnten nyelahang dengan lẽq jelo Sabat?" 11 Jawab Deside Isa, "Lamun araq lẽq antare side pade saq bedowẽ dombe, dait lẽq jelo Sabat dombe nike geriq ojok longkak saq dalem; napi ẽpẽn dombe nike ndẽq gen berusahe nyugulang dombe nike lẽman longkak nike? 12 Nah, manusie belẽqan ajine ketimbang dombe! Jari lamun maraq nike kanggo gawẽq hal saq solah lẽq jelo Sabat!" 13 Beterus Deside Isa bemanik lẽq dengan saq matẽ setowẽq imene nike, "Ulurang imende." Dengan nike ngulurang imene, beterus imene selah maraq saq setowẽq. 14 Laguq dengan-dengan Parisi bilin balẽ ibadah, terus ie pade mupakat gen nyematẽq Deside Isa. 15 Deside Isa wikan bahwe dengan-dengan Parisi nike bedowẽ niat jahat lẽq Ie. Jari Ie lumbar lẽman taoq nike, dait luwẽq dengan ngiring Ie. Beterus Deside Isa nyelahang selapuq dengan saq sakit. 16 Laguq Deside Isa balaq ie pade betutur mengenai Ie tipaq dengan lain. 17 Siq care nike telaksane napi saq sampun temanikang siq Allah langan Nabi Yesaya, 18 "Niki utusan Tiang saq Tiang pilẽq, Dengan saq Tiang kasihin dait saq nyenengang angen Tiang. Roh Tiang gen Tiang toloq lẽq Ie, keadilan Tiang gen Ie beriteang tipaq bangse-bangse. 19 Ie ndẽq gen betungkasan atao nyurak, atao pidato lẽq rurung-rurung belẽq. 20 Terẽng buloq saq empak ndẽq gen Ie polakang, dilah saq gen pedaq ndẽq gen Ie pedaqang. Ie gen terus bejuang jangke keadilan telaksaneang; 21 selapuq bangse gen beharep lẽq Ie." 22 Beterus araq dengan-dengan parek tipaq Deside Isa jauq dengan bute dait pakoq lantaran tekuasein siq sẽtan. Deside Isa nyelahang dengan nike sehingge ie tao nyerioq dait ngeraos malik. 23 Selapuq dengan saq nyaksiang peristiwe nike jari bengaq, dait bebase, "Sang Ie niki keturunan Daud?" 24 Sewaktu dengan-dengan Parisi pireng hal nike, terus ie pade nimbal, "Dengan niki cume tao sediq sẽtan lantaran Beelzebul, datune sẽtan saq sampun ngebẽng Ie kuase nike." 25 Deside Isa wikan pikiran dengan-dengan Parisi nike, jari manik Deside Isa lẽq ie pade, "Lamun sopoq negare lẽq dalemne araq golongan-golongan saq saling bemusuhan, pasti negare nike ndẽq bau tahen ngonẽq. Dait sebilang kote atao keluarge saq saling bemusuhan sopoq kance saq lain, pasti ndẽq gen tahen ngonẽq. 26 Maraq nike ẽndah lẽq dalem kerajaan Belis; lamun sopoq kelompoq sediq kelompoq saq lain, make kerajaan Belis nike sampun saling bemusuhan dait ndẽq gen tahen ngonẽq. 27 Side pade bebase bahwe Tiang sediq sẽtan siq kuase Beelzebul. Lamun maraq nike siq kuase sai pengiring-pengiringde sediq roh jahat? Pengiring-pengiringde mẽsaq saq buktiang bahwe side pade salaq! 28 Laguq setetune Tiang sediq sẽtan kadu kuase Roh Allah. Nike artine bahwe Kerajaan Allah sampun rauh lẽq side. 29 Berembẽ dengan bau tame ojok dalem balẽ sopoq dengan saq kuat, jari ngerampas dowẽne lamun ie ndẽq juluan sẽkoq dengan saq kuat nike? Sesampun sẽkoqne, baruq ie bau ngerampas dowẽ dengan nike. 30 Dengan saq ndẽq bepihak lẽq Tiang, setetune ie ngelawan Tiang. Dait dengan saq ndẽq nulung Tiang setetune ie sẽdaq karye Tiang! 31 Keranaq nike Tiang badaq side pade: Lamun dengan gawẽq dose atao menghine dengan lain, ie masih bau teampunin! Laguq lamun ie menghine Roh Allah, ie ndẽq gen teampunin! 32 Lamun dengan ngucapang sopoq hal ngelawan Bije Manusie, ie bau teampunin, laguq lamun ie menghine Roh Suci, ie ndẽq gen teampunin, timaq mangkin atao ẽraq lẽq jaman saq mudian!" 33 "Adẽq temauq buaq saq solah, lolone harus solah. Lamun lolone ndẽq solah buaqne ẽndah ndẽq gen solah. Jari, solah atao ndẽq lolone nike bau tetaoq lẽman buaqne. 34 Side dengan jahat, berembẽ side bau ngucapang hal-hal saq solah lamun side jahat? Sẽngaq napi saq teucapang lẽq biwih tetentuang siq isi atẽne! 35 Hal-hal saq solah sugul lẽman dengan saq solah sẽngaq ie penoq siq hal-hal saq solah. Laguq hal-hal saq jahat sugul lẽman dengan saq jahat sẽngaq ie penoq siq hal-hal saq jahat. 36 Laguq Tiang badaq side: Lẽq jelo Penghakiman ẽraq, sebilang dengan harus betanggung jawab lẽq ucapan-ucapanne saq ndẽq araq manpaatne. 37 Sẽngaq setetune, napi-napi saq sampun teucapang gen tekadu jari nentuang side salaq atao ndẽq." 38 Beterus ahli-ahli Taurat dait dengan-dengan Parisi matur lẽq Deside Isa, "Paq Guru, tiang pade melẽt serioq sopoq tande lẽman Pelungguh." 39 Laguq jawab Deside Isa, "Jahat gati dait durhake dengan-dengan lẽq jaman niki! Side pade mẽlẽ serioq Tiang miaq tande? Tipaq side pade ndẽq gen teicanin sopoq juaq tande kecuali tande Nabi Yunus. 40 Sẽngaq pade maraq Nabi Yunus ndot lẽq dalem tian empaq saq belẽq telu jelo telu kelem ngonẽqne. Maraq nike ẽndah Bije Manusie gen ndot lẽq dalem tian gumi telu jelo telu kelem. 41 Lẽq jelo Penghakiman, penduduk kote Niniwe gen teidupang bareng kance dengan-dengan jaman niki, dait nuduh ie pade. Sẽngaq dengan-dengan Niniwe nike betobat lẽman dose-dosene sesampun ie pade dengah hotbah Nabi Yunus. Laguq mangkin lẽq deriki setetune araq saq belẽqan lẽman Nabi Yunus! 42 Lẽq jelo Penghakiman, ratu lẽman negeri Lauq gen teidupang bareng kance dengan-dengan jaman niki, dait nuduh ie pade. Sẽngaq jari dengahang pengajahan Nabi Sulaiman saq bijaksane, ratu nike dateng lẽman poton gumi. Laguq mangkin lẽq deriki setetune araq saq belẽqan lẽman Nabi Sulaiman!" 43 "Lamun roh jahat sampun sugul lẽman manusie, roh nike begelining ojok taoq-taoq saq gero jari boyaq taoq mentelah, laguq ie ndẽq mauq. 44 Keranaq nike ie gen muni, 'Tiang gen tulak ojok balẽ saq sampun tiang bilin.' Waktu ie dateng lẽq derike, daitne balẽ nike sampun kosong, bersi dait teratur. 45 Beterus ie lalo dait jauq pituq roh lain saq jahatan lẽman ie. Terus ie pade tame ojok dalem dengan nike dait ndot lẽq derike. Dait ahirne keadaan dengan nike jari lengẽan lẽman saq mule. Hal saq maraq nike ẽndah gen telaksane tipaq dengan-dengan jahat jaman niki." 46 Lẽq waktu Deside Isa masih bebaos kance dengan luwẽq nike, sanak-sanak kance mamiq bini Deside Isa dateng. Ie pade nganjeng lẽq luah sambil berusahe adẽqne bau bebaos kance Deside Isa. 47 Sopoq lẽq antare dengan luwẽq nike matur lẽq Deside Isa, "Silaq cingakin mamiq bini dait sanak-sanak Pelungguh araq lẽq luah, ie pade gen bebaos kance Pelungguh." 48 Laguq jawab Deside Isa, "Sai mamiq bini Tiang? Sai sanak-sanak Tiang?" 49 Beterus Deside Isa nijoqang pengiring-pengiring-Ne dait bemanik, "Niki inaq dait semeton Tiang. 50 Dengan-dengan saq ngelaksaneang pekayunan Bapa Tiang saq lẽq sorge ie saq jari semeton mame dait semeton nine serte inaq Tiang."

Matthew 13

1 Lẽq jelo nike ẽndah Deside Isa bilin balẽ nike, beterus melinggih lẽq sedin danao. 2 Luwẽq gati dengan saq bekumpul lẽq sekelining Deside Isa, keranaq nike Ie margi dait taẽk ojok sopoq perau, dait dengan luwẽq nike nganjeng lẽq pesisi. 3 Beterus Deside Isa mulai ngajahang luwẽq hal lẽq dengan-dengan nike kadu perumpamean. Deside Isa bemanik, "Araq sopoq dengan lumbar sawur binẽq 4 Sewaktu dengan nike kenyeke sawur binẽq nike, araq binẽq saq geriq lẽq langan. Beterus dateng kedit ngaken binẽq nike jangke bis. 5 Araq ẽndah binẽq saq geriq lẽq taoq saq bebatu-batu saq sekediq tanaqne. Binẽq-binẽq nike becat tiwoq sẽngaq tanaqne sekediq. 6 Laguq sesampun panjeng jelo, suli-suli saq tiwoq nike mulai layu beterus gero dait matẽ sẽngaq ndẽq berakah. 7 Araq ẽndah binẽq saq geriq lẽq tengaq bebenes beduwi. Bebenes nike sayan belẽq dait gepit suli-suli nike jangke matẽ. 8 Laguq araq ẽndah binẽq saq geriq lẽq tanaq saq subur, terus bebuaq; araq saq satus, araq enem dase, dait araq ẽndah saq telung dase kali lipet luwẽqne." 9 Sesampun nyeriteang perumpamean nike, Deside Isa bemanik, "Sai-sai bedowẽ kentok, harus ie dengahang!" 10 Beterus pengiring-pengiring Deside Isa parek dait metakẽn lẽq Deside Isa, "Kembẽq Pelungguh kadu perumpamean lamun Pelungguh bebaos kance dengan luwẽq nike?" 11 Jawab Deside Isa, "Side pade sampun teicanin paice jari nenaoq rahasie Kerajaan Sorge, laguq dengan-dengan nike ndẽq. 12 Sẽngaq dengan saq sampun bedowẽ gen teican luwẽqan malik, dait ie gen bekelimpahan. Laguq dengan saq ndẽq bedowẽ napi-napi, make napi juaq saq araq lẽq ie gen tebait. 13 Nike alasan Tiang kadu perumpamean lamun Tiang ngajahang lẽq dengan luwẽq, sẽngaq ie pade setetune nyerioq, laguq maraq dengan ndẽq nyerioq; Ie pade dengah laguq maraq dengan ndẽq dengah dait ndẽq ngerti. 14 Siq care nike make telaksane napi saq sampun tenubuatang siq Nabi Yesaya, 'Allah bemanik: Side pade gen dengah laguq side pade ndẽq ngerti; side pade gen serioq laguq ndẽq paham. 15 Sẽngaq pikiran dengan-dengan nike sampun kongol, kentok ie pade sampun kedok dait penenteng ie pade sampun tepedemang. Hal niki telaksane adẽq penenteng ie pade ndaq nyerioq, kentok ie pade ndaq dedengah, pikiran ie pade ndaq ngerti, terus bebalik, sehingge Tiang nyelahang ie pade.' " 16 "Laguq side pade bahagie," manik Deside Isa lẽq pengiring-pengiring-Ne, "sẽngaq side pade tetu-tetu nyerioq dait dengah. 17 Keranaq nike Tiang badaq side: Setetune luwẽq nabi dait dengan saq taat lẽq Allah melẽt serioq napi saq side pade serioq mangkin, laguq ie pade ndẽq serioq. Ie pade melẽt dengah napi saq side pade dengah mangkin, laguq ie pade ndẽq dengah." 18 "Dengahang napi arti perumpamean penyawur binẽq nike. 19 Binẽq saq geriq lẽq langan nike ibarat dengan-dengan saq dengah manik mengenai Kerajaan Sorge, laguq ie pade ndẽq ngerti. Beterus Si Jahat nike dateng ngerampas napi saq sampun tesawur lẽq dalem atẽ dengan-dengan nike. 20 Binẽq saq geriq lẽq tanaq saq luwẽq batune, ibarat dengan-dengan saq dengah manik nike, dait langsung nerimaq siq senengne. 21 Laguq manik nike ndẽq berakah lẽq dalem atẽ ie pade, sehingge ndẽq tahen ngonẽq. Sewaktu dateng penyusah atao penganiayean lantaran manik nike, ie pade langsung murtat. 22 Binẽq saq geriq lẽq tengaq bebenes beduwi ibarat dengan-dengan saq dengah manik nike, laguq kuatir mengenai idupne dait mẽlẽ idup mẽwah. Keranaq nike manik lẽman Allah tegepit lẽq dalem atẽne sehingge ndẽq iniq bebuaq. 23 Dait binẽq saq geriq lẽq tanaq saq subur ibarat dengan-dengan saq dengah dait paham lẽq manik nike. Ie pade bebuaq luwẽq, araq saq satus, enem dase dait telung dase kali lipet hasilne." 24 Deside Isa nyampẽang malik sopoq perumpamean lẽq dengan luwẽq, manik-Ne, "Hal Kerajaan Sorge maraq perumpamean niki: Sopoq petani sawur binẽq saq solah lẽq lendangne. 25 Sewaktu selapuq dengan kenyeke mesarẽ, musuh petani nike dateng sawur binẽq rẽ lẽq antare gandum nike, beterus ie lumbar. 26 Sewaktu binẽq-binẽq nike tiwoq dait buaq-buaq mayangne mulai sugul, lolo-lolo rẽ nike ẽndah penggitan. 27 Beterus buruh-buruh tani saq teupaq nike dateng ojok petani nike dait bebase, 'Paq, tekan binẽq solah saq pelungguh talet lẽq lendang niki? Berembẽ jangke lolo rẽ nike araq lẽq derike?' 28 Jawab petani nike, 'Nike pegawẽan musuh.' Beterus buruh-buruh tani nike beketuan malik, 'Napi pelungguh kayun tiang pade embot lolo rẽ nike?' 29 'Ndaq,' jawab ẽpẽn dowẽ lendang nike, 'sẽngaq lamun lolo rẽ nike tembot laun gandumne milu kerembotan. 30 Alurang deduaqne belẽq bareng-bareng jangke dateng waktune tepataq. Laun tiang gen badaq dengan-dengan saq mataq nike: Kumpulang juluq lolo-lolo rẽ, taliq, dait sedut. Beterus kumpulang gandumne dait toloq lẽq dalem lumbung.' " 31 Deside Isa nyampẽang malik perumpamean lẽq dengan luwẽq, manik-Ne, "Hal Kerajaan Sorge nike seumpame tolang sawi saq tebait siq dengan terus tesawur lẽq lendangne. 32 Tolang sawi nike binẽq saq paling kodẽq. Laguq lamun ie sampun tiwoq, ie gen jari saq paling belẽq lẽq antare taletan-taletan saq lain. Ie jari lolo, sehingge kedit-kedit dateng miaq kesebu lẽq pẽmpang-pẽmpangne." 33 Araq sopoq perumpamean lain saq tesampẽang siq Deside Isa, lẽq dengan luwẽq. "Hal Kerajaan Sorge keadaanne pade maraq ragi ruti saq tebait siq sopoq dengan nine, terus teadon kance petang dase liter tepung terigu, jangke mbal selapuqne!" 34 Selapuqne teajahang siq Deside Isa lẽq dengan luwẽq kadu perumpamean, dait ndẽq araq sopoq juaq saq Ie ajahang tipaq ie pade ndẽq kadu perumpamean. 35 Siq care nike telaksane napi saq tesampẽang siq nabi, "Tiang kadu perumpamean lamun ngeraos kance ie pade; Tiang gen nyampẽang hal-hal saq teseboqang mulai lẽman dunie niki tecipteang." 36 Sesampun nike Deside Isa margi bilin dengan luwẽq nike, terus tame ojok sopoq gedẽng. Pengiring-pengiring-Ne parek beterus ie pade matur, "Tunas Pelungguh jelasang lẽq tiang pade napi arti perumpamean lolo rẽ lẽq antare gandum nike." 37 Beterus jawab Deside Isa, "Dengan saq sawur binẽq saq solah nike, Bije Manusie. 38 Lendang nike dunie niki. Binẽq saq solah nike, bije-bije Kerajaan. Lolo rẽ nike, anak-anak Belis. 39 Musuh saq sawur binẽq lolo rẽ nike, Belis. Waktu mataq nike, ahir jaman, dait dengan-dengan saq mataq nike malaẽkat-malaẽkat. 40 Pade maraq lolo-lolo rẽ tekumpulang terus tesedut lẽq dalem api, maraq nike ẽndah ẽraq lẽq ahir jaman. 41 Bije Manusie gen ngutus malaẽkat-malaẽkat-Ne dait ie pade gen ngumpulang selapuq hal saq nyesatang dait selapuq dengan saq gawẽq jahat, dait nyugulang ie pade lẽman dalem Kerajaan-Ne. 42 Ie pade selapuq gen tetetẽh ojok jangkih saq apine begelaur; lẽq derike ie pade gen nangis dait menderite. 43 Lẽq waktu nike dengan-dengan saq solẽh gen becahaye maraq sinar jelo dalem Kerajaan Bapa ie pade. Jari, sai bedowẽ kentok, harus ie dengahang!" 44 "Hal Kerajaan Sorge pade maraq perumpamean niki: Araq harte karun lẽq dalem tanaq terus tedait siq dengan, laguq tetamaqang malik ojok dalem tanaq. Dengan nike cemoh gati beterus ie lumbar jual selapuq dowẽne, terus ie tulak beli tanaq nike." 45 "Hal Kerajaan Sorge pade maraq perumpamean niki: Araq sopoq pedagang boyaq mutiare-mutiare saq mahel ajine. 46 Sewaktu ie ndait sopoq mutiare saq luar biase solahne, ie becat lumbar dait jual selapuq dowẽne, beterus beline mutiare saq sopoq nike." 47 "Hal Kerajaan Sorge pade maraq perumpamean jaring saq tepencar lẽq segare, beterus mauq empaq macem-macem ruene. 48 Sesampun jaring nike penoq siq empaq, jaring nike teangkat ojok darat siq nelayan-nelayan nike. Beterus ie pade tokol dait kelinne empaq-empaq nike: Saq solah toloqne lẽq dalem keranjang terus saq ndẽq solah tetẽhne. 49 Maraq nike ẽndah ẽraq lẽq ahir jaman, malaẽkat-malaẽkat gen lumbar kelin dengan-dengan jahat lẽman dengan-dengan saq taat ngelaksaneang pekayunan Allah. 50 Beterus dengan-dengan jahat tetetẽh ojok dalem jangkih saq araq apine, lẽq derike ie pade gen nangis dait menderite." 51 "Napi side pade ngerti selapuqne niki?" Deside Isa beketuan lẽq pengiring-pengiring-Ne. "Ngerti!" jawab pengiring-pengiring-Ne. 52 Beterus manik Deside Isa tipaq ie pade, "Keranaq nike sebilang ahli Taurat saq nerimaq perajahan mengenai hal Kerajaan Sorge nike, pade maraq ẽpẽn balẽ saq nyugulang barang-barang baru dait laẽq lẽman tangkaq dowẽne." 53 Sesampun Deside Isa selesẽ nyampẽang perumpamean-perumpamean nike, Ie margi bilin taoq nike, 54 beterus Ie tulak ojok kampung asal-Ne. Lẽq derike Ie ngajahang lẽq balẽ ibadah, dait dengan-dengan saq dengahang Ie bengaq gati terus ie pade bebase, "Lẽman mbẽ Ie mauq hikmat dait lẽman mbẽ Ie mauq kuase jari miaq muqjizat-muqjizat nike? 55 Tekan Ie nike bije tukang kayuq? Tekan Mariam nike mamiq bini-Ne, dait sanak-sanak-Ne: Yakub, Yusup, Simon dait Yudas? 56 Dait sanak-sanak-Ne saq nine araq ndot lẽq deriki ẽndah? Jari lẽman mbẽ Ie mauq selapuqne nike?" 57 Make ie pade ndẽq nerimaq Deside Isa. Beterus Deside Isa bemanik lẽq ie pade, "Sopoq nabi tehormatin lẽq mbẽ-mbẽ kecuali lẽq kampung asalne dait lẽq balẽne mẽsaq." 58 Jari, Deside Isa nẽnten miaq luwẽq muqjizat lẽq derike, sẽngaq ie pade ndẽq percaye.

Matthew 14

1 Lẽq waktu nike, Herodes saq jari raje wilayah negeri Galilea pireng kabar mengenai Deside Isa. 2 Beterus Herodes bebase lẽq pejabat-pejabatne, "Pasti niki Yahya Pembaptis saq sampun idup malik! Keranaq nike Ie bedowẽ kuase miaq keajaipan." 3 Sẽngaq sendẽqman nike Herodes ngutus dengan jari bau Yahya dait sẽkoq ie terus tetamaqang ojok dalem bui. Hal nike telaksaneang siq Herodes lantaran Herodias sebiniqne Pilipus, sanakne mẽsaq. 4 Sẽngaq Yahya sampun bebase maraq niki lẽq Herodes, "Nẽnten kanggo pelungguh merariq kance Herodias!" 5 Setetune Herodes beniat nyematẽq Yahya, laguq ie takut lẽq dengan-dengan, sẽngaq ie pade anggep Yahya nike nabi. 6 Sewaktu Herodes ngerayeang gawẽ ulang taunne, bije Herodias saq nine ngigel lẽq julun temuẽ-temuẽ. Igelan kanak nike tetu-tetu nyenengang angen Herodes, 7 sehingge Herodes bejanji kadu sumpah lẽq dedare nike, bahwe napi juaq saq ie tunas, gen teican tipaq ie. 8 Lantaran tehasut siq inaqne, dedare nike bebase, "Tiang tunas ulune Yahya Pembaptis adẽqne tejauq ojok tiang mangkin niki ẽndah kadu narẽ!" 9 Sesampun tepirengang siq Herodes napi saq tetunas siq dedare nike, Herodes jari sedih gati. Laguq lantaran ie sampun besumpah lẽq julun selapuq temuẽne, ie prẽntahang adẽq petunasan dedare nike tekabulang. 10 Herodes suruq dengan lumbar ojok bui jari penggal ulu Yahya. 11 Beterus ulu Yahya nike tejauq tame tangkaq narẽ, dait serahangne lẽq dedare nike. Terus jauqne siq dedare nike ojok inaqne. 12 Sesampun nike, pengiring-pengiring Yahya dateng bait jenazah Yahya dait nguburang ie. Beterus ie pade lumbar dait nyampẽang lẽq Deside Isa mengenai hal nike. 13 Sesampun Deside Isa pireng berite nike, Ie taẽk perau mẽsaq-mẽsaq dait bilin taoq nike, terus margi boyaq taoq saq sepi. Laguq sewaktu dengan-dengan dengah mengenai hal nike, ie pade bilin kote-kote ie pade dait nerutuk Deside Isa langan darat. 14 Sewaktu Deside Isa turun lẽman perau dait cingakin dengan luwẽq nike, Ie periak lẽq ie pade. Beterus Ie nyelahang dengan-dengan saq sakit lẽq antare ie pade. 15 Lẽq waktu serep jelo, pengiring-pengiring Deside Isa parek dait matur, "Sampun serep jelo, dait taoq niki kesempil. Solahan Pelungguh manikang dengan-dengan nike lumbar, adẽqne mauq beli keloran lẽq dẽse-dẽse." 16 Laguq manik Deside Isa lẽq ie pade, "Ndẽq perlu dengan luwẽq niki lumbar, side pade saq harus ngebẽng ie pade bekelor." 17 "Tiang pade cume bedowẽ lime ruti dait due empaq!" basen pengiring-pengiring Deside Isa nike. 18 "Jauq ojok deriki," manik Deside Isa. 19 Beterus manikang-Ne dengan luwẽq nike tokol lẽq atas pupaq. Deside Isa bait lime ruti dait due empaq nike, beterus nengadah andang langit dait ngucap syukur tipaq Allah. Sesampun nike peleng-peleng-Ne ruti nike siq gading-Ne terus icanin-Ne lẽq pengiring-pengiring-Ne jari tebagi-bagiang lẽq dengan luwẽq nike. 20 Selapuqne bekelor jangke besuh, sesampun nike pengiring-pengiring Deside Isa ngumpulang salone, araq due olas bakaq penoq luwẽqne. 21 Saq ngelor lẽq waktu nike araq kire-kire lime iyu dengan mame, ndẽqman terẽkẽng dengan nine dait kanak-kanak. 22 Sesampun nike, Deside Isa manikang pengiring-pengiring-Ne taẽk ojok perau dait juluan mbelat danao, lẽq waktu nike ẽndah Ie manikang dengan luwẽq nike ulẽq. 23 Sesampun dengan luwẽq nike lumbar, Deside Isa taẽk nyendiri bedo'e ojok atas sopoq bukit. Waktu nike sampun peteng, Deside Isa tetep masih araq lẽq derike mẽsaq-mẽsaq. 24 Lẽq waktu nike, perau saq taoqne taẽk pengiring-pengiring Deside Isa sampun jaoq lẽq tengaq-tengaq danao. Perau nike teampes-ampes siq umbak sẽngaq angin belawan andang kance perau nike. 25 Kire-kire jam telu parek menah, Deside Isa rauh tipaq ie pade, bemargi lẽq atas aiq. 26 Sewaktu pengiring-pengiring-Ne serioq Ie bemargi lẽq atas aiq, ie pade tinjot gati terus ie pade bekuih, "Nike hantu!" sẽngaq ie pade takut gati. 27 Laguq Deside Isa bemanik lẽq ie pade, "Tenang! Tiang niki Isa, ndaq takut!" 28 Terus Petrus matur, "Junjungan Saq Mulie, lamun tetu nike Pelungguh, manikang tiang parek lampaq lẽq atas aiq." 29 "Silaq dateng," jawab Deside Isa. Beterus Petrus turun lẽman perau, lampaq lẽq atas aiq dait parek ojok Deside Isa. 30 Laguq sewaktu Petrus serioq berembẽ belẽqne angin lẽq danao nike, ie takut terus mulai ketelep, dait ie bekuih, "Junjungan Saq Mulie, tulung tiang!" 31 Deside Isa ngulurang gading-Ne dait negel ie terus bemanik, "Hai, side dengan saq kurang percaye, kembẽq side bimbang?" 32 Beterus deduaqne taẽk ojok perau nike, dait langsung angin nike jari tenang. 33 Make selapuq pengiring-pengiring saq araq lẽq perau nike sujut nyembah Deside Isa. Ie pade matur, "Setetune Pelungguh Bije saq asalne lẽman Allah!" 34 Sewaktu ie pade rauh lẽq itoqan danao, ie pade mendarat lẽq Genesaret. 35 Dait sewaktu dengan-dengan lẽq derike serioq bahwe saq rauh nike Deside Isa, ie pade nyiarang kabar nike tipaq selapuq daẽrah sekiter kote nike. Beterus selapuq dengan sakit tejauq ojok arepan Deside Isa. 36 Dait ie pade tunas lẽq Deside Isa adẽq teijinang kintur jubah-Ne, timaq cume potone. Beterus selapuq saq kintur jubah Deside Isa nike jari selah.

Matthew 15

1 Sekelompoq dengan Parisi dait ahli-ahli Taurat lẽman Yerusalem parek ojok Deside Isa. Ie pade metakẽn lẽq Deside Isa, 2 "Kembẽq pengiring-pengiring Pelungguh ngelanggar adat istiadat pare leluhurte? Sewaktu ie pade bekelor, ie pade ndẽq bisoq imene juluq menurut aturan!" 3 Jawab Deside Isa, "Kembẽq side pade ẽndah ngelanggar prẽntah Allah cume lantaran mẽlẽ turut adat istiadat leluhurde? 4 Sẽngaq Allah bemanik, 'Pade hormatin amaq dait inaqde,' dait 'Sai-sai saq nyumpaq amaqne atao inaqne harus tehukum matẽ.' 5 Laguq side pade ngajahang: Sai-sai saq bebase lẽq amaqne atao lẽq inaqne, 'Napi saq seharusne tiang bẽng lẽq inaq dait amaq tiang, sampun tiang ngaturang tipaq Allah,' 6 make dengan nike ndẽq malik tewajibang hormatin amaqne atao inaqne. Jari, lantaran adat istiadat leluhurde, side pade nyatayang Manik Allah ndẽq berlaku. 7 Side pade dengan munapik! Mule kenaq gati napi saq sampun tenubuatang siq Nabi Yesaya mengenai side pade, 8 'Maraq niki manik Allah: Dengan-dengan nike cume nyembah Tiang siq ucapan-ucapan doang, laguq atẽne jaoq lẽman Tiang. 9 Percume ie pade nyembah Tiang, sẽngaq aturan manusie saq ie pade ajahang maraqne hal nike prẽntah Tiang.' " 10 Beterus Deside Isa ngemanikang dengan-dengan nike, dait bemanik lẽq ie pade, "Dengahang niki adẽq side pade ngerti! 11 Ndẽqne saq tame lẽq biwih saq miaq dengan nike najis; laguq saq sugul lẽman biwihne, hal nike saq najisang dengan." 12 Beterus pengiring-pengiring Deside Isa parek dait metakẽn lẽq Ie, "Napi Pelungguh wikan bahwe dengan-dengan Parisi nike tandruh sewaktu ie pade pireng Pelungguh bemanik maraq nike?" 13 Jawab Deside Isa, "Sebilang taletan saq ndẽq tetalet siq Bapa Tiang lẽq sorge gen tembot. 14 Ndaq runguq dengan-dengan Parisi nike. Ie pade pemimpin-pemimpin saq bute; dait lamun dengan bute mimpin dengan bute, make deduaqne gen geriq ojok longkak." 15 Beterus Petrus matur, "Tunas Pelungguh jelasang arti perumpamean nike lẽq tiang pade!" 16 Jawab Deside Isa lẽq ie pade, "Napi side pade ndẽqman ngerti ẽndah? 17 Napi side pade ndẽq nenaoq bahwe napi saq tame ojok dalem biwih gen turun ojok dalem tian beterus gen sugul malik? 18 Laguq saq sugul lẽman biwih asalne lẽman atẽ; dait hal nike saq jari penyebap dengan jari najis. 19 Sẽngaq lẽman atẽ timbul pikiran-pikiran jahat, saq miaq dengan nyematẽq, bezinah, gawẽq perbuatan saq cabul, memaling, ngebẽng kesaksian palsu dait pitnah. 20 Hal-hal nike saq miaq dengan jari najis, dait ndẽqne lantaran bekelor siq ime saq ndẽq tebisoq." 21 Beterus Deside Isa bilin taoq nike dait lumbar ojok daẽrah saq rapet lẽman kote Tirus dait Sidon. 22 Sopoq dengan nine lẽman Kanaan saq ndot lẽq daẽrah nike parek ojok Deside Isa, sambil bekuih-kuih, "Junjungan Saq Mulie, Keturunan Daud, periakang tiang, sẽngaq anak tiang saq nine tekuasein siq roh jahat dait sengsare gati." 23 Deside Isa nẽnten bejawab napi-napi lẽq dengan nine nike. Beterus pengiring-pengiring-Ne parek dait tunas lẽq Deside Isa, "Manikang dengan nine nike lumbar. Ie cume bekuih-kuih doang lẽq mudinte." 24 Jawab Deside Isa, "Tiang teutus cume tipaq bangse Israel, terutame tipaq ie pade saq sesat." 25 Dengan nine nike parek terus sujut lẽq arepan Deside Isa dait matur, "Junjungan Saq Mulie, tulung tiang niki." 26 Jawab Deside Isa, "Ndẽqne patut bait keloran kanak-kanak terus tesaut tipaq acong." 27 "Mule tetu, Junjungan Saq Mulie," jawab dengan nine nike, "laguq acong ẽndah ngaken salo-salo saq geriq lẽman mẽje majikanne." 28 Beterus Deside Isa bemanik lẽq dengan nine nike, "Inaq, tetu-tetu belẽq iman side! Alurang adẽqne telaksane napi saq side harepang!" Lẽq waktu nike ẽndah, bije dengan nine nike selah. 29 Deside Isa bilin taoq nike, dait bemargi lẽq sedin Danao Galilea, beterus Ie taẽk lẽq sopoq bukit dait melinggih lẽq derike. 30 Luwẽq dengan parek ojok Deside Isa jauq dengan-dengan saq dẽmpang, saq bute, saq kẽpaq, saq pakoq dait luwẽq malik dengan sakit saq lain. Ie pade toloq dengan-dengan nike lẽq arepan Deside Isa, dait ie pade teselahang. 31 Dengan luwẽq saq araq lẽq derike bengaq gati, waktu ie pade serioq dengan pakoq tao ngeraos, dengan dẽmpang jari selah, dengan kẽpaq iniq lampaq dait dengan bute iniq nyerioq. Beterus ie pade mulieang Allah bangse Israel. 32 Beterus Deside Isa ngemanikang pengiring-pengiring-Ne dait bemanik, "Tiang periak lẽq dengan luwẽq niki. Sampun telu jelo ngonẽqne ie pade turut Tiang, dait mangkin ie pade ndẽq bedowẽ keloran. Tiang ndẽq mẽlẽ suruq ie pade ulẽq dalem keadaan lapah, laun ie pade paleng lẽq tengaq langan." 33 Beterus pengiring-pengiring-Ne metakẽn lẽq Deside Isa, "Lẽq taoq saq kesempil niki lẽq mbẽ ite gen mauq keloran jari dengan saq luwẽqne maraq niki?" 34 "Araq pire ruti lẽq side pade?" Deside Isa beketuan lẽq ie pade. "Araq pituq," jawab ie pade, "dait araq ẽndah empaq-empaq kodẽq." 35 Make Deside Isa manikang dengan-dengan nike tokol lẽq tanaq. 36 Beterus Deside Isa bait kepituq ruti dait empaq-empaq nike, dait ngucap syukur tipaq Allah. Sesampun nike Ie peleng-peleng ruti dait empaq nike siq gading-Ne, terus icanin-Ne tipaq pengiring-pengiring-Ne. Dait ie pade bagi-bagiang lẽq dengan luwẽq nike. 37 Selapuq dengan nike bekelor jangke besuh. Sesampun nike, pengiring-pengiring Deside Isa ngumpulang salo keloran nike. Selapuqne araq pituq bakaq penoq. 38 Jumlah dengan mame saq milu bekelor waktu nike araq empat iyu dengan, ndẽqman terẽkẽng dengan nine dait kanak-kanak. 39 Sesampun nike, Deside Isa ngemanikang dengan-dengan nike ulẽq. Ie mẽsaq taẽk perau terus lumbar ojok daẽrah Magadan.

Matthew 16

1 Araq dengan-dengan Parisi dait dengan Saduki parek ojok Deside Isa jari cobe Ie. Ie pade tunas adẽq Deside Isa piaq tande ajaip lẽman sorge. 2 Laguq jawab Deside Isa lẽq ie pade, "Lamun kenyeke serep jelo, side pade bebase, 'Cuace bagus, sẽngaq langitne bẽaq.' 3 Dait lẽq kelẽmaq, side pade bebase, 'Jelo niki gen turun ujan, sẽngaq langitne bẽaq dait gulem.' Nah, side pade tao ngeramal cuace lẽman serioq keadaan langit, padahal tande-tande jaman ndẽq bau side pade ramal!" 4 "Jahat gati dait durhake dengan-dengan lẽq jaman niki! Side pade mẽlẽ serioq Tiang miaq tande? Tipaq side pade ndẽq gen teicanin sopoq juaq tande kecuali tande Nabi Yunus." Sesampun Deside Isa bemanik maraq nike, Ie margi bilin ie pade. 5 Waktu pengiring-pengiring Deside Isa rauh lẽq itoqan danao, baruq ie pade nenaoq bahwe ie pade lupaq jauq ruti. 6 Deside Isa bemanik lẽq ie pade, "Pade waspade lẽq ragi ruti dengan Parisi dait dengan Saduki." 7 Sewaktu ie pade dengah manik Deside Isa nike, pengiring-pengiring-Ne mulai bebase sopoq kance saq lain, "Deside Isa bemanik maraq nike sẽngaq ite ndẽq jauq ruti." 8 Deside Isa wikan napi saq ie pade raosang, jari Ie bemanik, "Kembẽq side pade ngeraosang mengenai ndẽq bedowẽ ruti? Side pade kurang percaye! 9 Napi side pade ndẽqman ngerti? Napi side pade ndẽq inget mengenai lime ruti saq Tiang peleng-peleng jari keloran lime iyu dengan nike? Pire bakaq salone saq side pade kumpulang? 10 Dait berembẽ ẽndah mengenai pituq ruti umaq empat iyu dengan nike, pire bakaq salo keloran saq side pade kumpulang? 11 Kembẽq side pade jangke ndẽq ngerti bahwe Tiang ndẽq ngeraos kance side pade mengenai ruti? Pade onyaq-onyaq lẽq ragi ruti dengan-dengan Parisi dait dengan Saduki!" 12 Ahirne pengiring-pengiring Deside Isa nike ngerti bahwe Ie peringet adẽq ie pade onyaq-onyaq ndẽqne lẽq ragi ruti saq tekadu jari miaq ruti, laguq lẽq pengajahan-pengajahan dengan-dengan Parisi dait Saduki. 13 Deside Isa rauh lẽq daẽrah Kaisarea Pilipi. Lẽq derike Deside Isa beketuan lẽq pengiring-pengiring-Ne, "Menurut basen dengan, sai Bije Manusie nike?" 14 Jawab pengiring-pengiring-Ne, "Araq saq bebase Yahya Pembaptis. Araq ẽndah saq bebase Elia, saq lain malik bebase Yeremia atao salaq sopoq lẽman pare nabi." 15 "Laguq menurut side pade, Tiang niki sai?" Deside Isa beketuan. 16 Jawab Simon Petrus, "Pelungguh Almasih, Bije saq asalne lẽman Allah saq idup." 17 Manik Deside Isa lẽq Petrus, "Bahagie side, Simon bije Yunus! Sẽngaq ndẽqne manusie saq badaq side hal nike, laguq Allah, Bapa Tiang saq lẽq sorge. 18 Dait Tiang badaq side, bahwe side Petrus, batu saq tegẽng. Dait lẽq atas batu niki Tiang gen anjengang jemaah Tiang, saq ndẽq bau tekalahang; timaqne siq alam maut! 19 Tiang gen bẽng side kunci Kerajaan Sorge. Dait napi saq side taliq lẽq gumi, gen tetaliq ẽndah lẽq sorge. Dait napi saq side lekaq lẽq dunie niki, gen telekaq ẽndah lẽq sorge." 20 Sesampun nike Deside Isa peringet pengiring-pengiring-Ne adẽq ie pade ndẽq bebadaq lẽq sai-sai bahwe Ie Almasih. 21 Mulai lẽman waktu nike, Deside Isa nyatayang secare terus terang lẽq pengiring-pengiring-Ne, bahwe Ie harus lumbar ojok Yerusalem dait ngalamin luwẽq penderitean lẽman pemimpin-pemimpin, imam-imam kepale dait ahli-ahli Taurat. Ie gen tematẽq, laguq lẽq jelo saq ketelu Ie gen teidupang malik. 22 Beterus Petrus ngantuq Deside Isa ojok lempẽng dait peringet Ie, basene, "Junjungan Saq Mulie, semoge Allah jaoqang hal nike lẽman Pelungguh! Sampunang hal nike jangke telaksane lẽq Pelungguh!" 23 Deside Isa cingakin andang Petrus dait bemanik, "Lalo lẽman tẽ Belis! Side ngalang-ngalangin Tiang. Pikirande pikiran manusie; ndẽqne pikiran Allah!" 24 Beterus Deside Isa bemanik lẽq pengiring-pengiring-Ne, "Sebilang dengan saq mẽlẽ turut Tiang, ie harus ngelupaqang kepentinganne mẽsaq, ngelẽmbah salibne, dait tetep turut Tiang. 25 Sẽngaq dengan saq mẽlẽ nyelametang nyawene, gen kẽlangan nyawene. Laguq dengan saq kẽlangan nyawene lantaran Tiang, dengan nike gen mauq idupne malik. 26 Napi untungne lẽq sopoq dengan, lamun seantẽro dunie niki jari dowẽne, laguq ie kẽlangan nyawene? Napi araq saq bau tekadu siq dengan jari tukah nyawene? 27 Ndẽq ngonẽq malik Bije Manusie, teiring siq malaẽkat-malaẽkat-Ne gen rauh lẽq dalem kemuliean Bapa-Ne. Lẽq waktu nike, Ie gen bales tipaq sebilang dengan menurut perbuatanne sopoq-sopoq. 28 Tiang badaq side pade: Setetune lẽq antare side pade saq araq lẽq deriki, araq saq ndẽq gen ninggal, sendẽqman ie pade serioq Bije Manusie rauh jari Raje dalem Kerajaan-Ne."

Matthew 17

1 Enem jelo sesampun nike, Deside Isa gadingang Petrus, Yakub dait Yahya semetonne Yakub, taẽk ojok sopoq gunung saq atas. Cume ie pade saq araq lẽq derike. 2 Beterus Deside Isa begentiq rue lẽq julun ie pade. Penjarupan-Ne jari menah maraq sinar jelo dait kuace-Ne jari putẽq becahaye. 3 Selung-selung ie pade serioq Musa dait Elia lẽq derike kenyeke bebaos kance Deside Isa. 4 Petrus matur lẽq Deside Isa, "Junjungan Saq Mulie, maiq gati ite lẽq deriki, lamun Pelungguh kayun, gen tiang penganjeng telu kẽmah lẽq deriki: Sopoq umaq Pelungguh, sopoqne umaq Musa dait sopoqne malik umaq Elia." 5 Lẽq waktu Petrus kenyeke matur, turun awan saq becahaye lẽq atas ie pade dait lẽman awan nike kedengahan suare saq ngeraos maraq niki, "Niki Bije Tiang saq Tiang kasihin. Ie nyenengang Tiang. Pade dengahang Ie!" 6 Sewaktu pengiring-pengiring Deside Isa dengah suare nike, ie pade takut gati jangke nyungkur ojok tanaq. 7 Beterus Deside Isa rauh dait kintur ie pade sambil bemanik, "Pade ures, ndaq takut!" 8 Sewaktu ie pade ures, ie pade ndẽq serioq sai-sai kecuali Deside Isa. 9 Waktu ie pade turun lẽman gunung nike, ie pade teperinget siq Deside Isa, "Ndaq tuturang sai juaq napi saq baruq side pade serioq nike, sendẽqman dateng waktune Bije Manusie teidupang malik lẽman ninggal-Ne." 10 Beterus pengiring-pengiring Deside Isa metakẽn lẽq Ie, "Kembẽq ahli-ahli Taurat bebase bahwe Elia gen dateng juluan?" 11 Jawab Deside Isa, "Mule tetu Elia gen dateng dait ie gen siepang selapuqne. 12 Laguq Tiang badaq side: Setetune Elia sampun dateng laguq dengan-dengan ndẽq kenal ie. Elia saq dateng nike teperlakuang semẽlẽ angen ie pade. Dait maraq nike ẽndah ie pade gen perlakuang Bije Manusie." 13 Beterus pengiring-pengiring-Ne ngerti bahwe Deside Isa bebaos mengenai Yahya Pembaptis. 14 Sewaktu Deside Isa dait ketelu pengiring-Ne tulak ojok dengan luwẽq nike, sopoq dengan mame parek, sujut lẽq arepan Deside Isa, 15 dait matur, "Junjungan Saq Mulie, periakang anak tiang. Ie sakit mopok, dait menderite gati sehingge ie rimpes geriq ojok dalem api dait rimpes ẽndah ojok dalem aiq. 16 Tiang sampun jauq ie ojok pengiring-pengiring Pelungguh, laguq ie pade ndẽq tao nyelahang ie." 17 Jawab Deside Isa, "Luar biase side pade niki! Side pade tetu-tetu dengan-dengan saq ndẽq percaye dait sesat! Jangke piran Tiang harus araq kance side pade dait tetep sabar tipaq side pade? Jauq kanak nike ojok deriki!" 18 Sesampun kanak nike tejauq, Deside Isa prẽntahang sẽtan saq araq lẽq dalem kanak nike adẽqne sugul. Dait sẽtan nike sugul, beterus kanak nike langsung selah. 19 Sesampun nike, pengiring-pengiring Deside Isa secare husus parek dait metakẽn, "Kembẽq tiang pade ndẽq bau sediq sẽtan nike?" 20 Jawab Deside Isa, "Sẽngaq side pade kurang percaye. Keranaq nike Tiang badaq side: Lamun side pade bedowẽ iman belẽqne maraq tolang sawi, make side pade bau bebase lẽq gunung niki, 'Ngalih ojok to!' pasti gunung niki gen ngalih. Ndẽq araq sopoq juaq saq ndẽq bau side pade piaq! 21 Laguq roh jahat saq maraq niki cume bau tesediq siq do'e dait puase doang." 22 Sewaktu pengiring-pengiring Deside Isa bekumpul lẽq Galilea, Deside Isa bemanik tipaq pengiring-pengiring-Ne, "Bije Manusie gen teserahang tipaq kuase manusie. 23 Ie gen tematẽq. Laguq lẽq jelo saq ketelu, Ie gen teidupang." Make pengiring-pengiring-Ne jari asẽq gati. 24 Sewaktu Deside Isa dait pengiring-pengiring-Ne rauh lẽq Kapernaum, penagih-penagih pajek Gedẽng Allah dateng tipaq Petrus dait beketuan, "Gurunde bayah pajek Gedẽng Allah atao ndẽq?" 25 Jawab Petrus, "Bayah!" Sewaktu Petrus ulẽq, ie teketuan juluan siq Deside Isa, "Simon, berembẽ menurut pendapet side? Sai saq harus bayah pajek tipaq raje-raje lẽq dunie niki? Rakyatne atao dengan pendateng?" 26 "Dengan pendateng," jawab Petrus. "Lamun maraq nike," manik Deside Isa, "rakyat ndẽq perlu bayah. 27 Laguq ndaq ite singgung perasaan dengan-dengan nike. Jari, silaq lumbar mancing ojok danao. Bait empaq saq penembẽq side bau. Lẽq dalem biwih empaq nike side gen ndait kẽpẽng logam saq cukup tekadu bayah pajekte kance due. Bait kẽpẽng nike dait bayah pajekte lẽq ie pade."

Matthew 18

1 Lẽq waktu nike pengiring-pengiring Deside Isa parek dait metakẽn, "Sai saq paling belẽq lẽq dalem Kerajaan Sorge?" 2 Deside Isa ngemanikang sopoq kanak kodẽq, dait penganjeng-Ne kanak nike lẽq julu ie pade. 3 Terus Deside Isa bemanik, "Tiang badaq side pade! Setetune lamun side pade ndẽq betobat dait jari maraq kanak kodẽq niki, side pade ndẽq gen tame dalem Kerajaan Sorge. 4 Dengan saq ngerendahang diriqne dait jari maraq kanak kodẽq niki, ie saq jari paling belẽq lẽq dalem Kerajaan Sorge. 5 Dait dengan saq nerimaq sopoq kanak maraq niki lantaran Tiang, artine nerimaq Tiang." 6 "Sai-sai saq jari penyebap salaq sopoq lẽman kanak-kanak kodẽq saq percaye lẽq Tiang niki bedose, solahan lamun batu penggilingan tetaliq lẽq belongne terus ie tetelepang lẽq segare saq dalem. 7 Celake gati dunie niki lantaran hal-hal saq jari penyebap dengan gawẽq dose. Mule hal-hal saq maraq nike gen tetep araq, laguq celake gati dengan-dengan saq jari penyebapne! 8 Lamun imende atao naẽnde miaq side bedose, araqan side peleng dait tetẽh. Solahan side bedowẽ setowẽq naẽ atao ime laguq side selamet idup bareng kance Allah, ketimbang side tetetẽh ojok dalem api nerake lantong kedue ime dait naẽnde. 9 Dait lamun penentengde miaq side bedose, luwit dait tetẽh. Solahan side bute setowẽq laguq idup bareng kance Allah, ketimbang side tetetẽh ojok dalem api nerake lantong kedue penentengde." 10 "Pade inget! Ndaq menghine salaq sopoq lẽman kanak-kanak kodẽq niki. Tiang badaq side, malaẽkat-malaẽkat ie pade tetep araq lẽq arepan Bapa Tiang lẽq sorge. 11 Sẽngaq Bije Manusie rauh jari nyelametang dengan saq sesat! 12 Berembẽ pendapet side? Seandẽne araq sopoq dengan saq bedowẽ satus dombe, terus sopoq lẽq antare dombe-dombe nike telang. Napi saq gen tepiaq siq dengan nike? Pasti ie gen bilin dombe-dombene saq siwaq pulu siwaq nike lẽq gunung dait lumbar boyaq saq telang nike. 13 Tiang badaq side, setetune lamun ie ndait malik dombe nike, cemohne gen belẽqan tipaq dombe saq sopoq nike ketimbang saq siwaq pulu siwaq lainne saq ndẽq telang. 14 Maraq nike ẽndah Bapa side saq lẽq sorge, nẽnten kayun salaq sopoq lẽman kanak-kanak niki telang." 15 "Lamun semetonde bedose lẽq side, dateng badaq ie dait jelasang napi kepelihanne. Laksaneang hal nike tedoq-tedoq antare side kance ie doang. Lamun ie turut nasẽhat side, artine side berhasil mauq semetonde malik. 16 Laguq lamun ie ndẽq mẽlẽ, dateng jauq sopoq atao due dengan malik. Sẽngaq araq tetulis lẽq dalem Kitab Suci, 'Sekurang-kurangne due atao telu dengan saksi saq teperluang jari nyatayang kesalaqan sopoq dengan saq tetuduh.' 17 Laguq lamun ie ndẽq mẽlẽ nerimaq nasẽhat dengan-dengan nike, sampẽang hal nike tipaq jemaah. Dait ahirne, lamun ie ndẽq nerimaq nasẽhat jemaah, anggep doang ie sebagẽ penagih pajek atao dengan saq ndẽq kenal Allah." 18 Tiang badaq side: "Napi saq side pade taliq lẽq dunie niki, gen tetaliq ẽndah lẽq sorge. Dait napi saq side pade lekaq lẽq dunie niki, gen telekaq ẽndah lẽq sorge. 19 Dait Tiang badaq side malik: Lamun lẽq antare side pade lẽq dunie niki araq due dengan sepakat mengenai napi juaq dait bedo'e, do'e nike gen tekabulang siq Bapa Tiang lẽq sorge. 20 Sẽngaq lẽq mbẽ araq due atao telu dengan bekumpul lantaran Tiang, Tiang araq lẽq tengaq-tengaq ie pade." 21 Beterus Petrus parek ojok Deside Isa dait metakẽn, "Junjungan Saq Mulie, lamun semeton tiang bedose lẽq tiang, jangke pire kali tiang harus ngampunin ie? Napi jangke pituq kali?" 22 Jawab Deside Isa, "Ndẽq, ndẽqne cume pituq kali, laguq jangke pituq pulu kali pituq kali! 23 Sẽngaq hal Kerajaan Sorge seumpame maraq sopoq raje saq gen ngerẽkẽng utang-utang hambe-hambene. 24 Sewaktu ie mulai ngaraqang pemeriksaan, tejauq ojok ie sopoq hambe saq bedowẽ utang jangke bejute-jute, 25 dait ie ndẽq sanggup ngelunasin. Beterus raje nike ngican prẽntah adẽq hambe nike tejual bareng seninene dait bijene, lantong selapuq dowẽne jari bayah utangne. 26 Hambe nike sujut lẽq arepan raje nike dait tunas, 'Tuan raje, sabar juluq, tiang gen ngelunasang selapuq utang tiang.' 27 Raje nike periak lẽq ie, sehingge ie bẽbasang selapuq utangne. 28 Sewaktu hambe nike sugul, ie bedait kance baturne pade pade jari hambe ẽndah saq berutang lẽq ie araq pire iyu luwẽqne. Baune baturne nike, pekokne dait ie bebase, 'Bayah selapuq utangde!' 29 Beterus baturne nike sujut ngẽndẽng tulung lẽq julune, 'Sabar juluq batur, selapuqne pasti gen tiang bayah!' 30 Laguq hambe nike nolaq, sebalikne, ie tamaq baturne ojok dalem bui, jangke ie ngelunasang utangne. 31 Sewaktu teserioq siq hambe-hambe saq lain napi saq sampun ie laksaneang lẽq baturne nike, ie pade asẽq dait ngelaporang hal nike ojok raje. 32 Beterus raje nike ngempoh hambe saq jahat nike dait bebase lẽq ie, 'Hambe saq jahat! Selapuq utangde sampun tiang apus cume lantaran petunasande lẽq tiang. 33 Seharusne side ẽndah periak lẽq baturde nike pade maraq tiang sampun periak lẽq side?' 34 Raje nike menggah gati. Hambe saq jahat nike tetamaq ojok dalem bui jangke ie ngelunasang selapuq utangne." 35 Ahirne Deside Isa nutuqang cerite-Ne siq manik niki, "Maraq nike ẽndah side pade sopoq-sopoq gen teperlakuang siq Bapa Tiang lẽq sorge, lamun side pade ndẽq ihlas ngampunin baturde."

Matthew 19

1 Sesampun Deside Isa tutuq manikang selapuq hal nike, Ie lumbar lẽman Galilea ojok daẽrah Yudea, lẽq itoqan Kokoq Yordan. 2 Luwẽq dengan ngiring Deside Isa, dait Ie nyelahang ie pade lẽq derike. 3 Beterus dengan-dengan Parisi dateng jari boyaq kesalaqan adẽqne bau nyalahang Deside Isa. Dengan-dengan nike metakẽn, "Napi kanggo dengan sẽang seninene lantaran alasan napi juaq?" 4 Jawab Deside Isa, "Napi side pade ndẽqman bace lẽq dalem Kitab Suci bahwe Allah cipteang manusie, lẽman penembẽqne Allah jariang ie pade mame dait nine? 5 Dait manik-Ne, 'Keranaq nike dengan mame gen bilin inaq amaqne dait besopoq kance seninene, make deduaqne jari sopoq.' 6 Jari ie pade ndẽqne due malik, laguq sopoq. Keranaq nike napi saq tepesopoq siq Allah, ndẽq kanggo tesẽang siq manusie." 7 Beterus dengan-dengan Parisi metakẽn lẽq Deside Isa, "Lamun maraq nike kembẽq Musa suruq dengan ngebẽng surat sẽang lẽq seninene saq ie sẽang?" 8 Jawab Deside Isa, "Musa ngijinang side pade sẽang seninende sẽngaq side pade sengke gati teajah. Laguq setetune ndẽq maraq nike lẽq penembẽqne. 9 Tiang badaq side: Sai-sai saq sẽang seninene -- padahal seninene nike ndẽq nyelẽwẽng -- beterus ie merariq malik kance dengan nine lain, artine dengan nike bezinah." 10 Make pengiring-pengiring-Ne matur lẽq Deside Isa, "Lamun maraq nike entan semame lẽq senine, bagusan ndaq merariq." 11 Jawab Deside Isa, "Ndẽq selapuq dengan bau terimaq hal nike, cume dengan-dengan saq sampun tetentuang siq Allah. 12 Sẽngaq araq dengan saq ndẽq mauq merariq, lantaran ie pade mule tebijeang maraq nike. Araq ẽndah dengan saq ndẽq iniq merariq lantaran tepiaq siq dengan lain. Dait araq ẽndah saq ndẽq merariq, lantaran kemẽlẽqne mẽsaq demi Kerajaan Sorge. Sai saq bau ngerti, alurang ie ngerti." 13 Araq dengan-dengan jauq kanak-kanak kodẽq ojok Deside Isa adẽq Deside Isa toloq gading-Ne lẽq atas ie pade dait do'eang ie pade. Laguq pengiring-pengiring Deside Isa siliq dengan-dengan nike. 14 Make Deside Isa bemanik lẽq pengiring-pengiring-Ne, "Alurang kanak-kanak nike dateng ojok Tiang! Ndaq balaq ie pade sẽngaq dengan-dengan maraq niki saq bedowẽ Kerajaan Sorge." 15 Beterus Deside Isa toloq gading-Ne lẽq atas kanak-kanak nike. Sesampun nike Deside Isa margi lẽman derike. 16 Araq sopoq terune parek tipaq Deside Isa dait matur, "Paq Guru, perbuatan solah napi saq harus tiang piaq adẽq tiang mauq idup sejati dait kekel?" 17 Jawab Deside Isa, "Kembẽq side beketuan lẽq Tiang mengenai napi saq solah? Cume araq Sopoq saq solah. Lamun side mẽlẽ idup, side harus taat lẽq prẽntah-prẽntah Allah." 18 "Prẽntah saq mbẽ nike?" basen dengan nike metakẽn. Jawab Deside Isa, "Ndaq nyematẽq, ndaq bezinah, ndaq memaling dait ndaq jari saksi duste, 19 pade hormatin amaq dait inaqde; dait kasihin sepadende manusie maraq side ngasihin diriqde mẽsaq." 20 "Selapuq prẽntah nike sampun tiang turut," jawab terune nike. "Napi malik saq perlu?" 21 Deside Isa bemanik lẽq terune nike, "Lamun side mẽlẽ jari sempurne, lumbar, jual selapuq dowẽnde. Bẽng kẽpẽngne tipaq dengan-dengan miskin, make side gen mauq harte lẽq sorge. Sesampun nike side dateng turut Tiang!" 22 Sesampun dengah manik Deside Isa nike, terune nike lumbar siq susah angenne sẽngaq ie sugih gati. 23 Beterus Deside Isa bemanik lẽq pengiring-pengiring-Ne, "Tiang badaq side, sengke gati dengan sugih tame ojok dalem Kerajaan Sorge. 24 Dait niki ẽndah saq Tiang gen sampẽang lẽq side: Molahan onte tame ojok dalem loang jarum, ketimbang dengan sugih tame ojok dalem Kerajaan Allah." 25 Sewaktu pengiring-pengiring-Ne dengah manik Deside Isa nike, ie pade bengaq. "Lamun maraq nike," atur ie pade, "sai saq bau selamet?" 26 Deside Isa merhatiang ie pade terus bemanik, "Bagi manusie hal nike mustahil! Laguq bagi Allah nẽnten araq sopoq juaq saq mustahil." 27 Beterus Petrus matur, "Pelungguh cingakin, tiang pade sampun bilin selapuq-lapuqne jari ngiring Pelungguh. Dait napi saq gen tiang pade terimaq?" 28 Deside Isa bemanik lẽq ie pade, "Tiang badaq side: Setetune lẽq Dunie saq Baru, Bije Manusie gen melinggih lẽq atas tahte-Ne saq mulie. Lẽq waktu nike side pade pengiring-pengiring Tiang gen tokol lẽq atas due olas tahte jari hakimin kedue olas suku bangse Israel! 29 Dait sebilang dengan saq sampun bilin balẽ, atao semeton mame atao nine, atao inaq amaqne, atao bije-bijene, atao kebon bangketne lantaran Tiang, dengan nike gen nerimaq satus kali lipet. Dait ie gen nerimaq ẽndah idup saq sejati dait kekel. 30 Laguq luwẽq dengan saq mangkin niki jari penembẽq, gen jari saq penutuq dait luwẽq saq mangkin niki jari penutuq gen jari saq penembẽq."

Matthew 20

1 "Kerajaan Sorge nike seumpame maraq niki: Araq sopoq dengan bedowẽ kebon anggur. Lẽq waktu kelẽmaq ie sugul boyaq dengan saq mẽlẽ begawẽan lẽq kebon anggurne. 2 Sesampun ie sepakat bayah buruh-buruh nike siq sopoq kẽpẽng perak sejelo, dengan nike suruq ie pade begawẽan lẽq kebon anggurne. 3 Jam siwaq kelẽmaq, ẽpẽn dowẽ kebon nike sugul malik, dait serioqne dengan-dengan nganggur lẽq peken. 4 Jari ẽpẽn dowẽ kebon nike bebase lẽq dengan-dengan nike, 'Silaq side pade begawẽan lẽq kebon anggur tiang. Tiang gen bayah side pade siq upaq saq pantes.' 5 Dengan-dengan nike lumbar. Waktu jam due olas tengari dait jam telu kebian, ẽpẽn dowẽ kebon nike sugul malik dait ngelaksaneang hal saq pade. 6 Kire-kire jam lime kebian, ie sugul malik, dait serioqne masih araq dengan saq nganggur. Beterus ẽpẽn dowẽ kebon nike beketuan lẽq ie pade, 'Kembẽq side pade nganjeng sejeloan lẽq deriki dait ndẽq begawẽan napi-napi?' 7 Jawab dengan-dengan nike, 'Ndẽq araq dengan saq mẽlẽ bẽng tiang pade pegawẽan.' 'Lamun maraq nike,' basen ẽpẽn dowẽ kebon nike, 'silaq side pade begawẽan lẽq kebon anggur tiang.' 8 Lẽq waktu serep jelo, ẽpẽn dowẽ kebon anggur nike bebase lẽq mandorne, 'Empoh buruh-buruh nike, dait bayah gajine sopoq-sopoq, mulai lẽman buruh saq paling mudi begawẽan jangke saq paling julu begawẽan.' 9 Beterus dateng buruh-buruh saq begawẽan mulai jam lime kebian. Sopoq-sopoq nerimaq upaq sopoq kẽpẽng perak. 10 Beterus dateng ẽndah buruh-buruh saq begawẽan lẽman kelẽmaq. Ie pade pikir gen nerimaq upaq saq lebihan. Laguq ie pade nerimaq upaq sopoq kẽpẽng perak ẽndah. 11 Sewaktu ie pade nerimaq kẽpẽng nike, ie pade ngerumun lẽq ẽpẽn dowẽ kebon nike: 12 'Dengan saq dateng paling mudi nike begawẽan cume sejam doang. Tiang pade begawẽan sejeloan lẽq bawaq panas jelo, laguq Pelungguh bayah dengan-dengan nike pade maraq tiang!' 13 ~Epẽn dowẽ kebon anggur nike bebase lẽq salaq sopoq dengan lẽman buruh nike, 'Semeton, tiang ndẽq gawẽq saq ndẽq adil lẽq side. Tekan side setuju tebayah siq sopoq kẽpẽng perak sejelo? 14 Mangkin silaq bait upaqde, beterus side lumbar. Tiang mule beniat ngebẽng gaji lẽq dengan saq begawẽan paling mudi nike siq upaq saq pade maraq saq tiang bẽng lẽq side. 15 Napi tiang ndẽq kanggo gawẽq semẽlẽ angen tiang siq dowẽn tiang mẽsaq? Atao side talon atẽ, sẽngaq tiang murah atẽ?' " 16 Beterus Deside Isa bemanik malik, "Maraq nike ẽndah dengan-dengan saq penutuq gen jari saq penembẽq, dait dengan-dengan saq penembẽq gen jari saq penutuq." 17 Sewaktu Deside Isa lumbar ojok Yerusalem, lẽq tengaq langan Ie ngemanikang kedue olas pengiring-Ne adẽqne bekumpul bekelin lẽman dengan-dengan lain. Beterus Deside Isa bemanik lẽq ie pade, 18 "Dengahang! Mangkin ite lumbar ojok Yerusalem. Lẽq derike Bije Manusie gen teserahang tipaq imam-imam kepale dait ahli-ahli Taurat. Terus Ie gen tehukum matẽ, 19 sesampun nike Ie gen teserahang tipaq bangse-bangse saq ndẽq kenal kance Allah, adẽq Ie teoloq-oloq, dait tesiksaq, terus tepakuq lẽq kayuq salib. Laguq lẽq jelo saq ketelu, Ie gen teidupang malik." 20 Sesampun nike, senine Zebedeus dait bije-bijene parek tipaq Deside Isa. Lẽq arepan Deside Isa ie sujut tunas sopoq hal. 21 Manik Deside Isa, "Napi mẽlẽnde inaq?" Jawab inaq nike, "Prẽntahang adẽqne deduaq anak tiang niki ẽraq bau tokol lẽq kiri dait kanan Pelungguh, lẽq dalem Kerajaan Pelungguh." 22 "Side pade ndẽq nenaoq napi saq side pade tunas," manik Deside Isa lẽq ie pade. "Napi side pade sanggup nginem lẽman cawan penderitean saq harus Tiang inem?" "Sanggup!" jawab ie pade. 23 Deside Isa bemanik, "Mule side pade gen nginem ẽndah lẽman cawan penderitean Tiang. Laguq mengenai sai saq gen tokol lẽq kanan atao kiri Tiang, nike ndẽqne Tiang saq berhak nentuang. Hal nike tesadangang tipaq dengan saq sampun tetentuang siq Bapa Tiang." 24 Waktu kesepulu pengiring saq lain dengah hal nike, ie pade sili lẽq kedue dengan saq besemetonan nike. 25 Keranaq nike, Deside Isa ngemanikang ie pade selapuq, dait bemanik, "Side pade nenaoq bahwe pemimpin-pemimpin bangse saq ndẽq kenal kance Allah nindes rakyatne. Dait pembelẽq-pembelẽqne bedowẽ wewenang penoq tipaq ie pade. 26 Laguq side pade ndẽq kanggo maraq nike. Sebalikne, dengan saq mẽlẽ jari belẽq lẽq antare side pade, ie harus jari pelayande. 27 Dait dengan saq mẽlẽ jari saq penembẽq lẽq antare side pade, ie harus jari hambende. 28 Pade maraq Bije Manusie nike ẽndah; Ie rauh nẽnten jari telayanin, laguq jari ngelayanin, dait nyerahang nyawe-Ne jari tebusan tipaq dengan luwẽq." 29 Sewaktu ie pade sugul lẽman kote Yeriko, luwẽq dengan ngiring Deside Isa. 30 Araq due dengan bute kenyeke tokol lẽq sedin rurung. Waktu ie pade dengah bahwe Deside Isa bemargi lẽq derike, ie pade bekuih, "Junjungan Saq Mulie, Keturunan Daud, periakang tiang pade!" 31 Dengan luwẽq saq araq lẽq derike peringet ie pade adẽq ie pade tedoq. Laguq ie pade bekuih sayan keras, "Junjungan Saq Mulie, Keturunan Daud! Periakang tiang pade!" 32 Beterus Deside Isa mentelah, dait ngemanikang kedue dengan bute nike. Ie bemanik, "Napi saq side pade melẽtang adẽq Tiang piaq lẽq side pade?" 33 Jawab kedue dengan bute nike, "Junjungan Saq Mulie, tiang pade melẽt tao nyerioq!" 34 Deside Isa periak lẽq deduaqne, terus Ie jamah penenteng ie pade. Langsung waktu nike ẽndah ie pade tao nyerioq. Beterus ie pade ngiring Deside Isa.

Matthew 21

1 Sewaktu sampun rapet Yerusalem, Deside Isa dait pengiring-pengiring-Ne rauh lẽq Betpage lẽq Bukit Zaitun. Lẽq derike Deside Isa ngemanikang due pengiring-Ne lampaq bejulu 2 dait bepesen: "Silaq lumbar ojok kampung saq araq lẽq julunde nike. Lẽq derike side pade gen ndait bagal dait anakne kenyeke tegeteng. Lekaq deduaqne terus jauq ojok deriki. 3 Lamun araq dengan saq beketuan lẽq side, badaqang, 'Junjungan Saq Mulie merluang bagal niki', make dengan nike pasti gen ngalurang bagal nike tejauq." 4 Siq care nike telaksane napi saq tesampẽang siq nabi, maraq niki, 5 "Sampẽang lẽq putri Sion: Sereminang, Rajende kenyeke rauh ojok side. Ie lemah lembut dait nunggang sopoq bagal, sopoq anak bagal saq masih odaq." 6 Beterus kedue pengiring-Ne nike lumbar dait ngelaksaneang napi saq temanikang siq Deside Isa tipaq ie pade. 7 Ie pade jauq bagal nike lantong anakne, terus ie pade lamak bongkor bagal nike kadu jubahne. Beterus Deside Isa taẽk. 8 Luwẽq dengan lẽq derike kelat jubahne lẽq langan, dait dengan-dengan lain peleng pẽmpang-pẽmpang lolo terus jẽjẽrne ẽndah lẽq tengaq langan. 9 Dengan luwẽq saq lampaq lẽq julu dait lẽq mudi Deside Isa pade bekuih-kuih, "Hosana tipaq Keturunan Daud! Teberkahin Ie saq rauh dalem pesẽngan Tuhan! Hosana lẽq taoq saq maheagung!" 10 Beterus, sewaktu Deside Isa tame ojok kote Yerusalem, selapuq kote nike jari biur lantur. "Sai dengan niki?" basen dengan-dengan lẽq kote nike beketuan. 11 "Ie Nabi Isa lẽman Nazaret, kote lẽq Galilea," jawab dengan-dengan luwẽq saq ngiring Deside Isa. 12 Beterus Deside Isa tame ojok Gedẽng Allah, dait sediq selapuq dengan saq kenyeke bedagang dait belanje lẽq derike. Balik belah-Ne selapuq mẽje-mẽje saq tekadu jari nukahang kẽpẽng, dait bangku-bangku saq tekadu bedagang kedit dare. 13 Terus Deside Isa bemanik lẽq dengan-dengan nike, "Lẽq dalem Kitab Suci tetulis bahwe Allah bemanik, 'Gedẽng Tiang gen tesebut gedẽng do'e.' Laguq side pade jariang ie taoqne bekumpul dengan-dengan jahat!" 14 Dengan-dengan bute dait dengan-dengan dẽmpang parek tipaq Deside Isa lẽq Gedẽng Allah, dait ie pade teselahang siq Deside Isa. 15 Laguq sewaktu imam-imam kepale dait ahli-ahli Taurat serioq muqjizat-muqjizat saq tepiaq siq Deside Isa dait pirengang kanak-kanak saq bekuih-kuih lẽq dalem Gedẽng Allah: "Hosana tipaq Keturunan Daud!" ie pade jari menggah gati. 16 Ie pade matur lẽq Deside Isa, "Napi Pelungguh pireng saq ie pade ucapang nike?" "Enggih, Tiang dengah," jawab Deside Isa. "Napi side pade ndẽqman bace ayat Kitab Suci niki: 'Lẽman biwih kanak-kanak, malahan bebẽaq-bebẽaq saq kenyeke nyusu, Tuhan sampun nyedieang puji-pujian'?" 17 Sesampun nike Deside Isa bilin dengan-dengan nike, beterus margi ojok kote Betania dait mererepan lẽq derike. 18 Lẽq jemaq kelẽmaqne, lẽq dalem pemargian-Ne tulak ojok kote, Deside Isa beridap seduk. 19 Ie cingakin sopoq lolo are lẽq sedin rurung, terus laiq-Ne lolo are nike, laguq ndẽq araq buaqne, kecuali daun-daunne doang. Terus Deside Isa bemanik lẽq lolo are nike, "Ndaq bebuaq malik jangke selaẽq-laẽqne!" Langsung lolo are nike gero. 20 Sewaktu pengiring-pengiring Deside Isa serioq peristiwe nike, selapuqne bengaq gati. Ie pade metakẽn, "Kembẽq lolo are nike selung-selung gero?" 21 Manik Deside Isa, "Tiang badaq side, setetune lamun side pade percaye dait ndẽq bimbang, side pade bau laksaneang napi saq sampun Tiang laksaneang lẽq lolo are niki. Dait ndẽqne nike doang, malahan lamun side pade bebase tipaq gunung niki, 'Kerungkahan dait ngalih ojok segare!' Make hal nike gen telaksane. 22 Dait napi juaq saq side pade tunas dalem do'e, side pade gen nerimaq ie asal side pade percaye." 23 Beterus Deside Isa tulak ojok Gedẽng Allah, terus tame dait ngajahang lẽq derike. Sewaktu Ie kenyeke ngajahang, imam-imam kepale dait pemimpin-pemimpin Yahudi parek dait metakẽn lẽq Ie, "Atas dasar napi Pelungguh ngelaksaneang selapuqne nike? Sai saq aturin Pelungguh kuase nike?" 24 Jawab Deside Isa, "Tiang ẽndah mẽlẽ beketuan lẽq side pade, dait lamun side pade bejawab, Tiang ẽndah gen badaq side siq kuase sai Tiang ngelaksaneang hal-hal nike. 25 Siq kuase sai Yahya baptis dengan? Kuase Allah atao manusie?" Beterus imam-imam kepale dait pemimpin-pemimpin Yahudi nike mulai berunding lẽq antare ie pade. Ie pade bebase, "Lamun ite jawab, 'Siq kuase Allah,' Ie gen bemanik, 'Lamun maraq nike kembẽq side pade ndẽq percaye lẽq Yahya?' 26 Laguq lamun ite bejawab, 'Siq kuase manusie,' ite takut lẽq dengan luwẽq, sẽngaq selapuq dengan anggep Yahya nike nabi." 27 Jari, jawab ie pade, "Mindah tiang." Beterus Deside Isa bemanik lẽq ie pade, "Lamun maraq nike, Tiang ẽndah ndẽq gen badaq side siq kuase sai Tiang ngelaksaneang selapuqne niki." 28 "Mangkin berembẽ pendapet side mengenai hal niki?" manik Deside Isa selanjutne. "Araq sopoq bapaq bedowẽ due bije mame. Ie lumbar ojok bijene saq sengake dait bebase, 'Nune, lalo begawẽan ojok kebon anggur jelo niki.' 29 'Tiang ndẽq mẽlẽ,' jawab kanak nike. Laguq ndẽq ngonẽq ie berobah pikiran, terus ie lalo ojok kebon nike. 30 Beterus bapaqne nike lumbar ojok bije saq kedue, dait bebase hal saq pade ẽndah. 'Enggih, Bapaq,' jawab bije saq kedue nike. Laguq ie ndẽq lumbar. 31 Nah, lẽq antare kedue bije nike, saq mbẽ ngelaksaneang kemẽlẽq bapaqne?" "Saq sengake," jawab ie pade. Terus Deside Isa bemanik malik lẽq ie pade, "Tiang badaq side, setetune penagih-penagih pajek dait dengan-dengan nine pelacur gen juluan tame Kerajaan Allah ketimbang side pade. 32 Sẽngaq Yahya nike rauh, jari nyatayang lẽq side pade care idup saq tekayunang siq Allah, dait side pade ndẽq percaye lẽq pengajahanne; laguq penagih-penagih pajek dait dengan-dengan nine pelacur nike percaye lẽq Yahya. Laguq timaq side pade sampun serioq selapuqne nike, side pade ndẽq mẽlẽ ngerobah pikirande dait ndẽq percaye lẽq ie." 33 "Pade dengahang malik perumpamean saq sopoq niki," manik Deside Isa. "Araq sopoq majikan bedowẽ kebon dait talet anggur lẽq kebon nike. Ie miaq lambah lẽq sekelining kebon nike, dait kaliq longkak jari taoqne peres anggur, terus ie penganjeng menare taoq dengan bejage. Sesampun nike sẽweangne kebon nike lẽq penyakap-penyakap, beterus ie berangkat ojok negeri negeri lain. 34 Waktu dateng musim padas buaq anggur, majikan nike ngutus pelayan-pelayanne tipaq penyakap-penyakap nike jari nerimaq bagianne. 35 Laguq penyakap-penyakap kebon nike bau pelayan-pelayan saq teutus siq majikan nike: Saq sopoq tepadek, saq lain tematẽq dait saq lain malik tepelẽwas siq batu. 36 Majikan kebon anggur nike ngutus malik pelayan-pelayan saq lain, luwẽqan lẽman saq penembẽq. Laguq ie pade ẽndah teperlakuang pade maraq saq juluan. 37 Ahirne majikan kebon anggur nike ngutus bijene mẽsaq tipaq ie pade, pikirne, 'Pasti anak tiang gen tehormatin.' 38 Laguq sewaktu penyakap-penyakap nike serioq bije majikanne nike, ie pade bebase sopoq kance saq lain, 'Niki ie ahli warisne, silaq ite matẽq ie, adẽq ite saq mauq warisanne!' 39 Make bije majikanne nike tebau, dait sautne ojok luah, terus tematẽq." 40 Deside Isa beketuan, "Lamun ẽpẽn dowẽ kebon anggur nike tulak, gen ie kumbẽqang penyakap-penyakapne nike?" 41 Jawab ie pade, "Pasti ie gen matẽq dengan-dengan jahat nike, terus sẽweangne kebon anggur nike tipaq dengan lain saq gen ngebẽng ie hasil lẽq musim padas anggur." 42 Deside Isa bemanik lẽq ie pade, "Napi side pade ndẽq uwah bace saq tetulis lẽq dalem Kitab Suci? 'Batu saq tetetẽh siq tukang bangunan sampun jari batu saq paling utame. Niki karye Tuhan; sopoq karye saq ajaip lẽq julunte!' " 43 "Keranaq nike Tiang badaq side, bahwe Kerajaan Allah gen tebait lẽman side, dait gen teicanin tipaq sopoq bangse saq gen ngasilang buaq Kerajaan nike. 44 Sai-sai saq geriq lẽq batu nike gen ancur; dait sai-sai saq tendet siq batu nike, ie gen remuk." 45 Sewaktu imam-imam kepale dait dengan-dengan Parisi nike pirengang perumpamean Deside Isa nike, ie pade ngerti bahwe Deside Isa bebaos mengenai ie pade. 46 Jari, ie pade berusahe bau Deside Isa. Laguq ie pade takut lẽq dengan luwẽq, sẽngaq dengan-dengan nike anggep Deside Isa nabi.

Matthew 22

1 Deside Isa bemanik malik lẽq dengan luwẽq kadu perumpamean, 2 manik-Ne, "Kerajaan Sorge nike seumpame maraq niki: Sopoq raje ngaraqang gawẽ jari ngawinang bijene. 3 Raje nike ngutus pelayan-pelayanne ngempoh dengan-dengan saq sampun tepesilaq ojok gawẽ nike, laguq dengan-dengan saq tepesilaq nike ndẽq mẽlẽ dateng. 4 Beterus raje nike ngutus malik pelayan-pelayan saq lain. Raje nike bebase lẽq pelayan-pelayanne, 'Sampẽang tipaq dengan-dengan saq tepesilaq nike: Pesajiq lẽq gawẽ nike sampun tesiepang. Sampi dait anak sampi tiang saq paling solah sampun tesembelẽh. Selapuqne sampun tesiepang. Silaq side pade dateng ojok gawẽ ngawinang!' 5 Laguq temuẽ-temuẽ saq tepesilaq nike ndẽq ngerunguq ie. Ie pade selapuq lumbar ojok taoqne begawẽan -- araq saq ojok lendangne, saq lainne lumbar ojok taoqne berusahe; 6 dait saq lainne bau pelayan-pelayan nike, terus tempuk dait ie pade tematẽq. 7 Raje nike jari menggah gati. Beterus ie ngutus tentere-tenterene jari nyematẽq tukang nyematẽq pelayan-pelayanne nike, dait sedut kote ie pade. 8 Sesampun nike raje ngempoh pelayan-pelayanne, terus bebase, 'Gawẽ niki sampun tesiepang laguq dengan-dengan saq tepesilaq ndẽq pantes. 9 Lalo ojok rurung-rurung belẽq, dait pesilaq dengan seluwẽq-luwẽqne dateng ojok gawẽ niki.' 10 Jari pelayan-pelayan nike lalo ojok rurung-rurung belẽq, terus ngumpulang selapuq dengan saq daitne lẽq derike, saq solẽh dait saq jahat. Make taoq gawẽ ngawinang nike jari penoq siq temuẽ-temuẽ. 11 Beterus raje nike tame serioq temuẽ-temuẽne nike. Laguq araq serioqne sopoq temuẽ saq ndẽq ngengadu kelambi begawẽ. 12 Beterus raje nike beketuan lẽq ie, 'Semeton, berembẽ entande jangke bau tame ojok deriki, padahal side ndẽq kadu kelambi begawẽ?' Dengan nike ndẽq tao bejawab. 13 Beterus raje nike bebase lẽq pelayan-pelayanne, 'Sẽkoq ime dait naẽn dengan niki, terus tetẽh ie ojok luah lẽq taoq saq peteng dedet. Lẽq derike ie gen nangis dait menderite.' " 14 Beterus maraq niki entan Deside Isa nutuqang perumpamean nike, "Mule luwẽq dengan saq tempoh laguq sekediq saq tepilẽq." 15 Beterus dengan-dengan Parisi lumbar dait berunding adẽq ie pade mauq langan nyalahang Deside Isa siq care besoal jawab. 16 Make ie pade ngutus pengiring-pengiring ie pade parek ojok Deside Isa bareng kance dengan-dengan golongan Herodes. Dengan-dengan nike matur lẽq Deside Isa, "Bapaq Guru, tiang pade nenaoq Pelungguh jujur. Pelungguh ngajahang secare terus terang mengenai langan saq kenaq tipaq Allah, dait nẽnten takut lẽq sai juaq. Sẽngaq Pelungguh nẽnten pilẽq kasih. 17 Keranaq nike tunas Pelungguh ngendike lẽq tiang pade: Menurut aturan agamente, kanggo napi nẽnten bayah pajek lẽq Kaisar?" 18 Deside Isa wikan maksut jahat dengan-dengan nike, make Ie bemanik lẽq ie pade, "Hai, dengan-dengan munapik! Kembẽq side pade beniat boyaq-boyaq kesalaqan adẽq bau nyalahang Tiang? 19 Cobaq petitoqang lẽq Tiang sopoq kẽpẽng perak saq side pade kadu bayah pajek!" Beterus dengan-dengan nike ngaturin Deside Isa sopoq kẽpẽng perak. 20 Deside Isa beketuan lẽq ie pade, "Gambar dait aran sai niki?" 21 "Gambar dait aran Kaisar," jawab ie pade. Make Deside Isa bemanik tipaq ie pade, "Lamun maraq nike serahang ojok Kaisar napi saq jari dowẽn Kaisar, dait tipaq Allah napi saq jari dowẽn Allah." 22 Waktu ie pade dengah penjelasan nike ie pade bengaq. Ahirne dengan-dengan nike lumbar bilin Deside Isa. 23 Lẽq jelo nike ẽndah, araq dengan-dengan Saduki parek ojok Deside Isa. Ie pade golongan saq bedowẽ pendapet bahwe dengan ninggal ndẽq gen idup malik. 24 Ie pade metakẽn lẽq Deside Isa, "Bapaq Guru, Musa ngajahang maraq niki: Lamun araq dengan mame ninggal, dait ie ndẽq bedowẽ bije, semetonne harus merariq kance bebalune adẽq ie bau ngebẽng keturunan tipaq dengan saq sampun ninggal nike. 25 Laguq lẽq antare tiang pade araq pituq dengan besemetonan. Saq sengake merariq, terus ninggal ndẽq bedowẽ bije, beterus bebalune tebait siq semetonne. 26 Semetonne nike ẽndah ninggal ndẽq bedowẽ bije. Maraq nike ẽndah lẽq semetonne saq ketelu dait seterusne jangke saq kepituq. 27 Ahirne dengan nine nike ẽndah ninggal. 28 Lẽq waktu dengan ninggal teidupang malik, sai semame dengan nine nike? Sẽngaq kepituq-pituqne sampun merariq kance ie." 29 Jawab Deside Isa, "Side keliru gati, sẽngaq side pade ndẽq ngerti Kitab Suci dait kuase Allah. 30 Sẽngaq ẽraq lamun dengan ninggal teidupang malik, ie pade ndẽq gen merariq malik, laguq ie pade gen idup maraq malaẽkat lẽq sorge. 31 Napi side pade ndẽqman bace napi saq temanikang siq Allah mengenai dengan ninggal teidupang malik? Allah bemanik, 32 'Tiang niki Allah Ibrahim, Allah Ishak dait Allah Yakub.' Allah nike nẽnten Allah dengan ninggal, laguq Allah dengan saq idup!" 33 Sewaktu dengan luwẽq nike dengah penjelasan Deside Isa, ie pade takjub siq pengajahan-Ne. 34 Sewaktu dengan-dengan Parisi pireng bahwe Deside Isa sampun miaq dengan-dengan Saduki ndẽq tao bejawab malik, ie pade bekumpul. 35 Salaq sopoq lẽq antarene, ahli Taurat, ie metakẽn lẽq Deside Isa jari boyaq kesalaqan-Ne: 36 Ie bebase, "Paq Guru, prẽntah napi saq paling utame lẽq dalem Hukum Taurat?" 37 Jawab Deside Isa, "Kasihin Tuhan Allahde siq segenep atẽnde, dait siq segenep jiwende, dait siq segenep akal budinde. 38 Nike prẽntah saq utame dait saq paling penting! 39 Prẽntah kedue pade maraq saq utame nike: Kasihin sepadende manusie, maraq side ngasihin diriqde mẽsaq. 40 Selapuq isi Hukum Taurat dait kitab nabi-nabi dasarne lẽq kedue prẽntah nike." 41 Sewaktu dengan-dengan Parisi masih bekumpul lẽq derike, Deside Isa beketuan lẽq ie pade, 42 "Napi pendapet side pade mengenai Almasih? Ie keturunan sai?" "Keturunan Daud," jawab ie pade. 43 Deside Isa bemanik lẽq ie pade, "Lamun maraq nike, kembẽq Roh Allah ngicanin Daud ilham jari nyebut Almasih nike 'Junjungan Saq Mulie'? Sẽngaq Daud bebase, 44 'Tuhan sampun bemanik lẽq Junjungan tiang: Melinggih lẽq sedi kanan Tiang, jangke Tiang piaq musuh-musuh Deside takluk lẽq Deside.' 45 Jari lamun Daud nike nyebut Almasih nike, 'Junjungan Saq Mulie', segerah Junjungan Saq Mulie nike keturunan Daud?" 46 Ndẽq araq sopoq dengan juaq saq tao jawab Deside Isa. Dait lẽman jelo nike ndẽq araq dengan bani metakẽn napi-napi lẽq Deside Isa.

Matthew 23

1 Beterus Deside Isa bemanik lẽq dengan luwẽq dait tipaq selapuq pengiring-Ne, 2 "Ahli-ahli Taurat dait dengan-dengan Parisi teican kuase jari napsirang Hukum Taurat. 3 Keranaq nike side pade harus taat dait ngelaksaneang selapuq hal saq ie pade ajahang lẽq side. Laguq ndaq side pade turut napi saq ie pade laksaneang, sẽngaq ie pade ngajahang laguq ie pade ndẽq ngelaksaneang. 4 Ie pade tuntut hal-hal saq sengke dait miaq aturan saq berat, laguq ndẽq araq gati usahene tulung dengan ngelaksaneang selapuq hal nike. 5 Selapuq saq ie pade laksaneang tujuanne cume adẽqne teserioq siq dengan. Ie pade sediah ngengadu tali sembahyang saq gamber-gamber dait pebẽlo ombẽr-ombẽr jubahne! 6 Ie pade seneng melinggih lẽq taoq saq paling tehormat lẽq taoq dengan-dengan begawẽ, dait melinggih lẽq kursi saq paling julu lẽq balẽ-balẽ ibadah. 7 Ie pade demen tehormatin siq dengan lẽq peken-peken dait teempoh 'Guru'. 8 Laguq side pade, ndaq gati mẽlẽ tesebut 'Guru', sẽngaq side cume bedowẽ sopoq Guru dait side pade selapuq besemetonan. 9 Dait ndaq side sebut sai juaq lẽq dunie niki siq sebutan, 'Bapa', sẽngaq Bapa side cume sopoq, Bapa saq lẽq sorge. 10 Ndaq ẽndah side pade mẽlẽ tesebut 'Pemimpin', sẽngaq cume araq sopoq Pemimpinde, nike Almasih. 11 Dengan saq paling belẽq lẽq antare side pade, ie harus jari pelayande. 12 Dait dengan saq nyombongang diriqne gen terendahang, dait dengan saq ngerendahang diriqne gen tetinggiang." 13 "Celake side pade ahli-ahli Taurat dait dengan-dengan Parisi! Side pade dengan-dengan munapik sẽngaq halangin dengan tame ojok Kerajaan Sorge. Side mẽsaq ndẽq mẽlẽ tame Kerajaan Sorge, laguq dengan lain saq mẽlẽ side pade halangin. 14 Celake side ahli-ahli Taurat dait dengan-dengan Parisi: Side pade dengan-dengan munapik. Side pade tipu bebalu-bebalu dait ngerampas balẽne dait jari seboq kejahatande nike side pade bedo'e bẽlo-bẽlo. Keranaq nike side pade pasti gen nerimaq hukuman saq beratan! 15 Celake side ahli-ahli Taurat dait dengan-dengan Parisi! Side pade dengan-dengan munapik! Side pade lumbar jaoq-jaoq mbelat segare, dait jelajah daratan cume jari miaq sopoq dengan turut agamende. Dait sesampun dengan nike tame agamende, side pade jariang ie calon isi nerake, saq due kali jahatan lẽman side mẽsaq! 16 Celake side pade pemimpin-pemimpin saq bute! Side pade ngajahang hal niki, 'Lamun dengan besumpah demi Gedẽng Allah, sumpah dengan nike ndẽq sah; laguq lamun dengan besumpah demi emas lẽq dalem Gedẽng Allah, dengan nike ndẽq gen lepas lẽman sumpahne.' 17 Side pade dengan-dengan bodo dait bute! Mbẽ saq pentingan; emas atao Gedẽng Allah saq jariang emas nike suci? 18 Side pade ẽndah ngajahang maraq niki, 'Lamun dengan besumpah demi mẽje taoq kurban, dengan nike ndẽq tetuntut siq sumpahne; laguq lamun dengan besumpah demi persembahan lẽq atas mẽje taoq kurban nike, make ie gen tetuntut siq sumpahne nike.' 19 Hai side pade dengan-dengan bute! Mbẽ saq pentingan? Persembahanne atao mẽje taoq kurban saq miaq persembahan nike jari suci? 20 Keranaq nike, lamun dengan besumpah demi mẽje taoq kurban, nike artine ie besumpah demi mẽje taoq kurban, dait demi selapuq persembahan saq araq lẽq atasne. 21 Dait lamun dengan besumpah demi Gedẽng Allah, nike artine ie besumpah demi Gedẽng Allah nike, dait demi Allah saq meneng lẽq derike. 22 Dait lamun dengan besumpah demi sorge, nike artine ie besumpah demi tahte Allah dait demi Allah saq betahte lẽq derike. 23 Celake side pade ahli-ahli Taurat dait dengan-dengan Parisi! Side pade dengan-dengan munapik. Reragian misalne selasih, adas manis dait jinten ẽndah side aturang sepersepulune. Padahal hal-hal saq paling penting lẽq dalem Hukum Taurat, misalne: Keadilan, belas kasihan, dait kesetiean, nike ndẽq side pade perhatiang. Padahal hal-hal nike saq harus side pade laksaneang, dait ndaq lupaqang hal saq lain-lain ẽndah. 24 Side pade pemimpin-pemimpin saq bute! Kelikit lẽq dalem aiq inemde side pade saring, padahal onte side pade belet! 25 Celake side pade ahli-ahli Taurat dait dengan-dengan Parisi! Side pade dengan-dengan munapik! Jembung-jembung dait piring-piringde side pade roas bersi-bersi lẽq bagian luahne, padahal bagian dalemne kotor gati siq hal-hal saq side pade mauq secare pakse dait serakah. 26 Hai dengan Parisi saq bute! Bisoq juluq bersi-bersi bagian dalem jembung piringde, adẽq bagian luahne ẽndah jari bersi! 27 Celake side pade ahli-ahli Taurat dait dengan-dengan Parisi! Side pade dengan-dengan munapik! Side pade maraq kuburan saq tecẽt putẽq; lẽq luahne penggitan solah, laguq lẽq dalemne penoq siq tolang dait selapuq saq berek. 28 Maraq nike ẽndah halne side pade. Side pade solah lẽq julun dengan; laguq lẽq dalemne, penoq siq hal-hal saq munapik dait jahat." 29 "Celake side pade ahli-ahli Taurat dait dengan-dengan Parisi! Side pade dengan-dengan munapik! Side pade piaqang nabi-nabi makam saq solah, dait side pade payas tugu dengan-dengan solẽh. 30 Dait side pade bebase, 'Lamun tiang pade araq lẽq jaman leluhur tiang pade laẽq, tiang pade ndẽq gen milu kance ie pade nyematẽq nabi-nabi.' 31 Jari, side pade ngaku mẽsaq bahwe side pade keturunan dengan-dengan saq nyematẽq nabi-nabi! 32 Lamun maraq nike, terusang dait selesẽang dose-dose saq sampun temulai siq leluhurde nike! 33 Side pade jahat! Dait keturunan dengan jahat! Segerah side pade bau nyelametang diriq lẽman hukuman api nerake? 34 Pade dengahang pacu-pacu: Tiang gen ngutus nabi-nabi tipaq side pade, dengan-dengan bijaksane dait guru-guru; terus separo lẽman dengan-dengan nike gen side pade matẽq, dait separo saq lain gen side pade pakuq lẽq kayuq salib. Araq ẽndah saq gen side pade siksaq lẽq dalem balẽ-balẽ ibadah, dait gen side pade aniaye lẽman sopoq kote ojok kote saq lain. 35 Keranaq nike side pade gen tehukum lantaran side pade nyematẽq dengan-dengan saq ndẽq salaq -- temulai lẽman Habil saq ndẽq salaq, jangke ninggalne Zakaria bije Berekia, saq side pade matẽq lẽq antare Gedẽng Allah dait mẽje taoq kurban. 36 Tiang badaq side: Selapuqne nike gen tetanggung siq dengan-dengan jaman niki!" 37 "Yerusalem, Yerusalem! Side matẽq nabi-nabi. Utusan-utusan Allah side pelẽwas siq batu jangke ninggal. Sampun pire kali Tiang mẽlẽ ngumpulang selapuq pendudukde, maraq inen manuk saq kekep anak-anakne lẽq bawaq kelẽtẽkne, laguq side ndẽq mẽlẽ! 38 Pade serioq balẽnde gen tebilin dait jari sepi. 39 Tiang badaq side: Mulai mangkin side ndẽq gen serioq Tiang malik, jangke side bebase, 'Teberkahin Ie saq rauh dalem pesẽngan Tuhan.' "

Matthew 24

1 Lẽq waktu Deside Isa sugul lẽman Gedẽng Allah, pengiring-pengiring-Ne parek tipaq Ie, dait nijoqang bangunan-bangunan Gedẽng Allah nike. 2 Deside Isa bemanik lẽq ie pade, "Napi side pade serioq selapuqne nike? Tiang badaq side: Setetune ndẽq araq sopoq juaq batu lẽq bangunan-bangunan nike saq masih beronjoq maraq bẽngan. Selapuqne gen terobohang." 3 Beterus Deside Isa lumbar ojok Bukit Zaitun, dait waktu Ie kenyeke melinggih, pengiring-pengiring-Ne secare husus parek tipaq Ie jari matur. Ie pade matur lẽq Deside Isa, "Silaq Pelungguh, sampẽang lẽq tiang pade piran selapuqne nike gen telaksane dait napi saq jari tande-tande kerauhan Pelungguh dait ahir jaman?" 4 Jawab Deside Isa, "Pade waspade, ndaq side pade jangke tetipu. 5 Sẽngaq luwẽq dengan gen dateng kadu aran Tiang dait bebase, 'Tiang niki Almasih!' Ie pade gen miaq luwẽq dengan jari sesat. 6 Side pade gen dengah suare-suare perang dait berite-berite mengenai perang, laguq ndaq takut. Sẽngaq hal-hal nike harus telaksane, laguq hal nike ndẽq berarti bahwe sampun wayene kiamat. 7 Bangse saq sopoq gen perang ngelawan bangse saq lain, dait negare saq sopoq gen nyerbu negare saq lain. Lẽq mbẽ-mbẽ gen araq bahle kelapahan dait lindur. 8 Selapuqne nike baruq awal penderitean sendẽqman dateng jaman saq baru. 9 Beterus side pade gen tebau dait teserahang jari tesiksaq dait tematẽq. Seantẽro dunie gen meriq lẽq side pade sẽngaq side pade jari pengiring Tiang. 10 Lẽq waktu nike, luwẽq dengan gen murtat, saling hianat dait saling meriqang sopoq kance saq lain. 11 Luwẽq gen dateng nabi-nabi palsu dait ie pade gen miaq dengan luwẽq jari sesat. 12 Kejahatan gen jari sayan luwẽq jangke luwẽq dengan engkah ngasihin Allah dait sepade manusie. 13 Laguq dengan saq tahen jangke penutuqne, gen teselametang. 14 Dait Kabar Solah mengenai Kerajaan Allah gen tekabarang ojok seantẽro dunie, adẽq selapuq dengan dengah hal nike. Sesampun nike baruq kiamat nike dateng." 15 "Side pade gen serioq berembẽ 'Perbuatan najis saq miaq binase', maraq saq tesampẽang siq Nabi Daniel, nganjeng lẽq taoq saq suci (hal niki saq harus teperhatiang siq dengan saq mace). 16 Lẽq waktu nike dengan-dengan saq araq lẽq Yudea harus pelai ojok pegunungan. 17 Dengan saq araq lẽq atas atep balẽ, ndaq turun ojok dalem balẽne bait napi juaq. 18 Dengan saq kenyeke araq lẽq lendangne, ndaq tulak bait jubahne. 19 Celake inaq-inaq saq kenyeke betian, atao inaq-inaq saq masih penyusuq bebẽaqne lẽq waktu nike! 20 Pade bedo'e adẽq ndaq jangke side harus pelai lẽq musim telih atao lẽq jelo Sabat! 21 Lẽq jelo-jelo saq luwẽq sengsare nike, gen araq kesusahan belẽq maraq saq ndẽq uwah araq lẽman dunie tecipteang jangke mangkin niki, dait ndẽq gen araq malik. 22 Seandẽne Allah nẽnten pesingket waktune; make ndẽq araq sopoq dengan juaq saq selamet. Laguq lantaran dengan-dengan saq sampun tepilẽq siq Allah nike, make Ie pesingket waktune. 23 Lẽq waktu nike, lamun araq dengan badaq side, 'Pade serioq, Almasih nike araq lẽq deriki!' atao 'Ie araq lẽq derike!' -- ndaq gati percaye lẽq dengan nike. 24 Sẽngaq almasih-almasih palsu dait nabi-nabi palsu gen dateng. Ie pade gen miaq tande-tande saq luar biase dait macem-macem muqjizat jari nipu, lamun bau dengan-dengan saq sampun tepilẽq siq Allah ẽndah. 25 Jari, pade inget! Tiang sampun juluan badaq hal nike lẽq side pade sendẽqman hal nike telaksane. 26 Lamun dengan bebase lẽq side, 'Serioq, Ie araq lẽq derike lẽq padang gurun!' -- ndaq side pade lumbar ojok derike. Atao lamun ie pade bebase, 'Serioq, Ie araq lẽq dalem kamar niki!' -- ndaq percaye. 27 Sẽngaq kerauhan Bije Manusie maraq cahaye kisap saq ngempor lẽman timuq jangke dateng bat. 28 Lẽq mbẽ araq bangkẽ, lẽq derike araq kedit saq girang ngaken bangkẽ." 29 "Ndẽq ngonẽq sesampun mase kesusahan nike, sinar jelo gen jari peteng, dait bulan ndẽq becahaye. Bintang-bintang gen geriq lẽman langit, dait selapuq kuase saq araq lẽq langit jari biur lantur. 30 Sesampun nike, tande Bije Manusie gen penggitan lẽq langit. Lẽq waktu nike selapuq bangse lẽq gumi gen nangis ẽroq asẽq. Ie pade serioq Bije Manusie rauh lẽq atas awan siq kuase dait kemuliean saq belẽq. 31 Terompẽt belẽq gen tepuniqang, dait Bije Manusie gen ngutus malaẽkat-malaẽkat-Ne ngumpulang dengan-dengan saq sampun Ie pilẽq lẽman keempat penjuru gumi, dait lẽman poton langit saq sopoq jangke poton langit saq lain." 32 "Pade bait perajahan lẽman lolo are. Lamun pẽmpang-pẽmpangne ijo dait odaq, terus mulai besuli, side pade gen nenaoq bahwe musim panas sampun rapet. 33 Maraq nike ẽndah lamun side pade serioq hal-hal nike telaksane, side pade nenaoq bahwe waktune sampun rapet gati. 34 Tiang badaq side: Setetune hal-hal nike gen telaksane sendẽqman dengan-dengan saq idup mangkin niki ninggal selapuqne. 35 Langit dait gumi gen musnah, laguq manik Tiang gen kekel selaẽq-laẽqne." 36 "Ndẽq araq saq nenaoq piran jelone dait jamne, malaẽkat-malaẽkat lẽq sorge nẽnten wikan, Bije saq asalne lẽman Allah ẽndah nẽnten wikan, cume Bapa doang saq wikan. 37 Lamun Bije Manusie rauh ẽraq, keadaanne pade maraq jaman Nuh laẽq. 38 Lẽq jelo-jelo sendẽqman belabur belẽq nike, dengan-dengan bekelor, nginem dait merariq. Tetep maraq nike jangke waktune Nuh tame ojok dalem kapalne. 39 Sewaktu ie pade selapuq tetimpe siq belabur nike, baruq ie pade sadar napi saq kenyeke ie pade alamin. Maraq nike ẽndah keadaanne ẽraq lamun Bije Manusie nike rauh. 40 Lẽq waktu nike, lamun araq due dengan kenyeke begawẽan lẽq lendang: Saq sopoqne gen tejauq dait saq sopoqne malik teadẽqang. 41 Lamun due dengan nine kenyeke nujaq gandum: Saq sopoqne gen tejauq, dait saq sopoqne malik gen teadẽqang. 42 Jari, pade siep sedie, sẽngaq side pade ndẽq nenaoq piran Tuhande rauh. 43 Ingetang hal niki! Lamun ẽpẽn balẽ nenaoq jam pire lẽq waktu kemalem maling gen dateng, pasti ie ndẽq gen mesarẽ adẽq maling nike ndẽq tame ojok balẽne. 44 Keranaq nike, side pade ẽndah harus tetep siep sedie. Sẽngaq Bije Manusie gen rauh lẽq waktu saq side pade ndẽq badẽq." 45 Deside Isa bemanik malik, "Lamun maraq nike, sai pelayan saq setie dait bijaksane, saq teangkat siq majikanne jari kepale tipaq pelayan-pelayan lain, adẽq ie ngebẽng ie pade bekelor lẽq waktune? 46 Bahagie gati pelayan saq tedait kenyeke ngelaksaneang tugasne waktu majikanne tulak. 47 Tiang badaq side: Setetune pelayan nike gen tesaduq siq majikanne jari jagaq selapuq dowẽne. 48 Laguq lamun pelayan nike jahat, ie gen bebase lẽq dalem angenne, 49 'Majikan tiang masih ngonẽq tulak,' terus ie mulai ngempuk pelayan-pelayan saq lain, sesampun nike ie bekelor dait nginem kance dengan-dengan saq girang bowos. 50 Beterus majikanne tulak lẽq jelo dait jam saq ndẽq ie badẽq. 51 Make pelayan nike gen tesiksaq jangke matẽ siq majikanne, terus tetetẽh ojok taoq dengan-dengan munapik. Ie pade gen nangis dait menderite lẽq derike."

Matthew 25

1 "Hal Kerajaan Sorge, keadaanne maraq perumpamean niki: Sepulu dedare pengiring pengantẽn pade bait dilahne mẽsaq, beterus ie pade lumbar nyambut pengantẽn mame. 2 Lime lẽq antare ie pade bodo, dait lime saq lainne bijaksane. 3 Kelime dedare saq bodo nike jauq dilahne, laguq ndẽq jauq cadangan minyak. 4 Kelime dedare saq bijaksane jauq dilah dait cadangan minyak. 5 Pengantẽn mame nike telat dateng, jari dedare-dedare nike ngantok terus ketindoqan. 6 Tengaq kelem, baruq kedengahan suare dengan bekuih, 'Pengantẽn mame dateng! Silaq sambut ie!' 7 Kesepulu dedare nike ures, terus ie pade penyalaq dilahne. 8 Dedare-dedare saq bodo nike bebase lẽq dedare-dedare saq bijaksane, 'Bẽng tiang pade sekediq minyakde, sẽngaq dilah tiang pade gen pedaq.' 9 'Ndẽq bau!' jawab dedare-dedare saq bijaksane nike, 'sẽngaq laun tiang pade ẽndah kurangan minyak. Solahan side lumbar ojok dagang minyak dait beli lẽq derike.' 10 Beterus kelime dedare saq bodo nike lumbar beli minyak. Lẽq waktu ie pade lumbar beli minyak, pengantẽn mame nike dateng. Kelime dedare saq bijaksane nike tame ojok taoq gawẽ bareng kance pengantẽn mame nike, dait lawangne teimpet! 11 Beterus dedare-dedare saq lainne nike dateng. Ie pade bekuih, 'Paq! Paq! Tulung bukaqang tiang pade lawang.' 12 Laguq jawab pengantẽn mame nike, 'Tiang ndẽq kenal side pade!' " 13 Make Deside Isa tutuqang perumpamean nike dait bemanik, "Keranaq nike pade siep sedie, sẽngaq side ndẽq nenaoq piran jelo dait jamne." 14 "Hal Kerajaan Sorge nike maraq perumpamean niki: Araq sopoq majikan gen lumbar ojok negeri saq jaoq. Majikan nike ngempoh pelayan-pelayanne, terus ie pade tepercaye jagaq dowẽnne. 15 Sebilang pelayan tebẽng kẽpẽng siq majikanne menurut kemampuanne sopoq-sopoq. Pelayan saq sopoq bẽngne lime iyu kẽpẽng emas, sopoqne malik bẽngne due iyu kẽpẽng emas. Dait sopoqne malik bẽngne siyu kẽpẽng emas. Terus majikan nike berangkat. 16 Pelayan saq nerimaq lime iyu kẽpẽng emas nike langsung lumbar bedagang, terus ie mauq bati lime iyu kẽpẽng emas malik. 17 Maraq nike ẽndah pelayan saq nerimaq due iyu kẽpẽng emas nike, mauq bati due iyu kẽpẽng emas malik. 18 Laguq pelayan saq nerimaq siyu kẽpẽng emas nike lumbar kaliq longkak lẽq tanaq, terus seboqne kẽpẽng majikanne lẽq derike. 19 Ngonẽq gati baruq majikanne tulak, dait mulai berẽkẽngan kance pelayan-pelayanne. 20 Pelayan saq nerimaq lime iyu kẽpẽng emas nike dateng, terus ie serahang sepulu iyu kẽpẽng emas, dait bebase, 'Paq, pelungguh ngebẽng tiang lime iyu kẽpẽng emas. Mangkin silaq sereminang, tiang mauq bati lime iyu malik.' 21 'Bagus,' basen majikan nike, 'side pelayan saq bagus dait setie. Sẽngaq side bau tepercaye lẽq hal saq sekediq, tiang gen percayeang hal saq luwẽqan malik lẽq side. Silaq tame, milu beseneng-seneng kance tiang!' 22 Terus pelayan saq nerimaq due iyu kẽpẽng emas nike dateng, dait matur, 'Bapaq ngebẽng tiang due iyu kẽpẽng emas. Mangkin silaq sereminang, tiang mauq bati due iyu malik.' 23 'Bagus,' basen majikan nike, 'side pelayan saq bagus dait setie. Sẽngaq side bau tepercaye lẽq hal saq sekediq, make gen tiang percayeang lẽq side hal-hal saq luwẽqan malik. Silaq tame, milu beseneng-seneng kance tiang!' 24 Beterus dateng ẽndah pelayan saq nerimaq siyu kẽpẽng emas nike, dait bebase, 'Paq, tiang taoq pelungguh dengan saq kejem. Pelungguh mataq lẽq taoq saq nẽnten pelungguh sawur binẽq, dait bait hasil lẽq taoq saq nẽnten pelungguh talet mẽsaq. 25 Tiang takut, jari tiang lalo seboq kẽpẽng pelungguh lẽq dalem tanaq. Niki kẽpẽng pelungguh nike.' 26 'Side pelayan saq jahat dait mayus!' basen majikan nike. 'Tekan side nenaoq bahwe tiang mataq lẽq taoq saq ndẽq uwah tiang sawur binẽq, dait bait hasil lẽq taoq saq ndẽq uwah tiang talet mẽsaq? 27 Seharusne side serahang kẽpẽng tiang nike ojok dengan saq ngelampaqang kẽpẽng, adẽq lẽq waktu tiang tulak, tiang bau bait malik kẽpẽng tiang nike bareng rẽntenne. 28 Keranaq nike, bait kẽpẽng nike lẽman ie, terus bẽng pelayan saq bedowẽ sepulu iyu kẽpẽng emas nike. 29 Sẽngaq sebilang dengan saq sampun bedowẽ gen teican luwẽqan malik, dait ie gen bekelimpahan. Laguq dengan saq ndẽq bedowẽ napi-napi, napi juaq saq araq lẽq ie gen tebait. 30 Dait pelayan saq ndẽq araq manpaatne nike, tetetẽh ojok taoq saq peteng dedet lẽq luah. Lẽq derike ie gen nangis dait menderite!' " 31 "Lamun Bije Manusie rauh dalem kemuliean-Ne teiring siq selapuq malaẽkat-Ne, Ie gen melinggih lẽq atas tahte-Ne saq mulie. 32 Selapuq bangse gen tekumpulang lẽq arepan-Ne. Terus Ie gen kelin dengan-dengan nike jari due kelompoq, pade maraq pangarat saq kelin dombe kance bẽmbẽq. 33 Dait Ie gen toloq dombe-dombe lẽq sedi kanan-Ne, bẽmbẽq-bẽmbẽq lẽq sedi kiri-Ne. 34 Beterus Raje nike gen bebase lẽq dengan-dengan saq lẽq sedi kanan-Ne, 'Side pade saq teberkahin siq Bapa Tiang, silaq tame ojok Kerajaan saq sampun tesiepang umaq side lẽman dunie tecipteang. 35 Sẽngaq waktu Tiang seduk, side pade bẽng Tiang bekelor, dait waktu Tiang bedak, side pade bẽng Tiang nginem. Sewaktu Tiang jari dengan pendateng, side pade bẽng Tiang nyodoq lẽq balẽnde. 36 Sewaktu Tiang ndẽq bekelambi, side pade bẽng Tiang kelambi. Sewaktu Tiang sakit, side pade ngerawat Tiang. Sewaktu Tiang tebui, side pade tulung Tiang.' 37 Beterus dengan-dengan solẽh nike matur, 'Junjungan Saq Mulie, piran tiang pade serioq Pelungguh seduk terus tiang pade aturin Pelungguh medaran? Atao tiang pade aturin nginem lẽq waktu Pelungguh bedak? 38 Piran ẽndah tiang pade serioq Pelungguh jari dengan pendateng, terus tiang pade aturin Pelungguh nyodoq lẽq balẽn tiang pade? Piran Pelungguh nẽnten bekuace, terus tiang pade aturin Pelungguh kuace? 39 Piran tiang pade serioq Pelungguh sungkan atao tebui, beterus tiang pade tulung Pelungguh?' 40 Raje nike gen bejawab, 'Tiang badaq side: Setetune waktu side pade ngelaksaneang hal nike lẽq salaq sopoq sanak-sanak Tiang saq paling hine, artine side ngelaksaneang hal nike tipaq Tiang!' 41 Beterus Raje nike gen bebase lẽq dengan-dengan saq araq lẽq sedi kiri-Ne, 'Lalo lẽman tẽ, side pade dengan-dengan saq tekutuk! Pade tame ojok dalem api saq ndẽq iniq pedaq saq sampun tesiepang umaq Belis dait malaẽkat-malaẽkatne! 42 Sẽngaq sewaktu Tiang lapah, side pade ndẽq bẽng Tiang bekelor; sewaktu Tiang bedak, side pade ndẽq bẽng Tiang nginem. 43 Sewaktu Tiang jari dengan pendateng, side pade ndẽq bẽng Tiang nyodoq lẽq balẽnde. Sewaktu Tiang ndẽq bekelambi, side pade ndẽq bẽng Tiang kelambi. Sewaktu Tiang sakit dait tebui side pade ndẽq ngerawat Tiang.' 44 Beterus ie pade gen bejawab, 'Junjungan Saq Mulie, piran tiang pade serioq Pelungguh seduk, atao bedak, atao jari dengan pendateng, atao nẽnten bekuace atao sungkan dait tebui? Terus tiang pade nẽnten tulung Pelungguh?' 45 Raje nike gen bejawab, 'Tiang badaq side: Lẽq waktu side pade ndẽq mẽlẽ tulung salaq sopoq dengan saq paling hine niki, artine side pade ndẽq mẽlẽ tulung Tiang.' 46 Make dengan-dengan nike gen tehukum siq hukuman saq kekel. Laguq dengan-dengan saq ngelaksaneang prẽntah Allah gen tame ojok dalem idup sejati dait kekel."

Matthew 26

1 Sewaktu Deside Isa selesẽ ngajahang selapuq hal nike, Ie bemanik lẽq pengiring-pengiring-Ne, 2 "Side pade nenaoq, bahwe karing due jelo Hari Raye Paskah, dait Bije Manusie gen teserahang jari tepakuq lẽq kayuq salib." 3 Waktu nike imam-imam kepale dait pemimpin-pemimpin Yahudi bekumpul lẽq istane Imam Agung Kayapas. 4 Ie pade berunding jari bau Deside Isa secare tedoq-tedoq dait nyematẽq Ie. 5 Laguq ie pade bebase, "Ndaq laksaneang hal nike waktu dengan-dengan kenyeke ngerayeang Paskah, adẽq rakyat ndẽq jari biur lantur." 6 Sewaktu Deside Isa kenyeke lẽq Betania, lẽq gedẽng Simon saq piranan sakit kuste, 7 araq sopoq dengan nine parek tipaq Deside Isa, dait jauq sopoq botol pualam berisi minyak sengẽh saq mahel. Lẽq waktu Deside Isa melinggih medaran, dengan nine nike nolẽngang minyak sengẽh nike lẽq sirah Deside Isa. 8 Pengiring-pengiring Deside Isa serioq hal nike, terus ie pade jari sili dait bebase, "Napi manpaatne minyak sengẽh nike tesẽdaq-ẽdaq?" 9 "Minyak sengẽh nike bau tejual siq aji saq mahel, terus kẽpẽngne bau tesedekahang tipaq dengan-dengan miskin!" 10 Deside Isa wikan pikiran pengiring-pengiring-Ne, terus Ie bemanik, "Kembẽq side pade piaq dengan nine niki susah? Ie ngelaksaneang hal saq solah tipaq Tiang. 11 Dengan miskin tetep araq lẽq antare side pade, laguq Tiang niki ndẽq seterusne araq bareng kance side pade. 12 Ie minyakin Tiang siq minyak sengẽh nike jari siepang pemakaman Tiang. 13 Tiang badaq side: Setetune lẽq seantẽro dunie, lẽq mbẽ juaq Kabar Solah lẽman Allah tesiarang, perbuatan dengan nine niki gen teceriteang ẽndah jari nginget ie." 14 Beterus salaq sopoq lẽman kedue olas pengiring-pengiring Deside Isa, saq aranne Yudas Iskariot, lumbar ojok imam-imam kepale. 15 Yudas bebase lẽq imam-imam kepale nike, "Napi saq side pade gen icanin tiang lamun tiang serahang Deside Isa tipaq side pade?" Terus imam-imam kepale nike ngerẽkẽng telung dase kẽpẽng perak, dait serahangne kẽpẽng nike lẽq Yudas. 16 Mulai lẽman waktu nike Yudas berusahe boyaq kesempatan jari behianat lẽq Deside Isa. 17 Lẽq jelo penembẽq Perayaan Ruti Ndẽq Beragi, pengiring-pengiring Deside Isa parek lẽq Ie, dait metakẽn, "Lẽq mbẽ Pelungguh kayun adẽq tiang pade siepang Pelungguh keloran Paskah?" 18 Jawab Deside Isa, "Pade lumbar ojok sopoq dengan lẽq kote, terus sampẽang lẽq ie, 'Manik Guru tiang, sampun waktune Tiang gen ngerayeang Paskah lẽq balẽnde bareng kance pengiring-pengiring Tiang.' " 19 Pengiring-pengiring-Ne ngelaksaneang napi saq temanikang siq Deside Isa. Ie pade siepang keloran Paskah nike. 20 Sesampun kekelem, Deside Isa dait kedue olas pengiring-Ne melinggih medaran keloran Paskah. 21 Sewaktu ie pade kenyeke medaran, Deside Isa bemanik, "Tiang badaq side: Setetune salaq sopoq lẽq antare side pade gen behianat lẽq Tiang." 22 Sewaktu pengiring-pengiring Deside Isa dengah hal nike, ie pade jari asẽq gati, beterus sopoq-sopoq mulai metakẽn lẽq Deside Isa, "Junjungan Saq Mulie, pasti ndẽqne tiang saq temaksut nike?" 23 Jawab Deside Isa, "Dengan saq bareng-bareng kance Tiang celep ruti lẽq dalem jembung, ie saq gen behianat lẽq Tiang. 24 Mule Bije Manusie gen ninggal maraq saq tetulis lẽq Kitab Suci. Laguq celake gati dengan saq behianat lẽq Bije Manusie nike! Solahan dengan nike ndẽq tebijeang!" 25 Beterus Yudas saq behianat nike bejawab, "Pasti ndẽqne tiang saq Guru maksut nike?" Jawab Deside Isa, "Maraq nike basende!" 26 Sewaktu ie pade medaran, Deside Isa bait ruti, beterus ngucapang do'e syukur. Sesampun nike, peleng-peleng-Ne ruti nike siq gading-Ne terus teicanin tipaq pengiring-pengiring-Ne, dait bemanik, "Silaq bait, terus kelorang; niki ragen Tiang." 27 Sesampun nike, Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike lẽq pengiring-pengiring-Ne, sambil bemanik, "Silaq selapuqde pade nginem lẽman cawan niki. 28 Sẽngaq niki daraq Tiang saq ngesahang perjanjian Allah -- daraq saq tetumpahang tipaq dengan luwẽq adẽq dose-dose ie pade teampunin siq Allah. 29 Tiang ẽndah badaq side: Tiang ndẽq gen nginem anggur niki malik jangke dateng waktune Tiang gen nginem anggur saq baru bareng kance side pade dalem Kerajaan Bapa Tiang." 30 Beterus ie pade nyanyiang lagu pujian. Sesampun nike ie pade lumbar ojok Bukit Zaitun. 31 Beterus Deside Isa bemanik lẽq pengiring-pengiring-Ne, "Kelem niki ẽndah side pade gen pelai bilin Tiang. Sẽngaq lẽq Kitab Suci tetulis: Allah bemanik, 'Tiang gen nyematẽq pengarat nike, dait selapuq dombe-dombene gen bekelin sopoq kance saq lain.' 32 Laguq sesampun Tiang idup malik, Tiang gen senjuluq side pade ojok Galilea." 33 Petrus matur lẽq Deside Isa, "Timaq selapuqne bilin Pelungguh, tiang nẽnten!" 34 Jawab Deside Isa lẽq Petrus, "Tiang badaq side: Setetune kelem niki ẽndah, sendẽqman manuk ngungkung, side sampun telu kali nilas Tiang." 35 Laguq jawab Petrus, "Timaq tiang harus matẽ bareng kance Pelungguh, tiang nẽnten gen nilas Pelungguh!" Dait selapuq pengiring saq lain ẽndah matur maraq nike. 36 Sesampun nike, Deside Isa lumbar kance pengiring-pengiring-Ne ojok sopoq taoq aranne Getsemani. Lẽq derike Deside Isa bemanik lẽq pengiring-pengiring-Ne, "Tokol lẽq deriki, waktu Tiang lalo bedo'e lẽq derike." 37 Beterus Deside Isa tẽnaq Petrus dait kedue bije Zebedeus lumbar bareng kance Ie. Deside Isa mulai beridap osah dait asẽq. 38 Deside Isa bemanik lẽq pengiring-pengiring-Ne nike, "Angen Tiang sedih gati, idapne maraq gen matẽ doang. Ndot lẽq deriki, dait bejage-jage bareng Tiang." 39 Sesampun nike Deside Isa margi jaoqan sekediq, terus Ie sujut lẽq tanaq dait bedo'e, "Bapa, lamun bau, bait cawan penderitean niki lẽman Tiang laguq sampunang menurut kemẽlẽq Tiang, laguq menurut pekayunan Bapa." 40 Sesampun nike, Deside Isa tulak ojok taoq ketelu pengiring-Ne terus ie pade tedait kenyeke tindoq. Deside Isa bemanik lẽq Petrus, "Cume sejam doang side pade ndẽq sanggup bejage kance Tiang? 41 Bejage-jage dait bedo'e, adẽq side pade ndẽq ngalamin cobe. Mule roh side mẽlẽ ngelaksaneang saq kenaq, laguq side pade ndẽq sanggup sẽngaq awakde nike lemah." 42 Karing sekali Deside Isa lumbar bedo'e, manik-Ne, "Bapa, lamun cawan penderitean niki harus Tiang terimaq, menengang pekayunan Bapa saq telaksane." 43 Sesampun nike Deside Isa tulak, terus dait-Ne malik pengiring-pengiring-Ne masih tindoq, sẽngaq ie pade ngantok gati. 44 Deside Isa lumbar bilin ie pade terus bedo'e saq ketelu kaline dait ngucapang do'e saq pade. 45 Sesampun nike Deside Isa tulak malik tipaq pengiring-pengiring-Ne, dait bemanik, "Napi side pade masih tindoq dait mentelah? Silaq pade serioq, sampun wayene Bije Manusie teserahang ojok ime dengan-dengan bedose. 46 Pade ures! Silaq ite lumbar! Pade serioq! Dengan saq behianat lẽq Tiang sampun dateng!" 47 Sewaktu Deside Isa masih bebaos, Yudas, salaq sopoq lẽman kedue olas pengiring-Ne nike dateng. Bareng kance Yudas araq ẽndah dengan luwẽq jauq klẽwang dait gegitik. Ie pade tesuruq siq imam-imam kepale dait pemimpin-pemimpin Yahudi. 48 Penghianat nike sampun badaq tande niki tipaq ie pade, "Dengan saq tiang siduk, Ie uwah denganne. Bau Ie!" 49 Sesampun dateng lẽq taoq nike, Yudas, langsung ojok Deside Isa dait matur, "Salam Bapaq Guru!" Terus ie siduk Deside Isa. 50 Jawab Deside Isa, "Semeton, napi maksutde dateng ojok deriki?" Beterus dengan luwẽq nike maju dait bau Deside Isa. 51 Salaq sopoq dengan lẽman dengan-dengan saq bareng Deside Isa serẽt klẽwangne, terus ngerantek pelayan Imam Agung jangke pegat kentokne. 52 Deside Isa bemanik lẽq pengiring-Ne nike, "Tamaqang klẽwangde lẽq dalem sarungne. Sẽngaq sai juaq saq kadu klẽwang gen ninggal siq klẽwang. 53 Side paran Tiang ndẽq bau tunas tulung lẽq Bapa Tiang, adẽq Ie gelis ngirim lebih lẽman due olas pasukan malaẽkat? 54 Laguq lamun hal nike Tiang laksaneang, ndẽq gen telaksane napi saq sampun tetulis lẽq dalem Kitab Suci bahwe mule harus telaksane hal maraq niki?" 55 Beterus Deside Isa bemanik lẽq dengan luwẽq nike, "Napi Tiang niki perampok, jangke side pade dateng jauq klẽwang dait gegitik jari bau Tiang? Sebilang jelo Tiang ngajahang lẽq Gedẽng Allah, dait side pade ndẽq bau Tiang. 56 Laguq mule seharusne maraq niki, adẽqne telaksane napi saq tetulis siq nabi-nabi lẽq dalem Kitab Suci." Sesampun nike, selapuq pengiring-pengiring-Ne pelai bilin Deside Isa. 57 Dengan-dengan saq bau Deside Isa jauq Deside Isa ojok gedẽng Imam Agung Kayapas. Lẽq derike ahli-ahli Taurat dait pemimpin-pemimpin Yahudi sampun bekumpul. 58 Petrus ngiring Deside Isa lẽman jaoq jangke lelẽah gedẽng Imam Agung. Dait sesampun tame ojok dalem, ie tokol bareng kance pengawal-pengawal. Petrus melẽt nenaoq berembẽ laun kejarianne selapuqne nike. 59 Imam-imam kepale dait selapuq anggote Mahkamah Agame berusahe mauq kesaksian palsu adẽq Deside Isa bau tehukum matẽ. 60 Laguq ie pade ndẽq mauq, timaq luwẽq dengan saq maju jari saksi duste. Ahirne araq due dengan maju ojok julu. 61 Ie pade bebase, "Dengan niki sampun bebaos bahwe, 'Ie bau robohang Gedẽng Allah, terus dalem telu jelo Ie sanggup penganjeng malik.' " 62 Terus Imam Agung nike nganjeng dait bebase lẽq Deside Isa, "Pelungguh kayun jawab napi saq tetuduhang nike atao nẽnten?" 63 Laguq Deside Isa tetep meneng. Imam Agung nike bebase malik lẽq Deside Isa, "Demi Allah saq idup, sampẽang lẽq tiang pade napi tetu Pelungguh niki Almasih, Bije saq asalne lẽman Allah?" 64 Jawab Deside Isa, "Maraq nike basen pelungguh. Laguq Tiang badaq side waktu niki side pade gen serioq Bije Manusie melinggih lẽq sedi kanan Allah saq Mahekuase, dait rauh lẽq atas awan lẽq langit!" 65 Make Imam Agung nike ngeroẽk-roẽk kuacene, dait bebase, "Ie menghine Allah! Ndẽq perlu saksi malik. Side pade dengah mẽsaq ucapan nike menghine Allah. 66 Mangkin berembẽ pendapet side pade?" Jawab dengan-dengan nike, "Ie salaq, dait harus tehukum matẽ." 67 Terus ie pade nijuh penjarupan Deside Isa, dait jagur Ie. Araq ẽndah saq nempẽlẽk Ie, 68 dait bebase, "Cobaq badaq tiang pade, hai Almasih! Sai saq ngempuk Side?" 69 Petrus kenyeke tokol lẽq luah, lẽq lelẽah. Salaq sopoq pelayan nine dateng ngerapetin Petrus dait beketuan, "Tekan side ẽndah saq bareng kance Deside Isa dengan Galilea nike?" 70 Laguq Petrus nilas lẽq julu selapuq dengan nike. "Tiang ndẽq ngerti napi maksut side," basen Petrus, 71 terus Petrus lumbar ojok jebak. Pelayan nine saq lain ẽndah serioq Petrus, terus bebase lẽq dengan-dengan lẽq derike, "Onẽq dengan niki araq bareng kance Deside Isa dengan Nazaret nike." 72 Laguq Petrus nilas malik dait besumpah, "Tiang tetu-tetu ndẽq kenal dengan nike!" 73 Ndẽq ngonẽq sesampun nike, dengan-dengan saq nganjeng lẽq derike dateng ngerapetin Petrus, dait bebase, "Pasti side salaq sopoq lẽman ie pade. Kentare gati agolde." 74 Beterus Petrus mulai besumpah-sumpah, dait bebase, "Tiang ndẽq kenal Deside Isa nike!" Lẽq waktu nike ẽndah manuk ngungkung. 75 Terus Petrus jari inget bahwe Deside Isa sampun manikang hal nike lẽq ie, "Sendẽqman manuk ngungkung, side sampun telu kali nilas Tiang." Beterus Petrus sugul dait nangis siq asẽqne.

Matthew 27

1 Kelẽmaq gati, selapuq imam kepale dait pemimpin-pemimpin Yahudi sampun miaq keputusan jari nyematẽq Deside Isa. 2 Ie pade sẽkoq Deside Isa, terus jauq Ie dait nyerahang Ie ojok Pilatus, gubernur pemrẽntahan Roma. 3 Sewaktu Yudas penghianat nike nenaoq bahwe Deside Isa sampun tekeneang hukuman matẽ, ie jari nyesel. Beterus Yudas lumbar nulakang kẽpẽng perak saq telung dase nike ojok imam-imam kepale dait pemimpin-pemimpin Yahudi. 4 Basene, "Tiang bedose sampun behianat lẽq dengan saq ndẽq salaq jangke Ie tehukum matẽ!" Laguq jawab imam-imam dait pemimpin-pemimpin Yahudi nike, "Tiang pade ndẽq araq urusan malik lẽq hal nike? Nike urusan side!" 5 Yudas timpoh kẽpẽng nike ojok dalem Gedẽng Allah. Beterus ie lumbar gantung diriqne. 6 Imam-imam kepale ngembuq kẽpẽng nike, dait bebase, "Kẽpẽng niki kẽpẽng daraq, menurut Hukum Taurat, ndẽq patut tetamaq ojok dalem taoq persembahan lẽq Gedẽng Allah." 7 Beterus sesampun ie pade sepakat, ie pade kadu kẽpẽng nike jari beli tanaq saq tesebut Tanaq Tukang Kemẽq. Tanaq nike tekadu jari kuburan dengan-dengan pendateng. 8 Nike lantaranne jangke jelo niki tanaq nike tesebut "Tanaq Daraq". 9 Siq care nike telaksane napi saq sampun tesampẽang siq Nabi Yeremia, "Ie pade nerimaq telung dase kẽpẽng perak, nike aji saq sampun tesepakatin siq bangse Israel jari bayah Ie. 10 Dait kẽpẽng nike ie pade kadu jari beli Tanaq Tukang Kemẽq, maraq prẽntah Tuhan lẽq tiang." 11 Sewaktu Deside Isa lẽq arepan Pilatus, gubernur negeri nike, Pilatus metakẽn lẽq Deside Isa, "Napi tetu Pelungguh raje dengan Yahudi?" "Maraq nike basen pelungguh," jawab Deside Isa. 12 Laguq sewaktu imam-imam kepale dait pemimpin-pemimpin Yahudi ngajuang macem-macem tuduhan lẽq Deside Isa, Ie nẽnten jawab napi-napi. 13 Keranaq nike Pilatus bebase lẽq Ie, "Napi Pelungguh nẽnten pirengang selapuq saq ie pade tuduhang tipaq Pelungguh nike?" 14 Laguq Deside Isa nẽnten kayun bejawab, sehingge gubernur nike bengaq gati. 15 Lẽq sebilang Perayaan Paskah, biasene gubernur bẽbasang sopoq tahenan saq tepilẽq siq rakyat. 16 Waktu nike, araq sopoq tahenan saq kesohor lantaran pegawẽanne saq jahat, aranne Isa Barabas. 17 Jari, sewaktu dengan luwẽq sampun bekumpul, Pilatus beketuan lẽq ie pade, "Silaq side pade pilẽq, sai saq gen tiang bẽbasang: Isa Barabas atao Isa saq tesebut Almasih?" 18 Hal nike tesampẽang siq Pilatus sẽngaq ie wikan bahwe penguase-penguase Yahudi nike nyerahang Deside Isa lẽq ie lantaran ie pade talon atẽ. 19 Waktu Pilatus kenyeke melinggih lẽq ruang pengadilan, sebiniqanne suruq dengan nyampẽang pesen niki lẽq Pilatus, "Ndaq side turut campur lẽq pelekare dengan saq ndẽq salaq nike. Sẽngaq lantaran Ie, tiang mauq ngimpi lengẽ jelo niki." 20 Laguq imam-imam kepale dait pemimpin-pemimpin Yahudi nike terus ngasut dengan luwẽq adẽq Pilatus bẽbasang Barabas dait Deside Isa tehukum matẽ. 21 Beterus Pilatus beketuan malik lẽq dengan-dengan nike, "Lẽman deduaqne nike, silaq side pade pilẽq, sai saq gen tiang bẽbasang?" "Barabas!" jawab ie pade. 22 "Lamun maraq nike tiang kumbẽqang Deside Isa saq tesebut Almasih?" basen Pilatus lẽq ie pade. "Pakuq Ie lẽq kayuq salib!" jawab ie pade selapuq. 23 "Laguq pegawẽan jahat napi saq sampun Ie piaq?" basen Pilatus. Laguq siq suare saq belẽqan malik dengan-dengan nike nyurak, "Pakuq Ie lẽq kayuq salib!" 24 Ahirne Pilatus sadar bahwe ie ndẽq bau piaq napi-napi malik, malahan dengan-dengan nike mulai ngore. Jari ie bait aiq, terus lẽq julu dengan luwẽq nike ie bisoq imene dait bebase, "Tiang ndẽq tanggung jawab lẽq ninggalne dengan niki! Nike urusan side pade!" 25 Jawab selapuq dengan luwẽq nike, "Enggih, alurang tiang pade dait anak-anak tiang pade saq nanggung hukuman lẽq ninggal-Ne!" 26 Beterus Pilatus bẽbasang Barabas, dait prẽntahangne dengan mecut Deside Isa. Terus nyerahang Ie adẽqne tepakuq lẽq kayuq salib. 27 Beterus prajurit-prajurit Pilatus jauq Deside Isa tame ojok istane gubernur, dait selapuq pasukan nike bekumpul ngiterin Ie. 28 Ie pade lekaq kuace-Ne, terus kaduang Ie jubah bewarne lempok lomaq. 29 Ie pade piaq sopoq mahkote lẽman pẽmpang-pẽmpang beduwi, dait kaduangne lẽq sirah Deside Isa. Beterus ie pade toloq sopoq tunjang lẽq gading kanan-Ne, terus sujut lẽq arepan-Ne dait ngoloq Ie. "Idup raje dengan Yahudi!" basen ie pade. 30 Ie pade tijuh Deside Isa dait bait tunjang nike, terus empukangne lẽq sirah-Ne. 31 Sesampun ngoloq-oloq Deside Isa, ie pade lekaq jubah lempok lomaq nike, terus kaduangne malik kuace-Ne mẽsaq. Beterus Ie tejauq ojok luah jari tepakuq lẽq kayuq salib. 32 Lẽq tengaq langan, ie pade bedait kance dengan lẽman Kirene aranne Simon. Ie pade paksaq dengan nike ngelẽmbah kayuq salib Deside Isa. 33 Beterus ie pade dateng lẽq sopoq taoq aranne Golgota, saq artine "Taoq Jerangkong". 34 Lẽq derike ie pade ngaturin Deside Isa nginem anggur saq sampun tecampur siq pepeduq, laguq sesampun Ie ngerasaq sekediq anggur nike, Ie nẽnten kayun nginem malik. 35 Beterus ie pade pakuq Deside Isa lẽq kayuq salib dait bagi-bagiang kuace-Ne kadu undian. 36 Sesampun nike, ie pade tokol jagaq Deside Isa lẽq derike. 37 Lẽq atas sirah-Ne ie pade toloq tulisan mengenai tuduhan tipaq Ie: "Niki Isa, Raje Dengan Yahudi". 38 Bareng kance Deside Isa, ie pade ẽndah pakuq due perampok lẽq kayuq salib; sopoq lẽq sedi kanan, sopoq malik lẽq sedi kiri-Ne. 39 Dengan-dengan saq liwat lẽq derike ngintek dait menghine Deside Isa. 40 Basen ie pade, "Hai, Side saq mẽlẽ ngerobohang Gedẽng Allah terus gen penganjeng dalem telu jelo! Lamun Side tetu-tetu Bije saq asalne lẽman Allah, cobaq turun lẽman kayuq salib nike dait selametang diriq-De!" 41 Maraq nike ẽndah imam-imam kepale dait ahli-ahli Taurat kance pemimpin-pemimpin Yahudi ngoloq Deside Isa. Ie pade bebase, 42 "Ie nyelametang dengan lain, laguq diriq-Ne mẽsaq ndẽq bau Ie selametang! Lamun Ie raje Israel, cobaq mangkin Ie turun lẽman kayuq salib nike, baruq tiang pade mẽlẽ percaye lẽq Ie. 43 Ie percaye lẽq Allah dait bebase bahwe Ie Bije saq asalne lẽman Allah. Nah, silaq ite serioq, napi Allah kayun nyelametang Ie mangkin." 44 Perampok-perampok saq bareng tepakuq lẽq kayuq salib nike ẽndah milu menghine Deside Isa maraq nike. 45 Mulai jam due olas tengari, sengonẽq telu jam, selapuq wilayah negeri nike jari peteng. 46 Jam telu kebian, Deside Isa bekuih keras-keras, "Eli, Eli lama sabaktani?" saq artine, "Ya Allah Tiang, ya Allah Tiang, kembẽq Deside menengang Tiang?" 47 Pire dengan saq nganjeng lẽq derike, dengah suare nike dait bebase, "Ie ngempoh Elia!" 48 Beterus salaq sopoq lẽq antare dengan-dengan nike becat-becat lumbar bait bunge karang terus celepne ojok dalem anggur saq pedis, beterus tancepne lẽq pucuk gegale dait jonjongne ojok cangkem Deside Isa. 49 Laguq dengan-dengan saq lain bebase, "Antih seberaq, cobaq serioq napi Elia rauh nyelametang Ie!" 50 Beterus Deside Isa bekuih malik keras-keras, terus nyerahang nyawe-Ne. 51 Kelambu saq araq begantung lẽq dalem Gedẽng Allah soẽk jari due lẽman atas jangke ojok bawaq. Gumi inggur dait gunung-gunung batu belaq. 52 Kuburan-kuburan jari kebukaq dait luwẽq dengan suci saq sampun ninggal teidupang malik. 53 Ie pade sugul lẽman kuburan-kuburan sesampun Deside Isa idup lẽman ninggal-Ne dait ie pade tame ojok Yerusalem. Dait lẽq derike luwẽq dengan serioq ie pade. 54 Kepale pasukan bareng kance prajurit-prajurit saq kenyeke jagaq Deside Isa jari takut gati sewaktu serioq lindur dait selapuq hal saq telaksane nike. Ie pade bebase, "Tetu Ie niki Bije saq asalne lẽman Allah!" 55 Lẽq derike araq ẽndah luwẽq dengan nine saq kenyeke serioq hal nike lẽman jaoq. Ie pade sampun ngiring Deside Isa dait nulung Deside Isa mulai lẽman Galilea. 56 Lẽq antare dengan-dengan nine nike, araq Mariam Magdalena, Mariam inaqne Yakub dait Yusup, dait inaqne bije-bije Zebedeus. 57 Lẽq waktu serep jelo dateng dengan sugih lẽman Arimatea aranne Yusup, ie ẽndah pengiring Deside Isa. 58 Yusup lumbar ojok Pilatus dait tunasne jenazah Deside Isa. Terus Pilatus prẽntah pengawalne adẽqne nyerahang jenazah Deside Isa lẽq Yusup. 59 Make Yusup bait jenazah nike, terus bungkusne siq kain lẽnen alus saq putẽq bersi. 60 Beterus Yusup toloq jenazah Deside Isa lẽq dalem makam dowẽne mẽsaq, saq baruq tepiaq lẽq dalem sopoq bukit batu. Sesampun nike Yusup gelompongang sopoq batu belẽq ojok lawang makam nike, terus ie lumbar. 61 Mariam Magdalena dait Mariam saq lain ndot tokol andang makam nike. 62 Jemaq kelẽmaqne, lẽq jelo Sabat, imam-imam kepale dait dengan-dengan Parisi lumbar bareng-bareng ngadep Pilatus 63 dait matur, "Bapaq, tiang pade inget waktu penipu nike masih idup, Ie sampun bebase, 'Sesampun telu jelo Tiang gen idup malik.' 64 Keranaq nike, utus dengan jagaq makam nike pacu-pacu jangke jelo saq ketelu, adẽq pengiring-pengiring-Ne ndẽq bau paling jenazah-Ne terus betutur lẽq dengan-dengan bahwe Deside Isa idup malik lẽman ninggal-Ne. Dait penipuan saq penutuq niki gen lengẽan malik lẽman saq penembẽq." 65 Basen Pilatus lẽq ie pade, "Niki tiang beng side pengawal-pengawal, silaq lumbar dait jagaq makam nike pacu-pacu." 66 Beterus ie pade lumbar ojok makam, dait sẽgelne batu pengimpet makam nike, terus suruqne pengawal bejage lẽq julune.

Matthew 28

1 Sesampun liwat jelo Sabat, lẽq jelo Ahad kelẽmaq aru, Mariam Magdalena dait Mariam saq lain lumbar ojok makam nike. 2 Selung-selung araq lindur saq belẽq gati. Sopoq malaẽkat Tuhan turun lẽman sorge alih batu pengimpet lawang makam nike dait melinggih lẽq atasne. 3 Muen malaẽkat nike maraq kisap dait kelambine putẽq gati. 4 Tentere pengawal saq bejage lẽq derike jari takut gati jangke ie pade ngijik dait jari maraq dengan matẽ. 5 Malaẽkat nike bebase lẽq dengan-dengan nine nike, "Ndaq takut! Tiang taoq side pade boyaq Deside Isa saq sampun tepakuq lẽq kayuq salib nike. 6 Ie ndẽq araq lẽq deriki. Ie sampun idup malik maraq saq sampun Ie manikang laẽq. Silaq serioq taoq-Ne tesarẽang. 7 Mangkin, becat side pade lumbar, kabarang tipaq pengiring-pengiring-Ne, 'Deside Isa sampun idup malik, dait Ie sampun senjuluq side pade lumbar ojok Galilea. Lẽq derike side pade gen serioq Ie!' Ingetang napi saq sampun tiang sampẽang lẽq side." 8 Sesampun nike, dengan-dengan nine nike becat-becat bilin makam nike. Siq perasaan takut awor seneng ie pade pelai ngabarang selapuq hal nike lẽq pengiring-pengiring Deside Isa. 9 Selung-selung Deside Isa bedait kance ie pade, dait bemanik, "Salam umaq side pade!" Beterus ie pade ngerapetin Deside Isa terus kapong cokor-Ne dait sujut nyembah Ie. 10 "Ndaq takut," manik Deside Isa lẽq ie pade, "silaq side pade lumbar kabarang lẽq selapuq sanak Tiang adẽqne lumbar ojok Galilea. Lẽq derike ie pade gen bedait kance Tiang." 11 Sewaktu dengan-dengan nine nike lumbar, araq pengawal-pengawal saq bejage lẽq makam nike lumbar ojok kote, dait ngelaporang peristiwe nike lẽq imam-imam kepale. 12 Imam-imam kepale nike mupakat kance pemimpin-pemimpin Yahudi, terus ie pade ngebẽng luwẽq kẽpẽng lẽq pengawal-pengawal nike, 13 dait bepesen, "Side pade harus badaqang bahwe pengiring-pengiring Deside Isa dateng lẽq tengaq kelem dait paling jenazah-Ne sewaktu side pade kenyeke tindoq. 14 Dait lamun gubernur pireng hal nike, tiang pade gen badaq ie adẽq side pade ndẽq ndait masalah." 15 Jari, pengawal-pengawal nike bait kẽpẽng nike, terus ngelaksaneang maraq saq tepesen siq imam-imam nike. Nike lantaranne cerite niki nyebar lẽq antare dengan-dengan Yahudi jangke jelo niki. 16 Kesolas pengiring Deside Isa nike lumbar ojok sopoq bukit lẽq Galilea sesuai kance manik Deside Isa tipaq ie pade. 17 Sewaktu ie pade serioq Deside Isa lẽq derike, selapuqne sujut nyembah Ie, laguq araq lẽq antarene saq masih bimbang. 18 Deside Isa ngerapetin ie pade, dait bemanik, "Selapuq kuase saq araq lẽq sorge dait lẽq gumi sampun teserahang lẽq Tiang. 19 Keranaq nike, silaq side pade lumbar ojok selapuq bangse lẽq dunie, dait jariang ie pade pengiring-pengiring Tiang, dait baptis ie pade lẽq dalem pesẽngan Bapa dait Bije dait Roh Suci. 20 Ajah ie pade taat lẽq selapuq saq Tiang prẽntahang tipaq side pade. Dait pade inget bahwe Tiang gen tetep bareng kance side pade jangke ahir jaman."

Mark 1

1 Niki awal Kabar Solah mengenai Deside Isa Almasih, Bije saq asalne lẽman Allah. 2 Maraq saq tetulis siq Nabi Yesaya: " 'Serioq, Tiang ngirim utusan Tiang juluan lẽman Deside, ie gen nyiepang langan bagi Deside.' 3 Araq dengan saq bekuih-kuih lẽq padang gurun, 'Pade siepang langan umaq Tuhan; dait rateang langan umaq Ie.' " 4 Yahya dateng lẽq padang gurun dait nyampẽang berite lẽman Allah. "Side pade harus tobat lẽman dose-dosende dait harus tebaptis, adẽq Allah ngampunin side," maraq nike basen Yahya. 5 Selapuq dengan lẽman negeri Yudea dait kote Yerusalem lumbar dengahang hotbah Yahya. Ie pade ngaku dose-dose ie pade dait Yahya baptis ie pade lẽq Kokoq Yordan. 6 Yahya ngengadu jubah saq tepiaq lẽman bulu onte, dait sabukne tepiaq lẽman lẽndong. Keloranne balang serte madulani gawah. 7 Yahya nyampẽang berite niki, "Sesampun tiang, gen rauh Dengan saq belẽqan kuase-Ne lẽman tiang, nunduk gen lekaq tali sepatu-Ne doang tiang ndẽq patut. 8 Tiang baptis side kadu aiq, laguq Ie gen baptis side kadu Roh Suci." 9 Lẽq waktu nike, Deside Isa rauh lẽman Nazaret lẽq daẽrah Galilea, dait Ie tebaptis siq Yahya lẽq Kokoq Yordan. 10 Waktu Deside Isa sugul lẽman aiq, Ie cingakin langit kebukaq, dait Roh Allah turun maraq ruen kedit dare ojok atas-Ne. 11 Beterus kedengahan suare lẽman sorge: "Side Bije Tiang saq Tiang kasihin. Side nyenengang Tiang." 12 Langsung sesampun nike, Roh Allah gadingang Deside Isa ojok padang gurun. 13 Petang dase jelo Deside Isa araq lẽq derike tecobe siq Belis. Lẽq derike araq ẽndah binatang-binatang gamang bareng kance Deside Isa, dait malaẽkat-malaẽkat ngelayanin Ie. 14 Sesampun Yahya tebui, Deside Isa lumbar ojok Galilea, dait lẽq derike Ie nyampẽang Kabar Solah lẽman Allah. 15 Manik-Ne, "Kerajaan Allah sampun rapet. Pade tobat lẽman dose-dosende, dait pade percaye lẽq Kabar Solah saq lẽman Allah!" 16 Sewaktu Deside Isa bemargi lẽq sedin Danao Galilea, Ie cingakin due nelayan aranne Simon dait Andreas adiqne. Ie pade kenyeke bau empaq kadu jaring lẽq danao nike. 17 Deside Isa bemanik lẽq ie pade, "Silaq turut Tiang. Tiang gen jariang side pade penjaring manusie." 18 Langsung ie pade bilin jaringne terus ngiring Deside Isa. 19 Deside Isa terus bemargi, dait cingakin ẽndah due dengan besemeton saq lain, Yakub dait Yahya, bije-bije Zebedeus. Ie pade kenyeke ngeremaq jaring lẽq dalem perau. 20 Deside Isa langsung ngemanikang ie pade. Dait ie pade bilin amaqne lẽq dalem perau bareng kance buruh-buruhne. Terus ie pade lumbar ngiring Deside Isa. 21 Deside Isa dait pengiring-pengiring-Ne rauh lẽq kote Kapernaum. Sesampun mulai jelo Sabat, Deside Isa tame ojok balẽ ibadah, dait mulai ngajahang. 22 Dengan-dengan jari takjub dengahang pengajahan Deside Isa. Sẽngaq Ie ngajahang siq wibawe, nẽnten maraq ahli-ahli Taurat. 23 Lẽq dalem balẽ ibadah nike araq sopoq dengan saq tekuasein siq roh jahat. Dengan nike nyurak: 24 "Hai Deside Isa dengan Nazaret, napi saq gen Pelungguh piaq lẽq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh saq Suci lẽman Allah!" 25 Laguq Deside Isa semprak roh jahat nike, "Tedoq, sugul lẽman dengan niki!" 26 Beterus dengan nike tegerik keras-keras siq roh jahat nike, terus sugul lẽman dengan nike sambil nyurak-nyurak. 27 Selapuq dengan bengaq gati, sehingge ie pade ngeraos sopoq kance saq lain, "Napi niki? Sopoq pengajahan saq baru! Siq wibawe dait kuase, Ie mrẽntahang roh-roh jahat sugul, dait ie pade taat lẽq Ie!" 28 Make berite mengenai Deside Isa becat gati nyebar ojok selapuq daẽrah Galilea. 29 Deside Isa dait pengiring-pengiring-Ne bilin balẽ ibadah nike dait lumbar ojok gedẽng Simon dait Andreas. Yakub dait Yahya ẽndah lumbar bareng ie pade. 30 Mentoaq nine Simon kenyeke mesarẽ lantaran sakit telih panas. Jari sewaktu Deside Isa dait pengiring-pengiring-Ne tame ojok balẽ nike, Ie tepajar mengenai hal nike. 31 Beterus Deside Isa lumbar ojok mentoaq nine Simon, dait negel imene, terus tulung ie ures. Sakit telih panasne telang, dait ie mulai ngelayanin ie pade. 32 Lẽq waktu serep jelo, dengan-dengan jauq selapuq dengan saq sakit dait saq tekuasein siq sẽtan ojok Deside Isa. 33 Selapuq penduduk kote nike bekeriwung lẽq julu balẽ nike. 34 Beterus Deside Isa nyelahang luwẽq dengan saq ngidap macem-macem penyakit, dait luwẽq ẽndah sẽtan tesediq. Sẽtan-sẽtan nike ndẽq teijinang ngeraos siq Deside Isa, sẽngaq ie pade nenaoq sai setetune Ie. 35 Jemaq kelẽmaqne, sewaktu masih subuh, Deside Isa metangi terus bilin gedẽng. Ie lumbar ojok taoq saq sepi lẽq luah kote, dait bedo'e lẽq derike. 36 Laguq Simon dait batur-baturne lumbar boyaq Deside Isa. 37 Dait sesampun ie pade bedait kance Deside Isa, ie pade matur, "Selapuq dengan kenyeke boyaq Pelungguh." 38 Laguq jawab Deside Isa, "Silaq ite terusang kelampante ojok kote-kote lain saq rapet lẽman deriki, adẽq lẽq derike ẽndah Tiang nyampẽang Kabar Solah, sẽngaq siq maksut nike Tiang dateng." 39 Beterus Deside Isa lumbar ojok mbẽ-mbẽ lẽq selapuq wilayah Galilea, dait nyampẽang Kabar Solah lẽman Allah lẽq balẽ-balẽ ibadah dait sediq roh-roh jahat. 40 Araq sopoq dengan saq sakit kuste parek ojok Deside Isa. Dengan nike sujut dait matur, "Lamun Pelungguh kayun, Pelungguh bau nyelahang tiang." 41 Make angen Deside Isa penoq siq belas kasihan lẽq dengan nike. Ie jamah dengan nike sambil bemanik, "Tiang mẽlẽ, mangkin side selah!" 42 Langsung waktu nike ẽndah, penyakitne telang dait ie selah. 43 Terus Deside Isa manikang dengan nike lumbar siq peringetan niki, 44 "Inget, ndaq tuturang lẽq sai-sai, laguq lumbar ojok imam, dait tunas adẽq ie pastiang bahwe side sampun selah. Beterus lumbar ngaturang kurban maraq saq teprẽntahang Musa jari bukti tipaq dengan-dengan bahwe side tetu-tetu sampun selah." 45 Laguq dengan nike lumbar, dait tetep doang nyeriteang peristiwe nike lẽq mbẽ-mbẽ jangke Deside Isa nẽnten bau tame kote secare terang-terangan. Ie cume meneng lẽq luah kote lẽq taoq-taoq saq sepi. Laguq lẽman mbẽ-mbẽ dengan terus doang parek tipaq Ie.

Mark 2

1 Pire jelo sesampun nike Deside Isa tulak ojok Kapernaum, make nyebar kabar bahwe Ie kenyeke lẽq gedẽng. 2 Beterus luwẽq dengan dateng bekeriwung lẽq derike jangke ndẽq araq taoq malik. Lẽq lawang ẽndah sampun penoq siq dengan. Beterus Deside Isa nyampẽang Manik Allah tipaq ie pade. 3 Sewaktu Ie kenyeke bebaos, empat dengan jauq sopoq dengan kẽpaq tipaq Deside Isa. 4 Laguq lantaran luwẽq gati dengan, ie pade ndẽq bau jauq ojok dẽkẽt Deside Isa. Make ie pade bungkar atep tepat lẽq atas taoq Deside Isa. Sesampun nike ie pade turunang dengan kẽpaq nike bareng kance tipahne. 5 Waktu Deside Isa cingakin belẽq gati iman ie pade, Ie bemanik lẽq dengan kẽpaq nike, "Anak Tiang, dose-dosende sampun teampunin." 6 Ahli-ahli Taurat saq kenyeke melinggih lẽq derike mulai beketuan lẽq dalem angenne, 7 "Bani gati dengan niki bebase maraq nike! Ie menghine Allah. Sai saq bau ngampunin dose selain Allah?" 8 Lẽq waktu nike ẽndah Deside Isa wikan pikiran ie pade. Terus Ie bemanik, "Kembẽq side pade beketuan maraq nike lẽq dalem angende? 9 Mbẽ saq molahan: ngucapang, 'Dosende sampun teampunin', atao ngucapang, 'Ures, angkat tipahde dait lampaq'? 10 Laguq adẽq side pade nenaoq bahwe lẽq dunie niki Bije Manusie bedowẽ kuase ngampunin dose." Beterus, Deside Isa bemanik lẽq dengan kẽpaq nike, 11 "Ures, angkat tipahde dait ulẽq!" 12 Dengan kẽpaq nike ures, langsung bait tipahne terus sugul tesaksiang siq ie pade selapuq. Dengan-dengan nike takjub, terus melieang Allah, ie pade bebase, "Ite ndẽq uwah serioq peristiwe maraq niki!" 13 Deside Isa tulak malik ojok sedin Danao Galilea. Luwẽq dengan parek tipaq Ie, dait Deside Isa ngajah ie pade. 14 Sewaktu Deside Isa bemargi lẽq derike, Ie cingakin sopoq penagih pajek, aranne Lewi bije Alpeus, kenyekene tokol lẽq taoqne begawẽan. Deside Isa bemanik lẽq ie, "Silaq turut Tiang!" Terus Lewi nganjeng dait ngiring Deside Isa. 15 Sewaktu Deside Isa kenyeke medaran lẽq gedẽng Lewi, luwẽq dateng penagih pajek dait dengan-dengan bedose, milu medaran bareng Deside Isa dait pengiring-pengiring-Ne. Sẽngaq luwẽq lẽq antare ie pade saq ngiring Deside Isa. 16 Araq ahli-ahli Taurat lẽman golongan Parisi serioq Deside Isa bareng medaran kance penagih-penagih pajek dait dengan-dengan bedose. Jari ie pade beketuan lẽq pengiring-pengiring Deside Isa, "Kembẽq gurunde teiring medaran siq penagih-penagih pajek dait dengan-dengan bedose?" 17 Deside Isa pirengang napi saq teketuanang siq ie pade, terus Deside Isa bejawab, "Dengan saq sẽhat ndẽq merluang tabib, cume dengan saq sakit doang. Tiang dateng ndẽqne jari ngempoh dengan-dengan saq nganggep diriqne sampun kenaq, laguq dengan-dengan saq bedose." 18 Lẽq sopoq waktu pengiring-pengiring Yahya dait dengan-dengan Parisi kenyeke puase. Terus araq dengan parek tipaq Deside Isa dait metakẽn, "Kembẽq pengiring-pengiring Yahya dait pengiring-pengiring dengan Parisi puase, laguq pengiring-pengiring Pelungguh nẽnten?" 19 Jawab Deside Isa, "Lẽq gawẽ ngawinang, napi temuẽ-temuẽ puase lamun pengantẽn mame masih araq bareng ie pade? Sengonẽq pengantẽn mame masih araq bareng ie pade, pasti ie pade ndẽq puase. 20 Laguq gen dateng waktune pengantẽn mame nike tebait lẽman ie pade. Lẽq waktu nike baruq ie pade puase. 21 Ndẽq araq dengan saq nampel kelambi saq sampun lotoh kadu bakal saq masih baru. Sẽngaq bakal saq jari penampel nike gen keset dait ngeroẽkang kelambi nike sehingge gen miaq kelambi nike sayan belẽq roẽkne. 22 Maraq nike ẽndah ndẽq araq dengan saq ngisiq aiq anggur saq baru lẽq dalem kantong lẽndong saq lebung. Sẽngaq aiq anggur saq baru nike gen miaq kantong nike bedah sehingge deduaqne tetetẽh. Anggur saq baru harus teisiq lẽq dalem kantong saq baru ẽndah!" 23 Lẽq sopoq jelo, waktu nike jelo Sabat, Deside Isa kance pengiring-pengiring-Ne bemargi lẽq lendang gandum. Sambil bemargi pengiring-pengiring-Ne pade bau gandum. 24 Beterus dengan-dengan Parisi matur lẽq Deside Isa, "Kembẽq pengiring-pengiring Pelungguh piaq hal saq ndẽq kanggo telaksaneang lẽq jelo Sabat?" 25 Jawab Deside Isa, "Napi side ndẽq uwah bace napi saq telaksaneang siq Daud sewaktu Abyatar kenyeke betugas jari Imam Agung. Lẽq waktu Daud dait dengan-dengan saq ngiring ie lapah dait ie pade ndẽq bedowẽ keloran, ie tame ojok Gedẽng Allah, dait kelorang ruti saq sampun teaturang tipaq Allah. Dait ruti nike ẽndah bẽngne tipaq dengan-dengan saq ngiring ie. Padahal menurut agamente, imam-imam doang saq kanggo ngelorang ruti nike." 27 Beterus Deside Isa bemanik malik, "Jelo Sabat tepiaq umaq manusie; ndẽqne manusie umaq jelo Sabat. 28 Jari, Bije Manusie nike ẽndah Penguase jelo Sabat."

Mark 3

1 Deside Isa tulak malik ojok balẽ ibadah. Lẽq derike araq sopoq dengan saq imene matẽ setowẽq. 2 Lẽq derike araq dengan-dengan saq mẽlẽ boyaq kesalaqan Deside Isa adẽqne bau ngelaporang Ie. Jari, ie pade terus merhatiang Deside Isa, napi Ie gen nyelahang dengan lẽq jelo Sabat. 3 Deside Isa bemanik lẽq dengan saq imene matẽ setowẽq nike, "Silaq nganjeng lẽq deriki, lẽq julu." 4 Beterus Deside Isa beketuan lẽq dengan-dengan saq araq lẽq derike, "Menurut agamente, napi saq kanggo ite laksaneang lẽq jelo Sabat? Laksaneang hal saq solah atao saq jahat? Nyelametang dengan atao nyematẽq?" Ie pade tedoq doang. 5 Siq menggah Deside Isa cingakin sekelining-Ne, laguq Deside Isa ẽndah sedih sẽngaq ie pade pagah gati. Beterus Ie bemanik lẽq dengan nike, "Ulurang imende." Dengan nike ngulurang imene, dait imene selah. 6 Make dengan-dengan Parisi bilin balẽ ibadah nike, terus nyerepek berunding kance pire dengan anggote golongan Herodes jari nyematẽq Deside Isa. 7 Beterus Deside Isa dait pengiring-pengiring-Ne nyingkir ojok Danao Galilea. Luwẽq gati dengan lẽman Galilea saq lumbar ngiring Deside Isa. Luwẽq ẽndah saq dateng lẽman Yudea, 8 lẽman Yerusalem, lẽman daẽrah Idumea, dait lẽman daẽrah lẽq bagian timuq Kokoq Yordan, dait lẽman sekiter kote-kote lẽq Tirus dait Sidon. Ie pade selapuq parek ojok Deside Isa, sẽngaq ie pade dengah mengenai hal-hal saq sampun telaksaneang siq Deside Isa. 9 Dengan-dengan nike luwẽq gati, sehingge Deside Isa ngemanikang pengiring-pengiring-Ne siepang Ie perau, adẽq Ie nẽnten tedesek siq dengan-dengan nike. 10 Luwẽq gati dengan teselahang siq Deside Isa, sehingge selapuq dengan sakit bedesek-desekan berusahe ngerapetin Deside Isa adẽqne bau jamah Ie. 11 Sewaktu serioq Deside Isa, roh-roh jahat nike terus doang sujut lẽq arepan-Ne dait bekuih, "Pelungguh Bije saq asalne lẽman Allah!" 12 Laguq roh-roh jahat nike tebalaq siq Deside Isa badaqang sai setetune Ie. 13 Beterus Deside Isa taẽk ojok sopoq bukit. Ie ngemanikang dengan-dengan saq Ie kayunang dait dengan-dengan nike parek. 14 Deside Isa pilẽq due olas dengan lẽq antare ie pade, dait bemanik, "Tiang pilẽq side pade, adẽq side pade turut Tiang, adẽq Tiang utus side pade jari nyebarang Kabar Solah lẽman Allah, 15 dait side pade gen mauq kuase jari sediq sẽtan." 16 Niki aran kedue olas dengan nike: Simon (saq Ie sebut ẽndah Petrus), 17 Yakub dait Yahya semetonne, ie pade bije-bije Zebedeus (ie pade niki tearanin siq Deside Isa Boanerges, artine "Anak guntur"), 18 Andreas, Pilipus, Bartolomeus, Matius, Tomas, Yakub bije Alpeus, Tadeus, Simon dengan Zelot, 19 dait Yudas Iskariot saq behianat lẽq Deside Isa. 20 Beterus Deside Isa tame ojok sopoq gedẽng. Laguq dengan luwẽq dateng malik bekumpul, jangke Deside Isa dait pengiring-pengiring-Ne ndẽq araq waktu medaran. 21 Sewaktu keluarge-Ne dengah hal nike, ie pade lumbar jari bait Deside Isa, sẽngaq dengan-dengan bebase, "Ie sampun jogang!" 22 Ahli-ahli Taurat saq dateng lẽman Yerusalem nimbal, "Ie tekuasein siq Beelzebul, dait siq kuase lẽman datune sẽtan Ie sediq sẽtan-sẽtan nike." 23 Make Deside Isa ngemanikang dengan luwẽq nike, dait bemanik kadu perumpamean-perumpamean lẽq ie pade. "Segerah Belis sediq Belis," manik Deside Isa. 24 "Lamun sopoq negare araq golongan-golongan saq saling bemusuhan negare nike ndẽq gen kuat. 25 Dait lamun dalem sopoq keluarge ndẽq araq persatuan dait anggote-anggotene saling bemusuhan, keluarge nike gen ancur. 26 Lamun Belis ngelawan diriqne mẽsaq dait saling bemusuhan, ie ndẽq bau tahen ngonẽq, dait pasti gen musnah. 27 Ndẽq araq sopoq dengan juaq saq bau tame ojok balẽ dengan saq kuat dait mẽlẽ ngerampas dowẽne lamun ie ndẽq juluan sẽkoq dengan saq kuat nike. Sesampun nike baruq ie bau ngerampas dowẽne. 28 Tiang badaq side: Setetune selapuq dose dait penghinean manusie gen teampunin, seluwẽq napi juaq penghinean saq ie pade ucapang. 29 Laguq lamun ie menghine Roh Suci, ie ndẽq bau teampunin! Sẽngaq penghinean nike dose saq kekel!" ( 30 Deside Isa bemanik maraq nike sẽngaq araq dengan saq bebase bahwe Ie tekuasein siq roh jahat.) 31 Sesampun nike, mamiq bini dait sanak-sanak Deside Isa rauh. Ie pade nganjeng lẽq luah, dait suruqne dengan ngempoh Deside Isa. 32 Waktu nike luwẽq dengan kenyeke tokol lẽq sekelining Deside Isa. Ie pade matur lẽq Deside Isa, "Silaq cingakin, mamiq bini dait sanak-sanak Pelungguh araq lẽq luah. Ie pade boyaq Pelungguh." 33 Jawab Deside Isa, "Sai mamiq bini Tiang? Sai sanak-sanak Tiang?" 34 Terus Deside Isa perhatiang dengan-dengan saq tokol lẽq sekelining-Ne terus bemanik, "Niki inaq dait semeton Tiang! 35 Dengan saq ngelaksaneang pekayunan Allah, ie saq jari semeton mame dait semeton nine serte inaq Tiang!"

Mark 4

1 Deside Isa mulai malik ngajahang lẽq sedin danao. Luwẽq gati dengan bekumpul lẽq sekelining-Ne. Keranaq nike Ie lumbar melinggih lẽq dalem sopoq perau lẽq atas aiq, dait dengan luwẽq nike nganjeng lẽq sedin danao. 2 Beterus Deside Isa ngajahang luwẽq hal tipaq ie pade kadu perumpamean. Maraq niki Deside Isa ngajah ie pade. 3 "Pade dengahang! Araq sopoq dengan lumbar sawur binẽq. 4 Sewaktu ie kenyeke sawur binẽq nike, araq binẽq saq geriq lẽq langan. Beterus dateng kedit ngaken binẽq nike jangke bis. 5 Araq ẽndah saq geriq lẽq taoq saq bebatu-batu saq tanaqne sekediq. Binẽq-binẽq nike becat tiwoq sẽngaq tanaqne sekediq, 6 laguq sesampun panjeng jelo, suli-suli nike mulai layu beterus gero dait matẽ sẽngaq ndẽq berakah. 7 Araq ẽndah binẽq saq geriq lẽq tengaq bebenes beduwi. Bebenes nike sayan belẽq, dait gepit suli-suli nike sehingge ndẽq bebuaq. 8 Laguq araq ẽndah binẽq saq geriq lẽq tanaq saq subur. Binẽq nike tiwoq, terus jari belẽq dait bebuaq, araq saq telung dase, araq saq enem dase, dait araq saq satus kali lipet." 9 Sesampun nyeriteang perumpamean nike, Deside Isa bemanik, "Sai-sai bedowẽ kentok jari dedengah, harus ie dengahang!" 10 Sewaktu Deside Isa kenyeke mẽsaq-mẽsaq, pire dengan saq sampun dengah perumpamean nike parek tipaq Ie bareng kance kedue olas pengiring-Ne. Ie pade tunas adẽq Deside Isa ngartiang perumpamean nike. 11 Make Deside Isa bemanik lẽq ie pade, "Side pade sampun teicanin jari nenaoq rahasie Kerajaan Allah. Laguq dengan-dengan luah teajah kadu perumpamean, 12 adẽq: 'Timaq ie pade serioq laguq ndẽq paham, timaq ie pade dengah laguq ie pade ndẽq ngerti, adẽq ie pade ndẽq tobat dait Allah ngampunin ie pade.' " 13 Beterus Deside Isa bemanik lẽq ie pade, "Lamun side pade ndẽq ngerti perumpamean nike, berembẽ side pade bau ngerti perumpamean-perumpamean saq lain? 14 Dengan saq sawur binẽq nike dengan saq nyampẽang Manik Allah. 15 Binẽq saq geriq lẽq langan ibarat dengan-dengan saq dengah Manik Allah. Sesampun dengah, dateng Belis dait bait napi saq sampun tesawur lẽq dalem atẽ ie pade. 16 Binẽq saq geriq lẽq taoq saq bebatu-batu ibarat dengan-dengan saq dengah Manik Allah nike, dait langsung nerimaq siq seneng angenne. 17 Laguq Manik Allah nike ndẽq berakah lẽq atẽ ie pade, sehingge ndẽq tahen ngonẽq. Sewaktu ie pade mauq penyusah atao penganiayean lantaran Manik Allah nike, ie pade langsung murtat. 18 Binẽq saq geriq lẽq tengaq bebenes saq beduwi nike ibarat dengan-dengan saq dengah Manik Allah nike, 19 laguq kuatir mengenai idup ie pade dait melẽt idup mẽwah. Segale macem napsu tame ojok dalem atẽ ie pade. Keranaq nike Manik Allah tegepit lẽq dalem atẽne sehingge ndẽq bebuaq. 20 Dait binẽq saq geriq lẽq tanaq saq subur ibarat dengan-dengan saq dengah Manik Allah nike, dait nerimaq, ie pade bebuaq luwẽq, araq saq telung dase, araq saq enem dase dait araq saq satus kali lipet hasilne." 21 Selanjutne manik Deside Isa, "Dengan jauq dilah ndẽqne jari tetoloq lẽq bawaq tepaq atao lẽq bawaq lasah, laguq adẽq tetoloq lẽq atas naẽn dilah. 22 Ndẽq araq saq teseboq, saq ndẽq gen penggitan; dait ndẽq araq saq terahasieang saq ndẽq gen tebungkar. 23 Keranaq nike, lamun bedowẽ kentok, pade dengahang!" 24 Beterus Deside Isa bemanik malik, "Perhatiang napi saq side pade dengah niki! Ukuran saq side pade kadu lẽq dengan lain, nike ẽndah gen tekadu siq Allah lẽq side pade -- malahan luwẽqan malik. 25 Sẽngaq dengan saq sampun bedowẽ, gen teican luwẽqan malik; laguq dengan saq ndẽq bedowẽ napi-napi, make napi juaq saq araq lẽq ie gen tebait." 26 Deside Isa ngelanjutang penuturan-Ne, "Maraq niki halne Kerajaan Allah nike, keadaanne bau teumpameang maraq dengan saq sawur binẽq lẽq lendangne. 27 Lẽq kekelem atao kenjelo, sewaktu ie tindoq atao ngase, binẽq-binẽq nike tiwoq dait sayan belẽq. Laguq berembẽ entane binẽq-binẽq nike tiwoq dait jari sayan belẽq dengan nike ndẽq nenaoq. 28 Tanaq nike mẽsaq saq nyugulang hasil: Penembẽq pẽmpangne, beterus motẽkne, terus buaqne. 29 Dait lamun gandum nike sampun toaq, dengan nike ẽndah saq penembẽq ngawis sẽngaq sampun wayene tepataq." 30 Deside Isa beketuan, "Napi saq gen ite kadu bandingang Kerajaan Allah nike? Conto napi saq bau ite kadu jari jelasang ie? 31 Kerajaan Allah setetune maraq perumpamean niki: Araq sopoq dengan bait sopoq tolang sawi, terus tesawur lẽq tanaq. Tolang sawi nike binẽq saq paling kodẽq lẽq dunie. 32 Laguq lamun sampun tiwoq, ie jari saq paling belẽq lẽq antare selapuq tetaletan. Pẽmpang-pẽmpangne benes gati bau taoq kedit-kedit miaq kesebu lẽq dalemne." 33 Maraq nike Deside Isa nyampẽang Manik Allah kadu luwẽq perumpamean, sesuai kance pengertian ie pade. 34 Deside Isa kereng kadu perumpamean lamun Ie ngajah dengan-dengan nike. Laguq lamun Ie kance pengiring-pengiring-Ne doang, Deside Isa jelasang selapuqne tipaq ie pade. 35 Lẽq kebian nike ẽndah, Deside Isa bemanik lẽq pengiring-pengiring-Ne, "Silaq ite belayar ojok itoqan danao." 36 Make Deside Isa taẽk ojok perau, dait pengiring-pengiring-Ne bilin dengan luwẽq lẽq sedin danao, terus taẽk ojok perau saq pade. Perau-perau lain ẽndah araq lẽq derike. Beterus Deside Isa dait pengiring-pengiring-Ne mulai belayar. 37 Ndẽq ngonẽq sesampun nike, dateng angin pusut. Umbak belẽq mulai ngamuk dait tame ojok dalem sehingge perau nike gen penoq siq aiq. 38 Lẽq waktu nike Deside Isa kenyeke merem lẽq bagian mudi perau nike. Pengiring-pengiring-Ne tangiang Deside Isa. Ie pade matur, "Paq Guru! Napi Pelungguh nẽnten peduli, lamun ite celake?" 39 Deside Isa metangi, terus semprak-Ne angin nike dait bemanik lẽq danao nike, "Engkah, tenang!" Langsung angin nike telang dait danao nike jari tenang gati. 40 Beterus Deside Isa bemanik lẽq pengiring-pengiring-Ne, "Kembẽq side pade takut? Kembẽq side pade ndẽq percaye?" 41 Make ie pade jari takut, dait bebase sopoq kance saq lainne, "Sai setetune dengan niki jangke angin dait umbak ẽndah taat lẽq Ie."

Mark 5

1 Beterus Deside Isa dait pengiring-pengiring-Ne rauh lẽq itoqan Danao Galilea, lẽq daẽrah dengan Gerasa. 2 Waktu Deside Isa baruq turun lẽman perau, Ie tedatengin siq sopoq dengan mame saq sugul lẽman goe-goe kuburan. 3 Dengan nike tekuasein siq roh jahat dait ndot lẽq kuburan-kuburan. Ie ndẽq bau tetaliq malik; timaq kadu rantẽ. 4 Ime dait naẽne rimpes tetaliq, laguq tetep rantẽ-rantẽ nike tepegatang, dait besi lẽq naẽne ie polakang. Ie kuat gati sehingge ndẽq araq sopoq dengan juaq saq bau nahen ie. 5 Kenjelo kekelem ie ngelamang lẽq kuburan dait lẽq bukit-bukit sambil nyurak-nyurak dait ngempuk awakne jangke bakat kadu batu. 6 Sewaktu lẽman jaoq ie serioq Deside Isa rauh, ie pelai terus sujut lẽq arepan Deside Isa. 7 Siq suare saq belẽq ie bekuih, "Deside Isa, Bije saq asalne lẽman Allah Saq Maheagung! Gen Pelungguh kumbẽqang tiang niki? Demi Allah tiang tunas, sampunang Pelungguh siksaq tiang!" ( 8 Dengan nike matur maraq nike sẽngaq Deside Isa bemanik lẽq ie, "Roh jahat, sugul lẽman dengan niki!") 9 Beterus Deside Isa bemanik lẽq ie, "Sai arande?" Jawab dengan nike, "Aran tiang 'Legiun' -- sẽngaq tiang pade luwẽq gati!" 10 Sanget siq ie tunas adẽq Deside Isa sampunang prẽntahang roh-roh jahat nike sugul lẽman daẽrah nike. 11 Lẽq dẽkẽt taoq nike araq luwẽq gati bawi kenyeke boyaq kakenan lẽq tembẽrẽng bukit. 12 Roh-roh jahat nike tunas lẽq Deside Isa, "Manikang tiang pade tame ojok dalem bawi-bawi nike." 13 Petunasan ie pade tekabulang siq Deside Isa. Jari, roh-roh jahat nike sugul lẽman dengan nike terus tame ojok dalem bawi-bawi nike. Selapuq bawi saq luwẽq nike pelai, terus nimproh lẽman sedin jurang ojok dalem danao, terus ketelep -- selapuqne araq kire-kire due iyu luwẽqne. 14 Penjage-penjage bawi nike pelai, terus nuturang hal nike lẽq kote dait lẽq dẽse sekiterne. Beterus dengan-dengan sugul jari serioq napi saq sampun telaksane. 15 Ie pade dateng ojok Deside Isa. Terus serioqne dengan saq tekuasein siq Legiun nike, kenyeke tokol lẽq derike. Ie sampun kadu kelambi, dait pikiranne ẽndah sampun waras. Make ie pade selapuq jari takut. 16 Dengan-dengan saq sampun nyaksiang mẽsaq peristiwe mengenai dengan nike dait bawi-bawi nike nyeriteang napi saq sampun telaksane. 17 Beterus sanget siqne tunas siq penduduk daẽrah nike adẽq Deside Isa bilin daẽrah nike. 18 Lẽq waktu Deside Isa taẽk ojok dalem perau, dengan saq sendẽqmanne tekuasein siq sẽtan nike tunas lẽq Deside Isa, adẽqne teijinang ngiring Ie. 19 Laguq Deside Isa nẽnten setuju, manik-Ne, "Ulẽq dait ceriteang lẽq kadang jarinde napi saq sampun telaksaneang Tuhan tipaq side dait berembẽ solahne Ie lẽq side!" 20 Jari dengan nike lumbar, dait mulai nyeriteang lẽq daẽrah Dekapolis selapuq saq sampun telaksaneang siq Deside Isa lẽq ie. Selapuq dengan bengaq dengah hal nike. 21 Deside Isa tulak malik ojok itoqan danao. Lẽq sedin danao nike luwẽq dengan dateng bekerimpun lẽq sekelining Deside Isa. 22 Beterus parek sopoq dengan aranne Yairus, ie kepale balẽ ibadah lẽq kote nike. Sewaktu Yairus serioq Deside Isa, ie sujut lẽq arepan-Ne, 23 dait sanget siqne tunas, "Bapaq, anak tiang saq nine sakit parah. Tunas Pelungguh rauh jari jamah ie adẽq ie selah dait tetep idup!" 24 Beterus Deside Isa lumbar teiring siq Yairus. Luwẽq dengan ngiring Ie, dait bedesek-desekan lẽq dẽkẽt-Ne. 25 Lẽq antarene araq ẽndah sopoq dengan nine saq sampun due olas taun sakit pendarahan. 26 Ie sampun kereng gati teowat siq tabib-tabib, jangke bis selapuq dowẽne, laguq ndẽq araq gati manpaatne malahan sebalikne keadaanne sayan parah. 27 Dengan nine nike sampun luwẽq dengah mengenai Deside Isa. Make lẽq tengaq-tengaq dengan luwẽq nike, ie rapetin Deside Isa lẽman mudi dait kintur jubah-Ne, 28 sẽngaq ie pikir, "Asal tiang kintur jubah-Ne, tiang gen selah!" 29 Dait langsung waktu nike ẽndah pendarahanne engkah. Ie beridap bahwe ie sampun selah. 30 Lẽq waktu nike ẽndah Deside Isa wikan bahwe araq kekuatan saq sugul lẽman diriq-Ne. Beterus Ie cingakin andang dengan luwẽq nike dait beketuan, "Sai saq kintur jubah Tiang?" 31 Pengiring-pengiring-Ne bejawab, "Pelungguh cingakin araq luwẽq dengan bedesek-desekan. Pelungguh masih beketuan sai saq kintur jubah Pelungguh?" 32 Laguq Deside Isa terus doang cingakin lẽq sekelining-Ne jari boyaq dengan saq sampun gawẽq hal nike. 33 Dengan nine nike nenaoq napi saq sampun telaksane lẽq diriqne, siq rase takut dait leger ie sujut lẽq arepan Deside Isa, terus ie ngakuq selapuq hal nike. 34 Beterus Deside Isa bemanik lẽq dengan nine nike, "Anak Tiang, imande sampun miaq side selah! Silaq Lumbar dalem damẽ, side tetu-tetu sampun selah!" 35 Sewaktu Deside Isa masih bebaos, araq pelayan-pelayan dateng lẽman balẽ Yairus. "Bijende sampun ninggal," basen ie pade tipaq Yairus. "Sampunang pelungguh nyusahang Bapaq Guru malik." 36 Laguq Deside Isa nẽnten peduli napi saq tesampẽang siq dengan-dengan nike, terus Ie bemanik lẽq Yairus, "Ndaq takut, percaye doang!" 37 Deside Isa tetep bemargi, laguq Ie nẽnten ngijinang sopoq dengan juaq ngiring Ie, kecuali Petrus, Yakub dait Yahya, semetonne Yakub. 38 Sewaktu ie pade rauh lẽq balẽ Yairus, Deside Isa cingakin dengan-dengan pade uyut gati, pade nangis dait pade ngerung keras-keras dait pada er~oq asẽq. 39 Beterus Deside Isa tame dait bemanik lẽq ie pade, "Kembẽq uyut-uyut dait nangis? Kanak nike ndẽq milinang, ie cume tindoq!" 40 Ie pade ngerẽrẽqang Deside Isa. Beterus Deside Isa manikang ie pade selapuq sugul, terus Ie jauq inaq amaq kanak nike dait ketelu pengiring-Ne tame ojok dalem kamar kanak nike. 41 Deside Isa tegel ime kanak nike terus bemanik lẽq ie, "Talita kum," saq artine, "Kanak nine, Tiang bemanik lẽq side: Ures!" 42 Kanak nike langsung ures dait lampaq sẽngaq umur kanak nike sampun due olas taun. Selapuq saq nyaksiang peristiwe nike takjub gati! 43 Laguq Deside Isa balaq ie pade ndaq gati nyeriteang hal nike tipaq sai-sai. Beterus manik-Ne, "Bẽng kanak nike bekelor."

Mark 6

1 Beterus Deside Isa berangkat lẽman derike dait rauh lẽq kampung asal-Ne, teiring siq pengiring-pengiring-Ne. 2 Lẽq jelo Sabat Ie mulai ngajahang lẽq balẽ ibadah. Araq luwẽq dengan lẽq derike. Waktu dengan-dengan nike dengah pengajahan Deside Isa, ie pade bengaq gati. Ie pade bebase, "Lẽman mbẽ dengan niki mauq selapuq nike? Hikmat macem napi saq araq lẽq Ie? Berembẽ Ie bau piaq muqjizat saq maraq nike? 3 Tekan Ie niki tukang kayuq, bije Mariam, dait sanakne Yakub, Yoses, Yudas dait Simon? Sanak-sanak-Ne saq nine ẽndah araq ndot lẽq deriki." Keranaq nike Deside Isa tetolaq siq ie pade. 4 Beterus Deside Isa bemanik lẽq ie pade, "Sopoq nabi tehormatin lẽq mbẽ-mbẽ, kecuali lẽq kampung asalne, lẽq antare semeton, kadang jarine dait keluargene mẽsaq." 5 Lẽq taoq nike Deside Isa nẽnten bau piaq sopoq juaq muqjizat, kecuali nyelahang dengan-dengan sakit siq care noloq gading-Ne lẽq atas ie pade. 6 Deside Isa bengaq sẽngaq ie pade ndẽq percaye. Beterus Deside Isa lumbar ojok kampung-kampung lẽq sekiter nike, dait ngajahang. 7 Ie ngemanikang kedue olas pengiring-Ne, terus ngutus ie pade due-due dait ngicanin kuase tipaq ie pade jari sediq roh-roh jahat. 8 Ie ngicanin petunjuk niki tipaq ie pade, "Ndaq jauq napi-napi dalem kelampande, kecuali tunjang. Ndaq jauq keloran, atao takaq sangu atao kẽpẽng. 9 Kadu sepatu, laguq ndaq jauq due kelambi." 10 Deside Isa ẽndah bemanik, "Lamun side pade tame ojok sopoq balẽ, ndot lẽq derike jangke side pade bilin taoq nike. 11 Laguq lamun side pade dateng lẽq sopoq taoq, dait dengan-dengan lẽq derike ndẽq mẽlẽ nerimaq dait dengahang side pade, bilin taoq nike. Dait kerapang kerepuk lẽman lampak naẽnde jari peringetan tipaq ie pade!" 12 Beterus kedue olas pengiring Deside Isa nike lumbar. Ie pade lumbar nyampẽang berite bahwe manusie harus tobat lẽman dose-dosene. 13 Pengiring-pengiring Deside Isa nike sediq luwẽq roh jahat, ngolẽsang minyak lẽq dengan sakit dait nyelahang ie pade. 14 Berite-berite mengenai selapuq peristiwe nike dateng ẽndah tipaq Raje Herodes, lantaran pesẽngan Deside Isa sampun kesohor lẽq mbẽ-mbẽ. Araq dengan saq bebase, "Yahya Pembaptis sampun idup malik! Keranaq nike Ie bedowẽ kuase jari miaq keajaipan nike." 15 Laguq dengan-dengan lain bebase, "Ie Elia." Araq ẽndah saq bebase, "Ie nabi maraq salaq sopoq nabi jaman laẽq." 16 Sewaktu Herodes pireng hal nike, ie bebase, "Pasti niki Yahya Pembaptis saq piranan sampun tiang suruq penggal ulune. Mangkin ie sampun idup malik!" 17 Sẽngaq sendẽqman nike Herodes sampun prẽntahang dengan bau Yahya, dait sẽkoqne ie lẽq dalem bui. Herodes ngelaksaneang hal nike lantaran Herodias, sebiniqne Pilipus sanakne mẽsaq. Sẽngaq Herodes sampun nikah kance Herodias, 18 dait mengenai hal nike Yahya sampun peringet Herodes maraq niki, "Nẽnten kanggo pelungguh merariq kance sebiniq sanakde nike!" 19 Keranaq nike Herodias dendem lẽq Yahya dait beniat nyematẽq Yahya, laguq ie ndẽq bau ngelaksaneang hal nike. 20 Sẽngaq Herodes sampun mrẽntahang dengan jagaq bagus-bagus keselametan Yahya lẽq bui, lantaran ie takut lẽq Yahya. Ie nenaoq bahwe Yahya nike dengan saq solẽh dait suci saq teutus siq Allah. Dait mule lamun Yahya bebase, Herodes seneng ẽndah pirengang ie, timaq ie jari osah gati. 21 Ahirne Herodias mauq kesempatan lẽq jelo ulang taun Herodes. Waktu nike Herodes ngaraqang gawẽ umaq selapuq pembelẽq-pembelẽq kerajaan, prewire-prewire, dait tokoh-tokoh masyarakat Galilea. 22 Lẽq gawẽ nike, bije Herodias saq dedare ngigel, dait igelanne nike sanget nyenengang angen Herodes dait temuẽ-temuẽne. Make Herodes bebase lẽq dedare nike, "Tunas lẽq tiang napi juaq saq side melẽtang. Tiang gen bẽng side!" 23 Beterus Herodes bejanji lẽq dedare nike kadu sumpah. Herodes bebase, "Napi juaq saq side tunas gen tiang bẽng, timaq separo lẽman kerajaan tiang." 24 Make dedare nike sugul dait beketuan lẽq inaqne, "Inaq, napi saq harus tiang tunas?" Jawab inaqne, "Tunas ulune Yahya Pembaptis." 25 Dedare nike becat tulak tipaq Herodes, dait bebase, "Tiang tunas ulu Yahya Pembaptis teican lẽq tiang mangkin niki ẽndah kadu narẽ!" 26 Pirengang petunasan nike Herodes sedih gati. Laguq ie ndẽq bau nolaq petunasan nike sẽngaq ie sampun besumpah lẽq julu temuẽ-temuẽne. 27 Jari, ie langsung mrẽntahang sopoq pengawalne bait ulu Yahya Pembaptis. Make dengan nike lumbar ojok bui, terus penggalne ulu Yahya. 28 Beterus ie jauq ulu nike kadu narẽ dait nyerahang tipaq dedare nike. Dait dedare nike ẽndah nyerahang tipaq inaqne. 29 Sewaktu pengiring-pengiring Yahya dengah hal nike, ie pade lumbar bait jenazah Yahya, terus nguburang ie. 30 Beterus rasul-rasul saq teutus siq Deside Isa nike tulak malik, dait bekumpul kance Deside Isa. Ie pade ngelaporang lẽq Deside Isa selapuq saq sampun ie pade laksaneang dait ajahang. 31 Luwẽq gati dengan saq dateng dait lumbar sehingge Deside Isa dait pengiring-pengiring-Ne nẽnten bedowẽ kesempatan medaran. Keranaq nike Deside Isa bemanik lẽq pengiring-pengiring-Ne, "Silaq ite lumbar ojok taoq saq sepi adẽq ndẽq araq dengan lain dait ite mauq mentelah seberaq." 32 Make ie pade lumbar kadu perau ojok taoq saq sepi. 33 Laguq sewaktu ie pade bilin taoq nike, luwẽq dengan serioq ie pade dait nenaoq ojok mbẽ ie pade lumbar. Beterus lẽman selapuq kote lẽq wilayah nike, dengan-dengan pelai langan darat senjuluq Deside Isa dait pengiring-pengiring-Ne. 34 Sewaktu Deside Isa turun lẽman perau, Ie cingakin dengan luwẽq. Make Deside Isa periak lẽq ie pade sẽngaq ie pade maraq dombe saq ndẽq bedowẽ pengarat. Make Ie mulai ngajahang mengenai luwẽq hal tipaq ie pade. 35 Sewaktu serep jelo, pengiring-pengiring Deside Isa matur lẽq Ie, "Taoq niki kesempil dait sampun serep jelo. 36 Solahan Pelungguh manikang dengan-dengan niki lumbar, adẽq ie pade mauq beli keloran lẽq dẽse-dẽse dait kampung-kampung lẽq sekiter niki." 37 Laguq jawab Deside Isa, "Side pade saq harus ngebẽng ie pade bekelor." "Napi tiang pade harus lalo beli ruti siq aji satak kẽpẽng perak jari bẽng bekelor dengan-dengan niki?" Maraq nike atur pengiring-pengiring Deside Isa nike. 38 Beterus Deside Isa beketuan, "Araq pire ruti lẽq side pade? Cobaq lumbar serioq." Sesampun ie pade lumbar serioq, ie pade matur, "Araq lime ruti dait araq due empaq ẽndah." 39 Beterus Deside Isa ngemanikang selapuq dengan nike tokol bekelompoq-kelompoq lẽq pupaq saq ijo. 40 Dengan-dengan nike tokol, araq saq satus dengan sekelompoq, dait araq ẽndah saq sẽket dengan sekelompoq. 41 Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike, Ie peleng-peleng ruti nike kadu gading-Ne terus icanin-Ne lẽq pengiring-pengiring-Ne jari tebagi-bagiang tipaq dengan luwẽq nike. Dait due empaq nike tebagi-bagi ẽndah tipaq ie pade selapuq. 42 Ie pade bekelor jangke besuh. 43 Beterus salo keloran nike tekumpulang siq pengiring-pengiring Deside Isa -- selapuqne araq due olas bakaq penoq. 44 Dengan-dengan mame saq ngelorang ruti nike luwẽqne kire-kire lime iyu dengan. 45 Sesampun nike, Deside Isa manikang pengiring-pengiring-Ne berangkat kadu perau senjuluq Ie ojok Betsaida lẽq itoqan danao. Lẽq waktu nike ẽndah Ie ngemanikang dengan luwẽq nike ulẽq. 46 Sesampun Deside Isa bekelin lẽman ie pade, Ie lumbar ojok bukit jari bedo'e. 47 Sewaktu kekelem, perau pengiring-pengiring Deside Isa sampun araq lẽq tengaq-tengaq danao, lẽq waktu nike Deside Isa masih araq lẽq darat. 48 Deside Isa cingakin ie pade sengke gati bedayung perau nike sẽngaq angin belawanan andang kance perau. Make kire-kire antare jam telu dait jam enem kelẽmaq, Deside Isa rauh tipaq ie pade bemargi lẽq atas aiq, dait Ie tetep bemargi maraqne gen liwatin ie pade. 49 Waktu ie pade serioq Deside Isa bemargi lẽq atas aiq, Deside Isa teparan hantu siq ie pade, 50 sehingge ie pade bekuih-kuih siq takutne, sẽngaq ie pade selapuq serioq Ie dait ie pade tinjot gati. Laguq Deside Isa langsung bemanik lẽq ie pade, "Tenang! Tiang niki Isa, ndaq takut!" 51 Beterus Deside Isa taẽk ojok perau ie pade, langsung waktu nike ẽndah angin jari tenang. Selapuq pengiring-pengiring-Ne bengaq gati. 52 Sẽngaq sesampun peristiwe ruti nike ie pade ndẽqman ẽndah ngerti dait ie pade tetep keras atẽ. 53 Sesampun rauh lẽq itoqan danao, ie pade mendarat lẽq Genesaret. 54 Waktu ie pade turun lẽman perau, dengan-dengan serioq bahwe saq rauh nike Deside Isa. 55 Terus ie pade pelai ojok mbẽ-mbẽ lẽq selapuq wilayah nike. Dait mulai jauq dengan-dengan sakit lẽq atas tipah ojok Deside Isa. Lamun ie pade dengah bahwe Deside Isa araq lẽq sopoq taoq, ie pade jauq dengan-dengan sakit ojok derike. 56 Lẽq mbẽ juaq Deside Isa rauh -- timaq lẽq kampung, lẽq kote atao lẽq dẽse -- lẽq derike dengan tetep dateng dait noloq dengan-dengan sakit lẽq peken-peken. Ie pade tunas adẽq dengan-dengan sakit nike teijinang kintur jubah Deside Isa, timaq cume potone. Selapuq saq kintur poton jubah-Ne jari selah.

Mark 7

1 Sekelompoq dengan Parisi dait pire ahli-ahli Taurat lẽman Yerusalem, parek ojok Deside Isa. 2 Ie pade serioq pengiring-pengiring Deside Isa bekelor kadu ime saq ndẽq bersi secare agame, ndẽq bisoq imene juluq, menurut aturan agame. 3 Dengan-dengan Parisi, maraq nike ẽndah selapuq dengan Yahudi, taat gati lẽq adat istiadat leluhur ie pade. Ie pade ndẽq gen bekelor sendẽqman bisoq ime maraq saq sampun tetentuang. 4 Lamun ulẽq lẽman peken, ie pade ẽndah ndẽq bekelor lamun ndẽq persiq diriqne juluq. Luwẽq warisan lain malik saq ie pade tegel, umpamene hal bisoq jembung, cẽrẽt dait pekakas-pekakas tembage. 5 Keranaq nike dengan-dengan Parisi dait ahli-ahli Taurat nike metakẽn lẽq Deside Isa, "Kembẽq pengiring-pengiring Pelungguh nẽnten idup menurut adat istiadat leluhurte, laguq bekelor kadu ime saq najis?" 6 Jawab Deside Isa, "Side pade dengan-dengan munapik! Tepat gati napi saq tenubuatang siq Nabi Yesaya, mengenai side pade, 'Maraq niki Manik Allah, Dengan-dengan nike nyembah Tiang cume siq ucapan doang, laguq atẽne jaoq lẽman Tiang. 7 Percume ie pade nyembah Tiang, sẽngaq aturan manusie ie pade ajahang, maraqne hal nike aturan Tiang!' 8 Prẽntah-prẽntah Allah side pade ndẽq perhatiang, dait aturan-aturan manusie side pade tegel pacu-pacu." 9 Beterus Deside Isa bemanik malik, "Side pade ceket gati nolaq prẽntah Allah adẽq side pade bau pertahenang ajahande mẽsaq. 10 Musa sampun ngicanin prẽntah niki, 'Pade hormatin amaq dait inaqde!' dait 'Sai-sai saq nyumpaq amaqne atao inaqne, harus tehukum matẽ.' 11 Laguq side pade ngajahang: Lamun dengan bebase lẽq amaqne atao lẽq inaqne, 'Napi saq seharusne tiang bẽng lẽq inaq dait amaq tiang, sampun tiang aturang tipaq Allah,' 12 make side pade bẽbasang dengan nike lẽman kewajibanne nulung amaqne atau inaqne. 13 Jari, lantaran adat istiadat leluhurde, side pade nyatayang Manik Allah ndẽq berlaku. Dait masih luwẽq hal-hal maraq niki saq side pade laksaneang." 14 Beterus Deside Isa ngemanikang malik dengan luwẽq nike, dait bemanik lẽq ie pade, "Pade dengahang adẽq side pade ngerti! 15 Ndẽq araq napi juaq lẽman luah saq tame ojok dalem dengan saq bau piaq dengan nike jari najis. Sebalikne saq sugul lẽman sopoq dengan, nike saq piaq ie najis. 16 Lamun bedowẽ kentok jari dengah harus dengahang." 17 Sewaktu Deside Isa bilin dengan luwẽq nike, dait tame ojok gedẽng, pengiring-pengiring-Ne metakẽn lẽq Ie mengenai maksut perumpamean nike. 18 Make Deside Isa bemanik lẽq ie pade, "Napi side pade ndẽqman ngerti ẽndah? Napi side pade ndẽq iniq ngerti bahwe saq tame ojok dalem sopoq dengan ndẽq bau piaq dengan nike najis? 19 Sẽngaq saq tame nike ndẽq liwat atẽ, laguq liwat tian, beterus sugul malik." Siq ucapan-ucapan nike Deside Isa nyatayang bahwe selapuq keloran halal. 20 Beterus Deside Isa bemanik malik, "Saq sugul lẽman dengan, hal nike saq piaq ie najis. 21 Sẽngaq lẽman dalem atẽ dengan, timbul pikiran-pikiran jahat saq jari penyebap dengan gawẽq perbuatan saq cabul, memaling, nyematẽq, 22 bezinah, nipu, pitnah, dait gawẽq hal-hal saq jahat, serakah, licik, talon atẽ, sombong dait sengke teajah. 23 Selapuq saq jahat nike dateng lẽman dalem, dait hal nike saq piaq dengan najis." 24 Beterus Deside Isa bilin taoq nike, dait lumbar ojok daẽrah Tirus. Ie tame ojok sopoq gedẽng dait nẽnten kayun tewikanang siq dengan bahwe Ie araq lẽq derike. Laguq Ie nẽnten bau ngerahasieang kerauhan-Ne. 25 Malahan, sopoq inaq saq bije ninene tekuasein siq roh jahat, dengah mengenai Deside Isa. Ie parek ojok Deside Isa dait sujut lẽq arepan-Ne. 26 Dengan nine nike dengan Yunani bangse Siro-Penisia. Ie tunas tipaq Deside Isa jari sediq roh jahat nike lẽman bijene. 27 Deside Isa bemanik lẽq dengan nine nike, "Kanak-kanak harus tebẽng bekelor juluan. Ndẽqne patut bait keloran kanak-kanak terus tesaut tipaq acong." 28 "Mule tetu, Junjungan Saq Mulie," jawab dengan nine nike, "acong-acong lẽq bawaq mẽje ẽndah ngaken salo-salo saq tegeriqang siq kanak-kanak!" 29 Beterus Deside Isa bemanik lẽq ie, "Lantaran jawabande nike, silaq side ulẽq; roh jahat sampun sugul lẽman bijende!" 30 Dengan nine nike ulẽq. Lẽq balẽ, daitne bijene kenyeke tindoq lẽq lasahne, dait sẽtan tetu-tetu sampun sugul lẽman kanak nike. 31 Beterus Deside Isa bilin daẽrah Tirus, dait nerusang pemargian-Ne langan Sidon ojok Danao Galilea, lẽq tengaq-tengaq Dekapolis. 32 Lẽq derike dengan-dengan jauq sopoq dengan kedok dait pakoq ojok Deside Isa. Ie pade tunas lẽq Deside Isa adẽq Ie noloq gading-Ne lẽq atas dengan nike. 33 Deside Isa gadingang dengan nike, pekelin ie lẽman dengan luwẽq beterus noloq ranggot-Ne ojok dalem kedue kentok dengan nike, terus Deside Isa beludah, dait jamah ẽlaq dengan nike. 34 Sesampun nike, Deside Isa nengadah andang langit sambil bebangsel dait bemanik tipaq dengan nike, "Epata!" artine, "Kebukaqan!" 35 Kentok dengan nike kebukaq dait ẽlaqne jari lemes, dait ie mulai tao ngeraos. 36 Beterus Deside Isa balaq ie pade selapuq adẽq ndaq nyeriteang hal nike lẽq sai-sai. Laguq sayan tebalaq siq Deside Isa, ie pade sayan nyebarang ie. 37 Dait selapuq dengan saq dengah hal nike bengaq gati. Ie pade bebase, "Selapuqne Ie laksaneang secare bagus! Malahan Ie piaq dengan kedok iniq dedengah dait dengan pakoq tao ngeraos!"

Mark 8

1 Ndẽq ngonẽq sesampun nike, araq malik sekelompoq dengan luwẽq dateng bekumpul. Sẽngaq ie pade ndẽq bedowẽ keloran, Deside Isa ngemanikang pengiring-pengiring-Ne dait bemanik, 2 "Tiang periak lẽq dengan luwẽq niki. Sampun telu jelo ngonẽqne ie pade turut Tiang, dait mangkin ie pade ndẽq bedowẽ keloran. 3 Lamun Tiang suruq ie pade ulẽq kenyeke lapah, ie pade gen paleng lẽq tengaq langan, sẽngaq araq lẽq antare ie pade saq dateng lẽman jaoq." 4 Jawab pengiring-pengiring Deside Isa, "Lẽq taoq saq kesempil niki, lẽq mbẽ dengan mauq keloran saq cukup jari selapuq dengan niki?" 5 Deside Isa beketuan lẽq ie pade, "Araq pire ruti lẽq side pade?" "Pituq," jawab ie pade. 6 Make Deside Isa manikang dengan luwẽq nike tokol lẽq tanaq. Terus Ie bait kepituq ruti nike dait ngucap syukur tipaq Allah. Sesampun nike, Deside Isa peleng-peleng ruti nike kadu gading-Ne dait icanin-Ne tipaq pengiring-pengiring-Ne jari tebagi-bagiang ojok dengan-dengan. Make pengiring-pengiring-Ne ngelaksaneang hal nike. 7 Ie pade ẽndah bedowẽ pire empaq kodẽq. Deside Isa bait empaq-empaq nike dait ngucap syukur tipaq Allah, terus ngemanikang pengiring-pengiring-Ne bagi-bagiang empaq-empaq nike ẽndah. 8 Ie pade bekelor jangke besuh -- araq kire-kire empat iyu dengan saq bekelor. Beterus pengiring-pengiring Deside Isa ngumpulang salo keloran -- araq pituq bakaq penoq. Beterus Deside Isa manikang dengan-dengan nike ulẽq, 10 dait Ie kance pengiring-pengiring-Ne langsung taẽk perau dait lumbar ojok daẽrah Dalmanuta. 11 Dengan-dengan Parisi parek ojok Deside Isa, dait mulai besoal jawab kance Ie jari boyaq kesalaqan adẽq ie pade bau nyalahang Deside Isa. Ie pade tunas Deside Isa piaq tande ajaip lẽman sorge. 12 Deside Isa ngeluh lẽq dalem atẽ-Ne terus bejawab, "Kembẽq dengan-dengan jaman niki tunas Tiang piaq tande? Tiang badaq side, ie pade ndẽq gen teican tande napi-napi!" 13 Beterus Deside Isa bilin ie pade, dait taẽk ojok perau; beterus berangkat ojok itoqan danao nike. 14 Pengiring-pengiring Deside Isa lupaq jauq ruti. Ie pade cume bedowẽ sopoq ruti lẽq perau. 15 Deside Isa peringet ie pade, "Onyaq-onyaq siq ragi ruti dengan-dengan Parisi dait ragi Herodes." 16 Make pengiring-pengiring Deside Isa nike mulai ngeraosang hal nike. Ie pade bebase, "Ie bemanik maraq nike, sẽngaq ite ndẽq bedowẽ ruti." 17 Deside Isa wikan napi saq ie pade raosang. Keranaq nike Ie beketuan lẽq ie pade, "Kembẽq side pade ngeraosang mengenai ndẽq bedowẽ ruti? Napi side pade ndẽqman nenaoq dait ndẽqman ngerti ẽndah? Napi pikirande sampun kongol gati? 18 Side pade bedowẽ penenteng -- kembẽq ndẽq serioq? Side pade bedowẽ kentok -- kembẽq ndẽq dengah? Napi side pade ndẽq inget malik, 19 lime ruti nike saq Tiang peleng-peleng jari lime iyu dengan? Pire bakaq penoq salo keloran saq side pade kumpulang?" "Due olas bakaq," jawab ie pade. 20 Deside Isa beketuan malik, "Dait waktu Tiang peleng-peleng pituq ruti jari empat iyu dengan, pire bakaq salo keloran saq side pade kumpulang?" "Pituq," jawab ie pade. 21 "Nah, napi side pade ndẽqman ngerti ẽndah?" manik Deside Isa malik. 22 Ie pade rauh lẽq Betsaida. Lẽq derike sopoq dengan jauq dengan bute tipaq Deside Isa, dait tunas adẽq Ie jamah dengan bute nike jari nyelahang ie. 23 Beterus Deside Isa tegel ime dengan bute nike dait ie tedẽndẽn siq Deside Isa ojok luah dẽse nike. Terus Deside Isa beludah lẽq penenteng dengan nike, dait noloq gading-Ne lẽq penenteng dengan bute nike, terus beketuan lẽq ie, "Napi araq saq side serioq?" 24 Dengan nike serioq ojok julu, terus matur, "Enggih. Tiang serioq dengan lampaq-lampaq; laguq ie pade penggitan maraq lolo." 25 Deside Isa noloq malik gading-Ne lẽq penenteng dengan nike. Mangkin niki dengan nike tetu-tetu nyerioq. Penentengne selah dait ie pedas serioq selapuqne. 26 Beterus Deside Isa bemanik lẽq ie, "Ulẽq, dait ndaq tame ojok kampung nike malik." 27 Deside Isa dait pengiring-pengiring-Ne lumbar ojok dẽse-dẽse lẽq sekiter Kaisarea Pilipi. Lẽq tengaq langan Deside Isa beketuan lẽq ie pade, "Menurut basen dengan, sai Tiang niki?" 28 Jawab ie pade, "Araq saq bebase: Yahya Pembaptis. Araq ẽndah saq bebase Elia, saq lain malik bebase: salaq sopoq nabi." 29 "Laguq menurut side pade mẽsaq, Tiang niki sai?" Deside Isa beketuan. Jawab Petrus, "Pelungguh Almasih!" 30 Beterus Deside Isa bemanik lẽq pengiring-pengiring-Ne, "Ndaq gati badaqang hal nike lẽq sai-sai." 31 Sesampun nike, Deside Isa mulai ngajah pengiring-pengiring-Ne bahwe Bije Manusie harus luwẽq menderite, dait tetentang siq pemimpin-pemimpin, imam-imam kepale, dait ahli-ahli Taurat. Ie gen tematẽq, laguq lẽq jelo saq ketelu Ie gen idup malik. 32 Secare jelas gati Deside Isa nyeriteang hal nike tipaq pengiring-pengiring-Ne. Make Petrus ngantuq Deside Isa ojok lempẽng dait peringet Ie. 33 Laguq Deside Isa cingakin dait merhatiang pengiring-pengiring-Ne, terus menggah lẽq Petrus, "Lalo lẽman tẽ, Belis! Pikirande pikiran manusie, ndẽqne pikiran Allah!" 34 Beterus Deside Isa ngemanikang dengan luwẽq saq araq lẽq derike bareng kance pengiring-pengiring-Ne. Beterus Ie bemanik lẽq ie pade, "Sebilang dengan saq mẽlẽ turut Tiang, ie harus ngelupaqang kepentinganne mẽsaq, ngelẽmbah salibne, dait tetep turut Tiang. 35 Sẽngaq dengan saq mẽlẽ nyelametang nyawene, gen kẽlangan nyawene. Laguq dengan saq kẽlangan nyawene lantaran Tiang dait demi Kabar Solah lẽman Allah, dengan nike gen nyelametang nyawene. 36 Napi untungne lẽq sopoq dengan, lamun seantẽro dunie niki jari dowẽne, laguq ie kẽlangan nyawene? 37 Atao napi saq tebẽng siq sopoq dengan jari penggentiq nyawene? 38 Lamun dengan ilaq ngakuq Tiang dait manik Tiang lẽq jaman durhake dait jahat niki, Bije Manusie ẽndah gen ilaq ngakuq dengan nike, lẽq waktu Ie rauh ẽraq dalem kemuliean Bapa-Ne, teiring malaẽkat-malaẽkat saq suci."

Mark 9

1 Deside Isa bemanik malik tipaq ie pade, "Tiang badaq side pade: Setetune lẽq antare side pade saq araq lẽq deriki araq saq ndẽq gen ninggal, sendẽqman serioq Kerajaan Allah rauh siq kuase!" 2 Enem jelo sesampun nike, Deside Isa gadingang Petrus, Yakub dait Yahya, nyendiri ojok sopoq gunung saq atas. Beterus Deside Isa begentiq rue lẽq julun ie pade. 3 Kuace-Ne jari putẽq ngempor. Ndẽq araq sopoq dengan tukang popoq lẽq dunie niki saq tao mopoq putẽqne maraq nike. 4 Beterus ketelu pengiring-Ne nike serioq Deside Isa kenyeke bebaos kance Elia dait Musa. 5 Make Petrus matur tipaq Deside Isa, "Paq Guru, maiq gati ite lẽq deriki. Silaq tiang pade penganjeng telu kẽmah, sopoq umaq Pelungguh, sopoqne Musa dait sopoqne malik umaq Elia." 6 Setetune Petrus ndẽq nenaoq napi saq harus ie ucapang, sẽngaq ie kance kedue baturne kenyeke takut gati. 7 Beterus awan turun lẽq atas ie pade, dait lẽman awan nike kedengahan suare, "Niki Bije Tiang saq Tiang kasihin. Pade dengahang Ie!" 8 Becat-becat ie pade serioq sekelining ie pade, dait ndẽq araq malik serioq sai-sai lẽq derike bareng ie pade, kecuali Deside Isa. 9 Sewaktu ie pade turun lẽman gunung nike, ie pade teperinget siq Deside Isa, "Ndaq tuturang lẽq sai juaq napi saq side pade serioq nike, sendẽqman Bije Manusie idup malik lẽman ninggal-Ne." 10 Ie pade taat lẽq pesen nike, laguq lẽq antare ie pade mẽsaq mulai ngeraosang napi maksut Deside Isa, "Idup malik lẽman ninggal-Ne". 11 Make ie pade metakẽn lẽq Deside Isa, "Kembẽq ahli-ahli Taurat bebase bahwe Elia harus rauh juluan?" 12 Jawab Deside Isa, "Mule tetu Elia gen dateng juluan dait ie gen siepang selapuqne. Laguq berembẽ halne siq Bije Manusie? Kembẽq lẽq dalem Kitab Suci tetulis bahwe Ie gen luwẽq menderite dait tehine siq dengan? 13 Laguq Tiang badaq side: Elia sampun dateng, dait dengan-dengan perlakuang ie semẽlẽ angen ie pade. Nike sesuai kance saq sampun tetulis dalem Kitab Suci mengenai diriqne." 14 Sewaktu Deside Isa dait ketelu pengiring-Ne sampun araq malik bareng pengiring-pengiring saq lainne, ie pade serioq luwẽq dengan lẽq derike. Araq ahli-ahli Taurat kenyeke besoal jawab kance pengiring-pengiring Deside Isa. 15 Sewaktu dengan-dengan nike serioq Deside Isa, ie pade kemomotan, terus pelai nyambut Ie. 16 "Napi saq side pade masalahang kance ahli-ahli Taurat nike?" Deside Isa beketuan lẽq pengiring-pengiring-Ne. 17 Jawab salaq sopoq lẽman dengan luwẽq nike, "Bapaq Guru, tiang jauq anak tiang tipaq Pelungguh. Ie tekuasein siq roh jahat saq miaq ie jari pakoq. 18 Lamun roh nike nyerang ie, awakne tetimpak-timpak ojok tanaq, biwihne bekowok, gigine bekeretek dait selapuq awakne jari kojor. Tiang tunas pengiring-pengiring Pelungguh sediq roh jahat nike, laguq ie pade ndẽq tao." 19 Make Deside Isa bemanik tipaq ie pade, "Luar biase side pade niki! Side pade tetu-tetu dengan saq ndẽq percaye. Jangke piran Tiang harus araq kance side pade dait sabar tipaq side pade? Jauq kanak nike ojok deriki!" 20 Beterus ie pade jauq kanak nike ojok Deside Isa. Waktu roh jahat nike serioq Deside Isa, ie piaq awak kanak nike kojor-kojor sehingge kanak nike geriq begoloq-goloq lẽq tanaq. Biwihne bekowok. 21 Terus Deside Isa beketuan lẽq amaq kanak nike, "Sampun pire ngonẽq ie maraq niki?" "Lẽman ie masih kodẽq!" jawab amaqne. 22 "Rimpes gati roh jahat nike berusahe nyematẽq ie siq care geriqang ie ojok dalem api atao ojok dalem aiq. Keranaq nike lamun Pelungguh bau nulung, tulung tiang pade dait periak lẽq tiang pade!" 23 "Napi basende? Lamun Pelungguh bau?" jawab Deside Isa. "Ndẽq araq saq mustahil umaq dengan saq percaye!" 24 Langsung amaq kanak nike bejawab siq suare saq belẽq, "Tiang percaye! Laguq iman tiang kurang. Tulung tiang adẽq tiang lebih percaye malik!" 25 Sewaktu Deside Isa cingakin dengan luwẽq mulai dateng bekerimpun lẽq derike, Ie prẽntahang roh jahat nike. Manik-Ne, "Roh pakoq dait kedok, Tiang prẽntahang sugul lẽman kanak niki dait ndaq gati tame malik ojok dalemne." 26 Roh jahat nike nyurak, dait awak kanak nike kojor-kojor, beterus sugul lẽman kanak nike. Kanak nike penggitan maraq mayit sehingge selapuq dengan bebase, "Ie sampun milinang!" 27 Laguq Deside Isa negel imene dait tulung ie ures. Beterus kanak nike ures. 28 Sesampun Deside Isa lẽq gedẽng, pengiring-pengiring-Ne secare husus parek dait metakẽn, "Kembẽq tiang pade ndẽq bau sediq roh jahat nike?" 29 Jawab Deside Isa, "Roh jahat saq maraq niki cume bau tesediq siq do'e." 30 Deside Isa dait pengiring-pengiring-Ne bilin taoq nike, dait lanjutang pemargian-Ne langan Galilea. Ie nẽnten kayun araq dengan saq nenaoq hal nike; 31 sẽngaq Ie kenyeke ngajah pengiring-pengiring-Ne. Deside Isa bemanik tipaq pengiring-pengiring-Ne, "Bije Manusie gen teserahang tipaq kuase manusie dait Ie gen tematẽq, laguq lẽq jelo ketelu Ie gen idup malik!" 32 Pengiring-pengiring Deside Isa ndẽq ngerti napi arti manik Deside Isa nike, laguq ie pade takut nakẽnang hal nike lẽq Deside Isa. 33 Deside Isa dait pengiring-pengiring-Ne rauh lẽq Kapernaum. Sesampun lẽq gedẽng, Deside Isa beketuan lẽq pengiring-pengiring-Ne, "Napi saq side pade raosang lẽq tengaq langan onẽq?" 34 Ie pade ndẽq bejawab, sẽngaq lẽq tengaq langan ie pade betungkasan mengenai sai saq paling belẽq lẽq antare ie pade. 35 Deside Isa melinggih, beterus ngemanikang kedue olas pengiring-Ne nike. Ie bemanik lẽq ie pade, "Dengan saq mẽlẽ jari saq penembẽq, ie harus jari saq penutuq dait harus jari pelayan selapuq dengan." 36 Beterus Deside Isa bait sopoq kanak kodẽq, dait penganjeng-Ne kanak nike lẽq julu ie pade selapuq. Deside Isa kapong kanak nike dait bemanik lẽq pengiring-pengiring-Ne, 37 "Dengan saq nerimaq sopoq kanak maraq niki lantaran Tiang, artine nerimaq Tiang. Dait dengan saq nerimaq Tiang, ie ndẽq nerimaq Tiang doang, laguq nerimaq ẽndah Ie saq ngutus Tiang." 38 Beterus Yahya matur lẽq Deside Isa, "Paq Guru, tiang pade serioq dengan sediq roh jahat siq pesẽngan Pelungguh. Terus tiang pade balaq ie sẽngaq ie ndẽq lẽman kelompoq ite." 39 Laguq jawab Deside Isa, "Ndaq balaq ie, sẽngaq ndẽq araq sopoq dengan juaq saq miaq keajaipan siq aran Tiang, lẽq waktu nike ẽndah ngucapang hal saq lengẽ tipaq Tiang. 40 Sẽngaq dengan saq ndẽq ngelawan ite, artine bepihak lẽq ite. 41 Pade inget! Dengan saq ngebẽng nginem tipaq side lantaran side pade pengiring Almasih, ie pasti gen nerimaq upaqne." 42 "Sai-sai saq jari penyebap salaq sopoq lẽman kanak-kanak kodẽq saq percaye lẽq Tiang niki bedose, solahan lamun batu penggilingan tetaliq lẽq belongne, dait ie tetetẽh ojok dalem segare. 43 Lamun imende miaq side bedose, peleng ime nike! Solahan side ndẽq bedowẽ ime setowẽq laguq idup bareng kance Allah, ketimbang bedowẽ due ime, laguq tetetẽh ojok api nerake saq kekel. 44 Lẽq derike api ndẽq iniq pedaq, dait ulet ndẽq iniq matẽ. 45 Dait lamun naẽnde miaq side bedose, peleng naẽ nike. Solahan side ndẽq bedowẽ naẽ setowẽq laguq side idup bareng kance Allah, ketimbang bedowẽ due naẽ, laguq tetetẽh ojok dalem api nerake. 46 Lẽq derike api ndẽq iniq pedaq dait ulet ndẽq iniq matẽ. 47 Lamun penentengde miaq side bedose, luit penentengde! Solahan side tame Kerajaan Allah bedowẽ sopoq penenteng, ketimbang side dait kedue penentengde tetetẽh ojok dalem api nerake. 48 Lẽq derike api ndẽq iniq pedaq dait ulet ndẽq iniq matẽ. 49 Sebilang dengan gen tesiaq siq api. 50 Sie nike solah, laguq lamun jari tawah, napi bau tepaẽqang malik? Jari, side pade harus jari maraq sie dait -- idup damẽ sopoq kance saq lain."

Mark 10

1 Beterus Deside Isa bilin taoq nike, dait lumbar ojok daẽrah Yudea dait daẽrah lẽq itoqan Kokoq Yordan. Dengan luwẽq dateng malik bekerimpun lẽq sekelining Deside Isa. Dait maraq biase Deside Isa ngajah ie pade. 2 Beterus araq dengan-dengan Parisi dateng ẽndah jari boyaq kesalaqan adẽqne bau nyalahang Deside Isa, ie pade metakẽn, "Napi kanggo sopoq semame sẽang seninene?" 3 Jawab Deside Isa, "Musa ngicanin prẽntah napi lẽq side pade?" 4 "Musa ngijinang dengan sẽang seninene asal nulis surat sẽang bejulu," jawab ie pade. 5 "Musa nulis prẽntah nike sẽngaq side pade sengke gati teajah," manik Deside Isa lẽq ie pade. 6 "Laguq lẽq penembẽqne, sewaktu Allah cipteang manusie, Allah bemanik bahwe 'Allah jariang ie pade mame dait nine. 7 Keranaq nike dengan mame gen bilin inaq amaqne dait besopoq kance seninene, 8 make deduaqne jari sopoq.' Jari ie pade ndẽqne due malik, laguq sopoq. 9 Keranaq nike, napi saq sampun tepesopoq siq Allah, ndẽq kanggo tesẽang siq manusie!" 10 Sesampun ie pade tame gedẽng, pengiring-pengiring Deside Isa metakẽn lẽq Deside Isa mengenai hal nike. 11 Deside Isa bemanik lẽq ie pade, "Sai-sai sẽang seninene, terus merariq malik kance dengan nine lain, dengan nike idup dalem perzinahan tipaq seninene saq penembẽq nike. 12 Maraq nike ẽndah dengan nine saq sẽang semamene terus merariq kance dengan mame saq lain, ie ẽndah bezinah." 13 Araq dengan-dengan jauq kanak-kanak kodẽk ojok Deside Isa adẽq Ie jamah ie pade. Laguq pengiring-pengiring Deside Isa siliq dengan-dengan nike. 14 Cingakin hal nike, Deside Isa menggah terus bemanik tipaq pengiring-pengiring-Ne, "Alurang kanak-kanak nike dateng ojok Tiang! Ndaq balaq ie pade, sẽngaq dengan-dengan saq maraq niki saq dowẽang Kerajaan Allah. 15 Tiang badaq side! Setetune sai-sai saq ndẽq nerimaq Kerajaan Allah maraq sopoq kanak kodẽq, ie ndẽq gen tame ojok dalemne." 16 Sesampun bemanik maraq nike, Deside Isa kapong kanak-kanak nike, beterus noloq gading-Ne lẽq atas ie pade dait ngicanin ie pade berkah. 17 Sewaktu Deside Isa ngelanjutang malik pemargian-Ne, araq dengan pelai tipaq Ie. Dengan nike sujut lẽq arepan Deside Isa dait metakẽn, "Paq Guru saq solah, napi saq harus tiang piaq adẽq bau nerimaq idup sejati dait kekel?" 18 Jawab Deside Isa, "Kembẽq side paran Tiang solah? Ndẽq araq saq solah kecuali Allah mẽsaq. 19 Side sampun nenaoq prẽntah-prẽntah Allah, 'Ndaq nyematẽq; ndaq bezinah; ndaq memaling; ndaq jari saksi duste; ndaq nipu; pade hormatin amaq dait inaqde.' " 20 "Bapaq Guru," atur dengan nike, "selapuq prẽntah nike sampun tiang turut lẽman bajang." 21 Deside Isa perhatiang dengan nike siq penoq kasih terus bemanik, "Masih sopoq hal malik saq side perluang. Lumbar dait jual selapuq dowẽnde; sedekahang kẽpẽngne tipaq dengan-dengan miskin, dait side gen mauq harte lẽq sorge. Sesampun nike dateng turut Tiang." 22 Sesampun dengah manik Deside Isa maraq nike, dengan nike kecẽwe, terus bilin taoq nike siq susah angenne, sẽngaq ie sugih gati. 23 Beterus Deside Isa perhatiang pengiring-pengiring-Ne, dait bemanik lẽq ie pade, "Sengke gati dengan sugih tame Kerajaan Allah!" 24 Pengiring-pengiring-Ne bengaq dengah manik Deside Isa nike. Laguq Deside Isa bemanik malik, "Bije-bije Tiang, mule sengke tame Kerajaan Allah! 25 Molahan sopoq onte tame loang jarum ketimbang dengan sugih tame ojok dalem Kerajaan Allah." 26 Ucapan-ucapan Deside Isa nike miaq pengiring-pengiring-Ne bengaq sehingge ie pade beketuan sopoq kance saq lain, "Lamun maraq nike, sai saq bau selamet?" 27 Deside Isa merhatiang ie pade, terus bemanik, "Bagi manusie nike mustahil, laguq nẽnten mustahil bagi Allah; selapuqne mungkin bagi Allah." 28 Beterus Petrus matur, "Tiang pade sampun bilin selapuq-lapuqne jari ngiring Pelungguh." 29 Manik Deside Isa, "Tiang badaq side: setetune sebilang dengan saq sampun bilin balẽne, semeton nine atao mame, inaq amaqne, atao bije-bijene, atao kebon bangketne lantaran Tiang dait lantaran Kabar Solah lẽman Allah, 30 dengan nike gen mauq luwẽqan lẽq waktu mangkin niki. Ie gen mauq balẽ, semeton nine, semeton mame, inaq, bije dait kebon bangket satus kali luwẽqan -- timaq tebarengin siq macem-macem siksaqan. Dait ẽraq lẽq jaman saq gen dateng, ie gen nerimaq idup saq sejati dait kekel. 31 Laguq luwẽq dengan saq mangkin niki jari penembẽq gen Jari saq penutuq, dait luwẽq saq mangkin niki jari penutuq gen jari saq penembẽq." 32 Deside Isa dait pengiring-pengiring-Ne kenyeke dalem pemargian ojok Yerusalem. Deside Isa bemargi lẽq arep, dait selapuq pengiring-pengiring-Ne kuatir. Dait dengan-dengan saq turut ie pade lẽman mudi ẽndah merase takut. Beterus Deside Isa ngemanikang malik pengiring-pengiring-Ne secare husus dait nyampẽang lẽq ie pade napi saq gen telaksane laun lẽq diriq-Ne. 33 Manik Deside Isa, "Pade dengahang. Mangkin ite lumbar ojok Yerusalem. Lẽq derike Bije Manusie gen teserahang tipaq imam-imam kepale dait ahli-ahli Taurat. Ie gen tehukum matẽ, beterus teserahang tipaq bangse-bangse saq ndẽq kenal kance Allah. 34 Ie pade gen ngoloq-oloq Ie, nijuh Ie, nyiksaq Ie, dait nyematẽq Ie. Laguq sesampun telu jelo, Ie gen idup malik." 35 Beterus Yakub dait Yahya, bije-bije Zebedeus parek tipaq Deside Isa, ie pade matur, "Bapaq Guru, araq sopoq hal saq tiang pade melẽt Pelungguh laksaneang lẽq tiang pade." 36 Manik Deside Isa, "Napi saq side pade mẽlẽ adẽq Tiang piaq lẽq side?" 37 Jawab ie pade, "Tiang pade melẽt tokol lẽq kiri dait kanan Pelungguh, lamun Pelungguh melinggih lẽq dalem kemuliean Pelungguh." 38 "Side pade ndẽq nenaoq napi saq side pade tunas," manik Deside Isa lẽq ie pade, "Napi side pade sanggup nginem cawan penderitean saq harus Tiang inem dait tebaptis kadu baptisan saq harus Tiang terimaq?" 39 "Sanggup," jawab ie pade. Beterus Deside Isa bemanik malik tipaq ie pade, "Mule, side pade gen nginem cawan penderitean saq harus Tiang inem dait tebaptis kadu baptisan saq harus Tiang terimaq. 40 Laguq mengenai sai saq gen tokol lẽq kanan atao kiri Tiang, nike ndẽqne Tiang saq berhak nentuang, sẽngaq taoq nike gen teicanin tipaq dengan-dengan saq tetentuang siq Allah jari tokol lẽq derike." 41 Sewaktu sepulu pengiring Deside Isa saq lainne dengah hal nike, ie pade sili lẽq Yakub dait Yahya. 42 Laguq Deside Isa ngemanikang ie pade terus bemanik: "Side pade nenaoq, bahwe ie pade saq tesebut pemrẽntah bangse-bangse mrẽntah rakyatne kadu ime besi, dait pembelẽq-pembelẽqne ngelampaqang kuasene secare keras tipaq ie pade. 43 Laguq side ndẽq kanggo maraq nike! Sebalikne, dengan saq mẽlẽ jari belẽq lẽq antare side pade, ie harus jari pelayande. 44 Dait dengan saq mẽlẽ jari saq penembẽq lẽq antare side pade, ie harus jari hambe tipaq selapuqne. 45 Sẽngaq Bije Manusie ẽndah rauh nẽnten jari telayanin laguq Ie rauh jari ngelayanin, dait nyerahang nyawe-Ne jari tebusan tipaq dengan luwẽq." 46 Ie pade rauh lẽq Yeriko. Waktu Deside Isa kance pengiring-pengiring-Ne dait dengan luwẽq bilin kote nike, araq dengan bute kenyeke tokol nunas-nunas lẽq sedin rurung. Aranne Bartimeus, bije Timeus. 47 Sewaktu ie dengah bahwe saq kenyeke liwat lẽq derike Deside Isa dengan Nazaret, ie bekuih, "Deside Isa, Keturunan Daud, periakang tiang!" 48 Ie tesiliq siq dengan luwẽq dait tesuruq tedoq. Laguq sayan keras ie bekuih, "Keturunan Daud periakang tiang!" 49 Beterus Deside Isa mentelah terus bemanik, "Empoh ie." Beterus ie pade ngempoh dengan bute nike. Ie pade bebase lẽq ie, "Tenang! Side temanikang siq Deside Isa, silaq ures!" 50 Dengan bute nike langsung saut jubahne, terus becat-becat nganjeng dait lumbar ojok Deside Isa. 51 Deside Isa beketuan lẽq dengan bute nike, "Napi saq side melẽtang adẽq Tiang piaq lẽq side?" Jawab dengan bute nike, "Paq Guru, tiang melẽt tao nyerioq." 52 Beterus manik Deside Isa, "Silaq Lumbar! Imande sampun miaq side selah." Langsung waktu nike ẽndah dengan nike tao nyerioq. Beterus ie ngiring Deside Isa lẽq pemargian-Ne.

Mark 11

1 Sesampun rapet Yerusalem, ie pade rauh lẽq kote Betpage dait Betania lẽq tembẽrẽng Bukit Zaitun. Deside Isa ngemanikang due pengiring-Ne lampaq bejulu 2 siq pesen: "Silaq lumbar ojok kampung saq araq lẽq julunde nike. Waktu side pade tame kampung nike, side pade gen ndait sopoq bagal saq masih odaq kenyeke tegeteng, saq ndẽq uwah tetunggang siq dengan. Lekaq getenganne terus jauq ojok deriki." 3 Dait lamun araq dengan beketuan lẽq side pade, "Kembẽq side lekaq getengan bagal nike?" Badaqang bahwe, "Junjungan Saq Mulie merluang bagal nike dait Ie gen becat nulakang ojok deriki." 4 Kedue pengiring Deside Isa nike lumbar, terus daitne sopoq bagal saq masih odaq kenyeke tegeteng lẽq lawang sopoq balẽ lẽq sedin rurung. Beterus ie pade lekaq getengan bagal nike. 5 Dengan-dengan saq nganjeng lẽq derike beketuan lẽq ie pade, "Napi maksutde lekaq getengan bagal nike?" 6 Ie pade bejawab maraq saq sampun temanikang siq Deside Isa tipaq ie pade. Make dengan-dengan nike ngalurang ie pade jauq bagal nike. 7 Sesampun dateng lẽq Deside Isa, bongkor bagal nike ie pade lamak siq jubah ie pade, beterus Deside Isa taẽk lẽq atasne. 8 Luwẽq dengan kelat jubah ie pade lẽq rurung, araq ẽndah saq noloq pẽmpang-pẽmpang lolo kayuq saq ie pade bait lẽman lendang. 9 Dengan-dengan saq lampaq lẽq julu dait dengan-dengan saq nurut mudi, selapuqne bekuih-kuih, "Hosana! Teberkahin Ie saq rauh dalem pesẽngan Tuhan! 10 Teberkahin kerajaan saq gen rauh -- Kerajaan Daud leluhurte! Hosana lẽq taoq saq maheagung!" 11 Ahirne Deside Isa rauh lẽq Yerusalem, beterus tame ojok Gedẽng Allah. Lẽq derike Ie perhatiang sekelining-Ne. Laguq lantaran gen serep jelo, Ie terus berangkat ojok Betania bareng kance kedue olas pengiring-Ne. 12 Lẽq jemaqne, sewaktu ie pade kenyeke lampaq sugul lẽman Betania, Deside Isa beridap seduk. 13 Lẽman jaoq Ie cingakin sopoq lolo are saq benes daunne. Jari Ie lumbar ojok lolo are nike sang araq buaqne. Laguq sesampun Ie rauh lẽq lolo nike, Ie nẽnten ndait napi-napi, kecuali daun-daun doang, sẽngaq waktu nike ndẽqman musim buaq are. 14 Beterus Deside Isa bemanik lẽq lolo are nike, "Mulai mangkin ndẽq araq sopoq dengan juaq saq gen kelorang buaq lẽman side malik!" Pengiring-pengiring Deside Isa dengah ucapan nike. 15 Beterus ie pade rauh lẽq Yerusalem, dait Deside Isa tame malik ojok Gedẽng Allah. Lẽq derike Ie mulai sediq selapuq dengan saq kenyeke bedagang dait belanje lẽq derike. Ie balik belah mẽje-mẽje dengan saq tekadu taoq tukah kẽpẽng, dait bangku-bangku saq tekadu bedagang kedit dare. 16 Dait Ie nẽnten ngijinang dengan jauq barang-barang liwat lelẽah Gedẽng Allah. 17 Beterus Deside Isa ngajahang dengan-dengan lẽq derike. Ie bemanik, "Lẽq dalem Kitab Suci tetulis maraq niki: Allah bemanik, 'Gedẽng Tiang gen tesebut gedẽng do'e umaq selapuq bangse.' Laguq side pade jariang ie taoqne bekumpul dengan-dengan jahat!" 18 Imam-imam kepale dait ahli-ahli Taurat pireng ucapan nike. Beterus ie pade mulai boyaq care jari nyematẽq Deside Isa. Ie pade takut lẽq Deside Isa, sẽngaq selapuq dengan takjub dengah pengajahan-Ne. 19 Lẽq waktu serep jelo, Deside Isa dait pengiring-pengiring-Ne bilin kote nike. 20 Lẽmaq kelẽmaqne, waktu Deside Isa dait pengiring-pengiring-Ne liwat lẽq lolo are nike, ie pade serioq lolo nike sampun matẽ jangke akah-akahne. 21 Terus Petrus inget siq peristiwe sejelo sendẽqmanne. Make Petrus matur lẽq Deside Isa, "Paq Guru, silaq cingakin! Lolo are saq Pelungguh kutuk nike sampun matẽ!" 22 Jawab Deside Isa, "Percaye tipaq Allah. 23 Tiang badaq side pade: Setetune sai juaq saq bebase tipaq gunung niki, 'Kerungkahan dait ngalih ojok segare!' make hal nike gen telaksane lẽq side pade; asal side pade percaye dait ndẽq bimbang, bahwe napi saq side pade ucapang nike gen tetu-tetu telaksane. 24 Keranaq nike Tiang badaq side pade: Napi juaq saq side pade tunas dalem do'e, pade percaye bahwe Allah sampun ngicanin side pade napi saq side pade tunas, make side pade gen nerimaq ie. 25 Dait lamun side pade bedo'e, laguq atẽnde ndẽq seneng lẽq sopoq dengan, ampunin dengan nike juluq, adẽq Bapa side lẽq sorge ẽndah ngampunin dose-dosende. 26 Lamun side pade ndẽq ngampunin dengan lain, Bapa side lẽq sorge ẽndah ndẽq gen ngampunin dose-dosende." 27 Ie pade tulak malik ojok Yerusalem. Dait lẽq waktu Deside Isa bemargi lẽq lelẽah Gedẽng Allah, imam-imam kepale, ahli-ahli Taurat dait pemimpin-pemimpin Yahudi parek tipaq Ie. 28 Ie pade metakẽn, "Atas dasar napi Pelungguh ngelaksaneang selapuqne niki? Sai saq aturin Pelungguh kuase nike?" 29 Jawab Deside Isa, "Tiang ẽndah mẽlẽ beketuan lẽq side pade. Silaq jawab dait Tiang gen badaq side pade siq kuase sai Tiang ngelaksaneang hal-hal niki. 30 Yahya baptis dengan siq kuase sai? Kuase Allah atao manusie?" 31 Beterus imam-imam kepale dait pemimpin-pemimpin Yahudi mulai berunding lẽq antare ie pade. Ie pade bebase, "Lamun ite jawab, 'Siq kuase Allah,' Ie gen bemanik, 'Lamun maraq nike kembẽq side pade ndẽq percaye lẽq Yahya?' 32 Laguq segerah ite jawab, 'Siq kuase manusie.' " Sẽngaq ie pade takut lẽq dengan luwẽq, lantaran selapuq dengan anggep Yahya nabi. 33 Jari, jawab ie pade, "Mindah tiang." Beterus Deside Isa bemanik lẽq ie pade, "Lamun maraq nike Tiang ẽndah ndẽq badaq side pade siq kuase sai Tiang ngelaksaneang selapuqne niki."

Mark 12

1 Beterus Deside Isa mulai bemanik kadu perumpamean lẽq imam-imam kepale dait ahli-ahli Taurat dait pemimpin-pemimpin Yahudi nike. Deside Isa bemanik, "Araq sopoq dengan saq nalet anggur lẽq kebonne. Terus ie miaq lambah lẽq sekelining kebon nike. Sesampun nike ie kaliq longkak jari taoqne peres anggur, terus ie penganjeng menare taoq dengan bejage. Sesampun nike sẽweangne kebon anggur nike lẽq penyakap-penyakap, beterus ie berangkat ojok negeri lain. 2 Sewaktu sampun waktune musim buaq anggur, ẽpẽn dowẽ kebon nike ngutus pelayanne tipaq penyakap-penyakap kebon nike, jari nerimaq bagianne. 3 Laguq penyakap-penyakap nike bau pelayan nike. Beterus ie pade empuk pelayan nike, dait suruqne ie ulẽq ndẽq jauq napi-napi. 4 ~Epẽn dowẽ kebon nike ngutus malik pelayanne saq lain. Laguq penyakap-penyakap nike ngempuk ulu pelayan nike, terus suruqne nyedi sambil tesumpaq-senaq. 5 ~Epẽn dowẽ kebon nike ngutus malik pelayanne saq lain. Laguq ie pade matẽq pelayan nike. Dait maraq nike seterusne ie pade perlakuang luwẽq pelayan saq lain ẽndah: araq saq tempuk dait araq ẽndah saq tematẽq. 6 Ahirne cume karing sopoq saq araq lẽq ie, bijene mẽsaq saq paling ie tunah. Jari ie ngutus bijene nike tipaq penyakap-penyakapne. Pikirne, 'Pasti anak tiang gen tehormatin.' 7 Laguq penyakap-penyakap nike bebase sopoq kance saq lain, 'Niki ie ahli warisne, silaq ite matẽq ie, adẽq ite mauq warisanne!' 8 Make ie pade bau ie terus tematẽq. Mayitne ie pade tetẽh ojok luah kebon nike." 9 Beterus Deside Isa beketuan, "Napi saq gen tepiaq siq ẽpẽn dowẽ kebon nike? Pasti ie gen dateng dait nyematẽq penyakap-penyakap nike, terus nyerahang kebon nike ojok penyakap-penyakap saq lain. 10 Side pade pasti sampun bace ayat niki lẽq Kitab Suci, 'Batu saq tetetẽh siq tukang bangunan sampun jari batu saq paling utame. 11 Niki karye Tuhan; sopoq karye saq ajaip lẽq julunte!' " 12 Make pare pemimpin bangse Yahudi saq dengah perumpamean nike berusahe bau Deside Isa, sẽngaq ie pade nenaoq bahwe perumpamean nike tetujuang tipaq ie pade. Laguq ie pade takut lẽq dengan luwẽq. Jari, ie pade lumbar bilin Deside Isa. 13 Pire dengan Parisi dait anggote-anggote golongan Herodes tesuruq boyaq kesalaqan Deside Isa siq care besoal jawab adẽqne bau nyalahang Deside Isa. 14 Ie pade parek ojok Deside Isa dait matur, "Bapaq Guru, tiang pade nenaoq Pelungguh jujur dait nẽnten takut lẽq sai juaq. Pelungguh ngajahang secare terus terang mengenai langan saq kenaq tipaq Allah. Sẽngaq Pelungguh nẽnten pilẽq kasih. Silaq Pelungguh bemanik lẽq tiang pade, 'Menurut aturan agamente, kanggo napi nẽnten bayah pajek lẽq kaisar? Napi pajek nike harus ite bayah atao nẽnten?' " 15 Deside Isa wikan kemunapikan ie pade. Jawab-Ne, "Kembẽq side pade boyaq-boyaq kesalaqan adẽq bau nyalahang Tiang? Petitoqang lẽq Tiang sopoq kẽpẽng perak." 16 Make ie pade serahang lẽq Deside Isa sopoq kẽpẽng perak. Beterus Deside Isa beketuan, "Gambar dait aran sai niki?" "Kaisar," jawab ie pade. 17 "Nah, lamun maraq nike," manik Deside Isa, "serahang ojok Kaisar napi saq jari dowẽn Kaisar, dait tipaq Allah napi saq jari dowẽn Allah." Ie pade bengaq dengah jawaban-Ne. 18 Pire dengan lẽman golongan Saduki parek ojok Deside Isa. (Ie pade golongan saq bedowẽ pendapet bahwe dengan ninggal ndẽq gen idup malik.) Ie pade metakẽn lẽq Deside Isa: 19 "Bapaq Guru, Musa nulis hukum niki tipaq ite: 'Lamun sopoq dengan mame ninggal dait ie ndẽq bedowẽ bije, make semetonne harus merariq kance bebalune adẽq ie bau ngebẽng keturunan tipaq dengan saq sampun ninggal nike.' 20 Sampun araq pituq dengan besemetonan. Saq sengake merariq, terus ninggal ndẽq bedowẽ bije. 21 Beterus saq kedue merariq kance bebalune, laguq ie ẽndah ninggal ndẽq bedowẽ bije. Maraq nike ẽndah telaksane lẽq semetonne saq ketelu, 22 dait seterusne jangke saq kepituq. Ahirne dengan nine nike ẽndah ninggal. 23 Lẽq jelo dengan ninggal teidupang malik, sai semame dengan nine nike? Sẽngaq kepituq-pituqne sampun merariq kance ie!" 24 Jawab Deside Isa, "Side pade keliru gati, lantaran side pade ndẽq ngerti Kitab Suci dait kuase Allah. 25 Sẽngaq lamun dengan-dengan ninggal teidupang malik, ie pade ndẽq gen merariq malik, laguq ie pade gen idup maraq malaẽkat lẽq sorge. 26 Dait mengenai dengan ninggal teidupang malik, napi side pade ndẽq uwah bace lẽq dalem kitab Musa mengenai bebenes saq nyale nike? Lẽq dalem ayat-ayat nike tetulis bahwe Allah bemanik tipaq Musa, 'Tiang Allahne Ibrahim, Allahne Ishak dait Allahne Yakub.' 27 Allah nike nẽnten Allah dengan ninggal, laguq Allah dengan saq idup. Side pade keliru gati!" 28 Beterus dateng sopoq ahli Taurat saq pirengang bebaosan antare Deside Isa kance dengan-dengan lẽman golongan Saduki nike. Ahli Taurat nike serioq bahwe Deside Isa sampun jawab dengan-dengan nike secare bagus. Make ie metakẽn tipaq Deside Isa, "Prẽntah mbẽ saq paling utame lẽq antare selapuq prẽntah?" 29 Jawab Deside Isa, "Prẽntah saq utame: 'Pade dengahang, hai bangse Israel! Allah, Tuhante, Tuhan Saq Mahe Esa! 30 Kasihin Allah, Tuhan side siq segenep atẽnde, dait siq segenep jiwende dait siq segenep akal budinde dait siq selapuq kekuatande.' 31 Prẽntah kedue: 'Kasihin sepadende manusie, maraq side ngasihin diriqde mẽsaq.' Ndẽq araq malik prẽntah lain saq pentingan lẽman kedue prẽntah nike." 32 Beterus ahli Taurat nike matur lẽq Deside Isa, "Tepat gati, Bapaq Guru! Mule kenaq napi saq Pelungguh manikang: Tuhan nike Allah saq esa, dait nẽnten araq malik Allah saq lain. 33 Dait manusie harus ngasihin Allah siq sepenoq angenne, dait siq selapuq akalne, dait siq selapuq kekuatanne. Dait ie ẽndah harus ngasihin sepade manusie maraq ie ngasihin diriqne mẽsaq. Nike jaoq solahan ketimbang ngaturang kurban tunuqan dait kurban-kurban saq lain tipaq Allah." 34 Deside Isa cingakin bahwe ahli Taurat nike sampun bejawab secare bagus gati. Dait Deside Isa bemanik lẽq ie, "Side ndẽq jaoq lẽman Kerajaan Allah." Sesampun nike, ndẽq araq sopoq dengan juaq saq bani malik metakẽn lẽq Deside Isa. 35 Lẽq waktu kenyeke ngajahang lẽq Gedẽng Allah, Deside Isa beketuan, "Berembẽ ahli-ahli Taurat iniq bebase bahwe Almasih nike keturunan Daud? 36 Padahal Daud mẽsaq -- lantaran teilhamin siq Roh Suci -- bebase, 'Tuhan bemanik lẽq Junjungan tiang: Melinggih lẽq sedi kanan Tiang, jangke Tiang piaq musuh-musuh Deside takluk lẽq Deside.' 37 Jari, lamun Daud mẽsaq nyebut Almasih nike 'Junjungan Saq Mulie', segerah Ie keturunan Daud?" Dengan saq araq lẽq Gedẽng Allah nike seneng dengahang pengajahan Deside Isa. 38 Ie bemanik lẽq ie pade, "Onyaq-onyaq lẽq ahli-ahli Taurat. Ie pade demen lampaq-lampaq kadu jubah saq bẽlo dait demen tehormatin lẽq peken-peken. 39 Ie pade seneng melinggih lẽq kursi saq paling julu lẽq balẽ-balẽ ibadah, dait seneng melinggih lẽq taoq saq paling tehormat lẽq taoq dengan-dengan begawẽ. 40 Ie pade tipu bebalu-bebalu dait ngerampas balẽne. Dait jari seboq pegawẽanne saq jahat nike, ie pade bedo'e bẽlo-bẽlo. Pasti ie pade gen nerimaq hukuman saq beratan!" 41 Sewaktu Deside Isa melinggih andang kotaq persembahan lẽq Gedẽng Allah, Deside Isa perhatiang dengan-dengan namaq kẽpẽng ie pade ojok dalem kotaq nike. Luwẽq dengan sugih tamaqang luwẽq kẽpẽng. 42 Beterus sopoq bebalu saq miskin dateng ẽndah tamaqang due kẽpẽng tembage, kẽpẽng rẽcẽh saq paling kodẽq ajine. 43 Make Deside Isa ngemanikang pengiring-pengiring-Ne, terus bemanik lẽq ie pade, "Tiang badaq side: Setetune bebalu niki namaqang ojok dalem kotaq nike luwẽqan tebanding saq tetamaqang siq selapuq dengan-dengan lain. 44 Sẽngaq ie pade selapuq ngebẽng lẽman kelebihan dowẽne. Laguq bebalu niki, timaq miskin gati, ie ngebẽng selapuq saq araq lẽq ie -- saq ie perluang jari biaye idup."

Mark 13

1 Sewaktu Deside Isa sugul lẽman Gedẽng Allah, salaq sopoq pengiring-pengiring-Ne matur, "Paq Guru, silaq Pelungguh cingakin bangunan-bangunan nike. Perhatiang batu-batune. Luar biase solahne!" 2 Jawab Deside Isa, "Side serioq bangunan-bangunan saq belẽq nike? Setetune ndẽq araq sopoq juaq batu lẽq bangunan-bangunan nike saq masih beronjoq maraq bẽngan. Selapuqne gen terobohang." 3 Beterus Deside Isa lumbar ojok Bukit Zaitun, dait melinggih lẽq taoq saq berandangan kance Gedẽng Allah. Beterus Petrus, Yakub, Yahya dait Andreas parek ojok Deside Isa jari matur secare husus lẽq Ie: 4 "Silaq Pelungguh sampẽang lẽq tiang pade, piran selapuqne nike gen telaksane? Dait napi saq jari tande-tandene lamun sampun dateng wayene?" 5 Jawab Deside Isa, "Pade waspade. Ndaq jangke side pade tetipu. 6 Luwẽq dengan gen dateng kadu aran Tiang, dait bebase, 'Tiang niki Ie!' Ie pade gen miaq luwẽq dengan jari sesat. 7 Lamun side pade dengah suare-suare perang dait berite-berite mengenai perang, ndaq takut. Hal-hal nike harus telaksane, laguq nike ndẽq berarti bahwe sampun wayene kiamat. 8 Bangse saq sopoq gen perang ngelawan bangse saq lain, dait negare saq sopoq gen nyerang negare saq lain. Lẽq mbẽ-mbẽ gen araq lindur dait kelapahan. Laguq selapuqne nike baruq awalne doang, maraq sakit saq tealamin dengan nine saq gen nganak. 9 Side pade harus onyaq-onyaq, sẽngaq side pade gen tebau dait teoros ojok Mahkamah Agame. Side pade gen tempuk lẽq balẽ-balẽ ibadah dait gen tejauq ojok pare penguase dait pare raje lantaran Tiang, sebagẽ kesaksian umaq ie pade. 10 Laguq Kabar Solah lẽman Allah harus tekabarang juluq tipaq selapuq bangse. 11 Dait lamun side pade tebau dait tejauq ojok pengadilan, ndaq kuatir mengenai napi saq harus side pade sampẽang. Lamun sampun waktune ngeraos, sampẽang doang napi saq tebadaq tipaq side pade lẽq waktu nike. Sẽngaq ucapan-ucapan saq side pade sampẽang nike ndẽqne ucapan-ucapande mẽsaq, laguq asalne lẽman Roh Suci. 12 Dengan gen nyerahang semetonne mẽsaq jari tematẽq. Dait hal nike gen telaksane ẽndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematẽq. 13 Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang." 14 "Side pade gen serioq 'Perbuatan najis saq miaq binase' nganjeng lẽq taoq saq tebalaq umaq ie. (Hal niki saq harus teperhatiang siq dengan saq mace.) Lẽq waktu nike dengan-dengan saq araq lẽq Yudea harus pelai ojok pegunungan. 15 Dengan saq araq lẽq atas atep balẽ, ndaq turun dait tame ojok dalem balẽ jari bait napi juaq. 16 Dengan saq kenyeke araq lẽq lendangne, ndaq tulak bait jubahne. 17 Celake inaq-inaq saq kenyeke betian, atao inaq-inaq saq masih penyusuq bebẽaqne lẽq waktu nike! 18 Pade bedo'e adẽq hal-hal nike ndaq telaksane lẽq musim telih. 19 Lẽq jelo-jelo saq penoq siq sengsare nike, gen araq kesusahan saq ndẽq uwah araq, lẽman Allah cipteang dunie jangke mangkin, dait ndẽq gen araq malik. 20 Seandẽne Tuhan nẽnten pesingket waktune nike, make ndẽq araq sopoq dengan juaq saq selamet. Laguq lantaran dengan-dengan saq sampun tepilẽq siq Tuhan, make Ie pesingket waktune. 21 Lẽq waktu nike, lamun araq dengan badaq side: 'Pade serioq, Almasih nike araq lẽq deriki!' atao 'Pade serioq, Ie araq lẽq derike!' -- ndaq gati percaye lẽq dengan nike. 22 Sẽngaq almasih-almasih palsu dait nabi-nabi palsu gen dateng. Ie pade gen miaq tande-tande dait muqjizat-muqjizat jari nipu, dait lamun bau, dengan-dengan saq sampun tepilẽq siq Tuhan ẽndah. 23 Jari, pade waspade! Selapuqne nike sampun Tiang badaq side sendẽqman hal nike telaksane." 24 "Sesampun mase kesusahan nike, sinar jelo gen jari peteng dait bulan ndẽq becahaye. 25 Bintang-bintang gen geriq lẽman langit dait selapuq kuase saq araq lẽq langit jari biur lantur. 26 Lẽq waktu nike, Bije Manusie gen penggitan rauh lẽq dalem awan siq kuase dait kemuliean saq belẽq. 27 Ie gen ngutus malaẽkat-malaẽkat jari ngumpulang dengan-dengan saq sampun Ie pilẽq lẽman keempat penjuru gumi, lẽman poton gumi jangke dateng poton langit." 28 "Pade bait perajahan lẽman lolo are. Lamun pẽmpang-pẽmpangne ijo dait odaq, dait mulai besuli, side pade nenaoq bahwe musim panas sampun rapet. 29 Maraq nike ẽndah lamun side pade serioq hal-hal nike telaksane, side pade nenaoq bahwe waktune sampun rapet gati. 30 Tiang badaq side: Setetune hal-hal nike gen telaksane sendẽqman dengan-dengan saq idup mangkin niki ninggal selapuqne. 31 Langit dait gumi gen musnah laguq manik Tiang gen kekel selaẽq-laẽqne." 32 "Timaqne maraq nike ndẽq araq sopoq dengan juaq saq nenaoq piran jelo atao piran jamne. Malaẽkat-malaẽkat lẽq sorge nẽnten wikan dait Bije ẽndah nẽnten wikan, cume Bapa doang saq wikan. 33 Jari, side pade harus bejage-jage dait waspade, sẽngaq side pade ndẽq nenaoq piran waktune. 34 Keadaanne ibarat sopoq dengan saq bilin balẽne, terus lumbar ojok taoq saq jaoq. Ie suruq pelayan-pelayanne ngurus balẽne dait ngebẽng tugas lẽq ie pade sopoq-sopoq. Lẽq penjage lawang, ie bepesen adẽqne pacu-pacu bejage. 35 Keranaq nike side pade harus bejage-jage, sẽngaq side pade ndẽq nenaoq piran waktune ẽpẽn balẽ nike gen tulak -- sang kebian atao sang tengaq kelem, sang subuh atao kelẽmaq. 36 Lamun ie selung-selung dateng, ndaq jangke ie ndait side pade kenyeke tindoq. 37 Napi saq Tiang sampẽang lẽq side niki, Tiang sampẽang ẽndah lẽq selapuq dengan: Pade bejage-jage!"

Mark 14

1 Due jelo sendẽqman Jelo Paskah dait Perayaan Ruti Ndẽq Beragi. Imam-imam kepale dait ahli-ahli Taurat kenyeke boyaq langan jari bau Deside Isa secare tedoq-tedoq dait nyematẽq Ie. 2 Ie pade bebase, "Ndaq laksaneang hal nike waktu dengan-dengan kenyeke ngerayeang Paskah, adẽq rakyat ndẽq jari biur lantur." 3 Sewaktu Deside Isa araq lẽq Betania, lẽq gedẽng Simon saq piranan sakit kuste, araq sopoq dengan nine parek tipaq Deside Isa. Ie jauq sopoq botol pualam berisi minyak sengẽh saq mahel, tepiaq lẽman ramuan akah saq sengẽh. Sewaktu Deside Isa kenyeke melinggih medaran, dengan nine nike belaqang botol nike dait tumpahangne minyak sengẽh nike lẽq sirah Deside Isa. 4 Pire dengan saq araq lẽq derike jari sili dait bebase sopoq kance saq lain, "Napi manpaatne minyak sengẽh nike tesẽdaq-ẽdaq? 5 Minyak nike bau tejual siq aji lebih lẽman telu ratus kẽpẽng perak, dait kẽpẽngne tesedekahang tipaq dengan miskin!" Make ie pade sili lẽq dengan nine nike. 6 Laguq Deside Isa bemanik, "Alurang ie! Kembẽq side pade nyusahang ie? Ie ngelaksaneang hal saq solah tipaq Tiang. 7 Dengan miskin tetep araq lẽq antare side pade. Sebilang waktu lamun side pade mẽlẽ, side pade bau nulung ie pade. Laguq Tiang ndẽq seterusne araq bareng kance side pade. 8 Dengan nine niki sampun ngelaksaneang napi saq bau ie laksaneang. Awak Tiang sampun ie minyakin sebagẽ persiepan jari pemakaman Tiang. 9 Tiang badaq side: Setetune lẽq seantẽro dunie, lẽq mbẽ juaq Kabar Solah lẽman Allah tesiarang, perbuatan dengan nine niki gen teceriteang ẽndah jari nginget ie." 10 Beterus Yudas Iskariot, salaq sopoq lẽman kedue olas pengiring Deside Isa, lumbar ojok imam-imam kepale siq maksut jari nyerahang Deside Isa tipaq ie pade. 11 Ie pade seneng gati pireng maksut nike, dait bejanji gen ngebẽng Yudas kẽpẽng. Sesampun nike Yudas mulai boyaq kesempatan jari behianat lẽq Deside Isa. 12 Lẽq jelo penembẽq Perayaan Ruti Ndẽq Beragi -- lẽq waktu dengan sembelẽh dombe Paskah -- pengiring-pengiring Deside Isa metakẽn lẽq Ie, "Junjungan Saq Mulie, lẽq mbẽ Pelungguh kayun adẽq tiang pade siepang Pelungguh keloran Paskah?" 13 Make Deside Isa ngemanikang due dengan lẽman ie pade, "Silaq lumbar ojok kote, lẽq derike araq sopoq dengan mame saq kenyeke jauq cẽrẽt berisi aiq gen bedait kance side pade. Turut ie 14 ojok balẽ saq ie tamein, dait badaq ẽpẽn balẽ nike, 'Manik Guru tiang, lẽq mbẽ Ie dait pengiring-pengiring-Ne gen medaran keloran Paskah?' 15 Dengan nike gen petitoq side sopoq kamar belẽq saq araq lẽq atas. Kamar nike sampun tesiepang lengkap kance perabotanne. Siepang ite selapuqne lẽq derike." 16 Terus kedue pengiring Deside Isa nike lumbar ojok kote. Lẽq derike ie pade ndait selapuqne tepat maraq saq temanikang siq Deside Isa. Beterus ie pade nyiepang keloran Paskah. 17 Kelemne, Deside Isa rauh teiring kedue olas pengiring-Ne. 18 Sewaktu ie pade kenyeke melinggih medaran, Deside Isa bemanik, "Tiang badaq side: Setetune salaq sopoq lẽq antare side pade, saq mangkin niki milu medaran kance Tiang, gen behianat lẽq Tiang." 19 Sesampun dengah hal nike pengiring-pengiring Deside Isa jari asẽq gati. Terus sopoq-sopoq mulai metakẽn lẽq Deside Isa, "Junjungan Saq Mulie, pasti ndẽqne tiang saq temaksut nike?" 20 Jawab Deside Isa, "Ie salaq sopoq lẽman side pade saq due olas niki, saq medaran sepiring kance Tiang. 21 Mule Bije Manusie gen ninggal maraq saq tetulis lẽq Kitab Suci. Laguq celake gati dengan saq behianat lẽq Bije Manusie nike! Solahan lamun dengan nike ndẽq tebijeang!" 22 Sewaktu Deside Isa dait pengiring-pengiring-Ne kenyeke medaran, Deside Isa bait ruti, terus ngucapang do'e syukur. Beterus Ie peleng-peleng ruti nike kadu gading-Ne, terus ngicanin tipaq pengiring-pengiring-Ne, sambil bemanik, "Silaq bait, niki ragen Tiang." 23 Sesampun nike Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike lẽq pengiring-pengiring-Ne. Beterus ie pade selapuq nginem anggur nike. 24 Sesampun nike, Deside Isa bemanik, "Niki daraq Tiang saq ngesahang perjanjian Allah, daraq saq tetumpahang tipaq dengan luwẽq. 25 Tiang badaq side, setetune Tiang ndẽq gen nginem anggur niki malik, jangke dateng waktune Tiang nginem anggur saq baru bareng kance side pade lẽq Kerajaan Allah." 26 Beterus ie pade nyanyiang lagu pujian. Dait sesampun nike ie pade lumbar ojok Bukit Zaitun. 27 Beterus Deside Isa bemanik lẽq ie pade, "Side selapuq gen pelai bilin Tiang. Sẽngaq dalem Kitab Suci tetulis, 'Tiang gen nyematẽq pengaratne, dait selapuq dombe-dombene gen bekelin sopoq kance saq lain.' 28 Laguq sesampun Tiang idup malik, Tiang gen senjuluq side pade ojok Galilea." 29 "Nẽnten," jawab Petrus, "timaq ie pade selapuq bilin Pelungguh, tiang nẽnten." 30 Manik Deside Isa lẽq ie, "Tiang badaq side, setetune kelem niki ẽndah, sendẽqman manuk ngungkung due kali, side sampun telu kali nilas Tiang." 31 Jawab Petrus secare teges, "Timaq tiang harus matẽ bareng kance Pelungguh, tiang nẽnten gen nilas Pelungguh!" Dait pengiring-pengiring saq lain ẽndah matur maraq nike. 32 Ie pade rauh lẽq sopoq taoq aranne Getsemani, dait Deside Isa bemanik lẽq pengiring-pengiring-Ne, "Tokol lẽq deriki, sewaktu Tiang bedo'e." 33 Beterus Deside Isa tẽnaq Petrus, Yakub dait Yahya lumbar bareng kance Ie. Deside Isa takut gati dait osah. 34 Deside Isa bemanik lẽq pengiring-pengiring-Ne nike, "Angen Tiang sedih gati, idapne maraq gen matẽ doang. Ndot lẽq deriki dait bejage-jage!" 35 Deside Isa lumbar jaoqan sekediq, beterus sujut lẽq tanaq dait bedo'e. Lẽq dalem do'e-Ne, Ie tunas lamun bau Ie sampunang ngalamin waktu penderitean nike. 36 Ie matur, "Bapa, ya Bapa, nẽnten araq sopoq hal saq mustahil bagi Deside. Jaoqang cawan penderitean niki lẽman Tiang. Laguq sampunang menurut kemẽlẽq Tiang, laguq pekayunan Bapa." 37 Sesampun nike, Deside Isa tulak dait-Ne pengiring-pengiring-Ne kenyeke tindoq. Ie bemanik lẽq Petrus, "Simon, napi side tindoq? Cume sejam doang, side ndẽq sanggup bejage-jage?" 38 Terus Deside Isa bemanik lẽq ie pade, "Bejage-jage, dait bedo'e, adẽq side pade ndẽq ngalamin cobe. Mule roh side mẽlẽ ngelaksaneang saq kenaq, laguq side pade ndẽq sanggup sẽngaq awakde nike lemah." 39 Karing sekali Deside Isa lumbar bedo'e, ngucapang do'e saq pade. 40 Sesampun nike Ie tulak malik tipaq pengiring-pengiring-Ne, dait-Ne ie pade masih tindoq, sẽngaq ie pade ngantok gati. Jari ie pade ndẽq nenaoq napi saq harus ie pade sampẽang tipaq Deside Isa. 41 Sewaktu Deside Isa tulak tipaq ie pade saq ketelu kaline, Ie bemanik, "Napi side pade masih tindoq dait mentelah? Sampun cukup! Sampun waktune Bije Manusie teserahang ojok ime dengan-dengan bedose. 42 Pade ures! Silaq ite lumbar. Serioq! Dengan saq behianat lẽq Tiang sampun dateng!" 43 Sewaktu Deside Isa masih bebaos, Yudas salaq sopoq lẽman kedue olas pengiring-Ne nike dateng. Bareng kance ie dateng ẽndah luwẽq dengan saq jauq klẽwang dait gegitik. Ie pade tesuruq siq imam-imam kepale, ahli-ahli Taurat dait pemimpin-pemimpin Yahudi. 44 Penghianat nike sendẽqmanne sampun badaq tande niki tipaq ie pade, "Dengan saq tiang siduk, Ie uwah denganne. Bau dait onyaq-onyaq jauq Ie." 45 Lẽq waktu Yudas dateng, ie langsung ojok Deside Isa, dait matur, "Bapaq Guru!" terus ie siduk Deside Isa. 46 Beterus dengan-dengan saq dateng bareng kance Yudas nike bau Deside Isa dait sẽkoq Ie. 47 Laguq salaq sopoq dengan saq araq lẽq derike serẽt klẽwangne, dait ngerantek pelayan Imam Agung jangke pegat kentokne. 48 Beterus Deside Isa bemanik tipaq ie pade, "Napi Tiang niki perampok, jangke side pade dateng jauq klẽwang dait gegitik jari bau Tiang? 49 Sebilang jelo Tiang ngajahang lẽq Gedẽng Allah lẽq julu side pade dait side pade ndẽq bau Tiang. Laguq mule seharusne maraq nike adẽqne telaksane napi saq tetulis dalem Kitab Suci." 50 Beterus selapuq pengiring-Ne pelai bilin Ie. 51 Sopoq terune saq cume ngadu kẽrẽng lẽnen jari ngilipang awakne, ngiring Deside Isa. Dengan-dengan mẽlẽ bau ie, 52 laguq ie lekaq kẽrẽngne nike terus pelai belondan. 53 Deside Isa tejauq ojok gedẽng Imam Agung. Lẽq derike selapuq imam kepale, pemimpin Yahudi dait ahli Taurat kenyeke bekumpul. 54 Petrus ngiring Deside Isa lẽman jaoq jangke tame ojok dalem lelẽah gedẽng Imam Agung. Lẽq derike ie tokol sambil mindu dẽkẽt api bareng kance pengawal-pengawal. 55 Imam-imam kepale dait selapuq Mahkamah Agame berusahe boyaq bukti-bukti saq nyalahang Deside Isa adẽqne bau mutusang hukuman matẽ tipaq Ie. Laguq ie pade ndẽq mauq bukti. 56 Luwẽq saksi saq tempoh jari ngebẽng kesaksian palsu tipaq Deside Isa, laguq kesaksianne betentangan sopoq kance saq lain. 57 Beterus araq pire saksi nganjeng dait ngebẽng kesaksian palsu niki mengenai Deside Isa, 58 "Tiang pade dengah dengan niki bebase, 'Tiang gen ngerobohang Gedẽng Allah niki saq tepiaq siq manusie, terus dalem telu jelo, Tiang gen penganjeng saq lain saq ndẽq tepiaq siq manusie.' " 59 Laguq kesaksian dengan-dengan nike ẽndah betentangan sopoq kance saq lain. 60 Beterus Imam Agung nganjeng lẽq julu ie pade selapuq dait metakẽn lẽq Deside Isa, "Pelungguh kayun jawab napi saq tetuduhang nike atao nẽnten?" 61 Laguq Deside Isa meneng doang. Ie nẽnten bejawab same sekali. Beterus karing sekali Imam Agung nike metakẽn lẽq Ie, "Napi Pelungguh Almasih, Bije saq asalne lẽman Saq Maheagung nike?" 62 Jawab Deside Isa, "Tiang niki Ie, dait selapuq side pade gen serioq Bije Manusie melinggih lẽq sedi kanan Allah Saq Mahekuase dait rauh dalem awan lẽman langit!" 63 Sesampun nike Imam Agung ngeroẽk-roẽk kuacene, dait bebase, "Ndẽq perlu saksi malik! 64 Side pade sampun dengah mẽsaq ucapan-ucapan-Ne saq menghine Allah. Mangkin napi keputusande?" Ie pade selapuq mutusang Deside Isa patut tehukum matẽ. 65 Beterus pire dengan mulai tijuh Deside Isa, dait ie pade tungkem penjarupan-Ne dait ngempuk Ie, terus bebase, "Cobaq badẽq, sai saq ngempuk Side?" Pengawal-pengawal ẽndah milu ngempuk Deside Isa. 66 Sewaktu Petrus masih araq lẽq lelẽah, salaq sopoq pelayan nine Imam Agung dateng ojok derike. 67 Waktu ie serioq Petrus mindu lẽq dẽkẽt api, ie perhatiang pacu-pacu muen Petrus, dait bebase, "Ndẽq napi side ẽndah bareng-bareng kance Deside Isa dengan Nazaret nike?" 68 Laguq Petrus nilas. "Mindah tiang dait tiang ndẽq ngerti napi maksut side," basen Petrus lẽq pelayan nike. Beterus Petrus lumbar ojok jebak gedẽng imam agung nike. Lẽq waktu nike, manuk ngungkung. 69 Pelayan nine nike serioq Petrus malik, dait bebase ẽndah tipaq dengan-dengan lẽq derike, "Ie mule salaq sopoq lẽman ie pade!" 70 Laguq Petrus nilas malik. Ndẽq ngonẽq sesampun nike, dengan-dengan lẽq derike bebase ẽndah tipaq Petrus, "Ndẽq bau tetilas malik side mule salaq sopoq dengan lẽman ie pade, sẽngaq side lẽman Galilea!" 71 Beterus Petrus mulai besumpah-sumpah, dait bebase, "Tiang ndẽq kenal dengan saq side pade maksut nike!" 72 Waktu nike ẽndah manuk ngungkung saq kedue kaline. Dait Petrus inget bahwe Deside Isa sampun bemanik lẽq ie, "Sendẽqman manuk ngungkung due kali, side telu kali nilas Tiang." Beterus Petrus nangis ẽroq asẽq.

Mark 15

1 Masih aru gati, selapuq Mahkamah Agame lantong imam-imam kepale, pemimpin-pemimpin dait ahli-ahli Taurat becat-becat berunding. Ie pade sẽkoq Deside Isa beterus jauq Ie dait nyerahang tipaq Pilatus. 2 Pilatus metakẽn lẽq Deside Isa, "Napi tetu Pelungguh raje dengan Yahudi?" Jawab Deside Isa, "Maraq nike basen pelungguh." 3 Imam-imam kepale nyampẽang luwẽq tuduhan tipaq Deside Isa. 4 Beterus Pilatus metakẽn malik lẽq Deside Isa, "Napi Pelungguh nẽnten kayun bejawab? Cobaq serioq luwẽq gati tuduhan saq ie pade tuduhang tipaq Pelungguh!" 5 Laguq Deside Isa nẽnten bejawab napi-napi malik, sehingge Pilatus bengaq. 6 Lẽq sebilang Perayaan Paskah, biasene Pilatus bẽbasang sopoq tahenan menurut pilẽqan dengan luwẽq. 7 Lẽq dalem bui, lẽq antare pemberontak-pemberontak saq sampun nyematẽq sewaktu kerusuhan, araq sopoq dengan aranne Barabas. 8 Dengan luwẽq bekumpul dait tunas lẽq Pilatus adẽq ie bẽbasang sopoq tahenan maraq biasene. 9 Pilatus beketuan lẽq ie pade, "Napi side pade mẽlẽ, tiang bẽbasang raje dengan Yahudi nike?" 10 Sẽngaq Pilatus sadar bahwe imam-imam kepale nyerahang Deside Isa lẽq ie cume lantaran talon atẽ. 11 Laguq imam-imam kepale hasut dengan luwẽq adẽqne tunas Pilatus bẽbasang Barabas umaq ie pade. 12 Beterus Pilatus bebase malik lẽq dengan luwẽq nike, "Lamun maraq nike, tiang harus kumbẽqang dengan saq side pade sebut raje dengan Yahudi nike?" 13 Ie pade nyurak, "Pakuq Ie lẽq kayuq salib!" 14 "Laguq pegawẽan jahat napi saq sampun Ie piaq?" Pilatus beketuan. Laguq siq suare saq belẽqan malik dengan-dengan nike bekuih, "Pakuq Ie lẽq kayuq salib!" 15 Pilatus mẽlẽ nyenengang angen dengan luwẽq nike, make ie bẽbasang Barabas umaq ie pade. Beterus ie prẽntahang dengan pecut Deside Isa, terus serahang-Ne jari tepakuq lẽq kayuq salib. 16 Deside Isa tejauq siq prajurit-prajurit ojok ruang pengadilan lẽq istane gubernur. Beterus selapuq pasukan tempoh bekumpul. 17 Terus ie pade kaduang Deside Isa jubah lempok lomaq dait miaq mahkote lẽman pẽmpang-pẽmpang beduwi, beterus kaduangne lẽq sirah Deside Isa. 18 Sesampun nike, ie pade ngucapang salam tipaq Ie. "Idup raje dengan Yahudi!" basen ie pade. 19 Ie pade empuk sirah Deside Isa kadu tunjang, terus ie pade tijuh Ie dait nyembah sujut lẽq arepan-Ne. 20 Sesampun ngoloq-oloq Deside Isa, ie pade lekaq jubah lempok lomaq nike terus kaduangne malik kuace-Ne mẽsaq. Beterus Ie tejauq ojok luah jari tepakuq lẽq kayuq salib. 21 Lẽq tengaq langan, ie pade paksaq sopoq dengan ngelẽmbah kayuq salib Deside Isa. Dengan nike baruq lẽman dẽse mẽlẽ tame ojok kote. (Aran dengan nike Simon, -- asalne lẽman Kirene -- amaqne Aleksander dait Rupus.) 22 Deside Isa tejauq ojok sopoq taoq aranne Golgota saq artine "Taoq Jerangkong". 23 Lẽq derike ie pade mẽlẽ ngaturin Deside Isa anggur saq becampur mur, laguq Deside Isa nẽnten kayun nginem anggur nike. 24 Beterus ie pade pakuq Deside Isa lẽq kayuq salib dait bagi-bagiang kuace-Ne kadu undian jari nentuang bagian sopoq-sopoq. 25 Ie tepakuq lẽq kayuq salib jam siwaq kelẽmaq. 26 Lẽq atas kayuq salib-Ne tepasang tulisan mengenai tuduhan tipaq Ie: "Raje Dengan Yahudi". 27 Bareng-bareng kance Deside Isa ẽndah, ie pade pakuq lẽq kayuq salib due perampok; sopoq lẽq sedi kanan dait sopoq malik lẽq sedi kiri-Ne. 28 Siq care nike telaksane saq tetulis dalem Kitab Suci: "Ie tame itungan lẽq antare dengan-dengan jahat." 29 Dengan-dengan saq liwat lẽq derike ngintek dait menghine Deside Isa, ie pade bebase, "Hai, Side saq mẽlẽ ngerobohang Gedẽng Allah terus gen penganjeng dalem telu jelo. 30 Cobaq turun lẽman kayuq salib nike dait selametang diriq-De!" 31 Maraq nike ẽndah imam-imam kepale dait ahli-ahli Taurat ngoloq-oloq Deside Isa. Ie pade bebase sopoq kance saq lain, "Ie nyelametang dengan lain, laguq diriq-Ne mẽsaq ndẽq bau Ie selametang! 32 Lamun Ie Almasih, Raje Israel, cobaq mangkin Ie turun lẽman kayuq salib nike, adẽq tiang pade serioq dait percaye lẽq Ie!" Dengan-dengan saq tepakuq lẽq kayuq salib bareng Deside Isa nike ẽndah menghine Deside Isa. 33 Jam due olas, sengonẽq telu jam selapuq wilayah negeri nike jari peteng. 34 Dait jam telu kebian, Deside Isa bekuih keras-keras, "Eloi, Eloi, lama sabaktani?" artine, "Ya Allah Tiang, ya Allah Tiang, kembẽq Deside menengang Tiang?" 35 Pire dengan saq nganjeng lẽq derike, dengah suare nike dait bebase, "Cobaq dengah, Ie ngempoh Elia!" 36 Salaq sopoq lẽman ie pade becat-becat lumbar bait bunge karang, terus celepne ojok dalem anggur saq pedis, beterus tancepne lẽq pucuk gegale, dait jonjongne ojok cangkem Deside Isa, sambil bebase, "Silaq ite serioq napi Elia rauh nurunang Ie lẽman kayuq salib nike." 37 Beterus Deside Isa bekuih keras-keras, dait nyerahang nyawe-Ne. 38 Kelambu saq begantung lẽq dalem Gedẽng Allah soẽk jari due lẽman atas jangke ojok bawaq. 39 Kepale pasukan saq nganjeng lẽq julu kayuq salib nike, serioq berembẽ Deside Isa ninggal. Kepale pasukan nike bebase, "Mule tetu dengan niki Bije saq asalne lẽman Allah!" 40 Lẽq derike araq ẽndah pire dengan nine saq kenyeke serioq selapuqne nike lẽman jaoq. Lẽq antarene araq Salome, Mariam Magdalena, dait Mariam inaqne Yakub saq bajang dait Yoses. 41 Ie pade dengan-dengan nine saq ngiring dait nulung Deside Isa sewaktu Ie lẽq Galilea. Dait araq luwẽq malik dengan-dengan nine lain lẽq derike saq sampun dateng ojok Yerusalem bareng-bareng kance Deside Isa. 42 Lẽq waktu serep jelo Yusup lẽman Arimatea dateng. Ie anggote Mahkamah Agame saq tehormatin. Ie ẽndah kenyeke ngantih piran Kerajaan Allah rauh. Jelo nike jelo persiepan (jelo sendẽqman jelo Sabat). Yusup baniang diriqne parek ojok Pilatus dait tunas jenazah Deside Isa. 44 Pilatus bengaq pirengang bahwe Deside Isa sampun ninggal. Jari ie prẽntahang dengan ngempoh kepale pasukan dait beketuan lẽq ie napi Deside Isa sampun ninggal. 45 Sesampun pirengang laporan prewire nike, Pilatus ngijinang Yusup bait jenazah Deside Isa. 46 Beterus Yusup beli kain lẽnen alus saq putẽq, dait sesampun nurunang jenazah Deside Isa, ie bungkus siq kain nike. Beterus ie toloq jenazah nike lẽq dalem sopoq makam saq tepiaq lẽq dalem bukit batu. Sesampun nike, ie gelompongang sopoq batu belẽq jari ngimpet lawang makam nike. 47 Lẽq waktu nike Mariam Magdalena dait Mariam inaqne Yoses merhatiang lẽq mbẽ Deside Isa tetoloq.

Mark 16

1 Sewaktu jelo Sabat sampun liwat, Mariam Magdalena, Mariam inaqne Yakub, dait Salome lumbar beli ramuan-ramuan jari minyakin jenazah Deside Isa. 2 Masih aru gati sewaktu baruq tiwoq jelo, lẽq jelo Ahad, ie pade lumbar ojok makam. 3 Lẽq tengaq langan ie pade bebase sopoq kance saq lainne, "Sai gen ngalihang ite batu pengimpet lawang makam?" Sẽngaq batu nike belẽq gati. Laguq sewaktu dateng lẽq derike ie pade serioq batu nike sampun ngalih. 5 Beterus ie pade tame ojok dalem makam nike. Lẽq dalemne lẽq sedi kanan, ie pade serioq sopoq dengan bajang saq ngengadu jubah putẽq kenyeke melinggih, dait ie pade tinjot. 6 Dengan bajang nike bebase, "Ndaq takut! Tiang taoq side pade boyaq Deside Isa dengan Nazaret saq sampun tepakuq lẽq kayuq salib nike. Ie ndẽq araq lẽq deriki. Ie sampun idup! Silaq serioq, niki taoq Ie tesarẽang siq ie pade. 7 Mangkin silaq lumbar, kabarang tipaq pengiring-pengiring-Ne, dait Petrus ẽndah. Pade badaq, 'Ie sampun senjuluq side pade lumbar ojok Galilea. Lẽq derike side pade gen serioq Ie, maraq saq sampun Ie manikang lẽq side.' " 8 Beterus ie pade sugul lẽman makam nike terus pelai lantaran tinjot dait takut. Ie pade ndẽq bebase napi-napi lẽq sai juaq lantaran takut. Secare singket ie pade nyampẽang selapuq pesen nike tipaq Petrus dait batur-baturne. Sesampun nike Deside Isa mẽsaq siq perantarean pengiring-pengiring-Ne beriteang lẽman Timuq ojok Bat berite saq suci dait saq ndẽq bau tebinaseang mengenai keselametan saq kekel nike. 9 Sesampun Deside Isa idup lẽman ninggal, masih aru gati lẽq jelo ahad, penembẽq gati Deside Isa nyatayang diriq tipaq Mariam Magdalena. Lẽman Mariam nike Deside Isa sampun nyugulang pituq roh jahat. 10 Make Mariam Magdalena lumbar badaqang peristiwe nike tipaq dengan-dengan saq tetep ngiring Deside Isa, saq kenyeke bedukecite dait nangis. 11 Laguq sewaktu ie pade dengah bahwe Deside Isa sampun idup dait bahwe Mariam sampun serioq Ie, ie pade ndẽq percaye. 12 Sesampun nike Ie nyatayang diriq siq rue saq lain tipaq due dengan lẽman ie pade, sewaktu deduaqne dalem kelampan ojok luah kote. 13 Jari ie pade tulak dait badaq hal nike tipaq saq lain-lainne. Laguq ie pade ndẽq percaye. 14 Ahirne Deside Isa nyatayang diriq lẽq solas pengiring-Ne sewaktu ie pade kenyeke bekelor. Ie pade teperinget siq Deside Isa sẽngaq ie pade kurang iman dait pagah gati sehingge ndẽq percaye lẽq dengan-dengan saq sampun serioq mẽsaq bahwe Deside Isa idup. 15 Beterus Deside Isa bemanik lẽq ie pade, "Silaq lumbar ojok seantẽro dunie dait beriteang Kabar Solah lẽman Allah tipaq selapuq mahluk. 16 Dengan saq percaye dait tebaptis gen selamet, laguq dengan saq ndẽq percaye gen tehukum. 17 Sebagẽ bukti bahwe ie pade percaye, dengan-dengan nike gen sediq roh jahat kadu aran Tiang; ie pade gen ngeraos kadu macem-macem base saq ndẽq ie pade kenal. 18 Lamun ie pade negel ulah atao nginem racun, ie pade ndẽq gen celake. Lamun ie pade noloq imene lẽq atas dengan-dengan saq sakit, dengan-dengan nike gen selah." 19 Sesampun Junjungan Saq Mulie Deside Isa bebaos kance ie pade, Ie kerangkatan ojok sorge. Lẽq derike Ie mrẽntah bareng kance Allah. 20 Make pengiring-pengiring-Ne lumbar dait nyampẽang Kabar Solah lẽman Allah ojok mbẽ-mbẽ. Dait Tuhan ẽndah bekarye bareng kance ie pade, dait tebuktiang siq tande-tande ajaip bahwe berite saq ie pade sampẽang nike mule kenaq.

Luke 1

1 Teopilus saq budiman, Luwẽq dengan sampun berusahe nulis secare teratur peristiwe-peristiwe saq sampun telaksane lẽq tengaq-tengaq ite. 2 Ie pade nulis sesuai maraq saq tesampẽang tipaq ite siq dengan-dengan saq serioq mẽsaq peristiwe-peristiwe nike lẽman penembẽq dait sesampun nike nyiarang kabarne. 3 Sesampun tiang selidik secare teliti selapuqne nike lẽman penembẽqne, tiang anggep solah jari nulis sopoq laporan saq teratur umaq side. 4 Tiang ngelaksaneang nike, adẽq side nenaoq bahwe napi saq sampun teajahang tipaq side mule kenaq. 5 Sewaktu Herodes jari raje negeri Yudea, araq sopoq imam aranne Zakaria. Ie termasuk golongan imam-imam Abia. Sebiniqanne ẽndah asalne lẽman keturunan Harun, aranne Elisabet. 6 Kehidupan senine-semame nike nyenengang Allah. Deduaqne taat lẽq selapuq prẽntah dait hukum-hukum Tuhan secare sempurne. 7 Ie pade ndẽq bedowẽ bije sẽngaq Elisabet bangkol dait deduaqne sampun lingsir. 8 Lẽq sopoq jelo, sewaktu golongan Abia mauq giliran, Zakaria ngelaksaneang tugas sebagẽ imam lẽq arepan Allah. 9 Siq undian, saq biasene telaksaneang siq imam-imam, Zakaria tetugasang tame ojok dalem Gedẽng Allah dait tunuq menyan. 10 Lẽq waktu upacare tunuq menyan telaksaneang, dengan luwẽq bedo'e lẽq luah. 11 Lẽq waktu nike malaẽkat Tuhan nyatayang diriq tipaq Zakaria. Malaẽkat nike nganjeng lẽq sedi kanan mẽje taoq tunuq menyan. 12 Sewaktu Zakaria serioq malaẽkat nike, ie bingung dait takut. 13 Laguq malaẽkat nike bebase, "Ndaq takut, Zakaria! Allah sampun pireng do'ende. Elisabet, seninende gen bijeang sopoq kanak mame. Side harus aranin ie Yahya. 14 Side gen bahagie dait cemoh gati, dait luwẽq dengan gen besukecite lamun kanak nike tebijeang! 15 Ie gen jari dengan belẽq lẽq arepan Tuhan, dait ie ndẽq gen nginem anggur atao ineman keras. Ie gen tekuasein siq Roh Allah lẽman tepetianang siq inaqne. 16 Luwẽq dengan Israel gen ie bimbing tulak tipaq Allah, Tuhan ie pade. 17 Siq roh dait kuase Elia ie gen jari utusan Tuhan. Ie gen damẽang dengan toaq kance bijene, dait dengan saq ndẽq taat gen ie pimpin tulak ojok pikiran saq kenaq. Siq care nike ie nyiepang sopoq umat saq patut bagi Tuhan." 18 "Berembẽ tiang nenaoq bahwe hal nike gen telaksane?" Zakaria metakẽn lẽq malaẽkat nike. "Tiang sampun toaq dait senine tiang ẽndah sampun toaq." 19 Jawab malaẽkat nike, "Tiang niki Jibril. Tiang ngelayanin Allah dait Ie saq ngutus tiang nyampẽang kabar solah niki tipaq side. 20 Napi saq tiang sampẽang gen telaksane lẽq waktune. Laguq lantaran side ndẽq percaye, side ndẽq tao ngeraos; side gen pakoq jangke napi saq tiang sampẽang nike telaksane." 21 Lẽq waktu nike, dengan-dengan tetep ngantih Zakaria. Ie pade bengaq kembẽq ie ngonẽq gati lẽq dalem Gedẽng Allah. 22 Dait lẽq waktu ie sugul, ie ndẽq tao ngeraos kance ie pade. Ie tetep doang ngebẽng isarat kadu imene, dait tetep pakoq. Make dengan-dengan ẽndah nenaoq bahwe Zakaria sampun serioq sopoq hal saq ajaip lẽq dalem Gedẽng Allah. 23 Sesampun tutuq mase tugasne lẽq Gedẽng Allah, Zakaria ulẽq ojok gedẽngne. 24 Ndẽq ngonẽq sesampun nike, Elisabet seninene betian, terus ndẽqne sugul-sugul lẽman lime bulan ngonẽqne. 25 Elisabet bebase, "Ahirne Tuhan nulung tiang dait ngapus kehinean tiang lẽq julun dengan." 26 Sewaktu Elisabet sampun betian enem bulan, Allah ngutus malaẽkat Jibril lumbar ojok Nazaret, sopoq kote lẽq daẽrah Galilea. 27 Jibril teutus tipaq sopoq dedare genten, aranne Mariam. Mariam nike sampun betunangan kance sopoq dengan aranne Yusup, keturunan Raje Daud. 28 Malaẽkat nike rauh tipaq Mariam dait bebase, "Salam, side saq teican paice! Tuhan bareng kance side!" 29 Sewaktu dengah basen malaẽkat nike Mariam tinjot, sehingge beketuan-tuan dalem angenne napi arti salam nike. 30 Make malaẽkat nike bebase lẽq ie, "Ndaq takut Mariam! Sẽngaq side sampun mauq paice lẽman Allah. 31 Side gen betian dait bijeang sopoq kanak mame. Harus side aranin Isa. 32 Ie gen jari agung dait tesebut Bije saq asalne lẽman Allah Saq Maheagung. Allah, Tuhante gen jariang Ie raje maraq Raje Daud, leluhur-Ne. 33 Dait Ie gen mrẽntah jari raje lẽq keturunan Yakub selaẽq-laẽqne. Kerajaan-Ne ndẽq gen tutuq." 34 "Laguq tiang masih dedare genten," basen Mariam tipaq malaẽkat nike, "berembẽ hal nike bau telaksane?" 35 Jawab malaẽkat nike, "Roh Suci gen rauh tipaq side, dait kuase Allah Saq Maheagung gen nguasein side. Keranaq nike bije saq gen tebijeang nike gen tesebut suci, Bije saq asalne lẽman Allah. 36 Setetune Elisabet, sanakde nike sampun betian enem bulan, timaq ie sampun lingsir dait dengan paran ie bangkol. 37 Sẽngaq bagi Allah nẽnten araq saq mustahil." 38 Beterus Mariam bebase, "Tiang niki pelayan Tuhan; menengang telaksane lẽq tiang maraq saq pelungguh sampẽang." Beterus malaẽkat nike lumbar bilin Mariam. 39 Pire waktu sesampun nike, Mariam lumbar ojok sopoq kote lẽq Yudea lẽq daẽrah pegunungan. 40 Ie lumbar ojok gedẽng Zakaria, dait sewaktu ie tame, ie ngucapang salam tipaq Elisabet. 41 Dait sewaktu Elisabet dengah salam Mariam, bebẽaq saq lẽq dalem tianne nike berunjaq-runjaq. Make Elisabet tekuasein siq Roh Suci, 42 terus bebase siq suare saq belẽq, "Side saq paling teberkahin lẽq antare selapuq dengan nine! Teberkahin bebẽaq saq gen side bijeang nike! 43 Sai tiang niki sehingge mamiq bini Junjungan tiang Saq Mulie rauh tipaq tiang? 44 Sewaktu tiang dengah salamde, bebẽaq dalem tian tiang berunjaq-runjaq saking cemohne. 45 Bahagie side, sẽngaq percaye bahwe napi saq temanikang siq Tuhan tipaq side gen telaksane!" 46 Mariam bebase, "Atẽn tiang mulieang Tuhan, 47 dait jiwen tiang besukecite sẽngaq Allah, Juruselamet tiang. 48 Ie iling lẽq tiang, hambe-Ne saq hine! Mulai mangkin selapuq bangse bebase tiang bahagie. 49 Sẽngaq Allah Saq Mahekuase ngelaksaneang hal-hal belẽq lẽq tiang. Pesẽngan-Ne nike suci. 50 Keturunan demi keturunan Ie ngicanin rahmat tipaq dengan saq takut lẽq Ie. 51 Siq gading-Ne saq perkase Ie miaq buyar dengan saq sombong, dait oreang rencane ie pade. 52 Raje-raje turunang-Ne lẽman tahte dait dengan hine teatasang kedudukanne. 53 Dengan lapah tepuasang siq selapuq kebajikan, dengan sugih tesediq nẽnten teicanin jauq napi-napi. 54 Ie nulung Israel, hambe-Ne, sẽngaq Ie iling lẽq rahmat-Ne, 55 maraq saq Ie janjiqang tipaq leluhurte, tipaq Ibrahim dait keturunanne jangke selaẽq-laẽqne." 56 Kire-kire telu bulan ngonẽqne Mariam ndot bareng Elisabet, baruq ie ulẽq ojok gedẽngne. 57 Sampun waktune Elisabet bebije. Ie bijeang sopoq kanak mame. 58 Tetangge-tetanggene dait kadang jarine dengah bahwe Tuhan sampun nyatayang rahmat-Ne saq belẽq gati lẽq Elisabet, ie pade ẽndah milu besukecite bareng kance ie. 59 Sewaktu bebẽaq nike beumur baluq jelo, ie pade dateng jari sunat kanak nike. Ie pade mẽlẽ ngaranin bebẽaq nike Zakaria, maraq aran bapaqne, 60 laguq Elisabet bebase, "Ndaq, ie harus tearanin Yahya!" 61 "Ndẽq sopoq dengan juaq lẽq antare keluargende bedowẽ aran maraq nike," basen ie pade lẽq Elisabet. 62 Beterus kadu isarat ie pade beketuan lẽq Zakaria aran napi saq mẽlẽ ie bẽng tipaq bebẽaq nike. 63 Zakaria tunas sopoq batu tulis, terus nulis, "Aranne Yahya." Ie pade selapuq bengaq. 64 Waktu nike ẽndah Zakaria tao ngeraos malik beterus ie mulieang Allah. 65 Tetangge-tetanggene selapuq takut, dait kabar nike nyebar ojok selapuq wilayah pegunungan Yudea. 66 Selapuq dengan saq dengah berite nike beketuan lẽq dalem angenne, "Jari napi bebẽaq nike ẽraq?" Sẽngaq Tuhan araq bareng kance ie. 67 Zakaria, bapaq bebẽaq nike tekuasein siq Roh Suci, sehingge ie nyampẽang pesen lẽman Tuhan. Ie bebase, 68 "Silaq ite memuji Allah, Tuhan bangse Israel, sẽngaq Ie sampun rauh tipaq umat-Ne dait bẽbasang ie pade. 69 Ie ngicanin ite penyelamet saq perkase, lẽman keturunan Daud, hambe-Ne. 70 Jaman laẽq, langan nabi-nabi-Ne saq suci, Ie sampun ngicanin janji-Ne 71 jari nyelametang ite lẽman musuhte, dait lẽman kuase dengan-dengan saq meriq lẽq ite. 72 Jari nyatayang rahmat-Ne tipaq leluhurte, janji-Ne saq suci nike gen Ie tepatin. 73 Ie besumpah tipaq Ibrahim, bapaq leluhurte, dait bejanji jari nyelametang ite lẽman musuhte, adẽq ite ndẽq takut ngelayanin Ie, 75 tetep suci dait tejariang kenaq lẽq arepan-Ne seumur idupte. 76 Side, anak tiang, gen tesebut nabi Allah Saq Maheagung, sẽngaq side teutus juluan lẽman Tuhan jari nyiepang Ie langan, 77 dait jari ngebẽng pengertian tipaq umat-Ne mengenai keselametan saq tedasarang pengampunan dose-dose ie pade, 78 siq rahmat dait belas kasihan lẽman Allahte, Ie rauh jari nyelametang ite. Maraq jelo saq tiwoq lẽq kelẽmaq aru, 79 maraq nike Ie ngicanin cahaye-Ne tipaq selapuq dengan saq idup lẽq dalem peteng dait ketakutan. Ie pimpin ite tipaq langan damẽ sejahtere." 80 Bije Zakaria nike sayan belẽq dait sayan kuat rohne. Ie ndot lẽq padang gurun, jangke dateng waktune ie harus nyatayang diriqne tipaq bangse Israel.

Luke 2

1 Lẽq waktu nike Kaisar Agustus mrẽntahang selapuq warge negare Kerajaan Roma daptarang diriqne jari tesensus. 2 Niki sẽnsus saq penembẽq telaksaneang sewaktu Kirenius jari gubernur negeri Siria. 3 Keranaq nike selapuq dengan lumbar daptarang diriqne lẽq kotene mẽsaq. 4 Yusup ẽndah berangkat lẽman Nazaret lẽq Galilea, ojok Betlehem lẽq Yudea, taoq Raje Daud tebijeang; sẽngaq Yusup keturunan Daud. 5 Yusup daptarang diriqne kance Mariam tunanganne, saq kenyeke betian. 6 Waktu ie pade lẽq Betlehem sampun wayene Mariam gen bebije. 7 Ie bijeang sopoq kanak mame, bijene saq sengake. Kanak nike bungkusne kadu kain lampin, terus toloqne lẽq dalem palung berisi jami; sẽngaq ie pade ndẽq mauq taoq mererepan. 8 Lẽq kelem nike araq pengarat-pengarat saq kenyeke jagaq dombe-dombene lẽq lendang pupaq lẽq daẽrah nike. 9 Selung-selung nganjeng malaẽkat Tuhan lẽq dẽkẽt ie pade, dait kemuliean Tuhan besinar menahin ie pade, dait ie pade takut gati. 10 Laguq malaẽkat nike bebase, "Ndaq takut! Sẽngaq tiang dateng jauq kabar solah tipaq side pade -- berite saq nyenengang gati tipaq selapuq dengan. 11 Jelo niki lẽq kote Daud sampun tebijeang Juruselamet, Almasih, Junjungan Saq Mulie. 12 Niki tandene: Side pade gen ndait sopoq bebẽaq tebungkus kadu kain lampin, dait tetindoqang lẽq dalem palung." 13 Selung-selung malaẽkat nike teiring siq luwẽq malaẽkat lain saq memuji Allah. Ie pade bebase, 14 "Kemuliean tipaq Allah lẽq taoq saq maheagung! Dait damẽ sejahtere lẽq gumi tipaq manusie saq nyenengang Allah!" 15 Sesampun malaẽkat-malaẽkat nike bilin ie pade dait tulak ojok sorge, pengarat-pengarat nike bebase sopoq kance saq lainne, "Silaq ite ojok Betlehem dait serioq peristiwe saq telaksane nike, saq temanikang siq Tuhan tipaq ite." 16 Ie pade becat-becat lumbar, beterus daitne Mariam kance Yusup, dait bebẽaq nike kenyeke tetindoqang lẽq dalem palung. 17 Waktu pengarat-pengarat serioq bebẽaq nike, ie pade nuturang napi saq tesampẽang siq pare malaẽkat mengenai bebẽaq nike. 18 Dait selapuq dengan bengaq dengah cerite pengarat-pengarat nike. 19 Laguq Mariam seboq selapuq hal nike lẽq dalem angenne dait tetep mikirang hal nike. 20 Pengarat-pengarat nike tulak sambil memuji dait mulieang Allah, sẽngaq selapuq saq sampun ie pade dengah dait serioq, pade maraq saq sampun tesampẽang siq malaẽkat tipaq ie pade. 21 Sesampun beumur baluq jelo, bebẽaq nike tesunat. Dait ie pade ngaranin Ie Isa, maraq saq tesampẽang siq malaẽkat tipaq ie pade, sendẽqman Ie tepetianang siq mamiq bini-Ne. 22 Tipaq wayene Mariam dait Yusup ngelaksaneang adat penyucian menurut Hukum Taurat Musa. Jari ie pade jauq Kanak nike ojok Yerusalem jari teserahang tipaq Tuhan. 23 Sẽngaq lẽq dalem Hukum Tuhan tetulis maraq niki, "Sebilang kanak mame saq sengake, harus tesuciang bagi Tuhan." 24 Ie pade ẽndah beniat ngaturang kurban sepacek kedit petuq atao due anak kedit dare, maraq saq tetentuang lẽq dalem Hukum Tuhan. 25 Waktu nike lẽq Yerusalem araq sopoq dengan aranne Simeon. Ie dengan solẽh dait taat lẽq Allah serte kenyeke ngantih penghiburan tipaq Israel. Roh Suci araq bareng kance ie, 26 dait Roh Suci sampun nyampẽang lẽq ie bahwe ie ndẽq gen ninggal sendẽqman serioq Almasih saq tejanjiqang siq Tuhan. 27 Siq bimbingan Roh Suci, Simeon tame ojok Gedẽng Allah. Lẽq waktu nike Yusup dait Mariam jauq tame Deside Isa, saq masih kodẽq nike jari ngelaksaneang upacare saq teprẽntahang siq Hukum Taurat. 28 Make Simeon bait Kanak nike dait umbaq Ie, terus Simeon memuji Allah, 29 "Mangkin Tuhan, menengang hambe Deside niki lumbar lẽq dalem damẽ sejahtere, sesuai manik Deside, 30 sẽngaq siq penenteng tiang mẽsaq sampun tiang serioq keselametan saq lẽman Deside, 31 nike keselametan saq sampun Deside siepang umaq selapuq bangse, 32 nike terang saq nyatayang pekayunan Deside umaq bangse-bangse lain, dait jari kemuliean bagi umat Deside, Israel." 33 Yusup dait Mariam jari bengaq dengah napi saq teucapang siq Simeon mengenai Bije ie pade. 34 Simeon ngucapang berkah lẽq ie pade, dait bebase lẽq Mariam, mamiq bini Kanak nike, "Kanak niki sampun tetentuang siq Allah jari binaseang atao jari nyelametang luwẽq dengan Israel. Ie ẽndah gen jari tande saq nimbulang pertentangan, 35 sehingge pikiran dait angen luwẽq dengan jari nyate. Kesedihan gen nusuk atẽnde maraq klẽwang saq merang." 36 Araq ẽndah sopoq nabi nine saq sampun lingsir gati, aranne Hana, bije Panuel lẽman suku Asyer. Sesampun pituq taun merariq, 37 Hana jari bebalu, dait mangkin umurne baluq pulu empat taun. Sengonẽq nike ie ndẽq uwah bilin Gedẽng Allah. Kenjelo-kekelem ie beribadah tipaq Allah lẽq derike dait bedo'e kance puase. 38 Tepat waktu nike ẽndah ie dateng ojok derike, terus ngucapang syukur tipaq Tuhan dait bebaos mengenai Kanak nike tipaq selapuq dengan saq ngantih waktu pembẽbasan Yerusalem. 39 Sesampun Yusup dait Mariam ngelaksaneang selapuq saq tewajibang Hukum Tuhan, ie pade ulẽq ojok Nazaret lẽq Galilea. 40 Kanak nike sayan belẽq dait kuat. Ie bijaksane gati dait rahmat Allah araq lẽq Ie. 41 Sebilang taun mamiq bini dait mamiq laki Deside Isa lumbar ojok Yerusalem jari ngerayeang Jelo Paskah. 42 Dait sewaktu Deside Isa beumur due olas taun, ie pade lumbar ojok perayaan nike maraq biasene. 43 Sesampun perayaan nike inggas ie pade ulẽq, laguq Deside Isa, Bijene nike, masih ndot lẽq Yerusalem, ndẽq tetaoq siq mamiq bini dait mamiq laki-Ne. 44 Ie pade paran Deside Isa lumbar turut rombongan. Sesampun lampaq sejeloan, baruq ie pade boyaq Deside Isa lẽq antare selapuq keluarge dait selapuq saq ie pade kenal. 45 Laguq ie pade ndẽq ndait Ie, jari ie pade tulak ojok Yerusalem boyaq Deside Isa. 46 Sesampun telu jelo boyaq Deside Isa, daitne Deside Isa araq lẽq Gedẽng Allah kenyeke melinggih pirengang guru-guru agame dait metakẽn mengenai luwẽq hal lẽq ie pade. 47 Selapuq dengan saq dengahang Ie bengaq lantaran pengertian saq araq lẽq Ie dait jawaban-jawaban saq Ie sampẽang. 48 Mamiq bini dait mamiq laki-Ne ẽndah bengaq serioq Ie. Mamiq bini-Ne bebase lẽq Ie, "Nune, kembẽq maraq niki entan-De lẽq tiang pade? Bapaq-De dait tiang kuatir boyaq Side!" 49 Jawab Deside Isa, "Kembẽq side pade boyaq Tiang? Napi side pade ndẽq nenaoq Tiang harus araq lẽq dalem gedẽng Bapa Tiang?" 50 Laguq ie pade ndẽq ngerti jawaban Deside Isa. 51 Beterus Deside Isa mantuk bareng ie pade ojok Nazaret, dait Deside Isa taat lẽq ie pade. Selapuq hal nike seboqne lẽq dalem angenne siq Mariam. 52 Deside Isa jari sayan belẽq dait sayan bijaksane, serte sayan tekasihin siq Allah dait manusie.

Luke 3

1 Lẽq taun kelime olas pemrẽntahan Kaisar Tiberius, Pontius Pilatus jari gubernur lẽq Yudea, dait Herodes mrẽntah lẽq Galilea, Pilipus semetonne Herodes mrẽntah lẽq wilayah Iturea dait lẽq Trakonitis, dait Lisanias mrẽntah lẽq Abilene. 2 Saq jari imam-imam agung, Hanas dait Kayapas. Lẽq taun nike Allah bemanik tipaq Yahya, bije Zakaria lẽq padang gurun. 3 Make Yahya lumbar ojok selapuq daẽrah Kokoq Yordan dait nyampẽang berite lẽman Allah. Yahya behotbah, "Pade tobat lẽman dose-dosende, dait side harus tebaptis, adẽq Allah ngampunin side." 4 Nike sesuai maraq saq tetulis lẽq dalem kitab Nabi Yesaya: "Araq dengan bekuih-kuih lẽq padang gurun, 'Pade siepang langan umaq Tuhan, rateang langan umaq Ie. 5 Sembilang tembẽrẽng gen teuruk, sebilang gunung dait bukit terateang. Langan saq bẽngkok-bẽngkok gen telomboqang, dait langan saq lekok-lekok terateang. 6 Dengan-dengan lẽq seantẽro dunie gen serioq keselametan saq lẽman Allah!' " 7 Luwẽq dengan dateng ojok Yahya jari tebaptis. Yahya bebase lẽq ie pade, "Side dengan jahat! Sai saq badaq bahwe side bau selamet lẽman hukuman Allah saq gen dateng? 8 Nyatayang siq perbuatande bahwe side sampun betobat lẽman dose-dosende! Ndaq bebase dalem angende bahwe Ibrahim nike bapaq tiang pade. Tiang badaq side: Lẽman batu-batu niki ẽndah Allah sanggup miaqang Ibrahim keturunan. 9 Kandik sampun tesadangang jari ngerebaq lolo jangke akah-akahne. Sebilang lolo saq ndẽq ngasilang buaq saq solah gen terebaq dait tetetẽh ojok dalem api!" 10 Dengan-dengan nike beketuan lẽq Yahya, "Jari, napi saq harus tiang pade piaq?" 11 Jawab Yahya, "Dengan saq bedowẽ due kelambi, harus ngebẽng sopoq tipaq dengan saq ndẽq bedowẽ; dait dengan saq bedowẽ keloran, gawẽq maraq nike ẽndah." 12 Penagih-penagih pajek ẽndah dateng ojok Yahya jari tebaptis. Ie pade beketuan, "Bapaq Guru, napi saq harus tiang pade piaq?" 13 Jawab Yahya, "Ndaq nagih luwẽqan lẽman napi saq sampun tetentuang." 14 Araq ẽndah prajurit saq beketuan, "Berembẽ lẽq tiang pade? Napi saq harus tiang pade piaq?" Jawab Yahya, "Ndaq peres sai juaq dait ndaq ngerampas kẽpẽng kadu tuduhan-tuduhan palsu. Cukupang diriqde siq gajinde!" 15 Waktu nike, dengan-dengan mulai beketuan-tuan, napi Yahya nike Almasih saq ie pade antih. 16 Keranaq nike Yahya bebase lẽq ie pade selapuq, "Tiang baptis side kadu aiq, laguq laun gen rauh Dengan saq belẽqan kuasene lẽman tiang. Jari lekaq tali sepatu-Ne doang tiang ndẽq patut. Ie gen baptis side kadu Roh Suci dait api. 17 Lẽq gading-Ne araq klẽong jari nampiq selapuq gandum jangke bersi. Selapuq gandumne gen tekumpulang lẽq dalem lumbung, laguq selapuq gambasne gen Ie tunuq lẽq api saq ndẽq iniq pedaq!" 18 Siq luwẽq nasẽhat lain Yahya beriteang Kabar Solah tipaq dengan luwẽq. 19 Laguq Herodes, penguase Galilea, teperinget siq Yahya, lantaran Herodes merariq kance Herodias, sebiniq sanakne, dait mengenai selapuq kejahatan lain saq sampun ie piaq. 20 Laguq Herodes malahan ngeromboq kejahatan-kejahatanne, ie tamaq Yahya ojok dalem bui. 21 Sesampun selapuq dengan nike tebaptis, Deside Isa ẽndah tebaptis. Dait sewaktu Deside Isa kenyeke bedo'e, langit kebukaq, 22 dait Roh Suci turun ojok atas-Ne maraq ruen kedit dare. Dait kedengahan suare lẽman langit, "Side Bije Tiang saq Tiang kasihin. Side nyenengang Tiang." 23 Lẽq waktu Deside Isa mulai karye-Ne, Ie beumur kire-kire telung dase taun. Menurut pendapet dengan, Ie bijene Yusup, Yusup bijene Eli, 24 Eli bijene Matat, Matat bijene Lewi, Lewi bijene Malki, Malki bijene Yanai, Yanai bijene Yusup, 25 Yusup bijene Matica, Matica bijene Amos, Amos bijene Nahum, Nahum bijene Hesli, Hesli bijene Nagai, 26 Nagai bijene Maat, Maat bijene Matica, Matica bijene Simei, Simei bijene Yosek, Yosek bijene Yoda, 27 Yoda bijene Yohanan, Yohanan bijene Resa, Resa bijene Zerubabel, Zerubabel bijene Sealtiel, Sealtiel bijene Neri, 28 Neri bijene Malki, Malki bijene Adi, Adi bijene Kosam, Kosam bijene Elmadam, Elmadam bijene Er, 29 Er bijene Yesua, Yesua bijene Eliezer, Eliezer bijene Yorim, Yorim bijene Matat, Matat bijene Lewi, 30 Lewi bijene Simeon, Simeon bijene Yehuda, Yehuda bijene Yusup, Yusup bijene Yonam, Yonam bijene Elyakim, 31 Elyakim bijene Melea, Melea bijene Mina, Mina bijene Matata, Matata bijene Natan, Natan bijene Daud, 32 Daud bijene Isai, Isai bijene Obed, Obed bijene Boas, Boas bijene Salmon, Salmon bijene Nahason, 33 Nahason bijene Aminadab, Aminadab bijene Admin, Admin bijene Arni, Arni bijene Hezron, Hezron bijene Perez, Perez bijene Yehuda, 34 Yehuda bijene Yakub, Yakub bijene Ishak, Ishak bijene Ibrahim, Ibrahim bijene Terah, Terah bijene Nahor, 35 Nahor bijene Serug, Serug bijene Rehu, Rehu bijene Peleg, Peleg bijene Eber, Eber bijene Salmon, 36 Salmon bijene Kenan, Kenan bijene Arpaksad, Arpaksad bijene Sem, Sem bijene Nuh, Nuh bijene Lamek, 37 Lamek bijene Metusalah, Metusalah bijene Henok, Henok bijene Yared, Yared bijene Mahalaleel, Mahalaleel bijene Kenan, 38 Kenan bijene Enos, Enos bijene Set, Set bijene Adam, Adam manusie penembẽq saq tecipteang siq Allah.

Luke 4

1 Deside Isa tekuasein siq Roh Suci lẽq waktu Ie bilin Kokoq Yordan terus Ie tepimpin siq Roh Suci nike ojok padang gurun. 2 Lẽq derike Deside Isa tecobe siq Belis petang dase jelo ngonẽqne. Sengonẽq nike, Ie nẽnten daharang napi-napi. Beterus Ie jari seduk. 3 Belis matur lẽq Deside Isa, "Lamun Pelungguh Bije saq asalne lẽman Allah, manikang batu niki jari ruti." 4 Jawab Deside Isa, "Araq tetulis lẽq dalem Kitab Suci bahwe: 'Manusie ndẽqne cume idup lẽman ruti doang.' " 5 Terus Belis jauq Deside Isa ojok taoq saq atas, dait araq sepengkejep doang Belis petitoqang Deside Isa selapuq kerajaan lẽq dunie. 6 Beterus Belis matur tipaq Deside Isa, "Selapuq kekuasean dait kesugihan niki gen tiang aturin tipaq Pelungguh, sẽngaq selapuqne sampun teserahang ojok tiang dait tiang bau ngebẽng lẽq sai juaq saq tiang mẽlẽ bẽng. 7 Selapuqne nike gen jari dowẽn Pelungguh, lamun Pelungguh sujut nyembah tiang." 8 Jawab Deside Isa, "Lẽq dalem Kitab Suci araq tetulis, 'Pade sembah Allah, Tuhan side dait tipaq Ie doang side beribadah.' " 9 Beterus Belis jauq Deside Isa ojok Yerusalem dait toloq-Ne lẽq atas buwung Gedẽng Allah. Belis matur lẽq Deside Isa, "Lamun Pelungguh Bije saq asalne lẽman Allah, cobaq Pelungguh nimproh lẽman deriki. 10 Sẽngaq araq tetulis lẽq dalem Kitab Suci, 'Allah gen mrẽntahang malaẽkat-malaẽkat-Ne jari jagaq Pelungguh.' 11 Dait ẽndah, 'Malaẽkat-malaẽkat gen sangklap Pelungguh kadu ime ie pade, adẽq cokor Pelungguh nẽnten kedantuk lẽq batu.' " 12 Jawab Deside Isa, "Lẽq dalem Kitab Suci tetulis, 'Ndaq Side cobe Allah, Tuhan side!' " 13 Sesampun Belis engkah cobe Deside Isa kadu segale macem care, ie bilin Deside Isa dait ngantih waktu saq tepat. 14 Siq kuase Roh Allah Deside Isa tulak ojok Galilea. Berite mengenai Deside Isa nyebar ojok selapuq daẽrah nike. 15 Deside Isa ngajahang lẽq balẽ-balẽ ibadah, dait selapuq dengan muji Ie. 16 Deside Isa lumbar ẽndah ojok Nazaret, taoq Ie tebelẽqang. Lẽq jelo Sabat maraq biasene Ie lumbar ojok balẽ ibadah. Deside Isa nganjeng jari bace Kitab Suci, 17 terus Ie teaturin kitab Nabi Yesaya. Deside Isa bukaq gulungan kitab nike, terus dait-Ne ayat niki, 18 "Roh Tuhan araq lẽq Tiang, sẽngaq Allah sampun nyuciang dait ngesahang Tiang jari beriteang Kabar Solah tipaq dengan miskin. Allah ngutus Tiang jari ngumumang tipaq dengan tawanan bahwe ie pade gen tebẽbasang dait tipaq dengan bute bahwe ie pade gen tao nyerioq malik; jari bẽbasang dengan saq tejajah, 19 jari beriteang taun rahmat Tuhan sampun rauh." 20 Deside Isa gulung malik kitab nike, dait tulakang-Ne ojok petugas, beterus melinggih. Selapuq dengan lẽq dalem balẽ ibadah nike perhatiang Ie. 21 Terus Deside Isa mulai bebaos lẽq ie pade maraq niki, "Lẽq jelo niki, ayat-ayat Kitab Suci niki sampun telaksane sewaktu side pade dengahang ayat-ayat nike." 22 Selapuq saq Ie ucapang bagus gati, sehingge ie pade takjub dait muji Ie. Ie pade bebase, "Tekan Ie bije Yusup?" 23 Make Deside Isa bemanik lẽq ie pade, "Pasti side pade gen kadu sesenggak niki lẽq Tiang, 'Tabib, selahang diriq-De mẽsaq. Dait silaq piaq lẽq kampung asal Pelungguh mẽsaq keajaipan saq tiang pade dengah Pelungguh piaq lẽq Kapernaum!' " 24 Deside Isa bemanik malik, "Tiang badaq side, setetune ndẽq araq nabi saq tehormatin lẽq kampung asalne mẽsaq. 25 Laguq dengahang: lẽq jaman Nabi Elia, sewaktu ndẽq turun ujan telu taun enem bulan ngonẽqne, araq musibah kelapahan lẽq selapuq negeri. Lẽq waktu nike luwẽq bebalu lẽq Israel. 26 Timaq maraq nike Allah nẽnten ngutus Nabi Elia lumbar ojok salaq sopoq bebalu-bebalu nike laguq cume tipaq sopoq bebalu lẽq Sarpat lẽq daẽrah Sidon. 27 Maraq nike ẽndah lẽq jaman Nabi Elisa, araq luwẽq dengan saq sakit kusta lẽq Israel, laguq dengan-dengan nike ndẽq araq saq teselahang, kecuali Naaman dengan Siria nike." 28 Selapuq dengan lẽq balẽ ibadah nike sili gati sewaktu dengah hal nike. 29 Ie pade nganjeng beterus tundungne Deside Isa ojok luah kote dait jauqne Deside Isa ojok tembẽrẽng gunung, saq araq lẽq luah kote nike. Ie pade beniat jelek Deside Isa ojok dalem jurang. 30 Laguq Deside Isa nerobos dengan luwẽq nike, terus lumbar. 31 Beterus Deside Isa lumbar ojok kote Kapernaum lẽq Galilea. Lẽq derike Deside Isa ngajahang dengan-dengan lẽq jelo Sabat. 32 Ie pade takjub dengahang pengajahan Deside Isa, sẽngaq ucapan-ucapan-Ne penoq kuase. 33 Lẽq dalem balẽ ibadah nike, araq sopoq dengan saq tekuasein siq roh jahat. Dengan nike bekuih-kuih siq suare saq keras, 34 "Deside Isa, dengan Nazaret, napi saq gen Pelungguh piaq lẽq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh Saq Suci lẽman Allah!" 35 Laguq Deside Isa semprak roh jahat nike, "Tedoq sugul lẽman dengan niki!" Beterus roh jahat nike timpak dengan nike lẽq julu ie pade selapuq, terus sugul lẽman dengan nike dait ndẽq nyakitin ie. 36 Selapuq dengan bengaq, dait bebase sopoq kance saq lain, "Luar biase manik-Ne. Siq wibawe dait kuase, Ie mrẽntahang roh-roh jahat sugul, dait ie pade ẽndah sugul!" 37 Make kabar mengenai Deside Isa nyebar lẽq selapuq wilayah nike. 38 Deside Isa bilin balẽ ibadah nike, beterus lumbar ojok gedẽng Simon. Mentoaq nine Simon kenyeke sakit telih panas, dait dengan-dengan tunas lẽq Deside Isa adẽq nulung ie. 39 Beterus Deside Isa nganjeng lẽq dẽkẽt mentoaq Simon nike, terus Ie bemanik siq suare saq belẽq jari nyelahang penyakit telih panas nike. Penyakit nike telang, dait mentoaq Simon langsung ures dait ngelayanin ie pade. 40 Sewaktu serep jelo, selapuq dengan pade jauq tipaq Deside Isa semeton-semetonne saq ngidap macem-macem penyakit. Deside Isa noloq gading-Ne lẽq atas ie pade sopoq-sopoq dait selahang ie pade. 41 Roh-roh jahat ẽndah sugul lẽman luwẽq dengan, sambil bekuih-kuih, "Pelungguh Bije saq asalne lẽman Allah!" Laguq Deside Isa semprak ie pade dait nẽnten ngijinang ie pade ngeraos, sẽngaq ie pade nenaoq bahwe Deside Isa nike Almasih. 42 Sewaktu mulai tiwoq jelo, Deside Isa bilin kote nike beterus lumbar ojok sopoq taoq saq sepi. Dengan-dengan mulai boyaq Ie, terus waktu ie pade ndait Deside Isa, ie pade berusahe adẽq Deside Isa sampunang bilin ie pade. 43 Laguq Deside Isa bemanik, "Kabar Solah mengenai Kerajaan Allah harus Tiang sampẽang ẽndah lẽq kote-kote lain, sẽngaq jari hal nike Allah ngutus Tiang ojok dunie." 44 Keranaq nike Deside Isa nyampẽang Kabar Solah lẽman Allah lẽq selapuq balẽ-balẽ ibadah lẽq Yudea.

Luke 5

1 Lẽq sopoq waktu, Deside Isa nganjeng lẽq sedin Danao Genesaret. Luwẽq dengan bedesek-desekan jari dengahang Manik Allah. 2 Deside Isa cingakin due perau lẽq sedin danao nike; nelayan-nelayanne sampun turun lẽman perau-perau nike dait ie pade kenyeke bisoq jaringne. 3 Deside Isa taẽk ojok salaq sopoq perau, perau nike peraune Simon, beterus Ie manikang Simon dorong peraune nike jaoqan sekediq lẽman sedin danao. Deside Isa melinggih lẽq dalem perau nike dait mulai ngajahang dengan luwẽq. 4 Sesampun tutuq ngajahang, Deside Isa bemanik lẽq Simon, "Silaq dayung peraunde ojok taoq saq dalem, terus pencar jaringde jari bau empaq." 5 Simon matur, "Guru, sekeleman tiang pade lelah begawẽan, laguq ndẽq mauq napi-napi! Laguq lantaran Pelungguh saq manikang, tiang gen pencar jaring tiang malik." 6 Sesampun ie pade laksaneang hal nike, ie pade luwẽq gati mauq empaq jangke jaring ie pade mulai roẽk. 7 Keranaq nike ie pade ngẽndẽng tulung lẽq batur-batur ie pade saq araq lẽq perau saq lain. Batur-baturne nike pade dateng beterus ie pade bareng-bareng ngisiq kedue perau nike penoq siq empaq, jangke perau-perau nike jaqne ketelep. 8 Waktu Simon serioq hal nike, ie sujut lẽq arepan Deside Isa terus matur, "Silaq bilin tiang, Junjungan Saq Mulie! Sẽngaq tiang dengan bedose!" 9 Simon dait selapuq dengan saq bareng kance ie bengaq lantaran luwẽq gati ie pade mauq empaq. 10 Maraq nike ẽndah batur-baturne Simon, Yakub dait Yahya, bije-bije Zebedeus. Deside Isa bemanik lẽq Simon, "Ndaq takut! Mulai mangkin side gen jaring manusie." 11 Simon dait batur-baturne kedeng perau-perau nike ojok sedin danao, beterus bilin selapuqne, terus ngiring Deside Isa. 12 Lẽq sopoq jelo, Deside Isa araq lẽq sopoq kote. Lẽq derike araq sopoq dengan mame saq awakne penoq siq penyakit kuste. Sewaktu ie serioq Deside Isa, ie sujut lẽq arepan-Ne sambil tunas, "Paq, lamun Pelungguh kayun, Pelungguh bau nyelahang tiang!" 13 Deside Isa jamah dengan nike dait bemanik, "Tiang mẽlẽ, mangkin side selah!" Waktu nike ẽndah penyakitne telang. 14 Beterus Deside Isa balaq dengan nike tuturang lẽq sai-sai, dait bemanik-Ne, "Silaq lumbar ojok imam, dait tunas ie pastiang bahwe side sampun selah. Beterus lumbar ngaturang kurban maraq saq teprẽntahang Musa, jari bukti tipaq dengan-dengan bahwe side tetu-tetu sampun selah." 15 Laguq kabar mengenai Deside Isa sayan nyebar ojok mbẽ-mbẽ, dait luwẽq dengan dateng jari dengahang Ie dait tunas adẽq teselahang penyakit-penyakitne. 16 Laguq Deside Isa lumbar jari bedo'e ojok taoq saq sepi. 17 Lẽq sopoq jelo sewaktu Deside Isa kenyeke ngajahang, araq dengan-dengan Parisi dait ahli-ahli Taurat melinggih lẽq derike. Ie pade dateng lẽman Yerusalem, dait lẽman kote-kote lẽq Galilea dait Yudea. Kuase Tuhan araq lẽq Deside Isa sehingge Ie tao nyelahang dengan-dengan sakit. 18 Lẽq waktu nike araq pire dengan dateng jauq sopoq dengan kẽpaq saq tetindoqang lẽq atas tipah. Ie pade berusahe jauq dengan nike ojok dalem balẽ adẽqne bau toloq ie lẽq arepan Deside Isa. 19 Laguq lantaran luwẽq gati dengan lẽq derike, ie pade ndẽq bau jauq ie tame. Keranaq nike ie pade taẽkang dengan kẽpaq nike ojok atas atep balẽ. Beterus ie pade bungkar atep, dait nurunang ie bareng-bareng kance tipahne lẽq arepan Deside Isa lẽq tengaq-tengaq dengan luwẽq nike. 20 Waktu Deside Isa cingakin belẽq gati iman ie pade, Deside Isa bemanik lẽq dengan nike, "Semeton, dosende sampun teampunin." 21 Ahli-ahli Taurat dait dengan-dengan Parisi mulai beketuan lẽq dalem angenne, "Sai dengan niki? Ie menghine Allah? Sai saq bau ngampunin dose selain Allah?" 22 Deside Isa wikan saq ie pade ketuanang. Jari Deside Isa bemanik, "Kembẽq side pade beketuan-tuan maraq nike lẽq dalem angende? 23 Mbẽ saq molahan, ngucapang, 'Dosende sampun teampunin', atao ngucapang, 'Ures dait lampaq?' 24 Laguq adẽq side pade nenaoq bahwe lẽq dunie niki Bije Manusie bekuase ngampunin dose." Beterus Deside Isa bemanik lẽq dengan saq kẽpaq nike, "Ures, angkat tipahde, dait ulẽq!" 25 Dengan nike langsung ures lẽq julu ie pade selapuq, terus ngangkat tipahne dait ulẽq sambil mulieang Allah. 26 Ie pade selapuq takjub gati terus mulieang Allah. Dait siq perasaan takut, ie pade bebase, "Ajaip gati peristiwe saq ite saksiang jelo niki!" 27 Sesampun nike Deside Isa sugul dait cingakin sopoq dengan penagih pajek, aranne Lewi, kenyeke tokol lẽq taoqne begawẽan. Deside Isa bemanik lẽq ie, "Silaq turut Tiang." 28 Beterus Lewi nganjeng dait bilin selapuqne, terus ngiring Deside Isa. 29 Sesampun nike Lewi ngaraqang gawẽ lẽq gedẽngne umaq Deside Isa. Luwẽq penagih pajek dait dengan-dengan lain milu medaran bareng-bareng kance ie pade. 30 Dengan-dengan Parisi dait ahli-ahli Taurat ndẽq seneng, terus bebase lẽq pengiring-pengiring Deside Isa, "Kembẽq side selapuq medaran dait nginem kance penagih pajek dait dengan-dengan bedose?" 31 Jawab Deside Isa tipaq ie pade, "Dengan saq sẽhat ndẽq merluang tabib; cume dengan saq sakit doang. 32 Tiang dateng ndẽqne jari ngempoh dengan-dengan saq nganggep diriqne sampun kenaq, laguq dengan-dengan saq bedose adẽq ie pade betobat lẽman dose-dose ie pade." 33 Dengan-dengan Parisi nike matur ẽndah lẽq Deside Isa, "Pengiring Yahya dait pengiring dengan Parisi rimpes puase dait bedo'e. Laguq pengiring-pengiring Pelungguh bekelor dait nginem." 34 Jawab Deside Isa lẽq ie pade, "Segerah side pade suruq temuẽ-temuẽ pade puase lẽq gawẽ ngawinang lamun pengantẽn mame masih araq bareng-bareng kance ie pade? Pasti ndẽq! 35 Laguq gen dateng waktune pengantẽn mame nike tebait lẽman ie pade. Lẽq waktu nike baruq ie pade gen puase." 36 Beterus Deside Isa nyeriteang tipaq ie pade perumpamean niki, "Ndẽq araq dengan saq nampel kelambi lotoh kadu bakal saq tebait lẽman kelambi saq masih baru. Sẽngaq lamun maraq nike entane, kelambi saq masih baru nike gen roẽk. Dait bakal saq tekadu nampel nike ẽndah ndẽqne cocok kance kelambi saq lotoh. 37 Maraq nike ẽndah ndẽq araq dengan saq ngisiq aiq anggur saq baru lẽq dalem kantong lẽndong saq lebung, sẽngaq aiq anggur baru nike gen miaq kantong nike bedah. Make anggurne tumpah dait kantongne sẽde. 38 Anggur saq baru harus teisiq lẽq dalem kantong saq baru ẽndah. 39 Maraq nike ẽndah ndẽq araq sopoq dengan juaq saq mẽlẽ nginem anggur baru sesampun nginem anggur saq let, sẽngaq basen ie pade, 'Anggur saq let nike maiqan.' "

Luke 6

1 Lẽq sopoq jelo, waktu nike jelo Sabat, Deside Isa kance pengiring-pengiring-Ne bemargi lẽq lendang gandum. Pengiring-pengiring-Ne pade bau gandum. Ie pade osok gandum nike kadu imene, terus ie pade kelorang. 2 Dengan-dengan Parisi bebase, "Kembẽq side pade piaq hal saq ndẽq tekanggo telaksaneang lẽq jelo Sabat?" 3 Jawab Deside Isa, "Napi side pade ndẽq uwah bace napi saq telaksaneang Daud, sewaktu ie dait dengan-dengan saq ngiring ie lapah? 4 Daud tame ojok dalem Gedẽng Allah terus bait ruti saq sampun teaturang tipaq Allah, terus kelorangne dait bẽngne tipaq pengiring-pengiringne, padahal ruti nike ndẽq kanggo tekelor kecuali siq imam-imam?" 5 Terus Deside Isa bemanik, "Bije Manusie nike Penguase jelo Sabat!" 6 Lẽq jelo Sabat saq lain, Deside Isa lumbar ojok balẽ ibadah terus ngajahang. Lẽq derike araq dengan saq ime kananne matẽ setowẽq. 7 Ahli-ahli Taurat dait dengan Parisi mẽlẽ boyaq kesalaqan Deside Isa adẽqne bau ngelaporang Ie. Jari ie pade tetep merhatiang napi Ie gen nyelahang dengan lẽq jelo Sabat. 8 Laguq Deside Isa wikan pikiran ie pade. Make Deside Isa bemanik lẽq dengan saq matẽ setowẽq imene nike, "Silaq nganjeng lẽq deriki lẽq julu!" Dengan nike ures, terus nganjeng lẽq derike. 9 Beterus Deside Isa beketuan lẽq dengan-dengan saq araq lẽq derike, "Mbẽ saq tekanggoang lẽq jelo Sabat, solah atao gawẽq hal saq jahat, nyelametang nyawe dengan atao nyematẽq dengan?" 10 Deside Isa cingakin sekelining ie pade selapuq, terus bemanik tipaq dengan nike, "Ulurang imende." Dengan nike ngulurang imene, terus imene jari selah. 11 Laguq ahli-ahli Taurat dait dengan-dengan Parisi nike sili gati, terus ie pade berunding, napi saq gen ie pade bau laksaneang tipaq Deside Isa. 12 Lẽq waktu nike Deside Isa taẽk ojok sopoq bukit jari bedo'e. Lẽq derike Ie bedo'e tipaq Allah sekeleman. 13 Sesampun menah, Ie ngemanikang pengiring-pengiring-Ne, terus pilẽq due olas dengan lẽman ie pade, Deside Isa aranin due olas dengan nike rasul-rasul. Aran dengan-dengan nike: 14 Simon (saq Ie sebut ẽndah Petrus), dait Andreas semetonne Simon; Yahya dait Yakub, Pilipus, Bartolomeus, 15 Matius dait Tomas, Yakub bijene Alpeus, dait Simon (saq tesebut dengan Zelot), 16 Yudas bijene Yakub dait Yudas Iskariot saq beterus jari penghianat. 17 Beterus Deside Isa turun lẽman bukit nike teiring siq rasul-rasul nike, terus mentelah dait nganjeng lẽq sopoq taoq saq lendek. Lẽq derike araq ẽndah luwẽq pengiring-pengiring-Ne saq lain dait luwẽq dengan saq dateng lẽman selapuq wilayah Yudea, Yerusalem dait kote-kote Tirus dait Sidon saq lẽq sedin segare. 18 Ie pade dateng jari dengahang Deside Isa, dait jari teselahang lẽman penyakit-penyakit ie pade. Ie pade saq tekuasein siq roh jahat dateng ẽndah dait teselahang. 19 Selapuq dengan berusahe jamah Deside Isa, sẽngaq araq kuase saq sugul lẽman diriq-Ne saq nyelahang ie pade selapuq. 20 Deside Isa perhatiang pengiring-pengiring-Ne terus bemanik, "Bahagie side pade dengan-dengan miskin, sẽngaq side pade saq dowẽang Kerajaan Allah! 21 Bahagie side pade saq lapah mangkin; side pade gen tepuasang! Bahagie side pade saq nangis mangkin; side pade gen kelelẽq! 22 Bahagie side pade, lamun lantaran Bije Manusie side pade temeriq, tetolaq, tehine dait tepitnah! 23 Nabi-nabi jaman laẽq teperlakuang maraq nike ẽndah. Lamun hal nike telaksane, side pade harus terimaq secare ihlas, dait tetep besukecite, sẽngaq upaq side pade belẽq lẽq sorge. 24 Laguq celake side pade saq sugih mangkin niki; sẽngaq side pade sampun ngalamin kenikmatan! 25 Celake side pade saq besuh mangkin niki; sẽngaq side pade gen kelapahan! Celake side pade saq kelelẽq mangkin niki; sẽngaq side pade gen asẽq dait nangis! 26 Celake side pade lamun selapuq dengan puji side pade; sẽngaq maraq nike ẽndah leluhur ie pade sampun perlakuang nabi-nabi palsu." 27 "Laguq tipaq side pade saq dengahang Tiang mangkin niki, Tiang sampẽang pesen niki: Kasihin musuh-musuhde, dait laksaneang saq solah tipaq dengan saq meriq lẽq side. 28 Berkahin dengan saq ngutuk side, dait do'eang dengan saq aniaye side. 29 Lamun dengan nempẽlẽk sangkẽpde saq sopoq, alurang ie nempẽlẽk sangkẽpde saq sopoqne ẽndah. Lamun jubahde terampas, bẽng ẽndah kelambinde. 30 Lamun araq dengan saq nunas lẽq side, bẽng ie; dait lamun dowẽnde terampas, ndaq lakoq ie malik. 31 Perlakuang dengan lain maraq side pade melẽt teperlakuang siq ie pade. 32 Lamun side pade ngasihin dengan-dengan saq ngasihin side pade, napi saq gen jari upaqde? Dengan bedose ẽndah ngasihin dengan-dengan saq ngasihin ie pade! 33 Dait lamun side pade solah tipaq dengan-dengan saq solah lẽq side, napi upaqde? Dengan bedose ẽndah piaq maraq nike! 34 Dait lamun side pade nyinggaqang kẽpẽng cume tipaq dengan-dengan saq bau nulakang, napi upaqde? Dengan bedose ẽndah nyinggaqang kẽpẽng tipaq dengan bedose, terus ie tagih malik! 35 Seharusne ndẽq maraq nike! Sebalikne side pade harus ngasihin musuhde dait solah lẽq ie pade. Side pade harus bẽng nyinggaq, dait ndaq harepang tetulakang malik. Lamun maraq nike, upaqde gen belẽq dait side pade gen jari bije-bije dowẽn Allah Saq Maheagung. Sẽngaq Allah nike murah atẽ lẽq dengan saq ndẽq tao betampi asih, dait tipaq saq jahat ẽndah. 36 Side pade harus murah atẽ, pade maraq Bapa side murah atẽ." 37 "Ndaq side pade hakimin dengan lain, make side pade ndẽq gen tehakimin. Ndaq side pade hukum dengan lain, make side pade ndẽq gen tehukum; ampunin dengan lain dait side pade gen teampunin. 38 Pade bẽng tipaq dengan lain, dait side pade gen tebẽng: Sopoq takahan saq solah, saq tepadetang, saq tegerik dait saq tumpah ojok luah gen tebẽng tipaq side pade. Sẽngaq ukuran saq side pade kadu lẽq dengan lain, nike ẽndah gen tekadu siq Allah lẽq side pade." 39 Beterus Deside Isa nyampẽang malik tipaq ie pade sopoq perumpamean: "Lamun dengan bute pimpin dengan bute saq lain, pasti deduaqne gen geriq ojok longkak. 40 Sopoq murit ndẽqne belẽqan lẽman gurune, laguq murit saq sampun tamat gen jari pade maraq gurune. 41 Kembẽq side pade pedaseng bubuk kayuq lẽq dalem penenteng semetonde, padahal balok lẽq dalem penentengde, ndẽq side pade perhatiang? 42 Berembẽ side pade bau bebase lẽq semetonde, 'Tunas, semeton, tiang sugulang bubuk kayuq lẽq penentengde nike,' padahal dalem penentengde mẽsaq araq balok saq ndẽq side pade serioq? Hai dengan munapik! Sugulang juluq balok saq araq lẽq penentengde mẽsaq, baruq side pade pedas serioq dait bau nyugulang bubuk kayuq lẽman penenteng semetonde." 43 "Lolo saq solah ndẽqne mungkin ngasilang buaq saq ndẽq solah. Maraq nike ẽndah lamun lolo nike ndẽq solah, ndẽqne mungkin ngasilang buaq saq solah. 44 Sebilang lolo tetaoq lẽman buaqne. Bebenes saq beduwi ndẽq ngasilang buaq are, dait pupaq saq beduwi ndẽq ngasilang buaq anggur. 45 Dengan saq solah nyugulang hal-hal saq solah sẽngaq atẽne penoq siq hal-hal saq solah. Dengan saq jahat nyugulang hal-hal saq jahat sẽngaq atẽne penoq siq hal-hal saq jahat. Sẽngaq napi saq teucapang siq biwih tetentuang siq isi atẽne." 46 "Kembẽq side pade ngempoh Tiang, 'Junjungan Saq Mulie, Junjungan Saq Mulie,' laguq ndẽq ngelaksaneang napi saq Tiang manikang lẽq side? 47 Kance sai bau ite padeang dengan saq dateng tipaq Tiang dait dengahang manik Tiang terus ie laksaneang manik nike? -- Tiang badaq side pade --. 48 Ie pade maraq dengan saq kenyeke penganjeng balẽ, kaliqne dalem-dalem, terus miaq dasar balẽ nike kadu batu. Waktu araq belabur dait aiq kokoq dateng babar balẽ nike, balẽ nike ndẽq iniq inggur, sẽngaq tepenganjeng lẽq atas dasar saq kuat. 49 Laguq dengan saq dengah manik Tiang dait ndẽq ie laksaneang, pade maraq dengan saq penganjeng balẽ ndẽq kadu dasar. Waktu tebabar siq belabur, balẽ nike becat ruk; dait luwẽq gati sẽdene!"

Luke 7

1 Sesampun tutuq manikang hal-hal nike lẽq dengan luwẽq, Deside Isa lumbar ojok Kapernaum. 2 Lẽq derike araq prewire Roma saq bedowẽ pelayan saq ie tunah gati. Pelayan nike sakit parah dait gen milinang. 3 Lẽq waktu prewire nike dengah mengenai Deside Isa, utusne pire pemimpin dengan Yahudi lumbar ojok Deside Isa jari tunas adẽq Ie rauh dait nyelahang pelayanne. 4 Sewaktu dateng lẽq Deside Isa, sanget siqne tunas siq dengan-dengan nike adẽq Deside Isa kayun nulung prewire nike. Ie pade matur lẽq Deside Isa, "Prewire niki patut Pelungguh tulung, 5 sẽngaq ie ngasihin bangsente dait sampun miaqang tiang pade balẽ ibadah." 6 Make Deside Isa lumbar bareng-bareng kance ie pade. Sendẽqman Deside Isa rauh lẽq gedẽng prewire nike, prewire nike ngutus batur-baturne jari matur tipaq Deside Isa, "Sampunang Pelungguh rẽpot-rẽpot, tiang nẽnten patut nerimaq Pelungguh lẽq balẽn tiang. 7 Malahan tiang mẽsaq nẽnten patut ngadep Pelungguh. Silaq Pelungguh bemanik doang adẽq pelayan tiang selah. 8 Sẽngaq tiang ẽndah bedowẽ atasan dait tiang harus taat lẽq ie. Dait lẽq bawaq tiang ẽndah araq prajurit-prajurit saq harus taat lẽq prẽntah tiang. Lamun tiang suruq sopoq prajurit, 'Lalo!' ie pasti lalo. Dait lamun tiang suruq saq lain, 'Dateng!' ie pasti dateng; dait lamun tiang prẽntah pelayan tiang, 'Laksaneang!' pasti ie laksaneang." 9 Deside Isa bengaq pirengang hal nike. Deside Isa nyereminang andang dengan luwẽq saq kenyeke ngiring Ie dait bemanik, "Tiang badaq side, iman sebelẽq niki ndẽq uwah Tiang ndait lẽq antare dengan Israel." 10 Sewaktu dengan-dengan saq teutus nike tulak ojok gedẽng prewire nike, pelayan nike sampun selah. 11 Ndẽq ngonẽq sesampun nike, Deside Isa lumbar ojok kote Nain. Pengiring-pengiring-Ne dait dengan luwẽq pade milu ngiring Deside Isa. 12 Sewaktu Deside Isa rauh lẽq dẽkẽt jebak kote, araq dengan-dengan saq kenyeke lẽmbah jenazah ojok luah kote. Saq milinang nike kanak mame, bijene bebalu, ie anak nunggal. Luwẽq penduduk kote milu ngatong bebalu nike. 13 Sewaktu Deside Isa, Junjungan Saq Mulie cingakin bebalu nike, Ie periak lẽq bebalu nike terus bemanik, "Inaq, ndaq nangis!" 14 Beterus Deside Isa ngerapetin kurung batang jenazah nike dait tegelne. Make dengan-dengan saq ngelẽmbah kurung batang nike mentelah. Deside Isa bemanik, "Nune, Tiang bemanik lẽq side, silaq ures!" 15 Terune saq sampun milinang nike ures, terus tokol dait mulai ngeraos. Make Deside Isa nyerahang ie ojok inaqne. 16 Selapuq dengan jari takut dait mulieang Allah. Ie pade bebase, "Sopoq nabi saq belẽq sampun rauh lẽq tengaq-tengaq ite! Allah sampun rauh jari nyelametang umat-Ne!" 17 Kabar mengenai Deside Isa niki nyebar lẽq selapuq wilayah Yudea dait lẽq daẽrah sekiterne. 18 Waktu Yahya mauq kabar lẽman pengiring-pengiringne mengenai selapuq peristiwe nike, ie ngempoh due pengiringne 19 terus ngutus ie pade lumbar ojok Junjungan Saq Mulie Deside Isa jari metakẽn, "Napi Pelungguh dengan saq gen rauh menurut janji Allah, atao tiang pade harus ngantih dengan saq lainan?" 20 Kedue pengiring Yahya nike lumbar ojok Deside Isa, dait matur, "Yahya Pembaptis ngutus tiang pade metakẽn lẽq Pelungguh, napi Pelungguh dengan saq gen rauh menurut janji Allah, atao tiang pade harus ngantih dengan saq lainan?" 21 Waktu nike, Deside Isa nyelahang luwẽq dengan, dait sediq roh jahat dait miaq luwẽq dengan bute tao nyerioq. 22 Jari jawab Deside Isa, "Tulak tipaq Yahya dait badaq napi saq side pade dengah dait serioq: dengan bute tao nyerioq, dengan kẽpaq tao lampaq, dengan sakit kuste selah, dengan kedok tao dedengah, dengan ninggal teidupang malik, dait Kabar Solah lẽman Allah tesampẽang tipaq dengan-dengan miskin. 23 Bahagie dengan saq ndẽq ragu-ragu lẽq Tiang." 24 Sesampun utusan-utusan Yahya nike lumbar, Deside Isa mulai bebaos lẽq dengan luwẽq mengenai Yahya, manik-Ne, "Side pade lumbar ojok padang gurun jari serioq napi? Napi terẽng buloq saq tetiup siq angin? 25 Side pade lumbar jari serioq napi? Serioq dengan saq bekelambi solah? Dengan-dengan saq bekelambi maraq nike dait saq idup mẽwah ndot lẽq istane! 26 Jari, side pade sugul serioq napi? Jari serioq nabi? Tetu, malahan ie lebih lẽman nabi. 27 Sẽngaq Yahya nike saq temaksut dalem ayat Kitab Suci niki, 'Serioq, Tiang suruq utusan Tiang, juluan lẽman Deside, ie gen nyiepang Deside langan.' 28 Tiang badaq side: Lẽq dunie niki ndẽq uwah araq dengan saq belẽqan lẽman Yahya Pembaptis. Laguq dengan saq paling kodẽq lẽq dalem Kerajaan Allah, belẽqan lẽman Yahya." 29 Selapuq dengan -- termasuk ẽndah penagih-penagih pajek -- dengah Deside Isa manikang hal nike. Ie pade ngakuq kebenaran Allah sẽngaq ie pade sampun tebaptis siq Yahya. 30 Laguq dengan-dengan Parisi dait ahli-ahli Taurat ndẽq mẽlẽ nerimaq rencane Allah tipaq ie pade. Ie pade ndẽq mẽlẽ tebaptis siq Yahya. 31 Beterus Deside Isa bebaos malik, manik-Ne, "Napi kance Tiang bandingang dengan-dengan jaman niki? Napi kancene bau tepadeang? 32 Ie pade maraq kanak-kanak saq tokol lẽq peken; sekelompoq bekuih tipaq saq lain, 'Tiang pade nyanyiang side pade lagu gembire, laguq side pade ndẽq mẽlẽ ngigel! Tiang pade nyanyiang lagu sedih, laguq side pade ndẽq nangis!' 33 Yahya Pembaptis dateng -- ie puase dait ndẽq nginem anggur -- dait side pade bebase, 'Ie tekuasein siq sẽtan!' 34 Bije Manusie rauh -- Ie medaran dait nginem -- terus side pade bebase, 'Serioq dengan nike! Melak, girang bowos, batur penagih pajek, dait batur dengan bedose!' 35 Timaq maraq nike, hikmat Allah gen nyate mule kenaq lẽq dalem kehidupan dengan-dengan saq tepimpin siq hikmat nike." 36 Araq dengan Parisi, aranne Simon, pesilaq Deside Isa medaran. Deside Isa lumbar ojok gedẽngne dait melinggih medaran. 37 Lẽq kote nike araq ẽndah dengan nine saq idup dalem dose. Waktu ie dengah bahwe Deside Isa kenyeke medaran lẽq gedẽng dengan Parisi nike, ie dateng jauq sopoq botol pualam berisi minyak sengẽh. 38 Ie nganjeng lẽq mudi Deside Isa dẽkẽt cokor-Ne dait nangis sambil basaqang cokor Deside Isa siq aiq penentengne. Beterus usapne cokor Deside Isa siq bulune jangke gero terus sidukne dait teminyakin siq minyak sengẽh nike. 39 Sewaktu dengan Parisi saq pesilaq Deside Isa serioq hal nike, ie bebase dalem angenne, "Seandẽne Ie niki nabi, pasti Ie wikanang sai dengan nine saq kintur Ie, sẽngaq dengan nine nike dengan bedose!" 40 Beterus Deside Isa bemanik lẽq Simon, "Simon, araq sopoq hal saq mẽlẽ Tiang sampẽang lẽq side." Atur Simon, "Silaq Pelungguh manikang." 41 Deside Isa bemanik, "Araq due dengan saq berutang lẽq dengan saq nyinggaqang kẽpẽng. Saq sopoq berutang lime ratus kẽpẽng perak, dait saq sopoqne malik sẽket kẽpẽng perak. 42 Deduaqne ndẽq bau ngelunasin utang nike, make ihlasangne utang ie pade. Nah, lẽq antare deduaqne sai saq belẽqan kasihne tipaq dengan saq nyinggaqang kẽpẽng nike?" 43 "Menurut tiang dengan saq paling luwẽq teihlasang utangne!" jawab Simon. "Kenaq pendapet side," jawab Deside Isa. 44 Beterus Deside Isa cingakin andang dengan nine nike dait bemanik lẽq Simon, "Side serioq dengan nine niki? Tiang dateng ojok balẽnde, dait side ndẽq sadangang aiq jari persiq naẽn Tiang; laguq dengan nine niki sampun persiq naẽn Tiang kadu aiq penentengne, dait usapne kadu bulune jangke gero. 45 Side ndẽq nyambut Tiang siq sidukan, laguq dengan nine niki ndẽq engkah-engkahne nyiduk naẽn Tiang mulai lẽman Tiang dateng ojok deriki. 46 Side ndẽq minyakin ulun Tiang siq minyak, laguq dengan nine niki sampun minyakin naẽn Tiang siq minyak sengẽh. 47 Keranaq nike Tiang badaq side: Lantaran dosene saq luwẽq sampun teampunin, make ie luwẽq nyatayang kasihne. Laguq dengan saq teampunin sekediq, ie ẽndah gen sekediq nyatayang kasihne." 48 Beterus Deside Isa bemanik lẽq dengan nine nike, "Dose-dosende sampun teampunin." 49 Dengan-dengan lain saq tokol ngiring Deside Isa medaran mulai bebase sopoq kance saq lain, "Sai dengan niki jangke Ie bau ngampunin dose?" 50 Laguq Deside Isa bemanik lẽq dengan nine nike, "Lantaran side percaye lẽq Tiang make side jari selah, silaq lumbar dalem damẽ!"

Luke 8

1 Ndẽq ngonẽq sesampun nike, Deside Isa lumbar ojok kote-kote dait kampung-kampung jari beriteang Kabar Solah mengenai Kerajaan Allah. Due olas pengiring Deside Isa ẽndah milu ngiring Ie. 2 Maraq nike ẽndah pire dengan nine saq sampun teselahang lẽman kuase roh jahat dait penyakit. Aran dengan-dengan nine nike, Mariam saq tesebut Magdalena (saq tebẽbasang lẽman pituq roh jahat); 3 Yohana, seninene Kuza, pegawẽ istane Herodes; Susana, dait luwẽq malik dengan nine lain. Siq biaye mẽsaq, ie pade nulung Deside Isa dait pengiring-pengiring-Ne. 4 Dengan-dengan terus doang dateng tipaq Deside Isa lẽman kote-kote saq lain. Dait sesampun luwẽq dengan pade bekumpul, Deside Isa nyeriteang ie pade perumpamean niki: 5 "Araq sopoq dengan lumbar sawur binẽq. Sewaktu ie sawur binẽq nike, araq binẽq saq geriq lẽq langan. Separo teicaq siq dengan dait saq lainne tekaken siq kedit. 6 Araq ẽndah saq geriq lẽq taoq bebatu-batu. Lẽq waktu suli-suline sugul taletan nike layu sẽngaq tanaqne gero. 7 Araq ẽndah binẽq saq geriq lẽq tengaq bebenes beduwi. Bebenes beduwi nike tiwoq bareng binẽq nike, dait gepitne jangke matẽ. 8 Laguq araq ẽndah binẽq saq geriq lẽq tanaq saq subur, terus tiwoq dait ngasilang buaq satus kali lipet." Sesampun nyeriteang perumpamean nike, Deside Isa bemanik, "Sai-sai bedowẽ kentok jari dedengah, harus ie dengahang!" 9 Pengiring-pengiring Deside Isa metakẽn lẽq Deside Isa mengenai arti perumpamean nike. 10 Jawab Deside Isa, "Side pade sampun teicanin paice jari nenaoq rahasie Kerajaan Allah. Laguq dengan-dengan lain teajah kadu perumpamean, adẽq timaq ie pade serioq, laguq ie pade ndẽq perhatiang; dait ie pade dengah laguq ndẽq ngerti." 11 "Niki arti perumpamean nike: Binẽq nike Manik Allah. 12 Binẽq saq geriq lẽq langan, ibarat dengan-dengan saq dengah manik nike. Laguq Belis dateng dait ngerampas manik nike lẽman atẽ ie pade, adẽq ie pade ndaq percaye dait teselametang. 13 Binẽq saq geriq lẽq taoq saq bebatu-batu ibarat dengan saq sewaktu dengah manik nike, nerimaq siq seneng angenne. Laguq manik nike ndẽq berakah lẽq atẽ ie pade. Ie pade percaye seberaq doang, dait lẽq waktu dateng cobe, ie pade murtat. 14 Binẽq saq geriq lẽq tengaq bebenes beduwi ibarat dengan saq dengah manik nike, laguq kuatir mengenai idup ie pade; dait melẽt idup mẽwah dait seneng lẽq dalem dunie niki. Selapuqne nike saq gepit ie pade sehingge ndẽq ngasilang buaq saq masak. 15 Binẽq saq geriq lẽq tanaq saq subur ibarat dengan saq dengah manik nike, terus simpenne lẽq dalem atẽ saq solah dait jujur. Ie pade bau tahen jangke ngasilang buaq." 16 "Ndẽq araq dengan saq nyaleang dilah terus kudungne kadu tepaq, atao toloqne lẽq bawaq lasah. Ie gen toloq dilah nike lẽq naẽn dilah, adẽq dengan saq tame bau serioq menahne. 17 Ndẽq araq saq teseboq saq ndẽq gen penggitan; dait ndẽq araq saq terahasieang saq ndẽq gen tebungkar dait tetaoq. 18 Keranaq nike, perhatiang solah-solah berembẽ entane side pade dedengah. Sẽngaq dengan saq sampun bedowẽ, gen teican luwẽqan malik; laguq dengan saq ndẽq bedowẽ, sekediq saq masih araq lẽq ie gen tebait ẽndah." 19 Mamiq bini dait sanak-sanak Deside Isa rauh tipaq Deside Isa, laguq ie pade ndẽq bau dateng tipaq Ie sẽngaq luwẽq gati dengan. 20 Beterus araq sopoq dengan saq matur lẽq Deside Isa, "Paq, mamiq bini dait sanak-sanak Pelungguh araq lẽq luah. Ie pade melẽt bedait kance Pelungguh." 21 Laguq Deside Isa bemanik lẽq ie pade, "Dengan-dengan saq dengah manik Allah dait ngelaksaneang ie, ie pade saq jari inaq dait semeton-semeton Tiang." 22 Lẽq sopoq jelo Deside Isa kance pengiring-pengiring-Ne taẽk ojok perau. "Silaq ite belayar ojok itoqan danao," manik Deside Isa lẽq ie pade. Make ie pade berangkat. 23 Sewaktu ie pade kenyeke belayar, Deside Isa ketindoqan. Selung-selung angin pusut nimpe danao nike. Aiq mulai tame ojok dalem perau, sehingge bahayeang ie pade selapuq. 24 Pengiring-pengiring-Ne lumbar ojok Deside Isa dait tangiang Ie. Ie pade matur, "Paq Guru, Paq Guru, ite celake!" Deside Isa metangi terus semprak-Ne angin dait umbak saq kenyeke ngamuk nike. Angin dait umbak nike engkah terus danao jari tenang. 25 Beterus Deside Isa bemanik lẽq pengiring-pengiring-Ne, "Kembẽq side pade ndẽq percaye lẽq Tiang?" Ie pade jari bengaq dait takut. Dait ie pade saling ketuan sopoq kance saq lain, "Sai setetune dengan niki, sehingge angin dait umbak taat lẽq prẽntah-Ne!" 26 Deside Isa dait pengiring-pengiring-Ne terus belayar jangke ojok daẽrah dengan Gerasa lẽq itoqan Danao Galilea. 27 Sewaktu Deside Isa turun ojok darat, Ie tedatengin sopoq dengan mame saq tekuasein siq sẽtan. Dengan nike lẽman kote. Sampun ngonẽq ie ndẽq bekelambi dait ndẽq mẽlẽ ndot lẽq balẽ. Ie cume mẽlẽ ndot lẽq goe-goe taoq ngubur jenazah. 28 Sewaktu serioq Deside Isa, ie nyurak terus sujut lẽq arepan Deside Isa dait bekuih, "Deside Isa, Bije saq asalne lẽman Allah Saq Maheagung! Gen Pelungguh kumbẽqang tiang niki? Tiang tunas sampunang siksaq tiang!" 29 Dengan nike matur maraq nike sẽngaq Deside Isa prẽntah sẽtan nike sugul lẽman ie. Sampun rimpes gati ie tekuasein siq roh jahat nike sehingge timaq ime dait naẽne sampun tebẽcang kadu rantẽ dait ie tejagaq pacu-pacu, ie masih doang bau pegatang rantẽ nike terus tejauq siq roh jahat ojok taoq-taoq saq sepi. 30 Deside Isa beketuan lẽq dengan nike, "Sai arande?" "Aran tiang 'Legiun'," jawab dengan nike -- sẽngaq araq luwẽq sẽtan saq sampun tame ojok dalem diriqne. 31 Sẽtan-sẽtan nike tunas lẽq Deside Isa adẽq ie pade ndẽq tesediq ojok dalem jurang maut. 32 Dẽkẽt taoq nike araq luwẽq gati bawi saq kenyeke boyaq kakenan lẽq tembẽrẽng gunung. Sẽtan-sẽtan nike tunas lẽq Deside Isa adẽq teijinang tame ojok dalem bawi-bawi nike. Petunasan ie pade tekabulang siq Deside Isa. 33 Make sẽtan-sẽtan nike sugul lẽman dengan nike dait tame ojok dalem bawi-bawi nike. Beterus bawi-bawi nike pelai dait nimproh lẽman sedin jurang ojok dalem danao, beterus ketelep. 34 Penjage-penjage bawi nike serioq napi saq sampun telaksane. Make ie pade pelai nuturang hal nike lẽq kote dait lẽq dẽse sekiterne. 35 Beterus dengan-dengan sugul jari serioq napi saq telaksane. Ie pade dateng tipaq Deside Isa, dait lẽq derike ie pade ndait dengan saq sampun bẽbas lẽman sẽtan-sẽtan nike kenyeke tokol dẽkẽt cokor Deside Isa. Ie sampun bekelambi malik dait sampun waras pikiranne. Ie pade jari takut. 36 Ie pade saq nyaksiang mẽsaq peristiwe nike nyeriteang tipaq dengan-dengan berembẽ dengan nike teselahang. 37 Beterus selapuq penduduk daẽrah Gerasa nike tunas adẽq Deside Isa bilin taoq nike, sẽngaq ie pade selapuq takut gati. Jari Deside Isa taẽk perau terus mantuk. 38 Dengan saq sampun tebẽbasang lẽman sẽtan-sẽtan nike tunas lẽq Deside Isa adẽq ie teijinang milu. Laguq Deside Isa suruq ie lumbar, manik-Ne, 39 "Ulẽq dait ceriteang napi saq Allah sampun laksaneang lẽq side." Make dengan nike lumbar nyeriteang ojok mbẽ-mbẽ lẽq selapuq kote, napi saq Deside Isa sampun laksaneang lẽq ie. 40 Sewaktu Deside Isa tulak lẽman itoqan danao, Ie tesambut siq dengan luwẽq, sẽngaq ie pade kenyeke ngantos Ie. 41 Beterus dateng sopoq kepale balẽ ibadah aranne Yairus. Ie sujut lẽq arepan Deside Isa, dait sanget siqne tunas adẽq Deside Isa rauh ojok gedẽngne, 42 sẽngaq sopoq-sopoqne bijene saq nine beumur due olas taun jaqne milinang. Sewaktu Deside Isa bemargi ojok gedẽng Yairus, Ie tedesek-desek siq dengan luwẽq. 43 Araq sopoq dengan nine saq sampun due olas taun sakit pendarahan dait ndẽq bau teselahang siq sai-sai. 44 Dengan nine nike ngerapetin Deside Isa lẽman mudi, terus kintur poton jubah-Ne. Waktu nike ẽndah pendarahanne engkah. 45 Deside Isa beketuan, "Sai saq kintur Tiang?" Selapuq dengan ndẽq araq saq ngaku. Beterus Petrus matur, "Paq Guru, araq luwẽq gati dengan lẽq sekelining Pelungguh; ie pade desek-desek Pelungguh!" 46 Deside Isa bemanik, "Laguq araq dengan saq kintur Tiang. Tiang taoq nike, sẽngaq araq kuase saq sugul lẽman Tiang!" 47 Dengan nine nike sadar bahwe perbuatanne sampun tewikanang, ie parek sambil ngijik terus sujut lẽq arepan Deside Isa. Ie nyeriteang lẽq julun selapuq dengan, kembẽq ie kintur Deside Isa, dait berembe penyakitne langsung selah. 48 Deside Isa bemanik lẽq ie, "Dẽnde, imande sampun miaq side selah, silaq lumbar dalem damẽ." 49 Lẽq waktu Deside Isa masih bebaos, sopoq pelayan dateng lẽman gedẽng Yairus. Ie matur lẽq Yairus, "Bijende sampun ninggal. Sampunang pelungguh nyusahang Bapaq Guru malik." 50 Sewaktu Deside Isa pirengang hal nike, Ie bemanik lẽq Yairus, "Ndaq takut. Percaye doang, bijende gen selah." 51 Sesampun rauh lẽq gedẽng Yairus, Deside Isa nẽnten ngijinang sopoq dengan tame kance Ie kecuali Petrus, Yahya, Yakub dait inaq amaq kanak nike doang. 52 Selapuq dengan kenyeke nangis dait ẽroq asẽq sẽngaq kanak nike milinang. Laguq Deside Isa bemanik, "Ndaq nangis. Kanak nike ndẽq milinang, ie cume tindoq!" 53 Ie pade ngelelẽqang Deside Isa, sẽngaq ie pade nenaoq kanak nine nike sampun milinang. 54 Beterus Deside Isa tegel ime kanak nike dait bemanik, "Dẽnde, silaq ures!" 55 Nyawe kanak nike tulak ojok ie, dait waktu nike ẽndah ie ures. Sesampun nike, Deside Isa manikang ie pade ngebẽng kanak nike bekelor. 56 Dengan toaq kanak nike bengaq gati. Laguq Deside Isa balaq ie pade nyeriteang peristiwe nike tipaq sai-sai.

Luke 9

1 Deside Isa ngemanikang kedue olas pengiring-Ne, terus ngicanin ie pade kuase jari sediq sẽtan-sẽtan dait nyelahang penyakit. 2 Beterus Deside Isa ngutus ie pade lumbar nyelahang dengan sakit dait nyampẽang kabar mengenai Kerajaan Allah. 3 "Ndaq jauq napi-napi dalem kelampande," manik Deside Isa lẽq ie pade. "Ndaq jauq tunjang, atao takaq sangu, ruti atao kẽpẽng, atao due kelambi. 4 Lẽq mbẽ juaq side pade teterimaq, ndot lẽq derike jangke side pade bilin kote nike. 5 Dait lẽq mbẽ side pade ndẽq teterimaq, lẽq waktu side pade bilin kote nike, kerapang kerepuk lẽman lampak naẽnde jari peringetan tipaq ie pade." 6 Pengiring-pengiring Deside Isa berangkat, beterus lumbar ojok dẽse-dẽse jari nyampẽang Kabar Solah nike dait nyelahang dengan sakit lẽq selapuq taoq. 7 Sewaktu Herodes saq jari raje wilayah negeri Galilea, mirengang selapuq peristiwe nike, ie jari bingung. Sẽngaq araq saq bebase bahwe Yahya Pembaptis sampun idup malik. 8 Araq ẽndah saq bebase bahwe Elia sampun muncul malik. Dengan lain ẽndah bebase bahwe sopoq nabi lẽman nabi-nabi jaman laẽq idup malik. 9 Herodes bebase, "Tiang sampun ngutus dengan penggal ulune Yahya. Laguq Dengan niki, sai setetune Ie? Luwẽq tiang dengah mengenai Ie." Beterus Herodes berusahe adẽqne bau bedait kance Deside Isa. 10 Rasul-rasul Deside Isa tulak dait nyeriteang tipaq Deside Isa selapuq saq sampun ie pade laksaneang. Terus Deside Isa tẽnaq ie pade lumbar ojok kote Betsaida sehingge cume ie pade kance Deside Isa lẽq derike. 11 Laguq sewaktu dengan-dengan nenaoq hal nike, ie pade nerutuk Deside Isa. Ie pade tesambut siq Deside Isa, terus bebaos tipaq ie pade mengenai Kerajaan Allah. Dait Ie ẽndah nyelahang dengan sakit lẽq antare ie pade. 12 Sewaktu serep jelo, kedue olas pengiring Deside Isa parek tipaq Deside Isa dait matur, "Taoq niki kesempil, solahan Pelungguh manikang dengan-dengan niki lumbar adẽq ie pade bau boyaq keloran dait taoq madẽq lẽq kampung-kampung dait dẽse-dẽse lẽq sekiter niki." 13 Laguq jawab Deside Isa, "Side pade saq harus ngebẽng ie pade bekelor." Pengiring-pengiring Deside Isa matur, "Tiang pade cume bedowẽ lime ruti dait due empaq. Segerah tiang pade harus lalo beliang selapuq dengan niki keloran?" 14 (Araq kire-kire lime iyu dengan mame lẽq derike.) Deside Isa bemanik lẽq pengiring-pengiring-Ne, "Suruq dengan-dengan niki tokol bekelompoq, kire-kire sẽket dengan sekelompoq." 15 Pengiring-pengiring Deside Isa ngelaksaneang napi saq temanikang Deside Isa nike, terus ie pade suruq dengan luwẽq nike tokol. 16 Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike Ie peleng-peleng ruti dait empaq nike kadu gading-Ne terus icanin-Ne lẽq pengiring-pengiring-Ne jari tebagi-bagiang tipaq dengan luwẽq nike. 17 Ie pade selapuq bekelor jangke besuh. Beterus pengiring-pengiring Deside Isa ngumpulang salone, ternyate araq due olas bakaq. 18 Lẽq sopoq jelo, sewaktu Deside Isa kenyeke bedo'e mẽsaq-mẽsaq, pengiring-pengiring-Ne parek tipaq Ie. Deside Isa beketuan lẽq ie pade, "Menurut dengan luwẽq, sai Tiang niki?" 19 Jawab ie pade, "Araq saq bebase Yahya Pembaptis. Araq ẽndah saq bebase Elia, saq lain malik bebase salaq sopoq nabi jaman laẽq saq sampun idup malik." 20 Deside Isa beketuan, "Laguq menurut side pade, sai Tiang niki?" Jawab Petrus, "Pelungguh Almasih saq tejanjiqang Allah." 21 Beterus Deside Isa bemanik lẽq pengiring-pengiring-Ne, "Ndaq gati badaqang hal nike lẽq sai-sai." 22 Deside Isa bemanik ẽndah, "Bije Manusie mule harus luwẽq menderite dait tetentang siq pemimpin-pemimpin, imam-imam kepale, dait serte ahli-ahli Taurat. Ie gen tematẽq, laguq lẽq jelo saq ketelu Ie gen teidupang malik." 23 Beterus Deside Isa bemanik lẽq selapuq dengan saq araq lẽq derike, "Sebilang dengan saq mẽlẽ turut Tiang, ie harus ngelupaqang kepentinganne mẽsaq, ngelẽmbah salibne sebilang jelo, dait tetep turut Tiang. 24 Sẽngaq dengan saq mẽlẽ nyelametang nyawene, gen kẽlangan nyawene. Laguq dengan saq kẽlangan nyawene lantaran Tiang, dengan nike gen nyelametang nyawene. 25 Napi untungne lẽq sopoq dengan, lamun seantẽro dunie niki jari dowẽne, laguq ie binaseang dait nyenyẽdaq idupne mẽsaq? 26 Lamun dengan ilaq ngakuq Tiang dait manik Tiang, Bije Manusie ẽndah gen ilaq ngakuq dengan nike lẽq waktu Ie rauh ẽraq dalem kemuliean-Ne, dait dalem kemuliean Bapa dait malaẽkat-malaẽkat saq suci! 27 Tiang badaq side: Setetune lẽq antare side pade lẽq deriki araq saq ndẽq gen ninggal, sendẽqman ie pade serioq Kerajaan Allah." 28 Kire-kire baluq jelo sesampun Deside Isa ngajahang hal nike, Ie gadingang Petrus, Yahya dait Yakub taẽk ojok atas gunung jari bedo'e. 29 Sewaktu Deside Isa bedo'e lẽq derike, penjarupan-Ne berobah dait kuace-Ne jari putẽq ngempor. 30 Selung-selung araq due dengan, Musa kance Elia penggitan lẽq dalem kemuliean. Ie pade kenyeke bebaos kance Deside Isa, mengenai ninggal-Ne saq ndẽq ngonẽq malik gen telaksane lẽq Yerusalem. 32 Lẽq waktu nike Petrus dait kedue pengiring saq lain ketindoqan, laguq selung-selung ures dait serioq Deside Isa lẽq dalem kemuliean-Ne dait kedue dengan nike nganjeng dẽkẽt Deside Isa. 33 Sewaktu Musa dait Elia gen bilin Deside Isa, Petrus matur tipaq Deside Isa, "Paq Guru, maiq gati ite lẽq deriki, mangkin tiang pade penganjeng telu kẽmah sopoq umaq Pelungguh, sopoqne umaq Musa dait sopoqne malik umaq Elia." (Petrus matur maraq nike sẽngaq ndẽq nenaoq napi saq ie ucapang.) 34 Sewaktu Petrus masih ngeraos, awan turun keliningin ie pade sehingge ie pade takut. 35 Beterus lẽman awan nike kedengahan suare, "Niki Bije Tiang saq Tiang pilẽq, pade dengahang Ie!" 36 Sesampun suare nike telang, ie pade serioq Deside Isa mẽsaq-mẽsaq lẽq taoq nike. Pengiring-pengiring-Ne rahasieang hal nike dait ndẽq betutur lẽq sai-sai mengenai peristiwe saq sampun ie pade serioq. 37 Lẽq jemaqne Deside Isa dait ketelu pengiring-Ne turun lẽman gunung nike, dait dengan luwẽq dateng ojok Deside Isa. 38 Sopoq dengan mame lẽman tengaq-tengaq dengan luwẽq nike bekuih, "Paq Guru, tulung cingakin anak tiang -- ie sopoq-sopoqne anak tiang! 39 Lamun roh jahat nyerang ie, ie selung-selung nyurak dait awakne kojor-kojor jangke biwihne bekowok. Roh nike terus nyiksaq ie dait ndẽq mẽlẽ sugul lẽman ie! 40 Tiang sampun tunas pengiring-pengiring Pelungguh sediq roh nike, laguq ie pade ndẽq tao." 41 Deside Isa bemanik, "Luar biase side pade niki! Side pade tetu-tetu dengan saq ndẽq percaye dait sesat. Jangke piran Tiang harus tetep araq kance side pade, dait sabar tipaq side pade? Jauq anakde nike ojok deriki!" 42 Lẽq waktu kanak nike lampaq ngerapetin Deside Isa, sẽtan nike timpak ie dait piaq awakne jari kojor-kojor. Laguq Deside Isa prẽntahang roh jahat nike sugul, terus kanak nike selah. Beterus kanak nike teserahang ojok amaqne. 43 Selapuq dengan bengaq serioq kuase Allah saq luar biase belẽqne. Lẽq waktu dengan-dengan masih bengaq serioq saq telaksaneang siq Deside Isa, Deside Isa bemanik tipaq pengiring-pengiring-Ne, 44 "Perhatiang solah-solah dait ndaq lupaq ucapan-ucapan Tiang niki: Bije Manusie gen teserahang tipaq kuase manusie." 45 Laguq pengiring-pengiring Deside Isa ndẽq ngerti napi maksut manik Deside Isa nike. Hal nike terahasieang tipaq ie pade adẽq ie pade ndẽq ngerti. Laguq ie pade takut metakẽn lẽq Deside Isa mengenai napi maksud manik-Ne nike. 46 Pengiring-pengiring Deside Isa betungkasan mengenai sai saq paling belẽq lẽq antare ie pade. 47 Deside Isa wikan pikiran ie pade, keranaq nike Ie bait sopoq kanak kodẽq, dait penganjeng-Ne kanak nike lẽq dẽkẽt-Ne. 48 Terus Deside Isa bemanik lẽq pengiring-pengiring-Ne, "Dengan saq nerimaq kanak niki lantaran Tiang, artine nerimaq Tiang. Dait dengan saq nerimaq Tiang, nerimaq Ie saq ngutus Tiang. Sẽngaq dengan saq paling kodẽq lẽq antare side pade, ie saq paling belẽq!" 49 Yahya matur, "Paq Guru, tiang pade serioq dengan sediq roh jahat siq pesẽngan Pelungguh, dait tiang pade balaq ie, sẽngaq ie ndẽq lẽman kelompoq ite." 50 Laguq manik Deside Isa, "Ndaq balaq ie, sẽngaq dengan saq ndẽq ngelawan side pade, artine bepihak lẽq side pade." 51 Sewaktu sampun rapet wayene Deside Isa teangkat ojok sorge, Deside Isa mutusang gen lumbar ojok Yerusalem. 52 Beterus Deside Isa ngemanikang dengan lumbar senjuluq Ie. Dengan-dengan saq Ie manikang nike lumbar, terus tame ojok sopoq kampung lẽq Samaria jari nyiepang selapuq saq teperluang siq Deside Isa. 53 Laguq dengan-dengan lẽq kampung nike ndẽq mẽlẽ nerimaq Deside Isa, sẽngaq Deside Isa kenyeke bemargi ojok Yerusalem. 54 Lẽq waktu kedue pengiring Deside Isa, Yakub dait Yahya nenaoq hal nike, ie pade matur, "Junjungan Saq Mulie, napi Pelungguh kayun, tiang pade tunas api turun lẽman langit jari binaseang dengan-dengan niki?" 55 Deside Isa nyereminang andang ie pade, dait menggah lẽq ie pade. 56 Sesampun nike ie pade lumbar ojok kampung saq lain. 57 Lẽq waktu Deside Isa dait pengiring-pengiring-Ne nerusang pemargian, araq dengan saq matur lẽq Deside Isa, "Paq, tiang mẽlẽ ngiring Pelungguh ojok mbẽ juaq Pelungguh lumbar!" 58 Jawab Deside Isa, "Serigale bedowẽ loang, dait kedit bedowẽ kesebu, laguq Bije Manusie ndẽq bedowẽ taoq begẽlaq." 59 Terus Deside Isa bemanik lẽq dengan saq lain, "Silaq turut Tiang." Laguq dengan nike matur, "Paq ijinang tiang ulẽq juluq nguburang amaq tiang." 60 Jawab Deside Isa, "Alurang dengan ninggal nguburang dengan ninggal. Laguq side, silaq lumbar dait beriteang Kerajaan Allah lẽq selapuq taoq." 61 Araq ẽndah dengan lain saq matur, "Paq, tiang mẽlẽ ngiring Pelungguh, laguq ijinang tiang ulẽq juluq bepamit lẽq keluarge tiang." 62 Deside Isa bemanik lẽq dengan nike, "Dengan saq siep nenggale, laguq ngẽngat andang mudi, ndẽqne patut bagi Kerajaan Allah."

Luke 10

1 Sesampun nike, Junjungan Saq Mulie Deside Isa pilẽq pituq pulu pengiring saq lain, terus ie pade teutus due-due siq Deside Isa jari senjuluq Ie ojok sebilang kote dait taoq saq gen Ie rauhin. 2 Manik-Ne tipaq ie pade, "Saq tepataq mule luwẽq, laguq tukang pataqne cume sekediq. Keranaq nike tunas lẽq ~Epẽne adẽq Ie ngirim tukang pataq jari mataq. 3 Silaq pade lumbar! Tiang ngutus side pade maraq anak dombe ojok tengaq-tengaq serigale. 4 Ndaq jauq dompẽt atao takaq sangu, atao sepatu. Ndaq mentelah jari ngucapang salam tipaq sai juaq lẽq tengaq kelampande. 5 Lamun side pade tame ojok sopoq balẽ, ucapang juluq, 'Moge-moge damẽ balẽ niki.' 6 Lamun lẽq derike araq saq patut nerimaq damẽ, make salamde nike gen tetep lẽq ie. Laguq lamun ndẽq, salamde nike gen tulak tipaq side. 7 Ndot lẽq sopoq balẽ doang. Terimaq napi saq tesajiang tipaq side, sẽngaq dengan saq begawẽan berhak nerimaq upaqne. Ndaq ngalih-ngalih lẽman sopoq balẽ ojok balẽ saq lain. 8 Lamun side pade dateng ojok sopoq kote dait lẽq derike side pade tesambut secare bagus, kelorang napi saq tesajiang tipaq side. 9 Selahang dengan-dengan sakit lẽq kote nike, dait badaq dengan-dengan lẽq derike, 'Kerajaan Allah sampun rapet lẽq side.' 10 Laguq lamun side pade dateng lẽq sopoq kote dait lẽq derike side pade ndẽq teterimaq, sugul ojok rurung-rurung lẽq kote nike dait ucapang maraq niki, 11 'Kerepuk kotende saq nekẽt lẽq naẽn tiang pade, tiang pade kerapang sebagẽ peringetan tipaq side. Laguq adẽq side pade nenaoq Kerajaan Allah sampun rapet!' 12 Tiang badaq side: Lẽq jelo Kiamat, dengan-dengan kote Sodom dait Gomora gen molahan teampunin siq Allah ketimbang dengan-dengan lẽq kote nike!" 13 "Celake side, kote Korazim! Dait celake side, kote Betsaida! Seandẽne muqjizat-muqjizat saq tepiaq lẽq tengaq-tengaqde nike sampun tepiaq lẽq kote Tirus dait Sidon, pasti dengan-dengan lẽq derike sampun ngonẽq betobat lẽman dose-dose ie pade, dait ngengadu kelambi dukecite serte noloq awu-awu lẽq atas ulu ie pade. 14 Lẽq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade! 15 Dait side, Kapernaum! Napi side paran, side gen teatasang jangke dateng langit? Ndẽq! Malahan side gen tetetẽh ojok dunie dengan matẽ!" 16 Beterus Deside Isa bemanik lẽq pengiring-pengiring-Ne, "Dengan saq dengahang side pade, artine ie dengahang Tiang. Dengan saq nolaq side pade, ie nolaq Tiang. Dait dengan saq nolaq Tiang, artine ie ẽndah nolaq Allah saq ngutus Tiang." 17 Waktu kepituq pulu pengiring nike tulak, angen ie pade cemoh gati. Terus ie pade matur, "Junjungan Saq Mulie, sẽtan-sẽtan ẽndah taat lẽq tiang pade lamun tiang pade prẽntah ie pade siq pesẽngan Pelungguh!" 18 Jawab Deside Isa, "Tiang serioq Belis geriq lẽman langit maraq kisap. 19 Setetune, side pade sampun Tiang bẽng kuase adẽq side pade bau ngicaq ulah dait teledu serte kuase jari nahen selapuq kekuatan musuh, sehingge ndẽq araq saq gen bahayeang side pade. 20 Timaq maraq nike ndaq gembire lantaran sẽtan-sẽtan taat lẽq side. Laguq solahan side pade gembire sẽngaq arande tecatet lẽq sorge." 21 Lẽq waktu nike ẽndah, Deside Isa gembire sẽngaq tekuasein Roh Suci. Terus Ie bemanik, "Bapa, Tuhan saq nguasein langit dait gumi! Tiang ngucap syukur lẽq Deside sẽngaq selapuqne nike Deside rahasieang lẽq dengan-dengan saq pinter dait bijaksane, laguq Deside nyatayang tipaq dengan saq biase-biase. Nike saq nyenengang Bapa. 22 Selapuq hal sampun teserahang siq Bapa tipaq Tiang. Ndẽq araq sopoq dengan juaq saq kenal kance Bije, selain Bapa. Ndẽq araq ẽndah saq kenal Bapa selain Bije; dait tipaq dengan-dengan saq Bije nike kayun nyatayang Bapa." 23 Beterus Deside Isa ngẽngat andang pengiring-pengiring-Ne, dait bemanik tipaq ie pade secare husus, "Bahagie side pade sẽngaq sampun serioq saq side pade serioq mangkin niki. 24 Tiang badaq side: Luwẽq nabi dait raje melẽt serioq saq side pade serioq mangkin laguq ie pade ndẽq serioq ie. Ie pade melẽt dengah saq side pade dengah mangkin niki, laguq ie pade ndẽq dengah ie." 25 Lẽq sopoq waktu araq ahli Taurat nganjeng jari boyaq kesalaqan Deside Isa. Ie metakẽn, "Bapaq Guru, napi saq harus tiang laksaneang adẽq bau nerimaq idup sejati dait kekel?" 26 Jawab Deside Isa, "Napi saq tetulis lẽq Kitab Suci? Berembẽ pendapet side mengenai hal nike?" 27 Jawab dengan nike, " 'Kasihin Allah, Tuhan side siq segenep atẽnde, dait siq segenep jiwende, dait siq selapuq kekuatande, dait siq segenep akal budinde,' dait 'Kasihin sepadende manusie maraq side ngasihin diriqde mẽsaq.' " 28 "Jawabande nike kenaq," manik Deside Isa. "Laksaneang nike, make side gen idup." 29 Laguq ahli Taurat nike mẽlẽ pekenaq diriqne mẽsaq. Make ie metakẽn lẽq Deside Isa, "Sai saq teparan pade-pade manusie maraq tiag?" 30 Jawab Deside Isa, "Araq sopoq dengan mame turun lẽman Yerusalem ojok Yeriko. Lẽq tengaq kelampan ie teserang perampok, terampas selapuq dowẽ bandene, tempuk jangke lelah, terus tebilin nyelangkar lẽq rurung dalem keadaan bakat saq parah. 31 Lẽq waktu nike araq ẽndah sopoq imam liwat lẽq rurung nike. Sewaktu ie serioq dengan nike, ie mirik lampaq langan itoqan rurung. 32 Maraq nike ẽndah sopoq dengan Lewi saq lampaq lẽq derike; sewaktu ie serioq dengan nike, ie mirik lampaq langan itoqan rurung. 33 Laguq sesampun nike sopoq dengan Samaria saq kenyeke bekelampan, liwat ẽndah lẽq derike. Sewaktu ie serioq dengan saq terampok nike, ie periak lẽq dengan nike. 34 Ie rapetin dengan nike terus persiq bakat-bakatne siq anggur dait ngowatin kadu minyak, beterus bebetne bakat-bakat nike. Sesampun nike, taẽkangne dengan nike ojok bagalne mẽsaq, dait jauqne ojok taoq penginepan dait ngerawat ie. 35 Lẽq jemaqne, ie ngebẽng due kẽpẽng perak tipaq ẽpẽn penginepan nike dait bebase, 'Rawat ie, dait lamun araq biaye-biaye lain, gen tiang bayah laun lamun tiang tulak ojok deriki.' " 36 Beterus Deside Isa nutuqang cerite nike dait beketuan niki, "Lẽman ketelu dengan nike, saq mbẽ side paran sepade manusie kance dengan saq terampok nike?" 37 Ahli Taurat saq teketuan nike bejawab, "Dengan saq sampun nulung dengan nike." Deside Isa bemanik, "Silaq lumbar dait laksaneang maraq nike ẽndah!" 38 Beterus Deside Isa dait pengiring-pengiring-Ne ngelanjutang pemargian, beterus rauh lẽq sopoq dẽse. Lẽq derike araq dengan nine aranne Marta, pesilaq Deside Isa ojok balẽne. 39 Marta bedowẽ semeton nine aranne Mariam. Mariam niki tokol lẽq dẽkẽt Deside Isa dengahang pengajahan-pengajahan-Ne. 40 Laguq Marta rẽpot gati siq pegawẽanne lẽq balẽ. Ie lumbar tipaq Deside Isa dait matur, "Junjungan Saq Mulie, kembẽq Pelungguh nẽnten peduli tiang tealurang begawẽan mẽsaq-mẽsaq siq Mariam? Manikang ie nulung tiang!" 41 "Marta, Marta!" jawab Deside Isa. "Side kuatir dait rẽpot mikirang luwẽq hal; 42 padahal saq penting cume sopoq. Mariam sampun pilẽq saq paling solah, saq ndẽq gen tebait lẽman diriqne."

Luke 11

1 Lẽq sopoq jelo Deside Isa bedo'e lẽq sopoq taoq. Sesampun Ie inggas bedo'e, salaq sopoq lẽman pengiring-pengiring-Ne matur, "Junjungan Saq Mulie, tunas Pelungguh ajahang tiang pade bedo'e maraq Yahya ngajahang pengiring-pengiringne bedo'e." 2 Make Deside Isa bemanik lẽq ie pade, "Lamun side bedo'e, ucapang maraq niki, 'Bapa, tesuciang pesẽngan Deside. Rauhang Kerajaan Deside. 3 Icanin tiang pade sebilang jelo keloran saq tiang pade perluang, 4 dait ampunin dose tiang pade, sẽngaq tiang pade ẽndah ngampunin dengan saq salaq tipaq tiang pade; dait sampunang gadingang tiang pade ojok dalem cobe.' " 5 Beterus Deside Isa bemanik lẽq pengiring-pengiring-Ne, "Lamun araq sopoq dengan lẽq antare side pade lumbar ojok balẽn baturne lẽq tengaq kelem, dait bebase, 'Semeton, bẽng tiang singgaq telu ruti, 6 sẽngaq batur tiang saq kenyeke bekelampan, nyelaloq lẽq balẽn tiang dait tiang ndẽq bedowẽ napi-napi jari bẽng ie ngelor.' 7 Seandẽne batur saq side datengin nike bejawab maraq niki, lẽman dalem balẽne, 'Ndaq nyusahang tiang! Lawang sampun telenting tiang kance anak-anak tiang sampun tindoq. Tiang ndẽq bau kawe ngebẽng side ruti.' " 8 Tiang badaq side, timaq side niki baturne, ie ndẽq gen mẽlẽ ures dait ngebẽng side napi-napi. Laguq lantaran ndẽq araq ilaqde terus doang side ngẽndẽng lẽq ie, make ie gen ures ẽndah dait ngebẽng side napi saq side perluang. 9 Keranaq nike Tiang badaq side: Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang. 10 Sẽngaq dengan saq nunas gen nerimaq; dengan saq boyaq gen mauq; dait dengan saq ketok lawang, gen tebukaqang lawang. 11 Lẽq antare side pade napi araq bapaq saq ngebẽng ulah lẽq bijene, lamun ie ngẽndẽng empaq? 12 Atao ngebẽng teledu, lamun ie ngẽndẽng teloq? 13 Jari, lamun side pade saq jahat, tao ngebẽng saq bagus lẽq bije-bijende. Lebih-lebih Bapa side pade lẽq sorge! Ie lebihan malik gen ngicanin Roh Suci tipaq sebilang dengan saq nunas lẽq Ie!" 14 Lẽq sopoq jelo, Deside Isa sediq sẽtan lẽman sopoq dengan pakoq. Sesampun sẽtan nike sugul, dengan nike mulai ngeraos. Luwẽq dengan bengaq, 15 laguq araq saq bebase, "Ie sediq sẽtan siq kuase Beelzebul, datune sẽtan nike." 16 Araq ẽndah dengan-dengan lain saq mẽlẽ boyaq kesalaqan Deside Isa, jari ie pade tunas Deside Isa piaq sopoq tande lẽman sorge. 17 Laguq Deside Isa wikan maksut ie pade. Make Deside Isa bemanik lẽq ie pade, "Lamun sopoq negare lẽq dalemne araq golongan-golongan saq saling bemusuhan, pasti negare nike ndẽq bau tahen ngonẽq. Dait sebilang keluarge saq saling bemusuhan sopoq kance saq lain, pasti gen ancur. 18 Maraq nike ẽndah lẽq dalem kerajaan Belis; lamun sopoq kelompoq besiaq kance kelompoq saq lain, kerajaan nike gen runtuh. Side pade bebase bahwe Tiang sediq sẽtan siq kuase Beelzebul. 19 Lamun maraq nike, siq kuase sai pengiring-pengiringde sediq sẽtan nike? Pengiring-pengiring side mẽsaq saq buktiang bahwe side pade salaq! 20 Laguq Tiang sediq sẽtan siq kuase Allah, dait setetune Kerajaan Allah sampun rauh tipaq side pade. 21 Lamun sopoq dengan saq kuat, jagaq balẽne mẽsaq kadu gegaman saq lengkap, selapuq dowẽne gen selamet. 22 Laguq lamun sopoq dengan saq kuatan nyerang dait ngalahang ie, make dengan saq kuatan nike gen ngerampas selapuq gegaman saq teandelang siq ẽpẽn balẽ nike, terus bagi-bagiang selapuq barang-barangne. 23 Dengan saq ndẽq bepihak lẽq Tiang, setetune ie ngelawan Tiang. Dait dengan saq ndẽq nulung Tiang setetune ie sẽdaq karye Tiang!" 24 "Lamun roh jahat sugul lẽman sopoq dengan, roh nike begelining ojok taoq-taoq saq gero jari boyaq taoqne mentelah, laguq ie ndẽq mauq. Keranaq nike ie gen muni, 'Tiang gen tulak ojok balẽ saq sampun tiang bilin!' 25 Waktu ie tulak ojok derike, daitne balẽ nike sampun bersi dait teratur. 26 Beterus ie lalo dait jauq pituq roh lain saq jahatan lẽman ie. Terus ie pade tame ojok dalem dengan nike dait ndot lẽq derike. Dait ahirne keadaan dengan nike jari lengẽan lẽman saq mule." 27 Sesampun Deside Isa bemanik maraq nike, sopoq dengan nine saq araq lẽq antare dengan luwẽq nike matur lẽq Deside Isa, "Bahagie gati dengan nine saq bijeang dait penyusuq Pelungguh!" 28 Laguq jawab Deside Isa, "Bahagiean malik dengan saq dengahang dait ngelaksaneang Manik Allah!" 29 Lẽq waktu dengan-dengan keriwung Deside Isa, Deside Isa bemanik malik, "Jahat gati dengan-dengan jaman niki. Ie pade tunas sopoq tande, laguq tipaq ie pade ndẽq gen teican sopoq juaq tande, kecuali tande Nabi Yunus. 30 Sẽngaq pade maraq Nabi Yunus jari tande dengan-dengan kote Niniwe, maraq nike ẽndah Bije Manusie gen jari tande lẽq dengan-dengan jaman niki. 31 Lẽq jelo Penghakiman, ratu lẽman negeri Lauq gen teidupang bareng kance dengan-dengan jaman niki, dait nuduh ie pade. Sẽngaq, jari dengahang pengajahan Nabi Sulaiman saq bijaksane, ratu nike dateng lẽman poton gumi. Laguq lẽq deriki mangkin araq saq belẽqan lẽman Nabi Sulaiman! 32 Lẽq jelo Penghakiman, penduduk Niniwe gen teidupang bareng kance dengan-dengan jaman niki, dait penduduk Niniwe nike gen ngukum ie pade, sẽngaq dengan-dengan Niniwe nike betobat sesampun ie pade dengah Nabi Yunus hotbah. Laguq lẽq deriki mangkin araq saq belẽqan lẽman Nabi Yunus!" 33 "Ndẽq araq dengan saq nyalaqang dilah terus ie seboq atao kudungne kadu tepaq. Ie gen noloq dilah nike lẽq naẽn dilah, adẽq dengan saq tame bau serioq menahne. 34 Penentengde nike dilah lẽq awak. Lamun penentengde solah, selapuq awakde jari terang. Laguq lamun penentengde jahat, selapuq awakde jari peteng dedet. 35 Keranaq nike, onyaq-onyaq, ndaq jangke terang saq araq lẽq side nike jari peteng. 36 Lamun selapuq awakde menah, dait ndẽq araq bagian saq peteng, make selapuq awakde nike gen menah maraq tesinarin cahaye dilah." 37 Sesampun Deside Isa tutuq bebaos, sopoq dengan Parisi pesilaq Ie medaran lẽq balẽne. Make Deside Isa lumbar medaran lẽq derike. 38 Dengan Parisi nike bengaq serioq Deside Isa medaran sẽngaq nẽnten bisoq gading-Ne juluq menurut aturan agame. 39 Keranaq nike Deside Isa, Junjungan Saq Mulie bemanik lẽq ie, "Mule side pade dengan-dengan Parisi biasene persiq jembung dait piring bagian luahne, laguq lẽq dalem diriqde mẽsaq penoq secare pakse dait serakah. 40 Side pade bodo! Tekan Allah saq jariang bagian luah nike, Ie ẽndah sampun jariang bagian dalemne? 41 Saq araq lẽq dalem piring jembungde nike, nike saq harus side pade bẽng ojok dengan-dengan miskin. Siq care nike, selapuqne gen jari bersi umaq side. 42 Celake side pade, dengan-dengan Parisi! Hasil taletande maraq misal selasih dait inggu dait selapuq jenis sayuran, side pade aturin sepersepulune ojok Allah, laguq keadilan dait kasih tipaq Allah ndẽq side pade perhatiang. Padahal nike saq seharusne side pade laksaneang dait ndaq lupaqang saq lain-lainne ẽndah. 43 Celake side pade, dengan-dengan Parisi! Side pade seneng melinggih lẽq kursi saq paling julu lẽq balẽ-balẽ ibadah, dait seneng tehormatin lẽq peken-peken. 44 Celake side pade! Side pade maraq kuburan saq ndẽq ngadu tande, sehingge dengan lampaq lẽq atasne ndẽq sadar bahwe ie pade lampaq lẽq atas kuburan." 45 Salaq sopoq ahli Taurat matur lẽq Deside Isa, "Paq Guru, siq ucapan-ucapan nike, Pelungguh menghine tiang pade ẽndah!" 46 Jawab Deside Isa, "Celake side pade ẽndah, ahli-ahli Taurat! Side pade nuntut hal-hal saq sengke dait ngebẽng aturan-aturan saq berat, laguq side pade sekediq juaq ndẽq mẽlẽ nulung dengan ngelaksaneang hal nike. 47 Celake side pade! Side pade piaq makam nabi-nabi, saq malahan tematẽq siq leluhur side mẽsaq. 48 Jari side pade mẽsaq ngakuq, bahwe side pade setuju napi saq sampun telaksaneang siq leluhurde; sẽngaq mule ie pade saq nyematẽq nabi-nabi nike dait side pade saq piaq makamne. 49 Keranaq nike Allah bemanik secare bijaksane, 'Tiang gen ngutus tipaq ie pade nabi-nabi dait utusan-utusan Tiang; separo gen tematẽq, dait separo gen teaniaye!' 50 Allah ngelaksaneang hal nike adẽq dengan-dengan jaman niki tehukum lantaran ie pade nyematẽq selapuq nabi-nabi lẽman mulai dunie niki tecipteang, 51 mulai lẽman Habil tematẽq jangke Zakaria tematẽq, saq telaksane lẽq antare mẽje taoq kurban dait Gedẽng Allah. Tiang badaq side: Dengan-dengan jaman niki pasti gen tehukum lantaran selapuqne nike. 52 Celake side pade, ahli-ahli Taurat! Kunci jari lekaq lawang penenaoq tesimpen lẽq side pade, laguq side pade ndẽq mẽlẽ tame ojok dalem jari boyaq penenaoq nike. Sebalikne side pade halang-halangin dengan-dengan saq berusahe tame ojok dalemne!" 53 Sewaktu Deside Isa bilin taoq nike, ahli-ahli Taurat dait dengan-dengan Parisi sayan peringet Deside Isa secare keras. Ie pade mulai boyaq-boyaq hal lẽq Deside Isa adẽq Ie kayun bebaos mengenai luwẽq hal. 54 Dait lẽq waktu nike ie pade perhatiang Deside Isa pacu-pacu jari boyaq-boyaq kesalaqan saq teucapang siq Deside Isa, adẽq Ie tebau.

Luke 12

1 Lẽq waktu beiyu-iyu dengan sampun bekeriwung dait bedesek-desekan, Deside Isa bemanik lẽq pengiring-pengiring-Ne, "Onyaq-onyaq lẽq ragi ruti dengan Parisi, maksut Tiang kemunapikan ie pade. 2 Ndẽq araq saq teseboq saq ndẽq gen penggitan, dait ndẽq araq saq terahasieang saq ndẽq gen tebungkar. 3 Saq side pade ucapang lẽq taoq saq peteng, gen kedengahan lẽq taoq saq menah; dait saq side pade pẽsẽq lẽq kentok dengan lẽq dalem kamar saq teimpet, gen teumumang belẽq-belẽq." 4 "Tiang badaq side, batur-batur Tiang! Ndaq takut lẽq ie pade saq bau nyematẽq awak laguq sesampun nike ndẽqne bau piaq napi-napi malik. 5 Mangkin araqan Tiang badaq side lẽq sai side pade harus takut. Pade takut tipaq Allah! Sẽngaq sesampun nyematẽq, Ie ẽndah bedowe kuase netẽh ojok dalem api nerake! Tiang badaq side pacu-pacu, tipaq Allah doang side pade harus takut. 6 Lime kedit perit tejual ajine due kẽpẽng saq paling kodẽq. Timaq maraq nike ndẽq araq sopoq juaq saq telupaqang siq Allah. 7 Bulu lẽq ulunde ẽndah sampun terẽkẽng selapuqne, keranaq nike ndaq takut; side pade jaoq belẽqan ajine tebanding kedit-kedit perit nike." 8 "Tiang badaq side: Dengan saq ngakuq lẽq julun dengan luwẽq bahwe ie pengiring Tiang, ie gen teakuq ẽndah siq Bije Manusie lẽq arepan malaẽkat-malaẽkat Allah. 9 Laguq dengan saq nilas lẽq julun dengan luwẽq bahwe ie pengiring Tiang, ie gen tetilas ẽndah siq Bije Manusie lẽq arepan malaẽkat-malaẽkat Allah. 10 Lamun dengan ngucapang sopoq hal saq nentang Bije Manusie, ie bau teampunin; laguq lamun ie menghine Roh Suci, ie ndẽq gen teampunin. 11 Lamun side pade tejauq ojok balẽ-balẽ ibadah jari teadilin lẽq arepan pemrẽntah atao penguase, ndaq kuatir mengenai berembẽ side pade harus bẽle diriq atao mengenai napi saq harus side pade sampẽang. 12 Sẽngaq lẽq waktu nike ẽndah Roh Suci gen badaq side pade napi saq harus side pade sampẽang." 13 Sopoq dengan lẽman tengaq-tengaq dengan luwẽq nike matur lẽq Deside Isa, "Bapaq Guru, silaq Pelungguh manikang semeton tiang adẽqne bẽng tiang separo harte warisan amaq tiang." 14 Jawab Deside Isa, "Semeton, sai saq ngangkat Tiang jari hakim atao tukang bagi warisan antare deduaq side pade?" 15 Beterus lẽq selapuq dengan saq araq lẽq derike Deside Isa bemanik, "Onyaq-onyaq dait waspade, ndaq jangke side pade serakah. Sẽngaq idup manusie ndẽq beharep lẽman kesugihanne, timaq dowẽne belimpah-limpah." 16 Beterus Deside Isa nyeriteang perumpamean niki, "Araq sopoq dengan sugih. Ie bedowẽ tanaq saq belimpah-limpah hasilne. 17 Dengan sugih nike mulai mikir dalem atẽne, 'Sampun ndẽq araq malik taoq tiang jari nyimpen hasil tanaq tiang. Napi akal tiang mangkin?' 18 Beterus ie mikir malik, dait ie ngeraos mẽsaq, 'Nah, tiang araq akal; gen tiang bungkar gudang-gudang tiang terus tiang penganjeng saq belẽqan. Lẽq derike taoq tiang toloq selapuq gandum tiang dait barang-barang tiang saq lain. 19 Beterus tiang gen muni lẽq diriq tiang mẽsaq: Side aget! Side sampun bedowẽ selapuq saq solah, dait ndẽq gen bis jangke betaun-taun. Mangkin mentelah! Ngelor dait nginem, dait puasang idupde!' 20 Laguq Allah bemanik lẽq ie, 'Hai dengan bodo! Kelem niki ẽndah side gen matẽ, terus sai saq gen mauq selapuq kesugihan saq sampun side kumpulang umaq diriqde nike?' 21 Maraq nike kejarianne sebilang dengan saq berusahe pesugih diriqne mẽsaq, laguq ndẽq berusahe jari sugih menurut pekayunan Allah." 22 Beterus Deside Isa bemanik lẽq pengiring-pengiring-Ne, "Keranaq nike Tiang badaq side pade, 'Ndaq side pade kuatir mengenai idupde, napi saq gen side pade kelor, atao napi saq gen side pade kadu.' 23 Sẽngaq idup nike pentingan lẽman keloran dait awak pentingan lẽman kelambi. 24 Perhatiang kedit-kedit gagak! Ie pade ndẽq uwah sawur binẽq, ndẽq ẽndah bedowẽ gudang atao lumbung. Laguq Allah peliharaq ie pade! Side pade jaoq belẽqan ajine ketimbang kedit-kedit! 25 Sai lẽq antare side pade siq kuatirne bau ngeromboq umurne timaqne sekediq? 26 Jari, lamun side pade ndẽq sanggup miaq sopoq hal timaq saq paling kodẽq, kembẽq side pade harus kuatir mengenai hal-hal lain? 27 Perhatiang berembẽ kembang-kembang bakung tiwoq; kembang-kembang nike ndẽq begawẽan, ndẽq ẽndah nyẽsẽk, laguq Tiang badaq side: Nabi Sulaiman timaq ie sugih gati, ndẽq ngengadu kelambi saq solahne maraq kembang-kembang nike! 28 Pupaq lẽq lendang tiwoq jelo niki dait lẽmaq bis tesedut. Laguq Allah payas pupaq nike solah gati. Lebih-lebih side pade, dengan-dengan saq kurang percaye! 29 Jari, ndaq kuatir dait bingung mengenai napi saq side pade kelor dait inem. 30 Selapuq nike teboyaq siq bangse-bangse lẽq dunie saq ndẽq kenal kance Allah. Padahal napi saq side pade perluang lẽq dalem idupde, selapuqne nike sampun tewikanang siq Bapa side pade. 31 Laguq boyaq Kerajaan Allah, make selapuq saq lain ẽndah gen teromboqang tipaq side pade siq Allah." 32 "Ndaq takut, side saq cume sekediq jumlahne! Sẽngaq Bapa side seneng ngicanin side Kerajaan-Ne nike. 33 Jual dowẽnde dait sedekahang kẽpẽngne tipaq dengan miskin. Piaqang diriqde dompẽt saq ndẽq iniq sẽde, nike harte saq tesimpen lẽq sorge. Harte nike ndẽq iniq telang sẽngaq maling ndẽq bau bait dait tembrẽnẽ ndẽq bau nyenyẽdaq. 34 Sẽngaq lẽq mbẽ hartende araq, lẽq derike ẽndah angende!" 35 "Bejage-jage lẽq selapuq hal. Side harus tetep siep kadu kelambi dait dilahde tetep tenyalaqang, 36 pade maraq pelayan-pelayan saq kenyeke ngantih majikanne tulak lẽman gawẽ ngawinang. Lamun majikan nike tulak, dait ketok lawang, ie pade nyerepek bukaq lawang. 37 Bahagie gati pelayan-pelayan saq tedait kenyeke ngantih lẽq waktu majikanne dateng. Tiang badaq side: Setetune majikan nike gen besiep-siep dait suruq pelayan-pelayan nike tokol, terus ie ngelayanin ie pade. 38 Bahagie gati pelayan-pelayan nike lamun majikan nike ndait ie pade kenyeke siep ngantih, timaq ie dateng tengaq kelem atao subuh! 39 Pade inget! Seandẽne ẽpẽn balẽ sampun nenaoq jam pire maling gen dateng, ie gen bejage adẽq maling ndẽq tame ojok dalem balẽne. 40 Keranaq nike, side pade ẽndah harus besiep-siep, sẽngaq Bije Manusie gen rauh lẽq waktu saq ndẽq side pade badẽq." 41 Petrus metakẽn, "Junjungan Saq Mulie, napi perumpamean nike Pelungguh tujuang tipaq tiang pade atao tipaq selapuq dengan?" 42 Jawab Junjungan Saq Mulie, "Sai pelayan saq setie dait bijaksane sehingge teangkat siq majikanne jari kepale tipaq pelayan-pelayan lain, adẽq ie bẽng ie pade bekelor lamun sampun wayene? 43 Bahagie gati pelayan saq tedait kenyeke ngelaksaneang tugasne waktu majikanne tulak! 44 Tiang badaq side: Setetune pelayan nike gen tesaduq siq majikanne jari jagaq selapuq dowẽne. 45 Laguq lamun pelayan nike jahat, ie gen bebase lẽq dalem angenne, 'Majikan tiang masih ngonẽq tulak,' terus ie ngempuk selapuq pelayan dait bekelor dait nginem jangke bowos, 46 beterus majikanne gen tulak lẽq jelo dait jam saq ndẽq ie badẽq. Make pelayan nike gen tesiksaq siq majikanne, dait tejariang senasip kance dengan-dengan saq ndẽq setie. 47 Pelayan saq nenaoq pekayunan majikanne, laguq ndẽq besiep-siep dait ndẽq ngelaksaneang pekayunan majikanne nike, gen tepecut keras-keras. 48 Laguq pelayan saq ndẽq nenaoq pekayunan majikanne, beterus ngelaksaneang hal saq salaq, sehingge harus tepecut sekediq doang. Sẽngaq dengan saq sampun teicanin luwẽq, lẽman ie gen tetuntut luwẽq ẽndah. Dait dengan saq sampun tepercayeang luwẽq, lẽman ie gen tetuntut luwẽq ẽndah." 49 "Tiang dateng jari nimbulang julat lẽq gumi niki. Solahan malik lamun apine sampun nyale! 50 Tiang harus ngalamin sopoq baptisan, dait angen Tiang osah gati sendẽqman hal nike telaksane. 51 Napi side pade paran Tiang dateng jari jauq perdamẽan ojok dunie? Ndẽq, ndẽqne perdamẽan, laguq perlawanan. 52 Mulai lẽman mangkin, keluarge saq luwẽqne lime dengan gen bemusuhan, telu lawan due atao due lawan telu. 53 Amaq gen ngelawan anakne saq mame, dait kanak mame gen ngelawan amaqne. Inaq gen ngelawan anakne saq nine, dait kanak nine gen ngelawan inaqne. Mentoaq nine gen ngelawan menantune saq nine dait menantu nine gen ngelawan mentoaqne saq nine." 54 Deside Isa bemanik ẽndah lẽq dengan luwẽq, "Lamun side pade serioq awan taẽk lẽq bagian bat, langsung side pade bebase, 'Gen ujan.' Dait tetu-tetu ujan. 55 Lamun side pade beridap angin dateng lẽman lauq, side pade bebase, 'Gen panas.' Dait tetu-tetu panas. 56 Side pade dengan-dengan munapik! Side pade tao badẽq cuace lẽman serioq keadaan langit dait gumi. Kembẽq tande-tande jaman niki ndẽq tao side pade tapsir?" 57 "Kembẽq side pade ndẽq mutusang mẽsaq napi saq kenaq? 58 Lamun araq dengan ngelaporang side pade ojok pengadilan, berusahe semampu side jari nyelesẽang pelekare nike kance ie sewaktu side pade masih lẽq tengaq langan. Lamun ndẽq, laun ie jauq side pade ojok hakim dait hakim nike gen nyerahang side pade ojok petugasne, dait dengan nike gen tamaqang side pade ojok dalem bui. 59 Tiang badaq side: Side pade ndẽq gen sugul lẽman bui sendẽqman side bayah utangde jangke lunas!"

Luke 13

1 Lẽq waktu nike ẽndah araq dengan saq nyampẽang tipaq Deside Isa mengenai dengan-dengan Galilea saq tematẽq siq Pilatus, sewaktu ie pade kenyeke ngaturang kurban tipaq Allah. 2 Deside Isa jawab ie pade, "Napi lantaran maraq nike entan dengan-dengan Galilea nike tematẽq maraq nike, side pade paran nike buktine ie pade belẽqan dosene tebanding selapuq dengan Galilea saq lain? 3 Tiang badaq side: Pasti Ndẽq! Laguq lamun side ndẽq betobat lẽman dose-dosende, side pade selapuq gen binase ẽndah, maraq ie pade. 4 Berembẽ dengan saq baluq olas saq ninggal ẽndah sewaktu ie pade tetimpe siq menare lẽq Siloam? Side pade paran nike buktine ie pade belẽqan dosene tebanding selapuq dengan-dengan lain saq ndot lẽq Yerusalem? 5 Tiang badaq side: Pasti ndẽq! Laguq lamun side pade ndẽq betobat lẽman dose-dosende, side pade selapuq gen binase ẽndah maraq ie pade." 6 Sesampun nike Deside Isa nyeriteang perumpamean niki, "Araq dengan nalet sopoq lolo are lẽq kebon anggurne. Lẽq sopoq jelo, ie lumbar boyaq buaq lolo are nike, laguq sopoq-sopoq ndẽq araq buaqne. 7 Jari, ie bebase lẽq penyakapne, 'Sampun telu taun tiang dateng boyaq buaq lolo are niki, laguq sopoq-sopoq ndẽq araq buaqne. Silaq pade rebaq lolo nike! Ie cume nyembih sari kakenan lẽman tanaq!' 8 Laguq jawab penyakap nike, 'Paq, alurang baẽ ie karing setaun. Tiang gen romboq tanaq lẽq sekiterne dait toloqang raboq. 9 Sang iniq bebuaq taun mudi. Laguq lamun ndẽq bebuaq, silaq pelungguh rebaq ie.' " 10 Lẽq sopoq jelo, waktu nike jelo Sabat, Deside Isa ngajahang lẽq salaq sopoq balẽ ibadah. 11 Lẽq derike araq sopoq dengan nine saq sampun baluq olas taun ngonẽqne sakit, sẽngaq araq roh jahat lẽq dalem diriqne. Dengan nine nike bongkok dait tetu-tetu ndẽq tao panjeng. 12 Sewaktu Deside Isa cingakin dengan nine nike, Deside Isa bemanik lẽq ie, "Inaq, penyakitde sampun selah!" 13 Beterus Deside Isa noloq gading-Ne lẽq atas dengan nine nike, dait waktu nike ẽndah ie panjeng, terus mulieang Allah. 14 Kepale balẽ ibadah nike sili, sẽngaq Deside Isa nyelahang dengan lẽq jelo Sabat, keranaq nike ie bebase lẽq dengan-dengan, "Araq enem jelo jari begawẽan, pade dateng lẽq jelo-jelo nike jari teselahang, ndaq lẽq jelo Sabat!" 15 Junjungan Saq Mulie bemanik, "Side pade munapik! Lẽq jelo Sabat selapuq dengan ngelepas sampi atao bagalne lẽman barene, dait jauqne sugul terus tebẽng nginem. 16 Nah, lẽq deriki mangkin araq sopoq dengan nine keturunan Ibrahim, saq sampun baluq olas taun tekuasein siq Belis. Napi ndẽq kanggo tebẽbasang lẽman kuase nike lẽq jelo Sabat?" 17 Jawaban Deside Isa nike piaq musuh-musuh-Ne jari ilaq gati; laguq selapuq dengan-dengan saq lain seneng serioq selapuq muqjizat saq tepiaq siq Deside Isa. 18 Deside Isa beketuan, "Mengenai Kerajaan Allah berembẽ keadaanne? Napi siq Tiang kadu bandingang ie? 19 Keadaanne maraq perumpamean niki. Sopoq tolang sawi tebait siq dengan terus tesawur lẽq kebonne. Tolang sawi nike tiwoq terus jari lolo, dait kedit-kedit piaq kesebu lẽq pẽmpangne." 20 Deside Isa bemanik malik, "Kadu napi malik gen Tiang umpameang hal Kerajaan Allah? 21 Keadaanne pade maraq ragi ruti saq tebait siq sopoq dengan nine terus teadon kance petang dase liter tepung terigu, jangke mbal selapuqne." 22 Dalem pemargian-Ne ojok Yerusalem, Deside Isa liwat langan kote-kote dait kampung sambil ngajahang. 23 Beterus araq dengan metakẽn lẽq Deside Isa, "Paq, napi cume sekediq doang dengan saq gen teselametang?" Jawab Deside Isa, 24 "Pade berusahe tame langan lawang saq supit. Tiang badaq side, luwẽq dengan berusahe tame laguq ndẽq bau. 25 Sewaktu ẽpẽn balẽ ures dait ngimpet lawangne, side pade nganjeng lẽq luah dait mulai ketok-ketok lawang sambil bebase, 'Paq, bukaqang tiang lawang!' ~Epẽn balẽ nike gen bejawab, 'Tiang ndẽq nenaoq side lẽman mbẽ!' 26 Side pade gen bejawab, 'Tiang pade sampun bekelor dait nginem kance Pelungguh, dait Pelungguh ẽndah sampun ngajahang lẽq rurung-rurung saq araq lẽq kote tiang pade!' 27 Laguq ẽpẽn balẽ nike gen bejawab malik, 'Tiang ndẽq nenaoq side pade lẽman mbẽ! Pade nyedi lẽman taoq niki, side pade saq gawẽq jahat!' 28 Sewaktu side pade serioq Ibrahim, Ishak dait Yakub serte selapuq nabi besukecite lẽq dalem Kerajaan Allah, side pade gen nangis dait menderite, sẽngaq side pade tetundung ojok luah! 29 Dengan-dengan gen dateng lẽman Timuq, Bat, lẽman Lauq dait Daye, dait gen besukecite lẽq dalem Kerajaan Allah. 30 Setetune, araq dengan saq penutuq gen jari dengan penembẽq, dait dengan saq penembẽq gen jari saq penutuq." 31 Lẽq waktu nike ẽndah araq dengan-dengan Parisi parek ojok Deside Isa dait matur, "Sampunang Pelungguh meneng lẽq deriki, silaq Pelungguh lumbar ojok taoq saq lain, sẽngaq Herodes beniat nyematẽq Pelungguh." 32 Jawab Deside Isa, "Silaq lumbar dait sampẽang ojok dengan saq ndẽq araq manpaatne nike, 'Jelo niki dait jemaq Tiang gen sediq roh jahat dait nyelahang dengan sakit, laguq lẽq jelo ketelu, Tiang gen nutuqang karye Tiang.' 33 Timaqne maraq nike Tiang harus nerusang ẽndah kelampan Tiang, jelo niki, jemaq dait sulẽqne, sẽngaq sopoq nabi ndẽq kanggo tematẽq lẽq luah Yerusalem. 34 Yerusalem, Yerusalem! Side matẽq nabi-nabi! Utusan-utusan Allah side pelẽwas siq batu jangke ninggal! Sampun pire kali Tiang mẽlẽ ngumpulang selapuq pendudukde maraq inen manuk saq kekep anak-anakne lẽq bawaq kelẽtẽkne, laguq side ndẽq mẽlẽ! 35 Setetune balẽnde gen tebilin dait jari sepi. Laguq Tiang badaq side: Mulai mangkin side ndẽq gen serioq Tiang malik, jangke side bebase, 'Teberkahin Ie saq rauh dalem pesẽngan Tuhan.' "

Luke 14

1 Lẽq sopoq jelo, waktu nike jelo Sabat, Deside Isa lumbar medaran lẽq gedẽng salaq sopoq pemimpin dengan Parisi. Lẽq derike dengan-dengan merhatiang Deside Isa secare teliti. 2 Terus araq sopoq dengan mame saq sakit kembaq aiq saq naẽ dait imene baq parek ojok Deside Isa. 3 Beterus Deside Isa beketuan lẽq ahli-ahli Taurat dait dengan-dengan Parisi saq araq lẽq derike, "Menurut Hukum Taurat, kanggo atao ndẽq ite selahang dengan sakit lẽq jelo Sabat?" 4 Ahli-ahli Taurat dait dengan-dengan Parisi nike meneng doang. Terus Deside Isa ngemanikang dengan nike dait nyelahang ie, beterus suruq ie lumbar. 5 Sesampun nike Deside Isa bemanik tipaq dengan-dengan, "Seandẽne salaq sopoq lẽman side pade bedowẽ sopoq bije atao sopoq sampi saq geriq ojok dalem lingkoq lẽq jelo Sabat, napi ie ndẽq gen nyerepek nyugulang bijene nike atao sampi nike lẽq jelo nike ẽndah?" 6 Laguq ndẽq sopoq dengan juaq bau jawab Deside Isa mengenai hal nike. 7 Deside Isa cingakin araq temuẽ-temuẽ saq milẽq taoq-taoq saq paling tehormat. Keranaq nike Deside Isa bemanik tipaq ie pade selapuq. 8 "Lamun side pade tepesilaq ojok gawẽ ngawinang, ndaq tokol lẽq kursi kehormatan. Sẽngaq ndaq-ndaq araq dengan lain saq pentingan lẽman side sampun tepesilaq ẽndah, 9 sehingge ẽpẽn balẽ saq sampun pesilaq side pade, gen dateng tipaq side dait bebase, 'Maap, taoq niki sampun tesadangang jari temuẽ niki.' Make siq ilaq side terpakse tokol lẽq taoq saq paling mudi. 10 Keranaq nike lamun side pade tepesilaq, pilẽq taoq saq paling mudi, sang ẽpẽn balẽ gen dateng dait bebase lẽq side, 'Batur, silaq tokol lẽq taoq saq solahan.' Siq care nike side tehormatin lẽq julun selapuq temuẽ saq lain. 11 Sẽngaq dengan saq nyombongang diriqne gen terendahang, dait dengan saq ngerendahang diriqne gen tetinggiang." 12 Beterus Deside Isa bemanik lẽq ẽpẽn balẽ, "Lamun side ngaraqang gawẽ lẽq kenjelo atao kekelem, ndaq pesilaq batur atao semeton, atao kadang jari, atao tetangge side saq sugih. Sẽngaq laun ie pade gen pesilaq side ẽndah, dait siq care nike side nerimaq balesan perbuatande. 13 Jari, lamun side ngaraqang gawẽ, pesilaq dengan miskin, dengan cacat, dengan kẽpaq dait dengan bute. 14 Side gen bahagie, sẽngaq dengan-dengan nike ndẽq gen mauq bales kesolahande. Kesolahande gen tebales siq Allah lẽq waktu dengan-dengan saq solẽh teidupang malik lẽman ninggal." 15 Lẽq waktu salaq sopoq temuẽ saq bareng-bareng medaran lẽq derike dengah manik Deside Isa, ie bebase, "Bahagie gati dengan saq gen tejamu dalem Kerajaan Allah!" 16 Laguq Deside Isa bemanik tipaq dengan nike, "Lẽq sopoq waktu araq sopoq dengan ngaraqang gawẽ saq belẽq dait pesilaq luwẽq dengan. 17 Sewaktu gawẽ nike gen temulai, dengan nike suruq pelayanne lumbar ojok dengan saq tepesilaq dait bebase, 'Silaq dateng, selapuqne sampun tesiepang!' 18 Laguq ie pade selapuq, sopoq-sopoq dengan mulai tunas maap. Saq penembẽq bebase lẽq pelayan nike, 'Tiang baruq gati beli lendang, dait tiang harus lalo periksaq ie. Tiang tunas maap.' 19 Saq lain bebase, 'Tiang baruq beli lime pasang sampi, dait tiang harus lalo periksaq sampi-sampi nike. Maapang tiang.' 20 Saq lain malik bebase, 'Tiang baruq gati merariq, keranaq nike tiang ndẽq bau dateng.' 21 Pelayan nike ulẽq, dait nyampẽang hal nike ojok majikanne. Majikan nike sili gati, dait bebase lẽq pelayanne, 'Becat lalo ojok rurung-rurung dait pengorong-pengorong lẽq kote. Jauq ojok deriki dengan miskin, dengan cacat, dengan bute dait dengan kẽpaq.' 22 Beterus pelayan nike bebase, 'Paq, prẽntah pelungguh sampun tiang laksaneang, laguq masih luwẽq taoq saq kosong.' 23 Beterus majikan nike bebase, 'Lalo ojok rurung-rurung belẽq dait pengorong-pengorong lẽq luah kote, dait paksaq dengan-dengan dateng, adẽq balẽn tiang penoq. 24 Tiang badaq side, ndẽq sopoq dengan juaq lẽq antare temuẽ-temuẽ saq sampun tepesilaq nike gen nikmatin keloran saq tesadangan lẽq gawe tiang niki!' " 25 Luwẽq dengan milu ngiring Deside Isa. Deside Isa ngẽngat andang ie pade dait bemanik, 26 "Lamun dengan dateng tipaq Tiang, laguq lebih ngasihin inaqne, amaqne, seninene, anak-anakne, semeton-semetonne, malahan diriqne mẽsaq, ie ndẽq bau jari pengiring Tiang. 27 Dengan saq ndẽq ngelẽmbah salibne, dait ngiring Tiang, ndẽq bau jari pengiring Tiang. 28 Lamun salq sopoq lẽman side pade mẽlẽ penganjeng sopoq menare, pasti ie gen tokol rẽkẽng juluq biayene adẽq ie nenaoq napi kẽpẽngne cukup jari nyelesẽang menare nike atao ndẽq. 29 Sẽngaq lamun ternyate ie ndẽq bau nyelesẽang, padahal dasarne sampun tepiaq, make selapuq dengan saq serioq pegawẽan nike gen ngelelẽqang ie. 30 Ie pade gen bebase, 'Dengan niki penganjeng sopoq menare, laguq ndẽq bau nyelesẽang!' 31 Lamun sopoq raje saq bedowẽ sepulu iyu tentere mẽlẽ perang kance raje lain saq bedowẽ due pulu iyu tentere, pasti raje nike gen melinggih pertimbangang juluq napi ie sanggup ngelawan musuhne nike. 32 Lamun ie nenaoq bahwe ie ndẽq kuat, pasti sewaktu musuhne nike masih jaoq, ie gen ngirim utusanne jari tunas bedamẽ." 33 Ahirne Deside Isa bemanik, "Maraq nike ẽndah lẽq side pade. Ndẽq sopoq dengan juaq lẽman side pade bau jari pengiring Tiang, lamun ie ndẽq ngorbanang selapuq-lapuqne." 34 "Sie nike solah, laguq lamun jari tawah, napi bau tepaẽqang malik? 35 Ndẽq araq manpaatne malik, timaq jari nyuburang tanaq atao jari raboq. Ie gen tetetẽh siq dengan. Lamun bedowẽ kentok, dengahang!"

Luke 15

1 Lẽq sopoq jelo, luwẽq penagih pajek dait dengan-dengan saq bedose, dateng dengahang Deside Isa. 2 Dengan-dengan Parisi dait ahli-ahli Taurat mulai ngerumun. Ie pade bebase, "Dengan niki nerimaq dengan-dengan saq bedose dait malahan bareng medaran kance ie pade!" 3 Keranaq nike Deside Isa nyeriteang perumpamean niki lẽq ie pade, 4 "Lamun salaq sopoq lẽman side pade bedowẽ satus dombe, terus ie kẽlangan sopoq -- napi saq gen ie piaq? Pasti ie gen bilin dombe saq siwaq pulu siwaq nike lẽq lendang pupaq, dait lumbar boyaq saq telang nike jangke kendaitan. 5 Lamun ie ndait malik dombe nike, ie cemoh gati sehingge ponggoqne dombe nike, 6 terus jauqne ulẽq. Beterus ie ngempoh batur-batur dait tetangge-tetanggene, dait bebase, 'Silaq ite beseneng-seneng. Sẽngaq dombe tiang saq telang sampun tiang ndait malik!' 7 Tiang badaq side, maraq nike ẽndah lẽq sorge gen araq sukecite saq belẽqan lantaran sopoq dengan bedose saq betobat, ketimbang siwaq pulu siwaq dengan saq sampun keruan kenaq dait ndẽq perlu betobat." 8 "Atao lamun sopoq dengan nine bedowẽ sepulu kẽpẽng perak, terus telang sopoq -- napi saq gen ie piaq? Ie gen penyalaq dilah dait sapu balẽne terus boyaq lẽq mbẽ-mbẽ jangke ie ndait kẽpẽng nike. 9 Sewaktu ie ndait kẽpẽng nike, ie ngempoh batur-batur dait tetangge-tetanggene, terus bebase, 'Tiang seneng gati sampun ndait malik kẽpẽng tiang saq telang. Silaq ite beseneng-seneng!' 10 Tiang badaq side, maraq nike ẽndah malaẽkat Allah gen gembire lamun araq sopoq dengan bedose betobat lẽman dose-dosene." 11 Deside Isa bemanik malik, "Araq sopoq amaq saq bedowẽ due bije mame. 12 Saq sengari bebase tipaq amaqne, 'Amaq, bẽng tiang dowẽ saq jari bagian tiang.' Make amaqne bagi kesugihanne nike tipaq kedue bijene. 13 Pire jelo sesampun nike bijene saq sengari nike jual bagianne nike terus lumbar ojok negeri saq jaoq. Lẽq derike ie ambur-amburang kẽpẽngne siq idup loyar dait beseneng-seneng. 14 Sewaktu selapuq kẽpẽngne bis, lẽq negeri nike araq musibah kelapahan saq belẽq, sehingge ie mulai melarat. 15 Terus ie lumbar begawẽan lẽq salaq sopoq penduduk lẽq derike. Dengan nike suruq ie ojok lendang jagaq bawine. 16 Saking lapahne ie melẽt ngisiq tianne siq kakenan bawi-bawi nike laguq ndẽq araq sopoq dengan juaq saq ngebẽng ie kakenan bawi nike. 17 Ahirne ie sadar dait bebase, 'Dengan-dengan saq begawẽan lẽq amaq tiang belimpah-limpah keloranne, dait tiang lẽq deriki matẽ kelapahan! 18 Tiang gen tulak ojok amaq tiang, dait bebadaq lẽq ie: Amaq, tiang sampun bedose tipaq Allah dait lẽq side. 19 Ndẽq patut malik tiang tesebut bijende. Anggep tiang niki salaq sopoq pesuruqde.' 20 Terus ie lalo ulẽq ojok amaqne. Masih jaoq lẽman balẽ, ie sampun teserioq siq amaqne. Amaqne jari periak lẽq ie dait pelai sambut ie, terus kapongne dait sidukne bijene nike. 21 'Amaq,' basen bijene nike, 'tiang sampun bedose tipaq Allah dait lẽq side. Tiang ndẽq patut malik tesebut bijende.' 22 Laguq amaqne ngempoh pelayan-pelayanne, dait bebase, 'Becat! Baitang kelambi saq paling solah, dait kaduang lẽq ie. Pasangang ali-ali lẽq ranggotne dait sepatu lẽq naẽne. 23 Sesampun nike bait anak sampi saq mokoh dait sembelẽh. Ite gen roah dait besukecite. 24 Sẽngaq bije tiang niki sampun milinang, mangkin idup malik; ie sampun telang laguq mangkin tedait malik.' Terus ie pade mulai begawẽ. 25 Lẽq waktu nike, bijene saq sengake araq lẽq lendang. Sewaktu ie ulẽq dait sampun rapet balẽne, ie dengah suare gending dait igel-igelan. 26 Ie ngempoh salaq sopoq pelayan-pelayanne, terus beketuan, 'Araq napi niki lẽq balẽ?' 27 Jawab pelayan nike, 'Adiqde sampun tulak! Dait amaqde sampun suruq dengan sembelẽh anak sampi saq mokoh, sẽngaq bijene sampun tulak malik dalem keadaan selamet!' 28 Bije saq sengake nike gedek gati, jangke ie ndẽq mẽlẽ tame balẽ. Beterus amaqne sugul dait ngodop ie adẽqne tame. 29 Laguq ie bebase lẽq amaqne, 'Betaun-taun ngonẽqne tiang begawẽan matẽ-matẽan umaq side. Tiang ndẽq uwah ngelawan prẽntahde. Dait napi saq side bẽng lẽq tiang? Timaq sopoq bẽmbẽq ndẽq uwah tiang terimaq lẽman side jari begawẽ kance batur-batur tiang! 30 Bijende nike sampun nyembih kesugihande kance pelacur-pelacur, laguq waktu ie tulak, side sembelẽh anak sampi saq mokoh umaq ie!' 31 'Anak,' jawab amaqne, 'side tetep araq lẽq deriki bareng kance tiang. Selapuq saq tiang ẽpẽang ẽndah jari dowẽnde. 32 Laguq ite harus roah dait beseneng-seneng, sẽngaq adiqde nike sampun milinang, laguq mangkin idup malik; ie sampun telang, laguq mangkin sampun tedait malik.' "

Luke 16

1 Deside Isa bemanik lẽq pengiring-pengiring-Ne, "Araq sopoq dengan sugih bedowẽ sopoq bendahare jari ngurus selapuq kesugihanne. Dengan sugih nike dengah laporan bahwe bendaharene nike ngambur-amburang kẽpẽngne. 2 Empohne bendahare nike dait bebase lẽq ie, 'Napi niki laporan saq tiang dengah mengenai side? Mangkin, serahang lẽq tiang laporan saq lengkap mengenai tugasde ngurus kesugihan tiang. Side ndẽq bau malik jari bendahare tiang.' 3 Jari bendahare nike mikir, 'Napi saq harus tiang piaq mangkin? Majikan tiang mẽlẽ pengkah tiang. Nambah tiang ndẽq tao, jari tukang mekir, tiang ilaq. 4 Tiang araq akal adẽq lamun tiang tepengkah, araq dengan saq mẽlẽ nerimaq tiang lẽq balẽne!' 5 Terus bendahare nike ngempoh sebilang dengan saq berutang lẽq majikanne. Lẽq saq penembẽq ie beketuan, 'Pire utangde lẽq majikan tiang?' 6 Jawab dengan nike, 'Satus gentong minyak zaitun.' Bendahare nike bebase, 'Niki surat utangde. Silaq tokol terus becat tulis utangde sẽket gentong.' 7 Beterus ie bebase lẽq dengan saq kedue, 'Pire utangde?' Jawab dengan nike, 'Siyu karung gandum.' Bendahare nike bebase lẽq ie, 'Niki surat utangde, tulis baluq ratus.' 8 Make majikan nike puji bendahare saq ndẽq jujur nike, lantaran entane saq ceket nike; sẽngaq bije-bije dunie niki ceketan ngatur urusanne mẽsaq ketimbang bije-bije terang. 9 Tiang badaq side: Manpaatang kesugihan dunie niki jari mauq sahabat, adẽq lamun kesugihan dunie niki sampun ndẽq bau nulung malik, side pade gen teterimaq lẽq balẽ saq kekel. 10 Dengan saq bau tesaduq lẽq hal-hal saq kodẽq, bau ẽndah tesaduq lẽq hal-hal saq belẽq. Laguq dengan saq ndẽq bau tesaduq lẽq hal saq kodẽq, ndẽq bau ẽndah tesaduq lẽq hal saq belẽq. 11 Jari lamun dalem hal kesugihan dunie niki side sampun ndẽq bau tesaduq malik, sai saq mẽlẽ percayeang tipaq side kesugihan saq sejati? 12 Dait lamun side ndẽq setie lẽq dowẽ dengan lain, sai saq gen mẽlẽ nyerahang lẽq side napi saq jari dowẽnde mẽsaq? 13 Ndẽq araq dengan saq tao begawẽan lẽq due majikan; sẽngaq lamun maraq nike ie gen meriq lẽq saq sopoq dait ngasihin saq lain, atao ie gen setie lẽq saq sopoq dait ndẽq gen merhatiang saq lain. Maraq nike ẽndah halne side pade; side pade ndẽq bau begawẽan tipaq Allah dait tipaq dowẽ bande ẽndah." 14 Dengan-dengan Parisi dengahang selapuq saq temanikang siq Deside Isa. Terus ie pade ngerẽrẽqang Deside Isa, sẽngaq ie pade demen kẽpẽng. 15 Laguq Deside Isa bemanik lẽq ie pade, "Side pekenaq diriqde lẽq julun dengan lain, laguq Allah wikan angende. Sẽngaq napi saq teagung-agungang siq manusie, temeriq siq Allah. 16 Hukum Taurat dait kitab nabi-nabi, tetep tekadu jangke jaman Yahya. Lẽman waktu nike Kabar Solah mengenai Kerajaan Allah terus teberiteang. Dait luwẽq dengan berebutan tame lẽq dalem Kerajaan Allah nike. 17 Laguq molahan gumi dait langit musnah ketimbang sopoq hurup dalem Hukum Taurat tebatalang. 18 Sai-sai saq sẽang seninene, terus merariq malik kance dengan nine lain, ie bezinah. Dait dengan saq merariq kance dengan saq tesẽang siq semamene nike, ie ẽndah bezinah." 19 "Araq dengan sugih. Kelambine mahel-mahel dait idupne mẽwah sebilang jelo. 20 Dait araq dengan miskin aranne Lazarus, awakne penoq siq korẽng, tindoq lẽq dẽkẽt lawang balẽn dengan sugih nike. 21 Lazarus melẽt ngisiq tianne siq napi juaq saq geriq lẽman mẽje dengan sugih nike. Malahan acong dateng dẽlat korẽngne. 22 Beterus dengan miskin nike ninggal terus jauqne siq malaẽkat ojok iwean Ibrahim. Dengan sugih nike ẽndah ninggal terus tekubur. 23 Lẽq alam maut ie menderite gati. Dait sewaktu ie nongaq, lẽman jaoq serioqne Ibrahim dait Lazarus araq lẽq iweanne. 24 'Bapaq Ibrahim!' basen dengan sugih nike. 'Periakang tiang! Suruq Lazarus tamaq ranggotne ojok dalem aiq terus dateng basaqang ẽlaq tiang. Tiang sengsare gati lẽq dalem api niki!' 25 Laguq jawab Ibrahim, 'Inget anak tiang: Sengonẽq side idup, side sampun mauq selapuq hal saq solah-solah, laguq Lazarus mauq saq lengẽ-lengẽ. Mangkin Lazarus seneng lẽq deriki, laguq side sengsare. 26 Selain nike, lẽq antare side kance tiang pade araq sopoq jurang saq dalem, adẽq dengan lẽq deriki ndẽq bau ojok derike dait dengan lẽman derike ndẽq bau ojok deriki!' 27 Basen dengan sugih nike, 'Lamun maraq nike, sanget siq tiang tunas adẽq Pelungguh ngutus Lazarus ojok balẽ bapaq tiang. 28 Araq lime semeton tiang lẽq derike. Suruq Lazarus peringet ie pade, adẽq ndaq jangke ie pade ẽndah tame ojok taoq siksaqan niki.' 29 Jawab Ibrahim, 'Dengan-dengan nike sampun bedowẽ Kitab Suci saq tesampẽang langan Musa dait kitab nabi-nabi saq lainne! Alurang ie pade taat lẽq napi saq tetulis lẽq dalem kitab-kitab nike!' 30 Laguq dengan sugih nike bejawab, 'Nike ndẽq cukup, Bapaq Ibrahim. Laguq lamun araq dengan ninggal idup malik dait dateng lẽq ie pade, pasti ie pade gen tobat lẽman dose-dosene.' 31 Laguq jawab Ibrahim, 'Lamun ie pade ndẽq dengahang kesaksian Musa dait nabi-nabi, pasti ie pade ẽndah ndẽq percaye, timaqne araq dengan ninggal idup malik.' "

Luke 17

1 Deside Isa bemanik lẽq pengiring-pengiring-Ne, "Hal-hal saq jari penyebap dengan gawẽq dose pasti gen araq. Laguq celake gati dengan saq jari penyebapne! 2 Solahan lamun batu penggilingan tetaliq lẽq belongne terus ie tesaut ojok dalem segare ketimbang lantaran ie salaq sopoq lẽman dengan saq kodẽq niki gawẽq dose. 3 Keranaq nike pade waspade! Lamun semetonde bedose, peringet ie. Lamun ie nyesel, ampunin ie. 4 Lamun ie bedose lẽq side pituq kali sejelo, dait sebilang ie dateng ojok side dait bebase, 'Tiang nyesel,' ampunin ie." 5 Rasul-rasul matur lẽq Junjungan Saq Mulie Deside Isa, "Teguqang iman tiang pade." 6 Jawab Junjungan Saq Mulie, "Lamun side bedowẽ iman timaqne maraq belẽq tolang sawi, side pade bau muni lẽq lolo are niki, 'Kerembotan terus nancep lẽq segare,' pasti lolo nike gen turut prẽntahde." 7 "Lamun lẽq antare side pade araq saq bedowẽ sopoq pelayan saq pegawẽanne nenggale lẽq bangket atao ngarat dombe, lamun ie tulak, napi side gen bebase lẽq ie, 'Silaq becat bekelor'? 8 Pasti ndẽq maraq nike! Malahan side gen bebase lẽq pelayan nike, 'Sadangang keloran tiang. Kadu kelambi saq bersi dait antih tiang jangke tiang engkah bekelor dait nginem; sesampun nike side kanggo bekelor.' 9 Napi side gen ngucapang tampi asih lẽq ie sẽngaq ie sampun ngelaksaneang prẽntahde? 10 Maraq nike ẽndah halne side pade, lamun side pade sampun ngelaksaneang napi saq tetugasang lẽq side pade, side pade harus bebase, 'Tiang niki pelayan-pelayan saq ndẽq araq manpaatne; tiang pade cume ngelaksaneang napi saq jari kewajiban tiang pade.' " 11 Dalem pemargian-Ne ojok Yerusalem, Deside Isa liwatin daẽrah perbatesan Samaria dait Galilea. 12 Waktu Ie tame lẽq sopoq kampung, Ie tedatengin siq sepulu dengan kuste. Dengan-dengan nike nganjeng lẽman jaoq 13 sambil bekuih, "Deside Isa, Guru, periakang tiang pade!" 14 Sewaktu Deside Isa cingakin dengan-dengan nike, Ie bemanik, "Silaq side lumbar, petitoqang diriqde lẽq imam-imam." Sewaktu ie pade kenyeke lampaq, penyakitne telang. 15 Waktu salaq sopoq lẽq antare dengan-dengan nike sadar bahwe ie sampun selah, ie tulak sambil mulieang Allah siq suare saq belẽq. 16 Terus lẽq arepan Deside Isa, ie sujut dait matur tampi asih. Dengan nike lẽman Samaria. 17 Deside Isa bemanik, "Tekan araq sepulu dengan teselahang? Mbẽ saq siwaq dengan malik? 18 Kembẽq cume dengan pendateng niki saq tulak jari mulieang Allah?" 19 Beterus Deside Isa bemanik lẽq dengan nike, "Silaq ures, terus side lumbar, lantaran side percaye make side jari selah." 20 Dengan-dengan Parisi metakẽn lẽq Deside Isa, piran Kerajaan Allah gen rauh. Jawab Deside Isa, "Kerajaan Allah nike nẽnten temulai siq tande-tande saq bau teserioq siq manusie, 21 sehingge dengan bau bebase, 'Silaq serioq, niki ie!' atao 'Lẽq derike taoqne!' Sẽngaq setetune Kerajaan Allah sampun araq lẽq antare side pade." 22 Sesampun nike Deside Isa bemanik lẽq pengiring-pengiring-Ne, "Gen dateng waktune side pade melẽt serioq sopoq lẽman jelo-jelo Bije Manusie nike, laguq side pade ndẽq mauq serioq ie. 23 Dait dengan gen bebase lẽq side, 'Serioq, Ie lẽq derike!' atao 'Serioq Ie lẽq deriki!' Laguq ndaq side sugul turut dengan nike. 24 Sẽngaq pade maraq kisap saq ngempor lẽman poton langit saq sopoq ojok poton langit saq lain, maraq nike ẽndah ẽraq jelo kerauhan Bije Manusie. 25 Laguq Ie harus luwẽq menderite dait tetolaq siq dengan lẽq jaman niki. 26 Pade maraq saq telaksane lẽq jaman Nuh, maraq nike ẽndah halne ẽraq waktu Bije Manusie rauh. 27 Dengan-dengan pade bekelor dait nginem serte merariq; maraq nike seterusne jangke dateng waktune Nuh tame ojok dalem kapal terus dateng belabur nimpe ie pade jangke selapuq dengan binase. 28 Maraq lẽq jaman Lot ẽndah, dengan-dengan pade bekelor dait nginem, bedagang dait belanje, betaletan dait miaq balẽ. 29 Laguq sewaktu Lot sugul lẽman Sodom, lẽq jelo nike api dait urirang turun lẽman langit binaseang selapuqne. 30 Maraq nike keadaanne ẽraq lẽq waktu Bije Manusie nyatayang diriq-Ne. 31 Lẽq jelo nike, dengan saq kenyeke araq lẽq atas atep balẽne ndaq turun malik bait barang-barang lẽq dalem balẽne. Maraq nike ẽndah dengan saq kenyeke araq lẽq lendangne, ndaq tulak ojok balẽne. 32 Ingetang, napi saq tealamin siq seninen Lot! 33 Dengan saq berusahe nyelametang nyawene gen kẽlangan nyawene. Dait dengan saq kẽlangan nyawene lantaran Tiang, dengan nike gen nyelametang nyawene mẽsaq. 34 Tiang badaq side: Lẽq kelem nike, due dengan saq kenyeke tindoq lẽq sopoq lasah, sopoq gen tejauq, terus saq sopoq malik gen teadẽqang. 35 Due dengan nine saq kenyeke giling gandum, sopoq gen tejauq dait sopoqne malik gen teadẽqang. 36 Due dengan kenyeke begawẽan lẽq lendang, saq sopoq gen tejauq, dait sopoq malik teadẽqang." 37 Pengiring-pengiring Deside Isa metakẽn, "Junjungan Saq Mulie, lẽq mbẽ hal nike gen telaksane?" Jawab Deside Isa, "Lẽq mbẽ araq bangkẽ, lẽq derike bekeriwung kedit saq girang ngaken bangkẽ."

Luke 18

1 Sesampun nike Deside Isa nyeriteang sopoq perumpamean jari ngajah pengiring-pengiring-Ne adẽq ie pade tetep bedo'e dait ndaq nyerah. 2 Deside Isa bemanik, "Lẽq sopoq kote araq sopoq hakim saq ndẽq takut tipaq Allah, dait ndẽq peduli lẽq sai-sai. 3 Lẽq kote nike araq ẽndah sopoq bebalu saq rimpes gati ojok hakim nike tunas adẽq pelekarene tebẽle, 'Silaq bẽle pelekara tiang ngelawan dengan saq nuduh tiang,' basen bebalu nike. 4 Bẽgaq ngonẽqne hakim nike ndẽq mẽlẽ tulung bebalu nike. Laguq ahirne hakim nike mikir, 'Timaq tiang ndẽq takut lẽq Allah dait ndẽq peduli lẽq sai-sai, 5 laguq lantaran bebalu niki terus doang ganggu tiang, bagusan tiang bẽle pelekarene. Lamun ndẽq, ie gen terus-terusan dateng dait nyusahang tiang.' " 6 Beterus Junjungan Saq Mulie Deside Isa bemanik, "Perhatiang napi saq teucapang siq hakim saq ndẽq adil nike! 7 Napi Allah nẽnten gen bẽle pelekare dengan-dengan pilẽqan-Ne saq kenjelo kekelem tunas lẽq Ie? Napi Allah gen ngulur-ngulur waktu jari nulung ie pade? 8 Tiang badaq side: Allah gelis gen bẽle pelekare ie pade! Laguq lamun Bije Manusie rauh, napi lẽq gumi niki masih araq tedait dengan saq bedowẽ iman?" 9 Deside Isa nyeriteang ẽndah perumpamean niki saq Ie tujuang tipaq dengan saq girang ngerẽmẽhang dengan lain, laguq yakin bahwe diriqne mẽsaq saq paling kenaq. 10 Manik Deside Isa, "Araq due dengan lumbar bedo'e ojok Gedẽng Allah. Saq sopoq dengan Parisi, saq lainne penagih pajek. 11 Dengan Parisi nike nganjeng mẽsaq-mẽsaq dait bedo'e, 'Ya Allah, tiang besyukur lẽq Deside, sẽngaq tiang ndẽq maraq dengan lain, saq serakah, ndẽq adil, atao bezinah. Tiang besyukur sẽngaq tiang ndẽq maraq penagih pajek nike. 12 Tiang puase due kali seminggu, dait tiang ngaturang sepersepulu lẽman selapuq pengasilan tiang.' 13 Laguq penagih pajek nike nganjeng jaoq-jaoq dait malahan ndẽq bani nongaq andang langit. Sambilne empuk dadene, ie matur, 'Ya Allah periakang tiang dengan bedose niki!' " 14 "Tiang badaq side, waktune ulẽq ojok balẽ, penagih pajek nike saq tejariang kenaq siq Allah, dait ndẽqne dengan Parisi nike. Sẽngaq dengan saq nyombongang diriqne gen terendahang, dait dengan saq ngerendahang diriqne gen tetinggiang." 15 Araq dengan-dengan jauq kanak-kanak kodẽq ojok Deside Isa adẽq ie pade tejamah dait teicanin berkah siq Deside Isa. Sewaktu pengiring-pengiring Deside Isa serioq nike, ie pade siliq dengan-dengan nike. 16 Laguq Deside Isa ngemanikang kanak-kanak nike dait bemanik lẽq pengiring-pengiring-Ne, "Alurang kanak-kanak nike dateng ojok Tiang! Ndaq balaq ie pade, sẽngaq dengan maraq niki saq dowẽang Kerajaan Allah. 17 Tiang badaq side: Setetune dengan saq ndẽq nerimaq Kerajaan Allah maraq sopoq kanak, ie ndẽq gen bau tame lẽq dalemne." 18 Araq sopoq pemimpin Yahudi metakẽn lẽq Deside Isa, "Paq Guru saq solah, napi saq harus tiang piaq adẽq tiang bau nerimaq idup sejati dait kekel?" 19 Jawab Deside Isa, "Kembẽq side paran Tiang solah? Ndẽq araq saq solah kecuali Allah. 20 Side sampun nenaoq prẽntah-prẽntah Allah: 'Ndaq bezinah, ndaq nyematẽq, ndaq memaling, ndaq jari saksi duste, dait pade hormatin amaq dait inaqde.' " 21 "Selapuq prẽntah nike sampun tiang turut lẽman masih bajang," atur dengan nike. 22 Sesampun Deside sa pireng dengan nike bebase maraq nike, Ie bemanik lẽq dengan nike, "Masih araq sopoq hal saq harus side laksaneang: Jual selapuq dowẽnde, bẽng kẽpẽngne tipaq dengan-dengan miskin, dait side gen mauq harte lẽq sorge. Sesampun nike dateng turut Tiang." 23 Laguq sewaktu dengan nike dengah hal nike, ie jari sedih sẽngaq ie sugih gati. 24 Deside Isa wikan dengan nike sedih angenne, keranaq nike Ie bemanik, "Sengke gati dengan sugih tame ojok dalem Kerajaan Allah! 25 Molahan sopoq onte tame loang jarum, ketimbang sopoq dengan sugih tame ojok dalem Kerajaan Allah." 26 Dengan-dengan saq dengah Deside Isa bemanik maraq nike metakẽn, "Lamun maraq nike, sai saq bau selamet?" 27 Jawab Deside Isa, "Napi saq ndẽq mungkin bagi manusie, jari mungkin bagi Allah!" 28 Terus Petrus matur, "Tiang pade sampun bilin selapuq saq tiang pade ẽpẽang jari ngiring Pelungguh." 29 Jawab Deside Isa, "Tiang badaq side, setetune sebilang dengan saq sampun bilin balẽne, atao seninene, atao semetonne, atao inaq amaqne atao anak-anakne lantaran Kerajaan Allah, 30 dengan nike gen tebales belipet-lipet lẽq waktu niki, dait lẽq jaman saq gen dateng, ie gen nerimaq idup sejati dait kekel." 31 Deside Isa ngumpulang kedue olas pengiring-Ne secare husus, terus bemanik, "Silaq mangkin ite lumbar ojok Yerusalem. Lẽq derike, selapuq saq tetulis siq nabi-nabi mengenai Bije Manusie gen telaksane. 32 Ie gen teserahang tipaq bangse-bangse saq ndẽq kenal kance Allah, saq gen ngoloq-oloq, menghine, dait nijuh Ie. 33 Ie pade gen siksaq dait nyematẽq Ie, laguq lẽq jelo ketelu, Ie gen idup malik." 34 Pengiring-pengiring Deside Isa nẽnten paham napi saq teucapang siq Deside Isa nike. Arti ucapan-ucapan-Ne nike terahasieang lẽman ie pade. Ndẽqne pade taoq napi maksut Deside Isa. 35 Sewaktu Deside Isa sampun rapet kote Yeriko, araq sopoq dengan bute kenyeke tokol nunas-nunas lẽq sedin rurung. 36 Sewaktu ie dengah dengan luwẽq nike liwat, ie beketuan, "Araq napi?" 37 "Deside Isa dengan Nazaret nike, liwat," basen ie pade lẽq ie. 38 Make dengan bute nike bekuih, "Deside Isa, keturunan Daud! Periakang tiang!" 39 Ie tesiliq siq dengan-dengan saq lẽq julu, dait suruq ie tedoq. Laguq sayan keras ie bekuih, "Bije Daud! Periakang tiang!" 40 Deside Isa mentelah, terus ngemanikang dengan jauq dengan bute nike tipaq Ie. Sesampun ie dateng, Deside Isa beketuan, 41 "Napi saq side melẽtang adẽq Tiang piaq lẽq side?" "Junjungan Saq Mulie," jawab dengan bute nike, "tiang melẽt tao nyerioq." 42 Terus Deside Isa bemanik, "Cobaq nyerioq! Imande sampun miaq side selah." 43 Waktu nike ẽndah ie tao nyerioq, terus ie ngiring Deside Isa sambil ngucap syukur tipaq Allah. Dengan luwẽq saq serioq hal nike ẽndah mulieang Allah.

Luke 19

1 Sewaktu Deside Isa tame kote Yeriko, Ie bemargi liwatin kote nike. 2 Lẽq kote nike araq sopoq kepale penagih pajek saq sugih. Aranne Zakeus. 3 Zakeus melẽt serioq sai Deside Isa nike, laguq lantaran luwẽq gati dengan dait awakne cẽndẽq, make ie ndẽq mauq serioq Deside Isa. 4 Jari, Zakeus pelai senjuluq dengan-dengan, terus ie taẽk lẽq sopoq lolo kayuq, adẽqne mauq serioq Deside Isa saq karing semendaq gen liwat lẽq derike. 5 Waktu Deside Isa rauh lẽq bawaq lolo kayuq nike, Deside Isa cingakin andang atas dait bemanik, "Zakeus, becat turun! Sẽngaq jelo niki Tiang harus madẽq lẽq balẽnde." 6 Zakeus becat-becat turun dait sambut Deside Isa siq cemohne. 7 Selapuq dengan saq serioq hal nike mulai ngerumun, ie pade bebase, "Ie madẽq lẽq balẽn dengan bedose!" 8 Sesampun lẽq balẽne, Zakeus nganjeng dait matur lẽq Deside Isa, "Junjungan Saq Mulie, separo lẽman dowẽn tiang gen tiang bẽng ojok dengan miskin; dait napi-napi saq sampun tiang bait lẽman dengan secare ndẽq jujur, gen tiang tulakang malik lẽq ie empat kali lipet!" 9 Deside Isa bemanik lẽq Zakeus, "Lẽq jelo niki keselametan sampun rauh lẽq keluarge niki, sẽngaq ie ẽndah keturunan Ibrahim. 10 Bije Manusie rauh jari boyaq dait nyelametang dengan saq sesat." 11 Lẽq waktu dengan-dengan masih dengahang Deside Isa bebaos, Deside Isa nyeriteang sopoq perumpamean. Sẽngaq, lẽq waktu nike Deside Isa kenyeke araq lẽq dẽkẽt Yerusalem, dait ie pade paran bahwe Kerajaan Allah gen becat penggitan. 12 Deside Isa bemanik, "Araq sopoq dengan mẽnak lumbar ojok negeri saq jaoq gen telantik jari raje, beterus tulak. 13 Sendẽqman lumbar, ie ngempoh sepulu pelayanne, dait sebilang dengan bẽngne sopoq kẽpẽng emas terus bebase lẽq ie pade, 'Kadu kẽpẽng niki bedagang jangke tiang tulak malik.' 14 Laguq rakyat lẽq negerine nike meriq lẽq ie. Jari, sesampun ie lumbar, ie pade ngirim utusan jari nyampẽang, 'Tiang pade ndẽq mẽlẽ dengan niki jari raje tiang pade.' 15 Laguq mẽnak nike telantik jari raje, beterus tulak ojok negerine. Langsung ie ngempoh pelayan-pelayan saq sampun ie bẽng kẽpẽng nike jari nenaoq pire bati saq sampun ie pade mauq. 16 Pelayan saq penembẽq dateng dait matur, 'Paq, sopoq kẽpẽng emas saq pelungguh icanin nike, sampun tiang jariang sepulu.' 17 'Bagus,' basen raje nike. 'Side pelayan saq bagus! Sẽngaq lẽq hal-hal saq kodẽq side bau tesaduq, tiang gen jariang side penguase lẽq sepulu kote.' 18 Pelayan saq kedue dateng dait matur, 'Paq, sopoq kẽpẽng emas saq pelungguh icanin nike, sampun tiang jariang lime.' 19 Raje nike bebase lẽq pelayan nike, 'Side gen tiang jariang penguase lẽq lime kote.' 20 Pelayan saq lain dateng dait matur, 'Paq, niki kẽpẽng pelungguh; tiang simpen lẽq dalem saputangan. 21 Tiang takut lẽq pelungguh, sẽngaq pelungguh dengan saq keras. Pelungguh bait napi saq nẽnten jari dowẽn pelungguh, dait pelungguh bait hasil lẽq taoq saq nẽnten pelungguh talet mẽsaq.' 22 Raje nike bebase lẽq ie, 'Side pelayan saq jahat! Sesuai ucapan-ucapande mẽsaq tiang gen hukum side. Side nenaoq tiang dengan saq keras: Tiang bait napi saq ndẽq jari dowẽn tiang dait bait hasil lẽq taoq saq ndẽq tiang talet mẽsaq. 23 Lamun maraq nike kembẽq side ndẽq serahang kẽpẽng tiang nike ojok dengan saq ngelampaqang kẽpẽng adẽq lẽq waktu tiang tulak bau tiang terimaq kẽpẽng nike bareng rẽntenne?' 24 Beterus raje nike bebase lẽq dengan-dengan saq nganjeng lẽq derike, 'Bait kẽpẽng nike lẽman ie dait bẽng ojok pelayan saq bedowẽ sepulu kẽpẽng emas nike.' 25 Laguq dengan-dengan nike bejawab, 'Paq, ie sampun bedowẽ sepulu.' 26 Jawab raje nike, 'Tiang badaq side: sebilang dengan saq sampun bedowẽ, gen teican luwẽqan malik. Laguq dengan saq ndẽq bedowẽ napi-napi, napi saq araq lẽq ie gen tebait ẽndah lẽman ie. 27 Laguq mangkin side jauq ojok deriki musuh-musuh tiang nike saq ndẽq setuju tiang jari rajene. Matẽq ie pade selapuq lẽq julun tiang!' " 28 Sesampun Deside Isa manikang selapuqne nike Ie bemargi lẽq julun ie pade jari nerusang ojok Yerusalem. 29 Sewaktu sampun rapet pemargian-Ne Betpage dait Betania lẽq Bukit Zaitun, Deside Isa ngemanikang due pengiring-Ne lampaq bejulu dait bepesen, 30 "Silaq lumbar ojok kampung saq araq lẽq julunde nike: Lamun side pade tame lẽq derike, side pade gen serioq sopoq bagal saq masih odaq tegeteng. Bagal nike ndẽq uwah tetunggang siq dengan. Lekaq getenganne terus jauq ojok deriki. 31 Lamun araq dengan saq beketuan lẽq side, 'Kembẽq side pade lekaq getengan bagal nike?' Badaqang bahwe, 'Junjungan Saq Mulie merluang bagal nike.' " 32 Kedue pengiring Deside Isa nike lumbar, terus daitne selapuqne tepat maraq saq temanikang siq Deside Isa. 33 Sewaktu ie pade lekaq getengan bagal nike, ẽpẽne beketuan lẽq ie pade, "Kembẽq side pade lekaq getengan bagal nike?" 34 Jawab ie pade, "Junjungan Saq Mulie merluang bagal niki." 35 Beterus ie pade jauq bagal nike ojok Deside Isa. Bongkor bagal nike ie pade lamak siq jubah ie pade, dait tulungne Deside Isa taẽk lẽq atas bagal nike. 36 Sewaktu Deside Isa liwat nunggang bagal nike, dengan-dengan kelat jubahne lẽq rurung. 37 Sewaktu Deside Isa sampun rapet Yerusalem, lẽq langan saq nurunang lẽq Bukit Zaitun, selapuq pengiring-pengiring-Ne saq luwẽq nike mulai memuji Allah dait ngucapang syukur tipaq Allah lantaran ie pade sampun nyaksiang muqjizat-muqjizat. 38 Ie pade bekuih, "Teberkahin Raje saq rauh dalem pesẽngan Tuhan! Damẽ sejahtere lẽq sorge dait kemuliean lẽq taoq saq maheagung!" 39 Dengan-dengan Parisi saq araq lẽq antare dengan luwẽq nike matur lẽq Deside Isa, "Paq Guru, manikang pengiring-pengiring Pelungguh adẽqne tedoq." 40 Jawab Deside Isa, "Tiang badaq side! Lamun ie pade tedoq, batu-batu nike gen nyurak." 41 Sewaktu Deside Isa sayan rapet kote Yerusalem dait cingakin kote nike, Ie besermin. 42 Deside Isa bemanik, "Periak, bagus gati lamun jelo niki side nenaoq napi saq bau datengang perdamẽan; laguq mangkin side ndẽq bau serioq ie. 43 Side gen ngalamin sopoq mase, bahwe musuh-musuhde gen piaq halangan-halangan lẽq sekeliningde, ie pade gen ngepung side dait desek side lẽman selapuq andang. 44 Ie pade gen ngancurang side bareng selapuq pendudukde; dait ndẽq gen araq sopoq batu saq masih beronjoq maraq bẽngan, sẽngaq side ndẽq nenaoq waktu Allah rauh tipaq side!" 45 Deside Isa tame ojok Gedẽng Allah dait mulai sediq selapuq pedagang lẽq derike. 46 Manik Deside Isa lẽq ie pade, "Lẽq dalem Kitab Suci tetulis Manik Allah maraq niki: 'Gedẽng Tiang gen jari gedẽng taoq bedo'e.' Laguq side pade jariang ie taoqne bekumpul dengan-dengan jahat!" 47 Sebilang jelo Deside Isa ngajahang lẽq dalem Gedẽng Allah. Imam-imam kepale dait ahli-ahli Taurat serte pemimpin-pemimpin Yahudi beniat nyematẽq Deside Isa, 48 laguq ie pade ndẽq taoq, berembẽ harus ngelaksaneang hal nike, sẽngaq selapuq dengan terus doang dengahang Deside Isa dait seneng lẽq pengajahan-Ne.

Luke 20

1 Lẽq sopoq jelo, Deside Isa kenyeke ngajahang dait nyampẽang Kabar Solah lẽman Allah tipaq dengan-dengan saq araq lẽq dalem Gedẽng Allah. Imam-imam kepale, ahli-ahli Taurat dait pemimpin-pemimpin Yahudi parek 2 dait metakẽn lẽq Deside Isa, "Tunas Pelungguh sampẽang lẽq tiang pade atas dasar napi Pelungguh ngelaksaneang selapuq hal niki? Sai saq aturin Pelungguh kuase nike?" 3 Jawab Deside Isa, "Tiang ẽndah mẽlẽ beketuan. Tunas side pade badaq Tiang, 4 Yahya baptis dengan siq kuase sai? Kuase Allah atao kuase manusie?" 5 Beterus ie pade mulai berunding, dait bebase, "Lamun ite jawab siq kuase Allah, Ie gen bemanik, 'Kembẽq side pade ndẽq percaye lẽq Yahya?' 6 Laguq lamun ite jawab, 'Siq kuase manusie,' selapuq dengan gen melẽwas ite siq batu, sẽngaq ie pade percaye bahwe Yahya nike nabi." 7 Jari jawab ie pade, "Mindah tiang." 8 Terus Deside Isa bemanik lẽq ie pade, "Lamun maraq nike Tiang ẽndah ndẽq gen badaq side pade siq kuase sai Tiang laksaneang selapuqne niki." 9 Deside Isa nyeriteang perumpamean niki lẽq dengan-dengan nike, "Araq sopoq dengan saq nalet anggur lẽq kebonne. Sẽweangne kebon anggur nike ojok penyakap-penyakap, terus ie lumbar ojok negeri lain, dait ndot ngonẽq lẽq derike. 10 Sewaktu dateng musim buaq anggur, ẽpẽn dowẽ kebon nike ngutus pelayanne ojok penyakap-penyakapne nike jari nerimaq bagianne. Laguq penyakap-penyakap nike ngempuk pelayan nike dait suruqne ie pade ulẽq ndẽq jauq napi-napi. 11 Sesampun nike ẽpẽn dowẽ kebon nike ngutus malik pelayanne saq lain; laguq pelayan nike ẽndah tempuk dait tehine terus suruqne ulẽq ndẽq jauq napi-napi. 12 Terus ẽpẽn dowẽ kebon nike ngutus malik pelayan saq ketelu. Laguq pelayan nike ẽndah tempuk dait tetetẽh ojok luah kebon anggur nike. 13 Ahirne ẽpẽn dowẽ kebon nike bebase, 'Napi saq harus tiang piaq malik? Tiang gen ngutus anak tiang mẽsaq saq tiang tunah gati, pasti ie pade gen hormatin anak tiang!' 14 Laguq sewaktu penyakap-penyakap kebon nike serioq bije ẽpẽn dowẽ kebon nike, ie pade berunding, 'Niki ie ahli warisne, silaq ite matẽq ie, adẽq ite mauq warisanne.' 15 Make orosne ie sugul ojok luah kebon nike terus ie tematẽq." Beterus Deside Isa beketuan, "Lamun ẽpẽn dowẽ kebon nike tulak, napi saq gen ie piaq tipaq penyakap-penyakap nike? 16 Pasti ie gen dateng dait nyematẽq penyakap-penyakap nike, beterus nyerahang kebon nike ojok penyakap-penyakap saq lain." Dengah hal nike, ie pade matur lẽq Deside Isa, "Sampunang gati jangke maraq nike!" 17 Deside Isa merhatiang ie pade, terus bemanik, "Lamun maraq nike napi artine ayat Kitab Suci niki? 'Batu saq tetetẽh siq tukang bangunan, sampun jari batu saq paling utame.' 18 Sai-sai saq geriq lẽq batu nike gen ancur, dait sai-sai saq tendet siq batu nike, ie gen remuk." 19 Ahli-ahli Taurat dait imam-imam kepale nenaoq bahwe perumpamean nike tetujuang tipaq ie pade siq Deside Isa. Keranaq nike ie pade mẽlẽ bau Deside Isa waktu nike ẽndah, laguq ie pade takut lẽq dengan luwẽq. 20 Jari ie pade boyaq kesempatan saq solah. Ie pade upaq dengan adẽqne puraq-puraq jari dengan jujur, dait suruqne dengan-dengan nike boyaq-boyaq kesalaqan Deside Isa siq care besoal jawab, adẽq ie pade bau serahang Deside Isa ojok gubernur. 21 Beterus dengan-dengan saq teupaq nike matur lẽq Deside Isa, "Paq Guru, tiang pade nenaoq bahwe selapuq saq Pelungguh manikang dait ajahang nike kenaq. Tiang pade nenaoq ẽndah bahwe Pelungguh ngajahang secare terus-terang mengenai langan saq kenaq tipaq Allah, sẽngaq Pelungguh nẽnten pilẽq kasih. 22 Keranaq nike, tunas Pelungguh sampẽang lẽq tiang pade, menurut aturan agamente, kanggo napi nẽnten bayah pajek lẽq Kaisar?" 23 Laguq Deside Isa wikan tipu muslihat ie pade. Keranaq nike Ie bemanik, 24 "Cobaq petitoqang lẽq Tiang sopoq kẽpẽng perak. Gambar dait aran sai niki?" "Kaisar!" jawab ie pade. 25 Make Deside Isa bemanik tipaq ie pade, "Lamun maraq nike, serahang ojok Kaisar, napi saq jari dowẽn kaisar, dait tipaq Allah napi saq jari dowẽn Allah." 26 Ternyate lẽq julun dengan luwẽq nike ie pade ndẽq iniq mauq sopoq juaq kesalaqan Deside Isa. Ie pade cume tedoq dait bengaq siq manik Deside Isa nike. 27 Dengan-dengan lẽman golongan Saduki parek ojok Deside Isa. (Ie pade golongan saq bedowẽ pendapet bahwe dengan ninggal ndẽq gen idup malik). Ie pade metakẽn lẽq Deside Isa, 28 "Bapaq Guru, Musa nulis hukum niki tipaq ite: Lamun sopoq dengan mame ninggal dait ie ndẽq bedowẽ bije, make semetonne harus merariq kance bebalune adẽq ie bau ngebẽng keturunan tipaq dengan saq sampun ninggal nike. 29 Araq pituq dengan besemetonan. Saq sengake merariq, terus ninggal ndẽq bedowẽ bije. 30 Beterus saq kedue merariq kance bebalune, laguq ie ẽndah ninggal ndẽq bedowẽ bije. 31 Maraq nike ẽndah telaksane lẽq semetonne saq ketelu dait seterusne jangke saq kepituq. 32 Ahirne dengan nine nike ẽndah ninggal. 33 Lẽq jelo dengan ninggal teidupang malik, sai semame dengan nine nike? Sẽngaq kepituq-pituqne sampun merariq kance ie." 34 Jawab Deside Isa, "Dengan-dengan saq idup mangkin niki merariq, 35 laguq dengan-dengan saq patut teidupang malik lẽman ninggal dait idup lẽq akhirat, ie pade merariq malik. 36 Keadaan ie pade maraq malaẽkat, dait ndẽq iniq ninggal. Ie pade nike bije-bije dowẽn Allah, sẽngaq ie pade sampun teidupang malik lẽman ninggalne. 37 Musa mẽsaq secare jelas nyatayang bahwe dengan ninggal gen teidupang malik. Dalem tulisanne mengenai bebenes saq nyale, ie sebut Tuhan nike 'Allahne Ibrahim, Allahne Ishak dait Allahne Yakub'. 38 Allah nike nẽnten Allah dengan ninggal, laguq Allah dengan saq idup! Sẽngaq lẽq arepan Allah, selapuq dengan idup." 39 Ahli-ahli Taurat matur, "Jawaban Paq Guru solah gati." 40 Keranaq nike ie pade ndẽq bani malik metakẽn napi-napi lẽq Deside Isa. 41 Deside Isa beketuan lẽq ie pade, "Berembẽ dengan-dengan iniq paran bahwe Almasih nike keturunan Daud? 42 Padahal Daud mẽsaq bebase lẽq dalem kitab Zabur, 'Tuhan bemanik lẽq Junjungan Tiang: Melinggih lẽq sedi kanan Tiang, 43 jangke Tiang piaq musuh-musuh Deside takluk lẽq Deside.' 44 Jari, lamun Daud nyebut Almasih nike 'Junjungan Saq Mulie', segerah Ie keturunan Daud?" 45 Sewaktu dengan luwẽq kenyeke dengahang Deside Isa bebaos, Ie bemanik lẽq pengiring-pengiring-Ne, 46 "Onyaq-onyaq lẽq ahli-ahli Taurat. Ie pade seneng lampaq-lampaq kadu jubah saq bẽlo, dait seneng tehormatin lẽq peken-peken. Ie pade seneng melinggih lẽq kursi saq paling julu lẽq balẽ-balẽ ibadah dait seneng melinggih lẽq taoq saq paling tehormat lẽq taoq-taoq gawẽ. 47 Ie pade nipu bebalu-bebalu dait ngerampas balẽne. Dait jari seboq kejahatanne nike, ie pade bedo'e bẽlo-bẽlo! Pasti ie pade gen nerimaq hukuman saq beratan!"

Luke 21

1 Lẽq Gedẽng Allah, Deside Isa cingakin dengan-dengan sugih tamaq kẽpẽng ojok dalem kotaq persembahan. 2 Ie cingakin ẽndah sopoq bebalu saq miskin gati, tamaq due kẽpẽng tembage. 3 Beterus Deside Isa bemanik, "Tiang badaq side: Setetune bebalu niki namaqang luwẽqan tebanding selapuq dengan saq lain. 4 Sẽngaq ie pade selapuq ngebẽng lẽman kelebihan dowẽne. Laguq bebalu niki, timaq miskin gati, ie ngebẽng selapuq saq araq lẽq ie, malahan saq ie perluang jari biaye idup." 5 Araq dengan-dengan saq ngeraos mengenai berembẽ solahne Gedẽng Allah tepayas siq batu saq solah-solah dait siq barang-barang saq teaturang tipaq Allah. Beterus Deside Isa bemanik lẽq ie pade, 6 "Laun araq waktune, selapuq saq side pade serioq niki gen terobohang; ndẽq araq sopoq juaq batu lẽman bangunan-bangunan nike saq masih beronjoq maraq bẽngan!" 7 Pengiring-pengiring Deside Isa metakẽn lẽq Deside Isa, "Bapaq Guru, piran selapuqne nike gen telaksane? Dait napi saq jari tandene bahwe sampun dateng wayene hal nike gen telaksane?" 8 Deside Isa bemanik, "Pade waspade, ndaq jangke side pade tetipu. Luwẽq dengan gen dateng kadu aran Tiang, dait bebase, 'Tiang niki Ie!' dait 'Sampun wayene.' Laguq ndaq side pade turut ie pade. 9 Ndaq ẽndah takut lamun side pade dengah berite mengenai perang dait pemberontakan. Selapuqne nike harus telaksane juluq. Laguq nike ndẽq berarti bahwe sampun wayene kiamat." 10 Beterus Deside Isa bebaos malik, "Bangse saq sopoq gen perang ngelawan bangse saq lain dait negare saq sopoq gen nyerbu negare saq lain. 11 Lẽq mbẽ-mbẽ gen araq lindur saq belẽq, kelapahan dait wabah penyakit. Gen araq hal-hal saq nakutang dait luar biase lẽq langit. 12 Laguq sendẽqman selapuqne telaksane, side pade gen tebau dait teaniaye. Side pade gen teadilin lẽq balẽ-balẽ ibadah dait tetamaq ojok dalem bui. Dait side pade gen teoros ojok arepan raje-raje dait penguase-penguase lantaran side pade pengiring Tiang. 13 Nike kesempatande ngebẽng kesaksian. 14 Keranaq nike teguqang angende bahwe side pade ndẽq gen kuatir mengenai napi saq harus side pade sampẽang jari bẽle diriq. 15 Tiang mẽsaq gen ngebẽng side kemampuan ngeraos secare bijaksane, sehingge ndẽq araq sopoq dengan juaq lẽman musuh-musuhde bau ngelawan atao nilas raosde. 16 Side pade gen tehianat siq inaq amaqde, siq semeton-semetonde, siq kadang jarinde dait siq batur-baturde. Separo lẽman side pade gen tematẽq siq ie pade. 17 Side pade gen temeriq siq selapuq dengan lantaran side pade jari pengiring Tiang. 18 Laguq timaq seuwat bulu saq araq lẽq ulunde ndẽq gen telang. 19 Lamun side pade tetep tahen dait sabar, side pade gen selamet." 20 "Lamun side pade serioq Yerusalem tekepung siq tentere, side pade gen nenaoq bahwe kote nike ndẽq ngonẽq malik gen temusnahang. 21 Lẽq waktu nike dengan saq araq lẽq Yudea harus pelai ojok pegunungan. Ie pade saq araq lẽq dalem kote harus bilin kote, dait ie pade saq lẽq luah kote, ndaq tame ojok dalem kote. 22 Sẽngaq jelo-jelo nike 'Jelo-jelo Pembalesan', adẽq siq care nike telaksane napi saq sampun tetulis dalem Kitab Suci. 23 Celake inaq-inaq saq kenyeke betian atao saq masih penyusuq bebẽaqne lẽq waktu nike! Negeri niki gen ngalamin kesusahan saq belẽq, dait murke tipaq bangse niki. 24 Araq saq gen tematẽq kadu klẽwang, araq ẽndah saq gen tejauq jari tawanan ojok negeri-negeri dengan; dait bangse-bangse saq ndẽq kenal kance Allah gen ngicaq-icaq Yerusalem jangke tutuq waktu saq sampun tetentuang Tuhan tipaq ie pade." 25 "Laun gen penggitan tande-tande lẽq jelo, bulan, dait bintang-bintang. Lẽq gumi bangse-bangse gen takut dait bingung hadepin suare angin dait suare umbak saq belẽq. 26 Manusie gen takut gati hadepin napi saq gen telaksane lẽq seantẽro dunie niki, sẽngaq selapuq kuase saq araq lẽq langit jari biur lantur. 27 Lẽq waktu nike Bije Manusie gen rauh lẽq dalem awan siq kuase dait kemuliean saq belẽq. 28 Lamun hal-hal nike mulai telaksane, pade ures dait petitoqang muende, sẽngaq ndẽq ngonẽq malik side pade gen teselametang." 29 Beterus Deside Isa nyeriteang tipaq ie pade perumpamean niki, manik-Ne, "Pade perhatiang lolo are dait selapuq lolo saq lain. 30 Lamun pusuk-pusukne mulai penggitan, side pade nenaoq bahwe sampun rapet musim panas. 31 Maraq nike ẽndah lamun side pade serioq hal-hal nike telaksane, side pade gen nenaoq bahwe Kerajaan Allah sampun rapet. 32 Tiang badaq side: Setetune hal-hal nike gen telaksane sendẽqman dengan-dengan saq idup mangkin niki ninggal selapuqne. 33 Langit dait gumi gen musnah, laguq manik Tiang gen kekel selaẽq-laẽqne." 34 "Pade jagaq diriqde, ndaq jangke side pade rẽpot gati siq beseneng-seneng jangke liwat bates dait nginem ineman keras, atao mikirang gati soal-soal idupde, sehingge side pade ndẽq siep sewaktu jelo Tuhan nike selung-selung dateng. 35 Sẽngaq Jelo nike gen dateng maraq perangkep tipaq selapuq dengan lẽq gumi niki. 36 Pade bejage-jage dait tetep bedo'e adẽq side pade luput lẽman selapuq hal saq gen telaksane dait side pade bau ngadep Bije Manusie." 37 Deside Isa ngajahang lẽq Gedẽng Allah waktu kenjelo, dait kelemne Ie lumbar ojok Bukit Zaitun dait mererepan lẽq derike. 38 Sebilang kelẽmaq selapuq dengan dateng ojok Gedẽng Allah jari dengahang pengajahan Deside Isa.

Luke 22

1 Perayaan Ruti Ndẽq Beragi saq tesebut Paskah sampun rapet. 2 Imam-imam kepale dait ahli-ahli Taurat kenyeke boyaq langan jari nyematẽq Deside Isa secare tedoq-tedoq, sẽngaq ie pade takut lẽq dengan luwẽq. 3 Beterus Belis tamein Yudas saq tesebut ẽndah Iskariot, salaq sopoq lẽman kedue olas pengiring Deside Isa. 4 Beterus Yudas lumbar dait berunding kance imam-imam kepale dait kepale-kepale pengawal Gedẽng Allah mengenai berembẽ entane adẽqne bau nyerahang Deside Isa tipaq ie pade. 5 Ie pade seneng gati dait bejanji gen ngebẽng kẽpẽng tipaq Yudas. 6 Yudas ẽndah setuju, dait mulai boyaq kesempatan jari nyerahang Deside Isa tipaq ie pade ndẽq tetaoq siq dengan luwẽq. 7 Jelo Perayaan Ruti Ndẽq Beragi sampun dateng. Nike jelone dombe jari keloran Paskah tesembelẽh. 8 Make Deside Isa ngemanikang Petrus dait Yahya, "Lumbar sedieang ite keloran Paskah." 9 Ie pade metakẽn, "Lẽq mbẽ taoq saq Pelungguh kayunang adẽq tiang pade siepang?" 10 Jawab Deside Isa, "Lẽq waktu side pade tame ojok kote, side pade gen bedait kance sopoq dengan mame saq kenyeke jauq cẽrẽt berisi aiq. Turut ie ojok balẽ saq ie tamein, 11 dait badaq ẽpẽn balẽ nike: Guru bemanik, 'Lẽq mbẽ taoq Tiang kance pengiring-pengiring Tiang ngelorang keloran Paskah?' 12 Dengan nike gen petitoq side sopoq kamar belẽq saq araq lẽq atas lengkap kance perabotanne. Sidieang selapuqne lẽq derike." 13 Make Petrus dait Yahya lumbar, terus daitne selapuqne tepat maraq saq sampun temanikang siq Deside Isa. Ie pade sedieang keloran Paskah nike. 14 Sewaktu sampun wayene ngelorang keloran Paskah nike, Deside Isa melinggih teiring pengiring-pengiring-Ne lẽq taoq perjamuan. 15 Terus Ie bemanik lẽq ie pade, "Tiang melẽt gati ngelor keloran Paskah niki bareng kance side pade, sendẽqman Tiang menderite! 16 Tiang badaq side: Tiang ndẽq gen ngelorang niki malik jangke arti perjamuan niki tenyatayang dalem Kerajaan Allah." 17 Sesampun nike, Deside Isa ngangkat cawan saq berisi anggur nike, terus ngucapang do'e syukur tipaq Allah, beterus bemanik, "Silaq bait niki, dait bagi-bagiang; 18 Tiang badaq side: Mulai mangkin niki Tiang ndẽq gen nginem anggur niki malik jangke Kerajaan Allah rauh." 19 Sesampun nike, Deside Isa bait ruti. Dait sesampun ngucapang do'e syukur, Ie peleng-peleng ruti nike kadu gading-Ne, terus ngicanin tipaq ie pade, dait bemanik, "Niki ragen Tiang saq teserahang umaq side pade. Laksaneang niki jari nginget Tiang." 20 Maraq nike ẽndah sesampun medaran, Ie ngicanin cawan saq berisi anggur tipaq ie pade dait bemanik, "Cawan niki perjanjian baru siq daraq Tiang, daraq saq tetumpahang tipaq side pade." 21 "Laguq serioq! Dengan saq behianat lẽq Tiang araq lẽq deriki bareng Tiang! 22 Bije Manusie mule gen ninggal maraq saq sampun tetentuang Allah; laguq celake dengan saq behianat lẽq Ie!" 23 Make ie pade mulai saling ketuan sopoq kance saq lain, sai lẽq antare ie pade saq gen ngelaksaneang hal nike. 24 Lẽq antare pengiring-pengiring Deside Isa araq pegejuhan mengenai sai saq harus teanggep paling belẽq lẽq antare ie pade. 25 Deside Isa bemanik lẽq ie pade, "Raje-raje bangse-bangse saq ndẽq kenal kance Allah perlakuang rakyatne semẽlẽ-mẽlẽ dait penguase-penguasene tesebut 'Pelindung Rakyat'. 26 Laguq side pade ndẽq kanggo maraq nike. Sebalikne, dengan saq paling belẽq lẽq antare side harus jari maraq saq paling kodẽq, dait pemimpin-pemimpin harus jari maraq pelayan. 27 Sai saq belẽqan: Dengan saq tokol bekelor lẽq mẽje, atao dengan saq ngelayanin ie? Pasti dengan saq tokol nike. Laguq Tiang araq lẽq antare side pade jari pelayan. 28 Side pade tetep bareng-bareng kance Tiang lẽq dalem selapuq cobe saq Tiang alamin. 29 Tiang nentuang hak-hak Kerajaan tipaq side, pade maraq Bapa Tiang nentuang hak-hak Kerajaan tipaq Tiang, 30 adẽq ẽraq side bekelor dait nginem semẽje kance Tiang lẽq dalem Kerajaan Tiang dait side gen tokol lẽq atas tahte jari hakimin kedue olas suku Israel." 31 "Simon, Simon, dengahang! Belis sampun tebẽng ijin jari nguji side pade; maraq gandum tekelin lẽman lẽndongne sehingge saq solah tekelin lẽman saq lengẽ. 32 Laguq Tiang sampun do'eang side, Simon, adẽq imande ndẽq luntur. Dait lamun side sampun tulak tipaq Tiang, side harus teguqang iman semeton-semetonde." 33 Jawab Petrus, "Junjungan Saq Mulie, tiang rẽde tame bui dait matẽ bareng-bareng kance Pelungguh!" 34 Laguq Deside Isa bemanik, "Tiang badaq side, Petrus, sendẽqman manuk ngungkung jelo niki, side telu kali nilas Tiang." 35 Sesampun nike Deside Isa bemanik tipaq ie pade, "Laẽq sewaktu Tiang ngutus side pade dait ndẽq ngijinang side pade jauq dompẽt, kantong atao sepatu, napi side pade kekurangan?" "Nẽnten!" jawab ie pade. 36 Terus Deside Isa bemanik lẽq ie pade, "Laguq mangkin, sai bedowẽ dompẽt atao kantong, harus tejauq; dait sai ndẽq bedowẽ klẽwang, harus jual jubahne jari beli klẽwang. 37 Tiang badaq side, bahwe ayat Kitab Suci saq tetulis maraq niki, 'Ie tame itungan lẽq antare dengan-dengan jahat,' harus telaksane lẽq diriq Tiang. Sẽngaq napi saq tetulis lẽq dalem Kitab Suci mengenai Tiang kenyeke telaksane mangkin niki." 38 Pengiring-pengiring Deside Isa matur, "Junjungan Saq Mulie silaq cingakin, lẽq deriki araq due klẽwang." "Nike sampun cukup!" jawab Deside Isa. 39 Deside Isa bilin kote dait maraq biasene lumbar ojok Bukit Zaitun, dait pengiring-pengiring-Ne lumbar ẽndah ngiring Ie. 40 Sewaktu rauh lẽq derike, Ie bemanik lẽq ie pade, "Pade bedo'e adẽq side pade ndẽq ngalamin cobe." 41 Beterus Deside Isa lumbar jaoqan sekediq lẽman ie pade, kire-kire sejaoq pelẽwasan batu, terus sujut dait bedo'e, 42 "Bapa, lamun bau, jaoqang lẽman Tiang cawan penderitean saq harus Tiang alamin niki. Laguq sampunang menurut kemẽlẽq Tiang, laguq menurut pekayunan Deside mẽsaq." 43 Sopoq malaẽkat rauh tipaq Deside Isa jari ngicanin Ie kekuatan. 44 Deside Isa menderite gati secare batin sehingge Ie sayan pacu-pacu bedo'e. Daur-Ne maraq ruen daraq ngitik ojok tanaq. 45 Sesampun tutuq bedo'e, Deside Isa tulak malik ojok pengiring-pengiring-Ne. Dait-Ne pengiring-pengiring-Ne kenyeke tindoq sẽngaq sedih gati. 46 Terus Ie bemanik lẽq ie pade, "Kembẽq side pade tindoq? Pade ures dait bedo'e adẽq side pade ndẽq ngalamin cobe." 47 Lẽq waktu Deside Isa masih bebaos, dateng serombongan dengan. Ie pade tepimpin siq Yudas, salaq sopoq pengiring Deside Isa. Beterus Yudas ngerapetin Deside Isa jari siduk Ie. 48 Laguq Deside Isa bemanik lẽq ie, "Yudas, napi siq sidukan nike side mẽlẽ behianat lẽq Bije Manusie?" 49 Sewaktu pengiring-pengiring Deside Isa saq araq lẽq derike serioq napi saq gen telaksane, ie pade matur, "Junjungan Saq Mulie, tiang pade serang doang ie pade kadu klẽwang!" 50 Terus salaq sopoq dengan lẽman ie pade ngerantek pelayan Imam Agung kadu klẽwang jangke pegat kentokne saq kanan. 51 Laguq Deside Isa bemanik, "Engkahang!" Terus Ie jamah kentok dengan nike dait nyelahang ie. 52 Beterus Deside Isa bemanik lẽq imam-imam kepale dait kepale-kepale pengawal Gedẽng Allah, serte pemimpin-pemimpin Yahudi saq dateng ojok derike jari bau Ie, "Napi Tiang niki perampok, jangke side pade dateng jauq klẽwang dait gegitik jari bau Tiang? 53 Sebilang jelo Tiang araq bareng side pade lẽq Gedẽng Allah, side pade ndẽq bau Tiang. Laguq niki waktune side pade ngelaksaneang, lẽq waktu penguase saq nguasein peteng negel kekuasean." 54 Ie pade bau Deside Isa dait jauqne ojok gedẽng Imam Agung. Petrus turut mudi lẽman jaoq. 55 Lẽq tengaq-tengaq lelẽah gedẽng nike, dengan sampun penyalaq api dait ie pade tokol keliningin api nike. Petrus ẽndah tokol lẽq antare ie pade. 56 Salaq sopoq pelayan nine serioq Petrus tokol lẽq dẽkẽt api nike; ie perhatiang Petrus, beterus bebase, "Onẽq dengan niki ẽndah araq bareng-bareng Deside Isa!" 57 Laguq Petrus nilas. Ie bebase, "Tiang tetu-tetu ndẽq kenal dengan nike!" 58 Ndẽq ngonẽq sesampun nike, araq dengan lain serioq Petrus dait bebase, "Side ẽndah salaq sopoq lẽman ie pade!" Laguq Petrus bejawab, "Ndẽq, ndẽqne tiang!" 59 Kire-kire sejam sesampun nike, araq dengan lain malik saq teges entane ngeraos, "Mule dengan niki pengiring Deside Isa, sẽngaq ie ẽndah dengan Galilea!" 60 Laguq Petrus bejawab, "Tiang ndẽq nenaoq, napi maksut side!" Waktu nike ẽndah, sewaktu Petrus masih ngeraos, manuk ngungkung. 61 Deside Isa ngẽngat andang Petrus. Beterus Petrus inget Junjungan Saq Mulie sampun bemanik lẽq ie, "Sendẽqman manuk ngungkung jelo niki, side telu kali nilas Tiang." 62 Terus Petrus sugul lẽman derike dait nangis ẽroq asẽq. 63 Dengan-dengan saq kenyeke jagaq Deside Isa, pade ngoloq dait ngempuk Ie. 64 Ie pade tungkem penjarupan-Ne dait beketuan lẽq Ie, "Cobaq badẽq sai saq ngempuk Side?" 65 Luwẽq ẽndah raos ie pade jari menghine Deside Isa. 66 Kelẽmaqne, pemimpin-pemimpin Yahudi, imam-imam kepale, dait ahli-ahli Taurat bekumpul, terus Deside Isa tejauq ojok arepan Mahkamah Agame ie pade. 67 Ie pade bebase lẽq Deside Isa, "Badaq tiang pade, napi Side niki Almasih?" Jawab Deside Isa, "Lamun Tiang badaq side, side pade tetep ndẽq gen percaye. 68 Dait lamun Tiang beketuan lẽq side, side pade tetep ndẽq gen bejawab. 69 Laguq mulai mangkin, Bije Manusie gen melinggih lẽq sedi kanan Allah Saq Mahekuase." 70 Ie pade selapuq bebase, "Lamun maraq nike, Side niki Bije saq asalne lẽman Allah?" Jawab Deside Isa, "Maraq nike basen side pade." 71 Make ie pade bebase, "Ndẽq perlu malik saksi! Ite sampun dengah lẽman cangkem-Ne mẽsaq!"

Luke 23

1 Selapuq dengan saq araq lẽq sidang nike nganjeng, terus Deside Isa tejauq ngadep Pilatus. 2 Lẽq derike ie pade mulai tuduh Deside Isa, basen ie pade, "Tiang pade ndait Dengan niki nyesatang rakyat. Ie balaq dengan bayah pajek lẽq Kaisar, sẽngaq Ie badaqang diriqne Almasih, sopoq Raje." 3 Terus Pilatus metakẽn lẽq Deside Isa, "Napi tetu Pelungguh raje dengan Yahudi?" Jawab Deside Isa, "Maraq nike basen Pelungguh." 4 Make Pilatus bebase lẽq imam-imam kepale dait dengan luwẽq nike, "Tiang ndẽq ndait sopoq juaq kesalaqan lẽq Dengan niki." 5 Laguq ie pade sayan maksaq dait bebase, "Siq pengajahan-Ne Ie hasut dengan lẽq selapuq Yudea; penembẽqne lẽq Galilea dait mangkin sampun dateng deriki." 6 Sewaktu Pilatus pirengang hal nike, ie beketuan, "Napi Dengan niki dengan Galilea?" 7 Dait sewaktu ie nenaoq bahwe Deside Isa asalne lẽman daẽrah kekuasean Herodes, Pilatus prẽntah dengan adẽqne jauq Deside Isa ojok Herodes, saq waktu nike araq ẽndah lẽq Yerusalem. 8 Herodes seneng gati waktu nyereminang Deside Isa, sẽngaq sampun ngonẽq gati ie pireng mengenai Deside Isa, dait melẽt sereminang Deside Isa. Herodes beharep mauq nyaksiang Deside Isa piaq muqjizat. 9 Keranaq nike Herodes beketuan luwẽq hal lẽq Deside Isa, laguq Deside Isa nẽnten bejawab napi-napi. 10 Imam-imam kepale dait ahli-ahli Taurat nganjeng dait nyampẽang tuduhan-tuduhan saq berat tipaq Deside Isa. 11 Make Herodes dait prajurit-prajuritne ngoloq-oloq dait menghine Deside Isa, terus kaduangne jubah kehormatan, dait jauq Ie tulak ojok Pilatus. 12 Lẽq jelo nike ẽndah Herodes dait Pilatus, saq sendẽqmanne bemusuhan jari besahabat. 13 Pilatus ngumpulang imam-imam kepale, pemimpin-pemimpin dait rakyat, 14 dait bebase lẽq ie pade, "Side pade jauq dengan niki ojok tiang dait paran Ie nyesatang dengan-dengan lain. Mangkin lẽq julu side pade sampun tiang periksaq Ie, dait selapuq kesalaqan saq side pade tuduhang tipaq Ie ndẽq araq saq tiang ndait lẽq Ie. 15 Maraq nike ẽndah pendapet Herodes, sẽngaq ie ẽndah sampun suruq dengan jauq Deside Isa nike tulak ojok tiang pade. Ndẽq araq sopoq juaq kesalaqan-Ne saq miaq Ie patut tehukum matẽ. 16 Keranaq nike, tiang gen pecut Ie dait bẽbasang Ie." 17 Sebilang perayaan Paskah, Pilatus bẽbasang sopoq tahenan tipaq rakyat. 18 Selapuq dengan saq bekumpul lẽq derike nyurak, "Matẽq Ie! Bẽbasang Barabas tipaq tiang pade!" ( 19 Barabas tebui lantaran miaq keributan lẽq dalem kote dait nyematẽq dengan.) 20 Pilatus kayun bẽbasang Deside Isa, keranaq nike ie bebase karing sekali tipaq dengan luwẽq nike. 21 Laguq ie pade nyurak, "Pakuq Ie lẽq kayuq salib! Pakuq Ie lẽq kayuq salib!" 22 Terus saq ketelu kaline Pilatus bebase lẽq ie pade, "Laguq pegawẽan jahat napi saq sampun Ie piaq? Tiang ndẽq ndait sopoq kesalaqan lẽq Ie saq miaq Ie patut tehukum matẽ. Tiang gen pecut Ie, terus gen tiang bẽbasang Ie!" 23 Laguq ie pade tetep nyurak sekuat-kuatne bahwe Deside Isa harus tepakuq lẽq kayuq salib. Dait ahirne surakan ie pade menang. 24 Beterus Pilatus mutusang adẽq tuntutan ie pade tekabulang, 25 dait bẽbasangne dengan saq tebui lantaran pemberontakan dait nyematẽq dengan pade maraq saq tetuntut siq ie pade. Terus Deside Isa teserahang tipaq ie pade jari teperlakuang semẽlẽ ie pade. 26 Beterus Deside Isa tejauq siq ie pade. Lẽq tengaq kelampanne, ie pade bedait kance sopoq dengan aranne Simon, saq asalne lẽman Kirene, saq kenyeke tame kote. Ie pade paksaq Simon ngelẽmbah kayuq salib nike dait lampaq lẽq mudi Deside Isa. 27 Luwẽq dengan ngiring Deside Isa; lẽq antarene araq ẽndah dengan-dengan nine. Dengan-dengan nine nike ngerung dait tangisin Deside Isa. 28 Laguq Deside Isa ngẽngat andang ie pade dait bemanik, "Hai, putri-putri Yerusalem! Ndaq tangisin Tiang. Laguq tangisin diriqde mẽsaq dait bije-bijende. 29 Sẽngaq gen dateng waktune dengan gen bebase, 'Aget gati dengan-dengan nine saq ndẽq uwah betian, saq ndẽq uwah bedowẽ bije dait ndẽq uwah penyusuq bebẽaq!' 30 Lẽq waktu nike ẽndah dengan gen bebase tipaq gunung-gunung, 'Silaq ndet tiang pade!' Dait tipaq bukit-bukit, 'Silaq tumput tiang pade!' 31 Sẽngaq lamun lẽq kayuq saq masih idup, dengan sampun piaq maraq niki, lebih-lebih saq gen ie pade piaq lẽq kayuq saq gero!" 32 Araq ẽndah due dengan lain -- deduaqne dengan jahat -- saq ie pade jauq jari tehukum matẽ bareng kance Deside Isa. 33 Ssesampun dateng lẽq taoq saq tearanin, "Jerangkong", ie pade pakuq Deside Isa lẽq kayuq salib bareng-bareng kance due dengan jahat nike -- sopoq lẽq sedi kanan dait sopoqne malik lẽq sedi kiri-Ne. 34 Beterus Deside Isa bedo'e, "Bapa, ampunin ie pade! Sẽngaq ie pade ndẽq ngerti napi saq ie pade piaq." Ie pade bagi kuace Deside Isa kadu undian. 35 Dengan luwẽq nganjeng lẽq derike sambil manto, lẽq waktu nike ẽndah pemimpin-pemimpin Yahudi ngoloq-oloq Deside Isa, dait bebase, "Ie sampun selametang dengan lain; dait mangkin alurang Ie selametang diriq-Ne mẽsaq. Tekan Ie Almasih, saq tepilẽq siq Allah?" 36 Prajurit-prajurit ẽndah ngoloq Deside Isa. Ie pade dateng dait ngebẽng Deside Isa aiq anggur saq pedis 37 dait bebase, "Lamun Side raje dengan Yahudi, selametang diriq-De." 38 Lẽq bagian atas kayuq salib Deside Isa, tetoloq tulisan: "Niki Raje Dengan Yahudi." 39 Salaq sopoq penjahat saq bareng tepakuq lẽq kayuq salib menghine Deside Isa. Ie bebase, "Tekan Side Almasih? Nah, selametang diriq-De dait tiang pade!" 40 Laguq penjahat saq sopoqne malik peringet baturne nike, "Napi side ndẽq takut lẽq Allah sẽngaq side ẽndah tehukum matẽ pade maraq Ie. 41 Hukumante kance due mule setimpal kance perbuatante, laguq Ie niki, ndẽq araq perbuatan-Ne saq salaq!" 42 Terus ie bebase, "Deside Isa, iling lẽq tiang lamun Pelungguh rauh jari Raje!" 43 Manik Deside Isa, "Tiang badaq side, setetune jelo niki ẽndah side gen bareng kance Tiang lẽq Pirdaus." 44 Kire-kire jam due olas tengari, ndẽq araq sinar jelo, dait selapuq negeri nike jari peteng gati jangke jam telu kebian. 45 Kelambu saq araq lẽq dalem Gedẽng Allah, soẽk jari due. 46 Beterus Deside Isa bekuih keras-keras, "Bapa! Lẽq gading Deside Tiang serahang nyawe Tiang!" Sesampun bemanik maraq nike, Ie nyerahang nyawe-Ne. 47 Waktu kepale pasukan serioq hal nike, ie mulieang Allah. Terus ie bebase, "Setetune Deside Isa ndẽq salaq!" 48 Dengan luwẽq saq dateng manto lẽq derike, serioq selapuq saq telaksane. Beterus selapuqne pade ulẽq dait nyesel gati angenne. 49 Dait selapuq kenalan Deside Isa lantong dengan-dengan nine saq ngiring Ie lẽman Galilea, nganjeng lẽman jaoq dait serioq selapuqne nike. 50 Araq sopoq dengan aranne Yusup, asalne lẽman kote Arimatea lẽq negeri Yudea. Yusup niki dengan solẽh saq tehormatin siq dengan, dait saq kenyeke ngantos Kerajaan Allah. Timaq ie anggote Mahkamah Agame, ie ndẽq setuju siq keputusan dait tindakan mahkamah nike. 52 Yusup niki lumbar ngadep Pilatus dait tunas adẽq jenazah Deside Isa teserahang lẽq ie. 53 Terus ie turunang jenazah Deside Isa lẽman kayuq salib, dait bungkusne kadu kain lẽnen alus saq putẽq. Sesampun nike, toloqne jenazah Deside Isa lẽq makam saq tepiaq lẽq dalem bukit batu -- makam nike ndẽq uwah tekadu. 54 Jelo nike jelo persiepan; sẽngaq jelo Sabat gen mulai. 55 Dengan-dengan nine saq ngiring Deside Isa lẽman Galilea turut Yusup dait serioq makam nike. Ie pade serioq ẽndah berembẽ entan jenazah Deside Isa tetoloq lẽq dalem makam. 56 Terus ie pade ulẽq dait siepang ramuan-ramuan dait minyak sengẽh jari minyakin jenazah Deside Isa. Lẽq jelo Sabat, ie pade mentelah begawẽan jari taat lẽq Hukum Taurat.

Luke 24

1 Lẽq jelo Ahad, kelẽmaq aru gati, dengan-dengan nine nike lumbar ojok makam jauq ramuan-ramuan saq sampun ie pade siepang. 2 Lẽq makam, ie pade ndait batu pengimpet lawang makam nike sampun tealih. 3 Terus ie pade tame ojok dalem makam nike, laguq ndẽq araq daitne jenazah Junjungan Saq Mulie Deside Isa lẽq derike. 4 Sewaktu ie pade kenyeke nganjeng lẽq derike dait bingung mikirang hal nike, selung-selung araq due dengan kadu kelambi saq putẽq ngempor dateng ngerapetin ie pade. 5 Ie pade takut gati jangke ie pade nunduk, laguq kedue dengan nike bebase lẽq ie pade, "Kembẽq side pade boyaq dengan saq idup lẽq taoq dengan ninggal? 6 Ie ndẽq araq lẽq deriki, Ie sampun idup malik! Ingetang napi saq Ie manikang lẽq side sewaktu Ie masih lẽq Galilea, 7 bahwe, 'Bije Manusie harus teserahang ojok ime dengan-dengan bedose, terus tepakuq lẽq kayuq salib, dait lẽq jelo saq ketelu Ie gen idup malik.' " 8 Beterus dengan-dengan nine nike inget napi saq sampun temanikang siq Deside Isa. 9 Sesampun tulak lẽman makam nike, ie pade tuturang selapuq peristiwe nike lẽq kesolas pengiring-pengiring Deside Isa dait selapuq pengiring saq lain. 10 Dengan-dengan nine saq nyampẽang selapuq hal nike tipaq rasul-rasul aranne: Mariam Magdalena, Yohana dait Mariam inaqne Yakub dait dengan-dengan nine lainne saq bareng kance ie pade. 11 Laguq rasul-rasul nike paran dengan-dengan nine nike cume nyeriteang saq ndẽq-ndẽq. Ie pade ndẽq percaye siq cerite dengan-dengan nine nike. 12 Timaq maraq nike, Petrus ures dait pelai ojok makam. Waktu ie nidok ojok dalem makam, serioqne cume kain putẽq lẽq derike. Petrus bengaq gati, terus ulẽq dait beketuan-tuan dalem angenne napi setetune saq sampun telaksane. 13 Lẽq jelo nike ẽndah, due pengiring Deside Isa kenyeke bekelampan ojok sopoq dẽse aranne Emaus, kire-kire solas kilo jaoqne lẽman Yerusalem. 14 Sambil lampaq ie pade ngeraosang selapuq peristiwe saq sampun telaksane nike. 15 Sewaktu ie pade ngeraos dait saling tukah pikiran, Deside Isa rauh dait bareng lampaq kance ie pade. 16 Ie pade serioq Deside Isa, laguq araq sopoq hal saq miaq ie pade ndẽq tandaq Deside Isa. 17 Beterus Deside Isa bemanik, "Napi saq side pade raosang lẽq tengaq kelampan niki?" Ie pade mentelah, dait muene sedih. 18 Terus salaq sopoq lẽq antare ie pade aranne Kleopas, metakẽn lẽq Deside Isa, "Napi Side sopoq-sopoqne dengan pendateng lẽq Yerusalem, saq ndẽq nenaoq peristiwe saq telaksane baruq-baruq niki?" 19 "Peristiwe napi nike?" manik Deside Isa. "Peristiwe mengenai Deside Isa, dengan lẽman Nazaret nike," jawab ie pade. "Ie nabi. Ucapan dait perbuatan-Ne penoq siq kuase lẽq arepan Allah, dait lẽq arepan selapuq bangse. 20 Imam-imam kepale dait pemimpin-pemimpin bangsente nyerahang Ie jari tehukum matẽ, terus Ie tepakuq lẽq kayuq salib! 21 Padahal tiang pade beharep Ie saq gen bẽbasang Israel! Dait jelo niki jelo saq ketelu lẽman peristiwe nike telaksane. 22 Dait dengan-dengan nine lẽq antare tiang pade sampun piaq tiang pade tinjot: Kelẽmaq aru gati ie pade lumbar ojok makam, 23 laguq ie pade ndẽq ndait jenazah Deside Isa lẽq derike. Beterus ie pade tulak dait bebadaq lẽq tiang pade bahwe ie pade serioq malaẽkat, dait malaẽkat-malaẽkat nike bebase bahwe Deside Isa idup malik. 24 Araq batur-batur tiang saq lumbar ojok makam, terus daitne napi saq teceriteang siq dengan-dengan nine nike mule tetu, laguq ie pade ndẽq serioq Deside Isa." 25 Beterus Deside Isa bemanik lẽq ie pade, "Side pade mule bodo! Ngonẽq gati side pade percaye napi saq sampun tesampẽang siq nabi-nabi! 26 Tekan Almasih harus ngalamin juluq penderitean nike, jari tame ojok dalem kemuliean-Ne?" 27 Beterus Deside Isa jelasang lẽq ie pade napi saq tetulis lẽq dalem selapuq Kitab Suci mengenai diriq-Ne, mulai lẽman kitab Musa jangke kitab nabi-nabi. 28 Sewaktu ie pade gen rauh lẽq dẽse saq ie pade laiq, Deside Isa maraqne gen bemargi terus, 29 laguq ie pade segah Deside Isa dait matur, "Silaq mererepan lẽq deriki, mangkin sampun serep jelo, dait karing seberaq peteng." Beterus Deside Isa tame dait mererepan lẽq taoq ie pade. 30 Sewaktu Deside Isa melinggih medaran kance ie pade, Ie bait ruti, terus ngucapang syukur tipaq Allah, dait peleng-peleng-Ne ruti nike kadu gading-Ne, terus ngicanin ie pade. 31 Beterus ie pade sadar bahwe nike Deside Isa. Laguq Deside Isa telang lẽman tengaq-tengaq ie pade. 32 Ie pade bebase sopoq kance saq lain, "Onẽq kan ite besemanget gati, sewaktu Ie bebaos kance ite lẽq tengaq kelampan, dait jelasang ite isi Kitab Suci?" 33 Waktu nike ẽndah ie pade nganjeng terus tulak ojok Yerusalem. Lẽq derike daitne solas pengiring Deside Isa kenyeke bekumpul bareng saq lain. 34 Ie pade saq araq lẽq Yerusalem nike bebase lẽq deduaqne, "Mule tetu Junjungan Saq Mulie sampun idup malik! Ie sampun nyatayang diriq-Ne lẽq Simon!" 35 Beterus kedue pengiring Deside Isa saq baruq dateng nike nyeriteang pengalaman ie pade lẽq tengaq kelampanne, dait berembẽ entan ie pade nandaq Deside Isa waktu Ie peleng-peleng ruti. 36 Lẽq waktu ie pade masih betutur, selung-selung Deside Isa araq lẽq tengaq-tengaq ie pade, dait ngucapang salam tipaq ie pade. 37 Ie pade tinjot dait takut gati, sẽngaq ie pade paran serioq hantu. 38 Laguq Deside Isa bemanik, "Kembẽq side pade takut? Kembẽq side pade jari bimbang? 39 Serioq imen Tiang dait naẽn Tiang. Tiang niki Isa. Silaq demak dait perhatiang, sẽngaq hantu ndẽq bedowẽ isi atao tolang maraq saq side pade serioq lẽq Tiang." 40 Sambil bemanik maraq nike Deside Isa petitoqang ie pade gading-Ne dait cokor-Ne. 41 Dait sewaktu ie pade ndẽqman percaye lantaran seneng gati dait bengaq, Deside Isa bemanik lẽq ie pade, "Napi lẽq deriki side pade bedowẽ keloran?" 42 Ie pade aturin Deside Isa sepeleng empaq gorẽng. 43 Deside Isa bait empaq nike, terus daharangne lẽq julu ie pade. 44 Sesampun nike, Deside Isa bemanik malik lẽq ie pade, "Hal niki saq sampun Tiang sampẽang lẽq side pade sewaktu Tiang masih bareng kance side pade: Bahwe selapuq hal saq tetulis mengenai Tiang lẽq dalem Kitab Taurat Musa, Kitab Nabi-nabi dait lẽq Kitab Zabur, harus telaksane." 45 Beterus Deside Isa bukaq pikiran ie pade, sehingge ie pade iniq ngerti maksut Kitab Suci. 46 Deside Isa bemanik malik lẽq ie pade, "Lẽq dalem Kitab Suci tetulis bahwe Almasih harus menderite, dait idup malik lẽman tengaq-tengaq dengan ninggal lẽq jelo saq ketelu. 47 Dait dalem pesẽngan Almasih nike ẽndah harus tekabarang tipaq selapuq bangse mengenai pertobatan dait pengampunan dose. Berite nike harus tekabarang mulai lẽman Yerusalem. 48 Side pade jari saksi lẽman selapuq hal nike. 49 Dait Tiang mẽsaq gen ngirimang side pade napi saq sampun tejanjiqang siq Bapa. Laguq side pade harus tetep ngantih lẽq kote niki jangke kuase lẽman Allah turun kuasein side pade." 50 Sesampun nike Deside Isa jauq ie pade ojok luah kote jangke rapet Betania. Lẽq derike Deside Isa ngangkat gading-Ne, terus ngicanin ie pade berkah. 51 Sewaktu Deside Isa ngelaksaneang hal nike, Ie kerangkatan ojok sorge, terus bekelin kance ie pade. 52 Ie pade sujut nyembah Deside Isa, terus tulak ojok Yerusalem siq angen saq seneng gati, 53 dait ie pade tetep araq lẽq Gedẽng Allah dait mulieang Allah.

John 1

1 Lẽq penembẽqne sendẽqman dunie tecipteang, Manik nike sampun araq. Manik nike araq bareng Allah, dait Manik nike Allah. 2 Lẽman penembẽqne Ie araq bareng Allah. 3 Selapuqne tejariang siq Ie, dait lẽman selapuq saq araq, ndẽq araq sopoq juaq saq tejariang, lamun nẽnten siq Ie. 4 Lẽq dalem-Ne araq idup, dait idup nike terang manusie. 5 Terang nike besinar lẽq tengaq peteng, dait peteng nike ndẽq bau nguasein terang nike. 6 Rauh dengan saq teutus siq Allah, aranne Yahya. 7 Ie rauh jari saksi mengenai terang nike, adẽq langan ie selapuq dengan jari percaye. 8 Ie ndẽqne terang nike, laguq ie harus besaksi mengenai terang nike. 9 Terang saq sejati, saq menahin selapuq manusie, kenyeke rauh ojok dunie. 10 Ie araq lẽq dunie, malahan dunie tecipteang siq Ie, laguq dunie ndẽq kenal kance Ie. 11 Ie rauh ojok dowẽ-Ne mẽsaq laguq ie pade ndẽq nerimaq Ie. 12 Laguq tipaq dengan-dengan saq nerimaq Ie, Ie icanin dengan-dengan nike kuase jari bije-bije dowẽn Allah, ie pade saq percaye lẽq pesẽngan-Ne. 13 Ie pade tebijeang ndẽqne lẽman daraq atao kemẽlẽq manusie, ndẽq ẽndah lẽman kemẽlẽq dengan mame, laguq lẽman Allah. 14 Manik nike sampun jari manusie, beterus Ie araq lẽq antare ite, dait ite sampun serioq kemuliean-Ne, kemuliean saq teicanin tipaq Ie sebagẽ Bije Nunggal saq asalne lẽman Bapa, penoq rahmat dait kebenaran. 15 Yahya rauh jari saksi-Ne, ie beriteang: "Niki Ie saq tiang maksut: Ie saq rauh mudian lẽman tiang belẽqan lẽman tiang, sẽngaq Ie sampun araq sendẽqman tiang araq." 16 Sẽngaq lẽman kesempurnean-Ne, ite selapuq sampun nerimaq rahmat demi rahmat. 17 Hukum Taurat ite terimaq lẽman Musa. Laguq rahmat dait kebenaran rauh langan Deside Isa Almasih. 18 Ndẽq araq saq sampun serioq Allah, laguq Bije Nunggal saq asalne lẽman Bapa, saq araq lẽq iwean Bapa. Ie saq nyatayang Bapa tipaq ite. 19 Niki kesaksian Yahya sewaktu pare penguase Yahudi lẽq Yerusalem suruq imam-imam dait dengan-dengan Lewi lumbar beketuan ojok Yahya, "Sai pelungguh niki?" 20 Yahya ngaku secare terus-terang, "Tiang niki nẽnten Almasih." 21 "Lamun maraq nike, pelungguh sai?" Ie pade beketuan. "Napi pelungguh Elia?" "Nẽnten," jawab Yahya. "Napi pelungguh nabi saq gen rauh?" "Nẽnten," jawab Yahya. 22 Ie pade bebase, "Lamun maraq nike, silaq badaq tiang pade sai pelungguh niki?" Adẽq tiang pade bau nyampẽang jawaban tipaq dengan-dengan saq ngutus tiang pade. Menurut pelungguh sai setetune pelungguh niki?" 23 Jawab Yahya, "Tiang niki dengan saq bekuih-kuih lẽq padang gurun, 'Rateang langan Tuhan.' Maraq saq sampun tesampẽang siq Nabi Yesaya." 24 Lẽq antare dengan-dengan saq teutus araq dengan Parisi, 25 ie pade beketuan, "Lamun pelungguh nẽnten Almasih, nẽnten Elia, nẽnten ẽndah nabi saq gen rauh, kembẽq pelungguh baptis dengan?" 26 Jawab Yahya, "Tiang baptis dengan kadu aiq. Laguq lẽq tengaq-tengaq side pade araq Dengan saq nẽnten side pade kenal. 27 Ie rauh mudian lẽman tiang, laguq jari lekaq tali sepatu-Ne doang tiang ndẽq patut." 28 Selapuqne nike telaksane lẽq Betania, lẽq itoqan Kokoq Yordan taoq Yahya baptis dengan. 29 Lẽq jelo jemaqne, Yahya serioq Deside Isa rauh tipaq ie. Terus Yahya bebase, "Pade serioq Anak Dombe Allah saq ngapus dose dunie. 30 Ie saq tiang maksut sewaktu tiang nyampẽang: Mudian lẽman tiang gen rauh sopoq dengan saq belẽqan lẽman tiang, sẽngaq Ie sampun araq sendẽqman tiang. 31 Sendẽqmanne, tiang ndẽq nenaoq sai Ie nike. Laguq jari hal nike tiang dateng dait baptis dengan kadu aiq, adẽq Ie tenyatayang tipaq bangse Israel." 32 Yahya ẽndah ngebẽng kesaksian niki, "Tiang serioq Roh Allah turun lẽman langit maraq ruen kedit dare, beterus meneng lẽq atas-Ne. 33 Lẽq waktu nike tiang ndẽqman nenaoq sai Ie. Laguq Allah saq manikang tiang baptis dengan kadu aiq sampun bemanik lẽq tiang, 'Lamun side serioq Roh Allah turun, beterus meneng lẽq atas sopoq dengan, Ie saq gen baptis dengan kadu Roh Suci.' 34 Tiang sampun serioq mẽsaq," basen Yahya, "dait tiang ngebẽng kesaksian bahwe Ie Bije saq asalne lẽman Allah." 35 Lẽq jelo jemaqne Yahya araq lẽq taoq nike malik kance due pengiringne. 36 Sewaktu ie serioq Deside Isa bemargi, ie bebase, "Silaq pade serioq! Nike Anak Dombe Allah." 37 Kedue pengiring nike dengah basen Yahya, beterus lumbar ngiring Deside Isa. 38 Deside Isa ngẽngat andang mudi, dait cingakin ie pade kenyeke turut Ie. Deside Isa beketuan, "Napi saq side pade boyaq?" Jawab ie pade, "Rabi (artine: Guru), lẽq mbẽ Pelungguh meneng?" 39 "Silaq serioq mẽsaq," manik Deside Isa. Ie pade lumbar kance Deside Isa dait serioq lẽq mbẽ gedẽng-Ne. Waktu nike jam empat kebian. Jelo nike ie pade ndot ngiring Deside Isa. 40 Salaq sopoq lẽman kedue dengan saq sampun dengahang napi saq tesampẽang Yahya, beterus lumbar ngiring Deside Isa, aranne Andreas, semetonne Simon Petrus. 41 Becat-becat Andreas boyaq Simon, semetonne, dait bebase lẽq ie, "Tiang pade sampun bedait kance Mesias!" (Mesias pade artine kance Almasih.) 42 Andreas ngatong Simon ojok Deside Isa. Deside Isa merhatiang Simon, terus bemanik, "Side Simon, bije Yahya. Side gen tearanin Kepas (artine: Petrus)." 43 Lẽq jelo jemaqne Deside Isa mutusang gen lumbar ojok Galilea. Ie bedait kance Pilipus, dait bemanik lẽq ie, "Silaq turut Tiang!" 44 Pilipus asalne lẽman Betsaida, taoqne ndot Andreas dait Petrus. 45 Pilipus bedait kance Natanael dait bebase lẽq ie, "Tiang pade sampun ndait Dengan saq tesebut siq Musa lẽq dalem Kitab Suci Taurat, dait saq teberiteang siq nabi-nabi. Ie Deside Isa bije Yusup lẽman Nazaret." 46 Laguq jawab Natanael, "Segerah iniq hal saq solah dateng lẽman Nazaret?" "Silaq serioq mẽsaq!" basen Pilipus. 47 Deside Isa cingakin Natanael dateng, terus bemanik mengenai ie, "Serioq niki dengan Israel sejati. Ndẽq araq saq palsu lẽq ie." 48 Natanael metakẽn lẽq Deside Isa, "Berembẽ Pelungguh iniq wikanang tiang?" Jawab Deside Isa, "Sendẽqman Pilipus ngempoh side, Tiang sampun serioq side lẽq bawaq lolo are nike." 49 "Bapaq Guru," basen Natanael, "Pelungguh tetu-tetu Bije saq asalne lẽman Allah! Pelungguh Raje dengan Israel!" 50 Deside Isa bemanik, "Side percaye, cume lantaran Tiang badaq bahwe Tiang sampun serioq side lẽq bawaq lolo are nike? Hal-hal saq jaoq belẽqan lẽman nike gen side serioq!" 51 Deside Isa bemanik ẽndah, "Tiang badaq side, side gen serioq langit kebukaq, dait malaẽkat-malaẽkat Allah turun-taẽk ojok Bije Manusie."

John 2

1 Due jelo sesampun nike araq gawẽ ngawinang lẽq kote Kana, lẽq Galilea, dait mamiq bini Deside Isa araq lẽq derike. 2 Deside Isa kance pengiring-pengiring-Ne tepesilaq ẽndah lẽq gawẽ ngawinang nike. 3 Sewaktu ie pade kurangan aiq anggur, mamiq bini-Ne bebase lẽq Deside Isa, "Aiq anggur ie pade sampun bis." 4 Jawab Deside Isa, "Inaq napi saq side kayunang lẽq Tiang? Ndẽqman waktune Tiang nyatayang diriq." 5 Laguq mamiq bini Deside Isa bebase lẽq pelayan-pelayan, "Laksaneang napi saq Ie manikang lẽq side." 6 Lẽq derike araq enem gentong saq tesadangang jari bisoq naẽ menurut adat Yahudi. Gentong nike sopoq-sopoq isine kire-kire satus liter. 7 Manik Deside Isa lẽq pelayan-pelayan nike, "Isiqang gentong-gentong nike." Ie pade isiq gentong-gentong nike jangke penoq. 8 Beterus Deside Isa bemanik lẽq ie pade, "Mangkin bait aiq nike sekediq dait atong ojok ketue saq ngatur gawẽ." Ie pade jauq aiq nike ojok ketue. 9 Terus ketue nike rasaq aiq saq sampun jari anggur nike. (Ie ndẽq nenaoq lẽman mbẽ anggur nike, cume pelayan-pelayan saq ngisiq aiq doang saq nenaoq.) Beterus ketue nike ngerapetin pengantẽn mame, 10 terus bebase lẽq ie, "Biasene dengan nyugulang anggur saq paling maiq juluan dait lamun selapuq temuẽ sampun puas nginem baruq anggur saq biase. Laguq side nyimpen anggur saq paling solah jangke mangkin!" 11 Nike keajaipan penembẽq saq tepiaq siq Deside Isa. Ie ngelaksaneang nike lẽq Kana lẽq Galilea. Siq tande nike Ie nyatayang kemuliean-Ne. Make pengiring-pengiring-Ne percaye lẽq Ie. 12 Sesampun nike Deside Isa lumbar ojok Kapernaum bareng-bareng kance mamiq bini-Ne, sanak-sanak-Ne dait pengiring-pengiring-Ne. Ie pade mererepan lẽq derike pire jelo ngonẽqne. 13 Sewaktu sampun rapet Hari Raye Paskah Yahudi, Deside Isa lumbar ojok Yerusalem. 14 Lẽq Gedẽng Allah lẽq Yerusalem, dait-Ne dengan-dengan saq jual sampi, dombe, kedit dare; dait ẽndah tukang tukah kẽpẽng tokol lẽq derike. 15 Deside Isa piaq pecut lẽman tali, beterus siuh-Ne selapuq sampi dait dombe nike lẽman dalem Gedẽng Allah. Balik-belah-Ne mẽje-mẽje saq tekadu taoq nukahang kẽpẽng jangke selapuq kẽpẽng ie pade begelanyatan. 16 Beterus Deside Isa bemanik lẽq dagang kedit dare nike, "Jauq selapuqne niki. Ndaq jariang Gedẽng Bapa Tiang taoq bedagang!" 17 Beterus pengiring-pengiring-Ne inget bahwe araq tetulis, "Rase kasih Tiang lẽq Gedẽng Deside, nguasein atẽn Tiang." 18 Pare penguase Yahudi nantang Deside Isa, basen ie pade, "Silaq miaq keajaipan jari tande lẽq tiang pade bahwe Pelungguh berhak ngelaksaneang maraq niki." 19 Jawab Deside Isa, "Runtuhang Gedẽng Allah niki, dait dalem telu jelo Tiang bau penganjeng malik." 20 Terus ie pade bebase, "Teperluang waktu petang dase enem taun jari penganjeng Gedẽng Allah niki, laguq Pelungguh gen penganjeng malik dalem telu jelo?" 21 Laguq Gedẽng Allah saq temaksut siq Deside Isa nike, rage-Ne mẽsaq. 22 Beterus sesampun Deside Isa idup lẽman ninggal, pengiring-pengiring-Ne inget bahwe hal nike sampun Ie manikang. Make ie pade percaye napi saq tetulis lẽq Kitab Suci dait napi saq temanikang siq Deside Isa. 23 Deside Isa araq lẽq Yerusalem sengonẽq Perayaan Paskah, luwẽq dengan percaye lẽq Ie lantaran keajaipan-keajaipan saq Ie piaq. 24 Laguq Deside Isa mẽsaq nẽnten percayeang diriq-Ne lẽq ie pade, sẽngaq Ie kenal selapuq dengan. 25 Ndẽq perlu dengan ngebẽng kesaksian tipaq Ie mengenai sai juaq, sẽngaq Ie mẽsaq wikan napi saq araq lẽq dalem angen manusie.

John 3

1 Araq sopoq ahli Taurat lẽman golongan dengan Parisi aranne Nikodemus. 2 Lẽq sopoq kelem ie parek ojok Deside Isa, dait matur, "Bapaq Guru, tiang pade nenaoq Pelungguh teutus siq Allah. Sẽngaq nẽnten araq sopoq dengan juaq saq bau miaq keajaipan maraq Pelungguh, lamun Allah nẽnten bareng ie." 3 Jawab Deside Isa, "Tiang badaq side: Setetune ndẽq araq sopoq manusie saq bau serioq Kerajaan Allah lamun ie ndẽq tebijeang malik." 4 Jawab Nikodemus tipaq Deside Isa, "Segerah dengan saq sampun toaq tebijeang malik? Napi ie iniq tame malik lẽq dalem tian inaqne beterus tebijeang malik?" 5 Jawab Deside Isa, "Tiang badaq side, setetune lamun dengan ndẽq tebijeang lẽman aiq dait lẽman Roh Allah, dengan nike ndẽq gen bau tame Kerajaan Allah. 6 Manusie secare jasmani tebijeang siq dengan toaqne, laguq secare rohani tebijeang lẽman Roh Allah. 7 Ndaq bengaq lantaran Tiang badaq side: Side selapuq harus tebijeang malik. 8 Angin lalo ojok mbẽ ie mẽlẽ; ite dengah suarene, laguq ndẽq nenaoq lẽman mbẽ datengne dait ojok mbẽ aningne. Maraq nike ẽndah dengan saq tebijeang lẽman Roh Allah." 9 Nikodemus metakẽn, "Berembẽ nike iniq telaksane?" 10 Jawab Deside Isa, "Side guru lẽq Israel; segerah side ndẽq nenaoq hal-hal nike? 11 Tiang badaq side: Setetune tiang pade nyampẽang mengenai napi saq tiang pade taoq, dait tiang pade ngebẽng kesaksian mengenai napi saq sampun tiang pade serioq; laguq side pade ndẽq mẽlẽ nerimaq kesaksian tiang pade. 12 Side pade ndẽq percaye lamun Tiang nyeriteang side mengenai hal-hal lẽman dunie niki; berembẽ side pade bau percaye, lamun Tiang nyeriteang side hal-hal mengenai sorge? 13 Ndẽq araq sopoq dengan juaq saq sampun taẽk ojok sorge, kecuali Ie saq turun ojok dunie, nike Bije Manusie. 14 Pade maraq Musa saq taẽkang ulah tembage lẽq sopoq kayuq lẽq padang gurun, maraq nike ẽndah Bije Manusie harus tetaẽkang, 15 adẽq selapuq dengan saq percaye lẽq Ie mauq idup sejati dait kekel. 16 Sẽngaq belẽq gati kasih Allah tipaq manusie lẽq dunie niki, jangke Ie ngicanin Bije-Ne saq nunggal, adẽq sebilang dengan saq percaye lẽq Ie ndẽqne binase, laguq mauq idup sejati dait kekel. 17 Sẽngaq Allah ngutus Bije-Ne nẽnten jari hakimin dunie niki, laguq adẽq langan Ie, dunie niki teselametang. 18 Dengan saq percaye lẽq Ie ndẽq gen tehukum. Laguq dengan saq ndẽq percaye sampun tehukum siq Allah, sẽngaq ie ndẽq percaye lẽq dalem pesẽngan Bije Nunggal saq asalne lẽman Allah. 19 Hukuman nike: Cahaye nike sampun rauh ojok dunie, laguq manusie demenan peteng ketimbang menah, sẽngaq perbuatan-perbuatan ie pade jahat. 20 Sebilang dengan saq gawẽq jahat, meriq lẽq cahaye; ie ndẽq mẽlẽ dateng lẽq cahaye nike, adẽq perbuatanne saq jahat ndẽq penggitan. 21 Laguq dengan saq ngelaksaneang napi saq kenaq, dateng tipaq cahaye nike adẽqne jari nyate bahwe napi saq ie laksaneang sesuai pekayunan Allah." 22 Sesampun nike Deside Isa dait pengiring-pengiring-Ne lumbar ojok Yudea. Lẽq derike Ie mererepan pire jelo ngonẽqne teiring siq ie pade sambil baptis dengan saq betobat. 23 Waktu nike Yahya ndẽqman tame bui. Ie baptis dengan lẽq Ainon, ndẽqne jaoq lẽman Salim, sẽngaq lẽq derike luwẽq aiq. Dengan-dengan pade dateng ojok derike terus Yahya, baptis dengan-dengan nike. 25 Terus pengiring-pengiring Yahya mulai pade betungkasan kance dengan Yahudi mengenai aturan penyucian. 26 Ie pade lumbar ojok Yahya, dait bebase, "Paq Guru, napi pelungguh masih iling lẽq dengan saq bareng kance pelungguh lẽq itoqan Kokoq Yordan nike saq piranan sampun pelungguh ceriteang tiang pade? Ie ẽndah baptis dengan, dait selapuq dengan lumbar ojok Ie!" 27 Jawab Yahya, "Ndẽq araq sopoq dengan juaq saq bau nerimaq napi-napi lamun ie nẽnten teicanin siq Allah. 28 Side pade sampun dengah raos tiang, 'Tiang ndẽqne Mesias saq tesebut ẽndah Almasih. Tiang teutus senjuluq Ie.' 29 Pengantẽn nine nike ẽpẽne pengantẽn mame. Sahabat pengantẽn mame nike cume nganjeng lẽq dẽkẽtne dait dengahang, dait ie besukecite lamun dengah suare pengantẽn mame. Maraq nike ẽndah tiang. Mangkin tiang seneng gati. 30 Ie harus sayan belẽq, laguq tiang harus sayan kodẽq." 31 Sai saq rauh lẽman atas ngelebihin selapuqne; sai saq asalne lẽman dunie, ie manusie warge dunie dait ngeraos mengenai hal-hal lẽq dunie. Sai saq rauh lẽman sorge ngelebihin selapuqne. 32 Ie bebaos mengenai napi saq sampun Ie cingakin dait Ie pirengang, laguq ndẽq araq sopoq dengan juaq saq percaye lẽq kesaksian-Ne. 33 Dengan saq percaye lẽq kesaksian-Ne nike, ngakuq bahwe Allah kenaq. 34 Sẽngaq dengan saq teutus siq Allah nyampẽang Manik Allah, sẽngaq nẽnten araq tutuqne Allah ngicanin Roh-Ne. 35 Bapa ngasihin Bije, dait sampun nyerahang selapuq kuase lẽq Ie. 36 Dengan saq percaye lẽq Bije nike gen mauq idup sejati dait kekel. Laguq dengan saq ndẽq taat lẽq Bije nike ndẽqne mauq idup. Ie tehukum siq Allah selaẽq-laẽqne.

John 4

1 Sewaktu Deside Isa wikan bahwe dengan-dengan Parisi sampun dengah, bahwe Ie luwẽqan mauq pengiring dait baptis pengiring ketimbang Yahya, ( 2 timaq Deside Isa mẽsaq nẽnten baptis dengan, laguq pengiring-pengiring-Ne doang,) 3 Ie lumbar lẽman Yudea tulak malik ojok Galilea. 4 Lẽq dalem pemargian-Ne nike, Ie harus liwatin daẽrah Samaria. 5 Beterus Deside Isa rauh lẽq sopoq kote lẽq Samaria aranne Sikar, ndẽqne jaoq lẽman tanaq saq laẽq Yakub icanin tipaq Yusup, bijene. 6 Lẽq derike araq lingkoq Yakub. Deside Isa lelah gati lantaran pemargian nike, keranaq nike Ie melinggih lẽq sedin lingkoq. Waktu nike kire-kire jam due olas tengari. 7 Waktu nike pengiring-pengiring Deside Isa sampun lumbar ojok kote beli keloran. Beterus araq dengan nine Samaria dateng nimbaq aiq. Deside Isa bemanik lẽq ie, "Inaq, bau Tiang tunas aiq inem." 9 Jawab dengan nine Samaria nike, "Bapaq dengan Yahudi, tiang dengan Samaria; kembẽq Pelungguh tunas nginem lẽq tiang?" (Sẽngaq dengan-dengan Yahudi ndẽq araq hubungan kance dengan Samaria.) 10 Jawab Deside Isa, "Lamun side nenaoq paice Allah dait sai saq tunas aiq inem lẽq side, pasti side mẽsaq gen tunas aiq inem lẽq Ie, dait Ie gen bẽng side aiq idup." 11 Basen dengan nine nike, "Pelungguh nẽnten bedowẽ timbaq, dait lingkoq niki dalem gati. Lẽman mbẽ Pelungguh mauq aiq idup nike? 12 Yakub, bapaq leluhur tiang pade, ngicanin tiang pade lingkoq niki. Dait ie mẽsaq bait aiq inemne lẽman deriki; maraq nike ẽndah bije-bijene lantong selapuq binatang saq ie anyam. Napi Pelungguh paran Pelungguh belẽqan kance Yakub?" 13 Deside Isa bemanik, "Dengan saq nginem aiq niki gen bedak malik, 14 laguq dengan saq nginem aiq saq gen Tiang bẽng, ndẽqne gen bedak malik selaẽq-laẽqne. Sẽngaq aiq saq gen Tiang bẽng nike gen jari pengembulan aiq lẽq dalem diriqne saq gen terus ngẽlẽk jangke dateng idup sejati dait kekel." 15 Basen dengan nine nike, "Bapaq, icanin tiang aiq nike, adẽq tiang ndẽq bedak malik; dait ndẽq perlu tulak ojok deriki bait aiq." 16 "Silaq lumbar, empoh semamende, terus tulak malik ojok deriki," manik Deside Isa. 17 "Tiang ndẽq bedowẽ semame," basen dengan nine nike. "Mule kenaq basende," manik Deside Isa. 18 "Sẽngaq side sampun merariq lime kali, dait dengan mame saq idup bareng side mangkin ndẽqne semamende." 19 "Taoq tiang mangkin bahwe Pelungguh niki nabi," basen dengan nine nike. 20 "Leluhur tiang pade nyembah Allah lẽq atas gunung niki, laguq bangse Pelungguh bebase bahwe cume lẽq Yerusalem doang taoq dengan nyembah Allah." 21 "Pade percaye," manik Deside Isa lẽq ie, "sopoq waktu dengan gen nyembah Bapa, ndẽqne lẽq gunung niki malik, dait ndẽqne ẽndah lẽq Yerusalem. 22 Side pade dengan Samaria nyembah saq ndẽq side pade kenal, laguq tiang pade dengan Yahudi nyembah Ie saq tiang pade kenal, sẽngaq keselametan dateng lẽman dengan Yahudi. 23 Laguq gen dateng waktune dait mangkin sampun dateng, bahwe penyembah-penyembah saq kenaq gen nyembah Bapa lẽq dalem roh dait kebenaran; sẽngaq Bapa kayunang penyembah-penyembah maraq nike. 24 Allah nike Roh dait sai-sai nyembah Ie, harus nyembah Ie lẽq dalem roh dait kebenaran." 25 Dengan nine nike matur lẽq Deside Isa, "Tiang nenaoq bahwe Mesias (saq tesebut Almasih) gen rauh. Lamun Ie rauh, Ie gen nyampẽang selapuq hal tipaq ite." 26 Manik Deside Isa lẽq ie, "Tiang niki Ie, saq mangkin kenyeke ngeraos kance side." 27 Lẽq waktu nike pengiring-pengiring Deside Isa tulak. Ie pade bengaq serioq Deside Isa bebaos kance dengan nine nike. Laguq ndẽq araq sopoq dengan juaq lẽman ie pade saq beketuan lẽq dengan nine nike, "Napi kemẽlẽqde?" atao saq metakẽn lẽq Deside Isa, "Kembẽq Pelungguh bebaos kance dengan nine nike?" 28 Dengan nine nike bilin pendaiqne terus pelai ojok kote dait badaq dengan-dengan lẽq derike, 29 "Silaq pade serioq, lẽq derike araq sopoq dengan saq badaq tiang selapuq hal saq sampun tiang piaq. Sang Ie Almasih?" 30 Beterus dengan-dengan nike ẽndah bilin kote dait lumbar ojok Deside Isa. 31 Lẽq waktu nike pengiring-pengiring-Ne pesilaq Deside Isa medaran. Ie pade matur, "Bapaq Guru, silaq medaran." 32 Laguq jawab Deside Isa, "Lẽq Tiang araq keloran saq side pade ndẽq taoq." 33 Beterus pengiring-pengiring-Ne mulai saling ketuan, "Napi araq dengan atongang Ie keloran?" 34 Beterus Deside Isa bemanik, "Keloran Tiang nike, ngelaksaneang pekayunan Ie saq ngutus Tiang, dait nutuqang karye saq teserahang ojok Tiang. 35 Basen side pade, 'Karing empat bulan musim mataq.' Laguq Tiang badaq side: Silaq serioq lendang-lendang saq sampun kuning, siep tepataq! 36 Dengan saq mataq sampun mulai nerimaq upaqne dait ngumpulang hasil jari idup sejati dait kekel. Jari, dengan saq nalet dait dengan saq mataq kanggo bareng beseneng-seneng. 37 Sesenggak niki kenaq ẽndah, 'Saq sopoq nalet, saq lain mataq.' 38 Tiang suruq side pade lumbar mataq lẽq taoq saq side pade ndẽq uwah betaletan; dengan lain sampun begawẽan lẽq derike, dait side pade nerimaq bati lẽman pegawẽan ie pade." 39 Luwẽq dengan Samaria lẽq kote nike percaye lẽq Deside Isa, lantaran raos dengan nine nike, "Ie badaq tiang selapuq hal saq sampun tiang piaq." 40 Sewaktu dengan-dengan Samaria bedait kance Deside Isa, sanget siq ie pade tunas adẽq Deside Isa meneng kance ie pade. Jari Deside Isa meneng lẽq derike due jelo ngonẽqne. 41 Beterus sayan luwẽq malik dengan saq percaye lẽq Deside Isa lantaran ie pade dengah mẽsaq pengajahan-Ne. 42 Ie pade bebase lẽq dengan nine nike, "Tiang pade percaye mangkin, ndẽqne lantaran napi saq side ucapang lẽq tiang pade, laguq lantaran tiang pade sampun dengah mẽsaq dait nenaoq bahwe Ie mule tetu Juruselamet dunie." 43 Sesampun due jelo lẽq Sikar, Deside Isa lumbar ojok Galilea. 44 Deside Isa mẽsaq sampun bemanik, "Sopoq nabi ndẽq tehormatin lẽq negerine mẽsaq." 45 Laguq sewaktu Ie rauh lẽq Galilea, dengan-dengan lẽq derike seneng nyambut Ie, sẽngaq ie pade araq lẽq Yerusalem sewaktu Hari Raye Paskah, dait sampun serioq selapuq saq telaksaneang siq Deside Isa. 46 Beterus Deside Isa tulak ojok Kana lẽq Galilea, lẽq taoq nike Ie sampun miaq aiq jari anggur. Lẽq kote nike araq sopoq pegawẽ istane, bijene kenyeke sakit lẽq Kapernaum. 47 Sewaktu ie dengah bahwe Deside Isa sampun rauh lẽq Galilea lẽman Yudea, ie lumbar ojok Deside Isa dait tunas adẽq Deside Isa rauh ojok Kapernaum jari nyelahang bijene saq gen milinang. 48 Manik Deside Isa lẽq pegawẽ istane nike, "Lamun side pade ndẽq serioq keajaipan-keajaipan, side pade ndẽq percaye." 49 "Junjungan Saq Mulie," jawab pegawẽ istane nike, "tunas gelisan rauh sendẽqman anak tiang milinang." 50 Manik Deside Isa lẽq ie, "Silaq lumbar, bijende selah!" Dengan nike percaye lẽq manik Deside Isa, terus ie lumbar. 51 Lẽq tengaq langan, pelayan-pelayanne dateng tipaq ie jauq kabar, "Bije pelungguh sampun selah." 52 Beterus ie beketuan lẽq ie pade, "Jam pire kanak nike mulai selah?" Jawab ie pade, "Rubin, kire-kire jam sekẽq tengari panasne telang." 53 Beterus bapaq kanak nike inget bahwe lẽq waktu nike Deside Isa bemanik lẽq ie, "Anakde selah." Terus ie dait selapuq keluargene percaye lẽq Deside Isa. 54 Nike keajaipan saq kedue saq tepiaq siq Deside Isa lẽq Galilea sesampun Ie rauh lẽman Yudea.

John 5

1 Sesampun nike araq perayaan Yahudi, make Deside Isa lumbar ojok Yerusalem. 2 Lẽq Yerusalem dẽkẽt Jebak Dombe araq sopoq telage, dalem base Ibrani tearanin Betesda. Lẽq derike araq lime sesangkok. 3 Lẽq sesangkok-sesangkok nike luwẽq dengan sakit tetindoqang, araq saq bute, araq saq dẽmpang, dait araq ẽndah saq kẽpaq. Ie pade selapuq ngantih aiq telage nike beumbak-umbak. 4 Sẽngaq sewaktu-waktu malaẽkat Tuhan turun ojok telage nike terus miaq aiqne jari beumbak-umbak. Dengan sakit saq penembẽq tame lẽq dalem telage nike sewaktu aiqne beumbak-umbak, gen selah, napi juaq penyakitne. 5 Lẽq taoq nike araq sopoq dengan mame saq sampun telung dase baluq taun ngonẽqne sakit. 6 Deside Isa cingakin ie tindoq lẽq derike, dait wikanang-Ne bahwe ie ngonẽq gati sakit; make Deside Isa bemanik lẽq ie, "Mẽlẽ side teselahang?" 7 Dengan sakit nike bejawab, "Guru, nẽnten araq dengan saq tamaq tiang ojok dalem telage sewaktu aiqne beumbak-umbak. Baruq tiang mẽlẽ tame, sampun araq dengan lain saq juluan tame." 8 Beterus Deside Isa lẽq ie, "Silaq ures, angkat tipahde, terus lampaq." 9 Lẽq waktu nike ẽndah ie langsung selah. Ie ngangkat tipahne terus lampaq. Hal nike telaksane lẽq jelo Sabat. 10 Keranaq nike penguase-penguase Yahudi bebase lẽq dengan saq baruq teselahang nike, "Jelo niki jelo Sabat. Ndẽq kanggo side ngangkat tipahde." 11 Laguq jawab dengan nike, "Dengan saq nyelahang tiang, Ie saq suruq tiang ngangkat tipah tiang terus lampaq." 12 Ie pade beketuan, "Sai dengan nike saq suruq side ngangkat tipahde terus lampaq?" 13 Laguq dengan saq sampun selah nike ndẽq nenaoq sai dengan nike, sẽngaq Deside Isa sampun telang lẽq tengaq dengan luwẽq nike. 14 Beterus Deside Isa bedait kance dengan nike lẽq dalem Gedẽng Allah, dait bemanik lẽq ie, "Mangkin side sampun selah, ndaq gawẽq dose malik, adẽq side ndẽq ndait saq lengẽan malik." 15 Beterus dengan nike lumbar, dait nyampẽang ojok pare penguase Yahudi bahwe Deside Isa saq nyelahang ie. 16 Dait nike lantaranne, ie pade mulai berusahe nganiaye Deside Isa sẽngaq Ie nyelahang dengan lẽq jelo Sabat. 17 Laguq Deside Isa bemanik lẽq ie pade, "Bapa Tiang terus bekarye jangke mangkin, maraq nike ẽndah Tiang terus bekarye." 18 Nike penguase-penguase Yahudi jari sayan berusahe gen nyematẽq Ie. Ie pade piaq maraq nike, ndẽqne cume lantaran Deside Isa ngelanggar aturan agame mengenai jelo Sabat, laguq ẽndah lantaran Ie badaqang bahwe Allah nike Bapa-Ne; artine Ie padeang diriq-Ne kance Allah. 19 Deside Isa jawab ie pade maraq niki, "Tiang badaq side, setetune Bije ndẽqne tao ngelaksaneang napi-napi lẽman diriq-Ne mẽsaq. Ie cume ngelaksaneang napi saq Ie cingakin telaksaneang siq Bapa-Ne. Sẽngaq napi saq telaksaneang siq Bapa, nike ẽndah saq telaksaneang siq Bije. 20 Sẽngaq Bapa ngasihin Bije-Ne dait nyatayang tipaq Bije nike selapuq saq Ie laksaneang mẽsaq. Malahan Bapa gen nyatayang tipaq Bije nike karye-karye saq belẽqan malik, jangke side pade jari bengaq. 21 Bapa nike nguresang dengan ninggal, dait ngidupang ie pade, maraq nike ẽndah Bije ngidupang sai saq Ie kayunang. 22 Bapa mẽsaq nẽnten hakimin sai juaq. Selapuq kekuasean jari hakimin sai juaq sampun teserahang tipaq Bije. 23 Bapa ngelaksaneang hal nike adẽq selapuq dengan hormatin Bije maraq ie pade hormatin Bapa. Dengan saq ndẽq hormatin Bije artine ie ẽndah ndẽq hormatin Bapa saq ngutus Ie. 24 Tiang badaq side: Setetune dengan saq dengah Tiang, dait percaye lẽq Bapa saq ngutus Tiang, ie gen mauq idup sejati dait kekel, dait ie ndẽq gen tehukum; ie sampun ngalih lẽman ninggal ojok dalem idup. 25 Tiang badaq side: Setetune gen dateng waktune -- malahan sampun dateng waktune -- dengan ninggal gen dengah suare Bije saq asalne lẽman Allah. Dait dengan saq dedengah gen idup. 26 Pade maraq Bapa saq jari sumber idup, make Bapa jariang Bije nike ẽndah sumber idup. 27 Bapa sampun ngicanin Bije-Ne kuase jari hakimin sai juaq, sẽngaq Ie Bije Manusie. 28 Ndaq side pade bengaq dengah hal niki, sẽngaq gen dateng waktune bahwe selapuq dengan saq sampun ninggal dengah suare-Ne, 29 dait ie pade saq gawẽq solah gen sugul dait idup malik jari mauq idup saq kekel, laguq ie pade saq sampun gawẽq jahat gen teidupang malik jari tehukum." 30 "Tiang ndẽq tao ngelaksaneang napi-napi lẽman diriq Tiang mẽsaq, Tiang cume ngakimin sesuai napi saq Tiang dengah. Dait penghakiman Tiang adil, sẽngaq Tiang ndẽq turut kemẽlẽq Tiang mẽsaq, laguq pekayunan Bapa saq ngutus Tiang. 31 Lamun Tiang ngebẽng kesaksian mengenai diriq Tiang mẽsaq, kesaksian nike ndẽq bau tesaduq. 32 Laguq araq dengan lain saq ngebẽng kesaksian mengenai Tiang, dait Tiang nenaoq bahwe kesaksian-Ne nike kenaq. 33 Side pade sampun ngirim utusan ojok Yahya, dait Yahya sampun ngebẽng kesaksian mengenai kebenaran. 34 Hal niki Tiang sampẽang, ndẽqne lantaran Tiang merluang saksi lẽman manusie, laguq adẽq side pade teselametang. 35 Yahya nike maraq dilah saq nyale dait becahaye. Semendaq doang side pade seneng nerimaq cahayene nike. 36 Laguq kesaksian Tiang pentingan lẽman kesaksian Yahya. Napi saq mangkin Tiang laksaneang, niki karye saq tetugasang siq Bapa tipaq Tiang, jari bukti bahwe Bapa sampun ngutus Tiang. 37 Dait Bapa saq ngutus Tiang ẽndah ngebẽng kesaksian mengenai Tiang. Side pade ndẽq uwah dengah manik-Ne atao serioq rue-Ne. 38 Selapuq manik-Ne ndẽq side pade simpen lẽq dalem atẽnde, sẽngaq side pade ndẽq percaye lẽq Tiang saq Ie utus. 39 Side pade berajah Kitab Suci sẽngaq side paran siq care nike side bedowẽ idup sejati dait kekel. Dait Kitab Suci ẽndah ngebẽng kesaksian mengenai Tiang. 40 Laguq side pade ndẽq mẽlẽ dateng ojok Tiang adẽq side pade mauq idup. 41 Tiang ndẽq boyaq pujian lẽman manusie. 42 Tiang kenal side pade. Tiang nenaoq side pade ndẽq ngasihin Allah dalem atẽnde. 43 Tiang dateng dalem pesẽngan Bapa Tiang, laguq side pade ndẽq nerimaq Tiang. Laguq lamun dengan lain saq dateng dalem pesẽnganne mẽsaq, side pade mẽlẽ nerimaq ie. 44 Berembẽ side pade bau percaye, lamun side pade boyaq pujian lẽman sepade manusie, dait ndẽq berusahe boyaq pujian lẽman Allah saq Esa? 45 Ndaq paran Tiang gen tuduh side pade lẽq arepan Bapa. Malahan Musa saq side pade harepang, ie saq tuduh side pade. 46 Seandẽne side pade percaye lẽq Musa, side pade gen percaye lẽq Tiang, sẽngaq Musa saq nulis mengenai Tiang. 47 Laguq lamun side pade ndẽq percaye lẽq napi saq tetulis siq Musa, berembẽ side pade bau percaye lẽq napi saq Tiang sampẽang?"

John 6

1 Sesampun nike Deside Isa lumbar ojok itoqan Danao Galilea, saq tesebut ẽndah Danao Tiberias. 2 Sesampun rauh lẽq derike, luwẽq dengan ngiring Deside Isa, sẽngaq ie pade sampun serioq muqjizat-muqjizat saq tepiaq siq Deside Isa sewaktu Ie nyelahang dengan sakit. 3 Deside Isa taẽk ojok atas gunung, terus melinggih lẽq derike teiring siq pengiring-pengiring-Ne. 4 Lẽq waktu nike Hari Raye Paskah dengan Yahudi sampun rapet. 5 Waktu Deside Isa cingakin lẽq sekelining-Ne, Ie cingakin dengan luwẽq dateng tipaq Ie. Beterus manik Deside Isa lẽq Pilipus, "Lẽq mbẽ taoqte beli keloran, adẽq selapuq dengan niki mauq ngelor?" ( 6 Setetune Deside Isa sampun wikan napi saq harus Ie laksaneang, laguq Ie bemanik maraq nike jari nguji Pilipus.) 7 Jawab Pilipus, "Ruti saq beraji satak kẽpẽng perak ndẽqne cukup umaq dengan-dengan niki, timaq sebilang dengan cume mauq pade sekediq." 8 Salaq sopoq pengiring Deside Isa saq lain aranne Andreas, semeton Simon Petrus matur, 9 "Lẽq deriki araq kanak mame bedowẽ lime ruti dait due empaq. Laguq napi artine lẽq dengan saq luwẽqne maraq niki?" 10 Manik Deside Isa, "Suruq dengan-dengan nike tokol." Lẽq taoq nike luwẽq pupaq, make dengan-dengan nike tokol lẽq pupaq -- selapuqne kire-kire lime iyu dengan mame. 11 Beterus Deside Isa bait ruti nike, dait ngucap syukur tipaq Allah. Sesampun nike bagi-bagiang-Ne ruti nike ojok dengan luwẽq. Terus Ie bagi empaq nike, dait ie pade ngelor jangke puas. 12 Sesampun selapuqne bekelor jangke besuh, Deside Isa bemanik tipaq pengiring-pengiring-Ne, "Kumpulang salo keloran nike; ndaq jangke araq saq tetetẽh." 13 Terus ie pade kumpulang due olas bakaq penoq salo keloran lẽman lime ruti saq tekelorang siq dengan luwẽq nike. 14 Sewaktu dengan luwẽq serioq keajaipan saq tepiaq siq Deside Isa, ie pade bebase, "Mule tetu, niki Nabi saq gen rauh ojok dunie!" 15 Deside Isa wikan ie pade mẽlẽ dateng jari paksaq Ie jari raje ie pade. Keranaq nike Deside Isa lumbar nyingkir ojok gunung mẽsaq-mẽsaq. 16 Sesampun serep jelo, pengiring-pengiring Deside Isa turun ojok danao. 17 Beterus ie pade taẽk perau mbelat danao nike lumbar ojok Kapernaum. Waktu nike sampun peteng laguq Deside Isa ndẽqman ẽndah rauh tipaq ie pade, 18 sedeng umbak lẽq danao mulai belẽq sẽngaq keras angin. 19 Sesampun belayar kire-kire lime atao enem kilomẽter, ie pade serioq Deside Isa rauh ojok perau bemargi lẽq atas aiq. Ie pade takut gati. 20 Laguq manik Deside Isa lẽq ie pade, "Niki Tiang, ndaq takut!" 21 Make seneng gati angen ie pade terus pesilaq Deside Isa taẽk ojok dalem perau. Dait waktu nike ẽndah perau ie pade dateng lẽq taoq saq ie pade laiq. 22 Lẽq jelo jemaqne dengan luwẽq saq masih ndot lẽq itoqan danao, sadar bahwe sendẽqmanne cume araq sopoq perau lẽq derike. Ie pade nenaoq bahwe pengiring-pengiring Deside Isa sampun berangkat kadu perau nike, laguq Deside Isa nẽnten milu. 23 Beterus perau-perau lẽman kote Tiberias dateng dait belabuh lẽq dẽkẽt taoq nike, taoq dengan luwẽq ngelorang ruti sesampun Junjungan Saq Mulie ngucapang syukur. 24 Sewaktu dengan luwẽq nike serioq bahwe Deside Isa dait pengiring-pengiring-Ne ndẽq araq lẽq derike, ie pade taẽk perau-perau nike dait lumbar ojok Kapernaum boyaq Deside Isa. 25 Sewaktu dengan-dengan nike bedait kance Deside Isa lẽq itoqan danao, ie pade metakẽn lẽq Deside Isa, "Bapaq Guru, piran Pelungguh rauh lẽq deriki?" 26 Jawab Deside Isa, "Tiang badaq side, setetune side pade boyaq Tiang ndẽqne lantaran side pade sampun ngerti napi maksut keajaipan-keajaipan saq Tiang piaq, laguq lantaran side pade sampun bekelor jangke besuh. 27 Ndaq begawẽan jari mauq keloran saq iniq bis dait sẽde. Laguq side pade harus begawẽan jari mauq keloran saq bau tahen jangke dateng idup sejati dait kekel, saq gen teicanin siq Bije Manusie, sẽngaq Ie sampun tesahang siq Allah Bapa." 28 Beterus ie pade metakẽn lẽq Deside Isa, "Napi saq harus tiang pade piaq adẽq tiang pade ngelaksaneang karye saq tekayunang siq Allah?" 29 Jawab Deside Isa, "Niki karye saq tekayunang siq Allah: Side pade harus percaye lẽq Ie saq teutus siq Allah." 30 Beterus ie pade matur, "Lamun maraq nike, bukti napi saq gen Pelungguh icanin adẽq tiang pade serioq dait percaye lẽq Pelungguh? Napi saq Pelungguh gen laksaneang? 31 Leluhur tiang pade ngelorang manna lẽq padang gurun, maraq tetulis lẽq Kitab Suci, 'Allah ngicanin ie pade kelorang ruti lẽman sorge.' " 32 Terus Deside Isa bemanik lẽq ie pade, "Tiang badaq side: Setetune ndẽqne Musa, laguq Bapa Tiang saq ngicanin side ruti saq setetune lẽman sorge. 33 Sẽngaq ruti saq teicanin siq Allah nike Ie saq turun lẽman sorge dait ngicanin idup tipaq manusie lẽq dunie." 34 Terus ie pade matur, "Junjungan Saq Mulie, tunas tetep icanin tiang pade ruti nike." 35 Manik Deside Isa lẽq ie pade, "Tiang niki ruti saq ngebẽng idup, dengan saq dateng tipaq Tiang, ndẽqne gen lapah malik. Dait dengan saq percaye lẽq Tiang ndẽqne gen bedak malik." 36 "Laguq maraq saq sampun Tiang sampẽang lẽq side: Timaq side pade sampun serioq Tiang, side pade ndẽq percaye. 37 Selapuq saq Bapa icanin tipaq Tiang gen dateng tipaq Tiang dait sai-sai saq dateng tipaq Tiang ndẽq uwah Tiang tolaq. 38 Sẽngaq Tiang turun lẽman sorge, ndẽq jari ngelaksaneang kemẽlẽq Tiang mẽsaq, laguq pekayunan Ie saq ngutus Tiang. 39 Dait niki pekayunan Ie saq ngutus Tiang: Adẽq selapuq saq sampun Ie icanin tipaq Tiang, ndẽq araq saq telang; laguq adẽq Tiang idupang malik lẽq ahir jaman. 40 Mule maraq niki pekayunan Bapa Tiang: Adẽq selapuq saq serioq Bije dait percaye lẽq Ie, bedowẽ idup sejati dait kekel, dait Tiang idupang malik lẽq ahir jaman." 41 Dengan-dengan Yahudi mulai ngomẽh lẽq Deside Isa, lantaran Ie bemanik: "Tiang ruti saq turun lẽman sorge." 42 Ie pade bebase, "Tekan Ie niki Isa, bije Yusup? Tiang pade kenal inaq amaq-Ne! Berembẽ Ie bau paran diriq-Ne, "Ie turun lẽman sorge?" 43 Beterus Deside Isa bemanik lẽq ie pade, "Ndaq ngomẽh! 44 Ndẽq araq sopoq dengan juaq saq bau dateng ojok Tiang, lamun Bapa saq ngutus Tiang, nẽnten gadingang ie tipaq Tiang; dait sai saq dateng, gen Tiang idupang lẽq ahir jaman. 45 Lẽq dalem Kitab Nabi-nabi tetulis maraq niki: 'Selapuq dengan gen teajah siq Allah.' Jari, selapuq dengan saq dengahang Bapa dait berajah lẽman Ie, dateng ojok Tiang. 46 Nike ndẽqne berarti bahwe araq dengan saq sampun serioq Bapa. Cume Ie saq rauh lẽman Allah, sampun cingakin Bapa. 47 Tiang badaq side: Setetune dengan saq percaye, bedowẽ idup sejati dait kekel. 48 Tiang niki ruti saq ngebẽng idup. 49 Leluhurde kelorang manna lẽq padang gurun dait ie pade ninggal ẽndah. 50 Laguq ndẽqne maraq nike ruti saq turun lẽman sorge; dengan saq ngelorang ruti nike ndẽqne gen ninggal. 51 Tiang niki ruti saq turun lẽman sorge -- ruti saq ngebẽng idup. Dengan saq ngelorang ruti niki gen idup selaẽq-laẽqne. Ruti saq gen Tiang bẽng jari kehidupan manusie lẽq dunie, nike ragen Tiang." 52 Dengahne manik Deside Isa maraq nike, dengan-dengan Yahudi betungkasan sopoq kance lainne, basen ie pade, "Berembẽ Dengan niki ngicanin ite rage-Ne jari tekelorang?" 53 Beterus Deside Isa bemanik lẽq ie pade, "Tiang badaq side: Setetune lamun side pade ndẽq ngelorang rage Bije Manusie dait nginem daraq-Ne, side pade ndẽq bedowẽ idup lẽq dalem diriqde. 54 Dengan saq ngelorang ragen Tiang dait nginem daraq Tiang bedowẽ idup sejati dait kekel, dait Tiang gen idupang ie lẽq ahir jaman. 55 Sẽngaq ragen Tiang tetu-tetu keloran dait daraq Tiang tetu-tetu ineman. 56 Dengan saq ngelorang ragen Tiang dait nginem daraq Tiang, ie araq lẽq dalem Tiang, dait Tiang araq lẽq dalem ie. 57 Pade maraq Bapa saq idup ngutus Tiang, dait Tiang ẽndah idup lẽman Bapa, maraq nike ẽndah halne sai-sai saq kelorang ragen Tiang gen idup lẽman Tiang. 58 Niki ruti saq sampun turun lẽman sorge: Ndẽqne maraq ruti saq tekelorang siq leluhurde. Sẽngaq sesampun ie pade ngelorang ruti nike, ie pade ninggal ẽndah. Laguq dengan saq ngelorang ruti niki gen idup selaẽq-laẽqne." 59 Selapuqne nike temanikang siq Deside Isa sewaktu Ie ngajahang lẽq balẽ ibadah lẽq Kapernaum. 60 Sesampun dengah manik Deside Isa nike, luwẽq lẽq antare pengiring-pengiring-Ne matur, "Perajahan niki keras, sai saq sanggup dengahang perajahan niki?" 61 Deside Isa wikan bahwe pengiring-pengiring-Ne ngerumun mengenai hal nike. Make Ie bemanik, "Napi perajahan nike miaq side bimbang? 62 Berembẽ jarine ẽraq lamun side pade serioq Bije Manusie taẽk gen tulak ojok taoq-Ne semule? 63 Roh saq ngicanin idup, awak manusie tetu-tetu ndẽqne araq manpaatne. Perajahan-perajahan saq Tiang sampẽang lẽq side nike roh dait idup. 64 Laguq lẽq antare side pade araq saq ndẽq percaye." (Deside Isa sampun wikan lẽman penembẽqne sai-sai saq ndẽq mẽlẽ percaye, dait sai saq gen behianat lẽq Ie.) 65 Terus Deside Isa bemanik malik, "Keranaq nike Tiang badaq side bahwe ndẽq araq sopoq dengan juaq bau dateng ojok Tiang, lamun Bapa nẽnten ngicanin ie paice." 66 Mulai waktu nike luwẽq pengiring-Ne ngundurang diriq, dait ndẽq ngiring Ie malik. 67 Beterus Deside Isa beketuan lẽq kedue olas pengiring-Ne, "Napi side pade ẽndah mẽlẽ bilin Tiang?" 68 Simon Petrus matur lẽq Deside Isa, "Junjungan Saq Mulie, sai saq gen tiang pade laiq? Pelungguh doang saq bedowẽ idup sejati dait kekel. 69 Tiang pade sampun percaye dait yakin bahwe Pelungguh Saq Suci lẽman Allah." 70 Jawab Deside Isa, "Tekan Tiang mẽsaq saq pilẽq side pade, saq due olas dengan niki? Laguq salaq sopoq lẽq antare side nike Belis!" 71 Saq temaksut siq Deside Isa nike, Yudas bije Simon Iskariot. Sẽngaq timaq Yudas jari salaq sopoq lẽman kedue olas pengiring-Ne, ie gen behianat lẽq Deside Isa.

John 7

1 Sesampun nike Deside Isa bemargi lẽq selapuq daẽrah Galilea. Ie nẽnten kayun ojok daẽrah Yudea, sẽngaq dengan-dengan Yahudi lẽq derike beniat nyematẽq Ie. 2 Waktu nike sampun rapet Hari Raye Pondok Daun. 3 Sanak-sanak Deside Isa matur lẽq Deside Isa, "Silaq bilin taoq niki, terus lumbar ojok Yudea, adẽq pengiring-pengiring Pelungguh bau serioq karye Pelungguh. 4 Ndẽq araq dengan saq gen seboq napi saq ie piaq, lamun ie mẽlẽ jari kesohor. Lamun Pelungguh ngelaksaneang hal-hal maraq nike, silaq Pelungguh nyatayang diriq tipaq dunie!" ( 5 Sẽngaq sanak-sanak-Ne ẽndah nẽnten percaye lẽq Ie.) 6 Beterus Deside Isa bemanik lẽq ie pade, "Mangkin ndẽqman waktu Tiang, laguq bagi side pade tetep araq waktu. 7 Dunie niki ndẽqne mungkin meriq lẽq side pade. Laguq Tiang mule temeriq siq dunie, sẽngaq Tiang tetep ngebẽng kesaksian mengenai dunie bahwe perbuatan-perbuatanne jahat. 8 Silaq side pade lumbar ojok perayaan nike. Tiang ndẽq gen lalo, sẽngaq mule ndẽqman waktu Tiang." 9 Maraq nike manik Deside Isa lẽq sanak-sanak-Ne, beterus Ie meneng lẽq Galilea. 10 Sesampun sanak-sanak-Ne lumbar ojok perayaan nike, meneng-meneng Deside Isa lumbar ndẽq tetaoq siq dengan. 11 Sengonẽq perayaan nike, penguase-penguase Yahudi boyaq Deside Isa dait beketuan-tuan, "Lẽq mbẽ Ie?" 12 Luwẽq dengan mulai bepẽsẽq-pẽsẽq ngeraosang Deside Isa. Araq saq bebase, "Ie dengan solah." Araq ẽndah saq bebase, "Nẽnten! Ie nyesatang dengan luwẽq." 13 Laguq ndẽq araq sopoq dengan juaq saq bani bebase terang-terangan ngeraosang Ie, sẽngaq ie pade takut lẽq dengan-dengan Yahudi. 14 Lẽq waktu perayaan nike kenyeke telaksaneang, Deside Isa tame ojok Gedẽng Allah, terus mulai ngajahang. 15 Dengan-dengan Yahudi bengaq gati, dait bebase, "Berembẽ dengan niki bedowẽ penenaoq maraq nike, padahal Ie ndẽq uwah berajah?" 16 Deside Isa bemanik, "Saq Tiang ajahang niki, ndẽqne perajahan lẽman Tiang, laguq perajahan lẽman Ie saq ngutus Tiang. 17 Dengan saq mẽlẽ turut pekayunan Allah gen nenaoq napi pengajahan Tiang asalne lẽman Allah atao lẽman Tiang mẽsaq. 18 Dengan saq ngajahang perajahanne mẽsaq boyaq kehormatan jari diriqne mẽsaq. Laguq dengan saq boyaq kehormatan jari Ie saq ngutus ie, dengan nike kenaq, ndẽq araq kesalaqan lẽq ie. 19 Tekan Musa sampun nyampẽang Hukum Taurat tipaq side. Laguq lẽq antare side pade ndẽq araq saq mẽlẽ taat lẽq Hukum Taurat nike. Kembẽq side pade mẽlẽ matẽq Tiang?" 20 Jawab dengan luwẽq nike, "Side siq tekuasein siq sẽtan! Sai saq mẽlẽ matẽq Side?" 21 Jawab Deside Isa, "Cume sopoq muqjizat saq Tiang piaq, dait side pade bengaq. 22 Musa ngicanin side pade aturan besunat -- timaq setetune sunat nike asalne ndẽqne lẽman Musa, laguq lẽman bapaq-bapaq leluhur sendẽqman Musa -- dait side pade sunat dengan lẽq jelo Sabat. 23 Lamun hal nike side pade laksaneang adẽq ndẽq teparan ngelanggar aturan Musa mengenai sunat, kembẽq side pade gedek lẽq Tiang lantaran nyelahang selapuq awak sopoq dengan lẽq jelo Sabat? 24 Ndaq hakimin dengan siq napi saq penggitan, laguq pade hakimin secare adil." 25 Beterus pire dengan penduduk kote Yerusalem bebase, "Tekan Ie niki saq teboyaq-boyaq gen tematẽq? 26 Pade serioq, Ie bẽbas bebaos lẽq julun dengan luwẽq, dait ndẽq araq saq bebase napi-napi lẽq Ie! Sang penguase-penguasente sampun sadar bahwe Ie niki Almasih? 27 Laguq lamun Almasih nike rauh, ndẽq araq sopoq dengan juaq saq nenaoq lẽman mbẽ asal-Ne. Padahal ite nenaoq lẽman mbẽ asal-Ne." 28 Waktu Deside Isa kenyeke ngajahang lẽq dalem Gedẽng Allah, Ie bemanik siq suare saq belẽq, "Mule side pade nenaoq sai Tiang niki dait lẽman mbẽ asal Tiang. Tiang dateng ndẽqne siq kemẽlẽq Tiang mẽsaq. Tiang teutus siq Ie saq kenaq saq ndẽq side pade kenal. 29 Tiang kenal kance Ie sẽngaq Tiang asalne lẽman Ie, dait Ie saq ngutus Tiang." 30 Lẽq waktu nike ie pade berusahe bau Deside Isa, laguq ndẽq araq saq bani negel Ie, sẽngaq ndẽqman waktune. 31 Luwẽq lẽq antare dengan-dengan nike mulai percaye lẽq Deside Isa, dait bebase, "Lamun Almasih nike rauh, napi Ie bau ngelaksaneang luwẽqan keajaipan ketimbang Dengan niki?" 32 Dengan-dengan Parisi dengah berembẽ dengan luwẽq nike bepẽsẽq-pẽsẽq raosang Deside Isa. Keranaq nike bareng-bareng kance imam-imam kepale, ie pade ngutus pire pengawal Gedẽng Allah lumbar bau Deside Isa. 33 Deside Isa bemanik, "Cume karing seberaq doang Tiang masih bareng kance side pade. Sesampun nike Tiang gen tulak ojok Ie saq ngutus Tiang. 34 Side pade gen boyaq Tiang, laguq ndẽq ndait Tiang; sẽngaq side pade ndẽq bau dateng ojok taoq lẽq mbẽ Tiang araq." 35 Beterus dengan-dengan Yahudi nike bebase sopoq kance saq lainne, "Dengan niki gen lumbar ojok mbẽ, sehingge ite ndẽq gen bau ndait Ie? Napi Ie gen lumbar ojok dengan-dengan Yahudi saq ndot lẽq perantoan lẽq antare dengan Yunani, dait ngajahang dengan Yunani? 36 Napi maksut-Ne bebaos bahwe ite gen boyaq Ie laguq ite ndẽq bau bedait kance Ie dait ite ndẽq bau dateng lẽq mbẽ taoq-Ne araq?" 37 Lẽq jelo penutuq perayaan nike, jelo saq paling penting, Deside Isa ngadeg beterus bemanik siq suare saq belẽq, "Dengan saq bedak, harus dateng ojok Tiang dait nginem! 38 Sai-sai saq percaye lẽq Tiang, maraq tetulis lẽq dalem Kitab Suci: 'Lẽman dalem atẽne gen ngẽlẽk ẽlẽkan-ẽlẽkan aiq idup.' " ( 39 Deside Isa bemanik mengenai Roh Allah, saq gen teterimaq siq dengan-dengan saq percaye lẽq Ie. Sẽngaq waktu nike Roh Allah ndẽqman teicanin; sẽngaq Deside Isa ndẽqman temulieang.) 40 Luwẽq dengan dengahang napi saq tebaosang siq Deside Isa, dait lẽq antare ie pade araq saq bebase, "Dengan niki pasti Nabi saq gen rauh!" 41 Saq lain bebase, "Ie niki Almasih!" Laguq araq ẽndah saq bebase, "Nẽnten, Almasih nẽnten rauh lẽman Galilea! 42 Dalem Kitab Suci tetulis bahwe Almasih nike keturunan Daud dait gen rauh lẽman Betlehem, dẽse asalne Daud." 43 Ahirne dengan-dengan mulai betungkasan mengenai Deside Isa. 44 Araq saq mẽlẽ bau Ie, laguq ndẽq sopoq dengan juaq saq bani negel Ie. 45 Sewaktu pengawal-pengawal Gedẽng Allah saq teutus jari bau Deside Isa tulak malik, imam-imam kepale dait dengan-dengan Parisi beketuan lẽq ie pade, "Kembẽq side ndẽq jauq Ie ojok deriki?" 46 Jawab pengawal-pengawal nike, "Ndẽq uwah araq dengan saq bebaos maraq Ie!" 47 "Napi side pade ẽndah tesesatang siq Ie?" basen dengan-dengan Parisi nike. 48 "Napi araq penguase-penguasente atao dengan Parisi saq percaye lẽq Ie? 49 Laguq dengan luwẽq niki, ie pade ndẽq ngerti Hukum Taurat, ie pade sampun tekutuk." 50 Salaq sopoq lẽq antare dengan Parisi nike, aranne Nikodemus saq sampun parek ojok Deside Isa. Nikodemus bebase tipaq dengan-dengan Parisi saq lain, 51 "Menurut Hukum Taurat, sopoq dengan ndẽq kanggo tehukum sendẽqman pelekarene tedengah dait perbuatanne teperiksaq." 52 Jawab ie pade, "Napi side ẽndah lẽman Galilea? Silaq periksaq Kitab Suci dait side gen nenaoq bahwe ndẽq araq nabi saq rauh lẽman Galilea!" 53 Sesampun nike selapuq dengan ulẽq ojok balẽne.

John 8

1 Laguq Deside Isa lumbar ojok Bukit Zaitun. 2 Jemaq kelẽmaqne Deside Isa lumbar malik ojok Gedẽng Allah, dait luwẽq dengan parek tipaq Ie. Deside Isa melinggih dait ngajah ie pade. 3 Waktu nike ahli-ahli Taurat dait dengan-dengan Parisi parek tipaq Deside Isa jauq sopoq dengan nine saq kendaitan bezinah. Ie pade suruq dengan nine nike nganjeng lẽq tengaq-tengaq, 4 beterus matur lẽq Deside Isa, "Bapaq Guru, dengan nine niki kendaitan kenyeke bezinah. 5 Lẽq dalem Hukum Taurat araq aturan bahwe dengan nine maraq nike harus tepelẽwas siq batu jangke matẽ. Mangkin berembẽ pendapet Pelungguh?" 6 Ie pade metakẽn maraq nike jari boyaq kesalaqan Deside Isa, adẽqne bau nyalahang Ie. Laguq Deside Isa nunduk doang dait nulis lẽq tanaq siq nyari-Ne. 7 Sewaktu ie pade terus matur, Deside Isa ngangkat sirah-Ne dait bemanik lẽq ie pade, "Dengan saq ndẽq bedowẽ dose lẽq antare side pade, alurang ie saq penembẽq melẽwasang batu tipaq dengan nine nike." 8 Sesampun nike Deside Isa nunduk malik dait nulis malik lẽq tanaq. 9 Sesampun ie pade dengah manik Deside Isa nike, ie pade lumbar bilin taoq nike, sopoq-sopoq mulai lẽman saq paling toaq. Ahirne karing Deside Isa kance dengan nine nike doang saq masih tetep nganjeng lẽq derike. 10 Beterus Deside Isa ngadeg dait bemanik tipaq ie, "Inaq, lẽq mbẽ ie pade? Ndẽq araq saq mẽlẽ hukum side?" 11 "Ndẽq araq Junjungan Saq Mulie," jawabne. Terus manik Deside Isa, "Tiang ẽndah ndẽq gen hukum side. Mangkin silaq side lumbar! Ndaq piaq dose malik." 12 Deside Isa bemanik malik lẽq dengan luwẽq, manik-Ne, "Tiang niki terang dunie; sai-sai saq turut Tiang, ie ndẽq gen lampaq lẽq dalem peteng, laguq ie gen bedowẽ cahaye kehidupan." 13 Dengan-dengan Parisi matur tipaq Deside Isa, "Mangkin Pelungguh icanin kesaksian mengenai diriq Pelungguh mẽsaq. Kesaksian Pelungguh nike nẽnten kenaq." 14 Jawab Deside Isa, "Timaq Tiang nyampẽang kesaksian mengenai diriq Tiang, kesaksian Tiang nike kenaq; sẽngaq Tiang nenaoq lẽman mbẽ Tiang dateng, dait ojok mbẽ lain Tiang. Side pade ndẽq nenaoq lẽman mbẽ Tiang dateng, dait ojok mbẽ lain Tiang. 15 Side pade hakimin dengan kadu care manusie; Tiang ndẽq hakimin sopoq dengan juaq. 16 Laguq lamun Tiang hakimin dengan, keputusan Tiang nike adil, sẽngaq Tiang ndẽq mẽsaq-mẽsaq; Bapa saq ngutus Tiang araq bareng Tiang. 17 Lẽq dalem Hukum Taurat tetulis maraq niki: Kesaksian saq kenaq nike kesaksian lẽman due dengan. 18 Saq nyampẽang kesaksian mengenai Tiang, araq due -- Tiang, dait Bapa, saq ngutus Tiang." 19 "Bapa Pelungguh nike lẽq mbẽ?" basen ie pade. Jawab Deside Isa, "Side pade ndẽq kenal kance Tiang dait Bapa Tiang. Seandẽne side pade kenal kance Tiang, pasti side pade kenal kance Bapa Tiang ẽndah." 20 Selapuq nike temanikang siq Deside Isa sewaktu Ie ngajahang lẽq Gedẽng Allah lẽq dẽkẽt kotaq-kotaq kẽpẽng persembahan. Laguq ndẽq araq sopoq dengan juaq saq bau Deside Isa, sẽngaq mule ndẽqman waktune. 21 Deside Isa bemanik malik tipaq ie pade, "Tiang gen lalo, dait side pade gen boyaq Tiang, laguq side pade gen matẽ dalem dosende. Ojok taoq saq Tiang laiq nike side pade ndẽq gen bau dateng." 22 Beterus dengan-dengan Yahudi nike bebase, "Sang Ie gen matẽq diriq, sẽngaq Ie bemanik, 'Ojok mbẽ lain Tiang, side pade ndẽq bau dateng.' " 23 Beterus Deside Isa bemanik tipaq ie pade, "Side pade dateng lẽman bawaq; laguq Tiang dateng lẽman atas. Side pade lẽman dunie; Tiang ndẽq lẽman dunie. 24 Keranaq nike Tiang badaq side pade, bahwe side pade gen matẽ dalem dose-dosende. Dait mule side pade gen matẽ dalem dose-dosende, lamun ndẽq percaye bahwe 'Tiang niki Ie'." 25 Ie pade metakẽn, "Sai Pelungguh setetune?" Jawab Deside Isa, "Napi manpaatne ngeraos malik kance side pade? 26 Masih luwẽq hal mengenai side pade saq gen Tiang sampẽang dait Tiang hakimin. Laguq Ie saq ngutus Tiang bau tepercaye. Dait Tiang nyampẽang ojok dunie napi saq Tiang dengah lẽman Ie." 27 Ie pade ndẽq ngerti bahwe Ie kenyeke bebaos lẽq ie pade mengenai Bapa. 28 Keranaq nike Deside Isa bemanik malik tipaq ie pade, "~Eraq lamun side pade sampun agungang Bije Manusie, side pade gen nenaoq bahwe 'Tiang niki Ie', dait side pade ẽndah gen nenaoq bahwe ndẽq araq sopoq juaq saq Tiang laksaneang lẽman diriq Tiang mẽsaq. Tiang cume nyampẽang napi saq temanikang siq Bapa lẽq Tiang. 29 Dait Ie saq ngutus Tiang araq bareng Tiang. Ie nẽnten menengang Tiang mẽsaq-mẽsaq, sẽngaq Tiang tetep ngelaksaneang napi saq nyenengang Ie." 30 Sesampun Deside Isa jelasang hal nike, luwẽq dengan percaye lẽq Ie. 31 Beterus Deside Isa bemanik lẽq dengan-dengan Yahudi saq sampun percaye lẽq Ie, "Lamun side pade tetep idup menurut manik Tiang, side pade tetu-tetu jari pengiring Tiang, 32 make side pade gen nenaoq kebenaran, dait kebenaran nike gen bẽbasang side pade." 33 Ie pade matur lẽq Deside Isa, "Tiang pade niki keturunan Ibrahim, ndẽq uwah tiang jari hambe sai-sai! Napi maksut Pelungguh bemanik, 'Side pade gen tebẽbasang'?" 34 Manik Deside Isa, "Tiang badaq side: Setetune dengan saq gawẽq dose, ie jari hambe dose. 35 Dait hambe nike ndẽq bedowẽ taoq saq tetep lẽq dalem keluarge, laguq bije bedowẽ taoq selaẽq-laẽqne lẽq dalem keluarge. 36 Keranaq nike lamun Bije bẽbasang side pade, make side gen tetu-tetu bẽbas. 37 Mule Tiang nenaoq bahwe side pade keturunan Ibrahim. Laguq side pade mẽlẽ nyematẽq Tiang, sẽngaq side pade ndẽq mẽlẽ nerimaq manik Tiang. 38 Napi saq Tiang serioq lẽq Bapa Tiang, nike saq Tiang sampẽang. Laguq side pade miaq napi saq teajahang siq bapaqde lẽq side pade." 39 Jawab ie pade, "Bapaq tiang pade Ibrahim." Jawab Deside Isa, "Lamun mule side pade tetu-tetu bije Ibrahim, pasti side pade ngelaksaneang napi saq telaksaneang siq Ibrahim. 40 Tiang nyampẽang lẽq side pade kebenaran saq Tiang dengah lẽman Allah, laguq side pade mẽlẽ nyematẽq Tiang. Pegawẽan saq maraq nike ndẽqne tegawẽq siq Ibrahim! 41 Side pade laksaneang napi saq telaksaneang siq bapaqde mẽsaq." Jawab ie pade, "Tiang pade ndẽq anak-anak haram. Bapa tiang pade cume sopoq, nike Allah." 42 Beterus manik Deside Isa lẽq ie pade, "Seandẽne Allah nike jari Bapa side pade make side pade pasti gen ngasihin Tiang, sẽngaq Tiang dateng lẽman Allah. Tiang ndẽq dateng siq kemẽlẽq Tiang mẽsaq, laguq Ie saq ngutus Tiang. 43 Kembẽq side pade ndẽq ngerti napi saq Tiang sampẽang? Sẽngaq side pade ndẽq tahen dengahang manik Tiang. 44 Belis nike saq jari bapaqde, dait side pade mẽlẽ turut kemẽlẽq bapaqde. Lẽman penembẽqne Belis nike tukang nyematẽq. Ie ndẽq uwah bẽle kebenaran, sẽngaq ndẽq araq kebenaran lẽq dalem diriqne. Lamun ie beduste nike hal saq biase, sẽngaq mule nike sipatne. Ie mule penduste dait sumber segale macem duste. 45 Laguq Tiang nyampẽang kebenaran, dait nike lantaranne side pade ndẽq percaye lẽq Tiang. 46 Sai lẽq antare side selapuq saq bau buktiang bahwe Tiang bedose? Lamun Tiang nyampẽang kebenaran, kembẽq side ndẽq percaye lẽq Tiang? 47 Dengan saq asalne lẽman Allah, dengah Manik Allah. Side ndẽq dengah sẽngaq asalde ndẽq lẽman Allah." 48 Jawab dengan-dengan Yahudi nike lẽq Deside Isa, "Tekan kenaq atur tiang pade bahwe Pelungguh dengan Samaria saq tekuasein siq sẽtan?" 49 Jawab Deside Isa, "Tiang ndẽq tekuasein siq sẽtan. Tiang hormatin Bapa Tiang, laguq side pade hine Tiang. 50 Tiang ndẽq boyaq kehormatan jari diriq Tiang mẽsaq. Araq sopoq saq ngusaheang kehormatan Tiang, dait Ie saq gen hakimin manusie. 51 Setetune kenaq manik Tiang niki, dengan saq turut manik Tiang, ie ndẽq gen ngalamin maut selaẽq-laẽqne." 52 Beterus dengan-dengan Yahudi nike matur lẽq Deside Isa, "Mangkin tiang pade nenaoq bahwe Pelungguh mule tetu-tetu tekuasein siq sẽtan! Ibrahim mẽsaq sampun ninggal, maraq nike ẽndah selapuq nabi, laguq Pelungguh bemanik bahwe, 'Selapuq dengan saq turut manik Pelungguh ndẽq gen ngalamin maut selaẽq-laẽqne.' 53 Lamun Ibrahim mẽsaq sampun ninggal, dait nabi-nabi ẽndah selapuqne sampun ninggal, Pelungguh niki sai? Segerah Pelungguh belẽqan lẽman bapaq tiang pade Ibrahim!" 54 Jawab Deside Isa, "Lamun Tiang boyaq kehormatan jari diriq Tiang mẽsaq, kehormatan nike ndẽq araq artine. Bapa Tiang saq mulieang Tiang. Side pade bebase bahwe Ie nike Allah side, 55 padahal side pade ndẽq kenal kance Ie, laguq Tiang kenal kance Ie. Dait lamun Tiang badaq bahwe Tiang ndẽq kenal kance Ie, make Tiang penduste, pade maraq side pade. Laguq Tiang kenal kance Ie dait Tiang taat lẽq manik-Ne. 56 Ibrahim, bapaqde tetu-tetu seneng gati bahwe ie sampun serioq jelo Tiang. Ie sampun serioq, dait ie besukecite!" 57 Beterus dengan-dengan Yahudi matur lẽq Deside Isa, "Umur Pelungguh ndẽqman araq sẽket taun, laguq Pelungguh sampun serioq Ibrahim?" 58 Jawab Deside Isa, "Tiang badaq side, bahwe setetune sendẽqman Ibrahim tebijeang, Tiang sampun araq." 59 Beterus dengan-dengan Yahudi nike bait batu gen melẽwas Ie; laguq Deside Isa nyeboq, beterus Ie lumbar bilin Gedẽng Allah.

John 9

1 Sewaktu Deside Isa bemargi, Ie cingakin dengan bute lẽman tebijeang. 2 Pengiring-pengiring Deside Isa metakẽn lẽq Deside Isa, "Bapaq Guru, kembẽq dengan niki tebijeang bute? Napi lantaran ie mẽsaq bedose atao lantaran inaq amaqne bedose?" 3 Jawab Deside Isa, "Ie bute ndẽq lantaran dosene mẽsaq atao dengan toaqne, laguq adẽq dengan bau serioq kuase Allah bekarye dalem diriqne. 4 Kedung masih tengari, ite harus ngelaksaneang karye Allah saq ngutus Tiang. Kelem gen dateng, dait ndẽq araq sopoq dengan juaq saq bau begawẽan. 5 Semasih Tiang lẽq dunie niki, Tiang niki cahaye dunie." 6 Sesampun bemanik maraq nike Deside Isa beludah ojok tanaq, dait ngaduk ludah-Ne nike kance tanaq. Beterus Ie ngolẽsang lẽq penenteng dengan nike, 7 beterus bemanik lẽq ie, "Silaq lumbar persiq muende lẽq Telage Siloam." (Siloam artine 'Saq Teutus'.) Make dengan nike lumbar persiq muene. Sewaktu ie tulak, ie sampun tao nyerioq. 8 Tetangge-tetanggene dait dengan-dengan saq sendẽqmanne serioq ie mekir, selapuqne bebase, "Ndẽq napi dengan niki saq biase tokol mekir?" 9 Araq saq bebase, "Mule ie." Laguq araq ẽndah saq bebase, "Ndẽqne ie, ie cume berambis ruene maraq dengan nike." Laguq dengan nike mẽsaq bebase, "Tiang uwah dengan bute nike." 10 "Berembẽ ceritene jangke side tao nyerioq?" basen ie pade lẽq dengan nike. 11 Jawabne, "Dengan saq bepesẽngan Deside Isa nike saq miaq reraok, terus ngolẽsang lẽq maten tiang dait bemanik, 'Silaq lumbar persiq muende lẽq Telage Siloam.' Beterus tiang lalo. Dait sewaktu tiang persiq muen tiang, tiang tao nyerioq." 12 Ie pade beketuan, "Lẽq mbẽ dengan nike?" Terus ie bejawab, "Mindah tiang." 13 Jelo nike jelo Sabat waktu Deside Isa ngaduk tanaq siq ludah-Ne jari miaq dengan bute nike tao nyerioq. Make dengan saq sendẽqmanne bute nike tejauq ojok dengan-dengan Parisi. 15 Ie pade ẽndah beketuan lẽq dengan nike berembẽ ie tao nyerioq. Jawab dengan nike, "Ie ngolẽsang reraok lẽq maten tiang, beterus tiang persiq dait tiang tao nyerioq." 16 Pire dengan lẽq antare dengan-dengan Parisi nike bebase, "Ndẽqne mungkin dengan saq ngelaksaneang niki asalne lẽman Allah, sẽngaq Ie ndẽq hormatin jelo Sabat." Laguq dengan lain bebase, "Ndẽqne mungkin dengan bedose miaq keajaipan-keajaipan maraq niki?" Beterus araq bẽde pendapet antare ie pade. 17 Make dengan-dengan Parisi nike beketuan malik lẽq dengan nike, "Napi pendapet side lẽq Ie saq miaq side jangke tao nyerioq?" "Ie nabi," jawab dengan nike. 18 Laguq pare pemimpin Yahudi nike ndẽq mẽlẽ percaye bahwe dengan nike mule bute sendẽqmanne dait mangkin tao nyerioq. Keranaq nike ie pade ngempoh dengan toaqne, 19 dait beketuan, "Napi tetu ie anak side, saq side paran teanakang bute? Berembẽ ie tao nyerioq mangkin?" 20 Jawab inaq amaq dengan nike, "Mule ie niki anak tiang pade; dait mule ie bute lẽman teanakang. 21 Laguq berembẽ ie tao nyerioq mangkin, mindah tiang. Dait sai saq miaq ie tao nyerioq, nike ẽndah mindah tiang. Ketuanang doang lẽq ie, ie sampun belẽq; ie tao jawab mẽsaq." 22 Inaq amaq dengan nike bebase maraq nike sẽngaq ie pade takut lẽq dengan-dengan Yahudi; sẽngaq ie pade sampun sepakat, bahwe dengan saq ngakuq Deside Isa nike Almasih, ndẽqne kanggo malik tame balẽ ibadah. 23 Keranaq nike inaq amaq dengan nike bebase, "Ie sampun belẽq; ketuan doang lẽq ie." 24 Beterus ie pade ngempoh malik dengan saq sendẽqmanne bute nike, dait bebase lẽq ie, "Sampẽang saq kenaq lẽq arepan Allah! Tiang pade nenaoq dengan nike dengan bedose." 25 Jawab dengan nike, "Napi Ie bedose atao ndẽq, mindah tiang. Laguq sopoq hal saq tiang taoq; laẽq tiang bute, mangkin tiang nyerioq." 26 Beterus ie pade bebase malik lẽq dengan nike, "Ie kumbẽqang side? Berembẽ entane Ie piaq side tao nyerioq." 27 Jawab dengan nike, "Sampun tiang ceriteang lẽq pelungguh, laguq pelungguh sami nẽnten kayun pirengang. Kembẽq pelungguh sami kayun pirengang malik? Sang pelungguh sami kayun jari pengiring-pengiring-Ne ẽndah?" 28 Beterus ie pade sumpaq ie dait bebase, "Side pengiring-Ne; tiang pade ndẽq! Tiang pade pengiring Musa. 29 Tiang pade nenaoq bahwe Allah sampun bemanik lẽq Musa. Laguq mengenai dengan nike, tiang pade ndẽq nenaoq lẽman mbẽ asal-Ne." 30 Jawab dengan nike, "Segerah pelungguh sami nẽnten wikan lẽman mbẽ asal-Ne, padahal Ie sampun miaq tiang tao nyerioq. 31 Ite nenaoq bahwe Allah nẽnten gen mirengang dengan bedose, laguq dengan saq solẽh dait ngelaksaneang pekayunan-Ne. 32 Lẽman penembẽq dunie niki araq, ndẽq uwah tedengah bahwe araq dengan miaq dengan saq teanakang bute tao nyerioq. 33 Lamun dengan nike nẽnten lẽman Allah, Ie nẽnten gen bau ngelaksaneang napi-napi." 34 Jawab ie pade, "Napi? Side saq penoq dose lẽman teanakang, side mẽlẽ ngajah tiang pade?" Make mulai waktu nike ie tebalaq tame ojok balẽ ibadah. 35 Deside Isa pireng bahwe ie pade sampun sediq dengan nike lẽman balẽ ibadah. Deside Isa boyaq dengan nike beterus bemanik lẽq ie, "Napi side percaye lẽq Bije Manusie?" 36 Jawab dengan nike, "Sai Ie, Junjungan Saq Mulie? Tunas manikang adẽq tiang percaye lẽq Ie." 37 "Side sampun serioq Ie," jawab Deside Isa. "Ie saq mangkin niki kenyeke bebaos kance side." 38 "Tiang percaye, Junjungan Saq Mulie," basen dengan nike, beterus sujut lẽq arepan Deside Isa. 39 Manik Deside Isa, "Tiang dateng ojok dunie niki jari ngakimin; adẽq dengan saq bute tao nyerioq, dait dengan saq tao nyerioq, jari bute." 40 Pire dengan Parisi saq araq lẽq derike dengah Deside Isa bemanik maraq nike, beterus ie pade metakẽn lẽq Ie, "Maksut Pelungguh tiang pade ẽndah bute?" 41 Jawab Deside Isa, "Seandẽne side pade bute, side pade ndẽq bedose. Laguq lantaran side pade bebase, 'Tiang pade nyerioq,' nike artine side pade masih bedose."

John 10

1 "Tiang badaq side: Setetune dengan saq tame ojok baren dombe liwat lambah, dait ndẽq liwat lawang, dengan nike maling dait perampok. 2 Laguq dengan saq tame liwat lawang, ie pengarat dombe nike. 3 Penjage bare bukaqang ie lawang, dait dombe-dombe turut suarene sewaktu ie ngempoh aranne sopoq-sopoq, dait ie pade tedẽndẽn ojok luah. 4 Sesampun dombe-dombe nike tejauq ojok luah, pengarat nike lampaq lẽq julu, dait dombe-dombe nike turut ie sẽngaq ie pade tandaq suarene. 5 Dombe-dombe nike ndẽqne mẽlẽ turut dengan lain, malahan gen pelai lẽman dengan nike, sẽngaq ndẽqne tandaq suarene." 6 Deside Isa nyeriteang perumpamean nike, laguq ie pade ndẽq ngerti napi maksut-Ne. 7 Beterus Deside Isa bemanik karing sekali, "Tiang badaq side setetune Tiang niki lawang umaq dombe nike. 8 Selapuq saq dateng sendẽqman Tiang, nike maling dait perampok, dait dombe-dombe ndẽq mẽlẽ dengahang suare ie pade. 9 Tiang niki lawang. Sai-sai tame langan Tiang gen selamet; ie sugul tame dait mauq keloran. 10 Maling dateng cume jari memaling, nyematẽq dait jari nyenyẽdaq. Laguq Tiang dateng adẽq manusie mauq idup -- idup belimpah-limpah. 11 Tiang niki pengarat saq solah. Pengarat saq solah nyerahang nyawene umaq dombe-dombene. 12 Dengan saq teupaq dait saq ndẽq pengarat dait ndẽqne ẽndah ẽpẽn dowẽ dombe-dombe nike, gen pelai bilin dombe-dombe lamun ie serioq serigale dateng. Make dombe-dombe nike gen tecakrah dait tepiaq buyar siq serigale nike. 13 Dengan saq teupaq nike pelai, sẽngaq ie begawẽan jari boyaq upaq. Ie ndẽq ngerunguq dombe-dombe nike. 14 Tiang niki pengarat saq solah. Pade maraq Bapa kenal kance Tiang dait Tiang kenal kance Bapa, maraq nike ẽndah Tiang kenal dombe-dombe Tiang dait ie pade ẽndah kenal Tiang. Tiang nyerahang nyawe Tiang umaq ie pade. 16 Masih araq dombe-dombe lain saq jari dowẽn Tiang ẽndah, laguq ndẽq tame itungan dombe-dombe saq luwẽq niki. Ie pade ẽndah harus Tiang jauq dait ie pade gen dengahang suare Tiang. Ie pade selapuq gen jari sopoq kumpulan siq sopoq pengarat. 17 Bapa ngasihin Tiang lantaran Tiang nyerahang nyawe Tiang jari bait ie malik. 18 Ndẽq araq sopoq dengan juaq saq bau bait ie lẽman Tiang. Tiang nyerahang ie siq kemẽlẽq Tiang mẽsaq. Tiang bekuase nyerahang ie, dait bekuase bait ie malik. Nike tugas saq Tiang terimaq lẽman Bapa Tiang." 19 Lantaran Deside Isa bemanik maraq nike, dengan-dengan Yahudi mulai betungkasan. 20 Luwẽq saq bebase, "Ie tekuasein siq sẽtan! Ie jogang! Kembẽq side pade dengah Ie?" 21 Laguq araq ẽndah saq bebase, "Dengan saq tekuasein siq sẽtan ndẽq ngeraos maraq nike! Napi bau sẽtan piaq dengan bute tao nyerioq?" 22 Lẽq Yerusalem dengan-dengan kenyeke ngerayeang Hari Raye Peresmian Gedẽng Allah. Waktu nike musim telih. 23 Deside Isa kenyeke bemargi lẽq Sesangkok Sulaiman lẽq dalem Gedẽng Allah, 24 sewaktu dengan-dengan Yahudi dateng bekumpul lẽq sekelining Deside Isa. Ie pade matur, "Jangke piran Pelungguh alurang tiang pade bimbang? Manikang secare terus terang, lamun Pelungguh tetu-tetu Almasih." 25 Jawab Deside Isa, "Sampun Tiang badaq side, laguq side pade ndẽq percaye. Karye-karye saq Tiang laksaneang dalem pesẽngan Bapa Tiang, nike ngebẽng bukti mengenai Tiang. 26 Side pade ndẽq percaye sẽngaq side pade ndẽq tame itungan dombe-dombe Tiang. 27 Dombe-dombe Tiang dengahang suare Tiang. Tiang kenal ie pade, dait ie pade turut Tiang. 28 Tiang ngebẽng idup sejati dait kekel tipaq ie pade dait ie pade pasti ndẽq gen binase selaẽq-laẽqne. Ndẽq araq sopoq dengan juaq saq bau ngerampas ie pade lẽman imen Tiang. 29 Bapa Tiang, saq sampun ngicanin ie pade lẽq Tiang, belẽqan lẽman selapuqne. Dait ndẽq sopoq dengan juaq bau ngerampas ie pade lẽman Bapa. 30 Tiang dait Bapa sopoq." 31 Beterus dengan-dengan Yahudi bait malik batu jari melẽwas Deside Isa. 32 Laguq manik Deside Isa lẽq ie pade, "Side pade sampun serioq Tiang ngelaksaneang luwẽq karye saq solah, saq tetugasang siq Bapa lẽq Tiang. Saq mbẽ lẽq antare karye nike saq jari penyebap side pade mẽlẽ melẽwas Tiang?" 33 Jawab dengan-dengan Yahudi nike, "Nẽnten lantaran karye-karye Pelungguh saq solah nike tiang pade mẽlẽ melẽwas Pelungguh kadu batu, laguq lantaran Pelungguh menghine Allah. Pelungguh manusie biase, laguq padeang diriq kance Allah?" 34 Beterus jawab Deside Isa, "Tekan araq tetulis lẽq dalem Kitab Suci Taurat, Allah bemanik, 'Side pade dẽwe'? 35 Jari, lamun ie pade tesebut dẽwe lantaran Manik Allah tesampẽang tipaq ie pade -- padahal Kitab Suci ndẽqne bau tebatalang --, 36 napi masih side pade bebase tipaq Ie saq tesuciang dait teutus ojok dunie siq Bapa: Side menghine Allah! Sẽngaq Tiang sampun bemanik, "Tiang Bije saq asalne lẽman Allah? 37 Lamun Tiang ndẽq ngelaksaneang karye-karye Bapa Tiang, ndaq percaye lẽq Tiang. 38 Laguq lantaran Tiang ngelaksaneang hal nike, pade percaye lẽq napi saq Tiang laksaneang nike, timaq side pade ndẽq mẽlẽ percaye lẽq Tiang. Adẽq side pade nenaoq dait ngerti bahwe Bapa lẽq dalem Tiang, dait Tiang lẽq dalem Bapa." 39 Ie pade berusahe malik bau Deside Isa, laguq Deside Isa luput lẽman ie pade. 40 Deside Isa tulak ojok itoqan Kokoq Yordan, lẽq taoq Yahya laẽq baptis dengan, terus meneng lẽq derike. 41 Luwẽq dengan parek ojok Deside Isa. Ie pade matur, "Yahya nẽnten ngelaksaneang keajaipan-keajaipan, laguq selapuq saq ie sampẽang mengenai dengan niki mule kenaq." 42 Beterus luwẽq dengan lẽq derike percaye lẽq Deside Isa.

John 11

1 Araq sopoq dengan aranne Lazarus ndot lẽq Betania bareng-bareng kance semetonne Mariam dait Marta. 2 Mariam nike dengan nine saq nolẽngang minyak sengẽh lẽq cokor Junjungan Saq Mulie, dait osokne siq bulune. Lẽq sopoq waktu Lazarus sakit. 3 Deduaq semetonne suruq dengan nyampẽang kabar niki tipaq Deside Isa, "Junjungan Saq Mulie, dengan saq Pelungguh kasihin nike kenyeke sakit." 4 Sewaktu Deside Isa pireng kabar nike, Ie bemanik, "Penyakit niki ndẽq gen miaq ie ninggal. Niki telaksane adẽq Allah temulieang dait siq care nike Bije saq asalne lẽman Allah ẽndah temulieang." 5 Deside Isa ngasihin Marta, Mariam dait Lazarus. 6 Laguq waktu Deside Isa mauq berite bahwe Lazarus sakit, Ie sediah mererepan lẽq taoqne due jelo malik. 7 Sesampun nike baruq Deside Isa bemanik lẽq pengiring-pengiring-Ne, "Silaq ite tulak ojok Yudea." 8 Jawab ie pade, "Bapaq Guru, baruq gati dengan-dengan Yahudi mẽlẽ melẽwas Pelungguh kadu batu dait mangkin Pelungguh kayun tulak ojok derike?" 9 Manik Deside Isa, "Tekan kenjelo ngonẽqne due olas jam? Dengan saq lampaq lẽq waktu kenjelo, ndẽq gen kedantuk sẽngaq ie serioq cahaye dunie niki. 10 Laguq dengan saq lampaq lẽq kekelem kedantuk, sẽngaq ndẽq araq cahaye lẽq ie." 11 Maraq nike manik Deside Isa. Beterus Ie bemanik malik, "Sahabatte Lazarus tindoq, laguq Tiang gen lalo nguresang ie." 12 Pengiring-pengiring Deside Isa matur, "Junjungan Saq Mulie, lamun Lazarus tindoq, laun ie gen selah." 13 Maksut Deside Isa nike bahwe Lazarus sampun ninggal. Laguq ie pade paran Deside Isa bemanik bahwe Lazarus tindoq biase. 14 Keranaq nike Deside Isa bemanik secare terus-terang tipaq ie pade, "Lazarus sampun ninggal. 15 Laguq Tiang seneng ẽndah sẽngaq Tiang ndẽq araq lẽq derike, sẽngaq solahan umaq side pade adẽq side pade iniq percaye. Mangkin silaq ite lumbar ojok Lazarus." 16 Tomas saq tesebut, "Didimus" bebase lẽq batur-baturne saq pade-pade pengiring Deside Isa, "Silaq ite milu, alur ite ninggal bareng Ie." 17 Sewaktu Deside Isa rauh lẽq taoq nike, Lazarus sampun empat jelo ngonẽqne tekubur. 18 Betania nike rapet lẽman Yerusalem, kire-kire telu kilomẽter jaoqne. 19 Luwẽq dengan Yahudi dateng ojok Marta dait Mariam jari hibur angen ie pade sẽngaq semetonne ninggal. 20 Sewaktu Marta dengah bahwe Deside Isa rauh, ie sugul jari nyambut Deside Isa, laguq Mariam ndot lẽq balẽ. 21 Marta matur lẽq Deside Isa, "Junjungan Saq Mulie, lamun waktu nike Pelungguh araq lẽq deriki, pasti semeton tiang ndẽq milinang. 22 Timaq maraq nike tiang nenaoq bahwe mangkin niki ẽndah Allah gen ngicanin napi juaq saq Pelungguh tunas lẽq Ie." 23 Manik Deside Isa tipaq Marta, "Semetonde gen idup malik." 24 Jawab Marta, "Tiang nenaoq Lazarus gen idup malik lamun dengan ninggal teidupang lẽq ahir jaman." 25 "Tiang saq ngebẽng idup dait ngidupang dengan ninggal." Manik Deside Isa tipaq Marta, "Dengan saq percaye lẽq Tiang gen idup, timaq ie sampun ninggal. 26 Dait dengan idup saq percaye lẽq Tiang, ndẽq gen binase selaẽq-laẽqne. Napi side percaye lẽq hal nike?" 27 Jawab Marta, "Junjungan Saq Mulie, tiang percaye Pelungguh niki Almasih, Bije saq asalne lẽman Allah, saq gen rauh ojok dalem dunie niki." 28 Sesampun Marta bebase maraq nike, ie lumbar ngempoh Mariam, semetonne dait bepẽsẽq lẽq ie, "Bapaq Guru araq lẽq deriki; Ie ketuanang side." 29 Dengah hal nike, Mariam becat-becat ures, terus lumbar ojok Deside Isa. 30 Waktu nike, Deside Isa ndẽqman tame ojok dẽse. Ie masih lẽq taoq Marta bedait kance Ie. 31 Dengan-dengan Yahudi saq kenyeke hibur angen Mariam lẽq balẽ, serioq Mariam becat-becat ures dait sugul; terus ie pade lumbar turut ie, sẽngaq ie pade paran Mariam lumbar nangis ojok kubur. 32 Sewaktu Mariam dateng lẽq taoq Deside Isa dait serioq Ie, Mariam sujut lẽq arepan-Ne dait matur, "Junjungan Saq Mulie, lamun Pelungguh araq lẽq deriki waktu nike, pasti semeton tiang ndẽq milinang." 33 Sewaktu Deside Isa cingakin Mariam nangis, dait dengan-dengan Yahudi saq dateng bareng Mariam nike ẽndah nangis, Deside Isa sedih gati. 34 Make Deside Isa beketuan tipaq ie pade, "Lẽq mbẽ side pade nguburang ie?" "Silaq Junjungan Saq Mulie cingakin," jawab ie pade. 35 Beterus Deside Isa besermin. 36 Make dengan-dengan Yahudi nike bebase, "Serioq, belẽq gati kasih-Ne lẽq Lazarus!" 37 Laguq araq lẽq antare ie pade saq bebase, "Ie piaq dengan bute tao nyerioq, kembẽq Ie ndẽq bau segah adẽq Lazarus ndẽq milinang?" 38 Deside Isa asẽq malik, beterus lumbar ojok kubur. Kubur nike sopoq goe saq teimpet kadu batu belẽq. 39 "Alih batu nike," manik Deside Isa. Jawab Marta semeton dengan saq ninggal nike, "Junjungan Saq Mulie, ie sampun empat jelo tekubur. Pasti sampun bais!" 40 Deside Isa bemanik lẽq Marta, "Tekan sampun Tiang badaq side: Lamun side percaye, side gen serioq kemuliean Allah!" 41 Make ie pade alih batu nike. Beterus Deside Isa nengadah andang langit dait bemanik, "Ya Bapa, Tiang ngucapang syukur tipaq Deside, sẽngaq Deside sampun mirengang Tiang. 42 Tiang nenaoq bahwe Deside tetep mirengang Tiang, laguq Tiang matur maraq niki, lantaran dengan-dengan saq araq lẽq deriki; adẽq ie pade percaye bahwe Deside saq ngutus Tiang." 43 Sesampun bemanik maraq nike, Deside Isa bemanik siq suare saq belẽq, "Lazarus, sugul!" 44 Make dengan saq sampun ninggal nike sugul. Ime dait naẽne masih tebungkus siq kain putẽq, dait muene masih tetutup siq kain penutup mue. Terus manik Deside Isa tipaq dengan-dengan lẽq derike, "Lekaq kain-kain nike adẽq ie ndẽq kelalah lampaq." 45 Luwẽq dengan-dengan Yahudi saq dateng jangoq Mariam, percaye lẽq Deside Isa sesampun serioq peristiwe nike. 46 Laguq pire dengan lẽq antare ie pade lumbar ojok dengan Parisi dait ngelaporang napi saq sampun telaksaneang siq Deside Isa. 47 Keranaq nike dengan-dengan Parisi dait imam-imam kepale ngaraqang sangkep bareng Mahkamah Agame. Ie pade bebase, "Napi saq harus ite piaq? Dengan niki luwẽq piaq keajaipan! 48 Lamun ite tetep ngalurang Ie maraq niki selapuq dengan gen percaye lẽq Ie! Dait ahirne dengan-dengan Roma gen dateng dait ngancurang Gedẽng Allah lantong selapuq bangsente!" 49 Salaq sopoq lẽman ie pade saq aranne Kayapas, Imam Agung lẽq taun nike, bebase, "Side pade ndẽq nenaoq napi-napi. 50 Napi side pade ndẽq sadar bahwe demi rakyat, solahan sopoq dengan ninggal ketimbang selapuq bangse ancur?" 51 Setetune Kayapas bebase maraq nike, ndẽq lẽman pikiranne mẽsaq. Laguq sebagẽ Imam Agung lẽq taun nike ie benubuat bahwe Deside Isa gen ninggal umaq bangse Yahudi. 52 Dait ndẽq umaq bangse Yahudi doang, laguq ẽndah jari ngumpulang dait pesopoq bije-bije dowẽn Allah saq sampun bepencar-pencar. 53 Mulai jelo nike pare penguase Yahudi besekongkol jari nyematẽq Deside Isa. 54 Keranaq nike Deside Isa nẽnten nyatayang diriq-Ne lẽq julun dengan luwẽq lẽq kalangan dengan Yahudi. Deside Isa bilin Yudea, beterus lumbar ojok kote saq aranne Epraim dẽkẽt padang gurun. Lẽq taoq nike Ie meneng bareng pengiring-pengiring-Ne. 55 Waktu nike sampun rapet Hari Raye Paskah Yahudi. Luwẽq dengan lẽman dẽse-dẽse sampun lumbar ojok Yerusalem jari ngelaksaneang upacare mersiq diriq sendẽqman perayaan nike. 56 Ie pade boyaq Deside Isa, dait sewaktu bekumpul lẽq Gedẽng Allah, ie pade bebase sopoq kance saq lainne, "Berembẽ pendapet side? Sang Ie ndẽq dateng lẽq perayaan niki." 57 Ie pade bebase maraq nike sẽngaq imam-imam kepale dait dengan-dengan Parisi sampun nyugulang prẽntah bahwe dengan saq nenaoq lẽq mbẽ Deside Isa araq, harus ngelaporang adẽq Ie tebau.

John 12

1 Enem jelo sendẽqman Hari Raye Paskah, Deside Isa lumbar ojok Betania. Lazarus saq sampun teidupang siq Deside Isa lẽman tengaq-tengaq dengan ninggal, ndot lẽq taoq nike. 2 Lẽq derike Deside Isa tejamu siq ie pade dait Marta ẽndah milu nulung ie pade. Lazarus dait temuẽ-temuẽ bareng melinggih medaran kance Deside Isa. 3 Beterus dateng Mariam, jauq kire-kire setenge liter minyak sengẽh narwastu saq mahel gati. Ie nolẽngang minyak nike lẽq cokor Deside Isa, dait osokne kadu bulune. Selapuq balẽ nike jari sengẽh siq ambu minyak nike. 4 Laguq Yudas Iskariot, salaq sopoq pengiring Deside Isa -- saq selanjutne behianat lẽq Ie -- bebase, 5 "Kembẽq minyak sengẽh nike ndẽq tejual doang siq aji telu ratus kẽpẽng perak, dait kẽpẽngne tesedekahang tipaq dengan miskin?" 6 Yudas bebase maraq nike ndẽqne lantaran ie merhatiang dengan miskin, laguq lantaran ie pemalingan. Ie kereng bait kẽpẽng kas saq tesimpen lẽq ie. 7 Laguq Deside Isa bemanik, "Alurang dengan nine nike! Ie ngelaksaneang hal niki jari jelo pemakaman Tiang. 8 Dengan miskin tetep araq lẽq antare side pade, laguq Tiang ndẽq." 9 Luwẽq dengan Yahudi dengah bahwe Deside Isa araq lẽq Betania, jari ie pade lumbar ojok derike. Ie pade lumbar ndẽq cume lantaran Deside Isa, laguq ẽndah ie pade mẽlẽ serioq Lazarus saq sampun teidupang siq Deside Isa lẽman tengaq-tengaq dengan ninggal. 10 Keranaq nike imam-imam kepale ẽndah mẽlẽ nyematẽq Lazarus; 11 sẽngaq ie jari penyebap luwẽq dengan Yahudi bilin ie pade dait percaye lẽq Deside Isa. 12 Lẽq jelo jemaqne, dengan luwẽq saq sampun dateng jari ngerayeang Paskah dengah bahwe Deside Isa kenyeke dalem pemargian ojok Yerusalem. 13 Ie pade bait daun-daun palem beterus lumbar nyambut Ie, sambil besurak-surakan, "Hosana! Teberkahin Ie saq rauh dalem pesẽngan Tuhan, Raje Israel!" 14 Deside Isa ndait sopoq bagal saq masih odaq, terus Ie taẽk lẽq atasne. Make telaksane saq tetulis dalem Kitab Suci: 15 "Ndaq takut, putri Sion! Pade serioq Rajende rauh, nunggang sopoq bagal saq masih odaq!" 16 Waktu nike pengiring-pengiring Deside Isa ndẽqman ngerti selapuqne nike. Laguq sesampun Deside Isa temulieang, baruq ie pade inget bahwe selapuq saq telaksane lẽq Deside Isa nike sampun tetulis lẽq Kitab Suci, maraq nike ẽndah selapuq hal saq sampun ie pade laksaneang tipaq Deside Isa. 17 Dengan-dengan saq araq waktu Deside Isa ngemanikang Lazarus sugul lẽman kubur dait ngidupang ie lẽman ninggal, terus ngebẽng kesaksian mengenai hal nike. 18 Keranaq nike dengan luwẽq nike lumbar ojok Deside Isa sẽngaq ie pade dengah bahwe Deside Isa saq miaq keajaipan nike. 19 Make dengan-dengan Parisi bebase sopoq kance saq lainne, "Ite ndẽq bau piaq napi-napi! Silaq serioq, seantẽro dunie lumbar turut Ie!" 20 Lẽq antare dengan-dengan saq lumbar ibadah ojok Yerusalem waktu perayaan nike araq ẽndah pire dengan Yunani. 21 Ie pade dateng ojok Pilipus dait bebase, "Paq, lamun bau tiang pade melẽt bedait kance Deside Isa." (Pilipus asalne lẽman Betsaida lẽq Galilea.) 22 Beterus Pilipus lumbar nyampẽang hal nike tipaq Andreas, deduaqne nyampẽang tipaq Deside Isa. 23 Deside Isa bemanik lẽq ie pade, "Sampun waktune Bije Manusie temulieang. 24 Tiang badaq side: Setetune lamun setolang gandum ndẽq tetalet lẽq dalem tanaq dait matẽ, ie gen tetep araq setolang. Laguq lamun tolang gandum nike matẽ, baruq ie bau ngasilang luwẽq gandum. 25 Dengan saq tunah nyawene gen kẽlangan nyawene. Laguq dengan saq meriq lẽq nyawene lẽq dunie niki, gen meliharaq ie jari idup sejati dait kekel. 26 Dengan saq mẽlẽ ngelayanin Tiang harus turut Tiang, dait lẽq mbẽ Tiang araq lẽq derike ẽndah pelayan Tiang araq. Dengan saq ngelayanin Tiang gen tehormatin siq Bapa Tiang." 27 "Angen Tiang kuatir; napi saq harus Tiang ucapang mangkin? Napi Tiang harus ngucapang, 'Bapa, selametang Tiang mulai mangkin?' Laguq malahan Tiang dateng jari ngalamin penderitean niki. 28 Bapa, mulieang pesẽngan Deside!" Make kedengahan suare lẽman langit, "Tiang sampun mulieang Ie, dait Tiang gen mulieang Ie malik." 29 Dengan luwẽq saq araq lẽq derike dengah suare nike. Ie pade bebase, "Nike guntur!" Laguq araq ẽndah saq bebase, "Ndẽq ie! Malaẽkat bebaos lẽq Ie!" 30 Beterus Deside Isa bemanik lẽq ie pade, "Suare nike kedengahan, ndẽq jari kepentingan Tiang, laguq jari kepentingan side. 31 Mangkin sampun waktune dunie tehakimin; mangkin penguase dunie niki gen tetetẽh ojok luah. 32 Laguq Tiang niki, lamun Tiang tetaẽkang lẽman gumi, Tiang gen antuq selapuq dengan dateng ojok Tiang." 33 Deside Isa bemanik maraq nike jari nyatayang berembẽ entane Ie gen ninggal. 34 Dengan luwẽq nike bebase lẽq Ie, "Menurut Hukum Taurat tiang pade, Almasih gen idup selaẽq-laẽqne. Berembẽ Pelungguh bau bebaos bahwe Bije Manusie harus tetaẽkang lẽman gumi? Sai Bije Manusie nike?" 35 Jawab Deside Isa, "Cume semendaq doang terang nike araq lẽq antare side pade. Jari, pade lampaq semasih terang nike araq, adẽq peteng nike ndaq nguasein side pade. Dengan saq lampaq lẽq tengaq peteng ndẽqne taoq ojok mbẽ aningne. 36 Pade percaye lẽq terang nike, semasih terang nike araq lẽq side, adẽq side pade jari bije-bije terang." Sesampun bemanik maraq nike, Deside Isa lumbar nyeboq lẽman ie pade. 37 Timaq sampun luwẽq keajaipan saq tepiaq siq Deside Isa lẽq julu ie pade, ie pade ndẽq percaye lẽq Deside Isa. 38 Siq care nike telaksane napi saq tesampẽang siq nabi Yesaya, "Tuhan, sai saq percaye lẽq berite tiang pade? Lẽq sai kuase Tuhan tenyatayang?" 39 Keranaq nike ie pade ndẽq iniq percaye, sẽngaq Yesaya sampun bebase ẽndah, 40 "Ie sampun buteang penenteng dait miaq atẽ ie pade jari pagah; adẽq ie pade ndaq serioq siq penenteng, dait pikiran ie pade ngerti, terus betobat, sehingge Tiang nyelahang ie pade." 41 Yesaya bebase maraq nike sẽngaq ie sampun serioq kemuliean Deside Isa, dait bebase mengenai Ie. 42 Timaq maraq nike, malahan luwẽq dengan lẽq antare penguase Yahudi percaye lẽq Deside Isa. Laguq ie pade ndẽq bani akuq nike secare terus terang, sẽngaq ie pade takut ndaq-ndaq dengan Parisi ndẽq ngijinang ie pade tame balẽ ibadah. 43 Ie pade demenan mauq pujian lẽman manusie ketimbang pujian lẽman Allah. 44 Beterus Deside Isa bemanik siq suare saq belẽq, "Dengan saq percaye lẽq Tiang, ndẽq lẽq Tiang ie percaye, laguq lẽq Ie saq ngutus Tiang. 45 Dait dengan saq serioq Tiang, serioq Ie saq ngutus Tiang. 46 Tiang dateng ojok dunie jari terang, adẽq selapuq dengan saq percaye lẽq Tiang ndaq ndot lẽq dalem peteng. 47 Dengan saq dengahang pengajahan Tiang, laguq ndẽq taat -- ndẽqne Tiang saq hukum ie. Sẽngaq Tiang dateng ndẽq jari hakimin dunie niki, laguq jari nyelametang ie. 48 Dengan saq nolaq Tiang dait ndẽq dengahang manik Tiang, sampun araq saq hakimin ie. Manik saq Tiang sampẽang, nike saq gen hakimin ie lẽq ahir jaman. 49 Sẽngaq Tiang ndẽq bemanik lẽman kemẽlẽq Tiang mẽsaq; Bapa saq ngutus Tiang, Ie saq prẽntah Tiang napi saq harus Tiang ucapang dait Tiang sampẽang. 50 Dait Tiang nenaoq bahwe prẽntah-Ne nike ngicanin idup sejati dait kekel. Make Tiang nyampẽang maraq saq teajahang Bapa lẽq Tiang."

John 13

1 Sejelo sendẽqman Hari Raye Paskah, Deside Isa wikan bahwe sampun waktune Ie bilin dunie niki jari tulak tipaq Bapa-Ne. Ie ngasihin dengan-dengan saq jari dowẽ-Ne lẽq dunie, dait Ie tetep ngasihin ie pade jangke penutuq. 2 Sewaktu Deside Isa dait pengiring-pengiring-Ne kenyeke medaran, Belis sampun tamaqang niat lẽq dalem atẽ Yudas bije Simon Iskariot jari behianat lẽq Deside Isa. 3 Deside Isa wikan bahwe Bapa sampun nyerahang selapuq kekuasean tipaq Ie. Ie wikan ẽndah bahwe Ie rauh lẽman Allah dait gen tulak tipaq Allah. 4 Keranaq nike Ie ngadeg, lekaq jubah-Ne terus bebet-Ne kain lẽnen lẽq kẽng-Ne. 5 Sesampun nike, Ie isiq aiq ojok dalem tepaq, beterus mulai bisoq naẽn pengiring-pengiring-Ne dait lapne kadu kain lẽnen saq tebebet lẽq kẽng-Ne nike. 6 Sewaktu giliran naẽn Simon Petrus tebisoq, ie matur lẽq Deside Isa, "Junjungan Saq Mulie, Pelungguh gen bisoq naẽn tiang?" 7 Jawab Deside Isa, "Mangkin side ndẽq ngerti napi saq Tiang laksaneang niki, laguq ẽraq side gen ngerti." 8 Jawab Petrus lẽq Deside Isa, "Junjungan Saq Mulie, sampunang gati Junjungan Saq Mulie bisoq naẽn tiang!" Laguq jawab Deside Isa, "Lamun Tiang ndẽq bisoq naẽnde, side ndẽq mauq bagian bareng Tiang." 9 Simon Petrus matur, "Lamun maraq nike, Junjungan Saq Mulie, sampunang cume naẽn tiang laguq ime dait ulu tiang ẽndah!" 10 Manik Deside Isa lẽq Petrus, "Dengan saq sampun mandiq, sampun bersi selapuqne Ie ndẽq perlu tepersiq malik; kecuali naẽne. Side pade sampun bersi, laguq ndẽq selapuqne." ( 11 Deside Isa sampun wikan sai saq gen behianat lẽq Ie. Keranaq nike Ie bemanik, "Side pade sampun bersi, laguq ndẽq selapuqne.") 12 Sesampun Deside Isa bisoq naẽn ie pade, Ie kadu malik jubah-Ne dait melinggih. Terus Deside Isa bemanik lẽq ie pade, "Napi side pade ngerti saq Tiang laksaneang lẽq side? 13 Side pade ngempoh Tiang Guru dait Junjungan Saq Mulie. Dait mule maraq nike setetune. 14 Lamun Tiang jari Junjungan Saq Mulie dait Gurunde sampun bisoq naẽn side, side pade wajib ẽndah saling bisoqang naẽ. 15 Tiang ngebẽng teladan niki lẽq side pade, adẽq side pade laksaneang ẽndah napi saq sampun Tiang laksaneang lẽq side. 16 Mule kenaq manik Tiang niki: Sopoq hambe ndẽqne belẽqan lẽman majikanne, dait sopoq utusan ndẽqne belẽqan lẽman saq ngutus ie. 17 Lamun side pade sampun nenaoq selapuqne niki, side pade gen bahagie lamun ngelaksaneang hal nike. 18 Napi saq Tiang sampẽang niki ndẽqne mengenai side pade selapuq. Tiang nenaoq sai-sai saq sampun Tiang pilẽq. Laguq napi saq tetulis dalem Kitab Suci, harus telaksane, 'Dengan saq iring Tiang medaran, gen ngelawan Tiang.' 19 Hal nike mangkin Tiang sampẽang lẽq side pade, sendẽqman telaksane, adẽq lamun laun hal nike telaksane, side pade gen percaye bahwe Tiang niki Ie. 20 Setetune kenaq manik Tiang niki: Sai nerimaq dengan saq Tiang utus, ie nerimaq Tiang. Dait sai saq nerimaq Tiang, nerimaq Ie saq ngutus Tiang." 21 Sesampun Deside Isa bemanik maraq nike, Ie jari asẽq gati. Beterus Ie bemanik, "Tiang badaq side, setetune salaq sopoq lẽq antare side pade gen behianat lẽq Tiang." 22 Pengiring-pengiring-Ne saling ẽngat sopoq kance saq lain dait jari bingung, sẽngaq ie pade ndẽq nenaoq sai saq temaksut siq Deside Isa. 23 Salaq sopoq pengiring saq tekasihin siq Deside Isa tokol lẽq dẽkẽt Deside Isa. 24 Simon Petrus ngebẽng isarat lẽq ie adẽq ie metakẽn lẽq Deside Isa sai saq temaksut nike. 25 Beterus pengiring Deside Isa nike ngerapetin Deside Isa, dait metakẽn, "Junjungan Saq Mulie, sai dengan nike?" 26 Jawab Deside Isa, "Dengan saq Tiang bẽng ruti sesampun Tiang telep ruti nike ojok dalem jembung, ie dengan saq Tiang maksut." Make Deside Isa bait sepeleng ruti, telepangne ojok dalem jembung; beterus icanin-Ne tipaq Yudas, bije Simon Iskariot. 27 Sesampun Yudas nerimaq ruti nike, Belis tame ojok dalem atẽne. Beterus Deside Isa bemanik lẽq ie, "Becat laksaneang napi saq mẽlẽ side laksaneang." 28 Ndẽq araq sopoq dengan juaq lẽq antare ie pade saq tokol bekelor lẽq derike ngerti kembẽq Deside Isa bemanik maraq nike lẽq Yudas. 29 Araq saq paran bahwe Deside Isa manikang Yudas beli napi-napi saq teperluang lẽq perayaan nike, atao ngicanin kẽpẽng tipaq dengan miskin -- sẽngaq Yudas nike jari bendahare lẽq antare ie pade. 30 Sesampun Yudas nerimaq ruti nike, ie langsung sugul. Waktu nike sampun peteng. 31 Sesampun Yudas lumbar, Deside Isa bemanik, "Mangkin Bije Manusie temulieang dait Allah temulieang langan Ie. 32 Lamun Allah temulieang langan Ie, Ie ẽndah gen temulieang siq Allah langan diriq-Ne. Malahan Allah gelis gen ngemulieang Ie. 33 Bije-bije Tiang, Tiang ndẽq gen ngonẽq malik ndot kance side pade. Side pade gen boyaq Tiang, laguq maraq saq sampun Tiang badaq lẽq dengan-dengan Yahudi, maraq nike ẽndah Tiang badaq side pade; ojok taoq saq Tiang laiq, side pade ndẽq bau dateng. 34 Tiang ngebẽng prẽntah baru lẽq side: Pade kasihin sopoq kance saq lain. Pade maraq Tiang ngasihin side pade, maraq nike ẽndah side pade harus saling kasihin. 35 Lamun side pade saling kasihin, selapuq dengan gen nenaoq bahwe side pade pengiring-pengiring Tiang." 36 Simon Petrus metakẽn lẽq Deside Isa, "Junjungan Saq Mulie, Pelungguh gen lumbar ojok mbẽ?" Jawab Deside Isa, "Ojok mbẽ lain Tiang, side ndẽq bau milu mangkin. Side gen turut Tiang ẽraq." 37 Petrus metakẽn malik, "Junjungan Saq Mulie, kembẽq tiang nẽnten bau turut Pelungguh mangkin? Tiang rẽde matẽ demi Pelungguh!" 38 Jawab Deside Isa, "Napi tetu side rẽde matẽ demi Tiang? Tiang badaq side pacu-pacu, laun sendẽqman manuk ngungkung, side sampun telu kali tilas Tiang!"

John 14

1 "Ndaq osah angende," manik Deside Isa lẽq ie pade. "Pade percaye lẽq Allah dait pade percaye lẽq Tiang ẽndah. 2 Lẽq gedẽng Bapa Tiang araq luwẽq taoq ndot. Tiang lalo ojok derike jari nyedieang side pade taoq. Tiang ndẽq gen badaq side maraq nike, lamun ndẽqne tetu maraq nike. 3 Sesampun Tiang lalo nyedieang taoq umaq side pade, Tiang gen tulak dait tutut side pade, adẽq lẽq mbẽ Tiang araq, lẽq derike ẽndah side pade araq. 4 Ojok taoq saq Tiang laiq side pade nenaoq langanne." 5 Beterus Tomas matur lẽq Deside Isa, "Junjungan Saq Mulie, tiang pade ndẽq nenaoq ojok mbẽ Pelungguh lumbar, berembẽ tiang pade nenaoq langanne?" 6 Jawab Deside Isa, "Tiang niki langan dait kebenaran dait idup. Ndẽq araq sopoq dengan juaq saq bau parek tipaq Bapa lamun ndẽq langan Tiang. 7 Lamun side pade kenal Tiang, pasti side pade gen kenal ẽndah Bapa Tiang. Mangkin side pade sampun kenal Ie, dait sampun serioq Ie!" 8 Beterus Pilipus matur lẽq Deside Isa, "Junjungan Saq Mulie, nyatayang Bapa lẽq tiang pade, adẽq tiang pade puas." 9 Laguq jawab Deside Isa, "Sampun bẽgaq ngonẽqne Tiang bareng kance side pade, laguq ndẽqman ẽndah side kenal Tiang, Pilipus? Dengan saq sampun serioq Tiang, sampun serioq Bapa, berembẽ side iniq bebase, 'Silaq nyatayang Bapa lẽq tiang pade'? 10 Pilipus! Napi side ndẽq percaye, bahwe Tiang lẽq dalem Bapa, dait Bapa lẽq dalem Tiang? Napi saq Tiang sampẽang lẽq side, ndẽq Tiang sampẽang lẽman diriq Tiang mẽsaq. Bapa saq tetep lẽq dalem Tiang, Ie saq ngelaksaneang selapuqne nike. 11 Pade percaye lẽq Tiang, bahwe Tiang niki lẽq dalem Bapa, dait Bapa lẽq dalem Tiang, atao paling ndẽq pade percaye lẽq napi saq sampun Tiang laksaneang. 12 Tiang badaq side: Setetune dengan saq percaye lẽq Tiang, gen ngelaksaneang napi saq sampun Tiang laksaneang -- malahan ie gen ngelaksaneang saq belẽqan malik -- sẽngaq Tiang lalo tipaq Bapa. 13 Dait napi-napi saq side pade tunas kadu aran Tiang, gen Tiang laksaneang, adẽq Bapa temulieang langan Bije. 14 Napi-napi saq side pade tunas kadu aran Tiang, gen Tiang laksaneang." 15 "Lamun side pade ngasihin Tiang, side pade gen ngelaksaneang prẽntah-prẽntah Tiang. 16 Tiang gen tunas lẽq Bapa, dait Ie gen ngicanin side Penulung lain, saq gen bareng side pade selaẽq-laẽqne. 17 Ie nike Roh Kebenaran. Dunie ndẽq iniq nerimaq Ie, sẽngaq dunie ndẽqne serioq Ie dait ndẽqne kenal Ie. Laguq side kenal Ie, sẽngaq Ie araq bareng side pade dait gen ndot kance side pade. 18 Side pade ndẽq gen Tiang bilin jari anak iwoq. Tiang gen tulak tipaq side. 19 Karing semendaq dunie ndẽq gen serioq Tiang malik. Laguq side pade gen serioq Tiang. Dait lantaran Tiang idup, side pade gen idup ẽndah. 20 Lamun sampun dateng jelo nike, side pade gen nenaoq bahwe Tiang lẽq dalem Bapa, side pade lẽq dalem Tiang, dait Tiang ẽndah lẽq dalem side pade. 21 Dengan saq taat lẽq prẽntah-prẽntah Tiang dait ngelaksaneang prẽntah-prẽntah nike, ie saq ngasihin Tiang. Bapa Tiang gen ngasihin dengan saq ngasihin Tiang, dait Tiang ẽndah gen ngasihin dengan nike, dait nyatayang diriq Tiang lẽq ie." 22 Yudas (saq ndẽqne Iskariot) metakẽn lẽq Deside Isa, "Junjungan Saq Mulie, kembẽq Pelungguh kayun nyatayang diriq tipaq tiang pade dait nẽnten tipaq dunie?" 23 Jawab Deside Isa, "Dengan saq ngasihin Tiang, gen turut manik Tiang. Bapa Tiang gen ngasihin ie. Bapa dait Tiang gen rauh tipaq ie dait ndot bareng ie. 24 Dengan saq ndẽq ngasihin Tiang, ndẽq turut manik Tiang. Manik saq side pade dengah nike, ndẽq lẽman Tiang, laguq lẽman Bapa saq ngutus Tiang. 25 Selapuqne nike Tiang sampẽang lẽq side semasih Tiang araq bareng kance side pade. 26 Laguq Roh Suci, Penulung saq gen teutus Bapa kadu aran Tiang, Ie saq gen ngajah side pade selapuqne dait ngingetang side pade lẽq napi saq sampun Tiang sampẽang tipaq side pade. 27 Damẽ sejahtere Tiang adẽqang umaq side pade. Damẽ sejahtere Tiang, Tiang bẽng lẽq side pade, dait napi saq Tiang bẽng ndẽq maraq saq tebẽng siq dunie tipaq side. Ndaq osah dait takut. 28 Side pade sampun dengahang Tiang bemanik, 'Tiang gen lalo, laguq Tiang gen dateng malik ojok side.' Lamun side pade ngasihin Tiang, side pade gen besukecite lantaran Tiang lalo tipaq Bapa, sẽngaq Bapa belẽqan lẽman Tiang. 29 Mangkin Tiang badaq hal nike lẽq side, sendẽqman selapuqne telaksane, adẽq lamun ẽraq hal nike telaksane, side pade gen percaye. 30 Tiang ndẽq gen badaq side padu luwẽqan malik, sẽngaq sampun waktune penguase dunie niki dateng. Laguq ie ndẽq bedowẽ kuase napi-napi lẽq diriq Tiang. 31 Timaqne maraq nike, adẽq dunie niki nenaoq bahwe Tiang ngasihin Bapa, make Tiang ngelaksaneang selapuq saq teprẽntahang siq Bapa tipaq Tiang. Pade ures, silaq ite lumbar lẽman deriki."

John 15

1 Deside Isa bemanik malik, "Tiang lolo anggur saq sejati, dait Bapa Tiang nike penggarapne. 2 Sebilang pẽmpang saq araq lẽq Tiang saq ndẽq bebuaq, peleng-Ne dait sebilang pẽmpang saq bebuaq tekurangin daunne dait persiq-Ne adẽq luwẽqan malik buaqne. 3 Side pade sampun bersi lantaran manik saq Tiang sampẽang lẽq side pade. 4 Tetep ndot lẽq dalem Tiang dait Tiang ẽndah tetep ndot lẽq dalem side pade. Pade maraq pẽmpang ndẽqne iniq bebuaq lẽman diriqne mẽsaq, kecuali lamun ie tetep lẽq lolone. Maraq nike ẽndah halne side pade ndẽq gen bebuaq, lamun side pade ndẽq ndot lẽq dalem Tiang. 5 Tiang niki lolo anggur, dait side pade pẽmpang-pẽmpangne. Dengan saq tetep ndot lẽq dalem Tiang, dait Tiang lẽq dalem ie, ie bebuaq luwẽq; sẽngaq lamun ndẽq lẽq dalem Tiang, side ndẽq tao piaq napi-napi. 6 Dengan saq ndẽq tetep ndot lẽq dalem Tiang, gen tetetẽh maraq pẽmpang, beterus jari gero. Pẽmpang-pẽmpang saq maraq nike gen tekumpulang dait tetetẽh ojok dalem api, beterus tesedut. 7 Lamun side pade ndot lẽq dalem Tiang dait manik Tiang ndot lẽq dalem side, pade tunas napi juaq saq side mẽlẽ, dait side gen nerimaq ie. 8 Lamun side pade bebuaq luwẽq, Bapa Tiang temulieang; dait siq care nike side tetu-tetu pengiring Tiang. 9 Maraq Bapa ngasihin Tiang, maraq nike ẽndah Tiang ngasihin side pade, pade ndot lẽq dalem kasih Tiang nike. 10 Lamun side pade turut prẽntah-prẽntah Tiang, side pade gen ndot lẽq dalem kasih Tiang, pade maraq Tiang sampun turut prẽntah-prẽntah Bapa Tiang dait ndot lẽq dalem kasih-Ne. 11 Selapuqne niki Tiang sampẽang tipaq side pade, adẽq sukecite Tiang araq lẽq dalem atẽnde, dait sukecitende jari sempurne. 12 Niki prẽntah Tiang: Pade kasihin sopoq kance saq lain, pade maraq Tiang ngasihin side pade. 13 Ndẽq araq kasih saq belẽqan lẽman kasih sopoq dengan saq rẽde nyerahang nyawene umaq sahabat-sahabatne. 14 Side pade sahabat-sahabat Tiang lamun side pade ngelaksaneang napi saq Tiang prẽntahang tipaq side pade. 15 Side pade ndẽq Tiang sebut hambe malik, sẽngaq hambe ndẽq nenaoq napi saq tepiaq siq majikanne. Side pade Tiang sebut sahabat, sẽngaq selapuq saq Tiang dengah lẽman Bapa Tiang, sampun Tiang sampẽang lẽq side pade. 16 Ndẽq side pade saq milẽq Tiang. Laguq Tiang saq milẽq side pade dait Tiang sampun netepang side pade lumbar dait ngasilang buaq dait buaqde nike ndẽq iniq binase, adẽq napi saq side tunas tipaq Bapa kadu aran Tiang, icanin-Ne tipaq side. 17 Niki prẽntah Tiang lẽq side: Pade kasihin sopoq kance saq lain." 18 "Lamun dunie meriq lẽq side pade, pade inget bahwe Tiang sampun juluan temeriq siq dunie. 19 Seandẽne side pade lẽman dunie side pade gen tekasihin siq dunie jari dowẽne. Laguq Tiang sampun pilẽq side pade lẽman dunie niki, jari side pade ndẽqne malik dowẽn dunie. Keranaq nike dunie meriq lẽq side pade. 20 Pade inget napi saq sampun Tiang sampẽang lẽq side pade, 'Hambe ndẽqne belẽqan lẽman majikanne.' Lamun ie pade sampun nganiaye Tiang, make ie gen nganiaye side pade. Lamun ie pade turut manik Tiang, make ie pade ẽndah gen turut basen side pade. 21 Laguq selapuqne nike gen ie pade laksaneang lẽq side pade lantaran aran Tiang, sẽngaq ie pade ndẽq kenal Allah saq sampun ngutus Tiang. 22 Seandẽne Tiang ndẽq dateng dait ndẽq nyampẽang lẽq ie pade, make ie pade ndẽq bedose. Laguq mangkin ie pade ndẽq bedowẽ alasan malik siq dose ie pade. 23 Dengan saq meriq lẽq Tiang, ie ẽndah meriq lẽq Bapa Tiang. 24 Seandẽne Tiang ndẽq ngelaksaneang karye lẽq tengaq-tengaq ie pade maraq saq ndẽq uwah telaksaneang siq dengan lain, pasti ie pade ndẽq bedose. Laguq mangkin timaq ie pade sampun serioq selapuqne nike, tetep doang ie pade meriq lẽq Tiang dait Bapa Tiang. 25 Laguq manik saq sampun araq tetulis lẽq dalem Kitab Suci Taurat ie pade harus telaksane, 'Ie pade ndẽq bedowẽ alasan napi-napi ie meriq lẽq Tiang.' 26 Tiang gen ngutus tipaq side Penulung saq asalne lẽman Bapa, nike Roh Kebenaran saq dateng lẽman Bapa. Lamun Roh nike dateng, Ie gen besaksi mengenai Tiang. 27 Dait side pade ẽndah harus besaksi mengenai Tiang, sẽngaq side pade sampun bareng kance Tiang lẽman penembẽqne.

John 16

1 Selapuqne nike Tiang sampẽang lẽq side pade, adẽq side pade ndẽq murtat. 2 Side pade gen tesugulang lẽman balẽ-balẽ ibadah. Dait gen dateng waktune bahwe dengan saq nyematẽq side pade gen paran diriqne ngabdi lẽq Allah. 3 Ie pade laksaneang hal nike lẽq side, sẽngaq ie pade ndẽqman kenal Bapa dait Tiang. 4 Laguq mangkin Tiang sampẽang hal nike lẽq side, adẽq ẽraq lamun hal nike telaksane, side pade inget bahwe sampun Tiang sampẽang tipaq side pade." "Hal niki ndẽq Tiang sampẽang lẽq side pade lẽman penembẽqne, sẽngaq Tiang masih araq bareng kance side pade. 5 Laguq mangkin Tiang gen lalo ojok Ie saq ngutus Tiang; dait ndẽq sopoq dengan juaq lẽq antare side pade saq beketuan ojok mbẽ lain Tiang. 6 Malahan mangkin side pade asẽq, lantaran Tiang sampẽang hal nike lẽq side pade. 7 Laguq Tiang sampẽang hal saq kenaq lẽq side pade: Solahan umaq side pade lamun Tiang lalo; sẽngaq lamun Tiang ndẽq lalo, Penulung nike ndẽq gen dateng ojok side pade. Laguq lamun Tiang lalo, Tiang gen ngutus Penulung nike ojok side pade. 8 Lamun Penulung nike dateng, Ie gen nyatayang tipaq dunie mengenai dose, mengenai kebenaran, dait mengenai penghakiman. 9 Mengenai dose, sẽngaq ie pade tetep ndẽq percaye lẽq Tiang; 10 mengenai kebenaran, sẽngaq Tiang lalo ojok Bapa dait side pade ndẽq gen serioq Tiang malik; 11 mengenai penghakiman, sẽngaq penguase dunie niki sampun tehukum. 12 Luwẽq malik saq mẽlẽ Tiang sampẽang tipaq side, laguq mangkin niki side ndẽqman sanggup nerimaq hal nike. 13 Laguq lamun Roh nike dateng, nike Roh kebenaran, Ie gen bimbing side pade jari nenaoq selapuq saq kenaq; sẽngaq Ie ndẽq gen bemanik lẽman diriq-Ne mẽsaq, laguq selapuq hal saq Ie pireng, nike saq gen Ie sampẽang dait Ie gen beriteang tipaq side hal-hal saq gen dateng. 14 Ie gen mulieang Tiang, sẽngaq napi saq Ie sampẽang tipaq side pade Ie terimaq lẽman Tiang. 15 Selapuq saq araq lẽq Bapa nike dowẽn Tiang. Keranaq nike, Tiang badaq bahwe napi saq tesampẽang siq Roh tipaq side pade, Ie terimaq lẽman Tiang." 16 "Karing semendaq side pade ndẽq gen serioq Tiang malik, dait karing semendaq ẽndah side pade gen serioq Tiang." 17 Pire dengan pengiring Deside Isa saling ketuan sopoq kance saq lainne, "Napi maksutne Ie bemanik lẽq ite: 'Karing semendaq side pade ndẽq gen serioq Tiang, dait karing semendaq ẽndah side pade gen serioq Tiang'? Napi ẽndah maksut-Ne bemanik, 'Tiang gen parek ojok Bapa'?" 18 Ie pade beketuan terus, "Napi artine, 'semendaq'? Ite ndẽq ngerti Ie bebaos mengenai napi!" 19 Deside Isa wikan bahwe ie pade mẽlẽ metakẽn lẽq Ie, make Ie bemanik, "Baruq Tiang sampẽang, 'Karing semendaq doang side pade ndẽq gen serioq Tiang, dait karing semendaq ẽndah side pade gen serioq Tiang.' Napi nike saq jari persoalan lẽq antare side pade? 20 Setetune Tiang badaq side, side pade gen nangis dait asẽq, laguq dunie gen gembire. Side pade gen susah, laguq kesusahande nike gen berobah jari sukecite. 21 Lamun sopoq dengan nine gen nganak, ie susah sẽngaq mule sampun wayene ie menderite. Laguq sesampun anakne sugul, ie lupaq lẽq penderiteanne lantaran cemohne bahwe sopoq manusie sampun teanakang ojok dalem dunie. 22 Maraq nike ẽndah side pade: Mangkin side pade susah, laguq Tiang gen bedait malik kance side pade, make angende gen jari sukecite; dait ndẽq araq sopoq dengan juaq saq bau bait sukecite nike lẽman atẽnde. 23 Lẽq jelo nike, side pade ndẽq gen beketuan napi-napi malik lẽq Tiang. Tiang badaq side: Setetune napi doang saq side pade tunas lẽq Bapa kadu aran Tiang, nike gen tekabulang siq Bapa. 24 Jangke mangkin niki side pade ndẽqman tunas napi-napi kadu aran Tiang. Pade tunas, make side pade gen nerimaq, adẽq sukecitende jari sempurne." 25 "Selapuqne niki Tiang sampẽang lẽq side pade kadu perumpamean. Laguq gen dateng waktune, Tiang ndẽq gen kadu perumpamean malik, laguq gen nyampẽang secare terus-terang lẽq side pade mengenai Bapa. 26 Lẽq waktu nike side pade gen bedo'e tipaq Bapa kadu aran Tiang. Dait ndẽq Tiang badaq side, bahwe Tiang gen tunasang side pade lẽq Bapa, 27 sẽngaq Bapa mẽsaq ngasihin side pade. Ie ngasihin side pade lantaran side pade ngasihin Tiang, dait percaye bahwe Tiang dateng lẽman Allah. 28 Mule Tiang asalne lẽman Bapa, dait sampun dateng ojok dalem dunie. Laguq mangkin Tiang bilin dunie jari tulak ojok Bapa." 29 Beterus pengiring-pengiring Deside Isa matur lẽq Deside Isa, "Mangkin niki Junjungan Saq Mulie bemanik secare terus-terang, nẽnten kadu perumpamean, 30 dait tiang pade nenaoq bahwe Junjungan Saq Mulie wikan selapuqne. Nẽnten araq sopoq dengan juaq saq perlu ketuanang napi-napi tipaq Junjungan Saq Mulie. Keranaq nike tiang pade percaye bahwe Pelungguh rauh lẽman Allah." 31 Jawab Deside Isa tipaq ie pade, "Jari, napi side pade percaye mangkin? 32 Inget! Waktune gen dateng, malahan sampun dateng, side pade gen bekelin sopoq kance saq lain. Side pade gen ulẽq ojok balẽnde mẽsaq dait bilin Tiang mẽsaq-mẽsaq. Laguq Tiang ndẽq mẽsaq-mẽsaq sẽngaq Bapa araq bareng Tiang. 33 Selapuqne niki Tiang sampẽang adẽq side pade mauq damẽ sejahtere lẽq dalem Tiang. Lẽq dunie niki side pade gen menderite. Laguq teguqang atẽnde! Tiang sampun ngalahang dunie!"

John 17

1 Sesampun bemanik maraq nike, Deside Isa bedo'e andang langit, "Bapa, mangkin sampun dateng waktune. Mulieang Bije Deside adẽq Bije Deside ẽndah mulieang Deside. 2 Deside sampun ngicanin tipaq Bije Deside kuase tipaq selapuq umat manusie, adẽq Ie ngicanin idup sejati dait kekel tipaq selapuq dengan saq Deside icanin tipaq Ie. 3 Niki idup sejati dait kekel; bahwe dengan kenal kance Deside, jari sopoq-sopoqne Allah saq kenaq, dait kenal kance Deside Isa Almasih saq sampun Deside utus. 4 Tiang sampun mulieang Deside lẽq gumi siq care nyelesẽang karye saq Deside serahang tipaq Tiang jari Tiang laksaneang. 5 Keranaq nike, Bapa, mangkin mulieang Tiang bareng-bareng kance Deside siq kemuliean saq sampun jari dowẽn Tiang dait dowẽn Deside sendẽqman dunie niki tecipteang. 6 Tiang sampun nyatayang pesẽngan Deside tipaq dengan-dengan lẽq dunie saq sampun Deside icanin tipaq Tiang. Ie pade nike jari dowẽn Deside, dait Deside sampun ngicanin ie pade tipaq Tiang dait ie pade sampun turut manik Deside. 7 Mangkin ie pade nenaoq bahwe selapuq saq Deside icanin tipaq Tiang asalne lẽman Deside. 8 Sampun Tiang sampẽang tipaq ie pade manik saq Deside icanin tipaq Tiang; dait ie pade sampun nerimaq manik nike. Ie pade nenaoq bahwe Tiang tetu-tetu dateng lẽman Deside dait ie pade percaye bahwe Deside saq ngutus Tiang. 9 Tiang do'eang ie pade. Tiang nẽnten do'eang dunie laguq jari dengan-dengan saq sampun Deside icanin tipaq Tiang, sẽngaq ie pade dowẽn Deside. 10 Selapuq saq jari dowẽn Tiang, jari dowẽn Deside ẽndah. Dait selapuq dowẽn Deside jari dowẽn Tiang ẽndah. Tiang temulieang lẽq antare ie pade. 11 Mangkin Tiang parek ojok Deside. Tiang nẽnten ndot malik lẽq dunie; laguq ie pade araq lẽq dunie. Bapa, saq suci! Jagaq ie pade siq kekuasean pesẽngan Deside, nike pesẽngan saq sampun Deside icanin tipaq Tiang -- adẽq ie pade jari sopoq, pade maraq Deside kance Tiang ẽndah sopoq. 12 Lẽq waktu Tiang masih bareng kance ie pade, Tiang sampun jagaq ie pade siq kuase pesẽngan Deside -- pesẽngan saq Deside icanin tipaq Tiang. Tiang sampun jagaq ie pade, dait nẽnten araq sopoq juaq lẽman ie pade saq binase; kecuali ie saq mule sampun tetentuang binase. Adẽq siq care nike telaksane napi saq tetulis lẽq Kitab Suci. 13 Mangkin Tiang parek ojok Deside. Selapuqne niki Tiang sampẽang semasih Tiang araq lẽq dunie; adẽqne penoq sukecite Tiang lẽq dalem ie pade. 14 Tiang sampun sampẽang lẽq ie pade selapuq manik Deside, dait dunie meriq lẽq ie pade, sẽngaq ie pade nẽnten dowẽn dunie, pade maraq Tiang ẽndah nẽnten dowẽn dunie. 15 Tiang nẽnten tunas adẽq Deside bait ie pade lẽman dunie niki, laguq Tiang tunas adẽq Deside jagaq ie pade lẽman saq jahat. 16 Pade maraq Tiang ndẽqne lẽman dunie, ie pade ẽndah ndẽqne lẽman dunie. 17 Suciang ie pade dalem kebenaran; manik Deside nike kebenaran. 18 Maraq Deside sampun ngutus Tiang ojok dunie, maraq nike ẽndah Tiang ngutus ie pade ojok dunie; 19 dait Tiang suciang diriq Tiang umaq ie pade, adẽq ie pade ẽndah tesuciang dalem kebenaran. 20 Nẽnten ie pade doang saq Tiang do'eang, laguq Tiang ẽndah do'eang dengan-dengan saq percaye lẽq Tiang siq kesaksian ie pade niki; 21 adẽq ie pade selapuq jari sopoq, pade maraq Deside lẽq dalem Tiang, dait Tiang lẽq dalem Deside, adẽq ie pade ẽndah lẽq dalem Ite, adẽq dunie percaye, bahwe Deside saq sampun ngutus Tiang. 22 Tiang sampun ngicanin ie pade kemuliean saq Deside icanin lẽq Tiang, adẽq ie pade jari sopoq, pade maraq Ite ẽndah sopoq; 23 Tiang lẽq dalem ie pade, dait Deside lẽq dalem Tiang; adẽq ie pade sempurne jari sopoq, adẽq dunie nenaoq bahwe Deside saq sampun ngutus Tiang, dait Deside ngasihin ie pade, pade maraq Deside ngasihin Tiang. 24 Bapa, Tiang melẽt adẽq lẽq mbẽ juaq Tiang araq, ie pade ẽndah araq bareng kance Tiang, ie pade saq sampun Deside icanin tipaq Tiang, adẽq ie pade serioq kemuliean Tiang saq sampun Deside icanin tipaq Tiang, sẽngaq Deside sampun ngasihin Tiang sendẽqman dunie tecipteang. 25 Bapa saq adil! Mule dunie nẽnten kenal kance Deside, laguq Tiang kenal kance Deside; dait ie pade niki nenaoq, bahwe Deside saq sampun ngutus Tiang, 26 dait Tiang sampun nyatayang pesẽngan Deside tipaq ie pade; dait Tiang gen laksaneang hal nike, adẽq kasih Deside lẽq Tiang tetep lẽq dalem atẽ ie pade dait Tiang lẽq dalem ie pade."

John 18

1 Sesampun Deside Isa bedo'e maraq nike, Ie kance pengiring-pengiring-Ne lumbar ojok itoqan Kokoq Kidron. Lẽq derike araq sopoq taman, dait Deside Isa kance pengiring-pengiring-Ne tame ojok taman nike. 2 Taman nike sampun tetaoq siq Yudas saq behianat lẽq Deside Isa; sẽngaq Deside Isa kance pengiring-pengiring-Ne rimpes bekumpul lẽq derike. 3 Make Yudas lumbar ojok taoq nike. Jauqne sepasukan tentere Romawi kance pengawal-pengawal Gedẽng Allah saq tesuruq siq imam-imam kepale dait dengan-dengan Parisi. Ie pade jauq gegaman, dilah dait obor. 4 Deside Isa wikan selapuq saq gen telaksane tipaq diriq-Ne. Jari Ie ngerapetin dengan-dengan nike, dait beketuan, "Sai saq side pade boyaq?" 5 "Deside Isa, dengan Nazaret," jawab ie pade. "Tiang niki Ie," jawab Deside Isa. Yudas penghianat nganjeng kance ie pade lẽq derike. 6 Sewaktu Deside Isa bemanik lẽq ie pade, "Tiang niki Ie," ie pade selapuq surut mudi dait rebaq ojok tanaq. 7 Deside Isa beketuan malik lẽq ie pade, "Sai saq side pade boyaq?" "Deside Isa dengan Nazaret," jawab ie pade. 8 "Sampun Tiang badaq side, Tiang niki Ie," manik Deside Isa. "Dait lamun mule Tiang saq side pade boyaq, alurang dengan saq lain nike lumbar." ( 9 Siq manik-Ne nike, make telaksane napi saq sampun temanikang siq Deside Isa sendẽqmanne: "Bapa, lẽman dengan-dengan saq Bapa icanin tipaq Tiang, nẽnten sopoq dengan juaq saq binase.") 10 Simon Petrus saq jauq klẽwang, nyerẽt klẽwangne terus ngerantek pelayan Imam Agung jangke pegat kentokne saq kanan. Aran pelayan nike Malkus. 11 Beterus Deside Isa bemanik tipaq Petrus, "Tamaqang malik klẽwangde ojok sarungne! Napi side paran Tiang ndẽq gen nginem cawan penderitean saq teicanin siq Bapa tipaq Tiang?" 12 Beterus prajurit-prajurit Romawi bareng komendanne dait pengawal-pengawal Yahudi bau dait sẽkoq Deside Isa. 13 Penembẽqne ie pade jauq Deside Isa ojok Hanas, mentoaqne Kayapas. Lẽq waktu nike Kayapas jari Imam Agung. 14 Kayapas nike saq sampun ngebẽng nasẽhat lẽq pare penguase Yahudi bahwe solahan sopoq dengan ninggal umaq selapuq bangse. 15 Simon Petrus dait sopoq pengiring saq lain ngiring Deside Isa. Pengiring saq lain niki sampun kenal kance Imam Agung. Keranaq nike, ie tame bareng kance Deside Isa ojok lelẽah gedẽng Imam Agung, 16 laguq Petrus ngantih lẽq luah, lẽq jebak. Beterus pengiring saq lain nike sugul, dait ngeraos kance pelayan nine saq jagaq lawang, beterus jauqne Petrus tame ojok dalem. 17 Pelayan nine saq jagaq lawang nike bebase lẽq Petrus, "Tekan side ẽndah salaq sopoq pengiring dengan nike?" "Ndẽq," jawab Petrus. 18 Waktu nike kenyeke telih gati, jari pelayan-pelayan kance pengawal-pengawal penyalaq api kadu areng dait ie pade mindu lẽq derike. Petrus ẽndah lumbar ojok derike dait milu mindu lẽq api bareng ie pade. 19 Imam Agung metakẽn lẽq Deside Isa mengenai pengiring-pengiring-Ne dait mengenai perajahan-Ne. 20 Jawab Deside Isa, "Tiang tetep nyampẽang secare terus terang lẽq julun dengan luwẽq. Tiang tetep ngajahang lẽq balẽ-balẽ ibadah dait Gedẽng Allah, taoq dengan Yahudi biasene bekumpul. Tiang ndẽq uwah nyatayang napi-napi secare nyeboq-nyeboq. 21 Jari, kembẽq pelungguh beketuan lẽq Tiang? Silaq beketuan lẽq dengan-dengan saq sampun dengahang pengajahan Tiang. Pasti ie pade nenaoq napi saq Tiang ajahang." 22 Sewaktu Deside Isa bemanik maraq nike, salaq sopoq pengawal lẽq derike tempẽlẽk Deside Isa dait bebase, "Bani gati Side bebase maraq nike tipaq Imam Agung!" 23 Jawab Deside Isa, "Lamun Tiang ngucapang hal saq salaq, nyatayang lẽq deriki napi kesalaqanne! Laguq lamun napi saq Tiang ucapang nike kenaq, kembẽq side tempẽlẽk Tiang?" 24 Beterus Hanas suruq dengan jauq Deside Isa saq sampun tesẽkoq nike ojok Imam Agung Kayapas. 25 Simon Petrus masih nganjeng mindu lẽq derike. Dengan-dengan bebase lẽq ie, "Tekan side ẽndah salaq sopoq pengiring-Ne?" Laguq Petrus nilas, "Ndẽq!" 26 Sopoq pelayan Imam Agung, keluarge lẽman dengan saq kentokne terantek siq Petrus, bebase, "Tekan onẽq tiang serioq side lẽq taman bareng kance Ie?" 27 Beterus Petrus nilas malik, "Ndẽq," -- dait tepat lẽq waktu nike manuk ngungkung. 28 Kelẽmaq gati ie pade jauq Deside Isa lẽman gedẽng Kayapas ojok istane gubernur. Dengan-dengan Yahudi ndẽq tame ojok dalem istane, adẽq ie pade ndẽq jari najis menurut aturan agame, sẽngaq ie pade mẽlẽ ngelorang keloran Paskah. 29 Keranaq nike Pilatus sugul dait beketuan lẽq ie pade, "Napi tuduhan side pade tipaq dengan niki?" 30 Jawab ie pade, "Lamun Ie ndẽq salaq, tiang pade ndẽq gen jauq Ie ojok pelungguh." 31 Beterus basen Pilatus lẽq ie pade, "Silaq bait dait adilin Ie menurut hukumde mẽsaq!" Laguq jawab dengan-dengan Yahudi nike, "Tiang pade ndẽq kanggo nyematẽq dengan." ( 32 Siq care nike, make telaksane napi saq sampun temanikang siq Deside Isa mengenai berembẽ entane Ie gen ninggal.) 33 Pilatus tame malik ojok dalem istane, dait ngempoh Deside Isa, terus ie metakẽn, "Napi tetu Pelungguh raje dengan Yahudi?" 34 Jawab Deside Isa, "Napi saq pelungguh ketuanang niki mule asalne lẽman pelungguh mẽsaq atao araq dengan lain saq badaq pelungguh mengenai Tiang?" 35 Jawab Pilatus, "Napi tiang niki dengan Yahudi? Saq nyerahang Pelungguh ojok tiang niki bangse Pelungguh mẽsaq dait imam-imam kepale. Setetune napi saq Pelungguh sampun piaq?" 36 Jawab Deside Isa, "Kerajaan Tiang ndẽq lẽman dunie niki. Seandẽne kerajaan Tiang lẽman dunie niki, pengiring-pengiring Tiang gen bejuang adẽq Tiang ndẽq teserahang ojok penguase Yahudi. Laguq mule kerajaan Tiang nike ndẽq lẽman dunie niki!" 37 Beterus Pilatus metakẽn lẽq Deside Isa, "Jari, Pelungguh niki Raje?" Jawab Deside Isa, "Pelungguh bebase bahwe Tiang niki Raje. Tiang tebijeang dait dateng ojok dunie niki siq sopoq maksut, ngebẽng kesaksian mengenai kebenaran. Dengan saq asalne lẽman kebenaran nike ie gen dengahang Tiang." 38 Pilatus metakẽn malik lẽq Deside Isa, "Napi artine kebenaran nike?" Sesampun nike Pilatus sugul malik lẽman istane dait bebase lẽq dengan-dengan Yahudi, "Tiang ndẽq ndait sopoq juaq kesalaqan lẽq Ie. 39 Laguq menurut adat saq biase, tiang harus bẽbasang sopoq tahenan lẽq Hari Raye Paskah. Napi side pade mẽlẽ lamun tiang bẽbasang Raje dengan Yahudi nike tipaq side pade?" 40 Ie pade bejawab nyurak-nyurak, "Sampunang Ie, laguq Barabas!" (Barabas nike tukang rampok.)

John 19

1 Beterus Pilatus tame dait suruq dengan mecut Deside Isa. 2 Prajurit-prajurit miaq sopoq mahkote lẽman pẽmpang-pẽmpang beduwi, terus kaduangne lẽq sirah Deside Isa. Sesampun nike ie pade kaduang Deside Isa jubah warne lempok lomaq, 3 terus sambil maju ojok julu ie pade bebase, "Idup raje dengan Yahudi!" Beterus ie pade tempẽlẽk Deside Isa. 4 Sesampun nike Pilatus sugul malik dait bebase tipaq dengan luwẽq nike, "Pade serioq! Tiang jauq Ie sugul ojok side pade, adẽq side pade nenaoq tiang ndẽq ndait sopoq juaq kesalaqan lẽq Ie." 5 Make Deside Isa sugul dait kadu mahkote duwi dait jubah lempok lomaq. Pilatus bebase tipaq ie pade, "Serioq dengan niki." 6 Sewaktu imam-imam kepale dait pengawal-pengawal nike serioq Deside Isa, ie pade nyurak, "Pakuq Ie lẽq kayuq salib! Pakuq Ie lẽq kayuq salib!" Pilatus bebase tipaq ie pade, "Bait Ie, dait pakuq Ie lẽq kayuq salib, sẽngaq tiang ndẽq ndait sopoq juaq kesalaqan lẽq Ie." 7 Jawab dengan-dengan Yahudi nike, "Tiang pade bedowẽ hukum dait menurut hukum nike Ie harus matẽ, sẽngaq Ie ngaku diriq-Ne Bije saq asalne lẽman Allah." 8 Sewaktu Pilatus pirengang ie pade bebase maraq nike, ie sayan takut malik. 9 Beterus ie tame malik ojok dalem istane, dait sesampun Deside Isa tejauq tame, ie metakẽn lẽq Deside Isa, "Lẽman mbẽ asal Pelungguh?" Laguq Deside Isa nẽnten bejawab. 10 Make Pilatus metakẽn malik, "Pelungguh nẽnten kayun bebaos kance tiang? Adẽq Pelungguh wikan, tiang bedowẽ kuase bẽbasang Pelungguh, dait kuase jari pakuq Pelungguh lẽq kayuq salib!" 11 Jawab Deside Isa, "Lamun Allah nẽnten ngicanin kuase nike tipaq pelungguh, pelungguh ndẽq bedowẽ kuase napi-napi tipaq Tiang. Keranaq nike dengan saq nyerahang Tiang tipaq pelungguh, belẽqan dosene lẽman pelungguh." 12 Sewaktu Pilatus pirengang hal nike, ie berusahe bẽbasang Deside Isa. Laguq dengan-dengan Yahudi nyurak-nyurak, "Lamun pelungguh bẽbasang Ie, pelungguh nẽnten sahabat Kaisar, dengan saq ngaku diriqne jari raje, ie ngelawan Kaisar!" 13 Sewaktu Pilatus pirengang ucapan-ucapan nike, ie jauq Deside Isa ojok luah terus melinggih lẽq kursi pengadilan lẽq taoq saq aranne Litostrotos. (Lẽq dalem base Ibrani aranne Gabata.) 14 Waktu nike gen jam due olas tengari, jelo sendẽqman Hari Raye Paskah. Pilatus bebase tipaq dengan-dengan nike, "Niki raje side pade!" 15 Ie pade nyurak-nyurak, "Matẽq Ie! Matẽq Ie! Pakuq Ie lẽq kayuq salib!" Pilatus beketuan malik, "Napi rajende harus tiang pakuq lẽq kayuq salib?" Jawab imam-imam kepale, "Cume Kaisar sopoq-sopoqne raje tiang pade!" 16 Beterus Pilatus nyerahang Deside Isa tipaq ie pade jari tepakuq lẽq kayuq salib. Ie pade bait Deside Isa, terus jauq Ie lumbar. 17 Deside Isa sugul sambil ngelẽmbah kayuq salib-Ne ojok taoq saq aranne "Taoq Jerangkong". (Lẽq dalem base Ibrani tesebut, Golgota.) 18 Lẽq derike Ie tepakuq lẽq kayuq salib. Bareng-bareng kance Ie araq ẽndah due dengan lain saq tepakuq lẽq kayuq salib; sopoq lẽq sedi kiri, sopoqne malik lẽq sedi kanan, dait Deside Isa lẽq tengaq-tengaq. 19 Lẽq kayuq salib Deside Isa, Pilatus suruq dengan pasang tulisan niki: "Isa lẽman Nazaret, Raje Dengan Yahudi". 20 Luwẽq dengan Yahudi bace tulisan nike, sẽngaq taoq Deside Isa tepakuq lẽq kayuq salib nike ndẽqne jaoq lẽman kote. Tulisan nike kadu base Ibrani, Latin, dait Yunani. 21 Imam-imam kepale matur lẽq Pilatus, "Sampunang tulis 'Raje dengan Yahudi', laguq tulis maraq niki, 'Dengan niki bebase, Tiang Raje dengan Yahudi.' " 22 Laguq jawab Pilatus, "Saq sampun tiang tulis, tetep tetulis." 23 Sesampun prajurit-prajurit nike pakuq Deside Isa lẽq kayuq salib, ie pade bait kuace-Ne. Kuace nike tebagi empat: Sebilang dengan mauq sopoq bagian. Ie pade bait ẽndah jubah-Ne. Jubah nike ndẽq araq jaitanne -- tesẽsẽk lẽman atas jangke dateng bawaq. 24 Prajurit-prajurit nike bebase sopoq kance saq lain, "Ndaq ite peleng-peleng jubah niki. Silaq ite piaq undian jari nentuang sai saq mauq jubah nike." Siq care nike make telaksane napi saq tetulis dalem Kitab Suci: "Ie pade bagi-bagi kelambi Tiang, dait piaq undian jari mauq jubah Tiang." Hal nike saq telaksaneang siq prajurit-prajurit nike. 25 Lẽq dẽkẽt kayuq salib Deside Isa, nganjeng mamiq bini-Ne, sanak mamiq bini-Ne, aranne Mariam senine Klopas, dait Mariam Magdalena. 26 Sewaktu Deside Isa cingakin mamiq bini-Ne dait pengiring-Ne saq Ie kasihin nganjeng lẽq derike, Ie bemanik lẽq mamiq bini-Ne, "Inaq, niki bijende." 27 Beterus Deside Isa bemanik tipaq pengiring-Ne nike, "Nike mamiq bini side." Mulai waktu nike pengiring-Ne nike nerimaq mamiq bini Deside Isa meneng lẽq balẽne. 28 Deside Isa wikan bahwe mangkin selapuqne sampun selesẽ, dait napi saq tetulis dalem Kitab Suci adẽq telaksane. Ie bemanik, "Tiang bedak." 29 Lẽq derike araq sopoq jembung penoq siq aiq anggur saq pedis. Beterus ie pade celep sopoq bunge karang lẽq aiq anggur nike, terus tancepne lẽq hisop dait jonjongne ojok cangkem Deside Isa. 30 Sesampun Deside Isa inem anggur saq pedis nike, Ie bemanik, "Sampun selesẽ!" Beterus Ie nundukang sirah-Ne dait nyerahang nyawe-Ne. 31 Pare penguase Yahudi ndẽq mẽlẽ mayit dengan-dengan saq tepakuq lẽq kayuq salib nike tetep begantung lẽq kayuq salib lẽq jelo Sabat, sẽngaq jelo Sabat nike Hari Raye saq husus. Sẽngaq jelo sewaktu Deside Isa tepakuq lẽq kayuq salib nike tepat sejelo sendẽqman jelo Sabat nike, dengan-dengan Yahudi tunas ijin lẽq Pilatus jari molakang naẽ dengan-dengan saq sampun tepakuq lẽq kayuq salib dait nurunang mayit-mayit nike lẽman kayuq salib. 32 Make, prajurit-prajurit nike lumbar dait molakang juluan naẽ kedue dengan saq tepakuq lẽq kayuq salib bareng Deside Isa. 33 Laguq sewaktu ie pade dateng lẽq arepan Deside Isa, ie pade serioq Deside Isa sampun ninggal. Make ie pade ndẽq molakang cokor-Ne. 34 Laguq salaq sopoq lẽman prajurit nike galah woteng Deside Isa kadu tumbak; dait waktu nike ẽndah sugul daraq dait aiq. 35 Dengan saq serioq mẽsaq peristiwe nike, ie saq nyeriteang hal nike, adẽq side pade ẽndah percaye. Dait kesaksianne nike kenaq, dait ie nenaoq bahwe nike kenaq. 36 Hal nike telaksane adẽqne genep napi saq tetulis dalem Kitab Suci, "Ndẽq sopoq juaq tolang-Ne gen tepolakang." 37 Lẽq dalem Kitab Suci ẽndah tetulis: "Ie pade gen perhatiang Ie saq sampun ie pade galah." 38 Sesampun nike Yusup lẽman Arimatea tunas ijin lẽq Pilatus jari bait jenazah Deside Isa. (Yusup nike pengiring Deside Isa laguq secare nyeboq-nyeboq, sẽngaq ie takut lẽq penguase-penguase Yahudi.) Pilatus ngicanin ijin tipaq ie, jari ie lumbar bait jenazah Deside Isa. 39 Nikodemus, saq piranan sampun parek tipaq Deside Isa lẽq kekelem, lumbar ẽndah bareng kance Yusup. Nikodemus jauq ramuan mur dait garu -- selapuqne kire-kire telung dase kilo luwẽqne. 40 Kedue dengan nike bait jenazah Deside Isa, terus bungkusne kadu kain lẽnen saq putẽq bareng-bareng kance ramuan sengẽh menurut adat penguburan dengan Yahudi. 41 Lẽq taoq Deside Isa tepakuq lẽq kayuq salib araq sopoq taman. Lẽq dalem taman nike araq sopoq kuburan baru, saq ndẽqman tekadu nguburang dengan. 42 Lantaran kuburan nike rapet, dait jelo nike jelo persiepan sendẽqman jelo Sabat, ie pade makamang Deside Isa lẽq derike.

John 20

1 Lẽq jelo Ahad kelẽmaq, waktu masih peteng, Mariam Magdalena lumbar ojok makam. Ie serioq batu pengimpetne nike sampun tealih lẽman loang makam nike. 2 Ie pelai boyaq Simon Petrus dait pengiring saq tekasihin siq Deside Isa, terus bebase lẽq ie pade, "Junjungan Saq Mulie sampun tebait lẽman makam, dait tiang ndẽq nenaoq lẽq mbẽ Ie tetoloq." 3 Beterus Petrus dait pengiring saq lain nike lumbar ojok makam. 4 Deduaqne pelai, laguq pengiring saq lain nike becatan lẽman Petrus, dait ie juluan dateng lẽq makam. 5 Ie nidok ojok dalem makam dait serioqne kain putẽq nike araq lẽq derike, laguq ie ndẽq tame. 6 Simon Petrus ẽndah dateng terutuk ie, dait tame ojok dalem makam nike. Ie serioq kain putẽq araq lẽq derike, 7 laguq kain saq tetaliq lẽq sirah Deside Isa ndẽq araq lẽq dẽkẽtne laguq sampun belekut lẽq taoq saq lain. 8 Beterus pengiring saq juluan dateng lẽq makam, tame ẽndah. Ie serioq dait percaye. ( 9 Jangke lẽq waktu nike ie pade ndẽqman ngerti napi saq tetulis lẽq dalem Kitab Suci bahwe Ie harus idup malik lẽman ninggal.) 10 Sesampun nike kedue pengiring Deside Isa nike ulẽq ojok balẽne. 11 Mariam Magdalena nganjeng lẽq julu makam sambil nangis. Sewaktu ie kenyeke nangis, ie nidok ojok dalem makam, 12 terus serioq due malaẽkat bekelambi putẽq. Ie pade melinggih lẽq onos taoq Deside Isa tesarẽang, saq sopoq lẽq bagian sirah, dait saq sopoqne malik lẽq bagian cokor. 13 Malaẽkat-malaẽkat nike beketuan, "Kembẽq side nangis, inaq?" Jawab Mariam, "Junjungan tiang Saq Mulie sampun tebait, dait tiang ndẽq nenaoq lẽq mbẽ Ie tetoloq." 14 Sesampun bebase maraq nike, ie ngẽngat andang mudi, dait serioq Deside Isa ngadeg lẽq derike. Laguq ie ndẽq tandaq bahwe nike Deside Isa. 15 Deside Isa bemanik lẽq ie, "Inaq, kembẽq side nangis? Sai saq side boyaq?" Mariam paran nike tukang kebon, jari ie bebase, "Paq, lamun Side saq jauq Ie lẽman deriki, tulung badaq tiang lẽq mbẽ Side toloq Ie, adẽq tiang bau bait Ie." 16 Deside Isa bemanik lẽq ie, "Mariam!" Mariam ngẽngat andang Deside Isa, beterus matur kadu base Ibrani, "Rabuni!" (Saq artine, "Guru".) 17 "Ndaq demak Tiang," manik Deside Isa lẽq ie, "sẽngaq Tiang ndẽqman lalo ojok Bapa. Laguq silaq lumbar tipaq sanak-sanak Tiang, dait sampẽang tipaq ie pade bahwe mangkin Tiang lalo ojok Bapa Tiang dait Bapa side ẽndah, Allah Tiang dait Allah side." 18 Terus Mariam lumbar nyampẽang tipaq pengiring-pengiring Deside Isa bahwe ie sampun serioq Junjungan Saq Mulie, dait Junjungan Saq Mulie sampun manikang selapuqne nike lẽq ie. 19 Lẽq jelo Ahad nike ẽndah, sesampun kekelem, pengiring-pengiring Deside Isa bekumpul lẽq sopoq balẽ saq lawang-lawangne telenting, sẽngaq ie pade takut lẽq dengan-dengan Yahudi. Selung-selung Deside Isa rauh dait ngadeg lẽq tengaq-tengaq ie pade, dait bemanik, "Damẽ sejahtere umaq side pade." 20 Sesampun bemanik maraq nike, Ie metitoqang gading dait woteng-Ne lẽq ie pade. Sewaktu ie pade serioq Junjungan Saq Mulie, ie pade cemoh gati. 21 Beterus karing sekali Deside Isa bemanik lẽq ie pade, "Damẽ sejahtere umaq side pade! Maraq Bapa ngutus Tiang, maraq nike ẽndah Tiang ngutus side pade." 22 Beterus Ie niupang embok-Ne lẽq ie pade dait bemanik, "Terimaq niki Roh Suci. 23 Lamun side pade ngampunin dose dengan, Allah ẽndah ngampunin dengan nike. Lamun side pade ndẽq ngampunin dose dengan, Allah ẽndah ndẽq ngampunin dengan nike." 24 Tomas (saq tesebut Didimus), salaq sopoq lẽman due olas pengiring Deside Isa, ndẽq araq lẽq taoq nike waktu Deside Isa rauh. 25 Make pengiring-pengiring Deside Isa saq lain bebase lẽq Tomas, "Tiang pade sampun serioq Junjungan Saq Mulie!" Laguq jawab Tomas, "Lamun tiang ndẽqman serioq onos paku lẽq gading-Ne, dait ndẽqman jujuq siq ranggot tiang ojok onos paku nike dait ndẽqman noloq ime tiang lẽq woteng-Ne, make tiang ndẽqman mẽlẽ percaye." 26 Baluq jelo sesampun nike pengiring-pengiring Deside Isa araq malik lẽq dalem balẽ nike dait Tomas bareng-bareng kance ie pade. Selapuq lawang telenting. Laguq Deside Isa rauh dait ngadeg lẽq tengaq-tengaq ie pade, terus bemanik, "Damẽ sejahtere umaq side pade." 27 Beterus Ie bemanik lẽq Tomas, "Toloq ranggotde lẽq deriki dait serioq imen Tiang, ulurang imende dait toloq lẽq woteng Tiang. Ndaq ragu-ragu malik, laguq percaye!" 28 Tomas matur lẽq Deside Isa, "Ya, Tuhan tiang dait Allah tiang!" 29 Beterus Deside Isa bemanik lẽq ie, "Lantaran side sampun serioq Tiang, make side percaye. Bahagie ie pade saq ndẽq serioq, laguq percaye." 30 Masih luwẽq malik keajaipan-keajaipan lain saq tepiaq siq Deside Isa lẽq julu pengiring-pengiring-Ne, laguq ndẽq tetulis lẽq dalem kitab niki. 31 Laguq selapuqne niki tetulis, adẽq side pade percaye bahwe Deside Isa nike Mesias, Bije saq asalne lẽman Allah, dait adẽq siq percaye, side pade nerimaq idup dalem pesẽngan-Ne.

John 21

1 Sesampun nike karing sekali Deside Isa nyatayang diriq lẽq pengiring-pengiring-Ne lẽq Danao Tiberias. Maraq niki kejarianne: 2 Lẽq sopoq jelo Simon Petrus, Tomas saq tesebut Didimus, Natanael lẽman Kana lẽq Galilea, bije-bije Zebedeus, dait due pengiring Deside Isa saq lainne, kenyeke bekumpul. 3 Basen Simon Petrus lẽq ie pade, "Tiang mẽlẽ lalo bau empaq." "Tiang pade milu," basen ie pade lẽq Petrus. Beterus ie pade lumbar taẽk perau. Laguq sekeleman nike ie pade ndẽq bau napi-napi. 4 Sewaktu tiwoq jelo, Deside Isa ngadeg lẽq pesisi, laguq ie pade ndẽq tandaq bahwe nike Deside Isa. 5 Deside Isa bemanik lẽq ie pade, "Kanak-kanak, napi side pade bedowẽ empaq?" "Nẽnten," jawab ie pade. 6 Deside Isa bemanik lẽq ie pade, "Saut jaringde ojok sedi kanan perau, laun side pade gen mauq empaq." Terus ie pade saut jaringne, laguq ie pade ndẽq bau antuq malik lantaran luwẽq gati empaq lẽq dalemne. 7 Pengiring saq tekasihin siq Deside Isa bebadaq lẽq Petrus, "Nike Junjungan Saq Mulie!" Sewaktu Simon Petrus dengah bahwe nike Junjungan Saq Mulie, ie kadu kelambine, sẽngaq ie ndẽq kadu kelambi, terus nimproh ojok aiq. 8 Pengiring-pengiring saq lain dateng kadu perau, sẽngaq ie pade ndẽq jaoq lẽman darat, cume kire-kire satus mẽter doang dait ie pade antuq jaringne saq penoq siq empaq nike. 9 Sewaktu ie pade turun lẽman perau, ie pade serioq araq barak api areng lẽq derike dait empaq lẽq atasne kance ruti. 10 Deside Isa bemanik lẽq ie pade, "Jauq ojok deriki pire empaq saq baruq side pade bau." 11 Simon Petrus taẽk ojok perau, terus antuq jaringne ojok darat. Jaring nike penoq siq empaq saq belẽq-belẽq: Selapuqne araq karobelah telu luwẽqne. Dait timaq luwẽqne maraq nike, jaringne ndẽq soẽk. 12 Deside Isa bemanik lẽq ie pade, "Silaq bekelor." Ndẽq araq sopoq dengan juaq lẽman pengiring-pengiring-Ne saq bani metakẽn, "Pelungguh sai?" Sẽngaq ie pade nenaoq bahwe Ie Junjungan Saq Mulie. 13 Beterus Deside Isa ngerapetin ie pade dait bait ruti nike dait ngicanin ie pade, maraq nike ẽndah empaq nike. 14 Niki ketelu kaline Deside Isa nyatayang diriq-Ne lẽq pengiring-pengiring-Ne sesampun Ie idup malik lẽman ninggal. 15 Sesampun ie pade bekelor, Deside Isa bemanik lẽq Simon Petrus, "Simon bije Yahya, napi side lebih ngasihin Tiang lebihan lẽman ie pade?" "Nggih, Junjungan Saq Mulie," jawab Petrus, "Pelungguh wikan tiang ngasihin Pelungguh." Deside Isa bemanik lẽq ie, "Peliharaq dombe-dombe Tiang!" 16 Saq kedue kaline Deside Isa bemanik lẽq ie, "Simon bije Yahya, napi side ngasihin Tiang?" "Nggih, Junjungan Saq Mulie," jawab Petrus, "Pelungguh wikan tiang ngasihin Pelungguh." Deside Isa bemanik lẽq ie, "Peliharaq dombe-dombe Tiang." 17 Saq ketelu kaline Deside Isa bemanik lẽq ie, "Simon bije Yahya, napi side ngasihin Tiang?" Petrus jari asẽq sẽngaq Deside Isa bemanik lẽq ie jangke telu kali. Make Petrus bejawab malik, "Junjungan Saq Mulie, Pelungguh wikan selapuq-lapuqne. Pelungguh wikan tiang ngasihin Pelungguh!" Beterus manik Deside Isa lẽq ie, "Peliharaq dombe-dombe Tiang. 18 Tiang badaq side: Setetune sewaktu side masih bajang, side taliq kẽngde mẽsaq dait lampaq ojok mbẽ doang side mẽlẽ, laguq lamun side sampun toaq, side gen ngulurang imende dait dengan lain gen naliq side dait jauq side ojok taoq saq side ndẽq mẽlẽ." 19 (Siq ucapan-ucapan nike, Deside Isa nyatayang berembẽ Petrus gen ninggal ẽraq jari mulieang Allah.) Sesampun nike Deside Isa bemanik lẽq Petrus, "Turut Tiang!" 20 Sewaktu Petrus ngẽngat, ie serioq bahwe pengiring saq tekasihin siq Deside Isa milu ẽndah. (Ie saq tokol dẽkẽt Deside Isa sewaktu medaran dait saq metakẽn lẽq Deside Isa, "Junjungan Saq Mulie, sai saq gen behianat lẽq Pelungguh?") 21 Sewaktu serioq ie, Petrus metakẽn lẽq Deside Isa, "Junjungan Saq Mulie, berembẽ lẽq dengan niki?" 22 Jawab Deside Isa, "Seandẽne Tiang mẽlẽ ie tetep idup jangke Tiang dateng, nike ndẽqne urusande. Laguq side, turut Tiang!" 23 Make nyebar kabar lẽq antare pengiring-pengiring Deside Isa bahwe pengiring nike ndẽq gen ninggal. Padahal Deside Isa nẽnten bemanik bahwe pengiring nike ndẽq gen ninggal, laguq: "Seandẽne Tiang mẽlẽ ie tetep idup jangke Tiang dateng, nike ndẽqne urusande." 24 Pengiring nike saq ngebẽng kesaksian mengenai peristiwe-peristiwe niki. Ie ẽndah saq sampun nulis hal niki. Dait ite nenaoq bahwe napi saq tesampẽang nike kenaq. 25 Masih luwẽq hal lain saq telaksaneang siq Deside Isa. Lamun selapuqne nike tetulis sopoq-sopoq, perasaq tiang ndẽq araq taoq saq cukup lẽq seantẽro gumi jari noloq selapuq kitab saq tetulis nike.

Acts 1

1 Teopilus saq budiman, lẽq dalem kitab tiang saq penembẽq sampun tiang jelasang selapuqne saq telaksaneang dait teajahang siq Deside Isa lẽman Ie mulai karye-Ne, 2 jangke dateng jelone Ie teangkat ojok sorge. Sendẽqman Ie taẽk ojok sorge, langan Roh Suci Ie ngicanin petunjuk-petunjuk tipaq rasul-rasul-Ne saq Ie pilẽq. 3 Sesampun Ie ninggal, sengonẽq petang dase jelo Ie rimpes nyatayang siq care saq nyate gati tipaq rasul-rasul nike bahwe Ie tetu-tetu idup. Ie pade serioq Deside Isa, dait Deside Isa bebaos kance ie pade mengenai Kerajaan Allah. 4 Lẽq sopoq jelo sewaktu Deside Isa medaran bareng ie pade, Ie ngicanin prẽntah niki lẽq ie pade, "Ndaq lumbar lẽman Yerusalem. Antih lẽq derike jangke Bapa ngicanin napi saq sampun Ie janjiqang, saq laẽq sampun Tiang badaq side. 5 Sẽngaq Yahya baptis kadu aiq, laguq karing pire jelo malik side pade gen tebaptis kadu Roh Suci." 6 Sewaktu ie pade bekumpul bareng-bareng kance Deside Isa, ie pade metakẽn lẽq Deside Isa, "Junjungan Saq Mulie, napi mangkin Pelungguh gen piaq malik kerajaan umaq Israel?" 7 Jawab Deside Isa, "Bapa Tiang mẽsaq saq nentuang jelo dait waktune. Hal nike ndẽq perlu side pade taoq, sẽngaq nike kuase Bapa. 8 Laguq side pade gen nerimaq kuase, sewaktu Roh Suci sampun rauh tipaq side. Dait side pade gen jari saksi-saksi Tiang lẽq Yerusalem, lẽq selapuq wilayah Yudea, lẽq Samaria, dait jangke dateng poton gumi." 9 Sesampun Deside Isa bemanik maraq nike, Ie kerangkatan ojok sorge lẽq julu ie pade, dait awan ilipang Ie lẽman penyerioqan ie pade. 10 Waktu ie pade masih merhatiang andang langit, sewaktu Deside Isa kerangkatan, selung-selung due dengan bekelambi putẽq nganjeng lẽq dẽkẽt ie pade, 11 dait bebase tipaq ie pade, "Hai, dengan-dengan Galilea, kembẽq side pade nganjeng doang lẽq derike serioq andang langit? Deside Isa, saq side pade serioq kerangkatan ojok sorge lẽq julu side pade, gen tulak malik siq care maraq nike ẽndah pade maraq saq side pade serioq." 12 Beterus rasul-rasul nike tulak ojok Yerusalem lẽman Bukit Zaitun. Bukit nike taoqne kire-kire sopoq kilomẽter jaoqne lẽman Yerusalem. 13 Lẽq Yerusalem ie pade lumbar ojok balẽ taoq ie pade mererepan, beterus taẽk ojok kamar saq lẽq atas. Rasul-rasul nike, Petrus dait Yahya, Yakub dait Andreas, Pilipus dait Tomas, Bartolomeus dait Matius, Yakub bije Alpeus, Simon dengan Zelot dait Yudas bije Yakub; 14 selapuqne tetep sopoq angen bekumpul jari bedo'e. Ie pade bedo'e bareng kance dengan-dengan nine lantong Mariam mamiq bini Deside Isa, dait bareng kance sanak-sanak Deside Isa. 15 Lẽq sopoq jelo, sewaktu ie pade kenyeke bekumpul -- araq kire-kire satus due pulu dengan luwẽqne -- Petrus nganjeng dait ngeraos. Ie bebase, 16 "Semeton-semeton! Napi saq tetulis lẽq dalem Kitab Suci, nike harus telaksane. Laẽq langan Daud, Roh Suci sampun benubuat mengenai Yudas, pemimpin dengan-dengan saq bau Deside Isa nike. 17 Yudas nike salaq sopoq dengan lẽman ite, dait ie ẽndah sampun tepilẽq jari milu begawẽan bareng-bareng kance ite." ( 18 Yudas niki sampun mauq tanaq kuburanne lẽman upaq penghianatanne saq jahat. Ie geriq dait ninggal tianne bedah jangke sugul selapuq isin tianne. 19 Selapuq dengan saq ndot lẽq Yerusalem nenaoq hal nike. Keranaq nike dalem base ie pade, tanaq nike ie pade aranin Akeldama, saq artine 'Tanaq Daraq'.) 20 "Sẽngaq lẽq dalem Kitab Suci Zabur araq tetulis maraq niki, 'Alurang taoqne ndot jari sepi; ndaq sopoq dengan juaq saq ndot lẽq dalemne.' Araq ẽndah tetulis maraq niki, 'Alurang jabatanne tebait siq dengan lain.' 21 Keranaq nike, harus araq sopoq dengan saq milu kance ite jari saksi bahwe Junjungan Saq Mulie Deside Isa sampun idup malik lẽman ninggal. Dengan nike harus salaq sopoq lẽman dengan-dengan saq tetep bareng-bareng kance ite sewaktu ite ngiring Deside Isa ojok embẽ-embẽ, lẽman Yahya mulai baptis dengan jangke waktune Deside Isa teangkat ojok sorge lẽman tengaq-tengaq ite." 23 Beterus dengan-dengan saq araq lẽq derike ngusulang due dengan, Yusup saq tesebut ẽndah Barsabas (ie tesebut ẽndah Yustus), dait Matias. 24 Terus ie pade bedo'e, ie pade matur, "Tuhan, Deside wikan angen selapuq dengan. Yudas sampun lumbar ojok taoq saq sampun tetentuang umaq ie. Jari, mangkin niki tunasang sai lẽq antare due dengan niki saq Deside pilẽq jari teicanin tugas nike gentiq Yudas." 26 Sesampun nike kedue aran nike teundi, beterus lẽman undian nike sugul aran Matias. Make ie teangkat jari rasul adẽqne turut bareng-bareng kance solas rasul saq lainne.

Acts 2

1 Sewaktu sampun wayene jelo Pentakosta, selapuq dengan percaye bekumpul lẽq sopoq taoq. 2 Selung-selung kedengahan suare lẽman langit maraq angin saq keras. Balẽ taoq dengan-dengan nike kenyeke melinggih selapuqne penoq siq suare nike. 3 Beterus ie pade serioq ẽlaq-ẽlaq maraq nyale api lampaq ojok embẽ-embẽ, dait nyontoq tipaq ie pade sopoq-sopoq. 4 Ie pade selapuq tepenoqin siq Roh Suci, dait mulai ngeraos kadu macem-macem base saq lain. Ie pade ngeraos maraq saq teicanin siq Roh nike tipaq ie pade jari teucapang. 5 Lẽq waktu nike luwẽq dengan Yahudi saq solẽh, lẽman macem-macem negeri lẽq seantẽro dunie, ndot lẽq Yerusalem. 6 Sewaktu kedengahan suare nike, luwẽq gati dengan-dengan bekerimpun. Ie pade selapuq bingung dengah dengan-dengan percaye nike ngeraos kadu base ie pade sopoq-sopoq. 7 Ie pade bengaq dait takjub terus bebase, "Tekan dengan-dengan saq ngeraos niki selapuqne dengan-dengan Galilea? 8 Segerah ite dengah ie pade ngeraos kadu base saq ite kadu lẽq negeri asalte? 9 Ite dengan-dengan lẽman Partia, Media, Elam, lẽman Mesopotamia, Yudea dait Kapadokia; lẽman Pontus dait Asia, 10 lẽman Prigia dait Pampilia, lẽman Mesir dait daẽrah-daẽrah Libia dẽkẽt Kirene; lẽq antare ite araq saq dateng lẽman Roma, 11 araq dengan-dengan Yahudi dait araq ẽndah dengan bangse-bangse lain saq sampun tame agame Yahudi; araq ẽndah saq dateng lẽman Kreta dait Arab. Ite selapuq dengah ie pade ngeraos kadu basente sopoq-sopoq mengenai hal-hal saq ajaip saq telaksaneang siq Allah!" 12 Ie pade selapuq bengaq dait takjub terus beketuan sopoq kance saq lain, "Napi artine niki?" 13 Laguq araq ẽndah dengan-dengan saq nyindir. Basene, "Dengan-dengan nike kenyeke bowos siq anggur manis!" 14 Beterus Petrus nganjeng bareng solas rasul saq lain, dait bebase tipaq dengan luwẽq nike siq suare saq belẽq, "Semeton-semeton, dengan-dengan Yahudi dait selapuq dengan saq ndot lẽq Yerusalem! Dengahang pacu-pacu, sẽngaq hal niki perlu tiang jelasang lẽq side. 15 Dengan-dengan niki ndẽqne bowos, maraq saq side pade paran; sẽngaq mangkin baruq jam siwaq kelẽmaq. 16 Laguq mengenai hal niki Allah sampun bemanik langan Nabi Yoel: 17 Allah bemanik, 'Lẽq ahir jaman Tiang gen curahang Roh Tiang ojok selapuq dengan. Bije-bijende saq mame-mame dait bije-bijende saq nine gen benubuat. Terune-terunende gen serioq hal-hal ajaip saq Tiang petitoqang tipaq ie pade. Dengan-dengan toaqde gen mauq impi saq Tiang icanin tipaq ie pade. 18 Tipaq pelayan-pelayan Tiang ẽndah -- saq mame-mame dait saq nine-nine --, gen Tiang curahang Roh Tiang lẽq jelo-jelo nike. Ie pade gen benubuat. 19 Tiang gen miaq keajaipan-keajaipan lẽq atas, lẽq langit, dait hal-hal luar biase lẽq bawaq, lẽq gumi; daraq dait api, gumpelan pendet. 20 Jelo gen jari peteng, bulan jari bẽaq maraq daraq sendẽqman Jelo Tuhan, jelo saq belẽq dait mulie nike rauh. 21 Lẽq waktu nike, dengan saq bekuih tipaq Tuhan gen teselametang.' 22 Dengan-dengan Israel! Pade dengahang napi saq tiang sampẽang niki: Deside Isa dengan Nazaret nike sampun tetentuang siq Allah umaq side. Nike nyate gati lẽq keajaipan-keajaipan dait hal-hal luar biase saq Allah laksaneang lẽq tengaq-tengaq side pade langan Deside Isa nike. Selapuqne nike side mẽsaq sampun nenaoq. 23 Sesuai maksut dait rencane Allah mẽsaq, Ie mutusang jari nyerahang Deside Isa tipaq side pade. Dait sewaktu Deside Isa teserahang, side pade nyematẽq Ie siq care ngalurang dengan-dengan jahat pakuq Ie lẽq kayuq salib. 24 Laguq Allah ngidupang Ie malik lẽman tengaq-tengaq dengan-dengan ninggal. Ie tekalahang siq kematẽan, laguq Allah ngelepasang Ie, sẽngaq ndẽq mungkin Ie tetep tekuasein siq kematẽan. 25 Mengenai Deside Isa niki, Daud sampun bebase, 'Tiang serioq Tuhan tetep lẽq julun tiang; Ie araq lẽq sedi kanan tiang, adẽq tiang ndẽq teguncang siq napi juaq. 26 Keranaq nike angen tiang besukecita, biwih tiang ngucapang nyanyian; dait awak tiang niki gen ndot dalem pengharepan. 27 Sẽngaq Deside nẽnten menengang jiwen tiang ndot dalem dunie dengan matẽ. Deside nẽnten menengang Dengan Suci Deside binase. 28 Deside sampun nyatayang tipaq tiang langan saq nuju idup saq sejati. Sukecite tiang belẽq gati, sẽngaq Deside araq bareng tiang.' 29 Semeton-semeton, ijinang tiang ngeraos secare terus terang mengenai Daud, bapaq leluhurte nike. Ie sampun ninggal dait sampun temakamang ẽndah; makamne masih araq lẽq tengaq-tengaqte jangke mangkin. 30 Allah sampun bejanji tipaq Daud, siq sumpah, bahwe salaq sopoq dengan lẽman keturunanne gen teangkat siq Allah jari raje. Sẽngaq Daud wikanang janji nike dait lantaran ie ẽndah nabi, 31 ie wikan ẽndah napi saq gen telaksaneang siq Allah. Jari ie sampun benubuat bahwe Almasih saq tejanjiqang siq Allah, gen idup malik lẽman ninggal. Daud bebase, 'Ie nẽnten temenengang lẽq dalem dunie dengan-dengan matẽ; rage-Ne nẽnten gen ancur dait bis.' 32 Deside Isa niki saq teidupang malik lẽman ninggal siq Allah. Tiang pade selapuq sampun nyaksiang mẽsaq hal nike. 33 Ie teangkat lẽq jabatan saq atas dait teicanin Roh Suci saq sampun tejanjiqang siq Bapa. Dait saq side pade dengah dait serioq mangkin niki, Roh nike saq Ie curahang tipaq tiang pade. 34 Daud mẽsaq nẽnten taẽk ojok sorge, laguq Daud bebase, 'Tuhan bemanik tipaq Junjungan tiang Saq Mulie: 35 Melinggih lẽq sedi kanan Tiang, jangke Tiang miaq musuh-musuh Deside takluk lẽq Deside!' 36 Keranaq nike selapuq dengan Israel harus nenaoq pacu-pacu bahwe Deside Isa saq side pade pakuq lẽq kayuq salib nike, Ie ẽndah saq sampun tejanjiqang siq Allah jari Junjungan Saq Mulie dait Almasih!" 37 Sewaktu dengan-dengan nike dengah hal nike, angen ie pade jari osah. Terus ie pade beketuan lẽq Petrus dait rasul-rasul saq lainne, "Semeton-semeton, napi saq harus tiang pade piaq?" 38 Jawab Petrus, "Pade tobat lẽman dose-dosende. Dait side pade sopoq-sopoq harus tebaptis dalem pesẽngan Deside Isa Almasih, adẽq dose-dosende teampunin. Make side pade gen nerimaq paice Roh Suci lẽman Allah. 39 Sẽngaq saq tejanjiqang siq Allah, nike umaq side dait keturunande, dait umaq dengan-dengan saq araq lẽq taoq-taoq saq jaoq -- selapuq dengan saq temanikang siq Allah, Tuhante jari parek tipaq Ie." 40 Maraq nike Petrus jelasang lẽq ie pade. Dait siq luwẽq ucapan lain malik ie ngebẽng sopoq kesaksian dait ngebẽng nasẽhat, dait basene: "Serahang diriqde adẽq teselametang lẽman keturunan saq jahat niki." 41 Luwẽq dengan percaye lẽq napi saq gen tesampẽang siq Petrus, terus ie pade tebaptis. Make jumlah dengan percaye lẽq jelo nike beromboq malik telu iyu dengan. 42 Ie pade pacu-pacu berajah lẽman rasul-rasul dait tetep bekumpul bareng-bareng. Ie pade bekelor bareng-bareng dait bedo'e bareng-bareng. 43 Luwẽq gati keajaipan saq tepiaq siq rasul-rasul nike sehingge selapuq dengan takjub dait takut. 44 Dengan-dengan percaye nike selapuqne tetep besopoq dait napi saq ie pade ẽpẽang, ie pade kadu bareng-bareng. 45 Ie pade jual barang-barang dait selapuq dowẽn ie pade, terus bagi-bagiang kẽpẽngne lẽq antare ie pade selapuqne menurut keperluanne sopoq-sopoq. 46 Sebilang jelo ie pade tetep bekumpul lẽq Gedẽng Allah. Ie pade bekelor bareng-bareng, siq angen saq gembire dait tulus atẽ lẽq balẽ-balẽ ie pade. 47 Ie pade tetep memuji-muji Allah dait tedemenang siq selapuq dengan. Sebilang jelo jumlah ie pade tetep beromboq sẽngaq Junjungan Saq Mulie ngicanin tipaq ie pade dengan-dengan saq teselametang.

Acts 3

1 Lẽq sopoq jelo Petrus dait Yahya lumbar ojok Gedẽng Allah jam telu kebian, nike wayene dengan gen mulai bedo'e. 2 Lẽq derike, lẽq jebak saq tesebut, "Lawang Solah", araq sopoq dengan mame saq kẽpaq lẽman tebijeang. Sebilang jelo dengan nike tejauq ojok derike jari mekir lẽq dengan-dengan saq tame ojok Gedẽng Allah. 3 Sewaktu dengan nike serioq Petrus dait Yahya kenyeke tame ojok Gedẽng Allah, ie nunas sedekah lẽq ie pade. 4 Make Petrus dait Yahya perhatiang ie, beterus Petrus bebase, "Serioq andang tiang pade!" 5 Beterus dengan nike merhatiang ie pade, siq harepan gen mauq sedekah lẽman ie pade. 6 Laguq basen Petrus lẽq ie, "Tiang tetu-tetu ndẽq bedowẽ kẽpẽng. Laguq napi saq araq lẽq tiang nike gen tiang bẽng lẽq side: Siq pesẽngan Deside Isa Almasih dengan Nazaret nike, silaq lampaq!" 7 Terus Petrus tegel ime kanan dengan kẽpaq nike dait tulung ie ures. Langsung naẽn dengan nike dait mate naẽne jari kuat. 8 Terus ie nyelontak nganjeng, dait mulai lampaq ketoq-ketẽq. Beterus ie tame ojok Gedẽng Allah, sambil lampaq dait nyelontak-lontak dait memuji Allah. 9 Selapuq dengan serioq ie lampaq dait memuji-muji Allah. 10 Terus ie pade sadar bahwe ie tukang mekir saq biase tokol lẽq "Lawang Solah" lẽq Gedẽng Allah. Ie pade bengaq gati dait takjub serioq napi saq telaksane lẽq dengan nike. 11 Dengan nike tetep doang turut Petrus dait Yahya. Dait sewaktu ie pade dateng lẽq sesangkok saq tesebut "Sesangkok Sulaiman", selapuq dengan ngerimpun ie pade lantaran takjub. 12 Sewaktu Petrus serioq dengan-dengan nike, ie bebase lẽq ie pade, "Hai dengan-dengan Israel, kembẽq side pade bengaq lẽq hal niki? Kembẽq side pade tetep merhatiang tiang pade? Napi side pade paran dengan niki tao lampaq lantaran tiang pade bedowẽ kuase, atao lantaran tiang pade taat tipaq Allah? 13 Allahne Ibrahim, Ishak, Yakub, Allahne leluhurte, Allah nike sampun ngemulieang Hambe-Ne, Deside Isa. Deside Isa nike saq side pade serahang ojok penguase dait side pade lawan lẽq arepan Pilatus, sewaktu Pilatus gen bẽbasang Ie. 14 Laguq side pade nentang Ie Saq Suci dait Kenaq dait nuntut adẽq Pilatus bẽbasang sopoq dengan tukang nyematẽq tipaq side pade. 15 Side pade nyematẽq Ie, padahal setetune Ie sumber idup tipaq selapuq dengan. Dait Allah sampun ngidupang Ie malik lẽman ninggal. Tiang pade sampun nyaksiang mẽsaq hal nike. 16 Side pade sampun serioq dait nyaksiang napi saq telaksane lẽq dengan kẽpaq niki. Ie sampun jari kuat dait sẽhat malik sẽngaq ie percaye dalem pesẽngan Deside Isa dait kuase-Ne. Lantaran percaye lẽq Deside Isa make dengan niki bau sẽhat malik lẽq julun side pade selapuq. 17 Semeton-semeton senamian! Mangkin tiang nenaoq bahwe napi saq side pade dait pemimpin-pemimpinde laksaneang tipaq Deside Isa, nike side pade laksaneang sẽngaq side pade ndẽq nenaoq napi saq side pade kenyeke laksaneang. 18 Dait siq care nike telaksane ẽndah napi saq sampun temanikang siq Allah laẽq langan selapuq nabi-nabi-Ne, bahwe Almasih saq tejanjiqang nike harus menderite. 19 Keranaq nike, semeton-semeton senamian, pade tobat lẽman dose-dosende dait tulak tipaq Allah, adẽq Allah ngapus dose-dose side pade, 20 adẽq Tuhan datengang waktu kelepasan, dait ngutus Deside Isa, saq lẽman penembẽqne tetetepang tipaq side sebagẽ Almasih. 21 Almasih harus meneng lẽq sorge jangke Allah nulakang selapuq-lapuqne, maraq saq temanikang siq Allah langan nabi-nabi saq suci lẽq jaman laẽq. 22 Nabi Musa sampun bebase, 'Allah, Tuhande gen ngutus tipaq side sopoq nabi lẽman bangsende mẽsaq, maraq Ie ngutus tiang. Side harus dengah selapuq saq tesampẽang siq nabi nike tipaq side. 23 Dengan saq ndẽq perhatiang napi saq tesampẽang siq nabi nike, dengan nike gen tesingkirang lẽman dengan-dengan saq tehususang bagi Allah dait tebinaseang.' 24 Nabi-nabi saq sampun nyampẽang berite lẽman Allah, mulai lẽman nabi Samuel, dait nabi-nabi lainne saq dateng mudian, selapuqne beriteang mengenai jaman niki. 25 Janji-janji lẽman Allah saq tesampẽang siq nabi-nabi, nike umaq side pade. Dalem perjanjian saq Allah piaq kance leluhurde, Allah bemanik tipaq Ibrahim maraq niki, 'Lẽman keturunande Tiang gen ngebẽng berkah tipaq selapuq bangse lẽq gumi.' Perjanjian nike umaq side pade ẽndah. 26 Jari, umaq side penembẽqne Allah ngidupang Hambe-Ne dait ngutus Ie tipaq side, adẽq Ie ngicanin side pade berkah siq care miaq side pade sopoq-sopoq bebalik lẽman selapuq kejahatan side pade."

Acts 4

1 Lẽq waktu Petrus dait Yahya masih bebaos kance dengan-dengan nike, imam-imam kepale dait kepale pengawal Gedẽng Allah kance dengan-dengan Saduki dateng ojok Petrus dait Yahya. 2 Ie pade menggah gati sẽngaq Petrus dait Yahya bebase lẽq dengan-dengan bahwe Deside Isa sampun idup malik lẽman ninggal. Dait nike buktiang bahwe dengan ninggal gen idup malik. 3 Make ie pade bau kedue rasul nike beterus tamaqne ojok dalem bui. Dait lantaran sampun peteng, make Petrus dait Yahya tetahen lẽq derike jangke jemaqne. 4 Laguq dengan-dengan saq sampun dengah pengajahan rasul-rasul nike, luwẽq saq percaye. Make sayan luwẽq jumlah ie pade, jangke kire-kire lime iyu dengan. 5 Jemaqne tokoh-tokoh Mahkamah Agame, pemimpin-pemimpin Yahudi dait ahli-ahli Taurat bekumpul lẽq Yerusalem. 6 Ie pade bedait kance Imam Agung Hanas, Kayapas, Yahya, Aleksander, dait selapuq saq termasuk keluarge Imam Agung nike. 7 Petrus dait Yahya tejauq ngadep ie pade, terus ie pade beketuan, "Berembẽ entane side pade nyelahang dengan kẽpaq nike? Kadu kekuatan napi atao kadu kekuasean lẽman sai side pade laksaneang nike?" 8 Petrus, saq tekuasein siq Roh Suci, bejawab, "Bapaq-bapaq, pemimpin-pemimpin bangse dait pemimpin-pemimpin Yahudi! 9 Tiang pade teadilin jelo niki lantaran ngelaksaneang hal saq kenaq jari nulung sopoq dengan kẽpaq, dait lantaran Bapaq-bapaq mẽlẽ nenaoq berembẽ dengan nike teselahang. 10 Nah, Bapaq-bapaq senamian harus nenaoq, selapuq bangse Israel ẽndah harus nenaoq bahwe dengan niki nganjeng mangkin niki siq awak saq sẽhat lantaran teselahang dalem pesẽngan Deside Isa, dengan Nazaret nike. Bapaq-bapaq sampun pakuq Deside Isa lẽq kayuq salib, laguq Allah sampun ngidupang Ie malik. 11 Deside Isa niki saq temaksut siq ayat dalem Kitab Suci, 'Batu saq tetetẽh siq side tukang-tukang bangunan, sampun jari batu saq paling utame.' 12 Cume langan Deside Isa doang dengan teselametang. Sẽngaq lẽq seantẽro dunie lẽq antare manusie ndẽq araq sopoq dengan lain juaq saq mauq kekuasean lẽman Allah jari nyelametang ite." 13 Anggote-anggote Mahkamah nike bengaq serioq ketabahan Petrus dait Yahya, sẽngaq ie pade nenaoq bahwe kedue rasul nike dengan-dengan biase saq pendidikanne rendah. Beterus ie pade sadar bahwe kedue rasul nike dengan-dengan saq ngiring Deside Isa. 14 Laguq ie pade ndẽq bau ngucapang napi-napi, sẽngaq dengan saq sampun teselahang nike araq nganjeng lẽq derike lẽq julun ie pade bareng kance Petrus dait Yahya. 15 Make ie pade suruq kedue rasul nike sugul lẽman ruang sidang, beterus ie pade berunding. 16 Ie pade bebase, "Napi saq harus ite piaq tipaq dengan-dengan niki? Selapuq dengan saq ndot lẽq Yerusalem sampun nenaoq bahwe keajaipan saq luar biase niki, telaksaneang siq deduaqne. Ite ndẽq bau tilas nike. 17 Laguq adẽq hal nike ndaq sayan nyebar lẽq antare dengan-dengan, silaq ite ancem ie pade adẽq ndẽq kanggo malik bebaos tipaq sopoq dengan juaq siq pesẽngan Deside Isa." 18 Make ie pade ngempoh kedue rasul nike tame malik, dait badaqang bahwe ie pade ndẽq kanggo gati nyebut malik atao ngajahang siq pesẽngan Deside Isa. 19 Laguq jawab Petrus dait Yahya, "Silaq pikir mẽsaq napi saq kenaq lẽq arepan Allah: turut prẽntah Bapaq-bapaq atao turut prẽntah Allah. 20 Sẽngaq tiang pade ndẽq tao engkah ngeraos mengenai napi saq sampun tiang pade serioq dait dengah mẽsaq." 21 Anggote-anggote Mahkamah nike ndẽq mauq sopoq alasan jari ngukum Petrus dait Yahya. Jari ie pade ngancem kedue rasul nike, beterus deduaqne telepas, sẽngaq selapuq dengan mulieang Allah lantaran keajaipan nike. 22 Dengan saq teselahang siq muqjizat nike sampun petang dase taun lebih umurne. 23 Sesampun Petrus dait Yahya tebẽbasang, ie pade tulak ojok batur-batur ie pade dait nyeriteang selapuq saq tesampẽang siq imam-imam kepale dait pemimpin-pemimpin Yahudi nike lẽq ie pade. 24 Sesampun batur-batur ie pade dengahang hal nike, siq sopog angen ie pade bedo'e tipaq Allah. Ie pade matur, "Tuhan, Deside saq cipteang langit dait gumi, segare dait selapuq isine. 25 Siq Roh Suci, Deside sampun bemanik langan leluhur tiang pade, Daud, nike hambe Deside; Deside bemanik, 'Kembẽq bangse-bangse sili; kembẽq suku-suku bangse miaq rencane saq ndẽq araq manpaatne? 26 Raje-raje dunie besiep-siep gen perang, dait pare pemimpin besopoq ngelawan Tuhan dait ngelawan Almasih-Ne.' 27 Sẽngaq mule Herodes dait Pontius Pilatus sampun ngaraqang sangkep kance dengan bangse-bangse lain dait kance dengan-dengan Israel lẽq kote niki. Ie pade bedait jari ngelawan Deside Isa, Hambe Deside saq suci nike, saq sampun Deside sahang jari Almasih. 28 Ie pade besopoq jari ngelaksaneang selapuq hal, saq Deside sampun tentuang bejulu bahwe nike gen telaksane. Dait Deside tentuang nike siq kekuasean dait pekayunan Deside mẽsaq. 29 Mangkin, Tuhan, cingakin berembẽ ie pade ngancem tiang pade. Dait ijinang tiang pade, hambe-hambe Deside niki, nẽnten takut beriteang Manik Deside nike. 30 Tunas adẽq tiang pade bau nyelahang dengan sakit dait miaq keajaipan-keajaipan dait tande-tande siq pesẽngan Deside Isa, Hambe Deside saq suci nike." 31 Sesampun ie pade inggas bedo'e, taoq ie pade bekumpul nike inggur. Ie pade selapuq tekuasein siq Roh Suci, dait mulai bani ngeraos mengenai Manik Allah. 32 Selapuq dengan saq percaye nike idup sopoq angen dait sopoq jiwe. Ndẽq araq sopoq dengan juaq lẽman ie pade anggep bahwe napi saq ie ẽpẽang jari dowẽne mẽsaq. Napi juaq saq araq lẽq ie pade, ie pade kadu bareng-bareng. 33 Siq kuase saq belẽq, rasul-rasul nike ngebẽng kesaksian bahwe Junjungan Saq Mulie Deside Isa sampun idup malik. Make ie pade idup dalem rahmat saq belimpah-limpah. 34 Dait ndẽq araq sopoq dengan juaq lẽq antare ie pade saq kekurangan napi-napi. Sẽngaq ie pade saq bedowẽ tanaq atao balẽ, jual tanaq atao balẽ ie pade; beterus kẽpẽng lẽman hasil jual tanaq atao balẽ nike ie pade jauq 35 dait ie pade serahang ojok rasul-rasul. Beterus kẽpẽng nike tebagi-bagiang tipaq sebilang dengan saq merluang. 36 Maraq nike ẽndah Yusup. Ie jual tanaqne, beterus kẽpẽngne ie jauq dait serahangne ojok rasul-rasul. Yusup nike sopoq dengan keturunan Lewi lẽman Siprus; ie ẽndah tesebut siq rasul-rasul nike Barnabas (artine Penghibur).

Acts 5

1 Laguq araq sopoq dengan mame aranne Ananias. Ie kance seninene aranne Sapira, jual ẽndah tanaq saq jari dowẽn ie pade. 2 Kẽpẽng lẽman penjualan nike separone ie adẽqang umaq diriqne mẽsaq dait saq lain ie serahang tipaq rasul-rasul. Ie ngelaksaneang nike tetaoq siq seninene. 3 Make Petrus bebase lẽq ie, "Ananias, kembẽq side alurang Belis nguasein atẽnde, jangke side bani beduste lẽq Roh Suci, secare tedoq-tedoq nahen separo kẽpẽng hasil jual tanaq nike umaq diriqde mẽsaq? 4 Tanaq nike jari dowẽn side sendẽqman side jual. Dait sesampun tanaq nike tejual, kẽpẽngne tetep jari dowẽnde ẽndah. Jari kembẽq araq maksut dalem angende jari miaq saq maraq nike? Side ndẽq beduste lẽq manusie, laguq Allah!" 5 Sesampun Ananias dengah ucapan-ucapan nike, ie rebaq, beterus ninggal. Selapuq dengan saq dengahang peristiwe nike jari takut. 6 Make dengan-dengan bajang dateng bungkus mayit Ananias, beterus jauqne sugul jari tekubur. 7 Kire-kire telu jam sesampun nike, seninene tame. Ie ndẽq nenaoq napi saq sampun telaksane. 8 Basen Petrus lẽq ie, "Silaq badaq tiang, napi semenẽ ajine tanaq saq tejual nike?" "Tetu, nike ajine," jawab senine Ananias. 9 Terus Petrus bebase lẽq ie, "Kembẽq side kance semamende sepakat jari cobe Roh Tuhan? Dengahang! Dengan-dengan saq nguburang semamende sampun tulak. Ie pade ẽndah gen jauq side sugul." 10 Langsung waktu nike ẽndah senine Ananias rebaq dait ninggal lẽq julun Petrus. Dait sewaktu dengan-dengan bajang nike tame, daitne ie sampun ninggal. Beterus ie pade jauq mayitne sugul dait tekubur lẽq dẽkẽt semamene. 11 Make selapuq dengan-dengan percaye nike dait dengan-dengan lainne, saq dengah mengenai peristiwe nike jari takut. 12 Lantaran pelayanan rasul-rasul make luwẽq keajaipan dait hal-hal saq luar biase telaksane lẽq antare masyarakat. Siq sopoq angen selapuq dengan percaye bekumpul lẽq Sesangkok Sulaiman lẽq Gedẽng Allah. 13 Dait dengan lain ndẽq araq saq bani dateng bekumpul kance dengan-dengan percaye nike. Laguq dengan-dengan percaye nike tehormatin gati siq masyarakat. 14 Dait sayan ngonẽq sayan luwẽq dengan-dengan saq percaye lẽq Junjungan Saq Mulie -- saq mame-mame dait saq nine. 15 Malahan ie pade jauq dengan-dengan sakit tetoloq lẽq atas lasah atao tipah, terus tejauq ojok rurung, sendẽq-ndẽqne adẽq ie pade bau kene siq lingonne Petrus lamun ie liwat lẽq derike. 16 Luwẽq gati dengan-dengan dateng lẽman kote-kote sekiter Yerusalem. Ie pade jauq dengan-dengan saq sakit dait saq tekuasein siq roh-roh jahat. Dait dengan-dengan nike teselahang selapuqne. 17 Ahirne Imam Agung dait selapuq pengiring-pengiringne, golongan dengan-dengan Saduki, mulai ngelaksaneang niatne lantaran ie pade talon atẽ. 18 Rasul-rasul nike tebau, terus tetamaq ojok dalem bui kote. 19 Laguq kelemne, sopoq malaẽkat Tuhan bukaq lawang-lawang bui, terus jauq rasul-rasul nike sugul. Malaẽkat nike bebase lẽq rasul-rasul nike, 20 "Silaq lumbar ojok Gedẽng Allah dait sampẽang lẽq dengan-dengan mengenai idup saq baru niki." 21 Beterus rasul-rasul nike patiq pesen malaẽkat nike. Masih aru gati ie pade lumbar ojok Gedẽng Allah, dait mulai ngajahang lẽq derike. Lẽq waktu nike Imam Agung dait pare pengiringne dateng, terus ngaraqang sidang mahkamah kance pare pemimpin Yahudi. Beterus ie pade ngutus dengan lumbar bait rasul-rasul nike lẽman bui adẽqne tejauq ngadep ie pade. 22 Laguq sewaktu dengan-dengan saq teutus nike dateng lẽq bui, ie pade ndẽq ndait rasul-rasul nike lẽq derike. Jari ie pade tulak, terus ngelaporang hal nike lẽq mahkamah. Ie pade matur, 23 "Sewaktu dateng bui, tiang pade ndait lawang bui nike telenting solah-solah, dait pengawal-pengawal kenyeke bejage lẽq lawang. Laguq waktu tiang pade bukaq lawang nike, tiang pade ndẽq ndait sopoq dengan juaq lẽq dalemne." 24 Sewaktu prewire pengawal Gedẽng Allah dait imam-imam kepale pireng laporan nike, ie pade bingung mengenai rasul-rasul nike, dait takut napi saq gen telaksane. 25 Beterus dateng sopoq dengan mame jauq berite niki, "Pade dengahang! Dengan-dengan saq bapaq-bapaq tahen lẽq bui nike mangkin kenyekene ngajahang dengan luwẽq lẽq Gedẽng Allah!" 26 Beterus prewire pengawal Gedẽng Allah nike bareng kance pengawal-pengawalne lumbar bait rasul-rasul nike malik. Laguq ie pade ndẽq kadu kekerasan, sẽngaq ie pade takut lẽq dengan luwẽq; ndaq-ndaq laun ie pade tepelẽwas kadu batu siq dengan luwẽq nike. 27 Rasul-rasul nike tejauq ngadep mahkamah. Beterus ie pade teperiksaq siq Imam Agung. 28 Ie bebase, "Tiang pade secare teges sampun balaq side pade adẽq ndaq ngajahang dengan kadu pesẽngan nike. Laguq mangkin silaq serioq napi saq side laksaneang! Side pade nyebarang pengajahande nike lẽq selapuq wilayah Yerusalem, dait malahan side pade mẽlẽ nuduh bahwe tiang pade saq jari penyebap Dengan nike ninggal." 29 Jawab Petrus dait rasul-rasul saq lain, "Tiang pade harus turut Allah dait ndẽqne turut manusie. 30 Deside Isa, saq side pade pakuq lẽq kayuq salib, sampun teidupang malik lẽman ninggal siq Allah leluhurte. 31 Dait Allah sampun ngicanin Ie kedudukan dait kekuasean saq tinggi sebagẽ Pemimpin dait Juruselamet; adẽq bangse Israel tebẽng kesempatan jari betobat lẽman dose-dosene dait mauq pengampunan. 32 Tiang pade saksi-saksi mengenai selapuqne nike -- tiang pade dait Roh Suci ẽndah saq teicanin siq Allah tipaq dengan-dengan saq turut prẽntah-Ne." 33 Sewaktu anggote-anggote Mahkamah Agame pirengang ucapan rasul nike, ie pade menggah gati, dait ie pade sepakat gen nyematẽq rasul-rasul nike. 34 Laguq lẽq antare anggote-anggote mahkamah nike araq sopoq dengan Parisi aranne Gamaliel. Ie ahli Taurat saq tehormatin gati siq selapuq dengan. Ie nganjeng terus suruqne dengan jauq sugul rasul-rasul nike semendaq. 35 Beterus ie bebase lẽq Mahkamah Agame nike, "Side pade dengan-dengan Israel! Silaq pikir bagus-bagus napi saq side pade kayun laksaneang lẽq dengan-dengan niki. 36 Sẽngaq laẽq sampun araq Teudas, saq nganggep diriqne dengan hẽbat, jangke kire-kire samas dengan saq jari pengiringne. Laguq ie tematẽq dait selapuq pengiringne ndẽq keruan aningne, dait kegiatanne musnah. 37 Sesampun nike, sewaktu araq sẽnsus, muncul ẽndah Yudas, dengan lẽman Galilea. Lantaran pengaruhne, luwẽq ẽndah dengan saq turut ie. Laguq ie ẽndah tematẽq, dait selapuq pengiringne ndẽq keruan aningne. 38 Jari mangkin lẽman peristiwe niki, tiang bẽng nasẽhat: Sampunang laksaneang napi-napi tipaq dengan-dengan niki, alurang ie pade. Sẽngaq lamun pengajahan dait kegiatan ie pade asalne lẽman manusie, make pengajahan dait kegiatan nike gen musnah. 39 Laguq lamun nike asalne lẽman Allah, side pade ndẽq gen bau ngalahang ie pade. Malahan sang gen nyate bahwe side pade ngelawan Allah." Nasẽhat Gamaliel nike teterimaq siq mahkamah. 40 Make rasul-rasul nike tempoh, beterus tepecut dait tebalaq ngajahang malik mengenai Deside Isa. Sesampun nike, baruq ie pade tebẽbasang. 41 Gembire gati angen rasul-rasul nike bilin Mahkamah Agame nike sẽngaq ie pade sampun teanggep patut siq Allah jari nerimaq hinean lantaran pesẽngan Deside Isa. 42 Dait sebilang jelo lẽq Gedẽng Allah dait lẽq balẽ-balẽ dengan, ie pade tetep ngajahang dait beriteang Kabar Solah mengenai Deside Isa, bahwe Ie Almasih.

Acts 6

1 Pengiring-pengiring Deside Isa sayan ngonẽq sayan luwẽq. Lẽq waktu nike dengan-dengan Yahudi saq kadu base Yunani, jari ndẽq demen lẽq dengan-dengan Yahudi asli. Saq kadu base Yunani nike bebase, "Dengan-dengan nine lẽq kalangan tiang pade saq sampun bebalu ndẽq mauq bantuan keperluan sebilang jelo saq tebagi-bagiang tipaq dengan-dengan." 2 Keranaq nike, kedue olas rasul-rasul nike ngumpulang selapuq pengiring dait bebase lẽq ie pade, "Ndẽqne bagus lamun tiang pade engkah nyampẽang Manik Allah, lantaran ngurus masalah-masalah keloran. 3 Jari, bagusan side pade pilẽq lẽq antare side pituq dengan saq kenaq perbuatanne dait tekuasein siq Roh Suci dait bijaksane, saq bau tiang pade tugasang ngurus masalah-masalah niki; 4 sẽngaq tiang pade mẽlẽ bedo'e dait beriteang Manik Allah doang." 5 Usul nike teterimaq bagus siq selapuq jemaah, terus ie pade pilẽq Stepanus, sopoq dengan saq beriman dait penoq siq Roh Suci, dait Pilipus, Prokorus, Nikanor, Timon, Parmenas, dait Nikolaus, sopoq dengan penganut agame Yahudi lẽman Antiokia. 6 Kepituq dengan nike teusulang ojok rasul-rasul, terus rasul-rasul nike bedo'e dait tunasang berkah Tuhan umaq ie pade. 7 Siq care nike Manik Allah sayan nyebar dait pengiring-pengiring Deside Isa lẽq Yerusalem ẽndah sayan luwẽq. Dait luwẽq ẽndah imam-imam saq percaye lẽq Deside Isa. 8 Stepanus sanget teberkahin siq Allah, sehingge ie miaq luwẽq keajaipan dait hal-hal luar biase lẽq antare masyarakat. 9 Laguq araq dengan-dengan saq nentang ie; ie pade anggote-anggote balẽ ibadah saq tesebut Balẽ Ibadah Dengan-dengan Bẽbas. Anggote-anggote balẽ ibadah nike dengan-dengan Yahudi lẽman Kirene dait Aleksandria. Ie pade kance dengan-dengan Yahudi lẽman Kilikia dait Asia bedebat kance Stepanus. 10 Laguq ie pade ndẽq sanggup ngelawan hikmatne dait Roh Allah saq bimbing ie bebaos. 11 Keranaq nike ie hasut pire dengan adẽqne mẽlẽ bebase, "Tiang pade dengah dengan nike menghine nabi Musa dait Allah!" 12 Maraq nike entan ie pade hasut dengan-dengan, dait pemimpin-pemimpin Yahudi dait ahli-ahli Taurat. Terus ie pade lumbar bau Stepanus, dait jauqne ngadep Mahkamah Agame. 13 Dait ie pade ajuang ẽndah saksi-saksi saq ngebẽng keterangan-keterangan saq ndẽq kenaq mengenai Stepanus. Saksi-saksi nike bebase, "Dengan niki terus-terusan menghine taoq saq suci niki dait menghine prẽntah-prẽntah Allah saq tesampẽang siq nabi Musa. 14 Sampun tiang pade dengah ie bebase, bahwe Deside Isa lẽman Nazaret nike gen ngeruntuhang taoq niki, terus ngerobah selapuq adat-istiadat saq teturunang siq Musa tipaq ite!" 15 Selapuq dengan saq araq lẽq dalem sidang Mahkamah Agame nike merhatiang Stepanus. Ie pade serioq muen Stepanus ruene maraq muen malaẽkat.

Acts 7

1 Imam Agung beketuan lẽq Stepanus, "Napi selapuq saq tesampẽang siq dengan nike kenaq?" 2 Jawab Stepanus, "Semeton-semeton dait bapaq-bapaq! Dengahang tiang! Sendẽqman Ibrahim, leluhurte nike ngalih ojok Haran, sewaktu ie masih ndot lẽq Mesopotamia, Allah saq Mahemulie rauh tipaq ie 3 dait bemanik, 'Bilin negerinde dait selapuq kadang jarinde. Lumbar ojok negeri saq gen Tiang petitoqang lẽq side.' 4 Make Ibrahim bilin negeri Kasdim, terus ngalih ojok Haran. Sesampun bapaqne Ibrahim ninggal, Allah manikang Ibrahim ngalih malik ojok negeri niki, saq semeton-semeton dait bapaq-bapaq taoqin mangkin niki. 5 Lẽq waktu nike ndẽq araq separone lẽman negeri niki saq Allah icanin tipaq Ibrahim jari dowẽne, timaqne sejengkak, ndẽqne teicanin tipaq ie. Laguq Allah bejanji bahwe Ie gen ngicanin tipaq Ibrahim jari dowẽne dait jari dowẽ keturunanne. Waktu nike Ibrahim ndẽqman bedowẽ bije. 6 Laguq niki saq temanikang Allah tipaq ie, 'Keturunande gen ndot sebagẽ dengan pendateng lẽq negeri dengan lain. Dengan-dengan negeri nike gen jariang ie pade panjak dait perlakuang ie pade secare kejem samas taun ngonẽqne. 7 Laguq Tiang gen hukum bangse saq jariang ie pade panjakne, dait ie pade gen sugul lẽman negeri nike dait gen nyembah Tiang lẽq taoq niki.' 8 Beterus Allah ngicanin tipaq ie perjanjian sunat. Make sesampun Ishak, bije Ibrahim tebijeang, Ibrahim sunat ie sewaktu ie beumur baluq jelo. Beterus Ishak ẽndah sunat bijene, aranne Yakub. Dait Yakub ẽndah sunat kedue olas bijene, saq jari bapaq-bapaq leluhur bangse Yahudi. 9 Bapaq-bapaq leluhurte nike talon atẽ lẽq Yusup, sehingge ie pade sepakat jual Yusup jari hambe lẽq Mesir. Laguq Allah araq bareng-bareng kance ie, 10 Allah bẽbasang ie lẽman selapuq kesusahanne dait ngicanin ie hikmat dait kebijaksanean sewaktu ie ngadep Piraun, raje Mesir, sehingge Piraun jariang ie gubernur negeri Mesir dait penguase istane Piraun. 11 Terus araq bahle kelapahan saq belẽq lẽq selapuq negeri Mesir dait Kanaan sehingge dengan menderite gati. Leluhurte ndẽqne bau mauq keloran. 12 Make sewaktu Yakub dengah araq gandum lẽq Mesir, ie suruq bije-bijene, leluhurte, lumbar ojok derike. Nike saq penembẽq. 13 Sewaktu ie pade lumbar saq kedue kaline, Yusup bebadaq tipaq semeton-semetonne nike bahwe ie setetune Yusup. Waktu nike baruq tewikanang siq raje Mesir mengenai keluarge Yusup. 14 Beterus Yusup ngirim berite tipaq Yakub, bapaqne jari tunas ie kance selapuq keluargene ngalih ojok Mesir -- selapuqne araq pituq pulu lime dengan. 15 Sesampun nike Yakub ngalih ojok Mesir dait lẽq derike ie kance selapuq leluhurte ninggal. 16 Beterus jenazah ie pade tejauq tulak ojok Sikem dait temakamang lẽq makam saq sampun tebayah kadu kẽpẽng siq Ibrahim lẽman suku bangse Hemor lẽq Sikem. 17 Sewaktu gen dateng waktune Allah nepatin janji-Ne tipaq Ibrahim, bangsente lẽq Mesir sampun sayan luwẽq. 18 Ahirne sopoq raje lain saq ndẽq kenal Yusup, mrẽntah lẽq Mesir. 19 Licik gati entan raje nike tipaq bangsente dait kejem lẽq leluhurte. Ie paksaq ie pade adẽqne netẽh bebẽaq-bebẽaq saq baruq teanakang, adẽqne karẽ-arẽ dait matẽ. 20 Lẽq waktu nike Musa tebijeang; ie bebẽaq saq solah gati. Telu bulan ngonẽqne ie tepeliharaq lẽq balẽ bapaqne, 21 dait sesampun ie tetetẽh, putri Piraun bait ie, beterus ie tepeliharaq maraq bijene mẽsaq. 22 Selapuq ilmu bangse Mesir teajahang tipaq ie dait ie jari dengan saq bekuase gati dalem ucapan dait perbuatan. 23 Waktu Musa beumur petang dase taun, ie beniat lumbar serioq keadaan bangsene dengan Israel. 24 Beterus serioqne sopoq dengan lẽq antare bangse Israel teaniaye siq sopoq dengan Mesir; terus ie bẽle dengan saq teaniaye nike, dait matẽq dengan Mesir nike. 25 Musa paran bangsene gen ngerti bahwe Allah ngutus ie jari bẽbasang ie pade. Laguq ie pade ndẽq ngerti. 26 Jemaqne, ie serioq ẽndah due dengan Israel kenyeke besiaq, terus ie berusahe damẽang ie pade. Basene, 'Side pade niki besemeton kembẽq side pade besiaq?' 27 Laguq dengan saq ngempuk baturne nike jelek Musa ojok sedi dait bebase, 28 'Sai saq ngangkat side jari pemimpin dait hakim tiang pade? Napi side mẽlẽ matẽq tiang ẽndah maraq side matẽq dengan Mesir nike rubin?' 29 Waktu Musa pirengang napi saq teucapang siq dengan nike, ie pelai lẽman Mesir terus ndot lẽq negeri Midian. Lẽq derike ie mauq due bije. 30 Petang dase taun sesampun nike sopoq malaẽkat rauh tipaq Musa lẽq padang gurun dẽkẽt Gunung Sinai. Malaẽkat nike rauh dalem api lẽq bebenes saq kenyeke nyale. 31 Musa bengaq cingakin hal nike, make ie dateng ngerapetin taoq nike adẽqne wikanang napi setetune nike. Terus pirengangne suare Tuhan bemanik, 32 'Tiang Allah leluhurde, Tiang Allahne Ibrahim, Ishak dait Yakub.' Musa jari ngijik siq takutne, terus ndẽqne bani malik cingakin bebenes nike. 33 Beterus Tuhan bemanik malik, 'Lepas sandel saq side kadu nike, sẽngaq tanaq saq taoq side nganjeng nike tanaq saq suci. 34 Tiang sampun serioq dait merhatiang paitne penderitean umat Tiang, lẽq Mesir. Tiang sampun dengah keluhan, dait Tiang gen turun bẽbasang ie pade. Mangkin, silaq! Tiang gen ngutus side tulak ojok Mesir.' 35 Musa niki ie saq ndẽq teakuq siq bangse Israel dait saq tetolaq siq ucapan niki, 'Sai saq ngangkat side jari pemimpin dait hakim tiang pade?' Laguq malahan ie saq teutus siq Allah jari pemimpin dait penyelamat, langan malaẽkat saq rauh tipaq ie lẽq tengaq bebenes saq nyale nike. 36 Musa nike saq mimpin bangse Israel sugul lẽman Mesir siq care piaq keajaipan-keajaipan dait hal-hal saq luar biase lẽq Mesir, lẽq Segare Bẽaq dait lẽq padang gurun petang dase taun ngonẽqne. 37 Musa niki ẽndah saq bebase lẽq bangse Israel bahwe, 'Allah gen ngutus sopoq nabi maraq tiang niki tipaq side pade lẽman bangsende mẽsaq.' 38 Musa nike saq araq lẽq tengaq-tengaq bangse Israel lẽq padang gurun, jari perantare tipaq malaẽkat saq bemanik lẽq ie lẽq Gunung Sinai kance leluhurte. Ie saq nerimaq lẽman Allah manik saq idup jari tesampẽang tipaq ite. 39 Timaq maraq nike leluhurte nẽnten kayun taat lẽq ie. Ie pade nolaq Musa dait ie pade melẽt tulak ojok Mesir. 40 Ie pade bebase lẽq Harun, 'Piaqang tiang pade dẽwe-dẽwe, adẽq dẽwe-dẽwe nike mimpin tiang pade. Sẽngaq tiang pade ndẽq nenaoq malik napi saq nimpe Musa, saq pimpin tiang pade sugul lẽman Mesir!' 41 Terus lẽq waktu nike ie pade miaq sopoq tetato anak sampi, beterus ie pade ngaturang kurban tipaq tetato nike dait ngaraqang gawẽ jari nyembah barang saq ie pade piaq mẽsaq. 42 Make Allah bilin ie pade dait menengang ie pade nyembah bintang-bintang lẽq langit. Nike pade maraq saq tetulis lẽq dalem kitab nabi-nabi. Maraq niki, 'Hai dengan-dengan Israel! Ndẽqne umaq Tiang side nyembelẽh dait ngurbanang binatang sengonẽq petang dase taun lẽq padang gurun. 43 Kẽmah berhale Molok saq side jauq-jauq bareng-bareng kance tetato bintang berhalende, Repan; nike tetato saq side piaq jari tesembah. Keranaq nike Tiang gen tetẽh side jangke dateng itoqan, lẽq negeri Babel.' 44 Kẽmah taoq Allah rauh tipaq manusie araq lẽq leluhurte lẽq padang gurun. Kẽmah nike tepiaq siq prẽntah lẽman Allah tipaq Musa dait menurut conto saq tepetitoqang siq Allah tipaq ie. 45 Beterus kẽmah nike tejauq siq leluhurte sewaktu ie pade bareng kance Yusak lumbar ngerebut negeri niki lẽman kekuasean bangse-bangse saq tetundung siq Allah lẽq julun ie pade. Kẽmah nike araq lẽq derike jangke dateng jaman Daud. 46 Daud nyenengang Allah, dait tunas lẽq Allah adẽqne teijinang miaq sopoq gedẽng umaq Allah saq tesembah siq Yakub nike. 47 Laguq Nabi Sulaiman saq piaq gedẽng umaq Allah. 48 Laguq Allah saq Maheagung nẽnten meneng lẽq dalem gedẽng saq tepiaq siq manusie; maraq saq tesampẽang siq nabi, 49 'Langit nike tahte Tiang, dait gumi lamak naẽn Tiang. Gedẽng napi gen side piaqang Tiang? Lẽq mbẽ taoq Tiang mentelah? Maraq nike manik Tuhan. 50 Tekan Tiang mẽsaq saq cipteang selapuqne?' maraq nike Manik Allah. 51 Hai dengan-dengan saq pagah, saq keras atẽ dait kedok, side tetep nentang Roh Suci, pade maraq leluhurde, maraq nike ẽndah side. 52 Napi araq nabi saq ndẽq teaniaye siq leluhurde? Ie pade nyematẽq utusan-utusan lẽman Allah saq laẽq sampun nyampẽang bahwe Dengan Kenaq lẽq arepan Allah nike gen rauh. Terus mangkin side pade matẽq dait behianat lẽq Ie. 53 Malaẽkat-malaẽkat sampun nyampẽang Hukum Taurat tipaq side pade, laguq side pade ndẽq mẽlẽ taat lẽq hukum nike!" 54 Sesampun anggote-anggote Mahkamah Agame nike pirengang selapuqne saq tesampẽang siq Stepanus nike, ie pade jari sakit angen dait gedek gati lẽq ie. 55 Laguq Stepanus saq tekuasein siq Roh Suci, serioq andang langit. Ie serioq kemuliean Allah dait Deside Isa ngadeg lẽq sedi kanan Allah. 56 Pade serioq basen Stepanus, "Tiang serioq sorge kebukaq dait Bije Manusie nganjeng lẽq sedi kanan Allah!" 57 Anggote-anggote mahkamah nike nyumpel kentokne sambil nyurak-nyurak, terus beriuk nyerang Stepanus. 58 Ie pade oros Stepanus sugul ojok luah kote, beterus pelẽwasne kadu batu. Saksi-saksi noloq jubah ie pade lẽq julun naẽn sopoq terune aranne Saulus. 59 Sewaktu ie pade pelẽwas Stepanus, Stepanus bekuih, "Junjungan Saq Mulie Deside Isa, terimaq roh tiang!" 60 Terus ie sujut dait bekuih siq suare saq belẽq, "Junjungan Saq Mulie, sampunang dose niki tetanggungang tipaq ie pade!" Sesampun bebase maraq nike, ie ninggal.

Acts 8

1 Dait Saulus ẽndah seneng Stepanus tematẽq. Jelo nike ẽndah jemaah lẽq Yerusalem mulai teaniaye, sehingge ie pade selapuq, bepencar-pencar ojok selapuq daẽrah Yudea dait Samaria kecuali rasul-rasul. 2 Dengan-dengan saq takut tipaq Allah nguburang Stepanus dait nangis ẽroq asẽq. 3 Laguq Saulus terus doang berusahe nganiaye jemaah. Ie lumbar lẽman balẽ saq sopoq ojok balẽ saq lainne, dait orosne sugul dengan-dengan beriman, terus tamaqne ojok dalem bui. 4 Dengan-dengan percaye saq sampun bepencar nike beriteang Kabar Solah lẽman Allah nike ojok embẽ-embẽ. 5 Pilipus lumbar ojok sopoq kote lẽq Samaria dait beriteang tipaq dengan-dengan lẽq derike mengenai Almasih saq tejanjiqang siq Allah. 6 Waktu dengan-dengan dengah Pilipus bebaos dait ie pade serioq keajaipan-keajaipan saq ie piaq, luwẽq lẽq antare ie pade saq perhatiang napi saq tesampẽang siq Pilipus. 7 Sẽngaq roh-roh jahat sampun sugul sambil nyurak-nyurak lẽman dengan luwẽq saq tekuasein siq roh jahat. Dengan-dengan kẽpaq dait dẽmpang ẽndah luwẽq saq teselahang. 8 Make dengan-dengan lẽq kote nike cemoh gati. 9 Lẽq kote nike araq sopoq dengan aranne Simon, saq lẽman laẽq miaq dengan-dengan Samaria takjub siq ilmu sẽhẽrne. Ie ngaku diriqne bahwe ie dengan saq luar biase. 10 Make selapuq dengan lẽq kote nike lẽman macem-macem golongan masyarakat sanget merhatiang ie. Ie pade bebase, "Dengan niki kuase lẽman Allah saq kesohor saq tesebut 'Kuase Belẽq' nike." 11 Sampun ngonẽq gati ie miaq ie pade takjub siq kekuatan sẽhẽrne, sehingge ie pade turut ie. 12 Laguq Pilipus beriteang tipaq ie pade Kabar Solah mengenai Kerajaan Allah dait mengenai pesẽngan Deside Isa Almasih. Make ie pade percaye lẽq berite saq tesampẽang siq Pilipus, terus ie pade tebaptis dengan-dengan mame dait dengan nine. 13 Simon mẽsaq ẽndah percaye. Dait sesampun tebaptis, ie tetep turut Pilipus. Keajaipan-keajaipan saq telaksane miaq Simon jari bengaq. 14 Rasul-rasul lẽq Yerusalem mirengang bahwe dengan-dengan Samaria sampun nerimaq Manik Allah. Keranaq nike ie pade ngutus Petrus dait Yahya ojok derike. 15 Waktu Petrus dait Yahya nike dateng, ie pade do'eang dengan-dengan Samaria nike adẽq ie pade mauq Roh Suci, 16 sẽngaq lẽq waktu nike lẽq antare ie pade ndẽqman araq sopoq dengan juaq saq nerimaq Roh Suci; ie pade baruq tebaptis dalem pesẽngan Junjungan Saq Mulie Deside Isa doang. 17 Terus Petrus dait Yahya noloq ime ie pade lẽq atas dengan-dengan Samaria nike; make ie pade nerimaq Roh Suci. 18 Simon serioq bahwe lantaran ime rasul-rasul tetoloq lẽq atas dengan-dengan nike, Roh Allah teicanin tipaq ie pade. Keranaq nike Simon jauq kẽpẽng tipaq Petrus dait Yahya, 19 terus bebase, "Icanin ẽndah tipaq tiang kuase nike adẽq lamun ime tiang tetoloq lẽq sai juaq, dengan nike gen nerimaq Roh Suci." 20 Laguq jawab Petrus, "Celake side dait kẽpẽngde! Side paran paice Allah bau tebeli siq kẽpẽng? 21 Side ndẽq bedowẽ bagian dalem pegawẽan tiang pade, sẽngaq atẽn side ndẽq lomboq lẽq arepan Allah. 22 Jari, pade tobat lẽman kejahatande niki dait bedo'e tipaq Tuhan semoge Ie ngampunin niat atẽnde niki. 23 Sẽngaq tiang taoq side penoq siq talon atẽ dait dose lẽq dalem atẽnde." 24 Beterus Simon bebase, "Tulung tunasang tipaq Tuhan adẽq ndẽq sopoq juaq lẽman saq side pade ucapang nike telaksane lẽq tiang." 25 Sesampun ie pade nyampẽang kesaksian dait beriteang manik Tuhan, Petrus dait Yahya tulak ojok Yerusalem. Dait lẽq dalem kelampan ulẽq, ie pade beriteang Kabar Solah nike lẽq luwẽq kampung lẽq Samaria. 26 Sopoq malaẽkat Tuhan bemanik lẽq Pilipus, "Silaq berangkat! Lumbar ojok lauq ojok langan saq hubungang Yerusalem dait Gaza." Rurung nike sepi. 27 Make Pilipus berangkat. Lẽq waktu nike araq sopoq pegawẽ istane Etiopia saq kenyeke dalem kelampanne tulak ojok negerine. Dengan nike pegawẽ tinggi saq betanggung jawab lẽq selapuq kesugihan Kandake, Ratu negeri Etiopia. Dengan nike sampun lumbar ojok Yerusalem jari beribadah tipaq Allah dait mangkin kenyeke tulak kadu kerẽte. Sewaktune melinggih lẽq atas kerẽtene nike ie bace kitab Nabi Yesaya. 29 Roh Allah bemanik lẽq Pilipus, "Lumbar rapetin kerẽte nike." 30 Beterus Pilipus lumbar ngerapetin kerẽte nike, terus dengahne dengan nike bace kitab Nabi Yesaya. Pilipus beketuan lẽq ie, "Napi pelungguh ngerti saq pelungguh bace nike?" 31 Jawab dengan nike, "Berembẽ tiang iniq ngerti, lamun ndẽq araq saq jelasang lẽq tiang?" Beterus ie tẽnaq Pilipus taẽk ojok kerẽte dait melinggih bareng kance ie. 32 Niki ayat-ayat saq tebace nike. "Ie maraq dombe saq tegeroh jari tesembelẽh, maraq anak dombe saq ndẽq ngembẽq, lamun bulune tegunting, maraq nike Ie ndẽq ngucapang napi-napi. 33 Ie tehine dait teperlakuang ndẽq adil. Nyawe-Ne tembot lẽman gumi sehingge ndẽq sopoq dengan juaq saq bau nyeriteang mengenai keturunan-Ne." 34 Pembelẽq lẽman Etiopia nike bebase lẽq Pilipus, "Tunas badaq tiang sai saq temaksut siq nabi nike? Diriqne mẽsaq atao dengan lain?" 35 Make Pilipus ẽndah mulai becerite; ie kadu ayat-ayat nike jari penembẽqne nyampẽang Kabar Solah mengenai Deside Isa tipaq pembelẽq nike. 36 Lẽq tengaq kelampan, ie pade dateng lẽq sopoq taoq saq araq aiq. Terus pembelẽq nike bebase, "Serioq nike, araq aiq! Napi saq masih kurang malik jari baptis tiang?" 37 Pilipus bebase, "Lamun pelungguh percaye sepenoq angen, pelungguh kanggo tebaptis." Basen pembelẽq Etiopia nike, "Tiang percaye Deside Isa Almasih Bije saq asalne lẽman Allah." 38 Beterus ie suruq kerẽtene mentelah; dait deduaqne, Pilipus dait pembelẽq nike, turun ojok dalem aiq terus Pilipus baptis pembelẽq nike. 39 Sewaktu ie pade sugul lẽman aiq, Roh Tuhan bait Pilipus lẽman derike. Pembelẽq Etiopia nike ndẽq serioq ie malik. Siq senengne pembelẽq nike ngelanjutang kelampanne. 40 Selung-selung Pilipus sampun araq lẽq Asdod. Dait sewaktu ie ngelanjutang kelampanne, ie beriteang Kabar Solah mengenai Deside Isa lẽq selapuq kote jangke ie dateng lẽq Kaisarea.

Acts 9

1 Lẽq waktu nike Saulus terus doang beniat ngancem dait nyematẽq pengiring-pengiring Junjungan Saq Mulie Deside Isa. Ie lumbar ojok Imam Agung, 2 dait ie tunas surat kuase jari tejauq ojok balẽ-balẽ ibadah dengan Yahudi lẽq kote Damsyik, adẽq lamun lẽq derike ie ndait dengan-dengan saq turut Langan saq tepetitoqang siq Junjungan Saq Mulie nike, ie bau dait jauq ie pade ojok Yerusalem. 3 Lẽq tengaq kelampan ojok Damsyik, sewaktune sampun rapet lẽq kote nike, selung-selung araq sinar lẽman langit becahaye lẽq sekiter Saulus. 4 Ie rebaq lẽq tanaq terus dengahne suare saq bemanik tipaq ie, "Saulus, Saulus! Kembẽq side nganiaye Tiang?" 5 "Sai Pelungguh, Tuan?" Saulus metakẽn. Jawab suare nike, "Tiang niki Isa, saq side aniaye. 6 Laguq mangkin side ures dait tame ojok kote. Lẽq derike side gen tebadaq napi saq harus side laksaneang." 7 Dengan-dengan saq milu kance Saulus tinjot jangke ie pade kemomotan; sẽngaq ie pade dengah suare nike, laguq ndẽqne serioq sopoq dengan juaq. 8 Beterus Saulus nganjeng, dait bukaqne penentengne, laguq penentengne ndẽqne bau serioq napi-napi malik. Make ie pade tegel ime Saulus dait dẽndẽnne tame ojok Damsyik. 9 Telu jelo ngonẽqne ie ndẽq tao nyerioq dait sengonẽq nike ie ndẽq bekelor atao nginem. 10 Lẽq Damsyik araq sopoq dengan pengiring Deside Isa aranne Ananias. Dalem sopoq penyerioqan, Junjungan Saq Mulie bemanik lẽq ie, "Ananias!" Jawab Ananias, "Niki tiang, Junjungan Saq Mulie." 11 Junjungan Saq Mulie bemanik, "Silaq berangkat mangkin. Lumbar ojok balẽne Yudas lẽq langan saq aranne Langan Lomboq. Ketuanang lẽq derike dengan saq aranne Saulus saq asalne lẽman kote Tarsus. Dengan nike kenyeke bedo'e, 12 dait lẽq dalem sopoq penyerioqan ie serioq sopoq dengan mame, aranne Ananias, dateng tipaq ie dait noloq imene lẽq atasne adẽqne tao nyerioq malik." 13 Jawab Ananias, "Junjungan Saq Mulie, tiang sampun dengah luwẽq dengan bebaos mengenai dengan nike, terutame mengenai penganiayean-penganiayean saq ie piaq tipaq dengan-dengan saq tehususang bagi Allah saq ndot lẽq Yerusalem. 14 Dait mangkin ie sampun dateng ojok deriki siq wewenang penoq lẽman imam-imam kepale jari bau selapuq dengan saq percaye lẽq Deside." 15 Laguq Junjungan Saq Mulie bemanik lẽq Ananias, "Silaq lumbar doang! Sẽngaq Tiang sampun milẽq ie jari ngelayanin Tiang, adẽq ie ngabarang mengenai Tiang tipaq bangse-bangse lain dait tipaq raje-raje dait tipaq dengan-dengan Israel ẽndah. 16 Dait Tiang mẽsaq gen nyatayang lẽq ie selapuq penderitean saq gen ie terimaq lantaran Tiang." 17 Make Ananias ẽndah lumbar ojok balẽ nike, dait toloq imene lẽq atas Saulus, terus bebase, "Semeton tiang Saulus, Junjungan Saq Mulie Deside Isa saq side serioq lẽq tengaq langan sewaktu side kenyeke ojok deriki, Ie saq manikang tiang dateng adẽq side tao nyerioq malik, dait tekuasein siq Roh Suci." 18 Waktu nike ẽndah araq maraq ruen sisik empaq geriq lẽman penenteng Saulus, dait ie bau nyerioq malik. Make ie ures, terus tebaptis. 19 Dait sesampun bekelor, ie jari kuat malik. Saulus ndot lẽq Damsyik kance pengiring-pengiring Deside Isa pire jelo ngonẽqne. 20 Ie langsung lumbar ojok balẽ-balẽ ibadah dait mulai beriteang bahwe Deside Isa nike Bije saq asalne lẽman Allah. 21 Selapuq dengan bengaq dengah Saulus. Ie pade bebase, "Tekan ie saq lẽq Yerusalem sampun nyematẽq selapuq dengan saq percaye lẽq Deside Isa? Tekan ie dateng ojok deriki siq maksut jari bau dait jauq ie pade tipaq imam-imam kepale?" 22 Laguq Saulus sayan belẽq pengaruhne. Bukti-bukti saq ie ajuang mengenai Deside Isa tetu-tetu piaq dengan takjub bahwe Deside Isa nike Almasih, jangke selapuq dengan Yahudi saq ndot lẽq Damsyik ndẽq bau malik nentang ie. 23 Sesampun liwat pire waktu ngonẽqne, dengan-dengan Yahudi besepakat gen nyematẽq Saulus. 24 Laguq rencane ie pade tetaoq siq Saulus. Kenjelo kekelem dengan-dengan Yahudi nike ngantih lẽq jebak belẽq kote jari nyematẽq ie. 25 Laguq lẽq sopoq kelem, pengiring-pengiring Saulus bait ie, terus nurunang ie lẽman tembok kote kadu sopoq keranjang. 26 Saulus lumbar ojok Yerusalem, dait lẽq derike ie berusahe begabung kance pengiring-pengiring Deside Isa. Laguq dengan-dengan nike takut lẽq ie, sẽngaq ie pade ndẽq percaye bahwe Saulus tetu-tetu sampun jari pengiring Deside Isa. 27 Laguq Barnabas dateng tipaq Saulus, terus jauqne Saulus ojok rasul-rasul. Barnabas nyeriteang lẽq ie pade berembẽ Saulus serioq Junjungan Saq Mulie lẽq tengaq langan, dait berembẽ Junjungan Saq Mulie bemanik lẽq ie. Barnabas ẽndah nyeriteang mengenai berembẽ wanẽnne Saulus ngajahang lẽq Damsyik siq pesẽngan Deside Isa. 28 Jari Saulus ndot bareng ie pade, dait siq bani gati hotbah lẽq selapuq wilayah Yerusalem siq pesẽngan Junjungan Saq Mulie. 29 Ie ẽndah bebaos dait bedebat kance dengan-dengan Yahudi saq kadu base Yunani, laguq ie pade berusahe nyematẽq Saulus. 30 Waktu dengan-dengan percaye saq lainne nenaoq hal nike, ie pade jauq Saulus ojok Kaisarea, beterus kirimne ojok Tarsus. 31 Sengonẽq pire waktu, jemaah lẽq selapuq Yudea, Galilea, dait Samaria araq dalem keadaan tentrem. Tetulung siq Roh Suci dait takut lẽq Tuhan, jemaah-jemaah nike sayan kuat dait sayan luwẽq. 32 Lẽq waktu nike Petrus lampaq ngelining dait bejangoq ojok jemaah-jemaah. Lẽq dalem kelampanne nike ie jangoq dengan-dengan saq tehususang bagi Allah saq ndot lẽq Lida. 33 Lẽq derike ie bedait kance sopoq dengan mame aranne Eneas, saq kẽpaq dait ndẽqne ures-ures lẽman petindoqanne baluq taun ngonẽqne. 34 Petrus bebase lẽq Eneas, "Eneas, Deside Isa Almasih nyelahang side. Silaq ures, periri petindoqande." Waktu nike ẽndah Eneas ures. 35 Selapuq penduduk lẽq Lida dait Saron serioq Eneas, terus ie pade selapuq percaye lẽq Tuhan. 36 Lẽq Yope araq sopoq dengan nine pengiring Deside Isa aranne Tabita. (Lẽq dalem base Yunani, aranne Dorkas saq artine mayung.) Ie tetep doang laksaneang hal-hal saq solah dait tulung dengan-dengan miskin. 37 Lẽq waktu nike ie sakit terus ninggal. Sesampun jenazahne tepandiqang, ie tetoloq lẽq kamar saq lẽq atas. 38 Kote Yope ndẽqne jaoq lẽman Lida. Jari sewaktu pengiring-pengiring Deside Isa lẽq kote Yope dengah bahwe Petrus araq lẽq Lida, ie pade ngutus due dengan lumbar ojok Petrus siq pesen niki, "Becat-becat dateng ojok deriki." 39 Petrus langsung ures dait turut ie pade. Sesampun dateng lẽq derike, ie tejauq ojok kamar saq lẽq atas. Selapuq bebalu lẽq derike keriwung Petrus sambil nangis dait petitoqangne lẽq ie kelambi-kelambi dait jubah-jubah saq tejaitang siq Dorkas waktu ie masih idup. 40 Petrus suruq ie pade selapuq sugul, terus ie sujut dait bedo'e. Sesampun nike ie serioq andang jenazah Dorkas, dait bebase, "Tabita, ures!" Make Dorkas bukaq penentengne, dait waktu ie serioq Petrus, ie tokol. 41 Beterus Petrus tegel imene dait tulung ie nganjeng. Sesampun nike Petrus ngempoh dengan-dengan percaye lẽq derike bareng kance bebalu-bebalu nike, terus serahangne Dorkas saq sampun idup nike lẽq ie pade. 42 Kabar mengenai peristiwe nike nyebar ojok selapuq wilayah Yope, sehingge luwẽq dengan percaye lẽq Junjungan Saq Mulie. 43 Petrus ndot lẽq derike pire jelo malik lẽq balẽ sopoq tukang kulit aranne Simon.

Acts 10

1 Lẽq Kaisarea araq sopoq dengan mame aranne Kornelius. Ie jari prewire "Tentere Italia." 2 Ie dengan saq takut lẽq Allah dait selapuq kadang jarine beribadah tipaq Allah. Ie luwẽq nulung dengan-dengan Yahudi saq miskin, dait ie rajin bedo'e tipaq Allah. 3 Lẽq sopoq jelo kire-kire jam telu kebian, pedas gati ie serioq lẽq dalem sopoq penyerioqan, sopoq malaẽkat Allah rauh dait ngemanikang ie, "Kornelius!" 4 Siq rase takut Kornelius perhatiang malaẽkat nike terus bebase, "Araq napi Bapaq?" Jawab malaẽkat nike, "Selapuq do'e dait kemurahan atẽnde nike sampun teterimaq siq Allah dait Allah iling lẽq side. 5 Mangkin suruq dengan lumbar ojok Yope ngempoh Simon saq aran lengkapne Simon Petrus. 6 Ie kenyeke nyodoq lẽq balẽ sopoq tukang kulit aranne Simon, saq ndot lẽq sedin pesisi." 7 Sesampun malaẽkat saq bemanik lẽq Kornelius nike lumbar, Kornelius ngempoh due pelayanne dait sopoq pengawal saq solẽh. 8 Kornelius nyeriteang tipaq ie pade napi saq sampun telaksane, terus suruq ie pade lumbar ojok Yope. 9 Jemaqne, sewaktu ie pade masih lẽq tengaq langan, dait gen dateng lẽq Yope, Petrus taẽk ojok atas balẽ jari bedo'e. 10 Beterus ie lapah gati dait melẽt bekelor. Sewaktu keloran kenyeke tesedieang, ie mauq sopoq penyerioqan. 11 Ie serioq langit kebukaq, dait selembar lakar saq gamber teulurang ojok gumi, begantung lẽq empat bucune. 12 Lẽq dalemne araq segale macem binatang benaẽ empat, selapuq binatang saq ngumang dait kedit-kedit saq liah. 13 Terus araq suare bemanik lẽq ie, "Petrus, ures! Silaq sembelẽh dait kelorang!" 14 Petrus bejawab, "Nẽnten, Tuhan! Nẽnten uwah tiang ngelorang napi-napi saq haram atao najis." 15 Laguq suare nike bemanik malik lẽq ie, "Napi saq sampun tenyatayang halal siq Allah, ndaq side anggep haram!" 16 Hal nike telaksane terus jangke telu kali, beterus lakar nike kerangkatan ojok sorge. 17 Petrus bingung mikirang napi arti penyerioqanne nike, sewaktu Petrus mikir-mikir, dengan-dengan saq tesuruq siq Kornelius boyaq balẽ Simon sampun araq lẽq julu lawang. 18 Terus ie pade ngempoh dengan dait beketuan, "Napi lẽq deriki araq temuẽ saq madẽq, aranne Simon Petrus?" 19 Dait sewaktu Petrus masih doang berusahe nenaoq arti penyerioqanne nike, Roh Allah bemanik lẽq ie, "Hai Petrus, araq telu dengan kenyeke boyaq side. 20 Silaq aruan turun ojok bawaq, dait ndaq ragu-ragu milu bareng ie pade, sẽngaq Tiang saq ngutus ie pade." 21 Beterus Petrus turun ojok bawaq, dait bebase lẽq dengan-dengan nike, "Tiang niki saq side pade pẽte, araq keperluan napi side pade dateng?" 22 Jawab ie pade, "Prewire Kornelius ngutus tiang pade ojok deriki. Ie dengan saq solẽh dait takut lẽq Allah, dait tehormatin siq selapuq dengan Yahudi. Langan sopoq malaẽkat, Allah manikang ie pesilaq pelungguh rauh ojok gedẽngne, adẽq ie dengahang napi saq gen pelungguh sampẽang lẽq ie." 23 Make Petrus suruq ie pade tame adẽqne madẽq lẽq derike. Jemaqne Petrus ures, dait lumbar bareng kance ie pade. Pire dengan semeton seiman lẽman Yope ẽndah milu. 24 Sejelo sesampun nike ie pade dateng lẽq Kaisarea. Lẽq derike ie pade sampun teantih siq Kornelius kance kadang jarine dait selapuq sahabat-sahabat karibne saq sampun tepesilaq. 25 Waktu Petrus dateng, Kornelius lumbar nyambut ie dait sujut lẽq julu Petrus. 26 Laguq Petrus penganjeng ie, beterus bebase, "Silaq side ures, tiang ẽndah manusie biase." 27 Sambil ie bebaos kance Kornelius, Petrus tame ojok dalem balẽ. Lẽq derike ie serioq luwẽq dengan sampun bekumpul. 28 Terus ie bebase lẽq ie pade, "Side pade nenaoq bahwe dengan Yahudi tebalaq siq Hukum Taurat dateng bejangoq atao berubungan kance dengan bangse-bangse lain. Laguq Allah sampun nyatayang lẽq tiang bahwe tiang ndẽq kanggo nganggep sai juaq najis atao haram. 29 Keranaq nike waktu pelungguh pesilaq tiang dateng, tiang ndẽq keberatan dateng. Jari, mangkin niki tiang melẽt nenaoq, kembẽq pelungguh pesilaq tiang dateng." 30 Jawab Kornelius, "Empat jelo saq liwat, kire-kire lẽq waktu maraq niki, tiang kenyeke bedo'e lẽq balẽ jam telu kebian. Selung-selung sopoq dengan mame nganjeng lẽq julun tiang. Kelambi dengan nike putẽq ngempor. 31 Ie bemanik, 'Kornelius, Allah sampun nerimaq do'ende dait iling lẽq kemurahan atẽnde. 32 Jari mangkin utus dengan lumbar ojok Yope ngempoh dengan aranne Simon Petrus, ie kenyeke madẽq lẽq balẽ sopoq tukang kulit aranne Simon; balẽne lẽq sedin pesisi.' 33 Keranaq nike tiang aruan ngutus dengan lumbar pesilaq pelungguh. Dait pelungguh ihlas rauh ojok deriki. Mangkin tiang pade selapuq bekumpul lẽq deriki lẽq arepan Allah jari dengahang selapuq saq Allah manikang lẽq pelungguh umaq tiang pade." 34 Terus Petrus bebase, "Mangkin tiang tetu-tetu sadar bahwe Allah nẽnten bẽde-bẽdeang dengan. 35 Dengan saq takut lẽq Allah dait ngelaksaneang saq kenaq, dengan nike teterimaq siq Allah, ndẽq peduli ie lẽman bangse napi. 36 Side pade sampun nenaoq isi berite saq Allah sampẽang tipaq bangse Israel. Nike Kabar Solah dait damẽ sejahtere langan Deside Isa Almasih, Junjungan Saq Mulie tipaq selapuq dengan. 37 Side pade nenaoq napi saq sampun telaksane lẽq selapuq wilayah Yudea, mulai lẽman Galilea, sesampun baptisan saq teanjurang siq Yahya. 38 Side pade nenaoq bahwe Allah sampun nyuciang dait ngesahang Deside Isa dengan Nazaret nike siq Roh Suci dait kuase. Side pade nenaoq ẽndah bahwe Deside Isa nike lumbar ojok mbẽ-mbẽ jari ngelaksaneang saq solah; Ie nyelahang selapuq dengan saq tekuasein siq Belis, sẽngaq Allah araq bareng Ie. 39 Tiang pade niki saksi-saksi saq sampun serioq mẽsaq selapuq hal saq Ie laksaneang lẽq wilayah Yudea dait lẽq Yerusalem. Timaq maraq nike ie pade pakuq lẽq kayuq salib dait nyematẽq Ie. 40 Laguq lẽq jelo saq ketelu Allah ngidupang Ie malik lẽman ninggal dait nyatayang Ie tipaq manusie; 41 ndẽqne tipaq selapuq dengan, laguq cume tipaq tiang pade saq sampun juluan tepilẽq siq Allah jari saksi-saksi-Ne: Tiang pade bekelor dait nginem kance Ie sesampun Ie idup malik lẽman ninggal. 42 Dait Ie ngutus tiang pade beriteang Kabar Solah tipaq dengan-dengan dait ngebẽng kesaksian bahwe Ie saq teangkat siq Allah jari Hakim dengan-dengan saq masih idup dait dengan-dengan saq sampun ninggal. 43 Mengenai Ie selapuq nabi ngebẽng kesaksian, bahwe sai-sai percaye lẽq Ie, ie gen teampunin dosene langan pesẽngan-Ne." 44 Sewaktu Petrus masih bebaos, Roh Suci turun nguasein selapuq dengan saq dengah berite nike. 45 Dengan-dengan Yahudi saq percaye lẽq Deside Isa dait turut Petrus lẽman Yope, selapuqne bengaq serioq Allah ngicanin ẽndah Roh Suci tipaq dengan bangse-bangse lain. 46 Sẽngaq ie pade dengah dengan-dengan nike ngeraos kadu macem-macem base dait mulieang Allah. Terus Petrus bebase, 47 "Silaq serioq, dengan-dengan niki sampun nerimaq Roh Suci pade maraq ite. Napi bau dengan halang-halangin ie pade tebaptis siq aiq?" 48 Make Petrus suruq ie pade tebaptis siq pesẽngan Deside Isa Almasih. Sesampun nike ie pade tunas adẽq Petrus ndot kance ie pade pire jelo ngonẽqne.

Acts 11

1 Rasul-rasul dait dengan-dengan saq percaye lẽq selapuq wilayah Yudea pirengang bahwe dengan bangse-bangse lain ẽndah sampun nerimaq Manik Allah. 2 Beterus sewaktu Petrus lumbar ojok Yerusalem, dengan-dengan Yahudi saq sampun percaye nike, ngewade Petrus. 3 Ie pade bebase, "Kembẽq side lumbar ojok balẽ dengan-dengan saq ndẽqman besunat? Malahan side ẽndah bekelor bareng kance ie pade!" 4 Keranaq nike Petrus jelasang lẽq ie pade selapuq saq telaksane lẽman penembẽqne. Petrus bebase, 5 "Tiang kenyeke bedo'e lẽq kote Yope, beterus tiang serioq sopoq penyerioqan. Tiang serioq araq selembar lakar saq gamber teturunang lẽman langit, begantung lẽq keempat bucune, beterus ndot lẽq sedin tiang. 6 Sewaktu tiang perhatiang lẽq dalemne, tiang serioq binatang-binatang benaẽ empat, binatang-binatang gamang, binatang saq ngumang dait kedit-kedit liah. 7 Beterus tiang dengah suare saq bemanik tipaq tiang, 'Silaq ures Petrus! Sembelẽh nike dait kelorang!' 8 Laguq tiang bejawab, 'Nẽnten Tuhan! Tiang nẽnten uwah ngelorang saq najis atao haram!' 9 Laguq suare nike bemanik malik lẽman langit, 'Barang saq sampun tenyatayang halal siq Allah ndẽq kanggo teparan haram.' 10 Tiang serioq hal nike jangke telu kali, terus selapuqne kerangkatan malik ojok sorge. 11 Tepat waktu nike ẽndah telu dengan lẽman Kaisarea, saq teutus ojok tiang dateng lẽq balẽ taoq tiang madẽq. 12 Beterus Roh Allah manikang tiang ndaq ragu-ragu lumbar bareng ie pade. Semeton saq enem dengan niki ẽndah milu bareng tiang ojok Kaisarea, dait tiang pade selapuq tame ojok dalem balẽne Kornelius. 13 Beterus Kornelius nyeriteang lẽq tiang pade berembẽ ie serioq sopoq malaẽkat nganjeng lẽq balẽne dait bemanik, 'Suruq dengan lumbar ojok Yope ngempoh sopoq dengan mame aranne Simon Petrus. 14 Ie gen nyampẽang tipaq side berite saq gen nyelametang side dait selapuq dengan saq araq lẽq balẽnde.' 15 Beterus Petrus bebase malik," dait lẽq waktu tiang mulai ngeraos, "Roh Suci turun ojok atas ie pade, pade maraq saq telaksane lẽq ite laẽq waktu penembẽqne. 16 Beterus tiang inget, Junjungan Saq Mulie sampun bemanik, 'Yahya baptis dengan kadu aiq, laguq side pade gen tebaptis kadu Roh Suci.' 17 Jari, lamun Allah ẽndah ngicanin ie pade paice pade maraq saq Ie icanin tipaq ite sewaktu ite baruq percaye lẽq Junjungan Saq Mulie Deside Isa Almasih. Segerah tiang bau segah Allah!" 18 Sesampun pirengang hal nike, ie pade ndẽq ngeraos malik. Beterus ie pade mulieang Allah. Basen ie pade, "Lamun maraq nike dengan bangse-bangse lain ẽndah teicanin kesempatan siq Allah jari betobat dait nerimaq idup kekel." 19 Sesampun Stepanus tematẽq, dengan-dengan saq percaye lẽq Deside Isa mulai teaniaye, sehingge ie pade bepencar-pencar ojok mbẽ-mbẽ. Araq saq pelai jangke dateng Penisia, dait araq ẽndah saq jangke dateng Siprus dait Antiokia. Laguq ie pade beriteang Kabar Solah tipaq dengan-dengan Yahudi doang. 20 Laguq lẽq antare ie pade, saq asalne lẽman Siprus dait Kirene, araq ẽndah saq lumbar ojok Antiokia. Ie pade beriteang Kabar Solah mengenai Deside Isa, Junjungan Saq Mulie, tipaq dengan-dengan Yunani. 21 Kuase Junjungan Saq Mulie araq lẽq ie pade sehingge luwẽq dengan jari percaye dait nyerahang diriqne tipaq Junjungan Saq Mulie. 22 Cerite-cerite mengenai peristiwe-peristiwe niki tedengah ẽndah jangke ojok jemaah lẽq Yerusalem. Make ie pade ngutus Barnabas ojok Antiokia. 23 Dait sewaktu Barnabas dateng lẽq derike, dait serioq rahmat Allah tipaq dengan-dengan nike, ie gembire gati. Beterus ie tunas adẽq ie pade pacu-pacu setie lẽq Junjungan Saq Mulie siq sepenoq angenne. 24 Barnabas niki dengan saq solah dait tekuasein siq Roh Suci dait kuat imanne. Dait luwẽq dengan dateng tipaq Junjungan Saq Mulie. 25 Beterus Barnabas lumbar ojok Tarsus boyaq Saulus. 26 Sesampun bedait kance Saulus, ie jauq Saulus ojok Antiokia dait setaun penoq ie pade bekumpul kance jemaah lẽq derike sambil ngajahang luwẽq dengan. Lẽq Antiokia nike dengan-dengan saq percaye lẽq Deside Isa penembẽqne tesebut dengan-dengan Nasrani. 27 Lẽq mase nike araq pire nabi rauh lẽman Yerusalem ojok Antiokia. 28 Lẽq antarene araq sopoq dengan aranne Agabus. Siq pimpinan Roh Allah ie benubuat bahwe lẽq seantẽro dunie gen araq bahle kelapahan saq belẽq. (Dait hal nike mule telaksane ẽndah lẽq waktu Kaisar Klaudius mrẽntah.) 29 Make selapuq pengiring Deside Isa nike sepakat jari ngirim sumbangan tipaq semeton-semeton saq ndot lẽq Yudea; sopoq-sopoq ngirim menurut kemampuanne. 30 Kesepakatan nike telaksaneang ẽndah, beterus Barnabas dait Saulus teutus jari ngatongang sumbangan nike ojok pemimpin-pemimpin jemaah.

Acts 12

1 Lẽq waktu nike Raje Herodes mulai keras lẽq anggote-anggote jemaah. 2 Siq prẽntahne, Yakub, semetonne Yahya tematẽq kadu klẽwang. 3 Sewaktu Herodes serioq bahwe perbuatanne nike nyenengang angen dengan-dengan Yahudi, ie piaq malik maraq nike; ie suruq dengan bau Petrus ẽndah. Hal nike telaksane waktu Hari Raye Ruti Ndẽq Beragi. 4 Sesampun tebau, Petrus tetamaq ojok dalem bui. Empat regu tentere tetugasang jari jagaq Petrus lẽq derike -- sopoq-sopoq regu berisi empat tentere. Sesampun perayaan Paskah inggas, baruq Herodes gen ngadilin Petrus lẽq julun dengan luwẽq. 5 Jari Petrus tetahen lẽq bui; laguq jemaah do'eang ie pacu-pacu tipaq Allah. 6 Lẽq kelem sendẽqman Herodes jauq Petrus lẽq julun dengan luwẽq, Petrus mesarẽ tetaliq kadu due rantẽ besi lẽq antare due tentere pengawal. Lẽq lawang bui, pengawal-pengawal lain ẽndah kenyeke jagaq bui. 7 Selung-selung malaẽkat Tuhan nganjeng lẽq derike dait araq sopoq cahaye saq besinar lẽq dalem kamar bui nike. Malaẽkat nike dodoq Petrus jangke ie ngase. Beterus manik malaẽkat nike, "Hai, becat ures!" Waktu nike ẽndah rantẽ besi nike teriq lẽman ime Petrus. 8 Sesampun nike malaẽkat nike bemanik, "Kadu kelambinde dait taliq sepatunde." Make Petrus ngengadu kelambine dait naliq sepatune. Beterus malaẽkat nike bemanik malik, "Kadu jubahde, dait turut tiang." 9 Make Petrus milu bareng malaẽkat nike sugul lẽman bui. Laguq Petrus ndẽq sadar bahwe napi saq kenyeke telaksaneang siq malaẽkat nike siq malaẽkat nike tetu-tetu telaksane. Petrus paran nike cume sopoq penyerioqan. 10 Sesampun ie pade liwatin taoq penjagaan saq penembẽq dait saq kedue, ie pade dateng lẽq lawang besi, saq nuju ojok kote. Lawang nike kebukaq mẽsaq, terus ie pade sugul dait lampaq langan sopoq pengorong. Selung-selung malaẽkat nike bilin Petrus. 11 Sesampun nike Petrus baruq sadar lẽq napi saq sampun telaksane lẽq diriqne, terus ie bebase, "Mangkin tiang nenaoq bahwe Tuhan tetu-tetu sampun ngirim malaẽkat-Ne jari bẽbasang tiang lẽman kuase Herodes, dait lẽman selapuq hal saq gen telaksaneang siq bangse Yahudi tipaq tiang." 12 Sesampun ie sadar lẽq keadaan nike, Petrus lumbar ojok balẽ Mariam, inaqne Yahya saq tesebut ẽndah Markus. Lẽq derike luwẽq dengan bekumpul dait kenyeke bedo'e. 13 Petrus ngetok lawang jebak, terus sopoq dengan pelayan nine aranne Rode, dateng jari bukaq jebak. 14 Langsung ie tandaq suare Petrus. Lantaran cemohne, ie becat-becat tame malik ndẽqne bukaqang lawang juluq, terus badaqang lẽq dengan-dengan lẽq derike bahwe Petrus araq lẽq luah. 15 "Side jogang!" basen ie pade. Laguq Rode pagah bebadaq bahwe nike tetu-tetu Petrus. Make ie pade bebase, "Nike malaẽkatne!" 16 Laguq Petrus terus doang ngetok lawang. Make sewaktu ie pade bukaq lawang, dait serioqne Petrus, ie pade bengaq gati. 17 Petrus ngebẽng tande kadu imene adẽq ie pade tenang, beterus ie nyeriteang berembẽ Tuhan sampun gadingang ie sugul lẽman bui. Sesampun nike ie bebase, "Sampẽang hal niki tipaq Yakub dait semeton-semeton saq lain ẽndah." Beterus Petrus bilin taoq nike dait lumbar ojok taoq saq lain. 18 Jemaq kelẽmaqne araq keributan lẽq antare tentere pengawal. Ie pade bingung gati mikirang napi saq sampun telaksane tipaq Petrus. 19 Terus Herodes mrẽntahang dengan boyaq Petrus, laguq ie pade ndẽq iniq ndait ie. Jari Herodes mrẽntahang adẽq pengawal-pengawal nike teketuan terus tematẽq. Sesampun nike Herodes lumbar lẽman Yudea ojok Kaisarea dait ndot lẽq derike. 20 Herodes menggah gati lẽq dengan-dengan Tirus dait Sidon. Keranaq nike ie pade bareng-bareng ngadep Herodes. Mule-mule ie pade kẽdẽq Blastus, saq jari kepale istane Herodes, sehingge ie bepihak lẽq ie pade. Sesampun nike ie lumbar ngadep Herodes, terus tunas bedamẽ, sẽngaq negeri ie pade beharep sepenoqne lẽq keloran lẽman negeri Herodes. 21 Lẽq sopoq jelo saq sampun tetentuang, Herodes kadu kuace kerajaanne, terus melinggih lẽq kursi kerajaan dait mulai pidato lẽq julu rakyat. 22 Rakyat saq kenyeke dengahang pidato nike bekuih-kuih, "Niki suare Dẽwe, ndẽqne suare manusie!" 23 Lẽq waktu nike ẽndah malaẽkat Tuhan tamper Herodes, sẽngaq ie ndẽq hormatin Allah. Herodes tekaken siq longe, terus ninggal. 24 Make Manik Allah sayan nyebar dait sayan luwẽq tedengah siq dengan. 25 Sesampun Barnabas dait Saulus nutuqang tugasne, ie pade tulak lẽman Yerusalem dait jauqne Yahya saq tesebut ẽndah Markus, bareng kance ie pade.

Acts 13

1 Lẽq dalem jemaah lẽq Antiokia araq nabi-nabi dait guru-guru, aranne Barnabas, Simeon saq tejulukin Niger, Lukius lẽman Kirene, Menahem saq tebelẽqang bareng kance Raje Herodes, dait Saulus. 2 Sewaktu ie pade beribadah tipaq Tuhan dait puase, Roh Suci bemanik lẽq ie pade, "Pilẽq Barnabas dait Saulus husus umaq Tiang, adẽq ie pade ngelaksaneang tugas saq sampun Tiang tentuang tipaq ie pade." 3 Sesampun puase dait bedo'e, ie pade noloq imene lẽq atas Barnabas dait Saulus, terus ngutus ie pade. 4 Lantaran teutus siq Roh Suci, Barnabas dait Saulus berangkat ojok Seleukia. Lẽman derike ie pade belayar ojok pulao Siprus. 5 Sewaktu ie pade dateng lẽq Salamis, ie pade nyampẽang Manik Allah lẽq balẽ-balẽ ibadah Yahudi. Yahya Markus tulung ie pade dalem kelampanne. 6 Selapuq pulao nike ie pade jelajahin jangke dateng Papos. Lẽq derike ie pade bedait kance sopoq dengan Yahudi, aranne Baryesus. Ie tukang sẽhẽr saq ngaku diriqne nabi. 7 Sergius Paulus, gubernur pulao nike batur tukang sẽhẽr nike. Gubernur nike dengan saq pinter dait bijaksane. Ie ngempoh Barnabas dait Saulus, sẽngaq ie melẽt pirengang Manik Allah. 8 Laguq Barnabas dait Saulus tetentang siq Elimas tukang sẽhẽr nike, sẽngaq Elimas (nike aranne dalem base Yunani) berusahe adẽq gubernur nike ndaq jangke percaye lẽq Deside Isa. 9 Laguq Saulus -- saq tesebut ẽndah Paulus -- tekuasein siq Roh Suci, sehingge ie peler ahli sẽhẽr nike, 10 terus bebase, "Hai, penipu belẽq, anak durhake! Side musuh selapuq saq kenaq. Kembẽq side pengẽngoh Langan saq tepetitoqang siq Junjungan Saq Mulie nike? 11 Mangkin serioq, Tuhan gen ngukum side! Pire jelo ngonẽqne side ndẽq gen bau serioq jelo." Waktu nike ẽndah Elimas beridap araq awun-awun saq bideng nutup penentengne, sehingge ie lampaq beganggam-ganggam boyaq dengan jari dẽndẽn ie. 12 Sewaktu Gubernur nike cingakin napi saq sampun telaksane, ie percaye lẽq Deside Isa; sẽngaq ie takjub gati lẽq ajahan mengenai Tuhan. 13 Lẽman Papos, Paulus dait batur-baturne belayar ojok Perga lẽq Pampilia. Lẽq derike Yahya Markus bilin ie pade, beterus tulak ojok Yerusalem. 14 Lẽman Perga ie pade ngelanjutang kelampan ojok Antiokia lẽq Pisidia, dait lẽq jelo Sabat ie pade lumbar terus melinggih lẽq dalem balẽ ibadah. 15 Sesampun Hukum Taurat dait kitab nabi-nabi tebaceang, pemimpin-pemimpin balẽ ibadah nike suruq dengan beketuan lẽq Paulus dait batur-baturne, "Semeton-semeton, lamun side pade bedowẽ nasẽhat tipaq dengan-dengan niki, silaq sampẽang nasẽhat nike." 16 Paulus nganjeng, terus ngebẽng tande kadu imene, dait bebase, "Semeton-semeton tiang dengan-dengan Israel dait semeton-semeton saq takut lẽq Allah! Silaq dengahang tiang: 17 Allah bangse Israel sampun milẽq leluhurte, dait jariang bangse niki bangse saq belẽq sewaktu ie pade ndot lẽq Mesir jari pendateng. Beterus siq kuase saq belẽq Allah gadingang ie pade sugul lẽman Mesir. 18 Allah sabar lẽq tingkah laku ie pade lẽq padang gurun petang dase taun ngonẽqne. 19 Pituq bangse Ie musnahang lẽq negeri Kanaan jari bagi-bagiang negeri nike tipaq bangse Israel adẽq negeri nike jari dowẽn ie pade. 20 Selapuqne nike telaksane empat ratus sẽket taun ngonẽqne. Sesampun negeri Kanaan nike tebagi-bagi, Allah ngicanin ie pade hakim-hakim jangke jaman Nabi Samuel. 21 Beterus ie pade tunas sopoq raje. Allah ngicanin ie pade Saul bije Kis lẽman suku bangse Benyamin jari raje ie pade petang dase taun ngonẽqne. 22 Sesampun Saul tesingkirang, Allah ngangkat Daud jari raje ie pade. Dait niki saq temanikang Allah mengenai Daud, 'Sampun tiang ndait Daud bije Isai dengan saq nyenengang angen Tiang. Ie saq gen ngelaksaneang selapuq pekayunan Tiang.' 23 Lẽman keturunan Daud nike Allah nyedieang tipaq bangse Israel sopoq Juruselamet, sesuai kance janji-Ne. Nike Deside Isa. 24 Sendẽqman Deside Isa rauh, Yahya sampun nganjurang tipaq dengan-dengan Israel adẽq ie pade betobat lẽman dose-dose ie pade dait tebaptis. 25 Dait lẽq waktu Yahya gen nutuqang karyene, ie bebase tipaq dengan-dengan nike, 'Sai tiang niki menurut side pade? Tiang ndẽqne Dengan saq side pade antih. Inget, Dengan nike gen rauh sesampun tiang; jari ngelekaq tali sepatu-Ne doang tiang ndẽq patut.' 26 Semeton-semeton keturunan Ibrahim, dait side pade selapuq saq lainne lẽq deriki saq takut lẽq Allah! Allah sampun ngirim tipaq ite berite keselametan nike; 27 sẽngaq dengan-dengan saq ndot lẽq Yerusalem dait pemimpin-pemimpin ie pade ndẽq kenal sai Deside Isa nike. Siq mutusang hukuman matẽ tipaq Deside Isa, ie pade genepang ucapan nabi-nabi saq tebaceang sebilang jelo Sabat. 28 Timaq ie pade ndẽq ndait sopoq hal lẽq Deside Isa saq patut tehukum siq hukuman matẽ, laguq ie pade tunas lẽq Pilatus adẽq Ie tematẽq. 29 Dait sesampun ie pade tutuq ngelaksaneang selapuqne saq araq tetulis dalem Kitab Suci mengenai Deside Isa, ie pade turunang jenazah-Ne lẽman kayuq salib, terus ie pade makamang. 30 Laguq Allah ngidupang Ie malik lẽman ninggal. 31 Beterus sengonẽq pire jelo Deside Isa rauh nyatayang diriq tipaq dengan-dengan saq ngiring Ie lẽman Galilea ojok Yerusalem. Mangkin niki ie pade nike saq jari saksi-saksi-Ne tipaq bangse Israel. 32 Jari, mangkin niki tiang pade nyampẽang Kabar Solah nike tipaq side: Napi saq Allah sampun janjiqang tipaq leluhurte, 33 nike sampun Ie laksaneang tipaq ite siq care ngidupang Deside Isa malik lẽman ninggal. Sẽngaq lẽq dalem Kitab Suci Zabur saq kedue araq tetulis, 'Deside Bije saq asalne lẽman Tiang, lẽq jelo niki Tiang angkat Deside jari Bije Tiang.' 34 Allah sampun ngidupang Ie malik lẽman ninggal. Mangkin Ie ndẽq gen ngalamin ninggal malik lẽq dalem makam. Mengenai hal nike Allah bemanik, 'Tiang gen ngicanin Deside janji suci saq pasti gen tetepatin, saq sampun Tiang janjiqang lẽq Daud.' 35 Keranaq nike lẽq Kitab Suci Zabur lẽq ayat saq lain tetulis, 'Deside nẽnten gen menengang Dengan Suci Deside cingakin kebinasean.' 36 Daud sampun ninggal dait temakamang ẽndah bareng-bareng kance leluhurne, dait ie mule teserahang tipaq kebinasean. 37 Laguq Deside Isa, saq teidupang siq Allah lẽman ninggal, nẽnten ngalamin kebinasean. 38 Keranaq nike semeton-semeton, harus side pade nenaoq bahwe langan Deside Isa nike berite mengenai pengampunan dose teberiteang tipaq side; side pade harus nenaoq bahwe sebilang dengan saq percaye lẽq Ie, tebẽbasang lẽman selapuq dose saq ndẽq bau teapus langan prẽntah-prẽntah Allah saq tesampẽang siq Musa. 40 Keranaq nike side pade harus perhatiang bagus-bagus, adẽq ndaq jangke telaksane lẽq side pade napi saq tesampẽang siq nabi-nabi niki. 41 'Perhatiang bagus-bagus, hai side dengan-dengan saq girang menghine! Side gen bengaq, terus ninggal! Sẽngaq lẽq jaman niki Tiang kenyeke ngelaksaneang sopoq hal saq side mẽsaq ndẽq gen percaye ie, timaq araq dengan saq jelasang tipaq side.' " 42 Waktu Paulus dait Barnabas bilin balẽ ibadah nike, dengan-dengan lẽq balẽ ibadah nike tunas ie pade tulak malik lẽq jelo Sabat saq gen dateng, jari ngelanjutang penjelasan mengenai hal-hal nike. 43 Sesampun inggas ibadah, luwẽq dengan Yahudi dait dengan bangse-bangse lain saq tame agame Yahudi, turut Paulus dait Barnabas; kedue rasul nike ngajah ie pade dait bẽng nasẽhat adẽq ie pade tetep idup lẽq dalem rahmat Allah. 44 Lẽq jelo Sabat selanjutne, aroh-aroh selapuq dengan lẽq kote nike dateng dengahang Manik Allah. 45 Waktu dengan-dengan Yahudi serioq dengan luwẽq nike, ie pade talon atẽ gati. Ie pade menghine Paulus dait nentang selapuq saq ie sampẽang. 46 Laguq Paulus dait Barnabas sayan bani doang bebaos terus terang. Ie pade bebase, "Manik Allah mule harus tesampẽang tipaq side pade juluq. Laguq lantaran side pade ndẽq mẽlẽ nerimaq ie, side pade sampun nentuang mẽsaq bahwe side pade ndẽq patut nerimaq idup sejati dait kekel. Dait mangkin tiang pade bilin side pade dait lalo tipaq dengan bangse-bangse lain. 47 Sẽngaq niki prẽntah Tuhan lẽq tiang pade; Tuhan bemanik, 'Tiang sampun nentuang side jari terang tipaq bangse-bangse saq ndẽq kenal kance Allah, adẽq side datengang keselametan tipaq seantẽro dunie.' " 48 Sewaktu dengan bangse-bangse lain dengah hal nike, ie pade seneng gati, terus mulieang Manik Tuhan. Dait dengan-dengan saq sampun tetentuang siq Allah jari mauq idup sejati dait kekel ẽndah jari percaye. 49 Manik Tuhan nike nyebar ojok mbẽ-mbẽ lẽq selapuq daẽrah nike. 50 Laguq pembelẽq-pembelẽq kote nike dait dengan-dengan nine saq tehormatin, saq takut lẽq Allah, tehasut siq dengan-dengan Yahudi. Ie pade nimbulang permusuhan tipaq Paulus dait Barnabas, dait deduaqne tetundung lẽman daẽrah nike. 51 Beterus, rasul-rasul nike kerapang kerepuk lẽq naẽn ie pade lẽq julun dengan-dengan nike jari peringetan, terus lumbar ojok Ikonium. 52 Pengiring-pengiring lẽq Antiokia gembire gati dait tekuasein siq Roh Suci.

Acts 14

1 Lẽq Ikonium Paulus dait Barnabas ẽndah lumbar ojok balẽ ibadah Yahudi, dait ngajahang sehingge luwẽq dengan Yahudi dait dengan bangse-bangse lain jari percaye lẽq Deside Isa. 2 Laguq dengan-dengan Yahudi saq ndẽq mẽlẽ percaye, hasut dengan bangse-bangse lain, sehingge miaq ie pade gedek lẽq dengan-dengan saq percaye tipaq Deside Isa. 3 Keranaq nike Paulus dait Barnabas ngonẽq ndot lẽq derike. Dait ie pade bani gati bebaos mengenai Tuhan. Make Ie ẽndah neguqang berite saq ie pade sampẽang mengenai rahmat-Ne, Ie ngicanin ie pade kuase jari ngelaksaneang keajaipan-keajaipan dait hal-hal saq luar biase. 4 Laguq penduduk kote nike ndẽq patuh sopoq kance saq lainne; araq saq bepihak lẽq dengan-dengan Yahudi dait araq saq bepihak lẽq rasul-rasul nike. 5 Terus dengan-dengan Yahudi dait pemimpin-pemimpinne bareng-bareng kance dengan bangse-bangse lain besepakat jari nyiksaq dait melẽwas rasul-rasul nike kadu batu. 6 Laguq rasul-rasul nike sadar lẽq keadaan nike, terus nyingkir ojok Listra dait Derbe, kote-kote lẽq Likaonia, dait ojok daẽrah sekiterne. 7 Lẽq derike ie pade ngabarang malik Kabar Solah nike. 8 Lẽq Listra araq sopoq dengan mame saq naẽne kẽpaq lẽman ie tebijeang, sehingge ie ndẽq uwah tao lampaq sẽngaq naẽne ndẽq kuat. 9 Dengan nike tokol lẽq derike dengahang Paulus bebaos. Paulus serioq bahwe dengan nike percaye dait bau teselahang. Make Paulus merhatiang ie. 10 Dait siq suare saq belẽq Paulus bebase, "Silaq nganjeng saq solah!" Dengan nike nyelontak nganjeng terus lampaq. 11 Waktu dengan luwẽq serioq napi saq sampun telaksaneang siq Paulus, ie pade bekuih kadu base Likaonia, "Dẽwe-dẽwe sampun turun ojok dunie kadu awak manusie." 12 Terus Barnabas ie pade aranin Zeus, dait Paulus ie pade aranin Hermes, sẽngaq ie saq bebaos. 13 Imam dẽwe Zeus, saq taoq ibadahne araq lẽq julu kote, dateng jauq sampi mame dait kembang-kembang ojok jebak belẽq kote. Ie mẽlẽ milu kance dengan luwẽq nike ngaturang kurban tipaq rasul-rasul nike. 14 Waktu Barnabas dait Paulus pirengang napi saq gen telaksaneang siq dengan-dengan nike, ie pade ngeroẽk-roẽk kelambine sambil ie pade pelai ojok tengaq-tengaq dengan luwẽq nike, beterus nyurak, 15 "Hai, kembẽq side pade ngelaksaneang hal niki? Tiang pade niki manusie ẽndah pade maraq side! Tiang pade dateng ojok deriki jari nyampẽang Kabar Solah tipaq side, adẽq side pade tetẽh hal-hal saq ndẽq araq manpaatne niki, dait bebalik tipaq Allah saq idup, saq jariang langit dait gumi, segare dait selapuq isine. 16 Lẽq waktu saq laẽq Allah menengang bangse-bangse idup menurut kemẽlẽq ie pade sopoq-sopoq. 17 Laguq Allah nẽnten lupaq ngicanin bukti-bukti mengenai diriq-Ne siq ngelaksaneang saq bagus. Ie ngicanin side ujan lẽman langit dait hasil tanaq lẽq musimne. Ie ngicanin keloran lẽq side dait nyenengang angende." 18 Laguq siq ucapan-ucapan nike masih sengke ẽndah rasul-rasul nike segah dengan-dengan nike jauq kurban tipaq ie pade. 19 Dengan-dengan Yahudi saq dateng ojok Listra lẽman Antiokia lẽq Pisidia dait lẽman Ikonium pengaruhin dengan luwẽq nike sehingge dengan-dengan nike bepihak lẽq ie pade. Terus ie pade pelẽwas Paulus kadu batu, dait orosne ojok luah kote. Ie pade paran Paulus sampun ninggal, 20 laguq waktu dengan-dengan saq percaye lẽq derike nganjeng lẽq sekeliningne, ie ures dait tame malik ojok kote. Jemaqne ie berangkat ojok Derbe bareng kance Barnabas. 21 Lẽq Derbe Paulus dait Barnabas nyampẽang Kabar Solah nike dait luwẽq dengan jari percaye lẽq Deside Isa. Sesampun nike ie pade tulak ojok Listra, beterus ojok Ikonium, Antiokia lẽq Pisidia. 22 Lẽq kote-kote nike ie pade neguqang angen pengiring-pengiring nike dait nasẽhat ie pade adẽqne tetep lẽq dalem iman, dait bebase bahwe jari tame ojok dalem Kerajaan Allah ite harus ngalamin luwẽq sengsare. 23 Dait lẽq sebilang jemaah, Paulus dait Barnabas ngangkat pemimpin-pemimpin umaq jemaah-jemaah nike, terus siq do'e dait puase, ie pade nyerahang pemimpin-pemimpin nike ojok Tuhan saq ie pade percaye nike. 24 Sesampun nike Paulus dait Barnabas ngelanjutang kelampan ie pade liwatin daẽrah Pisidia dait dateng lẽq Pampilia. 25 Dait sesampun ie pade nyampẽang Manik Allah lẽq Perga, ie pade lumbar ojok Atalia. 26 Lẽman derike ie pade belayar tulak ojok Antiokia. Nike kote taoqne ie pade teserahang laẽq tipaq rahmat Allah, adẽq ie pade ngelaksaneang pegawẽan saq mangkin sampun ie pade tutuqang. 27 Sewaktu dateng lẽq Antiokia, ie pade ngumpulang dengan-dengan lẽman jemaah nike, terus nyeriteang selapuq saq sampun tekaryeang siq Allah langan ie pade. Ie pade nyeriteang ẽndah berembẽ Allah sampun bukaq langan adẽq dengan bangse-bangse lain beriman dalem Deside Isa. 28 Lẽq kote nike Paulus dait Barnabas ngonẽq ndot kance dengan-dengan percaye.

Acts 15

1 Pire dengan lẽman Yudea dateng ojok Antiokia dait ngajahang dengan-dengan percaye lẽq Antiokia nike bahwe lamun ie pade ndẽq tesunat maraq aturan hukum Musa, ie pade ndẽq bau teselametang. 2 Paulus dait Barnabas nentang gati pengajahan dengan-dengan nike. Ahirne tetentuang adẽqne Paulus kance Barnabas dait dengan lain lẽman Antiokia lumbar ojok Yerusalem jari musyawarahang hal nike kance rasul-rasul dait pemimpin-pemimpin lẽq Yerusalem. 3 Jemaah lẽq Antiokia ngatong ie pade ẽntah luah kote, beterus ie pade lumbar langan Pinisia dait Samaria. Lẽq derike ie pade nyeriteang berembẽ dengan bangse-bangse lain sampun nyerahang diriqne tipaq Allah. Berite nike piaq dengan-dengan saq percaye lẽq derike seneng gati. 4 Sewaktu ie pade dateng lẽq Yerusalem, ie pade tesambut siq jemaah, dait rasul-rasul dait pemimpin-pemimpin. Terus ie pade nyeriteang tipaq dengan-dengan nike mengenai selapuq saq sampun telaksaneang siq Allah langan ie pade. 5 Laguq pire dengan lẽman golongan Parisi saq sampun percaye, nganjeng dait bebase, "Dengan bangse-bangse lain saq sampun percaye nike harus tesunat dait tewajibang turut aturan hukum Musa." 6 Terus rasul-rasul dait pemimpin-pemimpin bekumpul jari musyawarahang masalah nike. 7 Ngonẽq gati ie pade saling tukah pendapet. Ahirne Petrus nganjeng dait bebase, "Semeton-semeton, side pade sampun nenaoq bahwe pire waktu saq sampun liwat Allah milẽq tiang lẽman antare side pade jari nyampẽang Kabar Solah nike tipaq dengan bangse-bangse lain, adẽq ie pade ẽndah dengah dait percaye. 8 Dait Allah saq wikan angen manusie sampun nyatayang bahwe Allah nerimaq ie pade; Allah nyatayang hal nike siq care ngicanin tipaq ie pade Roh Suci, pade maraq saq sampun teicanin tipaq ite ẽndah. 9 Allah nẽnten bẽde-bẽdeang ite kance ie pade. Allah nyuciang atẽn ie pade lantaran iman ie pade. 10 Nah, kembẽq side pade mẽlẽ ngelawan Allah mangkin siq ngebẽng sopoq kewajiban saq berat lẽq pengiring-pengiring niki, padahal leluhurte dait ite mẽsaq ẽndah ndẽq sanggup ngelaksaneang hal nike? 11 Sebalikne, ite percaye dait teselametang langan rahmat Junjungante Saq Mulie Deside Isa, maraq nike juaq ie pade." 12 Make selapuq dengan saq bekumpul lẽq derike jari tedoq. Beterus ie pade dengahang Barnabas dait Paulus nyeriteang malik selapuq keajaipan dait hal-hal saq luar biase saq sampun telaksaneang siq Allah langan ie pade lẽq antare dengan bangse-bangse lain. 13 Sesampun ie pade tutuq bebaos, Yakub bebase, "Semeton-semeton! Dengahang tiang. 14 Simon baruq gati jelasang berembẽ Allah lẽq penembẽqne nyatayang rahmat-Ne tipaq dengan bangse-bangse lain, siq maksut milẽq lẽq antare ie pade dengan-dengan saq gen jari umat-Ne mẽsaq. 15 Hal nike sesuai maraq saq sampun tenubuatang siq nabi-nabi. Sẽngaq araq tetulis maraq niki, 16 'Sesampun nike Tiang gen dateng malik,' manik Tuhan, 'Tiang gen penganjeng malik gedẽng Daud saq sampun roboh, dait meririq saq sẽde, dait Tiang gen penganjeng ie malik; 17 adẽq selapuq dengan saq masih araq nike boyaq Tuhan, bareng kance dengan bangse-bangse lain, saq sampun Tiang manikang jari dowẽn Tiang.' 18 Maraq nike manik Tuhan, saq sampun tetaoq lẽman penembẽq." 19 "Jari menurut pendapet tiang," basen Yakub, "Ite ndẽq kanggo nyusahang bangse-bangse lain saq nyerahang diriqne tipaq Allah. 20 Laguq ite harus nulis surat tipaq ie pade dait bẽng nasẽhat, adẽq ie pade ndaq ngelorang keloran saq najis saq sampun teaturang tipaq berhale, atao ngelorang empaq binatang saq matẽ tepekok, atao ngelorang daraq. Dait ẽndah adẽq ie pade jaoqang diriqne lẽman perbuatan-perbuatan saq cabul. 21 Sẽngaq hukum Musa tebaceang lẽman jaman laẽq sebilang jelo Sabat lẽq balẽ-balẽ ibadah, dait teberiteang lẽq selapuq kote." 22 Rasul-rasul dait pemimpin-pemimpin, bareng-bareng kance selapuq anggote jemaah nike mutusang jari milẽq pire dengan lẽq antare ie pade saq gen teutus ojok Antiokia bareng kance Paulus dait Barnabas. Make ie pade pilẽq Silas dait Yudas saq tesebut ẽndah Barsabas. Kedue dengan nike tokoh masyarakat lẽq antare dengan-dengan percaye lẽq Yerusalem. 23 Bareng kance utusan-utusan nike ie pade ngirim ẽndah surat saq tetulis maraq niki, "Tipaq selapuq semeton-semeton saq asalne lẽman bangse-bangse lain, saq ndot lẽq Antiokia, Siria dait Kilikia. Salam lẽman tiang pade, rasul-rasul dait pemimpin-pemimpin, semeton-semetonde. 24 Tiang pade dengah araq pire dengan lẽman antare tiang pade saq sampun lumbar tipaq side pade, piaq kaco dait piaq side pade bingung siq pengajahan-pengajahan ie pade. Padahal tiang pade ndẽq suruq ie pade ngelaksaneang hal nike. 25 Keranaq nike tiang pade sampun berunding dait selapuqne setuju jari milẽq pire dengan dait ngutus ie pade ojok side. Ie pade gen lumbar bareng kance Barnabas dait Paulus saq tiang pade kasihin. 26 Kedue dengan niki dengan-dengan saq sampun taroqang nyawene, lantaran Junjungante Saq Mulie Deside Isa Almasih. 27 Jari, tiang pade ngutus Yudas dait Silas tipaq side pade, ie pade ẽndah saq gen nyampẽang mẽsaq secare langsung tipaq side berite saq tetulis dalem surat niki. 28 Sampun araq keputusan Roh Suci -- dait tiang pade ẽndah setuju -- adẽq side pade ndaq tebẽng kewajiban-kewajiban saq beratan lẽman kewajiban-kewajiban saq perlu niki doang: 29 Ndaq ngelorang keloran saq sampun teaturang tipaq berhale; ndaq kelorang daraq, ndaq kelorang empaq binatang saq matẽ tepekok, dait jaoqang idupde lẽman pegawẽan saq cabul. Lamun side pade jaoqang diriq lẽman hal-hal nike, side pade sampun ngelaksaneang saq bagus. ~Entah niki atur tiang pade. Salam!" 30 Sesampun tunas pamit, dengan-dengan saq teutus nike berangkat ojok Antiokia. Lẽq derike ie pade ngumpulang selapuq anggote jemaah, terus ie pade sampẽang surat nike. 31 Sewaktu anggote-anggote jemaah nike bace surat nike, ie pade seneng gati lantaran isi surat nike saq ngibur angen ie pade. 32 Yudas dait Silas, saq jari nabi ẽndah, ngonẽq bebaos kance semeton-semeton saq percaye lẽq Antiokia nike jari ngebẽng semanget dait teguqang angen ie pade. 33 Sesampun Yudas dait Silas ndot lẽq derike pire jelo ngonẽqne, dengan-dengan percaye lẽq Antiokia nike ngirim ie pade malik jari nyampẽang salam tipaq dengan-dengan saq ngutus ie pade. 34 Laguq Silas mutusang tetep ndot lẽq Antiokia. 35 Paulus dait Barnabas ẽndah ndot pire jelo ngonẽqne lẽq Antiokia. Lẽq derike ie pade ngajahang dait ngabarang manik Tuhan bareng kance luwẽq dengan lainne. 36 Ndẽqne ngonẽq sesampun nike Paulus bebase lẽq Barnabas, "Silaq ite tulak jangoq semeton-semeton saq percaye lẽq Deside Isa saq araq lẽq sebilang kote, taoq ite sampun ngabarang Manik Tuhan; adẽq ite serioq berembẽ keadaan ie pade." 37 Barnabas melẽt jauq Yahya saq tesebut Markus, 38 laguq Paulus secare teges bebase bahwe ie ndẽq setuju jauq Markus saq ndẽq mẽlẽ begawẽan bareng kance ie pade dait bilin ie pade lẽq Pampilia. 39 Make Paulus dait Barnabas betungkasan sehingge ie pade bekelin: Barnabas jauq Markus dait belayar kance ie ojok Siprus. 40 Paulus milẽq Silas terus berangkat kance ie sesampun semeton-semeton saq lẽq Antiokia nike nyerahang ie pade tipaq rahmat Allah. 41 Ie pade keliningin Siria dait Kilikia; lẽq derike ie pade neguqang iman jemaah-jemaah.

Acts 16

1 Paulus ngelanjutang kelampanne ojok Derbe beterus ojok Listra. Lẽq derike araq sopoq dengan pengiring Deside Isa aranne Timotius. Inaqne dengan Yahudi saq sampun percaye lẽq Deside Isa; laguq bapaqne dengan Yunani. 2 Lẽq antare dengan-dengan percaye saq ndot lẽq Listra dait lẽq Ikonium, Timotius tekenal jari dengan saq solẽh. 3 Paulus kayun adẽq Timotius milu kance ie; keranaq nike Paulus nyunat Timotius. Ie ngelaksaneang hal nike, sẽngaq dengan-dengan Yahudi lẽq daẽrah derike nike selapuqne nenaoq bahwe bapaqne Timotius dengan Yunani. 4 Lẽq sebilang kote saq ie pade datengin, ie pade nyampẽang tipaq dengan-dengan percaye keputusan-keputusan saq sampun tetentuang siq rasul-rasul dait pemimpin-pemimpin lẽq Yerusalem. Ie pade nasẽhatin semeton-semeton saq sampun percaye nike adẽqne taat lẽq aturan nike. 5 Make jemaah-jemaah nike sayan teguq imanne, dait sebilang jelo sayan luwẽq jumlahne. 6 Roh Suci nẽnten ngijinang Paulus dait Silas nyebarang Manik Allah lẽq wilayah Asia. Jari ie pade ngelanjutang kelampanne ojok daẽrah Prigia dait Galatia. 7 Sewaktu dateng lẽq perbatesan Misia, ie pade cobaq tame ojok daẽrah Bitinia, laguq Roh Deside Isa balaq ie ojok derike. 8 Jari ie pade liwatin Misia dait langsung tipaq Troas. 9 Kelemne, lẽq Troas, Paulus mauq sopoq penyerioqan. Dalem penyerioqanne nike Paulus serioq sopoq dengan Makedonia nganjeng lẽq julune dait ie tunas gati adẽq Paulus lumbar ojok Makedonia jari tulung ie pade. 10 Sesampun Paulus mauq penyerioqan nike, tiang pade langsung berejap gen lalo ojok Makedonia. Sẽngaq siq yakin tiang pade bait kesimpulan bahwe Allah manikang tiang pade ngabarang Kabar Solah nike tipaq dengan-dengan lẽq derike. 11 Tiang pade bilin Troas dait belayar langsung ojok Samotrake, dait jemaqne ojok Neapolis. 12 Lẽman derike tiang pade ojok Pilipi, kote saq utame lẽq bagian Makedonia. Pilipi niki kote perantoan dengan Roma. Lẽq derike tiang pade ndot cume pire jelo. 13 Lẽq jelo Sabat tiang pade lumbar ojok sedi kokoq lẽq luah jebak belẽq kote, sẽngaq tiang pade paran lẽq derike araq taoq ibadah dengan Yahudi. Terus tiang pade tokol dait ngeraos-ngeraos kance dengan-dengan nine saq bekumpul lẽq taoq nike. 14 Sopoq dengan lẽq antare ie pade bedagang lakar lempok lomaq, aranne Lidia, asalne lẽman Tiatira. Ie ngasihin Allah, make Tuhan bukaq angenne adẽq ie nerimaq napi saq Paulus ajahang tipaq ie. 15 Lidia dait selapuq dengan saq araq lẽq balẽne tebaptis. Sesampun tebaptis ie pesilaq tiang pade, ie bebase, "Lamun side pade merase bahwe tiang tetu-tetu sampun percaye lẽq Deside Isa, silaq mererepan lẽq balẽn tiang." Terus ie tunas gati adẽq tiang pade turut kemẽlẽqne. 16 Lẽq sopoq jelo sewaktu tiang pade lumbar ojok taoq bedo'e, tiang pade bedait kance sopoq pelayan nine. Pelayan nine nike tekuasein siq roh jahat saq bau ngeramalang peristiwe-peristiwe saq gen dateng. Siq care ngeramalang nasib dengan, ie ngebẽng keuntungan saq belẽq umaq majikan-majikanne. 17 Pelayan nine nike terus doang turut Paulus dait tiang pade sambil bekuih-kuih, "Dengan-dengan niki hambe-hambe Allah Saq Maheagung! Ie pade rauh gen nyampẽang tipaq semeton senamian berembẽ entane side pade bau selamet!" 18 Pire jelo ngonẽqne dengan nine nike terus doang bekuih maraq nike, Paulus telang kesabaranne, sehingge ie ngẽngat terus bebase lẽq roh nike, "Siq pesẽngan Deside Isa tiang prẽntahang side sugul lẽman dengan nine niki!" Waktu nike ẽndah roh nike sugul lẽman dengan nine nike. 19 Sewaktu majikan-majikanne sadar bahwe kesempatan ie pade jari mauq kẽpẽng sampun telang, ie pade bau Paulus dait Silas, terus ngoros deduaqne ojok lapangan ngadep penguase 20 Ie pade jauq Paulus dait Silas ojok pejabat-pejabat kote nike, terus bebase, "Dengan-dengan niki dengan Yahudi. Ie pade ngorayang lẽq kotente. 21 Ie pade nganjurang dengan ngelaksaneang adat kebiasean saq betentangan kance hukum-hukumte, dengan-dengan Roma. Ite ndẽq bau terimaq atao turut adat kebiasean nike!" 22 Dengan luwẽq ẽndah milu nyerang Paulus dait Silas; dait pejabat-pejabat kote ngantuq kelambi lẽman awak kedue rasul nike, terus suruq dengan mecut rasul-rasul nike. 23 Sesampun ie pade tepecut keras-keras, ie pade tetamaq ojok dalem bui. Kepale bui teprẽntahang jagaq ie pade pacu-pacu. 24 Lantaran prẽntah nike, kepale bui nike tahen ie pade lẽq kamar bui saq paling dalem, dait naẽn ie pade tebelakbak. 25 Kire-kire lẽq tengaq kelem, Paulus dait Silas kenyeke bedo'e dait nyanyiang lagu pujian tipaq Allah. Dengan-dengan saq tebui lainne ẽndah kenyeke dengahang ie pade benyanyi. 26 Selung-selung araq lindur saq belẽq gati jangke dasar bangunan bui nike ẽndah milu inggur. Selapuq lawang bui kebukaq dait rantẽ-rantẽ saq tekadu taliq selapuq dengan tahenan bui ẽndah jari lepas. 27 Kepale bui nike tinjot dait ures. Waktu ie serioq lawang-lawang bui kebukaq, ie serẽt klẽwangne gen matẽq diriqne, sẽngaq ie paran dengan-dengan tahenan bui sampun pelai selapuqne. 28 Laguq Paulus bekuih keras-keras, "Ndaq matẽq diriqde! Tiang pade masih araq lẽq deriki!" 29 Kepale bui nike tunas dilah terus pelai ojok dalem, dait siq ngijikne ie nyungkur lẽq julu Paulus dait Silas. 30 Beterus ie jauq rasul-rasul nike sugul, dait bebase, "Bapaq-bapaq, napi saq harus tiang laksaneang adẽq tiang teselametang?" 31 Paulus dait Silas bejawab, "Percaye lẽq Junjungan Saq Mulie Deside Isa Almasih! Make side gen selamet -- side dait selapuq dengan saq araq lẽq balẽnde!" 32 Terus Paulus dait Silas jelasang manik Tuhan tipaq kepale bui nike dait tipaq selapuq dengan saq araq lẽq balẽne. 33 Lẽq tengaq kelem nike ẽndah, kepale bui nike jauq ie pade beterus persiq bakat-bakat ie pade. Make ie dait selapuq dengan lẽq balẽne langsung tebaptis. 34 Beterus ie jauq Paulus dait Silas ojok balẽne, dait ngaturin ie pade medaran. Ie dait selapuq keluargene seneng gati, sẽngaq mangkin ie pade percaye tipaq Allah. 35 Jemaq kelẽmaqne, pejabat-pejabat kote nike ngutus petugas ojok bui jari nyampẽang prẽntah adẽq Paulus dait Silas telepas. 36 Kepale bui nike nyampẽang hal nike lẽq Paulus, ie bebase, "Bapaq-bapaq, pejabat-pejabat kote niki sampun nyugulang prẽntah jari bẽbasang side pade. Mangkin Bapaq-bapaq kanggo ulẽq. Silaq lumbar dalem damẽ!" 37 Laguq Paulus bebase lẽq petugas nike, "Tiang pade warge negare Roma. Ndẽqman teadilin tiang pade sampun tepecut lẽq julu dengan luwẽq dait tetamaq ojok dalem bui. Dait mangkin ie pade suruq tiang pade lalo tedoq-tedoq? Tiang pade ndẽq mẽlẽ! Suruq pejabat-pejabat kote nike dateng ojok deriki jari bẽbasang tiang pade." 38 Petugas-petugas nike ngelaporang hal nike tipaq pejabat-pejabat kote nike. Waktu ie pade dengah bahwe Paulus dait Silas warge negare Roma, ie pade jari takut. 39 Terus ie pade lumbar tunas maap lẽq Paulus dait Silas, beterus ngatong deduaqne sugul lẽman bui, dait tunas adẽq ie pade bilin kote nike. 40 Paulus dait Silas bilin bui nike terus lumbar ojok balẽ Lidia. Sesampun bedait kance dengan-dengan percaye saq araq lẽq derike, dait ngebẽng semanget lẽq ie pade, Paulus dait Silas berangkat.

Acts 17

1 Paulus dait Silas ngelanjutang kelampanne langan Ampipolis, dait Apolonia, terus dateng lẽq Tesalonika. Lẽq derike araq balẽ ibadah dengan Yahudi. 2 Make Paulus ẽndah lumbar ojok balẽ ibadah nike -- maraq saq biase ie laksaneang -- terus ie pade saling tukah pendapet kance dengan-dengan lẽq derike mengenai ayat-ayat Kitab Suci. Ie laksaneang nike telu jelo Sabat beturut-turut. 3 Siq dasar ayat-ayat Kitab Suci ie jelasang dait buktiang bahwe Almasih saq tejanjiqang siq Allah harus menderite dait teidupang malik lẽman ninggal. Basen Paulus, "Deside Isa saq tiang beriteang tipaq side nike, Almasih saq tejanjiqang." 4 Araq pire dengan jari percaye, terus turut Paulus dait Silas, maraq nike ẽndah luwẽq dengan bangse-bangse lain saq takut lẽq Allah, dait luwẽq malik dengan-dengan nine saq tehormatin. 5 Laguq dengan-dengan Yahudi talon atẽ. Ie pade ngempoh dengan-dengan jahat saq begerame lẽq peken, terus ie pade ngorayang lẽq selapuq kote nike dait nyerbu balẽ sopoq dengan percaye aranne Yason, jari boyaq Paulus dait Silas, sẽngaq ie pade mẽlẽ jauq Paulus dait Silas sugul ngadep dengan luwẽq. 6 Laguq sewaktu ie pade ndẽq ndait Paulus dait Silas, ie pade ngoros Yason dait pire dengan percaye lainne ojok arepan pejabat-pejabat kote nike. Ie pade bekuih, "Dengan-dengan niki ngorayang lẽq mbẽ-mbẽ! Mangkin kotente ẽndah tedatengin siq ie pade, 7 dait Yason sampun nerimaq ie pade lẽq balẽne. Ie pade ngelanggar aturan-aturan Kaisar Roma, sẽngaq ie pade bebase bahwe araq malik raje lain saq bepesẽngan Deside Isa." 8 Siq ucapan-ucapanne nike, ie pade miaq dengan luwẽq dait pare pejabat kote nike jari osah. 9 Laguq sesampun ie pade mauq jaminan lẽman Yason dait lẽman semeton-semeton seiman lainne, make ie pade telepas. 10 Lẽq kelem nike dengan-dengan percaye lẽq kote nike, suruq Paulus dait Silas ojok Berea. Sesampun dateng lẽq derike, Paulus dait Silas lumbar ojok balẽ ibadah Yahudi. 11 Dengan-dengan lẽq Berea solahan atẽne tebanding dengan-dengan lẽq Tesalonika. Seneng gati angen ie pade dengahang berite mengenai Deside Isa, dait sebilang jelo ie pade berajah Kitab Suci adẽqne nenaoq napi pengajahan Paulus nike kenaq atao ndẽq. 12 Luwẽq lẽq antare ie pade saq percaye lẽq Deside Isa, dait ndẽqne sekediq ẽndah dengan-dengan Yunani saq tehormatin saq percaye; nine atao mame. 13 Waktu dengan-dengan Yahudi lẽq Tesalonika dengah bahwe Paulus nyampẽang ẽndah Manik Allah lẽq Berea, ie pade dateng ẽndah ojok Berea ngasut dengan-dengan lẽq derike dait miaq ie pade osah. 14 Becat-becat semeton-semeton lẽq Berea nike ngatong Paulus ojok pesisi, laguq Silas dait Timotius tetep ndot lẽq kote nike. 15 Sesampun ie pade ngatong Paulus jangke dateng Atena, semeton-semeton nike tulak ojok Berea dait jauq pesen lẽman Paulus adẽq Silas dait Timotius becat-becat boyaq ie. 16 Sewaktu Paulus kenyeke ngantih Silas dait Timotius lẽq Atena, asẽq gati angenne serioq kote nike penoq siq berhale-berhale. 17 Keranaq nike lẽq balẽ ibadah, Paulus saling tukah pendapet kance dengan-dengan Yahudi dait dengan-dengan lain saq nyembah Allah lẽq derike. Maraq nike ẽndah lẽq peken-peken, sebilang jelo ie saling tukah pendapet kance sebilang dengan saq araq lẽq derike. 18 Guru-guru lẽman aliran Epikuros dait aliran Stoa bedebat ẽndah kance ie. Pire dengan lẽman ie pade bebase, "Napi saq mẽlẽ teraosang siq dengan niki? Penenaoqne cume sekediq, laguq ie luwẽq raos!" Dengan-dengan saq lain bebase, "Ruene ie beriteang mengenai dẽwe-dẽwe bangse lain." Ie pade bebase maraq nike, lantaran Paulus bebaos mengenai Deside Isa dait mengenai idup malik sesampun ninggal. 19 Terus ie pade jauq Paulus ngadep sidang Areopagus. Lẽq derike ie pade beketuan tipaq Paulus, "Tiang pade melẽt nenaoq pengajahan baru saq side beriteang nike. 20 Sẽngaq side nyampẽang hal-hal saq lain gati kedengahanne lẽq kentok tiang pade. Keranaq nike tiang pade melẽt nenaoq artine." ( 21 Sẽngaq selapuq dengan Atena dait dengan-dengan pendateng saq ndot lẽq derike seneng gati kadu sise waktune jari dengahang dait ngeraosang berite-berite saq paling baru.) 22 Sewaktu Paulus nganjeng lẽq julu dengan-dengan saq bekumpul lẽq Areopagus nike, Paulus bebase, "Hai dengan-dengan Atena! Tiang serioq bahwe dalem selapuq hal side taat beribadah tipaq dẽwe-dẽwe. 23 Sẽngaq waktu tiang lampaq-lampaq lẽq sekiter kotende, sambil merhatiang taoq-taoqde sembahyang, tiang serioq ẽndah sopoq mẽje taoq kurban; lẽq derike araq tetulis, 'Tipaq Allah Saq Nẽnten Tekenal'. Allah saq side pade sembah laguq ndẽq side pade kenal nike, Ie saq tiang beriteang tipaq side pade. 24 Allah saq cipteang dunie niki dait selapuq isine, Ie Tuhan penguase langit dait gumi. Ie nẽnten meneng lẽq dalem balẽ-balẽ dẽwe saq tepiaq siq manusie. 25 Ie ẽndah nẽnten merluang bantuan manusie, sẽngaq Ie saq ngicanin idup dait embok dait selapuqne tipaq manusie. 26 Lẽman sopoq manusie Ie jariang selapuq bangse dait mrẽntahang ie pade ndot lẽq seantẽro gumi. Ie ẽndah saq nentuang lẽman penembẽqne, piran dait lẽq mbẽ ie pade kanggo idup. 27 Allah ngelaksaneang nike adẽq ie pade boyaq Ie. Mudah-mudahan ie pade bedait kance Allah lẽq waktu ie pade boyaq Ie. Laguq setetune Allah nẽnten jaoq lẽman ite sopoq-sopoq. 28 Maraq saq ite dengah lẽman dengan, 'Ite idup dait bau ngeruit dait araq lẽq gumi niki lantaran kuase Allah.' Pade ẽndah kance napi saq teucapang siq penyair-penyairde. Basen ie pade, 'Ite niki bangse saq tejariang siq Allah ẽndah.' 29 Sẽngaq ite niki bangse saq tejariang siq Allah, ite ndẽq kanggo nganggep Allah pade maraq tetato saq tepiaq lẽman emas atao perak atao batu saq tepiaq menurut kepinteran manusie. 30 Selapuq perbuatante saq bodo nike sampun telupaqang siq Allah, laguq mangkin Allah mrẽntahang selapuq dengan lẽq seantẽro dunie betobat lẽman dose-dose ie pade. 31 Sẽngaq Allah sampun nentuang sopoq waktu jari ngadilin seantẽro dunie secare adil. Tugas nike gen telaksaneang siq sopoq dengan saq sampun tetentuang siq Allah lẽq hal nike. Dait adẽq selapuq dengan yakin lẽq hal nike, Allah sampun ngidupang malik dengan nike lẽman ninggal!" 32 Waktu dengan-dengan nike dengah mengenai idup malik sesampun ninggal, araq lẽman ie pade saq kelelẽqang Paulus. Araq ẽndah saq bebase, "Tiang pade melẽt dengah side bebaos malik mengenai hal niki lẽq waktu saq lain." 33 Beterus Paulus bilin ie pade. 34 Laguq araq lẽq antare ie pade saq bepihak lẽq Paulus dait percaye lẽq Deside Isa, lẽq antarene: Dionisius, anggote majelis Areopagus dait sopoq dengan nine aranne Damaris, dait araq pire dengan malik.

Acts 18

1 Sesampun nike Paulus bilin Atena dait lumbar ojok Korintus. 2 Lẽq derike ie bedait kance sopoq dengan Yahudi aranne Akwila, asalne lẽman negeri Pontus. Akwila baruq gati dateng lẽman Italia kance seninene aranne Priskila. Ie pade dateng ojok Korintus sẽngaq Kaisar Klaudius sampun mrẽntahang selapuq dengan Yahudi sugul lẽman Roma. Paulus lumbar jangoq ie pade, 3 terus ndot lẽq derike kance ie pade, dait begawẽan bareng-bareng kance ie pade, sẽngaq pegawẽanne pade maraq Paulus, tukang miaq kẽmah. 4 Laguq lẽq sebilang jelo Sabat, Paulus bebaos-baos lẽq balẽ ibadah, jari ngeyakinang dengan-dengan Yahudi dait dengan bangse-bangse lain. 5 Sesampun Silas dait Timotius dateng lẽman Makedonia, Paulus kadu selapuq waktune jari beriteang Manik Allah dait ngebẽng kesaksian tipaq dengan-dengan Yahudi bahwe Deside Isa nike Almasih saq tejanjiqang siq Allah. 6 Laguq lantaran dengan-dengan terus doang nentang dait ngewade ie, make Paulus ngerapang kerepuk lẽman kelambine jari ngebẽng peringetan tipaq kesalaqan ie pade. Basen Paulus, "Side mẽsaq saq nanggung kesalaqande. Tiang ndẽq salaq, tiang bersi! Mulai mangkin tiang gen lalo ojok dengan bangse-bangse lain." 7 Paulus bilin ie pade, terus lumbar ojok balẽ Titius Yustus, dengan saq ndẽq Yahudi, laguq ie nyembah Allah. Balẽne bedẽkẽtan kance balẽ ibadah. 8 Laguq Krispus, kepale balẽ ibadah nike kance selapuq keluargene percaye lẽq Junjungan Saq Mulie Deside Isa. Dait luwẽq ẽndah dengan-dengan Korintus lainne dengah berite saq tesampẽang siq Paulus, dait ie pade percaye lẽq Deside Isa terus tebaptis. 9 Lẽq sopoq kelem, Tuhan bemanik tipaq Paulus lẽq dalem sopoq penyerioqan, manik-Ne, "Ndaq takut! Beriteang terus Manik Allah, dait ndaq tedoq. 10 Sẽngaq Tiang araq bareng side. Ndẽq araq sopoq dengan juaq saq bau ngelaksaneang saq jahat tipaq side, sẽngaq luwẽq umat Tiang lẽq kote niki." 11 Keranaq nike Paulus ndot lẽq Korintus setaun setenge ngonẽqne, dait ngajahang Manik Allah tipaq ie pade. 12 Sewaktu Galio jari gubernur Akaya, dengan-dengan Yahudi besopoq nentang Paulus dait jauq ie ojok pengadilan. 13 Basen ie pade, "Dengan niki ngebẽng pengaruh lẽq dengan luwẽq adẽq nyembah Allah siq care saq betentangan kance hukum Taurat!" 14 Sewaktu Paulus mẽlẽ bejawab, Galio sampun bebase tipaq dengan-dengan Yahudi, "Hai dengan-dengan Yahudi! Lamun saq telaporang niki masalah pelanggaran atao kejahatan, mule sepatutne tiang sabar dengahang laporande niki. 15 Laguq niki pegejuhan mengenai ucapan-ucapan dait aran-aran dait ẽndah hukum-hukumde mẽsaq! Jari side pade saq harus nyelesẽang ie. Tiang ndẽq mẽlẽ ngadilin hal-hal saq maraq niki!" 16 Terus Galio tundung ie pade sugul. 17 Make ie pade bau Sostenes, kepale balẽ ibadah nike, dait ngempuk ie lẽq julu mẽje pengadilan. Laguq Galio tetu-tetu ndẽq peduli lẽq hal nike. 18 Sesampun nike Paulus masih ngonẽq ndot lẽq Korintus. Beterus ie bepamit lẽq dengan-dengan percaye lẽq derike, terus belayar kance Priskila dait Akwila ojok Siria. Lẽq Kengkrea, Paulus peleng bulune saq tealurang bẽlo lantaran nazarne tipaq Tuhan. 19 Sesampun dateng lẽq Epesus, Paulus bilin Priskila dait Akwila, terus tame ojok balẽ ibadah dait saling tukah pendapet kance dengan-dengan Yahudi lẽq derike. 20 Ie pade tunas adẽq Paulus mẽlẽ ngonẽqan ndot kance ie pade, laguq ie ndẽq mẽlẽ. 21 Timaq maraq nike, lẽq waktu gen berangkat, Paulus bebase, "Lamun Allah ngijinang, tiang gen tulak malik ojok deriki." Sesampun bebase maraq nike, ie berangkat lẽman Epesus. 22 Sesampun turun lẽq Kaisarea, ie lumbar ojok Yerusalem jari ngucapang salam tipaq jemaah lẽq derike, terus berangkat ojok Antiokia. 23 Sesampun ndot lẽq derike pire jelo ngonẽqne, ie berangkat malik ojok daẽrah Galatia dait Prigia jari neguqang iman selapuq dengan percaye. 24 Lẽq waktu nike, araq sopoq dengan Yahudi kelahiran Aleksandria dateng ojok Epesus, aranne Apolos. Ie ceket ngeraos dait paham gati mengenai isi Kitab Suci, 25 dait sampun tedidik jari nerimaq pengajahan mengenai Tuhan. Make ie semanget gati ngajahang mengenai Deside Isa secare teliti, timaq baruq baptisan Yahya doang saq ie taoq. 26 Ie mulai bani ngajahang lẽq balẽ ibadah, dait lẽq waktu Priskila dait Akwila dengah pengajahanne, ie pade jauq ie ojok balẽ. Terus lẽq derike ie tejelasang malik secare teliti mengenai karye Allah. 27 Beterus Apolos beniat lumbar ojok Akaya. Make dengan-dengan saq percaye tipaq Deside Isa lẽq Epesus, nulis surat tipaq semeton-semeton saq percaye lẽq Akaya adẽq ie pade nerimaq Apolos. Dait sewaktu Apolos dateng lẽq Akaya, ternyate bantuanne bemanpaat gati umaq dengan-dengan saq lantaran rahmat Allah sampun percaye lẽq Deside Isa. 28 Sẽngaq siq bukti-bukti saq kuat ie kalahang dengan-dengan Yahudi waktu ie pade bedebat lẽq julun dengan luwẽq. Dait ie buktiang kadu ayat-ayat saq araq lẽq Kitab Suci bahwe Deside Isa nike Almasih.

Acts 19

1 Sewaktu Apolos masih lẽq Korintus, Paulus kenyeke jelajahin daẽrah-daẽrah pedaleman terus dateng lẽq Epesus. Lẽq derike ie bedait kance pire dengan saq sampun percaye lẽq Deside Isa. 2 Paulus beketuan lẽq ie pade, "Napi side pade sampun nerimaq Roh Suci waktu side pade percaye lẽq Deside Isa?" Ie pade bejawab, "Ndẽqman, malahan tiang pade ndẽqman dengah araq Roh Suci." 3 Paulus beketuan, "Lamun maraq nike, kadu baptisan napi side pade tebaptis?" "Kadu baptisan Yahya," Jawab ie pade. 4 Terus Paulus bebase, "Yahya baptis dengan jari nyatayang bahwe dengan-dengan nike sampun tobat lẽman dose-dosene. Laguq lẽq waktu nike ẽndah Yahya bebase lẽq dengan-dengan Israel bahwe, ie pade harus percaye lẽq Dengan saq gen rauh sesampun Yahya, nike Deside Isa." 5 Sesampun ie pade dengah hal nike, ie pade tebaptis lẽq dalem pesẽngan Junjungan Saq Mulie Deside Isa. 6 Dait lẽq waktu Paulus noloq imene lẽq atas ie pade, Roh Suci turun lẽq ie pade, terus ie pade mulai ngeraos kadu base lain dait benubuat. 7 Selapuqne nike kire-kire araq due olas dengan luwẽqne. 8 Telu bulan ngonẽqne Paulus terus bani bebaos tipaq dengan-dengan lẽq balẽ ibadah dait bedebat kance ie pade mengenai Kerajaan Allah. 9 Laguq pire dengan lẽq antare dengan-dengan nike pagah dait ie pade ndẽq mẽlẽ percaye. Lẽq julu selapuq dengan saq bekumpul lẽq derike, ie pade ngewade pengajahan mengenai Tuhan nike. Keranaq nike Paulus bilin ie pade, terus lumbar kance pengiring-pengiringne ojok sekolah Tiranus. Lẽq derike sebilang jelo ie besoal jawab kance dengan-dengan. 10 Paulus tetep ngelaksaneang hal nike due taun ngonẽqne, jangke selapuq dengan saq ndot lẽq wilayah Asia, timaq dengan Yahudi atao dengan Yunani, selapuqne dengah Manik Tuhan. 11 Allah miaq keajaipan-keajaipan saq luar biase langan Paulus. 12 Malahan araq dengan saq jauq saputangan atao kẽrẽng saq sampun tekadu siq Paulus ojok dengan-dengan sakit, make penyakit ie pade telang dait roh jahat ẽndah sugul lẽman ie pade. 13 Pire dengan belian Yahudi lumbar ojok mbẽ-mbẽ, nyugulang roh jahat lẽman dengan-dengan. Ie pade ẽndah cobaq kadu pesẽngan Junjungan Saq Mulie Deside Isa jari nyugulang roh-roh jahat nike. Basen ie pade lẽq roh-roh jahat nike, "Lẽq dalem pesẽngan Deside Isa saq teberiteang siq Paulus, tiang prẽntahang side sugul!" 14 Araq sopoq imam kepale, aranne Skewa, bedowẽ pituq bije mame, ie pade saq ngelaksaneang hal saq maraq nike. 15 Laguq roh jahat nike ngeraos lẽq ie pade, "Tiang kenal Deside Isa dait Paulus ẽndah tiang kenal, laguq side niki sai?" 16 Terus dengan saq tekuasein siq roh jahat nike nyelontak dait gemes gati entan ie cakrah bije-bije Skewa nike jangke bakat dait ie pade pelai lẽman balẽ nike belondan sẽngaq kelambine soẽk. 17 Selapuq dengan Yahudi dait dengan bangse-bangse lain saq ndot lẽq Epesus dengah peristiwe nike, terus ie pade jari takut. Make pesẽngan Junjungan Saq Mulie Deside Isa sayan kesohor. 18 Luwẽq dengan saq sampun jari percaye lẽq Deside Isa, dateng ngakuq lẽq julun dengan luwẽq selapuq perbuatan-perbuatan ie pade. 19 Dait ie pade saq biase kadu ilmu-ilmu sẽhẽr, ngumpulang buku-buku ie pade terus sedutne lẽq julu dengan luwẽq. Aji buku-buku nike lamun terẽkẽng selapuqne, araq kire-kire sẽket iyu kẽpẽng perak. 20 Make, siq care saq hẽbat nike manik Tuhan sayan nyebar dait sayan kuat pengaruhne. 21 Sesampun peristiwe-peristiwe nike, Paulus beniat lumbar ojok Makedonia dait Akaya terus ojok Yerusalem. Basen Paulus, "Sesampun ojok derike, tiang harus lalo ojok Roma ẽndah." 22 Jari ie ngutus due pembantune, Timotius dait Erastus jari lumbar ojok Makedonia, laguq Paulus mẽsaq masih ndot pire waktu ngonẽqne lẽq Asia. 23 Kire-kire lẽq waktu nike ẽndah araq keributan belẽq lẽq Epesus lantaran pengajahan mengenai Langan saq tepetitoqang siq Junjungan Saq Mulie nike. 24 Sẽngaq lẽq kote nike araq sopoq dengan tukang pandẽ perak aranne Demetrius saq piaqang Dewi Artemis balẽ-balẽan lẽman perak. Usahe dengan nike bau datengang hasil saq belẽq lẽq buruh-buruhne. 25 Keranaq nike ie ngumpulang buruh-buruhne bareng kance buruh-buruh tukang pandẽ perak saq lainne, terus bebase, "Semeton senamian! Side pade nenaoq bahwe ite mauq pengasilan lẽman pegawẽan niki. 26 Mangkin side pade sampun serioq dait dengah mẽsaq napi saq telaksaneang siq Paulus nike. Ie bebase bahwe dẽwe-dẽwe saq tepiaq siq manusie nike ndẽqne dẽwe. Dait ie sampun nyesatang luwẽq dengan, ndẽqne cume lẽq deriki, lẽq Epesus, laguq gen jangke dateng selapuq wilayah Asia. 27 Bahayene bahwe usahente niki gen lengẽ aranne. Dait ndẽqne nike doang, malahan gedẽng Dẽwi Artemis ẽndah terẽmẽhang dait kemulieanne teicaq-icaq; padahal ie dẽwi saq tesembah siq selapuq dengan lẽq Asia dait lẽq seantẽro dunie!" 28 Sesampun ie pade dengah hal nike, angen ie pade jari panas, terus ie pade nyurak-nyurak, "Idup Artemis, dẽwi dengan Epesus!" 29 Make keributan nike sayan belẽq jangke dateng selapuq kote. Beterus perusuh-perusuh bau Gayus dait Aristarkus, ie dengan-dengan Makedonia saq ngiring Paulus lẽq dalem kelampanne, terus ie pade teoros ojok gedung kesenian nike. 30 Paulus mẽlẽ tame turut ie pade, laguq dengan-dengan saq percaye lẽq Deside Isa balaq ie. 31 Araq pembelẽq-pembelẽq propinsi Asia nike, saq besahabat kance Paulus, suruq dengan bebadaq lẽq Paulus adẽq ie ndaq tame lẽq gedung kesenian nike. 32 Lẽq waktu nike dengan-dengan saq bekumpul lẽq gedung nike sampun jari biur lantur. Araq saq nyurak maraq niki, araq ẽndah saq nyurak maraq nike, sẽngaq luwẽqan lẽq antare ie pade saq ndẽq nenaoq kembẽq ie pade bekumpul lẽq derike. 33 Terus sopoq dengan aranne Aleksander tejelek ojok julu siq dengan-dengan Yahudi. Ie mauq keterangan lẽman dengan luwẽq mengenai napi saq telaksane. Make Aleksander ngebẽng tande kadu imene adẽqne tebẽng kesempatan jari bẽle diriqne lẽq julun dengan-dengan nike. 34 Laguq sewaktu ie pade serioq bahwe ie dengan Yahudi, bareng-bareng ie pade nyurak keras-keras, "Idup Artemis! Dẽwi dengan Epesus!" 35 Ahirne jurutulis kote berhasil piaq tenang dengan luwẽq nike. Ie bebase, "Penduduk Epesus! Sebilang dengan nenaoq bahwe Epesus nike kote saq meliharaq gedẽng Dẽwi Artemis dait tetatone saq turun lẽman langit. 36 Ndẽq araq sopoq dengan juaq saq bau nentang hal nike. Keranaq nike side pade tenang, dait ndaq gupuh-gupuh gawẽq napi-napi. 37 Side pade jauq dengan-dengan nike ojok deriki ndẽqne lantaran ie pade sampun ngerampok gedẽng dẽwe atao lantaran ie pade sampun menghine dẽwinte. 38 Lamun Demetrius kance buruh-buruhne nike araq bedowẽ sopoq pengaduan tipaq dengan, alurang ie pade jauq pelekare nike ojok pengadilan. Pengadilan bau nerimaq hal nike dait pejabat-pejabat pemrẽntah ẽndah tetep araq. 39 Laguq lamun masih araq malik pelekare saq lain saq side pade melẽtang, nike harus teselesẽang lẽq dalem rapat umum saq sah. 40 Sẽngaq napi saq telaksane jelo niki bau bahayeang ite. Ite bau tetuduh miaq keributan, sẽngaq ite ndẽq bedowẽ sopoq alasan saq kenaq lẽq keributan niki." 41 Sesampun jelasang selapuq hal nike, jurutulis kote nike suruq dengan luwẽq nike ulẽq.

Acts 20

1 Sesampun keadaan lẽq Epesus tentrem malik, Paulus ngumpulang jemaah dait neguqang angen ie pade. Terus Paulus bepamit lẽq dengan-dengan nike, dait ngelanjutang kelampanne ojok Makedonia. 2 Paulus datengin daẽrah-daẽrah Makedonia, dait luwẽq ngebẽng nasẽhat lẽq dengan-dengan saq percaye lẽq Deside Isa dait ngebẽng ie pade semanget. Beterus ie lumbar ojok Yunani. 3 Telu bulan ngonẽqne ie ndot lẽq derike. Sewaktu ie kenyeke berejap gen belayar ojok Siria, araq berite bahwe dengan-dengan Yahudi kenyeke mupakat gen nyematẽq ie. Keranaq nike ie mutusang gen tulak langan Makedonia. 4 Sopater bije Pirus saq asalne lẽman Berea lumbar bareng kance ie; maraq nike ẽndah Aristarkus dait Sekundus dengan lẽman Tesalonika, dait Gayus dengan Derbe, Timotius, Tikikus dait Tropimus, dengan-dengan lẽman propinsi Asia. 5 Ie pade lumbar bejulu ngantih lẽq Troas. 6 Sesampun Perayaan Ruti Ndẽq Beragi, tiang pade belayar bilin Pilipi. Sesampun lime jelo, tiang pade bekumpul malik kance ie pade lẽq Troas. Lẽq derike tiang pade ndot pituq jelo ngonẽqne. 7 Lẽq jelo penembẽq dalem minggu nike, sewaktu tiang pade bekumpul jari bareng-bareng bekelor, Paulus bebaos kance semeton-semeton seiman lẽq derike, sẽngaq ie beniat gen berangkat lẽq jemaqne. 8 Lẽq kamar atas taoq tiang pade bekumpul nike araq luwẽq dilah saq nyale. 9 Sopoq terune aranne Eutikus tokol lẽq jendẽle. Sẽngaq Paulus ngonẽq gati bebaos, terune nike jari ngantok gati jangke ie ketindoqan lẽq jendẽle nike, terus ie geriq lẽman tingket saq ketelu. Waktu ie teangkat siq dengan-dengan, terune nike sampun milinang. 10 Laguq Paulus turun ojok bawaq, terus rebaqang diriqne lẽq atas terune nike dait kapongne. Basen Paulus, "Ndaq kuatir, ie masih idup!" 11 Beterus Paulus taẽk malik ojok atas, dait bagi-bagiang ruti, terus ie pade bekelor bareng-bareng. Sesampun inggas bekelor, Paulus bebaos malik kance dengan-dengan nike jangke dateng subuh. Beterus Paulus berangkat. 12 Dengan-dengan jauq ulẽq terune saq sampun idup nike ojok balẽne. Ie pade merase seneng dait tehibur. 13 Tiang pade juluan lumbar ojok kapal, terus belayar ojok Asos jari bait Paulus lẽq derike sesuai kance pesen lẽman ie, sẽngaq ie mẽlẽ lumbar ojok derike langan darat. 14 Sesampun bedait lẽq Asos, Paulus taẽk ojok kapal terus tiang pade belayar ojok Metilene. 15 Lẽman derike tiang pade belayar malik, dait jemaqne dateng lẽq taoq saq berandangan kance pulao Kios. Jemaqne tiang pade dateng lẽq Samos, dait karing sejelo malik dateng lẽq Miletus. 16 Paulus sampun mutusang ndẽqne nyelaloq lẽq Epesus, adẽqne ndẽq sie-sieang waktu lẽq daẽrah Asia. Lamun iniq Paulus mẽlẽ becat-becat dateng lẽq Yerusalem lẽq Hari Raye Pentakosta. 17 Lẽman Miletus Paulus ngirim berite ojok Epesus jari tunas pare pemimpin jemaah lẽq derike dateng bedait kance ie. 18 Sesampun ie pade dateng, Paulus bebase lẽq ie pade, "Semeton-semeton sampun nenaoq berembẽ tiang idup sengonẽq niki lẽq antare side pade lẽman jelo penembẽq tiang dateng lẽq Asia. 19 Siq kerendahan atẽ dait sedih gati, tiang ngelayanin Tuhan lẽq tengaq-tengaq penderitean saq tiang alamin lantaran rencane jahat dengan-dengan Yahudi saq mẽlẽ nyematẽq tiang. 20 Side pade sampun nenaoq bahwe tiang secare terus-terang nyampẽang lẽq side pade napi saq bemanpaat umaq side pade. Tiang ngajah side pade lẽq taoq-taoq dengan luwẽq dait lẽq balẽ-balẽ. 21 Tipaq bangse-bangse Yahudi dait dengan bangse-bangse lain, selapuqne tiang peringet adẽq ie pade tobat lẽman dose-dosene dait parek ojok Allah, serte beriman lẽq Junjungante Saq Mulie Deside Isa. 22 Mangkin jari taat lẽq prẽntah Roh Suci, tiang lalo ojok Yerusalem. Dait tiang ndẽq ngerti napi saq gen nimpe tiang lẽq derike. 23 Tiang cume nenaoq bahwe lẽq sebilang kote, Roh Suci sampun secare teges nyampẽang lẽq tiang, bahwe tiang gen tame bui dait gen menderite. 24 Laguq tiang ndẽq peduli lẽq idup tiang niki, asal tiang bau nutuqang tugas saq tepercayeang siq Junjungan Saq Mulie Deside Isa tipaq tiang dait asal tiang tetep setie jangke penutuq idup tiang jari beriteang Kabar Solah mengenai rahmat Allah nike. 25 Dait mangkin tiang nenaoq, side selapuq saq sampun tiang datengin jari nyampẽang berite mengenai Kerajaan Allah, ndẽq gen bedait kance tiang malik. 26 Keranaq nike mangkin secare teges tiang sampẽang tipaq side pade bahwe lamun araq lẽq antare side pade saq binase ẽraq, nike ndẽqne salaq tiang. 27 Tiang ndẽq uwah bilin tugas tiang jari jelasang selapuq rencane Allah tipaq side pade. 28 Side pade harus jagaq diriqde dait jagaq ẽndah selapuq jemaah saq sampun tepercayeang lẽq side pade siq Roh Suci jari tejagaq; sẽngaq side pade sampun teangkat jari pengawas jemaah nike. Side pade harus jagaq jemaah Allah nike maraq pengarat jagaq dombe-dombene, sẽngaq Allah sampun jariang jemaah nike jari dowẽ-Ne siq daraq Bije-Ne mẽsaq. 29 Sesampun tiang bilin, pasti gen dateng serigale-serigale saq galak ojok tengaq-tengaq side pade. Dait dengan-dengan saq side pade jagaq nike gen jari mangse serigale-serigale nike. 30 Malahan lẽq antare side mẽsaq ẽndah gen araq dengan-dengan saq gen nyampẽang berite saq ndẽq kenaq. Hal nike ie pade laksaneang adẽq dengan-dengan saq sampun percaye lẽq Deside Isa jari sesat dait turut ie pade. 31 Keranaq nike, side pade bejage-jage! Inget bahwe telu taun ngonẽqne, siq luwẽq nyugulang aiq mate, peteng menah, tiang ndẽq engkah-engkahne ngajah sebilang dengan lẽman side pade. 32 Mangkin tiang serahang side pade ojok Tuhan dait tipaq berite rahmat-Ne saq bekuase neguqang side pade dait ngicanin side pade paice jari warisan saq tetentuang umaq selapuq dengan saq sampun Ie suciang. 33 Tiang ndẽq uwah harepang emas, perak atao kelambi lẽman sai juaq. 34 Side mẽsaq nenaoq bahwe siq ime tiang mẽsaq tiang begawẽan jari keperluan tiang mẽsaq dait batur-batur saq milu kance tiang. 35 Lẽq dalem selapuq hal tiang sampun ngebẽng teladan tipaq side bahwe siq begawẽan pacu-pacu maraq niki, ite harus tulung dengan-dengan saq lemah. Sẽngaq ite harus inget lẽq napi saq sampun temanikang Junjungan Saq Mulie Deside Isa, 'Bahagiean ite ngebẽng ketimbang nerimaq.' " 36 Sesampun bebase maraq niki, Paulus bareng dengan-dengan nike sujut bedo'e. 37 Ie pade selapuq nangis sambil ngapong ie dait siduk ie. 38 Ie pade sedih terutame lantaran Paulus bebase bahwe ie pade ndẽq gen serioq ie malik. Terus ie pade ngatong Paulus jangke dateng kapal.

Acts 21

1 Tiang pade tunas pamit lẽq pemimpin-pemimpin jemaah lẽman Epesus nike, terus bilin ie pade. Terus tiang pade belayar langsung ojok pulao Kos; dait jemaqne tiang pade dateng lẽq pulao Rodos. Lẽman derike tiang pade belayar ojok pelabuan Patara. 2 Lẽq Patara tiang pade ndait kapal saq gen ojok Penisia. Jari tiang pade taẽk lẽq kapal nike terus berangkat 3 dait tiang pade belayar jangke tiang pade serioq pulao Siprus lẽq sedi kiri, laguq tiang pade terus belayar ojok Siria. Tiang pade belabuh lẽq Tirus, sẽngaq lẽq derike kapal taoq tiang pade numpang gen nurunang muatanne. 4 Lẽq taoq nike tiang pade lalo jangoq dengan-dengan saq percaye lẽq Deside Isa, terus ndot bareng kance ie pade pituq jelo ngonẽqne. Langan petunjuk lẽman Roh Allah, dengan-dengan nike ngebẽng nasẽhat tipaq Paulus adẽqne ndaq lumbar ojok Yerusalem. 5 Laguq sesampun waktune tiang pade harus berangkat, tiang pade bilin ie pade, terus ngelanjutang kelampan tiang pade lẽman derike. Ie pade selapuq lantong anak kance seninene ngatong tiang pade jangke dateng luah kote. Lẽq sedin pesisi, tiang pade selapuq sujut bedo'e. 6 Sesampun nike tiang pade besalam-salaman, terus tiang pade taẽk ojok kapal, dait ie pade ulẽq ojok balẽne. 7 Tiang pade belayar terus lẽman Tirus jangke dateng Ptolemais. Lẽq derike tiang pade lalo jangoq semeton-semeton saq percaye lẽq Deside Isa jari ngucapang salam tipaq ie pade, terus ndot sejelo bareng ie pade. 8 Lẽq jemaqne tiang pade berangkat malik, terus dateng lẽq Kaisarea. Lẽq derike tiang pade lalo ojok balẽn Pilipus dengan saq beriteang Kabar Solah nike, ie salaq sopoq lẽman pituq dengan saq tepilẽq lẽq Yerusalem, dait tiang pade ndot lẽq balẽne. 9 Empat bijene saq dedare sampun nerimaq paice jari benubuat. 10 Sesampun pire ngonẽqne tiang pade araq lẽq derike, araq sopoq nabi rauh lẽman Yudea, aranne Agabus. 11 Nabi nike rauh tipaq tiang pade, terus bait sabuk Paulus. Kadu sabuk nike ie taliq ime naẽne mẽsaq, terus bebase, "Niki saq temanikang siq Roh Suci: Dengan saq ngẽpẽ sabuk niki gen tetaliq maraq niki lẽq Yerusalem siq dengan-dengan Yahudi, dait teserahang ojok dengan bangse-bangse lain." 12 Waktu tiang pade dengah hal nike, tiang pade dait selapuq semeton saq ndot lẽq Kaisarea nike sanget siqne tunas lẽq Paulus adẽq ie ndaq lumbar ojok Yerusalem. 13 Laguq jawab Paulus, "Napi manpaatne side pade nangis maraq niki jangke piaq angen tiang susah? Tiang sampun siep, ndẽqne cume jari tebau lẽq derike, laguq ẽndah matẽ lantaran Junjungan Saq Mulie Deside Isa." 14 Paulus ndẽq mẽlẽ dengah tiang pade, jari tiang pade engkah balaq ie, "Menengang, pekayunan Tuhan doang saq telaksane." 15 Sesampun tiang pade ndot lẽq derike pire jelo ngonẽqne, tiang pade barang-barang, terus berangkat ojok Yerusalem. 16 Pire semeton lẽman Kaisarea milu ẽndah kance tiang pade jari ngatong tiang pade ojok balẽn Manason, sẽngaq tiang pade gen madẽq lẽq balẽne. (Manason nike dengan Siprus saq sampun ngonẽq jari pengiring Deside Isa.) 17 Sewaktu tiang pade dateng lẽq Yerusalem, semeton-semeton lẽq derike cemoh gati angenne nyambut tiang pade. 18 Lẽq jemaqne Paulus lumbar bareng kance tiang pade jangoq Yakub; selapuq pemimpin-pemimpin jemaah araq ẽndah lẽq derike. 19 Sesampun tiang pade ngucapang salam tipaq ie pade, Paulus nyeriteang lẽq ie pade selapuq saq sampun telaksaneang siq Allah langan ie lẽq antare dengan bangse-bangse lain. 20 Sesampun dengah cerite Paulus nike, ie pade selapuq mulieang Allah. Beterus bebase lẽq Paulus, "Semeton tiang Paulus, side harus nenaoq bahwe sampun beiyu-iyu dengan Yahudi saq percaye lẽq Deside Isa. Selapuqne nike dengan-dengan saq setie dait taat lẽq Hukum Taurat. 21 Dait mangkin ie pade dengah bahwe side ngajah selapuq dengan Yahudi saq ndot lẽq antare dengan bangse-bangse lain adẽqne ngelepas hukum Musa. Side ajah ie pade adẽq ndaq sunat bije-bijene atao turut adat istiadat Yahudi. 22 Mangkin dengan-dengan Yahudi saq sampun percaye nike pasti gen dengah bahwe side sampun araq lẽq deriki. Jari berembẽ mangkin? 23 Solahan side turut nasẽhat tiang pade. Araq empat dengan lẽq deriki saq sampun benazar tipaq Tuhan. 24 Nah, silaq side lumbar ngaraqang upacare penyucian diriq bareng kance ie pade, dait side saq nanggung selapuq biayene, adẽq ie pade bau peleng bulune. Siq care nike gen nyate tipaq selapuq dengan bahwe napi saq sampun ie pade dengah mengenai side ndẽqne tetu, sẽngaq side mẽsaq ngelaksaneang Hukum Taurat. 25 Laguq mengenai dengan bangse-bangse lain, saq sampun percaye lẽq Deside Isa, tiang pade sampun ngirim surat lẽq ie pade mengenai keputusan tiang pade, bahwe ie pade ndẽq kanggo ngelorang keloran saq sampun teaturang tipaq berhale, ndaq kelorang daraq, ndaq kelorang binatang saq matẽ tepekok; dait ndaq gawẽq perbuatan-perbuatan saq cabul." 26 Sesampun nike Paulus lumbar kance dengan-dengan saq empat nike, terus ngaraqang upacare penyucian diriq bareng kance ie pade. Beterus ie pade tame ojok Gedẽng Allah jari bebadaq karing pire jelo upacare penyucian nike gen inggas, dait piran kurban umaq ie pade sopoq-sopoq teaturang. 27 Sesampun gen tutuq pituq jelo, araq pire dengan Yahudi lẽman Asia serioq Paulus lẽq dalem Gedẽng Allah. Terus ie pade hasut dengan luwẽq dait bau Paulus 28 sambil nyurak-nyurak, "Hai, dengan-dengan Israel! Tulung! Paulus niki dengan saq lalo ojok mbẽ-mbẽ jari ngajahang selapuq dengan pengajahan saq nentang bangse Israel, nentang Hukum Taurat dait nentang Gedẽng Allah niki. Dait mangkin malahan ie jauq dengan bangse-bangse lain tame ojok dalem Gedẽng Allah dait najisang taoq saq suci niki!" ( 29 Ie pade bebase maraq nike sẽngaq ie pade serioq Tropimus dengan Epesus nike araq bareng kance Paulus lẽq kote; dait ie pade paran bahwe Paulus sampun jauq ie ojok dalem Gedẽng Allah.) 30 Selapuq kote jari biur lantur, dait selapuq dengan pelai bekerimpun. Ie pade bau Paulus, dait orosne sugul lẽman Gedẽng Allah. Langsung waktu nike ẽndah lawang Gedẽng Allah teimpet. 31 Lẽq waktu dengan-dengan saq miaq keributan nike berusahe matẽq Paulus, araq dengan saq ngelapor ojok kepale pasukan bahwe selapuq kote Yerusalem biur lantur. 32 Langsung kepale pasukan nike jauq pire prewire dait prajurit, terus becat-becat lumbar ojok taoq keributan nike. Waktu dengan luwẽq nike serioq kepale pasukan nike dateng bareng pasukanne, ie pade engkah ngempuk Paulus. 33 Kepale pasukan nike ngerapetin Paulus, terus bau ie dait suruq dengan borgol ie. Terus kepale pasukan nike beketuan, sai Paulus nike dait napi saq sampun ie piaq. 34 Separo lẽman dengan luwẽq nike bejawab maraq niki dait separo ẽndah bejawab maraq nike. Keadaanne ore gade jangke kepale pasukan nike ndẽq iniq nenaoq napi setetune saq telaksane. Keranaq nike ie mrẽntahang adẽq Paulus tejauq ojok markas. 35 Waktu ie pade jauq Paulus jangke dateng undak-undak, dengan-dengan saq miaq keributan nike ngamuk sehingge Paulus harus teopong siq prajurit-prajurit nike. 36 Ie pade teturut lẽman mudi siq dengan-dengan saq miaq keributan sambil nyurak-nyurak, "Matẽq ie!" 37 Sewaktu gen tame ojok dalem markas, Paulus bebase lẽq kepale pasukan nike, "Napi kanggo tiang matur semendaq kance pelungguh?" "Napi side tao base Yunani?" kepale pasukan nike beketuan. 38 "Lamun maraq nike side niki ndẽqne dengan Mesir saq piranan ngaraqang pemberontakan dait jauq pelai empat iyu pengaco saq kadu gegaman tame ojok padang gurun?" 39 Jawab Paulus, "Tiang dengan Yahudi, warge kote Tarsus, kote saq penting lẽq Kilikia. Tulung ijinang tiang ngeraos kance dengan-dengan nike." 40 Jari sesampun tebẽng ijin, Paulus nganjeng lẽq undak-undak, terus ngebẽng tande kadu imene. Selapuq dengan jari tenang, beterus Paulus ngeraos kance dengan-dengan nike kadu base Ibrani. Basen Paulus,

Acts 22

1 "Bapaq-bapaq dait semeton-semeton senamian! Tiang gen ngajuang pembẽlean tiang tipaq side pade. Silaq dengahang!" 2 Waktu dengan-dengan nike dengah Paulus mulai bebaos kadu base Ibrani, ie pade jari sayan tenang malik. Make Paulus ngelanjutang keteranganne. 3 "Tiang dengan Yahudi, Tiang tebijeang lẽq Tarsus lẽq negeri Kilikia, laguq tiang tebelẽqang lẽq deriki lẽq Yerusalem, dait tedidik pacu-pacu siq Gamaliel kadu hukum saq teicanin siq nabi Musa tipaq leluhurte. Pade maraq semeton-semeton senamian saq araq lẽq deriki jelo niki, tiang ẽndah dengan saq rajin begawẽan bagi Allah. 4 Tiang nganiaye pengiring-pengiring Junjungan Saq Mulie Deside Isa jangke matẽ. Ie pade selapuq saq mame dait saq nine, tiang bau dait tiang tamaq ojok dalem bui. 5 Imam Agung mẽsaq dait selapuq Mahkamah Agame bau ngicanin kesaksian bahwe tiang ndẽq beduste. Sẽngaq ie pade saq sampun ngicanin tiang surat kuase saq tetujuang tipaq dengan-dengan Yahudi lẽq Damsyik. Kadu surat nike tiang kanggo bau pengiring-pengiring Junjungan Saq Mulie Deside Isa saq araq lẽq derike, dait jauq ie pade ojok Yerusalem jari tehukum." 6 "Waktu tiang kenyeke dalem kelampan gen dateng lẽq Damsyik waktu nike panjeng jelo, sopoq cahaye saq menah gati selung-selung besinar lẽman langit lẽq sekelining tiang. 7 Tiang rebaq ojok tanaq, terus tiang dengah suare tipaq tiang, 'Saulus, Saulus! Kembẽq side nganiaye Tiang?' 8 Terus tiang beketuan, 'Sai Pelungguh, Tuan?' Jawab-Ne, 'Tiang Isa dengan Nazaret saq side aniaye nike.' 9 Dengan-dengan saq araq bareng kance tiang lẽq derike serioq ẽndah cahaye nike, laguq ie pade ndẽq dengah suare saq tetujuang tipaq tiang. 10 Terus tiang beketuan malik, 'Napi saq harus tiang piaq, Tuhan?' Dait jawab Tuhan, 'Ures, dait tame ojok Damsyik. Laun lẽq derike side gen tebadaq napi saq sampun tetentuang siq Allah side laksaneang.' 11 Tiang jari bute lantaran maten tiang keselaq siq cahaye nike. Jari batur-batur tiang saq dẽndẽn tiang tame ojok Damsyik. 12 Lẽq derike araq sopoq dengan aranne Ananias. Ie dengan saq solẽh dait taat ngelaksaneang Hukum Taurat. Selapuq dengan Yahudi saq ndot lẽq Damsyik hormat gati lẽq ie. 13 Ie dateng jangoq tiang, terus nganjeng lẽq dẽkẽt tiang dait bebase, 'Saulus semeton tiang, bukaq penentengde dait nyerioq malik!' Waktu nike ẽndah tiang pedasang ie dait tiang tao serioq ie. 14 Beterus ie bebase lẽq tiang, 'Allah leluhurte sampun milẽq side jari nenaoq pekayunan-Ne, jari serioq Saq Kenaq, dait jari dengah suare-Ne. 15 Side gen jari saksi saq nyebarang tipaq selapuq dengan napi saq sampun side serioq dait dengah. 16 Mangkin ndaq ngantih ngonẽq-ngonẽq malik. Silaq ures, dait serahang diriqde tebaptis. Tunas tipaq Tuhan adẽq side tebẽbasang lẽman dose-dosende.' " 17 "Tiang tulak ojok Yerusalem, dait sewaktu tiang kenyeke bedo'e lẽq Gedẽng Allah, roh tiang tekuasein siq kuase ilahi. 18 Tiang serioq Tuhan; Ie bemanik lẽq tiang, 'Becat bilin Yerusalem, sẽngaq dengan-dengan lẽq deriki ndẽq gen nerimaq kesaksiande mengenai Tiang.' 19 Jawab tiang, 'Tuhan, ie pade tetu-tetu nenaoq bahwe tiang niki sampun tame ojok balẽ-balẽ ibadah jari bau ie pade dait ngempuk dengan-dengan saq percaye lẽq Deside. 20 Maraq nike ẽndah waktu saksi Deside Stepanus tematẽq, tiang mẽsaq araq lẽq derike dait tiang setuju ie tematẽq. Malahan tiang saq jagaq kelambi dengan-dengan saq nyematẽq ie.' 21 Laguq Tuhan bemanik malik lẽq tiang, 'Silaq lumbar, sẽngaq Tiang gen suruq side lumbar ojok taoq saq jaoq, tipaq dengan bangse-bangse lain.' " 22 Dengan-dengan masih dengahang Paulus bebaos, laguq lẽq ucapanne saq penutuq nike ie pade bekuih sekeras-kerasne, "Matẽq doang dengan saq maraq niki! Ie ndẽq patut idup!" 23 Sambil ie pade bekuih, ie pade ngerapang jubah-jubah ie pade, dait nyugulang kerepukne. 24 Beterus kepale pasukan nike prẽntahang jauq Paulus ojok markas adẽqne teperiksaq kadu kekerasan dait adẽqne tetaoq kembẽq dengan-dengan Yahudi bekuih maraq nike tipaq ie. 25 Laguq waktu Paulus sampun tetaliq gen tepecut, Paulus bebase lẽq prewire saq nganjeng lẽq derike, "Napi kanggo sopoq dengan warge negare Roma tepecut sendẽqman ie teadilin?" 26 Dengah hal nike, prewire nike lumbar ojok kepale pasukan dait bebase, "Napi saq gen bapaq laksaneang niki? Dengan niki warge negare Roma!" 27 Beterus kepale pasukan nike lumbar ojok Paulus dait beketuan, "Silaq badaq, napi side warge negare Roma?" Jawab Paulus, "Mule tetu, tiang warge negare Roma." 28 Basen kepale pasukan nike malik, "Tiang jari warge negare Roma siq care bebayah luwẽq gati!" Jawab Paulus, "Laguq tiang tebijeang jari warge negare Roma." 29 Waktu nike ẽndah, anggote-anggote tentere saq mẽlẽ meriksaq Paulus nike, mundur dait kepale pasukan nike ẽndah jari takut lantaran ie sampun borgol Paulus, padahal Paulus warge negare Roma. 30 Kepale pasukan nike melẽt gati nenaoq napi setetune saq jari penyebap dengan-dengan Yahudi nyalahang Paulus. Keranaq nike lẽq jemaqne ie ngempoh imam-imam kepale dait Mahkamah Agame adẽqne bekumpul. Terus Paulus tejauq ngadep ojok ie pade selapuq.

Acts 23

1 Paulus merhatiang anggote-anggote mahkamah nike terus bebase, "Semeton-semeton tiang! Jangke dateng jelo niki tiang ndẽq merase salaq tipaq Allah lẽq dalem atẽ nurani tiang mengenai kehidupan tiang." 2 Waktu Paulus bebase maraq nike, Imam Agung Ananias prẽntah dengan saq nganjeng lẽq dẽkẽt Paulus namper cangkem Paulus. 3 Beterus Paulus bebase lẽq imam Agung nike, "Allah pasti namper side, dengan munapik saq puraq-puraq suci! Side melinggih lẽq derike ngadilin tiang kadu Hukum Taurat, padahal side mẽsaq ngelanggar hukum nike siq care suruq dengan namper tiang!" 4 Dengan-dengan saq araq lẽq dẽkẽt Paulus bebase lẽq Paulus, "Side menghine imam Agung Allah!" 5 Jawab Paulus, "Semeton-semeton, tiang ndẽq nenaoq, bahwe ie imam agung. Mule sampun araq tetulis lẽq dalem Kitab Suci, 'Ndaq side menghine pemimpin bangsende.' " 6 Paulus serioq bahwe separo anggote-anggote mahkamah nike asalne lẽman dengan-dengan golongan Saduki dait separone malik dengan-dengan Parisi. Keranaq nike ie bebase lẽq mahkamah nike, "Semeton-semeton, tiang dengan Parisi dait keturunan Parisi, tiang teadilin lẽq deriki lantaran tiang percaye bahwe dengan-dengan ninggal gen idup malik." 7 Sewaktu Paulus bebase maraq nike, dengan-dengan Parisi dait dengan-dengan Saduki mulai betungkasan, sehingge sidang nike jari due golongan. ( 8 Sẽngaq dengan-dengan Saduki bedowẽ keyakinan bahwe dengan ninggal ndẽq gen idup malik, ndẽq araq malaẽkat, dait roh-roh ẽndah ndẽq araq, laguq dengan Parisi percaye lẽq selapuqne nike.) 9 Beterus araq keributan saq belẽq. Pire dengan Parisi saq jari ahli taurat nganjeng dait secare keras ie nentang hal nike, basen ie pade, "Menurut tiang pade dengan niki tetu-tetu ndẽq salaq! Sang araq roh atao malaẽkat saq ngeraos lẽq ie!" 10 Pegejuhan nike jari sayan belẽq jangke kepale pasukan nike jari takut lamun Paulus gen tekembul siq ie pade. Make ie prẽntahang pasukanne bait Paulus lẽman tengaq-tengaq dengan luwẽq dait jauq ie ojok markas. 11 Lẽq kelem nike, Junjungan Saq Mulie Deside Isa Almasih ngadeg lẽq dẽkẽt Paulus dait bemanik, "Teguqang angende! Side sampun ngebẽng kesaksian mengenai Tiang lẽq Yerusalem. Laun side harus ngebẽng kesaksian lẽq Roma ẽndah." 12 Jemaqne masih aru gati, dengan-dengan Yahudi mulai miaq komplotan. Ie pade besumpah ndẽq gen bekelor atao nginem lamun ie pade ndẽqman matẽq Paulus. 13 Araq petang dase dengan lebih saq miaq komplotan nike. 14 Ie pade lumbar ojok imam-imam kepale dait pemimpin-pemimpin Yahudi dait matur, "Tiang pade sampun besumpah bareng-bareng, bahwe tiang pade ndẽq gen bekelor atao nginem napi juaq lamun tiang pade ndẽqman matẽq Paulus. 15 Nah, mangkin semeton-semeton dait anggote-anggote Mahkamah Agame adẽqne ngirim surat ojok kepale pasukan Roma nike jari tunas ie jauq Paulus tulak ngadep side pade, maraq side pade gen meriksaq malik pelekarene pacu-pacu. Dait tiang pade siep gen nyematẽq ie sendẽqman dateng lẽq deriki." 16 Laguq bije lẽman sanak Paulus saq nine dengah rencane komplotan nike. Make ie lumbar ojok markas nyampẽang hal nike lẽq Paulus. 17 Terus Paulus ngempoh sopoq prewire dait bebase lẽq ie, "Jauq terune niki ojok kepale pasukan, araq saq gen ie laporang lẽq kepale pasukan." 18 Prewire nike jauq terune nike ojok kepale pasukan dait matur, "Paulus, tahenan nike ngempoh tiang, dait ngelakoq adẽq tiang jauq terune niki tipaq pelungguh; araq saq gen ie laporang." 19 Kepale pasukan nike negel ime terune nike, terus jauqne ojok sedi mẽsaq-mẽsaq dait beketuan, "Napi saq mẽlẽ side laporang lẽq tiang?" 20 Terune nike bejawab, "Dengan-dengan Yahudi sampun sepakat gen tunas adẽq pelungguh jauq Paulus ngadep Mahkamah Agame jemaq, maraqne ie pade mẽlẽ meriksaq malik pelekarene pacu-pacu. 21 Laguq sampunang pelungguh turut kemẽlẽqne nike, sẽngaq araq petang dase dengan lebih saq kenyeke nyeboq gen ngadang ie lẽq tengaq langan. Ie pade selapuqne sampun besumpah ndẽq gen bekelor dait nginem lamun ie pade ndẽqman matẽq Paulus. Mangkin selapuqne sampun siep; karing ngantih jawaban pelungguh doang." 22 Basen kepale pasukan nike, "Ndaq bebadaq lẽq sai-sai bahwe side sampun ngelaporang hal niki lẽq tiang." Terus suruqne terune nike ulẽq. 23 Beterus kepale pasukan nike ngempoh due prewire, dait bebase lẽq ie pade, "Siepang satak prajurit dait pituq pulu tentere saq nunggang jaran dait satak tentere saq jauq tumbak, adẽq ie pade berangkat jam siwaq kelem niki ẽndah ojok Kaisarea. 24 Siepang ẽndah jaran adẽqne tekadu siq Paulus terus jauq ie selamet jangke dateng Gubernur Peliks." 25 Terus kepale pasukan nike nulis surat saq tetulis maraq niki, 26 "Saq Mulie Gubernur Peliks. Salam lẽman Klaudius Lisias! 27 Dengan niki sampun tebau siq dengan-dengan Yahudi dait aroh tematẽq siq ie pade, lamun tiang ndẽq dateng kance pasukan tiang dait nyelametang ie; sẽngaq tiang dengah bahwe ie warge negare Roma. 28 Lantaran tiang melẽt nenaoq napi setetune kesalaqan saq tetuduhang tipaq ie, make tiang jauq ie ojok Mahkamah Agame ie pade. 29 Ternyate dengan niki ndẽq piaq napi-napi saq patut tehukum siq hukuman matẽ atao tebui. Tuduhan dengan-dengan nike tipaq ie cume mengenai hal-hal saq berubungan kance Hukum Tauratne mẽsaq. 30 Beterus tiang mauq laporan bahwe araq rencane jahat lẽman dengan-dengan Yahudi tipaq ie, jari tiang langsung ngirim ie ojok Pelungguh, dait sampun tiang suruq selapuq penuntutne ngajuang pengaduanne tipaq pelungguh." 31 Beterus anggote-anggote tentere nike ngelaksaneang tugasne. Ie pade bait Paulus, terus kelem nike ẽndah jauqne Paulus ojok Antipatris. 32 Jemaqne ie pade ngalurang pasukan saq kadu jaran ngelanjutang kelampanne kance Paulus, dait ie pade tulak ojok markas. 33 Waktu pasukan saq kadu jaran nike dateng lẽq Kaisarea, ie pade nyampẽang surat nike tipaq Gubernur, dait nyerahang Paulus tipaq ie. 34 Sesampun surat nike tebace siq Gubernur, ie beketuan lẽq Paulus lẽman mbẽ asalne. Sewaktu ie wikan bahwe Paulus asalne lẽman Kilikia, 35 ie bebase, "Bagus! Tiang gen meriksaq pelekarende, lamun dengan-dengan saq nuntut side nike sampun dateng lẽq deriki." Terus ie mrẽntahang adẽqne Paulus tetahen lẽq dalem istane Herodes.

Acts 24

1 Lime jelo sesampun nike, Imam Agung Ananias dait pemimpin-pemimpin Yahudi lumbar ojok Kaisarea bareng sopoq pengacare aranne Tertulus. Ie pade ngadep Gubernur Peliks dait nyampẽang tuduhan ie pade tipaq Paulus. 2 Sewaktu Tertulus tempoh ojok julu, ie tuduh Paulus maraq niki, "Bapaq Gubernur Saq Mulie! Siq pimpinan pelungguh negeri tiang pade tentrem. Dait lantaran kebijaksanean pelungguh sampun luwẽq saq tepesolah umaq bangse tiang pade. 3 Tiang pade tetep sambut hal nike lẽq mbẽ juaq siq rase syukur. 4 Laguq adẽqne sampunang tetẽh luwẽq waktu pelungguh, tiang tunas adẽq pelungguh pirengang pengaduan tiang pade saq singket niki. 5 Tiang pade ndait dengan niki jari pengaco saq bahaye gati. Lẽq mbẽ-mbẽ ie nimbulang keributan lẽq antare dengan-dengan Yahudi, dait ie jari pemimpin golongan dengan-dengan Nasrani. 6 Malahan ie sampun nyobaq najisang Gedẽng Allah, laguq tiang pade bau ie. Maksut tiang pade ngadilin ie menurut Hukum Taurat tiang mẽsaq. 7 Laguq kepale pasukan Lisias ngerebut ie lẽman tiang pade, 8 dait mrẽntahang adẽq penuntut-penuntutne ngadep pelungguh. Lamun pelungguh meriksaq dengan niki, pelungguh mẽsaq gen pireng lẽman ie kebenaran selapuqne saq tiang pade tuduhang tipaq ie." 9 Dengan-dengan Yahudi saq lẽq derike ẽndah milu nuduh Paulus dait setuju lẽq selapuq saq tesampẽang siq Tertulus. 10 Terus Gubernur nike ngebẽng tande lẽq Paulus bahwe ie kanggo ngeraos. Beterus Paulus ngeraos, "Tiang nenaoq bahwe pelungguh sampun jari hakim negeri niki betaun-taun ngonẽqne. Keranaq nike tiang seneng ngajuang pembẽlean tiang niki lẽq arepan pelungguh. 11 Pelungguh bau selidik mẽsaq bahwe ndẽq lebih lẽman due olas jelo saq liwat tiang lalo ojok Yerusalem jari sembahyang. 12 Dait ndẽq uwah dengan-dengan Yahudi nike ndait tiang betungkasan kance sopoq dengan juaq atao ngumpulang dengan jari miaq keributan lẽq Gedẽng Allah atao lẽq balẽ-balẽ ibadah atao lẽq mbẽ doang lẽq dalem kote. 13 Ie pade ẽndah ndẽq bau buktiang tuduhan-tuduhan saq ie pade ajuang tipaq pelungguh mengenai tiang. 14 Mule tiang harus ngaku lẽq arepan pelungguh bahwe tiang nyembah Allah leluhur tiang pade menurut pengajahan saq teajahang siq Deside Isa nike saq ie pade anggep sopoq kepercayean. Laguq tiang masih percaye lẽq selapuqne saq tetulis lẽq Kitab Suci Taurat dait Kitab Nabi-nabi. 15 Pade maraq ie pade, tiang ẽndah bedowẽ harepan tipaq Allah bahwe selapuq dengan gen idup malik sesampun ninggal -- dengan-dengan saq solẽh dait maraq nike ẽndah dengan-dengan jahat! 16 Keranaq nike tiang tetep berusahe sebagus-bagusne, adẽq atẽ nurani tiang bersi tipaq Allah dait tipaq manusie. 17 Sesampun pire taun ndẽq ndot lẽq Yerusalem, tiang tulak ojok derike jari jauq bantuan kẽpẽng tipaq bangse tiang dait jari ngaturang persembahan tipaq Allah. 18 Sewaktu tiang kenyeke ngelaksaneang nike, ie pade ndait tiang lẽq Gedẽng Allah, sesampun tiang nutuqang upacare penyucian diriq. Tiang ndẽq kance dengan luwẽq, dait waktu nike ndẽq araq ẽndah keributan lẽq derike. 19 Cume araq pire dengan Yahudi lẽq derike lẽman Propinsi Asia. Ie pade saq seharusne araq lẽq deriki jari nyampẽang pengaduan ie pade lẽq pelungguh, lamun ie pade araq bedowẽ tuduhan tipaq tiang. 20 Atao alurang dengan-dengan niki mẽsaq jelasang kejahatan napi saq ie pade ndait lẽq tiang sewaktu tiang tejauq ojok arepan Mahkamah Agame. 21 Ie pade cume ndait kalimat saq sopoq niki doang saq tiang ucapang lẽq julun ie pade: Tiang teadilin jelo niki sẽngaq tiang percaye bahwe dengan-dengan ninggal gen teidupang malik." 22 Terus Peliks saq sampun luwẽq wikan mengenai pengajahan Deside Isa, nutuqang sidang pelekare nike, basene, "Tiang gen mutusang pelekare niki, lamun kepale pasukan Lisias sampun dateng." 23 Terus ie mrẽntahang prewire saq betanggung jawab lẽq Paulus nike adẽqne tetep nahen Paulus, laguq ngebẽng sekediq kebẽbasan lẽq ie dait ngijinang batur-baturne ngebẽng napi saq ie perluang. 24 Pire jelo sesampun nike Peliks dateng kance seninene aranne Drusila; ie dengan Yahudi. Terus Peliks suruq dengan bait Paulus, dait Peliks pirengang Paulus ngeraos mengenai iman tipaq Deside Isa Almasih. 25 Laguq sewaktu Paulus ngeraos mengenai kebenaran, penguasean diriq dait penghakiman saq gen dateng, Peliks jari takut. Terus ie bebase, "Side kanggo lumbar mangkin. Tiang gen ngempoh side malik lamun araq kesempatan." 26 Lẽq waktu nike Peliks beharep gen mauq kẽpẽng lẽman Paulus. Keranaq nike ie rimpes suruq dengan ngempoh Paulus jari ngeraos kance ie. 27 Sesampun due taun, Perkius Pestus gentiq Peliks jari gubernur. Dait lantaran Peliks kayun nyenengang angen dengan-dengan Yahudi, ie ngalurang Paulus tetep lẽq dalem bui.

Acts 25

1 Telu jelo sesampun Pestus dateng lẽq daẽrah nike, ie lumbar lẽman Kaisarea ojok Yerusalem. 2 Lẽq derike imam-imam kepale dait pemimpin-pemimpin Yahudi ngajuang lẽq ie tuduhan ie pade tipaq Paulus. Ie pade terus doang kẽdẽq Pestus 3 adẽq siq kesolahan angenne tipaq ie pade, ie mẽlẽ suruq dengan jauq Paulus ojok Yerusalem; sẽngaq ie pade sampun sepakat jari nyematẽq Paulus lẽq tengaq langan. 4 Laguq jawab Pestus, "Paulus kenyeke tetahen lẽq Kaisarea; dait tiang mẽsaq ndẽq ngonẽq malik gen tulak ojok derike. 5 Jari, alurang dengan-dengan saq tehormatin lẽq antare side pade lumbar bareng kance tiang ojok Kaisarea dait pelekareang ie lẽq derike, lamun mule ie sampun piaq kesalaqan." 6 Sesampun meneng lẽq Yerusalem kire-kire baluq atao sepulu jelo malik, Pestus tulak ojok Kaisarea. Jemaqne ie ngaraqang sidang pengadilan dait mrẽntahang adẽq Paulus tejauq ngadep. 7 Sewaktu Paulus dateng, dengan-dengan Yahudi saq sampun dateng lẽman Yerusalem nganjeng lẽq sekeliningne, dait mulai ngajuang tuduhan-tuduhan saq berat tipaq Paulus. Laguq ie pade ndẽq bau buktiang tuduhan-tuduhan nike. 8 Sebalikne, dalem pembẽleanne, Paulus bebase, "Tiang ndẽq piaq sopoq hal saq salaq tipaq Hukum Taurat dengan Yahudi atao tipaq Gedẽng Allah atao tipaq Kaisar Roma." 9 Laguq Pestus kayun nyenengang angen dengan Yahudi. Beterus ie beketuan lẽq Paulus, "Napi side mẽlẽ lumbar ojok Yerusalem jari teadilin lẽq derike lẽq julu tiang mengenai tuduhan-tuduhan nike?" 10 Jawab Paulus, "Tiang kenyeke nganjeng lẽq arepan mahkamah Kaisar Roma; dait lẽq taoq nike tiang harus teadilin. Pelungguh mẽsaq wikan bahwe tiang ndẽq salaq lẽq dengan Yahudi. 11 Lamun tiang sampun ngelanggar hukum dait piaq hal saq patut tehukum siq hukuman matẽ, tiang rẽde matẽ. Laguq lamun tuduhan-tuduhan ie pade ndẽq kenaq, ndẽq araq sopoq dengan juaq saq kanggo nyerahang tiang tipaq ie pade. Tiang tunas teadilin lẽq pengadilan Kaisar!" 12 Sesampun berunding kance penasẽhat-penasẽhatne, Pestus bebase, "Side mẽlẽ teadilin lẽq pengadilan Kaisar, jari side harus lumbar ngadep Kaisar." 13 Pire jelo sesampun nike, Raje Agripa dait Bernike rauh lẽq Kaisarea jari ngucapang selamet lẽq Pestus. 14 Sesampun pire jelo ie pade araq lẽq derike, Pestus jelasang pelekare Paulus lẽq Raje Agripa. Pestus bebase, "Araq lẽq deriki sopoq tahenan saq teadẽqang siq Peliks. 15 Waktu tiang araq lẽq Yerusalem, imam-imam kepale dait pemimpin-pemimpin Yahudi ngajuang pengaduan ie pade tipaq dengan nike dait tunas adẽq tiang mutusang hukuman tipaq ie. 16 Laguq jawab tiang bahwe dengan Roma ndẽq kanggo nyerahang maraq nike doang sopoq dengan saq tetuduh jari tehukum, lamun saq tetuduh ndẽqman tepade arepan kance penuntut-penuntutne dait tebẽng kesempatan bẽle diriq. 17 Jari, waktu ie pade dateng ojok deriki, tiang ndẽq ngantih ngonẽq-ngonẽq. Jemaqne tiang langsung ngaraqang sidang pengadilan dait mrẽntahang adẽq dengan nike tejauq ngadep. 18 Sewaktu pare penuntutne nganjeng ngajuang pengaduan ie pade, ie pade ndẽq ngajuang sopoq juaq kejahatan maraq saq tiang badẽq gen ie pade ajuang. 19 Ie pade cume bẽde pendapet kance ie mengenai agamene mẽsaq dait mengenai sopoq dengan saq pesẽnganne Deside Isa. Dengan nike sampun ninggal, laguq Paulus pagah bahwe dengan nike idup. 20 Sẽngaq tiang bingung berembẽ entan tiang mauq keterangan mengenai pelekare nike, tiang beketuan lẽq Paulus napi ie mẽlẽ lumbar ojok Yerusalem dait teadilin pelekarene lẽq derike. 21 Laguq Paulus tunas taẽk banding; ie tunas adẽq ie tetep ndot lẽq tahenan jangke pelekarene teputusang siq Kaisar. Keranaq nike tiang prẽntahang adẽq ie tetep tetahen, jangke tiang mauq kesempatan ngirim ie ojok Kaisar." 22 Terus Raje Agripa bebase lẽq Pestus, "Tiang mẽsaq ẽndah melẽt dengah dengan nike." "Jemaq pelungguh bau pirengang ie," jawab Pestus. 23 Jemaqne Raje Agripa dait Bernike rauh kadu upacare kerajaan. Ie pade tame ruang sidang teiring siq kepale-kepale pasukan dait dengan-dengan saq tehormatin lẽq kote nike. Siq prẽntah Pestus, Paulus tejauq tame. 24 Terus basen Pestus, "Baginde Agripa dait pare hadirin! Dengan niki sampun teaduang tipaq tiang siq selapuq bangse Yahudi, saq lẽq Yerusalem, dait saq araq lẽq deriki. Ie pade nuntut sambil nyurak-nyurak bahwe ie ndẽq patut tealurang idup. 25 Laguq tiang ndẽq ndait sopoq juaq kesalaqan saq sampun ie piaq saq bau tehukum siq hukuman matẽ. Dait lantaran ie mẽsaq sampun tunas adẽq pelekarene teadilin lẽq pengadilan Kaisar, tiang sampun mutusang gen ngirim ie ojok Kaisar. 26 Laguq tiang ndẽqman bedowẽ keterangan napi-napi saq teges mengenai diriqne jari tetulis lẽq surat tiang tipaq Kaisar. Keranaq nike tiang jauq ie ojok arepan pelungguh senamian, terutame gati tipaq Raje Agripa! Maksut tiang adẽq sesampun pemeriksaan niki, tiang bau nulis sopoq laporan. 27 Sẽngaq menurut pendapet tiang, ndẽqne pantes ngirim sopoq tahenan lamun ndẽq jelas kesalaqan-kesalaqan saq tetuduhang tipaq ie."

Acts 26

1 Raje Agripa bebase lẽq Paulus, "Side teijinang ngeraos jari bẽle diriq." Paulus ngangkat imene terus nyampẽang pembẽleanne, maraq niki, 2 "Baginde Agripa! Tiang merase bahagie gati bau ngajuang pembẽlean tiang malahan lẽq arepan pelungguh mengenai selapuq pengaduan saq teajuang tipaq tiang siq dengan-dengan Yahudi; 3 terutame gati lantaran pelungguh tetu-tetu wikan adat-istiadat dait masalah-masalah dengan Yahudi. Keranaq nike, tiang tunas pelungguh kayun sabar mirengang keterangan tiang. 4 Selapuq dengan Yahudi nenaoq berembẽ tiang idup lẽman tiang masih bajang. Ie pade nenaoq bahwe lẽman masih bajang, tiang sampun idup lẽq antare bangse tiang mẽsaq lẽq Yerusalem. 5 Sampun ngonẽq ie pade nenaoq mengenai tiang. Dait lamun ie pade mẽlẽ, ie pade bau ngebẽng kesaksian bahwe lẽman penembẽq tiang sampun idup sebagẽ dengan Parisi dait turut selapuq aturanne saq paling keras lẽq dalem agame tiang pade. 6 Dait mangkin tiang nganjeng lẽq deriki jari teadilin sẽngaq tiang percaye lẽq perjanjian saq tepiaq siq Allah tipaq leluhur tiang pade. 7 Perjanjian nike ẽndah saq teharep-harepang siq kedue olas suku bangse Israel, sehingge ie pade ibadah tipaq Allah kenjelo dait kekelem. Dait lantaran tiang percaye lẽq perjanjian nike, Raje Agripa saq mulie, tiang tesalaqang siq dengan-dengan Yahudi. 8 Kembẽq side pade dengan-dengan Yahudi ndẽq iniq percaye bahwe Allah ngidupang malik dengan ninggal? 9 Laẽq tiang mẽsaq ẽndah bedowẽ pendapet bahwe tiang harus ngelaksaneang selapuq-lapuqne jari nentang Deside Isa lẽman Nazaret nike. 10 Dait mule nike saq sampun tiang laksaneang lẽq Yerusalem. Kadu surat kuase lẽman imam-imam kepale, tiang sampun tamaq ojok dalem bui luwẽq dengan saq tehususang bagi Allah. Malahan tiang ẽndah milu setuju bahwe ie pade harus tehukum matẽ. 11 Rimpes gati tiang nyiksaq ie pade lẽq balẽ-balẽ ibadah dait paksaq ie pade tilas napi saq ie pade percaye nike. Panas gati atẽn tiang lẽq ie pade, sehingge ojok kote-kote lain ẽndah tiang lalo palẽq ie pade lẽq derike." 12 "Siq maksut nike ẽndah, tiang jauq surat kuase dait prẽntah lẽman imam-imam kepale, tiang lalo ojok Damsyik. 13 Raje Agripa saq mulie, sewaktu tiang lẽq tengaq langan, lẽq waktu tengari, tiang serioq sopoq cahaye lẽman langit saq menahan malik lẽman cahaye jelo. Cahaye nike ngempor lẽq sekelining dengan-dengan saq lampaq bareng kance tiang. 14 Tiang pade rebaq ojok tanaq, terus tiang dengah suare saq bebase lẽq tiang kadu base Ibrani, 'Saulus, Saulus! Kembẽq side nganiaye Tiang? Sengke side nendang sopoq hal saq tajep.' 15 Jawab tiang, 'Sai Pelungguh?' Dait jawab Junjungan Saq Mulie, 'Tiang Isa saq side aniaye. 16 Ures dait nganjeng! Tiang nyatayang diriq tipaq side siq maksut gen ngangkat side jari pelayan Tiang. Side harus jari saksi mengenai selapuq hal saq side serioq jelo niki mengenai Tiang dait mengenai napi saq gen Tiang petitoqang lẽq side laun lẽq waktu saq gen dateng. 17 Tiang gen kelin side lẽman bangse Israel dait lẽman dengan bangse-bangse lain. Tiang gen ngutus side lumbar ojok ie pade 18 jari miaq melẽng penenteng ie pade, adẽq ie pade bebalik lẽman peteng ojok menah dait lẽman kuase Belis tipaq Allah. Adẽq siq imanne tipaq Tiang, ie pade mauq pengampunan dose dait mauq bagian lẽq napi saq tetentuang jari dengan-dengan saq tehususang bagi Allah.' " 19 "Keranaq nike, Baginde Agripa, tiang tetep berusahe taat lẽq penyerioqan saq sampun tiang terimaq lẽman Allah nike. 20 Secare terus terang tiang badaq tipaq dengan-dengan bahwe ie pade harus betobat lẽman dose-dose ie pade dait nyerahang diriq tipaq Allah, dait metitoqang lẽq dalem idup ie pade bahwe ie pade sampun betobat lẽman dose-dose ie pade. Tiang badaq hal nike penembẽqne lẽq Damsyik, terus lẽq Yerusalem dait lẽq selapuq wilayah Yudea dait lẽq antare dengan bangse-bangse lain. 21 Keranaq nike tiang tebau siq dengan-dengan Yahudi lẽq Gedẽng Allah dait ie pade berusahe nyematẽq tiang. 22 Laguq jangke mangkin niki tiang telindungin siq Allah, sehingge tiang bau nganjeng lẽq deriki jari ngebẽng kesaksian tiang tipaq selapuq dengan -- saq belẽq atao saq kodẽq. Napi saq tiang ucapang niki ndẽqne lain lẽman napi saq sampun tenubuatang siq nabi-nabi dait nabi Musa ẽndah; 23 bahwe Almasih saq tejanjiqang siq Allah nike harus menderite, dait jari dengan penembẽq saq idup malik sesampun ninggal; adẽq siq hal nike Ie bau beriteang terang, tipaq dengan-dengan Yahudi dait dengan bangse-bangse lain." 24 Sewaktu Paulus kenyeke nyampẽang pembẽleanne nike, Pestus nyurak, "Side sampun jogang Paulus! Ilmunde saq luwẽq nike sampun jariang side jogang!" 25 Laguq jawab Paulus, "Tiang ndẽq jogang, Tuan Pestus. Ucapan-ucapan saq tiang sampẽang nike kenaq dait sugul lẽman pikiran saq waras. 26 Baginde Agripa mẽsaq wikan gati hal-hal niki. Keranaq nike tiang bani ngeraos lẽq arepan pelungguh secare terus terang. Tiang yakin ndẽq araq sopoq juaq lẽman hal-hal nike saq ndẽqman tewikanang siq pelungguh, sẽngaq selapuqne nike ndẽq telaksane lẽq taoq-taoq saq kesempil. 27 Baginde Agripa saq mulie, napi pelungguh percaye lẽq napi saq tesampẽang siq nabi-nabi? Tiang yakin pelungguh percaye!" 28 Terus Raje Agripa bebase lẽq Paulus, "Side paran molah jariang tiang dengan Nasrani lẽq waktu saq singket niki?" 29 Jawab Paulus, "Lẽq waktu saq singket atao lẽq waktu saq ngonẽq, tiang bedo'e tipaq Allah adẽq pelungguh dait bapaq-bapaq senamian saq pirengang tiang jelo niki gen jari maraq tiang -- kecuali borgol-borgol niki!" 30 Beterus Baginde Agripa, gubernur dait Bernike, serte selapuq saq lainne nganjeng. 31 Sesampun araq lẽq luah, ie pade bebase sopoq kance saq lainne, "Dengan niki ndẽq piaq sopoq hal saq patut tehukum siq hukuman matẽ atao tebui." 32 Terus basen Raje Agripa lẽq Pestus, "Dengan niki sampun bau tebẽbasang, seandẽne ie ndẽq nuntut pelekarene teadilin lẽq Pengadilan Kaisar."

Acts 27

1 Sesampun teputusang bahwe tiang pade harus belayar ojok Italia, Paulus dait pire dengan tahenan saq lain teserahang ojok Yulius, prewire pasukan tentere Roma saq tesebut "Pasukan Kaisar". 2 Tiang pade taẽk ojok kapal saq dateng lẽman Adramitium, beterus berangkat kadu kapal nike saq sampun siep belayar ojok pelabuan-pelabuan lẽq propinsi Asia. Aristarkus, dengan Makedonia saq dateng lẽman Tesalonika, belayar ẽndah bareng kance tiang pade. 3 Jemaqne tiang pade dateng lẽq Sidon. Paulus teperlakuang secare bagus gati siq Yulius. Ie teijinang jangoq batur-baturne adẽq ie pade iniq ngebẽng napi saq ie perluang. 4 Lẽman derike tiang pade belayar malik. Sẽngaq angin dateng belainan arah kance kapal, tiang pade terus belayar bedurus lẽq pesisi pulao Siprus. 5 Beterus tiang pade babar segare saq berandangan kance Kilikia dait Pampilia terus dateng lẽq Mira lẽq negeri Likia. 6 Lẽq derike prewire nike ndait sopoq kapal lẽman Aleksandria saq mẽlẽ belayar ojok Italia. Beterus ie alih tiang pade ojok kapal nike. 7 Pire jelo ngonẽqne, tiang pade belayar adẽng gati, dait sengke gati tiang pade belayar jangke bau dateng dẽkẽt kote Knidus. Sẽngaq angin masih doang ndẽq bagus, tiang pade ndẽq bau belayar ojok jurusan semule. Make tiang pade belayar ojok lauq pulao Kreta langan Tanjung Salmone. 8 Sengke gati tiang pade belayar bedurus lẽq pesisi pulao nike, ahirne tiang pade dateng lẽq sopoq taoq aranne Pelabuan Indah, ndẽqne jaoq lẽman kote Lasea. 9 Waktu nike Jelo Puase dengan Yahudi sampun liwat. Tiang pade sampun luwẽq bisang waktu sie-sie, sehingge ndẽq aman malik jari belayar. Keranaq nike Paulus peringet ie pade, 10 "Semeton-semeton, menurut pendapet tiang, gen bahaye gati lamun ite belayar terus. Ite gen ngalamin kerugian belẽq ndẽqne cume lẽq muatante dait kapalte, laguq nyawente ẽndah gen celake." 11 Laguq prewire nike lebih percaye lẽq jurumudi dait kapten kapal nike ketimbang ucapan-ucapan Paulus. 12 Pelabuan lẽq derike mule ndẽq bagus jari taoq ndot kapal-kapal sengonẽq musim telih. Keranaq nike luwẽqan anak buah kapal setuju belayar malik bilin pelabuan nike sẽngaq ie pade mẽlẽ berusahe adẽq bau dateng lẽq Peniks dait ndot lẽq derike sengonẽq musim telih. Peniks nike sopoq pelabuan lẽq Kreta saq andang bat daye dait bat lauq. 13 Lẽq waktu nike dateng angin lẽman lauq adẽng-adẽng. Anak buah kapal nike laporan ie pade gen bau belayar malik. Jari ie pade ngangkat jangkar terus belayar bedurus lẽq pesisi pulao Kreta. 14 Laguq ndẽq ngonẽq sesampun nike, dateng angin belẽq gati -- nike angin saq tesebut angin Timuq Segare -- keras gati dateng lẽman darat, 15 dait ngampes kapal tiang pade. Keranaq nike ndẽq mungkin kapal nike belayar terus ngelawan angin, make tiang pade nyerah doang dait ngalurang kapal nike ẽlẽh tejauq siq angin. 16 Tiang pade merase aman sekediq waktu tiang pade liwat lẽq lauq pulao Kauda saq kodẽq nike. Lẽq derike sengke gati tiang pade bau nguasein perau kodẽq saq araq lẽq kapal tiang pade. 17 Sesampun perau kodẽq nike tetaẽkang ojok kapal, terus kapal nike teteguqang kadu tali saq tetaliq ngelingkerin kapal nike. Sẽngaq takut kesandek lẽq dasar gerẽs Sirtis saq dawot, layar teturunang, terus kapal tealurang nurut angin. 18 Angin terus ngamuk, sehingge jemaqne, muatan kapal mulai tetetẽh ojok segare. 19 Jelo selanjutne anak buah kapal nike netẽh ẽndah pekakas-pekakas kapal ojok segare kadu imene mẽsaq. 20 Bejelo-jeloan ngonẽqne tiang pade ndẽq serioq jelo dait bintang, dait angin tetep ngamuk. Ahirne telang harepan tiang pade gen bau selamet. 21 Pire waktu ngonẽqne dengan-dengan nike ndẽq bekelor. Beterus Paulus nganjeng lẽq tengaq-tengaq ie pade dait bebase, "Semeton-semeton! Lamun side pade turut nasẽhat tiang dait ndẽq belayar lẽman Kreta, ite ndẽq ngalamin selapuq saq lengẽ dait rugi maraq niki. 22 Laguq mangkin sanget siq tiang tunas adẽq side pade belẽqang angen. Ndẽq araq sopoq dengan juaq lẽman side saq gen ninggal; ite cume gen kẽlangan kapal niki doang. 23 Sẽngaq uwiq bian malaẽkat lẽman Allah saq tiang sembah, Ie Allah saq dowẽang tiang, rauh tipaq tiang. 24 Manik malaẽkat nike, 'Ndaq takut, Paulus! Sẽngaq side gen ngadep Kaisar. Dait setetune lantaran rahmat Allah, selapuq dengan saq belayar kance side gen selamet lantaran side.' 25 Keranaq nike, semeton-semeton, side pade harus tabah! Sẽngaq tiang percaye lẽq Allah bahwe selapuqne gen telaksane maraq saq temanikang tipaq tiang. 26 Laguq ite gen kesasar lẽq sopoq pulao." 27 Lẽq kelem saq keempat olas tiang pade kenyeke ngompal lẽq Segare Adria. Kire-kire tengaq kelem anak buah kapal merase kapal kenyeke ngerapetin darat. 28 Jari ie pade ngulurang tali saq tegantungin batu jari ngukur dalemne segare. Ternyate taoq nike dalemne petang dase mẽter kurang sekediq. Ndẽq ngonẽq sesampun nike, ie pade ngukur malik, dait kire-kire telung dase mẽter dalemne lẽq taoq nike. 29 Ie pade takut kapal gen kandas lẽq batu karang, jari ie pade nurunang empat jangkar lẽman bagian mudi kapal, terus beharep lamun bau becat-becat menah. 30 Tedoq-tedoq pare anak buah kapal berusahe pelai lẽman kapal nike. Ie pade nurunang perau kodẽq ojok aiq, maraqne gen nurunang jangkar lẽman julu kapal. 31 Laguq Paulus bebase tipaq prewire dait prajurit-prajurit saq lẽq kapal nike, "Lamun anak buah kapal niki ndẽq ndot lẽq kapal, semeton-semeton selapuqne ndẽq gen selamet." 32 Keranaq nike, prajurit-prajurit nike peleng tali perau kodẽq nike, sehingge perau kodẽq nike ẽlẽh. 33 Lẽq waktu sendẽqman tiwoq jelo, Paulus nganjurang adẽq ie pade selapuq bekelor. Paulus bebase, "Sampun empat olas jelo ngonẽqne semeton selapuqne cume ngantih-ngantih doang siq rase takut dait ndẽq ngelorang napi-napi. 34 Tiang nganjurang, bekelor sekediq. Nike solah umaq side pade, adẽq side pade kuat malik. Sẽngaq semeton selapuqne gen selamet dait ndẽq kurang napi-napi." 35 Sesampun bebase maraq nike Paulus bait ruti terus ngucapang syukur tipaq Allah lẽq julu ie pade selapuq. Beterus ie bagi-bagiang ruti nike, dait bekelor. 36 Beterus ie pade selapuq besemanget malik dait milu bekelor ẽndah. 37 Selapuq saq araq lẽq kapal nike araq satak pituq pulu enem dengan. 38 Sesampun selapuqne bekelor secukupne, ie pade tetẽh muatan gandum ojok segare adẽq kapal jari dẽang. 39 Sesampun menah, anak buah kapal serioq daratan, laguq ie pade ndẽq taoq daratan napi nike. Ie pade serioq sopoq pulao kodẽq kance pesisine. Jari ie pade beniat belabuh lẽq derike, lamun bau. 40 Make tali-tali jangkar tepeleng terus jangkar-jangkar nike tealurang ketelep lẽq segare. Lẽq waktu nike ẽndah ie pade ngelepas tali saq naliq kemudi-kemudi. Beterus ie pade taẽkang layar lẽq bagian julu kapal adẽq angin tiup kapal nike ojok pesisi. 41 Laguq kapal nike kesandek lẽq dasar gerẽs. Bagian julune ketalet dait ndẽq iniq nguit, dait bagian mudine remuk teampes siq umbak saq keras. 42 Prajurit-prajurit lẽq kapal nike beniat nyematẽq selapuq dengan tahenan, sẽngaq ie pade takut ndaq-ndaq laun araq saq ngonong ojok darat dait pelai. 43 Laguq prewire nike segah niat ie pade sẽngaq ie mẽlẽ nyelametang Paulus. Ie suruq selapuq dengan saq tao ngonong nimproh juluan dait ngonong ojok pesisi; 44 saq lain turut mudi dait betegelan lẽq papan-papan atao kayuq peleng-pelengan kapal nike. Siq care nike tiang pade selapuq selamet jangke dateng darat.

Acts 28

1 Sesampun selamet dateng lẽq darat, baruq tiang pade taoq bahwe pulao nike aranne Malta. 2 Penduduk pulao nike gerasaq gati lẽq tiang pade. Ie pade sambut tiang pade selapuq secare bagus dait nyalaqang api jari tiang pade sẽngaq sampun mulai turun ujan dait hawene telih. 3 Paulus ngumpulang kayuq-kayuq, dait noloq kayuq-kayuq nike lẽq atas api. Sopoq ulah sugul lantaran panasne api nike, terus catok imene. 4 Sewaktu penduduk pulao nike serioq ulah nike begantung lẽq ime Paulus, ie pade bebase sopoq kance saq lainne, "Dengan niki pasti sampun nyematẽq dengan, sẽngaq timaq ie sampun selamet lẽman bahaye lẽq segare, Dẽwi Keadilan ndẽq ngalurang ie idup." 5 Laguq Paulus kerapang ulah nike ojok dalem api, dait sekediq juaq ndẽqne beridap sakit. 6 Pikir ie pade karing seberaq ime Paulus gen baq atao selung-selung ie gen rebaq dait ninggal. Laguq sesampun ngantih ngonẽqan malik, dait ndẽq araq napi-napi saq nimpe Paulus, ie pade berobah pikiran, terus bebase bahwe Paulus nike dẽwe. 7 Ndẽq jaoq lẽman taoq nike araq tanaq dowẽne Publius, penguase pulao nike. Tiang pade tesambut secare bagus jari temuẽne sengonẽq telu jelo. 8 Lẽq waktu nike bapaqne kenyeke sakit, teserang telih panas dait dẽsentri. Paulus lumbar serioq bapaq saq sakit nike terus bedo'e dait noloq imene lẽq atasne, sehingge ie selah. 9 Keranaq peristiwe nike selapuq dengan saq sakit lẽq pulao nike dateng ojok Paulus, dait ie pade teselahang. 10 Ie pade bẽng tiang luwẽq hadiah, dait sewaktu tiang pade gen belayar, ie pade ngatongang ojok kapal selapuq saq tiang pade perluang lẽq kelampan tiang pade. 11 Sesampun telu bulan lẽq derike, tiang pade berangkat lẽman pulao nike taẽk sopoq kapal lẽman Aleksandria saq belabuh lẽq derike sengonẽq musim telih. Kapal nike kadu simbul "Dẽwe Kembar". 12 Tiang pade belabuh lẽq kote Sirakusa dait ndot lẽq derike telu jelo. 13 Lẽman derike tiang pade belayar malik durus pesisi jangke dateng lẽq kote Regium. Jemaqne angin mulai dateng lẽman lauq, sehingge dalem due jelo tiang pade dateng lẽq kote Putioli. 14 Lẽq derike tiang pade bedait kance pire dengan saq percaye lẽq Deside Isa, dait lantaran undangan ie pade tiang pade ndot kance ie pade pituq jelo ngonẽqne. Beterus tiang pade berangkat ojok Roma. 15 Semeton-semeton lẽq Roma saq percaye lẽq Deside Isa pade dengah kabar mengenai tiang pade, sehingge ie pade lumbar jangke dateng Peken Apius dait Tres Taberne jari nyambut tiang pade. Waktu Paulus bedait kance ie pade, ie ngucapang syukur lẽq Allah dait teteguqang atẽne. 16 Sesampun dateng lẽq Roma, Paulus teijinang ndot mẽsaq dait tekawal siq sopoq prajurit. 17 Sesampun telu jelo, Paulus pesilaq tokoh-tokoh dengan Yahudi lẽq derike. Dait sesampun ie pade bekumpul, Paulus bebase lẽq ie pade, "Semeton-semeton! Tiang ndẽq salaq napi-napi lẽq bangsente, atao ngelanggar adat istiadat saq ite terimaq lẽman leluhurte. Timaq maraq nike tiang tebau lẽq Yerusalem dait teserahang ojok dengan-dengan Roma. 18 Sesampun pelekare tiang teperiksaq, ie pade mẽlẽ bẽbasang tiang, sẽngaq ternyate tiang ndẽq piaq sopoq kesalaqan saq patut tehukum siq hukuman matẽ. 19 Laguq lantaran tetentang siq dengan-dengan Yahudi, tiang terpakse nuntut pelekare tiang teadilin lẽq pengadilan Kaisar Roma. Tiang laksaneang nike ndẽqne lantaran tiang bedowẽ sopoq tuntutan tipaq bangse tiang mẽsaq. 20 Keranaq nike tiang tunas bedait kance side pade, jari ngeraos kance side pade. Tiang teborgol cume lantaran tiang percaye lẽq pengharepan saq tetu-tetu tepercaye siq dengan-dengan Israel." 21 Terus ie pade bebase lẽq Paulus, "Tiang pade ndẽqman nerimaq surat lẽman Yudea mengenai side. Dait ndẽq araq sopoq semeton juaq lẽman derike saq dateng jauq kabar mengenai side atao nuturang saq lengẽ mengenai side. 22 Laguq tiang pade melẽt ẽndah dengah mengenai pendapet side, sẽngaq tiang pade selapuq sampun dengah dengan-dengan ngewade pengajahan saq side percaye nike." 23 Beterus ie pade nentuang sopoq jelo jari bedait kance Paulus. Lẽq jelo nike luwẽq dengan dateng ojok taoqne Paulus ndot. Lẽman kelẽmaq jangke bian Paulus jelasang dait ngebẽng kesaksian tipaq ie pade mengenai Kerajaan Allah. Kadu ayat-ayat lẽman Kitab Nabi Musa kance Kitab Nabi-nabi, Paulus berusahe miaq ie pade percaye mengenai Deside Isa. 24 Araq saq percaye lẽq napi saq tesampẽang Paulus, laguq araq ẽndah saq ndẽq percaye. 25 Siq pendapet saq bẽde-bẽde ie pade bilin taoq nike. Paulus masih bebase, "Mule kenaq napi saq temanikang siq Roh Suci langan Nabi Yesaya tipaq leluhurte: 26 'Pade lumbar sampẽang ojok bangse niki: Side gen tetep dengah, laguq ndẽq ngerti; side gen tetep merhatiang laguq ndẽq taoq napi saq telaksane. 27 Sẽngaq pikiran dengan-dengan nike sampun kongol, kentok ie pade sampun kedok dait penenteng ie pade sampun tepedemang. Hal niki telaksane adẽq penenteng ie pade ndaq nyerioq, kentok ie pade ndaq dedengah, pikiran ie pade ndaq ngerti, terus bebalik, sehingge Tiang, nyelahang ie pade.' " 28 Ahirne Paulus bebase, "Semeton-semeton harus nenaoq bahwe kabar mengenai keselametan saq lẽman Allah mangkin sampun tesampẽang tipaq bangse-bangse lain dait ie pade gen dengah hal nike!" 29 Sesampun Paulus bebase maraq nike, dengan-dengan Yahudi nike bilin taoq nike sambil betungkasan sopoq kance saq lainne. 30 Due taun ngonẽqne Paulus ndot lẽq Roma, lẽq balẽ saq ie sẽwe mẽsaq. Paulus seneng nerimaq selapuq dengan saq dateng jangoq ie. 31 Dait bani ie nyampẽang tipaq ie pade mengenai Kerajaan Allah, dait mengenai Junjungan Saq Mulie Deside Isa Almasih. Paulus bẽbas ngelaksaneang nike ndẽq araq saq halangin ie.

Romans 1

1 Semeton senamian saq araq lẽq Roma, saq tekasihin siq Allah dait saq sampun tepilẽq jari dengan-dengan saq tehususang bagi Allah. Tiang, Paulus, sampun tepilẽq siq Allah jari rasul-Ne dait ẽndah nyampẽang Kabar Solah lẽman Allah. 2 Kabar Solah nike sampun tejanjiqang siq Allah lẽq jaman laẽq langan perantarean nabi-nabi-Ne dait sampun tetulis lẽq Kitab Suci. 3 Kabar Solah nike mengenai Bije-Ne, Junjungante Saq Mulie Deside Isa Almasih. Secare manusie Deside Isa nike keturunan Daud, 4 laguq secare ilahi Deside Isa nike setetune Bije saq asalne lẽman Allah. Hal nike tenyatayang lẽman kuase saq luar biase sewaktu Deside Isa idup malik lẽman ninggal. 5 Langan Deside Isa ẽndah Allah ngicanin tiang paice dait jabatan rasul jari bimbing selapuq bangse adẽq ie pade percaye dait taat tipaq Bije saq asalne lẽman Allah adẽq pesẽngan-Ne temulieang. 6 Saq temaksut selapuq bangse nike, lantong side pade saq araq lẽq Roma; sẽngaq side pade ẽndah sampun temanikang jari dowẽn Deside Isa Almasih. 7 Nike lantaranne tiang nulis tipaq side pade. Semoge Allah Bapante dait Junjungante Saq Mulie Deside Isa Almasih, ngicanin rahmat dait damẽ sejahtere tipaq side pade. 8 Pertame-tame, langan Deside Isa Almasih, tiang ngucapang syukur lẽq Allah lantaran semeton-semeton senamian; sẽngaq seantẽro dunie sampun dengah bahwe side pade tetu-tetu percaye lẽq Almasih. 9 Tiang tetep inget lẽq side pade lamun tiang bedo'e. Allah jari saksi bahwe napi saq tiang ucapang niki mule tetu. Ie Allah saq tiang layanin sepenoq angen siq nyampẽang Kabar Solah mengenai Bije-Ne. 10 Tiang tunas lẽq Allah mudah-mudahan mangkin tiang teijinang dateng tipaq side pade. 11 Sẽngaq tiang melẽt gati bedait kance side pade, adẽq tiang bau bagiang tipaq side pade paice-paice rohani jari neguqang side pade. 12 Maksut tiang, lantaran ite pade-pade sampun bedowẽ iman lẽq dalem Deside Isa Almasih, jari ite bau saling hibur dait saling neguqang. 13 Semeton senamian, tiang mẽlẽ adẽq side pade nenaoq bahwe setetune sampun pire kali tiang beniat gen jangoq side pade, laguq araq doang halanganne. Tiang melẽt adẽq lẽq antare side pade pegawẽan tiang araq ẽndah hasilne maraq pegawẽan tiang sampun berhasil lẽq antare dengan bangse-bangse lain. 14 Sẽngaq tiang bedowẽ kewajiban tipaq selapuq bangse: Dengan Yunani atao saq ndẽq Yunani, saq sekolah atao saq ndẽq sekolah. 15 Keranaq nike tiang ẽndah melẽt gati nyampẽang Kabar Solah nike tipaq side pade saq araq lẽq Roma. 16 Tiang tetu-tetu percaye lẽq Kabar Solah nike, sẽngaq Kabar Solah nike kekuatan Allah jari nyelametang selapuq dengan saq percaye; penembẽqne dengan Yahudi, beterus dengan bangse-bangse lain ẽndah. 17 Sẽngaq lẽq dalem Kabar Solah nike Allah nyatayang berembẽ manusie tejariang kenaq lẽq arepan-Ne sehingge hubungan manusie kance Allah jari solah malik; hal nike langan beriman lẽq Allah lẽman penembẽq jangke dateng penutuq. Nike pade maraq saq tetulis lẽq Kitab Suci, "Dengan saq tejariang kenaq lẽq arepan Allah sehingge hubunganne kance Allah jari solah malik, ie gen idup siq iman!" 18 Lẽman sorge Allah nyatayang murke-Ne tipaq selapuq dose dait kejahatan manusie, sẽngaq kejahatan jari penghalang manusie nenaoq kebenaran mengenai Allah. 19 Napi saq bau tetaoq siq manusie mengenai Allah sampun jelas lẽq dalem atẽ nurani manusie, sẽngaq Allah mẽsaq sampun nyatayang hal nike tipaq manusie. 20 Lẽman Allah cipteang dunie, sipat-sipat Allah saq ndẽq penggitan, keadaan-Ne sebagẽ Allah dait kuase-Ne saq kekel, sampun bau tepahamin siq manusie langan selapuq saq sampun tecipteang. Jari, manusie tetu-tetu ndẽq bedowẽ alasan napi juaq jari ndẽq kenal kance Allah. 21 Manusie nenaoq Allah, laguq manusie ndẽq mulieang Ie sebagẽ Allah, dait ndẽqne ẽndah besyukur tipaq Allah. Sebalikne, atẽ ie pade saq bodo sampun jari peteng. 22 Ie pade merase diriqne bijaksane, padahal setetune bodo. 23 Nẽnten Allah saq kekel saq ie pade sembah, laguq tetato-tetato saq ruene maraq mahluk saq bau matẽ, misalne: Manusie, kedit, binatang saq benaẽ empat dait binatang saq ngumang. 24 Keranaq nike Allah menengang ie pade tekuasein siq kemẽlẽq angen ie pade jari gawẽq saq bejat. Sehingge ie pade piaq hal-hal saq merilaq lẽq sepadene mẽsaq. 25 Sẽngaq ie pade gentiq kebenaran Allah siq duste dait mulieang serte nyembah mahluk, siq ngelupaqang Penciptene saq harus tepuji selaẽq-laẽqne, amin. 26 Sẽngaq manusie ngelaksaneang hal saq maraq nike, jari Allah menengang ie pade turut napsune saq hine. Dengan-dengan nine lẽq antare ie pade ndẽqne berangen malik lẽq dengan mame maraq saq biase lẽq manusie, laguq malahan berangen kance sepade ninene. 27 Dengan mame ẽndah maraq nike; ie pade ndẽqne malik secare wajar berubungan kance dengan nine, laguq birahi lẽq sepade mamene. Dengan mame gawẽq perbuatan saq merilaq tipaq sepade mamene, sehingge ie pade nerimaq pembalesan saq setimpal kance perbuatan ie pade saq jahat nike. 28 Sẽngaq manusie ndẽq merase perlu nenaoq Allah, make Allah menengang pikiran ie pade jari sẽde sehingge ie pade ngelaksaneang hal-hal saq ndẽq kanggo telaksaneang. 29 Pikiran ie pade penoq siq selapuq hal saq jahat, saq ndẽq kenaq; penoq siq keserakahan, lengẽ angenne, penoq siq dengki, napsu mẽlẽ nyematẽq, besiaq, nipu dait dendem, ndẽqne peduli lẽq Tuhan, 30 ie pade demen nyumpaq, tukang pitnah, sombong dait kurang ajar, meriq lẽq Allah. Ie pade ceket gati boyaq care-care baru jari miaq kejahatan, ngelawan dengan toaq. 31 Ie pade ndẽq bedowẽ akal budi, ndẽq setie dait ndẽq bedowẽ belas kasihan. 32 Ie pade nenaoq bahwe menurut hukum Allah, dengan saq ngelaksaneang selapuq hal nike patut tehukum matẽ, laguq timaq maraq nike ie pade tetep ngelaksaneang ẽndah hal-hal nike; dait malahan ie pade setuju lamun dengan lain ẽndah ngelaksaneang hal nike.

Romans 2

1 Keranaq nike semeton senamian, sai setetune side pade sehingge hakimin dengan lain? Side mẽsaq ndẽqne bẽbas lẽman kesalaqan, sẽngaq lamun side pade hakimin dengan lain padahal side mẽsaq ngelaksaneang hal saq pade maraq dengan-dengan nike, make side pade mutusang hukuman tipaq diriqde mẽsaq. 2 Ite nenaoq bahwe Allah mutusang hukuman tipaq dengan-dengan saq ngelaksaneang perbuatan-perbuatan saq maraq nike, keputusan Allah nike kenaq. 3 Laguq selapuq side pade, semeton-semeton, side mẽsaq ngelaksaneang ẽndah hal-hal saq selapuq side pade tuduhang tipaq dengan-dengan lain! Dait side pade pikir selapuq side pade gen bau luput lẽman hukuman Allah? 4 Atao side pade ngerẽmẽhang kemurahan Allah dait kesolahan kance kesabaran Allah saq belẽq nike? Pasti side pade selapuq nenaoq bahwe Allah nyatayang kesolahan angen-Ne sẽngaq Allah kayun adẽq side pade selapuq betobat lẽman dose-dose side pade. 5 Laguq side pade pagah dait ndẽq mẽlẽ betobat. Keranaq nike side mẽsaq saq miaq hukuman side pade jari sayan berat, sewaktu Allah nyatayang murke-Ne dait mutusang hukuman saq adil. 6 Sẽngaq Allah gen bales sebilang dengan pade maraq perbuatanne. 7 Allah ngicanin idup sejati dait kekel tipaq ie pade saq pacu-pacu ngelaksaneang napi saq solah, adẽq ie mauq saq mulie dait saq terhomat, dait saq kekel. 8 Laguq dengan-dengan saq mentingang diriqne mẽsaq dait ndẽq mẽlẽ taat lẽq kebenaran, laguq turut hal-hal saq jahat, make Allah gen murke gati lẽq dengan-dengan nike. 9 Sebilang dengan saq demen gawẽq jahat gen sengsare dait menderite, penembẽqne dengan Yahudi, dait dengan bangse-bangse lain ẽndah. 10 Laguq selapuq dengan saq demen ngelaksaneang napi saq solah gen teicanin kemuliean dait kehormatan dait damẽ sejahtere lẽman Allah. Penembẽqne tipaq dengan Yahudi maraq nike ẽndah tipaq dengan bangse-bangse lain. 11 Sẽngaq perlakuan Allah pade tipaq selapuq dengan. 12 Dengan bangse-bangse lain bedose, ie pade ndẽq ngerti Hukum Taurat, jari ie pade tehukum siq Allah lẽq luah hukum nike. Laguq dengan-dengan Yahudi bedose sesampun ie pade ngerti hukum nike, keranaq nike ie pade gen tetuntut ẽndah siq dasar hukum nike. 13 Ndẽqne dengan saq dengah Hukum Taurat saq tenyatayang sebagẽ dengan kenaq lẽq arepan Allah, laguq dengan saq taat lẽq hukum nike, saq gen tenyatayang kenaq. 14 Dengan bangse-bangse lain ndẽqne kenal kance Hukum Taurat, laguq lamun siq kemẽlẽqne mẽsaq ie pade mẽlẽ ngelaksaneang napi saq teprẽntahang siq Hukum Taurat nike, make atẽne mẽsaq saq jari hukum tipaq ie pade, timaq ie pade ndẽq kenal kance Hukum Taurat. 15 Tingkah laku ie pade nyatayang bahwe napi saq teprẽntahang siq hukum nike tetulis lẽq dalem atẽ ie pade. Dait ẽndah atẽ nurani ie pade buktiang hal nike, sẽngaq pikiranne mẽsaq saling tuduh atao saling bẽle. 16 Maraq nike saq gen telaksane lẽq jelo saq sampun tetentuang nike. Lẽq jelo nike -- menurut Kabar Solah saq tiang sampẽang, Allah langan Deside Isa Almasih gen hakimin selapuq hal saq teseboq lẽq dalem atẽ dait pikiran selapuq dengan. 17 Laguq mangkin berembẽ side pade niki? Side pade ngaku dengan Yahudi, side pade beharep sepenoq angen lẽq Hukum Taurat dait side pade bangge siq hubungan side pade kance Allah. 18 Side pade nenaoq pekayunan Allah. Dait lantaran teajah kadu Hukum Taurat, side pade nenaoq mbẽ saq solah dait mbẽ saq ndẽq solah. 19 Side pade yakin bahwe side pade jari pemimpin dengan bute dait cahaye tipaq dengan-dengan saq araq lẽq dalem peteng. 20 Side pade bimbing dengan-dengan saq ndẽqman dẽwase pikiranne dait guru-guru dengan saq bodo. Side pade yakin bahwe lẽq dalem Hukum Taurat side pade bedowẽ penenaoq dait kebenaran. 21 Side pade ngajah dengan lain, nah kembẽq side pade ndẽq ngajah diriqde mẽsaq? Side pade ngajah dengan adẽqne ndẽq memaling, laguq kembẽq side mẽsaq memaling? 22 Side pade ngajah dengan adẽq ie ndẽq bezinah, laguq kembẽq side mẽsaq bezinah? Side pade meriq tipaq berhale, laguq kembẽq side mẽsaq ngerampok barang-barang lẽman balẽ-balẽ berhale. 23 Side pade bangge-banggeang bahwe side pade bedowẽ Hukum Taurat, laguq kembẽq side mẽsaq menghine Allah siq care ngelanggar Hukum Taurat nike. 24 Lẽq dalem Kitab Suci tetulis maraq niki, "Lantaran side, dengan-dengan Yahudi, make pesẽngan Allah jari tehine lẽq antare bangse-bangse lain." 25 Lamun side pade taat lẽq Hukum Taurat, make sunat side pade nike araq ẽndah manpaatne. Laguq lamun side pade ndẽq taat lẽq hal-hal saq teprẽntahang dalem Hukum Taurat nike, make sunat side pade nike ndẽq araq manpaatne malik. 26 Lamun sopoq dengan saq ndẽq Yahudi saq ndẽq tesunat, laguq ie taat lẽq Hukum Taurat, napi ie ndẽq teanggep siq Allah sebagẽ dengan saq sampun tesunat? 27 Dait dengan-dengan saq ndẽq tesunat laguq saq ngelaksaneang Hukum Taurat, gen hakimin side pade saq bedowẽ hukum saq tetulis dait sunat, laguq ngelanggar hukum nike. Dengan-dengan Yahudi timaqne bedowẽ Hukum Taurat dait tesunat, laguq malahan dengan-dengan saq ndẽq tesunat saq taat lẽq Hukum Taurat. 28 Sẽngaq dengan Yahudi saq sejati ndẽqne dengan saq cume aranne doang dengan Yahudi, dait dengan saq tetu-tetu tesunat ie ndẽqne dengan saq tesunat secare lahiriah doang. 29 Laguq dengan Yahudi sejati nike, dengan saq ndẽq penggitan keyahudianne dait sunat saq sejati nike perobahan lẽq dalem atẽ siq Roh Allah. Dengan saq maraq nike nerimaq pujian lẽman Allah, ndẽqne lẽman manusie.

Romans 3

1 Lamun maraq nike napi keuntunganne jari dengan Yahudi? Dait napi manpaatne taat tipaq aturan sunat? 2 Pasti luwẽq gati manpaatne! Penembẽqne, sẽngaq tipaq dengan Yahudi Allah percayeang manik-Ne. 3 Laguq berembẽ lamun separo lẽman dengan Yahudi ndẽq setie lẽq Allah? Napi lantaran nike Allah jari ndẽq setie? 4 Tetu-tetu ndẽqne maraq nike! Sẽngaq sampun jelas Allah tetep kenaq timaq selapuq manusie salaq, lẽq Kitab Suci araq tetulis, "Adẽq Deside terbukti kenaq lẽq selapuq saq Deside manikang, dait Deside menang sewaktu teadilin." 5 Laguq lamun kesalaqante nyatayang kebenaran Allah, napi saq mẽlẽ ite ucapang malik? Bahwe Allah nẽnten adil lamun Ie nyatayang murke-Ne? (Mule napi saq teketuanang niki wajar secare manusie.) 6 Tetu-tetu ndẽqne maraq nike! Sẽngaq lamun Allah nẽnten adil, berembẽ Ie bau hakimin dunie niki? 7 Laguq lamun lantaran perbuatan saq salaq, kebenaran Allah jari sayan nyate sehingge Ie tepuji, kembẽq dengan saq piaq kejahatan nike masih tehakimin sebagẽ dengan saq bedose? 8 Kembẽq ite ndẽq kanggo bebase, "Solahan ite piaq hal saq jahat, adẽqne timbul hal saq kenaq." Mule araq dengan-dengan saq pitnah tiang, ie paran tiang ngeraos maraq nike. Dengan-dengan saq maraq nike sepatutne tehukum siq Allah. 9 Nah, napi kedudukante sebagẽ dengan Yahudi solahan ketimbang kedudukan bangse lain? Tetu-tetu ndẽqne maraq nike! Sampun tiang sampẽang bahwe dengan Yahudi dait maraq nike ẽndah dengan bangse-bangse lain, selapuqne sampun tekuasein siq dose. 10 Maraq saq tetulis lẽq dalem Kitab Suci, "Ndẽq araq sopoq dengan juaq saq kenaq lẽq arepan Allah, 11 ndẽq araq sopoq dengan saq ngerti dait ndẽq araq sopoq dengan juaq saq nyembah Allah. 12 Selapuq dengan sampun jaoqang diriqne lẽman Allah; selapuqne sampun sesat. Ndẽq araq sopoq dengan saq gawẽq hal saq solah, timaq sopoq dengan juaq! 13 Kerongkongan ie pade maraq kuburan saq ngangaq, tipu muslihat sugul lẽman ẽlaq ie pade dait biwih ie pade nyebarang pitnah, maraq racun ulah. 14 Biwih ie pade penoq siq kutukan dait sumpaq senaq. 15 Naẽn ie pade becat gati lamun mẽlẽ nyiksaq dait nyematẽq dengan. 16 Kesusahan dait keancuran, turut ie pade ojok mbẽ doang ie pade laiq. 17 Ie pade ndẽq kenal kance napi nike langan damẽ, 18 dait rase takut lẽq Allah tetu-tetu ndẽq araq lẽq dengan nike." 19 Mangkin ite nenaoq bahwe selapuq saq tetulis dalem Hukum Taurat nike tetujuang tipaq dengan-dengan saq araq lẽq bawaq kekuasean hukum nike, jari ndẽq araq sopoq dengan juaq saq bau ngebẽng alasan napi-napi, dait Allah berhak nuntut selapuq isi dunie niki. 20 Sẽngaq ndẽq sopoq dengan juaq saq bau tejariang kenaq lẽq arepan Allah, sehingge hubunganne kance Allah jari solah malik lantaran ngelaksaneang Hukum Taurat. Sebalikne hukum nike cume nyatayang tipaq manusie bahwe manusie bedose. 21 Laguq mangkin ndẽqne kadu Hukum Taurat, Allah sampun nyatayang langan berembẽ manusie tejariang kenaq lẽq arepan-Ne. Hukum Taurat dait kitab nabi-nabi sampun nyatayang hal nike, 22 bahwe Allah ngicanin langan tipaq manusie berembẽ tejariang kenaq lẽq arepan-Ne, cume lamun manusie beriman lẽq dalem Deside Isa Almasih. Allah piaq hal nike umaq selapuq dengan saq percaye tipaq Almasih. Allah nẽnten bẽde-bẽdeang dengan. 23 Sẽngaq selapuq dengan sampun bedose dait ndẽqne bau dateng ojok kemuliean Allah. 24 Laguq cume lantaran rahmat-Ne, Allah jariang manusie kenaq lẽq arepan-Ne secare cume-cume langan penebusan lẽq dalem Deside Isa Almasih. 25 Allah ngurbanang Deside Isa Almasih, adẽq Allah ngalihang murke-Ne lẽman manusie, dait Deside Isa nanggung hukuman dose-dose manusie. Manusie tejariang kenaq lẽq arepan Allah lamun ie percaye bahwe Deside Isa Almasih numpahang daraq-Ne dait ngurbanang idup-Ne umaq manusie. Allah piaq maraq nike jari nyatayang keadilan-Ne. Sẽngaq lẽq waktu saq laẽq Allah sampun sabar tipaq selapuq dose manusie, sehingge Allah nẽnten hukum ie pade. 26 Laguq mangkin, Allah buktiang keadilan-Ne tipaq dose-dose manusie nike, Allah buktiang bahwe diriq-Ne kenaq dait sebilang dengan saq beriman lẽq dalem Deside Isa Almasih tenyatayang sebagẽ dengan saq kenaq lẽq arepan Allah. 27 Keranaq nike, ite ndẽq bedowẽ alasan malik jari nyombongang diriq. Kembẽq maraq nike? Napi lantaran ite ngelaksaneang saq tetulis dalem Hukum Taurat? Ndẽq! Laguq lantaran imante. 28 Sẽngaq kesimpulanne maraq niki: Manusie tenyatayang sampun tejariang kenaq lẽq arepan Allah sehingge hubunganne kance Allah jari solah malik, ndẽqne lantaran ie ngelaksaneang napi saq tetulis dalem Hukum Taurat, laguq lantaran ie beriman lẽq dalem Deside Isa Almasih. 29 Napi Allah nike Allahne dengan Yahudi doang? Napi Ie Allah dengan bangse-bangse lain ẽndah? Tetu. Mule Ie ẽndah Allahne dengan bangse-bangse lain! 30 Sẽngaq Allah cume sopoq. Ie gen jariang kenaq lẽq arepan-Ne, dengan-dengan Yahudi langan iman dait ẽndah dengan bangse-bangse lain langan iman. 31 Napi niki artine bahwe lantaran ite beriman lẽq dalem Deside Isa Almasih, ite batalang Hukum Taurat? Tetu-tetu ndẽqne maraq nike! Malahan siq imante lẽq dalem Deside Isa Almasih nike, ite ngukuhang hukum nike.

Romans 4

1 Lamun maraq nike napi pendapet ite mengenai Ibrahim, leluhur bangsente? Berembẽ pengalamanne? 2 Lamun hal-hal saq ie laksaneang miaq ie tejariang kenaq lẽq arepan Allah sehingge hubunganne kance Allah jari solah malik, make araq ẽndah alasan Ibrahim jari nyombongang diriqne, laguq ie ndẽq bau nyombongang diriqne lẽq arepan Allah. 3 Lẽq Kitab Suci araq tetulis, "Ibrahim percaye tipaq Allah, dait lantaran percayene nike ie teterimaq siq Allah sebagẽ dengan saq tejariang kenaq lẽq arepan Allah." 4 Dengan saq begawẽan nerimaq upaq dait upaqne nike ndẽqne teanggep jari hadiah sẽngaq nike hakne. 5 Sebalikne dengan saq ndẽq begawẽan laguq percaye lẽq Allah saq bau jariang dengan jahat tejariang kenaq lẽq arepan-Ne, nike lantaran imanne ndẽqne lantaran hasil perbuatanne mẽsaq. 6 Pade maraq basen Daud ẽndah, bahagie dengan saq sampun teterimaq sebagẽ dengan saq tejariang kenaq lẽq arepan Allah sehingge hubunganne kance Allah jari solah malik, ndẽqne lantaran perbuatanne, 7 "Bahagie dengan saq kesalaqanne teampunin dait dose-dosene sampun teapus siq Allah! 8 Bahagie dengan saq dose-dosene ndẽq tetuntut siq Allah!" 9 Napi ucapan bahagie niki cume tetujuang tipaq dengan-dengan Yahudi doang? Atao tipaq dengan bangse-bangse lain ẽndah? Sendẽqmanne sampun tiang sebut bahwe Ibrahim teterimaq siq Allah sebagẽ dengan saq tejariang kenaq lẽq arepan-Ne, sẽngaq Ibrahim beriman lẽq Ie. 10 Nah, piran Allah nyatayang hal nike tipaq Ibrahim? Sendẽqman atao sesampun Ibrahim tesunat sesuai prẽntah Allah? Mule sendẽqman ie tesunat, ndẽqne sesampun ie tesunat. 11 Ie tesunat mudian, dait sunatne nike jari tande bahwe Allah sampun nerimaq ie tejariang kenaq lẽq arepan Allah, sẽngaq ie beriman tipaq Allah. Ie teterimaq siq Allah sewaktu ie ndẽqman ngelaksaneang sunat saq teprẽntahang siq Allah. Dait Ibrahim jari bapaq selapuq dengan percaye saq ndẽq besunat, dait ie pade teterimaq siq Allah sebagẽ dengan saq tejariang kenaq lẽq arepan-Ne. 12 Ibrahim ẽndah bapaq dengan-dengan saq besunat, nike dengan-dengan saq ndẽq cume taat tipaq aturan sunat, laguq lantaran ie pade ẽndah idup beriman tipaq Allah, pade maraq Ibrahim saq beriman sendẽqman ie ngelaksaneang sunat saq teprẽntahang siq Allah. 13 Allah bejanji tipaq Ibrahim dait keturunanne bahwe dunie niki gen jari dowẽne. Allah bejanji maraq nike ndẽq lantaran Ibrahim taat lẽq Hukum Taurat, laguq lantaran ie beriman tipaq Allah sehingge ie teterimaq siq Allah sebagẽ dengan saq tejariang kenaq lẽq arepan-Ne sehingge hubunganne kance Allah jari solah malik. 14 Sẽngaq lamun cume dengan-dengan saq taat tipaq Hukum Taurat doang saq gen nerimaq napi saq tejanjiqang siq Allah, make ndẽq araq artine dengan beriman tipaq Allah, dait janji Allah niki ẽndah batal. 15 Hukum Taurat datengang murke Allah, laguq lamun ndẽq araq hukum nike make ndẽq gen araq ẽndah pelanggaran. 16 Keranaq nike, janji Allah jari dasar dengan beriman tipaq Allah. Hal nike jari jaminan umaq selapuq keturunan Ibrahim. Janji nike teicanin tipaq ie pade langan rahmat lẽman Allah, ndẽq cume jari dengan saq taat tipaq Hukum Taurat doang, laguq umaq ie pade saq beriman tipaq Allah, pade maraq Ibrahim nike sebagẽ bapaqte selapuq. 17 Sẽngaq maraq niki Allah bemanik tipaq Ibrahim, "Tiang sampun jariang side umaq selapuq bangse." Ibrahim nike bapaqte lẽq arepan Allah. Dait Ibrahim percaye tipaq Allah. Ie Allah saq ngidupang dengan ninggal, Ie ẽndah Allah saq cipteang siq manik-Ne napi saq ndẽq araq jari araq. 18 Timaq sampun ndẽq araq harepan malik, laguq Ibrahim tetep doang beharep dait percaye. Keranaq nike ie jari bapaq luwẽq bangse. Pade maraq saq tetulis dalem Kitab Suci, "Keturunan side gen jari luwẽq gati." 19 Ibrahim nenaoq lẽq waktu nike bahwe ie ndẽq mungkin malik gen bedowẽ keturunan, sẽngaq ragene sampun lingsir gati dait umurne gen satus taun; maraq nike ẽndah Sarah, sebiniqanne nike bangkol, laguq iman Ibrahim ndẽq jari kurang. 20 Ie tetep percaye dait ndẽq ragu-ragu tipaq janji Allah, malahan imanne jariang ie sayan kuat -- sehingge ie mulieang Allah. 21 Ie yakin gati bahwe Allah pasti bau ngelaksaneang napi saq sampun Ie janjiqang nike. 22 Keranaq nike Ibrahim teterimaq siq Allah sebagẽ dengan saq tejariang kenaq lẽq arepan Allah sehingge hubunganne kance Allah jari solah malik. 23 Manik Allah lẽq dalem Kitab Suci, "Teterimaq siq Allah sebagẽ dengan saq tejariang kenaq lẽq arepan Allah sehingge hubunganne kance Allah jari solah malik," tetulis ndẽq umaq Ibrahim doang, 24 laguq umaq ite ẽndah. Ite ẽndah gen teterimaq siq Allah sebagẽ dengan saq tejariang kenaq lẽq arepan Allah sehingge hubungante kance Allah jari solah malik, sẽngaq ite percaye tipaq Allah saq ngidupang Junjungante Saq Mulie Deside Isa lẽman ninggal. 25 Deside Isa niki sampun teserahang jari tematẽq lantaran dose-dosente; terus Ie teidupang malik siq Allah adẽq ite bau tejariang kenaq lẽq arepan-Ne sehingge hubungante kance Allah jari solah malik.

Romans 5

1 Mangkin ite sampun tejariang kenaq lẽq arepan Allah sehingge hubungante kance Allah jari solah malik lantaran imante. Dait lantaran nike ite bedowẽ damẽ sejahtere kance Allah langan Junjungante Saq Mulie Deside Isa Almasih. 2 Sẽngaq ite beriman lẽq dalem Deside Isa, langan Ie ite bau tame ojok dalem rahmat Allah, dait mangkin siq rahmat nike ite idup. Keranaq nike ite besukecite dait beharep bahwe ite gen nerimaq kemuliean Allah! 3 Malahan luwẽqan malik, ite ẽndah besukecite lẽq dalem penderitean, sẽngaq ite nenaoq bahwe penderitean miaq dengan jari tekun. 4 Dait ketekunan miaq dengan jari tahen uji; niki saq nimbulang pengharepan. 5 Dait pengharepan saq maraq niki ndẽq gen ngecẽweang ite, sẽngaq atẽnte sampun teisiq siq Allah siq kasih-Ne. Hal nike telaksaneang siq Allah langan Roh Suci-Ne, saq sampun teicanin tipaq ite. 6 Lẽq waktu ite dalem keadaan lemah, Almasih ninggal umaq ite dengan-dengan saq durhake, lẽq waktu saq tepat saq tetentuang siq Allah. 7 Sẽngaq ndẽqne mudaq sopoq dengan rẽde matẽ umaq dengan saq kenaq, laguq sang umaq dengan saq solah araq dengan saq bani matẽ. 8 Laguq Allah nyatayang kasih-Ne lẽq ite sewaktu Deside Isa ninggal umaq ite, lẽq waktu ite masih bedose. 9 Mangkin ite sampun tejariang kenaq lẽq arepan Allah sehingge hubungante kance Allah jari solah malik langan ninggal-Ne Almasih; keranaq nike pasti ite gen teselametang ẽndah lẽman murke Allah siq Almasih. 10 Lamun lẽq waktu ite masih jari musuh Allah, ite tedamẽang kance Allah siq ninggal Bije-Ne, lebih-lebih mangkin sesampun hubungante kance Allah solah malik, pasti ite gen teselametang ẽndah langan idup Almasih. 11 Dait luwẽqan malik, ite ẽndah besukecite lẽq dalem Allah langan Junjungante Saq Mulie Deside Isa Almasih, sẽngaq langan Ie ite sampun nerimaq pendamẽan. 12 Dose tame ojok dalem dunie langan sopoq dengan, dait lẽman dose nike sampun datengang kematẽan, akibatne, selapuq umat manusie gen ngalamin kematẽan, lantaran selapuq dengan bedose. 13 Sendẽqman Hukum Taurat teturunang, dose sampun araq lẽq dalem dunie. Laguq dose ndẽqne teperitungang, sẽngaq ndẽq araq hukum saq bau telanggar. 14 Timaq maraq nike, kematẽan nguasein selapuq manusie lẽman jaman Adam jangke jaman Musa, malahan dengan-dengan saq ndẽq miaq pelanggaran maraq saq telaksaneang siq Adam, dengan-dengan nike milu ẽndah tekuasein siq kematẽan. Adam nike jari gambaran sopoq dengan saq gen rauh. 15 Laguq paice Allah tetu-tetu bẽde kance pelanggaran saq tepiaq siq Adam. Pelanggaran Adam jari penyebap luwẽq dengan matẽ, laguq jaoq belẽqan malik rahmat lẽman Allah saq teicanin tipaq dengan luwẽq, langan sopoq dengan, nike Deside Isa Almasih. 16 Rahmat Allah ẽndah jaoq belẽqan lẽman dose sopoq dengan nike, sẽngaq penghakiman lẽq sopoq pelanggaran saq tepiaq siq Adam, nike jari penyebap penghukuman. Laguq rahmat Allah tipaq luwẽq pelanggaran, nike jari penyebap manusie tejariang kenaq lẽq arepan Allah. 17 Langan sopoq pelanggaran saq tepiaq siq Adam kematẽan nguasein selapuq dengan. Laguq selapuq dengan saq nerimaq kelimpahan rahmat dait paice tejariang kenaq lẽq arepan Allah langan Deside Isa Almasih, gen idup dait bekuase. 18 Sẽngaq sopoq pelanggaran saq tepiaq siq Adam, sampun datengang penghukuman tipaq sebilang manusie. Laguq sopoq karye Almasih saq jariang manusie kenaq lẽq arepan Allah, miaq selapuq dengan kenaq lẽq arepan Allah dait ngicanin ie pade idup. 19 Dait maraq luwẽq dengan jari dengan bedose lantaran sopoq dengan saq ndẽq taat, maraq nike ẽndah luwẽq dengan gen bau tejariang kenaq lẽq arepan Allah lantaran sopoq dengan lain taat lẽq Allah. 20 Allah ngicanin Hukum Taurat adẽq selapuq dengan bau serioq berembẽ bedosene ie pade, laguq sayan manusie bedose, sayan belimpah-limpah rahmat Allah. 21 Pade maraq dose nguasein selapuq dengan dait datengang kematẽan, mangkin rahmat Allah bekuase dait jariang ite kenaq lẽq arepan Allah, sehingge ite nerimaq idup sejati dait kekel langan Junjungante Saq Mulie Deside Isa Almasih.

Romans 6

1 Lamun maraq nike napi saq bau ite raosang malik? Napi ite tetep doang gawẽq dose, adẽq rahmat Allah sayan beromboq? 2 Pasti ndẽqne maraq nike; dose ndẽq bekuase malik lẽq ite, jari segerah ite bau terus-terusan idup dalem dose? 3 Semeton senamian, napi side pade ndẽq nenaoq bahwe sewaktu ite tebaptis lẽq dalem Almasih, artine ite tebaptis dalem ninggal-Ne. 4 Siq baptisan ite tekubur bareng kance Almasih dait milu ninggal bareng Ie, adẽqne pade maraq Almasih teidupang lẽman ninggal-Ne siq kemuliean Bapa saq mulie, maraq nike ẽndah ite gen idup dalem idup saq baru. 5 Lamun ite sampun jari sopoq kance Almasih dalem ninggal-Ne, ite ẽndah gen jari sopoq kance Ie dalem idup-Ne saq sampun teidupang malik. 6 Selapuqte sampun nenaoq, bahwe tabiat ite saq laẽq sampun tematẽqang bareng Almasih lẽq kayuq salib adẽq awakte saq bedose nike telang kuasene, adẽq ite ndẽqne malik tekuasein siq dose. 7 Sẽngaq lamun sopoq dengan ninggal, dengan nike tebẽbasang lẽman kuase dose. 8 Laguq lamun ite sampun ninggal kance Almasih, ite percaye bahwe ite ẽndah gen idup bareng kance Ie. 9 Sẽngaq ite nenaoq bahwe Almasih sampun idup malik lẽman ninggal, dait Ie nẽnten gen ninggal malik; kematẽan nẽnten bekuase malik lẽq diriq-Ne. 10 Ninggal saq Ie alamin, nike ninggal tipaq dose, hal nike telaksane cume sekali doang jari selaẽq-laẽqne. Dait kehidupan-Ne nike idup bagi Allah. 11 Maraq nike ẽndah side pade harus anggep bahwe diriq side pade sampun ninggal tipaq dose, laguq idup bagi Allah dalem Deside Isa Almasih. 12 Ndaq malik alurang dose nguasein awakde saq iniq binase, adẽq side pade ndaq turut kemẽlẽqne saq jahat. 13 Ndaq ẽndah side pade nyerahang bagian-bagian awakde tipaq kuase dose jari tekadu lẽq maksut-maksut jahat. Laguq serahang diriqde tipaq Allah sebagẽ dengan saq sampun tealihang lẽman kematẽan tipaq idup. Dait serahang bagian-bagian awakde tipaq Allah adẽqne tekadu jari maksut-maksut saq kenaq lẽq arepan Allah. 14 Dose ndẽqne kanggo nguasein side pade, sẽngaq side pade ndẽq malik idup lẽq bawaq Hukum Taurat, laguq lẽq bawaq rahmat Allah. 15 Mangkin napi kesimpulante? Napi ite gen gawẽq dose lantaran ite ndẽq lẽq bawaq Hukum Taurat, laguq lẽq bawaq rahmat Allah? Pasti ndẽqne maraq nike! 16 Napi side pade nenaoq bahwe lamun side pade nyerahang diriq tipaq sopoq dengan jari taat lẽq ie, make artine side pade jari pelayan dengan nike --lẽq dalem dose saq jauq side pade ojok kematẽan, atao dalem ketaatan saq jariang side pade kenaq lẽq arepan Allah sehingge hubungan side pade kance Allah jari solah malik. 17 Laguq syukur tipaq Allah, sẽngaq laẽq side pade jari panjak dose, laguq mangkin siq sepenoq angen side pade taat lẽq pengajahan saq sampun teajahang tipaq side pade. 18 Side pade sampun tebẽbasang lẽman dose, dait sampun jari hambe saq tejariang kenaq lẽq arepan Allah. 19 Lantaran penenaoq side pade kurang gati, tiang kadu conto-conto mengenai hambe, adẽq side pade bau ngerti. Laẽq side pade sampun nyerahang bagian-bagian awakde sebagẽ panjak hal-hal saq kotor dait jahat. Hal nike jauq side pade tipaq maksut-maksut saq jahat. Maraq nike ẽndah mangkin side pade harus nyerahang awak side pade sebagẽ hambe saq tejariang kenaq lẽq arepan Allah. Hal nike jauq side pade tipaq penyucian. 20 Sewaktu side pade jari hambe dose, side pade ndẽq lẽq bawaq kuase saq jariang side pade kenaq lẽq arepan Allah. 21 Napi saq jari keuntungan side pade lẽq waktu nike? Mangkin selapuqne jari hal saq merilaq, sẽngaq perbuatan-perbuatan side pade nike cume jauq kematẽan. 22 Laguq mangkin side pade sampun tebẽbasang lẽman dose, dait side pade jari pelayan Allah, keuntungan saq side pade mauq mangkin, penyucian saq ahirne jauq side pade tipaq idup sejati dait kekel. 23 Sẽngaq upaq dose nike kematẽan; laguq paice Allah nike idup sejati dait kekel dalem Junjungante Saq Mulie Deside Isa Almasih.

Romans 7

1 Semeton-semeton tiang! Side pade sampun nenaoq Hukum Taurat. Jari side pade nenaoq bahwe kekuasean hukum tipaq sopoq dengan berlaku cume sewaktu dengan nike idup. 2 Misalne sopoq dengan nine saq bedowẽ semame, ie harus teriket lẽq hukum kance semamene saq masih idup. Laguq lamun semamene ninggal, dengan nine nike bẽbas lẽman hukum saq ngiket ie tipaq semamene. 3 Lamun dengan nine nike idup kance dengan mame lain sewaktu semamene masih araq, make dengan nine nike teparan bezinah. Laguq lamun semamene ninggal, make menurut hukum ie sampun bẽbas, dait lamun ie merariq malik kance dengan mame saq lain, make ie ndẽq bezinah. 4 Maraq nike ẽndah halne side pade, semeton tiang senamian. Side pade sampun ninggal tipaq Hukum Taurat langan rage Deside Isa Almasih dait jari dowẽ-Ne saq sampun teidupang malik lẽman ninggal. Deside Isa teidupang lẽman ninggal adẽq ite ngasilang buaq saq solah bagi Allah lẽq dalem idupte. 5 Sẽngaq, laẽq ite idup menurut kemẽlẽq awak saq bedose. Lẽq waktu nike kemẽlẽq nike timbul sẽngaq araq Hukum Taurat saq pengaruhin diriqte. Nike jari penyebap ite ngelaksaneang hal-hal saq jauq akibat kematẽan. 6 Laguq mangkin ite sampun tebẽbasang lẽman Hukum Taurat. Ite sampun ninggal umaq hukum saq laẽq nguasein ite. Ite ndẽq malik ngelayanin menurut hukum saq tetulis nike. Mangkin ite ngelayanin dalem keadaan saq baru dalem Roh Allah. 7 Lamun maraq nike, napi saq bau ite ucapang malik? Napi Hukum Taurat nike dose? Pasti ndẽq! Laguq setetune hukum nike saq ngajah tiang mengenai dose. Tiang ndẽq gen nenaoq napi artine melẽt nike, lamun ndẽq tebadaq siq hukum nike, "Ndaq melẽt." 8 Langan hukum nike, dose mauq kesempatan jari nimbulang macem-macem kemẽlẽq lẽq dalem atẽn tiang; sẽngaq lamun Hukum Taurat nike ndẽq araq, make dose ẽndah matẽ. 9 Laẽq tiang idup ndẽq kadu Hukum Taurat. Laguq sesampun araq prẽntah lẽman hukum nike dose mulai idup 10 dait tiang matẽ. Make prẽntah nike saq maksutne mule jari ngicanin idup malahan datengang kematẽan tipaq tiang. 11 Sẽngaq langan prẽntah nike, dose bait kesempatan nipu dait nyematẽq tiang. 12 Hukum Taurat nike suci dait sebilang prẽntah lẽq dalem hukum nike ẽndah suci, adil dait solah. 13 Mangkin, napi niki artine bahwe saq solah nike datengang kematẽan tipaq tiang? Pasti ndẽq! Dose nike saq datengang kematẽan tipaq tiang kadu saq solah nike, adẽq jari sayan nyate ẽndah kejahatan dose nike. Dait langan prẽntah-prẽntah nike sayan nyate berembẽ jahatne dose nike. 14 Sẽngaq ite nenaoq bahwe Hukum Taurat nike mengenai hal-hal saq berubungan kance roh; laguq tiang niki manusie siq kemẽlẽq awak saq bedose saq sampun tejual jari panjak dose. 15 Sẽngaq tiang mẽsaq ndẽq ngerti perbuatan tiang. Hal-hal saq melẽt tiang laksaneang nike, ndẽq tiang laksaneang; laguq hal-hal saq tiang meriq, malahan nike saq tiang laksaneang. 16 Mangkin lamun tiang laksaneang hal-hal saq betentangan kance kemẽlẽq tiang, nike artine tiang setuju bahwe Hukum Taurat nike solah. 17 Jari, setetune ndẽqne tiang saq ngelaksaneang nike, laguq dose saq nguasein diriq tiang. 18 Sẽngaq tiang nenaoq bahwe ndẽq araq sopoq juaq saq solah lẽq dalem diriq tiang; nike kemẽlẽq awak tiang saq bedose. Sẽngaq araq angen tiang piaq hal saq solah, laguq tiang ndẽq sanggup laksaneang. 19 Tiang ndẽq ngelaksaneang saq solah saq tiang melẽt laksaneang, laguq tiang ngelaksaneang hal-hal saq jahat, saq ndẽq mẽlẽ tiang laksaneang. 20 Lamun tiang ngelaksaneang hal-hal saq ndẽq mẽlẽ tiang laksaneang, nike artine ndẽqne tiang saq ngelaksaneang hal-hal nike, laguq dose saq nguasein diriq tiang. 21 Jari, tiang ndait hukum niki: Lamun tiang mẽlẽ ngelaksaneang saq solah, make cume saq jahat doang saq timbul lẽman diriq tiang. 22 Mule batin tiang suke lẽq hukum Allah, 23 laguq tiang sadar bahwe lẽq dalem bagian-bagian awak tiang araq ẽndah hukum lain saq pengaruhin tiang -- nike hukum saq ngelawan hukum akal budi tiang. Keranaq nike tiang teriket dalem hukum dose saq araq lẽq bagian-bagian awak tiang. 24 Tiang manusie celake! Sai saq gen nyelametang tiang lẽman awak saq jauq tiang tipaq kematẽan niki? Syukur tipaq Allah! Langan Junjungante Saq Mulie Deside Isa Almasih. Jari, siq hukum akal budi tiang, tiang ngelayanin hukum Allah, laguq lẽman kemẽlẽq awak tiang saq bedose, tiang ngelayanin hukum dose!

Romans 8

1 Ndẽqne araq malik penghukuman lẽq dengan-dengan saq sampun idup lẽq dalem Deside Isa Almasih. 2 Sẽngaq hukum Roh Allah saq miaq ite idup lẽq dalem Deside Isa Almasih sampun bẽbasang tiang lẽman hukum saq jauq dose dait kematẽan. 3 Napi saq ndẽq mungkin telaksaneang siq Hukum Taurat lantaran kelemahan manusie, sampun telaksaneang siq Allah. Dose saq araq lẽq dalem tabiat manusie nike sampun tekalahang siq Allah langan pengurbanan Bije-Ne mẽsaq saq rauh ojok dunie jari maraq manusie saq bedose, jari ngapus dose. 4 Hal nike telaksaneang siq Allah adẽq pekayunan-Ne saq tenyatayang dalem Hukum Taurat nike bau telaksaneang lẽq dalem diriqte saq idup menurut Roh Allah, dait ndẽqne menurut tabiat manusie. 5 Dengan-dengan saq idup menurut tabiat manusie, gen tetep mikirang napi saq jari kemẽlẽq tabiat manusiene, laguq dengan-dengan saq idup menurut Roh Allah, ie gen tetep mikirang napi saq jari pekayunan Roh Allah. 6 Lamun pikirande tekuasein siq kemẽlẽq tabiat manusie, make akibatne kematẽan, laguq lamun pikirande tekuasein siq Roh Allah, make akibatne idup dait damẽ sejahtere kance Allah. 7 Dengan saq pikiranne tekuasein siq kemẽlẽq tabiat manusie, dengan nike bemusuhan kance Allah; lantaran dengan nike ndẽqne taat lẽq hukum Allah; dait mule ie ndẽq iniq patuh lẽq hukum Allah. 8 Dengan-dengan saq idup menurut tabiat manusie, ndẽqne mungkin nyenengang Allah. 9 Laguq side pade ndẽq idup menurut tabiat manusie, side pade idup menurut Roh Allah -- lamun, Roh Allah tetu-tetu araq lẽq dalem diriqde. Dengan saq ndẽq bedowẽ Roh Almasih, ie ndẽqne dowẽn Almasih. 10 Laguq lamun Almasih idup lẽq dalem diriqde, make timaq awakde gen ninggal lantaran dose, laguq Roh Allah ngicanin idup tipaq side, sẽngaq hubungande kance Allah sampun solah. 11 Lamun Roh Allah saq ngidupang Almasih lẽman ninggal idup lẽq dalem diriqde, make Ie saq ngidupang Almasih lẽman ninggal gen ngidupang ẽndah awakde saq iniq binase nike siq Roh-Ne saq idup lẽq dalem diriqde. 12 Keranaq nike semeton senamian, ite bedowẽ tanggung jawab, laguq tanggung jawab nike ndẽqne lẽq tabiat manusie; ite ndẽq perlu idup menurut kemẽlẽqne. 13 Sẽngaq lamun side pade idup menurut tabiat manusie, make side pade gen matẽ; laguq lamun siq kuase Roh Allah side pade terus doang nyematẽq perbuatan-perbuatande saq bedose, make side pade gen idup. 14 Dengan-dengan saq tebimbing siq Roh Allah, ie jari bije-bije dowẽn Allah. 15 Sẽngaq Roh saq teicanin siq Allah tipaq side pade, ndẽq gen miaq side jari hambe sehingge side pade idup dalem ketakutan, laguq Roh Allah nike jariang side bije-bije dowẽn Allah. Dait siq kuase Roh Allah nike ite bau nyebut Allah nike, "Bapa, ya Bapa!" 16 Roh Allah bareng kance rohte nyatayang bahwe ite niki jari bije-bije dowẽn Allah. 17 Nah, lamun ite bije dowẽn Allah, make ite ẽndah ahli waris-Ne saq gen nerimaq berkah-berkah saq tesedieang siq Allah jari bije-bije dowẽ-Ne. Ite gen nerimaq bareng-bareng kance Almasih napi saq sampun tesedieang siq Allah umaq Ie; sẽngaq lamun ite milu menderite bareng kance Almasih, ite gen milu temulieang bareng kance Ie. 18 Selapuq penderitean saq ite alamin mangkin niki, menurut pendapet tiang, tetu-tetu ndẽqne bau tebandingang siq kemuliean saq gen tenyatayang tipaq ite. 19 Selapuq mahluk melẽt gati ngantih piran waktune Allah nyatayang bije-bije saq jari dowẽ-Ne. 20 Sẽngaq selapuq mahluk araq lẽq bawaq pikiran saq sie-sie, ndẽqne lantaran kemẽlẽqne mẽsaq, laguq siq pekayunan-Ne, siq pengharepan bahwe: 21 Selapuq mahluk gen tebẽbasang lẽman kuase saq binaseang dait gen tebẽbasang serte temulieang bareng kance bije-bije dowẽn Allah. 22 Ite nenaoq bahwe jangke mangkin selapuq mahluk ngeluh lantaran menderite, maraq dengan nine saq menderite sewaktune nganak. 23 Ndẽqne selapuq mahluk doang saq ngeluh, laguq ite mẽsaq ẽndah ngeluh lẽq dalem atẽnte. Ite saq sampun nerimaq paice lẽman hasil penembẽq Roh Allah, ite masih doang ngantih piran Allah bẽbasang diriqte selapuqne dait jariang ite bije-bije dowẽ-Ne. 24 Sẽngaq siq beharep, make ite teselametang. Laguq lamun napi saq ite harepang nike sampun ite serioq, make nike ndẽqne malik harepan. Sẽngaq sai saq masih beharep lẽq napi saq sampun ie serioq? 25 Laguq lamun ite beharep lẽq hal saq ndẽqman ite serioq, make ite gen sabar ngantih. 26 Maraq nike ẽndah Roh Allah nulung ite lamun ite ndẽq kuat. Sẽngaq ite ndẽq nenaoq berembẽ setetune ite bedo'e; Roh nike mẽsaq saq do'eang ite tipaq Allah siq keluhan-keluhan saq ndẽq bau ite ucapang. 27 Make Allah saq selidik atẽ manusie, wikan pekayunan Roh nike, sẽngaq Roh nike do'eang dengan-dengan saq tehususang bagi Allah, pade maraq pekayunan Allah. 28 Ite nenaoq mangkin bahwe Allah milu bekarye ngatur selapuq hal, sehingge ngasilang saq solah umaq dengan-dengan saq ngasihin Ie dait saq tepilẽq menurut rencane-Ne. 29 Sẽngaq selapuq dengan saq tepilẽq siq Allah lẽman penembẽq sampun tetentuang bahwe ie pade gen jari maraq Bije-Ne. Bije-Ne nike jari saq penembẽq lẽq antare semeton-semeton senamian. 30 Allah milẽq dengan-dengan saq sampun tetentuang juluan; dait dengan-dengan saq tepilẽq nike tejariang kenaq lẽq arepan-Ne sehingge hubungan ie pade kance Allah jari solah malik dait ie pade temulieang ẽndah. 31 Mangkin, napi saq gen teraosang malik mengenai selapuqne nike? Lamun Allah lẽq pihak ite, sai saq bau ngelawan ite? 32 Allah rẽdeang Bije-Ne mẽsaq, malahan Ie nyerahang Bije nike umaq ite selapuq. Segerah Allah nẽnten gen ngicanin secare cume-cume tipaq ite selapuq hal saq lainne? 33 Sai saq gen nuntut ite, dengan-dengan saq tepilẽq siq Allah? Allah mẽsaq nyatayang bahwe ite tejariang kenaq lẽq arepan-Ne sehingge hubungante kance Ie jari solah malik. 34 Napi araq dengan saq mẽlẽ ngukum ite? Malahan Deside Isa Almasih do'eang ite! Ie saq sampun ninggal dait saq sampun teidupang malik lẽman ninggal dait melinggih lẽq sedi kanan Allah. 35 Napi araq saq bau misahang kasih Junjungante Saq Mulie Deside Isa Almasih kance ite? Napi bau kesusahan, kesengsarean, penganiayean, kelapahan, kemiskinan, bahaye atao kematẽan gen jari penghalang? 36 Dalem Kitab Suci tetulis maraq niki, "Sejeloan tiang pade idup lẽq dalem bahaye maut lantaran Deside. Tiang pade teanggep maraq dombe saq gen tesembelẽh." 37 Setetune ndẽq! Malahan lẽq keadaan saq maraq nike ite lebihan lẽman dengan-dengan menang, langan Ie saq ngasihin ite! 38 Sẽngaq tiang yakin gati bahwe lẽq seantẽro dunie, kematẽan dait kehidupan, malaẽkat dait penguase dait anceman-anceman saq araq ẽraq; atao kekuatan-kekuatan saq lainne; 39 saq araq lẽq langit atao lẽq bawaq gumi atao ẽndah hal-hal napi doang saq lain, selapuqne ndẽq gen bau misahang kasih Allah lẽq ite, maraq saq sampun tenyatayang lẽq dalem Deside Isa Almasih, Junjungante Saq Mulie.

Romans 9

1 Napi saq tiang ucapang niki kenaq sẽngaq tiang ngeraos lẽq arepan Almasih. Tiang ndẽq beduste, atẽ nurani tiang saq tebimbing siq Roh Suci ngeyakinang tiang ẽndah napi saq tiang sampẽang niki kenaq. 2 Atẽn tiang sedih gati dait menderite gati 3 lantaran semeton-semeton tiang saq sebangse kance tiang, nike bangse Israel. Sẽngaq umaq ie pade tiang mẽsaq rẽde tekutuk siq Allah dait tekelin lẽman Almasih. 4 Ie pade dengan-dengan saq tepilẽq siq Allah dait tejariang bije-bije dowẽ-Ne, Ie nyatayang kemuliean-Ne tipaq ie pade dait ngaraqang perjanjian-perjanjian kance ie pade dait ngebẽng ie pade Hukum Taurat. Ie pade teprẽntahang siq Allah berembẽ entan beribadah, dait ie pade sampun nerimaq janji-janji-Ne. 5 Ie pade keturunan lẽman leluhurte. Secare jasmani Almasih asalne lẽman bangse ie pade. Ie atasan malik lẽman selapuqne. Ie Allah saq harus tepuji jangke selaẽq-laẽqne. Amin! 6 Laguq Manik Allah ndẽq mungkin gagal; ndẽqne selapuq dengan saq asalne lẽman Israel nike dengan Israel. 7 Ndẽqne selapuq keturunan Ibrahim nike bije-bije Ibrahim, sẽngaq Manik Allah tipaq Ibrahim, "Cume keturunan Ishak doang saq gen tesebut keturunande." 8 Nike artine bahwe keturunan Ibrahim saq jari bije-bije dowẽn Allah cume keturunanne saq tebijeang lantaran janji Allah. 9 Sẽngaq maraq niki janji Allah nike, "Lẽq waktu saq tetentuang, Tiang gen tulak, dait Sarah gen bedowẽ bije mame." 10 Dait niki ẽndah: Ribkah bijeang due bije mame lẽman sopoq amaq, Ishak leluhurte. 11 Sendẽqman kedue bije nike tebijeang, Allah sampun nentuang pilẽqan-Ne, adẽq rencane-Ne mengenai sai saq Ie pilẽq tetep berlaku. Sẽngaq lẽq waktu kedue bije Ribkah nike ndẽqman tao ngelaksaneang napi-napi saq solah atao saq jahat, 12 Allah sampun bemanik tipaq Ribkah, "Saq belẽqan gen jari pelayan saq kodẽqan." 13 Lẽq dalem Kitab Suci tetulis Allah bemanik maraq niki, "Yakub Tiang kasihin laguq Esau Tiang meriq." 14 Napi kesimpulante mangkin? Allah nẽnten adil? Ndẽqne mungkin! 15 Sẽngaq Allah bemanik tipaq Musa, "Tiang gen nyatayang rahmat tipaq dengan saq Tiang suke nyatayang rahmat, dait Tiang gen nyatayang belas kasihan tipaq dengan saq Tiang suke nyatayang belas kasihan." 16 Jari, keputusan Allah nike nẽnten teicanin lantaran kemẽlẽq manusie atao usahe manusie, laguq menurut rahmat Allah. 17 Sẽngaq lẽq dalem Kitab Suci tetulis, "Allah bemanik tipaq raje Mesir, 'Tiang jariang side raje siq sopoq maksut niki, adẽq langan side Tiang nyatayang kekuasean dait miaq aran Tiang kesohor lẽq seantẽro dunie.' " 18 Jari, Allah nyatayang rahmat-Ne tipaq sopoq dengan, lamun Allah kayunang hal nike. Dait Allah miaq dengan jari pagah, lamun Allah kayunang hal nike ẽndah. 19 Nah, side pade gen bebase lẽq tiang, "Lamun maraq nike kembẽq Allah masih nyalahang manusie? Tekan ndẽq araq sopoq dengan juaq saq bau halangin pekayunan Allah?" 20 Laguq side pade, side pade cume manusie biase, dait side pade ndẽq patut nimbal tipaq Allah! Napi bau barang saq tepiaq beketuan lẽq dengan saq miaq, "Kembẽq side piaq tiang maraq niki?" 21 Napi dengan saq miaq kemẽq nike ndẽq bedowẽ hak miaq tanaq malit nike semẽlẽ angenne? Lẽman sebongkah tanaq malit, dengan nike berhak miaq due macem rue: Saq sopoq tekadu jari tujuan saq mulie, dait saq sopoqne malik tekadu jari tujuan biase. 22 Maraq nike ẽndah napi saq tecipteang siq Allah. Allah nyatayang murke-Ne dait nyatayang kekuasean-Ne. Laguq Allah ẽndah sabar tipaq ie pade saq harus tehukum lantaran perbuatanne miaq Allah jari murke. 23 Malahan Allah sabar jari nyatayang kesugihan dait kesolahan-Ne saq belimpah-limpah tipaq dengan-dengan saq Ie kasihin, saq sampun Ie siepang sendẽqmanne jari nerimaq kemuliean-Ne, 24 termasuk ite saq sampun temanikang siq Allah, ndẽqne lẽman bangse Yahudi doang, laguq lẽman bangse-bangse lain ẽndah. 25 Sẽngaq lẽq dalem kitab Nabi Hosea, Allah bemanik, "Dengan-dengan saq ndẽq dowẽn Tiang, gen Tiang sebut 'Bije-bije dowẽn Tiang'. Bangse saq ndẽq Tiang kasihin, gen Tiang sebut 'Kekasih Tiang'. 26 Dait lẽq taoq lẽq mbẽ tebadaq tipaq dengan, 'Side pade ndẽqne dengan-dengan dowẽn Tiang', gen tesebut, 'Bije-bije dowẽn Allah saq idup.' " 27 Nabi Yesaya ẽndah bebase secare tegas mengenai bangse Israel, "Timaq jumlah bangse Israel nike maraq gerẽs lẽq segare, cume sekediq doang saq gen selamet; 28 sẽngaq Tuhan gen gelis ngukum selapuq isi dunie, adil dait sempurne." 29 Yesaya ẽndah bebase maraq niki, "Seandẽne Tuhan penguase alam semeste ndẽq ngadẽqang ite keturunan, pasti ite selapuq sampun maraq Sodom dait Gomora." 30 Jari, kesimpulanne: Bangse-bangse lain saq ndẽq uwah berusahe adẽqne jari kenaq lẽq arepan Allah, mangkin tejariang kenaq lẽq arepan Allah sehingge hubungan ie pade kance Allah jari solah malik langan iman ie pade. 31 Sebalikne dengan-dengan Yahudi tetep berusahe taat lẽq hukum adẽq tejariang kenaq lẽq arepan Allah. Laguq malahan ie pade ndẽq berhasil. 32 Kembẽq ie pade ndẽq berhasil? Sẽngaq ie pade ngelaksaneang hal nike ndẽqne lantaran beriman tipaq Allah, laguq siq usahene mẽsaq. Make ie pade geriq kedantuk lẽq "Batu Sandungan". 33 Mengenai batu nike tetulis lẽq Kitab Suci maraq niki, "Perhatiang niki: Lẽq Sion sampun Tiang toloq sopoq batu saq gen miaq dengan kedampes; sopoq batu saq miaq dengan geriq. Laguq dengan saq percaye lẽq Ie, ndẽq gen teperilaq."

Romans 10

1 Semeton senamian! Tiang melẽt gati adẽq bangse tiang ẽndah teselametang. Dait tiang tetu-tetu do'eang ie pade tipaq Allah. 2 Tiang bau ngebẽng kesaksian bahwe setetune ie pade semanget gati ngawule lẽq Allah. Laguq semangetne nike ndẽq tedasarang siq pengertian saq kenaq. 3 Ie pade ndẽq nenaoq berembẽ adẽqne jari kenaq lẽq arepan Allah sehingge hubungan ie pade kance Allah jari solah malik. Dait lantaran ie pade cume boyaq siq carene mẽsaq adẽqne jari kenaq lẽq arepan Allah, lantaran hal nike ie pade ndẽq patuh lẽq care saq teicanin siq Allah saq jariang manusie kenaq lẽq arepan-Ne. 4 Sẽngaq Almasih nike tujuan lẽman Hukum Taurat. Jari, sebilang dengan saq percaye tipaq Almasih tejariang kenaq lẽq arepan Allah. 5 Tetulis siq Musa bahwe dengan saq tejariang kenaq lẽq arepan Allah sehingge hubunganne kance Allah jari solah malik atas dasar Hukum Taurat, "Dengan nike gen idup siq ketaatanne lẽq Hukum Taurat nike." 6 Laguq dengan saq tejariang kenaq lẽq arepan Allah langan iman tipaq Allah, dalem Kitab Suci tetulis maraq niki, "Ndaq side bebase lẽq dalem angende, 'Sai saq gen taẽk ojok sorge?' (artine jauq Almasih turun), 7 atao, 'Sai saq gen turun ojok jurang maut?' (artine saq ngangkat Almasih taẽk lẽman ninggal)." 8 Maksutne maraq niki, "Berite lẽman Allah nike rapet gati lẽq side; lẽq biwihde dait dalem atẽnde." Nike berite lẽman Allah mengenai iman saq tiang sebarang. 9 Sẽngaq lamun side ngaku kadu biwihde bahwe, Deside Isa nike Junjungan Saq Mulie, dait percaye lẽq dalem atẽnde bahwe Allah sampun ngidupang Deside Isa Almasih lẽman ninggal, make side gen selamet. 10 Sẽngaq siq atẽne dengan percaye sehingge Allah nerimaq ie jari dengan saq tejariang kenaq lẽq arepan Allah sehingge hubunganne kance Ie jari solah malik. Dait siq biwihne dengan ngaku dait ie gen teselametang. 11 Lẽq dalem Kitab Suci tetulis, "Dengan saq percaye lẽq Ie ndẽq gen teperilaq." 12 Nike berlaku tipaq selapuq dengan, sẽngaq ndẽq araq bẽdene antare dengan Yahudi kance dengan bangse-bangse lain. Allah saq sopoq nike, Tuhan umaq selapuq dengan. Ie ngicanin berkah saq belimpah-limpah tipaq selapuq dengan saq nunas lẽq Ie. Sẽngaq dengan Yahudi atao dengan bangse-bangse lain ndẽq araq bẽdene. Tuhan saq pade umaq selapuq manusie, Ie ngicanin berkah saq belimpah-limpah tipaq selapuq dengan saq tunas lẽq Ie. 13 Dalem Kitab Suci tetulis, "Selapuq dengan saq ngempoh pesẽngan Tuhan gen teselametang." 14 Laguq berembẽ dengan bau ngempoh Ie lamun ie pade ndẽq percaye? Dait berembẽ ie pade bau percaye lẽq Ie lamun ie pade ndẽqman dengah berite mengenai Ie? Terus berembẽ ie pade bau dengah berite mengenai Ie lamun ndẽq araq dengan saq nyampẽang tipaq ie pade? 15 Dait berembẽ dengan bau nyampẽang berite mengenai Ie lamun ie pade ndẽq teutus? Lẽq dalem Kitab Suci tetulis maraq niki, "Berembẽ solahne kedatengan dengan-dengan saq jauq Kabar Solah!" 16 Laguq ndẽqne selapuq dengan Yahudi nerimaq Kabar Solah nike. Sẽngaq maraq basen Yesaya, "Tuhan, sai saq percaye lẽq berite saq tiang sampẽang niki?" 17 Keranaq nike, dengan-dengan jari beriman sẽngaq ie pade dengah berite. Dait berite nike tedengah sẽngaq araq dengan saq nyampẽang manik Almasih. 18 Laguq tiang beketuan: Napi tetu ie pade ndẽqman dengah berite nike? Pasti sampun! Sẽngaq araq tetulis lẽq Kitab Suci, "Suare ie pade sampun kedengahan ojok seantẽro dunie, napi saq ie pade sampẽang sampun dateng ojok poton dunie." 19 Tiang beketuan malik: Napi bangse Israel ndẽqman nenaoq? Penembẽqne Musa bebase, "Allah bemanik maraq niki, 'Tiang gen miaq side jari talon atẽ tipaq bangse-bangse saq ndẽqne bangse Israel. Dait tiang gen miaq side pade sili lẽq sopoq bangse saq bodo.' " 20 Yesaya sayan bani malik bebase, "Maraq niki Manik Allah, 'Dengan-dengan saq ndẽq boyaq Tiang, ie pade sampun bedait kance Tiang; dait Tiang nyatayang diriq Tiang tipaq ie pade saq ndẽq ngetuanang Tiang.' " 21 Laguq mengenai bangse Israel, Yesaya bebase, maraq niki Manik Allah, "Sejeloan Tiang ngulurang imen Tiang tipaq sopoq bangse saq pagah dait ndẽq taat."

Romans 11

1 Tiang beketuan: Napi Allah sampun nolaq Israel, umat-Ne mẽsaq? Pasti ndẽq! Tiang mẽsaq dengan Israel, keturunan Ibrahim dait lẽman suku Benyamin. 2 Allah nẽnten nolaq Israel saq sampun Ie pilẽq lẽman semule. Side pade nenaoq napi saq tetulis lẽq Kitab Suci mengenai Elia sewaktu ie tunasang tipaq Allah mengenai Israel. Elia matur, 3 "Tuhan, selapuq nabi Deside sampun ie pade matẽq, selapuq mẽje-mẽje taoq kurban Deside sampun teancurang. Mangkin karing tiang doang saq masih idup, laguq ie pade gen matẽq tiang ẽndah." 4 Napi jawaban Allah tipaq Elia? Manik Allah, "Sampun Tiang adẽqang pituq iyu dengan umaq Tiang mẽsaq. Ie pade ndẽq uwah nyembah Dẽwe Baal." 5 Maraq nike ẽndah mangkin niki: Araq sise dengan saq tepilẽq siq Allah lantaran rahmat-Ne. 6 Allah milẽq lantaran rahmat-Ne, dait ndẽq lantaran perbuatan manusie; sẽngaq lamun Allah milẽq lantaran perbuatan manusie, make rahmat Allah nike ndẽqne rahmat saq sejati. 7 Jari, berembẽ? Israel ndẽq mauq napi saq ie pade boyaq. Saq mauq cume dengan-dengan saq sampun tepilẽq siq Allah, saq lain selapuq jari pagah. 8 Sẽngaq dalem Kitab Suci tetulis maraq niki, "Allah miaq atẽ dait pikiran ie pade jari bebel; dait dateng mangkin penenteng ie pade ndẽq tao nyerioq dait kentok ie pade ndẽq tao dedengah." 9 Basen Daud ẽndah, "Alurang jamuan-jamuan saq ie pade piaq jari jeret dait perangkep, penghalang dait balesan tipaq diriqne mẽsaq. 10 Alurang penenteng ie pade jari peteng adẽq ie pade ndaq nyerioq; dait alurang ie pade jari bongkok selaẽq-laẽqne." 11 Tiang beketuan malik: Sewaktu ie pade kedampes, napi ie pade harus geriq? Pasti ndẽq! Laguq lantaran ie pade bedose, make bangse-bangse lain malahan teselametang, sehingge ie pade jari talon atẽ tipaq bangse-bangse lain nike. 12 Lantaran pelanggaran ie pade berarti kesugihan umaq dunie, dait kegagalan ie pade berarti kesugihan umaq bangse-bangse lain; pasti belẽqan malik kesempurnean ie pade. 13 Laguq mangkin tiang sampẽang tipaq side pade, dengan bangse-bangse lain! Sengonẽq tiang jari rasul umaq dengan bangse-bangse lain, tiang anggep pegawẽan tiang nike sopoq hal saq mulie. 14 Tiang harep pegawẽan tiang niki bau nimbulang talon atẽ lẽq bangse tiang mẽsaq, adẽq siq hal nike tiang bau nyelametang pire dengan lẽman ie pade. 15 Sẽngaq lamun ie pade tetolaq siq Allah, hubungan dunie kance Allah tedamẽang; lebih-lebih lamun lantaran ie pade teterimaq! Pasti nike maraq dengan ninggal saq idup malik! 16 Lamun sepeleng ruti sebagẽ hasil saq penembẽq nike suci, selapuq ruti nike ẽndah suci. Dait lamun akah lolo nike suci, make pẽmpang-pẽmpangne ẽndah suci. 17 Separo lẽman pẽmpang-pẽmpang lolo zaitun sampun tepeleng. Dait lẽq onos pelengan nike tedekung pẽmpang lolo zaitun saq tiwoq lẽq taoq saq ndẽq keruan. Dait mangkin side pade tedekung ojok derike adẽq side pade mauq keloran saq pade lẽman akah dait kesuburan lolo zaitun nike. 18 Ndaq side pade nyombongang diriq tipaq ie pade saq sampun peleng nike. Side pade harus tetep inget, ndẽqne pẽmpang saq jauq keloran ojok akah, laguq akah saq nungke pẽmpang. 19 Laguq side pade gen bebase, "Pasti, pẽmpang-pẽmpang nike tepeleng adẽq tiang pade tedekung lẽq lolone!" 20 Nike mule kenaq. Laguq ie pade tetetẽh lantaran ie pade ndẽq percaye, sebalikne side pade teterimaq lantaran iman side pade. Keranaq nike ndaq side pade jari sombong lantaran hal nike; sebalikne side pade harus merase takut. 21 Sẽngaq lamun Allah ndẽq merase sayang jari netẽh pẽmpang-pẽmpang saq asli nike, ndaq paran Allah ndẽq gen merase sayang jari netẽh side pade ẽndah! 22 Keranaq nike, ite nyaksiang berembẽ solahne dait berembẽ ẽndah tegesne Allah. Allah berlaku teges tipaq dengan-dengan saq gawẽq dose, laguq Ie ngasihin side pade -- asal side pade tetep idup lẽq dalem kasih-Ne. Lamun ndẽq maraq nike, make side pade ẽndah gen tepeleng. 23 Dait mengenai pẽmpang-pẽmpang saq tepeleng nike, lamun ie pade sadar dait percaye, make ie pade gen teterimaq malik; sẽngaq Allah bedowẽ kuase jari dekung ie malik. 24 Sẽngaq lamun side pade sebagẽ pẽmpang lolo zaitun saq ndẽq keruan taoqne tiwoq sampun tepeleng, dait betentangan kance keadaan side nike, side sampun tedekung lẽq lolo zaitun saq asli. Pasti solahan malik pẽmpang-pẽmpang saq asli, ie pade gen tedekung lẽq lolone saq mule. 25 Semeton-semeton senamian! Tiang harep side pade ndẽq anggep diriqde ceket. Tiang melẽt side pade nenaoq sopoq rahasie: Separo lẽman dengan Yahudi keras atẽ laguq hal nike gen tahen cume jangke penoq jumlah dengan bangse-bangse lain saq dateng. 26 Siq care saq pade dengan Yahudi gen teselametang. Sẽngaq araq tetulis lẽq dalem Kitab Suci, "Pembẽbas gen rauh lẽman Sion; Ie gen netẽh selapuq kejahatan lẽman keturunan Yakub. 27 Tiang piaq perjanjian nike kance ie pade lẽq waktu Tiang ngapus dose-dose ie pade." 28 Mengenai Kabar Solah, dengan Yahudi ndẽq nerimaq hal nike, make ie pade jari musuh Allah lantaran side pade; mengenai pilẽqan Allah, Allah tetep ngasihin ie pade demi leluhur ie pade. 29 Sẽngaq Allah ndẽq nyesel lẽq paice dait pilẽqan-Ne. 30 Laẽq, side pade ndẽq taat tipaq Allah. Laguq mangkin, Allah sampun nyatayang rahmat-Ne lantaran dengan Yahudi ndẽq taat. 31 Maraq nike ẽndah mangkin dengan Yahudi ndẽq taat tipaq Allah adẽq siq rahmat saq side pade terimaq lẽman Allah, ie pade nerimaq rahmat Allah. 32 Sẽngaq Allah menengang selapuq umat manusie tekuasein siq ndẽq taat, adẽq Allah bau nyatayang rahmat-Ne tipaq selapuq manusie. 33 Luar biase gati kesugihan Allah, kebijaksanean dait pewikanan-Ne! Sai saq bau selidik keputusan-keputusan Allah? Sai saq bau ngerti langan-langan Allah? 34 Dalem Kitab Suci tetulis maraq niki, "Sai saq nenaoq pikiran Tuhan? Sai saq bau nasẽhatin Tuhan? 35 Sai saq sampun ngaturin tipaq Tuhan sehingge ie bau nuntut balesan-Ne?" 36 Allah saq cipteang selapuqne. Selapuqne asalne lẽman Allah, dait selapuqne nike bagi Allah. Pade mulieang Allah selaẽq-laẽqne! Amin.

Romans 12

1 Semeton-semeton senamian! Siq kemurahan Allah lẽq ite, sanget siq tiang tunas adẽq side pade serahang diriqde jari kurban saq idup, saq suci dait nyenengang Allah. Seharusne maraq niki ibadah side pade tipaq Allah. 2 Ndaq turut kebiasean dunie niki, laguq robah diriqde mẽsaq siq pembaruan budi side pade, adẽq bau bẽdeang pekayunan Allah: Saq solah, saq nyenengang Allah, dait saq sempurne. 3 Allah sampun ngicanin tiang rahmat, keranaq nike tiang nasẽhatin side pade selapuq: Ndaq side pade merase atasan lẽman saq setetune. Sebalikne side pade harus anggep diriq sewajarne. Sebilang dengan harus serioq diriqne menurut iman saq teicanin siq Allah. 4 Awakte bedowẽ luwẽq bagian, sopoq-sopoq bagian bedowẽ tugas mẽsaq. 5 Maraq nike ẽndah ite dalem Deside Isa Almasih. Timaqne luwẽq, setetune ite maraq sopoq awak. Dait ite sopoq kance saq lainne saling berubungan jari bagian-bagian lẽq dalem sopoq awak. 6 Ite sopoq-sopoq bedowẽ paice saq belainan. Paice nike teicanin siq Allah tipaq ite menurut rahmat-Ne. Lamun sopoq dengan bedowẽ paice jari benubuat, alurang ie benubuat menurut imanne. 7 Lamun bedowẽ paice jari ngelayanin dengan lain, harus ngelayanin dengan lain. Lamun bedowẽ paice jari ngajahang, harus pacu-pacu ngajahang. 8 Lamun bedowẽ paice jari ngebẽng nasẽhat, alurang ie nasẽhatin dengan lain. Dengan saq ngebẽng, ngebẽng secare ihlas. Dengan saq mimpin, harus mimpin pacu-pacu, dengan saq nyatayang belas kasihan lẽq dengan lain harus ngelaksaneang siq sukecite. 9 Kasihde nike harus ndẽq puraq-puraq. Jaoqin selapuq hal saq jahat, dait laksaneang saq solah. 10 Side pade harus saling kasihin sopoq kance saq lain maraq dengan besemetonan dait side pade harus saling senjuluq ngebẽng hormat. 11 Pade begawẽan rajin-rajin, ndaq mayus. Besemanget ngelayanin Tuhan. 12 Pade besukecite dalem pengharepan, pade sabar lẽq segale macem kesusahan dait tetep bedo'e. 13 Pade tulung semeton-semetonde saq kekurangan dait bẽng nyodoq lẽq balẽ side pade! 14 Pade tunas berkah lẽman Allah umaq dengan-dengan saq nganiaye side pade. Ndaq side pade kutuk ie. 15 Milu begembire kance dengan-dengan saq gembire, dait nangis kance dengan saq nangis. 16 Pade idup secare rukun sopoq kance saq lainne. Ndaq kajuman, laguq jauq diriqde lẽq hal-hal saq sederhane. Ndaq anggep diriqde pinteran lẽman saq setetune. 17 Ndaq bales kejahatan siq kejahatan, laksaneang napi saq kenaq tipaq selapuq dengan. 18 Usaheang lẽq pihak side pade adẽqne idup damẽ kance selapuq dengan. 19 Semeton senamian saq tiang kasihin, ndaq gati bales dendem, alurang Allah saq ngukum. Sẽngaq araq tetulis lẽq Kitab Suci: "Pembalesan nike hak Tiang. Tiang gen nuntut pembalesan, manik Allah." 20 Sebalikne lamun musuh side pade lapah, bẽng ie ngelor; dait lamun ie bedak bẽng ie nginem, sẽngaq siq piaq hal nike side pade miaq ie ilaq. 21 Ndaq tekalahang siq kejahatan. Laguq side pade harus kalahang kejahatan nike siq hal saq solah.

Romans 13

1 Sebilang dengan harus tunduk lẽq pemrẽntah, sẽngaq ndẽq araq pemrẽntah saq ndẽq berasal lẽman Allah. Dait pemrẽntah saq araq tetentuang siq Allah. 2 Keranaq nike dengan saq ngelawan pemrẽntah pade maraq dengan saq ngelawan napi saq sampun tetetepang siq Allah. Dait dengan saq piaq maraq nike gen mauq hukuman. 3 Sẽngaq dengan saq perbuatanne solah ndẽqne perlu takut lẽq pemrẽntah. Cume dengan saq perbuatanne jahat doang saq takut. Lamun side pade mẽlẽ ndẽq merase takut lẽq pemrẽntah, side pade harus ngelaksaneang hal saq solah, make side pade gen tepuji siq pemrẽntah. 4 Sẽngaq pemrẽntah nike pelayan Allah saq begawẽan jari kesolahan side pade. Laguq lamun perbuatan side pade jahat, mule side pade harus takut lẽq pemrẽntah sẽngaq ndẽqne sie-sie pemrẽntah nike bekuase jari ngukum dengan. Pemrẽntah nike pelayan Allah saq balesang murke Allah tipaq dengan-dengan saq gawẽq kejahatan. 5 Keranaq nike side pade harus tunduk lẽq pemrẽntah -- ndẽqne cume lantaran murke Allah, laguq ẽndah lantaran atẽ nurani. 6 Nike ẽndah alasanne kembẽq side pade bayah pajek, sẽngaq pemrẽntah nike pegawẽ-pegawẽ saq tepercaye siq Allah jari ngelaksaneang tugas saq husus. 7 Bẽng tipaq selapuq dengan saq patut side bẽng: Bayah pajek side pade lamun side pade tewajibang bayah, dait bayah dudukan lamun side pade tewajibang bayah dudukan. Takut lẽq dengan saq patut tetakutang dait hormatin dengan saq patut tehormatin. 8 Ndaq berutang napi juaq lẽq sai-sai, laguq side pade harus saling kasihin sopoq kance lainne. Sẽngaq dengan saq ngasihin sepadene manusie, ie sampun sepenoqne ngelaksaneang Hukum Taurat. 9 Prẽntah-prẽntah nike: Ndaq bezinah, ndaq nyematẽq, ndaq memaling, ndaq melẽt napi saq teẽpẽang siq dengan lain; dait selapuq prẽntah-prẽntah lainne sampun tesimpulang jari sopoq hukum, "Kasihin sepadende manusie maraq side pade ngasihin diriqde." 10 Dengan saq ngasihin sepade manusie ndẽqne gen gawẽq kejahatan lẽq sepadene. Jari dengan saq ngasihin sepade manusie, ie sampun sepenoqne ngelaksaneang Hukum Taurat. 11 Laksaneang selapuq hal nike, dait ngerti keadaan mangkin, bahwe sampun wayene side pade ures lẽman tindoq. Sẽngaq keselametante sampun rapet tebanding waktu ite baruq percaye. 12 Kelem gen liwat dait seberaq malik gen jari menah. Keranaq nike silaq ite engkah gawẽq perbuatan-perbuatan saq jahat. Ite harus kadu perlengkapan senjate terang. 13 Ite harus gawẽq hal-hal saq solah maraq saq biase tegawẽq siq dengan kenaq; ndaq beseneng-seneng jangke liwat bates atao, bowos-bowosan. Ndaq gawẽq perbuatan saq cabul dait ndaq turut kemẽlẽq hawe napsu. Dait ndaq besiaq atao talon atẽ. 14 Laguq kadu Junjungan Saq Mulie Deside Isa Almasih sebagẽ perlengkapan senjate terang. Dait ndaq turut kemẽlẽq awak saq bedose jari muasang hawe napsu.

Romans 14

1 Terimaq dengan saq lemah imanne, ndaq hakimin pendapetne. 2 Araq dengan saq bedowẽ iman bahwe ie bau ngelorang napi juaq, laguq araq dengan lain saq ndẽq kuat imanne; cume bau ngelor sayur-sayuran doang. 3 Dengan saq ngelorang napi juaq, ndaq menghine dengan saq cume ngelorang keloran tertentu doang. Dait dengan saq ngelor keloran tertentu doang, ndẽq ẽndah ngukum dengan saq ngelorang selapuqne, sẽngaq Allah sampun nerimaq ie. 4 Sai side pade setetune sehingge side pade bani ngadilin pelayan dengan lain? Timaq pelayan nike rebaq atao nganjeng, nike urusan majikanne. Dait mule pelayan nike pasti gen nganjeng malik sẽngaq Allah sanggup piaq ie nganjeng. 5 Araq dengan saq merase bahwe araq jelo-jelo tertentu saq pentingan lẽman jelo-jelo saq lain, laguq araq ẽndah saq bedowẽ pendapet bahwe selapuq jelo pade doang. Alurang sopoq-sopoq dengan beranggepan menurut pikiranne mẽsaq. 6 Dengan saq mentingang jelo-jelo tertentu ie ngelaksaneang bagi Allah. Dengan saq ndẽq mentingang jelo-jelo tertentu ie ngelaksaneang ẽndah bagi Allah. Dengan saq ngelorang selapuq macem keloran, ie ngelaksaneang bagi Allah dait ie besyukur tipaq Allah. Maraq nike ẽndah dengan saq cume ngelor keloran tertentu doang, ie pade ngelaksaneang bagi Allah dait besyukur tipaq Ie. 7 Ndẽq araq sopoq dengan juaq lẽq antare ite saq idup umaq diriqne mẽsaq; dait ndẽq araq sopoq dengan juaq saq matẽ umaq diriqne mẽsaq. 8 Lamun ite idup, ite idup bagi Tuhan. Dait lamun ite matẽ, ite ẽndah matẽ bagi Tuhan. Jari, idup atao matẽ, ite dowẽn Tuhan. 9 Almasih sampun ninggal dait idup malik adẽq Ie jari Junjungan Saq Mulie umaq dengan-dengan saq idup dait dengan-dengan saq sampun ninggal ẽndah. 10 Jari, semeton-semeton, kembẽq side ngadilin semeton side pade saq seiman? Dait kembẽq side pade hine ie? Ite selapuq gen bareng-bareng ngadep tahte penghakiman Allah. 11 Sẽngaq araq tetulis lẽq Kitab Suci, maraq niki manik Tuhan, "Demi idup Tiang, sebilang dengan gen sujut lẽq arepan Tiang, dait sebilang dengan gen ngaku bahwe Tiang Allah." 12 Jari, ite sopoq-sopoq harus betanggung jawab lẽq selapuq perbuatante tipaq Allah. 13 Keranaq nike ite ndaq saling hakimin. Sebalikne turut hukum niki: Ndaq jangke miaq semeton side pade jari tegode dait bedose. 14 Tiang taoq lẽq dalem Junjungan Saq Mulie Deside Isa, dait yakin bahwe ndẽq araq sopoq hal saq najis lẽman diriqne mẽsaq; laguq lamun sopoq dengan anggep hal-hal nike najis, bagi dengan nike hal-hal nike najis. 15 Lamun napi saq side pade kelor nike jari nyakitin angen semeton side pade, artine perbuatan side pade ndẽqne atas dasar kasih. Sẽngaq Almasih sampun ninggal umaq ie, ndaq alurang semeton side pade nike teancurang siq napi saq side pade kelorang. 16 Keranaq nike ndaq alurang diriq side pade tepitnah mengenai napi saq solah lẽq side pade. 17 Sẽngaq Kerajaan Allah ndẽqne soal napi saq bau tekelorang dait teinem, laguq mengenai keadaan tejariang kenaq lẽq arepan Allah, damẽ sejahtere dait sukecite lẽq dalem Roh Suci. 18 Dengan saq ngelayanin Almasih maraq nike, nyenengang Allah dait tehargein siq dengan lain. 19 Keranaq nike silaq ite gawẽq napi saq datengang damẽ sejahtere dait saling neguqang iman. 20 Ndaq lantaran soal keloran side pade nyẽdaq napi saq sampun tepiaq siq Allah. Selapuq hal nike suci; laguq lamun lantaran keloran side pade miaq dengan lain bedose, make side pade salaq. 21 Solahan side pade ndẽq ngelorang daging atao nginem anggur, atao ngelaksaneang napi juaq lamun hal nike miaq semeton side pade jari bedose. 22 Napi saq side pade percaye, pade tegel kepercayean nike jari diriqde mẽsaq lẽq arepan Allah. Bahagie dengan saq ndẽq hukum diriqne mẽsaq mengenai napi saq ie anggep solah. 23 Laguq dengan saq merase ragu-ragu lẽq napi saq ie kelorang, ie sampun tehukum sẽngaq ie ndẽq ngelaksaneang hal nike atas dasar iman. Dait napi saq telaksaneang ndẽq atas dasar iman, nike dose.

Romans 15

1 Ite saq kuat imanne harus sabar lẽq kelemahan dengan saq lemah keyakinanne. Ndaq ite cume nyenengang diriqte mẽsaq. 2 Sebalikne sebilang dengan lẽq antare ite harus nyenengang angen sepadente demi kesolahanne jari neguqang imanne. 3 Sẽngaq Almasih mẽsaq nẽnten mikirang diriq-Ne mẽsaq. Lẽq Kitab Suci tetulis maraq niki, "Selapuq penghinean saq ie pade tujuang tipaq Deside, sampun nimpe tiang." 4 Selapuq saq tetulis lẽq Kitab Suci mule tetulis jari ngajah ite, adẽq siq ketekunan dait penghiburan saq araq lẽq tulisan-tulisan nike ite mauq pengharepan. 5 Semoge Allah sumber ketekunan dait penghiburan nulung side pade jari idup dalem kerukunan sesuai kance pekayunan Deside Isa Almasih. 6 Sehingge siq sopoq angen dait sopoq suare, side pade selapuq ngemulieang Allah, Bapa Junjungante Saq Mulie Deside Isa Almasih. 7 Keranaq nike side pade wajib saling nerimaq pade ẽndah maraq Almasih nerimaq side pade jari ngemulieang Allah. 8 Sẽngaq, pade inget bahwe Almasih sampun ngelayanin dengan Yahudi demi kebenaran Allah dait jari ngukuhang janji-janji-Ne tipaq leluhurte. 9 Adẽq dengan bangse-bangse lain ẽndah ngemulieang Allah lantaran rahmat-Ne tipaq ie pade. Lẽq dalem Kitab Suci tetulis maraq niki, "Keranaq nike tiang gen mulieang Deside lẽq antare bangse-bangse, tiang gen nyanyiang zabur umaq pesẽngan Deside." 10 Araq ẽndah tetulis maraq niki, "Pade begembire bareng umat-Ne, hai bangse-bangse!" 11 Dait niki ẽndah, "Pade puji Tuhan, selapuq bangse-bangse! Selapuq dengan pade puji Ie!" 12 Dait niki ẽndah saq teucapang siq Yesaya, "Gen muncul sopoq dengan lẽman keturunan Isai, saq gen mrẽntah selapuq bangse-bangse; tipaq Ie bangse-bangse gen beharep." 13 Semoge Allah, sumber pengharepan nike, penoqin angen side pade siq sukecite dait damẽ sejahtere sẽngaq side pade percaye lẽq Ie dait siq kuase Roh Suci side pade gen sayan kuat, belimpah-limpah siq pengharepan. 14 Semeton-semeton senamian! Tiang yakin bahwe araq luwẽq gati hal saq solah lẽq side. Side pade sampun nenaoq selapuq-selapuqne dait bau saling ajah sopoq kance lainne. 15 Laguq lẽq hal tertentu, lẽq dalem surat niki tiang peringet side pade secare teges, lantaran rahmat saq sampun teicanin lẽq tiang. 16 Allah sampun ngutus tiang jari pelayan Deside Isa Almasih tipaq dengan bangse-bangse lain, tiang nyampẽang Kabar Solah lẽman Allah tipaq ie pade adẽq ie pade bau teterimaq siq Allah jari persembahan saq husus dait tesuciang siq Roh Suci. 17 Jari, lẽq dalem Deside Isa Almasih tiang merase bangge gati siq pelayanan tiang tipaq Allah niki. 18 Tiang ndẽq bani ngeraosang saq lain kecuali napi saq sampun tepiaq siq Almasih langan diriq tiang, tugas tiang bimbing dengan bangse-bangse lain adẽqne taat lẽq Allah langan ucapan-ucapan dait perbuatan-perbuatan tiang. 19 Langan keajaipan-keajaipan saq luar biase ẽndah selapuqne nike telaksane siq kuase Roh Suci. Kabar Solah mengenai Almasih sampun tiang sampẽang tipaq dengan-dengan mulai lẽman Yerusalem dateng Ilirikum. 20 Tiang anggep sebagẽ kehormatan nyampẽang Kabar Solah lẽman Allah lẽq taoq-taoq lẽq mbẽ dengan-denganne ndẽqman dengah mengenai Almasih. Sẽngaq tiang ndẽq mẽlẽ begawẽan lẽq dasar saq sampun tetoloq siq dengan lain. 21 Araq tetulis lẽq Kitab Suci, "Dengan-dengan saq ndẽq uwah nerimaq berite mengenai Ie, gen serioq; dait ie pade saq ndẽq uwah dengah, gen ngerti." 22 Keranaq nike tiang rimpes gati araq halangan jari jangoq side pade. 23 Laguq mangkin pegawẽan tiang lẽq daẽrah-daẽrah nike sampun tutuq. Sampun pire taun ngonẽqne tiang melẽt gati dateng jangoq side pade. 24 Laun lamun tiang liwat lẽq kote side pade dalem kelampan tiang ojok Spanyol, tiang beharep lẽq derike tiang bedait kance side pade dait beseneng-seneng seberaq kance side pade. Sesampun nike tiang beharep side pade bau nulung tiang jari ngelanjutang kelampan tiang ojok Spanyol. 25 Laguq mangkin tiang kenyeke dalem kelampan ojok Yerusalem jari ngatong sumbangan umaq dengan-dengan saq tehususang bagi Allah saq araq lẽq Yerusalem. 26 Sẽngaq jemaah-jemaah lẽq Makedonia dait Akaya sampun setuju jari ngebẽng sumbangan tipaq dengan-dengan miskin lẽq antare dengan-dengan saq tehususang bagi Allah, lẽq Yerusalem. 27 Seneng gati angen ie pade ngebẽng sumbangan nike. Mule sepatutne ie pade nulung semeton-semeton saq miskin lẽq Yerusalem nike; sẽngaq lẽman dengan-dengan Yahudi nike dengan bangse-bangse lain sampun nerimaq berkah lẽman Allah. Jari, dengan bangse-bangse lain nike patut ẽndah nulung dengan-dengan Yahudi siq berkah-berkah saq berue barang. 28 Lamun tiang sampun nyelesẽang tugas niki, dait nyerahang selapuq sumbangan, tiang gen lalo ojok Spanyol dait nyelaloq lẽq kotende. 29 Lamun tiang dateng tipaq side pade, tiang yakin bahwe tiang gen dateng siq penoq berkah Almasih umaq side pade. 30 Demi Junjungante Saq Mulie Deside Isa Almasih dait demi kasih Roh Suci, sanget siq tiang tunas lẽq side pade, semoge side pade bedo'e bareng kance tiang lẽq arepan Allah mengenai perjuangan tiang. 31 Do'eang adẽq Allah nyelametang tiang lẽman dengan-dengan saq ndẽq percaye saq araq lẽq Yudea, adẽq tugas tiang ngatong sumbangan ojok Yerusalem niki teterimaq secare bagus siq dengan-dengan saq tehususang bagi Allah saq araq lẽq derike. 32 Siq pekayunan Allah, tiang gen dateng tipaq side pade siq sukecite dait gen merase tehibur lẽq tengaq-tengaq side pade. 33 Semoge Allah, sumber damẽ sejahtere gen bareng kance side pade selapuq! Amin.

Romans 16

1 Tiang tunas side pade perhatiang semetonte saq nine, Pebe, ie pelayan jemaah lẽq Kengkrea. 2 Pade terimaq ie lẽq dalem Junjungan Saq Mulie, maraq saq patut jari dengan-dengan saq tehususang bagi Allah. Pade tulung ie lamun ie merluang bantuan side pade sẽngaq ie mẽsaq sampun nulung luwẽq dengan dait tiang ẽndah tetulung siq ie. 3 Sampẽang salam tiang tipaq Priskila dait Akwila, batur-batur tiang saq bareng-bareng bagawẽan kance tiang lẽq dalem Deside Isa Almasih. 4 Ie pade aroh matẽ lantaran mẽlẽ nyelametang tiang. Tiang ngucapang tampi asih lẽq ie pade -- dait ndẽqne tiang doang, laguq selapuq jemaah lẽman bangse-bangse lain ẽndah. 5 Sampẽang ẽndah salam tiang tipaq jemaah saq bekumpul lẽq balẽ ie pade. Salam tipaq Epenetus, batur saq tiang kasihin, ie dengan saq penembẽq percaye tipaq Almasih lẽq daẽrah Asia. 6 Salam tiang ẽndah tipaq Mariam saq matẽ-matẽan begawẽan umaq side pade. 7 Sampẽang salam tiang ẽndah tipaq Andronikus dait Yunias, ie pade sebangse kance tiang dait sampun tebui bareng-bareng kance tiang. Sendẽqman tiang percaye lẽq Almasih, ie pade sampun juluan percaye. Deduaqne tehormatin lẽq antare pare rasul. 8 Salam tipaq Ampliatus saq tiang kasihin lẽq dalem Junjungan Saq Mulie. 9 Sampẽang salam tiang tipaq Urbanus, batur saq bareng begawẽan dalem Almasih dait tipaq Stakis batur saq tiang kasihin ẽndah. 10 Salam tipaq Apeles saq sampun tahen uji dalem Almasih. Salam ẽndah tipaq Aristobulus dait dengan-dengan saq ndot lẽq balẽne. 11 Salam tipaq Herodion. Ie sebangse kance tiang. Salam ẽndah tipaq semeton-semeton saq percaye lẽq Junjungan Saq Mulie, saq ndot lẽq balẽ Narkisus. 12 Sampẽang salam tiang tipaq Tripena dait Triposa saq matẽ-matẽan begawẽan umaq Junjungan Saq Mulie. Salam tipaq Persis saq tiang kasihin, saq matẽ-matẽan begawẽan umaq Junjungan Saq Mulie. 13 Salam tipaq Rupus bareng inaqne saq sampun tiang anggep maraq inaq tiang mẽsaq. Rupus nike dengan saq tepilẽq siq Junjungan Saq Mulie. 14 Sampẽang salam tiang tipaq Asinkritus, Plegon, Hermes, Patrobas, Hermas dait selapuq semeton saq bareng kance ie pade. 15 Sampẽang salam tiang tipaq Pilologus dait Yulia; dait Nereus bareng semetonne saq nine; tipaq Olimpas dait tipaq selapuq dengan saq tehususang bagi Allah saq bareng kance ie pade. 16 Silaq side pade besalam-salaman sebagẽ semeton seiman. Selapuq jemaah Almasih nyampẽang salam tipaq side pade. 17 Semeton-semeton senamian! Sanget siq tiang tunas lẽq side pade adẽq side pade waspade tipaq dengan-dengan saq nimbulang perpecahan dait nyesatang dengan lẽman perajahan saq sampun ie pade terimaq. Jaoqang diriqde lẽman dengan-dengan saq maraq nike. 18 Sẽngaq dengan-dengan saq gawẽq maraq nike ndẽq begawẽan umaq Almasih, Junjungante Saq Mulie, sebalikne ie pade cume muasang kemẽlẽqne mẽsaq. Siq rayuan dait ucapan saq manis-manis, ie pade nipu dengan-dengan saq tulus angenne. 19 Ketaatan side pade sampun tetaoq siq selapuq dengan. Dait tiang seneng gati dengah hal nike. Laguq tiang melẽt adẽq side pade bijaksane lẽq hal-hal saq solah, dait bersi lẽman hal-hal saq jahat. 20 Allah sumber damẽ sejahtere gen ngancurang Belis lẽq bawaq naẽn side pade. Rahmat Junjungante Saq Mulie Deside Isa Almasih araq bareng kance side pade. 21 Timotius, batur saq bareng begawẽan kance tiang nyampẽang salamne tipaq side pade, maraq nike ẽndah Lukius, Yason dait Sosipater saq sebangse kance tiang. 22 Tiang, Tertius saq nulis surat niki, ngucapang salam lẽq dalem Junjungan Saq Mulie tipaq side pade selapuq. 23 Gayus ẽndah ngirim salam tipaq side pade. Tiang ndot lẽq balẽne dait selapuq jemaah ẽndah nyodoq lẽq balẽne. Erastus saq jari bendahare kote ẽndah nyampẽang salam tipaq side pade, maraq nike ẽndah semetonte Kuartus. 24 Rahmat Junjungante Saq Mulie Deside Isa Almasih bareng kance side pade. Amin. 25 Puji syukur tipaq hadirat Allah! Ie bekuase neguqang side pade, sesuai kance Kabar Solah saq tiang sampẽang mengenai Deside Isa Almasih, sesuai kance pernyataan rahasie saq sampun berabad-abad ngonẽqne ndẽq tetaoq siq dengan. 26 Laguq mangkin siq prẽntah Allah saq kekel, rahasie nike sampun tenyatayang dait tesampẽang tipaq selapuq bangse langan kitab nabi-nabi, adẽq ie pade selapuq percaye dait taat lẽq Ie. 27 Ie sopoq-sopoqne Allah Saq Mahebijaksane. Temulieang langan Deside Isa Almasih selaẽq-laẽqne! Amin.

1 Corinthians 1

1 Semeton senamian jemaah Allah lẽq Korintus! Side sampun temanikang siq Allah jari dengan-dengan saq tehususang bagi Allah sẽngaq side dowẽn Deside Isa Almasih, bareng kance selapuq dengan lẽq embẽ juaq saq nyembah Junjungante Saq Mulie Deside Isa Almasih, saq jari Tuhan ie pade dait Tuhante ẽndah. Tiang, Paulus, dait semetonte Sostenes, beharep semoge Allah Bapante dait Junjungan Saq Mulie Deside Isa Almasih ngicanin side rahmat dait damẽ sejahtere. Tiang nulis surat niki sebagẽ rasul Deside Isa Almasih, saq teangkat siq Allah dait siq pekayunan-Ne ẽndah. 4 Tiang tetep besyukur tipaq Allah mengenai side pade, sẽngaq side pade sampun nerimaq rahmat lẽman Allah langan Deside Isa Almasih. 5 Lantaran side pade sampun araq lẽq dalem Almasih, make idupde sugih lẽq dalem selapuq hal. Penenaoqde mengenai selapuq hal sampun dalem gati, dait side pade ceket ngajahang penenaoq nike. 6 Hal nike nyatayang bahwe berite mengenai Almasih sampun tetu-tetu tepahamin jangke dalem atẽnde, 7 sehingge side pade ndẽq kekurangan sopoq paice juaq, dait side pade kenyeke ngantos kerauhan Junjungante Saq Mulie Deside Isa Almasih. 8 Almasih mẽsaq gen jamin side pade jangke dateng penutuqne; adẽq lẽq waktu jelo Tuhan, side pade tedait ndẽq araq cacat cele. 9 Allah nike setie. Ie sampun ngemanikang dait pesopoq side kance Bije-Ne, nike Deside Isa Almasih, Junjungante Saq Mulie. 10 Semeton senamian! Siq pesẽngan Junjungante Saq Mulie Deside Isa Almasih, tiang tunas adẽq side pade selapuq idup rukun; adẽq ndaq araq perpecahan lẽq antare side. Adẽq side pade besopoq, sopoq angen dait sopoq pikiran. 11 Sẽngaq, dengan-dengan lẽman keluarge Kloe ngelaporang tipaq tiang bahwe araq pegejuhan lẽq antare side. 12 Saq tiang maksut nike, bahwe lẽq antare side araq saq bebase, "Tiang lẽman golongan Paulus", araq ẽndah saq bebase, "Tiang lẽman golongan Apolos". Saq lain bebase, "Tiang lẽman golongan Kepas". Saq lainne malik bebase, "Tiang lẽman golongan Almasih." 13 Segerah Almasih tebagi-bagi? Napi Paulus tepakuq lẽq kayuq salib umaq side pade? Tekan side pade ndẽq tebaptis adẽqne jari pengiring-pengiring Paulus? 14 Syukur ndẽq araq sopoq dengan juaq saq tiang baptis lẽq antare side, selain Krispus dait Gayus. 15 Ndaq jangke araq sopoq dengan saq bebase bahwe tiang sampun baptis ie adẽqne jari pengiring tiang. ( 16 Mule tetu, Stepanus dait keluargene, mule tiang saq baptis ie pade. Laguq lainan siq ie pade, seinget tiang, ndẽq araq malik dengan lain saq tiang baptis.) 17 Almasih ngutus tiang ndẽqne jari baptis dengan, laguq jari nyampẽang Kabar Solah lẽman Allah; dait nike ẽndah harus tiang laksaneang ndẽq kadu kepinteran ngeraos secare manusie, adẽq kuase ninggal-Ne Almasih lẽq kayuq salib ndẽq sie-sie. 18 Sẽngaq bagi dengan-dengan saq mule gen binase, berite mengenai ninggal-Ne Almasih lẽq kayuq salib nike teanggep jari sopoq hal saq bodo. Laguq, bagi ite saq teselametang siq Allah, berite nike kekuatan Allah. 19 Sẽngaq lẽq dalem Kitab Suci, Allah bemanik, "Kebijaksanean dengan arip gen Tiang binaseang, dait pengertian dengan-dengan berilmu gen Tiang musnahang." 20 Lamun maraq nike, lẽq mbẽ dengan-dengan saq arip nike? Lẽq mbẽ ahli-ahli Taurat nike? Lẽq mbẽ dengan-dengan saq girang nentang nike? Tekan Allah sampun miaq kebijaksanean dunie niki jari sopoq hal saq bodo? 21 Sẽngaq timaq berembẽ ceketne manusie, ie ndẽq bau kenal kance Allah kadu kepinteranne mẽsaq. Laguq malahan lantaran Allah bijaksane, make Ie kayun nyelametang dengan-dengan saq percaye lẽq Ie langan berite saq tiang pade sampẽang, saq teanggep hal saq bodo siq dunie. 22 Dengan Yahudi nuntut keajaipan jari bukti, dait dengan Yunani ngutameang kebijaksanean dunie niki. 23 Laguq tiang pade cume nyampẽang Almasih saq ninggal tepakuq lẽq kayuq salib. Berite nike nyinggung perasaan dengan Yahudi, dait teanggep hal saq bodo siq dengan bangse-bangse lain. 24 Laguq bagi dengan-dengan saq sampun temanikang siq Allah -- dengan Yahudi dait dengan bangse-bangse lain -- Almasih nike kekuatan dait kebijaksanean Allah. 25 Sẽngaq napi saq ruene bodo laguq lẽman Allah, nike lebih bijaksane tebanding kebijaksanean manusie; dait saq ruene lemah laguq lẽman Allah, nike kuatan tebanding kekuatan manusie. 26 Semeton senamian! Cobaq inget berembẽ keadaande lẽq waktu Allah ngemanikang side pade. Cume sekediq doang lẽq antare side saq bijaksane, atao bekuase atao saq atas kedudukanne menurut pandangan manusie. 27 Sẽngaq mule Allah sediah milẽq saq teanggep bodo siq dunie niki, adẽq dengan-dengan pinter jari ilaq. Dait Allah milẽq ẽndah saq teanggep lemah siq dunie niki, adẽq dengan-dengan saq gagah perkase jari ilaq. 28 Allah milẽq saq teanggep rendah, hine, dait malahan saq teanggep ndẽq araq artine siq dunie niki, adẽq Allah ngancurang saq teanggep penting siq dunie. 29 Siq care nike ndẽq araq sopoq dengan juaq saq bau nyombongang diriqne lẽq arepan Allah. 30 Allah mẽsaq saq miaq side araq lẽq dalem Deside Isa Almasih. Langan Almasih ite tejariang bijaksane. Dait langan Ie ẽndah Allah miaq ite tejariang kenaq lẽq arepan-Ne sehingge hubungante kance Allah jari solah malik, jariang ite dengan-dengan saq tehususang bagi Allah dait bẽbasang ite. 31 Jari, maraq saq tetulis dalem Kitab Suci, "Dengan saq mẽlẽ bangge, harus bangge lẽq dalem Tuhan."

1 Corinthians 2

1 Semeton senamian! Lẽq waktu tiang dateng ojok side, dait beriteang lẽq side mengenai rencane Allah saq ndẽqman tetaoq siq dunie, tiang ndẽq kadu kebijaksanean dunie niki atao ngeraos siq raos saq muluk-muluk. 2 Sẽngaq tiang sampun mutusang bahwe sengonẽq tiang araq bareng kance side pade, tiang ndẽq melẽt nenaoq napi-napi, selain mengenai Deside Isa Almasih; terutame bahwe Ie sampun ninggal tepakuq lẽq kayuq salib. 3 Malahan sewaktu tiang araq bareng kance side pade, tiang dalem keadaan lemah dait ngijik siq takut tiang. 4 Berite saq tiang sampẽang tipaq side ndẽq tiang sampẽang kadu ucapan-ucapan saq manis-manis menurut kebijaksanean manusie. Tiang nyampẽang nike kadu kuase Roh Allah. 5 Tiang piaq maraq nike, adẽq iman side tipaq Almasih ndẽqne siq dasar kebijaksanean manusie, laguq siq dasar kuase Allah. 6 Timaqne maraq nike, lẽq antare dengan-dengan saq kehidupan rohanine sampun kuat, tiang mule ngeraos mengenai kebijaksanean. Laguq kebijaksanean niki ndẽqne kebijaksanean dunie, atao kebijaksanean penguase-penguase jaman niki, saq kekuaseanne gen musnah. 7 Kebijaksanean saq tiang sampẽang nike kebijaksanean lẽman Allah. Kebijaksanean nike ndẽqne tetaoq siq dunie, laguq Allah sampun nyedieang ite kemuliean sendẽqman dunie niki tecipteang. 8 Ndẽq araq sopoq dengan juaq lẽman penguase-penguase jaman niki saq nenaoq mengenai kebijaksanean nike. Sẽngaq, seandẽne ie pade sampun nenaoq, pasti ie pade ndẽq gen pakuq lẽq kayuq salib Junjungan Saq Mulie nike. 9 Sebalikne hal nike maraq saq tetulis dalem Kitab Suci, "Napi saq ndẽq uwah teserioq atao tedengah siq manusie, dait ndẽq uwah ẽndah timbul dalem pikiran manusie, nike saq tesedieang siq Allah umaq dengan-dengan saq ngasihin Ie." 10 Laguq Allah sampun nyatayang lẽq ite siq perantarean Roh-Ne. Roh nike selidik selapuq hal, jangke ojok rencane-rencane Allah timaq saq paling rahasie ẽndah. 11 Sẽngaq sai saq nenaoq isi atẽ sopoq dengan, selain roh dengan nike mẽsaq? Maraq nike ẽndah mengenai Allah. Saq wikan pekayunan Allah cume Roh Allah mẽsaq! 12 Dait ite, ndẽq nerimaq roh dunie niki, laguq Roh saq lẽman Allah, adẽq ite nenaoq selapuq saq sampun teicanin siq Allah tipaq ite. 13 Dait lantaran tiang pade nyampẽang hal-hal rohani tipaq ie pade saq bedowẽ Roh Allah, tiang pade ngeraos mengenai paice-paice Allah siq ucapan saq ndẽq teajahang tipaq tiang pade siq hikmat manusie, laguq siq Roh Allah. 14 Dengan saq ndẽq bedowẽ Roh Allah, ndẽq bau nerimaq napi saq tenyatayang siq Roh nike. Sẽngaq bagi dengan nike, hal-hal nike teanggep hal saq bodo. Dengan nike ndẽq iniq ngerti, sẽngaq hal-hal nike cume bau tenilai secare rohani. 15 Dengan saq bedowẽ Roh Allah bau nilai selapuq hal, laguq ndẽq araq sopoq dengan juaq saq berhak nilai Ie. 16 Lẽq dalem Kitab Suci tetulis, "Sai saq nenaoq pikiran Tuhan? Dait sai saq nasẽhatin Ie?" Laguq ite bedowẽ pikiran saq pade kance Almasih!

1 Corinthians 3

1 Semeton senamian, setetune tiang ndẽq tao ngeraos kance side pade maraq kance dengan saq idup menurut Roh Allah. Tiang cume tao ngeraos kance side maraq kance dengan saq ndẽq bedowẽ Roh Allah; maraq kance dengan saq masih bebẽaq dalem percayenne tipaq Almasih. 2 Tiang cume bau ngebẽng side keloran bebẽaq, ndẽqne keloran dengan dẽwase; lantaran side pade ndẽqman kuat nerimaq. Laguq mangkin ẽndah side pade masih ndẽqman kuat nerimaq hal nike, 3 sẽngaq side pade dengan saq ndẽq bedowẽ Roh Allah. Sẽngaq lamun side pade masih talon atẽ dait besiaq sopoq kance saq lainne, napi nike ndẽq buktiang bahwe side pade dengan saq ndẽq bedowẽ Roh Allah dait idup secare duniawi? 4 Lamun araq saq bebase, "Tiang lẽman golongan Paulus", dait saq lain bebase, "Tiang lẽman golongan Apolos", napi nike ndẽq buktiang bahwe side dengan saq ndẽq bedowẽ Roh Allah? 5 Setetune sai Apolos nike? Dait sai Paulus? Tiang pade cume pelayan-pelayan Allah, saq sampun bimbing side pade jari percaye tipaq Almasih. Tiang pade cume ngelaksaneang pegawẽan saq tetugasang siq Tuhan tipaq tiang pade sopoq-sopoq. 6 Tiang nenalet dait Apolos saq nyiram, laguq Allah mẽsaq saq niwoqang. 7 Jari saq paling penting nike Allah, sẽngaq Ie saq niwoqang. Saq nalet dait saq nyiram ndẽqne penting; 8 deduaqne nike pade kedudukanne. Sopoq-sopoq gen nerimaq upaq menurut lelahne begawẽan. 9 Tiang pade dengan-dengan saq bareng-bareng begawẽan bagi Allah; dait side pade, lendang Allah, gedung Allah ẽndah. 10 Menurut rahmat Allah, tiang sebagẽ ahli bangunan sampun noloq dasar gedung nike, dait dengan lain penganjeng gedung lẽq atas dasar nike. Sebilang dengan harus merhatiang bagus-bagus berembẽ ie miaq gedung lẽq atas dasar nike. 11 Sẽngaq Allah mẽsaq sampun nyedieang Deside Isa Almasih sebagẽ sopoq-sopoqne dasar jari gedung nike; ndẽq araq dasar saq lain. 12 Araq saq miaq gedung lẽq atas dasar nike kadu emas, araq saq kadu perak, araq saq kadu batu permate, araq ẽndah saq kadu kayuq, pupaq gero atao jami. 13 Pegawẽan sebilang dengan ẽraq gen penggitan lẽq waktu Almasih rauh malik. Sẽngaq lẽq jelo Tuhan nike api gen miaq pegawẽan sopoq-sopoq dengan gen penggitan. Api gen nguji dait nentuang mutu pegawẽan nike. 14 Lamun gedung saq tepiaq siq dengan lẽq atas dasar nike bau tahen api, dengan nike gen nerimaq upaqne. 15 Laguq lamun pegawẽanne julat, ie gen rugi; ie mẽsaq gen selamet, laguq maraq dengan saq selamet sugul lẽman api. 16 Napi side pade ndẽq nenaoq bahwe side pade gedẽng Allah dait Roh Allah araq lẽq dalem side pade? 17 Lamun araq dengan saq nyẽdaq gedẽng Allah, Allah ẽndah gen nyẽdaq dengan nike. Sẽngaq Gedẽng Allah nike husus bagi Allah doang, dait side pade gedẽng Allah nike. 18 Ndaq sopoq dengan juaq nipu diriqne mẽsaq. Lamun araq dengan lẽq antare side merase diriqne bijaksane menurut ukuran dunie niki, alurang dengan nike jari bodo, adẽq ie jari tetu-tetu bijaksane. 19 Sẽngaq saq teanggep bijaksane siq dunie, hal nike bodo bagi Allah. Lẽq Kitab Suci araq tetulis, "Dengan-dengan bijaksane tebau siq Allah kadu kepinteranne mẽsaq." 20 Araq tetulis maraq niki ẽndah, "Tuhan wikan bahwe pikiran dengan-dengan saq bijaksane, nike pikiran saq ndẽq araq manpaatne." 21 Keranaq nike, ndaq sopoq dengan juaq saq ngajum manusie, sẽngaq selapuq-lapuqne sampun teicanin jari dowẽnde: 22 Paulus, Apolos, Kepas, dunie niki, kehidupan dait kematẽan, jaman niki atao jaman saq gen dateng, selapuq-lapuqne dowẽnde. 23 Dait side pade jari dowẽn Almasih, dait Almasih dowẽn Allah.

1 Corinthians 4

1 Anggep bahwe tiang pade pelayan-pelayan Almasih, saq betanggung jawab beriteang rencane-rencane Allah saq ndẽqman tetaoq siq dunie. 2 Saq pertame-tame tetuntut lẽman pelayan saq maraq nike, bahwe ie setie lẽq majikanne. 3 Bagi tiang, ndẽqne jari soal napi saq side pade -- atao sai juaq -- pikirang ẽndah mengenai diriq tiang. Malahan napi saq tiang mẽsaq pikirang mengenai diriq tiang nike ndẽqne jari soal. 4 Tiang ndẽq merase salaq dalem hal napi juaq, laguq nike ndẽqne bukti bahwe tiang mule ndẽq salaq. Tuhan mẽsaq saq nentuang tiang salaq atao ndẽq. 5 Keranaq nike, ndaq side pade becat-becat nentuang bahwe sopoq dengan salaq atao ndẽq, sẽngaq ndẽqman waktune. Antih jangke Tuhan rauh ẽraq. Ie saq gen bukaq selapuq rahasie-rahasie saq teseboq lẽq dalem peteng. Ie saq gen bungkar selapuq niat saq araq lẽq dalem atẽ manusie. Lẽq waktu nike baruq sebilang dengan nerimaq pujian lẽman Allah maraq saq patut ie terimaq. 6 Semeton senamian! Jari kepentingande, tiang sampun laksaneang selapuqne nike tipaq Apolos dait lẽq diriq tiang mẽsaq. Maksutne adẽq conto lẽman tiang pade nike, side pade bau berajah napi arti ucapan niki, "Pade patuh lẽq aturan saq araq", siq care nike ndẽq araq sopoq dengan juaq lẽman side pade saq kanggo bangge-banggeang sopoq dengan, terus menghine saq lain. 7 Sai saq jariang side lebihan lẽman dengan lain? Tekan selapuqne side terimaq lẽman Allah? Jari, kembẽq mẽlẽ nyombongang diriq, maraqne napi saq araq lẽq side nike side anggep lẽman diriqde mẽsaq? 8 Mule side ndẽq merluang napi-napi malik! Side pade sampun sugih! Side pade sampun jari raje! Dait tiang pade ndẽq. Mule bagus gati lamun side pade sampun jari raje, adẽq tiang pade bau mrẽntah bareng side. 9 Sẽngaq menurut pendapet tiang, tiang pade rasul-rasul, sampun tejariang pantoan siq Allah lẽq julun manusie dait pare malaẽkat. Tiang pade maraq dengan-dengan hine saq tehukum siq hukuman matẽ lẽq julun dengan luwẽq dait tesurak-surak siq dunie. 10 Lantaran Almasih, tiang pade niki jari dengan bodo, laguq side pade bijaksane lẽq dalem Almasih! Tiang pade lemah, laguq side pade kuat! Tiang pade tecele, dait side pade teajum-ajum! 11 Jangke mangkin niki tiang pade kelapahan dait bedak; kelambi tiang pade masih saq lẽq awak doang; tiang pade tesiksaq siq dengan; tiang pade ndẽq bedowẽ taoq ndot; 12 tiang pade gawẽq pegawẽan saq berat gati jari boyaq napkah. Lamun tiang pade tekutuk, tiang pade bales siq berkah; lamun tiang pade teaniaye, tiang pade sabar; 13 lamun tiang pade telengẽ-lengẽang siq dengan, tiang pade bales kadu ucapan-ucapan saq solah. Tiang pade ndẽqne lebih lẽman dedoro dunie niki; jangke mangkin tiang pade masih teanggep maraq dedoro gumi. 14 Surat niki tiang tulis tipaq side pade, ndẽqne jari miaq side pade ilaq, laguq jari peringetin side pade maraq anak-anak tiang mẽsaq. 15 Sẽngaq timaq side pade sampun bedowẽ sepulu iyu guru lẽq dalem Almasih, laguq side pade ndẽq bedowẽ luwẽq bapaq. Lẽq dalem idupde sebagẽ dengan-dengan saq araq lẽq dalem Almasih, tiang saq jari bapaqde, sẽngaq tiang saq jauq Kabar Solah mengenai Almasih tipaq side. 16 Keranaq nike sanget siq tiang tunas adẽq side pade turut teladan tiang. 17 Lẽq hal nike tiang sampun ngutus Timotius ojok side, tiang ngasihin ie maraq anak tiang mẽsaq. Ie kanak saq bau tesaduq. Laun ie gen ngingetang side pade mengenai care idup saq tiang turut sesampun percaye tipaq Almasih, care idup nike saq tiang ajahang tipaq sebilang jemaah saq araq lẽq mbẽ-mbẽ. 18 Pire dengan lẽq antare side sampun jari sombong, sẽngaq ie pade paran tiang ndẽq gen dateng ojok side. 19 Laguq lamun Tuhan ngijinang, ndẽqne ngonẽq malik tiang gen dateng ẽndah ojok side. Lẽq waktu nike, tiang gen serioq ẽndah kekuatan dengan-dengan saq sombong nike; ndẽqne cume ucapanne doang. 20 Sẽngaq Kerajaan Allah ndẽqne mengenai ucapan doang, laguq ẽndah mengenai kuase. 21 Jari, pilẽq doang napi saq side pade melẽtang! Napi side pade mẽlẽ tiang dateng jari ngajah side pade secare keras atao secare alus dait kasih sayang?

1 Corinthians 5

1 Tiang setetune sampun nerimaq laporan bahwe lẽq antare side araq perbuatan-perbuatan cabul saq langsot gati: Araq lẽq antare side saq bezinah kance inaq tẽrẽqne, padahal dengan-dengan saq ndẽq kenal Allah ndẽq gawẽq hal maraq nike. 2 Timaq maraq nike, masih doang side sombong. Sebalikne side harus sedih, dait sugulang dengan saq gawẽq hal nike lẽman tengaq-tengaq side. 3 Secare lahiriah tiang jaoq lẽman side pade, laguq secare batin tiang araq lẽq tengaq-tengaq side pade. Jari tiang mẽlẽ ngelaksaneang maraqne tiang araq lẽq antare side, "Siq pesẽngan Junjungan Saq Mulie Deside Isa Almasih, tiang nyatayang bahwe dengan saq sampun gawẽq perbuatan saq kotor nike, harus tehukum!" Lamun side pade bekumpul anggep bahwe tiang araq lẽq antare side lẽq dalem roh, dait siq kuase Junjungante Saq Mulie Deside Isa Almasih, 5 side pade harus nyerahang dengan nike ojok Belis adẽq awak dengan nike binase dait siq care nike rohne teselametang lẽq jelo kerauhan Junjungan Saq Mulie Deside Isa. 6 Side pade ndẽq patut merase sombong. Sang side pade sampun nenaoq, "Ragi ruti saq sekediq miaq selapuq adonan jari mbal!" 7 Keranaq nike, tetẽh juluq ragi ruti saq masih araq, nike ragi dose, adẽq side pade jari maraq adonan saq baru, bersi lẽman ragi dose saq laẽq, dait tiang nenaoq bahwe side pade mule maraq nike. Sẽngaq, perayaan Paskahte sampun siep, lantaran Almasih saq jari anak dombe Paskahte, sampun tesembelẽh. 8 Jari, silaq ite rayeang hal nike kadu ruti saq ndẽq beragi, ruti saq jari lambang kemurnian dait selapuq saq teterimaq siq Allah. Ndaq ite rayeang hal nike kadu ruti saq teragiq siq ragi ruti saq laẽq, nike ragi dose dait kejahatan. 9 Lẽq dalem surat tiang saq piranan, tiang badaq side adẽq ndaq begaul kance dengan saq gawẽq cabul. 10 Maksut tiang ndẽqne dengan saq gawẽq cabul, atao serakah, atao penipu atao penyembah berhale saq tetu-tetu ndẽq kenal Allah. Ndẽqne ie pade saq tiang maksut; sẽngaq lamun side pade ndẽq mẽlẽ rapet kance ie pade, make side pade harus sugul lẽman dunie niki. 11 Maksut tiang, bahwe side pade ndaq begaul kance dengan saq ngaku diriqne semeton seiman, laguq dengan nike perbuatanne cabul, atao serakah, atao nyembah berhale, atao girang pitnah dengan, atao tukang bowos, atao pemalingan. Kance dengan saq maraq nike, ndaq gati side tokol atao bekelor bareng-bareng kance ie! 12 Mule jari ngadilin ie pade saq ndẽq termasuk dalem jemaah ndẽqne urusan tiang. Tekan side mẽsaq cume gen ngadilin dengan saq araq lẽq dalem jemaah? Dengan-dengan saq ndẽq termasuk dalem jemaah gen teadilin siq Allah mẽsaq. Lẽq Kitab Suci tetulis, "Sediq dengan jahat lẽman side pade."

1 Corinthians 6

1 Napi araq lẽq antare side pade lamun bepelekare kance semetonne, bani lumbar tipaq hakim saq ndẽq kenal Allah, dait ndẽq lumbar ojok dengan-dengan saq tehususang bagi Allah jari nyelesẽang pelekare nike? 2 Napi side pade ndẽq nenaoq bahwe dengan-dengan saq tehususang bagi Allah gen ngadilin dunie niki? Jari, lamun mule side pade gen ngadilin dunie niki, napi side pade ndẽq sanggup nyelesẽang pelekare-pelekare saq ndẽq araq artine? 3 Napi side pade ndẽq nenaoq bahwe ite gen ngadilin malaẽkat-malaẽkat? Jari, lebih-lebih pelekare-pelekare kehidupan sebilang jelo? 4 Make, lamun araq pelekare-pelekare maraq nike, napi side pade ngelaporang tipaq dengan-dengan saq tetu-tetu ndẽq bedowẽ kedudukan lẽq dalem jemaah? 5 Merilaq gati! Pasti lẽq antare side araq sopoq dengan saq cukup bijaksane jari nyelesẽang masalah lẽq antare semeton-semeton seiman! 6 Napi araq semeton saq sopoq boyaq keadilan tipaq semeton saq lain, dait malahan lẽq dengan-dengan saq ndẽq seiman? 7 Araq masalah lẽq antare side pade doang sampun jari kekalahan umaq side. Bagusan side pade teperlakuang ndẽq adil, atao terugiang! 8 Laguq malahan side mẽsaq perlakuang dengan lain secare ndẽq adil. Side mẽsaq ẽndah saq ngerugiang dengan lain. Dait malahan nike side pade laksaneang tipaq semeton-semeton seiman! 9 Napi side pade nenaoq bahwe dengan-dengan saq ndẽq turut pekayunan Allah, ndẽq gen mauq bagian lẽq dalem Kerajaan Allah? Ndaq sesat! Dengan-dengan saq gawẽq perbuatan saq cabul, dengan-dengan saq nyembah berhale, saq bezinah, saq gawẽq cabul kance sepade jenisne, 10 saq memaling, saq serakah, saq girang bowos, saq girang pitnah dengan lain, dait saq meres dengan lain -- selapuq dengan saq maraq nike, ndẽqne gen mauq bagian lẽq dalem Kerajaan Allah. 11 Pire dengan lẽq antare side laẽq bedowẽ kelakuan maraq nike. Laguq mangkin side pade tenyatayang bersi lẽman dose. Side pade sampun jari dowẽn Allah saq husus. Side pade sampun tejariang kenaq lẽq arepan Allah sehingge hubungan side pade kance Allah jari solah malik, nike lantaran pesẽngan Junjungan Saq Mulie Deside Isa Almasih dait lantaran Roh Allahte. 12 Araq saq bebase bahwe sebilang dengan kanggo ngelaksaneang selapuq hal. Laguq umaq tiang ndẽq selapuqne araq manpaatne. Jari, timaq tiang kanggo ngelaksaneang napi juaq, laguq tiang ndẽq mẽlẽ ngalurang diriq tiang tekuasein siq napi juaq. 13 Araq ẽndah saq bebase bahwe keloran nike umaq tian, dait tian tesedieang umaq keloran. Laguq deduaqne gen temusnahang siq Allah. Awak manusie ndẽqne kanggo tekadu jari gawẽq perbuatan saq cabul, laguq cume jari ngelayanin Tuhan. Dait Tuhan gen meliharaq awak nike. 14 Allah sampun ngidupang Junjungan Saq Mulie Deside Isa Almasih lẽman ninggal, maraq nike ẽndah Allah gen ngidupang ite siq kuase-Ne. 15 Napi semeton senamian ndẽq nenaoq bahwe awakde nike anggote rage Almasih. Jari, napi kanggo tiang bait sopoq anggote rage Almasih, terus jariang ie anggote awak dengan saq jari pelacur? Ndẽqne kanggo gati! 16 Atao sang side pade ndẽqman nenaoq bahwe dengan saq bareng tindoq kance pelacur, jari sopoq kance pelacur nike! Sẽngaq lẽq dalem Kitab Suci tetulis, "Deduaqne jari sopoq." 17 Laguq dengan saq pesopoq diriqne kance Tuhan, Roh Tuhan kance roh dengan nike jari sopoq. 18 Jaoqang diriqde lẽman perbuatan-perbuatan saq cabul. Sẽngaq selapuq dose lain saq tepiaq siq dengan, telaksane lẽq luah awak dengan nike. Laguq dengan saq gawẽq perbuatan cabul, artine gawẽq dose tipaq awakne mẽsaq. 19 Napi side pade ndẽq nenaoq bahwe awakde nike taoq Roh Allah. Roh nike ndot lẽq dalem side pade. Dait Allah mẽsaq saq ngicanin side Roh nike. Diriqde ndẽqne dowẽnde mẽsaq. Nike dowẽn Allah. 20 Side pade sampun tebeli dait tebayah lunas siq Allah. Keranaq nike, mulieang Allah kadu awakde.

1 Corinthians 7

1 Mangkin tiang gen sampẽang masalah-masalah saq side pade sebut lẽq dalem suratde. Lamun sopoq dengan mame ndẽq merariq, nike solah. 2 Laguq, adẽq ndẽq tegode jari gawẽq perbuatan saq cabul, solahan sebilang dengan mame bedowẽ seninene mẽsaq, dait sebilang dengan nine bedowẽ semamene mẽsaq. 3 Semame harus ngelaksaneang kewajibanne sebagẽ semame tipaq seninene, maraq nike ẽndah senine harus ngelaksaneang kewajibanne sebagẽ senine tipaq semamene. 4 Senine ndẽq bedowẽ kuase lẽq awakne mẽsaq; saq bekuase lẽq awakne nike, semamene. Maraq nike ẽndah semame ndẽq bedowẽ kuase lẽq awakne mẽsaq; saq bekuase lẽq awakne nike, seninene. 5 Ndaq saling jaoqin sopoq kance saq lain sebagẽ senine semame. Kecuali jari sementare waktu, asal deduaqne sampun setuju. Siq care nike sopoq-sopoq bau bedo'e. Laguq sesampun nike, side pade harus rukun malik dait idup berembẽ seharusne senine semame. Lamun ndẽq maraq nike, side pade gen kene rayuan Belis, sẽngaq side pade ndẽq kuat nahen napsu. 6 Tiang sampẽang hal niki ndẽqne sebagẽ prẽntah, laguq cume ngebẽng nasẽhat. 7 Setetune tiang demenan lamun selapuq dengan jari maraq tiang. Laguq sopoq-sopoq dengan sampun nerimaq paice saq husus lẽman Allah. Sopoq dengan bedowẽ paice maraq niki, saq lain bedowẽ paice maraq nike. 8 Tipaq dengan-dengan saq ndẽqman merariq dait tipaq dengan-dengan nine saq sampun bebalu, niki nasẽhat tiang: Solahan side tetep idup mẽsaq maraq tiang. 9 Laguq lamun side ndẽq bau nahen napsu, solahan side merariq. Sẽngaq solahan side merariq ketimbang napsunde belẽq. 10 Tipaq ie pade saq sampun merariq, niki prẽntah tiang: (Setetune ndẽqne tiang saq ngebẽng prẽntah niki, laguq Tuhan.) Sopoq dengan nine saq sampun merariq ndaq sẽang semamene. 11 Laguq lamun ie sampun sẽang semamene, ie harus tetep ndẽq besemame, atao tulak ojok semamene. Dait sopoq semame ndẽqne kanggo sẽang seninene. 12 Tipaq saq lain-lainne, maraq niki nasẽhat tiang -- niki nasẽhat tiang mẽsaq, ndẽqne lẽman Tuhan -- lamun araq sopoq semeton besenine kance dengan nine saq ndẽq percaye lẽq Almasih, dait seninene setuju idup bareng kance ie, dengan nike ndẽqne kanggo sẽang seninene. 13 Dait lamun sopoq dengan nine besemame kance dengan saq ndẽq percaye lẽq Almasih, dait semamene setuju jari idup bareng kance ie, make senine nike ndẽqne kanggo sẽang semamene. 14 Sẽngaq semame saq ndẽq percaye lẽq Almasih tesuciang lantaran ie merariq kance dengan saq sampun beriman lẽq Almasih. Maraq nike ẽndah senine saq ndẽq percaye lẽq Almasih tesuciang lantaran ie merariq kance semame saq sampun beriman lẽq Almasih. Lamun ndẽq maraq nike, bije-bije ie pade gen teparan bije-bije najis, padahal mangkin bije-bije nike sampun tesuciang. 15 Laguq lamun dengan saq ndẽq percaye nike sẽang senine atao semamene, ndaq balaq ie. Lẽq dalem hal niki saq nine atao saq mame bẽbas. Sẽngaq Allah manikang side jari idup lẽq dalem damẽ sejahtere. 16 Sẽngaq side sebagẽ senine -- saq sampun percaye lẽq Almasih -- berembẽ side bau nenaoq secare pasti bahwe side ndẽq bau nyelametang semamende? Maraq nike ẽndah side sebagẽ semame saq percaye lẽq Almasih, berembẽ side bau nenaoq secare pasti bahwe side ndẽq bau nyelametang seninende? 17 Sopoq-sopoq harus ngatur kehidupanne menurut bimbingan Tuhan, maraq saq sampun tetentuang siq Allah tipaq ie lẽq waktu Allah ngemanikang ie jari percaye lẽq Allah. Nike aturan saq tiang ajahang lẽq sebilang jemaah. 18 Umpamene, lamun sopoq dengan sampun tesunat lẽq waktu ie nerimaq Allah, make dengan nike ndaq berusahe telangang tande-tande sunat nike. Maraq nike ẽndah lamun sopoq dengan ndẽqman tesunat lẽq waktu ie nerimaq Allah, ndaq dengan nike belakoq tesunat. 19 Sẽngaq turut atao ndẽq aturan sunat, deduaqne pade-pade ndẽq araq artine. Saq penting turut hukum-hukum Allah. 20 Sebilang dengan harus tetep idup dalem keadaan maraq waktu ie temanikang siq Allah. 21 Lamun lẽq waktu side pade temanikang, side pade jari hambe, ndaq side pade susah-susah mikirang hal nike. Laguq lamun laun side pade mauq kesempatan jari dengan bẽbas, kadu kesempatan nike. 22 Sẽngaq sopoq dengan saq temanikang siq Tuhan waktu ie masih jari hambe, ie jari dengan saq bẽbas lẽq arepan Tuhan. Dait sopoq dengan bẽbas saq temanikang siq Almasih, ie jari hambe Almasih. 23 Side sampun tebeli siq Allah dait sampun lunas tebayah. Keranaq nike, ndaq side nyerahang diriqde jari hambe manusie. 24 Jari, semeton senamian, timaq berembẽ keadaan side sewaktu temanikang, side harus tetep idup maraq nike bareng kance Allah. 25 Mangkin mengenai dengan-dengan nine saq ndẽqman merariq. Mengenai hal nike, tiang ndẽq nerimaq prẽntah napi-napi lẽman Tuhan. Laguq sebagẽ dengan saq patut tepercaye lantaran rahmat Tuhan, tiang mẽlẽ nyampẽang nasẽhat tiang. 26 Lamun inget selapuq kesusahan saq ngancem mangkin niki, tiang rase solahan lamun dengan tetep idup maraq keadaanne saq mangkin. 27 Lamun side sampun bedowẽ senine ndaq berusahe sẽang seninende nike. Lamun side ndẽqman bedowẽ senine ndaq boyaq senine. 28 Laguq lamun side merariq, nike ndẽqne dose. Maraq nike ẽndah lamun sopoq dedare merariq, ndẽqne berarti ie bedose. Cume, ie pade saq merariq nike gen hadepin luwẽq kesusahan. Dait tiang melẽt adẽq side pade ndẽq tetimpe siq kesusahan-kesusahan nike. 29 Maksut tiang maraq niki, semeton senamian: Ite ndẽq bedowẽ luwẽq waktu malik. Mulai lẽman mangkin, sebilang dengan saq sampun bedowẽ senine, adẽqne idup maraqne ie ndẽq bedowẽ senine; 30 dengan saq nangis, idup maraqne ie ndẽq sedih angenne; dengan saq rẽrẽq, maraqne ie ndẽq gembire; dengan saq sampun beli, maraqne ie ndẽq bedowẽ napi-napi; 31 dait dengan-dengan saq ngadu barang-barang saq araq lẽq dunie niki, harus idup maraqne ie ndẽq ngadu hal-hal nike. Sẽngaq ndẽqne ngonẽq malik dunie niki, dalem keadaanne saq mangkin, gen musnah! 32 Tiang melẽt adẽq side pade ndẽq idup lẽq dalem kekuatiran. Dengan saq ndẽq bedowẽ senine gen hususang pikiranne lẽq hal-hal mengenai Tuhan, lantaran ie mẽlẽ nyenengang Tuhan. 33 Laguq dengan saq bedowẽ senine gen luwẽq mikirang hal-hal dunie niki, sẽngaq ie melẽt nyenengang seninene; 34 akibatne perhatianne tebagi-bagi. Sopoq dengan nine saq ndẽq bedowẽ semame, atao sopoq dedare gen luwẽq mikirang hal-hal mengenai Tuhan, sẽngaq ie melẽt adẽq awak dait rohne jari dowẽn Tuhan. Laguq sopoq dengan nine saq sampun bedowẽ semame, hususang pikiranne lẽq hal-hal dunie niki, sẽngaq ie melẽt nyenengang semamene. 35 Tiang nulis selapuqne nike jari kesolahande mẽsaq, ndẽqne siq maksut halangin kebẽbasande. Saq tiang melẽtang cume adẽq side ngelaksaneang saq kenaq dait patut, dait adẽq side bau hususang pikirande tipaq Tuhan. 36 Lamun sopoq dengan merase ndẽq ngelaksaneang hal saq sepatutne tipaq berayene, lamun ie ndẽq bau nahen napsune, dait ie merase perlu merariq kance dedare nike, alurang ie laksaneang napi saq bagus menurut ie. Ie ndẽq bedose, lamun ie pade merariq. 37 Laguq lamun sopoq dengan sampun miaq keputusan lẽq dalem angenne ndẽq gen merariq kance berayene dait keputusanne nike ndẽqne tepaksaq, make saq ie laksaneang nike solah, asal ie kuat ngelaksaneang hal nike. 38 Jari, dengan saq merariq solah perbuatanne, dait dengan saq ndẽq merariq solahan malik perbuatanne. 39 Sopoq dengan nine saq sampun merariq teriket tipaq semamene cume sengonẽq semamene idup. Lamun semamene sampun milinang, dengan nine nike bẽbas merariq malik kance dengan saq ie demenang; asal dengan nike dengan saq percaye lẽq Almasih. 40 Laguq ie gen lebih bahagie lamun ie ndẽq merariq malik. Nike pendapet tiang mẽsaq, laguq tiang rase bahwe saq tiang ucapang niki siq kuase Roh Allah.

1 Corinthians 8

1 Mangkin mengenai keloran saq teaturang tipaq berhale. Mule kenaq maraq basen dengan bahwe, "Ite selapuq sampun bedowẽ penenaoq." Kepinteran miaq dengan jari sombong, laguq kasih pesolah dengan. 2 Dengan saq beranggepan bahwe ie bedowẽ sopoq penenaoq, setetune ndẽqman nenaoq sedalem-dalemne. 3 Laguq dengan saq tetu-tetu ngasihin Allah, ie tekenal siq Allah. 4 Mengenai masalah ngelor keloran saq sampun teaturang tipaq berhale, ite nenaoq bahwe ndẽq araq berhale lẽq dunie. Dait ite nenaoq ẽndah bahwe Allah cume sopoq; ndẽq araq saq lain. 5 Mule luwẽq ẽndah napi saq tesebut dẽwe; saq araq lẽq langit dait saq araq lẽq gumi. 6 Laguq bagi ite, Allah cume sopoq. Ie Bapa saq cipteang selapuq-lapuqne, dait ite idup umaq Ie. Dait Tuhan cume sopoq ẽndah, nike Deside Isa Almasih. Langan Ie selapuq hal tecipteang, dait lantaran Ie make ite idup. 7 Timaq maraq nike, ndẽqne selapuq dengan nenaoq hal nike. Araq dengan saq lantaran masih terus nyembah berhale, ngelor keloran nike sebagẽ keloran saq sampun teaturang tipaq berhale. Sehingge atẽ nurani ie pade saq lemah merase jari kotor. 8 Setetune keloran nike ndẽqne miaq hubungante kance Allah jari sayan rapet. Lamun ite ngelor keloran nike, ite ndẽq mauq keuntungan napi-napi. Sebalikne lamun ite ndẽq ngelor keloran nike, ite ẽndah ndẽq rugi napi-napi. 9 Laguq, onyaq-onyaq! Ndaq jangke telaksane bahwe dengan lain jari bedose -- lantaran keyakinanne ndẽqman kuat -- sẽngaq side pade bẽbas ngelaksaneang napi juaq. 10 Maksut tiang maraq niki: Misalne side pade, saq bedowẽ penenaoq saq kuat, kenyeke tokol bekelor lẽq kuil berhale. Beterus araq sopoq dengan serioq side pade tokol bekelor lẽq derike. Lamun keyakinan dengan nike ndẽq kuat, make side pade gen miaq dengan nike bani ẽndah ngelor keloran saq sampun teaturang tipaq berhale nike. 11 Dait lantaran nike, make penenaoq side pade miaq dengan saq keyakinanne ndẽq kuat jari sesat. Padahal Almasih ninggal umaq dengan nike ẽndah. 12 Dait lamun side pade piaq dose maraq nike tipaq semeton-semetonde -- artine side pade nyẽdaq keyakinan ie pade saq lemah -- make side pade bedose tipaq Almasih. 13 Keranaq nike, lamun keloran jari penyebap semeton tiang bedose, make tiang ndẽq gen mẽlẽ gati ngelorang daging selaẽq-laẽqne. Sẽngaq ndaq-ndaq semeton tiang bedose lantaran tiang.

1 Corinthians 9

1 Napi tiang niki ndẽqne dengan bẽbas? Napi tiang niki ndẽqne rasul? Napi tiang ndẽq uwah serioq Deside Isa Junjungante Saq Mulie? Napi side pade ndẽqne hasil pegawẽan tiang lẽq dalem Tuhan? 2 Lamun dengan-dengan lain ndẽq mẽlẽ akuq tiang sebagẽ rasul, laguq bagi side pade tiang rasul! Sẽngaq idupde lẽq dalem Tuhan nike, buktiang bahwe tiang niki sopoq rasul. 3 Lamun dengan ngeraosang tiang, tiang gen jawab maraq niki: 4 Napi tiang ndẽq berhak bekelor dait nginem? 5 Napi tiang ndẽq berhak jauq sopoq senine saq seiman bareng-bareng dalem kelampan tiang, maraq saq telaksaneang siq sanak-sanak Junjungan Saq Mulie Deside Isa dait siq rasul-rasul lainne, termasuk Kepas? 6 Atao cume tiang dait Barnabas doang saq teharusang boyaq napkah mẽsaq? 7 Napi araq anggote tentere saq harus biayaq diriqne mẽsaq lẽq dalem angkatan perang? Napi araq petani saq nalet anggur lẽq kebonne terus ndẽqne kelorang hasil anggur lẽman kebon nike? Atao napi araq pengarat saq meliharaq dombe, terus ndẽq nginem susu lẽman dombe-dombene nike? 8 Tiang nyampẽang hal nike ndẽqne tedasarang napi saq biase dalem pengalaman sebilang jelo doang, laguq sẽngaq Hukum Taurat nyatayang hal nike ẽndah. 9 Lẽq dalem Kitab Musa tetulis, "Sampi saq kenyeke ngicaq-icaq gandum jari kelin tolang gandum lẽman lẽndongne, ndaq tepelẽbẽk biwihne." Napi sampi nike saq teperhatiang siq Allah? 10 Atao hal nike saq temaksut umaq ite? Mule nike saq tetulis umaq ite. Sẽngaq dengan saq begawẽan lẽq lendang dait dengan saq mersiq gandumne sampun sepatutne begawẽan dait beharep gen nerimaq separo lẽman hasil pegawẽanne. 11 Tiang pade sampun sawur binẽq rohani lẽq dalem idupde. Jari, lamun tiang pade mataq hasil duniawi lẽman side pade, napi nike artine tiang pade nuntut luwẽqan lẽman side pade? 12 Lamun dengan-dengan lain berhak beharep hal niki lẽman side pade, napi tiang pade ndẽq lebih berhak malik lẽman ie pade? Laguq tiang ndẽq kadu hak nike. Sebalikne tiang demenan nanggung selapuq hal ketimbang nimbulang penghalang penyebaran Kabar Solah mengenai Almasih. 13 Side pasti nenaoq bahwe dengan saq begawẽan lẽq Gedẽng Allah ie pade nerimaq keloran lẽman Gedẽng Allah. Dait dengan-dengan saq ngurus mẽje taoq kurban, mauq bagian lẽman kurban saq teaturang lẽq derike. 14 Maraq nike ẽndah Tuhan sampun nentuang bahwe dengan saq beriteang Kabar Solah nike harus mauq napkahne lẽman pemberitean nike. 15 Laguq sopoq juaq lẽman hak nike ndẽq uwah tiang kadu. Dait tiang nulis surat niki ẽndah ndẽqne bedowẽ maksut adẽqne hal nike saq telaksaneang lẽq tiang mangkin. Bagusan tiang matẽ ketimbang hal saq tiang banggeang nike telang. 16 Sẽngaq, lamun nike cume soal beriteang Kabar Solah lẽman Allah, make tiang ndẽq berhak bangge, sẽngaq Allah sampun mrẽntahang tiang jari ngelaksaneang hal nike. Celake tiang, lamun tiang ndẽq beriteang Kabar Solah nike! 17 Misalne tiang ngelaksaneang pegawẽan nike siq kemẽlẽq tiang mẽsaq, make tiang kanggo beharep jari mauq upaq. Laguq lantaran tewajibang make tiang beriteang Kabar Solah nike. Tiang tetugasang siq Allah jari ngelaksaneang hal nike. 18 Lamun maraq nike, napi saq jari upaq tiang? Niki upaqne: Bahwe tiang bau beriteang Kabar Solah nike ndẽq teupaq siq napi-napi, sẽngaq tiang ndẽq nuntut hak-hak tiang sebagẽ dengan saq beriteang Kabar Solah nike. 19 Tiang niki ndẽqne hambe sai-sai; tiang bẽbas. Timaq maraq nike, tiang sampun jariang diriq tiang niki hambe tipaq selapuq dengan. Tiang ngelaksaneang nike adẽq tiang bau jariang dengan pengiring Almasih seluwẽq-luwẽqne. 20 Tipaq dengan Yahudi, tiang piaq diriq tiang maraq dengan Yahudi, adẽq tiang bau jariang dengan Yahudi pengiring Almasih. Tipaq dengan-dengan saq idup menurut Hukum Taurat, tiang piaq maraqne tiang teriket lẽq hukum nike, timaq setetune tiang ndẽq teriket lẽq hal nike. Tiang piaq hal nike adẽq tiang bau jauq ie pade jari pengiring Almasih. 21 Tipaq dengan bangse-bangse lain, tiang piaq diriq tiang maraq dengan bangse-bangse lain, saq idup lẽq luah Hukum Taurat. Tiang ngelaksaneang nike adẽq tiang bau jauq ie pade jari pengiring Almasih. Laguq nike ndẽqne berarti bahwe tiang ndẽq taat lẽq prẽntah-prẽntah Allah; malahan tiang tekuasein siq prẽntah-prẽntah Almasih. 22 Lẽq tengaq-tengaq dengan-dengan saq keyakinanne ndẽq kuat, tiang ẽndah piaq diriq tiang maraq sopoq dengan saq ndẽq kuat keyakinanne, adẽq tiang bau jauq ie pade jari pengiring Almasih. Singketne, tiang jari selapuq-lapuqne tipaq selapuq dengan adẽq tiang bau nyelametang seluwẽq-luwẽqne lẽman ie pade. 23 Selapuq nike tiang laksaneang jari Kabar Solah lẽman Allah nike, adẽq tiang mauq bagian lẽq dalemne. 24 Side pasti nenaoq bahwe lẽq dalem perlombaan selapuq saq milu perlombaan milu pelai, laguq cume sopoq dengan saq nerimaq hadiah. Keranaq nike pade pelai pacu-pacu sehingge side nerimaq hadiahne. 25 Sebilang dengan saq kenyeke dalem perlombaan, nahen diriqne lẽq selapuq hal. Ie ngelaksaneang nike lantaran ie melẽt mauq sopoq mahkote saq iniq sẽde. Laguq ite niki nahen diriq dalem selapuq hal lantaran ite melẽt mauq sopoq mahkote saq kekel. 26 Keranaq nike tiang pelai tipaq tujuan saq sampun tetentuang. Maraq dalem pertandingan tinju, tiang ndẽq gen sembarangan bejagur. 27 Tiang ngelatih dait nguasein awak tiang, adẽq sesampun beriteang Kabar Solah lẽman Allah tipaq dengan lain, ndaq jangke tiang mẽsaq tetolaq.

1 Corinthians 10

1 Semeton senamian! Side pade harus inget napi saq telaksane tipaq leluhurte sewaktu ie pade ngiring Musa. Ie pade selapuq telindungin siq awan, dait selamet mbelat Segare Bẽaq. 2 Adẽqne bau jari pengiring-pengiring Musa, ie pade selapuq tebaptis lẽq dalem awan dait lẽq dalem segare nike. 3 Ie pade selapuq ngelor keloran rohani saq pade, 4 dait nginem ineman rohani saq pade. Ie pade selapuq nginem lẽman gunung batu rohani saq araq bareng kance ie pade; gunung batu nike Almasih mẽsaq. 5 Timaq maraq nike, luwẽq lẽman ie pade saq Allah nẽnten suke, dait lantaran nike mayit-mayit ie pade begelanyat lẽq padang gurun. 6 Selapuqne nike jari conto umaq ite, jari ngingetang ite adẽq ndaq melẽtang hal-hal saq jahat maraq ie pade. 7 Dait adẽq ite ẽndah ndaq nyembah berhale maraq saq tegawẽq siq separo lẽman ie pade. Lẽq dalem Kitab Suci tetulis, "Make bangse nike mulai ngelor dait nginem, dait ngigel jari nyembah berhale." 8 Ite ndẽq kanggo gawẽq hal-hal saq cabul maraq saq telaksaneang siq separo lẽman ie pade. Sehingge dalem sejelo doang, telu likur iyu dengan lẽman ie pade ninggal. 9 Ite ndẽq kanggo cobe Tuhan maraq saq telaksaneang siq separo lẽman ie pade laẽq, sehingge ie pade ninggal tekakoq siq ulah saq beracun. 10 Ite ndẽq kanggo ẽndah ngerumun; maraq saq telaksaneang siq separo lẽman ie pade laẽq, sehingge ie pade tematẽq siq malaẽkat maut. 11 Selapuq hal nike telaksane tipaq ie pade adẽqne jari conto bagi dengan-dengan lain. Dait selapuqne nike tetulis ẽndah adẽqne jari peringetan tipaq ite. Sẽngaq mangkin ite idup lẽq ahir jaman. 12 Dengan saq paran diriqne kuat nganjeng, harus onyaq-onyaq; ndaq jangke ie geriq. 13 Sebilang cobe saq side alamin, nike cobe saq biase tealamin siq manusie. Laguq Allah setie lẽq janji-Ne. Ie nẽnten gen menengang side tecobe lebihan lẽman kekuatande. Lẽq waktu side tetimpe siq cobe, Ie gen ngicanin side langan sehingge side bau nahen cobe nike. 14 Keranaq nike, semeton senamian saq tiang kasihin, jaoqang diriqde lẽman penyembahan berhale. 15 Tiang ngeraos lẽq side maraq tipaq dengan-dengan saq bijaksane. Side pade harus timbang mẽsaq ucapan tiang niki. 16 Sewaktu ite nginem anggur siq ucapan syukur tipaq Allah, napi hal nike ndẽq nyatayang bahwe ite niki besopoq kance daraq Almasih? Dait sewaktu ite bagi-bagiang ruti jari tekelorang bareng-bareng, napi nike ndẽq nyatayang bahwe ite besopoq dalem rage Almasih? 17 Sẽngaq cume araq sopoq ruti, dait selapuqte ngelor lẽman ruti saq sopoq nike ẽndah, make ite saq luwẽq niki jari sopoq awak. 18 Cobaq perhatiang bangse Israel. Tekan ie pade saq ngelor keloran saq teaturang nike bareng-bareng mauq bagian lẽman mẽje taoq kurban nike? 19 Napi maksut tiang lẽq hal nike? Berhale atao keloran saq teaturang tipaq berhale nike ndẽq bedowẽ arti napi-napi. 20 Napi saq teaturang tipaq berhale, nike ndẽqne teaturang tipaq Allah, laguq tipaq roh-roh jahat. Dait tiang ndẽq mẽlẽ side pade besopoq kance roh jahat. 21 Side pade ndẽq kanggo nginem lẽman cawan lẽq mẽje perjamuan Tuhan dait ẽndah lẽman cawan lẽq mẽje perjamuan Belis. Side pade ndẽq kanggo kelorang ruti lẽq mẽje perjamuan Tuhan, dait ẽndah lẽq mẽje perjamuan Belis. 22 Atao ite mẽlẽ piaq Tuhan talon atẽ? Napi ite kuatan tebanding Tuhan? 23 "Ite kanggo piaq napi doang saq ite melẽtang." Mule kenaq! Laguq ndẽqne selapuq saq ite melẽtang nike araq manpaatne. "Ite kanggo piaq napi doang saq ite melẽtang" -- laguq ndẽqne selapuq saq ite melẽtang nike bau pesolah idupte. 24 Ndaq sopoq dengan juaq bejuang jari kepentingan diriqne mẽsaq. Sebilang dengan harus bejuang jari kepentingan dengan lain. 25 Side pade kanggo ngelorang napi doang saq tejual lẽq peken. Ndẽqne perlu teperiksaq juluq, timaq araq keberatan-keberatan lẽq dalem atẽ nurani side. 26 Sẽngaq dalem Kitab Suci tetulis, "Gumi dait selapuq isine dowẽn Tuhan." 27 Lamun side pade tepesilaq bekelor siq sopoq dengan saq ndẽq percaye lẽq Almasih, dait side pade terimaq pesilaqan nike, kelorang napi saq tepesajiq umaq side. Ndaq side periksaq lẽman mbẽ asalne keloran nike, adẽq ndẽq araq keberatan-keberatan lẽq dalem atẽ nurani side. 28 Laguq lamun araq saq bebase lẽq side, "Keloran niki sampun teaturang tipaq berhale," ndaq kelor keloran nike, lantaran merhatiang kepentingan dengan nike dait lantaran suare atẽ nurani. 29 Maksut tiang ndẽqne suare atẽ nurani side, laguq suare atẽ nurani dengan nike. Sang araq saq beketuan, "Kembẽq kebẽbasan tiang harus tebatesin siq suare atẽ nurani dengan lain? 30 Lamun tiang ngelor keloran siq rase syukur tipaq Allah, kembẽq dengan ngewade tiang lantaran keloran nike, padahal tiang sampun ngucap syukur tipaq Allah?" 31 Napi juaq saq side laksaneang -- side bekelor atao side nginem -- laksaneang selapuqne nike jari mulieang Allah. 32 Pade idup maraq nike sehingge side ndẽq jari penyebap dengan lain piaq dose; napi ie pade dengan Yahudi atao dengan bangse-bangse lain, atao jemaah Allah. 33 Pade idup maraq tiang. Tiang berusahe nyenengang angen selapuq dengan dalem selapuq hal. Tiang ndẽq araq bedowẽ maksut jari kepentingan tiang mẽsaq. Saq jari tujuan tiang cume adẽq ie pade selapuq teselametang.

1 Corinthians 11

1 Turut teladan tiang, maraq tiang ẽndah turut teladan Almasih. 2 Tiang puji side pade sẽngaq side pade tetep inget lẽq tiang dait turut perajahan saq tiang ajahang tipaq side pade. 3 Laguq tiang mẽlẽ side pade nenaoq sopoq hal malik, bahwe saq jari kepale lẽq sebilang dengan mame nike, Almasih; saq jari kepale lẽq senine nike, semame dait saq jari kepale lẽq Almasih nike, Allah. 4 Lamun sopoq dengan mame lẽq waktu bedo'e atao lẽq waktu benubuat lẽq julun dengan luwẽq, ngengadu kerudung, make dengan nike menghine Almasih. 5 Dait lamun sopoq dengan nine lẽq waktu bedo'e atao benubuat lẽq julun dengan luwẽq ndẽq ngengadu kerudung, make ie menghine semamene saq jari kepale lẽq diriqne. Nike pade doang maraqne ulu dengan nine nike sampun tepeleng bulune. 6 Sẽngaq lamun sopoq dengan nine ndẽq mẽlẽ ngengadu kerudung, solahan bulune tepeleng. Laguq lamun sopoq dengan nine begunting atao tepeleng bulune, make nike sopoq penghinean tipaq ie. Keranaq nike bagusan ie ngengadu kerudung. 7 Dengan mame ndẽqne perlu ngengadu kerudung, sẽngaq ie nyatayang pribadi dait kemuliean Allah. Laguq dengan nine jari nyatayang kemuliean dengan mame, 8 sẽngaq dengan mame ndẽqne tejariang lẽman dengan nine, dengan nine saq tejariang lẽman dengan mame. 9 Dengan mame ndẽqne tecipteang lantaran dengan nine, laguq dengan nine tecipteang lantaran dengan mame. 10 Lantaran hal nike, dait lantaran pare malaẽkat, dengan nine harus kadu kerudung saq nyatayang wibawene. 11 Timaq maraq nike dalem kehidupante lẽq dalem Tuhan, ndẽq araq dengan mame saq ndẽq merluang dengan nine, dait ndẽq araq dengan nine saq ndẽq merluang dengan mame. 12 Sẽngaq timaq dengan nine penembẽq tecipteang lẽman dengan mame, laguq sesampun nike dengan mame tebijeang lẽman dengan nine; dait selapuq hal asalne lẽman Allah. 13 Cobaq semeton senamian timbang mẽsaq hal niki: Napi solah sopoq dengan nine bedo'e tipaq Allah lẽq julu dengan luwẽq, ndẽqne ngengadu kerudung? 14 Lẽman pengalaman saq biase, side pade sampun teajah bahwe sopoq hal saq merilaq lamun dengan mame bẽlo bulune. 15 Laguq bagi dengan nine, bulu nike teicanin jari penutup ulune dait bulu saq bẽlo jari kebanggeanne. 16 Nah, lamun araq saq mẽlẽ nentang mengenai masalah niki, tiang pade dait jemaah-jemaah Allah lainne ndẽq bedowẽ kebiasean saq maraq nike. 17 Mengenai hal saq selanjutne niki, tiang ndẽq puji side pade. Kumpulan-kumpulan ibadahde ndẽqne ngasilang saq solah, laguq saq ndẽq solah. 18 Penembẽqne tiang dengah, bahwe lẽq dalem kumpulan-kumpulan ibadahde araq golongan-golongan saq saling bẽde paham. Dait tiang yakin bahwe kabar nike kenaq. 19 Mule harus araq perpecahan lẽq antare side, adẽq laun penggitan sai-sai dengan saq tahen lẽq dalem ujian. 20 Laguq lẽq waktu side pade bekumpul, saq side pade araqang nike ndẽqne Perjamuan Tuhan. 21 Sẽngaq lẽq waktu bekelor, side pade sopoq-sopoq berebutan bait keloranne mẽsaq, jangke araq saq ndẽq mauq napi-napi, laguq saq lainne jari bowos. 22 Kembẽq jangke maraq nike? Tekan side bedowẽ balẽ? Side bau bekelor dait nginem lẽq derike! Atao side mẽlẽ menghine jemaah Allah dait perilaq dengan-dengan miskin? Napi saq harus tiang ucapang lẽq side pade? Napi harus tiang puji side pade? Ndẽq! Tiang ndẽq gati gen puji side pade. 23 Sẽngaq saq tiang ajahang lẽq side, nike tiang terimaq lẽman Tuhan mẽsaq: Bahwe lẽq kelem nike sewaktu Deside Isa, Junjungante Saq Mulie tehianatin, Ie bait ruti, 24 dait sesampun Ie ngucapang syukur tipaq Allah lẽq ruti nike, Ie peleng-peleng ruti nike kadu gading-Ne, terus bemanik, "Niki ragen Tiang saq teserahang umaq side pade. Laksaneang niki jari nginget Tiang." 25 Maraq nike ẽndah sesampun inggas medaran, Deside Isa bait cawan saq berisi anggur terus bemanik, "Cawan niki perjanjian Allah saq baru, saq tesahang kadu daraq Tiang. Sebilang side pade nginem anggur niki, laksaneang niki jari nginget Tiang." 26 Mule sebilang side pade ngelorang ruti dait nginem anggur niki, side pade beriteang ninggal-Ne Junjungante Saq Mulie, jangke Ie rauh. 27 Keranaq nike, dengan saq ngelorang ruti atao nginem lẽman cawan Tuhan siq care saq ndẽq patut, dengan nike bedose tipaq Tuhan saq sampun ngurbanang rage dait daraq-Ne. 28 Jari, sebilang dengan harus meriksaq diriqne juluq, baruq ie kanggo ngelorang ruti dait nginem anggur nike. 29 Sẽngaq lamun dengan ngelorang ruti dait nginem anggur ndẽqne ngakuq ragen Tuhan, dengan nike ngelor dait nginem jari nerimaq hukuman Allah tipaq diriqne mẽsaq. 30 Keranaq nike luwẽq lẽq antare side pade saq sakit dait lemah, dait araq ẽndah saq ninggal. 31 Laguq lamun ite nguji diriqte mẽsaq juluq, ite ndẽq gen tehukum siq Allah. 32 Laguq lamun ite tehukum siq Allah, Ie gen ngajah ite, adẽq ite ndẽq kene hukuman bareng kance dunie niki. 33 Keranaq nike, semeton-semeton tiang, lamun side pade bekumpul jari bekelor lẽq perjamuan Tuhan, side pade harus saling antih. 34 Lamun araq saq lapah, ie harus bekelor juluq lẽq balẽ. Lamun side pade perhatiang hal niki, make kumpulan-kumpulan ibadahde ndẽqne gen datengang hukuman lẽman Allah lẽq diriqde mẽsaq. Mengenai masalah-masalah saq lain, laun gen tiang jelasang tipaq side, lamun tiang dateng.

1 Corinthians 12

1 Mangkin mengenai paice-paice saq teicanin siq Roh Allah. Mengenai hal nike, tiang mẽlẽ adẽq semeton-semeton nenaoq saq setetune. 2 Pade inget bahwe sendẽqman side pade kenal Tuhan, side pade kena pengaruh jari turut berhale saq pakoq. 3 Side pade harus nenaoq bahwe dengan saq tepimpin siq Roh Allah ndẽq gen bebase, "Tekutuk Deside Isa!" Maraq nike ẽndah ndẽq araq sopoq dengan juaq saq bau ngaku, "Deside Isa nike Junjungan Saq Mulie!" lamun dengan nike ndẽq tepimpin siq Roh Allah. 4 Araq macem-macem paice lẽman Roh Allah, laguq selapuqne teicanin siq Roh saq sopoq. 5 Araq macem-macem pegawẽan jari ngelayanin Tuhan, laguq Tuhan saq telayanin nike, Tuhan saq sopoq ẽndah! 6 Araq luwẽq care Allah ngelaksaneang karye-Ne dalem kehidupante, laguq saq ngicanin kekuatan tipaq sebilang dengan nike, Allah saq sopoq ẽndah. 7 Laguq tipaq sebilang dengan, tepercayeang paice Roh Allah jari kepentingan bareng-bareng. 8 Tipaq sopoq dengan, Roh nike ngicanin paice jari bebaos siq hikmat. Tipaq saq lain Roh saq pade nike ngicanin paice jari bebaos siq penenaoq. 9 Tipaq sopoq dengan Roh saq pade ngicanin iman, dait tipaq saq lain Roh nike ngicanin paice jari nyelahang dengan. 10 Tipaq sopoq dengan Roh nike ngicanin kuase jari miaq keajaipan, dait tipaq saq lain Roh nike ngicanin paice jari benubuat, dait tipaq saq lain malik Roh nike ngicanin paice jari bẽde-bẽdeang macem-macem roh. Tipaq sopoq dengan Roh nike ngicanin paice jari bebaos kadu base-base saq ajaip, dait tipaq saq lain Roh nike ngicanin paice jari jelasang arti lẽman base-base saq ajaip nike. 11 Selapuqne nike telaksaneang siq Roh saq sopoq nike ẽndah; sopoq-sopoq dengan teicanin paice saq husus menurut pekayunan Roh nike. 12 Almasih nike maraq awak manusie; awak nike sopoq, laguq bedowẽ luwẽq anggote. Selapuq anggote nike, timaqne luwẽq, laguq sopoq awak. 13 Maraq nike ẽndah ite selapuq, timaq dengan Yahudi atao dengan bangse-bangse lain, hambe-hambe atao dengan bẽbas; ite selapuq sampun tebaptis siq Roh saq pade nike, adẽq ite tejariang sopoq lẽq rage Almasih nike. Ite selapuq sepenoqne ẽndah ngalamin Roh saq sopoq nike. 14 Sẽngaq awak nike mẽsaq ndẽqne berasal lẽman sopoq anggote doang laguq luwẽq anggotene. 15 Lamun naẽ muni, "Tiang ndẽqne ime, keranaq nike tiang ndẽqne bagian lẽman awak," nike ndẽqne berarti bahwe naẽ nike ndẽqne bagian lẽman awak. 16 Dait lamun kentok muni, "Sẽngaq tiang ndẽq penenteng, make tiang ndẽqne bagian lẽman awak," nike ẽndah ndẽqne berarti bahwe kentok nike ndẽqne bagian lẽman awak. 17 Seandẽne selapuq awak nike jari penenteng doang, berembẽ awak nike bau dengah? Atao lamun selapuq awak nike jari kentok doang, berembẽ awak nike bau ngambuq? 18 Ite serioq bahwe Allah saq noloq anggote-anggote nike lẽq awak. Sopoq-sopoq tetoloq siq Allah lẽq taoqne menurut pekayunan-Ne. 19 Lamun selapuqne cume sopoq anggote doang, mbẽ saq tesebut awak? 20 Jari mule araq luwẽq anggote, laguq awak cume sopoq. 21 Keranaq nike, penenteng ndẽqne bau muni lẽq ime, "Tiang ndẽq merluang side!" atao ulu muni lẽq naẽ, "Tiang ndẽq merluang side!" 22 Sebalikne anggote-anggote awak saq teanggep lemah nike, ite perluang gati; 23 dait anggote-anggote saq ite anggep kurang solah, malahan nike anggote-anggote saq ite bẽng perhatian husus. Anggote-anggote awak saq ndẽq solah ruene, malahan lebih ite perhatiang. 24 Anggote-anggote awak saq sampun solah ruene, ndẽqne merluang perhatiante. Allah sampun nyusun awakte maraq nike sehingge anggote-anggote saq kurang solah tebẽng perhatian saq husus. 25 Siq care nike awak nike ndẽqne tebagi-bagi; sopoq-sopoq anggote saling perhatiang sopoq kance saq lainne. 26 Lamun sopoq anggote menderite, selapuq anggote saq lainne menderite ẽndah; lamun sopoq anggote tepuji, selapuq anggote saq lainne milu seneng. 27 Semeton-semeton senamian bareng-bareng jari rage Almasih dait side pade sopoq-sopoq ẽndah jari anggote lẽman rage nike. 28 Maraq nike ẽndah lẽq dalem jemaah, Allah sampun nentuang taoq jari macem-macem dengan: Penembẽqne rasul-rasul; kedue nabi-nabi, ketelu guru-guru, terus ie pade saq mauq paice jari miaq keajaipan-keajaipan, jari nyelahang dengan, jari nulung dengan lain, jari mimpin, dait jari bebaos kadu macem-macem base saq ajaip. 29 Ie pade ndẽqne selapuqne rasul, atao nabi, atao guru. Ndẽq selapuqne mauq paice jari miaq keajaipan, 30 atao jari nyelahang dengan, atao jari bebaos kadu macem-macem base saq ajaip, atao jari ngartiang base-base nike. 31 Keranaq nike, side pade harus berusahe pacu-pacu adẽqde mauq paice-paice saq paling utame. Laguq selanjutne niki tiang nyatayang lẽq side langan saq lebih utame.

1 Corinthians 13

1 Timaqne tiang tao ngeraos kadu macem-macem base malaẽkat, laguq lamun tiang ndẽq bedowẽ kasih, make napi saq tiang raosang nike cume jari maraq suaren gong beléq ongkatne doang. 2 Timaq tiang bedowẽ paice jari benubuat dait tiang nenaoq selapuq rahasie dait bedowẽ selapuq penenaoq, dait timaq tiang bedowẽ iman saq sempurne sehingge tiang bau miaq gunung ngalih, laguq lamun tiang ndẽq bedowẽ kasih, make tiang ndẽq bedowẽ arti napi-napi! 3 Maraq nike ẽndah seandẽne selapuq dowẽn tiang, tiang sedekahang tipaq dengan miskin, dait tiang serahang diriq tiang jari tetunuq, laguq lamun tiang ndẽq bedowẽ kasih, make selapuqne nike ndẽq araq manpaatne umaq tiang. 4 Kasih nike sabar, kasih nike murah atẽ, ie ndẽq talon atẽ. Ie ndẽq girang sesumbar, dait ndẽqne sombong. 5 Ie ndẽq angkuh, ndẽqne kasar, ie ndẽq maksaq dengan lain harus turut kemẽlẽqne mẽsaq, ndẽq becat sili, dait ndẽq dendem. 6 Ie ndẽqne seneng lẽq hal saq ndẽq adil, laguq ie cume seneng lẽq hal saq kenaq. 7 Ie tahen menderite dalem selapuq hal, percaye lẽq selapuq hal, beharep lẽq selapuq hal, dait tekun lẽq dalem selapuq hal. 8 Kasih nike ndẽqne gen uwah araq tutuqne, nubuat gen tutuq. Base saq ajaip gen tutuq, penenaoq gen musnah. 9 Sẽngaq penenaoqte dait nubuatte ndẽqne sempurne. 10 Laguq lamun saq sempurne sampun dateng, make saq ndẽq sempurne nike gen musnah. 11 Sewaktu tiang masih kodẽq, tiang ngeraos maraq kanak kodẽq, tiang bedowẽ perasaan maraq kanak kodẽq dait pikiran tiang ẽndah maraq kanak kodẽq. Laguq mangkin tiang sampun dẽwase, kelakuan tiang saq maraq kanak kodẽq sampun tiang tetẽh. 12 Napi saq ite serioq mangkin niki maraq lingon saq saru lẽq dalem kesene. Laguq ẽraq ite gen serioq langsung secare jelas. Mangkin tiang ndẽqman nenaoq selapuqne, laguq ẽraq tiang gen nenaoq selapuqne, maraq Allah wikan selapuqne mengenai diriq tiang. 13 Jari, ketelu hal niki saq tetep araq: Iman, pengharepan, dait kasih. Saq paling belẽq lẽq antare ketelune nike kasih.

1 Corinthians 14

1 Jariang kasih nike tujuan side pade saq paling utame. Dait berusahe ẽndah jari mauq paice-paice saq teican siq Roh Allah, terutame gati paice benubuat. 2 Dengan saq ngeraos kadu base-base saq ajaip, ie ndẽqne ngeraos tipaq manusie laguq tipaq Allah. Ndẽq araq dengan saq ngerti napi saq ie raosang, sẽngaq Roh Allah saq miaq ie ngucapang hal-hal saq rahasie nike. 3 Sebalikne dengan saq benubuat, ie ngeraos kance manusie; jari pesolah ie pade, ngebẽng nasẽhat dait hibur ie pade. 4 Dengan saq ngeraos kadu base saq ajaip, ie cume pesolah diriqne mẽsaq. Laguq dengan saq benubuat ie pesolah jemaah. 5 Bagus gati lamun semeton senamian tao ngeraos kadu base-base saq ajaip. Laguq saq paling bagus, lamun semeton senamian benubuat. Sẽngaq dengan saq benubuat lebih beraji ketimbang dengan saq tao ngeraos kadu base saq ajaip; lain halne lamun dengan saq ngeraos kadu base saq ajaip nike iniq jelasang mẽsaq napi saq ie ucapang nike adẽq bau pesolah selapuq jemaah. 6 Lamun misalne tiang dateng ojok side terus tiang ngeraos kadu macem-macem base saq ajaip napi manpaatne nike umaq side pade? Tetu-tetu ndẽq araq manpaatne! Lain halne lamun tiang nyatayang sopoq rahasie lẽman Allah, atao tiang jelasang sopoq hal mengenai Allah, atao tiang nyampẽang nubuat, atao tiang ngajahang. 7 Alat-alat tetabuhan saq ndẽq bedowẽ nyawe maraq misalne suling dait kecapi, lamun tepuniqang ndẽq keruan-ruan, berembẽ dengan nenaoq lagu napi saq tepuniqang nike? 8 Sopoq conto saq lainne malik: Lamun terompẽt tetiup semẽlẽ-mẽlẽ, sai saq gen siep lumbar perang? 9 Maraq nike ẽndah siq kepinteran side ngeraos kadu macem-macem base saq ajaip. Lamun siq kepinterande nike side bebase kadu base saq ndẽq jelas, ndẽq araq sopoq dengan juaq saq iniq ngerti napi saq side ucapang. Ucapan-ucapande nike gen sie-sie. 10 Lẽq dunie niki araq luwẽq gati base, laguq ndẽq araq sopoq juaq lẽman base-base nike saq ndẽq bedowẽ arti. 11 Laguq lamun tiang ndẽq ngerti base saq teucapang siq sopoq dengan, make dengan saq ngeraos kadu base saq ndẽq tiang ngerti nike jari dengan asing lẽq tiang, maraq nike juaq tiang lẽq dengan nike. 12 Mengenai side mẽsaq, tiang nenaoq side pade melẽt gati mauq paice-paice lẽman Roh Allah. Laguq saq terutame gati, side pade harus berusahe kadu kemampuande jari pesolah jemaah. 13 Keranaq nike dengan saq ngeraos kadu base saq ajaip, harus bedo'e adẽq ie ẽndah teicanin paice jari jelasang napi saq ie ucapang nike. 14 Sẽngaq lamun tiang bedo'e kadu base saq ajaip, roh tiang mule bedo'e laguq pikiran tiang ndẽq milu bedo'e. 15 Jari, napi saq harus tiang laksaneang? Niki saq tiang laksaneang: Tiang bedo'e siq roh tiang, laguq tiang ẽndah gen bedo'e siq pikiran tiang. Tiang gen benyanyi siq roh tiang dait tiang ẽndah gen benyanyi siq pikiran tiang. 16 Sẽngaq lamun side ngucap syukur lẽq Allah siq rohde doang, dait araq dengan lain saq ndẽq ngerti base ajaip lẽman Roh Allah nike, segerah dengan nike tao ngucapang, "Amin" lẽq do'e syukurde nike? Sẽngaq ie ndẽq nenaoq napi saq side ucapang. 17 Timaq do'e syukurde tipaq Tuhan nike solah gati, laguq do'e nike ndẽq pesolah dengan lain. 18 Tiang besyukur lẽq Allah sẽngaq tiang mẽsaq tao ngeraos kadu base saq ajaip nike lebih lẽman side pade. 19 Laguq lẽq dalem kumpulan-kumpulan ibadah tipaq Tuhan, tiang demenan ngucapang lime ucapan saq bau piaq dengan paham ketimbang ngucapang beribu-ribu ucapan kadu base saq ajaip, adẽq tiang bau ngajah dengan lain. 20 Semeton senamian, ndaq side bedowẽ pikiran maraq kanak-kanak. Lẽq hal kejahatan, side harus maraq kanak kodẽq. Laguq lẽq hal pikiran, side harus jari dengan saq dẽwase. 21 Lẽq dalem Hukum Taurat araq tetulis, "Manik Tuhan, 'Lẽman dengan-dengan saq bedowẽ base saq lain, dait lẽman biwih dengan-dengan pendateng, Tiang gen bemanik tipaq bangse niki, timaq maraq nike ie pade ndẽq gen dengahang Tiang.' " 22 Jari, paice ngeraos kadu base saq ajaip nike tande, ndẽqne jari dengan saq beriman, laguq jari dengan saq ndẽq beriman; dait paice jari benubuat nike tande, ndẽqne jari dengan saq ndẽq beriman, laguq jari dengan saq beriman. 23 Keranaq nike, lamun misalne lẽq dalem kumpulan jemaah, selapuq jemaah ngeraos kadu base ajaip, terus araq dateng dengan luah, atao dengan-dengan saq ndẽq percaye lẽq Almasih, pasti dengan-dengan nike gen anggep side pade selapuq sampun jogang! 24 Laguq lamun side selapuq benubuat, terus dateng dengan luah atao dengan saq ndẽq percaye lẽq Almasih, make hal-hal saq side kabarang nike gen nyatayang dose-dose dengan nike dait piaq ie sadar lẽq dose-dosene. 25 Hal-hal saq ndẽq penggitan dalem atẽne gen tenyatayang, sehingge ie gen ngerendahang diriqne, beterus nyembah Allah. Ie gen ngaku bahwe Allah tetu-tetu araq lẽq tengaq-tengaq side pade. 26 Jari, semeton senamian, napi arti selapuqne nike? Lamun side pade bekumpul, sebilang dengan harus araq saq teaturang: Sopoq dengan benyanyi, saq lain ngajahang, atao araq saq nyampẽang berite lẽman Allah, atao paice jari ngeraos kadu base saq ajaip, atao paice jari jelasang base saq ajaip nike, laguq selapuqne nike harus tekadu jari ngajahang dait jari pesolah selapuqne. 27 Lamun araq saq mẽlẽ ngeraos kadu base saq ajaip, harus araq due atao paling luwẽq telu dengan doang secare begiliran, dait harus araq ẽndah saq jelasang napi artine saq teucapang siq dengan saq ngeraos nike. 28 Lamun ndẽq araq saq tao jelasang hal nike, make dengan-dengan saq ngeraos kadu base saq ajaip nike harus engkah ngeraos lẽq dalem kumpulan ibadah nike. Alurang ie pade ngeraos lẽq dalem angenne mẽsaq tipaq Allah. 29 Umaq ie pade saq mauq paice jari nabi, cume due atao telu dengan lẽq antare ie pade saq kanggo benubuat, dait saq lain merhatiang napi saq ie pade ucapang nike. 30 Laguq lamun misalne berite lẽman Allah nike dateng tipaq sopoq dengan lain saq tokol lẽq dalem kumpulan ibadah nike, make dengan saq kenyeke ngeraos nike harus engkah ngeraos. 31 Siq care nike, semeton senamian sopoq-sopoq bau benubuat; adẽq selapuqne bau nerimaq perajahan dait mauq kekuatan. 32 Paice jari benubuat takluk tipaq nabi saq bedowẽ paice nike. 33 Sẽngaq Allah nẽnten suke kekacoan, laguq damẽ sejahtere. Maraq saq berlaku lẽq dalem selapuq jemaah Allah, 34 dengan nine harus tedoq lẽq dalem kumpulan jemaah. Ie pade ndẽq kanggo ngeraos. Ie pade harus taat lẽq prẽntah, maraq saq teatur lẽq Hukum Taurat. 35 Lamun ie pade mẽlẽ nenaoq sopoq hal, solahan ie pade beketuan lẽq semamene lẽq balẽ. Ndẽqne patut lamun araq dengan nine ngeraos lẽq dalem kumpulan jemaah. 36 Napi Manik Allah dateng lẽman side pade? Atao cume tipaq side doang manik nike tesampẽang? 37 Lamun araq dengan saq merase bedowẽ paice jari nabi, atao bedowẽ paice saq lain, dengan nike harus sadar bahwe napi saq tiang tulis niki prẽntah lẽman Tuhan. 38 Laguq lamun araq saq ndẽq mẽlẽ nerimaq, ndaq perhatiang ie. 39 Keranaq nike semeton senamian, pade berusahe adẽq mauq paice benubuat, dait ndaq balaq dengan saq mẽlẽ ngeraos kadu macem-macem base saq ajaip. 40 Laguq selapuqne harus telaksaneang secare bagus dait tertib.

1 Corinthians 15

1 Dait mangkin, semeton senamian, tiang mẽlẽ adẽq side pade inget malik lẽq Kabar Solah lẽman Allah saq tiang beriteang tipaq side laẽq. Side pade nerimaq dait percaye tipaq Almasih lantaran Kabar Solah nike. 2 Lamun side percaye sepenoq angen lẽq napi saq tiang beriteang nike, make Kabar Solah nike nyelametang side pade; kecuali lamun side percaye ndẽqne siq pengertian. 3 Napi saq tiang sampẽang tipaq semeton senamian nike, nike sampun tiang terimaq ẽndah. Saq paling penting, tiang sampẽang tipaq side bahwe Almasih ninggal lantaran dose-dosente maraq saq tetulis lẽq dalem Kitab Suci, tiang sampẽang tipaq side bahwe Almasih ninggal lantaran dose-dosente; 4 bahwe Ie temakamang, laguq sesampun nike teidupang malik lẽq jelo saq ketelu. Nike ẽndah tetulis lẽq Kitab Suci. 5 Tiang badaq ẽndah lẽq side bahwe Almasih saq teidupang malik nike nyatayang ẽndah diriq-Ne lẽq Kepas, dait sesampun nike tipaq kedue olas rasul. 6 Sesampun nike Ie nyatayang diriq ẽndah sekaligus tipaq lebih lẽman lime ratus pengiring-Ne. Luwẽq lẽman dengan-dengan nike masih idup jangke mangkin, cume pire dengan saq sampun ninggal. 7 Sesampun nike Almasih nyatayang diriq ẽndah tipaq Yakub dait sesampun nike tipaq selapuq rasul. 8 Saq penutuq gati Ie nyatayang diriq lẽq tiang ẽndah -- tiang saq maraq bebẽaq saq teanakang sendẽqman wayene! 9 Tiang niki rasul Tuhan saq paling hine. Tiang ndẽq patut tesebut rasul, sẽngaq tiang sampun nganiaye jemaah Allah. 10 Laguq lantaran rahmat Allah tiang jari maraq keadaan tiang saq mangkin. Dait ndẽq sie-sie Allah ngicanin rahmat-Ne lẽq tiang. Malahan tiang saq lelahan begawẽan ketimbang selapuq rasul saq lainne. Laguq nike setetune ndẽqne usahe tiang; nike rahmat Allah saq ngasihin tiang dait saq bekarye bareng kance tiang. 11 Jari, lẽman sai side nerimaq Kabar Solah nike -- timaq nike lẽman tiang atao lẽman rasul-rasul saq lain -- nike ndẽqne jari soal. Saq penting tiang pade beriteang Kabar Solah nike dait side percaye. 12 Lamun saq tiang pade beriteang nike bahwe Almasih sampun teidupang malik lẽman ninggal, kembẽq araq lẽq antare side saq bebase bahwe dengan ninggal ndẽqne gen teidupang malik? 13 Lamun tetu dengan ninggal ndẽq gen teidupang malik, nike artine Almasih ẽndah nẽnten teidupang malik lẽman ninggal. 14 Dait lamun misalne Almasih nẽnten teidupang malik lẽman ninggal, make sie-sie napi saq tiang pade beriteang dait sie-sie ẽndah side pade percaye. 15 Lebih lẽman nike, ternyate bahwe tiang pade beduste mengenai Allah, sẽngaq tiang pade beriteang bahwe Allah sampun ngidupang malik Almasih lẽman ninggal, padahal Allah nẽnten ngidupang Ie malik -- lamun seandẽne tetu, bahwe dengan ninggal ndẽq teidupang malik! 16 Sẽngaq lamun dengan ninggal ndẽq teidupang malik, make Almasih ẽndah nẽnten teidupang malik lẽman ninggal. 17 Dait lamun Almasih nẽnten teidupang malik, make sie-sie side pade percaye; nike artine side pade masih dalem keadaan bedose. 18 Siq care nike artine bahwe dengan-dengan saq sampun ninggal lẽq dalem Almasih, ndẽq bedowẽ harepan ẽndah. 19 Lamun pengharepante tipaq Almasih cume sewaktu ite masih idup lẽq dunie niki doang, make ite niki dengan saq paling rugi lẽman selapuq umat manusie lẽq dunie niki! 20 Laguq nyatene Almasih sampun teidupang malik lẽman ninggal. Ie jari saq penembẽq lẽman ie pade saq sampun ninggal. 21 Sẽngaq kematẽan tame ojok dalem dunie siq perantarean sopoq dengan, maraq nike ẽndah idup malik lẽman kematẽan teicanin tipaq manusie siq perantarean sopoq dengan ẽndah. 22 Sẽngaq pade maraq lẽq dalem Adam selapuq manusie ninggal, maraq nike ẽndah lẽq dalem Almasih selapuq dengan gen teidupang. 23 Laguq sopoq-sopoq gen teidupang menurut giliranne: Almasih jari saq penembẽq; beterus ẽraq lẽq waktu Ie rauh malik, sesampun nike giliran dengan-dengan saq jari dowẽn Almasih. 24 Sesampun nike baruq kiamat. Lẽq waktu nike Almasih gen binaseang selapuq pemrẽntahan, selapuq kekuasean, dait selapuq kekuatan; terus Ie gen nyerahang kekuasean-Ne sebagẽ Raje, tipaq Allah, Bapante. 25 Almasih harus tetep mrẽntah jangke Allah jariang selapuq musuh Almasih takluk lẽq Almasih. 26 Musuh saq paling penutuq saq gen tebinaseang nike kematẽan. 27 Lẽq dalem Kitab Suci tetulis maraq niki, "Allah sampun jariang selapuq-lapuqne takluk lẽq Almasih." Jelas bahwe saq temaksut "selapuq-lapuqne" nike ndẽq termasuk Allah, saq miaq selapuq-lapuqne nike takluk lẽq Almasih. 28 Laguq sesampun selapuqne tetaklukang lẽq Almasih, make Bije saq asalne lẽman Allah nike, gen taklukang diriq-Ne tipaq Allah saq sampun jariang selapuq-lapuqne takluk lẽq Allah. Make Allah mẽsaq gen jari selapuq-lapuqne lẽq dalem selapuq-lapuqne. 29 Lamun dengan ninggal ndẽq teidupang malik, kembẽq araq dengan saq tebaptis umaq dengan ninggal? Napi manfaatne ie pade ngelaksaneang hal nike? Lamun mule dengan ninggal tetu-tetu ndẽq gen teidupang malik, kembẽq ie pade ngelaksaneang hal nike? 30 Dait kembẽq ẽndah tiang pade mẽlẽ hadepin bahaye sebilang waktu? 31 Semeton senamian! Sebilang jelo tiang berandangan kance bahaye saq ngancem jiwe tiang, laguq hal nike jari kebanggean tiang lẽq dalem Deside Isa Almasih, Junjungante Saq Mulie lantaran side pade, napi saq tiang sampẽang niki kenaq. 32 Lamun nike cume lẽman pikiran manusie doang, napi untungne umaq tiang bejuang maraqne ngelawan binatang saq galak lẽq kote niki, lẽq Epesus? Lamun mule dengan ninggal ndẽq teidupang malik, make, "Silaqte bekelor dait nginem dait beseneng-seneng, sẽngaq lẽmaq ite gen ninggal." 33 Ndaq jangke tetipu! Pergaulan saq lengẽ nyẽdaq kebiasean saq bagus. 34 Pade sadar mangkin, dait ndaq gawẽq dose malik. Sepatutne side pade harus ilaq, bahwe lẽq antare side araq saq ndẽq kenal Allah. 35 Sang araq saq beketuan, "Berembẽ dengan ninggal teidupang malik? Awak saq berembẽ saq teicanin lẽq ie pade sesampun ie pade teidupang malik?" 36 Bodo gati! Lamun side nalet binẽq lẽq dalem tanaq, binẽq nike ndẽq gen tiwoq, lamun binẽq nike ndẽqman matẽ juluq. 37 Dait binẽq saq side talet lẽq dalem tanaq nike -- sang binẽq gandum atao binẽq lain -- ie cume tolang binẽq nike doang, laun ndẽqne selapuq tetaletan saq gen tiwoq. 38 Allah mẽsaq saq gen ngicanin binẽq nike rue saq solah menurut pekayunan-Ne. Lẽq sebilang macem binẽq, Allah ngicanin rue taletanne sopoq-sopoq. 39 Awak mahluk-mahluk saq bedowẽ nyawe ndẽqne pade selapuqne. Ruen awak manusie bẽde kance ruen awak binatang-binatang, dait ruen awak kedit-kedit bẽde ẽndah kance ruen awak empaq-empaq. 40 Maraq nike ẽndah araq awak sorge dait araq awak dunie, laguq kemuliean awak sorge bẽde kance awak dunie. 41 Kemuliean jelo lain kance kemuliean bulan. Bintang-bintang ẽndah bedowẽ kemulieanne mẽsaq. Malahan bintang-bintang nike sopoq-sopoq lain ẽndah kemulieanne. 42 Maraq nike halne ẽraq dengan-dengan ninggal saq teidupang malik. Awak saq tekubur nike, awak saq iniq sẽde, laguq awak saq teidupang malik nike awak saq ndẽq iniq sẽde. 43 Lẽq waktu awak nike tekuburang, awak nike hine; laguq teidupang malik dalem kemuliean. Lẽq waktu tekubur, awak nike lemah; laguq teidupang malik lẽq dalem kekuatan. 44 Awak saq tekubur, nike awak lẽman dunie; laguq sesampun idup malik, make awak nike awak saq teicanin siq Roh Allah. Araq awak saq lẽman dunie, araq ẽndah awak saq lẽman Roh Allah. 45 Dalem Kitab Suci tetulis maraq niki, "Manusie saq penembẽq, Adam, jari mahluk saq idup," laguq Adam saq penutuq nike Roh saq ngicanin idup. 46 Saq dateng juluan nike saq jasmani, ndẽq saq rohani. Saq rohani dateng mudian. 47 Adam saq penembẽq tejariang lẽman tanaq, laguq Adam saq kedue asalne lẽman sorge. 48 Dengan-dengan dunie niki maraq Adam saq penembẽq, saq tejariang lẽman tanaq, laguq dengan-dengan sorge nike maraq Ie saq rauh lẽman sorge. 49 Pade maraq ite mangkin, maraq Adam saq tejariang lẽman tanaq, make ẽraq ite gen jari maraq Ie saq lẽman sorge nike. 50 Maksut tiang, semeton senamian: Awak saq tejariang lẽman daraq dait daging ndẽq mauq taoq lẽq dalem Kerajaan Allah; dait awak saq iniq binase ndẽqne iniq jari kekel. 51 Pade perhatiang rahasie niki: Ndẽqne selapuqte gen ninggal, laguq ite selapuqne gen berobah. 52 Hal niki gen selung-selung telaksane sepengkejep mate, sewaktu terompẽt penutuq tetiup. Sẽngaq sewaktu kedengahan suare terompẽt nike, dengan-dengan ninggal gen teidupang malik kadu awak saq kekel, dait ite selapuqne gen terobah. 53 Awakte saq iniq ninggal niki harus tegentiq siq awak saq ndẽq iniq ninggal, dait awak saq lẽman dunie harus tegentiq siq awak saq lẽman sorge. 54 Lamun awak saq iniq ninggal sampun tegentiq siq awak saq ndẽq iniq ninggal, dait awak saq lẽman dunie sampun tegentiq siq awak saq lẽman sorge, lẽq waktu nike baruq telaksane napi saq tetulis lẽq dalem Kitab Suci, "Kematẽan sampun temusnahang; kemenangan sampun dateng!" 55 "Wahai maut, lẽq mbẽ kemenangande? Wahai maut, lẽq mbẽ racunde?" 56 Racun maut nike dose, dait dose ngelaksaneang kuasene langan Hukum Taurat. 57 Laguq syukur tipaq Allah; Ie ngicanin ite kemenangan langan Deside Isa Almasih, Junjungante Saq Mulie. 58 Keranaq nike, semeton senamian saq tiang kasihin, side pade harus kuat dait kukuh. Pade terus pacu-pacu begawẽan bagi Tuhan. Sẽngaq side pade nenaoq bahwe selapuq saq side pade laksaneang bagi Tuhan, ndẽqne sie-sie.

1 Corinthians 16

1 Mangkin mengenai kẽpẽng saq side pade mẽlẽ sumbang tipaq dengan-dengan solẽh, tiang anjurang adẽq side pade laksaneang menurut petunjuk saq tiang bẽng tipaq jemaah-jemaah lẽq Galatia. 2 Lẽq jelo penembẽq sebilang minggu, side pade sopoq-sopoq harus kelin kẽpẽng sesuai penghasilanne sesuai pengasilande. Toloq kẽpẽng nike jangke tiang dateng, adẽq lẽq waktu nike ndẽqne perlu malik tekumpulang. 3 Laun lamun tiang dateng, tiang gen ngutus dengan-dengan saq sampun side pade anggep patut. Tiang gen ngebẽng surat lẽq ie pade, adẽq ie pade jauq kẽpẽng sumbangan nike ojok Yerusalem. 4 Dait lamun teanggep kenaq tiang milu ẽndah bareng kance ie pade, make tiang gen lalo bareng kance ie pade. 5 Tiang gen jangoq side pade sesampun tiang liwat lẽq Makedonia, sẽngaq tiang beniat gen liwat lẽq derike. 6 Sang tiang gen madẽq piro jelo ngonẽqne kance side pade, atao sang sengonẽq musim telih. Sesampun nike side pade bau tulung tiang ngelanjutang kelampan tiang ojok taoq saq lainne. 7 Tiang ndẽq mẽlẽ jangoq side pade sekedar nyelaloq doang. Lamun Tuhan ngijinang, tiang gen ndot ngonẽqan malik kance side pade. 8 Laguq tiang gen ndot lẽq Epesus, jangke jelo Pentakosta, 9 sẽngaq lẽq deriki luwẽq kesempatan jari ngelaksaneang pegawẽan saq bemanpaat, timaq luwẽq ẽndah dengan saq nentang pegawẽan nike. 10 Lamun Timotius dateng, terimaq ie bagus-bagus adẽq ie beridap betah lẽq antare side pade, sẽngaq ie maraq tiang ẽndah begawẽan bagi Tuhan. 11 Ndaq jangke araq saq ngerẽmẽhang ie. Tulung ie adẽqne bau selamet ngelanjutang kelampanne malik tulak ojok tiang, sẽngaq tiang ngantih kedatenganne bareng kance semeton-semeton saq lainne. 12 Mengenai semetonte Apolos, sampun pire kali tiang suruq ie adẽq bareng kance semeton saq lainne lumbar jangoq side pade. Laguq ie ndẽqman merase yakin bahwe ie harus lumbar mangkin. Laguq laun lamun araq kesempatan, ie pasti gen dateng. 13 Side pade harus waspade dait kuat lẽq dalem iman. Ndaq takut dait harus tetep kuat. 14 Selapuq saq side pade laksaneang, laksaneang nike lẽq dalem kasih. 15 Side pasti kenal kance Stepanus dait keluargene; ie pade saq penembẽq jari percaye tipaq Almasih lẽq Akaya. Ie pade sepenoq angenne begawẽan husus jari ngelayanin dengan-dengan saq tehususang bagi Allah. 16 Keranaq nike, pade taat lẽq dengan-dengan saq maraq nike, dait dengan-dengan lain saq begawẽan dait ngelayanin bareng ie pade. 17 Tiang seneng siq kedatengan Stepanus, Portunatus dait Akaikus, sẽngaq ie pade saq nyukupang napi saq masih kurang lẽq side pade. 18 Ie pade sampun miaq angen tiang jari seneng, maraq ie pade nyenengang angen side. Keranaq nike, side pade harus hargein dengan-dengan saq maraq nike. 19 Jemaah-jemaah lẽq Asia Kodẽq nyampẽang salam tipaq side pade. Akwila kance Priskila dait jemaah saq bekumpul lẽq balẽ ie pade ẽndah ngirim salam tipaq side pade. 20 Selapuq semeton lẽq deriki nyampẽang salam tipaq side pade. Pade besalam-salaman sebagẽ semeton seiman. 21 Tiang romboq lẽq deriki salam saq tiang tulis mẽsaq: 22 Dengan saq ndẽq ngasihin Tuhan, pasti ie tekutuk! Tuhan gen gelis rauh! 23 Rahmat Junjungan Saq Mulie, Deside Isa Almasih araq bareng kance side. 24 Kasih tiang araq bareng kance side selapuq lẽq dalem Deside Isa Almasih.

2 Corinthians 1

1 Semeton senamian jemaah Allah lẽq Korintus dait selapuq dengan-dengan saq tehususang bagi Allah lẽq selapuq wilayah Akaya. Tiang, Paulus, rasul Deside Isa Almasih, saq teangkat siq pekayunan Allah, bareng-bareng kance semetonte Timotius, 2 beharep semoge Allah Bapante dait Junjungan Saq Mulie, Deside Isa Almasih ngicanin rahmat dait damẽ sejahtere tipaq side pade. 3 Puji syukur tipaq Allah, Bapa lẽman Junjungante Saq Mulie, Deside Isa Almasih. Ie Bapa saq penoq siq belas kasihan, dait Allah sumber selapuq penghiburan. 4 Ie hibur tiang pade lẽq sebilang penderitean saq tiang pade alamin, adẽq siq penghiburan saq tiang pade terimaq lẽman Allah nike, tiang pade bau ẽndah hibur selapuq dengan saq dalem penderitean. 5 Kesengsarean-kesengsarean saq tealamin siq Almasih sampun luwẽq tiang pade alamin ẽndah. Dait langan Almasih ẽndah, tiang pade nerimaq penghiburan saq melimpah. 6 Lamun tiang pade ngalamin penderitean, nike setetune jari penghiburan dait keselametan side pade. Lamun tiang pade nerimaq penghiburan, make side pade milu ẽndah nerimaq penghiburan sehingge side pade mauq kekuatan adẽq tabah dalem kesengsarean-kesengsarean maraq saq tiang pade alamin ẽndah. 7 Tiang pade tetep yakin dait ndẽq uwah ragu-ragu mengenai side pade, sẽngaq tiang pade nenaoq bahwe side pade milu menderite kance tiang pade. Dait lantaran nike side pade milu ẽndah nerimaq penghiburan bareng kance tiang pade. 8 Semeton senamian! Tiang pade mẽlẽ side pade nenaoq mengenai penderitean saq tiang pade alamin lẽq wilayah Asia Kodẽq. Penderitean saq tiang pade tanggung nike berat gati sehingge tiang pade ndẽq beharep malik gen idup; 9 idapne maraq sampun tehukum siq hukuman matẽ doang. Laguq hal nike telaksane adẽq tiang pade ndaq beharep lẽq kekuatan mẽsaq, laguq lẽq Allah saq ngidupang dengan ninggal. 10 Ie saq sampun nyelametang tiang pade lẽman bahaye kematẽan saq belẽq nike. Dait Ie ẽndah saq gen nyelametang tiang pade ẽraq lẽq jelo-jelo saq gen dateng, sẽngaq tipaq Ie tiang pade beharep. 11 Tiang pade yakin bahwe side pade do'eang tiang pade, adẽq luwẽq dengan ngucapang syukur tipaq Allah lantaran paice saq tiang pade terimaq sẽngaq luwẽqne do'e ie pade umaq tiang pade. 12 Tiang pade bangge, sẽngaq atẽ nurani tiang pade ngebẽng kesaksian tipaq tiang pade bahwe idup tiang pade lẽq dunie niki -- terutame hubungan tiang pade kance side pade sampun tiang pade laksaneang secare ihlas dait murni. Tiang pade ngelaksaneang hal nike, ndẽqne siq kebijaksanean manusie, laguq siq rahmat Allah. 13 Saq tiang pade tulis tipaq side pade nike cume mengenai hal-hal saq side pade bau bace dait ngerti. Tiang beharep side pade tetu-tetu ngerti lẽq tiang pade. Siq care nike, lẽq jelo kerauhan Junjungan Saq Mulie Deside Isa ẽraq, side pade gen bangge lẽq tiang pade, maraq tiang pade ẽndah bangge lẽq side pade. 15 Lantaran keyakinan nike lẽq penembẽqne tiang ngerencaneang jari jangoq side pade adẽq side pade mauq rahmat saq kedue kaline. 16 Tiang bedowẽ maksut jangoq side pade lẽq kelampan tiang ojok Makedonia, dait selaloq malik lẽq side sewaktu tiang tulak, adẽq side pade bau tulung tiang ngelanjutang kelampan ojok Yudea. 17 Laguq tiang sampun ngerobah niat tiang nike; nah, napi nike artine pendirian tiang ndẽq tetep? Sewaktu miaq rencane, napi tiang miaq rencane menurut kemẽlẽq tiang mẽsaq, semendaq ngeraos, "Enggih" dait karing semendaqne "Ndẽq"? 18 Demi Allah saq setie, janji tiang lẽq side ndẽqne "Enggih" dait "Ndẽq". 19 Sẽngaq Deside Isa Almasih, Bije saq asalne lẽman Allah, saq teberiteang tipaq side siq Silwanus, Timotius, dait siq tiang mẽsaq ndẽqne "Enggih" atao "Ndẽq". Laguq sebalikne lẽq dalem Deside Isa Almasih cume araq "Enggih". 20 Sẽngaq Almasih nike "Enggih" bagi selapuq janji Allah. Siq dasar nike ite ngucapang "Amin" jari mulieang Allah. 21 Sẽngaq Ie saq sampun neguqang tiang pade bareng-bareng kance side lẽq dalem Almasih, nike Allah saq sampun nyuciang dait ngesahang ite. 22 Keranaq nike Allah sampun ngesahang ite jari dowẽ-Ne, dait ngicanin Roh Suci lẽq dalem atẽnte sebagẽ jaminan bahwe Ie gen ngicanin ite selapuq saq Ie janjiqang. 23 Allah jari saksi tiang -- sẽngaq Ie wikan angen tiang -- bahwe tiang burung lumbar ojok Korintus, sẽngaq tiang ngasihin side pade. 24 Tiang ndẽq maksaq side pade mengenai napi saq harus side pade percaye, sẽngaq side pade sampun tetu-tetu percaye lẽq Almasih. Tiang cume begawẽan bareng-bareng kance side pade adẽq side pade sayan bahagie.

2 Corinthians 2

1 Keranaq nike tiang sampun miaq keputusan ndẽq gen dateng malik ojok side lẽq waktu angen tiang sedih. 2 Sẽngaq lamun tiang miaq side pade jari sedih, sai malik saq tao hibur tiang, selain dengan-dengan nike ẽndah saq sampun tiang piaq sedih angenne? 3 Keranaq nike tiang nulis surat niki tipaq side, adẽq lamun tiang dateng, ndaq tiang tepiaq jari sedih siq ie pade saq seharusne miaq tiang seneng. Sẽngaq tiang yakin bahwe lamun tiang seneng, make side selapuqne pasti gen seneng ẽndah. 4 Tiang nulis tipaq side siq atẽ saq sedih dait kuatir dait luwẽq nyugulang aiq mate. Maksut tiang ndẽqne adẽq side jari sedih, laguq adẽq side pade nenaoq bahwe tiang tetu-tetu ngasihin side pade. 5 Lamun araq dengan saq miaq dengan jari sedih, make hal nike ie laksaneang ndẽqne tipaq tiang, laguq tipaq selapuqde atao sekurang-kurangne pire dengan lẽman side, adẽq tiang ndẽq ngelebihang raos. 6 Lẽq dengan saq maraq nike, hukuman saq teputusang tipaq ie siq separo lebih lẽman side, sampun cukup. 7 Mangkin side pade harus ngampunin ie dait hibur ie, adẽq ie ndaq binase lantaran kesedihan saq berat gati. 8 Keranaq nike tiang tunas, adẽq side pade nyatayang malik lẽq ie bahwe side pade tetu-tetu ngasihin ie. 9 Tiang nulis surat niki tipaq side siq maksut jari nguji side pade, napi side pade tetep taat dalem selapuq hal. 10 Lamun side ngampunin dengan saq sampun miaq kesalaqan lẽq side make tiang ẽndah ngampunin dengan nike. Sẽngaq napi saq sampun tiang ampunin -- lamun mule araq saq perlu teampunin -- nike tiang ampunin lẽq arepan Almasih jari kesolahan side pade. 11 Tiang laksaneang nike adẽq Belis ndaq mauq kesempatan jari nguasein ite; sẽngaq ite nenaoq rencane-rencanene. 12 Sewaktu tiang dateng lẽq Troas siq maksut jari beriteang Kabar Solah mengenai Almasih, Tuhan sampun bukaqang tiang langan jari begawẽan lẽq taoq nike. 13 Laguq tiang ndẽq tenang sẽngaq lẽq derike ndẽq bedait kance semetonte Titus. Jari tiang bepamit lẽq dengan-dengan lẽq taoq nike terus lalo ojok Makedonia. 14 Laguq syukur tipaq Allah! Ie tetep mimpin tiang pade milu lẽq arak-arakan kemenangan-Ne. Allah kadu tiang pade adẽq berite mengenai Almasih nyebar maraq ambu sengẽh saq ambune dateng mbẽ-mbẽ. 15 Sẽngaq tiang pade maraq ambu sengẽh saq asalne lẽman Almasih bagi Allah lẽq tengaq-tengaq dengan saq teselametang dait saq tebinaseang, tipaq dengan saq tebinaseang nike, tiang maraq ambu menyan dengan ninggal, dait tipaq dengan saq teselametang nike, tiang niki maraq ambu sengẽh saq datengang kehidupan. Laguq sai saq sanggup ngelaksaneang tugas nike? 17 Tiang pade ndẽqne maraq luwẽq dengan saq boyaq keuntungan lẽman Manik Allah. Tujuan-tujuan tiang pade murni, sẽngaq tiang pade tetugasang siq Allah. Dait Allah mẽsaq cingakin bahwe tiang pade nyampẽang berite nike sebagẽ hambe-hambe Almasih.

2 Corinthians 3

1 Napi hal niki maraqne tiang pade mulai puji diriq tiang pade? Atao napi perlu tiang pade petitoqang surat pujian tipaq side pade, atao lẽman side pade maraq saq teperluang siq dengan-dengan lain? 2 Side mẽsaq saq jari surat pujian tiang pade, saq tetulis lẽq dalem atẽn tiang pade dait saq bau tetaoq dait tebace siq sebilang dengan. 3 Ie pade bau serioq bahwe side pade surat saq tetulis siq Almasih, saq tekirim langan tiang pade. Surat nike ndẽqne tetulis kadu mangsi, laguq kadu Roh Allah saq idup; ndẽq ẽndah lẽq atas batu tulis, laguq lẽq atẽ manusie. 4 Tiang pade bebase maraq nike lantaran keyakinan tiang pade lẽq Allah langan Almasih. 5 Tiang pade ndẽq bedowẽ sopoq alasan jari nyatayang bahwe tiang pade sanggup ngelaksaneang pegawẽan niki, laguq Allah saq ngicanin kemampuan nike tipaq tiang pade. 6 Allah saq jariang tiang pade mampu jari pelayan lẽq sopoq perjanjian saq baru; perjanjian saq beharep lẽq Roh Allah, ndẽqne lẽq hukum saq tetulis. Sẽngaq saq tetulis nike jauq kematẽan, laguq Roh Allah nike ngicanin idup. 7 Sewaktu perjanjian saq jauq kematẽan nike tepiaq dait teukir lẽq batu, cahaye Allah besinar menah tandur lẽq penjarupan nabi Musa. Cahayene menah gati sehingge bangse Israel ndẽqne sanggup serioq penjarupan nabi Musa, timaq cahaye lẽq penjarupanne nike sampun saru lẽq waktu nike. Lamun saq jauq kematẽan nike tesahang siq kemuliean saq belẽq, 8 pasti perjanjian saq tepiaq siq Roh Allah, tesahang siq kemuliean saq belẽqan malik. 9 Lamun perjanjian saq ngukum manusie maraq nike muliene, pasti gen muliean malik perjanjian saq gen miaq manusie tejariang kenaq lẽq arepan Allah sehingge hubungan manusie kance Allah jari solah malik. 10 Jari bau teparan bahwe napi saq laẽq mulie, sampun ndẽq mulie malik lantaran kemuliean saq mangkin niki. 11 Lamun saq cume tahen sementare, maraq nike muliene, pasti napi saq kekel nike gen muliean malik. 12 Sẽngaq tiang pade bedowẽ harepan maraq nike, make tiang pade bani ngeraos maraq nike. 13 Tiang pade ndẽq maraq nabi Musa saq ngilipang penjarupanne kadu kerudung adẽq bangse Israel ndẽq serioq cahaye Tuhan saq gen telang lẽman penjarupanne. 14 Pikiran ie pade sampun tetutup. Dait jangke jelo niki ẽndah pikiran ie pade masih tetutup siq kerudung lẽq waktu ie pade bace perjanjian saq laẽq nike. Kerudung nike cume bau tebukaq lamun dengan araq lẽq dalem Almasih. 15 Mangkin ẽndah lamun ie pade bace kitab Musa, kerudung nike masih nutup pikiran ie pade. 16 Laguq lamun sopoq dengan bebalik tipaq Tuhan, kerudung nike teangkat lẽman muen dengan nike. 17 Tuhan nike Roh, dait lẽq mbẽ Roh Allah araq, lẽq derike ẽndah araq kemerdẽkean. 18 Mangkin muente selapuq ndẽq tetutup siq kerudung, dait ite nyatayang kemuliean Junjungan Saq Mulie Deside Isa Almasih. Dait lantaran nike ite secare terus-menerus terobah adẽq jari maraq Ie; sayan ngonẽq ite sayan mulie. Kemuliean nike asalne lẽman Tuhan, dait Roh nike Tuhan.

2 Corinthians 4

1 Tiang pade laksaneang pegawẽan niki lantaran kemurahan Allah. Keranaq nike tiang pade ndẽq telang semanget. 2 Tiang pade ndẽq kadu care saq nyeboq-nyeboq saq merilaq. Tiang pade ndẽq mẽlẽ licik begawẽan atao palsuang Manik Allah. Sebalikne tiang pade ngelayanin Allah siq atẽ saq murni menurut pekayunan-Ne. Keranaq nike, tiang pade ijinang selapuq dengan nilai diriq tiang pade lẽq dalem atẽ nurani ie pade lẽq arepan Allah. 3 Lamun Kabar Solah saq tiang pade beriteang nike masih ndẽqman tepahamin ẽndah, make cume dengan-dengan saq kenyeke nuju keancuran doang saq ndẽq paham, 4 nike dengan-dengan saq ndẽq percaye, saq pikiranne sampun tebuteang siq penguase jahat jaman mangkin niki, sehingge ie pade ndẽq serioq cahaye Kabar Solah mengenai kemuliean Almasih, saq jari gambaran Allah. 5 Berite saq tiang pade sampẽang nike ndẽqne berite mengenai tiang mẽsaq. Berite nike berite mengenai Deside Isa Almasih; bahwe Ie Tuhan; dait tiang pade hambe-hambe side pade lantaran Almasih. 6 Allah saq bemanik, "Lẽman peteng tiwoq cahaye." Allah nike ẽndah saq niwoqang cahaye nike lẽq dalem atẽnte, adẽq terang pikirante jari pahamin kemuliean Allah saq besinar lẽq penjarupan Almasih. 7 Laguq harte rohani saq solah nike tiang pade toloq lẽq dalem gerabah, nike diriq tiang mẽsaq. Siq care nike nyate bahwe keagungan kuase nike asalne lẽman Allah dait ndẽqne lẽman tiang pade. 8 Tiang pade tetindes lẽq dalem selapuq hal, laguq tiang pade ndẽq kejepit. Tiang pade bingung, laguq ndẽq jangke putus ase. 9 Tiang pade teaniaye, laguq tiang pade ndẽq teadẽqang mẽsaq-mẽsaq. Dait timaq tiang pade kereng tetimpak jangke geriq, laguq tiang pade ndẽq matẽ. 10 Ninggal-Ne Almasih masih tetep beridap lẽq awak tiang pade, adẽq kehidupan-Ne ẽndah jari nyate lẽq awak tiang pade. 11 Sengonẽq tiang pade idup, tetep tiang pade teancem siq kematẽan lantaran Deside Isa, adẽq siq care nike kehidupan Deside Isa ẽndah bau tenyatayang lẽq awak tiang pade saq iniq binase niki. 12 Niki artine bahwe lẽq dalem diriq tiang pade, araq kematẽan saq berusahe nyematẽq tiang pade, laguq tiang pade seneng bahwe araq kehidupan saq kenyeke giat lẽq dalem diriqde. 13 Lẽq dalem Kitab Suci tetulis maraq niki, "Tiang percaye, keranaq nike tiang ngeraos". Siq semanget percaye saq maraq nike ẽndah, tiang pade ngeraos sẽngaq tiang pade percaye. 14 Tiang pade yakin bahwe Allah saq sampun ngidupang malik Deside Isa Almasih, gen ngidupang tiang pade ẽndah bareng Deside Isa, dait gadingang side pade kance tiang pade ojok arepan-Ne. 15 Selapuqne nike jari kepentingan side. Sẽngaq sayan luwẽq dengan nerimaq rahmat, sayan luwẽq ẽndah do'e syukur saq tesampẽang tipaq Allah; siq care nike Allah temulieang. 16 Keranaq nike tiang pade ndẽq telang harepan, timaq tiang pade secare lahiriah jari sayan lemah laguq secare rohani tiang pade tejariang baru sebilang jelo. 17 Dait penderitean saq dẽang niki saq tiang pade alamin sementare, gen ngasilang sopoq kemuliean saq belẽq dait kekel. Kemuliean nike belẽqan lamun tebanding siq penderitean nike. 18 Sẽngaq tiang pade ndẽq merhatiang hal-hal saq penggitan, laguq hal-hal saq ndẽq penggitan. Sẽngaq saq penggitan cume tahen sementare, laguq saq ndẽq penggitan nike kekel selaẽq-laẽqne.

2 Corinthians 5

1 Sẽngaq tiang pade nenaoq bahwe lamun balẽ -- nike awak -- saq taoq ite ndot lẽq gumi niki tebungkar, Allah gen nyedieang ite sopoq balẽ lẽq sorge, saq tepiaq siq Allah mẽsaq dait saq tahen selaẽq-laẽqne. 2 Lẽq dalem balẽ saq mangkin niki, ite ngeluh sẽngaq ite melẽt gati ndot lẽq dalem balẽnte saq lẽq sorge nike. 3 Balẽ nike awakte saq baru. 4 Sengonẽq ite ndot lẽq dalem balẽ saq lẽman dunie niki, ite ngeluh sẽngaq bandeante berat. Ndẽqne lantaran ite melẽt lepas lẽman awakte saq lẽman dunie niki, laguq lantaran ite melẽt kadu awak saq lẽman sorge nike, adẽq awakte saq iniq matẽ niki tekuasein siq saq idup. 5 Malahan Allah mẽsaq saq nyiepang ite jari hal nike, dait Ie ngicanin Roh-Ne tipaq ite jari jaminan. 6 Keranaq nike atẽn tiang pade tetep merase kuat. Tiang pade nenaoq bahwe sengonẽq tiang pade masih ndot lẽq dalem awak tiang pade niki, tiang pade masih jaoq lẽman Tuhan. 7 Sẽngaq tiang pade idup siq dasar percaye tipaq Almasih, ndẽqne siq dasar lẽq napi saq bau teserioq, 8 keranaq nike atẽn tiang pade jari kuat. Tiang pade demenan lepas lẽman awak tiang pade niki, adẽq bau ndot ngiring Tuhan. 9 Keranaq nike tiang pade berusahe pacu-pacu jari nyenengang Ie, timaq sewaktu tiang pade masih araq lẽq awak tiang pade lẽq dunie, atao lẽq luahne. 10 Sẽngaq pasti ite selapuq gen tejauq ojok arepan pengadilan Almasih, dait sopoq-sopoq gen mauq balesan sesuai kance perbuatanne lẽq dunie niki -- perbuatan solah atao jahat. 11 Tiang pade nenaoq napi artine takut lẽq Tuhan; keranaq nike tiang pade berusahe ngeyakinang dengan. Allah wikan lẽq tiang pade, dait tiang harep side pade ẽndah kenal tiang pade lẽq dalem atẽnde. 12 Siq care niki tiang pade ndẽq tunas adẽq side pade muji diriq tiang. Tiang pade cume mẽlẽ ngebẽng sopoq alasan saq solah lẽq side adẽq jari bangge lẽq tiang pade, adẽq side pade nenaoq berembẽ side pade harus jawab dengan-dengan saq utameang rue dengan dait ndẽq utameang sipatne. 13 Lamun tiang pade ruene maraq dengan jogang, nike demi kepentingan Allah. Dait lamun tiang pade ruene waras, nike demi kepentingan side. 14 Kasih Almasih saq nguasein tiang pade; dait tiang pade sadar bahwe lamun sopoq dengan sampun ninggal umaq selapuq dengan, make artine bahwe selapuq dengan sampun ninggal. 15 Almasih ninggal jari selapuq dengan, adẽq dengan-dengan saq idup, ndẽqne idup malik umaq diriqne mẽsaq, laguq umaq Almasih saq sampun ninggal dait teidupang malik demi kepentingan ie pade. 16 Keranaq nike, tiang pade ndẽq malik nilai dengan menurut ukuran manusie. Mule tiang pade sampun nilai Almasih secare manusie, laguq mangkin ndẽq maraq nike malik. 17 Jari sai saq araq lẽq dalem Almasih, ie ciptean baru: Saq laẽq sampun ndẽq araq malik, setetune saq baru sampun dateng. 18 Selapuqne nike asalne lẽman Allah. Langan Almasih Allah jariang hubungante jari solah malik kance Ie, terus ite tetugasang adẽq dengan-dengan lain ẽndah bau solah hubunganne kance Allah. 19 Tiang pade beriteang bahwe siq perantarean Almasih, Allah jariang hubungan manusie kance Ie jari solah malik. Hal nike tejariang siq Allah dait Allah nẽnten nuntut selapuq kesalaqan-kesalaqan saq sampun tepiaq siq manusie tipaq diriq-Ne. Dait tiang pade sampun tetugasang siq Allah jari beriteang kabar nike. 20 Jari, tiang pade utusan-utusan Almasih. Allah sampun nyampẽang manik-Ne langan tiang pade. Demi pesẽngan Almasih, sanget siq tiang pade tunas: Pade terimaq paice lẽman Allah saq bau miaq side pade tedamẽang kance Allah! 21 Almasih nẽnten bedose, laguq Allah jariang Ie nanggung dosente, adẽq ite tejariang kenaq lẽq arepan-Ne sehingge hubungante kance Allah jari solah malik.

2 Corinthians 6

1 Lantaran tiang pade bareng-bareng begawẽan ngiring Allah, make sanget siq tiang pade tunas ndaq side pade sie-sieang rahmat Allah saq sampun side pade terimaq nike. 2 Lẽq Kitab Suci, Allah bemanik, "Lẽq waktu Tiang seneng, Tiang sampun dengahang side, dait lẽq jelo penyelametan, Tiang sampun nulung side." Mangkin niki waktune Allah seneng, mangkin niki jelo penyelametan nike! 3 Tiang pade ndẽq mẽlẽ pelayanan tiang pade tesalaqang, keranaq nike tiang pade berusahe ndẽq ngebẽng ndẽq ngebẽng sopoq dengan juaq jari ngelaksaneang hal nike. 4 Sebalikne, dalem selapuq hal, tiang pade nyatayang bahwe tiang pade hambe-hambe Allah. Sẽngaq, segale macem kesulitan sampun tiang pade alamin dait tiang sabar: 5 Tiang pade tesiksaq, tebui, tekembul; tiang pade begawẽan Jangke lelah, kereng ndẽq tindoq dait kereng ẽndah ndẽq bedowẽ keloran. 6 Secare tulus, bijaksane, sabar dait murah atẽ, tiang pade nyatayang bahwe tiang pade hambe Allah. Tiang pade ẽndah beharep sepenoq angen lẽq pertulungan Roh Allah, dait siq kasih saq ihlas, 7 dait dalem kebenaran dait kekuasean Allah, tiang pade nyatayang bahwe tiang pade hambe-hambe Allah. Tiang pade beharep lẽq pekayunan Allah jari senjate tiang pade jari nyerang atao bẽle diriq. 8 Tiang pade tehormatin, laguq tehine ẽndah; tepuji, dait tepitnah ẽndah. Timaq tiang pade jujur, tiang pade tetuduh ndẽq jujur. 9 Tiang pade ndẽq teanggep kesohor, laguq tiang pade tekenal siq selapuq dengan. Tiang pade teparan matẽ, laguq nyatene tiang pade masih idup. Timaq tiang pade teaniaye, tiang pade ndẽq matẽ. 10 Timaq angen tiang pade tepiaq asẽq, laguq tiang pade tetep seneng ẽndah. Ruene tiang pade miskin, laguq tiang pade sampun miaq luwẽq dengan jari sugih. Ruene tiang pade ndẽq bedowẽ napi-napi, laguq setetune tiang pade bedowẽ selapuq-lapuqne. 11 Semeton senamian saq tiang kasihin lẽq Korintus! Tiang pade sampun terus-terang lẽq side. Selapuq isi atẽn tiang pade sampun tiang pade sampẽang. 12 Lẽq dalem atẽn tiang pade, araq taoq saq belẽq umaq side, laguq kodẽq gati taoq umaq tiang pade lẽq dalem atẽnde. 13 Mangkin, alurang tiang ngeraos maraq lẽq anak-anak tiang mẽsaq. Pade bukaq atẽnde umaq tiang pade. 14 Ndaq side bepasangan kance dengan-dengan saq ndẽq beriman lẽq Deside Isa; hal nike ndẽqne paut. Ndẽqne mungkin hal saq kenaq iniq besopoq kance saq jahat! Napi iniq cahaye besopoq kance peteng? 15 Napi kancen pade antare Almasih dait Belial? Napi kancen pade dengan saq beriman lẽq Almasih dait dengan saq ndẽq beriman lẽq Almasih? 16 Napi hubunganne antare gedẽng Allah kance berhale? Ite niki gedẽng Allah saq idup. Allah mẽsaq bemanik, "Tiang gen araq lẽq tengaq-tengaq ie pade, dait idup bareng kance ie pade. Tiang gen jari Allah ie pade, dait ie pade gen jari umat Tiang. 17 Keranaq nike, bilin dengan-dengan saq ndẽq kenal Allah nike, dait kelin diriqde lẽman ie pade. Ndaq gati berubungan kance saq najis, make Tiang gen nerimaq side. 18 Tiang gen jari Bapa side, dait side gen jari bije-bije Tiang, maraq nike manik Tuhan Saq Mahekuase."

2 Corinthians 7

1 Semeton senamian saq tiang kasihin! Selapuq janji nike tetujuang tipaq ite. Keranaq nike ite harus persiq diriq lẽman selapuq hal saq najisang awak dait rohte. Ite harus takut lẽq Allah, adẽq ite bau idup husus umaq Ie lẽq dalem kesempurnean. 2 Terimaq tiang pade lẽq dalem atẽnde. Tiang pade ndẽq gawẽq salaq lẽq sai-sai, dait ndẽq uwah araq dengan saq tiang pade rugiang. Tiang pade ndẽq uwah boyaq keuntungan lẽman sai-sai. 3 Tiang sampẽang maraq nike, ndẽqne jari nyalahang side pade. Sẽngaq, maraq saq sampun tiang sampẽang laẽq, tiang pade tetu-tetu ngasihin side pade, dait ite batur-batur seidup-sematẽ. 4 Tiang yakin sepenoqne lẽq side pade. Malahan tiang bangge gati lẽq side! Timaq tiang pade ngalamin luwẽq kesulitan, angen tiang sanget tehibur lantaran side pade. Angen tiang tetu-tetu gembire! 5 Waktu tiang pade dateng lẽq Makedonia, tiang pade tetu-tetu ndẽq mauq mentelah. Lẽman mbẽ-mbẽ tiang pade mauq kesulitan: Lẽman pihak saq lain araq pegejuhan, lẽman dalem atẽn tiang mẽsaq araq ketakutan. 6 Laguq syukur, Allah tetep hibur dengan saq rendah atẽ; Ie hibur atẽn tiang pade siq kedatengan Titus. 7 Atẽn tiang pade tehibur ndẽqne cume lantaran Titus dateng, laguq ẽndah lantaran Titus ngelaporang berembẽ atẽne tehibur siq side pade. Ie bebadaq lẽq tiang pade bahwe side pade melẽt gati bedait kance tiang; bahwe side pade nyesel lẽq perbuatande laẽq dait mangkin rẽde bẽle tiang. Hal nike miaq tiang sayan seneng malik. 8 Timaq surat tiang miaq angende jari sedih, tiang ndẽq nyesel nulis surat nike. Mule lẽq waktu tiang serioq bahwe surat tiang nike miaq side pade sedih -- timaq kesedihande nike cume sementare -- tiang jari nyesel ẽndah sekediq. 9 Laguq mangkin tiang seneng -- ndẽqne lantaran angende jari sedih, laguq lantaran kesedihande nike miaq kelakuande berobah. Mule kesedihande nike pade maraq pekayunan Allah. Jari, tiang pade ndẽq miaq side pade jari rugi. 10 Sẽngaq sedih saq maraq nike ngasilang perobahan atẽ saq datengang keselametan. Dait dengan ndẽq gen nyesel lẽq hal nike. Sebalikne, sedih saq pade maraq kemẽlẽq manusie ngasilang kematẽan. 11 Cobaq side pade perhatiang napi hasilne umaq side, kesedihan saq pade maraq pekayunan Allah! Hasilne, side pade tetu-tetu berusahe gen piaq keadaan jari solah! Side pade jari meriq lẽq dose, side pade takut, side pade kangen, side pade jari besemanget, side pade rẽde ngukum saq salaq! Lẽq dalem selapuq persoalan niki sampun side pade buktiang bahwe side pade ndẽq salaq. 12 Jari, timaq tiang sampun nulis surat nike, tiang nulis ndẽqne lantaran dengan saq salaq nike. Ndẽqne ẽndah lantaran dengan saq menderite lantaran kesalaqan nike. Tiang nulis surat nike adẽq lẽq arepan Allah, side pade sadar mẽsaq berembẽ belẽqne kerẽdeande tipaq tiang pade. 13 Keranaq nike angen tiang pade tehibur. Selain tehibur, saq terutame gati tiang pade jari seneng lantaran serioq Titus gembire; atẽne tehibur siq semeton senamian. 14 Tiang mule sampun bangge-banggeang side pade lẽq ie. Syukur, side pade ndẽq merilaq tiang. Selapuq saq sampun tiang pade sampẽang lẽq side nike kenaq. Maraq nike ẽndah napi saq tiang pade bangge-banggeang mengenai side pade lẽq Titus, ternyate tetu ẽndah. 15 Mangkin ie sayan ngasihin side pade, sẽngaq ie inget berembẽ taatne side selapuq, dait berembẽ side pade nerimaq ie siq hormat dait patuh. 16 Tiang seneng gati, sẽngaq side pade bau tepercaye lẽq dalem selapuq hal.

2 Corinthians 8

1 Semeton senamian, tiang pade mẽlẽ side pade nenaoq ẽndah mengenai rahmat Allah tipaq jemaah-jemaah lẽq Makedonia. 2 Ie pade sampun teuji siq kesulitan-kesulitan saq berat. Laguq lẽq tengaq-tengaq kesulitan-kesulitan nike, ie pade gembire dait murah atẽ dalem hal ngebẽng sumbangan jari nulung dengan lain, timaq ie pade miskin gati. 3 Tiang bau mastiang bahwe ie pade ngebẽng semampu ie pade, malahan lebih. Timaq ndẽq araq saq suruq, 4 sanget siq ie pade tunas lẽq tiang pade lamun bau ie pade teijinang milu ngebẽng sumbangan tipaq dengan-dengan saq tehususang bagi Allah lẽq Yudea. 5 Ie pade ngebẽng jaoq luwẽqan lẽman saq tiang pade harepang. Penembẽq ie pade nyerahang diriq tipaq Tuhan, beterus tipaq tiang pade ẽndah, pade maraq pekayunan Allah. 6 Keranaq nike tiang pade sanget nganjurang Titus -- saq baruq mulaiang usahe nike, adẽqne ngelanjutang usahe saq solah niki lẽq antare side pade ẽndah. 7 Side pade mule lebihan dalem selapuq-lapuqne: Side pade lebihan dalem hal percaye, dalem hal nyatayang pendapet, dalem hal penenaoq, dalem segale macem usahe, dait dalem hal kasihde tipaq tiang pade. Keranaq nike, side pade ẽndah lebihan lẽq dalem usahe saq solah niki. 8 Tiang ndẽq nganjurang nike jari sopoq prẽntah. Laguq siq nyatayang berembẽ semangetne dengan lain nulung sepade manusie, tiang ẽndah melẽt nenaoq seberembẽ kasihde. 9 Sẽngaq side pade sampun nenaoq rahmat Junjungante Saq Mulie Deside Isa Almasih. Ie sugih, laguq Ie piaq diriq-Ne miskin jari kepentingande, adẽq siq kemiskinan-Ne nike, side pade jari sugih. 10 Menurut pendapet tiang, sepatutne side pade nutuqang napi saq sampun side pade piaq taun saq juluan. Sẽngaq side pade saq penembẽq gati mikirang dait mulaiang usahe niki. 11 Jari, mangkin side pade harus ngelanjutang menurut kemampuande. Side pade harus besemanget jari nutuqang usahe nike, maraq semangetde laẽq miaq rencane nike. 12 Lamun side pade ihlas ngebẽng, make Allah gen nerimaq sumbangande nike siq dasar napi saq araq lẽq side, ndẽqne siq dasar lẽq napi saq ndẽq araq lẽq side. 13 Tiang tetu-tetu ndẽq bemaksut jari bẽbasang dengan lain lẽman tanggung jawab, dait miaq side pade sayan berat. Laguq, lantaran mangkin side pade dalem keadaan cukup, make sampun sepatutne side pade nulung ie pade. Laun lamun side pade kekurangan, dait ie pade dalem keadaan cukup, make ie pade gen nulung side pade. Siq care nike deduaqne pade-pade tetulung. 15 Lẽq dalem Kitab Suci tetulis, "Dengan saq ngumpulang luwẽq, ndẽqne belebihan, dait dengan saq ngumpulang sekediq, ndẽqne kekurangan." 16 Tiang pade tetu-tetu besyukur lẽq Allah sẽngaq Ie sampun ngicanin rahmat tipaq Titus adẽqne besemanget maraq tiang pade jari nulung side pade! 17 Sẽngaq Titus ndẽqne cume rẽde lẽq napi saq tiang pade tunas, laguq ie ẽndah semanget gati mẽlẽ nulung side pade jangke siq kemẽlẽqne mẽsaq ie mutusang lumbar ojok side. 18 Bareng kance ie, tiang pade ngirim ẽndah sopoq semeton saq tehormatin gati lẽq selapuq jemaah sẽngaq pegawẽanne nyampẽang Kabar Solah lẽman Allah. 19 Selain nike, dengan nike sampun tepilẽq ẽndah dait tetentuang siq jemaah-jemaah jari bareng kance tiang pade lẽq dalem kelampan tiang pade. Sẽngaq tiang pade gen lampaq jari nyampẽang sumbangan nike, adẽq Tuhan temulieang, dait adẽq side pade serioq bahwe tiang pade rẽde nulung. 20 Tiang pade onyaq-onyaq gati adẽqne ndaq araq dengan saq nyalahang tiang pade dalem hal nyampẽang sumbangan saq belẽq niki. 21 Tiang pade mẽlẽ jujur ndẽqne cume lẽq arepan Tuhan, laguq lẽq julu manusie ẽndah. 22 Bareng-bareng kance Titus dait semeton nike, tiang pade ngirim ẽndah sopoq semeton saq lain. Sampun pire kali tiang pade nguji ie, ternyate ie tetep seneng nulung. Dait mangkin, ie tetu-tetu mẽlẽ nulung side pade sẽngaq ie percaye gati lẽq side. 23 Mengenai Titus, ie batur tiang, saq begawẽan kance tiang jari nulung side pade. Dait mengenai kedue semeton nike, saq lumbar bareng kance ie, ie pade dengan-dengan saq teutus siq jemaah-jemaah dait jari kebanggean umaq Almasih. 24 Tiang pade harep side pade nyatayang kasihde lẽq ie pade, adẽq selapuq jemaah nenaoq bahwe side pade ngasihin ie pade dait napi saq tiang pade banggeang mengenai side pade mule tetu.

2 Corinthians 9

1 Setetune ndẽqne perlu malik tiang nulis tipaq side pade mengenai sumbangan saq kenyeke tekirim tipaq dengan-dengan saq tehususang bagi Allah lẽq Yudea. 2 Tiang nenaoq side pade seneng nulung, dait sampun tiang banggeang side pade tipaq dengan-dengan lẽq Makedonia. Tiang badaq ie pade, bahwe lẽman taun saq juluan, semeton-semeton lẽq Akaya sampun siep gen ngebẽng sumbangan. Dait semangetde sampun miaq luwẽq dengan lẽman ie pade milu besemanget ẽndah. 3 Mangkin tiang ngutus Titus dait kedue semeton nike tipaq side adẽq napi saq tiang pade bangge-banggeang mengenai side pade ndaq cume jari ucapan doang. Jari, side pade harus tetu-tetu siep, sẽngaq tiang nyampẽang lẽq ie pade bahwe side pade siep lẽq hal nike. 4 Tiang kuatir lamun araq dengan-dengan Makedonia saq milu bareng kance tiang lẽq waktu tiang dateng ojok side. Dait lamun tedait siq ie pade bahwe side ndẽqman siep, berembẽ ilaqne tiang pade laun, lantaran sampun nyampẽang bahwe tiang pade percaye gati lẽq side! Dait side mẽsaq gen ilaq ẽndah. 5 Keranaq nike tiang merase perlu ngutus ie pade tipaq side juluan jari ngurus sumbangan saq side pade janjiqang nike. Hal nike tiang laksaneang, adẽq laun lamun tiang dateng, sumbangande nike sampun siep. Siq care nike, nyate bahwe sumbangande nike tebẽng secare ihlas, dait ndẽqne lantaran paksaqan. 6 Pade inget! Dengan saq sawur binẽq sekediq, gen mauq hasil saq sekediq ẽndah. Laguq dengan saq sawur binẽq luwẽq, gen mauq hasil saq luwẽq ẽndah. 7 Sebilang dengan harus ngebẽng menurut keihlasan angenne. Ndaq ie ngebẽng setenge angen atao terpakse, sẽngaq Allah ngasihin dengan saq ngebẽng siq atẽ saq sukecite. 8 Allah bekuase ngicanin side pade rahmat saq belimpah-limpah, adẽq side pade tetep bedowẽ napi saq side pade perluang; malahan side pade gen belebihan jari ngelaksaneang hal saq solah. 9 Lẽq Kitab Suci tetulis mengenai Allah, "Ie bagi-bagiang tipaq dengan miskin; kebenaran-Ne kekel selaẽq-laẽqne." 10 Allah saq nyedieang binẽq jari dengan-dengan saq sawur binẽq, dait saq nyedieang ite keloran. Ie ẽndah gen nyedieang dait jariang luwẽq napi saq side pade sawur, adẽqne hasil kemurahan atẽnde sayan luwẽq ẽndah. 11 Siq care nike side pade gen jari cukup lẽq selapuq hal, sehingge side pade tetep bau ngebẽng siq murah atẽ. Dait sumbangan-sumbangande saq tiang pade bagi-bagiang nike miaq luwẽq dengan jari besyukur lẽq Allah. 12 Sẽngaq perbuatan solah saq side pade laksaneang niki ndẽqne cume nyukupang kekurangan dengan-dengan saq tehususang bagi Allah doang, laguq ẽndah miaq luwẽq dengan besyukur lẽq Allah. 13 Dait lantaran side pade sampun tahen uji lẽq dalem pelayanan nike, ie pade mulieang Allah sẽngaq ie pade serioq kesetieande lẽq Kabar Solah mengenai Almasih saq side pade iring nike. Ie pade ẽndah mulieang Allah, sẽngaq side pade murah atẽ jari bagi-bagiang lẽq ie pade, dait tipaq selapuq dengan lain napi saq araq lẽq side. 14 Make ie pade gen do'eang side pade siq rase kasih lantaran rahmat Allah saq limpah lẽq side. 15 Side pade harus besyukur lẽq Allah lantaran rahmat-Ne saq luar biase nike!

2 Corinthians 10

1 Tiang, Paulus, dengan saq teparan ndẽq bani lamun berandangan mue kance side, laguq bani lamun jaoq lẽman side, tiang peringet side demi Almasih saq lemah lembut dait gerasaq. 2 Sanget siq tiang tunas ndaq miaq tiang jari bani lẽq side pade lamun tiang dateng laun. Sẽngaq tiang beniat gen teges lẽq dengan-dengan saq paran bahwe tiang pade begawẽan siq tujuan duniawi. 3 Mule tiang pade masih idup lẽq dalem dunie, laguq perjuangan tiang pade ndẽqne siq dasar tujuan duniawi. 4 Senjate-senjate saq tiang pade kadu lẽq dalem perjuangan tiang pade ndẽqne senjate dunie niki, laguq senjate-senjate Allah saq bekuase. Siq senjate-senjate nike tiang pade ngancurang bẽntẽng-bẽntẽng. 5 Tiang pade ngancurang pikiran-pikiran saq nyesatang dait segale macem kesombongan saq nentang penenaoq jari kenal kance Allah. Tiang pade taklukang pikiran dengan-dengan dait miaq ie pade taat tipaq Almasih. 6 Dait lamun side pade sampun tetu-tetu taat, tiang pade siep jari ngukum selapuq kedurhakean. 7 Side pade harus sadar berembẽ keadaan saq setetune. Lamun sopoq dengan tetu-tetu yakin bahwe ie dowẽn Almasih, ie harus ngingetang diriqne mẽsaq dait sadar bahwe tiang pade jari dowẽn Almasih ẽndah maraq ie. 8 Tiang ndẽq ilaq lamun tiang harus luwẽqan bangge-banggeang kekuasean saq sampun teicanin siq Tuhan tipaq tiang pade, sẽngaq kekuasean nike teicanin jari ngebẽng semanget lẽq side pade, ndẽqne jari nyenyẽdaq. 9 Tiang ndẽq mẽlẽ side pade merase bahwe tiang nakut-nakutin side pade kadu surat-surat tiang. 10 Lantaran araq bebase, "Surat-surat Paulus nike teges dait bedowẽ wibawe, laguq lamun ie mẽsaq araq lẽq tengaq-tengaq ite, pribadine lemah dait ucapan-ucapanne ndẽq bedowẽ arti napi-napi!" 11 Dengan saq maraq nike seharusne sadar bahwe lamun tiang pade araq lẽq tengaq-tengaq side pade, perbuatan tiang pade tepat maraq saq tiang pade tulis lẽq dalem surat-surat tiang pade. 12 Pasti tiang pade ndẽq bani bandingang atao anggep diriq tiang pade sederajat kance dengan-dengan saq nganggep diriqne atas derajatne. Berembẽ bodone ie pade! Ie pade miaq ukuran mẽsaq dait nilai diriqne mẽsaq kadu ukuran nike. 13 Tiang pade ndẽqne maraq nike. Lamun tiang pade bangge-banggeang diriq, tiang pade ndẽq keliwat bates. Tiang pade tetep lẽq dalem bates-bates daẽrah pegawẽan saq sampun tetentuang siq Allah umaq tiang pade. Dait side pade termasuk lẽq dalem daẽrah nike. 14 Jari, sewaktu tiang pade jangoq side pade dait jauq Kabar Solah mengenai Almasih tipaq side, tiang pade ndẽq sugul lẽman bates-bates daẽrah pegawẽan tiang pade. 15 Tiang pade ndẽq puji diriq lẽq pegawẽan dengan lain saq araq lẽq luah bates saq tetentuang siq Allah tipaq tiang pade. Sebalikne tiang pade tetep lẽq dalem bates-bates saq tetentuang siq Allah lẽq tiang pade dait beharep bahwe side pade sayan percaye lẽq Almasih, adẽq tiang pade bau ngelaksaneang pegawẽan saq belẽqan lẽq antare side pade. 16 Siq care nike tiang pade bau beriteang Kabar Solah nike lẽq negeri-negeri lain siq care ndẽq bangge-banggeang diriq lẽq pegawẽan saq sampun telaksaneang lẽq wilayah pelayanan dengan lain. 17 Lẽq dalem Kitab Suci tetulis, "Dengan saq mẽlẽ banggeang sopoq hal, seharusne banggeang napi saq sampun telaksaneang siq Tuhan." 18 Sẽngaq ndẽqne dengan saq puji diriqne saq tahen uji, laguq dengan saq tepuji siq Tuhan.

2 Corinthians 11

1 Tiang mẽlẽ adẽq side pade sabar lẽq kebodoan tiang saq sekediq nike. Mule side pade sampun nyatayang kesabarande lẽq tiang. 2 Tiang kangen lẽq side, maraq Allah mẽsaq ẽndah kangen lẽq side. Side pade maraq sopoq dedare genten saq sampun tiang janjiqang jari tetikah kance sopoq dengan mame, nike Almasih. 3 Laguq tiang kuatir pikirande gen tegode jari ndẽq setie malik lẽq Almasih, pade maraq Hawa laẽq ẽndah tegode siq kelicikan ulah. 4 Sẽngaq ruene side pade seneng doang nerimaq dengan saq dateng ojok side dait ngajahang mengenai Deside Isa saq lain -- ndẽqne Deside Isa saq tiang pade kenalang lẽq side. Dait side pade mẽlẽ ẽndah nyambut roh dait "kabar solah" saq tetu-tetu bẽde kance Roh Allah dait Kabar Solah saq sampun side pade terimaq lẽman tiang pade. 5 Tiang tetu-tetu ndẽq merase bawaqan lẽman "rasul-rasul" saq luar biase nike! 6 Sang tiang kurang ceket ngeraos, laguq mengenai penenaoq, tiang ndẽqne dengan saq bodo. Nike sampun tiang pade buktiang lẽq side dalem selapuq hal. 7 Lẽq waktu tiang beriteang Kabar Solah lẽman Allah tipaq side, tiang ndẽq tunas biaye napi-napi lẽq side pade; dait siq care nike tiang miaq diriq tiang jari bawaqan. Hal nike tiang laksaneang adẽq side saq teatasang. Napi nike sopoq kesalaqan tiang lẽq side? 8 Waktu tiang ngelayanin side pade, tiang tebiayaq siq jemaah-jemaah lain. Bau teparan tiang ngerugiang jemaah-jemaah nike adẽq tiang bau nulung side pade. 9 Lamun lẽq waktu nike tiang kekurangan, tiang ndẽq uwah nyusahang sopoq juaq lẽman side pade. Selapuq saq tiang perluang tesedieang siq semeton-semeton saq dateng lẽman Makedonia. Tiang jagaq bagus-bagus adẽq tiang ndẽq nyusahang side pade lẽq hal napi juaq, dait tiang gen tetep gawẽq maraq nike. 10 Saq tiang banggeang niki ndẽqne bau tehalangin siq sai-sai lẽq selapuq negeri Akaya, lantaran pengajahan Almasih saq kenaq araq lẽq tiang. 11 Kembẽq tiang sampẽang maraq nike? Napi lantaran tiang ndẽq ngasihin side pade? Allah wikan tiang ngasihin side pade! 12 Napi saq tiang laksaneang mangkin gen terus tiang laksaneang adẽq "rasul-rasul" saq lain nike ndẽq bedowẽ alasan jari belẽq-belẽqang diriqne dait bebase bahwe ie pade begawẽan maraq tiang pade. 13 Dengan-dengan maraq nike ie rasul-rasul palsu. Ie dengan-dengan saq pegawẽanne ngakalin dengan siq care nyamar jari rasul-rasul Almasih. 14 Ndaq bengaq lẽq hal nike, sẽngaq Belis ẽndah nyamar jari malaẽkat terang! 15 Jari, ndaq bengaq ẽndah lamun pelayan-pelayan Belis nyamar jari pelayan-pelayan saq kenaq lẽman Allah. Ahirne ie pade ẽndah gen nerimaq balesan saq setimpal kance selapuq perbuatan ie pade. 16 Tiang sampẽang karing sekali: Ndaq jangke araq saq nganggep tiang bodo. Laguq lamun side pade nganggep tiang maraq nike, ijinang tiang saq bodo niki bau bangge ẽndah sekediq. 17 Mangkin niki gen tiang jelasang, napi saq tiang banggeang nike, laguq ndẽqne Tuhan saq manikang tiang nyampẽang maraq nike. Lẽq dalem hal niki tiang tetu-tetu ngeraos maraq dengan bodo. 18 Mule araq luwẽq dengan saq banggeang hal-hal duniawi, jari tiang mẽlẽ ẽndah bangge maraq nike. 19 Sẽngaq siq angen saq seneng ie pade sabar lẽq dengan bodo, lantaran side pade merase diriq ceket gati! 20 Side pade alurang diriqde tejariang panjak siq dengan, atao meres dait bait keuntungan lẽman side pade, atao merase diriqne atasan lẽman side pade dait bani namper side pade. 21 Tiang ilaq akuq bahwe tiang pade lemah gati jari piaq maraq nike. Laguq napi saq dengan lain bani banggeang, tiang ẽndah bani! (Tiang ngeraos maraq dengan bodo.) 22 Napi ie pade dengan Ibrani? Tiang ẽndah dengan Ibrani. Napi ie pade dengan Israel? Tiang ẽndah dengan Israel. Napi ie pade keturunan Ibrahim? Tiang ẽndah maraq nike! 23 Napi ie pade pelayan-pelayan Almasih? Kedengahanne maraq tiang niki sampun telang akal, laguq tiang mule pelayan saq solahan lẽman ie pade selapuqne! Tiang luwẽqan begawẽan, tiang kerengan tetamaq ojok dalem bui, tiang luwẽqan tesiksaq dait kereng gati gen matẽ. 24 Sampun lime kali tiang tesiksaq siq dengan Yahudi, tempuk telung dase siwaq kali kadu pecut. 25 Telu kali tiang tepecut siq dengan-dengan Roma; sampun ẽndah tiang tepelẽwas kadu batu. Telu kali tiang ngalamin kandas kapal lẽq segare, dait sekali tiang ngompal lẽq segare empat likur jam ngonẽqne. 26 Kereng gati tiang lalo ojok taoq saq luwẽq bahayene: Teancem bahaye belabur, bahaye rampok, bahaye lẽman pihak Yahudi dait lẽman pihak ndẽq Yahudi, bahaye lẽq dalem kote, dait lẽq luah kote, bahaye lẽq segare, dait bahaye lẽman dengan-dengan saq ngaku semeton padahal ndẽq. 27 Tiang setenge matẽ begawẽan dait bejuang keras: Kereng ndẽq tindoq, ndẽq ngelor, ndẽq nginem, kereng gati tiang kelapahan, ketelihan sẽngaq kurang kelambi dait ndẽq bedowẽ taoq ndot. 28 Selain nike, sebilang jelo tiang kuatir ẽndah lẽq keadaan selapuq jemaah. 29 Lamun araq saq lemah tiang ẽndah milu merase lemah. Lamun araq saq bedose, angen tiang milu remuk. 30 Jari, lamun tiang harus banggeang sopoq hal, make hal-hal saq tiang banggeang nike nyatayang kelemahan tiang. 31 Allah, Bapa lẽman Junjungante Saq Mulie Deside Isa, wikan bahwe tiang ndẽq beduste. Tepuji pesẽngan-Ne selaẽq-laẽqne. 32 Sewaktu tiang araq lẽq Damsyik, gubernur saq bekuase lẽq derike, lẽq bawaq pemrẽntahan Raje Aretas, mrẽntahang tenterene jagaq jebak belẽq kote nike jari bau tiang. 33 Laguq siq sopoq keranjang tiang teturunang ojok bawaq langan sopoq loang lẽq tembok. Maraq nike entane tiang lolos lẽman kekuasean gubernur nike.

2 Corinthians 12

1 Mule ndẽq araq manpaatne banggeang diriq. Laguq tiang mẽlẽ ẽndah banggeang hal-hal saq Allah nyatayang tipaq tiang lẽq dalem wahyu atao dalem penyerioqan. 2 Tiang kenal sopoq dengan Nasrani saq empat olas taun saq sampun liwat teangkat ojok langit saq ketelu. (Tiang ndẽq nenaoq napi tetu-tetu awakne saq kerangkatan atao nike cume penyerioqan doang -- cume Allah saq wikan.) 3 Karing sekali tiang sampẽang: Tiang nenaoq bahwe dengan niki teangkat tame ojok Pirdaus. (Tiang ndẽq nenaoq napi tetu-tetu awakne saq kerangkatan atao cume penyerioqan doang -- cume Allah saq wikan.) Lẽq derike dengan nike dengah hal-hal saq ndẽq kanggo teucapang siq manusie dait ndẽq teijinang ẽndah manusie ngucapang hal nike. 5 Mengenai dengan nike saq mẽlẽ tiang banggeang, ndẽqne mengenai diriq tiang mẽsaq. Mengenai diriq tiang, cume hal-hal saq nyatayang kelemahan tiang nike saq mẽlẽ tiang banggeang. 6 Seandẽne tiang ẽndah melẽt banggeang sopoq hal, tiang ndẽq mẽlẽ jari dengan saq luwẽq raos saq ndẽq araq isine; tiang ngucapang kebenaran. Laguq tiang tahen diriq tiang, adẽq ndẽq araq dengan saq anggep tiang lebihan lẽman napi saq sampun ie serioq tiang laksaneang atao saq sampun ie dengah lẽman tiang. 7 Laguq adẽq tiang ndẽq jari sombong lantaran penyerioqan-penyerioqan saq luar biase nike, tiang teicanin sopoq duwi lẽq dalem awak tiang, nike sopoq utusan Belis jari nyakitin tiang, adẽq tiang ndaq jari sombong. 8 Telu kali tiang bedo'e tipaq Tuhan adẽq utusan Belis nike tesediq lẽman tiang. 9 Laguq jawab Tuhan, "Rahmat Tiang lẽq side sampun cukup; sẽngaq kuase Tiang malahan jari sempurne lamun side dalem keadaan lemah." Keranaq nike tiang demenan banggeang kelemahan-kelemahan tiang, sẽngaq lamun tiang lemah, make lẽq waktu nike tiang merase Almasih ngelindungin tiang siq kekuatan-Ne. 10 Jari tiang seneng siq kelemahan-kelemahan tiang. Tiang ẽndah seneng lamun lantaran Almasih tiang tepitnah, tiang ngalamin kesulitan, tepalẽq-palẽq dait tiang ngalamin kesusahan. Sẽngaq lamun tiang lemah, make lẽq waktu nike tiang jari kuat. 11 Mule tetu tiang sampun miaq diriq tiang maraq dengan bodo -- laguq side pade saq maksaq tiang jari maraq nike. Setetune side pade harus puji tiang. Sẽngaq timaq tiang ndẽq bedowẽ arti napi-napi, tiang tetu-tetu ndẽq kalah kance "rasul-rasul" saq luar biase nike! 12 Keajaipan-keajaipan kance hal-hal saq luar biase dait pegawẽan-pegawẽan saq belẽq-belẽq sampun tenyatayang tipaq side pade secare sabar, jari buktiang bahwe tiang sopoq rasul. 13 Lẽq dalem hal napi side pade kurang teperhatiang, tebanding jemaah-jemaah saq lain? Paling-paling cume dalem hal niki: Bahwe tiang ndẽq nyusahang side pade jari ngebẽng tiang biaye. Tiang tunas maap lẽq kesalaqan tiang nike! 14 Mangkin niki sampun saq ketelu kaline tiang siep jari jangoq side pade. Dait tiang ndẽq mẽlẽ nyusahang side pade, sẽngaq saq tiang melẽtang ndẽqne napi saq side pade ẽpẽang, laguq diriqde. Sẽngaq ndẽqne bije-bije saq harus boyaqang dengan toaqne napkah, laguq dengan toaq saq harus boyaqang bije-bijene napkah. 15 Keranaq nike, angen tiang seneng dait rẽde ngurbanang selapuq-lapuqne umaq side, malahan diriq tiang mẽsaq ẽndah. Lamun maraq nike rase kasih tiang lẽq side pade, napi patut side pade kurang ngasihin tiang? 16 Jari, side pade setuju bahwe tiang ndẽq uwah nyusahang side pade. Laguq araq saq bebase bahwe tiang niki licik; bahwe tiang mauq keuntungan lẽman side pade lantaran tiang nipu. 17 Nike ndẽqne mungkin! Napi langan dengan-dengan saq tiang utus nike tiang bait keuntungan lẽman side pade? 18 Tiang sampun ngutus Titus lumbar jangoq side pade, dait tiang ngutus semeton seiman saq lain nike lumbar bareng-bareng kance ie. Napi Titus bait keuntungan lẽman side pade? Laguq tiang pade kance due begawẽan siq tujuan saq pade dait napi saq tiang pade laksaneang nike kadu care saq pade! 19 Iniq doang side pade beranggepan bahwe sengonẽq niki tiang pade kenyeke berusahe bẽle diriq lẽman side pade. Side pade keliru gati! Allah wikan bahwe selapuq saq tiang pade ucapang nike menurut pekayunan Almasih. Dait selapuq saq tiang pade laksaneang nike jari neguqang imande. 20 Tiang kuatir bahwe laun lẽq waktu tiang jangoq side pade, tiang ndait side pade ndẽq maraq napi saq tiang pade harepang. Ndaq-ndaq laun araq saq begejuh, talon atẽ, gedek, mẽlẽ menang mẽsaq, saling pitnah, saling hasut, sombong dait ngorayang. 21 Tiang takut lamun tiang dateng malik, tiang gen terendahang siq Allah lẽq julun side pade, dait tiang gen nangis sẽngaq luwẽq lẽq antare side pade saq laẽq bedose, ndẽqman tobat lẽman perbuatan-perbuatanne saq cabul, kotor dait ndẽq patut.

2 Corinthians 13

1 Niki saq ketelu kaline tiang dateng jangoq side pade. Dalem Kitab Suci tetulis, "Sebilang pelekare harus tebuktiang siq kesaksian due atao telu dengan saksi, baruq pelekare nike sah." 2 Dengan-dengan saq laẽq saq sampun gawẽq dose dait selapuq dengan lainne, sampun tiang peringet bejulu sewaktu tiang dateng jangoq side pade saq kedue kaline. Mangkin, lẽq waktu tiang bejaoqan kance side, tiang peringet malik bahwe lamun tiang dateng malik, ndẽq araq sopoq dengan lẽman ie pade saq gen luput lẽman hukuman. 3 Make side pade gen mauq selapuq bukti saq side pade melẽtang bahwe Almasih tetu-tetu bemanik langan tiang. Lamun Almasih ngelaksaneang hal nike tipaq side pade, Ie nẽnten gen alem-alem, sebalikne Ie nyatayang kuase-Ne lẽq antare side. 4 Mule lẽq waktu Ie tepakuq lẽq kayuq salib Ie lemah, laguq mangkin Ie idup dalem kuase Allah. Mule tiang pade lemah lẽq dalem Almasih, laguq tiang pade gen idup bareng kance Ie siq kuase Allah. 5 Cobaq side pade uji diriqde mẽsaq napi side pade tetu-tetu idup lẽq dalem iman tipaq Almasih! Pasti side pade sadar bahwe Deside Isa Almasih araq lẽq dalem side pade! -- lain halne lamun mule side pade ndẽq tetu-tetu percaye. 6 Tiang harep side pade sadar bahwe tiang pade ndẽqne dengan saq ndẽq tahen uji. 7 Tiang pade bedo'e tipaq Allah semoge Ie kayun nulung side pade adẽq side pade ndẽq gawẽq jahat. Ndẽqne jari nyatayang bahwe tiang pade dengan-dengan saq berhasil, laguq adẽq side pade ngelaksaneang napi saq solah, timaq ruene tiang pade maraq dengan-dengan saq gagal. 8 Sẽngaq tiang pade ndẽq tao piaq napi-napi jari ngelawan kebenaran; tiang pade cume bau ngelaksaneang kebenaran. 9 Tiang pade seneng lamun tiang pade lemah, dait side pade kuat. Tiang pade bedo'e ẽndah adẽq side pade jari sempurne. 10 Keranaq nike tiang nulis surat niki lẽq waktu tiang ndẽqman araq lẽq tengaq-tengaq side pade. Siq care nike, lamun tiang dateng laun, tiang ndẽq gen keras tipaq side siq kekuasean saq teicanin siq Tuhan lẽq tiang. Kekuasean nike teicanin jari ngebẽng side pade semanget, ndẽqne jari ngancurang. 11 Ahirne, semeton senamian, side pade harus gembire, dait berusahe jari sempurne. Terimaq selapuq nasẽhat tiang. Side pade harus sepaham dait idup dalem damẽ sejahtere. Allah sumber kasih dait damẽ sejahtere gen araq bareng kance side pade. 12 Side pade harus besalam-salaman sopoq kance saq lain siq penoq kasih. Selapuq dengan-dengan saq tehususang bagi Allah ngirim salam tipaq side. 13 Rahmat Junjungan Saq Mulie Deside Isa Almasih dait kasih Allah dait persahabatan lẽq dalem Roh Suci araq bareng kance side pade selapuq!

Galatians 1

1 Semeton senamian, jemaah-jemaah lẽq wilayah Galatia, tiang Paulus, dait selapuq semeton seiman saq bareng kance tiang, beharep semoge Allah Bapante dait Junjungan Saq Mulie Deside Isa Almasih ngicanin rahmat dait damẽ sejahtere tipaq side. Tiang jari rasul ndẽqne siq perantarean manusie atao teangkat siq manusie, laguq siq Deside Isa Almasih dait Allah Bapante saq sampun ngidupang Deside Isa lẽman ninggal. 4 Taat lẽq pekayunan Allah Bapante, Almasih nyerahang diriq-Ne jari kurban demi dose-dosente, adẽq ite teselametang lẽman jaman saq jahat niki. 5 Puji syukur tipaq Allah selaẽq-laẽqne! Amin. 6 Tiang bengaq lẽq side pade! Side pade temanikang siq Allah lantaran rahmat Almasih, laguq mangkin side pade becat gati lupaq lẽq Allah dait turut "kabar solah" saq lain lẽman Kabar Solah saq lẽman Allah. 7 Setetune ndẽq araq "kabar solah saq lain", laguq araq dengan-dengan saq gen miaq side pade jari ore dait ngerobah Kabar Solah mengenai Almasih. 8 Dengan saq beriteang "kabar solah" saq lain lẽman Kabar Solah saq sampun tiang pade beriteang, alurang ie tekutuk siq Allah -- timaq dengan nike tiang mẽsaq atao malaẽkat lẽman sorge! 9 Tiang pade sampun nyampẽang hal nike laẽq, mangkin tiang sampẽang malik: Dengan saq beriteang lẽq side "kabar solah" saq lainan lẽman Kabar Solah saq sampun side pade terimaq lẽman tiang pade, dengan nike harus tekutuk siq Allah! 10 Napi siq care nike tiang jari maraq dengan saq melẽt teakuq siq manusie? Tetu-tetu ndẽqne maraq nike! Tiang cume ngarepang pengakuan lẽman Allah. Napi tiang kenyeke berusahe mikat angen manusie adẽq tedemen siq dengan? Lamun tiang masih piaq maraq nike, tiang ndẽqne hambe Almasih. 11 Side pade harus nenaoq bahwe Kabar Solah saq tiang beriteang nike ndẽqne berasal lẽman manusie. 12 Tiang ndẽq nerimaq kabar nike lẽman manusie, dait ndẽq sopoq dengan juaq saq ngajahang hal nike lẽq tiang, laguq sampun teturunang langan wahyu siq Deside Isa Almasih. 13 Pasti side pade sampun dengah berembẽ idup tiang laẽq jari penganut agame Yahudi. Side pade nenaoq berembẽ kejemne tiang perlakuang jemaah Allah dait berembẽ kerasne tiang berusahe ngancurang ie pade. 14 Dalem hal ngelaksaneang agame Yahudi, tiang lebihan tebanding kance dengan Yahudi lainne saq anjar-anjar tiang. Tiang semanget gati lẽq hal-hal mengenai adat istiadat leluhur tiang pade. 15 Laguq lantaran rahmat Allah, tiang sampun tepilẽq siq Allah sendẽqman tiang tebijeang dait ngemanikang tiang jari pelayan-Ne. 16 Allah nyatayang Bije-Ne lẽq dalem tiang adẽq tiang nyampẽang mengenai Ie tipaq dengan-dengan saq ndẽq Yahudi. Lẽq waktu nike tiang ndẽq lalo tunas nasẽhat ojok sai juaq. 17 Tiang ẽndah ndẽq lalo ojok Yerusalem jari bedait kance ie pade saq sampun jari rasul sendẽqman tiang. Laguq tiang lalo ojok negeri Arab, beterus lẽman derike tulak malik ojok Damsyik. 18 Telu taun sesampun nike, tiang lalo ojok Yerusalem jari bekenalan kance Kepas. Tiang ndot kance ie cume lime olas jelo ngonẽqne. 19 Tiang ndẽq serioq rasul-rasul saq lain, kecuali Yakub, sanak Junjungan Saq Mulie Deside Isa. 20 Lẽq arepan Allah, tiang yakinang side bahwe tiang ndẽq beduste mengenai napi saq tiang tulis tipaq side. 21 Sesampun nike tiang lalo ojok daẽrah-daẽrah Siria dait Kilikia. 22 Laguq muen tiang tetep ndẽq tetandaq siq jemaah-jemaah Almasih lẽq Yudea. 23 Ie pade cume dengah basen dengan, "Dengan saq laẽq nganiaye ite, mangkin beriteang kabar solah mengenai iman saq laẽq mẽlẽ ie musnahang." 24 Make, ie pade mulieang Allah lantaran tiang.

Galatians 2

1 Empat olas taun sesampun nike, tiang lalo malik ojok Yerusalem bareng kance Barnabas dait Titus ẽndah tiang jauq. 2 Tiang lalo ojok Yerusalem atas dasar wahyu lẽman Allah. Dait dalem sopoq sangkep saq husus kance pemimpin-pemimpin lẽq derike, tiang jelasang Kabar Solah saq tiang beriteang tipaq dengan-dengan saq ndẽq Yahudi. Sẽngaq tiang ndẽq mẽlẽ usahe tiang saq laẽq, atao saq mangkin, cume sie-sie. 3 Titus, saq bareng kance tiang, ie dengan Yunani, laguq ie ndẽq tepaksaq turut aturan sunat, 4 timaq araq dengan-dengan saq maksaq hal nike. Ie pade dengan-dengan saq tame secare tedoq-tedoq dait puraq-puraq jari semeton seiman. Ie pade tame tedoq-tedoq jari nyelidik kebẽbasan saq araq lẽq ite, sẽngaq ite araq lẽq dalem Deside Isa Almasih. Maksut ie pade milu nulakang ite lẽq keadaan saq semule sebagẽ hambe, 5 laguq tiang pade ndẽq mẽlẽ nyerah lẽq ie pade, sẽngaq tiang pade mẽlẽ jagaq adẽq Kabar Solah nike tetep murni tipaq side pade. 6 Laguq timaqne maraq nike, ndẽq araq hal-hal baru saq tetuntut lẽman tiang siq pemimpin-pemimpin nike -- umaq tiang ndẽq araq bẽdene dengan saq tehormat atao ndẽq, sẽngaq Allah ndẽq bẽde-bẽdeang dengan. 7 Sebalikne, ie pade ngakuq bahwe Allah sampun nugasang tiang jari beriteang Kabar Solah tipaq dengan-dengan saq ndẽq besunat, pade maraq Ie sampun nugasang Petrus jari beriteang Kabar Solah nike tipaq dengan saq besunat. 8 Sẽngaq Allah saq ngicanin Petrus kemampuan jari rasul umaq dengan-dengan saq besunat, ngicanin ẽndah lẽq tiang kemampuan jari rasul tipaq dengan-dengan saq ndẽq besunat. 9 Yakub, Kepas dait Yahya, saq teanggep jari pemimpin-pemimpin jemaah, ngakuq bahwe Allah sampun ngicanin tiang rahmat-Ne. Make ie pade besalaman kance Barnabas dait tiang sebagẽ tande persahabatan. Beterus ie pade dait tiang pade setuju bahwe tiang pade gen begawẽan lẽq antare dengan-dengan saq ndẽq besunat, dait ie pade lẽq antare dengan-dengan saq besunat. 10 Sopoq-sopoqne petunasan ie pade adẽq tiang pade merhatiang dengan miskin. Dait tiang malahan seneng ngelaksaneang hal nike. 11 Sewaktu Petrus dateng ojok Antiokia, tiang nentang ie secare terang-terangan, sẽngaq ie salaq. 12 Penembẽqne ie tokol bekelor bareng kance dengan-dengan saq ndẽq besunat. Laguq sesampun dengan-dengan utusan Yakub dateng, ie jaoqang diriqne lẽman semeton-semeton saq ndẽq besunat dait ndẽqne mẽlẽ malik bekelor kance ie pade, sẽngaq takut lẽq dengan-dengan saq mẽlẽ adẽqne selapuq dengan tesunat. 13 Semeton-semeton Yahudi saq lain ẽndah milu-miluan munapik maraq Petrus, sehingge Barnabas ẽndah milu maraq ie pade. 14 Sewaktu tiang serioq bahwe kelakuan ie pade sampun ndẽqne sesuai malik kance kebenaran Kabar Solah nike, tiang sampẽang tipaq Petrus lẽq julun selapuq dengan saq araq lẽq derike, "Lamun side dengan Yahudi idup maraq dengan saq ndẽq kenal kance Allah dait ndẽqne idup maraq dengan Yahudi, kembẽq mangkin side mẽlẽ maksaq semeton-semeton saq ndẽq besunat jari idup maraq dengan Yahudi?" 15 Menurut keturunan, tiang pade mule dengan Yahudi dait ndẽqne "dengan bedose lẽman bangse-bangse lain". 16 Timaq maraq nike tiang pade nenaoq bahwe dengan tejariang kenaq lẽq arepan Allah sehingge hubunganne kance Allah jari solah malik cume lantaran percaye lẽq Deside Isa Almasih, dait ndẽqne lantaran ngelaksaneang Hukum Taurat. Tiang pade ẽndah percaye lẽq Deside Isa Almasih, adẽq hubungan tiang pade kance Allah jari solah malik langan iman tiang pade lẽq dalem Almasih, ndẽqne lantaran tiang pade ngelaksaneang Hukum Taurat. Sẽngaq siq care ngelaksaneang Hukum Taurat, ndẽq araq sopoq dengan juaq saq bau miaq hubunganne kance Allah jari solah malik. 17 Tiang pade berusahe adẽq tiang pade tejariang kenaq lẽq arepan Allah sehingge hubungan tiang pade kance Allah jari solah malik langan idup lẽq dalem Almasih. Laguq lamun sesampun ngelaksaneang maraq nike, ternyate tiang pade tetep "dengan-dengan bedose" ẽndah maraq dengan-dengan saq ndẽq Yahudi, napi niki artine Almasih saq jari penyebap tiang pade bedose? Pasti ndẽqne maraq nike! 18 Lamun tiang mulai ngaraqang malik pengajahan Hukum Taurat saq sampun tiang sẽdaq, make tiang nyatayang bahwe tiang sampun ngelanggar hukum nike. 19 Laguq tiang sampun matẽ bagi Hukum Taurat -- tematẽq siq hukum nike mẽsaq -- adẽq tiang bau idup bagi Allah. Tiang sampun tepakuq lẽq kayuq salib ngiring Almasih. 20 Mangkin ndẽqne malik tiang saq idup, laguq Almasih saq idup lẽq dalem diriq tiang. Dait idup saq tiang alamin mangkin niki, idup siq iman tipaq Bije saq asalne lẽman Allah saq ngasihin tiang dait saq sampun ngurbanang diriq-Ne umaq tiang. 21 Tiang ndẽq ngerẽmẽhang rahmat Allah. Lamun dengan tejariang kenaq lẽq arepan Allah sehingge hubunganne kance Allah jari solah malik lantaran ngelaksaneang Hukum Taurat, nike artine ninggalne Almasih ndẽq araq manpaatne!

Galatians 3

1 Semeton senamian dengan-dengan Galatia! Side pade tetu-tetu bodo! Sang side pade sampun kene siq pengaruh dengan? Padahal ninggalne Almasih lẽq kayuq salib sampun tiang jelasang lẽq side sejelas-jelasne! 2 Cobaq badaq tiang saq sopoq niki doang: Napi side pade sampun nerimaq Roh Allah lantaran ngelaksaneang Hukum Taurat, atao lantaran side pade percaye lẽq pemberitean Kabar Solah lẽman Allah? 3 Kembẽq side pade bodo gati? Side pade sampun mulai idup baru siq Roh Allah, segerah mangkin side pade mẽlẽ nyempurneang diriqde siq kekuatande mẽsaq? 4 Percume doang selapuq saq sampun side pade alamin nike? Segerah selapuq nike sie-sie! 5 Allah ngicanin Roh-Ne lẽq side dait ngaraqang keajaipan-keajaipan lẽq antare side pade. Napi Allah ngelaksaneang nike lantaran side pade ngelaksaneang Hukum Taurat atao lantaran side pade percaye lẽq pemberitean Kabar Solah lẽman Allah? 6 Pade maraq saq tetulis lẽq dalem Kitab Suci mengenai Ibrahim, "Ibrahim percaye lẽq Allah, dait lantaran percayenne nike ie tejariang kenaq lẽq arepan Allah sehingge hubunganne kance Allah jari solah malik." 7 Keranaq nike, side pade harus nenaoq bahwe selapuq dengan saq idup lẽman iman, ie pade nike keturunan Ibrahim. 8 Kitab Suci, saq sampun juluan wikan bahwe Allah gen miaq dengan-dengan saq ndẽq Yahudi bau tejariang kenaq lẽq arepan-Ne sehingge hubungan ie pade kance Allah jari solah malik langan iman, sampun juluan beriteang kabar solah nike tipaq Ibrahim, "Langan side, selapuq suku-suku bangse gen mauq berkah lẽman Allah." 9 Ibrahim beriman, make ie teberkahin. Maraq nike ẽndah selapuq dengan saq beriman, gen teberkahin bareng kance Ibrahim. 10 Dengan-dengan saq beharep sepenoq angen lẽq Hukum Taurat, selapuqne idup lẽq bawaq kutukan. Sẽngaq lẽq dalem Kitab Suci tetulis, "Dengan saq ndẽq setie ngelaksaneang selapuq saq tetulis dalem Kitab Hukum Taurat tekutuk siq Allah!" 11 Ndẽq araq sopoq dengan juaq saq bau tejariang kenaq lẽq arepan Allah sehingge hubunganne kance Allah jari solah malik lantaran ngelaksaneang Hukum Taurat. Hal nike sampun tenyatayang lẽq dalem Kitab Suci, "Dengan saq tejariang kenaq lẽq arepan Allah sehingge hubunganne kance Allah jari solah malik, ie gen idup siq iman!" 12 Laguq Hukum Taurat nike ndẽqne tedasarang siq iman. Dalem Kitab Suci tetulis bahwe dengan saq ngelaksaneang Hukum Taurat, gen idup lantaran hukum nike. 13 Laguq Almasih sampun nebus ite lẽman kutukan Hukum Taurat. Ie piaq hal nike siq ngalurang diriq-Ne tekutuk lantaran ite. Sẽngaq lẽq dalem Kitab Suci tetulis, "Tekutuk dengan saq ninggal tegantung lẽq kayuq salib." 14 Almasih ngelaksaneang maraq nike adẽq berkah saq tejanjiqang siq Allah tipaq Ibrahim teicanin ẽndah tipaq dengan bangse-bangse lain. Sehingge langan iman, ite nerimaq Roh saq tejanjiqang siq Allah nike. 15 Semeton senamian! Tiang bẽng side conto lẽman pengalaman sebilang jelo. Lamun dengan miaq surat wasiat saq sampun tesahang, make ndẽq araq sopoq dengan juaq saq bau batalang atao ngeromboq surat wasiat nike. 16 Maraq nike ẽndah halne selapuq janji saq sampun teicanin tipaq Ibrahim dait tipaq keturunanne. Lẽq Kitab Suci ndẽqne tetulis "dait tipaq selapuq keturunan side", maraqne tipaq luwẽq dengan, laguq cume tipaq sopoq dengan, "dait tipaq keturunan side", nike Almasih. 17 Saq mẽlẽ tiang sampẽang lẽq deriki: Janji Allah sampun tepiaq dait tesahang juluan. Hukum Taurat saq teicanin empat ratus telung dase taun sesampun nike ndẽqne bau batalang pengesahanne dait ngapus janji Allah nike. 18 Sẽngaq lamun napi saq teicanin siq Allah nike teharepang siq dasar Hukum Taurat, make nike ndẽqne malik rahmat saq tejanjiqang. Malahan lantaran Allah sampun bejanji lẽq Ibrahim, make Allah ngicanin hal nike lẽq ie. 19 Lamun maraq nike, jari napi Hukum Taurat teicanin? Jawabne bahwe hukum nike teromboqang jari nyatayang pelanggaran manusie. Hukum Taurat nike berlaku jangke dateng sopoq dengan keturunan Ibrahim, saq tesebut lẽq dalem janji Allah tipaq Ibrahim. Hukum Taurat nike tesampẽang siq malaẽkat-malaẽkat langan perantarean sopoq manusie. 20 Jari, harus araq due pihak, baruq teperluang sopoq perantare. Laguq Allah nẽnten merluang perantare, sẽngaq Allah mẽsaq saq ngelaksaneang. 21 Napi hal nike artine bahwe Hukum Taurat belawanan kance janji Allah? Pasti ndẽqne maraq nike! Sẽngaq lamun Hukum Taurat teicanin jari sopoq hal saq ngidupang, make manusie bau tejariang kenaq lẽq arepan Allah sehingge hubunganne kance Allah jari solah malik langan Hukum Taurat. 22 Laguq lẽq dalem Kitab Suci tetulis bahwe selapuq umat manusie sampun araq lẽq bawaq kuase dose, adẽq janji saq asalne lẽman iman lẽq dalem Deside Isa Almasih bau dateng tipaq dengan-dengan saq percaye. 23 Sendẽqman iman nike dateng, mule ite araq lẽq bawaq pengawasan Hukum Taurat. Ite maraq tekurung jangke iman nike tenyatayang. 24 Siq care nike, Hukum Taurat nike sampun jari panutan saq jauq ite tipaq Almasih, adẽq ite tejariang kenaq lẽq arepan Allah sehingge hubungante kance Allah jari solah malik lantaran iman. 25 Sesampun iman nike dateng, ite ndẽqne malik araq lẽq bawaq pengawasan Hukum Taurat saq jari panutan nike. 26 Side pade sampun jari bije-bije dowẽn Allah siq iman lẽq dalem Deside Isa Almasih. 27 Side pade selapuqne sampun tebaptis siq pesẽngan Almasih, jari side pade sampun nerimaq lẽq diriq side pade sipat-sipat Almasih. 28 Dalem hal niki ndẽq araq malik bẽdene dengan Yahudi dait dengan Yunani, antare hambe dait dengan bẽbas, antare mame dait nine. Side selapuqne sopoq lẽq dalem Deside Isa Almasih. 29 Lamun side pade dowẽn Almasih, make side pade keturunan Ibrahim. Dait side pade gen nerimaq napi saq tejanjiqang siq Allah.

Galatians 4

1 Laguq perlu tiang tegesang: Sengonẽq ahli waris masih kodẽq, araq dengan saq ngawasin ie dait ngurus kepentingan-kepentinganne jangke ie cukup umurne, maraq saq sampun tetentuang siq bapaqne. Ie teperlakuang pade maraq sopoq hambe, timaq setetune ie ẽpẽn dowẽ selapuq kesugihan nike. 3 Maraq nike ẽndah halne ite: Sengonẽq ite ndẽqman dẽwase, ite tejariang panjak siq roh-roh saq nguasein dunie niki. 4 Laguq lẽq waktu saq tepat, Allah ngutus Bije-Ne ojok dunie. Ie tebijeang siq sopoq dengan nine dait idup lẽq bawaq kekuasean Hukum Taurat. 5 Siq care nike Ie nebus dengan-dengan saq idup lẽq bawaq kekuasean Hukum Taurat; adẽq ite ẽndah bedowẽ hak jari bije-bije dowẽn Allah. 6 Keranaq side pade bije-bije dowẽn Allah, Allah mrẽntahang Roh Bije-Ne tame ojok dalem atẽnde dait atẽn tiang, nike Roh saq bemanik, "Bapa, ya Bapa." 7 Jari, side pade ndẽqne malik hambe, laguq bije. Dait lantaran side pade bije dowẽn Allah, make side ẽndah jari ahli-ahli waris lantaran Allah. 8 Laẽq side pade ndẽq kenal Allah, keranaq nike side pade jariang diriqde hambe lẽman kuase-kuase saq setetune ndẽqne Allah. 9 Laguq mangkin side pade kenal Allah, atao tepatne malik Allah kenal side pade. Nah, kembẽq side pade mẽlẽ tulak malik tipaq roh-roh dunie saq lemah dait miskin? Kembẽq side pade mẽlẽ tejariang panjak siq roh-roh nike? 10 Side pade taat lẽq jelo-jelo saq husus, bulan-bulan saq husus, dait taun-taun saq husus. 11 Tiang kuatir, ndaq-ndaq usahe tiang lẽq side pade jari sie-sie doang. 12 Semeton senamian! Sanget siq tiang tunas lẽq side pade adẽq side pade jari maraq tiang. Sẽngaq tiang ẽndah sampun jari maraq side pade. Side pade ndẽq uwah miaq kesalaqan lẽq tiang. 13 Side pade pasti masih inget napi saq jari penyebap lẽq penembẽqne tiang beriteang Kabar Solah nike lẽq side. Nike lantaran tiang sakit. 14 Lẽq waktu nike side pade ndẽq merase kenjering lẽq tiang, timaq keadaan awak tiang jari cobe belẽq umaq side pade. Malahan side pade nerimaq tiang maraq nerimaq malaẽkat Allah atao maraq nerimaq Deside Isa Almasih mẽsaq. 15 Side pade bahagie gati waktu nike. Laguq mangkin, lẽq mbẽ kebahagiean nike? Tiang nenaoq bahwe lẽq waktu nike side pade rẽde congkẽl penentengde mẽsaq jari bẽng tiang, lamun nike bau telaksaneang. 16 Napi mangkin side pade sampun anggep tiang musuh, lantaran tiang nyatayang saq kenaq tipaq side? 17 Dengan-dengan saq lain nike semanget gati boyaq side pade, laguq maksut-maksut ie pade lengẽ. Ie pade cume mẽlẽ kelin side pade lẽman tiang, adẽq side pade besemanget turut ie pade. 18 Mule bagus besemanget lẽq hal-hal saq solah, asal tetep maraq nike, dait ndaq cume lamun tiang araq bareng kance side pade. 19 Bije-bije tiang saq tiang kasihin! Mangkin tiang niki menderite malik lantaran side pade. Tiang menderite maraq sopoq inaq saq menderite sewaktu nganak. Tiang gen tetep menderite, lamun sipat-sipat Almasih ndẽqman tetu-tetu araq lẽq dalem diriqde! 20 Tiang melẽt gati araq lẽq tengaq-tengaq side pade mangkin, adẽq tiang bau ngeraos kance side siq care saq lain, sẽngaq tiang ndẽq nenaoq malik mẽlẽ piaq napi lẽq side pade! 21 Semeton-semeton saq mẽlẽ idup lẽq bawaq kekuasean Hukum-hukum Taurat, cobaq dengahang tiang! Tiang gen badaq side napi saq setetune tetulis lẽq dalem kitab Hukum Taurat. 22 Lẽq derike tetulis bahwe Ibrahim bedowẽ due bije: Inaq lẽman bije saq sopoq nike sopoq hambe, dait inaq lẽman bije saq lain nike sopoq dengan saq merdẽke. 23 Bije lẽman dengan nine saq jari hambe tebijeang biase lantaran kemẽlẽq manusie. Laguq bije lẽman nine saq merdẽke, tebijeang sẽngaq tejanjiqang siq Allah. 24 Niki bau tekadu jari perumpamean. Due dengan nine nike ibarat due perjanjian: Saq sopoq asalne lẽman Gunung Sinai -- nike Hagar; bije-bijene tebijeang sebagẽ hambe. 25 Jari, Hagar nike Gunung Sinai, lẽq negeri Arab. Ie jari lambang kote Yerusalem saq araq mangkin, sẽngaq ie idup sebagẽ hambe bareng kance bije-bijene. 26 Laguq Yerusalem saq lẽq sorge nike dengan nine saq merdẽke, dait ie saq jari inaqte. 27 Sẽngaq lẽq dalem Kitab Suci tetulis, "Pade gembire side hai dengan nine saq bangkol, saq ndẽq uwah nganak! Pade besukecite dait besurak-surakan hai side saq ndẽq uwah idap sakitne nganak! Sẽngaq dengan nine saq tebilin siq semamene gen mauq bije luwẽqan tebanding dengan nine saq idup bareng kance semamene." 28 Semeton senamian! Pade maraq Ishak, side pade bije-bije lẽman janji Allah. 29 Lẽq waktu nike bije saq tebijeang menurut kemẽlẽq manusie, nganiaye bije saq tebijeang lantaran pekayunan Roh Allah. Maraq nike ẽndah mangkin. 30 Laguq napi saq tetulis lẽq dalem Kitab Suci? Lẽq derike tetulis maraq niki: "Sediq hambe nine nike bareng kance bijene, sẽngaq bije lẽman hambe nine nike ndẽqne gen jari ahli waris bareng kance bije lẽman dengan nine saq merdẽke nike." 31 Jari, semeton-semeton, ite niki ndẽqne bije-bije lẽman sopoq hambe nine; ite niki bije-bije lẽman dengan nine saq merdẽke.

Galatians 5

1 Mangkin ite merdẽke, sẽngaq Almasih sampun merdẽkeang ite! Keranaq nike pertahenang kemerdẽkean side dait ndaq mẽlẽ tejariang hambe malik. 2 Pade inget, lamun side pade nyunat diriqde, nike artine Almasih ndẽq araq manpaatne lẽq side. Saq ngucapang niki tiang mẽsaq, Paulus. 3 Karing sekali tiang peringet dengan saq nyunat diriqne, bahwe ie wajib ngelaksaneang selapuq Hukum Taurat! 4 Side pade, saq melẽt tejariang kenaq lẽq arepan Allah sehingge hubungande kance Allah jari solah malik langan Hukum Taurat, sampun tekelin lẽman Almasih dait sampun araq lẽq luah rahmat Allah. 5 Sẽngaq langan Roh Allah dait siq iman, ite ngantih napi saq kenaq, nike pade maraq napi saq ite harepang. 6 Sẽngaq lẽq dalem Deside Isa Almasih, besunat atao ndẽq besunat ndẽq araq manpaatne; laguq saq datengang manpaat, iman saq bekarye langan kasih. 7 Laẽq side pade bejuang secare bagus. Sai saq sampun halangin side pade sehingge side pade ndẽq taat malik lẽq kebenaran? 8 Pasti saq ngelaksaneang nike nẽnten Allah saq sampun ngemanikang side pade! 9 Basen dengan, "Ragi ruti saq sekediq gen miaq mbal selapuq adonan." 10 Lẽq dalem Almasih, tiang yakin bahwe side ndẽq gen turut pikiran saq lain. Dait tiang yakin bahwe saq nyesatang pikirande, gen tehukum siq Allah. 11 Mengenai tiang, semeton senamian, kembẽq tiang tetep doang temusuhin lamun tiang masih beriteang bahwe aturan sunat nike perlu? Lamun tiang mule beriteang maraq nike, make napi saq tiang beriteang mengenai salib Almasih ndẽq nimbulang masalah. 12 Bagusan dengan-dengan saq nyesatang pikiran side nike langsung doang sugul lẽman jemaah! 13 Side sampun temanikang jari dengan saq merdẽke. Laguq ndaq kadu kemerdẽkeande nike jari tetep ngelaksaneang kehidupan lẽq dalem dose, sebalikne side pade harus saling kasihin dait saling tulung. 14 Selapuq Hukum Taurat tesimpulang lẽq dalem prẽntah saq sopoq niki, "Side harus ngasihin sepadende manusie, maraq side ngasihin diriqde mẽsaq." 15 Laguq lamun side pade saling kakoq dait saling kaken, awas, ndaq jangke side pade saling binaseang. 16 Maksut tiang maraq niki: Menengang Roh Allah mimpin side pade, dait ndaq idup menurut kemẽlẽq tabiat manusie. 17 Sẽngaq kemẽlẽq tabiat manusie belawanan kance pekayunan Roh Allah, dait pekayunan Roh Allah belawanan kance kemẽlẽq tabiat manusie. Kedue-duene saling belawanan, sehingge side pade ndẽq bau ngelaksaneang napi saq side pade melẽtang. 18 Laguq lamun Roh Allah mimpin side pade, make side pade ndẽq tekuasein siq Hukum Taurat. 19 Kemẽlẽq tabiat manusie nyate dalem perbuatan-perbuatan saq cabul, kotor dait ndẽq patut; 20 dalem penyembahan berhale dait ilmu sẽhẽr; saling bemusuhan, besiaq, talon atẽ, becat sili, dait mentingang diriq mẽsaq, perpecahan dait saling ilon, 21 serte dengki, bowos-bowosan, pẽste-pẽste jangke liwat bates dait saq lain-lainne. Lẽq selapuqne nike mangkin tiang peringet side pade maraq tiang sampun peringet ẽndah side pade laẽq, bahwe dengan-dengan saq ngelaksaneang hal-hal maraq nike ndẽq gen mauq bagian lẽq dalem Kerajaan Allah. 22 Laguq buaq Roh nike: Kasih, sukecite, damẽ sejahtere, sabar, murah atẽ, gawẽq hal saq solah, kesetiean, 23 lemah lembut, nguasein diriq. Ndẽq araq hukum saq nentang hal-hal nike. 24 Dengan-dengan saq sampun jari dowẽn Deside Isa Almasih, dengan-dengan nike sampun nyematẽq kemẽlẽq tabiat manusiene kance selapuq napsu dait kemẽlẽqne. 25 Lamun ite idup menurut Roh, alurang idupte ẽndah tepimpin siq Roh. 26 Ndaq ite jari sombong, saling nyakitang angen, dait saling talon atẽ sopoq kance saq lainne.

Galatians 6

1 Semeton senamian! Lamun sopoq dengan tedait gawẽq dose, side pade saq idup menurut Roh Allah harus bimbing dengan nike adẽqne tulak ojok langan saq kenaq. Laguq side pade harus ngelaksaneang nike secare lemah lembut, dait jagaq ndaq jangke side mẽsaq tegode ẽndah. 2 Side pade harus saling tulung lẽq kesusahan dengan, adẽq siq care nike side pade taat lẽq prẽntah Almasih. 3 Lamun sopoq dengan paran diriqne penting, padahal ndẽq, dengan nike beduste lẽq diriqne mẽsaq. 4 Sebilang dengan harus meriksaq mẽsaq napi kelakuanne solah atao ndẽq. Lamun solah, ie bau merase bangge siq hal nike. Laguq ndaq ie bandingang kance napi saq telaksaneang siq dengan lain. 5 Sẽngaq sopoq-sopoq dengan harus bedowẽ rase tanggung jawab mẽsaq. 6 Dengan saq nerimaq pengajahan mengenai Manik Allah, sepatutne ie bagiang selapuq saq solah saq araq lẽq ie tipaq dengan saq ngebẽng pengajahan nike. 7 Ndaq sesat. Allah ndẽqne bau teanggep rẽmẽh! Napi saq tetalet, nike saq tepataq. 8 Lamun dengan nalet menurut tabiat manusiene, ie gen mataq kematẽan lẽman tabiatne nike. Laguq lamun ie nalet menurut pimpinan Roh Allah, ie gen mataq idup sejati dait kekel lẽman Roh Allah. 9 Keranaq nike, ndaq ite jari pendaq ngelaksaneang hal-hal saq solah; sẽngaq lamun ite ndẽq mentelah ngelaksaneang hal-hal nike, make lẽq sopoq jelo ẽraq ite gen mauq hasilne. 10 Jari, semasih ite araq kesempatan umaq, ite harus ngelaksaneang saq solah tipaq selapuq dengan, terutame gati tipaq semeton-semetonte saq seiman. 11 Perhatiang solah-solah bagian niki saq tiang tulis mẽsaq kadu hurup saq belẽq-belẽq. 12 Dengan-dengan saq mẽlẽ ajum diriqne lẽq hal-hal saq lahiriah, ie pade saq berusahe maksaq side turut aturan sunat. Laguq ie pade laksaneang nike cume adẽq ie pade ndẽq teaniaye lantaran salib Almasih. 13 Dengan-dengan saq turut aturan sunat ẽndah ndẽqne ngelaksaneang Hukum Taurat. Laguq ie pade mẽlẽ side pade tesunat, adẽq ie pade bau banggeang bahwe side pade taat lẽq aturan nike. 14 Laguq tiang tetu-tetu ndẽq mẽlẽ banggeang napi juaq, selain Junjungante Saq Mulie Deside Isa Almasih saq sampun ninggal tepakuq lẽq kayuq salib. Sẽngaq lantaran Ie sampun ninggal lẽq kayuq salib, make dunie ndẽqne bedowẽ arti napi-napi malik umaq tiang. Dait tipaq dunie niki, tiang ẽndah piaq diriq maraqne sampun tepakuq lẽq kayuq salib. 15 Tesunat atao ndẽq tesunat, nike ndẽqne penting. Saq penting nike jari ciptean baru. 16 Bagi dengan-dengan saq idup menurut pendapet nike, dait maraq nike ẽndah Israel saq jari dowẽn Allah, tiang harep Allah gen ngicanin damẽ sejahtere dait rahmat-Ne. 17 Selanjutne, ndaq jangke sopoq dengan juaq nyusahang tiang malik, sẽngaq lẽq awak tiang araq bukti-bukti bahwe tiang pengiring Deside Isa. 18 Rahmat Junjungante Saq Mulie Deside Isa Almasih, tetep araq bareng kance side pade. Amin.

Ephesians 1

1 Dengan-dengan saq tehususang bagi Allah lẽq Epesus, saq setie lẽq Deside Isa Almasih! 2 Tiang, Paulus, siq pekayunan Allah jari rasul Deside Isa Almasih, beharep semoge Allah Bapante dait Junjungan Saq Mulie Deside Isa Almasih ngicanin rahmat dait damẽ sejahtere tipaq side pade. 3 Puji syukur tipaq Allah, Bapa Junjungante Saq Mulie Deside Isa Almasih! Ie ngicanin ite berkah siq selapuq berkah rohani lẽq dalem sorge, sẽngaq ite araq lẽq dalem Almasih. 4 Sendẽqman dunie niki tecipteang, Allah sampun milẽq ite langan Almasih siq maksut adẽq ite jari dowẽ-Ne saq husus dait ndẽq bedowẽ cacat cele lẽq arepan-Ne. Lantaran kasih Allah, 5 make Ie sampun juluan nentuang bahwe langan Deside Isa Almasih, Ie gen ngangkat ite jari bije-bije dowẽ-Ne sesuai pekayunan-Ne, 6 adẽqne tepuji rahmat-Ne saq mulie, rahmat saq teicanin tipaq ite langan Bije saq asalne lẽman Ie saq sanget Ie sayang. 7 Sẽngaq lẽq dalem Almasih dait siq daraq-Ne ite bau tetebus, nike pengampunan dose sesuai rahmat-Ne saq melimpah. 8 Ie ngelaksaneang nike lantaran Ie sanget ngasihin ite, dait kasih nike limpahang-Ne tipaq ite siq kebijaksanean dait pengertian. 9 Menurut pekayunan-Ne mẽsaq, Allah nyatayang rahasie rencane-Ne tipaq ite; Ie sampun netepang bahwe rencane-Ne nike gen teselesẽang langan Almasih. 10 Rencane nike adẽq selapuq saq lẽq sorge dait saq lẽq gumi, tejariang sopoq lẽq dalem Almasih sebagẽ kepale. Dait hal nike gen teselesẽang siq Allah lamun sampun dateng waktune. 11 Tiang nyampẽang "lẽq dalem Almasih", sẽngaq lẽq dalem Ie tiang pade mauq bagian saq tejanjiqang -- tiang pade saq lẽman penembẽq tetentuang jari nerimaq bagian nike sesuai maksut Allah, saq lẽq dalem selapuqne bekarye menurut keputusan pekayunan-Ne. 12 Siq care nike, tiang pade saq penembẽq beharep lẽq Almasih, bau memuji Allah lantaran kemuliean-Ne! 13 Side pade ẽndah sampun jari dengan-dengan saq tehususang bagi Allah sewaktu side pade dengahang manik kebenaran, nike Kabar Solah saq nyelametang side. Lẽq dalem Almasih ẽndah, side pade tesahang siq Roh Suci, saq tejanjiqang nike. 14 Roh nike jari jaminan bahwe ite gen nerimaq napi saq tejanjiqang siq Allah tipaq umat-Ne. Niki ngebẽng keyakinan lẽq ite bahwe Allah gen bẽbasang umat-Ne. Puji syukur tipaq Allah lantaran keagungan-Ne! 15 Keranaq nike, mulai lẽman tiang dengah mengenai iman side pade lẽq Junjungan Saq Mulie Deside Isa Almasih, dait mengenai kasihde lẽq selapuq dengan-dengan saq tehususang bagi Allah, 16 ndẽq tutuq-tutuq tiang besyukur lẽq Allah mengenai side pade. Tetep tiang sebut arande sewaktu tiang bedo'e. 17 Tiang tunas adẽq Allah Junjungante Saq Mulie Deside Isa Almasih, Bapa Saq Mulie, ngicanin Roh hikmat dait wahyu sehingge side pade kenal kance Ie. Roh nike gen jariang side pade bijaksane, dait gen nyatayang Allah tipaq side pade sehingge side pade kenal kance Ie. 18 Tiang tunas adẽq Allah jariang atẽ nuraninde becahaye; adẽq side pade ngerti napi saq bau side pade harepang lẽman Allah saq ngemanikang side pade. Adẽq side pade nenaoq ẽndah berembẽ limpahne berkah-berkah saq solah saq tesedieang siq Allah tipaq dengan-dengan saq tehususang umaq Ie; 19 dait berembẽ hẽbatne Allah bekarye siq penoq kuase lẽq dalem diriqte saq percaye, sesuai kekuatan kuase-Ne, 20 saq Ie laksaneang sewaktu Ie ngidupang Almasih lẽman ninggal dait ngicanin Ie kedudukan saq paling atas ngiring Allah lẽq sorge. 21 Kedudukan Almasih nike jaoq atasan tebanding kance kedudukan selapuq pemrẽntah, selapuq penguase, selapuq pemimpin, selapuq tuan-tuan, dait sai juaq saq sampun teicanin kedudukan saq atas; saq idup lẽq jaman niki dait saq gen idup lẽq jaman saq gen dateng. 22 Selapuqne tetaklukang siq Allah lẽq bawaq kekuasean Almasih, dait Almasih sampun teicanin tipaq jemaah sebagẽ kepale lẽman selapuq saq araq. 23 Jemaah nike rage Almasih, tesempurneang siq Ie saq nyempurneang selapuq-lapuqne.

Ephesians 2

1 Laẽq side pade matẽ secare rohani lantaran pelanggaran-pelanggaran dait dose-dose side pade. 2 Lẽq waktu nike side pade turut kebiasean-kebiasean dunie niki; artine side pade taat lẽq penguase-penguase saq araq lẽq awang-awang, nike roh saq mangkin nguasein atẽ dengan-dengan saq durhake. 3 Laẽq ite selapuq pade ẽndah kance ie pade; ite idup turut tabiat manusie dait ngelaksaneang napi saq nyenengang awak dait pikirante saq jahat. Lẽq waktu nike ẽndah ite jari dengan-dengan saq temurkeang siq Allah, pade maraq dengan-dengan lain. 4 Laguq Allah saq limpah siq rahmat, lantaran kasih-Ne saq belẽq, saq Ie limpahang tipaq ite, 5 sehingge lẽq waktu ite masih matẽ secare rohani lantaran pelanggaran-pelanggarante, Ie ngidupang ite malik bareng-bareng kance Almasih. Jari, cume lantaran rahmat Allah, side pade teselametang siq Allah. 6 Dait lẽq dalem Deside Isa Almasih, Allah ngidupang ite malik bareng kance Deside Isa, adẽq ite mrẽntah ngiring Ie lẽq sorge. 7 Allah ngelaksaneang nike adẽq lẽq jaman saq gen dateng, manusie bau serioq berembẽ belẽq rahmat-Ne saq tenyatayang tipaq ite langan kesolahan-Ne langan perantarean Deside Isa Almasih. 8 Sẽngaq lantaran rahmat Allah side pade teselametang langan iman; nike ndẽqne hasil usahende, laguq teicanin siq Allah, 9 nike ndẽqne hasil pegawẽande: Sampunang araq dengan saq nyombongang diriqne. 10 Sẽngaq ite niki ciptean Allah, dait langan Deside Isa Almasih, Allah miaq ite adẽq ite ngelaksaneang hal-hal saq solah saq sampun Ie siepang umaq ite. 11 Semeton senamian saq ndẽq dengan Yahudi! Pade inget keadaande lẽq waktu saq laẽq: Side pade tesebut "dengan ndẽq besunat", siq dengan Yahudi saq ngaku diriqne tesunat (maksutne saq sampun mauq tande saq tepiaq siq manusie lẽq awak ie pade). 12 Lẽq waktu nike side pade idup jaoq lẽman Almasih, side pade dengan pendateng saq ndẽq termasuk umat pilẽqan Allah, Israel. Side pade ndẽq termasuk lẽq dalem iketan perjanjian saq tepiaq siq Allah kance umat-Ne. Side pade idup lẽq dunie niki ndẽqne bedowẽ harepan dait ndẽqne bedowẽ Allah. 13 Laguq mangkin, lantaran side pade sampun lẽq dalem Deside Isa Almasih, side pade saq laẽq jaoq, sampun terapetang siq ninggalne Almasih. 14 Sẽngaq Almasih nike damẽ sejahterente, saq sampun pesopoq kedue pihak dait saq sampun ngerobohang tembok saq misahang, nike permusuhan. 15 Sẽngaq siq ninggal-Ne sebagẽ manusie Ie sampun batalang Hukum Taurat kance selapuq prẽntah dait ketentuanne, jari nyipteang keduene tejariang sopoq manusie baru lẽq dalem diriq-Ne, dait siq care nike ngaraqang damẽ sejahtere. 16 Siq ninggal-Ne lẽq kayuq salib, Almasih damẽang keduene kance Allah, sehingge ndẽq araq malik permusuhan. 17 Keranaq nike Almasih rauh dait beriteang damẽ sejahtere tipaq side; lẽq side pade dengan bangse-bangse lain saq laẽq jaoq lẽman Allah, dait tipaq dengan Yahudi saq rapet kance Allah. 18 Siq perantarean Almasih, ite selapuq -- dengan Yahudi atao dengan bangse-bangse lain -- lẽq dalem sopoq Roh, bau parek tipaq Bapa. 19 Keranaq nike, side pade ndẽq malik termasuk dengan pendateng atao dengan luah. Mangkin side pade bareng-bareng jari dengan-dengan saq tehususang bagi Allah. Side pade anggote-anggote keluarge Allah. 20 Side pade ẽndah tepenganjeng lẽq atas dasar saq tetoloq siq rasul-rasul dait nabi-nabi, dait Deside Isa Almasih saq jari batu utame. 21 Ie saq nyusun selapuq bangunan nike jari Gedẽng Allah saq suci. 22 Lẽq dalem Almasih, side pade kenyeke tepenganjeng ẽndah bareng kance dengan-dengan lain jari taoq Allah meneng langan Roh-Ne.

Ephesians 3

1 Keranaq nike tiang, Paulus, tebui lantaran Deside Isa Almasih jari kepentingan side pade dengan bangse-bangse lain. 2 Pasti side pade sampun dengah mengenai tugas saq tepercayeang lẽq tiang jari nyampẽang rahmat Allah tipaq side pade. 3 Allah nyatayang rahasie rencane-Ne lẽq tiang langan wahyu. (Mengenai hal niki sendẽqmanne sampun tiang tulis secare singket, 4 dait lamun side pade bace, side pade gen paham rahasie mengenai Almasih, maraq saq tiang pahamin.) 5 Laẽq rahasie nike ndẽq uwah tesampẽang tipaq manusie, laguq mangkin Roh Allah sampun nyatayang tipaq rasul-rasul dait nabi-nabi-Ne. 6 Rahasie nike maraq niki: Langan Kabar Solah nike, dengan saq ndẽq Yahudi milu jari ahli-ahli waris dait anggote lẽman sopoq awak, dait milu nerimaq napi saq tejanjiqang siq Allah langan Deside Isa Almasih. 7 Tiang niki hambe lẽman Kabar Solah nike, sesuai rahmat saq teicanin siq Allah. Tiang nerimaq rahmat nike menurut karye kuase Allah. 8 Lẽq antare selapuq dengan-dengan saq tehususang bagi Allah, tiang saq paling hine. Laguq Allah ngicanin tiang rahmat niki: Tugas jari beriteang Kabar Solah tipaq dengan-dengan saq ndẽq Yahudi mengenai kesugihan Almasih saq ndẽq iniq bis nike; 9 dait ẽndah adẽq langan tiang selapuq dengan nenaoq berembẽ Allah, pencipte alam semeste niki, ngelaksaneang rencane-Ne saq lẽman laẽq gati terahasieang tipaq dunie. 10 Maksut Allah nike adẽq mangkin, langan jemaah, tesampẽang macem-macem hikmat Allah tipaq pemrẽntah-pemrẽntah dait penguase-penguase lẽq sorge. 11 Allah ngelaksaneang nike pade maraq rencane-Ne saq kekel, saq Ie laksaneang siq perantarean Deside Isa Almasih, Junjungante Saq Mulie. 12 Lẽq dalem Almasih ite jari bani parek tipaq Allah siq penoq keyakinan langan imante tipaq Ie. 13 Keranaq nike, saq tiang tunas: Ndaq putus ase serioq penderitean tiang lantaran side pade, sẽngaq selapuqne nike kemulieande. 14 Keranaq nike tiang sujut lẽq arepan Bapa. 15 Lẽman Ie sebilang keluarge lẽq sorge dait lẽq gumi nerimaq aranne. 16 Tiang bedo'e adẽq Allah menurut kemuliean-Ne saq melimpah neguqang batinde siq Roh-Ne. 17 Sehingge siq iman side pade, Almasih meneng lẽq dalem atẽnde, dait side berakah kuat maraq lolo kayuq dait tedasarang lẽq dalem kasih. 18 Tiang bedo'e semoge bareng-bareng kance selapuq dengan saq tehususang bagi Allah, side pade bau paham mengenai berembẽ galuh dait bẽlone serte atasne dait dalemne kasih Almasih, 19 saq menurut akal manusie ndẽqne bau tepahamin sedalem-dalemne. Tiang bedo'e adẽq side pade kenal kasih Almasih nike, sehingge side pade tepenoqin dalem selapuq kesempurnean Allah. 20 Bagi Allah, saq sanggup ngelaksaneang jaoq luwẽqan lẽman napi saq ite do'eang atao pikirang, sesuai kuase-Ne saq bekarye lẽq dalem ite, 21 bagi Ie kemuliean lẽq dalem jemaah dait lẽq dalem Deside Isa Almasih turun temurun jangke selaẽq-laẽqne! Amin.

Ephesians 4

1 Keranaq nike tiang -- sopoq tahenan, saq tetahen lantaran jari pelayan Tuhan -- tiang bẽng nasẽhat, adẽq idupde sebagẽ dengan-dengan saq sampun temanikang siq Allah, idup maraq maksut Allah ngemanikang side. 2 Side pade harus tetep rendah atẽ, lemah lembut, dait sabar. Petitoqang kasihde siq care saling tulung sopoq kance saq lain. 3 Dait pade berusahe meliharaq kesatuan Roh siq care kadu damẽ sejahtere jari pengiketne: 4 Sopoq awak, dait sopoq Roh, pade maraq side sampun temanikang tipaq sopoq pengharepan saq araq dalem maksut Allah ngemanikang side. 5 Cume araq sopoq Tuhan, sopoq iman, sopoq baptisan, 6 sopoq Allah dait Bapa lẽman selapuq, Allah saq lẽq atas selapuq dait siq selapuq dait bekarye langan dait lẽq dalem selapuq. 7 Sopoq-sopoq ite nerimaq rahmat menurut ukuran saq teicanin siq Almasih. 8 Lẽq dalem Kitab Suci tetulis, "Sewaktu Ie taẽk ojok taoq saq paling atas, Ie gadingang luwẽq tawanan; dait Ie ngicanin paice-paice tipaq manusie." 9 Nah, lamun teparan "Ie taẽk" artine Ie tetu-tetu sampun turun jangke taoq saq paling bawaq lẽq gumi niki. 10 Dait Ie saq sampun turun nike, Ie ẽndah saq taẽk jangke taoq saq jaoq atasan lẽman selapuq langit jari penoqang selapuq-lapuqne. 11 Ie saq ngicanin rasul-rasul dait nabi-nabi, dengan-dengan saq nyampẽang Kabar Solah dait pemimpin-pemimpin jemaah dait guru-guru jemaah. 12 Hal nike Ie laksaneang jari ngelengkapin dengan-dengan saq tehususang bagi Allah jari pegawẽan pelayanan, jari pembangunan rage Almasih. 13 Siq care nike ite selapuq jari sopoq siq iman saq pade dait pengertian saq pade mengenai Bije saq asalne lẽman Allah. Dait ite jari dengan-dengan saq dẽwase, saq sayan ngonẽq jari sayan sempurne maraq Almasih. 14 Make ite ndẽq jari kanak-kanak malik saq ndẽq tetep pendirian dait tejauq ketoq-ketẽq siq macem-macem pengajahan lantaran tipu muslihat manusie dait lẽq dalem kelicikan ie pade saq nyesatang. 15 Sebalikne, ite harus nyatayang kebenaran siq atẽ saq penoq kasih, sehingge dalem selapuq hal ite sayan ngonẽq jari sayan sempurne maraq Almasih saq jari kepalente. 16 Lẽq bawaq pimpinan-Ne, selapuq anggote awak nike tesusun rapi, dait saling tehubungang siq sendi-sendine sopoq-sopoq. Dait lamun sebilang anggote nike begawẽan maraq saq seharusne, make selapuq awak nike gen jari sayan dẽwase dait kuat langan kasih. 17 Keranaq nike demi pesẽngan Tuhan, niki saq gen tiang sampẽang dait tegesang: Sampunang malik idup maraq dengan-dengan saq ndẽq kenal kance Allah siq pikiranne saq sie-sie. 18 Pikiran ie pade nike sampun bute. Ie pade ndẽq kenal kance kehidupan saq teicanin siq Allah, sẽngaq ie pade tetu-tetu bodo dait pagah. 19 Ie pade sampun ndẽq bedowẽ rase ilaq malik, sehingge ie pade turut selapuq napsune, dait serakah gawẽq perbuatan saq cabul. 20 Laguq side pade ndẽq maraq nike. Side pade sampun berajah jari kenal kance Almasih. 21 Sẽngaq side pade sampun dengah mengenai Ie dait nerimaq pengajahan lẽq dalem Ie menurut kebenaran saq nyate lẽq dalem Deside Isa. 22 Keranaq nike tetẽh selapuq tabiat manusiende saq laẽq, saq kenyeke nyẽdaq siq kemẽlẽq-kemẽlẽq saq nyesatang. 23 Roh dait pikirande harus tejariang baru selapuqne. 24 Side pade harus idup jari manusie baru saq tecipteang menurut pekayunan Allah lẽq dalem kebenaran dait kesucian saq setetune. 25 Keranaq nike semeton senamian, sampunang malik beduste. Side pade harus jujur sopoq kance saq lain, sẽngaq ite selapuq pade-pade jari bagian jemaah Almasih. 26 Lamun side pade sili, ndaq alurang hal nike jari penyebap side pade bedose. Ndaq sili sejeloan, 27 adẽq Belis ndẽq mauq kesempatan. 28 Dengan saq biase memaling harus engkah memaling. Sebalikne ie harus begawẽan adẽqne mauq napkahne secare jujur dait mauq nulung dengan saq kekurangan. 29 Lamun side pade ngeraos, ndaq kadu ucapan-ucapan saq kotor. Kadu ucapan-ucapan saq solah saq bau ngajah dait nulung dengan lain. Ucapan-ucapan saq maraq nike gen datengang rahmat tipaq dengan-dengan saq dengah. 30 Ndaq miaq Roh Allah jari asẽq. Side pade sampun tesahang siq Roh Allah bahwe side pade jari dowẽn Allah. Roh nike ẽndah jari jaminan bahwe jelo penyelametan gen dateng tipaq side. 31 Tetẽh selapuq rase sakit atẽ, dendem, sili, betungkasan dait nyumpaq-nyumpaq. Ndaq malik araq rase meriq atao perasaan lain saq maraq nike. 32 Sebalikne, side pade harus gerasaq dait murah atẽ sopoq kance saq lain, dait saling ngampunin pade maraq Allah ngampunin side pade langan Almasih.

Ephesians 5

1 Keranaq nike side pade harus turut teladan Allah, sẽngaq side pade bije-bije saq tekasihin siq Allah. 2 Idupde harus tekuasein siq kasih, maraq Almasih ẽndah ngasihin ite. Ie ngurbanang diriq-Ne umaq ite, jari sopoq persembahan saq sengẽh dait kurban saq nyenengang Allah. 3 Laguq perbuatan-perbuatan saq cabul dait saq ndẽq patut, atao serakah, ndaq gati teraosang lẽq tengaq-tengaq side pade -- mule maraq nike sepatutne dengan-dengan saq tehususang bagi Allah. 4 Ndẽqne patut ẽndah side ngucapang raos saq kotor saq ndẽq araq manpaatne dait saq ndẽq pantes. Sebalikne side pade harus ngucapang syukur tipaq Allah. 5 Pade perhatiang solah-solah: Dengan saq gawẽq perbuatan saq cabul, atao ndẽq patut, atao serakah (kelakuan maraq nike pade doang maraq nyembah berhale), dengan nike ndẽqne mauq bagian lẽq dalem Kerajaan Almasih dait Allah. 6 Ndaq side pade tetipu siq raosan-raosan saq kosong. Sẽngaq hal-hal niki saq datengang murke Allah tipaq dengan-dengan durhake. 7 Jari, ndaq gati berubungan kance dengan-dengan maraq nike. 8 Laẽq side mẽsaq araq lẽq dalem peteng. Mangkin side pade sampun jari terang lẽq dalem Tuhan. Keranaq nike side pade harus idup sebagẽ bije-bije terang. 9 Sẽngaq terang cume ngasilang kesolahan dait keadilan dait kebenaran. 10 Pade berusahe jari nguji napi saq nyenengang Tuhan. 11 Ndaq gawẽq perbuatan-perbuatan saq ndẽq araq manpaatne saq tegawẽq siq dengan-dengan saq idup lẽq dalem peteng. Sebalikne, side pade harus nyatayang kesalaqan-kesalaqanne. ( 12 Sẽngaq hal-hal saq ie pade laksaneang nyeboq-nyeboq nike, jari teraosang doang sampun merilaq gati.) 13 Selapuq hal saq teperhatiang lẽq dalem menah, gen pedas penggitan. 14 Sẽngaq selapuq saq penggitan nike terang. Keranaq nike tesampẽang maraq niki, "Pade ures, hai side saq tindoq, dait idup lẽman ninggal! Almasih gen becahaye lẽq atasde." 15 Keranaq nike, pade perhatiang solah-solah berembẽ side idup. Ndaq idup maraq dengan-dengan bodo; pade idup maraq dengan-dengan saq bijaksane. 16 Manpaatang solah-solah selapuq kesempatan saq araq lẽq side, sẽngaq jaman niki jaman saq jahat. 17 Ndaq bodo, laguq selidik napi saq tekayunang siq Tuhan. 18 Ndaq side pade bowos siq anggur, sẽngaq nike gen nyẽdaq side pade. Sebalikne side pade harus tekuasein siq Roh Allah. 19 Lẽq waktu side pade ngeraos, kadu ucapan-ucapan saq araq lẽq dalem Zabur, nyanyiang pujian bagi Allah dait lagu rohani. Side pade harus memuji Tuhan siq sepenoq angen. 20 Sebilang waktu dait lẽq hal napi juaq side harus besyukur lẽq Allah Bapa, siq pesẽngan Deside Isa Almasih, Junjungante Saq Mulie. 21 Jari hormatin Almasih, side harus saling hormatin sopoq kance saq lain. 22 Hai senine, tunduk lẽq semamende, maraq tipaq Tuhan. 23 Sẽngaq semame nike jari kepale lẽq seninene, pade maraq Almasih ẽndah jari kepale lẽq jemaah dait Ie ẽndah saq nyelametang jemaah saq jari rage-Ne. 24 Pade maraq jemaah ẽndah tunduk lẽq Almasih, maraq nike ẽndah lẽq dalem selapuq hal, senine harus tunduk lẽq semame. 25 Hai semame, kasihin seninende, pade maraq Almasih ngasihin jemaah dait ngurbanang diriq-Ne umaq jemaah nike. 26 Almasih ngelaksaneang nike jari nyuciang jemaah, sesampun Ie persiq siq baptisan dait manik-Ne. 27 Siq care nike Almasih miaq jemaah nike bau nganjeng secare agung dait murni lẽq arepan-Ne, ndẽq araq bedowẽ cacat atao cele. 28 Maraq nike ẽndah semame harus ngasihin seninene maraq ie ngasihin awakne mẽsaq. Dengan saq ngasihin seninene artine ie ngasihin diriqne mẽsaq. ( 29 Ndẽq uwah araq dengan saq meriq lẽq awakne mẽsaq. Sebalikne, ie peliharaq dait jagaq, maraq Almasih ẽndah peliharaq jemaah-Ne. 30 Ite nenaoq hal nike, sẽngaq ite anggote-anggote rage Almasih.) 31 Lẽq dalem Kitab Suci tetulis, "Keranaq nike sopoq dengan mame gen bilin inaq amaqne dait besopoq kance seninene, dait deduaqne gen jari sopoq." 32 Ayat nike bedowẽ maqne saq dalem. Dait tiang hubungang hal nike antare Almasih kance jemaah. 33 Laguq ayat nike araq ẽndah hubunganne kance side pade. Sebilang semame harus ngasihin seninene maraq ie ngasihin diriqne mẽsaq dait sebilang senine harus berusahe hormat lẽq semamene.

Ephesians 6

1 Kanak-kanak saq jari pengiring Almasih, harus taat lẽq dengan toaqde sẽngaq hal nike saq patut telaksaneang. 2 "Pade hormatin amaqde dait inaqde". Nike prẽntah Allah saq penembẽq saq berisi janji, 3 "Adẽq side bahagie dait bẽlo umurde lẽq gumi." 4 Semeton senamian saq jari amaq! Ndaq perlakuang bije-bijende semẽlẽ angende sehingge ie pade jari sili. Sebalikne, didik ie pade lẽq dalem pengajahan dait nasẽhat Tuhan. 5 Semeton senamian saq jari hambe! Pade turut prẽntah tuande saq lẽq dunie niki. Laksaneang hal nike siq rase hormat dait patuh serte pacu-pacu, pade maraq side pade laksaneang tipaq Almasih. 6 Ndaq side bekelakuan maraq nike cume lẽq waktu side teawasin, cume jari teajum siq manusie. Laguq side pade harus laksaneang sebagẽ hambe Almasih saq kenyeke turut pekayunan Allah sepenoq angen. 7 Pegawẽan saq side pade laksaneang sebagẽ hambe nike, harus side pade laksaneang siq atẽ saq gembire maraq Tuhan saq side pade layanin, dait ndẽqne manusie. 8 Pade inget bahwe sebilang dengan, timaq hambe atao dengan merdẽke, lamun ie ngelaksaneang hal-hal saq solah, ie gen nerimaq balesan lẽman Tuhan. 9 Semeton senamian saq jari tuan! Side pade harus bekelakuan maraq nike ẽndah lẽq hambe-hambende. Ndaq malik kadu anceman-anceman. Inget bahwe side pade dait hambe-hambende nike pade-pade bedowẽ sopoq Tuan, nike Tuhan saq lẽq sorge. Ie nẽnten bẽde-bẽdeang dengan. 10 Ahirne, side harus jari kuat siq kekuatan saq side pade mauq lẽman kuase Tuhan, sẽngaq side pade araq lẽq dalem Tuhan. 11 Pade kadu selapuq perlengkapan perang saq teicanin siq Allah, adẽq side pade bau tahen ngelawan siasat-siasat Belis saq licik nike. 12 Sẽngaq ite bejuang ndẽqne ngelawan manusie, laguq ngelawan selapuq kekuatan sẽtan-sẽtan saq nguasein jaman saq jahat niki. Ite ngelawan roh-roh jahat saq araq lẽq awang-awang. 13 Keranaq nike, mangkin, pade kadu selapuq perlengkapan perang Allah, adẽq lẽq jelo saq jahat, side pade sanggup ngelawan serangan-serangan musuh. Dait adẽq sesampun side pade bejuang jangke tutuq, side pade masih gagah perkase. 14 Side pade harus tetep bejage-jage. Pade kadu kesetieande lẽq Allah jari sabuk, dait ketulusan jari kelambi besinde. 15 Kerẽdeande jari beriteang Kabar Solah damẽ sejahtere jari sepatunde. 16 Sebilang waktu kadu percayende tipaq Tuhan jari senjate penangkis, siq care nike side pade bau kalahang selapuq anak panaq berapi lẽman si jahat. 17 Pade bait keselametan jari songkoq waje, dait Manik Allah jari klẽwang lẽman Roh Allah. 18 Laksaneang selapuqne nike sambil bedo'e jari tunas pertulungan lẽman Allah. Lẽq sebilang kesempatan, pade bedo'e lẽq dalem Roh dait side pade harus tetep bejage-jage lẽq dalem do'ende nike siq petunasan saq ndẽq araq tutuqne umaq selapuq dengan-dengan saq tehususang bagi Allah. 19 Dait do'eang tiang ẽndah, adẽq lẽq waktu tiang ngeraos, Allah ngicanin tiang ucapan-ucapan saq tepat. Dait adẽq tiang bani jari nyampẽang rahasie Kabar Solah nike. 20 Lantaran Kabar Solah lẽman Allah nike, tiang jari sopoq utusan, dait mangkin araq lẽq dalem bui. Pade bedo'e adẽq tiang bani ngeraos mengenai Kabar Solah nike, berembẽ tiang harus ngeraos. 21 Tikikus, semetonte dait pelayan saq setie dalem karye Tuhan, gen badaq side selapuq hal mengenai tiang, adẽq side pade nenaoq keadaan tiang dait pegawẽan tiang. 22 Keranaq nike tiang ngutus ie tipaq side, jari badaq side selapuq keadaan tiang pade, adẽq ie belẽqang angende. 23 Damẽ sejahtere dait kasih dait iman lẽman Allah, Bapa dait lẽman Junjungan Saq Mulie Deside Isa Almasih araq bareng kance semeton senamian. 24 Rahmat Allah araq bareng kance selapuq dengan saq ngasihin Junjungante Saq Mulie Deside Isa Almasih siq kasih saq kekel.

Philippians 1

1 Selapuq dengan-dengan saq tehususang bagi Allah saq araq lẽq Pilipi, dait saq sampun lẽq dalem Deside Isa Almasih. Dait semeton-semeton pengawas dait pelayan jemaah! Tiang, Paulus, kance Timotius, hambe-hambe Deside Isa Almasih, beharep semoge 2 rahmat dait sejahtere lẽman Allah, Bapante, dait Junjungan Saq Mulie Deside Isa Almasih araq bareng kance side pade. 3 Tiang ngucap syukur tipaq Allah, sebilang tiang inget lẽq side pade. 4 Dait sebilang tiang do'eang side selapuq, Tiang bedo'e siq sukecite. 5 Tiang besyukur tipaq Allah sẽngaq side pade sampun nulung tiang nyampẽang Kabar Solah lẽman Allah mulai lẽman jelo penembẽq jangke mangkin niki. 6 Sẽngaq lẽq dalem atẽn tiang, tiang yakin bahwe Allah, saq sampun mulai karye saq solah lẽq dalem diriqde gen nutuqang ẽndah jangke kerauhan Deside Isa Almasih. 7 Mule patut tiang bedowẽ perasaan maraq nike lẽq side pade, sẽngaq selapuqde tetep araq lẽq angen tiang. Dait side pade ẽndah sampun bareng kance tiang nerimaq rahmat saq sampun teicanin siq Allah tipaq tiang sewaktu tiang masih lẽq bui dait sewaktu tiang bẽle dait pertahenang Kabar Solah nike. 8 Sẽngaq Allah nike saksi tiang bahwe tiang tetu-tetu kangen lẽq side siq rase kasih lẽman Deside Isa Almasih. 9 Niki do'e tiang umaq side pade: Semoge kasih side pade sayan luwẽq lẽq dalem penenaoq saq kenaq dait lẽq dalem selapuq pengertian. 10 Sehingge side pade tao pilẽq napi saq paling solah. Siq care nike, jangke kerauhan Almasih side pade jari suci dait ndẽq bedowẽ cacat cele, 11 penoq siq kebajikan, saq cume bau tehasilang siq Deside Isa Almasih, jari kemuliean dait pujian bagi Allah. 12 Tiang mẽlẽ side pade nenaoq bahwe hal-hal saq sampun telaksane lẽq tiang, malahan jari penyebap luwẽqan malik dengan dengah dait percaye lẽq Kabar Solah nike. 13 Akibatne, selapuq pengawal istane dait selapuq dengan lain nenaoq bahwe tiang tebui lantaran tiang jari pelayan Almasih. 14 Dait keadaan tiang saq tebui niki sampun miaq luwẽq semeton-semeton seiman lẽq kote niki jari sayan yakin lẽq dalem Tuhan, sehingge ie pade sayan bani, ndẽqne takut-takut malik ngabarang Manik Allah. 15 Mule araq pire dengan lẽq antare ie pade saq beriteang Almasih lantaran talon atẽ dait mẽlẽ betungkasan, laguq saq lainne beriteang Almasih sẽngaq bedowẽ maksut saq solah. 16 Ie pade saq beriteang siq maksut saq solah ngelaksaneang hal nike lantaran kasih, sẽngaq ie pade nenaoq bahwe tiang araq lẽq dalem bui jari bẽle Kabar Solah lẽman Allah nike. 17 Laguq dengan saq lain beriteang Almasih siq maksut saq ndẽq ihlas; ie pade beriteang jari kepentinganne mẽsaq. Siq care nike ie pade beharep bau miaq tiang jari sayan susah lẽq dalem bui. 18 Laguq ndẽqne kembẽ-kembẽ! Sẽngaq napi juaq maksutne, jujur atao palsu, saq penting Almasih teberiteang ẽndah; tiang jari seneng. Dait tiang gen tetep merase maraq nike, 19 sẽngaq tiang nenaoq bahwe siq do'e-do'ende dait siq bantuan lẽman Roh Deside Isa Almasih, tiang gen tebẽbasang. 20 Sẽngaq saq tiang melẽtang gati dait saq tiang harepang nike, adẽq lẽq dalem selapuq hal tiang ndẽq teperilaq. Sebalikne tiang beharep adẽq sebilang waktu, terutame gati mangkin, tiang bani sehingge siq selapuq awak dait roh tiang -- timaq tiang idup atao matẽ -- Almasih temulieang. 21 Sẽngaq bagi tiang idup nike umaq Almasih dait matẽ nike keuntungan. 22 Laguq lamun tiang idup lẽq dunie niki, tiang harus begawẽan dait beramal. Jari mbẽ saq harus tiang pilẽq, mindah tiang. 23 Tiang teantuq lẽman due pihak. Tiang melẽt gati bilin dunie niki, terus lalo dait araq bareng kance Almasih, sẽngaq nike jaoq solahan; 24 laguq, jari kepentingan side, solahan lamun tiang masih ndot lẽq dunie. 25 Tiang yakin lẽq hal nike. Keranaq nike tiang nenaoq tiang gen tetep ndot bareng kance side pade, adẽq side pade sayan maju dait besukecite lẽq dalem iman. 26 Keranaq nike, laun lamun tiang tulak ojok side, kebanggean side pade lẽq dalem Deside Isa Almasih gen sayan luwẽqan malik lantaran tiang. 27 Cume, padeang idupde kance Kabar Solah mengenai Almasih, adẽq lamun tiang dateng, tiang bau serioq, atao lamun tiang ndẽq dateng, tiang bau dengah bahwe side pade tetep araq lẽq dalem sopoq roh dait siq sopoq angen bejuang bareng-bareng lẽq dalem iman saq asalne lẽman Kabar Solah lẽman Allah nike. 28 Side pade harus tetep bani: Ndaq side pade takut lẽq musuh-musuhde. Bagi ie pade, selapuqne nike tande kebinasean, laguq umaq side pade nike tande keselametan saq asalne lẽman Allah. 29 Sẽngaq Allah sampun ngicanin paice tipaq side pade ndẽqne cume jari percaye lẽq Almasih, laguq jari menderite ẽndah bagi Almasih. 30 Mangkin side pade milu ẽndah kance tiang dalem perjuangan saq pade maraq saq laẽq side serioq lẽq tiang, dait saq mangkin side dengah mengenai tiang.

Philippians 2

1 Jari, lantaran lẽq dalem Almasih araq nasẽhat, araq penghiburan kasih, araq persahabatan lẽq dalem Roh Suci, araq rase saling kasihin dait belas kasihan, 2 sempurneang sukecite tiang siq hal-hal niki: Side pade harus sopoq angen dait sopoq pikiran, lẽq dalem sopoq kasih, sopoq jiwe, sopoq tujuan. 3 Ndaq ngelaksaneang napi juaq lantaran jari kepentingan mẽsaq, atao jari nyombongang diriq. Sebalikne, side pade sopoq-sopoq harus rendah atẽ anggep dengan lain solahan tebanding diriqde mẽsaq. 4 Sebilang dengan ndaq cume merhatiang kepentinganne mẽsaq, laguq kepentingan dengan lain ẽndah. 5 Side pade harus bedowẽ pikiran maraq Deside Isa Almasih: 6 Sẽngaq timaq Ie bedowẽ sipat ilahi, laguq Ie nẽnten nganggep bahwe keadaan-Ne saq ilahi nike harus tepertahenang. 7 Sebalikne, Ie lepas selapuqne terus jari pade maraq sopoq hambe. Ie jari pade maraq manusie. Dait lẽq dalem keadaan sebagẽ manusie, 8 Ie ngerendahang diriq-Ne dait taat jangke ninggal -- malahan jangke ninggal lẽq kayuq salib. 9 Keranaq nike Ie tetinggiang gati siq Allah dait Ie teicanin pesẽngan saq atasan lẽman selapuq pesẽngan. 10 Adẽq lẽq dalem pesẽngan Deside Isa Almasih, selapuq mahluk saq lẽq sorge, dait saq lẽq gumi, dait saq lẽq bawaq gumi, gen sujut lẽq arepan-Ne. 11 Dait selapuq biwih gen ngaku, "Deside Isa Almasih nike Junjungan Saq Mulie," bagi kemuliean Allah, Bapante. 12 Semeton senamian saq tiang kasihin, side pade tetep taat, keranaq nike jari dengan saq sampun teselametang, side pade harus ngamalang hal-hal saq kenaq, siq rase hormat dait patuh lẽq Allah, ndẽqne cume maraq sewaktu tiang araq lẽq tengaq-tengaq side pade, laguq lebihan malik mangkin, sewaktu tiang jaoq lẽman side pade, 13 sẽngaq Allah mẽsaq saq bekarye lẽq dalem diriqde jari miaq side pade rẽde dait sanggup ngelaksaneang menurut maksut Allah saq solah. 14 Laksaneang napi juaq siq care ndaq ngerumun dait betungkasan. 15 Adẽq side pade ndẽq araq cacat cele dait murni, sebagẽ bije-bije dowẽn Allah saq idup tulus dait kenaq lẽq tengaq-tengaq dengan-dengan jahat dait bedose, sehingge lẽq antare ie pade, side pade becahaye maraq bintang-bintang lẽq dalem dunie. 16 Lẽq waktu nike ẽndah, side pade harus nyatayang tipaq ie pade Manik Allah saq ngicanin idup. Adẽq siq care nike, tiang bau jari bangge sewaktu ẽraq Deside Isa Almasih rauh malik, sẽngaq ternyate tiang ndẽq sie-sie lelah berusahe. 17 Laguq timaq daraq tiang harus tetumpahang ẽndah jari kurban bagi Allah dait pengabdian demi imande, tiang cemoh dait tiang besukecite kance side pade selapuq. 18 Maraq nike ẽndah side pade harus merase seneng dait milu gembire bareng tiang. 19 Lẽq dalem Junjungan Saq Mulie Deside Isa Almasih, tiang beharep bau aruan ngutus Timotius tipaq side, adẽq atẽn tiang jari tenang sẽngaq tiang nenaoq hal mengenai side. 20 Sẽngaq dengan saq araq kance tiang, ndẽq araq sopoq dengan juaq saq sopoq angen dait sopoq pikiran maraq tiang kance ie dait saq tetu-tetu merhatiang kepentingan side. 21 Sẽngaq selapuq saq lainne cume ngurus kepentingan diriqne mẽsaq doang, ndẽqne kepentingan Deside Isa Almasih. 22 Side nenaoq bahwe kesetieanne sampun teuji. Ie sampun begawẽan bareng kance tiang jari nyampẽang Kabar Solah lẽman Allah. Tiang pade kance due maraq anak kance amaq. 23 Keranaq nike jelap sesampun tiang nenaoq berembẽ jarine pelekare tiang laun, tiang gen ngutus ie ojok side. 24 Laguq tiang percaye lẽq dalem Tuhan, bahwe tiang mẽsaq ndẽqne pire ngonẽq malik gen dateng ẽndah jangoq side pade. 25 Mengenai semetonte Epaproditus, saq side pade utus jari nulung tiang, tiang anggep perlu suruq ie tulak ojok side. Ie sampun bareng kance tiang lẽq dalem pegawẽan dait perjuangan tiang. 26 Sẽngaq ie sampun kangen gati lẽq side selapuqne, dait ie ndẽq tenang sẽngaq side pade sampun mauq berite bahwe ie sakit. 27 Mule tetu ie sakit jangke gen ninggal. Laguq Allah periak lẽq ie; dait ndẽqne cume ie doang, laguq tiang ẽndah, adẽq tiang ndaq jari sayan sedih malik. 28 Keranaq nike sayan belẽq ẽndah angen tiang gen suruq ie tulak ojok side, adẽq side pade seneng malik lamun side pade bedait kance ie, dait kuatir tiang jari sayan kurang. 29 Jari, terimaq ie siq sukecite lẽq dalem Tuhan. Hormatin selapuq dengan saq maraq ie. 30 Sẽngaq ie jangke gen ninggal demi pengabdianne tipaq Almasih dait nyawene tetaroqang jari genepang napi saq kurang lẽq dalem usahe side pade nulung tiang.

Philippians 3

1 Ahirne, semeton-semeton tiang, side pade harus besukecite lẽq dalem Tuhan. Tiang ndẽq merase berat jari nulis malik napi saq sampun tiang tulis tipaq side sendẽqmanne; sẽngaq hal nike solah jari keselametande. 2 Onyaq-onyaq lẽq dengan-dengan saq gawẽq hal-hal saq jahat, dengan-dengan saq pantes tesebut acong. Ie pade paksaq adẽq dengan-dengan tesunat. 3 Sẽngaq ite niki dengan-dengan saq sampun nerimaq sunat saq sejati, saq beribadah siq Roh Allah, dait jari bangge lẽq dalem Deside Isa Almasih dait ndẽq percaye lẽq hal-hal saq lahiriah. 4 Setetune tiang bau doang beharep sepenoq angen lẽq hal-hal saq lahiriah nike. Sẽngaq lamun araq dengan saq merase ie bedowẽ alasan jari beharep sepenoq angen lẽq hal-hal saq lahiriah, tiang lebihan malik. 5 Tiang tesunat sewaktu beumur baluq jelo. Tiang tebijeang jari dengan Israel, lẽman suku bangse Benyamin; tiang dengan Ibrani asli. Dalem hal ketaatan lẽq Hukum-hukum Taurat, tiang niki anggote golongan Parisi. 6 Malahan tiang semanget gati sehingge tiang nganiaye jemaah. Lamun tenilai menurut Hukum Taurat, tiang dengan saq solah saq ndẽq bedowẽ cacat cele. 7 Laguq lantaran Almasih, make selapuqne saq laẽq tiang anggep untung, mangkin selapuqne nike tiang anggep rugi. 8 Ndẽqne hal-hal nike doang; laguq malahan selapuq hal tiang anggep hal-hal saq ngerugiang doang. Saq tiang ẽpẽang mangkin niki lebih mulie: Kenal kance Deside Isa Almasih, Junjungan tiang Saq Mulie. Lantaran Almasih, make tiang sampun lepas selapuqne. Tiang anggep selapuqne nike maraq dedoro doang, adẽq tiang mauq Almasih, 9 dait araq lẽq dalem Ie ndẽqne siq kebenaran tiang mẽsaq lantaran taat lẽq Hukum Taurat, laguq siq kebenaran lantaran percaye lẽq Almasih, nike kebenaran saq teicanin siq Allah, siq dasar percaye lẽq Deside Isa Almasih. 10 Sopoq-sopoqne saq tiang melẽtang nike adẽq tiang kenal kance Almasih dait ngalamin kuase saq ngidupang Ie lẽman ninggal. Tiang melẽt milu menderite bareng kance Ie dait jari pade maraq Ie dalem hal ninggal-Ne. 11 Adẽq lẽq penutuqne tiang mẽsaq gen teidupang malik lẽman tengaq-tengaq dengan ninggal. 12 Tiang ndẽq paran bahwe tiang sampun berhasil atao sampun jari sempurne, laguq tiang tetep berusahe, sang tiang iniq mauq, sẽngaq tiang ẽndah sampun tebau siq Deside Isa Almasih. 13 Semeton senamian, tiang ndẽq merase bahwe tiang sampun berhasil ngerebut hadiah nike. Laguq araq sopoq hal saq tiang laksaneang, tiang ngelupaqang napi saq araq lẽq mudin tiang, dait berusahe keras adẽq tiang mauq napi saq araq lẽq julun tiang. 14 Dait pelai terus tipaq tujuan adẽq mauq hadiah, dait tiang temanikang siq Allah lẽman sorge langan Deside Isa jari mauq hadiah nike. 15 Ite selapuq saq sampun dẽwase secare rohani, harus bedowẽ pikiran maraq nike. Laguq lamun lẽq antare side araq saq lain pendapetne, make Allah gen jelasang ẽndah hal nike lẽq side. 16 Laguq ite harus idup menurut napi saq sampun ite turut jangke mangkin niki. 17 Semeton senamian! Silaq turut teladan tiang. Pade perhatiang selapuq dengan saq idup menurut teladan saq sampun tiang pade bẽng lẽq side. 18 Sẽngaq tiang sampun rimpes gati badaq side, dait mangkin tiang ulang malik sambil tiang nangis, bahwe araq luwẽq dengan saq idup jari musuh salib Almasih. 19 Idup dengan-dengan maraq nike gen tutuq lẽq keancuran, sẽngaq Tuhan ie pade, tianne mẽsaq. Hal-hal saq merilaq, malahan nike saq ie pade banggeang; sẽngaq ie pade cume mikirang hal-hal saq araq lẽq dunie niki doang. 20 Laguq ite niki warge sorge, dait lẽman derike ẽndah ite ngantos, Junjungan Saq Mulie Deside Isa Almasih sebagẽ Juruselamet. 21 Awakte saq lemah niki gen terobah siq Almasih jari maraq rage-Ne mẽsaq saq mulie. Ie bau ngelaksaneang nike lantaran Ie bedowẽ kuase jari ngalahang selapuq-lapuqne.

Philippians 4

1 Keranaq nike, semeton-semeton tiang saq tiang kasihin dait saq tiang kangen, saq jari sukecite dait mahkote tiang, side pade harus tetep teguq lẽq dalem Tuhan! 2 Tiang tunas tipaq Euodia dait Sintike adẽq ie pade sopoq angen dait sopoq pikiran lẽq dalem Tuhan. 3 Tipaq batur tiang saq setie, tiang tunas adẽq side tulung semeton-semeton nike. Deduaqne sampun lelah begawẽan bareng kance tiang jari beriteang Kabar Solah lẽman Allah; pade maraq Klẽmen dait selapuq dengan lainne saq begawẽan bareng kance tiang. Aran-aran ie pade araq tetulis lẽq dalem Kitab Kehidupan. 4 Semoge side pade tetep besukecite lẽq dalem Tuhan. Karing sekali tiang ucapang: Pade besukecite! 5 Kelakuande saq solah harus teserioq siq selapuq dengan: Sẽngaq ndẽqne ngonẽq malik Tuhan gen rauh. 6 Ndaq side pade kuatir lẽq napi juaq. Laguq nyatayang tipaq Allah selapuq hal saq side melẽtang dalem do'e dait petunasan siq ucapan syukur. 7 Damẽ sejahtere lẽman Allah saq ndẽqne tepahamin siq pikiran manusie, gen meliharaq atẽ dait pikirande lẽq dalem Deside Isa Almasih. 8 Ahirne, semeton senamian, pikirang selapuq saq kenaq, selapuq saq mulie, selapuq saq adil, selapuq saq suci, selapuq saq solah, selapuq saq maiq tedengah, selapuq saq tesebut kebajikan dait patut tepuji, pikirang selapuqne nike. 9 Laksaneang napi saq side pade perajahin, terimaq, dengah dait serioq lẽman tiang. Allah sumber damẽ sejahtere, gen araq bareng kance side pade. 10 Tiang sanget besukecite lẽq dalem Tuhan, sẽngaq sesampun bẽgaq ngonẽq, baruq mangkin niki pikiran dait perasaan side pade araq malik tipaq tiang. Perhatian side mule tetep araq, laguq side pade ndẽq araq kesempatan. 11 Hal niki tiang sampẽang ndẽqne lantaran tiang kekurangan, sẽngaq tiang sampun berajah cukupang diriq tiang siq napi saq araq. 12 Tiang sampun ngalamin idup kekurangan, dait ẽndah idup saq belebihan. Tiang sampun nenaoq rahasiene ngadepin keadaan napi juaq; timaq nike keadaan makmur atao keadaan miskin, keadaan mẽwah atao saq kekurangan. 13 Segale macem keadaan bau tiang hadepin siq kekuatan saq teicanin siq Almasih tipaq tiang. 14 Laguq napi saq side pade laksaneang nike mule solah, bahwe side pade sampun nulung tiang lẽq waktu tiang susah. 15 Side pade dengan Pilipi! Side mẽsaq nenaoq bahwe laẽq sewaktu tiang bilin Makedonia, sewaktu Kabar Solah nike tiang beriteang penembẽqne, side pade sopoq-sopoqne jemaah saq nulung tiang; side pade sopoq-sopoqne saq milu merase untung dait rugi idup bareng tiang. 16 Sewaktu tiang lẽq Tesalonika dait merluang bantuan, lebih lẽman sekali side pade sampun ngirim bantuan tipaq tiang. 17 Nike ndẽqne berarti tiang cume mẽlẽ nerimaq bantuan. Saq tiang melẽtang adẽq tiang mauq serioq hasil-hasil saq ngeromboq keuntungande. 18 Tiang sampun nerimaq selapuqne -- malahan jangke limpah! Selapuq bantuan saq side pade kirim tipaq tiang, sampun tiang terimaq lẽman Epaproditus. Bantuan-bantuan lẽman side pade nike maraq sopoq persembahan saq sengẽh, sopoq kurban saq nyenengang Allah dait teterimaq siq Allah. 19 Allah tiang gen cukupang selapuq keperluande menurut kesugihan dait kemuliean-Ne lẽq dalem Deside Isa Almasih. 20 Temulieang Allah Bapante selaẽq-laẽqne! Amin. 21 Sampẽang salam tiang tipaq selapuq dengan saq tehususang bagi Allah lẽq dalem Deside Isa Almasih. Dait terimaq ẽndah salam lẽman semeton-semeton saq araq bareng kance tiang lẽq deriki. 22 Selapuq dengan saq tehususang bagi Allah lẽq kote niki, terutame ie pade saq araq lẽq istane Kaisar, ngirim salam tipaq side pade. 23 Rahmat lẽman Junjungan Saq Mulie Deside Isa Almasih araq bareng roh side.

Colossians 1

1 Semeton senamian, dengan-dengan saq tehususang bagi Allah lẽq Kolose, saq percaye lẽq dalem Deside Isa Almasih! Tiang, Paulus, saq teangkat jari rasul Deside Isa Almasih, -- siq pekayunan Allah --, bareng-bareng kance semetonte Timotius. Rahmat dait damẽ sejahtere lẽman Allah, araq bareng kance side pade. 3 Tiang pade sampun dengah mengenai iman side pade lẽq dalem Deside Isa Almasih dait mengenai kasih side pade lẽq selapuq dengan-dengan saq tehususang bagi Allah. Keranaq nike sewaktu tiang pade do'eang side pade, tiang pade tetep ngucap syukur tipaq Allah, Bapa Junjungante Saq Mulie Deside Isa Almasih. 5 Keranaq pengharepan, saq tesedieang umaq side pade lẽq sorge. Mengenai pengharepan nike sampun juluan side pade dengah lẽq dalem manik kebenaran, nike Kabar Solah lẽman Allah. 6 Kabar Solah lẽman Allah nike nyebar lẽq seantẽro dunie dait terus-menerus datengang berkah, pade maraq saq sampun telaksane lẽq antare side pade mulai lẽman side pade dengah dait ngerti mengenai rahmat Allah saq setetune. 7 Hal nike tesampẽang tipaq side siq Epapras, batur saq tiang pade kasihin. Epapras nike pelayan Almasih saq setie begawẽan jari kepentingante. 8 Lẽman ie tiang pade dengah mengenai kasih side pade saq asalne lẽman Roh Allah. 9 Keranaq nike tiang pade tetep bedo'e adẽq side pade nerimaq selapuq hikmat dait pengertian saq kenaq, sehingge side pade nenaoq pekayunan Allah secare sempurne. 10 Siq care nike side pade bau idup menurut pekayunan Allah, dait tetep nyenengang Allah, sehingge lẽq dalem selapuq hal, side pade bau ngasilang hal-hal saq solah. Dait penenaoq side pade mengenai Allah ẽndah gen sayan beromboq. 11 Semoge siq kuase lẽman Allah saq mulie, side pade teteguqang sehingge side pade sanggup menderite lẽq selapuq hal secare tekun dait sabar 12 dait besyukur lẽq Bapa. Sẽngaq Bapa nike saq miaq side pade patut nerimaq napi saq tesedieang siq Allah umaq dengan-dengan saq tehususang bagi Allah lẽq dalem Kerajaan Terang. 13 Ie sampun bẽbasang ite lẽman penguase saq nguasein peteng dait ngalihang ite ojok dalem Kerajaan Bije-Ne saq Ie kasihin. 14 Siq Bije-Ne nike ite tetebus; artine dose-dosente sampun teampunin. 15 Almasih nike gambar Allah saq nẽnten penggitan, saq sengake, lebih utame lẽman selapuq saq tecipteang. 16 Sẽngaq langan Ie Allah cipteang selapuq hal saq araq lẽq sorge dait saq araq lẽq gumi, selapuq hal saq penggitan dait saq ndẽq penggitan, lantong selapuq roh saq bekuase dait saq mrẽntah. Selapuq hal tecipteang siq Almasih dait lantaran Almasih. 17 Sendẽqman selapuqne araq, Almasih sampun juluan araq. Dait lantaran Ie ẽndah make selapuqne araq lẽq taoqne mẽsaq-mẽsaq. 18 Jemaah nike ibarat ragene, dait Almasih jari sirahne. Ie saq sengake, saq teidupang selaẽq-laẽqne lẽq antare dengan ninggal, sehingge Ie jari saq paling utame lẽman selapuqne. 19 Allah mẽsaq saq kayun adẽq selapuq keilahian Allah saq sempurne, araq ẽndah secare lengkap lẽq dalem diriq Bije saq asalne lẽman Ie. 20 Dait langan Bije nike ẽndah Allah mutusang jari miaq selapuqne jari solah malik kance Ie -- selapuq saq araq lẽq gumi dait saq araq lẽq sorge. Hal nike telaksaneang siq Allah langan Bije-Ne ninggal lẽq kayuq salib. 21 Laẽq idup side pade jaoq lẽman Allah dait ngemusuhin Allah lẽq dalem atẽ dait pikiran maraq saq nyate lẽman perbuatan side pade saq jahat. 22 Laguq mangkin, siq ninggal Bije-Ne, Allah jariang hubungan side pade kance Ie jari solah malik. Siq care nike side pade bau tejauq ojok arepan Allah dalem keadaan suci, murni dait ndẽq bedowẽ cacat cele. 23 Laguq side pade harus tetep setie percaye dait teguq lẽq keyakinande nike. Ndaq jangke side pade ngelepas harepan saq sampun teicanin tipaq side pade sewaktu side pade nerimaq Kabar Solah lẽman Allah. Kabar nike sampun teberiteang tipaq sebilang dengan lẽq seantẽro dunie. Dait lantaran hal nike juaq tiang, Paulus sampun jari pelayan. 24 Mangkin tiang seneng menderite jari kepentingande. Sẽngaq siq penderitean lahiriah tiang, tiang genepang napi saq harus tederite siq Almasih bagi jemaah-Ne, nike rage-Ne. 25 Tiang temanikang siq Allah jari pelayan jemaah-Ne demi kepentingande, adẽq tiang nyampẽang Manik Allah selapuqne tipaq side; 26 nike rahasie saq sampun berabad-abad ngonẽqne terahasieang siq Allah lẽq selapuq dengan, laguq mangkin tenyatayang siq Allah tipaq umat-Ne. 27 Tipaq umat-Ne nike Allah kayun nyatayang berembẽ bagusne dait agungne rahasie nike umaq selapuq bangse. Rahasie nike: Almasih araq lẽq dalem diriqde. Nike artine bahwe side pade bedowẽ pengharepan jari mauq kemuliean. 28 Almasih nike saq tiang pade beriteang tipaq selapuq dengan. Tiang pade bẽng nasẽhat dait ngajah ie pade selapuq siq kebijaksanean. Tujuan tiang pade adẽq sebilang dengan bau tejauq tipaq Allah jari dengan-dengan saq sampun dẽwase lẽq dalem Almasih. 29 Adẽqne bau telaksane hal nike, tiang pacu-pacu begawẽan. Tiang berusahe siq selapuq kekuatan saq teicanin siq Allah lẽq tiang, dait saq bekarye lẽq dalem diriq tiang siq penoq kuase.

Colossians 2

1 Tiang melẽt side pade nenaoq berembẽ beratne tiang bejuang umaq side dait umaq ie pade saq lẽq Laodikia dait jari selapuq saq ndẽqman kenal tiang secare pribadi. 2 Selapuqne niki tiang laksaneang adẽq atẽ ie pade jari kuat dait ie pade saling kasihin sehingge ie pade jari teguq besopoq. Siq care nike ie pade jari tetu-tetu ngerti dait yakin serte paham rahasie Allah, saq temaksut nike Almasih mẽsaq. 3 Lẽq dalem Almasih nike tesimpen selapuq harte hikmat dait penenaoq lẽman Allah. 4 Tiang badaq niki adẽq side pade ndaq tetipu siq sai juaq saq manis-manis ucapanne lẽq side. 5 Sẽngaq timaq tiang bejaoqan kance side pade, anggep bahwe tiang araq lẽq antare side pade. Dait tiang seneng serioq side pade idup tertib dait teguq beriman tipaq Almasih. 6 Semeton senamian sampun nerimaq Deside Isa Almasih sebagẽ Tuhan. Keranaq nike side pade harus tetep idup lẽq dalem Ie, 7 imande maraq akah lolo kayuq saq kuat dait tepenganjeng lẽq atas-Ne, side pade harus tetep teguq lẽq dalem iman side pade, maraq saq sampun teajahang lẽq side. Dait atẽnde harus belimpah-limpah siq rase syukur. 8 Side pade harus onyaq-onyaq ndaq jangke araq saq pengaruhin siq pengajahan-pengajahan saq palsu dait ndẽq araq manpaatne. Pengajahan-pengajahan nike asalne lẽman adat istiadat dait roh-roh dunie, ndẽqne berasal lẽman Almasih. 9 Sẽngaq lẽq dalem Almasih meneng selapuq kepribadian Allah secare sempurne. 10 Side pade ẽndah sampun tejariang sempurne lẽq dalem Almasih. Almasih nike kepale selapuq pemrẽntah dait penguase. 11 Sẽngaq lẽq dalem Almasih, side pade sampun tesunat, ndẽqne siq sunat saq tepiaq siq manusie, laguq siq sunat saq tepiaq siq Almasih, saq bẽbasang side pade lẽman kuase tabiat saq bedose. 12 Sẽngaq sewaktu side pade tebaptis, side pade tekubur bareng-bareng kance Almasih; dait siq baptisan nike ẽndah, side pade milu teidupang malik bareng-bareng kance Almasih, sẽngaq side pade percaye lẽq kuase Allah saq sampun ngidupang Almasih lẽman ninggal. 13 Laẽq, side pade sampun matẽ secare rohani lantaran dose-dosende dait lantaran side pade ndẽq tesunat secare lahiriah. Laguq mangkin Allah ngidupang side pade bareng-bareng kance Almasih. Allah sampun ngampunin selapuq dosente, 14 dait surat hukumante, saq ngancem kadu sarat-sarat saq be