Markus Habar ta fie ta Markus nléfo
Yesuse nwóm pafulé, Yohanese nwóme ntube, bo nfaleleye kyate ne wlori
1 Nté bo kefeten Habar ta Fie, ne Yesus Kristus Jou Lahatala Ntu I. Tatube lima lésu, 2 Jou Lahatala nmeitene nde Jou Yesuse, bóngó ni nenan Yesaya nléfo kée ne fajé: Ya ktébo Aw po dunia pafulé, Ya nasé kane kyat isó nwóme ntube. Kyat ta nje bo nfamówe yefen ta Awe bo mde lo ne, (ne bo nane kyate ne rfaleley wlori, bo si rlonge Awe). 3 I bo nkakeme kyate ne po gewgów isó ta nelówe pnuwe, n-gelay fajé, “Mnuw pana, Jou bo nwóme! Sé ffamówe yefene ta I bo ndelolo ne, (ne ffaleley wlomi ne, bo flonge I).” 4 Mnuw bé neli, telel bé ga kyate nje nwóme, ne Yohanese. I nfan po gewgów ta nelówe pnuwe nje, nbaptise kyate. I necég fajé, “Fngali méwe, fpólen méw po Jou Lahatala ni, bóngó fpo fie bo kbaptise méwe. Néce ga Jou Lahatala nfayangese kée nómi selsóle ne.” 5 Poce kyat farime rfan neli Yohanes ni, si yama pnuw Yerusaleme ré pnuwe pnuw nese ta po bóten Yudea ne. Neli, recége róri selsóle ne ta bóngó Yohanese nbaptis si po Wóe Yordan. 6 Yohanese ni kabaya nje haiwan unta ni like, sno ni petpitene nje ma haiwan liko i. I nó mnóme ne maduga kakaso ré peplen gula. 7 Yohanese nfasodoto kyate ne fajé, “Ya ta kwóme ktube, mayta mnuw pana kyat isó nóte bo nwóme. I ni kawasa ne ta dele neliwi ya. Bo kgali I, kesóle ni tarupa ni wóle lé ma kemtate, sebabta Ie npelóy po ya ni. 8 Ya kbaptis méwe ne ré wóe lé, mayta I nasé ntébo Jou Lahatala ni Roh ta nfie nje bo nfapelo po wlomi wlólo. Néce ta I rénbaptise méwe ne.”
Yohanese nbaptis Yesuse, bóngó setane ne riri kolano nje nfalelóle Yesuse
9 Poce ta bóngó Yesuse ma nwóme. I lima pnuw Nasaret ta po bóten Galilea, nwóm po Wóe Yordan. Bóngó Yohanese nbaptis I poce. 10 Nbaptis I réwóre, Yesuse ncópen yama wóe lo, nekngól neya ga nemnaw langete nje ntepówe, bóngó Jou Lahatala ni Rohe ntébe nóp po I ni. Temnaw I ne delo mane pombo isó ta nfaébe nópe. 11 Faje-faje nega meiten ésó ncópen yama soroga necég fajé, “Awe, Ya ntig ta kgogoru ré kdodara, Awe ro ta mfamego ré wlége njé.” 12 Réwóre ta ne, Jou Lahatala ni Rohe nje nut I neli gewgów ta isó ntolno pa. 13 Gewgów ta ne, haiwan ta masesro ma fele, mayta Jou Lahatala ntébo ni nenan ta yama soroga ne rfamenawe I. Ngane yófefóte wlólo setane ne riri kolano nje nfalelóle I, neyówe bo Yesuse nderere i, mayta nefén I pa.
Yesuse nkakeme kyat ta bo rderere I
14 Rfasung Yohanese po bui lo réwóre ga Yesuse nfan po pnuw ré pnuw ta po bóten Galilea, nefeten Jou Lahatala ni meiten ta nfafeyfie ite ne. 15 Ne nefeten fajé, “Tatube lima ta Jou Lahatala nejaji ite ne, rénwómo ie ro. Mnuw pana Jou Lahatala bo ndadi Kolano, nkawasa kyat ta rderere I. Sé fngali méwe, fpólene méw po Jou Lahatala ni, fdele Jou Lahatala ni meiten ta Ya kecégo méwe nté, bo nfafeyfie méwe.” 16 Nuencó Yesuse nfane nde po Telaga Galilea lapo. Poce ga nengóto nelawe, faften seluwe, Simon i ré Andreas. Si renpawlo lóbene, sebabta riri yabe ne rerenfalóbene lé. 17 Poce Yesuse necégo si, “Méw lima, fderere Ya. Ngane fis lima méwe nimi yabé ne ffalobene lé, mayta nété Ya bo kfasodoto méw yabe nese. Méwe nimi yabe ta nóbene nté, nasé ffaftulo kyate bo si rderere Jou Lahatala.” 18 Poce bóngó Simon i ré Andrease rfatopo kée riri lobene ne, sé rderere I. 19 Rfan neli cuci, Yesuse nemnaw nelawe faften seluwe nóte, isó ngósno Yakobuse, isó ngósno Yohanese, Zebedeuse ntu si. Si rencaple riri lóbén po yéle lo. 20 Poce Yesuse nkakem si bo rderere I nóte, ta bóngó si ma rderere I. Rfatolene kée riri moké ré ni kyat yabe néste.
Yesuse nfafie legae isó ta setan fele rtolno i
21 Yesus ré ni wyóye néste rfan neli po pnuw Kapurnaum. Ni ngenngan Sabtu ta kyat Yahudi ne rerenpé yabé pa, Yesuse nfan po agama Yahudi ni um sembayange lo. Nfasodoto kyat Yahudi ta poce ne. 22 Kyate ne rtelele rlonge ta necége ne, rfacégo, “Alli, del ta méwe, I nfasodoto i ni fie ne! I nune fie ta necége ne, dolo rir guru agame ne pa!” 23 Poce faje réni legae isó ta setan fele ntolno i. I nemnaw Yesuse bóngó ni setan isó 24 nemtate sé n-gelay fajé, “éé, Yesuse, Legae Nasaret ta Awe. Ame kfeyal Awe. Awe ta mwóm yama Jou Lahatala ni. Mwóme nté bo mpé am fawa? Bo mfamót am-ó?” 25 Bóngó Yesuse necége si, “Eh! Ffatentengene méwe, fsópen poce kyat ta nje ni!” 26 Poce bóngó setan néste rfakeyowen legae nje, rgelaye gliri ne ma sesnar ndime, bóngó setane ne ma rcópene. 27 Kyat ta poce ne rtelele sé rfacégo, “Tabéu, I nane setane néste rcópene, ta bóngó rcópen si ndime ne! Tagaré ta I nfasodoto ne, fie ndime. Dodoto ta ne dolo nuencó pafulé, ta ite nté tlonge!” 28 Poce ta bóngó si rut meiten ta ne neli lima sogado kyat po pnuw ré pnuw po Galilea ne ma rlonge ndime.
Yesuse nfafie Petruse ni kmo mepine nje
29 Yesuse ncópen tóma agama Yahudi ni um sembayange lo. Poce i ré Yakobus ré Yohanese rfan neli Simon i ré Andrease riri ume lo. 30 Si rwóm po ume lo, poce ga kyate ne rfabingo Yesus ta Simone ni kmo mepine nje nlelete. 31 Yesuse ncung nemine, pegéle nje nenbóy i. Poce ga netane ni fao ne bóngó nfapangen i neya. Ta ne óro, pegéle nje nfie. Npangene ta bóngó n-gawéné si. Yesuse nfafie kyat fele (Mat 4:23) 32 Ta ngenngane ncép nóp ne, kyate ne rute kyat fele neli po Yesus ni, ta rpise ré ta setan pari haiwan leo rtolno si ne. 33 Kyat farime po pnuw ta njei rfajól po um netóo. 34 Poce Yesuse nfafie si ndime: kyat ta rpise, kyat ta rlelete, ré kyat fele ta haiwan leo pari setan rtolno si ne. Haiwan leo ré setane ne rune ta Yesuse Jou Lahatala Ntu I, mayta Yesuse wlo pafulé bo kyate ne rune I. Sé haiwan leo pari setane ne bo rmeitene, Ie nane si, “Eh, ffatentengene méwe!”
Yesuse nmeitene nde Jou Lahatala
35 Deroremi lésu, ta bo melówe nfaysayne i ne, Yesuse npangene ncópen poce, nfan po gewgów ésó ta beklingene. I rénwóm poce ga nmeitene nde Jou Lahatala. 36 Nópe ga Simone i ré ni dele ne rfajale I. 37 Rduk I bóngó rfabingo I, “Legae ta Awe, kyat fele reyówe Awe, ga Aw poté-ó?” 38 Yesuse ncónglo si, “Iya, mayta ta fie tfan po pnuwe pnuw ta nese ne su. Kyat poce rlonge nik meiten pafulé sé bo kfasodoto si. Néce ta mulo sogado Ya kwóm po dunia nté.” 39 Poce bóngó Yesus I ré ni wyóye ne rfane rejél pnuwe pnuw ta po bóten Galilea. I nfangsunge agama Yahudi ni um sembayange ne, nfasodoto kyate ne ré ncópne haiwan leo ré setan ta rtolno kyate ne.
Yesuse nfafie legae isó ta npado
40 Nuencó, legae isó npado nwóm po Yesus ni. I nwóm po Yesus ni, ncuba I, bóngó necége I fajé, “Legae ta Awe, bo wléme ne, mfafie ya nté su pa? Ya kune ta Awe meféne.” 41 Yesuse nlonge ta ne bóngó nmesia i. Netewle fao ne neya po legae nje ni ga necégo i, “Ya wlége, sé nté rémfie óro.” 42 Ta bóngó nfie i. 43 Poce bóngó Yesuse nane i, 44 “Mfan awe ro, mayta mati mefeten na, ta Ya kfafie awe nté. Mfalów aw neli po imame nje ni, mfaftulo i ta awe rémfie. Réwóre ga mpo anim sadaka ta delo tatube Jou Lahatala ni nenan Musa rénecége ne. Mpo sadaka ta néce, bo kyate ne rune ta awe rémfie.” 45 Poce bóngó legae nje nfane, mayta nfatentengen i pa. Nfabembinge neli ré lima, sogado Yesuse bo nfan po pnuw ré pnuwe ma ndadi i pana, kyate ne rfasesisen lima sé. Bóngó Yesus nfane ntolen I po gewgów ta réni kyat pa, ne ga poce ma rfafejale I lé.
Yesuse nfafie legae isó ta nkafe
1 Ngane fis neli ta telapese ne ga Yesuse npólen I nmule po pnuw Kapernaume. Poce kyate ne rlonge ta ré I po ume lo, 2 bóngó si rwóm lima ndime, sogado ume nje ma nemote. Po tó nelike ma réni gewgów pana ta kyate ne bo rtolno. Poce bóngó Yesuse nfasodoto si Jou Lahatala ni meitene. 3 Faje-faje kyat si dóren fóte rwóme, rerenléwte legae isó nkafe, bo rut i po Yesus ni. 4 Mayta, bo rcunge i nemin Yesus ni ma ndadi i pa, mmót ré gege ndime sé. Sé sie rpake legae nje neya po um pepo lo ne, redoke ume nje cuci, ga ta ga rtébo legae ta nkafe nje ré ni rerere nuencó lé nóp Yesus ni. 5 Poce Yesuse nemnaw si, nune ta fatuwe si rdele I. Bóngó Yesuse necégo legae ta nkafe nje, “Maké ta awe, nété anam selsóle ne Ya rékfayangese kée óro.” 6 Poce faje ma réni guru agama. Yesus necég faje ne, si renuta po wlori wlólo, 7 “Bée, ga necége nfayanges selsóle ne! Réni isó pa po dunia wlólo nfayangese ta róri selsóle ne, maduga Jou Lahatala lé! Ga npé ni diri delo Jou Lahatala ne! Cékédé, néce I nfalele bé Jou Lahatala ngósno!” 8 Poce ga Yesuse nune wlori ne, sé necége si, “Fpé sói sé ga méwe fenuta Ya kfalele Jou Lahatala ngósno ne? 9 Ya kfafie i pari kfayangese kée i nó selsóle ne pari, farime nde lima Jou Lahatala ni. Maduga, bo kfayanges i nó selsóle ne, femnaw pa sé fdele pa. Mayta bo kfafie i ne, femnawe sé fdele. 10 Sé wóre, nété bo kfafie i nóte, bo femnaw ré fune ta Ya nté kyat Ya yama soroga lo, Ya rénik kawasa aben luwe ne ndime, kawasa ta kfayangese kée selsóle ne, faje nóte Ya ma rénik kawasa kfafie kyate.” Bóngó ré Yesuse necégo legae ta nkafe nje fajé, 11 “Kecégo awe nté, mpangene, melile kée nim musela nje, meley po nim ume lo.” 12 Ta bóngó legae nje npangen neya, nelile ni musela nje bóngó nfan i. Kyat ta si poce remnaw ta ne, rtelele ndime, recég, “Tabéu, tagaré nuencó ta nté ta temnawe ne!” Bóngó si rfapelóy Jou Lahatala.
Kyate recég Yesuse, sebabta nemnóme nde kyat ta recogoma rmetégel pa
13 Réwóre ta ne, Yesuse nfane nóte, nde po Telaga Galilea ni lapo lo. Poce kyat fele rfajólo si neli Yesus ni nóte, bóngó I nfasodoto si. 14 Nfasodoto si réwóre, nfan neli ga nemnaw legae isó nentolene, npé yabé po um ta rerenpóles boselo ne. I ngósno Lewi, Alfeus ntu i. Bóngó Yesuse nkakem i, “Lima, mderere Ya, de.” Lewi nwosel neya ta bóngó nderere Yesuse. Si rfan neli po Lewi ni ume lo. 15 Kyat fele ma rderere si - kyat ta rfajólo bos ré kyat nese ta kyat Yahudi ne recogoma rmetégel pa ne. Neli, Yesus I ré ni wyóye néste remnóme rde kyat ta rderere si néste. 16 Poce guru agama ta rderere dodoto Farisi ne remnaw Yesuse nemnóm ré kyate néste bóngó recége ni wyóye ne, “Pé sói sé Yesuse ga nemnóme nde kyat ta rfajólo bos ré kyat nese ta rmetégel pa ne?” 17 Yesuse nlonge ta ne, ta bóngó ncónglo si, “Doctere nwóme ne, nureme kyat ta rpise. Iga pespise pa, nurem si pa. Faje nóte ré Ya. Ya kwóme nté, keyówe kyat ta róri selsól fele bo kgali si. Iga kyat ta recége cogo réróri selsól pa, wóre, keyówe si pa.”
Jou ni dodoto ne, mati tfambóngo ré rir adate ne na
18 Nuencó, Yohanes ni wyóye ne rcaume, si ré kyat Yahudi ta rderere dodoto Farisi ne. Poce bóngó kyate rwómo Yesuse ga rutne I, “Yohanese ni wyóye ne, si ré kyat Yahudi ta rderere dodoto Farisi ne rcaume, sé ga nim wyóye ne? Pé sói sé si rerencaum pa?” 19 Yesuse necége si, “Adéadé po fefsówe lo, menóye nje nentolene lésu, pai ta bo ncaume? Si rpé riri raméang su pa? 20 Ya nté ma delo menóye nje, Ya i poté lésu, ta mulo nik wyóye néste rcaum pafulé. Mayta neli-neli nasé ryó kée Ya po nik wyóye néste ni, néce ga tagaré si rcaume.” 21 Poce Yesuse npé adéadé isó nóte, “Kebaya ta nebone sé nemgawese, pai ta bo nerobo i ngalep wóbno ta ntotef i pafulé? Nasé tefsal po kabaya nje ni bóngó mgawese ne ta dele pelóye, nesuwe i pafulé sé. 22 Faje nóte haiwan liko ta rénebone, bo twóso i anggure ta nobene, nasé nkeposene bóngó ré nteporese. Anggur ré ni góo ne farime nasé le i. Maré gewgów ta nóbene, tagaré twóso anggur ta nóbene.” (Yesus npé adéadé ta ne, bo si rune ni dodoto ne mati rfambóngo ré riri adat ta tatube ne na.)
Yesuse Ie ro ta nfaftulo sói ta kyate ne bisa rpé po ngenngan Sabate
23 Ngenngan Sabat ta kyat Yahudi rfatóyne si ne, Yesuse nfane nde neli bet gandume wlólo. Ni wyóye ne rderere I, rtelóte sé reningete róri gandume ne sé rénó. 24 Kyat Yahudi ta rderere dodoto Farisi ne remnaw si, rfano Yesuse ga recége I, “Ah, mengóto nim wyóye ta ringet gandume nté! Ngenngan ta nté Jou Lahatala ni nenan Musa nane ite tpé yabé pa. Nópe ga si rpé yabe ne!” 25 Yesuse ncónglo si, “Ga fbaca Jou Lahatala ni meiten pafulé-ó? Ta nuencó Daude nfan po um sembayange lo, 26 po imam Abyatar ni yabe góoe lo ne? Ta ngenngane ne, Daud ré ni dele ne róri yelen pana, bóngó rtelóte. Sé Daude ncung nemin um sembayange lo ga nó nó roti ta masolo imame ne bo ró lé, bóngó i ma ndo ni dele ne. 27 Sé fajé; ngenngan Sabate ne Jou Lahatala npo n-gali bo tfatóyne ite. Mayta iga rir dele ne rduk kangélange, bo tfatentengen ite lé ma Jou wlo pa. 28 Sé Ya lé ta kfaftulo sói ta kyate ne bo rpé pari tise po ngenngan ta njei!”
Yesuse nfafie kyat po ngenngan Sabat sé kyate ne rcawan I
1 Yesuse ncunge nóte po agama Yahudi ni um sembayange lo. Poce réni kyat isó ta ni fao faspale kékéu. 2 Poce ma réni kyat Yahudi ta rderere dodoto Farisi ne. Si rengóto Yesuse, renuta, “Tfamenawe I, bo sogado nfafie kyate nje, tfasól I. Ngenngan Sabate ne Jou Lahatala ni nenan Musa nane ite tpé yabé pa, ga Ie bo nfafie kyate nje ne!” 3 Poce bóngó Yesuse necégo kyat ta ni fao kékéu nje, “Aw lima, mwosel po kyat ta fele ne usnori lo nté.” 4 Bóngó Yesuse necégo si farime, “Kutne méw su. Jou ni nenan Musa nane ite tpé ta fie pari tpé ta le po ngenngan Sabatelo? Tfafie kyat pari tpune kyate?” Si rlonge ta ne, rfatentengen si lé. 5 Yesuse nengóto si, ncawan po wlo wlólo mayta nenuta, “Kyat ta nté ta dele sén si ne ga! Wlori ne i ni metuwe ne! Rériri mesie pa po riri dele.” Bóngó necégo kyat ta fao kékéu nje, “Mfamelolen faom ta kékéu ne netó.” Kyate nje nfamelolen fao ne netó, ta nfie i. 6 Sé kyat Yahudi ta rderere dodoto Farisi ne rcópen tóma agama Yahudi ni um sembayange lo ne, ta rfane rfabable neli Kolano Herodese ni kyate ne. Neli, rfajólo si, reyówe yefene bo rfamót Yesuse.
Yesuse nfasodoto ré nfafie kyat fele
7-8 Yesuse I ré ni wyóye ne resale si po kyat ta fele ne, rfan neli po Telaga Galilea lapo lo. Mayta kyat fele rérlonge ta Yesuse nenenfafie kyate sé rfajale I. Igle ta si lima bóten Galilea, yama pnuw Yerusaleme ré farime bóten Yudea, yama bóten Idumea, yama bóten po Wóe Yordane ni faspal, ré yama pnuwe pnuw ta rfakraken Tirus ré Sidone. 9 Kyat ta rwóme ne rfele sé Yesuse nane ni wyóye ne reruwe yél ésó nelaw bo ncaplo, mati na ga kyate ne rfasesisene. 10 Poce kyat ta rpise ne, naé ta riri pespise. Si rlonge ta Yesus rénfafie kyat fele sé rfaftófe kyate ne neli, reyówe yefene bo retane I facuci bo si rfie. 11 Haiwan leo ré setan ta rtolno kyate ne remnaw I ne, remtate sé respók si nóp betbete lo, ga rgelay fajé, “Adu, Aw ta nté, Jou Lahatala Ntu Awe!” 12 Ta bóngó Yesus necége si, “E, ffatentengene méwe. Mati ma ffebinge na, ta Ya nté Jou Lahatala Ntu Ya.”
Yesuse nkakem ni wyóye yófesó ré seluwe ne
13 Yesuse nawet neya po metete lo, bóngó ré nkakeme kyate kyat ta I rénpili si ne, bóngó si rwómo I neli. 14-15 I npili si ne, bo rderere I, bo rfafan I ni dodoto, I ma npo si kawasa bo rfeunge haiwan leo ré setane. 16 Kyate néste kyat yófesó ré seluwe. Ngósnori ne fajé: Simon (ta Yesuse nfangósno i Petruse), 17 Yakobus ré ni fteno Yohanes (Zebedeus ntu si. Yesuse nfangósno si ‘boanerges’, ta ni ngalé ne riri meitene ne delo rub ta nteleye), 18 Andreas, Filipus, Bartolomeus, Matius, Tomas, Yakobus (Alfeus ntu i), Tadeus, Simon (kyat isó ta i ré ni dele ne riri le kyat Roma ta rkawasa riri bótene), 19 ré Yudas (kyat i lima pnuw Kariot, i ta nasé bo nwage Yesus.)
Kyat igle rfakcége Yesus, recége cogo méki ntolno I
20 Yesuse neley neli ume lo. Kyat fele rfajól neli po I ni nóte, sogado I ré ni wyóye ne bo remnóme ma ndadi i pa. 21 Yesuse ni néké ré ni fteno ne rlonge I nwóme, sé rfan neli bo ryó I, sebabta rlonge kyate ne recége cogo, “Wlo nje réntemam pana.” 22 Poce guru agama ta rwóm yama Yerusaleme ne rfalecégo neli lima, “Yesuse nje, méki ntolno I!”, ré, “Setane ne riri kolano nje npo I kawasa nfeunge setane ne.” 23 Yesuse nlonge si recég faje, nkakem kyat ta poce ne lima, bóngó necégo si, “Nuen fise setane ne riri kolano nje bo nfeunge ni del setane ne? 24 Adéadé pnuw isó, ni kyate ne rfamngamo lé, sie nasé naé ta msakori, rfaltolno si pnuw isó pana. 25 Faje nóte món ré mepin direncó, iga rfamngamo lé, nasé naé ta msakori, sé nturi ne ma msake spale luwe. 26 Ta mulo setane ne riri kolano nje, i nenfeunge ni del setane ne pa, nasé ni kawasa ne pelóy pana, naé ta msakori ro sé. 27 Kyat isó ta nkuat dolo méki, isó pa ta neféne ncunge ni ume lo bo nai ni wódóle ne. Maré kyat ta lebe npelóye npiten i su ga nyó ni wódóle ne.” (Yesuse necég faje ne, i ni ngalé, I lé ta npelóy po setane ne riri kolano nje, I lé ta neféne npitene kée méki nje.) 28 Yesuse necége nóte, “Kecégo méwe nté pa? Iga tcól po Jou Lahatala ni, pari tecég I nó ta le, teror po I ni ne, rór selsóle ne nasé nfayangese kée. 29 Mayta, bo tecég Jou Lahatala ni Rohe nje nó ta le, Jou Lahatala nfayangese rór selsóle ta njei pa, ite tcól sogado faje neli lé.” 30 Yesuse necég faje ne, nngamo kyat ta recége cogo setane ne riri kolano nje ntolno I.
Kyat pai lé ta npé ta nfamego ré Jou Lahatala wlo nje, néste dolo Yesuse ni néké ré fteno si
31-32 Yesuse nentolene lésu, I ré kyat ta rfajél I ne, bóngó ni néké ré fteno néste rwóme rwosel bé po tó, sé rane kyate ne rkakem I. Si nemine, recégo I, “Anim néké ré ftenome néste ta néste tóe, reyówe Awe.” 33 Bóngó ré Yesuse ncónglo si, “Iya, mayta anik néké ré ftenoge ne, néste lé pa, réni fele.” 34 Yesuse nfalengóto kyat ta rtolen póp ta rfajéle I ne, neftul si bóngó necégo si, “Méw ta nté ma anik néké ré ftenoge méwe. 35 Kyat pai lé ta npé ta nfamego ré Jou Lahatala wlo nje, néste ta Ya ftenog si, remag si, ré anik néké si.”
Adéadé gey ta resyape po betbet naé ta use
1 Nuencó nóte Yesuse nfasodoto kyat po Telaga Galilea lapo lo. Poce kyate ne rfele rfajól po I ni sé ncapel I po yéle lo, nesuwe I nelaw cuci, ga nmeitene nde si neléwe. Kyate ne si po léw bótene lo, regbono Yesus nelawe. 2 Poce I nfasodoto si, nfaadéadé si fele. Ta I nfasodoto ne fan fajé: 3 “Flonge nté su. Nuencó kyat isó nfan po bete lo, nesyape geye. 4 Nesyape geye ne, igle mnap po yefene lo bóngó mane ne rwóm lima retire róri ndime. 5 Igle ne mnap i po betbet ta réni lóy fele, ni betbete ne cuci lé. Geye ne ntube mla lé, sebabta betbet ta nputo ne menifese. 6 Mayta mgo ngenngane bóngó mlae i, nfalów nmót i, ni wówo ne ncung nóp lów pa sé. 7 Igle ne mnap po gemgamene wlólo. Ntube neya, wóle gemgamene ne nfaderere i neya, nfabkabe kée i sé nepyon pa. 8 Igle ne ga mnap po betbet ta fie lo. Ntub neya ne, bekboke sogado pyon fie. Tentónem ta nei, ngaé pusó ni pyono ne ndadi 30, igle ne 60, igle nóte sogado 100.” 9 Ta bóngó Yesuse necégo si, “Fflonge ré ffatelolmo méw fafie, sebabta gey ré betbete ta kefetene nté réni ngalé.”
Adéadé geye nje, Yesuse ntébo ni ngalé
10 Réwóre ta ne, kyat ta fele ne rfan si. Poce Yesuse nkumle ni wyóye yófesó ré seluwe ne ré kyat sefis neli nóte. Bóngó si rutne I, “Legae, adéadé tai pesewe nje ni ngalé fawa?” 11 I ncónglo si, “Ktébo ni ngalé pafulé, kecége nté su. Tatube, Jou Lahatala necége bo ndadi Kolano, nkawasa kyat ta rderere I, mayta nefetene ni ngalé pafulé. Nté Ya kefetno méwe, mayta po kyat nese kefetno si bé ni adéadé, 12 kderere ta Jou Lahatala necég po ni Buke wlólo ta necég fajé: ‘Masiké si remnaw sói lé ta Ya kpé ne, rune pa. Masiké rlonge nik meitene ne, rcaé pa. Bo tise, si rune ré rcaé, rpólen si po Jou Lahatala ni, bóngó Jou Lahatala nfayangese róri selsóle ne.’” 13 Poce bóngó Yesuse nutne si, “Sé adéadé tai pesewe nje méwe fune ni ngalé pa-ó? Iga adéadé tai pesewe nje ma fsaé i pa, ne ga tai igle ne nasé fanfawa? Mayta, wóre, nété Ya bo ktébo ni ngalé ne. 14 Gey ta kyate nje nesyape, néje Jou Lahatala ni meitene. 15 Ta mnap po yefen pepo lo ne, néce delo kyat direncó ta rlonge Jou Lahatala ni meitene ne. Rlonge réwóre ga setane ne riri kolano nje nwóme nyó kée i, sé ta rérlonge ne rfatelolmo si pana. 16 Ta mnap po betbet ta réni lóy fele ne, néce delo kyat ta tagaré rlonge Jou Lahatala ni meitene ne, bóngó rcenge. 17 Mayta rfaisno pa, sé kyate ne rengóto si rderere Jou Lahatala ne, lima ga rfakcége si pari rfanpune si. Mnuw pa, refén pana bóngó rderere pana. 18 Ta mnap po gemgamenelo ne, néce delo kyat ta rlonge Jou Lahatala ni meitene, 19 mayta ruta bé riri fenfan ré teltolene ne, ruta bé reyówe bo riri ré róri ne fafele, ré ruta bé ta igle ne nóte, sogado Jou Lahatala ni meitene ma rlonge ré rfaisno pana. Sé nópe, si delo tentónem ta nepyon pana. 20 Ta mnap po betbet ta fie lo ne, néce delo kyat ta rlonge Jou Lahatala ni meitene ne, bóngó rfaisno sé rdele ta fatuwe. Kyat ta ne rpé ta fie fele, delo tentónem ta pyono fie. Kfatailo si delo tentónem ta bekboke, ngaé pusó ni pyono ne ndadi 30, igle ne 60, igle nóte sogado 100.”
Adéadé padamaram ta tfarfura
21 Poce Yesuse nfaadéadé si nóte, necég fajé, “Iga testing padamarame, bo tfarfura i? Matine! Tpé i po ronget pópo ma, matine! Maré tesókte i neya, bo nmenano neli ré lima. 22 Fajé nóte ré Jou Lahatala ni meitene. Sói ta tcaé pafulé, nasé tcaé. Sói ta repino ite ne, nasé tune. 23 Sé ffameylonge fafie bo fsaé ta kecége nté.” 24 Bóngó Yesuse necégo si nóte, “Ffaisno fafie ta kecége nté, ni feleo ta fune ne nasé fduke nmule, bóngó nbóng po méw ni bo fele. 25 Pai ta nisene nik meitene nasé kbónge sogado nune fele. Mayta pai ta nisene nik meiten pa, cuci ta i nune ne ma nasé kyó kée.”
Adéadé gey ta ntube nkumel i
26 Yesuse nbónge ni meitene, necége, “Ta Jou Lahatala nkawasa ni kyate ta rderere I ne tfatailo ré gey ta ntub po bete lo. Ne adéadé kyat isó nesyape gey po bet wlólo. 27 Nesyape réwóre, dorem nyenef i ngenngane npangene, nenuta geye ne pa, geye ne ntube nkumel i. 28 Betbete ne ta nfatube i neya, npé wlu, npé werwóro, ncote, bóngó nepyone. 29 Pyono ne rémange, bóngó ningete kée ndime.”
Adéadé gey ta nalus
30 Bóngó Yesuse necége nóte, “Ta Jou Lahatala nkawasa ni kyate ne bo tfatailo sói? Tpé adéadé faisó nóte? Fajé pana. Ta Jou Lahatala nkawasa ni kyate ne néce delo 31 gey pusó ta nalus tuwe. Gey farime maduga gey ta nje ta naluse tuwe. 32 Mayta, ttónem i nópe, ntub neya ndadi ay ta pelóy tuwe. Ni sengsónge ne fele sé nruburubu fie. Sé iga mane ta renope neli lima bo reungene ne, reting si poce.” 33 Yesuse nefetno kyate ne adéadé sefis neli nóte, ta feleo i ne ni ngalé nópe ne Jou Lahatala ni meitene. I nefetno si bé ta si rune ré rcaé ne. 34 Kyat ta fele ne npo bé adéadé lé, tómesu I ré ni wyóye néste rkumele ga taga ntébo adéadé ni ngalé ne.
Yesuse nfateben more ré mewruwe
35 Nefeten adéadé ne réwóre, rémerime ro. Bóngó Yesuse necégo ni wyóye néste, “Méw lima, bo ite tap neli telaga faspale sé.” 36 Poce bóngó Yesuse ni wyóye ne rcapel neya yél kelulelo, ga rentor i sé rap si nelawe, rfatolene kée kyat ta fele po léwe ne. Kyat igle ma rderere si, rcaplo riri yél nese. 37 Renape nelawe ne, rduke róri more ré mewruwe sé nfabebebse si. Wóe ne ma npós neya yéle lo sogado bo remdire. 38 Poce faje Yesuse I po fafamile, nyenefe nemtole. Beboko nje npógle i nóp lilene lo. I ni wyóye néste remtate bóngó recége i, “Legae Guru, mpangene, ite nté bo tmóte, ga mfatentengen Aw-ó?” 39 Yesuse npangen neya, ta necége, “More ré mewruwe, mtebne ro!” Bóngó more nje ntebene, wólete nje ma nmeklóngene. 40 Yesuse necégo ni wyóye néste, “Fpé sói sé ga femtate ne? Ga fdele Ya pa-ó?” 41 Telel si, bóngó rfatutno isó ré isó, “Weh, pai ta njé I, sogado more ré mewruwe ne