1:1 Empai penembai adau Pirman. Pirmantu setunggal ngan Allah, mangku Pirmantu Allah. 2 Empai penembai Diau setunggal ngan Allah. 3 Gegalaunyau dijadikaNyau, mangku amun ukan Diau, sutiak kia nidau njadi. 4 Pirman itu ngenjuakka idup, mangku iduptu ngenjuakka terang ngan manusiau. 5 Terang itu besinagh di keleman, nidau pacak dipadamka kelemantu. 6 Adau sughang jemau diau diajung Allah, namaunyau Yuhanis. 7 Yuhanistu datang ngiciakka terang tadi, supayau gegalau jemau percayau, karnau kici'annyautu. 8 Yuhanis ukanau terang itu, tapitu diau endak ngiciakkanyau. 9 Terang diau sebenaghautu datang ke deniau nerangi gegalau manusiau. 10 Diau la adau di deniau. Deniau ini dijadikaNyau, anyautu deniauni nidau keruan Diau. 11 Diau datang ke nenggeriAu, anyautu jemau di nenggeriAutu nidau nerimauNyau. 12 Mangku bilang jemau diau nerimauNyau ngan percayau ngan Diau, dienjuakkaNyau hak njadi anak Allah. 13 Ughangtu njadi anak Allah ukan ngan carau manusiau, ukan pulau karnau dikenda'i sughang jemau lanang, anyautu idup itu asalau jak di Allah. 14 Pirman itu la njadi manusiau diau iluak nian ngan kitau. Di Diau kitau nginak diau benagh ceritau Allah. Diau mendam ngan kitau. Kitau la nginak keagunganNyau, keagungan diau dienjuakka ngan Diau, karnau Diautu Anak Bapak diau sughang itula. 15 Yuhanis ngiciakka Diau, kataunyau, "Inila Jemau diau kukiciakka: Diau ka datang la udim aku. Bekuasaula Diau sangkan aku, karnau antak ka aku adau, Diau la adau." 16 Keilu'anNyau la banyak tegalau. Kitau maju meghasaukanyau. 17 Allah ngenjuakka ukum Taurat ngan Musa, anyautu keilu'anNyau ngan kebenaghanNyau diancakkaNyau di Yesus Keristus. 18 Nidau sughang kia kekela nginak Allah lain jak di Anak Allah diau gi sughang itula ngan maju seghundak ngan Bapak. Diau itula nyatauka Bapak ngan kitau. 19 Tuau-tuau jemau Yahudi di Yerusalim ngajung imam-imam ngan jemau pengadau Liwi pegi njenguak Yuhanis ngan nanyaui diau, "Sapau kabani?" 20 Yuhanis ngaku'i ngan sebenaghau, diau nidau mbu'ung, kataunyau, "Akuni ukanau Mesias, Rajau Penyelamattu." 21 "Amun luak itu", katau ughangtu, "Sapau kabani? Apu kaba Elia?" "Ukanau", katau Yuhanis. Mangku ditanyaui agi, "Apu kaba nabi diau ka datangtu?" "Ukanau pulau", katau Yuhanis. 22 "Amun luak itu", katau ughangtu, "Kiciakkala ngan kami sapau kabani, mangku kami pacak nimbali jemau diau ngajung kami. Katau kaba, sapau kabani?" 23 Mangku Yuhanis nimbal, kataunyau, "Akunila diau dikiciakka nabi Yesaya, 'Suarau jemau di padang bungin diau ngiciak ngan suarau bias: Lughuskala jalan batan endak Tuhan!' " 24 Jak di rumbungan jemau diau diajungtu adau jemau Parisi. 25 Ughangtu betanyau, kataunyau, "Amun kabani ukan Mesias, ukan Elia ngan pulau ukan nabi diau ka datangtu, ngapau kabani mbaptiska jemau?" 26 Yuhanis nimbal, kataunyau, "Akuni mbaptis ngan ayiak, anyautu di guak kapu dighi adau Jemau diau nidau kecinauan ngan kapu dighi. 27 Diautu ka datang udim aku. Melegha'i tali sepatuAu aku nidau pantas." 28 Gegalau kici'an tadi nyatau tejadi di Betania di sebela matau-aghi idup ayiak Yurdan. Di situla Yuhanis mbaptiska jemau. 29 Pagi di aghiau Yuhanis nginak Yesus datang njenguak diau, mangku Yuhanis bekatau, "Kina'ila, itu Anak Bebiri diau disediauka Allah endak ngabiska dusau deniau. 30 Diautu Jemau diau kukiciakka, Diau ka datang udim aku. Anyautu bekuasaula Diau sangkan aku, karnau Diau la adau antak ka aku adau. 31 Senitu aku lum keruan, sapau Diautu, mangku aku datang mbaptis ngan ayiak, supayau jemau Israil keruan, sapau Diau." 32 Yuhanis ngiciakka luak ini pulau, kataunyau, "Aku nginak Rua Allah tughun jak di langit luak sikuak burung darau diau inggap di Yesus. 33 Senitu aku lum keruan sapau Diau. Anyautu Allah diau ngajung aku mbaptis ngan ayiak la ngiciak ngan aku: 'Amun kaba nginak Rua Allah tughun, mangku nginggapi sughang jemau, Diautu jemau diau ka mbaptis ngan Rua Allah.' 34 Aku la ngina'au nian," katau Yuhanis, "Mangku aku ngaku'i, Diautu Anak Allah." 35 Pagi di aghiau Yuhanis adau agi di badahau tadi serempak ngan duau anak-buahau. 36 Satu nginak Yesus lalu, diau bekatau, "Kina'ila, inila Anak Bebiri diau disediauka Allah!" 37 Anak-buahau ndengagh kici'annyautu, mangku ngikut Yesus. 38 Yesus nulia ke belakang endak nginak duau ughangtu ngikut Diau, mangku betanyau, "Tuapau kamu dala'i?" "Rabi," katau ughang duautu, retiau guru, "Di manau bada Dighi?" 39 "Mela, kina'ila!" katau Yesus. Mangku ughang duautu pegi ngan Yesus endak nginak badaHau. Aghitu la petang, mangku ughangtu betunggal ngan Yesus. 40 Sala sughang jak di duau anak-bua Yuhanis tadi diau la ndengagh kici'annyautu ngan ngikut Yesus itu Anderias, ading Simun Pitrus. 41 Dulu sekali diau betemu ngan dangau Simun ngan bekatau, "Kami la betemu ngan Mesias." Mesias semegi ngan Keristus, retiau Rajau Penyelamat. 42 Anderias ngantat Simun guak Yesus. Yesus ngina'i Simun, mangku bekatau ngan diau, "Kabani Simun, anak Yuna. Kaba ka dinamauka Kepas." Kepas semegi ngan Pitrus basau Yunani, retiau batu batan pelapiak. 43 Pagi di aghiau Yesus mutuska endak pegi ke Galilia. Di situ Diau betemu ngan Pilipus, mangku ngaja'inyau, "Mela, ngikut Aku!" 44 Asal Pilipus jak di Betsaida, bada Anderias ngan Pitrus. 45 Pilipus betemu ngan Natanail, mangku bekatau, "Kami la betemu ngan jemau diau dikiciakka Musa dalam buku Taurat ngan buku nabi-nabi. NamauNyau Yesus, anak Yusup, jak di Nasarit." 46 Natanail nimbal, kataunyau, "Asauku nidau ka adau setu diau iluak jak di Nasarit." "Mela, kina'ila ngan kaba!" katau Pilipus. 47 Yesus nginak Natanail datang, mangku ngiciakka diau, katauNyau, "Kina'ila, diautu jemau Israil nian, diau nidau kekela nipu!" 48 Natanail betanyau, "Kebilau Dighi keruan aku?" Yesus nimbal, katauNyau, "Antak ka Pilipus mantau kaba, Aku la nginak kaba di bawa batang aghau." 49 "Guru," katau Natanail, "Dighitu Anak Allah! Rajau jemau Israil!" 50 Yesus bekatau, "Kaba percayau, karnau Aku la ngiciakka, bansau Aku la nginak kaba di bawa batang aghau tadi? Kaba ka nginak setu diau lebia besak agi jak di itu tadi!" 51 Mangku Yesus bekatau agi, "Percayaula nian ngan katauKu ini: Kaba ka nginak langit tebukak ngan malaikat-malaikat Allah nayiak tughun ke Anak Manusiau."

2:1 Duau malam la udim itu adau jamuan nika di kuta Kana di Galilia. Mak Yesus adau di situ. 2 Yesus ngan anak-buaHau diaja'i pulau ke jamuan itu. 3 Mak Yesus nginak ayiak anggur la abis, mangku ngiciak ngan Yesus, kataunyau, "Ughangtu kurangan ayiak anggur." 4 "Ngapau njenguak Aku, mak?" katau Yesus. "Lum masaunyau Aku nyatauka kuasauKu." 5 Anyautu Mak Yesus ngiciak ngan tukang-tukang katang, kataunyau, "Kerjaukala tuapau diau ka dikiciakkaNyau ngan kamu." 6 Di situ adau enam guci diau disediauka batan pembasuan nurut adat lembagau jemau Yahudi. Dalam sebua gucitu isiau duau pulua tikau. 7 Katau Yesus ngan tukang-tukang katangtu, "Isila guci-guci ini ngan ayiak!" Ughangtu ngisiau enggut penua. 8 La penua galau, mangku katau Yesus, "Mbak kini cidukla ayiak dikit, mangku batak ke tuau kerjau." Ughangtu mbatak ayiaktu ke tuau kerjau, 9 mangku tuau kerjautu ngecap ayiak itu diau la beghuba njadi ayiak anggur. Tuau kerjautu nidau keruan ayiak anggurtu jak di manau. Tukang katang ajau diau nciduk ayiaktu tadi ngeruaninyau. Mangku tuau kerjautu mantau pengantin 10 ngan ngiciak ngan diau, kataunyau, "Biasaunyau jemau nengaka ayiak anggur diau lemak kudai, mangku jemau la nyagu minum, ditengaka diau biasau ajau. Mangku ngapau kaba ngimpani anggur diau lemak enggut mbak kini?" 11 Tandau diau dulu sekali ini dibuat Yesus di Kana di Galilia. Ngan tandau itu Diau nginakka kuasauNyau, mangku anak-buaHau percayau ngan Diau. 12 La udim itu Yesus pegi ke Kapernaum serempak ngan endu'Au, ading-adingAu ngan anak-buaHau Mangku ughangtu singga di situ bebeghapau aghi. 13 Aghi rerayau Paska jemau Yahudi la damping, mangku Yesus pegi ke Yerusalim. 14 Di tengalaman Ghuma Allah ditemukaNyau jemau bedagang sapi, kambing, bebiri ngan burung darau ngan pulau jemau penukar tanci duduak di situ. 15 Mangku Yesus mbuat semecam pemecit jak di tali, dikisitkaNyau gegalau ughangtu jak di Ghuma Allah ngan gegalau sapi ngan bebiritu. Mija-mija jemau penukar tanci dikangkangkaNyau, mangku tanciautu buamburan. 16 Mangku dikiciakkaNyau ngan jemau njual burung darau, "Batakla gegalaunyauni jak di sini. Jangan njadika Ghuma BapakKu bada bedagang!" 17 Mangku teghingatla anak-buaHau, bansau adau tetulis di Injil, "Sayang ngan Ghuma Dighi luak api maghak dalam atiKu." 18 Mangku tuau-tuau jemau Yahudi nantang Yesus, kataunyau, "Tuapau tandau buktiau Kaba behak beperembak luak itu?" 19 Katau Yesus, "Legha'ila Ghuma Allah ini, mangku jangkau tigau aghi Aku ka negakkanyau agi." 20 Katau jemau Yahuditu, "Manau ka adau Kaba negakka Ghuma Allah jangkau tigau aghi, awuak negakkanyau empaini empat pulua enam taun." 21 Anyautu Ghuma Allah diau dikiciakkaNyautu badanAu itula. 22 La udim Yesus diidupka jak di mati, teghingatla anak-buaHau, bansau Diau la ngiciakka luak itu, mangku anak-buaHautu percayau ngan Injil ngan kici'an diau la dikiciakka Yesus. 23 Penarau Yesus di Yerusalim selamau aghi rerayau Paska, banyak jemau percayau ngan Diau, karnau la nginak tandau-tandau diau dikerjaukaNyau. 24 Anyautu Yesus nidau percayau ngan ughangtu, karnau Diau keruan gegalau jemau. 25 Nidau nanti dikiciakka nian ngan Yesus perembak jemau, karnau Diau la keruan setu diau adau dalam ati manusiau.

3:1 Adau sughang pengulu jemau Yahudi jak di rumbungan Parisi, namaunyau Nikudimus. 2 Adau semalam diau datang njenguak Yesus, kataunyau, "Rabi, kami keruan, Kaba sughang Guru diajung Allah, karnau nidau bediau sughang kia diau pacak mbuat tandau diau luak Kaba buat, amun ukan Allah diau ngenjuakka kuasau ngan diau." 3 Yesus bekatau, "KatauKu ini benagh: Amun jemau nidau ngulang dilahirka, diau nidau pacak njadi angguta umat Allah." 4 "Baghia jemau la besak pacak ngulang dilahirka," katau Nikudimus. "Cengki nidau pacak masuak agi dalam busung endu'au, mangku ngulang dilahirka." 5 Yesus nimbal, katauNyau, "KatauKu ini benagh: Amun jemau nidau dilahirka jak di ayiak ngan Rua Allah, diau nidau pacak njadi angguta umat Allah. 6 Badan kitau dilahirka pejadi, mangku rua kitau diidupka Rua Allah. 7 Janganla dighi kemangan, amun Aku bekatau: gegalau kapu dighi mesti ngulang dilahirka. 8 Adau angin di manau diau endak. Kitau ndengagh muniau, anyautu nidau keruan jak di manau angintu ngan endak ke manau. Luak itula jemau diau dilahirka Rua Allah." 9 "Luak manau ka adau?" tanyau Nikudimus. 10 Timbal Yesus, "Dighi sughang guru di Israil. Baghia dighi nidau keruan. 11 Percayaula: Kamini ngiciakka setu diau keruan ngan Kami ngan nceritauka setu diau la Kami kinak. Anyautu kapu dighi enggup percayau ngan kici'an Kami. 12 Kapu dighi nidau percayau, amun Aku nceritauka setu diau tejadi di deniauni. Luak manau kapu dighi pacak percayau, amun Aku nceritauka setu diau tejadi di sergau? 13 Nidau bediau sughang kia diau la nayiak ke sergau lain jak di diau la tughun jak di sergau, diautu Anak Manusiau. 14 Luak Musa nayiakka ulagh ke kayu setak di padang bungin, luak itula pulau Anak Manusiau mesti dinayiakka, 15 mangku bilang jemau diau percayau ngan Diau bulia idup empai selelamaunyau. 16 Karnau Allah sayang nian ngan deniauni, mangku Diau la ngenjuakka Ana'Au diau gi sughang itula, supayau bilang jemau diau percayau ngan Diau nidau benasau, tapitu bulia idup empai selelamaunyau. 17 Karnau Allah ngajung Ana'Au pegi ke deniau ukan endak ngadili, tapitu endak nyelamatkanyau karnau Diau. 18 Jemau diau percayau ngan Diau nidau ka diukum. Anyautu jemau diau nidau percayau la diukum Allah, karnau diau nidau percayau ngan Anak Allah diau gi sughang itula. 19 Diau dituntut karnau ceritau ini: Terang la datang ke deniauni, anyautu manusiau milia keleman, nidau galak di terang, karnau perembak ughangtu ja'at. 20 Jemau diau mbuat ja'at luat ngan terang, diau enggup njenguak terang, mangku peremba'au diau ja'attu nidau kina'an. 21 Anyautu jemau diau ngerjauka kendak Allah njenguak terang, mangku tenyatau setu diau dikerjaukanyautu dikerjaukanyau nurut kendak Allah." 22 La udim itu Yesus ngan anak-buaHau pegi ke Yudia, mangku mendam di situ sampai mbaptis. 23 Yuhanis pulau mbaptis di Ainun, pasigh Salim, karnau di situ banyak ayiak, mangku jemau datang ke situ endak dibaptis. 24 Masau itu Yuhanis lum tekawal. 25 Mangku anak-bua Yuhanis bebala ngan jemau Yahudi pekarau ngambiak ayiak sembayang nurut adat lembagau Yahudi. 26 Mangku anak-buahau njenguak Yuhanis, kataunyau, "Guru, dighi masia teghingat Jemau diau serempak ngan dighi di sebeghang ayiak Yurdan diau dighi kiciakka ngan kami senitu? Mbak kini Diau mbaptis pulau ngan banyak jemau pegi guak Diau." 27 Yuhanis nimbal, kataunyau, "Sughang kia nidau pacak ngambiak tuapau-apau, amun nidau dienju'i Allah. 28 Kamu la ndengagh aku bekatau: Akuni ukan Mesias. Aku diajung nduluiNyau. 29 Jemau diau bebunting diautu pengantinan. Kantin pengantinantu ngantininyau ngan ndengaghkanyau ajau, mangku diau riang, amun ndengagh suarau pengantinantu. Luak itu pulau ngan aku. Mbak kini atiku riang nian. 30 KuasauNyau mesti tamba banyak, mangku kuasauku tamba dikit." 31 Jemau diau datang jak di atas lebia gegalaunyau. Jemau diau datang jak di deniau temasuak jemau deniau, ngiciakka deniaunila. Jemau diau asalau jak di sergau lebia gegalaunyau. 32 Diau ngiciakka setu diau la dikina'Au ngan didengaghAu, anyautu nidau bediau sughang kia diau percayau ngan kici'anNyautu. 33 Jemau diau percayau ngan kici'anNyautu nyetujui Allah itu benagh. 34 Jemau diau diajung Allah, Diautu ngiciakka kici'an Allah, karnau Rua Allah dienjuakkaNyau galau ngan Diau. 35 Bapak nyayangi Ana'Au, mangku gegalau kuasau dienjuakka ngan Diau. 36 Jemau diau percayau ngan Ana'Autu bulia idup selelamaunyau. Anyautu jemau diau nidau ta'at ngan Ana'Autu nidau ka bulia idup empai. Jemautu maju diukum Allah.

4:1 Jemau Parisi ndengagh, banyakla Yesus bulia anak-bua sangkan Yuhanis, mangku dibaptiskaNyau. 2 Sebenaghau Yesus nidau mbaptis, anak-buaHau ajau diau mbaptis. 3 Jak Yesus keruan, bansau jemau Parisi ndengagh ceritau itu, Diau pegi jak di Yudia baliak ke Galilia. 4 Diau mesti lalu di Samaria. 5 Mangku Yesus sampai di sebua kuta di Samaria, namaunyau Sikar. Kutatu pasigh tana diau dienjuakka Yakub senitu ngan Yusup ana'au. 6 Di guak itu adau pawuak Yakub. Yesus kekerian, karnau la jawua bejalan, mangku Diau duduak di tepi pawuak. Aghi la tengaghi. 7-8 Anak-buaHau pegi masuak kuta endak mbeli makanan. Mangku sughang tinau Samaria datang endak ngambiak ayiak. Yesus bekatau, "Aku mintak minum." 9 Katau tinau Samaria itu, "Dighi jemau Yahudi, aku jemau Samaria. Ngapau Dighi mintak minum ngan aku?" Karnau jemau Yahudi nidau seilu'an ngan jemau Samaria. 10 Timbal Yesus, "Amun kaba keruan, tuapau diau dienjuakka Allah, ngan sapau diau mintak minum ngan kaba, cengki kaba mintak ngan Diau, mangku Diau ka ngenju'i kaba ayiak diau ngenjuakka idup." 11 Katau jemau tinautu, "Dighi nidau bediau timbau, lagi pulau pawuak ini dalam nianan. Jak di manau Dighi bulia ayiak diau ngenjuakka idup itu? 12 Yakub, niniak puyang kami, ninggali kami pawuak ini. Diau ngambiak ayiak minum jak di sini, luak itu pulau anak-ana'au ngan benatang ingunannyau. Apu Dighi kirau, besakla Dighi sangkan Yakub?" 13 Timbal Yesus, "Jemau diau minum ayiak ini ka aus agi. 14 Jemau diau minum ayiak diau ka Kuenjuakka nidau ka aus agi selelamaunyau. Ayiak diau Kuenjuakkatu ka njadi matau-ayiak dalam idupau diau maju mancagh, mangku ngenjuakka idup selelamaunyau ngan jemau itu." 15 Katau tinautu, "Enju'ila aku ayiak itu, mangku aku nidau aus agi ngan nidau nanti ngulang ke sini endak ngambiak ayiak." 16 Mangku katau Yesus, "Pegila, jenguakla laki kaba, mangku ngulang ke sini batak laki kaba." 17 Tinautu nimbal, "Akuni nidau bediau laki." "Awu, nyela nian," katau Yesus, 18 "Kaba la limau ikuak laki, mangku laki kaba mbak kini ukanau laki kaba. Nyela nian, kaba nidau bediau laki." 19 "Mbak kini aku keruan Dighi sughang nabi", katau tinautu. 20 "Niniak puyang kami nyemba Allah di bukit ini, anyautu jemau kapu dighi ngiciakka, di Yerusalim ajau bada jemau nyemba Allah." 21 "Percayaula," katau Yesus, "Masaunyau ka sampai jemau ka nyemba Bapak ukan di bukit ini, ukan pulau di Yerusalim. 22 Kamu jemau Samaria nyemba setu diau nidau keruan ngan kamu. Anyautu kami jemau Yahudi nyemba Allah diau keruan ngan kami, karnau keselamatan asalau jak di jemau Yahudi. 23 Masaunyau ka sampai, mangku la sampai mbak kini, jemau ka nyemba Bapak ngan kuasau Rua Allah luak Diau nyatauka diriAu. karnau Bapak endak disemba luak itu. 24 Allah itu Rua, mangku jemau diau nyemba Allah mesti nyemba Diau ngan rua luak Diau nyatauka diriAu." 25 Tinautu nimbal, kataunyau, "Aku keruan Rajau Penyelamat diau pulau dikiciakka Keristus ka datang. Amun Diau datang, Diau ka ngiciakka gegalaunyau ngan kitau." 26 Katau Yesus, "Akunila Diau, diau dang ngiciak ngan kaba." 27 Masau itu anak-bua Yesus datang, mangku ughangtu kemangan nginak Yesus ngiciak ngan jemau tinau. Anyautu nidau bediau sughang kia diau betanyau ngan tinautu, "Kaba endak tuapau?" ngan nidau bediau diau betanyau ngan Yesus, "Ngapau Dighi ngiciak ngan tinautu?" 28 Mangku tinautu ninggalka guciau di situ pegi ke kuta mangku ngiciak ngan jemau di kutatu, kataunyau, 29 "Mela, nginak jemau diau ngiciakka ngan aku gegalaunyau diau la kukerjauka. Asauku Diau itula Keristus!" 30 Mangku ughangtu keluagh kuta pegi njenguak Yesus. 31 Penarau itu anak-buaHau ngajak Yesus makan, "Mela, makan", katau ughangtu. 32 Yesus bekatau, "Aku adau makanan diau lum keruan ngan kamu." 33 Mangku anak-buaHautu sangi tanyaui, "Apu adau jemau mbatak makanan batan endak Diau?" 34 Katau Yesus, "MakananKu ngerjauka kendak Allah diau ngajung Aku, mangku ngudimi kerjau diau diserakaNyau ngan Aku. 35 Katau jemau: 'Empat bulan agi pangkau ngetam', anyautu Aku bekatau ngan kamu: Kina'ila di sekitar kamu padi la nguning, la masak, la iluak diketam. 36 Mbak kini jemau diau ngetam la nerimau upahau, diau melungguakka asilau batan endak idup empai selelamaunyau, mangku jemau diau nanam ngan jemau diau ngetam semegi riangau. 37 Rimbayan ini benagh nian: 'Diau sughang nanam, diau lain ngetam.' 38 Akuni ngajung kamu ngetam di umau diau nidau kamu kerjauka. Jemau lain ngerjaukanyau, mangku kamu datang ngetam asil kerjau ughangtu." 39 Banyak jemau Samaria jak di kuta itu percayau ngan Yesus, karnau kici'an tinau tadi, "Diau ngiciakka ngan aku gegalau perembak diau la kukerjauka itu." 40 Jemau Samaria itu betemu ngan Yesus, mintak nian Diau mendam guak ughangtu. Mangku Diau temalam di situ duau malam. 41 Mangku banyak agi jemau diau percayau, karnau kici'an Yesus. 42 Ughangtu ngiciak ngan tinautu, kataunyau: "Mbak kini kami percayau, ukanau karnau kici'an kaba ajau, anyautu karnau kami la ndengagh ngan la keruan, Diau inila nian Penyelamat deniau." 43 La udim duau malam Yesus pegi jak di situ ke Galilia. 44 Diau la ngiciak, bansau sughang nabi nidau diregaui di badahau sendighi. 45 Mangku la sampai di Galilia, jemau Galilia pulau nyambut Diau, karnau ughangtu la nginak gegalaunyau diau dikerjaukaNyau di Yerusalim masau aghi rerayau Paskatu, karnau ughangtu pulau adau di situ. 46 Mangku Yesus ngulang ke Kana di Galilia. Di situ Diau senitu nguba ayiak njadi anggur. 47 Diau la ndengagh, Yesus la sampai jak di Yudia ke Galilia. Diau pegi njenguak Yesus, mangku ngenda'i Diau datang meghadui ana'au, karnau ana'autu laka mati. 48 Yesus ngiciak ngan diau, katauNyau, "Nidau bediau jemau di sini diau endak percayau, amun nidau nginak tandau buktiau diau nyelia." 49 Pekerjau rajautu bekatau, "Mela ke ghumaku, empungan anakku lum mati!" 50 Katau Yesus, "Baliakla, anak dighitu la ghadu!" Jemautu percayau nian ngan kici'an Yesus diau dikiciakkaNyautu, mangku baliak. 51 Diau gi adau di tenga jalan, mangku betemu ngan anak-buahau mbatak kebar, mbak bansau ana'au la adau jugau. 52 Mangku diau betanyau, kebilau diau adau jugau. Katau ughangtu, "Lingsir tengaghi kemaghi demamau ghadu." 53 Mangku bapa'autu teghingat, bansau masau itula Yesus bekatau ngan diau, "Anak dighi la ghadu." Mangku percayau diau. Diau seghuma percayau galau. 54 Inila tandau keduau diau dikerjauka Yesus, masau diau baliak ke Galilia jak di Yudia.

5:1 La udim itu adau aghi rerayau jemau Yahudi, mangku Yesus pegi ke Yerusalim. 2 Di Yerusalim guak mukau lawang Bebiri adau sutiak kulam, namaunyau Betesda dalam basau Ibrani. Di situ adau limau anggung-anggung. 3 Di anggung itu jemau banyak tebadai karnau buidapan. Adau jemau butau, jemau kincut, jemau lumpua pulau diau dang nungguka ayiak kulam tadi belimbang, 4 karnau kekadangan malaikat Tuhan tughun ke kulamtu melimbangka ayiaktu. Mangku jemau buidapan diau dulu sekali masuak, la udim ayiak kulamtu dilimbangka, jemautu dighadui jak di gegalau idapannyau. 5 Di situ adau sughang jemau diau buidapan la tigau pulua delapan taun. 6 Yesus nginak jemautu tebadai di situ. Diau keruan, bansau jemau itu la lamau buidapan, mangku betanyau, "Apu dighi endak ghadu?" 7 Jemau buidapan itu nimbal, kataunyau, "Nidau bediau jemau diau masuakka aku ke kulamtu, amun ayiak itu dang belimbang. Mangku penarau aku nuju kulamtu, jemau lain la ndului masuak." 8 Katau Yesus, "Betegakla dighi, ambiakla tikagh dighi mangku bejalanla!" 9 Masau itula pulau jemautu ghadu, Diau ngambiak tikaghau mangku bejalan. Aghitu aghi Sabat. 10 Karnau itu tuau-tuau jemau Yahudi ngiciak ngan jemau diau empai dighaduitu, kataunyau, "Aghi ini aghi Sabat. Nidau bulia kaba ngatangka tikagh." 11 Katau jemau diau empai dighadui, "Jemau diau meghadui aku bekatau ngan aku: 'Ambiakla tikagh mangku bejalanla.' " 12 Ughangtu betanyau, "Sapau diau ngajung kaba ngambiak tikagh ngan bejalan?" 13 Anyautu jemau diau empai dighaduitu nidau keruan sapau jemautu, karnau Yesus la lengit di pugan jemau banyak diau adau di situ. 14 La udim itu Yesus betemu ngan jemau tadi di Ghuma Allah ngan bekatau ngan diau, "Mbak kini dighi la ghadu. Jangan dighi mbuat dusau agi, supayau dighi jangan ngalami setu diau lebia pansan." 15 Mangku jemautu pegi nceritauka ngan tuau-tuau jemau Yahudi, bansau jemau diau meghaduinyautu Yesus. 16 Itula sebapau tuau-tuau jemau Yahudi mulai meluatka Yesus, karnau Diau meghadui jemau masau aghi Sabat. 17 Yesus ngiciak ngan ughangtu, katauNyau, "BapakKu maju nulung jemau enggut mbak kini, mangku Aku pulau nulungi jemau." 18 Karnau kici'anNyautu tuau-tuau jemau Yahudi tamba beusaha endak mbunua Yesus. Ughangtu endak mbunua Yesus ukan ajau, karnau Diau melanggar adat lembagau aghi Sabat, anyautu pulau karnau Diau ngiciakka, bansau Allah itu Bapa'Au. Amun luak itu, Diau nyamauka diriAu ngan Allah. 19 Mangku Yesus ngiciak agi ngan ughangtu, katauNyau, "Nyela nian kici'anKu ini: Anak nidau pacak ngerjauka tuapau-apau ngan kenda'Au sendighi. Diau ngerjauka ajau setu diau dikina'Au diau dikerjauka Bapak, karnau setu diau dikerjauka Bapak, itula pulau dikerjauka Ana'Au. 20 Bapak nyayangi Ana'Au. Karnau itu Diau nunjuakka ngan Diau gegalaunyau diau dikerjaukaNyau. Diau ka nunjuakka ngan Diau agi kerjau diau lebia penting, mangku kapu dighi kemangan. 21 Karnau luak Bapak ngidupka jemau mati, mangku dienjuakkaNyau idup empai, luak itula pulau Anak ngenjuakka idup ngan jemau diau endak Anak enjuakka idup. 22 Bapak nidau ngadili sughang kia. Kuasau ngadili la dienjuakkaNyau galau ngan Ana'Au, 23 mangku Anak diregaui gegalau jemau luak Bapak diregaui. Jemau diau nidau meregaui Anak itu, jemautu pulau nidau meregaui Bapak diau ngajung Ana'Au. 24 Kici'anKu ini benagh: Jemau diau ndengagh ngan nuruti kici'anKu, mangku percayau ngan Allah diau ngajung Aku, jemautu la ngempu idup empai selelamaunyau. Diau nidau ka diukum. Diau la ngalia jak di mati ke idup. 25 Percayaula, masaunyau ka sampai, mbak kini la sampai, jemau mati ka ndengagh suarau Anak Allah, mangku jemau diau ndengaghkanyau ka idup. 26 Karnau luak Bapak adau kuasau ngidupka, luak itula pulau Diau ngenjuakka ngan Ana'Au kuasau ngidupka. 27 Mangku Diau pulau la ngenjuakka ngan Diau kuasau ngadili, karnau Diautu Anak Manusiau. 28 Jangan kapu dighi kepagauan ngan kici'anKu tadi. Masaunyau ka sampai gegalau jemau mati ka ndengaghka suarauNyau, 29 mangku ngeluagh jak di kuburan. Jemau diau la bebuat iluak ka ngeluagh, mangku bulia idup empai. Anyautu jemau diau bebuat ja'at ka ngeluagh nerimau ukuman." 30 "Akuni nidau pacak ngerjauka tuapau-apau nurut kendakKu sendighi. Aku ngadili nurut setu diau la Kudengagh. Mangku keputusanKu benagh, karnau Aku nidau nuruti kendakKu sendighi, tapitu kendak Allah diau ngajung Aku. 31 Amun Aku ngiciakka diri Aku, kici'an itu nidau bediau buktiau. 32 Adau jemau lain diau ngiciakka Aku. Aku keruan kici'annyautu benagh. 33 Kapu dighi la ngajung jemau njenguak Yuhanis, mangku Yuhanis la ngiciakka Aku setu diau benagh. 34 Aku ngiciakka titu, ukan karnau Akuni endak tandau jak di jemau, anyautu supayau kapu dighi diselamatka. 35 Yuhanis luak lampu diau maghak ngan besinagh, anyautu kapu dighi riang ngan cayautu jerang ajau. 36 Anyautu Akuni adau tandau bukti lain pulau, pentingla diau sangkan kici'an Yuhanistu. Setu diau la dienjuakka Bapak ngan setu diau Kukerjauka mbak kini nyatauka Aku diajung Bapak. 37 Bapak la ngajung Aku. Diautu pulau nceritauka sapau Akuni. Kapu dighi lum kekela ndengaghka suarauNyau, lum pulau kekela nginak rupauNyau, 38 mangku kici'anNyau nidau netap di ati kapu dighi, karnau kapu dighi nidau percayau ngan Ana'Au diau diajungAu. 39 Kapu dighi melajaghi Kitab Injil, sangkauan kapu dighi carau inila bulia idup empai selelamaunyau. Injiltu nceritauka Aku, 40 anyautu kapu dighi enggup datang njenguak Aku, mangku bulia idup itu. 41 Aku ukan ndalak puji ngan jemau. 42 Aku keruan kapu dighi, Aku keruan kapu dighi nidau nyayangi Allah dalam ati. 43 Akuni datang dalam namau BapakKu, mangku kapu dighi enggup nerimau Aku. Amun adau jemau lain datang dalam namaunyau sendighi, kapu dighi endak nerimaunyau. 44 Kapu dighi ndalak puji jak di sughang ngan diau lain, nidau beusaha ndalak puji jak di Allah diau Esa. Luak manau kapu dighi pacak percayau? 45 Jangan kapu dighi sangkau Aku ka nyalaka kapu dighi di adapan Bapak. Diau nyalaka kapu dighi itu Musa diau kapu dighi aghapka. 46 Amun kapu dighi percayau nian ngan Musa, cengki kapu dighi percayau pulau ngan Aku, karnau diau ngiciakka Aku. 47 Kapu dighi nidau percayau ngan setu diau ditulisau, luak manau kapu dighi endak percayau ngan setu diau Kukiciakka?"

6:1 La udim itu Yesus pegi nyembeghang Danau Galilia diau dikiciakka pulau Danau Tiberias. 2 Jemau banyak ngikut Diau, karnau ughangtu la nginak tandau-tandau diau dikerjaukaNyau ngan meghadui jemau buidapan. 3 Yesus nayiak ke bukit mangku duduak di situ ngan anak-buaHau. 4 Masau itu laka Paska, aghi rerayau jemau Yahudi. 5 Yesus nginak jemau banyak nianan datang njenguak Diau, mangku ngiciak ngan Pilipus, katauNyau, "Di manau kitau mbeli makanan, mangku jemau banyak ini pacak makan?" 6 Yesus ngiciak luak itu endak nguji Pilipus, karnau Diau la keruan setu diau endak dibuatAu. 7 Pilipus nimbal, kataunyau, "Makanan diau regau duau ratus ribu rupiah, empuak diagiaka dikit sughang lum kila ka cukup." 8 Mangku Anderias, ading Simun Pitrus, sughang jak di anak-buaHau, bekatau ngan Diau, 9 "Di sini adau sughang budak keciak diau mbatak limau bua ruti jak di njelai ngan duau ikuak ikan, anyautu tuapau gunaunyau batan endak jemau sebanyak ini?" 10 Katau Yesus, "Ajungla jemau banyak ini duduak!" Di situ banyak ghumput, mangku duduak jemau banyaktu, jemau lanang adau limau ribu ughang. 11 Diau la duduak galau, Yesus ngambiak ruti itu, bedu'a beterimau-kasia, mangku diagiakaNyau ngan jemau banyak itu. Luak itula pulau dibuatAu ngan ikan tadi, mangku ughangtu makan enggut kenyang. 12 Jemau la kenyang galau, mangku Yesus ngajung anak-buaHau, katauNyau, "Lungguakkala tigha ruti tadi, mangku jangan adau diau mbuang!" 13 Mangku ughangtu melungguakka duau belas kinjagh penua tigha makanan tadi jak di limau bua ruti diau la dimakan jemau banyaktu. 14 Jemau banyaktu nginak tandau diau diadauka Yesus tadi mangku bekatau, "Nyela, Diaunila Nabi diau diaghapka ka datang ke deniau." 15 Yesus keruan ughangtu endak datang endak masau Diau njadi rajau. Karnau itu Diau pegi sughang nyemuni ke gunung. 16 Aghitu la sangkup malam, mangku anak-bua Yesus pegi ke danau. Ughangtu nayiak perawu endak nyembeghangi danautu 17 endak ke Kapernaum. Aghi la keleman, anyautu Yesus lum kila datang njenguak ughangtu. 18 Mangku adau umbak besak karnau angin nyaghu. 19 La bedayung limau enam kilu ughangtu nginak Yesus bejalan di pucuak ayiak masighi perawutu, mangku ughangtu takut kematila. 20 Yesus ngiciak ngan ughangtu, "Jangan penakut! Ini Aku!" 21 Ughangtu riang nerimau Yesus dalam perawu, mangku masau itu pulau perawutu sampai ke bada diau dijenguak. 22 Pagi aghiau jemau banyak diau masia adau di sebeghang danautu nyadari, tadi gi adau sebua perawu di situ. Ughangtu keruan anak-bua Yesus pegi ngan perawutu, anyautu Yesus nidau ngikut. 23 Mangku adau perawu-perawu lainau datang jak di Tiberias nyunggut pasigh bada jemau banyak makan ruti tadi, udim Tuhan beterimau-kasia. 24 Ughangtu la nginak, bansau Yesus ngan anak-buaHau nidau bediau agi guak itu, ughangtu pulau nayiak perawu pegi ke Kapernaum endak ndala'i Yesus. 25 Jemau banyaktu la betemu ngan Yesus di beghang danautu, ughangtu betanyau ngan Diau, "Kebilau Dighi sampai di sini?" 26 Yesus nimbal, "Ngenian, kapu dighi ndala'i Aku, ukan karnau la ngerti tandau-tandau diau Kukerjauka, tapitu karnau kapu dighi la makan ruti enggut kenyang. 27 Jangan bekerjau endak ngerjauka makanan diau ka busuak. Bekerjaula ajau endak makanan diau nidau ka busuak ngan ngenjuakka idup empai selelamaunyau. Makanantu ka dienjuakka Anak Manusiau ngan kapu dighi, karnau Diautu la ditetapka Allah Bapak." 28 Mangku ughangtu betanyau ngan Diau, "Tuapau diau mesti kami kerjauka, mangku kami ngerjauka kendak Allah?" 29 Yesus nimbal, "Inila diau dikenda'i Allah ngan kapu dighi: Percayaula ngan Aku diau diajung Allah." 30 "Amun luak itu," katau ughangtu, "Tuapau buktiau diau Dighi kerjauka, mangku kami pacak ngina'au ngan percayau ngan Dighi? Tuapau diau ka Dighi kerjauka? 31 Niniak puyang kami makan makanan Mana di padang bungin, luak ditulis dalam Injil: 'Ughangtu dienju'i makanan jak di sergau.' " 32 Mangku Yesus ngiciak ngan ughangtu, katauNyau, "KatauKu ini benagh: Ukan Musa diau ngenju'i kapu dighi makanan jak di sergau, anyautu BapakKutu diau ngenju'i kapu dighi makanan diau ngenianau jak di sergau. 33 Karnau makanan diau jak di Allahtu makanan diau tughun jak di sergau diau ngenjuakka idup ngan deniauni." 34 Mangku katau ughangtu, "Enju'ila kami makanan itu idang aghi!" 35 Katau Yesus, "Akunila makanan diau ngenjuakka iduptu. Jemau diau datang njenguak Aku nidau ka lapagh agi, mangku jemau diau percayau ngan Aku nidau ka aus agi. 36 Benagh luak diau la Kukiciakka ngan kapu dighi: Empuak kapu dighi la nginak Aku, kapu dighi nidau kila percayau. 37 Gegalau jemau diau dienjuakka Bapak ngan Aku ka datang njenguak Aku, mangku jemau diau njenguak Aku, cetau nidau ka Kutulak. 38 Karnau Aku datang jak di sergau ukan batan endak ngerjauka kendakKunila, tapitu batan endak ngerjauka kendak Allah diau ngajung Aku. 39 Inila kendak Allah diau ngajung Aku: Supayau jak di gegalau jemau diau la dienjuakkaNyau ngan Aku sughang kia nidau ka lengit, tapitu ughangtu Kuidupka masau aghi kiamat. 40 Nyela, inila kendak BapakKu: Supayau gegalau jemau diau nginak Ana'Au ngan percayau ngan Diau bulia idup empai selelamaunyau, mangku Akunila ngidupkanyau masau aghi kiamat." 41 Mangku jemau Yahudi mulai bemumut mumuti Yesus, karnau Diau ngiciakka, "Akunila makanan diau datang jak di sergau." 42 Ughangtu bekatau, "Ukanau Diauni Yesus, anak Yusup? Kitau keruan pejadiAu! Ngapau Diau beghani ngiciakka Diau datang jak di sergau?" 43 Katau Yesus, "Jangan agi kapu dighi bemumut! 44 Nidau sughang kia pacak datang njenguak Aku, amun ukan BapakKu diau ngajung Aku mbata'inyau njenguak Aku. Mangku jemau diau njenguak Aku ka Kuidupka masau aghi kiamat. 45 Dalam kitab nabi-nabi ditulis luak ini: 'Gegalau jemau ka diajagh Allah.' Mangku jemau diau ndengagh Bapak ngan belajagh jak di Diau, jemautu ka datang njenguak Aku. 46 Aku nidau ngatauka, adau jemau diau la nginak Bapak lain jak di jemau diau datang jak di Allah. Diautu la nginak Bapak. 47 Ingatkala, jemau diau percayau bulia idup empai selelamaunyau. 48 Akunila makanan diau ngenjuakka idup. 49 Empuak niniak puyang kapu dighi makan makanan Mana di padang bungin, mangku ughangtu masia mati. 50 Anyautu nidau luak itu makanan diau jak di sergau. Jemau diau makan makanantu cetau nidau ka mati. 51 Akunila makanan diau ngenjuakka idup diau datang jak di sergau. Jemau diau makan makanan ini ka idup selelamaunyau. Makanan diau ka Kuenjuakka nyela dagingKu diau ka Kuenjuakka batan ngenjuakka idup ngan deniauni." 52 Ndengagh titu jemau Yahudi bebala sughang ngan diau lain, kataunyau, "Luak manau jemau ini pacak ngenjuakka dagingAu ngan kitau batan makanan?" 53 Mangku Yesus ngiciak ngan ughangtu, "Percayaula nian: Amun kapu dighi nidau makan daging Anak Manusiau ngan minum daghaHau, kapu dighi nidau ka pacak idup ngenianau. 54 Jemau diau makan dagingKu ngan minum daghaKu diautula bulia idup empai selelamaunyau, mangku Aku ka ngidupkanyau masau aghi kiamat. 55 DagingKu makanan nian, daghaKu minuman nian. 56 Jemau diau makan dagingKu ngan minum daghaKu, diautu seghundak ngan Aku, Aku ngan diau. 57 Bapak diau ngenjuakka iduptu ngajung Aku, mangku Aku pulau idup karnau Bapak. Luak itu pulau jemau diau makan dagingKu ka idup karnau Aku. 58 Inila makanan diau jak di sergau, ukanau luluak makanan diau dimakan niniak puyang kapu dighi, mangku kesudimannyau masia mati. Jemau diau makan makanan tadi ka idup selelamaunyau." 59 Gegalaunyautu dikiciakka Yesus, masau Diau ngajagh di ghuma sembayang di Kapernaum. 60 La udim ndengagh gegalau kici'an Yesustu tadi, banyak jak di pengikut Yesus bekatau, "Kici'an ini segau igau! Sapau ka pacak nerimaunyau?" 61 Yesus keruan, bansau ughangtu bejijia karnau kici'anNyautu, mangku Diau bekatau, "Apu kapu dighi purik karnau kici'anKu tadi? 62 Mangku luak manau, amun kapu dighi nginak Anak Manusiau baliak nayiak ke bada asalAu? 63 Rua Allahtu diau ngenjuakka idup. Kekuatan manusiau nidau bediau gunaunyau. Kici'anKu ini diau Kukiciakka ngan kapu dighi asalau jak di Rua Allah diau ngenjuakka idup. 64 Anyautu adau jak di kapu dighi diau nidau percayau." Yesus keruan jak di senitu jemau diau enggup percayau ngan jemau diau njualkaNyau. 65 Mangku Yesus bekatau agi, "Itula sebapau la Kukatauka ngan kapu dighi, nidau bediau sughang kia diau pacak datang njenguak Aku, amun nidau ditulung Bapak." 66 Mulai masau itu banyak jemau ninggalka Diau, enggup agi ngikutiNyau. 67 Mangku Yesus betanyau ngan duau belas anak-buaHau, katauNyau, "Luak apau kamuni? Apu kamu endak pegi pulau ninggalka Aku?" 68 Katau Simun Pitrus, "Tuhan, amun kami pegi, kami njenguak sapau? Kici'an Dighi ajau diau ngenju'i idup empai selelamaunyau! 69 Kami la percayau ngan la keruan, Dighitula ajungan Allah diau suci." 70 Yesus nimbal, "Apu ukan Akuni diau milia kamu duau belas ughangni? Anyautu sughang jak di kamutu jemau ja'at." 71 Diau dikiciakka Yesustu Yudas, anak Simun Iskariut. Karnau empuak Yudas temasuak sughang jak di duau belas anak-buaHautu, diaula jemaunyau diau njualka Yesus.

7:1 La udim itu Yesus pegi ngidari Galilia. Diau enggup ke Yudia, karnau tuau-tuau jemau Yahudi di situ merencanauka endak mbunua Diau. 2 Masau itu laka masau aghi rerayau Punduk, aghi rerayau jemau Yahudi. 3 Mangku ading-beghadingAu ngiciak ngan Yesus, kataunyau, "Pegila jak di sini ke Yudia, mangku pengikut Dighi di situ nginak pulau setu diau Dighi kerjauka. 4 Karnau nidau bediau jemau diau mbunika setu diau dikerjaukanyau, amun diau endak, supayau jemau keruan sapau diau. Amun Dighi ngerjauka kerjau luak itu, gegalau deniau mesti keruan." 5 Karnau ading-beghadingAu ajau nidau percayau ngan Diau. 6 Katau Yesus ngan ughangtu, "MasauKu lum sampai. Amun kamu pacak kebilau ajau. 7 Jemau di deniauni nidau ka adau meluatka kamu. Anyautu Aku diau diluatka jemau, karnau Aku maju ngiciakka ngan jemau, bansau peremba'au ja'at. 8 Pegila kamu ajau ke reramian itu. Akuni lum pegi, karnau lum masaunyau batan endak Aku." 9 Luak itula kici'an Yesus ngan ading-beghadingAu, mangku Diau mendam di Galilia. 10 Ading-beghadingAu la bejalan ke jamuan aghi rerayau. Mangku ngan diam-diam Yesus pegi pulau ke situ, nidau keruan ngan jemau. 11 Selamau aghi rerayautu tuau-tuau jemau Yahudi ndala'i Yesus ngan betanyau, "Di manau jemau itu?" 12 Mangku banyak jemau bebisi'an. Adau diau ngiciakka, "Diautu jemau iluak." Adau pulau diau ngiciakka, "Nidau, Diautu nyesatka jemau banyak." 13 Anyautu nidau bediau jemau diau beghani ngiciakka Diau ngan teterangan, karnau takut ngan tuau-tuau jemau Yahudi. 14 La mbelahan masau aghi rerayautu, Yesus masuak ke Ghuma Allah, mangku mulai ngajagh. 15 Tuau-tuau jemau Yahudi kemangan ngan bekatau, "Luak manau jemau ini pacak ngeruani Kitab Suci awuak endiak sekul?" 16 Yesus nimbal, "Diau Kuajaghkani ukanau ajaghanKu, anyautu ajaghan Allah diau ngajung Aku. 17 Jemau diau endak nuruti kendak Allah ka keruan, apu ajaghanKuni asalau jak di Allah, apu jak di Aku. 18 Jemau diau ngajaghka ajaghannyau sendighi mintak diregaui batan endak diriau sendighi, anyautu jemau diau ndalak pujian batan endak jemau diau ngajungau diautu benagh, nidau endak nian mbu'ung. 19 Ukanau Musa la ngenjuakka ukum Taurat ngan kapu dighi? Anyautu nidau bediau sughang kia diau nuruti ukum Taurat itu. Ngapau kapu dighi endak mbunua Aku?" 20 Ughang banyaktu bekatau, "Kaba gilau. Sapau endak mbunua Kaba?" 21 Mangku Yesus nimbal, katauNyau, "Empai semecam ajau diau Kukerjauka aghi Sabat, kapu dighi la kemangan galau. 22 Musa netapka peraturan besunat, mangku kapu dighi nyunatka anak aghi Sabat. Sebenaghau sunattu ukan asalau jak di Musa, tapitu jak di niniak puyang antak ka Musa. 23 Kapu dighi nyunatka masau aghi Sabat, mangku jangan melanggar ukum Musa. Amun luak itu, ngapau kapu dighi mara ngan Aku, karnau Aku meghadui gegalau badan sughang jemau masau aghi Sabat? 24 Janganla ngadili nurut setu diau kina'an, tapitu adilila ngan carau diau benagh." 25 Adau jemau Yerusalim diau betanyau, kataunyau, "Ukanau Diaunila jemau diau didala'i endak dibunua? 26 Na, itu Diau. Diau ngiciak ngan sekenda'Au ajau di mukau jemau banyak, nidau bediau jemau diau ngiciakka tuapau-apau ngan Diau. Apu tuau-tuau kitau la nyadari, bansau Diaunila Keristus, Rajau Penyelamat? 27 Amun Keristus datang, nidau bediau jemau diau keruan jak di manau asalau, anyautu kitau keruan jak di manau asal jemau ini." 28 Masau Yesus ngajagh di Ghuma Allah, Diau ngiciak ngan suarau bias, katauNyau, "Nyela, kapu dighi keruan sapau Akuni ngan jak di manau asalKu. Aku ukan datang ngan kendak Akunila. Aku diajung Allah diau benagh. Anyautu kapu dighi nidau keruan Diau. 29 Akuni keruan Diau, karnau asalKu jak di Allah, Diautu ngajung Aku." 30 Masau itu ughangtu endak nangkap Yesus, anyautu nidau bediau jemau diau beghani ngecakka Diau, karnau lum masauNyau. 31 Jak di jemau banyaktu banyak diau percayau ngan Diau. Ughangtu bekatau, "Amun Keristus datang, cengki nidau ka banyak tandau diau dikerjaukaNyau jak di diau dikerjauka jemau ini." 32 Jemau jak di rumbungan jemau Parisi ndengagh jemau banyaktu mbisiakka Yesus luak itu. Karnau itu ughangtu ngan imam-imam bepangkat tinggi ngajung penjagau Ghuma Allah pegi nangkap Yesus. 33 Yesus ngiciak ngan jemau banyak di Ghuma Allah, katauNyau, "Tigha jerang agi Aku di guak kapu dighi. Udim itu Aku ka pegi njenguak diau ngajung Aku. 34 Kapu dighi ka ndala'i Aku, anyautu nidau ka betemu ngan Aku, karnau kapu dighi nidau pacak pegi ke bada di manau Aku adau." 35 Mangku tuau-tuau jemau Yahudi sangi tanyaui, kataunyau, "Jemau ini endak pegi ke manau, mangku kitau nidau pacak betemu ngan Diau? Apu Diau endak pegi njenguak jemau diau merantau bada jemau Yunani endak ngajagh jemau Yunani? 36 Tuapau retiau kici'anNyauni: 'Kapu dighi ka ndala'i Aku, anyautu nidau ka betemu ngan Aku,' lagi pulau: 'Kapu dighi nidau pacak pegi ke bada di manau Aku adau'?" 37 Aghi pengabisan masau rerayautu, aghi diau penting sekali, Yesus betegak dalam Ghuma Allah mangku ngiciak ngan suarau bias, katauNyau, "Jemau diau aus, jenguakla Aku mangku minumla! 38 Jemau diau percayau ngan Aku dikiciakka dalam Injil luak ini: Jak di dalam atiau ka adau matau-ayiak melilia diau ka ngenjuakka idup." 39 Kici'an Yesus tadi ngiciakka Rua Allah diau ka dienjuakkaNyau ngan jemau diau percayau ngan Diau. Masau itu Rua Allah lum dienjuakka, karnau Yesus lum dinayiakka ngan diagungka. 40 Jemau banyaktu ndengagh kici'an Yesustu, mangku adau diau ngiciak, "Jemau ini cetau Nabi diau ka datang." 41 Diau lain bekatau, "Diauni Keristus, Rajau Penyelamattu." Anyautu adau pulau diau bekatau, "Baghia Keristus datang jak di Galilia! 42 Dalam Injil ditulis, bansau Keristustu pengadau Rajau Daud, asalau jak di Betlihim, dusun Daud senitu." 43 Mangku jemau banyaktu mulai bebala karnau Yesus. 44 Adau jemau diau endak nangkap Diau, anyautu nidau sughang kia beghani ngecakkaNyau. 45 Mangku penjagau Ghuma Allah diau diajung nangkap Yesus ngelipat agi. Imam-imam bepangkat tinggi ngan jemau Parisitu betanyau ngan ughangtu, kataunyau, "Ngapau kamu nidau mbata'i Diau ke sini?" 46 Katau penjagautu, "Ui, lum kekela adau jemau ngiciak luak Diautu!" 47 "Apu kamu pulau la disesatka jemau itu?" katau jemau Parisi tadi. 48 "Apu adau jak di tuau-tuau kitau ngan jemau Parisi diau percayau ngan Diau? 49 Jemau banyaktu nidau keruan ukum Taurat. Ughangtu la meghakau!" 50 Nikudimus, sughang jak di jemau Parisi tadi diau senitu njenguak Yesus, ngiciak ngan jemau Parisi lainau, kataunyau, 51 "Nurut ukum Taurat kitau sughang jemau nidau bulia diukum, amun pekaraunyau lum keruan ngan peremba'au lum diperisau." 52 "Apu kaba pulau jak di Galilia?" katau ughangtu. "Perisau ajaula Injil. Kaba ka keruan, nidau bediau nabi diau asalau jak di Galilia." 53 Udim itu ughangtu baliak galau.

8:1 Mangku Yesus pegi ke bukit Saitun. 2 Pagi di aghiau akap nian Yesus pegi ke Ghuma Allah, banyak jemau datang njenguak Diau. Yesus duduak mangku mulai ngajagh. 3 Masau itu guru-guru ukum Taurat ngan jemau Parisi njenguak Yesus mbatak sughang jemau tinau diau kedapatan menaugawia. Ughangtu ngajung jemau tinautu betegak di tetengaan, 4 mangku bekatau ngan Yesus, "Pak Guru, jemau tinau ini kedapatan dang bebuat ja'at. 5 Dalam ukum Taurat Musa ngiciakka, jemau tinau luak ini mesti disipati ngan batu enggut mati. Luak apau pendapat kaba?" 6 Ughangtu betanyau luak ini endak ncubau nyalaka Yesus, mangku ughangtu pacak nyalakaNyau. Anyautu Yesus nunduak ajau ngan nuliska jaghiAu ke tana. 7 Karnau ughangtu maju betanyau, Yesus betegak sampai bekatau, "Jemau diau nidau bedusau jak di kapu dighi, gila diau dulu sekali nyipatka batu ke tinau ini." 8 Mangku Yesus nunduak ngulang nulis agi di tana. 9 La udim ndengagh Yesus ngiciak luak itu, ughangtu pegi ninggalka bada itu sejagh sughang mulai ngan diau tuau. Udim-udimau tigha Yesus sughang di situ ngan jemau tinau tadi diau masia betegak di badahau. 10 Yesus betegak ngiciak ngan tinautu, "Ui, kaba, di manau gegalau jemau tadi? Nidau bediau diau ngukum kaba?" 11 "Nidau." katau tinautu, "Iluakla," katau Yesus, "Aku pulau nidau ngukum kaba. Mbak kini pegila, jangan mbuat dusau agi." 12 Mangku Yesus bekiciak agi ngan jemau banyaktu, katauNyau, "Akunila terang deniau. Jemau diau ngikut Aku, nidau ka bejalan di keleman, anyautu diau la bulia terang diau ngenjuakka idup." 13 Katau jemau Parisi, "Kabani ngiciakka Kaba itula. Kici'an Kaba nidau benagh." 14 Yesus nimbal, "Empuak Aku ngiciakka diri Aku, kici'anKu itu benagh, karnau Aku keruan asalKu jak di manau ngan tujuanKu ke manau. Kapu dighi nidau keruan asalKu jak di manau ngan tujuanKu ke manau. 15 Kapu dighi ngadili jemau ngan carau manusiau, Akuni nidau ngadili sughang kia. 16 Anyautu misalau Aku ngadili jemau, keputusanKutu benagh, karnau Aku ukan sughang. Bapak diau ngajung Aku adau guak Aku. 17 Dalam ukum Taurat ditulis luak ini: Kici'an diau benagh kici'an jak di duau ughang. 18 Akuni ngiciakka diri Aku, mangku Bapak diau ngajung Aku ngiciakka Aku pulau." 19 "Bak Kaba di manau?" katau ughangtu. Yesus nimbal, "Kapu dighi nidau nian keruan sapau Aku ngan BapakKu. Amun kapu dighi keruan sapau Aku, cengki kapu dighi keruan pulau sapau BapakKu." 20 Gegalaunyautu dikiciakka Yesus, masau Diau ngajagh di Ghuma Allah pasigh kas pesembahan. Anyautu nidau bediau sughang kia diau nangkap Yesus, karnau masauNyau lum sampai. 21 Mangku Yesus ngiciak agi ngan jemau banyak, katauNyau, "Aku ka pegi. Kapu dighi ka ndala'i Aku, anyautu kapu dighi ka mati dalam dusau. Ke bada Aku pegi kapu dighi nidau pacak datang." 22 Katau jemau Yahuditu, "Diau bekatau, kami nidau pacak datang ke manau Diau pegi. Apu Diau endak mbunua diriAu?" 23 Yesus bekatau agi ngan ughangtu, "Asal kapu dighi itu jak di bawa, asal Akuni jak di atas. Kapu dighi jak di deniauni, Akuni ukan jak di deniauni. 24 Itula sebapau Aku bekatau ngan kapu dighi, bansau kapu dighi ka mati dalam dusau kapu dighi. Cetau kapu dighi ka mati dalam dusau kapu dighi, amun nidau percayau, Akunila Diau." 25 Mangku ughangtu betanyau, "Kabani sapau?" "Tuapau gunaunyau agi Aku ngiciak ngan kapu dighitu?" katau Yesus. 26 "Gi banyak diau endak Kukiciakka ngan ngadili kapu dighi. Diau ngajung Aku pacak dipercayaui, mangku setu diau Kudengagh jak di Diau, itula diau Kukiciakka ngan deniau." 27 Ughangtu nidau terti, bansau Yesus dang ngiciakka Bapak ngan ughangtu. 28 Itula sebapau Yesus bekatau agi, "Amun kapu dighi la nayiakka Anak Manusiau, mangku kapu dighi ka keruan, bansau Akunila Diautu, nidau ngerjauka tuapau-apau jak di diriKu, anyautu Aku ngiciakka ajau setu diau diajaghka Bapak ngan Aku. 29 Diau ngajung Aku nyertaui Aku. Diau nidau kekela ngenangka Aku sughang, karnau Aku maju ngerjauka setu diau melemakka atiAu." 30 La udim Yesus ngiciakka gegalaunyautu, banyak jemau percayau ngan Diau. 31 Mangku Yesus ngiciak ngan jemau Yahudi diau la percayau ngan Diau, katauNyau, "Amun kapu dighi idup nuruti ajaghanKu, kapu dighi njadi anak-buaKu nian. 32 Kapu dighi ka ngeruani Allah diau benagh, mangku Diau ka mbibaska kapu dighi." 33 "Kamini pengadau Abraham," katau ughangtu, "Lum kekela kami njadi budak belian ngan jemau. Ngapau Kaba ngiciakka, kapu dighi ka dibibaska?" 34 Yesus bekatau ngan ughangtu, "Percayaula katauKu ini: Jemau diau bebuat dusau jemautu budak dusau. 35 Sughang budak nidau mendam di ghuma selelamaunyau, anyautu anak maju mendam di ghuma. 36 Mangku, amun Anak itu mbibaska kapu dighi, kapu dighi bibas nian." 37 "Nyela, Aku keruan, kapu dighini pengadau Abraham. Anyautu kapu dighi endak mbunua Aku, karnau kapu dighi enggup nerimau ajaghanKu. 38 Aku ini ngiciakka setu diau la Kukinak di BapakKu. Kapu dighi pulau ngerjauka setu diau la kapu dighi dengaghka jak di bak kapu dighi." 39 Ughangtu nimbal, "Bak kami Abraham." Katau Yesus, "Misalau kapu dighi ngenian anak Abraham, cetau kapu dighi ngerjauka setu diau dikerjauka Abrahamtu. 40 Akuni ngiciakka ngan kapu dighi setu diau benagh diau Kudengagh jak di Allah, anyautu kapu dighi endak mbunua Aku. Perembak luak itu nidau dikerjauka Abraham. 41 Kapu dighi ngerjauka setu diau dikerjauka bak kapu dighitu." Ughangtu nimbal, "Kamini ukanau anak kampang. Bak kami gi sughang, diautu Allah." 42 Mangku Yesus bekatau ngan ughangtu, "Amun Allahtu bak kapu dighi, kapu dighi ka nyayangi Aku, karnau asalKu jak di Allah. Aku datang ukan karnau kendakKunila, tapitu Allah ngajung Aku. 43 Tuapau sebapau kapu dighi nidau ngerti setu diau Kukiciakka? Karnau kapu dighi enggup nerimau kici'anKu. 44 Bak kapu dighi Iblis, mangku kapu dighi endak nuruti kendak bak kapu dighi. Iblistu pembunua manusiau jak di senitu. Diau nidau kekela idup benagh, karnau nidau bediau setu diau benagh di diau. Amun diau mbu'ung, itu biasau, karnau luak itula caraunyau, karnau diau pembu'ung ngan bak gegalau pembu'ung. 45 Empuak Akuni ngiciakka setu diau benagh ngan kapu dighi, kapu dighi nidau percayau ngan Aku. 46 Sapau jak di kapu dighi beghani ngiciakka Aku bedusau? Mangku amun Aku ngiciakka setu diau benagh, ngapau kapu dighi nidau percayau ngan Aku? 47 Jemau diau asalau jak di Allah ndengaghka kici'an Allah, anyautu asal kapu dighi ukan jak di Allah. Itula sebapau kapu dighi enggup ndengaghiNyau." 48 Jemau Yahuditu nimbali Yesus, kataunyau, "Nyela katau kami, kaba jemau Samaria diau diarung iblis." 49 Yesus nimbal, "Aku nidau diarung iblis. Aku meregaui BapakKu, anyautu kapu dighi nidau meregaui Aku. 50 Aku nidau ndalak puji batan endak Aku. Adau Sughang diau beusaha, mangku Aku diregaui. Diau pulau ngadili ngan benagh. 51 Ngenian katauKu ini: Jemau diau nuruti kici'anKu nidau ka mati selelamaunyau." 52 Jemau Yahuditu bekiciak agi, "Mbak kini kami keruan Kabani diarung iblis nian. Abraham la mati, luak itu pulau gegalau nabi, anyautu Kaba ngiciakka, 'Jemau diau nuruti kici'anKu nidau ka mati selelamaunyau.' 53 Amun bak kami Abraham la mati ngan nabi la mati galau, Kabani sapau? Baghia besakla Kaba sangkan Abraham?" 54 Yesus nimbal, "Misalau Aku muji diriKu, dikit kiala nidau bediau gunaunyau. Diau muji Aku Bapak diau kapu dighi kiciakka Allah kapu dighi. 55 Anyautu kapu dighi nidau keruan Diau, tapitu Aku keruan Diau. Misalau Aku ngiciak, bansau Aku nidau keruan Diau, Aku semegi ngan kapu dighi jemau pembu'ung. Aku keruan Diau, mangku Aku nuruti kici'anNyau. 56 Abraham, bak kapu dighi, injiak nianan ka nginak aghi Aku datang, mangku la ngina'au, diau injiak." 57 Jemau Yahudi tadi ngiciak ngan Yesus, "Umur Kaba lum bulia limau pulua taun. Baghia Kaba la nginak Abraham?" 58 Yesus nimbal, katauNyau, "KatauKu ini benagh: Antak ka Abraham adau, Aku la adau." 59 Mangku jemau Yahuditu ngambiak batu endak nyipati Yesus. Anyautu Yesus melengit ninggalka Ghuma Allah.

9:1 Yesus dang ngerayau, Diau nginak sughang jemau diau butau jak di kandungannyau. 2 Anak-buaHau betanyau ngan Yesus, kataunyau, "Pak Guru, tuapau sebapau jemau ini butau jak di keciak? Apu ikak dusau diauni, apu ikak dusau pejadiau?" 3 Yesus bekatau, "Diauni butau ukan ikak dusaunyau, ukan pulau ikak dusau pejadiau, tapitu supayau kuasau Allah nyatau dalam idupau. 4 Selamau aghi siang kitau mesti ngerjauka kerjau Allah diau ngajung Aku. Aghi laka malam, mangku sughang kia nidau pacak mbuat tuapau-apau. 5 Selamau Aku di deniau ini, Akunila terang deniau." 6 La udim ngiciak luak itu, Yesus beluda ke tana, dikudakkaNyau ayiak liughAutu ngan tana, dikuyutka ke matau jemau butau tadi, 7 mangku bekatau ngan diau, "Pegila, bebasuala kaba di kulam Siluam." Siluam retiau "diajung". Mangku jemautu pegi mbasua dayiau, udim itu baliak, mataunyau la nginak. 8 Jemau pasigh ghumahau ngan jemau diau rajin nginak diau mintak-mintak senitu bekiciak, "Ukanau diauni jemau diau rajin mintak-mintak?" 9 Adau diau ngiciakka, "Nyela, diau." Adau diau ngiciakka, "Ukan, diau cuman luluak jemau itu." Jemau itu ngiciak, "Nyela, akunila diau." 10 Ughangtu betanyau, "Luak apau mangku matau kaba pacak nginak?" 11 Jemau tadi nimbal, "Jemau diau benamau Yesus mbuat licak dikit, dikuyutkaNyau di matauku, katauNyau, 'Pegila ke kulam Siluam, basuala dayi kaba.' Mangku aku pegi. La udim aku mbasua dayiku, aku pacak nginak." 12 Ughangtu betanyau, "Di manau jemau itu?" "Aku endiak keruan agi." katau jemau tadi. 13-14 Masau Yesus ngudak tana ngan ayiak liughAu batan endak meghadui matau jemau butau tadi pacak nginak, aghi itu aghi Sabat. Mangku jemau itu dibatak ke jemau Parisi. 15 Ughangtu betanyau pulau ngan diau, luak manau diau pacak nginak. Jemautu nimbal, "Diau nguyutka licak ke matauku, aku mbasuhinyau, mangku aku pacak nginak." 16 Adau jak di jemau Parisi diau ngiciak, "Nidau ka adau jemau diau ngerjauka ini asalau jak di Allah, karnau diau nidau nuruti adat lembagau aghi Sabat." Adau diau lain ngiciak, "Manau ka adau jemau bedusau ngerjauka tandau luak ini?" Mangku pendapat jemau Parisitu nidau semegi. 17 Ughangtu betanyau agi ngan jemau tadi, kataunyau, "Luak manau pendapat kaba ngan jemau diau mbuat kaba nginak?" "Diautu sughang nabi." katau jemau itu. 18 Anyautu jemau Yahudi tadi nidau percayau, bansau jemau itu butau sebelumau, mbak kini pacak nginak. Itula sebapau ughangtu ngajung njenguak pejadiau, 19 mangku betanyau ngan pejadiautu, "Apu anak kapu dighi nian diauni, diau kapu dighi kiciakka butau jak di keciak? Amun nyela nian, luak apau mangku pacak nginaktu?" 20 Pejadiau nimbal, "Nyela, anak kami nian, diau nian butau jak di keciak. 21 Anyautu luak manau diau pacak nginak mbak kini, kami nidau keruan. Mangku sapau diau njegilka mataunyautu, kami pulau nidau keruan. Tanyauka ajau ngan diau. Diau la besak, diau pacak ngiciakkanyau." 22 Pejadiau ngiciak luak itu karnau takut ngan jemau Yahudi, karnau jemau Yahudi la sepakat, mbak bansau jemau diau ngaku'i Yesustu Rajau Penyelamat nidau bulia agi masuak ghuma sembayang. 23 Itula sebapau pejadi jemau itu tadi ngiciakka, "Diau la besak, tanyauka ajau ngan diau." 24 Mangku jemau Yahuditu tadi mantau jemau diau senitu butautu sekali agi, ngiciak ngan diau, "Besumpala, kaba ka ngiciakka diau benagh. Kami keruan jemau diau meghadui kaba jemau bedusau." 25 "Apu Diau jemau bedusau, apu nidau," katau jemautu, "Aku nidau keruan. Sutiak ajau aku keruan, senitu aku butau, mbak kini aku la nginak." 26 Mangku ughangtu ngiciak agi ngan diau, kataunyau, "Tuapau dibuatAu ngan kaba? Luak manau Diau mbuat matau kaba nginak?" 27 Timbalau, "La kukiciakka ngan kapu dighi, anyautu kapu dighi nidau ndengaghkanyau. Ngapau kapu dighi endak ndengagh agi. Apu kapu dighi endak njadi pengikutAu pulau?" 28 Mangku ughangtu nggelakka diau, kataunyau, "Kabatula pengikutAu, kamini pengikut Musa. 29 Kami keruan, Allah ngiciak ngan Musa. Asalau jemau itu kami nidau keruan." 30 Jemau itu nimbal, kataunyau, "Luak manau titu? Kapu dighi nidau keruan asalAu jemau itu jak di manau, awuak Diautula mbuat aku pacak nginak? 31 Kitau keruan, Allah nidau ndengaghka jemau bedusau, tapitu jemau diau meregaui Allah ngan nuruti kenda'Au didengaghkaNyau. 32 Semenjak deniau adau lum kekela tedengagh adau jemau dighadui diau butau jak di keciak. 33 Amun asal jemau itu ukan jak di Allah, Diau nidau ka pacak mbuat tuapau-apau." 34 Ughangtu nimbal, kataunyau, "Tuapau? Kabani endak ngajagh kami? Kaba diau penua ngan dusau jak di keciak?" Mangku diau diajung kisit jak di ghuma sembayang. 35 Yesus la ndengagh, mbak bansau jemau butau tadi la diajung kisit, Diau ndala'i jemautu, mangku bekiciak, "Apu kaba percayau ngan Anak Manusiau?" 36 Jemautu nimbal, "Sapau Diautu, Guru? Kiciakkala, mangku aku percayau ngan Diau." 37 Katau Yesus, "Kaba la nginak Diau, mangku jemau diau dang ngiciak ngan kaba, nyelala Diau." 38 "Aku percayau, Tuhan!" katau jemau tadi, mangku nunduak nyemba Yesus. 39 Mangku Yesus ngiciak agi, katauNyau, "Aku datang ke deniau ini batan endak ngadili jemau; mangku jemau diau butau pacak nginak, jemau diau pacak nginak njadi butau." 40 Adau jemau Parisi diau ndengagh Yesus ngiciak luak itu tadi, mangku ughangtu betanyau ngan Diau, "Kamini butau pulau?" 41 Timbal Yesus, "Misalau kapu dighi butau, kapu dighi nidau bedusau. Anyautu karnau kapu dighi ngiciak, 'Kami nginak', kapu dighi maju dalam dusau."

10:1 "KatauKu ini benagh: Jemau diau masuak sangkaran bebiri nidau jalan duaghau, anyautu nayiak kandang, jemautu pemaling ngan perampuk. 2 Jemau diau masuak jalan duaghau diautu tukang sayia bebiri. 3 Penunggu sangkaran mbukakka duaghau, mangku tukang sayia masuak. Bebiri ka ndengagh suaraunyau, dipantaunyau bebiriau ngan namaunyau sikuak-sikuak, mangku dibata'inyau keluagh. 4 La udim bebiriautu dibata'i keluagh galau, diau bejalan di mukaunyau, mangku bebiri itu ngikut diau, karnau bebiritu kecinauan suaraunyau. 5 Jemau lain cetau nidau diikutkanyau. Diau ka larat jak di jemautu, karnau suaraunyau nidau kecinauan ngan diau." 6 Yesus ngiciakka cuntau ceritau ini, anyautu jemau Yahudi nidau terti tuapau retiau Diau ngiciakka luak itu. 7 Mangku Yesus ngiciak agi, katauNyau, "Keruanila ini: Akuni umpamau duaghau masuak sangkaran bebiri itu. 8 Gegalau jemau lain diau datang antak ka Aku, jemautu pemaling ngan perampuk. Bebiri nidau ndengaghka ughangtu. 9 Akuni umpamau duaghau. Jemau diau masuak jalan Aku ka selamat, diau masuak ngeluagh mangku bulia makanan. 10 Risau datang endak maling, endak mbunua, endak merusak. Akuni datang, supayau kapu dighi bulia idup, idup sempernau ngan gegalaunyau adau. 11 Akunila tukang sayia bebiri diau iluak lagi ngarap. Tukang sayia bebiri diau iluak ngenjuakka nyawaunyau batan endak bebiriau. 12 Jemau upahan diau ukan tukang sayia ngan ukan ngempu bebiritu nginak setuau datang, ditinggalkanyau bebiritu, mangku larat. Mangku setuautu nerengkam sampai nceghaika bebiritu. 13 Jemau tadi larat, karnau diau jemau upahan, nidau nyanauka bebiritu. 14 Akunila tukang sayia bebiri diau iluak lagi ngarap. Aku keruan bebiriKu, bebiriKu keruan Aku. 15 Semegi luak Bapak keruan Aku, Aku keruan Bapak. Mangku Aku ngenjuakka nyawauKu batan endak bebiriKu. 16 Masia adau agi bebiri lain ngan Aku diau nidau masuak sangkaran ini. Bebiri itu mesti Kubatak pulau, mangku bebiritu ka ndengaghka suarauKu. Gegalau bebiritu ka njadi seghundak ngan sughang tukang sayia. 17 Bapak nyayangi Aku, karnau Aku ngenjuakka nyawauKu, mangku Aku ka nerimaunyau agi. 18 Sughang kia nidau pacak ngambi'au jak di Aku. Aku ngenjuakkanyau ngan kesukauan atiKu. Aku bekuasau ngenjuakkanyau ngan bekuasau ngambi'au agi. Kuasau itu Kuterimau jak di BapakKu." 19 Mangku jemau Yahudi mulai bebala, karnau kici'an Yesus itu. 20 Banyak jemau ngiciakka, "Diauni diarung iblis, Diau gilau. Ngapau kamu ndengaghka Diau?" 21 Adau pulau diau lain ngiciakka, "Itu ukanau kici'an jemau gilau. Iblis nidau pacak meghadui jemau butau!" 22 Nidau lamau udim itu jemau Yahudi meringati aghi rerayau nyemak Ghuma Allah. Masau itu pangkau dingin. 23 Yesus ngenginak di berendau Suliman di Ghuma Allah. 24 Mangku jemau Yahudi nyeghundak guak Yesus ngan bekatau, "Lamau beghapau agi Kaba ngenangka kami asau-asauan. Amun Kabani Mesias, Rajau Penyelamat itu, kiciakkala ngan sebenaghau." 25 Katau Yesus, "La Kukiciakka ngan kapu dighi, anyautu kapu dighi enggup percayau. Kerjau diau Kukerjauka atas namau BapakKu mbuktika sapau Aku. 26 Kapu dighini nidau percayau, karnau kapu dighi nidau temasuak bilangan bebiriKu. 27 Gegalau bebiriKu ndengaghka suarauKu. Aku keruan diau, mangku gegalaunyau ngikut Aku. 28 Aku ngenju'i diau idup selelamaunyau, mangku bebiritu nidau ka benasau enggut selelamaunyau. Nidau bediau sughang kia diau ka merebuti diau jak di sayianKu. 29 BapakKu la ngenjuakkanyau ngan Aku. Bekuasaula Diautu sangkan sapau kila. Mangku sughang kia nidau pacak merebutinyau jak di tangan BapakKu. 30 Aku ngan Bapak gi sughang." 31 Mangku jemau Yahudi ngambiak batu agi endak nyipati Yesus. 32 Yesus ngiciak ngan ughangtu, katauNyau, "La banyak kerjau iluak jak di BapakKu diau Kukinakka ngan kapu dighi, mangku karnau perembak manau kapu dighi endak nyipati Aku?" 33 Jemau Yahudi itu nimbal, "Ukan karnau perembak kaba diau iluak itu kami endak nyipati kaba ngan batu, tapitu karnau kaba nggelakka Allah. Kabani sughang jemau endak njadika diri Kaba Allah." 34 Katau Yesus, "Ukanau ditulis dalam Kitab Taurat kapu dighi, 'Allah bekatau: Kamula allah'? 35 Kitau keruan, setu diau ditulis dalam Injil nidau pacak diurungka. Amun Allah ngenjuakka namau allah ngan jemau diau nerimau kici'anNyau tadi, 36 ngapau kapu dighi ngiciakka Aku nggelakka Allah, karnau Aku ngiciakka, Akuni Anak Allah, awuak Aku dipilia Bapak ngan diajungAu ke deniauni? 37 Amun Akuni nidau ngerjauka gegalau kerjau BapakKu, kapu dighi jangan percayau ngan Aku. 38 Anyautu amun Aku ngerjaukanyau, percayaula ngan kerjauKu, empuak kapu dighi nidau percayau ngan Aku. Mangku kapu dighi keruan ngan ngerti, bansau Bapak adau di dalam Aku, Aku di dalam BapakKu." 39 Mangku jemau Yahudi itu ncubau agi nangkap Yesus, anyautu Yesus luput jak di tangan ughangtu. 40 La udim itu Yesus pegi ke beghang ayiak Yurdan, bada Yuhanis mbaptis senitu, mangku Diau mendam di situ. 41 Banyak jemau datang njenguak Diau. Ughangtu bekatau, "Yuhanis nidau ngerjauka tandau sutiak kia, anyautu gegalaunyau diau dikiciakka Yuhanis ceritau Jemau ini benagh." 42 Mangku jemau di situ banyak percayau ngan Yesus.

11:1 Lasarus mendam di Betania ngan kelawaiau Maria ngan Marta. 2 Mariatu tinau diau minya'i keting Tuhan ngan minyak ghum, dikusu'inyau ngan gumba'au. 3 Lasarus itu buidapan, mangku kelawaiautu ngajung jemau ngiciakka ngan Yesus, "Muanai kami diau Dighi sayangitu buidapan." 4 Yesus ndengagh ceritau itu, Diau bekatau, "Idapan ini nidau ka mbatak nyawau. Ini tejadi, mangku Allah diagungka, Anak Allah pulau diagungka." 5 Yesus sayang nian ngan Marta tigau beghadingtu. 6 Yesus la ndengagh ceritau tadi, bansau Lasarus buidapan, mangku Diau masia mendam di badaHau duau aghi agi. 7 La udim itu Diau ngiciakka ngan anak-buaHau, "Mela, kitau ngulang ke Yudia." 8 Anak-buaHautu bekatau, "Senitu jemau Yahudi endak nyipati Dighi ngan batu. Mbak kini Dighi endak ngulang ke situ agi?" 9 Katau Yesus, "Ukanau saghi duau belas jam? Jemau diau bejalan aghi siang nidau tuantuak keting, karnau diau nginak terang deniau. 10 Jemau diau bejalan aghi malam, tuantuak keting, karnau nidau bediau terang ngan diau." 11 Luak itula kici'an Yesus, mangku Diau bekatau agi, "Kantin kitau Lasarus la tiduak, anyautu Aku ka pegi mbangunka diau." 12 Katau anak-buaHau, "Tuhan, amun Lasarus tiduak, diau ka ghadu." 13 Sebenaghau diau dikiciakkaNyau tadi, Lasarus mati, anyautu anak-buaHau nyangkau diau dikiciakkaNyautu, Lasarus tiduak nian. 14 Mangku Yesus ngiciak ngan ughangtu ngan sebenaghau, katauNyau, "Lasarus la mati. 15 Anyautu Aku riang pulau, Aku nidau di situ masau itu, karnau iluakla batan endak kamu luak ini, mangku kamu belajagh percayau. Mbak kini mela kitau pegi ngaruaka diau." 16 Tumas diau pulau dikiciakka "Gembagh" ngiciak ngan kantinau anak-bua Yesus lainau, kataunyau, "Mela kitau ngikut endak mati serempak ngan Diau." 17 Yesus sampai di Betania, Lasarus la empat aghi dikuburka. 18 Betaniatu pasigh ngan Yerusalim, kekirau bejalan setenga jam jawuhau. 19 Banyak jemau Yahudi la datang nandangi Marta ngan Maria endak melemakka ati ughang duau beghadingtu, karnau muanaiautu la mati. 20 Marta ndengagh ceritau Yesus la datang, diau pegi njenguak Diau. Maria mendam di ghuma. 21 Mangku Marta ngiciak ngan Yesus, kataunyau, "Tuhan, misalau Dighi adau di sini, muanaiku cetau nidau mati. 22 Anyautu aku keruan, mbak kini pulau Allah ka ngenjuakka ngan Dighi gegalaunyau diau Dighi pintak ngan Diau." 23 Katau Yesus, "Muanai kaba ka ngulang idup." 24 Katau Marta, "Aku keruan, diau ka ngulang idup masau aghi kiamat." 25 "Akunila ngenjuakka idup ngan mbuat jemau ngulang idup." Katau Yesus, "Jemau diau percayau ngan Aku ka idup, empuak diau la mati. 26 Mangku jemau diau idup ngan percayau ngan Aku, nidau ka mati selelamaunyau. Apu kaba percayau tini?" 27 "Au, Tuhan," katau Marta, "Aku percayau Dighitu Almasih, Rajau Penyelamat, Anak Allah, diau ka datang ke deniau ini." 28 La udim ngiciak luak itu, Marta pegi endak mantau Maria mbisi'inyau, "Guru adau di sini, nanyauka kaba." 29 Satu ndengagh ceritau itu, Maria cecepatan betegak pegi njenguak Yesus. 30 Yesus lum masuak dusun, Diau gi adau di bada Marta ngiciak ngan Diau tadi. 31 Jemau Yahudi diau dang adau di ghumahau endak melemakka atiau nginak Maria cecepatan betegak pegi keluagh. Ughangtu ngikutka diau, karnau nyangkau diau pegi ke perantuan endak nangis di situ. 32 La sampai di bada Yesus tadi, Maria nginak Yesus, mangku nunduak di adapanNyau ngan bekatau, "Tuhan, misalau Dighi di sini, cetau muanaiku nidau mati." 33 Satu Yesus nginak Maria nangis ngan jemau Yahudi diau ngikutkanyau nangis galau, atiAu sian nian, 34 mangku Diau nanyauka, "Di manau bada diau dikuburka?" Katau ughangtu, "Mela kina'ila, Tuhan!" 35 Mangku Yesus nangis. 36 Jemau Yahuditu bekatau, "Kina'ila, ukan main sayangAu." 37 Adau pulau diau bekatau, "Diauni mbuat jemau butau nginak. Cengki Diau pacak nulung, mangku Lasarus galak endiak ka mati." 38 Yesus sial nian mangku pegi ke perantuan. Kuburantu tebuak besak, ditukup ngan batu. 39 Katau Yesus, "Guliakkala batu itu." Marta, uau jemau mati itu, nimbal, kataunyau, "Tuhan, la empat aghi diauni dikuburka. Cetau la bembau." 40 Yesus bekatau, "La Kukiciakka ngan kaba, 'Amun kaba percayau, kaba ka nginak kuasau Allah.' " 41 Mangku ughangtu ngguliakka batu itu, Yesus ncungak ke langit ngan bekatau, "Terimau kasia, Bak, karnau Dighi la ndengaghka du'aKu. 42 Aku keruan Dighi maju ndengaghka du'aKu, anyautu Aku ngiciakka ini batan endak jemau banyak diau adau di sini, supayau ughangtu percayau, bansau Dighitu ngajung Aku." 43 La udim ngiciakka luak itu, Yesus tegauk, katauNyau, "Lasarus, keluaghla!" 44 Jemau diau la mati tadi ngeluagh. Keting tanganau masia bebalut ngan kain putia ngan dayiau ditukup ngan setangan. Mangku katau Yesus ngan ughang di situ, "Kelucungila kain pembalutau, mangku diau pacak bejalan." 45 Banyak jak di jemau Yahudi diau nandangi Maria percayau ngan Yesus, karnau la nginak setu diau dibuatAutu. 46 Adau pulau diau pegi njenguak jemau Parisi ngiciakka ngan ughangtu setu diau la dibuat Yesustu. 47 Mangku imam-imam bepangkat tinggi ngan jemau Parisi ngajung pengadilan agamau betunggal, ngiciakka, "Tuapau diau mesti kitau kerjauka? Jemau itu ngerjauka banyak tandau nyelia. 48 Amun kitau ngenangka Diau maju luak itu, gegalau jemau ka percayau ngan Diau, mangku penguasau jemau Rum ka datang merusakka Ghuma Allah ngan gegalau bangsau kitau." 49 Mangku sughang jak di ughangtu, namaunyau Kayapas, imam besak taun itu, bekatau, "Kamuni endiak keruan tuapau-apau. 50 Apu kamu nidau ngeruani, iluakla batan endak kamu sughang mati sangkan gegalau bangsau kitau benasau?" 51 Kayapas ngiciakka luak itu ukan jak di rupu'annyautula, tapitu karnau diau Imam Besak taun itu, diau meramalka, Yesus ka mati batan endak jemau Yahudi. 52 Diau ukan mati batan endak bangsau itu ajau, tapitu pulau endak nunggalka ngan nyatuka anak-anak Allah diau di bada lainau. 53 Mangku mulai aghitu pengulu-pengulu Yahudi sepakat endak mbunua Yesus. 54 Karnau itu Yesus nidau agi bejalan di mukau umum jemau Yahudi. Diau pegi jak di Yudia ke kuta Epraim diau pasigh ngan padang bungin. Di situla Yesus mendam ngan anak-buaHau. 55 Masau itu aghi rerayau Paska la pasigh. Banyak jemau la pegi ke Yerusalim endak njalanka adat lembagau pembasuan diri nurut adat Yahudi, antak ka aghi rerayau mulai. 56 Ughangtu ndala'i Yesus, mangku ughangtu dang betunggal di Ghuma Allah, sughang ngiciak ngan diau lain, kataunyau, "Luak manau pendapat kamu? Asauku Yesus nidau ka datang ngikuti aghi rerayau ini." 57 Imam-imam bepangkat tinggi ngan jemau Parisi la merintaka, bilang jemau diau keruan bada Yesus mesti ngiciakkanyau ngan ughangtu, supayau Yesus ditangkap.

12:1 Enam aghi antak ka aghi rerayau Paska Yesus pegi ke Betania, bada Lasarus diidupka jak di mati. 2 Di situ Yesus dijamu jemau dusun itu. Marta nepi'iNyau ngan Lasarus ngikut makan ngan Diau. 3 Mangku Maria mbatak minyak ghum segudu keciak diau besak nianan regaunyau, mangku diau minya'i keting Yesus, dikusu'inyau ngan gumba'au. Ghumatu ghum galau ngan minyak itu. 4 Mangku Yudas Iskariut, sughang jak di anak-bua Yesus diau njualkaNyau bekatau, 5 "Ngapau minyak ghum ini nidau dijual ngan regau tigau ratus tanci pirak, mangku dienjuakka ngan jemau serik?" 6 Yudas ngiciak luak itu, ukan karnau diau nyanauka jemau serik, anyautu karnau diau pemaling ngan maju ngambiak tanci ughangtu diau diimpaninyau. 7 Mangku katau Yesus, "Nengkela diauni! Diau ngerjauka ini batan endak aghi penguburanKu. 8 Jemau serik maju guak kamu, anyautu Aku nidau maju guak kamu." 9 Banyak jemau Yahudi ndengagh Yesus adau di Betania, mangku pegi ke situ. Ughangtu pegi ke situ ukan ajau endak nginak Yesus, tapitu karnau endak nginak Lasarus pulau diau la diidupka Yesus jak di mati. 10 Mangku imam-imam bepangkat tinggi merencanauka endak mbunua Lasarus pulau, 11 karnau banyak jemau Yahudi ninggalka ughangtu karnau Lasarus, mangku percayau ngan Yesus. 12 Jemau banyak la datang endak merayauka Paska. Pagi aghiau ughangtu ndengagh, bansau Yesus dang bejalan ngancamka Yerusalim. 13 Ughangtu ngambiak daun paku bindu, mangku pegi ngampak Yesus ngan besurak-surak, kataunyau, "Husana! Tepujila Jemau diau datang atas namau Tuhan. Tepujila Rajau Israil." 14 Yesus dapat sikuak keledai mudau, dinayi'iNyau, mangku ditepati setu diau ditulis dalam Injil, 15 "Nidau nanti takut, ui jemau Yerusalim. Kina'ila Rajau kamu datang nayiak sikuak anak keledai." 16 Masau itu anak-bua Yesus lum ngerti gegalaunyau itu. Anyautu la udim Yesus ngulang idup ngan diagungka, anak-buaHau teghingat, bansau setu diau dikerjauka ughangtu ngan Diau la ditulis dalam Injil. 17 Jemau banyak diau la nginak Yesus ngajung Lasarus ngeluagh jak di kuburan diidupkaNyau jak di mati maju ngiciakka kejadian itu. 18 Itula sebapau jemau banyak pegi ndepatka Yesus di jalan, karnau ughangtu la ndengagh, bansau Diautu ngerjauka tandau nyelia itu. 19 Mangku jemau Parisi ngiciak sughang ngan diau lain, kataunyau, "Na, kamu la nginak, kitau nidau pacak mbuat tuapau-apau. Gegalau jemau deniauni datang ngikut Diau." 20 Di antarau jemau diau datang ke Yerusalim endak sembayang masau aghi rerayau itu adau pulau jemau Yunani. 21 Ughangtu pegi njenguak Pilipus diau asalau jak di Betsaida di Galilia mangku bekatau, "Amun pacak, kami endak betemu ngan Yesus." 22 Pilipus ngiciakkanyau ngan Anderias, mangku ughang duautu ngiciak ngan Yesus. 23 Katau Yesus ngan ughangtu, "Masaunyau la sampai Anak Manusiau diagungka. 24 Ngenian katauKu ini: Amun semughak padi nidau ditugalka ke tana, mangku nidau busuak, diau ka maju semughak itula. Anyautu amun mughaktu busuak karnau tumbua, mangku ka banyak asilau. 25 Jemau diau nyayangi nyawaunyau ka kelengitan nyawaunyau, mangku jemau diau nidau nyayangi nyawaunyau ka bulia idup empai selelamaunyau. 26 Jemau diau endak bekerjau batan endak Aku, diau mesti ngikut Aku, mangku anak-buaKu adau guak Aku di badaKu. Mangku jemau diau bekerjau batan endak Aku diregaui BapakKu." 27 "Aku temas. Tuapau diau mesti Kukiciakka mbak kini? Bak, selamatkala Aku jak di sengsarau ini? Nidau, karnau batan endak itula Aku datang. 28 Bak, agungka namau Dighi!" Mangku tedengagh suarau jak di sergau diau ngiciakka, "Aku la ngagungkanyau, mangku Aku ka ngagungkanyau agi." 29 Jemau banyak diau di situ ndengagh suarau itu bekatau, "Itu gurua!" Adau pulau diau ngiciakka, "Ukanau, malaikat ngiciak ngan Diau." 30 Yesus bekatau ngan ughangtu, "Suarau itu ukan batan endak Aku, tapitu batan endak kapu dighi. 31 Mbak kini la masaunyau deniau diukum, mbak kini penguasau deniau ka dicapakka keluagh. 32 Amun Aku la dinayiakka jak di deniau, Aku ka ngajak gegalau jemau njenguak Aku." 33 Yesus ngiciakka luak itu endak nyatauka carau Diau ka mati. 34 Jemau banyak itu ngiciak ngan Diau, kataunyau, "Kami la keruan jak di ukum Taurat, bansau Mesias, Rajau Penyelamattu, ka idup selelamaunyau. Luak manau Kaba pacak ngiciak, Anak Manusiau mesti dinayiakka. Sapau Anak Manusiau itu?" 35 Katau Yesus agi ngan ughangtu, "Nidau ka lamau agi terang adau guak kapu dighi. Bejalanla empungan terang gi adau di kamu, mangku kapu dighi nidau bejalan di keleman. Jemau diau bejalan di keleman nidau keruan ke manau diau pegi. 36 Percayaula ngan terang itu, empungan terang itu gi adau di kapu dighi, mangku kapu dighi njadi jemau diau idup dalam terang." Udim ngiciak luak itu Yesus pegi nyemuni, mangku nidau kina'an agi. 37 La banyak tandau nyelia dikerjauka Yesus di mukau ughangtu. Empuak luak itu ughangtu nidau kila percayau ngan Diau. 38 Mangku setu diau la dikiciakka nabi Yesaya la ditepati, "Tuhan, sapau ka percayau ngan ceritau kami? Ngan sapau kuasau Tuhan dinyatauka?" 39 Itula sebapau ughangtu nidau pacak percayau, karnau Yesaya la bekatau pulau, "Katau Allah, 40 'Aku la mbutauka matau ughangtu ngan mbuat ughangtu keghas ati, supayau matau ughangtu jangan nginak ngan rupu'an ughangtu jangan terti, mangku ughangtu jangan ngulang njenguak Aku, mangku Aku jangan meghadui ughangtu.' " 41 Yesaya la ngiciak luak itu, karnau la nginak kuasau Yesus, mangku dikiciakkanyau. 42 Empuak luak itu banyak pulau jemau jak di pengulu jemau Yahudi percayau ngan Diau. Anyautu ughangtu nidau beghani ngaku'iNyau ngan terang-terangan, karnau takut, kalu jemau Parisi nidau ngajung ughangtu agi masuak ghuma sembayang. 43 Ughangtu galakla dipuji manusiau sangkan dipuji Allah. 44 Mangku Yesus bekatau bias, "Jemau diau percayau ngan Aku, ukan percayau ngan Aku ajau, tapitu percayau pulau ngan Allah diau ngajung Aku. 45 Mangku jemau diau nginak Aku nginak Allah pulau diau ngajung Aku. 46 Akuni datang ke deniau ini umpamau terang, mangku bilang jemau diau percayau ngan Aku jangan maju mendam di keleman. 47 Amun adau jemau diau ndengagh kici'anKu, anyautu nidau nurutinyau, Aku nidau ka ngukumau, karnau Aku datang ukan endak ngukum deniau, tapitu endak nyelamatkanyau. 48 Jemau diau nidau nerimau Aku ngan nidau nuruti kici'anKu, akimau la adau. Kici'anKu diau la Kukiciakka, itula diau ka ngukumau masau aghi kiamat. 49 Karnau Aku nidau ngiciak nurut rupu'anKunila, tapitu Bapak diau ngajung Aku Diautu ngajung Aku ngiciakka setu diau mesti Kukiciakka. 50 Aku keruan perintaHau itu ngenjuakka idup empai selelamaunyau. Mangku setu diau Kukiciakka, Aku ngiciakka luak la dikiciakka Bapak ngan Aku."

13:1 Mbak pagi di aghiau aghi rerayau Paska ka lasung, Yesus la keruan, bansau masauNyau la sampai Diau ninggalka deniau ini njenguak Bapa'Au. Yesus la nyayangi anak-buaHau, mangku Diau maju nyayangi ughangtu enggut pengabisanNyau. 2 Yesus ngan anak-buaHau dang makan malam. Iblis la mbisi'i Yudas Iskariut, anak Simun, supayau diau njualka Yesus. 3 Yesus keruan, bansau Bapa'Au la ngenjuakka gegalaunyau ngan Diau. Diau pulau keruan Diau asalau jak di Allah ngan baliak agi ke Allah. 4 Mangku Yesus betegak ngelucungka bajuAu. Diau ngambiak anduk, dikainkanyau. 5 La udim itu Diau ncughuaka ayiak dalam capa mangku mulai mbasua keting anak-buaHau, dikusu'iNyau ngan anduk diau dikainkatu. 6 Mangku Diau sampai di Simun Pitrus. Pitrustu bekatau, "Tuhan, baghia Dighi mbasua ketingku." 7 Katau Yesus, "Mbak kini kaba lum ngerti setu diau Kukerjauka ini, nanti kaba ka terti." 8 "Jangan, Tuhan," Katau Pitrus, "Jangan Dighi gheghapati mbasua ketingku." Katau Yesus, "Amun Aku nidau mbasua kaba, kaba nidau agi njadi anak-buaKu." 9 Katau Simun Pitrus, "Amun luak itu, Tuhan, jangan keting ajau, tapitu tangan ngan palakku pulau." 10 "Jemau diau la udim mandi la beresia gegalaunyau." Katau Yesus. "Diau nidau nanti diberesiaka agi lain jak di ketingau. Kamu la beresia, anyautu nidau gegalau kamu." 11 Yesus la keruan sapau ka njualkaNyau. Itula sebapau Diau ngiciakka, "Kamuni la beresia, anyautu nidau gegalau kamu." 12 La udim Yesus mbasua keting anak-buaHautu, Diau nyurumka bajuAu agi, mangku duduak sampai ngiciak ngan anak-buaHautu, katauNyau, "Apu kamu terti setu diau empai Kukerjauka ngan kamuni? 13 Kamu betutugh ngan Aku Guru ngan Tuhan. Nyela nian, kamutu benagh, karnau Akula Diau. 14 Amun Aku mbasua keting kamu, Akuni diau njadi Tuhan ngan Guru kamu, mangku kamu pulau sepantasau sangi mbasuhi keting. 15 Aku la mbuat penauan batan endak kamu, supayau kamu mbuat semegi luak aku buat ngan kamu. 16 Nyela nian katauKu ini: Sughang budak nidau lebia bekuasau jak di tuanau, mangku jemau diau diajung nidau lebia penting jak di jemau diau ngajungau. 17 Kamu la keruan gegalaunyauni. Riang kamu, amun dikerjauka. 18 Setu diau Kukiciakka, ukanau ngiciakka kamu gegalaunyau. Aku keruan, sapau-sapau diau la Kupilia. Anyautu setu diau ditulis di Injil mesti tejadi: 'Jemau diau la makan ngan Aku ka melawan Aku.' 19 Aku ngiciakkanyau ngan kamu mbak kini antak ka tejadi, supayau amun titu tejadi kelau, kamu percayau, bansau Akunila Diau. 20 Ngenian katauKu ini: Jemau diau nerimau jemau diau Kuajung, nerimau Aku. Mangku jemau diau nerimau Aku nerimau Allah diau ngajung Aku." 21 La udim Yesus ngiciakka luak itu, peghasauanNyau madak nian, mangku Diau bekatau, "KatauKuni benagh nian: Sughang jak di kamuni ka njualka Aku." 22 Anak-buaHau sangi kina'i ngan kemangan, karnau nidau keruan, sapau diau dikiciakkaNyautu. 23 Anak-bua diau disayangiNyau duduak di guak sebela kananAu. 24 Simun Pitrus ngenjuakka tandau ngan jemautu ngajungau betanyau ngan Yesus, sapau diau dikiciakkaNyautu. 25 Jemau diau duduak pasigh Yesustu nyelinga'iNyau sampai betanyau, "Sapau, Tuhan?" 26 Mangku katau Yesus, "Jemau diau Kuenju'i ruti diau Kuceculka dalam pan, diautu jemaunyau." Mangku Yesus ngambiak setepil ruti, diceculkaNyau dalam pan, dienjuakka ngan Yudas Iskariut, anak Simun. 27 La udim Yudas nerimau rutitu, iblis masuak dalam ati Yudas, mangku Yesus ngiciak ngan diau, katauNyau, "Setu diau endak kaba kerjauka, kerjaukala gegancang." 28 Nidau sughang kia jak di ughangtu diau duduak makan di situ terti, ngapau Yesus ngiciak luak itu ngan Yudas. 29 Adau diau nyangkau Yesus ngajung Yudas mbeli setu diau digunauka batan aghi rerayau, ngan ngenjuakka tanci ngan jemau serik, karnau Yudas tukang nyimpani tanci ughangtu. 30 La udim Yudas ngambiak ruti tadi, diau gegasip ngeluagh. Aghitu la malam. 31 La udim Yudas pegi, Yesus bekatau, "Mbak kini Anak Manusiau diagungka, mangku Allah pulau diagungka karnau Diau. 32 Amun Allah diagungka karnau Diau, Allah ka ngagungka Diau pulau karnau diriAu. Nyela, Allah ka cepat ngagungkaNyau. 33 Ai, anak-buaKu, tigha jerang agi Aku adau guak kamu. Kamu ka ndala'i Aku. Luak Aku la ngiciak ngan jemau Yahudi, Aku ngiciak pulau ngan kamu mbak kini, 'Ke bada Aku pegi kamu nidau pacak datang.' 34 Aku ngiciakka perinta empai ngan kamu: Kamu sangi sayangila sughang ngan diau lain. Aku la nyayangi kamu. Luak itula pulau kamu mesti sangi sayangi. 35 Amun kamu sangi sayangi, gegalau jemau ka keruan, bansau kamu anak-buaKu." 36 Mangku Simun Pitrus betanyau, "Tuhan, Dighi endak pegi ke manau?" Katau Yesus, "Ke bada Aku pegi, kaba nidau pacak ngikut Aku mbak kini, anyautu nanti kaba ka ngikut Aku." 37 Pitrus betanyau agi, "Tuhan, ngapau Aku nidau pacak ngikut Dighi mbak kini? Aku endak ngenjuakka nyawauku batan endak Dighi!" 38 Katau Yesus, "Luak manau kaba endak ngenjuakka nyawau kaba batan endak Aku? Aku bekatau sebenaghau: Antak ka ayam bekukuak, kaba la tigau kali nidau ngaku'i Aku."

14:1 "Janganla kamu temas." Katau Yesus, "Percayaula ngan Allah, percayaula pulau ngan Aku. 2 Di ghuma BapakKu banyak bada. Amun nidau luak itu, cetau Aku nidau ngiciak ngan kamu, bansau Aku pegi endak nyediauka bada batan endak kamu. 3 La udim Aku pegi ke situ ngan nyediauka bada batan endak kamu, Aku ka ngulang agi, mangku mbatak kamu ke badaKu, supayau di manau badaKu, di situ pulau bada kamu. 4 Ke manau Aku pegi, kamu keruan jalan ke situ." 5 Tumas ngiciak ngan Yesus, kataunyau, "Tuhan, kami nidau keruan, ke manau Dighi pegi. Luak manau kami keruan jalan?" 6 Katau Yesus, "Akunila jalan ngeruani Allah ngan idup nian. Nidau sughang kia diau pacak njenguak Bapak, amun nidau karnau Aku. 7 Amun kamu keruan Aku, cetau kamu pulau keruan BapakKu. Mbak kini kamu la keruan Diau ngan kamu la nginak Diau." 8 Katau Pilipus, "Tuhan, ancakka Bapaktu, jadila ngan kami." 9 Katau Yesus, "Ui, Pilipus, Aku la lamau ngan kamu, mangku kaba lum kila keruan Aku? Jemau diau nginak Aku la nginak Bapak. Ngapau kaba ngiciakka: Ancakka Bapaktu ngan kami? 10 Apu kabani nidau percayau, Akuni di dalam Bapak, Bapak pulau di dalam Aku? Setu diau Kukiciakka ngan kamu, asalau ukanau jak di Aku. Bapak diau mendam di dalam Aku ngerjauka gegalaunyau itu. 11 Percayaula ngan katauKu ini: Aku di dalam Bapak ngan Bapak di dalam Aku, senidau-nidaunyau percayaula ngan setu diau la Kukerjauka. 12 Ngenian katauKu ini: Jemau diau percayau ngan Aku ka ngerjauka setu diau la Kukerjauka, gi banyak setu diau lebia besak agi ka dikerjaukanyau. Aku pegi njenguak Bapak, 13 mangku setu diau kamu pintak atas namauKu ka Kuenjuakka, mangku Bapak dipuji karnau Aku. 14 Tuapau kila diau kamu pintak atas namauKu ka Kuenjuakka." 15 "Amun kamu nyayangi Allah, kamu ka nuruti gegalau perintaKu. 16 Aku ka mintakka ngan Bapak, mangku Diau ka ngenju'i kamu Penulung lain diau ka adau guak kamu selelamaunyau. 17 Diau itu Rua Allah diau ka nyatauka, sapau Allah sebenaghau. Deniau nidau pacak nerimau Diau, karnau deniau nidau nginak Diau ngan ngeruani Diau. Anyautu kamuni ngeruani Diau, karnau Diau di guak kamu ngan mendam dalam kamu. 18 Aku nidau ka ngenangka kamu njadi anak umang. Nanti Aku ka ngulang njenguak kamu. 19 Tigha jerang agi, deniau nidau ka nginak Aku agi, anyautu kamuni ka nginak Aku. Akuni idup, karnau itu kamu ka idup pulau. 20 Aghitu pulau kamu ka ngeruani, bansau Aku dalam BapakKu ngan kamu dalam Aku, Aku pulau dalam kamu. 21 Jemau diau nerimau perintaKu ngan nurutinyau, jemau itula nyayangi Aku. Mangku jemau diau nyayangi Aku ka disayangi BapakKu. Aku pulau ka nyayangi jemautu ngan nyatauka diriKu ngan diau." 22 Yudas, ukan Yudas Iskariut, betanyau ngan Yesus, kataunyau, "Tuhan, tuapau sebapau Dighi endak nyatauka Dighi ngan kami, nidau ngan gegalau deniau?" 23 Katau Yesus, "Amun jemau nyayangi Aku, diau ka nuruti kici'anKu. BapakKu ka nyayangi diau, mangku Kami ka njenguak diau ngan mendam ngan diau. 24 Jemau diau nidau nyayangi Aku nidau nuruti kici'anKu. Kici'an diau kamu dengaghtu ukan jak di Aku, tapitu jak di Bapak diau ngajung Aku. 25 Gegalaunyautu Kukiciakka ngan kamu, semasau Aku gi betunggal ngan kamu. 26 Anyautu Rua Allah, Penulung diau ka diajung Bapak atas namauKu, diautu ka ngajaghka gegalaunyautu ngan kamu ngan ngingatka gegalaunyau diau la Kukiciakka ngan kamu. 27 Aku mbuat ati kamu tenang. Keinji'anKu Kuenjuakka ngan kamu, mangku diau dienjuakka itu ukan luak diau dienjuakka deniau. Nidau nanti temas, ngan nidau nanti penakut. 28 Kamu la ndengagh Aku bekatau ngan kamu, Aku ka pegi, anyautu Aku ka ngulang agi njenguak kamu. Amun kamu nyayangi Aku, cetau kamu riang, karnau Aku pegi njenguak BapakKu, karnau pentingla Bapak sangkan Aku. 29 Aku ngiciakka titu ngan kamu mbak kini, antak ka gegalaunyautu tejadi, supayau kamu percayau, amun titu tejadi nanti. 30 Aku nidau ka ngiciak banyak agi ngan kamu, karnau la masaunyau penguasau deniauni datang. Anyautu diau nidau bekuasau ngan diriKu. 31 Anyautu gegalaunyautu mesti tejadi, supayau deniau keruan, bansau Aku nyayangi Bapak ngan ngerjauka gegalaunyau diau diajungka Bapak ngan Aku. Mela, kitau pegi jak di sini."

15:1 "Akuni umpamau batang anggur diau asli, mangku BapakKu tukang sayiau. 2 Bilang cangka di Aku diau nidau bebua diteta'Au, mangku bilang cangka diau bebua diberesiaka, supayau buahau tamba lebat. 3 Kamu la diberesiaka karnau kici'anKu diau la Kukiciakka ngan kamu. 4 Mendamla kamu di Aku, mangku Aku mendam di kamu. Cangka nidau pacak bebua, amun nidau maju di batang anggur. Luak itula pulau kamu nidau pacak bebua, amun nidau mendam di Aku. 5 Akunila batang anggur, kamunila cangka-cangkahau. Jemau diau mendam di Aku ngan Aku di diau, jemautu ka banyak buahau. Amun Aku nidau nulung, kamu nidau pacak mbuat tuapau-apau. 6 Jemau diau nidau mendam di Aku dicapakka keluagh luak cangka, mangku njadi keghing. La udim ditunggalka jemau, dicapakka ke dalam api, mangku mutung. 7 Amun kamu maju mendam di Aku ngan kici'anKu maju di ati kamu, pintakla tuapau kila kamu endak, mangku kamu ka dienju'i. 8 Amun kamu bebua banyak, kamu njadi anak-buaKu nian. Ngan carau luak itu BapakKu diagungka." 9 "Aku sayang ngan kamu luak Bapak sayang ngan Aku. Jangan nyimpang jak di sayangKu. 10 Amun kamu nuruti perintaKu, Aku maju sayang ngan kamu. Itu semegi ngan Aku nuruti perinta BapakKu, mangku Bapak maju sayang ngan Aku. 11 Gegalaunyau Kukiciakka ngan kamu, supayau keinji'anKu adau di ati kamu, mangku kamu injiak nianan. 12 Inila perintaKu: Kamu mesti sangi sayangi, luak Aku la nyayangi kamu. 13 Jemau diau sayang nianan ngan kantinau, jemau itu nyeraka nyawaunyau batan endak kantinau. 14 Kamuni kantinKu, amun kamu ngerjauka tuapau diau Kuperintaka ngan kamu. 15 Kamu nidau agi Kukiciakka budak, karnau budak nidau keruan, setu diau dikerjauka tuanau. Kamu Kukiciakka kantin, karnau gegalaunyau diau Kudengagh jak di Bapak la Kukiciakka ngan kamu. 16 Ukan kamuni diau milia Aku. Aku diau milia kamu. Aku ngajung kamu pegi ngan bebua banyak, bua diau ka ta'an. Mangku setu diau kamu pintak atas namauKu dienjuakka Bapak ngan kamu. 17 Inila perintaKu ngan kamu: Sangi sayangila kamu." 18 "Amun deniau luat ngan kamu, keruanila, Aku jak di senitu la diluatka deniau. 19 Misalau kamu semegi ngan jemau di deniau, cengki deniau ka nyayangi kamu, karnau kamu semegi ngan deniau. Anyautu karnau Aku la milia kamu jak di deniauni, kamu ukan semegi ngan deniau. Itula sebapau deniau luat ngan kamu. 20 Ingatkala setu diau la Kukiciakka ngan kamu: Sughang budak nidau lebia bekuasau jak di tuanau. Amun ughangtu la nganiayau Aku, ughangtu ka nganiayau kamu pulau. Amun ughangtu la nuruti kici'anKu, ughangtu ka nuruti kici'an kamu pulau. 21 Gegalaunyau ka dikerjauka ughangtu ngan kamu, karnau kamu anak-buaKu, karnau ughangtu nidau keruan Allah diau ngajung Aku. 22 Misalau Aku nidau datang ngan nidau ngiciakka gegalaunyau ngan ughangtu, ughangtu nidau besala. Anyautu mbak kini nidau bediau tapakan agi batan dusau ughangtu. 23 Jemau diau meluatka Aku, meluatka BapakKu pulau. 24 Misalau di guak ughangtu Aku nidau ngerjauka setu diau lum kekela dikerjauka jemau, ughangtu nidau besala. Mbak kini ughangtu la nginak gegalaunyau diau Kukerjauka, anyautu ughangtu meluatka Aku ngan BapakKu. 25 Nyela, semestiau luak itu, mangku setu diau la ditulis dalam kitab Taurat ughangtu ditepati: 'Ughangtu meluatka Aku nidau bediau tapakan.' 26 Aku ka ngajung Penulung njenguak kamu diau asalau jak di Bapak. Diau ka nyatauka Allah sebenaghau. Amun Diau datang, Diau ka ngiciakka Aku. 27 Mangku kamu pulau mesti ngiciakka Aku, karnau kamuni la seghundak ngan Aku jak di senitu.

16:1 Gegalaunyautu la Kukiciakka ngan kamu, mangku kamu jangan mandak percayau ngan Aku. 2 Kamu ka dikeluaghka jak di ghuma sembayang, mangku ka sampai masaunyau, jemau diau mbunua kamu, nyangkau diau melemakka ati Allah. 3 Ughangtu ka ngerjauka gegalaunyautu, karnau ughangtu nidau keruan BapakKu ngan Aku. 4 Anyautu gegalaunyautu Kukiciakka ngan kamu, mangku amun masaunyau la sampai, kamu teghingat, bansau Aku la ngiciakkanyau ngan kamu." 5 Mbak kini Aku ka pegi njenguak BapakKu diau ngajung Aku. Nidau sughang kia jak di kamu betanyau ke manau Aku pegi. 6 Mbak kini ati kamu njadi bingung, karnau Aku ngiciakka titu ngan kamu. 7 Mangku Kukiciakka diau benagh ngan kamu: Amun Aku pegi, begunau ngan kamu. Misalau Aku nidau pegi, Penulung itu nidau ka datang njenguak kamu. Anyautu amun Aku pegi, Aku ka ngajung Diau njenguak kamu. 8 Mangku amun Diau datang, Diau ka mbuktika deniau besala. Diau ka nyatauka Akuni benagh ngan Allah cetau ka ngukum deniau. 9 Diau ka nyatauka ughangtu besala, karnau nidau percayau ngan Aku. 10 Diau ka nyatauka Aku benagh, karnau Aku pegi njenguak Bapak, mangku kamu nidau nginak Aku agi. 11 Mangku Diau ka nyatauka pulau Allah la mulai ngukum, karnau penguasau deniauni la diukum. 12 Gi banyak diau endak Kukiciakka ngan kamu, anyautu mbak kini kamu lum ka ta'an nerimaunyau. 13 Amun Rua Allah itu datang, Diau nyatauka Allah itu benagh. Kamu ka dibimbingAu ngeruani gegalaunyau diau benagh. Diau nidau ka ngiciak jak di diriAu, anyautu Diau ka ngiciakka setu diau didengaghAu, mangku Diau ka ngiciakka ngan kamu setu diau ka tejadi nanti. 14 Diau ka ngagungka Aku, karnau setu diau dikiciakkaNyau ngan kamu diterimauNyau jak di Aku. 15 Gegalaunyau diau adau di Bapak adau pulau di Aku. Itula sebapau Aku bekatau: Setu diau dikiciakka Rua itu ngan kamu diterimauNyau jak di Aku." 16 "Tigha jerang ajau kamu nidau nginak Aku agi, lagi pulau tigha jerang agi, kamu ka nginak Aku." 17 Ndengagh titu anak-bua Yesus adau diau betanyau sughang ngan diau lain, "Tuapau retiau Diau ngiciak ngan kitau, 'Tigha jerang ajau kamu nidau nginak Aku agi', lagi pulau, 'Tigha jerang agi, kamu ka nginak Aku'? Tuapau pulau retiau, 'Aku pegi njenguak Bapak'?" 18 Mangku katau ughangtu, "Tuapau retiau, 'Tigha jerang ajau'? Kitau nidau terti Diau ngiciakka tuapau." 19 Yesus keruan, bansau anak-buaHautu endak betanyau ngan Diau, mangku Diau bekatau, "Apu kamu sangi kiciakka setu diau Kukiciakka tadi, Tigha jerang ajau kamu nidau nginak Aku agi, lagi pulau, Tigha jerang agi, kamu ka nginak Aku? 20 Kici'anKu ini benagh nian: Kamu ka nangis berandaian, anyautu deniau ka riang. Kamuni ka temas, anyautu temas kamutu ka beghuba njadi riang. 21 Amun jemau tinau endak merunggu diau temas, karnau la masaunyau diau kesakitan. Anyautu amun anak la adau, diau nidau teghingat agi kesakitannyautu, karnau riang kupiak la adau. 22 Luak itula pulau ngan kamu: Mbak kini kamu dukau, anyautu Aku ka betemu agi ngan kamu, mangku ati kamu ka riang, mangku nidau sughang kia pacak ngambiak keriangan kamu. 23 Aghi itu kamu nidau ka betanyau tuapau-apau agi ngan Aku. Ngenian katauKu ini: Tuapau kila diau kamu pintak ngan Bapak atas namauKu, titu ka dienjuakka Bapak ngan kamu. 24 Enggut mbak kini kamu lum mintak tuapau-apau atas namauKu. Pintakla, mangku kamu ka dienju'i, mangku kamu injiak nian." 25 "Gegalaunyau itu Kukiciakka ngan kamu pakai cuntau. Masaunyau ka sampai Aku nidau pakai cuntau agi, tapitu Aku ka ngiciakka Bapak ngan sebenaghau. 26 Masau itu kamu ka mintak ngan Bapak atas namauKu. Aku nidau njanjika mintak ngan Bapak batan endak kamu, 27 karnau Bapak pulau nyayangi kamu. Diau nyayangi kamu, karnau kamu nyayangi Aku ngan percayau, asalKu jak di Bapak. 28 Nyela, asalKu jak di Bapak, mangku Aku la datang ke deniau. Anyautu mbak kini Aku ninggalka deniauni endak baliak njenguak Bapak." 29 Mangku anak-buaHau ngiciak ngan Yesus, kataunyau, "Mbak kini Dighi ngiciak ngan sebenaghau, nidau agi pakai cuntau. 30 Mbak kini kami keruan: Nidau nanti jemau betanyau ngan Dighi, karnau Dighi ngeruani gegalaunyau. Itula sebapau kami percayau asal Dighi jak di Allah." 31 Katau Yesus, "Mbak kini kamu percayau? 32 Ingatkala, masaunyau ka sampai mangku la sampai, gegalau kamuni ka larat, ka baliak ke ghuma sesughangan. Kamu ka ninggalka Aku sughang, anyautu Aku nidau sughang, karnau Bapak adau guak Aku. 33 Gegalaunyautu Kukiciakka ngan kamu, mangku kamu tenang sempernau, karnau seghundak ngan Aku. Di deniau kamu ka sengsarau, anyautu beghanikala ati kamu. Aku la ngalaka deniau."

17:1 La udim ngiciak luak itu, Yesus ncungak ke langit, mangku bekatau, "Bak, masaunyau la sampai, agungkala Anak Dighi, mangku Anak Dighi ngagungka Dighi pulau. 2 Dighi la ngenjuakka kuasau ngan Diau nguasaui gegalau manusiau, mangku Diau ka ngenjuakka idup empai selelamaunyau ngan gegalau jemau diau la Dighi enjuakka ngan Diau. 3 Retiau idup empai selelamaunyau itula ngeruani Dighi, Allah diau sebenaghau diau gi sughang itula ngan ngeruani Yesus Keristus diau la Dighi ajung. 4 Aku la ngagungka Dighi di deniau ngan ngudimi kerjau diau la Dighi ajungka ngan Aku. 5 Bak, mbak kini agungka Aku di adapan Dighi ngan carau Aku diagungka, timpau Aku guak Bapak antak ka deniau adau. 6 Aku la nyatauka namau Dighi ngan gegalau jemau jak di deniauni diau la Dighi enjuakka ngan Aku. Dighitu ngempu ughangtu, mangku Dighi la ngenjuakka ughangtu ngan Aku. Ughangtu la nuruti kici'an Dighi. 7 Mbak kini ughangtu keruan, bansau gegalaunyau diau la Dighi enjuakka ngan Aku asalau jak di Dighi. 8 Kici'an diau Dighi kiciakka ngan Aku, la Kukiciakka ngan ughangtu, mangku ughangtu la nerimaunyau. Ughangtu keruan nian asalKu jak di Dighi, mangku ughangtu percayau, Dighitu ngajung Aku. 9 Aku ndu'aka ughangtu, Aku ukan ndu'aka deniau, anyautu Aku ndu'aka jemau diau la Dighi enjuakka ngan Aku, karnau Dighi ngempu ughangtu. 10 Gegalaunyau diau Kuempu itu, Dighi ngempuau pulau, mangku gegalaunyau diau Dighi empu itu, Aku ngempuau pulau. Aku la diagungka ughangtu. 11 Mbak kini Aku njenguak Dighi. Akuni nidau agi di deniauni, anyautu ughangtu gi adau di deniauni. Bak, diau suci, sayiala ughangtu ngan kuasau namau Dighi, namau diau la Dighi namauka ngan Aku, supayau ughangtu njadi seghundak luak Kitau. 12 Masau Aku gi adau guak ughangtu, Aku la nyayia ughangtu ngan kuasau namau Dighi, namau diau la Dighi namauka ngan Aku. Aku la njagaui ughangtu, mangku nidau sughang kia jak di ughangtu benasau lain jak di jemau diau semestiau benasau, mangku setu diau ditulis dalam Injil ditepati. 13 Mbak kini Aku njenguak Dighi. Gegalaunyau ini Kukiciakka, timpau Aku gi adau di deniau, mangku ughangtu meghasauka gegalau keinji'anKu. 14 La Kukiciakka ngan ughangtu kici'an Dighi, mangku deniau meluatka ughangtu, karnau ughangtu nidau jak di deniau, luak Aku pulau nidau jak di deniau. 15 Aku nidau mintak, supayau Dighi ngambiak ughangtu jak di deniauni, anyautu Aku mintak, supayau Dighi njagaui ughangtu jak di diau ja'at. 16 Ughangtu nidau jak di deniauni, luak Aku pulau nidau jak di deniauni. 17 Beresiakala ughangtu batan endak Dighi ngan Pirman Dighi diau benagh. Nyela, Pirman Dighitu benagh. 18 Aku ngajung ughangtu ke deniau, luak Dighi la ngajung Aku ke deniau. 19 Bak, batan endak ughangtu Aku nyeraka diriKu ngan Dighi, supayau ughangtu pulau nyeraka diriau nian batan endak Dighi. 20 Aku ukan ndu'aka ughang ini ajau. Aku pulau ndu'aka jemau diau ka percayau ngan Aku karnau kici'an ughang ini. 21 Bak, Aku mintak, supayau gegalau ughangtu njadi seghundak, luak Dighi seghundak ngan Aku, Aku seghundak ngan Dighi. Aku endak ughangtu seghundak ngan kitau, mangku deniau percayau, bansau Dighi ngajung Aku. 22 Akuni la ngagungka ughangtu ngan carau luak Dighi la ngagungka Aku, mangku ughangtu njadi seghundak, luak Kitau pulau la seghundak. 23 Aku seghundak ngan ughangtu, Dighi seghundak ngan Aku, mangku ughangtu seghundak nian. Mangku deniau keruan, Dighitu ngajung Aku, Dighi nyayangi ughangtu, luak Dighi nyayangi Aku. 24 Bak, Aku endak, supayau jemau diau Dighi enjuakka ngan Aku adau guak Aku di badaKu, mangku ughangtu nginak keagungan diau la Dighi enjuakka ngan Aku, karnau Dighi la nyayangi Aku antak ka deniau adau. 25 Bak diau adil, deniau nidau keruan Dighi, anyautu Aku keruan Dighi ngan ughangtu keruan, bansau Dighitu ngajung Aku. 26 Aku la nyatauka namau Dighi ngan ughangtu, Aku maju nyataukanyau, mangku sayang Dighi ngan Aku maju dalam ati ughangtu, mangku Aku seghundak ngan ughangtu."

18:1 La udim Yesus bedu'a luak itu, Diau ngeluagh jak di badaHau tadi ngan anak-buaHau pegi ke beghang ayiak Kidrun. Di situ adau kebun, mangku Yesus ngan anak-buaHau masuak ke kebun itu. 2 Yudas, jemau diau njualka Yesus itu, keruan badaHau, karnau Yesus rajin betunggal ngan anak-buaHau di situ. 3 Mangku Yudas pegi ke situ mbata'i serumbungan tentera jemau Rum ngan penjagau Ghuma Allah diau diajung imam-imam bepangkat tinggi ngan jemau Parisi. Ughangtu mbatak pakaian ngan lampu ngan ubur. 4 Yesus la keruan gegalaunyau diau ka ditanggungkaNyau, mangku Diau masighi ughangtu ngan betanyau, "Kamutu ndala'i sapau?" 5 Katau ughangtu, "Yesus, jemau Nasarit!" Katau Yesus, "Akunila Diau." Yudas, jemau diau njualka Yesustu, betegak pulau di situ ngan ughangtu. 6 Satu Yesus ngiciak, "Akunila Diau", ughangtu mundur galau, mangku rubua ke tana. 7 Yesus betanyau agi ngan ughangtu, "Kamu ndala'i sapau?" Katau ughangtu, "Yesus, jemau Nasarit!" 8 "La Kukiciakka, Akunila Diau," katau Yesus. "Amun kamutu ndala'i Aku nian, nengkela ughang ini pegi." 9 Luak itu dikiciakkaNyau, mangku ditepati setu diau la dikiciakkaNyau tadi, "Jak di ughangtu diau Dighi enjuakka ngan Aku, nidau sughang kia diau Kuenangka benasau." 10 Simun Pitrus diau mbatak pedang ncabut pedangautu, dikapakkanyau ngan budak Imam Besak mangku kutung telingau kananau. Namau budak itu Malkus. 11 Mangku Yesus bekatau ngan Pitrus, "Berangkaukala pedangtu! Apu kaba terupuak, Aku nidau mesti nanggung sengsarau diau la ditetapka Bapak ngan Aku?" 12 Mangku tentera-tentera Rum ngan kumandanau ngan penjagau-penjagau diau diajung jemau Yahudi tadi nangkap Yesus ngan dikebat tanganAu. 13 La udim itu Yesus dibata'i ngadap Hanas, karnau diau mentuau Kayapas diau njadi Imam Besak taun itu. 14 Kayapas itula diau senitu ngici'i pengulu jemau Yahudi, "Iluakla sughang mati batan endak gegalau jemau." 15 Simun Pitrus ngan sughang kantinau ngikut Yesus. Anak-bua itu la kecinauan ngan Imam Besak, mangku diau ngikut Yesus masuak ke tengalaman ghuma Imam Besak tadi. 16 Anyautu Pitrus di luagh pasigh mukau lawang, mangku kantinau tadi diau kecinauan ngan Imam Besak itu pegi keluagh ngiciak ngan tinau diau nunggui mukau lawangtu, mangku mbatak Pitrus masuak. 17 Jemau tinau diau nunggui mukau lawangtu ngiciak ngan Pitrus, "Ukan kaba pulau anak-bua Jemau itu?" "Ukan!" Katau Pitrus. 18 Karnau malam itu dingin, budak-budak ngan penjagau-penjagau Ghuma Allah ningguakka api, mangku ughangtu bediang guak api itu. Pitrus bediang pulau guak ughangtu. 19 Mangku Imam Besak mulai nanyaui Yesus ceritau anak-buaHau ngan ajaghanNyau. 20 Yesus nimbal, katauNyau, "Aku maju ngiciak ngan terang-terangan di mukau jemau banyak. Aku maju ngajagh di ghuma sembayang ngan di Ghuma Allah pulau, bada jemau Yahudi betunggal. Nidau kekela Aku mbunika kici'anKu. 21 Ngapau dighi nanyaui Aku? Tanyauila ughang diau la ndengagh Aku ngajagh. Cengki ughangtu keruan setu diau Kukiciakka." 22 Yesus ngiciak luak itu, mangku sughang penjagau diau betegak di situ nampagh dayiAu ngan bekatau, "Beghani nian Kaba ngiciak luak itu ngan Imam Besak!" 23 Yesus nimbal, "Amun Aku ngiciakka setu diau sala, kiciakkala tuapau salahau. Anyautu amun diau Kukiciakka itu benagh, ngapau kaba nampagh Aku?" 24 Mangku Hanas ngajung jemau mbatak Yesus diau dikebat tanganAu ke Imam Besak Kayapas. 25 Simun Pitrus gi bediang di situ. Adau jemau diau ngiciak ngan diau, "Ukan kaba pulau anak-bua Jemau itu?" Pitrus nidau ngaku'i Yesus, "Ukan!" kataunyau. 26 Mangku sughang budak Imam Besak diau masia busuran ngan jemau diau telingaunyau dikapak Pitrus tadi bekatau, "Asauku aku nginak kaba di kebun tadi seghundak ngan Diau." 27 Pitrus ngulang nidau ngaku'i Yesus, "Ukan!" kataunyau. Mangku masau itula pulau ayam bekukuak. 28 Gi akap nian Yesus dibatak jak di ghuma Kayapas ke bada gubernur. Jemau Yahudi nidau masuak ke bada gubernur itu, mangku nidau aram, karnau ughangtu endak ngikut makan Paska. 29 Karnau itu Pilatus ngeluagh njenguak ughangtu ngan betanyau, "Tuapau sala Jemau ini ngan kapu dighi?" 30 Ughangtu nimbal, "Amun Jemau ini nidau besala, nidau kami bata'i njenguak dighi." 31 Pilatus bekatau ngan ughangtu, "Batakla Diauni, adilila nurut ukum Taurat kapu dighi!" Jemau Yahudi itu nimbal, "Kami nidau bulia ngukum jemau ngan ukuman mati." 32 Mangku luak itula kici'an Yesus ditepati ngiciakka caraunyau Diau ka mati. 33 La udim itu Pilatus masuak agi ke bada gubernur. Diau mantau Yesus mangku betanyau, "Kabani Rajau jemau Yahudi?" 34 Yesus nimbal, "Apu kici'an dighitu nurut rupu'an dighi, apu jemau lain ngiciakka ngan dighi ceritau Aku?" 35 Katau Pilatus, "Apu akuni jemau Yahudi? Bangsau Kabatula ngan imam-imam bepangkat tinggi diau nyeraka Kaba ngan aku. Tuapau perembak Kaba?" 36 Katau Yesus, "KekuasauanKu ukan jak di deniau ini. Misalau kekuasauanKu jak di deniauni, cetau anak-buaKu ka beusaha, supayau Aku jangan diseraka ngan pengulu jemau Yahudi. Tapitu kekuasauanKu ukan jak di deniau ini." 37 Mangku Pilatus betanyau agi ngan Diau, "Amun luak itu, Kaba rajau?" Timbal Yesus, "Nyela, katau dighi Akunila rajau. Aku lahir ngan datang ke deniau ini batan endak ngiciakka diau benagh. Bilang jemau diau asalau jak di diau benagh ndengaghka kici'anKu." 38 Pilatus betanyau agi ngan Diau, "Tuapau retiau diau benagh itu?" 39 Anyautu nurut kebiasauan kapu dighi idang taun masau aghi Paska aku mbibaska sughang kawalan. Kapu dighi tetuju aku mbibaska Rajau jemau Yahudi batan endak kapu dighi?" 40 Ughangtu nimbal ngan tegauk-gauk, "Nidau! Jangan Diau! Barabas ajau!" Barabastu sughang bandit.

19:1 La udim itu Pilatus ngajung jemau mbaduki Yesus ngan pemecit bedughi. 2 Tentera-tentera mbuat gitar jak di ghanting bedughi, dikenauka di palak Yesus, mangku disurumka baju rajau ngan Diau. 3 La udim itu ughangtu beulang-ulang masighiNyau ngan bekatau, "Idup, Rajau jemau Yahudi!" Mangku ditampaghi dayiAu. 4 Pilatus ngeluagh agi ngan ngiciak ngan jemau banyak itu, "Kina'ila, aku mbatak Diau keluagh guak kapu dighi, supayau kapu dighi keruan, sutiak kia salaHau nidau kudapat di Diau." 5 Yesus ngeluagh ngan begitar dughi ngan bebaju rajau. Katau Pilatus, "Kina'ila Jemau ini!" 6 Nginak Yesus, imam-imam bepangkat tinggi ngan penjagau-penjagau tegauk-gauk, "Pakukala Diau! Pakukala Diau di kayu salip!" Katau Pilatus, "Batakla Diau ngan kapu dighi, pakukala di kayu salip. Akuni nidau kila dapat sutiak salaHau di Diau." 7 Mangku jemau Yahudi itu nimbal, "Nurut ukum kami Diau mesti diukum mati, karnau Diau ngiciakka diriAu Anak Allah!" 8 Ndengagh kici'an ughangtu, Pilatus tamba takut, 9 mangku masuak agi ke bada pengadilan ngan betanyau ngan Yesus, "Asal Kaba jak di manau?" Anyautu Yesus nidau nimbal. 10 Pilatus bekatau agi, "Kabani nidau nimbal? Ingatkala, aku bekuasau mbibaska Kaba ngan bekuasau makuka Kaba di kayu salip." 11 Yesus nimbal, "Dighi nidau bekuasau ngan Aku, amun kuasau itu nidau dienjuakka Allah ngan dighi. Karnau itu, besakla dusau jemau diau nyeraka Aku ngan dighi." 12 Satu Pilatus ndengagh titu, diau beusaha mbibaska Yesus, anyautu jemau Yahudi tegauk-gauk, kataunyau, "Amun dighi mbibaska Diau, dighi ukan kawan Kaisar. Jemau diau nganggap diriau rajau jemautu musua Kaisar." 13 La udim ndengagh kici'an itu, Yesus dibatak keluagh, mangku Pilatus duduak di kerusi pengadilan di bada diau benamau Dasagh Batu, basau Ibrani dikiciakka Gabata. 14 Aghi itu laka tengaghi, aghi bedandan batan endak aghi rerayau Paska. Pilatus bekatau ngan jemau Yahudi itu, "Inila Rajau kapu dighi!" 15 Ughangtu tegauk-gauk, "Bunuala Diau! Bunuala Diau! Pakukala Diau di kayu salip!" Katau Pilatus, "Aku mesti nyalipka Rajau kapu dighi?" Timbal imam-imam bepangkat tinggi, "Kami nidau bediau rajau lain jak di Kaisar!" 16 Mangku Pilatus nyeraka Yesus ngan ughangtu endak dipakuka di kayu salip. Mangku Yesus dibatak keluagh. 17 Yesus ngeluagh ngan mikul salipAu pegi ke bukit diau dikiciakka Kerungkang Palak, basau Ibrani dinamauka Gulguta. 18 Di situ Diau dipakuka di kayu salip serempak ngan duau jemau lain, sughang di sebela kidau, sughang di sebela kanan, Yesus di tetengaan. 19 Pilatus ngajung ngenauka tulisan di kayu salip itu, bacauannyau, "Yesus, jemau Nasarit, Rajau jemau Yahudi." 20 Banyak jemau Yahudi mbacau tulisan itu, karnau bada Yesus dipakuka di kayu saliptu nidau jawua jak di kuta. Tulisan itu basau Ibrani, basau Latin ngan basau Yunani. 21 Imam-imam bepangkat tinggi ngiciak ngan Pilatus, kataunyau, "Jangan dighi nulis, 'Rajau jemau Yahudi', tapitu tulisla, 'Jemau ini bekatau: Aku Rajau jemau Yahudi'!" 22 Pilatus nimbal, "Diau la ditulis, nengkela ditulis!" 23 La udim tentera itu makuka Yesus di kayu salip, ughangtu ngambiak bajuAu, dibagi empat padau sughang dapat sebagian. Ughangtu ngambiak kainAu pulau. KainAutu nidau bediau jayitannyau, ditenun galau jak di atas enggut ke bawa. 24 Karnau itu tentera ngiciak sughang ngan diau lain, "Jangan kitau ncebaghi kain ini. Mela kitau suntinka endak ngeruani sapau diau dapatau." Luak itula ditepati diau tetulis di Injil, "Ughangtu mbagika bajuKu ngan nyuntinka kainKu." Ngenian tentera itu la ngerjaukanyau. 25 Guak kayu salip itu betegak enduak Yesus, denga-sanak endu'Au, Maria bunting Kelupas, ngan Maria Magdalina. 26 Satu Yesus nginak endu'Au ngan anak-buaHau diau disayangiNyau di pasighau, Diau bekatau ngan endu'Au, "Mak, ini anak dighi!" 27 La udim itu Yesus bekatau ngan anak-buaHautu, "Itu mak kaba!" Mangku mulai masau itu anak-bua tadi nerimau tinau itu mendam di ghumahau. 28 Yesus keruan, mbak kini gegalaunyau la udim, mangku supayau ditepati setu diau ditulis di Injil Diau bekatau, "Aku aus!" 29 Di situ adau mangkuak besak penua ngan ayiak anggur masam. Mangku sutiak bungau karang diceculka ke dalam ayiak anggur itu, dicucuakka ke tungkat, dijujuaka ke mulut Yesus. 30 La udim Yesus ngisap ayiak anggur itu, Diau bekatau, "La udim!" Mangku Diau ngelintuakka pala'Au ngan nyeraka nyawauNyau. 31 Aghi itu aghi bedandan. Pengulu jemau Yahudi nidau endak mayat ughangtu maju tegantung di kayu salip masau aghi Sabat, apau agi aghi Sabat ini aghi rerayau besak. Karnau itu jemau Yahudi njenguak Pilatus mintak, supayau keting ughangtu dipataka, mangku mayatautu ditughunka. 32 Mangku tentera itu pegi mataka keting jemau diau sikuak ngan jemau diau lain diau disalipka serempak ngan Yesus. 33 Satu tenteratu sampai ke Yesus, ughangtu nginak, Diau la mati, mangku ketingAu nidau dipataka. 34 Sughang jak di tentera itu nuja ghusuak Yesus, mangku ngeluagh dagha undak ayiak. 35 Jemau diau nginak titu diautu ngiciakkanyau, supayau kamu percayau pulau. Kici'annyau itu benagh ngan diau keruan, bansau titu benagh. 36 Luak itula ditepati setu diau ditulis di Injil, "Nidau sutiak kia tulangAu ka dipataka." 37 Mangku adau pulau ditulis, "Ughangtu ka ngina'i Jemau diau dituja." 38 La udim itu Yusup jemau Arimatia mintak ngan Pilatus endak ngambiak mayat Yesus. Yusuptu pengikut Yesus, anyautu nidau ngan terang-terangan, karnau takut ngan pengulu jemau Yahudi. Pilatus ngajung nughunka mayat Yesustu, mangku Yusup pegi ngambiak mayat itu. 39 Nikudimus diau senitu pegi njenguak Yesus aghi malam pegi pulau ke situ. Diauni mbatak minyak ghum diau beundak rerempahan, kekirau tigau pulua kilu banya'au. 40 Ughang duautu ngambiak mayat Yesus, dibalutau ngan kain putia, diminya'inyau ngan minyak tadi nurut adat lembagau jemau Yahudi, amun nguburka jemau. 41 Pasigh bada Yesus disalipka adau kebun. Dalam kebun itu adau sutiak kuburan empai diau lum dipakai nguburka jemau. 42 Karnau aghi Sabat laka mulai ngan kuburantu pasigh, mangku mayat Yesus ditepiakka di situ.

20:1 Aghi minggu paghak siang butau Maria Magdalina pegi ke kuburan itu. La sampai di kuburan diau nginak batu penukup kuburan la teguliak jak di tebuak kuburantu. 2 Diau belaghi njenguak Simun Pitrus ngan anak-bua diau disayangi Yesus, mangku ngiciak ngan ughang duautu, kataunyau, "Tuhan la diambiak jemau jak di kuburan, anyautu kami nidau keruan di manau bada Diau ditepiakka." 3 Mangku Pitrus ngan kantinau tadi pegi ke kuburan. 4 Ughang duautu belaghi, anyautu cepatla kantinau sampai di kuburan sangkan Pitrus. 5 Anak-bua itu nyubuak kuburan, mangku tekinak kain pembalutAu di situ. Anyautu diau nidau masuak. 6 La udim itu Simun Pitrus sampai pulau. Diau masuak ke kuburantu, mangku nginak kain pembalutAu di situ. 7 Anyautu setangan diau dikebatka di palak Yesus nidau bediau di pasigh kain tadi, la tegulung di bada lain. 8 Mangku anak-bua diau dulu sampai di kuburantu masuak pulau. Diau nginak mangku percayau. 9 Masau itu ughangtu lum ngerti setu diau ditulis dalam Injil, bansau Diau mesti ngulang idup jak di mati. 10 La udim itu duau ughang anak-bua Yesustu baliak ke badahau. 11 Maria Magdalina betegak guak kuburan sampai nangis. Diau dang nangis, nyubuak dalam kuburan, 12 mangku tekinak duau ughang malaikat bebaju putia. Malaikat itu duduak di bada mayat Yesus ditepiakka senitu, diau sughang guak pala'Au, diau sughang agi di ketingAu. 13 Malaikat itu ngiciak ngan Maria, kataunyau, "Ngapau kaba nangis?" Katau Maria, "Tuhanku diambiak jemau, aku nidau keruan di manau Diau ditepiakka." 14 La udim ngiciak luak itu, diau nulia ke belakang, mangku tekinak Yesus betegak di situ, anyautu diau nidau keruan, bansau itu Yesus. 15 Yesus betanyau ngan diau, "Ngapau kaba nangis? Kaba ndala'i sapau?" Maria sangkau itu tukang sayia kebun, mangku diau ngiciak luak ini, "Amun dighi ngaliakaNyau, kiciakkala ngan aku, mangku aku pacak ngambi'Au." 16 Katau Yesus, "Maria!" Maria nulia ke Yesus, mangku bekatau basau Ibrani, "Rabuni!" Retiau guru. 17 Katau Yesus, "Jangan ngecakka Aku, karnau Aku lum nayiak njenguak Bapak. Anyautu pegila njenguak anak-buaKu, kiciakkala ngan ughangtu, mbak kini Aku nayiak njenguak BapakKu diau pulau Bapak kamu, AllahKu diau pulau Allah kamu." 18 Mangku Maria Magdalina pegi ngiciak ngan anak-bua Yesus, bansau diau la nginak Tuhan, lagi pulau bansau Yesus la ngiciakka gegalaunyautu ngan diau. 19 Aghi petamau minggu itu, satu aghitu la malam, anak-bua Yesus nunggal di sebua ghuma ngan duaghaunyau dikunci, karnau ughangtu takut ngan tuau-tuau jemau Yahudi. Mangku Yesus datang betegak di pugan anak-buaHautu ngan bekatau, "Salam damai batan endak kamu." 20 La udim bekatau luak itu, Diau ngancakka telapak tanganAu ngan ghusu'Au. Mangku anak-buaHautu riang nian nginak Tuhan. 21 Yesus bekatau agi ngan ughangtu, "Salam damai batan endak kamu! Luak Bapak ngajung Aku, luak itula pulau Aku ngajung kamu." 22 La udim ngiciak luak itu, Yesus niupka nyawaunyau ngan ughangtu sampai bekatau, "Terimaula Rua Allah. 23 Amun kamu ngabiska dusau jemau, dusaunyau ka abis. Amun kamu nidau ngabiska dusau jemau, dusaunyau nidau ka abis." 24 Anyautu Tumas, sughang jak di duau belas anak-buaHautu, diau dikiciakka "Gembagh", nidau bediau guguak ughangtu, masau Yesus datang ke situ. 25 Mangku anak-buaHau tadi ngiciak ngan Tumas, kataunyau, "Kami la betemu ngan Tuhan!" Anyautu Tumas bekatau, "Amun aku lum nginak engkas besipaku di tanganAu ngan lum ncucuakka jaghiku ke engkas besipakutu ngan ncucuakka tanganku ke ghusu'Au, aku nidau ka percayau." 26 La udim seminggu anak-bua Yesus betunggal agi di ghuma itu ngan Tumas adau pulau di situ. Duaghau dang dikunci, mangku Yesus datang betegak di tetengaan ughangtu sampai bekatau, "Salam damai batan endak kamu." 27 La udim itu Yesus ngiciak ngan Tumas, katauNyau, "Kina'ila tanganKu, tepiakka jaghi kaba di sini. Surungkala tangan kaba ngan cucuakka ke ghusuakKu. Mangku jangan kaba nidau percayau, anyautu percayaula." 28 Mangku katau Tumas, "Dighila Tuhanku ngan Allahku!" 29 Katau Yesus, "Kaba percayau, karnau la nginak Aku. Riangla jemau diau percayau empuak nidau nginak Aku." 30 Gi banyak tandau nyelia lainau diau dikerjauka Yesus di adapan anak-buaHau, anyautu nidau tecatat dalam kitab ini. 31 Tapitu gegalaunyau diau temasuak di sini la ditulis, supayau kamu percayau, Yesus itula Keristus, Rajau Penyelamat, Anak Allah, mangku supayau kamu bulia idup, karnau percayau ngan Diau.

21:1 La udim itu Yesus ngancakka diriAu agi ngan anak-buaHau di Danau Tiberias. Luak inila ceritaunyau: 2 Di tepi danau itu adau Simun Pitrus, Tumas diau dikiciakka "Gembagh", Natanail jemau Kana di Galilia, anak-anak Sebedius ngan duau anak-bua Yesus lainau. 3 Katau Simun Pitrus, "Aku endak pegi ndalak ikan!" Katau ughangtu, "Kami endak pulau ngikut!" Mangku ughangtu pegi nayiak perawu. Anyautu semalam getau itu ughangtu nidau bulia tuapau-apau. 4 Matau-aghi empai tumbua, Yesus betegak di tepi danau itu. Anak-buaHau nidau keruan, bansau itu Yesus. 5 Yesus ngiciak ngan anak-buaHau, "Ui, anak-buaKu. Apu kamu bulia ikan?" Katau ughangtu, "Sikuak kia endiak bulia!" 6 Katau Yesus ngan ughangtu, "Kipaskala jalau kamu di sebela kanan perawu, mangku kamu ka bulia ikan!" Ughangtu ngipaska jalau itu, mangku nidau tetariak agi, karnau ikan tegalau banyak. 7 Anak-bua diau disayangi Yesus bekatau ngan Pitrus, "Itu Tuhan!" Ndengagh itu Tuhan, Simun Pitrus nyurum bajuau karnau nidau bebaju, mangku melumpat ke danau. 8 Anak-buaHau diau lain ndaghat ngan perawu sampai nariak jalau diau penua ngan ikan. Ughangtu nidau jawua jak di daghat, kekirau enam pulua depau. 9 La sampai di daghat, anak-buaHau nginak adau panggangan ikan ngan ruti di api. 10 Katau Yesus, "Batak dikit ikan ke sini diau empai bulia." 11 Simun Pitrus nayiak perawu tadi, mangku nariak jalau ke daghat. Jalau itu penua ngan ikan besak-besak. Gegalaunyautu adau seratus limau pulua tigau ikuak. Empuak banyak ikan luak itu, jalaunyau nidau cebagh. 12 Katau Yesus, "Mela, makan!" Nidau sughang kia jak di anak-buaHau beghani betanyau, "Dighi sapau?" Karnau ughangtu keruan Diautu Tuhan. 13 Udim itu Yesus masighi anak-buaHautu, diambi'Au rutitu, dienjuakka ngan ughangtu tadi. Luak itula pulau ngan ikan. 14 Inila diau ketigau kaliau Yesus ngancakka diriAu ngan anak-buaHau, la udim Diau ngulang idup jak di mati. 15 La udim makan Yesus ngiciak ngan Simun Pitrus, katauNyau, "Simun, anak Yuhanis, apu kaba nyayangi Aku lebia jak di gegalaunyau ini?" "Au, Tuhan," katau Pitrus, "Dighi keruan aku nyayangi Dighi." Katau Yesus, "Sayiala anak bebiriKu!" 16 Yesus betanyau keduau kaliau, "Simun, anak Yuhanis, apu kaba nyayangi Aku?" "Au, Tuhan," katau Pitrus, "Dighi keruan aku nyayangi Dighi." Katau Yesus, "Sayiala bebiriKu." 17 Diau ketigau kaliau Yesus betanyau ngan diau, "Simun, anak Yuhanis," katau Yesus, "Apu kaba nyayangi Aku?" Pitrus bingung, karnau Yesus betanyau ngan diau enggut tigau kali, "Apu kaba nyayangi Aku?" Mangku Pitrus nimbal, "Tuhan, Dighi keruan gegalaunyau, Dighi keruan aku nyayangi Dighi." Katau Yesus, "Sayiala bebiriKu! 18 Percayaula ngan katauKu ini: Masau kaba gi mudau, kabanila ngenauka bebat kaba, pegi ke manau ajau kaba endak. Amun kaba la tuau, kaba nyurungka tangan kaba, mangku jemau lain ngebat kaba, mbatak kaba ke bada kaba enggup pegi!" 19 Ngan kici'an luak itu tadi Yesus nunjuakka carau Pitrus ka mati endak ngagungka Allah. La udim ngiciak luak itu, katau Yesus ngan Pitrus, "Ikutkala Aku!" 20 Satu Pitrus nulia, diau nginak di belakangau anak-bua diau disayangi Yesus. Diautu duduak pasigh Yesus masau makan sampai betanyau ngan Yesus, "Tuhan, sapau jemau diau ka njualka Dighi?" 21 Nginak diau, Pitrus betanyau ngan Yesus, "Tuhan, luak manau ngan diau ini?" 22 Katau Yesus, "Misalau Aku endak diau maju idup, enggut Aku datang, itu ukan kerjau kaba. Anyautu kabani, mela ngikut Aku!" 23 Mangku tesiar ceritau di pugan anak-buaHau, mbak bansau anak-bua itu nidau ka mati. Anyautu Yesus nidau ngiciakka, bansau anak-buaHautu nidau ka mati, tapitu, "Misalau Aku endak diau maju idup, enggut Aku datang, itu ukan kerjau kaba." 24 Anak-bua itula diau ngiciakka gegalau ceritau ini, diau pulau la nulisau. Kami keruan, tuapau diau dikiciakkanyautu benagh. 25 Gi banyak kerjau lain agi diau dikerjauka Yesus. Misalau gegalaunyau itu ditulis sejagh sutiak, asauku nidau ka cukup bada di gegalau deniau batan endak muatka gegalau kitab diau ka ditulis itu.