The New Testament of our Lord and Saviour Jesus Christ

Matius 1

1:1 Inila namau-namau niniak puyang Yesus Keristus, pengadau Daud, pengadau Abraham. 1:2 Abraham ngadauka Isak, Isak ngadauka Yakub, Yakub ngadauka Yehuda ngan ading-beghadingau. 1:3 Yehuda ngadauka Peris ngan Sira jak di Tamar. Peris ngadauka Hisrun, Hisrun ngadauka Ram, 1:4 Ram ngadauka Aminadab, Aminadab ngadauka Nahasun, Nahasun ngadauka Salmun, 1:5 Salmun ngadauka Buas jak di Rahab, Buas ngadauka Ubid jak di Rut, Ubid ngadauka Isai, 1:6 Isai ngadauka rajau Daud. Daud ngadauka Salumu jak di bini Uria, 1:7 Salumu ngadauka Rehabiam, Rehabiam ngadauka Abia, Abia ngadauka Asa, 1:8 Asa ngadauka Yusapat, Yusapat ngadauka Yuram, Yuram ngadauka Usia, 1:9 Usia ngadauka Yutam, Yutam ngadauka Ahas, Ahas ngadauka Hiskia, 1:10 Hiskia ngadauka Manasi, Manasi ngadauka Amun, Amun ngadauka Yusia, 1:11 Yusia ngadauka Yikunya ngan ading-beghadingau, masau jemau Israil dicapakka ke Babil. 1:12 La udim dicapakka ke Babil Yikunya ngadauka Sialtiil, Sialtiil ngadauka Serubabil, 1:13 Serubabil ngadauka Abihud, Abihud ngadauka Ilyakim, Ilyakim ngadauka Asur, 1:14 Asur ngadauka Saduk, Saduk ngadauka Akhim, Akhim ngadauka Iliud, 1:15 Iliud ngadauka Iliasar, Iliasar ngadauka Matan, Matan ngadauka Yakub, 1:16 Yakub ngadauka Yusup laki Maria. Diau itula melahirka Yesus diau dikiciakka Keristus. 1:17 Mangku gegalaunyau adau empat belas gilir jak di Abraham enggut ke Daud, empat belas gilir jak di Daud enggut bangsau Israil dicapakka ke Babil, ngan empat belas gilir jak di diau dicapakka ke Babil enggut ke Keristus. 1:18 Luak inila ceritau Yesus Keristus lahir: Endu'Au Maria la tunangan ngan Yusup. Anyautu ughang duautu lum nika, tenyatau Maria la ngandung. Kandungantu jak di Rua Allah. 1:19 Yusup pengantinannyautu jemau diau maju ngerjauka setu diau diajung ukum agamau. Anyautu diau enggup ngaduka Maria di mukau jemau banyak, mangku diau endak ngurungka rasanau ngan diam-diam. 1:20 Masau Yusup merupuakka titu, diau bemimpi. Dalam mimpiautu diau tekinak sughang malaikat Tuhan bekatau ngan diau, "Yusup, pengadau Daud, nidau nanti takut nikai Maria, karnau anak dalam kandungannyautu jak di Rua Allah. 1:21 Diau ka melahirka sughang anak lanang. Budak keciak itu mesti kaba namauka Yesus, karnau Diau ka nyelamatka umatAu jak di dusaunyau." 1:22 Gegalaunyautu tejadi luak itu, supayau ditepati setu diau dikiciakka Tuhan ngan nabiAu, 1:23 "Sughang budak gadis ka ngandung ngan melahirka sughang anak lanang. Anak itu ka dinamauka Imanuil." Imanuil retiau, "Allah betunggal ngan kitau." 1:24 Yusup bangun, mangku diau ngerjauka setu diau dikiciakka malaikat Tuhantu ngan diau. Diau nika ngan Maria. 1:25 Anyautu selamau Maria lum melahirka Ana'autu, diau nidau campur ngan Maria. Anak itu la adau, dinamaukanyau Yesus.

Matius 2

2:1 Yesus lahir di Betlihim, timpau Herudis njadi rajau di daira Yudia. Yesus la adau, adau jemau ahli bintang jak di sebela matau-aghi idup datang ke Yerusalim. 2:2 La sampai di situ ughangtu betanyau, kataunyau, "Di manau Kupiak diau empai adau batan Rajau jemau Yahudi? Kami la nginak bintangAu di sebela matau-aghi idup, mangku kami datang endak nyemba Diau." 2:3 Satu rajau Herudis ndengagh ceritau itu, diau tegagau nian. Luak itu pulau gegalau jemau di Yerusalim. 2:4 Mangku diajungau gegalau imam bepangkat tinggi ngan guru ukum Taurat betunggal, mangku diau betanyau, "Di manau Rajau diau dijanjika Allah ka lahir?" 2:5 Timbal ughangtu, "Di kuta Betlihim di daira Yudia, karnau luak inila ditulis sughang nabi, 2:6 'Kaba Betlihim di daira Yudia, kaba ukan diau keciak sekali di antarau kuta Yehuda, karnau jak di kabanila ka datang sughang pengulu diau ka njagaui umatKu Israil.' " 2:7 La udim ndengagh gegalaunyautu Herudis mantau ahli bintang itu ngan carau diam-diam, mangku ngan neghagi diau betanyau ngan ughangtu, kebilau pastiau bintangtu mulai kina'an. 2:8 Mangku diau ngajung ughangtu ke Betlihim, kataunyau, "Pegila, dala'i keruani nian Kupiak itu. Mangku amun la betemu, kiciakka ngan aku, mangku aku pulau pegi nyemba Diau." 2:9 La udim ndengagh titu, ughangtu pegi. Di tenga jalan bintang diau tekinak di sebela matau-aghi idup senitu ndului ughangtu, mangku mendam di tipatan bada Kupiak itu. 2:10 Alaka riangau ughangtu nginak bintang itu. 2:11 Ughangtu masuak ke ghuma, nginak Kupiak itu ngan endu'Au Maria. Ughangtu nunduak nyemba Kupiaktu, dibukakkanyau bada retau bendaunyau, dienjuakkanyau emas, keminyan ngan damagh ghum. 2:12 Mangku ughangtu baliak ke nenggeriau wuan jalan lain, karnau Allah la ngiciakka ngan ughangtu dalam mimpi, supayau jangan ngulang njenguak Herudis. 2:13 La udim ditinggalkanyau jemau ahli bintang tadi, Yusup tekinak malaikat Tuhan dalam mimpi. Malaikattu bekatau, "Bangunla kaba, bata'ila Kupiak ini ngan endu'tu, mangku pegila nyingkir ke Mesir. Mendamla di situ, enggut aku ngulang ngiciak agi ngan kaba, karnau rajau Herudis ndala'i Kupiak ini endak mbunuAu." 2:14 Mangku malam itu pulau Yusup bangun, dibata'inyau Kupiaktu ngan endu'Au mangku pegi nyingkir ke Mesir. 2:15 Diau mendam di situ, enggut rajau Herudis mati. Luak itula ditepati setu diau la dikiciakka Tuhan ngan nabiAu, "Aku mantau AnakKu jak di Mesir." 2:16 Satu rajau Herudis keruan, bansau ahli bintang tadi la nipukanyau, diau mara kematila. Mangku diau merintaka endak mbunua gegalau budak keciak di Betlihim ngan ngepungannyau diau beumur duau taun ke bawa. Itu sesuai ngan masau bintangtu kina'an luak diau dikiciakka ahli bintangtu. 2:17 Luak itula ditepati setu diau la dikiciakka nabi Yeremia, 2:18 "Di Rama tedengagh tangis berandaian. Rahil merandaika anak-ana'au, enggup dipuji, karnau ana'au la abis galau." 2:19 Rajau Herudis la mati, Yusup tekinak agi malaikat Tuhan dalam mimpi, kataunyau, 2:20 "Bangunla, batakla Budak keciak ini ngan endu'Au, baliakla ke Israil, karnau jemau diau endak mbunua Budak keciak ini la mati." 2:21 Mangku Yusup bangun, dibata'inyau Budak keciaktu ngan endu'Au, mangku baliak ke Israil. 2:22 Anyautu Yusup ndengagh, bansau Arkelaus anak Herudis nggentika ba'au njadi rajau di nenggeri Yudia, mangku diau takut pegi ke situ. Diau pegi ke daira Galilia, karnau diau dapat petunjuak Tuhan dalam mimpi. 2:23 La sampai di Galilia diau mendam di kuta Nasarit. Luak itula ditepati katau Allah diau la dikiciakka nabi, "Diau ka dikiciakka jemau Nasarit."

Matius 3

3:1 Masau itu Yuhanis Pembaptis datang ke padang bungin di Yudia ngan mulai beketuba, kataunyau, 3:2 "Ubaila perembak ngan dusau kamu, karnau nidau lamau agi Allah ka merinta luak rajau." 3:3 Nyela, Yuhanis itula diau dikiciakka nabi Yesaya ngan katau ini, "Adau suarau jemau di padang bungin, 'Sediaukala jalan batan endak Tuhan, lughuskala jalan batan endak Diau.' " 3:4 Baju Yuhanis jak di bulu untau, bebatau jak di bawuak, makanannyau belalang ngan manisan medu. 3:5 Banyak jemau jak di Yerusalim, jak di gegalau nenggeri Yudia, ngan jak di daira Yurdan datang njenguak Yuhanis. 3:6 Ughangtu ngaku'i dusau-dusaunyau mangku dibaptis Yuhanis di ayiak Yurdan. 3:7 Banyak pulau jemau Parisi ngan jemau Saduki datang endak dibaptis. Anyautu satu nginak ughangtu datang, Yuhanis bekatau, "Ui, kamutu jemau ja'at luak ulagh. Sapau diau ngiciakka, bansau kamu pacak lepas jak di ukuman Allah diau ka datangtu? 3:8 Nyataukala ngan perembak kamu, bansau kamu la ngubai jak di dusau kamu. 3:9 Jangan kamu sangkau, kamu ka lepas jak di ukuman ngan ngiciakka, bansau kamu pengadau Abraham. Keruanila, jak di batu-batu ini Allah pacak mbuat pengadau batan endak Abraham. 3:10 Kapak la adau di akagh kayu, mangku bilang kayu diau nidau ngasilka bua diau iluak ditebang mangku dicapakka dalam api. 3:11 Aku mbaptis kamu ngan ayiak, tandau la betubat. Nanti ka datang Jemau diau lebia bekuasau jak di aku. Melegha'i tali sepatuAu ajau aku endiak pantas. Diau ka mbaptis kamu ngan Rua Allah ngan api. 3:12 Di tanganAu la adau nighu endak nampi ighi'anNyau, padiAu endak ditunggalka dalam tengkiang. Gegalau ampaunyau ka disilap ngan api diau nidau ka padam." 3:13 Masau itu Yesus pegi jak di Galilia ke ayiak Yurdan. Di situ Diau datang njenguak Yuhanis endak dibaptis. 3:14 Anyautu Yuhanis enggup mbaptiskaNyau, kataunyau, "Aku diau semestiau dibaptis Kaba, mangku ngapau Kaba mintak dibaptis ngan aku?" 3:15 Mangku Yesus nimbal, katauNyau, "Nengkela mbak kini luak ini, karnau ngan carau luak ini kitau ngerjauka gegalau kendak Allah." Mangku Yuhanis nurut. 3:16 La udim dibaptis, Yesus ngeluagh jak di ayiak. Masau itu pulau langit tebukak, mangku Yesus nginak Rua Allah tughun luak burung darau inggap di Diau. 3:17 Mangku adau suarau jak di langit, katauNyau, "Inila AnakKu diau Kusayangi. Diau melemakka atiKu."

Matius 4

4:1 Mangku Yesus dibata'i Rua Allah ke padang bungin endak dicubaui Iblis. 4:2 Empat pulua aghi empat pulua malam Diau nidau makan, mangku Diau lapagh. 4:3 Mangku Iblis datang ngan bekatau, "Kabani Anak Allah. Ajungla batu-batu ini njadi ruti!" 4:4 Yesus nimbal, "Di Injil ditulis, 'Manusiau idup ukan jak di makanan ajau, tapitu jak di bilang katau diau dikiciakka Allah.' " 4:5 Udim itu Iblis mbatak Yesus ke Yerusalim, kuta sucitu, mangku diajung betegak di pucuak mubungan Ghuma Allah. 4:6 Mangku diau bekatau, "Kabani Anak Allah. Tumbanka diri Kaba ke bawa, karnau di Injil ditulis, 'Allah ka ngajung malaikat-malaikatAu njagaui Kaba. Ughangtu ka nyanggak Kaba, mangku keting Kaba endiak tuantuak ke batu.' " 4:7 Katau Yesus, "Di Injil ditulis pulau, 'Jangan kaba ncubaui Tuhan, Allah kaba.' " 4:8 La udim itu Iblis mbatak Yesus agi ke gunung diau tinggi nianan, diancakkanyau ngan Diau gegalau kerajauan di deniauni ngan gegalau kekayauannyau 4:9 mangku bekatau, "Gegalaunyautu ka kuenjuakka ngan Kaba, amun Kaba nunduak nyemba aku." 4:10 Mangku Yesus nimbal, "Kisitla kaba, Iblis! Di Injil ditulis, 'Kaba mesti nyemba Tuhan, Allah kaba. Diau ajaula mesti kaba semba.' " 4:11 Udim itu Iblis pegi jak di Diau, mangku malaikat-malaikat datang nepi'i Diau. 4:12 La ndengagh, bansau Yuhanis la dimasuakka ke jil, mangku Yesus pegi ke Galilia. 4:13 Diau ninggalka Nasarit, mangku mendam di Kapernaum di tepi danau Galilia, di daira Sibulun ngan Naptali. 4:14 Mangku la ditepati katau Allah diau dikiciakka nabi Yesaya, 4:15 "Tana Sibulun ngan tana Naptali, di jalan ke laut, di beghang ayiak Yurdan, Galilia tana jemau ukan Yahudi. 4:16 Jemau diau idup di keleman la nginak terang diau besinagh. Ngan jemau diau idup di nenggeri maut la tumbua sinagh terang." 4:17 Jak masau itu Yesus mulai ngiciakka, "Ubaila jak di dusau-dusau kamu, karnau nidau lamau agi Allah ka merinta luak rajau." 4:18 Yesus dang ngerayau di tepi danau Galilia, Diau nginak jemau duau beghading, diautu Simun diau dinamauka pulau Pitrus ngan adingau Anderias. Ughang duautu dang ngipaska jalaunyau di danau itu, karnau ughangtu tukang ndalak ikan. 4:19 Yesus bekatau ngan ughangtu, "Mela, ngikut aku. Aku ka ngajagh kamu njadi tukang ndalak jemau." 4:20 Ughang duautu ninggalka jalaunyau mangku ngikut Yesus. 4:21 Yesus la bejalan agi, mangku nginak jemau duau beghading lainau, diautu Yakubus ngan Yuhanis, anak Sebedius. Ughang duautu serempak ngan ba'au dang ngilu'i jalau dalam perawu, mangku dipantauNyau pulau ughang duautu. 4:22 Ughang duautu ninggalka perawu ngan ba'autu mangku ngikut Yesus. 4:23 Yesus ngidari gegalau daira Galilia. Diau ngajagh di ghuma-ghuma sembayang ngiciakka ceritau iluak, bansau Allah endak merinta. Diau pulau meghadui gegalau jemau buidapan ngan jemau cacat. 4:24 Mangku ceritau Yesus la tesiar di gegalau perupinsi Siria, mangku banyak jemau datang njenguak Diau. Ughangtu mbatak jemau diau nanggungka serbau idapan ngan serbau mecam sengsarau. Adau jemau diau disaraui rua ja'at, adau diau buidapan gilau bangkai, adau diau lumpua. Gegalaunyautu dighaduka Yesus. 4:25 Mangku jemau banyak nianan ngikut Yesus. Adau diau datang jak di Galilia, adau diau jak di Dikapulis, adau diau jak di Yerusalim, jak di Yudia ngan pulau jak di daira beghang ayiak Yurdan.

Matius 5

5:1 Yesus nginak jemau banyak itu, Diau nanyiak bukit mangku duduak endak ngajagh. Diau la duduaktu, anak-buaHau njenguak Diau. 5:2 Mangku Yesus mulai ngajagh ughangtu, katauNyau, 5:3 "Riangla jemau diau meghasau nidau pacak mbuat tuapau-apau ngan ngaghapka Allah ajau, karnau diau diterimau Allah njadi umatAu. 5:4 Riangla jemau diau bingung, karnau diau ka dilemakka. 5:5 Riangla jemau diau ngensian, karnau diau ka ngempu deniau. 5:6 Riangla jemau diau endak tegalau ngerjauka kendak Allah, karnau diau ka pacak ngerjaukanyau. 5:7 Riangla jemau diau nyialka jemau, karnau diau ka disialka. 5:8 Riangla jemau diau beresia atiau, karnau diau ka keruan Allah. 5:9 Riangla jemau diau ndamaika jemau, karnau diau ka dikiciakka anak Allah. 5:10 Riangla jemau diau diluatka jemau, ikak nuruti kendak Allah, karnau diau ka diterimau Allah njadi umatAu. 5:11 Riangla kamu, amun kamu digelakka dianiayau, diburuakka ikak Aku. 5:12 Nabi-nabi timpau senitu la dibuati luak itu. Riangla nian kamu, karnau upa kamu besak di sergau." 5:13 "Kamuni umpamau gagham batan endak deniau. Amun gagham nidau teghasau agi, apu pacak ngulang masin agi? Nidau begati agi. Diau dicapakka, mangku dipijakka jemau. 5:14 Kamuni umpamau terang batan endak deniau. Kuta diau adau di pucuak gunung nidau ka adau nidau kina'an. 5:15 Nidau bediau jemau diau maghakka lampu, mangku ditukupi ngan kinjagh. Lampu itu ka dikaitka di badahau, mangku gegalau jemau di ghuma itu pacak nginak terangau. 5:16 Luak itu pulau terang kamu mesti besinagh di guak jemau, supayau ughangtu nginak perembak kamu diau iluak, mangku ngagungka Bapak kamu di sergau." 5:17 "Jangan kamu sangkau, bansau Aku datang endak ngabiska ukum Taurat ngan ajaghan nabi-nabi. Aku datang ukan endak ngabiskanyau tapitu endak ngenjuakka retiau ngenian. 5:18 Ingatkala semasau langit ngan deniau ini gi adau, sutiak kia urup ngan tandau diau keciak nian nidau ka dilengitka jak di ukum Taurat, amun gegalaunyau lum tejadi. 5:19 Itula sebapau jemau diau melanggar sutiak perinta jak di ukum Taurat, empuak dikit ajau, mangku ngajagh jemau lain bebuat luak itu pulau, jemautu ka keciak nian di guak umat Allah. Mangku jemau diau na'ati gegalau ukum Taurat ngan ngajagh jemau lain bebuat luak itu pulau, jemautu ka besak di guak umat Allah. 5:20 Keruanila, amun kamu nidau lebia ta'at jak di guru-guru ukum Taurat ngan jemau Parisi ngerjauka kendak Allah, nidau ka adau kamu njadi umat Allah." 5:21 "Kamu la keruan, bansau niniak puyang kitau la diajaghka luak ini: 'Jangan mbunua. Jemau diau mbunua, mesti diukum.' 5:22 Anyautu mbak kini Akuni bekatau ngan kamu luak ini: Jemau diau marai kantinau mesti diukum. Jemau diau ngiciakkanyau 'buyan', mesti diadapka ngan pengadilan agamau. Mangku jemau diau ngiciakkanyau 'kapir', arus dicapakka dalam api nerakau. 5:23 Karnau itu, amun kaba mbatak kerban endak nyemba Allah, mangku teghingat, bansau adau kantin kaba diau purik ngan kaba, 5:24 tinggalkala kudai kerbantu di guak bada bekerban, mangku pegi bedamaila ngan jemau tadi. Udim itu pacak ngulang agi nyemba Allah. 5:25 Misalau adau jemau diau ngaduka kaba ke pengadilan, bedamaila ngan diau empungan masia di jalan, supayau lawan kaba jangan nyeraka kaba ngan akim, mangku akim itu nyeraka kaba ngan anak-buahau, mangku kaba dicapakka ke jil. 5:26 Ingatkala kaba cetau nidau ka pacak ngeluagh jak di jil, amun utang lum dibayighi galau." 5:27 "Kamu la keruan adau ajaghan luak ini: 'Jangan menaugawia.' 5:28 Anyautu mbak kini Aku bekatau ngan kamu: Jemau diau nginak sughang tinau ngan ngibaukanyau, jemautu la menaugawia ngan tinautu dalam atiau. 5:29 Mangku amun matau kanan kaba mbuat kaba bedusau, cungkilla ngan capakka matautu. Iluakla kelengitan sutiak jak di dandanan badan, sangkan gegalau badan kaba dicapakka dalam nerakau. 5:30 Amun tangan kanan kaba mbuat kaba bedusau, tetakla ngan capakka tangantu. Iluakla kelengitan sutiak jak di dandanan badan, sangkan gegalau badan kaba dicapakka dalam nerakau." 5:31 "Adau pulau ajaghan luak ini: 'Jemau diau nyagha'i biniau, mesti ngenjuakka surat saghak ngan diau.' 5:32 Anyautu mbak kini Aku bekatau ngan kamu: Jemau diau nyagha'i biniau, amun ukan karnau diau menaugawia, jemautu mbuat biniau menaugawia. Mangku jemau diau nika ngan tinau diau disagha'itu menaugawia pulau." 5:33 "Kamu pulau la keruan, bansau niniak puyang kitau la diajaghka luak ini: 'Jangan besumpa ngan setu diau mbu'ung. Setu diau la kamu sumpaka ngan Allah, mesti kamu kerjauka.' 5:34 Anyautu mbak kini Aku bekatau ngan kamu: Jangan besumpa dikit kia, empuak ngan langit, karnau langit bada duduak Allah, 5:35 empuak ngan deniau, karnau deniau lapiak ketingAu, empuak ngan Yerusalim, karnau Yerusalim kuta Rajau Besak. 5:36 Jangan pulau besumpa ngan palak kaba, karnau kaba endiak pacak mutiaka ngan ngitamka gumbak kaba, selambagh kia nidau. 5:37 Amun nyela, kiciakka ajau 'nyela'. Amun nidau, kiciakka 'nidau', lebia jak di itu asalau jak di Iblis." 5:38 "Kamu pulau keruan, bansau adau ajaghan luak ini: 'Matau genti matau, gigi genti gigi.' 5:39 Anyautu mbak kini Aku bekatau ngan kamu: Jangan mbalas jemau diau bebuat ja'at ngan kamu. Amun jemau nampagh pelipisan kanan kamu, ngenjuakka pulau pelipisan kidau. 5:40 Amun jemau ngaduka kaba ngan akim, karnau diau endak baju kaba, ngenjuakkala pulau kain kaba. 5:41 Amun jemau masau kaba mikul dandanannyau sejawua sekilu, pikulla sejawua duau kilu. 5:42 Enjuakkala ngan jemau diau mintak ngan kaba, pinjamkala ngan jemau diau endak minjam." 5:43 "Kamu keruan, bansau adau ajaghan luak ini: 'Sayangila kantin-kantin kaba ngan luatkala musua kaba.' 5:44 Anyautu mbak kini Aku bekatau ngan kamu: Sayangila musua kamu ngan du'akala jemau diau meluatka kamu. 5:45 Ngan carau luak itu kamu njadi anak-anak Bapak kamu diau di sergau. Diautu numbuaka matau-aghi batan endak jemau iluak ngan jemau diau ja'at pulau, ngan nughunka ujan batan endak jemau diau benagh ngan jemau diau nidau benagh pulau. 5:46 Amun kamu nyayangi ajau jemau diau sayang ngan kamu, nidau bediau jasa batan endak kamu. Tukang tagia cuki pulau ngerjauka titu. 5:47 Amun kamu bemuni ngan kantin-kantin kamu ajau, nidau bediau lebihau di kamu. Jemau diau nidau keruan Allah ngerjauka titu pulau. 5:48 Kamu mesti sempernau luak Bapak kamu di sergau."

Matius 6

6:1 "Ingatkala jangan kamu ngerjauka kewajiban agamau di mukau jemau banyak endak dikinak jemau. Amun kamu bebuat luak itu, kamu nidau ka dienju'i upa ngan Bapak di sergau. 6:2 Amun kaba ngenjuak ngan jemau, jangan kaba siarka ngan jemau lain, luak diau dikerjauka jemau diau cak iluak di ghuma-ghuma sembayang ngan di jalan besak, mangku dipuji jemau. Keruanila, ughangtu la nerimau upahau. 6:3 Anyautu amun kaba ngenjuak ngan jemau, jangan tangan kidau kaba ngeruani setu diau dikerjauka tangan kanan. 6:4 Nengkela kerjau kaba nidau keruan ngan jemau, lain jak di Bapak di sergau. Diautu nginak kerjau kaba di bada tebuni, mangku ka mbalas ngan kaba." 6:5 "Amun kamu bedu'a, jangan luak dikerjauka jemau cak alim. Ughangtu galak bedu'a sampai betegak di ghuma sembayang ngan di penyimpangan jalan endak dikinak jemau. Ingatkala ughangtu la nerimau upahau. 6:6 Anyautu amun kaba bedu'a, masuakla ke bilia, katupka duaghau, mangku bedu'ala ngan Bapak kaba diau nidau kina'an itu. Mangku Bapak kaba diau nginak kerjau kaba diau tebuni ka mbalas ngan kaba. 6:7 Lagi amun kamu bedu'a, jangan panjangpanjang nidau bediau tujuannyau luak jemau diau nidau keruan Tuhan. Ughangtu sangkau, du'a ughangtu ka didengagh karnau panjang ngan banyak katau itu. 6:8 Jangan luak ughangtu. Bapak kamu la keruan, setu diau kamu enda'au, antak ka kamu mintak ngan Diau. 6:9 Bedu'ala luak ini: 'Bapak kami diau di sergau, kami endak namau Dighi diregaui, karnau Dighi suci. 6:10 Kami endak Dighi njadi rajau kami, mangku kendak Dighi dituruti di deniau luak di sergau. 6:11 Enju'ila kami saghini makanan kami ngan secukupau. 6:12 Ngabiska sala kami, luak kami ngabiska sala jemau ngan kami. 6:13 Jangan enangka kami dicubaui, anyautu ilakkala kami jak di diau ja'at. Karnau Dighila rajau diau bekuasau ngan agung selelamaunyau. Amin.' 6:14 Amun kamu ngabiska sala jemau ngan kamu, Bapak kamu di sergau ka ngabiska sala kamu pulau. 6:15 Anyautu amun kamu nidau ngabiska sala jemau, Bapak kamu di sergau nidau pulau ka ngabiska sala kamu." 6:16 "Amun kamu puasau, dayi kamu jangan mangut luak jemau cak alim. Ughangtu cak litak, supayau jemau nginak diau dang puasau. Keruanila, ughangtu la bulia upahau. 6:17 Anyautu amun kaba puasau, suguila gumbak kaba ngan ghusapila dayi kaba, 6:18 supayau nidau bediau diau keruan, bansau kaba puasau, lain jak di Bapak kaba diau nidau kina'an. Mangku Diau nginak di bada diau tebuni ka mbalas ngan kaba." 6:19 "Jangan kaba melungguakka retau bendau batan endak diri kaba di deniau. Di deniauni retautu ka dimakan gegat ngan karat ngan dimalingi jemau. 6:20 Anyautu lungguakkala retau kaba di sergau. Di sergautu nidau ka dirusakka gegat ngan karat ngan pulau nidau dimalingi jemau. 6:21 Karnau di manau adau retau kaba, di situ pulau ati kaba. 6:22 Matau umpamau lampu ati. Amun matau kaba iluak, gegalau ati kaba terang. 6:23 Amun matau kaba ja'at, gegalau ati kaba keleman nian. Mangku amun lampu di ati kaba keleman, alangka kelemanau. 6:24 Nidau sughang kia pacak njadi anak-bua duau jemau, karnau amun luak itu, diau ka sayang ngan diau sughang diau sughang agi nidau. Diau ka setia ngan diau sughang ngan diau sughang agi nidau. Kamu nidau pacak bekerjau batan endak Allah ngan batan endak retau bendau pulau." 6:25 "Karnau itu ingatkala jangan kamu ghegak ngan pengidupan kamu, tuapau diau endak kamu makan ngan minum ngan tuapau diau endak kamu pakai. Ukanau pentingla idup sangkan makanan ngan badan sangkan baju? 6:26 Kina'ila burung di awang-awang. Diau nidau nanam, nidau ngetam, nidau bediau tengkiang. Empuak luak itu Bapak kamu di sergau ngenju'i diau makan. Beregaula kamu sangkan burung. 6:27 Sapau jak di kamu karnau ghegak pacak manjangka idupau empuak dikit kiala? 6:28 Mangku ngapau kamu ghegak ngan setu diau endak dipakai? Kina'ila bungau gheghumputan di padang. Diau tumbua nidau bekerjau ngan nidau pulau betenun. 6:29 Anyautu Rajau Salumu diau makai baju rajau diau alap nianan nidau pulau sualap bungautu. 6:30 Saghini ghumput di padang tumbua, pagi disilap abis. Empuak luak itu Allah ndandani ghumput itu alap nian, apau lagi kamu, ui jemau diau nidau percayau nian. 6:31 Karnau itu nidau nanti ghegak ngan bekatau, 'Tuapau diau ka kami makan? Tuapau diau ka kami minum? Tuapau diau ka kami pakai?' 6:32 Gegalaunyautu didala'i jemau diau nidau keruan Allah. Anyautu Bapak kamu di sergau keruan, bansau kamu endak gegalaunyautu. 6:33 Anyautu kamu beusahala, mangku Allah njadi rajau kamu, ngan kerjaukala kenda'Au, mangku gegalaunyautu ka dienjuakka ngan kamu. 6:34 Karnau itu nidau nanti kamu ghegak aghi pagi, karnau aghi pagi ka adau agi rupu'an lain. Rupu'an saghi jadila batan endak saghi."

Matius 7

7:1 "Jangan kamu ngukum jemau, mangku kamu nidau diukum. 7:2 Karnau luak kamu ngukum jemau kamu pulau ka diukum. Luak manau kamu ngulaki jemau, luak itu pulau jemau ngulaki kamu. 7:3 Ngapau kaba nginak kempenan di matau kantin kaba, anyautu baluk di matau kaba nidau kaba keruani? 7:4 Luak manau kamu pacak ngiciak ngan kantin kaba, 'Nengkela aku ngeluaghka kempenan di matau kaba.', awuak di matau kabatula adau baluk. 7:5 Ui, kaba cak iluak! Keluaghkala kudai baluk jak di matau kaba, mangku kaba nginak ngan terang endak ngeluaghka kempenan jak di matau kantin kaba. 7:6 Jangan ngenjuakka setu diau beresia ngan anjing. Jangan pulau nyipatka mutiara ngan kaput, mangku nidau dipijak-pijakkanyau ngan nidau ngelipat nyerang kamu." 7:7 "Pintakla, mangku kamu ka dienju'i. Bedalakla, mangku kamu ka bepulian. Gagurla duaghau, mangku kamu ka dibuka'i. 7:8 Karnau bilang jemau diau mintak dienju'i, bilang jemau diau ndalak bulia, mangku bilang jemau diau nggagur duaghau dibuka'i. 7:9 Apu adau jak di kamuni diau ngenju'i ana'au batu, amun diau mintak makan? 7:10 Apu dienju'i ulagh, amun diau mintak ikan? 7:11 Amun kamu diau ja'at pacak ngenjuak diau iluak ngan anak kamu, apau lagi Bapak kamu diau di sergau! Diau ka ngenju'i setu diau iluak ngan jemau diau mintak ngan Diau. 7:12 Bebuatla ngan jemau luak kamu endak ughangtu mbuati kamu. Itula isi gegalau ukum Taurat ngan kitab nabi-nabi." 7:13 "Masuakla wuan duaghau diau supit, karnau duaghau ngan jalan diau nuju ke nerakau besak ngan alap, mangku banyak jemau lalu wuan jalan itu. 7:14 Anyautu duaghau ngan jalan diau nuju idup supit ngan segau, mangku cuman dikit jemau diau ndapatkanyau." 7:15 "Sepepadaula ngan cak nabi. Ughangtu datang di guak kamu luak bebiri, anyautu sebenaghau ughangtu luak setuau diau ganas. 7:16 Kamu ka ngeruani ughangtu jak di kerjaunyau. Di ghumput bedughi nidau bediau bua anggur. Di kayu bedughi nidau bediau bua aghau. 7:17 Di batang diau iluak adau bua diau iluak. Di batang diau nidau iluak adau bua diau nidau iluak. 7:18 Nidau ka adau batang diau iluak ngasilka bua diau karut. Mangku batang diau nidau iluak nidau pulau ngasilka bua diau iluak. 7:19 Bilang kayu diau nidau ngasilka bua diau iluak, cetau ditebang mangku dicapakka dalam api. 7:20 Luak itula pulau ngan cak nabi tadi. Kamu ka ngeruani ughangtu jak di asil kerjaunyau." 7:21 "Nidau gegalau jemau diau mantau aku, 'Tuhan, Tuhan!' njadi angguta umat Allah, anyautu cuman jemau diau ngerjauka kendak BapakKu diau di sergau. 7:22 Masau aghi kiamat banyak jemau ka bekatau ngan Aku, 'Tuhan, Tuhan, ngan namau Tuhan kami la ngiciakka katau Allah. Ngan namau Tuhan kami la melaratka iblis. Lagi ngan namau Tuhan kami la banyak mbuat tandau nyelia.' 7:23 Masau itula Aku ka nimbali ughangtu, 'Aku nidau kekela ngeruani kamu. Laratla jak di sini, kamu diau ngerjauka setu diau ja'at.' " 7:24 "Bilang jemau diau ndengagh kici'anKu ini ngan nurutinyau, jemautu umpamau jemau bepengertian diau negakka ghumahau bepelapiak batu. 7:25 Amun aghi ujan ngan ayiak merampus ngan angin deghas nempua ghuma itu, ghumatu nidau rubua, karnau ditegakka bepelapiak batu. 7:26 Mangku bilang jemau diau ndengagh kici'anKu ini ngan nidau nurutinyau, jemautu umpamau jemau diau bigal diau negakka ghumahau bepelapiak bungin. 7:27 Amun aghi ujan ngan ayiak merampus ngan angin deghas nempua ghuma itu, ghumatu rubua mangku rusak galau." 7:28 Mangku Yesus ngudimka kici'anNyautu. Jemau banyak tadi kemangan nian ndengaghka ajaghanNyautu, 7:29 karnau Diau ngajagh ngan kuasau, lain nian ngan guru-guru ukum Taurat.

Matius 8

8:1 Yesus tughun jak di bukit, mangku banyak jemau ngikut Diau. 8:2 Mangku adau sughang jemau njenguak Diau. Jemautu buidapan ja'at diau mbayauka. Diautu nunduak nyemba Yesus sampai bekatau, "Pak, amun Dighi endak, Dighi pacak meghadui aku." 8:3 Yesus nyurungka tanganAu ngecakka jemau itu ngan bekiciak, "Aku endak, ghadula kaba." Masau itu pulau idapannyau ghadu. 8:4 Mangku Yesus bekatau ngan diau, "Ingatkala, jangan kaba kiciakka ngan sughang kia ceritau ini. Anyautu pegila njenguak imam, mintak diau merisau kaba. Udim itu enjuakkala kerban diau diajung Musa njadi buktiau ngan jemau, bansau kaba la ghadu." 8:5 Masau Yesus masuak ke Kapernaum, adau sughang kepalak tentera njenguak Diau ngan mintak tulung, kataunyau, 8:6 "Pak, budakku tebadai di ghuma karnau buidapan lumpua, la nanggung nian." 8:7 Katau Yesus ngan diau, "Aku ka pegi meghaduka diau." 8:8 Anyautu tentera itu bekatau, "Gaula, aku nidau pantas nerimau Dighi di ghumaku. Kiciakka sepata katau ajau, mangku budakku ghadu. 8:9 Aku sughang bawahan, mangku di bawa aku adau pulau tentera. Amun aku ngajung ngan sughang tentera 'Pegi!', mangku diau pegi, ngan sughang agi, 'Ke sini!' mangku diau datang, lagi ngan budakku, 'Kerjaukala ini!', mangku dikerjaukanyau." 8:10 Ndengagh kici'annyautu Yesus kemangan nian, mangku Diau ngiciak ngan jemau banyak diau ngikut Diau, katauNyau, "Nyela nian katauKu ini, di guak jemau Israil lum kekela Aku nemuka iman sebesak ini. 8:11 Ngenian, banyak jemau ka datang jak di sebela matau-aghi tumbua, jak di sebela matau-aghi tumban duduak makan serempak ngan Abraham, Isak ngan Yakub di sergau. 8:12 Anyautu jemau diau behak njadi umat Allah ka dicapakka di bada diau keleman sekali. Di situ ughangtu ka nangis ngan sengsarau." 8:13 Mangku Yesus bekatau ngan tentera tadi, "Baliakla, setu diau kaba percayaui ka tejadi." Masau itu pulau buda'au ghadu. 8:14 Yesus pegi ke ghuma Pitrus. Di situ Diau nginak mentuau tinau Pitrus dang tiduak karnau demam. 8:15 Yesus ngecakka tanganau mangku demamautu ghadu. Tinautu bangun nepi'i Diau. 8:16 Aghi laka malam, banyak jemau diau diarung iblis dibatak guak Yesus. Mangku ngan sepata katau ajau Yesus ngisitka iblis itu ngan meghaduka gegalau jemau buidapan. 8:17 Yesus ngerjauka gegalaunyautu, mangku ditepati setu diau la dikiciakka nabi Yesaya, "Diaula nanggungka sengsarau kitau ngan meghaduka idapan kitau." 8:18 Banyak nian jemau di guak Yesus. Masau Diau nginak gegalau ughangtu, Diau ngajung anak-buaHau nyembeghangi danau. 8:19 Mangku adau sughang guru agamau datang njenguak Diau ngan bekatau, "Pak guru, aku endak ngikut Dighi, ke manau ajau Dighi pegi." 8:20 Katau Yesus, "Landak adau lubangau, burung adau saghangau, anyautu Anak Manusiau endiak bediau badaHau." 8:21 Mangku sughang agi diau la njadi anak-buaHau bekatau, "Pak, ajungla aku baliak kudai endak nguburka bak kami." 8:22 Yesus nimbal, "Mela ngikut Aku. Nengkela jemau mati nguburka jemau mati." 8:23 Udim itu Yesus nayiak perawu ngan anak-buaHau ngikut pulau. 8:24 Mangku adau angin nyaghu di danau itu. Adau pulau umbak besak ngan ayiak masuak dalam perawu. Anyautu Yesus dang tiduak. 8:25 Mangku anak-buaHau pegi mbangunkaNyau ngan bekatau, "Pak, tulung, kitau celakau!" 8:26 Yesus ngiciak ngan ughangtu, "Ngapau kamu takut? Ngapau kamu nidau percayau?" Diau bangun mbentak angin ngan danau, mangku danautu tenang. 8:27 Ughangtu kemangan ngan bekiciak, "Sapau sebenaghau jemau ini? Diau merintaka angin ngan danau, mangku diau ta'at." 8:28 Mangku Yesus sampai di beghang danau di daira Gadara. Adau duau ughang datang diau diarung iblis. Ughang duautu buas nian, mangku nidau sughang kia beghani lalu di situ. Ughangtu ngeluagh jak di perantuan 8:29 ngan tegauk-gauk, kataunyau, "Ka Kaba apauka kami, ui Anak Allah? Apu Kaba endak nyaraui kami, empuak lum masaunyau?" 8:30 Nidau jawua jak di situ banyak kaput ingunan dang ndalak makanan. 8:31 Mangku iblistu mintak ngan Yesus, kataunyau, "Amun Kaba endak ngisitka kami, ajungla kami ngarung kaput itu." 8:32 "Pegila!" katau Yesus. Mangku iblis itu ngeluagh jak di ughangtu ngarung kaput. Kaput diau banyak itu belaghi tumban ke badas masuak danau mangku mati tebenak. 8:33 Tukangtukang sayia kaput itu belaghi ke kuta nceritauka gegalaunyau diau la tejaditu, pulau ceritau ughang duau diau diarung iblis tadi. 8:34 Mangku gegalau jemau di kuta itu pegi nemui Yesus. La betemu ngan Yesus, ughangtu mintak nian, supayau Diau pegi jak di bada itu.

Matius 9

9:1 La udim itu Yesus nayiak perawu mangku nyembeghangi danau baliak ke dusunAu. 9:2 Mangku adau jemau mbatak sughang jemau lumpua. Diau maju tebadai di bada tidu'au. Satu Yesus nginak ughangtu percayau nian, Diau bekatau ngan jemau lumpua tadi, "Ui, kantinKu, dusau kaba la diabiska." 9:3 Di situ adau guru-guru ukum Taurat diau berupuak, "Jemau ini nggelakka Allah?" 9:4 Yesus ngeruani rupu'an ughangtu, mangku Diau bekatau, "Ngapau rupu'an kapu dighi ja'at? 9:5 Manau diau lebia mura, ngiciakka, 'Dusau kaba la diabiska,' apu ngiciakka, 'Bangunla kaba bejalanla.'? 9:6 Anyautu Akuni ka ngajung jemau ini bangun, supayau kapu dighi keruan, bansau Anak Manusiau bekuasau di deniauni ngabiska dusau." Mangku Diau ngiciak ngan jemau lumpua itu, katauNyau, "Bangunla kaba, katangkala penjagang kaba, mangku baliakla ke ghuma kaba!" 9:7 Mangku jemau itu bangun baliak. 9:8 Masau jemau banyak nginak setu diau tejaditu, ughangtu takut galau mangku ngagungka Allah, karnau Allah ngenjuakka kuasau besak ngan manusiau. 9:9 Udim itu Yesus pegi jak di bada itu, mangku Diau nginak sughang tukang tagia cuki. Namaunyau Matius. Diau dang duduak di kanturau. "Mela, ngikut Aku." katau Yesus. Matius betegak, mangku ngikut Yesus. 9:10 Udim itu Yesus makan di ghumahau. Mangku banyak nian tukang tagia cuki ngan jemau bedusau datang makan serempak ngan Diau ngan anak-buaHau. 9:11 Adau jemau Parisi diau nginak itu ngan betanyau ngan anak-bua Yesus, kataunyau, "Ngapau guru kamu makan ngan penagia cuki ngan jemau bedusau?" 9:12 Yesus ndengagh kici'an ughangtu mangku nimbal, "Jemau diau sihat nidau endak duktur, jemau diau buidapan ajau. 9:13 Cubau keruani kudai retiau katau ini, 'Diau Kukenda'i sial ukan kerban benatang.' Aku datang ukan endak ndalak jemau diau benagh, tapitu jemau diau bedusau." 9:14 Mangku adau anak-bua Yuhanis datang njenguak Yesus ngan betanyau, "Ngapau kami ngan anak-bua jemau Parisi puasau, anyautu anak-bua Dighi nidau?" 9:15 Yesus nimbal, "Apu kamu pacak ngajung kantin pengantin bingung ngan dukau di jamuan nika, selamau pengantinan gi adau guak ughangtu? Cengki nidau! Masaunyau ka sampai, pengantinantu ka diambiak jak di ughangtu. Masau itula ughangtu ka puasau. 9:16 Endiak bediau jemau diau ngambiak batan penampit jak di kain empai endak nampiti baju diau bughuak, karnau penampit jak di kain empai itu ka ncebaghka kain baju diau bughuak tadi mangku tamba besak cebaghau. 9:17 Luak itu pulau nidau bediau sughang kia ngisika ayiak anggur diau empai ke dalam kantung bawak diau lamau, karnau ayiak anggur diau empaitu ka mecaka kantungtu, mangku anggurau tebuang ngan kantungtu rusak. Ayiak anggur diau empai mesti dimasuakka ke dalam kantung diau empai pulau, mangku anggur ngan kantungtu maju iluak." 9:18 Yesus gi ngiciak luak itu, adau sughang pengulu ghuma sembayang datang nunduak guak Yesus ngan bekatau. "Anak gadisku empai mati. Datangla tepiakkala tangan Dighi di diau, mangku diau idup agi." 9:19 Mangku Yesus betegak ngikutka jemautu, anak-buaHau ngikut pulau. 9:20 Yesus dang bejalan adau sughang jemau tinau diau buidapan bedagha, la duau belas taun lamaunyau. Tinau itu masighi Yesus jak di belakang ngan nginggut bajuAu, 9:21 karnau diau berupuak, "Asal aku nginggut bajuAu, aku ka ghadu." 9:22 Mangku Yesus nulia nginak diau sampai bekatau, "Tetapkala ati kaba. Karnau kaba percayau kaba dighadui." Masau itu pulau daghahau mandak melilia. 9:23 Mangku Yesus sampai di ghuma pengulu ghuma sembayang tadi. Diau nginak tukang seruling ngan jemau banyak ganau, 9:24 Diau bekatau, "Keluaghla, karnau budak gadis ini nidau mati. Diauni cuman tiduak." Gegalau ughangtu nawauka Yesus. 9:25 Ughangtu la ngeluagh galau, Yesus masuak ngecakka tangan budak gadis tadi, mangku budak gadistu bangun mangku betegak. 9:26 Ceritau itu tesiar di gegalau daira itu. 9:27 Yesus pegi jak di situ, mangku adau jemau butau duau ughang ngikut Diau sampai mantauiNyau, kataunyau, "Ui, Anak Daud, sialkala kamini!" 9:28 La sampai di ghuma, ughang duautu datang njenguak Yesus. Yesus betanyau ngan ughangtu, "Apu kamu percayau, bansau Aku pacak meghaduka kamu?" "Kami percayau, Pak!" katau jemau butautu. 9:29 Mangku Yesus ngecakka matau ughang duautu sampai bekatau, "Karnau kamu percayau, tejadila di kamu setu diau kamu aghapka." 9:30 Mangku ughang duautu pacak nginak. Yesus ngingatka ngan ughangtu nian, katauNyau, "Jangan ngiciakka ceritau ini ngan sughang kia." 9:31 Anyautu ughang duautu ngeluagh, mangku ngiciakka ceritau Yesus di gegalau daira itu. 9:32 Masau ughang duautu tadi pegi, jemau bisu diau diarung iblis dibata'i guak Yesus. 9:33 Yesus ngisitka iblis itu, mangku jemautu pacak ngiciak agi. Jemau banyak itu kemangan ngan bekatau, "Setu luak ini lum kekela tekinak ngan jemau Israil." 9:34 Anyautu jemau Parisi bekatau, "Pengulu iblis ngenjuak Diau kuasau batan endak ngisitka iblistu." 9:35 Luak itula Yesus pegi ngidari gegalau kuta ngan dusun. Diau ngajagh dalam ghuma-ghuma sembayang ngan ngiciakka ceritau iluak, bansau Allah laka merinta luak rajau, mangku Diau meghaduka jemau jak di gegalau idapan ngan cacat. 9:36 Nginak jemau banyak itu, Yesus sial ngan ughangtu, karnau ughangtu litak ngan kebingungan, luak bebiri diau nidau bediau tukang sayiau. 9:37 Mangku Diau bekatau ngan anak-buaHau, "Sawa libagh, jemau ngetamau dikit. 9:38 Karnau itu mintakla ngan jemau ngempu sawa itu, mangku diau ngajung jemau ngetaminyau."

Matius 10

10:1 Yesus milia duau belas anak-buaHau, dienjuakkaNyau kuasau endak melaratka iblis ngan meghaduka gegalau idapan ngan gegalau cacat. 10:2 Inila namau duau belas rasul itu: Diau dulu sekali Simun diau dinamauka pulau Pitrus ngan Anderias ading Simuntu, mangku Yakubus anak Sebedius ngan adingau Yuhanis, 10:3 mangku Pilipus ngan Bartulumius, Tumas ngan Matius tukang tagia cukitu, mangku Yakubus anak Alpius ngan Tadius, 10:4 mangku Simun diau dikiciakka jemau Silut ngan Yudas Iskariut, diaunila njualka Yesus. 10:5 Mangku duau belas anak-buaHau diajung Yesus pegi ngan kici'an luak ini, "Jangan nyimpang ke jalan jemau bangsau lain ngan jangan pulau masuak kuta jemau Samaria, 10:6 tapitu pegila njenguak jemau Israil, jemau diau sesat. 10:7 Kiciakkala ngan ughangtu, 'Allah laka merinta luak rajau.' 10:8 Ghadukala jemau buidapan, idupkala jemau mati, ghadukala jemau buidapan ja'at, laratkala iblis. Gegalau kuasau itu dienjuakka ngan kamu nidau dibeli. Karnau itu enjuakkala pulau nidau mintak bayighan. 10:9 Jangan kamu mbatak tanci emas, pirak ngan tembagau dalam bebat. 10:10 Jangan mbatak dumpit, amun endak bejalan. Batak baju duau jangan, sepatu jangan, tungkat jangan, karnau sughang pekerjau pantas dienjuakka upa. 10:11 Amun kamu masuak kuta ngan dusun, dalakla jemau diau endak nerimau kamu. Mendamla di situ enggut kamu pegi jak di situ. 10:12 Amun kamu masuak ghuma jemau, kiciakkala salam damai ngan ughangtu, 'Kiraunyau Tuhan njagaui kapu dighi.' 10:13 Amun ughang di ghuma itu nerimau kamu, salamtu ka mendam ngan ughangtu. Amun nidau, salamtu ka ngulang ke kamu. 10:14 Amun endiak bediau jemau diau nerimau kamu ngan ndengaghka kici'an kamu, pegila jak di ghuma ngan kuta itu, mangku kepaskala debu jak di keting kamu. 10:15 Keruanila, masau aghi kiamat banyakla tanggungan kuta itu sangkan Sudum ngan Gumura." 10:16 "Dengaghkala, Aku ngajung kamu luak bebiri pegi di pugan setuau. Karnau itu kamu mesti cerdiak luak ulagh ngan tulus luak burung darau. 10:17 Sepepadaula ngan gegalau jemau. Kamu ka ditangkap, diadapka ngan pengadilan agamau. Kamu ka disaraui di ghuma sembayang. 10:18 Kamu ka dibata'i ke adapan penguasau ngan rajau-rajau, karnau percayau ngan Aku. Itula kesempatan kamu nceritauka Aku ngan ughangtu ngan jemau diau nidau keruan Allah. 10:19 Amun kamu dibatak endak diadili, jangan kamu ghegak ngan setu diau endak kamu kiciakka, karnau katau diau mesti kamu katauka ka dienjuakka ngan kamu masau itu pulau. 10:20 Karnau diau ngiciak masau itu ukan kamu, tapitu Rua Bapak diau di sergau. Diautu ka ngiciak di ati kamu. 10:21 Jemau ka nyeraka adingbeghadingau endak dibunua. Luak itu pulau bak ka mbuati ana'au. Mangku anak pulau ka melawan pejadiau mangku nyeraka ughangtu endak dibunua. 10:22 Kamu ka diluatka gegalau jemau, karnau kamu percayau ngan Aku. Anyautu jemau diau beta'an enggut kesudiman ka selamat. 10:23 Amun jemau nganiayau kamu di sebua kuta, laratla ke kuta diau lain. Aku bekatau ngan kamu, 'Antak ka kamu udim nandangi gegalau kuta di Israil, Anak Manusiau la datang.' 10:24 Anak-murip nidau lebia penting jak di guruau, apu budak jak di tuanau. 10:25 Jadila, amun anak-murip la semegi ngan guruau, mangku budak la semegi ngan tuanau. Amun tuan ghuma dikiciakka Bilsebul, apau lagi jemau seghumahau." 10:26 "Jangan kamu penakut ngan jemau. Gegalaunyau diau nyemuni ka kina'an ngan gegalaunyau diau diresiauka ka keruan. 10:27 Setu diau Kukiciakka aghi malam, kiciakkala aghi siang. Setu diau dibisiakka ngan kamu, kiciakkala jak di berendau. 10:28 Jangan kamu penakut ngan jemau diau cuman pacak mbunua badan, tapitu nidau bekuasau mbunua jiwa. Takutla ngan Allah diau bekuasau mbenasauka dalam nerakau badan ngan jiwa. 10:29 Nyela nian, burung pipit dijual duau ikuak seringgit. Anyautu sikuak kia nidau ka umban ke tana, amun ukan kendak Bapak kamu. 10:30 Ngan kamu, gumbak kamu di palak la dibilangi galau. 10:31 Amun luak itu, jangan kamu takut, karnau beregaula kamuni sangkan burung pipit. 10:32 Jemau diau ngaku'i Aku di mukau jemau banyak, ka Kuaku'i di adapan BapakKu diau di sergau. 10:33 Anyautu jemau diau nidau ngaku'i Aku di adapan manusiau, nidau pulau ka Kuaku'i di adapan BapakKu diau di sergau." 10:34 "Jangan sangkau, bansau Aku datang endak mbatak damai ke deniauni. Aku nidau mbatak damai tapitu pelawanan. 10:35 Karnau Aku datang mbuat jemau belawanan ngan ba'au, anak tinau melawan ma'au, nantu tinau melawan mentuau tinaunyau. 10:36 Nyela, diau ka njadi musua nian jemau seghuma itula. 10:37 Jemau diau lebia nyayangi pejadiau jak di Aku nidau pantas njadi anak-buaKu. Luak itu pulau jemau diau lebia nyayangi ana'au empuak tinau empuak lanang jak di Aku nidau pantas njadi anak-buaKu. 10:38 Jemau diau nidau mikul salipau mangku ngikut Aku, nidau pantas njadi anak-buaKu. 10:39 Jemau diau endak ngilakka nyawaunyau ka kelengitan nyawaunyau. Anyautu jemau diau kelengitan nyawaunyau karnau ta'at ngan Aku, diautu ka bulia idup. 10:40 Jemau diau nerimau kamu nerimau Aku. Jemau diau nerimau Aku nerimau pulau diau ngajung Aku. 10:41 Jemau diau nerimau sughang nabi karnau diau nabi ka bulia upa nabi. Jemau diau nerimau jemau iluak karnau diau iluak ka bulia upa jemau iluak. 10:42 Mangku jemau diau ngenjuak minum ayiak bangkau, empuak cuman semangkuak, ngan sala sughang diau inau ini, karnau njadi anak-buaKu, percayaula, diau cetau ka nerimau upahau."

Matius 11

11:1 La udim diau ngajagh duau belas anak-buaHau, Yesus pegi jak di situ endak ngajagh ngan ngiciakka ceritau iluak di kuta lain. 11:2 Yuhanis dang dalam jil. Di situ diau ndengagh ceritau Keristus, mangku diau ngajung anak-buahau betanyau ngan Diau, 11:3 "Apu Dighi jemau diau ka datangtu? Apu kami mesti nantika jemau lain?" 11:4 Yesus nimbal, "Baliakla, kiciakkala ngan Yuhanis setu diau kamu kinak ngan dengagh: 11:5 Jemau butau nginak, jemau lumpua bejalan, jemau buidapan ja'at ghadu, jemau tuli ndengagh, jemau mati ngulang idup, ngan ceritau iluak dikiciakka ngan jemau sarau. 11:6 Mangku riangla jemau diau nidau keciwau ngan nulak Aku." 11:7 Ajungan Yuhanis la pegi, mangku Yesus mulai ngiciakka ceritau Yuhanis ngan jemau banyak itu, katauNyau, "Ngapau kamu pegi ke padang bungin? Apu kamu endak nginak ghumput diau digugak angin? Cengki ukan! 11:8 Ngapau kamu pegi? Endak nginak jemau bebaju alap? Jemau diau bebaju alap adau di istana rajau. 11:9 Mangku ngapau kamu pegi? Endak nginak sughang nabi? Nyela, lebia jak di nabi diautu. 11:10 Ceritau Yuhanis la ditulis di Injil: 'Katau Allah, keruanila, Aku ka ngajung ajunganKu ndului Kaba, diau ka mbukak jalan batan endak Kaba.' 11:11 Keruanila, endiak bediau jemau di deniau ini lebia besak jak di Yuhanis, anyautu jemau diau keciak sekali di bada Allah merinta, besakla jemau itu sangkan Yuhanis. 11:12 Jak Yuhanis ngiciakka ceritaunyau enggut mbak kini, umat Allah diserang jemau diau endak nguasauinyau ngan masau. 11:13 Enggut Yuhanis datang, gegalau nabi ngan ukum Taurat ngiciakkanyau. 11:14 Mangku amun kamu endak percayau, Yuhanis itula Elia diau ka datang. 11:15 Amun betelingau, dengaghkala! 11:16 Ngan tuapau jemau mbak kini pacak diumpamauka? Ughangtu umpamau budak keciak diau duduak di tengalaman libagh, ngiciak sughang ngan diau lain, 11:17 'Kami nabua kelintang, anyautu kamu enggup nari. Kami berandaian, anyautu kamu enggup nangis.' 11:18 Yuhanis datang, diau puasau ngan nidau minum anggur, mangku jemau ngiciakka, 'Diau gilau.' 11:19 Anak Manusiau datang, Diau minum-makan, mangku jemau bekatau, 'Kina'ila, Jemau itu selak, pemabuak, kantin penagia cuki ngan kantin jemau bedusau.' Empuak luak itu, pengertian dibenaghka asilau." 11:20 Mangku Yesus nyalaka kuta diau nidau ngubai jak di dusaunyau, awuak di situ Diau banyak sekali ngerjauka tandau nyelia. 11:21 "Celakaula kamu, jemau Kurasim! Celakaula kamu, jemau Betsaida. Misalau tandau nyelia diau dikerjauka guak kamu dikerjauka di Tirus ngan Sidun, cengki ughangtu la lamau ngubai peremba'au jak di dusaunyau ngan mbaduki pala'au. 11:22 Ingatkala, masau aghi kiamat banyakla tanggungan kamu sangkan tanggungan jemau Tirus ngan Sidun. 11:23 Mangku kamu, jemau Kapernaum, apu kamu ka ditinggika ke sergau? Nidau! Kamu ka dicapakka ke nerakau. Misalau tandau nyelia diau la diadauka guak kamu diadauka di Sudum, kuta itu cengki gi adau enggut mbak kini. 11:24 Keruanila, masau aghi kiamat banyakla tanggungan kamutu sangkan jemau Sudum." 11:25 Masau itu Yesus bekatau, "Bak, Aku ngagungka dighi, Tuhan langit ngan deniau, karnau gegalaunyau ini Dighi resiauka ngan jemau diau sekul ngan jemau pintar. Anyautu Dighi nyataukanyau ngan jemau biasau. 11:26 Itula diau melemakka ati Dighi. 11:27 Gegalaunyau la Dighi seraka ngan Aku. Nidau bediau sughang kia diau keruan Anak, lain jak di Bapak. Nidau bediau pulau diau keruan Bapak, lain jak di Anak ngan jemau diau dikenda'i Anaktu nyataukanyau. 11:28 Mela, jenguakla Aku gegalau kamu diau litak ngan bebata'an beghat. Aku ka ngenjuakka ampung ngan kamu. 11:29 Tanggungkala selungku diau Kukenauka ngan kamu, mangku belajaghla jak di Aku, karnau Aku ngaligh ngan nidau geduak, mangku kamu ka njadi tenang. 11:30 Karnau selungku diau Kukenauka lemak ngan bata'an diau Kutanggungka ngan kamu ampung."

Matius 12

12:1 Aghi Sabat Yesus lalu di umau. Karnau lapagh anak-buaHau ngambiak padi mangku dimakanau. 12:2 Nginak titu jemau Parisi ngiciak, katauNyau, "Kina'ila, anak-bua Kaba ngerjauka setu diau nidau bulia dikerjauka aghi Sabat." 12:3 Mangku Yesus nimbali ughangtu, "Cengki kapu dighi la mbacau setu diau dikerjauka Daud, masau diau ngan anak-buahau lapagh. 12:4 Diautu masuak ke dalam Ghuma Allah, mangku ughangtu makan ruti pesembahan, awuak nurut ukum agamau kitau diautu ngan anak-buahau pulau nidau bulia makanau, cuman imam ajau bulia makan. 12:5 Apu lum kapu dighi mbacau dalam ukum Musa, bansau idang aghi Sabat imam diau betugas di Ghuma Allah melanggar peraturan aghi Sabat, anyautu nidau disalaka? 12:6 Dengaghkala katauKu ini: Di sini adau diau lebia besak jak di Ghuma Allah. 12:7 Di Injil ditulis luak ini, 'Keilu'an ati diau Kukenda'i ukan kerban benatang.' Amun kapu dighi terti nian kici'an itu, cengki kapu dighi nidau nyalaka jemau diau nidau besala. 12:8 Karnau Anak Manusiau nguasaui aghi Sabat." 12:9 Yesus pegi jak di situ mangku masuak ghuma sembayang. 12:10 Di situ adau jemau diau mati sebela tanganau. Ughangtu betanyau ngan Diau, "Apu bulia meghaduka jemau aghi Sabat?" Ughangtu betanyau luak itu mangku pacak nyalaka Yesus. 12:11 Yesus nimbali ughangtu, katauNyau, "Misalau sughang jak di kapu dighi adau sikuak bebiri diau temasuak ke pelubang aghi Sabat, apu diau nidau ka ncubau ngeluaghka bebiriautu? 12:12 Manusiau jawua lebia beregau jak di bebiri. Karnau itu bulia kitau nulung jemau aghi Sabat." 12:13 Udim itu Yesus bekatau ngan jemau diau mati sebela tanganau, "Unjughkala tangan kaba!" Jemau itu ngunjughka tanganau, mangku tanganautu ghadu njadi luak tangan diau sebela. 12:14 Anyautu jemau Parisi ngeluagh mangku sepakat endak mbunua Yesus. 12:15 Yesus keruan rencanau ughangtu mangku nyingkir jak di bada itu. Banyak jemau ngikut Yesus, mangku Diau meghaduka gegalau jemau buidapan. 12:16 Diau negahi nian ughangtu ngiciakka ceritau Diau ngan jemau lain. 12:17 Luak itu ditepati kici'an nabi Yesaya, 12:18 "Inila BudakKu diau Kupilia, diau Kusayangi ngan melemakka atiKu. Aku ka ngenjuakka RuaKu ngan Diau, mangku Diau ka ngiciakka kendakKu ngan bangsau-bangsau. 12:19 Diau nidau ka bebala ngan nidau tegauk ngan nidau bepidatau di jalan. 12:20 Bulua diau tekulai nidau ka dilalukaNyau, lampu diau keciak magha'au nidau ka dipadamkaNyau. Diau ka ngerjaukanyau enggut ukum Allah dita'ati. 12:21 Mangku gegalau bangsau ka ngaghapka Diau." 12:22 La udim itu dibatak njenguak Yesus sughang butau ngan bisu karnau diarung iblis. Yesus meghaduka jemautu, mangku diau pacak ngiciak ngan nginak. 12:23 Jemau banyak di situ kepagauan galau, kataunyau, "Asauku Diauni Anak Daud diau dijanjikatu." 12:24 Jemau Parisi ndengagh kici'an itu mangku bekatau, "Diau ngisitka iblis ngan kuasau Bilsebul, pengulu iblis itu." 12:25 Anyautu Yesus keruan rupu'an ughangtu, mangku Diau bekatau, "Amun nenggeri teceghai-beghai sangi bemusuan, nenggeritu nidau ka beta'an. Lagi pulau amun jemau sedusun ngan seghuma nidau suijauan ngan bemusuan sughang ngan diau lain, ughangtu ka kacau. 12:26 Luak itula pulau ngan iblis. Amun iblis ngisitka iblis, mangku iblistu teceghai-beghai ngan kuasauannyau nidau pacak beta'an. 12:27 Kapu dighi ngiciak, Aku ngisitka iblis ngan kuasau Bilsebul. Amun luak itu, ngan kuasau sapau anak-bua kapu dighi ngisitkanyau? Anak-bua kapu dighitula mbuktika kapu dighi besala. 12:28 Anyautu Aku ngisitka iblis ngan kuasau Rua Allah, mangku ngenian Allah la mulai merinta di guak kapu dighi. 12:29 Luak manau jemau pacak masuak ke ghuma jemau diau kuat endak ngambiak retau bendaunyau, amun jemau kuat tadi nidau dikebat kudai? La udim dikebat, mangku pacak merampuk ghuma itu. 12:30 Jemau diau nidau mihak ngan Aku, diautu melawan Aku, mangku jemau diau nidau nulung aku nunggalka jemau, diautu nceghai-beghaika. 12:31 Itula sebapau Aku bekatau ngan kamu: Gegalau dusau ngan kici'an nggelak pacak diabiska, anyautu jemau diau nggelakka Rua Allah nidau pacak diabisi dusaunyau. 12:32 Amun jemau ngiciakka setu melawan Anak Manusiau, jemautu pacak diampuni. Anyautu jemau diau ngiciakka setu nggelakka Rua Allah nidau pacak diabisi dusaunyau, empuak di deniau mbak kini empuak nantitu." 12:33 "Batang diau kamu katauka iluak ngasilka bua diau iluak. Batang diau kamu katauka nidau iluak ngasilka bua diau nidau iluak. Bilang batang dikeruani jak di buahau. 12:34 Ui, kamu jemau ja'at. Manau ka adau kamu pacak ngiciakka setu diau iluak, amun kamu ja'at. Setu diau dikiciakka mulut, itula diau ngeluagh jak di ati. 12:35 Jemau iluak ngiciakka setu diau iluak, karnau atiau iluak. Jemau ja'at ngiciakka setu diau ja'at, karnau atiau ja'at. 12:36 Ingatkala masau aghi kiamat bilang katau diau nidau begunau mesti ditanggung-jawabka. 12:37 Karnau nurut kici'an kaba, kaba ka dibenaghka, mangku nurut kici'an kaba pulau, kaba ka diukum." 12:38 Mangku adau guru agamau ngan jemau Parisi bekatau, "Pak guru, kami endak nginak Kaba mbuat tandau nyelia." 12:39 "Alaka ja'at jemau mbak kini." Katau Yesus ngan ughangtu, "Kapu dighi mintak tandau nyelia, anyautu nidau ka bulia lain jak di tandau nabi Yunus. 12:40 Nabi Yunus mendam dalam peghut ikan tigau aghi tigau malam. Luak itula pulau Anak Manusiau ka mendam dalam tana tigau aghi. 12:41 Aghi kiamat jemau Niniwi ka diidupka serempak ngan jemau mbak kini, mangku ughangtu ka mburuakka jemau mbak kini, karnau ughangtu ngubai peremba'au jak di dusaunyau, masau ndengagh kici'an Yunus. Ngenian, diau adau di sini lebia besak jak di Yunus. 12:42 Aghi kiamat ratu jak di selatan ka diidupka serempak ngan jemau mbak kini, mangku diau ka mburuakka ughangtu, karnau ratu itu datang jak di ujung deniau endak ndengagh ajaghan Salumu diau bepengertian. Ngenian, diau adau di sini lebia besak jak di Salumutu." 12:43 "Amun rua ja'at ngeluagh jak di jemau, diau ngidari ghimbau ndalak bada gheghadu, anyautu endiak dapat. 12:44 Mangku diau bekatau, 'Aku endak ngulang agi ke ghuma diau kutinggalka tadi.' La sampai di situ, diau nginak ghumatu nidau betunggu, la beresia ngan alap. 12:45 Mangku diau pegi ngajak tujua kantinau diau lebia ja'at agi. Rua itu masuak mendam di ghumatu, mangku kesudimannyau jemautu lebia pansan jak di senitu. Luak itu pulau setu diau ka tejadi ngan jemau mbak kini." 12:46 Yesus gi ngiciak ngan jemau banyak itu, endu'Au ngan ading-beghadingAu datang betegak di luagh endak betemu ngan Diau. 12:47 Mangku adau jemau ngiciakka ngan Diau, kataunyau, "Mak Kaba ngan ading-beghading Kaba adau di luagh endak betemu ngan Kaba." 12:48 Yesus nimbali ughangtu, katauNyau, "Sapau makKu ngan sapau ading-beghadingKu?" 12:49 Mangku Diau nunjuakka anak-buaHau ngan bekatau, "Inila makKu ngan ading-beghadingKu! 12:50 Karnau jemau diau ngerjauka kendak BapakKu di sergau, ughang itula ading-beghadingKu ngan makKu."

Matius 13

13:1 Aghi itu pulau Yesus ngeluagh jak di ghuma itu, mangku pegi duduak di tepi danau. 13:2 Banyak nianan jemau datang bererumbungan njenguak Yesus, mangku Diau nayiak perawu ngan duduak di situ. Jemau banyak betegak di pulau. 13:3 Mangku Diau banyak ngajagh pakai cuntau ceritau. Diau bekatau, "Adau sughang tani pegi endak ngamburka benia. 13:4 Diau dang ngamburka benia, adau diau tumban di jalan, mangku burung datang makan beniatu enggut abis. 13:5 Adau pulau benia diau tumban di tana bebatu-batu diau dikit tanahau, mangku diau cepat tumbua, karnau tanahau dikit. 13:6 Anyautu aghi panas diau layu mangku njadi keghing, karnau akaghau nidau masuak. 13:7 Adau pulau benia diau tumban di pugan ghumput bedughi. Ghumputtu tumbua mangku ngincitka benia tadi enggut mati. 13:8 Mangku adau pulau benia diau tumban di tana iluak mangku bebua. Adau diau setangkai seratus butiak, adau diau enam pulua, adau diau tigau pulua." 13:9 Udim ngiciakka ceritau itu, Yesus bekatau agi, "Amun betelingau, dengaghkala!" 13:10 Mangku anak-bua Yesus datang betanyau ngan Diau, "Tuapau sebapau, amun Dighi ngiciak ngan jemau banyak, Dighi pakai cuntau?" 13:11 Katau Yesus, "Ngan kamu la dinyatauka resiau ngeruani Allah njadi rajau ngan kekuasauanNyau tapitu ngan ughangtu nidau. 13:12 Jemau diau la adau ka dienju'i lebia banyak agi, mangku diau ka belebihan. Anyautu jemau diau nidau bediau tuapau-apau, setu diau adau di diau ka diambiak pulau jak di diau. 13:13 Itula sebapau Aku pakai cuntau, amun ngiciak ngan jemau banyak, mangku empuak ughangtu nginak nidau kina'an, empuak ndengagh nidau kedengaghan ngan nidau terti. 13:14 Mangku ditepati kici'an nabi Yesaya, 'Allah bekatau, kamu maju ndengagh, anyautu nidau terti. Kamu maju nginak, anyautu nidau kina'an. 13:15 Karnau rupu'an ughangtu tekatup, telingau ughangtu la nuli, ngan matau ughangtu dipejamka. Mangku ughangtu jangan nginak, telingau ughangtu jangan ndengagh, ngan rupu'an ughangtu jangan tebukak, ngan jangan ngulang njenguak Aku, mangku Aku jangan meghaduka ughangtu.' 13:16 Riangla kamu, karnau kamu nginak nian ngan ndengagh nian. 13:17 Ingatkala, banyak nabi ngan jemau diau ta'at ngan Allah endak nginak setu diau kamu kinak, anyautu nidau kina'an. Ughangtu endak ndengagh setu diau kamu dengagh, anyautu nidau kedengaghan." 13:18 "Dengaghkala reti ceritau ngamburka benia tadi. 13:19 Benia diau tumban di jalan ibarat jemau diau ndengagh kici'an Allah endak merinta. Anyautu diau nidau ngerti. Mangku iblis datang merebuti setu diau la ditanam dalam atiau. 13:20 Benia diau tumban di tana bebatu-batu itu ibarat jemau diau ndengagh kici'antu, mangku diterimaunyau ngan riang. 13:21 Anyautu ceritautu endiak buakagh dalam atiau, mangku nidau beta'an lamau. Amun adau sengsarau ngan penanggungan karnau ceritau iluak itu, jemautu cepat ngelipat agi. 13:22 Benia diau tumban di pugan ghumput bedughi ibarat jemau diau ndengagh kici'an itu. Anyautu diau ghegak ngan idupau, endak idup lemak ngan riang ajau di deniau ini. Mangku kici'an tadi nidau pacak mendam di atiau, mangku endiak bebua. 13:23 Benia diau tumban di tana diau iluak ibarat jemau diau ndengagh ceritau itu, mangku ngerti. Itula sebapau diau bebua. Adau diau seratus kali, adau diau enam pulua, adau diau tigau pulua." 13:24 Yesus nceritauka agi ceritau ini ngan jemau banyak, katauNyau, "Amun Allah merinta, keadaannyau luak ini: Adau sughang jemau ngamburka benia diau iluak di umaunyau. 13:25 Adau semalam jemau dang tiduak galau, musua datang ngamburka benia lalang di pugan padi tadi mangku pegi. 13:26 Mangku tanaman itu tumbua. Diau la ngeluagh, kina'an pulau lalang. 13:27 Mangku anak-buahau datang njenguak jemau tadi ngan bekatau, 'Pak, ukan dighi ngamburka benia diau iluak di umau dighi? Jak di manau lalang itu?' 13:28 Jemautu nimbal, 'Itu kerjau musua.' Mangku anak-buahau betanyau, 'Dighi ngajung kami pegi ncabut lalang itu?' 13:29 'Jangan!' kataunyau, 'Karnau amun lalang dicabut, nanti padi ka tecabut pulau. 13:30 Nengkela lalangtu tumbua serempak ngan padi enggut ngetam. Nanti aku ka ngajung jemau diau ngetaminyau. Tunggalka kudai lalangautu, kebatkala mangku disilap. Udim itu tunggalka padiau masuakka dalam tengkiang.' " 13:31 Yesus ngiciakka ceritau lain agi ngan ughangtu, katauNyau, "Amun Allah merinta, keadaannyau luak ini: Sebutiak ijat jawi diambiak jemau mangku ditanamka di umaunyau. 13:32 Nyela, mulantu keciak sekali, anyautu amun tumbua, diau njadi batang besak, mangku burung-burung mbuat saghang di cangkahau." 13:33 Mangku Diau ngiciakka ceritau ini pulau ngan ughangtu, "Amun Allah merinta, keadaannyau luak ghagi diau diambiak sughang tinau, diundakka ngan ghebuak sebantal enggut gegalaunyau kembang." 13:34 Gegalaunyautu diajaghka Yesus pakai cuntau. Mangku amun nidau pakai cuntau, nidau dikiciakkaNyau ngan ughangtu. 13:35 Mangku ditepati kici'an nabi ini, "Aku pakai cuntau ceritau, amun ngiciak ngan ughangtu. Aku ka ngiciakka setu diau nidau dikeruani jak deniau adau." 13:36 Udim itu Yesus ninggalka jemau banyak itu mangku masuak ghuma. Anak-buaHau njenguak Diau ngan bekatau, "Cubau Dighi kiciakka ngan kami reti ceritau lalang di pugan padi tadi." 13:37 Mangku katau Yesus, "Jemau diau ngamburka benia diau iluak ibarat Anak Manusiau. 13:38 Umau itu deniauni. Benia diau iluak itu jemau diau njadi umat Allah. Lalang itu jemau diau ngikut carau Iblis. 13:39 Musua diau ngamburka benia lalang itu Iblis. Masau ngetam aghi kiamat, mangku jemau diau ngetam itu malaikat-malaikat. 13:40 Mangku luak lalangtu ditunggalka ngan disilap dalam api, luak itu pulau aghi kiamat nanti. 13:41 Anak Manusiau ka ngajung malaikatAu nunggalka gegalaunyau diau mbuat jemau bedusau ngan gegalaunyau diau ngerjauka setu diau ja'at jak di umatAu. 13:42 Gegalaunyautu ka dicapakka dalam api nerakau. Di situ ughangtu ka nangis ngan nerinit gigi. 13:43 Masau itu jemau diau ngerjauka kendak Allah ka besinagh luak matau-aghi di deniau empai diau dienjuakka Allah, Bapak ughangtu. Amun betelingau, dengaghkala!" 13:44 "Amun Allah merinta luak rajau, keadaannyau luak ceritau ini: Adau retau diau tependam dalam tana, mangku adau jemau diau ndapatau, dimasuakka agi. Mangku karnau riang nian diau pegi njual gegalau retaunyau mangku mbeli tana itu." 13:45 "Amun Allah merinta luak rajau, keadaannyau luak ceritau ini: Adau sughang pedagang diau ndalak mutiara diau alap. 13:46 Satu diau dapat mutiara diau beregau nian, diau pegi cecepat njual gegalau retaunyau mangku mbeli mutiara diau sutiak itu." 13:47 "Amun Allah merinta luak rajau, keadaannyau diumpamauka ngan jalau diau dikipaska dalam laut, mangku dapat serbau mecam ikan. 13:48 Jalautu la penua, ditaghiak ke daghat, mangku jemaunyau duduak nunggalka ikan diau iluak dalam kinjagh, ikan diau nidau iluak dicapakka. 13:49 Luak itu pulau masau kiamat malaikat-malaikat ka pegi ngasingka jemau diau ja'at jak di jemau diau ngerjauka kendak Allah. 13:50 Mangku jemau ja'attu ka dicapakka dalam api nerakau. Di situla ughangtu ka nangis ngan sengsarau." 13:51 Yesus betanyau, "Apu kamu ngerti gegalaunyautu?" "Ngerti, Pak." katau ughangtu. 13:52 Mangku Yesus bekatau, "Itula sebapau bilang guru ukum Taurat diau la njadi angguta umat Allah luak sughang tuan ghuma diau ngeluaghka dandanan empai ngan diau lamau jak di bada retaunyau." 13:53 La udim Yesus nceritauka gegalau ceritau itu, Diau pegi jak di situ. 13:54 Diau baliak ke bada asalau. Di situ Diau ngajagh di ghuma sembayang. Jemau diau ndengaghkaNyau kemangan ngan bekatau, "Jak di manau Diau dapat pengertian itu ngan kuasau mbuat tandau nyelia? 13:55 Ukanau Diauni anak tukang kayu? Ukanau Mariatu endu'Au ngan ading-beghadingAu Yakubus, Yusup, Simun ngan Yudas? 13:56 Ukanau kelawaiAu mendam di sini pulau? Jak di manau Diau dapat gegalaunyautu." 13:57 Mangku ughangtu keciwau ngan nidau nerimau Yesus, mangku Diau bekatau ngan ughangtu, "Sughang nabi diregaui di manau-manau, amun ukan di dusunau ngan di ghumahau." 13:58 Ughangtu nidau percayau mangku Diau nidau banyak mbuat tandau nyelia.

Matius 14

14:1 Masau itu rajau Herudis nguasaui daira itu. Mangku diau ndengagh ceritau Yesus. 14:2 Katau Herudis ngan anak-buahau, "La cetau Yuhanis Pembaptis la ngulang idup. Itula sebapau kuasauNyau luak itu ngerjauka gegalaunyautu." 14:3 Antak ka itu Herudis la ngajung nangkap Yuhanis, dighimpus ngan dimasuakka di jil. Herudis ngerjauka titu, karnau Herudias, bini Pilipus, kaka'au. 14:4 Karnau Yuhanis negughi Herudis, kataunyau, "Nidau bulia dighi nika ngan Herudias." 14:5 Herudis endak mbunua Yuhanis, anyautu diau takut ngan jemau, karnau ughangtu nganggap Yuhanis nabi. 14:6 Masau Herudis ulang taun, anak gadis Herudias nari di mukau mendahau. Tariannyau meriangka ati Herudis. 14:7 Mangku Herudis bejanji ngan diau ngan sumpa setu diau enda'au ka dienjuakkanyau. 14:8 Mangku karnau diajung endu'au, gadistu bekatau, "Aku mintak palak Yuhanis Pembaptis dienjuakka ngan aku mbak kini di dalam talam." 14:9 Ndengagh pinta'an itu Herudis bingung. Anyautu karnau la besumpa di mukau mendahau diajungau, supayau pinta'an gadistu dibulihi. 14:10 Diau ngajung anak-buahau pegi ke jil endak mancung liagh Yuhanis. 14:11 Mangku palak Yuhanistu dibatak masuak, ditepiakka dalam talam, dienjuakka ngan gadis itu, mangku gadistu ngenjuakkanyau ngan endu'au. 14:12 Udim itu anak-bua Yuhanis ngambiak mayatau mangku dikuburkanyau. Udim itu ughangtu pegi ngiciakkanyau ngan Yesus. 14:13 Udim ndengagh ceritau itu, Yesus nayiak perawu ninggalka bada itu endak pegi sughang ke bada diau suni. Anyautu jemau banyak ndengagh itu, mangku ughangtu ninggalka dusunau pegi nuruti Yesus jalan daghat. 14:14 Satu Yesus tughun jak di perawu ngan nginak jemau banyak itu, Diau sial ngan ughangtu, mangku dighadukaNyau jemau diau buidapan. 14:15 Aghitu la petang, anak-buaHau njenguak Yesus, ngan bekatau, "Aghi la petang, bada ini suni. Ajungla jemau banyak ini pegi, mangku ughangtu pacak mbeli makanan di dusun." 14:16 "Nidau nanti ughangtu pegi." Katau Yesus, "Kamunila ngenju'i ughang ini makan." 14:17 Anak-buaHau bekatau, "Diau adau di kami cuman limau bua ruti ngan ikan duau ikuak." 14:18 "Batak ke sini." Katau Yesus. 14:19 Mangku diajungAu jemau banyaktu duduak di ghumput. Udim itu Diau ngambiak limau bua ruti ngan duau ikuak ikan tadi, mangku ncungak ke langit sampai bedu'a beterimau-kasia, mangku dipiyak-piya'Au rutitu, dienjuakkaNyau ngan anak-buaHau, mangku diagiakanyau ngan jemau banyak itu. 14:20 Gegalau ughangtu makan enggut kenyang. Udim itu anak-buaHau nunggalka tigha ruti tadi, duau belas kinjagh penua. 14:21 Jemau diau makan kekirau limau ribu ughang, lum temasuak jemau tinau ngan budak keciak. 14:22 Mangku Yesus ngajung anak-buaHau nayiak perawu nduluiNyau ke beghang sanau, penarau Diau ngajung jemau banyak baliak. 14:23 La udim diajungAu jemau banyaktu baliak, Yesus nayiak bukit endak bedu'a sughang. Aghi la malam, Diau sughang di situ. 14:24 Perawu anak-buaHau la jawua jak di tepi, dibanting-bantingka umbak, karnau angin belawanan jak di adapan. 14:25 Antak ka paghak siang Yesus datang njenguak anak-buaHau tadi bejalan di atas ayiak. 14:26 Satu anak-buaHautu nginak Diau bejalan di atas ayiak, ughangtu tegagau. "Itu antu!" Ughangtu tegauk-gauk karnau takut. 14:27 Anyautu Yesus ngiciak, katauNyau, "Tenangla ajau. Nidau nanti takut, ini Aku." 14:28 Mangku Pitrus nimbal, kataunyau, "Amun Dighitu nyela nian, Tuhan, ajungla aku njenguak Dighi bejalan di atas ayiakni!" 14:29 Katau Yesus, "Mela, ke sini!" Mangku Pitrus tughun jak di perawu ngan bejalan di atas ayiak njenguak Yesus. 14:30 Anyautu satu teghasau angin deghas, diau penakut, diau mulai tebenak mangku tegauk, "Tulung aku, Tuhan!" 14:31 Mangku Yesus cecepatan nyurungka tanganAu ngan ngecakkanyau, katauNyau, "Ui, kaba nidau percayau nian. Ngapau kaba asau-asau?" 14:32 La udim itu ughang duautu nayiak perawu, mangku angin mandak. 14:33 Mangku jemau diau adau di perawu nyemba Yesus, kataunyau, "Nyela nian, Dighila Anak Allah!" 14:34 La sampai di beghang danautu, ughangtu ndaghat di Genesarit. 14:35 Satu jemau di situ nginak, bansau diau datangtu Yesus, ughangtu nyiarka ceritau itu di gegalau dairatu. Mangku gegalau jemau buidapan dibatak guak Yesus. 14:36 Ughangtu mintak, supayau bulia nginggut bajuAu, empuak cuman ujungau ajau. Mangku gegalau jemau diau nginggutau ghadu.

Matius 15

15:1 Adau rumbungan jemau Parisi ngan guru agamau. Ughangtu datang jak di Yerusalim njenguak Yesus ngan betanyau ngan Diau, 15:2 "Ngapau pulau anak-bua Kaba melanggar adat lembagau niniak puyang kitau? Ughangtu nidau bebasua tangan nurut peraturan antak ka makan." 15:3 Timbal Yesus, "Ngapau pulau kapu dighi melanggar perinta Allah, cuman karnau endak ngikuti adat lembagau kapu dighi? 15:4 Allah bekatau, 'Regauila enduak-bapak', lagi 'Jemau diau ndawaika pejadiau mesti diukum mati.' 15:5 Anyautu kapu dighi ngajaghka, 'Amun jemau bekatau ngan pejadiau, tanci diau semestiau dienjuakka ngan bak ngan mak la kuenjuakka ngan Allah, 15:6 mangku jemautu nidau diajung agi meregaui mak ngan bak.' Ngan carau luak itu kapu dighi nidau nyanauka katau Allah karnau adat lembagau niniak puyang kapu dighi. 15:7 Kapu dighi jemau cak alim! Ngenian diau dikiciakka nabi Yesaya ceritau kapu dighitu, 15:8 'Luak ini katau Allah, bangsau ini meregaui Aku cuman di mulut, anyautu ati ughangtu nidau terupuak Aku. 15:9 Melata ajau ughangtu nyemba Aku. Ajaghan diau ughangtu ajaghka katau manusiau ajau.' " 15:10 Mangku Yesus mantau jemau banyak ngan bekatau, "Dengaghkala mangku ngerti! 15:11 Diau masuak ke mulut nidau ngaramka jemau. Anyautu diau ngeluagh jak di mulut, itula diau mbuat jemau aram." 15:12 Mangku anak-bua Yesus datang ngan betanyau ngan Diau, "Apu Dighi keruan, bansau jemau Parisi purik karnau Dighi ngiciak luak itu?" 15:13 Yesus nimbal, "Bilang tanaman diau nidau ditanam Bapakku di sergau ka dicabut ngan akaghau. 15:14 Nengkela ughangtu. Ughangtu luak jemau butau diau mapa jemau butau. Amun jemau butau mapa jemau butau, cetau ughang duautu ka telabua masuak pelubang." 15:15 Mangku Pitrus bekatau, "Tulung retika umpamau itu ngan kami." 15:16 Yesus nimbal, "Kamu lum pulau terti? 15:17 Nidau keruan ngan kamu, bansau setu diau masuak ke dalam mulut tughun dalam busung, mangku ngeluagh agi? 15:18 Anyautu setu diau ngeluagh jak di mulut asalau jak di ati. Itula diau mbuat jemau aram. 15:19 Karnau jak di ati nimbul gegalau rupu'an ja'at, diau mbuat jemau mbunua, menaugawia ngan kerjau ja'at diau lain, maling, ngiciakka setu mbu'ung ngan nggelakka jemau. 15:20 Itula diau ngaramka jemau, ukan makan nidau bebasua tangan." 15:21 Udim itu Yesus ninggalka bada itu pegi ke daira Tirus ngan Sidun. 15:22 Mangku adau sughang tinau Kanaan datang njenguak Diau sampai bekatau, "Tuhan, anak Daud, sialkala aku. Anak gadisku diarung iblis. Diau nanggung nian." 15:23 Yesus nidau nimbali tinau itu dikit kiala. Mangku anak-buaHau njenguak Diau ngan bekatau, "Ajungla tinau itu pegi. Diauni maju ngikut kitau ngan tegauk-gauk." 15:24 Mangku Yesus bekatau ngan tinau tadi, "Aku diajung njenguak jemau sesat jak di jemau Israil ajau." 15:25 Tinautu datang nunduak nyemba Diau sampai bekatau, "Tulung aku, Tuhan." 15:26 Anyautu Yesus nimbal, "Nidau iluak ngambiak makanan budak keciak, disipatka ngan anjing." 15:27 "Nyela, Tuhan," katau tinautu, "Anyautu anjing pulau makan ghima diau tumban jak di mija tuanau." 15:28 Mangku katau Yesus, "Ui, dighi percayau nian. Tejadila setu diau dighi kenda'i." Masau itu pulau ana'au ghadu. 15:29 La udim ninggalka daira itu, Yesus pegi bejalan di tepi danau Galilia. Diau nayiak bukit mangku duduak di situ. 15:30 Banyak nianan jemau datang bererumbungan njenguak Diau mbatak jemau lumpua, jemau cingkung ngan kincut, jemau butau, jemau bisu ngan banyak diau buidapan lain, ditepiakkanyau guak keting Yesus, mangku dighaduiNyau gegalau ughangtu. 15:31 Mangku jemau banyak diau adau di situ kemangan nginak jemau bisu pacak ngiciak, jemau cingkung ngan kincut ghadu, jemau lumpua pacak bejalan ngan jemau butau pacak nginak, mangku ughangtu ngagungka Allah jemau Israil. 15:32 Mangku Yesus mantau anak-buaHau ngan bekatau, "Aku sial nginak jemau banyak ini. La tigau aghi ughangtu ngikut Aku, mbak kini nidau bediau makanan. Aku enggup ngajung ughangtu baliak ngan lapagh, kalu tebandam di jalan." 15:33 Anak-buaHau betanyau, "Luak manau kitau pacak dapat makan batan endak jemau banyak luak ini di bada diau sudut ini?" 15:34 Yesus betanyau, "Beghapau ruti adau ngan kamu?" "Tujua bua ruti," timbal ughangtu, "Ngan bebeghapau ikan keciak." 15:35 Mangku Yesus ngajung jemau banyak itu duduak di tana. 15:36 Udim itu Diau ngambiak tujua ruti ngan ikan tadi, beterimau-kasia ngan Allah, dipiyak-piya'Au, dienjuakkaNyau ngan anak-buaHau, mangku anak-buaHautu ngagiakanyau ngan jemau banyak itu. 15:37 Gegalau ughangtu makan enggut kenyang. Mangku tigha ruti ditunggalka, tujua kinjagh banya'au. 15:38 Jemau lanang ajau diau makan masau itu empat ribu ughang, lum temasuak jemau tinau ngan budak keciak. 15:39 Udim itu Yesus ngajung jemau banyak itu baliak. Diau nayiak perawu pegi ke daira Magadan.

Matius 16

16:1 Adau bebeghapau jemau Parisi ngan jemau Saduki datang njenguak Yesus endak ncubaui Diau. Ughangtu mintak, supayau Diau mbuat tandau nyelia batan endak mbuktika, bansau Diau datang jak di Allah. 16:2 Yesus nimbal, "Amun matau-aghi la umban ngan langit abang, kapu dighi bekatau, 'Aghi ka iluak.' 16:3 Mangku akap-akap, amun langit ghenung, kapu dighi bekatau, 'Aghi ini ka ujan.' Langit pacak kapu dighi bidaka, tandau saman nidau pacak kapu dighi keruani. 16:4 Alaka ja'at ngan jeditau jemau mbak kini. Kapu dighi mintak Aku mbuat tandau nyelia. Anyautu kamu nidau ka dienjuakka sutiak kia tandau nyelia, lain jak di tandau nabi Yunus." Udim ngiciak luak itu, Yesus pegi ninggalka ughangtu. 16:5 Masau anak-bua Yesus nyembeghang danau, ughangtu nidau teghingat mbatak ruti. 16:6 Yesus bekatau ngan ughangtu, "Sepepadaula ngan bejagaula ngan ghagi jemau Parisi ngan jemau Saduki." 16:7 Ndengagh titu, ughangtu mulai ngiciak sughang ngan diau lain, "Diau ngiciak luak itu, karnau kitau nidau mbatak ruti." 16:8 Yesus keruan setu diau ughangtu kiciakka, Diau bekatau, "Ngapau kamu ngiciakka nidau bediau ruti? Kamu nidau percayau nian. 16:9 Masia lum terti kamu? Apu kamu nidau teghingat agi limau ruti batan endak limau ribu ughang, beghapau kinjagh tigha ruti diau kamu tunggalka? 16:10 Luak manau pulau ngan tujua ruti batan endak empat ribu ughangtu, beghapau kinjagh tigha kamu tunggalka? 16:11 Ngapau kamu nidau terti, bansau Aku ukanau ngiciakka ruti ngan kamu? Diau Kukatauka, 'Sepepadaula ngan ghagi jemau Parisi ngan jemau Saduki.' " 16:12 Mangku anak-buaHau pulau ngerti, bansau Yesus ngajung ughangtu sepepadau ukanau ngan ghagi ruti, tapitu ngan ajaghan jemau Parisi ngan jemau Saduki. 16:13 Yesus la sampai di daira Kaisaria Pilipi. Di situ Diau betanyau ngan anak-buaHau, "Katau jemau, sapau Anak Manusiau?" 16:14 Ughangtu nimbal, "Adau diau bekatau, 'Yuhanis Pembaptis.' Adau diau ngiciakka, 'Elia.' Adau pulau diau bekatau, 'Yeremia' ngan 'Sughang jak di nabi.' " 16:15 Mangku Yesus betanyau ngan ughangtu, "Pendapat kamutu, sapau Akuni?" 16:16 Simun Pitrus nimbal, "Dighila Almasih, Rajau Penyelamat, Anak Allah diau idup." 16:17 Katau Yesus ngan diau, "Riangla kaba Simun anak Yuna, karnau ukan manusiau diau ngiciakka titu ngan kaba, tapitu Bapakku diau di sergau. 16:18 Ingatkala, kabatu Pitrus, mangku di pucuak batu pelapiak ini Aku ka negakka umatKu. Diau nidau pacak dikalaka, empuak maut. 16:19 Kaba ka dienjuakka kunci sergau. Setu diau ka kaba tegahi di deniauni ka ditegahi pulau di sergau. Setu diau ka kaba benaghka di deniauni ka dibenaghka pulau di sergau." 16:20 Mangku Yesus nidau nian ngajung ughangtu ngiciakka ngan jemau, bansau Diaula Rajau Penyelamat. 16:21 Jak masau itu Yesus mulai ngiciakka ngan anak-buaHau, bansau Diau mesti pegi ke Yerusalim, mangku meghasauka banyak penanggungan jak di pengulu-pengulu, imam-imam bepangkat tinggi ngan guru-guru ukum Taurat. Diau mesti dibunua, mangku la duau malam Diau ka idup agi. 16:22 Mangku Pitrus ngajung Yesus ke peridingannyau, nengul Diau, kataunyau, "Tuhan, Allah njawuaka titu! Jangan titu sampai tejadi ngan Dighi." 16:23 Yesus nulia mangku bekatau ngan Pitrus, "Laratla iblis! Kaba ngalangi Aku. Rupu'an kabatu rupu'an manusiau, ukan rupu'an Allah." 16:24 Mangku Yesus ngiciak ngan anak-buaHau, katauNyau, "Bilang jemau diau endak ngikut Aku jangan ndalak jalan idup batan endak diau sughang. Diau mesti mikul salipau, mangku maju ngikut Aku. 16:25 Karnau jemau diau endak ngilakka nyawaunyau ka kelengitan nyawaunyau. Jemau diau kelengitan nyawaunyau karnau Aku ka selamat. 16:26 Tuapau untungau, amun jemau bulia gegalau deniau njadi retaunyau, anyautu diau ka benasau? Tuapau diau pacak ditukarka batan endak nyawaunyau? 16:27 Karnau Anak Manusiau ka datang agi nanti ngan kuasau Bapa'Au, dikantini malaikatmalaikatAu. Masau itu Diau ka mbalas bilang jemau nurut kerjaunyau. 16:28 Keruanila, jak di kamuni di sini adau diau nidau ka mati, amun lum nginak Anak Manusiau datang luak rajau."

Matius 17

17:1 Enam aghi udim itu, Yesus mbata'i Pitrus, Yakubus ngan adingau Yuhanis ndaki gunung diau tinggi. Di situ ughangtu ajau. 17:2 Di adapan ughang tigautu Yesus beghuba. DayiAu njadi terang luak matau-aghi ngan bajuAu njadi putia besinagh. 17:3 Mangku kina'an ughang duau, diautu Musa ngan Elia. Ughang duautu ngiciak ngan Yesus. 17:4 Pitrus ngiciak ngan Yesus, kataunyau, "Tuhan, lemak nian kitau di bada ini. Amun Dighi endak, aku negakka tigau bua punduk di sini, sebua batan endak Dighi, sebua batan endak Musa, sebua batan endak Elia." 17:5 Diau gi ngiciak luak itu, adau aban terang tughun ngan mbayangi ughangtu, mangku jak di dalam aban itu tedengagh suarau diau bekatau, "Inila AnakKu diau Kusayangi. Diau melemakka atiKu. Dengaghkala Diautu." 17:6 Ndengagh suarau itu, anak-bua Yesus nunduak sampai ke tana karnau penakut nian. 17:7 Anyautu Yesus njenguak ughangtu, dikecakkaNyau sampai bekatau, "Betegakla, nidau nanti penakut!" 17:8 Satu ncega, ughangtu nidau kina'an sughang kiala lain jak di Yesus. 17:9 Masau ughangtu tughun jak di gunung itu, Yesus ngiciak ngan ughangtu, "Jangan kamu kiciakka ngan sughang kia setu diau kamu kinak tadi, amun Anak Manusiau lum ngulang idup agi." 17:10 Mangku anak-buaHau betanyau ngan Diau, "Amun luak itu, ngapau guru-guru ukum Taurat ngajaghka, bansau Elia mesti dulu datang?" 17:11 Yesus nimbal, "Nyela, Elia datang, mangku diau nyiapka gegalaunyau. 17:12 Keruanila, Elia la datang. Anyautu jemau nidau keruan diau. Ughangtu mbuati diau sekenda'au ajau. Luak itu pulau Anak Manusiau ka dibuati ughangtu." 17:13 Mangku anak-bua Yesus ngerti, bansau Diau ngiciakka Yuhanis Pembaptis. 17:14 Yesus ngan anak-buaHau la ngulang guak jemau banyak, adau sughang datang nunduak nyemba Yesus, 17:15 kataunyau, "Pak, sialkala anakku. Diau buidapan gilau bangkai, la pansan nian. Diau rajin rubua temasuak di api ngan di ayiak. 17:16 Aku la mbata'i diau njenguak anak-bua Dighi, anyautu ughangtu nidau pacak meghadukanyau." 17:17 Katau Yesus, "Ui, kamuni jemau nidau percayau lagi sesat. Lamau beghapau agi Aku mesti guak kamu? Lamau beghapau agi Aku mesti ngaligh ngan kamu? Batakla anak itu ke sini!" 17:18 Yesus mbentak diau, mangku rua ja'attu keluagh jak di diau. Masau itu pulau anak itu ghadu. 17:19 Udim itu anak-buaHau datang njenguak Yesus sughang ngan betanyau ngan Diau, "Tuapau sebapau kami nidau pacak melaratka iblis tadi?" 17:20 Diau nimbali ughangtu, "Karnau kamu nidau percayau nian. Ingatkala, amun kamu adau iman sebesak ijat sawi ajau, kamu pacak ngajung gunung ini, 'Ngaliala jak di sini ke situ.' Cetau gunung ini ka ngalia. Nidau bediau setu diau nidau pacak kamu buat. 17:21 Anyautu iblis diau luak itu cuman pacak dilaratka karnau du'a ngan puasau." 17:22 Masau Yesus ngan anak-buaHau betunggal di Galilia, Diau ngiciak ngan ughangtu, katauNyau, "Anak Manusiau laka diseraka dalam tangan manusiau. 17:23 Diau ka dibunua, mangku udim duau malam Diau ka idup agi." Mangku anak-buaHau bingung nian. 17:24 Yesus ngan anak-buaHau la sampai di Kapernaum, mangku tukang tagia cuki Ghuma Allah datang njenguak Pitrus ngan betanyau, "Apu guru kaba ukan mbayighi cuki Ghuma Allah?" 17:25 Diau nimbal, "Nyela!" Pitrus la baliak ke ghuma, Yesus betanyau, "Luak manau pendapat kaba? Sapau diau mbayighi cuki ngan rajau di deniau ini, apu anak-buahau, apu jemau lain?" 17:26 Timbal Pitrus, "Jemau lain." Mangku katau Yesus, "Amun luak itu, anak-buahau nidau mbayigh. 17:27 Tapitu jangan kitau nyinggung jemau. Pegila mancing ke danau. Mangku ikan diau bulia dulu sekali, ambiakla, bukakla mulutau. Di mulutautu kaba ka bulia tanci batan endak mbayighi cuki kitau duau. Ambiakla tancitu ngan bayighla cuki kitau duau batan endak Ghuma Allah."

Matius 18

18:1 Masau itu anak-bua Yesus njenguak Diau ngan betanyau, "Sapau diau penting sekali di guak umat Allah?" 18:2 Yesus mantau sughang budak keciak, diajungAu betegak di adapan ughangtu, 18:3 mangku bekatau, "Percayaula kamu nidau pacak njadi umat Allah, amun nidau beghuba njadi luak budak keciak. 18:4 Jemau diau ngensianka diriau, njadi luak budak keciak ini, diaula penting sekali di guak umat Allah. 18:5 Jemau diau nerimau sughang budak keciak luak diauni karnau Aku diautu nerimau Aku." 18:6 "Jemau diau nyesatka sala sughang jak di budak keciak diau percayau ini, iluakla digerintungka batu besak di liaghau, mangku dicapakka ke laut. 18:7 Celakaula deniau ini ngan gegalaunyau diau nyesatka jemau. Nyela, pencubauan cengki ka adau, anyautu celakaula jemau diau nyebapkanyau. 18:8 Mangku amun tangan ngan keting kaba mbuat kaba bedusau, tetakla ngan capakkala. Iluakla kaba idup ngan tangan ngan keting sebela sangkan dicapakka dalam api nerakau ngan duau tangan ngan duau keting. 18:9 Amun matau kaba mbuat kaba bedusau, cungkilla ngan capakkala matau itu. Iluakla kaba idup ngan Allah ngan sebela matau sangkan dicapakka dalam api nerakau ngan duau matau. 18:10 Ingatkala, mangku kamu jangan nggelakka sala sughang jak di budak keciak ini, karnau malaikatau maju adau di adapan BapakKu di sergau. 18:11 Karnau Anak Manusiau datang endak nyelamatka jemau diau sesat." 18:12 "Tuapau pendapat kamu? Misalau adau sughang diau adau seratus ikuak bebiri, mangku lengit sikuak, tuapau diau ka dibuat jemau itu? Cengki diau ka ninggalka bebiriau diau sembilan pulua sembilan itu di bukit, mangku pegi ndala'i diau lengit itu. 18:13 Mangku amun bebiritu la dapat agi, percayaula, riangla diau karnau bebiri diau lengit tadi sangkan bebiri diau sembilan pulua sembilan diau nidau lengit. 18:14 Luak itu pulau Bapak kamu di sergau enggup sala sughang jak di budak keciak ini benasau." 18:15 "Misalau kantin kaba besala ngan kaba, tegughila diau nidau bediau jemau ndengagh. Amun diau nurut kici'an kaba, mangku kaba la buasil mbatak diau ngulang njenguak Allah. 18:16 Amun diau enggup, batakla sughang apu duau ughang agi, karnau dalam Injil ditulis, 'Senidaunidaunyau adau duau tigau ughang batan endak mbuktika jemau besala.' 18:17 Amun diau enggup nerimau kici'an jemau tadi, kiciakkala ngan kumpulan jemau Keristen. Amun diau pulau nidau nerimau kici'an ughangtu, anggapla diau luak jemau diau nidau keruan Allah ngan tukang tagia cuki. 18:18 Keruanila, setu diau kamu larang di deniau ini ka dilarang pulau di sergau. Mangku setu diau kamu benaghka di deniau ka dibenaghka pulau di sergau. 18:19 Keruanila pulau, amun duau ughang jak di kamu di deniauni la sepakat endak mintak tuapau kila, pinta'an itu ka dibulihi BapakKu diau di sergau. 18:20 Karnau di manau duau tigau ughang betunggal bedu'a dalam namauKu, Aku adau di guak ughangtu." 18:21 Mangku Pitrus njenguak Yesus ngan betanyau, "Tuhan, amun kantinku besala ngan aku, enggut beghapau kali aku mesti ngabiska salahau? Apu tujua kali?" 18:22 Yesus nimbal, "Nidau, ukan tujua kali, tapitu tujua pulua kali tujua kali. 18:23 Karnau amun Allah merinta, umpamau sughang rajau diau endak mbirisi utang anak-buahau. 18:24 Satu diperisau, diadapka ngan diau sughang anak-buahau diau beghutang ratusan juta. 18:25 Karnau jemautu nidau pacak mbayighi utangau, mangku rajau merintaka, supayau diau dijual serempak ngan anak-biniau ngan gegalau retau-bendaunyau batan pembayigh utangautu. 18:26 Anak-buahau itu nunduak sampai di tana nyemba rajau. 'Tunggu kudai, Rajau!' kataunyau, 'Utangku ka kubayighi galau.' 18:27 Mangku rajautu sial ngan anak-buahau tadi, mangku diau dibuliaka baliak, utangau diabiskanyau galau. 18:28 Anyautu anak-buahau itu pegi jak di rajau tadi, mangku betemu ngan sughang kantinau, diau beghutang ngan diau cuman puluan ribu, dikecakkanyau, dipicitau kantinautu, kataunyau, 'Bayighila galau utang kaba ngan aku!' 18:29 Mangku kantinautu nunduak ngiciak ngan diau, 'Tunggu kudai!' kataunyau, 'Utangku ka kubayighi galau.' 18:30 Anyautu diau nidau nerimaunyau, mangku diserakanyau kantinau tadi di jil enggut utangau dibayighi galau. 18:31 Ngina'autu kantin-kantin diau lainau bingung nian, mangku dikiciakkanyau ngan rajau setu diau dibuatautu. 18:32 Rajau itu ngajung mantau anak-buahau tadi, mangku ngiciakka ngan diau, 'Ui, kabani ja'at nianan. Gegalau utang kaba la kuabiska galau, nidau mintak dibayighi, karnau kaba mintak ngan aku. 18:33 Sepantasau kaba nyialka kantin kaba, luak aku la nyialka kaba.' 18:34 Mangku rajautu mara nian ngan anak-buahautu, dimasuakkanyau ke jil enggut gegalau utangau dibayighinyau galau." 18:35 Mangku Yesus ngudimi ceritaunyau ngan katau ini, "Luak itu pulau BapakKu di sergau ka mbuati kamu, amun kamu nidau ngabiska sala kantin kamu nian."

Matius 19

19:1 La udim ngiciakka gegalaunyautu, Yesus ninggalka Galilia pegi ke Yudia di beghang ayiak Yurdan. 19:2 Jemau banyak ngikut Diau, mangku Diau meghadui ughangtu di situ. 19:3 Mangku jemau Parisi datang endak nguji Diau ngan betanyau, "Apu bulia jemau nyagha'i biniau ngan kenda'au ajau?" 19:4 Yesus nimbal, "Apu kapu dighi lum mbacau dalam Injil, bansau empai penembai Allah mbuat manusiau, dibuatAu lanang ngan tinau. 19:5 Mangku katau Allah, 'Itula sebapau jemau lanang ka ninggalka enduak-bapa'au endak seghundak ngan biniau, mangku ughang duautu njadi sutiak.' 19:6 Mangku ughangtu ukan agi duau tapitu sutiak. Karnau itu setu diau disatuka Allah nidau bulia disagha'i manusiau." 19:7 Mangku jemau Parisi betanyau agi, "Amun luak itu, ngapau Musa ngajung jemau ngenjuakka surat saghak ngan biniau, amun biniau disagha'i?" 19:8 Katau Yesus, "Musa mbuliaka kamu nyagha'i bini, karnau kamu segau diajagh. Anyautu jak di penembai nidau luak itu. 19:9 Dengaghkala ini, jemau diau nyagha'i biniau, empuak biniautu nidau bebuat ja'at, mangku nika ngan tinau lain, jemautu menaugawia." 19:10 Mangku anak-buaHau bekatau, "Amun luak itu ceritau jemau belaki bebini, iluakla nidau nanti nika." 19:11 Yesus nimbal, "Nidau gegalau jemau pacak nerimau kici'an ini, cuman jemau diau dienjuakka Allah pengertian. 19:12 Adau jemau nidau pacak nika, karnau lahir luak itu. Adau pulau diau nidau pacak nika, karnau dibuat jemau lain luak itu. Adau pulau diau milia nidau endak nika, mangku pacak bekerjau batan endak Allah. Jemau diau pacak nerimau ajaghan ini, nengkela diau nerimaunyau." 19:13 Mangku adau jemau diau mbatak anak-ana'au diau gi keciak njenguak Yesus, supayau Diau natap budak-budak keciaktu ngan ndu'aka ughangtu. Anyautu anak-buaHau marai ughangtu. 19:14 Anyautu Yesus bekatau, "Nengkela budak-budak keciak datang njenguak Aku. Jangan dialangi, karnau jemau luak inila Allah pacak njadi rajau dalam idupau." 19:15 Mangku Diau nepiakka tanganAu di palak budak keciaktu, didu'akaNyau. Mangku Diau pegi jak di situ. 19:16 Adau sughang jemau datang njenguak Yesus ngan betanyau, "Pak guru, kerjau diau iluak luak manau diau mesti kukerjauka, mangku aku bulia idup selelamaunyau?" 19:17 Timbal Yesus, "Ngapau kaba betanyau ngan aku kerjau diau iluak? Cuman sutiak diau iluak. Amun kaba endak idup, kaba mesti nuruti perinta Allah." 19:18 Jemau itu betanyau, "Perinta diau manau?" Yesus nimbal, "Jangan mbunua, jangan menaugawia, jangan maling, jangan mbu'ung, 19:19 regauila enduak-bapak kaba, mangku sayangila kantin kaba luak kaba nyayangi diri kaba." 19:20 "Gegalaunyautu la kuturuti." Katau jemau itu, "Tuapau agi?" 19:21 Yesus bekatau, "Amun kaba endak njadi iluak nian, pegila, jualkala gegalau retau kaba, enjuakkala tanciautu ngan jemau serik, mangku kaba ka bulia retau di sergau. La udim itu datangla ke sini ngikut Aku." 19:22 Ndengagh kici'anNyautu jemau mudau itu pegi ngan bingung, karnau diau kayau nian. 19:23 Mangku Yesus ngiciak ngan anak-buaHau, "KatauKuni benagh, segau nian jemau kayau nerimau Allah njadi rajau dalam idupau. 19:24 Ini pulau diau endak Kukiciakka ngan kamu, murala sikuak untau lalu wuan tebuak jaghum sangkan jemau kayau masuak sergau." 19:25 Satu anak-buaHau ndengagh kici'an Yesus itu, ughangtu kemangan nian ngan bekatau, "Amun luak itu, sapau diau pacak selamat?" 19:26 Yesus nimbal, "Amun manusiau, nidau ka adau. Anyautu amun Allah, gegalaunyau ka adau." 19:27 Mangku Pitrus bekatau ngan Yesus, "Kina'ila, kamini la ninggalka gegalau retau kami endak ngikut Dighi. Tuapau diau ka dienjuakka ngan kami?" 19:28 Katau Yesus ngan ughangtu, "Percayaula, di deniau diau empai, amun Anak Manusiau ka duduak di kerusi rajau, kamu diau ngikut Aku ka duduak pulau di duau belas kerusi mangku ngukum duau belas jungku jemau Israil. 19:29 Jemau diau ninggalka ghumahau, ading-beghadingau, pejadiau, anak-ana'au ngan umaunyau karnau Aku, jemautu ka nerimau agi lipat gandau, mangku diau ka nerimau idup selelamaunyau. 19:30 Anyautu banyak jemau diau dulu ka njadi mendian, jemau diau mendian ka njadi dulu."

Matius 20

20:1 Yesus bekatau, "Amun Allah merinta luak rajau, keadaannyau luak ini: Adau sughang diau ngempu kebun anggur. Akap-akap diau ndalak jemau upahan batan kebunau. 20:2 La tetuju upa ughangtu saghi sutiak tanci pirak, diau ngajung ughangtu bekerjau di kebunau. 20:3 Kekirau kindang aghi diau pegi agi, dikina'i adau jemau dang nganggur di pekan. 20:4 Kataunyau ngan ughangtu, 'Pegila kamu, bekerjaula di kebun anggurku. Aku ka ngupa kamu ngan upa diau pantas.' Ughangtu pegi pulau. 20:5 Kekirau tengaghi ngan pulau lingsir tengaghi diau pegi ngan ngerjauka diau semegi luak tadi. 20:6 Aghi la petang diau pegi agi, mangku nginak gi adau jemau nganggur, mangku diau betanyau ngan ughangtu, 'Ngapau kamu maju betegak di sini sesaghian, nidau ngerjauka tuapau-apau?' 20:7 Ughangtu nimbal, 'Karnau nidau bediau jemau diau endak ngupa kami.' 'Amun luak itu,' katau jemau tadi, 'Pegila ke kebun anggurku.' 20:8 Matau-aghi la padam, jemau diau ngempu kebuntu bekatau ngan mandurau, 'Pantaula jemau diau bekerjautu mangku mbayighi upa ughangtu, mulai ngan jemau diau bekerjau mendian mangku enggut jemau diau dulu bekerjau.' 20:9 Mangku datang jemau diau bekerjau la petang. Ughangtu nerimau padau sughang sutiak tanci pirak. 20:10 Udim itu datang pulau jemau diau bekerjau jak di akap. Ughangtu sangkau ka bulia lebia. Anyautu ughangtu nerimau pulau padau sughang sutiak tanci pirak. 20:11 Satu nerimau tancitu, ughangtu bemumut mumuti jemau ngempu kebuntu, 20:12 kataunyau, 'Ughangtu datang mendian, cuman bekerjau sejam ajau. Kami bekerjau sesaghian kepanasan, mangku dighi mbayighi ughangtu semegi ngan kami.' 20:13 Jemau diau ngempu kebuntu nimbali sughang jak di ughangtu, 'Kantin, aku nidau besala ngan kaba. Ukan kaba la tetuju nerimau upa sutiak tanci pirak bekerjau saghi? 20:14 Ambiakla upa kaba, pegila. Aku endak ngenjuakka ngan jemau diau bekerjau mendian itu upa diau semegi ngan diau kuenjuakka ngan kaba. 20:15 Apu aku nidau bulia bebuat sekendakku ngan hakku? Apu kaba sengit, karnau aku iluak?' " 20:16 Mangku Yesus bekatau agi, "Luak itula pulau jemau diau mendian ka njadi dulu, jemau diau dulu ka njadi mendian." 20:17 Yesus dang pegi ke Yerusalim. Di tenga jalan Diau mantau duau belas anak-buaHau mangku ngiciak ngan ughangtu ajau, 20:18 "Dengaghkala, mbak kini kitau ngancamka Yerusalim, mangku Anak Manusiau ka diseraka ngan imam-imam bepangkat tinggi ngan guru-guru ukum Taurat. Ughangtu ka ngukum Diau ngan ukuman mati. 20:19 Diau ka diseraka ngan jemau diau nidau keruan Allah. Diau ka digelakka, dibaduki ngan dibunua. Mangku la duau malam Diau ka idup agi." 20:20 Mangku mak Yakubus datang ngan duau ana'au njenguak Yesus, diau nunduak di adapanNyau, karnau adau setu diau endak dipintak. 20:21 Katau Yesus, "Dighi endak tuapau?" Diau nimbal, "Aku endak duau ughang anakku ini duduak di kidau ngan di kanan, amun Kaba njadi rajau nanti." 20:22 Katau Yesus, "Kamu nidau keruan setu diau kamu pintak. Apu kamu pacak nanggungka sengsarau luak Aku tanggungka?" Katau ughang duautu, "Kami pacak." 20:23 Katau Yesus agi, "Nyela, kamu ka nanggungka pulau sengsarau luak Aku. Anyautu sapau diau ka duduak di sebela kidau ngan kananKu, itu ukan hakKu. Bada itu batan endak jemau diau ditetapka BapakKu." 20:24 Ndengagh titu, sepulua anak-buaHau diau lain mara ngan jemau duau beghading tadi. 20:25 Karnau itu Yesus mantau gegalau ughangtu mangku katauNyau, "Kamu keruan, bansau penguasau bangsau diau nidau keruan Allah nyaraui jemaunyau. Pengulu-pengulu masau ughangtu. 20:26 Anyautu kamuni jangan luak itu. Jemau diau endak njadi pengulu, jemautu mesti njadi luak anak-bua. 20:27 Jemau diau endak njadi penting sekali mesti njadi luak budak kamu. 20:28 Semegi luak Anak Manusiau pulau datang ukan endak ditulung, tapitu endak nulung mangku ngenjuakka nyawauNyau njadi tebusan batan endak banyak jemau." 20:29 Yesus ngan anak-buaHau dang ngeluagh jak di Yiriku, jemau banyak ngikut Diau. 20:30 Adau duau jemau butau duduak di tepi jalan. Satu ndengagh Yesus lalu, ughang duautu tegauk, kataunyau, "Ui, Tuhan, Anak Daud! Sialkala kamini!" 20:31 Mangku jemau banyak marai jemau butautu, diajungau diam. Anyautu ughang duautu tamba bias ajau tegauk, kataunyau, "Ui, Tuhan, Anak Daud! Sialkala kamini!" 20:32 Mangku Yesus mendam, dipantauNyau jemau butautu, mangku bekiciak, "Tuapau kendak kamu mantauku?" 20:33 Katau ughang duautu, "Tuhan, kamini mintak matau kami ghadu, mangku pacak nginak." 20:34 Mangku Yesus sial ngan jemau butautu, ditatapAu mataunyau. Masau itula pulau ughang duautu pacak nginak, mangku ngikut Yesus.

Matius 21

21:1 Yesus ngan anak-buaHau la pasigh ngan Yerusalim mangku sampai di Betpagi di Bukit Saitun. Mangku Yesus ngajung duau ughang anak-buaHau 21:2 ngan bekatau, "Pegila ke dusun diau di adapan kamutu. Di situ kamu ka nginak sikuak keledai tetambang ngan ana'au adau di pasighau. Legha'ila keledaitu, mangku batak ke sini. 21:3 Amun adau jemau betanyau ngan kamu, kiciakkala ngan jemaunyau, 'Tuhan endak makaiau.' Mangku diau ka cepat ngenangka kamu mbata'au." 21:4 Luak itu ditepati setu diau dikiciakka nabi, 21:5 "Kiciakkala ngan Siun, 'Rajau kamu datang njenguak kamu. Diautu iluak atiAu ngan nayiak keledai, anak keledai diau mudau.' " 21:6 Duau ughang anak-buaHau tadi pegi, mangku ngerjauka setu diau la dikiciakka Yesus ngan ughangtu. 21:7 Ughang duautu mbatak keledaitu ngan ana'au. Ughangtu ngalasi belakang keledaitu ngan bajuau, mangku Yesus nayiak. 21:8 Banyak jemau diau di situ mbentangka bajuau di jalan. Adau pulau diau neta'i daun-daunan, mangku ditepiakka di jalan. 21:9 Jemau banyak diau bejalan di adapan ngan di belakang Yesus tegauk-gauk, "Idup, Anak Daud! Tepujila diau datang atas namau Tuhan. Tepujila Allah diau Mahatinggi!" 21:10 Mangku masau Yesus dang masuak Yerusalim, gegalau kuta itu ganau. Jemau betanyau, "Sapau ini?" 21:11 "Diauni nabi Yesus jak di Nasarit di Galilia." Timbal jemau banyak diau ngikut Yesus. 21:12 Mangku Yesus masuak ke Ghuma Allah ngan mulai ngisitka gegalau jemau diau bedagang di tengalaman Ghuma Allah. Mija-mija tukang nukar tanci ngan bangku tukang njual burung darau dikangkangkaNyau, 21:13 mangku dikiciakkaNyau ngan ughangtu, "Di Injil Allah bekatau, 'GhumaKu ghuma du'a.' Anyautu kamu njadikanyau saghang bandit." 21:14 Jemau butau ngan jemau lumpua datang njenguak Yesus di Ghuma Allah, mangku dighadukaNyau. 21:15 Anyautu imam-imam bepangkat tinggi ngan guru-guru ukum Taurat mara nian nginak gegalau tandau nyelia diau dibuatAutu, karnau budak-budak keciak besurak di Ghuma Allah, "Idup, Anak Daud!" 21:16 Ughangtu bekatau ngan Yesus, "Kaba ndengagh setu diau dikiciakka ughangtu?" Katau Yesus, "Au, Aku ndengagh. Apu lum kapu dighi mbacau ayat ini, 'Budak-budak keciak la diajagh batan endak ngiciakka pujian diau ngenianau.' " 21:17 La udim itu Yesus ninggalka ughangtu, mangku ngeluagh jak di kuta itu pegi ke Betania. Diau temalam di situ. 21:18 Pagi di aghiau akap-akap Yesus ngulang ke kuta. Masau itu Diau lapagh. 21:19 Diau nginak sebatang aghau di tepi jalan, dijengu'Au batang aghau itu. Diau nidau tekinak sebua kia buahau, cuman daunau ajau. Mangku Diau bekatau ngan batang aghautu, "Kaba nidau ka bebua agi selelamaunyau." Mangku batang aghautu layu. 21:20 Anak-bua Yesus nginak setu diau tejaditu, ughangtu kemangan nian. "Luak manau batang aghau itu pacak mati bekejut gegalaunyau?" katau ughangtu. 21:21 "Ngenian," katau Yesus, "Amun kamu percayau ngan nidau asau-asau, kamu pacak ngerjauka setu diau la kukerjauka ngan batang aghau ini. Ukan itu ajau, kamu pulau pacak bekatau ngan bukit ini, 'Tuangkatla ngan tecapakla ke dalam laut!' Mangku titu ka tejadi. 21:22 Tuapau ajau diau kamu pintak dalam du'a kamu ka nerimaunyau, amun kamu percayau nian." 21:23 La udim itu Yesus ngulang agi ke Ghuma Allah mangku masuak ngan ngajagh di situ. Diau dang ngajagh, imam-imam bepangkat tinggi ngan tuau-tuau jemau Yahudi datang njenguak Diau ngan betanyau, "Pakai kuasau apau Kaba ngerjauka gegalaunyautu? Mangku sapau ngenjuakkanyau ngan Kaba?" 21:24 Yesus nimbal, "Aku pulau endak betanyau ngan kapu dighi. Amun kapu dighi nimbal, Aku pulau ka ngiciakka ngan kapu dighi, ngan kuasau sapau Aku ngerjauka gegalaunyau ini. 21:25 Baptisan Yuhanis itu asalau jak di manau? Apu jak di Allah, apu jak di manusiau?" Ughangtu buijau, "Amun kitau kiciakka, 'Asalau jak di Allah', Diau ka bekatau, 'Ngapau kapu dighi nidau percayau ngan diau?' 21:26 Anyautu amun kitau kiciakka, 'Asalau jak di manusiau,' kitau takut ngan jemau banyak, karnau gegalau ughangtu nganggap Yuhanistu sughang nabi." 21:27 Mangku ughangtu nimbal, "Kami nidau keruan." Mangku Yesus bekatau ngan ughangtu, "Amun luak itu, Aku enggup pulau ngiciakka ngan kapu dighi ngan kuasau sapau Aku ngerjauka gegalaunyau ini." 21:28 "Mangku luak manau pendapat kapu dighi?" katau Yesus. "Adau sughang bak, anak lanangau adau duau ughang. Jemau itu njenguak ana'au diau tuau ngan bekatau, 'Nak, pegila bekerjau di kebun anggur saghini.' 21:29 'Jadi, bak.' katau anak itu. Anyautu diau nidau pegi. 21:30 Mangku jemau tadi njenguak ana'au diau bunsu ngan ngiciak luak itu pulau. Katau ana'autu, 'Aku enggup.' Anyautu rupu'annyau beghuba, mangku diau pegi ke kebun. 21:31 Sapau jak di duau ughangtu ngerjauka kendak bapa'au?" Imam itu ngan tuau-tuau jemau Yahudi nimbal, "Diau bunsu." Mangku Yesus bekatau ngan ughangtu, "Percayaula, dulula tukang tagia cuki ngan tinau pelacur ka njadi umat Allah sangkan kapu dighi. 21:32 Karnau Yuhanis Pembaptis datang nunjuakka ngan kapu dighi carau idup diau dikenda'i Tuhan. Anyautu kapu dighi enggup percayau ngan ajaghannyau. Tapitu tukang tagia cuki ngan tinau pelacur percayau ngan diau. Empuak kapu dighi la nginak gegalaunyau itu, kapu dighi nidau kila ngubai rupu'an ngan nidau percayau ngan diau." 21:33 "Dengaghkala ceritau ini agi," katau Yesus. "Adau sughang diau mbukak kebun anggur, mangku dikandangau, digalikanyau lubang batan bada neghit anggur, ditegakka bada njagaunyau di kebun tadi. Udim itu diparauka kebuntu ngan bebeghapau jemau parauan. Mangku diau pegi ke nenggeri lain. 21:34 Laka pangkaunyau mutigh anggur, jemau ngempu kebun tadi ngajung anak-buahau pegi njenguak jemau parauan tadi endak mintak bagian asil kebunau. 21:35 Anyautu jemau parauantu nangkap anak-bua tadi. Diau sughang dibaduki, diau lain dibunua, diau lain agi disipati ngan batu. 21:36 Mangku jemau ngempu kebuntu ngajung anak-buahau diau lain lebia banyak agi. Anyautu ughangtu dibuati ngan carau diau semegi ngan kantinau tadi. 21:37 Mangku jemau ngempu kebuntu ngajung ana'au njenguak jemau parauan tadi, rupu'annyau, 'Cengki anakku ka diregaui ughangtu.' 21:38 Anyautu satu jemau parauan nginak anak jemau ngempu kebuntu, ughangtu ngiciak sughang ngan diau lain, 'Diautu behak ngempu kebun ini nanti. Mela kitau bunua diau, mangku kebunni njadi hak kitau.' 21:39 Mangku ana'autu ditangkap, dicapakka keluagh kebun, udim itu dibunuau." 21:40 Mangku Yesus betanyau, "Amun jemau ngempu kebuntu la baliak, tuapau ka dibuatau ngan jemau parauan itu?" 21:41 Ughangtu nimbal, "Cengki diau ka mbunua jemau ja'at tadi, mangku marauka kebunau ngan jemau lain diau endak ngenjuakka bagian asilau, amun la pangkaunyau." 21:42 Mangku Yesus bekatau ngan ughangtu, "Apu kapu dighi lum kekela mbacau ayat ini, 'Batu diau dicapakka tukang negak ghuma, la njadi pelapiak tiang. Inila kerjau Tuhan, setu diau nyelia batan endak kitau.' " 21:43 Katau Yesus agi, "Gegalau hak njadi umat Allah ka diambiak jak di kapu dighi. Hak itu ka dienjuakka ngan bangsau lain diau ka ngerjauka perinta Allah. 21:44 Jemau diau tumban di batu itu ka pata, mangku jemau diau ditinggang batu itu ka lulua." 21:45 Imam-imam bepangkat tinggi ngan jemau Parisi ndengagh cuntau ceritau Yesus tadi, mangku ughangtu keruan, Diau ngiciakka ughangtu. 21:46 Itula sebapau ughangtu beusaha endak nangkap Diau. Anyautu ughangtu takut ngan jemau banyak, karnau jemau banyaktu nganggap Yesus sughang nabi.

Matius 22

22:1 Yesus ngiciak agi ngan ughangtu pakai cuntau, katauNyau, 22:2 "Amun Allah merinta luak rajau, keadaannyau luak ceritau ini: Sughang rajau ngadauka jamuan nika anak lanangau. 22:3 Rajau itu ngajung anak-buahau pegi nepatka jemau diau la dijeghuminyau ke jamuan itu. Anyautu jemau diau dijeghumitu enggup datang. 22:4 Rajautu ngajung agi anak-buahau diau lain, kataunyau ngan ughangtu, 'Kiciakkala ngan jemau diau dijeghumitu, Idangan jamu la siap. Sapi ngan anak sapi diau bunguak la disembelia. Gegalaunyau tigha kari. Datangla ke jamuan ini.' 22:5 Anyautu jemau diau dijeghumitu nidau nyanaukanyau. Gegalau ughangtu pegi ke bada kerjau sesughangan. Adau diau pegi ke umau. Adau diau pegi ke bada bedagang. 22:6 Adau pulau diau nangkap anak-bua rajautu, mangku dibaduki ngan dibunua. 22:7 Rajau itu mara kematila, mangku diau ngajung tenterahau mbunua pembunuatu ngan nyilap kuta ughangtu. 22:8 Udim itu diau mantau anak-buahau ngan bekatau, 'Jamuan tigha kari, anyautu jemau diau dijeghumi tadi nidau pantas. 22:9 Mbak kini pegila ke jalan besak, ajakla jemau banyak diau adau di situ ke jamuan nika.' 22:10 Mangku anak-buahautu pegi. Ughangtu pegi ke jalan besak mangku nunggalka gegalau jemau diau betemu ngan ughangtu, empuak iluak empuak ja'at. Mangku bada njamutu penua ngan menda. 22:11 Udim itu rajautu masuak endak nyambut mendahautu, mangku diau nginak adau sughang diau nidau makai baju alap. 22:12 Diau betanyau ngan jemau itu, 'Luak manau kaba pacak masuak ke sini, nidau makai baju alap?' Jemautu nidau pacak ngiciakka tuapau-apau. 22:13 Mangku rajautu bekatau ngan anak-buahau, 'Kebatla keting ngan tangan jemau ini, capakkala diau keluagh ke bada diau keleman. Di situ ka adau tangisan ngan penanggungan.' " 22:14 Mangku Yesus ngudimi ceritauNyau luak ini, "Banyak jemau diau dipantau, dikit ajau diau tepilia." 22:15 Mangku jemau Parisi pegi buijau, luak manau ughangtu pacak nyalaka Yesus ngan tanyauan. 22:16 Mangku ughangtu ngajung anak-bua ughangtu njenguak Yesus serempak ngan bebeghapau anak-bua Herudis. Ughangtu bekatau ngan Yesus, "Pak Guru, kami keruan kici'an Dighi benagh. Dighi ngajaghka kendak Tuhan diau benagh. Dighi nidau ngirauka pendapat sapau kila, karnau Dighi nidau milia jemau. 22:17 Karnau itu cubau Dighi kiciakka ngan kami: Nurut peraturan agamau kitau, apu bulia mbayigh cuki ngan Kaisar apu nidau?" 22:18 Yesus keruan rencanau diau jedit itu, mangku Diau bekatau, "Ngapau kamu endak ncubau Aku, ui, jemau cak iluak? 22:19 Cubau kinakka ngan Aku sutiak tanci pirak." Mangku dienjuakkanyau ngan Diau sutiak tanci pirak. 22:20 Mangku Diau betanyau, "Gambaran ngan namau sapau adau di situ?" 22:21 Ughangtu nimbal, "Gambaran ngan namau Kaisar." "Amun luak itu," katau Yesus, "Enjuakkala ngan Kaisar setu diau pantas endak Kaisar. Mangku enjuakkala ngan Allah setu diau pantas batan endak Allah!" 22:22 Ughangtu kemangan ndengagh titu, mangku pegi ninggalka Yesus. 22:23 Jemau Saduki nidau percayau, bansau jemau mati ka ngulang idup agi. Mangku adau jemau Saduki datang njenguak Yesus ngan betanyau, 22:24 "Pak guru, Musa ngajaghka luak ini: 'Amun sughang jemau lanang mati lum adau anak, denga-sana'au mesti nika ngan randaunyau, mangku endak ngadauka jurai batan endak jemau diau la matitu.' 22:25 Na, adau jemau lanang tujua beghading di sini. Diau tuau nika mangku mati, lum adau anak, mangku biniau ditinggalka batan endak adingau. 22:26 Luak itu pulau diau keduau ngan diau ketigau enggut diau ketujua mati galau, endiak bediau anak. 22:27 Udim-udimau tinau itu mati pulau. 22:28 Luak manau ngan tinau itu masau aghi jemau mati ka diidupka agi? Bini sapau tinautu, karnau ughang tujuatu la nikainyau galau?" 22:29 Yesus nimbal, "Kapu dighi sala, karnau kapu dighi nidau ngerti, empuak Injil empuak kuasau Allah. 22:30 Amun jemau mati nanti ngulang idup agi, ughangtu nidau ka belaki bebini agi. Ughangtu ka idup luak malaikat di sergau. 22:31 Apu lum kapu dighi mbacau diau dikiciakka Allah ceritau jemau mati ka diidupka agi? Diau bekatau luak ini, 22:32 'Aku Allah Abraham, Allah Isak ngan Allah Yakub.' Allahtu ukan Allah jemau mati, tapitu Allah jemau idup." 22:33 Jemau banyaktu ndengagh kici'an Yesus, mangku kemangan karnau ajaghanNyautu. 22:34 Jemau Parisi la ndengagh, bansau Yesus mbuat jemau Saduki nidau pacak ngiciak tuapau-apau agi. Ughangtu betunggal, 22:35 mangku adau sughang jak di ughangtu, sughang guru ukum Taurat, betanyau ngan Yesus endak nguji Diau, kataunyau, 22:36 "Guru, perinta diau manau diau penting sekali dalam ukum Taurat?" 22:37 Yesus nimbal, "Sayangila Tuhan, Allah kaba ngan sepenua ati kaba, ngan sepenua jiwa kaba, ngan gegalau akal-pikiran kaba. 22:38 Itula perinta diau dulu sekali ngan diau penting sekali. 22:39 Mangku perinta diau keduau, diau semegi ngan diau tadi: Sayangila jemau lain luak kaba nyayangi diri kaba. 22:40 Gegalau ukum Taurat ngan ajaghan nabi-nabi bepaut ngan duau perinta itu." 22:41 Jemau Parisi gi betunggal di situ, Yesus betanyau ngan ughangtu, 22:42 "Tuapau pendapat kapu dighi ceritau Mesias, Rajau Penyelamattu? Pengadau sapau Diau?" "Pengadau Daud," katau ughangtu. 22:43 Katau Yesus agi, "Amun luak itu, ngapau Daud diau dikuasaui Rua Allah ngiciakka Diau 'Tuhan'? Karnau Daud bekatau, 22:44 'Allah bekatau ngan TuhanKu, Duduakla di sebela kananKu, enggut Aku mbuat musua Kaba tunduak ngan nyemba Kaba.' 22:45 Mangku amun Daud ngiciakka Mesiastu Tuhan, manau ka adau Diau pengadau Daud?" 22:46 Nidau bediau sughang kiala diau pacak nimbali Yesus, mangku jak aghi itu nidau bediau sughang kia diau beghani nanyauka tuapau-apau agi ngan Diau.

Matius 23

23:1 Mangku Yesus ngiciak ngan jemau banyak ngan anak-buaHau, katauNyau, 23:2 "Guru-guru ukum Taurat ngan jemau Parisi dapat kuasau meretika ukum Taurat. 23:3 Itula sebapau kamu mesti na'ati ngan nuruti gegalau ajaghan ughangtu. Anyautu jangan kamu ngerjauka setu diau ughangtu kerjauka, karnau ughangtu nidau ngerjauka setu diau diajaghkanyau. 23:4 Ughangtu nuntut setu diau segau ngan ngenjuakka peraturan diau segau, anyautu dikit kia ughangtu nidau nulung jemau ngerjaukanyau. 23:5 Gegalaunyau diau dikerjauka ughangtu cuman endak dikinak jemau ajau. Ughangtu makai tali sembayang diau libagh ngan ghambu baju diau panjang. 23:6 Ughangtu galak duduak di bada diau iluak di jamuan ngan di mukau dalam ghuma sembayang. 23:7 Ughangtu galak diregaui di pekan ngan dikiciakka 'pak guru'. 23:8 Tapitu kamu jangan endak dipantau 'pak guru', karnau guru kamu cuman sughang, mangku gegalau kamu anak-buaHau. 23:9 Mangku jangan kamu mantau sughang kia 'bapak' di deniau ini, karnau bapak kamu cuman sughang, Bapak diau adau di sergau. 23:10 Jangan pulau kamu endak dikiciakka 'pengulu', karnau pengulu kamu cuman sughang, diautu Rajau Penyelamat. 23:11 Jemau diau endak njadi pengulu jak di kamu, jemautu mesti njadi luak anak-bua. 23:12 Jemau diau ninggika diriau ka dimaluka, mangku jemau diau ngensian ka diregaui." 23:13 "Celakaula kapu dighi, ai guru-guru ukum Taurat ngan jemau Parisi, kapu dighi jemau cak alim. Kapu dighi ngalangi jemau njadi umat Allah. Kapu dighitu nidau ka njadi umat Allah, mangku jemau lain diau endak nidau kapu dighi ajung. 23:14 Celakaula kapu dighi, ai guru-guru ukum Taurat ngan jemau Parisi, kapu dighi jemau cak alim. Kapu dighi nipuka randau-randau ngan ngambiak ghumahau, mangku mbunika perembak kapu dighi ngan bedu'a panjangpanjang. Karnau itu ukuman kapu dighi ka beghat. 23:15 Celakaula kapu dighi, ai guru-guru ukum Taurat ngan jemau Parisi, kapu dighi jemau cak alim. Kapu dighi pegi jawua-jawua nyembeghang laut ngan ngidari daghatan cuman endak dijadika sughang ajau anak-bua kapu dighi. La udim diau njadi anak-bua kapu dighi, dijadika anak nerakau diau lebia ja'at jak di kapu dighi. 23:16 Celakaula kapu dighi, ai pengulu-pengulu butau. Kapu dighi ngajagh luak ini, 'Amun jemau besumpa demi Ghuma Allah, sumpa itu nidau nanti ditepatinyau. Anyautu amun besumpa demi emas Ghuma Allah, diau mesti nepati sumpahautu.' 23:17 Ai, kapu dighi jemau bigal diau butau. Manau diau penting, apu emasau apu Ghuma Allah diau njadika emastu suci? 23:18 Lagi 'Amun jemau besumpa demi mija bada bekerban, sumpa itu nidau nanti ditepatinyau. Anyautu amun besumpa demi kerban diau adau di mija bada bekerbantu, jemautu mesti nepati sumpahau.' 23:19 Ai, kapu dighi jemau butau. Manau diau penting, apu kerban apu mija bada bekerban diau njadika kerbantu suci? 23:20 Itula sebapau, amun jemau besumpa demi mija bada bekerban, jemautu besumpa demi mija bada bekerbantu ngan pulau demi gegalaunyau diau adau di pucu'au. 23:21 Mangku jemau diau besumpa demi Ghuma Allah, jemautu besumpa demi Ghuma Allah ngan pulau demi Allah diau mendam di situ. 23:22 Jemau diau besumpa demi sergau, jemautu besumpa demi bada duduak Allah ngan pulau demi Allah diau duduak di situ. 23:23 Celakaula kapu dighi, ai guru-guru ukum Taurat ngan jemau Parisi, kapu dighi cak alim. Gheghuku ngan rerempahan diau lain, kapu dighi enjuakka bagi sepulua sebagi, anyautu diau penting dalam ukum Allah luak keadilan ngan keilu'an ngan kasia ngan Allah nidau kapu dighi sanauka. Awuak itula diau mesti kapu dighi kerjauka, diau lain pulau jangan dilalaika. 23:24 Kapu dighi pengulu-pengulu diau butau. Lalat dalam minuman kapu dighi saring, anyautu untau diau di dalamau kapu dighi teguak. 23:25 Celakaula kapu dighi, ai guru-guru ukum Taurat ngan jemau Parisi. Kapu dighi jemau cak alim. Mangkuak ngan piring kapu dighi basua banci-banci di luaghau, anyautu di dalamau kumua kematila ngan selak ngan barang nidau alal. 23:26 Ai jemau Parisi diau butau, basuala kudai banci-banci sebela dalam jak di mangkuak ngan piring kapu dighi, mangku luaghau ka banci pulau. 23:27 Celakaula kapu dighi, ai guru-guru ukum Taurat ngan jemau Parisi. Kapu dighi jemau cak alim. Kapu dighi luak kuburan diau dicat putia. Di luaghau kina'an alap, anyautu di dalamau penua ngan tulang ngan gegalaunyau diau busuak. 23:28 Luak itula pulau kapu dighi. Jak di luagh kapu dighi kina'an iluak ngan jemau. Anyautu di dalam kapu dighi cak alim ngan ja'at." 23:29 "Celakaula kapu dighi, ai guru-guru ukum Taurat ngan jemau Parisi. Kapu dighi jemau cak alim. Kapu dighi mbuat kuburan diau alap batan endak nabi-nabi ngan meriasi tugu-tugu jemau alim. 23:30 Kapu dighi bekatau, 'Misalau kami idup timpau niniak puyang kami senitu, cengki kami nidau ngikut ughangtu mbunua nabi-nabi itu.' 23:31 Kapu dighi ngakuak, bansau kapu dighi pengadau jemau diau mbunua nabi. 23:32 Amun luak itu, majukala ngan ngudimila dusau niniak puyang kapu dighi. 23:33 Ai, kapu dighi jemau ja'at ngan pengadau jemau ja'at luak ulagh bebisau. Luak manau kapu dighi pacak nyelamatka diri jak di ukuman di nerakau? 23:34 Dengaghkala iluak-iluak, aku ngajung nabi, jemau bepengertian ngan guru-guru ukum Taurat njenguak kapu dighi. Adau jak di ughangtu diau ka kapu dighi bunua ngan pakuka di kayu salip. Adau diau ka kapu dighi siksau di ghuma-ghuma sembayang. Adau pulau diau ka kapu dighi jagal ke sutiak kuta ke kuta diau lain. 23:35 Mangku kapu dighi ka nanggung ukuman pembunuan diau dikerjauka di jemau diau nidau besala, mulai ngan Habel diau nidau besala enggut Sakaria anak Berekia diau kapu dighi bunua di Ghuma Allah di entaghau bada diau suci ngan mija bada bekerban. 23:36 Percayaula, gegalaunyautu ka ditanggung jemau mbak kini." 23:37 "Ai jemau Yerusalim, nabi-nabi kamu bunua, ajungan Allah kamu sipati ngan batu enggut mati. La rajin Aku endak nunggalka anak-anak kamu, luak bai ayam nunggalka ana'au meghekupi di bawa sayapau, anyautu kamu enggup. 23:38 Mangku ghuma kamu ka ditinggalka, ka suni. 23:39 Keruanila, mulai mbak kini kamu nidau ka nginak Aku agi, enggut kamu bekatau, 'Tepujila jemau diau datang dalam namau Tuhan!' "

Matius 24

24:1 Udim itu Yesus ngeluagh jak di Ghuma Allah, mangku anak-buaHau njenguak Diau ngan nunjuakka Ghuma Allah. 24:2 Yesus bekatau ngan ughangtu, "Apu kamu nginak gegalaunyau itu? Keruanila, nidau bediau sutiak kia batu di sini diau ka tinggal tepasang di badahau. Gegalaunyau ka rubua." 24:3 Mangku Yesus pegi ke Bukit Saitun. Diau dang duduak di situ, anak-buaHau datang endak ngiciak ngan Diau sughang. Katau ughangtu, "Kiciakkala ngan kami, kebilau titu ka tejadi? Tuapau tandaunyau Dighi ka ngulang agi ngan deniau laka kiamat?" 24:4 Yesus bekatau, "Sepepadaula, jangan kamu disesatka jemau. 24:5 Banyak jemau ka datang makai namau aku ngan bekatau, 'Akula Rajau Penyelamat.' Ughangtu ka nyesatka banyak jemau. 24:6 Kamu ka ndengagh muni perang ngan ceritau perang. Sepepadaula, nidau nanti takut. Gegalaunyautu mesti tejadi kudai. Anyautu deniau lum ka kiamat. 24:7 Bangsau ka melawan bangsau, nenggeri diau sutiak melawan nenggeri diau lain. Ka adau kelapaghan ngan gempau di manau-manau. 24:8 Anyautu gegalaunyautu empai penembai ajau luak tinau diau empai kesakitan endak merunggu. 24:9 Masau itu kamu ka ditangkap ngan diseraka endak disaraui ngan dibunua. Kamu ka diluatka gegalau jemau, karnau kamu percayau ngan Aku. 24:10 Banyak jemau ka ngelipat ngan sangi luatka ngan nyeraka sughang ngan diau lain. 24:11 Banyak cak nabi ka datang ngan nyesatka banyak jemau. 24:12 Mangku karnau deniau ka tamba ja'at, banyak jemau nidau agi nyayangi diau lain. 24:13 Anyautu jemau diau beta'an enggut udim ka selamat. 24:14 Mangku ceritau iluak ceritau Allah endak merinta ka dikiciakka di gegalau deniau, mangku gegalau jemau ka ndengaghau. Udim itu kiamat." 24:15 "Kamu ka nginak 'Keja'atan diau ngancurka' betegak di bada suci, luak la dikiciakka nabi Daniil. Jemau diau mbacau ini peratikala tuapau retiau. 24:16 Masau itu jemau diau adau di Yudia mesti belaghi ke gunung. 24:17 Jemau diau adau di gaghang jangan masuak ghuma endak ngambiak retau jak di ghumahau. 24:18 Jemau diau adau di umau jangan baliak ngambiak pekakasau. 24:19 Ka celakau tinau-tinau diau dang ngandung ngan tinau diau minumi budak keciak masau itu. 24:20 Bedu'ala, supayau masau kamu belaghi jangan tekenau pangkau ujan madak aghi Sabat. 24:21 Karnau masau aghi diau nakutka itu ka adau kesengsarauan luak diau lum kekela tejadi jak deniau adau enggut mbak kini ngan pulau nidau ka adau agi. 24:22 Misalau masau itu nidau dipandakka, mangku nidau bediau sughang kia diau selamat. Anyautu karnau umatAu mangku masau itu ka dipandakka. 24:23 Masau itu amun adau jemau diau ngiciak ngan kamu, 'Kina'ila, Rajau Penyelamat adau di sini.' ngan 'Diau adau di situ.', jangan percayau ngan jemau itu. 24:24 Karnau ka adau cak rajau penyelamat ngan cak nabi. Ughangtu ka ngerjauka tandau-tandau nyelia, mangku amun pacak, endak nipuka umat Allah pulau. 24:25 Dengaghkala Aku la ngiciakkanyau ngan kamu, antak ka titu tejadi. 24:26 Amun jemau bekatau ngan kamu, 'Kina'ila Diau adau di padang bungin.', jangan kamu tetipu. Amun ughangtu bekatau, 'Kina'ila Diau nyemuni dalam biliak di sini.', jangan kamu percayau. 24:27 Karnau luak cayau kilat diau besinagh jak di sebela matau-aghi idup enggut ke sebela matau-aghi padam, luak itula nanti, amun Anak Manusiau ka datang. 24:28 Di manau adau buntang, di situ adau anjing." 24:29 "Nidau lamau udim sengsarau masau itu, langit ka kacau-balau. Matau-aghi ka njadi keleman, bulan nidau ka besinagh agi ngan bintang-bintang ka umban jak di langit. 24:30 Masau itula Anak Manusiau ka kina'an di langit. Mangku gegalau bangsau di deniau ka nangis. Ughangtu ka nginak Anak Manusiau datang di aban ngan gegalau kuasauNyau ngan keagunganNyau. 24:31 Terumpit diau besak ka dimunika, mangku Anak Manusiau ka ngajung malaikatAu nunggalka umatAu jak di gegalau deniau." 24:32 "Belajaghla jak di batang aghau. Amun ghantingau ijang ngan lembut ngan mulai nyinggit, kamu keruan, bansau laka musim panas. 24:33 Luak itu pulau, amun kamu nginak gegalaunyau tadi tejadi, kamu keruan, bansau masaunyau la pasigh nian. 24:34 Keruanila, gegalaunyautu ka tejadi, antak ka jemau mbak kini mati galau. 24:35 Langit ngan deniau ka lengit, tapitu kici'anKu nidau ka lengit, ka tetap selelamaunyau." 24:36 "Nidau bediau diau keruan, kebilau masaunyau ngan aghiau. Malaikat di sergau nidau keruan, Anak Allah pulau nidau, cuman Bapak ajau keruan. 24:37 Amun Anak Manusiau datang nanti, deniau ka semegi ngan timpau Nua senitu: 24:38 Antak ka ayiak merampus itu, jemau makan ngan minum, nika ngan dinikaka, enggut Nua masuak perawu besak. 24:39 Masau ughangtu kerampusan ngan mati galau, mangku ughangtu nyadari setu diau dang tejadi. Luak itula pulau nanti, amun Anak Manusiau datang. 24:40 Masau itu adau duau ughang diau bekerjau di umau, diau sughang ka dibata'i, diau sughang agitu ditinggalka. 24:41 Adau ughang duau jemau tinau dang nutuak ghebuak setabangan, diau sughang ka dibata'i, diau sughang agi ka ditinggalka. 24:42 Sepepadaula, karnau kamu nidau keruan, kebilau Tuhan datang. 24:43 Ingatkala ini, amun tuan ghuma keruan, masaunyau aghi malam pemaling datang, cengki diau nidau ka tiduak, mangku pemaling nidau masuak ghumahautu. 24:44 Itula sebapau kamu mesti siagau, karnau Anak Manusiau datang masau diau nidau kamu sangkau." 24:45 Katau Yesus agi, "Budak diau manau, diau pacak dipercayaui mangku diau dijadika tuanau kepalak jak di gegalau buda'au, supayau ngenju'i ughangtu makanan padau masaunyau? 24:46 Alaka riang budaktu, amun tuanau baliak, mangku nginak diau dang ngerjauka tugasau. 24:47 Percayaula tuanautu ka nyeraka gegalau retaunyau ngan buda'autu. 24:48 Anyautu, amun budaktu ja'at ngan bekatau dalam atiau, 24:49 'Tuanku lum ka baliak.', mangku diau mbaduki gegalau kantinau ngan makan-minum ngan mabu'an. 24:50 Mangku tuanautu ka baliak, masau ngan aghiau diau nidau disangkau-sangkau, masau diau nidau keruan. 24:51 Mangku budaktu ka diukum beghat ngan dijadika senasip ngan jemau diau nidau percayau ngan Allah. Di situ diau ka nangis ngan sengsarau."

Matius 25

25:1 "Amun Allah merinta luak rajau nanti, keadaannyau luak cuntau ceritau ini. Adau sepulua ughang gadis ngambiak lampu, mangku pegi nyungsung pengantinan. 25:2 Limau ughang jak di ughangtu bigal, limau ughang agi calak. 25:3 Gadis diau bigaltu mbatak lampu, anyautu nidau mbatak minyak cadangan. 25:4 Gadis diau calaktu mbatak lampu ngan mbatak minyak cadangan. 25:5 Pengantinan itu lamau lum datang-datang, mangku gadistu tekantuak ngan tekelap. 25:6 Aghi la tenga malam, mangku kedengaghan suarau, 'Pengantinan datang! Mela ngampak diau!' 25:7 Sepulua gadis itu bangun ngan maghakka lampuau. 25:8 Gadis diau bigaltu bekatau ngan gadis diau calak, 'Enju'i kami minyak dikit, karnau lampu kami laka padam.' 25:9 'Nidau.' katau gadis diau calaktu. 'Nanti nidau ka cukup batan endak kami ngan batan endak kamu. Pegila, mbeli di warung.' 25:10 Mangku gadis diau bigaltu pegi endak mbeli minyak. Penarau ughangtu pegi, pengantinan sampai. Limau gadis diau besiaptu masuak serempak ngan pengantinan ke bada jamuan, mangku duaghau dikatupka. 25:11 Udim itu gadis diau mbeli minyak tadi sampai. Ughangtu bekatau, 'Tuan, tuan, buka'ila kami duaghau!' 25:12 Anyautu pengantinantu nimbal, 'Nidau, aku nidau kecinauan kamu!' " 25:13 Mangku Yesus ngudimi ceritauNyau luak ini, "Karnau itu, kamu mesti bejagau-jagau, karnau kamu nidau keruan aghiau ngan masaunyau." 25:14 "Amun Allah merinta luak rajau, keadaannyau luak ceritau ini. Adau sughang diau endak pegi ke bada diau jawua. Antak ka pegi, diau mantau anak-buahau ngan nyeraka retaunyau ngan ughangtu. 25:15 Bilang anak-buahau dienjuakkanyau nurut kesanggupan sesughangan. Diau sughang dienjuakkanyau limau ribu tanci emas, diau sughang duau ribu, diau sughang agi dienjuakkanyau seribu. Mangku diau pegi. 25:16 Anak-bua diau nerimau limau ribu tanci emas tadi pegi bedagang ngan tancitu, mangku bulia untungau limau ribu tanci emas agi. 25:17 Luak itu pulau anak-bua diau nerimau duau ribu tanci emas tadi bulia untungau duau ribu agi. 25:18 Anyautu anak-bua diau nerimau seribu tanci emas tadi pegi mbuat tebuak di tana, mangku dibunika tanci tuanautu di situ. 25:19 La lamau pulau udim itu, mangku tuan tadi baliak, mangku diau ngadauka peritungan ngan ughangtu. 25:20 Anak-bua diau nerimau limau ribu tanci emas itu datang ngan mbatak untungau limau ribu, kataunyau, 'Tuan, dighi nyeraka ngan aku limau ribu tanci emas. Kina'ila, aku bulia asil limau ribu agi.' 25:21 'Iluakla,' katau tuanautu. 'Kaba anak-buaku diau iluak ngan pacak dipercayaui. Setu diau keciak kaba pacak dipercayaui, mangku aku ka nyeraka setu diau besak ngan kaba. Mela, masuak ngan ngikut beriang-riang ngan aku.' 25:22 Mangku anak-bua diau nerimau duau ribu tanci emas itu datang ngan mbatak untungau duau ribu, kataunyau, 'Tuan, dighi nyeraka ngan aku duau ribu tanci emas. Kina'ila, aku bulia asil duau ribu agi.' 25:23 'Iluakla,' katau tuanautu. 'Kaba anak-buaku diau iluak ngan pacak dipercayaui. Setu diau keciak kaba pacak dipercayaui, mangku aku ka nyeraka setu diau besak ngan kaba. Mela, masuak ngan ngikut beriang-riang ngan aku.' 25:24 Udim itu anak-buahau diau nerimau seribu tanci emas itu datang ngan bekatau, 'Tuan, aku keruan dighi jemau kejam. Dighi ngetam di bada diau nidau dighi tanam. Dighi ngambiak asilau di bada diau nidau dighi amburka benia. 25:25 Aku takut, mangku pegi nyemunika tanci dighi dalam tana. Inila tanci dighi!' 25:26 'Ui, kabani anak-bua diau ja'at ngan malas! Kaba la keruan aku ngetam setu diau nidau kutanam ngan ngambiak asilau di bada diau nidau kuamburka benia. 25:27 Amun luak itu, semestiau kaba menyapi tanciku di bang, mangku amun aku baliak, pacak kuambiak ngan ana'au. 25:28 Karnau itu ambiakla tanci itu jak di diau, enjuakka ngan jemau diau la adau sepulua ribu itu. 25:29 Karnau bilang jemau diau buadau ka dienjuakka agi, mangku diau belebia. Anyautu jemau diau nidau bediau tuapau-apau, setu diau gi adau di diau ka diambiak pulau jak di diau. 25:30 Mangku anak-bua diau nidau begunau itu capakka keluagh di keleman. Di situ diau ka nangis ngan sengsarau.' " 25:31 "Amun Anak Manusiau datang luak Rajau dikantini gegalau malaikat, mangku Diau ka duduak di bada duduak rajau diau agungtu. 25:32 Gegalau jemau ka ditunggalka di adapanNyau. Mangku Diau ka nceghaika ughangtu njadi duau rumbungan, luak tukang sayia nceghaika bebiri ngan kambing. 25:33 Mangku jemau diau ngerjauka kendak Allah ka ditunggalka di sebela kananAu, ngan diau lain di sebela kidauNyau. 25:34 Mangku Rajau itu ka bekatau ngan ughang di sebela kananAu, 'Mela, kamu diau disayangi BapakKu. Masuakla ke bada diau disediauka batan endak kamu jak deniau adau. 25:35 Karnau masau Aku lapagh, kamu ngenju'i Aku makan. Masau Aku aus, kamu ngenju'i Aku minum. Aku sughang merantau, kamu nerimau Aku di ghuma kamu. 25:36 Aku nidau bebaju, kamu ngenju'i Aku baju. Aku buidapan, kamu nyayia Aku. Aku dijilka, kamu ngaruaka Aku.' 25:37 Mangku ughangtu ka bekatau, 'Tuhan, kebilau kami nginak Dighi lapagh, mangku kami ngenju'i Dighi makan, Dighi aus, mangku kami ngenju'i Dighi minum? 25:38 Kebilau kami nginak Dighi luak jemau merantau, mangku kami nerimau Dighi di ghuma kami, ngan Dighi nidau bebaju, mangku kami ngenju'i Dighi baju? 25:39 Kebilau kami nginak Dighi buidapan ngan dijilka, mangku kami ngaruaka Dighi?' 25:40 Mangku Rajau itu ka nimbal, 'Keruanila, setu diau kamu ngerjauka ngan sala sughang kantinKu ini empuak diau inau sekali, kamu kerjauka batan endak Aku.' 25:41 Mangku Rajau itu ka bekatau ngan jemau di sebela kidauNyau, 'Laratla jak di adapanKu! Kamu jemau keparat. Pegila ke dalam api diau nidau ka padam-padam, diau disediauka batan endak Iblis ngan anak-buahau. 25:42 Karnau masau Aku lapagh, kamu nidau ngenju'i Aku makan. Masau Aku aus, kamu nidau ngenju'i Aku minum. 25:43 Aku sughang merantau, kamu nidau nerimau Aku di ghuma kamu. Aku nidau bebaju, kamu nidau ngenju'i Aku baju. Aku buidapan ngan dijilka, kamu nidau ngaruaka Aku.' 25:44 Mangku ughangtu pulau ka bekatau, 'Tuhan, kebilau kami nginak Dighi lapagh ngan aus ngan luak jemau merantau ngan nidau bebaju ngan buidapan ngan dijilka, mangku kami nidau nulung Dighi?' 25:45 Mangku Rajau itu ka nimbal, 'Keruanila, masau kamu nidau nulung sala sughang kantinKu ini, empuak diau inau sekali, kamu nidau nulung Aku.' 25:46 Mangku ughangtu ka diukum ngan ukuman selelamaunyau. Jemau diau ngerjauka kendak Allah tadi ka riang selelamaunyau."

Matius 26

26:1 La udim Yesus ngajaghka gegalaunyautu, Diau bekatau ngan anak-buaHau, 26:2 "Kamu keruan duau aghi agi aghi rerayau Paska, mangku Anak Manusiau ka diseraka endak dipakuka di kayu salip." 26:3 Masau itu imam-imam bepangkat tinggi ngan tuau-tuau jemau Yahudi betunggal di istana Imam Besak Kayapas. 26:4 Ughangtu buijau endak nangkap Yesus carau diam-diam mangku endak mbunua Diau. 26:5 Anyautu ughangtu bekatau, "Jangan titu dikerjauka masau aghi rerayau, mangku jangan jemau banyak ganau." 26:6 Yesus dang adau di Betania, di ghuma Simun diau senitu buidapan ja'at. 26:7 Mangku adau sughang jemau tinau datang guak Yesus mbatak sebua kacau buisi minyak ghum diau besak regaunyau. Yesus dang duduak makan, mangku tinau itu numpaka minyak ghumtu ke pucuak palak Yesus. 26:8 Anak-bua Yesus nginak titu mangku mara, "Tuapau gunau meghayakka gegalaunyautu? 26:9 Minyak itu pacak dijual ngan regau diau besak, mangku tanciau pacak dienjuakka ngan jemau serik." 26:10 Yesus keruan rupu'an ughangtu, mangku Diau bekatau, "Ngapau kamu nyinggung tinau ini? Diau ngerjauka setu diau iluak batan endak Aku. 26:11 Jemau serik maju guak kamu, anyautu Akuni nidau maju guak kamu. 26:12 Ngan carau numpaka minyak ghum itu di badanKu diau la nyiapka Aku batan endak penguburanKu. 26:13 Percayaula, di gegalau deniau di manau ceritau iluak jak di Allah diceritauka, setu diau dikerjauka tinau ini ka dikiciakka pulau endak ngingatka diau." 26:14 Mangku sughang jak di duau belas anak-bua Yesus pegi njenguak imam-imam bepangkat tinggi. Namaunyau Yudas Iskariut. 26:15 Diau bekatau ngan ughangtu, "Tuapau diau ka kapu dighi enjuakka ngan aku, amun aku nyeraka Yesus ngan kapu dighi?" Mangku ughangtu ngenjuakka tigau pulua tanci pirak ngan diau. 26:16 Jak masau itu Yudas ndalak jalan endak nyeraka Yesus ngan ughangtu. 26:17 Aghi petamau aghi rerayau Ruti Nidau Beghagi, anak-buaHau njenguak Yesus ngan betanyau, "Ke manau bada Dighi ngajung kami nyediauka jamuan Paska mangku Dighi makan?" 26:18 Yesus nimbal, "Pegila ke kuta njenguak sughang diau la ditetapka di situ, kiciakkala ngan diau, 'Katau guru, masauKu la sampai. Aku endak makan jamuan Paska di ghuma dighi serempak ngan anak-buaKu!' " 26:19 Mangku anak-buaHau ngerjauka luak diau dikiciakka Yesus, mangku disediaukanyau jamuan Paska. 26:20 Aghi la malam, Yesus ngan duau belas anak-buaHau duduak makan. 26:21 Ughangtu dang makan, Diau bekatau, "Dengaghkala! Sughang jak di kamu ka njualka Aku." 26:22 Ndengagh titu ughangtu bingung, mangku sejagh sughang ughangtu bekatau ngan Yesus, "Cengki ukan aku diau Dighi kiciakka?" 26:23 Yesus nimbal, "Jemau diau nceculka ruti dalam mangkuak serempak ngan Aku jemautu ka njualka Aku. 26:24 Nyela, Anak Manusiau ka mati nendiau, luak la ditulis dalam Injil. Anyautu celakaula jemau diau njualka Anak Manusiautu. Iluakla diau nidau dilahirka." 26:25 Mangku Yudas diau endak njualka Yesustu bekatau, "Cengki ukan aku diau Dighi kiciakka." Yesus nimbal, "Luak itula katau kaba." 26:26 Ughangtu dang makan, mangku Yesus ngambiak ruti, bedu'a beterimau-kasia, dipiyak-piya'Au mangku dienjuakkaNyau ngan anak-buaHau sampai bekatau, "Ambiakla, makanla. Inila badanKu." 26:27 Udim itu Yesus ngambiak mangkuak besak, bedu'a beterimau-kasia, dienjuakkaNyau ngan ughangtu sampai bekatau, "Gegalau kamu minumla jak di mangkuak ini. 26:28 Inila daghaKu diau neguaka janji Allah. Dagha itu ditumpaka batan endak ngampuni dusau banyak jemau. 26:29 Percayaula, mulai mbak kini Aku nidau ka minum anggur ini agi, enggut Aku minum anggur diau empai serempak ngan kamu di bada BapakKu merinta." 26:30 Udim itu ughangtu benyanyi ngagungka Allah, mangku pegi ke Bukit Saitun. 26:31 Mangku Yesus bekatau ngan ughangtu, "Malam ini gegalau kamu ka belaghi ninggalka Aku. Karnau di Injil ditulis, 'Aku ka mbunua tukang sayia, mangku bebiriau ka teceghai-beghai.' 26:32 Anyautu amun Aku la ngulang idup agi, Aku ka pegi ndului kamu ke Galilia." 26:33 Pitrus bekatau ngan Yesus, "Empuak gegalau diau lainau ninggalka Dighi, aku nidau ka ninggalka Dighi." 26:34 "Ingatkala," katau Yesus, "Malam ini antak ka ayam bekukuak, kaba la tigau kali ngiciakka nidau keruan Aku." 26:35 Pitrus nimbal, "Empuak aku mati serempak ngan Dighi, aku nidau ka bekatau, bansau aku nidau keruan Dighi." Gegalau anak-buaHau diau lain ngiciak luak itu pulau. 26:36 Mangku Yesus ngan anak-buaHau pegi ke bada diau benamau Getsimani. Di situ Diau bekatau ngan ughangtu, "Duduakla di sini, penarau Aku pegi bedu'a." 26:37 Mangku Diau ngajak Pitrus ngan duau anak Sebedius pegi serempak ngan Diau. Mangku Diau mulai meghasau sedia ngan gelisa. 26:38 Diau bekatau ngan ughang tigautu, "AtiKu madak nian, asaunyau luak ka mati. Mendamla kamu di sini, ngikut njagau ngan Aku." 26:39 Udim itu Diau pegi jawua dikit, mangku nunduak ngan bedu'a, katauNyau, "Bak, amun pacak, jawuakala sengsarau itu jak di Aku. Anyautu jangan nurut kendak Aku, tapitu kendak Dighi ajau." 26:40 La udim bedu'a Diau ngulang guak tigau ughang anak-buaHau tadi, ditemuiNyau ughangtu dang tiduak, mangku Diau bekatau ngan Pitrus, "Cuman sejam ajau kamu nidau pacak njagau ngan Aku. 26:41 Siagaula ngan bedu'ala, supayau kamu jangan bedusau, amun dicubaui. Nyela, kamu endak ngerjauka setu diau benagh, anyautu nidau pacak." 26:42 Yesus pegi agi endak bedu'a, katauNyau, "Bak, amun sengsarau ini mesti Kualami, nengkela kendak Dighi tejadi." 26:43 Udim itu Diau ngulang agi, ditemuiNyau anak-buaHau tadi masia pulau tiduak, karnau ughangtu ghungau nian. 26:44 Mangku Yesus ninggalka ughangtu agi endak bedu'a ketigau kaliau diau semegi luak du'a tadi. 26:45 La udim itu Diau ngulang agi njenguak anak-buaHau ngan bekatau, "Masia kamu tiduak ngan gheghadu? Kina'ila, la masaunyau Anak Manusiau diseraka ngan kuasau jemau bedusau. 26:46 Bangunla, mela kitau pegi. Jemau diau njualka Aku la datang." 26:47 Penarau Yesus gi ngiciak, Yudas, sughang jak di duau belas anak-buaHau, datang. Serempak ngan diau datang pulau jemau serumbungan besak mbatak pedang mbatak pembaduk. Ughangtu diajung Imam Besak ngan tuau-tuau jemau Yahudi. 26:48 Jemau diau njualka Yesus la ngiciakka tandau ini ngan ughangtu, "Jemau diau kucium itula jemaunyau. Tangkapla Diau." 26:49 La sampai di bada itu, Yudas masighi Yesus ngan bekatau, "Salam, Pak Guru." Mangku diciumau. 26:50 Yesus bekatau, "Ui kaba, endak ngapau kaba datang ke sini?" Udim itu ughangtu tadi masigh mangku nangkap Yesus. 26:51 Sughang jak di anak-buaHau diau adau di situ ncabut pedangau, ngapak anak-bua Imam Besak mangku putus telingaunyau. 26:52 Yesus bekatau ngan anak-buaHau itu, "Berangkaukala pedang kaba. Karnau jemau diau makai pedang, ka mati ngan pedang. 26:53 Apu kaba kirau, Aku nidau pacak mintak tulung ngan BapakKu? Mangku Diau gancang ngajung duau belas lebia rumbungan tentera malaikat endak nulung Aku. 26:54 Anyautu amun luak itu, manau ka adau tejadi setu diau la dikiciakka dalam Injil, bansau nyela mesti tejadi luak ini?" 26:55 Mangku Yesus bekatau ngan jemau banyak tadi, "Kamu datang mbatak pedang, mbatak pembaduk endak nangkap Aku. Apu Aku jemau ja'at? Idang aghi Aku ngajagh di Ghuma Allah. Kamu enggup nangkap Aku. 26:56 Nyela, gegalaunyautu mesti tejadi, mangku ditepati setu diau ditulis dalam kitab nabi-nabi." Mangku gegalau anak-buaHau belaghi ninggalka Yesus. 26:57 La udim ditangkap, Yesus dibata'i ke ghuma Imam Besak Kayapas. Di situ guru-guru ukum Taurat ngan tuau-tuau jemau Yahudi la betunggal. 26:58 Pitrus ngikut jak di jawua sampai ke tengalaman ghuma Imam Besaktu. Mangku diau pulau masuak ke tengalamantu, duduak guak penjagau. Diau endak keruan, luak manau gegalaunyautu ka udim. 26:59 Imam-imam bepangkat tinggi ngan gegalau pengadilan agamau beusaha nyalaka Yesus ngan kici'an mbu'ung, supayau pacak diukum mati. 26:60 Anyautu nidau bediau buktiau, empuak banyak jemau ngiciakka setu diau mbu'ung. Mangku adau duau ughang pegi ke mukau. 26:61 Ughang duautu bekatau, "Jemau ini ngatauka, 'Aku pacak merubuaka Ghuma Allah, mangku timpau tigau aghi negakkanyau agi.' " 26:62 Mangku Imam Besak betegak bekatau ngan Yesus, "Ngapau Kaba nidau nimbali buru'an diau mburuakka Kabatu?" 26:63 Anyautu Yesus diam ajau. Mangku Imam Besak ngiciak agi ngan Diau, kataunyau, "Demi Allah diau idup kiciakkala ngan kami, apu Kaba Mesias, Rajau Penyelamat, Anak Allah, apu nidau." 26:64 Yesus nimbal, "Dighitu la ngiciakkanyau. Anyautu percayaula, mulai mbak kini kapu dighi ka nginak Anak Manusiau duduak di sebela kanan Allah diau Mahakuasau mangku datang ngan aban di langit." 26:65 Mangku Imam Besak ncaghiakka bajuau ngan bekatau, "Diau nggelakka Allah. Nidau nanti dikiciakka jemau lain agi. Gegalau kapu dighi la ndengagh Diau nggelakka Allah. 26:66 Mbak kini luak manau pendapat kapu dighi?" Ughangtu nimbal, "Diau besala. Diau mesti mati." 26:67 Mangku ughangtu meludai dayi Yesus ngan mbaduki Diau. Adau pulau diau nampaghAu. 26:68 ngan bekatau, "Ai, Rajau Penyelamat, cubau dedak ngan kiciakka ngan kami, sapau nampagh kaba?" 26:69 Penarau Pitrus dang duduak di luagh di tengalaman, adau sughang jemau tinau budak Imam Besak datang bekatau ngan Pitrus, "Kaba pulau maju seghundak ngan Yesus, jemau Galiliatu." 26:70 Pitrus nidau ngaku'inyau di mukau gegalau ughangtu, kataunyau, "Aku nidau keruan tuapau dikiciakka kaba?" 26:71 Mangku diau pegi ke duaghau tengalamantu, jemau tinau diau lain nginak Pitrus mangku bekatau ngan jemau di situ, "Jemau ini pulau la seghundak ngan Yesus, jemau Nasarittu." 26:72 Pitrus nidau pulau ngaku'i Diau ngan sumpa, "Aku nidau nian keruan Jemau itu." 26:73 Nidau lamau udim itu adau jemau lain diau betegak di situ njenguak Pitrus ngan bekatau, "Cetau kaba sughang jak di ughangtu. Itu nampak carau kaba ngiciak." 26:74 Mangku Pitrus besumpa, "Aku nidau keruan Jemau itu. Nengkela Allah ngukum aku, amun aku mbu'ung." Masau itula ayam bekukuak. 26:75 Mangku Pitrus teghingat setu diau la dikiciakka Yesus ngan diau, "Antak ka ayam bekukuak, kaba la tigau kali nidau ngaku'i Aku." Mangku Pitrus ngeluagh jak di situ nangis sesedanan.

Matius 27

27:1 Aghi gi akap nianan, gegalau imam bepangkat tinggi ngan tuau jemau Yahudi betunggal mutuska endak mbunua Yesus. 27:2 Diau dighimpus, dibata'i endak diseraka ngan Pilatus, gubernur Rum itu. 27:3 Yudas diau njualka Yesustu la nginak Yesus diukum mati, diau nyesal. Mangku mbaliakka tigau pulua tanci pirak itu ngan imam ngan tuau-tuau. 27:4 Diau bekatau, "Aku la bedusau, karnau njualka jemau diau nidau besala, mangku Diau diukum mati." Ughangtu nimbal, "Ukan urusan kami. Itu urusan kaba." 27:5 Yudas ncapakka tancitu dalam Ghuma Allah, mangku pegi bekujut. 27:6 Imam-imam itu ngambiak tancitu ngan bekatau, "Tanci ini tanci dagha. Nurut ukum Taurat nidau bulia dimasuakka dalam bada pesembahan di Ghuma Allah." 27:7 Udim ughangtu buijau, digunaukanyau tancitu endak mbeli tana diau dikiciakka Tana Tukang Peghiyuak. Tana itu dipakai batan endak nguburka jemau asing. 27:8 Itula sebapau enggut mbak kini tana itu dinamauka tana dagha. 27:9 Luak itula ditepati setu diau la dikiciakka nabi Yeremia, "Ughangtu nerimau tigau pulua tanci pirak. Itu regau diau ditujui jemau Israil batan bayighan batan endak sughang jemau. 27:10 Mangku tanci itu dipakai endak mbeli tana tukang peghiyuak luak la diperintaka Tuhan ngan aku." 27:11 Mangku Yesus diadapka ngan Pilatus, gubernur nenggeri itu. Pilatustu betanyau, "Kaba rajau jemau Yahudi?" Yesus nimbal, "Dighitu la ngiciakkanyau." 27:12 Mangku imam-imam bepangkat tinggi ngan tuau-tuau jemau Yahudi ngiciakka Yesus ngan banyak buru'an. Anyautu Yesus nidau nimbal dikit kiala. 27:13 Mangku katau Pilatus, "Apu Kaba nidau ndengagh gegalau buru'an diau dikiciakka ughangtu?" 27:14 Anyautu Yesus nidau nimbal dikit kiala, mangku gubernurtu kemangan nian. 27:15 Idang taun masau aghi rerayau Paska biasaunyau gubernur mbibaska sughang kawalan nurut kendak jemau banyak. 27:16 Masau itu adau sughang kawalan diau tekenal, namaunyau Yesus Barabas. 27:17 Mangku jemau banyak la betunggal, Pilatus betanyau ngan ughangtu, "Sapau diau kamu endak kubibaska batan endak kamu, apu Yesus Barabas? Apu Yesus diau dikiciakka Keristus, Rajau Penyelamat?" 27:18 Pilatus ngiciak luak itu, karnau diau keruan, bansau pengulu jemau Yahudi nyeraka Yesus ngan diau, karnau ughangtu sengit. 27:19 Pilatus dang duduak di bada pengadilan, biniau bepesan ngan diau, "Jangan kamu ncampuri pekarau Jemau diau nidau besala itu. Di malam aku adau mimpi karut mangku nanggung nian karnau Jemau itu." 27:20 Anyautu imam-imam ngan tuau-tuau jemau Yahudi maju ngasung jemau banyaktu mintak ngan Pilatus, supayau Barabas dibibaska ngan Yesus diukum mati. 27:21 Mangku gubernurtu betanyau agi ngan ughangtu, "Jak di duau ughang itu sapau diau kamu endak kubibaska batan endak kamu?" Katau ughangtu, "Barabas!" 27:22 Mangku Pilatus betanyau ngan ughangtu, "Mangku tuapau diau mesti kubuat ngan Yesus diau dikiciakka Keristus?" Katau ughangtu, "Pakuka Diau di kayu salip!" 27:23 Katau Pilatus, "Tuapau keja'atanNyau?" Ughangtu tegauk, "Bunuala Diau! Pakukala Diau di kayu salip!" 27:24 Mangku Pilatus nyadari, bansau diau nidau pacak agi mbuat tuapau-apau, lagi jemau banyaktu la mulai kacau. Diau ngambiak ayiak, mbasua tanganau di mukau jemau banyak ngan bekatau, "Aku nidau betanggung-jawab ngan kematian Jemau ini. Itu urusan kamu!" 27:25 Gegalau jemau banyaktu nimbal, "Au, nengkela kami ngan anak-cucung kami nanggungka ukuman kematianNyau." 27:26 Mangku diau ngajung Barabas dibibaska batan endak ughangtu ngan Yesus dibaduki mangku diseraka endak dipakuka di kayu salip. 27:27 Mangku tentera-tentera Pilatus mbatak Yesus masuak ke istana gubernur. Gegalau tenterahau betunggal di guak Yesus. 27:28 Ughangtu ngelucungi baju Yesus mangku nyurumka baju rajau ngan Diau. 27:29 Ughangtu mbuat gitar jak di ghanting bedughi, dikenaukanyau di palak Yesus. Udim itu dienjuakka sebatang bulua di tangan kananAu, mangku ughangtu nunduak di adapanNyau ngan nggelakka Diau, katau ughangtu, "Idup, ui rajau jemau Yahudi!" 27:30 Ughangtu meludai Diau ngan ngambiak tungkattu mangku dibaduki pala'Au. 27:31 Udim dipusiakka, ughangtu ngelucungi baju rajau itu, dikenauka bajuAu agi ngan Diau, mangku dibata'i keluagh endak dipakuka di kayu salip. 27:32 Di tenga jalan ughangtu betemu Simun, jemau Kirini, mangku dipasau mikul salip Yesus. 27:33 Mangku ughangtu sampai di bada diau benamau Gulguta, retiau bada kerungkang palak. 27:34 Di situ ughangtu ngenju'i Yesus minum anggur undak empedu. Yesus la ngecap anggurtu, Diau enggup minumau. 27:35 La udim itu Diau dipakuka di kayu salip, mangku tenteratu mbagi pekakasAu disuntinkanyau. 27:36 Mangku ughangtu duduak di situ njagau Diau. 27:37 Di pucuak pala'Au dipasang tulisan buru'an mburuakka Diau, bacauannyau, "Inila Yesus, Rajau jemau Yahudi." 27:38 Adau pulau duau ughang bandit diau disalipka serempak ngan Yesus, sughang di sebela kananAu, sughang di sebela kidauNyau. 27:39 Jemau diau lalu di situ nggilingka palak ngan nggelakka Yesus. 27:40 Katau ughangtu, "Ai, Kaba endak merubuaka Ghuma Allah ngan negakkanyau timpau tigau aghi. Amun Kaba ngenian Anak Allah, selamatkala nyawau Kaba, tughunla jak di kayu salip itu." 27:41 Luak itu pulau imam-imam ngan guru-guru ukum Taurat ngan tuau-tuau nggelakka Yesus. Ughangtu bekatau, 27:42 "Diau nyelamatka jemau lain, anyautu diriAu nidau pacak Diau selamatka. Amun Diau Rajau Israil, iluakla Diau tughun mbak kini jak di kayu saliptu, mangku kami endak percayau ngan Diau. 27:43 Diau ngaghapka Allah ngan bekatau, bansau Diau Anak Allah. Mela kitau nginak, apu Allah endak nyelamatka Diau mbak kini." 27:44 Bandit diau dipakuka serempak ngan Diau nggelakka Diau luak itu pulau. 27:45 Aghitu tengaghi daira itu keleman galau selamau tigau jam. 27:46 Kekirau jam tigau petang Yesus tegauk, katauNyau, "Eli, eli, lama sabaktani!" Retiau, "AllahKu, AllahKu, ngapau Dighi ninggalka Aku?" 27:47 Ndengagh titu adau jemau diau betegak di situ diau bekatau, "Diau mantau Elia." 27:48 Mangku sughang jak di ughangtu belaghi mbatak bungau karang, dimasuakkanyau dalam anggur masam, dicucuakkanyau ke kemughu, mangku dienjuakkanyau batan minuman Yesus. 27:49 Anyautu jemau lain bekatau, "Tunggu kudai! Mela kitau nginak, apu Elia datang." 27:50 Udim itu Yesus tegauk agi, mangku nyawauNyau abis. 27:51 Tabir Ghuma Allah cebagh bela duau jak di pucuak enggut ke bawa. Adau gempau mangku bukit-bukit batu peca. 27:52 Kuburan-kuburan tebukak pulau ngan banyak umat Allah ngulang idup. 27:53 Masau Yesus la ngulang idup, ughangtu ngeluagh pulau jak di kuburan, mangku masuak kuta Yerusalim. Banyak jemau nginak ughangtu di situ. 27:54 Kumandan tentera ngan tenterahau diau dang njagaui Yesus nginak gempau ngan gegalau diau tejadi itu, mangku penakut nian ngan bekatau, "Nyela nian, Diauni Anak Allah." 27:55 Di situ adau pulau banyak jemau tinau diau dang nginak jak di jawua. Ughang itula diau ngikut Yesus jak di Galilia endak nulung Diau. 27:56 Di antarau ughangtu adau Maria Magdalina ngan Maria, mak Yakubus, ngan pulau mak Yuhanis. 27:57 Petang itu adau sughang jemau kayau jak di Arimatia diau benamau Yusup diau pulau anak-bua Yesus. 27:58 Diau pegi ngadap Pilatus mintak mayat Yesus. Mangku Pilatustu ngajung, supayau mayat Yesustu dienjuakka ngan diau. 27:59 Yusuptu ngambiak mayattu dibalutau ngan kain putia diau empai, 27:60 mangku ditepiakka dalam kuburannyau diau empai dibuat dalam bukit batu, mangku diguliakka sebua batu besak nukupi lubang duaghau kuburan itu. Udim itu diau pegi. 27:61 Maria Magdalina ngan Maria diau lain mendam di situ duduak ngadapinyau. 27:62 Pagi di aghiau aghi Sabat imam-imam bepangkat tinggi ngan jemau Parisi pegi ngadap Pilatus. 27:63 Ughangtu bekatau, "Tuan, kami teghingat, masau jemau penipu itu gi idup, Diau bekatau, 'La udim duau malam Aku ka idup agi.' 27:64 Karnau itu ajungla jemau njagau kuburan itu iluak-iluak enggut aghi ketigau, supayau anak-buaHau nidau pacak maling mayatAu, mangku ngiciakka ngan jemau, bansau Diau la diidupka jak di mati. Mangku tipuan diau mendian ka lebia ja'at jak diau senitu." 27:65 "Inila tentera-tentera." Katau Pilatus, "Pegila, jagauila kuburantu iluak-iluak." 27:66 Mangku ughangtu pegi ke kuburan, ditandaui batu penukupau, mangku tenteratu njagauinyau.

Matius 27

27:1 Aghi gi akap nianan, gegalau imam bepangkat tinggi ngan tuau jemau Yahudi betunggal mutuska endak mbunua Yesus. 27:2 Diau dighimpus, dibata'i endak diseraka ngan Pilatus, gubernur Rum itu. 27:3 Yudas diau njualka Yesustu la nginak Yesus diukum mati, diau nyesal. Mangku mbaliakka tigau pulua tanci pirak itu ngan imam ngan tuau-tuau. 27:4 Diau bekatau, "Aku la bedusau, karnau njualka jemau diau nidau besala, mangku Diau diukum mati." Ughangtu nimbal, "Ukan urusan kami. Itu urusan kaba." 27:5 Yudas ncapakka tancitu dalam Ghuma Allah, mangku pegi bekujut. 27:6 Imam-imam itu ngambiak tancitu ngan bekatau, "Tanci ini tanci dagha. Nurut ukum Taurat nidau bulia dimasuakka dalam bada pesembahan di Ghuma Allah." 27:7 Udim ughangtu buijau, digunaukanyau tancitu endak mbeli tana diau dikiciakka Tana Tukang Peghiyuak. Tana itu dipakai batan endak nguburka jemau asing. 27:8 Itula sebapau enggut mbak kini tana itu dinamauka tana dagha. 27:9 Luak itula ditepati setu diau la dikiciakka nabi Yeremia, "Ughangtu nerimau tigau pulua tanci pirak. Itu regau diau ditujui jemau Israil batan bayighan batan endak sughang jemau. 27:10 Mangku tanci itu dipakai endak mbeli tana tukang peghiyuak luak la diperintaka Tuhan ngan aku." 27:11 Mangku Yesus diadapka ngan Pilatus, gubernur nenggeri itu. Pilatustu betanyau, "Kaba rajau jemau Yahudi?" Yesus nimbal, "Dighitu la ngiciakkanyau." 27:12 Mangku imam-imam bepangkat tinggi ngan tuau-tuau jemau Yahudi ngiciakka Yesus ngan banyak buru'an. Anyautu Yesus nidau nimbal dikit kiala. 27:13 Mangku katau Pilatus, "Apu Kaba nidau ndengagh gegalau buru'an diau dikiciakka ughangtu?" 27:14 Anyautu Yesus nidau nimbal dikit kiala, mangku gubernurtu kemangan nian. 27:15 Idang taun masau aghi rerayau Paska biasaunyau gubernur mbibaska sughang kawalan nurut kendak jemau banyak. 27:16 Masau itu adau sughang kawalan diau tekenal, namaunyau Yesus Barabas. 27:17 Mangku jemau banyak la betunggal, Pilatus betanyau ngan ughangtu, "Sapau diau kamu endak kubibaska batan endak kamu, apu Yesus Barabas? Apu Yesus diau dikiciakka Keristus, Rajau Penyelamat?" 27:18 Pilatus ngiciak luak itu, karnau diau keruan, bansau pengulu jemau Yahudi nyeraka Yesus ngan diau, karnau ughangtu sengit. 27:19 Pilatus dang duduak di bada pengadilan, biniau bepesan ngan diau, "Jangan kamu ncampuri pekarau Jemau diau nidau besala itu. Di malam aku adau mimpi karut mangku nanggung nian karnau Jemau itu." 27:20 Anyautu imam-imam ngan tuau-tuau jemau Yahudi maju ngasung jemau banyaktu mintak ngan Pilatus, supayau Barabas dibibaska ngan Yesus diukum mati. 27:21 Mangku gubernurtu betanyau agi ngan ughangtu, "Jak di duau ughang itu sapau diau kamu endak kubibaska batan endak kamu?" Katau ughangtu, "Barabas!" 27:22 Mangku Pilatus betanyau ngan ughangtu, "Mangku tuapau diau mesti kubuat ngan Yesus diau dikiciakka Keristus?" Katau ughangtu, "Pakuka Diau di kayu salip!" 27:23 Katau Pilatus, "Tuapau keja'atanNyau?" Ughangtu tegauk, "Bunuala Diau! Pakukala Diau di kayu salip!" 27:24 Mangku Pilatus nyadari, bansau diau nidau pacak agi mbuat tuapau-apau, lagi jemau banyaktu la mulai kacau. Diau ngambiak ayiak, mbasua tanganau di mukau jemau banyak ngan bekatau, "Aku nidau betanggung-jawab ngan kematian Jemau ini. Itu urusan kamu!" 27:25 Gegalau jemau banyaktu nimbal, "Au, nengkela kami ngan anak-cucung kami nanggungka ukuman kematianNyau." 27:26 Mangku diau ngajung Barabas dibibaska batan endak ughangtu ngan Yesus dibaduki mangku diseraka endak dipakuka di kayu salip. 27:27 Mangku tentera-tentera Pilatus mbatak Yesus masuak ke istana gubernur. Gegalau tenterahau betunggal di guak Yesus. 27:28 Ughangtu ngelucungi baju Yesus mangku nyurumka baju rajau ngan Diau. 27:29 Ughangtu mbuat gitar jak di ghanting bedughi, dikenaukanyau di palak Yesus. Udim itu dienjuakka sebatang bulua di tangan kananAu, mangku ughangtu nunduak di adapanNyau ngan nggelakka Diau, katau ughangtu, "Idup, ui rajau jemau Yahudi!" 27:30 Ughangtu meludai Diau ngan ngambiak tungkattu mangku dibaduki pala'Au. 27:31 Udim dipusiakka, ughangtu ngelucungi baju rajau itu, dikenauka bajuAu agi ngan Diau, mangku dibata'i keluagh endak dipakuka di kayu salip. 27:32 Di tenga jalan ughangtu betemu Simun, jemau Kirini, mangku dipasau mikul salip Yesus. 27:33 Mangku ughangtu sampai di bada diau benamau Gulguta, retiau bada kerungkang palak. 27:34 Di situ ughangtu ngenju'i Yesus minum anggur undak empedu. Yesus la ngecap anggurtu, Diau enggup minumau. 27:35 La udim itu Diau dipakuka di kayu salip, mangku tenteratu mbagi pekakasAu disuntinkanyau. 27:36 Mangku ughangtu duduak di situ njagau Diau. 27:37 Di pucuak pala'Au dipasang tulisan buru'an mburuakka Diau, bacauannyau, "Inila Yesus, Rajau jemau Yahudi." 27:38 Adau pulau duau ughang bandit diau disalipka serempak ngan Yesus, sughang di sebela kananAu, sughang di sebela kidauNyau. 27:39 Jemau diau lalu di situ nggilingka palak ngan nggelakka Yesus. 27:40 Katau ughangtu, "Ai, Kaba endak merubuaka Ghuma Allah ngan negakkanyau timpau tigau aghi. Amun Kaba ngenian Anak Allah, selamatkala nyawau Kaba, tughunla jak di kayu salip itu." 27:41 Luak itu pulau imam-imam ngan guru-guru ukum Taurat ngan tuau-tuau nggelakka Yesus. Ughangtu bekatau, 27:42 "Diau nyelamatka jemau lain, anyautu diriAu nidau pacak Diau selamatka. Amun Diau Rajau Israil, iluakla Diau tughun mbak kini jak di kayu saliptu, mangku kami endak percayau ngan Diau. 27:43 Diau ngaghapka Allah ngan bekatau, bansau Diau Anak Allah. Mela kitau nginak, apu Allah endak nyelamatka Diau mbak kini." 27:44 Bandit diau dipakuka serempak ngan Diau nggelakka Diau luak itu pulau. 27:45 Aghitu tengaghi daira itu keleman galau selamau tigau jam. 27:46 Kekirau jam tigau petang Yesus tegauk, katauNyau, "Eli, eli, lama sabaktani!" Retiau, "AllahKu, AllahKu, ngapau Dighi ninggalka Aku?" 27:47 Ndengagh titu adau jemau diau betegak di situ diau bekatau, "Diau mantau Elia." 27:48 Mangku sughang jak di ughangtu belaghi mbatak bungau karang, dimasuakkanyau dalam anggur masam, dicucuakkanyau ke kemughu, mangku dienjuakkanyau batan minuman Yesus. 27:49 Anyautu jemau lain bekatau, "Tunggu kudai! Mela kitau nginak, apu Elia datang." 27:50 Udim itu Yesus tegauk agi, mangku nyawauNyau abis. 27:51 Tabir Ghuma Allah cebagh bela duau jak di pucuak enggut ke bawa. Adau gempau mangku bukit-bukit batu peca. 27:52 Kuburan-kuburan tebukak pulau ngan banyak umat Allah ngulang idup. 27:53 Masau Yesus la ngulang idup, ughangtu ngeluagh pulau jak di kuburan, mangku masuak kuta Yerusalim. Banyak jemau nginak ughangtu di situ. 27:54 Kumandan tentera ngan tenterahau diau dang njagaui Yesus nginak gempau ngan gegalau diau tejadi itu, mangku penakut nian ngan bekatau, "Nyela nian, Diauni Anak Allah." 27:55 Di situ adau pulau banyak jemau tinau diau dang nginak jak di jawua. Ughang itula diau ngikut Yesus jak di Galilia endak nulung Diau. 27:56 Di antarau ughangtu adau Maria Magdalina ngan Maria, mak Yakubus, ngan pulau mak Yuhanis. 27:57 Petang itu adau sughang jemau kayau jak di Arimatia diau benamau Yusup diau pulau anak-bua Yesus. 27:58 Diau pegi ngadap Pilatus mintak mayat Yesus. Mangku Pilatustu ngajung, supayau mayat Yesustu dienjuakka ngan diau. 27:59 Yusuptu ngambiak mayattu dibalutau ngan kain putia diau empai, 27:60 mangku ditepiakka dalam kuburannyau diau empai dibuat dalam bukit batu, mangku diguliakka sebua batu besak nukupi lubang duaghau kuburan itu. Udim itu diau pegi. 27:61 Maria Magdalina ngan Maria diau lain mendam di situ duduak ngadapinyau. 27:62 Pagi di aghiau aghi Sabat imam-imam bepangkat tinggi ngan jemau Parisi pegi ngadap Pilatus. 27:63 Ughangtu bekatau, "Tuan, kami teghingat, masau jemau penipu itu gi idup, Diau bekatau, 'La udim duau malam Aku ka idup agi.' 27:64 Karnau itu ajungla jemau njagau kuburan itu iluak-iluak enggut aghi ketigau, supayau anak-buaHau nidau pacak maling mayatAu, mangku ngiciakka ngan jemau, bansau Diau la diidupka jak di mati. Mangku tipuan diau mendian ka lebia ja'at jak diau senitu." 27:65 "Inila tentera-tentera." Katau Pilatus, "Pegila, jagauila kuburantu iluak-iluak." 27:66 Mangku ughangtu pegi ke kuburan, ditandaui batu penukupau, mangku tenteratu njagauinyau.

Matius 28

28:1 Aghi Sabat la lalu. Aghi Minggu paghak siang Maria Magdalina ngan Maria diau lain pegi ngaruaka kuburan Yesus. 28:2 Mangku adau gempau diau besak. Mangku sughang malaikat Tuhan tughun jak di sergau ngguliakka batu penukuptu ngan duduak di pucu'au. 28:3 Dayi malaikattu luak kilat, bajuau putia nianan. 28:4 Tentera diau njagaui kuburantu gemetagh ngan takut kematila njadi luak jemau mati. 28:5 Malaikattu bekatau ngan tinau tadi, "Nidau nanti penakut. Aku keruan kamu ndala'i Yesus diau la disalipka itu. 28:6 Diautu nidau bediau di sini. Diau la ngulang idup, luak setu diau la dikiciakkaNyau. Mela, kina'ila badaHau. 28:7 Mbak kini pegila cecepat, kiciakka ngan anak-buaHau Diau la ngulang idup. Diau ndului kamu ke Galilia. Di situ kamu ka betemu ngan Diau. Ingatkala katauku ini diau la kukiciakka ngan kamu." 28:8 Tinau tadi cecepat ninggalka kuburantu ngan peghasauan takut ngan riang nian. Ughangtu belaghi-laghi endak ngiciakka ceritau itu ngan anak-bua Yesus. 28:9 Yesus datang nemui tinautu ngan bekatau, "Salam." Mangku ughangtu masighi Diau ngan ngecakka ketingAu mangku nyemba Diau. 28:10 Mangku Yesus bekatau, "Nidau nanti penakut." Katau Yesus ngan ughangtu, "Pegila, kiciakka ngan kantin-kantinKu, supayau ughangtu pegi ke Galilia. Di situ ughangtu ka nginak Aku." 28:11 Penarau tinau tadi dang pegi, adau jak di tentera diau njagau kuburantu diau pegi ke kuta. Ughangtu ngiciak ngan imam-imam setu diau la tejadi. 28:12 Imamtu buijau ngan tuau-tuau jemau Yahudi, mangku ughangtu ngenjuakka tanci ngan tentera tadi. 28:13 Katau ughangtu, "Kamu mesti ngiciakka, bansau anak-buaHau datang aghi malam ngan maling mayatAu, penarau kamu dang tiduak. 28:14 Amun gubernur ndengagh ceritau itu, kami ka ngiciak ngan diau, mangku kamu nidau diukum." 28:15 Tentera itu ngambiak tancitu ngan ngerjauka setu diau dikiciakka ngan ughangtu. Ceritau itu masia tesiar di guak jemau Yahudi enggut mbak kini. 28:16 Sebelas anak-bua Yesus itu pegi ke bukit di Galilia luak diau diajungka Yesus ngan ughangtu. 28:17 Ughangtu nginak Yesus di situ, mangku nunduak nyemba Diau. Anyautu adau pulau diau asau-asau. 28:18 Yesus masighi ughangtu ngan bekatau, "Gegalau kuasau di sergau ngan di deniau la diseraka ngan Aku. 28:19 Karnau itu, pegila ke gegalau bangsau di deniau, jadikala ughangtu anak-buaKu, baptiskala ughangtu ngan namau Bapak, Anak ngan Rua Allah, 28:20 ajaghkala ughangtu ngerjauka gegalaunyau diau la Kukiciakka ngan kamu. Ingatkala, Aku ka maju adau guak kamu enggut aghi kiamat."

Markus 1

1:1 Inila Ceritau Iluak nceritauka Yesus Keristus, Anak Allah. 1:2 Ceritau iluak itu mulai luak diau la ditulis nabi Yesaya, " 'Inila ajunganKu,' katau Allah, 'Aku ngajung diau dulu datang sangkan Kaba. Diau ka nyediauka jalan batan endak Kaba.' 1:3 Adau suarau jemau di padang bungin, 'Sediaukala jalan batan endak Tuhan. Lughuskala jalan batan endak Diau.' " 1:4 Luak itula Yuhanis Pembaptis muncul di padang bungin sampai bekatau, "Ubaila perembak ngan dusau kamu, ngan mintak dibaptis, mangku Allah ka ngabiska dusau kamu." 1:5 Jemau jak di gegalau Yudia ngan gegalau jemau Yerusalim datang njenguak diau. Ughangtu ngaku'i dusaunyau mangku dibaptis di ayiak Yurdan. 1:6 Yuhanis makai baju jak di bulu untau, bebat jak di bawak. Makanannyau belalang ngan madu utan. 1:7 Ceritau ini dikiciakkanyau, "Nanti udim aku ka datang sughang Jemau. Bekuasaula Diau sangkan aku. Nunduak melegha'i tali sepatuAu ajau aku nidau pantas. 1:8 Aku mbaptis kamu ngan ayiak. Anyautu Diau ka mbaptis kamu ngan Rua Allah." 1:9 Masau itu Yesus datang jak di Nasarit di daira Galilia, mangku Diau dibaptis Yuhanis di ayiak Yurdan. 1:10 Diau dang ngeluagh jak di ayiaktu, Diau nginak langit tebukak, mangku Rua Allah tughun luak burung darau inggap di Diau. 1:11 Mangku adau suarau jak di langit, "Kabanila AnakKu diau Kusayangi. Kaba melemakka atiKu." 1:12 Udim itu Rua Allah mbatak Yesus pegi ke padang bungin. 1:13 Selamau empat pulua aghi Diau mendam di situ, dicubaui Iblis. Di guak Diau adau benatang belia. Mangku malaikat nepi'i Diau. 1:14 Yuhanis la dijilka, mangku Yesus pegi ke Galilia ngiciakka ceritau iluak jak di Allah. 1:15 KatauNyau, "Masaunyau la sampai. Allah laka merinta. Ubaila perembak ngan dusau-dusau kamu, mangku percayaula ngan ceritau iluak jak di Allah." 1:16 Yesus dang bejalan di tepi laut Galilia, mangku Diau nginak jemau duau beghading tukang ndalak ikan, namaunyau Simun ngan Anderias. Duau beghadingtu dang ngipaska jalau di laut. 1:17 Yesus ngajak tukang ndalak ikan tadi, "Mela, ngikut Aku! Aku ka ngajaghi kamu njadi tukang ndalak jemau." 1:18 Masau itu pulau jemau duau beghadingtu ninggalka jalaunyau, mangku ngikut Yesus. 1:19 Yesus bejalan dikit agi, mangku tekinak jemau duau beghading lainau, namaunyau Yakubus ngan Yuhanis, anak Sebedius. Diau dang ngilu'i jalaunyau dalam perawu. 1:20 Satu Yesus nginak ughangtu, dipantauNyau Yakubus ngan Yuhanis. Mangku duau beghadingtu ninggalka ba'au ngan jemau upahan di perawu, mangku ngikut Yesus. 1:21 Yesus ngan anak-buaHau sampai di Kapernaum. Aghi Sabat di mukau Yesus masuak ghuma sembayang mangku mulai ngajagh. 1:22 Jemau kemangan galau ndengagh Diau ngajagh, karnau Diau ngajagh ngan kuasau ukan luak guru-guru ukum Taurat. 1:23 Yesus dang ngajagh, adau sughang jemau di ghuma sembayang tadi diau diarung iblis. Jemau itu tegauk, kataunyau, 1:24 "Ui, Yesus, jemau Nasarit! Endak tuapau ngan kami? Dighi ke sini endak ncapakka kami? Aku keruan sapau Dighi. Dighitu Ajungan Allah diau suci!" 1:25 Anyautu Yesus marai iblistu, "Diam!" katauNyau, "Keluaghla jak di jemau ini!" 1:26 Jemautu dibanting-bantingka iblistu, mangku sampai tegauk ngeluagh iblistu jak di jemau tadi. 1:27 Gegalau jemau diau ngina'autu tegagau ngan kemangan, mangku sangi tanyaui, "Tuapau titu? Apu titu ajaghan empai? Diau ngajagh ngan kuasau. Iblis pulau diperintakaNyau, mangku diau na'atiNyau." 1:28 Mangku ceritau Yesustu cepat tesiar di gegalau daira Galilia. 1:29 Yesus ngan anak-buaHau keluagh jak di ghuma sembayang, mangku Diau pegi tandang ke ghuma Simun ngan Anderias. Yakubus ngan Yuhanis ngikut pulau. 1:30 Mentuau tinau Simun dang tiduak karnau buidapan demam. Yesus la sampaitu, dikiciakka ngan Diau, bansau mentuau Simun tadi buidapan. 1:31 Mangku Diau pegi masighi mentuau Simuntu, dikecakkaNyau tanganau, dibangunkaNyau, mangku demamau ghadu. La udim itu tinautu nepi'i mendahau. 1:32 Aghitu la sangkup malam, gegalau jemau buidapan ngan diau diarung iblis dibata'i galau njenguak Yesus. 1:33 Mangku gegalau jemau di dusuntu betunggal di mukau duaghau masuak ghuma itu. 1:34 Yesus meghadui serbau idapan jemau banyaktu ngan ngisitka iblis. Diau nidau ngajung iblistu ngiciak, karnau diau keruan, sapau Yesustu. 1:35 Pagi di aghiau paghak siang butau Yesus bangun ninggalka ghuma pegi ke bada diau suni mangku bedu'a di situ. 1:36 Anyautu Simun ngan kantin-kantinau pegi ndala'i Diau. 1:37 La betemu ughangtu bekatau, "Gegalau jemau ndala'i Dighi." 1:38 Anyautu Yesus nimbal, "Mela kitau pegi ke bada lain, ke dusun-dusun ngepungan ini. Aku mesti ngiciakka pulau ceritau iluak di situ. Itula tujuan Aku ke sini." 1:39 Mangku Yesus pegi ngidari gegalau Galilia ngan ngiciakka ceritau iluak di ghuma-ghuma sembayang ngan ngisitka iblis. 1:40 Adau sughang jemau diau buidapan ja'at datang njenguak Yesus. Jemautu nunduak di adapanNyau ngan mintak tulung nian, kataunyau, "Pak, amun Dighi endak, Dighi pacak meghadui aku." 1:41 Yesus sial ngan jemautu. Diau nyurungka tanganAu, dikecakkaNyau jemautu katauNyau, "Arau, ghadula kaba." 1:42 Masau itu pulau idapannyau lengit, mangku diau ghadu. 1:43 Mangku Yesus ngajung diau pegi ngan diingatka nian, katauNyau, 1:44 "Awas, jangan kaba kiciakka ceritau ini ngan sughang kiala. Pegila, kinakkala badan kaba ngan imam, enjuakkala kerban diau diperintaka Musa, buktiau ngan ughangtu, bansau kaba la ghadu." 1:45 Anyautu jemautu pegi ngan ngiciakka ceritau itu ngan gegalau jemau, mangku Yesus nidau pacak agi masuak kuta ngan terangterangan. Diau mendam di luagh di bada diau suni. Anyautu jemau maju datang jak di manau-manau.

Markus 2

2:1 La udim bebeghapau aghi Yesus ngulang ke Kapernaum, mangku tesiar ceritau, bansau Diau dang di ghuma. 2:2 Mangku banyak jemau datang begumbul, enggut nidau bediau agi bada. Di mukau duaghau penua pulau ngan jemau. Mangku Yesus ngiciakka katau Allah ngan ughangtu. 2:3 Diau dang ngiciak, adau jemau datang mbatak sughang jemau lumpua, dijagang ughang empat. 2:4 Anyautu ughangtu nidau pacak lalu njenguak Yesus, karnau jemau banyak di situ. Mangku ughangtu mbukak atap di tipatanNyau. La dibukakka ataptu, ditughunka bada tidu'au. 2:5 Satu nginak ughangtu percayau nian ngan Diau, Yesus bekatau, "Ui, kantinKu, dusau kaba la diabiska." 2:6 Anyautu adau pulau guru ukum Taurat duduak di situ ngan bekatau dalam ati, 2:7 "Beghani nian jemau ini ngiciak luak itu. Diau nggelakka Allah. Nidau bediau diau pacak ngabiska dusau, lain jak di Allah." 2:8 Masau itu pulau Yesus ngeruani rupu'an ughangtu, mangku Diau bekatau, "Ngapau kapu dighi berupuak luak itu? 2:9 Manau diau mura, ngiciakka, 'Dusau kaba la diabiska', apu ngiciakka, 'Bangunla kaba, katangka bada tiduak kaba ngan bejalanla'? 2:10 Anyautu Akuni ka ngajung jemau ini bangun, mangku kapu dighi keruan, bansau Anak Manusiau bekuasau ngabisi dusau di deniauni." Mangku Yesus ngiciak ngan jemau lumpua tadi, 2:11 "Bangunla kaba, katangkala bada tiduak kaba, mangku baliakla ke ghuma kaba!" 2:12 Masau itula pulau jemautu bangun, ngatangka bada tidu'au mangku ngeluagh, dikina'i gegalau ughangtu. Gegalau jemautu kemangan galau, mangku ngunjungka Allah, kataunyau, "Lum kekela kitau nginak setu luak itu!" 2:13 La udim itu Yesus pegi agi ke tepi laut Galilia. Gegalau jemau banyak datang nunggal ngan Diau, mangku Diau ngajagh jemau banyaktu. 2:14 La udim itu Yesus bejalan agi, mangku nginak sughang tukang tagia cuki, namaunyau Liwi, anak Alpius. Diau dang duduak di kantur cuki. "Mela, ngikut Aku!" katau Yesus. Liwi betegak, mangku ngikut Diau. 2:15 Mangku Yesus makan di ghumahau. Banyak nian kantinau tukang tagia cuki ngan jemau bedusau lainau ngikut makan serempak ngan Diau ngan anak-buaHau, karnau banyak jemau ngikut Diau. 2:16 Bebeghapau guru agamau ngan jemau Parisi nginak Yesus makan ngan tukang tagia cuki ngan jemau bedusau lainautu, mangku ughangtu betanyau ngan anak-buaHau, "Ngapau Diau makan ngan penagia cuki ngan jemau bedusautu?" 2:17 Yesus ndengagh tanyauan ughangtu mangku nimbal, "Jemau diau sihat nidau endak duktur, jemau diau buidapan ajau. Aku datang ukan endak mantau jemau diau benagh, tapitu jemau diau bedusau." 2:18 Adau saghi masau anak-bua Yuhanis ngan jemau Parisi dang puasau, mangku adau jemau diau njenguak Yesus ngan betanyau, "Ngapau anak-bua Yuhanis ngan anak-bua jemau Parisi puasau, anyautu anak-bua Kaba nidau?" 2:19 Yesus nimbal, "Apu di jamuan nika menda pacak diajung puasau, selamau pengantinan gi adau? Amun pengantinan gi adau jeghuman nidau pacak puasau. 2:20 Anyautu masaunyau ka sampai, pengantinantu ka diambiak jak di ughangtu. Masau itula ughangtu ka puasau. 2:21 Nidau bediau jemau diau ngambiak batan penampit jak di kain empai diau lum ngerutut endak nampiti baju diau bughuak, karnau amun luak itu, kain penampittu ka ncebaghkanyau. Diau empai ncebaghka diau la bughuak, tamba besak cebaghau. 2:22 Luak itu pulau nidau bediau sughang kia ngisika ayiak anggur diau empai ke dalam kantung bawak diau lamau, karnau ayiak anggur diau empaitu ka mecaka kantungtu, mangku anggurau tebuang ngan kantungtu rusak. Ayiak anggur diau empai mesti dimasuakka ke dalam kantung diau empai pulau." 2:23 Adau saghi aghi Sabat Yesus lalu di umau. Diau dang bejalan anak-buaHau ngambiak padi dikit. 2:24 Mangku adau jemau Parisi diau ngiciak, kataunyau, "Ngapau anak-bua Kaba ngerjauka setu diau nidau bulia dikerjauka aghi Sabat?" 2:25 Mangku Yesus nimbal, katauNyau "Cengki kapu dighi la mbacau setu diau dikerjauka Daud, masau diau ngan anak-buahau lapagh ngan nidau bediau makanan. 2:26 Diautu masuak Ghuma Allah, masau Abyatar njadi Imam Besak, mangku diau makan ruti diau dienjuakka ngan Allah, dienjuakkanyau ngan anak-buahau pulau, awuak ruti itu nidau bulia dimakan, amun ukan imam." 2:27 Mangku Yesus ngiciak agi, "Aghi Sabat diadauka batan endak manusiau, ukan manusiau batan endak aghi Sabat. 2:28 Karnau itu Anak Manusiau nguasaui aghi Sabat pulau."

Markus 3

3:1 Mangku Yesus masuak agi di ghuma sembayang. Di situ adau sughang jemau, tanganau mati sebela. 3:2 Adau jemau endak ndala'i sala Yesus mangku pacak ngadukaNyau. Ughangtu maju meratikaNyau, apu Diau ka meghaduka jemau tadi masau aghi Sabat. 3:3 Yesus ngiciak ngan jemau diau mati sebela tanganau, katauNyau, "Mela, betegak di mukau." 3:4 Mangku Yesus ngiciak ngan ughangtu, katauNyau, "Nurut agamau kitau tuapau diau bulia dikerjauka masau aghi Sabat, apu kerjau iluak apu kerjau ja'at, nyelamatka jemau apu ncelakaukanyau?" Ughangtu diam ajau. 3:5 Yesus bingung karnau ughangtu nidau endak nimbal. Mangku ngan mara Diau ngina'i gegalau ughangtu ngan ngiciak ngan jemau tadi, katauNyau, "Surungkala tangan kaba!" Jemau itu nyurungkanyau, mangku tanganau ghadu. 3:6 Mangku jemau Parisi tadi ngeluagh mangku langsung buijau ngan jemau Herudian endak mbunua Yesus. 3:7 Mangku Yesus ngan anak-buaHau nyingkir ke laut Galilia. Mangku banyak jemau jak di Galilia ngikut Diau. Banyak pulau jemau jak di Yudia, 3:8 jak di Yerusalim, jak di Idumia, jak di beghang ayiak Yurdan, jak di daira Tirus ngan Sidun. Gegalau ughangtu datang njenguak Yesus, karnau la ndengagh gegalaunyau diau dikerjaukaNyautu. 3:9 Ughangtu banyak kematila, mangku Diau ngajung anak-buaHau nyediauka perawu batan endak Diau, supayau jangan diincitka ughangtu. 3:10 Diau banyak meghaduka jemau, mangku gegalau jemau buidapan besesela'an masighi Diau endak ngecakkaNyau. 3:11 Mangku jemau diau diarung rua ja'at rubua di adapanNyau ngan tegauk, katauNyau, "Kaba Anak Allah!" 3:12 Anyautu Yesus negahi nian rua ja'attu ngiciakka sapau Diau. 3:13 Mangku Yesus pegi nayiak bukit. Diau mantau jemau diau dikenda'iNyau, mangku ughangtu datang. 3:14 Mangku Diau milia duau belas ughang, supayau ughangtu guak Diau, mangku diajungAu ngiciakka ceritau iluak, 3:15 dienjuakkaNyau kuasau endak ngisitka iblis. 3:16 Ini namau duau belas ughangtu: Simun diau dikiciakka pulau Pitrus, 3:17 Yakubus, anak Sebedius, ngan adingau Yuhanis. Duau beghadingtu dinamauka pulau Buanergis, retiau anak gurua. 3:18 Mangku Anderias, Pilipus, Bartulumius, Matius, Tumas, Yakubus anak Alpius, Tadius, Simun jemau Siluttu 3:19 ngan Yudas Iskariut diau njualka Yesus. 3:20 Yesus masuak ghuma, anyautu jemau banyak datang, mangku ughangtu nidau kungang agi makan. 3:21 Denga-sana'Au ndengagh ceritau itu mangku pegi ndepatka Diau, karnau jemau la ngiciak Diautu gilau. 3:22 Guru-guru ukum Taurat diau datang jak di Yerusalim bekatau, "Diau diarung Bilsebul, pengulu iblistu. Diautu ngenjuakka kuasau ngan Diau endak ngisitka iblis." 3:23 Mangku Yesus mantau jemau banyaktu, ngiciak ngan ughangtu pakai cuntau, katauNyau, "Luak manau iblis pacak ngisitka iblis? 3:24 Amun nenggeri teceghai-beghai sangi bemusuan nenggeritu nidau ka ta'an. 3:25 Lagi pulau amun jemau seghuma nidau suijauan ngan bemusuan sughang ngan diau lain, diau ka kacau. 3:26 Luak itula pulau ngan iblis. Amun iblistu teceghai-beghai ngan sangi bemusuan, diau nidau ka ta'an, ka abis kuasaunyau. 3:27 Nidau sughang kia pacak masuak ghuma jemau diau kuat endak merebuti retaunyau, amun diau nidau ngebat jemau itu kudai. La udim dikebat, mangku diau pacak merebut retaunyau. 3:28 Keruanila, gegalau dusau jemau pacak diabiska ngan gegalau gela'an diau dikiciakka jemau. 3:29 Anyautu amun jemau nggelakka Rua Allah, diau nidau pacak diabiska dusaunyautu, karnau gela'antu dusau selelamaunyau." 3:30 Yesus ngiciak luak itu, karnau adau jemau diau bekatau, bansau Diau diarung iblis. 3:31 Mangku ading-ading Yesus ngan ma'Au datang. Ughangtu betegak nunggu di luagh, mangku ngajung jemau mantau Diau. 3:32 Banyak jemau duduak di guak Yesus, mangku adau jemau ngiciak ngan Diau, "Nginak, mak ngan ading-beghading Kaba adau di luagh, endak betemu ngan Kaba." 3:33 Yesus nimbal, "Sapau makKu ngan adingbeghadingKu?" 3:34 Diau ngina'i jemau diau duduak di guak Diau ngan bekatau, "Inila makKu ngan ading-beghadingKu! 3:35 Jemau diau ngerjauka kendak Allah, diautu adingKu ngan makKu."

Markus 4

4:1 Adau saghi Yesus mulai agi ngajagh di tepi danau Galilia. Banyak kematila jemau datang rami-rami guak Diau. Mangku Diau nayiak perawu diau mendam di tenga ayiak, mangku duduak di situ. Jemau banyaktu adau di daghat di tepi danautu. 4:2 Yesus ngajaghka banyak ceritau ngan jemau banyaktu pakai umpamau. Luak inila Diau ngajaghi jemau, katauNyau, 4:3 "Dengaghkala! Adau jemau tani endak pegi ngamburka benia. 4:4 Dang diamburka, adau diau tumban di jalan. Mangku datang burung makani benia diau tumban di jalantu enggut abis. 4:5 Adau pulau diau tumban di tana bebatu-batu diau nidau banyak tanahau. Mangku beniatu gasip mekul, karnau tanahautu nipis. 4:6 Anyautu matau-aghi la tinggi, layula diau mangku mati, karnau akaghau nidau masuak dalam tana. 4:7 Adau pulau diau tumban di pugan ghumput bedughi. Diau tumbua serempak ngan ghumputtu, mangku diincitka enggut mati. Nidau lasung buasil. 4:8 Mangku separau tumban di tana diau iluak. Beniatu mekul, njadi besak mangku bebua. Asilau setangkai adau diau tigau pulua mughak, adau diau enam pulua, adau pulau diau seratus mughak." 4:9 Mangku katauNyau, "Sapau diau betelingau endak ndengagh, ndengaghla!" 4:10 Yesus gi sughang, mangku pengikutAu ngan duau belas anak-buaHau datang nanyauka, tuapau retiau ceritau tadi. 4:11 Katau Yesus, "Ngan kamu la dinyatauka resiau ngeruani Allah njadi rajau. Anyautu ngan jemau lain gegalaunyautu dikiciakka ngan cuntau ceritau, 4:12 mangku 'Ughangtu nginak tapitu nidau kina'an. Ughangtu ndengagh tapitu nidau terti, supayau ughangtu jangan ngubai jak di dusaunyau, mangku nidau diabiska dusaunyau.' " 4:13 La udim itu Yesus ngiciak ngan ughangtu, katauNyau agi, "Ngapau kamu nidau terti ceritau itu tadi? Amun luak itu, luak manau kamu pacak ngeruani gegalau ceritau diau lainau? 4:14 Jemau diau ngamburka benia tadi umpamau jemau diau ngiciakka ceritau Allah. 4:15 Benia diau tumban di jalan umpamau jemau diau ndengaghka ceritau tadi, mangku datang iblis ngambiak ceritau Allah diau empai dikiciakka ngan jemautu. 4:16 Benia diau tumban di tana bebatu-batu tadi umpamau jemau diau ndengaghka ceritau Allah, mangku nerimaunyau ngan riang. 4:17 Anyautu karnau ceritautu nidau tetanam dalam ati jemautu, diau nidau ta'an lamau. Amun dapat penanggungan ngan diluatka jemau karnau ceritau Allah tadi, jemautu gasip ngelipat. 4:18 Benia diau tumban di pugan ghumput bedughi tadi umpamau jemau diau ndengaghka ceritau Allah, 4:19 anyautu diau ghegak, kalu nidau dapat pengidupan, tetipu endak idup kayau ngan beribu peku serilau diau adau dalam ati jemau itu. Gegalaunyautu ngincitka ceritau Allah tadi, mangku nidau buasil. 4:20 Mangku benia diau tumban di tana iluak tadi umpamau jemau diau ndengaghka ceritau Allah ngan nerimaunyau, mangku bebua banyak. Asilau adau diau tigau pulua, adau diau enam pulua, adau pulau diau seratus." 4:21 Mangku Yesus bekatau agi ngan ughangtu, "Apu adau jemau diau maghakka lampu, mangku ditukupinyau ngan capa, apu ditepiakka di bawa katil? Cengki nidau! Lamputu ditepiakkanyau di bada lampu. 4:22 Gegalaunyau diau tebuni ka kina'an ngan gegalau resiau ka dikeruani. 4:23 Sapau diau betelingau endak ndengagh, ndengaghla!" 4:24 Mangku Diau ngiciak agi, "Ingatkala setu diau kamu dengagh. Takaran diau kamu pakai ngan jemau ka dipakai pulau batan endak kamu, lagi ka ditamba ngan kamu. 4:25 Karnau jemau diau buadau ka dienju'i, anyautu jemau diau nidau bediau, dikit diau adau di diau, ka diambiak pulau jak di diau." 4:26 Katau Yesus agi, "Amun Allah merinta, keadaannyau luak ini: Adau jemau diau ngamburka benia di umaunyau. 4:27 Aghi malam diau tiduak, aghi siang diau bangun. Penarau itu benia tadi tumbua ngan njadi besak. Anyautu luak manau beniatu tumbua, jemau tadi nidau keruan. 4:28 Tana itula diau mbuat beniatu tumbua, empai penembai tangkaiau, mangku putiak mangku buahau. 4:29 Amun bua paditu la masak, jemautu ngetam, karnau la masaunyau." 4:30 KatauNyau agi, "Amun Allah merinta, ngan tuapau kitau pacak nyamaukanyau? Apu ngan ceritau manau kitau pacak ngiciakkanyau? 4:31 Amun Allah merinta, keadaannyau luak ini: Semughak jawi ditanam di kebun. Mughaktu keciak nian jak di gegalau mughak diau adau di deniauni. 4:32 Anyautu amun diau la ditanam, diau tumbua, besakla diau sangkan kayu lainau. Cangkahau rimbun, mangku burung pacak besaghang di cangkahautu." 4:33 Ngan banyak ceritau luak itu Diau ngiciakka katau Allah ngan ughangtu, inggan manau ughangtu pacak ngerti. 4:34 Diau maju ngiciak makai cuntau, amun ngajagh jemau. Anyautu amun ngan anak-buaHau, Diau nerangka gegalaunyautu ngan ughangtu. 4:35 Aghi la petang, mangku Yesus ngiciak ngan anak-buaHau, "Mela kitau nyembeghang ke beghang sanau." 4:36 Mangku anak-buaHautu masuak perawu. Yesus la adau di perawutu. La udim itu jemau banyak ditinggalkaNyau di tepi danau. Adau pulau perawu lain pegi serempak ngan Diau. 4:37 Lum lamau udim itu adau angin nyaghu. Umbak besak kematila nempua perawutu, mangku ayiak masuak menui perawu tadi. 4:38 Di buntut perawu Yesus dang tiduak bebantal. Anak-buaHau ngucakka Diau. "Guru!" kataunyau, "Apu Dighi nidau keruan, bansau kitauni laka mati tebenak?" 4:39 Yesus bangun, mangku merintaka angintu, katauNyau ngan danau, "Redamla!" Mangku angintu mandak ngan danau diam nian. 4:40 La udim itu Yesus bekatau ngan anak-buaHau, "Ngapau kamu penakut? Ngapau nidau percayau ngan Aku?" 4:41 Mangku anak-buaHautu takut lagi kemangan. Sughang ngiciak ngan diau lain, kataunyau, "Sapau sebenaghau Jemau ini? Sangkan angin ngan umbak na'ati perintaHau."

Markus 5

5:1 Mangku Yesus ngan anak-buaHau sampai di beghang danau Galilia, di daira jemau Gerasa. 5:2 Yesus empai tughun jak di perawu, Diau didatangi sughang jemau lanang diau diarung iblis. Jemautu ngeluagh jak di perantuan. 5:3 Diautu mendam di situ. Nidau bediau jemau diau pacak ngebatau, empuak ngan rantai nidau. 5:4 La rajin tangan ngan ketingau dibeluk ngan dikebat ngan rantai, anyautu rantaitu diputuska ngan beluk dirusakkanyau, mangku nidau bediau jemau diau pacak na'anau. 5:5 Siang-malam diau bejalan di perantuan ngan di bukit sampai tegauk-gauk ngan mbaduki badanau ngan batu. 5:6 Satu nginak Yesus jak di jawua, diau belaghi njenguak Yesus, nunduak nyemba Diau, 5:7 mangku tegauk ngan suarau bias, "Ka Dighi apauka akuni, ui Yesus, Anak Allah diau Mahaagung? Demi Allah aku mintak, jangan Dighi nyaraui aku." 5:8 Diau ngiciak luak itu, karnau Yesus la ngiciak ngan diau, "Ui, iblis, keluaghla jak di jemau ini!" 5:9 Yesus betanyau ngan diau, "Sapau namau kaba?" Timbalau, "Namauku Legiun, karnau kamini banyak." 5:10 Mangku diau mintak nian ngan Yesus, supayau jangan dikisitka jak di daira itu. 5:11 Pasigh itu banyak kaput ingunan dang ndalak makanan di bukit. 5:12 Iblis itu mintak ngan Yesus, kataunyau, "Ajungla kami ngarung kaput itu." 5:13 Yesus tetuju, mangku iblistu ngeluagh jak di jemau tadi ngarung kaput. Kaputtu belaghi galau tumban jak di tepi badas masuak ke danau mangku mati tebenak. Gegalau kaputtu kekirau duau ribu ikuak. 5:14 Tukangtukang sayia kaput itu belaghi nyiarka ceritau itu di kuta ngan di dusun di ngepungannyau. Mangku jemau ngeluagh endak ngina'au ceritau itu. 5:15 Ughangtu datang njenguak Yesus mangku nginak jemau diau diarung iblis tadi dang duduak guak Yesus. Jemautu la bekain ngan rupu'annyau la waras, mangku ughangtu takut. 5:16 Ughang diau la nginak ceritau tadi ngiciakkanyau ngan ughangtu ceritau jemau diau diarung iblistu ngan ceritau kaput. 5:17 Mangku ughangtu mintak nian, supayau Yesus pegi jak di daira itu. 5:18 Yesus dang nayiak agi ke perawu, jemau diau diarung iblis tadi mintak, supayau diau bulia ngikut. 5:19 Anyautu Yesus nidau ngajung, katauNyau, "Baliakla ke dusun kaba, ceritaukala ngan adiak-sanak setu diau la dikerjauka Allah di kaba ngan gegalau keilu'anNyau." 5:20 Jemautu pegi ngiciakka di daira sepulua kuta gegalaunyau diau la dikerjauka Yesus di diau mangku gegalau jemau kemangan galau. 5:21 Yesus la baliak agi ke sebeghang, jemau berumbung-rumbungan datang ngumbuliNyau. Yesus dang adau di tepi danau itu. 5:22 Mangku adau sughang kepalak ghuma sembayang, namaunyau Yairus. Diau datang ke situ. Satu nginak Yesus, diau nunduak sampai ke tana di adapanNyau, 5:23 mangku mintak tulung nian, kataunyau, "Anakku buidapan, la pansan nian! Mela pegi ke ghuma kami kudai! Tepiakkala tangan Dighi di badan anakku, mangku diau ghadu, lum ka mati." 5:24 Mangku Yesus pegi ngan jemautu. Jemau rami-rami pegi ngikut Diau, sampai bererincitan di kidau kananAu. 5:25 Adau pulau sughang tinau diau buidapan bedagha, la duau belas taun lamaunyau. 5:26 Diau la rajin beubat ngan duktur, mangku gegalau retaunyau la abis galau. Anyautu nidau bediau diau pacak meghaduinyau, lagi tamba pansan idapannyau. 5:27 Tinau itu la banyak ndengagh ceritau Yesus. Mangku di pugan jemau banyaktu diau masighi Yesus jak di belakang mbibit bajuAu. 5:28 Diau berupuak, "Amun aku mbibit cuman bajuAu ajau, aku ka ghadu." 5:29 Masau itu pulau daghahau mandak melilia, mangku diau teghasau, bansau diau la ghadu. 5:30 Masau itu pulau Yesus teghasau, bansau adau kuasau ngeluagh jak di Diau, mangku Diau nulia ke jemau banyak itu ngan betanyau, katauNyau, "Sapau mbibit bajuKu?" 5:31 Anak-buaHau bekatau, "Dighi la nginak jemau banyak ngincitka Dighi. Mangku Dighi masia betanyau, 'Sapau mbibit Aku?' " 5:32 Yesus nginak di ngepungannyau endak ngeruani jemau diau mbibit Diau. 5:33 Tinau tadi keruan setu diau la tejadi di diau, mangku diau gemetagh ketakutan, mangku nunduak di adapan Yesus, diceritaukanyau gegalaunyautu. 5:34 Mangku katau Yesus ngan diau, "Kaba la dighadui, karnau kaba percayau. Baliakla ngan selamat. Idapan kaba la ghadu." 5:35 Yesus gi ngiciak, mangku adau jemau datang jak di ghuma Yairus, kataunyau, "Anak dighi la mati! Nidau nanti ngeriaka Pak Guru agi." 5:36 Yesus nidau nyanauka kici'an jemau itu, mangku ngiciak ngan Yairus, katauNyau, "Jangan takut! Percayaula ajau!" 5:37 Yesus nidau ngajung sughang kia ngikut Diau, cuman Pitrus, Yakubus ngan adingau Yuhanis bulia ngikut. 5:38 La sampai di ghuma Yairus, Yesus nginak jemau ganau nangis berandaian ngan suarau bias. 5:39 Mangku Yesus masuak ngan bekatau, "Ngapau kamu ganau? Ngapau nangis? Budak keciak ini nidau mati! Diauni tiduak ajau!" 5:40 Ughangtu nawauka Diau, mangku dilaratkaNyau galau ughangtu. La udim itu dibata'Au bak ngan mak budak keciaktu ngan anak-buaHau tadi masuak ke bili'au, 5:41 mangku dikecakkaNyau tanganau, katauNyau, "Talita kum!" Retiau, "Ui, anakKu, Aku ngajung kaba bangun. Bangunla!" 5:42 Masau itu pulau budak gadistu bangun betegak ngan bejalan. Umurau la duau belas taun. Jemau diau ngina'autu tegagau ngan kemangan galau. 5:43 Yesus nidau ngajung nian sughang kia ngiciakka ngan jemau setu diau dibuatAutu, mangku bekatau, "Enju'ila budak gadis ini makan!"

Markus 6

6:1 La udim itu Yesus pegi jak di situ baliak ke dusunAu. Anak-buaHau ngikut Diau. 6:2 Aghi Sabat Diau mulai ngajagh di ghuma sembayang, mangku banyak jemau ndengaghka Diau. Ughangtu kemangan ngan betanyau, "Jak di manau Diauni bulia gegalaunyautu? Pengertian apau pulau diau adau di Diau? Luak manau Diau pacak mbuat tandau nyelia? 6:3 Ukanau Diauni tukang kayu, anak Maria? Ukanau adingAu Yakubus, Yusis, Yudas ngan Simun ngan kelawaiAu pulau mendam ngan kitau di sini?" Mangku ughangtu keciwau ngan nidau nerimau Diau. 6:4 Mangku Yesus bekatau ngan ughangtu, "Sughang nabi diregaui di manau-manau, amun ukan di dusunau ngan denga-sana'au ngan ghumahau." 6:5 Dikit kiala Diau nidau pacak mbuat setu diau nyelia di situ. Diau cuman meghaduka bebeghapau jemau buidapan ngan nepiakka tanganAu di pucuak palak ughangtu. 6:6 Diau kemangan karnau ughangtu nidau percayau. Mangku Diau pegi ke dusun-dusun di ngepungannyau sampai ngajagh. 6:7 Yesus mantau duau belas anak-buaHau, mangku ngajung ughangtu pegi beduau-duau, dienjuakkaNyau kuasau endak ngisitka rua ja'at. 6:8 Mangku Diau bepesan ngan ughangtu, "Amun bejalan, jangan mbatak tuapau-apau lain jak di tungkat. Makanan jangan, minggangan jangan, tanci jangan. 6:9 Pakai sepatu bulia, tapitu jangan makai baju duau." 6:10 Diau bekatau agi, "Amun kamu la diterimau di ghuma jemau, mendamla di situ, enggut kamu melajuka pejalanan. 6:11 Amun di sutiak bada jemau nidau bediau nerimau kamu ngan nidau bediau endak ndengaghka kamu, pegila jak di situ, mangku kepaskala debu jak di keting kamu njadi peringatan batan endak ughangtu." 6:12 Mangku ughangtu pegi ngiciakka, bansau jemau mesti ngubai peremba'au jak di dusaunyau. 6:13 Ughangtu melaratka banyak iblis ngan nggusuakka minyak Saitun ngan jemau buidapan, mangku ughangtu ghadu. 6:14 Rajau Herudis pulau ndengagh ceritau Yesus, karnau namauNyau la dikeruani gegalau jemau. Mangku adau diau bekatau, "Yuhanis Pembaptis la idup agi. Itula sebapau Diau adau kuasau ngerjauka gegalaunyautu." 6:15 Adau diau ngiciakka, "Diautu Elia." Adau pulau diau ngiciakka, "Diautu sughang nabi luak nabi-nabi senitu." 6:16 Satu Herudis ndengagh ceritau itu, diau bekatau, "Cetau ini Yuhanis diau senitu kuajung dipancung liaghau. Mbak kini diau la idup agi." 6:17 Nyela, Herudistu la ngajung nangkap Yuhanis, dikebat ngan dimasuakka di jil. Herudis ngerjauka titu, karnau Herudias bini dangau Pilipus, karnau Herudis la nika ngan diau. 6:18 Mangku Yuhanis negughi Herudis, kataunyau, "Nidau bulia dighi nika ngan bini dang dighitu." 6:19 Itula sebapau Herudias luat ngan Yuhanis endak mbunua diau, anyautu diau nidau pacak ngerjaukanyau, karnau nidau diajung Herudis. 6:20 Herudis ngajung jemau njagaui Yuhanis iluak-iluak, karnau diau takut. Diau keruan, bansau Yuhanis sughang diau iluak, ajungan Allah. Diau galak ndengaghka Yuhanis ngiciak, empuak diau bingung ngan gelisa. 6:21 Mangku adau jalan batan endak Herudias, masau Herudis ngadauka jamuan ulang taun. Gegalau pejabat tinggi ngan kumandan ngan jemau penting di Galilia dijeghumi. 6:22 Di jamuan itu anak gadis Herudias nari. Tariannyautu meriangka ati Herudis ngan mendahau. Mangku rajau bekatau ngan diau, "Kaba endak tuapau? Mintakla, aku ka ngenjuakkanyau." 6:23 Mangku diau bejanji ngan gadistu ngan sumpa, "Tuapau kila diau kaba pintak ka kuenjuakka, empuak separau jak di retauku." 6:24 Budak gadistu ngeluagh ngan betanyau ngan ma'au, "Tuapau diau iluak diau kupintak?" Timbalau, "Mintakla palak Yuhanis Pembaptis." 6:25 Mangku gadistu cecepat ngulang njenguak rajau ngan bekatau, "Aku mintak palak Yuhanis Pembaptis dienjuakka ngan aku mbak kini pulau ditepiakka di talam." 6:26 Ndengagh pinta'an itu Herudis sedia. Anyautu diau nidau pacak nula'au, karnau la besumpa di mukau mendahau. 6:27 Rajautu ngajung sughang penjagau pegi ke jil endak ngambiak palak Yuhanis. Mangku jemautu mancung liaghau di jil. 6:28 Mangku diau mbatak palak Yuhanistu ditepiakka di talam, dienjuakka ngan gadis itu, mangku gadistu ngenjuakkanyau ngan endu'au. 6:29 Anak-bua Yuhanis la ndengagh ceritau itu, mangku datang ngambiak mayatau ngan dikuburkanyau. 6:30 Mangku rasul-rasul diau diajung Yesustu la ngulang agi betunggal ngan Diau, diceritaukanyau gegalaunyau diau la dikerjaukanyau ngan diajaghka. 6:31 Banyak nianan jemau datang ngan pegi, mangku makan kia ughangtu nidau kungang. Mangku katau Yesus, "Mela kitau pegi ke bada diau suni, mangku pacak kitau ajau, mangku kamu pacak gheghadu." 6:32 Mangku ughangtu pegi nayiak perawu nuju bada diau suni. 6:33 Anyautu banyak jemau nginak ughangtu pegi, mangku keruan sapau ughangtu. Jak di gegalau dusun di ngepungannyau jemau belaghi jalan daghat mangku ndului ughangtu. 6:34 Masau Yesus tughun jak di perawu ngan nginak jemau banyak nianantu, Diau sial ngan ughangtu, karnau ughangtu luak bebiri diau nidau bediau tukang sayiau. Mangku Diau mulai banyak setu diau diajaghkaNyau ngan ughangtu. 6:35 Aghitu la petang, anak-buaHau njenguak Yesus, ngan bekatau, "Aghi la petang ngan bada ini suni. 6:36 Ajungla jemau banyak ini pegi, mangku ughangtu pacak mbeli makanan di dusun di ngepungan ini." 6:37 Anyautu katau Yesus, "Kamu ajau ngenju'i ughangtu makan!" "Apu kami mesti pegi mbeli ruti regau duau ratus tanci pirak endak ngenju'i makan jemau ini?" Katau ughangtu. 6:38 Mangku Diau betanyau, "Beghapau ruti adau di kamu? Cubau kina'i!" Udim dikina'i, katau ughangtu, "Cuman adau limau bua ruti ngan duau ikuak ikan." 6:39 Mangku diajungAu jemau banyak itu duduak di ghumput beruguakruguak. 6:40 Mangku ughangtu duduak beruguak-ruguak. Adau diau seratus seruguak, adau diau limau pulua. 6:41 Udim itu Diau ngambiak limau bua ruti ngan duau ikuak ikan tadi, mangku ncungak ke langit sampai bedu'a beterimau-kasia, mangku dipiyak-piya'Au rutitu, dienjuakkaNyau ngan anak-buaHau, mangku ughangtu ngagiakanyau ngan jemau banyak itu. Luak itu pulau ngan duau ikuak ikan tadi. 6:42 Gegalau ughangtu makan enggut kenyang. 6:43 Udim itu tigha ruti tadi ditunggalka anak-buaHau, duau belas kinjagh penua temasuak pulau tigha ikan. 6:44 Jemau diau ngikut makan ruti kekirau limau ribu jemau lanang. 6:45 Mangku Yesus cecepat ngajung anak-buaHau nayiak perawu pegi nduluiNyau ke Betsaida di beghang danau, penarau Diau ngajung jemau banyak tadi baliak. 6:46 La udim jemau banyaktu pegi, Yesus nayiak ke bukit endak bedu'a. 6:47 Aghi la malam, perawu anak-buaHautu la jawua jak di tepi. Yesus gi adau di daghat. 6:48 Diau nginak ughangtu nanggung ndayungka perawu, karnau angin belawanan jak di adapan. Antak ka ayam bekukuak, Yesus datang njenguak ughangtu bejalan di pucuak ayiak. Diau luak endak melalui ughangtu. 6:49 Satu anak-buaHautu nginak Diau bejalan di pucuak ayiak, ughangtu ngirau Diautu antu mangku tegauk-gauk. 6:50 Gegalau ughangtu nginak Diau mangku tegagau nian. Anyautu Yesus ngiciak, katauNyau, "Tenangla ajau. Ini Aku. Nidau nanti takut." 6:51 Udim itu Diau masuak dalam perawu, mangku angintu mandak. Ughangtu kepagauan galau. 6:52 Tandau nyelia ngan limau bua ruti tadi lum kila ughangtu terti. Ughangtu segau ngerti. 6:53 La sampai di sebeghang danau, Yesus ngan anak-buaHau ndaghat ngan belabua di pantai Genesarit. 6:54 Satu ughangtu tughun jak di perawu, jemau nginak, bansau diau datang itu Yesus. 6:55 Mangku ughangtu belaghi ke gegalau daira itu ngan mulai mbata'i jemau buidapan njenguak Yesus di manau kila dikiciakka Diau adau. 6:56 Di manau kila Yesus datang, empuak di kuta, empuak di dusun, empuak di talang, jemau mbata'i jemau buidapan ke lapangan ngan mintak, supayau diajung mbibit baju Yesus, empuak cuman ujungau. Mangku gegalau jemau diau mbibitau ghadu galau.

Markus 7

7:1 Adau rumbungan jemau Parisi ngan guru ukum Taurat jak di Yerusalim datang njenguak Yesus. 7:2 Ughangtu nginak adau anak-bua Yesus diau makan ngan tangan kumua, nidau bebasua nurut peraturan agamau. 7:3 Karnau jemau Yahudi terutamau jemau Parisi nidau makan, amun lum bebasua tangan kudai, karnau ughangtu nurut nian adat lembagau niniak puyangau. 7:4 Setu diau dibeli di pekan nidau dimakan, amun lum dibasua kudai. Banyak pulau peraturan lain jak di niniak puyangau diau dituruti, misalau carau mbasua gelas, mangkuak ngan pekakas tembagau. 7:5 Karnau itu jemau Parisi ngan guru-guru ukum Taurattu betanyau ngan Yesus, "Ngapau anak-bua Kaba melanggar adat lembagau niniak puyang kitau? Ngapau ughangtu makan, nidau bebasua tangan kudai?" 7:6 Timbal Yesus, "Kamu jemau cak alim! Nyela nian setu diau dikiciakka nabi Yesaya ngiciakka kamu, 'Luak ini katau Allah, bangsau ini meregaui Aku cuman di mulut, anyautu ati ughangtu nidau terupuak Aku. 7:7 Paya ajau ughangtu nyemba Aku. Ajaghan diau ughangtu ajaghka cuman katau manusiau ajau.' 7:8 Perinta Allah nidau kamu turuti endak nuruti adat lembagau manusiau." 7:9 Mangku Yesus bekatau agi, "Kapu dighi pacak nian nulak perinta Allah, supayau kamu pacak ngikuti adat lembagau kamutu? 7:10 Musa la ngiciakka ini, 'Regauila enduak-bapak kamu' lagi, 'Jemau diau ndawaika enduak-bapa'au mesti diukum mati.' 7:11 Anyautu kamu ngajaghka, 'Amun jemau bekatau ngan pejadiau, tanci diau semestiau dienjuakka ngan bak ngan mak la kuenjuakka ngan Allah, 7:12 mangku kamu nidau ngajung agi jemautu nulungi pejadiau.' 7:13 Ngan carau luak itu kamu nyatauka katau Allah nidau belaku, karnau endak ngikuti adat lembagau kamu. Mangku banyak kerjau luak itu diau kamu kerjauka." 7:14 Mangku Yesus mantau jemau banyak ngan bekatau, "Gegalau kamu dengaghkala, mangku kamu ngerti! 7:15 Nidau bediau setu diau masuak ke mulut ngaramka jemau. Anyautu diau ngeluagh jak di mulut, itula diau ngaramkanyau. 7:16 Amun betelingau, ndengaghla!" 7:17 Mangku Yesus masuak ghuma endak nyingkir jak di jemau banyak, mangku anak-buaHau nanyauka reti umpamau itu. 7:18 Yesus nimbal, "Kamu pulau lum terti? Nidau keruan ngan kamu, bansau setu diau masuak ke dalam mulut nidau pacak mbuat jemau aram? 7:19 Karnau setu diau masuaktu nidau lalu jalan ati, tapitu jalan busung, mangku ngeluagh agi?" Ngan katau itu Yesus nyatauka, bansau nidau bediau makanan diau aram. 7:20 Mangku Yesus bekatau agi, "Setu diau ngeluagh jak di jemau itula diau ngaramkanyau. 7:21 Karnau jak di dalam, jak di ati nimbul gegalau rupu'an ja'at, diau mbuat jemau nidau senangaian, maling, mbunua, 7:22 menaugawia, selak, ja'at, nipu, sekenda'au ajau, sengit, ngupatka jemau, geduak, segau diajagh. 7:23 Gegalau kerjau ja'at itu nimbul jak di ati. Itula diau ngaramka jemau." 7:24 Udim itu Yesus ninggalka bada itu pegi ke daira Tirus. Diau masuak ghuma, karnau enggup keruan ngan jemau, bansau Diau adau di situ. Anyautu Diau nidau pacak munika diriAu. 7:25 Mangku adau sughang tinau, anak gadisau diarung iblis. Diautu ndengagh ceritau Yesus, mangku datang njenguak Diau ngan nunduak di adapanNyau. 7:26 Tinau itu ukan jemau Yahudi. Diautu asalau jak di daira Penisia di Siria. Diau mintak ngan Yesus ngisitka iblis jak di ana'autu. 7:27 Anyautu Yesus nimbal, "Nidau iluak ngambiak makanan budak keciak, disipatka ngan anjing. Budak keciak mesti kenyang kudai." 7:28 "Nyela, tuan," katau tinautu, "Tapitu anjing di bawa mija pulau makan ghima diau tumban jak di budak keciak." 7:29 Mangku katau Yesus, "Karnau timbal dighitu, baliakla mbak kini. Iblis la larat jak di anak dighi." 7:30 Tinau itu baliak. La sampai di ghuma diau nginak ana'au dang tiduak. Iblistu la larat jak di diau. 7:31 Mangku Yesus pegi jak di daira Tirus. Diau lalu di Sidun mangku pegi ke danau Galilia di daira Dikapulis. 7:32 Adau jemau mbata'i sughang jemau diau tuli ngan gagap, mangku mintak Yesus nepiakka tanganAu di badan jemau itu. 7:33 Yesus mbata'i jemautu, diasingkaNyau jak di jemau banyak, mangku dicucuakkaNyau jaghiAu ke tebuak telingau jemau tuli tadi. La udim itu Diau beluda ngan ngendaska tanganAu di lida jemautu. 7:34 Mangku sampai ncungak ke langit, Yesus nyintak nyawau panjang ngan ngiciak ngan jemautu, katauNyau, "Ipata!" Retiau, "Ndengaghla!" 7:35 Mangku telingau jemautu ndengagh ngan lidahau lembut, mangku kici'annyau lantas. 7:36 La udim itu Yesus nidau ngajung jemau banyak ngiciakka setu diau dibuatAutu ngan sughang kiala. Anyautu tamba Yesus nega, jemau tamba banyak ngebarkanyau. 7:37 Jemau diau ndengagh ceritau itu kepagauan nianan, kataunyau, "Gegalaunyau dijadikaNyau iluak. Jemau tuli dijadikaNyau pacak ndengagh. Jemau bisu dijadikaNyau pacak ngiciak."

Markus 8

8:1 Masau itu adau pulau jemau banyak nianan. Ughangtu nidau bediau makanan, mangku Yesus mantau anak-buaHau ngan bekatau, 8:2 "Aku sial nginak jemau banyak ini. La tigau aghi ughangtu ngikut Aku, mbak kini nidau bediau makanan. 8:3 Amun ughangtu la keliwatan lapagh kuajung baliak, ughangtu tebandam di jalan, apau agi adau diau datang jak di jawua." 8:4 Anak-buaHau bekatau, "Luak manau di bada diau sudut ini jemau pacak dapat makanan cukup batan endak jemau banyak luak ini?" 8:5 Yesus betanyau, "Beghapau ruti adau di kamu?" "Tujua," timbal ughangtu. 8:6 Mangku Yesus ngajung jemau banyaktu duduak di tana. Udim itu Diau ngambiak tujua rutitu, beterimau-kasia ngan Allah, dipiyakpiya'Au rutitu, dienjuakkaNyau ngan anak-buaHau, mangku anak-buaHautu ngagiakanyau ngan jemau banyak. 8:7 Ughangtu adau pulau bebeghapau ikan keciak. Yesus beterimau-kasia, mangku ngajung anak-buaHau ngagiaka ikantu pulau. 8:8 Gegalau ughangtu makan enggut kenyang. Mangku tigha ruti ditunggalka, tujua kinjagh banya'au. 8:9 Ughangtu kekirau empat ribu ughang. Mangku Yesus ngajung jemau banyaktu baliak. 8:10 Diau ngan anak-buaHau nayiak perawu pegi ke daira Dalmanuta. 8:11 Adau bebeghapau jemau Parisi datang sangi tanyaui ngan Yesus. Ughangtu endak ncubaui Diau mangku mintak Diau mbuat tandau nyelia batan endak mbuktika, bansau Diau datang jak di Allah. 8:12 Yesus nyintak nyawau panjang mangku bekatau, "Ngapau jemau mbak kini mintak Aku mbuat tandau nyelia. Keruanila, sutiak kiala Aku enggup nunjuakka tandau nyelia ngan ughangtu." 8:13 Mangku Yesus ninggalka ughangtu. Diau nayiak perawu pegi ke sebeghang. 8:14 Anak-bua Yesus kelingauan mbatak ruti. Ughangtu cuman adau sebua ruti di perawu. 8:15 Yesus bekatau ngan ughangtu, "Sepepadaula nian ngan ghagi jemau Parisi ngan ghagi Herudis." 8:16 Mangku ughangtu mulai ngiciakka titu, kataunyau, "Diau ngiciak luak itu, karnau kitau nidau bediau ruti." 8:17 Yesus keruan setu diau ughangtu kiciakka, Diau bekatau, "Ngapau kamu ngiciakka nidau bediau ruti? Apu kamu nidau keruan ngan lum terti? Ngapau kamu segau nian ngerti? 8:18 Kamu adau matau, ngapau nidau nginak? Kamu adau telingau, ngapau kamu nidau ndengagh? Apu kamu nidau teghingat, 8:19 masau Aku miyak-miya'i limau ruti batan endak limau ribu ughang, beghapau kinjagh tigha ruti diau kamu tunggalka?" "Duau belas," katau ughangtu. 8:20 Yesus betanyau agi, "Luak manau pulau ngan tujua ruti batan endak empat ribu ughangtu, beghapau kinjagh tigha kamu tunggalka?" "Tujua," katau ughangtu. 8:21 Katau Yesus, "Lum kila kamu terti?" 8:22 La udim itu Yesus ngan anak-buaHau sampai di Betsaida. Di situ adau jemau mbatak sughang jemau butau njenguak Yesus, mangku mintak Diau nepiakka tanganAu di mataunyau. 8:23 Yesus ngecakka tangan jemau butautu ngan mapahau keluagh dusun. Mangku Diau meludai matau jemautu, ditepiakkaNyau tanganAu di mataunyau ngan betanyau, "Tuapau diau la pacak kaba kina'i?" 8:24 Jemautu nginak ke adapan, kataunyau, "Aku la nginak jemau bejalan, anyautu masia luak batang kayu bejalan." 8:25 Yesus ngulang nepiakka tanganAu di mataunyau. Udim itu jemautu nginakka mataunyau, mangku adau pengina'an. Diau la isat nginak gegalaunyau. 8:26 La udim itu Yesus ngajung jemautu, "Baliakla ke ghuma kaba! Jangan kudai masuak ke dusun ini!" 8:27 La udim itu Yesus ngan anak-buaHau pegi ke dusun-dusun di ngepungan Kaisaria Pilipi. Ughangtu dang bejalan, Yesus betanyau ngan anak-buaHau, katauNyau, "Katau jemau, sapau Akuni?" 8:28 Katau anak-buaHau, "Adau jemau ngiciakka Yuhanis Pembaptis. Adau diau ngiciakka Elia. Adau pulau diau ngiciakka sughang jak di nabi." 8:29 Yesus betanyau agi ngan anak-buaHau, "Anyautu pendapat kamu, sapau Akuni?" Katau Pitrus, "Dighila Almasih, Rajau Penyelamat." 8:30 Mangku Yesus negahi anak-buaHautu nian, katauNyau, "Jangan ngiciakka ngan sughang kiala, sapau Akuni!" 8:31 La udim itu Yesus mulai ngajaghi anak-buaHau, bansau Anak Manusiau mesti meghasauka banyak penanggungan ngan nidau pulau diterimau tuau-tuau, imam-imam bepangkat tinggi ngan guru-guru ukum Taurat, mangku dibunua. La udim duau malam Diau ka ngulang idup agi. 8:32 Yesus ngiciakka titu ngan sebenaghau. Mangku Pitrus mbata'i Yesus ke peridingannyau, ngan nengul Diau. 8:33 Anyautu Yesus njelinga'i ngan ngina'i anak-buaHau, dimaraiNyau Pitrus, katauNyau, "Laratla iblis! Rupu'an kabatu rupu'an manusiau, ukan rupu'an Allah!" 8:34 La udim itu Yesus mantau jemau banyak ngan anak-buaHau, mangku bekatau, "Bilang jemau diau endak ngikut Aku, jangan ndalak jalan idup batan endak diau sughang, anyautu diau mesti mikul salipau, mangku ngikut Aku. 8:35 Karnau jemau diau endak ngilakka nyawaunyau ka kelengitan nyawaunyau. Anyautu jemau diau kelengitan nyawaunyau karnau Aku ngan ceritau Injil, diautu ka idup nian. 8:36 Tuapau untungau, amun sughang ngempu gegalau deniau njadi retaunyau, anyautu nyawaunyau benasau? 8:37 Tuapau diau pacak dienjuakka batan endak nggenti nyawaunyau? Nidau ka bediau! 8:38 Kinak luak itu, amun jemau maluan ngaku'i Aku ngan kici'anKu di pugan jemau idup mbak kini diau nidau ta'at ngan bedusau, Anak Manusiau pulau ka maluan ngaku'i jemautu, masau Diau datang nanti ngan kuasau Bapa'Au dikantini malaikat-malaikat suci."

Markus 9

9:1 Katau Yesus agi, "Keruanila, adau jak di kamu di sini diau nidau ka mati, amun lum nginak Allah merinta ngan kuasau." 9:2 Enam aghi udim itu, Yesus mbata'i Pitrus, Yakubus ngan Yuhanis ndaki gunung diau tinggi. Di situ nidau bediau jemau lain. Di adapan ughangtu Yesus beghuba. 9:3 BajuAu njadi putia besinagh. Nidau bediau sughang kia di deniauni pacak nesa seputia luak itu. 9:4 Mangku kina'an ughang duau, diautu Musa ngan Elia. Ughang duautu ngiciak ngan Yesus. 9:5 Pitrus ngiciak ngan Yesus, kataunyau, "Pak Guru, lemak nian kitau di sini. Kami endak negakka tigau bua punduk, sebua batan endak Dighi, sebua batan endak Musa, sebua batan endak Elia." 9:6 Diau ngiciak luak itu karnau nidau keruan setu diau mesti dikiciakka, karnau ughangtu takut kematila. 9:7 Mangku adau aban mbayangi ughangtu, mangku jak di dalam aban itu tedengagh suarau diau bekatau, "Inila AnakKu diau Kusayangi. Dengaghkala Diautu." 9:8 Ughangtu gasip nginak di ngepungannyau, anyautu nidau kina'an sughang kiala lain jak di Yesus. 9:9 Masau ughangtu tughun jak di gunung tadi, Yesus ngiciak ngan ughangtu, "Jangan kamu kiciakka ngan sughang kiala setu diau kamu kinak tadi, amun Anak Manusiau lum ngulang idup agi." 9:10 Ughangtu nurut kici'anNyautu, anyautu di antarau ughang tigau itu ughangtu mulai ngiciakka retiau 'ngulang idup agi'. 9:11 Mangku anak-buaHau betanyau ngan Diau, "Ngapau guru-guru ukum Taurat ngajaghka, bansau Elia mesti dulu datang?" 9:12 Yesus nimbal, "Nyela, Elia datang mangku nyediauka gegalaunyau. Anyautu luak manau ngan ceritau diau ditulis di Injil ngiciakka Anak Manusiau ka banyak sengsarau ngan digelakka jemau? 9:13 Keruanila, Elia la datang. Anyautu jemau mbuati diau sekenda'au ajau, luak la ditulis ceritau diau." 9:14 Masau Yesus empat beghading la ngulang guak anak-bua lainau, ughangtu nginak jemau banyak di situ. Mangku adau bebeghapau guru ukum Taurat dang bebala ngan anak-buaHautu. 9:15 Jemau banyak nginak Yesus mangku kemangan. Ughangtu belaghi ndepatka Diau. 9:16 Mangku Yesus betanyau, "Tuapau diau dibalaka?" 9:17 Sughang jak di jemau banyak nimbal, "Pak Guru, aku mbatak anakku njenguak Dighi. Diau bisu, karnau diarung iblis. 9:18 Amun iblistu nyerang diau, diau dibantingka ke tana, mulutau bebuwia, gigiau tekancing ngan badanau keghas galau. Aku la mintak anak-bua Dighi melaratka iblis itu, anyautu ughangtu nidau pacak." 9:19 Mangku Yesus bekatau ngan ughangtu, "Ui, kamu jemau diau nidau percayau nian. Lamau beghapau agi Aku mesti guak kamutu? Lamau beghapau agi Aku mesti ngaligh ngan kamutu? Batakla diautu ke sini!" 9:20 Mangku ughangtu mbatak budak keciak itu njenguak Yesus. Satu iblis itu nginak Yesus, diau nyerang budak keciaktu. Mangku diau rubua ke tana, diguliak-guliakka mangku mulutau bebuwia. 9:21 Yesus betanyau ngan ba'au, "La lamau beghapau diau luak ini?" "Jak di keciak." katau ba'au. 9:22 "La rajin iblistu endak mbunua diau ngan merubuaka diau di api ngan di ayiak. Amun Dighi pacak, tulungla nian kamini." 9:23 Timbal Yesus, "Tuapau kici'an kaba, amun pacak? Gegalaunyau pacak, amun percayau." 9:24 Bak itu tegauk, "Aku percayau. Tulungla aku diau nidau percayau." 9:25 Yesus nginak jemau banyak datang ngelilingi Diau, Diau ngajung iblistu kisit, katauNyau, "Ui kaba, iblis diau mbuat bisu ngan tuli, kisitla jak di budak keciak ini. Jangan ngarung diau agi!" 9:26 Mangku iblistu ngeluagh sampai tegauk ngan nyerang budak keciaktu nian. Diautu kina'an luak jemau mati. Mangku banyak jemau bekatau, "Diau la mati." 9:27 Anyautu Yesus ngecakka tangan budak keciaktu nulung diau bangun. Mangku diau bangun. 9:28 Yesus la di ghuma, anak-buaHau datang njenguak Yesus sughang ngan betanyau, "Tuapau sebapau kami nidau pacak melaratka iblis tadi?" 9:29 Yesus nimbal, "Iblis diau luak itu nidau pacak dilaratka, amun ukan bedu'a." 9:30 Yesus ngan anak-buaHau pegi jak di bada itu, mangku Diau lalu di Galilia. Diau enggup keruan ngan jemau, bansau Diau adau di situ, 9:31 karnau Diau dang ngajagh anak-buaHau. KatauNyau, "Anak Manusiau ka diseraka ngan manusiau. Diau ka dibunua, mangku udim duau malam Diau ka idup agi." 9:32 Ughangtu nidau terti kici'anNyautu, anyautu nidau beghani nanyaukanyau. 9:33 Yesus ngan anak-buaHau sampai di Kapernaum. La sampai di ghuma, Yesus betanyau ngan anak-buaHautu, katauNyau, "Tuapau diau kamu kiciakka di jalan tadi?" 9:34 Anak-buaHautu diam ajau, karnau ughangtu la bebala di jalan, mbalaka sapau diau lebia tinggi pangkatau. 9:35 Mangku Yesus duduak, dipantauNyau duau belas anak-buaHautu, katauNyau, "Jemau diau endak dulu sekali, diau mesti endak njadi kendian jak di gegalaunyau ngan njadi babu gegalau jemau." 9:36 Udim itu Yesus ngambiak sughang budak keciak, diajungAu betegak di adapan gegalau ughangtu, dipelu'Au budak keciaktu, katauNyau, 9:37 "Jemau diau nerimau sughang budak keciak luak diauni karnau Aku, semegi ajau ngan nerimau Aku. Mangku jemau diau nerimau Akuni, ukan nerimau Aku ajau, tapitu nyambut pulau diau ngajung Aku." 9:38 Katau Yuhanis, "Guru, kami nginak sughang diau ukan anak-bua Dighi ngisitka iblis pakai namau Dighi. Kami nidau ngajung diau, karnau diau ukan jak di kitau." 9:39 Yesus bekatau, "Jangan negahi diau, karnau nidau sughang kiala diau mbuat tandau nyelia pakai namauKu pacak ngarutka Aku. 9:40 Jemau diau nidau melawan kitau mihak ngan kitau. 9:41 Keruanila, jemau diau ngenjuak minum ayiak semangkuak ngan kamu, karnau kamu jemau Keristen, jemautu cengki ka nerimau upahau." 9:42 "Jemau diau nyesatka sala sughang jak di budak keciak diau percayau ini, iluakla amun batu besak dikebat di liaghau mangku dicapakka ke laut. 9:43 Amun tangan kaba mbuat kaba bedusau, tetakla tangan kabatu. Iluakla kaba idup ngan Allah ngan tangan sebela, sangkan masuak nerakau ngan duau bela tangan, di api diau nidau ka padam-padam. 9:44 Di situ ulat nidau ka mati, api nidau ka padam. 9:45 Amun keting kaba mbuat kaba bedusau, tetakla keting kabatu. Iluakla kaba idup ngan Allah ngan keting sebela, sangkan masuak nerakau ngan keting duau. 9:46 Di situ ulat nidau ka mati, api nidau ka padam. 9:47 Mangku amun matau kaba mbuat kaba bedusau, cungkilla matau kabatu. Iluakla kaba di sergau ngan matau sebela, sangkan dicapakka ke nerakau ngan matau duau. 9:48 Di situ ulat diau makan buntang nidau ka mati, api nidau ka padam. 9:49 Bilang jemau ka diberesiaka ngan api, luak kerban diberesiaka ngan gagham. 9:50 Gaghamtu iluak. Anyautu amun gagham nidau masin agi, apu pacak dimasinka? Kamu mesti njadi luak gagham. Idupla bedamai ngan gegalau jemau."

Markus 10

10:1 La udim itu, Yesus ninggalka bada itu pegi ke Yudia ngan ke sebeghang ayiak Yurdan. Jemau banyak datang agi njenguak Diau, mangku luak idang kali Diau ngajagh ughangtu pulau. 10:2 Mangku adau jemau Parisi datang endak nguji Diau ngan betanyau, "Apu bulia laki nyagha'i biniau?" 10:3 Yesus nimbal, "Tuapau perinta Musa ngan kapu dighi?" 10:4 Katau ughangtu, "Musa mbuliaka nyagha'i bini, asal ngenjuakka surat saghak kudai." 10:5 Mangku katau Yesus, "Musa nulis perinta itu, karnau kapu dighi segau diajagh. 10:6 Anyautu empai penembai Allah mbuat manusiau, dibuatAu lanang ngan tinau. 10:7 Itula sebapau jemau lanang ka ninggalka enduak-bapa'au endak seghundak ngan biniau, 10:8 mangku ughang duautu njadi sutiak. Mangku ughangtu ukan agi duau tapitu sutiak. 10:9 Karnau itu setu diau disatuka Allah nidau bulia disagha'i manusiau." 10:10 Ughangtu la sampai di ghuma, mangku anak-buaHau betanyau ngan Yesus ceritau itu. 10:11 Yesus bekatau, "Jemau diau nyagha'i biniau, mangku bebini ngan tinau lain, jemautu menaugawia karnau biniau senitu. 10:12 Luak itu pulau tinau diau nyagha'i lakiau, mangku belaki agi ngan lanang lain, diau menaugawia." 10:13 Adau jemau mbatak budak-budak keciak njenguak Yesus, mangku mintak Diau natap budak keciaktu. Anyautu anak-buaHau marai ughangtu. 10:14 Nginak titu, Yesus mara mangku ngiciak ngan anak-buaHau, katauNyau, "Nengkela budak-budak keciak itu njenguak Aku. Jangan dialangi, karnau jemau luak itula Allah pacak njadi rajau dalam idupau. 10:15 Ingatkala nian kici'anKu ini: Jemau diau nidau nyambut Allah njadi rajau dalam idupau luak sughang budak keciak, jemautu nidau pacak masuak sergau." 10:16 La udim itu Yesus meluak budak-budak keciak itu, ditatapAu bilang palak budak keciak, mangku didu'akaNyau. 10:17 Yesus endak bejalan agi, mangku adau jemau diau belaghi njenguak Diau. Jemautu nunduak di adapanNyau, mangku betanyau ngan Diau, "Pak Guru diau iluak, tuapau diau mesti kukerjauka, mangku aku bulia idup selelamaunyau?" 10:18 "Ngapau kaba ngiciakka Akuni iluak?" Katau Yesus. "Sughang kiala nidau bediau iluak lain jak di Allah ajau. 10:19 Kaba cengki la keruan gegalau perinta Allah: Jangan mbunua, jangan menaugawia, jangan maling, jangan ngiciakka setu mbu'ung, jangan nipuka jemau, regauila enduak-bapak kaba." 10:20 "Pak Guru", katau jemautu, "Gegalaunyautu la kuturuti galau jak di keciak." 10:21 Yesus ngina'i jemautu ngan nyayanginyau, katauNyau, "Cuman semecam agi diau lum kaba kerjauka: Pegila, jualka setu diau adau di kaba, enjuakkala tanciau ngan jemau serik, mangku kaba dapat retau di sergau. La udim itu mela ke sini ngikut Aku." 10:22 Ndengagh kici'an itu dayiau nyighap, mangku jemautu baliak kebingungan, ikak banyak igau retaunyau. 10:23 Mangku Yesus ngengina'i anak-buaHau ngan bekatau, "Alaka segaunyau jemau kayau nerimau Allah njadi rajau dalam idupau!" 10:24 Anak-buaHautu kemangan ndengagh kici'anNyautu. Anyautu Yesus maju ngiciak, katauNyau, "Ui anak-buaKu. Nyela, segau nian nerimau Allah njadi rajau dalam idup. 10:25 Murala sikuak untau lalu wuan tebuak jaghum sangkan jemau kayau masuak sergau." 10:26 Mangku tamba kemangan ngan tamba ganau anak-buaHautu. Sughang ngiciak ngan diau lain, kataunyau, "Amun luak itu, sapau diau ka pacak selamat?" 10:27 Yesus ngina'i ughangtu katauNyau, "Amun manusiau titu nidau ka adau, anyautu ukan luak itu amun Allah, karnau gegalaunyau ka pacak ngan Allah." 10:28 Mangku Pitrus ngiciak ngan Yesus, katauNyau, "Luak manau? Kamini la ninggalka gegalaunyau endak ngikut Dighi!" 10:29 Timbal Yesus, "Ingatkala kici'anKu ini: Bilang jemau diau ninggalka ghumahau, ading-beghadingau, enduak-bapa'au, anak-ana'au, tana sawa tana daghatau karnau Aku ngan ceritau injil, 10:30 jemau itu ka nerimau nian mbak kini seratus kali lebia banyak jak di diau ditinggalkanyau tadi. Diau ka nerimau ghuma, ading-beghadingau, mak, anak, tana, empuak diau diluatka jemau di deniauni. Di masau diau ka datang jemautu ka nerimau idup selelamaunyau. 10:31 Anyautu banyak jemau diau dulu sekali ka mendian sekali, mangku jemau diau mendian ka njadi dulu sekali." 10:32 Yesus ngan anak-buaHau dang bejalan ngancamka Yerusalim. Yesus bejalan dulu sekali. Anak-buaHautu meghasau temas. Jemau diau kendian ngikut ketakutan pulau. Mangku Yesus mantau duau belas anak-buaHau ngan ngiciakka setu diau ka dighasaukaNyau nanti, 10:33 katauNyau, "Dengaghkala mbak kini kitau pegi ngancamka Yerusalim. Mangku Anak Manusiau ka diseraka ngan imam-imam bepangkat tinggi ngan guru-guru ukum Taurat, mangku Diau ka diukum mati. Ughangtu ka nyeraka Diau ngan jemau diau nidau keruan Allah. 10:34 Diau ka dipusiakka, diludai, dipeciti, mangku dibunua. La udim duau malam Diau ka ngulang idup agi." 10:35 Mangku Yakubus ngan Yuhanis, anak Sebedius, datang njenguak Yesus, kataunyau, "Pak Guru, adau setu diau endak kami pintak ngan Dighi batan endak kami." 10:36 Katau Yesus, "Tuapau diau endak kamu pintak Kukerjauka batan endak kamu?" 10:37 Ughangtu nimbal, "Kami endak duduak di kidau ngan di kanan Dighi, amun Dighi njadi rajau nanti." 10:38 Katau Yesus, "Kamu nidau keruan setu diau kamu pintak. Apu kamu pacak nanggungka sengsarau luak diau Kutanggungka?" 10:39 Katau ughang duautu, "Kami pacak." Yesus bekatau agi, "Nyela, kamu ka nanggungka pulau sengsarau luak Kutanggungka. 10:40 Anyautu jemau diau ka duduak di sebela kidau ngan kananKu, itu ukan hakKu. Bada itu batan endak jemau diau ditetapka BapakKu." 10:41 Ndengagh titu, sepulua anak-bua diau lainau mara ngan jemau duau beghading tadi. 10:42 Karnau itu Yesus mantau gegalau ughangtu mangku bekatau, "Kamu keruan, bansau penguasau bangsau nyaraui rakyatau, penguluau masau ughangtu. 10:43 Anyautu kamu nidau bulia luak itu. Amun adau jak di kamuni diau endak bepangkat tinggi, diau mesti endak njadi penulung gegalau kamu. 10:44 Jemau diau endak dulu sekali jak di kamu, diau mesti endak njadi budak gegalau kamuni. 10:45 Karnau Anak Manusiau pulau datang ukan batan endak ditulung, tapitu batan endak nulung manusiau ngan nyeraka nyawauNyau nebusi banyak jemau." 10:46 Mangku Yesus ngan anak-buaHau sampai di Yiriku. Diau dang ngeluagh jak di Yiriku, jemau banyak ngikut Diau. Mangku adau sughang jemau butau duduak mintak-mintak di tepi jalan. Namaunyau Bartimius, anak Timius. 10:47 Satu ndengagh Yesus lalu, diau tegauk, kataunyau, "Ui, Yesus, Anak Daud! Sialkala aku!" 10:48 Mangku jemau banyak marai jemau butautu, diajungau diam. Anyautu diau tamba bias ajau tegauk, kataunyau, "Ui, Anak Daud! Sialkala aku!" 10:49 Mangku Yesus mendam, katauNyau, "Pantaula diau." Ughangtu mantau diau ngan bekatau, "Tenangla. Yesus mantau kaba. Mela betegakla." 10:50 Diau ngelucungka bajuau, mangku gegasip betegak njenguak Yesus. 10:51 Yesus betanyau, "Tuapau diau endak kaba pintak ngan Aku?" Jemau butau nimbal, "Pak Guru, aku endak pacak nginak." 10:52 Katau Yesus, "Pegila, kaba ghadu, karnau kaba percayau." Masau itu pulau jemautu pacak nginak mangku ngikut Yesus.

Markus 11

11:1 Yesus ngan anak-buaHau la pasigh ngan Yerusalim, la sampai di Betpagi ngan Betania di Bukit Saitun. Mangku Yesus ngajung duau ughang anak-buaHau 11:2 ngan bekatau, "Pegila ke dusun diau di adapan kamutu. Amun kamu la masuak, kamu ka nginak sikuak anak keledai tetambang diau lum kekela dinayi'i jemau. Legha'ila tambangan keledaitu, mangku batak ke sini. 11:3 Amun adau jemau betanyau ngan kamu, tuapau sebapau kamu melegha'i keledaitu, kiciakkala ngan jemaunyau, 'Tuhan endak makaiau, mangku gasip dibaliakka.' " 11:4 Duau ughang anak-buaHautu pegi, mangku betemu sikuak anak keledai dang tetambang di mukau duaghau di tepi jalan, mangku dilegha'inyau. 11:5 Jemau diau betegak di situ betanyau, "Ngapau kamu melegha'i keledai itu?" 11:6 Ughang duautu nimbal luak diau la dikiciakka Yesus, mangku jemau tadi ngenangka ughangtu mbatak keledaitu. 11:7 Ughang duautu mbatak keledaitu guak Yesus, dialasinyau ngan bajuau, mangku Yesus nayi'inyau. 11:8 Banyak jemau mbentangka bajuau di jalan. Adau pulau diau neta'i daun paku bindu jak di tepi umau, ditepiakkanyau di jalan. 11:9 Jemau diau bejalan dulu sekali ngan diau mendian tegauk-gauk, "Husana! Tepujila diau datang atas namau Tuhan. 11:10 Idupla pemerintahan diau ka datang, pemerintahan Daud, niniak puyang kitau. Tepujila Allah diau Mahatinggi!" 11:11 Yesus la sampai di Yerusalim mangku masuak Ghuma Allah. Di situ Diau ngina'i gegalaunyau, anyautu aghi laka malam, mangku Diau pegi keluagh ke Betania ngan duau belas anak-buaHau. 11:12 Pagi di aghiau masau Yesus ngan duau belas anak-buaHau bejalan ninggalka Betania, Yesus lapagh. 11:13 Jak di jawua Diau nginak sebatang aghau, daunau rimbun. Diau pegi guak batang aghau itu endak nginak apu adau buahau. La sampai di batangtu, Diau nidau tekinak buahau, cuman daunau ajau, karnau masau itu lum pangkau bua aghau. 11:14 Mangku Diau bekatau ngan batang aghautu, "Kaba nidau ka bebua agi selelamaunyau." Anak-buaHau ndengagh kici'an itu. 11:15 Mangku Yesus ngan anak-buaHau la sampai di Yerusalim. Diau masuak ke Ghuma Allah mangku mulai ngisitka gegalau tukang ngulua di tengalaman Ghuma Allah. Mija-mija tukang nukar tanci ngan bangku tukang njual burung darau dikangkangkaNyau. 11:16 Nidau sughang kia diajungAu mbatak dandanan wuan tengalaman Ghuma Allahtu. 11:17 Mangku Diau ngajagh ughangtu, katauNyau, "Di Injil ditulis luak ini: Allah bekatau, 'GhumaKu dikiciakka ghuma du'a batan endak gegalau bangsau.' Anyautu kamuni la njadikanyau saghang bandit." 11:18 Imam-imam bepangkat tinggi ngan guru-guru ukum Taurat ndengagh ceritau tadi, mangku ughangtu mulai ndalak jalan endak mbunua Yesus. Ughangtu takut ngan Diau, karnau gegalau jemau kemangan ndengagh ajaghanNyau. 11:19 Aghi laka malam mangku Yesus ngan anak-buaHau ngeluagh jak di kuta itu. 11:20 Pagi di aghiau gi akap-akap, masau ughangtu lalu guak batang aghautu, tekinak batangtu la keghing enggut akaghau. 11:21 Mangku Pitrus teghingat ceritau aghi empaini, mangku diau bekiciak ngan Yesus, kataunyau, "Guru, kina'ila, batang diau Dighi dawaika la keghing." 11:22 Yesus nimbal, "Percayaula ngan Allah. 11:23 Ngenian katauKu ini: Amun kamu percayau nian ngan nidau asau-asau, kamu pacak nian bekatau ngan bukit ini, 'Tuangkatla ngan tecapakla ke dalam laut!' Mangku titu ka tejadi. 11:24 Karnau itu ingatkala ini: Setu diau kamu pintak dalam du'a percayaula, bansau kamu la nerimaunyau, mangku titu ka dienjuakka ngan kamu. 11:25 Mangku amun kamu bedu'a, anyautu ati kamu nidau riang ngan sughang jemau, abiskala sala jemautu kudai, supayau Bapak kamu di sergau pulau ngabisi dusau kamu. 11:26 Amun kamu nidau ngabiska sala jemau, Bapak kamu di sergau pulau nidau ka ngabisi dusau kamu." 11:27 La udim itu Yesus ngan anak-buaHau la sampai di Yerusalim. Diau dang bejalan di tengalaman Ghuma Allah mangku imam-imam bepangkat tinggi ngan tuau-tuau jemau Yahudi datang njenguak Diau 11:28 ngan betanyau, "Pakai kuasau apau Kaba ngerjauka gegalaunyautu? Mangku sapau ngenjuakkanyau ngan Kaba?" 11:29 Yesus nimbal, "Aku pulau endak betanyau ngan kapu dighi. Amun kapu dighi nimbal, Aku pulau ka ngiciakka ngan kapu dighi, ngan kuasau sapau Aku ngerjauka gegalaunyautu. 11:30 Baptisan Yuhanis itu asalau jak di sergau apu jak di manusiau? Cubau nimbal." 11:31 Ughangtu buijau, "Amun kitau kiciakka, 'Asalau jak di sergau' Diau ka bekatau, 'Ngapau kapu dighi nidau percayau ngan diau?' 11:32 Baghia kitau kiciakka, 'Asalau jak di manusiau.' " Ughangtu takut ngan jemau banyak, karnau gegalau ughangtu nganggap Yuhanistu sughang nabi. 11:33 Mangku ughangtu nimbal, "Kami nidau keruan." Mangku Yesus bekatau ngan ughangtu, "Amun luak itu, Aku enggup pulau ngiciakka ngan kapu dighi ngan kuasau sapau Aku ngerjauka gegalaunyautu."

Markus 12

12:1 Mangku Yesus mulai ngiciak ngan ughangtu pakai umpamau, katauNyau, "Adau sughang jemau diau mbukak kebun anggur, mangku dikandangau, digalikanyau lubang batan bada neghit anggur, ditegakka bada nungguau. La udim itu diparauka kebuntu ngan bebeghapau jemau parauan. Mangku diau pegi ke nenggeri lain. 12:2 La pangkaunyau endak mutigh anggur, jemau ngempu kebun tadi ngajung sughang anak-buahau pegi njenguak jemau parauan tadi endak mintak bagian asil kebunau. 12:3 Anyautu jemau parauantu nangkap anak-bua tadi. La udim ditangkap, dibaduki mangku diajung baliak nidau bediau pulian. 12:4 Mangku jemau ngempu kebuntu ngajung sughang anak-bua diau lain. Anyautu diau dibaduki pala'au enggut lukau ngan digelakka nian. 12:5 Mangku diajung sughang anak-bua lainau agi. Anyautu diau dibunua. Banyak agi diau lain diau diajungau. Adau diau dibaduki, adau diau dibunua. 12:6 Mangku tigha ana'au diau sikuak itula diau disayangi. Diautu diajung njenguak jemau parauan tadi, rupu'annyau, 'Cengki anakku ka diregaui ughangtu.' 12:7 Anyautu jemau parauan ngiciak sughang ngan diau lain, 'Diautu behak ngempu kebun ini nanti. Mela kitau mbunua diau, mangku kebun ini njadi hak kitau.' 12:8 Mangku ana'autu ditangkap, dibunua, dicapakka keluagh kebun itu." 12:9 Mangku Yesus betanyau, "Mbak kini tuapau ka dibuat jemau ngempu kebuntu? Cengki diau ka datang mbunua jemau parauan tadi, mangku nyeraka kebunau ngan jemau lain. 12:10 Apu kapu dighi lum mbacau ayat ini, 'Batu diau dicapakka tukang negak ghuma, la njadi pelapiak tiang. 12:11 Inila kerjau Tuhan, setu diau nyelia batan endak kitau.' " 12:12 Mangku imam-imam bepangkat tinggi ngan jemau Parisi beusaha endak nangkap Yesus, karnau ughangtu keruan, bansau ceritau tadi ngenaui ughangtu. Anyautu ughangtu takut ngan jemau banyak, mangku pegi ninggalka Diau. 12:13 Udim itu adau jemau Parisi ngan jemau Herudis diajung nanyaui Yesus endak nyalakaNyau. 12:14 Ughangtu datang njenguak Yesus ngan bekatau, "Pak Guru, kami keruan kici'an Dighi benagh. Dighi ngajaghka kendak Allah ngan benagh. Dighi nidau ngirauka pendapat jemau, karnau Dighi nidau milia rupau. Karnau itu cubau Dighi kiciakka ngan kami: Nurut peraturan agamau kitau, apu bulia mbayigh cuki ngan Kaisar apu nidau? Apu mesti kitau bayighi cukitu?" 12:15 Yesus keruan rencanau diau jedit itu, mangku Diau bekatau, "Ngapau kamu endak ncubaui Aku? Cubau kinakka ngan Aku sutiak tanci pirak." 12:16 Mangku dienjuakkanyau ngan Diau sutiak tanci piraktu. Yesus betanyau, "Gambaran ngan namau sapau adau di situ?" Ughangtu nimbal, "Gambaran ngan namau Kaisar." 12:17 "Amun luak itu," katau Yesus, "Enjuakkala ngan Kaisar hak Kaisar. Mangku enjuakkala ngan Allah hak Allah!" Ughangtu kemangan nian ndengagh kici'anNyautu. 12:18 Jemau Saduki nidau percayau, bansau jemau mati ka ngulang idup agi. Mangku adau bebeghapau jemau Saduki datang njenguak Yesus ngan betanyau, 12:19 "Pak Guru, Musa ngajaghka peraturan ini: 'Amun sughang jemau lanang mati lum adau anak, dengasana'au mesti nika ngan randaunyau, mangku endak ngadauka jurai batan endak jemau diau la mati tadi.' 12:20 Na, adau jemau lanang tujua beghading. Diau tuau nika mangku mati, lum adau anak. 12:21 Mangku diau keduau nikai randaunyau, mangku mati pulau lum adau anak. Luak itu pulau diau ketigau. 12:22 Luak itula pulau enggut diau ketujua mati galau, nidau bediau anak. Udim-udimau tinautu mati pulau. 12:23 Luak manau ngan tinau itu masau aghi jemau mati ka diidupka agi? Bini sapau tinautu, karnau ughang tujuatu la nikainyau galau?" 12:24 Yesus nimbal, "Kapu dighi sala, karnau kapu dighi nidau ngerti empuak Injil empuak kuasau Allah. 12:25 Amun jemau mati nanti ngulang idup agi, ughangtu nidau ka belaki bebini agi. Ughangtu ka idup luak malaikat di sergau. 12:26 Ceritau jemau ka ngulang idup, apu lum kapu dighi bacau dalam Taurat ceritau belukagh diau maghak itu? Dalam ceritau itu Allah bekatau ngan Musa, 'Akula Allah Abraham, Allah Isak ngan Allah Yakub.' 12:27 Allah ukan Allah jemau mati, tapitu Allah jemau idup. Kapu dighi sala nian." 12:28 Mangku adau sughang guru ukum Taurat. Diau la ndengagh Yesus ngiciak ngan jemau Saduki tadi, bansau Yesus nimbali ughangtu ngan iluak. Diautu datang njenguak Yesus ngan betanyau, "Perinta manau diau penting sekali?" 12:29 Yesus nimbal, "Perinta diau penting sekali ini: Dengaghkala, ui jemau Israil, Tuhanla Allah kitau. Tuhan itu sutiak. 12:30 Sayangila Tuhan, Allah kaba ngan sepenua ati kaba ngan sepenua jiwa kaba ngan gegalau akal-pikiran kaba ngan gegalau kekuatan kaba. 12:31 Mangku perinta diau keduau ini: Sayangila jemau lain luak kaba nyayangi diri kaba. Nidau bediau perinta lain, pentingla diau sangkan duau perinta tadi." 12:32 Mangku guru ukum Taurat tadi bekatau, "Nyela nian, Pak Guru. Setu diau Dighi kiciakkatu benagh. Allah itu sutiak, nidau bediau allah lain jak di Diau. 12:33 Kitau mesti nyayangi Allah ngan sepenua ati ngan gegalau akal-pikiran ngan gegalau kekuatan ngan pulau nyayangi jemau luak kitau nyayangi diri kitau. Pentingla titu sangkan kerban benatang ngan gegalau kerban diau lain." 12:34 Yesus nginak timbal jemautu bepengertian nian, mangku Diau bekatau, "Dighi laka njadi angguta umat Allah." Mangku sughang kiala nidau beghani agi betanyau ngan Yesus. 12:35 Masau Yesus ngajagh di Ghuma Allah, Diau betanyau, "Ngapau guru-guru ukum Taurat pacak ngiciakka, bansau Mesias, Rajau Penyelamat, pengadau Daud? 12:36 Daud diajung Rua Allah bekatau, 'Allah bekatau ngan Tuhanku, Duduakla di sebela kananKu, enggut Aku mbuat musua Kaba tunduak nyemba Kaba.' 12:37 Mangku amun Daud ngiciakka Mesiastu Tuhan, manau ka adau Diau pengadau Daud?" 12:38 Diau bekatau, "Sepepadaula ngan guru-guru ukum Taurat. Ughangtu galak ngerayau ngan baju lambing ngan galak diregaui di pekan. 12:39 Ughangtu galak duduak di mukau di ghuma sembayang ngan di bada diau diregaui di jamuan. 12:40 Ughangtu ngambiak ghuma randau-randau, mangku bedu'a panjang-panjang endak nukupi kerjau ja'attu. Beghatla ukuman ughangtu." 12:41 Yesus dang duduak di Ghuma Allah ngadapi bada tanci batan endak Allah, mangku Diau nginak jemau masuakka tanci dalam badatu. Banyak jemau kayau masuakka tanci banyak. 12:42 Mangku Diau nginak sughang randau serik masuakka duau tanci tembagau diau keciak sekali regaunyau. 12:43 Mangku Yesus mantau anak-buaHau, bekatau ngan ughangtu, "Peratikala ini: Banyakla randau serik itu masuakka tanci di bada ini sangkan gegalau jemau lainau tadi. 12:44 Gegalau jemau tadi ngenjuakka tanci jak di kelebihan retaunyau. Anyautu randau ini ngenjuakka jak di kurangan, gegalaunyau diau adau di diau batan endak pengidupannyau."

Markus 13

13:1 Yesus dang ngeluagh jak di Ghuma Allah, mangku adau sughang anak-buaHau bekatau ngan Diau, "Pak Guru, kina'ila ghuma itu, alap nianan." 13:2 Yesus bekatau, "Kaba nginak ghuma diau alap. Nidau sebua kiala batu di ghumatu ka tinggal tesusun di badahau. Gegalaunyau ka rubua." 13:3 Mangku Yesus duduak di Bukit Saitun ngadap Ghuma Allah. Pitrus, Yakubus, Yuhanis ngan Anderias betanyau ngan Diau sughang, 13:4 "Kiciakkala ngan kami, kebilau titu ka tejadi? Tuapau tandaunyau la masaunyau?" 13:5 Yesus mulai bekatau, "Sepepadaula, jangan kamu disesatka jemau. 13:6 Banyak jemau ka datang makai namau Aku ngan bekatau, 'Akula Diau.' Ughangtu ka nyesatka banyak jemau. 13:7 Kamu ka ndengagh muni perang ngan ceritau perang. Anyautu nidau nanti takut. Gegalaunyautu mesti tejadi kudai. Anyautu deniau lum ka kiamat. 13:8 Bangsau ka melawan bangsau, nenggeri diau sutiak melawan nenggeri diau lain. Ka adau gempau di manau-manau ngan kelapaghan. Gegalaunyautu empai penembai penanggungan. 13:9 Kamuni sepepadaula! Kamu ka ditangkap ngan diseraka ke pengadilan agamau. Kamu ka dibaduki di ghuma sembayang, mangku kamu ka diadapka ngan penguasau ngan rajau, karnau percayau ngan Aku, mangku pacak nceritauka Aku ngan ughangtu. 13:10 Mangku ceritau iluak jak di Allah mesti dikiciakka kudai ngan gegalau bangsau. 13:11 Amun kamu ditangkap ngan dibatak ke pengadilan, jangan ghegak sebelumau ngan setu diau endak kamu kiciakka. Kiciakkala setu diau dikiciakka ngan kamu masau itu pulau, karnau katau itu ukan asalau jak di kamu, tapitu jak di Rua Allah. 13:12 Jemau ka nyeraka denga-sana'au endak dibunua. Luak itu pulau bak ngan ana'au. Anak pulau ka melawan pejadiau mangku nyeraka diau endak dibunua. 13:13 Kamu ka diluatka gegalau jemau karnau percayau ngan Aku. Anyautu jemau diau ta'an enggut kesudimannyau ka selamat." 13:14 "Kamu ka nginak 'Keja'atan diau ngancurka' betegak di bada diau dilarang. Jemau diau mbacau ini peratikala tuapau retiau. Masau itu jemau diau adau di Yudia mesti belaghi ke gunung. 13:15 Jemau diau adau di gaghang jangan masuak ghuma endak ngambiak retau jak di ghumahau. 13:16 Jemau diau adau di umau jangan baliak endak ngambiak pekakasau. 13:17 Ka celakau tinau-tinau diau dang ngandung ngan tinau diau minumi ana'au masau itu. 13:18 Bedu'ala, supayau gegalaunyau jangan tejadi pangkau ujan. 13:19 Karnau masau itu ka adau kesengsarauan luak diau lum kekela tejadi jak deniau dijadika Allah enggut mbak kini ngan nidau ka tejadi agi. 13:20 Misalau masau itu nidau dipandakka, mangku nidau bediau sughang kia diau selamat. Anyautu karnau umatAu diau la dipiliatu, mangku Tuhan ka mandakka masaunyau. 13:21 Masau itu amun adau jemau diau ngiciak ngan kamu, 'Kina'ila, Rajau Penyelamat adau di sini.' ngan 'Diau adau di situ.', jangan percayau ngan jemau itu, 13:22 karnau ka adau cak penyelamat ngan cak nabi. Ughangtu ka ngerjauka tandau-tandau nyelia, mangku amun pacak, endak nipuka umat Allah pulau. 13:23 Sepepadaula, gegalaunyautu la kukiciakka ngan kamu, antak ka tejadi." 13:24 "Nidau lamau udim sengsarau masau itu, matau-aghi ka njadi keleman, bulan nidau ka besinagh agi. 13:25 Langit ka kacau-balau. Bintang-bintang ka umbanan. 13:26 Masau itula jemau ka nginak Anak Manusiau datang dalam aban ngan gegalau kuasauNyau ngan keagunganNyau. 13:27 Masau itu pulau Diau ka ngajung malaikatAu nunggalka umatAu jak di gegalau ujung deniau." 13:28 "Belajaghla jak di batang aghau. Amun ghantingau lembut ngan mulai nyinggit, kamu keruan, bansau laka musim panas. 13:29 Luak itu pulau, amun kamu nginak gegalaunyau tadi tejadi, kamu keruan, bansau masaunyau la pasigh nian. 13:30 Keruanila, gegalaunyautu ka tejadi, antak ka jemau mbak kini mati galau. 13:31 Langit ngan deniau ka lengit, tapitu kici'anKu nidau ka lengit. 13:32 Nidau bediau diau keruan, kebilau masaunyau ngan aghiau. Malaikat di sergau nidau keruan, Anak Allah pulau nidau, cuman Bapak ajau keruan." 13:33 "Sepepadaula ngan bejagaula, karnau kamu nidau keruan, kebilau masaunyau. 13:34 Masau itu ibarat sughang diau ninggalka ghumahau mangku pegi ke bada diau jawua. Diau ngajung anak-buahau ngurus ghumahau, adau kerjau sesughangan. Diau bepesan ngan tukang nunggu duaghau, supayau bejagau iluak-iluak. 13:35 Karnau itu kamu mesti bejagau, karnau kamu nidau keruan, kebilau tuan ghumatu baliak, enta petang, enta tenga malam, enta paghak siang butau, enta masau matau-aghi tumbua. 13:36 Amun diau datang bekejut, jangan kamu dang tiduak. 13:37 Setu diau Kukiciakka ngan kamu, Kukiciakka pulau ngan gegalau jemau: Sepepadaula!"

Markus 14

14:1 Duau aghi agi aghi rerayau Paska ngan aghi rerayau Ruti Nidau Beghagi ka mulai, mangku imam-imam bepangkat tinggi ngan guru-guru ukum Taurat ndalak jalan endak nangkap Yesus carau diam-diam endak mbunua Diau. 14:2 Ughangtu bekatau, "Jangan titu dikerjauka masau aghi rerayau, mangku jemau banyak jangan ganau." 14:3 Yesus adau di Betania, di ghuma Simun diau senitu buidapan ja'at. Mangku adau sughang jemau tinau datang mbatak sebua kacau buisi minyak ghum diau besak regaunyau. Yesus dang duduak makan, mangku tinau itu mecaka liagh kacautu, ditutuakka minyak ghumtu ke pucuak palak Yesus. 14:4 Adau jemau mara, mangku ngiciak ngan diau lain, "Tuapau gunaunyau minyaktu dighayakka? 14:5 Minyaktu pacak dijual ngan regau lebia tigau ratus tanci pirak, mangku pacak dienjuakka ngan jemau serik." Mangku ughangtu maju marai tinau tadi. 14:6 Yesus bekatau, "Nengkela. Jangan kamu nyinggung tinau ini. Diau ngerjauka setu diau iluak batan endak Aku. 14:7 Jemau serik maju guak kamu, mangku kamu pacak nulung ughangtu, amun endak. Anyautu Akuni nidau maju guak kamu. 14:8 Diau la ngerjauka setu diau pacak dikerjaukanyau. Diau la nyediauka Aku ngan minyak ghum batan endak penguburanKu antak ka masaunyau. 14:9 Percayaula, di gegalau deniau di manau ceritau iluak jak di Allah diceritauka, setu diau dikerjauka tinau ini ka dikiciakka pulau endak ngingat diau." 14:10 Mangku Yudas Iskariut, sughang jak di keduau belas anak-buaHautu, pegi njenguak imam-imam bepangkat tinggi, rencanaunyau endak nyeraka Yesus ngan ughangtu. 14:11 Ndengagh kici'annyautu imam-imam tadi injiak nianan, mangku bejanji ka ngenjuakka tanci ngan Yudas. Mangku diau ndala'i jalan ngan masau diau iluak endak nyeraka Yesus. 14:12 Masau aghi rerayau Ruti Nidau Beghagi, aghi petamautu, sikuak anak bebiri disembelia batan endak jamuan meringati Paska, aghi itula anak-buaHau betanyau ngan Yesus, "Ke manau bada, Dighi ngajung kami nyediauka jamuan Paska, mangku Dighi makan?" 14:13 Mangku Yesus ngajung anak-buaHau duau ughang, katauNyau, "Pegila masuak kuta. Di situla kamu ka betemu ngan jemau lanang mbatak guci buisi ayiak. Ngikutla diautu, 14:14 mangku ngiciakka ngan tuan ghuma diau dimasu'inyau: 'Katau Guru, di manau bada diau la disediauka batan endak Aku makan Paska ngan anak-buaKu?' 14:15 Mangku ka ditunjuakkanyau ngan kamu bada di pucuak diau besak lagi la genap ngan dandanan. Di situla nyediauka jamuan Paska batan endak kitau." 14:16 Mangku pegila anak-buaHautu masuak kuta, ditemuinyau gegalaunyau luak diau la dikiciakka Yesus, mangku disediaukanyau jamuan Paska. 14:17 Aghi la sangkup malam, Yesus datang ngan duau belas anak-buaHau. 14:18 Ughangtu dang duduak makan, mangku Yesus bekatau, "Dengaghkala kici'anKu, sughang jak di kamuni diau makan serempak ngan Aku ka nyeraka Aku." 14:19 Ndengagh katau itu bingung anak-buaHautu, mangku bilang ughang ngiciakka ngan Diau, "Cengki, ukan aku." 14:20 Yesus nimbal, "Jemau itu sughang jak di duau belas kamuni, diau makan sepiring ngan Aku. 14:21 Nyela nian, Anak Manusiau ka ninggalka deniauni luak la ditulis di Injil ceritau Diau. Anyautu alaka celakau jemau diau nyeraka Anak Manusiautu. Iluakla jemautu nidau kekela adau di deniau." 14:22 Yesus ngan anak-buaHau dang makan, Yesus ngambiak ruti, bedu'a beterimau-kasia, dipiyak-piya'Au, dienjuakkaNyau ngan anak-buaHau, katauNyau, "Ambiakla, makanla! Inila badanKu." 14:23 La udim itu Yesus ngambiak mangkuak anggur, bedu'a beterimau-kasia, dienjuakkaNyau ngan anak-buaHautu, mangku gegalau anak-buaHau minum jak di mangkuak itu. 14:24 Katau Yesus, "Inila daghaKu diau neguaka janji Allah, diau melilia batan endak banyak jemau. 14:25 Percayaula, mulai mbak kini Aku nidau ka minum anggur ini agi, enggut Aku minum anggur diau empai di bada BapakKu merinta." 14:26 Ughangtu benyanyi ngagungka Allah. Udim itu ughangtu pegi ke Bukit Saitun. 14:27 Mangku Yesus bekatau ngan ughangtu, "Malam ini gegalau kamu ka belaghi ninggalka Aku. Karnau di Injil tetulis, 'Aku ka mbunua tukang sayia, mangku bebiriau ka teceghai-beghai.' 14:28 Anyautu udim Aku la idup agi, Aku ka pegi ndului kamu ke Galilia." 14:29 Pitrus bekatau ngan Yesus, "Empuak gegalau diau lainau ninggalka Dighi, aku nidau." 14:30 "Ingatkala," katau Yesus, "Malam ini antak ka ayam bekukuak duau kali, kaba la tigau kali ngiciakka nidau keruan Aku." 14:31 Pitrus nimbal ngan tegas, "Empuak aku mesti mati serempak ngan Dighi, aku nidau ka bekatau, bansau aku nidau keruan Dighi." Gegalau anak-buaHau diau lainau ngiciak luak itu pulau. 14:32 Mangku Yesus ngan anak-buaHau pegi ke bada diau benamau Getsimani. Di situ Diau bekatau ngan ughangtu, "Duduakla kamu di sini, penarau Aku pegi bedu'a." 14:33 Diau ngajung Pitrus, Yakubus ngan Yuhanis ngantini Diau. Mangku Diau mulai meghasau sedia ngan gelisa. 14:34 Diau bekatau ngan ughang tigau itu, "AtiKu madak nian, asaunyau luak ka mati. Mendamla kamu di sini, ngikut bejagau ngan Aku." 14:35 Udim itu Diau pegi njawua dikit, mangku Diau rubua ke tana ngan bedu'a, supayau amun bulia nidau nanti meghasauka sengsarau itu. 14:36 KatauNyau, "Bak, gegalaunyau ka pacak, amun Dighi. Jawuakala sengsarau itu jak di Aku. Anyautu jangan nurut kendak Aku, tapitu kendak Dighi ajau." 14:37 La udim itu Diau ngulang guak tigau ughang tadi, dikina'iNyau dang tiduak, mangku Diau bekatau ngan Pitrus, "Simun, tiduak kaba? Kaba nidau pacak bejagau sejam? 14:38 Bejagaula ngan bedu'ala, supayau kamu jangan bedusau, amun dicubaui. Nyela, dalam ati kamu endak ngerjauka setu diau benagh, anyautu kekuatan manusiau tebatas." 14:39 Yesus pegi bedu'a agi ndu'aka setu diau semegi ngan tadi. 14:40 Udim itu Diau ngulang agi, dikina'iNyau ughangtu masia tiduak pulau, karnau ghungau nian. Mangku ughangtu nidau keruan setu diau pacak dikiciakka ngan Yesus. 14:41 La udim itu Diau ngulang agi diau ketigau kaliau ngan bekatau ngan ughangtu, "Masia kamu tiduak ngan gheghadu? Udimla. Kina'ila, la masaunyau Anak Manusiau diseraka ngan jemau bedusau. 14:42 Bangunla, mela kitau pegi. Jemau diau njualka Aku la datang." 14:43 Penarau Yesus gi ngiciak, Yudas sughang jak di duau belas anak-buaHau datang. Serempak ngan diau datang pulau jemau serumbungan besak mbatak pedang mbatak pembaduk. Ughangtu diajung imam-imam bepangkat tinggi, guru-guru ukum Taurat ngan tuau-tuau jemau Yahudi. 14:44 Jemau diau nyeraka Yesus la ngiciakka tandau ngan jemau diau serempak ngan diau, kataunyau, "Jemau diau ka kucium itula Jemaunyau. Tangkapla Diau. Bata'ila ngan jagaui, jangan ka belaghi." 14:45 La sampai di situ Yudas gegasip masighi Yesus, kataunyau, "Pak Guru, diau kami regaui." Mangku diciuminyau. 14:46 La udim itu ughangtu nangkap Yesus, dikecakka ughangtu gegerut. 14:47 Mangku sughang jak di anak-buaHau diau adau di situ ncabut pedangau, dikapakkanyau ngan anak-bua Imam Besak, mangku putus telingaunyau. 14:48 Mangku Yesus bekatau ngan jemau banyak tadi, "Kamu sangkau Aku bandit, mangku mbatak pedang mbatak pembaduk endak nangkap Aku? 14:49 Idang aghi Aku ngajagh di Ghuma Allah. Kamu enggup nangkap Aku. Nyela, gegalaunyautu mesti tejadi, mangku ditepati setu diau ditulis dalam Injil." 14:50 La udim itu gegalau anak-buaHau belaghi ninggalka Yesus. 14:51 Adau sughang budak bujang ngikut Yesus. Diautu cuman bekain selambagh. Ughangtu endak nangkap diau. 14:52 Anyautu diau lepaska kainautu, mangku belaghi nidau bekain. 14:53 La udim Yesus ditangkap, Diau dibata'i ngadap Imam Besak. Mangku gegalau imam bepangkat tinggi, tuau jemau Yahudi ngan guru ukum Taurat betunggal di situ. 14:54 Pitrus ngikut jak di jawua sampai ke tengalaman Imam Besaktu. Mangku di situ diau duduak guak penjagau, bediang guak api. 14:55 Imam-imam bepangkat tinggi ngan gegalau pengadilan agamau ndalak jemau diau ngiciak nyalaka Yesus, supayau pacak diukum mati, anyautu nidau dapat. 14:56 Banyak jemau ngiciakka setu diau mbu'ung, anyautu kici'antu nidau pulau semegi. 14:57 Mangku adau bebeghapau jemau betegak ngiciakka setu diau mbu'ung nyalaka Yesus. 14:58 Ughangtu bekatau, "Kami ndengagh jemau ini bekatau, 'Aku ka merubuaka Ghuma Allah diau dibuat manusiauni, mangku timpau tigau aghi ka Kutegakka agi diau lain diau ukan dibuat manusiau.' " 14:59 Anyautu kici'an ughangtu pulau nidau semegi sughang ngan diau lain. 14:60 Mangku Imam Besak betegak di pengadilantu ngan betanyau ngan Yesus, "Ngapau Kaba nidau nimbali kici'an diau mburuakka Kabatu?" 14:61 Anyautu Yesus diam ajau nidau ngiciak tuapau-apau. Mangku Imam Besak betanyau agi ngan Diau, "Apu Kaba Mesias, Rajau Penyelamat, Anak Allah diau suci?" 14:62 Yesus nimbal, "Akula Diau. Kapu dighi ka nginak Anak Manusiau duduak di sebela kanan Allah diau Mahakuasau mangku datang ngan aban jak di langit." 14:63 Mangku Imam Besak ncebaghka bajuau ngan bekatau, "Nidau nanti kici'an jemau lain agi. 14:64 Gegalau kapu dighi la ndengagh Diau nggelakka Allah. Luak manau pendapat kapu dighi?" Mangku gegalau ughangtu mutuska, Diau pantas diukum mati. 14:65 Mangku ughangtu mulai meludai dayi Yesus, ditukupi dayiAu ngan ditinjui, sampai bekatau, "Ui nabi, cubau dedakla sapau ninju Kaba?" Mangku penjagau pulau nampagh Yesus. 14:66 Masau itu Pitrus gi adau di bawa di tengalaman. Mangku adau sughang budak Imam Besak jemau tinau datang ke situ. 14:67 Diau nginak Pitrus dang bediang guak api, diau ngengina'i dayiau ngan bekatau, "Kaba pulau maju seghundak ngan Yesus, jemau Nasarittu." 14:68 Anyautu diau nidau ngakuak, kataunyau, "Aku nidau keruan ngan nidau terti, tuapau kici'an dighi?" Mangku diau pegi ke duaghau masuak. Masau itu ayam bekukuak. 14:69 Mangku tinau tadi nginak diau agi, diau bekatau ngan jemau diau adau di situ, "Jemau ini nyela nian sughang jak di ughangtu." 14:70 Pitrus nidau pulau ngaku'i. Nidau lamau udim itu adau jemau lain diau adau di situ ngiciak ngan Pitrus, "Nyela nian, kaba sughang jak di ughangtu. Kaba jemau Galilia!" 14:71 Mangku Pitrus besumpa, "Aku endiak keruan Jemau itu. Nengkela Allah ngukum aku, amun aku mbu'ung!" 14:72 Masau itu pulau ayam bekukuak keduau kaliau. Mangku Pitrus teghingat setu diau la dikiciakka Yesus ngan diau, "Antak ka ayam bekukuak duau kali, kaba la tigau kali nidau ngaku'i Aku." Mangku Pitrus nangis sesedanan.

Markus 15

15:1 Paghak siang imam-imam bepangkat tinggi, tuau-tuau, guru-guru ukum Taurat ngan gegalau pengadilan agamau buijau ngambiak kesimpulannyau. Yesus dighimpus, dibatak mangku diserakanyau ngan Pilatus. 15:2 Pilatus nanyaui Yesus, katauNyau, "Kaba nian rajau jemau Yahudi?" Timbal Yesus, "Au, luak kici'an diau la dighi kiciakkatu." 15:3 Mangku imam-imam itu banyak mburuakka Yesus. 15:4 La udim itu Pilatus betanyau pulau, kataunyau, "Nidau Kaba ka nimbal? Kaba la ndengagh, alaka banyak buru'an ughangtu ngan Kaba." 15:5 Anyautu Yesus nidau nimbal dikit kiala. Mangku Pilatus kemangan. 15:6 Idang taun masau aghi rerayau itu biasaunyau sughang kawalan dibibaska nurut pinta'an jemau banyak. 15:7 Masau itu adau sughang kawalan diau benamau Barabas. Diautu dijilka serempak ngan bebeghapau jemau diau melawan pemerinta. Ughangtu la mbunua jemau. 15:8 Mangku jemau banyak datang mintak, supayau sughang kawalan dibibaska luak biasaunyau. 15:9 Pilatus betanyau ngan jemau banyak, "Apu kamu tetuju, aku mbibaska rajau jemau Yahudi batan endak kamu?" 15:10 Diau la keruan nian, bansau Yesus diseraka, karnau imam-imam bepangkat tinggi sengit. 15:11 Anyautu imam tadi ngasung jemau banyak, mangku ughangtu mintak Barabas dibibaska batan endak ughangtu. 15:12 Pilatus bekiciak agi ngan ughangtu, kataunyau, "Amun luak itu, tuapau diau kamu endak aku buat ngan Jemau ini, diau kamu kiciakka rajau jemau Yahudi?" 15:13 Mangku ughangtu tegauk, "Pakukala Diau di kayu salip!" 15:14 La udim itu Pilatus betanyau agi, "Ngapau? Tuapau keja'atan Jemau ini?" Anyautu ughangtu tamba bias tegauk, "Pakukala Diau di kayu salip!" 15:15 Pilatus endak meriangka ati jemau banyaktu, mangku diau ngajung Barabas dibibaska batan endak ughangtu ngan Yesus dibaduki, mangku diserakanyau endak dipakuka di kayu salip. 15:16 Mangku Yesus dibatak tentera masuak ke pengadilan di istana gubernur, mangku gegalau tentera di situ dipantau betunggal. 15:17 Ughangtu nyurumka baju rajau ngan Yesus, dibuat gitar jak di ghanting bedughi, dikenaukanyau di pala'Au. 15:18 Udim itu ughangtu mulai nunduak di adapanNyau, kataunyau, "Idup, ui Rajau jemau Yahudi!" 15:19 Ughangtu mbaduk pala'Au ngan tungkat, meludaiNyau mangku nunduak nyemba Diau. 15:20 Udim musiakka Diau, ughangtu ngelucungka baju rajautu, dikenauka bajuAu agi ngan Diau. 15:21 Masau itu adau sughang jemau lalu, namaunyau Simun, jemau Kirini, bak Aliksandar ngan Rupus. Diau empai datang jak di luagh kuta, mangku diau dipasau mikul salip Yesus. 15:22 Mangku Yesus dibatak ke bada diau benamau Gulguta, retiau Bada Kerungkang Palak. 15:23 Mangku Diau dienju'i anggur beundak mur, anyautu Diau enggup minumau. 15:24 Udim itu Yesus dipakuka di kayu salip, mangku tenteratentera ngagia pekakasAu, disuntinkanyau endak ngeruani bagian sesughangan. 15:25 La kekindang aghi masau Diau dipakuka di kayu salip. 15:26 Di pucuak kayu saliptu adau mirik diau ngiciakka sebapau Diau diukum, bacauannyau, "Rajau jemau Yahudi". 15:27 Serempak ngan Diau adau pulau duau bandit dipakuka di kayu salip, sikuak di kidauNyau, sikuak di kananAu. 15:28 Luak itula ditepati setu diau ditulis di Injil, bacauannyau, "Diau ka dikiciakka jemau ja'at." 15:29 Jemau diau lalu di situ, nggilingka pala'au ngan nggelakka Diau, kataunyau, "Agh Kaba, endak meleghak Ghuma Allah mangku ditegakka timpau tigau aghi. 15:30 Cubau, tughunla Kaba jak di kayu saliptu, ilakkala nyawau Kaba!" 15:31 Luak itu pulau imam-imam bepangkat tinggi ngan guru-guru ukum Taurat musiakka Yesus. Ughangtu ngiciak sughang ngan diau lain, "Jemau lain diselamatkaNyau, anyautu nyawauNyau sendighi nidau pacak diselamatkaNyau. 15:32 Amun Diau Rajau Penyelamat, Rajau Israil itu, cubaula Diau tughun jak di kayu saliptu, mangku kitau ngina'au ngan percayau ngan Diau!" Ughang duau diau dipakuka di kayu salip serempak ngan Yesustu nggelakka Diau pulau. 15:33 Masau tengaghi gegalau daira njadi keleman selamau tigau jam. 15:34 Mangku la petang tegauk Yesus ngan suarau bias, kataunyau, "Elui, elui, lama sabaktani!" Retiau, "AllahKu, AllahKu, ngapau Dighi ninggalka Aku?" 15:35 Ndengagh pantauanNyautu, jemau diau betegak di situ bekatau, "Dengaghkala, Diau mantau Elia!" 15:36 Mangku sughang jak di ughangtu datang mbatak bungau karang, dighendamkanyau di anggur masam, dicucuakkanyau di kemughu, mangku dienjuakkanyau batan minuman Yesus, sampai bekatau, "Cubau kitau tunggu, apu Elia ka datang endak nughunkaNyau jak di kayu saliptu!" 15:37 Mangku Yesus tegauk agi ngan suarau bias. La udim itu putus nyawauNyau. 15:38 Mangku tabir di Ghuma Allah caghiak bela duau jak di pucuak sampai ke bawa. 15:39 Kumandan tentera diau betegak buadapan ngan Yesus, nginak carau Diau mati, mangku bekatau, "Nyela nian, jemau ini Anak Allah." 15:40 Di situ adau pulau tinau-tinau diau nginak gegalaunyautu jak di jawua. Di rumbungan jemau tinautu adau Maria Magdalina, Maria mak Yakubus keciak ngan Yusias, ngan Salumi. 15:41 Gegalau tinautu ngikuti Yesus nepi'iNyau masau Diau di Galilia. Mangku adau pulau banyak tinau lainau diau datang ke Yerusalim serempak ngan Yesus. 15:42 Penarau itu aghi laka malam. Aghi itu aghi bedandan batan endak aghi Sabat. 15:43 Ikak luak itu Yusup, jemau Arimatia, mbeghanika diri ngadap Pilatus mintak mayat Yesus. Yusuptu sughang angguta pengadilan agamau. Diautu jemau diregaui ngan pulau nantika Allah merinta luak rajau. 15:44 Pilatus kemangan ndengagh Yesus la mati, mangku dipantaunyau kumandan tentera, ditanyaukanyau, apu Yesus la mati nian. 15:45 La udim ndengagh kici'an kumandantu, Pilatus ngajung Yusup ngambiak mayattu. 15:46 Mangku Yusup mbeli kain putia diau alap. La udim itu ditughunkanyau mayat Yesus jak di kayu salip, dibalutau ngan kain putia itu, ditepiakkanyau dalam kuburan diau digalika di bukit batu. Mangku diguliakkanyau sebua batu besak ke tebuak kuburan tadi. 15:47 Maria Magdalina ngan Maria mak Yusias nginak di manau Yesus ditepiakka.

Markus 16

16:1 La udim aghi Sabat, Maria Magdalina ngan Maria, mak Yakubus, ngan Salumi pegi mbeli rerempahan ghum endak pegi ke kuburan minya'i mayat Yesus. 16:2 Mangku akap aghi petamau minggu itu, satu matau-aghi empai tumbua, ughangtu pegi ke kuburan. 16:3 Di tenga jalan ughangtu ngiciak sughang ngan diau lain, "Sapau diau ka nulungi kitau ngguliakka batutu jak di tebuak kuburan?" 16:4 Anyautu la di guak kuburantu, tekinak batu diau besak nianan la teguliak. 16:5 Mangku tinautu masuak dalam kuburan, mangku tekinak sughang jemau mudau diau pakai baju lambing putia duduak di sebela kanan. Mangku tinautu tegagau nian. 16:6 Anyautu jemau mudau itu ngiciak ngan ughangtu, "Jangan takut," kataunyau, "Kamuni ndala'i Yesus, jemau Nasarit, diau dipakuka di kayu saliptu. Diau nidau bediau agi di sini, la ngulang idup. Kina'ila, inila bada Diau ditepiakka! 16:7 Mbak kini pegila, kiciakkala ceritau ini ngan anak-buaHau temasuak Pitrus. Kiciakka Diau pegi ndului kamu ke Galilia. Di situ kamu ka nginak Diau, luak diau la dikiciakka ngan kamu." 16:8 Mangku ughangtu ngeluagh jak di kuburantu, belaghi jak di situ karnau tegagau ngan takut. Ughangtu nidau ngiciakka tuapau-apau ngan sapau kila karnau takut. Tinau itu ngiciakka gegalaunyau diau dikiciakka malaikat tadi ngan Pitrus ngan kantin-kantinau. Udim itu Yesus makai anak-buaHau endak ngiciakka ceritau diau suci ngan nidau pacak dimandakka, ceritau keselamatan selelamaunyau, dikiciakkanyau jak di sebela matau-aghi idup ke sebela matau-aghi tumban. 16:9 La udim Yesus ngulang idup jak di mati, gi akap aghi Minggu itu, dulu sekali Diau ngancakka diriAu ngan Maria Magdalina. Jak di diautu Yesus la ngisitka tujua iblis. 16:10 Mangku tinautu pegi ngiciakka ceritau itu ngan anak-bua Yesus diau dang kebingungan ngan nangis. 16:11 Ughangtu ndengagh ceritau, bansau Yesus idup ngan la betemu ngan Maria, anyautu ughangtu nidau percayau. 16:12 Udim itu Diau ngancakka diriAu ngan duau ughang jak di anak-buaHau ngan carau diau lain, masau ughang duautu dang bejalan ke luagh kuta. 16:13 Ughangtu ngelipat ngiciakka ceritautu ngan kantin-kantin diau lain, anyautu ughangtu nidau pulau percayau. 16:14 Udim-udimau Yesus ngancakka diriAu ngan sebelas anak-buaHau, masau ughangtu dang makan. Diau nengul ughangtu, karnau ughangtu nidau percayau nian ngan nidau endak ndengagh kici'an jemau, karnau ughangtu nidau endak percayau ngan jemau diau la betemu ngan Diau, la udim Diau ngulang idup agi. 16:15 Mangku Diau bekatau ngan ughangtu, "Pegila ke gegalau deniau, kiciakkala ceritau iluak ngan gegalau isi deniau. 16:16 Jemau diau percayau ngan dibaptis ka selamat. Anyautu jemau diau nidau percayau ka diukum. 16:17 Jemau diau percayau ka mbuat tandau nyelia. Ughangtu ka ngisitka iblis ngan kuasauKu. Ughangtu ka ngiciak ngan basau diau nidau keruan ngan ughangtu. 16:18 Empuak ughangtu ngecakka ulagh ngan minum racun, ughangtu nidau ka celakau. Ughangtu ka nepiakka tanganau di jemau buidapan, mangku jemautu ka ghadu." 16:19 La udim Tuhan Yesus ngiciak ngan ughangtu, Diau tuangkat ke sergau. Di situ Diau duduak di sebela kanan Allah. 16:20 Mangku anak-buaHautu pegi ngiciakka ceritau iluaktu ke manau-manau. Mangku Tuhan ngenjuakka kuasau ngan ughangtu ngerjauka titu. Ngan tandau nyelia Diau mbuktika, bansau setu diau dikiciakka ughangtu benagh.

Lukas 1

1:1 Tiupilus diau diregaui. Banyak jemau la nulis ceritau diau la tejadi guak kitau. 1:2 Ughangtu nulis luak diau diceritauka ngan kitau jak di jemau diau la nginak nian ceritau itu tejadi jak di penembaiau, mangku disiarkanyau. 1:3 La udim diperisau galau neghagi nian jak di penembaiau, pendapatku iluak, amun aku pulau endak nuliska ceritau itu batan endak dighi. 1:4 Mangku dighi keruan, bansau gegalaunyau diau diajaghka ngan dighi benagh nian. 1:5 Timpau rajau Herudis merinta nenggeri Yudia, adau sughang imam jak di rumbungan Abia, namaunyau Sakaria. Biniau pulau asalau jak di pengadau Harun, namaunyau Elisabet. 1:6 Ughang duautu melemakka ati Allah, ta'at nian ngan gegalau perinta ngan ukum Tuhan. 1:7 Anyautu ughang duautu nidau bediau anak, awuak ughang duautu la tuau. 1:8 Adau saghi masau rumbungan Abia betugas, Sakaria ngerjauka tugasau imam di adapan Allah. 1:9 Biasaunyau imam-imam nyuntinka endak milia imam diau betugas. Udim disuntinka, Sakaria ditunjuak masuak Ghuma Allah endak nyilap keminyan. 1:10 Keminyantu dang disilap, gegalau jemau betunggal di luagh endak sembayang. 1:11 Penarau itula Sakaria kina'an malaikat Tuhan. Malaikattu betegak di sebela kanan mija bada nyilap keminyan. 1:12 Nginak malaikattu, Sakaria tegagau lagi penakut. 1:13 Anyautu malaikat tadi bekatau, "Ui, Sakaria, nidau endak takut, karnau Allah la ndengagh du'a kaba. Elisabet, bini kabatu, ka melahirka sughang anak lanang. Kaba mesti namaukanyau Yuhanis. 1:14 Kaba ka riang nian ngan banyak jemau ka riang pulau, amun anak itu la adau nanti. 1:15 Diau ka njadi jemau besak di adapan Tuhan. Diau nidau ka minum ayiak anggur ngan minuman diau mabuakka. Jak diau adau diau dikuasaui Rua Allah. 1:16 Banyak jemau Israil ngulang agi dibata'inyau njenguak Tuhan Allah. 1:17 Diau ka diajung antak ka Tuhan datang. Diau ka kuat ngan bekuasau luak Elia. Bapak ngan anak ka didamaikanyau. Jemau diau nidau ta'at dibata'inyau agi ke jalan diau benagh. Luak itula disediaukanyau umat diau la siap nerimau Tuhan." 1:18 "Luak manau mangku aku keruan titu ka tejadi?" tanyau Sakaria. "Aku la tuau, ngan bini aku la tuau pulau." 1:19 Katau malaikattu, "Akuni Jibrail. Aku bekerjau batan endak Allah. Diautu ngajung aku ngiciak ngan kaba, ngiciakka ceritau iluak itu. 1:20 Tuapau diau kukiciakka ka tejadi padau masaunyau. Anyautu karnau kaba endiak percayau, kaba ka bisu, nidau pacak ngiciak, enggut setu diau kukiciakka tadi tejadi." 1:21 Penarau itu, jemau banyak nantika Sakaria. Ughangtu kemangan, ngapau diau lamau nianan di Ghuma Allah. 1:22 Diau ngeluagh, diau nidau pacak ngiciak ngan ughangtu. Diau makai tandau ajau, karnau maju bisu. Mangku ughangtu ngerti galau, bansau diau la nginak pengina'an di Ghuma Allah. 1:23 La abis masau tugasau di Ghuma Allah, Sakaria baliak ke ghumahau. 1:24 Lum lamau itu, Elisabet ngandung, mangku diau bekurung di ghuma selamau limau bulan sampai bekatau, 1:25 "Tuhan nulung aku, mbak kini Diau mbuat aku nidau inau agi." 1:26 Kandungan Elisabet la enam bulan, Allah ngajung Jibrail pegi ke kuta Nasarit di Galilia. 1:27 Malaikattu diajung njenguak sughang gadis, namaunyau Maria. Mariatu la tunangan ngan Yusup. Diautu jak di pengadau rajau Daud. 1:28 Malaikat tadi njenguak Maria, kataunyau, "Ui Maria, kaba diau disayangi Tuhan. Tuhan maju nyertaui kaba." 1:29 Ndengagh kici'an itu, Maria tegagau, mangku betanyau dalam atiau, "Tuapau retiau kici'an itu?" 1:30 Malaikat itu bekatau, "Ui Maria, nidau endak takut, karnau Allah riang ngan kaba. 1:31 Kaba ka ngandung, mangku melahirka sughang Anak lanang diau mesti kaba namauka Yesus. 1:32 Diau ka njadi jemau besak, mangku Diau ka dikiciakka Anak Allah diau Mahatinggi. Tuhan Allah ka njadika Diau rajau luak rajau Daud, niniak puyangAu. 1:33 Mangku Diau ka merinta pengadau Yakub selelamaunyau. KekuasauanNyau nidau ka udim-udim." 1:34 "Aku masia gadis," katau Maria. "Luak manau titu ka adau?" 1:35 Malaikattu nimbal, "Rua Allah ka datang ke kaba, mangku kuasau Allah diau Mahatinggi ka menui kaba. Itula sebapau Anak diau ka kaba lahirkatu ka dikiciakka suci, Anak Allah. 1:36 Keruanila, Elisabet sanak kaba itu, la ngandung pulau, la enam bulan, empuak diau la tuau lagi jemau kiciakka nidau ka adau anak. 1:37 Karnau amun kendak Allah, nidau bediau diau nidau ka adau." 1:38 Katau Maria, "Aku ini budak Allah. Nengkela tejadi ngan aku luak diau dighi kiciakka." Mangku malaikattu pegi. 1:39 Nidau lamau udim itu, Maria pegi cecepat njenguak kuta di Yudia pasigh gunung. 1:40 Diau pegi ke ghuma Sakaria mangku masuak sampai ngiciak, "Ui, uncu Elisabet." 1:41 Satu Elisabet ndengagh kici'an Mariatu, beghinggut ana'au di kandungannyautu, mangku Elisabet pulau dikuasaui Rua Allah, 1:42 mangku ngiciak, kataunyau, "Allah iluak ngan kaba jak di gegalau tinau. Diau iluak pulau ngan Anak dalam kandungan kaba. 1:43 Sapau akuni sangkan enduak Tuhan berayak ngan aku? 1:44 Satu aku ndengagh kici'an kaba tadi, anak di kandunganku beghinggut karnau riang. 1:45 Riangla kaba, karnau percayau setu diau dikiciakka Tuhan ngan kaba, itu ka tejadi." 1:46 Mangku katau Maria, "Aku ngagungka Tuhan. 1:47 Atiku riang nian, karnau Allah Rajau Penyelamatku. 1:48 Diau teghingat aku, buda'Au diau nidau pantas ini. Mulai mbak kini gegalau jemau ka ngiciakka aku tinau diau diregaui, 1:49 karnau Allah diau Mahakuasau la ngerjauka kerjau diau besak batan endak aku. NamauNyau suci. 1:50 Jak di anak enggut ke enta-enta Allah sial ngan jemau diau takut ngan Diau. 1:51 Ngan tangan diau kuat Diau ngacauka rencanau jemau geduak. 1:52 Jemau diau bekuasau ditughunkaNyau jak di pangkatau, mangku jemau diau inau ditinggikaNyau. 1:53 Jemau diau lapagh dikenyangkaNyau ngan serbau diau iluak, mangku jemau diau kayau dilaratkaNyau nidau mbatak tuapau-apau. 1:54 Diau nulung jemau Israil, karnau Diau teghingat janjiAu diau dikiciakkaNyau ngan niniak puyang kitau. 1:55 Tuhan nidau lupau ngan janjiAu, mangku Diau iluak atiAu ngan Abraham ngan pengadaunyau enggut selelamaunyau." 1:56 Maria betunggal ngan Elisabet kekirau tigau bulan, mangku baliak ke ghumahau. 1:57 La sampai bulanau Elisabet merunggu, mangku adau sughang anak lanang. 1:58 Jemau sedusun ngan sana'au ndengagh, bansau Tuhan iluak nian ngan Elisabet, mangku ughangtu riang pulau. 1:59 Kupiak itu la beumur delapan aghi, ughangtu datang endak nyunatka diau, endak dinamaukanyau Sakaria luak namau ba'au. 1:60 Anyautu katau endu'au, "Jangan, diau mesti dinamauka Yuhanis." 1:61 "Endiak bediau sughang kiala jak di sanak kapu dighi benamau luak itu," katau ughangtu. 1:62 Mangku ughangtu makai tandau endak betanyau ngan Sakaria, "Sapau batan namau anak dighitu?" 1:63 Sakaria mintak batu tulis, mangku nulis luak ini, "Namaunyau Yuhanis." Ughangtu kemangan galau. 1:64 Masau itu pulau Sakaria pacak ngiciak agi, mangku diau ngagungka Tuhan. 1:65 Jemau dusunau penakut ngan kemangan galau. Mangku ceritau itu tesiar di ngepungan gunung Yudia. 1:66 Gegalau jemau diau ndengaghka ceritau itu merupuakkanyau mangku betanyau, "Njadi tuapau budak keciak itu nanti?" Karnau kuasau Tuhan nyertauinyau. 1:67 Sakaria, bapa'au, dikuasaui Rua Allah, mangku ngiciak luak sughang nabi, kataunyau, 1:68 "Tepujila Allah, Tuhan Israil, karnau Diau datang nulung umatAu ngan mbibaskanyau. 1:69 Mangku Diau ngenju'i kitau sughang Penyelamat diau bekuasau jak di pengadau Daud, buda'Autu, 1:70 luak dijanjikaNyau ngan kitau, mangku dikiciakka nabi-nabi senitu diau dipiliatu. 1:71 Tuhan njanjika endak nyelamatka kitau jak di musua kitau, jak di kuasau jemau diau meluatka kitau. 1:72 Diau endak nginakka keilu'an atiAu ngan niniak puyang kitau. JanjiAu diau suci ka ditepatiNyau. 1:73 Diau la besumpa ngan bejanji ngan niniak puyang kitau Abraham, 1:74 endak nyelamatka kitau jak di musua kitau, mangku kitau nidau takut nyemba Diau, 1:75 kitau diau ta'at ngan melemakka atiAu seumur idup. 1:76 Mangku kaba, ui anakku, kaba ka dikiciakka nabi Allah diau Mahatinggi, karnau kaba ka bejalan diduluka Tuhan endak nyediauka jalan batan endak Diau. 1:77 Kaba diajung ngiciakka ngan umatAu, bansau ughangtu ka diselamatka, karnau Allah ka ngabiska dusau-dusaunyau. 1:78 Karnau Allah iluak atiAu lagi penyayang, Diau ka datang nyelamatka kitau luak matau-aghi tumbua akap-akapan. 1:79 Luak itula Diau endak ngenjuak terang ngan jemau diau idup dalam keleman ngan takut ka mati. Diau endak mbimbing kitau ke jalan damai." 1:80 Anak Sakaria itu tamba besak tamba kuat wata'au. Mangku diau mendam di padang bungin enggut sampai masaunyau diau nyatauka diriau ngan jemau Israil.

Lukas 2

2:1 Timpau itu Kaisar Agustus merintaka, supayau gegalau jemau ditulis namaunyau. 2:2 Caca jiwa diau dulu sekali itu diadauka, timpau Kirinius njadi gubernur di nenggeri Siria. 2:3 Mangku jemau diau endak didaptarka baliak dusun galau. 2:4 Yusup pegi pulau jak di Nasarit di Galilia ke Betlihim di Yudia, asal rajau Daud, karnau Yusup itu pengadau Daud. 2:5 Yusup ngan Maria, buntingautu, pegi ke situ endak didaptarka namaunyau. Maria itu dang ngandung. 2:6 Ughang duautu la sampai di Betlihim, Maria la bulanau endak merunggu. 2:7 Mangku adau sughang anak lanang, anak tuaunyau. Kupiak itu dibalutau ngan kain, ditiduakka di bada makanan benatang, karnau ughangtu endiak dapat agi bada temalam di ghuma. 2:8 Di ngepungan itu adau tukang sayia bebiri nyayia bebiriau di padang malam itu. 2:9 Malaikat Tuhan datang guak ughangtu, mangku terang Tuhan besinagh nerangi ughangtu. Tukang sayia bebiritu takut kematila. 2:10 Malaikat itu bekatau, "Nidau endak takut, karnau aku datang mbatak ceritau iluak batan endak kamu, ceritau diau meriangka gegalau manusiau. 2:11 Malam ini di kuta Daud la lahir Rajau Penyelamat, Diautu Keristus, Tuhan. 2:12 Tandaunyau luak ini: Kamu ka betemu sughang Kupiak dibalut ngan kain, ditiduakka di bada makanan benatang." 2:13 Mangku adau malaikat banyak nianan ngan malaikat tadi diau muji-muji Allah, kataunyau, 2:14 "Tepujila Allah di bada diau Mahatinggi. Di deniau damai guak jemau diau melemakka ati Allah." 2:15 Malaikat la pegi galau baliak ke sergau, mangku tukang sayia bebiritu ngiciak sughang ngan diau lain, kataunyau, "Mela kitau pegi ke Betlihim, nginak ceritau diau la tejadi diau dikiciakka Tuhan ngan kitau." 2:16 Ughangtu pegi cecepat mangku betemu Maria ngan Yusup ngan Kupiak itu diau tiduak di bada makanan benatang. 2:17 La udim ngina'Autu, tukang sayia bebiritu ngiciakka ceritau Kupiaktu diau dikiciakka malaikat tadi. 2:18 Mangku jemau kemangan galau ndengagh ceritau tukang sayia bebiri itu. 2:19 Maria masuakka ceritau tadi dalam atiau mangku dirupuakkanyau. 2:20 Tukang sayia bebiritu baliak sampai muji ngan ngagungka Allah, karnau gegalaunyau diau la ughangtu dengagh ngan kinak semegi luak diau dikiciakka malaikat tadi. 2:21 La udim tujua malam, Kupiak itu disunat, mangku dinamauka Yesus, namau diau la dikiciakka malaikat, antak ka Diau dikandung. 2:22 La lepas pantang nurut ukum Taurat Musa, mangku enduak-bapa'Au mbatak Budak keciak itu ke Yerusalim endak diserakanyau ngan Tuhan, 2:23 karnau dalam ukum Tuhan ditulis luak ini, "Bilang anak lanang diau tuau mesti diseraka ngan Tuhan." 2:24 Ughangtu endak pulau mbatak kerban burung tekuku duau ikuak madak duau ikuak burung darau diau mudau, luak dikiciakka dalam ukum Tuhan. 2:25 Di Yerusalim adau sughang diau benamau Simiun. Diau jemau iluak lagi ta'at ngan Allah. Diau dang nungguka masaunyau Allah endak nyelamatka jemau Israil. Rua Allah nyertaui diau. 2:26 Rua Allahtu la nyatauka ngan diau, bansau diau nidau ka mati, amun lum nginak Rajau Penyelamat diau dijanjika Tuhan itu. 2:27 Simiun masuak ke Ghuma Allah, karnau dibimbing Rua Allah. Masau itula pulau Yesus diau masia keciaktu dibatak masuak ngan enduak-bapa'Au endak njalanka setu diau ditetapka ukum Taurat. 2:28 Mangku Simiun nyambut Budak keciak itu, dipitungAu sampai muji Allah, kataunyau, 2:29 "Tuhan, mbak kini ajungla aku pegi jak di deniauni ngan tenang, luak la Dighi janjika. 2:30 Aku la nginak sendighi keselamatan jak di Dighi, 2:31 keselamatan diau la Dighi sediauka batan endak gegalau umat manusiau. 2:32 Diautu terang diau nerangi bangsau lain diau nidau keruan Allah. Jemau Israil ka dipuji karnau Diau." 2:33 Enduak-bapa'Au kemangan ndengagh kici'an Simiun ngiciakka Anak ughangtu. 2:34 Mangku Simiun du'aka ughang duautu mangku ngiciak ngan Maria, enduak Budak keciak itu, kataunyau, "Budak keciak ini dipilia Allah, endak mbenasauka ngan nyelamatka banyak jemau Israil. Diauni njadi tandau diau dilawan banyak jemau, 2:35 mangku isi ati jemau banyaktu keruan. Anyautu ati kaba ka pedia, luak lukau ngan pedang diau tajam." 2:36 Adau pulau sughang nabi tinau diau la tuau nianan. Namaunyau Hana, anak Panuil jak di pengadau Asir. Diautu belaki tujua taun, 2:37 mbak kini diau la merandau. Umurau la delapan pulua empat taun. Diautu maju di Ghuma Allah. Diau puasau ngan bedu'a siang malam. 2:38 Masau itu pulau diau datang njenguak ughangtu, beterimau-kasia ngan Allah, mangku ngiciakka ceritau Budak keciak itu ngan gegalau jemau diau nantika Yerusalim dibibaska. 2:39 La udim dikerjauka gegalaunyau diau mesti dikerjauka nurut ukum Tuhan, Yusup tigau beghanak baliak ke dusunau Nasarit di Galilia. 2:40 Budak keciak itu tamba besak tamba kuat. Diau bepengertian nian ngan disayangi Allah. 2:41 Idang taun enduak-bapak Yesus pegi ke Yerusalim masau aghi rerayau Paska. 2:42 Umur Yesus la duau belas taun, ughangtu pegi endak merayauka Paska luak biasaunyau. 2:43 La udim aghi rerayau itu, ughangtu baliak. Anyautu Yesus tinggal di Yerusalim, nidau keruan ngan enduak-bapa'Au. 2:44 Ughang duautu sangkau Diau ngikut rumbungan. La bejalan sesaghian, mangku didala'inyau di pugan sana'au ngan kantin-kantinau. 2:45 Karnau endiak dapat, ughang duautu ngelipat ke Yerusalim maju ndala'i Diau. 2:46 La duau malam didala'i, mangku ughang duautu betemu Diau di Ghuma Allah dang duduak di guak guru-guru ukum Taurat sampai ndengagh ngan betanyau ngan ughangtu. 2:47 Jemau diau ndengagh Diau kemangan galau, karnau pacak nian nimbal. 2:48 Enduak-bapa'Au kemangan pulau nginak Diau, mangku endu'Au bekatau ngan Diau, "Nak, ngapau Kaba luak ini ngan kami? Bak Kaba ngan aku la temas ndala'i Kaba." 2:49 Mangku Yesus ngiciak ngan enduak-bapa'Au, katauNyau, "Ngapau kapu dighi ndala'i Aku? Apu kapu dighi nidau keruan, bansau Aku mesti adau di ghuma BapakKu?" 2:50 Anyautu enduak-bapa'Autu nidau terti kici'anNyautu. 2:51 La udim itu Diau baliak ke Nasarit serempak ngan enduak-bapa'Au. Diau maju na'ati perinta ughangtu. Gegalaunyautu disimpan dalam ati endu'Au. 2:52 Yesus tamba besak, tamba bepengertian, mangku tamba disayangi Allah ngan manusiau.

Lukas 3

3:1 Masau Kaisar Tiberius la merinta limau belas taun, Puntius Pilatus la njadi gubernur di Yudia. Masau itu Herudis merinta di daira Galilia. Pilipus, kaka'au, merinta di daira Ituria ngan Terakunitis. Lisanias merinta di Abilini. 3:2 Hanas ngan Kayapas njadi imam besak. Masau itula Yuhanis, anak Sakaria itu, ndengagh kici'an Allah di padang bungin. 3:3 Mangku Yuhanis pegi ngidari sekitar ayiak Yurdan sampai bekatau, "Ubaila perembak ngan dusau-dusau kamu, ngan mintak dibaptis, mangku Allah ka ngabisi dusau kamu." 3:4 Itu la ditulis dalam kitab nabi Yesaya, muniau luak ini, "Adau suarau jemau di padang bungin, 'Sediaukala jalan batan endak Tuhan. Lughuskala jalan batan endak Diau. 3:5 Bilang lembak ka ditimbusi, bilang gunung ngan bukit ka didataghka. Diau beliku-liku ka dilughuska, diau ngelup-ngelup ka didataghka. 3:6 Mangku gegalau jemau di deniau ka nginak Allah nyelamatka manusiau!' " 3:7 Banyak jemau datang mintak dibaptiska, mangku Yuhanis ngiciak ngan ughangtu, kataunyau, "Ui, kamuni jemau ja'at luak ulagh! Sapau ngiciak ngan kamu pacak ngilakka jak di ukuman Allah nanti? 3:8 Nyataukala ngan perembak kamu, bansau kamu la ngubai jak di dusau-dusau kamu. Jangan berupuak dalam ati, kamu ka selamat, karnau Abraham bak kamu. Keruanila, jak di batu-batu inila Allah pacak mbuat pengadau Abraham! 3:9 Kamuni luak sebatang kayu. Kapak la adau di akaghau, mangku bilang kayu diau nidau ngasilka bua diau iluak ka ditebang, mangku dicapakka dalam api." 3:10 "Amun luak itu," katau jemau banyak itu, "Tuapau diau mesti kami kerjauka?" 3:11 Katau Yuhanis, "Jemau diau adau duau lambagh baju enjuakkala selambagh ngan jemau diau nidau bediau, mangku jemau diau adau makanan enjuakka pulau luak itu." 3:12 Adau pulau tukang tagia cuki datang endak dibaptis. Ughangtu betanyau, "Pak, tuapau diau mesti kami kerjauka?" 3:13 Timbalau, "Jangan kamu nagia lebia banyak jak di diau la ditetapka ngan kamu." 3:14 Adau pulau tentera diau betanyau ngan diau, "Luak manau ngan kami? Tuapau diau mesti kami kerjauka?" Katau Yuhanis, "Jangan meregangi, jangan nekani ngan buruakka jemau. Cukupka ajau ngan gaji kamu." 3:15 Masau itu jemau banyak nantika Rajau Penyelamat, mangku betanyau-tanyau dalam ati, apu Yuhanis diau dinantika itu. 3:16 Mangku Yuhanis bekiciak ngan ughangtu, kataunyau, "Aku mbaptis kamu ngan ayiak. Nanti ka datang Jemau diau lebia bekuasau jak di aku. Melegha'i tali sepatuAu aku nidau pantas. Jemautu ka mbaptis kamu ngan Rua Allah ngan api. 3:17 Di tanganAu la adau nighu endak nampi ighi'anNyau, endak nunggalka padiAu dalam tengkiang. Ghumanau ngan ampaunyau ka disilap ngan api diau nidau ka padam." 3:18 Ngan carau luak itula Yuhanis ngajagh nian jemau banyak sampai ngiciakka ceritau iluak. 3:19 Yuhanis pulau negughi rajau Herudis, karnau diau nika ngan Herudias, bunting dangau, ngan gegalau perembak ja'at lainau diau dikerjaukanyau. 3:20 Mangku Herudis tamba ja'at agi ngan masuakka Yuhanis dalam jil. 3:21 Masau jemau banyak itu dibaptis, Yesus dibaptis pulau. Diau dang bedu'a, langit tebukak. 3:22 Mangku Rua Allah tughun luluak burung darau inggap di Diau, mangku adau suarau jak di langit, "Kabanila AnakKu diau Kusayangi. Kaba melemakka atiKu." 3:23 Masau Yesus mulai ngajagh, umurAu kekirau tigau pulua taun. Nurut pendapat jemau Yesustu anak Yusup anak Eli, 3:24 anak Matat, anak Liwi, anak Malki, anak Yanai, anak Yusup, 3:25 anak Matica, anak Amus, anak Nahum, anak Hesli, anak Nagai, 3:26 anak Maat, anak Matica, anak Simai, anak Yusik, anak Yuda, 3:27 anak Yuhanan, anak Resa, anak Serubabil, anak Sialtil, anak Neri, 3:28 anak Malki, anak Adi, anak Kusam, anak Elmadam, anak Ir, 3:29 anak Yesua, anak Eliisir, anak Yurim, anak Matat, anak Liwi, 3:30 anak Simiun, anak Yehuda, anak Yusup, anak Yunam, anak Elyakim, 3:31 anak Melia, anak Mina, anak Matata, anak Natan, anak Daud, 3:32 anak Isai, anak Ubid, anak Buas, anak Salmun, anak Nahasun, 3:33 anak Aminadab, anak Arni, anak Hesrun, anak Peris, anak Yehuda, 3:34 anak Yakub, anak Isak, anak Abraham, anak Tera, anak Nahur, 3:35 anak Serug, anak Rehu, anak Pelig, anak Ibir, anak Salmun, 3:36 anak Kenan, anak Arpaksad, anak Sim, anak Nua, anak Lamik, 3:37 anak Metusala, anak Hinuk, anak Yarid, anak Mahalalil, anak Kenan, 3:38 anak Inus, anak Sit, anak Adam, diau dijadika Allah.

Lukas 4

4:1 Yesus dikuasaui Rua Allah. Diau dang baliak jak di ayiak Yurdan, Diau dibata'i Rua itu ke padang bungin. 4:2 Di situ Diau mendam empat pulua aghi mangku dicubaui Iblis. Selamau itu Diau nidau makan tuapau-apau. Udim-udimau Diau kelapaghan. 4:3 Mangku Iblis ngiciak ngan Diau, kataunyau, "Kabani Anak Allah. Ajungla batu ini njadi ruti!" 4:4 Katau Yesus, "Di Injil ditulis, 'Manusiau idup ukan jak di ruti ajau.' " 4:5 Udim itu Iblis mbatak Yesus ke bada Diau tinggi nian, mangku timpau jerang ajau diau nginakka ngan Yesus gegalau kerajauan deniau. 4:6 Katau Iblis, "Gegalau kuasau ngan kekayauan ini ka kuenjuakka ngan Kaba galau, karnau gegalaunyautu aku ngempuau. Mangku aku pacak ngenjuakkanyau ngan sapau kila diau endak kuenju'i. 4:7 Kaba, amun Kabani nyemba aku, gegalaunyautu ka njadi hak Kaba." 4:8 Katau Yesus, "Dalam Injil tetulis, 'Kaba mesti nyemba Tuhan, Allah kaba. Diau ajau mesti kaba semba.' " 4:9 Udim itu Yesus dibata'i Iblis ke Yerusalim, ditepiakkanyau di mubungan Ghuma Allah, mangku katau Iblis, "Kabani Anak Allah. Numbanla Kaba jak di sini ke bawa, 4:10 karnau di Injil ditulis luak ini, 'Allah ka ngajung malaikat-malaikat nyayia Kaba iluakiluak.' 4:11 lagi pulau ditulis, 'Malaikattu ka nyanggak Kaba, mangku keting Kaba endiak tuantuak ke batu.' " 4:12 Yesus nimbal, katauNyau, "Adau pulau ditulis, 'Jangan ncubaui Tuhan, Allah kaba!' " 4:13 La udim ncubaui Yesus, Iblis pegi jak di Diau, mangku endak nunggu masau diau iluak. 4:14 Yesus baliak ke Galilia dikuasaui Rua Allah. CeritauNyau tesiar ke manau-manau di sekitar itu. 4:15 Diau ngajagh di ghuma sembayang, mangku jemau muji Diau galau. 4:16 Diau sampai di Nasarit, bada Diau diasua, mangku luak biasaunyau aghi Sabat Diau masuak ghuma sembayang. Diau betegak endak mbacauka Injil, 4:17 dienjuakka kitab nabi Yesaya. Satu dibuka'Au, Diau dapat ayat ini: 4:18 "Rua Tuhan adau di Aku, karnau Diau la netapka Aku endak ngiciakka ceritau iluak ngan jemau serik-sarau. Diau ngajung Aku ngebarka, bansau jemau tetangkap ka diluputka ngan jemau butau ka pacak nginak. Diau ngajung Aku nulung jemau diau dipasau 4:19 ngan ngatauka, masaunyau la sampai Tuhan nulung umatAu." 4:20 Udim itu Yesus nggulungka kitabtu, dibaliakkaNyau ngan petugas, mangku Diau duduak. Matau gegalau jemau di ghuma sembayangtu ngina'i Diau galau. 4:21 Mangku Diau mulai ngiciak ngan ughangtu, katauNyau, "Saghini isi kitab Injil tadi la ditepati, satu kapu dighi ndengaghkanyau." 4:22 Gegalau jemau itu nyetujui Yesus sampai kemangan, karnau katau-katau diau dikiciakkaNyautu iluak nianan, mangku ughangtu bekatau, "Ukanau Diauni anak Yusup?" 4:23 Mangku Yesus ngiciak ngan ughangtu, katauNyau, "Cengki kapu dighi ka ngiciakka pepata ini ngan Aku, 'Duktur ghadukala diri kaba sendighi', kerjaukala pulau di bada asal Kaba ini gegalaunyau diau kami dengagh Kaba kerjauka di Kapernaum." 4:24 KatauNyau pulau, "Ngenian katauKu ini, nidau bediau nabi diau diregaui di dusunau. 4:25 Ingatkala, katauKu ini benagh pulau: Timpau nabi Elia banyak tinau merandau di Israil, timpau nidau bediau ujan selamau tigau taun enam bulan, timpau kemaghau panjang di gegalau nenggeritu, mangku nidau bediau makanan. 4:26 Empuak luak itu, Elia nidau diajung pegi njenguak sala sughang tinau jemau Israil itu, anyautu diau diajung njenguak sughang randau di Sarpat di nenggeri Sidun. 4:27 Luak itu pulau timpau nabi Elisa banyak jemau Israil buidapan ja'at diau mbayauka, anyautu nidau sughang kia jak di ughangtu dighaduka lain jak di Na'aman, jemau Siria itu." 4:28 Ndengagh kici'anNyautu ughang di ghuma sembayang mara kematila. 4:29 Ughangtu betegak ngisitka Yesus keluagh, dibata'inyau pasigh badas, bada kuta itu ditegakka, endak ditulakkanyau ke badas. 4:30 Anyautu Yesus lalu di tetengaan jemau banyak itu, mangku Diau pegi. 4:31 Udim itu Yesus pegi ke Kapernaum, kuta di Galilia. Di situ Diau ngajagh di ghuma sembayang masau aghi Sabat. 4:32 Ughang di situ kemangan nian ndengagh ajaghanNyau, karnau Diau ngajagh ngan kuasau. 4:33 Di ghuma sembayang itu adau sughang jemau diau diarung iblis. Jemau itu tepekiakpekiak, 4:34 kataunyau, "Ui Kaba, Yesus, jemau Nasarit. Endak tuapau ngan kami? Kaba ke sini endak mbenasauka kami? Aku keruan Kaba. Kabani jemau suci diau diajung Allah." 4:35 Mangku Yesus mbentak diau, katauNyau, "Diam, keluaghla jak di jemau ini!" Iblistu mbanting-bantingka jemau tadi di pugan jemau banyak, mangku larat jak di jemautu, dikit kia nidau diapau-apauka. 4:36 Jemau kemangan galau, mangku ngiciak sughang ngan diau lain, kataunyau, "Ui, hibat nianan kici'anNyautu. Ngan kuasau Diau ngajung rua-rua ja'at keluagh, mangku diau ngeluagh pulau." 4:37 Mangku ceritau Yesus itu tesiar di gegalau daira itu. 4:38 Udim itu Yesus ngeluagh jak di ghuma sembayang, mangku pegi ke ghuma Simun. Mentuau tinau Simun Pitrus dang buidapan demam, mangku Yesus dipintak nulungi diau. 4:39 Yesus pegi guak tinau itu endak meghaduka demamau, mangku demamautu ghadu. Tinautu bangun cecepat nepi'i mendahautu. 4:40 Matau-aghi la padam, banyak jemau mbatak jemau buidapan njenguak Yesus. Idapannyau bemecam-mecam. Yesus nepiakka tanganAu di bilang palak ughangtu, mangku diau ghadu. 4:41 Iblis-iblis pulau ngeluagh jak di banyak jemau sampai mekiak-mekiak, kataunyau, "Kaba Anak Allah." Mangku Yesus marai iblis itu, nidau ngajung diau ngiciak, karnau iblistu keruan, bansau Diautu Rajau Penyelamat. 4:42 Matau-aghi la tumbua, Yesus ngeluagh dusun pegi ke bada diau suni. Anyautu jemau banyak ndala'i Diau. Mangku la betemu, ughangtu mintak, supayau Yesus jangan ninggalka ughangtu. 4:43 Anyautu Yesus bekatau, "Di dusun-dusun lain Aku mesti ngiciakka pulau ceritau iluak, bansau Allah laka merinta. Itula sangkan Aku diajung ke deniau." 4:44 Mangku Diau ngiciakka ceritau iluak di ghuma-ghuma sembayang di gegalau daira Yudia.

Lukas 5

5:1 Yesus dang betegak di tepi danau Genesarit, jemau banyak bererincitan endak ndengaghka ceritau jak di Allah. 5:2 Diau nginak duau bua perawu di tepi danau tadi. Tukang ndalak ikan la tughun jak di perawu mbasua jalaunyau. 5:3 Diau nayiak sebua perawu, perawu Simun, mangku ngajung diau nulakkanyau jawua dikit jak di tepi. Diau duduak mangku ngajagh jemau banyak tadi jak di perawutu. 5:4 La udim ngajagh, Diau ngiciak ngan Simun, "Bedayungla kaba ke guak dalam, kipaskala jalau kamu." 5:5 "Pak," katau Simun, "Semalam getau kami la keria bekerjau, nidau bulia tuapau-apau. Anyautu karnau Dighi ngajung, ka kukipaska agi." 5:6 La udim dikerjaukanyau, banyak nian ughangtu bulia ikan, mangku jalaunyau laka cebagh. 5:7 Ughangtu mintak tulung ngan kantinkantinau di perawu lain. Kantinautu datang, mangku diisi duau perawu penua ngan ikan, perawutu laka teghendam. 5:8 Nginak titu, Simun nunduak di adapan Yesus ngan bekatau, "Tinggalkala aku, Tuhan, karnau akuni jemau bedusau." 5:9 Simun ngan kantinautu kemangan nginak pulian ikan banyak itu. 5:10 Luak itu pulau ngan kantinau Yakubus ngan Yuhanis, anak Sebedius. Yesus bekatau ngan Simun, "Nidau endak takut. Mulai mbak kini kaba njadi tukang ndalak jemau." 5:11 Ughangtu naghiak perawu ke daghat, gegalaunyau ditinggalkanyau, mangku ngikut Yesus. 5:12 Yesus dang adau di kuta. Di situ adau sughang jemau lanang, badanau penua ngan idapan ja'at diau mbayauka. Satu nginak Yesus, diau nunduak di adapanNyau ngan mintak tulung, kataunyau, "Pak, amun Dighi endak, Dighi pacak meghadui aku." 5:13 Yesus nyurungka tanganAu ngecakka jemau itu ngan bekatau, "Arau, ghadula kaba." Masau itu pulau idapannyau ghadu. 5:14 Yesus nidau ngajung jemau itu ngiciakkanyau ngan sapau kila, mangku bekatau, "Pegila, kinakkala badan kaba ngan imam, enjuakkala kerban diau diperintaka Musa, buktiau ngan ughangtu, bansau kaba la ghadu." 5:15 Ceritau Yesus tamba tesiar ke manau-manau, mangku banyak jemau datang endak ndengaghkaNyau ngan mintak dighaduka jak di idapannyau. 5:16 Anyautu Yesus rajin pegi ke bada diau suni endak bedu'a. 5:17 Yesus dang ngajagh, adau jemau Parisi ngan guru-guru ukum Taurat. Ughangtu datang jak di gegalau dusun di Galilia ngan Yudia, jak di Yerusalim pulau. Kuasau Tuhan adau di Yesus, mangku Diau pacak meghaduka jemau buidapan. 5:18 Adau jemau datang njagang sughang jemau mati sepiak di penjagang. Ughangtu ncubau mbata'au masuak endak nepiakka jemau mati sepiaktu di adapan Yesus. 5:19 Anyautu ughangtu nidau pacak mbata'inyau masuak, karnau jemau banyak di situ. Itula sangkanau jemau tadi nayiak atap ghuma, dibukakkanyau ataptu, ditughunkanyau jemau mati sepiak tadi ngan penjagangau di pugan jemau banyaktu tepat di adapan Yesus. 5:20 Satu nginak ughangtu percayau nian ngan Diau, Yesus bekatau, "Ui, kantinKu, dusau-dusau kaba la diabiska." 5:21 Mangku guru-guru ukum Taurat ngan jemau jak di rumbungan jemau Parisi berupuak, "Sapau jemau ini diau beghani nian nggelakka Allah? Nidau bediau diau pacak ngabisi dusau, selain Allah." 5:22 Yesus ngeruani rupu'an ughangtu, mangku Diau bekatau, "Ngapau kapu dighi berupuak luak itu? 5:23 Manau diau lebia mura, ngiciakka, 'Dusau kaba la diabiska,' sangkan ngiciakka, 'Bangunla kaba bejalanla.'? 5:24 Anyautu Akuni ka ngajung jemau ini bangun, mangku kapu dighi keruan, bansau Anak Manusiau bekuasau di deniau ngabiska dusau." Mangku Yesus ngiciak ngan jemau mati sepiak itu, katauNyau, "Bangunla kaba, katangkala penjagang kaba, mangku baliakla ke ghuma kaba!" 5:25 Masau itula pulau jemau itu bangun di adapan jemau banyaktu, dikatangkanyau penjagangautu, mangku baliak ke ghumahau ngan ngagungka Allah. 5:26 Gegalau jemautu kemangan galau, mangku ngagungka Allah. Mangku ngan peghasauan takut ughangtu bekatau, "Saghini kitau la nginak setu diau nidau ka adau!" 5:27 Udim itu Yesus ngeluagh, mangku nginak sughang tukang tagia cuki. Namaunyau Liwi. Diau dang duduak di kanturau. "Mela, ngikut Aku." katau Yesus. 5:28 Liwi betegak, ninggalka gegalaunyau, mangku ngikut Yesus. 5:29 Mangku Liwi mantau makan Yesus di ghumahau. Banyak nian kantinau tukang tagia cuki ngan jemau lain ngikut makan serempak ngan Diau. 5:30 Jemau Parisi ngan guru-guru ukum Taurat bemumut mumuti anak-bua Yesus, kataunyau, "Ngapau kamu minum-makan ngan penagia cuki ngan jemau bedusau?" 5:31 Yesus nimbal, katauNyau, "Jemau diau sihat nidau endak duktur, jemau diau buidapan ajau. 5:32 Aku datang ukan endak mantau jemau diau benagh, tapitu jemau diau bedusau, mangku diau ngubai jak di dusaunyau." 5:33 Adau jemau diau bekiciak pulau ngan Yesus, kataunyau, "Anak-bua Yuhanis rajin bedu'a ngan puasau. Luak itu pulau anak-bua jemau Parisi. Anyautu anak-bua Kaba minum-makan." 5:34 Yesus nimbal, "Apu kapu dighi pacak ngajung kantin pengantin puasau di jamuan nika, selamau pengantinan gi adau? Cengki nidau! 5:35 Masaunyau ka sampai, pengantinantu ka diambiak jak di ughangtu. Masau itula ughangtu ka puasau." 5:36 Mangku Yesus nceritauka cuntau ini, "Nidau bediau jemau diau ngambiak batan penampit jak di kain empai endak nampiti baju diau bughuak, karnau kain empai itu ka cebagh, lagi pulau kain penampit diau dicebaghka jak di kain empai nidau sesuai ngan kain baju diau bughuak tadi. 5:37 Luak itu pulau nidau bediau sughang kia diau ngisika ayiak anggur diau empai ke dalam kantung bawuak diau lamau, karnau ayiak anggur diau empaitu ka mecaka kantungtu, mangku anggurau tebuang ngan kantungtu rusak. 5:38 Ayiak anggur diau empai mesti dimasuakka ke dalam kantung diau empai pulau. 5:39 Lagi pulau nidau bediau jemau diau la minum ayiak anggur diau lamau endak minum ayiak anggur diau empai. Diau ka bekatau, 'Ayiak anggur diau lamau itu lemak.' "

Lukas 6

6:1 Masau aghi Sabat Yesus lalu di umau. Anak-buaHau ngambiak padi, dipinsalau di tanganau, dimakanau. 6:2 Adau jemau Parisi ngiciak, kataunyau, "Ngapau kamu ngerjauka setu diau nidau bulia dikerjauka aghi Sabat?" 6:3 Mangku Yesus nimbali ughangtu, "Cengki kapu dighi la mbacau setu diau dikerjauka Daud, masau diau ngan anak-buahau lapagh. 6:4 Diautu masuak ke dalam Ghuma Allah, ngambiak ruti pesembahan, dimakanau, mangku dienjuakkanyau ngan anak-buahau pulau, awuak ruti itu nidau bulia dimakan, amun ukan imam." 6:5 Mangku Yesus bekatau agi, "Anak Manusiau nguasaui aghi Sabat pulau." 6:6 Aghi Sabat lainau Yesus pegi ngajagh di ghuma sembayang. Di situ adau jemau diau mati tangan kananau. 6:7 Guru-guru ukum Taurat ngan jemau Parisi ndalak sala Yesus endak ngadukaNyau, mangku diperatikanyau, apu Diau ka meghadui jemau itu masau aghi Sabat. 6:8 Yesus keruan rupu'an ughangtu, mangku ngiciak ngan jemau diau mati sebela tanganau, katauNyau, "Mela, betegak di sini." Jemautu betegak di situ. 6:9 Mangku Yesus ngiciak ngan ughangtu, katauNyau, "Aku betanyau ngan kapu dighi, nurut agamau kitau tuapau diau bulia dikerjauka masau aghi Sabat, kerjau iluak apu kerjau ja'at, nyelamatka jemau apu ncelakaukanyau?" 6:10 Udim itu Yesus ngina'i ughangtu galau, mangku ngiciak ngan jemau buidapan tadi, katauNyau, "Surungkala tangan kaba!" Jemau itu nyurungkanyau, mangku tanganau ghadu. 6:11 Mangku guru-guru ukum Taurat ngan jemau Parisi tadi mara kematila mulai buijau ka diapauka Yesus. 6:12 Masau itu Yesus pegi nayiak bukit endak bedu'a. Di situ Diau bedu'a nyemba Allah semalam getau. 6:13 Aghi la siang dipantauNyau anak-buaHau, dipiliHau duau belas jak di ughangtu, diau dikiciakkaNyau pulau rasul. 6:14 Diau itu Simun diau pulau dinamaukaNyau Pitrus ngan Anderias adingau Simuntu, Yakubus ngan Yuhanis, Pilipus ngan Bartulumius, 6:15 Matius ngan Tumas, Yakubus anak Alpius, ngan Simun diau dikiciakka jemau Silut, 6:16 Yudas anak Yakubus, ngan Yudas Iskariut diau itula ka njualka Yesus. 6:17 Mangku Yesus tughun jak di bukit tadi, diikuti anak-buaHau mangku gheghadu di bada diau datagh. Di situ banyak jak di anak-buaHau ngan banyak jemau lain betunggal ngan Diau. Ughangtu asalau jak di dusun-dusun di Yudia, jak di Yerusalim, jak di daira tepi pantai Tirus ngan Sidun pulau. 6:18 Ughangtu datang endak ndengaghka Yesus, endak dighadui idapannyau. Jemau diau diarung rua-rua ja'at dighaduiNyau pulau. 6:19 Gegalau jemau banyaktu ncubau ngecakkaNyau, karnau adau kuasau ngeluagh jak di Diau, mangku gegalau ughangtu dighadukaNyau galau. 6:20 Mangku Yesus ngina'i anak-buaHau ngan bekatau, "Riangla kamu jemau serik, karnau Allah njadi rajau kamu. 6:21 Riangla kamu diau lapagh mbak kini, karnau kamu ka dikenyangka. Riangla kamu diau nangis mbak kini, karnau kamu ka tetawau. 6:22 Riangla kamu, amun kamu diluatka, ditulak, digelakka ngan diburuakka jemau karnau Anak Manusiau. 6:23 Nabi-nabi timpau senitu pulau la dibuati luak itu. Amun itu tejadi, injiakla kamu sampai nari ngan riang, karnau ngenian upa kamu besak di sergau. 6:24 Tapitu celakaula kamu diau kayau mbak kini, karnau kamu la meghasauka lemak. 6:25 Celakaula kamu diau kenyang mbak kini, karnau kamu ka lapagh. Celakaula kamu diau tetawau mbak kini, karnau kamu ka nangis berandaian. 6:26 Celakaula kamu, amun gegalau jemau muji kamu, karnau luak itu pulau niniak puyang ughangtu muji-muji cak nabi senitu." 6:27 "Ngan kamu diau ndengaghka Aku, Aku bekatau: Sayangila musua kamu, kerjaukala diau iluak ngan jemau diau luat ngan kamu. 6:28 Mintak selamat batan endak jemau diau ndawaika kamu. Bedu'ala batan endak jemau diau nggelakka kamu. 6:29 Amun jemau nampagh kebual kamu diau sebela, ajung pulau nampagh kebual sebela lagi. Amun jemau ngambiak kain kamu, nengkela diau ngambiak baju kamu pulau. 6:30 Enju'ila bilang jemau diau mintak ngan kamu. Jangan mintak baliakka ngan jemau diau ngambiak barang kamu. 6:31 Mangku carau luak manau kamu endak jemau bebuat ngan kamu, luak itula pulau kamu bebuat ngan ughangtu. 6:32 Amun kamu nyayangi ajau jemau diau sayang ngan kamu, nidau bediau jasa batan endak kamu. Jemau bedusau pulau nyayangi jemau diau sayang ngan ughangtu. 6:33 Amun kamu iluak ajau ngan jemau diau iluak ngan kamu, nidau bediau jasa batan endak kamu. Jemau bedusau pulau iluak luak itu. 6:34 Mangku amun kamu minjamka ajau tanci ngan jemau diau pacak mbaliakkanyau, nidau bediau jasa batan endak kamu. Jemau bedusau pulau minjamka ngan jemau bedusau, mangku mintak itu dibaliakkanyau. 6:35 Anyautu kamu, sayangila musua kamu, iluakla ngan ughangtu. Pinjamkala ngan jangan ngaghapka dibaliakkanyau. Amun luak itu, upa kamu ka besak, mangku kamu ka njadi anak-anak Allah diau Mahatinggi. Karnau Allah iluak ngan jemau diau nidau tau beterimaukasia, ngan jemau diau ja'at pulau. 6:36 Semestiau kamu iluak ati, luak Bapak kamu iluak atiAu." 6:37 "Jangan kamu ngadili jemau, mangku kamu nidau diadili. Jangan kamu ngukum, mangku kamu nidau diukum. Ampunila jemau, mangku kamu diampuni. 6:38 Enjuakkala mangku kamu ka dienju'i. Takaran diau iluak diau la ditakari lenat lagi penua ka dienjuakka ngan kamu. Takaran diau kamu pakai ngan jemau ka dipakai pulau batan endak kamu." 6:39 Yesus ngiciakka umpamau ini pulau ngan ughangtu, "Apu jemau butau pacak mbata'i jemau butau? Cengki ughang duautu ka telabua masuak siring. 6:40 Anak murip nidau lebia jak di guruau. Anyautu amun diau la tamat pelajaghannyau, diau ka semegi ngan guruau. 6:41 Ngapau kamu nginak kempenan di matau kantin kamu, anyautu baluk di matau kamu nidau kamu keruani? 6:42 Luak manau kamu pacak ngiciak ngan kantin kamu, 'Ui kaba, nengkela aku ngeluaghka kempenan diau di matau kaba.', anyautu baluk di matau kamu nidau kamu kina'i? Kamu cak iluak! Keluaghkala kudai baluk jak di matau kamu, mangku pengina'an kamu terang endak ngeluaghka kempenan tadi jak di matau kantin kamu." 6:43 "Nidau bediau batang kayu diau iluak diau ngasilka bua nidau iluak, ngan pulau nidau bediau batang kayu diau nidau iluak ngasilka bua diau iluak. 6:44 Bilang batang kayu dikeruani jak di buahau. Di kayu bedughi nidau bediau bua aghau, di ghumput bedughi nidau bediau bua anggur. 6:45 Jemau iluak ngerjauka setu diau iluak, karnau atiau iluak nian. Jemau ja'at ngerjauka setu diau ja'at, karnau atiau ja'at nian. Tuapau diau dikiciakka mulut itula diau keluagh jak di atiau." 6:46 "Ngapau kamu mantau aku, 'Tuhan, Tuhan!', anyautu nidau ngerjauka setu diau Kukiciakka ngan kamu? 6:47 Ngan sapau pacak kitau samauka jemau diau datang njenguak Aku ngan ndengagh kici'anKu mangku dikerjaukanyau? Mela, Aku nunjuakka ngan kamu. 6:48 Jemau itu diumpamauka ngan jemau diau negakka ghuma. Jemautu nggali dedalam, masuakka batu batan pelapiak. Amun ghuma itu ditempur ayiak rawang, nidau ka rubua karnau tegua. 6:49 Tapitu jemau diau ndengagh kici'anKu, anyautu nidau dikerjaukanyau, diau diumpamauka jemau diau negakka ghuma nidau bepelapiak. Amun ditempur ayiak rawang, ghuma itu muda rubua, mangku banyak nian rusa'au."

Lukas 7

7:1 Udim Yesus ngiciakka ajaghanNyau itu ngan jemau banyak tadi, Diau pegi masuak Kapernaum. 7:2 Di situ adau sughang kepalak tentera Rum diau adau sughang budak belian diau disayanginyau nian. Budak itu dang buidapan laka mati. 7:3 Kepalak tentera tadi ndengagh ceritau Yesus, mangku ngajung pengulu-pengulu jemau Yahudi njenguak Yesus, mintak Diau datang meghadui buda'autu. 7:4 Ughangtu datang njenguak Yesus mintak tulung nian, 7:5 kataunyau, "Jemau itu pantas Kaba tulung, karnau diau sayang ngan bangsau kitau. Diautu negakka ghuma sembayang batan endak kami." 7:6 Mangku Yesus pegi serempak ngan ughangtu. La pasigh ngan ghumahau, kepalak tenteratu ngajung kantin-kantinau endak ngiciakka ngan Yesus luak ini, "Pak, nidau nanti kekerian, karnau aku nidau pantas nerimau Dighi di ghumaku. 7:7 Itu pulau sebapau aku nidau beghani njenguak Dighi. Kiciakka ajau sepata katau, mangku budakkutu ka ghadu. 7:8 Aku pulau sughang bawahan, mangku di bawa aku adau pulau tentera-tentera. Amun aku ngajung ngan sughang tentera 'Pegi!', mangku diau pegi, ngan sughang agi, 'Ke sini!', mangku diau datang, lagi ngan budakku, 'Kerjaukala ini!', mangku dikerjaukanyau." 7:9 Ndengagh kici'annyautu, Yesus kemangan nian, mangku Diau nulia ke jemau banyak diau ngikut Diau sampai bekatau, "Ngenian, di guak jemau Israil lum kekela Aku betemu jemau diau percayau nian luak jemau ini." 7:10 Jemau diau diajung kepalak tentera tadi la baliak ke ghumahau, ditemuinyau budak itu la ghadu. 7:11 Nidau lamau udim itu Yesus pegi ke kuta Nain. Anak-buaHau pegi serempak ngan Diau ngan pulau jemau banyak bererumbungan. 7:12 Yesus la di mukau lawang kuta tadi, adau jemau mati diau dijagang keluagh kuta. Jemau diau matitu anak sughang randau diau gi sikuak itula. Banyak jemau jak di kuta itu ngikutka randau itu. 7:13 Satu Tuhan nginak randau itu, Diau sial ngina'au, mangku Diau bekiciak, katauNyau, "Jangan Dighi nangis agi." 7:14 Udim itu dipasighiNyau, dikecakkaNyau penjagangautu, mangku jemau diau njagangau mendam. Udim itu Yesus bekatau, "Ui, budak bujang, Aku ngajung kaba bangun, bangunla!" 7:15 Budak itu bangun, duduak ngan mulai ngiciak, mangku diseraka Yesus ngan endu'au. 7:16 Gegalau jemau ketakutan galau, mangku muji-muji Allah, kataunyau, "Sughang Nabi besak la datang di guak kitau. Allah la datang nulung umatAu." 7:17 Mangku ceritau Yesus dikiciakka di gegalau Yudia ngan di ngepungannyau. 7:18 Gegalaunyautu dikiciakka anak-buahau ngan Yuhanis, 7:19 mangku diau ngajung duau ughang jak di anak-buahau njenguak Tuhan ngan betanyau, "Apu Dighi jemau diau ka datangtu? Apu kami mesti nantika jemau lain?" 7:20 Ughang duautu sampai guak Yesus ngan bekatau, "Yuhanis Pembaptis ngajung kami betanyau ngan Dighi, 'Apu Dighi jemau diau ka datangtu, apu kami mesti nantika jemau lain?' " 7:21 Masau itu Yesus meghadui banyak jemau buidapan, ngisitka rua-rua ja'at, ngan ngenjuak pengina'an ngan banyak jemau butau. 7:22 Mangku katau Yesus, "Baliakla, kiciakkala ngan Yuhanis setu diau kamu kinak ngan dengagh: Jemau butau nginak, jemau lumpua bejalan, jemau buidapan ja'at ghadu, jemau tuli ndengagh, jemau mati ngulang idup, ngan ceritau iluak dikiciakka ngan jemau serik. 7:23 Mangku riangla jemau diau nidau keciwau ngan nidau nulak Aku." 7:24 Ajungan Yuhanis la pegi, Yesus mulai ngiciakka ceritau Yuhanis ngan jemau banyak itu, katauNyau, "Ngapau kamu pegi ke padang bungin? Apu kamu endak nginak ghumput diau digugak angin? Cengki nidau! 7:25 Ngapau kamu pegi? Endak nginak jemau bebaju alap? Jemau diau bebaju alap ngan idup kayau adau di istana rajau. 7:26 Mangku ngapau kamu pegi? Endak nginak sughang nabi? Nyela, lebia jak di nabi diautu. 7:27 Ceritau Yuhanis la ditulis di Injil: 'Katau Allah, keruanila Aku ka ngajung ajunganKu ndului Kaba, diau ka mbukak jalan batan endak Kaba.' 7:28 Keruanila, nidau bediau jemau di deniau ini lebia besak jak di Yuhanis, anyautu jemau diau keciak sekali di bada Allah merinta, besakla jemautu sangkan Yuhanis." 7:29 Gegalau jemau banyak diau ndengagh kici'an Yuhanis senitu ngan tukang tagia cuki pulau ngaku'i Allah itu benagh, mangku mintak dibaptiska. 7:30 Anyautu jemau Parisi ngan guru-guru ukum Taurat nidau nerimau kendak Allah batan endak diau. Ughangtu enggup dibaptiska Yuhanis. 7:31 Katau Yesus pulau, "Ngan tuapau jemau mbak kini diumpamauka? Luak manau ughangtu? 7:32 Ughangtu umpamau budak keciak diau duduak di tengalaman libagh, ngiciak sughang ngan diau lain, 'Kami nabua kelintang, anyautu kamu enggup nari. Kami berandaian, anyautu kamu enggup nangis.' 7:33 Yuhanis Pembaptis datang, diau nidau makan ruti ngan nidau minum anggur, mangku kamu kiciakka, 'Diau diarung iblis.' 7:34 Anak Manusiau datang, Diau minum-makan, mangku kamu kiciakka, 'Kina'ila, Jemau itu selak, pemabuak, kantin penagia cuki ngan kantin jemau bedusau.' 7:35 Empuak luak itu, kepintaran dibenaghka jemau diau nerimaunyau." 7:36 Adau sughang jemau Parisi, namaunyau Simun. Diautu mantau Yesus makan di ghumahau. Yesus pegi ke ghumahau mangku makan. 7:37 Di kuta itu adau jemau tinau diau tekenal jemau jedit. Tinau itu ndengagh, bansau Yesus dang makan di ghuma jemau Parisi tadi, mangku diau datang mbatak kacau buisi minyak ghum. 7:38 Diau betegak pasigh keting Yesus ngan nangis sampai mbasuhi ketingAu ngan ayiak mataunyau, digusurinyau ngan gumba'au, mangku diciuminyau ngan diminyakghuminyau. 7:39 Jemau Parisi diau ngajak Yesus tadi nginak titu, mangku berupuak, "Amun Jemau ini nabi, cengki Diau keruan sapau jemau tinau itu diau ngecakka ketingAu. Cengki Diau keruan tinautu jemau jedit." 7:40 Mangku Yesus ngiciak ngan diau, "Simun, adau diau endak Kukiciakka ngan kaba." Timbal Simun, "Kiciakkala, Guru!" 7:41 Katau Yesus, "Adau jemau diau minjamka tanci. Mangku adau duau ughang diau beghutang ngan jemautu. Diau sughang beghutang limau ratus ribu, diau sughangtu limau pulua ribu. 7:42 Ughang duau itu nidau pacak mbayighi utangau, mangku gegalau utangtu diabiska jemau diau minjamka tanci tadi. Sapau jak di ughang duautu ka sayang nian ngan jemau itu tadi?" 7:43 Katau Simun, "Asauku jemau diau banyak sekali diabiska utangau." Katau Yesus, "Nyela, pendapat kaba benagh." 7:44 Mangku Yesus ngina'i tinau tadi sampai ngiciak ngan Simun, "Kaba nginak tinau ini? Aku datang ke ghuma kaba, kaba nidau nyediauka ayiak batan endak mbasua ketingKu. Tinau ini mbasuhi ketingKu ngan ayiak mataunyau, digusurinyau ngan gumba'au. 7:45 Kaba nidau nyambut Aku ngan ciuman, tinau ini nidau mandak-mandak nciumi ketingKu jak Aku datang ke sini. 7:46 Kaba nidau minya'i palakKu, tinau ini minya'i ketingKu ngan minyak ghum. 7:47 Keruanila, dusaunyau diau banyak itu la diabiska. Kitau keruan, karnau diau la banyak ngerjauka setu diau iluak. Anyautu jemau diau diabiska dikit dusaunyau, dikit pulau diau ngerjauka setu diau iluak." 7:48 Mangku Diau bekatau ngan tinau tadi, "Dusau kaba la diabiska." 7:49 Mangku jemau lain diau makan serempak ngan Yesus mulai berupuak, "Sapau Diau ini, sampai pacak ngabiska dusau?" 7:50 Anyautu Yesus ngiciakka ngan tinau itu, "Kaba diselamatka, karnau kaba percayau. Pegila ngan selamat."

Lukas 8

8:1 Nidau lamau udim itu, Yesus pegi ke kuta-kuta ke dusun-dusun ngiciakka ceritau iluak, bansau Allah laka merinta. Duau belas anak-buaHau ngikut serempak ngan Diau. 8:2 Luak itu pulau bebeghapau tinau diau la dighaduka jak di rua ja'at ngan idapan, diautu Maria Magdalina, tujua rua ja'at la dikeluaghka jak di diau, 8:3 Yuhana, bunting Kusa, pegawai Herudis, Susana ngan banyak tinau lain. Tinau itu nulung Yesus ngan anak-buaHau pakai retaunyau sendighi. 8:4 Jemau banyak datang bererumbungan jak di dusun-dusun njenguak Yesus. Jemau la banyak betunggal, Yesus nceritauka ngan ughangtu umpamau ini. 8:5 "Adau jemau tani diau pegi endak ngamburka benia. Diau dang ngamburka benia, adau diau tumban di jalan. Separau tepijak ngan jemau, separau dimakan burung enggut abis. 8:6 Adau pulau benia diau tumban di tana bebatu-batu. Diau la tumbua mangku njadi keghing, karnau nidau buayiak. 8:7 Adau pulau benia diau tumban di pugan ghumput bedughi. Ghumputtu tumbua serempak ngan benia itu, mangku diincitkanyau enggut mati. 8:8 Adau pulau benia diau tumban di tana iluak, diau tumbua mangku ngasilka bua seratus kali." Udim nceritauka umpamau itu, Yesus ngiciak agi, "Amun betelingau, ndengaghla!" 8:9 Anak-bua Yesus nanyauka ngan Diau, tuapau retiau umpamau tadi. 8:10 Katau Yesus, "Ngan kamu la dinyatauka resiau ngeruani Allah njadi rajau ngan kekuasauanNyau. Anyautu ngan jemau lain dikiciakka ngan umpamau, mangku ughangtu nginak anyautu nidau kina'an, ughangtu ndengagh anyautu nidau terti. 8:11 Inila retiau umpamau tadi: Benia ibarat kici'an Allah. 8:12 Benia diau tumban di jalan ibarat jemau diau ndengagh kici'an itu, anyautu iblis datang merebutinyau jak di atiau, supayau diau jangan percayau ngan jangan diselamatka. 8:13 Benia diau tumban di tana bebatu-batu itu ibarat jemau diau ndengagh kici'antu, nerimaunyau ngan riang, anyautu ceritautu nidau mendam di atiau. Ughangtu percayau jerang ajau, mangku amun diuji, diau ngelipat agi. 8:14 Benia diau tumban di pugan ghumput bedughi ibarat jemau diau ndengagh kici'an itu. Anyautu diau ghegak ngan idupau, endak idup lemak ngan riang ajau di deniau ini. Mangku kici'an Allah nidau pacak mendam di atiau, mangku nidau ngasilka bua diau iluak. 8:15 Benia diau tumban di tana diau iluak ibarat jemau diau ndengagh ceritau itu, mangku dimasuakkanyau dalam atiau diau iluak. Diautu buasil karnau ta'an uji." 8:16 "Amun jemau maghakka lampu, apu ditukupinyau ngan capa, apu ditepiakka di bawa katil? Cengki nidau! Anyautu ditepiakka di bada lampu, mangku jemau diau masuak pacak nginak terangau. 8:17 Gegalaunyau diau tebuni ka kina'an ngan gegalau resiau ka dikeruani. 8:18 Karnau itu peratikala iluak-iluak setu diau kamu dengagh. Karnau jemau diau buadau ka dienju'i agi, anyautu jemau diau nidau buadau, setu diau sangkau adau di diau ka diambiak pulau." 8:19 Mak Yesus ngan adingAu datang njenguak Yesus. Anyautu ughangtu endiak pacak sampai guak Diau, karnau jemau banyak nianan. 8:20 Mangku adau jemau ngiciakka ngan Diau, kataunyau, "Mak Kaba ngan ading-beghading Kaba adau di luagh endak betemu ngan Kaba." 8:21 Yesus nimbali ughangtu, katauNyau, "Jemau diau ndengaghka kici'an Allah ngan na'atinyau, ughang itula makKu ngan ading-beghadingKu." 8:22 Adau saghi Yesus ngan anak-buaHau nayiak perawu. Katau Yesus, "Mela, kitau pegi ke beghang sanau." 8:23 Mangku ughangtu belayar. Ughangtu dang belayar, Yesus tekelap. Mangku adau angin nyaghu, ngan ayiak masuak dalam perawu. Ughangtu dalam bayau laka tebenak. 8:24 Anak-buahau pegi mbangunka Yesus, kataunyau, "Guru, Guru, kitau laka tebenak!" Yesus bangun mbentak angin ngan umbak besak itu, mangku angin ngan umbaktu mandak, danau itu diam. 8:25 Udim itu Yesus ngiciak ngan ughangtu, "Ngapau kamu nidau percayau?" Ughangtu kemangan ngan penakut, mangku ngiciak sughang ngan diau lain, "Sapau sebenaghau Jemau ini? Diau merintaka angin ngan umbak, mangku diau ghedam." 8:26 Mangku Yesus ngan anak-buaHau sampai di daira jemau Gerasa diau di beghang danau Galilia. 8:27 Yesus la ndaghat, Diau didatangi sughang jemau lanang jak di kuta itu diau diarung iblis. Jemautu la lamau endiak bebaju. Diau enggup di ghuma, diau mendam di kuburan ajau. 8:28 Satu nginak Yesus, diau tegauk sampai terubua guak keting Yesus mangku ngiciak ngan suarau bias, "Endak tuapau ngan aku, ui Yesus, Anak Allah diau Mahatinggi. Aku mintak, jangan Dighi nyaraui aku." 8:29 Diau ngiciak luak itu, karnau Yesus ngajung iblis itu ngeluagh jak di diau. Iblis rajin mbanting-bantingka diau. Tanganau dikebat ngan rantai ngan ketingau dighimpus, supayau nidau bejalan. Empuak luak itu, diau masia pacak pulau mutuska rantaitu, mangku dibata'i iblistu ke bada diau suni. 8:30 Yesus betanyau ngan diau, "Sapau namau kaba?" Timbalau, "Banyak", karnau diau diarung banyak iblis. 8:31 Mangku iblis itu mintak ngan Yesus, supayau jangan diajung masuak nerakau. 8:32 Pasigh itu banyak kaput ingunan dang ndalak makanan di bukit. Iblis itu mintak ngan Yesus, supayau diau diajung ngarung kaput itu, mangku diajungAu. 8:33 Iblis itu ngeluagh jak di jemau tadi ngarung kaput. Kaput diau banyak itu belaghi tumban jak di tepi badas masuak ke danau mangku mati tebenak. 8:34 Satu tukang-tukang sayia kaput nginak titu, ughangtu belaghi ngan nyiarka ceritau itu di kuta ngan di dusun-dusun. 8:35 Ughang diau ndengagh ceritau itu ngeluagh endak ngina'au mangku datang njenguak Yesus. Di situ ughangtu nginak jemau diau la ditinggalka iblis dang duduak guak Yesus. Diau la bekain ngan rupu'annyau la waras, mangku ughangtu penakut. 8:36 Ughang diau la nginak itu tadi ngiciakkanyau ngan ughangtu, luak manau jemau diau diarung iblistu la dighaduka. 8:37 Mangku gegalau jemau jak di daira Gerasa mintak Yesus pegi jak di bada itu, karnau takut kematila. Mangku Yesus nayiak perawu endak baliak. 8:38 Jemau diau la dighadui jak di iblistu mintak, supayau diau bulia ngikut. Anyautu Yesus ngajung diau baliak, 8:39 katauNyau, "Baliakla, ceritaukala gegalaunyau diau la Allah buat ngan kaba." Jemau itu pegi ngiciakka di gegalau kuta setu diau la Yesus buat ngan diau. 8:40 Yesus la baliak ke sebeghang, jemau rami nyambut Diau ngan riang, karnau dang nungguka Diau. 8:41 Adau sughang jemau datang, namaunyau Yairus. Diautu kepalak ghuma sembayang. Sampai nunduak di adapan Yesus, diau mintak Yesus datang ke ghumahau, 8:42 karnau ana'au diau gi sikuak itula laka mati. Diautu la gadis, umurau kekirau duau belas taun. Yesus dang bejalan ke ghuma Yairus, jemau banyak bererincitan datang. 8:43 Adau sughang tinau diau buidapan bedagha la duau belas taun lamaunyau. Nidau bediau sughang kia diau pacak meghaduinyau. 8:44 Tinau itu masigh guak belakang Yesus, mangku mbibit bajuAu. Masau itu pulau daghahau mandak melilia. 8:45 Mangku Yesus betanyau, katauNyau, "Sapau mbibit Aku?" Anyautu nidau bediau jemau diau ngaku'inyau. Karnau itu Pitrus bekatau, "Jemau banyak di guak Dighi ngincitka Dighi." 8:46 Katau Yesus, "Tapitu adau jemau diau mbibit Aku. Aku keruan, karnau adau kuasau ngeluagh jak di Aku." 8:47 Mangku tinau tadi keruan, bansau peremba'autu la dikeruani. Itula sebapau diau datang sampai gemetagh, mangku nunduak di adapan Yesus, diceritaukanyau ngan jemau banyaktu, tuapau sebapau diau mbibit Yesus, mangku masau itula pulau idapannyau ghadu. 8:48 Mangku Yesus bekatau ngan diau, "Kaba dighadui, karnau kaba percayau. Baliakla ngan selamat." 8:49 Yesus gi ngiciak, adau jemau jak di ghuma Yairus datang ngiciak ngan Yairus, "Anak dighi la mati. Nidau nanti ngeriaka Guru agi." 8:50 Yesus ndengagh titu, mangku ngiciak ngan Yairus, "Nidau endak takut. Percayaula ajau. Anak dighi ka ghadu." 8:51 La sampai di ghuma Yairus, Yesus nidau ngajung sughang kia masuak serempak ngan diau lain jak di Pitrus, Yuhanis, Yakubus ngan enduak-bapak budak gadistu. 8:52 Gegalau jemau nangis berandaian nangisi budak gadis itu. Anyautu Yesus bekatau, "Jangan nangis," katauNyau, "Budak gadis ini nidau mati. Diauni cuman tiduak." 8:53 Ughangtu nawauka Yesus, karnau la keruan, bansau budak itu la mati. 8:54 Yesus ngecakka tangan budak gadis itu ngan bekatau, "Ui, bangunla kaba!" 8:55 Nyawaunyau ngulang adau agi. Masau itula pulau budak gadistu bangun ngan betegak. La udim itu, Yesus ngajung ughangtu ngenju'i budak itu makan. 8:56 Enduak-bapa'au kemangan. Anyautu Yesus nidau ngajung ughang duautu ngiciakka ceritau itu ngan sapau kila.

Lukas 9

9:1 Yesus mantau duau belas anak-buaHau, dienjuakkaNyau kuasau batan endak ngisitka iblis ngan meghadui idapan. 9:2 Mangku diajungAu pegi ngiciakka ceritau Allah merinta luak rajau ngan diajung meghadui jemau buidapan, 9:3 sampai bekatau ngan ughangtu, "Jangan mbatak tuapau-apau, amun endak bejalan. Batak tungkat jangan, minggangan jangan, makanan jangan, tanci jangan, baju duau jangan. 9:4 Amun kamu la diterimau di ghuma jemau, mendamla di situ, enggut kamu melajuka pejalanan. 9:5 Amun endiak bediau jemau diau nerimau kamu, pegila jak di kuta itu, mangku kepaskala debu jak di keting kamu njadi peringatan batan endak ughangtu." 9:6 Mangku anak-bua Yesus pegi ke dusun-dusun endak ngiciakka ceritau iluak itu ngan meghadui jemau buidapan di manau-manau. 9:7 Herudis, rajau daira itu, ndengagh gegalaunyau diau dikerjauka Yesus. Diau bingung, karnau adau jemau ngiciakka, Yuhanis la idup agi. 9:8 Adau pulau diau ngiciakka, Elia la nimbul agi. Adau pulau diau ngiciakka, sughang jak di nabi senitu la idup agi. 9:9 Herudis bekatau, "Amun Yuhanis, aku diau ngajung mancung liaghau. Sapau Diau ini?" Mangku Herudis ncubau endak nginak Yesus. 9:10 Rasul-rasul itu baliak nceritauka ngan Yesus gegalaunyau diau dikerjauka ughangtu. Mangku Yesus ngajak ughangtu pegi serempak ngan Diau ngasing guak kuta Betsaida. 9:11 Anyautu jemau banyak la keruan ceritau itu, mangku ngikut pulau. Yesus nyambut ughangtu ngiciakka ceritau Allah merinta luak rajau mangku meghaduka jemau buidapan. 9:12 Aghitu la petang, duau belas anak-buaHau njenguak Yesus, ngan bekatau, "Ajungla jemau banyak ini pegi ke dusun-dusun pasigh ini ndalak makanan ngan bada temalam, karnau di sini suni." 9:13 Yesus nimbal, "Kamunila ngenju'i ughang ini makan." Anak-buaHau bekatau, "Diau adau di kami cuman limau bua ruti ngan duau ikuak ikan. Apu kami arus pegi mbeli makanan batan endak gegalau jemau ini?" 9:14 Di situ kekirau limau ribu jemau lanang. Mangku Yesus bekatau ngan anak-buaHau, "Ajungla jemau banyak ini duduak bereruguak, limau pulua ughang seruguak." 9:15 Anak-buaHau nurutiNyau, mangku ngajung jemau banyaktu duduak. 9:16 Udim itu Yesus ngambiak limau bua ruti ngan duau ikuak ikan tadi, mangku ncungak ke langit sampai bedu'a beterimau-kasia, dipiyak-piya'au rutitu, dienjuakkaNyau ngan anak-buaHau, supayau diagiaka ngan jemau banyak itu. 9:17 Ughangtu makan galau enggut kenyang, mangku ditunggalkanyau tigha ruti tadi, duau belas kinjagh banya'au. 9:18 Yesus dang bedu'a sughang, anak-buaHau njenguak Diau. Yesus betanyau ngan ughangtu, "Katau jemau, sapau Akuni?" 9:19 Ughangtu nimbal, "Yuhanis Pembaptis. Adau diau ngiciakka, Elia. Adau pulau diau bekatau, sala sughang nabi timpau senitu diau idup agi." 9:20 Mangku Yesus betanyau, "Pendapat kamutu, sapau akuni?" Pitrus nimbal, "Dighila Almasih, Rajau Penyelamat, diau dijanjika Allah." 9:21 Mangku Yesus nidau ngajung nian ughangtu ngiciakka ceritau itu ngan sapau kila. 9:22 Yesus bekatau, "Anak Manusiau mesti banyak nanggungka sengsarau. Diau nidau ka diterimau pengulu-pengulu, imam-imam bepangkat tinggi ngan guru-guru ukum Taurat. Diau ka dibunua, mangku la duau malam Diau ka idup agi." 9:23 Mangku Yesus ngiciak ngan jemau banyak, katauNyau, "Jemau diau endak ngikut Aku jangan ndalak jalan idup batan endak diau sughang. Diau mesti mikul salipau idang aghi, mangku maju ngikut Aku. 9:24 Karnau jemau diau endak ngilakka nyawaunyau ka kelengitan nyawaunyau. Jemau diau kelengitan nyawaunyau karnau Aku ka selamat. 9:25 Tuapau untungau, amun jemau bulia gegalau deniau njadi retaunyau, anyautu diau ka benasau karnau diriau sendighi? 9:26 Karnau amun jemau maluan ngaku'i Aku ngan ajaghanKu, Anak Manusiau pulau ka maluan ngaku'i jemau itu, masau Diau ka datang agi nanti ngan kuasauNyau ngan kuasau Bapa'Au ngan malaikat-malaikat suci. 9:27 Keruanila, jak di kamuni adau diau nidau ka mati, amun lum nginak Allah merinta luak rajau." 9:28 La seminggu udim Yesus ngiciakka gegalau kici'anNyau tadi, Diau mbata'i Pitrus, Yuhanis ngan Yakubus ndaki gunung endak bedu'a. 9:29 Yesus dang bedu'a di situ, dayiAu beghuba ngan bajuAu njadi putia besinagh. 9:30-31 Mangku kina'an ughang duau ngan sinagh jak di sergau, diautu Musa ngan Elia. Ughang duautu ngiciak ngan Yesus ngiciakka kematianNyau diau ka dialamiNyau di Yerusalim. 9:32 Penarau itu Pitrus ngan kantinau tekantuak, mangku ughang tigau itu tebangun nginak Yesus besinagh ngan ughang duau tadi betegak guak Diau. 9:33 Ughang duau itu laka pegi, Pitrus ngiciak ngan Yesus, kataunyau, "Guru, lemak nian kitau di sini, ajungla kami negakka tigau bua punduk di sini, sebua batan endak Dighi, sebua batan endak Musa, sebua batan endak Elia." Pitrus ngiciak luak itu, endiak keruan retiau diau dikiciakkanyautu. 9:34 Diau dang ngiciak luak itu, adau aban mbayangi ughangtu, mangku ughang duau tadi masuak dalam aban itu, mangku anak-buaHau penakut. 9:35 Adau suarau jak di dalam aban diau bekatau, "Inila AnakKu diau la Kupilia. Dengaghkala Diau itu." 9:36 Suarau itu la diam, Yesus sughang agi kina'an. Masau itu anak-buaHau diam, nidau ngiciakka setu diau la dikinak ngan sughang kia. 9:37 Pagi di aghiau Yesus ngan anak-buaHau ughang tigautu tughun jak di gunung, mangku jemau banyak njenguak Yesus. 9:38 Sughang jak di jemau banyaktu ngiciak ngan bias, kataunyau, "Guru, aku mintak tulung kina'i anakku, karnau anakku gi sikuak inila. 9:39 Kekadangan diau kenau gilau bangkai, mangku diarung iblis. Diau tepekiak-pekiak. Iblis itu ngguliak-guliakkanyau, mangku mulutau bebuwia. Iblis itu maju nyaraui diau, segau ninggalkanyau. 9:40 Aku la mintak anak-bua Dighi ngisitka iblis itu, anyautu nidau pacak." 9:41 Katau Yesus, "Ui, kamuni jemau nidau percayau lagi sesat. Lamau beghapau agi Aku mesti guak kamu ngan ngaligh ngan kamu? Batakla anak itu ke sini!" 9:42 Budak keciak itu dang bejalan njenguak Yesus, iblis itu mbantingbantingka diau ke tana, mangku diguliakkanyau. Yesus mbentak iblis itu sampai meghadui budak keciak tadi, mangku diserakaNyau ngan ba'au. 9:43 Jemau kemangan galau nginak kuasau Allah diau besak itu. 9:44 "Dengaghkala iluak-iluak katauKu ini: Anak Manusiau ka diseraka di tangan manusiau." 9:45 Anak-buaHau endiak terti kici'anNyautu, karnau retiau nidau keruan ngan ughangtu, mangku ughangtu nidau terti kici'anNyautu. Ughangtu nidau beghani nanyauka retiau kici'anNyau tadi. 9:46 Mangku anak-bua Yesus bebala mbalaka, sapau jak di ughangtu diau penting sekali. 9:47 Yesus keruan rupu'an ughangtu, mangku Diau ngambiak sughang budak keciak, diajungAu betegak di peridinganNyau, 9:48 mangku Diau bekatau, "Jemau diau nerimau sughang budak keciak luak diauni karnau Aku diau nerimau Aku. Mangku jemau diau nerimau Aku nerimau pulau Allah diau ngajung Aku. Karnau jemau diau nidau penting jak di kamu, diaula penting sekali." 9:49 Yuhanis bekatau, "Guru, kami nginak jemau ngisitka iblis pakai namau Dighi, mangku kami negahi diau, karnau diau ukan anak-bua Dighi." 9:50 Mangku katau Yesus, "Jangan kamu negahi diau, karnau jemau diau nidau melawan kamu, diaula kawan kamu." 9:51 Mangku masaunyau laka sampai Yesus tuangkat ke sergau, Diau mutuska endak pegi ke Yerusalim. 9:52 Yesus ngajung jemau ndului Diau. Jemau diau diajungAutu pegi masuak dusun di Samaria endak nyediauka bada Yesus. 9:53 Anyautu jemau dusun itu enggup nerimau Yesus, karnau Diau dang ngancamka Yerusalim. 9:54 Yuhanis ngan Yakubus, anak-bua Yesustu, ndengagh ceritau itu mangku bekatau, "Cengki Dighi tetuju, amun kami ngajung api tughun jak di langit endak benasauka ughangtu." 9:55 Anyautu Yesus nulia marai ughang duautu. 9:56 Mangku Yesus ngan anak-buaHau pegi ke dusun lain. 9:57 Yesus ngan anak-buaHau dang melajuka pejalananNyau, adau sughang ngiciak ngan Yesus, kataunyau, "Aku endak ngikut Dighi, ke manau kila Dighi pegi." 9:58 Katau Yesus, "Landak adau lubangau, burung adau saghangau, anyautu Anak Manusiau endiak bediau badaHau." 9:59 Mangku Yesus ngiciak ngan jemau lain, katauNyau, "Mela, ngikut Aku!" Jemau itu bekatau, "Ajungla Aku baliak kudai endak nguburka bak kami." 9:60 Yesus nimbal, "Nengkela jemau mati nguburka jemau mati, anyautu kaba pegila ngiciakka di manau-manau ceritau Allah la mulai merinta." 9:61 Adau agi jemau lain bekatau, "Aku endak ngikut Dighi, anyautu ajungla aku baliak kudai endak pamit." 9:62 Anyautu Yesus bekatau ngan jemautu, "Jemau diau dang manca sampai nulia ke belakang, jemautu nidau pantas njadi umat Allah."

Lukas 10

10:1 La udim itu Tuhan milia tujua pulua anak-bua agi, diajungAu pegi beduau-duau nduluiNyau ke bilang kuta bilang dusun diau endak dijengu'Au. 10:2 Diau bekatau ngan ughangtu, "Sawa libagh, jemau ngetam dikit. Karnau itu pintakla ngan Allah diau ngempu sawa, mangku Diau ngajung jemau ngetami padiAu. 10:3 Bejalanla, Aku ngajung kamu pegi luluak anak bebiri pegi di pugan setuau. 10:4 Kamu mbatak tanci jangan, mbatak unjut jangan, mbatak terumpa jangan. Jangan gheghadu ngiciak ngan sughang kia di tenga jalan. 10:5 Amun masuak ghuma, kiciakka kudai, 'Salam damai batan endak ghuma ini.' 10:6 Amun di situ adau jemau diau endak nerimau salam damaitu, mangku damaitu ka maju mendam ngan diau. Amun endiak bediau, damaitu ka ngulang ke kamu. 10:7 Mendamla di ghuma itu, makanla tuapau diau dienjuakka ngan kamu, karnau jemau diau bekerjau pantas nerimau upa. Jangan ngalia ghuma. 10:8 Amun kamu masuak kuta, mangku di situ kamu iluak diterimau, makanla tuapau diau ditepiakka ngan kamu. 10:9 Mangku ghaduila jemau buidapan di kuta itu, kiciakkala ngan jemau di situ, 'Allah laka merinta njadi rajau kamu.' 10:10 Anyautu amun kamu masuak kuta, mangku nidau diterimau jemau, pegila ke jalan kuta itu, kiciakkala, 10:11 'Debu kuta kamu diau melekat di keting kami, kami kepaska njadi peringatan batan endak kamu. Anyautu keruanila, Allah endak merinta.' 10:12 Ingatkala, masau aghi kiamat banyakla tanggungan jemau kuta itu sangkan jemau Sudum." 10:13 "Celakaula kamu, jemau Kurasim! Celakaula kamu, jemau Betsaida. Misalau tandau nyelia diau dikerjauka guak kamu dikerjauka di Tirus ngan Sidun, cengki ughangtu la lamau ngubai peremba'au ngan mbaduki pala'au. 10:14 Masau aghi kiamat banyakla tanggungan kamu sangkan tanggungan jemau Tirus ngan Sidun. 10:15 Mangku kamu, jemau Kapernaum, apu kamu sangkau kamu ka ditinggika ke sergau? Nidau! Kamu ka dicapakka ke nerakau." 10:16 Mangku Yesus bekatau ngan anak-buaHau, "Jemau diau ndengaghka kamu ndengagh Aku. Jemau diau nidau nerimau kamu nidau nerimau Aku, mangku jemau diau nidau nerimau Aku, nidau pulau nerimau Allah diau ngajung Aku." 10:17 Tujua pulua anak-buaHautu baliak ngan riang nian sampai bekatau, "Tuhan, iblis pulau tunduak ngan kami, amun kami perintaka makai namau Dighi." 10:18 Yesus nimbal, "Aku nginak pengulu iblis umban jak di langit luluak kilat. 10:19 Ingatkala, Aku la ngenjuakka kuasau ngan kamu mijakka ulagh ngan kalau, nguasaui gegalau musua, nidau bediau diau pacak ncelakauka kamu. 10:20 Empuak luak itu, jangan kamu keinji'an, karnau iblis tunduak ngan kamu. Iluakla kamu injiak, karnau namau kamu la tecatat di sergau." 10:21 Masau itu pulau Yesus injiak nianan, karnau dikuasaui Rua Allah sampai bekatau, "Bak, Aku ngagungka Dighi, Tuhan langit ngan deniau, karnau gegalaunyautu Dighi resiauka ngan jemau pintar ngan jemau beilmu. Anyautu Dighi nyataukanyau ngan jemau biasau. Itula diau melemakka ati Dighi. 10:22 Gegalaunyau la dienjuakka Bapak ngan Aku. Nidau bediau sughang kia diau keruan Anak lain jak di Bapak. Nidau bediau pulau diau keruan Bapak lain jak di Anak ngan jemau diau dikenda'i Anak itu nyataukanyau." 10:23 Udim itu Yesus nulia ke anak-buaHau sampai bekatau ngan ughangtu ajau, "Riangla jemau diau nginak setu diau kamu kinak. 10:24 Ingatkala, banyak nabi ngan rajau endak nginak setu diau kamu kinak, anyautu nidau kina'an. Ughangtu endak ndengagh setu diau kamu dengagh, anyautu nidau kedengaghan." 10:25 Mangku adau sughang guru ukum Taurat datang endak nguji Yesus ngan betanyau, "Guru, tuapau diau mesti kukerjauka, mangku bulia idup selelamaunyau?" 10:26 Yesus nimbal, "Tuapau ditulis di Injil? Tuapau dighi bacau?" 10:27 Katau jemautu, "Sayangila Tuhan, Allah kaba ngan sepenua ati kaba, ngan segenap jiwa kaba, ngan segenap kekuatan kaba, ngan segenap akal-budi kaba. Mangku sayangila kantin kaba luak kaba nyayangi diri kaba." 10:28 Katau Yesus, "Timbal dighitu benagh. Kerjaukala titu, mangku dighi ka idup." 10:29 Anyautu jemau tadi endak mbenaghka diriau, mangku diau betanyau, "Sapau kantinkutu?" 10:30 Katau Yesus, "Adau sughang jemau diau tughun jak di Yerusalim ke Yiriku. Di tenga jalan diau disamun bandit, diambi'inyau gegalau dandanannyau, dilagauinyau, mangku diau laka mati ditinggalkanyau. 10:31 Betepatan adau sughang imam diau tughun pulau di situ. Diau nginak jemau itu, anyautu diau nyimpang. 10:32 Luak itu pulau sughang jemau pengadau Liwi sampai di guak bada jemau lukau tadi. Satu diau nginak jemautu, diau nyimpang pulau. 10:33 La udim itu adau sughang jemau Samaria dang bejalan sampai ke bada tadi. Mangku satu diau nginak jemau itu tadi, terupuak sial di atiau, 10:34 mangku dijengu'au jemautu, diubatinyau lukaunyau ngan minyak ngan anggur, mangku dibalutau. La udim itu dinayiakkanyau jemautu ke kudaunyau, mangku dibata'au ke bada jemau temalam ngan disayiau. 10:35 Pagi di aghiau diau ngenjuakka tanci ngan jemau ngempu ghuma badahau temalam tadi ngan bekatau, 'Sayiala diauni. Amun tanci ini lum cukup, aku nambainyau, amun aku ngelipat ke sini nanti.' " 10:36 Mangku Yesus ngudimi ceritauNyau ngan betanyau, "Pendapat dighi, sapau jak di ughang tigau itu njadi kantin batan endak jemau diau disamun itu?" 10:37 Jemautu nimbal, "Jemau diau la nulung jemau tadi." Katau Yesus, "Pegila, kerjaukala luak itu pulau!" 10:38 Yesus ngan anak-buaHau melajuka pejalanannyau, mangku Diau sampai di sebua dusun. Di situ adau jemau tinau, namaunyau Marta. Martatu ngajak Diau ke ghumahau. 10:39 Marta adau ading tinau benamau Maria. Mariatu duduak guak Yesus ndengaghka kici'anNyau. 10:40 Anyautu Marta banyak kerjau nepi'i mendahautu. Diau masighi Yesus sampai bekatau, "Apu Dighi endiak nyanauka adingku ngenangka aku sughang bekerjau? Ajungla diau nulungi aku." 10:41 "Ui Marta," katau Yesus, "Kaba ghegak ngan merupuakka ini-itu. 10:42 Sutiak diau penting. Maria la milia diau iluak diau nidau ka diambiak jak di diau."

Lukas 11

11:1 Adau saghi Yesus bedu'a. Udim bedu'a adau sughang anak-buaHau bekatau, "Tuhan, cubau ajaghi kami bedu'a luak Yuhanis ngajaghi anak-buahau bedu'a." 11:2 Mangku Yesus bekatau ngan ughangtu, "Amun kamu bedu'a, kiciakka luak ini: Bapak, kami endak namau Dighi diregaui karnau Dighi suci. Kami endak Dighi merinta kami. 11:3 Enju'i kami idang aghi makanan kami secukupau. 11:4 Ngabiska dusau kami, karnau kami pulau ngabiska bilang jemau diau besala ngan kami. Mangku jangan ngenangka kami dicubaui." 11:5 Mangku Yesus bekatau agi, "Misalau sughang jak di kamu pegi ke ghuma kantinau tenga malam ngan bekatau ngan diau, 'Minjam ruti tigau bua, 11:6 karnau adau kantin singga di ghuma. Aku nidau bediau makanan.' 11:7 Baghia diau nimbal luak ini: 'Jangan ngeriaka aku. Duaghau la dikunci. Aku ngan anak-anakku la tiduak galau. Aku endiak pacak bangun ngenjuakka tuapau-apau ngan kaba.' 11:8 Mangku luak manau? Aku bekatau, empuak diau nidau ka bangun ngenjuakka tuapau-apau ngan kaba karnau kaba kantinau, cengki karnau kaba nidau maluan maju mintak ngan diau, diau pulau ka bangun ngenju'i tuapau diau kaba enda'au. 11:9 Karnau itu aku bekatau: Pintakla, mangku kamu ka dienju'i. Bedalakla, mangku kamu ka bulia. Gagurla duaghau, mangku kamu ka dibuka'i duaghau. 11:10 Karnau jemau diau mintak ka dienju'i, jemau diau bedalak ka bulia, mangku jemau diau nggagur duaghau ka dibuka'i duaghau. 11:11 Apu adau jak di kamu diau ngenjuakka ulagh, amun ana'au mintak ikan? 11:12 Apu diau ngenjuakka kalau, amun diau mintak telugh? Cengki nidau! 11:13 Kinak luak itu, amun kamu jemau diau ja'at pacak ngenjuakka setu diau iluak ngan anak kamu, apau lagi Bapak kamu diau di sergau! Diau ka ngenjuakka Rua Allah ngan jemau diau mintak ngan Diau." 11:14 Adau saghi Yesus ngisitka iblis jak di sughang jemau bisu. Iblistu la ngeluagh, jemautu pacak ngiciak. Mangku jemau banyak kepagauan. 11:15 Anyautu adau diau ngiciak, "Diau ngisitka iblis ngan kuasau Bilsebul, pengulu iblis itu." 11:16 Adau pulau diau mintak tandau nyelia jak di sergau endak nguji Diau. 11:17 Anyautu Yesus keruan rupu'an ughangtu, mangku Diau bekatau, "Amun nenggeri teceghai-beghai sangi bemusuan, nenggeritu nidau ka beta'an. Lagi pulau amun jemau seghuma nidau suijauan ngan bemusuan sughang ngan diau lain, diau ka kacau. 11:18 Luak itula pulau ngan iblis. Amun iblistu teceghai-beghai ngan sangi bemusuan, luak manau kuasauannyau pacak beta'an? Kapu dighi ngiciak, Aku ngisitka iblis ngan kuasau Bilsebul. 11:19 Mangku amun Akuni ngisitka iblis ngan kuasau Bilsebul, ngan kuasau sapau anak-bua kapu dighi ngisitkanyau? Anak-bua kapu dighitula nyatauka kapu dighi besala. 11:20 Anyautu amun Aku ngisitka iblis ngan kuasau Allah, mangku Allah la mulai merinta di pugan kapu dighi. 11:21 Misalau sughang diau kuat bepakaian lengkap nyayia ghumahau, gegalau retaunyau ka selamat. 11:22 Anyautu amun sughang diau lebia kuat melawan ngalakanyau, jemautu ka ngambiak gegalau pakaiannyau diau diandalkanyautu, mangku gegalau retau diagiakanyau. 11:23 Jemau diau nidau mihak ngan Aku melawan Aku, mangku jemau diau nidau nunggalka ngan Aku nceghai-beghaika." 11:24 "Amun rua ja'at ngeluagh jak di jemau, diau ngidari ghimbau ndalak bada gheghadu, anyautu endiak dapat. Karnau itu diau bekatau, 'Aku endak ngulang agi ke ghuma diau kutinggalka tadi.' 11:25 La sampai di situ, diau nginak ghumatu la beresia ngan alap. 11:26 Mangku diau pegi ngajak tujua kantinau diau lebia ja'at agi. Rua itu masuak mendam di ghumatu, mangku udim-udimau jemautu lebia pansan jak di senitu." 11:27 La udim Yesus ngiciak luak itu, adau sughang jemau tinau jak di jemau banyaktu diau tegauk, kataunyau, "Riang nian tinau diau melahirka ngan minumi Kaba." 11:28 Anyautu Yesus nimbal, "Riangla jemau diau ndengaghka katau Allah ngan na'atinyau." 11:29 Penarau jemau tamba banyak, Yesus ngiciak agi, katauNyau, "Alaka ja'at jemau mbak kini. Ughangtu mintak tandau nyelia, anyautu cuman ka bulia tandau nabi Yunus. 11:30 Nabi Yunus njadi tandau batan endak jemau Niniwi, luak itula pulau Anak Manusiau ka njadi tandau batan endak jemau mbak kini. 11:31 Aghi kiamat ratu jak di selatan ka diidupka serempak ngan jemau mbak kini, mangku diau ka mburuakka ughangtu, karnau ratu itu datang jak di ujung deniau endak ndengagh ajaghan Salumu diau bepengertian. Ngenian, diau adau di sini lebia besak jak di Salumutu. 11:32 Masau aghi kiamat jemau Niniwi ka ngeluagh serempak ngan jemau mbak kini, mangku ka mburuakka ughangtu, karnau jemau Niniwi ngubai peremba'au jak di dusaunyau, masau ndengagh kici'an Yunus. Ngenian, diau adau di sini lebia besak jak di Yunus." 11:33 "Nidau bediau jemau diau maghakka lampu, mangku dibunikanyau ngan ditukupinyau. Lampu itu ka ditepiakka di badahau, supayau jemau diau masuak pacak nginak terangau. 11:34 Matau kamu umpamau lampu ati. Amun matau iluak, gegalau badan terang. Anyautu amun matau ja'at, gegalau badan keleman. 11:35 Karnau itu sepepadaula, supayau terang diau adau di ati kamu nidau njadi keleman. 11:36 Amun gegalau badan terang, nidau bediau diau keleman, mangku gegalaunyautu terang luak disinaghi lampu." 11:37 Udim ngiciak luak itu, sughang Parisi mantau Yesus makan di ghumahau, mangku Yesus pegi makan di ghumahautu. 11:38 Jemau Parisi itu kemangan nginak Yesus makan nidau mbasua tangan kudai. 11:39 Karnau itu Yesus ngiciak ngan diau, katauNyau, "Nyela, kapu dighi jemau Parisi biasaunyau mbasua mangkuak ngan piring di luagh ajau, anyautu dalam ati kapu dighi penua kesela'an ngan keja'atan. 11:40 Ui, kapu dighitu bigal. Apu ukan Allah diau mbuat sebela luagh mbuat sebela dalam pulau? 11:41 Anyautu enjuakkala isiau ngan jemau serik, mangku gegalaunyau ka beresia batan endak kapu dighi. 11:42 Celakaula kapu dighi, jemau Parisi, karnau gheghuku ngan tetaghuan kapu dighi enjuakka bagi sepulua sebagi, anyautu keadilan ngan kasia ngan Allah endiak disanauka. Awuak itula diau mesti kapu dighi kerjauka, diau lain pulau jangan dilalaika. 11:43 Celakaula kapu dighi, jemau Parisi, karnau kapu dighi galak duduak di bada duduak di mukau dalam ghuma sembayang ngan galak diregaui di pekan. 11:44 Celakaula kapu dighi, karnau kapu dighi luak kuburan nidau bediau tandau. Jemau endiak keruan, empuak mija'inyau." 11:45 Adau sughang guru ukum Taurat diau bekatau ngan Yesus, "Pak Guru, ngan kici'an luak itu Dighi nggelakka kami pulau." 11:46 Yesus nimbal, "Kapu dighi guru-guru ukum Taurat celakau pulau, karnau kapu dighi ngajung setu diau segau, ngenjuak peraturan diau segau dikerjauka, anyautu kapu dighitu dikit kia nidau endak nulung jemau ngerjaukanyau. 11:47 Celakaula kapu dighi, karnau kapu dighi mbuat kuburan nabi-nabi alap-alap, awuak nabitu dibunua niniak puyang kapu dighi. 11:48 Ngan carau luak itu kapu dighi mbenaghka perembak niniak puyang kapu dighi. Nyela, ughangtu mbunua nabitu, mangku kapu dighi mbuat kuburannyau alap-alap. 11:49 Luak ditulis dalam kitab Hikmat Allah, 'Aku ka ngajung nabi-nabi ngan ajungan-ajunganKu njenguak ughangtu. Separau ka dibunua, separau ka diluatka ngan disiksau.' 11:50 Allah ngerjauka titu, supayau jemau mbak kini diukum karnau pembunuan nabi-nabi diau dikerjauka jak deniau adau, 11:51 mulai jak di pembunuan Habel enggut pembunuan Sakaria diau dibunua di entaghau mija bada bekerban ngan Ghuma Allah. Percayaula, jemau mbak kini cengki ka diukum, karnau gegalau perembak itu. 11:52 Celakaula kapu dighi, guru-guru ukum Taurat, karnau kapu dighi la ngambiak kunci batan duaghau ngeruani Injil. Anyautu kapu dighi sendighi nidau masuak ke dalam ngeruaninyau, lagi pulau kapu dighi ngalangi jemau lain diau endak masuak ngeruaninyau." 11:53 La udim pegi jak di ghuma itu, guru-guru ukum Taurat ngan jemau Parisi purik kematila mangku maju nguji Yesus 11:54 ngan ninjau resiauNyau endak nangkap katau diau sala dikiciakkaNyau.

Lukas 12

12:1 Beribu-ribu jemau bererincitan, sampai adau diau tepijak keting. Penarau ughangtu betunggal, Yesus ngiciak ngan anak-buaHau, katauNyau, "Sepepadaula ngan ghagi jemau Parisi, diautu cak alim. 12:2 Gegalaunyau diau tebuni ka kina'an ngan gegalaunyau diau diresiauka ka keruan. 12:3 Setu diau kamu kiciakka aghi malam ka kedengaghan aghi siang. Diau kamu bisiakka di telingau jemau dalam biliak tekatup ka dikiciakka jak di berendau." 12:4 "Ingatkala, ui anak-buaKu, jangan kamu penakut ngan jemau diau cuman pacak mbunua badan. Udim itu nidau pacak ngapau-ngapaukanyau agi. 12:5 Nyela, Aku ka nunjuakka ngan kamu, sapau diau mesti kamu takuti. Takutla ngan Allah, karnau la udim ngambiak nyawau, Diau bekuasau pulau ncapakka dalam nerakau. Percayaula, Diautu mesti kamu takuti. 12:6 Ukanau burung pipit dijual limau ikuak seringgit? Empuak luak itu, nidau sikuak kia dilupauka Allah. 12:7 Gumbak di palak kamu pulau la dibilangi galau. Karnau itu nidau nanti penakut. Beregaula kamu, sangkan burung pipit." 12:8 "Ingatkala iluak-iluak, jemau diau ngaku'i Aku di mukau jemau, jemautu ka diaku'i Anak Manusiau di adapan malaikat-malaikat Allah. 12:9 Anyautu jemau diau nidau ngaku'i Aku di adapan manusiau, diau pulau nidau ka diaku'i di adapan malaikat-malaikat Allah. 12:10 Amun jemau ngiciakka setu melawan Anak Manusiau, diau ka diampuni. Anyautu amun jemau nggelakka Rua Allah, diau endiak pacak diampuni. 12:11 Amun kamu dibatak ke adapan gubernur ngan penguasau endak diadili, jangan kamu ghegak, luak manau ngan tuapau kamu kiciakka endak mbenaghka diri kamu, 12:12 karnau setu diau mesti kamu kiciakka itu ka diajaghka Rua Allah ngan kamu masau itu pulau." 12:13 Adau sughang jak di jemau banyak diau bekatau ngan Yesus, "Pak Guru, ajungla dang aku, mangku diau mbagi retau peninggalan bak kami ngan aku." 12:14 Yesus nimbal, "Sapau njadika Aku akim ngan pembagi retau kamu?" 12:15 Mangku katau Yesus lagi, "Dengaghkala! Sepepadaula, supayau kamu jangan selak, karnau empuak sughang banyak kematila retaunyau, idupau nidau tegantung ngan kekayauannyautu." 12:16 La udim itu cuntau ceritau ini diceritauka Yesus ngan ughang itu, katauNyau, "Adau sughang jemau kayau, tanahau ngasilka banyak nianan. 12:17 Mangku diau berupuak, 'Tuapau diau ka kukerjauka? Karnau aku nidau bediau bada agi batan endak nepiakka asil tanaku.' 12:18 Mangku diau bekatau, 'Aku berencanau endak meleghak tengkiangku, mangku ka kutegakka besak-besak. Di tengkiang itula aku ka nepiakka gegalau padiku ngan gegalau retauku. 12:19 La udim itu aku ka berupuak, Kaba la lemak, gegalaunyau la adau galau, la telungguak batan endak betaun-taun nidau ka abis. Mbak kini tigha kari gheghadu, tiduak makan ngan beriang-riang!' 12:20 Anyautu Allah bekatau ngan diau, 'Ui, jemau bigal! Malam inila pulau nyawau kaba ka diambiak. Mangku retau diau la kaba lungguakka itu batan endak sapau?' 12:21 Luak itula jemau diau melungguakka retau bendau batan endak diri sughang, amun diau nidau dianggap Allah kayau." 12:22 Mangku Yesus bekiciak ngan anak-buaHau, "Itula sebapau Aku bekatau ngan kamu, jangan ghegak ngan pengidupan kamu, tuapau diau endak kamu makan ngan tuapau diau endak kamu pakai. 12:23 Karnau pentingla idup kamu sangkan makanan, ngan badan kamu sangkan baju. 12:24 Kina'ila burung kak. Diau nidau nanam, nidau ngetam, nidau bediau tengkiang. Anyautu Allah nyayia diau pulau. Jawua beregaula kamu sangkan banyak burung kak itu. 12:25 Empuak kamu ghegak, sapau jak di kamu pacak manjangka umurau empuak jerang ajau? 12:26 Mangku setu diau keciak ajau kamu endiak pacak kerjauka, ngapau kamu ghegak ngan setu lain? 12:27 Kina'ila bungau kelinyu. Diau nidau mintal, nidau nenun, anyautu rajau Salumu ngan gegalau kekayauannyau nidau bebaju sualap bungau itu. 12:28 Saghini ghumput di padang tumbua, pagi disilap abis. Empuak luak itu ghumputtu didandani Allah, apau lagi kamu. Ui, kamuni jemau diau nidau percayau nian. 12:29 Jadi, nidau nanti ghegak ngan bingung ngan setu diau endak kamu makan ngan kamu minum. 12:30 Gegalaunyautu didala'i jemau di deniauni diau nidau keruan Allah. Anyautu Bapak kamu keruan, bansau kamu mesti makan ngan minum. 12:31 Jangan ghegak, anyautu beusahala, supayau Allah merinta dalam idup kamu. Udim itu gegalaunyau ka dienjuakka ngan kamu." 12:32 "Nidau nanti penakut, ui kamu diau dikit jemaunyau, karnau Bapak kamu riang njadika kamu rajau luak Diau. 12:33 Jualkala retau kamu, enjuakkala tanciau ngan jemau serik, buatla batan endak kamu dumpit diau nidau ka rusak njadi retau di sergau diau endiak ka abis. Retau luak itu nidau pacak diambiak pemaling ngan nidau pacak dipajua gegat. 12:34 Karnau di bada retau kamu adau, di situla pulau rupu'an kamu adau." 12:35 "Kamu mesti maju siap bebaju ngan lampu kamu maju maghak. 12:36 Kamu mesti luak anak-bua diau nunggu tuanau baliak jak di tandang, mangku amun diau baliak ngan nggagur duaghau, cecepat dibukakkanyau batan endak diau. 12:37 Alaka riangau anak-bua diau dang nunggu, masau tuanau sampai. Percayaula, tuanautu ka siap, ngajung anak-buahau itu duduak makan, mangku ditepi'inyau. 12:38 Amun diau sampai tenga malam apu paghak siang, amun ughangtu masia nunggu, riangla ughangtu. 12:39 Ingatkala ini, amun tuan ghuma keruan, kebilau pemaling datang, diau ka nunggu ghumahau, mangku pemaling endiak masuak. 12:40 Luak itu pulau kamu mesti siap nyambut Anak Manusiau, karnau kamu nidau keruan, kebilau masaunyau Diau ka datang." 12:41 Pitrus betanyau, "Apu kami diau Dighi kiciakka ngan ceritau tadi, apu gegalau jemau pulau?" 12:42 Katau Tuhan, "Jadila luak budak diau iluak ngan pacak dipercayaui, mangku diau dijadika tuanau kepalak jak di gegalau buda'au, supayau ngenju'i ughangtu makanan padau masaunyau. 12:43 Amun tuanau baliak mangku nginak diau dang ngerjauka tugasau, alaka riang budaktu! 12:44 Percayaula, tuanautu ka nyeraka gegalau retaunyau ngan buda'autu. 12:45 Anyautu, amun budaktu ja'at ngan bekatau dalam atiau, 'Tuanku lum ka baliakbaliak!', mangku mbaduki gegalau kantinau ngan makan-minum ngan mabuak. 12:46 Mangku tuanautu ka baliak, jam ngan aghiau diau nidau disangkau, mangku budaktu ka diukum beghat, dijadika senasip ngan jemau diau nidau percayau ngan Allah. 12:47 Budak diau tau kendak tuanau, anyautu nidau bedandan ngan nidau ngerjauka kendak tuanau, diau ka dilagaui banyak nian. 12:48 Anyautu jemau diau nidau keruan kendak tuanau, mangku ngerjauka setu diau mesti diukum, jemautu ka dibaduki dikit ajau. Jemau diau dienju'i banyak ka dituntut banyak pulau. Mangku jemau diau dipercayaui banyak dituntut lebia banyak lagi." 12:49 "Aku datang endak maghakka api di deniau. Alaka ilu'au, amun apitu la maghak. 12:50 Adau sengsarau diau mesti Kualami. Mangku atiKu kelang-kedia nian, antak ka titu tejadi. 12:51 Apu kamu sangkau, Aku datang endak mbatak damai di deniau? Nidau, ukan damai, tapitu pelawanan. 12:52 Mulai mbak kini limau ughang seghuma ka belawanan, tigau lawan duau, duau lawan tigau. 12:53 Ughangtu ka sangi bemusuan. Ba'au ka melawan ana'au diau lanang, anak lanang ka melawan ba'au. Ma'au ka melawan anak tinau, anak tinau ka melawan ma'au. Enduak mentuau ka melawan nantuau diau tinau, nantuau tinau ka melawan enduak mentuau." 12:54 Yesus ngiciak pulau ngan jemau banyak, katauNyau, "Amun kapu dighi nginak aban itam di ara barat, kapu dighi bekatau, 'Ka ujan'. Nyela, ujan nian. 12:55 Amun adau angin jak di selatan, kapu dighi bekatau, 'Ka panas'. Nyela, panas nian. 12:56 Ui, kapu dighi jemau cak nidau terti. Tandau deniau kapu dighi pacak keruan, ngapau tandau saman ini kapu dighi endiak terti? 12:57 Ngapau kapu dighitu nidau mutuska setu diau benagh? 12:58 Amun sughang jak di kapu dighi diaduka jemau ke pengadilan, ncubau bedamai ngan diau penarau masia di jalan. Amun nidau, dibata'inyau ngadap akim. Akimtu ka nyeraka diau ngan anak-buahau mangku dimasuakka dalam jil. 12:59 Percayaula, kapu dighi nidau ka ngeluagh jak di jil, amun dendau lum kapu dighi bayighi lunas."

Lukas 13

13:1 Masau itu adau jemau ngiciakka ngan Yesus ceritau jemau Galilia diau dibunua Pilatus, masau ughangtu dang bekerban ngan Allah. 13:2 Mangku Diau ngiciak ngan ughangtu, "Kamu sangkau, ughangtu dibunua luak itu mbuktika, besakla dusau ughangtu sangkan gegalau jemau Galilia diau lain. 13:3 Nidau nian. Anyautu ingatkala, amun kamu nidau ngubai jak di dusau, gegalau kamu ka mati luak ughangtu. 13:4 Luak manau pulau ngan delapan belas ughang diau mati ditinggang mubungan ghuma besak pasigh Siluam? Kamu sangkau besakla dusau ughangtu jak di gegalau jemau di Yerusalim. 13:5 Nidau nian. Sekali agi Kukiciakka, amun kamu nidau ngubai jak di dusau kamu, kamu ka mati galau luak ughangtu." 13:6 Mangku Yesus nceritauka cuntau ceritau ini, "Adau jemau diau nanam sebatang aghau di kebunau. Mangku jemautu pegi ndala'i bua di batang aghautu, anyautu nidau bulia sebua kia. 13:7 Mangku diau ngiciak ngan tukang sayia kebunau, 'Kina'ila, la tigau taun aku ndala'i bua aghau di batang ini, anyautu nidau bulia sebua kia. Tebangla ajau aghau ini. Batan tuapau diau idup endiak bediau gatiau.' 13:8 Timbal tukang kebun, 'Enangka diau idup setaun agi. Aku ka mangkughi tana di sekitarau ngan mupu'au. 13:9 Asauku taun di mukau ka bebua. Amun nidau, aku ka nebangau.' " 13:10 Adau saghi aghi Sabat, Yesus ngajagh di ghuma sembayang. 13:11 Di situ adau sughang jemau tinau diau la delapan belas taun buidapan. Adau rua ja'at di diau, mangku jemau tinautu la bungkuak, nidau pacak betegak agi. 13:12 Satu Yesus nginak tinau itu, dipantauNyau, dikiciakka ngan diau, katauNyau, "Idapan dighi la ghadu." 13:13 Mangku Yesus nepiakka tanganAu di palak tinau itu. Masau itu pulau tinautu betegak lughus, mangku ngagungka Allah. 13:14 Kepalak ghuma sembayang itu mara, karnau Yesus meghadui jemau aghi Sabat. Mangku diau bekatau ngan ughang banyaktu, "Adau enam aghi batan endak bekerjau. Amun endak dighaduka, datangla aghi itu, jangan aghi Sabat." 13:15 Tuhan nimbal, "Kapu dighini cak alim! Ukanau kapu dighi meluputka sapi jak di sangkarannyau aghi Sabat, mangku diau pacak minum? 13:16 Di sini adau sughang tinau, pengadau Abraham, diau la delapan belas taun dikuasaui iblis. Apu diau nidau bulia dibibaska jak di iblistu aghi Sabat?" 13:17 Timbal Yesustu mbuat gegalau musua Yesus maluan nian. Gegalau jemau banyak lain injiak, karnau gegalau kerjau nyelia diau dikerjauka Yesustu. 13:18 Mangku Yesus bekatau, "Amun Allah merinta luak manau keadaannyau? Ngan tuapau Aku pacak nyamaukanyau? 13:19 Diau umpamau mulan sawi diau tumban di tana. Mulantu tumbua, njadi batang besak, mangku burung-burung mbuat saghang di cangkahau." 13:20 Yesus bekatau agi, "Amun Allah merinta, ngan tuapau aku pacak nyamaukanyau? 13:21 Diau luak ghagi diau diambiak sughang tinau, diundakka ngan ghebuak sekaling enggut kembang." 13:22 Yesus melajuka pejalananNyau ke Yerusalim, Diau melalui kuta ngan dusun sampai ngajagh. 13:23 Mangku adau jemau diau betanyau, "Apu gi dikit ajau jemau diau ka diselamatka?" 13:24 Yesus nimbal, "Beusahala, mangku masuak jalan duaghau supit, karnau ingatkala, banyak jemau ncubau endak masuak, anyautu nidau pacak. 13:25 Amun tuan ghuma la ngunci duaghau, kamu ka betegak di luagh sampai nggagur duaghau ngan bekatau, 'Tuan, buka'ila kami duaghau!' Mangku diau ka nimbal, 'Aku nidau keruan kamu jak di manau.' 13:26 Kamu ka nimbal, 'Kami la makan serempak ngan dighi. Dighi la ngajagh di dusun kami.' 13:27 Anyautu tuan itu ka bekatau agi, 'Aku nidau keruan kamu jak di manau. Pegila jak di sini, kamu diau ngerjauka setu diau ja'at!' 13:28 Kamu ka nginak Abraham, Isak ngan Yakub ngan gegalau nabi keriangan di sergau, mangku kamu ka nangis ngan nerinit gigi, karnau purik kamu dilaratka keluagh. 13:29 Jemau bangsau lain ka datang jak di sebela matau-aghi idup sebela matau-aghi tumban, jak di utara ngan selatan, mangku ka duduak makan di sergau. 13:30 Ngenian, adau jemau diau mendian ka njadi dulu sekali, adau jemau diau dulu sekali ka njadi mendian." 13:31 Masau itu pulau adau jemau Parisi datang ngiciak ngan Yesus, kataunyau, "Jangan mendam di sini. Pegila ke bada lain, karnau Herudis endak mbunua Kaba." 13:32 Yesus nimbal, "Pegila, kiciakka ngan jemau calak itu, 'Aku ngisitka iblis ngan meghadui jemau buidapan mbak kini ngan pagi. Mangku lusau Aku ka ngudimi kerjauKu.' 13:33 Anyautu saghini, pagi ngan lusau Aku mesti neruska pejalananKu, karnau nidau pantas sughang nabi dibunua di luagh Yerusalim. 13:34 Ui jemau Yerusalim, nabi-nabi kamu bunua, ajungan Allah kamu sipati ngan batu enggut mati. La rajin aku endak nunggalka kamu, luak bai ayam nunggalka ana'au meghekupi di bawa sayapau, anyautu kamu enggup. 13:35 Ngenian, itula sebapau Allah nidau agi guak kamu. Keruanila, mulai mbak kini kamu nidau ka nginak Aku agi, antak ka kamu bekatau, 'Tepujila Jemau diau datang dalam namau Tuhan!' "

Lukas 14

14:1 Adau saghi aghi Sabat, Yesus pegi makan di ghuma sughang pengulu jak di jemau Parisi. Di situ gegalau jemau neghagi ngina'i Yesus. 14:2 Mangku sughang jemau buidapan nyembap datang njenguak Yesus. 14:3 Mangku Yesus betanyau ngan guru-guru ukum Taurat ngan jemau Parisi diau adau di situ, katauNyau, "Apu bulia kitau meghadui jemau buidapan aghi Sabat apu nidau?" 14:4 Guru-guru ukum Taurat ngan jemau Parisitu diam galau. Yesus mantau jemau tadi, dighadukaNyau, mangku diajungAu pegi. 14:5 Udim itu Yesus bekatau ngan ughangtu, "Misalau sughang jak di kapu dighi adau sughang anak madak sikuak sapi diau temasuak dalam pawuak aghi Sabat, apu nidau dikeluaghka aghi Sabat itu pulau?" 14:6 Nidau bediau sughang kia diau pacak nimbali Yesus. 14:7 Yesus nginak menda diau milia bada diau iluak nian. Karnau itu Diau ngiciakka ceritau ini ngan gegalau ughangtu. 14:8 "Amun kapu dighi diaja'i ke jamuan jemau nika, jangan duduak di mukau sekali, karnau misalau adau jemau lain diau diaja'i pulau, pentingla diau sangkan kapu dighi, 14:9 mangku tuan ghuma diau ngaja'i kapu dighi ngan jemau itu pulau tepasau pegi guak kapu dighi ngan bekatau, 'Ma'ap, bada ini la disediauka batan endak menda itu.' Mangku kapu dighi ka maluan nian, tepasau duduak di belakang sekali. 14:10 Amun kapu dighi diaja'i, duduakla di belakang sekali. Asauku tuan ghuma ka njenguak kapu dighi ngan bekatau, 'Mela, duduak di mukau.' Mangku kapu dighi diregaui di adapan gegalau menda diau lain. 14:11 Karnau jemau diau nganggap diriau lebia jak di jemau lain ka dimaluka, mangku jemau diau ngensianka diriau ka diregaui." 14:12 Mangku Yesus ngiciak ngan jemau diau ngaja'iNyau tadi, katauNyau, "Amun dighi endak njamu, jangan ngajak kantin dighi, ading-beghading dighi, denga-sanak dighi, jemau sedusun diau kayau, karnau ughangtu ka ngaja'i dighi pulau. Ngan carau luak itu dighi ka nerimau balasan. 14:13 Amun dighi endak njamu, aja'ila jemau serik, jemau cacat, jemau lumpua ngan jemau butau. 14:14 Dighi ka riang, karnau ughangtu nidau ka bediau batan pembalasau keilu'an dighi. Keilu'an dighi ka dibalas Allah, masau jemau diau benagh diidupka jak di mati." 14:15 Ndengagh titu sughang jak di mendatu bekatau ngan Yesus, "Riangla jemau diau dijamu Allah, amun Diau datang njadi rajau." 14:16 Yesus bekatau ngan ughangtu, "Adau sughang jemau diau ngadauka jamuan besak. Diau banyak njeghumi jemau. 14:17 La masau endak mulai njamu, diau ngajung anak-buahau pegi njenguak jeghumannyau ngan bekatau, 'Mela, datangla. Gegalaunyau la siap.' 14:18 Anyautu gegalau ughangtu sejagh sughang mintak ma'ap. Diau dulu bekatau ngan anak-buatu, 'Aku empai mbeli tana. Aku mesti pegi merisaunyau. Ma'apkala aku.' 14:19 Diau lain bekatau, 'Aku empai mbeli sepulua ikuak sapi. Aku mesti pegi ncubau sapitu. Ma'apkala aku.' 14:20 Diau lain agi bekatau, 'Aku empai udim nika. Aku endiak pacak datang.' 14:21 Mangku anak-bua tadi baliak ngiciakka gegalaunyau ngan tuanau. Tuan itu mara nian, mangku bekatau ngan anak-buahau, 'Pegila gegasip ke bilang jalan ngan penyimpangan, bata'ila ke sini jemau serik, jemau cacat, jemau butau, jemau lumpua.' 14:22 Udim dikerjauka, anak-buahau ngiciakka ngan tuanau, 'Tuan, diau diperintaka dighi la kami kerjauka, anyautu gi adau bada.' 14:23 Mangku tuan itu bekatau agi, 'Pegila keluagh kuta, desakla jemau di jalan ngan jemau di penyimpangan datang, mangku ghumakuni rami. 14:24 Keruanila, nidau bediau sughang kiala jak di menda diau kujeghumitu ka meghasauka makanan jamuanni.' " 14:25 Banyak kematila jemau bejalan serempak ngan Yesus. Sampai nulia, Yesus bekatau ngan ughangtu, 14:26 "Jemau diau datang njenguak Aku endak njadi anak-buaKu, jemautu mesti nyayangi Aku lebia jak di ba'au, ma'au, buntingau, anak-ana'au, ading-beghadingau, lagi lebia jak di nyawaunyau sendighi. Amun nidau, diau endiak pacak njadi anak-buaKu. 14:27 Jemau diau nidau endak mikul salipau, mangku ngikut Aku, diau endiak pacak njadi anak-buaKu. 14:28 Misalau sughang jak di kamuni endak negakka ghuma besak, cengki diau ka ngitung anggarannyau kudai, mangku diau keruan, apu tanciau cukup apu nidau. 14:29 Awuak la udim pendasiau, endiak pacak ngudiminyau, mangku jemau tetawau nginak kerjaunyautu 14:30 ngan bekatau, 'Jemau itu endak negakka ghuma, endiak pacak ngudiminyau.' 14:31 Misalau sughang rajau endak pegi beperang ngan rajau lain, cengki diau ka merupuakka kudai, apu tenterahau diau sepulua ributu pacak melawani tentera duau pulua ribu diau ndatangi ughangtu. 14:32 Amun nidau pacak, diau ka ngajung anak-buahau semasau musuatu gi jawua endak nanyauka sarat bedamai." 14:33 Yesus bekatau agi, "Luak itu pulau ngan kamu, sughang kia jak di kamu nidau pacak njadi anak-buaku, amun nidau ninggalka gegalau retaunyau. 14:34 Gagham itu iluak, anyautu amun gagham nidau buasau agi, apu pacak ngulang masin agi? Cengki nidau! 14:35 Gaghamtu nidau begati agi, empuak di umau empuak batan pupuak. Nyela, dicapakka ajau. Amun betelingau, dengaghkala!"

Lukas 15

15:1 Tukang tagia cuki ngan jemau nidau iluak banyak datang njenguak Yesus. 15:2 Mangku jemau Parisi ngan guru-guru ukum Taurat bemumut, kataunyau, "Diautu nerimau jemau bedusau, mangku makan serempak ngan ughangtu." 15:3 Karnau itu ceritau ini diceritauka Yesus ngan ughangtu: 15:4 "Misalau sughang jak di kapu dighi ngempu seratus ikuak bebiri, mangku kelengitan sikuak, apu diau nidau ninggalka diau sembilan pulua sembilan ikuak di padang ghumput, mangku pegi ndala'i diau lengittu enggut dapat? 15:5 Mangku amun la dapat, dipikul, dibata'au baliak ngan riang. 15:6 La sampai di ghuma dipantaunyau jemau pasigh ghumahau ngan kantin lainau sampai bekatau ngan ughangtu, 'Mela, kitau beriang-riang, karnau bebiriku diau lengit itu la dapat.' 15:7 Ngenian, luak itula pulau besakla keinji'an di sergau, karnau sughang jemau diau bedusau la betubat, sangkan keinji'an, karnau sembilan pulua sembilan jemau diau iluak ngan berupuak nidau nanti betubat." 15:8 "Misalau sughang tinau adau sepulua butiak tanci pirak, mangku lengit sutiak, apu diau nidau maghakka lampu, nyapu ghumahau mangku didala'inyau, enggut tanciautu dapat? 15:9 Mangku tanciau la dapat, dipantaunyau jemau diau pasigh ghumahau ngan kantin lainau sampai bekatau, 'Mela kitau beriang-riang, karnau tanciku diau lengittu la dapat.' 15:10 Keruanila, luak itu pulau malaikat-malaikat Allah keriangan, karnau sughang jemau bedusau betubat." 15:11 Yesus bekatau agi, "Adau sughang bapak, ana'au diau lanang adau duau ikuak. 15:12 Ngiciak diau bunsu ngan ba'au, kataunyau, 'Bak, enjuakkala ngan aku bagian retau kitau diau batan endak aku.' Mangku ba'au mbagika retau bendaunyau ngan duau ana'autu. 15:13 Lum lamau udim itu, anak bunsu tadi njualka gegalau bagiannyautu, mangku pegi merantau ke bada diau jawua. Di situ diau ncecapa'i tanciau ngan idup bereruyalan. 15:14 Tanciau la abis galau, mangku adau kelapaghan diau pansan nian. Anak bunsu itu pulau ngalami sengsarau. 15:15 Mangku diau pegi upahan ngan sughang jemau kayau diau mendam di situ, diajungau ke talang nyayia ingunan kaput. 15:16 Anak bunsu itu endak ngisi busungau ngan ampau ngan dedak diau njadi makanan kaputtu, anyautu nidau sughang kia diau ngenjuakkanyau ngan diau. 15:17 Mangku diau nyadari idupau, kataunyau, 'Banyak nian jemau upahan ngan bak kami. Ughangtu keliwatan banyak makanan, anyautu aku di sini mati kelapaghan. 15:18 Aku endak baliak njenguak bakku ngan bekatau ngan diau: Bak, aku la bedusau ngan sergau ngan dighi pulau. 15:19 Aku nidau pantas agi dikiciakka anak dighi. Terimaula aku luluak jemau upahan ngan dighi.' Mangku diau baliak njenguak ba'au. 15:20 Diau gi jawua, ba'au la kina'an diau, mangku ba'autu meghasau sial ngan diau. Ba'autu belaghi njengu'au, mangku disambutau ngan riang, dipelu'au ngan diciumau. 15:21 Katau ana'autu, 'Bak, akuni la bedusau ngan sergau ngan dighi pulau. Aku nidau pantas agi dikiciakka anak dighi.' 15:22 Anyautu ba'autu ngiciak ngan anak-buahau, 'Batakla ke sini gegasip baju diau alap sekali, surumka ngan diau, mangku kenaukala cincin ngan sepatuau. 15:23 Udim itu ambiakla anak sapi diau bunguak sekali, mangku sembeliala. Mela kitau njamu ngan bereriang, 15:24 karnau anakku ini la mati mangku ngulang idup, diau la sesat mangku baliak agi.' Mangku ughangtu mulai bereriang. 15:25 Masau itu ana'au diau tuau adau di umau, mangku diau baliak. La sampai pasigh ghumahau, diau ndengagh muni musik ngan nari. 15:26 Mangku diau mantau sughang anak-buahau ngan betanyau, 'Ngapau ghuma rami?' 15:27 Anak-buahautu nimbal, 'Ading kaba la baliak, mangku bak kaba ngajung nyembelia anak sapi diau bunguak, karnau ana'au la baliak ngan selamat.' 15:28 Ana'au diau tuautu mara kematila, enggup masuak ke ghuma, mangku ba'au ngeluagh muji diau. 15:29 Anyautu diau nimbal, 'La betaun-taun aku bekerjau batan endak dighi, nidau kekela melawan. Anyautu sikuak kambing lum kekela dighi enjuakka ngan aku endak bereriang ngan kantin-kantinku. 15:30 Anak dighi itu la ngabiska retau dighi ngan tinau nakal. Satu diautu baliak, dighi nyembelia sapi bunguak batan endak diau.' 15:31 Katau ba'au, 'Nak, kaba maju di sini ngan aku. Gegalau retauku, retau kaba pulau. 15:32 Kitau pantas bereriang, karnau ading kaba la mati, mangku ngulang idup, diau la sesat, mangku baliak agi.' "

Lukas 16

16:1 Yesus ngiciak ngan anak-buaHau, katauNyau, "Adau sughang jemau kayau diau adau tukang nyimpani tanci. Jemau kayau itu ndengagh kici'an, mbak bansau tukang nyimpani tanci tadi ngabiska tanciau. 16:2 Mangku diau mantau tukang nyimpani tancitu, mangku bekatau ngan diau, 'Aku la ndengagh ceritau kaba. Mbak kini tulisla galau diau masuak diau ngeluagh, mangku serakala ngan aku. Kaba endiak pacak agi njadi tukang nyimpani tanciku.' 16:3 Tukang nyimpani tancitu berupuak, 'Tuapau diau kukerjauka mbak kini? Tuanku endak mandakka aku jak di kerjauku. Mangkugh? Aku endiak kuat. Mintak-mintak? Aku maluan. 16:4 Adau akalku, mangku amun aku dipecat jak di kerjauku nyimpani tanci, adau kawan diau ka nerimau aku di ghumahau.' 16:5 Mangku tukang nyimpani tancitu mantau bilang jemau diau beghutang ngan tuanau. Ngan diau dulu sekali diau betanyau, 'Beghapau kaba beghutang ngan tuanku?' 16:6 Jemautu nimbal, 'Seratus guci minyak manis.' Mangku diau bekatau ngan jemautu, 'Ini surat utang kaba. Tulisla cecepat limau pulua.' 16:7 Mangku diau betanyau ngan diau lain, 'Beghapau utang kaba?' Timbal jemautu, 'Seratus pikul beghas.' Diau bekatau ngan jemautu, 'Inila surat utang kaba. Tulisla delapan pulua.' 16:8 Mangku tuanau tadi muji tukang nyimpani tanciau diau nidau jujurtu, karnau diau buakal. Karnau pacakla jemau deniauni bekundang ngan jemau sangkan jemau diau idup dalam terang. 16:9 Dengaghkala katauKu ini: Pakaila kekayauan deniauni, mangku bulia kantin, mangku amun tancitu nidau begati agi, kamu diterimau di bada jemau mendam selelamaunyau. 16:10 Jemau diau pacak dipercayaui kerjau diau keciak, pacak pulau dipercayaui kerjau diau besak. Jemau diau nidau jujur ngan kerjau diau keciak, jemautu nidau pulau jujur ngan kerjau diau besak. 16:11 Mangku amun ngan kekayauan deniauni kamu nidau pacak dipercayaui, sapau ka endak nyeraka ngan kamu kekayauan diau di sergau? 16:12 Amun kamu nidau pacak dipercayaui ngan retau jemau lain, sapau ka nyeraka hak kamutu ngan kamu? 16:13 Nidau sughang kia pacak bekerjau ngan duau jemau, karnau diau ka sayang ngan diau sughang ngan luat ngan diau lain. Diau ka setia ngan diau sughang ngan melalaika kerjau diau lain. Luak itu pulau ngan kamu. Kamu nidau pacak bekerjau batan endak Allah, batan endak retau bendau pulau." 16:14 Jemau Parisi ndengagh gegalaunyau diau dikiciakka Yesus, mangku nawaukaNyau, karnau ughangtu galak tanci. 16:15 Mangku Yesus bekatau ngan ughangtu, "Kapu dighini jemau diau endak kina'an benagh di mukau jemau, anyautu Allah keruan isi ati kapu dighi. Karnau setu diau dianggap manusiau iluak diluatka Allah. 16:16 Ukum Taurat ngan kitab nabi dituruti enggut masau Yuhanis datang. Jak masau itu ceritau iluak, mbak bansau Allah njadi rajau, maju dikiciakka, mangku jemau endak masau temasuak umat Allah. 16:17 Murala langit ngan deniau lengit sangkan sutiak urup dalam ukum Allah dilengitka. 16:18 Jemau diau nyagha'i biniau mangku bebunting ngan jemau lain jemautu bebuat ja'at. Jemau diau nika ngan tinau diau la disagha'i bebuat ja'at pulau." 16:19 "Adau sughang jemau kayau. Diau bebaju alap diau besak regaunyau. Idupau bereruyalan idang aghi. 16:20 Di mukau duaghau ghumahau adau sughang mintak-mintak, namaunyau Lasarus. Badanau penua ngan bagha. 16:21 Diau endak ngisi busungau ngan ghima diau tumban jak di mija jemau kayau tadi. Lagi anjing datang njilat baghahautu. 16:22 Jemau serik-sarau itu mati, mangku dibata'i malaikat di guak Abraham. Jemau kayau tadi mati pulau, mangku dikuburka. 16:23 Di bada jemau mati diau sengsarau nian. Mangku diau nginak ke atas. Jak di jawua diau nginak Lasarus adau guak Abraham. 16:24 Mangku diau mintak tulung nian, kataunyau, 'Bapak Abraham, sialkala aku! Ajungla Lasarus masuakka jaghiau ke ayiak mangku datang mbasai lidaku, karnau aku nanggung nian dalam api ini.' 16:25 Abraham nimbal, 'Ingatkala anakku, seumur idup kaba la meghasauka gegalaunyau diau lemak. Lasarus meghasauka gegalau diau madak. Mbak kini diau riang di sini, kaba sengsarau. 16:26 Lagi di entaghau kaba ngan kami adau badas diau dalam nian, mangku jemau jak di sini nidau pacak ke situ, jemau jak di situ nidau pacak ke sini.' 16:27 'Amun luak itu,' katau jemau kayautu, 'Aku mintak nian dighi ngajung Lasarus ke ghuma bak kami. 16:28 Adau limau beghading agi di ghuma. Ajungka Lasarus ngingatka ughangtu, supayau jangan masuak ke bada sengsarau ini.' 16:29 Abraham bekatau, 'Ughangtu la adau kitab Musa ngan kitab nabi-nabi. Nengkela ughangtu nuruti setu diau ditulis dalam kitabtu.' 16:30 Jemau kayautu nimbal, 'Itu endiak cukup, Bapak Abraham. Anyautu amun adau jemau datang jak di jemau mati, ughangtu ka ngubai jak di dusaunyau.' 16:31 Anyautu Abraham bekatau, 'Amun ughangtu nidau nuruti perinta Musa ngan nabi-nabi, cengki ughangtu nidau ka percayau pulau, empuak adau jemau mati ka idup agi.' "

Lukas 17

17:1 Yesus ngiciak ngan anak-buaHau, katauNyau, "Cetau ka adau jemau diau mbuat jemau lain bedusau. Anyautu celakaula jemau diau ngerjaukanyau. 17:2 Iluakla batu besak digerintungka di liaghau, mangku dicapakka dalam laut, sangkan nyesatka sala sughang jemau diau litak. 17:3 Karnau itu, sepepadaula!" 17:4 Lagi amun diau mbuat sala ngan kaba tujua kali saghi, mangku tujua kali diau datang njenguak kaba ngan bekatau, 'Ma'apkala aku, aku la besala,' kaba mesti ma'apka diau." 17:5 Mangku rasul-rasul mintak ngan Tuhan, "Teguakala iman kami." 17:6 Tuhan nimbal, "Misalau kamu adau iman sebesak mulan sawi ajau, kamu pacak ngiciak ngan batang besak ini, 'Tecabutla mangku tetanamla di laut,' mangku diau na'atinyau." 17:7 "Misalau sughang jak di kamu adau budak diau ngerjauka sawa ngan nyayia bebiri. Amun budaktu baliak jak di sawa ngan jak di padangan, apu kamu ka ngiciakka, 'Mela, makan!'? 17:8 Cengki nidau! Tapitu kamu ka bekatau, 'Tepiakkala makanan batan endak aku. Surumla baju diau beresia, nepi'i aku, penarau aku makan. La udim itu kabatu makan.' 17:9 Cengki budaktu nidau nanti dipuji, karnau diau cuman nuruti perinta tuanau. 17:10 Luak itu pulau kamu. Amun kamu la ngerjauka gegalaunyau diau la diajungka ngan kamu, kiciakkala, 'Kamini anak-bua biasau. Kami cuman ngerjauka setu diau diajungka ngan kami.' " 17:11 Yesus dang bejalan ngancamka Yerusalim, Diau melalui entaghau Samaria ngan Galilia. 17:12 Yesus dang masuak sebua dusun, Diau didatangi sepulua ughang buidapan ja'at. Ughangtu betegak jak di jawua, 17:13 mangku tegauk, "Ui, Guru, Yesus, sialkala kamini!" 17:14 Satu Yesus nginak ughangtu, Diau bekatau, "Pegila, ancakkala badan kamu ngan imam." Ughangtu dang di jalan, idapannyau ghadu. 17:15 Sughang jak di ughangtu, satu nginak diau la ghadu, ngelipat ngan ngagungka Allah. 17:16 Mangku diau nunduak di adapan Yesus ngan beterimau-kasia ngan Diau. Jemau itu jemau Samaria. 17:17 Yesus bekatau, "Ukanau tadi sepulua ughang diau dighaduka? Di manau diau sembilan agi? 17:18 Ngapau cuman jemau asing ini diau ngelipat beterimau-kasia ngan Allah?" 17:19 Mangku Diau bekatau ngan jemau tadi, "Betegakla, bejalanla. Kaba ghadu karnau percayau." 17:20 Adau jemau Parisi betanyau ngan Yesus, "Kebilau Allah endak merinta?" Yesus nimbal, "Amun Allah merinta, nidau kina'an ngan jemau, 17:21 lagi pulau jemau nidau pacak bekatau, 'Mela nginak, ini diau!' ngan 'Di situ diau!', karnau Allah la mulai merinta di guak kapu dighi." 17:22 Udim itu Yesus bekatau ngan anak-buahau, "Ka sampai masaunyau kamu endak nginak saghi jak di aghi-aghi Anak Manusiau, anyautu kamu nidau pacak ngina'au. 17:23 Nantitu jemau ka ngiciakka ngan kamu, 'Kina'i di sini! Kina'i di situ!' Jangan pegi! Jangan ngikuti jemautu! 17:24 Karnau luak kilat diau besinagh jak di ujung ke ujung, luak itula nanti, amun Anak Manusiau ka datang. 17:25 Anyautu Diau mesti banyak penanggungan kudai ngan nidau diterimau jemau mbak kini. 17:26 Amun Anak Manusiau datang nanti, deniau ka semegi ngan saman Nua: 17:27 Jemau makan ngan minum, nika ngan dinikaka, enggut Nua masuak perawu besak, mangku ayiak merampus ngan jemau mati galau. 17:28 Luak itu pulau timpau saman Lut: Jemau makan-minum, njual-beli, nanam ngan negakka ghuma. 17:29 Anyautu satu Lut ngeluagh jak di Sudum, aghi itu ujan api ngan belirang tughun jak di langit, mangku jemau mati galau. 17:30 Luak itula pulau nanti, masau Anak Manusiau dinyatauka. 17:31 Aghi itu jemau diau dang duduak di berendau jangan masuak ke dalam endak ngambiak dandanannyau diau di dalam ghuma. Luak itu pulau jemau diau dang di sawa jangan baliak ke dusun. 17:32 Ingatkala ceritau bini Lut! 17:33 Jemau diau beusaha ngilakka nyawaunyau ka kelengitan nyawaunyau. Anyautu jemau diau kelengitan nyawaunyau ka nyelamatkanyau. 17:34 Percayaula, malam itu adau ughang duau dang tiduak sekatil, diau sughang ka dibata'i, diau sughang agitu ka ditinggalka. 17:35 Adau tinau ughang duau dang nutuak ghebuak setabangan, diau sughang ka dibata'i, diau sughang agi ka ditinggalka. 17:36 Adau ughang duau dang ngerjauka sawa, diau sughang ka dibata'i, diau sughang agi ka ditinggalka." 17:37 Anak-buahau betanyau ngan Yesus, "Tuhan, di manau titu tejadi?" Yesus nimbal, "Di manau adau buntang di situ adau anjing."

Lukas 18

18:1 Udim itu Yesus ngiciakka cuntau ceritau endak ngajagh anak-buaHau, supayau ughangtu maju bedu'a jangan mura puas, 18:2 katauNyau, "Di sebua kuta adau sughang akim diau nidau takut ngan Allah ngan nidau nyanauka jemau. 18:3 Di kuta itu adau pulau sughang randau diau rajin ngadap akimtu mintak pekaraunyau dibenaghka, kataunyau, 'Tulungla aku, ngadap lawanku!' 18:4 Empai penembai akimtu enggup nulung randau itu. Anyautu udim-udimau akimtu berupuak, 'Empuak aku nidau takut ngan Allah lagi nidau nyanauka jemau, 18:5 tapitu randau ini maju datang nyusaka aku, iluakla aku nulung diau. Amun nidau, diau ka maju datang ngeriaka aku!' " 18:6 Mangku Tuhan bekatau, "Peratikala setu diau dikiciakka akim diau nidau adil itu! 18:7 Apu Allah nidau ka mbenaghka umatAu diau mintak ngan Diau siang-malam? Apu Diau melambatka masau endak nulung ughangtu? 18:8 Percayaula, Diau ka cepat mbenaghka pekarau ughangtu. Anyautu amun Anak Manusiau datang, apu gi adau jemau di deniauni percayau ngan Diau?" 18:9 Ceritau ini diceritauka Yesus ngan jemau diau nganggap diriau nidau besala ngan nganggap diriau lebia jak di jemau lain. 18:10 Katau Yesus, "Adau ughang duau diau pegi ke Ghuma Allah endak bedu'a. Sughang jak di rumbungan jemau Parisi, sughang tukang tagia cuki. 18:11 Jemau Parisitu betegak ngadap Allah ngan bedu'a dalam atiau, 'Allah, aku beterimau-kasia, karnau aku nidau luak jemau lain diau selak, nidau jujur, menaugawia, ngan pulau nidau luak tukang tagia cuki itu. 18:12 Akuni puasau duau kali seminggu, ngan pulau ngenjuakka ngan Dighi bagi sepulua sebagi jak di gegalau asilku.' 18:13 Anyautu tukang tagia cuki tadi betegak jejawua ngan nidau pulau beghani ncungak ke langit, sampai mbaduk pala'au diau bekatau, 'Allah, kesianila akuni, jemau bedusau.' 18:14 Nyela nian," katau Yesus, "Tukang tagia cuki itu baliak ke ghumahau la diterimau Allah, ukan jemau Parisi tadi. Karnau jemau diau nganggap diriau lebia jak di jemau lain nidau ka diregaui. Mangku jemau diau ngensian ka diregaui." 18:15 Mangku adau pulau jemau diau mbatak anak-ana'au diau gi keciak njenguak Yesus, supayau Diau natap budak-budak keciaktu. Nginak itu anak-buaHau marai ughangtu. 18:16 Anyautu Yesus mantau ughangtu mangku bekatau, "Nengkela budak-budak keciak datang njenguak Aku. Jangan dialangi, karnau jemau luak inila Allah pacak njadi rajau dalam idupau. 18:17 Ingatkala! Jemau diau nidau nerimau Allah njadi rajau dalam idupau luluak sughang budak keciak diau nidau ka temasuak umat Allah." 18:18 Adau sughang pengulu jemau Yahudi, diau betanyau ngan Yesus, kataunyau, "Pak Guru diau iluak, tuapau diau mesti kukerjauka, mangku bulia idup selelamaunyau?" 18:19 Timbal Yesus, "Ngapau kaba ngiciakka Aku iluak? Nidau bediau diau iluak lain jak di Allah. 18:20 Cengki kaba la keruan gegalau perinta Allah: Jangan menaugawia, jangan mbunua, jangan maling, jangan mbu'ung, regauila enduak-bapak kamu." 18:21 Katau jemautu. "Gegalau perinta itu la kuturuti jak di keciak." 18:22 Ndengagh kici'annyautu Yesus bekatau, "Masia adau semecam agi diau mesti kaba kerjauka: Jualkala gegalau retau kaba, enjuakka tanciautu ngan jemau serik, mangku kaba ka bulia retau di sergau. La udim itu datangla ke sini ngikut Aku." 18:23 Ndengagh kici'anNyautu jemau itu kebingungan, karnau diau kayau nian. 18:24 Mangku Yesus ngina'i jemautu ngan bekatau, "Alaka segaunyau jemau kayau nerimau Allah njadi rajau dalam idupau. 18:25 Murala sikuak untau masuak tebuak jaghum sangkan jemau kayau masuak sergau." 18:26 Mangku jemau diau ndengagh kici'an Yesus itu betanyau, "Amun luak itu, sapau diau pacak selamat?" 18:27 Yesus bekatau, "Setu diau nidau pacak dikerjauka manusiau pacak dikerjauka Allah." 18:28 Pitrus bekatau, "Kina'ila, kamini la ninggalka gegalau retau kami endak ngikut Dighi." 18:29 "Percayaula," katau Yesus, "Jemau diau ninggalka ghumahau, biniau, adingbeghadingau, pejadiau, anak-ana'au, karnau ta'at ngan Allah, 18:30 jemautu ka nerimau agi lipat gandau masau ini pulau, mangku masau diau ka datang diau ka nerimau idup selelamaunyau." 18:31 Yesus mantau duau belas anak-buaHau mangku bekatau ngan ughangtu, "Dengaghkala, mbak kini kitau ngancamka Yerusalim, mangku gegalaunyau diau ditulis nabi-nabi ceritau Anak Manusiau ka ditepati. 18:32 Diau ka diseraka ngan jemau diau nidau takut ngan Allah. Diau ka dipusiakka, digelakka, diludai, 18:33 mangku dibaduki ngan dibunua. Mangku la duau malam Diau ka idup agi." 18:34 Anak-buaHau dikit kia nidau terti gegalaunyautu. Reti kici'anNyau tadi diresiauka ngan ughangtu. Ughangtu nidau keruan tuapau diau dikiciakkaNyautu. 18:35 Yesus laka sampai di Yiriku. Di situ adau sughang butau dang duduak mintak-mintak di jalan. 18:36 Satu diau ndengagh jemau banyak lalu, diau betanyau, "Ngapau ramitu?" 18:37 Katau ughangtu, "Yesus, jemau Nasarit, lalu." 18:38 Mangku jemau butautu tegauk, kataunyau, "Yesus, Anak Daud, sialkala aku!" 18:39 Ughang diau bejalan di adapanNyau mara ngajung diau diam. Tapitu diau tamba tegauk agi, "Anak Daud, sialkala aku!" 18:40 Yesus gheghadu ngan ngajung jemau butautu dibatak guak Diau mangku betanyau, 18:41 "Tuapau kekenda'an kaba?" Jemau itu nimbal, "Tuhan, aku endak pacak nginak agi." 18:42 Mangku Yesus bekatau, "Nginakla kaba! Kaba la ghadu, karnau kaba percayau." 18:43 Masau itu pulau jemautu pacak nginak, mangku diau ngikut Yesus sampai beterimau-kasia ngan Allah. Jemau banyak diau nginak titu ngagungka Allah pulau.

Lukas 19

19:1 Yesus masuak ke kuta Yiriku. Diau maju bejalan melalui kuta itu. 19:2 Di situ adau sughang kepalak tukang tagia cuki, namaunyau Sakius. Diautu kayau nian. 19:3 Diau endak nginak, sapau Yesustu, anyautu nidau pacak, karnau diau pandak, lagi jemau di situ banyak nianan. 19:4 Mangku diau belaghi ndului jemau banyak. Udim itu nayiak batang aghau, mangku pacak nginak Yesus diau ka lalu di situ. 19:5 La sampai guak batang aghau tadi, mangku Yesus nginak ke atas sampai bekatau, "Sakius, tughunla gegancang, karnau saghini Aku endak singga di ghuma kaba." 19:6 Sakius tughun gegancang nerimau Yesus ngan riang. 19:7 Anyautu gegalau jemau diau ngina'autu bemumut, kataunyau, "Diautu singga di ghuma jemau bedusau." 19:8 La di ghumahau, Sakius betegak ngan ngiciak ngan Tuhan, "Tuhan, separau jak di retauku ka kuenjuakka ngan jemau serik. Amun adau jemau diau kutipuka, ka kubaliakka ngan diau empat kali lipat." 19:9 Yesus bekatau, "Saghini jemau seghuma ini la diselamatka, karnau jemau ini pulau pengadau Abraham. 19:10 Anak Manusiau datang endak ndala'i jemau lengit ngan nyelamatka jemau sesat." 19:11 Ngan jemau diau ndengagh kici'anNyautu, Yesus ngiciakka cuntau ceritau ini pulau. Masau itu Diau la pasigh Yerusalim, jemau nyangkau, Allah la endak njadi rajau di deniau ini. 19:12 Mangku Diau bekatau, "Adau sughang pengadau rajau pegi ke nenggeri diau jawua endak dijadika rajau, udim itu diau endak baliak. 19:13 Antak ka pegi, diau nunggalka sepulua ughang anak-buahau, dienju'inyau padau sughang sebutiak tanci emas ngan bekatau, 'Bedagangla pakai tanci ini, penarau aku pegi.' 19:14 Anyautu jemau di nenggeriautu luat ngan diau. Mangku jemau tadi la bejalan, ughangtu ngajung jemau, supayau ngiciakka, 'Kami enggup jemau itu njadi rajau kami.' 19:15 La udim jemautu dijadika rajau, diau baliak, mangku diau mantau anak-buahau diau dienju'inyau tanci tadi, endak ngeruani, beghapau asil dagangan ughangtu padau sughang. 19:16 Jemau diau dulu sekali datang bekatau, 'Tuan, sutiak tanci emas diau dighi enjuakkatu la njadi sepulua.' 19:17 Rajautu bekatau ngan anak-buahautu, 'Iluak, kaba anak-bua diau belagham. Setu diau keciak kaba pacak dipercayaui, karnau itu aku ka ngajung kaba nguasaui sepulua kuta.' 19:18 Anak-buahau diau keduau datang ngan bekatau, 'Tuan, sutiak tanci emas dighitu la njadi limau.' 19:19 Rajautu bekatau ngan anak-buahautu, 'Kaba ka nguasaui limau kuta.' 19:20 Mangku anak-buahau diau ketigau datang ngan bekatau, 'Tuan, ini tanci dighi. La kubunika dalam setangan. 19:21 Aku penakut ngan dighi, karnau dighi jemau kejam. Dighi ngambiak diau nidau kekela dighi kerjauka. Dighi ngetam diau nidau dighi tanam.' 19:22 Rajautu bekatau ngan anak-buahautu, 'Ui, kabanila ja'at! Aku ka ngukum kaba nurut kici'an kabani. Kaba la keruan akuni jemau kejam. Aku ngambiak setu diau endiak kukerjauka ngan ngetam setu diau endiak kutanam. 19:23 Amun luak itu, ngapau tanciku endiak kaba masuakka di bang, mangku amun aku baliak, aku pacak ngambi'au ngan ana'au.' 19:24 Mangku diau bekatau ngan jemau guak diau, 'Ambiak tancitu jak di diau, enjuakka ngan jemau diau la adau tanci sepulua?' 19:25 Ughangtu nimbal, 'Diau la adau sepulua.' 19:26 Rajautu bekatau, 'Ingatkala, jemau diau buadau ka dienjuakka agi, mangku jemau diau nidau bediau tuapau-apau, setu diau adau di diau ka diambiak pulau jak di diau. 19:27 Mangku mbak kini batakla ke sini musua-musuaku diau nidau tetuju aku njadi rajaunyau. Bunuala gegalau ughangtu di adapanku.' " 19:28 Udim ngiciakka gegalaunyautu, Yesus bejalan di mukau ughangtu melajuka pejalananNyau ke Yerusalim. 19:29 La pasigh Betpagi ngan Betania di Bukit Saitun, Diau ngajung duau ughang anak-buaHau 19:30 ngan bekatau, "Pegila ke dusun diau di adapan kitau. Amun kamu masuak ke situ, kamu ka nginak sikuak anak keledai tetambang diau lum kekela dinayi'i jemau. Legha'ila tali keledaitu, mangku batak ke sini. 19:31 Amun adau jemau betanyau ngan kamu, 'Ngapau kamu melegha'i tali keledaitu?' kiciakkala luak ini, 'Tuhan enda'au.' " 19:32 Duau ughang anak-buahautu pegi, mangku nginak gegalaunyau luak diau la dikiciakka Yesus. 19:33 Ughang duautu dang melegha'i tali anak keledai itu, jemau ngempuau bekatau, "Ngapau kamu melegha'i tali anak keledaitu?" 19:34 Katau ughangtu, "Tuhan enda'au." 19:35 Ughang duautu mbatak keledaitu guak Yesus, mangku ughang di situ mbentangka bajuau di belakang keledaitu ngan nayiakka Yesus di pucuak keledai. 19:36 Penarau Yesus nayiak keledaitu, jemau mbentangka bajuau di jalan. 19:37 Yesus laka sampai di Yerusalim, di jalan tebing Bukit Saitun, gegalau jemau rami diau ngikut Yesustu mulai tepekiakpekiak ngagungka Allah ngan riang, karnau gegalau kerjauNyau diau nyelia diau la ughangtu kinak. 19:38 Katau ughangtu, "Tepujila Rajau diau datang dalam namau Tuhan. Damai di sergau. Tepujila Allah!" 19:39 Adau bebeghapau jemau Parisi diau ngikut ngan jemau banyak itu ngiciak ngan Yesus, "Guru, ajungla anak-bua Kaba diam." 19:40 Yesus nimbal, "Percayaula, amun ughangtu diam, batu-batu inila ka tepekiak." 19:41 Mangku Yesus la pasigh ngan Yerusalim ngan nginak kuta itu, Diau nangisinyau, 19:42 katauNyau, "Alaka ilu'au, amun mbak kini pulau kaba terti tuapau diau ndatangka damai batan endak kaba. Anyautu mbak kini kaba nidau pacak ngina'au. 19:43 Masau ka sampai musua kaba ka ngelilingi kaba ngan kandang. Ughangtu ka ngepung kaba ngan ngesakka kaba jak di manau-manau. 19:44 Ughangtu ka mbenasauka kaba ngan gegalau jemau diau adau di kaba. Di dinding kaba sutiak kia batu nidau ka bediau agi diau tepasang ngan batu lain, karnau kaba nidau ngeruani, masau Allah datang endak nyelamatka kaba!" 19:45 Mangku Yesus masuak ke Ghuma Allah ngan mulai nundung jemau bedagang di situ. 19:46 Diau bekatau ngan ughangtu, "Di Injil Allah bekatau, 'Ghumaku ghuma du'a.' Anyautu kamu njadikanyau saghang penyamun." 19:47 Idang aghi Yesus ngajagh di dalam Ghuma Allah. Imam-imam bepangkat tinggi, guru-guru ukum Taurat ngan tuau-tuau jemau Yahudi pulau endak mbunua Diau. 19:48 Anyautu ughangtu nidau keruan, luak manau caraunyau, karnau gegalau jemau maju endak ndengaghka Diau.

Lukas 20

20:1 Adau saghi Yesus dang ngajagh jemau banyak di Ghuma Allah ngan ngiciakka ceritau iluak, imam-imam bepangkat tinggi, guru-guru ukum Taurat ngan tuau-tuau jemau Yahudi datang ke situ. 20:2 Ughangtu bekatau ngan Yesus, "Cubau kiciakka ngan kami, pakai kuasau apau Kaba ngerjauka gegalaunyautu? Mangku sapau ngajung Kaba?" 20:3 Yesus bekatau, "Aku pulau endak betanyau ngan kapu dighi. Cubau kiciakka ngan Aku, 20:4 baptisan Yuhanis itu asalau jak di sergau apu jak di manusiau?" 20:5 Ughangtu mulai buijau, "Amun kitau kiciakka, 'Asalau jak di Allah', Diau ka bekatau, 'Ngapau kapu dighi nidau percayau ngan diau?' 20:6 Anyautu amun kitau kiciakka, 'Asalau jak di manusiau,' gegalau jemau ka nyipati kitau ngan batu, karnau ughangtu percayau, bansau Yuhanistu sughang nabi." 20:7 Mangku ughangtu nimbal, "Kami endiak keruan." 20:8 Mangku Yesus bekatau ngan ughangtu, "Amun luak itu, Aku enggup pulau ngiciakka ngan kapu dighi ngan kuasau sapau Aku ngerjauka gegalaunyau ini." 20:9 Yesus ngiciakka cuntau ceritau ini ngan jemau banyak, "Adau sughang diau mbukak kebun anggur. Udim dibukak, diparauka ngan bebeghapau jemau parauan. Mangku diau pegi ke nenggeri lain. Diau lamau mendam di situ. 20:10 La pangkaunyau, jemau ngempu kebun tadi ngajung sughang anak-buahau pegi njenguak jemau parauan tadi endak mintak bagian asil kebunau. Anyautu jemau parauantu mbaduki anak-buahau tadi, diajung baliak nidau bepulian. 20:11 Mangku jemau ngempu kebuntu ngajung sughang anak-buahau diau lain. Anyautu anak-buahautu dibaduki pulau, digelakka ughangtu, mangku diajung baliak nidau bepulian. 20:12 Udim itu diajungau anak-buahau diau ketigau. Anyautu anak-buahautu dilukaui pulau, mangku dicapakka keluagh kebun itu. 20:13 Mangku jemau ngempu kebun itu bekatau, 'Tuapau agi diau kubuat? Aku ka ngajung anakku diau kusayangi. Cengki diautu ka diregaui ughangtu.' 20:14 Anyautu satu jemau parauan nginak anak jemau ngempu kebuntu, ughangtu buijau sampai bekatau, 'Diautu ka ngempu kebun ini nanti. Mela kitau mbunua diau, mangku kebun ini njadi kebun kitau.' 20:15 Ughangtu naghiak diau keluagh kebun, udim itu dibunuau." Mangku Yesus betanyau, "Tuapau ka dibuat jemau ngempu kebun ngan jemau parauan tadi? 20:16 Diau ka datang mbunua jemau parauantu, mangku nyeraka kebunau ngan jemau lain." Ndengagh titu jemau banyak bekatau, "Jangan!" 20:17 Yesus ngina'i ughangtu ngan bekatau, "Amun luak itu, tuapau retiau katau ini diau ditulis di Injil? 'Batu diau dicapakka tukang negak ghuma la njadi pelapiak tiang.' 20:18 Jemau diau tumban di batu itu ka pata, mangku jemau diau ditinggang batu itu ka lulua." 20:19 Guru-guru ukum Taurat ngan imam-imam bepangkat tinggi keruan, bansau cuntau ceritau itu ngenaui ughangtu. Itula sebapau ughangtu endak nangkap Yesus masau itu pulau. Anyautu ughangtu takut ngan jemau banyak. 20:20 Guru-guru ukum Taurat ngan imam-imam bepangkat tinggi ngengina'i Yesus. Ughangtu ngajung jemau diau ngerjauka luak kerjau jemau iluak endak betanyau ngan Yesus, supayau Diau sala ngiciak, mangku pacak nyerakaNyau ngan kekuasauan gubernur. 20:21 Ughangtu ngiciak luak ini, "Guru, kami keruan ajaghan ngan kici'an Dighi benagh. Dighi nidau milia jemau, tapitu ngajaghka kendak Tuhan ngan benagh. 20:22 Karnau itu kami endak betanyau ngan Dighi, apu bulia mbayigh cuki ngan Kaisar apu nidau?" 20:23 Yesus keruan rencanau diau jedit itu, mangku Diau bekatau, 20:24 "Cubau kinakka ngan Aku sutiak tanci pirak. Gambaran ngan tulisan sapau adau di situ?" Ughangtu nimbal, "Gambaran Kaisar." 20:25 "Amun luak itu," katau Yesus, "Enjuakkala ngan Kaisar setu diau pantas ngan Kaisar. Mangku enjuakkala ngan Allah setu diau pantas ngan Allah!" 20:26 Mangku ughangtu dikit kia nidau ndapatka katau diau sala di Yesus di mukau jemau banyaktu. Ughangtu kemangan ngan timbalAutu, mangku diam galau. 20:27 Jemau Saduki nidau percayau, bansau jemau mati ka ngulang idup agi. Mangku adau jemau Saduki datang njenguak Yesus ngan betanyau, 20:28 "Pak Guru, Musa nuliska perinta ini batan endak kitau: 'Amun sughang jemau lanang mati lum adau anak, denga-sana'au mesti nika ngan randaunyau, mangku endak ngadauka jurai batan endak jemau diau la matitu.' 20:29 Na, adau jemau lanang tujua beghading. Diau tuau nika mangku mati, lum adau anak. 20:30 Mangku diau keduau nika ngan randaunyau. Diau mati pulau, nidau bediau anak. 20:31 Luak itu pulau diau ketigau enggut diau ketujua mati galau, nidau bediau anak. 20:32 Udim-udimau tinau itu mati pulau. 20:33 Luak manau ngan tinau itu masau jemau mati ka diidupka agi? Bini sapau tinautu, karnau ughang tujuatu la nikainyau galau?" 20:34 Yesus nimbal, "Jemau di deniau mbak kini belaki bebini. 20:35 Anyautu jemau diau pantas ngulang idup jak di mati di deniau diau ka datang, diautu nidau ka belaki bebini agi. 20:36 Ughangtu luak malaikat, nidau ka mati agi. Ughangtu anak Allah, karnau la diidupkaNyau agi. 20:37 Musa la ngiciakka, mbak bansau jemau mati ka diidupka agi. Di ceritau belukagh diau maghak itu diau ngiciakka, 'Tuhanla Allah Abraham, Allah Isak ngan Allah Yakub.' 20:38 Na, Allah ukan Allah jemau mati, anyautu Allah jemau idup, karnau di adapan Allah gegalau jemau idup." 20:39 Ndengagh luak itu, guru-guru ukum Taurat bekatau, "Timbal kaba nendiau." 20:40 Mangku ughangtu nidau beghani agi nanyaui Yesus. 20:41 Yesus betanyau ngan ughangtu, "Luak manau dikiciakka, bansau Rajau Penyelamat pengadau Daud? 20:42 Awuak Daud itu la ngiciak dalam kitab Masmur, 'Allah bekatau ngan TuhanKu, Duduakla di sebela kananKu, 20:43 enggut Aku mbuat musua Kaba tunduak ngan nyemba Kaba.' 20:44 Daud ngiciakka Rajau Penyelamat itu Tuhan, manau ka adau Diau pengadau Daud?" 20:45 Penarau jemau banyak ndengagh Yesus ngiciak ngan anak-buaHau, Diau bekatau, 20:46 "Sepepadaula ngan guru-guru ukum Taurat diau galak bejalan pakai baju lambing endak diregaui di pekan. Ughangtu galak duduak di mukau sekali di ghuma sembayang ngan di bada jemau njamu. 20:47 Ughangtu nipuka randau-randau ngan ngambiak ghumahau, mangku mbunika peremba'autu ngan bedu'a panjang-panjang. Beghatla ukuman ughangtu nanti sangkan jemau lain."

Lukas 21

21:1 Di Ghuma Allah Yesus ngina'i jemau kayau masuakka tanci dalam bada tanci batan endak Allah. 21:2 Diau nginak pulau sughang randau diau serik-sarau masuakka duau butiak tanci tembagau di bada itu. 21:3 Mangku Yesus bekatau, "Ngenian, banyakla randau serik ini masuakka tanci sangkan gegalau jemau lain tadi. 21:4 Gegalau ughangtu ngenjuakka tanci jak di belebihan retaunyau. Anyautu randau ini, empuak diau seriksarau, ngenjuakka gegalaunyau diau adau di diau, diau mesti digunaukanyau batan endak idupau." 21:5 Adau jemau diau ngiciakka kualapan Ghuma Allah diau diperiasi batu alap-alap ngan dandanan diau dienjuakka ngan Allah. Mangku Yesus ngiciak ngan ughangtu, katauNyau, 21:6 "Nanti ka sampai masaunyau, gegalaunyau diau kamu kinak ini ka dirubuaka. Nidau bediau sutiak kia batu di sini diau ka tinggal tepasang di badahau." 21:7 Anak-buaHau betanyau ngan Yesus, kataunyau, "Guru, kebilau titu ka tejadi? Tuapau tandaunyau, bansau la masaunyau titu ka tejadi?" 21:8 Yesus bekatau, "Sepepadaula, jangan kamu tetipu. Banyak jemau ka datang makai namauKu ngan bekatau, 'Akula diau' lagi, 'La masaunyau'. Jangan kamu ngikut ughangtu. 21:9 Amun ndengagh adau perang ngan pelawanan, jangan kamu tegagau. Gegalaunyautu mesti tejadi kudai. Empuak luak itu ukan retiau, deniau laka kiamat." 21:10 Mangku Yesus neruska kici'anNyau, "Bangsau ka melawan bangsau, nenggeri diau sutiak melawan nenggeri diau lain. 21:11 Di manau-manau ka adau gempau diau besak kematila ngan idapan diau cepat minda ngan kelapaghan. Ka adau setu diau nakutka ngan tandau diau nyelia di langit. 21:12 Antak ka gegalaunyautu tejadi, kamu ka ditangkap, disiksau, mangku kamu ka diadili di ghuma sembayang ngan dimasuakka ke jil. Kamu ka dibata'i ngadap rajau ngan penguasau-penguasau, karnau kamu percayau ngan Aku. 21:13 Itula kesempatan kamu ngiciakka ceritau iluak jak di Allah. 21:14 Ingatkala nian: Jangan kamu ghegak ngan setu diau kamu kiciakka endak mbenaghka diri kamu. 21:15 Akunila ka ngenjuakka ngan kamu katau-katau ngan kepintaran, mangku nidau sughang kia jak di musua kamu pacak melawan ngan nyalaka kamu. 21:16 Mangku kamu ka diseraka enduak-bapak kamu, ading-beghading kamu, denga-sanak kamu, ngan kantin-kantin kamu. Separau jak di kamu ka dibunua. 21:17 Kamu ka diluatka gegalau jemau, karnau kamu percayau ngan aku. 21:18 Anyautu selambagh kia gumbak jak di palak kamu nidau ka diapau-apauka. 21:19 Amun kamu ka beta'an ngan sabar, kamu ka selamat." 21:20 "Amun kamu nginak Yerusalim dikepung tentera, kamu ka keruan, bansau nidau lamau agi kutatu ka diancurka. 21:21 Masau itu jemau diau di Yudia mesti belaghi ke gunung. Jemau diau adau di kuta mesti ninggalka kuta. Jemau diau di dusun-dusun jangan masuak ke kuta, 21:22 karnau itula masau pembalasan, mangku ditepati gegalaunyau diau ditulis dalam Injil. 21:23 Ka celakau tinau-tinau diau dang ngandung ngan tinau diau minumi budak keciak masau itu. Nenggeri ini ka adau sengsarau nian, karnau Allah ka ngukum bangsau ini. 21:24 Separau ka dibunua ngan pedang, separau agi ka dibata'i luak anak kawalan ke gegalau deniau. Yerusalim ka dipija'i jemau diau nidau percayau ngan Allah, enggut abis masau diau ditetapka Allah batan endak ughangtu." 21:25 "Ka adau tandau-tandau di matau-aghi, di bulan ngan bintang-bintang. Di deniau bangsau-bangsau ka penakut ngan bingung ngadapi muni umbak laut. 21:26 Manusiau ka takut kematila, karnau setu diau ka tejadi di gegalau deniauni, karnau kuasau langit ka kacau-balau. 21:27 Masau itula jemau ka nginak Anak Manusiau datang dalam aban ngan kuasau ngan terang besak. 21:28 Amun gegalaunyautu mulai tejadi, bangunla ngan katangka palak kamu, karnau jerang agi kamu ka diselamatka." 21:29 Mangku Yesus ngiciakka ngan ughangtu cuntau ini, katauNyau, "Kina'ila batang aghau ngan gegalau batang lain. 21:30 Amun di batang itu mulai kina'an daun mudau, kamu keruan, bansau laka musim panas. 21:31 Luak itu pulau, amun kamu nginak gegalaunyautu tadi tejadi, kamu ka keruan, bansau nidau lamau agi Allah ka merinta luak rajau. 21:32 Keruanila, gegalaunyautu ka tejadi, antak ka jemau mbak kini mati galau. 21:33 Langit ngan deniau ka lengit, tapitu kici'anku nidau ka lengit, ka tetap selelamaunyau." 21:34 "Sepepadaula, jangan kamu banyak merupuakka kerjau deniauni, jamu-jamuan ngan memabu'an, mangku aghi Tuhan jangan ndatangi kamu endiak keruan. Karnau luak kenau perangkap, 21:35 aghitu ka datang njenguak gegalau jemau di deniauni. 21:36 Sepepadaula ngan maju bedu'a, mangku kamu kuat ngadapi gegalaunyau diau ka tejaditu, mangku kamu pacak ngadap Anak Manusiau." 21:37 Yesus ngajagh di Ghuma Allah aghi siang, mangku malamau Diau ngeluagh pegi ke Bukit Saitun ngan mendam di situ. 21:38 Idang akap banyak jemau datang ke Ghuma Allah endak ndengaghka Yesus ngajagh.

Lukas 22

22:1 Aghi rerayau Ruti Nidau Beghagi diau dikiciakka Paska la pasigh. 22:2 Imam-imam bepangkat tinggi ngan guru-guru ukum Taurat dang ndalak jalan endak mbunua Yesus carau diam-diam, karnau ughangtu takut ngan jemau banyak. 22:3 Mangku Iblis la nguasaui Yudas diau pulau dikiciakka Iskariut. Diautu sughang jak di duau belas anak-bua Yesus. 22:4 Mangku Yudas pegi buijau ngan imam-imam bepangkat tinggi ngan kepalak penjagau Ghuma Allah, luak manau diau pacak nyeraka Yesus ngan ughangtu. 22:5 Ughangtu injiak nian, mangku bejanji endak ngenjuakka tanci ngan diau. 22:6 Yudas tetuju, mangku mulai ndalak jalan endak nyeraka Yesus ngan ughangtu, nidau dikina'i jemau banyak. 22:7 Mangku la sampai aghi rerayau Ruti Nidau Beghagi, aghi endak nyembelia bebiri batan endak makan Paska. 22:8 Mangku Yesus ngajung Pitrus ngan Yuhanis, katauNyau, "Pegila, sediaukala jamuan Paska batan endak kitau." 22:9 Katau ughang duautu, "Di manau Dighi endak kami nyediaukanyau?" 22:10 Yesus nimbal, "Amun kamu masuak ke kuta, kamu ka betemu ngan jemau lanang mbatak ayiak seguci. Ngikutla diau ke ghuma diau dimasu'inyau, 22:11 mangku kiciakkala ngan jemau ngempu ghumatu, 'Guru betanyau, di manau badahau batan endak Aku makan jamuan Paska ngan anak-buaKu?' 22:12 Mangku jemau ngempu ghumatu ka nunjuakka ngan kamu bada umbang di atas lagi la genap ngan dandanan. Sediaukala di situ." 22:13 Mangku pegi ughang duautu, ditemuinyau gegalaunyau luak dikiciakka Yesus, mangku disediaukanyau jamuan Paska. 22:14 La masaunyau endak makan jamuan Paska itu, Yesus duduak makan serempak ngan rasul-rasul. 22:15 Mangku Yesus ngiciak ngan ughangtu, katauNyau, "Aku endak nian makan makanan Paska ini serempak ngan kamu, antak ka Aku sengsarau. 22:16 Percayaula: Aku nidau ka makanau agi, enggut reti jamuan ini dinyatauka di sergau." 22:17 Udim itu Yesus ngambiak mangkuak besak, bedu'a beterimau-kasia mangku bekatau, "Ambiakla, gilirkala ngan kamu. 22:18 Keruanila, mulai mbak kini Aku nidau ka minum anggur ini agi, enggut Allah merinta." 22:19 Udim itu Yesus ngambiak ruti, bedu'a beterimau-kasia, dipiya'Au rutitu, dienjuakkaNyau ngan ughangtu sampai bekatau, "Inila badanKu diau dienjuakka batan endak kamu. Kerjaukala ini batan endak meghingati Aku." 22:20 Luak itu pulau udim makan dienjuakkaNyau mangkuak anggur ngan bekatau, "Mangkuak ini umpamau pejanjian Allah diau empai diau diteguaka ngan daghaKu diau melilia batan endak kamu. 22:21 Tapitu kina'ila! Jemau diau njualka Aku duduak makan di sini serempak ngan Aku. 22:22 Nyela, Anak Manusiau ka mati nendiau, luak diau la ditetapka Allah. Anyautu celakaula jemau diau njualkaNyau!" 22:23 Mangku ughangtu mulai betanyau-tanyau sughang ngan diau lain, sapau jak di ughangtu diau ka ngerjauka titu. 22:24 Mangku anak-bua Yesus bebala mbalaka sapau jak di ughangtu pacak dikiciakka penting sekali. 22:25 Yesus bekatau ngan ughangtu, "Rajau bangsau diau nidau takut ngan Allah nyaraui masarakatau, penguasaunyau endak dikiciakka 'penulung jemau'. 22:26 Kamu jangan luak itu. Anyautu jemau diau penting sekali jak di kamu mesti njadi luak jemau diau mudau sekali, mangku pengulu mesti njadi luak anak-bua. 22:27 Sapau diau lebia penting? Apu diau duduak makan, apu diau nepiakkanyau? Cengki jemau diau duduak makan. Anyautu Aku adau di guak kamu luak sughang budak. 22:28 Dalam gegalau sengsarauKu kamutu maju guak Aku. 22:29 Bapak la ngenjuakka ngan Aku kuasau endak merinta. Luak itu pulau Akuni ka ngenjuakka kuasau itu ngan kamu, 22:30 mangku kamu ka minum-makan serempak ngan Aku, amun Aku la njadi rajau. Mangku kamu ka duduak di kerusi rajau ngadili duau belas bangsau jemau Israil. 22:31 Simun, Simun, dengaghkala. Iblis la diajung nguji kamu, luak padi ditampi. 22:32 Anyautu Aku la bedu'a batan endak kaba, supayau kaba jangan ninggalka Aku. Mangku amun kaba la ngulang ngikut Aku, kaba mesti nguatka kantin-kantin kaba." 22:33 Pitrus nimbal, "Tuhan, aku sukau masuak jil lagi mati serempak ngan Dighi." 22:34 "Percayaula, Pitrus," katau Yesus, "Malam ini antak ka ayam bekukuak, kaba la tigau kali ngiciakka nidau keruan Aku." 22:35 Udim itu Yesus ngiciak ngan anak-buaHau, katauNyau, "Senitu, masau Aku ngajung kamu pegi nidau mbatak dumpit, unjut ngan terumpa, tuapau kamu kurangan?" "Nidau!" katau ughangtu. 22:36 "Mbak kini," katau Yesus, "Amun adau unjut, batakla, pedang pulau. Amun nidau bediau, jualkala baju mangku beli pedang. 22:37 Percayaula, katau Injil ini mesti digenapi, 'Diau dikiciakka jemau ja'at', karnau katau Injil ceritau Aku dang digenapi." 22:38 "Tuhan," katau anak-buaHau, "Ini duau bila pedang." "Udimla." katau Yesus. 22:39 Udim itu Yesus pegi jak di kuta, mangku luak idang malam Diau pegi ke Bukit Saitun. Anak-buaHau pegi pulau ngan Diau. 22:40 La sampai di situ, Yesus bekatau ngan ughangtu, "Bedu'ala, mangku kamu jangan bedusau, amun dicubaui." 22:41 Diau pegi sughang njawua dikit jak di anak-buaHau, kekirau sejawua batu digutukka, mangku Diau nunduak ngan bedu'a, katauNyau, 22:42 "Bak, amun pacak, jawuakala sengsarau itu jak di Aku. Anyautu jangan nurut kendakKu, tapitu kendak Dighi ajau." 22:43 Mangku sughang malaikat datang jak di sergau nguatka Diau. 22:44 Yesus penakut nian, mangku tamba bedu'a nian. Pelua luak dagha titi'an ke tana. 22:45 La udim bedu'a Diau ngulang guak anak-buaHau, ditemuiNyau ughangtu dang tiduak, karnau madak ngan sial nian. 22:46 Mangku Yesus ngiciak ngan ughangtu, katauNyau, "Ngapau kamu tiduak? Bangunla, bedu'ala, supayau kamu jangan bedusau, amun dicubaui." 22:47 Penarau Yesus gi ngiciak, adau serumbungan jemau datang. Ughangtu dibata'i Yudas, sughang jak di anak-bua Yesus. Yudastu masighi Yesus endak nciumAu. 22:48 Yesus bekatau, "Ui, Yudas, apu ngan ciuman ini kaba endak nyeraka Anak Manusiau?" 22:49 Satu anak-buaHau diau serempak ngan Yesus nginak, tuapau diau ka tejadi, ughangtu bekatau, "Tuhan, kami kapak ajau ngan pedang?" 22:50 Mangku sughang jak di ughangtu ngapak anak-bua Imam Besak ngan pedang, mangku putus telingau kananau. 22:51 Anyautu Yesus bekatau, "Udimla." Mangku Diau ngecakka telingau tadi, dighadukaNyau. 22:52 Udim itu Yesus ngiciak ngan imam-imam bepangkat tinggi, kepalak penjagau Ghuma Allah ngan tuau-tuau jemau Yahudi diau la datang ke situ endak nangkap Yesus, katauNyau, "Apu Akuni jemau ja'at, mangku kapu dighi datang mbatak pedang, mbatak pemaduk endak nangkap Aku? 22:53 Idang aghi Aku adau guak kapu dighi di Ghuma Allah. Kapu dighi nidau nangkap Aku. Na, mbak kini masaunyau kapu dighi pacak ngerjaukanyau, masau iblis bekuasau." 22:54 Mangku Yesus ditangkap, dibata'i ke ghuma imam besak. Pitrus ngikut jak di jawua. 22:55 Di tengalaman jemau maghakka api, bediang ngelilingi apitu. Mangku Pitrus pegi bediang pulau di situ. 22:56 Adau sughang budak tinau diau ngina'i Pitrus duduak di guak apitu. Tinautu ngengina'i Pitrus mangku bekatau, "Jemau ini pulau tadi serempak ngan Yesus." 22:57 Pitrus nidau ngaku'iNyau, kataunyau, "Ukan, aku endiak keruan Jemau itu." 22:58 Lum lamau udim itu, adau jemau lain nginak Pitrus ngan bekatau, "Kaba pulau sughang jak di ughangtu." Pitrus nimbal, "Ukan, ukan aku!" 22:59 Kekirau sepenanak udim itu, adau jemau lain agi bekatau rengak, "Nyela nian, jemau ini pulau anak-bua Yesus, karnau diau jemau Galilia pulau." 22:60 Anyautu Pitrus nimbal, "Aku endiak terti kici'an dighi." Masau itu pulau, penarau Pitrus gi ngiciak, ayam bekukuak. 22:61 Tuhan nulia ngina'i Pitrus. Mangku diau teghingat kici'an Tuhan tadi, "Antak ka ayam bekukuak malam ini, kaba la tigau kali nidau ngaku'i Aku." 22:62 Mangku Pitrus ngeluagh jak di situ ngan nangis sesedanan. 22:63 Jemau diau njagaui Yesus musiakkaNyau ngan mbadukiNyau. 22:64 Ughangtu nukup matauNyau ngan betanyau, "Ui, Nabi, cubau kiciakka, sapau mbaduki kaba?" 22:65 Banyak agi kici'an ughangtu nggelakka Diau. 22:66 Aghitu la siang, tuau-tuau jemau Yahudi ngan imam-imam bepangkat tinggi ngan guru-guru ukum Taurat betunggal, mangku Yesus dibata'i ngadap pengadilan agamau. 22:67 Katau ughangtu, "Amun kaba Mesias, Rajau Penyelamattu, kiciakkala ngan kami!" Yesus nimbal, "Amun Aku ngiciakkanyau, kapu dighi nidau ka percayau. 22:68 Amun Aku betanyau, kapu dighi nidau nimbal. 22:69 Mulai mbak kini Anak Manusiau ka duduak di sebela kanan Allah diau Mahakuasau." 22:70 Ughangtu bekatau galau, "Amun luak itu, Kabani Anak Allah?" Yesus nimbal, "Nyela, kapu dighi nian la ngiciakkanyau. Akuni Anak Allah." 22:71 Mangku katau ughangtu, "Nidau nanti dikiciakka jemau lain agi. Kitau la ndengagh Diau inila ngiciakkanyau."

Lukas 23

23:1 Udim itu gegalau pengadilan itu betegak mbatak Yesus ngadap Pilatus. 23:2 Di situ ughangtu mulai mburuakka Diau. Ughangtu bekatau, "Jemau ini nyesatka bangsau kami, nidau ngajung mbayighi cuki ngan Kaisar, ngan ngiciakka diriAu Keristus, sughang Rajau." 23:3 Mangku Pilatus nanyaui Yesus, "Nyela, Kaba rajau jemau Yahudi?" Yesus nimbal, "Au, luak katau dighitu." 23:4 Mangku Pilatus ngiciak ngan imam-imam bepangkat tinggi ngan gegalau jemau banyak di situ, kataunyau, "Aku nidau nemuka sutiak kia sala di Jemau ini." 23:5 Anyautu ughangtu tamba nyalakaNyau, kataunyau, "Ngan ajaghanNyau Diautu ngacauka jemau di gegalau Yudia. Empai penembai di Galilia, mbak kini la sampai pulau di sini." 23:6 Ndengagh titu, Pilatus betanyau, "Apu Jemau ini jemau Galilia?" 23:7 La udim dikiciakka, bansau Yesus asalau jak di Galilia, daira diau dikuasaui rajau Herudis, diau ngajung Yesus ngadap Herudis. Masau itu diau di Yerusalim pulau. 23:8 Herudis riang nian nginak Yesus, karnau la lamau diau ndengagh ceritau Yesus, mangku endak ngina'Au, lagi ngaghapka pacak nginak Yesus mbuat tandau nyelia. 23:9 Diau banyak betanyau ngan Yesus, anyautu sepata katau kia Yesus nidau nimbal. 23:10 Imam-imam bepangkat tinggi ngan guru-guru ukum Taurat adau pulau di situ, maju mburuakkaNyau nian. 23:11 Herudis ngan tenterahau musiakka, nggelakka Yesus ngan nyurumiNyau ngan baju rajau. Udim itu Herudis ngajung Diau ngulang ngadap Pilatus. 23:12 Mangku aghi itu pulau Herudis ngan Pilatus njadi sekantin, sebelumau ughang duautu bemusuan. 23:13 Udim itu Pilatus nunggalka imam-imam bepangkat tinggi, pengulu-pengulu ngan masarakat, 23:14 mangku bekatau ngan ughangtu, "Kapu dighi mbatak Jemau ini njenguak aku ngan ngiciakka, bansau Diauni nyesatka jemau banyak. Kapu dighi la nginak aku merisauNyau, mangku buru'an kapu dighi diau nyalaka Diau dikit kia nidau kudapati di Diau. 23:15 Luak itu pulau Herudis, karnau diau la ngajung Jemau ini ngulang njenguak kami. Ngenian, Jemau ini nidau ngerjauka dikit kia diau pantas diukum mati. 23:16 Itula sebapau aku ka ngajung Diau dibaduki, mangku dibibaska." 23:17 Idang taun masau aghi rerayau Paska Pilatus mesti mbibaska sughang kawalan nurut kendak masarakat. 23:18 Anyautu gegalau jemau tegauk, kataunyau, "Bunuala Diau. Bibaskala Barabas batan endak kami!" 23:19 Barabastu dikawalka, karnau kekacauan di kuta melawan pemerinta ngan pembunuan. 23:20 Pilatus endak mbibaska Yesus, mangku diau ngulang ngiciak bebias ngan ughangtu. 23:21 Anyautu ughangtu tegauk, kataunyau, "Pakuka Diau di kayu salip! Pakukala Diau!" 23:22 Ketigau kaliau Pilatus bekatau ngan ughangtu, "Tuapau salaHau Jemau ini? Nidau dikit kia salaHau kudapatka di Diau diau pantas diukum mati. Aku ka mbaduki Diau mangku dibibaska." 23:23 Anyautu ughangtu maju tegauk sekuat tenaga mintak Yesus dipakuka di kayu salip. Ughangtu menang, karnau suarau bias. 23:24 Mangku Yesus diukum mati nurut kendak jemau banyaktu. 23:25 Mangku jemau diau ughangtu pintak dibibaska, jemau diau dikawalka karnau kekacauan ngan pembunuan tadi. Udim itu Yesus diserakanyau endak dibuati sekendak ughangtu. 23:26 Mangku Yesus dibatak ughangtu. Di tenga jalan ughangtu betemu ngan Simun jemau Kirini. Diau empai endak masuak kuta, mangku dipasau mikul salip itu ngikutka Yesus. 23:27 Banyak jemau ngikut bejalan ngan Yesus. Adau pulau tinau diau nangis berandaian nangisi Yesus. 23:28 Yesus nulia ughangtu ngan bekatau, "Ui, tinau-tinau Yerusalim, jangan nangisi Aku. Tangisila diri kapu dighi ngan anak-anak kapu dighi. 23:29 Keruanila, ka sampai masaunyau, jemau ka bekatau, 'Alaka untungau tinau diau endiak bediau anak ngan nidau kekela melahirka ngan nidau kekela minumi ana'au.' 23:30 Mangku jemau ka mulai bekatau ngan gunung-gunung, 'Tinggangla kami!' ngan bukit-bukit, 'Timbusila kami!' 23:31 Amun kayu diau gi idup jemau la mbuati luak ini, tuapau pulau ka dibuat ughangtu ngan kayu mati?" 23:32 Adau pulau duau ughang lain. Ughang duautu bandit. Diau dibata'i endak diukum mati serempak ngan Yesus. 23:33 Ughangtu la sampai di bada diau dikiciakka Kerungkang Palak. Di situ Yesus dipakuka di kayu salip ngan duau ughang sebela kidauNyau. 23:34 Yesus bekatau, "Bapak, ampunila ughangni, karnau ughangni nidau keruan tuapau diau dikerjaukanyautu." Baju Yesus diagiaka ughangtu ngan disuntinkanyau. 23:35 Jemau banyak betegak di situ sampai nginak gegalaunyautu. Tuau-tuau jemau Yahudi nggelakka Yesus ngan bekatau, "Jemau lain diselamatkaNyau. Cubaula mbak kini Diau nyelamatka diriAu, amun Diau ngenian Mesias, Rajau Penyelamat, diau dipilia Allahtu." 23:36 Tentera-tentera pulau nggelakka Diau. Ughangtu ngenjuakka anggur masam ngan Diau 23:37 ngan bekatau, "Amun Kaba rajau jemau Yahudi, selamatkala nyawau Kaba!" 23:38 Di pucuak kayu salip Yesus adau dituliska luak ini, "Inila rajau jemau Yahudi." 23:39 Sughang jak di bandit diau disalipkatu nggelakka Yesus pulau, kataunyau, "Kaba Rajau Penyelamat. Selamatkala Kaba ngan kami pulau!" 23:40 Bandit diau sughangtu nengul kantinau, kataunyau, "Apu kaba endiak takut ngan Allah? Kaba semegi diukum mati ngan Diau. 23:41 Nyela, kitau ughang duauni pantas diukum sesuai ngan perembak kitau. Anyautu Diauni dikit kia nidau besala." 23:42 Mangku diau bekatau ngan Yesus, "Yesus, ingatkala aku, amun Dighi datang njadi Rajau." 23:43 "Percayaula," katau Yesus, "Saghini kaba ka adau ngan Aku di sergau." 23:44 Kekirau tengaghi daira itu keleman galau selamau tigau jam, 23:45 karnau matau-aghi nidau besinagh. Tabir di Ghuma Allah caghiak bela duau. 23:46 Mangku Yesus tegauk, katauNyau, "Bak, Aku nyeraka nyawauKu ngan Dighi." Udim ngiciak luak itu, nyawauNyau putus. 23:47 Kumandan tentera nginak gegalau diau tejadi, mangku ngagungka Allah ngan bekatau, "Nyela nian, Diauni jemau benagh." 23:48 Jemau banyak diau datang ke situ endak nginak tuapau diau tejadi tadi, baliak galau ngan peghasauan nyesal. 23:49 Gegalau kantin Yesus, temasuak jemau tinau diau ngikut Diau jak di Galilia, betegak jak di jawua nginak gegalaunyautu. 23:50-51 Adau sughang diau benamau Yusup, asalau jak di Arimatia di daira Yudia. Diautu jemau iluak ngan diregaui jemau. Diau pulau nantika masaunyau Allah mulai merinta njadi rajau. Empuak diau temasuak rumbungan pengadilan agamau, diau nidau tetuju ngan rencanau ngan keputusan pengadilan itu. 23:52 Yusuptu pegi ngadap Pilatus mintak mayat Yesus. 23:53 Mangku diau nughunka mayat Yesustu jak di kayu salip, dibalutau ngan kain putia. Udim itu ditepiakkanyau dalam kuburan diau dibuat dalam bukit batu. Kuburan itu lum kekela dipakai. 23:54 Aghitu aghi Jumat, aghi bedandan, ngan aghi Sabat laka mulai. 23:55 Tinau-tinau diau datang serempak ngan Yesus jak di Galilia ngikut Yusup nginak kuburannyautu. Tinautu nginak pulau, luak manau mayat Yesus ditepiakka dalam kuburan. 23:56 Udim itu ughangtu baliak nyediauka rerempahan ngan minyak ghum endak minya'i Yesus. Masau aghi Sabat ughangtu gheghadu endak na'ati ukum Taurat.

Lukas 24

24:1 Pagi di aghiau, aghi Minggu, akap-akap tinau-tinau itu pegi ke kuburan mbatak rerempahan diau la disediaukanyautu. 24:2 Di kuburan ughangtu tekinak batu penukup kuburan la teguliak. 24:3 Mangku ughangtu masuak dalam kuburantu, anyautu mayat Tuhan nidau tekinak agi di situ. 24:4 Penarau ughangtu gi betegak di situ ngan bingung merupuakkanyau, adau duau ughang betegak guak ughangtu, bajuau besinagh-sinagh. 24:5 Tinau tadi takut kematila, mangku nunduak enggut ke tana. Ughang duautu bekatau, "Ngapau kamu ndala'i jemau idup di guak jemau mati? 24:6 Diautu nidau bediau di sini. Diau la ngulang idup. Ingatkala setu diau dikiciakkaNyau ngan kamu, timpau Diau gi adau di Galilia, 24:7 bansau Anak Manusiau mesti diseraka ngan jemau bedusau, dipakuka di kayu salip, mangku la duau malam Diau ka ngulang idup." 24:8 Mangku tinautu teghingat kici'an Yesus itu. 24:9 La baliak jak di kuburan tadi, ughangtu ngiciakka gegalaunyautu ngan sebelas anak-bua Yesus ngan gegalau kantin lainau. 24:10 Tinau itu Maria Magdalina ngan Yuhana ngan Maria, mak Yakubus. Mangku tinau lainau diau serempak ngan tinau tadi ngiciakkanyau pulau ngan rasul-rasul. 24:11 Anyautu rasultu sangkau kici'an tinau itu ceritau mbu'ung. Ughangtu nidau percayau ceritau tinau-tinau tadi. 24:12 Empuak luak itu, Pitrus betegak belaghi ke kuburan. La sampai di kuburan, diau nyubuak ke dalam, mangku tekinak kain pembalutau ajau di situ. Pitrus kemangan mangku baliak ngan betanyau dalam atiau, tuapau diau la tejadi. 24:13 Aghi itu pulau anak-bua Yesus duau ughang pegi ke dusun Imawus, kekirau bejalan duau jam jak di Yerusalim. 24:14 Sampai bejalan ughang duautu ngiciakka gegalaunyau diau la tejadi tadi. 24:15 Penarau ughangtu dang ngiciakkanyau, Yesus datang guak ughang duautu, bejalan serempak ngan ughangtu. 24:16 Ughang duautu nginak Yesus, anyautu adau diau ngalangi mataunyau, mangku nidau kecinauan Yesus. 24:17 Yesus bekatau, "Tuapau kamu kiciakka di tenga jalanni?" Mangku ughangtu mendam ngan mangut. 24:18 Keliupas, sughang jak di ughang duautu, nimbal, "Apu Dighi sughang jemau asing di Yerusalim diau nidau keruan setu diau tejadi di situ empai ini?" 24:19 "Tuapau titu?" Katau Yesus. Ughang duautu nimbal, "Setu diau tejadi ngan Yesus, jemau Nasarittu. Diau sughang nabi diau ngajagh ngan bekerjau ngan kuasau di adapan Allah ngan manusiau. 24:20 Imam-imam bepangkat tinggi ngan tuau-tuau bangsau kitau nyeraka Diau endak diukum mati, mangku Diau la mati dipakuka di kayu salip. 24:21 Awuak kami senitu ngaghapka, bansau Diautu jemau diau ka datang endak mbibaska bangsau Israil. Mangku la duau malam jak gegalaunyautu tejadi. 24:22 Lagi pulau adau tinau-tinau jak di rumbungan kami diau mbuat kami tekejut. Gi akap nian tinautu la ke kuburan, 24:23 anyautu mayat Yesus endiak ngina'au agi. Mangku ughangtu baliak ngiciakka, bansau ughangtu la nginak malaikat diau ngiciakka Yesus idup. 24:24 Adau kantin kami pegi ke kuburan mangku nginak, bansau setu diau dikiciakka jemau tinau tadi nyela luak itu. Anyautu ughang duautu nidau nginak Yesus." 24:25 Mangku Yesus bekatau, "Ui, kamuni bigal. Kamuni lambat nian percayau gegalaunyau diau dikiciakka nabi-nabi. 24:26 Nyela, Rajau Penyelamat mesti meghasauka sengsarau itu kudai mangku diregaui." 24:27 Mangku Yesus ngiciak nerangka ngan ughangtu ceritau diau ditulis di Injil ngiciakka diriAu jak di kitab Musa ngan gegalau kitab nabi. 24:28 Laka sampai ke dusun diau endak ughang duautu tuju, Yesus luak endak maju bejalan. 24:29 Anyautu ughang duautu ngajak nian, kataunyau, "Temalamla ngan kami, karnau aghi laka malam ngan matau-aghi laka tumban." Mangku Yesus masuak endak temalam di bada ughangtu. 24:30 Diau dang duduak makan serempak ngan ughangtu, Diau ngambiak ruti, bedu'a beterimau-kasia, mangku dipiya'Au rutitu, dienjuakkaNyau ngan ughangtu. 24:31 Masau itu pulau ughangtu keruan, bansau Diautu Yesus. Anyautu Diau lengit jak di guak ughangtu. 24:32 Katau ughangtu sughang ngan diau lain, "Nyela, ati kitau riang tadi, masau Diau ngiciak ngan kitau di tenga jalan tadi, nerangka Injil ngan kitau." 24:33 Masau itu pulau ughang duautu ngelipat ke Yerusalim. Di situ ughangtu betemu ngan sebelas anak-bua Yesus dang betunggal ngan kantin-kantinau. 24:34 Ughangtu bekatau, "Ngenian, Tuhan idup agi. Simun la ngina'Au." 24:35 Mangku duau ughangtu nceritauka setu diau tejadi di tenga jalan tadi, luak manau ughangtu keruan Diau, masau Diau miyak-miyak ruti. 24:36 Ughangtu gi ngiciakka ceritau itu, Yesus betegak di guak ughangtu ngan bekatau, "Salam damai batan endak kamu!" 24:37 Ughangtu tegagau ngan penakut, karnau sangkauannyau antu. 24:38 Anyautu Yesus bekatau, "Ngapau kamu penakut? Ngapau asau-asau? 24:39 Kina'ila tanganKu ngan ketingKu. Inila Aku nian. Kecakkala Aku ngan kina'ila, karnau antu nidau bedaging ngan nidau betulang luak Aku." 24:40 Sampai ngiciak luak itu, Yesus nginakka tanganAu ngan ketingAu ngan ughangtu. 24:41 Ughangtu masia lum percayau, karnau keriangan igau ngan kemangan, mangku Yesus betanyau, "Apu kamu adau makanan di sini?" 24:42 Mangku dienjuakka ngan Diau panggangan ikan setak. 24:43 Yesus ngambiak ikantu, dimakanAu di adapan ughangtu. 24:44 Udim itu Yesus bekatau ngan ughangtu, "Inila kici'anKu diau la Kukiciakka ngan kamu, timpau Aku gi seghundak ngan kamu, bansau gegalaunyau diau tetulis dalam kitab Taurat, kitab Nabi ngan kitab Masmur mesti tejadi." 24:45 Udim itu Yesus mbukakka rupu'an ughangtu, mangku ughangtu ngerti ceritau Injil. 24:46 Katau Yesus, "Dalam Injil tetulis luak ini, 'Mesias, Rajau Penyelamat, mesti sengsarau, mangku la duau malam ngulang idup jak di mati.' 24:47 Ngan pulau, 'Atas namau Rajau Penyelamat itu arus dikiciakka ngan gegalau bangsau, bansau manusiau mesti ngubai jak di dusaunyau, mangku Allah endak ngabiska dusaunyau.' Ceritau itu dikiciakka mulai jak di Yerusalim. 24:48 Kamunila nginak gegalaunyautu, mangku kamu mesti ngiciakkanyau. 24:49 Akuni ka ngighimka ngan kamu, setu diau dijanjika BapakKu. Anyautu kamu mesti nunggu di kuta ini, enggut kamu nerimau kuasau jak di Allah." 24:50 Udim itu Yesus mbata'i anak-buaHau keluagh kuta pasigh Betania. Diau nyurungka tanganAu mangku ndu'aka ughangtu. 24:51 Diau dang ndu'aka ughangtu, Diau tuangkat ke sergau, mangku beceghai ngan anak-buaHautu. 24:52 Ughangtu nunduak nyemba Diau. Udim itu baliak ke Yerusalim ngan injiak nian. 24:53 Ughangtu maju betunggal di Ghuma Allah sampai ngagungka Allah.

Yuhanis 1

1:1 Empai penembai adau Pirman. Pirmantu setunggal ngan Allah, mangku Pirmantu Allah. 1:2 Empai penembai Diau setunggal ngan Allah. 1:3 Gegalaunyau dijadikaNyau, mangku amun ukan Diau, sutiak kia nidau njadi. 1:4 Pirman itu ngenjuakka idup, mangku iduptu ngenjuakka terang ngan manusiau. 1:5 Terang itu besinagh di keleman, nidau pacak dipadamka kelemantu. 1:6 Adau sughang jemau diau diajung Allah, namaunyau Yuhanis. 1:7 Yuhanistu datang ngiciakka terang tadi, supayau gegalau jemau percayau, karnau kici'annyautu. 1:8 Yuhanis ukanau terang itu, tapitu diau endak ngiciakkanyau. 1:9 Terang diau sebenaghautu datang ke deniau nerangi gegalau manusiau. 1:10 Diau la adau di deniau. Deniau ini dijadikaNyau, anyautu deniauni nidau keruan Diau. 1:11 Diau datang ke nenggeriAu, anyautu jemau di nenggeriAutu nidau nerimauNyau. 1:12 Mangku bilang jemau diau nerimauNyau ngan percayau ngan Diau, dienjuakkaNyau hak njadi anak Allah. 1:13 Ughangtu njadi anak Allah ukan ngan carau manusiau, ukan pulau karnau dikenda'i sughang jemau lanang, anyautu idup itu asalau jak di Allah. 1:14 Pirman itu la njadi manusiau diau iluak nian ngan kitau. Di Diau kitau nginak diau benagh ceritau Allah. Diau mendam ngan kitau. Kitau la nginak keagunganNyau, keagungan diau dienjuakka ngan Diau, karnau Diautu Anak Bapak diau sughang itula. 1:15 Yuhanis ngiciakka Diau, kataunyau, "Inila Jemau diau kukiciakka: Diau ka datang la udim aku. Bekuasaula Diau sangkan aku, karnau antak ka aku adau, Diau la adau." 1:16 Keilu'anNyau la banyak tegalau. Kitau maju meghasaukanyau. 1:17 Allah ngenjuakka ukum Taurat ngan Musa, anyautu keilu'anNyau ngan kebenaghanNyau diancakkaNyau di Yesus Keristus. 1:18 Nidau sughang kia kekela nginak Allah lain jak di Anak Allah diau gi sughang itula ngan maju seghundak ngan Bapak. Diau itula nyatauka Bapak ngan kitau. 1:19 Tuau-tuau jemau Yahudi di Yerusalim ngajung imam-imam ngan jemau pengadau Liwi pegi njenguak Yuhanis ngan nanyaui diau, "Sapau kabani?" 1:20 Yuhanis ngaku'i ngan sebenaghau, diau nidau mbu'ung, kataunyau, "Akuni ukanau Mesias, Rajau Penyelamattu." 1:21 "Amun luak itu", katau ughangtu, "Sapau kabani? Apu kaba Elia?" "Ukanau", katau Yuhanis. Mangku ditanyaui agi, "Apu kaba nabi diau ka datangtu?" "Ukanau pulau", katau Yuhanis. 1:22 "Amun luak itu", katau ughangtu, "Kiciakkala ngan kami sapau kabani, mangku kami pacak nimbali jemau diau ngajung kami. Katau kaba, sapau kabani?" 1:23 Mangku Yuhanis nimbal, kataunyau, "Akunila diau dikiciakka nabi Yesaya, 'Suarau jemau di padang bungin diau ngiciak ngan suarau bias: Lughuskala jalan batan endak Tuhan!' " 1:24 Jak di rumbungan jemau diau diajungtu adau jemau Parisi. 1:25 Ughangtu betanyau, kataunyau, "Amun kabani ukan Mesias, ukan Elia ngan pulau ukan nabi diau ka datangtu, ngapau kabani mbaptiska jemau?" 1:26 Yuhanis nimbal, kataunyau, "Akuni mbaptis ngan ayiak, anyautu di guak kapu dighi adau Jemau diau nidau kecinauan ngan kapu dighi. 1:27 Diautu ka datang udim aku. Melegha'i tali sepatuAu aku nidau pantas." 1:28 Gegalau kici'an tadi nyatau tejadi di Betania di sebela matau-aghi idup ayiak Yurdan. Di situla Yuhanis mbaptiska jemau. 1:29 Pagi di aghiau Yuhanis nginak Yesus datang njenguak diau, mangku Yuhanis bekatau, "Kina'ila, itu Anak Bebiri diau disediauka Allah endak ngabiska dusau deniau. 1:30 Diautu Jemau diau kukiciakka, Diau ka datang udim aku. Anyautu bekuasaula Diau sangkan aku, karnau Diau la adau antak ka aku adau. 1:31 Senitu aku lum keruan, sapau Diautu, mangku aku datang mbaptis ngan ayiak, supayau jemau Israil keruan, sapau Diau." 1:32 Yuhanis ngiciakka luak ini pulau, kataunyau, "Aku nginak Rua Allah tughun jak di langit luak sikuak burung darau diau inggap di Yesus. 1:33 Senitu aku lum keruan sapau Diau. Anyautu Allah diau ngajung aku mbaptis ngan ayiak la ngiciak ngan aku: 'Amun kaba nginak Rua Allah tughun, mangku nginggapi sughang jemau, Diautu jemau diau ka mbaptis ngan Rua Allah.' 1:34 Aku la ngina'au nian," katau Yuhanis, "Mangku aku ngaku'i, Diautu Anak Allah." 1:35 Pagi di aghiau Yuhanis adau agi di badahau tadi serempak ngan duau anak-buahau. 1:36 Satu nginak Yesus lalu, diau bekatau, "Kina'ila, inila Anak Bebiri diau disediauka Allah!" 1:37 Anak-buahau ndengagh kici'annyautu, mangku ngikut Yesus. 1:38 Yesus nulia ke belakang endak nginak duau ughangtu ngikut Diau, mangku betanyau, "Tuapau kamu dala'i?" "Rabi," katau ughang duautu, retiau guru, "Di manau bada Dighi?" 1:39 "Mela, kina'ila!" katau Yesus. Mangku ughang duautu pegi ngan Yesus endak nginak badaHau. Aghitu la petang, mangku ughangtu betunggal ngan Yesus. 1:40 Sala sughang jak di duau anak-bua Yuhanis tadi diau la ndengagh kici'annyautu ngan ngikut Yesus itu Anderias, ading Simun Pitrus. 1:41 Dulu sekali diau betemu ngan dangau Simun ngan bekatau, "Kami la betemu ngan Mesias." Mesias semegi ngan Keristus, retiau Rajau Penyelamat. 1:42 Anderias ngantat Simun guak Yesus. Yesus ngina'i Simun, mangku bekatau ngan diau, "Kabani Simun, anak Yuna. Kaba ka dinamauka Kepas." Kepas semegi ngan Pitrus basau Yunani, retiau batu batan pelapiak. 1:43 Pagi di aghiau Yesus mutuska endak pegi ke Galilia. Di situ Diau betemu ngan Pilipus, mangku ngaja'inyau, "Mela, ngikut Aku!" 1:44 Asal Pilipus jak di Betsaida, bada Anderias ngan Pitrus. 1:45 Pilipus betemu ngan Natanail, mangku bekatau, "Kami la betemu ngan jemau diau dikiciakka Musa dalam buku Taurat ngan buku nabi-nabi. NamauNyau Yesus, anak Yusup, jak di Nasarit." 1:46 Natanail nimbal, kataunyau, "Asauku nidau ka adau setu diau iluak jak di Nasarit." "Mela, kina'ila ngan kaba!" katau Pilipus. 1:47 Yesus nginak Natanail datang, mangku ngiciakka diau, katauNyau, "Kina'ila, diautu jemau Israil nian, diau nidau kekela nipu!" 1:48 Natanail betanyau, "Kebilau Dighi keruan aku?" Yesus nimbal, katauNyau, "Antak ka Pilipus mantau kaba, Aku la nginak kaba di bawa batang aghau." 1:49 "Guru," katau Natanail, "Dighitu Anak Allah! Rajau jemau Israil!" 1:50 Yesus bekatau, "Kaba percayau, karnau Aku la ngiciakka, bansau Aku la nginak kaba di bawa batang aghau tadi? Kaba ka nginak setu diau lebia besak agi jak di itu tadi!" 1:51 Mangku Yesus bekatau agi, "Percayaula nian ngan katauKu ini: Kaba ka nginak langit tebukak ngan malaikat-malaikat Allah nayiak tughun ke Anak Manusiau."

Yuhanis 2

2:1 Duau malam la udim itu adau jamuan nika di kuta Kana di Galilia. Mak Yesus adau di situ. 2:2 Yesus ngan anak-buaHau diaja'i pulau ke jamuan itu. 2:3 Mak Yesus nginak ayiak anggur la abis, mangku ngiciak ngan Yesus, kataunyau, "Ughangtu kurangan ayiak anggur." 2:4 "Ngapau njenguak Aku, mak?" katau Yesus. "Lum masaunyau Aku nyatauka kuasauKu." 2:5 Anyautu Mak Yesus ngiciak ngan tukang-tukang katang, kataunyau, "Kerjaukala tuapau diau ka dikiciakkaNyau ngan kamu." 2:6 Di situ adau enam guci diau disediauka batan pembasuan nurut adat lembagau jemau Yahudi. Dalam sebua gucitu isiau duau pulua tikau. 2:7 Katau Yesus ngan tukang-tukang katangtu, "Isila guci-guci ini ngan ayiak!" Ughangtu ngisiau enggut penua. 2:8 La penua galau, mangku katau Yesus, "Mbak kini cidukla ayiak dikit, mangku batak ke tuau kerjau." Ughangtu mbatak ayiaktu ke tuau kerjau, 2:9 mangku tuau kerjautu ngecap ayiak itu diau la beghuba njadi ayiak anggur. Tuau kerjautu nidau keruan ayiak anggurtu jak di manau. Tukang katang ajau diau nciduk ayiaktu tadi ngeruaninyau. Mangku tuau kerjautu mantau pengantin 2:10 ngan ngiciak ngan diau, kataunyau, "Biasaunyau jemau nengaka ayiak anggur diau lemak kudai, mangku jemau la nyagu minum, ditengaka diau biasau ajau. Mangku ngapau kaba ngimpani anggur diau lemak enggut mbak kini?" 2:11 Tandau diau dulu sekali ini dibuat Yesus di Kana di Galilia. Ngan tandau itu Diau nginakka kuasauNyau, mangku anak-buaHau percayau ngan Diau. 2:12 La udim itu Yesus pegi ke Kapernaum serempak ngan endu'Au, ading-adingAu ngan anak-buaHau Mangku ughangtu singga di situ bebeghapau aghi. 2:13 Aghi rerayau Paska jemau Yahudi la damping, mangku Yesus pegi ke Yerusalim. 2:14 Di tengalaman Ghuma Allah ditemukaNyau jemau bedagang sapi, kambing, bebiri ngan burung darau ngan pulau jemau penukar tanci duduak di situ. 2:15 Mangku Yesus mbuat semecam pemecit jak di tali, dikisitkaNyau gegalau ughangtu jak di Ghuma Allah ngan gegalau sapi ngan bebiritu. Mija-mija jemau penukar tanci dikangkangkaNyau, mangku tanciautu buamburan. 2:16 Mangku dikiciakkaNyau ngan jemau njual burung darau, "Batakla gegalaunyauni jak di sini. Jangan njadika Ghuma BapakKu bada bedagang!" 2:17 Mangku teghingatla anak-buaHau, bansau adau tetulis di Injil, "Sayang ngan Ghuma Dighi luak api maghak dalam atiKu." 2:18 Mangku tuau-tuau jemau Yahudi nantang Yesus, kataunyau, "Tuapau tandau buktiau Kaba behak beperembak luak itu?" 2:19 Katau Yesus, "Legha'ila Ghuma Allah ini, mangku jangkau tigau aghi Aku ka negakkanyau agi." 2:20 Katau jemau Yahuditu, "Manau ka adau Kaba negakka Ghuma Allah jangkau tigau aghi, awuak negakkanyau empaini empat pulua enam taun." 2:21 Anyautu Ghuma Allah diau dikiciakkaNyautu badanAu itula. 2:22 La udim Yesus diidupka jak di mati, teghingatla anak-buaHau, bansau Diau la ngiciakka luak itu, mangku anak-buaHautu percayau ngan Injil ngan kici'an diau la dikiciakka Yesus. 2:23 Penarau Yesus di Yerusalim selamau aghi rerayau Paska, banyak jemau percayau ngan Diau, karnau la nginak tandau-tandau diau dikerjaukaNyau. 2:24 Anyautu Yesus nidau percayau ngan ughangtu, karnau Diau keruan gegalau jemau. 2:25 Nidau nanti dikiciakka nian ngan Yesus perembak jemau, karnau Diau la keruan setu diau adau dalam ati manusiau.

Yuhanis 3

3:1 Adau sughang pengulu jemau Yahudi jak di rumbungan Parisi, namaunyau Nikudimus. 3:2 Adau semalam diau datang njenguak Yesus, kataunyau, "Rabi, kami keruan, Kaba sughang Guru diajung Allah, karnau nidau bediau sughang kia diau pacak mbuat tandau diau luak Kaba buat, amun ukan Allah diau ngenjuakka kuasau ngan diau." 3:3 Yesus bekatau, "KatauKu ini benagh: Amun jemau nidau ngulang dilahirka, diau nidau pacak njadi angguta umat Allah." 3:4 "Baghia jemau la besak pacak ngulang dilahirka," katau Nikudimus. "Cengki nidau pacak masuak agi dalam busung endu'au, mangku ngulang dilahirka." 3:5 Yesus nimbal, katauNyau, "KatauKu ini benagh: Amun jemau nidau dilahirka jak di ayiak ngan Rua Allah, diau nidau pacak njadi angguta umat Allah. 3:6 Badan kitau dilahirka pejadi, mangku rua kitau diidupka Rua Allah. 3:7 Janganla dighi kemangan, amun Aku bekatau: gegalau kapu dighi mesti ngulang dilahirka. 3:8 Adau angin di manau diau endak. Kitau ndengagh muniau, anyautu nidau keruan jak di manau angintu ngan endak ke manau. Luak itula jemau diau dilahirka Rua Allah." 3:9 "Luak manau ka adau?" tanyau Nikudimus. 3:10 Timbal Yesus, "Dighi sughang guru di Israil. Baghia dighi nidau keruan. 3:11 Percayaula: Kamini ngiciakka setu diau keruan ngan Kami ngan nceritauka setu diau la Kami kinak. Anyautu kapu dighi enggup percayau ngan kici'an Kami. 3:12 Kapu dighi nidau percayau, amun Aku nceritauka setu diau tejadi di deniauni. Luak manau kapu dighi pacak percayau, amun Aku nceritauka setu diau tejadi di sergau? 3:13 Nidau bediau sughang kia diau la nayiak ke sergau lain jak di diau la tughun jak di sergau, diautu Anak Manusiau. 3:14 Luak Musa nayiakka ulagh ke kayu setak di padang bungin, luak itula pulau Anak Manusiau mesti dinayiakka, 3:15 mangku bilang jemau diau percayau ngan Diau bulia idup empai selelamaunyau. 3:16 Karnau Allah sayang nian ngan deniauni, mangku Diau la ngenjuakka Ana'Au diau gi sughang itula, supayau bilang jemau diau percayau ngan Diau nidau benasau, tapitu bulia idup empai selelamaunyau. 3:17 Karnau Allah ngajung Ana'Au pegi ke deniau ukan endak ngadili, tapitu endak nyelamatkanyau karnau Diau. 3:18 Jemau diau percayau ngan Diau nidau ka diukum. Anyautu jemau diau nidau percayau la diukum Allah, karnau diau nidau percayau ngan Anak Allah diau gi sughang itula. 3:19 Diau dituntut karnau ceritau ini: Terang la datang ke deniauni, anyautu manusiau milia keleman, nidau galak di terang, karnau perembak ughangtu ja'at. 3:20 Jemau diau mbuat ja'at luat ngan terang, diau enggup njenguak terang, mangku peremba'au diau ja'attu nidau kina'an. 3:21 Anyautu jemau diau ngerjauka kendak Allah njenguak terang, mangku tenyatau setu diau dikerjaukanyautu dikerjaukanyau nurut kendak Allah." 3:22 La udim itu Yesus ngan anak-buaHau pegi ke Yudia, mangku mendam di situ sampai mbaptis. 3:23 Yuhanis pulau mbaptis di Ainun, pasigh Salim, karnau di situ banyak ayiak, mangku jemau datang ke situ endak dibaptis. 3:24 Masau itu Yuhanis lum tekawal. 3:25 Mangku anak-bua Yuhanis bebala ngan jemau Yahudi pekarau ngambiak ayiak sembayang nurut adat lembagau Yahudi. 3:26 Mangku anak-buahau njenguak Yuhanis, kataunyau, "Guru, dighi masia teghingat Jemau diau serempak ngan dighi di sebeghang ayiak Yurdan diau dighi kiciakka ngan kami senitu? Mbak kini Diau mbaptis pulau ngan banyak jemau pegi guak Diau." 3:27 Yuhanis nimbal, kataunyau, "Sughang kia nidau pacak ngambiak tuapau-apau, amun nidau dienju'i Allah. 3:28 Kamu la ndengagh aku bekatau: Akuni ukan Mesias. Aku diajung nduluiNyau. 3:29 Jemau diau bebunting diautu pengantinan. Kantin pengantinantu ngantininyau ngan ndengaghkanyau ajau, mangku diau riang, amun ndengagh suarau pengantinantu. Luak itu pulau ngan aku. Mbak kini atiku riang nian. 3:30 KuasauNyau mesti tamba banyak, mangku kuasauku tamba dikit." 3:31 Jemau diau datang jak di atas lebia gegalaunyau. Jemau diau datang jak di deniau temasuak jemau deniau, ngiciakka deniaunila. Jemau diau asalau jak di sergau lebia gegalaunyau. 3:32 Diau ngiciakka setu diau la dikina'Au ngan didengaghAu, anyautu nidau bediau sughang kia diau percayau ngan kici'anNyautu. 3:33 Jemau diau percayau ngan kici'anNyautu nyetujui Allah itu benagh. 3:34 Jemau diau diajung Allah, Diautu ngiciakka kici'an Allah, karnau Rua Allah dienjuakkaNyau galau ngan Diau. 3:35 Bapak nyayangi Ana'Au, mangku gegalau kuasau dienjuakka ngan Diau. 3:36 Jemau diau percayau ngan Ana'Autu bulia idup selelamaunyau. Anyautu jemau diau nidau ta'at ngan Ana'Autu nidau ka bulia idup empai. Jemautu maju diukum Allah.

Yuhanis 4

4:1 Jemau Parisi ndengagh, banyakla Yesus bulia anak-bua sangkan Yuhanis, mangku dibaptiskaNyau. 4:2 Sebenaghau Yesus nidau mbaptis, anak-buaHau ajau diau mbaptis. 4:3 Jak Yesus keruan, bansau jemau Parisi ndengagh ceritau itu, Diau pegi jak di Yudia baliak ke Galilia. 4:4 Diau mesti lalu di Samaria. 4:5 Mangku Yesus sampai di sebua kuta di Samaria, namaunyau Sikar. Kutatu pasigh tana diau dienjuakka Yakub senitu ngan Yusup ana'au. 4:6 Di guak itu adau pawuak Yakub. Yesus kekerian, karnau la jawua bejalan, mangku Diau duduak di tepi pawuak. Aghi la tengaghi. 4:7-8 Anak-buaHau pegi masuak kuta endak mbeli makanan. Mangku sughang tinau Samaria datang endak ngambiak ayiak. Yesus bekatau, "Aku mintak minum." 4:9 Katau tinau Samaria itu, "Dighi jemau Yahudi, aku jemau Samaria. Ngapau Dighi mintak minum ngan aku?" Karnau jemau Yahudi nidau seilu'an ngan jemau Samaria. 4:10 Timbal Yesus, "Amun kaba keruan, tuapau diau dienjuakka Allah, ngan sapau diau mintak minum ngan kaba, cengki kaba mintak ngan Diau, mangku Diau ka ngenju'i kaba ayiak diau ngenjuakka idup." 4:11 Katau jemau tinautu, "Dighi nidau bediau timbau, lagi pulau pawuak ini dalam nianan. Jak di manau Dighi bulia ayiak diau ngenjuakka idup itu? 4:12 Yakub, niniak puyang kami, ninggali kami pawuak ini. Diau ngambiak ayiak minum jak di sini, luak itu pulau anak-ana'au ngan benatang ingunannyau. Apu Dighi kirau, besakla Dighi sangkan Yakub?" 4:13 Timbal Yesus, "Jemau diau minum ayiak ini ka aus agi. 4:14 Jemau diau minum ayiak diau ka Kuenjuakka nidau ka aus agi selelamaunyau. Ayiak diau Kuenjuakkatu ka njadi matau-ayiak dalam idupau diau maju mancagh, mangku ngenjuakka idup selelamaunyau ngan jemau itu." 4:15 Katau tinautu, "Enju'ila aku ayiak itu, mangku aku nidau aus agi ngan nidau nanti ngulang ke sini endak ngambiak ayiak." 4:16 Mangku katau Yesus, "Pegila, jenguakla laki kaba, mangku ngulang ke sini batak laki kaba." 4:17 Tinautu nimbal, "Akuni nidau bediau laki." "Awu, nyela nian," katau Yesus, 4:18 "Kaba la limau ikuak laki, mangku laki kaba mbak kini ukanau laki kaba. Nyela nian, kaba nidau bediau laki." 4:19 "Mbak kini aku keruan Dighi sughang nabi", katau tinautu. 4:20 "Niniak puyang kami nyemba Allah di bukit ini, anyautu jemau kapu dighi ngiciakka, di Yerusalim ajau bada jemau nyemba Allah." 4:21 "Percayaula," katau Yesus, "Masaunyau ka sampai jemau ka nyemba Bapak ukan di bukit ini, ukan pulau di Yerusalim. 4:22 Kamu jemau Samaria nyemba setu diau nidau keruan ngan kamu. Anyautu kami jemau Yahudi nyemba Allah diau keruan ngan kami, karnau keselamatan asalau jak di jemau Yahudi. 4:23 Masaunyau ka sampai, mangku la sampai mbak kini, jemau ka nyemba Bapak ngan kuasau Rua Allah luak Diau nyatauka diriAu. karnau Bapak endak disemba luak itu. 4:24 Allah itu Rua, mangku jemau diau nyemba Allah mesti nyemba Diau ngan rua luak Diau nyatauka diriAu." 4:25 Tinautu nimbal, kataunyau, "Aku keruan Rajau Penyelamat diau pulau dikiciakka Keristus ka datang. Amun Diau datang, Diau ka ngiciakka gegalaunyau ngan kitau." 4:26 Katau Yesus, "Akunila Diau, diau dang ngiciak ngan kaba." 4:27 Masau itu anak-bua Yesus datang, mangku ughangtu kemangan nginak Yesus ngiciak ngan jemau tinau. Anyautu nidau bediau sughang kia diau betanyau ngan tinautu, "Kaba endak tuapau?" ngan nidau bediau diau betanyau ngan Yesus, "Ngapau Dighi ngiciak ngan tinautu?" 4:28 Mangku tinautu ninggalka guciau di situ pegi ke kuta mangku ngiciak ngan jemau di kutatu, kataunyau, 4:29 "Mela, nginak jemau diau ngiciakka ngan aku gegalaunyau diau la kukerjauka. Asauku Diau itula Keristus!" 4:30 Mangku ughangtu keluagh kuta pegi njenguak Yesus. 4:31 Penarau itu anak-buaHau ngajak Yesus makan, "Mela, makan", katau ughangtu. 4:32 Yesus bekatau, "Aku adau makanan diau lum keruan ngan kamu." 4:33 Mangku anak-buaHautu sangi tanyaui, "Apu adau jemau mbatak makanan batan endak Diau?" 4:34 Katau Yesus, "MakananKu ngerjauka kendak Allah diau ngajung Aku, mangku ngudimi kerjau diau diserakaNyau ngan Aku. 4:35 Katau jemau: 'Empat bulan agi pangkau ngetam', anyautu Aku bekatau ngan kamu: Kina'ila di sekitar kamu padi la nguning, la masak, la iluak diketam. 4:36 Mbak kini jemau diau ngetam la nerimau upahau, diau melungguakka asilau batan endak idup empai selelamaunyau, mangku jemau diau nanam ngan jemau diau ngetam semegi riangau. 4:37 Rimbayan ini benagh nian: 'Diau sughang nanam, diau lain ngetam.' 4:38 Akuni ngajung kamu ngetam di umau diau nidau kamu kerjauka. Jemau lain ngerjaukanyau, mangku kamu datang ngetam asil kerjau ughangtu." 4:39 Banyak jemau Samaria jak di kuta itu percayau ngan Yesus, karnau kici'an tinau tadi, "Diau ngiciakka ngan aku gegalau perembak diau la kukerjauka itu." 4:40 Jemau Samaria itu betemu ngan Yesus, mintak nian Diau mendam guak ughangtu. Mangku Diau temalam di situ duau malam. 4:41 Mangku banyak agi jemau diau percayau, karnau kici'an Yesus. 4:42 Ughangtu ngiciak ngan tinautu, kataunyau: "Mbak kini kami percayau, ukanau karnau kici'an kaba ajau, anyautu karnau kami la ndengagh ngan la keruan, Diau inila nian Penyelamat deniau." 4:43 La udim duau malam Yesus pegi jak di situ ke Galilia. 4:44 Diau la ngiciak, bansau sughang nabi nidau diregaui di badahau sendighi. 4:45 Mangku la sampai di Galilia, jemau Galilia pulau nyambut Diau, karnau ughangtu la nginak gegalaunyau diau dikerjaukaNyau di Yerusalim masau aghi rerayau Paskatu, karnau ughangtu pulau adau di situ. 4:46 Mangku Yesus ngulang ke Kana di Galilia. Di situ Diau senitu nguba ayiak njadi anggur. 4:47 Diau la ndengagh, Yesus la sampai jak di Yudia ke Galilia. Diau pegi njenguak Yesus, mangku ngenda'i Diau datang meghadui ana'au, karnau ana'autu laka mati. 4:48 Yesus ngiciak ngan diau, katauNyau, "Nidau bediau jemau di sini diau endak percayau, amun nidau nginak tandau buktiau diau nyelia." 4:49 Pekerjau rajautu bekatau, "Mela ke ghumaku, empungan anakku lum mati!" 4:50 Katau Yesus, "Baliakla, anak dighitu la ghadu!" Jemautu percayau nian ngan kici'an Yesus diau dikiciakkaNyautu, mangku baliak. 4:51 Diau gi adau di tenga jalan, mangku betemu ngan anak-buahau mbatak kebar, mbak bansau ana'au la adau jugau. 4:52 Mangku diau betanyau, kebilau diau adau jugau. Katau ughangtu, "Lingsir tengaghi kemaghi demamau ghadu." 4:53 Mangku bapa'autu teghingat, bansau masau itula Yesus bekatau ngan diau, "Anak dighi la ghadu." Mangku percayau diau. Diau seghuma percayau galau. 4:54 Inila tandau keduau diau dikerjauka Yesus, masau diau baliak ke Galilia jak di Yudia.

Yuhanis 5

5:1 La udim itu adau aghi rerayau jemau Yahudi, mangku Yesus pegi ke Yerusalim. 5:2 Di Yerusalim guak mukau lawang Bebiri adau sutiak kulam, namaunyau Betesda dalam basau Ibrani. Di situ adau limau anggung-anggung. 5:3 Di anggung itu jemau banyak tebadai karnau buidapan. Adau jemau butau, jemau kincut, jemau lumpua pulau diau dang nungguka ayiak kulam tadi belimbang, 5:4 karnau kekadangan malaikat Tuhan tughun ke kulamtu melimbangka ayiaktu. Mangku jemau buidapan diau dulu sekali masuak, la udim ayiak kulamtu dilimbangka, jemautu dighadui jak di gegalau idapannyau. 5:5 Di situ adau sughang jemau diau buidapan la tigau pulua delapan taun. 5:6 Yesus nginak jemautu tebadai di situ. Diau keruan, bansau jemau itu la lamau buidapan, mangku betanyau, "Apu dighi endak ghadu?" 5:7 Jemau buidapan itu nimbal, kataunyau, "Nidau bediau jemau diau masuakka aku ke kulamtu, amun ayiak itu dang belimbang. Mangku penarau aku nuju kulamtu, jemau lain la ndului masuak." 5:8 Katau Yesus, "Betegakla dighi, ambiakla tikagh dighi mangku bejalanla!" 5:9 Masau itula pulau jemautu ghadu, Diau ngambiak tikaghau mangku bejalan. Aghitu aghi Sabat. 5:10 Karnau itu tuau-tuau jemau Yahudi ngiciak ngan jemau diau empai dighaduitu, kataunyau, "Aghi ini aghi Sabat. Nidau bulia kaba ngatangka tikagh." 5:11 Katau jemau diau empai dighadui, "Jemau diau meghadui aku bekatau ngan aku: 'Ambiakla tikagh mangku bejalanla.' " 5:12 Ughangtu betanyau, "Sapau diau ngajung kaba ngambiak tikagh ngan bejalan?" 5:13 Anyautu jemau diau empai dighaduitu nidau keruan sapau jemautu, karnau Yesus la lengit di pugan jemau banyak diau adau di situ. 5:14 La udim itu Yesus betemu ngan jemau tadi di Ghuma Allah ngan bekatau ngan diau, "Mbak kini dighi la ghadu. Jangan dighi mbuat dusau agi, supayau dighi jangan ngalami setu diau lebia pansan." 5:15 Mangku jemautu pegi nceritauka ngan tuau-tuau jemau Yahudi, bansau jemau diau meghaduinyautu Yesus. 5:16 Itula sebapau tuau-tuau jemau Yahudi mulai meluatka Yesus, karnau Diau meghadui jemau masau aghi Sabat. 5:17 Yesus ngiciak ngan ughangtu, katauNyau, "BapakKu maju nulung jemau enggut mbak kini, mangku Aku pulau nulungi jemau." 5:18 Karnau kici'anNyautu tuau-tuau jemau Yahudi tamba beusaha endak mbunua Yesus. Ughangtu endak mbunua Yesus ukan ajau, karnau Diau melanggar adat lembagau aghi Sabat, anyautu pulau karnau Diau ngiciakka, bansau Allah itu Bapa'Au. Amun luak itu, Diau nyamauka diriAu ngan Allah. 5:19 Mangku Yesus ngiciak agi ngan ughangtu, katauNyau, "Nyela nian kici'anKu ini: Anak nidau pacak ngerjauka tuapau-apau ngan kenda'Au sendighi. Diau ngerjauka ajau setu diau dikina'Au diau dikerjauka Bapak, karnau setu diau dikerjauka Bapak, itula pulau dikerjauka Ana'Au. 5:20 Bapak nyayangi Ana'Au. Karnau itu Diau nunjuakka ngan Diau gegalaunyau diau dikerjaukaNyau. Diau ka nunjuakka ngan Diau agi kerjau diau lebia penting, mangku kapu dighi kemangan. 5:21 Karnau luak Bapak ngidupka jemau mati, mangku dienjuakkaNyau idup empai, luak itula pulau Anak ngenjuakka idup ngan jemau diau endak Anak enjuakka idup. 5:22 Bapak nidau ngadili sughang kia. Kuasau ngadili la dienjuakkaNyau galau ngan Ana'Au, 5:23 mangku Anak diregaui gegalau jemau luak Bapak diregaui. Jemau diau nidau meregaui Anak itu, jemautu pulau nidau meregaui Bapak diau ngajung Ana'Au. 5:24 Kici'anKu ini benagh: Jemau diau ndengagh ngan nuruti kici'anKu, mangku percayau ngan Allah diau ngajung Aku, jemautu la ngempu idup empai selelamaunyau. Diau nidau ka diukum. Diau la ngalia jak di mati ke idup. 5:25 Percayaula, masaunyau ka sampai, mbak kini la sampai, jemau mati ka ndengagh suarau Anak Allah, mangku jemau diau ndengaghkanyau ka idup. 5:26 Karnau luak Bapak adau kuasau ngidupka, luak itula pulau Diau ngenjuakka ngan Ana'Au kuasau ngidupka. 5:27 Mangku Diau pulau la ngenjuakka ngan Diau kuasau ngadili, karnau Diautu Anak Manusiau. 5:28 Jangan kapu dighi kepagauan ngan kici'anKu tadi. Masaunyau ka sampai gegalau jemau mati ka ndengaghka suarauNyau, 5:29 mangku ngeluagh jak di kuburan. Jemau diau la bebuat iluak ka ngeluagh, mangku bulia idup empai. Anyautu jemau diau bebuat ja'at ka ngeluagh nerimau ukuman." 5:30 "Akuni nidau pacak ngerjauka tuapau-apau nurut kendakKu sendighi. Aku ngadili nurut setu diau la Kudengagh. Mangku keputusanKu benagh, karnau Aku nidau nuruti kendakKu sendighi, tapitu kendak Allah diau ngajung Aku. 5:31 Amun Aku ngiciakka diri Aku, kici'an itu nidau bediau buktiau. 5:32 Adau jemau lain diau ngiciakka Aku. Aku keruan kici'annyautu benagh. 5:33 Kapu dighi la ngajung jemau njenguak Yuhanis, mangku Yuhanis la ngiciakka Aku setu diau benagh. 5:34 Aku ngiciakka titu, ukan karnau Akuni endak tandau jak di jemau, anyautu supayau kapu dighi diselamatka. 5:35 Yuhanis luak lampu diau maghak ngan besinagh, anyautu kapu dighi riang ngan cayautu jerang ajau. 5:36 Anyautu Akuni adau tandau bukti lain pulau, pentingla diau sangkan kici'an Yuhanistu. Setu diau la dienjuakka Bapak ngan setu diau Kukerjauka mbak kini nyatauka Aku diajung Bapak. 5:37 Bapak la ngajung Aku. Diautu pulau nceritauka sapau Akuni. Kapu dighi lum kekela ndengaghka suarauNyau, lum pulau kekela nginak rupauNyau, 5:38 mangku kici'anNyau nidau netap di ati kapu dighi, karnau kapu dighi nidau percayau ngan Ana'Au diau diajungAu. 5:39 Kapu dighi melajaghi Kitab Injil, sangkauan kapu dighi carau inila bulia idup empai selelamaunyau. Injiltu nceritauka Aku, 5:40 anyautu kapu dighi enggup datang njenguak Aku, mangku bulia idup itu. 5:41 Aku ukan ndalak puji ngan jemau. 5:42 Aku keruan kapu dighi, Aku keruan kapu dighi nidau nyayangi Allah dalam ati. 5:43 Akuni datang dalam namau BapakKu, mangku kapu dighi enggup nerimau Aku. Amun adau jemau lain datang dalam namaunyau sendighi, kapu dighi endak nerimaunyau. 5:44 Kapu dighi ndalak puji jak di sughang ngan diau lain, nidau beusaha ndalak puji jak di Allah diau Esa. Luak manau kapu dighi pacak percayau? 5:45 Jangan kapu dighi sangkau Aku ka nyalaka kapu dighi di adapan Bapak. Diau nyalaka kapu dighi itu Musa diau kapu dighi aghapka. 5:46 Amun kapu dighi percayau nian ngan Musa, cengki kapu dighi percayau pulau ngan Aku, karnau diau ngiciakka Aku. 5:47 Kapu dighi nidau percayau ngan setu diau ditulisau, luak manau kapu dighi endak percayau ngan setu diau Kukiciakka?"

Yuhanis 6

6:1 La udim itu Yesus pegi nyembeghang Danau Galilia diau dikiciakka pulau Danau Tiberias. 6:2 Jemau banyak ngikut Diau, karnau ughangtu la nginak tandau-tandau diau dikerjaukaNyau ngan meghadui jemau buidapan. 6:3 Yesus nayiak ke bukit mangku duduak di situ ngan anak-buaHau. 6:4 Masau itu laka Paska, aghi rerayau jemau Yahudi. 6:5 Yesus nginak jemau banyak nianan datang njenguak Diau, mangku ngiciak ngan Pilipus, katauNyau, "Di manau kitau mbeli makanan, mangku jemau banyak ini pacak makan?" 6:6 Yesus ngiciak luak itu endak nguji Pilipus, karnau Diau la keruan setu diau endak dibuatAu. 6:7 Pilipus nimbal, kataunyau, "Makanan diau regau duau ratus ribu rupiah, empuak diagiaka dikit sughang lum kila ka cukup." 6:8 Mangku Anderias, ading Simun Pitrus, sughang jak di anak-buaHau, bekatau ngan Diau, 6:9 "Di sini adau sughang budak keciak diau mbatak limau bua ruti jak di njelai ngan duau ikuak ikan, anyautu tuapau gunaunyau batan endak jemau sebanyak ini?" 6:10 Katau Yesus, "Ajungla jemau banyak ini duduak!" Di situ banyak ghumput, mangku duduak jemau banyaktu, jemau lanang adau limau ribu ughang. 6:11 Diau la duduak galau, Yesus ngambiak ruti itu, bedu'a beterimau-kasia, mangku diagiakaNyau ngan jemau banyak itu. Luak itula pulau dibuatAu ngan ikan tadi, mangku ughangtu makan enggut kenyang. 6:12 Jemau la kenyang galau, mangku Yesus ngajung anak-buaHau, katauNyau, "Lungguakkala tigha ruti tadi, mangku jangan adau diau mbuang!" 6:13 Mangku ughangtu melungguakka duau belas kinjagh penua tigha makanan tadi jak di limau bua ruti diau la dimakan jemau banyaktu. 6:14 Jemau banyaktu nginak tandau diau diadauka Yesus tadi mangku bekatau, "Nyela, Diaunila Nabi diau diaghapka ka datang ke deniau." 6:15 Yesus keruan ughangtu endak datang endak masau Diau njadi rajau. Karnau itu Diau pegi sughang nyemuni ke gunung. 6:16 Aghitu la sangkup malam, mangku anak-bua Yesus pegi ke danau. Ughangtu nayiak perawu endak nyembeghangi danautu 6:17 endak ke Kapernaum. Aghi la keleman, anyautu Yesus lum kila datang njenguak ughangtu. 6:18 Mangku adau umbak besak karnau angin nyaghu. 6:19 La bedayung limau enam kilu ughangtu nginak Yesus bejalan di pucuak ayiak masighi perawutu, mangku ughangtu takut kematila. 6:20 Yesus ngiciak ngan ughangtu, "Jangan penakut! Ini Aku!" 6:21 Ughangtu riang nerimau Yesus dalam perawu, mangku masau itu pulau perawutu sampai ke bada diau dijenguak. 6:22 Pagi aghiau jemau banyak diau masia adau di sebeghang danautu nyadari, tadi gi adau sebua perawu di situ. Ughangtu keruan anak-bua Yesus pegi ngan perawutu, anyautu Yesus nidau ngikut. 6:23 Mangku adau perawu-perawu lainau datang jak di Tiberias nyunggut pasigh bada jemau banyak makan ruti tadi, udim Tuhan beterimau-kasia. 6:24 Ughangtu la nginak, bansau Yesus ngan anak-buaHau nidau bediau agi guak itu, ughangtu pulau nayiak perawu pegi ke Kapernaum endak ndala'i Yesus. 6:25 Jemau banyaktu la betemu ngan Yesus di beghang danautu, ughangtu betanyau ngan Diau, "Kebilau Dighi sampai di sini?" 6:26 Yesus nimbal, "Ngenian, kapu dighi ndala'i Aku, ukan karnau la ngerti tandau-tandau diau Kukerjauka, tapitu karnau kapu dighi la makan ruti enggut kenyang. 6:27 Jangan bekerjau endak ngerjauka makanan diau ka busuak. Bekerjaula ajau endak makanan diau nidau ka busuak ngan ngenjuakka idup empai selelamaunyau. Makanantu ka dienjuakka Anak Manusiau ngan kapu dighi, karnau Diautu la ditetapka Allah Bapak." 6:28 Mangku ughangtu betanyau ngan Diau, "Tuapau diau mesti kami kerjauka, mangku kami ngerjauka kendak Allah?" 6:29 Yesus nimbal, "Inila diau dikenda'i Allah ngan kapu dighi: Percayaula ngan Aku diau diajung Allah." 6:30 "Amun luak itu," katau ughangtu, "Tuapau buktiau diau Dighi kerjauka, mangku kami pacak ngina'au ngan percayau ngan Dighi? Tuapau diau ka Dighi kerjauka? 6:31 Niniak puyang kami makan makanan Mana di padang bungin, luak ditulis dalam Injil: 'Ughangtu dienju'i makanan jak di sergau.' " 6:32 Mangku Yesus ngiciak ngan ughangtu, katauNyau, "KatauKu ini benagh: Ukan Musa diau ngenju'i kapu dighi makanan jak di sergau, anyautu BapakKutu diau ngenju'i kapu dighi makanan diau ngenianau jak di sergau. 6:33 Karnau makanan diau jak di Allahtu makanan diau tughun jak di sergau diau ngenjuakka idup ngan deniauni." 6:34 Mangku katau ughangtu, "Enju'ila kami makanan itu idang aghi!" 6:35 Katau Yesus, "Akunila makanan diau ngenjuakka iduptu. Jemau diau datang njenguak Aku nidau ka lapagh agi, mangku jemau diau percayau ngan Aku nidau ka aus agi. 6:36 Benagh luak diau la Kukiciakka ngan kapu dighi: Empuak kapu dighi la nginak Aku, kapu dighi nidau kila percayau. 6:37 Gegalau jemau diau dienjuakka Bapak ngan Aku ka datang njenguak Aku, mangku jemau diau njenguak Aku, cetau nidau ka Kutulak. 6:38 Karnau Aku datang jak di sergau ukan batan endak ngerjauka kendakKunila, tapitu batan endak ngerjauka kendak Allah diau ngajung Aku. 6:39 Inila kendak Allah diau ngajung Aku: Supayau jak di gegalau jemau diau la dienjuakkaNyau ngan Aku sughang kia nidau ka lengit, tapitu ughangtu Kuidupka masau aghi kiamat. 6:40 Nyela, inila kendak BapakKu: Supayau gegalau jemau diau nginak Ana'Au ngan percayau ngan Diau bulia idup empai selelamaunyau, mangku Akunila ngidupkanyau masau aghi kiamat." 6:41 Mangku jemau Yahudi mulai bemumut mumuti Yesus, karnau Diau ngiciakka, "Akunila makanan diau datang jak di sergau." 6:42 Ughangtu bekatau, "Ukanau Diauni Yesus, anak Yusup? Kitau keruan pejadiAu! Ngapau Diau beghani ngiciakka Diau datang jak di sergau?" 6:43 Katau Yesus, "Jangan agi kapu dighi bemumut! 6:44 Nidau sughang kia pacak datang njenguak Aku, amun ukan BapakKu diau ngajung Aku mbata'inyau njenguak Aku. Mangku jemau diau njenguak Aku ka Kuidupka masau aghi kiamat. 6:45 Dalam kitab nabi-nabi ditulis luak ini: 'Gegalau jemau ka diajagh Allah.' Mangku jemau diau ndengagh Bapak ngan belajagh jak di Diau, jemautu ka datang njenguak Aku. 6:46 Aku nidau ngatauka, adau jemau diau la nginak Bapak lain jak di jemau diau datang jak di Allah. Diautu la nginak Bapak. 6:47 Ingatkala, jemau diau percayau bulia idup empai selelamaunyau. 6:48 Akunila makanan diau ngenjuakka idup. 6:49 Empuak niniak puyang kapu dighi makan makanan Mana di padang bungin, mangku ughangtu masia mati. 6:50 Anyautu nidau luak itu makanan diau jak di sergau. Jemau diau makan makanantu cetau nidau ka mati. 6:51 Akunila makanan diau ngenjuakka idup diau datang jak di sergau. Jemau diau makan makanan ini ka idup selelamaunyau. Makanan diau ka Kuenjuakka nyela dagingKu diau ka Kuenjuakka batan ngenjuakka idup ngan deniauni." 6:52 Ndengagh titu jemau Yahudi bebala sughang ngan diau lain, kataunyau, "Luak manau jemau ini pacak ngenjuakka dagingAu ngan kitau batan makanan?" 6:53 Mangku Yesus ngiciak ngan ughangtu, "Percayaula nian: Amun kapu dighi nidau makan daging Anak Manusiau ngan minum daghaHau, kapu dighi nidau ka pacak idup ngenianau. 6:54 Jemau diau makan dagingKu ngan minum daghaKu diautula bulia idup empai selelamaunyau, mangku Aku ka ngidupkanyau masau aghi kiamat. 6:55 DagingKu makanan nian, daghaKu minuman nian. 6:56 Jemau diau makan dagingKu ngan minum daghaKu, diautu seghundak ngan Aku, Aku ngan diau. 6:57 Bapak diau ngenjuakka iduptu ngajung Aku, mangku Aku pulau idup karnau Bapak. Luak itu pulau jemau diau makan dagingKu ka idup karnau Aku. 6:58 Inila makanan diau jak di sergau, ukanau luluak makanan diau dimakan niniak puyang kapu dighi, mangku kesudimannyau masia mati. Jemau diau makan makanan tadi ka idup selelamaunyau." 6:59 Gegalaunyautu dikiciakka Yesus, masau Diau ngajagh di ghuma sembayang di Kapernaum. 6:60 La udim ndengagh gegalau kici'an Yesustu tadi, banyak jak di pengikut Yesus bekatau, "Kici'an ini segau igau! Sapau ka pacak nerimaunyau?" 6:61 Yesus keruan, bansau ughangtu bejijia karnau kici'anNyautu, mangku Diau bekatau, "Apu kapu dighi purik karnau kici'anKu tadi? 6:62 Mangku luak manau, amun kapu dighi nginak Anak Manusiau baliak nayiak ke bada asalAu? 6:63 Rua Allahtu diau ngenjuakka idup. Kekuatan manusiau nidau bediau gunaunyau. Kici'anKu ini diau Kukiciakka ngan kapu dighi asalau jak di Rua Allah diau ngenjuakka idup. 6:64 Anyautu adau jak di kapu dighi diau nidau percayau." Yesus keruan jak di senitu jemau diau enggup percayau ngan jemau diau njualkaNyau. 6:65 Mangku Yesus bekatau agi, "Itula sebapau la Kukatauka ngan kapu dighi, nidau bediau sughang kia diau pacak datang njenguak Aku, amun nidau ditulung Bapak." 6:66 Mulai masau itu banyak jemau ninggalka Diau, enggup agi ngikutiNyau. 6:67 Mangku Yesus betanyau ngan duau belas anak-buaHau, katauNyau, "Luak apau kamuni? Apu kamu endak pegi pulau ninggalka Aku?" 6:68 Katau Simun Pitrus, "Tuhan, amun kami pegi, kami njenguak sapau? Kici'an Dighi ajau diau ngenju'i idup empai selelamaunyau! 6:69 Kami la percayau ngan la keruan, Dighitula ajungan Allah diau suci." 6:70 Yesus nimbal, "Apu ukan Akuni diau milia kamu duau belas ughangni? Anyautu sughang jak di kamutu jemau ja'at." 6:71 Diau dikiciakka Yesustu Yudas, anak Simun Iskariut. Karnau empuak Yudas temasuak sughang jak di duau belas anak-buaHautu, diaula jemaunyau diau njualka Yesus.

Yuhanis 7

7:1 La udim itu Yesus pegi ngidari Galilia. Diau enggup ke Yudia, karnau tuau-tuau jemau Yahudi di situ merencanauka endak mbunua Diau. 7:2 Masau itu laka masau aghi rerayau Punduk, aghi rerayau jemau Yahudi. 7:3 Mangku ading-beghadingAu ngiciak ngan Yesus, kataunyau, "Pegila jak di sini ke Yudia, mangku pengikut Dighi di situ nginak pulau setu diau Dighi kerjauka. 7:4 Karnau nidau bediau jemau diau mbunika setu diau dikerjaukanyau, amun diau endak, supayau jemau keruan sapau diau. Amun Dighi ngerjauka kerjau luak itu, gegalau deniau mesti keruan." 7:5 Karnau ading-beghadingAu ajau nidau percayau ngan Diau. 7:6 Katau Yesus ngan ughangtu, "MasauKu lum sampai. Amun kamu pacak kebilau ajau. 7:7 Jemau di deniauni nidau ka adau meluatka kamu. Anyautu Aku diau diluatka jemau, karnau Aku maju ngiciakka ngan jemau, bansau peremba'au ja'at. 7:8 Pegila kamu ajau ke reramian itu. Akuni lum pegi, karnau lum masaunyau batan endak Aku." 7:9 Luak itula kici'an Yesus ngan ading-beghadingAu, mangku Diau mendam di Galilia. 7:10 AdingbeghadingAu la bejalan ke jamuan aghi rerayau. Mangku ngan diam-diam Yesus pegi pulau ke situ, nidau keruan ngan jemau. 7:11 Selamau aghi rerayautu tuau-tuau jemau Yahudi ndala'i Yesus ngan betanyau, "Di manau jemau itu?" 7:12 Mangku banyak jemau bebisi'an. Adau diau ngiciakka, "Diautu jemau iluak." Adau pulau diau ngiciakka, "Nidau, Diautu nyesatka jemau banyak." 7:13 Anyautu nidau bediau jemau diau beghani ngiciakka Diau ngan teterangan, karnau takut ngan tuau-tuau jemau Yahudi. 7:14 La mbelahan masau aghi rerayautu, Yesus masuak ke Ghuma Allah, mangku mulai ngajagh. 7:15 Tuau-tuau jemau Yahudi kemangan ngan bekatau, "Luak manau jemau ini pacak ngeruani Kitab Suci awuak endiak sekul?" 7:16 Yesus nimbal, "Diau Kuajaghkani ukanau ajaghanKu, anyautu ajaghan Allah diau ngajung Aku. 7:17 Jemau diau endak nuruti kendak Allah ka keruan, apu ajaghanKuni asalau jak di Allah, apu jak di Aku. 7:18 Jemau diau ngajaghka ajaghannyau sendighi mintak diregaui batan endak diriau sendighi, anyautu jemau diau ndalak pujian batan endak jemau diau ngajungau diautu benagh, nidau endak nian mbu'ung. 7:19 Ukanau Musa la ngenjuakka ukum Taurat ngan kapu dighi? Anyautu nidau bediau sughang kia diau nuruti ukum Taurat itu. Ngapau kapu dighi endak mbunua Aku?" 7:20 Ughang banyaktu bekatau, "Kaba gilau. Sapau endak mbunua Kaba?" 7:21 Mangku Yesus nimbal, katauNyau, "Empai semecam ajau diau Kukerjauka aghi Sabat, kapu dighi la kemangan galau. 7:22 Musa netapka peraturan besunat, mangku kapu dighi nyunatka anak aghi Sabat. Sebenaghau sunattu ukan asalau jak di Musa, tapitu jak di niniak puyang antak ka Musa. 7:23 Kapu dighi nyunatka masau aghi Sabat, mangku jangan melanggar ukum Musa. Amun luak itu, ngapau kapu dighi mara ngan Aku, karnau Aku meghadui gegalau badan sughang jemau masau aghi Sabat? 7:24 Janganla ngadili nurut setu diau kina'an, tapitu adilila ngan carau diau benagh." 7:25 Adau jemau Yerusalim diau betanyau, kataunyau, "Ukanau Diaunila jemau diau didala'i endak dibunua? 7:26 Na, itu Diau. Diau ngiciak ngan sekenda'Au ajau di mukau jemau banyak, nidau bediau jemau diau ngiciakka tuapau-apau ngan Diau. Apu tuau-tuau kitau la nyadari, bansau Diaunila Keristus, Rajau Penyelamat? 7:27 Amun Keristus datang, nidau bediau jemau diau keruan jak di manau asalau, anyautu kitau keruan jak di manau asal jemau ini." 7:28 Masau Yesus ngajagh di Ghuma Allah, Diau ngiciak ngan suarau bias, katauNyau, "Nyela, kapu dighi keruan sapau Akuni ngan jak di manau asalKu. Aku ukan datang ngan kendak Akunila. Aku diajung Allah diau benagh. Anyautu kapu dighi nidau keruan Diau. 7:29 Akuni keruan Diau, karnau asalKu jak di Allah, Diautu ngajung Aku." 7:30 Masau itu ughangtu endak nangkap Yesus, anyautu nidau bediau jemau diau beghani ngecakka Diau, karnau lum masauNyau. 7:31 Jak di jemau banyaktu banyak diau percayau ngan Diau. Ughangtu bekatau, "Amun Keristus datang, cengki nidau ka banyak tandau diau dikerjaukaNyau jak di diau dikerjauka jemau ini." 7:32 Jemau jak di rumbungan jemau Parisi ndengagh jemau banyaktu mbisiakka Yesus luak itu. Karnau itu ughangtu ngan imam-imam bepangkat tinggi ngajung penjagau Ghuma Allah pegi nangkap Yesus. 7:33 Yesus ngiciak ngan jemau banyak di Ghuma Allah, katauNyau, "Tigha jerang agi Aku di guak kapu dighi. Udim itu Aku ka pegi njenguak diau ngajung Aku. 7:34 Kapu dighi ka ndala'i Aku, anyautu nidau ka betemu ngan Aku, karnau kapu dighi nidau pacak pegi ke bada di manau Aku adau." 7:35 Mangku tuau-tuau jemau Yahudi sangi tanyaui, kataunyau, "Jemau ini endak pegi ke manau, mangku kitau nidau pacak betemu ngan Diau? Apu Diau endak pegi njenguak jemau diau merantau bada jemau Yunani endak ngajagh jemau Yunani? 7:36 Tuapau retiau kici'anNyauni: 'Kapu dighi ka ndala'i Aku, anyautu nidau ka betemu ngan Aku,' lagi pulau: 'Kapu dighi nidau pacak pegi ke bada di manau Aku adau'?" 7:37 Aghi pengabisan masau rerayautu, aghi diau penting sekali, Yesus betegak dalam Ghuma Allah mangku ngiciak ngan suarau bias, katauNyau, "Jemau diau aus, jenguakla Aku mangku minumla! 7:38 Jemau diau percayau ngan Aku dikiciakka dalam Injil luak ini: Jak di dalam atiau ka adau matau-ayiak melilia diau ka ngenjuakka idup." 7:39 Kici'an Yesus tadi ngiciakka Rua Allah diau ka dienjuakkaNyau ngan jemau diau percayau ngan Diau. Masau itu Rua Allah lum dienjuakka, karnau Yesus lum dinayiakka ngan diagungka. 7:40 Jemau banyaktu ndengagh kici'an Yesustu, mangku adau diau ngiciak, "Jemau ini cetau Nabi diau ka datang." 7:41 Diau lain bekatau, "Diauni Keristus, Rajau Penyelamattu." Anyautu adau pulau diau bekatau, "Baghia Keristus datang jak di Galilia! 7:42 Dalam Injil ditulis, bansau Keristustu pengadau Rajau Daud, asalau jak di Betlihim, dusun Daud senitu." 7:43 Mangku jemau banyaktu mulai bebala karnau Yesus. 7:44 Adau jemau diau endak nangkap Diau, anyautu nidau sughang kia beghani ngecakkaNyau. 7:45 Mangku penjagau Ghuma Allah diau diajung nangkap Yesus ngelipat agi. Imam-imam bepangkat tinggi ngan jemau Parisitu betanyau ngan ughangtu, kataunyau, "Ngapau kamu nidau mbata'i Diau ke sini?" 7:46 Katau penjagautu, "Ui, lum kekela adau jemau ngiciak luak Diautu!" 7:47 "Apu kamu pulau la disesatka jemau itu?" katau jemau Parisi tadi. 7:48 "Apu adau jak di tuau-tuau kitau ngan jemau Parisi diau percayau ngan Diau? 7:49 Jemau banyaktu nidau keruan ukum Taurat. Ughangtu la meghakau!" 7:50 Nikudimus, sughang jak di jemau Parisi tadi diau senitu njenguak Yesus, ngiciak ngan jemau Parisi lainau, kataunyau, 7:51 "Nurut ukum Taurat kitau sughang jemau nidau bulia diukum, amun pekaraunyau lum keruan ngan peremba'au lum diperisau." 7:52 "Apu kaba pulau jak di Galilia?" katau ughangtu. "Perisau ajaula Injil. Kaba ka keruan, nidau bediau nabi diau asalau jak di Galilia." 7:53 Udim itu ughangtu baliak galau.

Yuhanis 8

8:1 Mangku Yesus pegi ke bukit Saitun. 8:2 Pagi di aghiau akap nian Yesus pegi ke Ghuma Allah, banyak jemau datang njenguak Diau. Yesus duduak mangku mulai ngajagh. 8:3 Masau itu guru-guru ukum Taurat ngan jemau Parisi njenguak Yesus mbatak sughang jemau tinau diau kedapatan menaugawia. Ughangtu ngajung jemau tinautu betegak di tetengaan, 8:4 mangku bekatau ngan Yesus, "Pak Guru, jemau tinau ini kedapatan dang bebuat ja'at. 8:5 Dalam ukum Taurat Musa ngiciakka, jemau tinau luak ini mesti disipati ngan batu enggut mati. Luak apau pendapat kaba?" 8:6 Ughangtu betanyau luak ini endak ncubau nyalaka Yesus, mangku ughangtu pacak nyalakaNyau. Anyautu Yesus nunduak ajau ngan nuliska jaghiAu ke tana. 8:7 Karnau ughangtu maju betanyau, Yesus betegak sampai bekatau, "Jemau diau nidau bedusau jak di kapu dighi, gila diau dulu sekali nyipatka batu ke tinau ini." 8:8 Mangku Yesus nunduak ngulang nulis agi di tana. 8:9 La udim ndengagh Yesus ngiciak luak itu, ughangtu pegi ninggalka bada itu sejagh sughang mulai ngan diau tuau. Udim-udimau tigha Yesus sughang di situ ngan jemau tinau tadi diau masia betegak di badahau. 8:10 Yesus betegak ngiciak ngan tinautu, "Ui, kaba, di manau gegalau jemau tadi? Nidau bediau diau ngukum kaba?" 8:11 "Nidau." katau tinautu, "Iluakla," katau Yesus, "Aku pulau nidau ngukum kaba. Mbak kini pegila, jangan mbuat dusau agi." 8:12 Mangku Yesus bekiciak agi ngan jemau banyaktu, katauNyau, "Akunila terang deniau. Jemau diau ngikut Aku, nidau ka bejalan di keleman, anyautu diau la bulia terang diau ngenjuakka idup." 8:13 Katau jemau Parisi, "Kabani ngiciakka Kaba itula. Kici'an Kaba nidau benagh." 8:14 Yesus nimbal, "Empuak Aku ngiciakka diri Aku, kici'anKu itu benagh, karnau Aku keruan asalKu jak di manau ngan tujuanKu ke manau. Kapu dighi nidau keruan asalKu jak di manau ngan tujuanKu ke manau. 8:15 Kapu dighi ngadili jemau ngan carau manusiau, Akuni nidau ngadili sughang kia. 8:16 Anyautu misalau Aku ngadili jemau, keputusanKutu benagh, karnau Aku ukan sughang. Bapak diau ngajung Aku adau guak Aku. 8:17 Dalam ukum Taurat ditulis luak ini: Kici'an diau benagh kici'an jak di duau ughang. 8:18 Akuni ngiciakka diri Aku, mangku Bapak diau ngajung Aku ngiciakka Aku pulau." 8:19 "Bak Kaba di manau?" katau ughangtu. Yesus nimbal, "Kapu dighi nidau nian keruan sapau Aku ngan BapakKu. Amun kapu dighi keruan sapau Aku, cengki kapu dighi keruan pulau sapau BapakKu." 8:20 Gegalaunyautu dikiciakka Yesus, masau Diau ngajagh di Ghuma Allah pasigh kas pesembahan. Anyautu nidau bediau sughang kia diau nangkap Yesus, karnau masauNyau lum sampai. 8:21 Mangku Yesus ngiciak agi ngan jemau banyak, katauNyau, "Aku ka pegi. Kapu dighi ka ndala'i Aku, anyautu kapu dighi ka mati dalam dusau. Ke bada Aku pegi kapu dighi nidau pacak datang." 8:22 Katau jemau Yahuditu, "Diau bekatau, kami nidau pacak datang ke manau Diau pegi. Apu Diau endak mbunua diriAu?" 8:23 Yesus bekatau agi ngan ughangtu, "Asal kapu dighi itu jak di bawa, asal Akuni jak di atas. Kapu dighi jak di deniauni, Akuni ukan jak di deniauni. 8:24 Itula sebapau Aku bekatau ngan kapu dighi, bansau kapu dighi ka mati dalam dusau kapu dighi. Cetau kapu dighi ka mati dalam dusau kapu dighi, amun nidau percayau, Akunila Diau." 8:25 Mangku ughangtu betanyau, "Kabani sapau?" "Tuapau gunaunyau agi Aku ngiciak ngan kapu dighitu?" katau Yesus. 8:26 "Gi banyak diau endak Kukiciakka ngan ngadili kapu dighi. Diau ngajung Aku pacak dipercayaui, mangku setu diau Kudengagh jak di Diau, itula diau Kukiciakka ngan deniau." 8:27 Ughangtu nidau terti, bansau Yesus dang ngiciakka Bapak ngan ughangtu. 8:28 Itula sebapau Yesus bekatau agi, "Amun kapu dighi la nayiakka Anak Manusiau, mangku kapu dighi ka keruan, bansau Akunila Diautu, nidau ngerjauka tuapau-apau jak di diriKu, anyautu Aku ngiciakka ajau setu diau diajaghka Bapak ngan Aku. 8:29 Diau ngajung Aku nyertaui Aku. Diau nidau kekela ngenangka Aku sughang, karnau Aku maju ngerjauka setu diau melemakka atiAu." 8:30 La udim Yesus ngiciakka gegalaunyautu, banyak jemau percayau ngan Diau. 8:31 Mangku Yesus ngiciak ngan jemau Yahudi diau la percayau ngan Diau, katauNyau, "Amun kapu dighi idup nuruti ajaghanKu, kapu dighi njadi anak-buaKu nian. 8:32 Kapu dighi ka ngeruani Allah diau benagh, mangku Diau ka mbibaska kapu dighi." 8:33 "Kamini pengadau Abraham," katau ughangtu, "Lum kekela kami njadi budak belian ngan jemau. Ngapau Kaba ngiciakka, kapu dighi ka dibibaska?" 8:34 Yesus bekatau ngan ughangtu, "Percayaula katauKu ini: Jemau diau bebuat dusau jemautu budak dusau. 8:35 Sughang budak nidau mendam di ghuma selelamaunyau, anyautu anak maju mendam di ghuma. 8:36 Mangku, amun Anak itu mbibaska kapu dighi, kapu dighi bibas nian." 8:37 "Nyela, Aku keruan, kapu dighini pengadau Abraham. Anyautu kapu dighi endak mbunua Aku, karnau kapu dighi enggup nerimau ajaghanKu. 8:38 Aku ini ngiciakka setu diau la Kukinak di BapakKu. Kapu dighi pulau ngerjauka setu diau la kapu dighi dengaghka jak di bak kapu dighi." 8:39 Ughangtu nimbal, "Bak kami Abraham." Katau Yesus, "Misalau kapu dighi ngenian anak Abraham, cetau kapu dighi ngerjauka setu diau dikerjauka Abrahamtu. 8:40 Akuni ngiciakka ngan kapu dighi setu diau benagh diau Kudengagh jak di Allah, anyautu kapu dighi endak mbunua Aku. Perembak luak itu nidau dikerjauka Abraham. 8:41 Kapu dighi ngerjauka setu diau dikerjauka bak kapu dighitu." Ughangtu nimbal, "Kamini ukanau anak kampang. Bak kami gi sughang, diautu Allah." 8:42 Mangku Yesus bekatau ngan ughangtu, "Amun Allahtu bak kapu dighi, kapu dighi ka nyayangi Aku, karnau asalKu jak di Allah. Aku datang ukan karnau kendakKunila, tapitu Allah ngajung Aku. 8:43 Tuapau sebapau kapu dighi nidau ngerti setu diau Kukiciakka? Karnau kapu dighi enggup nerimau kici'anKu. 8:44 Bak kapu dighi Iblis, mangku kapu dighi endak nuruti kendak bak kapu dighi. Iblistu pembunua manusiau jak di senitu. Diau nidau kekela idup benagh, karnau nidau bediau setu diau benagh di diau. Amun diau mbu'ung, itu biasau, karnau luak itula caraunyau, karnau diau pembu'ung ngan bak gegalau pembu'ung. 8:45 Empuak Akuni ngiciakka setu diau benagh ngan kapu dighi, kapu dighi nidau percayau ngan Aku. 8:46 Sapau jak di kapu dighi beghani ngiciakka Aku bedusau? Mangku amun Aku ngiciakka setu diau benagh, ngapau kapu dighi nidau percayau ngan Aku? 8:47 Jemau diau asalau jak di Allah ndengaghka kici'an Allah, anyautu asal kapu dighi ukan jak di Allah. Itula sebapau kapu dighi enggup ndengaghiNyau." 8:48 Jemau Yahuditu nimbali Yesus, kataunyau, "Nyela katau kami, kaba jemau Samaria diau diarung iblis." 8:49 Yesus nimbal, "Aku nidau diarung iblis. Aku meregaui BapakKu, anyautu kapu dighi nidau meregaui Aku. 8:50 Aku nidau ndalak puji batan endak Aku. Adau Sughang diau beusaha, mangku Aku diregaui. Diau pulau ngadili ngan benagh. 8:51 Ngenian katauKu ini: Jemau diau nuruti kici'anKu nidau ka mati selelamaunyau." 8:52 Jemau Yahuditu bekiciak agi, "Mbak kini kami keruan Kabani diarung iblis nian. Abraham la mati, luak itu pulau gegalau nabi, anyautu Kaba ngiciakka, 'Jemau diau nuruti kici'anKu nidau ka mati selelamaunyau.' 8:53 Amun bak kami Abraham la mati ngan nabi la mati galau, Kabani sapau? Baghia besakla Kaba sangkan Abraham?" 8:54 Yesus nimbal, "Misalau Aku muji diriKu, dikit kiala nidau bediau gunaunyau. Diau muji Aku Bapak diau kapu dighi kiciakka Allah kapu dighi. 8:55 Anyautu kapu dighi nidau keruan Diau, tapitu Aku keruan Diau. Misalau Aku ngiciak, bansau Aku nidau keruan Diau, Aku semegi ngan kapu dighi jemau pembu'ung. Aku keruan Diau, mangku Aku nuruti kici'anNyau. 8:56 Abraham, bak kapu dighi, injiak nianan ka nginak aghi Aku datang, mangku la ngina'au, diau injiak." 8:57 Jemau Yahudi tadi ngiciak ngan Yesus, "Umur Kaba lum bulia limau pulua taun. Baghia Kaba la nginak Abraham?" 8:58 Yesus nimbal, katauNyau, "KatauKu ini benagh: Antak ka Abraham adau, Aku la adau." 8:59 Mangku jemau Yahuditu ngambiak batu endak nyipati Yesus. Anyautu Yesus melengit ninggalka Ghuma Allah.

Yuhanis 9

9:1 Yesus dang ngerayau, Diau nginak sughang jemau diau butau jak di kandungannyau. 9:2 Anak-buaHau betanyau ngan Yesus, kataunyau, "Pak Guru, tuapau sebapau jemau ini butau jak di keciak? Apu ikak dusau diauni, apu ikak dusau pejadiau?" 9:3 Yesus bekatau, "Diauni butau ukan ikak dusaunyau, ukan pulau ikak dusau pejadiau, tapitu supayau kuasau Allah nyatau dalam idupau. 9:4 Selamau aghi siang kitau mesti ngerjauka kerjau Allah diau ngajung Aku. Aghi laka malam, mangku sughang kia nidau pacak mbuat tuapau-apau. 9:5 Selamau Aku di deniau ini, Akunila terang deniau." 9:6 La udim ngiciak luak itu, Yesus beluda ke tana, dikudakkaNyau ayiak liughAutu ngan tana, dikuyutka ke matau jemau butau tadi, 9:7 mangku bekatau ngan diau, "Pegila, bebasuala kaba di kulam Siluam." Siluam retiau "diajung". Mangku jemautu pegi mbasua dayiau, udim itu baliak, mataunyau la nginak. 9:8 Jemau pasigh ghumahau ngan jemau diau rajin nginak diau mintak-mintak senitu bekiciak, "Ukanau diauni jemau diau rajin mintak-mintak?" 9:9 Adau diau ngiciakka, "Nyela, diau." Adau diau ngiciakka, "Ukan, diau cuman luluak jemau itu." Jemau itu ngiciak, "Nyela, akunila diau." 9:10 Ughangtu betanyau, "Luak apau mangku matau kaba pacak nginak?" 9:11 Jemau tadi nimbal, "Jemau diau benamau Yesus mbuat licak dikit, dikuyutkaNyau di matauku, katauNyau, 'Pegila ke kulam Siluam, basuala dayi kaba.' Mangku aku pegi. La udim aku mbasua dayiku, aku pacak nginak." 9:12 Ughangtu betanyau, "Di manau jemau itu?" "Aku endiak keruan agi." katau jemau tadi. 9:13-14 Masau Yesus ngudak tana ngan ayiak liughAu batan endak meghadui matau jemau butau tadi pacak nginak, aghi itu aghi Sabat. Mangku jemau itu dibatak ke jemau Parisi. 9:15 Ughangtu betanyau pulau ngan diau, luak manau diau pacak nginak. Jemautu nimbal, "Diau nguyutka licak ke matauku, aku mbasuhinyau, mangku aku pacak nginak." 9:16 Adau jak di jemau Parisi diau ngiciak, "Nidau ka adau jemau diau ngerjauka ini asalau jak di Allah, karnau diau nidau nuruti adat lembagau aghi Sabat." Adau diau lain ngiciak, "Manau ka adau jemau bedusau ngerjauka tandau luak ini?" Mangku pendapat jemau Parisitu nidau semegi. 9:17 Ughangtu betanyau agi ngan jemau tadi, kataunyau, "Luak manau pendapat kaba ngan jemau diau mbuat kaba nginak?" "Diautu sughang nabi." katau jemau itu. 9:18 Anyautu jemau Yahudi tadi nidau percayau, bansau jemau itu butau sebelumau, mbak kini pacak nginak. Itula sebapau ughangtu ngajung njenguak pejadiau, 9:19 mangku betanyau ngan pejadiautu, "Apu anak kapu dighi nian diauni, diau kapu dighi kiciakka butau jak di keciak? Amun nyela nian, luak apau mangku pacak nginaktu?" 9:20 Pejadiau nimbal, "Nyela, anak kami nian, diau nian butau jak di keciak. 9:21 Anyautu luak manau diau pacak nginak mbak kini, kami nidau keruan. Mangku sapau diau njegilka mataunyautu, kami pulau nidau keruan. Tanyauka ajau ngan diau. Diau la besak, diau pacak ngiciakkanyau." 9:22 Pejadiau ngiciak luak itu karnau takut ngan jemau Yahudi, karnau jemau Yahudi la sepakat, mbak bansau jemau diau ngaku'i Yesustu Rajau Penyelamat nidau bulia agi masuak ghuma sembayang. 9:23 Itula sebapau pejadi jemau itu tadi ngiciakka, "Diau la besak, tanyauka ajau ngan diau." 9:24 Mangku jemau Yahuditu tadi mantau jemau diau senitu butautu sekali agi, ngiciak ngan diau, "Besumpala, kaba ka ngiciakka diau benagh. Kami keruan jemau diau meghadui kaba jemau bedusau." 9:25 "Apu Diau jemau bedusau, apu nidau," katau jemautu, "Aku nidau keruan. Sutiak ajau aku keruan, senitu aku butau, mbak kini aku la nginak." 9:26 Mangku ughangtu ngiciak agi ngan diau, kataunyau, "Tuapau dibuatAu ngan kaba? Luak manau Diau mbuat matau kaba nginak?" 9:27 Timbalau, "La kukiciakka ngan kapu dighi, anyautu kapu dighi nidau ndengaghkanyau. Ngapau kapu dighi endak ndengagh agi. Apu kapu dighi endak njadi pengikutAu pulau?" 9:28 Mangku ughangtu nggelakka diau, kataunyau, "Kabatula pengikutAu, kamini pengikut Musa. 9:29 Kami keruan, Allah ngiciak ngan Musa. Asalau jemau itu kami nidau keruan." 9:30 Jemau itu nimbal, kataunyau, "Luak manau titu? Kapu dighi nidau keruan asalAu jemau itu jak di manau, awuak Diautula mbuat aku pacak nginak? 9:31 Kitau keruan, Allah nidau ndengaghka jemau bedusau, tapitu jemau diau meregaui Allah ngan nuruti kenda'Au didengaghkaNyau. 9:32 Semenjak deniau adau lum kekela tedengagh adau jemau dighadui diau butau jak di keciak. 9:33 Amun asal jemau itu ukan jak di Allah, Diau nidau ka pacak mbuat tuapau-apau." 9:34 Ughangtu nimbal, kataunyau, "Tuapau? Kabani endak ngajagh kami? Kaba diau penua ngan dusau jak di keciak?" Mangku diau diajung kisit jak di ghuma sembayang. 9:35 Yesus la ndengagh, mbak bansau jemau butau tadi la diajung kisit, Diau ndala'i jemautu, mangku bekiciak, "Apu kaba percayau ngan Anak Manusiau?" 9:36 Jemautu nimbal, "Sapau Diautu, Guru? Kiciakkala, mangku aku percayau ngan Diau." 9:37 Katau Yesus, "Kaba la nginak Diau, mangku jemau diau dang ngiciak ngan kaba, nyelala Diau." 9:38 "Aku percayau, Tuhan!" katau jemau tadi, mangku nunduak nyemba Yesus. 9:39 Mangku Yesus ngiciak agi, katauNyau, "Aku datang ke deniau ini batan endak ngadili jemau; mangku jemau diau butau pacak nginak, jemau diau pacak nginak njadi butau." 9:40 Adau jemau Parisi diau ndengagh Yesus ngiciak luak itu tadi, mangku ughangtu betanyau ngan Diau, "Kamini butau pulau?" 9:41 Timbal Yesus, "Misalau kapu dighi butau, kapu dighi nidau bedusau. Anyautu karnau kapu dighi ngiciak, 'Kami nginak', kapu dighi maju dalam dusau."

Yuhanis 10

10:1 "KatauKu ini benagh: Jemau diau masuak sangkaran bebiri nidau jalan duaghau, anyautu nayiak kandang, jemautu pemaling ngan perampuk. 10:2 Jemau diau masuak jalan duaghau diautu tukang sayia bebiri. 10:3 Penunggu sangkaran mbukakka duaghau, mangku tukang sayia masuak. Bebiri ka ndengagh suaraunyau, dipantaunyau bebiriau ngan namaunyau sikuak-sikuak, mangku dibata'inyau keluagh. 10:4 La udim bebiriautu dibata'i keluagh galau, diau bejalan di mukaunyau, mangku bebiri itu ngikut diau, karnau bebiritu kecinauan suaraunyau. 10:5 Jemau lain cetau nidau diikutkanyau. Diau ka larat jak di jemautu, karnau suaraunyau nidau kecinauan ngan diau." 10:6 Yesus ngiciakka cuntau ceritau ini, anyautu jemau Yahudi nidau terti tuapau retiau Diau ngiciakka luak itu. 10:7 Mangku Yesus ngiciak agi, katauNyau, "Keruanila ini: Akuni umpamau duaghau masuak sangkaran bebiri itu. 10:8 Gegalau jemau lain diau datang antak ka Aku, jemautu pemaling ngan perampuk. Bebiri nidau ndengaghka ughangtu. 10:9 Akuni umpamau duaghau. Jemau diau masuak jalan Aku ka selamat, diau masuak ngeluagh mangku bulia makanan. 10:10 Risau datang endak maling, endak mbunua, endak merusak. Akuni datang, supayau kapu dighi bulia idup, idup sempernau ngan gegalaunyau adau. 10:11 Akunila tukang sayia bebiri diau iluak lagi ngarap. Tukang sayia bebiri diau iluak ngenjuakka nyawaunyau batan endak bebiriau. 10:12 Jemau upahan diau ukan tukang sayia ngan ukan ngempu bebiritu nginak setuau datang, ditinggalkanyau bebiritu, mangku larat. Mangku setuautu nerengkam sampai nceghaika bebiritu. 10:13 Jemau tadi larat, karnau diau jemau upahan, nidau nyanauka bebiritu. 10:14 Akunila tukang sayia bebiri diau iluak lagi ngarap. Aku keruan bebiriKu, bebiriKu keruan Aku. 10:15 Semegi luak Bapak keruan Aku, Aku keruan Bapak. Mangku Aku ngenjuakka nyawauKu batan endak bebiriKu. 10:16 Masia adau agi bebiri lain ngan Aku diau nidau masuak sangkaran ini. Bebiri itu mesti Kubatak pulau, mangku bebiritu ka ndengaghka suarauKu. Gegalau bebiritu ka njadi seghundak ngan sughang tukang sayia. 10:17 Bapak nyayangi Aku, karnau Aku ngenjuakka nyawauKu, mangku Aku ka nerimaunyau agi. 10:18 Sughang kia nidau pacak ngambi'au jak di Aku. Aku ngenjuakkanyau ngan kesukauan atiKu. Aku bekuasau ngenjuakkanyau ngan bekuasau ngambi'au agi. Kuasau itu Kuterimau jak di BapakKu." 10:19 Mangku jemau Yahudi mulai bebala, karnau kici'an Yesus itu. 10:20 Banyak jemau ngiciakka, "Diauni diarung iblis, Diau gilau. Ngapau kamu ndengaghka Diau?" 10:21 Adau pulau diau lain ngiciakka, "Itu ukanau kici'an jemau gilau. Iblis nidau pacak meghadui jemau butau!" 10:22 Nidau lamau udim itu jemau Yahudi meringati aghi rerayau nyemak Ghuma Allah. Masau itu pangkau dingin. 10:23 Yesus ngenginak di berendau Suliman di Ghuma Allah. 10:24 Mangku jemau Yahudi nyeghundak guak Yesus ngan bekatau, "Lamau beghapau agi Kaba ngenangka kami asau-asauan. Amun Kabani Mesias, Rajau Penyelamat itu, kiciakkala ngan sebenaghau." 10:25 Katau Yesus, "La Kukiciakka ngan kapu dighi, anyautu kapu dighi enggup percayau. Kerjau diau Kukerjauka atas namau BapakKu mbuktika sapau Aku. 10:26 Kapu dighini nidau percayau, karnau kapu dighi nidau temasuak bilangan bebiriKu. 10:27 Gegalau bebiriKu ndengaghka suarauKu. Aku keruan diau, mangku gegalaunyau ngikut Aku. 10:28 Aku ngenju'i diau idup selelamaunyau, mangku bebiritu nidau ka benasau enggut selelamaunyau. Nidau bediau sughang kia diau ka merebuti diau jak di sayianKu. 10:29 BapakKu la ngenjuakkanyau ngan Aku. Bekuasaula Diautu sangkan sapau kila. Mangku sughang kia nidau pacak merebutinyau jak di tangan BapakKu. 10:30 Aku ngan Bapak gi sughang." 10:31 Mangku jemau Yahudi ngambiak batu agi endak nyipati Yesus. 10:32 Yesus ngiciak ngan ughangtu, katauNyau, "La banyak kerjau iluak jak di BapakKu diau Kukinakka ngan kapu dighi, mangku karnau perembak manau kapu dighi endak nyipati Aku?" 10:33 Jemau Yahudi itu nimbal, "Ukan karnau perembak kaba diau iluak itu kami endak nyipati kaba ngan batu, tapitu karnau kaba nggelakka Allah. Kabani sughang jemau endak njadika diri Kaba Allah." 10:34 Katau Yesus, "Ukanau ditulis dalam Kitab Taurat kapu dighi, 'Allah bekatau: Kamula allah'? 10:35 Kitau keruan, setu diau ditulis dalam Injil nidau pacak diurungka. Amun Allah ngenjuakka namau allah ngan jemau diau nerimau kici'anNyau tadi, 10:36 ngapau kapu dighi ngiciakka Aku nggelakka Allah, karnau Aku ngiciakka, Akuni Anak Allah, awuak Aku dipilia Bapak ngan diajungAu ke deniauni? 10:37 Amun Akuni nidau ngerjauka gegalau kerjau BapakKu, kapu dighi jangan percayau ngan Aku. 10:38 Anyautu amun Aku ngerjaukanyau, percayaula ngan kerjauKu, empuak kapu dighi nidau percayau ngan Aku. Mangku kapu dighi keruan ngan ngerti, bansau Bapak adau di dalam Aku, Aku di dalam BapakKu." 10:39 Mangku jemau Yahudi itu ncubau agi nangkap Yesus, anyautu Yesus luput jak di tangan ughangtu. 10:40 La udim itu Yesus pegi ke beghang ayiak Yurdan, bada Yuhanis mbaptis senitu, mangku Diau mendam di situ. 10:41 Banyak jemau datang njenguak Diau. Ughangtu bekatau, "Yuhanis nidau ngerjauka tandau sutiak kia, anyautu gegalaunyau diau dikiciakka Yuhanis ceritau Jemau ini benagh." 10:42 Mangku jemau di situ banyak percayau ngan Yesus.

Yuhanis 11

11:1 Lasarus mendam di Betania ngan kelawaiau Maria ngan Marta. 11:2 Mariatu tinau diau minya'i keting Tuhan ngan minyak ghum, dikusu'inyau ngan gumba'au. 11:3 Lasarus itu buidapan, mangku kelawaiautu ngajung jemau ngiciakka ngan Yesus, "Muanai kami diau Dighi sayangitu buidapan." 11:4 Yesus ndengagh ceritau itu, Diau bekatau, "Idapan ini nidau ka mbatak nyawau. Ini tejadi, mangku Allah diagungka, Anak Allah pulau diagungka." 11:5 Yesus sayang nian ngan Marta tigau beghadingtu. 11:6 Yesus la ndengagh ceritau tadi, bansau Lasarus buidapan, mangku Diau masia mendam di badaHau duau aghi agi. 11:7 La udim itu Diau ngiciakka ngan anak-buaHau, "Mela, kitau ngulang ke Yudia." 11:8 Anak-buaHautu bekatau, "Senitu jemau Yahudi endak nyipati Dighi ngan batu. Mbak kini Dighi endak ngulang ke situ agi?" 11:9 Katau Yesus, "Ukanau saghi duau belas jam? Jemau diau bejalan aghi siang nidau tuantuak keting, karnau diau nginak terang deniau. 11:10 Jemau diau bejalan aghi malam, tuantuak keting, karnau nidau bediau terang ngan diau." 11:11 Luak itula kici'an Yesus, mangku Diau bekatau agi, "Kantin kitau Lasarus la tiduak, anyautu Aku ka pegi mbangunka diau." 11:12 Katau anak-buaHau, "Tuhan, amun Lasarus tiduak, diau ka ghadu." 11:13 Sebenaghau diau dikiciakkaNyau tadi, Lasarus mati, anyautu anak-buaHau nyangkau diau dikiciakkaNyautu, Lasarus tiduak nian. 11:14 Mangku Yesus ngiciak ngan ughangtu ngan sebenaghau, katauNyau, "Lasarus la mati. 11:15 Anyautu Aku riang pulau, Aku nidau di situ masau itu, karnau iluakla batan endak kamu luak ini, mangku kamu belajagh percayau. Mbak kini mela kitau pegi ngaruaka diau." 11:16 Tumas diau pulau dikiciakka "Gembagh" ngiciak ngan kantinau anak-bua Yesus lainau, kataunyau, "Mela kitau ngikut endak mati serempak ngan Diau." 11:17 Yesus sampai di Betania, Lasarus la empat aghi dikuburka. 11:18 Betaniatu pasigh ngan Yerusalim, kekirau bejalan setenga jam jawuhau. 11:19 Banyak jemau Yahudi la datang nandangi Marta ngan Maria endak melemakka ati ughang duau beghadingtu, karnau muanaiautu la mati. 11:20 Marta ndengagh ceritau Yesus la datang, diau pegi njenguak Diau. Maria mendam di ghuma. 11:21 Mangku Marta ngiciak ngan Yesus, kataunyau, "Tuhan, misalau Dighi adau di sini, muanaiku cetau nidau mati. 11:22 Anyautu aku keruan, mbak kini pulau Allah ka ngenjuakka ngan Dighi gegalaunyau diau Dighi pintak ngan Diau." 11:23 Katau Yesus, "Muanai kaba ka ngulang idup." 11:24 Katau Marta, "Aku keruan, diau ka ngulang idup masau aghi kiamat." 11:25 "Akunila ngenjuakka idup ngan mbuat jemau ngulang idup." Katau Yesus, "Jemau diau percayau ngan Aku ka idup, empuak diau la mati. 11:26 Mangku jemau diau idup ngan percayau ngan Aku, nidau ka mati selelamaunyau. Apu kaba percayau tini?" 11:27 "Au, Tuhan," katau Marta, "Aku percayau Dighitu Almasih, Rajau Penyelamat, Anak Allah, diau ka datang ke deniau ini." 11:28 La udim ngiciak luak itu, Marta pegi endak mantau Maria mbisi'inyau, "Guru adau di sini, nanyauka kaba." 11:29 Satu ndengagh ceritau itu, Maria cecepatan betegak pegi njenguak Yesus. 11:30 Yesus lum masuak dusun, Diau gi adau di bada Marta ngiciak ngan Diau tadi. 11:31 Jemau Yahudi diau dang adau di ghumahau endak melemakka atiau nginak Maria cecepatan betegak pegi keluagh. Ughangtu ngikutka diau, karnau nyangkau diau pegi ke perantuan endak nangis di situ. 11:32 La sampai di bada Yesus tadi, Maria nginak Yesus, mangku nunduak di adapanNyau ngan bekatau, "Tuhan, misalau Dighi di sini, cetau muanaiku nidau mati." 11:33 Satu Yesus nginak Maria nangis ngan jemau Yahudi diau ngikutkanyau nangis galau, atiAu sian nian, 11:34 mangku Diau nanyauka, "Di manau bada diau dikuburka?" Katau ughangtu, "Mela kina'ila, Tuhan!" 11:35 Mangku Yesus nangis. 11:36 Jemau Yahuditu bekatau, "Kina'ila, ukan main sayangAu." 11:37 Adau pulau diau bekatau, "Diauni mbuat jemau butau nginak. Cengki Diau pacak nulung, mangku Lasarus galak endiak ka mati." 11:38 Yesus sial nian mangku pegi ke perantuan. Kuburantu tebuak besak, ditukup ngan batu. 11:39 Katau Yesus, "Guliakkala batu itu." Marta, uau jemau mati itu, nimbal, kataunyau, "Tuhan, la empat aghi diauni dikuburka. Cetau la bembau." 11:40 Yesus bekatau, "La Kukiciakka ngan kaba, 'Amun kaba percayau, kaba ka nginak kuasau Allah.' " 11:41 Mangku ughangtu ngguliakka batu itu, Yesus ncungak ke langit ngan bekatau, "Terimau kasia, Bak, karnau Dighi la ndengaghka du'aKu. 11:42 Aku keruan Dighi maju ndengaghka du'aKu, anyautu Aku ngiciakka ini batan endak jemau banyak diau adau di sini, supayau ughangtu percayau, bansau Dighitu ngajung Aku." 11:43 La udim ngiciakka luak itu, Yesus tegauk, katauNyau, "Lasarus, keluaghla!" 11:44 Jemau diau la mati tadi ngeluagh. Keting tanganau masia bebalut ngan kain putia ngan dayiau ditukup ngan setangan. Mangku katau Yesus ngan ughang di situ, "Kelucungila kain pembalutau, mangku diau pacak bejalan." 11:45 Banyak jak di jemau Yahudi diau nandangi Maria percayau ngan Yesus, karnau la nginak setu diau dibuatAutu. 11:46 Adau pulau diau pegi njenguak jemau Parisi ngiciakka ngan ughangtu setu diau la dibuat Yesustu. 11:47 Mangku imam-imam bepangkat tinggi ngan jemau Parisi ngajung pengadilan agamau betunggal, ngiciakka, "Tuapau diau mesti kitau kerjauka? Jemau itu ngerjauka banyak tandau nyelia. 11:48 Amun kitau ngenangka Diau maju luak itu, gegalau jemau ka percayau ngan Diau, mangku penguasau jemau Rum ka datang merusakka Ghuma Allah ngan gegalau bangsau kitau." 11:49 Mangku sughang jak di ughangtu, namaunyau Kayapas, imam besak taun itu, bekatau, "Kamuni endiak keruan tuapau-apau. 11:50 Apu kamu nidau ngeruani, iluakla batan endak kamu sughang mati sangkan gegalau bangsau kitau benasau?" 11:51 Kayapas ngiciakka luak itu ukan jak di rupu'annyautula, tapitu karnau diau Imam Besak taun itu, diau meramalka, Yesus ka mati batan endak jemau Yahudi. 11:52 Diau ukan mati batan endak bangsau itu ajau, tapitu pulau endak nunggalka ngan nyatuka anak-anak Allah diau di bada lainau. 11:53 Mangku mulai aghitu pengulu-pengulu Yahudi sepakat endak mbunua Yesus. 11:54 Karnau itu Yesus nidau agi bejalan di mukau umum jemau Yahudi. Diau pegi jak di Yudia ke kuta Epraim diau pasigh ngan padang bungin. Di situla Yesus mendam ngan anak-buaHau. 11:55 Masau itu aghi rerayau Paska la pasigh. Banyak jemau la pegi ke Yerusalim endak njalanka adat lembagau pembasuan diri nurut adat Yahudi, antak ka aghi rerayau mulai. 11:56 Ughangtu ndala'i Yesus, mangku ughangtu dang betunggal di Ghuma Allah, sughang ngiciak ngan diau lain, kataunyau, "Luak manau pendapat kamu? Asauku Yesus nidau ka datang ngikuti aghi rerayau ini." 11:57 Imam-imam bepangkat tinggi ngan jemau Parisi la merintaka, bilang jemau diau keruan bada Yesus mesti ngiciakkanyau ngan ughangtu, supayau Yesus ditangkap.

Yuhanis 12

12:1 Enam aghi antak ka aghi rerayau Paska Yesus pegi ke Betania, bada Lasarus diidupka jak di mati. 12:2 Di situ Yesus dijamu jemau dusun itu. Marta nepi'iNyau ngan Lasarus ngikut makan ngan Diau. 12:3 Mangku Maria mbatak minyak ghum segudu keciak diau besak nianan regaunyau, mangku diau minya'i keting Yesus, dikusu'inyau ngan gumba'au. Ghumatu ghum galau ngan minyak itu. 12:4 Mangku Yudas Iskariut, sughang jak di anak-bua Yesus diau njualkaNyau bekatau, 12:5 "Ngapau minyak ghum ini nidau dijual ngan regau tigau ratus tanci pirak, mangku dienjuakka ngan jemau serik?" 12:6 Yudas ngiciak luak itu, ukan karnau diau nyanauka jemau serik, anyautu karnau diau pemaling ngan maju ngambiak tanci ughangtu diau diimpaninyau. 12:7 Mangku katau Yesus, "Nengkela diauni! Diau ngerjauka ini batan endak aghi penguburanKu. 12:8 Jemau serik maju guak kamu, anyautu Aku nidau maju guak kamu." 12:9 Banyak jemau Yahudi ndengagh Yesus adau di Betania, mangku pegi ke situ. Ughangtu pegi ke situ ukan ajau endak nginak Yesus, tapitu karnau endak nginak Lasarus pulau diau la diidupka Yesus jak di mati. 12:10 Mangku imam-imam bepangkat tinggi merencanauka endak mbunua Lasarus pulau, 12:11 karnau banyak jemau Yahudi ninggalka ughangtu karnau Lasarus, mangku percayau ngan Yesus. 12:12 Jemau banyak la datang endak merayauka Paska. Pagi aghiau ughangtu ndengagh, bansau Yesus dang bejalan ngancamka Yerusalim. 12:13 Ughangtu ngambiak daun paku bindu, mangku pegi ngampak Yesus ngan besurak-surak, kataunyau, "Husana! Tepujila Jemau diau datang atas namau Tuhan. Tepujila Rajau Israil." 12:14 Yesus dapat sikuak keledai mudau, dinayi'iNyau, mangku ditepati setu diau ditulis dalam Injil, 12:15 "Nidau nanti takut, ui jemau Yerusalim. Kina'ila Rajau kamu datang nayiak sikuak anak keledai." 12:16 Masau itu anak-bua Yesus lum ngerti gegalaunyau itu. Anyautu la udim Yesus ngulang idup ngan diagungka, anak-buaHau teghingat, bansau setu diau dikerjauka ughangtu ngan Diau la ditulis dalam Injil. 12:17 Jemau banyak diau la nginak Yesus ngajung Lasarus ngeluagh jak di kuburan diidupkaNyau jak di mati maju ngiciakka kejadian itu. 12:18 Itula sebapau jemau banyak pegi ndepatka Yesus di jalan, karnau ughangtu la ndengagh, bansau Diautu ngerjauka tandau nyelia itu. 12:19 Mangku jemau Parisi ngiciak sughang ngan diau lain, kataunyau, "Na, kamu la nginak, kitau nidau pacak mbuat tuapau-apau. Gegalau jemau deniauni datang ngikut Diau." 12:20 Di antarau jemau diau datang ke Yerusalim endak sembayang masau aghi rerayau itu adau pulau jemau Yunani. 12:21 Ughangtu pegi njenguak Pilipus diau asalau jak di Betsaida di Galilia mangku bekatau, "Amun pacak, kami endak betemu ngan Yesus." 12:22 Pilipus ngiciakkanyau ngan Anderias, mangku ughang duautu ngiciak ngan Yesus. 12:23 Katau Yesus ngan ughangtu, "Masaunyau la sampai Anak Manusiau diagungka. 12:24 Ngenian katauKu ini: Amun semughak padi nidau ditugalka ke tana, mangku nidau busuak, diau ka maju semughak itula. Anyautu amun mughaktu busuak karnau tumbua, mangku ka banyak asilau. 12:25 Jemau diau nyayangi nyawaunyau ka kelengitan nyawaunyau, mangku jemau diau nidau nyayangi nyawaunyau ka bulia idup empai selelamaunyau. 12:26 Jemau diau endak bekerjau batan endak Aku, diau mesti ngikut Aku, mangku anak-buaKu adau guak Aku di badaKu. Mangku jemau diau bekerjau batan endak Aku diregaui BapakKu." 12:27 "Aku temas. Tuapau diau mesti Kukiciakka mbak kini? Bak, selamatkala Aku jak di sengsarau ini? Nidau, karnau batan endak itula Aku datang. 12:28 Bak, agungka namau Dighi!" Mangku tedengagh suarau jak di sergau diau ngiciakka, "Aku la ngagungkanyau, mangku Aku ka ngagungkanyau agi." 12:29 Jemau banyak diau di situ ndengagh suarau itu bekatau, "Itu gurua!" Adau pulau diau ngiciakka, "Ukanau, malaikat ngiciak ngan Diau." 12:30 Yesus bekatau ngan ughangtu, "Suarau itu ukan batan endak Aku, tapitu batan endak kapu dighi. 12:31 Mbak kini la masaunyau deniau diukum, mbak kini penguasau deniau ka dicapakka keluagh. 12:32 Amun Aku la dinayiakka jak di deniau, Aku ka ngajak gegalau jemau njenguak Aku." 12:33 Yesus ngiciakka luak itu endak nyatauka carau Diau ka mati. 12:34 Jemau banyak itu ngiciak ngan Diau, kataunyau, "Kami la keruan jak di ukum Taurat, bansau Mesias, Rajau Penyelamattu, ka idup selelamaunyau. Luak manau Kaba pacak ngiciak, Anak Manusiau mesti dinayiakka. Sapau Anak Manusiau itu?" 12:35 Katau Yesus agi ngan ughangtu, "Nidau ka lamau agi terang adau guak kapu dighi. Bejalanla empungan terang gi adau di kamu, mangku kapu dighi nidau bejalan di keleman. Jemau diau bejalan di keleman nidau keruan ke manau diau pegi. 12:36 Percayaula ngan terang itu, empungan terang itu gi adau di kapu dighi, mangku kapu dighi njadi jemau diau idup dalam terang." Udim ngiciak luak itu Yesus pegi nyemuni, mangku nidau kina'an agi. 12:37 La banyak tandau nyelia dikerjauka Yesus di mukau ughangtu. Empuak luak itu ughangtu nidau kila percayau ngan Diau. 12:38 Mangku setu diau la dikiciakka nabi Yesaya la ditepati, "Tuhan, sapau ka percayau ngan ceritau kami? Ngan sapau kuasau Tuhan dinyatauka?" 12:39 Itula sebapau ughangtu nidau pacak percayau, karnau Yesaya la bekatau pulau, "Katau Allah, 12:40 'Aku la mbutauka matau ughangtu ngan mbuat ughangtu keghas ati, supayau matau ughangtu jangan nginak ngan rupu'an ughangtu jangan terti, mangku ughangtu jangan ngulang njenguak Aku, mangku Aku jangan meghadui ughangtu.' " 12:41 Yesaya la ngiciak luak itu, karnau la nginak kuasau Yesus, mangku dikiciakkanyau. 12:42 Empuak luak itu banyak pulau jemau jak di pengulu jemau Yahudi percayau ngan Diau. Anyautu ughangtu nidau beghani ngaku'iNyau ngan terang-terangan, karnau takut, kalu jemau Parisi nidau ngajung ughangtu agi masuak ghuma sembayang. 12:43 Ughangtu galakla dipuji manusiau sangkan dipuji Allah. 12:44 Mangku Yesus bekatau bias, "Jemau diau percayau ngan Aku, ukan percayau ngan Aku ajau, tapitu percayau pulau ngan Allah diau ngajung Aku. 12:45 Mangku jemau diau nginak Aku nginak Allah pulau diau ngajung Aku. 12:46 Akuni datang ke deniau ini umpamau terang, mangku bilang jemau diau percayau ngan Aku jangan maju mendam di keleman. 12:47 Amun adau jemau diau ndengagh kici'anKu, anyautu nidau nurutinyau, Aku nidau ka ngukumau, karnau Aku datang ukan endak ngukum deniau, tapitu endak nyelamatkanyau. 12:48 Jemau diau nidau nerimau Aku ngan nidau nuruti kici'anKu, akimau la adau. Kici'anKu diau la Kukiciakka, itula diau ka ngukumau masau aghi kiamat. 12:49 Karnau Aku nidau ngiciak nurut rupu'anKunila, tapitu Bapak diau ngajung Aku Diautu ngajung Aku ngiciakka setu diau mesti Kukiciakka. 12:50 Aku keruan perintaHau itu ngenjuakka idup empai selelamaunyau. Mangku setu diau Kukiciakka, Aku ngiciakka luak la dikiciakka Bapak ngan Aku."

Yuhanis 13

13:1 Mbak pagi di aghiau aghi rerayau Paska ka lasung, Yesus la keruan, bansau masauNyau la sampai Diau ninggalka deniau ini njenguak Bapa'Au. Yesus la nyayangi anak-buaHau, mangku Diau maju nyayangi ughangtu enggut pengabisanNyau. 13:2 Yesus ngan anak-buaHau dang makan malam. Iblis la mbisi'i Yudas Iskariut, anak Simun, supayau diau njualka Yesus. 13:3 Yesus keruan, bansau Bapa'Au la ngenjuakka gegalaunyau ngan Diau. Diau pulau keruan Diau asalau jak di Allah ngan baliak agi ke Allah. 13:4 Mangku Yesus betegak ngelucungka bajuAu. Diau ngambiak anduk, dikainkanyau. 13:5 La udim itu Diau ncughuaka ayiak dalam capa mangku mulai mbasua keting anak-buaHau, dikusu'iNyau ngan anduk diau dikainkatu. 13:6 Mangku Diau sampai di Simun Pitrus. Pitrustu bekatau, "Tuhan, baghia Dighi mbasua ketingku." 13:7 Katau Yesus, "Mbak kini kaba lum ngerti setu diau Kukerjauka ini, nanti kaba ka terti." 13:8 "Jangan, Tuhan," Katau Pitrus, "Jangan Dighi gheghapati mbasua ketingku." Katau Yesus, "Amun Aku nidau mbasua kaba, kaba nidau agi njadi anak-buaKu." 13:9 Katau Simun Pitrus, "Amun luak itu, Tuhan, jangan keting ajau, tapitu tangan ngan palakku pulau." 13:10 "Jemau diau la udim mandi la beresia gegalaunyau." Katau Yesus. "Diau nidau nanti diberesiaka agi lain jak di ketingau. Kamu la beresia, anyautu nidau gegalau kamu." 13:11 Yesus la keruan sapau ka njualkaNyau. Itula sebapau Diau ngiciakka, "Kamuni la beresia, anyautu nidau gegalau kamu." 13:12 La udim Yesus mbasua keting anak-buaHautu, Diau nyurumka bajuAu agi, mangku duduak sampai ngiciak ngan anak-buaHautu, katauNyau, "Apu kamu terti setu diau empai Kukerjauka ngan kamuni? 13:13 Kamu betutugh ngan Aku Guru ngan Tuhan. Nyela nian, kamutu benagh, karnau Akula Diau. 13:14 Amun Aku mbasua keting kamu, Akuni diau njadi Tuhan ngan Guru kamu, mangku kamu pulau sepantasau sangi mbasuhi keting. 13:15 Aku la mbuat penauan batan endak kamu, supayau kamu mbuat semegi luak aku buat ngan kamu. 13:16 Nyela nian katauKu ini: Sughang budak nidau lebia bekuasau jak di tuanau, mangku jemau diau diajung nidau lebia penting jak di jemau diau ngajungau. 13:17 Kamu la keruan gegalaunyauni. Riang kamu, amun dikerjauka. 13:18 Setu diau Kukiciakka, ukanau ngiciakka kamu gegalaunyau. Aku keruan, sapau-sapau diau la Kupilia. Anyautu setu diau ditulis di Injil mesti tejadi: 'Jemau diau la makan ngan Aku ka melawan Aku.' 13:19 Aku ngiciakkanyau ngan kamu mbak kini antak ka tejadi, supayau amun titu tejadi kelau, kamu percayau, bansau Akunila Diau. 13:20 Ngenian katauKu ini: Jemau diau nerimau jemau diau Kuajung, nerimau Aku. Mangku jemau diau nerimau Aku nerimau Allah diau ngajung Aku." 13:21 La udim Yesus ngiciakka luak itu, peghasauanNyau madak nian, mangku Diau bekatau, "KatauKuni benagh nian: Sughang jak di kamuni ka njualka Aku." 13:22 Anak-buaHau sangi kina'i ngan kemangan, karnau nidau keruan, sapau diau dikiciakkaNyautu. 13:23 Anak-bua diau disayangiNyau duduak di guak sebela kananAu. 13:24 Simun Pitrus ngenjuakka tandau ngan jemautu ngajungau betanyau ngan Yesus, sapau diau dikiciakkaNyautu. 13:25 Jemau diau duduak pasigh Yesustu nyelinga'iNyau sampai betanyau, "Sapau, Tuhan?" 13:26 Mangku katau Yesus, "Jemau diau Kuenju'i ruti diau Kuceculka dalam pan, diautu jemaunyau." Mangku Yesus ngambiak setepil ruti, diceculkaNyau dalam pan, dienjuakka ngan Yudas Iskariut, anak Simun. 13:27 La udim Yudas nerimau rutitu, iblis masuak dalam ati Yudas, mangku Yesus ngiciak ngan diau, katauNyau, "Setu diau endak kaba kerjauka, kerjaukala gegancang." 13:28 Nidau sughang kia jak di ughangtu diau duduak makan di situ terti, ngapau Yesus ngiciak luak itu ngan Yudas. 13:29 Adau diau nyangkau Yesus ngajung Yudas mbeli setu diau digunauka batan aghi rerayau, ngan ngenjuakka tanci ngan jemau serik, karnau Yudas tukang nyimpani tanci ughangtu. 13:30 La udim Yudas ngambiak ruti tadi, diau gegasip ngeluagh. Aghitu la malam. 13:31 La udim Yudas pegi, Yesus bekatau, "Mbak kini Anak Manusiau diagungka, mangku Allah pulau diagungka karnau Diau. 13:32 Amun Allah diagungka karnau Diau, Allah ka ngagungka Diau pulau karnau diriAu. Nyela, Allah ka cepat ngagungkaNyau. 13:33 Ai, anak-buaKu, tigha jerang agi Aku adau guak kamu. Kamu ka ndala'i Aku. Luak Aku la ngiciak ngan jemau Yahudi, Aku ngiciak pulau ngan kamu mbak kini, 'Ke bada Aku pegi kamu nidau pacak datang.' 13:34 Aku ngiciakka perinta empai ngan kamu: Kamu sangi sayangila sughang ngan diau lain. Aku la nyayangi kamu. Luak itula pulau kamu mesti sangi sayangi. 13:35 Amun kamu sangi sayangi, gegalau jemau ka keruan, bansau kamu anak-buaKu." 13:36 Mangku Simun Pitrus betanyau, "Tuhan, Dighi endak pegi ke manau?" Katau Yesus, "Ke bada Aku pegi, kaba nidau pacak ngikut Aku mbak kini, anyautu nanti kaba ka ngikut Aku." 13:37 Pitrus betanyau agi, "Tuhan, ngapau Aku nidau pacak ngikut Dighi mbak kini? Aku endak ngenjuakka nyawauku batan endak Dighi!" 13:38 Katau Yesus, "Luak manau kaba endak ngenjuakka nyawau kaba batan endak Aku? Aku bekatau sebenaghau: Antak ka ayam bekukuak, kaba la tigau kali nidau ngaku'i Aku."

Yuhanis 14

14:1 "Janganla kamu temas." Katau Yesus, "Percayaula ngan Allah, percayaula pulau ngan Aku. 14:2 Di ghuma BapakKu banyak bada. Amun nidau luak itu, cetau Aku nidau ngiciak ngan kamu, bansau Aku pegi endak nyediauka bada batan endak kamu. 14:3 La udim Aku pegi ke situ ngan nyediauka bada batan endak kamu, Aku ka ngulang agi, mangku mbatak kamu ke badaKu, supayau di manau badaKu, di situ pulau bada kamu. 14:4 Ke manau Aku pegi, kamu keruan jalan ke situ." 14:5 Tumas ngiciak ngan Yesus, kataunyau, "Tuhan, kami nidau keruan, ke manau Dighi pegi. Luak manau kami keruan jalan?" 14:6 Katau Yesus, "Akunila jalan ngeruani Allah ngan idup nian. Nidau sughang kia diau pacak njenguak Bapak, amun nidau karnau Aku. 14:7 Amun kamu keruan Aku, cetau kamu pulau keruan BapakKu. Mbak kini kamu la keruan Diau ngan kamu la nginak Diau." 14:8 Katau Pilipus, "Tuhan, ancakka Bapaktu, jadila ngan kami." 14:9 Katau Yesus, "Ui, Pilipus, Aku la lamau ngan kamu, mangku kaba lum kila keruan Aku? Jemau diau nginak Aku la nginak Bapak. Ngapau kaba ngiciakka: Ancakka Bapaktu ngan kami? 14:10 Apu kabani nidau percayau, Akuni di dalam Bapak, Bapak pulau di dalam Aku? Setu diau Kukiciakka ngan kamu, asalau ukanau jak di Aku. Bapak diau mendam di dalam Aku ngerjauka gegalaunyau itu. 14:11 Percayaula ngan katauKu ini: Aku di dalam Bapak ngan Bapak di dalam Aku, senidaunidaunyau percayaula ngan setu diau la Kukerjauka. 14:12 Ngenian katauKu ini: Jemau diau percayau ngan Aku ka ngerjauka setu diau la Kukerjauka, gi banyak setu diau lebia besak agi ka dikerjaukanyau. Aku pegi njenguak Bapak, 14:13 mangku setu diau kamu pintak atas namauKu ka Kuenjuakka, mangku Bapak dipuji karnau Aku. 14:14 Tuapau kila diau kamu pintak atas namauKu ka Kuenjuakka." 14:15 "Amun kamu nyayangi Allah, kamu ka nuruti gegalau perintaKu. 14:16 Aku ka mintakka ngan Bapak, mangku Diau ka ngenju'i kamu Penulung lain diau ka adau guak kamu selelamaunyau. 14:17 Diau itu Rua Allah diau ka nyatauka, sapau Allah sebenaghau. Deniau nidau pacak nerimau Diau, karnau deniau nidau nginak Diau ngan ngeruani Diau. Anyautu kamuni ngeruani Diau, karnau Diau di guak kamu ngan mendam dalam kamu. 14:18 Aku nidau ka ngenangka kamu njadi anak umang. Nanti Aku ka ngulang njenguak kamu. 14:19 Tigha jerang agi, deniau nidau ka nginak Aku agi, anyautu kamuni ka nginak Aku. Akuni idup, karnau itu kamu ka idup pulau. 14:20 Aghitu pulau kamu ka ngeruani, bansau Aku dalam BapakKu ngan kamu dalam Aku, Aku pulau dalam kamu. 14:21 Jemau diau nerimau perintaKu ngan nurutinyau, jemau itula nyayangi Aku. Mangku jemau diau nyayangi Aku ka disayangi BapakKu. Aku pulau ka nyayangi jemautu ngan nyatauka diriKu ngan diau." 14:22 Yudas, ukan Yudas Iskariut, betanyau ngan Yesus, kataunyau, "Tuhan, tuapau sebapau Dighi endak nyatauka Dighi ngan kami, nidau ngan gegalau deniau?" 14:23 Katau Yesus, "Amun jemau nyayangi Aku, diau ka nuruti kici'anKu. BapakKu ka nyayangi diau, mangku Kami ka njenguak diau ngan mendam ngan diau. 14:24 Jemau diau nidau nyayangi Aku nidau nuruti kici'anKu. Kici'an diau kamu dengaghtu ukan jak di Aku, tapitu jak di Bapak diau ngajung Aku. 14:25 Gegalaunyautu Kukiciakka ngan kamu, semasau Aku gi betunggal ngan kamu. 14:26 Anyautu Rua Allah, Penulung diau ka diajung Bapak atas namauKu, diautu ka ngajaghka gegalaunyautu ngan kamu ngan ngingatka gegalaunyau diau la Kukiciakka ngan kamu. 14:27 Aku mbuat ati kamu tenang. Keinji'anKu Kuenjuakka ngan kamu, mangku diau dienjuakka itu ukan luak diau dienjuakka deniau. Nidau nanti temas, ngan nidau nanti penakut. 14:28 Kamu la ndengagh Aku bekatau ngan kamu, Aku ka pegi, anyautu Aku ka ngulang agi njenguak kamu. Amun kamu nyayangi Aku, cetau kamu riang, karnau Aku pegi njenguak BapakKu, karnau pentingla Bapak sangkan Aku. 14:29 Aku ngiciakka titu ngan kamu mbak kini, antak ka gegalaunyautu tejadi, supayau kamu percayau, amun titu tejadi nanti. 14:30 Aku nidau ka ngiciak banyak agi ngan kamu, karnau la masaunyau penguasau deniauni datang. Anyautu diau nidau bekuasau ngan diriKu. 14:31 Anyautu gegalaunyautu mesti tejadi, supayau deniau keruan, bansau Aku nyayangi Bapak ngan ngerjauka gegalaunyau diau diajungka Bapak ngan Aku. Mela, kitau pegi jak di sini."

Yuhanis 15

15:1 "Akuni umpamau batang anggur diau asli, mangku BapakKu tukang sayiau. 15:2 Bilang cangka di Aku diau nidau bebua diteta'Au, mangku bilang cangka diau bebua diberesiaka, supayau buahau tamba lebat. 15:3 Kamu la diberesiaka karnau kici'anKu diau la Kukiciakka ngan kamu. 15:4 Mendamla kamu di Aku, mangku Aku mendam di kamu. Cangka nidau pacak bebua, amun nidau maju di batang anggur. Luak itula pulau kamu nidau pacak bebua, amun nidau mendam di Aku. 15:5 Akunila batang anggur, kamunila cangka-cangkahau. Jemau diau mendam di Aku ngan Aku di diau, jemautu ka banyak buahau. Amun Aku nidau nulung, kamu nidau pacak mbuat tuapau-apau. 15:6 Jemau diau nidau mendam di Aku dicapakka keluagh luak cangka, mangku njadi keghing. La udim ditunggalka jemau, dicapakka ke dalam api, mangku mutung. 15:7 Amun kamu maju mendam di Aku ngan kici'anKu maju di ati kamu, pintakla tuapau kila kamu endak, mangku kamu ka dienju'i. 15:8 Amun kamu bebua banyak, kamu njadi anak-buaKu nian. Ngan carau luak itu BapakKu diagungka." 15:9 "Aku sayang ngan kamu luak Bapak sayang ngan Aku. Jangan nyimpang jak di sayangKu. 15:10 Amun kamu nuruti perintaKu, Aku maju sayang ngan kamu. Itu semegi ngan Aku nuruti perinta BapakKu, mangku Bapak maju sayang ngan Aku. 15:11 Gegalaunyau Kukiciakka ngan kamu, supayau keinji'anKu adau di ati kamu, mangku kamu injiak nianan. 15:12 Inila perintaKu: Kamu mesti sangi sayangi, luak Aku la nyayangi kamu. 15:13 Jemau diau sayang nianan ngan kantinau, jemau itu nyeraka nyawaunyau batan endak kantinau. 15:14 Kamuni kantinKu, amun kamu ngerjauka tuapau diau Kuperintaka ngan kamu. 15:15 Kamu nidau agi Kukiciakka budak, karnau budak nidau keruan, setu diau dikerjauka tuanau. Kamu Kukiciakka kantin, karnau gegalaunyau diau Kudengagh jak di Bapak la Kukiciakka ngan kamu. 15:16 Ukan kamuni diau milia Aku. Aku diau milia kamu. Aku ngajung kamu pegi ngan bebua banyak, bua diau ka ta'an. Mangku setu diau kamu pintak atas namauKu dienjuakka Bapak ngan kamu. 15:17 Inila perintaKu ngan kamu: Sangi sayangila kamu." 15:18 "Amun deniau luat ngan kamu, keruanila, Aku jak di senitu la diluatka deniau. 15:19 Misalau kamu semegi ngan jemau di deniau, cengki deniau ka nyayangi kamu, karnau kamu semegi ngan deniau. Anyautu karnau Aku la milia kamu jak di deniauni, kamu ukan semegi ngan deniau. Itula sebapau deniau luat ngan kamu. 15:20 Ingatkala setu diau la Kukiciakka ngan kamu: Sughang budak nidau lebia bekuasau jak di tuanau. Amun ughangtu la nganiayau Aku, ughangtu ka nganiayau kamu pulau. Amun ughangtu la nuruti kici'anKu, ughangtu ka nuruti kici'an kamu pulau. 15:21 Gegalaunyau ka dikerjauka ughangtu ngan kamu, karnau kamu anak-buaKu, karnau ughangtu nidau keruan Allah diau ngajung Aku. 15:22 Misalau Aku nidau datang ngan nidau ngiciakka gegalaunyau ngan ughangtu, ughangtu nidau besala. Anyautu mbak kini nidau bediau tapakan agi batan dusau ughangtu. 15:23 Jemau diau meluatka Aku, meluatka BapakKu pulau. 15:24 Misalau di guak ughangtu Aku nidau ngerjauka setu diau lum kekela dikerjauka jemau, ughangtu nidau besala. Mbak kini ughangtu la nginak gegalaunyau diau Kukerjauka, anyautu ughangtu meluatka Aku ngan BapakKu. 15:25 Nyela, semestiau luak itu, mangku setu diau la ditulis dalam kitab Taurat ughangtu ditepati: 'Ughangtu meluatka Aku nidau bediau tapakan.' 15:26 Aku ka ngajung Penulung njenguak kamu diau asalau jak di Bapak. Diau ka nyatauka Allah sebenaghau. Amun Diau datang, Diau ka ngiciakka Aku. 15:27 Mangku kamu pulau mesti ngiciakka Aku, karnau kamuni la seghundak ngan Aku jak di senitu.

Yuhanis 16

16:1 Gegalaunyautu la Kukiciakka ngan kamu, mangku kamu jangan mandak percayau ngan Aku. 16:2 Kamu ka dikeluaghka jak di ghuma sembayang, mangku ka sampai masaunyau, jemau diau mbunua kamu, nyangkau diau melemakka ati Allah. 16:3 Ughangtu ka ngerjauka gegalaunyautu, karnau ughangtu nidau keruan BapakKu ngan Aku. 16:4 Anyautu gegalaunyautu Kukiciakka ngan kamu, mangku amun masaunyau la sampai, kamu teghingat, bansau Aku la ngiciakkanyau ngan kamu." 16:5 Mbak kini Aku ka pegi njenguak BapakKu diau ngajung Aku. Nidau sughang kia jak di kamu betanyau ke manau Aku pegi. 16:6 Mbak kini ati kamu njadi bingung, karnau Aku ngiciakka titu ngan kamu. 16:7 Mangku Kukiciakka diau benagh ngan kamu: Amun Aku pegi, begunau ngan kamu. Misalau Aku nidau pegi, Penulung itu nidau ka datang njenguak kamu. Anyautu amun Aku pegi, Aku ka ngajung Diau njenguak kamu. 16:8 Mangku amun Diau datang, Diau ka mbuktika deniau besala. Diau ka nyatauka Akuni benagh ngan Allah cetau ka ngukum deniau. 16:9 Diau ka nyatauka ughangtu besala, karnau nidau percayau ngan Aku. 16:10 Diau ka nyatauka Aku benagh, karnau Aku pegi njenguak Bapak, mangku kamu nidau nginak Aku agi. 16:11 Mangku Diau ka nyatauka pulau Allah la mulai ngukum, karnau penguasau deniauni la diukum. 16:12 Gi banyak diau endak Kukiciakka ngan kamu, anyautu mbak kini kamu lum ka ta'an nerimaunyau. 16:13 Amun Rua Allah itu datang, Diau nyatauka Allah itu benagh. Kamu ka dibimbingAu ngeruani gegalaunyau diau benagh. Diau nidau ka ngiciak jak di diriAu, anyautu Diau ka ngiciakka setu diau didengaghAu, mangku Diau ka ngiciakka ngan kamu setu diau ka tejadi nanti. 16:14 Diau ka ngagungka Aku, karnau setu diau dikiciakkaNyau ngan kamu diterimauNyau jak di Aku. 16:15 Gegalaunyau diau adau di Bapak adau pulau di Aku. Itula sebapau Aku bekatau: Setu diau dikiciakka Rua itu ngan kamu diterimauNyau jak di Aku." 16:16 "Tigha jerang ajau kamu nidau nginak Aku agi, lagi pulau tigha jerang agi, kamu ka nginak Aku." 16:17 Ndengagh titu anak-bua Yesus adau diau betanyau sughang ngan diau lain, "Tuapau retiau Diau ngiciak ngan kitau, 'Tigha jerang ajau kamu nidau nginak Aku agi', lagi pulau, 'Tigha jerang agi, kamu ka nginak Aku'? Tuapau pulau retiau, 'Aku pegi njenguak Bapak'?" 16:18 Mangku katau ughangtu, "Tuapau retiau, 'Tigha jerang ajau'? Kitau nidau terti Diau ngiciakka tuapau." 16:19 Yesus keruan, bansau anak-buaHautu endak betanyau ngan Diau, mangku Diau bekatau, "Apu kamu sangi kiciakka setu diau Kukiciakka tadi, Tigha jerang ajau kamu nidau nginak Aku agi, lagi pulau, Tigha jerang agi, kamu ka nginak Aku? 16:20 Kici'anKu ini benagh nian: Kamu ka nangis berandaian, anyautu deniau ka riang. Kamuni ka temas, anyautu temas kamutu ka beghuba njadi riang. 16:21 Amun jemau tinau endak merunggu diau temas, karnau la masaunyau diau kesakitan. Anyautu amun anak la adau, diau nidau teghingat agi kesakitannyautu, karnau riang kupiak la adau. 16:22 Luak itula pulau ngan kamu: Mbak kini kamu dukau, anyautu Aku ka betemu agi ngan kamu, mangku ati kamu ka riang, mangku nidau sughang kia pacak ngambiak keriangan kamu. 16:23 Aghi itu kamu nidau ka betanyau tuapau-apau agi ngan Aku. Ngenian katauKu ini: Tuapau kila diau kamu pintak ngan Bapak atas namauKu, titu ka dienjuakka Bapak ngan kamu. 16:24 Enggut mbak kini kamu lum mintak tuapau-apau atas namauKu. Pintakla, mangku kamu ka dienju'i, mangku kamu injiak nian." 16:25 "Gegalaunyau itu Kukiciakka ngan kamu pakai cuntau. Masaunyau ka sampai Aku nidau pakai cuntau agi, tapitu Aku ka ngiciakka Bapak ngan sebenaghau. 16:26 Masau itu kamu ka mintak ngan Bapak atas namauKu. Aku nidau njanjika mintak ngan Bapak batan endak kamu, 16:27 karnau Bapak pulau nyayangi kamu. Diau nyayangi kamu, karnau kamu nyayangi Aku ngan percayau, asalKu jak di Bapak. 16:28 Nyela, asalKu jak di Bapak, mangku Aku la datang ke deniau. Anyautu mbak kini Aku ninggalka deniauni endak baliak njenguak Bapak." 16:29 Mangku anak-buaHau ngiciak ngan Yesus, kataunyau, "Mbak kini Dighi ngiciak ngan sebenaghau, nidau agi pakai cuntau. 16:30 Mbak kini kami keruan: Nidau nanti jemau betanyau ngan Dighi, karnau Dighi ngeruani gegalaunyau. Itula sebapau kami percayau asal Dighi jak di Allah." 16:31 Katau Yesus, "Mbak kini kamu percayau? 16:32 Ingatkala, masaunyau ka sampai mangku la sampai, gegalau kamuni ka larat, ka baliak ke ghuma sesughangan. Kamu ka ninggalka Aku sughang, anyautu Aku nidau sughang, karnau Bapak adau guak Aku. 16:33 Gegalaunyautu Kukiciakka ngan kamu, mangku kamu tenang sempernau, karnau seghundak ngan Aku. Di deniau kamu ka sengsarau, anyautu beghanikala ati kamu. Aku la ngalaka deniau."

Yuhanis 17

17:1 La udim ngiciak luak itu, Yesus ncungak ke langit, mangku bekatau, "Bak, masaunyau la sampai, agungkala Anak Dighi, mangku Anak Dighi ngagungka Dighi pulau. 17:2 Dighi la ngenjuakka kuasau ngan Diau nguasaui gegalau manusiau, mangku Diau ka ngenjuakka idup empai selelamaunyau ngan gegalau jemau diau la Dighi enjuakka ngan Diau. 17:3 Retiau idup empai selelamaunyau itula ngeruani Dighi, Allah diau sebenaghau diau gi sughang itula ngan ngeruani Yesus Keristus diau la Dighi ajung. 17:4 Aku la ngagungka Dighi di deniau ngan ngudimi kerjau diau la Dighi ajungka ngan Aku. 17:5 Bak, mbak kini agungka Aku di adapan Dighi ngan carau Aku diagungka, timpau Aku guak Bapak antak ka deniau adau. 17:6 Aku la nyatauka namau Dighi ngan gegalau jemau jak di deniauni diau la Dighi enjuakka ngan Aku. Dighitu ngempu ughangtu, mangku Dighi la ngenjuakka ughangtu ngan Aku. Ughangtu la nuruti kici'an Dighi. 17:7 Mbak kini ughangtu keruan, bansau gegalaunyau diau la Dighi enjuakka ngan Aku asalau jak di Dighi. 17:8 Kici'an diau Dighi kiciakka ngan Aku, la Kukiciakka ngan ughangtu, mangku ughangtu la nerimaunyau. Ughangtu keruan nian asalKu jak di Dighi, mangku ughangtu percayau, Dighitu ngajung Aku. 17:9 Aku ndu'aka ughangtu, Aku ukan ndu'aka deniau, anyautu Aku ndu'aka jemau diau la Dighi enjuakka ngan Aku, karnau Dighi ngempu ughangtu. 17:10 Gegalaunyau diau Kuempu itu, Dighi ngempuau pulau, mangku gegalaunyau diau Dighi empu itu, Aku ngempuau pulau. Aku la diagungka ughangtu. 17:11 Mbak kini Aku njenguak Dighi. Akuni nidau agi di deniauni, anyautu ughangtu gi adau di deniauni. Bak, diau suci, sayiala ughangtu ngan kuasau namau Dighi, namau diau la Dighi namauka ngan Aku, supayau ughangtu njadi seghundak luak Kitau. 17:12 Masau Aku gi adau guak ughangtu, Aku la nyayia ughangtu ngan kuasau namau Dighi, namau diau la Dighi namauka ngan Aku. Aku la njagaui ughangtu, mangku nidau sughang kia jak di ughangtu benasau lain jak di jemau diau semestiau benasau, mangku setu diau ditulis dalam Injil ditepati. 17:13 Mbak kini Aku njenguak Dighi. Gegalaunyau ini Kukiciakka, timpau Aku gi adau di deniau, mangku ughangtu meghasauka gegalau keinji'anKu. 17:14 La Kukiciakka ngan ughangtu kici'an Dighi, mangku deniau meluatka ughangtu, karnau ughangtu nidau jak di deniau, luak Aku pulau nidau jak di deniau. 17:15 Aku nidau mintak, supayau Dighi ngambiak ughangtu jak di deniauni, anyautu Aku mintak, supayau Dighi njagaui ughangtu jak di diau ja'at. 17:16 Ughangtu nidau jak di deniauni, luak Aku pulau nidau jak di deniauni. 17:17 Beresiakala ughangtu batan endak Dighi ngan Pirman Dighi diau benagh. Nyela, Pirman Dighitu benagh. 17:18 Aku ngajung ughangtu ke deniau, luak Dighi la ngajung Aku ke deniau. 17:19 Bak, batan endak ughangtu Aku nyeraka diriKu ngan Dighi, supayau ughangtu pulau nyeraka diriau nian batan endak Dighi. 17:20 Aku ukan ndu'aka ughang ini ajau. Aku pulau ndu'aka jemau diau ka percayau ngan Aku karnau kici'an ughang ini. 17:21 Bak, Aku mintak, supayau gegalau ughangtu njadi seghundak, luak Dighi seghundak ngan Aku, Aku seghundak ngan Dighi. Aku endak ughangtu seghundak ngan kitau, mangku deniau percayau, bansau Dighi ngajung Aku. 17:22 Akuni la ngagungka ughangtu ngan carau luak Dighi la ngagungka Aku, mangku ughangtu njadi seghundak, luak Kitau pulau la seghundak. 17:23 Aku seghundak ngan ughangtu, Dighi seghundak ngan Aku, mangku ughangtu seghundak nian. Mangku deniau keruan, Dighitu ngajung Aku, Dighi nyayangi ughangtu, luak Dighi nyayangi Aku. 17:24 Bak, Aku endak, supayau jemau diau Dighi enjuakka ngan Aku adau guak Aku di badaKu, mangku ughangtu nginak keagungan diau la Dighi enjuakka ngan Aku, karnau Dighi la nyayangi Aku antak ka deniau adau. 17:25 Bak diau adil, deniau nidau keruan Dighi, anyautu Aku keruan Dighi ngan ughangtu keruan, bansau Dighitu ngajung Aku. 17:26 Aku la nyatauka namau Dighi ngan ughangtu, Aku maju nyataukanyau, mangku sayang Dighi ngan Aku maju dalam ati ughangtu, mangku Aku seghundak ngan ughangtu."

Yuhanis 18

18:1 La udim Yesus bedu'a luak itu, Diau ngeluagh jak di badaHau tadi ngan anak-buaHau pegi ke beghang ayiak Kidrun. Di situ adau kebun, mangku Yesus ngan anak-buaHau masuak ke kebun itu. 18:2 Yudas, jemau diau njualka Yesus itu, keruan badaHau, karnau Yesus rajin betunggal ngan anak-buaHau di situ. 18:3 Mangku Yudas pegi ke situ mbata'i serumbungan tentera jemau Rum ngan penjagau Ghuma Allah diau diajung imam-imam bepangkat tinggi ngan jemau Parisi. Ughangtu mbatak pakaian ngan lampu ngan ubur. 18:4 Yesus la keruan gegalaunyau diau ka ditanggungkaNyau, mangku Diau masighi ughangtu ngan betanyau, "Kamutu ndala'i sapau?" 18:5 Katau ughangtu, "Yesus, jemau Nasarit!" Katau Yesus, "Akunila Diau." Yudas, jemau diau njualka Yesustu, betegak pulau di situ ngan ughangtu. 18:6 Satu Yesus ngiciak, "Akunila Diau", ughangtu mundur galau, mangku rubua ke tana. 18:7 Yesus betanyau agi ngan ughangtu, "Kamu ndala'i sapau?" Katau ughangtu, "Yesus, jemau Nasarit!" 18:8 "La Kukiciakka, Akunila Diau," katau Yesus. "Amun kamutu ndala'i Aku nian, nengkela ughang ini pegi." 18:9 Luak itu dikiciakkaNyau, mangku ditepati setu diau la dikiciakkaNyau tadi, "Jak di ughangtu diau Dighi enjuakka ngan Aku, nidau sughang kia diau Kuenangka benasau." 18:10 Simun Pitrus diau mbatak pedang ncabut pedangautu, dikapakkanyau ngan budak Imam Besak mangku kutung telingau kananau. Namau budak itu Malkus. 18:11 Mangku Yesus bekatau ngan Pitrus, "Berangkaukala pedangtu! Apu kaba terupuak, Aku nidau mesti nanggung sengsarau diau la ditetapka Bapak ngan Aku?" 18:12 Mangku tentera-tentera Rum ngan kumandanau ngan penjagau-penjagau diau diajung jemau Yahudi tadi nangkap Yesus ngan dikebat tanganAu. 18:13 La udim itu Yesus dibata'i ngadap Hanas, karnau diau mentuau Kayapas diau njadi Imam Besak taun itu. 18:14 Kayapas itula diau senitu ngici'i pengulu jemau Yahudi, "Iluakla sughang mati batan endak gegalau jemau." 18:15 Simun Pitrus ngan sughang kantinau ngikut Yesus. Anak-bua itu la kecinauan ngan Imam Besak, mangku diau ngikut Yesus masuak ke tengalaman ghuma Imam Besak tadi. 18:16 Anyautu Pitrus di luagh pasigh mukau lawang, mangku kantinau tadi diau kecinauan ngan Imam Besak itu pegi keluagh ngiciak ngan tinau diau nunggui mukau lawangtu, mangku mbatak Pitrus masuak. 18:17 Jemau tinau diau nunggui mukau lawangtu ngiciak ngan Pitrus, "Ukan kaba pulau anak-bua Jemau itu?" "Ukan!" Katau Pitrus. 18:18 Karnau malam itu dingin, budak-budak ngan penjagau-penjagau Ghuma Allah ningguakka api, mangku ughangtu bediang guak api itu. Pitrus bediang pulau guak ughangtu. 18:19 Mangku Imam Besak mulai nanyaui Yesus ceritau anak-buaHau ngan ajaghanNyau. 18:20 Yesus nimbal, katauNyau, "Aku maju ngiciak ngan terang-terangan di mukau jemau banyak. Aku maju ngajagh di ghuma sembayang ngan di Ghuma Allah pulau, bada jemau Yahudi betunggal. Nidau kekela Aku mbunika kici'anKu. 18:21 Ngapau dighi nanyaui Aku? Tanyauila ughang diau la ndengagh Aku ngajagh. Cengki ughangtu keruan setu diau Kukiciakka." 18:22 Yesus ngiciak luak itu, mangku sughang penjagau diau betegak di situ nampagh dayiAu ngan bekatau, "Beghani nian Kaba ngiciak luak itu ngan Imam Besak!" 18:23 Yesus nimbal, "Amun Aku ngiciakka setu diau sala, kiciakkala tuapau salahau. Anyautu amun diau Kukiciakka itu benagh, ngapau kaba nampagh Aku?" 18:24 Mangku Hanas ngajung jemau mbatak Yesus diau dikebat tanganAu ke Imam Besak Kayapas. 18:25 Simun Pitrus gi bediang di situ. Adau jemau diau ngiciak ngan diau, "Ukan kaba pulau anak-bua Jemau itu?" Pitrus nidau ngaku'i Yesus, "Ukan!" kataunyau. 18:26 Mangku sughang budak Imam Besak diau masia busuran ngan jemau diau telingaunyau dikapak Pitrus tadi bekatau, "Asauku aku nginak kaba di kebun tadi seghundak ngan Diau." 18:27 Pitrus ngulang nidau ngaku'i Yesus, "Ukan!" kataunyau. Mangku masau itula pulau ayam bekukuak. 18:28 Gi akap nian Yesus dibatak jak di ghuma Kayapas ke bada gubernur. Jemau Yahudi nidau masuak ke bada gubernur itu, mangku nidau aram, karnau ughangtu endak ngikut makan Paska. 18:29 Karnau itu Pilatus ngeluagh njenguak ughangtu ngan betanyau, "Tuapau sala Jemau ini ngan kapu dighi?" 18:30 Ughangtu nimbal, "Amun Jemau ini nidau besala, nidau kami bata'i njenguak dighi." 18:31 Pilatus bekatau ngan ughangtu, "Batakla Diauni, adilila nurut ukum Taurat kapu dighi!" Jemau Yahudi itu nimbal, "Kami nidau bulia ngukum jemau ngan ukuman mati." 18:32 Mangku luak itula kici'an Yesus ditepati ngiciakka caraunyau Diau ka mati. 18:33 La udim itu Pilatus masuak agi ke bada gubernur. Diau mantau Yesus mangku betanyau, "Kabani Rajau jemau Yahudi?" 18:34 Yesus nimbal, "Apu kici'an dighitu nurut rupu'an dighi, apu jemau lain ngiciakka ngan dighi ceritau Aku?" 18:35 Katau Pilatus, "Apu akuni jemau Yahudi? Bangsau Kabatula ngan imam-imam bepangkat tinggi diau nyeraka Kaba ngan aku. Tuapau perembak Kaba?" 18:36 Katau Yesus, "KekuasauanKu ukan jak di deniau ini. Misalau kekuasauanKu jak di deniauni, cetau anak-buaKu ka beusaha, supayau Aku jangan diseraka ngan pengulu jemau Yahudi. Tapitu kekuasauanKu ukan jak di deniau ini." 18:37 Mangku Pilatus betanyau agi ngan Diau, "Amun luak itu, Kaba rajau?" Timbal Yesus, "Nyela, katau dighi Akunila rajau. Aku lahir ngan datang ke deniau ini batan endak ngiciakka diau benagh. Bilang jemau diau asalau jak di diau benagh ndengaghka kici'anKu." 18:38 Pilatus betanyau agi ngan Diau, "Tuapau retiau diau benagh itu?" 18:39 Anyautu nurut kebiasauan kapu dighi idang taun masau aghi Paska aku mbibaska sughang kawalan. Kapu dighi tetuju aku mbibaska Rajau jemau Yahudi batan endak kapu dighi?" 18:40 Ughangtu nimbal ngan tegauk-gauk, "Nidau! Jangan Diau! Barabas ajau!" Barabastu sughang bandit.

Yuhanis 19

19:1 La udim itu Pilatus ngajung jemau mbaduki Yesus ngan pemecit bedughi. 19:2 Tentera-tentera mbuat gitar jak di ghanting bedughi, dikenauka di palak Yesus, mangku disurumka baju rajau ngan Diau. 19:3 La udim itu ughangtu beulang-ulang masighiNyau ngan bekatau, "Idup, Rajau jemau Yahudi!" Mangku ditampaghi dayiAu. 19:4 Pilatus ngeluagh agi ngan ngiciak ngan jemau banyak itu, "Kina'ila, aku mbatak Diau keluagh guak kapu dighi, supayau kapu dighi keruan, sutiak kia salaHau nidau kudapat di Diau." 19:5 Yesus ngeluagh ngan begitar dughi ngan bebaju rajau. Katau Pilatus, "Kina'ila Jemau ini!" 19:6 Nginak Yesus, imam-imam bepangkat tinggi ngan penjagau-penjagau tegauk-gauk, "Pakukala Diau! Pakukala Diau di kayu salip!" Katau Pilatus, "Batakla Diau ngan kapu dighi, pakukala di kayu salip. Akuni nidau kila dapat sutiak salaHau di Diau." 19:7 Mangku jemau Yahudi itu nimbal, "Nurut ukum kami Diau mesti diukum mati, karnau Diau ngiciakka diriAu Anak Allah!" 19:8 Ndengagh kici'an ughangtu, Pilatus tamba takut, 19:9 mangku masuak agi ke bada pengadilan ngan betanyau ngan Yesus, "Asal Kaba jak di manau?" Anyautu Yesus nidau nimbal. 19:10 Pilatus bekatau agi, "Kabani nidau nimbal? Ingatkala, aku bekuasau mbibaska Kaba ngan bekuasau makuka Kaba di kayu salip." 19:11 Yesus nimbal, "Dighi nidau bekuasau ngan Aku, amun kuasau itu nidau dienjuakka Allah ngan dighi. Karnau itu, besakla dusau jemau diau nyeraka Aku ngan dighi." 19:12 Satu Pilatus ndengagh titu, diau beusaha mbibaska Yesus, anyautu jemau Yahudi tegauk-gauk, kataunyau, "Amun dighi mbibaska Diau, dighi ukan kawan Kaisar. Jemau diau nganggap diriau rajau jemautu musua Kaisar." 19:13 La udim ndengagh kici'an itu, Yesus dibatak keluagh, mangku Pilatus duduak di kerusi pengadilan di bada diau benamau Dasagh Batu, basau Ibrani dikiciakka Gabata. 19:14 Aghi itu laka tengaghi, aghi bedandan batan endak aghi rerayau Paska. Pilatus bekatau ngan jemau Yahudi itu, "Inila Rajau kapu dighi!" 19:15 Ughangtu tegauk-gauk, "Bunuala Diau! Bunuala Diau! Pakukala Diau di kayu salip!" Katau Pilatus, "Aku mesti nyalipka Rajau kapu dighi?" Timbal imam-imam bepangkat tinggi, "Kami nidau bediau rajau lain jak di Kaisar!" 19:16 Mangku Pilatus nyeraka Yesus ngan ughangtu endak dipakuka di kayu salip. Mangku Yesus dibatak keluagh. 19:17 Yesus ngeluagh ngan mikul salipAu pegi ke bukit diau dikiciakka Kerungkang Palak, basau Ibrani dinamauka Gulguta. 19:18 Di situ Diau dipakuka di kayu salip serempak ngan duau jemau lain, sughang di sebela kidau, sughang di sebela kanan, Yesus di tetengaan. 19:19 Pilatus ngajung ngenauka tulisan di kayu salip itu, bacauannyau, "Yesus, jemau Nasarit, Rajau jemau Yahudi." 19:20 Banyak jemau Yahudi mbacau tulisan itu, karnau bada Yesus dipakuka di kayu saliptu nidau jawua jak di kuta. Tulisan itu basau Ibrani, basau Latin ngan basau Yunani. 19:21 Imam-imam bepangkat tinggi ngiciak ngan Pilatus, kataunyau, "Jangan dighi nulis, 'Rajau jemau Yahudi', tapitu tulisla, 'Jemau ini bekatau: Aku Rajau jemau Yahudi'!" 19:22 Pilatus nimbal, "Diau la ditulis, nengkela ditulis!" 19:23 La udim tentera itu makuka Yesus di kayu salip, ughangtu ngambiak bajuAu, dibagi empat padau sughang dapat sebagian. Ughangtu ngambiak kainAu pulau. KainAutu nidau bediau jayitannyau, ditenun galau jak di atas enggut ke bawa. 19:24 Karnau itu tentera ngiciak sughang ngan diau lain, "Jangan kitau ncebaghi kain ini. Mela kitau suntinka endak ngeruani sapau diau dapatau." Luak itula ditepati diau tetulis di Injil, "Ughangtu mbagika bajuKu ngan nyuntinka kainKu." Ngenian tentera itu la ngerjaukanyau. 19:25 Guak kayu salip itu betegak enduak Yesus, denga-sanak endu'Au, Maria bunting Kelupas, ngan Maria Magdalina. 19:26 Satu Yesus nginak endu'Au ngan anak-buaHau diau disayangiNyau di pasighau, Diau bekatau ngan endu'Au, "Mak, ini anak dighi!" 19:27 La udim itu Yesus bekatau ngan anak-buaHautu, "Itu mak kaba!" Mangku mulai masau itu anak-bua tadi nerimau tinau itu mendam di ghumahau. 19:28 Yesus keruan, mbak kini gegalaunyau la udim, mangku supayau ditepati setu diau ditulis di Injil Diau bekatau, "Aku aus!" 19:29 Di situ adau mangkuak besak penua ngan ayiak anggur masam. Mangku sutiak bungau karang diceculka ke dalam ayiak anggur itu, dicucuakka ke tungkat, dijujuaka ke mulut Yesus. 19:30 La udim Yesus ngisap ayiak anggur itu, Diau bekatau, "La udim!" Mangku Diau ngelintuakka pala'Au ngan nyeraka nyawauNyau. 19:31 Aghi itu aghi bedandan. Pengulu jemau Yahudi nidau endak mayat ughangtu maju tegantung di kayu salip masau aghi Sabat, apau agi aghi Sabat ini aghi rerayau besak. Karnau itu jemau Yahudi njenguak Pilatus mintak, supayau keting ughangtu dipataka, mangku mayatautu ditughunka. 19:32 Mangku tentera itu pegi mataka keting jemau diau sikuak ngan jemau diau lain diau disalipka serempak ngan Yesus. 19:33 Satu tenteratu sampai ke Yesus, ughangtu nginak, Diau la mati, mangku ketingAu nidau dipataka. 19:34 Sughang jak di tentera itu nuja ghusuak Yesus, mangku ngeluagh dagha undak ayiak. 19:35 Jemau diau nginak titu diautu ngiciakkanyau, supayau kamu percayau pulau. Kici'annyau itu benagh ngan diau keruan, bansau titu benagh. 19:36 Luak itula ditepati setu diau ditulis di Injil, "Nidau sutiak kia tulangAu ka dipataka." 19:37 Mangku adau pulau ditulis, "Ughangtu ka ngina'i Jemau diau dituja." 19:38 La udim itu Yusup jemau Arimatia mintak ngan Pilatus endak ngambiak mayat Yesus. Yusuptu pengikut Yesus, anyautu nidau ngan terang-terangan, karnau takut ngan pengulu jemau Yahudi. Pilatus ngajung nughunka mayat Yesustu, mangku Yusup pegi ngambiak mayat itu. 19:39 Nikudimus diau senitu pegi njenguak Yesus aghi malam pegi pulau ke situ. Diauni mbatak minyak ghum diau beundak rerempahan, kekirau tigau pulua kilu banya'au. 19:40 Ughang duautu ngambiak mayat Yesus, dibalutau ngan kain putia, diminya'inyau ngan minyak tadi nurut adat lembagau jemau Yahudi, amun nguburka jemau. 19:41 Pasigh bada Yesus disalipka adau kebun. Dalam kebun itu adau sutiak kuburan empai diau lum dipakai nguburka jemau. 19:42 Karnau aghi Sabat laka mulai ngan kuburantu pasigh, mangku mayat Yesus ditepiakka di situ.

Yuhanis 20

20:1 Aghi minggu paghak siang butau Maria Magdalina pegi ke kuburan itu. La sampai di kuburan diau nginak batu penukup kuburan la teguliak jak di tebuak kuburantu. 20:2 Diau belaghi njenguak Simun Pitrus ngan anak-bua diau disayangi Yesus, mangku ngiciak ngan ughang duautu, kataunyau, "Tuhan la diambiak jemau jak di kuburan, anyautu kami nidau keruan di manau bada Diau ditepiakka." 20:3 Mangku Pitrus ngan kantinau tadi pegi ke kuburan. 20:4 Ughang duautu belaghi, anyautu cepatla kantinau sampai di kuburan sangkan Pitrus. 20:5 Anak-bua itu nyubuak kuburan, mangku tekinak kain pembalutAu di situ. Anyautu diau nidau masuak. 20:6 La udim itu Simun Pitrus sampai pulau. Diau masuak ke kuburantu, mangku nginak kain pembalutAu di situ. 20:7 Anyautu setangan diau dikebatka di palak Yesus nidau bediau di pasigh kain tadi, la tegulung di bada lain. 20:8 Mangku anak-bua diau dulu sampai di kuburantu masuak pulau. Diau nginak mangku percayau. 20:9 Masau itu ughangtu lum ngerti setu diau ditulis dalam Injil, bansau Diau mesti ngulang idup jak di mati. 20:10 La udim itu duau ughang anak-bua Yesustu baliak ke badahau. 20:11 Maria Magdalina betegak guak kuburan sampai nangis. Diau dang nangis, nyubuak dalam kuburan, 20:12 mangku tekinak duau ughang malaikat bebaju putia. Malaikat itu duduak di bada mayat Yesus ditepiakka senitu, diau sughang guak pala'Au, diau sughang agi di ketingAu. 20:13 Malaikat itu ngiciak ngan Maria, kataunyau, "Ngapau kaba nangis?" Katau Maria, "Tuhanku diambiak jemau, aku nidau keruan di manau Diau ditepiakka." 20:14 La udim ngiciak luak itu, diau nulia ke belakang, mangku tekinak Yesus betegak di situ, anyautu diau nidau keruan, bansau itu Yesus. 20:15 Yesus betanyau ngan diau, "Ngapau kaba nangis? Kaba ndala'i sapau?" Maria sangkau itu tukang sayia kebun, mangku diau ngiciak luak ini, "Amun dighi ngaliakaNyau, kiciakkala ngan aku, mangku aku pacak ngambi'Au." 20:16 Katau Yesus, "Maria!" Maria nulia ke Yesus, mangku bekatau basau Ibrani, "Rabuni!" Retiau guru. 20:17 Katau Yesus, "Jangan ngecakka Aku, karnau Aku lum nayiak njenguak Bapak. Anyautu pegila njenguak anak-buaKu, kiciakkala ngan ughangtu, mbak kini Aku nayiak njenguak BapakKu diau pulau Bapak kamu, AllahKu diau pulau Allah kamu." 20:18 Mangku Maria Magdalina pegi ngiciak ngan anak-bua Yesus, bansau diau la nginak Tuhan, lagi pulau bansau Yesus la ngiciakka gegalaunyautu ngan diau. 20:19 Aghi petamau minggu itu, satu aghitu la malam, anak-bua Yesus nunggal di sebua ghuma ngan duaghaunyau dikunci, karnau ughangtu takut ngan tuau-tuau jemau Yahudi. Mangku Yesus datang betegak di pugan anak-buaHautu ngan bekatau, "Salam damai batan endak kamu." 20:20 La udim bekatau luak itu, Diau ngancakka telapak tanganAu ngan ghusu'Au. Mangku anak-buaHautu riang nian nginak Tuhan. 20:21 Yesus bekatau agi ngan ughangtu, "Salam damai batan endak kamu! Luak Bapak ngajung Aku, luak itula pulau Aku ngajung kamu." 20:22 La udim ngiciak luak itu, Yesus niupka nyawaunyau ngan ughangtu sampai bekatau, "Terimaula Rua Allah. 20:23 Amun kamu ngabiska dusau jemau, dusaunyau ka abis. Amun kamu nidau ngabiska dusau jemau, dusaunyau nidau ka abis." 20:24 Anyautu Tumas, sughang jak di duau belas anak-buaHautu, diau dikiciakka "Gembagh", nidau bediau guguak ughangtu, masau Yesus datang ke situ. 20:25 Mangku anak-buaHau tadi ngiciak ngan Tumas, kataunyau, "Kami la betemu ngan Tuhan!" Anyautu Tumas bekatau, "Amun aku lum nginak engkas besipaku di tanganAu ngan lum ncucuakka jaghiku ke engkas besipakutu ngan ncucuakka tanganku ke ghusu'Au, aku nidau ka percayau." 20:26 La udim seminggu anak-bua Yesus betunggal agi di ghuma itu ngan Tumas adau pulau di situ. Duaghau dang dikunci, mangku Yesus datang betegak di tetengaan ughangtu sampai bekatau, "Salam damai batan endak kamu." 20:27 La udim itu Yesus ngiciak ngan Tumas, katauNyau, "Kina'ila tanganKu, tepiakka jaghi kaba di sini. Surungkala tangan kaba ngan cucuakka ke ghusuakKu. Mangku jangan kaba nidau percayau, anyautu percayaula." 20:28 Mangku katau Tumas, "Dighila Tuhanku ngan Allahku!" 20:29 Katau Yesus, "Kaba percayau, karnau la nginak Aku. Riangla jemau diau percayau empuak nidau nginak Aku." 20:30 Gi banyak tandau nyelia lainau diau dikerjauka Yesus di adapan anak-buaHau, anyautu nidau tecatat dalam kitab ini. 20:31 Tapitu gegalaunyau diau temasuak di sini la ditulis, supayau kamu percayau, Yesus itula Keristus, Rajau Penyelamat, Anak Allah, mangku supayau kamu bulia idup, karnau percayau ngan Diau.

Yuhanis 21

21:1 La udim itu Yesus ngancakka diriAu agi ngan anak-buaHau di Danau Tiberias. Luak inila ceritaunyau: 21:2 Di tepi danau itu adau Simun Pitrus, Tumas diau dikiciakka "Gembagh", Natanail jemau Kana di Galilia, anak-anak Sebedius ngan duau anak-bua Yesus lainau. 21:3 Katau Simun Pitrus, "Aku endak pegi ndalak ikan!" Katau ughangtu, "Kami endak pulau ngikut!" Mangku ughangtu pegi nayiak perawu. Anyautu semalam getau itu ughangtu nidau bulia tuapau-apau. 21:4 Matau-aghi empai tumbua, Yesus betegak di tepi danau itu. Anak-buaHau nidau keruan, bansau itu Yesus. 21:5 Yesus ngiciak ngan anak-buaHau, "Ui, anak-buaKu. Apu kamu bulia ikan?" Katau ughangtu, "Sikuak kia endiak bulia!" 21:6 Katau Yesus ngan ughangtu, "Kipaskala jalau kamu di sebela kanan perawu, mangku kamu ka bulia ikan!" Ughangtu ngipaska jalau itu, mangku nidau tetariak agi, karnau ikan tegalau banyak. 21:7 Anak-bua diau disayangi Yesus bekatau ngan Pitrus, "Itu Tuhan!" Ndengagh itu Tuhan, Simun Pitrus nyurum bajuau karnau nidau bebaju, mangku melumpat ke danau. 21:8 Anak-buaHau diau lain ndaghat ngan perawu sampai nariak jalau diau penua ngan ikan. Ughangtu nidau jawua jak di daghat, kekirau enam pulua depau. 21:9 La sampai di daghat, anak-buaHau nginak adau panggangan ikan ngan ruti di api. 21:10 Katau Yesus, "Batak dikit ikan ke sini diau empai bulia." 21:11 Simun Pitrus nayiak perawu tadi, mangku nariak jalau ke daghat. Jalau itu penua ngan ikan besak-besak. Gegalaunyautu adau seratus limau pulua tigau ikuak. Empuak banyak ikan luak itu, jalaunyau nidau cebagh. 21:12 Katau Yesus, "Mela, makan!" Nidau sughang kia jak di anak-buaHau beghani betanyau, "Dighi sapau?" Karnau ughangtu keruan Diautu Tuhan. 21:13 Udim itu Yesus masighi anak-buaHautu, diambi'Au rutitu, dienjuakka ngan ughangtu tadi. Luak itula pulau ngan ikan. 21:14 Inila diau ketigau kaliau Yesus ngancakka diriAu ngan anak-buaHau, la udim Diau ngulang idup jak di mati. 21:15 La udim makan Yesus ngiciak ngan Simun Pitrus, katauNyau, "Simun, anak Yuhanis, apu kaba nyayangi Aku lebia jak di gegalaunyau ini?" "Au, Tuhan," katau Pitrus, "Dighi keruan aku nyayangi Dighi." Katau Yesus, "Sayiala anak bebiriKu!" 21:16 Yesus betanyau keduau kaliau, "Simun, anak Yuhanis, apu kaba nyayangi Aku?" "Au, Tuhan," katau Pitrus, "Dighi keruan aku nyayangi Dighi." Katau Yesus, "Sayiala bebiriKu." 21:17 Diau ketigau kaliau Yesus betanyau ngan diau, "Simun, anak Yuhanis," katau Yesus, "Apu kaba nyayangi Aku?" Pitrus bingung, karnau Yesus betanyau ngan diau enggut tigau kali, "Apu kaba nyayangi Aku?" Mangku Pitrus nimbal, "Tuhan, Dighi keruan gegalaunyau, Dighi keruan aku nyayangi Dighi." Katau Yesus, "Sayiala bebiriKu! 21:18 Percayaula ngan katauKu ini: Masau kaba gi mudau, kabanila ngenauka bebat kaba, pegi ke manau ajau kaba endak. Amun kaba la tuau, kaba nyurungka tangan kaba, mangku jemau lain ngebat kaba, mbatak kaba ke bada kaba enggup pegi!" 21:19 Ngan kici'an luak itu tadi Yesus nunjuakka carau Pitrus ka mati endak ngagungka Allah. La udim ngiciak luak itu, katau Yesus ngan Pitrus, "Ikutkala Aku!" 21:20 Satu Pitrus nulia, diau nginak di belakangau anak-bua diau disayangi Yesus. Diautu duduak pasigh Yesus masau makan sampai betanyau ngan Yesus, "Tuhan, sapau jemau diau ka njualka Dighi?" 21:21 Nginak diau, Pitrus betanyau ngan Yesus, "Tuhan, luak manau ngan diau ini?" 21:22 Katau Yesus, "Misalau Aku endak diau maju idup, enggut Aku datang, itu ukan kerjau kaba. Anyautu kabani, mela ngikut Aku!" 21:23 Mangku tesiar ceritau di pugan anak-buaHau, mbak bansau anak-bua itu nidau ka mati. Anyautu Yesus nidau ngiciakka, bansau anak-buaHautu nidau ka mati, tapitu, "Misalau Aku endak diau maju idup, enggut Aku datang, itu ukan kerjau kaba." 21:24 Anak-bua itula diau ngiciakka gegalau ceritau ini, diau pulau la nulisau. Kami keruan, tuapau diau dikiciakkanyautu benagh. 21:25 Gi banyak kerjau lain agi diau dikerjauka Yesus. Misalau gegalaunyau itu ditulis sejagh sutiak, asauku nidau ka cukup bada di gegalau deniau batan endak muatka gegalau kitab diau ka ditulis itu.

Ceritau Rasul-rasul 1

1:1 Tiupilus diau diregaui. Di kitab aku senitu la kutulis gegalaunyau diau dikerjauka ngan diajaghka Yesus 1:2 enggut aghi Diau tuangkat ke sergau. Antak ka Diau tuangkat, ngan kuasau Rua Allah Diau ngajung rasul-rasul diau la dipilia itu. 1:3 La udim Diau mati, Diau ngancakka diriAu ngan rasul itu, mangku ngan banyak carau Diau mbuktika, bansau Diau idup nian. Selamau empat pulua aghi Diau rajin ngancakka diriAu ngan nceritauka luak manau kekuasauan Allah. 1:4 Masau Diau betunggal ngan ughangtu, diajungAu luak ini, "Jangan kamu pegi jak di Yerusalim. Tunggula di sini, enggut BapakKu ngenjuakka setu diau dijanjikaNyau diau la Kukiciakka ngan kamu senitu. 1:5 Yuhanis mbaptiska ngan ayiak. Anyautu nidau lamau agi kamu ka dibaptis ngan Rua Allah." 1:6 Mangku rasul diau betunggal ngan Yesus betanyau, "Apu mbak kini Dighi endak negakka agi pemerinta bangsau Israil?" 1:7 Yesus nimbal, "BapakKu itula netapka masau ngan aghiau. Itu nidau nanti kamu keruani, karnau titu hak Bapak. 1:8 Kamuni ka nerimau kuasau, amun Rua Allah nguasaui kamu, mangku kamu ka nceritauka ngan jemau gegalaunyau diau kamu keruani ceritau Aku. Kebarka ngan kamu di Yerusalim, di gegalau Yudia ngan Samaria enggut sampai ke ujung deniau." 1:9 La udim ngiciak luak itu Yesus tuangkat ke sergau dikina'i ughangtu, mangku adau aban ngalangi ughangtu ngina'i Diau. 1:10 Ughangtu gi nginak ke langit, ngina'i Diau dang tuangkattu, mangku adau duau ughang bebaju putia betegak guak ughangtu 1:11 sampai bekatau, "Ui jemau Galilia, ngapau kamu ncungak ke langit? Yesus ini diau kamu kina'i tuangkat ke sergautu, ka ngulang agi ngan carau luak diau la kamu kina'i tadi." 1:12 La udim itu rasul-rasul baliak ke Yerusalim jak di bukit Saitun. Jawua bukittu kekirau sekilu jak di Yerusalim. 1:13 La sampai di kuta, ughangtu nayiak ke bada ughangtu numpang temalam. Rasul itu Pitrus, Yuhanis, Yakubus, Anderias, Pilipus, Tumas, Bartulumius, Matius, Yakubus, anak Alpius, Simun jemau Silut ngan Yudas, anak Yakubus. 1:14 Gegalau rumbungan itu maju seghundak ngan rajin bedu'a. Ughangtu bedu'a ngan tinau-tinau, ngan pulau Maria, mak Yesus, ngan ading-beghading Yesus. 1:15 Masau itu Pitrus betegak endak ngiciak ngan kantin-kantinau diau dang betunggal itu, kekirau seratus duau pulua ughang. Katau Pitrus, 1:16 "Ui, adiak-sanak, setu diau ditulis dalam Injil mesti tejadi. Senitu Rua Allah ngan Daud ngiciakka Yudas diau ngajung jemau nangkap Yesustu. 1:17 Diautu senitu kantin kitau, diau pulau dipilia bekerjau serempak ngan kitau." -- 1:18 Yudastu la mbeli sebidang tana ngan tanci jak di keja'atannyautu. Diau telabua teterukup, tegebur peghut laju mati. 1:19 Gegalau jemau di Yerusalim keruan ceritau itu. Mangku tana itu dinamauka Akaldama, retiau "Tana dagha". -- 1:20 "Karnau di kitab Masmur ditulis luak ini, 'Nengkela badahau njadi suni. Jangan sughang kia mendam di dalamau.' Adau pulau ditulis luak ini, 'Nengkela pangkatau diambiak jemau lain.' 1:21 Na, kitau mesti milia penggenti Yudas jak di ughang diau maju betunggal ngan kitau, timpau Yesus gi adau di guak kitau. 1:22 Jemau itu mesti seghundak ngan kitau jak di aghi Yesus dibaptis enggut Diau tuangkat ke sergau, mangku ngiciakka ngan jemau, bansau Yesus ngulang idup jak di mati." 1:23 Mangku jemau diau adau di situ milia duau ughang, diautu Matius ngan Yusup diau dinamauka pulau Barsabas ngan pulau dipantau Yustus. 1:24 Mangku ughangtu bedu'a, kataunyau, "Tuhan, Dighi keruan gegalau ati jemau. Tunjuakkala ngan kami, sapau jak di duau ughang ini diau Dighi pilia 1:25 batan endak penggenti Yudas diau la ninggalka tugasau ngan la mati." 1:26 La udim itu namau ughang duautu diundi. Diau dipilia Matias, mangku diau njadi rasul seghundak ngan sebelas rasul lain.

Ceritau Rasul-rasul 2

2:1 Aghi Pentakusta la sampai, mangku gegalau jemau diau percayau ngan Yesus betunggal sebada. 2:2 Adau muni kedengaghan jak di langit luak angin deghas. Muniautu pacak didengagh di gegalau ghuma bada ughangtu betunggal. 2:3 Mangku tekinak luak lida api diau njilat-njilat, mangku nginggapi ughangtu galau. 2:4 Ughangtu dikuasaui Rua Allah, mangku mulai ngiciak ngan serbau basau. Ughangtu ngiciak luak la dienjuakka Ruatu. 2:5 Masau itu banyak jemau Yahudi diau alim jak di gegalau nenggeri di deniauni ngerayau ke Yerusalim. Ughangtu jemau diau ta'at ngan Allah. 2:6 Ndengagh munitu tadi, banyak kematila jemau datang. Ughangtu tegagau galau, karnau ndengagh rasul itu ngiciak ngan basau sesughangan. 2:7 Ughangtu kepagauan nian, mangku bekatau, "Apu ukan jemau diau ngiciak ini jemau Galilia galau? 2:8 Luak manau kitau pacak ndengagh ughangtu ngiciak ngan basau kitau sesughangan, basau diau kitau pakai di nenggeri asal kitau. 2:9 Kitau jak di Partia, Midia, Ilam, jak di Mesuputamia, Yudia ngan Kapadukia, jak di Puntus ngan Asia, 2:10 jak di Perigia ngan Pampilia, jak di Mesir ngan daira Libia pasigh Kirini. Adau pulau diau datang jak di Rum. 2:11 Adau jemau Yahudi, adau jemau bangsau lain diau la masuak agamau Yahudi. Adau pulau diau datang jak di Kerita ngan Arab. Gegalau kitauni ndengagh ughangni ngiciak ngan basau kitau sesughangan ngiciakka setu diau nyelia diau dikerjauka Allah." 2:12 Ughangtu kemangan ngan kepagauan galau, mangku sangi tanyaui, "Tuapau retiautu?" 2:13 Adau pulau jemau nyindir, "Ughangtu mabuak." 2:14 Pitrus betegak ngan sebelas rasul itu, mangku ngiciak ngan jemau banyaktu. Ngan suarau bias diau bekatau, "Ui, gegalau kapu dighi diau adau di Yerusalim. Dengaghkala iluak-iluak kataukuni. 2:15 Jemau ini nidau mabuak luak kapu dighi sangkautu, karnau mbak kini gi akap. 2:16 Inila diau la dipesan Allah ngan nabi Yuil, 2:17 'Allah bekatau: Masau pengabisan saman Aku ka ngenjuakka RuaKu ngan gegalau manusiau. Mangku anak-anak kamu empuak lanang empuak tinau ka ngiciakka katau Allah. Budak bujang ka nginak pengina'an, jemau tuau ka bemimpi mimpika ceritau Allah. 2:18 Jugau ngan anak-buaKu empuak lanang empuak tinau ka Kuenjuakka RuaKu masau itu, mangku ughangtu ka ngiciakka katau Allah. 2:19 Aku ka ngerjauka setu diau nyelia di langit ngan tandau di deniau, ka adau dagha ngan api ngan asap bekabut. 2:20 Matau-aghi ka njadi keleman, bulan ka njadi abang luak dagha, antak ka aghi Tuhan datang, aghi besak diau nyelia itu. 2:21 Mangku jemau diau ka mintak tulung ngan Tuhan ka diselamatka.' 2:22 Ui, kapu dighi, dengaghkala kataukuni. Yesus, jemau Nasarit itu, la dipilia Allah. Itu dinyatauka ngan kapu dighi ngan tandau-tandau ngan setu diau nyelia diau dikerjauka Yesus guak kapu dighi ngan kuasau Allah, luak kapu dighi la keruan galau. 2:23 Nurut rencanauNyau Allah la nyeraka Diau, la kapu dighi bunua ngan ngajung jemau ja'at makuka Diau di kayu salip. 2:24 Anyautu Allah ngidupka Diau jak di mati, dilepaskaNyau jak di sengsarau maut, karnau nidau ka adau Diau maju dalam kuasau mauttu. 2:25 Karnau Daud ngiciakka Diau, 'Aku maju nginak ke Tuhan. Diau guak Aku, mangku Aku nidau mundur. 2:26 Itula sebapau atiKu riang ngan mulutKu ngagungka Tuhan, mangku badanKu ka mendam tenang ngaghapka Tuhan. 2:27 Dighi nidau ka ngenangka Aku di bada jemau mati. Dighi nidau ngenangka mayat Budak Dighi diau ta'at njadi busuak. 2:28 Dighi nunjuakka ngan Aku jalan diau nuju idup. Aku injiak nianan, karnau Dighi adau guak Aku.' 2:29 Aku endak ngiciak ngan kapu dighi terang-terangan ngiciakka ceritau Daud, bapak bangsau kitau. Diautu mati, mangku dikuburka. Kuburannyautu gi adau guak kitau enggut mbak kini. 2:30 Daudtu sughang nabi, mangku keruan, Allah la bejanji ngan besumpa, mbak bansau sughang jak di pengadau Daud ka dijadika Allah rajau luak diau. 2:31 Itula sebapau diau la keruan ngan ngiciakka Mesias, Rajau Penyelamattu, ka ngulang idup ngan ngiciakka, bansau Diau nidau ditinggalka di bada jemau mati ngan badanAu nidau ka busuak. 2:32 Yesus itula diau Allah idupka agi jak di mati. Kami gegalaunyau la ngina'au nian ngan ngiciakkanyau. 2:33 Diau diangkat Allah di sebela kananAu, mangku nerimau Rua Allah diau la dijanjika Bapak. Mangku setu diau la kapu dighi dengagh ngan kinak mbak kini, itu Rua Allah diau la dienjuakka ngan kami. 2:34 Daud itu nidau nayiak ke sergau. Diautu bekatau, 'Allah bekatau ngan TuhanKu, 2:35 duduakla di sebela kananKu, enggut Aku mbuat musua Kaba nyemba Kaba.' 2:36 Mangku gegalau jemau Israil mesti keruan nian, Yesus diau kapu dighi salipkatu dijadika Allah Tuhan ngan Rajau Penyelamat." 2:37 Satu ndengagh kici'annyautu, ughangtu nyesal nian ngan bingung, mangku betanyau ngan Pitrus ngan rasul lainau, "Tuapau diau mesti kami kerjauka?" 2:38 Pitrus nimbal, "Ubaila perembak kapu dighi jak di dusau ngan mintak dibaptis ngan namau Yesus Keristus, mangku dusau kapu dighi diabiska, mangku kapu dighi ka dienju'i Rua Allah. 2:39 Karnau inila setu diau dijanjika Allahtu batan endak kapu dighi ngan pengadau kapu dighi ngan batan endak jemau diau di bada jawua diau ka dipilia Allah, Tuhan kitautu." 2:40 Luak itula Pitrus ngiciak ngan ughangtu. Mangku ngan banyak katau lain diau ngajung ughangtu nian, supayau njawuaka diriau jak di jemau ja'attu diau ka diukum Allah. 2:41 Banyak jemau percayau ngan kici'an Pitrus, mangku mintak dibaptis. Gegalau jemau diau percayau aghi itu kekirau tigau ribu ughang. 2:42 Ngan rajin jemau diau percayautu belajagh jak di rasul ngan maju seghundak. Ughangtu makan, makan jamuan Tuhan ngan bedu'a seghundak. 2:43 Banyak nian tandau nyelia diau dikerjauka rasul itu, mangku gegalau jemau kepagauan ngan penakut. 2:44 Gegalau jemau diau percayau maju seghundak, mangku setu diau adau di ughangtu dienjuakka ngan jemau diau nidau bediau. 2:45 Adau jemau diau njualka retau bendaunyau, mangku tanciau dienjuakka ngan jemau nurut kepentingannyau sesughangan. 2:46 Idang aghi ughangtu maju seghundak di Ghuma Allah. Ughangtu makan, makan jamuan Tuhan jak di ghuma ke ghuma ngan riang ngan tulus ati. 2:47 Ughangtu maju ngagungka Allah, mangku gegalau jemau riang ngan ughangtu. Mangku idang aghi ughangtu maju betamba, karnau Tuhan ngenju'i jemau diau diselamatkaNyau.

Ceritau Rasul-rasul 3

3:1 Adau sepetang Pitrus ngan Yuhanis pegi ke Ghuma Allah endak sembayang. 3:2 Di situ adau sughang jemau lanang diau lumpua jak di keciak. Idang aghi jemau itu dibata'i ke situ, ditepiakka pasigh mukau lawang Ghuma Allah diau dikatauka Mukau Lawang Alap endak mintak sedeka ngan jemau diau masuak Ghuma Allah. 3:3 Satu jemautu nginak Pitrus ngan Yuhanis endak masuak, diau mintak sedeka ngan ughang duautu. 3:4 Ughang duautu ngina'i diau, mangku Pitrus bekatau, "Kina'ila kami!" 3:5 Mangku jemautu ngina'i ughang duautu ngaghapka sedeka. 3:6 Katau Pitrus, "Aku nidau bediau tanci dikit kiala. Anyautu tuapau diau adau di aku ka kuenjuakka ngan dighi. Ngan kuasau Yesus Keristus, jemau Nasarit itu, bejalanla!" 3:7 Mangku Pitrus ngecakka tangan kanan jemau lumpuatu, ditegakkanyau. Masau itu pulau ketingau njadi kuat nianan. 3:8 Diautu melumpat betegak ngan mulai bejalan ke situ ke sini, mangku masuak Ghuma Allah serempak ngan Pitrus ngan Yuhanis. Sampai bejalan diau melumpat-lumpat ngan ngagungka Allah. 3:9 Gegalau jemau nginak jemau diau bejalan ngan benyanyi ngagungka Allahtu, 3:10 mangku ughangtu jagau, bansau diau itula jemau mintak-mintak duduak pasigh Mukau Lawang Alap di Ghuma Allah. Ughangtu kemangan nian ngan kepagauan nginak setu diau la tejadi ngan diau. 3:11 Jemau tadi maju ngikut Pitrus ngan Yuhanis, mangku gegalau jemau banyak diau kemangan itu datang ngina'i ughangtu di anggung diau benamau Anggung Salumu. 3:12 Pitrus nginak jemau banyak itu mangku bekatau, "Ui, kapu dighi. Ngapau kapu dighi kemangan nginak titu? Ngapau kapu dighi ngina'i kami? Apu kapu dighi kirau, kami mbuat jemautu bejalan, karnau adau kuasau di kamini ngan kamini alim nian? 3:13 Allah niniak puyang kitau Abraham, Isak ngan Yakub la ngagungka Buda'Au Yesus. Yesus itula diau kapu dighi seraka ngan penguasau enggup nerimau Diau, empuak Pilatustu endak melepaskaNyau. 3:14 Diautu iluak lagi beresia. Anyautu kapu dighi enggup nerimau Diau, mangku ngajung Pilatus, supayau sughang pembunua dilepaskanyau batan endak kapu dighi. 3:15 Luak itula kapu dighi mbunua Diau, awuak Diautu pacak ngenjuakka idup nian ngan jemau. Allah la ngidupka Diau jak di mati. Kamini la ngina'Au mangku ngiciakkanyau. 3:16 Ngan kuasau namau Yesus itula jemau lumpuatu pacak bejalan. Karnau percayau ngan Yesus, mangku jemautu la ghadu ngan kuat luak kapu dighi la ngina'au. 3:17 Na, kapu dighi, aku keruan, kapu dighi ngan tuau-tuau kitau ngerjauka titu, karnau nidau terti tuapau diau dikerjaukatu. 3:18 Ngan carau luak itula la ditepati tuapau diau la dikatauka Allah senitu ngan nabiAu, mbak bansau Mesias, Rajau Penyelamat, mesti ka meghasauka sengsarau. 3:19 Karnau itu ubaila perembak ngan dusau kapu dighi, datangla ngan Allah, mangku dusau kapu dighi diabiskaNyau. 3:20 Mangku kapu dighi ka diteguaka Tuhan dalam rua, mangku Yesus ka diajung njenguak kapu dighi, Yesustu diau la ditetapka njadi Rajau Penyelamat batan endak kapu dighi. 3:21 Diau mesti mendam di sergau, enggut gegalaunyau dijadika empai, luak la dikiciakka Allah ngan nabiAu diau beresia senitu. 3:22 Nyela, Musa la bekatau, 'Tuhan Allah ka ngajung sughang jak di bangsau kamu njadi Nabi semegi ngan aku: Dengaghkala gegalaunyau diau dikiciakkaNyau ngan kamu.' 3:23 Mangku jemau diau nidau ndengagh Nabitu ka diasingka jak di umat Allah mangku benasau. 3:24 Nabi-nabi diau la nyampaika pesan Allah, mulai jak di nabi Samuil ngan nabi lainau diau datang udim diau, gegalaunyau ngiciakka masau ini. 3:25 Janji-janji Allah diau la dikiciakka nabi senitu dijanjika batan endak kamu. Dalam janji diau la dibuat Allah ngan niniak puyang kitau Allah bekatau ngan Abraham luak ini, 'Karnau pengadau kaba Aku ka iluak ngan gegalau bangsau di deniauni.' 3:26 Itula sebapau Allah netapka Buda'Au mangku ngajung Diau datang dulu guak kapu dighi, mangku Diau iluak ngan kapu dighi ngajung kapu dighi ngubai jak di perembak diau ja'at."

Ceritau Rasul-rasul 4

4:1 Penarau Pitrus ngan Yuhanis gi ngiciak ngan jemau banyaktu diau didatangi imam-imam ngan kumandan penjagau Ghuma Allah ngan jemau Saduki. 4:2 Ughangtu mara, karnau Pitrus ngan Yuhanis ngiciakka ngan jemau banyak, bansau Yesus la diidupka jak di mati, mangku titu mbuktika, bansau jemau mati ngulang idup. 4:3 Ughang duautu ditangkap, mangku dimasuakka di jil. Karnau aghi laka malam, diau mendam di situ enggut pagi di aghiau. 4:4 Jak di jemau diau la ndengagh kici'an rasul tadi banyak diau percayau, mangku gegalau jemau percayau njadi limau ribu ughang. 4:5 Pagi di aghiau pengulu-pengulu ngan tuau-tuau jemau Yahudi ngan guru-guru ukum Taurat betunggal di Yerusalim 4:6 ngan Imam Besak Hanas, Kayapas, Yuhanis, Aliksandar ngan jemau lain diau temasuak pemili Imam Besaktu. 4:7 Mangku Pitrus ngan Yuhanis dibatak ngadap sidang itu, mangku diperisau ngan petanyauan ini, "Luak manau caraunyau kamu meghaduka jemau lumpua itu? Pakai kuasau apau ngan namau sapau kamu ngerjauka titu?" 4:8 Mangku katau Pitrus, "Ui, pengulu-pengulu ngan tuau-tuau bangsau kitau, 4:9 kami saghini diperisau, karnau meghaduka jemau lumpua, mangku kapu dighi endak ngeruani, luak manau titu dikerjauka. 4:10 Kapu dighi ngan bangsau kitau pulau mesti keruan galau, bansau jemau ini ghadu karnau kuasau Yesus Keristus, jemau Nasarit itu. Yesus itu diau la kapu dighi pakuka di kayu salip la diidupka Allah jak di mati. 4:11 Yesus itula batu diau dicapakka tukang negakka ghuma, tukangtu kapu dighitula. Anyautu Diautula njadi batu pelapiak diau penting nian. 4:12 Nidau bediau jemau lain diau pacak nyelamatka lain jak di Diautu, karnau di deniau di guak manusiau nidau bediau sughang kia diau dapat kuasau jak di Allah diau nyelamatka lain jak di Yesus Keristus." 4:13 Jemau diau ngikut sidangtu kemangan nginak Pitrus ngan Yuhanis ngiciak ngan beghani nian, apau agi ughangtu keruan ughang duautu jemau biasau, nidau sekul, mangku ughangtu keruan, bansau ughang duautu kantin Yesus senitu. 4:14 Ughangtu nidau pacak ngiciakka tuapau-apau, karnau nginak jemau diau la dighadukatu betegak di guak Pitrus ngan Yuhanis. 4:15 Ughang tigautu diajung keluagh jak di bada sidang, mangku jemau sidangtu buijau, 4:16 kataunyau, "Tuapau diau ka kitau buat ngan ughangtu? Jemau di Yerusalim la keruan galau, bansau setu diau nyelia dikerjauka ughang duautu. Kitau nidau pacak ngiciakka 'Nidau bediau'. 4:17 Mangku, supayau setu diau tejaditu nidau tesiar agi ke manau-manau ngan jemau banyak, mela kitau ngancam ughang duautu, supayau jangan ngiciak agi ngan sughang kia pakai namau Yesus itu." 4:18 Mangku ughang duautu dipantau masuak agi, dikiciakkanyau, bansau nidau bulia agi ngiciak ngan ngajagh pakai namau Yesus. 4:19 Anyautu Pitrus ngan Yuhanis nimbal, "Rupuakkala ngan kapu dighi, tuapau diau benagh di adapan Allah, na'ati perinta kapu dighi, apu na'ati perinta Allah? 4:20 Karnau kami ini nidau pacak mandak ngiciakka setu diau la kami kinak ngan diau la kami dengagh." 4:21 Rumbungan sidangtu nidau dapat salahau endak ngukum Pitrus ngan Yuhanis. Ughangtu tamba ngancam duau rasultu mangku dilepaskanyau. Jemau banyak ngagungka Allah karnau kejadian itu. 4:22 Jemau diau la ghadu ngan tandau nyeliatu umurau la lebia empat pulua taun. 4:23 La udim dilepaska, Pitrus ngan Yuhanis pegi njenguak kantin-kantinau ngan nceritauka gegalaunyau diau la dikiciakka imam-imam ngan tuau-tuau tadi. 4:24 Ndengagh ceritau itu, ughangtu bedu'a suati, kataunyau, "Tuhan, Dighitu njadika langit ngan deniau, laut ngan gegalau isiau. 4:25 Ngan Rua Allah Dighi la ngiciak ngan niniak puyang kami Daud, budak Dighi. Katau Dighi, 'Ngapau jemau diau nidau keruan Tuhan mara kematila? Ngapau bangsau-bangsau merencanauka setu diau nidau ka buasil? 4:26 Rajau-rajau deniau bedandan endak beperang. Pengulu-pengulu betunggal endak melawan Tuhan ngan Rajau Penyelamat.' 4:27 Nyela, rajau Herudis ngan Puntius Pilatus la betunggal di kuta ini ngan jemau diau nidau keruan Tuhan ngan jemau Israil pulau. Ughangtu melawan Yesus, Budak Dighi diau beresia, diau la Dighi tetapka njadi Rajau Penyelamat. 4:28 Ughangtu betunggal endak ngerjauka gegalaunyau diau la Dighi tetapka jak di senitu, karnau kuasau ngan kendak Dighi. 4:29 Mbak kini, Tuhan, kina'ila luak manau ughangtu ngancam kami. Beghanikala kami diau njadi budak Dighi ngiciakka ceritau Dighi. 4:30 Nyataukala kuasau Dighi, mangku jemau buidapan dighaduka ngan tandau nyelia karnau kuasau namau Yesus, Budak Dighi diau beresia itu." 4:31 La udim ughangtu bedu'a, bada ughangtu betunggal begugak, gegalau ughangtu dikuasaui Rua Allah, mangku ughangtu ngiciakka ceritau Allah ngan beghani nianan. 4:32 Jemau percayau suati serupu'an galau. Nidau bediau sughang kia diau bekiciak, bansau setu diau adau di diautu retaunyau diau sughang, gegalaunyau sesamau ngempuau. 4:33 Ngan kuasau diau besak rasul-rasul ngiciakka ceritau Tuhan Yesus diau ngulang idup, mangku Allah iluak nian ngan gegalau ughangtu. 4:34 Nidau bediau jemau jak di ughangtu diau kurangan, karnau gegalau jemau diau adau tana ngan ghuma dijualau, mangku tanciau dibatak, 4:35 diserakanyau ngan rasul, mangku diagiakanyau ngan jemau diau nidau bediau. 4:36-37 Luak itula pulau Yusup. Diau pulau njualka tanahau, mangku tanciau dibata'au, diserakanyau ngan rasul. Yusuptu pengadau Liwi, asalau jak di Siprus. Diau pulau diadaki Barnabas, retiau jemau diau meriangka.

Ceritau Rasul-rasul 5

5:1 Adau sughang diau benamau Ananias ngan biniau, namaunyau Sapira. Ughang duautu njualka sebidang tanahau pulau. 5:2 Tanciau separau dibunika batan endak diau, separau diserakanyau ngan rasul. Biniau pulau keruan. 5:3 Mangku Pitrus ngiciak ngan diau, kataunyau, "Ananias, ngapau kaba enangka iblis nguasaui ati kaba? Ngapau kaba mbu'ungi Rua Allah ngan mbunika separau tanci regau tanatu? 5:4 Selamau tanatu lum dijual, itu hak kaba. La udim dijual, tanciau hak kaba pulau. Ngapau kaba endak mbuat luak itu? Kaba ukan mbu'ungi manusiau, tapitu mbu'ungi Allah." 5:5 Satu ndengagh kici'an itu, Ananias rubua mangku mati. Jemau diau ndengagh kejadian itu takut galau. 5:6 Mangku budak bujang datang, dibalutau mayattu, dibatak keluagh endak dikuburkanyau. 5:7 La tigau jam udim itu, bini Ananias datang. Diau lum keruan tuapau diau empai tejadi. 5:8 Katau Pitrus ngan diau, "Kiciakkala ngan aku. Apu sebesak itula tana itu kamu jual?" "Au, nyela." katau tinautu. 5:9 Katau Pitrus, "Ngapau kaba ngan laki kaba sepakat endak nguji Rua Tuhan? Keruanila, jemau diau empai nguburka laki kaba la baliak, mangku ka mbata'i kaba pulau keluagh." 5:10 Masau itu pulau tinautu rubua mati di adapan Pitrus. Budak bujang tadi masuak, nginak diautu la mati, mangku dibata'inyau keluagh, dikuburka pasigh lakiau tadi. 5:11 Mangku gegalau jemau percayau takut nian, ngan jemau diau ndengagh ceritau itu takut galau. 5:12 Rasul-rasul banyak ngadauka tandau nyelia di guak jemau banyak. Ngan sepakat gegalau jemau percayau maju seghundak di Ghuma Allah di anggung diau benamau Salumu. 5:13 Jemau lain nidau bediau diau beghani nyeghundak ngan ughangtu, empuak ughangtu diregaui jemau banyak. 5:14 Tamba lamau tamba banyak jemau diau percayau empuak lanang empuak tinau. 5:15 Mangku jemau buidapan dibata'i ke jalan ghedang, ditiduakka belapiak tikagh, mangku amun Pitrus lalu, senidau-nidaunyau kenau bayangau. 5:16 Mangku jemau datang bererumbungan jak di dusun-dusun di ngepungan Yerusalim, dibata'inyau jemau buidapan ngan jemau diau diarung sitan. Ughangtu dighadui galau. 5:17 Mangku Imam Besak ngan anak-buahau diau jak di rumbungan jemau Saduki sengit nian, 5:18 mangku rasul-rasul ditangkap, dimasuakka dalam jil. 5:19 Malamautu sughang malaikat Tuhan mbukakka duaghau jil, mangku rasultu dibata'inyau keluagh. Malaikattu bekatau, 5:20 "Pegila, betegak di Ghuma Allah ngan kiciakka ngan jemau banyak ceritau idup empai." 5:21 Mangku rasultu nuruti pesan malaikattu. Gi akap nianan ughangtu masuak Ghuma Allah mangku mulai ngajagh di situ. Penarau itu Imam Besak ngan anak-buahau ngajung gegalau pengulu-pengulu jemau Yahudi betunggal endak ngadauka sidang pengadilan agamau. Mangku ughangtu ngajung jemau njenguak rasul tadi di jil endak dibatak ngadap sidangtu. 5:22 Jemau diau diajungautu la sampai di jil, anyautu rasultu nidau tekinak agi ngan ughangtu, mangku ughangtu ngelipat, dikiciakkanyau. 5:23 "Kami la sampai di jil," katau ughangtu, "Kami temuni duaghau jiltu tekunci iluak. Gegalau penjagau adau di badahau di mukau duaghau, anyautu la udim dibukakkanyau, nidau bediau sughang kia diau kami kinak di dalamau." 5:24 Kumandan penjagau Ghuma Allah ngan imam-imam ndengagh kici'antu, ughangtu temas ngan nanyauka, tuapau diau la tejadi ngan rasul tadi. 5:25 Mangku adau jemau datang njenguak ughangtu ngan ngiciakka, "Ndengaghla, jemau diau kapu dighi masuakka dalam jil, adau di Ghuma Allah ngajagh jemau banyak." 5:26 Mangku kumandan penjagau pegi ngan anak-buahau ke Ghuma Allah endak mbata'i rasul itu, anyautu nidau ngan carau masau, karnau ughangtu takut, kalu disipati jemau banyak. 5:27 Rasultu dibatak masuak ngadap pengadilan, mangku Imam Besak merisau nanyaui rasultu, 5:28 kataunyau, "Kami nidau nian ngajung kamu agi ngajagh pakai namau Jemau itu. Anyautu mbak kini tenyatau, kamu la nyiarka ajaghan kamu di gegalau Yerusalim, mangku kamu mburuakka kami mbunua Jemau itu." 5:29 Pitrus ngan rasul lain nimbal, "Kami mesti nuruti kendak Allah, ukan kendak manusiau. 5:30 Yesus itu diau kamu bunua ngan pakuka di kayu salip la diidupka Allah diau niniak puyang kitau semba. 5:31 Diautu la ditinggika Allah di sebela kananAu, dijadikaNyau Penguasau ngan Rajau Penyelamat, supayau jemau Israil pacak ngubai ngan dusaunyau diabiska. 5:32 Kamini la ngeruani ngan ngiciakka gegalau ceritau itu, kami ngan Rua Allah diau dienjuakka Allah ngan gegalau jemau diau na'ati Diau." 5:33 Ndengagh kici'antu, ughangtu mara kematila endak mbunua rasul-rasul itu. 5:34 Anyautu adau sughang Parisi jak di angguta pengadilan agamautu, namaunyau Gamali'il. Diautu guru ukum Taurat ngan diregaui gegalau jemau. Diau betegak ngan mintak, supayau rasul tadi diajung keluagh jerang. 5:35 Mangku diau bekiciak ngan sidangtu, "Ui, kapu dighi, rupuakkala iluak-iluak, tuapau diau endak kapu dighi buat ngan ughangtu. 5:36 Senitu adau Tiudas diau nganggap diriau jemau penting. Anak-buahau adau kekirau empat ratus ughang. Diautu dibunua, anak-buahau teceghai-beghai mangku abis. 5:37 La udim itu, masau jemau didaptarka adau Yudas, jemau Galiliatu. Banyak jemau dijadikanyau anak-buahau. Anyautu diau pulau dibunua, mangku gegalau anak-buahautu teceghai-beghai. 5:38 Mbak kini dengaghkala kataukuni: Jangan diapau-apauka ughangtu, dienangka ajau. Amun ajaghan ngan kerjau ughangtu asalau jak di manusiau, cengki ka abis. 5:39 Amun itu asalau jak di Allah, kapu dighi nidau pacak ngabiska ughangtu. Asauku ka tenyatau, bansau kapu dighi melawan Allah." Mangku petua Gamali'iltu diterimau. 5:40 Rasul tadi dipantau, dibaduki ngan pemecit ngan ditegahi agi ngajaghka dalam namau Yesus. Udim itu dilepaskanyau. 5:41 Rasul itu pegi jak di pengadilantu ngan riang, karnau pantas sengsarau karnau namau Yesus. 5:42 Mangku idang aghi ughangtu maju ngajagh, empuak di Ghuma Allah empuak di ghuma jemau, ngiciakka ceritau Yesus, Diaula Almasih ngan Rajau Penyelamat.

Ceritau Rasul-rasul 6

6:1 Anak-bua Yesus tamba lamau tamba banyak. Mangku jemau Yahudi diau bebasau Yunani bemumut mumuti jemau Yahudi asli, karnau randaunyau nidau dapat bagian luak diau dienjuakka ngan randau lain batan makanan idang aghi. 6:2 Mangku duau belas rasultu ngajung gegalau anak-buahau betunggal ngan bekatau, "Nidau iluak, amun kami lalai ngiciakka katau Allah, karnau ngurus makanan randau-randau. 6:3 Jadi, kapu dighi piliala tujua ughang jak di kapu dighi diau iluak ngan dikuasaui Rua Allah lagi bepengertian, mangku kami njadika ughangtu pengurus makanan tadi. 6:4 Mangku tugas kamini bedu'a ngan nceritauka katau Allah." 6:5 Pendapat itu diterimau gegalau ughangtu. Mangku ughangtu milia Setipanus diau percayau nian ngan dikuasaui Rua Allah, ngan Pilipus, Perukurus, Nikanur, Timun, Parmenas ngan Nikulaus, jemau Antiukia diau masuak agamau Yahudi. 6:6 Tujua ughangtu diadapka ngan rasul, mangku rasultu ndu'akanyau ngan nepiakka tanganau di palak ughangtu. 6:7 Luak itula ceritau jak di Allah maju tamba tesiar ngan anak-bua Yesus di Yerusalim maju tamba banyak ngan banyak pulau imam percayau ngan Yesus. 6:8 Allah iluak nian ngan Setipanus, mangku dienjuakka kuasau ngerjauka banyak tandau nyelia di guak jemau banyak. 6:9 Anyautu adau jemau diau melawan Setipanus. Ughangtu asalau jak di Kirini ngan Aliksanderia. Ughangtu sembayang di ghuma sembayang diau dinamauka Libertini. Ughangtu ngan jemau Yahudi jak di Kilikia ngan diau jak di Asia bebala ngan Setipanus. 6:10 Anyautu ughangtu nidau pacak melawan kici'an Setipanustu, karnau Rua Allah ngenjuakka pengertian nian ngan diau. 6:11 Mangku ughangtu nyuduk jemau batan endak ngiciakka, "Kami la ndengagh jemautu nggelakka Musa ngan Allah." 6:12 Ngan carau luak itula ughangtu ngasung jemau banyak ngan tuau-tuau jemau Yahudi ngan guru-guru ukum Taurat. Mangku Setipanus ditangkap, dibata'i ngadap pengadilan agamau. 6:13 Mangku ughangtu ngajung jemau diau ngiciakka setu mbu'ung, kataunyau, "Jemau ini maju nggelakka Ghuma Allah ini ngan ukum Taurat. 6:14 Karnau kami la ndengagh diau ngiciakka, bansau Yesus, jemau Nasarittu, ka merubuaka bada ini ngan endak nguba adat lembagau diau diajaghka Musa ngan kitau." 6:15 Gegalau jemau diau adau dalam sidang pengadilan agamau itu ngina'i Setipanus. Masau itu dayiau kina'an luak dayi sughang malaikat.

Ceritau Rasul-rasul 7

7:1 Imam Besak betanyau, "Nyela, luak itu?" 7:2 Katau Setipanus, "Ui, kapu dighi gegalaunyau, dengaghkala. Allah diau Mahabesak la datang njenguak Abraham, niniak puyang kitau, masau diau di Mesuputamia, antak ka mendam di Haran. 7:3 Allahtu bekatau, 'Tinggalkala nenggeri ini ngan adiak-sanak kaba, pegila ke nenggeri diau ka Kutunjuakka ngan kaba.' 7:4 Abrahamtu ninggalka nenggeri Kasdim, mangku mendam di Haran. Ba'au la mati, Allah ngajung diau ngalia jak di situ ke nenggeri ini, bada kapu dighi mendam mbak kini. 7:5 Masau itu sebagi kia nenggeri ini lum Allah enjuakka ngan Abraham njadi retaunyau ngan retau pengadaunyau, dijanjika ajau, empuak masau itu diau lum adau anak. 7:6 Luak ini katau Allah ngan diau, 'Pengadau kaba ka njadi jemau asing di nenggeri jemau. Ughangtu ka dibudakka ngan dibuati ngan kejam selamau empat ratus taun. 7:7 Anyautu Aku ka ngukum bangsau diau mbudakka ughangtu,' katau Allah. 'La udim itu ughangtu ka ngeluagh jak di nenggeritu, mangku ka nyemba Aku di bada ini.' 7:8 La udim ngiciakka luak itu, janjitu diteguaka Allah ngan carau sunat. Isak, anak Abraham, la adau, mangku Abraham nyunatkanyau masau umurau tujua malam. Udim itu Isak njadi bak Yakub, mangku Yakub njadi bak duau belas ana'au, niniak puyang kitau. 7:9 Niniak puyang kitau sengit ngan adingau Yusup, mangku dijualkanyau njadi budak di Mesir. Anyautu Allah njagaui diau, 7:10 dilepaskaNyau jak di gegalau sengsaraunyau, dienjuakkaNyau pengertian, masau ngadap Piraun, rajau Mesirtu. Mangku Piraun ngenjuakkanyau kuasau nguasaui nenggeri Mesir ngan ngurus gegalau istana Pirauntu. 7:11 Udim itu adau kelapaghan di nenggeri Mesir ngan Kanaan, mangku jemau banyak sengsarau. Mangku niniak puyang kitau nidau bulia makanan. 7:12 Satu Yakub ndengagh, adau banyak padi di Mesir, diau ngajung ana'au, niniak puyang kitau, pegi ke situ. Itula empai penembai ughangtu pegi ke Mesir. 7:13 Timpau ughangtu pegi ke duau kaliau, Yusup ngiciakka ngan ughangtu, bansau diautu Yusup, ading ughangtu. Mangku Piraun keruan, asal-mulaunyau Yusup. 7:14 Mangku Yusup ngajung nepatka Yakub, ba'au ngan anak-beghanak cucungbecucung; gegalaunyau tujua pulua limau ughang. 7:15 Mangku Yakub ngalia ke Mesir. Di situla diau mati ngan niniak puyang bangsau kitau mati pulau di situ. 7:16 Mayat ughangtu dibatak ke Sikim, dikuburka di kuburan diau dibeli Abraham jak di jemau Himur di Sikim. 7:17 Laka masaunyau Allah endak nepati janjiAu diau dijanjika ngan Abraham senitu, jemau bangsau kitau di Mesir la tamba banyak. 7:18 Mangku adau sughang rajau lain merinta di Mesir diau nidau keruan Yusup. 7:19 Rajau itu nipuka bangsau kitau. Diau kejam ngan niniak puyang kitau, dipasaunyau ncapakka ana'au diau empai adau, mangku bangsau kitau jangan betamba. 7:20 Masau itu Musa lahir. Kupiak itu alap nianan. Selamau tigau bulan diau disayia di ghuma ba'au. 7:21 Mangku diau dicapakka, anyautu anak gadis Piraun ngambi'au, mangku disayiau luak ana'au sendighi. 7:22 Musatu diajagh gegalau ilmu jemau Mesir, mangku diau njadi jemau bekuasau, empuak kici'annyau empuak kerjaunyau. 7:23 Umur Musa la empat pulua taun, diau terupuak endak pegi nginak adiaksana'au, jemau Israil. 7:24 Masau itu diau nginak sughang jak di ughangtu disiksau, mangku diau endak mbenaghka jemautu ngan mbunua jemau Mesir tadi. 7:25 Musa sangkau adiak-sana'au ka terti, bansau Allah dang makai diau endak melepaska ughangtu. Anyautu ughangtu nidau terti. 7:26 Pagi di aghiau diau nginak pulau duau ughang jemau Israil belagau, mangku ncubau endak ndamaika ughang duautu, kataunyau, 'Kamuni sebangsau. Ngapau kamu belagau?' 7:27 Anyautu jemau diau mbaduk kantinautu nulakka Musa ngan bekatau, 'Sapau diau njadika kaba pengulu ngan akim kami? 7:28 Apu kaba endak mbunua aku pulau, luak kaba mbunua jemau Mesirtu kemaghi?' 7:29 Ndengagh kici'annyautu, Musa larat jak di Mesir, mangku mendam luak jemau asing di Midian. Di situ diau adau duau ughang ana'au. 7:30 La udim empat pulua taun di situ, Musa tekinak sughang malaikat di padang bungin di pasigh Bukit Sinai. Malaikattu adau dalam maghak api di pugan dughi itu. 7:31 Musa kemangan ngina'autu, mangku diau masigh ke situ endak ngeruaninyau, mangku diau ndengagh suarau Tuhan diau bekatau, 7:32 'Akunila Allah niniak puyang kaba, Allah Abraham, Isak ngan Yakub.' Musa gemetagh ketakutan, mangku nidau beghani agi ngina'i apitu. 7:33 Mangku Tuhan bekatau, 'Paculila terumpa diau kaba pakaitu, karnau bada kaba betegaktu bada beresia. 7:34 Aku la nginak nian kesengsarauan umatKu di Mesir. Aku la ndengagh ughangtu nyempit, mangku Aku la datang endak melepaska ughangtu. Mbak kini pegila, Aku ngajung kaba ngulang ke Mesir agi.' 7:35 Musa itula diau nidau diterimau jemau Israil itu ngan kici'an luak ini, 'Sapau diau njadika kaba pengulu ngan akim kami?' Musa itula diajung Allah njadi pengulu ngan penyelamat, ditulung malaikat diau kina'an dalam maghak api di pugan dughi tadi. 7:36 Diautu mbatak jemau Israil keluagh jak di Mesir ngan ngadauka banyak tandau nyelia di Mesir, di Laut Abang ngan di padang bungin selamau empat pulua taun. 7:37 Musa itu pulau ngiciak ngan jemau Israiltu, 'Sughang nabi luak akuni ka dienjuakka Allah jak di bangsau kamuni.' 7:38 Musatu adau ngan jemau Israil diau betunggal di padang bungin. Diautu adau di situ ngan malaikat di Bukit Sinai ngan niniak puyang kitau. Diautu nerimau katau Allah diau nunjuakka jalan idup, mangku disampaika ngan kitau. 7:39 Empuak luak itu niniak puyang kitau nidau endak ta'at ngan diau. Ughangtu nidau nerimaunyau, endak baliak ke Mesir ajau. 7:40 Ngan Harun ughangtu bekatau, 'Buatla patung batan endak kami, mangku patungtu mimpin kami. Karnau kami nidau keruan agi, tuapau diau tejadi ngan Musa diau mbata'i kami keluagh jak di Mesir.' 7:41 Masau itu ughangtu mbuat sikuak anak sapi, mangku bekerban ngan patung itu ngan keriangan lagi ngagungka buatan diau dibuat ughangtu. 7:42 Mangku Allah ninggalka ughangtu ngan ngenangka ughangtu nyemba setu di langit luak ditulis dalam kitab nabi-nabi, 'Ui, kapu dighi, apu batan endak Aku kamu ngerbanka benatang selamau empat pulua taun di padang bungin? 7:43 Nidau nian. Kima diwau Muluk diau kamu batak-bataktu ngan bintang diwau Ripan, patung-patung diau kamu buattu endak kamu semba. Karnau itu Aku ka ncapakka kamu jawua, sampai ke beghang Babil.' 7:44 Kima, bada Tuhan nyatauka diriAu ngan manusiau, adau di niniak puyang kitau di padang bungin. Kimatu dibuat karnau diperintaka Allah luak cuntau diau la Musa kinak. 7:45 Mangku kima itu dibatak niniak puyang kitau masuak ke nenggeri ini, masau ughangtu pegi ngan Yusua merebut nenggerini jak di kuasau bangsau diau la dilaratka Allah. Kimatu adau di situ enggut saman Daud. 7:46 Daud melemakka ati Allah, mangku mintak, supayau diau diajung negakka ghuma batan endak Allah. 7:47 Mangku Salumu negakka ghuma itu batan endak Allah. 7:48 Anyautu Allah diau Mahabesak nidau mendam dalam ghuma diau dibuat manusiau, luak ditulis dalam kitab nabi, 7:49 'Langit bada duduak Aku, deniau alas ketingKu. Ghuma apau diau kamu tegakka batan endak Aku? Di manau bada Aku gheghadu? 7:50 Apu ukan Akunila diau njadika gegalaunyau diau adau? Luak itula katau Allah.' 7:51 Ui, kapu dighi maju melawan, enggup ta'at ngan Allah. Amun ndengagh katau Allah, telingau kapu dighi tuli kematila. Kapu dighi luak niniak puyang kapu dighi, maju melawan Rua Allah. 7:52 Gegalau nabi diluatka niniak puyang kapu dighi. Lagi ughangtu mbunua jemau diau senitu la ngiciakka, mbak bansau Jemau Benaghtu ka datang. Diautu kapu dighi celakauka ngan bunua empaini. 7:53 Kapu dighi la nerimau ukum Taurat diau disampaika malaikat, anyautu kapu dighi nidau na'atinyau." 7:54 Ndengagh kici'an Setipanustu, gegalau angguta pengadilan agamau mara kematila. 7:55 Anyautu Setipanus dikuasaui Rua Allah ncungak ke langit, mangku nginak terang Allah ngan Yesus betegak di sebela kanan Allah. 7:56 "Ngenian," katau Setipanustu, "Aku nginak langit tebukak ngan Anak Manusiau betegak di sebela kanan Allah." 7:57 Ughangtu nekup telingau sampai tegauk-gauk, mangku serempak nganduni diau, 7:58 ditaghiak keluagh kuta, disipati ngan batu. Ughangtu nyeghumaka bajuau ngan sughang budak bujang, namaunyau Saulus. 7:59 Setipanus dang disipati, diau bedu'a, kataunyau, "Tuhan Yesus, terimaula ruaku." 7:60 Mangku diau nunduak ngan tegauk, "Tuhan, dusau ini jangan ditanggungka ngan ughangni." Udim ngiciakka luak itu diau mati.

Ceritau Rasul-rasul 8

8:1 Saulus pulau tetuju Setipanus dibunua. Mulai aghi itu jemau percayau di Yerusalim banyak dianiayau, mangku gegalau ughangtu lain jak di rasul teceghai-beghai ke gegalau Yudia ngan Samaria. 8:2 Jemau diau takut ngan Allah nguburka Setipanus ngan nangis berandaian nangisi diau. 8:3 Mangku Saulus maju beusaha endak ngacauka jemau percayau. Diau masu'i bilang ghuma, tinau lanang diau percayau ditaghi'au keluagh endak dijilka. 8:4 Jemau diau teceghai-beghai pegi ngiciakka ceritau iluak jak di Allah di manau-manau. 8:5 Pilipus pegi ke kuta Samaria ngiciakka ceritau Rajau Penyelamat ngan jemau di situ. 8:6 Ughang banyak di situ ndengagh kici'an Pilipus ngan nginak tandau-tandau diau dibuatau, mangku ughangtu nerimau setu diau dikiciakka Pilipustu, 8:7 karnau jak di banyak jemau diau diarung iblis rua ja'at ngeluagh ngan tepekiak-pekiak ngan jemau lumpua ngan jemau kincut pulau banyak diau dighadukanyau. 8:8 Mangku jemau Samaria riang nianan. 8:9 Di kuta itu adau sughang lanang, namaunyau Simun. Jak di senitu diau njadi dukun besak. Jemau Samaria kemangan nginak kerjaunyau ngan laga'au luak jemau nian. 8:10 Mangku gegalau jemau di kuta itu, besak-keciak, nuruti diau ngan bekatau, "Jemauni adau kuasau Allah diau dikiciakka 'Kuasau Besak' itu." 8:11 Ughangtu la lamau kepagauan nginak kerjaunyau ngan nurutinyau. 8:12 Mbak kini ughangtu percayau ngan Pilipus diau ngiciakka ceritau Allah njadi rajau ngan ceritau Yesus Keristus, Rajau Penyelamat, mangku ughangtu, tinau lanang mintak dibaptis. 8:13 Simuntu pulau percayau. Diau dibaptis mangku maju seghundak ngan Pilipus. Diau kepagauan nginak tandau nyelia diau dibuat Pilipustu. 8:14 Rasul-rasul di Yerusalim ndengagh, mbak bansau jemau Samaria nerimau katau Allah, mangku diajungau Pitrus ngan Yuhanis ke situ. 8:15 La sampai di situ, ughang duautu bedu'a du'aka jemau Samariatu, mangku bulia Rua Allah, 8:16 karnau Rua Allah lum nguasaui sughang kia jak di ughangtu. Ughangtu empai dibaptis dalam namau Tuhan Yesus ajau. 8:17 Mangku ditepiakkanyau tanganau di pucuak palak jemau Samariatu, mangku ughangtu nerimau Rua Allah. 8:18 Simun pulau nginak, mbak bansau jemau nerimau Rua Allah, karnau Pitrus ngan Yuhanis nepiakka tanganau di ughangtu, mangku diau endak ngenjuakka tanci ngan ughang duautu, 8:19 sampai bekiciak, "Enju'ila aku kuasau itu pulau, mangku amun aku nepiakka tanganku di jemau, diau nerimau Rua Allah." 8:20 Katau Pitrus, "Benasaula dighi ngan tanci dighi. Dighi sangkau, pengenjuak Allah pacak dibeli ngan tanci? 8:21 Dighi nidau behak endak ngikut kerjau kami, karnau ati dighi nidau lughus di adapan Allah. 8:22 Karnau itu, ubaila perembak dighi diau ja'attu, mintak ngan Tuhan, supayau Diau ngabiska rupu'an diau ja'attu. 8:23 Aku keruan, dighi sengit nian ngan ati dighi ja'at." 8:24 Simun nimbal, "Tulung du'aka aku mintak ngan Tuhan, mangku setu diau kaba kiciakkatu jangan tejadi ngan aku." 8:25 La udim Pitrus ngan Yuhanis ngiciakka setu diau ughang duautu keruan ceritau Tuhan Yesus ngan nyampaika katau Tuhan, ughang duautu baliak ke Yerusalim. Di jalan ughangtu ngiciakka ceritau iluak itu di dusun-dusun Samaria. 8:26 La udim itu sughang malaikat Tuhan ngiciak ngan Pilipus, kataunyau, "Pegila ke selatan, nurut jalan tughun jak di Yerusalim ke Gasa." Jalantu suni. 8:27 Mangku Pilipus pegi. Adau sughang pegawai istana, pangkatau tinggi. Diautu kepalak retau bendau Kandaki, ratu nenggeri Itiupia. Tadi diau pegi ke Yerusalim endak sembayang di situ. 8:28 Mbak kini diau dang baliak ke nenggeriau, duduak dalam pelangkinau sampai mbacau kitab nabi Yesaya. 8:29 Rua Allah bekatau ngan Pilipus, "Pegila, masighi pelangkin itu." 8:30 Pilipus pegi masighi pelangkintu, mangku ndengagh jemau itu mbacau kitab nabi Yesaya. Pilipus betanyau, "Apu dighi ngerti diau dighi bacautu?" 8:31 Jemautu nimbal, "Luak manau aku terti, amun nidau bediau jemau diau meretikanyau ngan aku?" Mangku diau ngajak Pilipus nayiak pelangkin duduak guak diau. 8:32 Diau dibacaunyautu muniau luak ini, "Luak sikuak bebiri Diau ditaghiak endak disembelia. Luak anak bebiri Diau nidau ngembiak, amun buluau digunting, luak itula Diau nidau ngiciakka sepata katau kia. 8:33 Diau digelakka ngan dibuati nidau adil. NyawauNyau diambiak jak di deniau, mangku sughang kia nidau bediau diau pacak ngiciakka pengadauNyau." 8:34 Pegawai jak di Itiupiatu bekatau ngan Pilipus, "Cubau kiciakka ngan aku, sapau diau dikiciakka nabitu. Apu ngiciakka diriau, apu ngiciakka jemau lain?" 8:35 Mangku Pilipus ngiciak. Mulai ngan katau nabi tadi diau ngiciakka ceritau Yesus, ceritau iluaktu ngan jemau tadi. 8:36 Di tenga jalan ughangtu sampai ke bada diau adau ayiak. Pegawai itu bekatau, "Kina'ila, itu adau ayiak. Tuapau agi alangan aku dibaptiska?" 8:37 Katau Pilipus, "Amun dighi percayau nian, bulia dibaptis." "Aku percayau Yesus Keristustu Anak Allah." Katau pegawai itu. 8:38 Mangku diau ngajung pelangkinautu mendam. Pilipus ngan pegawaitu tughun ke ayiak, mangku pegawaitu dibaptis. 8:39 Ughang duautu la keluagh jak di ayiak, Pilipus diambiak Rua Allah. Mangku pegawai jak di Itiupiatu nidau nginak diau agi. Diautu melajuka pejalanannyau ngan riang. 8:40 Tenyatau Pilipus la adau di Asdud. Diau lalu di daira itu ngan ngiciakka ceritau iluak di gegalau kuta ngan dusun enggut ke Kaisaria.

Ceritau Rasul-rasul 9

9:1 Masau itu Saulus maju ngancam endak mbunua anak-bua Tuhan Yesus. Diau pegi ngadap Imam Besak, 9:2 mintak surat kuasau endak dibatak ke kepalak ghuma sembayang jemau Yahudi di Damsik, supayau amun diau betemu di situ jemau diau percayau ngan Tuhan Yesus, pacak diau tangkap ughangtu, tinau lanang, mangku dibata'inyau ke Yerusalim. 9:3 Ngancamka Damsik, Saulus la pasigh ngan kuta itu, adau sinagh jak di langit di ngepungannyau. 9:4 Diau rubua ke tana, mangku ndengagh suarau diau bekatau ngan diau, "Ui, Saulus, tuapau sebapau kaba nganiayau Aku?" 9:5 Saulus betanyau, "Sapau Dighi, Tuhan?" Suarau itu nimbal, "Akunila Yesus diau kaba aniayau. 9:6 Mbak kini betegakla mangku pegi masuak kuta itu. Di situ ka dikiciakka ngan kaba tuapau diau mesti kaba kerjauka." 9:7 Kantin-kantin diau bejalan serempak ngan Saulustu kemangan, karnau ndengagh suarau tadi, anyautu nidau nginak sughang kia. 9:8 Saulus betegak ngan mbukak mataunyau, anyautu mataunyau nidau pacak nginak tuapau-apau, mangku diau dipapa masuak ke Damsik. 9:9 Tigau aghi diau nidau pacak nginak. Selamau itu diau nidau makan nidau minum dikit kiala. 9:10 Di Damsik adau sughang anak-bua Tuhan Yesus, namaunyau Ananias. Tuhan bekatau ngan diau dalam pengina'an, "Ananias!" Timbalau, "Ngapau, Tuhan?" 9:11 Katau Tuhan, "Mela, pegi ke ghuma Yudas di Jalan Lughus. Tanyauka di situ jemau benamau Saulus diau asalau jak di Tarsus. Diautu dang bedu'a. 9:12 Dalam pengina'annyau diau nginak sughang lanang benamau Ananias njenguak diau, nepiakka tangan ke pucuak pala'au, supayau diau pacak nginak agi." 9:13 Ananias nimbal, "Tuhan, aku la ndengagh banyak jemau ngiciakka jemau itu. Banyak kematila perembak diau ja'at dikerjaukanyau ngan jemau diau percayau di Yerusalim. 9:14 Mbak kini diau la datang ke sini mbatak surat kuasau jak di imam-imam bepangkat tinggi endak nangkap gegalau jemau diau percayau ngan Dighi." 9:15 Katau Tuhan, "Pegila ajau, karnau Aku la milia diau bekerjau batan endak Aku, ngiciakka Aku ngan bangsau-bangsau ngan rajaunyau ngan jemau Israil pulau. 9:16 Akunila ka nunjuakka ngan diau banyak sengsarau diau mesti dighasaukanyau karnau Aku." 9:17 Mangku Ananias pegi ke situ masuak ghumatu, ditepiakkanyau tanganau di pucuak palak Saulus. Katau Ananias, "Tuhan Yesus diau kaba kinak di tenga jalan masau kaba endak ke sini, Diau ngajung aku njenguak kaba, supayau kaba pacak nginak agi ngan dikuasaui Rua Allah." 9:18 Masau itu pulau setu diau luak sisiak ikan di matau Saulus pacul, mangku pacak nginak agi. Udim itu diau dibaptis. 9:19 Diau makan mangku diau kuat agi. Saulus mendam bebeghapau aghi di Damsik ngan anak-bua Yesus. 9:20 Diau pegi ke ghuma sembayang ngan ngiciakka, bansau Yesus itula Anak Allah. 9:21 Gegalau jemau kemangan ndengagh kici'annyautu ngan bekatau, "Diau inila asauku di Yerusalim mbunua gegalau jemau diau percayau ngan Yesus itu. Mangku diau datang ke sini endak nangkap ughangtu, dibata'inyau ngadap imam-imam bepangkat tinggi." 9:22 Anyautu Saulus tamba bekuasau mbuktika, Yesus itula Almasih, Rajau Penyelamat, mangku jemau Yahudi diau mendam di Damsiktu nidau pacak agi nimbal. 9:23 Lum lamau udim itu, jemau Yahudi sepakat endak mbunua Saulus. 9:24 Rencanau diau ja'attu keruan ngan diau. Siang-malam ughangtu nunggu di mukau lawang kuta endak mbunua diau. 9:25 Empuak luak itu, adau semalam anak-buahau ngambiak Saulus, mangku ditughunkanyau jak di dinding kuta pakai kinjagh. 9:26 Saulus pergi ke Yerusalim. Di situ diau ncubau nyeghundak ngan anak-bua Yesus. Anyautu ughangtu penakut galau ngan diau, karnau lum percayau nian, bansau Saulus la njadi anak-bua Yesus pulau. 9:27 Mangku Barnabas nulung diau, dibata'inyau njenguak rasulrasul, dikiciakkanyau ngan ughangtu ceritau Saulus nginak Tuhan di tenga jalan ngan Tuhan ngiciak ngan diau. Dikiciakka pulau ceritau Saulus diau beghani nian ngajagh di Damsik pakai namau Yesus. 9:28 Mangku Saulus mendam ngan ughangtu di Yerusalim ngajaghka namau Tuhan ngan beghani. 9:29 Diau pulau ngiciak ngan bebala ngan jemau Yahudi diau bebasau Yunani. Anyautu ughangtu maju ncubau endak mbunua diau. 9:30 Jemau percayau la keruan ceritau itu, mangku Saulus diantat ke Kaisaria. Jak di situ diau diajung pegi ke Tarsus. 9:31 Mangku jemau percayau di gegalau Yudia, Galilia ngan Samaria njadi tenang. Rua Allah nulung ughangtu njadi kuat ngan tamba banyak, karnau ughangtu idup takut ngan Tuhan. 9:32 Masau itu Pitrus pegi ke manau-manau nandangi jemau percayau, mangku diau pulau nandangi jemau diau percayau di Lida. 9:33 Di situ diau betemu jemau lanang benamau Inias. Diautu lumpua, nidau mbangun-bangun jak di bada tiduak la delapan taun. 9:34 Katau Pitrus ngan diau, "Inias, Yesus Keristus meghaduka dighi. Betegakla, gulungkala bada tiduak dighi!" Masau itu pulau Inias betegak. 9:35 Gegalau jemau di Lida ngan Sarun nginak diau, mangku ughangtu percayau ngan Tuhan. 9:36 Di Yupi adau sughang tinau jemau percayau, benamau Tabita. Basau Yunani itu Durkas, retiau ghusau. Diau maju ngerjauka setu diau iluak, nulungi jemau serik. 9:37 Masau itu diau buidapan mangku mati. La udim mayattu dimandika, diau ditepiakka di biliak pucuak. 9:38 Yupi nidau jawua jak di Lida. Masau ndengagh Pitrus adau di Lida, jemau percayau di Yupi ngajung duau ughang pegi njenguak Pitrus ngan ngiciakka, "Cepatla datang ke sini." 9:39 Pitrus bedandan mangku pegi serempak ngan ughang duautu. La sampai di situ, diau dibata'i ke biliak bada mayat tadi. Gegalau randau di situ ngelilingi diau sampai nangis, diancakka ngan diau baju-baju diau dijayit Durkas tadi, masau gi idup. 9:40 Pitrus ngajung gegalau ughangtu keluagh, mangku diau nunduak ngan bedu'a. Udim itu diau ngadapi mayattu ngan bekatau, "Tabita, bangunla!" Mangku Tabita mbukak mataunyau. Satu nginak Pitrus, diau duduak. 9:41 Pitrus ngecakka tanganau ngan nulung diau betegak. Udim itu dipantaunyau jemau percayau di situ ngan randau tadi, diserakanyau tinau diau la ngulang idup tadi ngan ughangtu. 9:42 Ceritau itu dikiciakka di gegalau Yupi, mangku banyak jemau percayau ngan Yesus. 9:43 Udim itu Pitrus mendam di situ bebeghapau aghi agi di ghuma Simun diau sughang tukang bawuak.

Ceritau Rasul-rasul 10

10:1 Di Kaisaria adau sughang jemau lanang, namaunyau Kurnilius. Diautu ngepala'i seratus tentera jak di rumbungan Italia. 10:2 Jemau itu alim. Diau ngan gegalau jemau di ghumahau takut ngan Allah. Diautu banyak ngenjuakka tanci ngan jemau Yahudi diau serik ngan rajin bedu'a ngan Allah. 10:3 Adau saghi kekirau jam tigau petang, Kurnilius nginak pengina'an. Adau sughang malaikat Allah datang njenguak diau mangku mantaunyau, "Kurnilius!" kataunyau. 10:4 Kurniliustu nginak malaikattu, mangku takut sampai bekatau, "Ngapau, Tuhan?" Malaikattu bekatau, "Gegalau du'a kaba ngan keilu'an kaba la diterimau Allah, mangku Allah teghingat ngan kaba. 10:5 Mbak kini ajungla jemau pegi ke Yupi njenguak Simun diau pulau dikiciakka Pitrus. 10:6 Diautu dang di ghuma Simun sughang tukang bawuak. Badahau di tepi laut." 10:7 Malaikat diau ngiciak ngan diautu la pegi, dipantaunyau duau ughang anak-buahau ngan sughang tenterahau diau alim ngan maju guak diau, 10:8 dikiciakkanyau gegalaunyau diau tejadi tadi, mangku diajungau ughang tigautu pegi ke Yupi. 10:9 Pagi di aghiau penarau ughang tigautu gi di jalan, laka sampai di Yupi, aghitu kekirau tengaghi, Pitrus nayiak ke pucuak ghuma endak bedu'a. 10:10 Diautu la lapagh endak makan. Makanan dang disediauka, Pitrus bepengina'an. 10:11 Diautu nginak langit tebukak, mangku adau setu luak kain libagh diau ditughunka tegerintung di empat jughuau. 10:12 Di kain itu adau serbau mecam benatang beketing empat, benatang njalagh ngan burung. 10:13 Mangku adau suarau diau bekatau, "Ui, Pitrus, mela, sembeliala ngan makanla." 10:14 Timbal Pitrus, "Nidau, Tuhan. Lum kekela aku makan setu diau aram ngan najis." 10:15 Suarau itu bekiciak agi ngan diau, "Setu diau dinyatauka Allah alal, jangan kaba kiciakka aram." 10:16 Suarautu ngiciakka titu tigau kali, mangku kaintu tuangkat ke langit. 10:17 Pitrus merupuakka tuapau reti pengina'annyautu. Penarau Pitrus gi merupuakkanyau, ughang tigau diau diajung Kurnilius tadi la sampai di ghuma Simun, la adau di mukau duaghau. 10:18 Mangku ughangtu mantau jemau ngan betanyau, "Apu adau jemau diau numpang temalam di sini, diau benamau Simun Pitrus?" 10:19 Pitrus masia merupuakka reti pengina'annyau tadi, Rua Allah bekatau ngan diau, "Ui, Pitrus, adau ughang tigau diau dang ndala'i kaba. 10:20 Tughunla cepat. Jangan asau-asau ngikut ughangtu, karnau Akunila diau ngajung ughangtu ke sini." 10:21 Mangku tughun diau ke bawa, ngiciak ngan ughangtu, "Aku diau kamu dala'i? Kamu datang endak ngapau?" 10:22 Ughangtu nimbal, "Kurnilius diau ngepala'i seratus tentera ngajung kami ke sini. Diautu jemau iluak ngan takut ngan Allah, lagi pulau diregaui nian ngan jemau Yahudi. Dalam pengina'an diau nginak sughang malaikat Allah ngajung diau pegi njenguak dighi, supayau dighi datang ke ghumahau, mangku diau pacak ndengaghka setu diau ka dighi ceritauka." 10:23 Mangku Pitrus ngajak ughangtu masuak temalam di ghuma itu. Pagi di aghiau Pitrus pegi serempak ngan ughang tigautu. Adau pulau jemau percayau jak di Yupi ngantini diau. 10:24 Saghi udim itu ughangtu sampai di Kaisaria. Di situ ughangtu la ditunggu Kurnilius. Diautu la ngajung denga-sana'au ngan kantin-kantinau betunggal. 10:25 Satu Pitrus sampai, Kurnilius nyungsung nyambut diau ngan nunduak di adapannyau sampai ke tana nyemba diau. 10:26 Pitrus ngajung diau betegak, kataunyau, "Betegakla, aku pulau manusiau biasau." 10:27 Sampai ngiciak ngan Kurnilius, diau masuak ke ghuma, mangku nginak banyak jemau betunggal. 10:28 Diau bekatau ngan ughangtu, "Kapu dighi la keruan, bansau jemau Yahudi nidau diajung agamaunyau tandang ngan sekantin ngan jemau diau jak di bangsau lain. Anyautu Allah la nyatauka ngan aku, bansau aku nidau bulia nganggap sughang kia najis ngan aram. 10:29 Karnau itu aku nidau bekebeghatan, masau dighi ngajung aku datang. Mbak kini aku endak keruan, tuapau sebapau dighi ngajung aku datang." 10:30 Katau Kurnilius, "Tigau malam diau la udim, kekirau aghi luak ini, jam tigau petang, aku dang bedu'a di ghuma, mangku adau sughang betegak di guak aku. Bajuautu besinagh-sinagh. 10:31 Diautu bekatau, 'Kurnilius, Allah la ndengagh du'a kaba, ngan ngingatka keilu'an ati kaba. 10:32 Ajungla jemau ke Yupi njenguak Simun Pitrus. Diautu dang temalam di ghuma tukang bawuak benamau Simun, ghumahautu di tepi laut.' 10:33 Mangku aku ngajung jemau cepat pegi njenguak dighi, mangku dighi la datang ke sini ngan riang. Mbak kini gegalau kami la betunggal galau di sini di adapan Allah endak ndengaghka gegalaunyau diau Allah ajung dighi kiciakka ngan kami." 10:34 Mangku Pitrus bekatau, "Mbak kini aku la keruan nian, bansau gegalau manusiau semegi di adapan Allah. 10:35 Bilang jemau, amun percayau ngan takut ngan Allah ngan ngerjauka diau benagh, diterimau Allah. Diautu nidau milia rupau. 10:36 Kapu dighi la keruan katau Allah diau dikiciakkaNyau ngan bangsau Israil. Katau itu ngiciakka ceritau iluak, jalan damai ngan Allah karnau Yesus Keristus. Diautu Tuhan gegalau manusiau. 10:37 Kapu dighi keruan pulau gegalaunyau diau la tejadi di gegalau Yudia, mulai jak di Galilia, la udim baptisan diau diajung Yuhanis. 10:38 Kapu dighi la keruan katau Yesus, jemau Nasarittu, mbak bansau Diautu dipilia Allah ngan dienjuakkaNyau Rua Allah ngan kuasau, mangku Diautu pegi ke manau-manau endak ngerjauka setu diau iluak ngan meghadui gegalau jemau diau diarung iblis, karnau Allah nyertaui Diau. 10:39 Kamini la nginak gegalaunyau diau dikerjaukaNyau di Yerusalim ngan gegalau Yudia. Empuak luak itu, ughangtu mbunua Diau ngan makuka Diau di kayu salip. 10:40 La udim duau malam, Diautu diidupka agi. Mangku Allah ngajung Diau nginakka diriAu, 10:41 ukan ngan gegalau jemau, cuman ngan kami diau la dulu dipilia Allah, supayau ngiciakkanyau. La udim Diau ngulang idup jak di mati, kamini la makan ngan Diautu. 10:42 Mangku Diau ngajung kami ngiciakkaNyau ngan gegalau bangsau ngan nceritauka, bansau Diautu dijadika Allah akim jemau diau gi idup ngan jemau diau la mati. 10:43 Gegalau nabi pulau ngiciakka ceritau Diau. Ughangtu bekatau, mbak bansau gegalau jemau diau percayau ngan Yesus ka diabiska dusaunyau karnau Diau." 10:44 Penarau Pitrus gi ngiciakka gegalaunyautu, Rua Allah tughun nguasaui gegalau jemau diau ndengagh ceritautu. 10:45 Mangku gegalau jemau Yahudi diau percayau diau ngantini Pitrus kemangan galau nginak Allah ngenjuakka Rua Hau ngan jemau bangsau diau ukan jemau Yahudi. 10:46 Ughangtu ndengagh jemau itu ngiciak ngan bemecam-mecam basau ngan ngagungka Allah. Katau Pitrus, 10:47 "Kina'ila, ughang ini la bulia Rua Allah luak kitau! Amun luak itu, apu pacak jemau ngalangi ughangni dibaptis ngan ayiak?" 10:48 Mangku diau ngajung ughangtu dibaptis dalam namau Yesus Keristus. La udim itu ughangtu mintak, supayau Pitrus maju seghundak ngan ughangtu bebeghapau aghi agi.

Ceritau Rasul-rasul 11

11:1 Rasul-rasul ngan jemau percayau di gegalau Yudia ndengagh, mbak bansau jemau diau ukan Yahudi nerimau pulau katau Allah. 11:2 Mangku Pitrus la sampai di Yerusalim, jemau jak di rumbungan besunat bebala ngan Pitrus. 11:3 Katau ughangtu, "Ngapau kaba masuak ghuma jemau diau nidau besunat, lagi makan ngan ughangtu?" 11:4 Mangku Pitrus nceritauka ngan ughangtu gegalaunyau diau la tejadi jak di penembai, kataunyau, 11:5 "Aku dang bedu'a di kuta Yupi, mangku aku nginak pengina'an. Adau setu luak kain libagh tughun jak di langit tegerintung di empat jughuau, mangku mandak guak aku. 11:6 Aku ngina'inyau, mangku di kaintu aku nginak serbau mecam benatang diau jinak ngan diau belia, benatang njalagh ngan pulau burung. 11:7 Mangku aku ndengagh suarau bekatau ngan aku, 'Ui, Pitrus. Mela, sembeliala mangku makanla!' 11:8 Tapitu aku nimbal, 'Nidau, Tuhan. Lum kekela aku makan makanan aram ngan najis.' 11:9 Anyautu suarau itu ngiciak agi jak di langit, kataunyau, 'Setu diau la dinyatauka Allah alal, jangan kaba kiciakka aram!" 11:10 Titu tejadi tigau kali. Udim itu gegalaunyau tuangkat ke langit. 11:11 Masau itu pulau adau tigau ughang jak di Kaisaria la sampai di mukau ghuma, bada kami temalam. Ughangtu diajung njenguak aku. 11:12 Mangku Rua Allah ngajung aku pegi serempak ngan ughangtu ngan nidau asau-asau. Ughang enam ini ngantini aku ke Kaisaria, mangku kami masuak ghuma Kurnilius. 11:13 Kurniliustu nceritauka ngan kami, luak manau diau nginak sughang malaikat betegak di ghumahau ngan bekatau, 'Ajungla jemau ke Yupi njenguak Simun Pitrus. 11:14 Diautu ka ngiciakka ngan kaba ceritau diau ka nyelamatka kaba ngan jemau di ghuma kaba.' 11:15 Penarau aku dang ngiciak, Rua Allah tughun nguasaui ughangtu semegi luak diau nguasaui kitau senitu. 11:16 Mangku aku teghingat ngan kici'an Tuhan, 'Yuhanis mbaptiska ngan ayiak, tapitu kamu ka dibaptiska ngan Rua Allah.' 11:17 Jadi, amun Allah la ngenjuakka pulau ngan jemau ukan Yahudi setu diau semegi luak dienjuakka ngan kitau, masau kitau empai percayau ngan Yesus Keristus, mangku manau ka adau aku negahi Allah?" 11:18 La udim ndengagh kici'annyautu, ughangtu mandak bebala, mangku ngagungka Allah kataunyau, "Amun luak itu, jemau ukan Yahudi pulau dienjuakka Allah masau ngubai jak di dusaunyau mangku bulia idup." 11:19 La udim Setipanus mati dibunua, jemau diau percayau ngan Yesus mulai meghasauka sengsarau, mangku ughangtu teceghai-beghai ke manau-manau. Adau diau belaghi sampai ke Penisia, adau diau sampai ke Siprus ngan Antiukia. Ughangtu ngiciakka ceritau iluak jak di Allah cuman ngan jemau Yahudi ajau. 11:20 Anyautu jak di ughangtu adau pulau jemau Siprus ngan jemau Kirini diau pegi sampai ke Antiukia ngiciakka ceritau iluak ngan jemau diau ukan jemau Yahudi, bangsau Yesus itula Tuhan. 11:21 Kuasau Tuhan adau di ughangtu, mangku banyak jemau njadi percayau ngan ta'at ngan Tuhan. 11:22 Ceritau jemau Antiukia itu pulau sampai di Yerusalim, didengagh jemau percayau di situ, mangku Barnabas diajung pegi ke Antiukia. 11:23 Barnabas la sampai di Antiukia, diau nginak Allah iluak ngan ughangtu, mangku diau riang nian. Diau ngajung, supayau ughangtu maju ta'at ngan Tuhan ngan setia. 11:24 Barnabastu jemau iluak atiau, lagi dkuasaui Rua Allah ngan percayau nian ngan Tuhan, mangku banyak jemau ngikut Tuhan. 11:25 La udim itu Barnabas pegi ke Tarsus ndala'i Saulus. La betemu dibata'inyau ke Antiukia. 11:26 Ughang duautu nyeghundak ngan jemau percayau di Antiukia setaun lamaunyau, sampai ngajagh banyak jemau. Di Antiukia itula jemau percayau dulu sekali dinamauka jemau Keristen. 11:27 Masau itula adau bebeghapau nabi diau datang jak di Yerusalim pegi ke Antiukia. 11:28 Jak di ughangtu adau sughang benamau Agabus. Diautu diajung Rua Allah ngiciakka, mbak bansau di gegalau deniau ka adau kelapaghan diau pansan. Titu tejadi masau Kaisar Kelaudius merinta. 11:29 Mangku jemau Keristen sepakat endak ngumpulka tanci nurut kerilaan sesughangan, endak dikighimka ke jemau percayau diau adau di Yudia. 11:30 Titu pulau dikerjauka, mangku Barnabas ngan Paulus diajung ngantatka tancitu ngan pengulu-pengulu jemau Keristen.

Ceritau Rasul-rasul 12

12:1 Timpau itu pulau rajau Herudis mulai nganiayau bebeghapau jak di jemau percayau. 12:2 Diau ngajung mbunua Yakubus, dang Yuhanis, pakai pedang. 12:3 Satu diau nginak, bansau kerjaunyautu meriangka ati jemau Yahudi, diau tamba ja'at ngan ngajung nangkap Pitrus pulau. Masau itu aghi rerayau Ruti Nidau Beghagi. 12:4 La udim ditangkap, diau dimasuakka dalam jil, dijagaui empat rumbungan tentera dalam serumbungan empat ughang. Rencanaunyau la udim Paska diadili di mukau jemau banyak. 12:5 Luak itula Pitrus dijilka. Anyautu jemau percayau maju ndu'akanyau ngan ngenian. 12:6 Malam antak ka Herudis endak ngadapkanyau ngan jemau banyak, Pitrus tiduak di antarau duau tentera, dikebat ngan duau rantai. Di duaghau jil adau pulau tentera lain diau njagauinyau. 12:7 Mangku adau malaikat Tuhan betegak di guak Pitrus mangku adau cayau di badahautu. Malaikattu nggugak Pitrus enggut bangun sampai bekatau, "Ui, bangunla cepat!?" Mangku rantai di tangan Pitrustu pacul. 12:8 Udim itu malaikattu bekatau, "Bebebatla, surumkala terumpa kaba!" Pitrus nurutinyau. Katau malaikat agi, "Surumkala baju kaba mangku ngikut aku!" 12:9 Mangku Pitrus ngikut malaikat itu pegi jak di jil. Anyautu diau nidau keruan, bansau setu diau dang dikerjauka malaikattu tejadi nian. Diau sangkau diau mimpi. 12:10 Malaikat ngan Pitrus la lalu di bada penjagauan petamau ngan diau keduau, mangku ughang duautu sampai ke mukau lawang besi diau nuju ke kuta. Mukau lawang itu tebukak sendighi. Mangku ughangtu ngeluagh ngan bejalan ke ujung jalan, mangku malaikattu lengit. 12:11 La udim itu, Pitrus jagau, tuapau diau la tejadi di diau, kataunyau, "Mbak kini aku la keruan, Tuhan ngajung malaikatAu endak melepaska aku jak di kuasau Herudis ngan gegalaunyau diau endak dibuat jemau Yahudi ngan aku." 12:12 La jagau, mangku Pitrus pegi ke ghuma Maria, mak Yuhanis diau pulau dinamauka Markus. Di situ banyak jemau dang betunggal ngan bedu'a. 12:13 Diautu nggagur duaghau luagh, mangku sughang budak jemau tinau benamau Rudi datang endak ngeruani, sapau diau nggagur duaghau itu. 12:14 Diau kecinauan suarau Pitrus, mangku karnau diau riang nian diau nidau mbukakka duaghau, tapitu cecepat masuak agi ke tenga endak ngiciakka, mbak bansau Pitrus adau di mukau duaghau. 12:15 Katau ughangtu, "Kici'an kaba endiak benagh agi." Anyautu diau maju ngiciakka, bansau nyela nian luak itu. Katau ughangtu, "Titu antuau!" 12:16 Pitrus maju nggagur duaghau. Satu ughangtu mbukak duaghau ngan nginak Pitrus, ughangtu kemangan nian. 12:17 Pitrus ngenjuakka tandau ngan tanganau, supayau tenang, mangku diceritaukanyau, luak manau Tuhan mbata'inyau keluagh jak di jil, kataunyau, "Kiciakkala ceritau ini ngan Yakubus ngan kantin kitau lain." La udim itu, diau pegi ke bada lain. 12:18 Pagi di aghiautu tentera-tentera ganau ngan bingung nian, karnau setu diau la tejadi ngan Pitrus. 12:19 Herudis ngajung jemau ndala'i Pitrus, anyautu nidau dapat. Mangku Herudis ngajung, supayau tentera itu ditanyaui mangku dibunua. Udim itu Herudis pegi jak di Yudia mendam di Kaisaria. 12:20 Herudis mara kematila ngan jemau Tirus ngan jemau Sidun. Mangku ughangtu serempak datang ngadap diau. Ughangtu muji Belastus, diau ngeruani istana rajau, mangku diau mihak ughangtu. Ughangtu endak ngadap Herudis endak mintak bedamai, karnau nenggeri ughangtu ngandalka makanan jak di nenggeri rajautu. 12:21 Adau saghi diau la ditetapka, Herudis nyurum baju rajau ngan duduak di kerusi rajau mangku mulai pidatau di mukau jemau banyak. 12:22 Jemau banyak diau dang ndengaghkanyau bekatau, "Itu suarau allah, ukan manusiau." 12:23 Masau itula pulau malaikat Tuhan nampagh Herudis, karnau diau nidau ngagungka Allah. Herudis mati dimakan biagh. 12:24 Mangku katau Allah tamba tesiar ngan tamba banyak jemau percayau. 12:25 Barnabas ngan Saulus la ngudimi tugasau di Yerusalim, ughang duautu baliak ngan mbata'i Yuhanis diau pulau dinamauka Markus serempak ngan ughangtu.

Ceritau Rasul-rasul 13

13:1 Di jemau Keristen di Antiukia adau bebeghapau nabi ngan guru agamau. Namaunyau Barnabas, Simiun diau pulau dikiciakka Nigir, Lukius, jemau Kirini, ngan Menahim diau diajagh serempak ngan gubernur Herudis, ngan Saulus. 13:2 Adau saghi ughangtu dang sembayang ngan puasau, mangku Rua Allah bekatau ngan ughangtu, "Piliala Barnabas ngan Saulus batan endak Aku, supayau ughang duau itu ngerjauka kerjau diau la kutetapka batan endak ughang duautu." 13:3 Ughangtu puasau ngan bedu'a, ditepiakkanyau tanganau di palak ughang duautu, mangku diajungau pegi. 13:4 Barnabas ngan Saulus pegi ke Selukia, karnau diajung Rua Allah, mangku jak di situ ughangtu belayar ke pulau Siprus. 13:5 La sampai di Salamis, ughangtu ngiciakka katau Allah di ghuma sembayang jemau Yahudi. Yuhanis Markus ngikut pulau ngan nulungi ughangtu. 13:6 Gegalau pulau itu diidari ughangtu enggut ke Papus. Di situ ughangtu betemu ngan sughang jemau Yahudi, benamau Baryisus. Jemau itu dukun diau ngaku'i diriau nabi. 13:7 Diautu sekantin ngan gubernur pulau itu. Gubernurtu namaunyau Sergius Paulus, diautu calak. Diau mantau Barnabas ngan Saulus, karnau endak ndengagh katau Allah. 13:8 Anyautu ughang duautu dilawan Ilimas, dukun tadi. Ilimas namaunyau basau Yunani. Diautu ncubau, supayau gubernur jangan percayau ngan Yesus. 13:9 Saulus diau diadaki Paulus dikuasaui Rua Allah, mangku ngina'i dukun tadi, 13:10 kataunyau, "Ui, kabani anak iblis. Kaba penipu ngan penja'at. Kaba musui gegalaunyau diau benagh. Kaba nidau mandak merusakka rencanau Allah diau endak nyelamatka manusiau. 13:11 Mbak kini keruanila, Tuhan ka ngukum kaba. Kaba ka njadi butau. Kaba nidau ka nginak matau-aghi selamau bebeghapau aghi." Masau itula pulau Ilimastu teghasau adau luak aban itam ngalangi mataunyau, mangku diau bejalan beghabal-ghabal ndala'i jemau batan endak mapa diau. 13:12 Nginak setu diau tejaditu, gubernur tadi percayau ngan Tuhan. Diautu kepagauan nian ngan ajaghan Tuhan. 13:13 Paulus ngan kantin-kantinau pegi jak di Papus belayar ke Perga di Pampilia. Di situ Yuhanis Markus ninggalka rumbungan itu pegi ke Yerusalim. 13:14 Jak di Perga ughangtu melajuka ke Antiukia daira Pisidia. Aghi Sabat ughangtu pegi ke ghuma sembayang mangku duduak. 13:15 Ukum Taurat ngan kitab nabi la dibacauka, petugas ghuma sembayangtu ngajung nanyauka ughang duautu, "Amun kamu adau pesan diau nguatka ughang ini, kiciakkala ngan kami." 13:16 Paulus betegak, mangku ngenjuakka tandau ngan tanganau ngan bekatau, "Ui, kapu dighi jemau Israil ngan kapu dighi jemau diau takut ngan Allah, dengaghkala aku! 13:17 Allah jemau Israil la milia niniak puyang kitau ngan njadika bangsau kitau besak, timpau ughangtu mendam di Mesir njadi jemau asing di situ. Mangku ngan kuasau diau besak Allah mbata'i ughangtu keluagh jak di nenggeri itu. 13:18 Selamau empat pulua taun Diau ngaligh ngan perembak ughangtu di padang bungin. 13:19 Tujua bangsau diancurkaNyau di nenggeri Kanaan, mangku diagiakaNyau nenggeritu ngan ughangtu njadi hak ughangtu. 13:20 Gegalaunyautu tejadi jangkau empat ratus limau pulua taun. La udim diagiakaNyau nenggeritu, dienjuakkaNyau akim enggut ke nabi Samuil. 13:21 La udim itu ughangtu mintak sughang rajau, mangku Allah ngenjuakka Saul, anak Kis, jak di jungku Benyamin, njadi rajau ughangtu selamau empat pulua taun. 13:22 La udim itu Allah nukar Saul ngangkat Daud njadi rajau ughangtu, mangku nceritauka Daud luak ini, 'Aku la keruan Daud, anak Isai, jemau diau melemakka atiKu ngan ngerjauka gegalau kendakKu.' 13:23 Mangku jak di pengadaunyau Allah la ngenjuakka ngan jemau Israil sughang Rajau Penyelamat luak la dijanjikaNyau. Yesus itula Rajau Penyelamat itu. 13:24 Yesustu la datang endak mulai kerjauNyau, Yuhanis la ngiciakka ngan gegalau bangsau, supayau ngubai jak di dusaunyau ngan mintak dibaptis. 13:25 Mangku Yuhanis laka ngudimi kerjaunyau, diau bekatau, 'Akuni ukan jemau diau kamu sangkau. Jemau itu ka datang la udim aku. Melegha'i tali sepatuAu aku nidau pantas.' 13:26 Ui, kapu dighi pengadau Abraham ngan kapu dighi diau lain diau ta'at ngan Allah. Ceritau keselamatan la dikiciakka ngan kitau. 13:27 Jemau Yerusalim ngan penguluau nidau ngaku'i Yesus. Ughangtu ngukum Yesus ngan ukuman mati, mangku kici'an nabi-nabi diau dibacauka idang aghi Sabat ditepati. 13:28 Empuak ughangtu nidau nemuka salaHau diau pantas diukum mati, ughangtu mintak ngan Pilatus, supayau Diau dibunua. 13:29 La udim dikerjauka gegalaunyau diau la ditulis ceritau Diau, Diautu ditughunka jak di kayu salip, mangku dimasuakka dalam kuburan. 13:30 Anyautu Allah ngidupkaNyau agi jak di mati. 13:31 Selamau empat pulua aghi Diau ngancakka diriAu ngan jemau diau la ngikut Diau jak di Galilia ke Yerusalim. Mbak kini ughang itula ngiciakka Diau ngan bangsau Israil. 13:32 Jadi, mbak kini kamini ngiciakka ceritau iluak itu ngan kapu dighi: Diau la dijanjika Allah ngan niniak puyang kitau, 13:33 la ditepatiNyau ngan kitau, ngan ngidupka Yesus jak di mati, luak ditulis di Masmur duau, 'Kaba anakKu. Mbak kini Aku njadi Bak Kaba.' 13:34 Allah la ngidupka Diau jak di mati. Mbak kini Diau nidau ka mati agi dalam kuburan. Titu dikiciakka Allah ngan katau ini, 'Aku ka nepati janji diau suci ngan pacak dipercayaui diau la Kukiciakka ngan Daud.' 13:35 Luak itu pulau la dikiciakka di Masmur lain, 'Dighi nidau ngenangka mayat Budak diau ta'at bembau.' 13:36 Daud ngerjauka kendak Allah mangku mati ngan dikuburka guak niniak puyangau. Nyela, mayatau busuak. 13:37 Anyautu Yesus diau diidupka agi jak di mati nidau busuak. 13:38 Jadi, keruanila kapu dighi, karnau Yesus mangku dikiciakka ngan kapu dighi ceritau, mbak bansau dusau pacak diabiska. 13:39 Karnau Diautu bilang jemau diau percayau pacak dilepaska jak di gegalau dusaunyau. Titu nidau pacak dikerjauka ukum Musa. 13:40 Itula sebapau kapu dighi mesti njagaui iluak-iluak, supayau jangan tejadi ngan kapu dighi setu diau la dikiciakka nabi, 13:41 'Ingatkala iluak-iluak, kamu diau galak nggelak. Kamu ka kemangan, mangku mati! Karnau masau kamu gi idup mbak kini, Aku ka ngerjauka kerjau diau nidau ka kamu percayaui, empuak dikiciakka ngan kamu.' " 13:42 Satu Paulus ngan Barnabas ngeluagh jak di ghuma sembayang, ughang duautu dipintak ngiciakka ceritau itu agi aghi Sabat di mukau. 13:43 La udim jemau ngeluagh jak di ghuma sembayangtu, banyak jemau Yahudi ngan jemau lain diau takut ngan Allah ngikut Paulus ngan Barnabas. Mangku rasultu ngajagh ughangtu, diajungau, supayau maju percayau ngan keilu'an Allah. 13:44 Aghi Sabat di mukau laka sekuta itu datang betunggal endak ndengaghka katau Allah. 13:45 Anyautu, satu nginak jemau banyak itu, jemau Yahudi sengit nianan, mangku nggelakka Paulus ngan melawan kici'an Paulustu. 13:46 Ngan beghani Paulus ngan Barnabas ngiciak terang-terangan, kataunyau, "Katau Allah mesti dikiciakka ngan kapu dighi kudai. Anyautu kapu dighi nidau nerimaunyau, mangku kapu dighi nidau dianggap pantas bulia idup selelamaunyau. Mangku kami pegi ke bangsau lain. 13:47 Inila diau diperintaka Allah ngan kami, 'Aku la netapka kaba njadi terang batan endak bangsau lain diau nidau keruan Allah, mangku karnau kaba gegalau deniau pacak diselamatka.' " 13:48 Ndengagh kici'an itu gegalau jemau diau ukan Yahudi riang nian ngan ngagungka ceritau jak di Tuhan. Mangku gegalau jemau diau la ditetapka Allah batan endak idup selelamaunyau percayau ngan Tuhan Yesus. 13:49 Mangku kici'an Tuhan tesiar di gegalau daira itu. 13:50 Anyautu pengulupengulu kuta itu ngan tinau-tinau diau diregaui ngan takut ngan Allah diasung jemau Yahudi, supayau ughangtu nganiayau Paulus ngan Barnabas, mangku ughang duautu dilaratka jak di daira itu. 13:51 Rasul itu ngepaska debu di ketingau di adapan ughangtu njadi peringatan ngan ughangtu, mangku pegi ke Ikunium. 13:52 Jemau percayau di Antiukia riang nianan ngan dikuasaui Rua Allah.

Ceritau Rasul-rasul 14

14:1 Di Ikunium pulau setu diau semegi dighasauka rasul itu. Ughang duautu masuak ghuma sembayang ngan ngajagh ngan carau endak nian, mangku banyak jemau Yahudi ngan jemau Yunani percayau ngan Yesus. 14:2 Anyautu jemau Yahudi diau enggup percayau ngasung jemau bangsau lain, mangku ughangtu mara lagi luat ngan jemau percayautu. 14:3 Karnau itu Paulus ngan Barnabas lamau mendam di situ. Ngan beghani ughang duautu ngiciakka ceritau Tuhan. Mangku Tuhan pulau mbuktika, bansau ceritau iluak itu benagh. Diau ngenjuakka kuasau ngan ughang duautu ngadauka tandau nyelia. 14:4 Mangku jemau kuta itu nidau semegi pendapat. Adau diau mihak ngan jemau Yahudi, adau diau mihak ngan rasul tadi. 14:5 Mangku jemau Yahudi ngan jemau bangsau lain diau nidau keruan Allah ngan penguluau sepakat endak mbunua rasultu ngan nyipati ughang duautu ngan batu. 14:6 Anyautu rasultu ngeruani rencanau itu, mangku nyingkir ke kuta di daira Likaunia, diautu Listera, Derbi ngan daira di sekitarau. 14:7 Di situla ughang duautu ngiciakka ceritau iluak. 14:8 Di Listera adau sughang jemau lanang diau duduak ajau ngan lum kekela pacak bejalan, karnau ketingau nidau mayau jak di keciak. 14:9 Diautu duduak ndengagh Paulus ngiciak. Paulus nginak, bansau jemautu percayau, mangku pacak dighaduka. Diau ngina'i jemautu, 14:10 bekatau ngan suarau bias, "Betegakla!" Jemau itu melumpat betegak mangku bejalan. 14:11 Satu jemau banyak nginak setu diau dikerjauka Paulus, ughangtu tegauk pakai basau Likaunia, "Diwau-diwau la tughun guak kitau luluak badan manusiau." 14:12 Barnabas dikiciakka diwau Sius, Paulus dikiciakka diwau Hermis, karnau diautu tukang ngiciak. 14:13 Mangku imam diwau Sius datang. Keramatau adau di luagh kuta. Imamtu mbatak sapi karai ngan bungau ke mukau lawang kuta endak bekerban nyemba rasul itu serempak ngan jemau banyak tadi. 14:14 Satu Barnabas ngan Paulus ndengagh setu diau dikerjauka ughangtu, ughang duautu ncebaghka bajuau, karnau nidau tetuju ngan peremba'autu, mangku belaghi ke pugan jemau ramitu sampai tegauk, 14:15 "Ui, kapu dighi. Ngapau kapu dighi ngerjauka ini? Kamini pulau manusiau luak kapu dighi. Kami ke sini endak ngiciakka ceritau iluak ngan kapu dighi, supayau kapu dighi ninggalka kerjau diau nidau begunau ini, mangku datang njenguak Allah diau idup, diau njadika langit ngan deniau, laut ngan gegalau isiau. 14:16 Timpau dulu Allah ngenangka gegalau bangsau idup nurut kenda'au ajau. 14:17 Empuak luak itu, Diau nidau kelingauan mbuktika diriAu ngan kerjau diau iluak. Diautu ngenjuakka ujan jak di langit ngan asil tana padau pangkaunyau. Diau ngenjuakka makanan ngan kapu dighi ngan nyenangka ati kapu dighi." 14:18 Empuak ngiciak luak itu, masia segau rasultu negahi ughang banyaktu bekerban batan endak ughang duautu. 14:19 Adau jemau Yahudi datang jak di Antiukia ngan Ikunium. Ughangtu muji jemau Listera, mangku jemau banyak mihak ngan ughangtu. Ughangtu nyipati Paulus ngan batu, mangku naghiak diau keluagh kuta, karnau disangkau ughang diau la mati. 14:20 Anyautu jemau percayau di situ betegak ngelilingi diau. Diautu bangun masuak agi ke kuta. Pagiau diau pegi ke Derbi serempak ngan Barnabas. 14:21 Di Derbi Paulus ngan Barnabas ngiciakka ceritau iluak, mangku banyak jemau percayau ngan Yesus. Udim itu ughang duautu ngulang ke Listera, udim itu ke Ikunium mangku ke Antiukia. 14:22 Di kuta itu duau rasultu neguaka ati jemau diau percayau ngan Yesus ngan ngajung ughangtu, supayau maju percayau. Rasultu bekatau, "Kitau mesti sengsarau kudai, mangku kitau pacak njadi angguta umat Allah." 14:23 Di bilang kumpulan jemau Keristen duau rasultu netapka pengulu-pengulu batan endak ughangtu. Mangku sampai puasau ngan bedu'a rasultu nyeraka pengulutu ngan Tuhan diau ughangtu percayauitu. 14:24 La udim itu Paulus ngan Barnabas melajuka pejalanannyau. Ughang duautu wuan daira Pisidia, mangku sampai di Pampilia, 14:25 dikiciakkanyau katau Allah di Perga, mangku pegi ke Atalia. 14:26 Jak di situ ughang duautu belayar agi ke Antiukia. Kuta itu bada ughang duautu senitu diseraka ngan Allah, supayau ughangtu ngerjauka kerjau diau mbak kini la diudimi. 14:27 La sampai di situ, ughangtu ngajung jemau percayau betunggal, mangku ughang duautu nceritauka gegalaunyau diau la Allah kerjauka ngan ughangtu, luak manau Allah la nyatauka, supayau bangsau lain pulau pacak percayau ngan Allah. 14:28 Rasul itu lamau betunggal ngan jemau percayau di situ.

Ceritau Rasul-rasul 15

15:1 Adau bebeghapau jemau jak di Yudia datang ke Antiukia ngajagh jemau Keristen di situ, kataunyau, "Amun kapu dighi nidau disunat nurut ukum Musa, kapu dighi nidau pacak diselamatka." 15:2 Paulus ngan Barnabas melawan nian ngan bebala, mbalahi pendapat ughangtu. Udim-udimau ditetapka, supayau Paulus ngan Barnabas ngan jemau lain jak di Antiukia pegi ke Yerusalim endak ngiciakka sual itu ngan rasul-rasul ngan pengulu-pengulu di situ. 15:3 Jemau Keristen di Antiukia ngantat ughangtu sampai keluagh kuta, mangku ughangtu pegi wuan Penisia ngan Samaria. Di situ ughangtu nceritauka, mbak bansau jemau bangsau lain diau nidau keruan Allah la percayau ngan Allah. Ceritau itu meriangka nian jemau percayau di situ. 15:4 La sampai di Yerusalim, ughangtu diterimau ngan iluak ngan jemau Keristen ngan rasul-rasul ngan pengulupengulu, mangku diceritauka gegalaunyau diau dikerjauka Allah ngan ughangtu. 15:5 Adau jemau jak di rumbungan Parisi diau la percayau betegak ngan bekatau, "Jemau bangsau lain mesti disunat ngan diwajibka nuruti ukum Musa." 15:6 Mangku rasul-rasul ngan pengulu-pengulu betunggal endak ngiciakka sual itu. 15:7 Lamau nianan ughangtu buijau. Kesudimannyau Pitrus betegak ngan bekatau, "Ui, kapu dighi. Kapu dighi keruan, bansau jak di senitu Allah milia aku jak di kapu dighi batan endak ngiciakka ceritau iluak ngan jemau bangsau lain, supayau ughangtu pulau ndengagh ngan percayau. 15:8 Allah keruan ati manusiau. Diau nunjuakka, mbak bansau Diau nerimau ughangtu ngan ngenjuakka ngan ughangtu Rua Allah, luak dienjuakkaNyau ngan kitau pulau. 15:9 Allah nidau nian mbidaka kitau ngan ughangtu. Diau mberesiaka ati ughangtu, karnau ughangtu percayau. 15:10 Amun luak itu, ngapau kapu dighi endak nguji kesabaran Allah ngan ngajung ngerjauka ukum diau beghat diau nidau pacak kitau turuti ngan niniak puyang kitau pulau nidau pacak. 15:11 Kitau percayau ngan diselamatka karnau keilu'an Tuhan Yesus Keristus. Luak itu pulau ughangtu." 15:12 Jemau diau betunggal di situ diam galau, mangku ndengaghka Paulus ngan Barnabas nceritauka gegalau tandau nyelia diau la Allah kerjauka ngan ughang duautu di guak jemau bangsau lain. 15:13 La udim Paulus ngan Barnabas ngiciak, Yakubus bekatau, "Ui, kapu dighi, dengaghkala aku. 15:14 Empai jerangnila Simun la nceritauka, luak manau Allah penembaian iluak ngan bangsau lain, endak milia jemau jak di ughangtu njadi umatAu. 15:15 Nabi-nabi senitu la ngiciakka titu di Injil luak ini, 15:16 'La udim itu Aku ka datang agi, katau Tuhan. Aku ka negakka agi ghuma Daud diau la rubua itu. Aku ka ngilu'i runtuannyau, mangku negakkanyau agi, 15:17 supayau gegalau tigha jemau lain ndala'i Tuhan ngan gegalau bangsau lain diau nidau keruan Allah, la Kupilia njadi umatKu. Luak itula katau Tuhan diau ngerjauka gegalaunyautu.' 15:18 Jak di senitu titu la dikiciakka. 15:19 Jadi," katau Yakubus, "Pendapatku, jangan kitau nyusaka jemau jak di bangsau lain diau la percayau ngan Allah. 15:20 Kitau mesti besurat ngan ughangtu, supayau jangan makan makanan diau la disiwauka, jangan menaugawia, jangan makan daging benatang diau ditekiak ngan jangan makan dagha. 15:21 Karnau jak di senitu ukum Musa la dikiciakka di bilang kuta ngan dibacauka idang aghi Sabat di ghuma sembayang." 15:22 Mangku rasul-rasul ngan pengulupengulu jemau Keristen ngan gegalau jemau percayau mutuska endak milia bebeghapau ughang jak di ughangtu diau ka diajung ke Antiukia serempak ngan Paulus ngan Barnabas. Mangku ughangtu milia Silas ngan Yudas diau pulau dikiciakka Barsabas. Ughang duautu diregaui nian di guak jemau percayau di Yerusalim. 15:23 Ngan ughang duautu diseraka surat muniau luak ini, "Batan endak gegalau jemau percayau diau asalau jak di bangsau lain diau adau di Antiukia ngan Siria ngan Kilikia. Salam jak di rasul-rasul ngan pengulu-pengulu, kantin-kantin kamu. 15:24 Kami la ndengagh ceritaunyau adau jemau jak di kami pegi njenguak kapu dighi ngan ngacauka kapu dighi ngan ajaghannyau. Kami nidau ngajung ughangtu ngerjauka titu. 15:25 Itula sebapau kami la buijau, mangku gegalaunyau tetuju galau endak milia bebeghapau ughang ngajung ughangtu pegi njenguak kapu dighi serempak ngan kantin kitau Paulus ngan Barnabas diau kami sayangi. 15:26 Ughang duautu jemau diau la cakap nyeraka nyawaunyau karnau Tuhan kitau Yesus Keristus. 15:27 Mangku kami la ngajung Yudas ngan Silas njenguak kapu dighi. Ughang duautu ka ngiciakka pulau ngan kapu dighi setu diau ditulis dalam surat ini. 15:28 Rua Allah la netapka mangku kami pulau nyetujuinyau, supayau kapu dighi jangan telampau banyak nanggungka beban lain jak di diau penting ini: 15:29 Jangan kapu dighi makan makanan diau la disiwauka, jangan makan dagha ngan daging benatang diau mati ditekiak ngan jangan menaugawia. Amun kapu dighi njawuaka diri jak di kerjau itu, kapu dighi la bebuat iluak. Inggan ini ajau. Salam kami." 15:30 La udim pamit, Yudas ngan Silas bejalan ke Antiukia. Di situ ughangtu mantau jemau diau percayau ngajung ughangtu betunggal, mangku surat itu dienjuakka ngan ughangtu. 15:31 La udim dibacaukanyau surattu, ughangtu riang nian, karnau isi surat tadi melemakka ati ughangtu. 15:32 Yudas ngan Silas diau pulau nabi lamau bekiciak ngan jemau percayau, melemakka ngan neguaka ati ughangtu. 15:33 La lamau jugau ughang duautu di situ, mangku jemau percayau di Antiukia ngajung ughangtu baliak nyampaika salam ngan jemau diau ngajung ughang duautu senitu. 15:34 Anyautu Silas maju endak mendam di Antiukia. 15:35 Paulus ngan Barnabas pulau lamau mendam di Antiukia. Di situ ughang duautu ngajagh ngan ngiciakka katau Tuhan ngan banyak jemau lain pulau. 15:36 Nidau lamau udim itu, Paulus ngiciak ngan Barnabas, kataunyau, "Mela kitau ngaruaka kantin-kantin kitau di bilang kuta, bada kitau ngiciakka katau Tuhan senitu, mangku kitau keruan, luak manau ughangtu." 15:37 Barnabas endak mbata'i Yuhanis Markus. 15:38 Anyautu Paulus meghasau nidau lemak mbatak jemau diau senitu numangka ughang duautu di Pampilia, nidau endak maju bekerjau ngan ughangtu. 15:39 Paulus ngan Barnabas bebala nian, mangku ughang duautu beceghai. Barnabas mbata'i Markus, mangku belayar ke Siprus. 15:40 Paulus milia Silas. Ughang duautu didu'aka jemau percayau ngan diseraka ngan keilu'an Tuhan, 15:41 mangku pegi ngidari Siria ngan Kilikia sampai neguaka ati jemau percayau di situ.

Ceritau Rasul-rasul 16

16:1 Paulus la pegi sampai di Derbi ngan Listera. Di situ adau sughang percayau, namaunyau Timutius. Endu'au jemau Yahudi diau la percayau pulau. Ba'au jemau Yunani. 16:2 Timutius tekenal iluak di guak jemau percayau di Listera ngan Ikunium. 16:3 Paulus endak mbata'i Timutius, mangku diau nyunatka diau karnau jemau Yahudi di daira itu. Ughangtu keruan galau, bansau ba'au jemau Yunani. 16:4 Di bilang kuta diau didatangi Paulus ngan Silas, dikiciakkanyau setu diau la ditetapka rasul-rasul ngan pengulu-pengulu di Yerusalim ngan ngajung ughangtu na'atinyau. 16:5 Mangku jemau percayau di situ diteguaka atiau, supayau maju percayau. Idang aghi tamba banyak jemau diau percayau. 16:6 Rua Allah nidau ngajung Paulus ngan Silas ngiciakka kici'an Allah di perupinsi Asia, mangku ughangtu melajuka pejalanannyau ke daira Perigia ngan Galatia. 16:7 La sampai di Misia ughangtu ncubau masuak ke daira Bitinia, anyautu Rua Yesus nidau ngajung ughangtu ke situ. 16:8 Ughangtu wuan Misia mangku sampai di Teruas. 16:9 Malamau Paulus adau pengina'an. Diau nginak jemau Makedunia betegak di situ mantau diau, kataunyau, "Mela, nyembeghangla ke sini, mangku tulung kami!" 16:10 La udim Paulus nginak pengina'antu, kami bedandan endak pegi ke Makedunia, karnau kami la percayau ngan mutuska, bansau Allah ngajung kami ngiciakka ceritau iluak ngan jemau di situ. 16:11 Mangku kami pegi jak di Teruas belayar ke Samuteraki. Pagi aghiau kami sampai di Niapulis. 16:12 Jak di situ kami ke Pilipi, kuta di daira petamau Makedunia itu. Itu kuta perantauan jemau Rum. Di situ kami mendam bebeghapau aghi. 16:13 Aghi Sabat kami pegi keluagh kuta ke tepi ayiak, karnau kami kirau adau bada sembayang jemau Yahudi di situ. Kami duduak, mangku ngiciak ngan tinau-tinau diau betunggal di situ. 16:14 Adau sughang jak di tinautu, namaunyau Lidia, asalau jak di Tiatira. Diautu tukang dagang kain ungu diau besak regaunyau. Diautu nyemba Allah. Tuhan mbukakka atiau, mangku diau nerimau kici'an Paulus, 16:15 mangku diau seghuma dibaptis galau. La udim dibaptis, diau ngajak kami ke ghumahau, kataunyau, "Amun kamu meghasau, aku la percayau nian ngan Tuhan Yesus, mela singga kudai di ghumaku. Aku ngajung temalam nian." Mangku kami ngikut diau. 16:16 Adau saghi kami dang pegi ke bada sembayang tadi, mangku kami betemu ngan sughang budak belian jemau tinau. Tinau itu dikuasaui rua sitan, mangku diau pacak meramalka. Ngan meramalka nasib jemau, tuan-tuanau bulia tanci banyak. 16:17 Tinautu ngikut Paulus ngan kami sampai ngiciak ngan suarau bias, kataunyau, "Ughang ini budak Allah diau Mahabesak. Ughangni ngiciakka ngan kapu dighi, luak manau caraunyau kapu dighi pacak selamat." 16:18 Bebeghapau aghi tinautu maju ngiciak luak itu. Mangku Paulus nidau ta'an agi ndengaghau. Diau nulia ngan bekatau ngan rua itu, "Ngan kuasau Yesus Keristus aku ngajung kaba keluagh jak di tinau ini. Keluaghla kaba!" Masau itu pulau rua itu ngeluagh. 16:19 Satu tuan-tuan tinau tadi nginak, bansau aghapan ka bulia tanci nidau bediau agi, ughangtu nangkap Paulus ngan Silas, ditaghiak ke tengalaman pengadilan endak diadapka ngan penguasau kuta. 16:20 Ughang duautu la dibata'i ngadap pengulu-pengulu kuta, ughang tadi bekatau, "Ughang duau ini jemau Yahudi. Diau ngacau di kuta kitau. 16:21 Ughang duautu ngajaghka adat lembagau diau belawanan ngan ukum kitau. Kitau ini jemau Rum. Kitau nidau pacak nerimau ngan nurutinyau." 16:22 Jemau banyak pulau ngikut melawan Paulus ngan Silas. Mangku pengulu-pengulu kutatu ngajung ncebaghka baju ngan mbaduki ughang duautu. 16:23 Ughang duautu la dibaduki enggut jeghia, mangku dimasuakka dalam jil. Kepalak jil diajung njagaui nian ughang duautu. 16:24 Karnau diajung luak itu, kepalak jiltu masuakka ughangtu di bada diau di tetengaan sekali, mangku ughangtu dimasuakka ke belukan. 16:25 Kekirau tenga malam Paulus ngan Silas bedu'a ngan benyanyi ngagungka Tuhan. Jemau lain diau di jil pulau ndengaghi ughang duautu benyanyi. 16:26 Mangku adau gempau diau besak kematila, sampai pendasi jil itu begugak galau. Masau itu pulau tebukak gegalau duaghau jil ngan belukan ngan pasungan pacul galau. 16:27 Kepalak jil tadi tegagau ngan bangun. Diau nginak duaghau jil tebukak galau, mangku diau ncabut pedangau endak mbunua diriau, karnau disangkaunyau anak kawalan la belaghi galau. 16:28 Anyautu Paulus tegauk, kataunyau, "Jangan bunua diri. Kami gi adau galau di sini!" 16:29 Kepalak jiltu ngajung mbatak lampu, mangku belaghi ke dalam. Ngan gemetagh diau nunduak di adapan Paulus ngan Silas. 16:30 La udim itu diau mbata'i ughang duautu keluagh mangku bekatau, "Tuapau diau mesti kukerjauka, mangku aku selamat?" 16:31 Ughang duautu nimbal, "Percayaula ngan Tuhan Yesus, mangku dighi selamat, dighi seghuma ka selamat galau." 16:32 Mangku Paulus ngan Silas ngiciakka katau Tuhan ngan kepalak jiltu ngan gegalau jemau diau adau di ghumahau. 16:33 Tenga malamtu pulau kepalak jil itu mbatak ughang duautu mangku ngubati lukaunyau. Mangku jemau seghumatu dibaptis galau. 16:34 La udim dibaptis, Paulus ngan Silas dibata'inyau ke ghumahau, ditepiakka makanan batan endak ughang duautu. Ughang seghuma riang nian, karnau la percayau ngan Allah. 16:35 Pagi di aghiau pengulu-pengulu kuta ngajung pelisi pegi ke kepalak jil ngan ngiciakka, "Lepaskala ughang duau itu!" 16:36 Kepalak jiltu ngiciakkanyau ngan Paulus, kataunyau, "Pengulu-pengulu kuta la ngajung kamu dilepaska. Mbak kini baliakla!" 16:37 Anyautu Paulus ngiciak ngan pelisi tadi, kataunyau, "Kamini jemau behak di nenggeri Rum. Ngan nidau diadili kami la dibaduki di mukau jemau banyak ngan dimasuakka dalam jil. Mbak kini ughangtu ngajung kami pegi, nidau keruan ngan jemau. Kami enggup luak itu! Ajungla pengulu-pengulu kuta ke sini melepaska kami." 16:38 Pelisi itu ngiciakka gegalaunyautu ngan pengulu-pengulu kuta. Satu ughangtu ndengagh, mbak bansau Paulus ngan Silas jemau behak di nenggeri Rum, ughangtu penakut. 16:39 Mangku ughangtu pegi mintak dima'apka duau rasultu ngan ngantat ughang duautu keluagh jil mangku mintak, supayau ughang duautu pegi jak di kuta itu. 16:40 Paulus ngan Silas ninggalka jil tadi pegi ke ghuma Lidia. Di situ ughang duautu betemu ngan jemau percayau ngan neguaka ati ughangtu. La udim itu ughang duautu pegi.

Ceritau Rasul-rasul 17

17:1 Paulus ngan Silas melajuka pejalanannyau wuan Ampipulis ngan Apulunia mangku sampai di Tesalunika. Di situ pulau adau ghuma sembayang jemau Yahudi. 17:2 Luak biasaunyau Paulus masuak ke ghuma sembayang itu. Tigau aghi Sabat beturut-turut diau ngiciakka isi Injil ngan ughang di situ. 17:3 Diau nerangka ngan mbuktika, mbak bansau Mesias, Rajau Penyelamattu, mesti sengsarau mangku ngulang idup jak di mati, kataunyau, "Inila Mesias, Rajau Penyelamattu, Yesus diau kukiciakka ngan kapu dighi." 17:4 Adau jemau diau percayau mangku ngikut Paulus ngan Silas. Banyak jemau Yunani diau takut ngan Allah ngan banyak jugau tinau diau diregaui diau percayau. 17:5 Anyautu jemau Yahudi sengit. Ughangtu mantau jemau ja'at di jalan ngan mbuat rumbungan pengacau, mangku ughangtu ngacau di gegalau kuta itu ngan masu'i ghuma Yasun endak mbata'i Paulus ngan Silas ngadap jemau banyaktu. 17:6 Anyautu karnau ughangtu nidau betemu ngan ughang duau itu, ditaghi'au Yasun ngan bebeghapau jemau percayau lainau ke pengulupengulu kuta, sampai tegauk, kataunyau, "Jemau diau ngacau di manau-manau la datang ke sini pulau. 17:7 Yasun ini nerimau ughangtu di ghumahau. Ughangtu melanggar ukum diau la ditetapka Kaisar. Ughangtu ngiciakka adau rajau lain, diautu Yesus." 17:8 Ndengagh kici'annyautu jemau banyak ngan pengulu-pengulu kutatu ganau. 17:9 Mangku Yasun ngan jemau percayau lainau diajung mbayighi tanci penebusau. La udim itu ughangtu dilepaska. 17:10 Malam itu pulau jemau percayau di situ ngajung Paulus ngan Silas pegi ke Beria. La sampai di situ ughang duautu pegi ke ghuma sembayang jemau Yahudi. 17:11 Jemau Yahudi di kuta itu nerimau nian kici'an Paulus, ukan luak jemau Tesalunika. Ngan riang ughangtu ndengaghka ceritau Yesus. Idang aghi ughangtu melajaghi nian Injil endak ngeruani, apu gegalaunyau nyela luak itu. 17:12 Banyak jak di ughangtu percayau ngan Yesus, ngan banyak pulau jemau Yunani diau diregaui, empuak tinau empuak lanang. 17:13 Anyautu jemau Yahudi di Tesalunika ndengagh, bansau di Beria pulau Paulus la ngiciakka katau Allah. Ughangtu datang pulau ke situ ngasung jemau banyak mbuat rumbungan pengacau. 17:14 Jemau diau percayau di situ cecepat ngantat Paulus ke pantai. Silas ngan Timutius masia mendam di Beria. 17:15 Jemau diau ngantat Paulus ngantini diau sampai di Atina. Mangku ughangtu baliak ke Beria mbatak pesan jak di Paulus, supayau Silas ngan Timutius cecepat njenguak diau. 17:16 Penarau Paulus nunggu Silas ngan Timutius di Atina, diau madak nian nginak kuta itu penua ngan patung. 17:17 Karnau itu Paulus peragau di ghuma sembayang ngan jemau Yahudi ngan jemau lain diau takut ngan Allah. Luak itula pulau di pekan idang aghi diau ngiciak ngan jemau diau adau di situ. 17:18 Adau pulau guru-guru ajaghan Ipikurus ngan Setua diau peragau ngan Paulus. Adau jemau diau bekatau, "Tuapau diau endak dikiciakka tukang mbu'ung ini?" Adau pulau jemau lain diau bekatau, "Upaunyau diauni ngiciakka diwau bangsau lain." Karnau Paulus ngiciakka ceritau Yesus ngan ceritau ngulang idup jak di mati. 17:19 Mangku ughangtu mbatak Paulus ngadap sidang Ariupagus ngan ngiciakka, "Kami endak keruan ajaghan empai diau dighi kiciakka itu. 17:20 Karnau dighi ngiciakka setu diau lum kekela kami dengagh ka adau. Itula sebapau kami endak keruan retiau gegalaunyau itu." 17:21 Adau banyak jemau Atina ngan jemau bangsau lain diau mendam di situ, kerjaunyau cuman ndengagh ngan ngiciakka ceritau diau empai. 17:22 Mangku Paulus betegak di adapan jemau diau betunggal di Ariupagustu ngan bekatau, "Ui, kapu dighi jemau Atina. Aku nginak kapu dighi buagamau nian. 17:23 Aku la ngerayau ngidari kuta kapu dighi, mangku aku ngina'i bada sembayang kapu dighi. Aku nginak pulau sutiak bada bekerban. Di bada itu ditulis luak ini, 'Batan endak Allah diau nidau kami keruani!' Allah diau kapu dighi semba, anyautu nidau kapu dighi keruani, Diau itula kukiciakka ngan kapu dighi. 17:24 Allah diau njadika deniau ini ngan gegalau isiau, Diautu Tuhan ngan nguasaui langit ngan deniau. Diau nidau mendam di keramat diau dibuat manusiau. 17:25 Diau pulau nidau kurang tuapau-apau endak ditulung manusiau, karnau Diau itula ngenjuakka manusiau idup ngan nyawau ngan gegalaunyau. 17:26 Jak di sughang jemau ajau Diau mbuat gegalau bangsau ngan ngajung ughangtu mendam di gegalau deniau. Diau pulau netapka jak di penembai, kebilau ngan di manau ughangtu bulia idup. 17:27 Gegalaunyautu dikerjauka Allah, supayau ughangtu ndala'i Diau, kalu-kalu betemu ngan Diau, amun didala'i, empuak Allah sebenaghau nidau jawua ngan kitau. 17:28 Luak itu pulau dikiciakka jemau, 'Kitau idup, kitau bekerjau, kitau adau di deniau ini karnau Diau.' Semegi pulau ngan setu diau dikiciakka tukang pengarang kapu dighi, kataunyau, 'Gegalau kitau pengadau Allah.' 17:29 Karnau asal kitau jak di Allah, kitau nidau bulia nganggap sipat Allah semegi ngan patung diau dibuat jak di emas, pirak ngan batu, diau dibuat ngan kepandaian manusiau. 17:30 Masau kitau nidau keruan nidau diingatka Allah agi. Mbak kini Allah ngajung gegalau jemau di deniau ngubai jak di peremba'au diau ja'attu. 17:31 Diau la netapka aghi endak ngadili deniau ini ngan adil. Titu ka dikerjauka Sughang diau dipilia Allah. Mangku Allah la mbuktika titu ngan ngidupka Jemau itu jak di mati." 17:32 Satu ughangtu ndengagh, bansau jemau mati ka ngulang idup, adau diau nawauka Paulus. Adau pulau diau bekatau, "Nanti ajau kami ndengagh kici'an kaba agi." 17:33 Mangku Paulus pegi ninggalka ughangtu. 17:34 Anyautu adau pulau bebeghapau jemau diau ngikut Paulus ngan percayau ngan Yesus. Di antaraunyau adau Diunisius, angguta sidang Ariupagus ngan sughang tinau, namaunyau Damaris ngan bebeghapau jemau lain agi.

Ceritau Rasul-rasul 18

18:1 La udim itu, Paulus ninggalka Atina mangku pegi ke Kurintus. 18:2 Di situ diau betemu ngan sughang jemau Yahudi, namaunyau Akwila, asalau jak di Puntus. Akwila empai datang jak di Italia ngan biniau Periskila, karnau Kaisar Kelaudius la ngajung jemau Yahudi pegi jak di Rum galau. Paulus berayak ke ghuma ughang duautu. 18:3 Ughang duautu tukang kima semegi ngan Paulus. Karnau itu Paulus mendam di situ ngan bekerjau ngan ughangtu. 18:4 Idang aghi Sabat Paulus pegi ke ghuma sembayang ngiciak ngan jemau Yahudi ngan jemau Yunani di situ, ngici'i ughangtu supayau percayau ngan Yesus. 18:5 Silas ngan Timutius la sampai jak di Makedunia, kerjau Paulus cuman ngiciakka ceritau jak di Allah ngan jemau Yahudi, mbak bansau Yesus itula Mesias, Rajau Penyelamat itu. 18:6 Anyautu ughangtu melawan ngan nggelakkanyau, mangku Paulus ngepaska debu jak di bajuau, tandau batan endak ngingatka sala ughangtu ngan bekatau, "Amun kapu dighi celakau, itu sala kapu dighi itula. Aku belepas tangan. Mulai mbak kini aku ka pegi ke bangsau lain." 18:7 Mangku diau ninggalka ughangtu pegi ke ghuma Titius Yustus. Jemautu nyemba Allah, ghumahau guak ghuma sembayang tadi. 18:8 Anyautu Kerispus, kepalak ghuma sembayang itu ngan jemau di ghumahau percayau ngan Tuhan Yesus, ngan banyak pulau jemau Kurintus lainau ndengagh kici'an Paulus. Ughangtu percayau mangku dibaptis. 18:9 Adau semalam Paulus adau pengina'an, mangku Tuhan bekatau ngan diau, "Jangan penakut! Kiciakkala maju katau Allah. Jangan mandak, 18:10 karnau Aku ngantini kaba. Nidau bediau sughang kia diau pacak ngerjauka setu diau ja'at ngan kaba. Karnau umatKu di kuta ini banyak." 18:11 Mangku Paulus mendam di Kurintus tenga duau taun. Diau ngajaghka katau Allah ngan ughangtu. 18:12 Mangku Galiu njadi gubernur di Akaya. Masau itu jemau Yahudi sepakat melawan Paulus, mangku dibata'inyau ngadap pengadilan. 18:13 Katau ughangtu, "Jemau ini ngajung jemau nyemba Allah ngan carau diau belawanan ngan ukum Taurat." 18:14 Satu Paulus endak nimbal, Galiu bekatau ngan jemau Yahudi, "Ui, jemau Yahudi, amun diau diaduka ini pelanggaran ngan keja'atan, sepantasau aku ndengagh aduan kapu dighi. 18:15 Anyautu ikak bebala mbalaka katau-katau ngan namau ngan ukum kapu dighi, mangku kapu dighila mesti ngurusau. Aku enggup ngadili pekarau luak itu." 18:16 Udim itu diau melaratka ughangtu. 18:17 Mangku ughangtu nangkap Sustenis, kepalak ghuma sembayang, ngan mbadukinyau di guak pengadilan. Anyautu Galiu nidau nyanaukanyau. 18:18 La udim itu Paulus masia lamau di Kurintus, mangku diau pamit ngan jemau percayau di situ. Diau belayar ke Siria serempak ngan Periskila ngan Akwila. Di Kengkeria Paulus ncukur gumba'au diau la dienangkanyau panjang, karnau niatau ngan Tuhan. 18:19 La sampai di Ipisus, Paulus beceghai ngan Periskila ngan Akwila. Diau masuak ghuma sembayang, peragau ngan jemau Yahudi. 18:20 Ughangtu mintak, supayau diau lamau mendam ngan ughangtu, anyautu diau enggup. 18:21 Diau laka bejalan, diau bekatau, "Amun Allah ngenda'i, aku ka ngulang agi ke sini." La udim ngiciak luak itu, diau belayar ninggalka Ipisus. 18:22 Diau ndaghat di Kaisaria, mangku pegi endak betemu ngan jemau Keristen. La udim itu diau pegi ke Antiukia. 18:23 La lamau jugau di situ, diau pegi agi ngidari gegalau daira Galatia ngan Perigia endak neguaka iman jemau percayau. 18:24 Penarau itu, adau sughang jemau Yahudi datang ke Ipisus. Jemautu asalau jak di Aliksanderia, namaunyau Apulus. Diautu pintar ngiciak ngan keruan gegalau isi Injil. 18:25 Diau la diajagh ajaghan Tuhan Yesus, mangku ngan riang nian diau ngajagh ngan neghagi ngajaghka ceritau Yesus, empuak diau empai ngeruani baptisan Yuhanis ajau. 18:26 Ngan beghani diau mulai ngajagh di ghuma sembayang. Periskila ngan Akwila ndengagh diau. Ughang duautu mbata'inyau ke ghuma, mangku diterangkanyau ngan neghagi ceritau Allah nyelamatka manusiau. 18:27 La udim itu, Apulus endak pegi ke Akaya. Mangku jemau percayau di Ipisus nyurati jemau diau percayau di Akaya, supayau ughangtu nerimau Apulus ngan riang. Apulus la sampai di Akaya, mangku nulung nian jemau percayau karnau keilu'an Allah. 18:28 Karnau ngan kuasau diau ngiciak di mukau jemau banyak, nyalaka jemau Yahudi ngan mbuktika, mbak bansau Yesusla Mesias, Rajau Penyelamat.

Ceritau Rasul-rasul 19

19:1 Penarau Apulus gi adau di Kurintus, Paulus ngidari daira itu, mangku sampai di Ipisus. Di situ diau betemu ngan bebeghapau jemau diau percayau ngan Yesus. 19:2 Diau betanyau ngan ughangtu, "Apu kapu dighi la nerimau Rua Allah, masau kapu dighi percayau ngan Tuhan Yesustu?" Ughangtu nimbal, "Lum, kami nidau kekela ndengaghau, bansau adau Rua Allah." 19:3 "Amun luak itu," Katau Paulus, "Ngan baptisan apau kapu dighi dibaptiska?" Timbal ughangtu, "Ngan baptisan Yuhanis." 19:4 Mangku katau Paulus, "Yuhanis mbaptiska jemau diau endak nyatauka, bansau diau la ngubai peremba'au jak di dusaunyau. Yuhanis pulau ngiciakka ngan jemau banyak, bansau ughangtu mesti percayau ngan Jemau diau ka datang la udim diau, diautu Yesus." 19:5 Satu ndengagh titu, ughangtu mintak dibaptiska atas namau Tuhan Yesus. 19:6 Penarau Paulus nepiakka tanganau di palak ughangtu, ughangtu dikuasaui Rua Allah, mangku mulai ngiciak ngan basau Rua ngiciakka ceritau Allah. 19:7 Gegalau ughangtu kekirau duau belas ughang. 19:8 Selamau tigau bulan Paulus maju pegi ke ghuma sembayang ngajagh jemau di situ ngan beghani. Ngan ajaghannyautu diau ngajung ughangtu percayau ngan kici'annyau ceritau Allah endak merinta. 19:9 Anyautu adau bebeghapau jemau diau enggup ndengagh kici'annyautu ngan enggup percayau, lagi di mukau jemau banyak ughangtu nggelakka kici'annyau ceritau jalan Tuhan. Itula sebapau Paulus ninggalka ughangtu, mangku pegi ke sekul Tiranus serempak ngan jemau diau percayau ngan Yesus. Idang aghi diau peragau ngan jemau di situ. 19:10 Diau ngerjauka titu selamau duau taun, mangku gegalau jemau diau mendam di daira Asia ndengagh katau Allah, empuak jemau Yahudi, empuak jemau bangsau lain. Ughangtu ndengagh katau Allah galau. 19:11 Paulus ngerjauka banyak tandau nyelia karnau Allah. 19:12 Lagi setangan ngan kain diau la dipakai Paulus dibatak jemau, ditepiakka di jemau buidapan, mangku idapannyau ghadu ngan rua sitan ngeluagh jak di ughangtu. 19:13 Adau pulau bebeghapau dukun jemau Yahudi diau pegi ke manau-manau di daira itu. Ughangtu ncubau ngisitka iblis pakai namau Tuhan Yesus. Ughangtu bekatau, "Atas namau Yesus diau dikiciakka Paulus itu aku ngajung kaba keluagh." 19:14 Dukun itu tujua anak Sekiwa. Diautu sughang imam bepangkat tinggi jemau Yahudi. 19:15 Anyautu iblis tadi nimbal ngan ughangtu, kataunyau, "Yesus aku keruan, Paulus aku keruan pulau, anyautu kamuni sapau?" 19:16 Mangku jemau diau diarung iblistu nerengkam ughangtu, dibaduki ngan dikalakanyau. Mangku ughangtu belaghi jak di ghumahau ngan telanjang ngan lukau-lukau. 19:17 Gegalau jemau Yahudi ngan jemau bangsau lain di Ipisus ndengagh ceritau itu. Ughangtu penakut galau, mangku namau Yesus tamba dipuji-puji. 19:18 Banyak jemau diau la percayau ngan Yesus datang ngaku'i di mukau jemau banyak setu diau la dikerjaukaNyau. 19:19 Banyak pulau jak di ughangtu diau ngerjauka kuasau gelap nunggalka buku-buku mangku disilap di mukau jemau banyak. Regau bukutu kekirau limau pulua ribu tanci pirak. 19:20 Ngan carau luak itu katau Tuhan tamba tesiar ngan tamba bekuasau. 19:21 La udim gegalaunyau itu, Paulus merencanauka endak pegi ke Makedunia ngan Akaya mangku ke Yerusalim. Kataunyau, "La udim pegi ke situ, aku mesti pegi pulau ke Rum." 19:22 Mangku diau ngajung duau ughang anak-buahau, Timutius ngan Irastus, dulu pegi ke Makedunia, penarau diautu gi mendam di Asia. 19:23 Kekirau masau itula adau keributan besak karnau ajaghan ceritau Yesus. 19:24 Di situ adau sughang tukang pirak, namaunyau Dimetrius. Diau mbuat cak ghuma diwau Artemis jak di pirak. Kerjaunyautu ngasilka banyak tanci batan endak tukangau. 19:25 Diautu nunggalka anak-buahau ngan tukang pirak lainau, mangku bekatau, "Kamuni keruan, ngan kerjau ini kitau dapat pengidupan. 19:26 Mbak kini kamu la nginak ngan ndengagh galau setu diau dikerjauka Paulus itu. Diau ngiciakka, bansau diwau diau dibuat jemau ukan diwau ngan nidau bediau kuasau. Mangku diau la buasil mbuat banyak jemau percayau ngan ajaghannyautu, ukan cuman di Ipisus, tapitu laka di gegalau Asia pulau. 19:27 Bayaunyau, kerjau kitauni ka digelakka jemau. Ukan itu ajau, ghuma diwau Artemis pulau nidau ka bediau retiau agi. Mangku Artemistu ka kelengitan keagungannyau, awuak diautu disemba ngan dipuji gegalau jemau di Asia ngan gegalau deniau." 19:28 Ndengagh titu, ati ughangtu besak, mangku ughangtu tegauk-gauk, kataunyau, "Idup Artemis, diwau jemau Ipisus!" 19:29 Gegalau kuta itu kacau-balau, mangku ughangtu rami-rami pegi ke balai petemuan. Ughangtu nangkap Gayus ngan Aristarkus, jemau Makedunia, kantin Paulustu, mangku ditaghiak ke balaitu. 19:30 Paulus endak masuak ngikut ughangtu, anyautu jemau percayau di situ nidau ngajung diau. 19:31 Lagi bebeghapau pengulu daira Asia itu diau la sekawan ngan Paulus ngajung jemau ngiciakka ngan Paulus, supayau jangan pegi ke balai itu. 19:32 Penarau itu, jemau diau betunggal di balai tadi tegauk-gauk. Diau sughang ngiciakka luak itu, diau sughang ngiciakka luak ini. Gegalaunyautu kacaubalau. Kebanya'an jak di ughangtu nidau keruan, ngapau ughangtu betunggal. 19:33 Separau jak di ughangtu ngirau Aliksandar njadi kepala'au, karnau diautu diajung jemau Yahudi ke mukau jemau banyak. Mangku Aliksandar ngenjuakka tandau ngan tanganau endak ngiciak mbenaghka diriau di adapan jemau banyak itu. 19:34 Anyautu satu ughangtu nginak, mbak bansau diautu jemau Yahudi, ughangtu serempak tepekiak-pekiak selamau duau jam, kataunyau, "Idup Artemis, diwau jemau Ipisus!" 19:35 Udim-udimau tukang tulis kuta itu pacak nenangka jemau banyak itu, kataunyau, "Ui, jemau Ipisus. Bilang jemau di gegalau deniau keruan, bansau kuta Ipisus inila nyayia ghuma diwau Artemis ngan batuau diau tumban jak di langit. 19:36 Titu nidau pacak dibanta. Karnau itu tenangla, jangan ngerjauka setu ngan nidau sepadau. 19:37 Kamu mbatak ughang ini ke sini, empuak ughangtu nidau merampuk ghuma diwau kitau ngan nidau nggelakka namaunyau. 19:38 Amun Dimetrius ngan anak-buahau adau aduan, apu nidau bediau pengadilan ngan gubernur? Nengkela ughangtu mbatak pekaraunyautu ke pengadilan. 19:39 Amun gi adau agi setu lainau diau kamu kenda'i, titu mesti dikiciakka di sidang jemau banyak diau sah. 19:40 Karnau setu diau tejadi saghini mbayauka kitau. Kitau ka diburuakka ngacauka pemerinta, karnau nidau bediau tapakan diau pacak kitau kiciakka endak mbenaghka kekacauan ini." 19:41 Ngan kici'an luak itu diau ngajung jemau banyaktu baliak.

Ceritau Rasul-rasul 20

20:1 La udim Ipisus tenang agi, Paulus nunggalka jemau percayau ngan neguaka ati ughangtu. Mangku diau pamit endak pegi ke Makedunia. 20:2 Diau berayak ke daira itu. Ngan banyak petua diau neguaka ati jemau percayau di situ. Mangku diau pegi ke Yunani. 20:3 Selamau tigau bulan diau mendam di situ, mangku diau endak belayar ke Siria. Anyautu adau ceritau, bansau jemau Yahudi sepakat endak mbunua diau. Itula sebapau diau mutuska endak pegi wuan Makedunia. 20:4 Diau dikantini Supatar, anak Pirus, jemau Beria, ngan Aristarkus ngan Sekundus, jemau Tesalunika, ngan pulau Gayus, jemau Derbi, ngan Timutius, ngan Tikikus ngan Terupimus, jemau Asia. 20:5 Ughangtu pegi ndului kami, mangku nunggu kami di Teruas. 20:6 La udim aghi rerayau Ruti Nidau Beghagi, kami ninggalka Pilipi belayar ke Teruas. Limau aghi udim itu, kami la sampai di Teruas nunggal agi ngan ughangtu. Kami singga di situ seminggu. 20:7 Malam minggu kami betunggal makan, makan jamuan Tuhan, mangku Paulus beketuba ngan jemau percayau di situ enggut tenga malam, karnau pagiau diau endak bejalan agi. 20:8 Kami betunggal di luan di pucuak. Di situ banyak lampu dimaghakka. 20:9 Adau budak bujang, namaunyau Iutikus. Diautu duduak di awangan. Mangku karnau Paulus lamau nian ngiciak, budak bujangtu tekantuak mangku tekelap, mangku tumban jak di tingkat tigau. Satu diau dikatangka, diau la mati. 20:10 Paulus tughun ke bawa, mangku meluak budak bujangtu, kataunyau, "Jangan ghegak. Diauni gi idup." 20:11 La udim itu diau nayiak agi ke pucuak, diau ngagiaka ruti mangku makan jamuan Tuhan. La udim makan diau ngulang ngiciak, enggut paghak siang, mangku diau bejalan. 20:12 Budak bujang tadi diantat baliak ke ghumahau, ughangtu riang galau. 20:13 Kami ndulu pegi ke kapal endak belayar ke Asus. Di situ kami endak ndepatka Paulus ke kapal. Diau endak luak itu, karnau diau ka ke situ jalan daghat. 20:14 La betemu kami di Asus, diau nayiak kapal, mangku kami belayar ke Metilini. 20:15 Jak di situ kami belayar agi, pagiau kami lalu di bada tipatan Kius. Pagi di aghiau kami ke Samus, mangku pagi di aghiau agi kami sampai di Militus. 20:16 Paulus la mutuska nidau ka singga di Ipisus, supayau jangan lamau di Asia, karnau diau endak cecepat sampai di Yerusalim, amun pacak antak ka aghi rerayau Pentakusta. 20:17 Di Militus Paulus ngajung jemau pegi ke Ipisus mintak pengulu jemau Keristen datang ke Militus. 20:18 Ughangtu la sampai, mangku Paulus bekatau, "Kapu dighi keruan, luak manau carau idupku selamau ini di guak kapu dighi, jak di petamau aku sampai di Asia. 20:19 Ngan ngensian aku bekerjau batan endak Tuhan. Aku banyak ngeluaghka ayiak-matau ngan banyak meghasauka penanggungan jak di jemau Yahudi diau endak mbunua aku. 20:20 Aku nidau mandak ngiciakka setu diau begunau ngan kapu dighi. Gegalaunyautu kukiciakka ngan ajaghka, empuak di mukau jemau banyak empuak di ghuma kapu dighi. 20:21 Empuak jemau Yahudi empuak jemau Yunani aku maju ngingatka nian, supayau ughangtu ngubai peremba'au, datang ngan Allah ngan percayau ngan Tuhan kitau Yesus Keristus. 20:22 Mbak kini aku pegi ke Yerusalim, karnau endak na'ati Rua Allah. Aku nidau keruan, tuapau diau ka tejadi ngan akuni di situ. 20:23 Aku cuman keruan, setu diau dinyatauka Rua Allah di bilang kuta, bansau aku ka masuak jil ngan sengsarau. 20:24 Anyautu aku nidau nyanauka idupkuni, asal aku pacak ngudimi kerjauku diau la ditugaska Tuhan Yesus ngan aku ngan setia enggut mati, ngiciakka ceritau keilu'an Allahtu. 20:25 Aku la nandangi kapu dighi galau ngan la ngiciakka pulau ceritau Allah merinta njadi Rajau. Mbak kini keruanila, kapu dighi nidau ka betemu agi ngan aku. 20:26 Itula sebapau kukatauka ngan kapu dighi mbak kini, amun adau jak di kapu dighi diau benasau, itu ukan salaku agi. 20:27 Karnau nidau kekela aku malas ngerjauka kerjauku ngiciakka ngan kapu dighi gegalau rencanau Allah. 20:28 Jagauila diri kapu dighi ngan jagauila pulau gegalau jemau Keristen diau la dipercayauka Rua Allah ngan kapu dighi, supayau dijagaui, karnau kapu dighi la dijadika tukang sayia jemau Keristen. Allahtu diau njadika ughangtu hak Allah, karnau Ana'Autu la mati batan endak ughangtu. 20:29 Aku keruan, amun aku la pegi, setuau diau ganas ka datang guak kapu dighi, mangku jemau diau kapu dighi jagauitu ka njadi makanan setuautu. 20:30 Lagi jak di kapu dighini pulau ka adau jemau diau ka ngiciakka ceritau diau nidau benagh. Ughangtu ngerjauka titu, mangku jemau diau la percayau ngan Yesus ka sesat ngan ngikut ughangtu. 20:31 Karnau itu, sepepadaula! Ingatkala, mbak bansau aku ngajagh kapu dighi siang malam selamau tigau taun ngan banyak ayiak matau. 20:32 Mangku mbak kini aku nyeraka kapu dighi ngan Allah, supayau Diau njagaui kapu dighi ngan kapu dighi na'ati ceritau keilu'an Allah. Allahtu bekuasau nguatka kapu dighi ngan ngenjuakka setu diau iluak diau la disediauka batan endak gegalau umatAu. 20:33 Nidau kekela aku endak pirak ngan emas ngan baju jak di jemau. 20:34 Kapu dighini keruan, mbak bansau aku rajin bekerjau ngan tangankunila batan endak pengidupanku ngan kantin-kantinku diau ngikut aku. 20:35 Ngan gegalaunyautu aku la ngenjuakka penauan ngan kapu dighi, bansau ngan kerjau luak itula kitau mesti nulung jemau diau nidau kuat. Kitau mesti ngingatka katau Tuhan Yesus diau dikiciakkaNyautu, 'Iluakla ngenjuak sangkan nerimau!' " 20:36 La udim ngiciak luak itu, Paulus ngan gegalau jemau itu nunduak mangku bedu'a. 20:37 Ughangtu nangis sesedanan galau, mangku sampai besalaman ngan Paulus, ngiciakka, "Bejalanla!" 20:38 Ughangtu kemada'an nian, karnau diau ngiciak, ughangtu nidau ka betemu ngan diau agi. Mangku ughangtu ngantat diau ke kapal.

Ceritau Rasul-rasul 21

21:1 La udim pamit, kami beceghai ngan ughangtu, mangku belayar ke pulau Kus. Pagiau kami sampai di Rudus, mangku jak di situ kami belayar ke Patara. 21:2 Di Patara kami dapat kapal diau endak ke Pinisia. Kami nayiak kapal itu mangku belayar. 21:3 Mangku kina'an Siprus di sebela kidau. Kami maju belayar nuju ke Siria, mangku kami ndaghat di Tirus, karnau isi kapaltu endak dibungkar di kuta itu. 21:4 Di situ kami tandang ngan jemau diau percayau ngan Yesus, mangku singga ngan ughangtu seminggu. Ngan petunjuak Rua Allah ughangtu ngici'i Paulus, supayau jangan pegi ke Yerusalim. 21:5 Anyautu la abis masaunyau, kami pegi jak di situ melajuka pejalanan kami. Gegalau ughangtu ngan anak-biniau ngantat kami inggan luagh kuta. Di tepi pantai di situ kami nunduak galau ngan bedu'a. 21:6 La udim itu, kami salaman mangku nayiak kapal. Ughangtu baliak ke ghumahau. 21:7 Kami maju belayar jak di Tirus ke Petulemais. Di situ kami tandang ngan jemau percayau, mangku kami seghundak ngan ughangtu semalam. 21:8 Pagi di aghiau kami pegi mangku sampai di Kaisaria. Di situ kami pegi ke ghuma Pilipus, penginjiltu, mangku mendam di ghumahau. Diautu sala sughang jak di tujua ughang diau dipilia di Yerusalim senitu. 21:9 Pilipustu adau empat ughang anak gadisau diau pacak ngiciak luak nabi. 21:10 La bebeghapau aghi kami di situ, adau sughang nabi datang jak di Yudia, namaunyau Agabus. 21:11 Diau datang njenguak kami, ngambiak bebat Paulus, mangku ngebat keting ngan tanganau sendighi ngan bekatau, "Luak inila diau dikiciakka Rua Allah, 'Jemau diau ngempu bebat ini ka dikebat jemau Yahudi luak ini di Yerusalim, mangku diseraka ngan jemau bangsau lain.' " 21:12 Ndengagh titu kami ngan jemau percayau di situ mintak nian, supayau Paulus jangan pegi ke Yerusalim. 21:13 Anyautu Paulus nimbal, "Ngapau kapu dighi nangis galau? Ngan carau luak itu kapu dighi mbuat aku madak ajau. Karnau aku sukau ukan ajau endak dikebat, tapitu pulau endak mati di Yerusalim karnau namau Tuhan Yesus." 21:14 Paulus enggup ndengaghka kami, mangku kami mandak negahinyau. Katau kami, "Nengkela kendak Tuhan ajaula diau tejadi." 21:15 La bebeghapau aghi kami singga di Kaisaria, kami bedandan mangku pegi ke Yerusalim. 21:16 Adau bebeghapau jemau percayau jak di situ pegi pulau serempak ngan kami. Ughangtu ngantat kami ke ghuma Manasun. Diautu jemau Siprus ngan la lamau jugau percayau. Kami ka numpang di ghumahau. 21:17 Satu kami sampai di Yerusalim, kami diterimau jemau percayau ngan riang. 21:18 Pagi di aghiau kami pegi serempak ngan Paulus nandangi Yakubus. Gegalau pengulu jemau Keristen adau pulau di situ. 21:19 Paulus ngiciakka pesan jak di jemau Keristen lain, mangku nceritauka ngan neghagi nian gegalaunyau diau dikerjauka Allah di guak jemau bangsau lain karnau kerjau Paulus. 21:20 Ndengagh ceritau Paulustu ughangtu ngagungka Allah galau. Mangku ughangtu bekatau ngan Paulus, "Paulus, kaba la keruan, mbak bansau beribu-ribu jemau Yahudi la percayau. Ughangtu maju na'ati ukum Taurat. 21:21 Ughangtu la ndengagh ceritau kaba, bansau kaba ngajagh gegalau jemau Yahudi diau di guak bangsau lain, supayau jangan na'ati ukum Musatu, karnau kaba ngiciakka, supayau ughangtu nidau nyunatka ana'au ngan nidau nuruti adat lembagau kitau. 21:22 Jemau Yahudi diau percayau cengki ka ndengagh, bansau kaba la adau di sini. Mbak kini luak manau? 21:23 Iluakla kaba nuruti katau kamini: Adau empat ughang di sini diau la beniat ngan Tuhan. 21:24 Bata'ila ughangtu ngan kerjaukala pembasuan nyucika diri serempak ngan ughangtu, mangku bayighila bayighan ughangtu, supayau gumba'au pacak dicukur. Mangku gegalau jemau ka keruan, bansau gegalaunyau diau ughangtu dengagh ceritau kaba nidau benagh nian, karnau kabatu pulau nuruti ukum Taurat. 21:25 Ceritau jemau bangsau lain diau percayau ngan Tuhan, kami la ngighimka surat ngan ughangtu ceritau pendapat kami, mbak bansau ughangtu jangan makan makanan diau la disiwauka, jangan makan dagha ngan daging benatang diau mati ditekiak ngan jangan menaugawia." 21:26 Pagiautu Paulus pegi ngadauka pembasuan diri serempak ngan empat ughangtu. Udim itu ughangtu pegi masuak Ghuma Allah endak ngiciakka, kebilau pembasuantu ka udim, mangku kerban batan endak bilang ughangtu ka dikerbanka. 21:27 Jangkau tujua aghi itu laka udim, jemau Yahudi jak di Asia nginak Paulus dalam Ghuma Allah, mangku ughangtu ngasung jemau banyak, udim itu ditangkap 21:28 sampai tegauk, kataunyau, "Ui, jemau Israil, mela tetulungan! Inila jemaunyau diau ngajagh di manau-manau, ngajaghka gegalau jemau melawan bangsau kitau, melawan ukum Taurat ngan Ghuma Allah ini. Mbak kini diau mbata'i pulau jemau Yunani masuak dalam Ghuma Allah, mangku ngumuhi bada diau suci ini." 21:29 Ughangtu ngiciak luak itu, karnau la nginak Terupimus jak di Ipisus ngan Paulus di kuta, mangku ughangtu sangkau, Paulus la mbatak diau masuak Ghuma Allah. 21:30 Gegalau kuta njadi kacau-balau. Jemau banyak datang rami-rami begumbul, mangku ughangtu nangkap Paulus, ditaghi'au keluagh jak di Ghuma Allah. Masau itu pulau mukau lawang Ghuma Allah dikatupka galau. 21:31 Penarau ughangtu endak mbunua diau, la dikiciakka ngan kumandan tentera Rum, bansau gegalau kuta dang kacau-balau. 21:32 Kumandantu cecepat mbatak tenterahau pegi ke guak jemau banyak tadi. Satu jemau banyaktu nginak kumandan ngan tenterahautu, ughangtu mandak mbaduki Paulus. 21:33 Kumandantu pegi guak Paulus nangkap diau, mangku ngajung anak-buahau ngebat diau ngan duau rantai ngan betanyau, "Sapau jemau ini? Tuapau la dikerjaukanyau?" 21:34 Separau jak di jemau banyaktu tegauk luak ini, separau luak itu. Ughangtu ganau, mangku kumandantu nidau pacak ngeruani, tuapau sebenaghau diau la tejadi. Mangku diau ngajung Paulus dibatak ke binting. 21:35 La sampai di tanggau, jemau banyaktu mara kematila, mangku Paulus tepasau diinjungka tentera. 21:36 Jemau banyaktu ngikut sampai tegauk, "Bunuala diau!" 21:37 La endak masuak dalam binting, Paulus bekiciak ngan kumandan tadi, "Bulia aku ngiciak jerang ngan dighi?" Katau kumandantu, "Kaba pacak basau Yunani? 21:38 Amun luak itu, kaba ukan jemau Mesir diau empaini ngadauka kekacauan, mangku belaghi mbatak empat ribu ughang pengacau bepakaian ke padang bungin?" 21:39 Paulus nimbal, "Akuni jemau Yahudi, asalku jak di Tarsus, kuta diau pentingtu di Kilikia. Ajungla aku ngiciak ngan jemau banyak ini." 21:40 La udim diajung ngiciak, Paulus betegak di tanggau, mangku ngenjuakka tandau endak ngiciak. Jemau banyaktu la diam, diau mulai ngiciak pakai basau Ibrani, kataunyau,

Ceritau Rasul-rasul 22

22:1 "Gegalau adiak-sanak, dengaghkala kataukuni. Aku endak mbenaghka diriku." 22:2 Satu jemau banyaktu ndengagh Paulus ngiciak pakai basau Ibrani, ughangtu tamba diam. Paulus bekatau, 22:3 "Akuni jemau Yahudi, lahir di Tarsus di perupinsi Kilikia, mangku aku besak di Yerusalim ini. Aku diajagh guru Gamali'il ngan neghagi belajagh ukum Taurat niniak puyang kitau, mangku aku galak kerjau batan endak Allah semegi ngan kapu dighi mbak kini. 22:4 Aku nganiayau jemau diau ngikut ajaghan empai enggut mati. Tinau lanang kutangkap dimasuakka dalam jil. 22:5 Imam Besak ngan gegalau pengulu kitau pacak nceritauka, bansau aku nidau mbu'ung. Ughang itula la ngenjuakka surat kuasau ngan aku batan endak nangkap jemau diau ngikut ajaghan empaitu diau adau di Damsik. Mangku aku pegi ke situ endak nangkap jemau diau ngikut ajaghan empaitu diau adau di situ, mangku mbata'i ughangtu ke Yerusalim endak diukum." 22:6 "Aku dang bejalan, laka sampai di Damsik, kekirau tengaghi, adau cayau diau terang nianan besinagh jak di langit di sekitar aku. 22:7 Aku rubua ke tana, mangku aku ndengagh suarau ngiciak ngan aku, 'Ui, Saulus, ngapau kaba nganiayau Aku?' 22:8 Aku betanyau, 'Sapau Dighi, Tuhan?' Kataunyau, 'Akuni Yesus, jemau Nasarittu, diau kaba aniayau.' 22:9 Kantin-kantinku nginak cayautu pulau, anyautu nidau ndengagh suarau diau ngiciak ngan aku. 22:10 Mangku aku betanyau agi, 'Tuapau mesti kukerjauka, Tuhan?' Katau Tuhan, 'Betegakla ngan pegila ke Damsik. Di situ nanti ka dikiciakka ngan kaba gegalaunyau diau Allah ajungka ngan kaba.' 22:11 Mangku aku njadi butau, karnau cayau diau nyilauka itu. Mangku kantin-kantinku mapa aku masuak Damsik. 22:12 Di situ adau sughang benamau Ananias. Diautu alim, ta'at ngan ukum Taurat, lagi diregaui jemau Yahudi di Damsik. 22:13 Diau datang njenguak aku, betegak guak aku ngan bekatau, 'Ui, Saulus, nginakla agi kaba.' Masau itu pulau aku ncega, mangku matauku nginak agi. 22:14 Mangku kataunyau agi, 'Allah niniak puyang kitau la netapka kaba, supayau kaba ngeruani kenda'Au ngan nginak Jemau diau suci diau ngerjauka kendak Allah ngan ndengagh suarauNyau, 22:15 karnau kaba mesti ngiciakka ngan gegalau jemau setu diau la kaba kinak ngan kaba dengagh. 22:16 Mbak kini jangan agi kaba asau-asau. Mintakla dibaptis. Ngiciakla ngan Tuhan, mintak supayau dusau kaba diabiska.' " 22:17 "Aku ngulang ke Yerusalim, mangku aku dang bedu'a di Ghuma Allah, aku dikuasaui Rua Allah. 22:18 Aku nginak Tuhan diau bekatau ngan aku, 'Pegila, tinggalkala cecepat Yerusalim, karnau jemau di sini nidau ka nerimau kici'an kaba ceritau Aku.' 22:19 Aku bekatau, 'Tuhan, ughangtu keruan nian, bansau akuni pegi ke ghuma-ghuma sembayang endak nangkap jemau diau percayau ngan Dighi, mangku dimasuakka dalam jil ngan dibaduki. 22:20 Mangku satu Setipanus diau ngiciakka ceritau Dighi dibunua, aku pulau adau di situ nyetujui pembunuan itu, lagi akuni nunggui pekakas jemau diau ngerjaukanyautu.' 22:21 Anyautu Tuhan bekatau agi, 'Pegila, Aku ka ngajung kaba ke bada diau jawua jak di sini njenguak jemau bangsau lain.' " 22:22 Jemau banyaktu maju ndengaghka Paulus ngiciak, anyautu satu ndengagh katau itu, ughangtu tegauk-gauk, kataunyau, "Bunuala diau! Diauni nidau pantas idup!" 22:23 Ughangtu maju tegauk-gauk, sampai ngepaska baju ngan ngamburka debu. 22:24 Karnau itu kumandan ngajung Paulus dibatak ke binting, supayau diperisau ngan dibaduki endak ngeruani, tuapau sebapau jemau banyaktu tegauk luak itu melawan diau. 22:25 Anyautu la udim Paulus dikebat endak dibaduki, diau bekiciak ngan tentera diau betugastu, "Apu bulia mbaduki sughang diau behak di nenggeri Rum, apau agi amun lum diadili?" 22:26 Ndengagh itu, tentera tadi pegi njenguak kumandan ngan bekatau, "Tuapau diau dighi kerjauka? Jemau itu behak di nenggeri Rum." 22:27 Mangku kumandan pegi guak Paulus, kataunyau, "Kiciakkala, apu kaba ngenian jemau behak di nenggeri Rum?" Timbal Paulus, "Awu, nyela." 22:28 Katau kumandantu, "Aku njadi jemau behak di nenggeri Rum, karnau kubeli ngan regau besak." Katau Paulus, "Akuni behak di nenggeri Rum, karnau bak kami la behak di nenggeri Rum." 22:29 Mangku tentera diau endak mbaduki Paulustu cecepat mundur. Kumandantu penakut pulau, karnau diau la ngajung ngebat Paulus, awuak diautu behak di nenggeri Rum. 22:30 Kumandan itu endak nian ngeruani, tuapau sebapau jemau Yahudi nyalaka Paulus. Karnau itu pagi di aghiau diau ngajung imam-imam bepangkat tinggi ngan gegalau pengadilan agamau, supayau betunggal, mangku Paulus dikeluaghka jak di jil, dibatak jak di binting ngadap ughangtu.

Ceritau Rasul-rasul 23

23:1 Paulus ngina'i angguta pengadilan, mangku bekatau, "Ui, kapu dighi. Enggut mbak kini aku nidau meghasau besala dalam atiku di adapan Allah." 23:2 Imam Besak Ananias ngajung jemau diau guak Paulus nampagh mulut Paulus. 23:3 Mangku Paulus bekatau ngan diau, "Allah ka nampagh dighi, ui dinding diau dikapur putia-putia. Dighitu duduak di sini endak ngadili aku nurut ukum Taurat, awuak dighi melanggar ukum Taurattu ngan carau ngajung jemau nampagh aku." 23:4 Jemau diau di guak Paulus bekatau, "Kaba nggelakka Imam Besak Allah." 23:5 Paulus nimbal, "Aku nidau keruan, bansau diautu Imam Besak. Nyela, adau ditulis di Injil, 'Jangan ja'at ngan pengulu bangsau kamu.' " 23:6 Paulus keruan, mbak bansau separau jak di angguta pengadilan agamautu jemau Saduki ngan separau agi jemau Parisi, mangku diau bekatau ngan ughangtu, "Akuni jemau Parisi, bak kami jemau Parisi pulau. Aku diadapka di pengadilan ini, karnau aku percayau, bansau jemau diau la mati ka idup agi." 23:7 Satu diau ngiciak luak itu, jemau Parisi ngan jemau Saduki mulai bebala, mangku sidangtu peca njadi duau. 23:8 Jemau Saduki bependapat, bansau jemau mati nidau ka idup agi, malaikat ngan rua nidau bediau. Anyautu jemau Parisi percayau gegalaunyautu. 23:9 Mangku ughangtu mulai ganau. Bebeghapau guru ukum Taurat jak di rumbungan Parisi betegak ngan melawan nian, kataunyau, "Pendapat kami, dikit kia jemau ini nidau besala. Asauku adau nian rua malaikat ngiciak ngan diau." 23:10 Keributan itu tamba ganau, mangku kumandantu takut, kalu Paulus dibunua. Karnau itu, diau ngajung tentera tughun ke bawa ngambiak Paulus jak di guak ughangtu, dibata'inyau ke binting. 23:11 Malamautu Tuhan betegak guak Paulus ngan bekatau, "Teguakala ati kaba, karnau luak kaba la ngiciakka ceritau Aku di Yerusalim ngan beghani, luak itu pulau kaba mesti ngiciakkanyau nanti di Rum." 23:12 Akap pagiautu jemau Yahudi sepakat. Ughangtu besumpa nidau ka makan ngan minum, amun lum mbunua Paulus. 23:13 Ughang diau sepakattu adau empat pulua lebia. 23:14 Ughangtu pegi njenguak imam-imam bepangkat tinggi ngan tuau-tuau Yahudi ngan bekatau, "Kami la besumpa nidau ka makan ngan minum, amun lum mbunua Paulus. 23:15 Karnau itu mbak kini kapu dighi ngan angguta pengadilan agamau ngighim surat ngan kumandan mintak, supayau Paulus dibatak ngadap kapu dighi agi, luak kapu dighi endak merisau pekaraunyau agi ngan neghagi. Penarau itu kami ka siap endak mbunua diau, antak ka sampai di guak kapu dighitu." 23:16 Anyautu anak kelawai Paulus ndengagh ceritau itu, mangku diau pegi ke binting ngiciakkanyau ngan Paulus. 23:17 Mangku Paulus mantau sughang tentera ngan bekatau, "Batakla budak bujang ini njenguak kumandan, karnau adau setu diau endak dikiciakkanyau ngan diau." 23:18 Tenteratu mbatak budak bujangtu njenguak kumandan ngan bekatau, "Paulus diau dita'antu mantau aku mintak, supayau budak bujangni njenguak dighi, karnau adau setu diau endak dikiciakka." 23:19 Kumandantu ngecakka tangan budak bujangtu, dibata'inyau ke peridingan ngan betanyau, "Tuapau diau endak kaba kiciakka ngan aku?" 23:20 Katau budak bujangtu, "Jemau Yahudi la sepakat endak mintak ngan dighi, supayau pagi Paulus dibata'i agi ngadap pengadilan agamau. Ughangtu luak endak merisau agi pekaraunyau ngan neghagi nian. 23:21 Anyautu jangan dighi nuruti pinta'an ughangtu, karnau lebia jak di empat pulua ughang ka nyemuni ngadang diau di jalan. Ughangtu la besumpa nidau ka makan ngan minum, amun lum mbunua Paulus. Mbak kini ughangtu la siap, tigha nunggu keputusan dighi." 23:22 Mangku kumandantu bekatau, "Jangan kiciakka ngan sughang kiala, bansau kaba la ngiciakka ceritau ini ngan aku." Mangku diau ngajung budak bujang tadi baliak. 23:23 La udim itu kumandan itu mantau duau pengulu tentera ngan bekatau, "Cadangkala duau ratus tentera endak pegi ke Kaisaria ngan pulau tujua pulua tentera nayiak kudau ngan duau ratus tentera pakai kujur. Ughangtu mesti bejalan jam sembilan malam kelau. 23:24 Sediaukala pulau kudau batan endak Paulus, mangku batakla diau ke gubernur Pelikes ngan selamat." 23:25 Mangku diau nulis surat. Isiau luak ini, 23:26 "Salam jak di aku, Kelaudius Lisias, batan endak gubernur Pelikes diau kami regaui. 23:27 Jemau ini ditangkap jemau Yahudi endak dibunua. Mangku aku datang ngan tentera ngalangi ughangtu ngan nyelamatka diau, karnau aku ndengagh, bansau diautu jemau behak di nenggeri Rum. 23:28 Aku endak ngeruani, tuapau sebenaghau salahau diau ughangtu buruakka ngan diau, mangku aku mbata'inyau ngadap pengadilan agamau ughangtu. 23:29 Tenyatau diau nidau ngerjauka tuapau-apau diau pantas diukum ukuman mati ngan dijilka. Buru'an ughangtu ngan diau cuman besangkutan ngan ukum Taurat ughangtu. 23:30 Adau diau ngiciakka ngan aku, bansau adau rencanau ja'at endak mbunua diau. Itula sebapau aku cecepat ngajung diau dibatak njenguak dighi, mangku aku ngajung jemau diau mburuakkanyau ngiciakka pekarau itu ngan dighi." 23:31 Mangku tentera itu ngambiak Paulus luak la diajung ngan ughangtu, dibata'inyau malam itu ke Antipatris. 23:32 Pagi di aghiau tentera diau nayiak kudau ngan Paulus melajuka pejalanannyau, mangku tentera lain baliak ke binting. 23:33 La sampai di Kaisaria tentera diau nayiak kudau ngenjuakka surat tadi ngan gubernur, mangku Paulus diseraka ngan diau. 23:34 Gubernurtu mbacau surattu, mangku diau betanyau ngan Paulus, jak di manau asalau. Satu diau keruan, bansau diau asalau jak di Kilikia, 23:35 diau bekatau, "Aku ka merisau pekarau kaba, amun jemau diau ngaduka kaba la sampai di sini." Mangku diau ngajung Paulus dita'an di istana Herudis.

Ceritau Rasul-rasul 24

24:1 La udim empat malam Imam Besak Ananias ngan tuau-tuau jemau Yahudi pegi ke Kaisaria serempak ngan sughang diau keruan ukum, namaunyau Tertulus. Ughangtu ngadap gubernurtu ngiciakka aduan ngaduka Paulus. 24:2 Paulus diadapka, mangku Tertulus mulai ngiciakka pengaduan, kataunyau, "Gubernur Pelikes diau kami regaui. Dighi ngatur nenggeri kami ngan iluak. Karnau itu nenggeri kami maju meghasauka tenteram, mangku ngan pengertian dighi banyak peghubahan diau iluak di bangsau kami. 24:3 Karnau gegalaunyautu kami riang nian ngan gegalau jemau maju beterimau-kasia ngan dighi. 24:4 Mangku supayau nidau lamau, aku mintak dighi ndengaghka kami ngan ngaligh jerang ajau. 24:5 La nyatau ngan kami, bansau jemau ini mbayauka. Diautu ngacauka jemau Yahudi di manau-manau di gegalau deniau. Diau pulau pengulu partai Nasarit. 24:6 Lagi diau ncubau ngumuhi Ghuma Allah. Itula sebapau kami nangkap diau rencanau endak diadili nurut ukum Taurat kami. 24:7 Anyautu Kumandan Lisias merebuti kami ngambiak Paulus jak di kami, 24:8 mangku ngajung tukang ngadu ngadap dighi. Amun dighi merisau jemau ini, dighi ka ngeruani gegalaunyau diau kami aduka ini." 24:9 Jemau Yahudi diau adau di situ pulau ngikut ngaduka Paulus ngan mbenaghka gegalaunyau diau dikiciakka Tertulus tadi. 24:10 Mangku gubernur ngenjuakka tandau ngan Paulus, bansau diau bulia ngiciak. Mangku Paulus bekatau, "Aku keruan dighi la betaun-taun njadi akim di nenggeri ini. Karnau itu aku beghani mbenaghka aku di adapan dighi. 24:11 Amun dighi merisau, dighi ka keruan, mbak bansau lum lebia jak di duau belas aghi aku pegi ke Yerusalim endak sembayang di situ. 24:12 Mangku nidau kekela jemau Yahuditu nginak aku bebala ngan sughang kia ngan ngacauka, empuak di Ghuma Allah empuak di ghuma sembayang, empuak di manau kila di kuta. 24:13 Ughang ini nidau pulau pacak mbuktika buru'an diau dikiciakka ngan dighi mburuakka aku. 24:14 Nyela, aku ngakuak ngan dighi, mbak bansau aku nyemba Allah niniak puyang kami nurut ajaghan empai diau dikiciakka ughang ini sala. Anyautu aku masia percayau gegalaunyau diau ditulis dalam ukum Taurat ngan kitab nabi-nabi. 24:15 Luak ughangtu pulau aku ngaghapka Allah, bansau gegalau jemau ka idup jak di mati, empuak jemau iluak empuak jemau ja'at. 24:16 Karnau itu aku beusaha, supayau aku maju idup ngan ati beresia di adapan Allah ngan manusiau. 24:17 Aku la lamau nidau di Yerusalim, la bebeghapau taun, mangku aku ngulang agi mbatak enju'an tanci batan endak bangsauku ngan endak bekerban batan endak Allah. 24:18 Penarau aku dang ngerjauka titu, ughangtu nginak aku di Ghuma Allah, masau aku empai udim mberesiaka diriku. Jemau banyak nidau bediau ngan nidau bediau kekacauan. 24:19 Cuman adau bebeghapau jemau Yahudi di situ jak di Asia. Ughang itula semestiau ngadap di sini endak ngiciakka pengaduan ngan dighi, amun ughangtu adau nian setu diau endak diaduka ngan aku. 24:20 Nengkela ughang ini diau adau di sini mbak kini ngiciakka kejeditanku diau ughangtu keruani di aku, masau aku diperisau di pengadilan agamau. 24:21 Di pugan ughangtu aku cuman ngiciak luak ini, 'Aku diadili mbak kini, karnau aku percayau, bansau jemau mati ka idup agi.' " 24:22 Mangku Pelikes diau la banyak keruan ceritau ajaghan empai itu gheghaduka sidang itu, kataunyau, "Nanti amun kumandan Lisias datang ke sini, aku ka mutuska pekarau ini." 24:23 Mangku diau ngajung Paulus maju dikawalka, anyautu diau nidau dikebat ngan kantin-kantinau bulia tandang pulau ngan ngenjuakka tuapau kila diau enda'au. 24:24 La udim bebeghapau aghi Pelikes ngan biniau Derusila diau jemau Yahudi ngajung njenguak Paulus, mangku ndengagh diau ngiciak ngiciakka ceritau percayau ngan Yesus Keristus. 24:25 Anyautu Paulus ngiciakka carau jemau dibenaghka Allah ngan carau nguasaui diri ngan ukuman aghi kiamat. Pelikes penakut mangku bekatau, "Jadila kudai, mbak kini pegila. Aku ka ngajung njenguak kaba agi, amun adau luangan." 24:26 Penarau itu diau ngaghapka ka dapat tanci jak di Paulus. Itula sebapau diau rajin ngajung jemau njenguak Paulus endak ngiciak ngan diau. 24:27 La udim duau taun Pelikes digenti, mangku Perkius Pestus njadi gubernur. Pelikes endak meriangka jemau Yahudi, mangku diau ngenangka Paulus tekawal.

Ceritau Rasul-rasul 25

25:1 La tigau malam Pestus sampai di situ, diau pegi jak di Kaisaria ke Yerusalim. 25:2 Di situ imam-imam bepangkat tinggi ngan pengulupengulu jemau Yahudi datang ngadap diau mburuakka Paulus. Ughangtu mintak tulung nian, 25:3 supayau diau iluak ngan ughangtu, mangku ngajung Paulus dibata'i ke Yerusalim, karnau ughangtu la sepakat endak mbunua diau di tenga jalan. 25:4 Pestus nimbal, "Paulus dang dikawalka di Kaisaria. Akuni pulau nidau lamau agi ka ngulang ke situ. 25:5 Jadi, pengulu-pengulu pacak ngikut ke situ serempak ngan aku, mangku ngadukanyau, amun ngenian diau besala." 25:6 Kekirau delapan apu sepulua aghi agi Pestus adau di Yerusalim. La udim itu diau ngulang ke Kaisaria. Pagi di aghiau diau ngadauka sidang pengadilan ngan ngajung Paulus diadapka. 25:7 Paulus la sampai, jemau Yahudi diau la datang jak di Yerusalim betegak ngelilingi diau ngan mulai ngiciakka banyak buru'an diau ja'at. Anyautu ughangtu nidau pacak mbuktika buru'annyautu. 25:8 Mangku Paulus mbenaghka diriau, kataunyau, "Aku dikit kia endiak besala, empuak ngan ukum Taurat jemau Yahudi, empuak ngan Ghuma Allah, empuak ngan Kaisar." 25:9 Anyautu Pestus endak melemakka ati jemau Yahudi, mangku diau bekatau, "Kaba endak pegi ke Yerusalim, mangku diadili di situ di adapanku karnau buru'an itu?" 25:10 Paulus nimbal, "Mbak kini aku betegak di sini ngadap pengadilan Kaisar. Di bada inila aku mesti diadili. Dighitu keruan pulau aku dikit kia endiak besala ngan jemau Yahudi. 25:11 Amun aku sala nian ngan ngerjauka setu diau ja'at diau pantas diukum ngan ukuman mati, aku sukau mati. Anyautu amun buru'an ughangtu nidau benagh, nidau sughang kia pacak nyeraka aku ngan ughangtu endak meriangka ughangtu. Aku mintak diadili ngan Kaisar!" 25:12 Pestus buijau ngan jemau diau ngenjuakka petua ngan diau. La udim itu diau bekatau, "Kaba la mintak diadili ngan Kaisar, kaba mesti pegi ngadap Kaisar." 25:13 Nidau lamau udim itu rajau Agripa ngan Berniki datang ke Kaisaria endak ngiciakka salam ngan Pestus. 25:14 La bebeghapau aghi ughang duautu adau di situ, Pestus ngiciakka pekarau Paulus ngan rajau, kataunyau, "Di sini adau sughang kawalan diau ditinggalka Pelikes. 25:15 Masau aku adau di Yerusalim, imam-imam bepangkat tinggi ngan pengulu-pengulu jemau Yahudi ngiciakka buru'an ughangtu mburuakka jemau itu ngan mintak, supayau diau diukum. 25:16 Katauku ngan ughangtu, 'Nidau biasau jemau Rum nyeraka sughang diau diburuakka luak itu ajau, amun diau lum diadapka ngan jemau mburuakka ngan lum pacak mbenaghka diriau.' 25:17 Itula sebapau ughangtu ngikut ke sini serempak ngan aku, mangku pagi di aghiau aku ngadauka sidang pengadilan ngan ngajung jemau itu dibatak ngadap. 25:18 Satu jemau diau mburuakkanyau betegak ngiciakka buru'annyautu, ughangtu nidau ngiciakka setu diau ja'at, luak aku kirau ka dikiciakka. 25:19 Ughangtu cuman bebala mbalaka ceritau agamau ngan ceritau sughang jemau diau benamau Yesus diau la mati. Anyautu Paulus ngiciakka, bansau Diau idup nian. 25:20 Aku bingung, luak manau aku mesti merisau pekarau luak itu, mangku aku betanyau, apu diau sukau pegi ke Yerusalim ngan diadili di situ. 25:21 Anyautu Paulus mintak diadili ngan Kaisar. Diau mintak maju tekawal sampai nunggu, enggut pekaraunyau diputuska ngan Kaisar. Itula sebapau aku ngajung diau tekawal, enggut pacak kukighimka ke Kaisar." 25:22 Katau Agripa ngan Pestus, "Aku endak ndengagh jemau itu." Katau Pestus, "Pagi dighi ka ndengaghka diau." 25:23 Pagi di aghiau Agripa ngan Berniki datang ngan gegalau kekayauannyau ngan diregaui nian. Ughang duautu masuak bada pengadilan, ngan kumandan ngan pengulupengulu kuta masuak pulau. La udim itu Pestus ngajung, supayau Paulus diadapka. 25:24 Pestus bekatau, "Rajau Agripa ngan gegalau kapu dighi diau adau di sini. Kina'ila jemau ini. Diautu diburuakka gegalau jemau Yahudi, empuak diau adau di Yerusalim, empuak diau adau di sini. Ughangtu la njenguak aku ngan ngiciakka tegauk-gauk, bansau jemautu nidau bulia idup lamau agi. 25:25 Anyautu akuni nidau nemuka setu diau dikerjaukanyau diau pantas diukum mati. Mangku karnau diautu la mintak diadili ngan Kaisar, aku mutuska endak ngighimkanyau ngadap Kaisar. 25:26 Anyautu lum bediau setu diau mesti kutulis ngan Kaisar ceritau diau. Itula sebapau aku ngadapka diau ngan gegalau kapu dighi, petamau ngan dighi, rajau Agripa, supayau la udim diau diperisau, adau setu diau pacak kutulis. 25:27 Karnau pendapatku nidau pantas ngighimka sughang kawalan ngan nidau nyatauka buru'an diau diaduka ngan diau."

Ceritau Rasul-rasul 26

26:1 Agripa bekatau ngan Paulus, "Kaba bulia ngiciak endak mbenaghka diri kaba." Mangku Paulus ngangkat tanganau ngan ngiciak endak mbenaghka diriau, kataunyau, 26:2 "Rajau Agripa diau kuregaui. Aku riang nian, karnau saghini aku pacak ngiciak mbenaghka diriku di adapan dighi karnau gegalau buru'an jemau Yahudi, 26:3 petamau karnau dighi keruan nian adat lembagau jemau Yahudi ngan pendapat ughangtu diau nidau semegi. Itula sebapau aku mintak, supayau dighi ndengaghka kici'anku ngan ngaligh. 26:4 Gegalau jemau Yahudi keruan carau idupku jak di keciak, karnau jak di keciak aku mendam di pugan bangsauku di Yerusalim. 26:5 La lamau ughangtu keruan aku. Amun ughangtu endak, ughangtu pacak ngiciakka, mbak bansau aku la idup luak jemau Parisi nurut peraturan agamau kitau diau ketat nian. 26:6 Mangku mbak kini aku ngadap pengadilan, karnau aku ngaghapka janji diau la Allah janjika ngan niniak puyang kitau ka ditepati. 26:7 Janji itu pulau diaghapka duau belas jungku bangsau kitau, mangku ughangtu sembayang ngan Allah siangmalam. Karnau janji itula diau kuaghapka, aku diaduka jemau Yahudi. 26:8 Ngapau kapu dighi nidau endak percayau, bansau Allah ngidupka jemau mati? 26:9 Senitu akuni pulau bependapat, bansau aku mesti ngerjauka gegalaunyau endak melawan Yesus, jemau Nasarit itu. 26:10 Nyela, aku ngerjauka titu di Yerusalim. Aku bulia surat kuasau jak di imam-imam bepangkat tinggi, mangku banyak jemau percayau kumasuakka dalam jil ngan tetuju, amun ughangtu diukum mati. 26:11 Aku rajin nganiayau ughangtu ngan masau ughangtu, supayau ninggalka setu diau dipercayaui. Karnau mara nian nginak ughangtu, aku nganiayau ughangtu di manau-manau, sampai di kuta jawua." 26:12 "Ngan rencanau itu aku pegi ke Damsik mbatak surat kuasau jak di imam-imam bepangkat tinggi. 26:13 Aku dang di tenga jalan kekirau tengaghi, adau sinagh jak di langit, terangla diau sangkan matau-aghi. Terangtu nyinaghi di sekitar aku ngan kantin-kantinku. 26:14 Kami rubua galau, mangku aku ndengagh suarau ngiciak ngan aku pakai basau Ibrani, 'Saulus, ngapau kaba maju nganiayau Aku? Kabatu ka sengsarau, amun maju melawan Aku.' 26:15 Mangku katauku, 'Sapau Dighi, Tuhan?' Katau Tuhan, 'Akuni Yesus diau kaba aniayau. 26:16 Mbak kini mela, betegakla! Aku ngancakka diriKu ngan kaba endak netapka kaba njadi tukang ngiciak ngiciakka gegalaunyau diau la kaba kinak ceritau Aku ngan setu diau ka Kutunjuakka ngan kaba nantitu. 26:17 Aku ka mbibaska kaba jak di jemau Yahudi ngan bangsau lain. Aku ka ngajung kaba njenguak ughangtu 26:18 endak mbukakka matau ughangtu, supayau ughangtu ngeluagh jak di keleman masuak terang, supayau ughangtu lepas jak di kuasau iblis mangku dikuasaui Allah. Mangku dusaunyau ka diabiska, karnau ughangtu percayau ngan Aku, mangku ughangtu njadi angguta umat Allah diau dipilia itu.' " 26:19 "Itula sebapau, rajau Agripa, aku maju ta'at ngan pengina'an diau la kuterimau jak di Allah. 26:20 Ngan terang-terangan aku ngiciakka ngan jemau, mbak bansau ughangtu mesti ngubai peremba'au jak di dusaunyau ngan ngulang njenguak Allah ngan mbuktika ngan idupau, bansau ughangtu la ngubai nian. Aku ngiciakka titu dulu sekali di Damsik, udim itu di Yerusalim ngan di gegalau Yudia, mangku pulau ngan jemau bangsau lain. 26:21 Itula sebapau jemau Yahudi nangkap aku di Ghuma Allah endak mbunua aku. 26:22 Anyautu enggut mbak kini aku dijagaui Allah, mangku aku pacak betegak di sini ngiciak ngan gegalau jemau, empuak besak empuak keciak. Setu diau kukiciakka itu semegi ngan setu diau la dikiciakka nabi-nabi ngan Musa. 26:23 Ughangtu ngiciakka, mbak bansau Rajau Penyelamat diau dijanjika Allahtu mesti sengsarau, mangku Diau dulu sekali ka ngulang idup jak di mati. Mangku Diau ka ngenjuakka pengertian ngan jemau Yahudi ngan jemau lain pulau luak manau ka selamat." 26:24 Penarau Paulus ngiciakka gegalaunyautu endak mbenaghka diriau, Pestus tegauk, kataunyau, "Kaba gilau, Paulus! Kepintaran kaba mbuat kaba gilau." 26:25 Paulus nimbal, "Aku nidau gilau, Pestus diau kuregaui. Aku ngiciakka diau benagh ngan rupu'an diau waras. 26:26 Rajau pulau keruan nian gegalau ceritau itu. Karnau itu aku ngiciak terang-terangan ngan rajau. Aku percayau rajau cetau la ndengagh gegalau ceritautu, karnau gegalaunyautu nidau tejadi di bada diau tuasing. 26:27 Rajau Agripa, apu dighi percayau ngan kici'an nabi-nabi? Aku keruan, dighi percayau." 26:28 Katau Agripa, "Kaba kirau gampang njadika aku jemau Keristen ngan jangkau luak ini?" 26:29 Paulus nimbal, "Apu gi lamau, apu jerang agi, aku bedu'a ngan Allah, supayau rajau ngan kapu dighi gegalaunyau diau adau di sini ngan ndengagh kici'anku njadi luak aku, cuman nidau tekawal." 26:30 Mangku rajau ngan gubernur ngan Berniki ngan gegalau jemau lainau betegak galau. 26:31 Ughangtu ngeluagh ngan bekiciak sughang ngan diau lain, "Jemau ini nidau ngerjauka setu diau pantas diukum mati ngan dijilka." 26:32 Mangku Agripa bekatau ngan Pestus, "Sebenaghau jemau ini pacak dilepaska, amun diau nidau mintak diadili ngan Kaisar."

Ceritau Rasul-rasul 27

27:1 La udim ditetapka, bansau kami ka belayar ke Italia, mangku Paulus ngan bebeghapau kawalan lainau diseraka ngan Yulius, sughang kepalak tentera jak di rumbungan Kaisar. 27:2 Kami nayiak kapal jak di Adramitium, mangku kami pegi ngan kapaltu diau belayar ke pelabuan di perupinsi Asia. Aristarkus, jemau Makedunia asalau jak di Tesalunika, pegi serempak ngan kami. 27:3 Pagi di aghiau kami sampai di Sidun. Paulus diterimau Yulius ngan iluak, mangku diajung nandangi kantinkantinau di situ, mangku ughangtu pacak ngenjuakka ngan diau setu diau enda'au. 27:4 Jak di situ kami belayar agi. Adau angin jak di adapan, mangku kami belayar wuan pulau Siprus di sebela pantai diau bang telindung. 27:5 Mangku kami nyembeghang laut di guak Kilikia ngan Pampilia, mangku kami sampai di Mira di daira Likia. 27:6 Di situ pengulu tenteratu dapat kapal jak di Aliksanderia diau endak belayar ke Italia. Mangku kami ngalia ke kapal itu. 27:7 La bebeghapau aghi kami belayar, kami lambat, mangku ngan jeghia kami sampai di Kenidus. Angin maju karut melawan kami, mangku kami nidau pacak maju ara itu. Karnau itu kami belayar ke ara selatan wuan pulau Salmuni, mangku nurut tepi pulau Kerita diau bang telindung. 27:8 La jeghia kami wuan pulautu, mangku kami sampai ke bada diau benamau "Pelabuan Alap" pasigh kuta Lasia. 27:9 Kami lamau jugau di situ, enggut jemau Yahudi la udim puasau, mangku ka bayau, amun maju belayar. Itula sebapau Paulus ngici'i ughangtu, 27:10 kataunyau, "Pendapatku bayau nian, amun kitau maju belayar. Kitau ka rugi banyak, ukan ajau barang ngan kapal, anyautu kitau pulau pacak benasau." 27:11 Anyautu kepalak tenteratu percayaula ngan kici'an jemau ngemudika kapal ngan jemau ngempu kapal sangkan katau Paulus. 27:12 Pelabuan di situ ngenian nidau iluak kapal mendam di situ musim dingin. Karnau itu banyak jemau kerjau kapal tetuju belayar agi ninggalka pelabuan itu, mangku ncubau njenguak kuta Penikes endak mendam di situ selamau musim dingin. Kuta Penikestu pelabuan di Kerita diau tebukak ke ara matau-aghi umban. 27:13 Masau itu adau angin dikit jak di selatan. Ughangtu kirau rencanau ughangtu pacak dikerjauka. Alat mendamka kapal ditaghiak, mangku kapal belayar nurut tepi pulau Kerita. 27:14 Anyautu nidau lamau udim itu, adau angin nyaghu jak di ara pulau tadi diau dikiciakka angin "Timur laut". 27:15 Kapal kami ditempua angintu, mangku nidau pacak melawan angintu. Karnau itu kami nyera ajau mangku ngenangka kapal anyut dibatak angintu. 27:16 Kami anyut enggut ke pulau keciak, namaunyau Kauda. Di situ ngan jeghia kami pacak nguasaui perawu diau dibatak kapaltu. 27:17 Perawutu dinayiakka ke kapal, mangku kapal dililiti ngan tali, supayau diau nidau mura pata, karnau ughangtu takut tebansal di bungin Sirtis diau sughuttu. Layar ditughunka, mangku kapaltu dienangka dibatak angin ajau. 27:18 Angin nyaghutu maju nempua kapal kami, mangku pagi di aghiau barang bata'an kapal dicapakka dalam laut. 27:19 Mangku pagi di aghiau agi dandanan kapaltu dicapakka pulau. Ughang itula ngerjaukanyau. 27:20 La buaghi-aghi kami nidau nginak matau-aghi ngan bintang, angin nyaghutu maju nempua kami, mangku kami nidau bediau agi aghapan ka idup. 27:21 La lamau jugau ughangtu nidau makan, mangku Paulus pegi njenguak ughangtu ngan bekatau, "Amun kamu nuruti kici'anku ngan nidau belayar jak di Kerita, cengki kitau nidau meghasauka kerusakan ngan kerugian ini. 27:22 Mbak kini pulau aku mintak nian, supayau kamu jangan keciak ati, karnau nidau sughang kia jak di kamu ka mati. Cuman kitau ka kelengitan kapal ajau. 27:23 Di malam adau malaikat jak di Allah diau kusemba njenguak aku, 27:24 kataunyau, 'Nidau endak takut, Paulus, kaba mesti ngadap Kaisar. Mangku karnau keilu'an Allah, gegalau jemau diau adau di kapalni ngan kaba ka selamat karnau kaba.' 27:25 Itula sebapau kamu mesti netapka ati, karnau aku percayau ngan Allah, bansau gegalaunyau ka tejadi nian luak la dikiciakka ngan aku. 27:26 Kitau ka tebansal di pantai sebua pulau." 27:27 La malam ke empat belas kami masia dibatak angin di laut Adria. Kekirau tenga malam jemau kerjau kapal sangkau, kami dang nuju tepian. 27:28 Mangku ughangtu nughunka tali ngan batu endak ngeruani dalam laut, tenyatau di situ dalamau duau pulua depau. Mangku diukur agi, tenyatau limau belas depau dalamau. 27:29 Ughangtu takut, kalu tekandas di batu karang, mangku ditughunkanyau empat bua alat mendamka kapal di belakang, mangku kami bedu'a, supayau aghi gancang siang. 27:30 Jemau kerjau kapal ncubau belaghi jak di kapaltu. Ughangtu nughunka perawu ngan luluak endak nughunka alat mendamka kapal di mukau. 27:31 Mangku Paulus bekatau ngan kepalak tentera ngan tenterahau diau adau di kapal, "Amun ughangtu nidau di kapal, kamu nidau ka selamat." 27:32 Tenteratu netak tali perawu tadi, mangku perawutu anyut. 27:33 Satu paghak siang, Paulus ngajak gegalau ughangtu makan, kataunyau, "La empat belas aghi kamu nunggu-nunggu ajau, nidau makan tuapau-apau. 27:34 Karnau itu aku ngajung kamu makan kudai dikit jadila. Itu penting, mangku kamu selamat, karnau nidau sughang kia jak di kamu ka kurang tuapau-apau." 27:35 La udim ngiciak luak itu, Paulus ngambiak ruti, bedu'a beterimau-kasia ngan Allah di adapan gegalau ughangtu, dipiyak-piya'au, mangku dimakanau. 27:36 Mangku ughangtu riang galau ngan makan pulau. 27:37 Gegalau jemau diau adau di kapaltu duau ratus tujua pulua enam ughang. 27:38 La udim makan kenyang, ughangtu ncapakka beghas gendum di laut, mangku kapaltu ampung. 27:39 Satu aghi la siang, ughangtu nginak teluak ngan pantaiau datagh. Empuak ughangtu nidau keruan tepiautu, ughangtu endak ndaghatka kapaltu di situ, amun pacak. 27:40 Ughangtu netak tali alat mendamka kapal, mangku ngenangka alattu dalam laut, tali kemudi dipaculi, layar di mukau dipasang, mangku kapal dibatak angin nuju pantai tadi. 27:41 Anyautu kapaltu melanggar bungin di dasagh laut, mangku kapaltu tebansal. Mukaunyau nidau pacak begerak agi. Belakangau ancur ditempua umbak besak. 27:42 Tentera di kapaltu merencanauka endak mbunua gegalau kawalan, karnau takut adau diau bedenang ke daghat ngan belaghi. 27:43 Anyautu kepalak tentera nidau ngajung anak-buahau ngerjaukanyau, karnau diau endak nyelamatka Paulus. Mangku diau ngajung gegalau jemau diau pacak bedenang terjun ke laut bedenang nuju ke pantai. 27:44 Diau lainau diajungau ngikut makai papan ngan pecahan kapaltu. Luak itula kami selamat galau sampai ke daghat.

Ceritau Rasul-rasul 28

28:1 La sampai di daghat, kami ndengagh, bansau daghattu pulau Malta. 28:2 Jemau pulau itu iluak nian ngan kami. Ughangtu ningguakka api besak batan endak kami, karnau aghi ujan lagi dingin. 28:3 Paulus ngambiak kayu ditepiakkanyau di api, mangku adau ulagh keluagh, karnau panas apitu, ncetuak tanganau. 28:4 Satu ughangtu nginak ulagh itu tegerintung di tangan Paulus, ngiciak sughang ngan diau lain, "Jemautu cengki pembunua, karnau empuak diau lepas jak di bayau laut, diwau keadilan nidau ngenangka diau idup." 28:5 Anyautu Paulus ngelecingka ulaghtu ke dalam api, dikit kia nidau teghasau sakit. 28:6 Ughangtu nyangkau, tanganau ka mengkak ngan diautu ka mati masau itu pulau. Anyautu la lamau nunggu-nunggu, nidau tejadi tuapau-apau ngan Paulus, mangku rupu'an ughangtu beghuba, dikiciakka Paulus itu diwau. 28:7 Nidau jawua jak di bada itu adau tana Publius. Diautu gubernur. Ngan iluak diau nerimau kami njadi mendahau selamau tigau aghi. 28:8 Masau itu bak Publius dang buidapan demam ngan mising abang. Paulus masuak bili'au. Diau bedu'a, ditepiakka tanganau di diau, dighadukanyau. 28:9 La udim itu datang pulau jemau buidapan lainau di pulau itu njenguak Paulus, mangku dighadukanyau pulau. 28:10 Kami diregaui ughangtu nian. Mangku satu kami endak belayar, ughangtu ngenjuakka gegalaunyau diau kami enda'au. 28:11 La tigau bulan di situ, kami pegi jak di pulau itu nayiak kapal jak di Aliksanderia. Selamau musim dingin diau belabua di pulau itu. Kapal itu makai lambang diwau Kembagh. 28:12 Kami belabua di Sirakusa, singga di situ tigau aghi. 28:13 Jak di situ kami belayar agi nurut pantai, mangku kami sampai di Regium. Pagi di aghiau adau angin jak di selatan, mangku pagi di aghiau agi kami sampai di Putiuli. 28:14 Di situ kami betemu bebeghapau jemau diau percayau ngan Yesus. Ughangtu ngajak kami, mangku kami singga ngan ughangtu selamau seminggu. La udim itu kami pegi ke Rum. 28:15 Jemau diau percayau di Rum la ndengagh ceritau kami, mangku ughangtu datang njenguak kami di Purum Apius ngan Teris Taberni. Satu Paulus nginak ughangtu, diau beterimau-kasia ngan Allah mangku atiau diteguaka. 28:16 La sampai di Rum, Paulus dibuliaka mendam di ghumahau dijagaui sughang tentera. 28:17 La tigau aghi di Rum, Paulus ngajak pengulu-pengulu jemau Yahudi di situ betunggal. Ughangtu la betunggal, Paulus bekatau, "Adiak-sanak, aku nidau besala ngan bangsau kitau ngan nidau melawan adat lembagau niniak puyang kitau. Empuak luak itu, aku ditangkap di Yerusalim ngan diseraka ngan jemau Rum. 28:18 Pekarauku diperisau, ughangtu endak melepaska aku, karnau nidau bediau salaku diau pantas diukum ngan ukuman mati. 28:19 Anyautu karnau jemau Yahudi melawan, mangku aku tepasau nuntut pekarauku diadili ngan Kaisar. Anyautu aku ukan endak ngaduka bangsauku. 28:20 Itula sebapau aku mintak, supayau betemu ngan kapu dighi endak ngiciak ngan kapu dighi. Karnau aku tekawal, karnau Rajau Penyelamat diau diaghapka bangsau Israil." 28:21 Mangku ughangtu bekatau, "Kami lum nerimau surat jak di Yudia ceritau kaba, lagi nidau sughang kia jak di adiak-sanak kitau datang ngiciakka setu diau ja'at ceritau kaba. 28:22 Anyautu kami endak pulau ndengagh pendapat kaba, karnau gegalau kami la keruan, bansau ajaghan diau kaba percayaui dilawan di manau-manau." 28:23 Mangku ughangtu netapka aghiau endak betemu ngan Paulus. Aghi diau ditetapkatu banyak nian jemau datang ke bada Paulus. Jak di akap enggut malam Paulus ngiciakka ngan nerangka ceritau Allah endak merinta. Makai ayat-ayat kitab Musa ngan kitab nabi-nabi diau beusaha, supayau ughangtu percayau ngan Yesus. 28:24 Adau diau percayau karnau kici'an Paulus, adau diau nidau. 28:25 Mangku pendapat ughangtu nidau semegi. Antak ka ughangtu pegi jak di situ, Paulus ngiciak luak ini, "Nyela nian, katau Rua Allah diau dikiciakka nabi Yesaya ngan niniak puyang kapu dighi. 28:26 'Katau Allah, pegila, kiciakkala ngan bangsau ini: Kamu ka maju ndengagh, anyautu nidau terti, kamu maju nginak, anyautu nidau kina'an. 28:27 Karnau ati ughangtu keghas, telingau ughangtu ditukup, matau ughangtu dipejamka, supayau ughangtu jangan nginak, jangan ndengagh ngan jangan ngerti, mangku ughangtu jangan ngulang njenguak Aku, mangku ughangtu nidau pacak Kughaduka.' " 28:28 Mangku Paulus bekatau, "Kapu dighi mesti keruan, bansau keselamatan diau jak di Allahtu dikiciakka ngan bangsau lain. Ughangtu ka nerimaunyau." 28:29 La udim Paulus ngiciak luak itu, jemau Yahudi itu pegi ngan bebala sughang ngan diau lain. 28:30 Paulus nunggu ghuma siwahannyautu selamau duau taun. Diau nerimau gegalau jemau diau tandang ngan diau. 28:31 Ngan beghani diau ngiciakka ngan ughangtu ceritau Allah endak merinta ngan ceritau Tuhan Yesus Keristus. Paulus ngerjaukanyau ngan bibas, nidau dialang-alangi.

Rum 1

1:1 Kantin-kantinku di Rum diau disayangi Allah. Aku, Paulus, nulis surat ini. Aku sughang budak Yesus Keristus diau dipilia ngan dijadika rasul mangku ditugaska endak ngiciakka ceritau iluak jak di Allah. 1:2 Ceritau iluak itu la dijanjika Allah senitu ngan dikiciakka nabi-nabi, mangku ditulis di Injil. 1:3-4 Ceritau iluaktu nceritauka Anak Allah, Tuhan kitau Yesus Keristus. Nurut manusiau Diau pengadau Daud. Nurut Rua Diau Anak Allah diau suci. Itu dibuktika ngan kuasau besak, karnau Diau la mati mangku ngulang idup. 1:5 Karnau Diau pulau kami disayangi Allah mangku dijadika rasul endak meregaui Keristus ngan mbimbing jemau jak di gegalau bangsau, supayau percayau ngan ta'at ngan Keristus. 1:6 Kamu pulau temasuak jemau itu diau la dipilia Keristus njadi umatAu. 1:7 Itula sebapau aku nulis ngan kamu diau adau di Rum, jemau diau disayangi Allah ngan dipilia njadi umatAu. Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan njagaui kamu ngan damai. 1:8 Dulu sekali aku endak ngiciakka, bansau gegalau deniau la ndengagh kamu percayau ngan Keristus. Mangku aku beterimau-kasia ngan Allah karnau ceritau kamutu. 1:9 Aku maju ndu'aka kamu, amun aku bedu'a. Allah keruan setu diau kukiciakkatu benagh. Batan endak Allah itula aku bekerjau nian ngan segenap atiku mangku ngiciakka ceritau iluak nceritauka Ana'Au. 1:10 Aku mintak nian ngan Allah, supayau aku lasung nian berayak ngan kamu, amun kendak Allah. 1:11 Karnau aku endak nian betemu ngan kamu, mangku aku pacak ngenjuakka ngan kamu keilu'an jak di Rua Allah endak neguaka ati kamu. 1:12 Mangku gegalau kitau diteguaka. Kamu diteguaka karnau nginak aku percayau, aku diteguaka karnau nginak kamu percayau. 1:13 Kantin-kantinku, aku endak, supayau kamu keruan, bansau la rajin aku endak nian berayak ngan kamu, anyautu maju adau alangan. Aku endak, supayau di guak kamutu pulau kerjauku buasil, luak kerjauku buasil di guak jemau bangsau lain. 1:14 Aku adau kewajiban ngan gegalau jemau, empuak jemau diau maju empuak jemau diau kulut, empuak jemau diau sekul empuak jemau butau urup. 1:15 Itula sebapau aku endak nian ngiciakka ceritau iluaktu pulau ngan kamu diau adau di Rum. 1:16 Aku percayau nian ceritau iluak itu, karnau di ceritau iluaktu adau kuasau Allah diau nyelamatka gegalau jemau diau percayau, jemau Yahudi kudai, mangku jemau bangsau lain pulau. 1:17 Karnau ngan ceritau iluaktu diancakka caraunyau Allah mbuat manusiau seilu'an agi ngan diriAu. Caraunyau ngan percayau ngan Allah, jak di penembai enggut udim. Titu dikiciakka di Injil luak ini, "Jemau dibenaghka karnau percayau ka idup." 1:18 Jak di sergau Allah nyatauka maraHau karnau dusau ngan keja'atan manusiau. Keja'atantu ngalangi manusiau ngeruani ajaghan diau benagh ceritau Allah. 1:19 Ughangtu ka diukum, karnau setu diau pacak dikeruani manusiau ceritau Allah la nyatau ngan manusiau, karnau la dinyatauka Allah. 1:20 Jak Allah njadika deniau, manusiau pacak ngeruani, bansau Diaula Allah ngan kuasauNyau nidau ka udim-udim. Empuak titu nidau kina'an, tapitu pacak dikeruani, karnau setu diau dijadikaNyau, mangku dikit kia nidau bediau tapakan manusiau endak mbenaghka diriau. 1:21 Manusiau keruan adau Allah, anyautu nidau meregaui Diau ngan nidau beterimau-kasia ngan Diau, empuak Diautu Allah. Anyautu ughangtu merupuakka diau nidau-nidau ngan rupu'an ughangtu lagi bigal lagi buyan. 1:22 Ughangtu nganggap diriau pintar, awuak bigal. 1:23 Ukan Allah diau selelamaunyau diau ughangtu semba, tapitu patung-patung diau dibuat nyerupaui jemau diau pacak mati, nyerupaui burung, benatang keting empat, ngan ulagh. Setitula diau disemba ughangtu. 1:24 Itula sebapau Allah ngenangka ughangtu dikuasaui serilau atiau endak ngerjauka setu diau nidau senangaian, mangku sangi kerjauka setu diau ja'at. 1:25 Allah diau benagh ughangtu genti ngan allah tiruan, mangku diau disemba ughangtu setu diau dijadika Allah, ukan Allah diau njadikanyau. Allahtu mesti dipuji selelamaunyau. Amin. 1:26 Itula sebapau Allah ngenangka ughangtu nuruti serilau diau maluka. Jemau tinau nidau ibau agi ngan jemau lanang, anyautu sangi ibauka setinauan. 1:27 Luak itu pulau jemau lanang. Ughangtu nidau agi ngibauka tinau ngan carau diau pantas. Ughangtu sangi ribangka selanangan, mangku jemau lanang ngerjauka diau nidau senangaian ngan jemau lanang. Mangku ughangtu nanggungka di diriau akibat peremba'autu. 1:28 Manusiau enggup ngeruani Allah, mangku Allah ngenangka rupu'an ughangtu njadi rusak, mangku ughangtu ngerjauka setu diau nidau pantas. 1:29 Ati ughangtu penua ngan gegalaunyau diau nidau benagh, diau ja'at, selak, busuak, sengit, endak mbunua, belagau, nipu, ndendam, 1:30 ngupatka jemau, ngarutka jemau, luat ngan Allah, langguak, kiciak besak, kurang ajagh, kepaca'an bebuat ja'at, melawan pejadi, 1:31 bigal, nidau pacak dipercayaui, nidau sayang, nidau terti sial. 1:32 Ughangtu keruan, bansau jemau diau ngerjauka gegalaunyautu pantas diukum mati nurut ukum Allah. Empuak luak itu, ughangtu maju ngerjaukanyau, lagi pulau riang, amun jemau lain ngerjaukanyau pulau.

Rum 2

2:1 Ui kantin-kantinku, apu kamu endak nyalaka jemau? Amun luak itu, kamu nidau bediau tapakan endak mbenaghka diri kamu. Amun kamu nyalaka jemau, awuak kamu pulau ngerjauka kerjau diau ughangtu kerjauka, kamu ngukum diri kamu itula. 2:2 Mangku kitau keruan galau, Allah nidau sala, amun Diau ngukum jemau diau ngerjauka kerjau itu tadi. 2:3 Anyautu kamutu pulau ngerjauka setu diau kamu buruakka ngan jemau. Apu kamu sangkau kamu pacak luput jak di ukuman Allah? 2:4 Apu kamu nganggap mura karnau Allah iluak, ngaligh ngan lambat ngukum? Cengki kamu keruan, bansau Allah iluak karnau Diau endak, supayau kamu ngubai jak di dusau-dusau kamu. 2:5 Anyautu kamu maju melawan, enggup beghuba. Karnau itu kamu itula diau mbuat ukuman kamu tamba beghat masau aghi kiamat nanti, amun Allah nyatauka maraHau ngan ukumanNyau diau adil, 2:6 karnau Allah ka ngukum bilang jemau nurut kerjaunyau. 2:7 Jemau diau maju ngerjauka diau iluak ngan ndalak setu diau dipuji ngan diregaui ngan ta'an selelamaunyau ka dienjuakkaNyau idup selelamaunyau. 2:8 Anyautu jemau diau ndalak idup batan endak diau sughang, nidau endak ta'at ngan Allah ngan maju ngerjauka diau ja'at, jemautu ka didawaika Allah nian. 2:9 Bilang jemau diau galak ngerjauka diau ja'at ka sengsarau ngan nanggung. Jemau Yahudi kudai mangku jemau Yunani mangku pulau jemau bangsau lain. 2:10 Anyautu gegalau jemau diau galak ngerjauka diau iluak ka dipuji ngan diregaui ngan dienju'i damai ketenteraman jak di Allah, jemau Yahudi kudai mangku pulau jemau bangsau lain. 2:11 Karnau Allah nidau milia rupau jemau. 2:12 Jemau diau bedusau ngan nidau keruan ukum Taurat ka benasau, empuak nidau keruan ukum itu. Jemau Yahudi bedusau, empuak keruan ukum Taurat, mangku ughangtu diukum nurut ukumtu. 2:13 Jemau nidau dibenaghka, amun keruan ukum Taurat. Jemau dibenaghka, amun ngerjauka setu diau diajung ukum Taurattu. 2:14 Jemau bangsau lain nidau keruan ukum Taurat, mangku amun ughangtu ngerjaukanyau karnau kenda'an atiau, ughangtu nyatauka, bansau atiau keruan setu diau mesti dikerjauka, empuak nidau keruan ukum Taurat. 2:15 Perembak ughangtu nunjuakka, bansau setu diau diajung ukum Taurattu la adau dalam atiau. Ati keciak ughangtu pulau mbuktikanyau, karnau kekadangan ughangtu disalaka rupu'annyau, kekadangan dibenaghka. 2:16 Nurut ceritau iluak diau kukiciakkatu, gegalaunyau ka tejadi nanti masau aghi itu, amun Allah ngajung Yesus Keristus ngukum gegalaunyau diau tebuni dalam ati jemau. 2:17 Mbak kini luak manau ngan kamu? Kamu ngakuak kamu jemau Yahudi. Kamu bepaut ngan ukum Taurat ngan bangga karnau njadi umat Allah. 2:18 Kamu diajagh ukum itu, mangku kamu keruan kendak Allah, mangku pacak mbidaka setu diau iluak ngan diau ja'at. 2:19 Kamu percayau, kamu mapa jemau butau ngan nunjuakka terang batan endak jemau diau mendam di keleman. 2:20 Kamu njadi guru jemau bigal ngan pengajagh budak keciak, karnau kamu percayau, bansau dalam ukum Taurat kamu keruan gegalaunyau diau benagh. 2:21 Kamu ngajagh jemau. Ngapau kamu nidau ngajagh diri kamu sendighi? Kamu ngajagh jemau mangku jangan maling, apu kamutu nidau maling? 2:22 Kamu ngajagh jemau mangku jangan menaugawia, apu kamutu nidau menaugawia? Kamu luat ngan jemau nyemba diwau, apu kamutu nidau ngambiak dandanan jak di ghuma diwau. 2:23 Kamu bangga karnau keruan ukum Taurat, apu kamu nidau nggelakka Allah ngan carau nidau nuruti ukumtu? 2:24 Di Injil ditulis luak ini, "Karnau kamu mangku namau Allah digelakka jemau bangsau lain." 2:25 Nyela, sunat adau gunaunyau, amun kamu ta'at ngan ukum Taurat. Anyautu amun kamu nidau ta'at ngan ukumtu, sunattu nidau bediau gatiau. 2:26 Amun jemau diau nidau disunat ta'at ngan perinta ukum Taurat, apu diau ukan dianggap semegi ngan jemau diau la disunattu? 2:27 Mangku jemau diau nidau disunat anyautu ngerjauka ukum Taurat ka nyalaka kamu diau la keruan ukum Taurat ngan disunat, anyautu melanggar ukumtu. 2:28 Sapau jemau Yahudi? Ukan jemau diau adau bapa'au jemau Yahudi ngan disunat di luagh. 2:29 Anyautu jemau diau ngenian Yahudi, jemau diau jiwahau jemau Yahudi. Sunat diau ngenian, sunat di ati diau dikerjauka Rua Allah ukan diau dikerjauka nurut setu diau ditulis di kitab. Mangku jemau luak itu dipuji Allah, ukan dipuji manusiau.

Rum 3

3:1 Amun luak itu, tuapau untungau jemau Yahudi? Tuapau gunaunyau besunat? 3:2 Banyak nian! Terutamau jemau Yahudi nerimau katau Allah. 3:3 Mangku luak manau, amun adau jemau Yahudi diau nidau setia? Apu karnau itu Allah pulau nidau setia? 3:4 Nidau ka adau! Cetau Allah maju benagh, empuak bilang jemau mbu'ung. Di Injil ditulis, "Cengki Dighi maju nyatau benagh. Dighi menang, amun disalaka." 3:5 Amun keilu'an Allah tamba nyatau karnau dusau kitau, tuapau katau kitau? Apu Allah nidau adil, amun kitau diukum? Titu rupu'an jemau. 3:6 Nidau nian! Amun Allah nidau adil, luak manau Diau endak ngadili deniauni? 3:7 Amun karnau perembak diau nidau benagh keilu'an Allah tamba nyatau ngan tamba dipuji, ngapau jemau bedusautu maju diukum? 3:8 Ngapau kitau nidau bulia ngiciakka, "Iluakla kitau bebuat ja'at, supayau keilu'an Allah tamba nyatau." Adau pulau jemau nggelakka kami, bansau kami ngiciak luak itu. Jemau luak itu pantas diukum. 3:9 Mbak kini luak manau? Tuapau lebihau kitau jemau Yahudi? Nidau bediau lebihau. La kukiciakka, empuak jemau Yahudi empuak jemau bangsau lain, gegalaunyau dikuasaui dusau. 3:10 Di Injil ditulis, "Nidau bediau diau benagh, sughang kiala nidau. 3:11 Nidau sughang kiala diau ngerti. Nidau sughang kiala pulau diau nurut kendak Allah. 3:12 Gegalau jemau nidau nyanauka Allah, la sesat galau. Nidau bediau diau ngerjauka setu diau benagh, sughang kiala nidau. 3:13 Kelungkungan ughangtu tengangau luak kuburan tebukak. Mulut ughangtu nipuka jemau ngan kici'an ughangtu bebayau luak bisau ulagh. 3:14 Ughangtu maju meluatka ngan ndawaika jemau. 3:15 Ughangtu cepat, amun endak nyaraui ngan mbunua jemau. 3:16 Ke manau kila ughangtu pegi, di situ mbuat kacau ngan sengsarau. 3:17 Ughangtu nidau keruan jalan damai. 3:18 Ughangtu nidau meregaui Allah." 3:19 Kitau keruan, gegalaunyau diau ditulis di ukum Taurat ditulis batan endak jemau diau semestiau nuruti ukum Taurattu. Mangku nidau bediau tapakan agi ngan gegalau jemau diukum Allah. 3:20 Karnau nidau sughang kiala pacak dibenaghka di adapan Allah ngan jalan nuruti ukum Taurat. Ukum Taurattu cuman nyatauka manusiau jemau bedusau. 3:21 Mbak kini Allah la nunjuakka jalan, mangku manusiau dibenaghka Allah. Caraunyautu nidau bediau sangkut-pautau ngan ukum Taurat. La dikiciakka dalam ukum Taurat ngan kitab nabi-nabi, 3:22 bansau jemau pacak dibenaghka Allah, amun percayau ngan Yesus Keristus. Itula carau Allah mbenaghka gegalau jemau diau percayau ngan Keristus, karnau Allah nidau mbidaka jemau, 3:23 karnau gegalau jemau la bedusau ngan nidau bediau diau pacak meriangka ati Allah. 3:24 Karnau keilu'an Allah ughangtu dibenaghka Allah. Nidau bediau bayighan, dienjuakka ajau, karnau Yesus Keristus la nebusau. 3:25 Yesus Keristus itula la ditetapka Allah batan endak mati, mangku manusiau pacak seilu'an ngan Allah, amun percayau. Allah ngerjauka titu endak nyatauka, bansau Diautu adil. Senitu Allah ngaligh ngan jemau bedusau, mangku lum diukum. 3:26 Mbak kini Diau nidau agi ngenangka perembak jemau, anyautu Diau endak seilu'an ngan jemau. Ngan carau itu Diau nyatauka, bansau Diautu benagh ngan pulau mbenaghka jemau diau percayau ngan Yesus. 3:27 Amun luak itu, nidau bediau sebapau kitau bangga? Ngapau? Apu pacak bangga karnau ta'at ngan ukum? Nidau pacak, karnau percayau. 3:28 Kami keruan, bansau jemau dibenaghka karnau percayau ngan Keristus ukan karnau ta'at ngan ukum Taurat. 3:29 Apu Allahtu Allah jemau Yahudi ajau? Apu ukan Allah jemau bangsau lain pulau? Nyela, Diau Allah jemau bangsau lain pulau. 3:30 Allah gi sughang. Diautu mbenaghka jemau Yahudi karnau percayau, mangku jemau bangsau lain pulau karnau percayau. 3:31 Apu retiautu, kitau ncapakka ukum Taurat karnau percayau? Nidau nian! Karnau kitau percayau, kitau maju mbenaghka ukum Taurat.

Rum 4

4:1 Amun luak itu, tuapau diau ka kitau kiciakka ceritau Abraham, niniak puyang kitau? 4:2 Amun Abraham dibenaghka karnau kerjaunyau, diau adau sebapau endak bangga, anyautu ukan di adapan Allah. 4:3 Di Injil ditulis, "Abraham percayau, mangku karnau itu diau diterimau Allah njadi jemau benagh." 4:4 Amun jemau bekerjau, diau nerimau upa. Upahautu nidau dianggap enju'an ajau, karnau upatu ha'au. 4:5 Anyautu amun adau jemau diau nidau ngandalka kerjaunyau, mangku diau percayau ngan Allah diau nyatauka jemau bedusau bibas jak di salahau, jemautu dibenaghka Allah karnau percayau. 4:6 Luak itu pulau la dikiciakka Daud, bansau riangla jemau diau dibenaghka Allah ukan karnau kerjaunyau. 4:7 "Riangla jemau diau la diampuni dusaunyau ngan salahau la diabiska Allah. 4:8 Riangla jemau diau dusaunyau nidau diperitungka Allah!" 4:9 Apu riang itu cuman batan endak jemau diau besunat, apu batan endak jemau nidau besunat pulau? Nyela, batan endak jemau nidau besunat pulau. La kami kiciakka, bansau Abraham dibenaghka karnau percayau. 4:10 Kebilau diau dibenaghka? Apu antak ka disunat apu la udim? Nyela, antak ka disunat. 4:11 Sunattu cuman njadi tandau, bansau diau dibenaghka Allah karnau percayau antak ka besunat. Mangku diau njadi bapak gegalau jemau percayau diau nidau besunat, mangku ughangtu dibenaghka karnau percayau. 4:12 Mangku diau pulau bapak jemau diau besunat, ukan ajau karnau ughangtu besunat, tapitu karnau ughangtu menau Abraham diau percayau antak ka besunat. 4:13 Allah bejanji ngan Abraham ngan pengadaunyau, bansau deniau njadi ha'au. Allah bejanji luak itu ukan karnau Abraham ta'at ngan ukum Taurat, tapitu karnau diau percayau mangku dibenaghka Allah. 4:14 Amun cuman jemau diau ta'at ngan ukum Taurat ajau ka nerimau setu diau dijanjika Allah, mangku percayau ngan Allahtu nidau bediau gunaunyau ngan janjitu mbu'ung. 4:15 Ukum Taurat mbuat manusiau diukum. Anyautu amun nidau bediau peraturan, pelanggaran pulau nidau bediau. 4:16 Allah bejanji karnau jemau percayau ngan Diau. Janjitu dienjuakka ajau, mangku janjitu dienjuakka ngan gegalau pengadau Abraham, ukan ajau ngan jemau diau nuruti ukum Taurat, tapitu pulau ngan jemau diau percayau luak Abraham, karnau Abraham bak kitau galau. 4:17 Di Injil ditulis luak ini, "Aku njadika kaba bak banyak bangsau." Luak itu janji Allah ngan Abraham, mangku Abraham percayau ngan Diau. Diautu Allah diau ngidupka jemau mati ngan njadika setu diau nidau bediau njadi adau ngan kici'an ajau. 4:18 Abraham maju ngaghap ngan percayau, awuak nidau bediau aghapan agi, bansau diau njadi bak banyak bangsau, luak ditulis di Injil, "Pengadau kaba ka banyak nianan." 4:19 Sebenaghau masau itu Abraham la tuau laka seratus taun, lagi pulau Sara, biniautu, nidau bediau anak. Empuak luak itu, Abraham maju percayau. 4:20 Diau nidau asau-asau ngan janji Allah. Mangku diau tamba kuat karnau percayau nian, mangku ngagungka Allah. 4:21 Diau percayau nian, bansau Allah pacak ngerjauka setu diau la dijanjikaNyautu. 4:22 Itula sebapau diau dibenaghka Allah. 4:23 Katau ini "diau dibenaghka" ukan ditulis batan endak Abraham ajau, 4:24 tapitu batan endak kitau pulau. Kitau pulau dibenaghka, amun kitau percayau ngan Allah diau ngidupka Yesus, Tuhan kitau, jak di mati. 4:25 Yesustu diseraka ngan dibunua karnau dusau kitau, mangku Diau diidupka agi, supayau kitau pacak ngulang seilu'an ngan Allah.

Rum 5

5:1 Mbak kini kitau la seilu'an agi ngan Allah karnau percayau, mangku kitau idup damai ngan Allah karnau Tuhan kitau Yesus Keristus. 5:2 Karnau kitau percayau ngan Diau, mangku Diau nulung kitau ngeruani keilu'an Allah. Mbak kini kitau la meghasaukanyau. Mangku kitau riang, karnau adau aghapan kitau ka meghasauka keagungan Allah. 5:3 Lebia agi kitau riang karnau sengsarau, karnau kitau keruan sengsarautu mbuat kitau tekun. 5:4 Ketekunan mbuat kitau ta'an diuji, mangku karnau ta'an diuji adau aghapan. 5:5 Aghapan luak itu nidau ka ngeciwauka kitau, karnau ati kitau la diisi ngan sayang Allah. Titu dikerjauka Rua Allah diau la dienjuakka ngan kitau. 5:6 Masau kitau gi malas, Keristus la mati batan endak kitau, masau diau ditetapka Allah, awuak kitau jemau ja'at. 5:7 Nidau bediau jemau endak mati batan endak jemau diau benagh. Amun batan endak jemau diau iluak, asauku ka adau jemau diau endak mati. 5:8 Anyautu Allah nyatauka sayangAu ngan kitau, karnau Keristus mati batan endak kitau, masau kitau gi jemau bedusau. 5:9 Apau agi mbak kini, kitau la seilu'an ngan Allah karnau Keristus mati, mangku kitau cengki ka diselamatka jak di ukuman Allah karnau Diau. 5:10 Masau kitau gi bemusuan ngan Allah, kitau la didamaika karnau Ana'Au mati batan endak kitau, apau agi mbak kini kitau diau la seilu'an ngan Allah, cengki kitau ka diselamatka karnau Keristus idup. 5:11 Ukan itu ajau. Kitau riang pulau karnau keilu'an Allah itu, mangku kitau la seilu'an ngan Diau karnau Tuhan kitau Yesus Keristus. 5:12 Dusau masuak ke deniau karnau sughang jemau, mangku jemau mati ikak dusau. Mangku kematian nguasaui gegalau jemau ikak bedusau galau. 5:13 Antak ka ukum Taurat dienjuakka, dusau la adau di deniau. Anyautu dusau nidau dituntut, karnau nidau bediau ukum diau pacak dilanggar. 5:14 Empuak luak itu jak timpau Adam enggut timpau Musa gegalau jemau mati galau. Jemau diau nidau melanggar luak Adam ngikut mati galau. Adamtu gambaran jemau diau ka datang nantitu. 5:15 Anyautu ughang duautu nidau semegi. Besakla akibat keilu'an ati Allah sangkan akibat pelanggaran Adam. Nyela, banyak jemau mati, ikak sughang jemau nidau ta'at. Besakla akibat keilu'an ngan pengenjuak Allah diau dienjuakka ngan banyak jemau, karnau keilu'an ati sughang jemau, diautu Yesus Keristus. 5:16 Besakla pulau pengenjuak Allah sangkan akibat dusau sughang jemau tadi. Karnau jemautu la bedusau, mangku diau diukum. Anyautu banyak jemau la bedusau, mangku dinyatauka nidau besala karnau keilu'an ati Allah. 5:17 Gegalau jemau mati ikak dusau sughang jemau tadi. Besakla akibat diau dikerjauka sughang jemau lainau, diautu Yesus Keristus. Karnau Diautu Allah la ngenjuakka keilu'an ngan banyak jemau, dienjuakka ajau, mangku jemau pacak seilu'an ngan Allah. Mangku jemautu ka idup ngan menang karnau Yesus Keristus. 5:18 Jadi, dusau sughang jemau mbuat gegalau jemau diukum. Luak itu pulau kerjau sughang jemau diau ngerjauka kendak Allah mbuat gegalau jemau dilepaska jak di dusaunyau, mangku dienjuakka idup. 5:19 Gegalau jemau la njadi jemau bedusau, karnau sughang jemau nidau ta'at. Luak itu pulau banyak jemau seilu'an agi ngan Allah, karnau sughang jemau diau ta'at ngan Allah. 5:20 Mangku ukum Taurat dienjuakka Allah, mangku pelanggaran tamba banyak. Anyautu tamba jemau banyak bedusau, tamba Allah banyak nyayangi jemau. 5:21 Na, jemau mati karnau bedusau. Anyautu Allah nunjuakka jalan ngan kitau, mangku kitau seilu'an ngan Diau, karnau Diau nyayangi kitau. Mangku kitau la seilu'an ngan Allah. Diau ngenjuakka idup selelamaunyau ngan kitau karnau Tuhan kitau Yesus Keristus.

Rum 6

6:1 Amun luak itu, tuapau diau ka kitau kiciakka? Apu kitau maju mbuat dusau, supayau Allah tamba nyayangi kitau? 6:2 Nidau ka adau! Dusau nidau agi nguasaui kitau. Mangku manau pacak kitau maju ngerjauka dusau? 6:3 Cengki kamu la keruan, bansau masau kitau dibaptis, kitau njadi seghundak ngan Yesus Keristus. Itu bereti, kitau pulau mati ngan Diau. 6:4 Masau kitau dibaptiskatu, kitau mati ngan Diau, mangku kitau pulau dikuburka ngan Diau. Mangku Keristus diidupka agi jak di mati, karnau kuasau Bapak diau agung. Luak itu pulau kitau pacak njalani idup diau empai. 6:5 Amun kitau la seghundak ngan Keristus, la mati ngan Diau, cengki kitau pulau seghundak ngan Diau diidupka agi luak Diau. 6:6 Kitau keruan, bansau carau idup kitau diau lamau la mati serempak ngan Keristus di kayu salip, supayau serilau kitau diau melawan Allah nidau bekuasau agi, mangku kitau nidau agi dikuasaui dusau. 6:7 Karnau jemau diau la mati nidau agi dikuasaui dusau. 6:8 Amun kitau la mati serempak ngan Keristus, kitau percayau, kitau ka diidupka pulau serempak ngan Diau. 6:9 Kitau keruan, bansau Keristus la diidupka jak di mati, nidau ka mati agi. Kematian nidau bekuasau agi ngan Diau. 6:10 Karnau satu Diau mati, dusau nidau bekuasau agi. Titu tejadi cuman sekali ajau batan endak selelamaunyau, mangku idupAu mbak kini batan endak Allah. 6:11 Kamu pulau mesti nganggap diri kamu mati batan endak dusau, tapitu idup batan endak Allah karnau seghundak ngan Yesus Keristus. 6:12 Karnau itu jangan agi endak idup kamu di deniauni dikuasaui dusau, supayau jangan agi nuruti serilau diau ja'at. 6:13 Jangan agi kamu nyeraka dandanan badan kamu ngan kuasau dusau endak ngerjauka setu diau ja'at. Anyautu serakala diri kamu ngan Allah karnau kamu la ngalia jak di mati mangku ngulang idup. Mangku serakala gegalau diri kamu ngan Allah batan endak ngerjauka setu diau benagh. 6:14 Dusau nidau agi nguasaui kamu, karnau kamu nidau idup agi nurut ukum Taurat, tapitu nurut keilu'an Allah. 6:15 Mangku luak manau kitau? Apu bulia kitau mbuat dusau, karnau kitau nidau agi dikuasaui ukum Taurat, tapitu disayangi Allah? Nidau ka adau! 6:16 Cengki kamu keruan, amun kamu njualka diri kamu ngan sughang jemau njadi buda'au, mangku kamu budak jemautu nian ngan mesti na'atinyau. Apu kamu budak dusau ngan na'ati dusau diau nyebapka kamu mati, apu kamu budak Allah ngan na'atiNyau, mangku kamu dibenaghka? 6:17 Terimau-kasia nian ngan Allah, karnau senitu kamu njadi budak dusau, mbak kini kamu na'ati nian ajaghan diau benagh diau la dikiciakka ngan kamu. 6:18 Kamu la dilepaska jak di dusau, mangku njadi budak Allah. 6:19 Karnau kamu segau ngerti, aku endak ngiciakka cuntau idup idang aghi. Senitu kamu nyeraka diri kamu njadi budak setu diau nidau senangaian ngan tamba ja'at mangku ngerjauka keja'atan. Luak itu pulau mbak kini kamu mesti nyeraka gegalau diri kamu njadi budak Allah mangku ngerjauka setu diau beresia. 6:20 Masau kamu njadi budak dusau, kamu sangkau nidau pantas ngerjauka kendak Allah. 6:21 Mangku tuapau asilau? Gegalaunyau maluka kamu mbak kini. Kerjau itu cuman mbatak mati. 6:22 Anyautu mbak kini kamu la dilepaska jak di dusau mangku njadi budak Allah. Untungau kamu la idup batan endak Allah mangku bulia idup sejati selelamaunyau. 6:23 Karnau upa dusau itu mati. Anyautu Allah ngenjuakka idup sejati selelamaunyau karnau seghundak ngan Yesus Keristus Tuhan kitau, dienjuakka ajau.

Rum 7

7:1 Kantin-kantinku, cengki gegalau kamu la keruan peraturan, mangku kamu keruan, bansau peraturan belaku ngan jemau, masau jemau gi idup. 7:2 Misalau jemau tinau diau la belaki tekungkung ngan lakiau nurut peraturan, masau lakiautu gi idup. Amun lakiau mati, tinautu bibas jak di peraturan itu. 7:3 Amun tinautu idup ngan lanang lain, masau lakiautu gi idup, tinautu menaugawia. Anyautu amun lakiau la mati, tinautu la bibas jak di peraturan tadi. Mangku amun diau nika agi ngan lanang diau lain, diau nidau menaugawia. 7:4 Luak itu pulau ngan kamu. Kamu la mati tuadap ukum Taurat, karnau kamu la seghundak ngan badan Keristus. Mangku kamu la njadi hak Keristus diau la diidupka agi jak di mati, supayau kitau begunau batan endak Allah. 7:5 Senitu kitau idup nurut carau manusiau. Masau itu serilau bedusau nguasaui kitau. Serilautu nimbul karnau ukum Taurat, mangku kitau ngerjauka setu diau nyebapka kitau mati. 7:6 Mbak kini kitau la dilepaska jak di ukum Taurat. Mbak kini kitau la mati tuadap ukum diau senitu nguasaui kitau. Mangku kitau nidau agi nuruti carau lamau, ukum diau ditulis. Mbak kini kitau idup nurut carau diau empai diau ditunjuakka Rua Allah. 7:7 Amun luak itu, tuapau diau pacak kitau kiciakka? Apu ukum Taurat ja'at? Nidau ka adau! Aku keruan dusau karnau ukum Taurat. Aku nidau keruan, tuapau retiau ngibauka barang jemau, amun ukan ukum ngiciakka, "Jangan ngibauka barang jemau." 7:8 Anyautu karnau perintatu dusau bulia jalan nimbulka di atiku serbau serilau diau ngibauka. Karnau amun ukum Taurat nidau bediau, nidau keruan dusau. 7:9 Senitu aku idup nidau keruan ukum Taurat. Masau aku keruan ukumtu, dusau mulai nimbul, 7:10 mangku aku mati. Mangku ukum diau sebenaghau njanjika idup tenyatau mbuat aku mati. 7:11 Dusau bulia jalan nipuka ngan mbunua aku karnau ukum itu. 7:12 Ukum Taurattu beresia ngan perintahau pulau beresia, benagh ngan iluak. 7:13 Apu itu bereti, bansau setu diau iluak mbuat aku mati? Nidau ka adau! Dusau itu makai setu diau iluak, mangku mbuat aku mati, mangku jemau keruan nian tuapau itu dusau. Ukumtu nyatauka alaka ja'atau dusau. 7:14 Kitau keruan, ukum Taurat asalau jak di Rua Allah. Anyautu aku manusiau biasau. Aku la tejual njadi budak dusau. 7:15 Aku nidau terti perembakku, karnau setu diau endak kukerjaukatu nidau kukerjauka, tapitu setu diau kuluatka itula diau kukerjauka. 7:16 Amun aku ngerjauka setu diau nidau kukenda'i, aku nyetujui, bansau ukum Taurattu benagh. 7:17 Amun luak itu, ukan agi aku diau ngerjauka titu, tapitu dusau diau mendam di atiku. 7:18 Aku keruan, nidau bediau setu diau iluak dalam atiku, karnau aku manusiau ajau. Nyela, aku endak ngerjauka setu diau iluak, anyautu nidau pacak ngerjaukanyau. 7:19 Aku nidau ngerjauka setu diau iluak diau endak kukerjauka. Aku ngerjauka setu diau ja'at diau enggup kukerjauka. 7:20 Amun aku ngerjauka setu diau nidau endak kukerjauka, mangku ukan aku diau ngerjaukanyau, tapitu dusau diau mendam di atiku. 7:21 Mangku adau carau ini di aku: amun aku, endak ngerjauka setu diau iluak, anyautu diau adau di aku cuman diau ja'at. 7:22 Atiku riang nian ngan perinta Allah. 7:23 Anyautu aku meghasau di aku adau pulau carau lain diau belawanan ngan carau diau disetujui rupu'anku. Carau itu diau nguasaui diriku, mangku aku tunduak ngan dusau diau mendam di atiku. 7:24 Celakau aku! Sapau diau ka ngilakka aku jak di badan ini diau mbuat aku mati? 7:25 Terimau-kasia ngan Allah. Diau endak nyelamatka aku karnau Yesus Keristus, Tuhan kitau. Luak inila aku: Ngan rupu'anku aku na'ati ukum Allah, anyautu ngan perembakku aku na'ati dusau.

Rum 8

8:1 Mbak kini jemau diau idup seghundak ngan Yesus Keristus nidau agi diukum selelamaunyau, 8:2 karnau Rua Allah diau nguasaui kitau ngan ngenjuakka idup la melepaska kitau jak di kuasau dusau ngan maut. 8:3 Setu diau nidau pacak dikerjauka ukum Taurat karnau kitau manusiau bedusau la dikerjauka Allah. Diau la ngajung Ana'Au datang ke deniau nyerupaui manusiau biasau, njadi kerban batan dusau manusiau, mangku dusau diukum ngan diabiskaNyau. 8:4 Allah ngerjauka titu, supayau kitau pacak ngerjauka kenda'Au diau nyatau dalam ukum Taurat, karnau kitau idup nurut Rua Allah ukan nurut serilau manusiau. 8:5 Jemau diau idup nurut serilau manusiau maju merupuakka setu diau diibauka manusiau. Jemau diau idup nurut Rua Allah maju merupuakka setu diau dikenda'i Rua Allah. 8:6 Amun kitau idup nurut serilau manusiau, kitau mati. Amun kitau idup nurut Rua Allah, kitau idup damai ngan Allah. 8:7 Amun ati jemau dikuasaui serilau manusiau, diau bemusuan ngan Allah, karnau diau nidau na'ati ukum Allah, nyela, diau nidau pacak ta'at ngan ukum Allah. 8:8 Jemau diau idup nurut serilau manusiau nidau pacak melemakka ati Allah. 8:9 Anyautu kamu nidau idup nurut serilau manusiau. Kamuni idup nurut Rua Allah, amun ngenian Ruatu adau dalam kamu. Jemau diau nidau bediau Rua Allah ukan hak Keristus. 8:10 Amun Keristus adau dalam kamu, mangku Rua Allah ngenjuakka idup ngan kamu karnau la dibenaghka, empuak badan kamu ka mati karnau dusau. 8:11 Amun Rua Allah diau la ngidupka Keristus jak di mati adau dalam kamu, mangku Allah diau ngidupka Keristus jak di matitu ka ngidupka badan kamu pulau, karnau RuaHau adau dalam kamu. 8:12 Mangku, kantin-kantinku, kitau adau utang. Kitau ukan beghutang ngan manusiau endak idup nurut serilau manusiau. 8:13 Amun kamu idup nurut serilau manusiau, kamu ka mati. Anyautu amun ngan kuasau Rua kamu la matika perembak diau bedusau, kamu ka idup. 8:14 Gegalau jemau diau nuruti Rua Allah njadi anak Allah. 8:15 Karnau Rua diau kamu terimau nidau njadika kamu budak, mangku kamu nidau penakut agi. Anyautu Ruatu njadika kamu anak Allah, mangku karnau kuasau Ruatu kitau mantau Allah "Bak, bakku!" 8:16 Rua Allah ngan rua kitau nyatauka, bansau kitau anak-anak Allah. 8:17 Mangku karnau kitau ana'Au, kitau pulau behak nerimau setu diau dijanjika Allah batan endak ana'Au. Kitau ka nerimau pulau luak Keristus setu diau la disediauka Allah batan endak Diau. Karnau, amun kitau sengsarau ngan Diau, kitau pulau ka diagungka ngan Diau. 8:18 Aku keruan, bansau penanggungan kitau mbak kini nidau pacak dibandingka ngan keagungan diau ka diancakka ngan kitau nanti. 8:19 Gegalau setu diau dijadika nunggu nian masau Allah ngancakka anak-ana'Au. 8:20 Karnau gegalaunyautu la diseraka ngan nidau begati, ukan karnau dikenda'inyau, tapitu karnau kendak Allah diau nyerakanyau. 8:21 Empuak luak itu adau aghapan, bansau adau masau gegalaunyau diau dijadika Allah ka dilepaska jak di kuasau diau mbenasauka, mangku ka dilepaska ngan diagungka serempak ngan anak-anak Allah. 8:22 Kitau keruan, enggut mbak kini gegalaunyautu nyempit, karnau kesakitan luak tinau diau endak merunggu. 8:23 Ukan itu ajau, kitau pulau nyempit dalam ati. Kitau la nerimau Rua diau dienjuakka Allah njadi pengenjuak diau dulu sekali. Kitau masia nunggu Allah mbibaska kitau njadika kitau ana'Au. 8:24 Kitau diselamatka karnau ngaghapka Allah. Anyautu amun setu diau kitau aghapka la kina'an, titu ukan diaghapka agi. Sapau masia ngaghapka setu diau la kina'an? 8:25 Anyautu amun kitau ngaghapka setu diau lum kitau kinak, mangku kitau ta'an nungguau. 8:26 Luak itu pulau Rua Allah nulung kitau, karnau kitau nidau tegua, karnau kitau nidau keruan, luak manau semestiau kitau bedu'a. Rua itula mintak ngan Allah batan endak kitau karnau ghindu tegalau, nidau pacak dikiciakka. 8:27 Mangku Allah diau ngeruani ati manusiau ngerti kendak Rua, karnau Ruatu mintak nurut kendak Allah batan endak umatAu. 8:28 Kitau keruan, bansau Allah ngatur gegalaunyau, mangku ngasilka diau iluak batan endak jemau diau nyayangi Diau, jemau diau la dipilia nurut kenda'Au. 8:29 Karnau bilang jemau diau la dipilia Allah jak di senitu pulau la ditetapka endak njadi semegi ngan Ana'Au Yesus Keristus, mangku Ana'Autu njadi diau tuau jak di ading-beghadingAu. 8:30 Luak itula Allah milia ughangtu diau la dulu ditetapkaNyau, mangku ughang diau la dipiliatu pulau la seilu'an ngan Diau. Mangku ughang diau la seilu'antu ka diagungka pulau. 8:31 Mangku tuapau diau pacak kitau kiciakka mbak kini? Sapau pacak melawan kitau, amun Allah mihak ngan kitau? 8:32 Allahtu rila nyeraka Ana'Au batan endak kitau galau. Baghia Diau nidau ngenjuakka ngan kitau gegalaunyau diau lainau. 8:33 Sapau pacak ngaduka jemau diau dipilia, amun Allah la mbenaghkanyau? 8:34 Apu adau diau pacak nyalaka ughangtu? Nidau bediau! Yesus Keristus la mati, tapitu la diidupka agi jak di mati, la duduak di sebela kanan Allah, mangku Diautu ka mbenaghka ughangtu. 8:35 Tuapau pacak ngalangi Keristus nyayangi kitau? Apu Diau dialangi, amun kitau bingung ngan nanggung, amun kitau diluatka, amun kelapaghan ngan serik, amun adau bayau, lagi mati? 8:36 Dalam Injil ditulis luak ini, "Sesaghian kami adau dalam bayau maut karnau Dighi. Kami dibuati luak bebiri diau endak disembelia." 8:37 Dalam gegalaunyautu kitau pacak menang nian, karnau Diau nyayangi kitau. 8:38 Aku yakin, di gegalau deniau nidau bediau diau pacak ngalangi Allah nyayangi kitau, empuak mati, empuak idup, empuak malaikat, empuak penguasau, empuak masau mbak kini, empuak masau diau ka datang, 8:39 empuak kuasau diau adau di langit, empuak diau adau di deniau, empuak setu diau lainau. Gegalaunyautu nidau pacak ngalangi Allah nyayangi kitau, luak diau la kitau ghasauka dalam Tuhan kitau Yesus Keristus.

Rum 9

9:1 Setu diau kukiciakka ini benagh. Aku nidau mbu'ung, karnau aku hak Keristus. Ati keciakku diau dikuasaui Rua Allah ngiciak pulau, bansau kici'anku ini benagh. 9:2 Aku bingung nian ngan atiku madak kematila 9:3 karnau adiak-sanakku, jemau bangsauku. Lagi aku sukau didawaika ngan diceghaika ngan Keristus batan endak ughangtu. 9:4 Jemau Israil dipilia Allah, la dijadika ana'Au. KuasauNyau la dinyatauka ngan ughangtu. Diautu la bejanji ngan ughangtu, la dienjuakka ukum Taurat, la dikiciakka carau sembayang ngan janji-janjiAu. 9:5 Ughangtu pengadau niniak puyang kami diau agungtu. Secarau manusiau Keristus asalau jak di bangsau itu. Allah diau nguasaui gegalaunyau dipuji selelamaunyau. Amin. 9:6 Titu ukan bereti, bansau janji Allah nidau lasung. Nyela, ukan gegalau jemau Israil njadi umatAu. 9:7 Lagi nidau gegalau pengadau Abraham dikiciakka anak Abraham nian. Allah ngiciakka ngan diau, "Cuman pengadau Isak ka dikiciakka pengadau kaba." 9:8 Itu bereti, ukan gegalau pengadau dikiciakka ana'au, cuman pengadau diau dijanjika Allah. 9:9 Karnau Allah bejanji luak ini, "Masau diau ditetapka Aku ka ngulang agi, mangku Sara ka adau sughang anak lanang." 9:10 Ukan itu ajau, Ribka adau duau ughang ana'au. Keduaunyau ba'au Isak, niniak puyang kitautu. 9:11 Antak ka duau ana'autu adau, Allah la milia sughang. Pilian Allah nidau bepaut ngan kerjau manusiau, tapitu bepaut ngan kendak Allah, karnau masau itu duau ughangtu lum pacak ngerjauka tuapau-apau, apu diau iluak apu diau ja'at. 9:12 Masau itu la dikiciakka ngan Ribka, "Anak diau tuau ka njadi budak adingau." 9:13 Dalam Injil ditulis luak ini, "Yakub Kusayangi, Isau Kuluatka." 9:14 Amun luak itu, tuapau kitau kiciakka mbak kini? Apu Allah nidau adil? La cetau Allah adil! 9:15 Allah la ngiciakka ngan Musa, "Aku ka iluak ngan jemau diau Kukenda'i, Aku ka nyayangi jemau diau endak Kusayangi." 9:16 Mangku pilian Allah nidau tepaut ngan kendak ngan kerjau jemau, tapitu ngan keilu'an Allah. 9:17 Dalam Injil Allah bekatau ngan Piraun, rajau Mesirtu, "Aku njadika kaba rajau, karnau Aku endak ngancakka kuasauKu di kaba, mangku namauKu dikeruani di gegalau deniau." 9:18 Mangku Allah nyialka jemau diau endak disialkaNyau. Diau mbuat jemau melawan, amun dikenda'iNyau. 9:19 Mangku kamu ka ngiciak ngan aku, "Amun luak itu, ngapau Allah masia nyalaka manusiau? Sapau pacak ngalangi kendak Allah?" 9:20 Sapau kamu, ui jemau, mangku endak nimbali Allah? Apu pacak setu diau dibuat ngiciak ngan diau mbuatau, "Ngapau aku dibuat luak ini?" 9:21 Apu ukan tukang peghiyuak behak ngerjauka tana liat sekenda'au? Tukangtu behak ngerjauka setu duau mecam pakai sebungka diau semegi, semecam batan endak kerjau diau iluak, semecam batan endak kerjau diau biasau. 9:22 Luak itu pulau Allah endak nunjuakka maraHau ngan nyatauka kuasauNyau. Anyautu Diau ngaligh nian ngan jemau diau mesti diukum ikak mbuat Diau mara. 9:23 Allah pulau endak nunjuakka keagungan ngan kekayauan diau nidau abis-abis ngan kitau diau disayangiNyau, kitau diau la disediauka endak diagungka, 9:24 kitau diau la dipilia ukan cuman jak di jemau Yahudi, tapitu jak di jemau bangsau lain pulau. 9:25 Dalam kitab nabi Husia ditulis, "Jemau ukan umatKu ka Kukiciakka 'umatKu'. Bangsau diau nidau Kusayangi ka Kujadika kesayanganKu." 9:26 Mangku, "Di bada jemau dikiciakka, 'ukan umatKu', di situ ughangtu ka dikiciakka 'anak Allah diau idup'." 9:27 Nabi Yesaya ngiciakka jemau Israil luak ini, "Empuak jemau Israil banyak nian luak bungin di laut, cuman dikit ajau diau ka selamat, 9:28 karnau nidau lamau agi Tuhan ka ngukum isi deniau." 9:29 Yesaya ngiciak pulau senitu luak ini, "Misalau Allah diau Mahakuasau ngabiska pengadau kitau, gegalau kitau njadi luak Sudum ngan Gumura." 9:30 Amun luak itu, tuapau kesimpulan kitau? Tuapau pacak kitau kiciakka? Ini: bansau jemau bangsau lain diau nidau beusaha endak dibenaghka Allah, la dibenaghka karnau percayau. 9:31 Anyautu jemau Yahudi diau maju beusaha na'ati ukum endak dibenaghka Allah nidau buasil. 9:32 Ngapau pulau nidau buasil? Karnau ughangtu ngerjauka titu ukan karnau percayau, tapitu ngaghapka kerjaunyau sendighi. Mangku ughangtu telabua karnau tuantuak ngan batu diau njadi pengalang. 9:33 Ceritau batutu la ditulis dalam Injil luak ini, "Keruanila, di Siun la Kutepiakka sebua batu diau mbuat jemau tuantuak ngan telabua. Mangku bilang jemau diau percayau ngan Diau nidau ka dimaluka."

Rum 10

10:1 Kantin-kantinku, aku endak nian, supayau bangsauku diselamatka. Mangku aku bedu'a ngan Allah ndu'akanyau. 10:2 Aku beghani ngiciakka ughangtu ta'at nian ngan agamaunyau, anyautu ughangtu nidau terti carau diau benagh. 10:3 Ughangtu nidau terti carau manusiau seilu'an ngan Allah. Ughangtu ngikut carau ughang itula, nidau nerimau carau diau ditunjuakka Allah. 10:4 Tujuan ukum Taurat la ditepati Keristus, mangku bilang jemau diau percayau njadi seilu'an ngan Allah. 10:5 Musa nulis, bansau jemau diau endak dibenaghka Allah karnau ukum Taurat, jemautu ka idup, amun ta'at nian ngan ukumtu. 10:6 Anyautu ceritau carau jemau dibenaghka karnau percayau ngan injil dikiciakka luak ini, "Nidau nanti kaba ngiciak dalam ati, 'Sapau ka nayiak ke sergau?' " Retiau endak ngajung Keristus tughun. 10:7 "Ngan, 'Sapau ka tughun ke deniau jemau mati?' " Retiau endak ngajung Keristus nayiak jak di deniau jemau mati. 10:8 Luak inila ditulis dalam Injil, "Katau Allah adau guak kamu, adau di mulut kamu ngan di ati kamu." Itula katau diau kami kiciakka, bansau jemau mesti percayau. 10:9 Karnau amun kamu ngaku'i ngan mulut, bansau Yesusla Tuhan, ngan percayau dalam ati, bansau Allah la ngidupka Diau jak di mati, kamu ka selamat. 10:10 Ngan ati jemau percayau mangku dibenaghka. Ngan mulut jemau ngaku'i mangku diselamatka. 10:11 Karnau di Injil ditulis, "Jemau diau percayau nidau ka dimaluka." 10:12 Titu batan endak gegalau jemau, empuak jemau Yahudi empuak jemau bangsau lain, nidau bediau bidahau, karnau Allah diau sughangtu Tuhan gegalau jemau. Diau iluak nian ngan gegalau jemau diau mintak tulung ngan Diau. 10:13 Dalam Injil ditulis, "Bilang jemau diau mantau namau Tuhan ka diselamatka." 10:14 Anyautu luak manau ughangtu pacak mantau Tuhan, amun lum percayau? Luak manau pacak percayau, amun lum ndengagh ceritauNyau? Luak manau pacak ndengagh ceritauNyau, amun nidau bediau jemau diau ngiciakkanyau? 10:15 Mangku luak manau pulau jemau pacak ngiciakkanyau, amun nidau diajung? Dalam Injil ditulis luak ini, "Alaka lema'au nerimau jemau datang ngiciakka ceritau iluak jak di Allah." 10:16 Anyautu nidau gegalau jemau nerimau ceritau itu. Yesaya la ngiciak, "Tuhan, sapau ka percayau ngan kici'an kamu?" 10:17 Jadi, jemau percayau karnau ndengagh, mangku jemau ndengagh karnau adau diau ngiciakka ceritau Keristustu. 10:18 Mangku aku betanyau, apu nyela ughangtu lum ndengaghkanyau? Cetau la ndengagh, karnau di Injil ditulis luak ini, "Suarau ughangtu la tedengagh di manau-manau, kici'an ughangtu la sampai ke gegalau deniau." 10:19 Aku betanyau agi, apu jemau Israil lum keruan? Katau Musa nimbalinyau, "Luak inila katau Allah, 'Aku ka mbuat kamu sengit ngan jemau diau ukan umatKu, Aku ka mbuat kamu mara ngan jemau diau bigal.' " 10:20 Lagi pulau Yesaya ngiciak ngan beghani, "Luak ini katau Allah, 'Jemau diau nidau ndalak Aku la betemu ngan Aku. Aku la ngancakka diriKu ngan jemau diau nidau nanyauka ceritauKu.' " 10:21 Ceritau jemau Israil dikiciakka Yesaya luak ini, "Luak ini katau Allah, 'Aku maju endak bedamai ngan ughangtu, anyautu ughangtu maju melawan ngan enggup ta'at.' "

Rum 11

11:1 Aku betanyau agi, apu Allah la ncapakka umatAu? Nidau ka adau! Karnau akuni pulau jemau Israil, pengadau Abraham jak di jungku Benyamin. 11:2 Allah nidau ncapakka umatAu diau dipiliHau jak di senitu. Cengki kamu la keruan setu diau ditulis di Injil ceritau Elia ngaduka jemau Israil ngan Allah, kataunyau, 11:3 "Tuhan, nabi-nabi Dighi la ughangtu bunua, mija bada bekerban la ughangtu ancurka. Tigha aku sughang, mangku ughangtu endak mbunua aku pulau." 11:4 Mangku tuapau timbal Allah ngan Elia? "Aku la nighaka tujua ribu ughang batan endak Aku. Ughangtu nidau kekela nyemba diwau Ba'al." 11:5 Luak ini pulau mbak kini adau tigha jemau diau dipilia Allah karnau keilu'anNyau. 11:6 Diau milia ughangtu karnau keilu'anNyau, ukan karnau kerjau ughangtu. Amun Allah milia jemau nurut kerjaunyau, mangku keilu'an itu ukan keilu'an nian. 11:7 Rupaunyau jemau Israil nidau dapat setu diau didalak, anyautu jemau diau ndapatau jemau diau dipilia Allah. Diau lain nuli, mangku nidau pacak ndengagh suarau Allah. 11:8 Dalam Injil ditulis luak ini, "Allah mbuat ughangtu nidau pacak berupuak. Enggut mbak kini ughangtu nidau pacak nginak ngan nidau pacak ndengagh." 11:9 Daud bekatau, "Nengkela ughangtu tejeghat ngan kerjau ughangtu diau bereruyalan, mangku ughangtu sesat ngan diukum. 11:10 Nengkela pengina'an ughangtu njadi keleman mangku nidau pacak nginak. Nengkela ughangtu mbengkung selelamaunyau karnau banyak penanggungan." 11:11 Mangku aku betanyau, apu jemau Yahudi sesat, supayau benasau? Nidau nian. Anyautu karnau ughangtu bedusau, jemau bangsau lain diselamatka, supayau ughangtu njadi sengit. 11:12 Jemau Yahudi besala ngan nidau nuruti kendak Allah, mangku Allah iluak nian ngan jemau bangsau lain, apau agi amun jemau Yahudi seilu'an ngan Allah, cengki besakla keilu'an Allah ngan gegalau deniau. 11:13 Mbak kini aku endak ngiciak ngan kamu, ui jemau diau ukan jemau Yahudi. Aku rasul batan endak jemau ukan jemau Yahudi, mangku riang nian ngan kerjaukuni. 11:14 Aghapanku, supayau bangsauku njadi sengit. Mangku ngan carau luak itu aku pacak nyelamatka separau jak di ughangtu. 11:15 Ughangtu nidau diterimau Allah, mangku deniau seilu'an agi ngan Allah. Apau agi amun ughangtu diterimau Allah. Cetau titu semegi ajau ngan jemau mati idup agi. 11:16 Amun sebua ruti dienjuakka ngan Allah, mangku gegalaunyau njadi hak Allah. Amun akagh sebatang kayu hak Allah, mangku cangkahau hak Allah pulau. 11:17 Separau cangka kayu saitun diau iluak diau diumpamauka jemau Yahudi la ditetak. Mangku cangka kayu diau karut dicangkuakka di guak teta'an tadi. Kamu diumpamauka cangka cangku'antu, mangku kamu idup jak di batang diau iluak. 11:18 Jangan nganggap kamu lebia jak di cangka diau ditetaktu. Ingatkala, bansau kamu cuman cangka ajau. Ukan cangka ngenjuakka idup ngan akagh, tapitu akagh ngenjuakka idup ngan cangka. 11:19 Asauku kamu ka bekatau, "Nyela, anyautu cangkatu ditetak, supayau aku pacak dicangkuakka di batangtu." 11:20 Nyela nian. Ughangtu dicapakka karnau nidau percayau. Kamu diterimau karnau percayau. Jangan kamu geduak. Kamu mesti takut, 11:21 karnau amun Allah nidau sial ncapakka jemau Yahudi diau luak cangka asli tadi, jangan sangkau Diau ka sial ncapakka kamu. 11:22 Kitau nginak keilu'an Allah ngan ketegasan Allah. Diau tegas ngan jemau diau bedusau, tapitu iluak ngan kamu, amun kamu maju idup pantas nerimau keilu'anNyau. Amun nidau, kamu pulau ka dicapakka. 11:23 Mangku jemau Israil pulau, amun la percayau agi, ughangtu ka diterimau agi, karnau Allah pacak nerimau ughangtu agi. 11:24 Amun kamu diau la diambiak jak di batang saitun diau karut mangku pacak dicangkuakka di batang saitun diau iluak, apau agi ughangtu, cengki mura diulangka ke batang asalau. 11:25 Kantin-kantinku, mangku supayau kamu jangan nganggap kamu la keruan gegalaunyau, aku endak supayau kamu ngeruani resiau ini: Separau jak di jemau Israil melawan, anyautu cuman enggut bilangan jemau bangsau lain diau percayau la cukup. 11:26 Mangku gegalau jemau Israil ka diselamatka, karnau di Injil ditulis luak ini, "Rajau Penyelamat ka datang jak di Siun. Diau ka ngabiska gegalau keja'atan pengadau Yakub. 11:27 Aku ka neguaka janjiKuni ngan ughangtu, masau Aku ngabiska dusau ughangtu." 11:28 Jemau Israil enggup nerimau ceritau iluak jak di Allah mangku njadi musua Allah. Titu njadi untung ngan kamu. Anyautu karnau Allah milia ughangtu, ughangtu maju disayangi Allah karnau niniak puyang ughangtu. 11:29 Karnau Allah nidau kekela nyesali keilu'an ngan pilianNyau. 11:30 Senitu kamu nidau ta'at ngan Allah, mbak kini la dibenaghka Allah, karnau ughangtu nidau ta'at. 11:31 Luak itu pulau ughangtu mbak kini nidau ta'at, supayau kamu disialka, mangku nanti ughangtu pulau ka disialka. 11:32 Allah la ngenangka gegalau manusiau nidau ta'at, supayau Diau pacak nyatauka keilu'anNyau ngan gegalau jemau. 11:33 Alaka kayau nian ngan bepengertian nian Allah ngan ngeruani gegalaunyau. Nidau sughang kiala pacak ngeruani rencanauNyau. Nidau sughang kiala pacak ngeruani carauNyau. 11:34 Di Injil ditulis, "Sapau diau ngeruani rupu'an Tuhan? Sapau pulau pacak ngenjuak petua-peturun ngan Diau? 11:35 Sapau pacak ngenjuak ngan Diau, mangku pacak mintak balasan?" 11:36 Gegalaunyau dijadika Allah, asalau jak di Allah, batan endak Allah. Allah diagungka selelamaunyau Amin.

Rum 12

12:1 Mangku, kantin-kantinku, Allah iluak nian ngan kitau. Itula sebapau aku mintak nian ngan kamu, supayau kamu nyeraka diri kamu njadi kerban diau idup batan endak Allah ngan melemakka atiAu. Luak itula semestiau kamu nyemba Allah. 12:2 Jangan menau carau deniauni. Enangka Allah ngubai ati kamu, supayau carau idup kamu njadi empai, mangku kamu pacak ngeruani kendak Allah, tuapau diau iluak diau melemakka ati Allah ngan diau sempernau. 12:3 Allah la ngenjuakka pengertian ngan aku, mangku aku ngici'i gegalau kamu, jangan nganggap diri kamu lebia jak di sebenaghau. Anyautu kamu mesti merupuakka diri kamu ngan ngensian, bilang ughang nurut kesanggupan percayau diau dienjuakka Allah ngan kamu. 12:4 Badan kitau banyak dandanan. Bilang dandanan lain gunaunyau. 12:5 Luak itu pulau kitau. Empuak banyak, kitau cuman sutiak badan karnau seghundak ngan Keristus. Mangku bilang kitau dandananNyau luak dandanan sutiak badan. 12:6 Bilang kitau adau kesanggupan diau dienjuakka Allah ngan kitau sesughangan nurut kenda'Au, mangku kitau mesti nggunaukanyau. Amun jemau pacak ngiciakka katau Allah, diau mesti ngerjaukanyau nurut imanau. 12:7 Jemau diau pacak nulung jemau mesti nulung nian. Jemau diau pacak ngajagh mesti ngajagh nian. 12:8 Jemau diau pacak muji jemau mesti muji nian. Jemau diau pacak ngenju'i jemau mesti ngenjuak nian ngan sepantasau. Jemau diau pacak mimpin mesti mimpin nian. Jemau diau pacak nyialka jemau mesti nyialkanyau ngan riang. 12:9 Jangan cak nyayangi. Luatka diau ja'at, kerjaukala diau iluak. 12:10 Kamu mesti sangi sayangi luak jemau duau beghading, simbang-cepat sangi regaui. 12:11 Rajinla bekerjau, jangan malas. Bekerjaula batan endak Tuhan ngan riang jak di Rua Allah. 12:12 Aghapkala Tuhan ngan riang. Amun adau penanggungan, ngalighla ngan maju bedu'a. 12:13 Tulungla kantin diau percayau diau nidau bediau tuapau-apau. Terimaula jemau di ghuma kamu ngan riang. 12:14 Mintak ngan Allah setu diau iluak batan endak jemau diau meluatka kamu, du'akala, jangan didawaika. 12:15 Riangla ngan jemau diau riang, nangisla ngan jemau diau nangis. 12:16 Suijauanla sughang ngan diau lain. Jangan geduak. Terimaula pulau jemau diau nidau diregaui. Jangan anggap diri kamu pintar. 12:17 Jangan balaska ja'at ngan ja'at. Kerjaukala diau dianggap gegalau jemau iluak. 12:18 Kamu mesti beusaha idup damai ngan gegalau jemau. 12:19 Kantin-kantinku diau kusayangi, jangan kamu ndendam. Nengkela Allah diau ngukum, karnau di Injil ditulis, "Allah bekatau, 'Akula diau mbalas, Akula diau ngukumau.' " 12:20 Anyautu amun musua kamu lapagh, enju'i diau makan. Amun diau aus, enju'i diau minum. Ngan carau luak itu diau ka maluan. 12:21 Jangan endak dikalaka ngan setu diau ja'at, anyautu kalakala keja'atan ngan keilu'an.

Rum 13

13:1 Bilang jemau mesti na'ati pemerinta, karnau pemerinta asalau jak di Allah. Pemerintatu ditetapka Allah. 13:2 Itula sebapau jemau diau melawan pemerinta semegi ajau ngan melawan setu diau ditetapka Allah. Jemau diau ngerjauka titu mintak diukum. 13:3 Jemau diau bebuat iluak nidau nanti takut ngan pemerinta. Jemau diau bebuat ja'at ajau diau takut. Amun kamu endak, supayau kamu nidau takut ngan pemerinta, kamu mesti ngerjauka setu diau iluak, mangku kamu dipuji. 13:4 Pemerintatu wakil Allah endak ngerjauka setu diau begunau batan endak kamu. Anyautu amun kamu ngerjauka setu diau ja'at, kamu mesti takut, karnau diau adau kuasau ngukum. Pemerintatu wakil Allah endak ngukum jemau diau bebuat ja'at. 13:5 Karnau itu kitau mesti ta'at ngan pemerinta, ukan ajau karnau enggup diukum, tapitu pulau karnau suarau ati keciak kitau. 13:6 Itula pulau sebapau kamu mbayighi cuki, karnau pemerinta wakil Allah diau ngurus cukitu. 13:7 Bayighila ngan gegalau jemau setu diau mesti dibayighi. Bayighila gegalau cuki diau mesti kamu bayighi. Regauila gegalau jemau diau mesti diregaui. 13:8 Jangan beutang tuapau-apau ngan sapau kila. Cuman semecam ini diau mesti kamu kerjauka: sangi sayangi. Karnau jemau diau nyayangi kantinau la na'ati gegalau ukum Taurat. 13:9 Perinta ini: jangan menaugawia, jangan mbunua, jangan maling, jangan ngibauka barang jemau. Gegalaunyautu ngan perinta diau lain pulau disimpulka ngan perinta ini: "Sayangila kantin kaba luak kaba nyayangi diri kaba." 13:10 Jemau diau nyayangi kantinau nidau ka ngerjauka setu diau ja'at ngan diau. Karnau itu jemau diau nyayangi kantinau la nuruti ukum Taurat. 13:11 Gegalaunyautu mesti kamu kerjauka. Kamu la keruan, masau mbak kini kitau mesti bangun jak di tiduak, karnau pasighla mbak kini masau kitau diselamatka sangkan masau kitau percayau senitu. 13:12 Malam laka lalu. Aghi laka siang. Karnau itu mela kitau mandakka kerjau ja'at diau dikerjauka di keleman. Kitau mesti ngenauka pakaian terang. 13:13 Kitau mesti iluak-iluak luak jemau diau idup dalam terang. Jangan bereruyalan, jangan memabu'an, jangan menaugawia, jangan nuruti serilau, jangan belagau, jangan sengit. 13:14 Enangka Tuhan Yesus Keristus njagaui kamu. Jangan nuruti serilau manusiau diau bedusau, jangan muaskanyau.

Rum 14

14:1 Jemau diau nidau tegua imanau mesti kamu terimau ngan iluak. Jangan bebala ngan diau mbalaka pendapatau. 14:2 Adau diau bependapat, bansau diau bulia makan tuapau kila. Adau diau nidau tegua imanau bependapat, bansau diau cuman bulia makan gulai tetaghuan ajau. 14:3 Jemau diau makan tuapau kila jangan nggelakka jemau diau makan tetaghuan ajau. Mangku jemau diau makan tetaghuan ajau jangan ngadili jemau diau makan gegalaunyau, karnau Allah la nerimau jemautu. 14:4 Kamu nidau bulia ngadili budak jemau. Apu diau benagh apu sala, itu urusan tuanau. Nyela, budak itu ka ngerjauka setu diau benagh, karnau Tuhan pacak njagaui diau, supayau maju ngerjauka setu diau benagh 14:5 Adau diau nganggap adau aghi, pentingla aghitu sangkan aghi lain. Adau diau lain nganggap gegalau aghi semegi. Nengkela bilang ughang yakin ngan pendapatau. 14:6 Jemau diau nganggap aghi penting ngerjauka titu endak meregaui Tuhan. Jemau diau makan gegalaunyau ngerjauka titu endak meregaui Tuhan pulau, karnau beterimau-kasia ngan Allah. Luak itu pulau jemau diau nidau makan gegalaunyau. Diau ngerjauka titu endak meregaui Tuhan, ngan pulau beterimau-kasia ngan Allah. 14:7 Nidau sughang kia jak di kitau idup batan endak diriau ngan mati batan endak diriau. 14:8 Kitau idup, idup batan endak Tuhan. Kitau mati, mati batan endak Tuhan. Empuak idup empuak mati kitauni hak Tuhan. 14:9 Keristus la mati ngan idup agi, mangku Diau njadi Tuhan jemau diau mati ngan jemau diau idup. 14:10 Kantin-kantinku, tuapau gunaunyau kamu ngadili kantin kamu? Tuapau gunaunyau nggelakka kantin kamu? Gegalau kitau ka ngadap Allah endak diadili. 14:11 Di Injil ditulis luak ini, "Katau Tuhan, 'Ngenian, bilang jemau ka nunduak nyemba Aku. Bilang jemau ka ngaku'i Aku Allah!' " 14:12 Gegalau kitau mesti nanggung-jawabka gegalau kerjau kitau ngan Allah. 14:13 Karnau itu jangan agi kitau sangi salaka. Anyautu beusahala, supayau kamu jangan mbuat kantin kamu bedusau ngan nyesatka diau. 14:14 Aku seghundak ngan Tuhan Yesus, mangku aku keruan nidau bediau setu diau asalau aram, anyautu ngan jemau diau nganggap titu aram nyela titu aram. 14:15 Amun kamu nyakiti ati kantin kamu karnau makanan, kerjau kamutu nyatauka kamu nidau nyayangi diau. Jangan mbenasauka kantin kamu karnau makanan, karnau Keristus la mati batan endak diau. 14:16 Setu diau iluak batan endak kamu jangan enangka digelakka jemau. 14:17 Amun Allah njadi rajau dalam idup jemau, makan diau aram ngan alal nidau penting agi. Diau penting nuruti kendak Allah, idup tenang ngan riang. Titu dienjuakka Rua Allah. 14:18 Amun jemau bekerjau batan endak Keristus ngan carau luak itu, jemautu melemakka ati Allah ngan diregaui jemau. 14:19 Itula sebapau kitau mesti beusaha, supayau idup suijauan ngan sangi teguaka. 14:20 Jangan merusakka kerjau Allah karnau makanan. Gegalau makanan bulia dimakan. Anyautu amun setu diau kamu makan mbuat jemau bedusau, kamutu besala. 14:21 Iluakla nidau makan daging, ngan nidau minum anggur ngan nidau ngerjauka tuapau-apau, amun titu mbuat kantin kitau bedusau. 14:22 Setu diau kamu yakintu kerjaukala di adapan Allah ajau. Riangla jemau diau nidau meghasau besala ngan setu diau dianggap iluak endak dikerjauka. 14:23 Amun jemau asau-asau ngan setu diau endak dimakan, mangku masia dimakan, jemautu besala, karnau kerjaunyautu nidau dikerjauka nurut kepercayauannyau. Gegalaunyau diau dikerjauka nidau nurut kepercayauan itu dusau.

Rum 15

15:1 Kitau diau tegua imanau mesti ngaligh ngan jemau diau nidau semegi pendapat ngan nidau tegua imanau. Jangan kitau melemakka ati kitau ajau. 15:2 Bilang kitau mesti melemakka ati kantin kitau batan endak keilu'annyau, mangku diau tamba percayau. 15:3 Keristus pulau nidau merupuakka diriAu ajau. Di Injil ditulis, "Gegalau gela'an diau kaba asauka la Kutanggungka." 15:4 Gegalaunyau diau la ditulis di Injil endak ngajagh kitau, supayau kitau tekun ngan tegua ngaghapka Allah, karnau ajaghan Injiltu. 15:5 Aku bedu'a, supayau Allah mbuat kamu suijauan ngan menau Keristus. Allahtu mbuat jemau tekun ngan tegua. 15:6 Mangku ngan suati gegalau kamu pacak muji Allah, Bapak Yesus Keristus, Tuhan kitau. 15:7 Karnau itu terimaula sughang ngan diau lain, luak Keristus pulau nerimau kamu, mangku Allah dipuji. 15:8 Ingatkala, bansau Keristus datang endak nulung jemau Yahudi, supayau ngerti, bansau Allah itu pacak dipercayaui ngan nepati janjiAu ngan niniak puyang kitau. 15:9 Diau pulau mbuat jemau bangsau lain meregaui Allah, karnau keilu'an atiAu ngan ughangtu. Di Injil ditulis, "Karnau itu aku ka muji Dighi di antarau jemau bangsau lain. Aku ka benyanyi muji namau Dighi." 15:10 Mangku pulau, "Ui, bangsau-bangsau, beriangla kamu ngan umat Allah." 15:11 Lagi, "Pujila Allah, ui gegalau bangsau. Gegalau jemau mesti muji Diau." 15:12 Mangku nabi Yesaya la ngiciak, "Jak di pengadau Isai ka adau sughang diau merinta bangsau-bangsau. Ughangtu ka ngaghapka Diau." 15:13 Allah itu bada kamu buaghap. Aku bedu'a, supayau Allah mbuat ati kamu riang ngan meghasau damai karnau kamu percayau, mangku ngan kuasau Rua Allah kamu ka tamba ngaghapka Diau. 15:14 Kantinkantinku, aku keruan, bansau kamutu iluak. Kamutu pulau la keruan gegalaunyau, mangku pacak sangi ajaghi. 15:15 Mangku dalam surat ini aku beghani nulis bebeghapau petua-peturun ngan kamu, karnau titu la ditugaska Allah ngan aku. 15:16 Diautu ngajung aku bekerjau batan endak Yesus Keristus. Diau njadika aku imam batan endak ngiciakka ceritau iluak jak di Allah ngan jemau bangsau lain, supayau ughangtu nyeraka diriau ngan Allah endak idup melemakka ati Allah ngan diberesiaka Rua Allah. 15:17 Karnau aku seghundak ngan Keristus, aku bulia meghasau bangga, karnau bekerjau batan endak Allah. 15:18 Aku beghani ngiciak luak itu ngiciakka cuman setu diau dikerjauka Keristus karnau aku, supayau mbuat jemau bangsau lain ta'at ngan Allah. Aku ngerjauka titu ngan kici'anku ngan perembakku, 15:19 ngan kuasau ngan tandau nyelia. Gegalaunyautu karnau kuasau Rua Allah. Luak itula kerjauku di manaumanau, mulai jak di Yerusalim enggut Ilirikum aku ngiciakka gegalau ceritau iluak nceritauka Keristus. 15:20 Tujuanku jak di senitu endak ngiciakka ceritau iluak jak di Allah di guak jemau diau lum ndengaghka ceritau Keristustu, karnau aku enggup ndalak untung jak di kerjau jemau. 15:21 Luak ditulis di Injil, "Jemau diau lum kekela ndengagh ceritauNyau ka keruan. Jemau diau lum nerimaunyau ka ngerti." 15:22 Itula sebapau aku lum pacak berayak ngan kamu. 15:23 Anyautu mbak kini kerjauku di daira ini la udim. La lamau aku endak berayak ngan kamu. 15:24 Nanti amun aku ke Sepanyul, aku pacak berayak ngan kamu, mangku betunggal jerang ngan kamu. Udim itu kamu pacak nulung aku melajuka pejalananku ke Sepanyul. 15:25 Anyautu mbak kini aku endak pegi ke Yerusalim kudai, endak mbatak tanci batan endak umat Allah di situ. 15:26 Karnau jemau Keristen di Makedunia ngan Akaya la nyetujui endak nunggalka tanci batan endak jemau Keristen diau serik di Yerusalim. 15:27 Nyela, ngan riang nian ughangtu ngerjauka titu. Sepantasau ughangtu nulung kantin kitau di situ. Jak di jemau Yahudi jemau bangsau lain la nerimau keilu'an Allah, mangku ughangtu sepantasau ngenjuakka jak di retau bendaunyau ngan ughang tadi. 15:28 Amun kerjaukuni la udim, la kuseraka tanci diau la ditunggalka ughangtu, aku ka bejalan ke Sepanyul, mangku lalu di guak kamu. 15:29 Mangku aku keruan, amun aku datang berayak ngan kamu, aku ka mbatak banyak setu diau iluak jak di Keristus. 15:30 Karnau kitau semegi percayau ngan Keristus ngan kitau sangi sayangi karnau Rua Allah, mangku aku mintak nian, supayau kamu ndu'aka aku. 15:31 Bedu'ala, supayau jemau di Yudia diau nidau percayau nidau ngancam aku, supayau kerjauku batan endak Yerusalim diterimau jemau Keristen di situ ngan riang. 15:32 Mangku amun Allah ngenda'i, aku pacak berayak ngan kamu ngan riang, mangku aku diteguaka di guak kamu. 15:33 Aku bedu'a, supayau Allah diau ngenjuakka damai ngan manusiau nyertaui gegalau kamu. Amin.

Rum 16

16:1 Aku endak ngiciakka kantin kitau Pibe ngan kamu. Diautu bekerjau batan endak Tuhan di guak jemau Keristen di Kengkeria. 16:2 Terimaula diau dalam Tuhan ngan carau diau pantas batan endak jemau percayau. Tulungla diau, amun diau kurangan, karnau diau la banyak nulung jemau, temasuak aku. 16:3 Sampaika pesanku ngan Periska ngan Akwila, kantin sekerjauku batan endak Keristus. 16:4 Ughang duautu mati-matian endak ngilakka nyawauku. Aku beterimau-kasia nian ngan ughangtu. Ukan ajau aku diau beterimau-kasia ngan ughang duautu, tapitu gegalau jemau Keristen jak di bangsau lain. 16:5 Sampaikala pulau pesanku ngan jemau Keristen diau betunggal di ghuma ughang duautu. Pesan pulau ngan Ipenitus diau kusayangi. Diautu jemau diau dulu sekali percayau ngan Keristus di daira Asia. 16:6 Pesanku pulau ngan Maria diau la bekerjau nian batan endak kamu. 16:7 Sampaikala pulau pesanku ngan Anderunikus ngan Yunias. Ughang duautu sebangsau ngan aku ngan pulau tejil serempak ngan aku. Ughang duautu la percayau antak ka aku percayau ngan tekenal jak di rasul. 16:8 Pesanku ngan Ampeliatus diau kusayangi. Diau njadi kantinku karnau semegi percayau ngan Tuhan. 16:9 Pesanku ngan Urbanus, kantin sekerjau kitau batan endak Keristus ngan pulau Setakis diau kusayangi. 16:10 Pesanku ngan Apelis diau la diuji karnau Keristus. Pesan pulau ngan kapu Aristubulus. 16:11 Pesanku ngan Herudiun diau sebangsau ngan aku. Pesanku pulau ngan kapu Narkisus diau la percayau. 16:12 Pesanku ngan Teripina ngan Teripusa diau mbanting tulang bekerjau batan endak Tuhan. Pesanku ngan Persis diau kusayangi diau pulau mbanting tulang nian bekerjau batan endak Tuhan. 16:13 Pesanku ngan Rupus, jemau diau dipilia Tuhan, ngan endu'au diau kuanggap luak makku. 16:14 Sampaikala pulau pesanku ngan Asinkeritus, Peligun, Hermis, Patrubas, Hermas ngan gegalau kantin percayau diau seghundak ngan ughangtu. 16:15 Pesanku pulau ngan Pilulugus ngan Yulia, ngan Narius ngan kelawaiau ngan Ulimpas ngan gegalau jemau percayau diau seghundak ngan ughangtu. 16:16 Sangi pesankala kamu ngan carau diau iluak. Gegalau jemau Keristen bepesan ngan kamu. 16:17 Kantin-kantinku, aku mintak nian, supayau kamu sepepadau ngan jemau diau melawan ajaghan diau la kamu terimau, diau mbuat kacau ngan nyesatka. Jawuhi jemau luak itu, 16:18 karnau jemau diau ngerjauka titu ukan bekerjau batan endak Keristus, Tuhan kitau. Jemau itu bekerjau batan endak muaska serilaunyau. Ngan makai katau diau iluak ngan lemak didengagh ughangtu nipuka jemau diau iluak. 16:19 Gegalau jemau la keruan kamu ta'at nian. Karnau itu aku riang ngan ceritau kamu. Aku endak, supayau kamu bepengertian ngan setu diau iluak, tapitu bigal ngan setu diau ja'at. 16:20 Allah ngenjuakka damai ngan manusiau. Diau ka cepat ngancurka kuasau iblis ngan nunduakka diau ngan kamu. Yesus, Tuhan kitau, maju iluak ngan kamu. 16:21 Timutius, kantin sekerjauku, bepesan ngan kamu. Luak itu pulau Lukius, Yasun ngan Susipatir, jemau sebangsau ngan aku. 16:22 Diau nulis surat ini aku, Tertius. Aku bepesan ngan kamu diau semegi percayau ngan Tuhan. 16:23 Gayus bepesan ngan kamu. Aku numpang di ghumahau ngan jemau Keristen pulau betunggal endak sembayang di situ. Erastus, kepalak menyapi tanci kuta, bepesan ngan kamu. Luak itu pulau kantin kitau Kuartus. 16:24 Aku bedu'a, supayau Tuhan kitau, Yesus Keristus, iluak nian ngan gegalau kitau. Amin. 16:25 Tepujila Allah! Diau bekuasau neguaka kamu nurut ceritau iluak jak di Allah diau kuceritauka ngiciakka Yesus Keristus. Aku ngiciakka titu nurut setu diau dinyatauka Allah ceritau rencanau Allah diau buabad-abad nidau dikeruani jemau. 16:26 Anyautu mbak kini rencanau itu la dinyatauka karnau perinta Allah, mangku dikiciakka ngan gegalau bangsau jak di tulisan nabi-nabi, supayau ughangtu percayau ngan ta'at ngan Allah. 16:27 Cuman Diau sughang itula Allah diau bepengertian nian. Aku bedu'a supayau Diau maju diagungka selelamaunyau karnau Yesus Keristus! Nyela nian. Amin.

1 Kurintus 1

1:1 Jak di Paulus, diau dipilia Allah njadi rasul Yesus Keristus, ngan jak di Sustenis, kantin kitau, 1:2 batan endak jemau Keristen di Kurintus, jemau diau la dipilia Allah njadi umatAu ngan melemakka atiAu karnau Keristus Yesus, ngan gegalau jemau di manau ajau diau nyemba Tuhan kitau Yesus Keristus, Tuhan ughangtu ngan Tuhan kitau pulau. 1:3 Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai ngan gegalau kamu. 1:4-5 Aku maju beterimau-kasia ngan Allah, karnau kamu la nerimau keilu'an Allah karnau la seghundak ngan Yesus Keristus, mangku kamu la njadi kayau ngan gegalaunyau, kayau ngan katau, kayau ngan pengertian. 1:6 Itu tandaunyau, bansau ceritau Keristus la meghesap dalam ati kamu. 1:7 Mangku kamu nidau kurang tuapau-apau pengenjuak Rua Allah, penarau kamu nunggu Tuhan kitau Yesus Keristus datang agi. 1:8 Diau pulau ka neguaka ngan njagaui kamu enggut pengabisan, mangku kamu nidau becacat masau aghi Tuhan kitau Yesus Keristus datang. 1:9 Allah ka ngerjaukanyau. Diautu pacak dipercayaui nian. Diaula milia kamu njadi seghundak ngan Ana'Au Yesus Keristus, Tuhan kitau. 1:10 Dalam namau Tuhan kitau Yesus Keristus aku mintak nian, supayau kamu suijauan ngan jangan adau diau bebala, anyautu kamu mesti semegi pendapat. 1:11 Karnau adau jak di kapu Kelui diau la ngiciakka ngan aku, bansau adau jak di kamu diau bebala. 1:12 Inila diau kukiciakka: Adau diau ngatauka, "Aku ngikut Paulus," adau diau lain agi bekatau, "Aku ngikut Apulus," adau agi diau bekatau, "Aku ngikut Pitrus," mangku adau pulau diau bekatau, "Aku ngikut Keristus." 1:13 Baghia Keristus dibagi-bagi? Apu Paulus mati di kayu salip batan endak kamu? Apu kamu dibaptiska ngan namau Paulus njadi anak-buahau? 1:14 Untungla aku nidau mbaptis sughang kiala jak di kamu lain ngan Kerispus ngan Gayus. 1:15 Mangku nidau bediau diau pacak bekatau, bansau kamu dibaptis ngan namauku endak njadi anak-buaku. 1:16 Nyela, kapu Setipanus kubaptiska pulau, tapitu lain jak di itu pengingatanku endiak bediau agi diau kubaptiska. 1:17 Keristus ngajung aku ukan endak mbaptiska jemau, tapitu endak ngiciakka ceritau iluak jak di Allah. Itu pulau mesti kukerjauka, ukan karnau pintar ngiciak, supayau kematian Keristus di kayu salip jangan kesesiau ajau. 1:18 Ceritau Yesus mati di kayu salip dianggap mbu'ung ngan jemau diau ka benasau, anyautu ngan kitau diau ka diselamatka, itu kuasau Allah. 1:19 Dalam Injil Allah bekatau, "Kepintaran jemau bepengertian ka Kuabiska. Rupu'an jemau beilmu ka Kukacauka." 1:20 Mangku tuapau retiau jemau pintar? Tuapau retiau jemau beilmu ngan jemau pintar ngiciak? Allah la nyatauka, bansau kepintaran manusiau nidau bediau retiau. 1:21 Luak manau kila pintar manusiau, diau nidau ka pacak keruan Allah ngan kepintarannyautu. Anyautu karnau Allah bepengertian, Diau endak nyelamatka jemau diau percayau ngan Diau karnau ceritau iluak diau dianggap deniau kici'an bigal. 1:22 Jemau Yahudi mintak tandau nyelia njadi buktiau, jemau Yunani ndalak kepintaran manusiau. 1:23 Kamini ngiciakka Keristus mati di kayu salip. Ceritau itu nyinggung jemau Yahudi, jemau ukan Yahudi nganggap itu bigal. 1:24 Batan endak jemau diau la dipilia Allah, empuak jemau Yahudi empuak jemau ukan Yahudi, ceritau itu nyatauka kuasau Allah ngan pengertian Allah. 1:25 Karnau setu diau kina'an bigal di Allah, pintarla titu sangkan kepintaran manusiau; diau kina'an litak di Allah, teguala titu sangkan manusiau. 1:26 Cubau ingatka, luak manau idup kamu masau kamu dipilia Allah. Gi dikit ajau jak di kamu diau bepengertian nurut pandangan manusiau. Gi dikit diau bekuasau ngan bepangkat tinggi. 1:27 Allah sajauka milia diau dianggap bigal di deniauni, supayau jemau diau pintar dimaluka. Allah milia pulau diau dianggap deniau litak, supayau jemau diau gaga dimaluka. 1:28 Allah milia diau dianggap deniau inau ngan diau nidau bediau retiau, supayau diabiska diau diregaui deniau. 1:29 Mangku nidau sughang kia pacak ninggika diriau di adapan Allah. 1:30 Kamu seghundak ngan Keristus karnau Allah. Kitau bepengertian karnau Keristus. Diautu mbenaghka kitau ngan njadika kitau umat Allah ngan mbibaska kitau. 1:31 Mangku itu luak la ditulis di Injil, "Jemau diau endak bangga mesti mbanggaka setu diau dikerjauka Allah."

1 Kurintus 2

2:1 Kantin-kantinku, luak itu pulau, timpau aku datang guak kamu endak ngiciakka ngan kamu rencanau Allah, aku endiak ngiciak ngan katau pintar, nidau pulau makai kepintaran manusiau. 2:2 Karnau masau aku guak kamu, aku la mutuska nidau endak ngeruani tuapau-apau, lain jak di Yesus Keristus, lagi pulau Diautu mati di kayu salip. 2:3 Masau aku guak kamu, aku litak ngan gemetagh ketakutan. 2:4 Ceritau diau kukiciakka ngan kamu nidau kukiciakka ngan katau kepintaran manusiau, anyautu ceritautu kukiciakka ngan carau diau mbuktika kuasau Rua Allah. 2:5 Aku ngerjauka titu, supayau kamu percayau, ukan karnau asil kepintaran manusiau, tapitu karnau kuasau Allah. 2:6 Empuak luak itu, ngan jemau diau la tegua imanautu nyela aku ngajaghka bepengertian, anyautu pengertiantu ukan pengertian deniau, ukan pulau jak di penguasaupenguasau deniauni, jemau diau kuasaunyau ka lengit. 2:7 Pengertian diau kukiciakkatu pengertian jak di Allah. Pengertiantu nidau dikeruani deniau. Allah la nyediaukanyau batan endak keriangan kitau, antak ka deniau dijadikaNyau. 2:8 Nidau sughang kia jak di penguasau mbak kini diau keruan pengertian itu, karnau amun ughangtu la ngeruaninyau, cengki ughangtu nidau makuka Tuhan diau agungtu di kayu salip. 2:9 Luak itula diau ditulis dalam Injil, "Setu diau nidau kekela dikinak ngan didengagh manusiau, ngan nidau pulau kekela dirupuakka manusiau, titu disediauka Allah batan endak jemau diau nyayangiNyau." 2:10 Allah la ngajung RuaHau nyataukanyau ngan kitau, karnau Ruatu ngeruani gegalaunyau, lagi pulau rencanau Allah diau tebuni. 2:11 Diau ngeruani isi ati sughang jemau, rua jemau itula. Luak itu pulau ngan Allah, diau ngeruani isi ati Allah, Rua Allah itula. 2:12 Kitau nidau nerimau rua deniau, tapitu Rua diau asalau jak di Allah, mangku kitau keruan gegalaunyau diau la dienjuakka Allah ngan kitau. 2:13 Mangku, amun kami ngiciakka Allah ngan jemau diau adau Rua Allah, kami nidau ngiciakkaNyau nurut rupu'an jemau, tapitu nurut ajaghan Rua Allah. 2:14 Jemau diau nidau bediau Rua Allah nidau pacak nerimau setu diau dinyatauka Rua itu. Jemau luak itu nidau pacak ngerti, karnau nganggap titu bigal, karnau titu cuman pacak dikeruani, amun diajagh Rua Allah. 2:15 Jemau diau diajagh Ruatu pacak ngeruani reti gegalaunyau, anyautu diautu nidau pacak dikeruani sughang kiala. 2:16 Di Injil ditulis, "Sapau keruan rupu'an Tuhan? Sapau pacak nasihatiNyau?" Anyautu kamini adau rupu'an Keristus.

1 Kurintus 3

3:1 Mangku aku, kantin-kantinku, aku nidau pacak ngiciak ngan kamu luak ngiciak ngan jemau diau adau Rua Allah. Anyautu aku cuman pacak ngiciak ngan kamu luak ngan jemau diau gi idup nurut serilau manusiau, luak gi kupiak dalam iman Keristen. 3:2 Puan kuenjuakka ngan kamu senitu, ukan makanan jemau besak, karnau kamu lum pacak nerimaunyau. Mbak kini kamu lum pulau pacak nerimaunyau, 3:3 karnau kamu gi idup nurut serilau manusiau. Amun kamu gi sengit ngan belagau sughang ngan diau lain, apu titu ukan mbuktika, bansau kamu masia dikuasaui serilau manusiau, gi idup luak jemau deniauni? 3:4 Karnau adau diau ngiciak, "Aku anak-bua Paulus." Adau diau ngiciak, "Aku anak-bua Apulus." Apu titu ukan mbuktika, bansau kamu semegi ngan jemau deniauni diau nidau bediau Rua Allah? 3:5 Sebenaghau sapau Apulus, sapau Paulus? Kamini cuman pekerjau Allah diau mbimbing kamu percayau ngan Keristus. Kami cuman ngerjauka tugas diau diajungka Allah ngan kami sesughangan. 3:6 Aku nanam, Apulus ngayi'inyau, anyautu Allah itu diau numbuakanyau. 3:7 Mangku diau nanam ngan diau ngayi'inyau nidau penting; diau pentingtu Allah, sangkanau Diau numbuakanyau. 3:8 Diau nanam ngan diau ngayi'i semegi. Diau ka nerimau upa sesughangan nurut kerjaunyautula. 3:9 Kamini semegi ajau bekerjau batan endak Allah. Kamuni umpamau umau Allah, kamu pulau umpamau ghuma Allah. 3:10 Ngan pengertian diau dienjuakka Allah, aku luak tukang negakka ghuma la mbuat pelapiak batan endak ghuma itu, mangku jemau negakka ghuma di pucuak pelapiaktu. Bilang jemau mesti ngeruani, luak manau negak di pucu'autu. 3:11 Karnau nidau sughang kiala pacak mbuat pelapiak lain jak di diau la dibuat Allah, diautu Yesus Keristus. 3:12 Adau diau negakka ghuma di pucuak pelapiaktu makai emas, pirak ngan permatau, madak kayu, ghumput ngan jeghami. 3:13 Mangku kerjau bilang jemau ka kina'an, masau Keristus ngulang datang nanti, karnau ka dinyatauka ngan api. Aghi itu kerjau bilang jemau ka diuji ngan api, mangku keruan regaunyau. 3:14 Amun kerjau sughang jemau ta'an, diau ka nerimau upa. 3:15 Amun kerjaunyau mutung, diau ka rugi. Diautu ka diselamatka, anyautu luak jemau diau luput jak di api. 3:16 Keruan ngan kamu, bansau kamu ghuma Allah? Mangku kamu bada Rua Allah. 3:17 Amun adau jemau diau merusakka ghuma Allah, Allah pulau ka merusakka jemautu, karnau ghuma Allah itu suci. Kamunila ghuma Allahtu. 3:18 Jangan sughang kia nipuka diriau. Amun adau jak di kamu diau meghasau pintar nurut deniauni, nengkela diau njadi bigal, mangku diau bepengertian nian. 3:19 Setu diau dianggap deniau pintar dikiciakka Allah bigal. Dalam Injil ditulis, "Allah ngenangka manusiau tetangkap ngan kepintarannyau." 3:20 Mangku adau agi ditulis luak ini, "Tuhan keruan rupu'an jemau diau pintar. Gegalaunyautu endiak begati." 3:21 Karnau itu jangan adau diau langguak karnau sughang jemau. Gegalaunyau la dienjuakka njadi hak kamu: 3:22 empuak Paulus, empuak Apulus, empuak Pitrus, empuak deniau, empuak idup, empuak mati, empuak masau mbak kini, empuak masau nanti; gegalaunyautu hak kamu. 3:23 Anyautu kamu hak Keristus ngan Keristus hak Allah.

1 Kurintus 4

4:1 Anggapla kami pekerjau Keristus diau dipercayauka ngiciakka rencanau Allah diau lum keruan ngan deniau. 4:2 Diau penting, supayau pekerjautu pacak dipercayaui. 4:3 Amun aku, nidau ngapau-ngapau, apu aku diakimi kamu, apu jemau lain. Aku pulau nidau ngakimi aku sendighi. 4:4 Aku nidau meghasau besala, anyautu titu ukan mbuktika, bansau aku endiak besala. Tuhan itula ka netapka, apu aku besala apu nidau. 4:5 Itula sebapau, jangan kamu cepat ngakimi jemau, amun lum masaunyau, antak ka Tuhan datang. Diautu ka nginakka gegalaunyau diau dibunika di keleman. Diau ka ngancakka gegalaunyau diau direncanauka dalam ati manusiau. Masau itula bilang jemau ka nerimau jak di Allah pujian diau pantas diterimau. 4:6 Kantin-kantinku, katauku ini kukenauka ngan aku ngan Apulus njadi cuntau batan endak kamu, supayau kamu belajagh jak di kami tuapau reti kici'an ini: "Turutila peraturan diau adau." Jangan adau di guak kamu jemau diau ninggika diau sughang ngan nginauka diau lain. 4:7 Sapau njadika kamu lebia jak di jemau lain? Apu ukan gegalaunyau diau adau di kamu kamu terimau? Ngapau kamu geduak, luak setu diau adau di kamutu ukan jak di Allah? 4:8 Nyela, kamu la puas, nidau endak tuapau-apau agi. Kamu la kayau, la njadi rajau, kami nidau. Alaka ilu'au, amun kamu la njadi rajau nian, mangku kami pulau pacak njadi rajau ngan kamu. 4:9 Nurut pendapatku, ngan kami diau la njadi rasul Allah ngenjuakka bada diau inau sekali, luak jemau diau la diukum mati, mangku kami la njadi tuntunan deniau, malaikat ngan manusiau. 4:10 Karnau Keristus kamini bigal, kamutu pintar; kami litak, kamu kuat; kami digelakka, kamu dipuji. 4:11 Enggut mbak kini kami kelapaghan ngan keausan. Baju kami, baju jarit di badannila. Kami dilagaui, kami nidau bebada. 4:12 Kami mbanting tulang. Amun kami didawaika, kami mbalaska ngan du'a. Amun kami disaraui, kami ngaligh. 4:13 Amun jemau ngarutka kami, kami nimbal ngan katau iluak. Kami nidau lebia jak di sesara deniau, luak kapaghan enggut mbak kini. 4:14 Aku nuliska ini ukan endak maluka kamu, anyautu endak ngajagh kamu luak anakku diau kusayangi. 4:15 Empuak kamu beribu-ribu guru, bak kamu cuman sughang. Akunila bak kamu, karnau aku ngiciakka ceritau Keristus ngan kamu senitu, mangku kamu percayau. 4:16 Karnau itu aku ngajung kamu menau aku. 4:17 Itula sebapau aku ngajung Timutius guak kamu. Diautu anakku dalam Keristus diau kusayangi ngan pacak dipercayaui. Diau ka ngingatka kamu carau idupku ngikut Yesus Keristus, carau diau kuajaghka ngan jemau Keristen di manau kila. 4:18 Adau bebeghapau jemau jak di kamu diau la geduak. Ughangtu sangkau, aku nidau agi ka datang guak kamu. 4:19 Amun Tuhan ngenda'i, nidau lamau agi aku ka datang guak kamu, mangku aku ka ngeruani kuasau jemau geduaktu, ukan cuman kici'annyau ajau. 4:20 Karnau amun Allah njadi rajau dalam idup sughang jemau, titu dikeruani ngan kerjaunyau ukan ngan kici'annyau ajau. 4:21 Kamu endak luak manau? Apu kamu ngenda'i aku datang mbatak pemecit, apu kamu ngenda'i aku datang ngan sayang ngan sabar?

1 Kurintus 5

5:1 Jemau la ngiciakka, bansau adau jak di guak kamu diau menaugawia. Jemau diau nidau keruan Allah ajau nidau ngerjauka kerjau ja'at luak itu. Adau jemau lanang diau seghundak ngan enduak tighiau. 5:2 Empuak luak itu, kamu masia langguak. Semestiau kamu bingung ngan maluan, mangku melinsi jemau diau ngerjauka titu jak di guak kamu. 5:3 Empuak badanku endiak guak kamu, atiku maju merupuakka kamu, mangku aku la mutuska pekarau jemau diau ngerjauka titu, luak aku adau guak kamu. 5:4 Amun kamu betunggal dalam namau Tuhan Yesus, anggapla aku adau guak kamu dalam rua, mangku ngan kuasau Yesus, Tuhan kitau, 5:5 jemau itu mesti diseraka ngan Sitan, mangku badanau benasau ngan ruahau selamat, masau Tuhan datang nanti. 5:6 Nidau pantas kamu langguak. Asauku kamu la keruan, bansau ghagi dikit ngembangka gegalau lejuan. 5:7 Capakkala kudai ghagi lamau itu, diautu ghagi dusau, mangku kamu njadi luak lejuan ghebuak empai, banci jak di ghagi dusau diau lamau. Karnau aghi rerayau Paska kitau la pasigh. Keristus diau njadi bebiri Paska kitau la dikerbanka. 5:8 Mangku jangan kitau merayauka jamuan itu ngan ghagi diau lamau, diautu ghagi keja'atan ngan kejeditan. Mela kitau merayaukanyau ngan ruti diau nidau beghagi. Rutitu mbayangka gegalaunyau diau iluak ngan benagh di adapan Allah. 5:9 Di suratku empaini la kukiciakka ngan kamu, supayau kamu jangan bekantin ngan jemau diau ngerjauka setu diau ja'at. 5:10 Diau kukiciakkatu ukan jemau diau nidau keruan Allah diau menaugawia, jemau selak, penipu ngan jemau diau nyemba patung. Ukan ughangtu diau kukiciakka, karnau amun kamu endak njawuhi ughangtu, cengki kamu ngeluagh nian jak di deniauni. 5:11 Diau kukiciakka, supayau kamu jangan bekantin ngan jemau diau ngakuak diriau jemau Keristen, anyautu jemau itu nidau senangaian, selak, nyemba patung, ngarutka jemau, tukang mabuak ngan pemaling. Serempak makan ajau jangan ngan jemau luak itu. 5:12-13 Ukan kerjauku ngadili jemau diau ukan Keristen. Allah ka ngadili ughangtu. Anyautu jemau Keristen mesti kamu adili. Dalam Injil ditulis, "Laratkala jemau ja'at jak di guak kamu."

1 Kurintus 6

6:1 Amun adau pekarau di guak kamu, ngapau pulau adau diau beghani pegi ke akim diau nidau percayau ngan Tuhan endak ngaduka kantinau diau percayau? Ngapau diau nidau mintak jemau percayau ngadili pekarau itu? 6:2 Apu kamu endiak keruan, bansau jemau percayau ka ngadili deniau ini? Mangku amun kamu ngadili deniau ini nian, apu kamu nidau pacak ndamaika pekarau diau nidau bediau retiau? 6:3 Apu kamu nidau keruan, bansau kitau ka ngadili malaikat? Apau lagi pekarau idup idang aghi. 6:4 Amun adau pekarau luak itu, apu kamu nyerakanyau ngan jemau diau nidau terti tuapau-apau carau jemau Keristen? Apu kamu nidau maluan? 6:5 Maluka nian! Apu nidau bediau sughang jak di kamu diau bepengertian diau pacak ndamaika pekarau jemau percayau? 6:6 Anyautu adau di kamutu diau pegi ke jemau diau ukan Keristen endak ngaduka pekaraunyau ngan kantinau jemau Keristen. 6:7 Adau pekarau di guak kamu, itu nyatauka kamu la kala. Iluakla kamu dibuati nidau adil ngan dirugika. 6:8 Anyautu kamutu mbuati jemau nidau adil, kamutu merugika jemau. Lagi titu dibuati jak di kamu ngan kantin kamu jemau Keristen. 6:9 Cengki kamu keruan, jemau diau nidau nuruti kendak Allah nidau ka bulia hak njadi umat Allah. Jangan kamu tetipu. Jemau diau ngerjauka kerjau ja'at, nyemba patung, menaugawia, sangi ribangka selanangan, sangi ribangka setinauan, 6:10 jemau pemaling, pengeghit ngan selak, tukang mabuak, galak ngarutka jemau ngan penipu, gegalau jemau luak itu nidau bulia hak njadi umat Allah. 6:11 Adau jak di kamu ngerjauka titu senitu. Anyautu mbak kini dusau kamu la dibasua. Kamu la njadi hak Allah nian. Kamu la dibenaghka ngan kuasau Tuhan Yesus Keristus ngan Rua Allah. 6:12 Katau jemau, "Gegalaunyau bulia dikerjauka." Nyela, anyautu nidau begunau galau. Empuak aku bulia ngerjauka tuapau kila, aku enggup ngenangka diriku dikuasaui tuapau kila. 6:13 Makanan batan endak busung, busung bada makanan. Empuak busung empuak makanan, gegalaunyau ka diabiska Allah. Anyautu badan ukan batan endak ngerjauka kerjau ja'at, tapitu batan endak ngerjauka kerjau Tuhan mangku Tuhan ka nyayiau. 6:14 Allah la ngidupka Tuhan Yesus jak di mati. Luak itu pulau kitau ka diidupka ngan kuasau Allah. 6:15 Kamu la keruan, badan kamu angguta Keristus. Apu ka kitau ambiak angguta Keristus endak diseraka ngan tinau ja'at? Nidau ka adau! 6:16 Apu kamu endiak keruan, bansau jemau diau nyeghundak ngan tinau ja'at njadi seghundak ngan diau? Dalam Injil la ditulis, "Ughang duautu njadi seghundak." 6:17 Anyautu amun jemau nyeghundakka diriau ngan Tuhan, ruahautu ngan Rua Tuhan njadi sutiak. 6:18 Jawuhila kerjau diau ja'attu! Gegalau dusau lain diau dikerjauka jemau di luagh badan. Anyautu jemau diau ngerjauka kerjau ja'at ndusaui badanau sendighi. 6:19 Cengki kamu la keruan, bansau badan kamu umpamau ghuma Allah, bada Rua Allah diau dienjuakka Allah ngan kamu, mangku kamutu ukan hak kamu. Kamutu hak Allah. 6:20 Kamu la dibeli, regaunyau la dibayighi galau. Karnau itu regauila Allah ngan badan kamu.

1 Kurintus 7

7:1 Mbak kini aku endak ngiciakka setu diau la kamu tulis dalam surat kamu. Nyela, itu iluak, amun jemau lanang nidau bebunting. 7:2 Anyautu, supayau nidau teguda, iluakla bilang lanang adau biniau ngan bilang tinau adau lakiau. 7:3 Lakiau mesti ngerjauka diau pantas ngan biniau. Luak itu pulau biniautu mesti ngerjauka diau pantas ngan lakiau. 7:4 Biniau nidau bekuasau di badanau, diau bekuasau itu lakiau. Luak itu pulau lakiau nidau bekuasau di badanau, diau bekuasau biniau. 7:5 Jangan kamu beceghai sughang ngan diau lain. Bulia amun jerang ajau, amun tetuju galau, supayau pacak bedu'a. Udim itu kamu mesti ngulang seghundak, supayau jangan diguda iblis, karnau nidau pacak na'ani serilau. 7:6 Diau kukiciakka ini ukan perinta, tapitu petua ajau. 7:7 Empuak luak itu, iluakla, amun bilang ughang semegi ngan aku. Anyautu bilang ughang la dienjuakka Allah carau sesughangan. Diau sughang caraunyau luak ini, diau sughang caraunyau luak itu. 7:8 Ngan jemau diau lum nika ngan diau la randau kukiciakka, iluakla kamu maju nyughang luak aku. 7:9 Anyautu, amun diau nidau pacak na'an serilau, iluakla diau nika. Karnau iluakla nika, sangkan rusak ngan serilau. 7:10 Jemau diau la nika aku merintaka, -- sebenaghau ukan aku merinta tapitu Tuhan, -- sughang bini jangan ninggalka lakiau. 7:11 Amun diau ninggalkanyau, diau nidau bulia belaki agi, amun ukan ngulang ngan lakiau tadi. Sughang laki nidau bulia nyagha'i biniau. 7:12 Ngan diau lain aku ngiciakka luak ini -- ini katauku, ukan katau Tuhan -- amun jemau Keristen la bebunting ngan jemau diau nidau percayau mangku buntingautu tetuju idup ngan diau, tinau itu jangan disagha'i. 7:13 Mangku amun adau jemau tinau diau Keristen la belaki ngan jemau diau nidau percayau mangku lakiau endak idup ngan diau, jangan lanangtu ditinggalka. 7:14 Laki diau lum percayau njadi pantas di adapan Allah, karnau diau nika ngan biniau diau la njadi hak Allah. Luak itu pulau bini diau lum percayau njadi pantas di adapan Allah, karnau diau nika ngan lakiau diau la njadi hak Allah. Amun ukan luak itu, anak ughangtu luak anak jemau kapir, awuak anaktu njadi pantas di adapan Allah. 7:15 Anyautu, amun jemau diau nidau percayau endak ninggalka lakiau apu biniau diau Keristen, nengkela. Ngan luak itu kamu bibas, karnau Allah endak kitau idup bedamai. 7:16 Kamu bini diau percayau apu kamu keruan, bansau kamu nidau ka pacak nyelamatka laki kamu? Mangku kamu laki diau percayau apu kamu keruan, bansau kamu nidau ka pacak nyelamatka bini kamu? Cengki nidau! 7:17 Bilang jemau mesti maju idup luak la ditetapka Tuhan ngan diau, luak masau diau empai percayau ngan Allah. Inila peraturan diau kukiciakka ngan gegalau jemau Keristen. 7:18 Misalau adau jemau la besunat masau diau empai percayau ngan Allah, jangan diau ncubau melengitka tandau besunattu. Luak itu pulau amun adau jemau diau lum besunat masau diau empai percayau ngan Allah, nidau nanti mintak disunat. 7:19 Besunat ngan nidau besunat nidau penting. Diau penting nuruti perinta Allah. 7:20 Iluakla bilang jemau maju idup, luak masau diau empai percayau ngan Allah. 7:21 Amun kamu budak masau kamu empai percayau, nidau ngapau-ngapau. Anyautu amun kamu pacak bibas, gunaukala titu. 7:22 Karnau budak diau percayau ngan Tuhan njadi jemau bibas karnau Tuhan. Mangku jemau bibas diau percayau ngan Keristus njadi buda'Au. 7:23 Kamu la dibeli, regaunyau la dibayighi galau. Karnau itu, jangan kamu njadi budak manusiau. 7:24 Jadi, luak manau pulau kamu masau empai percayau ngan Allah, luak itula kamu pulau maju idup ngan Allah. 7:25 Mbak kini ceritau jemau diau lum nika. Ceritau ughangtu nidau bediau perinta Tuhan. Anyautu karnau pengertian jak di Tuhan ngan aku, aku endak ngiciakka pendapatku diau pacak dipercayaui. 7:26 Nginak kemada'an masau ini, iluakla amun jemau maju idup luak mbak kini. 7:27 Misalau kamu diau la bebunting, jangan nyagha'inyau. Amun kamu lum bebunting, sualapau nidau nanti bebunting. 7:28 Anyautu amun kamu nika, ukan dusau. Luak itu pulau amun budak gadis nika, ukan bedusau. Anyautu jemau diau nika banyak meghasauka penanggungan di deniauni, mangku aku endak supayau jangan kamu banyak meghasauka penanggungan luak jemau diau la nikatu. 7:29 Maksudku luak ini: Masaunyau la pandak. Mangku mulai mbak kini jemau diau bebunting mesti idup luak nidau bebunting. 7:30 Jemau diau nangis luak nidau nangis, jemau diau tetawau luak nidau riang, jemau diau la mbeli luak nidau bediau tuapau-apau. 7:31 Mangku jemau diau pansan ngerjauka kerjau deniau luak nidau ngerjaukanyau, karnau deniauni nidau ka lamau agi. 7:32 Aku endak, supayau kamu nidau ghegak. Jemau diau nidau bebunting, musatka rupu'annyau ngan Tuhan, karnau diau endak melemakka ati Tuhan. 7:33 Jemau diau la bebunting, banyak merupuakka deniau, karnau endak melemakka ati buntingau. 7:34 Mangku rupu'annyau tebagi-bagi. Sughang tinau diau nidau belaki ngan budak gadis ka merupuakka kerjau Tuhan, karnau diau endak, supayau gegalau idupau njadi hak Allah. Tinau diau la belaki banyak merupuakka deniauni, karnau endak melemakka ati lakiau. 7:35 Gegalaunyautu kukiciakka batan endak keilu'an kamu, ukan nidau ngajung itu-ini, tapitu supayau ngerjauka setu diau benagh ngan iluak, mangku kamu pacak musatka rupu'an kamu ngan Tuhan. 7:36 Amun adau jemau meghasau nidau pantas ngan gadisau, karnau la tamba tuau, amun diau nidau pacak na'ani serilau ngan meghasau endak nika nian, nengkela ughangtu nika, amun diau endak. Itu ukan dusau. 7:37 Anyautu amun adau jemau diau la mutuska dalam atiau nidau ka nika, amun nidau dipasau ngan pacak na'ani serilau, mangku nidau nika, jemau itu bebuat iluak. 7:38 Jadi, jemau diau nika iluak kerjaunyau, jemau diau nidau nika lebia iluak agi kerjaunyau. 7:39 Bini tekungkung ngan lakiau selamau lakiautu gi idup. Amun pengantinannyau la mati, diau bibas nika ngan sapau kila diau endak, asal jemau itu jemau percayau. 7:40 Anyautu amun pendapatku, riangla tinau itu nidau nika agi. Mangku aku kirau setu diau kukiciakkatu kukiciakka ngan kuasau Rua Allah.

1 Kurintus 8

8:1 Mbak kini aku endak ngiciakka ceritau makanan diau la disiwaukatu. Ngenian katau jemau, "Gegalau kitauni la pintar." Anyautu kepintarantu mbuat jemau geduak, tapitu nyayangi jemau neguaka ati. 8:2 Jemau diau nyangkau la banyak keruan, lum ngeruani nian. 8:3 Anyautu jemau diau nyayangi Allah, diautu dikeruani Allah. 8:4 Kitau keruan, ceritau makan daging diau disiwauka, diumpamauka setu diau sebenaghau nidau bediau. Kitau keruan Allah itu sughang, nidau bediau diau lain. 8:5 Nyela, banyak pulau setu diau dikiciakka diwau ngan tuan, empuak di langit, empuak di deniau. 8:6 Anyautu amun kitau, Allah gi sughang, Diautu Bapak diau njadika gegalaunyau. Batan endak Diaula kitau idup. Mangku Tuhan gi sughang pulau, Diautu Yesus Keristus. Karnau Diau gegalaunyautu dijadika mangku karnau Diau pulau kitau idup. 8:7 Anyautu nidau bilang ughang ngeruani titu. Adau jemau diau senitu pegi ke keramat, mbak kini diau gi meghasau, bansau makanan diau la disiwaukatu makanan diwau. Mangku amun ughangtu makan makanan itu, ughangtu meghasau bedusau, karnau kepercayauannyau lum tegua. 8:8 Nyela, makanan nidau mbuat kitau diterimau ngan Allah. Amun kitau makan makanan itu, kitau nidau bediau untungau. Amun kitau nidau makan, kitau pulau nidau rugi tuapau-apau. 8:9 Anyautu sepepadaula. Jangan tejadi jemau lain bedusau karnau kepercayauan lum tegua, karnau kamu bibas ngerjauka tuapau kila. 8:10 Misalau kamu diau la keruan mangku duduak makan di keramat, mangku jemau diau kurang kepercayauannyau nginak kamu, jemautu pulau dibeghanika makan daging diau la disiwaukatu. 8:11 Mangku jemau diau nidau tegua kepercayauantu njadi benasau karnau kamu, awuak Keristus mati batan endak diau pulau. 8:12 Amun kamu bedusau luak itu ngan kantin kamu jemau Keristen tadi, ngan merusakka jemau diau kurang kepercayauannyautu, kamu sebenaghau bedusau ngan Keristus. 8:13 Itula sebapau amun makan daging diau mbuat kantinku bedusau, aku enggup agi nian makanau, mangku jangan kantinku bedusau karnau aku.

1 Kurintus 9

9:1 Apu ukan aku jemau bibas? Ukan aku rasul? Apu aku lum nginak Yesus, Tuhan kitau? Apu ukan kamu asil kerjauku batan endak Tuhan? 9:2 Empuak jemau lain nidau endak ngaku'i aku rasul, cengki kamu ngaku'i aku rasul, karnau idup kamu jemau Keristen mbuktika, bansau aku rasul. 9:3 Amun jemau diau nyalaka aku, aku nimbali luak ini: 9:4 Apu aku nidau behak dienju'i makanan karnau kerjauku? 9:5 Apu aku endiak behak mbatak bunting diau Keristen serempak bejalan ngan aku, luak diau dikerjauka rasul lain ngan ading-beghading Tuhan Yesus ngan Pitrus pulau? 9:6 Apu cuman ughangtu diau behak nidau nanti kerjau batan endak pengidupan? Apu Barnabas ngan aku nidau pacak? 9:7 Manau ka adau tentera diau dang beperang makai tanciau sendighi? Manau ka adau jemau diau nanam kebun anggur, mangku nidau makan asilau? Manau ka adau jemau diau nyayia bebiri, mangku nidau minum puan bebiritu? 9:8 Katauku ini ukan cuman rupu'an manusiau ajau. Ukum Taurat ngiciakkanyau pulau. 9:9 Di ukum Musa ditulis luak ini, "Jangan kamu nyempal mulut sapi diau dang ngighiak gendum." Apu sapi diau Allah kiciakka? 9:10 Apu ukan itu ditulis batan endak kitau? Nyela, batan endak kitau. Jemau diau njawat ngan jemau diau ngighiak ngerjaukanyau ngan ngaghapka bulia bagian asil kerjaunyau. 9:11 Kami la ngamburka benia ruhani dalam idup kamu. Apu ka banyak igau, amun kami mintak bagian asil deniau jak di kamu? 9:12 Amun jemau lain behak ngaghapka titu jak di kamu, cengki kami lebia behak jak di ughangtu. Anyautu kami lum nggunauka hak itu. Iluakla aku nanggungka gegalaunyau sangkan ngengalangi ceritau iluak jak di Keristus. 9:13 Cengki kamu keruan, bansau jemau diau bekerjau di Ghuma Allah bulia makanan jak di Ghuma Allah. Jemau diau ngurus bada bekerban bulia bagian jak di kerban itu. 9:14 Luak itu pulau Tuhan la netapka, bansau jemau diau ngiciakka ceritau iluak pantas bulia pengidupan jak di kerjaunyautu. 9:15 Anyautu lum kekela aku makai hakku itu. Aku nulis titu, ukan supayau titu dikerjauka ngan aku mbak kini. Iluakla aku mati sangkan kelengitan setu diau kubanggakatu. 9:16 Karnau amun aku ngiciakka ceritau iluak, nidau bediau tanggua endak mbanggaka diri, karnau titu mesti kukerjauka. Celakaula aku, amun nidau ngiciakka ceritau iluaktu. 9:17 Misalau aku ngerjaukanyau ngan kendakku sendighi, nyela aku behak nerimau upa. Anyautu aku ngerjauka titu karnau kewajibanku. Aku diajung Allah batan endak ngerjaukanyau. 9:18 Amun luak itu, tuapau upaku? Inila upaku: Aku pacak ngiciakka ceritau iluak nidau mintak diupa, karnau nidau makai hakku, amun ngiciakka ceritau iluak. 9:19 Aku ukan budak jemau, aku bibas. Empuak luak itu, aku njadika diriku budak gegalau jemau, supayau aku pacak banyak menangka jemau batan endak Keristus. 9:20 Ngan jemau Yahudi aku luak jemau Yahudi, mangku pacak menangka jemau Yahudi batan endak Keristus. Ngan jemau diau idup nurut ukum Taurat, aku njadi luak jemau diau idup nurut ukum Taurat, empuak aku sebenaghau nidau mesti nuruti ukum Taurattu, supayau pacak menangka ughangtu batan endak Keristus. 9:21 Luak itu pulau ngan jemau diau nidau idup nurut ukum Taurat, aku luak jemau diau nidau idup nurut ukum Taurat. Itu nidau bereti, aku idup di luagh ukum Allah, karnau aku idup nurut ukum Keristus. Aku ngerjauka titu, supayau pacak menangka ughangtu batan endak Keristus. 9:22 Ngan jemau diau nidau tegua imanau, aku pulau luak jemau diau nidau tegua iman, mangku pacak menangka ughangtu batan endak Keristus. Aku njadi gegalaunyau batan endak gegalau jemau, supayau ngan carau manau ajau aku pacak nyelamatka bebeghapau jak di ughangtu. 9:23 Gegalaunyautu kukerjauka karnau ceritau iluak jak di Allah, supayau aku bulia bagian jak di Allah. 9:24 Kamu la keruan, bansau tanding belaghi gegalau angguta ngikut belaghi, anyautu cuman sughang bulia adia. Karnau itu belaghila nian, mangku kamu bulia adiahautu. 9:25 Bilang tukang main diau ngikut betanding mesti maju na'an diriau. Jemautu ngerjauka titu endak bulia adia diau nidau ka lamau. Anyautu kitau na'an diri, karnau endak bulia adia diau ta'an lamau. 9:26 Itula sebapau aku belaghi adau tujuan. Lagi pulau aku nidau ninju asal ajau. 9:27 Aku melatia badanku enggut nguasaui gegalaunyau, supayau udim ngiciakka ceritau iluak ngan jemau lain, jangan akuni nidau diterimau.

1 Kurintus 10

10:1 Kantin-kantinku, kamu la keruan setu diau la tejadi ngan niniak puyang kitau, timpau ughangtu ngikut Musa. Ughangtu dibayangi aban galau, mangku nyembeghangi Laut Abang ngan selamat. 10:2 Itu pacak dikiciakka umpamau baptisan dalam aban ngan laut endak njadi anak-bua Musa. 10:3 Gegalau ughangtu makan makanan ruhani diau semegi 10:4 ngan minum minuman ruhani diau semegi. Gegalau ughangtu minum jak di gunung batu ruhani diau ngantini ughangtu. Mangku gunung batu itu Keristus. 10:5 Empuak luak itu, Allah nidau riang ngan banyak nian jak di ughangtu, mangku mayat ughangtu beunjughan di padang bungin. 10:6 Gegalaunyautu njadi cuntau batan endak kitau njadi peringatan, supayau kitau jangan endak ngerjauka setu diau ja'at luak dikerjauka ughangtu. 10:7 Jangan pulau nyemba diwau luak dikerjauka separau jak di ughangtu, luak ditulis di Injil, "Bangsau itu duduak makan-minum ngan beriang-riang ngerjauka setu diau nidau senunuan endak nyemba patung." 10:8 Jangan kitau menaugawia luak dikerjauka separau jak di ughangtu. Mangku duau pulua tigau ribu jak di ughangtu mati jangkau saghi, karnau ngerjauka titu. 10:9 Jangan pulau kitau ncubaui Tuhan, luak diau dikerjauka separau jak di ughangtu senitu, mangku ughangtu mati dicetuak ulagh. 10:10 Jangan kitau bemumut luak diau dikerjauka separau jak di ughangtu, mangku ughangtu dibunua malaikat kematian. 10:11 Gegalaunyautu tejadi ngan ughangtu njadi cuntau ngan jemau lain, mangku ditulis njadi peringatan batan endak kitau, kitau diau idup masau pengabisan saman ini. 10:12 Mangku jemau diau nyangkau diau tegua, sepepadaula, supayau jangan benasau. 10:13 Amun kamu dicubaui, ingatkala, bansau jemau lain pulau meghasaukanyau luak itu. Allah nepati janjiau. Diau nidau ngenangka kamu dicubaui lebia jak di kekuatan kamu. Masau kamu dicubaui, masau itu pulau Diau ngenjuakka jalan keluagh ngan kamu ngan neguaka kamu mangku pacak ta'an. 10:14 Itula sebapau, kamu mesti njawuhi diwau. 10:15 Aku ngiciak ngan kamu luak ngan jemau diau bepengertian. Rupuakkala ngan kamu kici'anku ini. 10:16 Mangkuak diau kitau pakai masau kitau minum anggur ngan beterimau-kasia ngan Allah, apu ukan titu nunjuakka kitau seghundak ngan Keristus dalam kematianNyau? Ruti diau kitau agia-agiaka masau kitau makanau serempak, apu ukan titu nunjuakka, bansau kitau seghundak ngan badan Keristus? 10:17 Ruti cuman sebua, mangku kitau diau makanau empuak banyak njadi sutiak, karnau gegalau kitau bulia bagian jak di ruti diau sebuatu. 10:18 Kina'i jemau Israil senitu. Ukanau jemau diau makan makanan diau dikerbanka njadi seghundak ngan bada bekerban itu? 10:19 Tuapau reti katauku ini? Apu makanan diau disiwauka adau retiau? Apu diwau penting? 10:20 Nidau! Diau kukiciakkatu luak ini: Setu diau disiwaukatu dikerbanka ngan iblis ukan ngan Allah. Mangku aku nidau ngajung kamu seghundak ngan iblis. 10:21 Kamu nidau pacak minum jak di mangkuak Tuhan ngan pulau jak di mangkuak iblis. Mangku kamu nidau kila pacak makan di bada makanan Tuhan ngan pulau di bada makanan iblis. 10:22 Apu kitau endak ngajung Tuhan sengit? Apu kuatla kitau sangkan Tuhan? 10:23 Katau jemau, "Kitau bulia ngerjauka tuapau kila." Nyela, anyautu nidau gegalaunyautu begunau. "Kitau bulia ngerjauka tuapau kila." Nyela, anyautu nidau gegalaunyau ngiluakka idup kitau. 10:24 Jangan sughang kia merupuakka diriau ajau. Bilang jemau mesti merupuakka jemau lain pulau. 10:25 Kamu bulia makan gegalaunyau diau dijual di pekan, nidau nanti ditanyauka kudai, karnau nidau nanti ghibal. 10:26 Karnau di Injil ditulis, "Deniau ngan gegalau isiau Tuhan empuau." 10:27 Amun kamu dipantau makan di ghuma jemau diau nidau percayau, mangku kamu pegi, makanla setu diau dienjuakka ngan kamu, nidau nanti nanyauka jak di manau makanan itu, mangku kamu nidau ghibal. 10:28 Anyautu amun adau jemau diau ngiciakka ngan kamu, "Makanan ini la disiwauka", jangan kamu makan makanan itu karnau nyanauka jemau diau la ngiciakkanyautu, mangku atiau nidau ghibal. 10:29 Diau kukiciakkatu ukan keghibalan ati kamu, tapitu keghibalan ati ughang itu. Asauku adau diau betanyau, "Ngapau kebibasanku dibatasi keghibalan jemau? 10:30 Amun aku makan ngan beterimau-kasia ngan Allah, ngapau pulau jemau nggelakka aku karnau makan itu, awuak aku beterimau-kasia ngan Allah?" 10:31 Tuapau kila diau kamu kerjauka, apu makan apu minum, kerjaukala gegalaunyautu batan endak meregaui Allah. 10:32 Jangan nyinggung peghasauan jemau, empuak jemau Yahudi empuak jemau Yunani empuak jemau percayau. 10:33 Idupla luak aku. Aku beusaha endak melemakka ati gegalau jemau ngan carau luak manau kila, ukan batan endak kepentingan akunila, tapitu supayau banyak jemau diselamatka.

1 Kurintus 11

11:1 Penaula aku, luak aku pulau menau Keristus. 11:2 Aku endak muji kamu, karnau kamu maju ngingatka ngan nuruti ajaghan diau la kuajaghka ngan kamu. 11:3 Aku endak, supayau kamu ngeruani, bansau diau ngepala'i jemau lanang nyela Keristus, diau ngepala'i jemau tinau nyela lakiau, diau ngepala'i Keristus nyela Allah. 11:4 Amun jemau lanang diau dang bedu'a ngan ngiciakka katau Allah di adapan jemau banyak, mangku nudungi pala'au, jemautu nggelakka Keristus diau ngepala'inyau. 11:5 Anyautu amun jemau tinau dang bedu'a ngan ngiciakka katau Allah di adapan jemau banyak, nidau makai telekung, tinau itu nggelakka lakiau diau ngepala'inyau. Itu semegi ngan palak tinautu la dicukur. 11:6 Amun sughang tinau enggup makai telekung, iluakla gumba'au digunting. Anyautu amun sughang tinau dicukur ngan digunting gumba'au, diau digelakka. Karnau itu iluakla makai telekung. 11:7 Jemau lanang nidau nanti makai telekung, karnau diau nggambarka keagungan Allah. Anyautu jemau tinau nggambarka keagungan jemau lanang, 11:8 karnau jemau lanang nidau dijadika jak di jemau tinau, tapitu jemau tinau dijadika jak di jemau lanang. 11:9 Mangku jemau lanang nidau dijadika batan endak jemau tinau, tapitu jemau tinau dijadika batan endak jemau lanang. 11:10 Itula sebapau jemau tinau mesti makai telekung, tandau diau dikepala'i lakiau karnau malaikat-malaikat. 11:11 Empuak luak itu, ngan kitau jemau Keristen jemau tinau nidau bediau, amun ukan jemau lanang; mangku jemau lanang nidau bediau, amun ukan jemau tinau. 11:12 Karnau empuak jemau tinau asalau jak di jemau lanang, mangku jemau lanang adau karnau jemau tinau, gegalaunyau jak di Allah. 11:13 Cubau rupuakkala ini ngan kamu: Apu iluak jemau tinau bedu'a ngan Allah di mukau jemau banyak nidau makai telekung. 11:14 Nurut adat amun lanang gumbak panjang, itu nidau pantas. 11:15 Anyautu amun jemau tinau gumbak panjang, titu njadi kebanggaan, karnau gumbaktu dienjuakka ngan diau batan endak nukupi pala'au. 11:16 Amun adau jemau diau endak bebala mbalaka pekarau telekung, diau pacak kukiciakka ngan jemautu, bansau kami ngan jemau Keristen lainau cuman carau luak itu tadi, lain nidau bediau agi. 11:17 Aku nidau muji kamu ngan setu diau endak kukiciakka ini: Carau kamu betunggal ukan sangi neguaka iman kamu, tapitu ngarutka iman. 11:18 Aku ndengagh, amun jemau Keristen betunggal, adau rumbungan diau nidau semegi pendapat, mangku aku kirau dikit banya'au ceritautu benagh. 11:19 Nyela, sepantasau adau pepecahan di antarau jemau Keristen, supayau kina'an, sapau jak di kamu diau Keristen diau ngenian. 11:20 Amun kamu betunggal, diau kamu adauka ukan jamuan Tuhan. 11:21 Karnau masau kamu makan, bilang jemau berebut ngambiak makanan sesughangan, mangku adau diau nidau dapat tuapau-apau, adau diau mabuak. 11:22 Ngapau pulau luak itu? Apu kamu nidau beghuma? Kamu pacak makan-minum di situ. Apu kamu endak nggelakka umat Allah? Apu endak maluka jemau diau nidau bediau tuapau-apau? Tuapau diau mesti kukiciakka ngan kamu? Apu aku mesti muji kamu? Nidau! Aku nidau ka muji kamu. 11:23 Setu diau la kuajaghka ngan kamu itu, kuterimau jak di Tuhan, bansau malamau Tuhan Yesus diseraka, Diau ngambiak ruti, 11:24 mangku beterimau-kasia ngan Allah. Udimautu dipiyak-piya'Au rutitu ngan bekatau, "Inila badanKu diau Kuenjuakka batan endak kamu. Kerjaukala itu batan endak ngingatka Aku." 11:25 Luak itu pulau udim makan Diau ngambiak mangkuak anggur mangku bekatau, "Mangkuak anggur ini janji Allah diau empai, diau disahka ngan daghaKu. Idang kali kamu minum jak di mangkuakni, kerjaukala itu batan endak ngingatka Aku." 11:26 Jadi, idang kali kamu makan ruti ngan minum jak di mangkuaktu kamu ngiciakka kematian Tuhan, enggut Diau datang. 11:27 Karnau itu jemau diau makan ruti ngan minum jak di mangkuak Tuhan itu tadi ngan carau nidau pantas, jemautu bedusau tuadap Tuhan diau la nyeraka badanAu ngan daghaHau. 11:28 Amun luak itu, bilang jemau mesti ngeruani diriau kudai, mangku udim itu makan ruti ngan minum anggurtu. 11:29 Amun jemau diau makan ruti ngan minum jak di mangkuaktu nidau ngaku'i retiau badan Tuhan, diau ndatangka ukuman batan endak diriau, masau diau makanau ngan minumau. 11:30 Itula sebapau banyak jak di kamu diau buidapan ngan litak. Adau pulau diau la mati. 11:31 Amun kitau ngeruani diri kitau kudai, kitau nidau ka diukum Allah. 11:32 Anyautu amun kitau diukum Allah, Diau endak ngajagh kitau, mangku kitau nidau diukum serempak ngan deniauni. 11:33 Itula sebapau, kantin-kantinku, amun kamu betunggal endak makan jamuan Tuhan, kamu mesti sangi nanti. 11:34 Amun adau diau lapagh, jemautu makan kudai di ghumahau, supayau jangan betunggal batan endak diukum. Setu diau lain ka kukiciakka ngan kamu, amun aku datang agi.

1 Kurintus 12

12:1 Kantin-kantinku, mbak kini ceritau pengenjuak Rua. Ceritau itu kendakku, supayau kamu keruani diau benagh. 12:2 Kamu keruan, timpau kamu lum percayau ngan Tuhan, kamu disesatka nyemba diwau diau bisu ngan mecam-mecam carau. 12:3 Mangku kamu mesti keruan, bansau nidau bediau jemau diau dipimpin Rua Allah diau bekatau, "Meghakaula Yesus!" Luak itula pulau nidau bediau jemau diau ngaku'i, "Yesusla Tuhan!", amun ukan dipimpin Rua Allah. 12:4 Adau bemecam-mecam pengenjuak, anyautu gegalaunyau dienjuakka Rua semegi. 12:5 Adau bemecam-mecam kerjau batan endak Tuhan, anyautu Tuhan gi sughang. 12:6 Mangku adau bemecam-mecam carau ngerjauka kerjautu. Anyautu diau ngenjuakka kuasau ngan bilang jemau batan endak gegalaunyautu, itu Allah diau gi sughang itula. 12:7 Rua Allah bekerjau di bilang jemau batan endak neguaka gegalau kitau. 12:8 Ngan diau sughang Ruatu ngenjuakka kuasau, mangku pacak ngiciak ngan pengertian. Ngan jemau lain Rua diau semegitu ngenjuakka kuasau, mangku diau pacak ngiciakka katau Allah. 12:9 Ngan diau sughang agi Rua diau semegitu ngenjuakka kuasau, mangku pacak percayau nian. Ngan jemau lain Rua itu ngenjuakka kuasau, mangku pacak meghaduka jemau buidapan. 12:10 Diau sughang dienjuakka kuasau ngadauka tandau nyelia, diau lain dienjuakka kuasau ngiciak luak sughang nabi. Adau diau dienjuakka kuasau mbidaka, manau diau Rua Allah manau diau ukan. Adau diau dienjuakka kuasau bekiciak basau rua. Adau pulau diau dienjuakka kuasau ngiciakka reti basau ruatu. 12:11 Gegalaunyautu dikerjauka Rua semegi. Bilang jemau dienju'i kuasau sesughangan nurut kendak Ruatu. 12:12 Keristus umpamau badan manusiau. Badanautu sutiak, anyautu dandanannyau banyak. Gegalau dandanannyautu empuak banyak cuman sutiak badan. 12:13 Luak itu pulau gegalau kitau, empuak jemau Yahudi empuak jemau Yunani, empuak ambau empuak tuan, gegalau kitau la dibaptis ngan Rua diau semegi, supayau kitau njadi sutiak badan Keristus, mangku gegalau kitau dienjuakka Rua diau semegitu. 12:14 Nyela, badantu ukan cuman badan ajau. Anyautu adau banyak dandanannyau. 12:15 Misalau keting bekatau, "Aku ukan tangan, mangku aku ukan dandanan badan." Apu nyela diau ukan dandanan badan? 12:16 Misalau telingau bekatau, "Aku ukan matau, mangku aku ukan dandanan badan." Apu nyela diau ukan dandanan badan? 12:17 Misalau gegalau badantu cuman matau ajau, luak manau pacak ndengagh? Misalau gegalau badan telingau ajau, luak manau pacak ngembau? 12:18 Kitau nginak, bansau Allah la netapka bada dandanan badantu. Bilang mecam ditetapka badahau nurut kendak Allah. 12:19 Misalau gegalaunyau cuman semecam dandanan ajau, manau diau dikiciakka badan? 12:20 Nyela nian, bemecam-mecam dandanannyautu, anyautu badan gi sutiak. 12:21 Mangku matau nidau pacak ngiciakka ngan tangan, "Aku nidau endak kaba." Palak nidau pacak ngiciakka ngan keting, "Aku nidau endak kaba." 12:22 Awuak dandanan badan diau dikiciakka litak nian, itula diau penting nian. 12:23 Dandanan diau kitau anggap kurang beregau, kitau regaui nian. Mangku dandanan diau nidau alap, tamba kitau sanauka. 12:24 Dandanan badan diau alap nidau nanti kitau sanauka nian. Allah la mbuat badan kitau ngan carau, supayau dandanan diau nidau pantas diancakka diperatika nian. 12:25 Ngan carau luak itu badantu nidau tebagi-bagi, mangku bilang dandanan sangi peratika. 12:26 Amun sutiak dandanan nanggung, gegalau dandanan diau lain nanggung pulau. Amun sutiak dandanan dipuji, gegalau dandanan diau lainau ngikut riang pulau. 12:27 Gegalau kamu umpamau badan Keristus. Bilang ughang dandanannyau. 12:28 Mangku Allah la netapka mecam-mecam jemau di guak jemau Keristen, diau dulu sekali rasul, mangku nabi, mangku guru, mangku adau pulau diau pacak mbuat tandau nyelia ngan diau pacak meghaduka jemau buidapan, mangku diau pacak nulung jemau lain ngan diau pacak mimpin, mangku pulau diau pacak ngiciak basau rua. 12:29 Apu gegalaunyau rasul, apu nabi, apu guru? Apu gegalaunyau pacak ngadauka tandau nyelia, 12:30 apu pacak meghaduka, apu ngiciak basau rua, apu meretika basau ruatu? Nidau. 12:31 Beusahala kamu, supayau kamu bulia pengenjuak Rua diau penting sekali jak di gegalaunyau. Anyautu aku endak nunjuakka ngan kamu jalan diau iluak sekali.

1 Kurintus 13

13:1 Empuak aku pacak ngiciak serbau mecam basau manusiau ngan basau malaikat pulau, anyautu amun aku nidau nyayangi jemau lain, aku semegi ngan gung ngan canang diau dimunika asal ajau. 13:2 Empuak aku pacak ngiciakka katau Allah ngan ngerti gegalau resiau Allah ngan ngeruani gegalaunyau, empuak aku percayau nian ngan Allah, mangku pacak ngaliaka gunung, anyautu aku nidau nyayangi jemau, dikit kia aku nidau begunau. 13:3 Empuak gegalau retauku kuenjuakka ngan jemau serik, ngan pulau nyeraka badanku disilap, anyautu aku nidau nyayangi jemau, mangku gegalaunyautu nidau bediau gunaunyau. 13:4 Jemau diau nyayangi jemau lain ngaligh ngan atiau iluak. Diau nidau sengit, nidau langguak ngan nidau geduak. 13:5 Diau nidau ngerjauka setu diau nidau pantas ngan nidau masau jemau nuruti kenda'au. Diau nidau mura purik ngan nidau maju ngingatka sala jemau. 13:6 Diau nidau riang ngan setu diau nidau adil, tapitu ikut riang ngan setu diau benagh. 13:7 Diau ta'an ngadapi gegalaunyau, percayau gegalaunyau, ngaghapka gegalaunyau, ta'an, ngaligh ngan gegalau penanggungan. 13:8 Kasia nidau ka abis. Ngiciakka katau Allah ka udim. Ngiciak basau rua ka mandak. Kepintaran ka lengit pulau. 13:9 Karnau kepintaran ngan ngiciakka katau Allah nidau sempernau. 13:10 Anyautu nanti ka datang masaunyau, Allah ka nggenapi gegalaunyau. Mangku diau nidau sempernau ka lengit. 13:11 Timpau aku budak keciak, aku ngiciak luak budak keciak, peghasauan luak budak keciak, berupuak luak budak keciak. Mbak kini aku la wagat, mangku aku ninggalka perembak luak budak keciaktu. 13:12 Setu diau kitau kina'i mbak kini luak gambar di cemin diau kabugh. Nanti kitau ka nginak diau jelas. Mbak kini aku keruan lum sempernau. Nanti aku keruan diau sempernau, luak aku la dikeruani Allah. 13:13 Mangku penarau ini adau tigau mecam diau mesti kitau kerjauka: percayau, ngaghapka ngan nyayangi jemau. Mangku diau penting sekali jak di tigau itu nyayangi jemau.

1 Kurintus 14

14:1 Beusahala kamu nyayangi jemau. Beusahala pulau nerimau kuasau jak di Rua Allah. Diau penting supayau pacak ngiciakka katau Allah. 14:2 Jemau diau ngiciak basau rua, ukan ngiciak ngan manusiau, tapitu ngan Allah. Nidau bediau jemau diau terti setu diau dikiciakkanyautu, karnau Rua Allah mbuat diau ngiciakka setu diau cuman dikeruani Allah. 14:3 Anyautu jemau diau ngiciakka katau Allah ngan manusiau, jemautu nulungi ngan neguaka ngan ngenjuakka semangai. 14:4 Jemau diau ngiciak basau rua cuman neguaka diriau, tapitu jemau diau ngiciakka katau Allah majuka iman jemau Keristen. 14:5 Alaka iluak, amun gegalau kamu pacak ngiciak basau rua, anyautu iluakla, amun kamu pacak ngiciakka katau Allah. Jemau diau ngiciakka katau Allah, begunaula diau sangkan jemau diau ngiciak basau rua, lain amun jemau diau ngiciak basau ruatu pacak meretika setu diau dikiciakkanyautu, supayau begunau batan endak gegalau jemau Keristen. 14:6 Amun aku datang guak kamu ngan ngiciak basau rua, tuapau gunaunyau ngan kamu? Dikit kia nidau begunau, lain amun aku ngiciakka pengina'an jak di Allah ngan nerangka setu ceritau Allah, ngiciakka rencanau Allah ngan ngajagh. 14:7 Misalau dandanan musik diau nidau benyawau luak seruling ngan kecapi, amun nidau belainan muniau, luak manau ngeruani lagu tuapau diau dimunika? 14:8 Misalau pulau amun terumpit perang dimunika asal ajau, sapau ka bedandan endak beperang? 14:9 Luak itu pulau amun kamu ngiciak basau rua: Amun kamu nidau makai katau diau jelas, nidau sughang kia pacak ngerti, setu diau kamu kiciakka. Kici'an kamu ka lengit ajau. 14:10 Di deniauni banyak nian basau, tapitu nidau bediau sutiak kia diau nidau bereti. 14:11 Anyautu amun aku nidau ngerti basau, jemau diau ngiciak basautu jemau asing ngan aku. Mangku aku pulau jemau asing ngan diau. 14:12 Luak itu pulau kamu: Nyela, kamu beusaha bulia kuasau Rua Allah, anyautu kamu mesti beusaha makaiau, supayau begunau batan endak jemau Keristen. 14:13 Karnau itu jemau diau ngiciak basau rua mesti bedu'a, supayau diau pulau dienjuakka kuasau endak meretika setu diau dikiciakkanyautu. 14:14 Amun aku bedu'a ngan basau rua, ruaku bedu'a, tapitu rupu'anku nidau bedu'a. 14:15 Mangku tuapau diau mesti kukerjauka? Ini diau kukerjauka: Aku endak bedu'a ngan ruaku, tapitu aku pulau endak bedu'a ngan rupu'anku. Aku endak benyanyi ngan muji ngan ruaku, tapitu aku pulau endak benyanyi ngan muji ngan rupu'anku. 14:16 Amun kamu beterimau-kasia ngan Allah ngan basau rua ajau, mangku jemau lain nidau pacak ngaminka du'a beterimau-kasia, karnau nidau terti setu diau kamu kiciakkatu. 14:17 Empuak du'a terimau-kasia ngan Allah iluak nian, du'a itu nidau begunau ngan jemau. 14:18 Aku beterimau-kasia ngan Allah, karnau akuni pacak ngiciak basau rua lebia jak di gegalau kamu. 14:19 Anyautu amun jemau Keristen betunggal, galakla aku ngiciak limau katau diau jemau ngerti endak ngajagh ughangtu, sangkan aku ngiciak beribu-ribu katau makai basau rua. 14:20 Jangan kamu berupuak luak rupu'an budak keciak. Amun ngan keja'atan nengkela kamu luak budak keciak, tapitu rupu'an kamu mesti njadi luak rupu'an jemau besak. 14:21 Di ukum Taurat ditulis luak ini, "Tuhan bekatau, 'Jemau diau ngiciak basau Kuajung ngiciak ngan umatKu. Jemau asing Kuajung ngiciak katauKu. Empuak luak itu ughangtu enggup ndengagh kici'anKu.' " 14:22 Amun luak itu, kuasau pacak ngiciak basau rua itula tandau batan endak jemau diau nidau percayau, ukan batan endak jemau percayau. Mangku kuasau ngiciak katau Allah itula tandau batan endak jemau percayau, ukan batan endak jemau diau nidau percayau. 14:23 Misalau gegalau jemau Keristen betunggal, mangku bilang jemau ngiciak basau rua, mangku datang jemau diau nidau terti ngan jemau diau nidau percayau, cengki jemautu ka ngiciakka kamu gilau galau. 14:24 Anyautu amun gegalau kamu ngiciakka katau Allah, mangku datang jemau diau nidau terti ngan jemau diau nidau percayau, jemautu ka nyadari dusaunyau ngan diukum karnau gegalaunyau diau didengaghautu. 14:25 Gegalau resiau dalam atiau ka kina'an, mangku diau ka nunduak nyemba Allah ngan ngaku'i, "Nyela, Allah adau nian guak kamu." 14:26 Luak manau mbak kini, ui kantin-kantinku? Amun kamu betunggal, adau diau nyanyi, adau diau ngajagh, adau diau ngiciakka pengina'an Allah, adau diau ngiciak basau rua, adau diau meretika kici'antu. Anyautu gegalaunyautu mesti dikerjauka, supayau begunau batan endak gegalaunyau. 14:27 Amun adau jemau diau endak ngiciak basau rua, nengkela duau ughang, sebanyakbanya'au tigau ughang, sejagh sughang, mangku mesti adau jemau diau meretikanyau. 14:28 Amun nidau bediau jemau diau pacak meretikanyau, jemau diau endak ngiciak basau ruatu tadi mesti diam. Nengkela diau ngiciak dalam atiau ajau ngan Allah. 14:29 Enangka duau apu tigau ughang ngiciakka katau Allah, penarau diau lain merupuakka setu diau dikiciakkatu. 14:30 Anyautu amun adau jemau lain diau duduak di situ bulia katau Allah, jemau diau ngiciak tadi mesti diam. 14:31 Ngan carau luak itu gegalau kamu pacak ngiciakka katau Allah sejagh sughang, mangku kamu diajaghi galau ngan tamba percayau. 14:32 Kuasau ngiciakka katau Allah mesti dijagaui jemau diau ngiciaktu, 14:33 karnau Allah enggup kekacauan, tapitu Diau galak damai. Di manau-manau, amun jemau percayau betunggal, 14:34 jemau tinau mesti diam. Ughangtu nidau bulia ngiciak. Ughangtu mesti nunduak, luak itu ditulis di ukum Taurat. 14:35 Amun adau setu diau endak dikeruani, itu mesti ditanyaukanyau ngan lakiau di ghumahau, karnau nidau pantas, amun jemau tinau ngiciak di bada betunggal. 14:36 Apu katau Allah asalau jak di kamu? Apu ngan kamu ajau katau Allahtu dikiciakka? 14:37 Amun adau jemau meghasau pacak ngiciakka katau Allah ngan adau kuasau jak di Rua Allah, jemau itu mesti keruan, bansau setu diau kukiciakkatu perinta Tuhan. 14:38 Amun adau jemau diau enggup nerimaunyau, jangan kamu nerimau jemautu. 14:39 Mangku, kantin-kantinku, beusahala bulia kuasau ngiciakka katau Allah. Anyautu jangan negahi jemau ngiciak basau rua. 14:40 Tapitu gegalaunyau mesti dikerjauka iluak-iluak.

1 Kurintus 15

15:1 Mbak kini, kantin-kantinku, aku endak ngingatka agi ceritau iluak jak di Allah, diau la kukiciakka senitu ngan kamu. Kamu la nerimaunyau, dijadika dasagh iman kamu. 15:2 Amun kamu nuruti nian setu diau kukiciakka ngan kamu, mangku ceritau iluaktu ka nyelamatka kamu. Amun kamu nidau nurutinyau, nidau bediau gunaunyau kamu njadi jemau percayau. 15:3 Setu diau kukiciakka ngan kamutu kuterimau pulau. Diau penting sekali la kukiciakka ngan kamu, bansau Keristus mati karnau dusau-dusau kitau, luak la ditulis dalam Injil, 15:4 bansau Diau dikuburka, mangku la duau malam diidupka agi. Itu pulau ditulis dalam Injil. 15:5 Aku ngiciakka pulau, bansau Keristus diau la idup agitu ngancakka diriAu ngan Pitrus, mangku ngan duau belas anak-buaHau. 15:6 La udimautu Diau ngancakka diriAu ngan limau ratus anak-buaHau serempak. Banyak jak di ughangtu gi idup mbak kini. Adau pulau jak di ughangtu diau la mati. 15:7 La udim itu, Diau ngancakka diriAu ngan Yakubus mangku ngan gegalau rasul. 15:8 Mangku mendian sekali Diau ngancakka diriAu ngan akuni pulau -- aku luak kupiak diau adau lum masaunyau. 15:9 Akuni rasul diau nidau nian bereti jak di rasul lain, karnau aku nyaraui umat Keristen. 15:10 Anyautu karnau keilu'an Allah aku njadi luak aku mbak kini. Mangku nidau rugi Allah iluak ngan aku. Aku la bekerjau mati-matian nian jak di gegalau ughangtu. Sebenaghau ukan aku diau ngerjauka titu, tapitu Allah diau nyayangi ngan nulungi aku. 15:11 Itula sebapau empuak aku empuak ughangtu, itula diau kami ajaghka, mangku itula diau kamu percayau. 15:12 Amun kami ngiciakka, bansau Keristus ngulang idup, ngapau jak di kamu adau diau ngiciakka, bansau jemau mati nidau ka idup agi? 15:13 Misalau jemau mati nidau ka idup agi, Keristus pulau nidau idup agi. 15:14 Mangku misalau Keristus nidau idup agi, nidau bediau gunaunyau kami ngiciakkanyau, mangku pulau nidau bediau gunaunyau kamu percayau. 15:15 Lagi tenyatau kamini mbu'ung ngan ceritau Allah, karnau kami ngiciakka, bansau Allah la ngidupka Keristus jak di mati, awuak Diau nidau ngulang idup, amun nyela jemau mati nidau ngulang idup. 15:16 Amun ngenian jemau mati nidau diidupka agi, Keristus pulau nidau diidupka agi. 15:17 Amun Keristus nidau idup agi, nidau bediau gunaunyau kamu percayau, mangku kamu masia dikuasaui dusau. 15:18 Mangku jemau diau la mati, empuak percayau ngan Keristus, benasau pulau. 15:19 Amun kitau ngaghapka Keristus cuman batan endak idup di deniauni ajau, mangku jak di gegalau manusiau kitauni diau malang sekali. 15:20 Anyautu nyela, Keristus idup agi jak di mati. Mangku adau aghapan, bansau jemau diau la mati ka idup agi. 15:21 Maut adau di deniau karnau sughang jemau, luak itula pulau idup agi jak di mati dienjuakka ngan manusiau karnau sughang jemau. 15:22 Gegalau jemau mati karnau kerjau Adam, luak itu pulau gegalau jemau ka idup agi karnau kerjau Keristus. 15:23 Anyautu bilang jemau ka diidupka nurut gilirannyau: Dulu sekali Keristus, nanti masau Diau datang agi, giliran jemau diau njadi hak Keristus. 15:24 La udim itu kiamat. Masau itu Keristus ka nunduakka gegalau pemerintahan ngan kuasau ngan kekuatan, mangku Diau ka nyeraka kuasauNyau njadi rajau ngan Allah Bapak. 15:25 Keristus mesti maju merinta, enggut Allah nunduakka gegalau musuAu di bawa ketingAu. 15:26 Musua diau mendian ditunduakka itula maut. 15:27 Dalam Injil ditulis luak ini, "Allah la nunduakka gegalaunyau di bawa ketingAu." Nyela, amun dikiciakka gegalaunyau la ditunduakka ngan Diau, itu bereti diau nunduakkanyau Diau sendighi nidau temasuak. 15:28 Anyautu amun gegalaunyau la ditunduakka ngan Keristus, mangku Anak Allah itu ka nunduakka diriAu ngan Allah. Mangku Allah merinta gegalaunyau. 15:29 Misalau jemau mati nidau ka ngulang idup, tuapau gunaunyau jemau dibaptis batan endak jemau mati? Ngapau adau jemau diau endak dibaptis batan endak jemau mati, amun nyela jemau mati nidau ka idup agi? 15:30 Kamini pulau, ngapau kami maju endak ngadapi bayau? 15:31 Idang aghi aku ngadapi maut. Aku ngiciakka luak ini, karnau aku bangga ngan idup kamu, karnau kamu la percayau ngan Yesus Keristus, Tuhan kitau. 15:32 Amun nurut rupu'an manusiau ajau, tuapau gunaunyau aku melawan benatang ganas di Ipisus? Amun jemau mati nidau ka idup agi, iluakla kitau "makan-minum, beriang-riang, karnau pagi kitau ka mati." 15:33 Jangan kamu tetipu! Amun bekantin ngan jemau jedit, itu merusakka perembak diau iluak! 15:34 Mbak kini jagaula! Jangan maju ngerjauka dusau. Adau jak di kamu diau lum percayau nian ngan Allah. Titu maluka nian! 15:35 Asauku adau diau betanyau, "Luak manau jemau mati diidupka agi? Badan diau luak manau ka dienjuakka ngan ughangtu, amun idup agi?" 15:36 Alaka bigalau! Amun kamu nanam benia, beniatu nidau ka tumbua, amun beniatu lum abis. 15:37 Benia diau kamu tanam di tana, apu benia padi apu benia lainau, itu cuman mughak ajau, ukan tanaman diau ka tumbua nanti. 15:38 Anyautu Allah ngenjuakkanyau rupau nurut kenda'Au. Bilang mecam benia dienjuakkaNyau rupau diau cucuk. 15:39 Gegalaunyau diau benyawau badanau nidau semegi. Badan manusiau lain ngan badan benatang. Badan burung lain pulau, badan ikan lain agi. 15:40 Luak itu pulau adau setu di langit ngan setu di deniau. Ringkia setu diau di langit lain ngan ringkia setu diau di deniauni. 15:41 Ringkia matau-aghi lain ngan ringkia bulan. Ringkia bintang lain agi, mangku ringkia bintang pulau nidau semegi. 15:42 Luak itu pulau nanti ngan jemau mati diau idup agi. Badan diau ditanamtu ka busuak, badan diau idup agi nidau ka busuak. 15:43 Badan diau ditanamtu litak, badan diau idup agi ka kuat. 15:44 Badan diau ditanam badan jak di deniau, badan diau idup agi badan diau dienjuakka Rua Allah. Adau badan jak di deniauni, mangku adau pulau badan jak di Rua Allah. 15:45 Dalam Injil ditulis luak ini, "Mangku manusiau diau dulu sekali, diautu Adam, dijadika, mangku diau idup." Mangku Adam diau mendiantu rua diau ngenjuakka idup. 15:46 Diau datang dulu sekali ukan badan jak di rua, tapitu badan jak di deniau. Diau jak di rua datang mendian. 15:47 Adam diau dulu sekali asalau jak di tana. Adam diau udim itu asalau jak di sergau. 15:48 Jemau deniau ini luak Adam diau dibuat jak di tana, jemau sergau luak diau datang jak di sergau. 15:49 Mbak kini kitau semegi ngan Adam diau asalau jak di tana, luak itu nanti kitau ka semegi pulau ngan diau jak di sergau. 15:50 Diau endak kukiciakka ngan kamu luak ini: Badan diau dijadika jak di dagha ngan daging nidau pacak bulia bada di sergau, mangku badan diau ka busuaktu nidau pacak idup selelamaunyau. 15:51 Ndengaghla resiau ini: Nidau gegalau kitau ka mati, anyautu kitau ka beghuba galau, 15:52 masau negal ajau, masau terumpit diau mendian ka dimunika. Karnau masau ndengagh muni terumpittu, jemau mati ka ngulang idup selelamaunyau, mangku kitau ka diuba galau. 15:53 Karnau badan diau ka mati ini mesti digenti ngan badan diau nidau ka mati. Mangku badan diau jak di deniauni mesti digenti ngan badan jak di sergau. 15:54 Mangku amun badan diau ka mati la digenti ngan badan diau nidau ka mati, badan jak di deniauni digenti ngan badan jak di sergau, mangku la ditepati setu diau ditulis dalam Injil, "Kematian la dilengitka, kemenangan la dapat." 15:55 "Ui, maut, di manau kemenangan kaba? Di manau bisau kaba?" 15:56 Bisau maut itula dusau, mangku kuasau dusau itula ukum Taurat. 15:57 Empuak luak itu, terimau-kasia ngan Allah. Diau la ngenjuakka kemenangan ngan kitau karnau Yesus Keristus, Tuhan kitau. 15:58 Karnau itu, kantin-kantinku diau kusayangi, kuatkala ngan teguakala iman kamu. Bekerjaula maju batan endak Tuhan ngan ngenianau, karnau kamu keruan, bansau kerjau kamu batan endak Tuhan nidau ka keria ajau.

1 Kurintus 16

16:1 Ceritau kumpulan tanci diau ka dienjuakka ngan jemau Keristen diau adau di Yudia, kamu mesti ngerjaukanyau luak la kutunjuakka ngan jemau Keristen di Galatia. 16:2 Idang aghi minggu gegalau kamu mesti ngasingka tanci sesughangan nurut pulian kamu. Penyapila tancitu enggut aku datang, mangku masau itu nidau nanti ditunggalka agi. 16:3 Nanti amun aku la sampai, aku ka ngajung jemau diau kamu anggap pantas pegi ke Yerusalim mbatak surat, mangku ughangtu mbatak tanci kumpulantu ke Yerusalim. 16:4 Mangku amun iluak, bansau aku pegi pulau, ughangtu pacak pegi serempak ngan aku. 16:5 Aku endak berayak ngan kamu, udim aku ngidari Makedunia, karnau rencanauku endak lalu di situ. 16:6 Asauku aku ka lamau mendam guak kamu, asauku selamau pangkau dingin. Mangku kamu pacak nulung aku melajuka pejalananku. 16:7 Aku enggup cuman singga. Aku endak lamau berayak ngan kamu, amun Tuhan kenda'i. 16:8 Aku ka mendam di Ipisus enggut aghi rerayau Pentakusta, 16:9 karnau mbak kini banyak jalan tebukak batan endak ngerjauka kerjau diau penting, empuak adau banyak diau melawan. 16:10 Amun Timutius datang, terimaula diau iluak-iluak, mangku diau riang guak kamu, karnau luak aku pulau diau bekerjau batan endak Tuhan. 16:11 Jangan adau diau nidau meregauinyau. Tulungla diau melajuka pejalanannyau ngulang guak aku ngan selamat. Aku nunggu diau datang serempak ngan kantin-kantin kitau diau lain. 16:12 Amun ceritau kantin kitau Apulus, la rajin kuajung, supayau diau pegi berayak ngan kamu serempak ngan kantin-kantin diau lain. Anyautu diau lum endak pegi mbak kini. Nanti diau ka datang, amun diau kungang. 16:13 Sepepadaula, percayaula ngan tegua, beghanikala diri kamu ngan maju kuat. 16:14 Gegalaunyau diau kamu kerjauka, kerjaukala ngan sayang. 16:15 Kamu cengki keruan Setipanus ngan denga-sana'au. Ughangtu jemau diau dulu sekali njadi Keristen di Akaya. Ngan ngenian ughangtu bekerjau nulung umat Allah. 16:16 Aku ngajung kamu nian, supayau kamu nurut nian ajaghan jemau luak itu ngan jemau lainau diau bekerjau ngan diau ngenian. 16:17 Aku riang, Setipanus, Purtunatus ngan Akaikus datang, karnau ughangtu nggenti kamu nulungi aku. 16:18 Ughangtu meriangka atiku nian, luak itu pulau ati kamu. Jemau luak itu mesti diregaui nian. 16:19 Adau pesan jak di jemau Keristen di perupinsi Asia. Akwila ngan Periskila ngan kantin kitau diau betunggal di ghumahau bepesan pulau ngan gegalau kamu. 16:20 Gegalau kantin di sini bepesan ngan kamu. Sangi pesankala sughang ngan diau lain ngan carau iluak. 16:21 Aku namba pesanku diau kutulis ngan tangankuni, "Pesan jak di aku, Paulus." 16:22 Jemau diau nidau nyayangi Tuhan Yesus nengkela diukum Allah. Maranata -- Tuhan datangla! 16:23 Tuhan Yesus nyayangi kamu. 16:24 Aku pulau nyayangi gegalau kamu diau percayau ngan Yesus Keristus.

2 Kurintus 1

1:1 Jak di aku, Paulus diau njadi rasul Yesus Keristus karnau kendak Allah, jak di kantin kitau Timutius, batan endak jemau Keristen di Kurintus ngan gegalau jemau percayau diau adau di Akaya. 1:2 Kami bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai. 1:3 Tepujila Allah, Bapak Tuhan kitau Yesus Keristus. Diaula Bapak diau iluak nianan ngan maju nulung ngan neguaka kitau. 1:4 Diau neguaka kami ngadapi gegalau tanggungan, mangku kami pacak neguaka jemau diau meghasauka bemecam-mecam tanggungan ngan carau diau semegi luak kami la diteguaka Allah. 1:5 Tanggungan diau dighasauka Keristus la banyak pulau kami ghasauka, mangku karnau Keristus pulau kami diteguaka nian. 1:6 Amun kami sengsarau, itu batan endak neguaka kamu, supayau kamu selamat. Amun kami diteguaka, kamu pulau diteguaka, mangku kamu ta'an ngan ngaligh nanggungka sengsarau diau luak kami tanggungka pulau. 1:7 Kami maju yakin ngan kamu, nidau kekela asau-asau, karnau kami keruan, bansau kamu diau ngikut sengsarau ngan kami mbak kini, ka ngikut pulau diteguaka luak kami. 1:8 Kami endak, supayau kamu ngeruani gegalau sengsarau diau kami ghasauka di perupinsi Asia Keciak. Kami meghasau tanggungan diau kami ghasaukatu beghat igau, mangku kami nidau bediau aghapan agi ka idup. 1:9 Kami meghasau luak la diukum mati. Anyautu titu tejadi, supayau kami jangan ngandalka diri kami, tapitu ngandalka Allah diau ngidupka jemau mati. 1:10 Diautu la nyelamatka kami jak di bayau maut diau nakutka. Diau pulau ka nyelamatka kami nanti, karnau Diau itula kami aghapka. 1:11 Kami percayau, bansau karnau du'a kamu batan endak kami, Allah ka nyelamatka kami agi jak di bayau. Allah ndengaghka du'a jemau banyak, mangku iluak ngan kami. Mangku banyak jemau ka beterimau-kasia ngan Diau. 1:12 Kami bangga, karnau diyakinka ati keciak kami, bansau gegalaunyau diau kami kerjauka di deniau ini terutamau ngan kamu, la kami kerjauka ngan jujur ngan beresia di adapan Allah. Kami ngerjaukanyau ukan ngan pengertian manusiau, tapitu ngan kekuatan jak di Allah. 1:13-14 Kami cuman nulis ngan kamu setu diau pacak kamu bacau ngan terti. Mbak kini kamu la ngerti separau, mangku kami ngaghap nanti kamu ka ngeruani kami nian. Mangku masau Tuhan Yesus datang nanti, kamu ka bangga karnau kami, luak kami pulau bangga karnau kamu. 1:15 Karnau aku yakin nian ngan titu, mangku aku la merencanauka endak berayak ngan kamu, supayau kamu nerimau sayang Allah lebia banyak agi. 1:16 La udim itu aku endak melajuka pejalanan ke Makedunia, mangku jak di situ ngelipat singga agi ngan kamu. Mangku kamu pacak nulung aku melajuka pejalananku ke Yudia. 1:17 Anyautu rencanaukutu la beghuba. Apu itu bereti, bansau pendirianku nidau benagh? Apu aku mbuat rencanau nurut kendakkunila, mangku kekadangan aku ngiciakka "au" kekadangan "nidau"? 1:18 Demi Allah diau pacak dipercayaui janjiku ngan kamu ukan "au" ngan "nidau". 1:19 Karnau Yesus Keristus, Anak Allah, diau dikiciakka aku, Silas ngan Timutius ngan kamu ukan "au" ngan "nidau". Di Diau cuman adau "au". 1:20 Gegalau janji la "au" galau dalam Keristus. Karnau itu kitau ngiciakka "nyela nian" endak ngagungka Allah karnau Diau. 1:21 Allah itula diau la mbuat kami ngan kamu seghundak nian ngan Keristus. Diau pulau la milia kitau. 1:22 Diau la nandaui kitau njadi ha'Au ngan ngenjuakka RuaHau dalam ati kitau. Titu jaminan, bansau Diau ka ngenjuakka gegalaunyau diau la dijanjikaNyau batan endak kitau. 1:23 Allah ngeruani aku. Diau keruan, bansau aku nidau lasung ke Kurintus, karnau aku nidau endak mbingungka kamu. 1:24 Kami nidau endak masau kamu ngan setu diau mesti kamu percayaui, karnau kamu la percayau nian ngan Keristus. Kami cuman endak sesamau bekerjau ngan kamu batan endak meriangka kamu.

2 Kurintus 2

2:1 Mangku aku la mutuska nidau ka berayak agi ngan kamu, amun kamu kebingungan. 2:2 Karnau amun aku mbingungka kamu, sapau diau pacak meriangka aku, amun ukan jemau diau kubingungkatu? 2:3 Itula sebapau aku nulis surat senitu ngan kamu. Aku enggup berayak ngan kamu, amun aku ka bingung karnau kamu, awuak kamu diau mesti meriangka aku. Aku percayau, amun aku riang, kamu riang pulau. 2:4 Aku nulis ngan kamu ngan atiku madak nian ngan temas sampai banyak numbanka ayiak-matau. Aku nulis itu, ukan supayau kamu njadi bingung, tapitu supayau kamu keruan, bansau aku sayang nian ngan kamu. 2:5 Amun adau jemau diau mbingungka, mangku ukan aku diau dibingungka, tapitu gegalau kamu, senidau-nidaunyau separau jak di kamu. Aku enggup mbesakka. 2:6 Ngan jemau luak itu la cukup ukuman diau la diukumka separau jak di kamu. 2:7 Mangku mbak kini kamu mesti ma'apka ngan neguaka diau, supayau diau jangan putus aghapan karnau kebingungan igau. 2:8 Karnau itu aku mintak, supayau kamu sayang nian ngan diau. 2:9 Nyela, aku nulis surat senitu endak nguji kamu, apu kamu endak ta'at ngan gegalau kici'anku. 2:10 Amun kamu ma'apka sala jemautu, aku ma'apkanyau pulau. Amun aku ma'apka, kalu adau diau mesti kuma'apka, itu kukerjauka di adapan Keristus batan endak kamu. 2:11 Mangku Iblis jangan adau jalan nguasaui kitau, karnau kitau la keruan rencanaunyau. 2:12 Masau aku la sampai di Teruas endak ngiciakka ceritau iluak jak di Keristus, Tuhan la mbukak jalan ngan aku endak bekerjau di bada itu. 2:13 Anyautu aku nidau tenang, karnau nidau betemu ngan kantin kitau Titus. Mangku aku pamit endak pegi ke Makedunia. 2:14 Aku beterimau-kasia ngan Allah! Diau maju mbatak kami di jalan menang serempak ngan Keristus. Diau makai kami, supayau ceritau Keristus tesebar ke manau-manau luak embau ghum. 2:15 Karnau kami luak embau ghum diau asalau jak di Keristus batan endak Allah di guak jemau diau diselamatka ngan diau benasau. 2:16 Ngan jemau diau ka benasau kami luak embau busuak diau mbunua. Ngan jemau diau diselamatka kami luak embau ghum diau ngenjuakka idup. Sapau diau pacak ngerjauka tugas ini? 2:17 Kami nidau luak banyak jemau diau ndalak untung ngan ngiciakka katau Allah. Tujuan kami iluak, karnau kami diajung Allah endak ngiciakka ceritau itu luak semestiau di adapan Allah, karnau kami seghundak ngan Keristus.

2 Kurintus 3

3:1 Apu kami la mulai agi muji diri kami? Apu kami mesti nunjuakka surat pujian ngan kamu luak jemau lain, apu mintak surat pujian ngan kamu? 3:2 Kamu itula surat pujian kami diau ditulis dalam ati kami, mangku pacak dikeruani ngan dibacau gegalau jemau. 3:3 Mangku la nyatau, bansau kamu surat Keristus diau ditulis karnau kerjau kami. Surat itu ukan ditulis ngan dawat, tapitu ngan Rua Allah diau idup, ukan ditulis di batu, tapitu di ati manusiau. 3:4 Kami ngiciak luak itu, karnau kami percayau nian ngan Allah karnau Keristus. 3:5 Amun kamini ajau, kami nidau sanggup ngerjauka kerjau itu. Anyautu Allah diau nyanggupka kami. 3:6 Diautu pulau mbuat kami sanggup bekerjau batan endak Allah nurut janji empai. Janjitu tegantung ngan Rua Allah ukan ngan ukum diau tetulis. Karnau diau ditulistu mbatak mati, tapitu Rua Allah ngenjuakka idup. 3:7 Masau janji diau mbatak matitu dibuat ngan diukir di batu, keagungan Allah kina'an di dayi Musa. Sinaghau terang nian, mangku jemau Israil nidau ta'an nginak dayi Musa, empuak sinaghtu la mulai pudagh. Amun janji diau mbatak matitu dikiciakka ngan terang diau besinagh luak itu, 3:8 cengki besakla keagungan diau nyertaui janji diau dienjuakka Rua Allah. 3:9 Amun kerjau diau ngukumtu agung luak itu, apau agi keagungan kerjau diau mbuat jemau seilu'an ngan Allah. 3:10 Sebenaghau kerjau diau senitu dianggap agung nidau bediau retiau agi, amun dibandingka ngan keagungan mbak kini. 3:11 Amun kerjau diau ta'an jerang ajau agung luak itu, cengki agungla kerjau diau ta'an selelamaunyau. 3:12 Karnau kami adau aghapan luak itu, mangku kami beghani ngiciak luak itu. 3:13 Kami nidau luak Musa nukup dayi ngan selampung, supayau jemau Israil jangan nginak terang Tuhan diau jerangtu padam. 3:14 Anyautu rupu'an ughangtu tetutup. Enggut mbak kini rupu'an ughangtu masia tetutup, amun ughangtu mbacau kitab janji diau lamau itu. Rupu'an ughangtu cuman pacak tebukak, amun seghundak ngan Keristus. 3:15 Mbak kini pulau amun ughangtu mbacau kitab Musa, rupu'an ughangtu masia tetutup. 3:16 Anyautu amun jemau ngulang njenguak Tuhan, mangku rupu'an tebukak. 3:17 Karnau Tuhan itu Rua, mangku jemau diau adau Rua Allahtu bibas. 3:18 Mangku di kitauni kina'an keagungan Tuhan, karnau rupu'an kitau nidau tetutup, mangku kitau maju diubai njadi luak Diau. Tamba lamau kitau tamba besinagh karnau keagungan diau asalau jak di Tuhan diautu Rua.

2 Kurintus 4

4:1 Kami nerimau tugas itu, karnau Allah itu iluak. Karnau itu kami nidau tekedan. 4:2 Kami enggup nggunauka carau gelap diau maluka. Kami nidau nipuka jemau ngan nidau ngubai katau Allah. Kami ngiciakka kendak Allah ngenianau. Mangku teserala ngan jemau endak nilai kami dalam ati keciak di adapan Allah. 4:3 Mangku amun ceritau iluak diau kami kiciakkatu masia pulau jemau nidau terti, itu cuman jemau diau ka benasau diau nidau ngerti. 4:4 Ughangtu nidau percayau, karnau rua iblis diau nguasaui deniauni ngalangi rupu'an, supayau nidau ngerti ngan nidau nginak terang jak di ceritau iluaktu, ceritau keagungan Keristus diau luak gambaran Allah. 4:5 Ceritau diau kami kiciakkatu ukan nceritauka kaminila. Ceritautu nceritauka Yesus Keristus, bansau Diautu Tuhan, mangku kamini njadi budak kamu karnau Keristus. 4:6 Allah la bekatau, "Jak di keleman ka nimbul terang." Allah itu pulau nimbulka terang di ati kitau, supayau rupu'an kitau njadi terang mangku ngeruani keagungan Allah diau kina'an di dayi Keristus. 4:7 Retau sergau itu adau di kami diau nidau beregautu diau luak guci dibuat jak di tana, mangku nyatau, bansau kuasau injil diau besaktu asalau jak di Allah ukan jak di kamini. 4:8 Kami diluatka di manau-manau, tapitu kami nidau nyera. Kami bingung, tapitu nidau putus aghapan. 4:9 Kami disaraui, tapitu nidau kekela dienangka kami ajau. Kami diempaska enggut rubua, tapitu nidau mati. 4:10 Kami maju meghasauka kematian Yesus di badan kami, mangku idupAu pulau ka nyatau di badan kami. 4:11 Empungan gi idup, kami maju dalam bayau maut karnau Yesus, mangku idup Yesus pulau dinyatauka di badan kami diau pacak mati. 4:12 Kami maju dalam bayau maut, mangku kamu bulia idup. 4:13 Di Injil ditulis katau ini, "Aku percayau, karnau itu aku ngiciak." Mangku kami percayau. Karnau itu kami pulau ngiciak. 4:14 Kami keruan, bansau Allah diau la ngidupka Tuhan Yesus ka ngidupka kami pulau ngan Yesus. Diau ka mbata'i kami ngan kamu pulau ke adapanNyau. 4:15 Gegalaunyautu batan endak kamu. Karnau tamba banyak jemau meghasauka keilu'an Allah, tamba banyak pulau du'a beterimau-kasia ngan Allah, mangku Allah diagungka. 4:16 Itula sebapau kami nidau tekedan. Empuak badan kami tamba guyuk, ati kami maju diteguaka. 4:17 Mangku tanggungan diau mbak kini kami ghasauka nidau sebeghapau. Itu ka ngasilka keriangan selelamaunyau diau jawua lebia besak, amun dibandingka ngan penanggungantu. 4:18 Kami nidau nyanauka setu diau kina'an, tapitu setu diau nidau kina'an, karnau diau kina'an jerang ajau, diau nidau kina'an selelamaunyau.

2 Kurintus 5

5:1 Badan kitau diumpamauka ngan anjung. Mangku kitau keruan, amun anjung diau kitau tunggu di deniauni la dileghak, Allah nyediauka ghuma di sergau batan endak kitau diau nidau dibuat jemau mangku ta'an selelamaunyau. 5:2 Semasau kitau gi adau di anjung ini, kitau madak ngan nyempit, karnau kitau ghindu nian endak mendam di ghuma kitau di sergau. 5:3 Ghumatu badan kitau diau empai, mangku kitau telindung. 5:4 Semasau gi adau di anjung di deniauni, kitau nyempit karnau tanggungan diau beghat ini. Kitau endak mendam di ghuma di sergau ukan karnau endak bibas jak di badan kitau di deniauni, tapitu karnau kitau endak ngenauka badan diau jak di sergautu, mangku badan kitau diau pacak mati ini digenti ngan diau idup. 5:5 Allah nyediauka kitau batan endak itu, mangku Diau ngenjuakka RuaHau ngan kitau njadi jaminan gegalaunyau diau la disediauka batan endak kitau. 5:6 Mangku kami maju meghasau tegua, empuak kami keruan, semasau kami gi mendam di badan kamini, kami gi jawua jak di ghuma diau ka kami tunggu ngan Tuhan. 5:7 Kami idup karnau percayau, ukan karnau nginak. 5:8 Karnau itu ati kami tegua. Kami endak nian bibas jak di badan kamini, mangku pacak mendam ngan Tuhan. 5:9 Mangku kami beusaha nian melemakka atiAu, empuak kami mendam di anjung kami di sini, empuak di situ. 5:10 Karnau gegalau kitau ka diadili Keristus, mangku bilang jemau ka nerimau balasan diau setimpal nurut peremba'au di deniauni, empuak iluak empuak ja'at. 5:11 Kami keruan retiau takut ngan Tuhan. Karnau itu kami beusaha meyakinka jemau. Allah keruan ati kami, mangku aku ngaghap kamu pulau keruan kami dalam ati kamu. 5:12 Ngan kici'an ini kami nidau mintak dipuji. Kami cuman endak nunjuakka jalan iluak, mangku kamu bangga karnau kami, mangku pacak nimbali jemau diau mentingka rupau ukan ati. 5:13 Amun kami kina'an luak gilau, titu batan endak Allah. Amun kami kina'an waras, titu batan endak kamu. 5:14 Kasia Keristus nguasaui kami, mangku kami keruan, amun sughang la mati batan gegalau jemau, mangku itu bereti gegalau jemau la mati. 5:15 Keristus la mati batan endak gegalau jemau, mangku jemau diau idup nidau agi idup batan endak diriau, tapitu batan endak Keristus diau la mati ngan la diidupka agi batan endak ughangtu. 5:16 Karnau itu kami nidau agi ngeruani jemau nurut rupu'an manusiau. Nyela, senitu kami ngeruani Keristus nurut rupu'an manusiau, tapitu mbak kini nidau agi. 5:17 Amun jemau la seghundak ngan Keristus, diau njadi manusiau empai. Idup diau lamau nidau bediau agi, gegalaunyau la njadi empai. 5:18 Gegalaunyautu dikerjauka Allah. Mangku karnau Keristus Allah mbuat kitau seilu'an ngan Diau ngan ngenju'i kitau kerjau ngiciakka ceritau damaitu, supayau jemau lain pulau seilu'an ngan Diau. 5:19 Kami ngiciakka, bansau Allah mbuat manusiau seilu'an ngan Diau karnau Keristus. Allah ngerjauka titu nidau nuntut dusau jemau. Mangku kami la ditugaska ngiciakka ceritau damaitu. 5:20 Kamini diajung Keristus. Mangku amun kami ngiciak, itu luak Allah ngiciak ngan kamu. Atas namau Keristus kami mintak nian, terimaula kasia Allah diau mbuat kamu seilu'an ngan Diau. 5:21 Keristustu nidau bedusau. Anyautu Allah ngajung Diau nanggungka dusau kitau, supayau kitau dibenaghka karnau seghundak ngan Keristus.

2 Kurintus 6

6:1 Kamini sesamau bekerjau ngan Allah, mangku kami mintak nian, supayau jangan kamu mbuat keilu'an ati Allah diau la kamu ghasauka nidau begunau agi. 6:2 Dalam Injil Allah bekatau, "Masau Aku endak, Aku ka ndengaghka kamu. Masau Aku endak nyelamatka kamu, Aku ka nulung kamu." Nyela nian, mbak kini la masaunyau, mbak kini masaunyau Diau endak nyelamatkatu. 6:3 Kami nidau endak, kerjau kami disalaka jemau, mangku kami beusaha supayau nidau bediau tapakan jemau nyalaka kami. 6:4 Anyautu gegalau kerjau kami nunjuakka kami bekerjau batan endak Allah. Kami la nanggungka gegalau sengsarau ngan penanggungan ngan ngaligh nian. 6:5 Kami disaraui, dijilka, disamun. Kami bekerjau mati-matian, rajin nidau tiduak, nidau makan. 6:6 Kami nunjuakka kami ambau Allah, bekerjau ngan jujur, bepengertian, ngaligh ngan iluak. Kami bepaut ngan Rua Allah ngan nyayangi nian. 6:7 Kami ngiciakka ceritau jak di Allah ngan kuasau Allah. Perembak kami diau iluak njadi pakaian kami endak nyerang ngan mbenaghka diri kami. 6:8 Kami diregaui empuak digelakka. Kami dipuji empuak diburuakka. Kami dikiciakka pembu'ung, empuak kamini jujur. 6:9 Kami dianggap nidau tekenal, tapitu dikeruani gegalau jemau. Kami dikiciakka mati, tapitu kina'ila kami idup. Kami diukum, tapitu nidau mati. 6:10 Empuak dimadakka, kami maju riang. Empuak kami serik, kami mbuat banyak jemau kayau. Empuak kami nidau bediau tuapau-apau, kami adau gegalaunyau. 6:11 Kantin-kantin diau kusayangi di Kurintus. Kami la ngiciak ngan terang-terangan ngan kamu. Ati kami la tebukak libagh batan endak kamu. 6:12 Kami nidau nukup ati kami batan endak kamu. Cuman kamu diau nukup ati batan endak kami. 6:13 Mbak kini aku endak ngiciak ngan kamu luak ngan anakku. Bukakla pulau ati kamu nian batan endak kami. 6:14 Jangan kamu endak seghundak ngan jemau diau nidau percayau. Titu nidau iluak. Manau ka adau keilu'an seghundak ngan keja'atan. Manau ka adau jemau diau nuruti kendak Allah ngan jemau diau melawan Allah sesamau bekerjau. Nidau ka adau terang seghundak ngan keleman. 6:15 Nidau ka adau Keristus sepakat ngan Iblis. Mangku tuapau diau semegi di antarau jemau diau percayau ngan Keristus ngan jemau diau nidau percayau? 6:16 Tuapau ubungannyau Ghuma Allah ngan keramat? Kitau ini Ghuma Allah diau idup. Allahtu bekatau, "Aku ka mendam di guak ughangtu, Aku endak idup seghundak ngan ughangtu. Aku ka njadi Allah ughangtu, mangku ughangtu ka njadi umatKu." 6:17 Karnau itu, "Tinggalkala jemau diau nidau keruan Allah, jawuaka diri kamu jak di ughangtu. Jangan ngecakka setu diau aram, mangku Aku ka nerimau kamu. 6:18 Mangku Aku ka njadi Bapak kamu, kamu ka njadi anakKu. Luak itula katau Tuhan diau Mahakuasau."

2 Kurintus 7

7:1 Kantin-kantinku diau kusayangi. Gegalau janji itu batan endak kitau. Karnau itu mela kitau mberesiaka diri kitau jak di gegalaunyau diau ngumuhi ati ngan rua kitau. Kitau mesti takut ngan Allah, mangku kitau pacak idup beresia batan endak Allah. 7:2 Terimaula kami dalam ati kamu. Kami nidau besala ngan sughang kiala. Nidau sughang kia diau kami rugika. Nidau jak di sughang kiala kami ndalak untung. 7:3 Aku ngiciak luak itu ukan endak nyalaka kamu. Tadi la kukiciakka, bansau kamu adau di ati kami, mangku kitau sekantin seidup semati. 7:4 Aku percayau nian ngan kamu, aku bangga nian karnau kamu. Empuak kami meghasauka banyak penanggungan, atiku diriangka karnau kamu, mangku aku riang nian. 7:5 Masau kami sampai di Makedunia, kami nidau pulau tenang. Kami maju adau penanggungan, jak di jemau lain bantahan, jak di ati kami ketakutan. 7:6 Anyautu kami beterimau-kasia. Allah meriangka ati jemau diau tekedan. Diau pulau meriangka kami, masau Titus datang. 7:7 Aku riang ukan ajau karnau Titus datang, tapitu pulau karnau diau ngiciakka atiau riang karnau kamu. Diau ngiciakka ngan kami, bansau kamu ghindu nian endak betemu ngan aku, bansau kamu la nyesali kerjau senitu, mbak kini endak mbenaghka aku. Karnau itu aku tamba riang nian. 7:8 Suratku senitu mbuat kamu madak, mangku mbak kini aku nidau nyesal nulis surat itu. Nyela, masau aku nginak, bansau suratkutu mbuat kamu madak, empuak madak kamu cuman jerang, aku nyesal pulau. 7:9 Mbak kini aku riang nian, ukan karnau kamu madak, tapitu karnau kemada'an kamutu mbuat kamu beghuba. Allah ngenda'i kemada'an diau luak itu, mangku kami nidau merugika kamu. 7:10 Kemada'an diau jak di Allah ngasilka ati beghuba mangku selamat. Jemau nidau ka nyesali titu. Anyautu kemada'an jak di deniauni kemada'an diau mbenasauka. 7:11 Cubau kami ngingatka, tuapau asilau di kamu kemada'an jak di Allah. Asilau kamu beusaha nian endak mberesiaka diri jak di pemburu'an. Kamu keghengaman ngan dusau, takut, ghindu, rajin, mangku endak ngukum jemau diau besala. Ngan gegalaunyautu kamu la mbuktika, bansau kamu nidau besala dalam pekarau itu. 7:12 Empuak aku la nulis surat itu senitu, kutulis ukan karnau jemau diau besalatu, ukan pulau karnau jemau diau nanggung salatu. Aku nulis surat itu, supayau kamu nyadari diri kamu di adapan Allah, bansau kamu nyanauka kami nian. 7:13 Itula sebapau kami riang. Ukan itu ajau, tapitu kami lebia jak di riang karnau nginak Titus riang pulau, karnau kamu meriangka diau. 7:14 Aku la mbanggaka kamu ngan diau. Terimau-kasia kamu nidau maluka aku. Gegalaunyau diau la kami kiciakka ngan kamu benagh. Luak itu pulau setu diau kami banggaka ngan Titus ceritau kamu tenyatau benagh. 7:15 Mbak kini diau tamba sayang ngan kamu, karnau diau teghingat, bansau kamu nerimau diau ngan takut nian, mangku ta'at ngan diau. 7:16 Aku riang nian, karnau kamu pacak dipercayaui ngan gegalaunyau.

2 Kurintus 8

8:1 Kantin-kantinku, kami endak ngiciak ngan kamu ceritau keilu'an Allah ngan jemau Keristen di Makedunia. 8:2 Ughangtu la meghasauka penanggungan diau beghat, anyautu ughangtu maju riang nian ngan ngenjuak nidau dikit nulung jemau, empuak serik nian. 8:3 Aku la nginak, bansau ughangtu la ngenjuak setu diau adau, lebia agi jak di itu dienjuakka. Ngan setulusau 8:4 ughangtu mintak nian ngan kami, amun bulia ngikut nulung ngenju'i umat Allah di Yudia. 8:5 Ughangtu ngenjuak lebia jak di kami aghapka. Ughangtu nyeraka diriau kudai ngan Allah, mangku pulau ngan kami karnau kendak Allah. 8:6 Karnau itu kami ngajung Titus diau mulai kerjau iluak itu, supayau diudiminyau di guak kamu. 8:7 Keilu'an adau galau di kamu. Carau kamu percayau, carau kamu nyatauka pendapat, carau kamu pengertian, carau kamu nulung jemau ngenian, carau kamu nyayangi kami iluak galau. Karnau itu mbak kini iluakla kamu ngerjauka kerjau diau iluaktu pulau. 8:8 Aku ukan ngiciakka titu endak ngajung kamu, tapitu endak nunjuakka jemau lain diau rajin ngenjuak ngan jemau. Mangku aku endak keruan pulau, apu kamu sayang nian. 8:9 Kamu keruan, bansau kitau disayangi Yesus Keristus, Tuhan kitau. Empuak Diau kayau, Diau njadi serik batan endak kamu, mangku kamu njadi kayau karnau keserikanNyautu. 8:10 Nurut pendapatku, iluakla kamu ngudimi kerjau diau la dimulai taun empaini. Kamutu diau dulu sekali nembaika kerjautu. 8:11 Mbak kini udimila kerjautu. Kerjaukala titu nurut luak manau kamu pacak ngan sukau. Kamu mesti riang ngudiminyau luak kamu riang merencanaukanyau senitu. 8:12 Amun kamu sukau ngenjuak, mangku Allah ka nerimau enju'an kamutu nurut setu diau adau di kamu, ukan nurut setu diau nidau bediau di kamu. 8:13 Aku nidau endak mbibaska jemau jak di tugasau mangku mbeghati kamu, anyautu mangku semegi. 8:14 Mbak kini kamutu sepantasau ncukupi jemau diau kurangan. Mangku amun ughangtu belebia, ughangtu ka nulung kamu, amun kamu kurang. Ngan carau luak itu kamu sesamau tetulung. 8:15 Luak ditulis dalam Injil, "Jemau diau ngambiak banyak nidau belebia. Jemau diau ngambiak dikit nidau kurangan." 8:16 Terimau-kasia ngan Allah! Diautu mbuat Titus endak nian nulung kamu luak kami endak nulung kamu. 8:17 Nyela, Titus ukan ajau sukau endak nuruti setu diau kami kiciakka, mangku diau endak nian nulung kamu. Ngan kenda'au sendighi diau mutuska endak pegi njenguak kamu. 8:18 Serempak ngan diau kami ngajung pulau sughang kantin diau dipuji di gegalau jemau Keristen, karnau kerjaunyau ngiciakka ceritau iluak jak di Allah. 8:19 Ukan itu ajau. Diau pulau la dipilia ngantini kami ngerjauka kerjau iluak itu. Diautu nulung kami ngerjaukanyau, mangku Tuhan diregaui ngan diagungka, mangku tebukti kami sukau nulung jemau. 8:20 Kami sepadau nian, supayau jangan adau jemau diau nyalaka kami nyampaika kumpulan tanci diau banyak itu. 8:21 Kami endak mbuat jujur, ukan cuman di adapan Tuhan, tapitu pulau di adapan jemau. 8:22 Serempak ngan ughang duautu kami ngajung pulau sughang kantin diau lainau. Kami la rajin nguji diau, tenyatau diau maju galak nulung. Mbak kini diau endak nulung kami nian, karnau besak aghapannyau ngan kamu. 8:23 Titustu kantinku diau bekerjau ngan aku batan endak nulung kamu. Kantin diau lain diau pegi serempak ngan diautu diajung jemau Keristen bekerjau endak meregaui Keristus. 8:24 Mangku kami mintak, supayau kamu nyatauka sayang kamu ngan ughangtu, mangku gegalau jemau Keristen keruan, bansau kamu nyayangi ughangtu nian ngan setu diau kami banggaka ceritau kamutu benagh.

2 Kurintus 9

9:1 Sebenaghau nidau nanti kutuliska agi ceritau kumpulan tanci batan endak umat Allah di Yudia. 9:2 Aku keruan kamu galak nulung, mangku aku muji kamu di adapan jemau Makedunia. Aku la ngiciakka ngan ughangtu, bansau jak taun empaini kantin kitau di Akaya la siap ngenjuakka tanci. Mangku kerjau kamu mbuat banyak jemau endak nulung pulau. 9:3 Mbak kini aku ngajung Titus ngan kantinautu njenguak kamu, supayau setu diau kami banggaka ceritau kamu jangan njadi kici'an mbu'ung. Kamu mesti siap, karnau la kukiciakka ngan ughangtu, bansau kamu la siap. 9:4 Amun jemau Makedunia datang serempak ngan aku nanti, jangan ughangtu nemuni kamu lum siap. Alaka maluannyau kamini nanti, karnau la percayau nian ngan kamu. Kamu pulau ka maluan. 9:5 Itula sebapau aku ngajung ughangtu dulu pegi endak ngurus kumpulan tanci diau la kamu janjikatu. Mangku amun aku datang, tancitu la tekumpul, mangku tenyatau kamu ngenjuak ngan riang, ukan karnau tepasau. 9:6 Ingatkala, jemau diau nanamka benia dikit ka dikit pulau dapat asilau. Jemau diau nanamka banyak benia ka banyak pulau asilau. 9:7 Bilang jemau mesti ngenjuak nurut kenda'au, jangan ngan asau-asauan, jangan meghasau tepasau, karnau Allah nyayangi jemau diau ngenjuak ngan riang. 9:8 Allah bekuasau ngenjuakka ngan kamu setu diau iluak banyak tegalau, mangku setu diau kamu enda'au maju adau galau, lagi ka lebia batan endak bebuat lebia iluak agi. 9:9 Di Injil ditulis, "Diau banyak ngenjuak ngan jemau serik. Keilu'an atiAu batan endak selelamaunyau." 9:10 Allah nyediauka benia ngan tukang tanam ngan makanan batan endak kitau. Diau pulau ka nyediauka banyak benia batan endak kamu nanam, ka dibuat banyak asilau, mangku keilu'an ati kamu ka tamba banyak pulau. 9:11 Ngan carau luak itu kamu ka serbau cukup, mangku kamu maju pacak ngenjuak ngan riang. Mangku banyak jemau ka beterimau-kasia ngan Allah, karnau enju'an kamu diau kami agiaka. 9:12 Kerjau iluak diau kamu kerjaukatu ncukupi umat Allah diau kurangan, mangku pulau mbuat banyak jemau beterimau-kasia ngan Allah. 9:13 Karnau keilu'an diau kamu nyataukatu banyak jemau Keristen di Yudia ka muji Allah, karnau nginak kamu ta'at ngan ceritau iluak jak di Keristus diau kamu ikutitu. Ughangtu ka muji Allah pulau, karnau kamu iluak ngan ngenjuak setu diau adau di kamu ngan gegalau jemau. 9:14 Mangku ughangtu ka ndu'aka kamu ngan sayang nian ngan kamu, karnau Allah iluak nian ngan kamu. 9:15 Terimau-kasia ngan Allah, karnau enju'anNyau diau iluak nianantu.

2 Kurintus 10

10:1 Aku, Paulus, adau diau endak kukiciakka ngan kamu. Nurut katau jemau akuni nidau beghani, amun buadapan ngan kamu, tapitu beghani, amun jawua. Karnau Keristustu iluak ngan lembut, 10:2 aku mintak nian, jangan masau aku keghas ngan kamu, amun aku datang nanti. Aku la berencanau endak marai jemau diau ngiciakka kami idup nurut deniau. 10:3 Nyela, kami gi adau di deniau, tapitu kami nidau bejuang nurut carau deniau. 10:4 Pakaian diau kami gunauka dalam peperangan ini ukanau pakaian deniauni, tapitu pakaian diau adau kuasau Allah, mangku binting dirubuaka. Bebalahan kami tangkis. 10:5 Kami merusakka setu diau dibuat jemau geduak endak melawan setu diau benagh ceritau Allah. Kami na'an gegalau rupu'an jemau ngan mbuatau ta'at ngan Keristus. 10:6 Mangku amun kamu la ta'at nian, kami siap endak ngukum jemau diau nidau ta'at. 10:7 Kamu cuman nginak setu diau kina'an jak di luagh ajau. Amun adau sughang diau yakin, bansau diau hak Keristus, diau mesti berupuak agi, mangku nyadari, bansau kamini pulau hak Keristus semegi ngan diautu. 10:8 Aku nidau maluan, amun aku lebia mbanggaka kuasau diau dienjuakka Tuhan ngan kami, karnau kuasau itu dienjuakka batan endak neguaka kamu, ukanau batan endak mbenasauka kamu. 10:9 Aku enggup kamu meghasau ditakuti ngan suratku. 10:10 Jemau bekatau, "Surat Paulus itu tegas ngan keghas. Anyautu amun adau guak kitau, diau lemas ngan kici'annyau nidau bediau retiau." 10:11 Jemau diau ngiciak luak itu mesti nyadari, bansau amun kami datang guak kamu nanti, kami mbuat semegi ngan setu diau kami tulis dalam surat. 10:12 Nyela, kami nidau beghani nyamauka ngan mbandingka kamini ngan jemau diau muji diriau. Alaka bigal ughangtu! Makai diriau njadi ukuran, mangku mbandingka diriau ngan diri ughangtula. 10:13 Kami nidau luak itu. Amun kami bangga, kami nidau lebia jak di batas. Kami maju adau dalam batas kerjau diau ditetapka Allah batan endak kami. Kamu temasuak dalam itu. 10:14 Mangku kami nidau di luagh batas daira kerjau kami, masau kami berayak ngan kamu senitu ngan ngiciakka ceritau iluak jak di Keristus ngan kamu. 10:15 Kami nidau muji diri kami ngan kerjau jemau diau adau di luagh batas diau ditetapka Allah batan endak kami. Kami ngaghapka kamu tamba percayau ngan Keristus, mangku kami pacak ngerjauka kerjau diau lebia besak agi di guak kamu. Kerjau itu maju adau dalam batas diau ditetapka Allahtu. 10:16 Ngan carau luak itu kami pacak ngiciakka ceritau iluaktu di nenggeri jemau. Kami nidau nanti muji diri kami ngan asil kerjau jemau diau dikerjauka di daira ughangtu. 10:17 Di Injil ditulis, "Jemau diau bangga, mesti mbanggaka setu diau dikerjauka Tuhan." 10:18 Jemau diau dipuji Tuhan ta'an uji ukan jemau diau muji diriau.

2 Kurintus 11

11:1 Enangka kerjauku diau bang bigal ini. Asauku bulia. 11:2 Aku nyanauka kamu nian luak Allah nyanauka kamu. Aku la njanjika kamu ngan Keristus. Mangku aku endak, supayau kamu maju beresia luak sughang gadis beresia enggut aghi nika. 11:3 Anyautu aku ghegak rupu'an kamu disesatka, nidau agi ta'at ngan Keristus, luak Hawa senitu pulau disesatka kecalakan ulagh. 11:4 Rupaunyau kamu riang nerimau jemau diau datang guak kamu ngan ngiciakka ceritau Yesus diau lain, ukan Yesus diau kami kiciakka ngan kamu. Kamu pulau endak nerimau rua ngan ceritau diau lain nian ngan Rua Allah ngan ceritau iluak diau kamu terimau jak di kami. 11:5 Dikit kiala aku nidau meghasau inau jak di rasul-rasul diau hibat itu. 11:6 Asauku aku kurang pacak nian ngiciak, tapitu amun ngeruani ceritau Allah ukan aku nidau pacak, la kami buktika ngan kamu ngan gegalaunyau. 11:7 Aku la ngiciakka ceritau iluak jak di Allah ngan kamu, nidau mintak dibayighi dikit kiala. Aku nginauka diriku endak ninggika kamu. Apu itu salaku ngan kamu? 11:8 Masau aku kerjau batan endak kamu, aku dibayighi jemau Keristen lainau. Pacak dikiciakka aku merugika jemautu, mangku pacak nulung kamu. 11:9 Amun aku dang nidau betanci, aku nidau kekela nyusaka sughang kia jak di kamu. Gegalaunyau diau aku enda'au disediauka kantin-kantin diau datang jak di Makedunia. Aku njagau nian, mangku nidau njadi beban kamu. Mangku aku njagau, supayau maju luak itu. 11:10 Karnau ajaghan Keristus diau benagh adau di aku, nidau sughang kiala di gegalau daira Akaya pacak melengitka kebanggaanku itu. 11:11 Ngapau luak itu? Apu aku nidau nyayangi kamu? Allah keruan aku nyayangi kamu. 11:12 Setu diau kukerjauka mbak kini ka maju kukerjauka, supayau rasul diau lainautu nidau bediau tapakan endak muji diriau ngan ngiciakka, bansau ughangtu bekerjau ngan carau luak kami. 11:13 Ughangtu cak rasul. Ughangtu bekerjau ngan mbu'ungi jemau, ughangtu luluak rasul Keristus. 11:14 Nidau nanti kemangan ughangtu ngerjauka titu. Iblis pulau luluak malaikat terang. 11:15 Mangku nidau nanti kemangan, amun anak-bua iblis luluak anak-bua Allah. Udim-udimau ughangtu ka nerimau balasan diau setimpal ngan kerjaunyautu. 11:16 Kukiciakka sekali agi: Jangan adau diau nganggap aku bigal. Anyautu amun nyela adau diau nganggap aku bigal, terimaula aku luak jemau bigal. Mangku nengkela aku diau bigalni muji diriku dikit. 11:17 Ka kukiciakka kebanggaanku luak jemau bigal. Ukan Tuhan diau ngajung aku ngiciakkanyau. Aku ngiciak luak jemau bigal. 11:18 Banyak jemau muji diriau ngan carau deniau. Aku endak pulau muji diriku. 11:19 Kamu ngaligh nian ngan jemau bigal, karnau kamu meghasau pintar. 11:20 Kamu nerimau nian, amun jemau mbudakka kamu, amun jemau nguasaui ngan ngambiak untung banyak jak di kamu, amun jemau nganggap diriau lebia jak di kamu ngan beghani nampagh kamu. 11:21 Aku maluan ngaku'i, bansau kami nidau pacak ngerjauka titu. Anyautu setu diau jemau lain beghani mbanggaka, aku mbanggaka pulau. Akuni ngiciak luak jemau bigal. 11:22 Ughangtu jemau Ibrani, aku pulau jemau Ibrani! Ughangtu jemau Israil, aku pulau jemau Israil! Ughangtu pengadau Abraham, aku pulau pengadau Abraham! 11:23 Apu ughangtu bekerjau batan endak Keristus? Aku ngiciak luak jemau gilau, iluakla aku sangkan gegalau ughangtu. Nemanla aku bekerjau, rajinla aku dijilka. Banyakla aku disaraui ngan rajin sengkiap mati. 11:24 Limau kali aku dibaduki jemau Yahudi, idang kali tigau pulua sembilan. 11:25 Tigau kali aku dipeciti jemau Rum. Aku pulau digutuki ngan batu. Tigau kali ngalami kapal tebenak, saghi semalam aku tuapung-apung di tenga laut. 11:26 Amun aku bejalan, aku rajin ngadapi bayau, bayau ayiak merampus, bayau perampuk, bayau jak di jemau Yahudi, bayau jak di jemau ukan Yahudi, bayau di kuta, bayau di padang, bayau di laut ngan bayau jak di jemau diau ngiciakka diriau jemau Keristen awuak ukan. 11:27 Aku mbanting tulang ngan beusaha mati-matian, rajin nidau tiduak. Aku keruan lapagh ngan aus, rajin nidau makan, kedinginan ngan nidau bediau baju. 11:28 Lain jak di gegalaunyautu aku idang aghi temas merupuakka gegalau jemau Keristen. 11:29 Amun adau diau nidau tegua, aku meghasau pulau nidau tegua. Amun adau diau celakau ngan dusau, atiku madak nian karnau maluan. 11:30 Amun aku mesti mbanggaka diriku, aku endak mbanggaka kuranganku. 11:31 Allah, Bapak jak di Yesus, Tuhan kitau, keruan aku nidau mbu'ung. Tepujila namaunyau selelamaunyau. 11:32 Masau aku di Damsik, gubernur diau ditetapka rajau Aretas ngajung tenterahau njagau mukau lawang kutatu endak nangkap aku. 11:33 Anyautu aku ditughunka jak di tebuak dinding kutatu pakai kinjagh, mangku aku luput jak di tangan ughangtu.

2 Kurintus 12

12:1 Aku endak maju muji diriku, empuak nidau bediau gunaunyau. Mangku aku ngiciakka pulau setu diau dikinakka Tuhan dalam pengina'an ngan aku. 12:2 Aku keruan sughang jemau Keristen. Empat belas taun diau la udim jemautu diangkat ke tingkat diau ketigau di sergau. Apu badan nian tuangkat, apu pengina'an ajau, aku nidau keruan. Cuman Allah ajau diau keruan. 12:3 Aku keruan jemautu, apu badanau tuangkat nian, apu pengina'an ajau, aku nidau keruan, cuman Allah ajau keruan, 12:4 jemautu tuangkat ke sergau. Di situ diau ndengagh katau diau nidau pacak dikiciakka manusiau ngan nidau diajung dikiciakka manusiau. 12:5 Jemau itula diau kupuji. Amun di diriku, aku cuman muji kuranganku. 12:6 Misalau aku endak muji diriku, aku nidau ka mbu'ung, aku ka ngiciakka diau benagh. Anyautu aku na'an diriku, supayau jangan adau jemau diau nganggap aku lebia jak di setu diau dikinak di aku ngan didengagh jak di aku. 12:7 Mangku supayau aku jangan geduak karnau pengina'an diau nyeliatu, aku dienjuakka setu diau luak dughi di badanku. Titu njadi alat Iblis endak mbaduk aku, mangku aku jangan geduak. 12:8 La tigau kali aku mintak ngan Tuhan, supayau titu diambiak jak di aku. 12:9 Tuhan nimbal, "Aku nyayangi kaba, jadila batan endak kaba. Amun kaba litak, mangku kuasauku ka nyatau nian." Karnau itu aku riang nian muji kelita'anku, mangku Keristus njagaui aku ngan kuasauNyau. 12:10 Itula sebapau aku riang ngan sukau, amun aku litak. Aku riang, amun aku digelakka, amun adau pekarau ngan setu diau segau karnau Keristus. Karnau amun aku litak, masau itu aku kuat nian. 12:11 Nyela, aku la njadi luak jemau bigal. Kamutu mbuat aku luak itu. Sebenaghau kamu diau mesti muji aku. Karnau empuak aku nidau bediau retiau, dikit kiala aku nidau kala ngan rasul diau hibattu. 12:12 Tandau nyelia ngan kerjau diau hibat diau kukerjauka di guak kamu ngan ngaligh la nyatauka akuni rasul. 12:13 Dalam segi tuapau kamu kurang disanauka, amun dibandingka ngan jemau Keristen diau lain? Paling-paling karnau aku nidau mbeghati kamu mbayighi aku. Ma'apkala aku karnau salaku itu! 12:14 Mbak kini la ketigau kaliau aku endak berayak ngan kamu. Aku enggup mbeghati kamu, karnau ukan retau kamu diau kuenda'au tapitu ati kamu. Pejadi diau mesti ndalak pengidupan batan endak anak-ana'au, ukan anak ndalak batan endak pejadiau. 12:15 Itula sebapau ngan riang aku sukau ngerbanka gegalaunyau batan endak kamu, lagi diriku. Amun aku nyayangi kamu luak itu, apu pantas kamu kurang nyayangi aku? 12:16 Kamu la nginak, bansau aku nidau kekela mbeghati kamu. Anyautu adau diau bekatau, bansau akuni calak, bansau aku la dapat untung ngan carau nipuka kamu. 12:17 Ngan carau luak manau? Apu ngan jemau diau kuajung guak kamutu aku dapat untung jak di kamu? Nidau ka adau. 12:18 Nyela, aku la ngajung Titus berayak ngan kamu. Kuajung pulau kantin kitau diau laintu. Apu Titustu ngambiak untung jak di kamu? Apu kami duauni nidau bekerjau ngan tujuan diau semegi? Apu kami nidau bekerjau ngan carau diau semegi? 12:19 Apu kamu ngirau selamau ini kami beusaha endak mbenaghka diri kami tuadap kamu? Dikit kiala nidau! Allah ngeruani, bansau gegalaunyau diau kami kiciakkatu nurut kendak Keristus. Gegalaunyau diau kami kerjaukatu endak neguaka kamu mangku tamba percayau. 12:20 Aku ghegak, amun aku datang nanti, aku ka nemuni kamu nidau luak diau kuaghapka, mangku kamu pulau ka nemuni aku nidau luak diau kamu aghapka. Aku ghegak, kalu adau diau belagau, sengit, ati besak, mentingka diriau, sangi gelakka, sangi buruakka, geduak, becelikaian. 12:21 Aku ghegak, amun aku datang nanti, Allah ka mbuat aku maluan karnau kamu. Mangku aku ka nangis, karnau banyak jak di kamu diau bedusau senitu lum ngubai jak di kerjaunyau diau kumua, menaugawia ngan nidau senangaiantu.

2 Kurintus 13

13:1 Inila diau ketigau kaliau aku endak datang berayak ngan kamu. Dalam Injil ditulis, "Pekarau mesti dikiciakka duau madak tigau ughang saksi, mangku pekarautu sah." 13:2 Jemau diau senitu la bedusau ngan gegalau jemau lainau senitu la kuingatka, masau aku berayak ngan kamu keduau kaliau. Mbak kini, penarau aku jawua ngan kamu, aku ngingatka agi, amun aku datang nanti, gegalau ughangtu ka diukum. 13:3 Mangku kamu bulia bukti diau kamu pintak, bansau Keristus ngiciak ngan aku. Keristustu nidau litak ngan kamu, tapitu Diau ka nunjuakka kuasauNyau di guak kamu. 13:4 Nyela, masau Diau dipakuka di kayu salip, Diau litak, tapitu mbak kini Diau idup karnau kuasau Allah. Nyela, kamini litak pulau karnau seghundak ngan Keristus, anyautu amun buadapan ngan kamu, kami pulau adau kuasau Allah karnau seghundak ngan Keristus. 13:5 Cubau uji diri kamu, apu kamu ngenian idup percayau ngan Keristus. Cengki kamu ka ngeruani, bansau Yesus Keristus adau di ati kamu, lain amun kamu nidau percayau nian. 13:6 Kuaghapka kamu ngeruani, bansau kamini ukanau jemau diau nidau ta'an uji. 13:7 Kami bedu'a ngan Allah, supayau Diau nulung kamu nidau ngerjauka diau ja'at, ukan supayau nyatau, bansau kami ngerjauka tugas kami nian, tapitu supayau kamu ngerjauka kendak Allah, empuak kamini kina'an luak nidau buasil, nidau ngapau-ngapau. 13:8 Kami nidau pacak ngerjauka setu diau belawanan ngan kendak Allah. Kami mesti nuruti kendak Allah. 13:9 Kami riang, amun kami litak ngan kamu kuat. Kami bedu'a pulau, supayau kamu njadi iluak agi. 13:10 Itula sebapau aku nulis surat ini, masau aku gi jawua ngan kamu. Mangku amun aku datang guak kamu, aku nidau nanti ngukum nurut kuasau diau dienjuakka Tuhan ngan aku. Aku endak majuka kamu ukan endak ngancurka. 13:11 Mangku, kantin-kantinku, kamu mesti riang ngan beusaha, supayau sempernau. Terimaula gegalau petuaku. Kamu mesti suijauan ngan idup bedamai sughang ngan diau lain. Mangku Allah ka nyayangi kamu ngan ngenjuakka damai ngan kamu. 13:12 Sangi pesanka sughang ngan diau lain ngan carau diau iluak. Gegalau umat Allah bepesan ngan kamu. 13:13 Aku bedu'a, supayau Tuhan Yesus Keristus iluak nian ngan kamu, Allah nyayangi kamu ngan Rua Allah nyatuka gegalau kamu.

Galatia 1

1:1-2 Batan endak kantin-kantin kami jemau Keristen di perupinsi Galatia. Aku, Paulus, sughang rasul nulis surat ini. Aku njadi rasul ukan karnau dikenda'i manusiau ukan pulau karnau diajung jemau, tapitu karnau kendak Yesus Keristus ngan Allah Bapak diau la ngidupka Diautu jak di mati. Gegalau kantin kitau diau adau seghundak ngan aku bepesan ngan kamu. 1:3 Kami bedu'a, supayau Allah, Bapak kitau, ngan Tuhan Yesus Keristus iluak nian ngan ngenjuakka damai ngan kamu. 1:4 Keristus na'ati kendak Allah Bapak kitau, mangku Diau nyeraka nyawauNyau batan endak dusau-dusau kitau, supayau kitau diselamatka jak di deniau diau ja'at ini. 1:5 Tepujila Diau selelamaunyau! Amin. 1:6 Aku kemangan ngan kamu. Kamu dipilia Allah, karnau Keristus sayang ngan kamu. Anyautu mbak kini kamu cepat nian nyimpang jak di Diau mangku ngikut ceritau iluak diau lain. 1:7 Sebenaghau nidau bediau injil lain. Anyautu adau jemau diau ngacauka kamu, endak ngubai ceritau iluak jak di Keristus. 1:8 Amun adau jemau diau ngiciakka ceritau iluak diau lain jak di ceritau iluak diau la kami kiciakkatu ngan kamu, empuak jemautu jak di kaminila, empuak malaikat jak di sergau, nengkela jemautu didawaika Allah. 1:9 Luak diau la kami kiciakka, mbak kini kukiciakka agi: Amun adau jemau diau ngiciakka injil lain jak di ceritau iluak diau la kamu terimau jak di kami, jemautu didawaika. 1:10 Luak manau akuni? Apu aku ngaghapka diregaui manusiau? Ukan, dikit kiala nidau. Aku cuman ngaghapka diregaui Allah. Apu aku beusaha melemakka ati manusiau, mangku dipuji jemau? Amun aku masia ngerjauka kerjau luak itu, aku ukan budak Keristus. 1:11 Kantin-kantinku, kamu mesti ngeruani, bansau ceritau iluak diau kukiciakkatu asalau ukan jak di manusiau. 1:12 Aku nidau nerimaunyau jak di manusiau. Nidau sughang kia ngajaghkanyau ngan aku, tapitu Yesus Keristus nyataukanyau ngan aku. 1:13 Cengki kamu la ndengagh ceritau idupku senitu. Aku sughang diau ngikut agamau Yahudi ngenianau. Ngan kejam aku nganiayau jemau Keristen ngan beusaha ngabiskanyau. 1:14 Aku lebia ta'at jak di banyak jemau Yahudi diau sebayau njalanka agamauku. Aku rajin nian ngikuti adat lembagau niniak puyang kami. 1:15 Anyautu karnau keilu'an atiAu Allah milia aku, antak ka aku adau mangku ngajung aku bekerjau batan endak Diau. 1:16 Allah nyatauka Ana'Au ngan aku, supayau ceritau Ana'Autu pacak kukiciakka ngan jemau bangsau lain. Masau itu aku nidau mintak pendapat ngan sughang kiala. 1:17 Aku nidau pulau pegi njenguak jemau di Yerusalim diau la lamau jak di aku njadi rasul. Anyautu aku pegi ke nenggeri Arab, mangku jak di situ ngulang ke Damsik agi. 1:18 Tigau taun la udim itu, aku pegi ke Yerusalim endak betemu ngan Pitrus. Aku berayak ngan diau cuman limau belas aghi. 1:19 Aku nidau betemu ngan rasul diau lain, selain Yakubus, ading Tuhan Yesus. 1:20 Setu diau kutulis ini benagh. Allah keruan, aku nidau mbu'ung. 1:21 La udim itu aku pegi ke daira Siria ngan Kilikia. 1:22 Masau itu jemau Keristen di Yudia lum kecinauan nian aku. 1:23 Ughangtu cuman ndengagh, bansau jemau diau senitu nganiayau ughangtu mbak kini ngiciakka ceritau iluak diau senitu endak diabiskanyau. 1:24 Mangku ughangtu muji Allah karnau aku.

Galatia 2

2:1 Empat belas taun udim itu aku ngulang ke Yerusalim ngan Barnabas ngan Titus ngikut pulau. 2:2 Aku pegi ke Yerusalim, karnau Allah la nyatauka ngan aku, bansau aku mesti pegi. Aku betemu ngan pengulupengulu jemau Keristen di situ, mangku aku ngiciakka ceritau iluak diau kukiciakka ngan jemau bangsau lain, supayau jangan kerjauku empuak senitu empuak mbak kini nidau bediau retiau. 2:3 Titus diau ngantini aku sughang jemau Yunani. Empuak luak itu diau nidau dipasau endak disunat. 2:4 Nyela, adau jemau diau endak masau carau itu. Ughangtu cak jemau Keristen ngan masuak nidau dikeruani luak mematau. Ughangtu endak ngeruani ngan ngalangi kebibasan diau adau di kitau, karnau kitau idup seghundak ngan Yesus Keristus. Ngan carau luak itu ughangtu endak mbudakka kitau agi. 2:5 Anyautu kami nidau nyera dikit kia ngan ughangtu, karnau kami endak njagaui, supayau ceritau iluak diau benaghtu nidau diuba batan endak kamu. 2:6 Empuak luak itu, nidau bediau setu diau dituntut jak di aku ngan jemau diau dianggap beregau. - Amun aku, nidau penting apu ughangtu beregau apu nidau, karnau Allah nidau milia rupau. 2:7 Mangku jemau diau dianggap beregautu ngaku'i, bansau Allah la nugaska aku ngiciakka ceritau iluak ngan jemau nidau besunat, semegi luak Diau la nugaska Pitrus ngiciakka ceritau iluaktu ngan jemau besunat. 2:8 Allah njadika Pitrus rasul batan endak jemau besunat. Diautu pulau njadika aku rasul batan endak jemau nidau besunat. 2:9 Yakubus, Pitrus ngan Yuhanis diau njadi pengulu jemau Keristen ngaku'i, bansau aku la ditugaska luak itu. Mangku ughangtu bejabat tangan ngan aku ngan Barnabas njadi tandau tetuju, bansau kami pegi endak bekerjau di guak jemau ukan Yahudi, ngan ughangtu pegi bekerjau di guak jemau Yahudi. 2:10 Ughangtu cuman mintak, supayau maju nyanauka jemau serik. Mangku aku riang ngerjaukanyau. 2:11 Masau Pitrus berayak ke Antiukia, aku negughi diau ngan terang-terangan, karnau diau sala nian. 2:12 Penembaiau diau makan serempak ngan jemau diau nidau besunat. Mangku adau jemau jak di anak-bua Yakubus datang, diau njawuaka diriau jak di jemau ukan Yahudi, enggup makan agi serempak ngan ughangtu karnau takut ngan jemau Yahuditu. 2:13 Mangku jemau Yahudi lainau ngikut perembak diau ca'autu. Barnabas pulau ngikut perembak ughangtu. 2:14 Satu aku nginak, perembak ughangtu nidau sesuai ngan ceritau iluak diau benaghtu, mangku aku bekiciak ngan Pitrus di adapan gegalau jemau, "Amun dighi sughang jemau Yahudi la idup luak jemau ukan Yahudi, ngapau dighi mbak kini endak masau jemau lain idup luak jemau Yahudi?" 2:15 Nyela, kami jemau Yahudi karnau bak kami jemau Yahudi. Kami ukan jemau bedusau jak di bangsau lain. 2:16 Empuak luak itu kamu keruan, bansau nidau sughang kiala dibenaghka karnau nuruti ukum agamau, tapitu gegalau jemau dibenaghka karnau percayau ngan Yesus Keristus. Itula sebapau kamini pulau percayau ngan Keristus, supayau kami dibenaghka karnau percayau ngan Keristus ukan karnau na'ati ukum agamau. Karnau nidau sughang kiala dibenaghka karnau nuruti ukum agamau. 2:17 Kamini ngaghapka dibenaghka ngan carau idup seghundak ngan Keristus, mangku tenyatau kami pulau jemau bedusau luak jemau ukan Yahudi. Tuapau retiau ini? Apu Keristus mbuat kami bedusau? Nidau ka adau! 2:18 Amun aku mulai negakka agi setu diau la kuleghak, mangku aku nyatauka diriku pelanggar ukum Taurat. 2:19 Aku la mati batan endak ukum Taurat karnau ukum Taurattu, mangku aku idup batan endak Allah. Aku la disalipka ngan Keristus. 2:20 Mbak kini ukan agi aku diau idup, tapitu Keristus idup dalam diriku. Mangku mbak kini aku idup karnau percayau ngan Anak Allah diau la nyayangi aku ngan nyeraka nyawauNyau batan endak aku. 2:21 Aku nidau nulak keilu'an Allahtu. Misalau jemau dibenaghka karnau ukum Taurat, kematian Keristus nidau bediau retiau.

Galatia 3

3:1 Ui jemau Galatia, kamu bigal nian! Kamu tepengarua ngan sapau? Keristus diau la mati di kayu saliptu la kamu keruan nian. 3:2 Cubau kiciakka ngan aku diau sutiak ini: Apu kamu nerimau Rua Allah karnau na'ati ukum Taurat, apu karnau ndengagh ceritau iluak jak di Allah ngan percayau ngan Keristus? 3:3 Ngapau kamu bigal nian? Kamu la mulai idup empai ngan Rua Allah. Baghia mbak kini kamu endak maju idup enggut udim ngan usaha kamu sendighi? 3:4 Apu nidau bediau gunaunyau ngan gegalaunyau diau la kamu ghasauka itu? Baghia nidau bediau gunaunyau. 3:5 Allah ngenjuakka RuaHau ngan kamu ngan mbuat banyak tandau nyelia di guak kamu. Apu Allah ngerjauka titu karnau kamu na'ati ukum Taurat, apu karnau ndengagh ceritau iluaktu ngan percayau ngan Keristus? 3:6 Itu semegi luak diau ditulis di Injil ceritau Abraham, "Abraham percayau ngan Allah. Karnau itu diau diterimau Allah njadi jemau benagh." 3:7 Amun luak itu, kamu keruan, bansau jemau diau pengadau Abraham nian jemau diau percayau ngan Allah. 3:8 Jak di senitu kitab Injil la keruan, bansau Allah mbenaghka jemau diau ukan Yahudi karnau percayau ngan Diau. Ceritau iluak itu la dikiciakka senitu ngan Abraham ngan janji ini, "Karnau kaba, Allah ka iluak ngan gegalau bangsau." 3:9 Abraham percayau, mangku diau disayangi. Luak itu pulau gegalau jemau diau percayau ka disayangi semegi ngan Abraham. 3:10 Jemau diau bepaut ngan ukum Taurat idup ngan dawaian. Karnau di Injil ditulis, "Jemau diau nidau nuruti gegalaunyau diau ditulis dalam kitab Taurat didawaika Allah." 3:11 Nidau sughang kia ka dibenaghka Allah karnau na'ati ukum Taurat. Titu la dinyatauka dalam Injil, "Jemau diau la dibenaghka karnau percayau ka idup nian." 3:12 Anyautu ukum Taurat nidau bepaut ngan iman, tapitu jemau diau nuruti ukumtu ka idup karnau kerjaunyautu. 3:13 Keristus mbibaska kitau jak di dawaian ukum Taurattu. Diau ngerjauka titu ngan ngenangka diriAu didawaika karnau kitau. Karnau di Injil ditulis, "Jemau diau mati digerintungka di kayu didawaika." 3:14 Yesus Keristus ngerjauka titu, supayau keilu'an Allah diau dijanjikaNyau ngan Abrahamtu dienjuakka pulau ngan jemau ukan Yahudi. Ngan carau luak itu gegalau kitau diau percayau nerimau Rua diau dijanjika Allah. 3:15 Kantin-kantinku, nengkela aku ngiciakka cuntau jak di idup kitau. Amun duau jemau bejanji ngan janjitu la disahka, mangku nidau sughang kia pacak mbatalka janjitu ngan namba tuapau kila. 3:16 Janji-janji Allah dijanjikaNyau ngan Abraham ngan jemau pengadau Abraham. Di Injil nidau ditulis, "ngan pengadau-pengadau Abraham", retiau banyak jemau. Diau ditulis di situ, "ngan jemau pengadau kaba", retiau gi sughang ajau, diautu Keristus. 3:17 Diau endak kukiciakka di sini: Janji Allah la disahka senitu. Ukum Taurat empai dienjuakka empat ratus tigau pulua taun udim itu. Ukumtu nidau pacak mbatalka ngan ngabiska janji itu. 3:18 Amun pengenjuak Allah bepaut ngan ukum Taurat, itu ukan agi pengenjuak diau dijanjikatu. Tapitu karnau Allah la njanjikanyau ngan Abraham, mangku dienjuakkaNyau ngan diau. 3:19 Amun luak itu, batan tuapau ukum Taurattu dienjuakka? Ukumtu ditambaka batan endak nyatauka pelanggaran manusiau. Ukum Taurattu dijalanka cuman enggut pengadau diau dikiciakkatu datang. Ukum itu disampaika malaikat ngan sughang jemau diau njadi pengantarau. 3:20 Pengantarau cuman penting, amun adau duau pihak. Anyautu Allah itu sutiak. 3:21 Amun luak itu, apu ukum Taurat belawanan ngan janji Allah? Nidau ka adau! Karnau misalau ukum Taurat dienjuakka batan endak bulia idup, mangku manusiau dibenaghka karnau nuruti ukumtu. 3:22 Anyautu di Injil la ditulis, bansau gegalau manusiau la dikuasaui dusau, mangku setu diau dijanjika Allah dienjuakka ngan jemau diau percayau ngan Keristus, karnau janjitu cuman dienjuakka ngan jemau amun percayau. 3:23 Antak ka masaunyau jemau pacak percayau ngan Keristus, kitau dipasau ukum Taurat, luak dikurungka. Udim itu dinyatauka carau kitau percayau ngan Keristus. 3:24 Mangku ukum Taurat njadi penjagau kitau, enggut Keristus datang endak mbenaghka kitau, karnau kitau percayau ngan Diau. 3:25 Mbak kini la masaunyau manusiau pacak percayau ngan Keristus, mangku kitau nidau agi dijagaui ukum itu. 3:26 Gegalau kamu la percayau ngan Yesus Keristus, mangku kamu la seghundak ngan Diau ngan njadi anak-anak Allah. 3:27 Gegalau kamu la dibaptis dalam namau Keristus, mangku kamu la nerimau sipat Keristus. 3:28 Mangku nidau bediau bidahau, empuak jemau Yahudi empuak jemau ukan Yahudi, empuak budak empuak jemau bibas, empuak tinau empuak lanang. Gegalaunyau semegi karnau Yesus Keristus. 3:29 Mangku amun kamu hak Keristus, kamu pulau pengadau Abraham, mangku kamu behak nerimau setu diau dijanjika Allahtu.

Galatia 4

4:1 Diau endak kukiciakka ini: Selamau sughang anak diau behak nerimau peninggalan ba'au gi keciak, dikit kiala nidau bediau bidahau ngan sughang budak, empuak diau behak ngempu gegalaunyautu. 4:2 Anyautu adau jemau diau njagauinyau ngan ngurusau, enggut masau diau ditetapka ba'au. 4:3 Luak itu pulau kitau: Selamau kitau lum ngerti, kitau dikuasaui rua deniau. 4:4 Anyautu la sampai masaunyau diau ditetapka Allah, mangku Diau ngajung ana'Au ke deniau. Diautu dilahirka sughang jemau tinau, mangku idup ta'at ngan ukum Taurat. 4:5 Ngan carau luak itu Diau melepaska jemau diau idup dikuasaui ukum Taurattu, mangku gegalau kitau pacak njadi anak Allah. 4:6 Karnau kamu anak Allah, mangku Diau ngajung Rua Ana'Au nguasaui ati kitau diau ngiciakka, "Bak, bakku!" 4:7 Mangku kamu ukan agi budak, tapitu anak. Mangku amun kamu anak Allah, kamu pulau behak nerimau gegalaunyau diau disediauka Allah batan endak anak-ana'Au. 4:8 Senitu, masau kamu lum keruan Allah, kamu dikuasaui rua-rua diau ukan jak di Allah. 4:9 Anyautu mbak kini kamu la keruan Allah, apu tepatla Allah keruan kamu. Ngapau kamu endak ngulang agi ke rua deniau diau litak ngan sarau? Ngapau kamu endak dikuasaui agi ngan rua itu? 4:10 Kamu meringati aghi diau ditetapka ngan bulan ngan taun diau ditetapka. 4:11 Aku ghegak, kalu aku bulia keria ajau batan endak kamu. 4:12 Kantin-kantinku, aku mintak nian, supayau kamu njadi luak aku, karnau aku pulau la njadi luak kamu. Kamu nidau kekela ngerjauka setu diau nidau iluak ngan aku. 4:13 Cengki kamu gi teghingat, bansau aku senitu ngiciakka ceritau iluak ngan kamu, karnau aku buidapan. 4:14 Masau itu kamu nidau gheging ngan aku, empuak badanku luak itu mangku njadi cubauan batan endak kamu. Anyautu kamu nerimau aku luak nerimau malaikat Allah, luak nerimau Yesus Keristus itula. 4:15 Kamu riang nian masau itu. Mbak kini di manau keriangan kamutu? Aku keruan, masau itu kamu sukau ngenjuakka gegalaunyau ngan aku, lagi pulau ncungkil matau kamu itula batan endak dienjuakka ngan aku, amun pacak. 4:16 Apu kamu mbak kini nganggap aku musua, karnau aku ngiciakka setu diau benagh ngan kamu? 4:17 Jemau diau lain itu ngan riang ndala'i kamu, anyautu rencanau ughangtu nidau iluak. Ughangtu cuman endak nceghaika kami ngan kamu, supayau kamu ngikut ughangtu ngan riang. 4:18 Nyela iluak, amun riang ngerjauka setu diau iluak, asal maju luak itu, jangan cuman masau aku adau di guak kamu. 4:19 Ui anak-anakku, karnau kamu aku mbak kini sengsarau agi luak sughang tinau diau endak merunggu. Aku ka maju sengsarau, amun sipat Keristus lum nyatau di kamu. 4:20 Aku ghindu nian endak seghundak ngan kamu, supayau aku pacak ngiciak ngan kamu ngan carau lain, karnau aku nidau keruan agi, tuapau diau endak kubuat ngan kamu. 4:21 Cubau kiciakkala ngan aku, ui kamu diau endak idup na'ati ukum Taurat, apu kamu nidau ngerti setu diau dikiciakka dalam ukum itu? 4:22 Di situ ditulis, bansau Abraham adau duau ughang anak, sughang anak jak di tinau diau njadi buda'au, diau sughang agi jak di buntingau nian. 4:23 Anak jak di tinau diau njadi budaktu adau karnau kendak manusiau. Anak jak di buntingautu adau karnau dijanjika Allah. 4:24 Itu pacak dipakai njadi umpamau. Duau ughang tinau itu ibarat duau janji Allah. Diau sutiak asalau jak di gunung Sinai, itula Hagar. Anak-ana'au njadi budak pulau. 4:25 Hagar itula gunung Sinai di nenggeri Arab. Diautu ibarat kuta Yerusalim ngan gegalau jemaunyau diau mbak kini la njadi budak. 4:26 Anyautu Yerusalim diau di sergau itu Yerusalim nian, mangku diaula enduak kitau. 4:27 Karnau di Injil ditulis, "Riangla kaba, ui tinau diau nidau bediau anak ngan nidau kekela melahirka! Riangla ngan injiakla, ui kaba diau nidau kekela meghasauka sakit endak merunggu! Karnau tinau diau ditinggalka lakiau banyakla ana'au sangkan tinau diau maju idup ngan lakiau." 4:28 Kantinkantinku, kamu anak Allah diau adau karnau janji Allah, semegi luak Isak itu. 4:29 Mangku senitu anak diau adau karnau kendak manusiau nganiayau anak diau adau karnau kendak Rua Allah. Luak itu pulau mbak kini. 4:30 Mangku tuapau diau ditulis di Injil? Adau ditulis, "Laratkala tinau budak itu ngan ana'au, karnau anak jak di tinau budaktu nidau pacak sesamau hak ngan anak buntingau." 4:31 Karnau itu, kantin-kantinku, kitauni ukanau anak jak di sughang budak, tapitu kitau anak jak di buntingau nian.

Galatia 5

5:1 Kitau mbak kini bibas, karnau Keristus la mbibaska kitau. Karnau itu ta'ankala kebibasan kamu, jangan endak dibudakka agi. 5:2 Aku, Paulus, ngiciak ngan kamu nian: Amun kamu mintak disunat, Keristus nidau nian begunau ngan kamu. 5:3 Lagi kukiciakka ngan kamu. Bilang jemau diau mintak disunat wajib nuruti gegalau ukum Taurat. 5:4 Amun kamu endak dibenaghka karnau nuruti ukum Taurat, itu mbuktika kamu la beceghai ngan Keristus. Ngan carau luak itu kamu nidau pacak meghasauka keilu'an Allah. 5:5 Anyautu kaminila ngaghapka, bansau kami ka dibenaghka Allah, karnau Rua Allah nulung kami percayau ngan Keristus. 5:6 Karnau amun kitau la idup seghundak ngan Keristus, apu besunat apu nidau besunat, itu nidau bediau retiau. Diau penting, percayau ngan Keristus, mangku itu nyatau ngan sayang kitau ngan jemau. 5:7 Senitu kamu bejuang ngan iluak. Mbak kini ngapau kamu nidau ta'at agi ngan Allah? Sapau diau ngasut kamu? 5:8 Cetau ukan Allah! Allahtu la ngajung kamu njenguak Diau. 5:9 Katau jemau, "Ghagi dikit ka ngembangka gegalau lejuan." 5:10 Empuak luak itu akuni percayau, bansau kamu nidau ka bediau pendapat lain jak di aku, karnau kitau la seghundak karnau Keristus. Mangku jemaunyau, sapau kila diau ngacauka rupu'an kamu, ka diukum Allah. 5:11 Mangku aku, ngapau aku maju diluatka, amun aku masia ngajung jemau besunat? Amun ngenian aku ngiciak luak itu, kici'anku ceritau kayu salip Keristus nidau njadi pekarau agi. 5:12 Iluakla jemau diau ngacauka kamutu pegi ajau jak di guak jemau Keristen. 5:13 Kantin-kantinku, nyela kamutu la diajung njadi jemau diau bibas. Anyautu jangan kebibasantu njadi tapakan endak idup nuruti kendak dusau. Tapitu kamu mesti sangi sayangi ngan sangi tulungi. 5:14 Karnau gegalau ukum Taurat disimpulka ngan sutiak perinta ini, "Kaba mesti nyayangi kantin kaba luak diri kaba." 5:15 Anyautu amun kamu sangi gigiti ngan sangi tegu'i, awas, nanti kamu ka ancur galau. 5:16 Diau endak kukiciakka ini: Idupla dibimbing Rua Allah, mangku kamu nidau ka nuruti serilau manusiau. 5:17 Serilau manusiau belawanan ngan kendak Rua Allah, kendak Rua Allah belawanan ngan serilau manusiau, karnau sangi musui. Itula sebapau kamu nidau pacak ngerjauka setu diau kamu kenda'i. 5:18 Anyautu amun kamu idup dibimbing Rua Allah, kamu nidau dikuasaui ukum Taurat. 5:19 Serilau manusiau nyatau di kerjau menaugawia, kumua ngan diau nidau pantas, 5:20 di kerjau nyemba di keramat, menterau, bemusuan, belagau, sengit, cepat mara, merupuakka diriau ajau, ngasung ngan mihak, 5:21 luat, memabu'an, bereruyalan ngan kerjau lain luak itu. Aku ngingatka kamu, luak aku la ngingatka kamu senitu, bansau jemau diau ngerjauka setu luak itu nidau ka nerimau setu diau disediauka Allah, masau Diau bekuasau. 5:22 Anyautu jemau diau dibimbing Rua Allah asilau luak ini: Jemautu sayang ngan jemau, diau riang, adau damai, ngaligh, galak nulung jemau, diau iluak, setia, 5:23 ngensian, ngan pacak nguasaui diriau. Nidau bediau ukum diau negahi kerjau luak itu. 5:24 Jemau diau la njadi hak Yesus Keristus, jemautu nidau agi nuruti kendak manusiau ngan gegalau serilaunyau. 5:25 Rua Allah la ngenjuakka ngan kitau idup diau empai. Karnau itu idup kitau mesti pulau dibimbing Rua itu. 5:26 Kitau jangan geduak, jangan sangi sakiti ati, jangan sangi sengitka, jangan sangi luatka.

Galatia 6

6:1 Kantin-kantinku, amun adau sughang kedapatan mbuat dusau, kamu diau idup na'ati Rua Allah mesti mbimbing jemautu ke jalan diau benagh. Anyautu kamu mesti ngerjauka titu ngan ngaligh sampai njagau diri kamu, supayau jangan bedusau pulau. 6:2 Betetulunganla kamu nanggungka beban jemau. Ngan carau luak itula kamu na'ati perinta Keristus. 6:3 Amun sughang nyangkau diriau penting awuak nidau, jemautu mbu'ungi diriau. 6:4 Bilang jemau mesti merisau diriau, apu kerjaunyau iluak apu nidau. Amun iluak, diau bulia meghasau bangga, nidau nanti mbandingkanyau ngan kerjau jemau. 6:5 Karnau bilang jemau mesti mikul tanggungannyau sendighi. 6:6 Jemau diau nerimau ajaghan ceritau Keristus semestiau mbagika ngan guruau gegalaunyau diau iluak diau adau di diau. 6:7 Jangan kamu tetipu! Allah nidau pacak dipusiakka. Setu diau ditanam, titu pulau diketam. 6:8 Amun jemau beperembak nurut serilaunyau, asilau kematian. Amun jemau beperembak nurut bimbingan Rua Allah, asilau idup selelamaunyau jak di Rua itu. 6:9 Karnau itu jangan kitau puas ngerjauka setu diau iluak. Karnau amun kitau nidau mandak-mandak ngerjauka titu, kitau ka nerimau asilau, amun masaunyau la sampai. 6:10 Empungan gi adau masaunyau, mela kitau iluak ngan gegalau jemau, apau agi ngan kantin-kantin seagamau. 6:11 Peratikala iluak-iluak tulisan ini diau kutulis ngan tangankunila ngan urup besak-besak. 6:12 Jemau diau nganggap diriau lebia karnau setu diau kina'an, ughangtula diau endak masauka kamu besunat. Ughangtu ngerjauka titu, supayau nidau diluatka jemau Yahudi karnau ngiciakka ceritau Keristus diau mati di kayu salip. 6:13 Jemau diau ngikut peraturan sunat nidau pulau nuruti ukum Taurat. Ughangtu endak, supayau kamu disunat, mangku ughangtu pacak mbanggaka diriau, bansau kamu nuruti peraturantu. 6:14 Anyautu akuni dikit kiala nidau endak mbanggaka diriku, lain jak di Tuhan kitau Yesus Keristus diau mati di kayu salip. Karnau Diau la mati di kayu salip, mangku deniau nidau bereti agi ngan aku, ngan deniauni aku meghasau mbak asau la mati. 6:15 Apu disunat apu nidau besunat nidau penting. Diau penting itu njadi manusiau empai. 6:16 Mangku ngan jemau diau idup nurut pendirian ini aku bedu'a, supayau Allah iluak nian ngan ngenjuakka damai. Luak itu pulau ngan gegalau umat Allah. 6:17 Mangku jangan sughang kia madakka aku agi, karnau di badanku adau buktiau, bansau aku anak-bua Yesus. 6:18 Aku bedu'a, supayau Tuhan kitau Yesus Keristus iluak ngan kamu. Amin.

Ipisus 1

1:1 Jak di aku, Paulus, diau dijadika rasul Yesus Keristus karnau kendak Allah batan endak jemau di Ipisus diau percayau ngan Yesus Keristus. 1:2 Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai. 1:3 Tepujila Allah, Bapak Tuhan kitau Yesus Keristus! Diau la ngenjuakka ngan kitau gegalau keilu'an jak di sergau, karnau kitau seghundak ngan Keristus. 1:4 Antak ka deniauni dijadika, Allah la milia kitau, supayau kitau beresia ngan nidau becacat di adapanNyau. Karnau Diau nyayangi kitau, 1:5 mangku Diau la netapka jak di senitu, supayau kitau dijadika ana'Au karnau Yesus Keristus, nyela titu kenda'Au. 1:6 Mangku Allah dipuji karnau keilu'anNyau diau agungtu diau dienjuakka ngan kitau karnau Ana'Au Yesus Keristus diau disayangiNyau. 1:7 Karnau Keristus la mati njadi kerban, mangku kitau dibibaska, retiau dusau kitau diabiska, karnau Diau nyayangi kitau nianan. 1:8 Allah iluak ngan kitau, karnau Diau keruan gegalaunyau ngan bepengertian nian. 1:9 Diau la nyatauka ngan kitau resiau rencanauNyau, karnau Diau endak nyataukanyau. Rencanautu la direncanauka jak di penembai endak diudimi Keristus. 1:10 RencanauNyautu supayau gegalaunyau, empuak di sergau empuak di deniauni, njadi seghundak, mangku Keristus njadi kepala'au. Titu ka dikerjauka Allah, amun la sampai masaunyau. 1:11 Allah ngerjauka gegalaunyautu nurut kenda'Au diau ditetapka jak di senitu. Jak di penembai Diau la milia kitau njadi umatAu, karnau seghundak ngan Keristus. 1:12 Mangku kami diau dulu sekali ngaghapka Keristustu ngagungka Allah karnau Diau agung. 1:13 Kamu pulau la njadi umatAu, masau kamu ndengagh katau Allah, ceritau iluak diau nyelamatka kamu. Kamu la percayau ngan Keristus, mangku kamu ditandaui Rua Allah diau dijanjikaNyautu. 1:14 Rua itula njamin kitau ka nerimau setu diau la dijanjika Allah ngan umatAu. Mangku kitau yakin, bansau kitau ka ditebus nian ngan dijadikaNyau umatAu, supayau Allah dipuji karnau keagunganNyau. 1:15 Itula sebapau jak aku ndengagh, bansau kamu percayau ngan Tuhan Yesus ngan nyayangi gegalau umat Allah, 1:16 aku nidau mandak-mandak beterimau-kasia ngan Allah karnau kamu. Aku maju ndu'aka kamu. 1:17 Aku mintak, supayau Allah Tuhan kitau Yesus Keristus, Bapak diau agungtu, ngenjuakka RuaHau ngan kamu, mangku Ruatu ka ngenjuakka ngan kamu pengertian ngan nyatauka Allah diau benagh ngan kamu, mangku kamu ka keruan Diau. 1:18 Aku mintak, supayau Diau mbukakka rupu'an kamu, mangku kamu ngerti setu diau kamu aghapka jak di Allah diau milia kamu. Mangku kamu keruan, bansau Allah kayau nian ngan serbau diau iluak diau disediaukaNyau batan endak umatAu. 1:19 Mangku kamu keruan pulau, bansau Allah besak nian kuasauNyau diau bekerjau dalam ati kitau. Kuasau Allahtu semegi ngan kuasau diau besak 1:20 diau ngidupka Keristus jak di mati, dienjuakkaNyau bada diau bekuasau di sebela kanan Allah di sergau. 1:21 Besak tegalau kuasau Keristustu sangkan gegalau kuasau pemerinta, penguasau, pengulu, tuan ngan sapau kila diau bepangkat tinggi, empuak masau mbak kini empuak masau diau ka datang. 1:22 Gegalaunyautu la ditunduakka ngan kuasau Keristus, mangku Diau dijadika kepalak gegalau jemau Keristen. 1:23 Ughangtu umpamau badan Keristus, la disempernauka Keristus diau nyempernauka gegalaunyau.

Ipisus 2

2:1 Senitu kamu luak mati, karnau kamu bedusau ngan melanggar perinta Allah. 2:2 Masau itu kamu nuruti carau deniau. Kamu ta'at ngan penguasau diau adau di awang-awang, diautu rua diau mbak kini nguasaui ati jemau diau nidau ta'at ngan Allah. 2:3 Sebenaghau senitu gegalau kitau semegi ngan ughangtu. Kitau nuruti serilau manusiau ngan ngerjauka sekendak badan ngan rupu'an kitau diau ja'at. Masau itu kitau jemau diau kenau mara Allah semegi ngan jemau laintu. 2:4 Anyautu Allah iluak nianan ngan kitau. Karnau Diau sayang tegalau, 2:5 mangku masau kitau gi luak mati karnau dusau kitau, kitau diidupka ngan Keristus. Kamu diselamatka cuman karnau keilu'an ati Allah. 2:6 Mangku kitau seghundak ngan Yesus Keristus. Karnau itu Allah ngidupka kitau agi, mangku Diau ngenjuakka ngan kitau bada di sergau endak merinta ngan Diau. 2:7 Allah ngerjauka titu, supayau masau diau ka datang manusiau pacak nginak keilu'an ati Allah diau dinyatauka ngan kitau karnau Yesus Keristus. 2:8 Allah sayang nian ngan kamu. Karnau itu Diau nyelamatka kamu, karnau kamu percayau ngan Yesus. Keselamatan kamutu ukan karnau usaha kamu. Itu pengenjuak Allah, 2:9 ukan kerjau kamu. Mangku nidau sughang kia diau pacak nyumbungka diriau. 2:10 Kitauni buatan Allah, mangku karnau seghundak ngan Keristus, kitau dijadika endak ngerjauka setu diau iluak diau la disediaukaNyau sebelumau, supayau kitau ngerjaukanyau. 2:11 Kantin-kantinku diau ukan jemau Yahudi! Ingatkala luak manau kamu senitu. Kamu dikiciakka "jemau nidau besunat" ngan jemau Yahudi diau ngaku'i diriau "disunat", itula tandau diau dikerjauka manusiau. 2:12 Masau itu kamu lum seghundak ngan Keristus, kamu jemau asing diau nidau temasuak umat Allah. Kamu nidau temasuak jemau diau bulia bagian diau dijanjika Allah ngan umatAu. Kamu idup di deniauni nidau bediau aghapan ngan nidau keruan Allah. 2:13 Anyautu mbak kini kamu la seghundak ngan Keristus, mangku kamu diau senitu jawua ngan Tuhan mbak kini la dipasighka, karnau Keristus mati batan endak kamu. 2:14 Keristus ndamaika kitau. Jemau Yahudi ngan jemau ukan Yahudi dijadikaNyau sebangsau. Bemusuan ughangtu diau luak dinding nceghai la diabiskaNyau, karnau Diau la mati di kayu salip. 2:15 Mangku ukum Taurat ngan gegalau perintahau diabiska Keristus, mangku duau bangsau itu njadi manusiau empai karnau seghundak ngan Keristus. Ngan carau luak itu Diau ndamaika ughangtu. 2:16 Karnau Diau mati di kayu salip, bemusuan ughangtu diabiskaNyau, mangku ughangtu seghundak, mangku njadi seilu'an ngan Allah. 2:17 Mangku Keristus datang ngiciakka ceritau damai ngan kamu, jemau diau senitu nidau keruan Allah, pulau ngan jemau diau la keruan Allah. 2:18 Karnau Keristus mangku gegalau kitau, empuak jemau Yahudi empuak ukan jemau Yahudi, pacak ngadapi Allah karnau Rua diau semegi. 2:19 Mangku kamu ukan agi jemau asing ngan jemau luagh. Mbak kini kamu semegi ngan umat Allah, kamu njadi anak Allah. 2:20 Kamu umpamau ghuma diau ditegakka di pelapiak diau dibuat rasul-rasul ngan nabi-nabi ngan Keristus njadi batu pelapiak diau penting sekali. 2:21 Diaula nyusun ghumatu njadi Ghuma Allah diau beresia batan endak Tuhan. 2:22 Karnau kamu seghundak ngan Keristus, kamu ngikut disusun ngan jemau lain njadi Ghuma Allah bada RuaHau.

Ipisus 3

3:1 Itula sebapau akuni, Paulus, dijilka karnau Yesus Keristus batan endak kepentingan kamu diau ukan jemau Yahudi. 3:2 Cengki kamu la ndengagh, bansau Allah la nugaska aku bekerjau batan endak kamu karnau keilu'an atiAu. 3:3 Allah la nyatauka resiau rencanauNyau ngan dikiciakka ngan aku. Ceritau itu tadi la kutuliska dikit. 3:4 Amun kamu mbacaunyau, kamu ka keruan resiau Keristus luak aku ngeruaninyau. 3:5 Timpau senitu resiautu nidau dikiciakka ngan jemau, anyautu mbak kini la dinyatauka Rua Allah ngan rasul-rasul ngan nabi-nabiAu. 3:6 ResiauNyau luak ini: karnau ceritau iluak itu, mangku jemau ukan Yahudi ngikut meghasauka keilu'an Allah, mangku njadi angguta badan diau semegi ngan nerimau setu diau dijanjika Allah karnau Yesus Keristus. 3:7 Allah ngenju'i aku kerjau endak nceritauka ceritau iluak, karnau Diau iluak ngan aku. Tugastu dienjuakka ngan aku karnau kuasauNyau diau neguaka aku. 3:8 Jak di umat Allah diau inau akuni diau inau sekali. Anyautu Allah la nunjuakka keilu'anNyau ngan aku. Diau pulau ngenjuakka ngan aku kerjau iluaktu endak ngiciakka ngan jemau ukan Yahudi ceritau iluak ngiciakka keilu'an Yesus Keristus diau nidau ka abis-abis. 3:9 Diau pulau nugaska aku ngiciakka ngan gegalau jemau, luak manau Allah diau njadika gegalau deniauni ngerjauka rencanauNyau diau diresiauka senitu. 3:10 Diau ngerjauka titu, supayau mbak kini jak di jemau Keristen gegalau pengulu ngan penguasau di awang-awang ka ngeruani gegalau pengertian Allah. 3:11 RencanauNyau la adau jak di penembai, mangku diajungAu Yesus Keristus, Tuhan kitau, ngerjaukanyau. 3:12 Karnau kitau percayau ngan Keristus ngan seghundak ngan Diau, mangku kitau beghani ngiciak ngan Allah, karnau kitau percayau nian. 3:13 Karnau itu aku mintak nian, supayau kamu jangan ghegak karnau sengsarauku batan endak kamu. Gegalaunyautu batan endak keilu'an kamu. 3:14 Itula sebapau aku nunduak di adapan Bapak di sergau. 3:15 Jak di Diau bilang pemili di sergau ngan di deniau nerimau namau sesughangan. 3:16 Aku bedu'a, supayau Allah diau kayau ngan agung sekali neguaka ati kamu ngan RuaHau. 3:17 Mangku ati kamu njadi bada Keristus karnau kamu percayau ngan Diau, mangku gegalau kerjau kamu dikerjauka karnau nyayangi. 3:18 Aku bedu'a, supayau kamu ngan gegalau umat Allah pacak ngeruani alaka libaghau ngan panjangau ngan tinggiau ngan dalamau sayang Keristus. 3:19 Mangku kamu meghasauka sayang itu, empuak nidau pacak dikeruani rupu'an manusiau. Mangku kamu dibimbingAu idup menau carau Allah, 3:20 karnau kuasau Allah bekerjau dalam ati kitau. Banyak tegalau dikerjauka Allah sangkan diau pacak kitau du'aka ngan rupuakka. 3:21 Allah mesti maju diagungka jemau Keristen karnau Yesus Keristus. Tepujila Allah enggut selelamaunyau. Nyela nian. Amin.

Ipisus 4

4:1 Itula sebapau, aku sughang kawalan diau dikawalka karnau bekerjau batan endak Tuhan. Mangku aku mintak nian, supayau kamu diau la dipilia Allah idup sesuai ngan piliantu. 4:2 Kamu mesti maju ngensian, iluak, ngaligh, sangi sayangi ngan sangi terimau. 4:3 Usahakala nian idup bedamai, supayau kesatuan diau dienjuakka Rua Allah nidau beghuba. 4:4 Cuman adau sutiak badan ngan sutiak Rua. Luak itu pulau kamu dipilia batan endak ngaghapka setu diau semegi. 4:5 Tuhan gi sughang, iman semecam, baptisan semecam. 4:6 Allah gi sughang pulau diau njadi Bapak gegalau jemau. Diautu nguasaui gegalaunyau, bekerjau di gegalaunyau ngan adau di gegalaunyau. 4:7 Kitau sesughangan dienju'i pengenjuak nurut kendak Keristus. 4:8 Dalam Injil ditulis, "Masau Diau nayiak ke bada diau tinggi sekali, Diau banyak mbatak kawalan. Diau ngenjuakka pengenjuak ngan manusiau." 4:9 Tuapau retiau, "Diau nayiak"? Titu bereti Diau pulau tughun ke bada diau endap sekali di deniauni. 4:10 Diau la tughun, mangku Diautu pulau la nayiak ke bada diau tinggi nianan jak di gegalau langit, mangku Diau adau di gegalaunyau. 4:11 Mangku tuapau retiau, "Diau ngenjuakka pengenjuak ngan manusiau"? Adau diau dipilia njadi rasul, adau diau njadi nabi. Adau diau dipilia ngiciakka ceritau iluak. Adau diau dipilia mimpin jemau Keristen, adau pulau diau ngajagh jemau Keristen. 4:12 Gegalaunyau dikerjaukaNyau, supayau umat Allah didandani galau, mangku pacak bekerjau batan endak Tuhan, mangku badan Keristus, diautu jemau percayau, diteguaka. 4:13 Ngan carau luak itu gegalau kitau njadi seghundak, karnau kitau semegi percayau ngan Keristus ngan ngeruani diau benagh ceritau Anak Allah. Mangku kitau njadi jemau percayau diau la wagat diau tamba lamau tamba sempernau luak Keristus. 4:14 Mangku kitau ukan agi luak budak keciak diau diumbang-ambingka ngan dibatak ke situ ke sini karnau bemecam-mecam ajaghan jak di jemau diau cak calak. Ughangtu nyesatka jemau ngan tipuan. 4:15 Anyautu kitau mesti nyatauka setu diau benagh ngan maju sangi sayangi. Mangku gegalau kitau tamba lamau tamba sempernau luak Keristus diau ngepala'i kitau. 4:16 Diautu mimpin kitau galau, mangku gegalau badan tesusun iluak ngan sendi-sendi tesusun pulau. Mangku amun bilang anggutatu bekerjau ngan semestiau, gegalau badantu ka tumbua ngan diteguaka njadi wagat karnau sangi sayangi. 4:17 Karnau itu demi namau Tuhan aku mintak nian, supayau kamu jangan agi idup luak jemau diau nidau keruan Allah ngan maju merupuakka setu diau nidau begati. 4:18 Rupu'an ughangtu la nyimpang. Ughangtu nidau meghasauka idup diau dienjuakka Allah, karnau ughangtu bigal ngan melawan. 4:19 Ughangtu nidau meghasau maluan agi, mangku ughangtu nuruti gegalau serilau ngan idup kumua sekendak atiau. 4:20 Anyautu Keristus diau kamu keruani ukan luak itu. 4:21 Kamu la ndengagh ceritau Diau. Kamu la njadi anak-buaHau, la diajagh ceritau sipat Allah diau adau di Diau. 4:22 Karnau itu capakkala manusiau lamau ngan carau idup senitu diau dirusakka serilau diau sesattu. 4:23 Ati ngan rupu'an kamu mesti beghuba njadi empai galau. 4:24 Kamu mesti njadi manusiau empai diau dijadika nurut gambaran Allah mangku idup ngan carau diau benagh ngan beresia. 4:25 Karnau itu, jangan agi mbu'ung. Kiciakkala diau benagh sughang ngan diau lain, karnau kitau angguta badan Keristus galau. 4:26 Amun kamu mara, jangan enggut bebuat dusau. Jangan mara sesaghian, 4:27 mangku iblis nidau pacak mbuat kamu bedusau. 4:28 Jemau diau pemaling jangan agi maling. Diau mesti bekerjau nian, mangku bulia pengidupan diau benagh ngan pacak nulung jemau diau kurangan. 4:29 Jangan kiciakka kici'an kumua. Kiciakkala katau diau meriangka ngan nulung jemau. Kici'an luak itu nimbulka keilu'an ngan jemau diau ndengaghau. 4:30 Jangan madakka Rua Allah. Kamu la ditandaui ngan Ruatu njadi hak Allah. Ruatu njadi jaminan batan endak kitau, bansau aghi kitau diselamatka ka sampai. 4:31 Lengitkala gegalau peghasauan purik, mara ngan dendam. Jangan tegauk-gauk ngan nggelakka. Jangan agi adau peghasauan luat ngan peghasauan diau ja'at lainau. 4:32 Anyautu kamu mesti iluak, sial, sangi sayangi ngan sangi ma'apka luak Allah ngampuni kamu karnau Keristus.

Ipisus 5

5:1 Kamu la njadi anak Allah diau disayangiNyau. Karnau itu penaula Diau. 5:2 Idupla sangi sayangi luak Keristus nyayangi kitau. Diau la nyeraka nyawauNyau batan endak kitau njadi kerban diau iluak ngan melemakka ati Allah. 5:3 Kamutu umat Allah. Karnau itu jangan kamu menaugawia ngan ngerjauka setu diau nidau senangaian ngan selak. Ngiciakkanyau ajau jangan. 5:4 Nidau pantas kamu ngiciakka setu diau kumua ngan nidau senangaian ngan kici'an bigal. Tapitu kamu mesti beterimau-kasia ngan Allah. 5:5 Ingatkala iluak-iluak, jemau diau peremba'au menaugawia ngan nidau senangaian ngan selak, kerjau itu semegi ngan nyemba diwau. Jemau itu nidau pacak dikiciakka Keristus njadi rajau dalam idupau, mangku nidau ka bulia setu diau disediauka Allah batan endak umatAu. 5:6 Jangan kamu tetipu ngan kici'an diau mbu'ung, karnau setu luak itu mbuat Allah mara ngan jemau diau nidau ta'at. 5:7 Jangan kamu sekantin ngan jemau luak itu. 5:8 Nyela, senitu kamu idup bekeleman. Mbak kini kamu adau di terang, karnau la njadi umat Tuhan. Karnau itu kamu mesti idup dalam terang. 5:9 Jak di terang itu nimbul gegalau kerjau diau iluak ngan adil ngan benagh. 5:10 Beusahala ngeruani setu diau meriangka ati Tuhan. 5:11 Jangan kamu ngikut jemau ngerjauka kerjau diau nidau begati diau dikerjauka di keleman. Anyautu kamu mesti ngancakka ja'atau kerjau itu. 5:12 Karnau ngiciakka ajau kerjau diau dikerjauka ughangtu di bada nidau kina'antu la maluka. 5:13 Anyautu gegalaunyau diau diancakka terang kina'an, karnau terang nginakka gegalaunyau. 5:14 Itula sebapau la dikiciakka luak ini, "Bangunla, ui kaba diau tiduak, idupla jak di mati, mangku Keristus ka nerangi kaba." 5:15 Karnau itu kina'ila iluak-iluak carau idup kamu. Jangan idup luak jemau bigal. Idupla luak jemau diau bepengertian. 5:16 Gunaukala iluak-iluak masau diau adau, karnau masau ini masau diau ja'at. 5:17 Jangan kamu bigal, anyautu beusahala ngeruani kendak Tuhan. 5:18 Jangan kamu mabuak anggur, karnau anggur merusakka kamu. Anyautu kamu mesti dikuasaui Rua Allah. 5:19 Amun ngiciak ngan kantin, kiciakkala katau masmur, pujian ngan nyanyian ruhani. Nyanyila ngagungka Tuhan ngan ati riang. 5:20 Luak manau kila maju beterimaukasiala ngan Allah Bapak dalam namau Tuhan kitau Yesus Keristus. 5:21 Kamu mesti sangi ta'ati. Ngan carau luak itula kamu meregaui Keristus. 5:22 Bini mesti ta'at ngan lakiau luak ngan Tuhan, 5:23 karnau laki ngepala'i biniau luak Keristus ngepala'i jemau Keristen. Lagi pulau Diautu Rajau Penyelamat jemau Keristen. Ughangtu umpamau badanAu. 5:24 Karnau itu luak jemau Keristen ta'at ngan Keristus, luak itu pulau bini mesti ta'at ngan lakiau luak manau kila. 5:25 Laki mesti nyayangi biniau, luak Keristus nyayangi jemau Keristen ngan nyeraka diriAu batan endak ughangtu. 5:26 Diau ngerjauka titu endak mberesiaka ughangtu ngan ajaghanNyau ngan ayiak baptisan, mangku pacak diseraka ngan Allah. 5:27 Ngan carau luak itu ughangtu pacak ngadap Diau ngan beresia ngan alap, nidau bediau cacat ngan celakau ngan tuapau kila diau karut. 5:28 Luak itu pulau laki mesti nyayangi biniau luak badanau sendighi. Jemau diau nyayangi biniau nyayangi diriau. 5:29 Nidau kekela jemau meluatka diriau, anyautu diau nyayia ngan njagaui diriau semegi luak Keristus nyayangi jemau Keristen, 5:30 karnau kitau umpamau dandanan badan Keristus. 5:31 Di Injil ditulis, "Karnau itu sughang lanang ka ninggalka pejadiau endak seghundak ngan biniau, mangku ughang duautu njadi sutiak." 5:32 Resiau itu dalam, anyautu diau kukiciakka ubungan Keristus ngan jemau Keristen. 5:33 Luak manau kila gegalaunyautu ngenaui kamu pulau. Sayangila bini kamu luak diri kamu, mangku bini mesti meregaui lakiau.

Ipisus 6

6:1 Budak keciak ta'atila pejadi kamu, luak diau pantas kamu kerjauka karnau percayau ngan Keristus. 6:2 "Regauila pejadi kamu." Ini perinta diau dulu sekali adau janji. 6:3 Janjiau luak ini, "mangku kamu riang ngan umur panjang di deniau." 6:4 Kamu diau la njadi bak, jangan kamu mbuati anak kamu njadi mara. Anyautu besakkala diau njadi ta'at ngan ajaghan Tuhan. 6:5 Kamu, budak-budak, ta'atila perinta tuan kamu diau adau di deniauni ngan takut. Kerjaukala titu ngenian, luak ta'at ngan Keristus. 6:6 Jangan ajau, amun dikinak, endak dipuji manusiau, tapitu luak budak Keristus diau na'ati kendak Allah ngan riang. 6:7 Kerjaukala kerjau kamu ngan ati riang luak jemau diau bekerjau batan endak Tuhan ukan batan endak manusiau. 6:8 Ingatkala, bansau bilang jemau, empuak budak empuak ukan budak, ka nerimau balasan jak di Tuhan, amun diau ngerjauka setu diau iluak. 6:9 Kamu, tuan-tuan, mesti luak itu pulau ngan budak-budak kamu. Jangan ngancam. Ingatkala, bansau Tuhan kamu ngan Tuhan ughangtu adau di sergau. Diau nidau milia rupau. 6:10 Mangku kamu mesti tegua dalam Tuhan ngan kuasau jak di Tuhan. 6:11 Kenaukala gegalau pakaian diau dienjuakka Allah ngan kamu, mangku kamu pacak ta'an melawan tipuan iblis. 6:12 Kitau bejuang ukan melawan manusiau, anyautu melawan kekuatan iblis diau nguasaui masau diau ja'at ini. Kitau melawan kekuatan rua ja'at diau nguasaui awang-awang. 6:13 Karnau itu kenaukala gegalau pakaian jak di Allah, mangku masau diau ja'at kamu pacak melawan serangan musua. Mangku amun kamu la bejuang enggut pengabisan, kamu nidau mundur. 6:14 Kamu mesti maju siagau. Kenaukala ceritau Allah diau benagh njadi bebat ngan kerjau diau benagh njadi baju besi kamu. 6:15 Kesukauan ngiciakka ceritau iluak diau ndamaika njadi sepatu kamu. 6:16 Pakaila iman kamu njadi penangkis. Ngan imantu kamu pacak madamka pana buapi jak di iblis. 6:17 Ambiakla keselamatan njadi tupi besi ngan katau Allah njadi pedang diau dienjuakka Rua Allah. 6:18 Kerjaukala gegalaunyautu sampai bedu'a mintak tulung ngan Allah. Di gegalau kerjau kamu bedu'ala luak Rua Allah mimpin kamu. Kamu mesti maju siagau ngan jangan nyera. Du'akala maju gegalau umat Allah. 6:19 Du'akala pulau aku, supayau amun aku ngiciak, Allah ngenjuakka aku katau diau tepat, mangku aku ngiciakka resiau ceritau iluak ngan beghani. 6:20 Aku njadi ajungan batan endak ceritau iluak itu, mbak kini aku dalam jil. Du'akala aku, mangku aku beghani ngiciakka ceritau iluaktu, luak aku mesti ngiciakkanyau. 6:21 Tikikus, kantin kitau diau ngelapan bekerjau batan endak Tuhan, ka ngiciakka ceritau aku ngan kamu, mangku kamu keruan luak manau ngan aku. 6:22 Batan endak itula aku ngajung diau njenguak kamu, mangku kamu keruan ceritau kami, mangku ati kamu riang. 6:23 Aku bedu'a, supayau Allah Bapak ngan Tuhan kitau Yesus Keristus ngenjuakka damai ngan kamu gegalau jemau Keristen, ngan nulung kamu sangi sayangi ngan maju percayau. 6:24 Aku bedu'a, supayau Allah iluak ngan gegalau kamu diau nyayangi Tuhan kitau Yesus Keristus ngan sayang diau nidau ka abis-abis.

Pilipi 1

1:1 Jak di aku, Paulus, ngan Timutius diau bekerjau batan endak Yesus Keristus. Kami nulis surat ini batan endak kamu diau njadi umat Allah diau adau di Pilipi karnau percayau ngan Yesus Keristus ngan pulau batan endak pengulu jemau Keristen ngan penulungau. 1:2 Kami bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai. 1:3 Dang aku teghingat ngan kamu, aku maju beterimau-kasia ngan Allah. 1:4 Mangku dang aku ndu'aka gegalau kamu, aku bedu'a ngan ati riang. 1:5 Aku beterimau-kasia ngan Allah, karnau kamu nulung aku ngiciakka ceritau iluak jak di penembaiau enggut mbak kini. 1:6 Allah la mulai ngerjauka diau iluak di ati kamu. Mangku aku percayau nian, Diau ka neruska kerjauNyau diau iluaktu enggut udim, masau Yesus Keristus datang. 1:7 Gegalau kamu maju adau di atiku. Nyela, sepantasau aku bepeghasauan luak itu tuadap kamu. Gegalau kamu la nulung aku ngan kerjauku diau dienjuakka Allah ngan aku, empuak masau aku dijilka, empuak masau aku na'anka ngan mbenaghka ceritau iluak itu. 1:8 Allah keruan, bansau aku ghindu tegalau ngan kamu ngan sayang diau asalau jak di Yesus Keristus. 1:9 Aku ndu'aka kamu, mangku kamu tamba nyayangi Allah ngan jemau ngan tamba ngeruani diau benagh ngan bepengertian nian. 1:10 Mangku kamu pacak milia diau iluak sekali, mangku idup kamu ka beresia ngan nidau becacat ngan nidau bediau buru'an tuapau kila, amun Keristus datang nanti. 1:11 Idup kamu ka dipenui ngan kerjau diau benagh diau cuman pacak dikerjauka Yesus Keristus. Mangku Allah diregaui ngan diagungka. 1:12 Aku endak, supayau kamu keruan, bansau setu diau la tejadi di aku mbuat tamba banyak jemau percayau ngan ceritau iluaktu. 1:13 Mangku penjagau istana ngan jemau lainau di sini la keruan galau, bansau aku dijilka karnau bekerjau batan endak Keristus. 1:14 Karnau aku dijilka, banyak jemau Keristen di sini tamba percayau ngan Tuhan, mangku tamba beghani ngiciakka katau Allah ngan nidau takut. 1:15 Adau diau ngiciakka Keristus karnau sengit ngan endak bebala. Adau pulau diau ngiciakkaNyau ngan tujuan diau iluak. 1:16 Ughangtu ngerjauka titu karnau nyayangi Keristus. Ughangtu keruan, bansau Diau la ngajung aku mbenaghka ceritau iluaktu. 1:17 Ughang lain tadi ngiciakka Keristus ngan tujuan nidau iluak. Ughangtu ngerjauka titu karnau kepentingan ughang itula. Ughangtu endak ngajung aku nanggung dalam jil. 1:18 Anyautu nidau ngapaungapau! Diau penting Keristus diceritauka luak manau kila, empuak ngan tujuan iluak, empuak ngan tujuan nidau iluak. Itula sebapau aku riang ngan maju ka riang. 1:19 Aku keruan, aku ka selamat karnau du'a kamu ngan pulau karnau ditulung Rua Yesus Keristus. 1:20 Aku endak nian ngan ngaghapka, supayau aku maju ngerjauka diau benagh. Aku ngaghapka, supayau luak jak di senitu mangku pulau mbak kini Keristus diregaui ngan gegalaunyau diau kukiciakka ngan kukerjauka, empuak aku idup empuak aku mati. 1:21 Amun aku, idup batan endak Keristus; amun aku mati, aku untung. 1:22 Anyautu amun idup di deniauni, aku pacak ngerjauka diau begunau, mangku aku nidau keruan, manau diau mesti kupilia. 1:23 Aku didesak setu duau mecam: Aku endak nian ninggalka deniauni pegi seghundak ngan Keristus, karnau titu diau iluak sekali batan endak aku. 1:24 Anyautu batan endak kepentingan kamu iluakla aku maju di deniau. 1:25 Aku percayau ngan titu, mangku aku keruan aku ka idup ngan seghundak agi ngan gegalau kamu, nulung kamu mangku tamba riang tamba tegua percayau ngan Keristus. 1:26 Mangku amun aku datang agi nanti guak kamu, kamu diau seghundak ngan Keristus ka tamba bangga karnau aku. 1:27 Diau penting mbak kini, supayau idup kamu nurut ceritau Keristus itu. Mangku amun aku pacak datang, aku nginak, amun nidau pacak datang, aku ka ndengagh, bansau kamu tegua ngan sesamau bekerjau batan endak sutiak tujuan, diautu batan endak percayau nurut ceritau iluak. 1:28 Kamu mesti maju beghani, jangan takut ngan lawan kamu. Ngan carau luak itu kamu ka njadi tandau ngan ughangtu, bansau ughangtu ka kala. Kamutu ka menang, karnau Allah ngenjuakka kemenangan ngan kamu. 1:29 Karnau ngan kamu la dienjuakka setu diau iluak ukan ajau percayau ngan Keristus, tapitu pulau sengsarau batan endak Keristus. 1:30 Mbak kini kamu pulau ngikut bejuang semegi luak kamu nginak aku bejuang senitu ngan maju bejuang enggut mbak kini, luak diau la kamu dengagh.

Pilipi 2

2:1 Kamu tegua, karnau seghundak ngan Keristus. Kamu riang, karnau disayangi Keristus. Kamu dibimbing Rua Allah mangku sangi sialka ngan sangi sayangi. 2:2 Mangku cubaula kamu meriangka atiku nian ngan carau ini: Kamu mesti idup suati ngan sayang diau semegi, serupu'an ngan tujuan diau semegi. 2:3 Jangan bekerjau ndalak kepentingan diri kamu ngan mintak dipuji. Anyautu kamu mesti ngensian ngan nganggap pentingla jemau sangkan kamu. 2:4 Sanaukala pulau kepentingan jemau, jangan cuman kepentingan kamu itula. 2:5 Kamu mesti adau rupu'an ngan peghasauan luak Yesus Keristus. 2:6 Diau semegi ngan Allah. Empuak luak itu, Diau nidau terupuak, bansau kedudu'anNyautu mesti dita'anka. 2:7 Anyautu Diau sukau ninggalka gegalaunyautu, mangku njadi semegi luak sughang budak, njadi luak manusiau, mangku idup luak sughang jemau. 2:8 Diau ngensianka diriAu ngan ta'at ngan Allah enggut mati, lagi mati di kayu salip. 2:9 Karnau itu Allah ngagungka Diau seagungagungau, dienjuakkaNyau kuasau. Besaklah kuasau itu sangkan gegalau kuasau diau lain. 2:10 Mangku Yesus diregaui gegalaunyau diau adau di sergau ngan di deniauni ngan di deniau jemau mati nunduak nyemba Diau. 2:11 Mangku gegalau ughangtu ka ngaku'i, "Yesus Keristusla Tuhan!" Mangku Allah Bapak diagungka. 2:12 Kantin-kantinku diau kusayangi, kamu maju ta'at ngan aku, masau aku guak kamu, mangku mbak kini masau aku jawua, kamu mesti lebia ta'at agi. Beusahala maju, supayau keselamatan kamu njadi nyatau. Kerjaukala titu ngan takut ngan meregaui Allah. 2:13 Allahtu maju bekerjau dalam ati kamu, mangku kamu sukau ngan pacak ngerjauka kenda'Au. 2:14 Kerjauka gegalaunyau ngan nidau bemumut ngan nidau bebala. 2:15 Mangku kamu nidau besala, luak anak-anak Allah diau nidau becacat ngan idup ngan benagh di guak jemau diau ja'at ngan bedusau. Mangku kamu luak bintang diau besinagh di langit nerangi deniau, 2:16 masau kamu ngiciakka ceritau diau ngenjuakka idup. Amun kamu idup luak itu, mangku aku pacak mbanggaka kamu, masau Yesus Keristus datang agi. Itu njadi buktiau, bansau pejuanganku ukan nidau begunau ngan kerjauku adau asilau. 2:17 Berangkali daghaku ka ditumpaka luak dicughuaka di pucuak kerban diau kamu enjuakka ngan Allah karnau percayau. Amun titu ka tejadi nian, aku beterimau-kasia ngan ikut riang ngan kamu. 2:18 Mangku kamu pulau mesti beterimau-kasia ngan ikut riang ngan aku. 2:19 Aku ngaghap, aku pacak ngajung Timutius berayak ngan kamu, amun titu kendak Tuhan, mangku aku diriangka ngan ceritau kamu. 2:20 Cuman Timutius sughang diau suati serupu'an ngan aku ngan nyanauka kamu nian. 2:21 Gegalau jemau lainau cuman ngerjauka kepentingan diriau ajau, ukan kepentingan Yesus Keristus. 2:22 Kamu la keruan, bansau Timutiustu setia nian. Diau la sesamau bekerjau ngan aku endak nceritauka ceritau iluak jak di Allah. Kami ughang duau luak duau beghanak. 2:23 Diautu kuaghapka cepat kuajung guak kamu, amun la keruan, luak manau pekarauku putus nanti. 2:24 Mangku aku percayau, amun Tuhan kenda'i, aku pulau nidau lamau agi ka berayak ngan kamu. 2:25 Mangku aku ngirau iluak, amun kuajung kantin kitau Epapruditus diau kamu ajung nulung aku baliak ngan kamu. Diau la sesamau bekerjau ngan bejuang ngan aku. 2:26 Diau ghindu nian ngan gegalau kamu ngan temas, karnau kamu la ndengagh ceritau diau buidapan. 2:27 Nyela, diau buidapan nian, mis mati. Anyautu Allah sial ngan diau, ukan cuman ngan diau ajau, tapitu ngan aku pulau, mangku aku jangan tamba bingung. 2:28 Itula sebapau aku cepat ngajung diau baliak. Mangku kamu riang, amun betemu ngan diau agi, mangku atiku tenang. 2:29 Terimaula diau ngan riang luak kantin kamu dalam Tuhan ngan regauila gegalau jemau luak diau. 2:30 Karnau kerjau Keristustu diau mis mati. Diau sukau nyeraka nyawaunyau endak nulung aku, karnau gegalau kamu nidau pacak ngerjaukanyau.

Pilipi 3

3:1 Mangku, kantin-kantinku, riangla kamu karnau la seghundak ngan Tuhan. Aku nidau meghasau beghat endak ngulangi setu diau la kutulis senitu, mangku kamu keruan nian. 3:2 Sepepadaula ngan jemau diau ngerjauka setu diau ja'at diau luak anjing. Ughangtu endak masau jemau besunat, 3:3 awuak kitaula diau besunat nian, ukan ughangtu. Kitauni nyemba Allah, dibimbing Rua Allah. Kitauni beterimau-kasia nian karnau la seghundak ngan Yesus Keristus. Kitauni nidau tepaut ngan setu diau dikerjauka di badan manusiau. 3:4 Sebenaghau akunila pacak bepaut ngan kerjau manusiautu. Amun adau jemau diau meghasau adau tapakan bepaut ngan kerjautu, apau agi aku. 3:5 Akuni disunat masau umur tujua malam. Aku jemau Israil jak di jungku Benyamin, jemau Ibrani asli. Ceritau ta'at ngan ukum Taurat aku jemau Parisi. 3:6 Aku ta'at tegalau, mangku nganiayau jemau Keristen. Ceritau ukum agamau Yahudi aku nidau becacat. 3:7 Anyautu setu diau senitu kuanggap untung, mbak kini kuanggap rugi karnau Keristus. 3:8 Gegalaunyau kuanggap rugi, karnau beregaula ngeruani Keristus Tuhanku sangkan gegalaunyautu. Karnau Diautu, mangku aku ninggalka gegalaunyau. Kuanggap gegalaunyautu sesara, supayau aku bulia Keristus 3:9 ngan seghundak ngan Diau. Aku nidau agi dibenaghka karnau kerjaukunila ngan ta'at ngan ukum Taurat. Mbak kini aku dibenaghka karnau percayau ngan Keristus. Allahtu diau mbenaghka jemau karnau percayau ngan Keristus. 3:10 Diau kukenda'itu ngeruani Diau ngan kuasauNyau diau ngidupka Diau jak di mati. Aku endak ngikut sengsarau ngan Diau ngan njadi seghundak ngan Diau dalam kematianNyau. 3:11 Mangku aku ngaghap, aku ka diidupka pulau jak di mati. 3:12 Aku nidau ngiciakka aku la buasil ngan sempernau. Aku maju beusaha endak bulia setu diau dijanjika Yesus Keristus. Batan endak itula aku la dijadika hak Keristus. 3:13 Kantin-kantinku, akuni nidau ngirau bansau aku la buasil. Anyautu adau semecam diau kukerjauka. Aku nidau nyanauka setu diau la udim. Aku beusaha endak bulia setu diau di adapanku. 3:14 Mangku aku maju beusaha endak sampai ke tujuan endak bulia adia, diautu idup di sergau. Batan endak itula kitau dipilia Allah karnau Yesus Keristus. 3:15 Gegalau kitau diau la sempernau mesti berupuak luak itu. Amun adau di guak kamu diau rupu'an lain, Allah ka meretikanyau ngan diau. 3:16 Luak manau kila ini diau penting, ngikut carau diau la kitau terimau enggut mbak kini. 3:17 Kantin-kantinku, penaula aku. Kami la ngenjuakka penauan diau iluak. Karnau itu ikutkala jemau diau menau kami. 3:18 Aku la rajin ngiciakka ngan kamu, mbak kini kukiciakka agi sampai nangis, banyak jemau idup njadi musua salip Keritus. 3:19 Idup jemau luak itu ka benasau, karnau serilau ughangtu njadi tuanau. Setu diau maluka itu dibanggaka ughangtu. Ughangtu maju merupuakka setu di deniauni ajau. 3:20 Anyautu kitauni jemau diau behak di sergau. Jak di situla pulau kitau nantika ngan ghindu nian ngan Tuhan Yesus Keristus, Rajau Penyelamat kitau. 3:21 Badan kitauni diau litak ngan pacak mati ka diuba Keristus njadi luak badanAu diau agungtu. Diau ka ngerjauka titu, karnau Diau adau kuasau endak nunduakka gegalaunyau.

Pilipi 4

4:1 Karnau itu, kantin-kantinku diau kusayangi, majula percayau nian ngan Tuhan. Aku ghindu nian ngan kamu. Kamula mbuat aku riang ngan bangga. 4:2 Yudia ngan Sintiki, aku mintak nian, supayau kamu duau suati serupu'an karnau sesamau percayau ngan Tuhan. 4:3 Ngan kaba Sunsugus, kantinku diau pacak dipercayaui, aku mintak, supayau kaba nulung ughang duautu. Ughang duautu la sesamau bekerjau ngan aku endak ngiciakka ceritau iluak jak di Allah luak Kelimines ngan gegalau jemau lainau diau bekerjau ngan aku. Namau ughangtu la adau di buku jemau idup. 4:4 Luak manau kila kamu mesti riang karnau seghundak ngan Tuhan. Sekali agi aku ngiciakka: Riangla kamu! 4:5 Keilu'an kamu mesti dikeruani gegalau jemau. Tuhan la damping. 4:6 Jangan kamu ghegak ngan tuapau kila! Maju bedu'a, mintakla ngan Allah setu diau kamu endak ngan maju beterimau-kasia. 4:7 Mangku damai jak di Allah diau nidau pacak manusiau terti ka njagaui ati ngan rupu'an kamu karnau la seghundak ngan Yesus Keristus. 4:8 Mangku, kantin-kantinku, rupuakkala setu diau begunau ngan pantas dipuji, gegalaunyau diau benagh, diau diregaui, diau adil, diau beresia, diau alap ngan iluak. 4:9 Kerjaukala setu diau la kamu pelajaghi ngan terimau jak di aku, diau kamu dengagh ngan diau kamu kinak di aku. Mangku Allah diau ngenjuakka damai ka adau guak kamu. 4:10 Aku riang nian dalam Tuhan, karnau mbak kini kamu teghingat agi ngan aku. Aku ukan ngiciakka kamu nidau teghingat ngan aku. Nyela, kamu maju ngingatka aku, cuman nidau kungang nunjuakkanyau. 4:11 Aku ngiciakka ini ukan karnau aku kurangan. Aku la belajagh meghasau cukup ngan setu diau adau. 4:12 Aku pacak idup ngan serbaunyau kurang, mangku aku pacak pulau idup ngan serbau keliwatan banyak. Aku la keruan resiau idup luak manau kila, empuak kenyang empuak lapagh, empuak dang buadau empuak serik. 4:13 Gegalaunyautu pacak kutanggung, karnau kuasau diau dienjuakka Keristus ngan aku. 4:14 Luak manau kila, iluak pulau kerjau kamu la nulung aku, masau aku nanggung. 4:15 Kantin-kantinku di Pilipi, kamu keruan nian, bansau senitu, masau aku ninggalka Makedunia, masau ceritau iluaktu empai kukiciakka, nidau bediau jemau Keristen diau nulung aku lain jak di kamu. Cuman kamu itula diau meghasauka untung ngan rugi ngan aku. 4:16 Masau aku di Tesalunika, la lebia sekali kamu ngighim tanci ngan aku. 4:17 Ukan aku cuman endak nerimau pengenjuak. Diau aku endak, supayau kamu adau asil diau nguntungka kamu. 4:18 Mbak kini aku la nerimau gegalaunyau, la lebia jak di cukup. Gegalau pengenjuak kamu la kuterimau jak di Epapruditus. Gegalaunyau diau kuendak la adau galau. Pengenjuak kamutu luak kerban diau bembau ghum diau dikerbanka ngan Allah ngan diterimau ngan riang. 4:19 Allah diau kusemba kayau kematila. Diau ka ngenjuakka ngan kamu gegalaunyau diau kamu mesti gunauka karnau Yesus Keristus. 4:20 Tepujila Allah Bapak kitau selelamaunyau. Amin! 4:21 Sampaika pesanku ngan gegalau umat Allah diau percayau ngan Yesus Keristus. Terimaula pulau pesan jak di kantin-kantin kitau diau seghundak ngan aku. 4:22 Gegalau umat Allah di sini bepesan ngan kamu, terutamau jemau jak di istana Kaisar. 4:23 Aku bedu'a, supayau Tuhan Yesus Keristus iluak ngan gegalau kamu.

Kulusi 1

1:1 Jak di aku, Paulus, diau dijadika rasul Yesus Keristus karnau kendak Allah ngan pulau jak di kantin kitau Timutius. 1:2 Batan endak umat Allah diau percayau ngan Keristus di Kulusi. Kami bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai. 1:3 Amun kami bedu'a ndu'aka kamu, kami maju beterimau-kasia ngan Allah, Bapak Tuhan kitau Yesus Keristus, 1:4 karnau kami la ndengagh ceritau kamu percayau ngan Yesus Keristus ngan kamu nyayangi gegalau umat Allah. 1:5 Kamu ngerjauka titu, karnau kamu ngaghapka setu diau disediauka Allah batan endak kamu di sergau. Kamu la ndengagh titu, masau ceritau iluak diau benagh dikiciakka ngan kamu. 1:6 Ceritau iluak jak di Allahtu la tesiar di gegalau deniau, mangku ngenjuakka setu diau iluak ngan jemau. Luak itu pulau kamu, jak kamu empai ndengagh ceritautu senitu ngan nerimau keilu'an Allah ngenian. 1:7 Gegalaunyautu la dikiciakka Ipapras ngan kamu. Diautu kantin sekerjau kami diau kami sayangi. Diau rajin bekerjau batan endak Keristus endak nulung kamu. 1:8 Jak di diautu kami ndengagh ceritau kamu sangi sayangi ngan kuasau Rua Allah. 1:9 Itula sebapau jak ndengagh ceritau kamu, kami maju ndu'aka kamu. Kami mintak ngan Allah, supayau kamu dienjuakka pengertian endak ngeruani kendak Allah nian. 1:10 Mangku kamu pacak idup nurut kendak Allah ngan maju melemakka atiAu, mangku ngan tuapau kila kamu pacak ngerjauka diau iluak ngan tamba ngeruani setu diau benagh ceritau Allah. 1:11 Mangku kamu diteguaka ngan kuasau Allah diau agung endak nanggungka gegalaunyau ngan ngaligh ngan riang. 1:12 Mangku kamu beterimau-kasia ngan Allah Bapak, karnau Allahtu njadika kamu pantas nerimau setu diau disediaukaNyau batan endak umatAu di bada diau terang. 1:13 Diautu la ngilakka kitau jak di kuasau iblis mangku ngaliaka kitau dalam kuasau Ana'Au diau disayangi. 1:14 Karnau Diau kitau la ditebus, retiau dusau kitau la diabiska. 1:15 Keristus itu gambaran diau nyatau jak di Allah diau nidau kina'an. Diau anak tuau, pentingla Diau sangkan gegalaunyau diau dijadika. 1:16 Allah ngajung Diautu njadika gegalaunyau diau adau di sergau ngan di deniau, empuak diau kina'an empuak diau nidau kina'an, lagi pulau gegalau rua diau bekuasau ngan merinta. Gegalaunyautu dijadika karnau Keristus batan endak Keristus. 1:17 Antak ka gegalaunyau adau, Keristus la adau, ngan pulau gegalaunyau adau karnau Diau. 1:18 Diautu kepalak jemau Keristen. Diautu anak tuau diau dulu sekali ngulang idup jak di mati, mangku pentingla Diau sangkan gegalaunyautu. 1:19 Gegalau sipat Allah adau galau di Diau. 1:20 Mangku karnau Diau, Allah ndamaika ngan diriAu gegalaunyau diau adau di sergau ngan di deniau. Allah ngerjauka titu ngan carau Ana'Au mati di kayu salip. 1:21 Senitu kamu jawua jak di Allah. Kamu melawan Diau, karnau perembak ngan rupu'an kamu ja'at. 1:22 Mbak kini kamu la seilu'an ngan Diau karnau Ana'Au mati. Ngan carau itu kamu pacak dibatak ngadap Allah ngan ati beresia, nidau bediau sala ngan nidau becelakau. 1:23 Karnau itu kamu mesti maju percayau ngan tegua, jangan sampai ninggalka aghapan diau dienjuakka ngan kamu, masau kamu ndengagh ceritau iluak. Ceritau itu la dikiciakka ngan gegalau deniau. Batan endak itula aku, Paulus, bekerjau. 1:24 Mbak kini aku riang sengsarau batan endak kamu. Mangku ngan sengsarautu aku nepati di badanku setu diau lum ditanggung Keristus batan endak jemau Keristen. Ughangtu umpamau badanAu. 1:25 Allah ngajung aku bekerjau batan endak jemau Keristen endak ngiciakka gegalau ceritau iluak ngan kamu. 1:26 Ceritautu diresiauka Allah buabad-abad, mbak kini la dinyatauka ngan umatAu. 1:27 Allah endak, supayau ughangtu keruan ceritau diau diresiaukaNyautu iluak ngan agung nian batan endak gegalau manusiau. Resiaunyau ini: Keristus adau di ati kamu, mangku kamu adau aghapan bulia ngikut meghasauka keagunganNyau. 1:28 Diau itula kami kiciakka ngan bilang jemau, amun kami ngingatka ngan ngajagh ughangtu ngan pengertian, mangku bilang jemau njadi sempernau karnau seghundak ngan Keristus. 1:29 Batan endak itula aku bekerjau mati-matian. Aku beusaha ngan gegalau tenaga diau dienjuakka Keristus ngan aku diau kuat bekerjau di aku.

Kulusi 2

2:1 Aku endak, supayau kamu ngeruani, bansau aku bekerjau nian batan endak kamu ngan jemau di Laudikia ngan gegalau jemau lain diau lum keruan aku. 2:2 Aku ngerjauka titu, supayau ughangtu diteguaka ngan sangi sayangi, mangku ughangtu besatu. Ngan carau luak itu ughangtu ngerti nian ngan yakin ngan ngeruani resiau Allah, diautu Keristus. 2:3 Keristus itula kunci ngeruani gegalau keilu'an ngan pengertian Allah diau lum dikeruani. 2:4 Aku ngiciakka titu, supayau kamu jangan dicalu'i jemau diau pacak ngiciak. 2:5 Empuak aku jawua ngan kamu, rupu'anku guak kamu. Aku riang nginak kamu suati ngan tegua percayau ngan Keristus. 2:6 Kamu la nerimau Yesus Keristus njadi Tuhan kamu. Karnau itu kamu mesti idup seghundak ngan Diau 2:7 ngan buakagh dalam Diau, mangku tamba bepaut ngan Diau ngan tamba tegua percayau nurut setu diau la diajaghka ngan kamu. Mangku ati kamu mesti banyak beterimau-kasia. 2:8 Sepepadaula, jangan adau diau mikati kamu ngan rupu'an manusiau diau nidau begunau ngan nyesatka. Rupu'antu ukan jak di Keristus, tapitu jak di manusiau ngan rua deniau. 2:9 Karnau gegalau sipat Allah adau galau di Keristus, masau Diau adau di deniau njadi manusiau. 2:10 Mangku karnau kamu idup seghundak ngan Keristus, kamu dienju'i idup ngenianau. Keristusla kepalak gegalau rua diau bekuasau ngan merinta. 2:11 Karnau seghundak ngan Keristus kamu la disunat, ukan ngan sunat diau dibuat manusiau, tapitu ngan sunat diau dibuat Keristus. Sunattu mbibaska kamu jak di kuasau serilau diau bedusau. 2:12 Masau kamu dibaptis, kamu dikuburka seghundak ngan Keristus. Mangku masau itu pulau kamu diidupka agi seghundak ngan Diau, karnau percayau ngan kuasau Allah diau la ngidupka Keristus jak di mati. 2:13 Senitu kamu luak mati, karnau kamu jemau bedusau ngan nidau keruan ukum Allah. Mbak kini kamu la diidupka Allah seghundak ngan Keristus ngan gegalau dusau kitau la diabiskaNyau. 2:14 Diau la mbatalka surat utang diau ngancam kitau ngan carau diau beghat. Surattu la dipakukaNyau di kayu salip, mangku gegalau buru'an la diabiska. 2:15 Diau la mbuat gegalau rua diau bekuasau ngan merinta nidau bekuasau agi. Ruatu dijadikaNyau tuntunan gegalau jemau, masau Diau nggiring ruatu njadi kawalan karnau menang. 2:16 Karnau itu jangan enangka jemau nyalaka kamu, empuak karnau makanan ngan minuman, empuak karnau aghi rerayau agamau, empuak karnau aghi rayau bulan empai ngan aghi Sabat. 2:17 Gegalaunyautu bayangan ajau jak di setu diau ka datang, anyautu diau nyatau itu Keristus. 2:18 Jangan enangka kamu dirugika jemau nerimau hak kamu. Jemautu cak ngensian, cak alim ngan nyemba malaikat. Jemautu geduak, karnau rupu'annyau rupu'an deniau. Diautu nganggap diriau lebia, karnau adau pengina'an. 2:19 Diautu nidau agi bepaut ngan Keristus diau luak palak. Diau njagaui ngan nyatuka gegalau badan ngan ughat ngan sendi, mangku tumbua nurut kendak Allah. 2:20 Kamu la mati seghundak ngan Keristus, la bibas jak di kuasau rua deniauni. Ngapau kamu gi idup luak jemau diau dikuasaui deniau? Ngapau kamu tunduak ngan peraturan luak ini: 2:21 "Jangan ngucak ini. Jangan ngecap itu. Jangan nginggut itu-ini." 2:22 Gegalau peraturan itu ngiciakka setu diau nidau begunau agi, amun la dipakai. Itu cuman peraturan ngan ajaghan diau dibuat jemau. 2:23 Jemau diau mbuat peraturantu kina'an bepengertian karnau ngajung jemau sembayang nurut carau ughangtula ngan ngensianka ngan nganiayau diriau. Anyautu gegalaunyautu nidau begati, cuman muaska serilau manusiau.

Kulusi 3

3:1 Kamu la diidupka agi seghundak ngan Keristus. Karnau itu beusahala, mangku bulia setu diau adau di sergau, di bada Keristus duduak di sebela kanan Allah. 3:2 Rupuakkala setu diau adau di sergau, jangan setu diau adau di deniau. 3:3 Karnau kamu la mati, mangku idup kamu tebuni ngan Keristus di Allah. 3:4 Idup diau ngenianau itu idup seghundak ngan Keristus. Mangku amun Keristus datang nanti, kamu ka adau ngan Diau dalam keagunganNyau. 3:5 Karnau itu, mandakkala serilau deniau diau adau dalam diri kamu, diautu menaugawia, setu diau nidau senangaian, gegalau serilau diau ja'at ngan selak. Gegalaunyautu semegi ngan nyemba diwau, 3:6 karnau gegalaunyautu ka ndatangka dawaian Allah ngan jemau diau nidau ta'at. 3:7 Senitu kamu pulau ngerjauka kerjau luak itu, masau kamu dikuasauinyau. 3:8 Mbak kini kamu mesti mandak ngerjauka gegalau kerjau ja'at luak purik ngan mara, meluatka, nggelakka, ngupatka jemau, kici'an kumua. 3:9 Jangan agi sangi bu'ungi, karnau idup diau lamau ngan peremba'au la kamu tinggalka. 3:10 Mbak kini kamu la adau idup empai. Kamu manusiau empai diau maju diempaika njadi luak gambaran Allah, mangku kamu keruan Allah luak Diau sebenaghau. 3:11 Mangku nidau bediau bidahau antarau jemau Yahudi ngan jemau ukan Yahudi, antarau jemau besunat ngan jemau nidau besunat, antarau bangsau-bangsau, antarau babu ngan jemau bibas, karnau Keristus itu gegalaunyau, Diautu seghundak ngan gegalau ughangtu. 3:12 Kamutu la njadi umat Allah. Kamu la dipilia njadi ha'Au ngan disayangiNyau. Karnau itu kamu mesti sial, iluak, ngaligh, ngensian, jangan geduak, jangan kejam. 3:13 Kamu mesti ngaligh sughang ngan diau lain ngan sangi ma'apka, amun nidau tetuju ngan carau jemau. Tuhan la ngabiska dusau kamu, mangku kamu pulau mesti sangi ma'apka. 3:14 Mangku diau penting sekali, kamu mesti sangi sayangi, karnau ngan sayang kamu disatuka nian. 3:15 Damai jak di Keristus diau adau di ati kamu mesti netapka gegalau kerjau kamu, karnau kamu la dipilia Allah batan endak damai, mangku njadi sutiak badan. Kamu mesti beterimau-kasia. 3:16 Ajaghan Keristus mesti bekerjau dalam ati kamu ngan carau diau iluak. Mangku sangi ajaghila ngan sangi retika ngan bepengertian nian. Nyanyikala masmur ngan pujian ngan lagu ruhani batan endak Allah sampai beterimau-kasia dalam ati. 3:17 Gegalaunyau diau kamu kerjauka ngan kiciakka kerjaukala dalam namau Tuhan Yesus, sampai beterimau-kasia ngan Allah Bapak karnau Diau. 3:18 Tinau diau la belaki tunduakla ngan laki kamu, karnau itula carau diau iluak batan endak jemau Keristen. 3:19 Lanang diau la bebini maju sayangila bini kamu. Jangan endak sekendak ngan diau. 3:20 Budak keciak ta'atila gegalaunyau ngan pejadi kamu, karnau itula diau melemakka ati Allah. 3:21 Bak-bak jangan nyakiti ati anak kamu, mangku diau jangan tekedan. 3:22 Babu-babu ta'atila gegalaunyau ngan tuan kamu diau di deniauni. Jangan cuman ta'at, amun dikina'i karnau endak dipuji. Ta'atila diau nian, karnau takut ngan Tuhan. 3:23 Tuapau kila diau diajung ngan kamu kerjaukala ngan riang luak kamu bekerjau batan endak Tuhan, ukan batan endak manusiau. 3:24 Ingatkala bansau kamu ka nerimau upa jak di Tuhan diau dijanjikaNyau, karnau Keristus Tuhan kamu ngan kamu bekerjau batan endak Diau. 3:25 Jemau diau mbuat sala ka nanggungka salahautu, karnau Tuhan nidau milia rupau.

Kulusi 4

4:1 Kamu diau njadi tuan, buatila budak kamu ngan adil ngan benagh. Ingatkala, kamu pulau adau tuan di sergau. 4:2 Bedu'ala maju ngan sepepadau penarau bedu'a ngan beterimau-kasia ngan Allah. 4:3 Du'akala pulau kami, supayau kami pacak ngiciakka ceritau resiau Keristus. Ikak aku ngerjauka titu, aku dijilka. 4:4 Bedu'ala, supayau aku pacak ngiciakka ceritautu ngan iluak luak semestiau. 4:5 Carau kamu bekundang ngan jemau diau nidau percayau, kamu mesti bepengertian nian, mangku gunaukala masau diau adau iluak-iluak batan endak Tuhan. 4:6 Kici'an kamu mesti tepat ngan melemakka ati. Kamu mesti keruan, luak manau semestiau nimbali jemau. 4:7 Tikikus, kantin kitau diau disayangi, ka ngiciakka ngan kamu gegalau ceritau aku. Diautu ngelapan ngan sesamau bekerjau ngan kami batan endak Tuhan. 4:8 Aku ngajung diau berayak ngan kamu ngan tujuan, supayau kamu keruan ceritau kami mangku kamu diteguaka. 4:9 Unisimus ka pegi serempak ngan diau. Diautu sughang jak di kamu diau pacak dipercayaui, kami nyayangi diau. Ughang duautu ka ngiciakka ngan kamu gegalaunyau diau la tejadi di guak kami. 4:10 Aristarkus diau adau di jil seghundak ngan aku bepesan ngan kamu. Luak itu pulau Markus, denga-sanak Barnabas. Kamu la dipesanka, supayau kamu nerimau diau, amun diau datang guak kamu. 4:11 Adau pulau pesan jak di Yisus diau pulau diadaki Yustus. Jak di jemau Yahudi diau la percayau ngan Tuhan Yesus cuman ughang tigau itula diau sesamau bekerjau ngan aku batan endak Allah. Ughangtu nulungi aku nian. 4:12 Pesan pulau jak di Ipapras. Diau pulau sughang jak di kamu. Diau bekerjau batan endak Yesus Keristus ngan maju ndu'aka kamu nian, supayau kamu percayau nian ngan bepengertian, mangku kamu ta'at nian ngan kendak Allah. 4:13 Akuni pacak ngiciakka, bansau diau la bekerjau nian batan endak kamu ngan batan endak jemau Laudikia ngan jemau Hirapulis pulau. 4:14 Duktur Lukas diau kitau sayangi ngan Dimas bepesan ngan kamu. 4:15 Sampaika pulau pesan kami ngan kantin kitau di Laudikia, mangku pulau ngan Nimpa ngan jemau Keristen diau betunggal di ghumahau. 4:16 Amun surat ini la dibacauka ngan kamu, usahakala supayau surat ini dibacauka pulau ngan jemau Keristen di Laudikia. Kamu pulau mesti mbacau surat batan endak jemau Laudikia diau ka dikighimka ngan kamu. 4:17 Kiciakka ngan Arkipus, bansau diau mesti ngudimka kerjau diau diajung ngan diau batan endak Tuhan. 4:18 Pesan jak di aku, Paulus. Akunila nulis pesan ini. Ingatkala aku, bansau aku masia dalam jil. Aku bedu'a, supayau Tuhan iluak ngan kamu.

1 Tesalunika 1

1:1 Jak di Paulus, Siluanus ngan Timutius batan endak jemau Keristen di Tesalunika diau njadi umat Allah Bapak ngan Tuhan Yesus Keristus. Aku bedu'a, supayau Tuhan iluak ngan kamu ngan ngenjuakka damai. 1:2 Kami maju beterimau-kasia ngan Allah karnau gegalau kamu. Kami maju du'aka kamu. 1:3 Kami maju teghingat ngan kamu di adapan Allah Bapak kitau, bansau dalam kerjau kamu kina'an kamu percayau nian, kamu iluak ngan jemau ngan galak bekerjau nulung jemau. Kami teghingat pulau, bansau kamu tekun ngaghapka Tuhan kitau Yesus Keristus. 1:4 Kami keruan, ui kantin-kantinku, Allah sayang ngan kamu ngan milia kamu njadi umatAu. 1:5 Kami ngiciakka ceritau iluak itu ngan kamu ukan ngan katau ajau, tapitu pulau ngan kuasau Rua Allah. Kami percayau nian ceritau iluak itu benagh. Kamu keruan, luak manau kami idup guak kamu batan endak nulung kamu. 1:6 Kamu la menau idup kami ngan idup Tuhan. Empuak kamu sengsarau nian, kamu nerimau ceritau iluak diau kami kiciakkatu ngan riang. Riang itu jak di Rua Allah. 1:7 Ngan carau itu kamu njadi penauan batan endak gegalau jemau Keristen di Makedunia ngan Akaya. 1:8 Jak di kamu ceritau Tuhan la tesiar sampai ke gegalau Makedunia ngan Akaya. Ukan itu ajau, tapitu ceritau kamu percayau ngan Allah la keruan di memanau, mangku kami nidau nanti ngiciakka tuapau-apau agi. 1:9 Gegalau ughangtu ngiciakka ceritau kamu nerimau kami senitu, masau kami datang guak kamu. Ughangtu ngiciakka ceritau kamu ninggalka diwau mangku njenguak Allah diau idup ngan benagh endak nuruti ngan nyemba Diau. 1:10 Ughangtu ngiciakka pulau ceritau kamu ngaghapka Anak Allah datang jak di sergau, diautu Yesus diau la diidupka Allah jak di mati. Yesus itula diau nyelamatka kitau jak di mara Allah diau ka datangtu.

1 Tesalunika 2

2:1 Kantin-kantinku, kamuni pulau la keruan, bansau banyak asilau, masau kami datang guak kamu. 2:2 Kamu keruan, antak ka kami datang, kami la dibuati ngan digelakka jemau di Pilipi. Anyautu empuak banyak jemau melawan kami, Allah mbeghanika kami endak ngiciakka ngan kamu ceritau iluak diau asalau jak di Allah. 2:3 Aja'an kamini ukan karnau kami sesat, ukan pulau karnau tujuan diau nidau iluak, ukan pulau endak nipuka. 2:4 Kami ngiciak ukan endak melemakka ati manusiau, tapitu endak melemakka ati Allah, karnau Allah nganggap kami pantas ngiciakka ceritau iluak itu. Diautu nguji ati kami. 2:5 Kamu keruan, kami nidau kekela iluak di mulut, nipuka kamu endak nyemunika kesela'an kami. Allah keruan! 2:6 Kami nidau kekela mintak dipuji manusiau, empuak jak di kamu, empuak jak di jemau lain. Sebenaghau kami behak mintak setu jak di kamu, karnau kamini rasul Keristus. 2:7 Anyautu ati kami iluak, masau kami guak kamu, luak enduak ngasua ana'au. 2:8 Karnau kami sayang, mangku kami galak ngenjuakka ngan kamu ukan ajau ceritau iluak jak di Allah, tapitu idup kami pulau, karnau kami nyayangi kamu nian. 2:9 Cengki kamu gi teghingat, luak manau kami bekerjau mati-matian. Siang-malam kami bekerjau, supayau kami nidau ngeriaka sughang kia jak di kamu, masau kami ngiciakka ceritau iluak jak di Allah itu ngan kamu. 2:10 Idup kami beresia, benagh ngan nidau bediau cacatau tuadap kamu diau la percayau ngan Keristus. Kamuni ngeruani kami ngan Allah pulau ngeruani kami. 2:11 Kamu keruan, bansau kami nulung bilang kamu luak bapak nulungi ana'au. 2:12 Kami ngajagh kamu, neguaka ati kamu ngan ngajung kamu, supayau kamu idup melemakka ati Allah. Karnau Allah ngajak kamu njadi angguta umat Allah ngan ngikut meghasauka keagunganNyau. 2:13 Adau semecam agi diau mbuat kami beterimau-kasia ngan Allah. Masau kami ngiciakka ngan kamu ceritau jak di Allah, kamu ndengagh ngan nerimau ceritautu, ukan luak kici'an manusiau, tapitu luak ceritau jak di Allah. La nyela nian katau Allah. Diautu dang bekerjau dalam ati kamu diau percayau. 2:14 Kantinkantinku, setu diau kamu ghasauka la dighasauka jemau Keristen di Yudia diau la njadi hak Yesus Keristus. Kamu dianiayau bangsau kamutula. Titu semegi ngan diau dighasauka jemau Keristen di Yudiatu jak di jemau Yahudi. 2:15 Jemau Yahudi la mbunua Tuhan Yesus ngan nabi-nabi, lagi nganiayau kami. Ughangtu maju melawan Allah ngan njadi musua gegalau jemau. 2:16 Lagi ughangtu endak ngalang-ngalangi kami ngiciakka ngan jemau ukan Yahudi ceritau diau pacak nyelamatka ughangtu. Ngan carau luak itu jemau Yahuditu maju namba dusaunyau enggut genap mecamau. Mangku mbak kini ughangtu ditimpau mara Allah. 2:17 Mbak kini, kantinkantinku, jak kami beceghai jerang ngan kamu, beceghai di matau di ati nidau, kami nidau mandak ghindu ngan kamu, mangku kami beusaha nian endak betemu ngan kamu. 2:18 Kami la merencanauka endak berayak ngan kamu. Aku, Paulus, la rajin ncubau, anyautu Iblis ngalangi kami. 2:19 Kamuni ngenian njadi aghapan kami ngan meriangka kami, karnau amun nanti Tuhan Yesus datang ngan kitau ngadapiNyau, kamuni pulau njadi kebanggaan kami. 2:20 Nyela, kamunila njadi kebanggaan kami ngan meriangka kami.

1 Tesalunika 3

3:1 Mangku kami nidau pacak na'an ghindu kami agi. Karnau itu kami berupuak, iluakla kami ninggal sughang di Atina, 3:2 mangku kami ngajung Timutius, ading kitau. Diautu bekerjau ngan kami batan endak Tuhan ngiciakka ceritau Keristus. Kami ngajung Timutius, supayau diau neguaka ati kamu ngan ngajung kamu tamba percayau nian ngan Keristus, 3:3 supayau nidau sughang kia jak di kamu ngelipat karnau sengsarau kitau ini. Kamu la keruan, bansau sengsarautu adau dalam rencanau Allah batan endak kitau. 3:4 Masau kami gi adau guak kamu, kami la ngiciakka, bansau kitau ka sengsarau. Nyela, titu la tejadi, luak kamuni keruan. 3:5 Itula sebapau aku ngajung Timutius, karnau aku nidau ta'an agi, mangku aku keruan nian, apu kamu percayau. Aku ghegak, kalu kamu la dicubaui iblis ngan dikalaka, mangku kerjau kami nidau bediau gatiau. 3:6 Mbak kini Timutius la baliak jak di kamu ngan ngiciakka ngan kami ceritau diau meriangka, bansau kamu maju percayau ngan sangi sayangi. Diau ngiciakka, bansau kamu maju mbuat ingatan diau iluak ngingatka ceritau kami guak kamu, ngan bansau kamu ghindu endak betemu ngan kami, semegi luak kami ghindu endak betemu ngan kamu. 3:7 Mangku dalam kemada'an ngan kesengsarauantu kami diriangka ndengagh ceritau kamu diau percayau nian. 3:8 Mbak kini kami meghasau idup nian, karnau kamu maju seghundak ngan Tuhan. 3:9 Kami beterimau-kasia nian ngan Tuhan Allah, karnau kami riang tegalau karnau kamu. 3:10 Siang-malam kami bedu'a nian, supayau kami pacak betemu ngan kamu endak namba diau gi kurang percayau. 3:11 Kami bedu'a, supayau Allah Bapak kitau ngan Tuhan kitau Yesus ngenjuakka jalan ngan kami mangku betemu ngan kamu. 3:12 Kami bedu'a, supayau Tuhan mbuat kamuni tamba sangi sayangi ngan nyayangi gegalau jemau, mangku kamu nyayangi nian, semegi luak kami nyayangi kamu. 3:13 Ngan carau luak itula Tuhan neguaka ati kamu, mangku kamu beresia, nidau becelakau di adapan Allah Bapak kitau, masau Yesus Tuhan kitau datang ngan gegalau jemau percayau.

1 Tesalunika 4

4:1 Mangku mbak kini, kantin-kantinku, kami ngajung kamu idup melemakka ati Allah, semegi ngan diau la kami kiciakka ngan kamu senitu. Nyela, kamu la ngerjaukanyau. Anyautu mbak kini ngan kuasau Tuhan Yesus kami ngajung kamu tamba beusaha agi melemakka ati Allah. 4:2 Nyela, kamu keruan ajaghan diau kami ajaghka ngan kamu ngan kuasau Tuhan Yesus. 4:3 Inila kendak Allah, supayau kamu idup beresia. Jangan kamu menaugawia. 4:4 Bilang lanang jak di kamu mesti keruan, luak manau bulia bunting ngan carau diau beresia, mangku idup ngan buntingautu ngan carau diau melemakka ati Allah ngan manusiau. 4:5 Jangan ngikut serilau ajau, luak diau dikerjauka jemau diau nidau keruan Allah. 4:6 Jangan sughang kia mbuat ja'at ngan jemau ngan nipukanyau. Senitu la kami kiciakka nian ngan kamu, bansau Tuhan ka ngukum jemau diau ngerjauka titu. 4:7 Allah milia kitau, ukan supayau kitau idup ja'at, tapitu supayau kitau idup beresia. 4:8 Karnau itu, jemau diau enggup nerimau ajaghan ini, ukanau enggup nerimau manusiau, tapitu enggup nerimau Allah diau ngenjuakka RuaHau diau beresia ngan kamu. 4:9 Nidau nanti kami nulis agi ngan kamu ceritau nyayangi kantin seagamau. Kamuni la diajaghi Allah sangi sayangi. 4:10 Nyela, kamu la ngerjaukanyau ngan gegalau jemau diau percayau di Makedunia. Anyautu kami ngajung kamu, supayau tamba ngerjaukanyau nian. 4:11 Beusahala idup diau tenang. Jangan ncampuri urusan jemau. Bekerjaula batan pengidupan kamu itula, luak diau la kami ajungka ngan kamu senitu. 4:12 Amun kamu ngerjauka titu, kamu nidau tegantung ngan jemau, mangku kamu diregaui jemau diau nidau percayau pulau. 4:13 Mangku, kantinkantinku, kami endak, supayau kamu ngeruani diau sebenaghau ceritau jemau diau la mati, mangku kamu nidau bingung luak jemau diau nidau bediau aghapan. 4:14 Kitau percayau, bansau Yesus la mati, la idup agi, mangku kitau percayau pulau, bansau jemau percayau diau la mati ka diidupka ngan ditunggalka Allah di guak Yesus. 4:15 Inila ajaghan Tuhan diau endak kami sampaika ngan kamu: Masau Tuhan Yesus datang, kitau diau gi idup nidau ka ndului jemau diau la dulu mati. 4:16 Allah ka merintaka, mangku ka kedengaghan suarau pengulu malaikat ngan muni terumpit Allah, mangku Tuhan ka tughun jak di sergau ngan jemau diau la mati dalam Keristus ka dulu diidupka. 4:17 La udim itu kitau diau gi idup masau itu ka dinayiakka ke aban serempak ngan ughangtu endak betemu ngan Tuhan di awang-awang. Mangku kitau ka maju guak Tuhan selelamaunyau. 4:18 Karnau itu sangi teguakala ati kamu ngan kici'an ini.

1 Tesalunika 5

5:1 Nidau nanti kami tuliska ngan kamu, kebilau masaunyau titu ka tejadi. 5:2 Karnau kamuni la keruan, bansau aghi Tuhan datang, nidau disangkau, luak jemau pemaling datang aghi malam. 5:3 Amun jemau bekiciak, "Gegalaunyau aman ngan tenang," mangku masau itula ughangtu benasau. Luak jemau tinau diau kesakitan endak merunggu, ughangtu nidau pacak ngilakkanyau. 5:4 Anyautu kamuni ukan jemau diau idup di keleman, mangku aghitu nidau nggagauka kamu luak pemaling. 5:5 Karnau gegalau kamu idup di terang, kamu temasuak anak terang. Kitau ukan jemau diau idup dalam keleman ngan nidau temasuak anak keleman. 5:6 Itula sebapau kitau nidau bulia tiduak-tiduak ajau luak jemau lain. Kitau mesti sepepadau ngan maju siagau. 5:7 Aghi malam jemau tiduak, aghi malam pulau jemau mabuak. 5:8 Anyautu kitau ini anak terang. Karnau itu rupu'an kitau mesti terang. Kitau mesti maju percayau ngan Tuhan ngan nyayangi jemau, lagi ngaghapka Allah nyelamatka kitau. Itula pakaian diau njagaui kitau. 5:9 Karnau Allah milia kitau ukan batan endak ditimpau mara, tapitu batan endak diselamatka karnau Tuhan kitau Yesus Keristus. 5:10 Diautu mati batan endak kitau, supayau masau Diau datang nanti, enta kitau gi idup enta la mati, kitau pacak idup guak Diau. 5:11 Itula sebapau kamu mesti sangi tulungi ngan teguaka ati kamu, luak diau la kamu kerjauka. 5:12 Kami ngajung kamu nian, kantin-kantinku, supayau kamu meregaui jemau diau bekerjau guak kamu, jemau diau la dipilia Tuhan njadi pengulu kamu ngan ngajaghi kamu. 5:13 Kami ngajung, supayau kamu meregaui ngan nyayangi ughangtu nian karnau kerjau ughangtu. Idupla ngan damai sughang ngan diau lain. 5:14 Kami ngajung kamu pulau, supayau kamu negughi jemau diau enggup bekerjau. Teguaka ati jemau diau asau-asau. Tulungla jemau diau litak. Ngalighla ngan gegalau jemau. 5:15 Jangan enangka jemau mbalas keja'atan ngan ja'at. Anyautu beusahala maju bebuat iluak sughang ngan diau lain ngan gegalau jemau. 5:16 Maju injiakla kamu, 5:17 ngan maju bedu'a. 5:18 Luak manau kia setu diau tejadi di kamu, kamu mesti beterimau-kasia ngan Allah, karnau itula diau Allah kenda'i ngan kamu, jemau diau percayau ngan Yesus Keristus. 5:19 Jangan ngalangi Rua Allah. 5:20 Jangan nganggap enteng ceritau diau dienjuakka Rua Allah. 5:21 Keruanila gegalaunyau, diau iluak mesti diikuti. 5:22 Jawuhi gegalau mecam keja'atan. 5:23 Aku bedu'a, supayau Allah ngenjuakka kamu damai ngan njadika kamu jemau diau idup nian batan endak Allah. Aku bedu'a, supayau Allah njagaui gegalau idup kamu, rua ngan jiwa kamu, mangku amun Tuhan kitau Yesus Keristus datang agi, kamu nidau bediau cacatau. 5:24 Allah itu setia, Diau milia kamu, mangku Diau pulau ka ngerjaukanyau. 5:25 Mangku du'aka pulau kami. 5:26 Sambutla ngan riang gegalau kantin kitau diau la percayau. 5:27 Ngan kuasau Tuhan aku ngajung kamu nian, supayau surat ini dibacauka ngan gegalau kantin kitau diau percayau. 5:28 Aku bedu'a, supayau Tuhan kitau Yesus Keristus iluak nian ngan kamu.

2 Tesalunika 1

1:1 Jak di Paulus, Siluanus ngan Timutius batan endak jemau Keristen di Tesalunika diau njadi umat Allah Bapak ngan Tuhan Yesus Keristus. 1:2 Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai ngan kamu. 1:3 Kantin-kantinku, kami maju beterimau-kasia ngan Allah karnau kamu. Nyela, semestiau luak itu, karnau kamu tamba percayau ngan Keristus ngan tamba sangi sayangi. 1:4 Itula sebapau kami muji kamu di guak jemau Keristen. Riang nian kami nceritauka kamu, karnau kamu maju percayau ngan tekun ngan Keristus, empuak kamu diluatka ngan dianiayau. 1:5 Gegalaunyautu nyatauka Allah ngakimi ngan adil. Kamu sengsarau mbak kini, karnau Allah njadi rajau kamu, mangku kamu sepantasau njadi umatAu. 1:6 Allah itu adil. Diau ka mbalaska jemau diau mbuati kamu. 1:7 Mbak kini kitau diau sengsarau. Allah ka mbibaska kitau nanti, masau Tuhan Yesus tughun jak di sergau ngan malaikatAu diau bekuasau. 1:8 Ngan api diau maghak Diau ka tughun endak ngukum jemau diau enggup percayau ngan Allah ngan enggup ta'at ngan ceritau iluak jak di Yesus, Tuhan kitau. 1:9 Ughangtu ka benasau selelamaunyau, dicapakka keluagh jak di guak Tuhan, jak di kuasauNyau diau agung. 1:10 Gegalaunyautu ka tejadi, amun Diau datang nanti endak diagungka umatAu ngan diregaui bilang jemau diau percayau. Kamuni pulau ka temasuak umatAu, karnau kamu percayau ngan ceritau diau kami kiciakka ngan kamu. 1:11 Itula sebapau kami maju du'aka kamu, supayau Allah njadika kamu pantas idup nuruti kenda'Au, karnau batan endak itula kamu dipilia. Kami bedu'a, supayau Allah ngan kuasauNyau nulung kamu endak ngerjauka setu diau iluak diau endak kamu kerjauka, karnau percayau ngan Keristus. 1:12 Ngan carau luak itula Tuhan kitau Yesus diagungka karnau kitau, mangku kamu pulau dipuji Yesus karnau keilu'an ati Allah ngan Tuhan kitau Yesus Keristus.

2 Tesalunika 2

2:1 Ceritau Tuhan kitau Yesus Keristus datang ngan ceritau kitau ditunggalka ngan Diau, inila diau kami ajungka nian ngan kamu: 2:2 Jangan kamu mura bingung ngan ghegak, karnau adau ceritau aghi Tuhan la sampai, enta ceritautu asalau jak di katau rua, enta jak di ajaghan, enta jak di surat diau dikiciakka asalau jak di kami. 2:3 Empuak luak manau, jangan kamu ditipuka jemau, karnau antak ka aghitu sampai, banyak jemau ka ngelipat ngan melawan Allah. Mangku ka adau sughang Jemau Ja'at diau ditetapka masuak ke nerakau. 2:4 Jemautu ka melawan ngan ninggika diriau lebia tinggi jak di gegalaunyau diau disemba manusiau ngan gegalaunyau diau dianggap manusiau allah. Lagi diau ka duduak di Ghuma Allah ngan ngiciakka diautu Allah. 2:5 Baghia kamu nidau teghingat agi, bansau gegalaunyautu la kukiciakka ngan kamu. Masau itu aku gi adau guak kamu. 2:6 Mangku kamuni keruan setu diau na'ani jemautu ngerjauka gegalaunyautu. Nanti masaunyau diau la ditetapka Allah, Jemau Ja'attu ka dinyatauka. 2:7 Kuasau diau ngerjauka keja'atan itu la mulai bekerjau ngan carau diresiaukanyau, anyautu masia dita'ani. Amun diau na'aninyautu la dijawuaka, 2:8 Jemau ja'attu kina'an. Mangku amun Tuhan Yesus datang, Diau ka mbunua Jemau Ja'attu ngan nyawau jak di mulutAu, Diau ka mbenasaukanyau ngan keagunganNyau. 2:9 Jemau Ja'attu ka datang ngan kuasau Iblis, mangku diau ka ngadauka gegalau mecam tandau nyelia ngan bemecam tipuan. 2:10 Diau ka makai gegalau mecam tipuan diau ja'at ngan jemau diau ka benasau. Ughangtu ka benasau nian, karnau ughangtu enggup nerimau, nidau meregaui ceritau benagh jak di Allah diau pacak nyelamatka ughangtu. 2:11 Itula sebapau Allah ngajung kuasau diau nyesatka ughangtu, mangku ughangtu percayau ceritau diau mbu'ung. 2:12 Ikak itula gegalau jemau diau nidau percayau ngan setu diau benagh, galak mbuat ja'at ka diukum. 2:13 Kantin-kantinku diau disayangi Tuhan. Kami sepantasau beterimau-kasia ngan Allah karnau kamu, karnau jak di penembai Allah milia kamu batan endak diselamatka karnau kerjau Rua Allah diau njadika kamu umatAu diau beresia, lagi pulau karnau kamu percayau ceritau diau benagh jak di Allah. 2:14 Batan endak itula kamu diajak karnau ceritau iluak diau la kami kiciakka ngan kamu, mangku kamu ngikut meghasauka keagungan Yesus Keristus, Tuhan kitau. 2:15 Karnau itu majula percayau ngan maju nuruti ajaghan diau la kami ajaghka ngan kamu, empuak diau kami kiciakka, empuak diau kami tuliska. 2:16-17 Kami bedu'a, supayau Tuhan kitau Yesus Keristus ngan Allah Bapak kitau melemakka ngan neguaka ati kamu, mangku kamu pacak ngerjauka ngan ngiciakka setu diau iluak. Allah nyayangi kitau. Diau maju neguaka nian ngan ngenjuakka aghapan diau iluak ngan kitau, karnau Allahtu iluak.

2 Tesalunika 3

3:1 Mangku, kantin-kantinku, du'aka kami. Bedu'ala, supayau katau Allah cepat tesiar mangku diterimau ngan iluak, luak diau la tejadi guak kamu senitu. 3:2 Bedu'ala, supayau Allah nyelamatka kami jak di pengacau ngan jemau ja'at, karnau nidau gegalau jemau percayau ngan ceritau Tuhan. 3:3 Tuhan pacak dipercayaui nian. Diau ka neguaka ati kamu ngan njagaui kamu jak di diau ja'at. 3:4 Kami percayau nian ngan Tuhan, bansau kamu nidau ka mandak ngerjauka setu diau kami kiciakka ngan kamu. 3:5 Kami bedu'a, supayau Tuhan nulung kamu, mangku kamu terti nian kasia Allah ngan carau Keristus nanggung ngan ngaligh. 3:6 Ui kantin-kantinku, ngan kuasau Tuhan Yesus Keristus kami ngajung kamu, supayau kamu njawuhi bilang jemau percayau diau malas bekerjau ngan nidau nuruti ajaghan diau kami ajaghka ngan kamu. 3:7 Kamutu keruan, kamu mesti menau carau kami. Kami nidau malas, masau kami adau di guak kamu. 3:8 Kami nidau makan makanan jemau ngan nidau dibayighi. Siang-malam kami bekerjau mbanting tulang, supayau kami jangan merugika sughang kia jak di kamu, 3:9 ukanau karnau kami nidau behak mintak tulung ngan kamu, anyautu kami endak njadi penauan batan endak kamu. 3:10 Lagi masau kami gi adau di guak kamu, kami la ngajagh kamu luak ini: Jemau diau enggup bekerjau, jangan diajung makan. 3:11 Kami ngiciakka itu, karnau kami la ndengagh, bansau adau jemau jak di kamu diau idup malas, nidau ngerjauka tuapau-apau lain jak di ngiciakka jemau. 3:12 Jemau luak itu kami ngajung nian dalam namau Tuhan Yesus Keristus, supayau ughangtu neman bekerjau, mangku bulia pengidupan. 3:13 Mangku kamu, jangan kamu puas bebuat iluak. 3:14 Amun adau jemau diau enggup nuruti setu diau kami kiciakka dalam surat ini, sepepadaula ngan jemautu. Jangan sekantin ngan diau, mangku diau maluan. 3:15 Anyautu jangan nganggap diau musua, tapitu tegughila diau luak adiak-sanak. 3:16 Kami bedu'a, supayau Tuhan maju ngenjuakka damai ngan kamu, empuak luak manau ajau. Aku bedu'a, supayau Tuhan nyertaui gegalau kamu. 3:17 Pesan jak di aku, Paulus. Inila tulisanku. Luak inila tandau tanganku di gegalau suratku. 3:18 Aku bedu'a, supayau Tuhan kitau Yesus Keristus iluak ngan gegalau kamu.

1 Timutius 1

1:1 Jak di aku, Paulus. Aku njadi rasul Yesus Keristus karnau perinta Allah, Penyelamat kitau, ngan Yesus Keristus diau njadi aghapan kitau. 1:2 Batan endak Timutius diau njadi anakku nian karnau percayau ngan Yesus. Aku bedu'a, supayau Allah Bapak ngan Tuhan kitau Yesus Keristus sayang ngan iluak nian ngan kaba ngan ngenjuakka damai. 1:3 Masau aku pegi ke Makedunia, la kuajungka ngan kaba, supayau maju mendam di Ipisus, karnau di situ adau jemau diau ngajaghka ajaghan nidau benagh, mangku kaba mesti ngajung ughangtu mandak. 1:4 Tegughi ughangtu, supayau jangan agi galak ndengagh ceritau mbu'ung ngan ceritau niniak puyang senitu. Gegalaunyautu cuman mbuat jemau bebala, ukan majuka rencanau Allah diau cuman pacak dikeruani amun percayau. 1:5 Tujuan petuaku ini, supayau pacak sangi sayangi ngan ati iluak ngan ati keciak beresia ngan percayau nian ngan Tuhan. 1:6 Anyautu adau jemau diau nidau idup luak itu agi, diau sesat ngan kici'an diau nidau begati. 1:7 Ughangtu endak ngajagh ukum Taurat, awuak ughangtu nidau ngerti kici'annyautu diau dikiciakka ngan yakin nian. 1:8 Kitau keruan, bansau ukum Taurat iluak, amun digunauka semestiau. 1:9 Ingatla, bansau ukumtu dibuat ukan batan endak jemau diau benagh, tapitu batan endak pelanggar ukum, penja'at, jemau diau nidau keruan Tuhan, jemau bedusau, jemau diau idup nurut carau deniau, jemau nidau ta'at ngan nidau buagamau, pembunua pejadiau ngan pembunua lainau, 1:10 jemau menaugawia, jemau sangi ribangka selanangan, jemau maling jemau, pembu'ung, jemau galak besumpa, ngan sapau kila diau ngerjauka setu diau belawanan ngan ajaghan diau benagh. 1:11 Ajaghantu adau di ceritau iluak diau la dipercayauka ngan aku endak dikiciakka. Ceritautu asalau jak di Allah diau agung ngan pantas dipuji. 1:12 Aku beterimau-kasia ngan Yesus Keristus Tuhan kitau. Diautu nguatka aku bekerjau batan endak Diau, karnau Diau nganggap aku pantas ngerjauka titu. 1:13 Empuak senitu aku madakka, nganiayau ngan nggelakka Diau, aku la disialkaNyau, karnau masau itu aku lum percayau, mangku nidau keruan setu diau kukerjaukatu. 1:14 Anyautu aku dienju'i Tuhan keilu'an banyak kematila, mangku aku pacak percayau ngan nyayangi Yesus Keristus, karnau seghundak ngan Diau. 1:15 Nyela nian kici'an ini ngan pantas diterimau nian, "Yesus Keristus datang ke deniau endak nyelamatka jemau bedusau." Mangku jak di ughangtu aku diau paling bedusau ngan ja'at sekali. 1:16 Anyautu Allah nyialka aku, mangku Yesus Keristus pacak nyatauka gegalau kengalighanNyau ngan aku, jemau diau paling bedusauni. Mangku aku njadi penauan batan endak jemau diau ka percayau nanti ngan bulia idup selelamaunyau. 1:17 Allah itu Rajau gegalau saman diau nidau beghuba selelamaunyau ngan nidau kina'an. Diau sughang itula Allah ngan pantas diregaui ngan dipuji selelamaunyau. Nyela nian. Amin! 1:18 Timutius, anakku! Tugas ini kupercayauka ngan kaba, karnau katau Allah diau dikiciakka nabi senitu ceritau kaba. Kici'an itu mesti njadi pembimbing kaba mangku pacak bejuang iluak-iluak. 1:19 Bejuangla ngan percayau ngan Keristus ngan ati diau beresia. Adau jemau diau nidau nyanauka suarau ati keci'au, mangku iman ughangtu kacau. 1:20 Di antaraunyau Himenius ngan Aliksandar. Ughang duautu la kuseraka ngan iblis, supayau belajagh mandak nggelakka Allah.

1 Timutius 2

2:1 Diau penting diau endak kukiciakka, supayau jemau Keristen bedu'a, mintak ngan Allah ngan beterimau-kasia, ndu'aka gegalau jemau. 2:2 Du'akala rajau ngan gegalau jemau diau adau kuasau, mangku kitau pacak idup tenang ngan tenteram endak meregaui Allah ngan kerjau diau pantas. 2:3 Itula diau iluak ngan melemakka ati Allah, Penyelamat kitau. 2:4 Diau endak, supayau gegalau jemau ngeruani diau benagh ngan diselamatka. 2:5 Allah gi sughang. Mangku diau mbuat manusiau seilu'an ngan Allahtu gi sughang pulau, diautu manusiau Yesus Keristus. 2:6 Diau la nyeraka diriAu endak mbibaska gegalau jemau jak di dusau. Luak itu Allah mbuktika masau diau tepat, bansau Diau endak, supayau gegalau jemau diselamatka. 2:7 Batan endak itula aku dipilia njadi rasul endak ngiciakka ceritau iluak ngan jemau ukan Yahudi ngan ngajagh ughangtu percayau ngan ceritau benaghtu. Kataukuni benagh, aku nidau mbu'ung. 2:8 Mangku aku endak, supayau amun jemau Keristen betunggal di manau kila, jemau lanang bedu'a ngan ati diau beresia, ngan nidau mara ngan nidau bebala. 2:9 Luak itu pulau jemau tinau mesti ndandani diriau ngan carau biasau diau pantas. Jangan putungan gumbak nyelia, jangan makai periasan emas ngan mutiara, jangan makai baju diau besak regaunyau. 2:10 Jemau tinau mesti ndandani diriau ngan perembak diau iluak, diau pantas ngan jemau tinau diau endak ta'at ngan Allah. 2:11 Jemau tinau mesti belajagh ngan diam ngan penurut. 2:12 Aku nidau ngajung jemau tinau ngajagh ngan nidau ngajung diau merintaka lanang. Diau mesti diam. 2:13 Karnau Adam diau dulu sekali dijadika mangku Hawa. 2:14 Lagi pulau ukan Adam diau ditipuka ulagh, tapitu Hawa, mangku melanggar perinta Allah. 2:15 Anyautu jemau tinau ka selamat, karnau diau melahirka anak, amun diau maju percayau ngan Keristus ngan nyayangi jemau ngan idup batan endak Allah.

1 Timutius 3

3:1 Nyela nian kici'an ini, "Jemau diau endak njadi pengulu jemau Keristen endak ngerjauka kerjau diau beregau." 3:2 Karnau itu pengulu jemau Keristen mesti jemau diau nidau bediau salahau. Buntingau cuman sughang. Diau mesti nguasaui diriau, bepengertian, ngelapan, galak nerimau jemau di ghumahau, pacak ngajagh jemau. 3:3 Jangan diau tukang mabu'an, jangan galak belagau, anyautu diau mesti ngaligh ngan galak bedamai. Jangan jemau diau tetancian. 3:4 Diau mesti terti mimpin ghuma-tanggaunyau ngan iluak ngan ngajagh anak-ana'au ta'at ngan meregaui pejadiau. 3:5 Amun jemau nidau pacak ngurus ghumatanggaunyau, luak manau diau pacak ngurus Ghuma Allah? 3:6 Jangan milia jemau diau empai percayau, mangku diau jangan njadi geduak ngan diukum luak iblis. 3:7 Diau mesti pulau diregaui jemau, mangku diau nidau njadi kici'an jemau ngan dikalaka iblis. 3:8 Jemau diau endak nulung kerjau Tuhan mesti pulau jemau diau iluak ngan jujur. Jangan jemautu tukang minum anggur ngan jemau tetancian. 3:9 Ughangtu mesti maju percayau nian ngan ajaghan Keristus ngan ati diau beresia. 3:10 Ughangtu mesti diuji kudai. Amun tenyatau jemautu pacak dipercayaui, mangku diau bulia nulung kerjau Tuhan. 3:11 Biniau pulau mesti jemau iluak. Jangan diau galak ngupatka jemau. Diau mesti nguasaui diriau ngan pacak dipercayaui ngan gegalaunyau. 3:12 Ughangtu mesti jemau diau gi sughang biniau ngan mimpin anak-ana'au ngan ghuma-tanggaunyau ngan iluak. 3:13 Jemau diau nulung kerjau Tuhan ngan iluak ka diregaui, mangku tamba beghani ngiciakka ceritau percayau ngan Keristus ngan jemau. 3:14 Aku ngaghap nidau lamau agi aku berayak ngan kaba. Empuak luak itu aku pulau nulis surat ini ngan kaba. 3:15 Mangku amun aku lambat sampai, kaba la keruan, luak manau kitau anak-anak Allah mesti idup. Kitauni anak Allah diau idup diau njadi tiang penegak, njadi pelapiak ajaghan diau benagh jak di Allah. 3:16 Agung nianan resiau agamau kitau, Diau ngancakka diriAu ngan rupau manusiau, dibenaghka Rua Allah, dikinak malaikat-malaikat, dikiciakka ngan bangsau-bangsau diau nidau keruan Allah, dipercayaui di gegalau deniau, diangkat ke sergau bada diau agung.

1 Timutius 4

4:1 Rua Allah ngiciakka nian, bansau nanti ka adau jemau diau ngelipat, nidau agi ngikut Yesus. Ughangtu ka ngikut rua ja'at diau nyesatka ngan ngikut ajaghan iblis. 4:2 Ughangtu ditipuka jemau diau mbu'ung ngan ati keci'au la tekatup. 4:3 Ughangtu nidau ngajung jemau nika, nidau ngajung makan makanan diau dijadika Allah, awuak bulia dimakan jemau diau percayau ngan Keristus ngan keruan diau benagh, amun beterimau-kasia ngan Allah. 4:4 Gegalaunyau diau dijadika Allah iluak. Nidau bediau diau aram, amun diterimau ngan beterimau-kasia ngan Allah. 4:5 Gegalaunyautu njadi alal karnau katau Allah ngan du'a. 4:6 Amun kaba ngajaghka gegalaunyautu ngan kantin-kantin kitau diau percayau, kaba ka njadi budak Yesus Keristus diau bekerjau ngan iluak. Kaba mesti maju neguaka ati kaba ngan katau Allah diau kitau percayaui ngan ajaghan diau benagh diau kaba turuti selamau ini. 4:7 Jawuhila ceritau mbu'ung niniakniniak diau nidau begatitu. Belajaghla idup luak jemau Keristen diau iluak. 4:8 Melatia badan gi dikit gunaunyau. Melatia rua banyak gunaunyau, karnau adau janji batan endak idup mbak kini ngan idup nanti. 4:9 Kici'an itu benagh ngan pantas dipercayaui nian. 4:10 Itula sebapau kitau bejuang ngan bekerjau nian, karnau kitau ngaghapka nian Allah diau idup. Diautu pacak nyelamatka gegalau jemau, terutamau jemau diau percayau. 4:11 Ajaghkala gegalaunyautu ngan ajungla jemau nurutau. 4:12 Jangan sughang kia nidau meregaui kaba, karnau kaba gi mudau. Anyautu jadila penauan batan endak jemau percayau ngan kici'an kaba, perembak kaba, sayang kaba, percayau kaba, ngan keberesian idup kaba. 4:13 Penarau ini enggut aku datang, kaba mesti maju mbacau Injil nian ngan ngajagh ngan neguaka jemau. 4:14 Jangan lalai nggunauka kuasau diau dienjuakka Allah ngan kaba, masau pengulu jemau Keristen nepiakka tangan di palak kaba ngan nabi-nabi ngiciakka pesan Allah. 4:15 Kerjaukala gegalaunyautu ngan ngenianau, mangku kemajuan kaba ka kina'an ngan gegalau jemau. 4:16 Jagauila diri kaba ngan jagauila ajaghan kaba. Kaba mesti tekun ngerjauka gegalaunyautu, karnau ngan carau luak itu kaba ka nyelamatka diri kaba ngan gegalau jemau diau ndengaghka kaba.

1 Timutius 5

5:1 Jangan kaba marai jemau diau la tuau, tapitu tegughi diau luak bak kaba. Tegughila jemau mudau luak denga-sanak kaba, 5:2 tinau diau tuau luak mak kaba, tinau diau mudau luak kelawai kaba ngan sikap diau beresia. 5:3 Regauila randau diau idup sughang. 5:4 Anyautu amun sughang randau adau anak ngan cucung, ughangtula diau mesti belajagh, bansau ughangtu wajib nulung denga-sana'au ngan mbalas keilu'an pejadi ngan nini'au. Itula diau melemakka ati Allah. 5:5 Randau diau nian idup sughang ngan nidau bediau jemau nyayiau cuman ngaghapka Allah. Siang malam diau maju bedu'a ngan mintak tulung jak di Allah. 5:6 Anyautu randau diau galak idup besesenang la mati, empuak diau gi idup. 5:7 Kiciakka titu pulau ngan randau-randau, supayau ughangtu idup ngan nidau becelakau. 5:8 Amun adau jemau diau nidau nyayia denga-sana'au, apau agi jemau seghumahau, jemautu ngelipat ngan lebia ja'at jak di jemau diau nidau percayau. 5:9 Randau diau endak dicatat, umurau mesti enam pulua lebia ngan cuman sekali belaki. 5:10 Randautu mesti tekenal ngerjauka kerjau diau iluak, misalau mbesakka ana'au ngan iluak, riang nerimau menda di ghumahau, mbasua keting jemau diau percayau, nulung jemau diau nanggung ngan ngerjauka nian gegalau kerjau diau iluak. 5:11 Jangan ncatat randau diau gi mudau. Karnau amun serilaunyau kuat, diau endak belaki agi mangku ninggalka Keristus. 5:12 Mangku diau besala nian, karnau nidau nepati janjiau. 5:13 Lagi pulau ngan ngeluagh masuak ghuma jemau diau belajagh malas. Mangku lebia ja'at agi diau ngiciakka jemau, ncampuri urusan jemau ngan ngiciakka setu diau nidau pantas. 5:14 Itula sebapau aku endak, supayau randau mudau belaki agi, mangku adau anak, nyayia ghuma-tanggaunyau, mangku musua nidau pacak ngarutka namau kitau. 5:15 Karnau la adau randau diau sesat ngikut iblis. 5:16 Amun adau jemau percayau diau adau denga-sana'au diau la randau, diau mesti nulung randau itu. Jangan enangka jemau Keristen lain nanggungka diautu. Ngan carau luak itu randau diau nidau bediau jemau pacak ditulung nian. 5:17 Pengulu diau iluak kerjaunyau pantas diregaui duau kali lipat, terutamau jemau diau rajin beketuba ngan ngajagh. 5:18 Karnau dalam Injil ditulis, "Benatang diau dang ngighiak jangan ditukup mulutau." Lagi, "Jemau diau bekerjau pantas nerimau upa." 5:19 Jangan kaba terimau buru'an tuadap pengulu jemau Keristen, amun nidau dikiciakka duau madak tigau ughang. 5:20 Jemau diau maju bedusau tegughila di mukau gegalau jemau Keristen, mangku diau lain njadi takut. 5:21 Di adapan Allah ngan Yesus Keristus ngan malaikat diau suci aku mintak nian, supayau kaba nuruti petua ini ngan jangan nyalaka jemau, amun lum ngeruani nian. Jangan milia rupau. 5:22 Jangan cepat nepiakka tangan di sughang jemau njadika diau pengulu. Jangan ngikut ngan dusau jemau. Jagauila diri kaba supayau maju beresia. 5:23 Jangan agi minum ayiak bangkau ajau. Minumla anggur dikit, karnau busung kaba rajin sakit ngan badan kaba rajin litak. 5:24 Adau jemau dusaunyau la keruan antak ka diadili. Adau jemau lainau dusaunyau ka dikeruani la udim diadili. 5:25 Luak itu pulau kerjau diau iluak cepat kina'an, mangku diau nidau mura kina'an nidau pulau pacak maju tebuni.

1 Timutius 6

6:1 Jemau diau njadi budak mesti nganggap tuanau pantas diregaui, mangku namau Allah ngan ajaghan kitau nidau pacak dikarutka jemau. 6:2 Amun tuanau jemau percayau, jangan nidau diregaui, karnau semegi anak Tuhan. Budak itu mesti bekerjau lebia iluak agi, karnau tuan diau nerimau kerjau iluaktu semegi percayau ngan disayangi. Ajaghkala nian gegalaunyautu. 6:3 Amun adau jemau diau ngajaghka ajaghan diau lain ngan nidau tetuju ngan ajaghan diau benagh jak di Tuhan kitau Yesus Keristus ngan nidau pulau tetuju ngan ajaghan agamau kitau, 6:4 jemau itu geduak, awuak nidau terti tuapau-apau. Penyakitau galak bebala, mbuat jemau sengit, kacau, nggelak, sangsi, 6:5 becelikaian diau nidau udim-udim. Rupu'an ughangtu la buntu, nidau agi benagh. Ughangtu sangkau pacak kayau jak di agamau. 6:6 Nyela agamau mbuat kayau nian, amun jemau puas ngan setu diau adau di diau. 6:7 Nidau bediau diau kitau batak ke dalam deniauni, nidau bediau pulau diau pacak kitau batak keluagh deniau. 6:8 Jadila, amun adau baju ngan adau makanan. 6:9 Anyautu jemau diau endak kayau teguda ngan mecam-mecam serilau diau bigal ngan merusak. Serilau itu mbuat jemau celakau ngan benasau 6:10 karnau tetancian nimbulka serbau diau ja'at. Adau jemau diau nidau agi percayau karnau tanci, mangku banyak meghasauka sengsarau mangku nanggung nian. 6:11 Anyautu kaba la njadi hak Allah, mangku kaba mesti njawuhi gegalaunyautu. Usahala njadi jemau diau benagh di adapan Allah, diau idup batan endak Allah ngan ngelapan, diau nyayangi jemau, ngaligh ngan nyanauka jemau. 6:12 Bejuangla nian batan endak setu diau kaba percayaui, mangku kaba dapat upa idup selelamaunyau. Batan endak itula Allah milia kaba, masau kaba ngaku'i di mukau jemau banyak, bansau kaba percayau nian. 6:13 Mangku mbak kini di adapan Allah diau ngidupka gegalaunyau ngan di adapan Yesus Keristus diau ngaku'i ceritau diau benagh di mukau Puntius Pilatus, aku ngajung kaba nian, 6:14 ta'atila gegalau perinta itu ngan beresia ngan nidau becelakau, enggut Tuhan kitau Yesus Keristus dinyatauka, 6:15 masau diau ditetapka Allah. Diau tepuji ngan nguasaui gegalaunyau, rajau gegalau rajau, Tuhan gegalau tuan. 6:16 Diau sughang diau nidau pacak mati. Diau adau di terang diau besinagh nian diau nidau pacak dipasighi jemau. Sughang kia nidau kekela nginak Diau ngan nidau pacak ngina'Au. Diaula diregaui, kuasauNyau selelamaunyau! Amin. 6:17 Ingatkala jemau kayau di deniau ini, supayau jangan geduak ngan jangan ngandalka retau bendau diau nidau ka lamau. Ughangtu mesti ngaghapka Allah diau ngenjuakka gegalaunyau banyak kematila, supayau kitau riang nggunaukanyau. 6:18 Ingatkala jemau, supayau kayau ngan kerjau iluak, mura nulung jemau ngan galak ngenjuak. 6:19 Ngan carau luak itu ughangtu melungguakka retau njadi mudal diau iluak di masau diau ka datang, mangku ka bulia idup nian selelamaunyau. 6:20 Ui, Timutius, jagauila setu diau la dipercayauka ngan kaba. Jawuhila kici'an diau nidau beresia ngan nidau begati ngan kici'an bebala mbalaka setu diau dikiciakka "kepintaran". 6:21 Karnau adau jemau ngiciakka kepintarantu adau di diau, mangku nyimpang jak di ajaghan Keristen diau dituruti senitu. Aku bedu'a, supayau Tuhan iluak ngan kaba.

2 Timutius 1

1:1 Jak di aku, Paulus, diau dijadika rasul Yesus Keristus karnau kendak Allah, supayau ngiciakka idup diau dijanjika Allah ngan jemau diau seghundak ngan Yesus Keristus 1:2 batan endak Timutius diau kusayangi luak anakku. Aku bedu'a, supayau Allah Bapak ngan Tuhan kitau Yesus Keristus sayang ngan iluak ngan kaba ngan ngenjuakka damai. 1:3 Aku beterimau-kasia ngan Allah. Batan endak Diau aku bekerjau ngan ati diau beresia luak dikerjauka niniak puyangku senitu. Aku maju teghingat kaba dalam du'a ngan beterimau-kasia ngan Allah empuak siang empuak malam. 1:4 Amun aku teghingat kaba nangis, aku ghindu nian endak betemu ngan kaba, mangku aku riang nianan. 1:5 Karnau aku teghingat kaba percayau nian ngan Keristus semegi luak niniak kaba Luis ngan mak kaba Iuniki, mangku aku yakin kaba percayau pulau luak itu. 1:6 Itula sebapau aku ngingatka, supayau kaba maju nggunauka kuasau diau dienjuakka Allah ngan kaba, masau aku nepiakka tanganku di pucuak palak kaba ndu'aka kaba. 1:7 Karnau Rua diau dienjuakka Allah ngan kitau ukan rua diau mbuat kitau penakut. Rua Allah mbuat kitau kuat ngan sayang ngan jemau, mangku kitau pacak nguasaui diri kitau. 1:8 Karnau itu jangan kaba takut nceritauka Tuhan kitau ngan jangan pulau maluan aku dijilka karnau bekerjau batan endak Diau, tapitu kaba mesti ngikut sengsarau karnau ceritau iluak. Allah ka nulung kaba. 1:9 Allahtu nyelamatka kitau ngan milia kitau, supayau njadi umatAu. Titu dikerjaukaNyau ukan karnau setu diau kitau kerjauka, tapitu karnau rencanauNyau ngan keilu'anNyau itula. Keilu'anNyautu dienjuakka ngan kitau karnau Yesus Keristus, antak ka deniauni dijadika. 1:10 Mbak kini Allah nyatauka keilu'anNyautu ngan kitau, karnau Penyelamat kitau Yesus Keristus la datang. Yesustu la ngalaka kuasau maut ngan ngenjuakka idup selelamaunyau, amun kitau percayau ngan ceritau iluak. 1:11 Endak ngiciakka ceritau iluak itu Allah milia aku njadi rasul ngan guru. 1:12 Itula sebapau aku nanggungka gegalaunyautu, tapitu aku nidau maluan, karnau aku keruan diau kupercayauitu. Aku yakin, bansau setu diau la dipercayauka ngan aku pacak Diau jagaui enggut aghi kiamat. 1:13 Ikutila nian ajaghan diau benagh diau la kaba dengagh jak di aku. Kerjaukala gegalaunyautu ngan maju percayau ngan sayang diau adau di kitau karnau seghundak ngan Yesus Keristus. 1:14 Ngan kuasau Rua Allah diau adau di kitau kaba mesti njagaui iluak-iluak setu diau iluak diau la dipercayauka ngan kaba. 1:15 Kaba keruan, bansau gegalau kantin di daira Asia Keciak enggup agi sekantin ngan aku, temasuak pulau Pigelus ngan Hermugenis. 1:16 Kapu Unesipurus la rajin meriangka atiku. Aku bedu'a, supayau Tuhan iluak ngan diau. Empuak aku di jil, diau nidau maluan ngan setu diau kughasauitu. 1:17 Masau diau sampai di Rum, diau ndala'i aku nian enggut betemu. 1:18 Diau pulau banyak nulung aku masau di Ipisus. Ceritau itu kaba keruan. Aku bedu'a, supayau Tuhan iluak ngan diau masau aghi kiamat.

2 Timutius 2

2:1 Timutius, anakku, kaba mesti kuat karnau keilu'an diau dienjuakka ngan kitau karnau seghundak ngan Yesus Keristus. 2:2 Ajaghan diau la kaba dengagh jak di aku di mukau jemau banyak mesti kaba percayauka ngan jemau diau pacak dipercayaui ngan cakap ngajagh jemau. 2:3 Ikutla sengsarau luak tentera Yesus Keristus diau ta'at. 2:4 Sughang tentera diau dang bejuang nidau merupuakka diriau ngan pengidupannyau, karnau diau endak melemakka ati kumandanau. 2:5 Jemau diau ngikut betanding nidau ka dapat juara, amun nidau na'ati peraturan tandingtu. 2:6 Petani diau bekerjau mati-matian, diautu behak dulu sekali meghasauka asil kerjaunyautu. 2:7 Rupuakkala setu diau la kukiciakka itu. Tuhan ka ngenjuakka ngan kaba pengertian endak ngerti gegalaunyau. 2:8 Ingatkala ceritau Yesus Keristus, pengadau Daud, diau la idup agi jak di mati luak ceritau iluak diau kukiciakkatu. 2:9 Ikak ngiciakka ceritau iluaktu aku sengsarau, lagi dirantai luak bandit. Anyautu katau Allah nidau pacak dirantai. 2:10 Itula sebapau aku nanggungka gegalaunyautu ngan ngaligh batan endak jemau diau dipilia Allah, mangku ughangtu pulau pacak diselamatka Yesus Keristus ngan meghasauka keagunganNyau selelamaunyau. 2:11 Kici'an ini benagh nian, "Amun kitau mati ngan Diau, kitau ka idup pulau ngan Diau. 2:12 Amun kitau beta'an, kitau ka merinta ngan Diau. Amun kitau nidau endak ngaku'i Diau, Diau pulau nidau ngaku'i kitau. 2:13 Amun kitau nidau setia, Diau maju setia, karnau Diau nidau pacak nidau ngaku'i diriAu." 2:14 Ingatkala gegalaunyautu ngan jemau. Ajungla ughangtu di adapan Allah, supayau jangan bebala, karnau nidau bediau gunaunyau, cuman ngacauka jemau diau ndengaghau. 2:15 Usahakala, supayau kaba dianggap pantas bekerjau batan endak Allah, mangku nidau nanti maluan karnau kerjau kaba. Anyautu ajaghka nian ajaghan diau benaghtu. 2:16 Jawuhila kici'an mbu'ung diau nidau begunau. Kici'an luak itu cuman mbuat jemau tamba ja'at. 2:17 Ajaghan ughangtu meghatau luak pughu. Di antarau ughangtu temasuak Himenius ngan Pilitus. 2:18 Ughangtu la nyimpang jak di ajaghan diau benagh ngan ngacauka kepercayauan jemau ngan kici'an, bansau kitau la udim diidupka. 2:19 Anyautu pelapiak diau tegua diau dibuat Allah nidau pacak diguraka. Di pucu'au ditandaui luak ini, "Tuhan keruan jemau Diau empu." ngan "Jemau diau ngaku'i ngan nyemba Tuhan mesti mandak ngerjauka setu diau ja'at." 2:20 Di ghuma diau besak adau bemecam-mecam dandanan. Adau diau dibuat jak di emas ngan pirak, adau pulau diau dibuat jak di kayu ngan tana. Diau ini digunauka batan endak kerjau idang aghi. Diau tadi digunauka batan endak tujuan diau penting. 2:21 Jemau diau mberesiaka diriau jak di kerjau diau ja'at njadi luak dandanan diau alap. Diau ka pantas digunauka tuanau batan endak gegalau kerjau diau penting. 2:22 Karnau itu jawuhila serilau anak mudau. Usahakala idup diau iluak, nurut kendak Allah, sayang ngan jemau ngan idup bedamai. Kerjaukala titu ngan idup seghundak ngan jemau diau ngaku'i namau Tuhan ngan ati diau beresia. 2:23 Jangan ngikut bebala ngan jemau bigal mbalaka setu diau nidau begunau. Kaba keruan, gegalaunyautu cuman mbuat jemau belagau. 2:24 Jemau diau bekerjau batan endak Tuhan nidau bulia bebala. Diau mesti iluak ngan gegalau jemau ngan pacak ngajagh jemau ngan ngaligh, 2:25 ngajaghi jemau diau galak melawan. Asauku Tuhan endak nulung, mangku jemautu ngubai jak di peremba'au ngan keruan ajaghan diau benagh. 2:26 Ngan carau luak itu jemautu njadi jagau ngan luput jak di jeghat iblis diau la nangkap diau, masau diau ngikuti kendak iblistu.

2 Timutius 3

3:1 Ingatla, masau pengabisan saman ka adau banyak penanggungan. 3:2 Manusiau ka merupuakka diriau ajau ngan tetancian, ka geduak ngan langguak, galak nggelakka jemau, melawan pejadi, nidau terti beterimaukasia, nidau buagamau, 3:3 nidau sayang, nidau endak seilu'an ngan jemau, galak ngarutka jemau, kejam, garang, meluatka setu diau iluak, 3:4 nidau pacak dipercayaui, nidau panjang rupu'an, kiciak besak, galakla nuruti serilau deniau sangkan nuruti kendak Allah. 3:5 Ughangtu nuruti kewajiban agamau, anyautu nidau endak keruan kuasaunyau. Jawuhila jemau luak itu. 3:6 Adau jak di ughangtu diau masuak ghuma jemau, mangku mikati jemau tinau diau nidau percayau nian ngan banyak dusaunyau ngan dikuasaui bemecam serilau. 3:7 Tinautu maju endak ngeruani gegalaunyau, anyautu nidau kekela ngeruani ajaghan diau benagh. 3:8 Luak Yanis ngan Yamberis melawan Musa senitu, luak itula pulau ughangtu melawan ajaghan diau benagh. Rupu'an ughangtu la rusak ngan nidau percayau agi. 3:9 Ughangtu nidau ka maju buasil, karnau kerjau ughangtu ka dikeruani gegalau jemau, luak la dighasauka Yanis ngan Yamberis. 3:10 Anyautu kabatu la ngikuti ajaghanku, carau ngan tujuan idupku. Kaba la nginak carau aku percayau ngan nyayangi jemau. Kaba pulau keruan aku ngaligh ngan tekun. 3:11 Kaba la nginak aku dianiayau ngan nanggung. Kaba keruan gegalaunyau diau tejadi di aku di Antiukia ngan Ikunium ngan Listera. Kaba keruan gegalaunyau diau kutanggungka. Anyautu jak di gegalaunyautu Tuhan la ngilakka aku. 3:12 Nyela, bilang jemau diau endak idup ta'at ngan Allah ngan idup seghundak ngan Yesus Keristus ka dianiayau. 3:13 Jemau ja'at ngan jemau penipu ka tamba ja'at. Ughangtu nipuka jemau, awuak ughangtu pulau tetipu. 3:14 Anyautu kaba mesti maju nuruti ajaghan diau benagh diau la diajaghka ngan kaba diau kaba percayaui nian, karnau keruan sapau guru kaba. 3:15 Ingatkala, bansau jak di keciak kaba la keruan Injil. Injiltu pacak ngenjuakka ngan kaba pengertian endak ngajaghka jalan selamat, amun percayau ngan Yesus Keristus. 3:16 Gegalaunyau diau ditulis di Injiltu jak di Rua Allah. Gegalaunyautu begunau endak ngajaghka diau benagh, endak nyatauka diau sala, endak ngilu'i perembak ngan ngajagh jemau nuruti kendak Allah. 3:17 Mangku bilang jemau Keristen didandani batan endak gegalau kerjau diau iluak.

2 Timutius 4

4:1 Yesus Keristus ka datang agi ke deniau endak ngadili jemau diau idup ngan diau mati. Diau ka datang endak merinta luak rajau. Karnau itu aku mintak nian ngan kaba di adapan Allah ngan Yesus Keristus, 4:2 kiciakkala katau Allah. Kaba maju ngerjaukanyau, empuak masau iluak empuak masau nidau iluak. Yakinkala jemau, tunjuakkala setu diau sala, tegughila ngan ngajaghila jemau ngan ngaligh. 4:3 Karnau ka sampai masaunyau jemau nidau endak agi nerimau ajaghan diau benagh. Anyautu ughangtu ka nunggalka banyak guru nurut kendak ughang itula endak diajagh setu diau lemak didengagh. 4:4 Ughangtu enggup ndengagh ceritau diau benagh, tapitu endak ndengagh ceritau mbu'ung. 4:5 Empuak luak itu kaba mesti nguasaui diri, empuak luak manau kila. Tanggungkala ngan ngaligh. Kerjaukala tugas kaba endak ngiciakka ceritau iluak jak di Allah. Kerjaukala titu iluak-iluak batan endak Allah. 4:6 Ceritau aku la sampai masaunyau aku ka mati luak dikerbanka batan endak Allah. Jerang agi aku ka ninggalka deniauni. 4:7 Aku la ngikut tandingan ngan iluak, la sampai ke batasau. Aku maju percayau ngan Keristus. 4:8 Mbak kini adia menang la nunggu aku, karnau idupku la dibenaghka Allah. Masau aghi kiamat, Tuhan akim diau adil ka nyeraka adiatu ngan aku. Ukan aku ajau diau ka nerimau adiatu, tapitu gegalau jemau diau nungguka nian Tuhan datang. 4:9 Beusahala cecepat njenguak aku, 4:10 karnau Dimas la nyayangi deniauni, mangku ninggalka aku pegi ke Tesalunika. Keriskis la pegi ke Galatia, mangku Titus la pegi ke Dalmatia. 4:11 Cuman Lukas gi adau guak aku. Depatka Markus, batakla diau ke sini, karnau diau pacak nulung aku. 4:12 Tikikus la kuajung pegi ke Ipisus. 4:13 Amun kaba datang, mbatak mantil diau kutinggalka di Teruas di ghuma Karpus. Batak pulau bukuku diau penting diau dibuat jak di bawak. 4:14 Aliksandar, tukang tembagautu, la banyak bebuat ja'at tuadap aku. Tuhan ka mbalaska diau nurut peremba'au. 4:15 Kaba pulau mesti sepepadau ngan diau, karnau diau melawan nian ajaghan kitau. 4:16 Masau dulu sekali aku mbenaghka diriku di pengadilan, nidau bediau sughang kia diau nulung aku. Gegalaunyau ninggalka aku. Aku bedu'a, supayau Allah jangan nyalaka ughangtu. 4:17 Anyautu Tuhan la nulung ngan neguaka aku, mangku aku pacak ngiciakka gegalau ceritau iluak itu, mangku didengagh gegalau jemau diau ukan jemau Yahudi. Mangku aku luput jak di ukuman mati. 4:18 Tuhan ka ngilakka aku jak di gegalau rencanau diau ja'at. Diau ka mbatak aku ke sergau ngan selamat. Diautu mesti dipuji selelamaunyau. Amin. 4:19 Pesanku ngan Periska ngan Akwila ngan kapu Unesipurus. 4:20 Irastus mendam di Kurintus. Terupimus kutinggalka di Militus dang buidapan. 4:21 Beusahala datang antak ka pangkau dingin. Pesan jak di Ibulus, Pudis, Linus, Kelaudia ngan gegalau kantin kitau. 4:22 Aku bedu'a, supayau Tuhan njagaui kamu ngan iluak nian ngan kamu.

Titus 1

1:1 Jak di aku, Paulus. Akuni dijadika rasul Yesus Keristus ngan bekerjau batan endak Allah. Akuni dipilia ngan diajung batan endak nulung jemau diau dipilia Allah, supayau ughangtu tamba percayau. Akuni pulau mesti mbimbing ughangtu, supayau keruan ajaghan diau benagh luak diajaghka agamau kitau. 1:2 Kitau ngaghapka idup selelamaunyau. Allah la njanjika idup itu, antak ka deniau dijadika, mangku Allah nidau ka adau mbu'ung. 1:3 Mangku masau diau ditetapkaNyau, Allah nyatauka janjiAu ngan katauNyau. Katau Allahtu la dipercayauka ngan aku, mangku aku ngiciakkanyau, karnau la diajung Allah, Penyelamat kitau. 1:4 Batan endak Titus diau njadi anakku nian karnau semegi percayau ngan Keristus. Aku bedu'a, supayau Allah Bapak ngan Yesus Keristus, Rajau Penyelamat kitau, iluak nian ngan kaba ngan ngenjuakka damai. 1:5 Aku la ninggalka kaba di Kerita, mangku kaba ngatur setu diau mesti diatur. Kaba mesti milia pengulu di bilang kuta, luak diau la kuajungka ngan kaba. 1:6 Pengulu jemau Keristen mesti jemau diau nidau bediau salahau, buntingau cuman sughang. Anak-ana'au mesti percayau ngan Keristus ngan nidau pacak dikiciakka idup nidau senangaian ngan nidau pacak diatur. 1:7 Pengulu jemau Keristen jemau diau ngerjauka kerjau Allah, mangku diau nidau bulia besala, geduak, pemara, memabu'an, galak belagau, ngan tetancian. 1:8 Anyautu diau mesti riang nerimau jemau di ghumahau, galak ngan setu diau iluak, bepengertian, jujur, beresia ngan pacak nguasaui diri. 1:9 Diau mesti bepaut ngan ajaghan diau benagh luak la diajaghka, mangku diau pacak ngajagh jemau nurut ajaghantu ngan pacak ngiciakka sala jemau diau melawan. 1:10 La banyak jemau diau melawan, terutamau jemau diau asalau jak di agamau Yahudi. Ughangtu nyesatka jemau ngan kici'an mbu'ung. 1:11 Jemau diau luak itu mesti ditukup mulutau, karnau ughangtu ngacauka banyak ghuma-tanggau ngan ngajaghka diau nidau-nidau endak bulia untung diau nidau pantas. 1:12 Adau sughang nabi jak di ughangtu diau asalau jak di Kerita ngiciak luak ini, "Jemau Kerita tukang mbu'ung, benatang ganas, selak ngan pemalas." 1:13 Setu diau dikiciakka nabitu benagh. Karnau itu kaba mesti negughi ughangtu nian, mangku ughangtu maju percayau ngan ajaghan diau benagh. 1:14 Mangku ughangtu nidau agi nuruti ceritau mbu'ung jemau Yahudi ngan peraturan diau dibuat manusiau diau nyimpang jak di ajaghan diau benagh. 1:15 Gegalaunyau beresia, amun jemau beresia. Anyautu amun jemau diau rupu'annyau kumua, dikit kia nidau bediau diau beresia, karnau rupu'an ngan ati keciak jemautu kumua. 1:16 Ughangtu bekatau, bansau ughangtu keruan Allah, awuak perembak ughangtu nidau ngaku'i Allah. Ati ughangtu ja'at ngan melawan ngan nidau pacak ngerjauka setu diau iluak.

Titus 2

2:1 Anyautu kaba ajaghkala setu diau benagh. 2:2 Jemau lanang diau la tuau mesti idup tau diri, bepengertian, luak jemau diau pantas diregaui. Ughangtu mesti percayau ngan Allah ngan carau diau benagh, nyayangi jemau ngan ta'an sengsarau ngan ngaligh. 2:3 Luak itu pulau jemau tinau diau tuau mesti idup ngan carau diau pantas ngan jemau diau percayau ngan Allah. Jangan ughangtu ngupatka jemau ngan jangan memabu'an. Ughangtu mesti ngajaghka setu diau iluak. 2:4 Ngan carau luak itu ughangtu ngajagh tinau diau gi mudau nyayangi lakiau ngan anak-ana'au, 2:5 bepengertian, idup beresia, ngurus ghuma-tanggaunyau iluak-iluak, ta'at ngan lakiau. Mangku nidau bediau diau pacak nggelakka katau Allah. 2:6 Luak itu pulau budak perjakau, tegughila ughangtu, supayau nguasaui diriau. 2:7 Mangku kaba mesti ngerjauka kerjau diau iluak batan penauan. Kaba mesti ngajagh ngan jujur ngan ngenianau. 2:8 Kiciakkala katau diau bepengertian diau nidau pacak disalaka jemau, mangku lawan kaba maluan, karnau nidau bediau setu diau nidau iluak diau pacak ughangtu kiciakka ceritau kitau. 2:9 Budak-budak mesti ta'at ngan tuanau ngan gegalaunyau ngan meriangka atiau. Jangan melawan, 2:10 jangan maling. Anyautu ughangtu mesti maju iluak ngan ta'at. Mangku ajaghan Allah, Penyelamat kitau, maju dipuji jemau. 2:11 Keilu'an Allah diau nyelamatka gegalau manusiau la dinyatauka. 2:12 Keilu'antu ngajagh kitau, supayau kitau nidau agi idup belawanan ngan Allah ngan nidau agi nuruti serilau deniau. Kitau diajagh, supayau kitau idup di deniau ini na'an diri, jujur ngan takut ngan Allah. 2:13 Mbak kini kitau dang nungguka aghi diau meriangka diau kitau ngaghapka itu. Aghitu deniau ka nginak keagungan Allah diau Mahabesak ngan Yesus Keristus, Rajau Penyelamat kitau. 2:14 Diautu la nyeraka diriAu batan endak kitau endak nyelamatka kitau jak di gegalaunyau diau ja'at. Diautu njadika kitau umatAu diau beresia diau njadi ha'Au ngan rajin ngerjauka diau iluak. 2:15 Kiciakkala gegalaunyautu, ajaghla ngan tegughila ngan kuasau jemau diau ndengaghka kaba. Jangan enangka sughang kia nganggap kaba nidau bereti.

Titus 3

3:1 Ingatkala jemau Keristen, supayau tunduak ngan pemerinta ngan jemau diau bekuasau. Ughangtu mesti ta'at ngan sukau ngerjauka gegalaunyau diau iluak. 3:2 Kiciakka ngan ughangtu, supayau jangan ngupatka jemau ngan jangan belagau, tapitu supayau maju ngaligh ngan iluak ngan sukau bedamai ngan gegalau jemau. 3:3 Karnau senitu kitau pulau idup bigal, nidau ta'at, sesat. Kitau dibudakka bemecam serilau ngan kendak. Idup kitau ja'at, sengit, sangi luatka. 3:4 Anyautu Allah, Penyelamat kitau, nyayangi kitau, la nyatauka keilu'anNyau ngan kitau. 3:5 Masau itu Diau nyelamatka kitau, ukan karnau kitau ngerjauka setu diau iluak, tapitu karnau Diau sayang ngan kitau. Diau nyelamatka kitau ngan carau mbasua kitau endak ngenjuakka idup diau empai. Titu dikerjauka Rua Allah 3:6 diau la dienjuakkaNyau galau ngan kitau karnau Yesus Keristus, Rajau Penyelamattu. 3:7 Mangku kitau diau la dibenaghka karnau keilu'anNyautu bulia idup selelamaunyau diau kitau aghapkatu. 3:8 Kici'an itu benagh. Mangku aku endak, supayau kaba nekanka kici'antu, mangku jemau diau la percayau ngan Allah beusaha nian ngerjauka setu diau iluak. Itula diau iluak ngan begunau batan endak gegalau jemau. 3:9 Jawuhila balahan diau nidau begunau diau bigal, ceritau niniak puyang, becelikaian ngan balahan ceritau ukum Taurat. Gegalaunyautu nidau bediau gunaunyau ngan nidau bediau untungau. 3:10 Jemau diau mbuat becelikaian di guak jemau Keristen mesti kaba tegughi sekali ngan duau kali. Udim itu jangan agi bekawan ngan diau. 3:11 Kaba keruan, bansau jemau luak itu sesat ngan maju bedusau. Itu nyatauka diau besala nian. 3:12 Amun aku la ngajung Artemas madak Tikikus njenguak kaba, beusahala cecepat datang guak aku di Nikupulis, karnau aku la merencanauka mendam di situ selamau pangkau dingin. 3:13 Tulungla nian Sinas, guru ukumtu, ngan Apulus, mangku ughang duautu pacak bejalan ngan nidau bediau kurangau. 3:14 Jemau kitau mesti belajagh maju ngerjauka setu diau iluak, supayau pacak ncukupi setu diau enda'au diau penting. Mangku idup ughangtu begunau. 3:15 Pesan jak di gegalau jemau diau adau di sini seghundak ngan aku. Sampaika pesan kami ngan kantin-kantin kitau diau percayau ngan Keristus. Aku bedu'a, supayau Tuhan iluak nian ngan gegalau kamu.

Pilemun 1

1:1 Pilemun, kantin sekerjau kami. Aku, Paulus, diau dijilka karnau Yesus Keristus ngan kantin kitau Timutius nulis surat ini batan endak kaba, 1:2 batan endak kantin kitau Apia, batan endak kantin sekerjau kitau Arkipus ngan jemau Keristen diau betunggal di ghuma kaba. 1:3 Kami bedu'a, supayau Allah Bapak kitau ngan Tuhan Yesus Keristus iluak ngan ngenjuakka damai ngan kamu. 1:4 Dang aku bedu'a ndu'aka kaba, aku maju beterimau-kasia ngan Allah. 1:5 Karnau aku la ndengagh, bansau kaba nyayangi gegalau umat Allah ngan percayau nian ngan Tuhan Yesus. 1:6 Kitau la disatuka karnau percayau ngan Keristus. Mangku aku bedu'a, supayau kaba tamba ngerti keilu'an diau dienjuakka ngan kitau karnau seghundak ngan Keristus. 1:7 Sayang kaba meriangka ngan neguaka aku. Kaba la meriangka gegalau umat Allah. 1:8 Karnau kitau sekantin percayau ngan Keristus, aku pacak merintaka kaba ngerjauka setu diau mesti kaba kerjauka. 1:9 Anyautu karnau kitau sangi sayangi, iluakla aku mintak ajau. Akuni la tuau, lagi pulau mbak kini dalam jil karnau Yesus Keristus. 1:10 Aku, Paulus, mintak ngan kaba batan endak anakku Unisimus. Aku njadi ba'au dalam Keristus masau di jil. 1:11 Senitu diau nidau begunau ngan kaba. Mbak kini diau begunau nian, ukan ajau ngan kaba, ngan aku pulau diau begunau. 1:12 Mbak kini aku ngajung diau baliak ngan kaba. Diautu kesayanganku. 1:13 Sebenaghau aku endak na'an diau di sini, supayau diau pacak nulung aku genti kaba, selamau aku di jil ikak ngiciakka ceritau iluak jak di Allah. 1:14 Anyautu aku nidau endak ngerjauka tuapau-apau, amun lum kaba kiciakka. Aku nidau endak masau kaba. Aku riang, amun kaba ngerjaukanyau ngan sukau. 1:15 Asauku Unisimus beceghai ngan kaba jerang, supayau kaba pacak dapat diau agi selelamaunyau. 1:16 Mbak kini diau ukan cuman budak batan endak kaba. Diau lebia jak di itu. Diau sesamau jemau Keristen diau disayangi. Diau begunau nian batan endak aku, apau agi batan endak kaba! Cengki diau begunau nian, empuak luak budak empuak luak jemau percayau ngan Tuhan. 1:17 Karnau itu amun kaba nganggap aku kantin kaba, terimaula diau luak kaba nerimau aku. 1:18 Mangku amun diau besala ngan adau utang ngan kaba, nengkela akuni diau nanggung gegalaunyautu. 1:19 Aku, Paulus, nulisau ngan tangankuni, "Aku ka mbayighi gegalaunyautu." Cengki nidau nanti kuingatka, bansau kabatu beghutang ngan aku, titu diri kaba itula. 1:20 Karnau itu, cubau tulung aku karnau Tuhan. Riangkala atiku, karnau kitau sekantin dalam Keristus. 1:21 Gegalaunyautu kutulis ngan percayau, bansau kaba ka ngerjauka setu diau kupintak. Aku keruan lebia jak di itu ka kaba kerjauka. 1:22 Penarau itu, sediaukala bada batan endak aku di ghuma kaba, karnau aghapan aku ka ngulang ngan kaba karnau du'a kamu. 1:23 Ipapras adau ngan aku di jil karnau Yesus Keristus. Diau bepesan ngan kaba. 1:24 Terimaula pulau pesan jak di kantin sekerjauku, Markus, Aristarkus, Demas ngan Lukas. 1:25 Aku bedu'a, supayau Tuhan Yesus Keristus iluak nian ngan kamu.

Ibrani 1

1:1 Timpau senitu Allah la rajin ngajung nabi-nabi ngiciak ngan niniak puyang kitau makai serbau carau. 1:2 Masau pengabisan ini Diau la ngajung Ana'Au ngiciak ngan kitau. Diau ngajung Ana'Autu njadika langit ngan deniau ngan gegalau isiau, mangku ditetapkaNyau behak nerimau gegalaunyau. 1:3 Di Diautula tekinak keagungan Allah diau besinagh. Gegalau sipat Allah adau di Diau galau. Diautu pulau nyayia gegalaunyau ngan katauNyau diau bekuasau nian. Diautu dipakuka di kayu salip, mangku dusau manusiau pacak diabiska. Udim itu Diau duduak di sebela kanan Allah diau Mahakuasau di bada diau tinggi. 1:4 Jawua tinggila pangkat Ana'Autu sangkan pangkat malaikat. Mangku kedudukan diau dienjuakka ngan Diau jawua tinggila diau sangkan diau dienjuakka ngan malaikattu. 1:5 Nidau kekela Allah ngiciak luak ini ngan sughang malaikat, "Kaba AnakKu! Saghini Aku njadi Bak Kaba." ngan pulau, "Aku ka njadi Bapa'Au, Diautu njadi AnakKu." 1:6 Masau Allah ngajung Ana'Au diau tuautu ke deniau, Diau bekatau, "Gegalau malaikat Allah mesti nyemba Diau." 1:7 Nceritauka malaikat Allah bekiciak, "Aku mbuat malaikattu njadi luak angin ngan budak-budakKu njadi luak maghak api." 1:8 Anyautu ngan Ana'Autu Allah bekiciak, "Kabatu Allah, Rajau selelamaunyau! Kaba merinta ngan adil." 1:9 "Kaba riang ngan setu diau benagh ngan meluatka setu diau nidau benagh. Itula sebapau Aku, Allah Kaba, milia Kaba. Aku meregaui Kaba, mangku riangla Kaba sangkan kantin-kantin Kaba." 1:10 KatauNyau agi, "Empai penembai Kaba, Tuhan, njadika deniau. Diau njadika langit Kabatula. 1:11 Gegalaunyautu ka abis, ka njadi bughuak luak baju, anyautu Kabatula diau ka maju adau. 1:12 Gegalaunyau ka Kaba puntal luak baju, ka Kaba genti ngan setu diau lain. Anyautu Kaba nidau kekela ka beghuba, ka adau selelamaunyau." 1:13 Nidau kekela Allah ngiciak ngan sughang malaikat, "Duduakla di sebela kananKu, enggut musua Kaba Kutunduakka ngan Kaba." 1:14 Amun luak itu, malaikattu sapau sebenaghau? Ughangtu rua diau bekerjau batan endak Allah, diajungAu nulung jemau diau ka diselamatka.

Ibrani 2

2:1 Itula sebapau kitau mesti meratika nian ajaghan diau la kitau dengagh, mangku kitau jangan ngikut anyut. 2:2 Katau Allah diau la dikiciakka malaikat ngan niniak puyang kitau benagh nian, mangku jemau diau melanggarau ngan nidau ta'at diukum ngan ukuman diau setimpal. 2:3 Apau agi ngan ceritau selamat. Hibatla ceritau itu sangkan katau Allah tadi! Amun kitau nidau meratika nian ceritau selamattu, cetau kitau ka diukum. Tuhan itula diau dulu sekali ngiciakka ceritau selamattu, mangku jemau diau la ndengaghau senitu la mbuktika ngan kitau, bansau ceritautu benagh. 2:4 Lagi pulau Allah neguaka kici'an ughangtu ngan tandau nyelia ngan nyatauka kuasauNyau ngan ngenjuakka Rua Allah ngan jemau nurut kenda'Au. 2:5 Ukan ngan malaikat Allah la ngenjuakka kuasau endak merinta deniau empai diau ka datang, deniau diau dang kitau kiciakka. 2:6 Di Injil ditulis luak ini, "Sapau sebenaghau manusiau, mangku Dighitula ngingatkanyau? Ughangtu cuman manusiau, anyautu Dighi nyanaukanyau. 2:7 Gi jerang ajau Dighi mbuat kuasaunyau kurang jak di kuasau malaikat. Mangku dienjuakka ngan diau pangkat tinggi diau agung ngan diregaui, 2:8 dienjuakka kuasau nguasaui gegalaunyau." Amun dikiciakka gegalaunyau ka dikuasaui manusiau, itu bereti nidau bediau setu diau nidau dikuasauinyau. Anyautu mbak kini lum kina'an ngan kitau, bansau gegalaunyau dikuasauinyau. 2:9 Diau kitau kinak itu Yesus diau bekuasau. Gi jerang ajau kuasauNyau dibuat kurang jak di kuasau malaikat, supayau Diau sengsarau ngan mati batan endak gegalau manusiau, karnau Allah sayang ngan kitau. Mbak kini kitau nginak Diau la dienjuakka pangkat tinggi diau agung ngan diregaui, karnau Diau la sengsarau enggut mati. 2:10 Allah itu njadika gegalaunyau batan endak diriAu. Sepantasau Diau njadika Yesus sempernau ngan carau Diau sengsarau, mangku dibata'Au banyak jemau endak diagungka. Diautu pulau mbukak jalan mangku ughangtu selamat. 2:11 Yesus diau mberesiaka jemau jak di dusaunyau ngan jemau diau diberesiakatu gi sughang Bapa'au, Diautu Allah. Itula sebapau Diau nidau maluan ngaku'i ughangtu ading-beghadingAu, 2:12 katauNyau, "Aku ka ngiciakka ceritau Dighi ngan ading-beghadingKu. Aku ka ngagungka Dighi di guak umat Dighi." 2:13 Lagi pulau, "Aku percayau nian ngan Allah." Ngan pulau, "Inila Aku ngan anak-bua diau la dienjuakka Allah ngan Aku." 2:14 Jemau diau dikiciakka anak-buaHautu manusiau diau ka mati. Mangku Yesus njadi semegi ngan jemau, idup luak jemau, mangku karnau Diau matitu Iblis diau nguasaui mauttu la dikalaka. 2:15 Ngan carau luak itu Diau mbibaska jemau diau seumur idup njadi budak karnau takut mati. 2:16 Mangku ngenian ukan malaikat diau disanaukaNyau, tapitu pengadau Abraham. 2:17 Itula sebapau Diau mesti njadi semegi nian ngan manusiau, mangku Diau njadi Imam Besak diau iluak ngan nyialka jemau ngan pacak dipercayaui, bekerjau batan endak Allah. Mangku dusau manusiau pacak diabiska. 2:18 Mangku mbak kini Diau pacak nulung jemau diau dicubaui, karnau Diau pulau la sengsarau ngan dicubaui.

Ibrani 3

3:1 Kantin-kantinku jemau Keristen, kamu pulau dipilia Allah. Rupuakkala nian ceritau Yesus. Diautu diajung Allah njadi Imam Besak di agamau diau kitau percayaui. 3:2 Diautu ta'at ngan Allah diau milia Diau endak bekerjau batan endak Diau, luak pulau Musa senitu ta'at ngerjauka tugasau di ghuma Allah. 3:3 Diregauila tukang negakka ghuma sangkan ghuma diau ditegakkanyautu. Luak itu pulau pantasla Yesus diregaui sangkan Musa. 3:4 Nyela bilang ghuma adau jemau diau mbuatau. Mangku diau mbuat gegalaunyau Allah itula. 3:5 Musatu pekerjau ghuma Allah diau ta'at. Diau ngiciakka setu diau ka dinyatauka Allah masau diau ka datang. 3:6 Tapi Keristus itu Anak diau ngepala'i ghuma Allahtu ngan ta'at. Mangku kitau inila ghuma Allah, amun kitau tegua ngan maju percayau ka bulia setu diau kitau aghapka. 3:7 Mangku luak la dikiciakka Rua Allah, "Amun kamu ndengagh suarau Allah mbak kini, 3:8 jangan ngeghaska ati luak niniak puyang kamu, masau ughangtu melawan Allah, nguji Allah di padang bungin. 3:9 'Di situ niniak puyang kamu ncubaui Aku, ngan carau nguji Aku, empuak ughangtu la nginak kerjauKu 3:10 empat pulua taun lamaunyau.' Itula sebapau Aku mara ngan ughangtu ngan bekatau, 'Ughangtu maju enggup ngikut Aku, maju enggup na'ati perintaKu.' 3:11 Mangku Aku mara ngan besumpa, 'Ughangtu nidau ka masuak ke nenggeritu, mangku nidau bulia gheghadu di badaKu.' " 3:12 Kantinkantinku, sepepadaula, supayau di guak kamu jangan adau sughang kiala diau mbuat ja'at ngan nidau percayau mangku ngelipat ninggalka Allah diau idup. 3:13 Anyautu sangi tegughila kamu idang aghi, semasau gi pacak dikiciakka "mbak kini", supayau jangan adau jak di kamu diau ngeghaska atiau karnau ditipuka dusau. 3:14 Kitau la bulia bagian ngan Keristus, amun kitau maju tegua percayau enggut mati luak senitu. 3:15 Ini diau ditulis di Injil, "Amun mbak kini kamu ndengagh suarau Allah, jangan ngeghaska ati luak niniak puyang kamu, masau ughangtu melawan Allah." 3:16 Sapau jemau diau la ndengagh suarau Allah, mangku mara ngan Diau? Apu ukan gegalau ughangtu dipimpin Musa ngeluagh jak di Mesir? 3:17 Mangku ngan sapau Allah mara selamau empat pulua taun? Apu ukan ngan jemau diau bedusau? Mangku ughangtu mati galau di padang bungin. 3:18 Masau itu Allah besumpa, "Ughangtu nidau ka masuak nenggeritu, nidau pulau pacak gheghadu di badaKu." Mangku sapau diau dikiciakkatu? Apu ukan jemau diau nidau ta'attu? 3:19 Mbak kini kitau ngerti, bansau ughangtu nidau masuak karnau nidau percayau.

Ibrani 4

4:1 Itula sebapau iluakla kitauni sepepadau, supayau jangan sughang kiala jak di kamu diau ketinggalan, empungan gi adau janji bulia bada gheghadu. 4:2 Ceritau iluak itu la dikiciakka ngan kitau luak diau la dikiciakka ngan ughangtu. Anyautu nidau bediau gatiau ceritautu dikiciakka, amun jemau diau ndengaghau nidau percayau. 4:3 Mangku kitau diau percayau ka bulia gheghadu luak diau la dijanjika Allah. Titu dikiciakka Allah luak ini, "Aku mara mangku besumpa, 'Ughangtu nidau bulia gheghadu di badaKu.' " Allah ngiciak luak itu, empuak bada itu la adau jak deniau dijadika. 4:4 Nyela, ceritau aghi ketujua ditulis di Injil luak ini, "Aghi ketujua Allah gheghadu jak di gegalau kerjauNyau." 4:5 Mangku ceritautu pulau dikiciakka luak ini, "Ughangtu nidau bulia gheghadu di badaKu." 4:6 Mangku jelas, bansau jemau diau senitu ndengagh ceritau iluaktu nidau bulia gheghadu karnau nidau ta'at. Mangku adau jemau lain diau bulia gheghadu. 4:7 Allah la netapka aghi lain diau dikiciakka "mbak kini". La lamau udim itu Allah ngajung Daud ngiciakkanyau luak itu tadi, "Mbak kini amun kamu ndengagh suarau Allah, jangan ngeghaska ati kamu." 4:8 Amun Yusua la mbatak ughangtu ke bada gheghadu, cengki Allah nidau ngiciakka ceritau aghi lain pulau. 4:9 Mangku batan endak umat Allah gi adau aghi gheghadu, aghitu aghi ketujua. 4:10 Mangku jemau diau bulia bada gheghadu, jemautu la gheghadu jak di gegalau kerjaunyau luak Allah gheghadu. 4:11 Karnau itu mela kitau beusaha bulia bada gheghadutu. Jangan adau diau urung luak ughang senitu ikak nidau ta'at. 4:12 Katau Allahtu bekuasau ngan ngenjuakka idup. Tajamla katautu sangkan pedang bematau duau. Diau nusuak dalam nian endak nceghaika jiwa ngan rua, sendi-sendi ngan beghesi, mangku diau ngeruani serilau ngan rupu'an ati jemau. 4:13 Nidau bediau diau pacak nyemuni di adapan Allah. Gegalaunyau kina'an ngan matauNyau. Ngan Diautu kitau mesti nanggung-jawabka gegalau kerjau kitau. 4:14 Mela kitau maju ngandalka ngan kepercayauan kitau, karnau kitau adau Imam Besak diau agung diau la sampai guak Allah, diautu Yesus, Anak Allah. 4:15 Imam Besak kitautu pacak meghasauka kekilapan kitau, karnau Diau pulau dicubaui ngan gegalaunyau, anyautu nidau bedusau. 4:16 Karnau itu mela kitau beghani ngadap Allah diau iluak atiAu. Allahtu iluak ngan kitau ngan nyayangi kitau, mangku kitau ditulung, kebilau kitau merlukanyau.

Ibrani 5

5:1 Bilang imam besak dipilia jak di guak kantin-kantinau, ditetapka bekerjau batan endak Allah nggentika ughangtu. Tugasau endak ngenjuakka ngan Allah enju'an ngan kerban karnau dusau. 5:2 Imamtu adau pulau banyak kekilapan, mangku diau ngerti jemau diau nidau keruan ngan sesat. 5:3 Diautu mesti ngenjuakka kerban karnau dusau, ukan ajau karnau dusau jemau, tapitu pulau karnau dusaunyautula. 5:4 Nidau bediau jemau diau njadika diriau imam. Diautu dipilia Allah batan endak tugas itu, luak Harun senitu. 5:5 Luak itu pulau Keristus. Diautu nidau ngagungka diriAu njadi Imam Besak, tapitu Allah itula diau milia Diau, katauNyau, "Kabanila AnakKu. Saghini Aku njadi Bak Kaba." 5:6 Mangku Diau bekatau pulau, "Kaba imam selelamaunyau, nurut carau imam Melkisidik." 5:7 Masau Yesus adau di deniauni, Diau bedu'a sampai nangis, mintak ngan Allah diau pacak ngilakkaNyau jak di mati. Mangku Diau didengaghka, karnau Diau nunduak takut ngan Allah. 5:8 Empuak Diautu Anak Allah, mangku ngan sengsarauNyautu Diau belajagh ta'at. 5:9 Mangku la udim Diau njadi sempernau, Diau pacak nyelamatka enggut selelamaunyau jemau diau nurutiNyau. 5:10 Mangku Diautu ditetapka Allah njadi Imam Besak nurut carau imam Melkisidik. 5:11 Adau banyak ceritau diau mesti kami kiciakka, anyautu segau diretika, karnau kamu lambat nian ngerti. 5:12 Sebenaghau la masaunyau kamu ngajagh jemau, tenyatau kamutu diau mintak diajagh setu diau dulu sekali diajaghka ceritau ajaghan Allah. Kamu gi minum puan, lum pacak makan makanan keghas. 5:13 Jemau diau gi minum puan gi budak keciak, lum ngerti ceritau diau benagh ngan diau sala. 5:14 Makanan keghas batan endak jemau besak. Mangku karnau diau la belajagh, diau pacak mbidaka manau diau iluak ngan manau diau ja'at.

Ibrani 6

6:1 Karnau itu mela kitau jangan ngina'i ajau setu diau diajaghka senitu. Mela kitau belajagh banyak-banyak ceritau ajaghan jak di Keristus. Jangan kitau maju ngajaghka ceritau ngubai jak di kerjau diau nidau begati mangku percayau ngan Allah, 6:2 ceritau baptisan, ceritau nepiakka tangan di pucuak palak jemau, ceritau jemau ngulang idup ngan ceritau ukuman selelamaunyau. 6:3 Mangku itula diau mesti kitau kerjauka, amun Allah ngajung. 6:4 Adau jemau diau senitu la nerimau terangAu ngan meghasauka keilu'an Allah ngan nerimau kuasau Rua Allahtu. 6:5 Jemautu la keruan, bansau Katau Allahtu iluak ngan la meghasauka kuasau diau ka nyatau di masau diau ka datangtu. 6:6 Mangku amun jemautu ngelipat, nidau ka adau diilu'i agi mangku ngubai jak di peremba'au, karnau diautu luluak makuka agi Anak Allah di kayu salip ngan mbuat Diau digelakka di mukau jemau banyak. 6:7 Allah itu iluak ngan tana diau ngisap ayiak ujan diau rajin mbasainyau mangku ngasilka tanaman diau begunau batan endak jemau diau ngerjaukanyau. 6:8 Anyautu amun tanatu ngasilka gheghumputan bedughi diau nidau begati, mangku ka didawaika ngan disilap ngan api. 6:9 Kantin-kantinku diau kusayangi, empuak kami ngiciak luak itu, kami percayau ngan kamu. Kami yakin, bansau kamu ka milia jalan diau iluak mangku kamu ka selamat. 6:10 Allah ukan Allah nidau adil. Diau maju teghingat kerjau kamu senitu batan endak Diau. Diau teghingat pulau sayang kamu diau kamu nyatauka ngan carau kamu nulung kantin-kantin diau percayau. Mangku kamu maju ngerjaukanyau enggut mbak kini. 6:11 Kami endak supayau bilang kamu maju ngerjaukanyau nian enggut mati, mangku kamu ka nerimau setu diau kamu aghapkatu. 6:12 Kami enggup kamu njadi malas. Kami endak, supayau kamu idup luak jemau diau nunggu ngan ngaligh endak nerimau setu diau dijanjika Allah, karnau percayau ngan Diau. 6:13 Masau Allah bejanji ngan Abraham, Diau besumpa, bansau Diau ka ngerjauka setu diau la dijanjikaNyautu. Mangku Diau besumpa demi diriAu, karnau nidau bediau diau lebia bekuasau jak di Diautu. 6:14 Diau bekiciak, "Aku bejanji endak iluak nianan ngan kaba ngan njadika pengadau kaba banyak nian." 6:15 Abrahamtu nunggu ngan ngaligh mangku nerimau setu diau dijanjikatu. 6:16 Amun jemau besumpa, diau besumpa demi jemau diau lebia bekuasau, mangku sumpatu mandakka balahan. 6:17 Allah endak negaska ngan jemau diau nerimau janjiAutu, bansau Diau nidau ka ngubai rencanauNyau. Itula sebapau Diau nambai sumpaHau ngan janjiAutu. 6:18 Duau mecamtu nidau pacak beghuba, diautu janji ngan sumpa. Allah nidau ka adau mbu'ung ceritautu. Mangku kitau diau la njenguak Allah endak selamat diteguaka nian, supayau maju ngaghapka setu diau dijanjikatu ngan kitau. 6:19 Aghapan kitautu njadi pegangan diau kuat ngan aman batan endak idup kitau luak sauh, alat diau mendamka kapaltu. Aghapantu masuak enggut ke belakang tabir duaghau, ke dalam biliak diau Mahasuci di Ghuma Allah. 6:20 Yesus la mbuat jalan batan endak kitau ke bada itu. Diau la masuak ke situ njadi Imam Besak batan endak kitau selelamaunyau nurut carau imam Melkisidik.

Ibrani 7

7:1 Melkisidiktu rajau kuta Salim ngan imam Allah diau Mahabesak. Masau Abraham baliak jak di perang ngalaka rajau-rajau, Melkisidiktu datang nyungsung diau endak ndu'aka diau, 7:2 mangku dienjuakka Abraham bagi sepulua sebagi jak di gegalaunyau diau dighebutinyau. Reti namau Melkisidiktu rajau keadilan, mangku pulau rajau damai, karnau diau rajau Salim. 7:3 Diautu nidau bediau bak ngan mak ngan nidau bediau pengadau. Nidau pulau keruan, kebilau diautu adau, kebilau diau mati. Diautu luak Anak Allah, imam selelamaunyau. 7:4 Kitau nginak, pangkatautu tinggi nian. Mangku Abraham, niniak puyang kitau, ngenjuakka ngan diau bagi sepulua sebagi jak di gegalau retau bendau diau dighebutinyautu diau beregau sekali. 7:5 Dalam ukum Taurat ditetapka, bansau pengadau Liwi diau njadi imam mesti nerimau bagi sepulua sebagi jak di pulian jemau Israil, empuak ughangtu denga-sanak, pengadau Abraham galau. 7:6 Melkisidiktu ukan pengadau ughangtu. Anyautu diau nerimau bagi sepulua sebagi jak di Abraham ngan ndu'akanyau, empuak Abrahamtu la nerimau janji jak di Allah. 7:7 Nyela nian, jemau diau ndu'aka lebia tinggi pangkatau jak di jemau diau didu'akatu. 7:8 Biasaunyau imam diau nerimau bagi sepulua sebagi cuman manusiau diau ka mati. Tapitu nurut Injil, Melkisidik diau nerimau bagi sepulua sebagitu maju idup. 7:9 Mangku pacak dikiciakka, bansau Liwi diau nerimau bagi sepulua sebagi jak di jemau Israil, ngenjuakka pulau bagi sepulua sebagi masau Abraham ngenjuakkanyautu. 7:10 Empuak Liwi lum adau, bulia dikiciakka la adau dalam badan Abraham, puyangautu, masau Abraham betemu ngan Melkisidik. 7:11 Karnau imam-imam Liwi ukum Taurat dienjuakka ngan jemau Israil. Anyautu imamtu nidau pacak ngerjaukanyau ngan sempernau. Karnau itu mesti adau imam lain diau nurut carau imam Melkisidik, ukan jak di rumbungan Harun. 7:12 Mangku amun kedudukan imamtu beghuba, ukum Taurat mesti beghuba pulau. 7:13 Diau dikiciakkatu Tuhan kitau. Diau jak di jungku lain. Nidau sughang kiala jak di jungku itu diau la njadi imam. 7:14 La keruan galau, bansau Tuhan kitau asalau jak di pengadau Yahudi, mangku Musa nidau kekela ngiciakka jungku itu, masau diau ngiciakka ceritau imam. 7:15 Setu diau dikiciakkatu tamba jelas agi, karnau adau sughang imam lain nurut carau Melkisidik. 7:16 Diautu dijadika imam ukan karnau peraturan manusiau, tapitu karnau kuasauNyau ngan idupAu diau nidau ka abis. 7:17 Ceritaunyau la dikiciakka di Injil, "Kaba ka njadi imam selelamaunyau nurut carau Melkisidik." 7:18 Peraturan diau lamau nidau dipakai agi, karnau nidau kuat ngan nidau begunau. 7:19 Ukum Taurattu nidau pacak nyempernauka. Mangku mbak kini kitau dienju'i aghapan diau lebia iluak agi, mangku kitau pacak masighi Allah. 7:20 Lagi pulau gegalaunyautu diteguaka ngan sumpa Allah. Anyautu nidau bediau sumpa luak itu, masau imam-imam itu tadi ditetapka. 7:21 Yesustu ditetapka njadi imam pakai sumpa Allah, katauNyau ngan Diau, "Tuhan la besumpa, nidau ka beghuba agi, 'Kabani imam selelamaunyau.' " 7:22 Ngan carau luak itu Yesus njadi jaminan pejanjian diau lebia iluak agi. 7:23 Lagi imam diau laintu banyak, karnau ughangtu mati mangku nidau pacak neruska tugasau. 7:24 Anyautu Yesus idup selelamaunyau, mangku tugasAu njadi imam nidau dienjuakka ngan jemau lain. 7:25 Itula sebapau selelamaunyau Yesus pacak nyelamatka jemau diau masighi Allah, diantat ngan Diau. Diautu adau selelamaunyau endak mintak ngan Allah batan endak ughangtu. 7:26 Imam Besak luak Yesus itula diau kitau perluka. Diautu beresia, nidau bediau sala ngan dusauNyau. Diau diasingka jak di jemau bedusau, mangku Diau ditinggika ke bada diau tinggi di sergau. 7:27 Diautu nidau luak imam besak lain diau idang aghi bekerban ngan Allah karnau dusaunyau. Udim itu diau ngenjuakka kerban karnau dusau jemau. Yesustu ngenjuakka kerban cuman sekali ajau, masau Diau nyeraka diriAu njadi kerban. 7:28 Ukum Taurattu senitu netapka jemau diau adau banyak kekilapan njadi imam besak. La udim itu Allah bejanji ngan sumpa, bansau Diau netapka Ana'Au njadi Imam Besak diau sempernau selelamaunyau.

Ibrani 8

8:1 Inti gegalau kici'an tadi kitau adau Imam Besak diau duduak di sebela kanan Allah diau Mahabesak di sergau. 8:2 Diautu ngerjauka tugasAu di bada diau Mahasuci dalam kima Tuhan diau asli diau ditegakka Tuhan, ukan ditegakka manusiau. 8:3 Bilang imam besak kerjaunyau ngenjuakka ngan Allah enju'an ngan kerban. Luak itu pulau Imam Besak kitau, Diautu mesti adau setu diau endak dikerbanka. 8:4 Misalau Diau di deniauni, Diau nidau nian ka njadi imam, karnau la adau imam diau ngenjuakka kerban nurut ukum Taurat. 8:5 Kerjau imam diau dikerjauka ughangtu sebenaghau cuman mbayangka setu diau adau di sergau. Itu la dikiciakka Allah ngan Musa, masau diau endak negakka kima Tuhan. Katau Allah ngan diau, "Ingatkala, gegalaunyau mesti kaba kerjauka nurut cuntau diau la ditunjuakka ngan kaba di pucuak gunung." 8:6 Anyautu mbak kini Yesus dapat tugas imam diau jawua lebia penting jak di kerjau imam-imam tadi, karnau pejanjian diau dibuatAu di antarau Allah ngan manusiau jawua lebia penting, karnau setu diau dijanjikatu lebia iluak. 8:7 Misalau janji diau petamau la iluak, mangku nidau penting agi janji diau keduau. 8:8 Anyautu Allah la ngiciakka sala umatAu, mangku Diau bekatau, "Ngenian, masaunyau ka sampai, Aku ka bejanji agi janji diau empai ngan jemau Israil ngan jemau Yahudi. 8:9 Ukan luak janji diau Kujanjika ngan niniak puyangau, masau Aku nulung ughangtu ngeluagh jak di Mesir. Ughangtu nidau nuruti janji diau Kujanjika ngan ughangtu. Karnau itu Aku nidau nyanauka ughangtu." Luak itula katau Tuhan. 8:10 "Mangku inila janji diau Kujanjika ngan umat Israil," katau Tuhan, "Masaunyau ka sampai, Aku ka mbuat ughangtu maju merupuakka perintaKu, mangku ati ughangtu ka maju ngingatkanyau. Aku ka njadi Allah ughangtu, mangku ughangtu ka njadi umatKu. 8:11 Mangku ughangtu nidau nanti ngajagh denga-sana'au ngan kantinau agi, ngan ngiciakka ngan diau, 'Keruanila Tuhan!' Karnau gegalau ughangtu, besak keciak, ka ngeruani Aku. 8:12 Aku ka ngabiska sala ughangtu, ngan nidau agi ngingatka dusau-dusaunyau." 8:13 Allah la ngiciakka janji diau empai, mangku janji diau dulu njadi tuau ngan nidau begunau agi. Mangku setu diau la tuau ka gasip lengit.

Ibrani 9

9:1 Janji diau dulu adau carau sembayang ngan bada sembayang diau dibuat jemau. 9:2 Adau kima ditegakka, mangku bagian mukau dikiciakka Bada Suci. Di situ adau tiang lampu ngan mija ngan ruti enju'an batan endak Allah. 9:3 Bagian dalam di baling tabir adau bada diau dikiciakka Bada Mahasuci. 9:4 Di bada itu adau mija bekerban jak di emas bada nyilapka keminyan. Mangku adau pulau Peti Pejanjian diau dilapisi emas galau. Dalam petitu adau guci emas buisi Mana, ruti jak di sergautu, ngan tungkat Harun diau la betunas, mangku pulau duau bua batu tulis diau ditulisi perinta Allah. 9:5 Di pucu'au adau duau kerub, benatang sergau diau nunjuakka keagungan Allah. Benatangtu adau sayap diau nukupi peti tadi, bada ngabiska dusau. Gegalaunyautu nidau pacak kitau kiciakka mbak kini ngan neghagi. 9:6 Luak itula gegalaunyautu diatur. Idang aghi imam masuak ke bada suci kimatu endak ngerjauka tugasau. 9:7 Diau masuak ke bada diau dalam sekali di kimatu Imam Besak, cuman sekali ajau setaun. Titu dikerjaukanyau ngan mbatak dagha diau dienjuakka ngan Allah batan endak diriau ngan umatau endak ngabiska dusau diau nidau disajauka. 9:8 Ngan carau luak itu Rua Allah nyatauka, bansau jalan masuak ke bada diau Mahasucitu lum tebukak, selamau bada sebela mukau kimatu gi adau. 9:9 Titu nggambarka masau mbak kini. Retiau bansau enju'an ngan kerban benatang diau dikerbanka ngan Allahtu nidau pacak mberesiaka ati ngan sempernau jemau diau ngerbankanyau. 9:10 Gegalaunyautu cuman ngiciakka makanan minuman ngan mecam-mecam carau mberesiaka diriau, cuman peraturan di luagh ajau diau dikerjauka enggut Allah mbuat gegalaunyau empai. 9:11 Anyautu Keristus la datang njadi Imam Besak batan endak setu diau iluak diau ka datangtu. Kima Tuhan, bada Diau ngerjauka tugasAutu, lebia agung ngan lebia sempernau. Kimatu nidau dibuat manusiau, retiau asalau ukan jak di deniauni. 9:12 Diautu masuak ke dalam kimatu di bada diau suci sekali cuman sekali ajau. Masau itu Diau mbatak dagha Diautula, ukan dagha kambing lanang, ukan dagha sapi diau endak dikerbanka. Mangku ngan daghaHautu Diau mbibaska kitau selelamaunyau. 9:13 Dagha kambing ngan sapi lanang ngan abu kerban sapi mudau dipakai endak megheci'i jemau najis, endak dibasua mangku beresia. Amun dagha ngan abutu pacak mberesiaka jemau di luagh nurut peraturan agamau, 9:14 apau agi dagha Keristus. Karnau Rua diau selelamaunyau Keristus nyeraka diriAu njadi kerban diau nidau becacat batan endak Allah. DaghaHautu mberesiaka ati kitau jak di kerjau diau nidau begati, mangku kitau pacak nyemba Allah diau idup. 9:15 Karnau kerjau Keristustu Allah mbuat pejanjian diau empai, mangku jemau diau la dipilia Allah pacak nerimau setu diau la dijanjikaNyautu. Keristus la mati endak mbibaska jemau jak di salahau diau dibuat masau pejanjian diau dulu masia dipakai. 9:16 Amun adau surat peninggalan, mesti adau pulau buktiau, bansau jemau diau mbuatautu la mati. 9:17 Surattu nidau belaku, masau jemau diau mbuatau gi idup. Surattu cuman pacak dipakai, amun jemaunyau la mati. 9:18 Itula sebapau pejanjian diau dulu pulau disahka ngan dagha. 9:19 Musa ngiciakka gegalau perinta Allah ngan jemau Israil. Udim itu diau ngambiak dagha anak sapi ngan dagha kambing lanang diundakka ngan ayiak, mangku dipegheciakka di kitab ukum Taurat ngan di gegalau jemau Israil pakai ghumput isup ngan bulu bebiri abang, 9:20 sampai bekatau, "Inila dagha diau ngesahka pejanjian Allah batan endak kamu diau mesti kamu turuti." 9:21 Mangku kima ngan gegalau dandanan diau dipakai endak sembayang dipegheci'i ngan dagha carau luak itu. 9:22 Nurut ukum Taurat ampir gegalaunyau diberesiaka ngan dagha. Mangku dusau cuman pacak diabiska, amun adau dagha ditumpaka. 9:23 Gegalaunyautu nggambarka setu diau adau di sergau, mangku mesti diberesiaka ngan carau luak itu tadi. Anyautu setu diau adau di sergau ngan kerban diau lebia iluak jak di itu. 9:24 Keristus nidau masuak ke bada suci diau dibuat manusiau diau cuman gambar jak di bada suci diau sebenaghau. Diautu masuak sergau nian, mangku mbak kini Diau ngadap Allah batan endak kepentingan kitau. 9:25 Idang taun imam besak masuak ke bada diau suci sekali mbatak dagha benatang. Tapitu Keristus masuak ngerbanka diriAu ukan beulang-ulang. 9:26 Misalau Keristus semegi ngan imam besak tadi, bereti jak deniau dijadika Diau mesti rajin sengsarau. Anyautu tenyatau mbak kini masau pengabisan ini Diau datang sekali ajau endak ngabiska dusau ngan carau ngerbanka diriAu. 9:27 La ditetapka, bansau manusiau mati cuman sekali ajau, udim itu diadili. 9:28 Luak itu pulau Keristus ngerbanka diriAu cuman sekali ajau endak ngabiska dusau banyak jemau. Mangku Diau ka datang agi ukan endak nanggungka dusau agi, tapitu endak nyelamatka jemau diau nunggu Diau datang.

Ibrani 10

10:1 Ukum Taurat nggambarka setu diau iluak diau ka datang nanti. Itu cuman gambaran ajau, ukan diau sebenaghau. Idang taun kerban diau semegi maju dikerbanka. Manau ka adau ukum Taurat ngan kerbantu pacak nyempernauka jemau diau endak nyemba Allah. 10:2 Misalau jemau diau nyemba Allah ngan carau luak itu la diberesiaka nian jak di dusaunyau, diau nidau agi meghasau besala, mangku jemau mandak bekerban. 10:3 Anyautu kerban diau dikerbanka idang tauntu mbuat jemau maju teghingat ngan dusaunyau. 10:4 Dagha sapi ngan dagha kambing lanang nidau pacak ngabiska dusau. 10:5 Itula sebapau masau Keristus datang ke deniau, Diau bekatau ngan Allah, "Kerban ngan enju'an nidau Dighi kenda'i. Tapitu Dighi ngenjuakka badan ngan Aku. 10:6 Dighi nidau riang ngan kerban benatang diau disilap ngan kerban endak ngabiska dusau. 10:7 Mangku Aku bekatau, 'Allah, Aku datang endak ngerjauka kendak Dighi, luak ceritauKu diau la ditulis di Injil.' " 10:8 Tadi Diau bekatau, "Kerban ngan enju'an, kerban benatang diau disilap ngan kerban endak ngabiska dusau nidau Dighi kenda'i, Dighi nidau riang ngan gegalaunyautu." Diau ngiciak luak itu, empuak kerbantu dikerbanka nurut ukum Taurat. 10:9 Mangku Diau bekatau, "Aku datang endak ngerjauka kendak Dighi." Retiau Allah la ngabiska kerban diau senitu, digenti ngan kerban empai, diautu Keristus. 10:10 Yesus Keristus la ngerjauka kendak Allah ngan nyeraka diriAutula njadi kerban. Mangku kitau la diberesiaka karnau kerbantu diau dikerbanka cuman sekali ajau. 10:11 Idang aghi imam maju ngerjauka tugasau, maju ngerbanka kerban diau semegi diau nidau nian pacak ngabiska dusau. 10:12 Tapitu Keristus cuman ngerbanka kerban sekali ajau endak ngabiska dusau batan endak selelamaunyau. Udim itu Diau duduak di sebela kanan Allah. 10:13 Mbak kini Diau cuman nunggu masaunyau musuAu ditunduakka ngan Diau. 10:14 Ngan sutiak kerban ajau Keristus la nyempernauka selelamaunyau jemau diau la diberesiaka jak di dusaunyau. 10:15 Ceritau itu la dikiciakka Rua Allah ngan kitau, katauNyau, 10:16 " 'Inila janji diau ka Kujanjika ngan ughangtu nanti,' katau Tuhan. 'Aku ka masuakka ukumKu dalam ati ughangtu, mangku ughangtu ka maju merupuakkanyau.' " 10:17 Allah bekatau pulau, "Aku nidau ka ngingatka agi dusau ngan sala ughangtu." 10:18 Mangku amun dusau ngan sala jemau la diabiska, nidau nanti agi ngerbanka kerban karnau dusau. 10:19 Mangku, kantin-kantinku, mbak kini dagha Yesus mbuat kitau beghani masuak ke bada diau suci. 10:20 Diautu la mbuat jalan diau empai batan endak kitau, jalan diau ngenjuakka idup. Jalan itu wuan tabir, diautu badan Yesus itula. 10:21 Mangku kitau adau imam diau agung diau njadi kepalak Ghuma Allah. 10:22 Karnau itu mela kitau ngadap Allah ngan ati diau sebenagh-benaghau ngan maju percayau, karnau ati kitau la diberesiaka jak di sala kitau, badan kitau la dibasua ngan ayiak diau beresia. 10:23 Mela kitau maju ngaghapka setu diau la kitau aku'i, karnau Allah diau la njanjikanyau pacak dipercayaui. 10:24 Mela kitau sangi peratika, mangku kitau sangi ingatka endak ngerjauka diau iluak ngan sangi sayangi. 10:25 Mela kitau rajin betunggal endak sembayang, jangan kitau malas luak bebeghapau jemau. Mela kitau sangi ingatka ngan tamba rajin ngerjaukanyau, karnau nidau lamau agi Tuhan ka datang. 10:26 Amun kitau sajauka bedusau, empuak la keruan diau benagh, nidau bediau agi kerban endak ngabiska dusau itu. 10:27 Diau adau batan endak jemau itu ukuman Allah diau nakutka ngan api besak kematila diau mutungka jemau diau melawan Allah. 10:28 Jemau diau nidau nerimau ukum Musa diukum mati, amun dibuktika duau madak tigau ughang saksiau, bansau diautu besala. Jemautu nidau disialka. 10:29 Apau agi jemau diau nijak-nijakka Anak Allah, jemau diau nggelakka dagha pejanjian Allah, itu kematian Keristus diau mberesiaka jak di dusau. Jemau itu nggelakka keilu'an Rua Allah. Beghatla ukuman jemautu. 10:30 Kitau la keruan Allah diau bekatau luak ini, "Aku ka mbalas! Aku ka ngukum!" ngan pulau, "Tuhan ka ngadili umatAu." 10:31 Alaka nanggungau, amun diukum Allah. 10:32 Ingatkala senitu, masau kamu empai percayau ngan Yesus, kamu banyak tanggungan. Anyautu kamu maju beta'an. 10:33 Adau masau kamu dimadakka di mukau jemau banyak, adau masau kamu ngikut sengsarau ngan jemau diau dimadakka luak itu. 10:34 Kamu ngikut meghasauka kemada'an jemau diau dijilka. Masau gegalau retau kamu diambiak jemau, kamu maju riang, karnau kamu keruan, kamu adau setu diau lebia iluak agi diau ka ta'an selelamaunyau. 10:35 Karnau itu jangan ncapakka aghapan kamutu, karnau amun kamu maju percayau, adau upa diau besak. 10:36 Kamu mesti tekun, supayau kamu pacak ngerjauka kendak Allah, mangku kamu nerimau setu diau dijanjikaNyau. 10:37 Di Injil ditulis, "Tigha jerang agi, Keristus diau ka datangtu sampai. Diau nidau ka lambat datang. 10:38 Mangku umatKu diau la dibenaghka ka idup karnau percayau. Amun adau diau nidau percayau agi, Aku nidau riang ngan jemau itu." 10:39 Kitauni jemau diau percayau mangku bulia idup, ukan jemau diau ngelipat mangku benasau.

Ibrani 11

11:1 Amun percayau nian, kitau yakin nian ngan setu diau kitau aghapka, kitau yakin nian ngan setu diau nidau kitau kinak. 11:2 Karnau percayau nian, jemau senitu diceritauka di Injil. 11:3 Karnau percayau, mangku kitau ngerti, bansau langit ngan deniau dijadika Allah ngan kici'anNyau, mangku setu diau kitau kinak dijadika jak di setu diau nidau kina'an. 11:4 Karnau percayau, mangku Abil ngenjuakka kerban ngan Allah diau lebia iluak jak di kerban Kain. Itula sebapau Abil diterimau Allah njadi jemau diau benagh, karnau Allah nerimau kerbanau ngan riang. Karnau percayau nian, diau maju ngiciak, empuak la mati. 11:5 Karnau percayau, mangku Inuk nidau mati. Diau tuangkat, dibatak guak Allah. Nidau sughang kia nginak diau agi, karnau la tuangkat. Antak ka diau tuangkattu, la dikiciakka, bansau diautu melemakka ati Allah. 11:6 Amun nidau percayau, nidau ka adau Allah riang ngan jemau. Karnau jemau diau datang ngadap Allah mesti percayau, bansau Allahtu adau, ngan ngenjuakka upa ngan jemau diau ndala'i Diau ngenian. 11:7 Karnau percayau, mangku Nua nerimau petunjuak jak di Allah ceritau setu diau ka jerang agi tejadi diau lum kina'an. Nuatu ta'at ngan Allah, mangku diau mbuat sebua kapal besak endak nyelamatka diriau ngan anak-biniau. Ngan carau luak itu Nua itu dibenaghka, karnau percayau nian, tapitu deniau diukum. 11:8 Karnau percayau, mangku Abraham ta'at, masau diau dipilia ngan diajung pegi ke nenggeri diau Allah janjika ngan diau. Mangku Abraham bejalan, nidau keruan ka ke manau diau. 11:9 Karnau percayau, diau njadi jemau asing di nenggeri diau dijanjika Allahtu. Badahau di kima. Luak itu pulau Isak ngan Yakub diau ngikut nerimau janjitu pulau. 11:10 Mangku Abrahamtu nungguka kuta diau direncanauka ngan ditegakka Allah ngan pelapiak diau kuat. 11:11 Karnau percayau, diautu ngan Sara adau anak, empuak ughang duautu la tuau nian. Diautu percayau nian, bansau Allah ka nepati janjiAu padau masaunyau. 11:12 Masau itu diau luak jemau tigha kari matiau. Empuak luak itu di diau banyak pengadau, nidau kebilangan banya'au luak bintang di langit ngan bungin di tepi laut. 11:13 Gegalau jemautu percayau mangku mati, nidau nerimau setu diau dijanjika Allahtu, cuman ngina'au jak di jawua mangku riang. Ughangtu ngaku'i, bansau ughangtu jemau asing ngan merantau di deniauni. 11:14 Jemau diau ngiciak luak itu nyatauka, bansau diau dang ndalak bada diau njadi ha'au. 11:15 Ukan bada diau la ditinggalka ughangtu diau dirupuakkatu. Misalau dirupuakka nian, cengki ughangtu la ngelipat ke bada itu. 11:16 Anyautu ughangtu meghinduka bada diau lebia iluak, diautu bada diau di sergau. Itula sebapau Allah nidau maluan dikiciakka Allah ughangtu, karnau Allah la nyediauka sutiak kuta batan endak ughangtu. 11:17 Karnau percayau, mangku Abraham ngenjuakka Isak njadi kerban, masau diuji Allah. Ngan Abraham itula Allah bejanji, mangku diau pulau rila nyeraka ana'au diau gi sughang itula, 11:18 empuak la dikiciakka ngan diau, "Pengadau diau asalau jak di Isaktu ka dikiciakka pengadau kaba." 11:19 Diautu yakin, bansau Allah pacak ngidupka jemau mati, mangku pacak dikiciakka, Isak la ngulang idup jak di mati dienjuakka ngan ba'autu. 11:20 Karnau percayau, mangku Isak ndu'aka Yakub ngan Isau batan endak idupau nanti. 11:21 Karnau percayau, mangku Yakub masau laka mati ndu'aka duau anak Yusup, nyandar di pangkal tungkatau sampai nyemba Allah. 11:22 Karnau percayau, mangku Yusup, masau diau laka mati, ngiciakka ceritau jemau Israil ngeluagh jak di Mesir, bemanat ngiciakka luak manau mesti dikerjauka ngan tulangau. 11:23 Karnau percayau, mangku pejadi Musa nyemunikanyau jak empai adau tigau bulan lamaunyau. Pejadiautu nginak, bansau diautu anak diau alap, mangku ughangtu nidau takut melawan perinta rajau. 11:24 Karnau percayau, mangku masau Musa la besak enggup dikiciakka anak jak di anak tinau rajau Mesir. 11:25 Galakla diau ngikut sengsarau ngan umat Allah sangkan jerang ajau beriang-riang karnau idup diau bedusau. 11:26 Musa nganggap beregaula digelakka karnau Rajau Penyelamat diau dijanjika Allahtu sangkan bulia gegalau retau Mesir, karnau diau ngaghapka upa nanti. 11:27 Karnau percayau, mangku Musa ninggalka Mesir, nidau takut dimarai rajau. Diau maju ajau luak nginak Allah diau nidau kina'antu. 11:28 Karnau percayau, mangku Musa mbuat Paska, diajungau supayau dagha dipegheciakka di duaghau ghuma jemau Israil, mangku malaikat kematian nidau mbunua anak tuau ughangtu. 11:29 Karnau percayau, mangku jemau Israil pacak nyembeghangi Laut Abang luak bejalan di tana keghing, tapitu jemau Mesir tebenak di laut, masau ughangtu ncubau nyembeghang pulau. 11:30 Karnau percayau, mangku dinding Yiriku rubua, la udim dikelilingi jemau Israil selamau tujua aghi. 11:31 Karnau percayau, mangku Rahab, pelacurtu, nerimau mematau jemau Israil ngan iluak, mangku nidau ngikut tebunua ngan jemau diau melawan Allah. 11:32 Aku pacak ajau maju ngiciak, anyautu masaunyau gi dikit. Lum pulau aku ngiciakka Gidiun, Barak, Simsun, Yipta, Daud, Samuil ngan nabi-nabi. 11:33 Karnau percayau, mangku ughangtu la ngalaka rajau-rajau. Ughangtu ngerjauka setu diau benagh, mangku nerimau setu diau dijanjika. Adau diau nukup mulut setuau. 11:34 Adau diau madamka api besak kematila. Adau diau luput jak di matau pedang. Adau diau litak, mangku njadi kuat. Adau diau kuat beperang, mangku ngalaka tentera jemau asing. 11:35 Karnau percayau, mangku jemau tinau ngulang dapat agi jemau diau la mati. Adau pulau diau sukau disiksau ngan mati, enggup dibibaska, karnau endak diidupka agi ngan idup diau lebia iluak. 11:36 Adau pulau diau digelakka, dipeciti, dikebat ngan rantai ngan dimasuakka dalam jil. 11:37 Adau diau disipati ngan batu enggut mati. Adau diau ditetak ngan gergaji. Adau diau dibunua ngan pedang. Adau diau nidau bebada ngan makai baju jak di bawak bebiri ngan kambing. Ughangtu serik-sarau, nanggung ngan disiksau. 11:38 Deniauni ukan bada diau pantas batan endak ughangtu. Bada ughangtu di padang bungin ngan di bukit, di gua ngan di tebuak tana. 11:39 Gegalau ughangtu diceritauka di Injil karnau percayau. Anyautu ughangtu lum nerimau setu diau dijanjikatu, 11:40 karnau Allah merencanauka setu diau lebia iluak batan endak kitau. RencanauNyau, supayau ughangtu njadi sempernau serempak ngan kitau.

Ibrani 12

12:1 Mangku kitauni banyak nian cuntau, jemau diau percayau tadi. Karnau itu mela kitau pulau ncapakka gegalaunyau diau mbeghati kitau ngan dusau diau maju melekat ngan kitau. Mela kitau maju betanding ngan tekun petandingan diau kitau ikuti. 12:2 Mela kitau ngerjauka titu ngan maju merupuakka Yesus. Diau itula mbuat kitau percayau, mangku Diautu pulau nulung kitau maju percayau. Yesustu ta'an sengsarau, nidau nyanauka, bansau mati di kayu saliptu setu diau maluka. Diau cuman ngingatka riang diau ka dighasaukaNyau nanti. Mbak kini Diau duduak di sebela kanan Allah. 12:3 Rupuakkala maju sengsarau Yesustu ngadap jemau bedusau diau melawan Diau ngan luat kematila, mangku kamu nidau tekedan ngan maju adau aghapan. 12:4 Kamu lum bejuang melawan jemau bedusau, lum enggut mati dibunua. 12:5 Jangan kamu melupauka tegughan Allah diau dikiciakka ngan kamu diau njadi anak-ana'Au. "Ui anakKu, peratikala iluak-iluak ajaghan Tuhan. Jangan kaba keciak ati, amun ditengul Tuhan. 12:6 Karnau Tuhan ngajagh bilang jemau diau disayangiNyau. Diau mbaduk bilang jemau diau diaku'iNyau ana'Au." 12:7 Terimaula badukan jak di Allah njadi ajaghan jak di bak, karnau nidau bediau sughang kia anak diau nidau diajagh ba'au. 12:8 Amun kamu nidau diajagh luak gegalau anak lain, bereti kamu ukan ana'Au nian, tapitu luak anak kampang. 12:9 Kitau adau bak di deniauni diau ngajagh kitau, mangku kitau meregauinyau. Apau agi Bapak kitau di sergau, cengki kitau mesti tunduak ngan Diau, supayau kitau idup. 12:10 Bak kitau di deniauni ngajagh kitau masau jerang ajau, nurut setu diau dighasauka iluak. Anyautu Allah ngajagh kitau batan endak keilu'an kitau, mangku kitau njadi beresia luak Diau. 12:11 Nyela, amun kitau diukum, kitau nidau riang tapitu nangis. Anyautu ngan kitau diau la diajagh, ukumantu mbuat kitau idup nurut kendak Allah, mangku kitau idup ngan damai. 12:12 Karnau itu tegangkala tangan kamu diau litak ngan palak entuat diau gemetaghtu! 12:13 Dataghkala jalan kamu, mangku keting kamu diau kincut nidau tegesur, tapitu tamba kuat. 12:14 Beusahala idup damai ngan gegalau jemau. Idup kamu mesti beresia batan endak Tuhan. Nidau sughang kiala pacak nginak Tuhan, amun idupau nidau luak itu. 12:15 Jagauila, supayau jangan adau diau njawuaka diriau jak di keilu'an Allah, supayau jangan adau akagh diau beracun tumbua di guak kamu, mangku nimbul kekacauan ngan merusak banyak jemau karnau racunau. 12:16 Jangan adau diau menaugawia. Jangan adau diau nidau meregaui Allah luak Isau. Diautu anak tuau. Mangku diau njual ha'autu karnau cuman makanan sepiring ajau. 12:17 Kamu keruan, bansau udim itu diau endak didu'aka luak anak tuau, anyautu ditulak, nidau bediau agi jalan endak ngilu'i salahau, empuak mintak sampai nangis. 12:18 Kamu nidau ngadapi setu luak diau diadapi jemau Israil senitu. Ughangtu ngadapi setu diau pacak dikecakka ngan dighasauka, itula gunung Sinai ngan api besak diau maghaktu, keleman kakup ngan angin nyaghu, 12:19 muni terumpit ngan suarau nyaghing. Masau ughangtu ndengagh kici'annyau, ughangtu mintak nian, supayau jangan ngiciak agi ngan ughangtu. 12:20 Ughangtu nidau ta'an ndengagh perinta ini diau dikiciakka suarau tadi, "Bilang jemau ngan benatang diau ngecakka gunung ini mesti disipati ngan batu enggut mati." 12:21 Setu diau dikinak jemau Israiltu nakutka nian, mangku katau Musa, "Aku takut nian ngan gemetagh." 12:22 Anyautu diau kamu adapitu bukit Siun ngan kuta Allah diau ngenjuakka idup, Yerusalim di sergau ngan beribu-ribu malaikatau. 12:23 Kamu ngikut tunggalan diau riang nian, tunggalan anak-anak tuau diau namaunyau la ditulis di sergau. Kamu betunggal ngan jemau senitu diau la disempernauka. Kamu ngadap Allah, akim gegalau manusiau. 12:24 Kamu ngadap Yesus diau mbuat janji empai ngan dipegheciakka dagha mangku njamin setu diau lebia iluak jak di dagha Abil. 12:25 Karnau itu, sepepadaula, jangan adau diau enggup ndengagh diau ngiciaktu. Jemau diau enggup ndengaghka jemau diau ngiciakka katau Allah di deniauni nidau pacak melaghika diriau jak di ukuman. Apau agi kitau diau ndengaghka diau ngiciak jak di sergau. Amun kitau enggup ndengaghkaNyau, manau ka adau kitau nidau diukum. 12:26 Masau itu adau gempau karnau suarauNyau. Anyautu mbak kini Diau bejanji, "Sekali agi ka adau gempau karnau Aku, ukan cuman di deniau, tapitu di langit pulau." 12:27 Katau tadi "sekali agi" nunjuakka, bansau gegalau deniau diau dijadikatu ka digugak ngan digentika, mangku ka tinggal setu diau nidau pacak digugak. 12:28 Itula sebapau kitau mesti beterimau-kasia ngan Allah, karnau kitau la nerimau bada di manau Allah merinta diau nidau pacak diambiak jak di kitau. Kitau mesti meregaui ngan nyemba Allah ngan takut ngan carau diau dikenda'iNyau diau melemakka atiAu. 12:29 Karnau Allah kitau luak api diau mutungka.

Ibrani 13

13:1 Sangi sayangila kamu, ui jemau Keristen! 13:2 Terimaula di ghuma kamu jemau diau lum kecinauan ngan kamu, karnau ngan kerjau luak itu adau jemau nidau keruan la njamu malaikat. 13:3 Peratikala jemau diau dalam jil, mbak asau kamu pulau di dalam jil ngan ughangtu. Peratikala pulau jemau diau dibuati, mbak asau kamutu dibuati luak itu. 13:4 Gegalau kamu mesti meregaui pekawinan. Laki bini mesti sangi sayangi. Jemau nakal ngan jemau diau menaugawia ka diukum Allah. 13:5 Jangan kamu tetancian, tapitu cukupkala ngan setu diau adau di kamu, karnau Allah la bekiciak, "Aku nidau ka ngenangka ngan ninggalka kaba." 13:6 Itula sebapau kitau pacak ngiciak ngan beghani, "Tuhan itula penulungku. Aku nidau takut ngan setu diau pacak dikerjauka jemau mbuati aku." 13:7 Ingatkala pengulu kamu diau ngiciakka ceritau jak di Allah ngan kamu. Peratikala carau idupau ngan carau diau mati. Penaula carau ughangtu percayau. 13:8 Yesus Keristus nidau beghuba, empuak senitu empuak mbak kini enggut selelamaunyau. 13:9 Jangan kamu disesatka ngan bemecam-mecam ajaghan. Ati kitau diteguaka karnau keilu'an Allah, ukan karnau peraturan makanan. Nuruti peraturan makanantu nidau bediau gunaunyau. 13:10 Kitau adau mija bada bekerban, mangku imam-imam diau bekerjau di Ghuma Tuhan nidau behak makan jak di bada itu. 13:11 Dagha benatang diau dikerbanka batan endak ngabiska dusau dibatak imam besak ke bada diau Mahasuci, anyautu buntang benatangtu disilap di luagh dusun. 13:12 Itula sebapau Yesus pulau mati di luagh kuta endak mberesiaka umatAu jak di dusaunyau ngan daghaHautula. 13:13 Karnau itu mela kitau pegi njenguak Diau di luagh kuta ngikut meghasauka tanggunganNyautu. 13:14 Di deniauni kitau nidau bediau bada netap. Kitau dang ndalak bada selelamaunyau. 13:15 Karnau itu mela kitau maju muji Allah karnau Yesus. Titu njadi kerban beterimau-kasia ngan Diau, diau kitau enjuakka ngan mulut kitau endak ngagungka Diau. 13:16 Mangku majula kerjauka diau iluak ngan sangi tulungi, karnau itula kerban diau melemakka ati Allah. 13:17 Ta'ati pengulu kamu ngan tunduak ngan ughangtu, karnau ughangtu maju njagaui kamu ngan nanggungjawabkanyau ngan Allah. Amun kamu ta'at, ughangtu pacak bekerjau ngan riang. Amun nidau, ughangtu bekerjau ngan dayi mangut, mangku carautu nidau nulung kamu. 13:18 Majula du'aka kami. Kami yakin ati keciak kami beresia, karnau kami maju endak ngerjauka setu diau iluak. 13:19 Lagi aku mintak nian, supayau kamu ndu'aka aku, mangku aku pacak cepat ngulang guak kamu. 13:20 Allah la ngidupka Yesus, Tuhan kitau, jak di mati. Mangku karnau Diau matitu, Diau njadi tukang sayia kitau diau agung. DaghaHautu pulau ngesahka janji diau dijanjika Allah ngan kitau. Aku bedu'a, supayau Allah diau ngenjuakka damai ndandani kamu ngan serbau diau iluak, mangku kamu pacak ngerjauka kenda'Au. 13:21 Aku bedu'a, supayau Allah ngajung Yesus Keristus ngerjauka di kitau setu diau melemakka atiAu. Tepujila Diau selelamaunyau! Amin. 13:22 Mangku, kantin-kantinku, aku mintak, supayau kamu nerimau petua itu tadi ngan riang, karnau surat ini nidau panjang nian. 13:23 Aku endak, supayau kamu keruan, bansau kantin kitau Timutius la dibibaska, mangku amun diau la sampai, aku ka cepat berayak ngan kamu serempak ngan diau. 13:24 Sampaikala pesan kami ngan gegalau pengulu kamu ngan gegalau jemau Keristen. Adau pulau pesan jak di kantin-kantin kitau di Italia. 13:25 Aku bedu'a, supayau Allah iluak ngan gegalau kamu.

Yakubus 1

1:1 Batan endak gegalau umat Allah diau adau di gegalau deniau. Pesan jak di aku, Yakubus. Aku bekerjau batan endak Allah ngan Tuhan kitau Yesus Keristus. 1:2 Kantin-kantinku, riangla kamu, amun kamu meghasauka banyak cubauan. 1:3 Kamu la keruan, amun kamu maju percayau empuak dicubaui, mangku asilau kamu njadi tekun. 1:4 Mangku kamu mesti maju tekun mangku ngasilka diau sempernau, nidau kurang tuapau-apau. 1:5 Amun adau jemau jak di kamu diau kurang bepengertian, jemautu mesti mintak ngan Allah, mangku Allah ka ngenjuakka pengertian ngan diau, karnau ngan bilang jemau Allah ngenjuak ngan riang, nidau ngungkit. 1:6 Jemau diau mintak mesti percayau, jangan asau-asau. Jemau diau asau-asau luak umbak laut diau diembus angin ke situ ke sini. 1:7-8 Jemau diau luak itu rupu'annyau nidau tetap ngan nidau keruan tuapau diau endak dikerjaukanyau. Karnau itu diau nidau nanti ngaghapka bulia setu jak di Tuhan. 1:9 Jemau diau serik mesti meghasau riang, amun Allah ninggikanyau. 1:10 Jemau kayau mesti riang pulau, amun Allah nyerikkanyau karnau diau ka abis luak bungau ghumput. 1:11 Matau-aghi tumbua, mangku masau dang angat ghumputtu ka layu, bungaunyau runtuan, alapau abis. Luak itu pulau jemau kayau; diau ka abis, masau dang beusaha. 1:12 Riangla jemau diau ta'an dicubaui, karnau udim diau buasil diujitu, diau ka nerimau upa, itu idup diau la dijanjika Allah ngan jemau diau nyayangi Diau. 1:13 Amun adau jemau diau dicubaui, jangan diau ngiciakka, "Cubauan itu datang jak di Allah." Allah nidau pacak dicubaui diau ja'at ngan nidau pulau ncubaui sughang kiala. 1:14 Tapitu bilang jemau dicubaui ngan serilaunyau sendighi, diau dipikati serilaunyautu. 1:15 Mangku amun serilau diau ja'attu dituruti, nimbul dusau. Mangku amun dusau la buasil, akibatau mati. 1:16 Kantin-kantinku diau kusayangi, jangan kamu tetipu! 1:17 Gegalau enju'an diau iluak ngan diau sempernau datang jak di sergau, dienjuakka Allah diau njadika gegalau terang di langit. Diautu Allah diau nidau beghuba ngan nidau mbuat keleman, karnau nidau njawuhi kitau. 1:18 Nurut kenda'Autula Diau njadika kitau ngan pirmanAu diau benagh. Diau ngerjauka titu, supayau kitau bulia bada diau iluak sekali jak di gegalaunyau diau la dijadikaNyau. 1:19 Ui kantin-kantinku diau kusayangi. Ingatkala iluak-iluak. Bilang jemau mesti cepat ndengagh, tapitu nidau cepat nimbal ngan nidau cepat mara. 1:20 Jemau diau mara nidau pacak ngerjauka setu diau iluak diau melemakka ati Allah. 1:21 Karnau itu capakkala gegalaunyau diau nidau iluak ngan ja'at diau banyak nian. Terimaula ngan riang katau Allah dalam ati kamu, karnau katau itu adau kuasau nyelamatka kamu. 1:22 Kamu mesti ngerjauka katau Allah, jangan cuman ndengagh ajau. Amun nidau luak itu, kamu nipuka diri kamu sendighi. 1:23 Amun jemau cuman ndengagh katau ajau ngan nidau ngerjaukanyau, diautu luak jemau diau ngina'i dayiau diau sebenaghau di cemin. 1:24 Udim dikina'i iluak-iluak, diau pegi ngan nidau teghingat agi dayiau tadi. 1:25 Ukum Allah sempernau, adau kuasau endak nyelamatka manusiau. Jemau diau melajaghi, meratikanyau iluak-iluak ngan ngerjauka ukumtu nian, jemautu ka disayangi Allah, mangku gegalaunyau diau dikerjaukanyau ka buasil, karnau ukan cuman ndengagh ajau, mangku nidau teghingat agi, 1:26 Amun adau jemau diau meghasau diriau ta'at ngan agamaunyau, anyautu nidau njagaui lidahau, diau nipuka diriau. Agamaunyau nidau bediau retiau. 1:27 Keta'atan agamau diau ngenian nurut Allah Bapak, itu nulung jemau anak umang ngan randau diau sengsarau ngan njagaui diri, mangku jangan dirusakka deniau.

Yakubus 2

2:1 Kantin-kantinku diau percayau ngan Yesus Keristus, Tuhan diau agungtu, jangan kamu nginak rupau. 2:2 Misalau adau jemau kayau pakai cincin emas ngan baju alap datang betunggal ngan kamu, mangku adau pulau jemau serik diau pakai baju cebagh galau. 2:3 mangku kamu meregaui jemau diau bebaju alaptu ngan bekiciak ngan diau, "Duduakla di kerusi diau alap ini." Mangku ngan jemau serik tadi kamu bekiciak, "Betegakla di situ." apu "Duduakla di dasagh guak ketingku." 2:4 Ngan carau luak itu kamu la mbidaka di antarau kamu ngan ngengirauka jemau ngan rupu'an diau ja'at. 2:5 Kantin-kantinku diau kusayangi, ingatkala, jemau diau dianggap deniau serik dipilia Allah njadi jemau kayau karnau percayau. Jemautu ka bulia bagian di sergau diau dijanjika Allah ngan jemau diau nyayangiNyau. 2:6 Anyautu kamu nggelakka jemau serik. Awuak jemau kayautula diau nyaraui kamu ngan mbatak kamu ke pengadilan. 2:7 Ughangtula nggelakka namau diau diregaui diau dienjuakka ngan kamu. 2:8 Amun kamu nuruti ukum diau penting ini diau ditulis di Injil, "Sayangila kantin kaba, luak kaba nyayangi diri kaba", kamu ngerjauka setu diau iluak. 2:9 Anyautu amun kamu nginak rupau, kamu bedusau. Ukum Allahtu nyatauka, bansau kamu melanggar ukum. 2:10 Jemau diau melanggar sutiak perinta Allah semegi ngan melanggar gegalaunyau. 2:11 Karnau Diau bekatau, "Jangan menaugawia." Diau pulau bekatau, "Jangan mbunua." Amun kamu nidau menaugawia, tapitu mbunua, kamu pelanggar ukum. 2:12 Ngiciakla ngan kerjaula luak jemau diau diadili nurut ukum Allah diau mbibaska manusiau. 2:13 Karnau Allah nidau ka ngancakka sayangAu ngan jemau diau nidau endak nyayangi. Anyautu kuatla sayang sangkan ukuman. 2:14 Kantin-kantinku, tuapau gunaunyau jemau bekatau, "Aku percayau", anyautu peremba'au nidau nunjuakkanyau? Apu percayau luak itu pacak nyelamatka? 2:15 Misalau sughang kantin kamu diau percayau nidau bediau baju ngan nidau bediau makanan, 2:16 mangku amun sughang jak di kamu ngiciakka ngan diau, "Allah iluak ngan kaba. Pakaila baju tebal ngan makanla", anyautu nidau ngenjuakka ngan diau setu diau ka ngidupkanyau, tuapau gunaunyau? 2:17 Luak itula pulau, amun percayau. Amun nidau dinyatauka di perembak, mangku percayautu nidau bediau gunaunyau. 2:18 Asauku adau diau bekatau, "Kamutu percayau, akuni ngerjauka setu diau iluak." Aku ka nimbal, "Tunjuakkala ngan aku percayau kamutu nidau bediau setu diau iluak, mangku aku ka nunjuakka ngan kaba percayauku ngan kerjauku diau iluak." 2:19 Kamu percayau, bansau Allah gi sughang. Iluak! Iblis pulau percayau titu, mangku diau gemetagh ketakutan. 2:20 Ui, kamu bigal nianan. Apu aku mesti nunjuakka, bansau percayau nidau bediau kerjau diau iluak nidau bediau gunaunyau? 2:21 Ingatka ajau Abraham, niniak puyang kitau. Diau diterimau Allah karnau kerjaunyau, masau diau nyeraka Isak, ana'au, endak dikerbanka ngan Allah. 2:22 Nyela nian, bansau percayau mesti dinyatauka ngan kerjau, mangku ngan kerjau itu percayau njadi sempernau. 2:23 Luak itu ditepati katau Injil ini, "Abraham percayau ngan Allah, mangku diau diterimau njadi jemau benagh." Itula sebapau Abraham dikiciakka "kantin Allah". 2:24 Na, kamu nginak, bansau jemau dibenaghka karnau kerjaunyau, ukan karnau cuman percayau ajau. 2:25 Luak itu pulau Rahab, tinau pelacur itu. Diau diterimau Allah karnau kerjaunyau, masau diau mbunika ajungan itu di ghumahau ngan nulung ughangtu belaghi ke jalan lain. 2:26 Na, luak badan nidau bediau rua mati, luak itu pulau percayau nidau bediau kerjau nidau bediau gunaunyau.

Yakubus 3

3:1 Kantin-kantinku, nidau nanti banyak jak di kamu diau endak njadi guru. Kitau keruan, bansau kitau diau njadi guru ka diadili lebia beghat jak di jemau lain. 3:2 Gegalau kitau rajin bebuat sala. Jemau diau nidau kekela bebuat sala ngan kici'an, diautu sempernau diau pacak nguasaui gegalau diriau. 3:3 Kitau ngenauka buling di idung kebau, mangku diau ngikut kendak kitau, mangku kitau nguasaui gegalau kebau itu. 3:4 Kina'ila pulau kapal. Kapal itu besak nian ngan dibatak angin deghas, anyautu kapaltu dikendalika kemudi diau keciak nian nurut kendak jemau diau ngendalikanyautu. 3:5 Luak itu pulau ngan lida kitau. Empuak lidatu keciak, mangku diau pacak nyumbungka diri ngiciakka setu diau besakbesa'an. Kina'ila pulau api diau keciak, diau pacak nyilap utan diau libagh nian. 3:6 Lida itu luak api. Lidatu nimbulka keja'atan di badan kitau mangku gegalaunyau ja'at. Ngan api diau asalau jak di nerakau lidatu mutungka gegalau idup kitau. 3:7 Bilang mecam benatang belia, benatang njalagh, burung ngan ikan pacak dijinakka manusiau, nyela la dijinakka. 3:8 Anyautu lida manusiau nidau pacak dijinakka sughang kia. Lidatu ja'at, nidau pacak dikuasaui, penua racun diau mbunua. 3:9 Ngan lidatu kitau muji Tuhan, Bapak kitau. Ngan lida kitau pulau ndawaika jemau diau dijadika nurut rupau Allah. 3:10 Jak di mulut diau semegi ngeluagh katau pujian ngan pulau katau dawaian. Semestiau jangan luak itu! 3:11 Apu adau matau-ayiak diau ngeluaghka ayiak biasau ngan ayiak masin jak di matau-ayiak diau semegi? 3:12 Batang aghau nidau pacak ngasilka niugh, batang kupi nidau pacak ngasilka aghau. Luak itu pulau matau-ayiak diau masin nidau pacak ngeluaghka ayiak biasau. 3:13 Amun adau jak di kamu diau bepengertian nian, diau mesti nyataukanyau ngan idup iluak ngan kerjau diau iluak diau dikerjauka ngan pengertian ngan nidau geduak. 3:14 Anyautu amun kamu sengit, purik ngan merupuakka diriau ajau, titu nidau nanti dibanggaka, karnau ngan carau itu kamu ngubai ceritau diau benagh njadi sala. 3:15 Pengertian luak itu ukan asalau jak di sergau. Diau asalau jak di deniau, jak di serilau manusiau, jak di iblis. 3:16 Amun adau diau sengit ngan merupuakka diriau ajau, mangku adau pulau kekacauan ngan gegalau mecam kerjau diau ja'at. 3:17 Anyautu jemau diau adau pengertian jak di sergau, diau penting sekali supayau jemautu tulus, mangku galak bedamai, galak begaul ngan belagham. Diau nyialka jemau nian ngan ngerjauka diau iluak, diau nidau mihak ngan nidau cak iluak. 3:18 Nyela, keilu'an diasilka jak di damai jak di jemau diau galak damai.

Yakubus 4

4:1 Jak di manau asalau gegalau belagau ngan bebala? Apu ukan asalau jak di serilau kamu diau maju bekerjau di kamu? 4:2 Kamu adau setu enda'au, anyautu nidau dapat, mangku kamu sengit endak mbunua. Kamu ncubau, anyautu nidau dapat setu diau kamu enda'au, mangku kamu bebala ngan belagau. Kamu nidau dapat tuapau-apau, karnau kamu nidau mintak ngan Allah. 4:3 Mangku amun kamu bedu'a, kamu nidau ka dapat, karnau du'a kamu sala. Setu diau kamu pintaktu batan endak serilau kamu itula. 4:4 Ui, kamu jemau diau nidau ta'at! Apu kamu nidau keruan, amun bekantin ngan deniau, njadi musua Allah? Jemau diau bekantin ngan deniau bemusuan ngan Allah. 4:5 Jangan kamu sangkau, setu diau ditulis di Injil ca'au ajau, "Rua diau dienjuakka Allah ngan kitau dikenda'iNyau ngan sengit!" 4:6 Empuak luak itu besakla sayang Allah ngan kitau. Itula sebapau di Injil ditulis, "Allah melawan jemau diau geduak, tapitu nyialka jemau diau ngensian." 4:7 Karnau itu tunduakla ngan Allah ngan lawanla Iblis, mangku diau ka larat jak di guak kamu. 4:8 Pasighila Allah, mangku Allah masighi kamu. Beresiakala tangan kamu, ui, kamu diau bedusau! Beresiakala rupu'an kamu diau nidau tetap. 4:9 Kamu mesti nyesal nian ngan nangis berandaian. Tetawau kamu gentila ngan nangis. Riang kamu gentila ngan bingung. 4:10 Ngensianla di adapan Tuhan, mangku Diau ka ninggika kamu. 4:11 Kantin-kantinku, jangan kamu sangi buruakka ngan sangi salaka. Jemau diau mburuakka ngan nyalaka kantinau, diau mburuakka ngan nyalaka ukum Allah. Amun kamu nyalaka ukum Allah, kamu nidau na'ati ukumtu, tapitu kamu njadi akimau. 4:12 Cuman sughang diau behak netapka ukum ngan ngadili manusiau. Itula Allah diau bekuasau nyelamatka ngan mbenasauka. Anyautu sapau kamu, mangku kamu endak nyalaka kantin kamu? 4:13 Dengaghkala katauku ini, ui kamu diau bekiciak, "Saghini apu pagi kami ka pegi ke kuta anu. Kami endak mendam di situ setaun endak bedagang ngan ndalak tanci." 4:14 Kamu nidau keruan, tuapau diau ka tejadi ngan kamu pagi. Tuapau reti idup kamu? Kamu semegi luak embun. Diau kina'an jerang ajau mangku lengit. 4:15 Semestiau kamu bekatau, "Amun Tuhan ngenda'inyau, kami gi idup ngan ngerjauka itu-ini." 4:16 Anyautu mbak kini kamu geduak ngan kiciak besak. Gegalau kici'an luak itu sala. 4:17 Karnau itu jemau diau keruan setu diau iluak diau mesti dikerjaukanyau, anyautu nidau ngerjaukanyau, jemautu bedusau.

Yakubus 5

5:1 Ui kamu, jemau kayau, dengaghkala katauku ini! Kamu mesti nangis berandaian, karnau kamu ka sengsarau. 5:2 Kekayauan kamu la busuak ngan pekakas kamu la dimakan gegat. 5:3 Emas ngan pirak kamu la bekarat. Karattu ka nyalaka kamu, ka makan badan kamu luak api. Kamu la melungguakka retau bendau masau pengabisan ini. 5:4 Kamu nidau mbayighi upa jemau diau bekerjau di sawa kamu. Mbak kini dengaghkala sempitan jemau diau ngetam di sawa kamu. Ughangtu mintak tulung, mangku tangisan ughangtu la sampai ngan Allah, Tuhan diau Mahakuasau. 5:5 Kamu la idup miwa ngan bereruyalan di deniau ini. Kamu luak dang mbunguakka kamu batan endak aghi penyembelian. 5:6 Kamu ngukum ngan mbunua jemau diau nidau besala. Ughangtu nidau melawan kamu. 5:7 Karnau itu, ngalighla, enggut Tuhan datang. Kina'ila jemau tani. Ngan ngaligh diau nantika asil diau beregau jak di umaunyau. Ngan ngaligh diau nantika pangkau ujan. 5:8 Kamu mesti ngaligh pulau ngan neguaka ati kamu, karnau Tuhan laka datang. 5:9 Jangan kamu bemumut ngan sangi salaka, mangku kamu nidau diukum. Ingatkala, akim diau ngadili kitau laka datang. 5:10 Ingatkala nabi diau ngiciak dalam namau Tuhan. Ughangtu ngaligh ngan ta'an sengsarau. Penaula ughangtu. 5:11 Ughangtu dikiciakka jemau riang, karnau ughangtu beta'an. Kamu la ndengagh kengalighan Ayub ngan la keruan setu diau ahirau dienjuakka Tuhan ngan diau, karnau Tuhan penyayang ngan iluak atiAu. 5:12 Diau penting sekali, jangan kamu besumpa, empuak demi sergau empuak demi deniau empuak demi tuapau kila. Kiciakka ajau "nyela", amun nyela, ngan "nidau", amun nidau, mangku kamu jangan diukum. 5:13 Amun adau jak di kamu diau sengsarau, diau mesti bedu'a. Amun adau diau riang, diau mesti benyanyi ngagungka Allah. 5:14 Amun adau diau buidapan, diau mesti mantau pengulu-pengulu jemau Keristen. Mangku ughangtu ndu'aka jemau buidapantu ngan nggusu'i diau ngan minyak dalam namau Tuhan. 5:15 Bedu'a ngan Tuhan ngan percayau, mangku jemau buidapantu ka ghadu. Tuhan ka meghadukanyau, mangku amun diau la bedusau, dusaunyau ka diabiska. 5:16 Karnau itu kamu mesti sangi aku'i sala ngan sangi du'aka, mangku kamu ghadu. Du'a jemau diau benagh, amun didu'aka ngan yakin adau kuasau diau besak. 5:17 Elia manusiau biasau luak kitau. Diau bedu'a ngan ngenian, supayau nidau ujan. Mangku nidau nian ujan di nenggeriau selamau tenga empat taun. 5:18 Udim itu diau bedu'a agi, mangku adau ujan mangku umau buasil. 5:19 Kantin-kantinku, amun adau jak di kamu diau nidau agi ngikuti ajaghan Allah, mangku adau sughang diau mbuat jemau tadi ngulang ngan Allah, 5:20 ingatkala, jemau diau mbuat jemau bedusau ngelipat jak di jalanau diau sesat, jemautu nyelamatka jemau diau bedusautu jak di kematian, mangku banyak dusau diabiska.

1 Pitrus 1

1:1 Jak di aku, Pitrus, rasul Yesus Keristus, batan endak jemau diau dipilia dijadika umat Allah diau tesebar di rantauan di daira Puntus, Galatia, Kapadukia, Asia ngan Bitinia. 1:2 Kamu dipilia luak diau la direncanauka Allah Bapak. Kamu la diberesiaka Rua Allah, supayau kamu idup ta'at ngan Yesus Keristus ngan dibasua ngan daghaHau. Aku bedu'a, supayau Allah iluak nianan ngan kamu, maju ngenjuakka damai. 1:3 Mela kitau beterimau-kasia ngan Allah, Bapak Tuhan kitau Yesus Keristus! Diau nyayangi kitau nian. Karnau itu Diau ngenjuakka ngan kitau idup diau empai ngan carau ngidupka Yesus Keristus jak di mati, mangku kitau adau aghapan diau tetap. 1:4 Mangku kitau ngaghapka bulia bagian diau disediauka Allah batan endak umatAu. Bagiantu diimpani di sergau, mangku nidau pacak ghemas, busuak ngan luntur. 1:5 Gegalaunyautu batan endak kamu, karnau kamu percayau ngan Allah, mangku kamu dijagaui kuasau Allah, supayau kamu nerimau keselamatan diau dinyatauka masau pengabisan saman. 1:6 Itula sebapau kamu mesti riang, empuak mbak kini kamu madak karnau banyak cubauan. 1:7 Tujuan gegalaunyautu endak nguji iman kamu. Emas diau pacak ghemas diuji pulau ngan api. Beregaula iman kamu sangkan emas, mangku imantu mesti diuji pulau, supayau njadi tegua. Mangku kamu ka dipuji, diregaui ngan diagungka, amun Yesus Keristus datang agi. 1:8 Empuak kamu nidau kekela ngina'Au, kamu nyayangiNyau. Empuak mbak kini pulau kamu nidau ngina'Au, kamu percayau ngan Diau. Mangku kamu riang ngan injiak nianan, nidau pacak dikiciakka agi. 1:9 Kamu riang, karnau tujuan iman kamu la tecapai, titu keselamatan jiwa kamu. 1:10 Keselamatan itula diau endak dikeruani nabi-nabi neghagi nianan. Ughangtu la ngiciakka keilu'an diau dienjuakka Allah ngan kamu. 1:11 Ughangtu endak ngeruani, kebilau ngan luak manau titu ka tejadi diau dikiciakka Rua Keristus diau adau dalam ughangtu. Rua itu la ngiciakka sebelumau gegalau penanggungan diau mesti dighasauka Keristus ngan keagunganNyau diau ka dienjuakka ngan Diau udim itu. 1:12 Ngan nabi-nabi itu la dikiciakka, bansau setu diau ughangtu kerjauka ukan batan endak kepentingan ughangtula, tapitu batan endak kamu. Setu diau kamu dengagh mbak kini jak di jemau diau ngiciakka ceritau iluak nceritauka Yesus Keristus. Ughangtu ngiciakka itu ngan kamu ngan kuasau Rua Allah diau dienjuakka jak di sergau. Malaikat-malaikat pulau endak ngeruani ceritau diau dikiciakka ughangtu. 1:13 Karnau itu kamu mesti rupuakka kudai setu diau endak dikerjauka. Sepepadaula ngan aghapkala nian setu diau ka dienjuakka ngan kamu, masau Yesus Keristus datang nanti. 1:14 Kamu la ta'at ngan Allah, mangku jangan nuruti serilau kamu senitu, luak masau kamu lum keruan Allah. 1:15 Anyautu gegalaunyau diau kamu kerjauka mesti suci, luak Allah diau milia kamutu suci. 1:16 Karnau di Injil ditulis, "Kamu mesti suci, karnau Aku suci." 1:17 Amun kamu bedu'a, kamu ngiciakka Allah itu Bapak. Allah ngukum gegalau jemau nurut peremba'au sesughangan, nidau milia rupau. Mangku kamu mesti meregaui Diau, selamau kamu gi adau di deniau ini. 1:18 Kamu keruan, bansau kamu la ditebus jak di idup diau nidau begunau diau kamu bulia jak di niniak puyang kamu. Bayighan batan endak kamu ukan emas ngan pirak diau pacak lengit regaunyau, 1:19 tapitu dagha Keristus itula diau besak nian regaunyau. Diautu njadi luak anak bebiri diau nidau bediau cacat ngan nidau bediau salahau diau dikerbanka ngan Allah. 1:20 Keristustu la dipilia antak ka deniau dijadika. Mangku masau pengabisan ini Diau datang ke deniau batan endak kamu. 1:21 Karnau Diau kamu percayau ngan Allah diau la ngidupkaNyau jak di mati ngan ngagungkaNyau, mangku kamu percayau ngan ngaghapka Allah itula. 1:22 Karnau kamu la ta'at ngan Allah, kamu la mbasua diri kamu, mangku pacak nyayangi jemau percayau ngenian. Karnau itu kamu mesti sangi sayangi nian. 1:23 Karnau katau Allah diau idup selelamaunyau kamu la dijadika manusiau empai diau adau ukan karnau manusiau diau ka mati, tapitu karnau Bapak diau selelamaunyau. 1:24 Karnau di Injil ditulis luak ini, "Gegalau manusiau luak ghumput. Gegalau keagungannyau luak bungau ghumput. Ghumputtu layu, bungaunyau runtua; 1:25 anyautu katau Allah tetap selelamaunyau." Katau itu ceritau iluak diau la dikiciakka ngan kamu.

1 Pitrus 2

2:1 Karnau itu capakkala jak di kamu gegalaunyau diau ja'at. Jangan agi mbu'ung, jangan cak iluak, jangan sengit, jangan ngupatka jemau. 2:2 Luak kupiak diau empai adau maju endak minum, kamu pulau mesti maju aus ngan katau Tuhan diau asli. Ngan carau luak itu kamu ka tumbua ngan diselamatka. 2:3 Luak ditulis di Injil, "Kamu la meghasauka Tuhan itu iluak nian." 2:4 Datangla njenguak Tuhan. Diau umpamau batu idup diau dicapakka manusiau, karnau dianggap nidau begati. Anyautu Diautu dipilia Allah, mangku nyatau Diau batu diau beregau. 2:5 Kamu umpamau batu-batu diau idup. Karnau itu enangka kamu dipakai batan endak negakka ghuma Allah diau ruhani. Ngan carau luak itu kamu njadi imam-imam diau idup beresia batan endak Allah, mangku ngerbanka ngan Allah kerban diau ruhani diau melemakka ati Allah karnau Keristus. 2:6 Karnau di Injil ditulis, "Aku la milia sebua batu diau beregau diau Kutepiakka di Siun njadi batu pelapiak. Mangku jemau diau percayau ngan Diau nidau ka dimaluka." 2:7 Batu itu beregau nian batan endak kamu diau percayau. Anyautu batan endak jemau diau nidau percayau katau Injil ini benagh, "Batu diau la dicapakka tukang negakka ghuma, la njadi batu pelapiak." 2:8 Ngan pulau, "Itula batu diau mbuat jemau tuantuak, batu diau mbuat jemau telabua." Ughangtu tuantuak, karnau nidau ta'at ngan kici'an Allah. Luak itula ditetapka Allah batan endak ughangtu. 2:9 Anyautu kamunila bangsau diau dipilia, imam-imam diau kerjau batan endak rajau, bangsau diau idup beresia batan endak Allah, umat Allah itula. Allah milia kamu ngan mantau kamu ngeluagh jak di keleman endak masuak terangAu diau besinagh-sinagh, supayau kamu ngiciakka kerjauNyau diau nyeliatu. 2:10 Senitu kamu ukan umat Allah, mbak kini kamu la njadi umat Allah. Senitu kamu nidau disialka Allah, mbak kini kamu la disayangiNyau. 2:11 Kantin-kantinku diau kusayangi. Kamu jemau pendatang ngan perantau di deniau ini. Karnau itu aku mintak nian, supayau kamu jangan nuruti serilau manusiau diau maju beperang melawan rua. 2:12 Carau idup kamu di guak jemau diau nidau keruan Allah mesti iluak nian. Mangku amun ughangtu ngiciakka kamu jemau ja'at, ughangtu maju nginak perembak kamu diau iluaktu, mangku ughangtu ka muji Allah masau Tuhan datang. 2:13 Demi Tuhan tunduakla ngan gegalau penguasau manusiau, empuak ngan rajau diau besak sekali kuasaunyau, 2:14 empuak ngan gubernur ngan jemau diau ditetapka rajautu endak ngukum jemau ja'at ngan meregaui jemau diau beperembak iluak. 2:15 Karnau Allah endak, supayau ngan perembak kamu diau iluak 2:16 Idupla luak jemau bibas. Jangan makai kebibasan kamutu batan endak nukupi keja'atan. Anyautu idupla luak budak Allah. 2:17 Regauila gegalau jemau, sayangila kantin-kantin kamu diau percayau, takutla ngan Allah, regauila rajau! 2:18 Kamu diau njadi budak, tunduakla ngan tuan kamu ngan meregaui diau nian, ukan ajau diau iluak ngan mura bekantin, tapitu pulau diau kejam. 2:19 Amun kamu nanggung ngan ngaligh dibuati nidau adil karnau ngerti kendak Tuhan, Allah ka iluak ngan kamu. 2:20 Apu kamu dipuji, amun kamu nanggungka ukuman diau semestiau kamu tanggung karnau besala? Anyautu amun kamu nanggung karnau kerjau diau iluak, mangku Allah ka iluak ngan kamu. 2:21 Batan endak itula kamu la dipilia Allah, karnau Keristus la sengsarau batan endak kamu mangku njadi penauan batan endak kamu, supayau kamu ngikut carauNyau. 2:22 Diau nidau kekela mbuat dusau ngan nidau sughang kia ndengagh Diau mbu'ung. 2:23 Masau Diau digelakka ngan ditulak, Diau nidau mbalas. Masau Diau nanggung, Diau nidau ndendam, tapitu Diau nyeraka pekarauNyau ngan Allah, akim diau adil. 2:24 Keristus itula diau nanggungka dusau kitau di kayu salip, supayau kitau bibas jak di kuasau dusau mangku idup nurut kendak Allah. Kamu la ghadu karnau lukau Keristustu. 2:25 Senitu kamu luak bebiri diau sesat. Mbak kini kamu la ngulang ngikut tukang sayia diau njagaui jiwa kamu.

1 Pitrus 3

3:1 Luak itu pulau kamu diau njadi bini, kamu mesti tunduak ngan laki kamu, supayau amun adau diau nidau percayau ngan ceritau jak di Allah, kerjau kamu pacak mbuat diau percayau, nidau nanti ngiciak tuapau-apau, 3:2 karnau diau nginak kerjau kamu diau beresia ngan alim nian. 3:3 Jangan kualapan kamu di luagh ajau ngan carau kamu meriasi gumbak ngan makai periasan emas ngan bebaju alap-alap. 3:4 Anyautu kualapan kamu semestiau nimbul jak di ati ngan carau diau iluak ngan tenang. Itu kualapan diau tetap diau beregau nian di adapan Allah. 3:5 Ngan carau luak itula tinau-tinau senitu diau buagamau ngan ngaghapka Allah meriasi diriau ngan carau tunduak ngan lakiau. 3:6 Sara pulau luak itu. Diau ta'at ngan Abraham ngan ngiciakka diau tuanau. Kamu mbak kini anak-anak Sara, amun kamu ngerjauka setu diau iluak ngan nidau penakut. 3:7 Mangku kamu pulau diau njadi laki, kamu semestiau idup ngan bini kamu ngan jagau, bansau diautu jemau nidau kuat. Regauila diau, karnau diau pulau luak kamu ka dienjuakka Allah idup selelamaunyau. Kerjaukala itu, mangku nidau bediau diau ngalangi du'a kamu. 3:8 Mangku kamu mesti suijauan ngan semegi peghasauan. Sangi sayangila kamu luak jemau duau beghading, mangku sangi sialka kamu ngan jangan sangi gedu'i. 3:9 Jangan mbalas setu diau ja'at ngan ja'at, apu maki ngan maki. Anyautu balaskala ngan mintak setu diau iluak jak di Allah. Karnau batan endak itula kamu dipilia Allah, supayau kamu nerimau setu diau iluak jak di Diau. 3:10 Karnau di Injil ditulis luak ini, "Jemau diau endak meghasauka idup diau lemak ngan meghasauka masau diau iluak, jemautu jangan ngiciak setu diau ja'at ngan jangan ngiciak setu diau mbu'ung. 3:11 Jemautu mesti njawuhi setu diau ja'at ngan ngerjauka setu diau iluak. Jemautu mesti beusaha nian endak idup ngan damai. 3:12 Karnau Tuhan maju njagaui jemau diau nuruti kenda'Au. Tuhan maju ndengagh du'a ughangtu. Anyautu Tuhan maju melawan jemau diau ngerjauka setu diau ja'at." 3:13 Sapau diau endak mbuat ja'at ngan kamu, amun kamu maju mbuat diau iluak? 3:14 Anyautu amun nyela kamu sengsarau karnau ngerjauka setu diau iluak, riangla kamu. Jangan kamu takut ngan sapau kila, jangan ghegak. 3:15 Dalam ati kamu regauila Keristus, karnau Diau Tuhan. Mangku kamu mesti maju siap-siagau nimbali jemau diau betanyau nanyauka aghapan diau adau di kamu. 3:16 Kerjaukala titu ngan iluak ngan meregaui pendapat jemau. Ati keciak kamu mesti beresia, mangku amun kamu dikiciakka ja'at ikak ngerjauka diau iluak karnau percayau ngan Keristus, mangku jemau diau ngiciakka setu diau ja'attu ka maluan nian. 3:17 Amun nyela kendak Allah kamu nanggung, iluakla nanggung karnau kerjau iluak sangkan nanggung karnau kerjau ja'at. 3:18 Keristustu mati sekali batan endak dusau manusiau, jemau diau nidau besala batan endak jemau besala. Keristus ngerjauka titu, supayau Diau pacak mbimbing kamu njenguak Allah. Diautu la dibunua masau njadi manusiau, tapitu la diidupka agi nurut rua. 3:19 Dalam ruatu Diau pegi ngiciakka ceritau jak di Allah ngan rua-rua diau di kawalan, 3:20 diautu rua jemau diau nidau ta'at ngan Allah timpau Nua. Masau itu Allah nunggu ngan ngaligh, masau Nua mbuat kapalau. Cuman jemau diau adau di kapaltu, gegalaunyau delapan ughang, diau diilakka karnau ayiak merampus. 3:21 Gegalaunyautu umpamau baptisan diau mbak kini nyelamatka kamu. Baptisantu ukan batan endak mberesiaka badan jak di gegalaunyau diau kumua, anyautu njadi janji ngan Allah jak di ati keciak diau iluak. Baptisantu nyelamatka kamu, karnau Yesus Keristus la idup jak di mati 3:22 ngan la nayiak ke sergau. Mbak kini Diau duduak di sebela kanan Allah ngan merinta gegalau malaikat ngan penguasau ngan rua.

1 Pitrus 4

4:1 Keristus sengsarau di kayu salip. Karnau itu kamu pulau mesti berupuak luak Diau, karnau jemau diau sengsarau di deniauni nidau endak agi ngerjauka dusau. 4:2 Mangku mulai mbak kini selamau gi adau di deniau idupla nurut kendak Allah, jangan agi nurut serilau manusiau. 4:3 Senitu kamu pulau maju ngerjauka setu diau dikerjauka jemau diau nidau keruan Allah. Kamu nuruti serilau diau nidau senangaian, memabu'an, bereruyalan, nyemba diwau ngan carau diau meghegingka. 4:4 Mbak kini jemau diau nidau keruan Allah kemangan ngan kamu, karnau kamu nidau agi ngikut carau ughangtu idup luak anjing, mangku kamu digelakka. 4:5 Ughangtu nanti mesti nanggung-jawabka kerjau ughangtu ngan Allah diau la nunggu endak ngadili jemau diau idup ngan diau mati. 4:6 Itula sebapau ceritau iluaktu la dikiciakka pulau ngan jemau mati, mangku jemau diau la meghasauka mati, luak gegalau manusiau ka mati, bulia idup dalam rua semegi ngan Allah. 4:7 Gegalaunyau laka bekesudiman. Karnau itu kamu mesti nguasaui diri kamu ngan sepepadau, supayau kamu pacak bedu'a. 4:8 Diau penting sekali, kamu mesti sangi sayangi nian, karnau amun kamu sangi sayangi, kamu sukau pulau sangi ma'apka. 4:9 Sangi terimaula kamu di ghuma sesughangan ngan nidau bemumut. 4:10 Bilang kamu la bulia pengenjuak diau bebida jak di Allah, mangku jadila pengurus pengenjuak Allahtu diau iluak ngan makaiau endak nulungi jemau. 4:11 Jemau diau beketuba mesti ngiciakka katau Allah. Jemau diau nulungi jemau mesti ngerjaukanyau ngan kekuatan jak di Allah, mangku Allah maju diregaui karnau Yesus Keristus. KuasauNyau ngan keagunganNyau nidau ka udim-udim selelamaunyau. Nyela nian. 4:12 Kantin-kantinku diau kusayangi. Mbak kini kamu banyak penanggungan ikak diuji. Nidau nanti kemangan, karnau setu diau tejadi di kamu nidau sebeghapau. 4:13 Anyautu kamu mesti riang, karnau kamu ngikut sengsarau ngan Keristus. Mangku kamu pulau ngikut riang nian, amun keagunganNyau diancakka nanti. 4:14 Mujurla kamu, amun digelakka mbak kini karnau percayau ngan Keristus. Titu ngancakka, bansau Rua diau bekuasau, diautu Rua Allah, adau di kamu. 4:15 Jangan sughang kia jak di kamu nanggung karnau mbunua, maling, ja'at ngan ncampuri urusan jemau. 4:16 Anyautu amun kamu sengsarau karnau Keristus, nidau nanti maluan. Pujila Allah, karnau kamu dikiciakka jemau Keristen. 4:17 La sampai masaunyau Allah ngadili deniau. Umat Allah itula diau dulu sekali diadili. Amun kitau dulu diadili, luak manau jadiau nanti ngan jemau diau nidau percayau ngan ceritau iluak jak di Allah itu? 4:18 Di Injil ditulis luak ini, "Amun jemau diau benagh segau diselamatka, tuapau pulau diau ka tejadi ngan jemau bedusau diau nidau keruan Allah!" 4:19 Itula sebapau amun adau jemau diau sengsarau karnau Allah ngenda'i luak itu, jemau itu mesti maju ngerjauka diau iluak, mangku nyeraka diriau ngan Allah diau njadikanyau. Diau cetau nepati janjiAu.

1 Pitrus 5

5:1 Aku mintak pengulu-pengulu jemau Keristen peratikala. Karnau aku sughang pengulu pulau ngan la nginak Keristus sengsarau ngan ngikut diagungka, amun keagungan Keristus dinyatauka nanti, mangku aku mintak nian, 5:2 supayau kamu nyayia jemau Keristen diau di kamu luak rumbungan bebiri diau diseraka Allah ngan kamu. Sayiala ughangtu ngan riang, luak dikenda'i Allah. Jangan bemumut, jangan pulau karnau ndalak untung, tapitu karnau endak nian bekerjau batan endak Allah. 5:3 Jangan pulau nguasaui jemau diau dipercayauka ngan kamu. Anyautu jadila penauan batan endak ughangtu. 5:4 Mangku amun Keristus, tukang sayia bebiri diau agungtu, datang nanti, kamu ka nerimau adia menang diau alap nianan diau nidau ka beghuba. 5:5 Luak itu pulau kamu diau gi mudau, tunduakla ngan jemau tuau, mangku gegalau kamu sangi tulungila ngan nganggap jemau lain lebia penting. Karnau di Injil ditulis luak ini, "Allah melawan jemau geduak, tapitu nyayangi jemau ngensian." 5:6 Karnau itu, tunduakla ngan Allah diau bekuasau, mangku Diau ka ninggika kamu, amun la masaunyau. 5:7 Serakala gegalau keghega'an ngan Allah, karnau Diau njagaui kamu. 5:8 Sepepadaula ngan maju siap-siagau, karnau Iblis musua kamu. Diau luak setuau bejalan ghatau sampai ngaum endak ndalak mangsaunyau. 5:9 Lawanla diau ngan percayau nian ngan Keristus, karnau kamu keruan kantin kamu diau percayau di gegalau deniau sengsarau semegi ngan kamu. 5:10 Udim kamu sengsarau jerang, mangku Allah ka ndandani kamu. Diau ka ngenjuakka pelapiak diau kuat ngan neguaka ati kamu, karnau Allahtu iluak. Diautu la milia kamu endak seghundak ngan Keristus, mangku kamu meghasauka keagunganNyau diau nidau ka udim-udim. 5:11 Diautula bekuasau selelamaunyau. Amin. 5:12 Silas, kantinku diau pacak dipercayaui nulung aku nulis surat diau dikit ini. Aku endak neguaka ngan yakinka kamu, bansau gegalaunyau ini ngenian ceritau keilu'an Allah. Bepautla nian ngan pesan ini. 5:13 Kantin-kantin kitau di Babilun diau pulau dipilia Allah bepesan ngan kamu. Luak itu pulau Markus diau luak anakku. 5:14 Sangi bepesanla sughang ngan diau lain ngan sayang jak di Keristus. Aku bedu'a, supayau Tuhan njagaui gegalau kamu diau la seghundak ngan Keristus. Amin.

2 Pitrus 1

1:1 Jak di Simun Pitrus, budak ngan rasul Yesus Keristus, batan endak jemau diau percayau semegi luak kami, karnau la dibenaghka Allah ngan Yesus Keristus, Rajau Penyelamat kitau. 1:2 Aku bedu'a, supayau Allah iluak nian ngan kamu ngan maju ngenjuakka damai, mangku kamu maju tamba keruan Allah ngan Yesus, Tuhan kitau. 1:3 Allah la makai kuasauNyau endak ngenjuakka ngan kitau gegalaunyau diau kitau enda'au, mangku pacak idup alim. Titu dikerjaukaNyau, karnau kitau keruan Keristus diau la milia kitau endak ngikut meghasauka keilu'an ngan keagunganNyau. 1:4 Ngan carau luak itula kitau la nerimau janji diau iluak ngan beregau diau la dijanjikaNyau, mangku kamu pacak bibas jak di serilau diau ja'at diau mbenasauka deniau, mangku kamu ngikut meghasauka sipat Allah. 1:5 Karnau itu kamu beusahala nian, supayau kamu maju percayau ngan Keristus. Mangku percayau kamu ditamba ngan kerjau diau iluak. Kerjau diau iluak ditamba ngan ngeruani kendak Allah. 1:6 Ngeruani kendak Allah ditamba ngan nguasaui diri. Nguasaui diri ditamba ngan tekun. Tekun ditamba ngan ta'at ngan Allah. 1:7 Ta'at ngan Allah ditamba ngan sayang ngan kantin diau suagamau. Sayang ngan kantin kamu ditamba ngan sayang ngan gegalau jemau. 1:8 Amun gegalaunyautu adau galau di kamu, kamu nidau ka malas, mangku buasil ngan tamba ngeruani Tuhan kitau Yesus Keristus. 1:9 Anyautu jemau diau nidau bediau gegalaunyautu diau luak jemau butau, nidau banyak ngerti. Diau nidau teghingat agi, bansau dusaunyau diau senitu la diabiska. 1:10 Karnau itu, kantin-kantinku, beusahala nian, supayau pilian Allah di kamu tamba tegua. Amun kamu ngerjauka titu, kamu nidau ka ngelipat. 1:11 Mangku kamu ka dienju'i nian hak masuak sergau, itu kerajauan diau selelamaunyau jak di Tuhan ngan Rajau Penyelamat kitau Yesus Keristus. 1:12 Karnau itu aku maju ngingatka gegalaunyautu ngan kamu, empuak kamu la ngeruaninyau ngan percayau nian ngan ceritau jak di Allah diau la kamu terimautu. 1:13 Semasau aku gi idup, aku meghasau pantas ngingatka gegalaunyautu ngan kamu. 1:14 Karnau aku keruan, bansau nidau ka lamau agi aku ka ninggalka deniauni. Tuhan kitau Yesus Keristus la ngiciakkanyau nian ngan aku. 1:15 Mangku aku beusaha, supayau amun aku la mati, kamu maju ngingatka gegalaunyautu. 1:16 Masau kami ngiciakka ngan kamu kuasau ngan keagungan Tuhan kitau Yesus Keristus diau ka datangtu, kami nidau nceritauka andai-andai manusiau. Keagungan Keristus itula diau la kami kinak nian ngan matau kaminila. 1:17 Kami adau di situ, masau Diau diregaui ngan diagungka Allah Bapak. Masau itu adau suarau jak di Allah diau Mahaagungtu ngiciakka, "Inila AnakKu diau Kusayangi diau melemakka atiKu." 1:18 Kami inila ndengagh suarau itu ngiciak jak di sergau, masau kami adau seghundak ngan Diau di pucuak bukit Allahtu. 1:19 Itula sebapau kami tamba percayau nian ngan katau Allah diau la diceritauka nabi. Alaka ilu'au, amun kamu meratika katau itu, karnau katautu luak lampu diau besinagh di bada diau keleman enggut aghi siang ngan luak bintang timur besinagh dalam ati kamu. 1:20 Diau penting sekali ingatkala nian ini: Katau Allah diau ditulis nabi-nabi dalam Injil nidau bulia diretika nurut pendapat manusiau, 1:21 karnau nidau kekela nabi ngiciakka titu ngan kenda'au sendighi. Anyautu ughangtu dikuasaui Rua Allah mangku ngiciakka katau jak di Allah.

2 Pitrus 2

2:1 Masau baghini la adau cak nabi di guak umat Allah. Luak itu pulau di guak kamu ka adau guru diau nyesatka. Ughangtu ka ngajaghka ajaghan diau nidau benagh diau mbenasauka jemau. Ughangtu nidau ngaku'i penguasau diau la nebus ughangtu. Ngan carau luak itu ughangtu sala sendighi, sangkan cepat diukum. 2:2 Banyak jemau ka ngikuti carau idup ughangtu diau dikuasaui serilaunyau. Mangku ikak kerjau ughangtu banyak jemau ka nggelakka jalan diau benagh. 2:3 Ughangtu selak, mangku ughangtu ndalak untung jak di kamu ngan ngiciakka ceritau mbu'ung. Anyautu ukuman ughangtu la lamau ditetapka. Ughangtu ka cepat diukum mangku benasau. 2:4 Malaikat diau bedusau nidau dienangka Allah bibas jak di ukuman, dicapakka ke nerakau. Malaikattu dimasuakka ke tebuak tana diau keleman endak dita'an di situ enggut masau pengukuman. 2:5 Luak itu pulau deniau timpau senitu nidau Allah enangka bibas jak di ukuman. Allah mbuat ayiak merampus di deniau, mangku jemau diau ja'at mati galau. Cuman Nua delapan beghanak diselamatka, karnau Nua ngiciakka ceritau diau benagh. 2:6 Luak itu pulau ngan kuta Sudum ngan Gumura. Allah mbenasauka kuta itu ngan api, mangku njadi peringatan batan endak jemau ja'at di masau la udim itu. 2:7 Anyautu Lut diselamatkaNyau, karnau diau jemau benagh. Luttu nanggung nian nginak perembak jemau diau nidau senangaian, nidau endak keruan ukum, tapitu ngikut serilaunyau ajau. 2:8 Lut mendam di guak jemau luak itu. Idang aghi diau nginak ngan ndengagh perembak jemau diau ja'attu, mangku atiau diau benaghtu meghasau sengsarau. 2:9 Tuhan pacak nyelamatka jemau diau benagh, amun adau pencubauan. Diau pacak pulau na'an jemau diau ja'at endak disiksau di aghi pengadilan nanti, 2:10 terutamau jemau diau nuruti serilaunyau diau nidau senangaian ngan nggelakka kuasau Allah. Ughangtu geduak ngan beghani nian mangku nidau takut nggelakka malaikat diau agung di sergau. 2:11 Bekuasaula malaikattu sangkan guru diau ja'attu. Empuak luak itu, malaikat nidau mburuakka ughangtu ngan katau nggelakka di adapan Allah. 2:12 Anyautu guru tadi luak benatang diau cuman idup endak ditangkap ngan dibunua. Ughangtu nidau berupuak, cuman ngikut serilaunyau ajau. Ughangtu nggelakka setu diau nidau dikeruaninyau, mangku ikak peremba'au diau ja'attu ughangtu ka benasau luak benatang ganas. 2:13 Ughangtu ka sengsarau karnau upa keja'atan. Ughangtu ngerjauka tuapau kila diau melemakka atiau, dikerjauka aghi siang endak nuruti serilaunyau ajau. Amun ughangtu duduak ngan kamu di jamuan, ughangtu maluka karnau mabuak ngan serilau. 2:14 Ughangtu dikuasaui serilau menaugawia, nidau kekela puas mbuat dusau. Ughangtu mikati jemau diau nidau tegua percayau. Ughangtu la tebasi selak. Ughangtu jemau meghakau! 2:15 Ughangtu enggup ngikut jalan diau benagh, mangku ughangtu sesat. Ughangtu milia jalan diau diturut Biliam ngan Biur senitu diau galak nerimau upa jak di kerjau diau ja'at. 2:16 Anyautu Biliamtu ditegughi nian jak di keja'atannyautu, masau keledaiau diau bisu ngiciak ngan suarau manusiau. Mangku nabitu tepasau mandak jak di kerjaunyau diau bigaltu. 2:17 Guru ja'attu luak matau-ayiak diau keghing, luak aban diau ditiup angin nyaghu. Allah la nyediauka bada diau keleman nian batan endak ughangtu. 2:18 Ughangtu muji diriau ngan kici'an bigal. Ngan serilau diau nidau senangaian ughangtu mikati jemau diau empai bibas jak di guak jemau diau idupau sesat. 2:19 Guru tadi njanjika kebibasan ngan jemau, awuak ughang itula dibudakka kerjau diau merusakka manusiau, karnau amun jemau dikalaka, mangku diau njadi budak setu diau ngalakanyautu. 2:20 Amun sughang jemau la keruan Tuhan ngan Rajau Penyelamat kitau Yesus Keristus, diau la bibas jak di kuasau deniau diau merusakka manusiau. Anyautu amun diau ngulang agi dikuasauinyau, mangku diau tamba pansan agi jak di senitu. 2:21 Iluakla jemau itu, amun nidau kekela keruan jalan diau benagh sangkan ngeruaninyau ngan nidau nuruti perinta Allah diau dienjuakka ngan diau. 2:22 Kerjau ughangtu luak diau dikiciakka dalam pantun ini, "Anjing ka makan agi setu diau dimuntakanyau. Kaput diau la dimandika ka ngulang agi bekubang di licak."

2 Pitrus 3

3:1 Kantin-kantinku diau kusayangi. Inila surat diau keduau diau kutulis ngan kamu. Di duau surat itu aku la beusaha nimbulka rupu'an diau benagh di kamu ngan peringatan. 3:2 Aku endak, supayau kamu ngingatka kici'an diau la senitu dikiciakka nabi-nabi Allah ngan perinta Tuhan, Rajau Penyelamattu, diau la dikiciakka rasul-rasul ngan kamu. 3:3 Diau penting diau mesti kamu keruani, bansau masau pengabisan saman ka adau jemau diau idupau dikuasaui serilaunyau. Ughangtu ka nggelakka kamu. 3:4 Katau ughangtu, "Kataunyau Tuhan bejanji ka datang! Mbak kini di manau Diau? Jak niniak puyang kitau mati gegalaunyau gi semegi luak masau deniau dijadika." 3:5 Ughangtu sajauka nidau endak keruan, bansau senitu langit ngan deniau dijadika ngan katau Allah. Daghatan nimbul jak di ayiak, dibentuak ngan ayiak, 3:6 mangku ngan ayiak pulau deniau senitu dibenasauka ngan ayiak diau merampustu. 3:7 Anyautu langit ngan deniau diau adau mbak kini disayia ngan katau Allah, ka dibenasauka pulau ngan api. Diau gi nunggu enggut masau jemau diau nidau keruan Allah diukum ngan dibenasauka. 3:8 Anyautu kantin-kantinku, jangan kamu lupau ini: Amun Tuhan, saghi semegi ngan seribu taun, seribu taun semegi ngan saghi. 3:9 Tuhan nidau lambat nepati janjiAu, empuak adau diau nganggap luak itu. Anyautu Diau ngaligh ngan kamu, karnau Diau endak, supayau jangan adau diau benasau. Diau endak, supayau gegalau jemau ngubai jak di dusaunyau. 3:10 Anyautu aghi Tuhan datang ka sampai nidau disangkau, luak pemaling. Masau itu langit ka lengit ngan muni gurua diau besak. Setu diau adau di langit ka abis galau mutung ngan api. Deniau ngan gegalau isiau ka abis galau. 3:11 Amun gegalaunyau ka abis ngan carau luak itu, mangku kamu mesti idup beresia batan endak Allah ajau ngan ta'at ngan Diau, 3:12 semasau kamu nunggu ngan beusaha Tuhan cepat datang. Masau itu langit ka abis mutung, deniau ka ancur karnau angatau. 3:13 Anyautu kitauni nantika setu diau la dijanjika Allah, langit diau empai ngan deniau diau empai. Di situ kendak Allah ka dituruti galau. 3:14 Karnau itu, kantin-kantinku diau kusayangi, penarau nantika gegalaunyautu, beusahala nian, supayau kamu idup beresia ngan nidau becacat di adapan Allah ngan maju idup damai ngan Allah. 3:15 Tuhan kitau ngaligh. Anggapla masau ini diau dienjuakka ngan kitau, supayau pacak selamat. Paulus, kantin kitau diau disayangi, la nulis pulau luak itu ngan kamu. Diau nulis titu nurut pengertian diau dienjuakka Allah ngan diau. 3:16 Di gegalau suratau diau nulis ceritau itu. Nyela, dalam suratautu adau diau segau dikeruani, mangku jemau diau nidau ngeruaninyau ngan nidau tegua imanau ngubai retiau. Ughangtu ngerjauka titu ngan gegalaunyau diau ditulis dalam Injil, mangku ughangtu ka benasau. 3:17 Anyautu kamu diau kusayangi la keruan gegalaunyautu. Karnau itu sepepadaula. Jangan kamu tebatak sesat ngan jemau diau nidau keruan ukum, ngan jangan kelengitan aghapan diau tegua. 3:18 Kamu mesti tamba meghasauka keilu'an Tuhan, Rajau Penyelamat kitau Yesus Keristus, ngan tamba ngeruani Diau. Tepujila Diau mbak kini enggut selelamaunyau. Amin.

1 Yuhanis 1

1:1 Isi surat ini ngiciakka Pirman diau ngenjuakka idup. Diautu la adau jak di penembai, la kami dengagh ngan kinak ngan matau kaminila, lagi la kami kecakka ngan tangan kami nian. 1:2 Idup itu la diancakka,