1:1 Sug Allah emahasesei augwanbuma, kaba, Sud Hom, moho Gesai Moro, en toua moongga sug nosohob. Dara en emehig dou enin touwero. Doba lan lahwas lais huhugb sug nosohob. Dangga maran geicara augwan toua emeba dahamero. Doba maran geicara augwan aninim namcir. Dara en moho ingma susugb dau Allah touwero, doba en moho toua dag Allah dau huhugwohob. 2 Dangga sug acgunog, kaba, Sud Hom Gesai Moro en toua moongga desij Allah enohob. 3 Hang areg Allah en auwam an deb naugb sug en ahasesei, kaba, en emahasesei hom dou eninero. Doba lan laohw maruwedoum naugwahabi, lan lamahasesei augwan emogdoc Sud Hom Gesai Moro gin toua. 4 Dara maireseb menau geb huhugb, kaba, emen dau len gus touwero, doba en dau Sud Hom Gesai Moro enin dous. Dangga gareg en einesa maireseb menau geb huhugb ginohob, kaba, en emeigtou se lobeigbogo deitero. Doba en ecinaga areg misen augwan toua. Anai maireseb menau geb huhugb gini edag mouf aisema enohob. 5 Hang lobeigbogo men goubesa emedeinyum naugb sug etohoi mouf dau lusud merdoc mes touwero. Doba mouf gini aisema len beb huhugb terimda. 6 Dara Allah arougb sud hom, moho Yohanes, naugb en esai mer geigouhw eisaugb Sud Hom Gesai Moro gini dou lusud toua deb nosahabi. Dauntoba sug len louman dau mer gin, kaba, len lesedeb merdoc mes deb naugb sug len merdoc ebdebin an Sud Hom Gesai Moro gin toua. 7 Dangga sug Yohanes edebeij lenohob, kaba, en enara dou len, endagai: Cum, kaba, sud hom gedag mouf edebeij yen naugb en ens areg asesa Allah enin medoc mes augwan dou yen toua. 8 Dangga Yohanes gin, kaba, en emedag sud hom geic mouf dou lusudero. Doba en en naugb en esedeb lusud merdoc mes naugb sud hom geic mouf dou lusud gin dous. 9 Doba Sud Hom Gesai Moro gedig en ouwaden dau bogo naugb aisema lusud se cinogo gin augwan, kaba, enin dous eng edag mouf misen gini. 10 Doba lusud, kaba, len lemeigdoumesa en moho dag mouf gaisema len touwero. Doba len letogoto en namcir. Dangga hang, Allah esinsin lusud laugwan ogdoc Sud Hom Gesai Moro ginohob. Doba sug en edebeij len, kaba, len merdoc emebdebin an en touwero. 11 Dara sug en en aud enin men meijouhuder, kaba, len lemebin en touwero. 12 Doba gareg en ebin Sud Hom Gesai Moro gini, hanoba en medoc ebdebin an en toua, kaba, Allah eigdoumesa len meroho dag en mogwihi mogo len dag misen namcir. 13 Hang len lemedag Allah mehir emogdoc dau sug merna lauwam an, dara merimir louwadanir, dara lusud logod an deb touwero. Doba len ledag Allah mehir gini dau Allah enin medoc mes dous. 14 Dara emen toua emeiya dau Sud Hom Gesai Moro men gogouf cucugb gedig en Mena ogugwo dou en Meisi mohora hom gin touohob. Anai en emeigtou se bogo dou eninero. Doba en ouwaden dau bogo naugb en eigtou desij maman. Dara en emedag mena touwero, doba en mocbobaga toua dag lusud misen. Dangga emen emeiya dau men geicara sug en medoc eineg an lusud ucucugb terimda. Dara emen emecinaga areg asesa Allah enin medoc mes. Anai en Meisi gin, kaba, en ens augwan gini asesa dou emen touohob. 15 Dara Yohanes gedig en ogun lusud se duhu, kaba, en toua ouma debin Sud Hom Gesai Moro ginohob. Anai sug en eiya Sud Hom Gesai Moro en en aud en sug nosa, kaba, en eija mer dou men logodeh, endagai: Dan den dou yen sug nosa dag cum, kaba, sud hom en emaimo ucan dan naugb en emeperwei dans. Dara dan den dou yen dag en moho agas medam edreg dau dan namcir touohob. Sug Yohanes enara dou men logodeh dag ginohob, kaba, en ens Sud Hom Gesai Moro enin mog dou len deit, endagai: Sud hom gedig dan den dou yen graga, kaba, inggada. 16 Dara sug Sud Hom Gesai Moro gini en ouwaden dau bogohob, kaba, en emecgun mesira debin areg geigouhw dau maman touwero. Doba en agaha mesira an dou maman naugb en eic geigouhw aingma aingma dou maman terimda. 17 Dangga areg Allah eic dou lusud ogdoc Musa sug nosa, kaba, dag men gomnomna dous. Doba areg asesa Allah enin medoc mes, kaba, en ens augwan gini dou maman ogdoc Yesus Krisdus enin. Anai en medoc eineg an maman namcirohob. 18 Dara sud hom ingma, kaba, en emeiya Allah dara en maires touebma. Doba en Meisi mohora hom gin dous eng ens areg geb se Allah enin medoc mes augwan asesa dou maman. Anai enin dous eng en moho aninim dag Allah. Dara enin dous eng eigtou bogodgod Mena maga an areg gin augwan sug nosohob. 19 Sug Yohanes ogun lusud se duhu sug nosa, kaba, leng Yahudi meren mougtir larougb merug hosa dau gembala gesa taij dara Lewi medebeitor naugb len leihwedaud Yohanes. Hanoba len lenara dou len, lendagai: Yen yeihweda naugb yen yedeijidougwo Yohanes en eng Sud Hom Geigdoc Maman Dau Maman Gogom Augwan enei? Era naroei? Dangga sug len ledebeij enohob, kaba, len leijidougwo en, lendagai: Ban eng Sud Hom Beigdoc Emen Dau Emen Gogom Augwanei? 20 Doba Yohanes, kaba, en emaunun dougwo enin dou lenero. Doba en ens meijouhw asesa dag misen dou len namcir. Hanoba en enara dou len, endagai: Dani Sud Hom Geigdoc Yen Dau Meijen Gogom Augwan ginero, doba sud hom gus dous. 21 Dangga hang, len leijidougwo en deit, lendagai: Gedangga, kaba, ban, kaba, garena? Bang Elias eng beisa dau gomom ucugb ginei? Doba Yohanes auni len merir ucugb dou len, endagai: Dang Elias touwero. Sug len louman dau gini, kaba, len leijidougwo en deit, lendagai: Bani Eliasero, kaba, bani sud hom gesai Allah moro eisaugb Mesias sug en en dou emen, ingginei? Doba Yohanes auni len merir ucugb dou len toua, endagai: Dani sud hom gesai Allah moro eisaugb Mesias sug en en dou yen touwero. 22 Dangga len lenara dou en deit, lendagai: Ban bemauni areg emen emeijidougwo ban an gragero, kaba, ban beigdoumesa ban aboho dag garena deseino emena? Ban bens meijouhw asesa dou emen, dauntoba emen emedecic augwan asesa dou emen mougtir touahabi. 23 Doba sug Yohanes auni dou len, kaba, en ecic dau areg sud hom gesai Allah moro nosa, moho Yesaya, en og deb se Surad Injil Meb Mohon deb sug nosohob. Hanoba en enara dou en, endagai: Dan dedag sud hom geija mer esesa dou lusud se lomougwisa, endagai: Yen yesa yen meigdoc mes bobosboro deb naugb maman Adehsud sug en en. Aninim dag lusud lesinsin ucina obosboro naugb meren mougt mera medam sug en einesa aud len toua. 24-25 Sug lusud gedig leng Parisi lesa len aud Yohanes graga len louman en mer an gini, kaba, len len dougwo en, lendagai: Ban bemedag Sud Hom Emeigdoc Emen Dau Emen Gogom, dara ban bemedag Elias, dara ban bemedag sud hom gesai Allah moro eisaugb Mesias sug en en dou emen deit touwero, kaba, ban bogun lusud se duhu deb anara? 26 Dangga Yohanes auni dou len, endagai: Dan, kaba, dan dogun yen se duhu, doba duhu misen dous. Doba cum, kaba, sud hom en emaimo ucan dan aud yens. 27 En, kaba, dan indoho emedeinyum naugb sug dan demesga aumagan dau men hwigbeimos icira en mohora touwero. Dara en moongga se yen meijufu touohob, doba yen yemecinaga enbuma. 28 Aremer augwan gin, kaba, ebiji deinyor Betania dig duhu Yordan nagama aud dig igda eisaugb. Anai us gin, kaba, sug Yohanes ogun lusud se duhu deb se ingga. 29 Se loneinda deit, kaba, Yohanes en eiya Yesus sug en en aud en. Hanoba en enara dou men logodeh, endagai: Yen yeiya sud hom gagunya gaden, kaba, en eng Allah Men Domba naugb en aigdougwo lusud se cinogo augwan meren sesar. 30 Eni sud hom gedig dan den dou yenohob, dag en emaimo ucan dans. Dara en moho agas edreg medam dau dan touohob. Anai en eis huhugb sug dan touebma. 31 Aimougtut, kaba, dan demecinaga sud hom goucan dan gin dag misenbuma. Doba sug Allah arougb dan naugb dan dogun lusud se duhu sug nosa, kaba, en esulou dan ucan deit, endagai: Sug ban bogun lusud se duhu gini, kaba, ban bemeiya Mena Gogoufu emouwaden dau bogo naugb en eigtou desij sud hom dau len gini. En gin eng emesa Mena Gogoufu se lusud merdoc mes toues. 32-33 Dangga dan demecinaga sud hom goucan dan gini sug nosa touwero. Doba dan den naugb dan dogun lusud se duhuahabi. Dauntoba sug dan deiya Mena Gogoufu eigtou desij sud hom dau len gini, kaba, dan dens en dou mamang Israel dag en emeigdoc maman dau maman gogom augwans. Sug Yohanes ens Yesus dou men logodehohob, kaba, en ouma debin en ucan dou len deit, endagai: Sug dan dogun en se duhu, kaba, dan deiya Mena Gogoufu ohw dau bogaden dag bohobei eigtou desij enohob. 34 Dangga hang, dan decinaga en edag Allah Meisi mohora hom gini. Anai dan deiya areg graga augwan se dan indires dag misen touohob. 35 Lona hom debin gin deit, kaba, Yohanes en moongga se usi sug en ogun lusud se duhu. Dara men logodeh lahwai lan marugwengga desij en sungga toua. 36 Dangga sug en eiya Yesus oudreg len, kaba, en ens en dou men logodeh lahwai gini, endagai: Yan yaiya Allah men Domba graga inggadeinda. 37 Sug lan lauman Yohanes mer an gin, kaba, lan larges en deb sungga. Hanoba lan laucan Yesuseda. 38 Dangga sug Yesus eineg dig medigo, kaba, en eiya lan laucan en. Hanoba en eijidougwo lan, endagai: Yan yaucan dan naugb ara? Hang lan launi dou en, landagai: Adehsud, ban bedatou sugiro? 39 Sug Yesus ouman, doba lan laijidougwo en dag gin, kaba, en oho mer debin lan, endagai: Yan yaucan danahabi, yan yamedeiyes. Doba sug Yesus oho mer debin len dag gin, kaba, igda edeisameni deinyor lobohob. Dangga sug lan laucan en terimda, kaba, lan ladeiya sug en atoudohob. Hanoba lan laigtou desij en sungga terimda loba namcirahabi, lan lamecicugb. 40 Doba lang lauman Yohanes mer graga, dara laucan Yesus gini, kaba, laingma maroho dag Andreas, Simon Petrus magto. 41 Dangga sug lan lacicugb dau Yesus inegohob, kaba, Andreas en edehilon en maguna Simon. Sug en edesma enohob, kaba, en en dou en, endagai: Aman ameiya Sud Hom Geigdoc Maman Dau Maman Gogom Augwan enohob. (Meijouhw gini se leng Grika meren leci dag Krisdus.) 42 Sug en en dou en danggohob, kaba, en ahwan en aud Yesus toua. Sug Yesus eiya Simonohob, kaba, en auweila en augwougwu. Hanoba en enara dou en, endagai: Iteitogini ban aboho Simon, Yohanes meisi. Doba dan desagai ban aboho deit dag Kepas. (Kepas gini, kaba, men meijouhw se leng Grika meren leci aninim dag Petrus, era igdahab gouji gototo.) 43 Se loneinda deit, kaba, Yesus esedeb naugb en eihwedig leng Galilea meren hancob deit. Dangga sug en ec mohora asa ucina gin, kaba, en eiya sud hom moho Pilipus. Sug en edeiya enohob, kaba, en enara dou en, endagai: Ban toua bin, baimo dan. 44 Pilipus gini, dara Andreas, dara Simon, len laugwan dau cinogo Bedsaida. 45 Sug Yesus enara dou Pilipus naugb en aimo enohob, kaba, Pilipus edehilon en magto Nataniel toua. Sug en edebeij enohob, kaba, en enara dou en, endagai: Emen emesma sud hom areg Musa dara leng lesai Allah moro nosa len log deb se Allah men gomnomna eisaugb en sug nosa touohob. Eni Yusub meisi, moho Yesus, dau cinogo Nasared. 46 Doba sug Nataniel en ouman dag Yesus en dau cinogo Nasaredohob, kaba, en esbes Pilipus mer an gin namcir, endagai: Ara geigouhw hom ingma emen dau Nasaredei? Naro, areg geigouhw hom ingma emen dau Nasared ginero. Doba Pilipus enara ehin mougtai en, endagai: Ban bemenara danggerobma. Doba banin bin naugb bideiya en se ban abiresahabi. 47 Sug Yesus eiya Nataniel edagunyohob, kaba, en eigdoumesa en moho deseino len gus, endagai: Yen yeiya sud hom gen gaben. Eni edag sud hom dau leng Israel gedag beim namcir. Anai en aimo maman gaben augwan dag misenohob. Dangga hang, men geicara augwan, kaba, dag en emarerei lusud meriresi touwero. 48 Sug Nataniel ouman Yesus mer dag ginohob, kaba, en eijidougwo en, endagai: Gareng edecic indan geicara dou ban, hang ban bemecinaga gina? Doba Yesus auni dou en, endagai: Sug Pilipus emedebeij banbuma, doba dan deiya ban sug ban beigtou se sogo ara meiyohob. 49 Sug Nataniel en ouman Yesus mer dag gin deitohob, kaba, en ousa deisa Yesus mer an, endagai: Adehsud, ban beiya dan dag ginohob, kaba, gini ansins dag ban bedag Allah Meisi mohora hom dag misenohob. Dara ban bedag mamang Israel maman mougt mera medam touohob. 50 Doba Yesus enara bauni ucugb dou en, endagai: Ban abdoc ebdebin an dan ogdoc sug dan den dou ban dag dan deiya ban se sogo ara meiyo graga dousei? Doba hom gin dousero. Anai cum, kaba, dan demens aremer einyana edreg dau gin dou ban deit. 51 Sug Yesus os dangga dou Nataniel dauwohob, kaba, en os dou men logodeh laugwan ucan deit, endagai: Yen youman dan indir gin deigeigouhwahabi. Anai cum, kaba, yen yemeiya misis se bogo emec dau Allah men malaikadir lemeisaugb lemouwada naugb len lemesedougwo Lusud Maraguna Mebin dans. Augwan gini asesa dag misen namcir.

2:1-2 Lona hwai debin dau sug Yesus eija Pilipus dara Natanielohob, kaba, lusud lougwan ared debin leng leicim se cinogo Kana se leng Galilea meren hancob. Dangga len lesa merir dou Yesus an men logodeh, dauntoba len len naugb ledetara dara len toua. Sug len lougwan ara gin, kaba, Yesus mem en toua moongga desij leni. 3 Doba sug len letara, kaba, meren anggur mohu ouwohob. Dangga Yesus mem eisa bedenara dou meisi, endagai: Len gin, kaba, meren anggur mohu augwan ouwa dau lenohob. 4 Doba Yesus auni dou en mem, endagai: Daneh, ban bemarougb dan naugb dan demens danin dou lusudlobma. Anai indan lona emedeinyum naugb ginbuma. 5 Doba Yesus mem enara dou sogougwir, endagai: Areg dan indisi en arougb yen an, kaba, yen yeicara yaimo en mer an gin dous. 6 Doba debecij maga senggem inggeb an duhu desij len ingga naugb len ledu len meraga becabeci deseino Allah dauwahabi, len lemetara. Anai gini aimo dau leng Yahudi meren gaben danggohob. Astesda debecij gin, kaba, oho ampo maga huntun hom an duhu ebsa. 7 Dangga, kaba, Yesus arougb sogougwir, endagai: Yen yedagain duhu debsa debecij gin augwan batij namcir. Sug len louman Yesus en mer an dag ginohob, kaba, len laimo en mer naugb len lagain duhu deb se augwan batij namcir toua. 8 Sug len lagain duhu debsohob, kaba, Yesus arougb len deit, endagai: Yen yagain duhu ingga ingma naugb yen yodo dou mougt mera gesedougwo gougwanara gini en eg bainyen nosahabi. Sug len lodo dou enohob, kaba, mougt mera ingga en ainyen duhu gini. Doba eperwei dag anggur mohu gahaufo namcirohob. 9-10 Dangga en eija sud hom geic mesouwa graga, hanoba en enara debin en, endagai: Astesda sud hom gougwanara, kaba, en eic anggur mohu gahaufo dou men lusud leg nosahabi. Dangga sug len leg gahaufo bedeinyum dauwohob, kaba, en emeic anggur mohu goubesebesa dou len lemeg ucan deit. Doba ban, kaba, ban bob geigouhw gin debahabi, ban bemeic dou len leg daiyamo gini. (En enara debin en dangga, anai en emecinaga dau sug duhu geperwei dag anggur mohu gin touwero. Doba sogougwir gedig len lagain duhu se dibecij, kaba, len dous eng lecinaga dau gini.) 11 Dangga sug Yesus men logodeh leiya dau gin, kaba, len merdoc ebdebin an en dag en en dau bogo naugb eigdoc len dau meren gogom augwanohob. Anai en ens men gogouf cucugb ogdoc ganusbus gin eb ainyes dou lenohob. 12 Sug len letara bouwohob, kaba, Yesus, dara mem an magtor, dara men logodeh, len laugwan leihwedig Kapernaum. Hanoba len ledeigtou sungga se lona aibibra toua. 13 Sug leng Yahudi meren Lona Gohw Bedreg ebeij deinyorohob, kaba, Yesus en toua eisaugb dig Yerusalem naugb len lougwan ared debin meren lona gin toua. Anai se lona ingga, kaba, leng Yahudi merna eiseisan lona sug Allah esga len merjemouwer dau cinogo Mesir sug nosohob. 14 Dangga sug en einesa Allah Men Tuariohob, kaba, en eiya, doba leng lohw sapi, dara domba, dara bohobei leigtou acec Allah Men Tuari maga naugb lauma aregoufu daum deb gini. Dara en eiya leng leic aregoufu laocagem len toua leigtou se meren boromei acec Allah Men Tuari maga ingga toua. 15 Sug en eiya lenohob, kaba, en ecgun aigdaga meida. Hanoba en ocirma aremeta dag sapi dara domba len laugwan dau Allah men igtia gini. Dara en eineg boromei an leng leic aregoufu laocagem augwan etrij baisoboro namcir toua. 16 Sug en ocirma leng lohw sapi, dara leng leic aregoufu laocagem dauwohob, kaba, en ocirma len lohw bohobei toua, endagai: Yen yeihwedan meijen bohobei augwan dau sugin namcir toua. Anai dan demouwan naugb yen yesinsin dan Indina Men Tuari gin dag tu gedig lusud lohwaresero. 17 Sug Yesus men logodeh len leiya dau gini, kaba, len merdoc eiseisan areg Daud en erba Ugwaremer an deb nosohob, endagai: Dan indoc gororougb aban Tuari dag smougb gait dan indoc mes an namcir. 18 Doba leng Yahudi meren mougtir, kaba, len lenara gouji dou Yesus namcir, lendagai: Ban bens gansins ingma debin gin dou emen, dauntoba emen emecinaga dag ban aboho edeinyum naugb ban bocirma len gin dau Allah Men Tuari gina? 19 Dangga Yesus enara bauni len merir ucugb, endagai: Sug yen yot Allah Men Tuari gini baisoboro, doba se lona homoi, kaba, dan dohud se mohw ucugwohob. 20 Sug len louman dau gin, kaba, len lesbes an en namcir, lendagai: Dagiro, naugwe hang, ban ben dou emen dag ban bohud Tuari gini ucugb se lona homoi dousa? Anai sug emen emjemouwer lohud Tuari gini sug nosa, kaba, len lohud se arisogomoc sud hwai senggem edeisohob, gina? 21 Doba tuari gedig Yesus eic bainyen dou len gin, kaba, en aimeh an enin maga dou len dous. 22 Dangga edebeij lona sug Allah eigdoumesa Yesus dau gomom ucugwohob, kaba, men logodeh merdoc eiseisan dag aremer gin, kaba, Yesus en dou len sug nosohob. Hang areg lusud len log deb se Surad Injil Meb Mohon eisaugb en debohob, dara areg Yesus enin enara dou len, kaba, len merdoc ebdebin an gin augwan namcir. 23 Dara irir sug Yesus en moongga se Yerusalem naugb Lona Gohw Bedreg gin, kaba, lusud leinyana merdoc ebdebin an en toua. Anai len leiya dau sug en eic ganusbus einyana dou lenohob. 24 Doba Yesus, kaba, en medoc emeica lenero. Anai en ecinaga len laugwan merdoc mes asesohob. 25 Dangga hang, emedeinyum naugb len gus lemens dau areg geb se lusud merdoc mes dou enero. Anai en eiya areg geb se lusud merdoc mes augwanohob.

3:1 Se cinogo Yerusalem gini, kaba, leng Yahudi meren mougt mera medam hom, moho Nikodemus dau leng Parisi, en toua moongga. 2 Dangga se loba hom, kaba, en edebeij Yesus naugb edenara dou eni. Sug en edebeij enohob, kaba, en enara baineino Yesus men, endagai: Adehsud, ban beic ganusbus einyana dou emenohob. Dangga hang, emen emecinaga dag Allah esa ban aud emen naugb sug ban bedidib en mer meijouhw augwan asesa dou emen toua. Anai sug Allah emesa sud hom aud emen dag misenero, kaba, en emeic ganusbus dag Adehsud bang ginero. 3 Doba Yesus enara bauni en mer gini, endagai: Ban bouman dan indir gin deigeigouhwahabi. Anai ban bouwan Allah oiharaga ban ucugb, kaba, esloulougb naugb ban bedag godeh mahaniheni ucugb deitahabi. Augwan gini asesa dag misen namcir. 4 Sug Nikodemus ouman Yesus mer an gin, kaba, en ouma medocesero. Hanoba en eijidougwo Yesus ucugb deit, endagai: Adehsud, dan demedag lugdeh mahaniheni se indim menuhwa naugb en emouwadan dan deit, dagiro? Anai dan dedag sud bodohob gina? 5 Doba Yesus enara bauni en mer ucugb, endagai: Ban bouman dan indir deigeigouhw deitahabi. Sud hom ingma emeinesa Allah men goiharaga ogdoc sug mem ouwadan en dous ginero. Doba ogdoc sug Mena Gogoufu einesa en medoc mes, hanoba eic maireseb menau geb huhugb dou en touahabi. 6 Anai gareg mem ouwadan en, kaba, en maireseb aimo maga men geicara se cinogo gin dous. Doba sud hom areg Mena Gogoufu einesa en medoc mesohob, kaba, men geicara aimo maireseb menau geb huhugb gin toua. 7 Dangga hang, ban bemeimiman dau sug dan den dou ban dag yen yaugwan yedag logodeh mahaniheni deit gin touwero. Anai augwan gini aimo dau areg Allah enin esedeb naugb yenohob. 8 Dara maireseb menau gin, kaba, sud hom ingma emarougb Mena Gogoufu en an touwero. Doba en eic dou lusud aimo dau areg enin ouwan dous. Aninim dag loungmen sug en eisa, kaba, sud hom ingma emarougb en an touwero. Doba en eisa sungga sungga augwougb toua. Hang ban bemecinaga en eisa daugiro, beihwedig touwero. Doba ban bouman en mougb dangga dous. 9 Doba Nikodemus, kaba, en eijidougwo Yesus ucugb deit, endagai: Augwan gini emacgunog dagiro? 10 Doba Yesus enara debin en, endagai: Ban bedag sud hom gedig en edidib Musa men gomnomna men meijouhw augwan asesa dou leng Israel moho agas ginohob. Dangga dagiro, naugwe hang, ban bemecinaga areg graga augwan ginero? 11-13 Anai areg dan desai dou yen gin, kaba, dan deic areg geb se cinogo daimeh debin gin dou yen touohob. Dangga sug yen meigdoc emebdebin an dan sug dan decic dau areg geb se cinogo daimeh dou yenero, kaba, dagiro yen meigdoc ebdebin an dan sug dan decic dau areg geb se bogo dou yen toua? Naro, yen meigdoc emebdebin an dan sug dan decic dau areg se bogo dou yen touwero. Dara areg emen emesai dou yen dau bogo gin, kaba, emen emesai augwougb dou yen touwero. Doba emen emeiya dara emecinaga augwan dag misenohob. Hang emen emesai dou yen toua. Anai sud hom ingma, kaba, en emeisaugb dig bogo mougwa hom touebma. Doba Lusud Meraguna Mebin gedig dan douwaden dau bogo aud yenohob, kaba, danin dous eng eisaugb dig bogo ginohob. Dobnaro. Sud hom ingma dau yen, kaba, en emouwan naugb ebin areg emen emecic gin se en medoc mesero. Doba yen yotogoto augwan gin namcir. Ban bouman dan indir an areg dan den dou ban gini deigeigouhw terimda. Anai augwan gini asesa dag misen namcir. 14-15 Dara aninim dag Musa eigdoumesa sogo an hinogo dau kermum gohoseri naugb leng Israel se lomougwisa sug nosa, kaba, lusud lemeigdoumesa sogo an Lusud Meraguna Mebin dan toues, aimo dau areg Allah esedeb naugb danohob. Dauntoba gareg en medoc ebdebin an dan dag dan domom taiba sogo salib naugb men sesarohob, kaba, Allah eic maireseb menau geb huhugb dou en toua terimda. 16 Anai Allah medoc gororougb lusud se cinogo gin augwan. Dangga hang, en emeic en Meisi dan dag mogud dou len toua. Dauntoba gareg en medoc ebdebin an dan, kaba, en emomom deitero. Doba Allah eic maireseb menau geb huhugb dou en namcir. 17 Anai Allah emesa en Meisi dan se cinogo gini naugb dan demogod gomom deb naugb lusudero. Doba en esa dan aud len naugb dan deigdoc len dau meren gogom augwan dous. 18 Dangga gareg en medoc ebdebin an Allah Meisi danohob, kaba, Allah emogod gomom deinaugb en se lona daiyamo gacin toua deitero, doba en arges dau namcirohob. Doba gareg en medoc emebdebin an danero, kaba, Allah ogod gomom deinaugb en debohob. Anai en medoc emebdebin an Allah Meisi mohora hom danero, doba en asidged danohob. 19 Dara Allah emogod aremer gomom gini deinaugb lusud augwougb touwero. Doba en ogod deinaugb len, anai en ens areg asesa enin medoc mes augwan dag mouf dou len deb nosohob. Doba lusud merdoc mes gororougb meren geicara gecgu gin terimda. Dangga hang, len lemaimo areg se mouf gin touwero, doba len laimo areg geb se lobeigbogo dous. 20 Anai gareg en medoc gororougb men geicara gecgu gini, kaba, en emen naugb emeinesa mouf touwero. Doba en medoc esdigeij mouf gin namcir. Anai en ecinaga dau sug en einesa mouf ginohob, kaba, dag mouf ens men geicara gecgu gini eb ainyes dou en toua. Dangga hang, en emouwan gin touwero. 21 Doba gareg en ouwan eicara baimo areg asesa Allah enin medoc mes, kaba, en emeigtou se lobeigbogo deitero, doba en einesa mouf. Dauntoba mouf ens men geicara eb ainyes dou lusud dag men geicara augwan gin, kaba, aimo areg asesa Allah enin medoc mes dag misenohob. 22 Sug len lougwanaresa Lona Gohw Bedreg dauwohob, kaba, Yesus dara men logodeh leihweda se leng Yudea meren hancob naugb en eigtou desij men logodeh sungga se lona aibibra. Hanoba en ogun lusud se duhu toua. 23 Dara Yohanes en toua ogun lusud se duhu se usi hom moho Ainon deinyor cinogo Salim. Anai sungga, kaba, duhu einyana. Dangga lusud leinyana len len aud en naugb en ogun len se duhu toua. 24 Aremer augwan gini acgunog sug Herodes emouf Yohanes se tu gesisugbuma. 25 Doba sug Yohanes men logodeh len leiya Yesus en ogun lusud se duhu toua, kaba, len len aud en naugb leijidougwo en an gini. Anai len merir laised sud hom dau leng Yahudi endag gareng men ucina eic len merdoc ecabeci deseino Allah ena? 26 Dangga sug len ledebeij enohob, kaba, len lenara dou en, lendagai: Adehsud, ban abdoc eiseisan sud hom grag ban bens dou emen sug en agunya debin maman se Yordan mebera dig igda eisaugb sug nosohobei? Anai iteitogin, kaba, en ogun lusud se duhu. Dara lusud laugwan louwa aud en toua. Hang men ucina gin toua eigouhwei? Era naroei? 27 Doba Yohanes auni dou len, endagai: Aremer augwan dag gin, kaba, emen dau lusud lenin merdoc mesero. Doba aimo dau areg Allah enin ouwan naugb en eic dou lusud dous. 28 Dara yenin yecinaga sug dan den dou yen sug nosa, kaba, dag dan demeigdoumesa danin indoho dag Sud Hom Geigdoc Yen Dau Sesar Men Gogom deseino yen touwero. Doba dan den dou yen dag dan deino en men naugb desedeb ucina deb naugb en dous. 29 Anai sug sud hom eic mesouwa, kaba, en mesouwa gini emeb naugb en mesi ginero. Doba eb naugb mesuwa gin dous. En mesi misen, kaba, en eigtou se misis moc naugb en ouman dau sug mesi enara dou mesouwohob. Dangga sug en ouman, doba mesuwa enara geigouhw dou mesouwa ginohob, kaba, en medoc agahugouhw an mesi gin namcir. Hang iteitogin, kaba, dan indoc agahugouhw an sud hom gin toua terimda. Anai en, kaba, dag sud hom geic mesouwohob. Doba dan dedag en mesi misen dous. 30 Dara en moho, kaba, eisaugb dig gadeda namcir. Doba dan indoho, kaba, eb tainya dig gaihida dous. Anai augwan gini aimo dau areg Allah esedeb sug nosohob. 31 Gareg en ouwaden dau bogo, kaba, en moho edreg dau areg gus augwan namcirohob. Anai gareg dau cinogo gin, kaba, eni aninim dag lusud se cinogo gin dous. Hanoba men geicara dara areg en en, kaba, augwan gini dag lusud meren geicara gin toua terimda. Doba gareg en en dau bogo, kaba, en moho agas bedreg dau augwan namcir. Anai en emen dau cinogo ginero, doba en dau bogo ginohob. 32 Hang en ens dau areg en eiya dara areg en ouman se bogo augwan asesa dou maman touohob. Doba sud hom ingma, kaba, en medoc emebdebin an areg en en dou maman gin touwero. 33 Doba gareg en ebin areg en esai dou maman gini se en medoc mes, kaba, en ouma debin Allah dag en mer gin, kaba, mer areibahau touwero, doba mer misen namcirohob. 34 Dangga hang, sud hom gareg Allah esa en aud mamanohob, kaba, en emereiyara dou maman touwero. Doba areg en esai dou maman gin, kaba, dag geica namcir. Anai sug Allah esa Mena Gogoufu se en medoc mes, kaba, en emekeba ingma dauwero. Doba en esa augwan batij bobdaga se en medoc mes ginohob. 35 Dara en Mena medoc gororougb en Meisi. Hanoba en eigdoumesa en moho dag mougt mera medam naugb augwan gin touohob. 36 Dangga gareg en medoc ebdebin an Allah Meisi mohora hom ginohob, kaba, Allah eic maireseb menau geb huhugb dou en toua. Doba gareg en emaimo Meis gin en merero, kaba, en emdesma maireseb huhugb gin touwero. Doba Allah medoc esrougb an en namcir naugb en eic gogom dou en toua terimda.

4:1 Dara leng Parisi len toua louman dau Yesus dag lusud leinyana lou audi en. Dara en ogun leinyana bedreg dau Yohanes gin touohob. 2 Dobnaro. Yesus enin, kaba, en emogun lusud se duhwero. Doba men logodeh len dous eng logun len se duhu gini. 3 Dangga sug Yesus ecinaga dag leng Parisi len toua louman dau ginohob, kaba, en emeigtou se leng Yudea meren hancob gin debero. Doba en eihwededau sungga dig leng Galilea meren hancob deitda. 4 Doba sug en eihweda, kaba, Allah out en mebes naugb en eraga leng Samaria meren hancob. Anai gini aimo dau areg Allah esedeb naugb en sug nosohob. 5 Dangga sug en eragasa leng Samaria meren hancob gin, kaba, en edebeij cinogo hom, moho Sikar. Cinogo gini, kaba, deinyor Yakub men sesa gen eic dou en meisi Yusub sug nosohob. 6 Dara Yakub men cinogo mes naugb duhu toua eb deinyor Sikar gini. Dangga sug Yesus en ec bedebeij cinogo mes inggohob, kaba, en eigtou debin en mog sungga. Anai deinyor igdabogo, dara en mog toua omsires namcirohob. 7 Sug en eigtou debin en mog dag gin, kaba, gida hom dau leng Samaria en en dau cinogo ingga naugb en edagain duhu se cinogo mes gini. Dangga Yesus acgeij en an duhu, endagai: Ban bagain duhu ingma dou dan didegahabi. 8 Yesus acgeij gida gini, anai men logodeh laugwan leihweda naugb ledouma ared se beimes dau enohob. 9 Sug gida ingga en ouman, doba Yesus acgeij en an duhu, kaba, en eija medocesa an gin namcir. Anai leng Yahudi, kaba, len lousan lenin dau leng Samaria namcir. Dangga hang, en enara bauni dou Yesus ucugb deit, endagai: Dagiro, naugwe hang, ban bacgeij dan an duhu. Anai ban, kaba, dau leng Yahudi. Doba dan, kaba, dau leng Samaria gina? 10 Doba Yesus enara bauni en mer ucugb deit, endagai: Ban bemecinaga dau areg Allah esedeb naugb en eic dou ban dag misenbuma. Dara ban bemecinaga dang dacgeij ban an duhu gin dag misen touebma. Anai sug ban becinaga dan dag misenohob, kaba, ban bemeic duhu dou danero. Doba ban eng bacgeij duhu dau dan dous. Anai duhu gedig dan deic dou ban gini, kaba, eic maireseb geb huhugb dou ban namcir. 11 Sug gida ingga ouman dau gin, kaba, en enara baised Yesus mer, endagai: Adehsud, ban bemeic areng bemagain duhu geic maireseb huhugb gin dou dana? Anai cinogo mes gin, kaba, aga deisa medam namcirdaha. 12 Ban eng aboho agas edreg dau emen emjemouwa Yakubei? Anai enin eng ogo cinogo gin deb naugb emen. Hanoba enin an en mehir dara men aremeta, len laugwan leg dau duhu gin toua, doba len laugwan lomom dauwohoba? 13 Doba Yesus enara bauwun en mer ucugb deit, endagai: Gareg en eg duhu dau cinogo mes gini, kaba, cum merijeben ucugb deit. 14 Doba gareg en eg duhu gedig dan deic dou en gini, kaba, merijemeba en deitero. Anai duhu gedig dan deic dou en, kaba, aninim dag mer edeij bohw besesa se en medoc mes. Hang eic maireseb huhugb dou en toua namcir. 15 Sug gida graga en ouman Yesus mer an gin dangga, kaba, en acgeij en an duhu gini, endagai: Adehsud, ban beic duhu areg ban ben dou dan graga dou dan dideg iteitogini. Dauntoba merijemeba dan, kaba, dan demen naugb demdagain duhu sugin toua deitero. 16 Doba Yesus enara bauni en mer. Hanoba en arougb en, endagai: Ban beihwedesa aban tu naugb ban bedahwan ban absuwa toua en en suginahabi. 17 Doba gida enara dougwo en mer, endagai: Dan insuwa ingmaro. 18 Sug Yesus ouman dau gin, kaba, en ousa deisa en mer an, endagai: Areg ban ben dou dan gini, kaba, asesa dag misen namcir. Anai sug nosa, kaba, ban bes ban absuwa merug sergemohob. Doba giji hom geic ban daiyamo gini, kaba, en emedag ban absuwa misen touwero. Dangga areg ban ben dou dan gini, kaba, se geica namcirohob. 19 Sug gida ouman Yesus ens dau men geicara augwan asesa dou enohob, kaba, en ousa deisa en mer an, endagai: Indeic, ban, kaba, bedag sud hom gesai Allah moro dou lusud dag misenohob. 20 Sug gida ingga eigdoumesa Yesus moho dauwohob, kaba, en eijidougwo en an deit, endagai: Emen emjemouwer, kaba, len lesijaresa Allah se menmod gada. Doba yeng Yahudi, kaba, yen yen dougwo emen, yendagai: Allah en ouwan naugb maman maugwan masijaresa en se men Tuari se Yerusalem hom dous. 21 Doba Yesus enara bakebin gida ingga en mer ucugb deit, endagai: Daneh, yeng Samaria, kaba, yen yesijaresa, doba yen yemecinaga sud hom gedig yen yesijaresa ginero. Emeng Yahudi, kaba, emenin dous eng emecinaga sud hom ginohob. Anai Sud Hom Geigdoc Lusud Dau Meren Gogom Augwan, kaba, en en dau emen meijouhuda hom gini. 22 Doba inggaida. Anai cum, kaba, lusud lemesijaresa maman Mamina Allah se meijen menmod gini dara Yerusalem toua deitero. 23 Doba lona ebeij deinyorohob naugb sug len lesijaresa en se geica namcir engga. Anai Mena Gogoufu ens areg asesa enin medoc mes augwan dou lenohob. Anai augwan gin, kaba, aimo dau areg Allah enin ouwan dangga. 24 Dara maireseb menau geb huhugb gini, kaba, en dau Allah enin dous. Dangga leng louwan lesijaresa Allah dag misen, kaba, esloulougb naugb Mena Gogoufu eic maireseb menau geb huhugb dou len, dara en ens areg asesa Allah enin medoc mes dou len nosahabi, len lemesijaresa en toua dag misen namcir. Anai gini aimo dau areg Allah ogod an deb sug nosohob. 25 Doba gida graga, kaba, en enara baunun Yesus mer deit, endagai: Dan decinaga sug Sud Hom Geigdoc Maman Dau Maman Gogom Augwan en en, kaba, en ens meijouhw dau aremer augwan dag misen dou maman toua. 26 Doba Yesus auni dou en. Hanoba en ens enin dou en, endagai: Dan indugweng, denara dou ban gini. 27 Sug Yesus auni dou gida ingga inegaba, kaba, men logodeh toua ledagunyohob. Dangga sug len leiya, doba Yesus enara dou gida gin, kaba, len leimiman dau gin namcir. Doba sud hom ingma emeijidougwo gida ingga an areg en ouwan. Dara sud hom ingma emeijidougwo Yesus an men mou genara dou gida gin touwero. Doba len laugwan lesa dag lodinanir namcir. 28 Dangga gida ingga en arges men debecij dougwo duhu deb sungga. Hanoba en obga ucugb dig beimes naugb en edenara dou men lusud. 29 Sug en edebeij lenohob, kaba, en enara dou len, endagai: Yen yin naugb yideiya sud hom geigtou dougwo Yakub men cinogo mes gadahabi. En edag Sud Hom Geigdoc Maman Dau Maman Gogom Augwan gragenggei? Era naroei? Anai en ens indan geicara augwan asesa dou danohob. 30 Sug len louman gida mer an ginohob, kaba, len laugwan len dau cinogo ingga naugb len ledeiya Yesus sug eigtou dougwo cinogo mes graga. 31 Irir sug gida graga edahwan men lusud dau beimes ingga, kaba, Yesus men logodeh leic ared laganini en, lendagai: Adehsud, ban bet ared ginahabi. 32 Doba Yesus enara bauni dou len ucugb, endagai: Indan ared inggeb dara dan ginohob. Doba yen yemecinaga dau ginbuma. 33 Sug men logodeh louman gin, kaba, len leijidougwom ucucugb, lendagai: En emouwan ared debin maman ginero, kaba, ligbum len len naugb ledeic ared dou en betohobei? 34 Sug Yesus ouman len merir an gin, kaba, en ens meijouhw eisaugb gini asesa dou len deit, endagai: Indan ared, kaba, dag dan daimo areg asesa Allah enin medoc mes dous. Dara dan daimo en mer an areg en arougb dan an gini augwan terimda edebeij sug ouwedoc gin toua. 35 Sug Yesus ens meijouhw dau men ared asesa dou men logodehohob, kaba, en eic gainyenara hom ucan dou len deit. Dauntoba len lemeigtou lemateteij lusudero. Doba len lahwan len dedemeda naugb Allah eic maireseb huhugb dou len touahabi. Hanoba en enara dou len, endagai: Sug yen yeba meij, kaba, yen yos igda doum, yendagai: Igda hogu deitahabi, kaba, maman ared se maman lo emohoseri naugb maman mameic meij deb. Doba dan denara dou yen naugb yen yemeigtou yemateteij deitlo. Doba yen yesa yauweilahabi. Anai ared se lo augwan ohoser namcir naugb sug yen yeic meij debohob. 36 Dangga yen yemeisan gurog dau ginlo. Doba yen yeic meijuwemougb esesa naugb yen youci meij gin debinim terimda. Anai meij gin, kaba, emetaha touwero, doba eb beb huhugb namcir. Dara meijen geicara gini, kaba, dag mogud touwero. Doba Allah esedeb naugb en eic siouwa dou yen an gin touohob. Dangga, kaba, sud hom geba meij dara sud hom geic meij debinim, kaba, lan lahwas mardoc eigouhw an gin namcir toua. 37 Augwan gini aimo dau meijen aremeijouhw dag misen touohob. Anai yen yenara, yendagai: Sud hom en eba meij. Dara sud hom gus, kaba, en esedeh naugb sug en eic meij baihiro deb deit. 38 Dangga dan toua darougb yen naugb yen yedouci meij debinim se lo gedig yen yemeba meij ingma deb nosa habero. Anai len gus, kaba, len leic merug erij naugb leba meij gini deb nosohob. Doba yen, kaba, yen yedec mera dau gin dous. 39-40 Sug Yesus esulou men logodeh dauwohob, kaba, leng Samaria dau cinogo Sikar gini, len toua ledagunya debin len. Sug len lenohob, kaba, len laganini en, lendagai: Adehsud, ban batou desij emen suginahabi. Len lacgeij en dangga, anai gida graga edenara dou len dag Yesus ens dau men geicara augwan asesa dou enohob. Hang len toua lod merna deisa Yesus en edag sud hom Geigdoc Len Dau Meren Gogom Augwan. Sug len laganini en dag ginohob, kaba, Yesus aimo len merir. Hanoba en atou desij len se loba hwai sungga naugb en edidib Allah mer men meijouhw augwan asesa dou len toua. 41 Dangga lusud leinyana deit sug len louman dau areg Yesus edidib dou len gin, kaba, len merdoc ebdebin an en, dag eni Sud Hom Geigdoc Len Dau Meren Gogom Augwan touohob. 42 Hanoba len lenara dou gida graga ucugb, lendagai: Iteitogini, kaba, emen emdoc ebdebin an en emogdoc areg ban beden dou emen deitero. Doba ogdoc areg enin edidib dou emenohob. Anai emenin ouman dau enin mers teisisohob. Dangga hang, emen emecinaga dag eni sud hom geigdoc mamang se cinogo augwan dau sesar men gogom aud maireseb menau geb huhugb dag misen namcirohob. 43 Sug Yesus eigtou desij leng Sikar graga se lona hwaiyohob, kaba, en emecicugb dig leng Yudea meren hancob deitero. Doba en eihwedig leng Galilea meren hancob dous. 44 Anai Yesus enin ens dau leng Yahudi meren aremeijouhw hom dou men logodeh deb nosohob, endagai: Sug sud hom en esai Allah moro dou lusud, kaba, lugmahara lebin en mer an gini. Doba sug en ecicugb dig enin men cinogo, kaba, men lusud lemeigdoumesa en moho an gin touwero. Dangga hang, en eihweda naugb en eigtou desij lusud se leng Galilea meren hancob gin dous. 45 Sug en edebeij meren hancobohob, kaba, len leinyana lesa dagasa naugb lebin en. Dara len merdoc agahugouhw an en toua namcir. Anai sug len lougwanara debin Lona Gohw Bedreg se Yerusalem, kaba, len leiya dau men geicara dag ganusbus augwan touohob. 46 Sug len lesa dagasa Yesus dauwohob, kaba, en eihweda naugb en atou desij len se cinogo Kana se leng Galilea meren hancob deit. Sungga, kaba, en eperwei duhu dag anggur mohu deb nosohob. Dara se cinogo Kapernaum se leng Galilea hancob ingga, kaba, mougt mera medam men gedeijan en toua moongga. En meisi areba medam. 47 Sug en ouman dag Yesus ecicugb dau Yudea dig leng Galilea meren hancobohob, kaba, en eihwededau Kapernaum dig Kana naugb en edenara dou Yesus. Anai en meisi areba medam dag ahauwohob. Dangga sug en edebeij Yesusohob, kaba, en acgeij en, endagai: Ban baimo dani naugb ban bedeic geigouhw dou dan indisahabi. Anai eni deinyor omom se cinogo Kapernaum gaihohob. 48 Doba Yesus enara bagod dougwo en mer, endagai: Yen youwan dan dens ganusbus dara gansins dou yenahabi, yen meigdoc emebdebin an dani. Doba mogud, kaba, yen meigdoc emebdebin an danero. 49 Doba sud hom gedeijan mougt mera gouji gin, kaba, en agodgod Yesus namcir, endagai: Adehsud, ban baimo dan dedemeda sug dan indisi en emomombuma. 50 Doba Yesus en arougb en, endagai: Ban beihweda. Anai ban abisi eigouhwohob. Sug sud hom gini en ouman dag en meisi eigouhwohob, kaba, en od mena debsa Yesus mer an gin namcir. Hanoba en ecicugb dig men tueda. 51 Sug en ecicugb, doba en edebeij se ucina mogumsi, kaba, men sogougwir ledagaseni. Hanoba len len dou en, lendagai: Ban abisi eigouhwohob. 52 Sug en ouman dau gini, kaba, en eijidougwo len ucugb deit, endagai: Dan indisi eigouhw aisohoba? Hang len launi dou en, lendagai: Mos gesrougb augwan obsara dau en se igda ehin maga giyohob. 53 Sug sud hom gini en ouman men sogougwir merir an gin dangga, kaba, en mena eiseisan sug igda ehin maga gia, kaba, Yesus enara dou en dag en meisi eigouhw ginohob. Dangga hang, eni dara leng leigtou desij en se men tu, kaba, len laugwan merdoc ebdebin an Yesus toua. 54 Ganusbus hom gin, kaba, goucan ganusbus hom gedig Yesus aben dou leng Galilea se cinogo Kana gin nosohob.

5:1 Lona hom debin sug Yesus eic geigouhw dou sud hom en meisi ginohob, kaba, Yesus ecicugb dig cinogo Yerusalem naugb len ledougwanara debin leng Yahudi meren lona gouji hom sungga deit. 2 Doba se Yerusalem gin, kaba, cinogo mes hom eb deinyor misis sug lusud leb dombesa. Len leija cinogo mes gini se lec Ibrani mer dag Betesda, era Us Medoc An. 3-4 Len leija cinogo mes dag gini, anai se lona hom yom, kaba, Allah men malaikad hom en ouwaden dau bogo naugb en ebir duhu geb se cinogo mes ingga bogrogro. Dangga gareg dau leng areber en esogwesa ino, kaba, men gareba augwan ediyebeiya dau en toua. Hang leng areber dag leng meraires mougb, dara leng merohora ecgu, dara leng lagaim, kaba, len laugwan leigtou se tu meij sergem geb acec cinogo mes ingga naugb sug malaikad en en. Hanoba en ebir duhu bogrogro naugb lenahabi. 5 Dara sud hom en mohora agaim se arisogomoc sud hom sorama hobjeromoi nagama edeisohob, kaba, en toua moongga desij len toua. 6 Dangga sug Yesus eiya sud hom gini, doba en atou namcir, kaba, en eijidougwo en, endagai: Ban bouwan naugb ban beigouhwei? En eija en dag gini, anai en ecinaga, doba sud hom gin, kaba, en eijobur se arisogomoc einyanohob. 7 Doba sud hom gagaim gini en enara bauni Yesus mer ucugb, endagai: Adehsud, astesda sug malaikad ebir duhu ogrogro, kaba, dan dainyen naugb desogwesa duhu ingga. Doba len gus lesogwesa ino dougwo dan terimda. Anai sud hom ingma en emousa dan naugb sug dan desogwesa touwero. 8 Dangga Yesus arougb en, endagai: Ban beisa bod aban sidgwa. Hanoba ban beihwedan dig aban tueda. 9 Sug Yesus arougb en dag gin inegohob, kaba, en mohora ouwasis namcir. Hanoba en eigdoumesa men sidgwa. Dauwohob, kaba, en eihwedanda. Doba lona sug Yesus eic geigouhw dou sud hom gin, kaba, leng Yahudi meren Lona Gemeicaresero. 10 Dangga sug leng Yahudi meren mougtir len leiya, doba sud hom ingga en odo men sidgwa se lona ingga, kaba, len letaha en an gini, lendagai: Ban bemodo aban sidgwa se lona ginlo. Anai lona gin, kaba, maman Lona Gemeicaresero, hang maman gomnomna emen dougwo ban an gin touohob. 11 Doba sud hom ingga, kaba, en ahacugb gogom, endagai: Sud hom geic geigouhw dou dan gin, kaba, en eng emarougb dan naugb dan demeigdoumesa indan sidgwahabi, dan demec an gin toua. 12 Sug mougtir len louman dau gin, kaba, len leijidougwo en ucugb deit, lendagai: Sud hom garougb ban gin, kaba, ban beija en dag garena? 13 Doba lusud leinyana ledregim dougwo en maires an Yesusohob. Dangga hang, en emecinaga gareg eic geigouhw dou en gin touwero. 14 Cum deit, kaba, Yesus edagasa en se Allah Men Tuari. Hanoba en esulou en, endagai: Ban bouman dan indir gin deigeigouhwahabi. Anai iteitogin, kaba, ban abaga augwan eigouhw namcirohob. Dangga hang, ban bemaimo sesar toua deitero, doba ban beineg dau namcir. Anai sug ban bemeineg dauwero, kaba, ban besma gogom medam edreg dau gin deit. 15 Sug sud hom gini en ecinaga dag Yesus eng eic geigouhw dou enohob, kaba, en eihwededau Allah Men Tuari. Hanoba en edens Yesus moho dou leng Yahudi meren mougtir toua. 16 Sug len louman, doba Yesus eng eic geigouhw dou sud hom ginohob, kaba, len lehilon ucina naugb sug len leic gogom dou en namcir. Anai en eic geigouhw dou sud hom gin se Lona Gemeicareserohob. 17 Doba Yesus enara bauni len merir an gini, endagai: Dan Indina Allah, kaba, en emehig dau men geicara mougwa homero. Doba en eicara astesda lona naugb en agauwesa areg en ahasesei augwan terimda. Dangga hang, en Meisi dan toua demehig dau indan geicara touwero. Doba dan desogwa deisa en mohotimei mohw naugb dan deicara astesda lona toua terimda. 18 Sug leng Yahudi meren mougtir len louman Yesus mer an gini, kaba, eg len merug deit naugb sug len leic gomom dou en namcir. Anai en emedreg dau Lona Gemeicaresero hom gin dousero. Doba en eigdoumesa enin moho aninim dag Allah, anai en eija en dag en Mena touohob. 19 Doba Yesus enara bauni dou len deit, endagai: Indan goubesa naugb sug dan deicara daimo areg graga augwan, kaba, dau daninero. Doba areg dan deiya dan Indina naugb en eicara baimo gin, kaba, en Meisi dan deicara daimo dag gini toua. Dara dan demedreg dau dan Indina men geicara hom touwero. Doba areg en aimo gin, kaba, en Meisi dan daimo en ucan an augwan gin toua terimda. Yen youman dan indir an areg dan den dou yen gini deigeigouhw. Anai augwan gin, kaba, asesa dag misen namcirohob. 20 Dara dan Indina gin, kaba, en emecgoneh ara ara hom dau dan touwero. Doba areg enin aimo gin, kaba, en ens dau augwan gini dou dan toua. Anai en medoc gororougb en Meisi dan ginohob. Dangga hang, en emens dau areg graga augwan dou dan dousero. Doba en esedeb naugb en ens dau aremer moho agas ingma dou dan deit. Dauntoba dan daimo gin toua. Hang yen yeimiman dau gin toua namcir. 21 Anai cum, kaba, dan demeic maireseb menau geb huhugb dou lusud, aimo dau areg danin douwan an len dous. Aninim dag dan Indina en toua eigdoumesa lusud dau gogom ucugb sug nosa naugb en eic maireseb menau geb huhugb dou len touohob. 22 Dangga dan Indina en emogod aremer gomom dara maireseb huhugb dou lusud toua deitero. Doba en ogugwo augwan gini se en Meisi dan insirohob. Dauntoba lusud laugwan leigdoumesa dan indoho agas namcir, aninim dag len leigdoumesa en moho agas touohob. 23 Dangga gareg en emeigdoumesa dan indoho an areg dan desai dou en ginero, kaba, gini aninim dag en emeigdoumesa dan Indina en moho touwero. Anai en eng esa dan aud yenohob. 24 Hang yen youman dan indir deigeigouhw deitahabi. Gareg en medoc edag beim an areg dan desai dou en ginohob. Hanoba en od mena debsa sud hom gesa dan aud yen gin toua terimda, kaba, en moho emeb se ucina gomom deitero. Doba eb se ucina maireseb menau geb huhugb ginohob. Hang dan demogod gomom deinaugb en touwero. Doba dan deic maireseb menau geb huhugb dou en dous. Augwan gini asesa dag misen namcir. 25 Dara yen youman dan indir deigeigouhw deit. Anai lona ebeij deinyor namcir touohob naugb sug leng lomom len laugwan louman dang Allah Meisi dan indir engga. Dangga gareg en medoc edag beim an areg dan desai dou en gin, kaba, en emomom deitero. Doba dan demeic maireseb menau geb huhugb dou en toues. Augwan gini asesa dag misen namcir toua. 26 Anai dan Indina ogugwo men goubesa dou en Meisi dan naugb dan deic maireseb menau geb huhugb dou lusud. Aninim dag men goubesa eb dou eninohob naugb sug en eic maireseb menau geb huhugb dou len toua namcirohob. 27 Hang en emeigdoumesa en Meisi dan indoho naugb dan dogod aremer aga lusud laugwan gin toua. Anai dan dedag Lusud Meraguna Mebin danohob. 28-29 Yen yemeimiman dau areg dan den dou yen ginlo. Doba yen meigdoc eica terimda. Anai lona ebeij deinyorohob naugb sug leng leigtou debin len merug se meruda, kaba, len laugwan louman Allah Meisi dan indir. Hanoba len leisa toua. Dangga gareg en eicara geigouhwohob, kaba, en eisa dau gomom aud maireseb menau geb huhugb namcir. Doba gareg en eicara gecgu sug nosa touohob, kaba, en eisa dau gomom naugb dan dogod gomom dag dum smougb deinaugb en dous. 30 Dara dan demeic augwan gini dau danin indoc mes touwero. Doba areg Allah arougb dan an ginohob, kaba, dan dogod aremer aga lusud dag gin dous. Anai dan indoho emagas emedeinyum naugb ginero. Dangga areg dan dogod an gin, kaba, se geica namcir. Anai dan demaimo areg danin douwan touwero. Doba dan daimo areg sud hom gesa dan aud yen ginohob en ouwan dous. 31 Dara dan demos demadi danin an areg graga dou yen touwero. Anai sug dan dos dadi danin an areg dan den dou yen gini, kaba, emedeinyum naugb sug yen meigdoc emebdebin an gin touwero. 32 Doba sud hom gus en toua moongga naugb en os badi dan dou yen. Dara dan decinaga dag areg en os badi dan dou yen gini, kaba, dag misen namcirohob. 33 Anai sug yen yesa meijen lusud aud Yohanes naugb len leijidougwo en eisaugb dan sug nosa, kaba, en os badi dan dou yen dag areg dan den dou yen gin, kaba, se geica namcirohob. 34 Dan dens dau areg en enara eisaugb dan sug nosa gini dou yen. Dauntoba eic yen meigdoc eiloboro aud dan naugb dan deigdoc yen dau sesar men gogom augwan aud maireseb menau geb huhugb gin toua. Anai naugb danin, kaba, dan demehilon sud hom ingma naugb en os badi dan indoho dou lusud ginero. 35 Doba Yohanes, kaba, en edag mouf gaisema yen sug nosa. Hang yen meigdoc emesgiraha naugb yen yemaimo en se mouf gin gurereito touohob. 36 Dara areg gus geperwei dan induhw naugb os badi dan deseino yen edreg dau areg Yohanes os badi dan an gin dou yenohob, kaba, toua inggebga. Anai indan geicara areg dan Indina arougb dan an ginohob naugb dan deicara daimo, kaba, augwan gini eperwei dan induhw. Hanoba os badi dan indoho deseino yen. Dara ens dou yen dag dan Indina Allah enin eng esa dan aud yen dag misenohob. Anai dan daimo augwan gini an yen touohob. 37 Dara dan Indina gedig en esa dan aud yenohob, kaba, en eperwei dan induhw naugb en os badi dan deseino yen sug nosa touohob. Doba yen yemouman en mer, dara yen yemeiya en mebes se yen meijires gin mougwa hom touebma. 38 Dara yen yemebin en mer areg dan desai dou yen se yen meigdoc mesero. Anai yen meigdoc emebdebin an sud hom areg en esa dan aud yen touwero. 39 Dara yen yeiya Surad Injil Meb Mohon, moho hom yom, astesda lona terimda. Anai yen yod meijina debsa endag yen yeicara dag gin, kaba, enin ens ucina aud maireseb huhugb dou yen toua. 40 Dangga dagiro, naugwe hang, yen yemen aud dan naugb dan deic maireseb huhugb dou yenero? Anai Surad Injil Meb Mohon gin, kaba, os badi dan deseino yen dag ginohob. Dobnaro. Yen yaiyan meigdocesem dougwo dan namcir naugb yen yemen aud dan touwero. 41-42 Anai dan decinaga areg geb se yenin meigdoc mes dag yen meigdoc gororougb Allah terimdero. Hang dan demouwan naugb yen yemeigdoumesa dan indoho an indan geicara gin touwero. 43 Anai dan Indina Allah, kaba, enin eng eigdoumesa dan indoho naugb dan desai en moro dou yen gini. Doba yen yemebin danero. Doba sug len gus len len aud yen, hanoba len leigdoumesa lenin meroho an areg len lesai dou yen gin, kaba, yen yemowun lenero. Doba yen yebin len namcir. 44 Dangga hang, yen yemeic meijuwemougb esesa naugb sug Allah mohora hom gini en eigdoumesa yen meijoho an meijen geicara gin touwero. Doba yen youwan naugb sug yenin yeigdoumesa yenin meijoho an meijen geicara ucucugb doum dous. Sug yen yeicara dag gin terimda, kaba, dagiro, naugwe hang, yen meigdoc ebdebin an areg dan desai dou yen gina? Naro, yen meigdoc emebdebin an areg dan den dou yen touwero. 45 Dara yen youdesa dag dan eng demoho demas yen an meijen geicara gin dou dan Indina Allah enei? Naro, dan demoho demas yenero. Doba meijen sud hom moho Musa gedig yen yod meijina debsa endag en eng emeigdoc yen dau meijen gogom augwans, kaba, enin eng emoho emas yen an meijen geicara gin dou Allah dous. 46 Anai areg en og deb se men surad sug nosa, kaba, en emog eisaugb enin dou yenero. Doba en og baimeh an dan eng dou yen dous. Dangga sug yen meigdoc ebdebin an areg en og dou yen dag misenohob, kaba, yen yemotogoto dan indir an areg dan desai dou yen gin touwero. Doba yen yeic se yen meigdoc mes namcir toua. 47 Doba yen meigdoc emebdebin an areg Musa en og deb gin dag misenbuma. Dangga dagiro, naugwe hang, yen meigdoc ebdebin an areg dan desai dou yen gin toua? Naro, yen yemeicara yemaimo dag gin touwero.

6:1 Lona hosa debin gin, kaba, Yesus an men logodeh len leisa ij dig Galilea, era Tiberias, nagama deit. 2 Dara lusud leinyana leila ucan len toua. Anai len leiya dau ganusbus sug Yesus eic geigouhw dou leng areber leinyana sug nosohob. 3 Sug Yesus dara men logodeh len ledebeij nagamohob, kaba, len leisaugb se mengarougb hom naugb leigtou sungga. 4 Doba lona sug len leisaugb dig men gorougb gin, kaba, deinyor lona sug leng Yahudi len lougwan ared debin meren Lona Gohw Bedreg gin touohob. 5 Dangga sug Yesus esa bauweila, doba lusud leinyana len len aud en, kaba, en eijidougwo men godeh hom, moho Pilipus, endagai: Maman mameic ared daugiro naugb maman mameic dou lusud leinyana gouji gina? 6 Doba en eijidougwo Pilipus naugb en ainyen en dangga dous. Anai enin ecinaga men geicara an gin augwan edeinyumohob. 7 Doba Pilipus enara bauni Yesus mer ucugb, endagai: Maman mameic aregoufu edeinyum naugb sug maman mauma ared dou len leinyana gin dagiro? Anai gini et perag mogo huntun hom naugb sud hom et mehir mougwa hom dous dangga. 8-9 Dara sud hom dau Yesus men logodeh hom deit, en moho Andreas, Simon Petrus magto, en toua enara bouwasi Pilipus mer an gini, endagai: Eisaugb ared, kaba, godeh hom men roti mogo sergem dara hosei magac hwai, isinggini. Doba gini emedeinyum naugb lusud leinyana gouji gin dagiro? 10 Doba sungga, kaba, aremon geigouhw toua moongga. Dangga, kaba, Yesus arougb men logodeh, endagai: Yen yen dou lusud gin laugwan leigtouahabi. Sug len len dou lenohob, kaba, len laugwan leigtou se aremon ingga toua. Dau leng leigtou gin, kaba, len lecic ligiji mogud dous, kaba, merug ribu sergem. 11 Sug len laugwan leigtousohob, kaba, Yesus os roti graga. Hanoba en en sijo dou Allah toua. Sug en en sijo dou en dauwohob, kaba, en eic roti dou men logodeh naugb len lohw anir toua. Gin dauwohob, kaba, en eic hosei dou men logodeh lohw anir dag gin toua. Hang len laugwan letara medam namcir. 12 Sug len laugwan letara beicer namcirohob, kaba, Yesus arougb men logodeh, endagai: Yen youci ared mougwu augwan debinim se aigdaga mes, dauntoba hom emebero. 13 Dangga sug len louci ared mougwu dau roti mogo sergem gedig lusud let dau gin debinimohob, kaba, len leisgoho se aigdaga mes sisa hobjerai atij an namcir. 14 Sug lusud leiya dau Yesus men ganusbus gini, kaba, len lenara doum, lendagai: Indeic, sud hom gin, kaba, sud hom grag Allah esedeb en naugb en esai en moro eisaugb Mesias sug en en dou maman se cinogo gin deit, eng gini. 15 Doba Yesus ecinaga dag len louwan lagaigeij en deb naugb len leigdoumesa en moho dag mougt mera medam naugb len deit. Dangga hang, en asid enin aigus se menmod hom dau len toua. 16-17 Sug Yesus men logodeh leigtou naugb en terimda igdedeij deinyor lobohob, kaba, len louwada dig Galilea mebera naugb len leihwedig Kapernaum ucugb deitda. Dangga sug loba dougwo Yesus namcirohob, kaba, len leisa ij ino dau en dig Kapernaum toua. Anai en emen aud len touebma. 18 Sug len leisa ij ginda, kaba, loungmen medam eisa. Hang duhu toua oc medam namcir. 19 Doba sug len leisa ij ledebeij se duhu medi taijohob, kaba, len leiya Yesus ec mohora se duhu mod ucan len bedebeij deinyor lenohob. Dangga hang, len lahau dareg merug omom an namcir. 20 Doba Yesus oho mer debin len, endagai: Yen yemahaulo. Anai dan Yesus eng doucan yen ginin. 21 Sug len louman Yesus enin mer asesa, kaba, len merdoc emahau deitero. Doba len lebin en naugb en eigtou desij len se ingmes toua. Sug Yesus aingmo desij len se ingmes inegohob, kaba, ij toua edos us nagama ginohob. 22 Loneinda deit sug lusud gedig len latou deb dig nagama len leisa dau latouda, kaba, len merdoc eica dag loba greb, kaba, ij homto dous inggebga. Dara len lecinaga dau sug Yesus men logodeh len leisa ij, kaba, dag Yesus emaingmo desij len touwero, doba en eigtou deb dous. 23 Hang len merairesi lahilon dougwo Yesus, doba len lemeiya enero. Doba sug len leicara dag gin, kaba, leng dau cinogo Tiberias ingga len ledeic meren ij hosa deb se usi irir sug maman Adehsud en en sijo dou Allah aga roti naugb len let giohob. 24 Dangga sug len lecinaga, doba Yesus mogero. Dara men logodeh toua len leisa ij dau lenohob, kaba, len laingmo leng Tiberias meren ij aibibra naugb len ledehilon Yesus an men logodeh se Kapernaum deitda. 25 Sug len ledebeij dig nagamohob, kaba, len ledeiya Yesus en toua moongga. Hanoba len leijidougwo en, lendagai: Adehsud, ban ben aisohoba? 26 Doba Yesus owun len meroho namcir. Hanoba en enara dou len, endagai: Yen yemehilon dan an ganusbus gedig dan dens dou yen gia ginero. Doba yen yehilon dan an ared gedig yen yet beijeijohob gin dous. Anai yen meiju emobgesa meijouhw dau ganusbus ingga augwan dag misen touebma. 27 Dobnaro. Yen yemeic meijuwemougb esesa icira ared misen ginlo. Doba yen yeic meijuwemougb esesa icira ared gedig Lusud Meraguna Mebin dan deic dou yen dous. Anai ared misen, kaba, etaha bediyebeiya ucugb dangga. Doba ared gedig dan deic dou yen, kaba, emetaha bemediyebeiya deitero. Doba eic maireseb huhugb dou yen terimda. Anai dan Indina Allah ouma debin dan dag dan indoho agas edeinyum naugb ginohob. Yen youman dan indir an areg dan den dou yen gin deigeigouhw. Anai augwan gini asesa dag misen namcir. 28 Sug len louman dag gini, kaba, len leijidougwo en ucugb, lendagai; Emen emeicara dagiro, dauntoba emen emaimo areg asesa Allah enin medoc mes gina? 29 Dangga Yesus auni dou len, endagai: Areg asesa Allah enin medoc mes, kaba, dag yen meigdoc ebdebin an dan, en eng esa dan aud yenohob. 30 Doba len leija launi ucugb dou en deit, lendagai: Ban besedeb ganusbus dag ara naugb ban bens dou emen. Dauntoba sug emen emeiya dau gini, kaba, emen emdoc ebdebin an ban dag Allah esa ban aud emen dag misenohob. 31 Anai emen emjemouwer, kaba, Musa eic ared, moho w mana dau bogo dou len se lomougwisa sug nosa naugb len letohoba? Augwan gini esogwa deisa areg len log deb se Surad Injil Meb Mohon deb sug nosa touohob, lendagai: En eic ared dau bogo dou len naugb len let. 32 Doba Yesus auni dou len, endagai: Yen youman dan indir deigeigouhwahabi. Areg Musa eic dou yen meijemouwer se lomougwisa sug nosa, kaba, ared misen dau bogo touwero. Doba areg dan Indina enin eng eic dou yen, kaba, gini ared misen dau bogo dous. 33 Anai ared misen gedig en eic dou yen gin, kaba, dag sud hom gen dau bogo naugb en eic maireseb menau geb huhugb dou yen se cinogo augwan toua. Areg dan den dou yen gini, kaba, asesa dag misen namcir. 34 Sug lusud louman en mer an gin, kaba, len lacgeij en, lendagai: Adehsud, emen emouwan naugb ban beic ared gin eng mogud dou emen besesa terimda. 35 Dangga hang, Yesus ens enin ainyes dag misen dou len toua, endagai: Gareg en en aud dan, kaba, sir emeba en deitero. Dara gareg en medoc ebdebin an dan, kaba, merij emeba en touero. Anai danin eng dedag ared geic maireseb menau geb huhugb dou lusud dous. 36 Dara yen yecinaga dan dedag roti misen geic maireseb menau geb huhugb dou lusud. Anai yen yeiya dau ganusbus areg dan daben deseino yenohob. Doba yen meigdoc emebdebin an dan touwero, aimo dau areg dan den dou yen touohob. 37 Doba astesda sud hom gareg dan Indina en eic len dou dan deb sug nosohob, kaba, len eng len aud dan toua. Dara gareg en en aud danohob, kaba, dan demecicugb en touwero. Doba dan debin en beigtou desij dan beb huhugb namcir. 38 Anai dan demouwaden dau bogo naugb dan demaimo areg dau danin indoc mesero. Doba dan douwaden dau bogo naugb dan daimo areg asesa sud hom gesa dan aud yen enin medoc mes gin dous. 39 Dara areg sud hom gesa dan aud yen en ouwan, kaba, dag dan insira emagada sud hom ingma dau gareg en eic dou dan deb gin touwero. Doba dan demeigdoumesa len laugwan dau gomom se lona gouwedoc toues. 40 Dangga gareg en medoc eica Allah Meisi dan, hanoba en medoc ebdebin an dan toua, kaba, en emomom deitero. Doba dan demeigdoumesa en se Lona Gouwedoc naugb dan demeic maireseb menau geb huhugb dou en toues. Anai augwan gini aimo dau areg dan Indina enin ogod an deb sug nosohob. 41 Sug leng Yahudi graga len louman, doba Yesus ens enin dag roti misen gouwaden dau bogo dou lenohob, kaba, len logurgur an en mer gini namcir. 42 Hanoba len lenara doum, lendagai: Sud hom gin, kaba, Yusub en Meisi Yesus enei? Era naroei? Anai maman macinaga en mena dara mem lan toua asesohoba? Dangga dagiro, naugwe hang, en enara dou maman dag en edag ared misen gouwaden dau bogo naugb mamanohoba? 43 Doba Yesus etaha len merir an, endagai: Yen yemeijidougwom eisaugb dan doum ucucugblo. 44 Anai sud hom ingma, kaba, en emen aud dan augwougwero. Doba en en aud dan ogdoc sug dan Indina enin eng arautut en dous. Hang dan demeigdoumesa en dau gomom aud maireseb menau geb huhugb se Lona Gouwedoc toues. Anai dan Indina enin eng esa dan aud yenohob. 45 Augwan gini aimo dau areg leng lesai Allah en moro sug nosa len log deb se Surad Injil Meb Mohon deb sug nosa touohob, lendagai: Se lona daiyamo gacin, kaba, Allah enin emedidib aremeijouhw augwan asesa dou lens. Dangga gareg en medoc edag beim an dan Indina an en mer gini, hanoba en medoc eica en an toua, kaba, len lemotogoto danero, doba len len aud dan toua terimda. 46 Doba areg dan den dou yen graga, kaba, gini meijouhw dag len leiya dan Indina en mebes dara len merairesi gin touohobei? Naro, gini men meijouhwero. Anai sud hom ingma, kaba, en emeiya dan Indina dara en maires mougwa hom touebma. Doba danin dous eng deiya dan Indina dara dan indiresohob. Anai danin dous eng den dau Allah aud yenohob. 47 Dangga yen youman dan indir ginahabi. Gareg en medoc ebdebin an dan, kaba, en emomom deitero, doba maireseb huhugb eb naugb enohob. 48 Anai danin eng dedag roti geic maireseb huhugb dou yen dous. Augwan gini asesa dag misen namcirohob. 49 Anai yen meijemouwer, kaba, len let ared, moho w mana se lomougwisa sug nosa. Doba len laugwan lomom andohob. 50 Doba gareg en et roti gen dau bogo gin, kaba, en emomom deitero. Doba maireseb huhugb eb naugb en namcir. 51 Danin eng dedag roti gouwaden dau bogo naugb dan deic maireseb menau geb huhugb dou lusud. Dangga gareg en et ared gin, kaba, en emomom deitero. Doba maireseb huhugb eb naugb en namcir. Dara ared gedig dan deic dou en gin, kaba, dag dan indug gedig dan deic dou lusud se cinogo augwan. Dauntoba len lemomom deitero, doba maireseb menau geb huhugb eb naugb len laugwan toua terimda. 52 Doba sug leng Yahudi louman dau gini, kaba, len merdoc esrougb medam an en namcir. Hanoba len lenara merir edregim ucucugb, lendagai: Sud hom gin, kaba, en eic en mog dag ara dou maman naugb maman mata? 53 Dangga Yesus ou mesira mougwa hom ucan dou len deit, endagai: Yen youman dan indir an gin toua deitahabi. Sug yen yemet Lusud Meraguna Mebin dan indug, dara yen yemeg dan indugwihi ginero, kaba, maireseb menau geb huhugb emeb naugb yen touwero. 54 Doba gareg dau yen en et dan indug, dara en eg dan indugwihi, kaba, en emomom deitero. Doba dan demeigdoumesa en dau gomom aud maireseb huhugb se lona gouwedoc gin toues. 55 Anai dan indug dag ared misen. Dara dan indugwihi dag duhu misen gin dous. 56 Dangga gareg en et dan indug, dara en eg dan indugwihi, kaba, aman amahwas dag homohob. Augwan gini asesa dag misen namcir. 57 Dan Indina gedig en eic maireseb huhugb dou lusud, kaba, enin eng esa dan aud yenohob. Sug maireseb huhugb eb naugb en dag ginohob, kaba, dan demomom touwero. Doba maireseb huhugb eb naugb dan ogdoc en touohob. Dangga gareg en et dan indug gin, kaba, en emomom toua deitero. Doba maireseb huhugb eb naugb en toua terimda. 58 Dangga roti gouwaden dau bogo gin, kaba, aninim dag ared gedig yen merjemouwer len let se lomougwisa sug nosa ginero. Anai areg len let gin, kaba, ared misen dous. Hang emeic maireseb huhugb dou len touwero, doba len lomom andohob. Doba gareg dau yen en et roti gouwaden dau bogo gini, kaba, en emomom deitero, doba maireseb huhugb eb naugb enohob. 59 Areg Yesus en en dou leng Yahudi meren mougtir gin, kaba, en ebedbed dou len se meren tuari se Kapernaum. 60 Doba Yesus men logodeh leinyana, kaba, len toua merugwengga desij len gini. Dangga sug len louman dau areg en enara dou lusud dag gragohob, kaba, len logurgur an en mer gini. Hanoba len lenara doum, lendagai: Maman mamouman en mer an areg en en dou len ginlo. Anai areg en en dou len gin, kaba, edreg dau maman mamdoc mes namcirohob. 61 Doba len lemenara dau gin dou Yesusero. Doba en, kaba, en ecinaga dag len logurgur eisaugb en mer graga dag len let en mog dara len leg en mogwihi ingga augwougb ginohob. Hanoba en eijidougwo len, endagai: Areg dan den dou lusud graga, kaba, eic yen meigdoc momogo dou yen, hang yen yemasid yenin dau dan touei? 62 Sug yen meigdoc momogo an areg dan den dou lusud gragohob, kaba, dagiro, naugwe hang, sug yen yeiya Lusud Meraguna Mebin dan decicugb se dan dugun deseino yen, kaba, yen meigdoc emebara an dana? 63 Doba yen meigdoc momogo an areg dan den dou lusud gragero. Anai lusud misen, kaba, meren goubesa emedeinyum naugb sug len leic maireseb menau geb huhugb dou lusudero. Doba maireseb menau geb huhugb gin, kaba, ogdoc Mena Gogoufu gen dau Allah gin dous. Dangga hang, areg dan desai dou yenohob, kaba, ousa yen naugb Mena Gogoufu gin, kaba, en en aud yen naugb en eic maireseb menau geb huhugb dou yen toua. 64 Doba ligbum dau yen, kaba, yen meigdoc emebdebin dan an areg dan den dou yen ginero. Doba yen yotogoto dan indir an gini terimda. (Yesus enara dangga dou men logodeh, anai en ecinaga dau gareg dau len en medoc emebdebin an enero. Dara sud hom gareg en ohw en se len gus merisira len laugwan teiteiyohob.) 65 Sug Yesus enara dag graga dou men logodeh dag ginohob, kaba, en esulou len ucan deit, endagai: Dan decinaga dag areg dan den dou yen graga, kaba, edreg dau yen meigdoc mes namcirohob. Hang dan den dou yen dag sud hom ingma, kaba, en emen aud dan dau eninero. Doba ogdoc sug dan Indina arautut en dara eic goubesa dou en naugb gin dous. 66 Dobnaro. Ogdoc aremer hom gin, kaba, men logodeh leinyana len lemaimo en deitero, doba len lasid lenin dau en namcir. Anai en enara dou len dag len let en mog dara len leg en mogwihi touohob. 67 Dangga hang, Yesus eijidougwo men logodeh merug sisa hobjerai, endagai: Yen yasid yenin dau dan toua namcirei? 68 Doba Simon Petrus en enara bauni Yesus mer ucugb, endagai: Adehsud, emen emougbda dau ban aud gara en deita? Anai areg ban besai dou emen, kaba, gin dous eng ens ucina maireseb menau geb huhugb dou emeni. 69 Hang emen ememeija emouwesa ban toua deitero. Doba emen emod emina debsa ban namcir. Anai emen emecinaga dag ban eng Sud Hom Gecabeci Gen Dau Allah aud emenohob. 70 Doba Yesus owun en mer an gini, endagai: Naro, dan douci yen meijug sisa hobjerai debinim naugb daninohob. Gini misenei? You, gini misenohob. Doba hom dau yen, kaba, en medoc dag Bilis en medoc an danohob. 71 Doba areg Yesus enara dou Petrus gin, kaba, en enara dou en eisaugb Simon dau cinogo Keriod en meisi Yudas gin dous. Anai Yudas gin, kaba, eni dau Yesus men logodeh merug sisa hobjerai gin toua. Doba eng sud hom gohw Yesus deb se leng Yahudi meren mougtir merisira gini.

7:1 Sug Yesus ens enin dag ared gouwaden dau bogo dou lusud se cinogo Kapernaum gin bouwohob, kaba, en eihweda sungga sungga se leng Galilea meren hancob naugb en esai Allah moro dou len gus toua. Anai en ecinaga dag leng Yahudi meren mougtir se leng Yudea meren hancob, kaba, len lesedeb naugb leic gomom dou enohob. Dangga hang, en emouwan naugb en emecicugb sungga touwero. 2-3 Doba sug leng Yahudi meren lona naugb sug len len tu meijesa ebeij deinyorohob, kaba, Yesus magtor lenara lareineg en, lendagai: Ban beihwededau sugini dig leng Yudea meren hancob ucugbda. Dauntoba aban logodeh se cinogo ingga, kaba, len toua leiya dau aban geicara ganusbus gin touahabi. 4 Anai sug sud hom en ens ganusbus dag gini, kaba, en emecgoneh mog anero. Doba en eic maga ainyes an gin dou len gus, dauntoba len lecinaga en dag misen touahabi. Dangga sug ban beic ganusbus dag misenohob, kaba, ban bemecgoneh ban abug an gin dau lusud touwero. Doba ban beic ban abaga an ainyes dou len laugwan toua. 5 En magtor lenara dag gini anai len toua loududa lendag en emen naugb eigdoc lusud dau meren gogom touwero. 6 Doba Yesus enara bauwun len merir an gini, endagai: Indan lona areg Allah esedeb naugb sug dan deihwedig Yerusalem gin, kaba, emedagasebma. Doba yen, kaba, yen meijohora ebeibei Yerusalem astesda lona terimda. Anai ara ara ingma emata dougwo yenero. 7 Hang lusud gedig Bilis oiharaga len se cinogo gin, kaba, len merdoc emecgwan yen touwero. Anai yen yeicara aninim dag lenohob. Doba dan, kaba, len gini len merdoc ecgwan dan terimda. Anai dan den dougwo len dag meren geicara augwan, kaba, mog mog namcirohob. 8 Dangga yen yeino dan indin naugb yen yedougwan ared debin lona sug maman mahud tu meijesa inggada. Doba dan, kaba, dan demeihwedebma. Anai indan lona areg Allah esedeb naugb sug dan deihweda, kaba, emedagasebma. 9 Sug Yesus enara bedeinyum dou en magtor dangga dauwohob, kaba, en eigtou se leng Galilea meren hancob gini se lona hosa deitda. 10 Sug Yesus magtor leino en men naugb ledougwanara debin tu meij se Yerusalem dauwohob, kaba, en toua oucan lenda. Doba sug en eihweda gin, kaba, en emerba moc inoro. Doba en edeigtou augwougb dous. 11 Dangga astesda lona sug lusud lougwanara gin, kaba, leng Yahudi meren mougtir len lehilon en terimda. Hanoba len leijahaija dougwo len gus, lendagai: Yen yeiya sud hom gin, kaba, en toua moongginei? 12 Sug lusud louman gini, kaba, len merir laisedim eisaugb Yesus gin toua. Ligbum, kaba, len leigdoumesa en moho, lendagai: Eni sud hom gedag beim namcir. Doba laingma, kaba, len loto len merir an gini, lendagai: Naro. Sud hom gini, kaba, en eicara baugwohosa lusud naugb len laijahasero dous. 13 Doba areg len len doum gin, kaba, len lemen ainyes naugb len gus lemoumanero. Doba len lec luluf an doum dous. Anai len lahau dau sug len lenara doum ainyes, kaba, leng Yahudi meren mougtir leic gogom dou len toua. 14 Dangga sug lona naugb len lougwanara debin tu meij gini ebeij taitaijohob, kaba, Yesus en toua einesa Allah Men Tuari naugb en edidib Allah mer men meijouhw augwan asesa dou len deit. 15 Sug leng Yahudi meren mougtir len louman dau areg Yesus edidib dou lusud gin, kaba, len leimiman dau en namcir. Hanoba len leijidougwom, lendagai: Gareng arautut sud hom gini, hang en emecinaga aremeijouhw augwan dag gina? Anai sud hom ingma, kaba, en emens dau augwan gini dou en touebma. 16 Doba sug Yesus ouman dau areg len leijidougwom an gini, kaba, en enara bagod len merir, endagai: Areg dan dedidib gin, kaba, dan demeic dau danin indoc mes dou yenero. Doba en dau sud hom gesa dan aud yen enin medoc mes dous. 17-18 Hang dan demeigdoumesa dan indoho an gin dou yen touwero. Anai gareg en edidib ara ara dau enin medoc mes dou lusud, kaba, en ouwan naugb lusud leigdoumesa enin moho an gin dous. Doba gareg en ecinaga dag en esai sud hom gus en moro dou lusud dous, kaba, en emouwan naugb len lemeigdoumesa en moho an ginero. Doba en ehilon naugb len leigdoumesa sud hom gesa en aud len gini en moho dous. Dangga areg en esai dou len gini, kaba, dag en emereiyara dou len touwero. Doba en enara augwan se geica dou len terimda. Dara gareg dau yen en medoc erleij naugb en aimo areg asesa Allah enin medoc mes namcir, kaba, en toua emdecinaga dag areg dan dedidib dou yen gini, kaba, emen dau danin indoc mesero. Doba en dau Allah enin medoc mes dous, anai Allah enin emens gin dou ens. 19 Musa eic Allah men gomnomna dou yen sug nosohob. Gini misenei? You, augwan gini misenohob. Dangga dagiro naugwe hang, yen youwan yeic gomom dou dana? Anai en ens dau areg dan desai dau gin deb se men gomnoma sug nosohob. Dobnaro. Sud hom ingma dau yen, kaba, en emaimo areg en og gini augwan dag misen touebma. Doba yen yedreg namcirohob. Hang yen yemehilon ucina naugb sug yen yeic gomom dou dan toua. 20 Sug lusud louman Yesus mer an gin dag ginohob, kaba, len lenara gouji dou en, lendagai: Gareg en ouwan es ban, hang ban bemenara dag gin dou emena? Mena mog mog einesa ban abdoc mes namcirohobei? 21 Doba Yesus enara bauni dou leng Yahudi meren mougtir ucugb deit, endagai: Dan daben ganusbus hom deseino yen se Lona Gemeicaresero gin. Hang yen meigdoc emesrougb an dan naugb yen yemeic gomom dou dan icira gin toua. 22 Doba yen toua, sug lona naugb yen yec merus dau logodeh mahaniheni, kaba, yen yamsoho len se Lona Gemeicaresero gin touwero. Doba yen yeic meijus naugb yen yec len merus dau len se lona ingga toua. Anai gini aimo dau areg Musa arougb yen an ginohob. Hang yen yemedreg en mer gin touwero. Dobnaro. Areg Musa arougb yen an gini, kaba, emebiji dau enero. Doba ebiji dau yen meijemouwer sug nosohob. 23 Dangga hang, sug yen yec godeh mahaniheni hom en mos dau en se lona ingga, dauntoba yen yemedreg Musa men gomnomna an gin touwero, kaba, dagiro, naugwe hang, yen meigdoc mog mog an dan sug dan deic geigouhw dou sud hom mohora agaim se Lona Gemeicaresero gin toua? 24 Hang yen yemogod aremer aga lusud emaimo dau areg yen yeiya ginero. Doba yen yogod aremer aga len aimo dau areg edag beim se geica an len dous. 25-26 Doba ligbum dau leng se Yerusalem, kaba, len leijidougwom, lendagai: Sud hom graga, kaba, maman mougtir len lehilon en naugb leic gomom dou en gia ingginei? Dangga dagiro, naugwe hang, len lemen dougwo enero? Anai yen yeiya en eic mos naugb en edidib Allah mer men meijouhw ainyes dou lusud terimda. Gedangga, kaba, len toua loudesa en edag Sud Hom Geigdoc Maman Dau Maman Gogom Augwanohobei? 27 Dobnaro. Anai Sud Hom Geigdoc Maman Dau Maman Gogom Augwan, kaba, maman mamecinaga sug en gun touwero. Doba en en aud maman augwougb dous. Doba sud hom gini, kaba, maman macinaga sug en gunohob. Hang en emedag Sud Hom Geigdoc Maman Dau Maman Gogom Augwan dag misen touwero. 28 Doba Yesus, kaba, en edidib Allah mer men meijouhw se Allah Men Tuari gin terimda. Dangga sug en ouman, doba lusud leijidougwom dag ginohob, kaba, en esa mer debin len. Hanoba en eijidougwo len, endagai: Yen youdesa yen yecinaga areg eisaugb dan dara dan dugun augwan dag misenohobei? Naro, yen yemecinaga dani dara sug dan dugun touebma. Anai sug dan den aud yen gini, kaba, dan demen augwougb dau danin indoc mesero. Doba sud hom gus en mer ogod an dan, hang dan demen aud yen gini naugb dan desai en moro dou yen toua. Dangga areg en en dou yen gin, kaba, eigouhw naugb yen yod meijina debsa en an gin terimda. Anai en emereiyara dou yen touwero, doba en enara se geica dou yen namcirohob. Dara yen yemecinaga sud hom gesa dan gini dag misen touebma. 29 Doba danin, kaba, dan decinaga en dag misenohob. Anai enin eng mer ogod an dan, hang dan demen aud yen toua. 30 Sug lusud louman en mer an gin, kaba, len louwan lagaigeij en. Doba sud hom ingma emeic mos naugb emagaigeij en touwero. Anai Allah men lona areg en ogod deinaugb enohob, kaba, emedagasebma. 31 Doba leinyana dau lusud ingga, kaba, len lod merna debsa enohob. Hanoba len len dougwo lusud graga, lendagai: Yen youdesa dagiro? Sug Sud Hom Geigdoc Maman Dau Maman Gogom Augwan en en aud maman, kaba, en emeic ganusbus ingma bemedreg dau ginsei? Naro. 32 Doba leng Parisi, kaba, len louman dau areg lusud lec luluf eisaugb Yesus dag gin doumohob. Dangga hang, leni dara gembala gesa taij meren mougtir, kaba, len larougb leng lesedougwo Allah Men Tuari naugb sug len ledagaigeij Yesus toua. 33 Dangga Yesus esulou lusud laugwan mougwa hom ucan deit, endagai: Dan demeigtou desij yen terberbahabero. Doba se lona hosa deit, kaba, dan decicugb aud sud hom gesa dan aud yen gini ucugb dangga. 34 Se lona ingga, kaba, yen yehilon dougwo dan, doba yen yemdeiya danero. Anai usi gedig dan deigtousa gin, kaba, yen yemdebeij touwero. 35 Sug leng Yahudi meren mougtir len louman dau gini, kaba, len leijidougwom ucucugb, lendagai: Sud hom gini en eihwedigiro, hang maman mamdeiya enero gina? En eihwedig lugmahara meren cinogo gedig maman lusud latou desij len naugb en edidib Allah mer men meijouhw augwan dou len touei? 36 Anai en enara dou maman dag cum, kaba, maman mahilon dougwo en. Doba maman mamdeiya enero. Dara en enara dou maman toua dag usi sug en eigtousa, kaba, maman mamdebeij touwero. Augwan gini, kaba, meijouhw dagiro, inggina? 37 Se lona gouwedoc naugb sug leng Yahudi lougwanara debin tu meij gini, kaba, Yesus eisa besa naugb en enara dou lusud deit. Anai lona hom gini, kaba, moho agas edreg dau lona gus sug len lougwanara debin tu meij gin augwan namcir. Dangga sug en eisa besohob, kaba, en enara dou len dara mer medam, endagai: Gareg dau yen merijebeni, kaba, en en aud dan naugb dan deic duhu dou en beg. 38 Dara gareg en medoc ebdebin an dan, kaba, duhu geic maireseb menau geb huhugb dou lusud agunya dau en toua. Augwan gini esogwa deisa areg len log deb se Surad Injil Meb Mohon deb eisaugb dan sug nosa touohob. 39 Doba areg Yesus eic duhu bainyen dou len gini, kaba, en emen dau duhu misen dou lenero. Doba en en eisaugb Mena Gogoufu deb dou len dous. Anai gareg en medoc ebdebin an en, kaba, en os dou len naugb en emesa Mena Gogoufu aud len toues. Doba sug en enara gini, kaba, Allah emeigdoumesa en dau gomom aud gogouf cucugb ucugbuma. Hang Allah emesa Mena Gogoufu aud lusud touebma. 40 Sug lusud louman Yesus mer an gin, kaba, merug hosa len louma debin en, lendagai: Indeic, sud hom gin, kaba, eni sud hom gesai Allah moro eisaugb Mesias sug en en dou maman. 41 Doba ligbum, kaba, len len dougwo len, lendagai: Sud hom gin, kaba, eni sud hom gesai Allah moro eisaugb Mesias dou maman, isnaro. Doba en eng Mesias Geigdoc Maman Dau Maman Gogom Augwan ginohob. Doba ligbum deit, kaba, letaha len merir an gini, lendagai: Yen youdesa Sud Hom Geigdoc Maman Dau Maman Gogom Augwan, kaba, en en dau leng se Galileaei? Naro, en emen dau Galilea, isnaro. 42 Anai Surad Injil Meb Mohon en dou maman dag Mesias, kaba, eni sud hom dau Daud medebeitor len dous. Dangga hang, en emen dau leng se Galilea touwero. Doba sug mem ouwadan en, kaba, en ouwadan en se Bedlehem dous. Anai se Bedlehem gini, kaba, Daud en gun engga. 43 Dangga hang, len merdoc dag hom eisaugb Yesus ginero. Doba len merir laisedim endaha. 44 Dara lingma, kaba, len louwan lagaigeij en. Doba sud hom ingma dau len, kaba, en emeic mos naugb gin touwero. 45 Sug leng Yahudi meren mougtir len leiya, doba leng lesedougwo Allah Men Tuari len lecicugb dara merug mogud en, kaba, len lehin merir se len, lendagai: Dagiro, naugwe hang, yen yemagaigeij sud hom graga aud emen suginero, anara? 46 Doba len lenara laugbtarera dougwo len merir, lendagai: Emen ememagaigeij enero. Anai men genara, kaba, aninim dag sud hom ingma men genara touwero, doba susugb dau lusud gus laugwan namcir. 47 Sug leng Parisi louman dau gin, kaba, len lenara debin len, lendagai: Sud hom gin, kaba, en augwohosa yen, aninim dag en augwohosa len gus laugwan touohobei? 48-49 Anai len gin, kaba, len lemecinaga Musa men gomnomna dag misenbuma. Hang Allah ouwara dougwo len touohob. Doba yen yeiya dau mougtir gus dara emeng Parisi, kaba, dag emingma emobsara aud touohobei? Naro, sud hom ingma dau emen, kaba, en emobsara dou enero. 50-51 Doba sud hom dau leng Parisi, en moho Nikodemus, kaba, en owun len merir an gin namcir. Hanoba en enara dou len, endagai: Maman gomnomna en dou maman dag maman mamogod aremer gogom debin sud hom augwougblobma. Doba en ens dau men geicara dou maman. Dauntoba sug maman macinaga meijouhw augwan nosahabi, kaba, maman mamogod aremer gogom debin en daiyamo. Sud hom Nikodemus gin, kaba, eni sud hom gedebeij Yesus naugb loba sug nosohob. 52 Doba sug leng Parisi dara mougtir len louman Nikodemus en mer an gini, kaba, len merir eigdoc en icira gini. Hanoba len lenara dou en, lendagai: Ban toua dau leng Galilea, hang ban benara dangga dou emenei? Ban becic Surad Injil Meb Mohonahabi. Anai sug ban beicara baimo dag gin, kaba, ban becinaga dag sud hom gesai Allah moro eisaugb Mesias dou maman, kaba, en emen dau leng se Galilea naugb enara dou mamanero.

8:1 Doba Yesus, kaba, en eisaugb aud mengarougb moho Saitun Meda naugb en atou sungga. 2 Se loneinda, kaba, en ouwaden naugb en einesa Allah Men Tuari deit. Sug en einesohob, kaba, lusud laugwan lou acec en. Dangga sug len laugwan lacinimohob, kaba, en eigtou. Hanoba en edidib Allah mer men meijouhw dou len toua. 3 Doba irir sug Yesus ens aremeijouhw dou len gin, kaba, leng meru ouforoho se Musa men gomnomna dara leng Parisi, len lahwan gida hom aud en. Hanoba len larougb en bedeseino lusud laugwan toua. Gida gin, kaba, lusud leiya en sug giji hom mesira ebsa enohob. 4 Dangga sug en edesohob, kaba, len lenara lainyen Yesus medoc mes an gin toua. Hanoba len leijidougwo en, lendagai: Adehsud, gida hom gin, kaba, lusud leiya sug giji hom lan laobsara animohob. 5 Hang ban bauwam an dagiro eisaugb gida gina? Anai Musa men gomnomna enara dou maman dag gida gedig en eicara dag gin, kaba, maman marba igdahab an en naugb maic gomom dou en toua? 6 Len leijidougwo en an dag gini, dauntoba sug en enara bedreg Musa men gomnomna ginohob, kaba, len ledehin meraga an en deseino meren mougt mera goujir toua. Doba Yesus, kaba, en eic mesira mob, hanoba en ogmen naugb aguci cinogo namcir. 7 Doba leng meru ouforoho se Musa men gomnomna dara leng Parisi graga, kaba, len merir lawun en terimda. Dangga Yesus en oho mergo. Hanoba en enara dou len, endagai: Gareg dau yen en emebesesar mougwa hombuma, kaba, en eng emeic igdahabi naugb en ed gida gin aimougtut. 8 Sug en enara dangga dou lenohob, kaba, en mergo omnen. Hanoba en eic mesira mob aguci cinogo ucugb deit. 9 Sug len louman Yesus enara dou len dag ginohob, kaba, len laugwan lemesa sungga debero. Doba ebiji dau lusudbod terimda logodeh, kaba, hom isisi, hwai isisi, terimda len laugwan louwa dau enohob. Dangga Yesus enin dous eng eigtou deb. Dara gida hom graga, kaba, en toua esedeb sunggaba. 10 Sug len laugwan louwa dau lanohob, kaba, Yesus oho mergo. Hanoba en eijidougwo gida graga, endagai: Daneh, ban beiya lusud graga len laugwan merug inggiroda? Sud hom ingma dau len, kaba, en emeigtou naugb emehin meresa ban deiteroei? 11 Doba gida ingga, kaba, en auni dou en, endagai: Adehsud, lingma, kaba, len lemesa sugin deb naugb lemehin merir se dan touwero. Sug gida enara dag gin dou enohob, kaba, en dou en, endagai: Sug len lemeic gogom dou banero, kaba, dan toua demeic gogom dou ban touwero. Hang ban beihweda dara ban bemebesesar toua deitero. 12 Sug gida graga eihwededau Yesusohob, kaba, Yesus enara dou leng Parisi deit, endagai: Danin dedag mouf naugb daisema lusud se cinogo gin augwan. Dangga gareg en aimo dan, kaba, en emec se lobeigbogo deitero. Doba dan induf gini aisema en aud maireseb menau geb huhugb namcir. 13 Sug leng Parisi louman gin, kaba, len lenara debin en, lendagai: Ban bos badi banin an gin deseino emen dous. Dangga hang, areg ban ben dou emen gin, kaba, dag misenero. Doba dag ban bereiyara dou emen terimda. 14 Doba Yesus owun len merir an gini namcir. Hanoba en enara dou len, endagai: Naro, areg dan dos dadi danin an gini deseino yenohob, kaba, augwan gini asesa dag misen namcir. Anai dan decinaga dan dugun sug dan den aud yen gin dau. Dara dan decinaga deb naugb sug dan decicugb touohob. Doba yen, kaba, yen yemecinaga dan sug dugun dara sug dan demecicugb gin touwero. 15 Dangga sug yen yogod aremer aga lusud, kaba, yen yowun len meroho aimo dau areg eb ainyes se yen meijires an len dous. Doba dan, kaba, dan demeicara dangga an sud hom ingma ginero. 16 Doba sug dan dogod aremer an lusud, kaba, dan decinaga dag areg dan dogod anir, kaba, augwan gini asesa se geica namcir. Anai dan demaimo augwan gini dau danin indoc mes an lenero. Doba dan Indina gedig en esa dan aud yen, kaba, en toua moongga dara dan an ginohob. 17 Lusud log se meijen gomnomna, lendagai: Sug lahwai logod sogo mera hom debin aremer homohob, kaba, areg len lenara augwan gini se geica namcir. 18 Dangga hang, areg dan den dou yen gin, kaba, augwan toua dag misen namcir. Anai danin demouma debin dan indir an gin dousero, doba dan Indina en toua ouma debin dan an ginohob. 19 Sug lusud louman en mer an gin, kaba, len leijidougwo en ucugb, lendagai: Ban Abina gin moonggiro? Doba Yesus auni len merir, endagai: Yen yemecinaga areg geb se danin dara dan Indina aman amahwas amdoc mes augwan asesabuma. Anai sug yen yecinaga areg asesa danin indoc mes augwan dag misenohob, kaba, yen yecinaga areg asesa dan Indina enin medoc mes augwan dag misen touohob. Doba yen yemecinaga areg asesa danin indoc mes augwan dag misenbuma. Hang yen yemecinaga areg asesa dan Indina enin medoc mes augwan dag misen touebma. Anai sug yen yecinaga dan dag misen, kaba, gini aninim dag yen yecinaga dan Indina touohob. 20 Areg Yesus en en gin, kaba, sug en edidib Allah mer men meijouhw dou lusud se Allah men igtia deinyor biruwa an aregoufu sug len lob deisa. Doba sud hom ingma, kaba, en emeic mos naugb emagaigeij en touwero. Anai Allah men lona areg en ogod deinaugb enohob, kaba, emedagasebma. 21 Sug Yesus ens enin dag mouf gaisema lusud aud maireseb huhugb dou len dag gragohob, kaba, en esulou len mougwa hom ucan deit, endagai: Cum, kaba, dan deihwededau yenohob. Dangga se lona ingga, kaba, yen yehilon dan. Dobnaro. Anai meijen sesar ahwan yen aud gomom dau dan touohob. Hang yen yemedebeij dan se usi sug dan deigtou touwero. 22 Sug leng Yahudi meren mougtir len louman Yesus mer an gini, kaba, len leijidougwom, lendagai: Sud hom gini en ouwan ed enin. Hang en emenara endag usi sug en eihwedesa, kaba, maman mamdebeij enero, ginei? 23 Doba Yesus enara bauwun len merir, endagai: Yen, kaba, yen meigdoc aninim dag lusud se cinogo tainya gaih gini. Doba dan, kaba, dan den dau bogo gada aud yen. Dara yen yugun, kaba, se cinogo gin toua. Doba dan dugun, kaba, se cinogo ginero. 24 Hang dan demenara dou yen graga dag maireseb menau geb huhugb emeb naugb yen touwero. Doba meijen sesar gini ahwan yen aud gomom dous. Anai sug yen meigdoc emebdebin an dan dag dan demedag Adehsud Geis Huhugb namcirohob ginero, kaba, maireseb menau geb huhugb gini emeb naugb yen touwero. Doba meijen sesar eic gogom dou yen dous. 25 Sug leng Yahudi meren mougtir louman Yesus mer dau gini, kaba, len leijidougwo en dareg lehi rasahasa eni, lendagai: Ban bedag garena? Doba Yesus auni dou len ucugb, endagai: Dani sud hom gedig dan dens en dou yen dau acgunog ginohob. 26 Dangga hang, indan goubesa inggebga naugb sug dan dens dau meijen geicara. Dara dan dowun yen an gin toua. Anai meijen geicara einyana dag ecgu terimda. Dobnaro. Dan demen ara ara dau danin indoc mes dou yenero. Doba areg sud hom gesa dan aud yen en arougb dan an ginohob, kaba, dan dens dau augwan gini dou yen dous. Anai en, kaba, en emereiyara mougwa hom touwero. Doba areg en en gin, kaba, se geica namcir. 27 Doba len meru edgom dougwo gin terimda. Hang len lemecinaga dag en enara dou len eisaugb en Mena Allah se bogo touwero. 28 Dangga Yesus enara dou len deit, endagai: Se lona sug yen yeigdoumesa sogo salib an Lusud Meraguna Mebin dan ainyesohob, kaba, yen meiju emedgom dougwo dan deitero. Doba yen yecinaga dan dedag Adehsud Geis Huhugb namcir gin dag misenohob. Hang se lona ingga, kaba, yen yecinaga toua dag dan demesai moho hom dau danin indoc mes dou yen touwero. Doba dan desai areg dan Indina enin eng arougb danohob gin dou yen dous. 29 Dangga sud hom gesa dan aud yenohob, kaba, en emarges dan deb touwero. Doba eni moongga dara dan terimda. Anai dan daimo areg geic en medoc eigouhw dou en gin dous. 30 Sug lusud louman dau areg Yesus enara dou len gin, kaba, len leinyana merdoc ebdebin an en toua namcir. 31 Sug Yesus eiya, doba merug hosa dau leng Yahudi len merdoc ebdebin an enohob, kaba, en esulou len ucan gin deit, endagai: Sug yen yeicara yaimo dan indir an areg dan desai dou yen graga, hanoba yen yedag beim an namcir toua, kaba, yen yedag indan logodeh misenohob. 32 Hang yen yemedag sogougb toua deitero. Doba sug yen yecinaga areg se geica ginohob, kaba, areg se geica gini eigdoc yen dau gin toua namcir. 33 Doba len lesa merir debin en. Hanoba len leijidougwo an, lendagai: Emen emedag Abraham medebeitor. Hang emen emedag sogougb dou sud hom ingma touebma. Dangga ban abu dagiro, hang ban bemenara dou emen dag emen emecinaga areg se geicohob, kaba, emesga emen dau sogougb gin toua? 34 Doba Yesus enara bauni len merir ucugb, endagai: Gareg dau yen en aimo sesar, kaba, en edag sesar men sogougb gin toua. Yen youman dan indir ginahabi, anai augwan asesa dag misen namcir. 35 Dara sogougb, kaba, en ematou desij mougt mera se men tu touwero. Doba mougt mera meisi enin dous eng atou desij mena se men tu terimda. 36 Dangga sug Allah Meisi dan desga yen, kaba, yen yemedag sesar men sogougb toua deitero, doba yen yarges dau ginohob. 37 Dan decinaga yen yedag Abraham medebeitor gini. Doba yen yehilon ucina naugb sug yen yeic gomom dou danohob. Anai yen yemebin Allah en mer areg dan desai dou yenohob augwan se yen meigdoc mes gin touwero, doba yen yotogoto namcir. 38 Areg dan Indina en ens dou danohob, kaba, dan desai dau augwan gin dou yen. Doba yen, kaba, yen yeicara yaimo dau areg yenin meijina en en dou yen gin dous. 39 Sug leng merdoc ebdebin an Yesus mer graga len louman dau gini, kaba, len lesa mer debin en deit, lendagai: Emen, kaba, emen emina Abraham hom gin dous. Doba Yesus enara bauni dou len ucugb, endagai: Sug yen yedag Abraham medebeitor dag misenohob, kaba, yen yemedreg dau men geicara sug nosa touwero. Doba yen yeicara yaimo eni aud augwan gin toua terimda. Doba meijen geicara augwan, kaba, emesogwa deisa men geicara touwero. Doba yen yedreg dau men geicara augwan namcirohob. Dangga hang, yen yemedag Abraham medebeitor misen touwero. 40-41 Anai dan, kaba, dan demedreg dau geica areg dan douman dau Allah mougwa hom touwero. Doba dan dens dau augwan dou yen dous. Doba yen yehilon ucina naugb sug yen yeic gomom dou dan terimda. Abraham, kaba, en emeicara dag gin mougwa hom touebma. Doba len lenara launi ucugb dou en, lendagai: Emen, kaba, dag logodeh gaugwougwero. Doba Allah enin eng emen Emina misen gini. 42 Doba Yesus auni dou len namcir, endagai: Sug yen yedag Allah mehir misenohob, kaba, yen meigdoc gororougb dan toua terimda. Anai dan den dau Allah aud yen, hang dan demedebeij yen toua. Dangga dan demedebeij yen emaimo dau danin indoc mes an ginero, doba Allah enin eng esa dan aud yenohob. 43-44 Doba sug dan den dau Allah aud yen dag ginohob, kaba, dagiro, naugwe hang, yen meigdoc emobgesa areg dan desai dou yen ginero? Yen meigdoc emobgesa areg dan den dou yen ginero, anai yen yemedag Allah en mehirero. Doba yen yedag Bilis en mehir gin dous. Dara en edag yen meijina misen gin toua. Hang yen yemei meijums an areg dan desai gin dou yen touwero. Doba yen meigdoc erleij naugb yen yaimo yen meijina an areg en medoc etrij icira gin dous. En, kaba, en emaimo areg se geica mougwa hombuma. Doba dau acgunog, kaba, en ouwan eic gomom dou lusud namcir. Anai areg misen emeb se en medoc mes teiteiyero. Dangga hang, sug en ereiyara, kaba, gini dag aremer menau naugb enero. Doba gini dag moumougb dous. Anai en eng ebin gereiyara namcirohob. Dara en edag mebin naugb leng lereiyara len laugwan gin toua. 45 Doba dan, kaba, dan desai areg se geica mogud dou yen dous. Hang yen meigdoc emebdebin dan indir an gin touwero. Anai Bilis en edag yen meijina teitei ginohob. 46 Sud hom gareg dau yen en owun dan indoho an areg dan desai dou yen gin, kaba, dag dan demenara misen dou yenero? Naro, sud hom ingma en emens moho hom dag sesar dou dan se gin touwero. Dangga hang, sug dan denara areg se geica dou yen dous, kaba, dagiro, naugwe hang, yen meigdoc emebdebin dan indir an ginero? 47 Doba inggaida. Anai gareg en edag Allah mogwihi mogo dag misenohob, kaba, en ei moms an en mer gin toua terimda. Doba yen, kaba, yen yemedag Allah en mehir ginero. Hang yen yemei meijums an areg dan desai dou yen gin touwero. Doba yen yoc meijums dougwo augwan gini namcir. 48 Sug leng Yahudi graga len louman Yesus mer an gini, kaba, len lesa mer debin en deit, lendagai: Aban genara dou emen gini, kaba, dag sud hom dau leng Samaria gedig merna mog mog leisa se en medoc mes ginohob. Hang areg emen ememenara doum eisaugb ban sug nosa, kaba, augwan dag misen namcir. 49 Doba Yesus etaha len merir an gini, endagai: Dan, kaba, merna mog mog emeicara se dan indoc mesero. Anai dan demeic dan Indina en moho demacecimero. Doba se indan geicara augwan, kaba, dan deigdoumesa en moho gin terimda. Doba yen, kaba, yen yeic dan indoho yacecim namcirohob. 50 Dara dan demacgeij lusud naugb len leigdoumesa dan indoho gin touwero. Anai sud hom gus, kaba, eni moongga. En, kaba, en ousa deisa debin danohob. Hang en ehilon ucina naugb sug lusud leigdoumesa dan indoho gin toua terimda. 51 Dangga gareg en emotogoto dan indir an areg dan desai dou en ginero, doba en eicara baimo dag gin terimda, kaba, en emomom toua deitero. Doba maireseb menau geb huhugb eb naugb enohob. Yen youman dan indir an areg dan den dou yen gin deigeigouhw namcir. Anai augwan gini asesa dag misenohob. 52 Doba sug lusud graga len louman Yesus mer an gin, kaba, len lenara se merir gouji ucugb dou en deit, lendagai: Iteitogin, kaba, emen emecinaga dag merna mog mog leicara se ban abdoc mes dag misenohob. Anai Abraham, kaba, en omomohob. Dara leng lesai Allah moro sug nosa, kaba, len laugwan lomom touohob. Doba ban benara dou emen dag gareg en eicara baimo areg ban ben dou emen gin, kaba, en emomom deitero, doba maireseb menau geb huhugb eb naugb enohob. 53 Ban beigdoumesa ban aboho agas edreg dau maman mamjemouwa Abraham ginei? Anai en, kaba, en omom namcirohoba? Naro, ban aboho emedreg dau enero. Dara leng lesai Allah en moro sug nosa, kaba, len laugwan lomom touohob. Hang ban bens banin dag garena dou emen gina? 54 Doba Yesus auni dou len deit, endagai: Dan Indina gedig yen yeigdoumesa yenin meijoho an en dag en edag meijen Allah ginohob, kaba, enin eng sud hom gedig en eigdoumesa dan indoho gini. Dan, isnaro. Anai sug dan deigdoumesa danin indoho an ara ara, kaba, gini aninim dag mera gouwada namcir dous. 55 Dara yen yemecinaga areg asesa Allah enin medoc mes augwan mougwa hom touebma. Doba danin dous eng decinaga areg asesa enin medoc mes augwan ginohob. Dangga hang, sug dan denara dou yen dag dan demecinaga areg asesa Allah medoc mes augwan dag misenbuma, kaba, dan dereiyara. Aninim dag yen yereiyara toua namcirohob. Dobnaro. Dan decinaga areg asesa enin medoc mes augwan dag misenohob. Hang dan demotogoto en mer gin touwero. Doba dan deicara daimo areg en arougb dan an ginohob augwan dag misen toua terimda. 56 Dara yen meijemouwa Abraham, kaba, en toua medoc agahugouhw medam an indan lona sug dan den aud yen gini. Anai Allah os dou en dag en omom dau lona ginero, doba en eiya gin touahabi. Dangga iteitogini, kaba, en eiya ginohob. Hang en medoc agahugouhw an gin toua terimda. 57 Doba sug leng Yahudi gini len louman en mer an gin dangga, kaba, len lenara lawun en mer an gin namcir. Hanoba len lenara dou en, lendagai: Ban bedag sud aisohoba, hang ban bemenara dou emen endag ban beiya Abrahamohob gina? Anai aban arisogomoc emedebeij mos sergem touebma. 58 Doba Yesus auni len merir ucugb deit, endagai: Yen youman dan indir gin deigeigouhwahabi. Sug Abraham mem emouwadan enbuma, kaba, dan indugwengga sug nosohob. Anai dan dedag Adehsud Geis Huhugb Sugraga touohob. Areg dan den dou yen gin, kaba, dag misen namcir. 59 Doba sug leng Yahudi len louman en mer an gin deit, kaba, len louwan leic igdahabi lad eni. Doba Yesus eic len gus baihidida. Hanoba en eihwededau Allah Men Tuari inggeda.

9:1 Sug Yesus dara men logodeh len lededau Allah Men Tuariohob, kaba, len lec merohora ledreg sud hom mairesmougb teitei dau mem menuhwa gedig en eigtou se ucina mebera deb gini. 2 Dangga, kaba, Yesus men logodeh leijidougwo eni, lendagai: Adehsud, gareg en ebesesar, hang emeic en mairesmougb dag gina? Eninei? Era mena dara mem lanei? 3 Doba Yesus enara bauni len merir, endagai: Sud hom gin, kaba, en maires mougb emogdoc enin men sesar dara mena dara mem, maran sesar touwero. Doba en mairesmougb gin, kaba, eic cumougt dou dan naugb dan dens dau Allah men goubesa dou lusud naugb len leiyahabi. 4 Anai sug loba osun dougwohob, kaba, sud hom ingma emeicara toua deitero. Dangga hang, eigouhw naugb maman mamarges dau sug maman maicara gin touwero. Doba sug lona ebaba gin, kaba, maman maimo areg sud hom gesa dan aud yen gini en arougb maman an gin terimda. 5 Anai sug dan indugwengga desij lusud se cinogo ginaba, kaba, dan dedag mouf naugb dan dens dau areg se geica dou len toua. 6 Sug Yesus esulou men logodeh dag ginohob, kaba, en eigdores se cinogo. Dauwohob, kaba, en mesira mob arilarahabi. Sug en mesira mob arilarohob, kaba, en eic mesira mob an cinogo graga. Hanoba en ehinsa sud hom ingga mairesi. 7 Sug en ehinsohob, kaba, en arougb en, endagai: Ban beihweda naugb bededu cinogo dau ban abiresi se duhu geindaredeb, moho Siloamahabi. Dangga sud hom graga, kaba, en aimo Yesus en mer naugb en eihwedig Siloam gin toua. Sug en edebeij duhu geindaredeb ginohob, kaba, en edu cinogo dau en mairesi. Hanoba enin eihwededau sugada dig men tueda, anai en maires esga namcirohob. 8 Sug en mesir dara len gus len leijesan, doba en maires esgohob, kaba, len leimiman dau gin namcir. Hanoba len leijidougwom, lendagai: Sud hom mairesmougb gohwiaga lusud an aregoufu grag, ingginei? Len leijidougwom dag gini, anai len lecinaga dag sug nosa, kaba, sud hom gin en eigtou se ucina mebera naugb ohwiaga lusud an aregoufu terimdohob. 9 Dangga ligbum, kaba, len lousa deisa merir, lendagai: You, sud hom inggangga. Doba ligbum, kaba, len loto merir, lendagai: Sud hom gin, kaba, en mocbobaga aninim dag sud hom ingga dous. Doba sud hom ingga, kaba, en auni len merir, endagai: Dani sud hom inggang gini. 10 Sug len louman en mer dag gin, kaba, len leijidougwo en ucugb, lendagai: Areg eberou ban, hang ban abires emesga naugb ban bemeiya lo asesa ucugb deit gina? 11 Dangga hang, en auni dou len, endagai: Sud hom, moho Yesus, kaba, en esinsin cinogo mor dag uluto. Hanoba en ehin se dan indires. Dauwohob, kaba, en arougb dan naugb dan dededu dan indibes an indiresi se duhu geindaredeb, moho Siloam, gin toua. Sug dan daimo en mer naugb dan dededu dan indibes se duhu ginohob, kaba, dan indires toua esga naugb dan deiya lo asesa ucugb namcir. 12 Sug len louman en mer an gin, kaba, len leijidougwo en, lendagai: Sud hom gini moonggiro? Doba en auni dou len, endagai: Dan demecinaga sug en eigtou touwero. 13-14 Doba lona sug Yesus eic cinogo mor dag uluto naugb asga sud hom gin maires egsa, kaba, leng Yahudi meren lona naugb len lemeicaresero. Dangga hang, en mesir graga, kaba, len lahwan en naugb en edens enin dou leng Parisi se meren tuari touahabi. 15 Sug len ledebeij leng Parisi se meren tuariohob, kaba, len toua leijidougwo en deit, lendagai: Ban abires esga naugb ban beiya lo asesa ucugwohob gini ogdoc ara? Dangga en emecic dau augwan dou len deit, endagai: Sud hom eic uluto baugb dan indiresi. Hanoba dan dededu dan indibes an gin se duhu. Dauwohob, kaba, dan indires toua esga naugb dan deiya lo asesa namcir. 16 Dangga ligbum dau leng Parisi, kaba, len lowun Yesus en moho an gin namcir, lendagai: Sud hom gin, kaba, Allah emesa en aud maman, anai en emaimo maman gomnomna eisaugb Lona Gemeicaresero gin touwero. Doba ligbum, kaba, len loto merir, lendagai: Yen youdesa sud hom gebesesarohob, kaba, en aben ganusbus ingma dag ginohobei? Hang len merdoc dag hom se aremer ginero. Doba len lenara merir eisaugwim icira gin namcir. 17 Sug len merir eisaugwim icira gin terimda, kaba, len leijidougwo sud hom ingga enin deit, lendagai: Ban beigdoumesa sud hom graga en moho dag ara, anai ban bos badi en dag en esga ban abiresi dou emenohoba? Dangga hang, en auni dou len namcir, endagai: Allah esa en aud maman naugb en esai en moro dou maman dag misenohob. 18 Doba leng Yahudi meren mougtir, kaba, len merdoc emebdebin an sud hom graga en mer dag en mairesmougb teiteiyohob ginero. Anai len leiya, doba en eiya lo asesa namcir. Hang len larougb lusud naugb len ledahwan sud hom graga en mena dara mem aud lenahabi. Dauntoba len leijidougwo lan eisaugb aremer gin toua deitahabi. 19 Dangga sug lan ladebeij lenohob, kaba, len leijidougwo lan, lendagai: Yan yaiya sud hom gin endag yan maijisi misen ingginei? Era naroei? Anai sug nosa, kaba, yan yan dou emen dag yan maijisi gini en mairesmougb teitei dau sug mem ouwadan enohoba? Gedangga, kaba, dagiro, naugwe hang, sud hom gini en eiya lo asesa ucugb dag gina? 20 Doba lan launi dou len, landagai: Sud hom gini, kaba, aman amecinaga eni aman ameisi misen. Dara aman amecinaga dag sug mem ouwadan en, kaba, en mairesmougb teitei touohob. 21 Doba ogdoc ara, hang en maires emesga naugb en emeiya lo iteitogini. Dara gareg en esga en maires gin, kaba, aman amecinaga dau ginero. Yen yeijidougwo enin anahabi. Anai en edag sudohob, hang emedeinyum naugb sug enin auni dou yen toua. 22 Lan laideido dag gin dou len, anai lan lacinaga dag gareg en os badi Yesus en edag Sud Hom Geigdoc Lusud Dau Meren Gogom Augwan, kaba, mougtir gini len lohw merdocedoumohob naugb len lerba sud hom gin dau meren tuari gini. Dangga lan lahau dau mougtir gin toua terimdohob. 23 Hang lan lamarougb len dag graga toua, landagai: Yen yeijidougwo en ai yenin meijir se dous, anai en edag sudohob. 24 Sug mougtir graga len louman lan marir an gini, kaba, len leija sud hom mairesmougb graga aud len deit. Sug en edebeij lenohob, kaba, len lenara lad en medoc mes, lendagai: Ban becic areg se geica dou emen dous. Hanoba ban bou Allah en moho debin gini toua. Dauntoba emen emecinaga dag areg ban ben dou emen, kaba, misen namcir. Anai ban beigdoumesa sud hom graga dag en esga ban abiresohob. Doba emen emecinaga dag sud hom ingga, kaba, en ebesesar namcirohob, hang emedeinyum naugb sug en emesga ban abires gin touwero. 25 Doba sud hom graga, kaba, auni dou len ucugb, endagai: Sug sud hom gini en ebesesarohob, era en emebesesar touebma, kaba, dan demecinagero. Doba aremer hom, kaba, dan decinaga dag misen namcir. Anai sug nosa, kaba, dan indires mougb. Doba iteitogin, kaba, dan indires esga naugb dan deiya lo asesa ucugwohob. 26 Dangga len leijidougwo en ucugb deit, lendagai: En ebara dara ban, hang ban abires emesga gina? 27 Doba sud hom mairesmougb graga, kaba, en esa mer debin len, endagai: Dan decic augwan gini dou yen iteitogragohob. Doba yen meigdoc emebdebin an gin touwero. Dangga dagiro, naugwe hang, yen youwan naugb dan decic dau augwan gin dou yen deita? Yen youwan naugb yen yedag men logodeh gin touei? 28 Dangga len louwara debin en, lendagai: Bang hom dous eng bedag sud hom ingga men godeh gini. Doba emen, kaba, emen emaugwan emedag Musa men logodeh gin dous. 29 Anai emen emecinaga dag sug nosa, kaba, Allah enara dou Musa dag misenohob. Doba eisaugb sud hom ingga, kaba, emen emecinaga dau sug en en ginero. 30 Doba sud hom mairesmougb graga, kaba, en owun len meroho an gin namcir. Hanoba en enara dou len, endagai: Sud hom gin, kaba, en esga dan indiresohob. Doba yen yenara dag yen yemecinaga sud hom gini sug en en dau sugiro touwero. Ara hom gin, kaba, dag ganusbus namcir. 31 Anai maman macinaga dau sug sud hom en ebesesar, kaba, dag Allah en emouman en mer naugb ousa en touwero. Doba gareg en esijaresa eni, hanoba en aimo areg asesa enin medoc mes namcir, kaba, maman macinaga dag en ouman en mer naugb ousa en dous. 32-33 Dangga sug sud hom gini en emen dau Allah enero, kaba, men goubesa naugb ara ara toua ingmaro. Doba men goubesa naugb ara ara inggebga ginohob. Hang emens dou maman dag sud hom gini en en dau Allah aud maman dag misenohob. Anai dau sug Allah en ahasesei cinogo terimda iteitogin, kaba, lusud lemouman dau sud hom ingma dag en esga leng meriresmougb gin touebma. 34 Sug mougtir gini len louman, doba sud hom mairesmougb graga en esbes an len dangga, kaba, len lenara gouji dou en, lendagai: Ban, kaba, ban bebesesar teitei dau sug ban abim ouwadan banohob. Dangga dagiro, naugwe hang, ban bouwan bens aremeijouhw dou emena? Sug len lenara gouji dangga dou en dauwohob, kaba, len locirma en dau meren tuari gin toua namcir. 35 Doba sug Yesus ouman dag leng Parisi locirma sud hom mairesmougb graga dau meren tuariohob, kaba, en ehilon en. Dangga sug en edagasa enohob, kaba, en eijidougwo eni, endagai: Ban abdoc ebdebin an Lusud Meraguna Mebin ginohobei? 36 Dangga sud hom mairesmougb graga, kaba, en eijidougwo Yesus ucugb deit, endagai: Adehsud, ban bens dau Lusud Meraguna Mebin gin dou danahabi. Dauntoba dan indoc ebdebin an en namcir toua. 37 Doba Yesus enara bauni en mer, endagai: Ban beiya enohob. Anai sud hom genara dou ban iteitogini, kaba, Lusud Meraguna Mebin en ingga. 38 Sug sud hom mairesmougb graga en ouman Yesus mer an gin, kaba, en auni dou en, endagai: Adehsud, dan indoc ebdebin an ban hom namcir. Sug en enara ineg dou en dag ginohob, kaba, en mohorbrida badedeijlo naugb en esijaresa Yesus toua. 39 Doba Yesus enara dou en deit, endagai: Dan douwaden dau bogo naugb dan dekeba lusud daum. Dangga gareg en ecinaga dag en mairesmougb dougwo augwan namcirohob, kaba, dan desga en mairesi naugb en ecinaga augwan asesa ucugb deit. Doba gareg en eigdoumesa enin moho deseino dan dag en ecinaga augwan dag misenohob, kaba, dan deic dou en dag en edag sud hom mairesmougb gini. 40 Dangga sug leng Parisi merug hosa gedig len lesa desij lan ingga, len louman Yesus mer an gin, kaba, len leijidougwo en, lendagai: Ban bauwam an dag emen gin toua emiresmougwei? Dangga, isnaro. Anai emen, kaba, emen emeiya augwan dag misen namcirohob. 41 Doba Yesus auni dou len, endagai: Sug yen yowun yenin meigdoc mes arjaga dag yen meijiresmougb dougwo augwan namcirohob, kaba, sesar men gogom emeb naugb yen touwero. Doba iteitogini, kaba, yen yeigdoumesa yenin meijoho dag yen meijires esga naugb yen yeiya augwan dag misenohob, hang sesar men gogom eb naugb yen toua terimda.

10:1 Sug Yesus enara dou leng Yahudi meren mougtir dag graga dauwohob, kaba, en eic gainyenara hom eisaugb gembala dara men domba ucan dou len deit. Hanoba en enara dou len, endagai: Yen youman dan indir an areg dan den dou yen gin deigeigouhwahabi. Gareg en emeinesa misis aud dombaro, doba en aiga uro mes aud len, kaba, en edag sud hom geiyohora dara gesma dous. 2 Doba gareg en einesa misis mandeij aud domba, kaba, en eng meren gembala misen ginohob. Augwan gini asesa dag misen namcir. 3 Dangga hang, sud hom gesedougwo misis, kaba, en emoung misis dougwo en touwero, doba en ec misis dau en. Anai en ecinaga eni gembala misenohob. Dara sug en eb men domber meroho astesda len laugwan, kaba, len louman en mer. Hanoba en ahwan len dig medigo toua. 4 Sug en ahwan len dig medigohob, kaba, en einoisa len. Hanoba len toua loucan en, anai len lecinaga en mer dag misenohob. 5 Doba sug sud hom gus, kaba, len lemoucan enero. Doba len lougbdedau en namcir. Anai len lemecinaga en mer asesa ginero. 6 Doba areg Yesus eic bainyen dou len gini, kaba, len meru emobgesa mougwa hom touwero. 7 Sug len meru emobgesa gainyenara gragero, kaba, Yesus ens meijouhw dau gin ucan dou len deit, endagai: Yen youman dan indir gin deigeigouhw deitahabi. Danin dous eng dedag misis naugb domber. 8 Dangga gembala areg len leino dan indin sug nosa, kaba, domber len lemouman len merir touwero. Anai len laugwan ledag leng leiyohora dara leng lesma aremougb dou domba len dous. 9 Dan dedag misis. Gareg en einesa uro mes ogdoc dan, kaba, sesar men gogom emeb naugb en toua deitero. Doba dan deigdoc en dau gogom augwan toua namcir. Dara dan deic ared edeinyum dou en, anai en einesa. Hanoba en agunya ucucugb naugb gin toua namcir. 10 Doba sud hom gedig en ouwan eiyohora lusud meren aremougb, kaba, en en aud len naugb en esma meren ara ara dau len dous. Hanoba en eic gomom, dara en eic mor mor dou len toua. Doba dan, kaba, dan den aud yen naugb dan demeic maireseb menau geb huhugb dou yen dousero. Doba dan deic maireseb gini batij bobdaga dou yen toua terimda. 11 Dan dedag domber meren Gembala Misen gini. Anai dan demesedougwo dan indina agau ginero. Doba dan dohw dan indugt edug naugb len terimda. 12-13 Doba sud hom gedig lusud lohw momsi dou en dous, kaba, en emesa naugb emebehnehino domber ginero. Doba sug en eiya mihiloro mog mog en agunyen, kaba, en arges maga bougbdedau len namcir. Anai en emedag meren gembala misen dara en moho aiga len touwero. Dangga hang, sug mihiloro en einesa uro mes debin domber ginohob, kaba, en au len. Dara en eic dag len lougb laisoboro dau uro mes gin toua namcir. 14-15 Doba dan, kaba, dan dedag gembala misen naugb domber ginohob. Hang dan decinaga areg geb se len merdoc mes. Dara len lecinaga areg geb se dan indoc mes augwan. Aninim dag dan Indina ecinaga areg geb se dan indoc mes. Hanoba dan decinaga areg geb se en medoc mes augwan toua. Dangga hang, dan demougbdedau indan domber gin touwero. Doba dan dohw dan indugt edug naugb len namcir. 16 Dara indan domber gus gedig len lemeinesa uro mes ginbuma, kaba, len toua merugwengga. Dangga hang, dan Indina en arougb dan naugb dan dedehilon lenahabi, dan dedahwan len se uro mes gini. Dauntoba len laugwan dag hom dara meren gembala hom gin toua. Dara len gin, kaba, len lemohoiya dan indir touwero. Doba len laimo dan an areg dan darougb len an gin toua terimda. 17 Sug dan dohw dan indugt edug aud gomom naugb indan domber dag gini, kaba, dan Indina medoc gororougb dan toua terimda. Hanoba en emeic dan indireseb ucugb dou dan toues. 18 Dangga sud hom ingma, kaba, men goubesa naugb sug en eic gomom dou dan touwero. Doba dan daimo ucina gomom dau danin indoc mes aud gin dous. Anai indan goubesa inggebga naugb sug dan deic gomom dou danin. Dara indan goubesa inggebga naugb sug dan deic maireseb dou danin ucugb toua. Augwan gini aimo dau areg dan Indina enin eng ogod deinaugb dan deb sug nosa touohob. 19 Sug lusud louman Yesus mer an gin, kaba, len lenara laisedim eisaugb areg Yesus en dou len gin deit. 20 Leinyana, kaba, len len dougwo leng gus, lendagai: Dagiro, naugwe hang, yen youman sud hom en mer gina? Anai merna mog mog einesa en medoc mes, hang merei emeba en naugb en emenara aibibra dag gini toua. 21 Doba ligbum loto len gin merir, lendagai: Sud hom merna mog mog einesa en medoc mesohob, kaba, en emenara dag ginero. Dara mena mog mog men goubesa inggebga naugb sug en esga leng meriresmougb toua dag ginei? Naro, mena mog mog men goubesa emedeinyum naugb gin touwero. 22-23 Lona hom deit, kaba, Yesus en esebesa se lomod geb acec Allah Men Tuari se cinogo Yerusalem, moho Solaiman. Anai leng Yahudi len loucimdeb se cinogo ingga naugb len merna eiseisan len merjemouwer sug len leigdoumesa Allah Men Tuari dag ecabeci ucugb. Anai leng Siria, kaba, leic gogor dou Allah Men Tuari gin sug nosohob. Doba lona naugb sug len lougwan ared debin len merjemouwer meren geicara gin, kaba, igda goho dugurij namcirohob. 24 Dangga sug Yesus esebesa se lomod ingga, kaba, leng Yahudi len len naugb louwa debin en sungga deit. Hanoba len leijidougwo en, lendagai: Ban beigtou se lona hosa deitahabi, hang ban bemens areg se misen dou emena? Anai sug ban bedag Sud Hom Geigdoc Emen Dau Emen Gogom Augwan dag misenohob, kaba, ban bens dou emen iteitogini. Dauntoba emen emeija emuwesa ban deitero. 25 Doba Yesus enara dougwo len merir, bendagai: Dan dos dadi danin dag Sud Hom Geigdoc Yen Dau Meijen Gogom augwan mougwa einyana deseino yenohob. Anai ganusbus areg dan daben deseino yen ogdoc dan Indina men goubesa, kaba, auma debin gin dou yenohob. Doba yen meigdoc emebdebin an dan indir an ginero. 26 Anai yen, kaba, yen yemedag indan domba misenero. Hang yen meigdoc aihagab gin toua namcir. 27 Anai indan domber misen, kaba, len merdoc emaihagab dan indirero. Doba len louman dan indir naugb len laimo dan terimda. Dara dan decinaga len toua. 28 Hang len lemomom toua deitero, doba dan deic maireseb menau geb huhugb dou len terimda. Dara sud hom ingma, kaba, en emesma len dau dan insira mes touwero. 29 Anai dan Indina gedig en eic len dou danohob, kaba, men goubesa edreg dau augwan namcir. Hang sud hom en emesma len dau en mesira mes touwero, doba en esedougwo len beb huhugb terimda. 30 Anai dan Indina aman amahwas dag hom naugb augwan gin touohob. 31 Sug leng Yahudi louman Yesus mer an gin, kaba, len louwan leic igdahab naugb led en toua deit. 32 Doba Yesus eijidougwo len, endagai: Dan dens dau indan geicara geigouhw areg dan Indina mer ogod an deb sug nosa einyana dou yenohob. Dangga se indan geicara geigouhw augwan gin, kaba, ogdoc aremer ara, hang yen meigdoc emehin naugb yen yemed dan icira gina? 33 Doba leng Yahudi launi ucugb dou en, lendagai: Ogdoc aban geicara geigouhw augwan gin, kaba, emen ememed ban icirero. Doba ogdoc sug ban beic Allah moho bacecim, hang emen ememed ban icira gini. Anai ban, kaba, lusud misen dous. Doba ban beigdoumesa banin aboho dag Allah toua. 34 Doba Yesus enara bauwun len merir an gin deit, endagai: Allah enara se meijen gomnomna sug nosohob, endagai: Yen meijoho toua, dag dan indoho Allah gin touohob. Gini misenei? You, gini misenohob. 35-36 Dara maman macinaga dag areg len log se Surad Injil Meb Mohon deb ginohob, kaba, hom emouwedoc touwero, doba augwan ebsugeb beb huhugb namcir. Dangga sug Allah eija len dag Allah gin touohob, kaba, dagiro, naugwe hang, yen yowun dan indoho dag dan deic Allah en moho dacecim sug dan deigdoumesa dan indoho dag en Meisi gina? Anai len, kaba, Allah esa en mer dou len dous. Doba eisaugb danin, kaba, dan Indina enin eng ouci dan. Hang en emesa dan aud lusud se cinogo gini naugb dan desai en mer dou len toua. 37 Dangga sug yen yeiya, doba dan demeicara demaimo areg dan Indina arougb dan an gini asesero, kaba, eigouhw naugb yen yemod meijina debsa dan an touwero. 38 Doba sug dan deicara daimo augwan gini dag misen namcirohob, kaba, eigouhw naugb yen yod meijina debsa dan ogdoc indan geicara gin toua terimda. Dauntoba yen yemeija meijuwesa dan deitero. Doba dau iteitogin, kaba, yen yecinaga se misen dag dan Indina aman amahwas amdoc anim dag hom namcirohob. Dan dacgeij dau yen dangga, anai yen yemouwan naugb yen meigdoc ebdebin an dan ogdoc areg dan desai dou yen gin touwero. Doba yen meigdoc oududa dan an gin terimda. 39 Sug leng Yahudi louman Yesus mer an gin deit, kaba, len louwan lagaigeij en. Doba en arges maga bec dau len namcir. 40 Sug Yesus arges maga beihwedau lenohob, kaba, en emeigtou sungga deitero. Doba en eihwedig duhu Yordan mebera nagama deit, aud usi sug Yohanes en ogun lusud se duhu sug nosa. Sug en edebeij us ginohob, kaba, en eigtou sungga toua. 41 Doba lusud leinyana, kaba, len ledebeij en sungga toua deit. Dangga sug len lehigdecin en an men geicara dag ganusbus gini, kaba, len lenara doum, lendagai: Yohanes, kaba, en emens ganusbus ingma dag gin dou mamanero. Doba areg en os badi sud hom gin an men geicara dou maman sug nosa, kaba, augwan gini asesa dag misen namcirohob. 42 Hang lusud leinyana dau len ingga, kaba, len lod merna debsa Yesus toua terimda.

11:1 Se lona hom, kaba, sud hom en moho Lasarus, en areba medam namcir. En, kaba, en eigtou se cinogo Betania geb deinyor cinogo Yerusalem se leng Yudea meren hancob ingga. Betania gin, kaba, Mariam dara Marta sug lan lagun ingga toua. 2 Mariam gin, kaba, en eng gida hom gedig en ehin aremoung mohu men ouwadebeda se maman Adehsud en mohora sug nosa. Hanoba en eic enin mougt modi agunin dau en mohora touohob. En eng meijemeito Lasarus gareba medam gini. 3 Dangga sug en areba medam dag ginohob, kaba, en medamouwera gini lan lasa marir deinaugb Yesus, landagai: Adehsud, sud hom gedig ban abdoc gororougb en, kaba, en areba medam namcir. 4 Sug Yesus ouman dau gini, kaba, en auni dou men logodeh, endagai: Men gareba gin, kaba, emoho gomom namcirero. Doba en areba dag gin dauntoba lusud leigdoumesa Allah aman amoho agas ogdoc gin namcir. Anai dan toua dedag Lusud Meraguna Mebin ginohob. 5 Yesus, kaba, en medoc gororougb Marta, dara Mariam, dara Lasarus len gin namcir. 6 Doba sug en ouman dag Lasarus areba medam, kaba, en emeihweda sungga dedemedero. Doba en eigtou lona hwai debin ginahabi, en emeihweda. 7 Dangga sug lona hwai debin ginohob, kaba, en enara dou men logodeh deit, endagai: Yen yin. Maman macicugb dig Yudea ucugbda. 8 Doba men logodeh len len dougwo en, lendagai: Adehsud, dagiro, naugwe hang, ban becicugb dig Yudea deita? Anai leng Yahudi lesedeb naugb len led ban sug nosohob. 9 Doba Yesus auni ucugb dou len, endagai: Sug mouf inggebga naugb lusud, kaba, augwan adedim dag ijam sisa hobjerai. Gini misenei? You, gini misenohob. Dangga hang, gareg en ec naugb mouf gini, kaba, en emetohobro touwero. Doba en ec dara geigouhw namcir. Anai en eiya, doba sud hom gedig en eic mouf naugb aisema lusud se cinogo gin augwan, kaba, eni moongga desij enaba. 10 Doba sug en ec se lobeigbogo mogud, kaba, en etohobro bobsara namcir. Anai sud hom gedag mouf gin, kaba, en edug dau enohob. 11 Sug Yesus enara dag gin dauwohob, kaba, en enara dou len ucan deit, endagai: Maman mamsi Lasarus graga en atoudohob. Dangga hang, dan demeihweda naugb demdebir ens. 12 Sug men logodeh louman gin, kaba, len len dougwo en, lendagai: Adehsud, sug en atoudohob, kaba, cum, eic eigouhw ucugb dou en. Hang maman mamderses en touwero. 13 Len loudesa Lasarus atou misen, hang len lemenara dangga. Doba areg Yesus enara dou len graga, kaba, en aimeh dag Lasarus en omom misenohob. 14 Hang Yesus emenara aimeh dou len deitero. Doba en enara misen namcir dou len, endagai: Lasarus en omom misenohob. 15 Doba eigouhw naugb yen dag dan indug sunggaro. Anai sug yen yeiya dau indan geicara dou en se lona daiyamo gin, kaba, eic dag yen yemeija meijuwesa dan deitero. Doba eic dag yen meigdoc ebdebin an dan toua terimda. Dangga dan indoc momogo touwero, doba dan indoc eigouhw an gin namcir. Hang yen yin, maihwedaud Lasarus iteitoginda. 16 Sug Yesus men logodeh len louman dau gini, kaba, sud hom dau len, en moho Tomas, en enara bad mesir len gus medoc mes, endagai: Yen yin. Maman maimo maman Adehsud gini, dauntoba len ledeic gomom dou maman toueda. Dara lusud leija Tomas en moho dag lang marogoc agacgecim gin toua. 17 Sug Yesus dara men logodeh len ledebeij se Betania ginohob, kaba, len leiya, doba lusud lec Lasarus se lona hoguohob. 18 Dara Betania gini, kaba, emeb aigus dau Yerusalemero. Doba eb deinyorim namcir. 19 Dangga hang, leng Yahudi leinyana dau cinogo ingga, kaba, len toua len len naugb ledenara lad Marta dara Mariam mardoc mes an marjemeito gomom gin toua. 20 Sug Marta ouman dag Yesus en toua edagunyohob, kaba, en obga dagasenda. Doba Mariam, kaba, en eigtou se tu deb naugb en ougwan ared namcir. 21 Sug Marta edagasa Yesusohob, kaba, en eiyagarij en, endagai: Adehsud, sug ban bemen sugraga, kaba, dan injemeito en emomom dag ginero. Doba ban beigtou aigusi dau aman, hang en emomom gini. 22 Doba inggaida. Anai dan decinaga dag areg ban bacgeij dau Allah, kaba, en auni dou ban toua. 23 Doba Yesus oho mer debin en, endagai: Ban abjemeito en emeises. 24 Dangga Marta en auni en mer ucugb dou en, endagai: Dan decinaga dau sug Allah eigdoumesa lusud dau gomom ucugb se lona sug ouwedocahabi, en emeigdoumesa dan injemeito Lasarus en toues. 25 Doba Yesus en dougwo en, endagai: Danin eng deigdoumesa lusud dau gomom ucugb. Dara dan deic maireseb menau geb huhugb dou len toua. Dangga gareg en medoc ebdebin an dan, kaba, en emomom namcirero. Doba sug en omom dag ginohob, kaba, dan demeigdoumesa en aud maireseb menau geb huhugb ucugb deits. 26 Dangga gareg dan deic maireseb menau dou enohob, kaba, en emomom deit touwero. Doba maireseb huhugb eb naugb en terimda, anai en medoc ebdebin an danohob. Ban bod abina debsa areg dan den dou ban ginohobei? 27 Doba sug Marta ouman Yesus eijidougwo en dag gin, kaba, en eigdoumesa en moho, endagai: Adehsud, dan dod indina debsa ban an areg ban ben dou dan graga gin namcir. Anai dan decinaga bang Allah Meisi misen gouwaden dau bogo se cinogo gini naugb ban beigdoc emen dau emen gogom augwan namcir. Hang ban bedag sud hom gedig Allah esedeb en naugb en esa en aud emen gin touohob. 28 Sug Marta auni dag graga dou Yesus dauwohob, kaba, en ecicugb dig tueda naugb edeija medemeito Mariam. Hanoba en ec luluf dou en, endagai: Nanan Adehsud eijidougwo ban, anai en toua moongginohob. 29 Sug Mariam ouman gin, kaba, en eisa dedemeda. Hanoba en eihweda naugb edagasa Yesus toua. 30 Anai Yesus, kaba, en emedebeij cinogo Betaniabuma. Doba en eigtou se ucina mogumsi sug Marta agasa en deb grag dousaba. 31 Sug leng Yahudi gedig len leigtou desij Mariam se men tu naugb lenara lad en medoc mes graga len leiya, doba Mariam eisa dedemeda dig medigo gabeda, kaba, len toua leisa ucan en. Anai len loudesa endag en eihweda naugb edeb se aremogougb moda dous. 32 Sug Mariam edebeij Yesus se us gragohob, kaba, en eic mohorbrida badedeij cinogo deseino en. Hanoba en eiyagarij en, endagai: Adehsud, sug ban bemen sugraga, kaba, dan injemeito en emomom dag ginero. Doba ban beigtou aigusi dau aman, hang en emomom gini. 33 Sug Yesus en eiya, doba Mariam eiyagarij en. Dara leng Yahudi gedig len loucan enohob len laugwan leb dangga toua, kaba, en medoc eisaugb namcir. Hanoba en medoc enmohomoho, kaba, en eijidougwo len dara mer medam, endagai: 34 Yen yedec en deb sugiro? Sug en eijidougwo len dangga, kaba, len launi dou en, lendagai: Adehsud, ban bin naugb emen emdens dou banahabi. 35 Len leicara dag gin, kaba, Yesus eb medam debin len namcir. 36 Sug leng Yahudi leiya, doba en eb dag gin, kaba, len loudesa endag en eb an Lasarus. Dangga hang, len lenara doum, lendagai: Yen yeiya en medoc gororougb Lasarus gin namcir, hang en toua emeb an en gini. 37 Doba ligbum, kaba, len lenara ceg ceg en, lendagai: Sud hom gin, kaba, en esga lusud gus merireseb naugb len leiya lo asesa ucugwohob. Dangga dagiro, naugwe hang, en emen dougwo Lasarus, dauntoba en emomom touwero? 38 Sug Yesus en ouman, doba len lenara ceg ceg en dag gini, kaba, eic en medoc enmohomoho medam deit. 39 Dangga sug en edebeij aremogougb modohob, kaba, en arougb len dara mer medam, endagai: Yen yegririj igdohos meh dau. En arougb len dag gini, anai aremogougb moda gin, kaba, dag igdohos mes dous. Dangga, kaba, len leic igdahab meh lauf dougwo toua. Doba Lasarus medamouwa Marta, kaba, en en dougwo Yesus, endagai: Adehsud, dangga, isnaro. Anai len lec en se lona hogu beiyemohob. 40 Doba Yesus enara bauwun en mer, endagai: Ban ben dougwo dan dag gin, anara? Anai dan den dou ban graga dag sug ban abdoc ebdebin an dan, kaba, dan demens dau Allah men goubesa dou ban touesa? 41 Sug len louman Yesus mer an gin, kaba, len laimo en mer naugb legririj igdohos meh dau gin toua. Sug len leicara dag ginohob, kaba, Yesus oho mergo dig bogo. Hanoba en enara dou en Mena, endagai: Akeinya, dan den sijo medam dou ban, anai dan decinaga dag ban boc ban abums dou dan indir terimda. 42 Dangga hang, areg dan dacgeij dau ban iteitogini, kaba, dan demacgeij naugb danin touwero. Doba dan dacgeij dau ban, dauntoba sug lusud gini len leiya, kaba, len merdoc ebdebin an dan dag ban besa dan aud lenohob. Anai naugb danin, kaba, dan decinaga dag ban bemoc ban abums dougwo dan indir mougwa hom touwero. Doba ban bou dou dan an areg dan den dou ban terimdohob. 43 Sug Yesus enara dag gin dou en mena dauwohob, kaba, en eija Lasarus dara mer medam, endagai: Lasarus, ban beisa dau igdohos mes en. 44 Dangga sud hom gomom graga, kaba, en agunyen. Doba minc meti gedig lusud lahud en mesira dara mohora, dara minc meti gedig len laihiron dougwo mebes augwan eb smougb mougwaba. Dangga, kaba, Yesus arougb len deit, endagai: Yen yesga areg geb se mos gin augwan dau en. Hanoba yen yarges en beihweda. 45 Sug leng Yahudi gedig len loucan Mariam graga len leiya ganusbus gini, kaba, len leinyana merdoc ebdebin an Yesus toua. 46 Doba ligbum dau len, kaba, len leihweda naugb len ledoho ledas Yesus an men geicara gini dou leng Parisi toua. 47 Dangga sug leng Parisi len louman dau Yesus men ganusbus ginohob, kaba, leni dara gembala gesa taij meren mougtir an meren Majelis len laugwan loucimdeb naugb len lohw merdocedoum eisaugb Yesus toua. Sug len loucimdebohob, kaba, len leijidougwom, lendagai: Sud hom gini en aben ganusbus einyana terimdaha. Dangga maman mab ara dara sud hom gina? 48 Anai sug maman mamsoho en deb, kaba, lusud lemaimo maman deitero. Doba len laugwan merdoc ebdebin an en dous. Dangga cum, kaba, leng Roma meren mougtir len leinesa maman cinogo gin naugb len lod Allah Men Tuari augwan baisoboro. Dara len leic mor mor dou maman hancob augwan toua dangga. 49 Doba Gembala Gesa Taij Meren Mougt Mera Medam se arisogomoc ingga, en moho Kayapas, kaba, en esa mer debin len, endagai: Yen yenara dag yen meiju edgom, anara? 50 Eigouhw naugb sud hom en omom dous dau gedag maman lusud laugwan lemomom, isnaro. 51 Doba areg Kayapas en en dou len gini, kaba, en emen dau enin medoc mesero. Doba sug en edag Gembala Gesa Taij Meren Mougt Mera Medam se arisogomoc inggohob, kaba, Allah enin eng arautut en naugb en medoc ens deb eisaugb Yesus sug en omom naugb leng Yahudi meren sesar augwan toua. 52 Dara en emomom naugb leng Yahudi meren sesar hom gin dousero. Doba en omom naugb Allah mehir geb se cinogo gus augwan toua. Dauntoba len lemaisobororo, doba en ouci len laugwan debinim hom dous. 53 Dangga sug mougtir len louman Kayapas mer an ginohob, kaba, len lohw merdocedoum se lona ingga naugb sug len leic gomom dou Yesus namcir. 54 Sug Yesus ecinaga ginohob, kaba, en emeic maga ainyes se leng Yahudi merufu dag nosa deitero. Doba en eihwedan men logodeh dau leng Yudea meren hancob gini dig cinogo hom, moho Epraim, geb deinyor lomougwisa naugb len leigtou sungga dous. 55 Doba lona ingga, kaba, irir sug leng Yahudi lougwan ared debin lona sug Allah esga len merjemouwer dau cinogo Mesir sug nosohob. Dangga leinyana len len dau dingan dingan naugb leisaugb dig Yerusalem. Dauntoba len ledu lenin meraga ecabeci deseino Allah nosa dauwahabi, len lemougwanara se lona gouji gin toua. 56 Dangga sug len graga ledoucimdeb se Allah Men Tuari maga, kaba, len lehilon dougwo Yesus sungga. Hanoba len leijidougwom, lendagai: Yen youdesa dagiro? Sug maman maugwanara gini, kaba, en toua emensei? 57 Len len dangga doum, anai gembala gesa taij meren mougtir dara leng Parisi len lesulou len deb nosohob, dag gareg en eiya Yesus mog sugiro, kaba, len leden dou len toua, dauntoba len lagaigeij en namcir.

12:1 Sug lona senggem debin Lona Gohw Bedreg ginohob, kaba, Yesus en toua eisaugb dau cinogo Epraim dig cinogo Betania geb deinyor Yerusalem nosahabi. Anai cinogo gin, kaba, sud hom moho Lasarus gedig Yesus eigdoumesa en dau gomom nosohob, men cinogo ingga. 2 Sug en edebeij Betania ginohob, kaba, len sungga lougwan ared dou en an men logodeh toua. Dara Marta en toua ousa len sungga naugb ohw ared an len toua. Doba Lasarus, kaba, en eigtou desij len gus se boromei naugb letara desij Yesus dous. 3 Sug len letara, kaba, Mariam en edeic ampo taitaij hom an aremoung mohu men ouwedebeda. Men ouwedebeda gin, kaba, mera eisaugb namcir, anai len lemeic aremoung mohu gus lemed se touwero, doba len leic enin mohu mogud dous. Mohu gin, kaba, len lesinsin dau sogo mom gedig men ouwedebeda gini. Dangga sug en edebeij Yesusohob, kaba, en eir aremoung mohu men ouwedebeda gini se en mohora. Hanoba en eic enin mougt modi baihin aremoung mohu gin se Yesus mohora toua. Hang men gouwedebeda gin, kaba, ecinten se tu mes ingga augwan namcir. 4 Doba sud hom dau Yesus men logodeh, en moho Yudas dau cinogo Keriod, sug en eiya dau gini, kaba, en enara debin Mariam, endagai: 5 Ban beicara dag gin, anara? Eigouhw naugb maman maic mauma aregoufu, hanoba maman maohw an leng merunggwereij dousa? Anai mani men ouwadebeda gin, kaba, mera eisaugb namcir dag len leic aregoufu perag mogo huntun homoiyahabi, len lemauma gina? 6 Yudas en enara dag gini anai en medoc emerij an leng merunggwereij dag misenero. Doba en en len meroho baiyeiyo dougwo dous. Dauntoba sug len leic aregoufu dou len, kaba, en esedi ingma naugb enin. Anai en eng oho i moto an meren aregoufu augwan toua. Dara eni sud hom gedig en ehin magan Yesus dou leng Yahudi meren mougtir gini. 7-8 Doba sug Yesus ouman Yudas mer an gin, kaba, en en dougwo en, endagai: Ban bemen dougwo en danggero. Anai leng merunggwereij, kaba, len merugwengga desij yen terimda. Doba dan, kaba, dan demeigtou desij yen deitero. Anai lona hosa deit, kaba, dan domom dau yenohob. Dangga hang, men geicara gin, kaba, naugb lona sug len ledec dan dag gini touohob. 9 Sug leng Yahudi louman, doba Yesus en edebeij se Betaniohob, kaba, len toua leihweda sungga naugb ledeiya eni. Dara len lemeihweda sungga naugb lemedeiya Yesus hom dousero. Doba len leihweda se Betania gini naugb ledeiya Lasarus toua. Anai len louman dag Yesus eigdoumesa eni dau gomom sug nosohob. 10 Dangga sug gembala gesa taij meren mougtir len leiya, doba Lasarus en maireseb ucugwohob, kaba, len lohw merdocedoum naugb len lemeic gomom dou Yesus dousero. Doba len lohw merdocedoum naugb len leic gomom dou Lasarus en toua. 11 Anai lusud leinyana sug len leiya dau Lasarus dag Yesus eigdoumesa en dau gomom ucugwohob, kaba, len louwa dau mougtir gin namcir. Hanoba len merdoc ebdebin an Yesus dous. 12-19 Doba leng areg len lesa lauweila Yesus sug en eija Lasarus en en dau igdohos mes naugb maireseb deitohob, kaba, len ledecic dau gin dou leng louwa debin Lona Gohw Bedreg se cinogo Yerusalem len laugwan toua. Dangga se loneinda sug len louman, doba Yesus en toua en en aud cinogo Yerusalem engga, kaba, len leinyana len logod duleg meh. Hanoba len leihwedan naugb len ledagasa en se ucina mogumsi. Anai sug len louman dau men ganusbus dag ginohob, kaba, len merdoc erleij naugb len ledeiya en toua. Dangga sug len lec merohora aud en dag gini, kaba, len lagahugouhw an Allah, lendagai: Allah, emen emen sijo dou ban eisaugb sud hom gini. Dangga hang, ban beic geigouhw dou en terimda. Anai en en se Adehsud, ban aboho, naugb en eperwei ban abuhw, dauntoba en edag mougt mera medam naugb emeng Israel deit. Doba sug leng Parisi len leiya dau gin, kaba, len lomi an doum, lendagai: Maman mameba dagiro deita? Anai lusud se cinogo gin augwan len louwa audi en dau mamandohob gina? Doba Yesus, kaba, en eic keledai hom. Hanoba en eisa medgomori naugb en eihwedan dig Yerusalem, dauntoba men geicara augwan gin, kaba, esogwa deisa areg sud hom en og deb se Surad Injil Meb Mohon deb eisaugb sug nosa touohob, endagai: Yeng dau cinogo Yerusalem, yen yemahau deitero. Anai yen yeiya, doba meijen mougt mera medam en eisa keledai medgomori naugb en en aud yenohob. Dara Yesus men geicara augwan se lona ingga, kaba, men logodeh merdoc emobgesa mougwa hom touebma. Doba edebeij lona sug Yesus en omom. Hanoba Allah eigdoumesa en aud gogouf cucugb se bogo ucugb touohob, kaba, len merdoc emdeiseisan lusud meren geicara dou en se lona ingga toua. Anai augwan gini esogwa deisa areg sud hom en og deb se Surad Injil Meb Mohon eisaugb en asesa sug nosohob. 20 Se lona sug leng Yahudi louwa debin Lona Gohw Bedreg se Yerusalem, kaba, merug hosa dau leng Grika len toua merugwengga desij len naugb len lesijaresa Allah toua. 21 Dangga len ledebeij sud hom dau Yesus men logodeh, moho Pilipus, dau cinogo Bedsaida se leng Galilea meren hancob. Sug len ledebeij enohob, kaba, len lacgeij dau en, lendagai: Emen toua emouwan naugb emdeiya Yesusahabi. 22 Sug Pilipus ouman len merir an ginohob, kaba, en eihwedaud mesi hom, moho Andreas. Hanoba en eden aremer gin dou en, kaba, lan lahwas laihweda naugb ledecic aremer gin dou Yesus toua. 23 Doba Yesus auni dou len ucugb, endagai: Yan yamenara dou danlo. Anai lona naugb sug Allah eigdoumesa Lusud Meraguna Mebin dan indoho ainyes deseino lusud laugwan, kaba, ebeij deinyorohob. 24 Anai tramdad mogo hom, doba lusud lemeba se gos habero, kaba, mogo hom smougb mougb, dangga dous. Doba sug len leba mogo hom gin se gos, hanoba en etaha, kaba, era mera einyana toua. Yen youman dan indir gin deigeigouhwahabi, anai augwan gini asesa dag misen namcir. 25 Dangga gareg dau yen en ebehnehino enin maga dougwo sug omom, kaba, cum, en mena toua ediyebeiya dau en namcir. Doba gareg dau yen, en eic enin maga baseslo se cinogo gini, kaba, en emdesma mena maireseb menau geb huhugb namcir toua. 26 Dara gareg dau yen en ouwan aimo dan, kaba, en emaimo enin men ucina deitero. Doba esloulougb naugb indan sogougb gin, kaba, en esogwa deisa dan induhw asa ucina gedig dan daimo gin terimda toua. Dauntoba sugiro dan indugwengga, kaba, en toua moongga desij dan sungga toua. Dara gareg en eicara baimo dan asa ucina gini terimda, kaba, dan Indina emeigdoumesa en moho agas an gin toues. 27 Sug Yesus esulou len laugwan dag graga dauwohob, kaba, en ens dau en omom mougwa hom dara dou len deit, endagai: Lona naugb sug lusud leic dan indug erij aud gomom dou dan, kaba, edagasa namcirohob. Dangga dan indoc eijesa medam an gin toua. Hang dan demacgeij ara ara dau dan Indina ena? Dan dacgeij dag en eigdoc dan dau ucina mog erij gindei? Naro, dan demeicara danggero. Doba dan daimo ucina gin terimda edebeij sug ouwedocahabi. Anai dan Indina enin eng esa dan sugini naugb dan daimo ucina aud gomom ginohob. 28 Sug Yesus enara dau sug en omom dag graga dou len bouwohob, kaba, en ocuncum dou en Mena ucan deit, endagai: Akeinya, ban bens banin aboho ainyes deseino len ginahabi, dag ban aboho gini agas medam namcirohob. Sug Yesus enara dag gin ineg dou en Menohob, kaba, en Mena auni dau bogaden dou en ucugb deit, endagai: Dan dens dau danin indoho dag agas medam ainyes dou len sug nosohob. Dara dan demens danin indoho ainyes dag gini dou len deit toues. 29 Sug leng lesa desij Yesus len louman mer gin, kaba, ligbum len lenara, lendagai: Yen youman bagar mougb engga. Doba ligbum, kaba, len loto merir, lendagai: Bagar mougb, isnaro, doba malaikad hom enara dou en. 30 Doba Yesus enara dou len, endagai: Mer dau bogo gin, kaba, naugb dan, isnaro. Doba naugb yen dous. 31 Anai lona naugb sug Allah ogod aremer gogom deinaugb lusud se cinogo gini, dara sug en owun meren mougt mera medam, moho Bilis, bobsara dau len toua, kaba, edagasa namcirohob. 32 Dangga sug lusud leigdoumesa dan taiba ainyes se cinogo ginohob, kaba, dan debin lusud se cinogo augwan naugb len louwa aud dan toua. 33 Sug Yesus enara dag graga, kaba, en ens dau ucina areg lusud laimo an en naugb sug len leic gomom dou en dou len toua. 34 Doba lusud graga, kaba, len lenara dougwo en mer an gin, lendagai: Maman gomnomna enara deb, bendagai: Sug Sud Hom Geigdoc Emen Dau Emen Gogom Augwan en enohob, kaba, en emomom dau emen deitero. Doba en esan emen beb huhugb namcir. Dangga dagiro ban ben dou emen dau sug Lusud Meraguna Mebin en enohob, kaba, dag lusud leigdoumesa en beb ainyes se cinogo gini naugb en omom toua deita? Lusud Meraguna Mebin gin, kaba, eni garena? 35 Doba Yesus auni dou len, endagai: Iteitogini, kaba, mouf inggebga naugb aisema yenaba. Dangga yen yec meijohora se ucina gin dedemeda sug mouf ebaba, dauntoba loba emogod dougwo yenero. Anai gareg en ainyen naugb ec mohora se loba gin, kaba, en emecinaga ucina touwero. 36-37 Dangga hang, yen yemesbes an mouf gini touwero. Doba sug en moongga desij yen gin, kaba, yen yod meijina debsa en terimda. Dauntoba yen yemedag lobeigbogo men logodeh deitero, doba yen yedag mouf men logodeh dous. Sug Yesus enara dag graga dou len bouwohob, kaba, en emens enin dou len deitero. Doba en en aud enin dau len namcir. Anai en aben ganusbus einyana abeba len meriresi ginohob. Doba len merdoc emebdebin an en dag en eng Sud Hom Geigdoc Len Dau Sesar Men Gogom Augwan gin touwero. 38 Augwan gini aimo asesa dau areg sud hom gesai Allah moro sug nosa, en moho Yesaya, en omi an dou Allah sug nosa touohob, endagai: Adehsud, emen emesai ban aburo dou len terimdohob. Doba gareg en emod mena debsa gina? Dara aban goubesa mougb, kaba, ban bemens dou gara en deita? Anai, lingmaro. 39 Dangga hang, sug leng Yahudi graga leicara dag gini an Yesus toua terimdohob, kaba, Allah eic len meriresmougb dara len merdoc agadgeij dougwo Yesus en mer dou len toua. Hang emedeinyum naugb sug len merdoc ebdebin an en touwero. Doba len lotogoto en mer gin namcir. Augwan gini aimo dau areg maman Adehsud Allah en enara deb dou Yesaya gin sug nosa touohob, endagai: 40 Len lemod merna debsa dan indir ginero, kaba, dan deic dag len meriresmougb dougwo dan namcir. Dauntoba sug len leiya, doba len lemecinaga meijouhw asesero. Dara dan deic len merdoc agadgeij dougwo dan dou len toua. Dauntoba sug len lecinaga, doba len meru emobgesero. Anai dan demouwan naugb sug len lecicugb aud dan, dauntoba dan deic geigouhw dou lenlo. 41 Doba areg Yesaya en ens gin, kaba, en emens eisaugb men lusud se lona ingga dousero. Doba en og augwan gini eisaugb Yesus sug Allah eigdoumesa en moho agas medam se lona daiyamo gacin toua. Anai en eiya augwan gin deb sug nosohob. 42 Dangga hang, edag mougtir, kaba, len leinyana lohoiya en mer namcir. Doba leinyana dau len, kaba, len merdoc ebdebin an Yesus touohob. Doba len ledu meruwedau lenin dous, anai len lemouwan naugb sug leng Parisi lemerba len dau meren goucimdebero. Hang len lemos lemadi Yesus moho deseino lusud touwero. 43 Anai len louwan naugb lusud se cinogo gini leigdoumesa len meroho dous. Doba Allah, kaba, inggaida. 44 Sug Yesus esulou lusud naugb len merdoc ebdebin an mouf dag graga bouwohob, kaba, en enara se mer medam debin gin dou len deit, endagai: Gareg dau yen, en od mena debsa dan indir an areg dan desai dou yen gin, kaba, en emod mena debsa dan dousero. Doba en od mena debsa sud hom gedig en esa dan aud yen gin touohob. 45 Dangga toua, gareg dau yen en eiya dau indan geicara, kaba, en medoc eica sud hom gesa dan aud yen men geicara gini touohob. 46 Anai dan douwaden dau bogo dag mouf se cinogo gini. Dauntoba gareg en medoc ebdebin an areg dan desai dou en gini, kaba, en emeigtou se lobeigbogo deitero. Doba en ecinaga areg se geica men meijouhw augwan asesa namcir toua. 47-48 Gareg dau yen en ouman dau areg dan desai dou yen gini, doba en emaimoro, kaba, dan demasij gogom debin en touwero. Doba ara ara gus inggebga naugb sug ogod gogom deinaugb en. Ara ara gin, kaba, dag areg dan desai dou enohob. Dangga gareg en otogoto dan, hanoba en emebin dan indir an areg dan desai dou en touwero, kaba, dan indir gini emogod gogom deinaugb en se Lona Gouwedoc gin toues. Anai dan, kaba, dan demouwaden dau bogo naugb dogod gogom debin lusudero. Doba dan douwaden dau bogo naugb dan deigdoc len dau meren gogom augwan dous. 49 Augwan gini misen namcir. Anai areg dan desai dou yen gin, kaba, dan demeic dau danin indoc mes dou yenero. Doba dan Indina gedig en esa dan aud yen gin, kaba, enin eng ens dau areg dan denara dou yen augwan dou danohob. Hanoba en arougb dan naugb dan desai dou yen toua. 50 Dara dan decinaga dau areg en mer ogod an dou dan naugb dan desai dou yen gin, kaba, eic maireseb menau geb huhugb dou yen toua. Dangga areg dan desai dou yen gin, kaba, dan demeic dau danin indoc mesero. Doba dan daimo dau areg dan Indina en mer ogod an deb naugb danohob dous.

13:1 Lona hom dau sug leng Yahudi lougwan ared debin lona sug Allah esga len merjemouwer dau cinogo Mesir sug nosa, kaba, Yesus en ecinaga dag men lona ebeij deinyorohob naugb sug en ededau cinogo gini aud en Mena ucugb dangga. Dara en medoc emarges men logodeh debero. Doba en medoc gororougb len dau lona sug en ouci lenohob terimda edebeij lona sug en omom dau len toua. 2 Dangga sug Yesus dara men logodeh len letara se loba, kaba, Bilis en outi se Simon meisi, moho Yudas dau cinogo Keriod, en medoc mes naugb en edehin magan Yesus dou leng Yahudi meren mougtir toua. 3 Doba Yesus en medoc momogo an ginero. Anai en ecinaga dag en Mena eic goubesa mougb naugb augwan dou enohob. Dara en ecinaga dau sug en en dau Allah enohob, kaba, dag en emecicugb aud en toues. 4 Dangga sug len letara, kaba, Yesus en eisa besa. Sug en eisa besohob, kaba, en eg men sansun gouji deb. Hanoba en eic minc hom naugb ahud meiyo maga. 5 Sug en eic minc bahud meiyo magohob, kaba, en eir duhu deisa igdebir gouji hom. Hanoba en edu men logodeh merohora toua. Sug en edu len merohorohob, kaba, en eic minc graga dau meiyo maga naugb en agun duhu mohu dau len merohora toua. 6 Doba sug Yesus edebeij irir Simon Petrus naugb en edu en mohora toua, kaba, Simon Petrus en dougwo en, endagai: Adehsud, banin eng bedu dan indohora ginei? 7 Doba Yesus enara bauni en mer ucugb, endagai: Indan geicara dou yen gini, kaba, ban bemecinaga meijouhw augwan asesa touebma. Doba se lona daiyamo gacin, kaba, ban bemecinaga meijouhw eisaugb gin augwan dag misen toues. 8 Doba Petrus oungben dougwo Yesus, endagai: Dan demouwan naugb ban bedu dan indohora namcirero. Dangga Yesus auni ucugb dou en deit, endagai: Sug dan demedu ban abohora ginero, kaba, emedeinyum naugb ban bemedag indan logodeh touwero. 9 Sug Simon Petrus ouman Yesus mer an dag gini, kaba, en enara dou en, endagai: Adehsud, gedangga, kaba, ban bemedu dan indohora dousero. Doba ban bedu dan insira dara dan indugt toua. 10 Doba Yesus enara bauwun Petrus mer, endagai: Gareg en omceduhu ginohob, kaba, en emedu en maga dedemeda deitero. Doba en edu en mohora gini ucucugb dous, anai en maga gus augwan, kaba, ecabeci namcirohob. Dangga hang, iteitogin, kaba, sud hom dau yen enin dous eng ogoraba. Yeng gus, kaba, yen yaugwan gecabecohob. 11 Yesus enara dag graga dou len, anai enin ecinaga sud hom gohw en dou len gus en moho dag misenohob. Hang en enara dou len dag sud hom dous eng ogoraba. Doba len gus laugwan lecabecohob. 12 Sug Yesus edu men logodeh merohora dauwohob, kaba, en eg men sansun gouji ucugb. Hanoba en edeigtou se en mohw deit. Sug en edeigtouohob, kaba, en eijidougwo len, endagai: Yen meigdoc obgesa indan geicara dou yen gini men meijouhwohobei? Era anambei? 13 Anai sug yen yenara dou dan, kaba, yen yeija dan indoho dag Guru. Dara yen yeigdoumesa dan indoho dag meijen Adehsud touohob. Areg yen yeija dan dag gin, kaba, augwan asesa dag misen namcir. Anai dan dedag sud hom gens meijouhw asesa dou yen. Dara dan dedag meijen mougt mera medam naugb dan darougb yen an ara ara gin touohob. 14 Dangga hang, sug yen yeiya, doba meijen Guru, dara meijen Adehsud, en owun enin medoc mes arjaga anim naugb en edu yen meijohora dag ginohob, kaba, eigouhw naugb yen toua yowun yenin meigdoc mes arjaga naugb yen yedu yenin meijohora ucucugb toua. 15 Anai indan geicara gin, kaba, dag ansins dou yen, dauntoba yen yesogwa dan indohotimei mohw anim dag gin toua terimda. 16 Anai sud hom gedag sogougb, kaba, en moho emedreg dau men mougtero. Dara sud hom gesai moro, kaba, en moho emedreg dau sud hom garougb en an touwero. Doba en moho eb tainya dous. Yen youman dan indir an areg dan den dou yen gin deigeigouhwahabi, anai augwan gini asesa dag misen namcirohob. 17 Dangga hang, sug yen yecinaga areg graga dag misenohob, kaba, eigouhw naugb yen yaimo augwan gini anim ucucugb terimda. Anai sug yen yeicara dag gin, kaba, Allah eic geigouhw dou yen toua namcir. 18 Areg dan den dou yen gin, kaba, dan demen eisaugb yen yaugwanero. Anai sug dan douci yen sug nosa, kaba, dan decinaga areg geb se yen meigdoc mes augwan debohob. Hang dan decinaga dag sud hom dau yen, kaba, en eineg mohotimei an dan toua. Doba dan douci en, dauntoba esogwa deisa areg Daud en eiyagarij an se Surad Ugwaremer deb sug nosa touohob, endagai: Dan insi hom gedig en et ared dara dan, kaba, en eineg en mohotimei an dan ucugwohob. 19 Dan dens dau gin augwan deb dou yen nosahabi. Dauntoba sug aremer augwan gini agunya ainyesohob, kaba, yen yod meijina debsa dan dag dan dedag Adehsud Geis Huhugb Sugraga gini. 20 Dangga gareg en ebin sud hom gedig dan desa en aud en naugb en esai dan induro dou en, kaba, en ebin dan touohob. Dara gareg en ebin dan, kaba, en ebin sud hom gesa dan aud en gin touohob. Yen youman dan indir an areg dan den dou yen gin deigeigouhwahabi, anai augwan gini asesa dag misen namcirohob. 21 Sug Yesus enara dag graga bouwa dou men logodehohob, kaba, en medoc momogo medam an gin deit. Hanoba en emenara dag aimeh dou len deitero. Doba en enara moho ainyes dou len namcir, endagai: Yen youman deigeigouhw deitahabi. Cum, kaba, sud hom dau yen en emohw dan dou len gus toues. Augwan gini asesa dag misen namcir. 22 Sug men logodeh len louman dau gin, kaba, len leineg lauweilem ucucugb namcir. Anai len leija meruwesa dag gareg dau len en eineg mohotimei an Yesus gina? 23-24 Dangga Simon Petrus en mesira bainyen dou godeh hom gedig en eigtou desij Yesus dig en mesira misen. Hanoba en enara dou en, endagai: Ban beijidougwo Yesus dag gareng dau maman en eineg mohotimei an en gina? En acgeij godeh hom gini naugb en eijidougwo Yesus an dangga, anai Yesus medoc gororougb godeh hom gin namcirohob. 25 Dangga godeh hom gin, kaba, en ocuc desij Yesus. Sug en ocuc desij enohob, kaba, en eijidougwo en, endagai: Adehsud, gareg dau emen en eineg mohotimei an ban gina? 26 Doba Yesus auni dou en, endagai: Ban beiya dau sug dan dogun roti mogo hom se mohu. Hanoba dan deic dou sud hom, kaba, sud hom, inggang, emeineg mohotimei an dans. Sug Yesus auni dag gin dou en dauwohob, kaba, en ekris roti naugb en ogun se mohu. Hanoba en eic an dou Simon meisi, moho Yudas dau cinogo Keriod, en toua. 27 Sug Yesus eic roti dou Yudas inegohob, kaba, Setan outi se Yudas en medoc mes toua. Dangga hang, Yesus arougb en, endagai: Areg ban besedeb se ban abdoc mesohob, kaba, ban bemamsoho deitero. Doba ban beicara baimo dedemeda iteitogini an gin namcir. 28 Doba areg Yesus arougb Yudas an gini, kaba, men logodeh gus gedig len leigtou desij en naugb letara, kaba, len lemecinaga meijouhw augwan asesero. 29 Dangga hang, ligbum, kaba, len loudesa endag Yesus arougb Yudas naugb en edouma ara ara naugb Lona Gohw Bedreg gini. Dara ligbum deit, kaba, len loudesa Yesus arougb en naugb en edohw aregoufu dou leng merunggwereij. Anai Yudas gin eng en edag mougt naugb meren aregoufu augwan. 30 Dangga sug Yudas eic roti dau Yesus mesira inegohob, kaba, en arges maga bec an namcir. Doba sug en eihwededau len gin, kaba, loba osunir touohob. 31 Sug Yudas eihwededau lenohob, kaba, Yesus enara dou men logodeh gus, endagai: Cum, kaba, Allah emeigdoumesa Lusud Meraguna Mebin dan indoho, beb ainyes deseino lusud. Dara dan demeigdoumesa en moho beb ainyes deseino lusud laugwan toues. 32 Doba sug dan deigdoumesa Allah en moho beb ainyes deseino lusud dag ginohob, kaba, en emamsoho dan deb touwero. Doba en emeigdoumesa Lusud Meraguna Misen dan indoho beb ainyes ucugb deseino len laugwan dedemeda toues. 33 Dan indihirija, dan demeigtou desij yen terberbahabero. Doba cum, kaba, dan deihwededau yenohob. Dangga yen yehilon dougwo dan, doba yen yemdeiya dan deitero. Dara ucina gedig dan deraga gini, kaba, yen yemaimo dan se ucina gin touwero. Gini aninim dag dan den dou leng Yahudi meren mougtir sug nosa touohob. 34 Hang iteitogin, kaba, dan deic gomnomna menau dou yen dag gini: Yen meigdoc gororougwim namcir. Dara yen meigdoc gororougwim gin, kaba, aninim dag dan indoc gororougb yen sug nosa touohob. 35 Anai sug yen meigdoc gororougwim dag gin ucucugb terimda, kaba, ens dou lusud laugwan dag yen yedag indan logodeh misen touohob. 36 Sug Yesus men logodeh len louman dag Yesus emeigtou desij len terberbahabero, kaba, Simon Petrus eijidougwo en eisaugb gini, endagai: Adehsud, ban beihwedigero? Doba Yesus auni dou en, endagai: Ucina gedig dan deraga gin, kaba, ban bemaimo dan se ginbuma. Doba se lona daiyamo gacin, kaba, ban beicara baimo dan se ucina gin toua. 37 Dangga Petrus auni Yesus mer ucugb, endagai: Adehsud, dagiro, naugwe hang, ban ben dougwo dan naugb dan demaimo ban asa ucina gini iteitoginero. Anai dan desedeb naugb sug dan dohw dan indugt edug naugb banohob, gina? 38 Doba Yesus auni en mer ucugb dou en, endagai: Ban bohw ban abugt edug aud gomom naugb danohobei? Naro, anai ban bouman deigeigouhwahabi. Sug berougwu emeba mer mougwa hombuma, kaba, ban baideido dougwo dan mougwa homoi icirohob. Augwan gini asesa dag misen namcir.

14:1 Sug Yesus esulou men logodeh dag graga bouwohob, kaba, en enara bad len merdoc mes ucan gin deit, endagai: Yen meigdoc emeijesa ucan danlo. Doba yen yod meijina debsa dan an areg dan den dou yen terimda. Aninim dag yen yod meijina debsa Allah sug nosa touohob. 2 Anai se dan Indina men tu, kaba, dimei einyana inggebga. Dangga dan deihwedaud en naugb dan desedeb areg geb se dimei gini augwan naugb yen toua. Gini misenero, kaba, dan demen dau gin dou yen touwero. Doba misen namcir. 3 Dara dan demeihwededau yen terimda touwero. Doba sug dan desedeb ara ara se dimei naugb yen debohob, kaba, dan demecicugb aud yen deits. Hanoba dan dedahwan yen aud indan dimei graga. Dauntoba sugiro dan indugwengga, kaba, yen toua meijugwengga desij dan terimda. 4 Dara dan Indina men tu gedig dan deihwedaud gin, kaba, yen yecinaga ucina aud gin touohob. 5 Doba Tomas en eijidougwo ucina gini bagod dougwo Yesus mer an, endagai. Adehsud, emen ememecinaga ucina sug ban beraga aud dimei ginbuma. Dagiro, naugwe hang, emen emeraga ucina aud dimei gina? 6 Dangga Yesus enara dou en, endagai: Danin dous eng sud hom gedig en ens areg asesa Allah enin medoc mes augwan dag misen dou lusud. Dara danin dous eng sud hom gedig en eic maireseb menau geb huhugb dou lusud toua. Dangga gareg en emeraga danin dag ucina ginero, kaba, en emedebeij dan Indina se bogo touwero. 7 Sug Yesus ens enin dag gini dou Tomasohob, kaba, en enara dou men logodeh laugwan deit, endagai: Doba yen gin, kaba, yen yeiya dara yen yecinaga areg geb se dan Indina enin medoc mes augwan dag misen namcir. Anai yen yecinaga dan touohob. Dangga hang, dau iteitogini, kaba, yen yeiya en dara yen yecinaga en toua terimda. 8 Doba sud hom dau Yesus men logodeh, moho Pilipus, en medoc emobgesa Yesus mer an ginbuma. Hanoba en acgeij Yesus, endagai: Adehsud, ban bens ban Abina gin dou emenahabi, dauntoba emen emeiya en dara emen emiresi. Anai gini edeinyum naugb emenohob. 9 Doba Yesus auni en mer an gini, endagai: Dan deigtou desij yen yaugwan igda einyanohob. Doba ban bemecinaga areg asesa danin indoc mes augwan dag misen touebma, anara? Anai gareg en ecinaga areg asesa danin indoc mes augwan dag misenohob, kaba, en ecinaga areg asesa dan Indina enin medoc mes augwan dag misen touohob. Dangga dagiro, naugwe hang, Pilipus, ban benara dou dan dag dan dens dan Indina ainyen dou yena? 10 Ban abdoc emebdebin an dag dan Indina aman amahwas amedag hom gineroei? Era ara? Anai areg dan desai dou yen gin, kaba, dan demeic ara moho hom dau danin indoc mes dou yen touwero. Doba dan Indina enin eng ens dau geicara augwan dou dan, hang dan demaimo toua. Anai eni moongga dara dan terimda. 11 Dangga sug dan denara dou yen dag dan Indina aman amahwas amdoc dag hom naugb augwanohob, kaba, yen meigdoc ebdebin dan an dan indir gin toua terimda. Anai augwan misen namcir. Dobnaro, kaba, yen meigdoc ebdebin an areg dan den dou yen gini ogdoc indan ganusbus dou yen dous. 12 Dangga gareg dau yen en medoc ebdebin an dan, kaba, men geicara augwan aninim dag indan geicara augwan gin toua. Dara gin dousero, doba men geicara einyana edreg dau gin deit. Anai dan demeihwedaud dan Indina se bogo naugb gin toues. Yen youman dan indir an areg dan den dou yen gini deigeigouhw. Anai augwan gini asesa dag misen namcir. 13 Dangga areg yen yacgeij se dan indoho dau dan Indina se lona ingga, kaba, dan demeic dou yens. Dauntoba dan deigdoumesa dan Indina en moho agas medam icira gin deseino yen namcir. 14 Hang areg yen yacgeij se dan indoho dau en, kaba, dan demeic dou yen toues. Anai yen yedag indan logodehohob. 15 Sug Yesus enara dag graga dou men logodeh bouwohob, kaba, en esulou len deit, endagai: Sug yen meigdoc gororougb dan dag misen, kaba, yen yemohoiya dan indir an areg dan darougb yen an touwero, doba yen yeicara yaimo augwan gin toua terimda. 16 Dara sug yen yaimo dan indir dag gin, kaba, dan dacgeij dan Indina naugb en esa sud hom gus dou yen. Dauntoba en eperwei dan induhw naugb en ousa yen se aremer graga augwan toua terimda. Anai en emamsoho yen debero, doba en eigtou desij yen beb huhugb namcir. 17 En, kaba, Mena Gogoufu gedig Allah emesa en aud yens, hang en ens areg asesa Allah enin medoc mes augwan dag misen dou yen toues. Doba lusud gedig Bilis oiharaga len se cinogo gin, kaba, emedeinyum naugb Mena Gogoufu gini einesa len merdoc mes ginero. Anai len lemeiya dau en dara len lemecinaga areg geb se en medoc mes augwan asesa touebma. Doba yen, kaba, cum, yen yecinaga areg geb se enin medoc mes augwan asesa terimda. Anai sug en enohob, kaba, en emamsoho yen debero. Doba en eigtou desij yen se yen meigdoc mes beb huhugb namcir. 18-19 Sug Yesus enara eisaugb Mena Gogoufu gini dou men logodeh dauwohob, kaba, en enara ad len merdoc mes ucan deit, endagai: Lona hom debin gin, kaba, lusud gedig Bilis oiharaga len se cinogo gini len lemeiya dan deitero. Anai dan domom dau lenohob. Doba yen, kaba, yen yemeiya dan deits. Anai sug dan deisa dau gomom ucugwohob, kaba, dan demens danin ainyes dou yen naugb dan demeic maireseb menau geb huhugb dou yens. Aninim dag dan deisa dau gomom aud maireseb menau geb huhugb se lona ingga touohob. Dangga hang, sug dan dededau yen, kaba, dan demamsoho yen dag adougwen deb touwero. Doba cum, kaba, dan demecicugb aud yen deits. 20 Dara se lona ingga, kaba, yen yemeija meijuwesa dan toua deitero. Doba sug yen yeiya dan deisa dau gomom ucugb dag ginohob, kaba, yen yecinaga dag dan Indina aman amdoc dag hom. Aninim dag yen meigdoc dag hom dara dan, dara dan indoc dag hom dara yen touohob. 21 Gareg dau yen en ebin areg dan darougb yen an ginohob, hanoba en eicara baimo toua, kaba, enin eng sud hom gedig en medoc gororougb dan dag misen namcir. Dara gareg en medoc gororougb danohob, kaba, dan Indina aman amdoc gororougb en. Hanoba dan demens dau areg geb se danin indoc mes augwan asesa dou en toues. 22 Doba sud hom dau Yesus men logodeh, moho Yudas, sug en ouman dag Yesus ens enin ainyes dou len dous, kaba, en eija mouwesa gin namcir. Dangga, kaba, en eijidougwo Yesus an gini, endagai: Adehsud, sug ban bens dau aban gogouf cucugb ainyes dou emen, kaba, emen dous eng emeiya dau gin se lona inggei? Doba dagiro, naugwe hang, len gedig Bilis oiharaga len se cinogo gini len lemeiya dau ginero, anara? Anai len toua merugwengga desij emen gina? (Yudas geijidougwo Yesus an gin, kaba, eni Yudas dau cinogo Keriod, isnaro. Doba en Yudas dau len gus dous.) 23 Doba Yesus auni dou en deit, endagai: Gareg en medoc gororougb dan, kaba, en emohoiya dan indir an areg dan desai dou yen touwero. Doba en eicara baimo gin terimda. Dara gareg en aimo areg dan dens dou enohob, kaba, dan Indina medoc gororougb en toua. Dara aman amen aud en naugb aman amaigtou desij en se en medoc mes gin toua namcir. 24 Doba gareg en medoc gororougb danero, kaba, en emeicara emaimo dan indir an areg dan den dou yen gin touwero. Dara areg dan den dou yen gin, kaba, dan demen dau danin indoc mes dou yenero. Doba en dau dan Indina gedig en esa dan aud yenohob en dous. 25 Dan dens dau areg graga augwan dou yen sug dan indugwengga dara yenaba. 26 Doba sug Mena Gogoufu enohob, kaba, en ens dau areg dan den dou yen gin augwan asesa dou yen. Dara en edidib aremeijouhw debin gin dou yen toua. Anai cum, kaba, dan Indina emesa en aud yen naugb en eperwei dan induhw, dauntoba en emousa yen se aremer augwan deits. 27 Doba sug dan demeihwededau yen dag ginbuma, kaba, dan douwan deic medoc agadgeij dougwo augwan dou yen toua. Dara medoc gebtou gini, kaba, susugb dau len gedig Bilis oiharaga len se cinogo gini len leic dou yen. Doba aimo dag danin toua indoc agadgeij dougwo augwan gin touohob. Dangga hang, yen meigdoc momogo dau sug dan deihwededau yenero. Dara yen meigdoc emeijesa dara yemahau dau augwan gin touwero, doba ebtou namcir. 28 Anai dan den dou yen dag dan demamsoho yen debero. Doba sug dan deihwededau yenohob, kaba, dan demecicugb aud yen toues. Dangga sug yen meigdoc gororougb dan dag misenohob, kaba, yen meigdoc momogo an dan sug dan deihwededau yen aud dan Indina touwero. Doba yen meigdoc agahugouhw an gin namcir. Anai dan Indina en moho agas bedreg dau danohob. Doba yen meigdoc gororougb dan dag misenbuma. Hang yen meigdoc emagahugouhw an dan sug dan deihwededau yen aud dan Indina touwero, doba yen meigdoc momogo namcir. 29 Dan dens dau augwan gini dou yen sug emedebeijbuma. Dauntoba sug acgunog, kaba, yen yemeija meijuwesa gin deitero. Doba yen yod meijina debsa dan an areg dan den dou yen gin dag misen namcir. 30 Dara dan denara dou yen dag gin deit, doba gurereito dous. Anai sud hom goiharaga lusud se cinogo gin, kaba, en en aud dan naugb en moho aiga dan. Dobnaro. En men goubesa emedeinyum naugb ginero. 31 Doba dan douwan naugb lusud se cinogo gin, kaba, len lecinaga dag dan indoc gororougb dan Indina dag misen namcirohob. Hang dan demaimo en mer an areg en arougb dan an gin toua. Dangga eigouhw naugb maman maihwededau suginda.

15:1 Sug Yesus esulou men logodeh eisaugb aremer graga augwan dauwohob, kaba, en eic gainyenara hom ucan dou len deit, endagai: Danin eng dedag anggur maga misen hom dous. Dara dan Indina, kaba, en edag mougt naugb en esedougwo sogo gin toua. 2 Dangga astesda mesira gemera merero, kaba, en eigteh dau. Doba astesda mesira gera mera, kaba, en aos meh dau becabeci namcir. Dauntoba era mera geigouhw edreg dau nosa deit. 3 Doba yen gin, kaba, yen yecabeci ogdoc areg dan desai dou yenohob. 4 Dangga hang, yen yemasid yenin dau dan touwero. Doba yen yedag hom dara dan namcir. Aninim dag dan demasid danin dau yen touwero, doba dan dag hom dara yen toua terimda. Anai sug yen yedag hom dara dan dag gini, kaba, yen yera mera geigouhw toua. Doba sug yen yasid yenin dau dan, kaba, yen yemera mera geigouhw deitero. Aninim dag sogo mesira sug eigteh dau maga, kaba, emera mera touwero. Doba sug mesira gini eb se maga, kaba, era mera geigouhw toua terimda. 5 Dan dedag sogo maga, dara yen yedag mesira. Gareg dau yen en edag hom dara dan. Hanoba dan dedag hom dara en toua, kaba, enin eng era mera geigouhw einyana namcir. Anai yen yemera mera dau yeninero, doba ogdoc danin dous. 6 Doba gareg dau yen en asid enin dau dan namcir, kaba, dan Indina erba en dau men lo gini, hanoba en agac namcir. Aninim dag lusud sug len lerba sogo mesira dig medigo, kaba, sogo mesira agac toua. Hanoba len louci mesira gin augwan debinim naugb len lec se smougb toua namcir. 7 Doba sug yen meigdoc dag hom dara dan terimda, dara yen yebin areg dan desai dou yen gini se yen meigdoc mes toua, kaba, yen yacgeij dan Indina an areg yen youwan. Hanoba en emeic dou yen toues. 8 Anai sug yen yera mera geigouhw einyana dag gini, kaba, yen yeigdoumesa dan Indina en moho deseino lusud. Dara yen yens yenin ainyes dou len dag yen yedag indan logodeh misen ginohob. 9 Dan indoc gororougb yen aninim dag dan Indina medoc gorougb dan touohob. Dangga hang, yen yemobsara dau sug yen yaimo areg dan darougb yen an gin touwero. Doba yen yeicara dag gini terimda, dauntoba dan indoc gororougb yen toua namcir. 10 Anai sug yen meigdoc edag beim an areg dan darougb yen an gini, kaba, dan demobsara dau sug dan indoc gororougb yen touwero. Doba dan deicara daimo dangga an yen namcir, aninim dag dan Indina emobsara dau sug en medoc gororougb dan touwero. Doba en eicara dangga toua terimda, anai dan daimo areg en arougb dan an ginohob augwan gin toua namcirohob. Doba sug yen yemaimo areg dan darougb yen an ginero, kaba, dan indoc gororougb yen toua deitero. 11 Dan dens dau areg graga augwan dou yen, dauntoba yen meigdoc momogo an ara hom touwero. Doba yen meigdoc agahugouhw an augwan mogud namcir. Aninim dag dan indoc momogo touwero, doba dan indoc agahugouhw an augwan touohob. 12 Dara dan deic gomnomna hom ucan dou yen toua dag yen meigdoc gororougwim namcir, aninim dag dan indoc gororougb yenohob. 13 Dara aremer gororougb edreg dau aremer gororougb gus augwan, kaba, dag sud hom eic en mougt edug aud gomom naugb en mesir gini. Anai aremer gus ingma emedreg dau sug en ohw en mougt edug naugb len ginero. 14 Dangga hang, sug yen yaimo dan indir an areg dan desai dou yen gin namcir, kaba, gini ansins dag yen yedag dan insir misen touohob. 15 Dara dan demeija yen dag sogougb toua deitero. Anai sogougb, kaba, en emecinaga dau men mougt mera men geicara meijouhw augwanero. Doba dau iteitogini, kaba, dan deija yen dag dan insir misen dous. Anai dan dens dau areg dan Indina en en dou dan meijouhw augwan asesa dou yenohob. 16 Dara yen yemedag dan insir dau sug yen yenin youci dan touwero. Doba dan danin douci yen. Hanoba dan deigdoumesa yen meijoho naugb yen yera mera einyana toua. Dara mera gin, kaba, emetaha dau yen touwero, doba eb naugb yen beb huhugb namcir. Sug yen yera mera dag gin, kaba, yen yacgeij ara ara dau dan Indina, hang en emeic dou yen toues. Anai yen yedag dan insir ginohob. 17 Dangga hang, areg dan darougb yen an gin, kaba, dag yen meigdoc gororougwim namcir. 18 Sug Yesus enara dou men logodeh dag graga bouwohob, kaba, en esulou len ucan gin deit, endagai: Sug lusud gedig Bilis oiharaga len se cinogo gini len merdoc obgos an yen, kaba, yen meigdoc eiseisan dag len merdoc obgos an dan touohob. 19 Anai sug yen meigdoc dag hom dara len, kaba, len merdoc mog mog an yenero. Doba len leigdoumesa yen meijoho dag meren lusud toua. Hanoba len merdoc gororougb yen toua namcir. Doba dan douci yen debinim dau len naugb danohob. Dangga hang, len merdoc gororougb yen toua deitero. Doba len merdoc mog mog an yen dous, anai yen meigdoc aninim dag len deit touwero. 20 Dara yen meigdoc moc dougwo areg dan denara dou yen sug nosa gin touwero. Doba yen yeiseisan terimda. Anai dan den dou yenohob dag sogougb, kaba, en moho emagas emedreg dau men mougt mera touwero, doba eb tainya namcir. Dangga hang, sug len leic mog erij dou dan sug nosa, kaba, len lemeic mog erij dou yen. Dara sug len laimo dan indir an areg dan desai dou len ginohob, kaba, len lemaimo yen meijir an areg yen yesai dou len toues. 21 Dara gecgu areg len leic dou yen gin, kaba, len leicara dangga an yeni, anai yen meigdoc aninim dara len deitero. Doba yen meigdoc dag hom dara dan dau lenohob. Dara len lemecinaga sud hom gesa dan aud len en medoc mes asesa touwero. 22 Sug dan demen aud len naugb dan demesai dan Indina en moro dou lenero, kaba, sesar men gogom ingmemeb naugb len touwero. Doba iteitogin, kaba, dan desai dan Indina en moro augwan dag misen dou lenohob. Hang meren ara ara naugb sug len launun dougwo meren sesar, kaba, ingmemeb naugb len toua deitero. 23 Gareg en medoc obgos an dan, kaba, en medoc obgos an dan Indina gin touohob. 24 Dangga toua, sug dan demaben ganusbus einyana debin areg dan desai gin dou lenero, kaba, sesar men gogom emeb naugb len touwero. Doba iteitogin, kaba, len leiya augwan gini dag misenohob. Hang meren ara ara naugb sug len launun dougwo meren sesar, kaba, ingmemeb naugb len toua deitero. Anai areg dan daben deseino len, kaba, sud hom ingma en emaben touebma. Dobnaro. Len merdoc emobgos an dan dousero. Doba len merdoc obgos an dan Indina en touohob. 25 Doba meren geicara dou dan gin, kaba, augwan esogwa deisa areg mougt mera medam, moho Daud, en eiyagarij Allah se men Surad Ugwaremer deb sug nosa touohob, endagai: Indan aremer naugb sug len merdoc ecgwan dan icira gin, kaba, hom ingma touwero. Doba len merdoc ecgwan dan se gedis maga dous. 26 Doba cum, kaba, dan demesa sud hom dau dan Indina aud yen ucugb naugb en ousa yen se aremer augwan toua. En, kaba, Mena Gogoufu gedig en ens dau areg geb se Allah enin medoc mes augwan asesa dou yen, anai en en dau en aud yen. Dangga hang, sug en edebeij yenohob, kaba, en emens dau areg geb se danin indoc mes augwan asesa dou yen toues. 27 Dara yen, kaba, dan douwan naugb yen yens dau areg yen yeiya dara youman dau danohob augwan asesa dou lusud toua. Anai yen yaimo dan dau sug acgunog ginohob.

16:1 Dara dan dens dau aremer gin augwan dou yen deb, dauntoba yen meigdoc emobsara dau danlo. Doba yen meigdoc ebdebin an dan terimda. 2 Anai cum, kaba, leng Yahudi lasid yen dau meren tuari. Dara lona ebiji naugb sug sud hom areg en ogod yen yomom, kaba, en eigdoumesa en moho dag en ousa Allah ginohob. 3 Dobnaro. Len leicara dag gini dou yen, anai len lemecinaga areg geb se dan Indina aman amdoc mes augwan dag misenbuma. 4 Dan demens dau areg graga augwan dou yen acgunog touwero. Anai se lona ingga, kaba, dan indugwengga desij yen dougwaba. Doba dan dens dau augwan gin dou yen iteitogini, dauntoba sug meren lona naugb sug len leic mog erij dou yen edebeijohob, kaba, yen meigdoc eiseisan dag dan dens dau augwan gini dou yenohob. Hang emeic yen meigdoc aiyansem dou yen toua. 5-6 Anai iteitogini, kaba, dan demecicugb aud sud hom gesa dan aud yen gini. Dangga hang, yen meigdoc momogo medam an areg dan den dou yen gin toua namcir. Doba sud hom ingma dau yen, kaba, en emeijidougwo dan an usi sug dan decicugb aud gin touwero. 7 Doba eigouhw naugb dan deihwededau yen. Anai sug dan demeihwedero, kaba, Mena Gogoufu en emen aud yen touwero. Doba sug dan deihwededau yenohob, kaba, dan demesa en aud yen naugb en emousa yens. Yen youman dan indir an areg dan den dou yen gini deigeigouhwahabi. Anai augwan gini asesa dag misen namcir. 8 Dara sug en en aud yenohob, kaba, en ens ainyes dou lusud se cinogo gini dag meren gauwamara eisaugb sesar. Dara areg dan desai dou len, dara Allah men gogom areg en ogod deinaugb len, kaba, len lauwam an augwan gini dag didi namcirohob. 9 Anai en emens dou len dau sug len merdoc emebdebin an danero, kaba, dag meren sesar emediyebeiya dau len touwero, doba eb naugb len terimda. 10 Dara en emens dou len dau sug dan decicugb aud dan Indina, kaba, gini ansins dag dan demereiyara dou len touwero. Doba dag areg dan den dou len gin, kaba, augwan asesa dag misen namcirohob. 11 Dara en emens dou len dau sug meren sesar eb naugb len terimdaba, kaba, dag Allah emamsoho len touwero. Doba en emogod gogom deinaugb len toues. Anai en ogod gogom deinaugb meren mougt mera medam gedig en oiharaga len se cinogo gin touohob. 12 Dan douwan dens dau aremer einyana ucan gin dou yen deit. Doba iteitogin, kaba, emedeinyum naugb sug yen yeic augwan gini se yen meigdoc mes touebma. 13 Doba sug Mena Geica en en aud yenohob, kaba, en emens dau areg misen meijouhw augwan asesa dou yen toua. Anai en emens dau areg se enin medoc mes dou yenero. Doba en ens dau areg geb se Allah enin medoc mes dou yen dous. Hang areg en ouman dau Allah ginohob, kaba, en ens dau augwan gini dou yen. Dara en ens dau areg Allah esedeb naugb lona daiyamo gacin augwan dou yen toues. 14 Dara en emeigdoumesa dan indoho agas medam deseino yen dag dan toua deigtou se gogouf cucugb gini. Anai en eic dau areg geb naugb danohob. Hanoba en emens dou yen toues. 15 En eicara dag gini, anai areg geb naugb dan Indina, kaba, augwan gini eb naugb dan touohob. Hang dan demen dou yen dag en eic dau areg geb naugb danahabi. Hanoba en emens dou yen toues. 16 Sug Yesus esulou men logodeh dag graga ouwohob, kaba, en esulou len deit, endagai: Cum, kaba, yen yemeiya dan deitero. Doba se lona hosa debin gin, kaba, yen yemeiya dan ucugb deits. 17 Sug Yesus men logodeh len louman en mer an gin, kaba, ligbum len leijidougwom ucucugb, lendagai: En enara dou maman dag cum, kaba, maman mameiya en deitero. Doba cum, kaba, maman maiya en ucugb deits. Dara en enara dou maman toua dag maman mameiya en touwero. Anai en eihwededau maman aud en Mena ucugb gini. 18 Dangga areg en enara dou maman dag cum gin, kaba, men meijouhw dagiro? Anai maman mamecinaga meijouhw asesebma. 19 Doba Yesus ecinaga dag len louwan leijidougwo en an areg en en dou len graga. Dangga hang, en emenara dou len, endagai: Dan den dou yen dag cum, kaba, yen yemeiya dan deitero. Dara dan den dou yen toua dag lona hosa debin gin, kaba, yen yemeiya dan ucugb deits. Yen yeijidougwom an areg dan den dou yen graga ingginei? 20 Doba yen youman dan indir an areg dan den dou yen gini deigeigouhwahabi. Anai cum, kaba, yen yeb dara yeingdara ucan dan. Doba lusud gedig Bilis oiharaga len se cinogo gini, kaba, len lagahugouhw debin dan namcir. Dangga sug aimougtut gini, kaba, yen meigdoc eijesa medam ucan dan namcir. Doba cum, kaba, yen meigdoc agahugouhw ucugb deitohob. Augwan gini asesa dag misen namcir. 21 Anai sug gida ouwadan meh, kaba, aimougtut en menuhwa erij medam namcir. Hanoba eic en medoc momogo dou en toua. Doba sug en ouwadan mehohob, kaba, en agahugouhw an gin dous. Hang en medoc emeiseisan areg geic momogo dou en graga deitero, doba en medoc ougwo namcirohob. 22 Dangga toua, dara yen iteitogini, kaba, yen meigdoc momogo ucan dan namcir. Doba cum, kaba, yen meigdoc momogo deitero. Doba yen meigdoc agahugouhw an dan, anai dan den aud yen deit. Dara yen meigdoc gagahugouhw gin, kaba, sud hom ingma emowun yen an gin toua deitero. Doba eb naugb yen toua beb huhugb terimda. 23 Dangga sug lona ingga edebeijohob, kaba, yen yemacgeij ara ara dau dan toua deitero. Doba dan Indina enin eng emeic areg yen yacgeij dau en dou yen toues. Anai yen yedag indan logodeh ginohob. 24 Dara yen yemesa doc dau gin touwero. Doba yen yemacgeij dau dan Indina terimda. Dauntoba meijen gagahugouhw emediyebeiya dau yen touwero. Doba yen meigdoc atij an gin namcir. Anai terimda iteitogin, kaba, yen yemacgeij ara hom dau dan Indina se dan indoho touebma. Yen youman dan indir an areg dan den dou yen deigeigouhw terimda, anai augwan gini asesa dag misen namcir. 25 Sug Yesus esulou men logodeh dag graga dauwohob, kaba, en enara bad len merdoc mes ucan deit, endagai: Lona ebeij deinyorohob naugb sug dan demenara demaimeh eisaugb dan Indina gin dou yen toua deitero. Doba dan demens areg geb se enin medoc mes augwan ainyes dag misen dou yen toua. Anai dau sugraga terim iteitogin, kaba, dan denara einyana dag daimeh dou yen dous. 26 Sug lona gin edagasohob, kaba, dan demacgeij ara ara dau dan Indina naugb yen toua deitero. Doba yenin yacgeij ara ara se dan indoho dau en dous. Anai yen yedag hom dara danohob. Hanoba en emeic dou yen toues. 27 Anai yen meigdoc gororougb dan dara yen yod meijina debsa dan dag dan den dau en touohob. Hang dan Indina medoc gororougb yen toua terimda. 28 Augwan gini misen namcir. Anai dan den dau dan Indina aud yen se cinogo ginohob. Dangga sug dan deihwededau cinogo gin, kaba, dan decicugb aud en toua deit. 29 Sug Yesus men logodeh louman en mer an gini, kaba, len lousa deisa en an. Hanoba len lenara dou en, lendagai: Adehsud, iteitogin, kaba, ban bemenara bemaimeh dou emen deitero. Doba ban bens aremer gini ainyes dag misen dou emenohob. 30 Dangga iteitogin, kaba, emen emecinaga dag ban abu ouforoho naugb ban becinaga areg geb se lusud merdoc mes augwan dag misen touohob. Anai sud hom ingma, kaba, en emeijidougwo ban an ara ara touwero. Doba ban becinaga areg len louwan leijidougwo ban an gini deb sug nosohob. Hang emen emecinaga dag ban ben dau Allah aud emen dag misenohob. 31-32 Doba Yesus enara bauwun len merir an gini, endagai: Yen yod meijina debsa dan dag misen, ingginei? Naro, anai cumougt edagasohob naugb sug yen yaugwan yougb yaisoboro dig meijen tu dau daninto deb dangga. Dobnaro. Dan Indina eni moongga desij danohob. 33 Dan dens dau areg graga augwan dou yen, dauntoba yen yemahau dau ara ara touwero. Doba sug yen meigdoc dag hom dara dan dag ginohob, kaba, yen meigdoc ebtou namcir. Anai lusud gedig Bilis oiharaga len se cinogo gin, kaba, len lemeic mog erij dou yen toues. Doba yen yaiyan meigdocesem naugb yen yes agadgeij terimda. Anai dan daiyan len laugwan meroho eb tainya danohob.

17:1 Sug Yesus esulou men logodeh dag gin dauwohob, kaba, en eised mergo dig bogo naugb en ocuncum dou en Mena ucan gin deit. Hanoba en enara dou en, endagai: Akeinya, lona edagasa namcirohob. Dangga hang, ban bens dau ban Abisi indan gogouf cucugb dou lusud, dauntoba ban Abisi dan dens dau aban gogouf cucugb dou len toua. 2 Anai ban beigdoumesa ban Abisi dan indoho dag mougt mera medam naugb lusud se cinogo augwanohob. Dauntoba gareg ban beic dou dan, kaba, dan demeic maireseb menau geb huhugb dou len laugwan toua. 3 Dangga gareg en ecinaga ban dag misen dara en ecinaga Yesus Krisdus dan dag misen touohob, kaba, maireseb menau geb huhugb eb naugb enohob. Anai banin dous eng Allah misen hom dous. Dara ban eng besa dan aud lusud gini naugb dan deigdoc len dau meren gogom augwan toua. 4 Hang dan demens dau aban gogouf cucugb augwan dou len se cinogo ginohob. Anai areg ban beic dou dan naugb dan desai dou len gini, kaba, dan deicara daimo augwan bedeinyum an len touohob. 5 Dangga, Akeinya, iteitogin, kaba, ban beigdoumesa dan indoho desij ban se gogouf cucugb deit. Aninim dag dan deigtou se gogouf cucugb sug ban bemesinsin cinogo dara bogo gin touebma. 6 Dara dan dens dau areg geb se banin abdoc mes augwan dou indan logodeh gin touohob. Anai ban bouci len laugwan debinim dau cinogo gini naugb banohob. Hang len lemedag lenin deitero, doba len laugwan ledag aban namcir. Dara len gin, kaba, ban bogugwo len laugwan deb se dan insira naugb dan dagauwesa len toua. Dangga areg dan desai dou len, kaba, len lemesbes an touwero. Doba len leicara laimo augwan gin terimda. 7 Anai iteitogin, kaba, len lecinaga dag areg dan desai gin, kaba, emen dau daninero. Doba augwan en dau banin dous. 8 Dangga areg ban beic dou dan naugb dan desai dou len, kaba, len lemotogoto dan indir an touwero. Doba len lebin se len merdoc namcir. Anai len lecinaga dag dan den dau ban aud len dag misenohob. Hang len lod merna debsa dan dag areg dan desai dou len gini, kaba, dan demeic dau danin indoc mes dou lenero. Doba banin eng besa dan aud len naugb dan desai dou len toua. 9 Dangga dan democuncum naugb lusud gedig Bilis oiharaga len se cinogo ginero. Doba dan docuncum naugb len gedig ban beic dou dan len gin dous. Anai len gin, kaba, aban logodehohob. 10 Dara aban dousero. Doba len gin, kaba, indan logodeh touohob. Anai areg geb naugb dan, kaba, aban. Dara areg geb naugb ban, kaba, indan toua. Hang len lemens dau indan gogouf cucugb dou lusud laugwan toua terimda. 11 Doba iteitogini, kaba, dan demeigtou an len se cinogo gin deitero. Anai cum, kaba, dan den aud ban ucugb dau lenohob. Doba len, kaba, len merugwengga se cinogo ginaba. Dangga hang, Akeinya Gedig Ban Becabeci Namcir, kaba, dan dacgeij ban naugb ban aboho oiharaga len dougwo areg gecgu augwan terimda. Dauntoba len ledag hom, aninim dag nanan nandoc dag hom toua. Anai ban aboho gin, kaba, mobisamougb namcir. Hanoba ban bogugwo dou dan touohob. 12 Dangga sug dan indugwengga an len se cinogo ginaba, kaba, sud hom ingma dau len en emobsara dau dan insira mes touwero. Doba sud hom gedag dum smougb meh teiteiyohob, kaba, enin eng obsara dau dan insira mes dous. Dauntoba areg len log deb se Surad Injil Meb Mohon deb sug nosohob, kaba, acgunog toua. Doba len gus, kaba, dan deseyeiyo len laugwan namcirohob. Hang len lemobsara dau dan insira mes touwero. Doba dan desedougwo len ogdoc ban aboho men goubesa gin terimda. Anai ban bogugwo ban aboho gin dou dan naugb lenohob. 13 Doba iteitogin, kaba, dan desedeb naugb sug dan deihwededau len aud banohob. Dangga hang, sug dan indugwengga desij len se cinogo ginaba, kaba, dan dacgeij augwan gin dau ban. Dauntoba sug len louman gin, kaba, eic dag len merdoc atij an gagahugouhw terimda. Aninim dag dan indoc atij an gagahugouhw gin toua namcirohob. 14 Dara areg ban bens dou dan, kaba, dan desai gin augwan dou len touohob. Hang lusud se cinogo gin, kaba, len merdoc emesgiraha an len dag nosa deitero. Doba len merdoc esrougb an len namcir. Anai sug len louman ban abir ginohob, kaba, len merdoc dag hom dara len toua deitero. Aninim dag dan indoc dag hom dara len touwero. 15 Dara dan demacgeij ban, dauntoba ban bemeigdoumesa len dau cinogo gin, isnaro. Doba dan dacgeij naugb ban beseyeiyo len dougwo Sud Hom Mobgos Maha dous. 16 Anai indan logodeh gin, kaba, len merdoc dag hom dara lusud gedig Bilis oiharaga len se cinogo gin deitero. Aninim dag dan indoc dag hom dara len gin touwero. 17 Dangga hang, ban beic ban abir misen gini, hanoba ban bouci len debinim naugb banin ogdoc ban abir misen gin toua. Anai ban abir gin, kaba, geica namcir. 18 Dara dan desa len naugb len lesai ban aburo dou lusud se cinogo gini. Aninim dag ban besa dan naugb dan desai ban aburo dou len se cinogo gini sug nosa touohob. 19 Dangga hang, dan dohw dan indugt edug dou ban naugb dan deicara daimo ban abir misen gini dag ansins dou len toua. Dauntoba sug len leiya, kaba, len lohw len merugt edug naugb sug len leicara laimo ban an areg ban barougb len an gin toua terimda. Anai ban abir gin, kaba, geica namcir. 20 Dara dan democuncum naugb indan logodeh gin dousero. Doba dan docuncum dou ban deb naugb len gedig merdoc ebdebin an dan se lona daiyamo gacin ogdoc sug indan logodeh gini len lesai dan induro dou len toua. 21 Akeinya, dan dacgeij naugb ban bousa len gini dara leng se lona daiyamo gacin gin toua. Dauntoba len laugwan merdoc emedregimlo, doba len laugwan merdoc dag hom namcir. Dara dan dacgeij naugb ban bousa len. Dauntoba len laugwan merdoc emedreg nanan touwero, doba len merdoc dag hom dara nanan terimda. Aninim dag nanan toua nandoc dag homohob. Dauntoba sug lusud se cinogo gini len leiya dau gin, kaba, len lod merna debsa dan dag ban besa dan aud lenohob. 22 Dangga hang, dan dogugwo gogouf cucugb areg ban bogugwo dou dan sug nosohob ingma dou indan logodeh gin toua. Dauntoba len merdoc emedregim touwero, doba len merdoc aninim dag hom terimda. Aninim dag nanan nandoc dag hom toua namcirohob. 23 Anai sug dan dedag hom dara indan logodeh gini, hanoba nanan nandoc dag hom toua terimda, kaba, eic dag len merdoc emedregim touwero. Doba len laugwan merdoc dag hom terimda. Hang len se cinogo gin, kaba, len lemeija meruwesa dan toua deitero. Doba len lod merna debsa dan dag ban besa dan aud len. Dara ban abdoc gororougb indan logodeh gini, aninim dag ban abdoc gororougb dan dag misen touohob. 24 Akeinya, ban beic logodeh augwan gini dag indanohob. Dangga hang, dan demacgeij dau ban, dauntoba len laugwan ledeigtou desij dan se indan usi naugb len ledeiya indan gogouf cucugb areg ban bogugwo dou danohob augwan toua namcir. Anai ban abdoc gororougb dan sug ban bemahasesei cinogo touebma. Hang ban bemogugwo aban gogouf cucugb gini dou dan touohob. 25 Akeinya, lusud se cinogo gin, kaba, len lemecinaga areg geb se banin abdoc mes augwan dag misen touebma. Doba danin, kaba, dan decinaga areg geb se ban abdoc mes augwan dag misenohob. Dara indan logodeh gin, kaba, len lecinaga dag ban besa dan aud len dag misen touohob. Anai ban, kaba, ban bedag beim an augwan namcir. 26 Dara dan demarges dau sug dan dens dau areg geb se banin abdoc mes augwan dou len gini touwero. Doba dan deicara daimo dangga dou len terimda bouwedoc gin toua. Dauntoba len merdoc gororougwim, aninim dag ban abdoc gororougb dan touohob. Dara emen emdoc toua dag hom namcir.

18:1 Sug Yesus ocuncum dangga dou en Mena dauwohob, kaba, en ouwadan men logodeh dau tu ingga aud lo medam hom geb dig duhu Kidron mebera nagama. Sug len ledebeijohob, kaba, len leinesa toua. 2 Doba sud hom gohw Yesus se leng Yahudi meren mougtir merisirohob, en moho Yudas, kaba, en ecinaga lo gin debohob. Anai sug nosa, kaba, Yesus dara men logodeh len loucimdeb debinbin sunggohob. 3 Dangga hang, en esan leng Roma meren sadodor merug aibibra aud lo ingga. Dara gembala gesa taij meren mougtir dara leng Parisi len toua lohw merug aibibra dau leng lesedougwo Allah Men Tuari naugb laicira len toua. Sug len leihweda, kaba, ligbum len lodo meren pelita. Dara ligbum, kaba, len lei hiraga. Dara len lodo meren kebtemaga dara krawan edeinyum len laugwan toua. 4 Doba Yesus en ecinaga areg acgunog debin en gini augwan sug nosa debohob. Dangga sug len laugwan ledagunya debin en an men logodeh se lo gragohob, kaba, Yesus enin eisa dau men logodeh aud len. Hanoba en eijidougwo len, endagai: Yen yehilon garena? 5 Doba len launi en mer, lendagai: Emen emehilon sud hom, moho Yesus dau cinogo Nasared. Dangga Yesus ens enin ainyes. Hanoba en enara dou len, endagai: Dan indugwenggini. Dara Yudas gohw en gini, kaba, en toua moongga desij lengga. 6 Sug Yesus ens enin ainyes dag gin dou lenohob, kaba, len laugwan laisacij. Hanoba len leijeboho dig meridigo debinim se cinogo gabeda namcir. 7 Dangga Yesus eijidougwo len ucugb deit, endagai: Yen yehilon garena? Doba len launi ucugb dou en, lendagai: Emen emehilon sud hom moho Yesus dau cinogo Nasared. 8 Hang Yesus enara dou len dougwo, endagai: Sug yen yehilon danin dous, kaba, yen yamsoho indan logodeh gini. Dauntoba len laugwan leihwededauwahabi, anai dan dens dan indug ainyes dou yenohob. 9 Yesus enara dag gin dougwo men logodeh, dauntoba esogwa deisa enin mogtimei mohw an areg en ocuncum dou en Mena naugb len sug nosohob, endagai: Akeinya, indan logodeh gedig ban bogugwo dou danohob, kaba, sud hom ingma dau len en emobsara dau dan insira mes touwero. 10 Doba Simon Petrus en eigdesa men krawan dau meihw naugb en ogod Gembala Gesa Taij Meren Mougt Mera Medam men sogougb, moho Malkus, en moms dig mesira misen edug dau en namcir. Anai men krawan inggeb se meihw isisga. 11 Doba Yesus en dougwo Petrus, endagai: Ban bes aban krawan se meihw ucugb. Ban bauwam endag dan demeg areg gedougdaha geb se mog gin touweroei? Naro, areg dan Indina en esedeb naugb danohob, kaba, dan deg toua. 12 Sug Yesus enara dag gin inegohob, kaba, leng Roma meren sadodor, dara meren mougt, dara leng Yahudi gedig len lesedougwo Allah Men Tuari len laugwan lagaigeij Yesus. Hanoba len lahud en mesira hwas darem namcir. 13 Sug lan lahud enohob, kaba, len lahwan en dou Kayapas maba, Hanas, se men tu nosahabi. Anai sug nosa, kaba, en edag Gembala Gesa Taij Meren Mougt Mera Medam naugb lenohob. Doba se arisogomoc ingga, kaba, en maba Kayapas en edag mougt mera medam naugb gembala gesa taij len laugwan deit. 14 Sud hom Kayapas gin, kaba, en eng esulou leng Yahudi meren mougtir laugwan sug nosa touohob, endagai: Eigouhw naugb sud hom en omom dous. Dau gedag maman lusud laugwan lemomom, isnaro. 15 Sug leng sadodor lahwan Yesus aud Hanas se men tu gin, kaba, Petrus dara sud hom gus dau Yesus men logodeh lan toua laucan len. Doba Yesus men godeh hom gin, kaba, eni Hanas mesi misen toua. Hang en emeinesa Hanas men tu oucan Yesus gin toua. 16 Doba Petrus, kaba, en esa se misis moc dig medigo deb. Sug Yesus men godeh hom graga en eiya dag gini, kaba, en ecicugb naugb en edenara dou gida hom gesedougwo misis ingga. Sug en enara dou en dauwohob, kaba, en ahwan Petrus dig uro meseda. 17 Sug lan lainesa uro mesohob, kaba, gida gesedougwo misis maga en enara bauwi Petrus, endagai: Ban eng giag baimo sud hom gada touohob. Doba Petrus enara bauwun en mer, endagai: Dan, isnaro. 18 Sug Petrus aideido dou en dauwohob, kaba, en eihweda naugb en edesa desij Hanas men sogougwir dara leng lesedougwo en men tu se smougb mebera naugb smougb esij en toua. Anai igda goho dugurij, hang len lemouci sisguraha debinim naugb lec se smougb debohob. Hanoba len lesa acec, dauntoba smougb esij len laugwan toua. 19 Sug len lahwan Yesus deseino Hanasohob, kaba, Hanas enara dou en, endagai: Ban bens dau aban logodeh dara areg ban besai dou lusud augwan asesa dou danahabi. 20 Doba Yesus enara bauni en mer ucugb, endagai: Sug dan desai Allah moro dou lusud sug nosa, kaba, dan demecgoneh dan indug aingma dau lenero. Doba dan desai augwan se meren tuari dara Allah Men Tuari dou len laugwan loumanohob. Anai se tuari gin, kaba, leng Yahudi len loucimdeb astesda lona terimda. 21 Dangga ban bemeijidougwo danlo. Doba ban beijidougwo leng louman dan indir anohob dous. Anai len lecinaga areg dan desai dou len augwan dag misen namcirohob. 22 Sug Yesus auni dag graga dou Hanasohob, kaba, sud hom dau leng lesedougwo Hanas en men tu ingga, kaba, en oto Yesus namcir. Hanoba en enara debin en, endagai: Dagiro, naugwe hang, ban beic abus naugb ban bauni Gembala Gesa Taij Meren Mougt Mera Medam en mer dag gina? 23 Doba Yesus auni dou en, endagai: Dan denara didi, kaba, ban bens augwan gini asesa dou leng se dimei mes gin len laugwan toua. Dauntoba len toua lecinaga dag misen namcir. Dobnaro, kaba, dagiro, naugwe hang, ban bogod dan gina? 24 Sug Yesus auni dag gin dou sud hom graga ginohob, kaba, Hanas arougb leng sadodor naugb len lahwan Yesus aud Gembala Gesa Taij Meren Mougt Mera Medam, en moho Kayapas, se men tu deit. Doba aumaga, kaba, eb se Yesus mesira terimdaba. 25 Doba Petrus, kaba, eni moongga desij len se smougb meberaba. Dangga leng lesa desij en se smougb mebera ingga, kaba, len lenara lauwi en deit, lendagai: Ban eng baimo sud hom graga en touohob. Doba Petrus aideido dougwo dou len namcir, endagai: Dan, isnaro. 26 Sug len lemenara merir emedug anbuma, kaba, sogougb hom dau Gembala Gesa Taij Meren Mougt Mera Medam en toua enara baised Petrus deit, endagai: Dan deiya dag ban toua abugwengga desij sud hom graga se lo gaihohoba. Sud hom gin, kaba, mesi eng Petrus en ogod moms edug dau gragohob. 27 Doba Petrus en aideido dougwo deit namcir, endagai: Dan, isnaro. Sug en aideido dougwo dag gin inegohob, kaba, berougwu eba mer bagod en mer an toua. 28 Sug lona esgohob, kaba, leng Roma meren sadodor lahwan Yesus dau Kayapas men tu ingga aud leng Roma meren mougt mera, moho Pilatus, se men tu deit. Dangga sug len ledebeij Pilatus men tu magohob, kaba, leng sadodor mogud dous eng lahwan Yesus aud Pilatus se men dimeiyeda. Doba leng Yahudi dara meren mougtir, kaba, len laugwan lesa dig medigo dous. Anai lona naugb sug len lougwanara debin meren Lona Gohw Bedreg gin, kaba, ebeij deinyor namcirohob. Dangga hang, len lemouwan naugb lugmahara meren tu gin, kaba, emeic gogor dou lenlo. Doba len lecabeci deseino Allah, dauntoba edeinyum naugb sug len let ared se Lona ingga toua. 29 Dangga, kaba, Pilatus en en dau men dimei mes. Hanoba en eijidougwo len, endagai: Sud hom gini men geicara gecgu dagiro, hang yen yemahwan en aud dan gina? 30 Doba len launi dou en ucugb, lendagai: Ban boudesa endag sud hom ingga men geicara gecgu ingmaro, hang ban bemeijidougwo emen ucugb dag ginei? Naro. Sud hom ingga, kaba, en edreg emen gaben namcirohob. Hang emen emahwan en dou ban toua. Naro, kab, naro. 31 Dangga Pilatus asid dou len, endagai: Sug en edreg dau meijen gaben dag ginohob, kaba, yen yeihwedan en dau sugindahabi, yenin yemdogod gogom debin en yaimo dau meijen gomnomna an en dous. Doba leng Yahudi meren mougtir, kaba, len lenara dougwo en mer, lendagai: Emen emogod aremer gomom debin emen lusud deitero. Anai yeng Roma, kaba, yen yen dougwo emen an ginohob. 32 Doba aremer augwan gini acgunog, dauntoba esogwa deisa areg Yesus enara dou men logodeh sug nosohob. Anai en ens dou len dag leng Yahudi lemeic gomom dou enero. Doba dag leng Roma eng letob en se sogo salib dous, aimo dau meren gaben an en dangga. 33 Sug Pilatus ouman leng Yahudi merir an dag graga, kaba, en einesa men dimei ucugb. Hanoba en arougb men sadodor naugb len ledahwan Yesus aud eni. Sug len lahwan Yesus aud enohob, kaba, en eijidougwo Yesus, endagai: Ban eng bedag mougt mera medam naugb leng Yahudiei? 34 Doba Yesus eijidougwo en ucugb, endagai: Len gus len dangga dou ban, hang ban bemeijidougwo dan dag ginei? Era ban beic dau banin abdoc mes dousei? 35 Doba Pilatus enara bauwun Yesus mer an gini, endagai: Ban bauwam endag dan dau yeng Yahudi, hang ban bemeijidougwo dan an dag ginei? Naro. Banin aban lusud dara meijen gembala gesa taij meren mougtir len eng lemoho lemas ban dou dan gini. Areg len len dou dan gini, kaba, dag misenei? Era naroei? Ban bens augwan asesa dou danahabi. 36 Doba Yesus enara bauni en mer ucugb, endagai: Dan demedag mougt mera aninim dag mougt mera se cinogo ginero. Anai sug dan dedag mougt mera aninim dag len se cinogo gin, kaba, indan logodeh lemamsoho dan debero. Doba len lebehnehino dougwo dan terimda. Dauntoba len gus lemohw dan se leng Yahudi meren mougtir merisira touwero. Doba dan dedag mougt mera gedig susugb dau mougtir se cinogo gin namcir. Dangga hang, indan logodeh ingma, kaba, len lemebehnehino dougwo danero. Doba len lamsoho dan dou len gus naugb len lohw danohob. 37 Sug Pilatus ouman dau gin, kaba, en auni Yesus mer ucugb dou en, endagai: Ban benara dag gin, kaba, ban toua bedag mougt mera medamohoba? Era dagiro? Doba Yesus auni en mer ucugb dou en, endagai: Ban eng benara dangga. Dan, kaba, ga, naro, anai dan douwaden dau bogo. Hanoba dan indim ouwadan dan se cinogo gini naugb sug dan desai areg se geica dou lusud dous. Gareg en aimo ucina se geica gin, kaba, en ouman dan indir an areg dan desai dou en touohob. 38 Doba Pilatus, kaba, en esbesan Yesus naugb en eijidougwo en ucugb, endagai: Geica, kaba, gini dag ara? Sug Pilatus eijidougwo Yesus dag graga dauwohob, kaba, en eihwedig medigo naugb en edenara dou leng Yahudi deit, endagai: Dagiro, naugwe hang, dan dogod aremer gomom naugb sud hom gina? Anai dan dehilon en medoc mes an ginohob, doba men aremer gecgu hom naugb sug maman maic gomom dou en touwero gina? 39 Doba astesda se meijen Lona Gohw Bedreg gin, kaba, dan daimo yen meijir naugb dan desga sud hom dau tu gesisug dou yen ucugb. Dangga hang, yen youwan dan darges meijen mougt mera medam gin ucugb dou yenei? Era naroei? 40 Doba len laugwan lesa merir aninim, lendagai: Sud hom gin, isnaro. Doba ban besga Abbas meisi dou emen dous. (Len lenara dangga dou en, anai Abbas meisi gin, kaba, en mog mog namcir naugb sug en ouwan ocirma leng Roma dau meren hancob touohob.)

19:1 Sug leng Yahudi lesa merir aninim danggohob, kaba, Pilatus en einesa men dimei ucugb. Hanoba en arougb men sadodor, endagai: Yen yohugouhw Yesus gini naugb yen yedogod enda. 2 Dangga sug Pilatus men sadodor lohugouhw endohob, kaba, len lecgun lisug maga an mog. Hanoba len leg se en mougt, dara len leg sansun gagas geirir hom se en toua. 3 Sug len leicara dag gin dou en dauwohob, kaba, len legregim naugb leic en lacecim, lendagai: Ban abireseb huhugb naugb ban besedougwo leng Yahudi dag meren mougt mera medam terimda. Len lenara dag gin ineg, kaba, aisa len merisira naugb len loto en toua. 4 Sug len logod en dauwohob, kaba, Pilatus en eihwedig medigo naugb en edenara dou leng Yahudi deit, endagai: Yen yaugwan yeiya sug indan sadodor lahwan sud hom gin aud yenahabi. Dauntoba sug yen yeiya en, kaba, yen yecinaga dag dan dehilon en. Doba men aremer gecgu hom ingma naugb sug maic gomom dou en touwero. 5 Dangga sug men sadodor lahwan Yesus an lisug mog dara sansun geirir ainyes deseino leng Yahudiohob, kaba, Pilatus ens Yesus dou len. Hanoba en enara ceg ceg en dou len, endagai: Yen yeiya sud hom graga inggini. Dan demeic gomom dou en augwougb dagiro? 6 Doba sug gembala gesa taij meren mougtir, dara leng lesedougwo Allah Men Tuari len leiya Yesus se len meriresi dangga, kaba, len lesa merir medam an dou Pilatus, lendagai: Ban barougb aban sadodor naugb len letob en dara sogo salib namcir. Doba Pilatus enara bauni len merir ucugb, endagai: Yen youwan dangga, kaba, yenin yedahwan en naugb yen yetob en se sogo salib dous. Anai dan dehilon en, doba men aremer hom naugb sug maic gomom dou en touwero. 7 Doba leng Yahudi len lenara launi ucugb dou Pilatus, lendagai: Emenin emen gomnomna ogod aremer gomom naugb en debohob. Anai en eigdoumesa enin moho dag Allah Meisi mohora hom deseino emenohob. 8 Sug Pilatus ouman len merir an gin, kaba, en medoc ogom edreg deit naugb sug en ogod aremer gomom deinaugb Yesus gini. 9 Dangga sug en einesa men dimei ucan Yesusohob, kaba, en eijidougwo en deit, endagai: Ban daugiro? Doba Yesus en emauni ara ara hom dou enero. Doba en eigtou dag lodinanir namcir. 10 Sug Pilatus eiya, doba Yesus emauni dou enero, kaba, en enara dou en, endagai: Indan goubesa inggebga naugb dan darges ban ucugb. Dara dan detob ban dara sogo salib toua. Dangga dagiro, naugwe hang, ban bemens aremeijouhw asesa dou dan touwero? 11 Doba Yesus enara bauni dou en ucugb, endagai: Goubesa augwan gin, kaba, emen dau baninero. Doba dau sug Allah eic dou ban, hang ban bemetob dan toua. Anai sug Allah emeic goubesa dou banero, kaba, aban goubesa ingmemeb naugb dan touwero. Dangga gareg en ohw dan augwougb se ban absira, kaba, men sesar medam edreg dau ban toua namcir. 12 Sug Pilatus ouman Yesus mer an gini, kaba, en ahau medam. Dangga en ehilon ucina naugb en arges Yesus toua. Doba leng Yahudi lesa merir medam aninim deit, lendagai: Gareg en eigdoumesa enin moho dag mougt mera medam, kaba, en emeigdoumesa mougt mera medam dau yeng Roma en moho deitero. Doba en eicara bauwun en moho namcirohob. Dangga hang, sug ban barges sud hom gin, kaba, aban mougt mera medam gini en emeija ban dag en mesi toua deitero. Doba ban bedag men mocohob. Anai sud hom gin, kaba, en eigdoumesa enin moho dag mougt mera medam touohob. 13 Sug Pilatus ouman len merir an gin, kaba, en arougb men sadodor naugb len lahwan Yesus dig medigo aud men maija moc gowunaresa geb se usi moho Igdahab Geihwidua. (Era se lec Ibrani mer, kaba, Gabata.) Sug len ledebeij se maija mocohob, kaba, Pilatus en eigtousa naugb en ogod aremer naugb Yesus toua. 14 Doba sug Pilatus ogod aremer ingga, kaba, ebeij igdabogohob. Dara leng Yahudi meren Lona Gohw Bedreg toua ebeij deinyorohob. Dangga hang, Pilatus en ens Yesus dou leng Yahudi mougwa hom ucan deit, endagai: Meijen Adehsud, ingginbo. 15 Doba len lenara dara merir medam, lendagai: Naro, ban betob en dara sogo salib bomom namcir. Dangga Pilatus eijidougwo len ucugb deit, endagai: Yen youwan naugb dan deic gomom dou meijen Adehsud namcirdei? Doba gembala gesa taij meren mougtir len launi en mer ucugb, lendagai: Sud hom gin, isnaro. Doba emen emeigdoumesa yeng Roma meijen mougt mera medam hom dous eng edag mougt mera medam naugb emen gini. 16 Sug Pilatus ouman len merir dangga, kaba, en arges Yesus deb se men sadodor merisira naugb len letob en se sogo salib. Sug en arges en deb se len merisirohob, kaba, len lahwan en naugb ledetob en se sogo salib toua namcir. 17 Dangga sug len lagunya dau Yerusalemohob, kaba, len lahwan en aud mengarougb hom, moho Mougt Mera Mer. (Era se lec Ibrani mer, kaba, dag Golgoda.) Dara len larougb en naugb en odo men sogo salib teitei dara en aud us ingga toua. 18 Sug len ledebeij mengarougb inggohob, kaba, len letob en dara sogo salib namcir. Dara len letob lahwai desij en toua. Laingma, kaba, dig en mesira misen, doba laingma, kaba, dig en mesira metigi. Hanoba Yesus enin se meraufu. 19 Sug len letob Yesus dara sogo salibohob, kaba, Pilatus arougb men lusud, endagai: Yen yog se surad, yendagai: Sud hom gin, kaba, eni Yesus dau cinogo Nasared. En edag leng Yahudi meren mougt mera medam. Sug len log augwan se suradohob, kaba, en arougb len, endagai: Yen yetob surad an moho gini dara sogo salib dig en mougt toua. 20 Dara en arougb men lusud naugb len lemog surad an moho gini se lec Ibrani mer dousero. Doba len log se Latin mer, dara Grika mer toua. Dangga lusud leinyana lecic dau surad an moho gin. Anai us mougb gedig len letob Yesus se sogo salib se gin, kaba, emeb aigus dau Yerusalemero, doba deinyorto namcir. 21 Doba gembala gesa taij meren mougtir len len dougwo Pilatus, lendagai: Ban bemog en edag emeng Yahudi emen mougt mera medam se surad dangga, isnaro. Doba ban bog endag, enin eigdoumesa enin moho dag emen mougt mera medam dous. 22 Doba Pilatus en ohoiya len merir. Hanoba en enara dou len, endagai: Areg dan dogohob, kaba, ebsugeb namcir. 23 Sug len letob Yesus dara sogo salib dauwohob, kaba, len leg men sansun augwan dau en namcir. Hanoba len lekeba dag hogu icira daum toua. Hang astesda dau len, kaba, sud hom en oho hom dous. Dara len leg sansun gagas geb aimei dau en toua. Doba sansun hom gin, kaba, len lemogon mohw emebsero. Doba len lesinsin dag hom namcir dous. 24 Dangga sug leng sadodor len leiya, doba sansun gin mohw emebsero, kaba, len lenara doum, lendagai: Maman mamaga anim, isnaro. Doba maman marba nomor maic dous. Dauntoba gareg nomor ens en, kaba, enin gang en emoho dous. Len leicara dag gini, dauntoba esogwa deisa areg Daud en erba Ugwaremer an gin deb sug nosa touohob, endagai: Indan sansun augwan, kaba, len lekeba doumohob. Doba indan sansun geb aimei, kaba, len lemekeba doumero. Doba len lerba nomor laic dous. 25 Doba Yesus mem, dara mem medamouwa, dara Mariam, Klopas mesouwa, dara Mariam dau cinogo Magdala, kaba, len laugwan lesa deinyor sogo salib meiyo an Yesus toua. 26 Dangga sug Yesus eiya, doba en men dara godeh hom gedig en medoc gororougb en lan lasa deinyor sogo salib meiyo an en, kaba, en esulou mem, endagai: Daneh, dan decug indan godeh hom gini dag ban abisi naugb en esedougwo ban deit. 27 Gin ouwohob, kaba, en esulou men godeh hom gin toua deit, endagai: Dan decug Daneh gini se ban absira naugb ban besedougwo en dag ban abim toua. Dangga dau lona ingga, kaba, men godeh hom gini en ahwan Yesus mem se men tu toua namcir. 28 Sug Yesus esulou mem dara men godeh hom lahwas dauwohob, kaba, en eiyagarij lusud, endagai: Merijeba dani. En eicara dag gini, anai en ecinaga dau sug en eicara dag gin, kaba, en aimo areg Allah ens deb naugb en augwan bouwedoc namcirohob. 29 Dangga sug len louman Yesus eiyagarij len dag gin, kaba, len leic augb keita geb se dum mohu naugb len logun se anggur mohu gedougdaha geb se igdebir sungga. Sug len logun sehob, kaba, len leihwi se aremerij w hisob maga. Hanoba len lemoutan dou Yesus naugb en outut toua. 30 Sug en oututohob, kaba, en enara, endagai: Augwan ouwedocohob. Sug en enara dag gini inegohob, kaba, en mergo obsara. Hanoba en esa mena deisa Mena mesira naugb en omom namcir. 31 Doba sug Yesus esa mena bomom gin, kaba, leng Yahudi meren Lona Gemeicaresero toua ebeij deinyorohob. Dara se Lona Gemeicaresero gini, kaba, len merna eiseisan Lona Gohw Bedreg naugb len lougwanara debin toua. Dangga sug lona hwas gini adedim dag ginohob, kaba, leng Yahudi leigdoumesa Lona Gemeicaresero gini agas edreg dau Lona Gemeicaresero gus augwan namcir. Hang leng Yahudi meren mougtir leihwedaud Pilatus. Anai len lemouwan naugb merdesa emeb se sogo salib se lona gouji ginero. Sug len ledebeij enohob, kaba, len ledenara dou en, lendagai: Ban barougb aban sadodor naugb len ledeised leng leb se sogo salib ingga len merohobaga bedug namcir, dauntoba len lomom dedemeda. Hanoba ban barougb len naugb len leic merdesa dau sogo salib naugb ledec toua. 32 Dangga sug leng sadodor leihwedaud usi ginohob, kaba, len ledeised sud hom dau lahwai gedig len letob lan desij Yesus graga en mohobaga bous nosahabi. Dauwohob, kaba, len ledeised en mesi homa mohobaga toua ucan. 33 Doba sug len ledebeij Yesusohob, kaba, len leiya en, doba en omomohob. Dangga hang, len lemeised en mohobaga touwero. 34 Doba sud hom dau len, kaba, en eic kebtemaga bedesugb Yesus se mocbo meniha. Sug en edesugb inegohob, kaba, mogwihi dara mohu ohw dau Yesus en mocbo meniha gin toua. 35-37 Aremer augwan gini esogwa deisa areg len log deb se Surad Injil Meb Mohon eisaugb Yesus deb sug nosa touohob, lendagai: Len lemeised en mori hom emousero. Dara len log ingma deit, lendagai: Sug len ledesugb en, kaba, lusud lesa lauweila en toua. (Aremer gin, kaba, sud hom en eiya augwan se en mairesohob. Dangga hang, en emesai gin augwan asesa dou yen toua. Dauntoba yen meigdoc ebdebin an areg en esai dou yen gini dag misen namcir. Anai sug en eiya augwan asesa gragohob, kaba, en ecinaga dag areg en esai dou yen gin, kaba, augwan toua se geica namcirohob.) 38 Sug Yesus omomohob, kaba, Yusub, dau cinogo Arimatea, en eihwedaud Pilatus naugb en edacgeij en an Yesus maga. Dangga sug en edebeij Pilatusohob, kaba, en acgeij en, endagai: Ban bouwan, kaba, dan dideic Yesus maga dau sogo salib naugb dan didecda. En eicara dag gini, anai en toua dag Yesus men logodehohob. Doba en ahau dau leng Yahudi meren mougtir. Hang en emens enin ainyes an gin dou len touwero. Doba en ecgoneh mog dau len namcir. Dangga sug Pilatus ousan dou enohob, kaba, en eihweda naugb en edec Yesus maga dau sogo salib toua. 39 Doba sug en eihwedaud sogo salib gin, kaba, sud hom, moho Nikodemus, en aimo en. Hanoba en arougb men sogougwir naugb len lodo aremoung mohu dau w mur dara w gaharu ucan lan toua. Dara aremoung mohu gin, kaba, men gogom augwan edebeij kilo mos homoiyohob. Nikodemus gin, kaba, eni sud hom gedig en edebeij Yesus se loba sug nosohob. 40 Sug lan ladebeij sogo salib meiyohob, kaba, lan laic Yesus maga dau toua. Hanoba lan laic minc lagacgec en maga. Dauwohob, kaba, lan lair aremoung mohu graga debin en maga ucan deit. Anai augwan gini aimo dau leng Yahudi meren gaben sug len lec aremogougb danggohob. 41 Doba deinyor sug len letob Yesus se sogo salib gini, kaba, lo hom toua moongga. Dara se lo gin, kaba, igdohos mes hom gedig lusud lemec aremogougb mougwa hom sebuma toua moongga. 42 Dangga sug Yusub dara Nikodemus lan laiya, doba igdohos mes gin deinyor, kaba, lan lado Yesus maga naugb ladec sungga toua. Anai leng Yahudi meren Lona Gemeicaresero ebeij deinyor namcirohob.

20:1 Doba edebeij Ari sug lona esgesgaba, kaba, Mariam dau cinogo Magdala en eisa lonamenmen naugb edogod dougwo igdohos mes an Yesus. Anai Lona Gemeicaresero ouwa dauwohob. Sug en edebeij aremogougb modohob, kaba, en eiya, doba len leila igdohos meh dauwohob. 2 Sug en eiya dau ginohob, kaba, en obga ucugb aud Simon Petrus, dara Yesus men godeh hom gedig en medoc gororougb en toua. Sug en edebeij lanohob, kaba, en en dou lan, endagai: Lusud leic maman Adehsud en maga dau igdohos mesdohob. Doba emen ememecinaga len ledob en deb sugiro deitohoba? 3 Sug lan toua lauman gin, kaba, lan labursa Mariam medigo naugb ladogod dougwo igdohos mes deit. 4 Dangga sug lan laobga, kaba, Yesus men godeh hom gedig en medoc gororougb en, kaba, en obga eino Petrus men. Hanoba en en edebeij igdohos mes nosa. 5 Sug godeh hom gini en edebeij igdohos mesohob, kaba, en emeinesa namcirdero. Doba en ou mergo bogug dous. Dangga en emeiya ara ingma emeb se igdohos mes touwero. Doba en eiya minc gedig len lagacgec Yesus maga inggeb se igdohos mes deb dous. 6 Doba sug Simon Petrus en toua edagunyohob, kaba, en emesa ucucugb se medigoro. Doba en eic mos namcir se igdohos meseda. Dangga en toua emeiya ara ingma emeb se igdohos mes touwero. Doba en eiya minc mogud inggeb dous. 7 Dara en eiya minc gedig len lahud dougwo Yesus mougt, kaba, emeb debin minc gedig len lagacgec en magero. Doba ebtoumou beb se mohw dangga. 8 Sug Yesus men logodeh gobgeino graga en eiya, doba Petrus einesa igdohos mes namcirohob, kaba, en eic mos naugb en einesa ucan en toua. Dangga en toua eiya minc dougwo mougt emebdebin se minc dougwo maga ginero, doba ebtoumou beb se mohw dangga dous. Hanoba en medoc ebdebin an dag Yesus eisa dau gomom dag misenohob. 9 (Dara sug Yesus eisa dau gomom ucugb dag gin, kaba, aimo dau aregAllah en ogod deb deinaugb en sug nosa. Hang lusud len log deb dau gini se Surad Injil Meb Mohon deb sug nosa touohob. Doba areg len log deb gin, kaba, Yesus men logodeh lahwai graga lan mardoc emobgesa meijouhw se lona ingga asesa touebma.) 10 Dangga hang, sug Petrus dara godeh hom gini lan laiya augwanohob, kaba, lan lacicugb dig maran tu ucugb deitda. 11 Doba Mariam, kaba, en esa beb dougwo igdohos moc deb. Sug en eb gin, kaba, en ou mergo bogug dougwo igdohos mes toua. 12 Dangga en eiya, doba malaikad lahwai eng laigtou se boromei gedig len lob Yesus maga deb se graga deb gini. Laingma, kaba, lahig dig mougt. Laingma, kaba, lahig dig mohora. Lang gin lahwai, kaba, lan lag sansun gogoufu namcir. 13 Dangga lan laijidougwo en, landagai: Daneh, ban beb an garena? Doba Mariam en auni dou lan, endagai: Dan deb an indan Adehsud. Anai len leiyoho en maga dau sugindohob. Hang dan demecinaga sug len ledob en deb touwero. 14 Sug en enara dag gin dou lanohob, kaba, en eineg dig medigo. Hanoba en eiya sud hom gesa dig en medigo. Doba en emecinaga dag en ingga Yesusero. 15 Dangga Yesus eijidougwo en, endagai: Daneh, ban behilon garena, hang ban bemeb an en gina? Doba Mariam en oudesa Yesus en edag sud hom gesedougwo lo ingga dous. Hang en emeijidougwo en ucugb, endagai: Adehsud, sug ban beic en maga dau sugindohob, kaba, ban bedens sug ban bedobdeb dou danahabi. Dauntoba dan dedeic en naugb dobdeb en se mohw gin ucugb deit. 16 Doba Yesus eija en moho, endagai: Mariam. Sug Mariam ouman Yesus mer asesohob, kaba, en eineg namcir beija Yesus moho se lec Ibrani mer, endagai: w Raboni. (Meijouhw gini dag indan Guru.) 17 Doba Yesus en dougwo en, endagai: Ban bemos danlobma. Anai dan demedebeij dan Indinabuma. Dangga ban becicugb aud dan indaguner dara dan indamouwer yen yaugwanahabi. Hanoba ban ben dou len dag iteitogin, kaba, dan deihwedaud maman Mamina ucugb. Anai eni dan Indina dousero, doba yen toua Meijina. Dara ban ben dou len dag dan decicugb aud maman Allah. Anai en emedag indan Allah dousero, doba yen toua meijen Allah. 18 Sug Mariam dau cinogo Magdala en ouman dag ginohob, kaba, en ecicugb aud Yesus men logodeh. Hanoba en enara dou len, endagai: Dan deiya maman Adehsud en eisa ucugb dau gomomohob. Sug en en dou len danggohob, kaba, en ecic dau areg Yesus en en dou enohob graga augwan asesa ucan dou len deit. 19 Dangga edebeij se Ari loba, kaba, Yesus men logodeh len laugwan merugwengga se tu hom. Hang len louf misis augwan dougwo len namcir. Anai len lahau dau meren mougtir dau leng Yahudi sug len leic gogom dou len toua. Doba sug len leigtou dag gin, kaba, Yesus agunya debin len se dimei mes ingga. Hanoba en ou len, endagai: Allah eic geigouhw dou yen dougwo areg gecgu augwan terimda. 20 Sug en ou len dauwohob, kaba, en ens mosutimei mes dara mocbo meniha mes dou len toua. Dangga hang, men logodeh merdoc agahugouhw namcir. Anai len leiya, doba meren Adehsud en eisa dau gomom ucugwohob. 21 Doba Yesus enara dou len deit, endagai: Allah eic geigouhw dou yen dougwo areg gecgu augwan namcir. Sug en acgeij Allah naugb en eic geigouhw dou len dag ginohob, kaba, en esulou len, endagai: Dan darougb yen naugb yen yesai dan induro dou lusud se cinogo augwan. Aninim dag dan Indina esa dan naugb dan desai en moro dou yen touohob. 22-23 Dangga gareg dau len en esga men sesar dou yen, hanoba yen toua meigdoc esgirahesa naugb yen yogod an namcir, kaba, Allah toua aigdougwohob. Doba sug yen meigdoc emesgirahesa sesar ingga naugb yemogodero, kaba, Allah toua emaigdougworo, doba eb naugb en terimda. Sug Yesus esulou len dauwohob, kaba, en esa mena se len. Hanoba en enara dou len deb, endagai: Dan desa Mena Gogoufu se yen meigdoc mes. 24 Doba sug Yesus ens enin ainyes dou men logodeh aimougtut se loba gin, kaba, sud hom dau Yesus men logodeh sisa hobjerai, en moho Tomas, kaba, en mogero. Lusud leija en moho toua dag lang marogoc agacgecim toua. 25 Dangga Yesus men logodeh gus len len dou en, lendagai: Emen emeiya maman Adehsud eisa dau gomom ucugwohob. Doba Tomas esbes len merir, endagai: Sug dan demeiya paku mohw icira en mesira, dara dan demob dan insira mob se en mesira mes dara mocbo meniha mesahabi, kaba, dan indoc emebdebin anero. Doba sug dan deiya augwan gini se dan indiresohob, kaba, dan indoc ebdebin an en dag en eisa dau gomom ucugb dag misenohob. 26 Ari hom debin gin, kaba, Yesus men logodeh len laugwan merugwengga se dimei mes hom gin deit. Dara Tomas en toua moongga desij len. Dara len louf misis augwan dougwo leng Yahudi namcir touohob. Doba Yesus agunya debin len augwougb se dimei mes ingga deit. Hanoba en ou len, endagai: Allah eic gesgigouhwesa dou yen dougwo areg gecgu augwan namcir. 27 Sug en enara dou len dag gin dauwohob, kaba, en eija Tomas. Hanoba en enara dou en, endagai: Ban bin naugb ban beiya dan insira mes ingginahabi, ban bemou absira mob deisa. Hanoba ban bou ban absira bousousa dan inducba meniha mes gin toua. Dauntoba ban bemeija abuwesa dan deitero. Doba ban bod abina debsa dan namcir dag dan deisa dau domom ucugb dag misenohob. 28 Sug Tomas eiya gin, kaba, en argobin. Hanoba en enara, endagai: Indeic, ban, kaba, indan Adehsud dara indan Allah ingginohob. 29 Doba Yesus enara bauni en mer ucugb, endagai: Ban beiya gini, hang ban abdoc emebdebin an danohobei? Naro. Dangga gareg en emeiya dan se en maires mougwa hombuma, doba en medoc ebdebin an dan augwougb dous, kaba, Allah eic geigouhw medam dou en namcir. 30 Dara Yesus aben ganusbus einyana ingma dara abeba men logodeh meriresi. Doba dan demog augwan se indan surad ginero. 31 Doba ganusbus areg dan dens dou yen se indan surad ginohob, kaba, dan dog dauntoba yen yecinaga dag Yesus gini, kaba, en edag Allah Meisi misen. Dara en edag Sud Hom Geigdoc Yen Dau Sesar Men Gogom Augwan gin toua. Dara dan dog augwan gini se surad, dauntoba yen yecinaga dau sug yen meigdoc ebdebin an en, kaba, dag en emeic maireseb menau geb huhugb dou yen toues.

21:1 Lona aibibra debin sug Yesus ens enin ainyes dou men logodeh se dimei gragohob, kaba, en edens enin ainyes dou men logodeh se Tiberias mebera deit. Doba areg en ens enin ainyes an gin, kaba, men meijouhw dag gini. 2 Se lona hom, kaba, Simon Petrus, dara Tomas gedig lusud leija en toua dag lang marogoc agacgecim, dara Nataniel dau cinogo Kana se leng Galilea meren hancob, dara Sebedeus meisi lahwai, dara Yesus men logodeh lahwai gus, kaba, len laugwan ledeigtou se Tiberias mebera. 3 Sug len leigtou se Tiberias mebera dag gini, kaba, Simon Petrus enara dou mesir, endagai: Dan dederba diara debin hosei dangga. Doba mesir toua launi dou en, lendagai: Maman maugwanda. Dangga len laugwan leihweda ledeisa ij hom naugb lederba diara debin hosei toua. Doba se loba hom sug len lerba diara gini, kaba, len lemesma hosei homero namcir. 4 Sug lona esgohob, kaba, Yesus en toua edesa Tiberias meberohob. Doba len lemecinaga en touwero. 5 Dangga Yesus eijidougwo len, endagai: Indihirija, yen yeic hosei ingma naugb sug matohobei? Doba len launi dou en, lendagai: Emen ememesma hom touwero. 6 Sug Yesus ouman len merir an gin, kaba, en arougb len, endagai: Yen yerba diara debin hosei dig ij nagama aud yen meisira misen, kaba, yen yemaic hosei ingmes. Dangga sug len laimo en mer naugb lerba diara debin hoseiyohob, kaba, len lesma hosei einyana atij diara mes namcir. Hang emedeinyum naugb sug len leigdoumesan touwero. 7 Dangga Yesus men godeh hom gedig en medoc gororougb en namcir, kaba, en enara dou Petrus, endagai: Ban beiya maman Adehsud eng inggesa gac. Sug Petrus en ouman dag meren Adehsud inggedesa gac, kaba, en eg men sansun gouji dougwo en ucugb. Hanoba en esogwesa se duhu aud enda. Anai sug en erba diara debin hosei, kaba, en eg men sansun gouji dau enohob. 8 Doba mesir gus, kaba, len leisa ing mes dangga. Hanoba len lohugouhw diara an hosei einyana dig lonogeda. Anai len lemdeba aigus dau lonogero, doba deinyor dag len lec merohora mougb huntun hom dous. 9 Sug len lesogwa dau ing mes se lonogohob, kaba, len leiya, doba hosei eb se smougb. Dara roti toua eb desij se smougb mebera deb gini toua. 10 Doba Yesus eijer, endagai: Yen yodo hosei gedig yen yerba diara debin menenau ingga ingmanahabi. 11 Sug Petrus ouman Yesus mer an gin, kaba, en toua aingma deisa ingmes. Hanoba len laugwan lesara diara an hosei dig lonogeda. Sug len lesara anim, kaba, len leiya, doba hosei medam mogud dag huntun hom mos sergem homoi edeisu atij diara mes namcir. Doba diara emobogougb an hosei einyana gin touwero. 12 Sug len lesara diara an hosei dig lonogohob, kaba, Yesus eija len, endagai: Yen yen naugb maman mat hosei dara roti ginahabi. Doba len lahau dau en. Hang sud hom dau len en emeic mos naugb emeijidougwo en ucugb touwero. Anai len laugwan lecinaga dag eni maman Adehsud misenohob. 13 Sug len laugwan lacinimohob, kaba, Yesus eic roti. Hanoba en ohw an len naugb len laugwan let. Dau, kaba, en eic hosei dou len toua deit. 14 Sug Yesus ens enin ainyes dou men logodeh se Tiberias mebera dag gin, kaba, gini dag mougwa homoi dau lona sug Allah eigdoumesa en dau gomom ucugwohob. 15 Sug len letara bouwa dauwohob, kaba, Yesus eijidougwo Simon Petrus, endagai: Simon, Yona meisi, ban abdoc gororougb dan edreg dau len laugwan ginei? Doba Simon enara bauni ucugb dou en, endagai: Adehsud, ban becinaga dag dan indu ehigehi banohob. Dangga Yesus en dou en deit, endagai: Sug ban abu ehigehi danohob, kaba, ban bagauwesa indan domba. 16 Sug Yesus enara dou Simon Petrus dauwohob, kaba, en eijidougwo en mougwa hom dara deit, endagai: Simon, Yona meisi, ban abdoc gororougb dan dag misen ingginei? Doba Petrus enara bauni ucugb dou en deit, endagai: Adehsud, ban becinaga dag dan indu ehigehi ban dag misenohob. Dangga Yesus en dou en deit, endagai: Ban abu ehigehi dan dag misenohob, kaba, ban bagauwesa indan domba toua. 17 Doba Yesus eijidougwo Petrus mougwa hom dara deit, endagai: Simon, Yona meisi, ban abdoc gororougb dan dag misen namcir ingginei? Dangga Petrus medoc momogo medam, anai Yesus enara barauwi en mougwa homoi icira an ginohob. Hang en enara bauni Yesus mer ucugb dou en, endagai: Adehsud, ban becinaga augwan dag misen namcir. Dangga hang, ban becinaga dag dan indu ehigehi ban dag misenohob. Sug Petrus auni dangga dou Yesusohob, kaba, Yesus arougb en, endagai: Ban bagauwesa indan domba dara geigouhw namcir. 18 Doba ban bouman dan indir gin deigeigouhw deitahabi. Anai sug ban bugdeh mesaba, kaba, len gus lemen dougwo banero. Doba ban bec asa abu naugb ban beihweda sungga sungga baimo dau areg banin bouwan dous. Doba sug ban bedag sud bodohob, kaba, ban bou ban absira hwas dou len gus naugb len lohud darem dous. Hanoba len lahwan ban aud usi gedig banin bemouwanero namcir toua. Areg dan den gini, kaba, dag misen namcir. 19 Doba areg Yesus enara dou Petrus gin, kaba, dauntoba en ecinaga meijouhw deb sug len gus lemeic gomom dagiro dou ena? Anai gini dag en aigdoumesa Allah moho namcir. Sug Yesus enara dangga dou Petrusohob, kaba, en enara mougwa hom dara dou en deit, endagai: Ban beicara baimo dan se indan ucina aud gomom ucan dan toua. 20-21 Sug Yesus ens ucina aud gomom dou Petrus dag gragohob, kaba, Petrus en eineg. Hanoba en eiya, doba godeh hom gedig Yesus medoc gororougb en namcir, kaba, en toua moongga se medigo. Dangga en eijidougwo Yesus, endagai: Adehsud, dagiro naugb godeh hom gina? En toua omomei? Era naroei? Petrus eijidougwo en dag gini, anai se loba sug len letara sug ouwedoc, kaba, godeh hom gin eng eigtou deinyor Yesus. Dara en eng toua eijidougwo maman Adehud se loba ingga dag gareg dau len en ohw en se len gus mesirohoba? 22 Doba Yesus enara bauni Petrus mer ucugb, endagai: Sug sud hom gini en mena agau terim bedebeij sug dan decicugwen, era en omom, kaba, gini aban aremer naugb ban binero. Doba gini ogdoc dan dous. Dangga ban abdoc momogo an ginero. Doba ban, kaba, ban beicara besogwa deisa aban ucina gedig dan dens dou banohob ucan dan dous. 23 Dangga mesir leigdoc loungmen an gini. Hanoba len ledecic dou mesir gus deit dag Yesus men godeh hom gin, kaba, en emomom deitero, doba en maireseb terimda. Dobnaro. Yesus emenara ingma dangga dou Petrusero. Doba en enara dou Petrus dag sud hom gini en omom, era en maireseb terimda edebeij Lona Sug Yesus En Edecicugb, kaba, gini Petrus men aremerero, doba ogdoc Yesus enin dous. 24 Gareg en ens dara en og augwan se surad gin, kaba, en toua dau Yesus men logodeh. Dangga emen emecinaga dag areg en ens dara en og gin, kaba, augwan se geica namcirohob. 25 Dara dan demog dau Yesus men geicara augwan se surad ginero. Anai sug dan dog dau men geicara astesda hom yom se surad gin, kaba, dan doudesa lusud meren hancob augwan emesa naugb gin touwero.