NA LII MÀNANGU PA-LAWITI-NA I YUHANI

Rukuna na Pulungu na madedi tolu

1:1 La kawunga-na ninya na Pulungu, tàka na Pulungu lai Alaya, dàngu Alaya na Pulungu. 2 La kawunga-na jiaya na maninya lai Ala. 3 Nyuna hi nadedi mbuu ndàbana; jàka nda Nyuna nda haua madedi na ngara madedi-ka. 4 Lai Nyunaya na luri, tàka na luri jiaya na hambila na ma-paharii-nya na tau. 5 Na hambila na-handaraku la kapàtangu, tàka na kapàtangu nda na-kataku-aya. 6 Ninya na tau, na pa-paràha-na i Ala, Yuhani-ya na tamuna. 7 Maina pa-hakahii la pa-hakahii-nya na hambila, ka peku pawaina mbuu ndàbana rukuna nyuna. 8 Nda jia-aya nyuna na hambila, tàka ka hakahii-nya na hambila wàna-a. 9 Na hambila lànga-tàka, na ma-paharii nimbihu-nya na tauka, mai-nanyaka la pinu tana. 10 Nimanya la pinu tana, rukuna Nyuna hi nadedi na pinu tana, tàka na pinu tana nda natanda-aya. 11 Maina la mangu wikina, tàka da manguna nda da-kataku-aya. 12 Tàka da tuda ma-kataku-ya, nawua-nja ngerada paana Ala, na da mawaiya na tamuna. 13 Nda ruku riaya, nda ruku pambuha toluya, nda ruku pambuha tau miniya, tàka rukuna i Alaya hi dadedi. 14 Na Pulungu natolu-ka hi na-ngiangu la padua-nda, hi mapanau-nya mangunju-na, jiangu-ma na mangunju pawua-nanya na Ana kamehangu paraïna i Ama, ba pa-namungu dàngu ba malànga-tàka ju-juaya. 15 Ka hakahii-du-nanyaka Nyuna paraïna i Yuhani ba nawara: Yiana jia-mayaka na papeka-nggu: Nàmu na ma-malamiri-ngga na-mangilu-nggapa, maa ba ni mangilu-manyaka welingu lai nyungga ba wànggu, wàna. 16 Maa ba welingu la ma-bundungu lai Nyunadu, hi tangala ndàbangu pa-namungu pandua pa-namungu. 17 Nadu na uku, i Muha na matanggu wuangu-ya, tàka na panamungu dàngu na malànga-tàka rukuna i Yehu Karitu hi ninja. 18 Ndedi ningu ndokua tau maita-ya i Ala; na Ana kamehangu na maninya la karaha-na i Ama, Nyuna na mambàda pekaya.

Na hakahiingu-na wikina i Yuhani

19 Yiana-ya na pa-hakahii-na i Yuhani, nu da tau Yahundi da maninja la Yeruhali, ba da-paràhangu ratu dàngu tau Lewi hawiangu paàra-nya: Nggamukau, wàminya ba wàdanja. 20 Ka peka-nanyaka, nda na-pahini-anya; na papeka-na: Nyungga nda jia-aka na Karitu, wàna. 21 Ka paàra-danyaka: Mala, ka nggàrakau dumu? Jiakau i Elia? hi wàdanya. Nanapa-ya nyuna: Ndia-a, wàna. Jiakau na wunangu? wàdanya: Ndia-a, wàna ba nahema-ha. 22 Hàla: Mala, ka nggaakau dumu ka peku hema-manja da ma-paràha-nggama. Nggikina wàmunya na ruku wikimu? hi wàdanya. 23 Nanapa-ya i Yuhani: Nyungga yia na warangu-na na ma-wara la maràda telangu: Patànji-ya na andana i Miri, na mawàna, hama tuna na patiki-na na wunangu Yahaya. 24 Ningumbui pa-paràha-na tau Parihi. 25 Nu ka paàra-danyaka: Ka ni, nggikinai dumu hiu parunungu, jàka nda Karitu-kau, jàka nda Elia-kau, jàka nda jiakau na wunangu? hi wàdanya. 26 Nanapa-ya i Yuhani: Nyungga waia pa-parunu wànggu, tàka ninya la padua-mi na panda tandami, 27 na ma-malamiri-ngga; jiapa la pa-wàkahu-nya liku halapa-ana nyungga yia nda ràka-mbuna, hi wàna. 28 Yiada la Mbaitani-ha la hapapa luku Yarandingu datumbu ningu, la ngia pakàli parunungu-na i Yuhani.

Na hakahii-nanya i Miri Yehu paraïna i Yuhani

29 Hadangu harii ita-nanyaka i Yehu ba namai lai nyuna: Tà-ngaru, na Ana mbimbina i Ala na madanda-nja da njala-na na pinu tana. 30 Jia-mayaka na papeka-nggu: La malamiri-nggu nàmunya na ma-mangilu-ngga,' maa ba ni mangilu-manyaka welingu lai nyungga. 31 Nyunggai duku nda kutanda-aya; tàka ka peku bowaya la tau Ihirailu, jiaya hi kiri mainggu pa-parunu wàngu wai, wàna. 32 Ka hakahii-nanyaka i Yuhani: Kuita-yaka na Ngahuna i Ala ba napuru welingu la awangu, ba hama tuna kulundiha-ya, hi na-ngiangu lai Nyuna. 33 Nyunggai duku nda kutanda-aya, tàka na ma-paràha-ngga pa-parunu wàngu wai, Nyuna na mambàda pekangga: Na paita-mu na ngia papuru ninguna i Ngahu hi na-ngiangu ningu, jia-yaka na ma-parunu wànya i Ngahu Matua, wànangga. 34 Kuita-yaka dàngu ku-hakahii-nyaka Nyuna ba Anana i Alaya wàna.

Na kawunga pindi-nanja da papanau-na i Miri Yehu

35 Hadangu harii hili ninyaka i Yuhani lai nu dàngu da madua da papanau-na. 36 Nu ba naita-yaka nàhunya i Yehu: Tàngaru, na Ana mbimbi-na i Ala! hi wàna. 37 Ka rongu-danyaka da madua da papanau-na ba napanii tuna nu, hi datundu-nya i Yehu. 38 Ka mbaili-nanyaka i Yehu; ba naita-haka ba datundu-nya: Nggàraya na pahimbu-mi? hi wànanja. Napaha nyuda: Rabbi, jàka bilunya: Ngguru bawànda, nggii ungiarigu ningu? hi wàdanya. 39 Tàka Nyuna: Mai nàmu kai itaya, hi wànanja. Nu ka lua-danyaka, hi daita-ya na ngia pa-ngiangu-na; ka ndàdiku-danyaka lai nyuna la lodu nuna. Nu ràkangu njàmu patuya la malingu. 40 I Andaria, na anguna paluhu i Himungu Peturu, jiaya na pa-madua wàda, da marongu-ya lai Yuhani dàngu da.matundu-nya i Yehu. 41 Nu i Andaria nahunggu mangilu-ya na angunapaluhu, i Himungu: Mahunggu-yaka i Mahia, jia-duyaka na Karitu ba wànda, hi wànanya. 42 Ka karia-nanyaka lai Yehu. Tàka i Yehu hi napanau-ya: Nyumu na jiakau i Himungu, anana i Yuhani. Napa i Kepahu wàndanggau, hi wànanya, jia-duyaka Peturu i ba wànda. 43 Hadangu harii, luanggu la Nggalilia wàna i Yehu, hi na-tàbuku-ya i Pilipu: Tundungga, hi wànanya. 44 Nyuna i Pilipu tau Mbaituhaida-ya, angu kotaku-da i Andaria àda i Peturu. 45 Tàka i Pilipu, hi nahunggu-ya i Natanilu. Nu na palana i Muha la huratu uku hamanai da wunangu, mbàda hunggu-manyaka, jia-duyaka i Yehu, anana i Yuhupu, tau Naharitu. hi wànanya. 46 Nanapa-ya i Natanilu: Peku-nakaka nàhu la Naharitu pa-tumbu na mahàmu? hi wànanya. Tàka i Pilipu: Mai kau itaya, hi wànanya. 47 Tàka ba naita-yaka paraïna i Yehu na nàmunya i Natanilu lai Nyuna: Tàngaru, na tau Ihirailu lànga-tàka na manda ningu kambàlikungu, hi wànanya. 48 Nanapa-ya i Natanilu: Ka nggiki bianahiu tandaka, hi wànanya. Tàka i Yehu: Ba ndedi napaau-nggau i Pilipu, kuita-makauka ba la lumbu kapilitu-kau, hi wànanya. 49 Nanggepi-ya i Natanilu: Ngguru, Nyumu na jiakau na Anana i Ala, jiakau na Hanganji tau Ihirailu, hi wànanya. 50 Nanapa-ya i Yehu: Kuita-makauka la lumbu kapilitu ba wànggunggau, jiaya hi kiri pawaimu ai? Napa na kàu itangu marihi-nya yiana, hi wànanya. 51 Lànga-tàka-manggunggai, napa kai itaya na awangu ba na-tawanggahu, dàngu da papalewa-na i Ala ba dahei puru la Ana tau, hi hili wànanja.

Na pamaü papa la Kana

2:1 La lodu patailu wàna ninya na remi pamaü papa la Kana, la tana Nggalilia; tàka na inana i Yehu ninya lai nu. 2 Pa-dundangu-mbuha i Yehu dàngu da papanau-na la pamaii papa. 3 Ba na-yàmihu-nja wai angguru, tàka na inana: Nda ningu-apa wai angguru-da, hi wànanya i Yehu. 4 Nanapa-ya i Yehu: Ha ràmbu, ta-panggiki na Nyungga dàngu nyumu? Ndedi jiaya na rehinggu hi wànanya. 5 Nu ka panii-nanjaka da ma-paloku na inana: Jàka nggàraya na papanii-nanggai, iwà-manya, wànanja. 6 Nunjuya na huri pa-yahangu-na na tau Yahundi, lai nu ninja da pa-bànjalu-da, ba nomuda da mbàlu watu bokulu, ma-ihingu dàmbu ndia tilu mbua wuru wai ha-hau. 7 Tàka i Yehu: Pinuha wai yiada da mbàlu, hi wànanja. Hi dapinu wuhaha. 8 Hàla, takuwa kai ngàndinya na katiku remi, hi wànanja. Ka ngàndi-danyaka. 9 Ba najàli-yaka na wai na ma-pambeli wai angguru na katiku remi - nda napinya jàka nggii welina, mbulungu da ma-paloku da mataku-ya da mapinya - ka paau-nanyaka na bidi papa mini: 10 Na huri lati, na tauka na-pahangga mangilu-nyapa wai angguru hàmu, hàla ba damaiiku-kika hi mangu pa-pahangga-nya na maràka hàmungu. Tàka nyumu pahàmu bia-munyai na wai angguru hàmu lundu nàhu, hi wànanya. 11 Yiana na pakiri-da da tandana, la Kana la Nggalilia-ya na-patumbu niya i Yehu; pa-jiliku-nanya na mangunju-na. Nu da papanau-na ka pawai-danyaka lai Nyuna. 12 Nu ka puru-danyaka la Kapinaiingu i Yehu dàngu na inana, dàngu da anguna paluhu, lupa da papanau-na; ka ndàdiku-danyaka lai nu, nda pira mbua lodu-mbuda.

Na pa-matua-nanya na uma Ala i Miri Yehu

13 Mareni-amanaka na remi Pahada da tau Yahundi. Ka hadangu-nanyaka i Yehu, hi nahei la Yeruhali. 14 Ka toma-du-nanjaka la uma Ala da tau da ma-danggangu hapi, dàngu mbimbi, dàngu kulundiha, hamanai da tau da manjepa ndui da ma-mandapu lai nu. 15 Ka puti-nanyaka mbuli kalorungu, hi nawàngga ndàbaya na tau welingu la uma Ala, hamanai da mbimbi dàngu da hapi; tàka da nduida da manjepa ndui hi na-huburu-nja, da menjada hi na-kabeli-ha, 16 ka peka-nanjaka da ma-danggangu kulundiha: Ngàndi hàlaha yiada welingu lai yiahu; na umana na Amanggu àmbi tuya ngia pabili batu, wànanja. 17 Ka namu-danyaka da papanau-na ba ninya la Huratu: Na maràna-nya na umamu haromu mapamau-ka, ba wàna. 18 Danggepi-ya da tau Yahundi: Nggàra tandaka pa-pahangga-munggama, hi peku tumunya na matuna nu, wàdanya. 19 Nanapa-ya i Yehu: Nyungguru-ya yiana na uma Ala, napa tilu mbua lodunggu ba ku-pahada belinya, hi wànanja. 20 Tàka da tau Yahundi: Patu kambulu nomu mbua ndauna na tau ba nawulu-ya yiana na uma Ala, tàka Nyumu hi tilu mbua loduamu la pa-pahada-nya? hi wàdanya. 21 Tàka na uma Ala na palana Nyuna, jiaya na tauna duna. 22 Ba pa-pahadangu-yaka welingu la padua mameti, namu-danyaka da papanau-nau, ba mbàda panii-nanyaka nuna; ka wai-danyaka na Huratu, hamanai na pulungu na papanii-na i Yehu. 23 Ba talànga la Yeruhali-ya i Yehu, ba jiaya na remi Paha, nadangu na mapawai la tamuna, rukuna ba dangita-ha da tanda da pa-patumbu-na. 24 Tàka i Yehu nda na-pajàmangu wikina lai nyuda, maa ba tanda ndàba-mananja. 25 Dàngui ba nda nggàra naihi wàngu tau mapeka-nya rukuna na tau, ba pi wiki-mananya na etina na tau.

Na panii dànanya i Nikundemu paraïna i Miri Yehu

3:1 Ninya na tau na angu tau Parihi, Nikundemu-ya na tamuna, ma-pangora la tau Yahundi-ya. 2 Yiana namai wàngu rudungu lai Yehu: Ngguru, mapinggau ba ngguru ma-welingu lai Alakau, maa ba nda ningudu ma-ngalangu pa-patumbu-ha nu da tanda hama tuna da pa-patumbu-mu Nyumu, jàka nda nimanya i Ala lai nyuna, hi wànanya. 3 Nanapa-ya i Yehu: Lànga-tàka-manggunya ka kupeka-nggau, nda ningua tau ma-ngalangu paita-ya na pahanganji-na i Ala, mbulungu jàka paana belinya badi, hi wànanya. 4 Tàka i Nikundemu: Nggiki hama paana-nyaka na tau dàngu kaweda bia-naka? Na-ngalangu nàhu pa-panduangu patama la kambu inana, hi paana belinya? hi wànanya. 5 Nanapa-ya i Yehu: Lànga-tàka-manggunya ka kupeka-nggau: Jàka nda ruku wai dàngu i Ngahu-madu ba paana-nya, nda peku-ana na tau patama la ngia pahanganji-na i Ala. 6 Na pa-paanangu ruku tolu, toluya, tàka na pa-paanangu rukuna i Ngahu, ma-pangahu-ya. 7 Àmbu hangàtaru-dunya: Pa-paana belingu-kai badi, ba wànggu-nggau. 8 Na ngilu ba na-hapuputu, wàngu bia-nanya etina, murongu-ya nyuna na kanduu-na, tàka ndau pianya jàka nggii ngia paweli-na dàngu ngia pa-hanggangu-na. Tuna numbudu na tauka na pa-paanangu rukuna i Ngahu, wànanya. 9 Nanapa-ya i Nikundemu: Nggiki hama peku biana nu? hi wàna. 10 Tàka i Yehu: Nyumu hi ngguru la tau Ihirailu-kau wàngguka. Ka ni yiada, hi ndau pi-mbuanja? 11 Lànga-tàka-manggunya ka kupeka-nggau: Nyuma duma na papima jiaya na papanii-ma, dàngu na pambàda itama jiaya na pa-hakahii-ma, tàka nyimi ndai kataku-aya na pa-hakahii-ma. 12 Jàka kupeka-nggainya na rukuna la pinu tana ba ndai pawai-kadu, nggiki hama pawai-mika jàka kupeka-nggainya na rukuna la awangu? 13 Nda ninguki na mambàda hei la awangu, mbulungu pàku na mambàda puru welingu la awangu, na na Ana tau. 14 Hama tuna i Muha ba na-pajangga-ya na ularu la maràda telangu, tuna numbu haromu na Ana tau ba pa-pajangga-ya badi. 15 Mata jàka nggaa na mapawai, ka peku mangu-nanya na luri pa-lup angu lai Nyuna. 16 Maa ba nuduya na mbuha-nanya yia la pinu tana paraïna i Ala, hi kiri wua-nanya na Ana kamehangu-na, jàka nggaa na mapawai lai Nyuna, ka àmbu na-molungu, mata ka peku mangu-nanya na luri pa-lupangu. 17 Nadu hi kiri paràha-nanya na Anana paraïna i Ala yia la pinu tana, ka na-panjala-ya nda wàna-a, tàka ka peku mànangu-na yia la pinu tana rukuna Nyuna, wàna duna. 18 Jàka nggamuya na mapawai lai Nyuna nda pa-panjala-aya. Tàka na manda pawai mbàda pa-panjala-yaka, maa ba nda nawai-duya na tamuna na Ana kamehangu-na i Ala. 19 Yiana-ya na pa-panjala wàngu, na hambila ba mbàda mainaka la pinu tana, tàka na tau narihi mbuha-nyapa na kapàtangu welingu la harii, maa ba na-akatu-du na pawunda-da. 20 Nadu jàka nggaa na ma-patumbu ma-akatu, nakaraü-nya éti na harii, hi nda na-hurungu-mbu la maharii, ka àmbu peku wuwana na pa-patumbu-na. 21 Tàka na maliiya na ma-tubangu, namaiya la maharii, ka peku wuwada da pa-patumbu-na ba pa-patumbu lai Alaha, hi wàna.

Na hakahii-nanya i Miri Yehu paraïna i Yuhani

22 Tunaka nu laku-nanyaka la tana Yundia i Yehu dàngu da papanau-na; ka ndàdiku-nanyaka lai nu, hi na-parunungu tau. 23 Tàka i Yuhani parunungu-mbunanya tau la Ainungu la lihina la Halingu, maa ba nadangu-du na wai lai nu; ka mai-nanyaka na tau lai nu, hi na-parunu-nya. 24 Nu ba ndedi-dupa papuhi-ya la uma kapàtangu i Yuhani. 25 Nu ka tumbu-nanyaka na pa-lumungu la papanau-na i Yuhani dàngu na haàtu na tau Yahundi, rukuna na pa-yahangu wàngu. 26 Ka lua-danyaka lai Yuhani: Ngguru, na maninya yia-nana lai nyumu la hapapa luku Yarandingu, na pa-hakahii-mu, pa-runungu pàku-nanya nu, hi nalua ndàbà na tau lai Nyuna, hi wàdanya. 27 Nanapa-ya i Yuhani: Nda jia peku-ana na tau papiri ngga-nggàra, jàka nda pa-wuangu-ya welingu la awangu. 28 Nyimi wiki hakahii-manggunggai: Nyungga nda jia-aka na Karitu, tàka pa-paràhangu-aka la pa-mangilu-nya, ba wànggu. 29 Na matunggu-nya na bidi papa kawini jiaya na bidi papa mini; tàka na ariyaa-na na bidi papa na maninya lai nyuna, na marongu-ya, dira hawola-yaka rukuna na nggoruna na bidi papa mini; nu toma wàngu-nanyaka duku na hawola-nggu. 30 Nyuna na-kabutuhu badi, nyungga ku-kawawaku badi. 31 Na mamai weli ditangu nalànga ndàbanya. Na ma-welingu la pinu tana, pinu tanaya na dedina, hi ruku pinu tanaya na papanii-na. Na mamai welingu la awangu nalànga-nya mbuu ndàbana. 32 Na paita-na dàngu na parongu-na jiaya na pa-hakahii-na, tàka nda ningu ma-kataku-ya na pa-hakahii-na. 33 Na ma-kataku-ya na pa-hakahii-na, kawuku-nanyaka ba ma-palànga-tàkangu-ya i Ala. 34 Nadu na pa-paràha-na i Ala jiaya na puluna i Ala na panii-na, maa ba nda nareki-du i Ala ba na-wuangu-ya na Ngahu. 35 I Ama nambuha-nya i Ana, ka pakata-nanyaka mbuu ndàbana la Umana. 36 Jàka nggaa mawaiya i Ana, mangu-nanyaka na luri pa-lupangu; tàka na manda patingi-nya, nda jia ita-ananya na luri, tàka na hànggana i Ala padaingu-na padua lai nyuna.

Ba napanii dànya na kawini Hamaria i Miri Yehu

4:1 Nu ba napi-njaka paraïna i Yehu da tau Parihi ba darónguyaka ba dadangu-pa da papanaungu da pangala-na dàngu da pa-parunu-na i Yehu welingu lai Yuhani, 2 - na nyuna nda Nyuna wikia i Yehu na ma-parunungu, tàka jiaha da papanau-na - 3 ka dunjaku-nanyaka na tana Yundia hi nahili laku beli la Nggalilia. 4 Nu nalaku lii badi la tana Hamaria. 5 Ka tàka-nanyaka la hau kotaku la Hamaria, la Hikaru ba wàdanya, la lihina na tana pawua-nanya àmangu i Yuhupu anana paraïna i Yakupu. 6 Lai nu ninya na humuru-na i Yakupu. Ba njili-mananya nàmu i Yehu, ka uhuku-nanyaka la lihi mata wai. Nu tidu lodu-yaka, 7 Nu ka tàka-nanyaka na kawini Hamaria na mamai pataku wai. Tàka i Yehu: Wuanda ka ta-ngunungu, hi wànanya. 8 Maa ba hambàda-dudaka la paraingu da papanaungu pakei pangangu. 9 Nanapa-ya na kawini Hamaria: Ka ni Nyumu tau Yahundi, hi karai bia-mungga pa-ngunungu nyungga kawini Hamaria? hi wànanya. Nadu tau Yahundi ba nda na-panggolu dàngu tau Hamaria. 10 Tàka i Yehu: Jàkau pinya lati na pawua-na i Ala dàngu jàka nggamuya wuanda ka ta-ngunungu na ma-wànanggau, nyumu lati makarai-ya Nyuna, hi nawua-nggau wai luri, hi wànanya. 11 Nanapa-ya na kawini: Miri, nda ninguki hambamu, mala hi na-manjolungui na humuru, ka nggii biaka Nyumu ungala ninya na wai luri? hi wànanya. 12 Ka jia rihi-munya-kaka Nyumu i Yakupu bokuma na ma-wua-nggamanya yiana na humuru; nyuna wiki na-ngunungu-ka, hamanai da anana lupa da bandana? hi wànanya. 13 Tàka i Yehu: Jàka nggamu na mangunu-nya na wai yiana, napa nahili madau. 14 Tàka napa jàka nggamu na mangunu-nya na wai pawua-nggunya Nyungga, nda namadau ndoku-apa lundu nu-nu, nadu na wai na pawua-nggunya Nyungga napa na-pamata waingu la etina na ma-kabubalungu luri pa-lupàngu, hi wànanya. 15 Nanapa-ya na kawini: Miri, wua àru-ngganya nuna na wai, ka àmbu kumadau dàngu ka àmbu kuhili mai lai yiahu pataku wai, wànanya. 16 Tàka ì Yehu: Lua kau paaunya na leimu, kau mangu pamai nàmu, hi wànanya. 17 Nahema na kawini: Nda ningua leinggu, hi wàna. Tàka i Yehu: Tubana, nda ningua leinggu, ba wàmu; 18 ba mbàda malima-duhaka da leimu, dàngu na maninya nàhu lai nyumu ba nda lei-dumunya; na-tubangu-du na paniimu, hi wànanya. 19 Nanapa-ya na kawini: Pi-nggunyaka ba wunangu-kau. 20 Da bokuma dakàli hamayangu la palindi yiana, tàka nyimi, jiaya la Yeruhali badi na ngia pa-hamayangu wàmi, hi wànanya. 21 Tàka i Yehu: Ha ràmbu, muwai-kawa Nyungga, ninya haromu na rehina ba nda jiaya la palindi yiana, nda jia-mbuya la Yeruhali na ngia pa-hamaya niminya i Ama. 22 Nyimi hamaya-minya na panda pimi, nyuma duma hamaya-manya na papima, nadu na pa-mànangu wàngu ba welina la tau Yahundi. 23 Tàka ninya na rehina haromu, dàngu rehi-ma-nanyaka nàhu, da ma-hamayangu lànga-tàka, ba na-pangahu dàngu ba na-padeningu na hamaya-danya i Ama. Maa ba jia-duha da ma-hamaya tudanya nu da pawuku-na i Ama. 24 I Ala ngahuya, jia-duya na ma-hamaya-nya Nyuna hi na-pangahu dàngu hi na-padeningu badi na hamayangu-da. 25 Nanapa-ya na kawini: Kupinya ba nàmunya i Mahia, Karitu ba wàda; jàka natàka Nyuna haromu, napeka-ndanya mbuu ndàbana, hi wànanya. 26 Tàka i Yehu: Jia-makaka mapanii dànggau, hi wànanya. 27 Nu ba nàmunja-ka da papanau-na, ka hangàtaru-danyaka rukuna ba napanii dàngu tau kawini i Yehu. Na nyuna: Nggàra pawuku-mu, ndia nggikina hiu panii dànya, nda ningu mawàna. 28 Hàla, ka dunjaku-nanyaka na wuru waina na kawini, hi nalaku la paraingu, hi napanii-nya na tau: 29 Mai kai itaya na tau na mapeka hàla-ngganya na palii-ngguka. Mala nda jia-aya ni na Karitu? hi wànanja. 30 Ka luhu-danyaka welingu la paraingu, hi dalua lai Nyuna. 31 Ba talànga tunaka nu, paàra-danyaka parai da papanau-na: Ngguru, màlawa lati kau ngangu, wàdanya. 32 Nanapa-ha Nyuna: Nimanya na pangangu na panga-manggu duku, na panda pimi nyimi, hi wànanja. 33 Nu ka panii-danyaka dàngga anguda da papanaungu: Ningu ihu mangàndi-nya pangangu? ba wàda. 34 Tàka i Yehu: Na panganggu Nyungga jiaya na nunju-nggunya na pambuha-na na Ma-paràha-ngga dàngu ba ku-palànyapu-ya na paràma-na. 35 Mala: Patu mbua wula-kia-naka na rapa muti nda wàmia? Lànga-tàka ka kupeka-nggai: I-jakarungu-wa matami kai tàngaru-ha da woka, nàhu rara-danyaka, jia la muti-kia-haka. 36 Na-ngalangu-ka wundana na marmiti, hi na-kangutungu ihi woka ndumana na luri pa-lupangu, ka peku maràngga hawola-da da ma-hàbarungu dàngu da mamuti. 37 Nu hi na-padeningu wàngu na lawiti: Haàtu ma-hàbarungu, haàtu mamuti, ba wàna. 38 Nyungga paràha-nggunggaika la pamuti-ya na panda jàrami. Hawiangu majàra, tàka nyimi ngala-minyaka na ruku jàrada, hi wànanja. 39 Nadangu na tau Hamaria lai nu la paraingu na mawaiya i Yehu, rukuna na pa-hakahii-na na kawini, napeka hàla-ngganja da paliinggu, ba wàna. 40 Nu ba natàka-ka lai Nyuna na tau Hamaria, pamanda-danyaka, ndàdiku àru lai nyuma ba wàdanya. Dàmbu loduna ba na-ndàdiku lai nu. 41 Ka manaü dangu-naipa na mapawai rukuna na puluna Nyuna. 42 Nu ka panii-danyaka na tau kawini: Nda ruku-anapa na kareuku-mu nyumu hi mapawai, maa ba mbàda rongu wiki-mamanya, hi mapi-nyaka ba jia lànga-tàkaya, na Ma-pamàna-nya yia la pinu tana, wàda. ■ ■ .

Na màlaru-na na anana mini na tau la hanganji

43 La hambeli-da nu da dàmbu lodu, hadangu-nanyaka welingu lai nu, hi nalaku la Nggalilia. 44 Nadu i Yehu wiki ba hakahii-ma-nanyaka, na wunangu ba nda patembi-ya la parai wikina. 45 Ba natàka-ka la Nggalilia, kataku-danyaka da tau Nggalilia ba mbàda ita-du-danjaka da pa-patumbu-na nàmu la remi la Yeruhali; maa ba dalua-mbudu nyuda la remi. 46 Nu ka hili tàka-nanyaika la Kana la Nggalilia, na ngia pa-pambeli-nanya wai angguru na wai. Nu hi ninyai duna la •Kapinaüngu na tau la hanganji, na mahidu anana mini. 47 Nu ba narongu-nyaka tàkanai Yehu la Nggalilia welingu la Yundia, lua toma-nanyaka hi na-pamanda-nya palua pa-pamàlaru-ya na anana, ba meti-amanaka. 48 Tàka i Yehu: Jàka ndai itangu-ma tanda dàngu pa-hangàtaru wàngu, ndai pawaia, hi wànanya. 49 Nanapa-ya nu na tau la hanganji: Miri, màla-ndawa, talànga ndedi metina na ananggu, hi wànanya. 50 Tàka i Yehu, hi napanii-nya: Lakuwa nyuna, naluri-ka na anamu, hi wànanya. Ka wai-nanyaka na pulungu na papanii-nanya i Yehu nu na tau, ka laku-nanyaka. 51 Nu ba nàhu bia-yapa la ngarangia, mai-danyaka da atana pa-tàbuku-ya: Naluri-ka na anamu, wàdanya. 52 Ka paàra-nanjaka, jàka nggikina na lodu ba na-pakiringu pa-mandapu. Kangeu, njàmu hauya, ba na-mandangu na pariti-na, hi wàdanya. 53 Ka pi-du-nanyaka; na amana na anakeda, ba jiaya na rapana, naluri-ka na anamu, ba wànanya i Yehu. Ka pawai-nanyaka nyuna wiki lupa na tau la kuru uma-naka. 54 Yiana-yaika na tanda na padua wàda, na pa-patumbu-na i Yehu, ba natàka la Nggalilia welingu la Yundia.

Na pa-màlaru-na mahidu la lodu hangahu i Miri Yehu

5:1 Tunaka nu jia-yaka na remi tau Yahundi; ka lua-nanyaka la Yeruhali i Yehu. 2 Nu la Yeruhali la lihina na Pindu Mbimbi, ninya na ngia paihu na malima mbua kawindu-na, Mbaituhenda da wàdanya la hilu Imbarani. 3 Lai nu la kawindu lalu danguha da mahidu da ma-tanggi-lungu, mapoki, ma-kaliparu, mameti hapapa, da ma-patia-nya na wai ba na-kanggàbuku. 4 Nadu jàka rehina ba napuru-du na papalewa-na i Miri lai nu la ngia paihu hi na-kàbuku-nya na wai; tàka na mapuru mangilu hàla pa-kàbuku-nya na wai na-màlaru, jiapa nda nggàra mahidu-nyakadu. 5 Lai nu ninya na tau, mbàda tilu kambulu walu mbua ndaunaka ngalana pahidu. 6 Ba naita-yaka ba na-tanggilungu paraïna i Yehu dàngu ba napinya ba mandai-manaka pahidu, ka panii dà-nanyaka: Mala umbuhangu pa-màlaru? hi wànanya. 7 Nanapa-ya na mahidu: Miri, nda ningua duku mangàndi-ka la ngia paihu, jàka na-kanggàbuku na wai. Tàka ba nàhu bia-nggapa, mbàda ninguka haàtu mapuru mangilu-ngga, hi wànanya. 8 Nanapa-ya i Yehu: Hadangu kau dandanja da topumu, kau laku, hi wànanya. 9 Ka màlaru madua-nanyaka nuna na tau, hi nadanda-nja da topuna, laku-nanyaka. Nu lodu hangahu-ya. 10 Ka panii-danyaka na pa-pamàlaru da tau Yahundi: Ka ni hi lodu hangahu-ya, nda uku-aya lati pangàndi-ha da topumu, hi wàdanya. 11 Nanapa-ya nyuna: Na ma-pamàlaru-ka, Nyuna: Dandanja da topumu kau laku, na ma-wànangga, hi wànanja. 12 Nu ka paàra-danyaka: Nggamuya nu, dandanja da topumu kau laku, na ma-wànanggau, hi wàdanya. 13 Tàka na pa-pamàlaru nda napi^anya jàka nggamuya. Maa ba mbàda kandulingu-dunaka i, Yehu, ba lalu dangu-duya na tau lai nu. 14 Hàlaka nu toma-nanyaka paraïna i Yehu la uma Ala: Ri-mangu, nàhu màlaru-munyaka; àmbu tudupa ma-akatu, ka àmbu nanggàna-kau marihi mbotu, hi wànanya. 15 Nu ka laku-nanyaka mina na tau, hi napanii-nja da tau Yahundi, ba jiaya i Yehu na ma-pamàlaru-ya. 16 Jia-duyaka ka ta-kanuka-ya i Yehu hi wàda da tau Yahundi, rukuna ba na-patumbu-ya nuna la lodu hangahu. 17 Nanapa-ya i Yehu: Na Amanggu, ràma-mananya lundu nàhu, tumbuna Nyungga ba kuràma, hi wànanja. 18 Jia-duyaka hi manaü himbuda ànda ka pameti-ya ba wàda, nda jia biaya ba napangga-ya na lodu hangahu, tàka jia-mbuya: Ama wiki-nggunya i Ala ba wàna, ba na-pahamangu wikina lai Ala.

Na hakahiingu-na wikina i Miri Yehu

19 Nanapa-ya i Yehu: Lànga-tàka-manggunggai, nda pekuana i Ana ba nawàngu etina la pa-patumbu ngga-nggàra, mbulungu ba naita-ya i Ama badi ba na patumbu-ya; nadu jàka nggàraya na pa-patumbu-na i Ama, tumbu duna i Ana ba na-patumbu-ya. 20 Maa ba nambuha-dunya i Ana paraïna i Ama, hi na-paita hà-lanja lai Nyuna da pa-patumbu wiki-naka, napa hi na-paita-nya da pa-patumbu-na da marihi-nja yiada, ka peku hangàtaru-mi. 21 Nadu hama tuna i Ama ba na-pahada-nja da mameti hi na-paluri-ha, tu-mbuduna i Ana ba na-paluri-ha da tau pawuku-na. 22 Nadu i Ama ba nda ningumbu haàtu pa-patanda-na wai ngera, tàka mbàda pakata hàla-nanyaka na pa-tandangu lai Ana. 23 Mata ka peku tembi hàla-danya i Ana hama tuna ba datembi-ya i Ama. Na manda tembiya i Ana, nda tembi-nanya i Amambu na ma-paràha-nya. 24 Lànga-tàka-manggunggai: Na-marongu-ya na pulunggu, dàngu na mawaiya na Ma-paràha-ngga, mangu-nanyaka luri pa-lupangu, nda pa-patandangu-ayapa, tàka mbàda lelingu-naka welingu la meti la luri. 25 Lànga-tàka-manggunggai: Ninya na rehina haromu dàngu rehi-ma-nanyaka nàhu, da mameti ba darongu-ya na nggo-runa na Anana i Ala, tàka da marongu-ya jiangu-ma ba daluri. 26 Nadu hama tuna i Ama ba ningu luri wikina, tuna nudu ba nawua-mbunya i Ana ka ningu luri wikina. 27 Dàngu hi na-pakata-nya kuaha la pa-patandangu, maa ba Ana tauduya. 28 Àmbi hangàtaru-dunya, maa ba nàmunya na rehina, mbuu ndàbada da maninja la reti, ba darongu-ya na nggoruna, 29 hi daluhu, da matu mahàmu hadangu-danya la luri, tàka da matu ma-akatu hadangu-danya la pa-patanda-nya wai ngerada. 30 Nda peku-anggu ba kuwàngu etinggu la pa-patumbu ngga-nggàra; na pa-tandangu-nggu hama tuna na parongu-nggu, dàngu natànji na patandangu-nggu, nadu ba nda jia-aya na pambuha-nggu Nyungga, tàka jiaya na pambuha-na na Ma-paràha-ngga duku na pahimbu-nggu. 31 Jàka ku-hakahii-nya na ruku wikinggu, nda na-undungua na pa-hakahiingu-nggu. 32 Nimanya duna na haàtu na ma-hakahii-nya na rukunggu dàngu kupinya, ba na-undungu na pa-hakahiingu na pa-hakahii-na rukunggu Nyungga. 33 Mbàda paràhangu-dumika tau lai Yuhani, hi na-hakahii-nya na malànga-tàka. 34 Nyungga duku nda nggàra kuihi wàngua pa-hakahii tau, tàka hi kiri panii-nggunya yiana, mata ka peku mànangu-da wànggu-anggai. 35 I Yuhani jiaya na palita na maketi na ma-hambila, tàka nyimi hawutu-ana tambaha-nya eti na hambila-na, ba wàmi. 36 Tàka Nyungga ninya na pa-hakahii na marihi-nya na pa-hakahii-na i Yuhani; nadu da paràma da pa-pakata-nangga i Ama, ka na-palundu-nja ba wànangga, na da paràma da paràma-nggu, nuda-duha da ma-hakahii-nya na rukunggu ba i Ama na ma-paràha-ngga. 37 Dàngu i Ama na ma-paràha-ngga, Jia-mayai na mambàda hakaliii-nya na rukunggu. Ndedi i-handàkangua parongu-ya na nggoruna, jàka ndia paita-ya na hadana. 38 Dàngu na puluna ndai pamàndu-mbunya la etimi, maa ba ndai waiduya na pa-paràha-na Nyuna. 39 Mi-manginjiru-ha da Huratu, jiaha da ngia pa-ngalangu-nda luri pa-lupangu, ba wàmidu; tàka jia-mahaka lati da ma-hakahii-ngga. 40 Ba tuna ndai bihui pamai lai Nyungga, ka peku ndumangu-mi luri. 41 Ka natembi-ka tau nda wànggua, 42 tàka kupi-nggaika, ba nda nianya na mbuhanya i Ala lai nyimi. 43 Nyungga mai ngàndi-nggunya na tamuna na Amanggu, tàka ndai kataku-aka; jàka ningu haàtu mamai ngàndiya na tamu wikina, jia niyai na pa-kataku-mi taì. 44 Nggiki hama pawai-mika, ba dàngu keha-minya padua na tembi la dàngga angumi, tàka na tembi na ma-welingu lai Ala ma-kamehangu ba ndai keha-anya? 45 Ka kukàla-ha la Amanggu taì wànanda-ka ihu, àmbi wàmidu; nimanya duna na makàla-kai, na i Muha na pamonu-mi. 46 Nadu jàka waiminya i Muha lati, iwai-mbuduka Nyungga badi, maa ba mbàda tu-du-nanyaka la Huratu na rukunggu Nyungga. 47 Tàka jàka ndai wai-maduha da huratu-na nyuna, nggiki hama wai bia-minja da papanii-nggu, hi wànanja.

Na wua-nanya pangangu na tau lima rata paraïna i Yehu

6:1 Hàlaka nu laku-nanyaka i Yehu la hapapa tehiku Timbiria la Nggalilia. 2 Lalu danguya na tau na matundu-nya, ba daita-duhaka da tanda da pa-patumbu-na la mahidu. 3 Tunaka nu, ka kandekalu-nanyaka la palindi i Yehu, hi na-uhuku dàngu da papanau-na lai nu. 4 Nu jia-amayaka na Paha, na remida da tau Yahundi. 5 Ba na-jakarungu-ka matana i Yehu dàngu ba naita-ya na tau dangu na mamai lai nyuna, ka panii-nanyaka lai Pilipu: Nggiiaka takei ningu kambamba, ka nangangu yiana na tau dangu? hi wànanya. 6 Tàka hi kiri panii tunanu i Yehu, ka kukama-nya wàna, maa ba pi-mananya duna jàka nggàraya na pa-patumbu-na tal. 7 Nanapa-ya i Pilipu: Kambamba ma-wilingu dua ngahu ndinaru nda natoma-mbuha, jiapa ka da-màrangga hawutu-kadu, hi wànanya. 8 Tàka na haàtu la papanau-na, i Andaria, na anguna paluhu i Himungu Peturu: 9 Lai yiahu ninya na anakeda na maningu kambamba watarungu ba lima mbuada dàngu da iyangu ba dua ngiuda. Tàka nggiki wànda-kinjaka la tau dangu tungu yia, hi wàna. 10 Nanapa-ya i Yehu: Paràha-nya na tau dangu ka na-uhuku, hi wàna. Lai nu na-parumba. Nu ka uhuku-danyaka, na tau mini jua ningu lima rataya. 11 Ka piti-nanjaka da kambamba i Yehu hi na-pamalangungu, hàla hi na-paberi-nja da ma-uhuku lai nu, jia-mayai da iyangu, ba dawàngu pambuha-da. 12 Ba dambihu-ka: Pauhi-nja da kapipi tàdi ngada, ka àmbu ningu ma-dimangu, hi wànanja da papanau-na. 13 Ka pauhi-danjaka, ha-kambulu dàmbu mbola mbinuda da kapipi kambamba wataru da malima mbuada, jia-duhaka da tàdi ngada da tau da mangangu. 14 Nu ba daita-yaka na tanda pa-patumbu-na, ka panii-nanyaka na tau dangu: Lànga-taka, yiana jiaya na wunangu na ma-nàmunya yia la pinu tana ba wàda, hi wàda. 15 Nu ba napi-nyaka paraïna i Yehu, mata ka talua pa-pambana-ya la pa-hanganji ba wàdanya, ka bili lawihiru-nanyaka la ma-palindingu, ba didi meha-aya.

Ba nalii la pinu wai i Miri Yehu

16 Ba na-malingu-ka, puru-danyaka la tehiku da papanau-na, 17 ka hei-danyaka la tena hi hanàhu-da la Kapinaiingu la hapapa tehiku. Nu kapàtangu-ma-nanyaka, tàka i Yehu ndedi namai tomaha, 18 inalai na tehiku lalu mbana ngalingu-ya, ba tungu-dunanya na ngilu bokulu. 19 Ba ningu lima nomu kilu-daka nàhu ngalada pabuhi, hi jia ita bia-danya i Yehu ba nalii la pinu wai, ba hanàmu-na la tenada; ka mangàdatu-danyaka. 20 Tàka i Yehu: Jiaka Nyungga, àmbi mangàdatu-du, hi wànanja. 21 Ka orangu-danyaka la panggepi-ya la tena; nu hi pa-ngalangu tàka-ma-ananyai duna na tena la hingi, la ngia pa-hanggangu-da.

Na kambamba paluri wàngu

22 Hadangu harii pi-danyaka da tau dangu da maninja la hapapa tehiku, ba nda ningu lai nu tena hau, mbulungu ba hauna, dàngui ba nda nahei karia-anja la tena da papanau-na da mapala. 23 Tàka hi nàmunja da tena da ma-welingu la Timbiria, la lihi ngia pangangu-da kambamba, ba nahàla pa-malangu-nja i Miri. 24 Nu ba daita-ya na tau dangu ba nda ninya lai nu i Yehu, hamanai da papanau-na, ka hei-madanyai duda la tena, hi dalaku la Kapinaiingu pahimbu-ya i Yehu. 25 Ba datoma-nyaka la hapapa tehiku: Pirangu tàkamu yiahu Ngguru? hi wàdanya. 26 Nanapa-ya i Yehu: Lànga-tàka-manggunggai, nyimi na nda rukuna bai itangu tanda-a hi kiri himbu-mingga, tàka jia-aya rukuna bai ngangu kambamba hii mbihu. 27 Àmbi ràmadu lumuna na pangangu na ma-molungu, tàka mata ka lumuna na pangangu na ma-padaingu lundu nu-nu, na pawua-nanggai tal na Ana tau, maa ba jiaya na patuna kawuku i Ala, i Ama, hi wànanja. 28 Ka paàra-danyaka: Mala nggiki-maka badi, ka peku ràma-manja da paràma ba wàna i Ala? hi wàdanya. 29 Nanapa-ya i Yehu: Yiana-ya na paràma ba wàna i Ala, bai waiya na pa-paràha-na Nyuna, hi wànanja. 30 Tàka nyuda: Mala nggàra tanda-yaka na pa-patumbu-mu, ka peku ita-manya, ka mawaikau? Nggàraya na paràma-mu? 31 Da bokuma duma dangangu kambamba màna la maràda telangu, hama tuna na maninya la Huratu: Kambamba welingu la awangu pawua-nanja pangada ba wàna, hi wàdanya. 32 Nanapa-ya i Yehu: Lànga-tàka-manggunggai, nda nyuna i Muha na mawua-nggainya na kambamba na ma-welingu la awangu, na Amanggu duna na mawua-nggainya na kambamba ma-welingu la awangu na malànga-tàka. 33 Nadu, ba jiaya na kambamba na pawua-na i Ala, na mapuru welingu la awangu dàngu na mawua-nya paluri wàngu yia la pinu tana, hi wànanja. 34 Napaha nyuda: Miri, mala kau wua mànu àru-nggamanya lati na kambamba ba wàmu, hi wàdanya. 35 Tàka i Yehu: Nyungga yia jia-makaka na kambamba paluri wàngu; na mamai lai Nyungga nda nahili manjuu ndoku-apa, dàngu na mapawai lai Nyungga nda nahili madau ndoku-mbupa. 36 Tàka mbàda peka-nggunggainya-ka: Jiapa ka nda mbàda ita-mingga-kadu, tàka ndai pawaimbu, ba wànggu. 37 Mbuu ndàbana na pawua-nangga i Ama, jiangu-ma ba namai lai Nyungga, tàka na mamai lai Nyungga nda jia jukaru-anggunya. 38 Nadu hi kiri purunggu welingu la awangu, ka ku-paloku-ya na pambuha-nggu Nyungga ba nda wànggua, tàka jiaya na pambuha-na na Ma-paràha-ngga duku. 39 Yiana-ya na pambuha-na na Ma-paràha-ngga, mbuu ndàbana na pawua-nangga, ka àmbu ningu pa-yàmihu-nggu, tàka ka lupa ku-pahada-nja badi tai la hupu njàpuna. 40 Maa ba yiana-duya na pambuha-na i Ama, mata na tauka na ma-tàngaru-ya i Ana hi napawai lai Nyuna, ka na-mangungu luri pa-lupangu, tai Nyungga ku-pahada-nya la hupu njàpuna, wànanja. 41 Ka kanguruku-danyaka da tau Yahundi rukuna Nyuna: Nyungga yia jiaka na kambamba na mapuru welingu la awangu, ba wàna. 42 Nda jia-aya ni i Yehu, na anana i Yuhupu, na patanda-nda inana dàngu amana? Ka ni purunggu welingu la awangu, hi jia wàna bia, hi wàda. 43 Nanapa-ya i Yehu: Àmbi kanguruku-du la dàngga angumi. 44 Nda ningua haàtu ma-ngalangu pamai lai Nyungga, jàka nda jiaya i Ama na ma-paràha-ngga na mairu ngàndiya, tal Nyungga ku-pahada-nya la hupu njàpuna. 45 Ninya la huratu-da da wunangu: Tai pa-papeka-na i Alaha mbuu ndàbada, ba wàna. Na tauka na marongu dàngu na ma-papekangu lai Ama, jiaya na mamai lai Nyungga. 46 Ninguka mambàda itaya i Ama nda wànggua, mbulungu na ma-welingu lai Ala-a na mambàda itaya i Ama. 47 Lànga-tàka-manggunggai, na mapawai na-mangungu-ka luri pa-lupangu. 48 Nyungga yia jiaka na kambamba na paluri wàngu. 49 Da bokumi dangangu kambamba màna la maràda telangu, ba tuna mbàda meti bia-danyai. 50 Yiana-ya na kambamba na mapuru welingu la awangu, mata da manganya ka àmbu dameti. 51 Nyungga jiaka na kambamba luri na mapuru welingu la awangu; jàka nggaa manganya na kambamba yiana, jiangu-ma ba naluri lundu nu-nu; nu na kambamba na pawua-nggu tal, jiaya na tolunggu lumuna na lurina yia na pinu tana, hi wànanja. 52 Ka pa-rawaku-danyaka dàngga anguda da tau Yahundi: Nggiki hama wua bia-nandanya na toluna yiana yia ka tanganya, ba wàda. 53 Nanapa-ya i Yehu: Lànga-tàka-manggunggai, jàka ndai ngamanya na toluna na Ana tau, dàngu jàka ndai unu-manya na wai riana, nda ningua luri wikimi. 54 Na manganya na tolunggu dàngu na mangunu-nya na wai rianggu, ngalangu-nanyaka luri pa-lupangu, tai Nyungga ku-pahada-nya la hupu njàpuna. 55 Nadu na tolunggu ba pangangu lànga-tàkaya dàngu na wai rianggu ba pa-ngunungu lànga-takaya. 56 Na manganya na tolunggu dàngu na mangunu-nya na wai rianggu, na-padaingu lai Nyungga, hamanai Nyungga lai nyuna. 57 Hama tuna ba na-paràha-ngga i Ama na maluri, dàngu Nyungga ba kuluri rukuna i Ama, tuna numbudu na mangangga tal ba naluri rukunggu Nyungga. 58 Yiana-ya duna na kambamba na mambàda pura welingu la awangu, nda hama tuana na nganguda da bokumi hi meti bia-danyai. Na manganya na kambamba yiana, jiangu-ma ba naluri lundu nu-nu, hi wànanja. 59 Ba napanii-ha yiada, la uma bungguru la Kapinaungu-ya na pa-pekangu ningu.

No kanduli-nanya tau dangu i Miri Yehu

60 Dadangu da papanau-na da marongu-ya: Nambotu na kareuku yiana, nggaa ma-ngalangu parongu-ya, da mawàda. 61 Nu ba pinanya la etina i Yehu, ba da-kanguruku da papanau-na rukuna nuna, hi napanii-nja: Mi-hanggàmaru wàmanya yiana yia? 62 Mala jàkai ita-mayaka na Ana tau ba nahei la ngia pani memanya! 63 Jia na Ngahu duna na ma-paluri, tàka na tolu nda ningu ndokua linguna. Da kareuku da pambàda panii-nggunggai Nyungga ma-pangahu-ha dàngu ma-paluri-ha. 64 Tàka ninja lai nyimi hawiangu da manda pawai, hi wànanja. Maa ba pi-mananya paraïna i Yehu welingu la kawunga-na jàka nggamuha da manda pawai dàngu jàka nggaaya na ma-kaleka-nya tai. 65 Ka panii-nanjaka: Jia-duya nda ningua ma-ngalangu pamai lai Nyungga, jàka nda pawua-mananya paraïna i Ama, hi kiri wànggunggai, hi wànanja. 66 Piti welingu nu dadangu da papanau-na da ma-kandulingu, nda dahili laku karia-anyapa.

Na pekana i Peturu

67 Nu ka panii-nanjaka da ma-hakambulu madua paraïna i Yehu: Mala nyimi, ka talaku nda wàmia, hi wànanja. 68 Nanapa-ya i Himungu Peturu: Miri, nggaa lai nyunaipa malaku ningu? Lai Nyumu pàkuha da pulungu paluri pa-lupangu wàngu. 69 Nyuma yia mapawai-maka dàngu mapi-nyaka, Nyumu ba jiakau na Ma-matua lai Ala, hi wàna. 70 Nanapa-ya i Yehu: Nda ha-kambulu madua-akai yia ba kupindi-kai? Tàka na haàtu na angumi hi kambàliku biayai, hi wànanja. 71 Nu lananya i Yunda, na anana i Himungu Ihakariu. Maa ba jia-duya tal na pa-hakambulu madua wàda, na ma-kaleka-nya.

Na rukuna na nda pawaida lai Miri Yehu da anguna paluhu

7:1 Hàlaka nu njada-nanyaipa la Nggalilia i Yehu, maa ba nda nabihu-du pa-paengangu la Yundia, ba himbu-danya ànda da tau Yahundi la pa-pameti-ya. 2 Tàka na remi tau Yahundi, na na remi kawarungu, mareni-ma-nanyaka. 3 Napaha da anguna paluhu: Hadangu-wa welingu lai yiahu kau laku la Yundia, ka peku ita-danja da paràma-mu paraìda da papanau-mu. 4 Ba nda ningua ma-patumbu ngga-nggàra la ma-kawiningu, dàngu-mbu keha ka kuwuwa jàka wàna. Ba dàngu patumbu-munja padua yiada, pa-wuwangu-wa wikimu yia la madangu, hi wàdanya. 5 Nadu jiapa da anguna paluhu-kadu ba nda dapawai-mbu lai Nyuna. 6 Nanapa-ya i Yehu: Ndedi jia-ayapa na rehinggu Nyungga, tàka nyimi rehi ma-mànu-maminya. 7 Nda peku-ana na pinu tana yiana la pa-karaii-nggai eti, Nyungga nyuna da karaü-ngga, kiringu ba ku-hakahii-nya na rukuna, ba na-akatu-du na paruku-naka. 8 Ilakuwa nyuna la remi, Nyungga ndedi kulua la remi yiana, maa ba ndedi jia-aya duku na rehinggu, hi wànanja. 9 Ba wànanja-ka nu, ndàdiku-nanyaka la Nggalilia.

Na luana la remi kawarungu i Miri Yehu

10 Tàka ba taliu-da da anguna paluhu palua la remi, lua-mananyai duna, na nyuna nda nalua-a la mbabu, nawàngu palua winingua. 11 Nu da tau Yahundi hamata-danya padua nu la remi: Nggii-yaka Nyuna, wàda. 12 Nadangu na pa-kambunguku-da rukuna Nyuna nu la mbabu; tau hàmuya, wàdanya hawiangu; hawiangui: Ndia-a, na-panyonga tau dangu, wàdanya. 13 Na nyuna nda ningua matara papanii pa-habola-nya na rukuna, ba da-mangàdatu-nya na tau Yahundi. 14 Ba padua remi-yaka, hei-nanyaka i Yehu la uma Ala, hi na-papekangu. 15 Ka maratangu-danyaka da tau Yahundi: Nggikina ihu na tau yiana hi jia pingu biana, dàngu nda pa-papekangu-ya, hi wàda. 16 Nahema i Yehu: Na pa-papekangu wànggu Nyungga, nda ma-welingu lai Nyungga-aya, tàka welina la Ma-paràha-ngga. 17 Jàka nggamu ma-patikingu la pawunda-ya na pambuha-na Nyuna, jiangu-ma duna napinya na pa-papekangu wànggu, jàka welina lai Ala, ndia jàka ma-welingu lai Nyungga-ya ba kupanii. 18 Jàka nggamuya na ma-paluhu kareuku wikina, keha-nanya na rihi wikina. Tàka na makeha-nya na rihina na ma-paràha-nya, jia-ya na malànga-tàka, nda ningua manda tànji lai nyuna. 19 Mala nda nawua-anggainya na uku i Muha? Tàka nda ningui haàtu lai nyimi manunju-ya na uku. Nggikina hii himbungga ànda la pa-pameti-ka? hi wànanja. 20 Nanapa-ya na tau dangu: Huruku-nanggau! Nggamuya na ma-himbu-nggau ànda la pa-pameti-kau? hi wàdanya. 21 Tàka i Yehu: Hauana na pa-patumbu-nggu, hangàtaru ndàba-ma-aminya. 22 Jia-duya hi wànggunggai: Mbàda wua-nanggainya-ka i Muha nu huri kàri - nda welina lai Muha-a, tàka welina la boku -hii kàrimbu tau la lodu hangahu. 23 Jàka ningu biduai tau pakàri la lodu hangahu, ka àmbu peku panggaya na ukuna i Muha ka ni hi karaü-ininggai eti Nyungga rukuna ba ku-pahàmu hàlaya na ihi dana tau la lodu hangahu? 24 Àmbi patanda palii pinungu-du, tàka mata kai wànya na matànji bai pa-tandangu. 25 Ninja da tau Yeruhali: Nda jia-aya ni na pahimbu-da ànda ka pameti-ya ba wàda? 26 Ka ni, hi panii hawewa pàku-ananya, tàka hi nda nggàra wàda bianya. Dapi hàmunya ihu ni da ma-pangora, ba jiaya na Karitu ai? 27 Na tau yiana, tapi-manya na paweli-na, tàka na Karitu, jàka natàka, nda tapi-anya na paweli-na, da mawàda. 28 Ka wara-nanyaka i Yehu ba na-papekangu daa la uma Ala: Nyimi itanda-ka dàngu mipi-mbunya na paweli-nggu; na nyuna nda wàngu-anggunya eti wikinggu ba kumai, tàka ninya na Malànga-tàka ma-paràha-ngga, na panda tandami nyimi. 29 Nyungga kutanda-ya, maa ba welinggu lai Nyuna, dàngu ba Nyunadu na ma-paràha-ngga, wànanja. 30 Ka tayàpa-ya wàda, tàka nda ningui haàtu ma-palaku-nya lima, maa ba ndedi jia-duya na rehina. 31 Nadangu la koru tau dangu da mawaiya: Jàka natàka ngeru na Karitu, dangu-dapa ihu da tanda pa-patumbu-na welingu la pa-patumbu-na yiana? wàda. 32 Ba darongu-yaka da tau Parihi, ba kambunguku tudanya nu parai tau dangu, ka paràhangu-danyaka tau payàpa-ya. 33 Ka panii-nanyaka i Yehu: Hawutu-kianaka ba ningga lai nyimi, hàla laku-nggunyaka duku la Ma-paràha-ngga. 34 Napa mihimbu-ka tàka ndai hunggu-akapa, dàngu la ngia paningga Nyungga ndai ngalangua patàka, wàna. 35 Nu ka panii-danyaka dàngga anguda da tau Yahundi; Nggii kulaku ningu wànaka ihu ni, hi nda ta-ngalangu nyuta pahunggu-ya? Jia laku-nakaka la ma-tanyalangu la koru tau Nggarika la pa-papeka-nya na tau Nggarika? 36 Nggàraya wàna ihu, napa mihimbu-ka tàka ndai hunggu-kapa, dàngu la ngia paningga Nyungga.ndai ngalangua patàka nyimi ba wàna? wàda.

Na wai paluri wàngu

37 La lodu njàpu remi, na lodu bokulu ba wàda, ndolaku-nanyaka i Yehu hi nawara: Jàka nggaa mamadau, màtawa ka namai lai Nyungga, ka na-ngunungu. 38 Na mapawai lai Nyungga, hama tuna na maninya la Huratu, napa da-manama welingu la etina da luku wai luri, wàna. 39 Ba napanii tuna nu, lananya i Ngahu, na pangala-da tal da mapawai lai Nyuna; nu ba ndedi ninyapa i Ngahu, ba ndedi pa-pabunjuku-duyaipa i Yehu. 40 Ninja hawiangu la tau dangu, ba darongu-haka nu da kareuku: Yiana jia lànga-tàka-mayaka na wunangu, da mawàda. 41 Hawiangu: Yiana jia-yaka na Karitu, wàda. Hawiangui: Jia welina la Nggalilia-kaka na Karitu? 42 Mala la wàlana i Ndautuya, la Mbaitulehingu, na ngia pa-ngiangu-na i Ndautu, na paweli-na na Karitu, nda wàna-a la Huratu? wàda. 43 Nu ka kawita-nanyaka na tau dangu rukuna Nyuna. 44 Hawiangu ka tayàpa-ya wàda, tàka nda ningua haàtu ma-palaku-nya lima.

Ba na-kahiri-ya i Miri Yehu paraïna i Nikondemu

45 Nu ka beli-danyaka da tau papalewa-da da ratu pangora dàngu da tau Parihi, tàka nyuda: Nggikina hi ndai ngàndiya, hi wàdanja. 46 Napaha da tau papalewa: Ndedi ninguma haàtu mapanii tungu nu, hama tuna na tau nuna, hi wàda. 47 Tàka hi dahema da tau Parihi: Ka nyimi, pa-panyonga-mbu-kaika? 48 Jia ningu-kaka wàmi la ma-pangora ndia la tau Parihi na mawaiya? 49 Yi, na tau dangu pàku yiana na manda pinya na uku, pa-ràtungu-yaka, wàdanja. 50 Nanapa-ya i Nikundemu, na haàtu na anguda, na mamai lai Yehu àmangu: 51 Mala na ukunda na-panjala bia nàhu tau, dàngu ndedi ronguya na paniina, ka pinya na pa-patumbu-na? hi wànanja. 52 Tàka dahema nyuda: Nyumu ma-welingu la Nggalilia-mbukau? Manginjiru pàkuya kau pinya, nu la Nggalilia ba nda ningua wunangu ma-hadangu, hi wàda. 53 Nu ka maràngga beli-danyaka la umada.

Na rukuna na kawini kajari

8:1 Tàka i Yehu laku-nanyaka la palindi Haitungu. 2 Hadangu la mbaru, ni beli-nyaika la uma Ala; ka mai-nanyaka na tau danguka lai Nyuna. Ka uhuku-nanyaka, hi na-papeka-nja. 3 Tàka da mapingu uku dàngu da tau Parihi dangàndi-ya na kawini, na patoma-da ba talànga tuna manjala, hi da-pandolaku-ya la padua: 4 Ngguru, yiana na kawini pa-tomangu-ya ba talànga tuna manjala. 5 Na pa-paràha-na i Muha, pinjalu-nya watu badi na kawini tungu nu, wànanda la huratu uku. Mala Nyumu, nggikina wàmu? wàdanya. 6 Hi kiri panii tudanya nu, ka takama wànya, ka peku panjala-ndanya, wàda. Tàka i Yehu karuduku-nanyaka hi na-huratu wàngu limana la tana. 7 Nu ba paàra panua-madanya, ka ndolaku-nanyaka: Na manda ningu njalangu lai nyimi, mata ka na-mangilu la pa-pinjalu-nya watu na kawini hi wànanja. 8 Hàla, hili karuduku-nanyaka, hi na-huratu la tana. 9 Ba darongu-yaka nu, laku ha-kaàtu-ha-kaàtungu-danyaka, piti welingu la ma-maaya lundu dalaku ndàbaha; ka didi-kia-yaka i Yehu dàngu na kawini na maninya nu la padua. 10 Nu ba na-ndolaku-ka i Yehu, hi napanii dànya na kawini: Ha ràmbu, ka nggiihaka nyuda? Nda haàtu biai ma-panjala-kau? hi wànanya. 11 Nanapa-ya nyuna: Nda haàtua Miri, hi wàna. Tàka i Yehu: Jàka tuna nu, Nyungga nda ku-panjala-mbukau. Lakuwa, àmbu hili tudupa manjala, hi wànanya.

I Miri Yehu na ma-hambila la pinu tana

12 Ka hili panii-nanjaka i Yehu: Nyungga jiaka na hambila na ma-paharii-ya na pinu tana. Na makiku-ngga Nyungga, nda jia liiana la kapàtangu, tàka mangu-nanya na hambila, nu na luri, wàna. 13 Tàka da tau Parihi: Nyumu hakahiingu-munya wikimu, nda na-àndangua na pa-hakahii-mu, hi wàdanya., 14 Nanapa-ya i Yehu: Jiapa ku-hakahiingu-kadu wikinggu, na-àndangu-mbu na pa-hakahii-nggu, ba kupi-dunya na ngia paweli-nggu dàngu na ngia pa-hanggangu-nggu; nyimi ndai pianya na ngia paweli-nggu dàngu na ngia pa-hanggangu-nggu. 15 Nyimi nunju-minya toluma-a bai pa-tandangu, Nyungga nda ningua haàtu pa-patanda-nggu. 16 Jàka ku-patandangu-kai, na-padeningu-mbu na pa-tandangu-nggu, ba nda didi meha-aka, ba angu-manggunya na Ma-paràha-ngga. 17 Dàngui nimbunya la huratu ukumi: Na pa-hakahii-da da tau madua, na-àndangu ba wàna. 18 Nyungga ma-hakahiingu wikinggu, hamanai i Ama na ma-paràha-ngga na-hakahii-mbunya na rukunggu hi wànanja. 19 Tàka nyuda: Ka nggiiya na Amamu? hi wàdanya. Nanapa-ya i Yehu: Nyungga ndai tandaaka, hamanai na Amangu ndiambu. Jàkai tandaka Nyungga lati, mitanda-mbuya na Amanggu, hi wàna. 20 Nuda da kareuku, la pangia pàti hungguya na panii niha, ba talànga pa-pekangu-na la uma Ala; nda ningua mayàpa-ya, ba ndedi jia-duyapa na rehina.

Na pa-tayaku dànanja da tau Yahundi i Miri Yehu

21 Ka hili panii-nanjaka: Nyungga laku-nggunyaka, napa ihimbu-ka, taì hii meti ngàndiya na njalami; la ngia palaku-nggu Nyungga, nyimi nda peku tàka-ami, wànanja. 22 Nu ka panii-danyaka da tau Yahundi: Ka ku-pameti wikinggu wànaka ihu, la ngia palaku-nggu Nyungga nyimi nda peku tàka-ami hi wàna? hi wàda. 23 Nanapa-ya i Yehu: Nyimi weli waami, Nyungga weli ditanggu, nyimi welimi la pinu tana yiana, Nyungga nda welinggu la pinu tana yiana-a. 24 Jia-duya, taì imeti ngàndiya na njalami, hi kiri wànggunggai. Nadu jàka ndai pawaima ba jiaka Nyungga, meti ngàndi-minyaka tai na njalami, hi wànanja. 25 Tàka nyuda: Nggamukau Nyumu na? hi wàdanya. Nanapa-ya i Yehu: Nggàra-yaipa hi kupanii dànggami? 26 Nadangu-pa lati na papanii dàngu na pa-patandangu ba wànggu, na rukumi nyimi. Tàka na Ma-paràha-ngga ma-palànga-tàkangu-ya; Nyungga duku, na parongu-nggu lai Nyuna jiambuya na papanii-nggunya na pinu tana, hi wànanja. 27 Tàka nda dapi-anya ba jiaya na rukuna i Ama na papanii-nanja. 28 Jia-duyaka hi napanii-nja paraïna i Yehu: Jàkai pajangga-yaka tal na Ana tau, hinaka hii pingga ba jiaka Nyungga, dàngu ba nda ningua ngga-nggàra pa-patumbu mehanggu, na nyuna nunju-nggunya na papeka-nangga i Ama ba kupanii-ha yiada. 29 Dàngu na Ma-paràha-ngga nimanya lai Nyungga, nda na-dunjaku meha-angga, nadu ba hi mànu-manggunya na paora-na, hi wàna.

Rukuna na ma-tubangu na ma-pamarandeka

30 Ba napanii tuna nu nadangu na mawaiya. 31 Nu ka panii-nanjaka paraïna i Yehu da tau Yahundi da mambàda pawai lai Nyuna: Jàkai padaingu la pulunggu, jia hi papanau lànga-tàka-nggunggai. 32 Napa hii pi wànya na ma-tubangu, tàka na ma-tubangu hi na-pamarandeka-kai, wàna. 33 Napaha nyuda: Nyuma wàlana i Ambarahangu-kama, ndedi handàkangua ba naata-nggama tau, ka ni, napa i-marandeka hi jia wàmu bia, hi wàdanya. 34 Nahema i Yehu: Lànga-tàka-manggunggai, na matu manjala, ata-nanya manjala. 35 Na ata nda jia padaingu lupa-ana la kuru uma, jiaya na ana-a duna na-mapadai lupangu. 36 Jia-duya, jàka na-pamarandeka-kai paraïna i Ana, jiaya hii marandeka palànga-tàkangu. 37 Kupinya ba wàlana i Ambarahangu-kai, tàka himbu-minggai ànda la pa-pameti-ka, nadu na pulunggu ba nda ningua ka-naina lai nyimi. 38 Nyungga na pambàda itanggu lai Ama jiaya na papanii-nggu, hama-mbuna nyimi, na parongu-mi la amami jiaya na pawunda-mi, wànanja. 39 Napaha nyuda: Jiaya i Ambarahangu duma na amama, wàdanya. Tàka i Yehu: Jàka anana i Ambarahangu-kai, miwunda-ya badi na pawunda-na i Ambarahangu. 40 Tàka nàhu himbu-minggai ànda la pa-pameti-ka, na tau na mambàda panii-nggainya na ma-tubangu, na parongu-na lai Ala. Nda tuna nua i Ambarahangu. 41 Nyimi na, ràma-minya na paràma-na na amami, hi wànanja. Napaha nyuda: Nda ruku kajaria duma hi madedi. Haàtu-ana duma na Amama, jiaya i Ala, hi wàdanya. 42 Tàka i Yehu: Jàka jiaya i Ala na Amami, imbuhangga lati, maa ba welinggu lai Ala-duka hi ningga yiahu; ba nda wàngu-nggunya eti wiki-anggu ba kumai, tàka Nyuna na ma-paràha-ngga. 43 Ka ni hi ndai pinya na paniinggu? Maa ba ndai ngalangu-du parongu-ya na pulunggu. 44 Nyimi welimi lai kambàliku, na amami, dàngu na pambuha-na na amami na paora-mi la panunju-ya. Nyuna ma-pameti tauya welingu la kawunga-na, nda na-ndolaku-nya na ma-tubangu, maa ba nda ningudu ma-tubangu lai nyuna. Jàka napanii ma-kambàliku, panii-nanya nunjuya na hurina, maa ba ma-kambàliku-duya dàngu ama kambàliku-ya. 45 Tàka Nyungga, rukuna ba kupanii-ya na ma-tubangu-du hi ndai waika. 46 Nggamuya lai nyimi na ma-pabowangu ruku njalanggu Nyungga? Jàka kupanii ma-tubangu ka ni hi ndai waika? 47 Na ma-pawelingu lai Ala na-patingi-nja da puluna i Ala, Jia-duya hi ndai pa-tìngingu ba nda welimi lai Ala, hi wànanja. 48 Napaha da tau Yahundi: Mala nda tuba-ana, tau Hamaria-ya dàngu pa-huruku wàndiya ba wàmanggau? hi wàdanya. 49 Napaya i Yehu: Nyungga nda huruku-anangga wàndi, tàka tembi-nggunya na Amanggu, ba tuna nyimi paaka bia-mingga. 50 Nyungga, keha ka natembi-ka tau nda wànggua; ninya duna na haàtu na ma-kehangu dàngui na ma-patandangu. 51 Lànga-tàka-manggunggai, jàka nggamu ma-pamàndu-nya na pulunggu, nda jia itangu-ana meti lundu nu-nu, hi wànanja. 52 Tàka da tau Yahundi: Nàhu pi-manggauka ba huruku-nanggau. I Ambarahangu mbàda meti bia-naka, hamanai da wunangu, tàka Nyumu: Jàka nggamu ma-pamàndu-nya na pulunggu, nda jia pàdangu-ana meti lundu nu-nu wàmui? 53 Ka jia rihi-munya-kaka i Ambarahangu, bokuma, na ma-mbàda meti? Hamanai da wunangu mbàda meti-mbudaka. Ka nggàra-makaka wàmu? hi wàdanya. 54 Nanapa-ya i Yehu:Jàka ku-pabunjuku wikinggu, nda nggàra ndokua linguna na bunjuku-nggu; na Amanggu duku na ma-pabunjuku-ka, jia-duyaka na Alanda ba wàmi. 55 Nyimi ndai tanda-aya, tàka Nyungga kutanda-ya. Nda kutanda-aya jàka wànggu, hama-du-nggunggaika, ma-kambàliku-dukaka. 56 I Ambarahangu na bokumi, rinju mbaha eti-mananya la paita-ya na lodunggu; naita-mayaka ka hawola-nanyaka, hi wànanja. 57 Ka panii-danyaka da tau Yahundi: Ndedi lima kambulu ndaumbumu, mbàda ita bia-munya i Ambarahangu? hi wàdanya. 58 Nanapa-ya i Yehu: Lànga-tàka-manggunggai, ba ndedi ni-mbunya i Ambarahangu, Nyungga ninggaka, hi wànanja. 59 Nu ka putu madua-danyaka watu, ka ta-nàhaku-nya ba wàda. Tàka i Yehu hi na-pahapindingu wikina, hi naluhu welingu la uma Ala.

Na màlaru-na na madedi poki

9:1 Nàhu ba nalaku, ita-nanyaka na mapoki welingu ba nadedi. 2 Nu ka paàra-danyaka da papanau-na: Ngguru, nggamuya ihu na manjala, hi kiri dedi pokina, na tau nina, ndia hi inana amana, hi wàdanya. 3 Nanapa-ya i Yehu: Nda nyuna-a na manjala, nda ina ama-mbuna, tàka jiaya ka peku pa-itangu-ya na paràma-na i Ala lai nyuna. 4 Ba talànga hariina taràma-ha badi da paràma-na i Ala na ma-paràha-ngga, napa nàmunya na rudungu na rapa nda peku ràmana na tau. 5 Ba talànga ningga la pinu tana, paharii wàna na pinu tanaka, hi wànanja. 6 Ba nahàla-ka papanii tuna nu, pangànji-nanyaka la tana, hi na-unggulu wànya kapihaku na wai iluna, hi naperi-nya na kapihaku la matana: 7 Lua kau baha wikimu la ngia paihu la Hiluangu - pa-parà-hangu wàna jàka hilunya - hi wànanya. Ka lua-nanyaka hi nabaha wikina, hi nabeli dàngu itana. 8 Nu da angu kotaku-na dàngu hawiangu da mapinya àmangu ba nakarai hunggu: Nda jiaya ni na makàli mandapu pakarai tuma? hi wàdanya. 9 Hawiangu: Jia-mayaka, wàda; hawiangui: Ndia-a, hama-ana, wàda. Nyuna wiki: Jia-makaka, wàna. 10 Napaha nyuda: Nu ka nggiki biana hi da-pabulangu da ma-tamu? hi wàdanya. 11 Hi nahema nyuna: Na tau, i Yehu ba wàdanya tamuna, na-unggulu kapihaku hi naperi-nja da matanggu. Hàla kau laku la ngia paihu la Hiluangu, kau baha, wàna. Ka laku-nggunyaka, hàlaka pabaha, ita-nggunyaka, wàna. 12 Tàka: Ka nggiiyaka nàhu, hi wàdanya. Nda kupi-anya, hi wàna. 13 Nu ka ngàndi-danyaka na mapoki kawai la tau Parihi. 14 Nu na lodu pa-unggulu wàna kapihaku i Yehu, dàngu ba na-pabula-nja da matana, lodu hangahu-ya. 15 Ka hili pa-àrangu-danyaka da tau Parihi, jàka nggiki biana hi na-pabulangu. Nanapa-ya nyuna: Naperi-nja kapihaku da matanggu, hi kubaha, hi ku-pabulangu, hi wànanja. 16 Tàka hawiangu da tau Parihi: Na tau yiana nda paweli-na lai Ala-a, maa ba nda na-pamàndu-dunya na lodu hangahu, wàda. Hawiangui: Nggiki hama ngalangu biana na tau njala la pa-patumbu tanda tungu nu, wàda. Ka kawita-danyaka. 17 Nu ka paàra-danyaka na mapoki: Mala nyumu, nggàraya wà-mu, ba na-pabula-dunjaka da matamu? hi wàdanya. Wuna-ngu-duya, hi wànanja. 18 Tàka da tau Yahundi nda dawai-aya ba napoki la wungana hi na-pabulangu nàhu, hi lupa dapaau-nja da inana da amana na mabidi ngita. 19 Hi da-paàra-nja: Nina jiaya na anami na madedi poki ba wàmi? Ka ni hi pa-bulangu bia-nanyai? hi wàdanja. 20 Napaha da inana da amana: Mapinya nina ba ana-manya dàngu ba nadedi poki. 21 Na nyuna jàka nggikina ni hi jia pa-bulangu biana, nda mapi-anya, dàngu jàka nggamuya na ma-pabula-nja da matana, nda mapi-anya. Ipaàra wiki bianya; matua-madu-nanyaka, mata ka napanii-yaka na ngera wikina, hi wàda. 22 Hi dapanii tuda nu da inana da amana, mangàdatu-danja da tau Yahundi. Jàka era ningu mapeka-ya i Yehu ba Karitu-ya, wàrunya badi welingu la uma bungguru, wàda. 23 Jia-duya, matua-madu-nanyaka, paàra wiki bia-minya, hi kiri wàda da inana da amana. 24 Nu ka hili paau-danyaka na mapoki kawai: Tembi niya i Ala. Mapinya nyuma na tau nuna, ba tau njalaya, wàdanya. 25 Nanapa-ya nyuna: Jàka tau njalaya duna nda kupi-anya. Hau-ma-ana duku na papinggu: Nyungga mapoki-ka, nàhu pa-bulangu-nggunyaka, hi wàna. 26 Tàka nyuda: Ka nggiki bia-nanggau? Nggiki pabula bia-nanja da matamu? hi wàdanyai. 27 Nanapa-ya nyuna: Mbàda panii-madu-nggunggainya-ka, tàka ndai rongua. Nggikina hili ronguya hi wàmi? Ka papanau-nanda wàmimbu ihu nyimi? hi wànanya. 28 Nu ka payudi-danyaka: Nyumu dumu papanau-na Nyuna-kau, nyuma duma papanau-na i Muha-kama. 29 I Muha mapi-manya duma ba napanii-nyaka paraïna i Ala, tàka na tau nuna nda mapi-anya jàka nggii paweli-na, hi wàdanya. 30 Nanapa-ya na tau: Yiana-mayaka na pa-hàngataru wàngu: Nyimi ndai pianya jàka nggii paweli-na, tàka pabula-nanja padua-ka da matanggu. 31 Tapi-manya, na tau njala ba nda narongu-ya paraïna i Ala, mbulungu na malumu-nya dàngu na manunju-ya na pambuha-na na parongu-na. 32 Weli nungu ndedi parongua ma-pabulangu mata tau madedi poki. 33 Jàka nda paweli-na lai Alama Nyuna, nda jia ngalangu-ana lati pa-patumbu ngga-nggàra, hi wànanja. 34 Ka hema-danyaka: Nyumu dedimu la manjala juama-a, ka papeka-nja wàmu-nggama ai? wàdanya. Nu ka wàru-danyaka la hambeli. 35 Ka rongu-nanyaka i Yehu na wàru-danyaka la hambeli; ba na-tàbuku-yaka hi napanii-nya: Mala nyumu muwai-yaka na Ana tau? hi wànanya. 36 Nanapa-ya nyuna: Ka nggamuya nu Miri, ka peku wainggunya, hi wàna. 37 Tàka i Yehu: Mbàda ita-ma-munyaka, na mapanii dànggau jia-mayaka, hi wànanya. 38 Nanapa-ya nyuna: Kupawai-ka, Miri, hi wànanya. Ka marubuku-nanyaka la hanggana. 39 Ka panii-nanyaka paraïna i Yehu: Jia la parata wai ngera-maka, hi kiri mainggu la pinu tana, mata da manda ita ka peku itada, dàngu da maita ka dapoki, hi wàna. 40 Nu ka rongu-danyaka hawiangu da tau Parihi da maninja la lihina: Ka mapoki-mbu-kamaka nyuma yia? hi wàdanya. 41 Nanapa-ya i Yehu: Jàkai poki lati nda ningua njalami. Tàka nàhu, maita wàmi, jia hi na-padaingu na njalami, hi wànanja.

Rukuna na mini pawangu na mahàmu

10:1 Lànga-tàka-manggunggai, jàka nggamu na manda lii la ngaru pindu ba natama la oka mbimbi, tàka na mahei ningu la hau pangia, ma-manganga-ya dàngu ma-rambangu-ya. 2 Na nyuna na matama lii la ngaru pindu, mini pawangu-ya na mapawa-nja da mbimbi. 3 Nyuna na-bunggahu-nya pindu paraïna na madai pindu, tàka da mbimbi hi da-katàmbalu-nya na nggoruna, hi napaau wànja tamuda da mbimbi wikina, hi nangàndi-ha la hambeli. 4 Ba na-paluhu ndàba-haka da mbimbi wikina, mangilu-nanjaka, tàka da mbimbi hi datundu-nya, maa ba datanda-duya na nggoruna. 5 Tàka na tau hawiangu nda jia tundu-adanya, tàka dapalai-ma-anya ba nda datanda-duya na nggoruna na tau hawiangu, wànanja. 6 Nuna na pangerangu, panii-nanja nyuda lati paraïna i Yehu, tàka nyuda nda dapi-anya jàka nggàra wàna na papanii-nanja. 7 Hi nahili paniinjai i Yehu: Lànga-tàka-manggunggai, Nyungga yia jiaka na pinduda da mbimbi. 8 Mbuu ndàbana na mamai mangilu-ngga, ma-manganga-ha dàngu ma-rambangu-ha; tàka da mbimbi nda da-katàmbalu-anja. 9 Nyungga jiaka na pindu. Jàka nggamu na matama liika Nyungga, mara-nanyaka, napa hi natama luhu hi na-hunggungu pangangu. 10 Na ma-manganga jia-aya la pa-manganga, la parupu dàngu la pa-pamolungu hi namai. Na mainggu Nyungga ka peku ngalangu-da paluri wàngu dàngu pa-mbokaru wàngu, wànggu. 11 Nyungga jiaka na mini pawangu na mahàmu. Na mini pawangu na mahàmu na-pajàma-nya na lurina lumuda da mbimbi. 12 Tàka na pa-kahewa, na nda mini pawangu, na manda mangu wikinja da mbimbi, naita-yaka nàmunya na ahu rumba, dunjaku-ma-ananja da mbimbi hi napalai. Tàka na ahu rumba yàpa-nanjaka hi na-paiha-ihanja. 13 Na tau pa-kahewa hi napalai, ba tau pa-kahewa-aya duna, nda nainga-aha da mbimbi. 14 Nyungga jiaka na mini pawangu na mahàmu, kutanda-ha da mangunggu, tàka da mangunggu datanda-mbuka Nyungga, 15 hama tuna i Ama ba natanda-ka Nyungga, Nyunggai duku ba kutanda-ya i Ama, hi ku-pajàma-nya na luringgu lumuda da mbimbi. 16 Ninjaipa hawiangu da mbimbinggu, da manda welingu la oka yiana; nudambu kungàndi-ha badi, hi da-katàmbalu-nya na nggorunggu tai, hi lupa na-mbulungua na kabàba-da dàngu hi haàtu-ana na mini pawangu. 17 Jia-duya hi nambuha-ngga i Ama, nadu ba ku-pajàma-dunya na luringgu ka peku piti beli-nggunyai. 18 Nda ningua maàli-ngganya, Nyungga wikima-a ma-pajàma-nya. Ngera-nggunya la pa-pajàma-nya dàngu ngera-mbunggunya la papiri beliya. Yiana na pulungu na pangala-nggu lai Ama, wànanja. 19 Nu ka hili kawita-danyaika da tau Yahundi rukuna yiana na kareuku. 20 Dadangu lai nyuda: Huruku-nanyaka, katoba-nanyaka, nggikina hii patingi-nya, da mawàda. 21 Hawiangui: Yiana nda kareuku tau pa-huruku-aya. Jia ngalangu-nakaka na wàndi pa-pabulangu mata mapoki? wàda.

Na paniina i Miri Yehu ba jia na remi pa-matua uma Ala

22 Nu la Yeruhali rehi-nanyaka na remi pa-matua uma Ala, urangu-ya. 23 Ka wenangu-nanyaka i Yehu la uma Ala la kawindu Halemangu. 24 Nu ka winggiru-danyaka para'ida tau Yahundi: Pira mandai-manapa bau pa-hondaru-ha da etima? Jàka jia-dukau Nyumu na Karitu, panii pangala-nggamanya, hi wàdanya. 25 Nanapa-ya i Yehu: Mbàda panii-madu-nggunggaika, tàka ndai pawaia; da paràma da paràma wànggunya na tamuna na Amanggu, jia-mahaka da ma-hakahii-nya na rukunggu. 26 Tàka nyimi ndai pawaia, maa ba nda angu-dudanggai da mbimbinggu. 27 Da mbimbinggu da-katàmbalu-nya na nggorunggu, dàngu Nyungga kutanda-ha hi datundu-ngga padua, 28 dàngu kuwua-nja luri pa-lupangu, hi nda da-molungu lundu nu-nu, dàngu nda jia ningua maramba-nja welingu la limanggu. 29 Na pawua-nangga na Amanggu narihi ndàba-nyapa, dàngu nda ningua majia ngalangu paramba-nja welingu la limana i Ama. 30 Nyungga dàngu i Ama mbulungu-ma, wànanja. 31 Nu ka hili piti-danyaka watu da tau Yahundi ka ta-nàhaku-nya ba wàda. 32 Nanapa-ya i Yehu: Dadangu-maka lati da paràma mahàmu da ma-welingu lai Ama da pa-paita-nggunggai, mala nggàra paràma-yaika, nàhaku-nya watu, hi kiri wàmingga, hi wànanja. 33 Hi dahema da tau Yahundi: Nda rukuna na paràma-mu na mahàmua nàhaku-nya watu hi kiri wàmanggau, jia-aya bau palapingu, Alaka ba jia wàmu bia, ni ba tau-madukau, hi wàdanya. 34 Nanapa-ya i Yehu: Mala nda nianya la huratu ukumi: Alalia wànggunggai-ka, ba wàna? 35 Mala Alaha jàka wàna bidua-njai da tau da patàka-na na puluna i Ala, màlai na ihina na Huratu ba nda peku-ana la pa-nyanggaru-ya, 36 ka ni, pa-lapingu-nanya hi wàmi bianya na pa-pamatua-na i Ama, na pa-paràha-na yia la pinu tana, rukuna: Anana i Alaka ba wànggu? 37 Jàka nda kuràma-ha da paràma-na i Ama, àmbi waiduka. 38 Tàka jàka rama bidua-nggunja ka ndai waikakai, màtawa kai waiha nu da paràma, ka peku tanda ka peku pamàndu-minya, i Ama ba lai Nyunggaya dàngu Nyungga ba lai Amaka, wànanja. 39 Nu ka tayàpa-ya hi hili wàdanyai; tàka hi tamàhiku-ma-ananya welingu la limada. 40 Ka hili laku-nanyaka la hapapa luku Yarandingu, la ngia pa kawunga pa-runungu-na tau i Yuhani, hi na-ndàdiku lai nu. 41 Nadangu na tau na malua lai Nyuna: Nda ningumai nyuna tanda pa-patumbu-na i Yuhani, na nyuna na papanii-naka i Yuhani rukuna yiana na-padeningu hàlama, wàda. 42 Lai nu nadangu na tau na mawaiya.

Na pahada beli-nanya i Laharu paraïna i Miri Yehu

11:1 Ninya na tau na mahidu, i Laharu tau Mbaitani, la kotaku-da i Maria dàngu na anguna kawini i Maràta. 2 I Maria jiaya na maburi-nya mbii kati i Miri dàngu na ma-langora wànja lunggina da wihina. Nyuna na maana mini-nya i Laharu, nu na mahidu. 3 Ka pa-ràhangu-danyaka tau da ana winina lai Yehu: Miri, na tau na pambuha-mu, hidu-nanya, hi wàdanya. 4 Narongu-yaka nu paraïna i Yehu: Na hidu yiana nda nalua-aya la meti, tàka jiaya na pa-mangunju wàna i Ala, ka peku pa-mangunju wànya na Ana Ala, hi wàna. 5 Nyuna i Yehu nambuha-nja i Maràta dàngu na anguna kawini lupa i Laharu. 6 Ba narongu-yaka hiduna i Laharu, dàmbu lodu-naipa ba na-ndàdiku lai nu la ngia paninya. 7 Hàla, ka panii-nanjaka da papanaungu: Màlawa ka tabeli la Yundia, wànanja. 8 Napaha da papanau-na: Ngguru, bidi pàku-napa, ka tanàhaku-nya watu ba wàdanggau da tau Yahundi, tàka nàhu hili beli lai nàhu hi jia wàmu bia, hi wàdanya. 9 Tàka i Yehu: Mala nda ha-kambulu dàmbu njàmu-ana diini na lodu? Jàka nalaku la lodu na tau, nda na-tunjurua, maa ba naita-duya na harii la pinu tana yiana. 10 Tàka jàka ningu malaku wàngu rudungu, na-tunjuru, maa ba nda nidunya na harii lai nyuna, hi wànanja. 11 Nuya na paniina i Yehu; hàla: I Laharu na làngginda katuda-nanyaka, tàka ka kulua pabengi-nya wànggu, hi wànanja. 12 Napaha da papanaungu: Miri, jàka katuda-dua-nanya, na-hadangu duna taì, wàdanya. 13 Nu i Yehu la-nanyaka na metina duna, tàka nyuda jiaya na minjalu-na na katuda duna na palana wàda bia. 14 Nu hi napanii pangala-nja paraïna i Yehu: Nameti-ka i Laharu. 15 Dàngu nambaha na etinggu lumumi nyimi ba nda ningga lai nu, ka peku pawaimi; màlanda ka talua lai nyuna, wànanja. 16 Nanapa-ya i Tomahu, i Ndindimu ba wàdanya tamuna: Màlawa nyuna ka talua-mbu nyuta, ka tameti karia-nya, hi wànanja da anguna papanaungu. 17 Ba natàka-ka i Yehu, toma-nanyaka ba mbàda patu mbua lodu-manaka la reti i Laharu. 18 Nu la Mbaitani nalihi-nya la Yeruhali, ningu tilu mbua kiluana marauna. 19 Nadangu na tau Yahundi na mambàda mai lai Maràta dàngu i Maria la pa-panggaüru-ha rukuna na ana minida. 20 Nu ba narongu-yaka paraïna i Maràta na nàmunya i Yehu, lua-nanyaka pa-tàbuku-ya, tàka i Maria uhuku bia-nanya la uma. 21 Nu ka panii-nanyaka i Maràta: Jàka ninggau lati yiahu, Miri, nda nametia lati na ana mininggu. 22 Na nyuna nàhumbu kupinya, jiapa nda nggàraya pakarai-mu lai Ala, i Ala jiangu-ma nawua-nggaunya duna, wànanya. 23 Tàka i Yehu: Napa na-hadangu na ana minimu, hi wànanya. 24 Nanapa-ya i Maràta: Kupi-manya ba na-hadangu la rehi hadangu tai la hupu njàpuna, hi wànanya. 25 Tàka i Yehu: Nyungga jiaka na hadangu dàngu na luri. Na mapawai lai Nyungga, jiangu-ma naluri, jiapa nda mbàda meti-nakadu, 26 dàngu jàka nggamuya na maluri dàngu na mapawai lai Nyungga, nda jia meti-ana lundu nu-nu. Muwai-duya nu? hi wànanya. 27 Nanapa-ya i Maràta: Oo Miri, nyungga kupawai-ka ba jiakau Nyumu na Karitu, na Anana i Ala na mamai la pinu tana yiana, hi wànanya. 28 Tunaka nu lua-nanyaka hi napaau wininya i Maria, na anguna kawini: Ninya i Ngguru, napaau-nggau, hi wànanya. 29 Narongu-yakaka nuna, hadangu madua-nanyaka hi nalua tomaya. 30 Nu i Yehu ndedi natama-a la kotaku, jiapa bia-yapa la ngia pa-tàbuku-nanya i Maràta. 31 Nu da tau Yahundi da maninja lai Maria la uma, da ma-panggaiiru-ya na etina, ba daita-yaka ba jia hadangu biana, ndàki-danyaka, lua-nanya la reti pahii ningu wàda bia. 32 Ba natàka-ka i Maria la ngia paninya i Yehu, naita-yakaka, maràbaku-nanyaka la wihina: Miri, jàka ninggau lati yiahu, nda jia meti-ana lati na ana mininggu, hi wànanya. 33 Nu ba naita-yakaka paraïna i Yehu ba nahii, hamanai da tau Yahundi da mamai karia-nya ba dahii, mbumbaru-nanyaka la etina pa-kariangu hawina. 34 Ka nggini mi-bànjalu niya? hi wàna. Tàka nyuda: Mai kau tàngaru, hi wàdanya. 35 Ka hii-nanyaka i Yehu. 36 Napaha da tau Yahundi: Tàngaru ba nda uku mbuha-nanya, wàda. 37 Tàka hawiangu lai nyuda: Mala nina na mambàda pabula-nja da matana na mapoki, nda namàka-a pa-kahiri-ya yiana hi kiri nda metina? hi wàda. 38 Nu ka hili mbumbaru-nanyaka la etina i Yehu, hi nalua la reti; nu na reti liangu-ya, hi ninya na watu ndàbina. 39 Tàka i Yehu: Kilunya na watu, wàna. Nanapa-ya i Maràta na ana winina na mameti: Miri, jàmu waunaka, nàhu ba mbàda patu mbua lodu wànaka, hi wànanya. 40 Tàka i Yehu: Jàkau pawaima, jiangu-ma muita-ya na mangunju-na i Ala, nda wànggu-anggau? hi wànanya. 41 Nu ka kilu-danyaka na watu. Ka tangara-nanyaka i Yehu: A Ama, ku-pamalangu-nggau bau rongu-dukaka. 42 Kupi-manya duku bau rongu ma-mànu-maka; na nyuna lumuna na tau dangu na ma-winggiru-ngga hi kupanii, ka peku pawai wànguda ba Nyumu ma-paràha-ngga wànggua, hi wàna. 43 Ba nahàla-ka papanii tuna nu, ka wara pa-kodungu-nanyaka: Ha Laharu, luhuwa nàmu, hi wàna. 44 Ka luhu-nanyaka na mameti dàngu pa-yubuhungu-da da wihina da limana, hamanai na matana kamburungu bia-nanyapa tera podahu. Tàka: Ngguliya, mata ka nalaku, hi wànanja.

Na ratada da ratu pangora la pa-pameti-ya i Miri Yehu

45 Nadangu na tau Yahundi na mamai pa-tadalu-ya i Maria, nu ba da-tàngaru-yaka na pa-patumbu-na hi dapawai lai Nyuna. 46 Tàka hawiangui, dalaku-ha la tau Parihi hi dapanii-nja da pa-patumbu-na i Yehu. 47 Nu ka pauhi-danyaka na Bata Bokulu parai da ratu pangora dàngu da tau Parihi: Nggikina wànda-aka? Maa ba dadangu-duka da tanda pa-patumbu-na na tau yiana. 48 Jàka tamàta bianya la patuna nu, haromu napawai ndàba na tauka lai Nyuna; ka hadangu-du-nanyaka haromu na tau Rumu, hi nawàhi-ya na pangia-nda dàngu na banjaru-nda, hi wàda. 49 Tàka na haàtu na anguda, na ma-tamungu Kayapahu, na Ratu Bokulu la ndaungu nuna: Nyimi nda ningu ndokua papimi. 50 Ndai pangàda-mbunya ba nalingu lai nyimi, jàka haàtu-na na mameti lumuna na banjaru yiana, mili àmbu na-molungu ndàbadu nyuna na tauka, wànanja. 51 Tàka hi kiri panii tuna nu, nda wini eti-ananyai, jia ba ngaha paratu bokulu-ya la ndaungu nuna, jia hi nawuna-nya na rukuna i Yehu, ba nameti haromu lumuna nuna na banjaru, 52 dàngui nda lumuna nuna na banjaru bia, tàka ka peku kahau-mbunanja da ana Ala da ma-paihangu. 53 Piti welingu la lodu nu, batangu-danyaka la pa-pameti-ya i Yehu. 54 Jia-duyaka hi nda nahili pa-korungu wikina i Yehu la tau Yahundi, tàka welingu lai nu laku-nanyaka la tana ma-lihingu maràda telangu, la kotaku na ma-tamungu Eparaingu, hi na-ndàdiku lai nu dàngu da papanau-na. 55 Nu mareni-amanaka na remi Pahada da tau Yahundi. Nadangu na tau welingu la woka na mahei la Yeruhali ba ndedi natàka na lodu Pana, ka ta-hawari wikinda ba wàda. 56 Nu ka bimbu-danyaka i Yehu hi dapanii dàngga anguda nu la uma Ala: Mala nàmunya wàmi haromu la remi? hi wàda. 57 Nu da ratu pangora dàngu da tau Parihi, mbàda panii-danyaka na tau dangu: Jàka ningu mapinya nggiiya, mata ka napanii-ya ka peku yàpa-ndanya, wàda.

Na burinya mbìi kati i Miri Yehu la Mbaitani

12:1 Nomu bia-napa na lodu hi mangu pajia-ya na remi Paha, tàka-nanyaka i Yehu la Mbaitani la ngia paninya i Laharu, na pa-pahada belina welingu la padua mameti. 2 Hi dapama pambabu-nya lai nu, tàka i Maràta na mainga-ha tàka i Laharu jiaya na haàtu na anguda da ma-mandapu dànya pangangu. 3 Ka piti-nanyaka i Maria ba hakati-na na mbii kati narawatu ihi mbàngina, na mambotu wilina, hi naburi-nja da wihina i Yehu, hi na-langora wànja lunggina; ka hibu-nanyaka na uma ba na-hambungaru na mbii kati. 4 Tàka i Yunda Ihikariu, na anguda da papanau-na, na ma-kaleka-nya tai: 5 Nggikina hi nda padangga-anya ni na mbii kati ka kei wànya tilu ngahu ndinaru ka wuanja da mamila, hi wàna. 6 Tàka hi panii tuna nu, nda ruku-ana na namu-nanja da mamila, jia-aya ba tau manganga-ya, na makata-nya na kanai àmahu hi nakàli pitiha da papuhi lai nu. 7 Nanapa-ya i Yehu: Màta-nyaka, mata ka beri pahàmu-nanya nduma-na na lodu taningu-ka. 8 Da mamila hanii mànu-mada lai nyimi, tàka Nyungga nda hanii mànu-anggu lai nyimi, hi wàna. 9 Da tau Yahundi ba hau daada, pi-danyaka ba ninya lai nu i Yehu, hi kiri maida, nda mbulungu lumuna i Yehu, tàka ka peku ita-ndanya i Laharu na pa-pahada-na welingu la padua mameti, wàdambu. 10 Nu ka batangu-danyaka da ratu pangora la pa-pameti-ya i Laharu-mbu. 11 Maa ba nadangu-du na tau Yahundi da malua rukuna nyuna, hi dapawai lai Yehu.

Na tamana la Yeruhali i Miri Yehu

12 Hadangu harii, ba narongu-yaka tau dangu na mambàda mai la remi, na nàmunya i Yehu la Yeruhali, 13 piti-danyaka ru karumangu hi dalua pa-tàbuku-ya; ka kayaka-danyaka: Oha-naka, na-mànjaku maringu-wa na mamai wànya na tamuna i Miri, na Hanganji tau Ihirailu, hi wàda. 14 Na-ngalangu-ka heu kamboka kalandai i Yehu, hi na-kaliti-ya, hama tuna na maninya la Huratu: 15 Àmbu mangàdatu-du, ha bidi kawini Hiungu: Tàngaru, nàmunya na Hanganji-mu, na-kaliti ana kalandai, ba wàna. 16 La kawunga-na ndedi dapi-anya yiana da papanau-na. Na nyuna ba pa-mangunju-yaka i Yehu, hinaka hi danamu-ya, nu ba nimanya la Huratu na rukuna Nyuna dàngu na tudanya nu. 17 Nu ka hakahii-danyaka da tau dangu, da maninja lai Nyuna ba napaau-nya i Laharu paluhu welingu la reti, dàngu ba na-pahada-nya welingu la padua mameti. 18 Jia-duyaka hi kiri luana pa-tàbuku-ya parai tau dangu, ba darongu-duyaka na patumbu-nanya yiana na tanda. 19 Nu ka panii-danyaka dàngga anguda da tau Parihi: Ita mata-minyaka ba nda ningu ndokua lingumi, nàhu hàla-nyaka na ihi panggubulu awangu la pakiku-nya Nyuna, hi wàda.

Na panii-nanya na metina i Miri Yehu

20 Nu la angu tau mahei pa-hamayangu la remi, ninja da tau Nggarika hawiangu. 21 Dalua lai Pilipu, na tau Mbaituhaida la Nggalilia, hi dakarai-ya: Umbu, ka taita-ya i Yehu wàma lati, hi wàdanya. 22 Tàka i Pilipu, hi nalua lai Andaria, hàla lua-danyaka i Andaria dàngu i Pilipu papanii-nya i Yehu, 23 Nanapa-ya i Yehu: Tàka-nanyaka na rehina ba pa-mangunju-ya na Ana tau. 24 Lànga-tàka-manggunya ka kupeka-nggai: Jàka nda natama-ma la tana ka nameti na wini uhu, jia-jia-ma-aya ba hauna. Tàka jàka nameti, wua padangu-nanyaka. 25 Jàka nggamu na manamu-ya na lurina, jia hi na-yàmihu-ya, tàka jàka nggamu na mamayau-nya na lurina la pinu tana yiana, jia hi na-kahiri-ya, hi lupa nanduma-nya na luri pa-lupangu. 26 Jàka ningu tau ka kulumu-nya na ma-wànangga, natundu-ngga badi, dàngu jàka nggiiya na ngia paningga Nyungga, lai numbuya tal na malumu-ngga. Jàka nggamu na malumu-ngga, jiangu-ma tal ba natembi-ya paraïna i Ama. 27 Nàhu lalu handuka-ya na etinggu; nggikina wàngguaka badi? A Ama, pamara àruka la rehi nàhu! Na nyuna jia-mayaika yiaiia, hi kiri tàkanggu la rehi nàhu. 28 A Ama, pa-mangunju-yawa na tamumu! hi wàna. Nu ka lingu-nanyaka welingu la awangu: Mbàda pa-mangunju-ma-nggunyaka, dàngu jiangu kuhili pa-mangunju-mayaipa tai, na mawàna. 29 Nu na tau dangu da maninja lai nu da matongu-ya: Kangguruku-ya, hi wàda, Hawiangui: Ninya na papalewa na mapanii dànya, wàda. 30 Nanapa-ya i Yehu: Nda. lumunggu Nyungga-a hi natàka yiana na lii, tàka lumumi nyimi. 31 Nàhu rehi-nanyaka ba patanda-nya na pinu tana yiana; nàhu jiangu-ka pa-wàrungu-ya la hambeli, na ngorana na pinu tana yiana. 32 Tàka Nyungga jàka pa-pajangga-kaka, taì hi kumeni ndàbaha lai Nyungga, hi wàna. 33 Yiana hi napanii-ya, pàmaü-nanya jàka nggàra metiya tai na pameti wàna. 34 Nu ka hema-nanyaka na tau dangu: Na parongu-ma la uku, na Karitu duna na-padaingu lundu nu-nu wàna; ka ni jiangu-ma badi tal ba pajangga-ya na Ana tau hi wàmui Nyumu? Ka nggamu-yaka nu na Ana tau? hi wàdanya. 35 Nanapa-ya i Yehu: Hawutu-kia-naka na pani wànya na hambila lai nyimi. Lakuwa ba talànga ninyapa lai nyimi na hambila, ka àmbu natoma-nggai kapàtangu. Jàka nggamu malaku la kapàtangu, nda napingua ngia pa-hanggangu-na. 36 Ba talànga ninyapa lai nyimi na hambila, iwaiya-wa na hambila, mata ka ana hambila-kai, hi wànanja. Ba napanii-njaka nu, laku-nanyaka i Yehu, hi na-winingu wikina lai nyuda.

Na nda pawaida da tau Yahundi

37 Jiapa ka nda hau daa-dakadu da tanda pa-patumbu-na la hanggada, nda dapawaia lai Nyuna. 38 Mata ka peku pa-tutungu-na na puluna i Yahaya, na wunangu: Nggamu-aka na mawaiya na parongu-na lai nyuma? Dàngu nggamu lai nyuna-aka na ngia pa-pawuwa-ya na Umana i Miri? ba wàna. 39 Jia-duyaka hi nda da-ngalangu papawai, maa ba nimanyai na patiki-na i Yahaya: 40 Na-papoki-haka da matada, dàngu na-patongguru-haka da etida, ka àmbu daita wàngu matada, ka àmbu dapingu wàngu etida hi da-pambelingu, hi ku-pamàlaru-ha, ba wàna. 41 Nu hi kiri peka-nanya paraïna i Yahaya, ba naita-duyaka na mangunju-na, hi napanii-ya na rukuna. 42 Jiapa ka nda tuna-kadu nu, dadangu-mbu da ma-pangora da mapawai lai Nyuna, na nyuna nda dapeka pawuwa-anya, lumuda da tau Parihi, ka àmbu dawàru-nggama welingu la uma bungguru, ba wàda. 43 Nadu, ka natembi-ta tau ba wàda parihi mbuhada, nda jia-aya na tembi-nanja paraïna i Ala. 44 Ka wara-nanyaka i Yehu: Na mapawai lai Nyungga nda jia-aka Nyungga pawaina, tàka na Ma-paràha-ngga duna. 45 Dàngu na mailu-ka Nyungga, ilu-nanya na Ma-paràha-ngga. 46 Na mainggu la pinu tana, mata ka ma-paharii-ka wànggu, jàka nggamu na mapawai lai Nyungga ka àmbu na-padaingu la kapàtangu. 47 Jàka ninya na marongu-ha da pulunggu, tàka hi nda pamàndu-nanjai, nda ku-panjala-aya Nyungga. Nadu ba nda mainggu pa-panjala-aya na ihi pinu tana, tàka mata ka pamàna-nya ba wànggu duku. 48 Jàka nggamu na mawàru-ngga dàngu na manda kataku-ha da pulunggu, nimanya duna na ma-panjala-ya la hupu njàpuna. 49 Nyungga ba nda wàngu-nggunya eti wiki-dunggu ba kupanii, tàka i Ama na ma-paràha-ngga, Nyuna na mahupu liingganya, jàka nggàraya na papeka-nggu dàngu jàka nggàraya na papanii-nggu- 50 Dàngu kupi-manya duku na hupu liina Nyuna, ba jiaya na luri pa-lupangu. Jia-duya na papanii-ngguka, nunju-nggunya na papanii-nangga i Ama ba kupanii-ya, hi wàna.

Na baha-nanja da wihida da papanau-na i Miri Yehu

13:1 Ba ndedi jia-yapa na remi Paha, pi-nanyaka i Yehu ba jia-yaka na rehina la pa-haleli welingu la pinu tana yiana lai Ama. Nu ba nambuha-nja da tauna da maninja la pinu tana, mbuha pangala-mananja lundu njàpuna. 2 Ba jia-yaka na pamangu rudungu, ba narunda-yaka paraïna i kambàliku na etina i Yunda Ihikariu, anana i Himungu, la pa-kaleka-nya i Yehu, 3 ba pi-mananya i Yehu ba mbàda pakata hàla-nanja la Umana paraïna i Ama, hamanai ba paweli-na lai Ala dàngu ba lai Alaya nalaku ningu, 4 hadangu-nanyaka nu la pamangu, hi na-bànjalu-ha da pakina, hi napiti hawàla tera hi na-borungu. 5 Hàlaka hi naburi wai la kaba julangu; ka pa-kiringu-nanyaka pabaha-ha da wihida da papanau-na, hi na-langora wànja na tera paboru-na. 6 Nu ba natàka-ka lai Himungu Peturu: Miri, Nyumu-maka badi mabaha-ha da wihinggu? hi wànanya. 7 Nanapa-ya i Yehu: Na pawunda-nggu Nyungga, nyumu ndau pianya nàhu, talpa badi la malamiri kau pinya, hi wànanya. 8 Nanapa-ya i Peturu: Ujàma ai-lulungu la pabaha-ha da wihinggu, hi wànanya. Napaya i Yehu: Jàka nda kubaha-makau nda ningua ngeramu lai Nyungga, hi wànanya. 9 Napaya i Himungu Peturu: Miri, àmbu jia biaha da wihinggu, màlambu da lima dàngu na katiku-nggu, hi wàna. 10 Nanapa-ya i Yehu: Na mambàda ihu, jàmangu la pabaha-ya, jiaha da wihi-ana, maa ba yahangu hàla-du-nanyaka; nyimi na yahangu-minyaka, na nyuna nda mbuu ndàba-ami, wànanja. 11 Maa ba pi-mananya jàka nggamuya tal na ma-kaleka-nya. Jia-duyaka nda mbuu ndàbaami ma-yahangu hi kiri wàna. 12 Ba nahàla-ka pabaha-ha da wihida, dàngu ba napaki-haka da pakina, mandapu beli-nanyaka. Nu ka panii-nanjaka: Mipinya nu na pawunda-nggunggai? 13 Nyimi: Ngguru, jaka ndia Miri, wàmingga; tàka tuba-mana ba wàmi, maa ba Nyungga-maduka. 14 Nyungga, na Miri, na Ngguru, jàka kubaha bidua-hai da wihimi, nyimimbu ipabaha wihi dàngga angumi badi. 15 Maa ba paita-dunggaika ngerangu, hama tuna na pawunda-nggunggai, mata ka jia-mayai na pawunda-mi nyimi. 16 Lànga-tàka-manggunggai, na ata nda jia rihi-ananya na mirina, hamanai na papalewa nda jia rihi-ananya na mapalewa-ya. 17 Jàkai pi-manjaka yiada, wangu-manaka dimi jàkai wànja. 18 Nda mbuu ndàba-ami palanggu; kupi-manja duku jàka nggamuha da papindi-nggu. Na nyuna ka peku pa-tutungu-na na maninya la Huratu: Na manganya na uhunggu, na-jakaru-nggaka tàndana la pa-kambara-ka, ba wàna. 19 Nàhu hi kupanii haha-nggainya ba ndedi natumbu, mata jàka natumbu-ka taì ka peku pawaimi, ba jia-makaka Nyungga. 20 Lànga-tàka-manggunggai: Jàka nggamu na mainga-ya na pa-paràha-nggu, inga-nangga Nyungga-maka, dàngu jàka nggamu na mainga-ka Nyungga, inga-nanya na Ma-paràha-manggaka, wàna.

Na panii-nanya na ma-kaleka-nya i Miri Yehu

21 Ba nahàla-ka papanii tuna nu i Yehu, ka mila mumuhu-nanyaka na etina, hi na-hakahii: Lànga-tàka-manggunggai, na haàtu na angumi nyimi tal na ma-kaleka-ngga, hi wànanja. 22 Ka maràngga pa-tàngaru-danyaka dàngga anguda, ba da-hondaru-nya na palana. 23 Na haàtu na papanau-na, na na pambuha-na i Yehu, mandapu hangera-nanya lai Yehu. 24 Nu ka kamàdiku-nanyaka yiana paraïna i Himungu Peturu: Tikiya, jàka nggamuya nu na palana, wànanya. 25 Ka pa-mbelingu-nanyaka la hanggana i Yehu: Miri, nggamuya nu, hi wànanya. 26 Nanapa-ya i Yehu: Na pa-dàtalu-nggu kawita kambamba^ dàngu na pawua-nggu, jia-mayaka, hi wànanya. Ka dàtalu-nanyaka na kawita kambamba, hi na-yàlitu-ya, hi nawua-nya i Yunda anana i Himungu Ihikariu, 27 Ba nakei-yaka na kawita kambamba paraïna i Yunda, ka huruku madua-nanyaka paraïna i kambàliku. Tàka i Yehu: Na pawuku-mu, mu-parengga-nyawa, hi wànanya. 28 Na nyuna nda ningu haàtu nu la angu mandapu-na mapinya jàka nggàraya na pawuku-na hi panii tuna nu. 29 Nadu hawiangu, ba ma-katangu kanai àmahu-ya i Yunda, lua kau keinda pa-lumungu wànda la remi, jàka ndia wuanja ngga-nggàra da mamila wànanya duna paraïna i Yehu, wàda bia. 30 Nu ba nakei-yaka na kawita kambamba i Yunda, ka luhu madua-nanyaka; ka rudungu-nanyaka.

Na uku bidi

31 Ba taliu-naka panii-nanyaka i Yehu: Nàhu pa-mangunju-yaka na Ana tau, hamanai i Ala pa-manguju-yaka lai Nyuna. 32 Jàka pa-mangunju-yaka i Ala lai Nyuna, jiangu-mbu na-pa-mangunju-mbu-duyaka Nyuna paraïna i Ala la mangunju wikina dàngu naluu pa-mangunju-maya duna. 33 Ha ananggu, hawutu-kia-naka na pani wàngga lai nyimi. Taì himbu-minggaka, tàka hama tuna na papanii-nggunja da tau Yahundi, la ngia pa-hanggangu-nggu ndai ngalangua patàka ba wànggunja, nàhu jia-mbuya na papanii-nggunggai nyimi. 34 Kuwua-nggai uku mabidi, màtawa kai pa-mbuhangu; hama tuna Nyungga ba kumbuha-nggai nyimi, mata nyimimbu kai pa-mbuhangu dàngga angumi. 35 Yiana-ya na papi wànanggai tauka ba papanau-nggu Nyunggakai, jàkai pa-mbuhangu dàngga angumi, hi wànanja.

Na deka-nanya na pa-hiningu-na i Peturu i Miri Yehu

36 Nanapa-ya i Himungu Peturu: Ngginika kulaku ningu wàmu nu Miri, hi wànanya. Nahema i Yehu: La ngia pa-hanggangu-nggu, ndau ngalangua nàhu la pakiku-ngga, hi wànanya. 37 Nanapa-ya i Peturu: Nggikina Miri, hi nda ku-ngalangu nàhu pakiku-nggau, ku-pajàma-manya duku na luringgu lumumu Nyumu, wànanya. 38 Nahema-ya i Yehu: Jia pajàma-munya-kaka na lurimu lumunggu Nyungga? Lànga-tàka-manggunggau, ba ndedi da-hakuku-mbu tal da manu, mbàda pa-ndilungu-muka la pa-pahini-ngga, hi wànanya.

Na pa-nggauru-nanja da etida da papanau-na i Miri Yehu

14:1 Àmbu da-hawina-du da etimi. Ipawai lai Ala, pawaiwa lai Nyunggambu. 2 La umana na Amanggu dadangu da ngia pa-ngiangu; jàka nda tuna mbàda peka-nggunggaika lati, nadu ba laku-nggunya pa-paloku-nggai pangia-mi. 3 Nu ba kulaku-ka ba kuhàla-ka pa-paloku-nggai pangia-mi, beli-du-nggunyaka taì hi kupiti karia-nggai mata la ngia paningga Nyungga ka lai numbukai nyimi. 4 Na ngia pa-hanggangu-nggu mipinya na ngarangia-na, hi wànanya. 5 Nanapa-ya i Tomahu: Miri, nda mapi-anya na ngia pa-hanggangu-mu, nggiki hama pi bia-manya na ngarangia-na, hi wàna. 6 Ka panii-nanyaka i Yehu: Nyungga jiaka na ngarangia dàngu na ma-tubangu dàngu na luri. Nda ningua haàtu majia tàka lai Ama, jàka nda naliika Nyungga. 7 Jàkai tandaka Nyungga lati, mitanda-mbu-duyaka na Amanggu. Piti welingu nàhu tanda-minyaka dàngu mbàda ita-minyaka, hi wànanya. 8 Nanapa-ya i Pilipu: Miri, paita àru-nggamanya i Ama, jiaka-ma-aka duma, hi wànanya. 9 Tàka i Yehu: Mandai bia-naka na ningga lai nyimi, nàhu ndau tanda-aka? Na mambàda itaka Nyungga, mbàda ita-ma-nanyaka i Ama, ka ni, paita-nggamanya i Ama, hi wàmui? 10 Ndau pawaima dumu, Nyungga ba lai Amaka dàngu i Ama ba lai Nyunggaya? Da kareuku da papanii-nggunggai Nyungga, nda wàngu-nggunya eti wiki-anggu ba kupanii-ha; tàka i Ama, na ma-ngiangu lai Nyungga duna na maràma-ha da paràma-na. 11 Miwai-kawa Nyungga ba lai Amaka, dàngu i Ama ba lai Nyunggaya; jàka ndia màtawa kai pawai rukuda nudaka da paràma. 12 Lànga-tàka-manggunggai, na mapawai lai Nyungga, jiangu-ma ba naràma-mbuha nyuna taì da paràma-nggu Nyungga, jiapa da marihi-nja yiada-kadu, maa ba laku-nggunya lai Amadu. 13 Jiapa nda nggàra-yakadu na pakarai wàminya na tamunggu, jiangu-ma ba ku-patumbu-ya, ka peku pa-mangunju-ya i Ama lai Ana. 14 Jàka ningu pakarai-mi lai Nyungga bai wànya na tamunggu, jiangu-ma duku ba ku-patumbu-ya.

Na panjanji-na i Miri Yehu rukuna i Ngahu Matua

15 Jàka mbuha-dimingga, jiangu-ma bai pamàndu-nja da ukunggu. 16 Dàngu Nyungga napa kukarai-ya i Ama, hi na-paràha-nggai Ma-panggaiiru haàtu, mata ka peku hanii mànuna lai nyimi lundu nu-nu. 17 Jia-duyaka i Ngahu na pangia ma-tubangu, na pa-nda ngalana la pa-kataku-ya parai pinu tana, maa ba nda naita-ya dàngu. ba nda natanda-duya, tàka nyimi mitanda-ya, ba hanii-duna lai nyimi, dàngu ba la eti-minya taì. 18 Nda jia pa-dunjaku ana mamila-anggunggai, kumaima duku lai nyimi. 19 Hawutu-amaki-naka ba nda nahili itaka na pinu tana, tàka nyimi miita-ka, maa ba kuluri-du tàka nyimi napa ilurimbu. 20 La lodu nu tal kai pinya, Nyungga ba lai Amaka, dàngu nyimi ba lai Nyunggakai, dàngu Nyungga ba lai nyimika. 21 Na mamangu-nja da ukunggu dàngu na ma-pamàndu-nja, jiaya na mambuha-ngga; dàngu na mambuha-ngga, nambuha-nya taì paraïna na Amanggu, hamanai Nyungga kumbuha-mbunya hi ku-pawuwangu wikinggu lai nyuna, hi wàna. 22 Nanapa-ya i Yunda, nda jiaya i Ihikariu: Ka nggikina duna Miri, hi pa-wuwangu bia-munyai wikimu lai nyuma taì, tàka la pinu tana yiana hi ndiai, wànanya. 23 Nanggepi-ya i Yehu: Jàka ningu mambuha-ngga, jiangu-ma ba na-pamàndu-nya na pulunggu, hi nambuha-nya paraïna i Ama, ka mai-manyaka lai nyuna tai hi ma-ngiangu lai nyuna. 24 Na manda mbuhangga, nda jia pamàndu-ananja da pulunggu; dàngu na pulungu na parongu-mi, nda pulunggu Nyungga-aya, tàka puluna i Amaya duna na ma-paràha-ngga. 25 Yiada mbàda panii-ngunggainja-ka ba ninggapa lai nyimi. 26 Tàka na Ma-panggaüru, na i Ngahu Matua, na pa-paràha-na i Ama tai lumuna na tamunggu, jia-yaka na ma-papeka-nggainja mbuu ndàbada, hi na-panamu-ngainja mbuu ndàbada da pambàda panii-nggunggai Nyungga. 27 Mapeku pa-bànjalu-nggunggai, na mapeku paruku-nggu Nyungga pawua-nggunggai; nda hama tuana na pakàli wuana na pinu tana na pawua-nggunggai Nyungga. Àmbu da-handuka-du da etimi dàngu àmbi mangàdatu-du. 28 Mbàda rongu-minyaka, nàhu laku-nggunya dàngu napa kubeli-maka duku ba wànggunggai. Lati jàka mbuha-mingga, jiangu-maka dimi bai hawola, ba laku-nggunyaka lai Ama, maa ba narihi-dunggapa i Ama. 29 Nàhu mbàda panii-nggunggainya-ka ba ndedi natumbu, mata napa jàka natumbu-ka, ka peku pawaimi. 30 Nda nahili dangu-apa na pa-kareuku wànggunggai, maa ba nàmu-dunyaka na ngora pinu tana, dàngu nda nggàra-a pa-ngala-na lai Nyungga. 31 Tàka, mata ka napinya-wa yia na pinu tana na mbuha-nggunya i Ama, dàngu ba kuliiya hama tuna na pa-paràha-nangga i Ama, hadangu-wa, ka talaku welingu lai yiahu, hi wànanja.

Na pingi angguru lànga-tàka

15:1 Nyungga jiaka na pingi angguru lànga-tàka, tàka na Amanggu jiaya na mangu wokangu. 2 Hau kahanga-hau kahanga lai Nyungga na manda tu wuana na-kàtahu-ya, dàngu hau kahanga-hau kahanga na matu wuana, na-pabulu-ya ka peku pa-rukangu-na pawua. 3 Nyimi mbàda yahangu-mika, rukuna na pulungu na pambàda panii-nggunggai. 4 Màtawa kai padaingu lai Nyungga, hamanai Nyunggambu lai nyimi. Hama tuna na kahanga ba nda jia ngalangu-ana patu meha wuana, jàka nda na-padaingu la pingi angguru, jia-mbuya nyimi ba ndia, jàka ndai padaingu lai Nyungga. 5 Nyungga jiaka na pingi angguru, nyimi kahanga-kai. Na ma-padaingu lai Nyungga, hamanai Nyungga lai nyuna, jiaya na ma-ràjingu wuana, nadu jàka nda jiaka Nyungga, ndai ngalangua pa-patumbu ngga-nggàra. 6 Jàka ninya na manda padaingu lai Nyungga, pa-wàrungu-yaka la hambeli hama tuna na kahanga, hi nameti; hàla hi ohuru-nja hi wàrunja la epi, ka mutungu-danyaka. 7 Jàkai padaingu lai Nyungga, hamanai da kareuku-nggu ka da-padaingu-mbu lai nyimi, karaiwa jàka nggàraya na pambuha-mi, jiangu-ma duna ba na-patutungu lai nyimi. 8 Yiana-duyaka na pa-mangunju wànguya na Amanggu jàkai wua padangu, nu papanau-du-nggunggaika.

Mata kai padaingu la mbuhangu-nggu, ba wàna i Miri Yehu

9 Hama tuna i Ama ba nambuha-ngga Nyungga, jia-mbuya Nyungga ba kumbuha-nggai nyimi. Mata kai padaingu nu la mbuhangu-nggu. 10 Jàkai pamàndu-nja da ukunggu, mi-padaingu la mbuhangu-nggu, hama tuna Nyungga ba ku-pamàndu-njaka da ukuna na Amanggu dàngu ku-padaingu la mbuhangu-na. 11 Yiada mbàda paiiii-nggunggainja-ka, mata na hawola-nggu Nyungga ka na-ngiangu lai nyimi, dàngu ka na-lànyapu na hawola-mi. 12 Yiana-ya na ukunggu, mata kai maràngga pambuhangu dàngga angumi, hama tuna Nyungga ba kumbuha-nggai nyimi. 13 Nda jia ningua marini mbuhangu-na, mbulungu-na jàka ningu ma-pajàma-nya na lurina lumuda da lànggina. 14 Nyimi lànggi-nggunggai jàkai liiha da pa-paràha-nggunggai. 15 Atalia nda wànggu-anggaipa, nadu na ata ba nda napi-anya na paliina na mirina; lànggi-nggunja mbàda wànggunggai-ka, nadu mbuu ndàbana na parongu-nggu lai Ama, ba mbàda panii-du-nggunjaka lai nyimi. 16 Nda nyimia mapindi-ka Nyungga, Nyungga mapindi-kai nyimi, hi ku-paràha-nggai kai laku kai tu wuami dàngu ka haniina na wuami, mata jàka nggàraya na pakarai wàminya na tamunggu lai Ama, ka nawua-nggaminya. 17 Yiada lii kupanii-nggainja, ka peku pa-mbuhangu-mi dàngga angumi.

Na karaü-nanja eti da pa-panaungu na pinu tana

18 Jàka na-karaü-nggai eti pinu tana, mata kai pinya padua, ba mbàda karaü mangilu-nanggaka eti Nyungga welingu lai nyimi. 19 Jàka ma-welingu la pinu tanakai, nambuha-nya lati na mangu wikina na pinu tana; tàka ba nda welimi la pinu tana, tàka hi Nyungga mapindi-kai welingu la pinu tana, jiaya hi na-karaü-nggai eti na pinu tana. 20 Inamu-yawa na pulungu na pambàda panii-nggunggai, na ata nda narihi-anya na mirina, ba wànggunggai. Jàka dakeha-madungga Nyungga, jiangu-mbu ba dakeha-nggai nyimi; jàka da-pamàndu-nya na pulunggu Nyungga, jiangu-mbu ba da-pamàndu-nya na pulumi nyimi. 21 Na nyuna yiada mbuu ndàbada hi da-palua-nggainja tai, jiaya rukuna na tamunggu, maa ba nda datanda-duya na Ma-paràha-ngga. 22 Jàka nda kumai ka kupanii dànja, nda ningua lati njalada, tàka nàhu nda ningua pa-pandàda wàdanya na njalada. 23 Na ma-karaü-ngga eti Nyungga, na-karaü-mbunya eti na Amanggu. 24 Jàka nda kuràma-ha la hanggada da paràma da panda rama ndokuna hawiangu, nda ningua lati njalada; tàka nahu mbàda ita-danjaka, hi karaii bia-danggaka eti Nyungga dàngu i Ama. 25 Tàka hi tuna nu, jiaya ka peku pa-tutungu-na na maninya la huratu uku: Nda ningu ndoku kiringu ba da-karaü-ngga eti, ba wàna. 26 Jàka natàka-ka na Ma-panggaliru, na pa-paràha-nggunggai Nyungga tal welingu lai Ama, na Ngahu na pangia matubàngu na maluhu welingu lai Ama, Nyunaka tal na ma-hakahii-nya na rukunggu; 27 hamanai nyimimbu, ihakahii-ngga badi, maa ba nidunggai lai Nyungga welingu la kawunga-na, hi wànanja.

16:1 Yiada-ka hi kupanii-nggainja, mata ka àmbu peku hanggà-maru-mi. 2 Napa dawàru-nggai welingu la uma bungguru, màlai nàmunya na rehina, jàka nggamuya na ma-pameti-kai, ngàndi-nggunya maraku i Ala, ba wàna. 3 Nu hi tuda nu, maa ba nda datanda-duya i Ama, hamanai Nyungga ndiambu. 4 Tàka hi kupanii-nggainja yiada, jàka jia-yaka na rehina taì, ka peku namu-minja, ba kupanii-nggainjaka Nyungga. Yiada nda kupanii-anggainja welingu la wungana, maa ba ni-dunggapa lai nyimi.

Na paràma-na na Ma-panggaüru

5 Tàka nàhu laku-nggunyaka la Ma-paràha-ngga, nda haàtu-mbu lai nyimi ma-paàra-ngga, nggii ulaku ningu na ma-wànangga. 6 Jia-aya ba kupanii-nggainjaka yiada, hi nahulu-nja pa-handuka wàngu da etimi. 7 Tàka Nyungga . panii-nggunggainya na ma-padeningu, ba na-lingu-du lai nyimi jàka kulaku. Nadu jàka nda kulaku-ma, nda jia mai-ana na Ma-panggaiiru lai nyimi, tàka jàka kulaku-ka, ku-paràha-manggainya duku taì. 8 Nu jàka natàka-ka Nyuna tal hi nabowa-nya na pinu tana rukuna na ma-akatu dàngu rukuna na matànji dàngu rukuna na pa-tandangu. 9 Rukuna na ma-akatu, ba nda dawai-duka Nyungga; 10 rukuna na matànji, ba laku-dunggunya lai Ama, hi ndai hili itaka; 11 rukuna na pa-tandangu, maa ba pa-patandangu-duyaka na ngorana na pinu tana yiana. 12 Nadangu-pa lati na pa-paniingu-ha ba wànggunggai, tàka nàhu ndai ngalangua paduku-ha. 13 Na nyuna jàka natàka-ka Nyuna, na Ngahu na pangia ma-tubangu, hi nabowa-nggai ànda la papi hàlanya na ma-tubangu. Nadu ba nda jia wàngu-ana eti wikina jàka napanii, mbulungu na parongu-ana na papanii-na, dàngu hi napeka-nggainya na ma-nàmunya tai. 14 Nyuna na ma-pamangunju-ka tal, maa ba napiti-du taì welingu la mangunggu, hi napeka-nggai nyimi. 15 Mbuu ndàbada da maninja lai Ama, mangu-nggunja; jia-duyaka napiti welingu la mangunggu hi napeka-nggai tai, hi wànggu.

Na handuka na malua-ya la hawola

16 Hawutu-ki ndai ita-akapa, tàka hili hawutu-ki ita-minggaka tal wàna. 17 Nu ka panii-danyaka dàngga anguda da papanaungu hawiangu: Nggàraya wàna ihu na papanii-nanda: Hawutu-ki ndai ita-akapa, tàka hili hawutu-ki ita-minggaka, dàngu: Laku-nggunya lai Ama ba wànanda, hi wàda. 18 Nu ka panii-danyaka: Nggàra wànaka ihu, hawutu-ki ba wàna. Nda tapi-anya na papanii-na, hi wàda. 19 Nu ba napi-nyaka paraïna i Yehu, ka ta-paàra-nya ba wàda, ka panii-nanjaka: Bata-minya yiana dàngga angumi, hawutu-ki ndai ita-akapa, tàka hili hawutu-ki ita-minggaka tai ba wànggu? 20 Lànga-tàka-manggunggai, nyimi hii-minyaka dàngu pa-dudu-rungu-minyaka tai, tàka na pinu tana hawola-nanyaka; handuka-minyaka tai, na nyuna na handuka-mi napa nalua-ya la hawola. 21 Na kawini na ma-habola na-handuka, maa ba jia-duyaka na rehina. Tàka jàka na-habola-nyaka na anakeda, nda nahili namu-ayapa na mayila^na parai pambaha na etina, maa ba nadedi-duka haàtu tau la pinu tana. 22 Nyimi timi numbu nàhu bai handuka, tàka kuita belikai tai; nu hi dambaha da etimi, dàngu nda ningua haàtu majia wàhiya na pambaha eti wàmi. 23 La lodu nu tal nda ningu ndokua pa-paàra-mi lai Nyungga. Lànga-tàka ka kupeka-nggai, jàka ningu pakarai-mi lai Ama, nawua-manggai duna la tamunggu. 24 Lundu nàhu ndedi ningua pakarai-mi la tamunggu. Ikarai-wa, jiangu-ma duna ingalangu, ka peku jàngapu-na na mbaha etimi. 25 Yiada kupanii wànggainja pangerangu; tàka nàmunya na rehina ba nda kuhili panii wànggai pangerangu, tàka kupeka pangala-nggainya ha rukuna i Ama. 26 La lodu nu napa ikarai la tamunggu, dàngu Nyungga maka-rai-ya i Ama ndumami nyimi, nda wànggu-anggai. 27 Nadu i Ama wiki ba nambuha-manggai, maa bai mbuha-dungga Nyungga dàngu bai pawai-duka ba ma-welingu lai Alaka. 28 Ma-welingu lai Amaka hi kumai la pinu tana, hili dunjaku-nggunyaika na pinu tana hi kulaku lai Ama, wànanja. 29 Napaha da papanau-na: Nàhu paai-lulungu-ma-amunya bau panii, ndau wàngu-apa pangerangu. 30 Nàhu .pi-manyaka ha pi hàla-mamunya dumu, dàngu ba nda nggàra ihi wànguipa tau ma-paàra-nggau; jia-duka hi mapawai ba ma-welingu lai Alakau, wàdanya. 31 Nanapa-ya i Yehu: Ipawai-duka nàhu ai? 32 Tàngaru, nàmunya na rehina, dàngu rehi-ma-nanyaka nàhu, ba pa-paihangu-kai hi maràngga hanggangu la ngaba wikimi, tàka Nyungga hii dunjaku mehangga. Na nyuna nda jia pa-mehangu-anggu, nadu i Ama ba nimanya lai Nyungga. 33 Yiada kupanii-nggainjaka, mata kai peku wàngu lai Nyungga. Yia la pinu tana mi-pàdangu mayila. Na nyuna i-pamàndungu etimi, maa ba mbàda talu-nggunyaka Nyungga na pinu tana, hi wànanja.

Na hamayangu-na i Miri Yehu

17:1 Nudaha da papanii-na i Yehu, hàla tangara-nanyaka la awangu hi napanii: Aa Ama, jia-yaka na rehina; pa-mangunju-yawa na Anamu, ka peku pa-mangunju-nanggau na Anamu. 2 Hama tuna bau wuanya kuaha la tauka, ka peku wua hàla-nanja luri pa-lupangu da pambàda wua-munya. 3 Yiana-ya na luri pa-lupangu, ba datanda-kau Nyumu, Ala ma-kamehangu, ma-palànga-tàkangu, dàngu i Yehu Karitu, na pa-paràha-mu. 4 Nyungga ku-pamangunju-kauka la pinu tana, ba ku-palànyapu-ya na paràma na pa-patanggu-mungga la paràma-ya. 5 Aa Ama, màtawa nàhu kau pa-mangunju-ka la lihimu Nyumu, hama tuna na mangunju na maninya lai Nyungga ba la lihi-mungga, ba ndedi ninya na pinu tana. 6 Ku-wàlahu-njaka na tamumu da tau da pawua-mungga welingu la pinu tana. Mangumu Nyumuha, hiu wua-ngganja Nyungga, nu da-pamàndu-manyaka na pulumu. 7 Nàhu pi-danyaka, mbuu ndàbada da pambàda wua-mungga, ba ma-welingu lai Nyumuha. 8 Nadu da pulungu da pawua-mungga ba mbàda wua-du-nggunjaka, hi da-kataku-ha, hi dapi palànga-tàkanya ba ma-welingu lai Nyumuka, dàngu dapawai-maka ba Nyumu ma-paràha-ngga. 9 Hamaya-nggunja ndumada nyuda; nda hamaya-nggunya ndumana na pinu tana-a, tàka ndumada da pambàda wua-mungga, maa ba mangumu Nyumu-duha. 10 Mbuu ndàbada da mangunggu mangu-munja, hamanai, da mangumu mangu-nggunja, hi pa-mangunju-kaka lai nyuda. 11 Nda niangga-pa la pinu tana; nyuda ninjapa la pinu tana, tàka Nyungga laku-nggunyaka lai Nyumu. Aa Ama matua, opanja la tamumu na pawua-mungga, mata ka peku mbulungu-da hama tuna nyuta. 12 Ba ninggapa lai nyuda kuopa-manja duku la tamumu, na pawua-mungga, dàngu kumangga-manjaka hi nda ningu haàtu ma-yàmihu lai nyuda, jia-aya na tunggu molungu, ka peku pa-tutungu-na na maninya la Huratu. 13 Nàhu laku-nggunyaka lai Nyumu, tàka yiada hi kupanii-ha ba talànga ningga la pinu tana, mata na mbaha eti rukunggu Nyungga ka peku lundungu-na daa la etida. 14 Kuwua-manjaka duku na pulumu, hi nakaraii-nja eti parai na pinu tana, maa ba nda ma-welingu la pinu tana-duha, hama tuna Nyungga ba nda ma-welingu la pinu tanaka. 15 Mata kau pitiha welingu la pinu tana nda wànggua, tàka mata kau mangganja lai ma-akatu, wànggu duku. 16 Nda ma-welingu la pinu tana-aha, hama tuna Nyungga ba nda ma-welingu la pinu tanaka. 17 Pa-matua-ha la ma-tubangu. Na pulumu Nyumu ma-tubangu-ya. 18 Hama tuna bau paràha-ngga la pinu tana, tumbuna Nyungga ba ku-paràha-nja la pinu tana. 19 Dàngu ku-pamatua wikinggu lumuda nyuda, ka peku pa-matua-mbuha la ma-tubangu. 20 Nda rukuda nyuda meha-a hi ku-hamayangu, tàka ruku-mbuda da mapawai-ka tal rukuna na pulungu na pangàndi-da. 21 Mata ka peku mbulungu-da mbuu ndàbada, hama tuna Nyumu, aa Ama, ba lai Nyunggakau, tàka Nyungga ba lai Nyumuka, mata nyudambu ka lai nyutaha, ka peku pawaina na pinu tana ba Nyumu ma-paràha-ngga. 22 Na mangunju na pambàda wua-mungga, mbàda wua-ma-nggu-njaka duku, mata ka peku mbulungu-da hama tuna nyuta ba mbulunda: 23 Nyungga lai nyuda, dàngu Nyumu lai Nyungga, ka peku lundungu-na na mbulungu-da, mata ka peku pinanya na pinu tana ba Nyumu ma-paràha-ngga dàngu bau mbuhanja, hama tuna na mbuha-mungga Nyungga. 24 Aa Ama, na pawua-munggaka, la ngia paningga Nyungga ka nimbunja nyuda la lihinggu wànggu, ka peku ita-danya na mangunju na pambàda wua-mungga. Maa bau mbuha-dungga ba ndedi pa-padikangu-ya na panggubulu awangu. 25 Aa Ama matànji, na pinu tana nda datanda-akau, tàka Nyungga kutanda-kau, dàngu nyuda dapi-nyaka ba Nyumu ma-paràha-ngga. 26 Mbàda peka-nggunjaka na tamumu, dàngu napa kuhili peka-manjaipa, mata na mbuhangu na pambuha wàmungga ka peku padaingu-na lai nyuda, hamanai Nyungga lai nyuda, wàna.

Na yàpa-danya i Miri Yehu la woka Nggehimani

18:1 Ba wànaka nu, ka luhu-nanyaka i Yehu dàngu da papanau-na hi dapala la hapapa ana luku Kindurungu; lai nu ninya na woka, na ngia patama-na dàngu da papanau-na. 2 Tàka i Yunda, na ma-kaleka-nya, napi-mbunya lai nu, ba mbàda kàli pauhi dà-du-nanjaka da papanau-na i Yehu lai nu. 3 Ka mai-nanyaka i Yunda lai nu ba na-karia-nya na kalibaru hurundandu dàngu tau la ratu pangora, dàngu la tau Parihi, da mangàndi palita, dàngu jilu, dàngu madàka. 4 Tàka i Yehu duna ba pi-ma-nanyaka na matàka-nyaka, lua to-ma-nanjaka hi napanii dànja: Nggamuya na pahimbu-mi? wànanja. 5 Napaha nyuda: I Yehu, tau Naharitu, hi wàdanya. Tàka i Yehu: Nyungga-maka yia, hi wànanja. Nu i Yunda na ma-kaleka-nya, ndolaku dà-mananja. 6 Nu Nyungga-maka yia ba wànanja-kaka, kandulingu madua-danyaka hi danjoru la tana. 7 Hi nahili paàra-nja paraïna i Yehu: Nggamuya na pahimbu-mi? wànanja. Tàka nyuda: I Yehu tau Naharitu, hi wàdanya. 8 Nanapa-ya i Yehu: Nyungga-maka yia, hi mbàda wànggu-madu-nggaika. Jia-duya jàka Nyunggadu pahimbu-mi, puli-njawa yiada ka dalaku, hi wànanja. 9 Ka peku pa-tutungu-na na pulungu na pambàda paniina: Na tauka na pawua-mungga nda jia ningua haàtu ma-yàmihu lai Nyungga, ba wàna. 10 Tàka i Himungu Peturu na maningu hapandangu, hi na-binjiru-ya na hapanda-na hi na-làndahu-nya na tau la Ratu Bokulu, na-kàtahu-maya na kahilu kawana-na. Nuna na tau Màluku-ya na tamuna. 11 Nanapa-ya i Yehu: Patiku-nya na hapanda-mu! Jia nda ngunu-nggunya-kaka na kaba wai pawua-nangga i Ama dumu? hi wànanya.

La hanggana i Anahu. Na pa-hiningu-na i Peteru

12 Tàka da hurundandu dàngu na ngorada dàngu da pa-palewa tau Yahundi, yàpa-danyaka i Yehu, hi dahondu-ya, 13 hi dangàndi mangilu-ya lai Anahu, ba ama yerana i Kayapahu-duya, na maratu bokulu la ndaungu nuna. 14 Nyuna-duka i Kayapahu na mawua-nja kareuku da tau Yahundi, ba nalingu-ma jàka nameti na haàtu lumuna na banjaru. 15 Ka kiku-nanyaka i Yehu paraïna i Himungu Peturu, dàngu na papanaungu na haàtu. Nuna na papanaungu natanda-ya parai na Ratu Bokulu, ka tama karia-nanyaka i .Yehu.hu.daa la talora umana na Ratu Bokulu. 16 Tàka i Peteru duna, ndolaku-nanya la hambeli la ngaru pindu. Nu ka luhu-nanyaka na papanaungu na haàtu, na patanda-na na Ratu Bokulu, hi napanii dànya na kawini na madaiya na pindu, hàla hi natama ngàndiya i Peturu. 17 Tàka nuna na kawini na madaiya na pindu hi napanii dànya i Peturu: Mala nyumu nda angu-adanggau da papanau-na na tau nina? hi wànanya. Nanapa-ya i Peturu: Ndia-a duku, wàna. 18 Tàka da tau ata dàngu da tau pa-palewa diru bia-danya epi na pambàda pa-dukulu-da, ba lalu maringu-duya. Jia-mbuya i Peturu hi nadiru dànja epi nyuda. 19 Nu ka paàra-nanyaka i Yehu parai na Ratu Bokulu rukuda da papanau-na dàngu rukuna na pa-pekangu-na. 20 Nanapa-ya i Yehu: La mbabu tauma lati ba kupanii-nya, na pinu tana. La uma bungguru dàngu la uma Ala ma-mànu-maka ku-papekangu ningu, la ngia pa-pauhi ndàbana na tau Yahundi, nda ningu ndokua papanii wininggu. 21 Nggikina hiu paàra-ngga Nyungga? Paàra bianja da mambàda ronguya na papanii-nggunja, da-pimanya duda na papanii-nggu. 22 Ba tunaka nu, tàka na haàtu na tau pa-palewa na ma-ndola-ku la lihina hi natàba-ya: Tu biamu nu bau hemaya na Ratu Bokulu ai? hi wànanya. 23 Nanapa-ya i Yehu: Jàka nanjala na papanii-nggu, peka-ngga-nyawa na manjala; tàka jàka na-tubangu biduai, ka ni hiu tàbakai? hi wànanya. 24 Ka pangàndi-nanyaka dàngu honduna i Yehu paraïna i Anahu lai Kayapahu na Ratu Bokulu. 25 Tàka i Himungu Peturu, jiapa bia-yapa diruna epi; ka panii dà-danyaka: Mala nyumu nda angu-adanggau dumu da papanau-na na tau nina? wàdanya. Ka pa-hiningu-nanyaka: Ndia-a duku, ba wàna. 26 Nanapa-ya na haàtu na atana na Ratu Bokulu, na kalembi-na na tau pa-kàtahu-na kahilu i Peturu: Nda kuita-akau dumu la woka la anguna Nyuna? hi wànanya. 27 Ka hili pa-hiningu-nanyaika i Peturu; ka hakuku madua-nanyaka na manu.

La hanggana i Pilatu

28 Nu ka ngàndi-danyaka i Yehu welingu lai Kayapahu nàhu la uma timbangu, hina-ma-apa naharii. Da tau Yahundi nda datama wiki-ada la uma timbangu, ka àmbu ta-iraku, ka peku ngangunda la pamangu Paha, ba wàda. 29 Nu ka luhu-nanyaka lai nyuda i Pilatu: Nggàra-yaka na pa-panjala wàminya nina na tau, hi wàna. 30 Danapa-ha nyuda: Nina jàka nda tau akatu-maya nda jia pakata-amanggaunya, hi wàdanya. 31 Nanapa-ya i Pilatu: Ingàndi biaya dimi, kai ratanya wai nge-rana nunjuya na ukumi, hi wànanja. Tàka da tau Yahundi: Nda ngera-amanya duma la pa-pameti tau, hi wàdanya. 32 Nu ka peku pa-tutungu-na na patiki-na i Yehu rukuna na pameti wàna tai. 33 Ba natama belika la uma timbangu i Pilatu, paau-nanyaka i Yehu hi na-paàra-nya: Jiakau dumu na Hanganji tau Yahundi? wànanya. 34 Nanapa-ya i Yehu: Ma-pawelingu la eti wiki-munya na, bau panii tumu nu, jàka ndia hi hawiangu bia mapanii-nggaunya na rukunggu? hi wàna: 35 Tàka i Pilatu: Ka tau Yahundi-ya wàmungga? Na banjaru wiki-mamu dumu dàngu da ratu pangora da mambàda pakata-nggau lai nyungga. Nggàraya na paruku-mu? hi wànanya. 36 Nanapa-ya i Yehu: Na pahanganji-nggu Nyungga nda paweli-na la pinu tana yiana-a; jàka paweli-na la pinu tana yiana lati na pahanganji-nggu, da-hadangu-ka lati da taunggu ka àmbu da-pakata-ngga la tau Yahundi, tàka nda paweli-na yiahua duku na pahanganji-nggu, hi wànanya. 37 Nahema i Pilatu: Ka hanganji-makau dumu? hi wànanya. Nanapa-ya i Yehu: Hama tuna ba wàmu, ba hanganji-duka. Nuna-duyaka hi kiri dedinggu dàngu jia-mbu-duyaka na pamai wànggu la pinu tana yiana, ka peku hakahii-nggunya na ma-tubangu; jàka nggamu na ma-pawelingu la ma-tubangu, narongu-ya na ngarunggu, hi wàna. 38 Tàka i Pilatu: Nggàra-yaka nu na ma-tubangu? hi wànanya. Tunaka nu, ka hili luhu-nanyaika la tau Yahundi: Nyungga nda ningu ndokua manjala pahunggu-nggu lai Nyuna. 39 Na nyuna huri-madumi la lodu Paha ba ku-pahàla-nggai haàtu; mala pahàla-nggamanya na Hanganji tau Yahundi, wàmingga? hi wànanja. 40 Ka hili kaoka-danyaka: Nda Nyuna-a! I Mbaramba duma, hi wàda. Nyuna i Mbaramba tau rambangu-ya.

Na majila-na i Miri Yehu

19:1 Nu ka pa-ràhangu-nanyaka i Pilatu la pa-pajàra-ya i Yehu. 2 Tàka da hurundandu hi dauna-nya nggubi rii madàka hi da-patàmbaku-nya na katiku-na hi da-paringgi-nya hundarangga. 3 Nu ka hurungu-danyaka lai Nyuna: Oha-amuwa, oi Hanganji tau Yahundi, hi wàdanya; nu ka tàba-danyaka. 4 Ka hili luhu-nanyaka i Pilatu hi napanii dànja: Tàngaru, kuluhu ngàndi-nggainya, ka peku pi-minya ba nda ningu ndokua manjala pahunggu-nggu lai Nyuna, wànanja. 5 Ka luhu-nanyaka i Yehu dàngu nggubingu-na rii madàka dàngu maringgi-na hundarangga. Tàngaru, na tau, hi wànanja. 6 Nu ba daita-yaka da ratu pangora dàngu da tau pa-palewa, ka kaoka-danyaka: Harika-nya, harika-nya! wàda. Nanapa-ya i Pilatu: Mingàndi biaya dimi kai harika-nya, nadu nyungga ba nda ku-hunggungua manjala lai Nyuna, hi wànanja. 7 Dahema da tau Yahundi: Nimanya duma na ukuma, nunjuya nuna nameti-ma badi, rukuna Ana Alaka ba wàna, hi wàdanya. 8 Nu ba narongu-yaka nuna i Pilatu, ka manaü mangàdatu-naka. 9 Ka tama beli-nanyaka la uma timbangu hi napanii dànya i Yehu: Nggii paweli-mu dumu? hi wànanya. Tàka i Yehu nda nahema-aya. 10 Tàka i Pilatu: Ndau panii dàangga na nyungga? Ndau pinya dumu ba kuaha-nggunya la pa-pahàla-kau dàngu ba kuaha-mbunggunya la pa-harika-nggau? hi wànanya. 11 Nanapa-ya i Yehu: Nda jia ningu ndokua kuaha-mu lai Nyungga, jàka nda pa-wuangu-kau weli ditangu; jia-duya hi narihi ningu na njalana na tau na ma-pakata-ngga lai nyumu, wànanya. 12 Piti welingu nu, himbu-nanyaka ànda i Pilatu la pa-pahàla-ya i Yehu. Tàka da tau Yahundi, kaoka-ma-adanya: Jàkau pa-hàla-maya nana, nda ariyaa-ananggau na hanganji bokulu, hi wàdanya. 13 Ba narongu-yaka nuna na kareuku i Pilatu, pa-ràhangu-nanyaka paluhu ngàndiya i Yehu hi na-mandapu la kanjàka timbangu, la pangia Bangga Watu ba wàdanya, jia-duyaka Nggabata ba wàna la hilu Imbarani. 14 Nu lodu pa-yemangu wàngu Pahaya, ràkangu njàmu nomuya. Tàka i Pilatu: Tàngaru, na hanganji-mi, hi wànanja da tau Yahundi. 15 Tàka kaoka-ma-adanya nyuda: Wàrunya, wàrunya, harika-nya! ba wàda. Na-napaya i Pilatu: Ku-harika bianya na hanganji-mi? wànanja. Ka hema-danyaka da ratu pangora: Nda ningua duma hanganji-ma, didi-aya na hanganji bokulu, hi wàda. 16 Nu ka puli-nanjaka i Yehu la pa-harika-nya.

Na metina i Miri Yehu la ai harikangu

17 Nu ka piti-danyaka i Yehu; luhu-nanyaka dàngu duku wikinanya na ai harikangu-na hi nalaku la pangia Kaba Kotu ba wàdanya, jia-duyaka Nggolunggota ba wàna la hilu Imbarani. 18 Ka harika-danyaka lai nu, lupa da madua da tau hawiangu, haàtu la hapapa-hapapa, tàka i Yehu la padua-ya. 19 Tàka i Pilatu huratu-nanyaka na rukuna hi natuya la kapuka ai harikangu: I Yehu tau Naharitu, na Hanganji tau Yahundi, ba wàna. 20 Nadangu na tau Yahundi na mambaha-ya nuna na pa-huratu ba la lihi paraingu-duya na ngia pa-harika-danya i Yehu, màlai hi pa-tulihu wàngu hilu Imbarani, hilu Rumu dàngu hilu Nggarika-duya. 21 Nu ka panii-danyaka da ratu pangora tau Yahundi: Hanganji tau Yahundi, àmbu wàmu-dunya, tàka: Nyungga Hanganji tau Yahundi-ka wàna wàmunya badi, wàdanya i Pilatu. 22 Nanapa-ya i Pilatu: Na pambàda huratu-nggu, jia-mayaka, hi wànanja. 23 Nu da hurundandu ba da-harika-nyaka i Yehu, hi dapiti-ha da pakina hi da-paberi kapatu-nja, hi ta-tangguna haàtu-haàtu, hinggilu-na na kalembi daluna. Nuna na kalembi nda ningua utu ditana, patinu pa-nuangu-ma-aya. 24 Ka panii-danyaka dàngga anguda: Àmbu tahira-duya, mata ka tawingu bianya ndandu, jàka nggamu na manduma-nya, wàda. Ka peku pa-tutungu-na na maninya la Huratu: Da-paberi-njaka da pakinggu, tàka na kalembi-nggu dawingu-nya ndandu, ba wàna. Nuya na pawàda da hurundandu. 25 La lihina na ai harikangu-na i Yehu ninja na inana dàngu na anguna kawini na inana, dàngu i Maria papaha-na i Kaliopa, dàngu i Maria Mandalena. 26 Nu i Yehu ba naita-yaka na inana dàngu na papanaungu na pambuha-na la lihina, panii-nanyaka la inana: Ràmbu! tàngaru, nana na anamu, hi wànanya. Hàla hi napanii dànya nuna na papanaungu: Tàngaru, nana na inamu, hi wànanya. 27 Piti welingu nu, nggepi-nanyaka la umana paraïna na papanaungu. 28 Hàlaka nu ba napi-nyaka i Yehu, ba lundungu hàla-nanyaka, ka peku pa-tutungu-na na maninya la Huratu: Madau-nggunya, hi wàna. 29 Lai nu ninya na wurungu na mambinu wai angguru mayilu; ka tu-danyaka lumutu maningu wai angguru mayilungu la hupu karàngga, hi da-pajola-nya la ngaruna i Yehu. 30 Ba na-lamuji-yaka na wai angguru mayilu, panii-nanyaka: Lundungu-nanyaka, wàna. Nu ka karuduku-nanyaka hi napuli-nya na ngahuna. 31 Nu ba lodu pa-yemangu-ya, ka pamanda-danyaka i Pilatu da tau Yahundi, la papata-ha da wihida dàngu la pa-papurunja da mameti. Nadu ka àmbu haniida da metida la ai harikangu la lodu hangahu ba wàda, nuna na lodu hangahu . ba lodu bokulu-duya. . 32 Ka mai-danyaka da hurundandu hi dapata-ha da wihina. na ma-mangilu hamanai na haàtu na pa-harika pa-angungu-ya. 33 Nu ba datàka-nyaka i Yehu dàngu ba daita-ya ba mbàda meti-naka, nda dapata-aha da wihina. 34 Ba tuna na haàtu na hurundandu nakoja wànya nimbuna na karaha-na; nu ka luhu madua-nanyaka na ria dàngu na wai. 35 Na mambàda itaya jia-yaka na ma-pa-hakahiingu, tàka na pa-hakahii-na nyuna ma-tubangu-maya, dàngu napi-manya duna ba panii-nanya na ma-tubangu, ka peku pawai-mbumi nyimi. 36 Nudaka hi datumbu, mata ka peku pa-tutungu-na na maninya la Huratu: Nda hapungu-mbu riina tal papata, ba wàna. 37 Dàngu nimbunya la Huratu: Tal dapanau-yaka na pambàda kojada, na mawàna.

Na taninya i Miri Yehu

38 Hàlaka nu lua-nanyaka i Yuhupu, tau Arimatia, lai Pilatu. Nyuna i Yuhupu papanau-na i Yehu-mbuya, na nyuna na-kàpingu wikina parai pa-mangàdatu-nja da tau Yahundi. Ka pamanda-nanyaka ka ku-papuru àrunya na metina i Yehu, ba wàna; hi napuli-nya paraïna i Pilatu. Ka laku-nanyaka hi na-papuru-nya na metina. 39 Tàka i Nikundemu na mamai wàngu rudungu àmangu lai Yehu, namaimbu, hi nangàndi mbii kati muru pa-pakorungu nitu, ràkangu hangahu katina. 40 Nu ka papuru-danyaka na metina i Yehu, hi da-payubuhu wànya tera yubuhu lupa nuda da mbii kati, namatu-ya na huri taningu tau Yahundi. 41 Nu la lihi ngia pa-harika-nya i Yehu ninya na woka; lai nu ninya na reti bidi, ndedi ninguma pa-taningu ningu lai nu. 42 Lai nuduka da-bànjalu niya i Yehu, ba lodu pa-yemangu tau Yahundi-duya, ba na-mareni-du nuna na reti.

Na hadangu-na dàngu na kawunga pa-jilikungu-na wikina i Miri Yehu

20:1 La lodu kawunga minggu, la mbaru hada rudungu, lua-nanyaka i Maria Mandalena nu la reti, hi naita-ya na watu ba mbàda nggilungu-naka welingu la reti. 2 Ka manyamalu-nanyaka lai Himungu Peturu dàngu la papanaungu na haàtu na pambuha-na i Yehu: Nangàndi-yaka tau i Miri welingu la reti, nda mapinya jàka nggiiya na-bànjalu niya, hi wànanya. 3 Ka laku-nanyaka i Peturu dàngu na papanaungu na haàtu hi dalua la reti. 4 Nuda da madua handàka manyamalu-mada, na nyuna na papanaungu na haàtu na-mangilu, narengga-pa welingu lai Peturu, hi natàka mangilu la reti. 5 Ba na-karuduku-ka, ita-nanjaka da tera yubuhu da pa-bànjalu, tàka nda natama-a. 6 Nu ka tàka-nanyaka i Peturu la malamiri-na, ka tama-nanyaka la reti hi napanau-ha da tera yubuhu da pa-bànjalu, 7 tàka na tera podahu, na pahondu la katiku-na lati, nda pa-pambulungu-aya dàngu da tera yubuhu, pa-làpitu biaya la hau pangia. 8 Nu hi natama-mbu na papanaungu na haàtu na matàka mangilu; ba naita-yaka ka pawai-nanyaka. 9 Maa ba ndedi-dupa dapinya na maninya la Huratu, lupangu-ma na-hadangu beli welingu la padua mameti, ba wàna. 10 Nu ka beli-danyaka la uma da papanaungu. 11 Tàka i Maria ndolaku bia-nanya nu la hambeli la lihi reti dàngu hiina. Nu ha nahii, karuduku-nanyaka hi na-kahinu hu daa la reti. 12 Ka ita-nanjaka da madua da papalewa da mapaki mabara, da ma-uhuku na haàtu la katiku-ya, na haàtu la wihiya la ngia pa-bànjalu-ya na metina i Yehu. 13 Ka panii-danyaka lai Maria: Ha ràmbu, nggikina hiu hii hi wàdanya. Nanapa-ya i Maria: Ba napiti-duyaka tau na Miri-nggu, tàka nda kupi-anya jàka nggii da-bànjalu niya, wànanya. 14 Tunaka nu, ka pa-mbelingu-nanyaka i Maria hi naita-ya i Yehu ba na-ndolaku lai nu, tàka nda natanda-aya ba jiaya i Yehu. 15 Tàka i Yehu: Ha ràmbu, nggikina hiu hii? Nggamuya na pahimbu-mu? hi wànanya. Tàka i Maria, jiaya na madai woka ba wàna bia: Miri, jàka Nyumu mangàndi-ya, paniingga jàka nggii mu-bànjalu niya, mata ka kulua papiti-ya, hi wànanya. 16 Nanapa-ya i Yehu: Maria! hi wànanya. Nu ka pa-mbelingu-nanyaka i Maria: Rabbuni! hi wàna la hilu Imbarani, nu Ngguru! wàna-duka. 17 Nanapa-ya i Yehu: Àmbu yàpa-duka, nadu ba ndedi kuhei-apa lai Ama. Na nyuna lakuwa la angunggu paluhu: Hei-nggunyaka la Amanggu dàngu la Amami, la Alanggu dàngu la Alami, wàna ka wàmunja, hi wànanya. 18 Ka laku-nanyaka i Maria Mandalena, hi napanii-nja da papanaungu na ita-nanya i Miri dàngu ba tuna nu na papanii-nanya.

Na pa-jilikungu-na wikina i Miri Yehu la papanaungu

19 Nu ba na-malingu-ka, la lodu kawunga minggu, ba dàngu kabitangu biada da pindu nu la ngia paninja da papanaungu, parai pa-mangàdatu-nja da tau Yahundi, tàka-nanyaka i Yehu, ba jia ndolaku biana la padua-da: Ipeku hàmuwa, hi wànanya. 20 Tunaka nu paita-nanjaka da Umana dàngu na karaha-na. Ka mbaha-danyaka da etida da papanaungu nu ba daita-yaka i Miri. 21 Tàka i Yehu: Ipeku hàmuwa, hi hili wànanjai. Hama tuna i Ama ba na-paràha-ngga, tumbunggu Nyungga ba ku-paràha-nggai nyimi, hi wànanya. 22 Hàlaka patuna nu, hi nahapui-nja: Kataku-yawa i Ngahu Matua. 23 Nggamuha da pajàma-mi njalada, da-jàmangu-ma eluda, dàngu nggamuha da pa-paduku-mi njalada, daduku-maha duda, hi wànanya.

Na pa-jilikungu-na wikina i Miri Yehu lai Tomahu

24 Tàka i Tomahu, na haàtu na pa-hakambulu madua wàda, i Ndindimu ba wàdanya tamuna, nda nianya lai nyuda ba na-tàka i Yehu. 25 Nu ka panii-danyaka da papanaungu hawiangu: Mbàda ita-manyaka i Miri, wàdanya. Nanapa-ya i Tomahu: Jàka nda kuita-maya na rukuda da paku la Umana, dàngu jàka nda kuràma wànya wua limanggu na rukuda da paku, hamanai jàka nda kuràma wànya limanggu na karaha-na, nda jia pawai-anggu, hi wànanya. 26 Pa-làngangu-ka walu mbua lodu, hili pauhi-danyai da papanaungu nu la uma, nimbunya i Tomahu lai nyuda. Ka tàka-nanyaka i Yehu ba dàngu kabitangu biada da pindu, ba jia ndolaku biana la padua-da: Ipeku hàmuwa, hi wànanya. 27 Nu ka panii dà-nanyaka i Tomahu: Pajola-nya nàmu na wua limamu, kau itaha da limanggu, dàngu pajola-nyawa nàmu na limamu, kau ràmaya na karaha-nggu, àmbu jia nda pawai-dumupa, tàka màtawa kau pawai, hi wànanya. 28 Nanapa-ya i Tomahu: Dou Miringgu, dou Alanggu! hi wànanya. 29 Tàka i Yehu: Rukuna bau ita-dukaka hiu pawai ai? Oha-adaka da tau da mapawai dàngu nda itada, hi wànanya. 30 Dadangu-maipa nyuna da tanda hawiangu da pa-patumbu-na i Yehu la hanggada da papanau-na, da panda tulihu la huratu yiana. 31 Na nyuna yiada hi tulihu-ha, mata ka peku pawaimi, i Yehu ba jiaya na Karitu, na Anana i Ala, dàngu ka peku mangu wàminya luri na tamuna rukuna na pawaimi.

Na pa-jilikungu-na wikina i Miri Yehu la tehiku Timbiria

21:1 Hàlaka nu hili pa-jilikungu-nanyaika wikina i Yehu la papanau-na la hingi tehiku Timbiria. Tuna nu ba na-pajiliku-ngu wikina. 2 Màtuda i Himungu Peturu dàngu i Tomahu, i Ndindimu ba wàdanya, dàngu i Natanilu, tau Kana la Nggalilia, dàngu da anana i Hambandiu, lupa da madua da papanau-na hawiangu. 3 Tàka i Himungu: Luanggu pa-njeringu, wànanja. Napaha nyuda: Malua karia-mbudunggau, hi wàdanya. Ka lua-danyaka hi dahei la tena. Tàka nu la rudungu nda ningu ndokua pangala-da. 4 Ba na-pabarahu-ka, na-ndolaku i Yehu la hingi tehiku. Tàka da papanaungu nda dapi-anya ba jiaya i Yehu. 5 Nu ka panii dà-nanjaka paraïna i Yehu: Ha anakeda, ningu nu hiana panga wàngu? hi wàna. Napaha nyuda: Nda ningua, hi wàdanya. 6 Ka panii-nanjaka: Walaya na njeringu la kawana-na na tena, mi-ngalangu-ma duna, hi wànanja. Nu ka wala-danyaka na njeringu, nda damàka-mbupa payila-ya parai padangu na iyangu. 7 Nu na papanaungu na pambuha-na i Yehu: Jiaya i Miri, hi wàna lai Peturu. Narongu-kaka i Peturu ba jiaya i Miri, maringgi-nanyaka na kalembi ditana, ba nda nahaudu kalembi, hi na-linjungu la tehiku. 8 Tàka da papanaungu hawiangu hi damaiha la tena, maa ba nda ngii marau-adapa welingu la mara, lima kambulu ràpa-adaka, hi dayila-ya na njeringu na mambinu iyangu. 9 Ba da-lundungu-ka la mara, ka ita-danyaka ba ninya na epi pa-padukulu, lai nu ningu padua-ka iyangu dàngu kambamba. 10 Tàka i Yehu: Ngàndinda hiana hawutu iyangu pabidi yàpami, hi wànanja. 11 Nu ka hei-nanyaka i Himungu Peturu la tena, hi nayila-ya na njeringu la mara, ba mbinu bia-naka iya bokulu, ba hangahu lima kambulu tilu ngiuda. Jiapa ka nda dadangu tuda nukadu, tàka nda na-kahira-mbu na njeringu. 12 Tàka i Yehu: Maiwa kai ngangu, hi wànanja. Na nyuna nda ningua haàtu nu la papanaungu matoru mbeni pa-paàra-nya: Nggamukau, na ma-wànanya, ba pi-ma-danyaka jiaya i Miri. 13 Nu ka hurungu-nanyaka i Yehu, hi napiti-ya na kambamba, hi nawua-nja, hamanai da iyangu. 14 Yiana jia-duyaka na pa-pandilungu wàna ba na-pa-jilikungu wikina i Yehu la papanaungu la hambeli hadangu-na welingu la padua tau meti.

Na pakata beli-nanya wai ngerana i Peturu paraïna i Miri Yehu

15 Ba dahàla-ka pangangu panii dà-nanyaka i Himungu Peturu i Yehu: Ha Himungu, anana i Yuhani, urihi-njapa yiada nyumu la pambuha-ngga? wànanya. Nanapa-ya i Peturu: Aadu Miri, upi-mangga ba kumbuha-nggau, wànanya. Tàka i Yehu: Pawa-njawa da ana mbimbinggu, hi wànanya. 16 Hi nahili panii dànyai la pa-panduangu wàna: Ha Himungu, anana i Yuhani, umbuha-dungga? wànanyai. Nanapa-ya i Peturu: Aadu Miri, upi-mangga ba kumbuha-nggau, hi wànanya. Tàka i Yehu: Njanga-hawa da mbimbinggu, hi wànanya. 17 Nu ka hili panii dà-nanyaika la pa-pandilungu wàna: Ha Himungu, ahana i Yuhani, umbuha-ngga? hi wànanya. Ka handuka-nanyaka na etina i Peturu, rukuna: umbuha-ngga? ba wànanya la pa-pandilungu wàna. Ka panii-nanyaka: Miri, upi-manya mbuu ndàbana, upingga ba kumbuha-nggau, hi wànanya. Tàka i Yehu: Pawa-njawa da mbimbinggu, hi wànanya. 18 Lànga-tàka-manggunya ka kupeka-nggau: Ba bidi minikau, uborungu wikimu hiu laku la ngia pambuha etimu. Tàka jàkau kaweda-ka haromu, pajola-munjaka da limamu, hi haàtu ma-paboru-nggau hi nangàndi-kau la ngia panda mbuhamu, hi wànanya. 19 Hi panii tuna nu, pamaü-nanya na pameti wàna tal, na pa-mangunju wànanya i Ala nyuna i Peturu. Tunaka nu: Tundungga, hi wànanya. 20 Ka pa-mbelingu-nanyaka i Peturu, hi naita-ya tundungu-na na pa-panaungu na pambuha-na i Yehu. Jia-duyaka yiana na ma-pambelingu la hanggana i Yehu la pamangu: Miri, nggamuya nu na ma-kaleka-nggau? na ma-wànanya. 21 Nu ba naita-yaka paraïna i Peturu, ka panii-nanyaka lai Yehu: Miri, nggiki-naka nina haromu? hi wànanya. 22 Nanapa-ya i Yehu: Mata ka na-padaingu lundu tomaya na tàkanggu jàka wànggunya, nggàra wàinuka dumu nyumu? Nyumu utundu biangga, hi wànanya. 23 Nu ka kada-danyaka yiana na pulungu da angu paluhu, nuna na papanaungu nda nametia tal wàna, ba wàda. Tàka nda nametia tai nda wàna-a duna i Yehu, tàka: Mata ka na-padaingu lundu tomaya na tàkanggu, jàka wànggunya, nggàra wàmuka dumu, wàna duna.

Na bànjalu-na

24 Jia duyaka yiana na papanaungu na ma-hakahii-nja yiada dàngu na ma-tulihu-ha, dàngu tapi-manya ba na-tubangu na pa-hakahii-na. 25 Nadangu-mapa na pa-patumbu ha-hauna i Yehu. Jàka tulihu nimbihu-mahaka, ba kukaka-ya, jiapa na pinu tana-kadu, nda da-jàmungu-mbu da huratu da pa-tulihu.