Ka-patàgaha ka-kalawara

Lii Ege-ate ta barada ka-abu kej'u Jurata

1 Yesus na-patàgaha wu lakawa patama-na wàdi japata

Iha làd'o, àmini wu ata, na-kataba ta arona i Yesus. Linage nàda ata: "Ama, manawara-ki-gani anagu, kapàraka-nage. Na-paàli hinguwe kapàraka-na, na-kàli monu ta we waleka ta làti. Ngidib'e-d'ani ana pakodo palole-mu, bolo wàle damàka-mani pa-patàgahayi," Na-baleha-we i Yesus: aga linad'a-hinguwe tilrami? Pira taupoge madige b'a guenga-na ta barami? Pira taupoge ba gu-pamaloya-gimi ate? Ngidiga-ni nàd'a lakawa ta baragu." Nyi ka nawuga-yi i Yesus nàda wàdi japata. B'ege nàd'a wàdi japata nayelani nàd'a lakawa. Nyi ka na-tàgaha mema nàd'a lakawa. Mat. 17:14-18

2 Maraka-na wu lawai b'alu kamila

Iha làd'o, nangod'o i Yesus ta bara pàti maraka ta Uma Ala. Na-hamàtara-di ràd'a ata ka-patama-na àmaha ta pàti maraka. Buta ata kapote, ka tau pabuta-ni àmaha nàd'a pàti. B'ege àmini wu lawai b'alu kamila-ki. Nàd'a lawai b'alu na-patama-na d'o bàla àmaha màraha, d'a kabulu arupi-pedi. Yesus na-dàheka-yi ana pakodo palole-na, mono linadi, "Pato patidi-na, maraka-na nàd'e lawai b'alu àtuda-podi hi' di ta barana i Ala, d'ubu maraka-d'a tàngad'a ata wad'e. Oro ata wad'e yid'ad'a-ge wali ta hapote-d'a ka majab'ola, bolo nàd'e lawai b'alu kamila yid'ada-di àmaha-na tanga pa-hi waina payaa. Yi kàhana-ge tàngage kad'ana ta barana, tàngage pa-moriha waina." Mrk. 12:41-44

3 Yesus na-patàgaha-yi ata ka-katilu lopo ka-kabànga j'àla

D'age padàka, b'a d'angidi-yi ata wu ata ka-katilu lopo ka-kabànga j'àla ta arona i Yesus. D'akarai-yi i Yesus, tànagu i Yesus ka naijala-ni lima nàda ata. B'ege i Yesus na-palihike-ni nàd'a ata katilu wali ta ata buta, nyi ka d'ad'ud'a-pe i Yesusd'a. Na-tarumi-na i Yesus mono nanàto-nage làmana nàd'a ata. B'ege na-patama-ni karàki limana i Yesus ta katilu-na nàd'a ata, tamra tangara-na ta langta, nangahu d'ete, mono linage: "Ma-b'ugera-wu!" Nyi payàd'a-d'awe b'a na-tàgaha katilu-na nàd'a ata katilu, na ma-b'ugera; mono làmana na-tawàlaha-we. Naingta panewe padàha-nage. B'ege i Yesus na-pauna-yi red'a ata kad'ana ned'a, ila d'ad'ulka-kawe ta ata heka b'a agawe'nna kad'ad'i. Bolo, rehi herina-ge i Yesus, rehi gi toma gi d'ikiwe b'a talara-ge. D'a-hangàtara tetàka ata mono lid'age b'a d'apanewe, "Yesus na-padàha kàhawe, ata katilu na-pad'ad'i-ge b'a darànge, ata kabànga na-pad'ad'i-ge b'a d'a-panewe." Mrk. 7:31-37

4 Yesus nakako ta pànu we

B'a manari gàd'ina-ge, ana pakodo palole-na i Yesus tau nutud'a ta taska. D'awaina tena, b'a d'apala-ge taska, aro nutu ta parona Kapernaum. Kàha b'a nagàdi-ge, wàle nad'iki-ma-hodi i Yesus. Na hawarata na-rereha, mono ngalungu na-mapalu ta tena. B'a pata lima watu pa-padede-ge b'a d'ab'ohe-yi tenad'a ràd'a ana pakodo palole-na i Yesus, nyi eta payàd'a-d'ani i Yesus b'a na-d'àheka-yi tena, b'a nakako ta pànu we. Hàda madauta-yi, bolo linage i Yesus, "Ilami madauta-ka, nauwa-'nna 'nne, gurumi.' D'ubu d'a-au pahiba-yi i Yesus tama ta tena. Nyida memawe b'a d'ad'iki-ge padau arod'a. Yoh. 6:16-21

5 Yesus na-patàgaha ata kalawara ta Genesaret

D'age iha làd'o i Yesus mono ana pakodo palole-na b'a d'a-pala-na taska. D'ad'iki ta Genesaret, mono d'aburu-d'a ned'a. B'a tamra hud'a wali ta tena, wingu tadad'a-ni i Yesus. Red'a ata ta kalingora-ge, d'amala-lai, d'araka-di ata kalawara b'a d'angidi-nadi i Yesus. D'angidi-yi ata kalawara ta padauna i Yesus pa-madàmu-d'a. D'angidi-yi ràd'a ata kalawara ta paràgana padau maina i Yesus, walid'a ta iha desa — iha desa iha kota — ina kota mono iha parona — iha parona. Dakarai-we ta i Yesus, ka napahai-ge b'a jojayi, langu kaj'oj'a-d'a kanage kalàbe-na i Yesus. Mono tàngana ata ka j'oj'awe 'nna kalàbe, d'a-tàgaha tàkad'a. Mrk. 6:53-56

6 Ata tada mono ata kabànga karayi-na uma

Padàka, linage i Yesus: "Iha ata — iha ata karànge-gage lii panua-gu mono kad'oku-ge, natuj'a-yi ata tada karayi-d'ana umana ta pànu tana katuu." Naburu ura, àmige lai we mono naj'oj'a-we warata kàla bolo wàle nabuka-mawe 'nna uma, oro b'a padede-d'awe ta tana katuu. Lina d'omoge i Yesus, "Ata karànge-gage lii panua-gu, mono wàle nad'oku-ge, tuj'ana-ni iha wu ata ka-kabànga, ka-padede-d'a umana ta pahalai. Naburu ura, àmige lai we mono naj'oj'a-we warata kàla bukana-ge 'nna uma. Hàladau-we manyegara-ge!" Mat. 7:24-27

7 Yesus na-pakanawa warata

Padàka, napàne i Yesus ta iha wu tena, d'ad'oku-ni ana pakodo palole-na. Nyi mawud'a payàd'a-d'ana warata ned'a ta taska pad'au pakako-d'ani tena, lodo tamana-ni we nàd'a tena. Bolo tamra dura-monage i Yesus. Nyid'awe ma ka-àmidi ana pakodo palole-na i Yesus paràd'u-yi, lid'age, "Guru gatama, bulod'a-ge-lage!" Na-baleha-we i Yesus, "Àha ma mi-madauta-mi? Wàle ana-manage lewara-ge patena-miga!" Kàdena-ge i Yesus, na pa-kanawa-yi warata mono ngalungu. Wingu kanànara d'ahingu-nage 'nna taska. Ana pakodo palole-na i Yesus kad'ana ned'a lari ta tena, d'a-hangàtara, mono lid'age: "Aga ata kataud'a-nani nàd'e ata, ma nad'oku-kani warata mono ngalungu?" Mat. 8:23-27