Mark 1:21-34

Yesus inam enen samasamai elapei let ina

21 Yesus itora nei kanei gasua ir dapan natapen Kapernaum ka dame ne. Tentene hari Sabtu maera sinonongan, ja Yesus itora nei kanei gasua ir pel natapen er kanei tamata pen daakai dai galai jebagulgul, ja Yesus ersirpei Jirjir Duai lir ja papai aka perai ner. 22 Perai ner daerang aka Yesus kanei nounou, ka Yesus seina elraka sena Jirjir Duai lir ja papai. Ja on apuk pei tungguru dameme ne ida nounou. 23 Yesus inou sena era, tentene tamata ertomtom enen samasamai akai ei galai jebagulgul abil er, ja igolal nam jinjinai, ka inaka Yesus nam on: 24 "Yesus, Nazaret jujuirna ken ei, ken ma kam tongar leba pelpel kama? Ken ma kam punpun kama, tei! Ok kolraka ken nata! Mo ken, Jirjir Duai kanei tamata loirna peipei dosa ken!" 25 Tentene Yesus ekatou enen samasamai er nam on: "Ngaroroir pui! Molapei let nen!" 26 Tentene enen samasamai er kase aka elapeipei, mo inam let ner ertabeibeina, ja igolal nam jinjinai, japun mo elapei let ner, ka ela. 27 Ja tamata dameme ne daerang, ja era darjaman darpoyai, mo danaka dam on: "E! Seta maera on jertun tajou atorang ruparupa on. Ka Yesus inaka leba ia gatan ka erlanganna, ragoi nei inaka enen samasamai er ka elapeipei, ka enen samasamai er elapei." 28 Ja jomijomir seina mo tamata dameme ne darsirpei ka era pen min, ja dapo dai sena garia Galilea, aka Yesus ma idem tantan let ner.

Yesus inam tamata jabijabin jobinai

29 Jampun era lemai dalalu dapei galai jebagulgul er, Yesus, Yakobus, Yohanes, Simon pel Andreas, daten tene dai Simon ja Andreas ida galai. 30 Era dasi, mo Simon janin konikonirna ner ne ininin, aka nei taporan rarai dengal, ja era ina jomijomir ukuk mo ersirpei ka Yesus aka konar ergoragorak nen. 31 Yesus isika nei, ka esaru nei lemai, ka inam nei erlongar. Ja nei taporan rararai er ka pui, mo nei idem manam aka era. 32 Baritan maera ner somna, japun natapen er abil, yang dargagayal, dartomtom enen samasamai, dapoyai sena dasika Yesus. 33 Ja natapen er kanei tamata dargulai sena dai ne. 34 Ja erda jarajarai er, in jabin, ja Yesus igakar sena ukai, ja nei ekarir enen samasamai pei tamata jabin. Nei ekarir enen samasamai nam ne, mo nei ekatou enen samasamai er, ka elapei gatan, takom ersirsir. Nei ekatou enen samisamin dir, aka enen samisamin dir dalraka Yesus Jirjir Duai anat, ja nei jesana aka era darsir dapeipeina.

Mark 1:40-45

Yesus inam tamata igaga kusta ina jobana

40 Yesus erter natapen dir, mo let ina ijou Yesus ka isikana. Let nen iga kusta. Isika Yesus, ka eropna ei Yesus juai, ka ebarai pei nei nam on: "Ok kolraka ken bisa mom ok jobanga. Ja kenjou ken kot, ja mom kusta on pui pei ok, to ok bisa kutorai mam sambayang min." (Aka era Israel juir sakali bisa datora tamata dagaga kusta damdam sambayang, dasaruai min ka sakali bisa.) 41 Mo Yesus abil ipan aka nei, ja nei inam lemai tanna ka inam on: "Ok kot. Kekanam kusta on pui sin." 42 Jomijomir seina, mo kusta er pui pei let ner sin. 43 Tentene Yesus inaka nei ka ela nam jomijomir, mo inakana nam on: 44 "Mela, ka takom morsir peipei ok mak dem tantan ken on, mo tentene sika taper yang iparapara tamata ida lemalema jan ei Jirjir Duai kanei galai jinjinai er, ka mo ijou kekanam kusta on pui sin. Jam po ariran ruai, ka muk ariran ir aka kekanam lemalema aka Jirjir Duai. Ka Jirjir Duai inaka Musa ka tamata yang jobana peipei kusta inal ariran ruai ka ipo aka Jirjir Duai. One ja era daparong na dalraka ken jobaka sin, ka ken bisa tora era minam sambayang min." 45 Tentene let ner ela, kase aka isarasaran Jirjir Duai kanei galai jinjinai er. Nei ela nam on, Yesus ma ekatou nei ka takom ersirpeipei kaka pen, one mo nei ela ka ersirpei ka tamata jabin, darsirpei darkayai, natapenpen dameme garia ner dalraka dasena, aka Yesus ma inam kusta er pui pei nei. Ragoi Yesus na ipan nal natapen ia, natapen abil er dam nei ime taporan, ragoi nei sakali bisa ipan nalnal natapen dir min, mo ela ka ime ra jurin toba sakaloiloina ina. One mo tamata jabin dai bana ba gatan, daela darok Yesus dai ra er.

Mark 2:1-12

Yesus inam let abai jan sosoyardi jobana

1 Yesus ka dame ra er ga maera pen kase ja daltuk dai natapen Kapernaum, ka dame galai ia. Tamata dameme ne datalenga aka Yesus nena galai sin, 2 ja era daparong dasi ka dargulai dai galai er aka nei, ja galai er jelai sampi leipapai min ka jelai. Mo Yesus ersirpei Jirjir Duai lir ja papai aka era. 3 Yesus ime galai abil, ersirpei Jirjir Duai lir ja papai nam on, mo tamata pen dapo let ina dai galai er. Ja let ner, era kai databana datan gale, aka nei abai jan soyardi. 4 Mo era sakali bisa dapopo let ner daldal leipapai, aka tamata jabijabin er. Ja era daakai reyan dai galai er kanei pupan, ka dadem doudou tongir uk pel Yesus imeme. Let ner ime nei kanei gale er, japun dadem sel datan nei kanei gale er, ka dam nei elalu ei papa aka Yesus. 5 Yesus ijou era dadem damdam on, ja nei elraka era batultul percaya aka nei Jirjir Duai anat. Ja nei ersirpei ka let abai jan sosoyardi ner nam on: "Boi ei, ok naka ken, kekanam dosa dir puidi sin." (Yesus ersir nam ne, ungatin inam nei abai dir jobijobin, mo jertun inam nei kanei dosa er puipui.) 6 Mo tungguru agama pen datalar ne min, mo dapipikir dam on: 7 "Nei ersir nam ne aka? Mo nei elakala nei rupa Jirjir Duai e? Kama malraka Jirjir Duai seina bisa inam dosa on pui." 8 Mo Yesus jomijomir seina ijou et lar era abaldi, ja nei inaka era nam on: "Kern mipikir minam ne aka? 9 Ok ma korsir kom nei dosa dir puidi, mo kern ungatin percacaya ok kela kuasa ruparupa ne. Mo kenjou ok kom nei abai dir epardi ka erter, one ja kern na melraka ok kela Jirjir Duai kanei kuasa. 10 Ok kol bana Jirjir Duai kuma dunia on, ketpei tamata, ja ok kela kuasa ei dunia on, ragoi ok bisa kom nei dosa dir puidi, pel kom nei abai dir epardi min. Mo mijou on miuk matin, to kern melraka." Tentene nei inaka let abai jan sosoyardi ner nam on: 11 "Ok naka ken, morlongar, kam ran po kekanam gale on, ka mela moi bot." 12 Tentene let ner erlongar, ka iran po nei kanei gale er, ka erter ela. Ja era daparong dajou, ka daerang dengal, ka daparora Yesus kanei boi Jirjir Duai, ka dam on: "Seta jertun maera on tajou tamata ina idem namnam on."

Mark 3:1-6

Yesus igakar tamata pel maera sinonongan, Farisi juir ir makinai

1 Yesus itora perai ina daakai dai galai jebagulgul pel maera sinonongan, mo ei ne tamata ina lemai penai soir. 2 Mo Parisi juir pen dame ne min, ja Parisi juir in, kenjou ina inam karja pel maera sinonongan, era makinai dengal. Tentene Parisi juir ir dasalala reyar Yesus, aka nei na igakar tamata nen pel maera sinonongan on te sakali, to era daela ka darsirpei ka gul ja kapala aka Yesus inam karja pel maera sinonongan. 3 Nei inaka tamata lemai penai sosoir ner, ka inam on: "Ma ka momarer taporan on." 4 Japun mo; nei inaka Parisi juir ir nam on: "Maera sinonongan on, Jirjir Duai inaka seta ka takom tarn karja, mo tatongan. Mo kern melakala tene seta sakali bisa tapo epepir aka tamata pelpel maera sinonongan min e? Kenjou ok sakali kubanbantu nei, sama pel ok kupun nei gatan, teil" Ja era sakali dakotkot, mo era didingil pui gatan. 5 Yesus esalala era pel mamakai, ka inam on: "Kern mijou tamata nen ergagayal on, mo kern sakali bisa abai dapan akakana e?" Tentene inaka tamata ner inam on: "Nayar lemam." Japun mo inayar, ja nei lemai penai er epir sin. 6 Tentene, Parisi juir ir dalalu pei galai jebagulgul er, ka dasika raja Herodes kanei tamata ir, ka era daparong darsir aka dapunpun Yesus.

Mark 4:35-41

Yesus inam enen er pui pel banol ir ka daropai

35 Maera ia, Yesus ersirpei Jirjir Duai lir ja papai aka perai ina. Inou sena era, ka dededam sin, ja inaka nei kanei gasua ir nam on: "Mima ka mietar ka tai danau penai ne." 36 Era dalapei perai ner, mo nei itora era daetar letai nei ma italatalar er, tentene letin apukpukdi daar goyar era, ka erda suka aka datalelenga nei ersirsir. 37 Tentene mangar samasamai ima, ja ipo enen pel goyan. Banol darakaiai, ka banol sapusapur et lengan letai abil, letai er koil aka raram. 38 Yesus ime letai abil, mo inin letai mir. Era dapangan nei, japun darsirpei ka nei dam on: "Tungguru ei, seta kai na topalda, mo ken sakali bebebar e?" 39 Tentene nei ertamarer, ka osul enen er, mo inaka banol dameme danau ner ka inam on: "Meropkim! Enen er ka seta!" Tentene enen er seta, banol ir ka daropai, danau tit er ka eriora. 40 Nei inaka era ka inam on: "Kern mibebar aka leba? Kern nungatin percacaya ok kol bana Jirjir Duai e?" 41 Mo era daerang dengal, ja era ina ka ijaman era ina: "Nen nata? Ragoi inaka enen er pel danau ner ka daiku nei."

Mark 5:1-43

Yesus ekarir enen samisamin jabin pei let ina

1 Yesus itora nei kanei gasua ir dalar ka dapan danau penai ne, ei garia Gerasa juir dameme. 2 Yesus jertun elalu peipei letai, mo let ina inal bana lia abil, ela elaseta nei. (Lia din aka Israel juir ida atorang, tamata dagoi, ja sakali dangolangolai, mo damai dai lia abil.) Mo let nen ertom enen samasamai, ka jerana. 34 Nei jola imeme lia abaldi din. Tamata dameme ne pernah dasel nei dauk sel pel rantai, karaka nei ipunpun tamata pen. Era dam sel ja rantai tan nei mata arei ba sin, mo nei at sipan sel jan ja ingayal rantai dir, ka sakali bisa tamata ina isel nal nei minmin. Tamata sakali bisa dam nei ermalamala. 5Ja pit mo maera, nei erter ela ka ima, ei lia juin dino, ja akai til ino, mo igolal ja inar nei taporan uk pot. 6 Setin Yesus ime jou, mo let nen ijou nei sin. Tentene let nen ela isi, ja enen samasamai er ibebar aka Yesus kanei kuasa, 7-8 ja igolal nam jinjinai, mo inam on: "Yesus ei, ok kolraka ken Jirjir Duai anat ken! Ken ma aka gala ba?" Tentene Yesus inaka enen samasamai er nam on: "Enen samasamai ken ei, molapei tamata nen!" Ja tentene, enen samasamai er inaka Yesus nam on: "Takom siksiksa ok! Mur gaba tan ken amam Jirjir Duai!" 8 Tentene Yesus ijaman enen samasamai er nam on: "Kekanam ngaran ba?" Enen samasamai er ersirpei ka Yesus nam on: "Ken tor ok mom Bataliun gatan, aka kama jabin dengal ona na let nen." 10 Ja nei ebarai pei Yesus, ka takom Yesus ekaririr enen samisamin dir peipei garia ner. 11 Mo pop perai ina ime til ner sian, aka darokrok manam. 12 Tentene enen samisamin dir dabarai pei Yesus, ka dam on: "Naka kama ka sur ukkam mai pop ino abaldi." 13 Tentene Yesus itela nal erda narpet on, ka inaka enen samisamin dir ka sur ukai dai pop ir abaldi. Ja pop perai ner, dajouai sena ja kotan ertom ripun rua. Pop ir dala dai sel ner tit, ka darbarai dai danau Galilea abil, ka topalai, ja pop ir soyarai dasena. 14 Mo tamata dajajaga pop ir dala daltuk ka darsirpei dai kota ja natapen dameme ne. Tamata dai banabana kota, natapenpen jan, daparong dasi ka dajou let ner. 15 Era dapan one aka Yesus, mo dajou tamata yang enen samisamin ma damemena ner, serai jan tongardi sin, ka uk jertai sin, ka italar. Tamata ir dajou nei, ja daerang pel dabebar. 16 Tentene tamata yang ma dajoujou ir darsirpei ka tamata yang jertun ma damama ir, aka Yesus ma ekarir enen samisamin pei let ner, ja era darsirpei min aka pop ir ma darbarbarai er. 17 Tentene pop duduinai ir pel tamata dabanabana garia ner danaka Yesus dam on: "Mom, to molapei kakama garia nen." 18 Tentene nei akai ei letai min, ja let yang enen samisamin ma dalapeipeina ner ebarai pei Yesus nam on: "Yesus ei, kenjou ken kot, ja ok tora ken." 19 Yesus jesana, mo inaka nei nam on: "Moltuk moi kekanam tamata, ka morsirpei aka era leba gatan Jirjir Duai ma idem tantan ken on, pel nei abil ipan aka ken." 20 Tentene let ner inaltuk, ka ersirpei ka tamata dameme garia Dekapolis aka leba gatan Yesus idem tantan nei er. Ja tamata dameme garia ner daerang.

Yesus inam konar ergagayal ina jobana, ja inam rarga sosoirna ina erna

21 Yesus ka dalar dai danau penai ne dauk letai. Dapan one, ja tamata jabin daparong dasi ka dam nei ime taporan. Mo Yesus ertamarer danau ner parepir. 22 Yesus ime ne, mo Yairus isi. Nen Yairus ei kapala pei natapen er kanei galai jebagulgul. Isika Yesus aka nei anat ergayal. Isampi Yesus juai, japun eropna ka esaru Yesus abai jan. 23 Tentene ersirpei ka Yesus nam on: "Yesus, ok ma ka kobarai pei ken, ka ok anang konikonirna ergayal, ka naroka sosoirna. Ja ken tora ok moi ok kanang galai, to ken mom lemam tan nei, to nei takom sosoirna." 24 Tentene Yesus itora Yairus darter. Mo tamata perai ner ar goyar era, ja daroka era, ja dartiltilai, Yesus min ka datil daukna. 25 Mo konar ina erter goyar era min. Konar nen ergayal tahun urpapa ia mo ruai sin, aka gun ertar. 26 Nei jausin isika tamata dargagakar jabin sin, ka ekapui nei kanei doit tan era, one mo nei sakali jobajobana, mo pit ja maera nei jergayal er jola akakai. 27 Tentene nei etalenga tamata darsirpeipei aka Yesus igakar nalnal tamata jabin, ja nei isi, ka ei perai ner aruai, ka erter ei Yesus til kei. Tentene nei esaru tan Yesus kanei jertai, 28 aka nei ipikir nam on: "Kenjou ok kosaru tan Yesus kanei jertai no gatan, jergayal on na pui." 29 Jomijomir seina, gun er ka at seta, jergayal er ka pui, ja nei iperat nei taporan jau marangai uk sin. 30 Yesus ungatin ijoujou konar ner, mo nei elraka nei ma inam konar ner jobana sin. Japun nei erutarna, ka ijaman nei kanei gasua ir nam on: "Nata ma esaru tan ok kanang jertai on?" 31 Nei kanei gasua ir darsir dapei ka nei dam on: "Tamata jabijabin er ma dartiltilai daidai ken juam er, mo ken morjaman aka nata ma esaru tantan ken er e?" 32 Japun mo nei ijou elat perai ner, ka nata ma esaru tantan nei. 33 Konar ner ibebar dengal ja emagor, aka nei ma esaru tan Yesus kanei jertai er. Ja nei elraka nei jobajobana on aka Yesus. Tentene nei isika Yesus, ka eropna ka esaru nei abai jan. Japun mo nei ersir erpeina ka Yesus nam on: "Ok kanang jergayal er ka pui sin, aka ok ma kosaru tan kekanam jertai er." 34 Ja Yesus inaka konar ner nam on: "Jena ei, mela gatan. Ka ken percaya ok kol bana Jirjir Duai, ja kekanam jergayal er ka pui sin. Ja mela, ka ken sakali na mil gaga on minmin." 35 Yesus netanatan ersirsir ka konar ner, mo tamata pen dabana Yairus kanei galai dama, aka Yairus anat ner ma soirna sin. Era darsirpei ka Yairus dam on: "Kekanam gasua ner ma soirna sin. Ja takom naka Yesus ka isi minmin." 36 Yesus etalenga erda rau er, ka ikom uk gatan, mo inaka Yairus nam on: "Takom auriiram. Ken percaya ok aka leba gatan, ok bisa." 37 Ja Yesus inaka era ka dame sena, mo nei elat nal Petrus pel Yakobus pel Yakobus kanei jel Yohanes ner, ka datora nei dai galai Yairus kanei. 38 Era dapan Yairus kanei galai on, mo dajou tamata jabin daten dam jinjinai aka Yairus anat ner ma soirna. 39 Yesus akai ei galai abil, ja inaka tamata perai ner inam on: "Kern mitenten aka? Gasua nen sakali ma sosoirna, mo nei ne ininin gatagatan." 40 Ja tamata dameme ne dajear Yesus, ka era dalraka rarga ner ma soirna sin. Tentene Yesus inaka perai ner nam on: "Kern miela." Japun mo nei itora gasua ner jinai ja amai jan ir, pel nei kanei gasua lasai ir, sur ukai dai godong gasua sosoirna ner imeme. Rarga ner pet puina sin. 41 Tentene Yesus esaru tan gasua ner lemai jan, mo inaka nei uk erda rau er inam on: "Talita kum!" Mo one kanei arti nam on: "Rarga ken ei, morlongar!" 42 Jomijomir seina, mo rarga ner erna min sin, ka erlongar. Nei emarer ka erter nal godong ner abil. Rarga nen kanei umur jau tahun urpapa ia mo ruai sin. Ja tamata dameme ne dakatan darukai. 43 Ja Yesus inaka nei jinai ja amai jan ir ka inam on: "Kern takom mersirpei kaka pen aka ok ma kom nei ererna on." Ja nei inaka era ka dai manam aka rarga ner, ka emanam.

Mark 6:30-56

Yesus inat manam ka let ripun lema

30 Maera ia, Yesus oban nei kanei gasua ka darterter natapen jabin, aka danounou tamata dameme ne pel dagakar daldal tamata dargagayal. Japun era daituk damaka Yesus, ka darsirpei ka Yesus aka leba gatan yang era datotongar pel danounou tamata dameme natapen dir. 31 Yesus kanei gasua ir tobinai, mo tamata jabin daela ka dama, ja era damanamnam ka sakali bisa. Ja Yesus inaka era nam on: "Mima ka seta seida targatda tai ra jurin toba sakaloiloina ina, to bisa seta seida tame ne, ja kern bisa mitongan minal leilei ia." 32 Ja era daetar letai, ka dasaran ra jurin toba sakaloiloina. 33 Mo tamata jabin dajou era dalapei ne, ja dajou gayai, ja dabana natapenpen dameme garia nen, tamata dala dai jala ra, dapeda pei era dai ra jurin toba sakaloiloina ner. "Tentene Yesus elalu pei letai, mo nei ijou tamata jabin uk, ja nei abil ipan aka era, ka ersirpei ka nei kanei gasua ir nam on: "Tamata perai nen ida tungguru agama jan sakali danou era dam epepir. Mo era rupa kana ne mo domba sakali tamata dajajagai." Tentene nei inou era uk Jirjir Duai kanei nounou, mo uk rau mangapan jabin. 35-36 Maera ibel sin, nei kanei gasua ir dasi ka danaka nei dam on: "Tungguru ei, on ka jou dengal, ja lebai naka tamata jabijabin on ka daela, ka pit er on sin. To era dakel manam dai natapenpen dina na ne." 37 Ja Yesus naka era nam on: "Kern minam era damanam." Tentene era dam on: "E! Joba tamata kuran! Mo tamata jabijabin on, ja kama na maela ka makel roti mauk doit sama pel maera rat rua kanei gaji!" 38 Tentene Yesus ijaman era nam on: "Roti arei ba dina na kern? Mo miela ka mijoudi." Ja daela ja dajou dasenadi, ja era dama darsirpei ka Yesus dam on: "Roti dir lema, pel sima ir ruai." 39 Ja Yesus inaka nei kanei gasua ir ka danaka perai ner darpalenai ka dadem perai jabin, ka datalar gur molamolam er tit, 40 perai ina ka rat, perai ina ka urlema. 41 Tentene Yesus inal roti lema dir ja sima ruai ir, ja ijou po ei atajo, ka ersir ka Jirjir Duai nam on: "Boi ei, matamala ka ken ma mol manam on ka kama sin!" Japun mo ikoyal roti dir uk lemai, ja inaldi ka nei kanei gasua ir, ka era dapalendi darter perai ner. Ja sima ruai ir min ka ikoyalai, ka era dapalenai daka era min. 42 Ja era daparong daka ga era tubar jan jelin. 43 Daka dasena, ja nei kanei gasua ir dagul roti ja sima ungatin dakakadi dir, ja dartom dai goba jelai urpapa ia mo rua. 44 Ja tamata dameme ne, let seina ertom nal ripun lema, mo ungatin konar ja gasua.

Yesus erter nal gar er tit

45 Yesus inaka nei kanei gasua ir ka daetar letai er, ja nei nam on: "Kern mipeda mei danau penai ne, ka mei natapen Betsaida, mo ok na kol mir kak naka tamata jabijabin on ka daltuk, japun ok na kar goyar kern." Tentene nei kanei gasua ir daapal dakom nei dai ne, 46 japun nei inaka tamata jabijabin er nam on: "Kern miela, mo ok me on." Tentene nei seina ela ka akai ei til ner tit to nei jou pei tamata, ka nei na ersir pelpel Jirjir Duai. 47 Tentene maera ner somna, ka jau pit sin, mo letai er jau ena jou sin, mo nei seina ime ra. 48 Tentene nei ijou era dapapayan letai er, ka darboi dengal, aka daroiroi enen er. Lobar tit, ja nei erter nal gar er tit isika era ei danau ner taporan. Erter gar no tit, ja nei kase aka inal juai peipei era. 49 Tentene era dajou nei erterter gar no tit er, mo dalakala tene nei tamata kuir ia, ka dagolal. 50 Ka era daparong dajou nei, ja dakatan darukai. Tentene nei ersir ka era nam on: "Sakali leba ia! Ok er on. Yesus ok. Takom mibebebar." 51 Nei etar ei letai abil aka era, ja enen er seta. Mo era daerang dengal. 52 Era so dajou nei idem manam aka tamata jabijabin er, one mo era ungatin dalraraka nei Jirjir Duai anat. Ragoi dajoujou nei erter nalnal gar tit er, ja daerang dengal. Ka ungatin dalraraka nei kanei kuasa.

Yesus igakar Genesaret juir jan

53 Era dapo letai er ka dapan danau penai ne, ja databei pot ka darmen Genesaret kanei bel sian. 54 Era dalalu pei letai, mo tamata dameme ne daparong dajou daga nei, ka dam nono Yesus. 55 Ja era dala daela ka dama dai garia ner dasika tamata dargagayal, ka dapoyai damaka Yesus. 56 Ja Yesus ei ba gatan, ei natapen te, ei kota tejei mo ei masaman, ei ne tamata jola dagulgul erda tamata dargagayal aka Yesus. Ja era dabarai dapei Yesus, to Yesus kot, ja masakia tamata dargagayal ir dasaru Yesus kanei jertai ganim gatan. Dargagayal ir, bai ja bai dasaruru Yesus ka jobinai.

Mark 7:24-37

Konar sakali Israel jujuirna ina percaya Yesus

24 Yesus ka darter papa dalapei garia Galilea, ka dai kota Tirus kanei garia, mo garia nono itom Siro-Fenisia. Mo garia Siro-Fenisia nen, ime negara Israel kanei juai. Mo tamata dameme garia nen kafir, sakali dam sambayang akaka Jirjir Duai. Yesus itora nei kanei gasua ir dapan one ka dame galai ia, mo Yesus jesana aka tamata jabin dalraraka nei imama. One mo tamata jabin datalenga aka Yesus nena na ne. 25-26 Konar ina etalenga aka Yesus ime ne. Mo konar ner kanei anat konikonirna ina, ertom enen samasamai. Konar nen ime garia Siro-Fenisia on, ja nei sakali Israel juir, mo nei inal bana negara Yunani. Ja konar ner etalenga Yesus ime ne sin, ka isikana, ka eropna ei Yesus juai. Tentene nei ebarai pei Yesus, to nei ekarir enen samasamai er pei nei anat. 27 Mo Yesus uji konar ner, ka ersir nam on: "Jirjir Duai oban ok ka kubantu Israel juir. Mo ken sakali Israel juir, ja ok nak bantu ken aka leba? Kol manara epepir pei Israel juir ka kotabei aka kern, ok jesang!" 28 Konar ner nam on: "Batul ken, boi. Ok sakali Israel juir. Mo kenjou era Israel juir pen jesinai aka ken molmol epepir akaka era, ja lebai mol epepir leilei ia aka kama min." 29 Tentene Yesus elraka konar ner percaya aka Yesus inal bana Jirjir Duai, ka inam on: "Ken ma morsir mom ne, ja mela moi bot gatan, ka ok kom enen samasamai er elapei ken anat sin." 30 Tentene konar ner inaltuk ei nei kanei bot, ka ijou nei anat ner ininin koi tit, mo enen samasamai er jausin ma elapei nei anat ner sin.

Yesus igakar nal tamata guguyakna ina

31 Yesus itora nei kanei gasua ir darter papa dabana kota Tirus daela ka dai kota Sidon. Ja dalapei Sidon ka daela dai danau Galilea, mo darter dai garia Dekapolis kanei taporaporan. 32 Era dajit ne, mo dartom tamata dapo let ina dasika Yesus, mo let ner guyakna, ja sakali bisa ersirsir aka nei kabelir top. Tentene dasi ka dabarai pei nei mo dabilom nei, to Yesus inam lemai jan tan let ner. 33 Yesus igat let nen pei tamata perai ner, to era ruai tinai. Yesus isur uk lemai oyoir tan let nen takir abaldi, ja iner bala nei lemai oyoir, japun mo erbum let ner kabelir. 34 Tentene Yesus esalala ei atajojo, mo at pet, to let guguyakna ner elraka aka Yesus ne ebarairai peipei Jirjir Duai. Tentene inaka let nen uk erda rau er nam on: "Efata!" One kanei arti nam on: "Ken takur din na tolardi!" 35 Tentene tamata ner takir dir ka tolardi, nei kabelir er ka epir, ja nei ersir ka tongirna. 36 Yesus ersir ka tamata dameme ne, ka takom darsir dapeipei akaka era pen minmin. Jerjer tun ka Yesus ekatou era aka darsir dapei, ka sakali mo era dapo dai papa je nangan. 37 Ja tamata dameme ne dakatan, ka daerang dengal, mo danaka dam on: "E! Yesus nen idem gala ia gatan ka erlanganna. Inam guguyakai ka datalenga papa, dudukuai ka darsir."

Mark 8:1-13

Yesus inam tamata ripun ka damanam

1 Maera ia, tamata jabin dargulai aka datalenga Yesus ersirsir. Era dame ne, mo era manam puiai dauk. Nei itor nei kanei gasua ir ka inaka era nam on: 2 "Ok abul ipan aka tamata jabijabin on, ka maera lat din era datora ok, ka erda sean er daka dasena sin. 3Ja kenjou ok naka era ka daltuk dai erda bot je taruan, mo era kanorai, era pen na dapaloloar, ja dapan dai jala, ka era pen dabana deden, mo era pen dabana joujou ukuk." 4 Tentene nei kanei gasua ir danaka nei dam on: "Seta tameme ra jurin toba sakaloiloina nen, mo tamata sakali dameme on, manam ka pui, ja seta na tarn perai nen ika leba?" 5 Nei ijaman era nam on: "Roti arei ba dina na kern?" Era darsirpei dam on: "Roti din dubam tin." 6 Yesus inaka tamata perai ner ka datalar kola tit. Japun mo nei nal roti dubam dir, ka ersir ka Jirjir Duai nam on: "Boi ei, matamala ka ken ma mol roti din ka kama sin!" Tentene nei ikoyaldi ja inaldi ka nei kanei gasua ir, ka era dapalendi darter perai ner. 7 Nei kanei gasua ir daela sima boraborarai arei ba min, japun nei ersir ka Jirjir Duai nam on: "Boi ei, matamala ka ken ma mol sima in ka kama sin!" Ja inaka era ka dapalen sima ir darter perai ner min. aJa perai ner ika ga era tubar jelin, mo nei kanei gasua ir dagul roti ja sima koyaldi ungatin dakakadi dir, ja dartom goba jelai dubam. 8 Tamata perai ner daparong sena kotan ripun ka. Damanam sena, ja nei inaka era ka daltuk dai erda natapen jan. 10 Nei itora nei kanei gasua ir daakai dai letai, ka dalar dai natapen Dalmanuta.

Parisi juir danaka Yesus ka idem mujizat, mo nei jesana

11 Dapan one, ja Parisi juir arei ba dasika Yesus. Era sakali dapercacaya aka Yesus Jirjir Duai anat, ja danaka nei dam on: "Kenjou Jirjir Duai anat ken, ja ken dem mujizat ia aka kama, to kama majou." (Era daujuji nei on.) 12 Tentene Yesus at pet, mo inam on: "Ah! Kern tup on melraka sin, mo ok dem mujizat ia aka leba min? Ok sakali nak demdem mujizat ruparupa dine aka kem minmin!" 13 Tentene Yesus apal kom era ei ne, mo akai ei letai, ka dalar dai danau penai ne.

Mark 8:22-26

Yesus inam let matai kolikolin ina erjou

22 Yesus itora nei kanei gasua ir daetar letai er ka dapan natapen Betsaida. Mo ei ne tamata pen datora let matai kolikolin ina dasika Yesus, ja dabarai pei nei, to inam lemai tan let matai kolikolin ner, to nei matai dir epardi. 23 Tentene Yesus esaru tan let matai kolikolin ner lemai, ka darter dai natapen er juai. Tentene nei iner bala let ner matai dir, japun inam lemai tan let ner, mo ijaman nei: "Ken bisa morjou sin te nungatin?" 24 Tentene let ner esalala ei mona, ja ersir nam on: "Eya, ok jou tamata darterter sin, mo ok kujou era rupa kana ne kei jan." 25 Yesus inam lemai tan let nen matai dir min, japun mo nei esalala ka erjou nam epepir. 26 Nei matai dir epardi, ja Yesus inaka nei nam on: "Takom pan molmol natapen on, mo morter tentene moi kekanam galai."

Mark 9:14-29

Yesus inam enen samasamai elapei gasua ina

14 Yesus itora nei kanei gasua lasai ir dalalu dapei til tit ototai, dasaran til ner sian aka nei kanei gasua serai ir. Dajou nei kanei gasua serai ir dame perai ina taporaporan, ja tungguru agama pen datora Yesus kanei gasua serai ir dam papa gora. 15 Tentene perai ner ijou Yesus imama sin, ja era dakatan, ka dala dasikana ka dam on: "Ken ma si e?" 16 Mo Yesus ijaman era nam on: "Kem mitora era. minam papa gora aka leba?" 17 Tentene let ina imeme ne ersirpei nam on: "Tungguru ei, ok mak tora ok kanang gasua letletna maka ken, aka enen samasamai ime nei, ja inam nei sakali bisa ersirsir. 18 Nei, kenjou enen samasamai on inal tan nei mata ia, ja inar ukna tan kola, ka siberber nal papai abil, nin jan ka katou tandi, mo nei taporan ka kelir. Ja ok ma kobarai pei kekanam gasua in ka dakarir enen samasamai er, mo era sakali bisa." 19 Tentene Yesus inaka era nam on: "Ah! Kem tup on nungatin mipercacaya ok kol bana Jirjir Duai, tei! Ok kutora kem tame, ka ok nou kem mo jou sin, mo sampi maera on ok nungatin kujoujou nounou er kanei simai. Ja ok kom ba aka kem? Kusabar kem te kolapei kem? Mitora gasua nono mima." 20 Tentene datora gasua ner dasika Yesus. Mo enen samasamai er ijou Yesus, ja elraka Yesus kase aka igakar gasua nen, ja enen samasamai er inal tan gasua ner min. Inam gasua ner ertabeibeina, ka gasua ner ipan tan kola, ka erilarna, ja siberber nal nei papai abil. 21 Yesus ijaman gasua ner amai nam on: "Enen samasamai er ime nei mo jou si e?" Nei nam on: "Nei sakali igara pelpel, mo nei boraborarna, ja nei ertom. 22 Enen samasamai er jola etabeibei nei ei ou abil tejei ei gar abil, aka ipunpun nei. Mo ken, ken kuatka aka mom enen samasamai on elapei ok anang nen te sakali?" 23 Yesus nam on: "Ken morjaman aka ok kuatnga e? Leba gatan ok bisa, malikang ken percaya ok bisa." 24 Gasua ner amai igolal nam on: "Ok percaya ken bisa, mo ok kanang percaya on kuran uk. Tolong ok, to ok nak percaya kom batultul!" 25 Yesus ijou tamata jabin dala damama, ja nei osul enen samasamai er nam on: "Enen samasamai ken ei, ken mom gasua nen sakali bisa ersirsir mo sakali bisa etalelenga, mo ok naka ken ka molapei nei, ka takom maka nei minmin." 26 Tentene enen samasamai er igolal, ja inam gasua ner ertabeibeina, japun elapei nei. Mo gasua ner rupa kana ne mo sosoirna, ragoi tamata jabin dameme ne dalakala nei ma soirna sin. 27 Mo Yesus esaru gasua ner lemai, ka inam nei emarer, aka nei jobana sin. 28 Lakaria mo Yesus itora nei kanei gasua ir daakai dai galai, ja nei kanei gasua ir dajaman Yesus dam on: "Inam ba sampi kama ma marakot, mo sakali bisa ma malmal enen samasamai er peipei gasua ner?" 28 Nei nam on: "Enen samisamin din, kem seikim sakali bisa minamdi dalapei tamata, mo malikang dam sambayang ka dabarai pei Jirjir Duai, japun bisa."

Mark 10:46-52

Yesus inam Bartimeus matai dir ioardi

46 Yesus itora nei kanei gasua ir dasaran Yerusalem, ja dapan kota Yerikho. Tentene dabana Yerikho daela, ja datora perai jinjinaina ina darter. Mo Timeus kanei anat Bartimeus ner italatalar jala er juai, ja nen Bartimeus jola italatalar ne ka erloloar doit, aka nei matai jan kolin. 47 Tentene nei etalenga tamata dameme ne darsir dam Yesus ima sin. Japun mo nei itor ka Yesus nam on: "Yesus ei! Ok kolraka raja Daud anat ken! Sayang ok!" (Nei tortor namnam "raja Daud anat" er, aka raja Daud ner netanatan ererna, mo Jirjir Duai ersirpei ka raja Daud ner nam on: "Ken abul gair ina na ei raja pei Israel juir, ka inam Israel juir eparai.") 48 Ja perai ner ekatou nei nam on: "Ngaroroir pui!" Jejei mo nei itor Yesus uk lir ababil, ja inam on: "Yesus ei! Ok kolraka raja Daud anat ken! Sayang ok!" 48 Tentene Yesus etalenga nei itortor on, ja ertamarer, mo inaka perai ner, ka inam on: "Minaka nei ka ima." Tentene era pen dator tamata matai kolikolin ner, ka dam on: "Takom aururam, mo mortamarer! Ka nei ne itortor ken." 50 Tentene nei etabei nei kanei sabola er, mo ertamarer uk, ka erter isika Yesus. 51 Tentene Yesus ijaman nei nam on: "Kekanam narpet leba, to ok dem aka ken?" Tentene nei inaka Yesus nam on: "Tungguru ei, ok kanang narpet, mom ok matang din darjou." 52 Tentene Yesus inaka nei nam on: "Mela gatan, ka Jirjir Duai na inam ken matam dino darjou, aka ken percaya ok kol bana Jirjir Duai." Ja jomijomir seina, mo let ner erjou sin. Tentene nei itora Yesus darter daldal jala er.

Mark 15:1-47

Pilatus ijaman Yesus

1 Hari Jumat er kanei loloar pit gair molamolam, mo tamata monimoninai ur dubam ir dargulai dai Yerusalem. Ja ine, imam jinjininai, ja Israel juir ida taperperai, ja tungguru agama jan. Era daparong dabagul, ka darsir aka era na datora Yesus dasika Pilatus, mo darsir damdam ba. Tentene era dasel Yesus, ka datora nei dasika Pilatus. Aka Pilatus nono ei jinjinaina pei Yudea garia nono, ja nei min ka ime Yerusalem min. 2 Dapan one, ja Pilatus ijaman nei nam on: "Ken, batultul negara Israel kanei jinjinaina ner, ken e?" Ja Yesus nam on: "Kotan ken mam nanaka no, tongir." 3 Tentene imam jinjininai ir darsirpei nei ka Pilatus, era daur Yesus, dam nei sakali ikiku Israel juir ida atorang pel negara Roma kanei atorang. 4 Era daur Yesus dam on, mo nei sakali ersirsir, ka nei elraka nei sakali salasalana. Tentene Pilatus ijaman Yesus inam on: "Era ma daur ken, mo ken sakali morsirsir aka leba? Ma motalenga si e?" 5 Mo Yesus didingil pui gatan, sakali namnam e te o, ragoi Pilatus erang dengal.

Perai ner isoran uk Yesus

6 Tahun ina ka mata ot, Israel juir dadem ramiang dai Yerusalem, ka era serin dai aka Jirjir Duai inam erda nuinui dalapeipei Mesir. Dademdem ramiang on, ja era jola dasanounou tamata ina ka Pilatus, ka Pilatus inal nei pei bui. 7 Mo let ina itom Barabas itora tamata pen dame bui ner, aka era jausin dapo pet sika negara Roma kanei tentara pen, ka jau darapun tamata sin. 6 Ja perai ner isi ka itor ka Pilatus nam on: "Kama mama on aka masanounou tamata ina, to ken mol nei pei bui aka kama." 8 Tentene Pilatus ijaman perai ner nam on: "Kekima suka aka nata? Kima suka aka kem Israel juir kima jinjinaina ner, te?" 10 Pilatus kanei narpet aka inam Yesus elapeipei, ka nei elraka Yesus sakali salasalana. Pilatus elraka imam jinjininai ir ida sala, ka era dainal Yesus, ja era jesinai aka tamata datoratora nei. 11 Mo imam jinjininai ir darter perai ner taporaporan, ka danaka dam on: "Minaka Pilatus ka inam Barabas elapei bui aka seta." Tentene perai ner inaka Pilatus nam on: "Mom Barabas elapei." 12 Tentene Pilatus ijaman era min nam on: "Mo tamata nen, tamata kem mitortorna kem Israel juir kima jinjinaina nen, ok na kom ba akana?" 13 Era dagolal dam on: "Paku nei tan kei salib gatan!" 14 Mo Pilatus nam on: "Dasalibna aka? Nei itongar atorang samasamai leba?" Mo era dagolal dam jinjinai dam on: "Mosalibna gatan!" 15 Pilatus ibebar perai ner, ja inam Barabas elapei bui aka era. Mo Yesus nen, inalna ka tentara pen ka danarna dauk sel, leilei ia aka sosoirna. Danarna dasena, ja Pilatus oban tentara pen ka inam on: "Miela ka mesalib Yesus nen."

Tentara jan dajear Yesus

16 Tentara arei ba ir datora Yesus dai Pilatus kanei galai jinjinai er abil, ka dator dagul tentara ir dasena. 17 Kana tentara ir dalraka Yesus ma ersir nam nei raja, mo era sakali dapercacaya, ja era dam nei uk jertai rupa raja kanei, one aka dajejear nei. Jertai on, jertai bebeir, ja era datel kei elela ririr, ka dam ei nei jikalai, ka dam on: "Raja kanei topi on!" 18 Tentene era dajear nei dam on: "Ye! Ken molakala tene, ken negara Israel kanei jinjinaina ken, tei!" 19 Tentara perai ner eparong inar nei jikalai uk gangar kaikuikui, ja daner dauk sebar tan nei, japun dapan aka nei abai jan ka darnel nei. 20 Dajear sena nei, japun dam nei uk nei kanei jertai min. Tentene era pen datora nei dalapei galai er, ka darter dalapei kota Yerusalem er, ka to dasalib nei.

Dapaku Yesus dai kei salib

21 Yesus itaba nei kanei kei salib ner ibana kota Yerusalem abil er isaran luar kota. Dajit jala taporan, ja dartom Kirene juir ina itom Simon, ibanabana luar kota erter ma. Nen Simon kanei anat jan, Aleksander ja Rufus. Ja tentara ir danaka Simon aka itabataba Yesus kanei kei salib ner. 22 Tentene dapo Yesus dai tampa ia itom Golgota, mo one kanei arti "Tamata Sosoyarai Gulkalin." 23 Era dakapela anggur pel gakar itomtom mur dai ot, ka dai ka nei, to nei sakali iperaperat, mo nei jesana, ja sakali inunun. 24 Tentene tentara ir dapei Yesus kanei jertai peina, ja dapaku nei lemai ja abai jan tan kei salib ner, japun datarer kei salib ner. Tentene era dai nei kanei jertai er, ka databei ondi, japun dapalen jertai er darterai, era ina ka ia. 25 Loloar pit gair jam 9, mo Yesus, dasalibna sin. 26 Roma juir ida atorang, kenjou dasalib tamata ina, ja dajir nei kanei sala tan kei penapenai, ka dapaku tan nei kanei kei salib otai. Mo dadem kei penapenai aka Yesus, ja dajir dam on: "Israel juir ida jinjinaina ner nen." 27 Japun dasalib tamata darnonongau ruai, ka datarer ina dai Yesus juai penai alemalema, ja ina ei Yesus juai penai angapangapa. Era dam Yesus min ka tamata samasamaina, ja dam era ruai in dapel Yesus dame ot. 28 One tongir pel Jirjir Duai lir ja papai, ka Yesus ungatin igaragara ei dunia on, mo Jirjir Duai jausin ersirpei ka nabi Yesaya nam on: "Yesus na ima dunia on, mo era na dalakala tene Yesus tamata samasamaina." 29 Tamata darter daldal ne dajoka nei, ja dajear nei, ka dam on: "Ye! Ken molakala ken bisa sai Jirjir Duai kanei galai jinjinai er, ka maera lat ken bisa torar min e? 30 Mo kenjou ken mo let, ja molalu pei kei salib otai on, one ja ken sakali na sosourka!" 31 Mo imam jinjininai ir datora tungguru agama ir dajear nei dam ne min, ka darsirpei dam on: "Ye! Kenjou ken batultul mom tamata apukai jobinai muk Jirjir Duai kanei kuasa, ja inam ba sampi ken sakali bisa molapeipei kei salib nen?" 32 Era dam on: "Ken molakala tene, ken Israel kanei jinjinaina, ken e? Molakala tene, Jirjir Duai esanou ken ka mom kama jobakam e?" Ja era dam on: "Kenjou ken seika molalu pei kei salib otai on, one ja kama na majou mauk matin, one ja kama na percaya aka ken mol bana Jirjir Duai." Mo tamata damaloiloi dai kei salib apukpukdi dir, dajojoka nei min.

Yesus soirna

33 Maera erua jam 12, ja garia ner sena rupa kana ne mo pit kai demur, ijit jam 3 maera ibel. 34 Jam 3 er, Yesus itor nam jinjinai uk erda rau er nam on: "Eloi, Eloi, lama sabakhtani?" Mo one kanei arti on: "Boi oi, ok kom sambayang aka ken seika, mo inam ba sampi ken mapal kom ok sin?" 35 Tentene tamata pen dameme ne datalenga nei itortor er, ja dam on: "Monjon, ka nei ne itortor nabi Elia!" 36 Tentene era ina ela ka inal somsom ia, ka itop ei anggur manelnelai, ka isur tan kei jurin. Japun ipo kei ner ela, ka isi ertamarer papa, mo inam somsom er ei Yesus papai to inun. Ja inam on: "Ma ka tajou Elia ner na ima ka inam nei elalu pei kei salib otai on te sakali." 37 Tentene Yesus itor nam jinjinai, japun soirna. 38 Tentene sabola punipunik inana Jirjir Duai kanei galai jinjinai er abil, seina petarai ei taporan abil; ibana atajo jit papa, ei penai rua. Sabola punipunik on erlutur godong mosimosinna ukuk ner, to tamata takom sur tantanai daidai godong ner abil. Yesus sosoirna er, ja sabola punipunik on seina petarai. 39 Mo tentara duduaina yang ma ertamarerer mo esalalala Yesus ner, ijou Yesus ma soirna nam ba, tentene nei nam on: "O martona, let nen, Jirjir Duai anat!" 40-41 Mo konar jabin dame ne, dasalala dabana jou. Era lasai, waktu Yesus imeme garia Galilea er, era lasai in jola dadem manam akaka nei. Ina itom Maria Magdalena, ina itom Salome, mo ina min itom Maria min, mo Maria nen anat jan, Yakobus Mirmirna pel Yoses. Ja konar perai yang ma datoratora era lasai in, Yesus ungatin sosoirna, mo era datora Yesus darter dabana garia Galilea dai Yerusalem.

Yusuf inam Yesus ei lia abil

42 Maera ibel, ja Israel juir ir serin dai aka hari Jumat kanei pit, one pit sinonongan, ka sakali bisa dademdem leba ia. Na datongan pei karja, tamata sosoyarai min ka sakali bisa damai dalalu peipei kei salib. Maera ungatin somsomna, ja bisa. 43 Ja jomijomir seina mo Yusuf, Arimatea juir ner, isika Pilatus. Yusuf nen itora tamata ur dubam ir, era min ka datorai dai monamona pei negara Israel, ja tamata ka dason Yusuf nen kanei epepir. Mo nen Yusuf, maera ia tan maera ia, nei etangarangara Jirjir Duai ima ka eparenrenta dunia on. Nei kanei narpet aka idem epepir tan Yesus, ja nei sakali kamareireina, mo isika Pilatus, ka erpei sera pei Pilatus to inal Yesus pei kei salib otai. 44 Ja Pilatus erang aka Yusuf ma ersirpei nam Yesus ma soirna sin, ja nei oban tentara duduaina ner ima. Ima, ka ijaman nei nam on: "Yesus ner ma soirna si e?" 45 Ja tentara duduaina ner ersirpei nam on: "Eya, ma soirna sin." Ja Pilatus kot, ka inaka Yusuf ka inal Yesus pei kei salib ner otai. 46 Tentene Yusuf ikel sabola elajirjir epepir ia, ka inam Yesus elalu pei kei salib otai er, ka nei opa Yesus uk sabola er, japun inam nei ei lia yang Yusuf inetanetak sin. Inam nei ei lia er abil sena, japun ibilar pot jinjinaina ina tan lia papai er. 47 Mo Maria Magdalena ipel Yoses kanei jena Maria ner, dajou nei inamnam Yesus ei lia ba.

Mark 16

Yesus erna sin!

1 Tentene pit, ka loloar maera sinonongan hari Sabtu. Japun maera ner somna, ja hari Sabtu maera sinonongan er pui sin. Pit er seina, ja Maria Magdalena pel Salome datora Yakobus kanei jena Maria ner, dakel manara lengoingoina tareidi, ka to era dasi dam tan Yesus. Mo pit sin, ja danin dapeda. 2 Lobar tene hari Minggu, maera ar mama, ja era darter dai lia er. 3 Era dasisi er, mo darjamanai dam on: "E! Bai ja bai na dabilar pot ner pei lia er papai aka seta?" 4 Ka pot ner gaibunna dengal. Dapan lia er, ka dajou dai mona, mo jausin, pot ner ma elapei lia papai sin. 5 Tentene era sur ukai dai lia er abil, mo dajou galetlet ina italar penai alemalema, mo nei uk jertai elajirjir, ja era dakatan darukai. Galetlet nen, Jirjir Duai kanei oboban ibanabana sorga. 6 Mo nei inaka era nam on: "Takom mekatantan! Kem mima merokrok nata? Merokrok Yesus, Nazaret jujuirna, yang dasaliblibna ner e? Nei sakali nena na on, mo nei ma erna sin. Mo mijou nei kanei tampa ininin ono, ka nei ma elapei sin. 7 Mo misi, mersirpei ka Petrus pel Yesus kanei gasua apukpukai, minam on: "Nei na ipeda pei kem ei Galilea, ja kem na misi ja na mertom miuk nei mei ne, one nei nungatin sosoirna er, mo nei ersirpei ka kem sin." 8 Tentene konar ir dalapei lia er, ka dala, ka era daerang dengal. Dartom pen dai jala, sakali bisa darsirsir, ka daerang aka ma dajoujou er. Dapan one aka Petrus ka, japun darsirpei.

Yesus emalia tan nei kanei gasua ir, japun akai ei sorga

9 Hari Minggu kanei loloar pit gair er, Yesus erlongar pei lia abil er, ja emalia tan Maria Magdalena peda. (Mo Maria nen pernah ertom enen samisamin dubam, ka dame sena nei, japun Yesus ekarir sena enen samisamin dubam dir pei nei sin.) 10 Yesus emalia tan Maria nen, tentene Maria ela ka ersirpei leba yang nei ma ijoujou er ka tamata yang jola datoratora Yesus ir, mo era daparong datenten aka Yesus sosoirna er. 11 Nei ersirpei ka era nam Yesus erna min ka ma ijouna, mo era sakali dapercacaya nei. 12 Maera er seina, era ruai darter dapei kota Yerusalem, ka dasaran natapen ia. Dajit jala taporan, ja Yesus emalia tan era, mo era damalung aka nen Yesus. Lakaria mo dajou daga nei, japun era dalraka aka ma itoratora era Yesus. 13 Tentene era daltuk ka darsirpei ka tamata datenten ir aka Yesus erna sin, mo era ruai min ka tamata datenten ir sakali dapercacaya era ruai minmin. 14 Maera er seina, Yesus kanei gasua urpapa ia mo ot ir damanamnam, mo Yesus emalia tan era min. Tentene nei naka era nam on: "Kem sakali mipercacaya ok ernga si e? Ok ma komalia tan Maria, kem ungatin mipercacaya. Let ruai ir min, ka kem ungatin mipercacaya. Kem baitan mijou miuk matin, japun melraka ok ernga sin, tei!" 15 Ja Yesus inaka era nam on: "Miela ka mei dunia on sena, ka mersirpei rau epepir on, ka ok sournga aka tamata dameme dunia on ida dosa, mo ok ernga min sin. 16 Nata ipercaya rau epepir on, mo nei etabei manara samasamai ka damna itir gar baptisan, Jirjir Duai na inam nei loirna pei dosa, ka itora Jirjir Duai dapo abaldi ot. Mo nata sakali ipercacaya rau epepir on, nei sakali loirna peipei nei kanei dosa, mo kenjou nei na soirna sin, Jirjir Duai na ukum nei. 17 Mo tamata yang dapercacaya rau epepir on, ok nak dem mujizat pelai, to tamata bisa dajou ok kanang kuasa. Mo mujizat dir dam on: Pen na dakarir enen samasamai pei tamata dauk ok kanang kuasa; mo pen, bangsa apuk kanei rau jarjar yang nungatin era darsir daukuk, bisa darsir dauk. 18 Mo pen, kenjou era dasaru jela, tejei danun racun, ja era sakali na dagogonga; mo pen, kenjou era dam lemin tan tamata dargoragorak, tamata ir na jobinai." 19 Tuhan Yesus ersir sena ka nei kanei gasua ir, ja tentene nei kanei boi Jirjir Duai iran pona ei nei kanei sinalnalar ei atajojo, ka nei kanei boi Jirjir Duai itora nei daparenta dunia on. 20 Mo nei kanei gasua ir daela ka darsirpei rau er dai papa je nangan. Ja Tuhan Yesus inal nei kanei kuasa ka era, ka dadem mujizat dauk nei kanei kuasa, to tamata yang datalelenga rau er dalraka rau er tongir.