1

1 Siginan ngays fagsigadan e Sik-Longan wan. Ay Ka-Fag-Longan gufud wa Funbalugu. Ay kata yay at sadi Ka-Fag-Longan ay Funbalugu. 2 Ka-Fag-Longan gufud wa Funbalugu siginan ngays fagsigadan. 3 Ay Ka-Fag-Longan wan At naawat fagayu. Dua nkawat mandi nus di sadi, Kanya nu dua naawat. 4 Siginan wa Ka-Fag-Longan fagayu faglelegun. Ay ka fag faglelegun tagfayamag sas taw. 5 Ka-Fag-Fagmayamagun nadamlag sas marum, ay at marum dua mafafalayung Ka-Fag-Fagmayamagun. 6 Ebia taw Funbalugu nasugu sik taw, at ngayan Uan Tagfasurung. 7 Uan Tagfasurung at fagindasugun laman nanfatuyan. Kanya nanfoyung Ka-Fag-Fagmayamagun sasa ngay taw. Laman fagayu taw umfandiug ban sa Ka-Fag-Fagmayamagun. 8 Ay bunya Uan Tagfasurung Ka-Fag-Fagmayamagun. Uan Tagfasurung at nanfoyung yay Ka-Fag-Fagmayamagun sas taw. 9 At Matuyan-Fag-Fagmayamagun At faginsureun ste swa daga laman nanfayamag ban sas fagayu taw. 10 Ay Kanya dewa batang stiye swa daga. Ay dewa te, Kanya wan At naawat tam fagdaul daga. At ngay taw dia nasaful te, sinu Kanya fag Taw. 11 Ay Kanya bandi gina ndasug sa At talun, At ngay taw sanya kalimata way Anya. 12 Roro ngap nus nga sinu fag taw nu nafili tuwa Anya, ay nu kafandiug tuwa sa Anya, Funbalugu nafangayan ka fag taw te, Funbalugu At unga. 13 Funbalugu At ngay unga nu kalangfe, di kata sik mangena at unga. Bundi siginans sik taw at fakaumsigun. Ay bundi siginans sik taw at fasadan. Kanya siginan was Funbalugu fasadan. 14 Ka-Fag-Longan inke taw ay inke bilug, ay nanbanwan sa emi. Ay nalag wami At kasinean, Funbalugu At Bugtung Baguama At kasinean. Ay Kanya kafanyu tuwa dawdaw ay matuyan yangay dawdaw. 15 Ebi Uan Tagfasurung nafoyung wan gina guro te, Kanya wa ngani ebi ku nafoyung ayu te, Siginan yay ban ku guyan, e mdasug yay ban Sik Taw taglabi angku. Madyay Kanya dan tuwa sanya, aw dewa aw yud e taw. 16 Ay anway matvngvd dawdaw At fakafanyuun ay fagayu tam inke fagmasineun yangay tam fiya siginan Anya. 17 Ay ebi Funbalugu nu nafadasug sa antam At-Longan siginan Ku-Unga. Ay bandi nafadasug yangay fiya At fakafanyuun ay At fagmasineun siginan yangay fiya Isus Fagtayukan. 18 Nus di saiginan oma du e taw batang glag tam Funbalugu. Ay roro antuway At Bugtung Baguama igfaudgufudan sa At Tama, Kanya yay at nafoyung antam Funbalugu At ugali. 19 Kata tuy Uan Tagfasurung at longan ebi gina sik ngay Taw-Naseg sas Erusalem nasugu at ngay taganyun ay anggan At-Famaalo-At-Taw laman nanginto sas Uan te, Sinu wo. 20 Ay Uan dua nafanuksukanan nu nafoyung sanya fag ngay taw te, Bunya aw tam Fagtayukan. 21 Ay tiba gdog yangay nanginto anya te, Sinu way o. Go o yay ebi fag taw at ngayan te, Funbalugu-Tam-Taw-Yabi-At-Masine. Ay Uan igbalus yay fiya te, Idia. Bunya aw. Ay at tiba nanginto yay fiya te, Go o wan ka fag Funbalugu At taglong. Ay Uan igbalus yay fiya te, Yaya. Kanya sigon bunwa aw. 22 Ay tiba ginto yangay fiya te, Sinu way o sangay, laman e foyungan tuwa ro ami sa at nasugu emi. Go sinu o. Katsi foyungi wemi te, tain nu gfoyung o sa tibak taw te, kanya aw. 23 Ay Uan bagu igbalus te, Aw sik taguro kway fag taw sas talun at yud e taw, kata tuy te, Faturuni tam Fun At fasad dalan. Katanya yangay Funbalugu-Nabalabag, sik Funbalugu At taglong, at foyungan ebi. 24 At Taw-Naseg at ngay Taw-Tagfalayun at nasugu ka fag ngay taginto. 25 Ay kanya gdog yay fiya ginto sas Uan te, Taw madyay am fagfasurungun nu bunyay o Fagtayukan. Ay nu bunyay o Funbalugu-Tam-Taw-Yabi-At-Masine. Ay nu bunyay o ka fag Funbalugu At Taglong. 26 Ay Uan nabalus yay fiya te, Aw tagfasurung akway taw sasad safa. Ay ginanya e malindug Sik Taw si ay buknga ay du am nasaful te, Sinu Kanya. 27 Roro Kanya wa mangaro ku longan te, E mdasug ban siginan ku guyan. Ay kapla akway igted nus di si At fansalod At fanguskus darafa. 28 Ebi insure wan fagayu gina sis dife safa Mababaun fag fulan at ngayan te, At-Yud-E-Kwa. Anway sanya wan Uan Tagfasurung at fagsurungan taw. 29 Ay balabag di Uan Tagfasurung nalag Isus nu kadasug sa anya. Ay Uan nalong sa tiba te, Nin. Funbalugu-At-Tupa. At nanfaliam fagayu taw at asalanan ste swa daga. 30 Tuy wa ngani katsi, egmenit ku longan ayu te, siginan yay ban ku guyan, At kumdasug ban fag Taw taglabi angku. Madyay Kanya dan tuwa sanya, aw dewa aw yud e taw. 31 Anggan aw, ebi kia nasaful te, sinu Tuy fag Taw. Ay dewa katanya, indasug aw laman nansurung aw at ngay taw. Ay ku fagnasurungun ngani at masuad te, e fasure ban Anya sasa ngay Taw-Tagagbuan. 32 Ay Uan Tagfasurung nafoyung yangay te, Nalag aw At-Masine-Fag-Falad nu kababa siginans banwa kata sik linatad. Ay insubuk wa daw sa Anya. 33 Ebia taw kia nasaful te, sinu Tuy fag Taw. Ay at Tagsugu angku laman nanfasurung aw at ngay taw sasad safa. Ay Kanya At nalong angku te, Nu nalag wo At-Masine-Fag-Falad nu kababa. Ay kasubuk sa Sik Taw. Kanya yangay ban fag Taw At fasurung sik ngay taw sa At-Masine-Fag-Falad. 34 Ay nalag aw Anya. Ay nafatuyan aw sa ayu te, Tuy Funbalugu-At-Baguama. 35 Ay balabag di Uan Tagfasurung ay at tagadal fag duwa gina malindug sanya. 36 Ay Uan gulit gina Isus kadasug, ay igfoyung sa at duwak tagadal te, Nin. Funbalugu-At-Tupa. 37 Ay Uan Tagfasurung at tagadal fag duwa nu nadungug Uan at longan, nangalo wa sas Isus. 38 Ay Isus inbiling, ay nalag nu e guyan Anya, ay ginto sanya fag duwama te, Go nataw ay fagstiyeun. Ay ka fag duwama igbalus te, Yaya. Anway ami nanginto Emu te, Dada nu namanwan O, Rabi. (Rabi at masuad te, sik takamoyung). 39 Ay Isus igbalus te, Ay kin. Gewan wan. Nanlag watam ngani Ku fagbanwanan. Ay ka fag duwama nangalo wa fiya sas Isus. Ay nalag At fagbanwanan. Ay sanya yay, anway gakayabiun wan. 40 Ka fag duama at sadi, at nadungug Uan nu glong, ay at nangalo wa sas Isus, at ngayan Butuan. Ay kanya Simun Takata-Sik-Batu at fadugsay. 41 Ay rodi tv Butuan nansarap yay at fadugsay ay nanfoyung anya te, Nalag wami tam Mesias. (Mesias at masuad te, Fagtayukan.) 42 Ay Butuan nataban at fadugsay sas Isus. Ay Isus nu nalag anya, nalong anya te, O wan Simun, Sik-Udkuruan at baguama. Katsi ban am ngayan at sadi te, Sefas. (Sadi yay at masuad te, Takata-Sik-Batu). 43 Ay balabag di Isus galoun wa sas talun Balulangan. Ay Kanya nalag sik ama at ngayan te, Takesug-Kabayu. Ay nalong anya te, Gewan. Aloi wa Angku. 44 Takesug-Kabayu siginans fulan Fagfanguyangan. Sanya Butuan ay Takata-Sik-Batu at fulan. 45 Ay Takesug-Kabayu nansarap sik taw at ngayan te, Funbalugu-Tagfon. Ay nu nalag wan, nanfoyung anya te, Nalag ami Ka fag taw, ebi Ku-Unga at nafoyung sa At-Longan. Ay anggan Funbalugu At ngay taglong ebi at nadiuganan nafoyung sa baliwa Ka fag taw, Isus, siginans fulan Nasaret. At-Fakafamutan at baguama. 46 Ay Funbalugu-Tagfon ginto sas Takesug-Kabayu te, Go sangay sik fagmasineun insure daw siginans Fulan-Nasaret. Ay go yaya. Ay Takesug-Kabayu nabalus anya te, Gewan wan. Nanlag wata. 47 Gina Funbalugu-Tagfon nangakbang sas Isus, Isus nalong sa tiba te, Nin wan sik Taw-Tagagbuan at yud gfanluk. 48 Ay Funbalugu-Tagfon nainto sas Isus te, Taw ro Am fagnasafulun angku. Ay Isus nabalus anya te, Bagu Takesug-Kabayu nanfoyung emu, gina o sis daga fun kayu, ginanya nalag Ak wemu. 49 Ay Funbalugu-Tagfon bagu intuyan te, Em Takamoyung, O wa mangaro Funbalugu-At-Baguama. Ay anggan O wa mangaro Taw-Tagagbuan at Fun. 50 Ay Isus nalong anya te, Go katsi kafandiug tuwo anway sa Ku nalongan emu te, Nalag Aw emu sis daga fun kayu. Ay bandi ban am nalag glabi yay katvngvd kanya. 51 Ay Isus nalong yangay anya te, Matuyan Ku longan sa emu te, Lumag wa ban o tam Banwa nu maluangan. Ay Funbalugu At ngay tagbukngan nu gdugsun ay nu gsakbo laman nantarabang Angku, Taw-At-Baguama.

2

1 Nu nlangfe wa duwak menit e gfadaduwa sas fulan Gaanyamuun sas talun Balulangan. Ay sanya wan Isus At tina. 2 Ay e nagewan Isus ay anggan At ngay tagadal sa at fagfadaduwan. 3 Ay at uwat buadan safa namin wan. Ay Isus At tina nalong sas Isus te, Namin wan at buadan safa. 4 Ay Isus nalong sa At tina te, Sena, taw ro am fagnanfoyungun Angku. Ku menit dia ndasug. 5 Ay Isus At tina nalong sanya fag ngay fanuguan te, Nus nge wain ro Isus At longan ayu, faningi wan. 6 Sanya unum fagsuadan daw safa at fangawat batu. At fagnafatsanyaun at safa, laman igfasine, igfaning Taw-Naseg at ugali. Tiba at fagsuadan kayu ro 20 k baringan. Ay tiba, 30 k baringan. 7 Ay Isus nalong sanya fag ngay fanuguan te, Fapnui at safa sat ngay fagsuadan. Ay kanya nafapnu wa fiya. 8 Ay Isus nalong yangay te, Buli sik safa ay ubai sa ay tagmagurang ayu sanya. Ay ka fag ngay fanuguan nananfon wa fiya. 9 Ay at tagmagurang nafaskud sirut nainum ka fag ba safa ay inkata wa fiya sik buadan safa. Ay kanya dua nasaful te, daginan at fagbulan. Ka fag ngay fanuguan way at tagsaful. Ay at tagmagurang nafaakbang sa anya takadaduwa at mangama. 10 Ay nalong anya te, Sik taw gina e yafun daul at nafon at taguna at masine tuwa dawdaw fag buadan safa. Ay fagayu taw sanya nu napyan wan, kanya fag taw gdog yangay nanfon at yud bangan masine. Roro mangaro emu tuwa am nafon katsi at masine fiya fiya. 11 Kanya yay Isus at nafalag at taguna At ke masuad fag fagbulun sas fulan Gaanyamuun sas talun Balulangan. Ay At nafasure At fagmadaragangun. Ay At ngay tagadal nu nalag, intvngvd nu kafandiug sa Anya. 12 Ay bandi Isus ay At tina talnayan, ay anggan At ngay tagadal galoun wa sas Takafanyu-At-Fulan. Ay nut sanya ban, dua glugo sirut. 13 Makbang wan Taw-Naseg at fagamatanganun fag ngay menit at ngayan te, Famalangfe. Ay ginanya, Isus nalo sas Erusalem. 14 Ay nu nasakbo wa sas Tagbvt-Fag-Bale-Funbalugu Isus nalag at ngay taw nu gfesali baka ay tupa ay linatad. Ay anggan at ngay tagfabangsian salafi at malunggung sanya. 15 Ay Isus naawat sik lubid at famusfus ay naayian fagayu tagsanya fag ngay taw. Ay anggan nafalimu at ngay tupa ay at ngay baka siginans Tagbvt-Fag-Bale-Funbalugu. Ay anggan wa naburas at nafabangsian fag ngay salafi. Ay nabiling wan at fagsandigan sigon. 16 Ay Isus nalong sas tagfesali linatad te, Buli wan ste ginan. Lag fakata sik bale fagfesalian Ku Mama bale. 17 Ay Isus At ngay tagadal namatang At-Rirukan at nalong te, Matvngvd tuwa nu kesug Aw Am bale. 18 Ay at ngay Taw-Naseg get Isus te, Falagi emi Am fagbulun at ke masuad. Laman sumaful ami te, sanya ginan Am fagmadaragangun. 19 Ay Isus nabalus anya te, Kin. Nu rumasras wa ban am tuy at Tagbvt-Fag-Bale-Funbalugu, tulu way bank menit nu kawat Aw. 20 Ay at ngay Taw-Naseg nalong sas Isus te, Dewa daw 46 k banwa nu kawat tuy at Tagbvt-Fag-Bale-Funbalugu. Ay go sangay ban O nu kaawat O tulu way ban sirutk menit nu nafatabu Wo. 21 Ay roro Isus At longan fag Tagbvt-Fag-Bale-Funbalugu, At bilug wan. 22 Ay gina ban Isus nu gdog yay gleleg, At ngay tagadal ban mamatang yay ebia taw Isus At longan. Ay kanya yay nu mafanud tuwa sa ebia taw Funbalugu-At-Rirukan sas Isus baliwa. Ay kanya gafanud yangay anggan sas Isus At longan. 23 Gina Isus sas Erusalem, kaduge e fagamatanganun fag ngay menit at ngayan te, Famalangfe, ngayuk taw takafandiug sa Anya nu nalag At ke masuad fag fagbulun. 24 Ay Isus dua gfadiuganan sa sik taw dewa kata kafandiug. Anway Isus nasaful tuwa fagayu taw at ugali. 25 Ay du e masuad dewa e nafoyung sas Isus te, masine at ngay taw at ugali. Anway Isus nasaful tuwa fagayu taw at amatanganan.

3

1 Ebi e sik Taw-Tagfalayun at ngayan Tagbabo-Tiba. Kanya Taw-Naseg at sadi at magurang. 2 Ka fag taw nu kadasug sas Isus gina wa sad yabi, ay iglong sas Isus te, Takamoyung. Nasaful wami te, O wa mangaro sik takamoyung. Ay Funbalugu wa mangaro At nasugu Emu. Anway sik taw at fagbulun du e masuad kata si Emu, Funbalugu nu dway gtarabang ka fag taw. 3 Ay Isus nalong anya te, Matuyan iglong Aw emu te, Sik taw ya mdasug sas Funbalugu-At-Fagmagurangan-Taw yap ngay duwa ginan kalangfe. 4 Ay Tagbabo-Tiba nainto te, Setain ro sik taw nu kalangfe nu gbiya wan. Go gdog yay ban fiya sa tina ungdan laman gdog yay fiya umlangfe. 5 Ay Isus igfayamag te, Matuyan iglong Aw emu te, Sik taw ya mdasug sas Funbalugu-At-Fagmagurangan-Taw yap ngay ka fag taw umlangfe sas safa ay anggan sa At-Masine-Fag-Falad. 6 At bilug gfalangfe at bilug. Ay At-Falad gfalangfe yangay at falad. 7 Lag o gadulawan si Ku nalong emu aro te, At masine nu duwa ginan tuwo kalangfe. 8 At tagmara nu kadasug snga ndaginan nu e guwig. Ay dewa o nadungug at fawas du o nasaful te, daginan ay dada ro. Katanya yangay fiya fiya At-Masine-Fag-Falad nu gfalangfe sik taw. 9 Ay Tagbabo-Tiba ginto yangay te, Ay tain ro nu kin nu mkatanya aw. 10 Ay Isus nabalus te, Taw ro am fagadayuanun. Madyay o wan sik Taw-Tagagbuan at magurang. Taw way am fagyudun gsaful katanya Ku longan. 11 Matuyan iglong Aw emu te, Dewa Ami nafoyung ayu Em nasaful, ay nafatuyan sa ayu Em nalag, du am gafanud. 12 Dewa Aw sigon nafoyung ayu sik fafaskudanan ste swa daga, du am gafanud. Setain yaro ay fagmafanudun sa Ku foyungan ayu tagsiginans Banwa fag ugali. 13 Du e taw batang gsakbo sas Banwa dasday Aw, Taw-At-Baguama, At nat siginans Banwa. 14 Ay kata Ku-Unga ebi ebi nu gfaabat sik ubianun sas talun at yud e taw, e faabat yangay ban Angku, Taw-At-Baguama, katanya. 15 Laman nus nga sinu takafandiug sa Angku gleleg tuwa ban faggugat. 16 Matvngvd tuwa Funbalugu nu kesug fagayu taw ste swa daga. At fagnasuguun ngani Angku, At Bugtung Baguama, sas fagayu taw. Laman nus nga sinu ban takafandiug sa Angku di kate. Ay faggugat ban gleleg tuwa. 17 Anway Funbalugu at fagnasuguun Angku, At Baguama, ste swa daga, laman At fasadan di nanfaegan at taw. At fagnasuguun antuwa te, laman ban fagayu taw umbalabag tuwa. 18 Nus nga sinu takafandiug sa Angku, di ban e kafoyung te, E asalanan. Ay nus nga sinu nu dyay kafandiug e kafoyung yay te, E asalanan yay. Anway kanya dia kafandiug sa Angku, Funbalugu-At-Bugtung-Baguama. 19 Ay gina At-Fagmayamagun indasug ste swa daga, nafasaful sas taw te, At taw e asalanan. Anway at taw at fakaumsigun dawdaw sas marum way, ay dua ngap kaumsig sat mayamag. Anway mauri dawdaw at fagbulun. 20 Anway kayu at ke fagbulun mauri kalimata way sa Ka-Fag-Fagmayamagun. Ay dua kaumsig kaakbang sa Anya. Anway fakatanyaun dua kaumsig nu msure at fagmauriun mandi. 21 Ay sik taw at matuyan at fagbulun nangakbang tuwa sa Ka-Fag-Fagmayamagun. Laman gfasaful sa tiba te, ka fag taw at fagbulun igfaning tuwa Funbalugu. 22 Bandi ban Isus ay At ngay tagadal nalo wan sas talun Naseg. Ay sanya yay Isus maful yay si At ngay tagadal ay igsurung yay sanya fag taw. 23 Ay anggan Uan Tagfasurung nasurung taw sas fulan Ke-Bulbug, at makbang sas fulan Ntabuan. Anway ngayu at safa sanya. Ay at ngay taw nangadasug sanya laman Uan Tagfasurung nasurung anya. 24 Anway ginanya di e nasungsung Uan Tagfasurung. 25 Ay Uan at ngay tagadal igfabadbabuan sa sik Taw-Naseg. Anway dua kata at sadi amatanganan nu gfasineun at safa. 26 Ay Uan at ngay tagadal nangakbang sas Uan ay nafoyung te, Em Takamoyung. Am ufud ebi sas dife safa Mababaun, am nafatuyanan ebi. Kanya wan At sadi tagsurung taw. Ay ngayu at nangakbang sa Anya. 27 Ay Uan nalong sa at ngay tagadal te, Sik taw du e fagmafabulun, nus nge wain, nu dway ro e nafon anya sik ngay fagmadaragangun siginans Banwa. 28 Am wan at nafatuyanan ku longan ebia taw te, Bunwa aw tam Fagtayukan. Ay, Funbalugu fagnasuguun angku, anway te, laman nangguna akway fagtvngvd tam Fagtayukan. 29 Ay Uan nafafaskudanan te, Sik mangama nabul sik baguina ay indaduwa. Ay at fagues gina malindug guseganan dawdaw nu nadungug at mangama nu ge longan nu guseganan. Ay aw katvngvd akyangay kanya fag fagues nu guseganan dawdaw, gina akyangay gdungug Isus At longan. 30 At masine Isus ituwa At kumdungug laman ngayu tuwa taginfamutan tagalo Anya. Ay aw long dewa aw tiba daga tiba daga fag taw. 31 Ay Uan Tagfasurung nalong yangay te, Kanya nut siginans tungud, Kanya wan tagtiba tungud. Ay kanya nut siginans daga, kanya sik taw way daga. Ay at foyungan ste ginan yangay swa daga. Kanya nut siginans Banwa, Kanya long tagtiba tungud. 32 Ay Kanya nafoyung At nalag ay At nadungug, ay du e taw inkumsig sa At longan. 33 Sik taw tagafanud sa At longan, kanya intuyan yangay te, matuyan tuwa ngaro Funbalugu. 34 Funbalugu At Fagsuguan At nanfoyung At longan anway Funbalugu nafatsi wa fiya Anya At-Masine-Fag-Falad. 35 Ay At Tama kesug At Baguama ay nafon wa fiya fagayu At fagmadaragangun sa Anya. 36 Nus nga sinu takafandiug sas Funbalugu At Baguama gleleg tuwa ban faggugat. Ay nus nga sinu at yud kafandiug sas Funbalugu At Baguama dua ban gleleg. Ay Funbalugu kadotama way ban anya.

4

1 At ngay Taw-Tagfalayun nadungug tibak taw longan sas Isus baliwa te, Isus nu gfaful ay nu gsurung At ngay tagadal, glabi yay sis Uan at ngay tagadal. 2 Roro ngap Isus du e nasurung nus di sadi. Isus way At ngay tagadal at nasurung. 3 Ay Isus nu nasaful te, at ngay Taw-Tagfalayun nadungug, Isus nalo wan siginans talun Naseg. Ay gafoliun wa sas talun Balulangan. 4 Ay At fasadan ganandalanun yay sas talun Fagbantayan. 5 Ay Isus nu nadalan sas talun Fagbantayan ay indasug sa sik fulan at ngayan Sikar. Ka fag fulan makbang sas Takamilug at nafon ebi ebi sa at baguama, At-Fakafamutan, fag daga. 6 Sanya yay ebi Takamilug at falinoan. Ay Isus malunggung sanyas day bibig falinoan, anway kalufuy At naloan. Ay ginanya anwa swa bilug menit. 7 Ay sik mangena Taw-Fagbantayan indasug laman managub. Ay Isus get sa ka fag mangena te, Foni sirut Angku am ba safa. 8 Anway Isus At ngay tagadal nalo wa sas fulan laman nansali at fakonun. 9 Ay ka fag mangena nainto sas Isus te, Taw ro Am fagetun angku ku ba safa. Madyay O sik Taw-Naseg way O. Ay aw sik Taw-Fagbantayan kway. Anway Taw-Naseg ay Taw-Fagbantayan at ugali dua batang gkamatuanan ebi ginan. 10 Ay Isus nabalus ka fag mangena te, Nu nasaful di o Funbalugu At fagfonun sas taw. Ay nu nasaful di o te, sinu Aw, taget am ba safa. Ay o sigon eti yangay Angku. Ay Aw, igfon Kyangay ro emu Sik-Safa-Tagfon-Leleg. 11 Ay ka fag mangena nalong sas Isus te, Yaya. Ngabasad way em alian. Ay du o e famul at safa. Ay sangay daginan ro Am fagbulan Sik-Safa-Tagfon-Leleg. 12 Go sangay O glabi yay O tam aguyangan Takamilug, at nafon emi ebi ebi ste fag falinoan. Ay go yaya. Ay kanya ebi iste ginan wan at faginuman. Ay anggan at ngay baguama. Ay anggan at ngay balan. 13 Ay Isus nalong te, Nus nga sinu at fagbulan at fanginum nu ste ginan way fag safa, gdog yay ban kadanum. 14 Ay nus nga sinu at nainum Ku nafon fag safa di ban kadanum faggugat. Anway Ku nafon fag safa kata tuwa e sik mata bulbug siginan sad basad taw. Ay laman bandi gleleg tuwa faggugat. 15 Ay ka fag mangena nalong sas Isus te, Ay kin, Sama. Nu katanya, foni angku ka fag safa. Laman ban da kdi kadanum. Ay da kdi gdog managub. Anway ngayayu way ngap ku fagfanaguban. 16 Ay Isus nasugu ka fag mangena te, Ulii wan. Ay tabani yap stiye am mangama. 17 Ay ka fag mangena nalong sas Isus te, Aw, ku e mangama. Ay Isus nalong anya te, Kin. Matuyan am longan te, Wo e mangama katsi. 18 Muag, ebi lima wan am mangama. Ay am mangama katsi bunwa o ke mangama. Matuyan am longan. 19 Ay ka fag mangena nalong te, Ku magurang. Katsi bagu aw nasaful te, O wa mangaro at sadi Funbalugu At Taglong. 20 Em aguyangan nu gseg Funbalugu ste ginan fag muyud. Ay Am Taw-Naseg nalong am te, Nu naseg am Funbalugu, segi sas Erusalem yakman. 21 Ay Isus nalong sanya fag mangena te, Sena, afanudi Ku foyungan emu te, Umdasug ban sik menit. Ay fagayu am Taw-Fagbantayan ay fagsegan bundi ste ginan fag muyud. Ay bundi sas Erusalem fagtvngvd, nu gseg am sa tam Tama. 22 Ay o, ay anggan fagayu am Taw-Fagbantayan, yam nasaful te, sinu ay fagsegan. Ay ami, Taw-Naseg, nasaful wami em fagsegan. Anway taw at fagbalabagun siginan ways Taw-Naseg. 23 Ay roro umdasug ban sik menit, ay laman katsi ndasug wan. Ay taganansegun sumeg wa fiya sa tam Tama. Anway At-Masine-Fag-Falad nafon At fagmadaragangun ay At fagmatuyanun sa anya. Laman sumeg wa fiya sa tam Tama. Ay tam Tama kaumsig tuwa takatanya fag taw nu gseg Anya. 24 Funbalugu mangaro sik Falad. Ay at tagseg Anya, segi sa at fagmadaragangun ay sa at fagmatuyanun siginan At-Masine-Fag-Falad. 25 Ay ka fag mangena gfasulitanan sas Isus te, Nasaful aw te, umdasug ban tam Mesias. Laman At sadi At ngayan te, Fagtayukan. Ay nu mdasug ban, Kanya ban At nanfamoyung sa emi fagayu. 26 Ay Isus nalong anya te, Aw tagfamatuan emu katsi, Aw wan ay Fagtayukan. 27 Ay rodi indasug Isus At ngay tagadal. Ay At ngay tagadal gamatangan dawdaw te, taw ro Isus fagfasulitananun sa ka fag mangena. Ay At ngay tagadal dua mafalong sa ka fag mangena te, Nataw am fakaumsigun. Ay anggan dua mafalong sas Isus te, Taw ro am fagfasulitananun sanya fag mangena. 28 Ay rodi ka fag mangena naubun at faguban safa. Ay guli wa sas fulan. Ay nalong sasa ngay mangama sanya te, 29 Bastam. Glo watam. Laman nanlag tam aro fag Taw At nafoyung angku ebia taw ku fagbulun fagayu. Ay Kanya wa mangaro tam Fagtayukan. Go kin. 30 Ay rodi ka fag mangena ay anggan ka fag ngay mangama nalo wan siginans fulan. 31 Ay gina ka fag ngay taw gyud indasug, Isus At ngay tagadal matvngvd nu gfabulun sas Isus te, Oni yap. 32 Ay Isus nalong sa At ngay tagadal te, E ba fafa Aktuwa. Ay du am nasaful te, nataw ka fag fafa. 33 Ay At ngay tagadal gfangintuanan sit dayu te, Go sinu manga at nafon Anya ka fag fafa. 34 Ay Isus nafafaskudanan te, Kata nu kon Aw sik fafa, katanya igfaning Aw At Nasugu Angku At fakaumsigun. Ay manga nanfatabu Aw At fagbulun. 35 Ay anggan am nafafaskudanan yangay am te, Ufat ya ban gmagdanun nu kataba at tanuman. Ay nafafaskudanan Kyangay fiya te, Kin. Bantayi sasa ngaba gamasun. Anway at buadan maraska wan ay famulan wan. 36 At tagbul at buadan igbul yangay ban at nalufuyan. Ay ka fag buadan at masuad te, sik taw takafandiug e leleg tuwa faggugat. Anway tagtanum ay anggan tagbul at buadan gasfuan nu guseganan. 37 Matuyan ka fag fafaskudanan te, Sik taw natanum ay tibak taw at nabul at buadan. 38 Nasugu Aw ayu laman nanbul am at buadan siginans gamasun. Dewa gyud am inlufuy igfagbulunan. Am way at nabul at buadan ay iba dewa inlufuy. 39 Ay sanya ginan fag fulan ngayuk Taw-Fagbantayan takafandiug sas Isus. Anway ka fag mangena nafoyung sasa ngay taw te, Isus nafoyung angku ebia taw ku fagbulun fagayu. 40 Ay at ngay Taw-Fagbantayan nangakbang sas Isus ay nanginto Anya te, Go kaumsig yay O namanwan ste si emi. Ay kin, Isus nat sanya yay duwak menit. 41 Ay inkayu yay fiya takafandiug sas Isus gina nadungug At longan. 42 Ay ka fag ngay takafandiug nafoyung sa ka fag mangena te, Anggan ami, kafandiug wami katsi. Anway nadungug wa long ami Isus At longan. Ay bundi fagtvngvd am longan. Ay intuyan wa long ami te, Kanya wa ngaro tam Tagbalabag sas fagayu taw ste swa daga. 43 Ay nu nlangfe duwak menit, Isus nafatunglus yay nalo sas talun Balulangan. 44 Ebia taw Isus nalong te, Sas Funbalugu At taglong ngap fag talun, at ngay taw sanya dua gseg sa At taglong. 45 Ay gina Isus indasug sas talun Balulangan, at ngay Taw-Balulangan igseg tuwa Anya. Anway ka fag ngay taw nalag tuway Isus At ngay fagbulun sas Erusalem gina e tagbiya fag yafun at ngayan Famalangfe. Anway ginanya Taw-Balulangan si yays Erusalem. 46 Ay Isus gdog yay ndasug sas fulan Gaanyamuun sas talun Balulangan. Sanya ebia taw Isus nu gfasik buadan safa siginan sik safa. Ay makbang yangay sanya Takafanyu-At-Fulan. Ay sanya sik fun sirut at baguama e dailan. 47 Ay ka fag fun sirut nadungug te, Isus mangaro indasug wa sas talun Balulangan siginan talun Naseg. Ay rodi ka fag fun sirut nanlag wa Isus ay nalong Anya te, Kaumsig aw nu nalo O sas Takafanyu-At-Fulan, laman nanfafiyai ku baguama, anway gakateun wan. 48 Ay Isus nalong anya te, Go sangai am kafandiug yap ngay am fiya fiya nalag at ke masuad fag fagbulun ay at matvngvd fag fagbulun. 49 Ay ka fag fun sirut gfafali Isus te, Em Magurang, glo wata laman ro ku baguama dia mkate. 50 Ay Isus nalong te, Loi wan. Am baguama ro anyay gleleg. Ay ka fag fun sirut gafanud wa sas Isus At longan. Ay noli wa sa at fulan. 51 Ay gina ka fag fun sirut sasa ngaba dalan, at ngay fanuguan nafablang anya ay nafoyung te, Am baguama gleleg yay. 52 Ay ka fag fun sirut ginto te, Seduge nu kafiya ku baguama. Ay at ngay fanuguan nabalus te, Nu kafiya nu karios egmenit ginat menit bagu nbiling. 53 Ay at tama gamatangan te, e kin. Gina waro fiya Isus glong fag buknga te, Am baguama gleleg. Ay kanya gamatangan te, ay kin. Ginanya waro fiya fag buknga ku baguama nu kafiya. Ay ka fag fun kafandiug sas Isus ay anggan fagayu taw sanya fag bale. 54 Kanya yay Isus at faduwak ke masuad fag fagbulun gina nalo siginans talun Naseg ay indasug sas talun Balulangan.

5

1 Ay bandi ban Taw-Naseg e sik tagbvt fag yafun sas Erusalem, ay Isus nalo sanya. 2 Sas Erusalem e sik lino sirut at makbang sas tupa at fagsakboan sasad alad. Ka fag lino at ngayan sa Taw-Atsi-Baliwa at fagngayanan, E-Kayu-Ulibu. Sanya e limak bale sirut masalugan sasa ngaba tigyangan lino. 3 Ay ngayu at taw ke dailan sanya at mabunglian sat masalugan fag ngay bale. Tiba wa glag. Ay tiba wa malo. Ay tiba wa malelegan. 5 Sanya sik taw e dailan laman 38 k banwa. 6 Ay Isus nalag ka fag taw nu mabunglian sanya. Ay Isus nasaful te, glugo wan nu katanya. Ay Isus nainto sa anya te, Go kaumsig o nfiya. 7 Ay at ke dailan nabalus te, Em magurang, Tain ro. Du e guba angku sasad safa. Ay nu glibuan wa ngap at lino, gina aw nangakbang, anway tibak taw naguna wa angku sasad lino. 8 Ay Isus nalong wa anya te, Ay alindugi. Ubai am tagbung ay loi wan. 9 Ay rodi tv ka fag taw infiya wa fiya. Ay naubanan wa fiya at tagbung ay nalo wan. Ay ginanya fag menit at Fakamatoun-Menit. 10 Ay at ngay Taw-Naseg nasalag at kinfiya te, Dua masine nu guba o am tagbung nut si ways Fakamatoun-Menit. 11 Ay at kinfiya nalong te, Kanya way fag taw At nafafiya angku At nalong angku te, Ubai am tagbung ay loi wan. 12 Ay at ngay Taw-Naseg ginto sat kinfiya te, Sinu Kanya fag taw At nasugu emu te, Ubai am tagbung ay loi wan. 13 Ay at kinfiya dua nasaful te, Sinu manga aro fag taw At ngayan. Anway Isus infalyu wa yay saswa taw ay taba wa inyayu. 14 Ay rodi Isus nalag yangay fiya aro at nafafiya sas Tagbvt-Fag-Bale-Funbalugu, ay nalong anya te, Amatangani. Infiya tuwo ay, katsi. Lag gdog e asalanan. Laman ban di mdasug sa emu at matvngvd fag mauri, sak lumabi aro am dailan. 15 Ay at kinfiya nalo wan ay nafoyung ngap karo sasa ngay Taw-Naseg te, Isus At tagfafiya angku. 16 Ay nu katanya, Taw-Naseg igfauri way Isus. Anway Isus At nafagbulunan wayay sis Fakamatoun-Menit. 17 Ay Isus nalong sasa ngay Taw-Naseg te, Ku Mama igfagbulunan tuwa faggugat anggan katsi. Ay anggan Aw mafafagbulunan Kyangay. 18 Isus nalong wayay katanya, nafaugatan sas Taw-Naseg nu kaumsig gafateun Anya. Ay bunwa fagtvngvd Isus At nafafiyan sas Fakamatoun-Menit. Anggan way sigon At nalongan te, Funbalugu Ku Mama. At masuad te, Isus ay Funbalugu kata yay at sadi. 19 Ay Isus nalong yangay sasa ngay Taw-Naseg te, Matuyan iglong Ku ayu te, Aw wan, Funbalugu At Baguama. Ay dewa katanya, Kua mafabul mandi, nu da Kway ro naulit Ku Mama At fagbulun. Ay naulit Aktuway Ku Mama nu gfagbulun, anggan Aw mafafabul Akyangay. 20 Anway Ku Mama kesug tuwa Angku, At Baguama, ay nafoyung tuwa Angku At fagbulun fagayu. Ay moyung yay ban Angku tibak fagbulun glabi yay katsi. Laman madulawan tuwam. 21 Anway Ku Mama nafaleleg tuwa at kinkate, anggan Aw, At Baguama, mafafaleleg Kyangay nus nga sinu Ku fakaumsigun. 22 Bundi Ku Mama tagtap at taw at asalanan. Nafili tuway Angku, At Baguama, laman Aw way tagtap taw at asalanan. 23 Laman fagayu taw sumeg ban Angku, At Baguama, kata at taw nu gseg Ku Mama. Nus nga sinu fag taw nu dway naseg Angku, dua gseg anggan sa Ku Mama, At nasugu Angku. 24 Matuyan iglong Ku ayu te, Nus nga sinu at nadungug Ku longan ay takafandiug sa At nasugu Angku, gleleg tuwa faggugat. Ay di ban e kafoyung te, E asalanan. Ay kanya nalangfe tuwa fakateun ay gleleg tuwa faggugat. 25 Matuyan iglong Ku ayu te, Snga ginain ban sik menit, ay siginan wa katsi. At kinbul dumungug Angku, Funbalugu-At-Baguama, nu ge longan. Ay nu dumungug wan, gleleg tuwa ban. 26 Ku Mama fagnasuguun Angku. Laman kata Ku Mama nu gfaleleg, katanya Kyangay, anggan Aw, At Baguama, mafafaleleg Akyangay. 27 Ay Ku Mama fagnasuguun Angku, At Baguama. Laman Aw way At nanfoyung taw at asalanan, anway Aw wan Taw-At-Baguama. 28 Lag gadulawan sa Ku foyungan. Anway snga ginain ban sik menit fagayu taw tagsas fagsandigan dumungug ban Angku, Taw-At-Baguama, nu ge longan Aw. 29 Ay fagayu ban tagsas fagsandigan malfas tuwa. Ay at masine fag taw gdog yay gleleg. Laman bandi gleleg tuwa ban faggugat. Ay at mauri fag taw gdog yay gleleg. Laman bandi umdasug ban sas faurianan at yud e fakatabuan faggugat. 30 Aw Kwa mafafagbulun nu Aw way sesadi. Igfaning Aktuwa sa Ku Mama At foyungan Angku, nu gtap Aw taw at asalanan. Ay matuyan nu natap Aw taw at asalanan. Anway da Kdi gfaning Ku fakaumsigun. Ku fagfaningun antuwa At nasugu Angku At fakaumsigun. 31 Nu Aw way fagsadi tagfatuyan Ku ugali, du e masuad. 32 Ay roro e nafatuyan tuwa sa Ku ugali. Ay nasaful Aw te, Matuyan tuwa ay Kanya At nafatuyanan. 33 Ay ebi nasugu am ay fanuguan sas Uan Tagfasurung. Ay faggugat Uan nafoyung at matuyan sa Angku baliwa. 34 Bundi sik taw at nafatuyan fiya sa Ku ugali. Nanfoyung Kway ayu fagtvngvd Uan Tagfasurung at longan laman umbalabag ban am. 35 Uan Tagfasurung takata sik salung nu gigang ay igdamlag dawdaw. Ay ginas bagu nu siaba, kaumsig yay am ka fag mayamag. 36 Ay e nafatuyan sa Ku ugali glabi yay Uan Tagfasurung nu gfatuyan. Ka fag fagbulun Ku Mama at nasugu Angku laman nafatabu Aw. Ay kanya wa fag fagbulun tagfatuyan sa tiba Ku ugali. Ay tagfasaful sa tiba te, Ku Mama At nasugu Angku. 37 Ay Ku Mama yangay At nasugu Angku, ay manga tagfatuyan sa tiba Ku ugali. Ay faggugat yam batang gdungug Ku Mama nu ge longan. Ay yam batang glag Ku Mama At mata. 38 Ay di am mangaro am gamatangan sa Ku Mama At-Longan. Teway du am ay, kafandiug sa Angku, Ku Mama At suguan. 39 Madyay nafaudguwasan wam dawdaw nu gtap am At-Rirukan. Ay manga te nafasarapun wam te, tain ban ay faglelegun faggugat. Ay Ka-Fag-Rirukan wa nangus at nafatuyan sa ayu Ku ugali. 40 Ay du am kaumsig kalong gafaningun Angku te, laman gleleg tuwam faggugat. 41 Ku fagsarapun bunwa te, laman e sumeg Angku. 42 Anway nasaful Kwan nu maugalian am Taw-Naseg, madyay dua am kesug Funbalugu. 43 Ay Ku fagindasugun ste swa daga anway Ku Mama nafon Angku At fagmadaragangun. Ay dewa katanya di am gafanud sa Angku. Ay nu tibak taw tuwa long taglong siginan at fagagbilugun fag fagmadaragangun, gafanud tuwa long am dawdaw anya. 44 Tain ban nu mfandiug am sa Angku. Anway ay fakaumsigun sa way baliwa te, laman ay iba antuwa igseg ayu. Ay du am gsarap sa baliwa te, laman Funbalugu guseganan tuwa ayu. 45 Lag am gamatangan te, nanfoyung Aw ay asalanan sa Ku Mama. Igdi. Anway Ku-Unga wan at nafoyung ay asalanan. Ay ay fakafandiugan sa yay Ku-Unga. 46 Nu kafandiug tuwam sa Ku-Unga, anggan sa Angku kafandiug wam. Anway Ku-Unga naguna wa nafoyung ayu Ku ugali. 47 Yaya am gafanud sa Ku-Unga At-Rirukan, setain ban nu mafanud am sa Ku longan.

6

1 Ay bandi Isus nandife wa lino Balulangan. Sadi yay lino Balulangan ay lino Tiberias. 2 Ay sik ngay taw ayuwayu nangalo wa sas Isus. Teway ebi nalag tuway Isus At ke masuad fag fagbulun sat ke dailan. 3 Ay Isus naulul sa sik tungud muyud ay malunggung yay sanya maful At ngay tagadal. 4 Ay ginanya makbang wan Taw-Naseg at tagbiya fag yafun at ngayan te, Famalangfe. 5 Ay Isus nabantay ay nalag sik ngay taw ayuwayu nu kakbang sa Anya. Ay Isus nainto sas Takesug-Kabayu te, Daginan ro tam fagbulan takayu niya fag fafa laman ro at ngay taw di kalunus. 6 Ay Isus fagnaintoun katanya laman nanfaskud Takesug-Kabayu. Ay dewa katanya, Isus nasaful wan At fagbulun ro. 7 Ay Takesug-Kabayu nabalus sas Isus te, Dewa ro tam nabul, tenday 200 k menit sik taw at nalufuyan, em fanbul fafa. Dia kalong kalong gakasafungun sas fagayu taw te, laman ro fagayu taw e nabul tuwa sirut. 8 Ay at sadi At tagadal, Butuan, Simun Takata-Sik-Batu at fadugsay, nalong sas Isus te, 9 Ay ste sik baguama sirut e ubanan limak fafa ay duwa yak uyang. Ay nu kayu way ro niya, dua kalong kalong umsafung sanya fag ngay taw. 10 Ay Isus nalong sa At ngay tagadal te, Falunggungi ka fag ngay taw. Ay sanya fag talun mamakmak. Ay kanya fag ngay taw malunggung sanya sa ngaba mamakmak. Ay at ngay mangama sanya nu ndain manga 5000 . 11 Ay Isus nagalumutan ka fag limak fafa ay nauseganan sas Funbalugu. Ay nafon nafafafudan sa At ngay tagadal. Ay At ngay tagadal nafafafud sa at ngay malunggung. Ay anggan at uyang, nafon yangay sa at ngay taw nus nga seyu ka fag taw at fakaumsigun. 12 Fagayu taw nu napsug wan, Isus nalong sa At ngay tagadal te, Nanfafuli yap am at ngay nagsawadan at nakaramyukan. Laman du e nfangulan. 13 Ay At ngay tagadal nafaful at nakaramyukan. Ay inkapnu yay 12 k sabi. At sawad siginan aro fag limak fafa at ngay taw at nakapsugan. 14 Ay ka fag ngay taw nu nalag Isus At ke masuad fag fagbulun, nalodlongan te, Matuyan Tuy wa fiya ka fag Funbalugu At taglong, ebi tibak taglong at nafoyung te, e mdasug yay ban. 15 Ay Isus nasaful wan ka fag ngay taw at fasadan. Anway kanya kaumsig nated Isus ay nantaban te, laman at fun. Ay katanya wayay, Isus nasesadian wa nalo sa was muyud. 16 Ay nu kayabi wan, Isus At ngay tagadal nalo wan ay ndasug wa sas tigyangan lino. 17 Ay At ngay tagadal nasakay sa sik balutu ay nafasigad nafalo nangadasug sas Takafanyu-At-Fulan. Ay gina glo, marum wan. Ay Isus dia ndasug. 18 Ay at lino glumbak wa dawdaw teway magong at tagmara. 19 Ay At ngay tagadal nayiyang at safa at kadugayan kaduge dua ginan kafalin tam menit. Ay rodi kanya nalag Isus nu nalo sasa ngaba tungud lino. Ay Isus nangakbang sas balutu. Ay At ngay tagadal matvngvd nu kalimu. 20 Ay Isus nalong sa At ngay tagadal te, Aw wan. Lag kalimu. 21 Ay At ngay tagadal kaumsig nafasakay Isus sa at balutu. Ay rodi at balutu indasug wa sas tigiyangan lino, sa aro at fasadan. 22 Ginanya fag balabag at ngay taw sanya yays dife lino. Ay ka fag ngay taw nasaful te, aros fafun sadi way at balutu ste. Ay Isus At ngay tagadal nu nasakay wa sat balutu, Isus dua gufud sanya sis balutu. Ay at ngay tagadal way at nalo. 23 Ay rodi tibak balutu sirut siginans fulan Tiberias indasug yangay sanya fag tigyangan lino. At fakadasugan makbang yay sa aro Isus At fagfafangonan sik ngay taw fag talun, gina Isus ntabu nu guseganan sas Funbalugu. 24 Ay ka fag ngay taw nu nasaful te, Isus ay anggan At ngay tagadal dua ste. Rodi ka fag ngay taw nasakay wa sa sik ngay balutu sirut. Ay sumaros Takafanyu-At-Fulan laman nansarap Isus. 25 Ay ka fag ngay taw nu nalag wa Isus sas dife lino, kanya nainto sas Isus te, Em Takamoyung, seduge wan nu kadasug O ste. 26 Ay Isus nalong te, Matuyan iglong Kua ayu te, Ay fagsarapun Angku mangaro bunwa te, nalag am Ku fagbulun at ke masuad. Ay fagsarapun Angku anway mangaro te, ebi non am Ku nafon ayu fag fafa ay napsug am. 27 Lag dawdaw gasarapan ay fagsarapun nu anway fafa takabalangug. Ay fagsarapun ani tuwa fafa at yud kabalangug faggugat, ay at tagfon leleg sas taw faggugat. Aw wa ban, Taw-At-Baguama, Ku fagnafonun ayu ka fag fafa. Anway Ku Mama, tam Funbalugu, At fanfatuyan te, Masine Ku Baguama. 28 Ay ka fag ngay taw ginto sas Isus te, Tain ngani ban em fagbulun. Laman mafafaning ami Funbalugu At fagbulun. 29 Ay Isus nabalus te, Tuy wan Funbalugu At fagbulun. Nu kafandiug tuwam sas Funbalugu At Nasugu. 30 Ay ka fag ngay taw nalong sas Isus te, Falagi emi ngani Am matvngvd fag fagbulun. Laman nu nalag ami, gafanud ami sa Emu. Falagi wa ngani emi katsi. 31 Em ngay aguyangan naon ka fag fafa at ngayan te, Taw-Tuy, sas talun at yud e taw. Madyay e rirukan wa te, Kanya nafon anya fafa siginans Banwa, laman naon. 32 Ay Isus nalong anya te, Matuyan iglong Kua ayu te, Bundi Ku-Unga fagtvngvd at nafon ayu sik ngay fafa siginans Banwa. Ku Mama tuwa At nafon ayu at matuyan fag fafa tagsiginans Banwa. 33 Anway Funbalugu At nafon fag fafa indasug stiye siginans Banwa. Ay nafon ban at leleg sas fagayu taw ste swa daga. 34 Ginanya ka fag ngay taw nalong sas Isus te, Em Magurang, kanyai tuwa fag fafa Am fon emi. 35 Ay Isus nafafaskudanan te, Aw wan takata Sik-Fafa-Tagfon-Legeg. Nus nga sinu nu kaakbang tuwa sa Angku di ban kalunus. Ay nus nga sinu nu kafandiug tuwa sa Angku di ban kadanum. 36 Ay nalong Aw ayu te, Dewa am nalag Angku, du am gafanud. 37 Ku Mama At nafon Angku fag ngay taw at kumdasug ban sa Angku. Ay at kumdasug ban sa Angku, da Kwa gayiyan. 38 Ku fagindasugun siginans Banwa stiye swa daga da Kua nanfaning Ku fakaumsigun mandi. Igfaning Aktuwa At nasugu Angku At fakaumsigun. 39 Ay At fagnasuguun Angku At fakaumsigun te, laman dangai Aw nanfaliam nus di sadi At nafon Angku. Ay igfaleleg ban Aw fagayu At nafon Angku fag taw sas fakatabuan fag ngay menit. 40 Ay kata tuy Ku Mama At fakaumsigun, laman fagayu taw nu nalag Angku, At Baguama, ay nu kafandiug tuwa sa Angku, gleleg tuwa faggugat. Ay Aw yangay ban tagfaleleg anya sas fakatabuan fag menit. 41 Ay at ngay Taw-Naseg gibugan anway sas Isus At nalongan te, Aw wan Ka fag fafa at kindasug siginans Banwa. 42 Ay at ngay Taw-Naseg nalong te, Tuy fag Isus, anway At-Fakafamutan at baguama, go kin. Nu kanya way, gsaful way ami At tama ay At tina. Taw ro At fagnalongun te, Indasug Aw siginans Banwa. 43 Ay Isus nalong anya te, Lag am gfangibuganan. 44 Du e taw kafandiug sa Angku yap ngay Ku Mama, At nasugu Angku, At tagfaakbang anya sa Angku. Ay gfaleleg ban Aw anya sas fakatabuan fag ngay menit. 45 Ebi ebi Funbalugu at taglong nariruk wa te, Funbalugu nafoyung ban sas fagayu taw. Fagayu taw nu nadungug tuwa ay nu nasaful tuwa Funbalugu At foyungan, kanya at nangakbang sa Angku. 46 Dewa sik taw nadungug ay nasaful At foyungan, kanya dua nalag Ku Mama. Aw way, Funbalugu At nasugu, At batang glag Ku Mama. 47 Matuyan iglong Kwa ayu te, Kanya nu kafandiug tuwa sa Angku, gleleg tuwa faggugat. 48 Aw wan takata Sik-Fafa-Tagfon-Leleg. 49 Ay aguyangan dewa naon ka fag fafa at ngayan te, Taw-Tuy, sas talun at yud e taw, inkate wan. 50 Ay Ka fag fafa At kindasug katsi siginans Banwa, nus nga sinu fag taw at naon, di ban kate. 51 Aw wan takata Sik-Fafa-Tagfon-Leleg At kindasug siginans Banwa. Nus nga sinu fag taw at naon Ka fag fafa, gleleg tuwa ban faggugat. Ay Angku Ku nafon fag fafa, Ku bilug wan, laman at ngay taw ste swa daga gleleg tuwa ban. 52 Ay at ngay Taw-Naseg gfabadbabuan sa tiba te, Taw ro Ka fag taw At fagfonun unu antam At bilug, laman kon tam. 53 Ay Isus nalong anya te, Matuyan iglong Kwa ayu te, Nu dway am naon Ku bilug, at masuad Taw-At-Baguama At bilug, ay nu dway am nainum Ku taguk, dua long ban am gleleg. 54 Nus nga sinu nu naon tuwa Ku bilug ay nu nainum tuwa Ku taguk, gleleg tuwa ban faggugat. Ay Aw wan tagfon anya at leleg sas fakatabuan fag ngay menit. 55 Anway Ku bilug sik fakonun wa fiya. Ay Ku taguk sik fanginum wa fiya. 56 Nus nga sinu at naon Ku bilug ay nainum Ku taguk, kanya insadi wa sa Angku. Ay Aw insadi Akwa sa anya. 57 Ku Mama tagleleg faggugat At nasugu Angku. Ay gleleg Akyangay anway Ku Mama gfaleleg tuwa Angku. Ay katanya yangay sik taw at naon Ku bilug. Kanya gleleg tuwa anway Aw wan tagfaleleg anya. 58 Ka fag fafa at kindasug siginans Banwa, di kata ay aguyangan at naon ay nkate wan. Nus nga sinu at naon Ka fag fafa gleleg tuwa ban faggugat. 59 Katanya Isus At longan gina nafoyung sas Taw-Naseg at bale fakafulan sas Takafanyu-At-Fulan. 60 Ay at ngay tagalo sas Isus nu nadungug ka fag foyungan, nalong te, Mafalyu way Isus At longan. Sinu at sumaful ka fag longan at masuad. 61 Ay Isus dewa yud nadungug at tibugan, nasaful yay, ay nalong te, Go Ku longan gfalimataan way ayu. 62 Tain nu kin ban ay amatanganan gina am glag Angku, Taw-At-Baguama, nu gsakbo ban Aw sa ebi Ku talun. 63 Funbalugu At-Masine-Fag-Falad tagfon leleg sas taw. Sik taw at bilug du e fagmadaragangun. Ku nafoyung ayu fag longan siginan wa At-Masine-Fag-Falad. Ay At-Masine-Fag-Falad tagfon leleg sas taw. 64 Ay am tiba tagste du am kafandiug. Fakatanyaun At longan anway Isus nasaful wan siginan ngay ebi taguna te, kanya fag ngay taw at yud way kafandiug. Ay manga kanya fag taw ban at namoyung way Anya. 65 Ay Isus nalong te, Anway katanya, Ku fagnalongun ayu te, Du e taw kaakbang sa Angku nu dway Ku Mama gfaakbang anya sa Angku. 66 Katanya wayay Isus At longan, at ngay tagalo Isus insaman wan ay dua ganangaloun Isus. 67 Ay Isus nainto sa At Labi-Duwa te, Go anggan am kafoli wa ban am. Ay go igdi. 68 Ay Simun Takata-Sik-Batu nabalus Isus te, Em Magurang. Sinu nu kin ban em fagnangaloan. Anway O wayay At ke longan tagfon leleg sas taw. 69 Ay kafandiug tuwami. Anway nasaful wami te, O way fag sadi Funbalugu At suguan. 70 Ay Isus nalong sa At Labi-Duwa te, Aw wan At nafili ayu fag Labi-Duwa. Go kin. Ay am at sadi sik tagfangabaya way am. 71 Isus At faglongan at masuad sa sik taw at ngayan Segi, Nadungug at baguama, tagsiginans Ufat-Fulan-Sirut. Ay Segi at namoyung ban Isus sat mauri fag taw. Dewa te, anwa at sadi At Labi-Duwa.

7

1 Ay bandi Isus iglo sasa ngaba talun Balulangan laman igfoyung. Ay Kanya dua kaumsig iglo sasa ngaba talun Naseg. Anway Taw-Naseg at ngay magurang kaumsig wayay nanfate Anya. 2 Ay ginanya makbang wan Taw-Naseg at tagbvt fag yafun at ngayan te, Bale-Mafadfalianan. 3 Ay Isus At ngay fadugsay mangama nasugu sas Isus te, Loi wa ste ginan laman adasugi sas talun Naseg. Laman Am ngay tagadal sanya lumag wa fiya Am ngay fagbulun. 4 Anway sik taw dua gsuksuk at fagbulun nu kaumsig wa te, laman fagayu taw sumaful wa fiya anya. Ay nu e fagbulun yangay O katanya, falagi Am fagbulun sas fagayu taw ste swa daga. 5 Anway anggan Isus At ngay fadugsay fag mangama dua kafandiug sa Anya. 6 Ay Isus nabalus at ngay fadugsay te, Ku menit dia ndasug. Am loi wan. Anway fagayu menit ay menit. 7 Ay fagayu taw ste swa daga dua kadotama ayu. Sa way Angku at fakadotamaun. Anway nafoyung Aw te, Mauri way fagayu taw ste swa daga at ugali. 8 Am loi wan. Ay adasugi ban sas tagbvt fag yafun. Da Kia sanya sas tagbvt fag yafun katsi. Anway Ku menit dia ndasug. 9 Nu ntabuan Isus At longan sat ngay fadugsay, Isus sanya yay sas talun Balulangan. 10 Isus At ngay fadugsay fag mangama nalo wan sas tagbvt fag yafun. Ay bandi anggan Isus nalo wan. Ay Isus nu nalo, masuksuanan way. Ay dua gfalaganan sa tiba. 11 Ay at ngay Taw-Naseg nansarap wa ngani Isus sas tagbvt fag yafun te, Dada manga. 12 Ay at ngay taw sanya gibugan ayuwayu. Tiba glong te, Kanya fag taw masine tuwa. Ay tiba glong te, Yaya. Kanya gfanlamangan way At longan sat ngay taw. 13 Ay at ngay taw dua gfadaul nu ge longan. Anway fagayu taw kalimu Taw-Naseg at ngay magurang. 14 Ay gina e tagbvt fag yafun Isus nasakbo sas Tagbvt-Fag-Bale-Funbalugu. Ay nanfoyung sat ngay taw sanya. 15 Ay at ngay Taw-Naseg gadulawan te, Sinu Ka fag taw At ke fagsafulun dewa yud batang e naadal. 16 Ay Isus nalong anya te, Ku foyungan bunwa Ku longan mandi. At nasugu tuwa Angku At Ke longan. 17 Nus nga sinu fag taw nu kaumsig tuwa gfaning Funbalugu At fakaumsigun, kanya fag taw at sumaful te, sanya ginan Ku longan. Go siginans Funbalugu. Ay go siginan way Ku longan mandi. 18 Sik taw at foyungan nut siginan way at longan mandi, kanya kaumsig way tiba nu gseg anya. Ay roro ngap Kanya fag taw At foyungan antuwa te, Segi At nasugu Angku. Ka fag taw At longan matuyan wa fiya ay At ugali di e mauri. 19 Ebi ebi Funbalugu nafon Ku-Unga At-Longan sa ayu. Go kin. Ay fagayu am du am nafaning At-Longan. Taw ro ay fakaumsigun igfate Angku. 20 Ay at ngay taw nainto sas Isus te, Sangay e mafurat O fag falad. Sinu takaumsig igfate Emu. 21 Ay Isus nalong anya te, Sadi way ebi Ku nafasure At matvngvd fag fagbulun sas Fakamatoun-Menit. Ay fagayu am gadulawan yay am. 22 Ku-Unga At-Longan nafoyung ayu te, buli tuwa ay ngenge fag ama at lusku butu sis fawaluk menit. (Ay roro bunya Ku-Unga At-Longan fiya at nafasigad ka fag ugali. Siginan yay ay aguyangan at nafasigad.) Ay igfaning wam ka fag ugali dewa te at fawaluk menit si was Fakamatoun-Menit. 23 Ay anggan katsi, katanya way ay fagbulun sa ay ngenge. Ay di am kamabo sa Ku-Unga At-Longan si ay ngenge. Dewa sis Fakamatoun-Menit. Ay go kadotama am sa Angku te, nafafiya Aw sik taw, fagdaul at bilug, sis Fakamatoun-Menit. 24 Agi yap daw gfanmafali iglong, yap ngay am namatangan ay nasaful fiya. Fanyayi yap te, go matuyan. 25 Ay tibak taw sas Erusalem nalong te, Go Kanya fag taw tam ngay magurang wa at fagafateun. Go kin. 26 Damai. Ste wan Kanya fag taw. Ay nu nafoyung, dua gsuksuan. Ay tam ngay magurang du e longan sa Anya. Go katsi tam ngay magurang nasaful wa fiya te, Kanya tam Fagtayukan wa fiya. Go yaya. 27 Roro ngap, nasaful wami te, sanya ginan ka fag Taw. Tam Fagtayukan nu ndasug, at ngay taw dua nasaful te, sanya ginan. 28 Ay Isus gbiya nu ge longan sas Tagbvt-Fag-Bale-Funbalugu te, Am nasaful tuwam te, Sinu Aw ay sanya ginan Aw. Aw da kwa mandi gsugu Angku. At nasugu Angku At ke longan tuwa at matuyan. Ay di am nasaful Anya. 29 Aw nasaful Ak tuwa Anya. Anway Aw sanya ginan Kwan. Ay Kanya tuwa At nasugu Angku. 30 Ay tibak taw kaumsig ganantedun Isus. Ay roro ngap du e taw mafated Anya anway At menit dia ndasug. 31 Ay ngayuk taw kafandiug sas Isus ay gidgintoan te, Tam Fagtayukan nu ndasug, go e gfagbulun iglabi yay Tuy fag taw At matvngvd fag fagbulun. Go yaya. 32 Ay Taw-Naseg at ngay Taw-Tagfalayun nadungug at ngay taw nu gibugan sas Isus baliwa. Ay at ngay taganyun daul ay at ngay Taw-Tagfalayun nasugu sik ngay tagbarangian, laman nanted Isus. 33 Ay Isus nalong te, Glugo yay sirut nu ste Aw si ayu. Ay bandi, guli Kua ban sa At nasugu Angku. 34 Ay sumarap ban am Angku. Ay dua ban am e nalag. Ay nut sa ma ban Ku fakadasugan, wa ban am madasug. 35 Ay at ngay Taw-Naseg gfasulitanan sa tiba te, Dada unu ro, laman dua unu ban tam lumag Anya. Go Kanya nanlag sasa ngay Taw-Naseg at maful sasa ngay Taw-Gresia. Laman nanfoyung sas Taw-Gresia. Go yaya. 36 Taw ro manga at masuad Isus At fagnalongun te, Sumarap ban am Angku ay dua ban am lumag. Ay, nut sa ma Ku fakadasugan, du am madasug. 37 At fakatabuan fag menit sas tagbvt fag yafun glabi yay tibak menit nu masine. Ginanya fag menit Isus malindug siswa taw ay gbiya nu ge longan te, Nus nga sinu takadanum, akbangi sa Angku ay inumi. 38 Kata tuy Funbalugu-At-Rirukan nalong te, Nus nga sinu takafandiug sa Angku, siginan at amatanganan e kata Sik-Safa-Tagfon-Leleg. 39 Isus At fafaskudanan at masuad te, At-Masine-Fag-Falad kadasug ban sas takafandiug. Anway kaduge Isus ste, At-Masine-Fag-Falad dia ndasug sas takafandiug. Anway Isus dia ndasug sa At fagmasineun. 40 Ay at ngay taw nu nadungug Isus At longan, tibak taw nalong te, Tuy wa fiya fag taw ka fag taglong siginans Funbalugu. 41 Ay tiba nalong te, Kanya wan tam Fagtayukan. Ay tiba nainto te, Go sangay tam Fagtayukan ndasug siginans talun Balulangan. Go yaya. 42 Anway At-Rirukan nafoyung te, Tam Fagtayukan At sadi fun Fakafanyuun at kadagdagan. Laman Kanya nu kadasug, siginans fun Fakafanyuun at fulan, at ngayan te, Fulan-Ke-Fafa. 43 Ay at ngay taw dua masadi at amatanganan sas Isus baliwa. 44 Ay tiba dewa ganantedun Isus, kanya dua mafated. 45 Aro fag ngay tagbarangian noli wa sas Taw-Naseg at ngay taganyun daul ay at ngay Taw-Tagfalayun. Ay ka fag ngay Taw-Naseg nainto sas tagbarangian te, Taw ay fagyudun nataban Isus stiye. 46 Ay at ngay tagbarangian nabalus te, Du e taw katvngvd Ka fag taw nu gfoyung. 47 Ay at ngay Taw-Tagfalayun nainto sas tagbarangian te, Go Ka fag taw igfanluk yangay anggan sa ayu. 48 Ay go Taw-Naseg at ngay magurang ay anggan at ngay Taw-Tagfalayun kafandiug sa Anya. Ay go yaya. 49 At ngay taw at nangalo Anya dia nasaful Ku-Unga At-Longan. Ay katanya wayay, Funbalugu kadotama sa at ngay taw. Go kin. 50 Ay sanya at sadi sik Taw-Tagfalayun, at ngayan te, Tagbabo-Tiba. Kanya ebi at nananlag Isus. Ay katsi kanya nalong sas Taw-Tagfalayun te, 51 Nu gfaning di tam tam ugali, di mi gfauri sik taw yap ngay tam fiya fiya nadungug sanya ginan fag taw. Laman sumaful tam te, Go masine ay go mauri at fagbulun. 52 Ay at ngay Taw-Tagfalayun nabalus Tagbabo-Tiba te, Go anggan o siginan os talun Balulangan. Go yaya. Tapi yap At-Rirukan laman sumaful yangay am te, du ban e msure sik Funbalugu At taglong siginans talun Balulangan. 53 Ay fagayu taw noli wan.

8

1 Ay Isus nalo wa sas Muyud-Tagakayuun-Ulibu. 2 Ay balabag di gina bagu nyamag, Isus nasakbo sas Tagbvt-Fag-Bale-Funbalugu. Ay fagayu taw nangakbang Anya. Ay Isus malunggung ay nafoyung sasa ngay taw. 3 Ay Taw-Naseg at ngay tagfasaful ay at ngay Taw-Tagfalayun nataban sik mangena sas buknga taw. Anway tiba nalag nu e kamayun sanya fag mangena. 4 Ay Taw-Naseg at ngay magurang nalong sas Isus te, Em Takamoyung, e nalag nu e kamayun iste fag mangena. 5 Ay Ku-Unga At-Longan nafoyung antam te, Falangi anya batu, nus nga sinu fag mangena takatanya at ugali. Ay tain emu am fasadan sa anya. 6 Katanya at ngay magurang at longan sas Isus, anway at fakaumsigun nanfe asalanan Isus. Laman e kafoyung Isus At asalanan. Ay Isus garungan way ay At fanriruk sas daga At sumyuan. 7 Ay ka fag ngay magurang faladlayunan nu ginto sas Isus. Ay Isus inlindug ay nalong anya te, Nus nga sinu at yud e asalanan, kanyai taguna tagfalang anya batu. 8 Ay Isus gdog yay garungan ay At sumyu At fanriruk sas daga. 9 Ay at ngay magurang nu nadungug Isus At longan, nalo wa nasadsadian, at magurang tiba tungud taguna at nalo. Ay rodi du e magurang sanya. Isus way ay ka fag mangena tagsanya. 10 Ay Isus inlindug ay ginto sa ka fag mangena te, Fagina, dada wan katsi ka fag ngay magurang. Go katsi dua ste tagfoyung am asalanan. 11 Ay ka fag mangena nabalus sas Isus te, Kin. Yaya, ku Magurang. Dua ste tagfoyung ku asalanan. Ay Isus nalong anya te, Anggan Aw. Da Kua gtap am asalanan. Loi wan. Ay lag o gdog nangasalanan. 12 Ay Isus nafoyung sik fafaskudanan sasa ngay Taw-Tagfalayun te, Aw wan At-Fagmayamagun sas fagayu taw ste swa daga. Nus nga sinu at nangalo Angku, di ban glo sad marum. Anway kanya e Sik-Fagmayamagun-Tagfon-Leleg. 13 Ay at ngay Taw-Tagfalayun nalong sas Isus te, O way mandi tagfatuyanan sa Emu. Ay nu katanya, Am longan du e masuad. 14 Ay Isus nalong te, Dewa Aw mandi tagfatuyanan sa Angku, matuyan Ku longan. Anway nasaful Aw te, sanya ginan Aw, ay sanya ban nu glo Aw. Ay roro ngap du am nasaful te, sanya ginan Aw ay sanya ban nu glo Aw. 15 Nu gtap way am tibak taw at asalanan, ay fagfaningun sa way sik taw at amatanganan. Aw Kua gtap taw at asalanan. 16 Ay dewa Aw gtap taw at asalanan, ku fagtapun matuyan wa fiya. Anway da Kdi gsesadian nu gtap Aw. Aw ay anggan At nasugu Angku igtap tuwa. 17 Anway ebi e nariruk wa sa ay Longan te, nu duwa wak taw at nadiuganan at longan, matuyan wa fiya. 18 Aw wan at nafatuyan sa ayu Ku ugali. Ay anggan Ku Mama, At nasugu Angku, an yangay nafatuyan. 19 Ay at ngay Taw-Tagfalayun nainto sas Isus te, Dada Am Mama. Ay Isus nabalus te, Du am nasaful te, Sinu Aw. Ay anggan Ku Mama, du am nasaful te, Sinu Kanya. Nu nasaful tuwam Angku, nasaful yangay am Ku Mama. 20 Katanya Isus At longan nu nafoyung sas Ke-Fagsandigan-Salafi-Fag-Salug, sas Tagbvt-Fag-Bale-Funbalugu. Ay du e taw nated Anya, anway Isus At menit dia ndasug. 21 Ay Isus nafatagak yangay sasa ngay Taw-Tagfalayun te, Lumo Kua ban ste ginan, ay sumarap ban am Angku. Ay umkate ban am sa ay ngay asalanan. Ay dua ban am masud Angku sa Ku fagnangadasugan. 22 Ay at ngay Taw-Tagfalayun igfasulitanan sa tiba te, Go sangay Isus nanfate ban At balyu. Ay go igdi. Madyay Kanya nalong sa antam te, Dua ban am masud Angku sa Ku fagnangadasugan. 23 Ay Isus nalong te, Am wan tagsis daga. Ay Aw wan tagsiginans tungud. Am wan tagste swa daga. Ay Aw da Kwa tagste ginan swa daga. 24 Anway katanya iglong Aw ayu aro te, Umkate ban am sa ay asalanan. Anway du am gafanud te, Aw-Wan, ay umkate ban am sa ay asalanan. 25 Ay at ngay Taw-Naseg nainto te, Sinu Wo. Ay Isus nabalus te, Kata wa ebi Ku longan ayu siginans fagsigadan. 26 Ngayu yay Ku fagananlongun ayu. Ay ngayu yay Ku fagananfoyungun ay asalanan. Matuyan At nasugu Angku At longan. Ay nanfoyung Aw sas fagayu taw ste swa daga Ku dungganan siginan At nasugu Angku. 27 Ay ka fag ngay Taw-Naseg dua nasaful Isus At nalongan te, At nasugu Angku. Roro anwa At Tama At nasugu. 28 Anway katanya Isus nalong sasa ngay Taw-Naseg te, Kaduge yay ban am faabat Angku, Taw-At-Baguama, ginanya yay ban fag menit nu sumaful am te, Aw Aw-Wan. Ay anggan sumaful yangay am te, Aw Ku e fagbulun mandi. Ku foyungan Ku Mama tuwa At nafoyung Angku. 29 At nasugu Angku si tuwa Angku. Kanya di gubun Angku sesadi. Anway igfaning Aktuway faggugat At fakaumsigun. 30 Gina Isus nafoyung katanya, ngayuk taw takafandiug sa Anya. 31 Isus nalong sasa ngay Taw-Naseg at takafandiug sa Anya te, Nu nafaning tuwam fagayu Ku longan, am Ku tagadal wam fiya. 32 Ay sumaful wam fiya te, at matuyan siginan tuwas Funbalugu. Ay nu nasaful tuwam katanya, bundi ban am sik fanuguan. 33 Ay at ngay Taw-Naseg nalong sas Isus te, Abrayam wami at sugfun. Ay di ami batang sik taw at fanuguan. Taw ro Am fagnalongun emi te, Bundi ban am sik fanuguan. 34 Ay Isus nalong anya te, Matuyan iglong Aw ayu te, Nus nga sinu fag taw nu gfaning way asalanan, kanya asalanan wa fiya at fanuguan. 35 Sik talanan at fanuguan dua faggugat nut sanya fag talanan. At baguama tuwa tagsanya faggugat. 36 Ay Aw, At Baguama, ku fagbulun sa ayu antuwa te, laman bundi ban am sik fanuguan. Ay kin, nu katanya, bundi ban am sik fanuguan. 37 Nasaful Kwa te, am wan Abrayam at sugfun. Dewa katanya, gananfateun way am Angku. Anway du am kaumsig gfaning sa Ku foyungan. 38 Igfoyung Aw ayu Ku Mama At nafoyung Angku. Ay am, ay fagfaningun sa way mandi ay tama at foyungan ayu. 39 Ay at ngay Taw-Naseg nalong sas Isus te, Abrayam wan em aguyangan. Ay Isus nalong te, Laman ro ay aguyangan nu antuwa Abrayam, igfaning tuwam at fagbulun. 40 Ay roro ngap katsi kaumsig way am gananfateun Angku. Dewa Aw sik taw tagfoyung ayu at matuyan, Ku nadungug siginans Funbalugu. Ay dua katanya Abrayam at fagbulun. 41 Ay fagfaningun anway sa ay tama. Ay at ngay Taw-Naseg nalong sas Isus te, Bundi ami sik nafamayun. Funbalugu tuwa em Tama. 42 Ay Isus nalong te, Laman ro ay tama nu Funbalugu tuwa, kesug tuwam Angku. Anway indasug Aw ste swa daga siginans Funbalugu. Ay Ku fagindasugun Kua gfaning Ku fakaumsigun. Ay Ku fagfaningun Aktuwa sa At nasugu Angku At fakaumsigun. 43 Taw ro ay fagyudun gsaful Ku longan. Teway dua mangaro am gdungugan Ku longan. 44 Am wan tagfaning ay tama at ngayan te, Takamuag-Tiba-At-Fagbulun. Ay ay fakaumsigun igfaning way am ay tama at fakaumsigun. Siginan ngay ebi ebi kanya sik tagfate wa taw. Ay dua gfaning at matuyan, teway at matuyan dua ay si anya. Kanya nu kamuag way, igfaning at ugali, anway sik takamuag wa fiya. Ay kanya fagayu taw takamuag at tama. 45 Ay dewa Aw nafoyung at matuyan, du am gafanud sa Angku. 46 Sinu nu kin am fag taw at nalag Ku asalanan. Ay nu matuyan Ku longan, taw way ay fagyudun gafanud sa Angku. 47 Funbalugu At unga nadungug wa fiya Funbalugu At longan. Ay ay fagyudun kaumsig gdungugan bunwa am Funbalugu At unga. 48 Ay at ngay Taw-Naseg nalong sas Isus te, Go matuyan em longan aro te, O wan sik Taw-Fagbantayan At ke mauri fag falad. Go kin. 49 Ay Isus nabalus te, Aw da Kdi e mauri fag falad. Ay naseg Aw Ku Mama. Ay kalimata way am daw Angku. 50 Ay Aw Kua gsarap laman e gseg Angku. Funbalugu tuwa At ke fasadan laman e gseg tuwa Angku. Ay Kanya yangay tagtap taw at asalanan. 51 Matuyan iglong Aw ayu te, Nus nga sinu tagfaning Ku longan, di ban kate faggugat. 52 Ay at ngay Taw-Naseg nalong sas Isus te, Katsi nasaful wami fiya te, e mafurat fag falad way O. Madyay nkate wan Abrayam, ay anggan ebi Funbalugu At ngay taglong. Ay nalong yay O te, Nus nga sinu tagfaning Ku longan, di ban kate faggugat. 53 Go O tuwa tiba tungud em aguyangan Abrayam at kinkate. Ay anggan ebi Funbalugu At ngay taglong at kinkate. Go sinu Wo. Tain nu gfoyung O Emu sa tibak taw. 54 Ay Isus nabalus anya te, Nu gseg Kway ro Angku, du e masuad. Ku Mama tagseg Angku. Ay am glong am te, Kanya em Funbalugu. 55 Ay du am nasaful Anya. Aw way At nasaful Anya. Nu nalong Akway ro te, Kua nasaful Anya, Aw sik takamuag Akway kata ayu. Anway nasaful Akwa Anya ay igfaning Aw At longan. 56 Am aguyangan Abrayam guseganan dawdaw ebi nu lumag di ban nu kadasug ban Aw fag menit. Ay kanya nalag wa fiya, ay nauseganan wa dawdaw. 57 Ay at ngay Taw-Naseg nalong sas Isus te, Bunya 50 Am banwa. Dewo nalong te, Nalag Wo Abrayam. 58 Ay Isus nabalus anya te, Matuyan iglong Aw ayu te, Abrayam dewa gyud e taw, Aw Aw-Wan. 59 Ay at ngay Taw-Naseg nabul batu laman gaukasun sas Isus. Ay Isus nasuksuan nalaklo siginans Tagbvt-Fag-Bale-Funbalugu.

9

1 Ay Isus gina glo, nalag sik taw at yud glag siginan ngay bagu kalangfe. 2 Ay Isus At ngay tagadal ginto sas Isus te, Em Takamoyung. Sinu at ke asalanan. Go tuy fag taw. Ay go at magurang yay. Madyay dua glag siginan ngay bagu kalangfe. 3 Ay Isus nabalus anya te, Dewa ka fag taw yud glag at masuad bunwa te, ka fag baguama at ke asalanan. Ay bunwa te, at magurang ke asalanan. At masuad at fagyudun glag, antuwa te, laman umsure Funbalugu At fagmadaragangun sa anya. 4 Kaduge mamenit, masine nu nanfagbulun watam sa At nasugu Angku At fagbulun. Anway nu nyabi wan dua kafagbulunan. 5 Kaduge Aw ste swa daga, Aw wan At Fagmayamagun sas fagayu taw ste swa daga. 6 Ay Isus nu nalong wa katanya, natufe sas daga. Ay nalugu At tufe. Ay nafatayuk ka fag lifak sa at yud glag at mata. 7 Ay rodi Isus nalong sat yud glag te, Loi wan. Fegusi am mata sa sad lino Silue. Silue at masuad te, Siginan-Sik-Fagsagubanan. Ay ka fag taw nalo wan ay nafegus at mata. Ay nu guli wan, glag tuwa. 8 Ay at ngay fasabale ay anggan at ngay kaiban nalag anya ebi gina get. Ay kanya fag ngay taw nalong te, Go tuy wa siring ebi at yud glag. Ay at malunggung sis day dalan laman get. 9 Ay tibak taw nalong te, Kanya wa fiya. Ay tibak taw nalong te, Yaya long. Sik taw way kata ka fag taw ebi nu gmatan. Ay ka fag taw aro at yud glag nalong te, Aw wa fiya. 10 Ay ka fag ngay taw nainto anya te, Tain daw nu gfafiya am mata. 11 Ay ka fag taw at yud glag ebi nabalus anya te, Sik ama At ngayan Isus nalugu lifak ay nafatayuk sa ku mata. Ay Kanya nalong angku te, Loi wan sas lino Siginan-Sik-Fagsagubanan. Ay fegusi am mata. Ay nalo akwa fiya. Ay nafegus aw ku mata. Ay rodi glag aktuwa. 12 Ay at ngay taw nalong te, Dada wan ka fag ama katsi. Ay at bagu glag fag taw nabalus te, Safulun katsi. 13 Ay rodi ro tiba nataban at yud glag ebi sasa ngay Taw-Tagfalayun. 14 Ginanya sis Fakamatoun-Menit Isus nu nalugu lifak. Ay nu nafafiya ka fag taw at mata. 15 Ay at ngay Taw-Tagfalayun ginto yangay anya te, Tain nu mafafiya am mata. Ay at bagu glag nabalus yay fiya te, Sik ama nafatayuk lifak sa ku mata. Ay nu nafegus akwa ku mata, rodi glag kwan. 16 Ay tibak Taw-Tagfalayun glong te, Ka fag ama bunwa Funbalugu At suguan. Anway Kanya dua gfaning tam ugali madyay nu gfafiya si ways Fakamatoun-Menit. Ay tiba nalong yangay te, Go sik tagasalanan mafabul at ke masuad fag fagbulun. Ay at ngay Taw-Tagfalayun dua gdiuganan at amatanganan. 17 Ay at ngay Taw-Tagfalayun gdog yay nainto sat bagu glag te, Tain am longan sa emi. Anway Kanya nafafiya am mata. Ay ka fag taw nabalus te, Kanya sik Funbalugu At taglong. 18 Ay at ngay Taw-Naseg dua gafanud te, ebi fag taw at yud glag katsi glag wan. Yap ngay nafat sanya ka fag bagu glag at mangaguyang fag duwa. 19 Ay rodi at ngay Taw-Naseg ginto sat duwak mangaguyang te, Go tuy wan ay baguama, ay longan at yud glag siginan ngay bagu kalangfe. Ay nataw katsi at faginfiyaun. 20 Ay at mangaguyang nabalus te, Tuy ngaro em baguama. Ay nasaful wami te, dua glag siginan ngay bagu kalangfe. 21 Ay du ami nasaful te, tain tuwa nu glag. Ay sinu At nafafiya at mata. Intoi wa anya, anway magurang wan. Ay kanya mafafoyung wa ro ayu. 22 Anway at mangaguyang at fagnalongun katanya, kalimu sat ngay Taw-Naseg. Anway ebi at ngay Taw-Naseg nadiuganan te, sik taw nu nafoyung way te, Isus tam Fagtayukan, ayiyani wan ka fag taw siginans tam bale fakafulan. 23 Katanya at mangaguyang at fagnalongun te, Kanya magurang wan. Intoi wa anya. 24 At faduwa ginan wan at ngay Taw-Naseg nu gfakbang anya ka fag taw aro at yud glag. Ay nalong anya te, Tam fagusegananan sa ways Funbalugu fagsadi. Anway nasaful watam te, aro fag tagfafiya emu sik tagasalanan way. 25 Ay at bagu glag nabalus te, Kua nasaful te, go Ka fag taw sik tagasalanan way. Ay go igdi. Ku nasaful sadi way te, madyay dewa aw yud glag, katsi glag aktuwa. 26 Ay at ngay Taw-Naseg gdog yay nainto te, Go tain At fagbulun sa emu. Ay go tain nu nafafiya am mata. 27 Ay at bagu glag nabalus te, Taw yay ro guggat ay fagnangintoun angku. Aro dewa aw nafoyung ayu. Ay aro dewa am yud gdungugan. Ay go ate kaumsig wam nangasik tagadal. Ay go yaya. 28 Ay at ngay Taw-Naseg kalimata anya te, O way At tagadal. Ami Ku-Unga way ami at tagadal. 29 Anway nasaful wami te, Funbalugu At fagfoyungan sa way Ku-Unga. Ay Kanya aro fag taw, du ami nasaful te, daginan. 30 Ay at bagu glag nalong te, Tuy sik madulawan fag fagbulun. Anway du am nasaful te, daginan ka fag taw. Madyay Kanya nafafiya ku mata. 31 Ay nasaful watam te, Funbalugu dua gdungug sik tagasalanan. Ay roro ngap nus nga sinu tagseg Anya ay tagfaning Anya, Funbalugu nadungug wa fiya anya. 32 Dia tam batang e nadungug siginan ngay ebi ebis fagsigadan te, sik taw nafafiya sik taw yud glag siginan ngay bagu kalangfe. 33 Ay anggan aro fag taw nu bunway ro Funbalugu At nasugu, dua mafabul. 34 Ay at ngay Taw-Naseg nalong sat bagu glag te, Madyay anggan o, nu kalangfe o si yay o swa asalanan. Taw ro am fagmafafoyungun emi. Ay ka fag ngay Taw-Naseg nayiyan at bagu glag siginans bale fakafulan. 35 Isus nadungug te, At ngay Taw-Naseg nayiyan wa at bagu glag. Ay Isus nu nalag at bagu glag nalong anya te, Go kafandiug tuwo sas Taw-At-Baguama. 36 Ay at bagu glag nabalus te, Em Magurang. Sinu Kanya, Taw-At-Baguama, ku fakafandiugan ban. 37 Ay Isus nabalus anya te, Nalag wo Anya. Ay Kanya wa tagfamatuan emu katsi. 38 Ay at bagu glag nalong te, Ku Magurang. Kafandiug aw. Ay at bagu glag igseg wa fiya sas Isus. 39 Ay Isus nalong te, Ku fagindasugun ste swa daga laman nafoyung Aw te, Fagayu taw e asalanan. Ay laman at yud glag, laman ban glag tuwa. Ay at taglag, laman ban dua glag. 40 Ay at ngay Taw-Tagfalayun at makbang sas Isus nu nadungug At longan, nainto Anya te, Go anggan ami, dua ro mi glag katsi. 41 Ay Isus nafafaskudanan te, Laman ro nu am wa at yud glag katsi, di am e asalanan. Ay roro ngap nalong am te, Glag tuwami. Ay nu katanya e asalanan yay am.

10

1 Matuyan iglong Kwa ayu te, Sik taw at fagsakboan nu dway sasad sakbawan alad tupa. Ay roro nut sa way sad sulat alad. Kanya sik masuksuanan way fag taw. Ay manga sik takamul way. 2 At tagsakbo sasad sakbawan alad tupa at tagbilug tupa wa fiya. 3 At tagtanud sakbawan naluang at dingding sakbawan nu ndasug tagbilug tupa. Ay at ngay tupa natogdungug tuwa at tagbilug nu ge longan. Anway at tagbilug nalong at tupa at ngayan. Ay kanya naguna tuwa at ngay tupa nu glo. 4 Ay at ngay tupa bagu malfas siginan sad sakbawan alad, at tagbilug tuwa taguna at malfas. Ay at ngay tupa nangalo wa fiya anya. Anway nasaful at tagbilug nu ge longan. 5 Ay at ngay tupa iglagyu way ay dua nangalo nut sa way sik famaklay. Anway at ngay tupa natogdungug tuway te, kanya tage longan sik famaklay way. 6 Isus nafoyung ka fag fafaskudanan sasa ngay Taw-Tagfalayun. Ay kanya dua nasaful Isus At longan at masuad. 7 Ay Isus gdog yay nalong sasa ngay Taw-Tagfalayun te, Matuyan iglong Kwa ayu te, Aw wan At-Sakbawan-Alad-Tupa. 8 Fagayu at naguna Angku nu gsakbo, sik masuksuanan way fag taw. Ay manga sik takamul way. Ay Ku ngay tupa natogdungug tuwa te, bunwa kanya em agbilug. 9 Aw wan At-Sakbawan-Alad-Tupa. Nus nga sinu at fagsakboan nut sa tuwa sad Sakbawan-Alad, umbalabag wa fiya. Ay kanya lumag at fagfangonan, ay nalaklo ay noli. 10 Ay sik masuksuanan fag taw at fagindasugun laman nanfamul ay nanfarasras ay nanfate sanya fag ngay tupa. Ay Aw Ku fagindasugun laman Ku ngay tupa gleleg wa fiya ay du e fagayudanun kaduge gleleg. 11 Aw wan At-Masine-Fag-Tagbilug-Tupa. Anway At-Masine-Fag-Tagbilug-Tupa mabayan tuwa dewa te anwa e gafateun Anya. Laman At ngay tupa e fanambagun ban. 12 Sik tagtanud tupa at fasadan anway fagtvngvd te, igbul way at nalufuyan. Ay dua baliwa nangasaful tupa at ugali. Teway bunwa ngani ay, tagbilug tupa. Ay nu nabantay wa ngani sik mela fag idu talun, ka fag tagtanud naubun way at ngay tupa ay nalagyu wan. Ay at mela naagat at tibak tupa ay anggan nafasaruwayan wan tiba. 13 Ka fag tagtanud nalagyu way. Teway tagtanud wayay. Ay dua kesug at ngay tupa. 14 Aw wan At-Masine-Fag-Tagbilug-Tupa. Kata Ku Mama faggugat nu gsaful Angku. Ay anggan Aw gsaful Kyangay Ku Mama. Katanya yangay nu gsaful Aw Ku ngay tupa. Ay anggan Ku ngay tupa gsaful yangay Angku. 15 Ay mabayan Aktuwa dewa te anwa e gafateun Angku. Laman Ku ngay tupa e fanambagun tuwa. 16 Ay e tibak tupa Akyay, bundi ste ginan fagtvngvd fag alad. Ay nanfastiye Akyangay ban sa Angku ka fag ngay tupa. Ay kanya gsaful yangay ban Angku nu ge longan Aw. Ay nanfasadi Akban Ku ngay tupa ayuwayu te, laman sadi way at tagbilug. 17 Ku Mama kesug Angku anway mabayan Aktuwa dewa te anwa e gafateun Angku. Anway gdog Kyangay ban gleleg. 18 Dia ban e gfate Angku yap ngay Aw nafanabayan anya. Aw mabayan Aktuwa dewa te anwa e gafateun Angku. E fagmadaragangun Aw laman mabayan Aktuwa dewa e nafate Angku. Ay e fagmadaragangun Aw laman gdog Kyangay gleleg. Katanya Ku Mama At suguan Angku. 19 Ay at ngay Taw-Naseg inkafud, anway Isus At nalongan. 20 Ay sik fulan iglong way te, Isus e mafurat way fag falad. Madyay naliam At amatanganan. Taw ro ay fagnandunguganun Anya. 21 Ay sik fulan iglong tuwa te, Igdi. Madyay nu ge longan di kata nu e mafurat fag falad. Laman ro nu e mafurat way fag falad, dua mafafiya sik taw at yud glag. Go kin. 22 Ay katsi fag menit Taw-Erusalem e tagbvt fag yafun at ngayan te, Nafon-Sas-Funbalugu-At-Tagbvt-Fag-Bale-Funbalugu. 23 Ay ginanya at matis fag magdanun. Ay Isus gayayag sa sik ngabak Fun-Mabayan-At-Maugunan-Fag-Dalan sisa ngaba day Tagbvt-Fag-Bale-Funbalugu. 24 Ay at ngay Taw-Naseg insafung sas Isus ay ginto te, Go seduge ro nu gfoyung O emi at matuyan. Go ate O wan Fagtayukan. Foyungi wemi katsi fatignauni wan. Laman sumaful wami te, O wa ngaro fiya. 25 Ay Isus nabalus anya te, Batang Kwa gfoyung ayu, ay du am gafanud. Ku Mama tuwa At nasugu Angku kanya fag fagbulun At nafatuyan sa ayu Ku ugali. 26 Ay du am gafanud, anway bunwa am Ku tupa. 27 Ku ngay tupa natogdungug nu ge longan Aw. Ay nasaful Aw te, kanya Ku ngay tupa. Ay Ku ngay tupa nangalo tuwa Angku. 28 Ay nafon Aw leleg at yud katabu sa Ku ngay tupa. Ay di ban kate faggugat. Ay du e mafaago Angku. 29 Ku Mama nafon Angku ka fag ngay tupa. Ay Ku Mama tiba tungud. Ay du e mafaago Ku Mama. 30 Ami duwa, kata tuwami at sadi, Aw ay Ku Mama. 31 Ay at ngay Taw-Naseg gdog yay nabul batu, ay gaukasun sas Isus. 32 Ay Isus nalong anya te, Nafalag Kua ayu Ku Mama At nafafagbulun sa Angku at masine. Nataw ya ay fakalimataun Ku fagbulun ay fagaukasun batu sa Angku. 33 Ay at ngay Taw-Naseg nabalus Anya te, Du ami kukas batu sa Emu teway masine tuway Am fagbulun. Em fagaukasun batu sa Emu anway te, sad ami Am longan mauri way sas Funbalugu baliwa. Anway O wan at masadi sas Funbalugu dewa O sik taw. 34 Ay Isus nalong te, Nariruk wan ebi sa ay Longan te, Funbalugu nalong te, Am wan sik ngay Funbalugu At baguama. 35 Nasaful watam te, tam Funbalugu At Rirukan e masuad tuwa faggugat. Ay ebi Funbalugu nafangayan ka fag ngay taw at fagfoyungan At-Longan te, Funbalugu At ngay baguama. 36 Nu katanya, go nalong am sa Angku te, Mauri way Am longan sas Funbalugu baliwa. Anway sa Ku nafoyungan te, Aw wan Funbalugu-At-Baguama. Funbalugu wan At nafili Angku ay At nasugu Angku stiye swa daga. 37 Nu da Kway ro nafaning Ku Mama At nafafagbulun sa Angku, lag gafanud Ku longan. 38 Ay nu nafaning Aktuwa Ku Mama At nafafagbulun sa Angku, afanudi tuwa sa Ku Mama At fagbulun. Dewa gyud am gafanud sa Angku. Laman sumaful ro am te, Ku Mama si wa Angku ay Aw si Kwa Ku Mama. 39 Ay At ngay Taw-Naseg gdog yay gananyukfuun Isus. Ay Isus dua nasudan nasuksuan wayay. 40 Ay Isus gdog yay nalo. Ay nadife wa safa Mababaun. Ay indasug wa sa ebi Uan at fagsurungan taw. Ay Isus sanya yay ginanya sirut. 41 Ay ngayuk taw at nangakbang sas Isus. Ay ka fag ngay taw igsulitanan sit dayu te, Dewa Uan yud e matvngvd fag fagbulun, matuyan wa fiya fagayu at longan sas Isus baliwa. 42 Ay sanya ngayuk taw takafandiug sas Isus.

11

1 E sik taw gadailan, at ngayan Funbalugu-Ku-Tagtarabang, sas fulan At-Yud-E-Kwa. Funbalugu-Ku-Tagtarabang ay Taglu ay Sik-Ina sisian wan. Ay nu gbanwan sanya fag fulan. 2 Ay at ke dailan at fadugsay, Taglu, ebi at nananfatayuk bebanglu fag lumad sas Isus. Ay at fanrarus sas Isus at darafa, at buk wan. 3 Ay ka fag dugsay fag mangena nasugu tibak taw sas Isus laman nanfoyung te, Em Magurang. Am fakesugun fag taw gadailan way. 4 Ay Isus nu nadungug, nalong te, At masuad dewa gadailan, bunya fakateun gurungan. At masuad roro anway te, laman umsure Funbalugu At fagmadaragangun. Ay laman ban at taw sumeg Angku, Funbalugu-At-Baguama. 5 Ay Isus kesug ka fag tuluk sisian, Sik-Ina ay at fadugsay ay Funbalugu-Ku-Tagtarabang. 6 Ay dewa Isus nadungug te, Funbalugu-Ku-Tagtarabang e dailan way, Isus dia nananlag duwak menit. 7 Nu nlangfe wa duwak menit, Isus nalong sa At ngay tagadal te, Bastam. Glo watam. Kafoli yangay tam sas Talun Naseg. 8 Ay at ngay tagadal nalong sas Isus te, Em Takamoyung. Katsi ebi tv at ngay Taw-Naseg kaumsig gaukasun sa Emu batu. Go dewa katanya, kafoli yay O sanya. Ay go yaya. 9 Ay Isus nafafaskudanan te, Sik menit nu siaba, mayamag tuwa. Ay sik taw nu glo nu gina tuwa mamenit, di ntaid. Ay kanya glag tuwa. Anway at fagmayamagun ste swa daga tagfayamag anya. 10 Ay sik taw nu glo nu sad yabi wadi, umtaid wa fiya. Teway dia ay mayamag si anya. 11 Katanya Isus At longan. Ay rodi nalong yangay sa At ngay tagadal te, Tam fagues, Funbalugu-Ku-Tagtarabang, gtiug wan. Ay nanlag Akyay anya laman nanfafulo Aw anya. 12 Ay At ngay tagadal nalong sas Isus te, Em Magurang. Funbalugu-Ku-Tagtarabang nu maatiug tuwa, gakafiyaun wan. 13 Roro ngap Isus At longan at masuad anwa te, Funbalugu-Ku-Tagtarabang nkate wan. Ay At ngay tagadal nu gfasad, fafiyaan yay at lufuy fag tiugun ay. 14 Ay Isus nafatignaun wa daw nu glong te, Funbalugu-Ku-Tagtarabang nkate wan. 15 Ay guseganan Aw dewa yud Aw sanya gina Funbalugu-Ku-Tagtarabang kate. Laman e fanambagun ban am. At masuad laman kafandiug ban am. Ay bastam wan. Nanlag watam anya. 16 Ay Duwak-Nasfuan, at ngayan at sadi te, Kambal, nalong sa at ufud fag ngay tagadal te, Bastam ngatu. Anggan itam nangate watam nanfasfuan watam tam fagues. 17 Ay Isus nu ndasug sanya, e nafoyung anya te, Katsi Funbalugu-Ku-Tagtarabang ufat wak menit nu masandigan sa sik fagsandigan fag luib. 18 Ka fag fulan At-Yud-E-Kwa ay fulan Erusalem gakbangan way. At kayayuan, kaduge way sik sineud katama. 19 Ay anway makbang wayay, ngayuk Taw-Naseg indasug sa Sik-Ina ay Taglu laman nanfaliaman anya. Teway at fadugsay nkate wayay. 20 Ay Sik-Ina nu nadungug te, Isus umdasug ro, nalo wan laman nanfablang. Ay Taglu igfanya way sat bale. 21 Ay Sik-Ina nalong sas Isus te, Ku Magurang, nu ste di ro O, ku fadugsay satu ro dia nkate. 22 Ay dewa katanya, nasaful aw te, manga ginanya nus nge wain Am fagetun siginans Funbalugu, Funbalugu mafafon ro Emu. 23 Ay Isus nalong anya te, Am fadugsay gdog yay ro gleleg. 24 Ay Sik-Ina nabalus Isus te, Kin yay long. Ku fagsafulun anway te, ku fadugsay gdog yay gleleg sas fakatabuan fag menit. Gina ban at ngay taw gdog yay gleleg. 25 Ay Isus nalong sa Sik-Ina te, Aw wan Tagfadog-Gfaleleg ay At-Faglelegun. Nus nga sinu takafandiug sa Angku, dewa nkate, gleleg yay. 26 Ay nus nga sinu tagleleg ay nu antuwa kafandiug sa Angku, di ban kate faggugat. Go an tuwo gafanud. 27 Ay Sik-Ina nabalus sas Isus te, Kin, ku Magurang. Gafanud aw te, O wan Fagtayukan, Funbalugu-At-Baguama. O wan ebi Funbalugu At nalong te, E mdasug ban ste swa daga. 28 Ay Sik-Ina nu nalong wa katanya sas Isus, rodi guli wan. Ay kanya nanfoyung yay sirut sas Taglu te, Snay wa sa ngaba dalan tam Takamoyung. Ay kaumsig galagun emu. 29 Ay Taglu nu nadungug, mafali tuwa nu kalindug ay nu nanfablang Isus. 30 Ay Isus dia ndasug sat fulan. Kanya ro si way kabats Sik-Ina fagfablangan Anya. 31 Ay at ngay Taw-Naseg at tagfaliaman Taglu gina sit bale, nu nalag Taglu nu kalindug mafali ay nu nalo, ay fagayu nangalo wa anya. Ay at tiba nu gfasad, Taglu nu glo sa ways fagsandigan, laman nanguyway sanya. 32 Ay Taglu nu ndasug ay nu nalag wa Isus, rodi namalub sas Isus darafa te, Ku Magurang. Nu ste di ro O, ku fadugsay satu ro dia nkate. 33 Ay Isus nu nalag Taglu nu guyway, ay anggan at ngay ufud fag Taw-Naseg nu guyway, matvngvd Isus nu kabalu sat amatanganan. 34 Ay Isus nainto te, Dada wan nu gsandig am. Ay tiba nabalus te, Em Magurang, bastam wam. Nanlag watam at sandigan. 35 Ay Isus guyway. 36 Ay at ngay Taw-Naseg nalong te, Linggati. Matvngvd Isus nu kesug Funbalugu-Ku-Tagtarabang. 37 Ay tiba nalong te, Tuy wa fag taw ebi at nafafiya sik taw at yud glag. Go kin. Ay nu katanya, go Kanya mafafadingding yangay katsi sa tagakateun te, laman dua mkate. 38 Ay Isus gdog yay fiya matvngvd nu kabalu sat amatanganan, ay indasug sas fagsandigan. Ay at fagsandigan sik luib, ay at fandingding sakbawan sik batu yangay. 39 Ay Isus nasugu tiba te, Buli at fandingding sakbawan. Ay at kinkate at fadugsay, Sik-Ina, nafoyung sas Isus te, Em Magurang. Em fadugsay baruas wa ro katsi anway ufat wak menit nu matian. 40 Ay Isus nabalus anya te, Aro nalong Aw emu te, Nu gafanud tuwo, lumag ro o Funbalugu At fagmadaragangun. Go kin. 41 Ay e nabul wa fiya at fandingding. Ay Isus natangda ay ge longan te, Ku Mama. Naseg Aw Emu anway nadungug tuwo Angku. 42 Ay nasaful Aw te, nadungug Tuwo ay Angku faggugat. Ku fagnalongun katanya, laman fagayu taw tagste mafanud te, nasugu Wo fiya Angku. 43 Ay Isus nu ntabu nu gdarangin, rodi gbiya nu glong te, Funbalugu-Ku-Tagtarabang. Alfasi sanya ginan ay stiyei wan. 44 Ay aro at matian fag taw kalfas wan. Ay at daluap ay at darafa e fansifig yay. Ay at alfuyu sigon e fansifig yay sik sinyag sirut. Ay Isus nalong sa tiba te, Buskadi at fansifig, laman ro maalaklo wan. 45 Ngayuk Taw-Naseg at kindasug sas Taglu. Ay nalag Isus At fagbulun. Ay kafandiug sas Isus. 46 Ay tibak Taw-Naseg nalo ay nananfoyung sasa ngay Taw-Tagfalayun te, katanya Isus At ngay fagbulun. 47 Ay Taw-Naseg at ngay taganyun daul ay at ngay Taw-Tagfalayun nanfaful yay at ngay magurang. Ay nanfangintuanan te, Tain ban tam fagbulun anway Ka fag taw ngayu dawdaw At ke masuad fag fagbulun. 48 Ay nu dway tam sumalag Anya, fagayu taw umfandiug wa ban sa Anya. Ay at ngay Taw-Ruma gina mdasug rumasras wa ban tam Tagbvt-Fag-Bale-Funbalugu. Ay anggan tam talun sigon. Ay sumalag wa tam ngay taw. 49 Ay sadik Taw-Naseg, at ngayan Takabalu, at Tiba-Tungud-Fag-Taganyun-Daul ginanya fag banwa. Ay kanya nalong sat ngay Taw-Naseg te, Go yam e fagsafulun. Go yaya. 50 Go di am nasaful te, at masine sik taw sadi nu nkate tuwa, laman tam ngay taw e fanambagun. At masuad te, laman tam ngay taw di ban mamin. 51 Takabalu dua nafoyung katanya namandian. Anway kanya wan Tiba-Tungud-Fag-Taganyun-Daul ginanya fag banwa, Funbalugu nafaamatanganan anya laman kanya naguna nafoyung te, Isus umkate ban laman fagayu at Taw-Naseg e fanambagun. 52 Ay bundi sas Taw-Naseg fagtvngvd at ke fanambagun. Anggan tuwa sas Funbalugu At ngay unga. Anway Isus nafaful yangay ay nafasadi Funbalugu At ngay unga at nasaruwayan. 53 Ay siginan ginanya fag ngay menit, at ngay Taw-Naseg at magurang igsulitanan te, Tain ban nu mafafate tam kanya fag Isus. 54 Ay nu katanya Isus dua mafalaganan nu nalo saswa Taw-Naseg. Ay Isus nalo wa sanya ginan. Ay indasug sa sik talun nangakbang sas talun at yud e taw. Sa sik fulan at ngayan te, At-Nafadaragang. Ay sanya yay sirut Isus ay anggan At ngay tagadal. 55 Ay ginanya makbang wan Taw-Naseg at fagamatanganun fag ngay menit at ngayan te, Famalangfe. Ngayuk Taw-Naseg siginan sa ngay talun nalo sanya sas Erusalem. Anway kaumsig gfaning Taw-Naseg at ugali nu gfasineun at balyu, gina ban umdasug at fagamatanganun fag ngay menit. 56 Ay at ngay Taw-Naseg igsarap Isus. Ay gina maful sas Tagbvt-Fag-Bale-Funbalugu, fangintuanan te, Tain nu gfasad am. Go Isus dua ban umdasug sas fagamatanganun fag ngay menit. Ay go yaya. 57 Anway Taw-Naseg at ngay taganyun daul ay at ngay Taw-Tagfalayun nafatagak sasa ngay taw te, Snga ginain nu lumag am Isus, foyungi emi. Laman nanyukfu ban tam Anya.

12

1 Isus nu madasugan sas fulan At-Yud-E-Kwa, unum wak menit bagu umdasug at fagamatanganun fag ngay menit, at ngayan te, Famalangfe. Sanya Funbalugu-Ku-Tagtarabang nu gbanwan, si ebi Isus At fagfalelegan anya. 2 Sanya Isus naon sik yafun. Ay Sik-Ina matvngvd nu kamasadan at fakonun. Ay Funbalugu-Ku-Tagtarabang gfasfuan sa tibak taw nu maful sas Isus sat fagfangonan. 3 Ay Taglu nauba sik malayun nardu fag lumad. At kadaulan kadaul sik fungkuk. Ay ngayu nu kasali. Ay kanya nauguag sas Isus At darafa. Ay at fanrarus at buk wan. Ay fagdaul basad bale inbebanglu wan. 4 Sanya Isus At tagadal, sik taw at ngayan Segi, siginans fulan Ufat-Fulan-Sirut. Ay kanya at namoyung ban Isus sas mauri fag taw. Ay Segi nalong anya te, 5 Taw ro tam fagyudun nafesali kanya fag lumad. Nu nafesali di ngap ro tam, satu ro tam nafabul, kayu 300 k menit sik taw at nalufuyan. Ay manga e fon tuwa tam sas taw at yud e kwa. 6 Ay Segi dua kafanyu at taw at yud e kwa. At fagnalongun katanya anway te, kanya sik takamul wan. Anway kanya tagtanud At ngay tagadal at salafi. Ay tiba ginan nafamul wan at tiba at suadan. 7 Ay Isus nalong anya te, Lag kalimata tuy fag mangena at fagbulun. Fabayani wa anya. Anway tuy fag fagbulun sik fagamatanganun ban sa Angku gina ban e sumandig Ku bilug. 8 Anway at taw at yud e kwa faggugat ban fasagbatan yay ayu. Ay Aw bunwa ban faggugat nu gfasagbatan Aw ayu. 9 Sik ngay Taw-Naseg nu nasaful te, Isus sanya yay sis fulan At-Yud-E-Kwa, kanya indasug yangay sanya. Ay at fagnanlagun bundi fagtvngvd sas Isus. Anggan tuwa Funbalugu-Ku-Tagtarabang, sa ebi Isus At fagfalelegan anya. 10 Ay Taw-Naseg at ngay taganyun daul nafamasadan gananfateun Funbalugu-Ku-Tagtarabang. 11 Anway ngayuk Taw-Naseg naubun at ngay taganyun daul ay kafandiug tuwa sas Isus. Anway nadungug At fagbulun ebi sas Funbalugu-Ku-Tagtarabang baliwa. 12 Ay balabag di sik ngay taw ayuwayu indasug sas tagbiya fag yafun sas Erusalem. Ay kanya nadungug te, Isus umdasug ro sanya. 13 Ay at ngay taw nu nasaful, nabul falungfung kayu. Ay nauba gina glo, at famaumseganan ro gina nafablang Isus. Ay gbiya tuwa at ngay taw nu ge longan te, Gseg watam. Masine tuwa Kanya At fagindasugun At fagmadaragangun siginan was Funbalugu. Ay masine tuwa Kanya anwa Taw-Tagagbuan at Fun. 14 Ay Isus gina nalag sik asnu riangan, malunggung sat tungud, igfaning At-Rirukan te, 15 Fulan Malanggangan at ngay taw, lag kalimu. Linggati. Anway gadasugun wan ay Fun At malunggung si sik tungud asnu riangan. 16 Ay Isus At ngay tagadal dia nasaful ka fag fagbulun at masuad ginanya. Gina yay ban Isus gdog gleleg At fagmasineun nu msure, ay ginanya yay ban At ngay tagadal nu namatang te, katanya ngaro ebi At-Rirukan sas Isus baliwa. Ay katanya wa fiya at kindasug sas Isus. 17 Ka fag ngay taw at nanangufud Isus gina gfaleleg Funbalugu-Ku-Tagtarabang ay nafalfas anya siginans fagsandigan. Ay bandi long ka fag ngay taw nananfoyung wa sa tiba at nalag Isus At fagbulun. 18 Ay nu katanya, at ngay taw nananfablang wa fiya Isus. Teway nadungug te, Isus e masuad waro fiya fag fagbulun ginanya. 19 Ay at ngay Taw-Tagfalayun igsulitanan te, Tain tam fagbulun nu dway e masuad. Ay fagayu taw ste swa daga nu nangalo way ngap Isus. 20 Sik ngay Taw-Gresia nangufud at ngay taglo sas Erusalem laman nanseg Funbalugu gina sas tagbiya fag yafun. 21 Ay ka fag ngay Taw-Gresia nangakbang sas Takesug-Kabayu, sik taw siginans fulan Fagfanguyangan sas talun Balulangan. Ay Taw-Gresia nalong anya te, Sama, ami kaumsig wami nanlag Isus. 22 Ay Takesug-Kabayu nanfoyung sas Butuan. Ay Butuan nangufud Takesug-Kabayu ay nanfoyung yangay sas Isus. 23 Ay Isus nalong te, Gadasugun wan Ku menit. Anway Aw, Taw-At-Baguama, Ku fagmasineun umsure wan. 24 Matuyan iglong Aw ayu te, Nu dway e nafatong sik bantuyan sas daga ay nu dway maliam at lukba, mafungsuanan way guguat sanya. Ay roro nu e nafatong tuwa sik bantuyan sas daga, ay nu maliam tuwa at lukba, taba wa long ban tumugbung. Ay muadan ngayu. 25 Sik taw nu kesug way at leleg, bandi ban dua ban e leleg. Ay roro sik taw nu gdi kesug at leleg, bandi ban e leleg tuwa faggugat. 26 Ay sik taw nu gtarabang tuwa Angku, kanya at nangalo Angku. Ay nus nga nday Aw, anggan Ku fanuguan sanya yangay. Sik taw nu gtarabang tuwa Angku, Ku Mama guseganan yangay ban anya. 27 Katsi kabalu Akway. Ay gamatangan Aw te, Go masine nu lumong Aw sa Ku Mama te, Ku Mama, balabagi Angku. Laman ban ginanya fag menit dua mdasug. E, lagi. At masuad Ku fagindasugun stiye swa daga, laman anwa fiya e faurianan sa Angku. 28 Nadarangin Aw te, Ku Mama, fasurei Am fagmadaragangun sas fagayu taw. Ay rodi e nabalus Anya sik longan siginans Banwa te, Nafasure Akwan. Ay nanfasure Akyangay fiya. 29 Ay at ngay malindug sanya e dungganan. Ay sik fulan taw nalong te, Gtalafun siring. Ay sik fulan taw nalong te, Yaya. Funbalugu way At tagbukngan iglong Anya. 30 Ay Isus nalong te, Ka fag longan at fagindasugun bunwa te, laman at ke fanamabagun Aw. At fagindasugun an tuwa te, laman am tuwa at ke fanambagun. 31 Ay katsi Funbalugu igtap way fagayu taw ste swa daga at asalanan. Ay katsi ban Funbalugu maayiyan wan tagfun ste swa daga. 32 Ay Aw, nu gina ban e faabat Angku siginans daga, mafafaful Akban fagayu taw sa Angku. 33 Isus At fagnalongun katanya, laman nafoyung te, Katanya ban At fagfatean Anya gina mkate. 34 Ay at ngay taw nainto sas Isus te, At-Rirukan nafoyung emi te, Fagtayukan gleleg tuwa unu faggugat. Ay taw ro Am fagnalongun te, E faabat ban Taw-At-Baguama. Sinu yay ro Kanya fag taw Am longan te, Taw-At-Baguama. 35 Ay Isus nalong te, At-Fagmayamagun nut si ayu glugo wa sirut. Loi wan gina mayamag, laman nu mkarum, bundi gina am glo. Sik taw nu glo nut si way sad marum, dua nasaful te, dada ro nu glo. 36 Nu gina wa At-Fagmayamagun si ayu, afandiugi wa sa At-Fagmayamagun. Laman Ka-Fag-Fagmayamagun tuwa ban am At taw. Ay Isus nu nalong wa katanya, nalo wa nasuksuanan at ngay taw. 37 Dewa ngayu Isus At nafasure At ke masuad fag fagbulun, ka fag ngay taw dua kafandiug sa Anya. 38 Ay katanya tuway, ingurungan wan Funbalugu At taglong, at ngayan Funbalugu-Nabalabag, At-Rirukan te, Em Fun. Sinu manga tagafanud sa em foyungan. Ay sinu manga at nalag sas Funbalugu At fagmadaragangun. 39 Funbalugu-Nabalabag ebi naguna yangay nafoyung ka fag ngay taw at fagyudun gafanud, nu nalong te, 40 Funbalugu nafaarum ka fag ngay taw at mata, ay nafaliam at amatanganan. Laman dua glag ay dua nasaful. Laman dua kabiling sa Angku te, laman nanfafiya Akyay anya. 41 Katanya Funbalugu-Nabalabag ebi at fagnalongun. Anway kanya ebi nalag Isus At fagmasineun. Ay naguna nafoyung at nalag sas taw. 42 Ay ginanya, Taw-Naseg at ngay magurang at tiba kafandiug tuwa sas Isus. Ay kanya dua gfoyung te, kafandiug akwan. Anway kalimu Taw-Tagfalayun te, maayiyan anya siginan at bale fakafulan. 43 Anway ka fag ngay magurang kaumsig way te, laman tiba gseg anya. Ay dua matvngvd sa ngaps Funbalugu nu guseganan anya. 44 Ay Isus gbiya nu ge longan te, Nus nga sinu takafandiug sa Angku, bundi fagtvngvd sa Angku. At fakafandiugan anggan tuwa sa At nasugu Angku. 45 Nus nga sinu at nalag Angku, kata wa nalag anggan sa At nasugu Angku. 46 Insure Aw kata sik fagmayamagun stiye swa daga. Laman fagayu at kinfandiug sa Angku di tumunglus sas marum. 47 Nus nga sinu at nadungug Ku longan ay dewa yud nafaning Aw da Kdi gtap at asalanan. Anway Ku fagindasugun bundi te, laman nantap Aw fagayu taw ste swa daga at asalanan. Ku fagindasugun laman nanbalabag Aktuwa fagayu taw ste swa daga. 48 Ay roro sik taw nu kamayud way Angku ay nu dua gafanud sa Ku longan, e fasure ban at asalanan. Ay Ku longan wa ban at fasure at asalanan gina sas fakatabuan fag menit. 49 Anway da Kdi glong nanmandianan. Ku Mama tuwa At nasugu Angku At nafoyung Angku Ku longan, nus nga se taw Ku foyungan. 50 Ay nasaful Aw te, Ku Mama tuwa At nafon sas taw leleg at yud katabu. Ay nu katanya Ku longan, igfaning Aktuwa Ku Mama At foyungan sa Angku.

13

1 Gina bagu mdasug at fagamatanganun fag ngay menit at ngayan, Famalangfe, Isus nasaful wa te, ndasug wan Ku menit nu gaubunun Aw ste ginan swa daga. Ay gauliun Akwa sa Ku Mama. Ay Isus matvngvd nu kesug At ngay taw ste swa daga. Ay kesug yangay ban anggan sas fakatabuan fag menit. 2 Ay ginanya Isus ay At ngay tagadal kon at yafun. Ay aro taw Takamuag-Tiba-At-Fagbulun nafaamatanganan wa sas Segi te, laman ro moyung Isus sas mauri fag taw. Ka fag Segi siginans Ufat-Fulan-Sirut, ay at tama at ngayan Nadungug. 3 Ay Isus nasaful wa te, Ku Mama At nafon Angku At fagmadaragangun. Ay Aw siginan Akwas Funbalugu. Ay guli Akyangay ban sas Funbalugu. 4 Ay Isus inlindug siginan at fagfangonan. Ay nasandig At lanbung. Ay nafasafung way sa At faguan sik fanrarus. 5 Ay Kanya natalin sik safa sa sik fatagubungan. Ay nafasigad nafegus nafasadsadian At ngay tagadal at darafa. Ay At famatat at darafa At nafasafung wa sa At faguan fag fanrarus. 6 Ay Isus kakbang sas Simun Takata-Sik-Batu laman nafegus yangay at darafa. Ay Takata-Sik-Batu nainto Anya te, Em Magurang, Taw ro at masuad Am fagfegusun ku darafa. 7 Ay Isus nabalus anya te, Yo saful Ku fagbulun katsi. Bandi ban sumaful yay o. 8 Ay Takata-Sik-Batu nalong sas Isus te, Lagi. Da kwa gfafegus sa Emu ku darafa faggugat. Ay Isus nabalus anya te, Nu da Kway nafegus am darafa, bunwa ban o Ku tagadal fiya fiya. 9 Ay Simun Takata-Sik-Batu nalodlongan sas Isus te, Em Magurang. Nu katanya, bundi fagtvngvd ku darafa. Anggan tuwa ku daluap ay ku alfuyu sigon. 10 Ay Isus nafoyung te, Sik taw nu naigus wan, rodi kanya ya gaigusun. At darafa way at fagfegusun. Anway malaksi yay at bilug. Ay maigusan yay am. Dasday am at sadi at yud maigusan. 11 Ay Isus dan wa nasaful te, kanya wa fiya fag taw at namoyung ro Anya sas mauri fag taw. Anway katanya, Isus At fagnalongun te, Bunwa am fagayu at maigusan. 12 Ay Isus nu ntabu wa nu gfegus At ngay tagadal at darafa fagayu, gdog yay nabul At lanbung. Ay gdog yay fiya sas fagfangonan. Ay nalong sa At ngay tagadal te, Go nasaful wam aro Ku fagbulun at masuad. 13 Nafangayan wam Angku te, Em Takamoyung ay Em Magurang. Ay matuyan wa fiya ay longan. Kin, Aw wan. 14 Ay Aw wanay at nafegus ay darafa. Ay Aw wanay ay takamoyung ay ay magurang. Ay nu katanya, anggan am, fedfegusani yangay ay iba at darafa. 15 Anway nafaulit Ku ayu Ku fagbulun. Ay anggan am, fagbuluni yangay sa ay iba. Kata ay nalag Ku fagbulun sa ayu. 16 Matuyan iglong Aw ayu te, Sik fanuguan dua glabi sa at fun. Ay sik suguan dua glabi sa at nasugu anya. 17 Nu nasaful tuwam katanya Ku longan, guseganan wam nu gfaning tuwam. 18 Ku nafoyung ayu fag longan bunwa sa ayu fagayu. Anway nasaful Kua te, kayu way niya Ku nafili fag taw. Ay nafaning watam Funbalugu At-Rirukan te, Kanya Ku nafaon, kanya takamabo way Angku. 19 Siginan ngay katsi gfaguna Kua gfoyung sa ayu. Laman Ku longan gina msure, gafanud tuwam te, Aw-Wan. 20 Matuyan iglong Aw ayu te, Kanya nu gfantain tuwa sa Ku suguan, kanya gfantain sa Angku. Ay kanya nu gfantain tuwa sa Angku, kanya gfantain yangay sa At nasugu Angku. 21 Isus nu nafoyung wa katanya, kabalu dawdaw sat amatanganan. Ay dua nasuksuk nu nalong te, Matuyan iglong Aw ayu te, Am waro fiya at sadi at moyung Angku sas mauri fag taw. 22 Ay At ngay tagadal gfanlinggatanan, anway dua nasaful te, sinu ro manga ami Isus At faglongan at masuad. 23 Ay at sadi Isus At tagadal at masarare sas Isus At dubdub, kanya Isus At fakesugun fag tagadal. 24 Ay Simun Takata-Sik-Batu nafalelegan at alfuyu sat tusama te, Oi wan taginto sa Anya te, dada am faglongan. 25 Ay ka fag tagadal at masarare namasingian nalong sas Isus te, Em Magurang. Foyungi emi te, sinu mi. 26 Ay Isus nabalus te, Nus nga nday waro Ku fagfonan tuy fag fafa gina aw nafasurung sa sat sabo, kanya waro. Ay Isus nafasurung wa fiya ay nafon sas Segi, Nadungug at baguama siginans Ufat-Fulan-Sirut. 27 Ay Segi nu nabul wa ka fag fafa, Tagfansalag wan tagmagurang anya. Ay Isus nalong sas Segi te, Mafalii tuwa nu gfagbulunan o. 28 Ay nus di sadik tagadal sis fagfangonan du e nasaful Isus At longan aro at masuad. 29 Ay tibak tagadal gamatangan te, nu nda Isus At longan at masuad te, Salii tam ba yafun ban sas tagbvt fag yafun. Anway Segi taguba at salafi. Ay tibak tagadal gamatangan te, Isus At longan at masuad te, Foni sas taw at yud e kwa. 30 Ay rodi Segi nu nabul wa Isus At nafon fag fafa, nalo wan. Ay ginanya inyabi wan. 31 Segi nu nalo wan, Isus nafoyung te, Katsi long, Aw, Taw-At-Baguama, Ku fagmasineun gakasureun wan. Ay anggan Funbalugu At fagmasineun gakasureun yangay. Anway Aw, Taw-at-Baguama, nafagbulunan Akwan. 32 Ay Funbalugu At fagmasineun nu nsure wan siginan Ku fagbulun, Funbalugu yangay At nafasure Ku fagmasineun. Ay dua glugo tv nu gfasure Ku fagmasineun. 33 Sisian am, dua glugo sirut nu ste aw gufud ayu. Ay masarapan yay ban am Angku. Ay kata ebi Ku longan sas Taw-Naseg, katanya yangay anggan sa ayu Ku longan katsi te, Sa ma Ku fakadasugan, wa ban am madasug. 34 Nanfoyung Kyay ayu sik longan bagu te, laman ban kedkesugan tuwam. Kata nu kesug Aw ayu, katvngvdi yangay anya nu kedkesugan ban am. 35 Nu katanya tuwa ay fagbulun, fagayu taw sumaful ban te, Am wan Ku ngay tagadal, nu kedkesugan tuwam. 36 Simun Takata-Sik-Batu nainto sas Isus te, Em Magurang, dada ban nu galoun O. Ay Isus igbalus te, Sa ban Ku fagloan, yo mafaalo Angku katsi. Sa yay ban tibak menit, nu galo o Angku. 37 Ay Takata-Sik-Batu ginto yangay sas Isus te, Em Magurang, sangay dada ban O, nu da kyay masud Emu katsi. Mabayan aktuwa, dewa te e fate wa angku, laman e fanambagun Tuwo. 38 Ay Isus nabalus Takata-Sik-Batu te, Go kaumsig wo fiya nangate, laman Aw at ke fanambagun. Matuyan iglong Kua emu te, O wan at mamayud Angku tulu ginan, bagu ro tabag tumarakit.

14

1 Dangai mafanawaan sa ay amatanganan. Afandiugi tuwa sas Funbalugu, ay anggan afandiugi yangay sa Angku. 2 Sa Ku Mama bale ngayu tuwa tagbiya fag salug. Matuyan tuwa, laman ro nu dway matuyan, ebia taw nafoyung Kua ayu. Ay katsi Aw sumanya Kwan. Laman nanfamasadan Akyay sanya sik ngay salug sa ayu. 3 Ay nu ndasug Akwa sanya. Ay nu nafamasadan Akwa sik ngay salug sa ayu. Kafoli Kyangay ban ay nantaban ban Aw ayu. Laman nus nga nday Aw, sanya tuwam. 4 Ay nasaful wam Ku dalan ay sa Ku fakadasugan. 5 Ay Duwak-Nasfuan nalong sas Isus te, Em Magurang. Yami nasaful te, dada ro nu lumo O. Ay tain nu sumaful ami sanya Am dalan. 6 Ay Isus nabalus anya te, Aw wan At-Dalan ay anggan At-Matuyan ay At-Faglelegun sigon. Nus nga sinu dua ban madasug sa tam Tama, nu da Kway ban tumaban. 7 Nu nasaful tuwam Angku ebi, anggan Ku Mama, nasaful yangay Anya ebi. Ay katsi long nasaful wam Anya. Ay kata wam nalag Anya. 8 Ay Takesug-Kabayu nalong sas Isus te, Em Magurang. Fasurei sa emi tam Tama ay kin long. 9 Ay Isus nalong anya te, Glugo wan nu gufud Aw ayu. Ay sangai o nasaful Angku, Takesugu-Kabayu. Sik taw nu nalag tuwa Angku, kata wa nalag anggan sa tam Tama. Taw ro am fagnalongun te, Fasurei sa emi tam Tama. 10 Go du am gafanud te, Aw si Kua Ku Mama, ay Ku Mama si wa Angku. Ku foyungan bundi Ku namandianan fag longan. Ku Mama tuwa tagsi Angku At tagbul At fagbulun mandi. 11 Afanudi tuwa sa Ku foyungan te, Gudgufudan Ami, Aw ay Ku Mama. Ay yayam gafanud katanya, afanudi si ay nalag Ku fagbulun. 12 Matuyan iglong Kua ayu te, Nus nga sinu takafandiug sa Angku, at fagbulun nu kata tuwa Ku fagbulun. Ay at fagbulun ban glabi yay Ku fagbulun. Anway Aw guli Akyay ban sa tam Tama. 13 Nus nge wayin ay fagetun sa Angku, igfaning ban Aw. Laman at tibak taw nu lumag Ku fagmadaragangun, Funbalugu-At-Baguama, sumeg ban Tam Tama. 15 Laman nu kesug tuwam Angku, igfaning tuwa ban am fagayu Ku longan. 16 Ay nanget ban Aw ay Tagtarabang sa Tam Tama. Ay Tam Tama sumugu ban sa ayu ay Tagtarabang. Ay Kanya si tuwa ban ayu faggugat. 17 Ay Kanya ban fag Tagtarabang At ngayan at sadi te, At-Matuyan-Fag-Falad. Ay at ngay taw ste swa daga dua ban kaumsig sanya fag Falad-At-Masine. Anway dia nalag Anya ay dia nasaful Anya. Ay am long nasaful wam Anya. Anway Kanya dua ban kayayu ayu. Ay si way ban ayu faggugat. 18 Da Kua fiya naubun ayu nu dway ban e gtarabang ayu. Ay gdog Kyangay ban ste. 19 Bandi tv at ngay taw ste swa daga taba wa ban yud lumag Angku. Ay am way at nalag Angku. Ay gleleg yangay ban am anway gleleg Aw. 20 Ay ginanya ban fag menit sumaful wam te, Aw sa Kua Ku Mama. Ay am yangay tagsi Angku. Ay Aw tagsi ayu. 21 Kanya at nadungug Ku longan ay anggan tagfaning, kanya takesug Angku. Ay Ku Mama kesug yangay takesug Angku. Ay anggan Aw kesug Kyangay takesug Angku. Ay umsure ban Aw sa takesug Angku. 22 Ay Segi, (bunwa tagsiginans Ufat-Fulan-Sirut), nainto sas Isus te, Em Magurang. Taw ro fagsaun emi fagtvngvd nu glong O. Go laman ban ami way at lumag Emu. Ay at ngay taw ste swa daga at fagyudun ban lumag Emu. 23 Ay Isus nabalus anya te, Sik taw nu kesug tuwa Angku, faggugat kanya igfaning tuwa Ku longan. Ay Ku Mama kesug anya. Ay Ami nangakbang Ami sa anya. Ay si tuwa ban Ami anya faggugat. 24 Laman kanya nu dway kesug Angku, dua gfaning sa Ku longan. Ay ka fag longan ay nadungug, bunwa Ku longan mandi. Tam Tama tuwa At nasugu Angku At ke longan. 25 Katanya Ku longan gina Aw gufud ayu. 26 Ay Tam Tama at sumugu ban ay Tagtarabang sa Ku fagmadaragangun. Ay Kanya, At-Masine-Fag-Falad, At nanfoyung ban ayu fagayu. Ay At nanfaamatanganan ayu fagayu Ku longan. 27 Aw nafanabayan Kua ayu. Kata nu manabayan Aw, anggan am, manabayan yangay am. Bundi ste ginan swa daga fag ngay taw at fagmanabayanun. Lag kabalu sa ay amatanganan. Ay dangai sigon kalimu. 28 Ebi nadungug wam nu glong Aw ayu te, Lumo Akyay ban. Ay gdog Kyangay ban kafoli stiye sa ayu. Nu kesug tuwam Angku, guseganan tuwam. Anway lumo Akyay ay nanlag Aw sa Tam Tama. Ay Tam Tama taglabi tuwa Angku. 29 Ay katsi naguna Akwa nafoyung ayu, laman gina ban umsure Ku longan, gafanud tuwam. 30 Ay katsi da Kua gfalugo sirut nu ge longan Aw sa ayu. Anway gadasugun wa ste swa daga tagfun. Ay kanya du e fagmadaragangun mafasugu Angku. 31 Dewa katanya at kumdasug sa Angku, igfaning Aktuwa tam Tama At suguan Angku. Laman at ngay taw ste swa daga sumaful ban te, kesug Aktuwa tam Tama. Ay alindugi wan. Glo watam.

15

1 Aw wa fiya takata sik uwat buadan safa at fun. Ay Ku Mama At tagbilug tanuman. 2 Kanya naukas wan fagayu Ku sanga at yud e buadan. Ay fagayu Ku sanga at ke buadan, Ku Mama At nadungful at mata laman umkayu at buadan. 3 Madungfulan tuwam katsi, kata sik sanga, anway igfaning tuwam ay, sa Ku longan ayu. 4 Matubui tuwa sa Angku. Kata sik uwat at sanga nu matubu sat fun. Ay Aw wan tagsi ayu. Kata sik uwat at sanga nu dway matubu sat fun, kanya du e buadan. Ay anggan am, katanya yangay am. Nu dway am matubu sa Angku, du am e buadan. 5 Aw wan At uwat at fun. Ay am wan at ngay sanga. Kanya nu matubu tuwa sa Angku, ay nut si Aktuwa anya, kanya e buadan ban ngayu. Ay nu dway am matubu sa Angku, du am mafabul. 6 Nus nga sinu fag taw nu dway matubu sa Angku, e mukas wa ban anya kata sa sik sanga, ay indarag. Ay at ngay darag e nafaful ay naukas sasad afuy laman iglabe. 7 Nu matubu tuwam sa Angku. Ay nu gamatangan tuwam faggugat sa Ku longan. Eti wa long nus nge wain ay fakaumsigun. Ay umsure wa sa ayu. 8 Nu ngayu tuwa ay buadan, tiba nasaful te, masine dawdaw Ku Mama. Ay anggan nafasaful te, am wan Ku tagadal. 9 Kata Tam Tama nu kesug Angku, anggan Aw kesug Kyangay ayu. Lag kayayu Angku, anway kesug Aktuwa ayu. 10 Nu gfaning tuwam Ku longan, kesug Aktuwa ayu faggugat. Kata nu gfaning Aw Ku Mama At longan. Ay Kanya kesug yangay Angku faggugat. 11 Nafoyung Akwa ayu katanya, laman guseganan yangay am, kata nu guseganan Aw. Ay laman ngayu yangay ay fagusegananun. 12 Kata tuy Ku suguan sa ayu te, Tanani tuwa. Edkesugani katvngvd yangay nu kesug Aw ayu. 13 At tiba tungud fag fakesugun kata tuy. Sik taw mabayan tuwa dewa te anwa e fate anya, laman at fagues e fanambagun. 14 Am wan Ku fagues, nu gfaning tuwam nus nge wayin Ku foyungan ayu. 15 Katsi ban da kdi gfangayan ayu te, Ku fanuguan. Anway sik fanuguan dua nasaful at fun at fasadan. Nafangayan Aktuwa ayu te, Ku fagues. Anway nafoyung Aktuwa ayu fagayu Ku Mama at foyungan Angku. 16 Bundi am at nafili Angku. Aw tuwa At nafili ayu. Ay At nasugu ayu te, Loi wan laman nanfe buadan am. Ay laman ka fag buadan sanya tuwa ban faggugat. Ay nu katanya, nus nge wayin ay fagetun sa Tam Tama ay sa Ku fagmadaragangun, Kanya nafon ban sa ayu. 17 Ay Ku suguan sa ayu te, Tanani tuwa edkesugani. 18 Dewa at ngay taw ste swa daga kalimata ban dawdaw ayu. Nasaful wam te, kanya taguna nu kalimata sa yay Angku. 19 Nu tagste swa daga yay am fag taw, anggan tibak taw ste swa daga kesug yay ayu. Teway kata yay am ay anya. Ay roro bundi am tagste swa daga fag taw. Anway nafili Akwa ayu ste ginan fag ngay taw. Ay teway katanya fakalimataun ayu. 20 Amatangani aro tv Ku longan te, Sik fanuguan dua nanlabi sa at fun. Tibak taw nu gfauri way Angku, gfauri yangay anggan ayu. Ay tiba nu nadungug tuwa Ku longan, nadungug yangay anggan ay longan. 21 Katanya ban ste swa daga fag ngay taw at fagbulun sa ayu. Anway kafandiug wam sa Angku. Anway kanya dia nasaful At nasugu Angku. 22 Nu da Kway ro ndasug ay nafoyung anya, kanya dua nasaful te, e asalanan. Ay roro katsi kanya dua mafabalus. Anway nasaful te, e asalanan way mangaro. 23 Kanya nu kalimata way sa Angku, kalimata yangay anggan sa Ku Mama. 24 Nu da Kway ro inke fagbulun glabi yay tibak taw at fagbulun siswa taw, kanya dua nasaful te, e asalanan. Ay kanya nu nalag wa Ku fagbulun, kalimata way sa Angku ay anggan sa Ku Mama. 25 Ay katanya at ngay taw at fagbulun, laman nanfaning ebi At-Rirukan at longan te, At ngay taw kalimata ban Angku dewa gyud e fanlonganan. 26 Aw, sumugu ban Aw ka fag Tagtarabang, At-Matuyan-Fag-Falad, tagsiginan tam Tama. Ay Kanya nu ndasug ban ste swa daga nanfoyung te, katanya Isus At ugali. 27 Ay nanfoyung ban am sas fagayu taw. Anway gufud tuwam Angku siginan ngay Aw bagu nanfoyung ayu.

16

1 Katanya Ku longan sa ayu, laman di ban am maliam ay fakafandiugun. 2 Ay e maayiyan ban ayu siginans Taw-Naseg at ngay bale fakafulan. Kin wa fiya. Umdasug ban sik menit at ngay taw ban igfate ban ayu. Anway kanya gamatangan te, nu fate aktuwa anya, gfaning aw sas Funbalugu. 3 Ay katanya at fagbulun mauri way. Anway kanya dua nasaful Tam Tama ay anggan ngap Angku. 4 Katanya Ku longan sa ayu. Laman nu ndasug ka fag menit at ngay taw gina gfauri ayu, laman gamatangan tuwam Ku longan sa ayu. Ebi taguna Kia nafoyung ayu ka fag longan, anway gufud Akyayay si ayu. 5 Ay katsi ban tv guli Akyay sa At nasugu Angku. Ay du am e fagintoan te, Dada O katsi ro. 6 Ay anway nafoyung Kwayay ayu kanya fag longan, katsi matvngvd way nu kabalu am say amatanganan. 7 Ay iglong Aw sa ayu at matuyan te, E fanambagun yay ban am gina Aw noli. Anway nu da Kyay noli, Ka fag Tagtarabang dua ban umdasug sa ayu. Ay nu lumo Aktuwa, nansugu Akyay ban Ka fag Tagtarabang sa ayu. 8 Ay Ka fag Tagtarabang gina ban indasug ste swa daga, Kanya nanfaamtanganan yay sa at ngay taw. Anway at ngay taw nasalan yay at gamtanganan te, katanya tuwa mangaro anway asalanan. Ay katanya mangaro antuwa at masine fag fagbulun. Ay nu katanya way mangaro Funbalugu gtap yay taw at asalanan. 9 Ay at ngay taw nasalan nu gamatangan sas asalanan baliwa, anway dua kafandiug sa Angku. 10 Ay at ngay taw nasalan yangay nu gamatangan sat masine fag fagbulun. Anway lumo Akyay ban sa Tam Tama. Ay dia ban am e nalag Angku. 11 Ay at ngay taw nasalan yangay nu gamatangan sas Funbalugu nu gtap at taw at asalanan. Anway Funbalugu natap wan ste swa daga tagfun at asalanan. 12 Ay ngayu yay Ku fasad fagalongunun sa ayu. Ay roro di yangap am maamatang katsi. 13 Ay kanya, At-Matuyan-Fag-Falad, gina ban umdasug, nanfoyung yay ban ayu fagayu at matuyan fag longan. Anway Kanya dua nafoyung namandianan. At fagfoyungun antuwa At nadungug. Ay Kanya naguna nafoyung te umdasug ban. 14 Ay Kanya nanfasure Ku fagmasineun. Anway Kanya nadungug wan ay nanfoyung ban sa ayu Ku longan. 15 Tam Tama At longan ay Ku longan kata yay at sadi. Katanya Ku fagnalongun ayu te, At-Matuyan-Fag-Falad nadungug ban Ku longan. Ay nanfoyung ban sa ayu fagayu Ku longan. 16 Sik gadugayun ban sirut yam e nalag Angku. Ay bandi tv lumag yangay ban am Angku. 17 Ay Isus At tagadal tiba igsulitanan te, Taw at masuad Isus fagnalongun antam te, Sik gadugayun ban yam e nalag Angku. Ay bandi tv lumag yangay ban am Angku. Ay anggan At fagnalongun te, Anway guli Akyay ban sa tam Tama. 18 Katanya at sulitanan sit dayu te, Nataw at masuad te, katsi ban tv. Dua tam nasaful at masuad At fagnalongun katanya. 19 Isus nasaful At ngay tagadal at faganangintoun sa Anya. Ay nu katanya, nalong anya te, Go ay fagidgintoanun te, nataw at masuad Am fagnalongun te, sik gadugayun ban tv yam e nalag Angku. Ay bandi tv lumag yangay ban am Angku. 20 Matuyan iglong Aw ayu te, Muyway wa ban am fiya ay maluanun wa ban am fiya, dewa at ngay taw ste swa daga guseganan. Umbalu ban am. Ay dewa am kabalu katsi, bandi ban baliwa guseganan tuwam. 21 Sik mangena gina gafalangfeun ganini ay gafanawa anway ndasug wan at menit. Dewa katanya nu nlangfe wa at ngenge, at tina di e namatangan at manini. Anway guseganan te, katsi inlangfe tuwa at ngenge. 22 Katvngvd yangay anya katsi, nu kabalu wam. Ay dewa katanya, nanlag Akyangay ayu. Ay guseganan tuwa ban am sa ay amatanganan. Ay du e mafasalag ayu at katvngvdan nu guseganan am. 23 Nu ginanya wa ban fag menit, dua ban am mafaet sa Angku. Matuyan iglong Aw ayu te, Ay fagetan siginan wa ban Tam Tama. Ay Kanya nafon ban ayu, teway am wan Ku taw. 24 Ebi ginan di am e fagetun, dewa am Ku taw. Ay katsi long eti wan. Ay e gfon ban ayu. Laman ngayu tuwa ay fagusegananun. 25 Ebi Ku foyungan ayu sik fafaskudanan yay. Ay katsi long ban nu mdasug sik menit, bunwa sik fafaskudanan nu gfoyung Aw ayu. Gfatignaun Akwan nu gfoyung ban Aw ayu Tam Tama At ugali. 26 Ginanya ban fag menit, am wan taget sa Ku fagmadaragangun. Ay bunwa Aw taget sa Tam Tama laman e fanambagun am. 27 Ay tam Tama wan takesug ayu. Anway am kesug tuwam Angku. Ay gafanud wam te, Aw wan tagsiginan Tam Tama. 28 Ebi siginan Akwa Tam Tama ay indasug Aw ste swa daga. Ay katsi ban naubun Akyangay ste ginan swa daga. Ay guli Akyangay sa Tam Tama. 29 Ay Isus At ngay tagadal nalong te, E, katsi long, matignaun wan nu glong O. Ay bundi sik fafaskudanan. 30 Ay katsi nasaful wami te, O wan tagsaful fagayu. Anway gsaful Wo em ngay fagintoun ban. Dewa yud ami nainto Emu. Ay anway katanya, gafanud wami te, O wan Tagsiginans Funbalugu. 31 Ay Isus ginto sa At ngay tagadal te, Go gafanud wam katsi. Ay go idia. 32 Dungugani Ku longan. Umdasug ban sik menit, ay gadasugun wan katsi. Fagayu wam gasaruwayanun wam sa ay ngay bale. Ay fagayu am mubun wam Angku. Ay dewa katanya bun Akdi sesadi, anway Ku Mama si wa Angku. 33 Nafoyung Aw ayu katanya, laman manabayan tuwam nu kafandiug am sa Angku. E faurianan ban sa ayu ste swa daga. Ay dewa katanya, fatvngvdi ay amatanganan. Anway nababo Akwan iste swa daga at ngay mauri.

17

1 Gina ntabu Isus nu nalong katanya, rodi natangda sas Banwa ay igdarangin te, Ku Mama. Indasug wan katsi kanya fag menit. Fasurei Ku fagmasineun. Laman Aw, Am Baguama, nanfasure Akyangay ban Am fagmasineun. 2 Anway O wan At nafon Angku Am fagmadaragangun. Laman Aw tagtiba tungud sas fagayu taw. Ay nanfon Aw anya leleg at yud katabu, kayu Am nafatsa Angku fag ngay taw. 3 Kata tuy ka fag ngay taw at fagelelegun at yud katabu at masuad. Laman sumaful te, O way Funbalugu fagsadi At Matuyan. Ay laman ka fag ngay taw umtuyan yangay Angku, Isus Fagtayukan, Am suguan. 4 Nafasure Akwan Am fagmasineun stiye swa daga. Ay nafatabu Akwan Am suguan Angku fag fagbulun. 5 Ay katsi O, Ku Mama, fasurei yangay Ku fagmasineun sa Am akbang. At masuad, ebi yay Ku fagmasineun gina Aw si Emu ay ebi yay gina gyud e daga. 6 Aw nafoyung Kwan Am ugali sa Am nafatsa Angku fag ngay taw tagsiginan ste swa daga fag ngay taw. Ebi Am ngay taw am nafatsa Angku. Ay kanya tagfaning wa Am longan. 7 Katsi ka fag ngay taw nasaful te, Fagayu Am nafaste sa Angku siginan Wemu. 8 Teway nafoyung Aktuway anya Am nafoyung Angku fag longan. Ay kanya kaumsig wa fiya. Ay nasaful wa fiya te, Aw tagsiginan Aw Emu. Ay kanya gafanud wa fiya te, O wan At nasugu Angku. 9 Nadarangin Aw sa Emu te, laman gtarabang O anya. Ku fagdaranginun bunwa tagste swa daga fag ngay taw. Ku fagdaranginun antuwa Am nafastiye sa Angku fag ngay taw, teway Am ngay taw tuway. 10 Fagayu Ku taw Am taw yangay. Ay fagayu Am taw Ku taw yangay. Ay kanya fag ngay taw at nafasure Ku fagmasineun. 11 Ay katsi ban Kua ste swa daga. Guli Kua ban sa Emu. Ay Ku ngay taw igbanwan yay ban ste swa daga. Ku masine fag Mama, dingdingi ban Ku ngay taw siginan Am fagmadaragangun. Kata Am nafon Angku fag fagmadaragangun. Laman Ta ngay taw umsadi kata nu masadi Ta. 12 Ebi kaduge Aw gufud Ku ngay taw, nadingding Aktuwa anya. Anway nafon tuwo Angku Am fagmadaragangun. Ay kayu Ku natanud Ku ngay taw di e naliam. Dasday sadi, Sik-Tagfarasras, laman nanfaning Am Rirukan ebia taw. 13 Ay katsi gauliun Akwa sa Emu. Ay nafoyung Akwan fagayu sa Ku ngay taw ste swa daga. Laman guseganan yangay dawdaw, katvngvd nu guseganan Aw. 14 Nafoyung Kua sa Ku ngay taw Am longan. Ay at ngay taw ste swa daga kalimata Ku ngay taw. Anway Ku ngay taw di gfaning ste swa daga at mauri fag ngay ugali. Kata Aw nu gyud Aw gfaning ste swa daga at mauri fag ngay ugali. 15 Da Kua gdarangin te, laman nantaban yay O Ku ngay taw sat dayu ste ginan swa daga. Ku darangin anyay te, laman dumingding tuwo Ku ngay taw siginan at ngay mauri. 16 Anway Ku ngay taw di gfaning iste swa daga at ngay mauri fag ugali. Kata aw nu gyud Aw gfaning ste swa daga at mauri fag ugali. 17 Faakbangi tuwa Ku ngay taw sa Emu siginan Am longan at matuyan. Anway matuyan tuwa fagayu Am longan. 18 Kata nu nasugu O Angku stiye swa daga, Aw nansugu Akyangay Ku ngay taw sa tibak taw ste swa daga. 19 Aw kaakbang Aw sa Emu laman Ku ngay taw e fanambagun tuwa te, laman kanya kaakbang yangay sa Emu anway siginan Am longan At matuyan. 20 Ku fagdaranginun bundi sa katsi fagtvngvd Ku ngay taw. Ku fagdaranginun anggan tuwa fagayu takafandiug ban sa Angku. Ay anggan at nadungug ban Ku ngay taw at foyungan. 21 Laman fagayu Ku ngay taw umsadi. Kata nu masadi Ta, Aw ay O, Ku Mama. Ay laman anggan Ku ngay taw umsadi sa Anta. Laman iste swa daga fag ngay taw mafanud ban te, O wan At nasugu Angku. 22 Am nafon Angku fag fagmasineun, Aw nafon Akyangay sa Ku ngay taw. Laman Ku ngay taw masadi tuwa, kata nu masadi Ta. 23 Aw wan At masadi sa Ku ngay taw. Ay O wan At masadi sa Angku. Laman Ku ngay taw umsadi wa fiya. Ay laman ste swa daga fag ngay taw sumaful wa fiya te, O wan At nasugu Angku. Ay O wan takesug Ku ngay taw, kata nu kesug O Angku. 24 Ku Mama, kaumsig Aw Am nafon Angku fag ngay taw te, laman maful ban si Angku. Laman lumag ban Ku fagmasineun, ebi Am nafasure sa Angku siginan ngay ebi nu yud e daga, anway kesug Tuwo Angku. 25 Ku Masine fag Mama. Dewa ste swa daga fag ngay taw gyud nasaful Emu, Aw nasaful Aktuwa Emu. Ay anggan Ku ngay taw nasaful yangay te, O wan At nasugu Angku. 26 Ebi nafoyung Akwa sa Ku ngay taw Am ngay ugali, ay nanfoyung Kyangay ban. Laman kata nu kesug O Angku, ay laman katvngvd yangay anya Ku ngay taw nu kesug at tiba. Ay laman Aw masadi Aktuwa si Ku ngay taw faggugat.

18

1 Ay Isus nu ntabu wa nu gdarangin, nalo wan nangufud wa At ngay tagadal. Ay igdife wa sa sik liskung, ay at ngayan Magong. Ay sanya at dife sik gamasun e tanum sik ngay kayu ulibu. Isus ay At ngay tagadal indasug sanya fag gamasun. 2 Ay anggan Segi, at namoyung Isus sa tiba, nasaful ka fag gamasun. Anway ngayu ginan wan Isus ay At ngay tagadal nu maful sanya. 3 Ay Segi nataban sanya Fun-Ruma sik fulan at tagbarangian. Ay tibak tagdingding sakbawan sas Tagbvt-Fag-Bale-Funbalugu. Ay anggan at taganyun daul ay Taw-Tagfalayun at ngay suguan. Ay ka fag ngay taw, tiba e fiso. Ay tiba e salung safa. Ay tiba e salung lune. 4 Ay anway Isus nasaful wan fagayu at kumdasug sa Anya, Kanya nangakbang sanya fag ngay tagbarangian ay ginto te, Nataw ay fagsarapun stiye. 5 Ay ka fag ngay tagbarangian nabalus te, Isus, sik Taw siginans fulan Nasaret. Ay Isus nalong te, Fagalay kanya, Aw wa ngaro. Ay Segi, at namoyung Isus, maful malindug sanya fag ngay tagbarangian. 6 Ay gina Isus iglong te, Aw wan, ka fag ngay tagbarangian naatangdaun ay taba wa intong intangda. 7 Ay Isus gdog yay nainto te, Sinu ay fagsarapun stiye. Ay ka fag ngay tagbarangian nabalus yay fiya te, Isus, sik taw siginans fulan Nasaret. 8 Ay Isus nalong te, Aro nafoyung Ku ayu te, Aw wan. Ay ay fagsarapun mangaro Aw wanay. Lag gbalabag Ku ngay taw nu gfangulian ro. 9 Katanya Isus At fagnalongun, laman igfagurungan aro At longan te, Ku Mama, da Kdi e nafaliam nus di sadi Am nafatsa Angku fag ngay taw. 10 Ay Simun Takata-Sik-Batu naguyud at fiso. Ay nabasing Taguna-Fag-Taganyun-Daul at fanuguan. Ay naayas at talinga at siun. Ay ka fag fanuguan at ngayan te, Sik-Fun. 11 Ay Isus nasalag sas Takata-Sik-Batu te, Folii wan am fiso sa am guma. Anway minum Kua ngap ro fiya Ku Mama At nafon Angku sas taya. Go kin. 12 Ay at Fun-Ruma at ngay tagbarangian, ay ka fag ngay tagbarangian at fun, ay anggan at ngay tagdinging sakbawan sas Tagbvt-Fag-Bale-Funbalugu nated ay nasalod Isus. 13 Ay at ngay tagbarangian at taguna at fagtabanan Isus sa sik taw at ngayan te, Mafanyan. Ay Mafanyan, Takabalu nugangama. Ay Takabalu at Taguna-Fag-Taganyun-Daul ginanya fag banwa. 14 Takabalu ebi at naguna nafoyung sasa ngay Taw-Naseg te, At masine sik taw sadi dewa nkate, laman at ngay taw e fanambagun. 15 Ay Simun Takata-Sik-Batu ay sadi yak tagadal at nangalo sas Isus. Ay Taguna-Fag-Taganyun-Daul natoglag yay ka fag tagadal at sadi. Ay ka fag tagadal at sadi nangufud yay Isus anggan indasug sas Taguna-Fag-Taganyun-Daul at basad faglanuan. 16 Ay Takata-Sik-Batu malindug yay sis day sakbawan alad faglanuan. Ay ka fag tagadal at sadi, at Taguna-Fag-Taganyun-Daul aro taw at natoglag, kanya nalfas wa sas day alad. Ay nananfatuyan wa sa ka fag baguina at tagtanud sakbawan. Laman ro ka fag tagadal tumaban wa Takata-Sik-Batu sasad faglanuan. 17 Ay ka fag baguina at tagtanud sakbawan, nainto sas Takata-Sik-Batu te, Go o at sadi Ka fag Taw at tagadal. Ay go kin. Ay Takata-Sik-Batu kamayud te, Yaya. Bunwa long aw. 18 Ay ginanya fag yabi matis dawdaw. Ay sanya fag ngay fanuguan ay anggan at tagdingding sakbawan sas Tagbvt-Fag-Bale-Funbalugu nafe afuy sa sik uwing. Ay malindug igsafungan, laman gfangenbung. Ay anggan Takata-Sik-Batu malindug yangay sanya gfangenbung. 19 Ay at Taguna-Fag-Taganyun-Daul nainto sas Isus laman nangasaful At foyungan ay anggan sa At ngay tagadal sigon. 20 Ay Isus nabalus te, Faggugat Kua nasuksuk nu nafoyung Aw ste swa daga fag ngay taw. Nafoyung Aw sas Taw-Naseg at ngay bale fakafulan at ngay taw. Ay anggan sas Tagbvt-Fag-Bale-Funbalugu sas Erusalem, fagayu Taw-Naseg at fagmafulan. Da Kdi batang e suksukan Ku longan. 21 Taw ro at masuad am fagintoun Angku. Intoi wa sa at ngay nadungug Ku longan sanya. Anway kanya fag ngay taw nasaful wan Ku longan. 22 Ay Isus nu nalong wa katanya, at tagdingding sakbawan sas Tagbvt-Fag-Bale-Funbalugu natalaptap dawdaw sas Isus fingi. Ay nalong te, Taw ro Am fagnalongun ngap takatanya sa tam Taguna-Fag-Taganyun-Daul. 23 Ay Isus nabalus te, Ku longan nu anway at yud matuyan, tain am famatuyanan sat taw iste. Ay nu matuyan tuwa Ku longan, taw ro am fagnatalaptapun Angku. 24 Ay rodi Mafanyan nafalo wa Isus ay masalodan wan. Laman nanfadasug sas Takabalu, sas Taguna-Fag-Taganyun-Daul, at akbang. 25 Ay Simun Takata-Sik-Batu malindug yay gugat sanya gfangenbung. Ay ka fag ngay taw nainto anya te, Go o wan at sadi At tagadal. Ay go kin. Ay Takata-Sik-Batu kamayud te, Yaya. Bunwa aw. 26 Ay sanya at sadi Taguna-Fag-Taganyun-Daul at fanuguan. Aro Takata-Sik-Batu at naayas fag fanuguan at lagbe at talinga. Ay ka fag fanuguan katsi nalong sas Takata-Sik-Batu te, Nalag aw emu nu gufud o Isus sas gamasun. Ay go kin. 27 Ay Takata-Sik-Batu gdog yay kamayud ginanya sigon. Ay rodi tv sik tabag gtarakit. 28 Ginas balabag sirut e nataban Isus signans Takabalu bale. Ay nanfadasug Isus sanya fag talun sat fun at tagbiya fag bale. Ay at ngay Taw-Naseg dua gsakbo sa at fun at bale. Anway dua kaumsig nu gfafurat. Anway sik Taw-Naseg nu mafurat way, dua ban e gfaon anya at tagbiya fag yafun at ngayan te, Famalangfe. 29 Ay fun At-Ke-Bangko nalaklo sat day bale, laman nanginto sanya fag ngay Taw-Naseg te, Nataw sangay ay nasafulan Kanya fag Taw At asalanan. 30 Ay at ngay Taw-Naseg nabalus te, Laman nu gdi mauri Ka fag Taw At fagbulun, du ami nantaban sa emu. 31 Ay fun At-Ke-Bangko nalong anya te, Tabani wan Ka fag Taw. Ay am wan tagfatugan te, go setvngvdi ay fanfauri Anya, nus nga se tawi way ay ugali. Ay at ngay Taw-Naseg nabalus te, Ay longan sa emi ebi te, lag gfate nus nga sinu. 32 Katanya at ngay Taw-Naseg at longan. Laman umgurungan ro ebia taw Isus At longan at naguna nafoyung te, katanya ban nu gfate. 33 Ay fun At-Ke-Bangko gdog yay nasakbo sat basad bale ay igfaakbang sa anya Isus ay ginto te, Go O wan Taw-Naseg at fun. Ay go kin. 34 Ay Isus ginto te, Go am foyungan am longan way mandi. Go ate am iba nafoyung wemu Ku ugali. 35 Ay fun At-Ke-Bangko ginto yangay te, Go sangay aw sik Taw-Naseg aw. Ay go yaya. Am ngay Taw-Naseg anggan Am ngay taganyun daul nataban Emu sa angku. Nataw way sangay Am asalanan. 36 Ay Isus nabalus te, Ku fagmagurangun saman yay ste swa daga sa sik fun nu gmagurang. Satu ro Ku fagmagurangun nu ste way swa daga, Ku ngay fanuguan igfabarangian yay. Laman tiba dua nataban Angku sas Taw-Naseg. 37 Ay fun At-Ke-Bangko nalong sas Isus te, O wan sik Fun. Ay go kin. Ay Isus nabalus te, Kin. Kata wa fiya am longan. Aw wan sik Fun. Ku faginlangfeun ay Ku fagindasugun ste swa daga laman nanfoyung Aw at matuyan. Nus nga sinu takaumsig gfaning sat matuyan fag longan, kanya yangay tagdungug sa Ku longan. 38 Ay fun At-Ke-Bangko nalong sas Isus te, Nataw tuwa ngani at matuyan fag longan. Ay fun At-Ke-Bangko nu ntabu wa at longan, gdog yay nalaklo sat day bale. Ay nanfoyung sasa ngay Taw-Naseg te, Aw ku e nasafulan Isus At asalanan. 39 Ay e ugali way am, laman gfalfas aw sik masungsungan gina gadasugun at Famalangfe fag ngay menit. Go kaumsig am nu gfalfas aw sa ayu Kanya At ngayan te, Taw-Naseg at Fun. 40 Ay at ngay Taw-Naseg nauro dawdaw te, Lagi Kanya fag Taw. Am fagfalfasun Sik-Takamoyung-Baguama yakman. Ay kanya Sik-Takamoyung-Baguama dewa sik takamul.

19

1 Ay fun At-Ke-Bangko nataban Isus ay nafafalang Anya sa at ngay tagbarangian. 2 Ay at ngay tagbarangian nabugyas sik ngay madugi. Ay nafasangboan sas Isus At alfuyu. Ay anggan nafe lanbung Isus sik lanbung ngaba maloban. 3 Ay at ngay tagbarangian nasadsadian nangakbang sas Isus ay ge longan te, Masine Tuwo, Taw-Naseg at Fun. Ay ginanya natalaptap yangay dawdaw sas Isus fingi. 4 Ay fun At-Ke-Bangko gdog yay nalaklo siginan sad bale, laman nanlong sasa ngay Taw-Naseg te, Dungugani. Katsi gtaban akwa sa ayu laman sumaful ro am te, aw ku e nasafulan Ka fag Taw At asalanan. 5 Ay rodi ngani Isus nsure wa fiya, e sangbo madugi ay e lanbung ngaba maloban. Ay fun At-Ke-Bangko nalong sasa ngay Taw-Naseg te, Nin wa ngani Ka fag Taw. 6 Ay at ngay taganyun daul ay at ngay tagdingding sakbawan gina nalag Isus, nauro dawdaw te, Tuktuki Anya sas salibagan kayu. Tuktuki Anya sas salibagan kayu. Ay fun At-Ke-Bangko nabalus te, Am wa long tagtaban ay tagtuktuk Anya. Aw ku e nasafulan At asalanan. 7 Ay ka fag ngay Taw-Naseg nalong yangay sas fun At-Ke-Bangko te, Em magurang e longan wemi ebi. Ay nu gfaning wami ka fag longan, masine Isus nu mkate ro. Anway ebi Isus nafoyung te, Aw wan Funbalugu-At-Baguama. 8 Ay fun At-Ke-Bangko nu nadungug yangay at ngay Taw-Naseg at longan, inkugat yay siginan aro taw nu malimuanan. 9 Ay fun At-Ke-Bangko gdog yay gsakbo sat basad bale ay nainto sas Isus te, Daginan O. Ay Isus dua gbalus. 10 Ay fun At-Ke-Bangko nalong sas Isus te, Taw way Am fagyudun gbalus angku. Asafuli te, e fagmadaragangun akwa fiya laman igfalfas aw Emu. Ay e fagmadaragangun kyangay laman e tumuktuk Emu sas salibagan kayu. 11 Ay Isus nabalus anya te, Du o e fagmadaragangun katvngvd anya, nu dway ro siginans Funbalugu. Ay anway katanya, at ngay tagtaban Angku sa emu at asalanan glabi yay am asalanan. 12 Ay fun At-Ke-Bangko nu nadungug Isus At longan aro taw, kanya gfasadsarapan gamatangan dawdaw te, tain ro nu gfafalfas aw Isus. Ay at ngay Taw-Naseg nauro te, Nu gfalfas way long o Ka fag Taw, bunwa o fun Sesar at fagues. Anway nus nga sinu nu nafoyung way te, aw wan sik fun, kanya kamabo way fun Sesar. 13 Ay fun At-Ke-Bangko nu nadungug yangay at ngay Taw-Naseg at longan, gdog yay nataban Isus sas day bale ay malunggung sat Fagnansarapan-Asalanan-Fag-Faglunggungan. Ay ka fag faglunggungan sisad Faglanuan-Mafadatagan-Fag-Ngay-Batu. Ay Taw-Atsi-Baliwa nafangayan ka fag faglanuan te, Gabata. 14 Ay ginanya fag menit kamasadan yay sa ban balabag fag menit. Ay ginanya anwa swa bilug menit, fun At-Ke-Bangko nalong sasa ngay Taw-Naseg te, Nin wan ay Fun. 15 Ay at ngay Taw-Naseg nauro te, Fatei wa Anya. Fatei wa Anya. Katsi tuktuki wa ngani sas salibagan kayu. 16 Ay rodi fun At-Ke-Bangko nataban Isus sasa ngay Taw-Naseg laman tumuktuk wa Anya sas salibagan kayu. 17 Ay e nataban yangay Isus. Ay Isus nu glo wan nafasanan wa At salibagan kayu. Ay nangadasug sas talun Butul-Alfuyu. Ay sas Taw-Atsi-Baliwa at ngayan te, Gulguta. 18 Sanya wan at fagtuktukan Isus sas salibagan kayu. Ay duwa yak ama at natuktuk nafasumbalian Isus. Ay Isus sisad buknga. 19 Ay fun At-Ke-Bangko nariruk sik fagsafulan ay nadafut sas Isus At salibagan kayu. Ay at rirukan sanya te, SIK TAW NASARET, TAW-NASEG AT FUN. 20 Ay ngayuk Taw-Naseg at natap ka fag fagsafulan. Anway at fagtutukan Isus fag buknga makbang way sis fulan. Ay manga te, at rirukan sa tuwas Taw-Atsi-Baliwa ay sas Taw-Ruma ay sas Taw-Gresia at fanlongan. 21 Ay Taw-Naseg at ngay taganyun daul nasalag sas fun At-Ke-Bangko te, Lag griruk te, Taw-Naseg at Fun. Am rirukan anyakman te, Tuy fag Taw nalong te, Aw wan Taw-Naseg at Fun. 22 Ay fun At-Ke-Bangko nabalus te, Ku nariruk, nariruk kua ngap. 23 Ay ufatk tagbarangian nabul wan Isus At ngay lanbung. Ay rodi nu natuktuk wa Isus, ka fag ufat tagbarangian naafudan wan Isus At ngay lanbung. Ay roro At sadi at lanbung at ngaba at yud e sugfunan, fagdaul sadi way. 24 Ay at ngay tagbarangian lodlongan te, Agi yap tam ggirat. Nanfagsafulan yay tam te, sinu ro tam at mul ka fag lanbung at ngaba. Ka fag ngay tagbarangian at fagbulun igfagurungan At-Rirkan sa ebi at longan te, Kanya mafudan Ku ngay lanbung. Ay igfagsafunan yay te, Sinu at mul Ku lanbung at ngaba. 25 Ay katanya wa fiya at ngay tagbarangian at fagbulun. Ay ufatk mangena malindug sanya makbangs day salibagan kayu. At sadi, Isus At tina. Ay at sadi, Isus At tina at fadugsay. Ay at sadi Taglu, Kleupas at mangena. Ay at sadi, Taglu tagsiginans fulan At-Ke-Bale-Ngabat. 26 Ay Isus nu nalag At tina ay anggan At fakesugun fag tagadal nu malindug sanya, Kanya nalong sa At tina te, Fagina. Ste wan ku fakesugun fag tagadal bilang am baguama. 27 Ay Isus nalong yangay sa ka fag tagadal te, Ste wan bilang am mina. Ay ginanya fag menit ka fag tagadal nataban wa Isus At tina sat bale laman nanbanwan sanya. 28 Ay rodi Isus nu nasaful te, fagayu ingurungan wan, Kanya nalong te, Kadanum Akyay. Isus At fagnalongun katanya igfagurungan sa At-Rirukan ebi. 29 Sanya e sik taya e buadan safa mayat. Tiba nafasurung sik fanrarus sanya sas taya. Ay natugdan ka fag fanrarus sa sik anyamu at fanfadasug sas Isus bibig laman gfasupsup Isus. 30 Ay Isus nu nasupsup wa ka fag buadan safa mayat, nae longan yay te, Ntabuan. Ay inkarung wa At alfuyu. Ay rodi inkate wan. 31 At Taw-Naseg at ngay magurang nanget yay sas fun At-Ke-Bangko te, laman e nanfud yay at bitis at matuktukan fag taw sis salibagan kayu. Laman ro umkate wan ay nanbul wa at bilug siginan salibagan kayu. Anway ginanya fag menit kamasadan way sa ban balabag fag menit. Anway Taw-Naseg kalimata way nu e bilug way sis salibagan kayu ginanya fag menits balabag. Anway balabag fag menit, sik Fakamatoun-Menit way, taglabi nu masine sas fagayu tibak Fakamatoun-Menit. 32 Ay katanya wayay, at ngay tagbarangian indasug. Ay nafud at sadi at kintuktuk at bitis, ay anggan at ufud at bitis. 33 Ay inkaakbang yay sas Isus. Ay nu nalag te, matian wa mangaro, dua nafud At bitis. 34 Ay dewa katanya at sadik tagbarangian nabangko yay daw Isus At tigiangan. Ay rodi inkugwag At taguk ay sik safa. 35 Ay aw, nalag akwan fagayu at fagbulun. Ay nafatuyan kyangay sa ayu. Laman anggan am kafandiug yangay am. Ay ku foyungan matuyan. Ay nasaful aw te, matuyan wa fiya fagayu ku longan. 36 Kanya fag fagbulun ingurungan sa At-Rirukan ebi at nalong te, At butul du e mfud, nus di sadi. 37 Ay At-Rirukan at nalong yangay te, At ngay taw ban lumag At fagbangkoan. 38 Ay rodi ro At-Fakafamutan, sik taw sigians fulan Maabat, nangakbang sas fun At-Ke-Bangko laman nanget ay nanbul Isus At bilug. At-Fakafamutan at sadi tagalo sas Isus. Ay kanya dua nafoyung sa tiba te, Aw at sadi tagalo sas Isus. Anway kalimu Taw-Naseg at ngay magurang. Ay fun At-Ke-Bangko gfantain At-Fakafamutan at fasadan. Ay At-Fakafamutan indasug sanya ay nafadaga Isus At bilug ay nauba. 39 Ay anggan Tagbabo-Tiba, ebi at kinkakbang sas Isus gina sad yabi, indasug yangay sanya. Ay at fangubaun sik ngay lune fili ay lune sabila at famabebanglu sas Isus At bilug. Ay at kamabiatan kamabiat sik taw. 40 Ka fag duama natarabangan nauba Isus At bilug. Ay nabarikus sas Isus At bilug sik mayung fag sinyag malagsi. Ay nafatsa sad langkub fansifig at ngay famabebanglu. Igfaning wa mandi at ugali Taw-Naseg gina ganansandigun. 41 Ay sanya at fagtuktukan Isus si sik day gamasun. Ay sanya sad gamasun e bagu naawat sik fagsandigan fag luib. Dia batang e nasandig taw sanya. 42 Ay anway ginanya kamasadan yay fag menit, ay anway makbang tuway at fagsandigan, ka fag duama nasandig Isus At bilug sanya.

20

1 Sas fasadik menit sis fafitu, dewa te marum yadi, sik ina at ngayan Taglu siginans Fulan-At-Ke-Bale-Ngabat nananlag wa sas fagsandigan fag luib. Ay manlag di mabulan wan at fandingding sakbawan fag batu. 2 Ay rodi mafali Taglu nu guli. Ay nanfoyung sas Simun Takata-Sik-Batu ay sa yangay Isus At fakesugun fag tagadal te, E nabul wan tam Fun At bilug siginans fagsandigan. Ay du ami nasaful te, dada ro at falinan. 3 Ay Takata-Sik-Batu nalo ay anggan ka fag tagadal laman nanlag sas fagsandigan. 4 Ay ka fag duwama matarung nu nalo. Ay roro at sadi amatarung yap sas Takata-Sik-Batu nu glo. Ay naguna wa indasug sas fagsandigan. 5 Ay kanya naarungan gfatangun sanya sad luib. Ay at nalag sanya at fansifig way fag sinyag. Ay dewa nat sanya, dua nasakbo. 6 Ay rodi tv Takata-Sik-Batu indasug yangay, naguyan at sadi. Ay kanya nasakbo tuwa sasad fagsandigan. Ay at nalag sanya at fansifig way. 7 Ay nalag yangay at fansifig Isus At alfuyu fag sinyag sirut. Ay at fansifig At alfuyu di maful si at fansifig At bilug. Malutan tuwa mandi. 8 Ay anggan aro taguna kindasug fag tagadal, nasakbo tuwa sasad fagsandigan. Ay nalag ay gafanud. 9 Anway ka fag duwama dia nasaful ebi At-Rirukan at masuad te, Isus gdog yay gleleg. 10 Ay rodi ka fag duwak tagadal noli wa sat ngay bale mandi. 11 Ay Taglu malindug sas day sakbawan fagsandigan ay guyway. Ay dewa guyway, garungan yay glinggat sasad fagsandigan. 12 Ay Taglu nalag duwak tagbukngan, ay at lanbung malaksi. Ay kanya fag duwa nu malunggung si yangay aro Isus At bilug at fagmatungkudan. Sadi sit alfuyu ayt sadi sit darafa. 13 Ay ka fag duwak tagbukngan nainto sas Taglu te, Fagina. Taw ro am faguywayun. Ay Taglu nabalus te, Teway e nabul ku Fun At bilug, ay kua nasaful te, dada manga at falinan. 14 Gina Taglu ge longan, inbiling ay nalag Isus nu malindug sanya. Ay Taglu dua natoglag te, Kanya Isus yay. 15 Ay Isus nainto sas Taglu te, Fagina. Taw ro am faguywayun. Sinu am fagsarapun stiye. Ay Taglu gamatangan te, Kanya tagtanud way iste fag gamasun. Ay Taglu nalong Anya te, Sama. Nu o wa at nabul Anya, foyungi yap long angku te, dada wan am falinan. Ay nanbul akyay. 16 Ay Isus nae longan te, Taglu. Ay Taglu inbiling wa daw. Ay at e longan sas Isus sas Taw-Atsi-Baliwa at fanlongan te, Rabuni. Rabuni at masuad te, Takamoyung. 17 Ay Isus nalong yangay sas Taglu te, Lag gfatawad Angku. Anway Kia batang nanlag tam Tama. Ay o, nanlagi way sa Ku ngay fadugsay. Ay foyungi anya te, nalo Akyay ban sas Banwa. Nanlag Akyay Ku Mama, ay ay Tama, ay Ku Funbalugu, ay ay Funbalugu. 18 Ay Taglu, sik taw tagsiginans fulan At-Ke-Bale-Ngabat, indasug ay nafoyung sas Isus At ngay tagadal te, Nalag akwan tam Fun. Ay Taglu nafoyung yangay sa tiba fagayu aro Isus At foyungan anya. 19 Sa taguna fag menit sis fafitu sfafun, Isus At ngay tagadal maful wa sa sik bale. Ay nadingding wan at ngay sakbawan. Anway At ngay tagadal kalimu wayay sas Taw-Naseg at ngay magurang. Ay ginanya Isus insure ay malindug wa daw si tuwa tagadal ay nalong te, Manabayani tuwa. 20 Ay Isus nu nae longan wa katanya, nafalag At daluap ay At tigyangan sa At ngay tagadal. Ay At ngay tagadal guseganan yay dawdaw gina nalag at Fun. 21 Ay Isus gdog yay nalong te, Manabayani tuwa. Kata Tam Tama nu nasugu Angku, anggan Aw sumugu Akyangay ban ayu. 22 Ay Isus nu nalong wa katanya, nauyup sa At ngay tagadal ay nalong yangay te, Katsi si wa ayu Funbalugu At-Masine-Fag-Falad. Ay fabayani wa ban Anya nut si ayu. 23 Nu gfaliam tuwam sik taw at asalanan, ka fag taw at asalanan e nafaliam wan. Ay nu dway am nafaliam sik taw at asalanan, ka fag taw at asalanan du e nafaliam. 24 Sadi at Labi-Duwa at ngayan te, Duwak-Nasfuan, tibak taw nu gngayan anya Kambal. Ka fag tagadal duat sanya gina ebi Isus kasure sa tibak tagadal. 25 Ay bandi tv At ngay tagadal nalong sas Duwak-Nasfuan te, Nalag wami tam Fun. Ay Duwak-Nasfuan nabalus te, Da kia gafanud yap ngay aw nalag At daluap nu masulatan. Ay yap ngay ku sumyu nautkut sa At masulatan. Ay yap ngay sigon ku daluap naapkap sa At fakabangkoan sa At tigyangan. 26 Sas fawaluk menit, Isus At ngay tagadal gdog yay maful sa aro fag bale. Ay anggan Duwak-Nasfuan maful yangay sanya. Ay gdog yangay nadingding at sakbawan. Ay rodi Isus insure yangay fiya ay malindug wa daw si atuwa tagadal, ay nalong te, Manabayani tuwa. 27 Ay Isus iglong sas Duwak-Nasfuan te, Fastei am sumyu ay utkuti sa Ku fakafakuan Ku daluap. Ay am daluap apkapi sa Ku fakabangkoan sa Ku tigyangan. Ay lag yud gafanud. Afandiugi tuwa. 28 Ay Duwak-Nasfuan nalong sas Isus te, Ku Fun, ku Funbalugu. 29 Ay Isus nalong sas Duwak-Nasfuan te, Go gafanud wo anway nalag wo Angku katsi. Sik taw nu kafandiug tuwa sa Angku dewa yud nalag, guseganan wan. 30 Ngayu wan Isus At ke masuad fag fagbulun ebi gina si At ngay tagadal. Ay ya nariruk ste At tiba At fagbulun. 31 Dewa katanya, at tiba long nariruk wa iste At ke masuad fag fagbulun, laman kafandiug tuwam te, tam Isus tam Fagtauykan, Funbalugu-At-Baguama. Ay nu kafandiug tuwam sas Isus, gleleg tuwam faggugat.

21

1 Bandi ban Isus gdog yay insure sa At ngay tagadal sas tigyangan lino Tiberias. Kata tuy At faginsureun. 2 Kayu tuy At tagadal at maful sanya. Simun Takata-Sik-Batu. Ay Duwak-Nasfuan, tibak taw nu gngayan anya Kambal. Ay Funbalugu-Tagfon, kanya siginans fulan Gaanyamuun sas talun Balulangan. Ay Funbalugu-Nafon at duwak baguama. Ay anggan duwa yak tagadal. 3 Ay Simun Takata-Sik-Batu nalong sat tiba te, Aw nanfanguyang kway. Ay at tiba sigon naguyudan anya ay nalong te, Kin, anggan ami. Nangufud ami emu. Ay kanya fag ngay tagadal nalo wan ay nasakay sa sik balutu. Ay dewa ginanya fag ngabak yabi, du e nafabul at uyang nus di sirut. 4 Nu mayamag wa sirut, Isus malindug sas tigyangan lino. Ay At ngay tagadal dua natoglag te, Kanya anwa Isus. 5 Ay Isus nainto anya te, Mangama, go wam e nafabul. Ay go yaya. Ay At ngay tagadal nabalus te, Yaya ngaro. Du ami mafabul. 6 Ay Isus nasugu te, Katsi ro falayugi yangay ay fanggamat uyang siginan siun baliwa fag day balutu, ay fafabul waro am. Ay At ngay tagadal nafalayug yangay at fanggamat uyang. Ay at kayu wan long at nafabul at uyang, At ngay tagadal dua mafaguyud. 7 Kanya fag tagadal, Isus At fakesugun, at nafoyung sas Takata-Sik-Batu te, Kanya wan tam Fun. Ay Takata-Sik-Batu nu nadungug te, Kanya wan tam Fun, rodi nasulun at lanbung, anway aro taw masandigan yay. Ay kanya mafali naarabang sasad lino siginan at balutu. 8 Ay At tibak tagadal si way at balutu iguyud way at fanggamat at uyang at mapnu. Ay kanya indasug sas tigyangan lino, anway dua ngayayu sas tigyangan. Kayayu way ro limak safuluk dufa. 9 Ay at ngay tagadal nu nalfas siginan at balutu, nalag sik nakadayagan e afuy. Ay sanya e sinugba uyang ay e sik fafa. 10 Ay Isus nasugu te, Fastei tiba ay ba uyang at bagu. 11 Ay Simun Takata-Sik-Batu nasakay sas balutu ay naguyud at fanggamat uyang saswa daga. Ay mapnu at nafagamat ay gbiya fag ngay uyang. At kayu wan 153 k uyang. Ay dewa ngayu wa ngayu at ba uyang, at fanggamat di nrasras. 12 Ay Isus nalong sa At ngay tagadal te, Stei. Nanyabas watam. Ay nus di sadi at tagadal du e mafainto sas Isus te, Sinu wo. Teway natoglag yayay te, Kanya yay mangaro tam Fun. 13 Ay Isus nangakbang sas afuy. Ay nabul at fafa. Ay nafon sa At ngay tagadal. Ay nafon yangay at uyang sigon. 14 Siginan Isus gdog yay gleleg, ginanya at fatulu ginan wa Isus nangasure sa At ngay tagadal. 15 Nu ntabu wa At ngay tagadal nu kon, Isus nainto sas Simun Takata-Sik-Batu te, Simun, Sik-Udkuruan at baguama. Go kesug tuwo dawdaw Angku, glabi yay sa am iba. Ay Simun nabalus Isus te, Kin, ku Fun. Nasaful Wo te, kesug aktuwa long Emu. Ay Isus nasugu te, Faguti Ku ngay tupa riangan. 16 Ay at faduwa ginan Isus nainto sas Simun te, Simun, Sik-Udkuruan at baguama. Go kesug tuwo dawdaw Angku. Ay Simun nabalus yay fiya te, Kin, ku Fun. Nasaful Wo te, kesug aktuwa long Emu. Ay Isus nasugu yangay te, Tanudi Ku ngay tupa. 17 Ay Isus nainto yangay at fatulu ginan sas Simun te, Simun, Sik-Udkuruan at baguama. Go kesug tuwo Angku. Ay Simun kabalu, anway sas Isus At naintoan anya tulu ginan te, go kesug tuwo Angku. Ay Simun nabalus yay fiya te, Ku Fun. Nasaful Wo fagayu nus nge wain. Ay nasaful yangay O te, kesug aktuwa Emu. Ay Isus nasugu te, Faguti Ku ngay tupa. 18 Ay Isus nalong yay te, Matuyan iglong Aw emu te, Gina o mabaguama, igsulun yay o am lanbung. Ay nalo yay o nus nga nday am fakaumsigun. Ay roro nu mafufuama wa ban o, gfalugde ban o am take. Ay am iba way ban tagfasulun emu am lanbung. Ay e tumaban ban emu sa am fagyudun kaumsig fag talun. 19 Isus At fagnalongun katanya, laman naguna nafoyung te, katanya Simun nu mkate ban. Ay Simun at fakateun ban nafalag ban sa tibak taw te, masine tam Funbalugu. Ay nu ntabu wa Isus nu glong katanya, nalong sas Simun te, Aloi yangay ban Angku. 20 Ay Takata-Sik-Batu gina nbiling, nalag Isus At fakesugun fag tagadal nu guyan anya. Ka fag tagadal ebi at masarare sis Isus At dubdub gina gfangon, ay ginanya nainto sas Isus te, Em Fun, sinu ro at namoyung Emu. 21 Ay katsi Takata-Sik-Batu gina glag ka fag tagadal, nainto sas Isus te, Ku Fun. Tain ban nin Am tagadal. 22 Ay Isus nabalus sas Takata-Sik-Batu te, Dewa Aw kaumsig te, laman nin fag tagadal gleleg yap ban gugat anggan te, stumiye Aw swa daga. Ay dewa katanya, da kia nanfanusetaw emu. Aloi tuwa gugat Angku. 23 Anway Isus At fagnalongun katanya, at tibak taw nafoyung sat ngay fadugsay te, kanya fag tagadal dua ban kate. Ay roro Isus dewa nalong katanya, at masuad bunwa te, kanya dua ban kate. At longan anway te, Dewa Aw kaumsig te, laman kanya gleleg yap anggan yangay stumiye Aw swa daga. Ay dewa katanya, da kia nanfanusetaw emu. 24 Aw wan ka fag tagadal, at nafoyung katanya fag fagbulun ay at nariruk sigon katanya. Ay fagayu tam nasaful watam te, matuyan ku foyungan fagayu. 25 Ngayu yay fiya fiya Isus At fagbulun. Nu rumiruk way ro fagayu fagayu, nu ndain duwa ro sumak at ngay rirukan sa omas fagdaul daga.