Lia hahu nian
1:1 Houri uluk kedas liafuan iha nanis; liafuan horik nanis ho Maromak. 2 Houri uluk kedas Nia horik hamutuk ho Maromak. 3 Maromak halo buat hotu hodi Nia; la hodi Nia buat ida la moris. 4 Nia mak moris Na'in, no moris ne'e mak ema nia naroman. 5 Naroman nabilan hela iha nakukun laran; nakukun la bele halakon nia. 6 Mane ida mosu mai nebe Maromak mak haruka; nia naran Joao. 7 Nia mai nudar sasin ida atu fo sasin kona ba naroman atu ema hotu bele fiar hodi nia. 8 Nia la'os naroman maibe nia mosu atu fo sasin kona ba naroman. 9 Naroman los mai iha raiklaran, naroman nebe leno ema hot-hotu. 10 Nia horik nanis iha raiklaran; Nia rasik mak hakiak raiklaran, maibe raiklaran la hatene Nia. 11 Nia mai ba nia emar sira, maibe sira ne'e la simu Nia. 12 Maibe, ba ema sira nebe simu Nia hodi fiar nia naran, Nia haraik kbiit atu sai Maromak nia oan. 13 Ema sira ne'e la mai housi ema nia ran, eh tuir ema nia isin nia hakarak; la'os housi ema nia hakarak, maibe housi Maromak. 14 Liafuan ne'e halo An ba mane. Nia horik duni ho ita. Ami hare tebes nia gloria, gloria nebe Nia simu housi Aman, nudar Oan Mane mesak, kmanek no los teb-tebes. 15 Joao fo sasin kona ba Nia, dehan: "Ema ne'e mak Ida nebe ha'u dehan ona katak Nia nebe tuir ha'u mak uluk tiha ha'u, basa Nia uluk liu ha'u." 16 Housi nia diak nakonu mak ita simu diak oi-oin tu-tuir malu. 17 Basa ukunfuan mai housi Moises, maibe grasa no lialos mai housi Jesus Kristu. 18 Ema ida la dauk hare Maromak; maibe Oan mane mesak nebe horik ho Aman, Nia mak haklaken Maromak.
Joao fo sasin kona ba nia an
19 Ida ne'e mak Joao nia sasin wainhira Judeu sira housi Jerusalem haruka am'lulik no levita sira atu husu ba nia: "O se los?" 20 Nia dehan sai, la heli lia dehan: "Ha'u la'os Messias." 21 Sira husu ba nia: "O se los? O Elias?" Nia hatan, "Lae." "O Profeta?" nia hatan: "Lae." 22 Sira dehan ba nia: "O se los atu ami bele fo hatene ba sira nebe haruka ami mai. O dehan sa ida kona ba o nia an?" 23 Nia dehan sai hanesan profeta Isaias hateten: "Ha'u mak lia nebe hakilar iha rai fuik maran. Imi sei halos Na'i nia dalan." 24 Sira ne'e fariseu sira mak haruka, 25 Sira husu ba nia: "O la'os Messias, la'os Elias, la'os profeta: nusa mak o sarani ema?" 26 Joao hatan ba sira: "Ha'u sarani ho be, maibe iha imi nia leet iha Ida nebe imi la hatene, 27 Ida nebe mai tuir ha'u nebe ha'u la soi atu kore nia sandalias tali." 28 Buat ne'e mosu iha Betania, iha mota Jordao nia sorin, iha nebe Joao sei sarani hela.
Joao hatudu Jesus ba ema
29 Loron tuir mai, hare tiha Jesus hakbesik ba nia, Joao dehan: "Ne'e mak Maromak nia Bibi-Oan nebe kasu mundu nia sala. 30 Kona ba Ida ne'e mak ha'u dehan ona: ‘Ema Ida sei mai tuir ha'u, nebe ba ona uluk ha'u, tamba Nia iha ona uluk ha'u.' 31 Ha'u uluk la hatene Nia, maibe ha'u sarani ho be, atu Nia bele hatudu an ba Israel." 32 Joao fo sasin, dehan: "Ha'u hare Espiritu Santu tun mai housi lalehan hanesan manu falur ida, nebe mai tur iha nia leten. 33 Ha'u uluk la hatene Nia, maibe Ida nebe haruka ha'u mai sarani ho be mak dehan mai ha'u: "Ida nebe o hare Espiritu tun ba Nia, hodi hela iha Nia, Nia mak sei sarani ho Espiritu Santu." 34 Ha'u hare duni, hodi fo sasin katak Nia mak Maromak Oan."
Jesus hahu bolu eskolante sira
35 Liu tiha loron ida, Joao hamutuk hela ho nia eskolante na'in rua. 36 Wainhira hare Jesus nebe liu dau-daun, nia dehan: "Maromak nia Bibi-Oan mak neba!" 37 Rona tiha lia hirak ne'e, eskolante na'in rua ne'e tuir Jesus. 38 Hare sira tuir Nia, Jesus fila hodi husu ba sira: "Imi buka sa ida?" Sira hatan: "Rabbi, katak Mestre, Ita hela iha nebe?" 39 Jesus dehan: "Imi mai hare." Sira ba duni, hodi hare Nia horik iha nebe. Loron ne'e duni sira hela ho Nia kala tuku haat loraik. 40 Sira na'in rua nebe rona Joao hodi tuir Jesus ne'e, ida mak Andre, Simao Pedro nia alin. 41 Nia hetan uluk nia maun Simao hodi dehan: "Ami hetan ona Messias!" katak "Kristu." 42 Nia lori Simao ba Jesus. Jesus fihir nia, dehan: "O Simao, Joao nia oan; o sei hanaran an Cefas, katak Pedro." 43 Liu tiha loron ida, Jesus hanoin atu ba Galileia. Nia hetan Filipe hodi dehan ba nia: "Tuir Ha'u mai!" 44 Filipe ema Betsaida, Andre no Pedro nia knua. 45 Filipe hare Natanael hodi dehan ba nia: "Ami foin hetan Ida nebe Moises no profeta sira fo sai nanis, katak Jesus, Jose nia oan, housi Nazare." 46 Natanael hateten: "Buat diak ida bele mai housi Nazare?" Filipe hatan ba nia: "O mai hare." 47 Hare Natanael hakbesik ba Nia, Jesus dehan kona ba nia: "Ida ne'e mak ema Israel lo-los, iha nebe la iha lia bosok!" 48 Natanael husu ba Nia: "O hatene ha'u oin sa?" Jesus hatan: "Molok Filipe bolu o, Ha'u hare ona o iha ai figueira okos." 49 Natanael dehan fali: "Rabbi, Ita mak Maromak nia Oan, Ita mak Israel nia Liurai!" 50 Jesus hatan: "Tan Ha'u hateten ba o katak Ha'u hare ona o iha ai figueira okos, mak o fiar? O sei hare buat boot liu ida ne'e." 51 Hafoin Jesus dehan ba nia: "Los duni, Ha'u dehan ba imi katak imi sei hare lalehan nakloke, Maromak nia anju sira sa'e tun ba Oan Mane."
Festa kaben nian iha Kana
2:1 Liu tiha loron tolu, ema halo festa kaben nian iha Kana Galileia. Jesus nia inan iha neba. 2 Jesus ho nia eskolante sira simu mos konvite ba festa. 3 Tamba tua la iha ona, Jesus nia inan dehan ba Nia: "Sira nia tua hotu ona." 4 Jesus simu dehan: "Na'in feto, ita atu halo sa los? Ha'u nia loron la dauk to'o." 5 Maibe nia inan dehan ba sira nebe hein meja: "Imi halo tuir buat nebe Nia haruka." 6 Kusi neen iha neba, atu Judeu sira fase ain no liman; kusi ida-ida bele lori litru ualu nulu ka atus ida rua nulu. 7 Jesus lia tun ba sira: "Imi tau be ba kusi sira ne'e to'o nakonu." Sira tau be nakonu di-diak to'o ibun. 8 Hafoin Jesus dehan ba sira: "Imi bele hasai ona, lori ba uma na'in tenda." Sira lori duni. 9 Uma na'in tenda koko tiha be nakfila ba tua (tan nia la hatene tua ne'e mai housi nebe, maibe ema sira nebe hein meja no kuru be hatene); nia bolu noivu 10 hodi dehan: "Ema hotu fo uluk tua diak; konvidadu sira hemu di-diak ona, hafoin mak fo tua la dun diak. O fali rai subar tiha tua diak to'o oras ne'e." 11 Ne'e mak milagre uluk nebe Jesus halo iha Kana Galileia. Nia hatudu nia gloria, nia eskolante sira fiar Nia. 12 Liu tiha ne'e, Jesus ho nia inan, maun-alin no eskolante sira tun ba Kafarnaum. Sira hela loron ruma iha neba.
Jesus hamos templu
13 Besik dau-daun ona Judeu sira nia Paskua, Jesus sa'e ba Jerusalem. 14 Iha templu laran, Nia hetan ema nebe fa'an karau, bibi no falur, ho ema sira nebe troka osan tur hela iha sira nia meja. 15 Nia bobar tali hamutuk, hodi duni sai sira hotu housi templu hamutuk ho bibi no karau sira. Nia halo namtate ba rai ema troka osan sira nia osan, hodi halo taka-fila meja sira. 16 Ba sira nebe fa'an falur, Nia dehan: "Hasai buat hirak ne'e housi ne'e: keta halo Ha'u Aman nia uma sai uma kontratu ida." 17 Eskolante sira hanoin kedas liafuan nebe hakerek: "Tan badinas tau matan ba o nia uma, mak Ha'u lakon Ha'u an." 18 Judeu sira husu ba nia: "Sinal sa los mak o bele fo mai ami atu hatudu katak o bele halo nune'e?" 19 Jesus hatan ba sira: "Imi sobu templu ne'e, Ha'u sei harii fali nia iha loron tolu nia laran." 20 Judeu sira dehan: "Ema halo templu ne'e iha tinan haat nulu resin neen nia laran, no o sei harii fali nia iha loron tolu nia laran?" 21 Maibe Jesus koalia kona ba templu nia isin nian. 22 Tan ne'e, wainhira Jesus moris hi'as housi mate, nia eskolante sira hanoin hikas katak uluk nia dehan nanis: nune'e sira fiar eskritura no lia fuan sira nebe uluk nia dehan. 23 Wainhira Jesus sei hela iha Jerusalem, iha festa Paskua, ema barak fiar iha Nia naran, tan milagre sira nebe Nia halo. 24 Maibe Nia la fiar sira, basa Nia hatene sira hotu. 25 Nia la kuran atu ema fo hatene ba Nia kona ema naran ida, basa Nia hatene buat sa los mak iha ema nia laran.
Jesus ho Nicodemos
3:1 Iha fariseu ida naran Nicodemos, emboot Judeu sira nian. 2 Iha kalan nia mai koalia ho Jesus, dehan: "Rabbi, ami hatene katak Ita boot mai housi Maromak nudar mestre, tan ema ida la bele halo buat nebe Ita halo wainhira Maromak la hela ho nia." 3 Jesus hatan ba nia: "Tebes, Ha'u dehan ba o katak ema nebe la moris fali, nia la bele hare Maromak nia reinu." 4 Nicodemos hateten ba Jesus: "Oin sa ema katuas ida bele moris fali? 5 Nia bele tama fali iha inan nia laran atu moris hikas?" Jesus hatan ba nia: "Tebes, Ha'u hateten ba o katak ema nebe la moris housi be no Espiritu, nia la bele tama iha Maromak nia reinu. 6 Buat nebe moris housi isin, isin nian; no buat nebe moris housi Espiritu Espiritu nian. 7 Keta hakfodak tamba Ha'u dehan ba o, ‘O ten ke moris fali.' 8 Anin hu'u ba fatin nebe nia hakarak; o rona nia lia, maibe o la hatene nia mai housi nebe ka nia ba nebe. Nune'e mos ho ema hotu nebe moris housi Espiritu." 9 Nicodemos husu ba Jesus: "Buat ne'e bele sai oin sa los?" 10 Jesus hatan ba nia: "O, mestre Israel nian, la hatene buat ne'e? 11 Los duni Ha'u hateten ba o katak ami koalia kona ba buat nebe ami hatene, hodi fo sasin kona ba buat nebe ami hare ona; maibe imi la simu ami nia lia sasin. 12 Imi la fiar Ha'u karik, wainhira Ha'u koalia kona ba sasan mundu ne'e nian, oin sa mak imi bele fiar wainhira Ha'u koalia kona ba sasan lalehan nian? 13 Ema ida la dauk sa'e ba lalehan; ema ida deit: Ida nebe tun housi lalehan, katak Oan Mane. 14 Hanesan uluk Moises foti samea iha rai fuik maran, nune'e mos sira sei foti Oan Mane, 15 atu ema hotu nebe fiar Nia la bele lakon, maibe hetan moris rohan laek. 16 Basa Maromak hadomi tebes mundu to'o fo Nia Oan Mane mesak, atu ema hotu nebe fiar Nia la bele lakon, maibe hetan moris rohan laek. 17 Maromak la haruka nia Oan mai iha mundu atu fo terus mundu, maibe atu mundu hetan maksoin hodi Nia. 18 Ema nebe fiar Nia la hetan kastigu, maibe ema nebe la fiar hetan ona kastigu, basa la fiar iha Maromak nia Oan Mane mesak nia naran. 19 Sira hetan kastigu nune'e: roman mai iha mundu, maibe ema sira hadomi nakukun liu fali roman, tamba sira nia hahalok aat. 20 Basa ema nebe halo aat hakribi roman, la hakbesik ba roman atu ema la bele hare nia hahalok sira. 21 Maibe ema sira nebe moris tuir lialos hakbesik ba roman atu mosu mo-mos katak, buat hotu nebe nia halo, halo iha Maromak."
Joao nia sasin kona ba Jesus
22 Hafoin Jesus hamutuk ho nia eskolante sira ba rai Judeia. Nia hela ho sira iha neba hodi sarani ema. 23 Joao mos sarani iha Enon, besik Salim basa iha be barak iha neba no ema mai atu simu baptismu. 24 Joao seidauk tama iha dadur laran. 25 Joao nia eskolante sira haksesuk malu ho Judeu sira kona ba fase an tuir ukunfuan. 26 Sira mai husu Joao: "Mestre, Ida nebe la'o hamutuk ho ita iha Jordao no ita fo sasin kona ba Nia, Nia mos sarani ema, no ema hotu ba hasouru Nia." 27 Joao hatan: "Ema la bele simu buat ruma nebe Maromak la fo ba nia. 28 Imi rasik mak bele fo sasin katak Ha'u dehan: ha'u la'os Messias, maibe ida nebe Maromak haruka atu ba uluk Nia. 29 Ida nebe iha noiva mak noivu; maibe noivu nia belun nebe hamriik hodi rona nia, haksolok teb-tebes wainhira nia rona noivu nia lia. Ohin ha'u nia ksolok boot teb-tebes. 30 Nia sei sai boot liu no ha'u sei sai kiik liu." 31 Ida nebe mai housi leten, Nia iha ema hotu nia leten. Ida nebe mai housi rai, rai ne'e nian, nia koalia kona ba rai. Ida nebe mai housi lalehan, nia aas liu hotu. 32 Nia fo sasin kona ba buat nebe Nia hare no rona, maibe ema ida la simu nia sasin. 33 Ema nebe simu nia sasin hametin liafuan ida ne'e, katak Maromak los. 34 Basa ida nebe Maromak haruka, Nia fo sai Maromak nia liafuan, tamba Maromak haraik Espiritu tomak ba Nia. 35 Aman hadomi Oan no saran ba Nia buat hot-hotu. 36 Ema nebe fiar Oan, nia hetan moris rohan laek; maibe ema nebe lakohi fiar Oan, nia sei la hare moris, no Maromak nia hirus hela ho nia.
Jesus ho feto Samaritana
4:1 Wainhira Na'i hatene katak fariseu sira rona katak Jesus simu no sarani eskolante barak liu fali Joao; 2 maski la'os Jesus mak sarani, maibe nia eskolante sira, 3 Nia husik Judeia hodi fila fali ba Galileia. 4 Nia ten ke la'o liu housi rai Samaria. 5 Ne'e duni, Nia to'o iha Samaria nia sidade ida, naran Sikar, besik to'os nebe Jacob uluk fo ba nia oan Jose. 6 Jacob nia be matan iha neba. Jesus la'o loke ona; tan ne'e, Nia tur iha be matan nia sorin. Loron besik fahe rua ona. 7 Feto Samaria nian ida mai kuru be. Jesus dehan ba nia: "Fo be mai Ha'u." 8 Eskolante sira ba iha sidade atu sosa aihan. 9 Feto ne'e hatan ba Nia: "Oin sa mak O, ema Judeu ida husu be housi ha'u, ema Samaritana ida?" Tamba Judeu ho Samaritanu sira hare malu la diak. 10 Jesus simu hodi dehan: "O hatene karik Maromak nia presente, no se los mak dehan ba o ‘Fo be mai Ha'u,' o mak sei husu ba Nia, Nia sei fo be moris ba o." 11 Feto dehan ba Nia: "Na'i, Ita kanaban la iha, be matan mos klean; ita nia be moris mai housi nebe? 12 Ita kala boot liu fali ami nia aman Jacob nebe fo be matan ne'e mai ami? Nia rasik hemu, nia oan sira, nia balada sira mos hemu." 13 Jesus hatan ba nia: "Ema nebe hemu be ne'e, sei hamrook fali; 14 maibe ema nebe hemu be nebe Ha'u sei fo, sei la hamrook tan, basa be nebe Ha'u fo ba nia sei sai iha nia nudar be matan nebe suli ba moris rohan laek." 15 Feto ne'e dehan: "Na'i, fo be ida ne'e mai ha'u, atu ha'u keta hamrook, nune'e ha'u lalika mai tan kuru be iha ne'e." 16 Jesus dehan ba nia: "Ba bolu o nia laen, hafoin fila mai iha ne'e." 17 Feto hatan: "Ha'u la iha laen." Jesus dehan: "O dehan los, o la iha laen; 18 basa o iha laen lima, no ida nebe hela ho o dau-daun ne'e la'os o nia laen. Kona ba ne'e, o hateten los." 19 Feto hatan: "Na'i, ha'u hare katak Ita profeta ida. 20 Ami nia bei-ala sira adora iha foho ne'e; imi dehan fali katak iha Jerusalem mak ema sei adora." 21 Jesus dehan teni: "Feto, fiar Ha'u: loron sei to'o mai wainhira imi sei adora Aman la'os iha foho ne'e, mos la'os iha Jerusalem. 22 Imi adora buat nebe imi la hatene, ami adora buat nebe ami hatene, basa maksoin mai housi Judeu sira. 23 Maibe loron sei mai, lo-los mai tiha ona, wainhira ema nebe adora lo-los sei adora Aman tuir espiritu no lialos: tamba Aman hakarak atu ema adora Nia nune'e. 24 Maromak mak espiritu, no sira nebe adora Nia sei adora tuir espiritu no lialos." 25 Feto hateten ba Nia: "Ha'u hatene katak Messias sei mai, ida ba naran Kristu; wainhira Nia mai, Nia sei hanorin buat hot-hotu." 26 Jesus hatan: "Ha'u rasik mak koalia ho o." 27 Iha oras neba eskolante sira to'o mai ona. Sira hakfodak tan hare Jesus koalia ho feto ida; maibe sira ida la husu ba Nia "Ita hakarak sa ida?" eh "Tan sa ita koalia ho nia?" 28 Husik tiha kanaban, feto ne'e halai ba sidade, hodi hateten ba ema sira: 29 "Imi mai hare ema nebe hateten mai ha'u buat hotu nebe ha'u halo. Nia mak Messias karik?" 30 Ne'e duni, sira sai housi sidade, hodi ba hare Jesus. 31 Eskolante sira konvida Jesus, dehan: "Mestre, han ba." 32 Maibe Nia hatan ba sira: "Ha'u iha aihan nebe imi la hatene." 33 Eskolante sira husu ba malu: "Ema ruma lori karik aihan ba Nia?" 34 Jesus dehan ba sira: "Ha'u nia aihan mak halo tuir Ida nebe haruka Ha'u mai nia hakarak, hodi hala'o nia hahalok. 35 Imi la dehan, ‘Fulan haat tan, ema haknata han ona? Maibe Ha'u dehan ba imi: Imi foti matan, hodi hare ba to'os: aihan sira tasak hotu ona, hein deit atu haknata. 36 Haknata na'in sira simu ona sira nia kolen, hodi halibur ai-fuan sira ba moris rohan laek; nune'e, ida nebe kuda no ida nebe haknata bele haksolok hamutuk. 37 Ida ne'e hatudu lo-los lia nebe dehan: ‘Ema ida kuda, ema seluk haknata.' 38 Ha'u haruka imi atu ba haknata buat nebe imi la kuda; ema seluk serbisu, imi mai manan deit sira nia kosarben." 39 Ema Samaritanu barak housi sidade fiar Jesus tamba feto dehan: "Nia dehan buat hotu nebe ha'u halo." 40 Tan ne'e, wainhira sira mai hare Nia, sira husu ba Nia atu hela hamutuk ho sira. Nia hela duni loron rua. 41 Ema barak liu tan fiar tamba nia liafuan. 42 Sira dehan ba feto ne'e: "La'os tamba buat nebe o dehan, mak ami fiar; ami rasik rona no hatene katak, los duni, Nia mak mundu nia Maksoin."
Jesus ba Galileia
43 Liu tiha loron rua, Jesus ba Galileia. 44 Nia rasik mak fo sai katak ema sira la simu di-diak profeta ida iha nia rai rasik. 45 To'o tiha Galileia, ema Galileia sira simu Nia di-diak, tamba sira hare ona buat hotu nebe Nia halo iha Jerusalem, iha festa nebe sira mos tuir ba. Jesus Fo Isin Diak Ba Funsionariu Nia Oan 46 Jesus fila fali ba Kana Galileia, iha nebe Nia halo be nakfila ba tua. Iha Kafarnaum, iha funsionariu ida nebe nia oan mane moras. 47 Rona tiha katak Jesus to'o ona Galileia housi Judeia, ema ne'e ba hasouru Nia hodi husu ba Nia atu mai fo isin diak ba nia oan, nebe besik atu mate. 48 Jesus hateten ba nia: "Imi la hare karik sinal no milagre sira, imi la fiar." 49 Funsionariu hatan ba Nia: "Mai, Na'i, molok ha'u nia oan mate." 50 Jesus dehan: "Ba, o nia oan sei moris." Ema ne'e fiar buat nebe Jesus hateten ba nia, hodi fila fali ba uma. 51 Nia sei la'o dau-daun, nia atan sira hasouru nia, hodi dehan katak nia oan sei moris hela. 52 Nia husu ba sira tuku hira nia oan hahu sai diak fali. Sira dehan: "Isin manas lakon hourse'ik besik tuku ida." 53 Aman ne'e hanoin fali katak iha oras neba Jesus dehan ba nia: "O nia oan sei moris." Ne'e duni, nia ho nia familia tomak fiar. 54 Dala rua ona mak Jesus halo milagre wainhira Nia mai iha Galileia housi Judeia.
Jesus bali ema isin mate ida iha pisina Betsaida nian
5:1 Tuir mai Jesus sa'e fali ba Jerusalem, iha nebe Judeu sira halo festa. 2 Iha Jerusalem, besik odamatan Bibi sira nian, iha pisina ida naran Betsata iha lia Ebreu, nebe iha portiku lima. 3 Iha neba tur hela ema moras barak (matan delek, ain aat no isin mate sira), nebe hein atu be book an. 4 Basa Na'i nia anju tun fila-fila hodi book be; ida nebe tama uluk iha pisina, nia hetan kedas isin diak housi moras naran deit. 5 Iha mos ema moras ida nebe hein nune'e tinan tolu nulu resin ualu ona. 6 Hare nia tur iha neba, hodi hatene katak nia hein kleur teb-tebes ona, Jesus husu ba nia: "O hakarak hetan isin diak?" 7 Ema moras ne'e dehan: "Na'i, ha'u ema la iha atu hatama ha'u iha pisina laran wainhira be book an; nune'e wainhira ha'u hakbesik ba be, ema seluk tama tiha uluk liu ha'u." 8 Jesus dehan: "Hamriik ba, kaer o nia biti hodi la'o ba." 9 Teki-teki ema ne'e hetan isin diak. Hafoin nia foti nia biti hodi hahu la'o. Buat ne'e mosu iha loron Sabadu 10 Tan ne'e Judeu sira hateten ba ema nebe foin hetan isin diak: "Ohin loron Sabadu; o la bele lori o nia biti." 11 Nia hateten ba sira: "Ema nebe fo isin diak mai ha'u dehan mai ha'u: ‘Kaer o nia biti, la'o ba!'" 12 "Se mak dehan ba o, ‘Kaer o nia biti, la'o ba?'" sira husu nia. 13 Maibe ema ne'e la hatene se los tamba Jesus lakon kedas iha ema lubun boot nia leet iha fatin neba. 14 La kleur Jesus hetan nia iha templu hodi dehan ba nia: "Hare ba, o isin diak ona; keta halo sala fali, atu buat aat liu tan la bele mosu ba o." 15 Ema ne'e fila fali hodi hateten ba Judeu sira katak Jesus mak fo isin diak ba nia. 16 Tuir mai, Judeu sira hahu duni Jesus, tamba Nia halo buat hirak ne'e iha loron Sabadu. 17 Maibe Jesus hatan ba sira: "Ha'u nia Aman serbisu nafatin, nune'e mos Ha'u serbisu." 18 Tan ne'e, Judeu sira buka liu tan atu oho Jesus, tamba Nia la halakon deit lisan loron Sabadu nian, maibe mos tamba Nia bolu Maromak nia Aman rasik hodi halo an hanesan Maromak.
Jesus nia liafuan kona ba nia an
19 Jesus hatan ba sira: "Tebes, tebes, Ha'u dehan ba imi katak Oan la bele halo buat ida housi nia An rasik; Nia bele halo deit buat nebe nia hare Aman halo, basa buat nebe Aman halo Oan mos halo 20 Basa Aman hadomi Oan hodi hatudu ba Nia buat hotu nebe Nia halo, no Nia sei hatudu ba Nia hahalok sira nebe boot liu fali sira ne'e. atu imi hakfodak. 21 Basa nudar Aman halo ema sira moris hi'as fali hodi fo moris ba sira, nune'e mos Oan fo moris ba naran ema nebe Nia fihir. 22 Aman la tesi lia ba ema ida, maibe husik Oan tesi lia hot-hotu. 23 Atu ema hotu hamtauk Oan nudar sira hamtauk Aman. Ema nebe la hamtauk Oan, nia la hamtauk mos Aman nebe haruka Oan. 24 Tebes, tebes, Ha'u dehan ba imi: Ema nebe rona Ha'u nia liafuan ne'e hodi fiar Ida nebe haruka Ha'u mai, nia hetan moris rohan laek: ema ne'e la hetan kastigu, nia liu ona housi mate ba moris. 25 Tebes, tebes, Ha'u dehan ba imi katak loron besik ona, lo-los to'o ona mai, wainhira ema mate sira sei rona Maromak Oan nia lia, no sira hotu nebe rona sei moris. 26 Basa, nudar Aman mak moris na'in, nune'e mos Nia halo Oan sai moris na'in, 27 hodi haraik ba Nia kbiit atu tesi lia, basa Nia mak Oan Mane. 28 Imi keta hakfodak ho buat ne'e, basa loron to'o dau-daun wainhira matebian sira hotu nebe iha rate laran sei rona Nia lia, no 29 sira nebe halo diak, sei sa'e ba moris rohan laek: sira nebe halo aat sei hetan kastigu. 30 Ha'u mesak la bele halo buat ida. Ha'u tesi lia tuir buat nebe Ha'u rona. Ha'u nia lia los tamba Ha'u la tuir Ha'u nia hakarak, maibe Ida nebe haruka Ha'u nia hakarak. 31 Ha'u fo sasin karik kona ba Ha'u an rasik, Ha'u nia sasin la los. 32 Ida seluk mak fo sasin kona ba Ha'u, no Ha'u hatene katak Nia sasin los. 33 Wainhira imi haruka ema ba Joao, nia fo sasin kona ba lialos. 34 Ha'u la simu lia sasin housi ema ida, maibe Ha'u dehan buat ne'e atu imi hetan maksoin. 35 Joao mak ahi oan nebe lakan hodi fo naroman, no imi hakarak haksolok uitoan iha nia naroman. 36 Maibe Ha'u nia sasin boot liu fali Joao nian, tamba hahalok sira nebe Aman haruka Ha'u, hahalok sira nebe Ha'u halo dau-daun katak Aman haruka Ha'u mai. 37 Aman nebe haruka Ha'u mai, Nia rasik mak fo sasin kona ba Ha'u. Imi seidauk rona nia lia, seidauk hare nia oin; 38 nia liafuan la hela iha imi, tan imi la fiar Ida nebe haruka Ha'u mai. 39 Imi lee Eskritura sira basa imi hanoin katak imi bele hetan moris rohan laek iha sira: sira mak fo sasin kona ba Ha'u. 40 Maibe imi lakohi mai hakbesik Ha'u atu imi hetan moris. 41 Ha'u la buka gloria housi ema. 42 Maibe Ha'u hatene katak imi la iha domin ba Maromak. 43 Ha'u mai hodi Ha'u Aman nia naran, no imi lakohi simu Ha'u; ema seluk mai karik hodi nia naran rasik, imi sei simu nia. 44 Imi bele fiar oin sa, imi nebe fo gloria ba malu, maibe la buka gloria nebe mai deit housi Maromak? 45 Keta hanoin katak Ha'u mak sei duu imi ba Aman; Moises nebe imi hein mak sei duu imi. 46 Imi fiar Moises karik , imi sei fiar mos Ha'u, tamba nia hakerek kona ba Ha'u. 47 Maibe, imi la fiar karik buat nebe nia hakerek, oin sa mak imi bele fiar Ha'u nia liafuan?"
Jesus fo han ba ema rihun lima
6:1 Tuir mai, Jesus liu ba tasi Galileia, katak tasi Tiberiades, nia sorin balun. 2 Ema lubun boot tuir Nia, tan sira hare milagre hirak nebe Nia halo ba ema moras sira. 3 Sa'e tiha ba foho ida, Jesus tur iha neba ho nia eskolante sira. 4 Paskua, katak Judeu sira nia festa, besik dau-daun ona. 5 Foti tiha matan, hodi hare katak ema lubun boot mai hasouru Nia, Jesus dehan ba Filipe: "Ita bele sosa paun iha nebe los atu fo han ema sira ne'e?" 6 Jesus koalia nune'e atu koko nia, basa Nia hatene ona atu halo sa. 7 Filipe hatan ba Nia:" Osan atus rua mos sei la to'o atu ema ida-ida simu paun baluk oan ida." 8 Andre, Simao Pedro nia alin, hateten ba Jesus. 9 "Iha ne'e, iha labarik oan ida ho paun fuan lima no ikan rua; maibe ne'e to'o oin sa los ema barak ne'e?" 10 Jesus lia tun, dehan: "Haruka ema sira ne'e tur hotu." Iha fatin neba iha du'ut barak. Ema sira tur tiha hotu, mane deit to'o besik rihun lima. 11 Kaer tiha paun , Jesus fo agradese , hodi fahe ba ema sira nebe tur iha neba; ho ikan sira Nia halo mos nune'e. Sira han to'o bosu. 12 Hafoin Jesus hateten ba nia eskolante sira: "Imi ba halibur baluk oan sira nebe resin atu la bele lakon." 13 Sira halibur duni paun rahun sira nebe sira nebe han tiha husik, hodi hakonu luhu sanulu resin rua. 14 Hare milagre nebe Jesus halo, ema sira dehan ba malu: "Tebes, ida ne'e mak profeta nebe atu mai iha mundu." 15 Maibe, wainhira Nia hatene katak sira atu kaer Nia hodi foti Nia nudar liurai, Jesus subar an mesak hodi fila fali ba foho.
Jesus la'o iha be leten
16 Wainhira loron monu ona, eskolante sira tun ba tasi. 17 Sa'e tiha ba ro ida, sira hakur tasi atu ba Kafarnaum. Nakukun ona, maibe Jesus seidauk to'o hamutuk ho sira. 18 Tasi sai boot tan anin hu'u maka'as. 19 Wainhira ro dook ona besik kilometru haat, sira hare Jesus la'o iha be leten hakbesik ro. Sira tauk; 20 maibe Nia dehan ba sira: "Ha'u mak ne'e, keta tauk!" 21 Sira haksolok atu simu Nia iha ro laran; ro to'o kedas rai nebe sira ba. 22 Liu tiha loron ida, ema barak nebe hela iha tasi sorin balun hare katak iha neba iha ro ida deit, no Jesus la sa'e hamutuk ho nia eskolante sira, maibe sira ne'e ba mesak deit. 23 Maibe, ro balun to'o housi Tiberiades, besik fatin nebe ema sira han paun, wainhira Na'i fo agradese. 24 Hare katak Jesus ho nia eskolante sira la iha ona, ema sira sa'e ro hodi ba Kafarnaum atu buka Jesus.
Paun moris nian
25 Hetan tiha Nia iha tasi sorin balun ba, sira hateten ba Nia: "Mestre, wainhira mak Ita boot iha ne'e?" 26 Jesus hatan ba sira: "Tebes, tebes, Ha'u dehan ba imi: imi buka Ha'u la'os tan imi hare milagre sira, maibe tan imi han paun to'o bosu. 27 Keta serbisu atu hetan aihan nebe mohu, maibe ba aihan nebe hela ba moris rohan laek; aihan nebe Oan Mane sei haraik ba imi, basa ba Nia mak Aman Maromak tau nia marka." 28 Rona tiha ne'e, sira hasa'e lia ba Nia dehan: "Ami sei halo sa los atu kaer Maromak nia serbisu?" 29 Jesus lia tun ba sira: "Maromak nia serbisu mak ida ne'e: imi fiar Ida nebe Nia haruka mai." 30 Sira hasa'e lia ba Nia: "Sinal sa los mak Ita halo, atu ami hare hodi fiar Ita? Hahalok sa ida mak Ita halo? 31 Iha rai fuik maran, ami nia bei-ala sira han mana, tuir Eskritura hateten: ‘Nia fo han sira ho paun nebe tun housi lalehan." 32 Jesus hatan ba sira: "Tebes, tebes, Ha'u dehan ba imi katak la'os Moises mak fo ba imi paun housi lalehan; maibe Ha'u Aman mak fo ba imi paun los housi lalehan. 33 Basa Maromak nia aihan mak tun housi lalehan hodi fo moris ba mundu." 34 Sira dehan ba Nia: "Na'i, haraik nafatin aihan ne'e mai ami." 35 Jesus hatan ba sira: "Ha'u mak aihan moris nian. Ema nebe hakbesik Ha'u sei la hamlaha tan; no ema nebe fiar Ha'u sei la hamrook tan 36 Maibe Ha'u dehan ona ba imi katak maski imi hare tiha Ha'u, imi la fiar. 37 Sira hotu nebe Aman fo mai Ha'u, sei hakbesik Ha'u; no ida nebe hakbesik Ha'u, Ha'u sei la duni sai. 38 Basa Ha'u mai housi lalehan la'os atu halo Ha'u nia hakarak, maibe atu halo tuir Ida nebe haruka Ha'u mai nia hakarak. 39 No Ida nebe haruka Ha'u mai nia hakarak mak ida ne'e: atu Ha'u keta lakon buat nebe Nia fo tiha mai Ha'u, maibe atu Ha'u halo sira moris hi'as iha loron ikus. 40 Basa Ha'u nia Aman nia hakarak mak ida ne'e: katak ema ida-ida nebe hare Oan hodi fiar Nia, ema ne'e sei hetan moris rohan laek; no Ha'u sei halo nia moris hi'as iha loron ikus." 41 Ema Judeu sira mura-mura ba Jesus tamba Nia dehan: "Ha'u mak aihan nebe tun housi lalehan." 42 Sira hateten: "Nia la'os Jesus, Jose nia Oan? Ita hatene Nia aman no inan. Nusa mak nia bele dehan, ‘Ha'u mai housi lalehan?" 43 Jesus hatan ba sira, dehan: "Imi keta mura-mura iha imi leet. 44 Ha'u Aman nebe haruka Ha'u mai la dada nia karik, ema ida la bele hakbesik Ha'u; no Ha'u sei halo ema ne'e moris hi'as iha loron ikus. 45 Profeta sira hakerek nanis ona, dehan: ‘Maromak sei hanorin sira hotu.' Ema hotu nebe rona Aman hodi aprende housi Nia, ema ne'e hakbesik Ha'u. 46 Ema ida seidauk hare Aman. Ida nebe mai housi Maromak, Nia deit mak hare ona Aman. 47 Tebes, tebes, Ha'u dehan ba imi: ema nebe fiar hetan moris rohan laek. 48 Ha'u mak aihan moris nian. 49 Iha rai fuik maran imi nia bei-ala sira han mana, no sira mate ona. 50 Ida ne'e mak aihan nebe tun housi lalehan, atu ema nebe han aihan ne'e sei la mate. 51 Ha'u mak aihan moris nian nebe tun mai housi lalehan. Ema nebe han aihan ne'e, nia moris ba nafatin; no aihan nebe Ha'u sei fo mak Ha'u nia isin, saran ba mundu nia moris." 52 Ema Judeu sira haksesuk malu, dehan: "Oin sa mak Nia bele fo nia isin mai ita atu han?" 53 Jesus hatan ba sira: "Tebes, tebes, Ha'u tebes ba imi: imi la han karik Oan Mane nia isin, imi la hemu karik nia ran, imi sei la hetan moris iha imi, 54 Ema nebe han Ha'u nia isin hemu Ha'u nia ran hetan moris rohan laek, no Ha'u sei halo nia moris hi'as iha loron ikus. 55 Basa Ha'u nia isin aihan duni, Ha'u nia ran tua duni. 56 Ema nebe han Ha'u nia isin no hemu Ha'u nia ran horik iha Ha'u, no Ha'u horik iha nia. 57 Nudar Ha'u Aman nebe moris haruka Ha'u mai, no Ha'u moris tamba Aman, nune'e mos ema nebe han Ha'u, sei moris tamba Ha'u. 58 Ne'e mak aihan nebe tun mai housi lalehan; la'os hanesan ida nebe imi nia aman sira han, hafoin sira mate hotu; ema nebe han aihan ne'e sei moris ba nafatin." 59 Jesus hateten lia hirak ne'e iha sinagoga wainhira nia hanorin iha Kafarnaum. 60 Rona tiha ne'e eskolante barak dehan: "Liafuan hirak ne'e todan teb-tebes: se los mak bele rona?" 61 Hatene katak nia eskolante mura-mura kona ba ne'e, Jesus hateten ba sira: "Liafuan hirak ne'e la monu los ba imi nia laran? 63 Imi hare karik Oan Mane sa'e ba fatin nebe uluk Nia horik ba, sei sa'e oin sa los? 63 Espiritu mak halo moris; isin la folin buat ida; liafuan nebe Ha'u dehan ba imi mak espiritu no moris. 64 Maibe imi balun la fiar." Basa Jesus hatene houri uluk kedas sira nebe la fiar no se mak atu saran Nia ba mate. 65 Hafoin Nia dehan: "Tan ne'e mak Ha'u dehan ba imi katak ema ida la bele hakbesik mai Ha'u, wainhira Ha'u Aman dada nia." 66 Ne'e hotu tiha, Jesus nia eskolante barak fila kotuk hodi la tuir tan ona Nia. 67 Tuir mai, Jesus lia tun ba sira na'in sanulu resin rua: "Imi mos hakarak ba ona?" 68 Simao Pedro hatan ba Nia: "Na'i, ami atu ba los ho se? Ita mak iha liafuan moris rohan laek nian. 69 Ami fiar ona hodi hatene katak Ita mak Maromak nia Santu." 70 Jesus hateten fali ba sira: "La'os Ha'u rasik mak fihir imi na'in sanulu resin rua? Maibe imi ida diabu!" 71 Jesus koalia kona ba Judas, Simao Iscariotes nia Oan: basa nia, sira na'in sanulu resin rua ne'e ida, mak sei saran Nia ba mate.
Jesus sa'e ba Jerusalem hodi hanoin
7:1 Tuir mai, Jesus la'o iha Galileia; Nia la bele hela iha Judeia, basa Judeu sira hakarak oho Nia. 2 Festa Tabernakulu Judeu sira nian besik dau-daun ona. 3 Nia maun-alin sira hateten ba Nia: "Husik fatin ne'e hodi ba rai Judeia atu o nia eskolante sira bele hare hahalok sira nebe o halo. 4 Basa ema ida hakarak karik katak ema hotu hatene nia, nia la halo buat ida sub-subar deit. O halo ona buat sira ne'e, hatudu o nia an ba mundu!" 5 Lo-los, Nia maun-alin sira mos la fiar Nia. 6 Jesus hatan ba sira: "Ha'u nia tempu seidauk to'o, maibe ba imi nian iha nafatin. 7 Mundu la bele hakribi imi, maibe nia hakribi Ha'u tamba Ha'u fo sasin katak nia hahalok sira aat. 8 Imi sa'e ba festa ba. Ha'u la ba basa Ha'u nia tempu seidauk to'o lo-los." 9 Koalia nune'e hotu tiha, Nia hela iha Galileia. 10 Maibe wainhira Nia maun-alin ba tiha ona, Nia mos ba, maibe sub-subar deit. 11 Judeu sira buka Nia iha festa, dehan: "Nia iha nebe?" 12 Ema barak haksesuk malu kona ba Nia. Balun dehan: "Nia ema diak," sira seluk dehan: "Lae, Nia lori povu ba dalan sala." 13 Maibe ema ida la koalia mo-mos kona ba Nia tamba tauk Judeu sira. 14 Iha ona festa klaran mak Jesus sa'e ba templu hodi hahu hanorin. 15 Judeu sira hakfodak, dehan: "Nia la ba eskola, oin sa los Nia hetan matenek ne'e?" 16 Jesus hatan ba sira: "Ha'u nia doutrina la'os Ha'u nian, maibe mai housi Ida nebe haruka Ha'u mai. 17 Ema nebe hakarak tuir Nia hakarak, nia sei hatene Ha'u nia doutrina mai housi Maromak ka Ha'u koalia housi Ha'u nia An. 18 Ema nebe koalia housi nia an, nia buka nia rasik nia gloria; maibe ema nebe buka gloria ba ida nebe haruka nia, ema ne'e los, la iha lia bosok iha nia. 19 La'os Moises mak fo ukunfuan ba imi? Maibe imi ida la tuir ukunfuan! Tansa imi buka atu oho Ha'u?" 20 Sira hatan: "Diabu iha o nia laran! Se los mak buka atu oho o?" 21 Jesus dehan teni: "Ha'u halo hahalok ida deit, no imi hotu hakfodak. 22 Moises fo ba imi sirkunsisaun, nebe mai housi patriarka sira, la'os housi Moises, no imi halo sirkunsisaun iha loron Sabadu. 23 Ema ida simu karik sirkunsisaun iha loron Sabadu atu halo tuir Moises nia ukun fuan, tansa imi hirus Ha'u wainhira Ha'u halo ema nia isin tomak fali iha loron Sabadu? 24 Imi keta tesi tuir buat nebe bele hare, maibe tesi lia tuir justisa lo-los."
Ema sira haksesuk malu kona ba Jesus mai housi nebe
25 Iha Jerusalem ema balun hateten: "La'os ida ne'e mak ema buka atu oho? 26 Maibe Nia koalia iha ema hotu nia oin, no sira la dehan buat ida ba Nia. Keta na'i ulun sira hatene ona lo-los katak Nia mak Kristu karik? 27 Maibe ita hotu hatene ema ne'e mai housi nebe; wainhira Messias to'o, ema la hatene Nia mai housi nebe." 28 Tuir mai, wainhira Nia hanorin iha templu, Jesus dehan ho lia maka'as: "Imi hatene Ha'u, imi hatene mos Ha'u mai housi nebe? Maibe Ha'u la mai atu tuir Ha'u rasik nia hakarak. Maibe Ida nebe haruka Ha'u mai, Nia los; no imi la hatene Nia; 29 Ha'u hatene Nia, basa Ha'u mai housi Nia; Nia mak haruka Ha'u mai." 30 Sira hakarak kaer Nia, maibe ema ida la tau liman ba Nia, basa nia oras seidauk to'o.
Jesus fo sai katak Nia sei fila hikas mai
31 Maibe ema barak fiar Nia; sira dehan: "Wainhira Messias sei mai, Nia sei halo milagre barak fali ema ne'e nian?" 32 Fariseu sira rona katak ema lubun boot koalia nune'e, no am'lulik boot no fariseu sira haruka guarda sira atu kaer Nia. 33 Tuir mai Jesus dehan: "Ha'u sei hela ho imi uitoan tan deit; hafoin Ha'u sei fila fali ba Ida nebe haruka Ha'u mai, 34 imi sei buka Ha'u, maibe imi sei la hetan Ha'u, tan imi la bele ba iha fatin nebe Ha'u hela." 35 Judeu sira hateten ba malu: "Nia sei ba nebe, atu ita bele hetan Nia? Nia sei ba karik hamutuk ho ema gentiu sira nebe namkari lemo rai, hodi hanorin sira? 36 Nia liafuan hirak ne'e katak sa: ‘Imi sei buka Ha'u, maibe imi se la hetan Ha'u,' no ‘Imi la bele ba iha fatin nebe Ha'u hela'?"
Be nebe fo moris
37 Iha loron ikus, loron boot festa nian, Jesus hamriik hodi hateten ho lia maka'as: "Ema nebe hamrook, mai hakbesik Ha'u hodi hemu! 38 Ema nebe fiar Ha'u, nudar eskritura hateten tiha: ‘Housi nia fuan sei suli mota be moris nian." 39 Nia dehan ne'e kona ba Espiritu nebe sei haraik ba sira nebe fiar Nia. Espiritu seidauk fo ba ema, tamba Jesus la dauk simu gloria.
Ema haksesuk malu kona ba Jesus
40 Wainhira sira rona liafuan hirak ne'e, balun dehan: "Ema ne'e Profeta los duni." 41 Balun dehan fali: "Nia mak Messias." Maibe sira seluk hateten: "Messias bele mai housi Galileia? 42 Eskritura la dehan katak Kristu mak David nia bei-oan no mai housi Belem, David nia knua?" 43 Ne'e duni, sira haksesuk malu kona ba Nia. 44 Ema balun hakarak kaer Nia, maibe ema ida la tau liman ba Nia. 45 Guarda sira fila fali ba am'lulik boot no fariseu sira, nebe dehan ba sira: "Tansa imi la lori Nia mai?" 46 Guarda sira nia na'i ulun hatan: "Ema ida seidauk koalia hanesan ema ne'e!" 47 Fariseu sira husu fali ba sira: "Nia lori tiha mos imi ba dalan sala?" 48 Na'i ulun eh fariseu ruma fiar Nia karik? 49 Maibe ema lubun boot ne'e, nebe la hatene ukunfuan hetan malisan ba!" 50 Sira ida naran Nicodemos, nebe uluk ba koalia ho Nia, hateten ba sira: 51 "Ita nia ukunfuan fo kastigu ba ema ida, wainhira seidauk rona nia, seidauk hatene nia di-diak?" 52 Sira hatan, "O mos housi Galileia? Buka iha eskritura no o sei hare katak la iha profeta nebe mai housi Galileia." 53 Sira ida-ida fila ba uma.
Feto sala na'in
8:1 Maibe Jesus sa'e ba foho Oliveira. 2 Iha dader, Nia mosu fali iha templu. Povu tomak hakbesik Nia, no Jesus tur hodi hanorin sira. 3 Eskriba no fariseu sira lori feto ida nebe ema toman halo sala ho mane seluk. 4 Sira tau feto ne'e iha klaran, hodi dehan ba Jesus: "Mestre, ema toman feto ne'e halo sala ho mane seluk. 5 Tuir ukunfuan, Moises haruka ita atu tuda mate feto sira hanesan ne'e. O dehan sa los?" 6 Sira husu ne'e hodi koko Nia, atu sira bele hetan lia ruma hasouru Nia. Maibe Jesus hakru'uk, hodi hakerek iha rai ho nia liman fuan. 7 Tan sira litik nafatin Nia, Jesus hamriik hodi dehan ba sira: "Imi ida nebe sala la iha, nia mak tuda uluk feto ne'e!" 8 Hafoiin Nia hakru'uk fali hodi hakerek iha rai. 9 Rona tiha liafuan hirak ne'e, sira ida-ida sai dau-daun, hahu housi katuas sira. Ikus mai Jesus hela mesak ho feto nebe hamriik iha nia oin. 10 Hodi foti matan, Jesus dehan ba nia: "Feto, sira hotu ba nebe? Ema ida la tesi lia ba o?" 11 Nia hatan: "La iha, Na'i." Jesus koalia fali hodi dehan ba nia: "Ha'u mos la tesi lia hasouru o; la'o ona ba, no keta sala tan."
Jesus mak mundu nia naroman
12 Jesus koalia hikas ba sira nune'e: "Ha'u mak mundu nia naroman. Ema nebe tuir Ha'u, nia sei la la'o iha nakukun laran, maibe sei iha naroman moris nian." 13 Fariseu sira dehan ba Nia: "O fo sasin ba o nia an; O nia sasin la los."14 Jesus hatan ba sira, dehan: "Maski Ha'u fo sasin kona ba Ha'u An, Ha'u nia sasin los, tamba Ha'u hatene Ha'u mai housi nebe no Ha'u ba nebe; maibe imi la hatene Ha'u mai housi nebe no Ha'u ba nebe. 15 Imi tesi lia tuir isin nia hanoin. Ha'u la tesi lia kona ba ema ida 16 Maibe, Ha'u tesi lia mos karik, Ha'u nia lia los, tamba Ha'u la hela mesak. Ha'u hela ho Ida nebe haruka Ha'u mai. 17 Iha imi nia ukunfuan hakerek katak ema na'in rua nia sasin los. 18 Ha'u fo sasin kona ba Ha'u An; no Aman nebe haruka Ha'u mai, Nia mos fo sasin kona ba Ha'u." 19 Sira husu ba Nia: "O Nia Aman iha nebe?" Jesus hatan: "Imi la hatene Ha'u, la hatene mos Ha'u Aman. Imi hatene Ha'u karik, imi sei hatene mos Ha'u Aman." 20 Jesus hateten liafuan hirak ne'e besik osan fatin, wainhira Nia hanorin dau-daun iha templu. Maibe ema ida la kaer Nia, basa nia oras seidauk to'o.
Jesus la'os housi mundu ne'e
21 Jesus dehan fali ba sira: "Ha'u sei ba, imi sei buka Ha'u; maibe imi sei mate iha imi nia sala. Ba fatin nebe Ha'u ba, imi la bele ba." 22 Judeu sira hateten ba malu: "Nia atu oho an karik, tan ne'e Nia dehan: ‘Ba fatin nebe Ha'u ba, imi la bele ba?" 23 Jesus lia tun ba sira, dehan: "Imi mai housi kraik, Ha'u mai housi leten; imi mundu ne'e nian, Ha'u la'os mundu ne'e nian. 24 Ha'u dehan ba imi katak imi sei mate iha imi nia sala, basa imi la fiar karik katak Ha'u mak Nia, imi sei mate iha imi nia sala." 25 Sira husu ba Nia: "O se los?" Jesus hatan: "Ha'u hateten ona ba imi uluk kedas. 26 Ha'u sei iha buat barak atu koalia no tesi lia kona ba imi. Maibe ida nebe haruka Ha'u mai, Nia los; no Ha'u fo sai ba mundu buat nebe Ha'u rona housi Nia." 27 Sira la hatene katak Nia koalia ba sira kona ba Aman. 28 Ne'e duni, Jesus dehan: "Wainhira imi sei foti tiha Oan Mane, iha oras neba mak imi sei hatene katak Ha'u mak Nia, no katak Ha'u la halo buat ida hodi Ha'u rasik nia kbiit, maibe Ha'u koalia nune'e nudar Aman hanorin mai Ha'u. 29 Ida nebe haruka Ha'u mai hela ho Ha'u; Nia la husik Ha'u mesak basa Ha'u halo nafatin buat nebe fo ksolok ba Nia." 30 Jesus koalia nune'e hela, no ema barak fiar Nia
Jesus ho Abraao
31 Tuir mai Jesus dehan ba sira nebe fiar iha Nia: "Imi hela nafatin karik iha Ha'u nia liafuan, imi sei sai Ha'u nia eskolante lo-los; 32 no imi sei hatene lialos, no lialos sei soi imi." 33 Sira hatan: "Ami Abraao nia oan; ami la dauk sai ema ida nia atan. Nusa mak o dehan: ‘Imi sei hetan maksoin'?" 34 Jesus hatan ba sira : "Tebes, tebes, Ha'u dehan ba imi: ema nebe halo sala, ema ne'e sala nia atan. 35 Atan la horik nafatin iha uma; Oan Mane mak horik nafatin iha uma. 36 Ne'e duni, Oan Mane soi imi karik, imi sei hetan maksoin duni. 37 Ha'u hatene katak imi Abraao nia oan; maibe imi hakarak oho Ha'u basa Ha'u nia liafuan la monu ba imi nia laran. 38 Ha'u koalia kona ba buat nebe Ha'u hare iha Ha'u Aman; no imi fali halo buat nebe imi rona housi imi nia aman." 39 Sira hatan ba Nia: "Ami nia aman mak Abraao." Jesus hatan, "Imi Abraao nia oan sira karik, imi sei halo buat nebe nia halo, 40 maibe ohin imi hakarak oho Ha'u, nebe fo sai ba imi lialos nebe Ha'u rona housi Maromak. Abraao la halo buat ne'e! 41 Imi halo dau-daun imi aman rasik nia hahalok." Sira dehan fali ba Nia: "Ami la moris tan sala foer: ida deit mak ami nia Aman, katak Maromak." 42 Jesus hatan: "Maromak mak imi nia Aman karik, imi sei hadomi Ha'u, basa Ha'u sai no mai housi Maromak. Ha'u la mai hodi Ha'u nia hakarak rasik, maibe Nia mak haruka Ha'u mai. 43 Tansa mak imi la komprende buat nebe Ha'u hateten? Tamba imi la bele tahan atu rona Ha'u nia liafuan. 44 Tan diabu mak imi nia aman. imi hakarak tuir imi nia aman nia hakarak. Houri uluk kedas nia oho ema. Nia la hela iha lialos, basa la iha lialos iha nia. Wainhira nia bosok, nia fo sai buat nebe tuir nia an nian, basa nia bosokten no lia bosok nia aman. 45 Maibe tan Ha'u hateten lialos ba imi, imi la fiar. 46 Imi ida nebe mak bele dehan katak Ha'u sala? Ha'u hateten lialos karik ba imi tansa imi la fiar Ha'u? 47 Ema nebe mai housi Maromak, rona Maromak nia liafuan; imi la rona sira tamba imi la mai housi Maromak." 48 Judeu sira hatan ba Nia: "Ami la koalia los wainhira ami dehan katak O ema Samaritanu ida no diabu iha O nia laran?" 49 Jesus hatan: "Ha'u diabu la iha, maibe Ha'u hahi Ha'u nia Aman, no imi la hamtauk Ha'u. 50 Ha'u la buka naran boot ba Ha'u An. Iha Ida seluk nebe buka nia no Nia sei tesi lia. 51 Tebes, tebes, Ha'u dehan ba imi: Ema ida halo tuir karik Ha'u nia liafuan, nia sei la mate tinan ba tinan." 52 Judeu sira hateten ba Nia: "Oras ne'e ami hatene katak O iha diabu. Abraao mate tiha ona, profeta sira mos mate ona; maibe O dehan: ‘Ema nebe halo tuir Ha'u nia liafuan, nia sei la mate tinan ba tinan.' 53 O boot liu fali ami nia aman Abraao, nebe mate ona? Profeta sira mos mate. O halo an sa los?" 54 Jesus hatan: "Ha'u fo gloria ba Ha'u nia an karik, Ha'u nia gloria la folin buat ida; Ha'u nia Aman mak fo gloria mai Ha'u. Nia nebe imi bolu imi nia Maromak. 55 Maibe imi la hatene Nia, Ha'u mak hatene Nia. Ha'u dehan karik Ha'u la hatene Nia, Ha'u bosokten hanesan imi. Maibe Ha'u hatene Nia no Ha'u halo tuir nia liafuan. 56 Imi nia aman Abraao haksolok tan nia atu hare Ha'u nia loron; nia hare tiha ona hodi haksolok." 57 Judeu sira hateten ba Nia: "O seidauk tinan lima nulu, O hare ona Abraao?" 58 Jesus hatan ba sira: "Tebes, tebes, Ha'u dehan ba imi katak molok Abraao moris, Ha'u mak Ha'u." 59 Nune'e sira kaer fatuk atu tuda Nia, maibe Jesus la'o haksumik tiha, hodi sai housi templu.
Jesus bali ema matan delek
9:1 Jesus liu dau-daun, Nia hare ema nebe matan delek houri moris mai. 2 Eskolante sira husu ba Nia: "Na'i, se nia sala mak halo ema ne'e moris matan delek: nia sala ka nia aman sira nian?" 3 Jesus hatan ba sira: "Nia la sala, nia aman inan sira mos la sala; maibe, ne'e atu Maromak nia hahalok sira mosu iha nia. 4 Wainhira sei loron, Ha'u sei halo Ida nebe haruka Ha'u mai nia serbisu; kalan to'o mai wainhira ema ida la bele serbisu. 4 Wainhira Ha'u iha mundu, Ha'u mundu nia naroman." 6 Dehan tiha ne'e, Nia tafui ba rai halo tahu ho nia kaben, hafoin nia kose tahu ne'e ba matan delek ne'e nia matan 7 hodi dehan ba nia: "O ba fase iha pisina Siloe nian." Siloe katak "ida nebe ema haruka." Ne'e duni, nia ba fase; hafoin nia fila, hodi hare ona. 8 Ema sira nebe hela besik nia, no sira hotu nebe hare nia husu esmola, husu ba malu: "Ema ne'e la'os ida nebe tur husu esmola?" 9 Ema balun dehan: "Nia duni," seluk fali dehan: "La'os nia; ema ida hanesan nia!" Nia rasik dehan: "Ha'u duni!" 10 Sira husu ba nia: "Oin sa mak o nia matan nakloke?" 11 Nia hatan: "Ema ida naran Jesus halo tahu, kose ha'u nia matan hodi dehan: ‘Ba fase iha pisina Siloe.' Ha'u ba, fase tiha, no ha'u hare." 12 Sira husu tan: "Nia iha nebe?" Nia hatan: "Ha'u la hatene." 13 Sira lori ema nebe uluk matan delek ne'e ba fariseu sira. 14 Loron nebe Jesus halo tahu hodi loke nia matan ne'e, loron Sabadu ida. 15 Fariseu sira husu ba nia oin sa nia hahu hare. Ema ne'e dehan ba sira: "Nia tau tahu ba ha'u nia matan, hafoin ha'u ba fase; oras ne'e ha'u hare." 16 Fariseu balun dehan: "Ema ne'e la mai housi Maromak, basa nia la halo tuir Sabadu." Balun dehan: "Oin sa mak ema maksalak ida bele halo milagre ida hanesan ne'e?" Sira nia lia la tuir malu. 17 Sira husu fali ba ema matan delek ne'e: "O dehan sa kona ba ema nebe loke o nia matan?" Nia hatan: "Ema ne'e Profeta ida." 18 Maibe Judeu sira la fiar katak ema ne'e uluk matan delek, hafoin hahu hare. Tan ne'e, sira bolu nia aman inan, 19 hodi husu ba sira: "Ida ne'e mak imi nia oan nebe imi dehan katak moris mai matan delek? Nusa mak oras nia bele hare?" 20 Nia aman inan hatan: "Ami hatene katak ida ne'e ami nia oan nebe moris mai matan delek, 21 maibe halo nusa mak oras ne'e nia hare, se mak loke nia matan, ne'e ami la hatene. Nia iha otas ona: imi husu nia ba, nia rasik sei koalia." 22 Nia aman inan koalia hanesan ne'e, tan sira tauk Judeu sira. Basa Judeu sira lia tuir malu ona katak ema ruma karik hateten katak Jesus mak Messias, sira sei duni sai nia housi sinagoga. 23 Tan ne'e, mak nia aman inan dehan: "Nia iha otas ona, imi husu nia ba." 24 Sira bolu ema nebe uluk matan delek dala ida tan, hodi dehan ba nia: "O hahi Maromak ba! Ami hatene katak ema ne'e ema maksalak." 25 Nia hatan: "Nia ema maksalak ka lae, ha'u la hatene. Ha'u hatene deit katak, uluk ha'u matan delek, oras ne'e ha'u hare." 26 Sira husu ba nia: "Nia halo sa ida ba o? Oin sa mak nia loke o nia matan?" Nia hatan: "Ha'u dehan ona ba imi, imi la rona; tansa imi hakarak rona hikas? Imi mos hakarak sai nia eskolante, ka?" 28 Sira hateten ba nia: "O mak nia eskolante; ami Moises nia eskolante sira. 29 Ami hatene katak Maromak koalia ba Moises; maibe ida ne'e ami la hatene Nia mai housi nebe!" 30 Ema ne'e dehan fali ba sira: "Ne'e mak halo ema hakfodak, katak imi la hatene Nia mai housi nebe, maibe Nia loke ha'u nia matan. 31 Ita hatene katak Maromak la rona ema maksalak sira, maibe Nia rona ema nebe adora Maromak no halo tuir nia hakarak. 32 Houri uluk seidauk rona ema ida loke matan ba ema nebe matan delek houri loron nia moris! 33 Nia la mai karik housi Maromak, Nia la bele halo buat ida." 34 Sira hatan: "O moris iha sala nia laran, o hakarak hanorin fali ami?" Hafoin sira duni sai nia. 35 Jesus rona katak sira duni sai nia; hetan tiha nia, Jesus dehan ba nia: "O fiar Oan Mane?" 36 Nia hatan: "Nia se los, Na'i, atu ha'u fiar nia?" 37 Jesus dehan: "O hare tiha ona Nia: Nia mak koalia dau-daun ho o." 38 Ema ne'e dehan: "Ha'u fiar, Na'i!" Hafoin nia hakneak iha Jesus nia futar oin, hodi adora Nia. 39 Jesus lia tun ba nia: "Ha'u mai iha mundu atu tesi lia, atu sira nebe la hare bele hare, no sira nebe hare, sira nia matan sai delek." 40 Rona liafuan hirak ne'e, fariseu balun nebe iha neba husu ba Nia: "Ne'e duni, ami mos matan delek?" 41 Jesus hatan ba sira: "Imi matan delek karik, imi la sala. Maibe tamba imi dehan ‘ami hare' mak imi nia sala hela nafatin."
Bibi-atan diak
10:1 Tebes, Ha'u dehan ba imi: ida nebe la tama ba bibi luhan housi lutu matan maibe tama housi fatin seluk, ema ne'e na'okten ida. 2 Maibe ida nebe tama housi lutu matan, nia mak bibi atan. 3 Nia bolu bibi sira hodi sira nia naran, sira rona nia lia, hafoin nia lori sira ba liur. 4 Hasai hotu tiha nia bibi sira, nia ba uluk; bibi sira tuir nia, tan sira hatene nia lia. 5 Maibe bibi la tuir ema leet ida; sira halai housi nia, tan sira la hatene ema ne'e nia lia." 6 Ne'e mak aiknanoik nebe Jesus hateten ba sira; maibe sira la komprende lo-los Jesus koalia kona ba sa. 7 Ne'e duni Jesus dehan teni ba sira: "Tebes, tebes, Ha'u dehan ba imi: Ha'u mak bibi sira nia lutu matan. 8 Ema hotu nebe mai uluk liu Ha'u, mesak na'okten no ahu-na'in sira; bibi sira la rona sira nia lia. 9 Ha'u mak lutu matan. Ida nebe liu housi Ha'u sei hetan diak; nia sei tama, sei sai, hodi hetan du'ut matak. 10 Ema na'okten mai atu na'ok, atu harahun deit. Ha'u mai atu ema hetan moris, hodi hetan moris ne'e wa'in liu tan. 11 Ha'u mak bibi atan diak. Bibi-atan diak saran nia moris ba nia bibi sira. 12 Maibe ema nebe la'os bibi atan, la'os bibi na'in, hare tiha asu fuik mai, nia halai hodi soe bibi sira, nebe asu fuik kaer hodi halo namkari. 13 Tan nia ema kontratu, la tau matan ba bibi sira. 14 Ha'u mak bibi atan diak, Ha'u hatene Ha'u nia bibi sira, no Ha'u nia bibi sira hatene Ha'u. 15 Nudar Aman hatene Ha'u, nune'e mos Ha'u hatene Aman; no Ha'u saran Ha'u nia moris ba Ha'u nia bibi sira. 16 Ha'u sei iha tan bibi seluk nebe seidauk tama iha bibi luhan ida ne'e. Ha'u sei dada mos sira mai. Sira sei rona Ha'u nia lia, no sei iha bibi luhan ida deit ho bibi atan ida deit. 17 Aman hadomi Ha'u tamba Ha'u saran Ha'u nia moris atu simu fali nia. 18 Ema ida la hasai Ha'u nia moris housi Ha'u; hodi Ha'u rasik nia hakarak mak Ha'u saran moris ne'e. Ha'u iha kbiit atu saran Ha'u nia moris, no mos iha kbiit atu simu fali nia. Ida ne'e mak ukunfuan nebe Ha'u simu housi Ha'u Aman." 18 Dala ida tan Judeu sira haksesuk malu tamba liafuan hirak ne'e. 20 Sira barak dehan: "Diabu iha nia laran, Nia bulak: tansa imi rona Nia?" 21 Balun fali dehan: "Ema nebe iha diabu iha nia laran la koalia hanesan ne'e, diabu bele loke karik matan delek nia matan?"
Jesus fo sai katak nia Maromak Oan. Judeu sira hakribi nia.
22 Iha Jerusalem sira halo dau-daun festa dedikasaun templu nian iha tempu malirin. 23 Iha templu, Jesus la'o iha portiku Salomao nian. 24 Judeu sira halibur hamutuk ho Nia hodi husu ba: "To'o wainhira O sei husik ami iha nakukun laran? O mak Kristu karik, hateten los kedas mai ami." 24 Jesus hatan ba sira: "Ha'u hateten ona ba imi, maibe imi la fiar. Hahalok sira nebe Ha'u halo hodi Ha'u Aman nia naran fo sasin kona ba Ha'u, 26 maibe imi la fiar, basa imi la'os Ha'u nia bibi sira. 27 Ha'u nia bibi sira rona Ha'u nia lia; Ha'u hatene sira, no sira tuir Ha'u. 28 Ha'u fo ba sira moris rohan laek. Sira la lakon, no ema ida sei la bele hadau sira housi Ha'u nia liman. 29 Ha'u Aman, nebe fo sira mai Ha'u, Nia boot liu ema hotu; no ema ida sei la bele hadau sira housi Aman nia liman. 30 Aman ho Ha'u ida deit." 31 Dala ida tan Judeu sira kaer fatuk atu tuda Jesus. 32 Nia dehan ba sira: "Ha'u hatudu ona ba imi hahalok diak barak nebe mai housi Aman: tan hahalok ida nebe mak imi tuda Ha'u?" 33 Judeu sira hatan ba Nia: "Ami la tuda o tamba hahalok diak ruma, maibe tamba o koalia aat Maromak; tamba maski o ema deit, o halo an Maromak." 34 Jesus husu sira: "La hakerek iha imi nia eskritura, ‘ha'u dehan, imi sira ne'e maromak'? 35 Ne'e duni, eskritura hanaran ‘maromak' ema sira nebe Maromak nia liafuan to'o tiha, no ema ida la bele halakon eskritura, 36 maibe ba Ida nebe Aman halo santu hodi haruka ba mundu, imi dehan ‘O koalia aat Maromak; tamba Ha'u dehan ‘Ha'u Maromak nia Oan'? 37 Ha'u la halo karik Ha'u Aman nia hahalok, imi keta fiar Ha'u. 38 Maibe, Ha'u halo karik, maski imi lakohi fiar Ha'u, imi fiar Ha'u nia hahalok sira, atu imi bele hatene no komprende katak Aman hela iha Ha'u no Ha'u iha Aman." 39 Tuir mai, sira buka atu kaer Jesus, maibe Nia halai housi sira nia liman. 40 Nia fila fali ba mota Jordao nia sorin balun, fatin iha nebe uluk Joao sarani ema, hodi hela iha neba. 41 Ema barak mai hakbesik Nia, dehan: "Tebes, Joao la halo sinal ida, maibe buat hotu nebe Joao dehan kona ba ema ne'e, los duni." 42 No ema barak iha neba fiar Nia.
Lazaro moris hi'as
11:1 Iha tempu neba, ema ida moras, naran Lazaro; nia ema Betania, knua ida Maria ho nia bin Marta nian. 2 Maria ne'e, mak tau mina morin ba Na'i, hodi hamaran Jesus nia ain ho nia fuuk. Nia maun Lazaro mak moras. 3 Nia feto sira haruka fo hatene ba Jesus: "Na'i, ida nebe Ita hadomi moras." 4 Rona tiha ne'e, Jesus dehan: "Moras ne'e la'os atu mate; maibe atu fo gloria ba Maromak, hodi halo ema fo gloria ba Maromak Oan." 5 Jesus ho Marta, nia alin, no Lazaro, sira belun boot. 6 Maibe, rona tiha katak Lazaro moras, Nia hela tan loron rua iha neba. 7 Liu tiha ne'e, Nia dehan ba eskolante sira: "Ita ba fali Judeia." 8 Eskolante sira hateten Nia: "Mestre foin dau-daun Judeu sira buka atu tuda mate Ita, Ita sei hakarak fila fali ba neba? 9 Jesus hatan, dehan: "La'os loron ida iha oras sanulu resin rua? Ema nebe la'o iha loron la sidi, basa hare naroman mundu ne'e nian; 10 maibe nia la'o karik iha kalan, nia sidi, basa naroman la iha." 11 Koalia tiha nune'e, Nia dehan tan: "Ita nia belun Lazaro toba; Ha'u ba atu fanu nia." 12 Eskolante sira dehan: "Na'i, nia toba karik, nia sei diak fali." 13 Jesus koalia kona Lazaro nia mate, maibe sira hanoin katak Jesus dehan Lazaro dukur deit. 14 Tan ne'e, Jesus dehan sai mo-mos: "Lazaro mate tiha ona. 15 Ha'u haksolok tamba Ha'u la iha neba atu imi bele fiar. Ita ba hare nia." 16 Tome, ida nebe ema hanaran Kaduak, dehan ba nia maluk sira: "Ita mos ba atu mate hamutuk ho nia." 17 To'o tiha neba, Jesus hetan nia belun ema hakoi liu tiha loron haat. 18 Betania besik Jerusalem kala kilometru tolu. 19 Judeu barak ba hare Marta no Maria atu fo ksolok tamba sira nia maun mate. 20 Rona katak Jesus to'o dau-daun, Marta sai ba hasouru Nia. Maria tur hela iha uma. 21 Marta dehan ba Jesus: "Na'i, Ita iha ne'e karik, Ha'u nia maun la mate! 22 Maibe oras ne'e mos Ha'u hatene katak Maromak sei haraik ba Ita buat nebe Ita husu ba Nia." 23 Jesus hatan ba nia: "O nia maun sei moris hi'as." 24 Marta simu: "Ha'u hatene katak nia sei moris hi'as iha loron ikus." 25 Jesus dehan teni ba nia: "Ha'u ne'e moris hi'as no moris. Ema nebe fiar Ha'u, maski mate ona, nia sei moris. 26 Ema hotu nebe moris hodi fiar Ha'u, nia sei la mate tan. O fiar lia ne'e?" 27 Marta dehan: "Ha'u fiar, Na'i; Ha'u fiar katak Ita mak Messias, Maromak Oan, nebe atu mai iha mundu." 28 Dehan tiha ne'e, Marta bolu nia alin Maria, hodi dehan sub-subar: "Mestre iha ne'e, Nia bolu o." 29 Rona tiha ida ne'e, Maria hamriik kedas hodi ba buka Jesus. 30 Jesus seidauk tama iha knua; Nia sei hela iha fatin nebe Marta hasouru Nia. 31 Wainhira Judeu sira nebe hamutuk ho Maria iha uma hodi fo ksolok hare nia hamriik no sai lalais, sira tuir nia, tan hanoin katak sira ba tanis iha rate. 32 To'o tiha iha fatin nebe Jesus hela ba, hodi hare Nia, Maria monu ba Jesus nia ain, dehan: "Na'i, Ita iha ne'e karik, Ha'u nia maun la mate!" 33 Hare tiha nia tanis, no mos hare Judeu sira nebe mai ho nia tanis hotu, Jesus nia laran taridu teb-tebes, neon susar, tan hanoin. 34 Hafoin Nia husu: "Imi tau nia iha nebe?" Sira hatan: "Ita mai hare, Na'i." 35 Jesus tanis. 36 Judeu sira dehan: "Hare ba oin sa Na'i hadomi nia!" 37 Maibe balun dehan fali: "Nia nebe loke matan delek nia matan, la bele halo ema ne'e keta mate?" 38 Nia laran taridu dala ida tan, Jesus hakbesik ba rate. Rate ne'e, fatuk kuak ida nebe taka hela ho fatuk boot ida. 39 Jesus dehan: "Imi hasai tiha fatuk." Marta, matebian nia feton, hatan: "Iis ona, Na'i; loron hat ona" 40 Jesus dehan: Ha'u la dehan ba o katak o fiar karik, o sei hare Maromak nia gloria?" 41 Sira hasai fatuk. Jesus foti matan ba lalehan, dehan: "Aman, Ha'u fo agradese ba Ita Boot tan Ita rona Ha'u." 42 Ha'u hatene nanis ona katak Ita rona Ha'u nafatin; maibe Ha'u koalia nune'e tamba povu nebe hale'u Ha'u, atu sira fiar katak Ita haruka Ha'u mai." 43 Dehan tiha ne'e, Nia foti lia maka'as, dehan: "Lazaro, sai mai liur!" 44 Matebian sai mai ho liman no ain falun tiha ho hena. Nia oin taka ho lensol ida. Jesus dehan ba sira: "Kore tiha nia, hodi husik nia la'o ba."
Na'i ulun sira futu lia atu oho Jesus
45 Hare tiha buat nebe Jesus halo, Judeu barak nebe ba hare Maria, fiar Nia, 46 maibe sira balun ba fo hatene ba fariseu sira buat nebe Jesus foin halo. 47 Amlulik sira nia na'i ulun no fariseu sira halibur hamutuk hodi dehan: "Ita atu halo sa los tan ema ne'e halo milagre barak? 48 Ita husik nia karik, ema hotu sei fiar Nia, hafoin Romano sira sei mai sobu rahun ita nia templu ho nasaun tomak." 49 Maibe sira ida, naran Kaifas, am'lulik boot ba tinan neba, hateten ba sira: "Imi la hatene buat ida! 50 Imi la hatene katak, diak liu ba imi ema ida deit mak mate, liu fali povu tomak terus!" 51 Nia la dehan ne'e tan nia an rasik, maibe tamba nia mak am'lulik boot iha tinan ne'e, nia si'ik katak Jesus sei mate tan nasaun 52 no la'os ba nasaun deit, maibe atu halibur hamutuk ho neon ida deit Maromak nia oan sira nebe namkari lemo rai. 53 hahu housi loron ne'e, sira futu lia atu oho Nia. 54 Tan ne'e, Jesus la la'o ona iha Judeu sira nia leet. Nia husik rai ne'e ba sidade Efraim, besik rai fuik maran, hodi hela iha neba ho nia eskolante sira. 55 Paskua Judeu sira nian besik ona. Ema barak sa'e ba Jerusalem housi rai atu hamos an ba festa. 56 Sira buka Jesus hodi dehan ba malu: "Imi hanoin sa? Imi hanoin katak Nia sei mai iha festa?" 57 Am'lulik boot no fariseu sira fo ordem atu ema nebe hatene Nia iha nebe, fo hatene. atu sira bele kaer Nia.
Mina morin ba Jesus iha Betania
12:1 Loron neen molok festa Paskua, Jesus ba Betania. Lazaro nebe Jesus halo moris hi'as housi mate horik iha neba. 2 Sira fo han Jesus. Lazaro han hamutuk ho Nia. Marta serbi meja. 3 Maria fali hola mina morin buli ida ho folin boot hodi fase no hamaran Jesus nia ain ho fuuk, to'o mina morin nia iis hamorin uma laran tomak. 4 Eskolante sira ida, Judas Iscariotes. Simao nia oan, ida nebe atu saran Nia ba mate. husu: 5 "Tansa ita la fa'an mina morin ne'e ba denariu atus tolu, hodi fo osan ba ema kiak sira?" 6 Nia hateten buat ne'e la'os tan hanoin kiak sira, maibe tamba nia na'okten ida; dala barak nia foti housi sira hotu nia osan. nebe nia rai. 7 Jesus dehan: "Husik nia halo nune'e, hodi hanoin loron atu hakoi Ha'u. 8 basa kiak sira sei hela nafatin iha imi nia leet, maibe Ha'u sei la hela nafatin ho imi" 9 Rona tiha katak Nia iha neba, Judeu barak mai, la'os deit tamba Jesus, maibe mos atu hare Lazaro, nebe Nia halo moris hi'as housi mate. 10 Amlulik boot sira futu lia atu oho mos Lazaro, 11 tamba hodi nia ema barak husik sira no fiar Jesus.
Jesus tama iha Jerusalem
12 Liu tiha loron ida, ema lubun boot nebe ba festa rona katak Jesus hakbesik dau-daun ba Jerusalem. 13 Sira kaer ramos sanak sira no ba hasouru Nia, hodi haklalak: "Osana! Rahun diak ba Ida nebe mai hodi Na'i nia naran, Israel nia Liurai!" 14 Jesus hetan kuda burro oan ida hodi sa'e, nudar hakerek: 15 "Keta tauk, Siao nia oan feto; hare ba, o nia liurai to'o mai, sa'e kuda burro oan ida." 16 Uluk eskolante sira la komprende buat ne'e; maibe wainhira Jesus simu ona gloria. mak sira hanoin fali katak ne'e hakerek tiha ona kona ba Nia. no katak sira halo tiha nune'e ba Nia. 17 Ema barak nebe hamutuk ho Jesus wainhira Nia bolu Lazaro sai housi rate hodi halo nia moris hi'as housi mate, fo sasin kona ba Nia. 18 Ema barak ba hasouru Nia tan sira rona katak Nia halo milagre ne'e. 19 Ne'e duni, fariseu sira hateten ba malu: "Hare ba, imi la bele halo buat ida; mundu tomak tuir Nia!"
Jesus fo sai kona ba nia mate
20 Sira nebe ba adora iha loron festa, balun ema Gregu. 21 Sira ne'e hakbesik ba Filipe, ida nebe mai housi Betsaida iha Galileia, hodi dehan ba nia: "Na'i, ami hakarak hare Jesus." 22 Filipe ba dehan ba Andre; hafoin Filipe ho Andre hato'o ba Jesus. 23 Jesus hatan ba sira dehan: "Loron to'o ona atu Oan Mane simu gloria. 24 Tebes, tebes, Ha'u dehan ba imi: trigu musan nebe monu ba rai la mate karik, nia hela mesak; maibe mate karik, nia fo fulin barak. 25 Ema nebe hadomi nia moris, sei lakon nia moris ne'e; ema nebe hewai nia moris iha mundu ne'e sei rai hela nia ba moris rohan laek. 26 Ema nebe serbi Ha'u, sei tuir Ha'u; no iha fatin nebe Ha'u hela, Ha'u atan mos sei hela neba. Ema nebe serbi Ha'u, Ha'u Aman sei hahi nia." 27 "Oras ne'e Ha'u neon sala: Ha'u sei dehan los sa ida? ‘Aman, hadook tiha Ha'u housi oras ne'e?' Lae; tan ne'e duni mak Ha'u mai to'o oras ne'e. 28 Aman hahi Ita naran!" Lia ida mai housi lalehan, dehan: "Ha'u hahi tiha ona Nia, no Ha'u sei hahi tan Nia!" 29 Ema lubun boot nebe hamriik iha neba rona lia ne'e no sira dehan katak ne'e rai tarutu ida. Balun dehan: "Anju ida mak koalia ba Nia." 30 Jesus hatan: "La'os tan Ha'u mak lia ne'e mosu, maibe tan imi. Ohin mak tesi lia ba mundu; ohin mos mak sei duni sai ona liurai mundu ne'e nian. 32 Wainhira ema foti Ha'u housi rai, Ha'u sei dada ema hot-hotu mai Ha'u." 33 Nia koalia hanesan ne'e atu hatudu oin sa Nia sei mate. 34 Ema barak hateten fali ba Nia: "Ami rona housi eskritura katak Kristu sei hela ba nafatin; oin sa mak o dehan katak ema sei foti Oan Mane? Se los mak Oan Mane ne'e?" 35 Jesus hatan ba sira: "Naroman sei hela tan ho imi tempu uitoan deit. Imi la'o ba wainhira naroman sei hela ho imi keta nakukun ukun imi; basa ema nebe la'o iha nakukun laran la hatene nia ba nebe. 36 Wainhira naroman sei hela ho imi, imi fiar naroman ba, atu imi sai naroman nia oan sira." Koalia tiha nune'e, Jesus hadook An hodi subar housi sira.
Judeu sira la fiar Jesus
37 Maski Jesus halo milagre barak iha sira nia oin, sira la fiar Nia, 38 atu halo tuir Profeta Isaias nia liafuan nebe dehan: "Na'i, se los mak fiar ami nia liafuan? Ba se los mak Na'i hatudu nia liman?" 39 Tan ne'e, sira la bele fiar, basa Isaias dehan: 40 "Nia halo tiha sira matan delek no laran tos, keta sira hare ho sira nia matan no hatene lo-los ho sira nia fuan, nune'e sira fila mai Ha'u hodi hetan isin diak." 41 Isaias koalia nune'e tan nia hare Nia gloria no koalia kona ba Nia. 42 Na'i ulun barak fiar Nia, maibe tan sira tauk fariseu sira, sira la fo sasin, keta ema duni sai sira housi sinagoga, 43 basa sira hadomi gloria housi ema liu fali gloria housi Maromak. 44 Jesus dehan tan ho lia maka'as: "Ema nebe fiar Ha'u, la fiar Ha'u maibe ida nebe haruka Ha'u mai. 45 No ema nebe hare Ha'u, hare Ida nebe haruka Ha'u mai. 46 Ha'u mai iha mundu nudar naroman, atu ema nebe fiar Ha'u la bele hela iha nakukun laran. 47 Ema ida rona karik Ha'u nia liafuan maibe la halo tuir nia, Ha'u la tesi lia hasouru nia; basa Ha'u la mai atu tesi lia hasouru mundu, maibe atu soi mundu. 38 Ema nebe hakribi Ha'u hodi la simu Ha'u nia liafuan, nia iha ona ida nebe sei tesi lia hasouru nia: Ha'u nia liafuan mak sei tesi lia hasouru nia iha loron ikus. 49 Basa Ha'u la koalia hodi Ha'u nia kbiit rasik; maibe Aman nebe haruka Ha'u mai, Nia mak haruka Ha'u atu koalia sa los, no atu dehan sa. 50 No Ha'u hatene katak Nia ukunfuan mak moris rohan laek. Ne'e duni, Ha'u koalia nudar Aman haruka Ha'u."
Jesus fase eskolante sira nia ain
13:1 Molok tama ba festa Paskua, wainhira Jesus hatene ona katak Nia oras to'o ona atu husik mundu ne'e hodi liu ba Aman, no hadomi tiha nia doben sira nebe hela iha mundu, Nia hadomi sira to'o rohan 2 Sira sei han hela, diabu hatama tiha ba Judas Iscariotes nia ulun atu saran Jesus ba mate. 3 Hatene tiha ona katak Aman saran tiha buat hotu iha Nia liman, no katak Nia mai housi Maromak no sei fila hikas ba Maromak, 4 Jesus hamriik, kolu nia unuk no hola hena mutin naruk ida hodi kesi ba nia knotak. 5 Tuir mai, Nia tau be iha basia ida no hahu fase apostolu sira nia ain, hodi hamaran sira ho hena mutin bobar hela iha nia knotak. 6 Nia to'o ba Simao Pedro nebe dehan: "Na'i, Ita atu fase atan Ha'u nia ain?" 7 Jesus hatan ba nia: "Oras ne'e o la bele komprende buat nebe Ha'u halo dau-daun. Ikus mai o sei hatene." 8 Pedro simu: "Lae, ba nafatin Ita sei la fase ha'u nia ain!" Jesus dehan fali ba nia: "Ha'u la fase o nia ain karik, o sei la hela hamutuk ho Ha'u." 9 Simao Pedro hasa'e fali lia ba Jesus, dehan: "Ne'e sa, Na'i, fase ha'u ain; fase mos ha'u liman no oin." 10 Jesus lia tun hikas ba nia, dehan: "Ema nebe haris tiha ona sei fase deit ain, tan nia isin mos ona. Imi mos tiha ona; maibe la'os imi hotu." 11 Jesus hatene se los mak sei saran Nia ba mate; tan ne'e Nia dehan: "Imi mos ona maibe la'os imi hotu." 12 Fase hotu tiha sira nia ain, no hola tiha nia unuk, Nia fila ba nia fatin. Jesus dehan ba sira: "Imi hatene Ha'u halo sa los ba imi? 13 Imi bolu Ha'u Mestre no Na'i; imi los, Ha'u nune'e duni. 14 Ne'e duni, Ha'u nebe Na'i no Mestre fase karik imi nia ain, imi mos sei fase nia ain ba malu. 15 Basa Ha'u fo esemplu ba imi, atu imi banati tuir nudar Ha'u foin halo ba imi. 16 Tebes, tebes, Ha'u dehan ba imi: ‘Atan ida la sai boot liu fali nia na'i; nia la boot liu fali ida nebe haruka nia.' 17 Imi hatene buat ne'e karik, rahun diak ba imi wainhira imi halo tuir. 18 Ha'u la koalia kona ba imi hotu; Ha'u hatene Ha'u fihir se. Maibe eskritura ne'e sei sai los: ‘Ema nebe han paun hamutuk ho Ha'u, foti ona nia ain tuban hasouru Ha'u.' 19 Ha'u dehan buat hirak ne'e kedas ba imi, molok nia mosu atu wainhira buat ne'e mosu duni, imi bele fiar katak Ha'u mak Ha'u. 20 Tebes, tebes, Ha'u hateten ba imi: ema nebe simu ida naran deit nebe Ha'u haruka simu Ha'u; no ida nebe simu Ha'u, simu Ida nebe haruka Ha'u mai."
Jesus fo sai kona ba Judas
21 Dehan tiha ne'e hotu, Jesus nia laran taridu hodi fo sasin: "Tebes, tebes, Ha'u dehan ba imi katak imi ida sei saran Ha'u." 22 Eskolante sira hateke ba malu hodi hanoin Nia koalia kona ba se los. 23 Eskolante ida nebe Jesus hadomi tur besik nia sorin. 24 ne'e duni, Simao Pedro halo sinal ida ba nia, dehan: "Husu to'ok , Nia dehan se los!" 25 Nia sader ba Jesus nia hirus matan hodi husu: "Se los, Na'i?" 26 Jesus hatan: "Nia mak ida nebe Ha'u sei fo paun nebe Ha'u sei habokon." Hafoin, habokon tiha paun baluk ida, Nia fo ba Judas, Simao Iscariotes nia oan. 27 Paun simu tiha, diabu tama iha Judas nia laran. Jesus dehan ba nia: "Buat nebe o atu halo, halo lalais ba!" 28 Sira nebe tur iha meja la hatene tansa Jesus dehan nune'e ba nia. 29 Tamba Judas kaer kohe osan nian, sira balun hanoin katak Jesus dehan ba nia: "O ba sosa buat nebe ita kuran ba festa;" eh haruka nia fo esmola ba ema kiak sira. 30 Simu tiha paun baluk ne'e, Judas sai kedas. Kalan ona.
Ukunfuan foun
31 Judas sai tiha, Jesus dehan: "Ohin Oan Mane simu gloria, no Maromak sei simu gloria iha Nia. 32 Maromak simu karik gloria iha Oan Mane, Maromak mos sei fo gloria ba Nia iha Nia An rasik no sei fo gloria kedas ba Nia. 33 Kosok oan sira, tempu uitoan deit ona mak Ha'u sei hela ho imi. Imi sei buka Ha'u, no hanesan Ha'u dehan ona ba Judeu sira, ohin Ha'u dehan ba imi: ‘Ba fatin nebe Ha'u sei ba, imi la bele ba.' 34 Ha'u fo ba imi ukunfuan foun: imi sei hadomi malu; nudar Ha'u hadomi imi, nune'e mos imi sei hadomi malu. 35 Nune'e mak ema hotu sei hatene katak imi Ha'u nia eskolante sira: wainhira imi hadomi malu." 36 Simao Pedro dehan ba Jesus: "Na'i, Ita ba nebe?" Jesus hatan: "Ohin o la bele tuir Ha'u ba fatin nebe Ha'u ba, maibe o sei tuir aban bainrua." 37 Pedro simu dehan: "Na'i, tansa ha'u la bele tuir Ita ohin? Ha'u sei saran ha'u nia moris tamba Ita!" 38 Jesus lia tun fali ba nia: "O sei saran o nia moris tamba Ha'u? Tebes, tebes, Ha'u dehan ba o katak molok manu kokorek, o sei heli Ha'u dala tolu."
Jesus ba hadia fatin ba nia eskolante sira
14:1 "Imi laran keta taridu resin. Imi fiar Maromak, fiar mos Ha'u. 2 Iha Ha'u Aman nia uma iha fatin wa'in. Lae karik, Ha'u la dehan ba imi, ‘Ha'u ba hadia fatin ba imi.' 3 Wainhira Ha'u ba ona hodi hadia fatin ba imi, Ha'u sei fila hikas mai hodi lori imi ho Ha'u; nune'e, iha fatin nebe Ha'u hela, imi mos sei iha neba ba. 4 Ba fatin nebe Ha'u atu ba, imi hatene ona dalan." 5 Tome dehan ba Nia: "Na'i, ami la hatene Ita ba los nebe; oin sa ami bele hatene dalan?" 6 Jesus hateten ba nia: "Ha'u ne'e dalan, lialos no moris. Ema ida la liu karik housi Ha'u, nia la bele hakbesik Ha'u Aman. 7 Imi hatene ona Ha'u karik, imi hatene ona mos Ha'u Aman. Houri ohin ba oin, imi hatene ona Nia, no imi hare ona Nia." 8 Filipe husu ba Nia: "Na'i , hatudu Aman mai ami; ne'e to'o ona mai ami." Jesus dehan ba nia: 9 "Ha'u hela kleur ona ho imi, Filipe, imi seidauk hatene Ha'u? Ema nebe hare ona Ha'u, hare ona mos Ha'u Aman. Nusa mak o dehan, ‘Hatudu Aman mai ami?' 10 Imi la fiar katak Ha'u hela iha Aman no Aman hela iha Ha'u? Liafuan hirak nebe Ha'u dehan ba imi, Ha'u la dehan hodi Ha'u an rasik. Ha'u Aman, nebe hela iha Ha'u, mak halo Nia hahalok. 11 Fiar Ha'u katak hela iha Aman, no Aman hela iha Ha'u. Lae karik, fiar Ha'u tamba hahalok hirak ne'e. 12 Tebes, tebes, Ha'u dehan ba imi: ema nebe fiar iha Ha'u sei halo mos hahalok sira nebe Ha'u halo; nia sei halo hahalok boot liu fali hirak ne'e, tan Ha'u ba Aman. 13 Buat nebe imi husu hodi Ha'u nia naran, Ha'u sei halo, atu Aman hetan gloria iha Oan; 14 imi husu karik buat ida hodi Ha'u nia naran, Ha'u sei halo." 15 "Imi hadomi Ha'u karik, imi sei halo tuir Ha'u nia ukunfuan sira. 16 Ha'u sei harohan ba Aman; no Nia sei fo ba imi Mahein seluk ida, atu hela nafatin ho imi. 17 Nia mak Espiritu lialos nian, nebe mundu la bele simu, basa la hare Nia no la hatene Nia. Imi hatene Nia, tan Nia hela ho imi, no iha imi laran. 18 Ha'u sei la husik imi oan kiak; Ha'u sei fila fali ba imi. 19 Uitoan tan, mundu sei la hare ona Ha'u; maibe imi sei hare Ha'u; basa Ha'u moris no imi mos sei moris 20 Iha loron neba, imi sei hatene katak Ha'u hela iha Aman, no imi iha Ha'u, no Ha'u iha imi. 21 Ema nebe simu hodi halo tuir Ha'u nia ukunfuan, nia mak hadomi Ha'u; no ema nebe hadomi Ha'u, Ha'u Aman sei hadomi nia; no Ha'u sei hadomi nia hodi hatudu Ha'u An ba nia." 22 Judas, la'os Iscariotes, hateten ba Nia: "Na'i, tansa ita atu hatudu An ba ami, la'os ba mundu?" 23 Jesus hatan ba nia: "Ema nebe hadomi Ha'u sei simu Ha'u liafuan, no Ha'u Aman sei hadomi nia; Ami sei mai iha nia, hodi horik ho nia. 24 Ema nebe la hadomi Ha'u la simu Ha'u nia liafuan; no liafuan nebe imi rona dau-daun la'os Ha'u nian, maibe mai housi Aman nebe haruka Ha'u mai." 25 "Ha'u hateten lia hirak ne'e wainhira Ha'u sei hela iha imi nia leet; 26 maibe ksolok Na'in, katak Espiritu Santu, nebe Aman sei haruka mai hodi Ha'u nia naran, sei hanorin imi buat hot-hotu, hodi halo imi hanoin fali buat tomak nebe Ha'u hateten ona ba imi. 27 Dame Ha'u husik ba imi, Ha'u nia dame Ha'u fo ba imi; la'os hanesan mundu fo mak Ha'u fo ba imi. Imi keta laran susar, keta tauk. 28 Imi rona Ha'u hateten ona ba imi: ‘Ha'u ba ona, no Ha'u sei fila fali ba imi.' Imi hadomi tiha Ha'u karik, imi sei haksolok tan Ha'u ba Ha'u Aman, basa Aman boot liu Ha'u. 29 Ha'u hateten sai kedas buat ne'e ba imi molok nia mosu, atu wainhira nia mosu, imi fiar. 30 Ha'u sei la koalia buat barak tan ho imi, basa ukun na'in mundu ne'e nian mai dau-daun ona. Nia la iha kbiit atu ukun Ha'u; 31 Maibe Ha'u halo buat nebe Aman haruka atu mundu bele hatene katak Ha'u hadomi Aman. Hamriik ba, Ita ba ona!"
Jesus mak uvas hun lo-los
15:1 "Ha'u mak uvas hun lo-los, Ha'u Aman mak to'os na'in. 2 Sanak hotu nebe la fo fuan, Nia hasai, no sanak nebe fo fuan Nia hamos di-diak atu fo fuan liu tan. 3 Imi mos ona tamba liafuan nebe Ha'u hatene ona ba imi. 4 Imi hela iha Ha'u, no Ha'u iha imi. Nudar uvas sanak, haketak housi hun, la bele fo fuan mesa-mesak, nune'e mos imi wainhira imi la hela iha Ha'u.5 Ha'u mak hun, imi sanak sira; ema nebe hela iha Ha'u no Ha'u iha nia, ema ne'e mak fo fuan barak; basa ketak housi Ha'u, imi la bele halo buat ida. 6 Ema la horik iha Ha'u karik, ema sei haketak nia hanesan ai-sanak hodi sai maran; ema futu hamutuk ai-sanak sira ne'e hodi soe ba ahi, no ahi sei han sira. 7 Maibe imi hela iha Ha'u karik, no Ha'u nia liafuan hela iha imi, imi husu buat naran deit no sei halo duni ba imi. 8 Ha'u Aman hetan gloria nune'e: katak imi fo fuan barak hodi hatudu katak imi Ha'u nia eskolante sira. 9 Nudar Aman hadomi Ha'u, nune'e mos Ha'u hadomi imi; hela iha Ha'u nia domin ba. 10 Imi halo tuir Ha'u nia ukunfuan sira karik, imi sei hela iha Ha'u nia domin; nudar Ha'u mos halo tuir Ha'u Aman nia ukunfuan sira no hela iha nia domin."
Domin boot liu hotu
11 "Ha'u dehan sai lia hirak ne'e ba imi atu Ha'u nia ksolok hela iha imi no imi nia ksolok sai lo-los. 12 Ha'u nia ukunfuan mak ida ne'e: imi hadomi malu nudar Ha'u hadomi imi. 13 Ema ida la bele hadomi liu fali ema nebe saran nia moris tan nia belun sira. 14 Imi Ha'u nia belun sira wainhira imi halo tuir nebe Ha'u haruka ba imi. 15 Ha'u la bolu ona imi atan, basa atan la hatene nia na'in halo sa; maibe Ha'u bolu imi belun, tan Ha'u fo hatene ona ba imi lia hotu nebe Ha'u rona housi Aman. 16 La'os imi mak fihir Ha'u, maibe Ha'u mak fihir imi, hodi haruka imi ba atu ba fo fuan, no imi nia fuan hela ba nafatin, nune'e buat hotu nebe imi husu ba Aman hodi Ha'u naran, Nia sei haraik ba imi. 17 Ha'u haruka imi: hadomi malu."
Mundu hakribi Jesus no eskolante sira
18 "Mundu odi imi karik, imi hatene ba katak nia odi Ha'u uluk liu imi. 19 Imi housi mundu ne'e karik, mundu sei hadomi imi nudar ninia an rasik; maibe, tan imi la'os housi mundu, basa Ha'u fihir ona imi housi mundu, tan ne'e mak mundu odi imi. 20 Imi hanoin fali lia hirak nebe Ha'u hateten ona ba imi: ‘Atan ida la'os boot liu nia na'in.' Sira fo terus Ha'u karik, sira sei fo terus ba imi; sira simu karik Ha'u nia liafuan, sira sei simu mos imi nian. 21 Maibe sira sei halo buat ne'e hotu ba imi hodi Ha'u nia naran, basa sira la hatene Ida nebe haruka Ha'u mai. 22 Ha'u la mai karik hodi koalia ba sira, sira sei la iha sala; maibe oras ne'e sira la bele heli sira nia sala. 23 Ema nebe odi Ha'u, odi mos Ha'u Aman. 24 Ha'u la halo tiha ona karik iha sira nia leet hahalok sira nebe ema seluk la dauk halo, sira sei la iha sala; maibe ohin ne'e, sira hare ona no sira odi Ha'u no Ha'u Aman. 25 Ne'e hotu mosu atu halo tuir lia hirak nebe hakerek ona iha sira nia eskritura: ‘Sira odi Ha'u la ho lia hun ida.' 26 Maibe wainhira Ksolok Na'in mai, nebe Ha'u sei haruka mai housi Aman, katak Espiritu lialos nian nebe mai housi Aman, Nia sei fo sasin kona ba Ha'u; 27 imi mos sei fo sasin, basa houri uluk kedas imi hamutuk ho Ha'u."
16:1 "Ha'u fo hatene ona buat hirak ne'e ba imi atu imi keta monu. 2 Sira sei duni sai imi housi sinagoga sira; lo-los, oras sei to'o mai wainhira ema nebe oho imi sei hanoin katak nia serbi Maromak. 3 Sira sei halo nune'e tamba sira la hatene Aman, la hatene mos Ha'u. 4 Maibe Ha'u dehan tiha buat hirak ne'e ba imi atu wainhira oras to'o ona, imi bele hanoin fali katak Ha'u hateten ona kona ba sira ne'e ba imi. Ha'u la dehan buat sira ne'e ba imi houri uluk kedas basa iha tempo neba Ha'u sei hela ho imi."
Espiritu Santu sei mai
5 "Ha'u atu ba ona ba Ida nebe haruka Ha'u mai, no imi ida la husu Ha'u: ‘Ita ba nebe?' 6 Maibe, tan Ha'u dehan buat hirak ne'e ba imi mak imi neon sala. 7 Maibe Ha'u dehan lialos ba imi: diak liu ba imi katak Ha'u ba, basa Ha'u la ba karik, Ksolok Na'in sei la mai iha imi; maibe Ha'u ba karik, Ha'u sei haruka Nia ba imi. 8 No wainhira Nia mai, Nia sei hatudu ba mundu kona ba sala, kona ba moris los no kona ba tesi lia. 9 Kona ba sala, tan sira la fiar Ha'u; 10 Kona ba moris los, basa Ha'u ba Ha'u Aman no imi sei la hare Ha'u ona; 11 kona ba tesi lia, tamba sei tesi lia ona hasouru ukun na'in mundu ne'e nian." 12 "Ha'u sei iha tan buat barak atu hateten ba imi, maibe oras ne'e imi la bele simu hotu. 13 Wainhira Espiritu lialos nian mai, Nia sei hanorin lialos tomak ba imi; basa Nia sei la koalia hodi nia naran rasik, maibe sei hateten buat nebe Nia rona, hodi fo sai ba imi buat nebe sei mosu aban bainrua. 14 Nia sei fo gloria mai Ha'u, basa nia sei simu buat nebe Ha'u nian no sei fo hatene ba imi. 15 Ha'u Aman nia sasan tomak, Ha'u nian mos; tan ne'e mak Ha'u dehan katak Nia simu buat nebe Ha'u nian hodi fo hatene ba imi."
Terus uluk liu fali ksolok
16 "Uitoan tan, imi sei la hare ona Ha'u; hafoin, uitoan tan, imi sei hare fali Ha'u." 17 Tuir mai nia eskolante balun hateten ba malu: "Lia nebe Nia dehan mai ita ne'e katak sa, ‘Uitoan tan, imi sei hare ona Ha'u, hafoin uitoan tan imi sei hare fali Ha'u' no mos, ‘Ha'u atu ba Ha'u Aman'? 18 Sira dehan, ‘Uitoan tan' ne'e katak sa? Ita la hatene Nia dehan katak sa." 19 Jesus hatene kedas katak sira hakarak husu ba Nia, tan ne'e Nia dehan: "Imi husu ba malu kona ba ne'e: ‘Uitoan tan imi sei la hare ona Ha'u; hafoin uitoan tan imi sei hare fali Ha'u?' 20 Tebes, tebes, Ha'u dehan ba imi katak imi sei tanis no laran susar, maibe mundu sei haksolok; imi sei sai neon sala, maibe imi nia neon sala sei nakfila ba ksolok. 21 Wainhira feto ida atu tur ahi, nia neon sala basa nia oras to'o ona; maibe, tur ahi hotu tiha, nia haluha ona nia terus hodi haksolok tamba ema ida moris ona ba mundu. 22 Nune'e mos, oras ne'e imi neon sala; maibe Ha'u sei hare fali imi, no imi nia fuan sei haksolok, no ema ida la bele hasai housi imi ksolok nebe imi hetan. 23 Iha loron ne'e, imi sei la husu Ha'u buat ida tan. Tebes, tebes, Ha'u dehan ba imi, imi husu buat naran deit ba Aman, Nia sei haraik ba imi hodi Ha'u nia naran. 24 Too ohin imi la dauk husu buat ida hodi Ha'u nia naran. Husu ba; imi sei simu, atu imi nia ksolok sei sai lo-los." 25 "Ha'u hateten ona buat hirak ne'e ba imi ho aiknanoik sira, oras sei mai wainhira Ha'u sei la koalia tan ho aiknanoik sira, maibe Ha'u sei hateten mo-mos ba imi kona ba Aman. 26 Iha loron neba, imi sei husu hodi Ha'u nia naran; no Ha'u la dehan katak Ha'u sei harohan ba Aman tamba ba imi, 27 basa Aman rasik hadomi imi, tamba imi hadomi tiha Ha'u hodi fiar katak Ha'u mai housi Aman. 28 Ha'u mai housi Aman hodi mai iha mundu; Ha'u atu husik fali mundu hodi fila ba Aman." 29 Eskolante sira dehan: "Oras ne'e Ita koalia mo-mos, la'os tan ho aiknanoik. 30 Oras ne'e ami hare katak Ita hatene buat hotu, no la presisa ema atu husu Ita. Tan ne'e ami fiar katak Ita mai housi Maromak." 31 Jesus hatan: "Imi fiar ona, ka? 32 Oras sei to'o mai, lo-los mai tiha ona, wainhira imi sei namkari, ida-ida ba nia uma, no husik Ha'u mesak; maibe Ha'u sei la mesak, basa Aman hamutuk ho Ha'u. 33 Hau fo hatene buat ne'e ba imi atu imi hetan dame. Iha mundu imi sei hetan susar barak; maibe imi haksolok ba, basa Ha'u manan tiha mundu."
Jesus nia orasaun
17:1 Dehan tiha liafuan hirak ne'e, Jesus foti matan ba lalehan, dehan: "Aman, oras to'o ona. Fo gloria ba ita Oan, atu ita Oan bele fo gloria ba Ita; 2 atu nune'e, basa Ita fo ona ba Nia kbiit atu ukun ema tomak, atu fo moris rohan laek ba sira hotu nebe Ita tau iha nia liman.3 Ne'e mak moris rohan laek: hatene Ita nudar Maromak los mesak deit, no Jesus Kristu nebe Ita haruka mai." 4 Ha'u hahi ona Ita iha rai, hodi halo to'o rohan serbisu nebe Ita haruka Ha'u atu halo. 5 Aman, oras ne'e hahi fali Ha'u ho gloria nebe Ha'u iha uluk ho Ita, molok mundu mosu mai." 6 Ha'u haklaken tiha Ita naran ba ema sira nebe Ita haraik mai Ha'u housi mundu. Sira Ita nian, no Ita fo sira mai Ha'u; sira simu ona Ita nia liafuan. 7 Oras ne'e sira hatene katak buat hotu nebe Ita fo mai Ha'u, mai housi Ita, 8 basa Ha'u haklaken tiha ba sira lia hirak nebe Ita fo mai Ha'u. Sira simu ona lia hirak ne'e no hatene mo-mos katak Ha'u mai housi Ita, hodi fiar katak Ita mak haruka Ha'u mai. 9 Ha'u harohan ba sira; Ha'u la harohan ba mundu, maibe ba sira nebe Ita haraik mai Ha'u, basa sira Ita nian. 10 Buat hotu nebe Ha'u nian, Ita nian; no buat nebe Ita nian, Ha'u nian mos. No Ha'u hetan gloria iha sira. 11 Ohin Ha'u la hela ona iha mundu, maibe sira sei hela iha mundu, no Ha'u ba hasouru Ita. Aman Santu, tau matan ba sira iha Ita naran. nebe ita haraik mai Ha'u, atu sira sai ida deit, nudar Ita ho Ha'u ida deit. 12 Wainhira Ha'u sei hela ho sira, Ha'u rasik tau matan ba sira iha Ita naran. Ha'u tau matan di-diak ba sira nebe Ita haraik mai Ha'u. Ha'u tahan di-diak sira, atu sira ida la lakon; lakon deit mak lakon an nia oan, atu eskritura sai tuir lo-los. 13 Maibe oras ne'e Ha'u atu fila ba Ita, no Ha'u dehan sai buat hirak ne'e iha mundu atu sira hetan Ha'u nia ksolok to'o sai lo-los. 14 Ha'u fo hatene ona ba sira ita nia liafuan, no mundu odi sira, basa sira la'os mundu ne'e nian, nudar Ha'u mos la'os mundu ne'e nian. 15 Ha'u la husu atu Ita hasai sira housi mundu, maibe atu Ita hadook sira housi Aat Na'in. 16 Sira la'os mundu ne'e nian, nudar Ha'u mos la'os mundu ne'e nian. 17 Halo sira santu iha lialos. Ita nia liafuan mak lialos. 18 Nudar Ita haruka Ha'u mai iha mundu, nune'e mos Ha'u haruka sira ba mundu. 19 No tamba sira mak Ha'u halo An santu, atu sira mos bele sai santu iha lialos." 20 "Ha'u la harohan deit ba sira ne'e, maibe mos ba sira nebe sei fiar Ha'u tan sira ne'e nia liafuan; 21 atu sira hotu sai ida deit, Ita, Aman, horik iha Ha'u, no Ha'u iha Ita; atu sira mos hela iha Ita Na'in rua, nune'e mundu bele fiar katak Ita mak haruka Ha'u mai. 22 Ha'u fo ona ba sira gloria nebe Ita fo mai Ha'u, atu sira sai ida deit, nudar Ita Na'in rua ida deit. 23 Ha'u iha sira, no Ita iha Ha'u; atu sira laran ida deit teb-tebes, nune'e mak mundu sei hatene katak Ita mak haruka Ha'u mai, no mos katak Ita hadomi sira nudar Ita hadomi Ha'u. 24 Aman, Ha'u hakarak katak sira mos nebe Ita fo mai Ha'u, hela hamutuk ho Ha'u iha fatin nebe Ha'u hela; atu sira bele hare Ha'u nia gloria nebe Ita fo tiha mai Ha'u tan Ita hadomi Ha'u molok mundu hahu. 25 Aman Santu, mundu ne'e la hatene Ita; maibe sira ne'e hatene katak Ita mak haruka Ha'u mai. 26 Ha'u fo hatene tiha ba sira Ita nia naran, no Ha'u sei fo hatene liu tan, atu domin nebe Ita hadomi Ha'u bele hela iha sira, no Ha'u hela iha sira."
Sira kaer Jesus
18:1 Dehan tiha liafuan hirak ne'e, Jesus ho nia eskolante sira hakat liu ba rai klean Sedron. Sira tama iha to'os ida iha neba. 2 Judas, ida nebe atu saran Nia ba mate, hatene mos fatin ne'e, basa dala barak ona Jesus halibur hamutuk ho nia eskolante sira iha neba. 3 Ne'e duni, Judas ba neba ho soldadu lubun ida, guarda balun no na'i ulun housi am'lulik boot no fariseu sira, ho ahi oan no kroat. 4 Hatene tiha buat hotu nebe sei mosu ba Nia, Jesus ba hasouru sira hodi dehan: "Imi buka se?" 5 Sira hatan ba Nia: "Ami buka Jesus Nazare." Nia simu: "Ha'u mak ne'e." Judas, nebe atu saran Nia ba mate, nia mos hamutuk ho sira. 6 Wainhira Jesus dehan ‘Ha'u mak ne'e', sira hakiduk hodi monu ba rai. 7 Dala ida tan, Jesus husu ba sira, dehan: "Imi buka se?" Sira hatan: "Jesus Nazare." 8 Jesus simu hikas; "Ha'u hateten ona ba imi katak Ha'u mak ne'e; ne'e duni, imi buka Ha'u karik, husik sira ne'e la'o ba." 9 Buat ne'e, atu halo tuir lia hirak nebe Nia dehan uluk: "Sira nebe Ita haraik mai Ha'u, ida la lakon." 10 Iha oras neba, Simao Pedro losu nia surik no hakanek am'lulik boot nia atan ida hodi sabir tiha nia tilun kuana. Atan ne'e naran Malco 11 Maibe Jesus lia tun ba Pedro: "Hatama o nia surik iha nia fatin! Ha'u sei la hemu kalis nebe Ha'u Aman haraik mai Ha'u?" 12 Tuir mai soldadu lubun ida ho sira nia na'i ulun no guarda sira kaer Jesus, hodi futu metin nia. 13 Uluk knanain, sira lori nia ba Anas, Caifas nia banin. Iha tinan neba Caifas mak am'lulik boot. 14 Caifas mak fo lia ba Judeu sira, dehan katak diak liu ema ida deit mak mate ba povu.
Pedro Heli Jesus
15 Simao Pedro ho eskolante ida seluk tuir Jesus. Eskolante ida ne'e, nebe am'lulik boot hatene, tama ho Jesus ba am'lulik boot nia uma klabis. 16 Pedro hela deit iha odamatan liur. Hafoin eskolante ida seluk nebe am'lulik boot hatene, sai ba liur, koalia ho atan feto nebe hein odamatan, hodi lori Pedro ba uma laran. 17 Atan feto dehan ba Pedro: "O la'os ema ne'e mos nia eskolante ida?" Nia hatan: "Ha'u lae." 18 Atan no guarda sira hamriik hela iha neba. Tan malirin, sira tau ahi hodi haneruk; Pedro mos haneruk hamutuk ho sira. 19 Hafoin am'lulik boot husu ba Jesus kona ba nia eskolante sira no mos kona ba nia doutrina.20 Jesus hatan ba nia, dehan: Ha'u koalia iha ema hotu nia oin. Ha'u hanorin bei-beik iha sinagoga sira no iha templu, iha nebe Judeu hotu sira halibur hamutuk. Ha'u la subar lia ida. 21 Tansa o husu Ha'u? Husu sira nebe rona Ha'u, buat nebe Ha'u hanorin sira. Sira hatene buat nebe Ha'u dehan." 22 Jesus koalia tiha nune'e, guarda ida basa nia, dehan: "O hatan ba am'lulik boot hanesan ne'e?" 23 Jesus simu hodi dehan: "Ha'u koalia sala karik, ne'e sa hatudu to'ok mai; maibe, Ha'u koalia los karik tansa o basa Ha'u?" 24 Tuir mai Anas haruka Jesus nebe futu metin hela, ba am'lulik boot Caifas. 25 Simao Pedro sei haneruk dau-daun, sira dehan ba nia: "O mos keta nia eskolante ida karik?" Nia heli lia, dehan, "Ha'u lae!" 26 Amlulik boot nia atan ida, ida nebe Pedro sabir nia tilun nia parenti, hateten ba nia: "Ha'u la hare o iha to'os laran ho Jesus?" 27 Dala ida tan ba Pedro heli lia. Iha oras neba manu ida kokorek kedas.
Jesus iha Pilatos nia oin
28 Sira lori Jesus housi Caifas nia uma ba gubernador nia uma. Dadersan ona, sira la tama ba uma laran atu la bele sai foer, nune'e sira bele han Paskua. 29 Pilatos mai hasouru sira iha liur hodi dehan: "Imi kesar ema ne'e tansa los?" Sira hatan: 30 "Nia la'os ema aat karik, ami sei la saran Nia ba ita liman." 31 Pilatos dehan, "Tesi lia ba Nia ba tuir imi nia ukunfuan." Judeu sira hatan fali ba nia: "Bandu tiha mai ami atu oho ema." 32 Ne'e atu halo tuir lia nebe Jesus hateten nanis ona oin sa Nia sei mate. 33 Ne'e duni, Pilatos tama fali ba uma laran. Nia bolu Jesus, hodi husu ba Nia: "O mak Judeu sira nia liurai?" 34 Jesus hatan: "O rasik dehan buat ne'e, ka ema seluk mak dehan ba o kona ba Ha'u?" 35 Pilatos simu hikas, dehan: "Ha'u ema Judeu ida? O nia povu no am'lulik boot sira mak saran o ba ha'u nia liman. O halo sa ida?" 36 Jesus hatan: "Ha'u nia reinu la'os raiklaran ne'e nian. Ha'u nia reinu raiklaran ne'e nian karik, Ha'u nia emar sira sei halo funu atu Ha'u la bele monu ba Judeu sira nia liman. Maibe, Ha'u nia reinu la'os raiklaran ne'e nian. 37 Pilatos dehan ba Nia: "Ne'e sa o liurai duni?" Jesus hatan: "O mak dehan katak Ha'u liurai. Tan ne'e mak Ha'u moris, no tan ne'e mak Ha'u mai iha mundu, atu fo sasin kona ba lialos. Ema hotu lialos nian rona Ha'u nia lia." 38 Pilatos husu fali: "Sa ida mak lialos?" Dehan tiha buat hirak ne'e, nia sai fali hasouru Judeu sira, dehan: "Ha'u la hetan lia ida hasouru ema ne'e. 39 Maibe, tuir imi nia lisan tinan-tinan iha loron Paskua, ha'u sei husik sai ema dadur ida. Ne'e duni, imi hakarak Ha'u husik ba imi Judeu sira nia liurai?" 40 Sira hotu hakilar: "La'os nia, maibe Barrabas!" Barrabas mak ema na'okten ida.
19:1 Tuir mai, Pilatos haruka ema lori Jesus hodi baku Nia. 2 Soldadu sira halo koroa ai-tarak nian ida, no tau iha Jesus nia ulun. Sira tau ba Nia hatais unuk mean boot ida. 3 Hafoin, hakbesik ba Nia, sira hasara Nia, dehan: "Viva Judeu sira nia liurai!" hodi basa tan Nia. 4 Pilatos sai fali, hodi hateten ba sira: "Hare ba. Ha'u hatudu Nia ba imi atu imi hatene katak Ha'u la hetan sala ida iha Nia." 5 Nune'e Jesus sai mai iha liur, ho koroa ai-tarak no unuk mean. Pilatos dehan: "Ema mak ne'e!" 6 Hare tiha Nia, am'lulik ulun no guarda sira hakilar, dehan: "Hedi Nia ba krus! Hedi Nia ba krus!" Pilatos hateten: "Imi rasik lori Nia ba, hodi hedi Nia ba krus, tan ha'u la hetan sala ida iha Nia." 7 Judeu sira simu: "Ami iha ukunfuan ida: tuir ukunfuan ne'e Nia sei mate, tan Nia foti an nudar Maromak Oan!" 8 Rona tiha lia ida ne'e, Pilatos tauk liu tan. 9 Tama fali ba uma laran, nia husu ba Jesus: "O mai housi nebe?" Maibe Jesus la hatan ida. 10 Tan ne'e Pilatos dehan ba Nia: "O la hatan mai? O la hatene katak ha'u iha kbiit atu hasai o, no mos iha kbiit atu hedi o ba krus?" 11 Jesus lia tun, dehan: "O la simu karik kbiit housi leten, o sei la iha kbiit ida hasouru Ha'u. Tan ne'e, ema nebe saran Ha'u ba o nia liman, nia sala boot liu fali o nian."
Sira tesi lia atu oho Jesus
12 Tan ne'e Pilatos buka atu husik sai Jesus, maibe Judeu sira hakilar: "O husik nia sai karik, o la'os Cesar nia belun, tan ida nebe foti an nudar liurai, nia foti liman hasouru Cesar." 13 Rona tiha lia hirak ne'e, Pilatos lori fali Jesus mai iha liur, hodi tur iha justisa tur fatin, naran "fatin fatuk belar," nebe iha lia Ebreu "Gabbata." 14 Loron ne'e, loron hadia Paskua nian, besik meio-dia. Pilatos hateten ba Judeu sira: "Imi nia liurai mak ne'e!" 15 Sira hatan hodi hakilar: "Lori Nia ba, lori Nia ba; hedi Nia ba krus!" Pilatos husu ba sira: "Ha'u sei hedi imi nia liurai ba krus?" Am'lulik boot sira dehan: "Ami nia liurai mak Cesar deit." 16 Ne'e duni, Pilatos saran Jesus ba sira atu sira hedi Nia ba krus.
Jesus mate iha krus
17 Tuir mai Judeu sira lori Jesus no Nia sai ba liur hodi Nia lori nia krus iha nia kbaas ba fatin ida naran "ulun ruin," nebe dehan iha lia Ebreu "Golgota." 18 Iha neba sira hedi Nia iha krus tutun, hamutuk ho ema na'in rua, ida iha sorin ida-ida, no Jesus iha klaran. 19 Pilatos haruka hakerek ai-kabelak ida atu tara iha krus tutun. Hakerek nune'e: "Jesus Nazare, Judeu sira nia liurai." 20 Judeu barak lee liafuan sira ne'e, tan fatin nebe sira hedi Jesus besik sidade, no hakerek ho lia Ebreu, Gregu no Latin. 21 Ne'e duni, am'lulik ulun sira hateten ba Pilatos: "Keta hakerek: ‘Judeu sira nia liurai', maibe ‘Ema ne'e dehan: Ha'u mak Judeu sira nia liurai.'" Pilatos simu: "Buat nebe ha'u hakerek ona, ha'u hakerek ona!" 23 Hedi tiha Jesus ba krus, soldadu sira hola nia unuk hodi fahe ba sira na'in hat. no mos nia hatais. Hatais ne'e la suku ida, ema soru naruk deit. 24 Tan ne'e sira dehan ba malu : "Ita keta les hatais ne'e: Ita koko deit sorte atu hare nia monu los ba se." Nune'e sai tuir los lia eskritura nebe dehan: "Sira fahe Ha'u nia hena ba malu, sira koko sorte ba Ha'u nia hatais." Soldadu sira halo duni nune'e. 25 Besik Jesus nia krus hamriik nia inan, nia inan nia alin, katak Maria, Cleofas nia fen, ho tan Maria Madalena. 26 Hare tiha nia inan ho eskolante nebe nia hadomi iha nia sorin, Jesus lia tun ba nia inan: "Na'in feto, o nia oan mak ida ne'e!" 27 Hafoin Nia lia tun ba eskolante: "O nia Inan mak ida ne'e!" No houri oras neba, eskolante ne'e simu nia iha nia uma. 28 Tuir mai, tan hatene ona katak buat hotu la'o tuir ona, atu halo tuir lo-los eskritura, Jesus dehan: "Ha'u hamrook!" 29 Iha neba iha kusi oan ida ho tua sin, tan ne'e, sira habokon hena ida iha tua sin ne'e, tau iha fafulu tutun, hodi lolo ba Jesus nia ibun. 30 Koko tiha tua sin ne'e, Jesus dehan: "Buat hotu tuir los ona," hafoin, Nia halis nia ulun hodi saran nia klamar.
Soldadu ida sona borus Jesus nia sorin
31 Tamba loron neba, loron hadia an nian, atu ema mate sira nia isin la bele hela iha krus iha loron Sabadu, tan Sabadu ne'e loron boot ida, Judeu sira husu Pilatos atu hatohar tiha sira nia ain, hodi hasai sira nia isin mate housi krus. 32 Ne'e duni, soldadu sira mai baku tohar tiha ema uluk nia ain, hafoin ida seluk nian, sira nebe sira hedi hamutuk ho Jesus. 33 To'o tiha Jesus, tan hare Nia mate tiha ona, sira la hatohar nia ain; 34 maibe soldadu ida sona borus nia sorin ho diman, hodi halo be kahur ho ran suli sai. 35 Ema nebe hare, nia rasik mak fo sasin ida ne'e; nia lia sasin los tebes; nia hatene katak nia koalia los atu imi mos bele fiar. 36 Ne'e mosu tuir los eskritura nia lia, nebe dehan: "Nia ruin ida mos ema sei la hatohar." 37 Escritura seluk dehan tan: "Sira sei fihir ema nebe sira sona borus."
Ema hakoi Jesus
38 Tuir mai, Jose housi Arimateia, Jesus nia eskolante ida, maski subar deit tan tauk Judeu sira, husu lisensa ba Pilatos atu hasai Jesus nia isin mate no Pilatos fo tiha lisensa. Sira ba hodi hasai Nia isin mate. 39 Nicodemos, ema nebe ba hasouru Jesus iha kalan, mai ho mina kahur ho naan horun no alo besik libra atus ida. 40 Sira hola Jesus nia isin mate, falun tiha ho hena mutin ida, hodi fakar tiha mina morin, tuir Judeu sira nia lisan atu hakoi mate. 41 Iha fatin nebe sira hedi Jesus iha krus, iha to'os oan ida no iha to'os ne'e iha rate foun ida iha nebe seidauk hakoi ema ida. 42 Tamba Loron Hadia Paskua nian, no mos tan rate ne'e besik hela, sira hakoi Jesus iha neba.
Rate Mamuk
20:1 Iha loron uluk semana nian, iha dadersan nakukun, Maria Madalena ba to'o rate. Hare fatuk iha rate nia oin duir tiha ba sorin, 2 nia halai fali hasouru Simao Pedro no eskolante ida seluk nebe Jesus hadomi, hodi dehan ba sira: "Ema lori tiha Na'i housi rate, ami la hatene sira tau los Nia iha nebe!" 3 Pedro ho eskolante ida seluk sai kedas ba rate. 4 Sira halai hamutuk, maibe eskolante ida seluk lalais liu Pedro, hodi to'o uluk rate. 5 Nia hakru'uk, hodi hare hena sira namkari iha rai, maibe nia la tama. 6 Simao Pedro mos to'o tuir nia; nia tama iha rate laran hodi hare hena sira namkari iha rai, 7 no mos hena mutin nebe hodi falun Jesus nia ulun, hena ne'e la tau hamutuk ho hena seluk, maibe lulun ketak iha fatin seluk. 8 Hafoin, eskolante ida seluk nebe to'o uluk tama hotu. Nia hare hodi fiar. 9 Tamba to'o oras ne'e sira nia neon la dauk nakloke ba lia eskritura nian katak Nia sei moris hi'as duni housi mate. 10 Tuir mai eskolante sira fila fali ba uma.
Jesus mosu ba Maria Madalena
11 Maria fali hamriik iha rate liur hodi tanis, no sei tanis hela, nia hakru'uk hodi hateke ba rate laran. 12 Nia hare anju na'in rua hatais mutin tur iha fatin nebe sira tau Jesus nia isin, ida iha ulun, ida iha ain. 13 Sira dehan: "Feto, tansa o tanis? O buka se?" Nia hatan ba sira: "Basa ema lori tiha ha'u nia Na'i, no ha'u la hatene sira tau Nia iha nebe." 14 Dehan tiha liafuan hirak ne'e, nia fila hodi hare Jesus hamriik iha neba, maibe nia la hatene katak ne'e mak Jesus. 15 Jesus dehan ba nia, "Feto, tansa o tanis? O buka se?" Hanoin katak nia mak to'os na'in, Maria husu fali: "Na'i, ita mak lori nia karik, hateten to'ok mai ha'u ita tau Nia iha nebe, atu ha'u bele ba hola Nia." 16 Jesus dehan: "Maria!" Nia fila, hodi dehan ba Jesus: "Rabboni!" katak Mestre. 17 Jesus dehan fali ba nia: "Keta kona netik Ha'u, tan Ha'u seidauk sa'e ba Aman. Maibe ba hasouru Ha'u nia maun alin sira, hodi dehan ba sira katak Ha'u sa'e ba Ha'u nia Aman no imi nia Aman; ba Ha'u nia Maromak no imi nia Maromak." 18 Ne'e duni, Maria Madalena ba hateten ba eskolante sira: "Ha'u hare ona Na'i;" no nia hateten ba sira katak Nia dehan buat sira ne'e ba nia.
Jesus mosu ba eskolante sira
19 Iha kalan loron uluk semana nian, uma iha nebe eskolante sira hela, nia odamatan taka metin tan sira tauk Judeu sira, Jesus mosu mai, hamriik iha sira leet, hodi dehan: "Dame hela ho imi!" 20 Koalia tiha nune'e, Jesus hatudu ba sira Nia liman no sorin. Hare tiha Jesus, eskolante sira haksolok teb-tebes. 21 Nia lia tun teni ba sira: "Dame hela ho imi! Nudar Ha'u Aman haruka Ha'u mai, nune'e mos Ha'u haruka imi." 22 Hateten tiha ne'e, Nia hu'u iis ba sira dehan: "Simu ba Espiritu Santu! 23 Sira nebe imi perdua sira sala, sira hetan duni perdua ba sira sala; sira nebe imi la perdua sira sala, sira la hetan duni perdua ba sira sala." 24 Tome, sira na'in sanulu resin rua ne'e ida, nebe ema hanaran Kaduak, la hamutuk ho sira wainhira Jesus mosu. 25 Tan ne'e, eskolante sira hateten ba nia: "Ami hare ona Na'i!" Maibe nia hatan ba sira: "Ha'u la hare karik besi kusan nia kuak iha nia liman, la tau karik ha'u nia limanfuan iha besi kusan fatin, no la hatama karik ha'u nia liman iha nia sorin, ha'u sei la fiar." 26 Liu tiha loron ualu, eskolante sira halibur fali iha uma. Tome mos hamutuk ho sira. Odamatan sei taka hela, Jesus mosu hodi hamriik iha sira leet, dehan: "Dame hela ho imi!" 27 Hafoin Nia hateten ba Tome: "Tau o nia limanfuan iha ne'e, no hare Ha'u nia liman; lolo o nia liman hodi hatama iha Ha'u nia sorin. O keta laran tos, maibe fiar!" 28 Tome hatan: "Ha'u nia Na'in, ha'u nia Maromak!" 29 Jesus lia tun teni ba nia: "O fiar tan o hare tiha Ha'u? Rahun diak ba sira nebe fiar maski la hare." 30 Jesus halo sinal seluk barak tan iha nia eskolante sira oin, nebe la hakerek iha livru ne'e. 31 Maibe sira ne'e hakerek atu imi fiar katak Jesus mak Kristu, Maromak Oan; atu nune'e, hodi fiar, imi hetan moris hodi Nia naran.
Jesus mosu iha tasi Tiberiades nia sorin
21:1 Tuir mai, Jesus mosu dala ida tan besik tasi Tiberiades. Nia mosu nune'e. 2 Simao Pedro, Tome nebe hanaran Kaduak; Natanael housi kana Galileia nian; Zebedeu nia oan sira, ho tan eskolante na'in rua, halibur hamutuk iha neba. 3 Simao Pedro hateten ba sira: "Ha'u ba tiha ikan." Sira dehan ba nia: "Ami mos ba hotu." 4 Iha rai hun mutin, Jesus hamriik iha tasi ibun; maibe eskolante sira la hatene katak Nia mak Jesus. 5 Nia dehan ba sira: "Labarik sira, imi iha buat ruma atu han?" Sira hatan: "La iha" 6 Nia simu fali: "Imi soe dai ba sorin kuana, imi sei hetan." Ne'e duni, sira soe dai, hafoin sira la bele dada mai, tan ikan barak liu.7 Tan ne'e, eskolante nebe Jesus hadomi hateten ba Pedro: "Nia mak Na'i!" Rona katak Na'i mak neba, Simao Pedro hatais tiha, basa nia isin tanan, hodi haksoit ba tasi laran. 8 Eskolante sira seluk tama iha ro laran, hodi dada dai nebe nakonu ho ikan, basa sira la dook housi rai, besik metru atus ida. 9 Tun tiha ba rai, sira hare ahi klaak ho ikan iha leten ho tan paun . 10 Jesus hateten ba sira: "Imi lori ikan balun nebe imi foin kaer mai." 11 Simao Pedro sa'e ba ro hodi dada dai ba rai, ho ikan nakonu; ikan boot deit atus ida lima nulu resin tolu. Maski barak nune'e, dai la nakles. 12 Jesus dehan ba sira: "Imi mai han." Eskolante sira ida mos la berani atu husu ba Nia "Ita se los?" tan sira hatene katak Nia mak Na'i. 13 Jesus hakbesik, kaer paun, hodi fo ba sira; nune'e mos ho ikan. 14 Nune'e ba dala tolu Jesus mosu ba nia eskolante sira, liu tiha Nia moris hi'as housi mate. 15 Sira han hotu tiha, Jesus husu ba Simao Pedro: "Simao, Joao nia oan, o hadomi Ha'u liu fali sira ne'e?" Nia hatan: "Tebes, Na'i, Ita hatene katak ha'u hadomi Ita." Jesus dehan ba nia: "Fo han Ha'u nia bibi-oan sira." 16 Dala ida tan Nia husu: "Simao, Joao nia oan, o hadomi Ha'u?" Pedro hatan: "Tebes duni, Na'i, Ita hatene katak ha'u hadomi Ita." Jesus dehan ba Nia: "Tau matan ba Ha'u nia bibi sira." 17 Ba dala tolu Nia husu: "Simao, Joao nia oan, o hadomi Ha'u?" Pedro neon sala, tan Jesus husu dala tolu ona ba nia "O hadomi Ha'u?" Nia dehan ba Nia: "Na'i, Ita hatene hotu, Ita hatene katak ha'u hadomi Ita." Jesus hateten ba Nia: "Fo han Ha'u nia bibi sira. 18 Tebes, tebes, Ha'u dehan ba o: wainhira o sei klosan o rasik mak hatais an, hodi la'o ba fatin nebe o hakarak; maibe katuas tiha, o sei lolo liman atu ema seluk fo hatais o, hodi lori o ba fatin nebe o lakohi." 18 Nia koalia nune'e atu fo sai oin sa Pedro sei hetan mate hodi fo gloria ba Maromak. Tuir mai, Jesus dehan ba nia: "Tuir Ha'u mai." 20 Pedro fila hodi hare katak eskolante nebe Jesus hadomi tuir sira, katak, ida nebe sader ba Jesus nia hirus matan wainhira sira han, hodi dehan, "Na'i, se los mak sei saran Ita ba mate?" 21 Ne'e duni, hare tiha nia, Pedro husu ba Jesus: "Na'i, kona ba nia?" 22 Jesus hatan: "Ha'u hakarak karik katak nia hela to'o Ha'u mai fali, ne'e sa ida ba o? O tuir deit Ha'u!" 23 Housi ne'e mosu lia ida iha eskolante sira leet, katak eskolante ida ne'e sei la mate. Maibe Jesus la dehan ba Pedro, "Nia sei la mate;" Nia dehan deit "Ha'u hakarak karik nia hela to'o Ha'u mai fali, ne'e sa ida ba o?" 24 Ida ne'e mak eskolante nebe fo sasin kona ba buat hirak ne'e, no hakerek tiha buat hirak ne'e, no ami hatene katak nia sasin los. 25 Jesus halo tan buat barak seluk: atu hakerek buat ne'e hotu, ha'u hanoin katak iha mundu tomak la iha fatin atu tau livru sira nebe sei hakerek.