BARITA NA ULI NA SINURAT NI SI
JOHANNES
Hata i na gabe daging.
/1 Di mulana i nunga adong Hata i, djala saor tu Debata do Hata i, djala Debata do Hata i. 2 I ma na saor tu Debata di mulana i. 3 Saluhutna i marhite sian Hata i do, umbahen na mandjadi; djala ndang adong nanggo sada sian naung djadi i, na so marhite sian I. 4 Dibagasan Hata i do hangoluan; laos hangoluan i do Panondang ni hadjolmaon. 5 Na maisinondang do Panondang i dibagasan na holom, alai ndang didjangkon na holom i. 6 Hehe do sada halak sinuru ni Debata, si Johannes do goarna. 7 Sitindangi do ibana, umbahen na ro, asa dihatindangkon Panondang i, anggiat gabe porsea saluhutna marhite sian Ibana. 8 Ndang apala ibana Panondang i; na mangkatindangkon Panondang i do tahe. 9 Alai nunga mandok ro udju i tu portibi on Panondang na sintong i, na manondangi nasa djolma. 10 Di portibi on hian do Ibana, djala marhite sian Ibana do mandjadi portibi on; hape ndang ditanda portibi on Ibana. 11 Na ro do Ibana manopot na di Ibana hian, gabe ndang didjangkon angka na di Ibana i Ibana. 12 Alai manang piga na mandjangkon Ibana, tusi do dilehon huaso, asa gabe anak ni Debata nasida, angka na porsea di Goarna. 13 I ma angka na so tubu sian mudar, manang sian sangkap ni daging, manang sian sangkap ni baoa, tung sian Debata do. 14 Gabe daging ma Hata i djala maringan di tongatonga ni hita on, djadi huida hami ma hasangaponna, i ma hasangapon ni Anak sasada na sian Ama i, gok asi ni roha dohot hasintongan. 15 Dihatindangkon si Johannes do Ibana, ai ninna ma: On do Ibana na hudok i, na ro sian pudingku; djumolo do Ibana adong asa ahu, ai pardjolo hian do Ibana. 16 Ai sian hamoraonna do saluhut hita mandjalo, i ma asi ni roha na so marnamontok. 17 Ai marhite sian si Musa do dilehon anggo patik i; alai hinorhon ni Jesus Kristus do mandjadi asi ni roha dohot hasintongan. 18 Ndang dune adong na marnida Debata; Anak na sasada i, na di ampuan ni Ama i, Ibana do mamaritahonsa. Dihatindangkon si Johannes pandidi do Tuhanta: Birubiru ni Debata. 19 Disuru angka Jahudi sian huta Jerusalem ma angka malim dohot halak Lepi manungkun si Johannes: Ai ise do ho? Gabe on ma dihatindangkon: 20 Ai diparhatopot do, ndang diporso, didok do; Ndang ahu Kristus i. 21 Gabe disungkun nasida ma ibana: Antong ise do ho? Si Elias do ulaning? Djadi didok ma: Ndang i ahu! Panurirang i do ho? Dung i dialusi ma: Ndang! 82 Dung i ninna nasida ma mandok ibana: Antong, ise do ho?, asa haalusan hami angka na marsuru hami. Aha do dohononmu taringot tu ho? 23 Dung i ninna ma: Soara ni na mandjoudjou di halongonan do ahu: Patigor hamu ma dalan ni Tuhan! songon naung nidok ni panurirang Jesajas. 24 Sian Parise do angka na sinuru i. 26 Djadi didok nasida ma manungkun ibana: Boasa mandidihon ho, so manang Kristus ho, manang si Elias, manang panurirang i? 26 Gabe didok si Johannes ma mangalusi nasida: Ia ahu aek do hudidihon; alai nunga djongdjong di tonga-tongamuna Ibana, na so tinandamuna i. 27 Ibana do i na ro sian pudingku; na hurang tama do ahu mangkarhari tali ni sipatuna. 28 Di Betania do i masa, di ipar ni aek Jordan, ai disi do mandidihon si Johannes. 29 Torang ni arina i diida si Johannes ma Jesus ro tusi, djadi didok ma: On do Birubiru ni Debata, na mamorsan dosa ni portibi on! 30 Ibana do na hudok i: Sian pudingku ro sada halak, naung djumolo adong asa ahu; ai pardjolo hian do Ibana. 31 Ahu pe, ndang hutanda Ibana; alai asa tandap Ibana di halak Israel, umbahen na ro ahu mandidihon aek. 32 Dung i dihatindangkon si Johannes ma, ninna ma: Huida do Tondi i tuat songon darapati sian banua gindjang i djala mian di Ibana! 33 Ahu pe, ndang hutanda Ibana djolo. Alai Ibana na marsuru ahu mandidihon aek, I do mandok tu ahu: Ia tusi diida ho tuat Tondi i djala mian di Ibana, Ibana do sididihon Tondi Parbadja. (Luk. 3:2) 34 Asa nunga huida djala huhadjongdjongkon: Ibana do Anak ni Debata. Angka sisean na pardjolo i. 35 Marsogotna i djongdjong muse si Johannes disi dohot siseanna dua halak. 36 Djadi di na niidana i Jesus mamolus, ninna ma: On do Birubiru ni Debata! 37 Djadi dibege siseanna na dua i ma hatana, gabe diihuthon ma Jesus. 38 Dung i humusor ma Jesus, diida ma nasida na mangihuthon Ibana, djadi ninna ma mandok nasida: Aha do na niluluanmuna? Djadi didok nasida ma mandok Ibana: Rabbi (na mandok: Guru) didia do Ho sorang ? 39 Djadi didok ma mandok nasida: Ro ma hamu, asa diida hamu! Dung i ro ma nasida, diida ma parmiananna; laos rap ma nasida dohot Ibana sadarina i. Tar di pungkul opat ma i. 40 Si Andreas, dongan saama ni si Simon Petrus, do na sada sian na dua i, na umbege hata ni si Johannes dohot mangihuthon Ibana. 41 Dung i padiumpang ma ibana djumolo dohot si Simon, donganna saama, djadi didok ma mandok ibana: Nunga djumpang hami Messias i (astuanna: Kristus)! 42 Laos ditogihon ma ibana tu Jesus. Alai dibereng Jesus ma ibana huhut ma didok: Si Simon, anak ni si Jonas do ho; si Kepas ma ho goaron (astuanna: Batu mamak, Petrus)! 43 Torang ni arina i, di na naeng laho Ibana tu Galilea, djumpangsa ma si Pilippus, dung i didok Jesus ma mandok ibana: Ihuthon ma Ahu! 44 Alai sian Betsaida do si Pilippus, i ma huta ni si Andreas dohot si Petrus. 45 Dapot si Pilippus ma si Natanael, djadi didok ma mandok ibana: Nunga djumpang hami Ibana, na nidok ni si Musa di surat patik i djala na pinaboa ni angka panurirang; i ma Jesus, anak ni si Josep na sian huta Nasaret. 46 Dung i didok si Natanael ma mandok ibana: Tung tarbahen ma ro na denggan sian huta Nasaret? Djadi didok si Pilippus ma: Ro ma ho marnida! 47 Diida Jesus ma si Natanael ro manopot Ibana, djadi didok ma taringot tu ibana: On ma sada halak Israel na tutu, na so marpangansi dibagasan! 48 Ninna si Natanael ma mandok Ibana: Sian dia ditanda Ho ahu? Dung i dialusi Jesus ma ibana: Huida do ho, udju ditoru ni hau ara i ho, andorang so didjou si Pilippus i dope ho. 49 Dung i ninna si Natanael ma mangalusi Ibana: Gurunami, Ho do Anak ni Debata! Ho do radja ni halak Israel! 50 Dung i ninna Jesus ma mangalusi ibana: Ala hudok tu ho: huida ho di toru ni hau ara i, umbahen na porsea ho? Idaonmu dope na sumurung sian i! 51 Laos ninna ma: Na tutu situtu do na hudok on tu hamu: Idaonmuna do mungkap banua gindjane djala manaek midjur angka surusuruan ni Debata tumopot Anak ni djolma i.

Na marbagas di huta Kana.
/2 Dune i patoluarihon adong ma na marbagas di huta Kana na di luat Galilea, djala disi ma ina ni Jesus. 2 Alai dohot ma Jesus raphon angka siseanna dipio tu pesta i. 3 Djadi dung hurangan anggur nasida, ninna ina ni Jesus ma mandok Ibana: Ndang adong anggur di nasidai! 4 Alai ninna Jesus ma mandok ibana: Marhua ho tu Ahu, inang? Ndang dope ro tingkingku. 5 Dung i ninna inana i ma mandok aneka parhobas: Manang dja dohononna tu hamu, bahen hamu ma! 6 Alai mangihuthon adat parburion ni halak Jahudi, adong ma diri disi onom gunsi (hudon batu), siatsiat dua ro di tolu pitong. 7 Dung i ninna Jesus ma mandok nasida: Gohi hamu ma angka gunsi on aek! Djadi gok situtu ma dibahen. 8 Laos didok muse tu nasida: Tahui hamu ma sian i, dung i boan hamu ma tu indukmuna! Djadi diboan nasida ma. 9 Alai didai induk ni angka parhobas i ma aek i naung gabe anggur, djala ndang diboto haroroanna, ai holan angka parhobas na manahui aek i do umbotosa, gabe didjou ma pangoli i. 10 Djadi ninna ma mandok ibana: Saluhut djolma mangalehon pardjolo anggur na dumenggan; dung pe butong halak, asa dilehon na humurang. Ia ho, dipeop ho do anggur na dumenggan ro di nuaeng! 11 Asa i ma tanda na pardjolo, na binahen ni Jesus di huta Kana na di Galilea, papatarhon hasangaponna i. gabe porsea ma angka siseanna di Ibana. 12 Dung salpu i, tuat ma Ibana tu Kapernaum rap dohot inana, angka anggina dohot siseanna, laos mian manang piga ari disi. Dipabali Jesus angka partigatiga sian djoro i. 13 Djadi djonok ma Paska ni Jahudi, gabe nangkok ma Jesus tu huta Jerusalem. 14 Dung i hundol ma di djoro i didapot angka partigatoga lombu, birubiru dohot darapati ro di angka panungkari. 15 Djadi dipauli Jesus ma tali bahen linsinglinsing, dipabali ma nasida saluhutna sian djoro i, rap dohot angka birubiru dohot lombu, disarahon ma hepeng ni panungkari i, diunggilhon ma medjana. 16 Dung i ninna ma mandok angka partigatiga darapati: Boan hamu ma i sian on! Unang bahen hamu bagas ni Damang gabe partigatigaan! 17 Djadi diingot angka siseanna i ma hata na tarsurat i: "Hamuruhon humophop bagasmi do mangallang ahu!" 18 Dung i ninna angka halak Jahudi ma mangalusi Ibana: Aha ma tanda patuduhononmu tu hami, umbahen songon i dibahen Ho? 19 Gabe ninna Jesus ma mangalusi nasida: Lohai hamu ma djoro on; dung i padjongdjongonku ma i dibagasan tolu ari! 20 Djadi didok angka Jahudi i ma: Opatpulu onom taon do lelengna dipauli bagas djoro on; ia Ho, padjongdjongonmu ma i dibagasan tolu ari? 21 Alai dagingna i do djoro na nidokna disi. 22 Asa dung hehe Ibana sian na mate, diingot angka siseanna ma hata ondeng, eabe porsea ma nasida di hata ni surat i nang di hata na nidok ni Jesus. 23 Alai udju di huta Jerusalem Ibana, di pesta Paska i, lan ma porsea di Goarna, dung diida nasida tanda angka na binahenna i. 24 Alai ndang dihaporseai Jesus i nasida, ala saluhut nasida ditanda. 25 Ai ndang pola mandjalo panindangion Ibana taringot tu djolma i, ai diboto Ibana hian do na dibagasan roha ni halak.

Na hinatahon ni Jesus dohot si Nikodemus.
/3 Asa adong ma sahalak sian angka Parise, sintua ni Jahudi na margoar Nikodemus. 2 Na ro bornginborngin manopot Ibana, djadi didok ma mandok Ibana: Gurunami, huboto hami do Ho guru na ro sian Debata, ai ndang tarpatupa agia ise tanda songon na binahenmi, ia so Debata donganna. 3 Dung i ninna Jesus ma mangalusi ibana: Na tutu situtu do na hudok on tu ho: Ia so tubu djolma sian gindjang, ndang tarbahensa marnida haradjaon ni De- bata! 4 Dung i ninna si Nikodemus ma mandok Ibana: Songon dja ma tarbehen tubu muse halak, ia naung matua? Tune haulahansa ma mamasuhi siubeon ni inana, asa tubu? 5 Djadi dialusi Jesus ma: Na tutu situtu do na hudok on di ho: Anggo so tubu djolma sian aek dohot sian Tondi, ndang habongotansa haradjaon ni Debata! 6 Daging do na tubu sian daging, tondi do na tubu sian Tondi. 7 Unang ma longang roham, ala hudok tu ho: Ingkon tubu hamu sian gindjang! 8 Na mangullus do alogo dompak lomo ni rohana; dibege ho do parngongosna, alai ndang diboto ho haborhatanna manang hasahatanna. Laos songon i do ganup naung tubu sian Tondi. 9 Dung i ninna si Nikodemus ma mangalusi Ibana: Songon dia ma tarpadjadi i? 10 Djadi ninna Jesus ma mangalusi ibana: Ho, guru ni bangso Israel, ndang diboto ho i? 11 Na tutu situtu do na hudok on di ho: Huhatahon hami do na huboto hami djala huhatindangkon hami do naung huida hami, gabe ndang didjangkon hamu na huhatindangkon hami. 12 Gari angka na di tano on huhatahon tu hamu, ndang porsea hamu; tung porsea ma hamu, molo huhatahon tu hamu angka na di banua gindjang i? 13 Ndang adong na manaek tu banua gindjang, ia so naung tuat i sian banua gindjang; i ma Anak ni djolma i, na di banua gindjang i hian. 14 Djadi songon naung pinatimbo ni si Musa ulok i di halongonan, songon i naeng patimboon Anak ni djolma i, 15 asa dapotan hangoluan na salelenglelengna ganup na porsea di Ibana. 16 Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. 17 Ai ndang na disuru Debata Anakna i tu portibi on, asa uhumanna; naeng paluaonna portibi on tahe, umbahen na disuru. 18 Ndang siuhuman na porsea di Ibana; alai anggo na so porsea i, nunga hona uhum, ala so porsea ibana di Goar ni Anak sasada ni Debata. 19 Alai on ma uhum i: Nunga ro na tiur i tu portibi on, djadi holongan do roha ni angka djolma di na holom i asa di na tiur i, ai na djahat do parulannasida. 20 Ai ganup na mangulahon na roa, hosom do rohana di na tiur i, djala ndang didapothon na tiur i, asa unang gabe patar angka ulaonna i. 21 Alai na mangula hasintongan i, didapothon do na tiur i, asa patar parulanna i; ai dibagasan Debata do diula. Dihatindangkon si Johannes do Tuhan Jesus. 22 Dung i ro ma Jesus dohot angka siseanna i tu luat Judea, djadi mian disi ma djolo Ibana rap dohot nasida djala mandidihon. 23 Alai dohot do si Johannes mandidihon di Enon, mardonokkon huta Salem, ai na nia aek disi. Djadi tusi ma ro halak gabe tardidi. 24 Ai ndang dope dihurungkon si Johannes udju i. 26 Marsual ma disi angka sisean ni si Johannes dohot sahalak Jahudi siala parburion i. 26 Djadi didapothon nasida ma si Johannes, didok ma tu ibana: Gurunami, Halak i na ro tu djolom, di ipar ni aek Jordan, na hinatindangkonmi, I do mandidihon nuaeng, gabe saluhut halak ro mandapothon Ibana. 27 Dung i ninna si Johannes ma mangalusi: Ndang tarbuat djolma manang aha, anggo so dilehon tu ibana sian banua gindjang. 28 Hamu sandiri do sitindanggingku di na hudok: Ndada ahu Kristus i; na sinuru do ahu patudjolona. 29 Nampuna oroan, i do pangoli i. Alai na djongdjong do aleale ni pangoli i patangitangi ibana; djadi marlas ni roha situtu dibahen soara ni pangoli i. Asa halalas ni roha sisongon i ma djumpang di ahu.