/1 O hurata nenanga ma dola ya korona o Demo i hi doaka o ngango, ena genanga o Demo nagaka ka o dunia ma hirahi; Ngomi mi ihenoka, de' mia make oka de to ngomi mia lako mahirete; Ngomi mia pulonoka, de' mia so oka de to ngomi mia giama. Ma oraha o ngango genanga i hi matoko, ngomi mia make; Hababu genanga i ma korona enanga ngomi mi hi doaka o hakihi; Ngomi mi hi ngahu ngini ika mangale o ngango ma dutu de' i kakali, naga de o Ama, de' wo hi matokoka ngomi ino. Okia ngomi mia make oka de' mi ihene, ngomi o mi hi ngahu genanga ngini ika, la' ngini de ngomi ha make o ngango ka moi de o Ama de ai Ngohaka o Yesus Kristus. Ngomi mi tulihi nenanga la' to ngone nanga hininga i gou-goungu i morene. O abari nenanga ngomi mi ihenoka ai Ngohakino de' ngomi mi hi adonoka ngini ika: ma Jou Madutu genanga o dararono, de' unangoka ha kali-kali koiwa o hu hutu. Nako ngone ho temo ngone ho wango ka moi de de unanga, ena hioko ngone ho wango o hu hutu ma goronaka, ma ngone ho eluku ya oa de nanga demo-demo ya oa de nanga manarama. Ma' nako ngone ho wango o dararono ma goronaka hoka sarakia ma Jou Madutu naga o dararono ma goronaka, ngone ho wango i kekete, ho ma kao ya oa moi de moi, de' o Yesus, ai Ngohaka, ai awunu i hi tebini hagala to ngone nanga baradoha. Nako ngone ho temo ngone ho baradoha ua, ngone ha tipu nanga diri mahirete; de' ma Jou Madutu ko i wiwa to ngone nanga hininga ma goronaka. Ma' nako ngone ho ma ngaku hagala nanga baradoha ma Jou Madutu ika, unanga aha wo hi ganapu ai jaji de okia wo diai i adili; Unanga aha wo hi apongo hagala nanga baradoha de wo na hi tebini ngone hagala nanga manarama i howo-howonino. Ma nako ngone ho temo ngone ho baradoha ua, ngone ha pulono ma tero-tero ma Jou Madutu wo elu-eluku de ngone ha gogonua ma Jou Madutu ai demo nanga hiningaka.

/2 Ahi ngoha-ngohaka! Ngohi to tulihi nenanga ngini ika la' ngini uha ni diai o baradoha; Ma' nako naga yo diai o baradoha, to ngone nanga ro riwo wo ma tengo, ena genanga o Yesus Kristus wo adi-adili genanga; unanga aha wo na gahoko mangale ngone o Ama ai himangoka.