/1 Ba va sosodea Tamasa sa Nana tataru koa gita, sina pa totosona pu koa tie sini si gita, si mate hobe gita sa Karisito. Sipu lopu ele kamo sa inevana pasova, si gilania Zisu sipu ele kamo tugo sa aoa tanisa pude taluarae pa popoa pepeso meke la koasa Tamana si Asa, ele tataru ni Sa saripu, Nana pu koa pa popoa pepeso, ke tolene gua tataru sisigitini Sa si arini. Meke mae guadi tugo koe Zisu Karisito, sa tie va sosode hinokara, sapu turu pule va kenue pa minate, sapu sa Banara tadi na Banara pa popoa pepeso; Asa si tataruni gita, meke va via gita meke nuzapa pani sari nada sini pa korapa eharana soti. Loke tataru sapu noma holania sapu gua he, si pude ponia sa tie sa nana tinoa, pude paeni sari na turanana. Ura tataru va sisigitini Tamasa sarina tinoni pa popoa pepeso, ke poninia Sa sa tuna ekei, pude saripu ranea Asa si lopu kaqu mate palae ba kaqu tagoa ri sa tinoa hola. Gama doduru tinoni Izireli, ele tataru va sisigitini gamu Rau si gamu gua si asa, ke lopu kaqu hite ari makudona sa qua tataru koa gamu, gua.

/2 Meke loke tie si kaqu osonia sa lohina gua sa hinokarana sa linotu: sina ta dogoro pa tini tie sa Tamasa, meke tava tonotona koasa Maqomaqo hope, meke ta dogoro koari na mateana, ta tarae koari na butubutu, meke tava hinokara pa kasia popoa, meke ta turana la pa nana qulori. Pa podalaena si koanana tugo sa zinama, meke koa koasa Tamasa sa zinama; Meke sa Tamasa tugo sa zinama meke ta evanae tinoni sa zinama, meke somana koa koa gita meke dogoria gita sa Nana qulori. Sina ta evana beto saripu gua hire, pude tava gore vura sapu koroto nia sa Tamasa koa sa Poropita. Kaqu ari tianania sa vineki sa koburu meke podoa sa si keke tuna koreo, meke kaqu pozania rini e Imanuela, sa pozana sa; Sapu sa Tamasa si koa somana koa gita si gunia sa. Ele koa va seunae koa goi si Rau, ba lopu gilanau goi ta Pilipi? Asa sapu ele dogorau, si ele dogoria tugo sa sa Tamaqu; ba vegua ke zama guni nau tu goi, va dogoroni gami sa Tamamu gua? gua se Zisu. Lopu va hinokaria goi sipu koa koa sa Tamaqu si Rau, meke sa Tamaqu si koa koa Rau?.

/3 Asa sapu helahelaenia sapu na Tuna Tamasa se Zisu, si koa koa sa sa Tamasa, meke koa koasa Tamasa si asa. Meke olana la tugo sa mateana, Kaqu mae koa goi sa Maqomaqo Hope, meke sa niniranira Tanisa sapu ululu hola si kaqu va aqorigo; Ura Asa sapu kaqu podoa goi si kaqu ta pozae Hopena, na Tuna sa Tamasa tugo. Meke zama laia Zisu si asa, Ele dogoria goi si Asa, meke Asa tugo sapu korapa zama atu koa goi. Ele ta podo koa gita si keke koburu! Ele ta poni koa gita sa Tuna meke kaqu ta evanae nada koimata; Meke kaqu ta pozae, Na vinari va magasa, Na tie varikarovae, na Tamasa lavata, na tamada ninira, meke na Banara tana Binule. Ba sipu korapa zama gua Sa, si mae opo tamuni keke lei nedalana si arini: Meke vura mae gana pa lei si keke mamalaini zinama, sapu zama guahe, Sa Tuqu koleo tugo si hiera sapu qetunia rau; Ke mi avosia tu gamu si Asa, gua. Ura koanana pa tinina Karisito sa doduruna sa guguana gotogotona tanisa Tamasa.

/4 Meke zama la koa rini si Asa, Gamu si mae mia panapeka: Arau si mae guaqu tu pana ulu: Gamu sina butu butu pa popoa pepeso; ba Arau si lopu tanisa popoa pepeso. Meke zama la koa rini se Zisu, Zama hinokara atu koa gamu si Rau, sipu lopu ele koa se Ebarahami, si ele koa qua tu si Rau. Meke zamaia sa barikaleqe si Asa, Gilania qua sipu kaqu mae sa Mesaia sapu ta pozae Karisito: pana mae si Asa, si kaqu tozi vurani sari doduru gorena ka sagena. Meke zamaia Zisu si asa, Arau mo hie si Asa sapu korapa zama atu koa goi. Meke zama lai Zisu si arini, Arau tugo sa palavana sa tinoa: Asa sapu mae koa Rau si lopu ovia; meke asa sapu rane Au si lopu kaqu memeha. Meke zama pule lai pule Zisu si arini, Zama hok'hokara atu koa gamu si Arau, Arau tugo sa sasada tadi na sipi. Meke zama laia Zisu si asa, Na vina toa pule, meke na tinoa holatugo si Rau: Asa sapu rane Au si Arau be mate si asa, ba kaqu toa pule si asa. Pozanau titisa na Banara gamu si Arau, uve hinokaramia tugo si gamu, ura gua tugo Asa si Rau.

/5 Meke zama va haboti sa pa duduli sa minate, meke henai sa sari ka lima palava, meke sari karu igana, meke dono sage la pa manauru, meke manani Sa, Meke valai Sa koari Nana disaepeli meke va hiani ri na disaepeli koari na minate. Meke ta hia beto sori noduru meke dena beto tugo: Meke pudiki varigarani ri sari umumu koa holadi, si sini sari ka manege rua pili. Banara, doduru boni si habu mo si gami, ba namu loketona hokara vagia: ba leana, pa Mua zinama si kaqu ta ipae tugo sa vaqara. Meke sipu ele ipania rini sinia na igana sa vaqara, meke qi ta rikata si asa. Meke korapa habotu dia pa vale sirana sari karua tie behudi, meke sipu avosonia ri karua sapu e Zisu si ene hola, gua, si velavela vura si arini, meke zama, ke Banara, Tuna Devita, mu tataruni gami, gua si arini. Meke turu noso se Zisu, meke tioki sa si arini, na sa si emi nia gamu pude tavete ponini gamu Rau?. Meke olana la koasa sari karua, Banara pude tava vanunu sari mata mami, gua. Ke tataru ni Zisu sarini meke hinoqa dodogorae sari matadi, meke lulia rini si Asa.

/6 Uru ele gilana va leania gamu doduru butu butu tie Izireli, sapu ele va turu pulea Tamasa se Zisu, sapu va matea gamu, pude koa Banara se Karisito. Meke pude ta evana si guahe, sapu mate sa Karisito, meke turu pule, meke toa hola pude boka koa na Banara tadi na matedi meke na tie toadi. Tavete betoi Sa sari doduru likakalae meke loke tona sapu lopu taveti Sa. Ura ta tavete koa Sa sari doduru likakalae, pa Manauru meke pa pepeso, tinitona ta dogorodi, meke tinitona lopu ta dogorodi, na butu butu na hinia, na binanara na ninira nira, tava podaka vura koa sa sari doduru likakalae pude Tanisa tugo. Ba pa vina betodi rina rane hire si ele zama si Asa pa korapana sa Tuna, sapu meru meruni sari doduru tinitona, meke pa tinokaena Sa si podaka vura sa pepeso. Hinokara tugo sa Tamasa sapu tioko gamu pude somanae koasa Tuna, sapu e Zisu Karisito, sa nada Banara.

/7