O Demo ma dutu gea o Yesusu
1 Ka ma dodihirainohi o dunia ko idadiuahi de Una iwihiromanga o Demo, Una gea nagau. De Una o Demo naga Ma Jouoka abe Una de Ma Jou o Baba ona hoimoi ho duru yomatoteroino. 2 Ho ka ma dodihirainohi Una naga de Ma Jou. 3 O dulaada mata-mata idadi ka o Demoino mangale moioo de ko iwa idadi nako ko Unanginoua wohidadi. 4 O wowango ihititi Una o Demoino, de o wowango gea o dararono abe yahitararono o nyawaika. 5 De ma dararono gea ihitararono o fufutu ma goronaka abe ko idadiua o fufutu gea yahohonenge. 6 De naga Ma Jou ai hidingoto ma nyawa womatengo ai romanga o Yohanese. 7 Ma Jou wihidingoto o Yohanese o nyawaika la una wahihingahu-ngahu onangika o dararono ma titi. De Ma Jou ai mau la o nyawa mata-mataika ihigihene de yangaku ai hingahu ma demoika. 8 De o dararono gea, ko ma titiua o Yohanese abe una ka woboa dika la wahingahu-ngahu o nyawaika, wato, 9 "O dararono ma gou-goungu, gea Una abe woboaka la ka idadi wahitararono o nyawa mata-mataika o duniaka naa." Hokogea o Yohanese ai hingahu ma demo. 10 Abe o Demo Una nagau o dunia ma lokuoka de ngaro Ma Jou wohidadi o dunia de ma dola mata-mata Unangino masara o dunia ma nyawa ona ko iwihiorikuahi abe o Demo Unangoo Ma Jou. 11 Ho Una woboa ai kapongika, masara ona ai kapongoka yogogere, o Yahudi ma nyawa, ona gea ko manga ngoe ko iwidafongua. 12 Masara o nyawa utu iwidafongo hiadono iwingaku Unangika. De gea Una wahiakunu onangika manga ngiriki ho hiadono iwingaku la yodadi to Ma Jou ai ngofa-ngofaka. 13 Ho gea yodadi Ma Jou ai ngofa-ngofaka ko imakadaenua hoka o duniaka ma ngofaka abe manga baba o nyawa hiadono yomaboa manga eleino. Masara ona manga ngongaku Unangika ma titi hiadono Ma Jou wahidadi to Una ai ngofa-ngofaka idodutu. 14 O Demo Una womahidadioka o nyawa la gea ka idadi wogogere ngone o nyawa nanga hidogoronaka. De ngomi abe wiwinii-niiki miamakeokau ai debi-debini ma dararono itotiai. De ka Ma Jou o Babaino dika wamake ai buturungu ma medebini itotiai gea. Una Ma Jou ai ngofaka womatengoka ho duru ai hiningaka iwiomangoka o dora ma ngango de mata-mata wodiai gea inahimatoko Ma Jou ai hininga ma gou-goungu. 15 De gea Una ma titi abe o Yohanese wahingahu-ngahu o nyawaika duru waamo-amokiye wato, "Ma dihira tato ahao naga womatengo Una wohihidoduruino, de ma oraha naa Una naga abe tinihingahuoka. De nako Una de ngohi, ka Unangohi wokurutiye angamoi ngohi ko tomaboauahi de Una nagau." Hokogea o Yohanese wahitararono o nyawaika. 16 Mangale Ma Jou o Ngofaka ai dora ma ngango abe duru ilamoko o nyawa mata-mataika hiadono de ai dora ma gahumino gea wonagopoa ngoneino ma owa irupa-rupa. De ai dora ma ngango gea ko itoa-toakua. 17 Ma dihira ngone o Yahudi ma nyawa Ma Jou wonahidoaka ai pareta o Musaino masara ai pareta gea ko inahitararonuahi Ma Jou ai dora. Abe o dora ma ngango de ma gou-goungu abe yadaene mata-mataika gea ena mata-mata, wonahimatoko o Yesusu Kristusino. 18 De Ma Jou, Una gea o nyawa ko ma moiuahi iwimake ai rupa. Masara naga Ma Jou o Baba ka womatengo dika de ai hininga duru adaene Unangika abe ona yomatoteroino. De ai Ngofaka Una wonahimatoko ngoneino Ma Jou ai hininga la hiadono ka idadi duru hihioriki.
O Yohanese womahingahu o Yahudi ma nyawaika
19 De ma moiuku o Yahudi ma nyawa manga hohidimono abe yogogere o Yerusaleeme ma kotaka, yahidingoto manga hidemo Ma Jouika yamuruono naga la ona o Yohanese iwitutumu. De naga o hidimono utu onangoo o Lewi ma dutuino abe yahidingoto la to ona manga leleha ma demo yadofanga o Yohanesika. Ho ona yotuono yoboa o Yohanesino de iwileha unangika ato, "Hobata, ngomi naa mimahilooahi, mitotaka mia hidimono manga leleha la ka idadi ngomioli miadofanga onangikali ani bobaluhu ma demo. De hokonaa dika mia gianongoru minileha, ‘Ngona naa nomahingahu ngomino nodadi onaguna? Sarakia, ka idadi nomihingahu ngomino?’" 20 De o Yohanese ko womahipongonua masara duru womahingahu onangika wato, "Duru tagou-goungu, ngohi naa Ma Jou ai behehongua abe hihiromanga o Mesia." 21 Ho iwilehali ato, "Nako gea marai ngona Ma Jou ai uru ma dodofanga o Elia abe naa nolioli o duniauku e?" De wapaluhu onangika wato, "Koua, ngohi ko o Eliaua." De ona iwilehali ato, "Ho marai ngona womatengo gea Ma Jou ai uru ma dodofanga abe wato ahao woboa?" De o Yohanese wopaluhu onangika wato, "Koua, gea ko ngohiua." 22 Ho ma bahaika iwilehali ato, "Hobata, mimahilooahi, ma kiani minihioriki ngona onaguna la naga ani demo de ma titioka la miadofanga mia hidimonika. Ho migahoko la nomahitararono ngomino." 23 Ho gea o Yohanese womahitararono onangika, wato, "Ngohi naa abe ma dihira Ma Jou ai uru ma dodofanga o Yesaya wotemo ma titi ngohi duru ihihitaana wato, 'Ahao naga womatengo abe waamo-amokiye o tonaka ma kakaahaka, wahitararono o nyawaika wato, "O ngekomo niwihidiai la Ma Jou genangino ka idadi woboa.'" O Yesaya ai demo gea ma titi duru itaana ngohino naa." Hokogea o Yohanese womahingahu onangika. 24 Masara genangoka nagali o Farisi manga doomuino ma nyawa, onangoo o Yahudi ma nyawa manga hohidimono yahidingoto o Yohanesika. 25 Ho ahao onangoo iwileha, ato, "Masara, Hobata, nako ngona ko o Mesiaua, de ko o Eliaua, de ko Ma Jou ai uru ma dodofangua abe wonahibehehongoka, adodoa ho ngona o nyawa naohiki?" 26 De o Yohanese wapaluhu onangika wato, "Ngohi naa o nyawa taohiki ka de o akere dika masara womatengo gea Una nagau ti ngini nia hidogoronaka ngaro ko niwihiorikuahi. 27 Una gea ahao wohihidoduruino de Unangohi wokurutiye ho hiadono ngaro ngohi todadi o gilaongo abe totobahupu-huputu o nyawa manga sandaala masara nako to Una ai sandaala, ngohi ahi dodipokouku hiadono ko tomoroinua tahuputu." Hokogea o Yohanese womahitararono. 28 De mata-mata gea idadi o Betania ma kapongoka abe naga doka o Yorodani ma akere ma honongaka, genangoka o Yohanese ma oraha gea o nyawa watobaohiki.
O Yesusu, Una gea Ma Jou ai Domba
29 De ma dawangeino o Yohanese wimake o Yesusu woboaino de o Yohanese wahidumutu ai doo-dodiawoika wato, "Abeika, Ma Jou ai Domba ka ma ngofakohi, gea Una abe o nyawa o duniaka manga howono Ma Jouika waofi. 30 Naa Una abe tinihingahuoka tato, naga womatengo ahao wohihidoduruino de nako ngohi de Una ka Unangohi wokurutiye. De ngaro ngohi tohira tomaboa masara ko tomaboauahi de Una nagau. 31 Ma dihira ngohioo ko tihiorikuahi Ma Jou ai Domba gea onaguna, ma naa tihiorikoka. Abe ma titi ngohi toboa nenangino de tinihiohiki de o akere, duru ma titi moi dika, de gea la ngini o Isiraele ma nyawa, nginioo niwihioriki. Ho Una naa tinihimatoko nginika." 32-33 De o Yohanese waade-adeohi onangika wato, "Ma dihira ngohioo ko tihiorikuahi Una Ma Jou ai ngofaka de ai romanga o Yesusu. De ngohi naa Ma Jou wohihidingotino naangino la o nyawa tahiohiki de o akere. De Una wohihingahuoo ngohino wato, 'Ka onaguna dika nimake Ma Jou o Womaha widangi unanguku, gea Una abe ahao o nyawa wahiohiki de Ma Jou o Womaha hiadono wangohama manga hiningaika. De ngohi timakeoka Ma Jou o Womaha dakuku o Horogauku wouti hoka o namodaara hiadono wigutiuku Unanguku de yomahidogogere moi Una de o Yesusu. 34 Ho duru tohioriki tamakeoka ai dodunguu Ma Jouino abe Una naa Ma Jou ai Ngofaka de duru tagou-goungu nginika tinihingahu Una naa." Hokogea o Yohanese ai hitararono onangika.
Ona abe duru ma dodihiraka iwinii-niiki o Yesusu
35 De ma dawangeinoli naga genangoka o Yohanese de ai dodiawo yahinooto, ona gea ai doomuino abe ka ihikaika iwiniiki. 36 Ho ka de o Yohanese wimake o Yesusu witilakuru de wotemo yahinootoika gea, wato, "Una gea nimalegahi, Una gea Ma Jou ai huhuba ma domba abe ka ma ngofakohi!" 37 Ho ka de yahinooto gea yoihene de yosoboka, o Yohanese iwidogunoaika de o Yesusoli iwiniiki. 38 Ho o Yesusu wadogilioro de ona wamake iwihidoduruino de waleha onangika wato, "Hobata, ngini naa nialingiri o kia?" De ona iwipaluhu unangika ato, "Mia Guru, minileha dika, o kiaka ngona nogogere?" 39 De o Yesusu wopaluhu onangika wato, "Ka idadi nihiniiki naa la nihioriki." De yahinooto gea iwiniiki o Yesusu ho yomahiadonoka ai ngiika. Gea yomahiadono ka o ngoruminohi abe o takoro ngimoi. De o wange gea yomahidogogere genangoka de o Yesusu. 40 Ona yahinooto gea o Yesusu iwiniiki angamoi o Yohanese wahingahuokau, wato o Yesusu Ma Jou ai huhuba ma domba abe ka o ngofakohi. De abe yahinootoino gea, naga womatengo ai romanga o Andareasa, una gea o Peturusu ai dodoto. O Peturusu una gea abe ai romanga hinooto, ho moi ai romanga o Simono. 41 De una ko iwiwa genangoka o Yesusu ai ngioka ho ka de o Andareasa o Yesusu wirekata ibooto de wato, "Naa ko kia-kiauahi todiai la iti ahi riaka o Peturusu timakeokahi la naa tihingahu ma titi nanga guru naa." Ho duru womataiti wilingiri ai riaka o Simono Peturusu. Ho ka de wimake de wihitodokanika wato, "Ngomi wiwimakeoka nanga Mesia." O romanga o Mesia nako o Yunani manga demo gea o Kristusu de gea ma titi Ma Jou ai Behehongo abe ngone o nyawa wonahihohe nanga howonino. 42 Ho ka de wihingahuoka o Simono Peturusika wato, "Wiwimakeoka nanga Mesia," de o Andareasa ai riaka wiao o Yesusika. Ho gea ahao yomarihimanga o Yesusu de o Simono Peturusu, de o Yesusu widamaanoka unangika de wato, "Ngona naa tonihioriki, ngona o Simono, o Yohanese ai ngofaka. De naa tonihiromangoli ho ani romanga o Kefasa." O romanga o Kefasa gea ma titi o loku hakaru ho nako haturuuru o Yahudi ma nyawa manga demoika gea o Peturusu.
O Yesusu wahoko o Filipusu de o Natanele la iwiniiki
43 De ma dawangeinoli o Yesusu wato woiki o Galileaika. De gea waika de wimake womatengo ai romanga o Filipusu de wiahokino wato, "Hobata, togahoko la ngonaoo nohiniiki ngohi." 44 O Filipusu yomahikapongo moi de o Peturusu de o Andareasa, manga kapongo o Besaida ma romanga. 45 De o Filipusu ahao wimake manga dodiawo o Natanele de wihingahu unangika wato, "Ngomi wiwimakeoka nanga Mesia abe o Musa wotulihukuoka Ma Jou ai Behehongo ma Bukuoka, de ma titi Una gea abe Ma Jou ai uru ma dodofanga onangoo ma dodihiraino inahingahuokau. De Una gea wiwimakeoka. Una o Nasaretino ma nyawa, o Yusupu ai ngofaka." 46 Ka de gea woihene de o Natanele woleha wato, "Mode ka idadi hamake ma owa o Nasarete ma kapongino iboa?" De o Filipusu wopaluhu wato, "Irahai hosobo genangika la ngonaoo ka idadi nimake." Ho yosobo ato o Yesusu iwitutumu. 47 Ho yoboaino o Yesusino de ona yotagiohi iwihimangino abe o Natanele ko womahiadonuahi de o Yesusu wihidaere unangika wato, "Ho ngone naa himakeoka o nauru abe ko woelu-elukua ho itiai una naa hihiromanga o Isiraele ma nyawa ma gou-goungu." Hokogea o Yesusu wotemo o nyawa manga himangoka. 48 Ho gea woihene de o Natanele wileha o Yesusika wato, "Hobata, o kiaka homakamakeoka hiadono ngona nato nohihioriki ngohi naa?" De o Yesusu wipaluhu unangika wato, "Gianongoru, kangano o Filipusu ko woniahokuahi de ngohi tonimakeokau abe ngona o gota o gogilioro gea ma timiuku nomafofongika, nogogeruku." 49 O Yesusu ai demo gea woihene de o Natanele wohidemo de ai heranga ma demo wato, "Mia Guru, gea mata-mata nohioriki e? Ngona igoungu Ma Jou ai Ngofaka. Ngona o Isiraele ma nyawa manga Koano!" 50 De o Yesusu wipaluhu o Natanelika wato, "Gea tonihingahu dika abe tonimakeoka o gogilioro ma gota ma timiuku de done ngona nohingakuokau? Masara naga utuohi ahao namake abe utuohi inihiheranga." 51 De ahao o Yesusu wihitararonohi wato, "Naa duru tagou-goungu tonihingahu, ngona ahao namake ahao o Horoga ifelenga de Ma Jou ai malaekata youti-doa o Nyawa ma Ngofakoka abe Una wodadi manga ngute."
O Yesusu o heheranga wodiai o gogilaka ma rame-rameoka
1 De o wange hinooto ipaha de naga o gogilaka ma rame-rame o Kana ma kapongoka abe o Galilea ma tonakoka de o Yesusu de ngoi meme naga o rame-rameoka gea. 2 Abe o gogilakino manga baluhu manga hiaturu la o Yesusu de ona iwitobaniiki onangoo yahokino la manga gogilaka ma rame-rame yaniiki. 3 De ona abe yahokino yaniiki o gogilaka ma rame-rame onangika yahiokere o angguru ma teongo ma gohaka. Masara ahao manga angguru ma teongo yamataka de o Yesusu ngoi meme moiki mihingahu o Yesusika mato, "Manga angguru ko iwaka." 4 De o Yesusu womipaluhu munangika wato, "Ele, ngaro ufa nahuha manga angguru gea, nanoaika ngohioka, ma, iti nohioriki ma oraha ko adonuahi abe ahao tomahimatoko ahi buturungu ma gahumu. 5 Ho ngoi meme mahingahu onangika abe yoleleani o rame-rameoka gea mato, "O kia dika o Yesusu winihuloko la nidiai, gea ngini nidiai." 6 De genangoka naga o akere ma ngi butaanga abe yodiai o hakaruino. De o akere ma ngi gea ma hapa hoka o boto duru ma ago-agomo abe amomoiika ka idadi ihinoa o akere ngade-ngade o litere o ratuhu moi. De genangino yomaguiti o akere la yapake yomaihoro de genangino yale la manga kiahonanga ihihoro ihidodiai imaketero hoka o Yahudi ma nyawa yomahibohono la ato manga datoro itiai Ma Jouika. Gea ma titi hiadono o akere ma ngi butaanga gea naga genangoka. 7 De abe yoleleani o rame-rame ma goronaka gea o Yesusu wahibehehongo onangika, wato, "O akere ma ngi gea kiani niakokiomanga de o akere." Ka de ai behehongo yoihene de yomulaengoka o akere yale de yoguhe ma boto-botouku gea hiadono duru yakokiomangoka. 8 Gea yaomanga ibooto de ahao o Yesusu wahibehehongoli ona yoleleanika wato, "Ho gea ibooto ho naa genangoka niwiguiti la o rame-rame manga hidimonika niwidotaka." Ho yodiai hoka o Yesusu wahibehehongoka. 9 De o akere iwidotaka unangika gea o Yesusu wohidadioka o angguru ma teongo ma gohaka. Ho naa, ka de o rame-rame ma hidimono gea wataili de duru woheranga hiadono womatemo ai hiningaka wato, "O kiaino o angguru naa?" Una gea ko wohiorikua o angguru ma teongo o kiaino iwiguhe masara ona abe yoleleani ona duru ihioriki. Ho naa una ka de wataili ibooto de wiahokino woila-ilaka. 10 De wiade-ade unangika wato, "O nyawa manga biaha yahitihiraka manga angguru ma rorahai abe yahiokere onangika abe yahokino. Gea yahiokere hiadono yakokiwedonoka de ahao manga angguru biaha abe ikuranga imutiti enangoli yahiokere. Masara nanga biaha gea ngona nohikawalimi, angamoi ngaro ani angguru kangano irahai ma ka nenangohi irahai abe nagogonika hiadono ma oraha naa de ahao nohihupu." 11 O heheranga naa o Yesusu wodiai o Galilea ma tonakoka abe o Kana ma kapongoka. Genangoka wohititi ai dodunguu, abe yahiheranga o nyawa, la onangika womahimatoko ai buturungu ma medebini itotiai. De o Yesusu Iwinii-niiki manga ngongaku ikokidogoli o Yesusika. 12 Ho gea ipaha de o Yesusu woiki dai o Kapenaumu ma kapongoko. Naga yomakiniiki ngoi meme de ai doo-dodoto de ona gea abe wairiki la iwitobaniiki. Ho manga futu muruonino naga yomahidodogumu o Kapenaumu ma kapongoka. O Yesusu waduhu abe yomafuku-fukunu Ma Jou ai Tauoka O Matiusu 21:12-13; O Maruku 11:15-17; O Lukasa 19:45-46 13 De genangoka o Yesusu wodamaa hiadono itigioka o Yahudi ma nyawa ihirame-rame manga Totilakuru ma Rame-rame de ahao wogila-gila daku o Yerusaleeme ma kotaiye. 14 De womahiadonika de ahao woiki Ma Jou ai Tauika de wowohama. De abe ihiromanga Ma Jou ai Tau ma punga-punga genangoka o Yesusu wamake o nyawa ko manga ngoe duru genangoka yomafukunu o hapi, de o domba, de o namodaara. De naga o nyawa utu genangoka yogogeruku manga meja-mejaka la o nyawa o tonaka utuino manga tiwi yaturuuru de o tiwi abe ka idadi yapake o Yerusaleemoka. 15 Mata-mata gea o Yesusu wamake de una duru ko woigoua ho waleino hoka o migi de womadiai o boboha moi. De ai boboha gea ahao wapake la o nyawa gea wahikiniiki Ma Jou ai Tauoka. Ho ona gea waduhu ka ma moi de manga hapi de manga domba. De abe o tiwi yotobaturuuru, to ona manga meja-meja wamotumu ho hiadono manga tiwi wapurarahoka. 16 De wahuloko onangika abe o namodaara yofuku-fukunu, wato, "Nia totaleo nihihupuoka! Ahi Baba ai tau ufa nihidadi o bubukunu ma tau!" 17 Gea ka de idadi de ona iwitobaniiki yomahohininga abe itulihukuokau Ma Jou ai Demo-demoka abe itemo ato, "Ahi Baba, ahi dora alufungoka ani tauika hiadono ko tomatongohonokaua ho kiani ani tau todatoko o dorouino." 18 Hokogea o Yesusu wakiniiki ibootino de naga o Yahudi ma nyawa manga balu-baluhu yomarihimanga de o Yesusu de iwileha, ato, "Sarakia ngona naa hiadono hokogea nodiai? Nako Ma Jou wonihigunoa ngona nodiai hokogea ngomi miato kiani nomihimatoko o dodunguu la nomahitaana la gea minihioriki ngona de ani kuahaka." 19 De o Yesusu wapaluhu onangika wato, "Nako Ma Jou ai Tau nenanga niakilianga de ahao o wange hange dika de ngohi tohigokokali." 20 De ona iwipaluhu o Yesusika ato, "Adoo! Barikua ona ko manga ngoe abe Ma Jou ai Tau nenanga yodiai de o taongo moruata de butaangaino yokarajaanga masara genangoo de ko yabootua. Ho done sarakia ngona nato ngaro naga yakilianga masara ngona napoa de o wange hange dika nohigokokali?" Hokogea manga demo. 21 Masara o Yesusu womahiketero de ai badanga dika abe wato Ma Jou ai Tau gea ma titi to una ma hirete ai badanga. 22 Masara duru ma dekanino de ahao ai demo ma titi gea ona iwitobaniiki yohininga de yomangaratii. Abe ai lungunino o Yesusu womomikokau de ahao yomahohininga ai demo ma dihira gea womahiketero ai badanga de Ma Jou ai Tau. Ho gea yomahohininga de ona duru yangaku Ma Jou ai Demo-demoika. De abe ma dihira o Yesusu wahingahuoka abe wato ai futu hange dika de womomikoka, genangikaoo duru yangaku. O Yesusu duru wahioriki o nyawa manga hininga 23 De ma oraha o Yesusu waniiki o Totilakuru ma Rame-rame gea o Yerusaleeme ma kotaka, naga o nyawa manga ngoe iwingaku, masara ai romangika dika yangaku, ho yomahinganono ai romangika dika mangale iwimake wodiai o heheranga ma ngoe genangoka. 24-25 Masara onangika abe manga ngongaku hokogea dika o Yesusu wahioriki abe manga ngongaku ko ingodumuahi angamoi o nyawa mata-mata duru manga hininga wahioriki. Ho ngaro ufa naga iwihingahu hokokia o nyawa manga hiningaka angamoi gea Una wohiorikokau.
O Yesusu de o Nikodemusu yomakoketemo
1 Naga womatengo waniiki o Yahudi ma nyawa manga agama ma doomu abe ihiromanga o Farisi ma doomu. De una womatengo gea ai romanga o Nikodemusu, de una o Yahudi ma nyawa manga hidimono. Abe una wodadi manga hidimono moi yamoritumidino abe duru yokokurutiye o Yahudi ma nyawaka. 2 Ho o futu-futuoka de o Nikodemusu woboa o Yesusino de wotemo o Yesusika wato, "Guru, ngomi mihioriki gea Ma Jou wonihidingoto ngomino mangale miamake to ngona ani dodunguu. Angamoi ko moiua ka idadi yodiai o heheranga abe hoka ngonali nodiai nako ko Ma Jouokaua de aino." Hokogea o Nikodemusu womaade-ade. 3 De o Yesusu wopaluhu unangika wato, "Naa duru tagou-goungu tonihingahu, o nyawa abe Ma Jou ahao wahikoano ona gea kiani yomaboali." 4 De o Nikodemusu wileha o Yesusika wato, "Ho mode yobaluhiyeoka de ka idadi yomaboali? De mode ka idadiohi manga meme ami pokorika yolioli la yahigerewotoli?" 5 De o Yesusu wipaluhu wato, Ngona nagoungu ko idadiua hokogea o nyawa yomaboali. Masara Ngohi naa duru tagou-goungu tonihingahu, nako moioo de ko yahigerewotuahi de o akere de o Womaha Ma Jouino, ona gea ko idadiuahi Ma Jou wahikoano. 6 Angamoi o kia dika yahigerewoto o roehino gea ka o roeholi, de o kia dika yahigerewoto o Womahino gea ka o womaholi. 7 Ho ufa ngona noheranga angamoi ngohi tonihingahuoka ngonaika tato, ngini kiani nimaboali." 8 De ahao o Yesusu wohiketero wato, "Ma Jou ai Womaha ka idadi hohiketero de o hidaloko angamoi ko idadiua o hidaloko hamake de nanga lako. Gea iwuwu ka idadi ma ilingi hoihene ma, ko hohiorikua o kiaino iboa de o kiaika akaika. Imaketero hokogea de ona abe yomaboali ma titi yahigerewoto de Ma Jou ai Womahino abe ka idadi hamake manga wowango ma datorino abe ona yodadioka Ma Jou wahikoano." 9 Ka de hokogea woihene de o Nikodemusu duru woheranga hiadono wotemo wato, "Ei, ma titi gea marai ngohi ko tomangaratiiuahi." 10 De o Yesusu wipaluhu unangika wato, "Ngona naa o Isiraele ma nyawa manga guru abe ona duru inihikurutiye de mode ngona ko nomangaratiiua ma titi naa abe tonihingahuoka? 11 Naa duru tagou-goungu tonihingahu ngonaika, gea abe ngomi o nyawa miamakeoka de mia lako, gea minihingahuoka nginika. Mia demo gea ma titi mihiorikoka hiadono mitemo masara ngini ko niodafongua. 12 De ma titi naa abe ngohi tonihingahuoka, gea abe idadi o duniaka, ho nako ma titi gea ko nomangaratiiua de done sarakia nohingaku nako tonihingahuoli abe idadi o Horogaka? 13 Ma, igoungu, ko iwa moi o nyawa o duniaka naa abe yadonoka daku o Horogaiye. Masara Ngohi abe tomahiromanga o Nyawa ma Ngofaka, Ngohi o Horogaka de tauku.” 14 Ka de gea o Yesusu wihingahuoka de ahao ai demo-demo wohigila-gila o Nikodemusika wato, "Duru imaketero hoka o Musa o tonaka ma kakaahaka o dodiha o tabaagaino gea wohidoaiye o gotaka la o nyawa wahihupu manga boditoino, de duru hoka genangoo Ma Jou ai putuhu ma titi hiadono o Nyawa ma Ngofaka kiani iwihidoaiye. 15 De gea la onagona dika iwingaku Unangika, ona gea yamake o wowango ma hungioli ka hiado-adonika. 16 Mangale Ma Jou duru wadora o nyawa o duniaka naa, ho wihidoaka ai Ngofaka ngaro ka womatengo dika, la onagona dika iwingaku ko yobinaahaua de gea yamake o wowango ma hungi ka hiado-adonika. 17 Angamoi gea Ma Jou wihidingoto ai Ngofaka o duniauku, mangale ko ma titiua wahohowono o dunia ma nyawa, masara ma titi to ona manga howono Ma Jouika waofi. 18 De onagona dika iwingaku ai Ngofakika, ona gea o hohowono Ma Jouino ko amakeuau, masara nako ko iwingakua ona gea manga hohowono o binaahaika nagahi angamoi ona ko iwingakua Ma Jou ai Ngofaka womatengoka gea, ho ko idadiua waofi manga howono. 19 Hokonaa ma titi manga hohowono gea: angamoi o dararono ma gou-goungu Ma Jouino iboakau o duniauku, masara o nyawa nako o dararono de o fufutu ka o fufutuohi yoigo mangale gea ona yodiaioka itorou. 20 Onagona dika yotobadiai itotorou ona gea ka yodohata o dararono ma gou-goungika gea, de yoluku yanoa o fufutu gea la yoboa o dararonino. O fufutu yoluku yanoa ma titi ato done manga howonino yahitararono. Gea ma titi ho hiadono manga hohowono o binaahaika gea nagahi. 21 Masara ona abe yoboa o dararonino, gea o nyawa abe yoigo yaniiki ma gou-goungu Ma Jouino. Ho ma titi gea ona yowango de Ma Jou hiadono manga datoroka itaana yodiai itiai de gea o nyawa utu yamake de ihioriki Ma Jou dika wahiakunu onangika ka hiadono manga datoro itiai."
O Yohanese wahitararono ma titi o Yesusu
22 Ipahaika de o Yesusu de Iwinii-niiki yoiki o Yudea ma tonakika, abe doka o Isiraele manga tonaka ma honongaka. De genangoka yogogere o minggu muruonino naga, de o Yesusu o nyawa waohiki genangoka. 23-24 De ma oraha gea o Yohanese una ko iwibuiuahi. Ho una naga o ngi moioka imakitingaka de o Yesusu ko ikurutikaua abe ma romanga o Ainono, de genangoka o Yohanese o nyawa waohiki angamoi naga o akere ma ngoe genangoka. O Ainono ma ngi gea abe imahitigika o Salimi ma kapongo. De genangino ka ihikaika naga o nyawa yoboaino la ka idadi o Yohanese waohiki. 25 De o wange moiuku o Yohanese iwinii-niiki de womatengo o Yahudi ma nyawa, ona yomaketeribuutu ma titi hokokia kiani yomaohiki itiai Ma Jou ai himangoka. 26 Ho yomaketeribuutu ibooto de ahao ona abe o Yohanese iwitobaniiki gea yoboa unangino de iwihingahu unangika ato, "Mia Guru, o Yesusu gea abe nengokadau o Yorodani ma honongakahi una de ngona naga genangoka de duru nihikurutiye mia himangoka. Masara ma oraha naa Unangoo womulaenge o nyawa waohiki. De gea hiadono o nyawa mata-mata yokokiloiki unangika dika!" 27 De o Yohanese watemo onangika wato, "Adodoaua gea, ngone o nyawa hamake Ma Jou ai hidoakino dika ho hiadono hamake. Ho o kia dika wonahidoaka, gea hodafongo. 28 Ngini niihenoka abe ngohi ma hirete tinihingahuoka tato ko ngohiua o Mesia, masara, Ma Jou wohihidingoto la ngohi tohira toboa. Ahi demo gea ngini niihenoka." 29 De ahao o Yohanese womahiketero iwitobaniikika hokonaa, wato, "Naga o nauru yahinooto duru yomaketedodiawo de womatengo de ai darunoka. Ma gea ai dodiawo ko witaleanua, ma ka wogarago dika hiadono una wohikaaturu la ai dodiawo ai gogilaka idadi. Una wohioriki ma ngofeka gea ko to unangua. Una ai karajaanga wohiatu-aturu dika. Abe ai dodiawo womitarunu, una dika ka idadi womile la womahitouna ai darunu gea. Ho ai dodiawo wohira woiki o gogilaka ma ngiika la wohiaturu la una woila-ilaka gea woboaino womile. Ho ma hiaturu ibooto de ahao woila-ilaka woboa. Ho una de ai garago ma demo wato, 'Tomamakeoka, ngohi fekata!' Ka de o demo gea ai dodiawo woihene de unangoo duru wogarago." Hokogea o Yohanese womahiketero ho wato, "De duru imaketero hoka woila-ilaka ai dodiawo gea de ai garagoka, ngohioo duru ahi garago ingodumu ma oraha naa. 30 Abe ngohi kiani tomulaenge tomadohuku o nyawa manga himangino, ma kiani o Yesusu ka ihikaika wodogo wokurutiye manga himangoka." 31 De o Yohanese wohigila-gila wahitararono wato, “Una o Mesia de woboa o Horogauku, ho o dunia ma nyawa watilakuru mata-mata, abe ka Unangohi wokurutiye. De o nyawa abe o duniaka dika de yomaboa, ona gea manga tobahioriki abe naga o duniaka dika ma tobahioriki. Ho gea dika ka idadi ihikabarihi. Masara Una abe wokokurutiye, Una daku o Horogaka de wauku. 32 Ho Una o Horogaka de wauku womahidotao mata-mata abe wamake de woihene o Horogaka, de gea ena abe wohikabarihi o dunia ma nyawaika. Masara ai demo gea ngade-ngade o nyawa ko moiua yodafongo angamoi ko yangakua. 33 Masara onagona dika yangaku o Horogaino ma hingahu, ona gea duru iwitaana Ma Jou wagou-goungu abe manga ngongaku ihititi ai demo ma gou-goungika. 34 De mangale o Yesusu gea Ma Jou o Baba wihidingoto, ho to Unangoo ai demo imakadaene de Ma Jou. De Ma Jou ai Womaha woahumu wihidoaka o Yesusika. 35 O Baba duru widora Ma Jou o Ngofakika de wihidoaka Unangika o kuaha la hiadono ko iwa moi abe ko idadiua wohipareta. 36 Onagona dika ka de iwingaku Ma Jou o Ngofakika de gea yamakeokau o wowango ma ngango ka hiado-adonika. Masara ona abe ko iwingakua ona ko amakeua o wowango ma ngango gea, ma titi Ma Jou ai dohata manga howonika nagahi ho to ona manga hohowono Ma Jou ko waofiuau angamoi ko iwingakua.” Hokogea o Yohanese ai hitararono ma titi Ma Jou o Ngofaka o Yesusu.
O Yesusu de o Samaria ma ngofeka yomakoketemo
1-3 O Yudea ma tonakokahi o Yesusu o nyawa wadotoko de o Farisi manga doomuino ma nyawa yoihenoka abe o nyawa manga ngoe o Yesusu waohiki. De ka ihikaika ka yodogo-dogo o Yesusu iwiniiki hiadono nako una de o Yohanese, ka o Yesusohi yowoe wadotoko de waohiki. Masara gea ko o Yesusua o nyawa waohiki ma, ona iwitobaniiki gea ona abe o nyawa yaohiki. Ho ka de o Yesusu wahioriki o Farisi ma nyawa iwihininga-kuranga de wato, "Hosobo, holio o Galileaika." 4 Ho o Yudea ma tonaka o Yesusu wanoaka woiki o Galilea ma tonakika de Ma Jou ai mau o Yesusu waniiki ho hiadono kiani o Samaria ma tonaka wohidotobikika, enangoo o Isiraele manga tonaka ma honongaka. 5-6 Ho o bimaowaka, ngade-ngade o takoro butaanga, de yomahiadono o kapongika moi o Samaria ma tonakoka ma romanga o Sikara. Ona aika o kapongo ma datekoka de yotulu o humuika abe naga genangoka. O Sikara imakadateke de o tonaka abe ma dodihiraka manga tofora o Yakubu wihidoaka ai ngofakika o Yusupu. De genangoka naga moi o humu ihiromanga o Yakubu ai Humu. De angamoi manga dodagi ma gurutika ho o Yesusu iwiboleoka ho wogogeruku genangoka o Yakubu ai Humu ma datekoka. 7-8 De ona iwitobaniiki o Yesusu iwinoaika o humuokahi de ona yogila-gila o kapongika gea la ka idadi yomaija manga inomo. Ho ona yosoboka de ahao naga momatengo o Samaria ma ngofeka moboaino momahionoko. De o Yesusu womagahoko munangika wato, "Hobata, ka idadi ani akere nohiguhe la ngohi tokere?" 9 De o Samaria ma ngofeka gea mopaluhu mato, "Hobata, ngona o Yahudi ma nyawa de ngohi naa o Samaria ma nyawa, ho done sarakia nogahoko o akere ngohino?" Muna mopaluhu hokogea angamoi nako o Yahudi ma nyawa de o Samaria ma nyawa ko yomakigoua hiadono yomahikobohono hiadono ko idadiua ato to ona manga dodai eko manga mangko yapake ihiokere eko ihiolomo ona abe ko manga doomuinoua. 10 Masara o Yesusu wopaluhu munangika wato, "Hobata, nako ngona nohioriki Ma Jou ai hidoaka o nyawaika, de nako ngohi nohihioriki ngohi naa de hokogenangua notemo. Abe nako nohihioriki onaguna ngohi naa abe togahoko ani akere tokere, marai ngohi o akere ko togahokuahi de ngona nogahokokau ngohino o akere ma ngango abe inihidoaka o wowango ma ngango." Hokogea o Yesusu womahingahu munangika 11 De o Samaria ma ngofeka gea motemo unangika mato, "Hobata, ko iwa ani guguiti de o humu naa kohagurutuku ho done o kiaino namake o akere abe inahidoaka o wowango o nyawaika? Ho done sarakia ngona nato ka idadi nohihiokere ngohino o akere ma ngango gea? 12 De abeika o humu naa mia tofora o Yakubino miamake abe duru ma dodihiraka una de ai ngofa-ngofaka yokere nenangino. De o humu naa wapakeoo la wohiokere ai duduono abe ai hapi, ai domba, de ai kabingi. Masara Hobata, ngohi tataoko ani demoino ma titi hoka nako ngona de o Yakubu, nato ka ngonahi nokurutiye. Done sarakia gea?" 13 De o Yesusu womipaluhu munangika wato, "Hobata, o nyawa mata-mata abe yaokere o akere o humuino naa ahao manga ngomaha ka yodudungokali. 14 Masara onagona dika yokere o akere abe ngohi ka idadi tahidoaka, gea ma moi dika yaokere de ko yopereluokaua yokere o akere ngohino gea. Angamoi o akere gea ahao idadi o akere ibubungiye manga badanga ma goronaka de genangino yomamake o wowango ma ngango ho ka hiado-adonika." 15 De ahao o ngofeka gea mogahoko mato, "Hobata, nohihidoaka ngohinoo o akere gea la ibootohi ahi ngomaha yodudungu de ngaro ufa ka ihikaika tomaguiti o humuino naa." 16 De gea o Yesusu wotemoli wato, "Hobata, noikohi ani rokata nileohi de ahao ngini niboaino ngohino naa." 17 De muna mopaluhu mato, "Ahi rokata ko iwa." De o Yesusu wato, "Ngona gea nagoungu, nato ko iwa ani rokata. 18 De angamoi igoungu, ani rokata nomaturuuru ma motoa ibooto de ma oraha naa o nauru abe nimahitau moi, una gea ko ani rokatua. Ho, Hobata, gea notemo itiai nato ani rokata ko iwa." 19 De muna moheranga mato, "Hobata, marai ngona Ma Jou ai uru ma dodofanga angamoi gea itararono ngohino. 20 Ma, abeika, to ngomi mia totofora yomahuba Ma Jouiye kiani ma lokuoka dokea yaika la genangoka yomahuba. Masara ngini o Yahudi ma nyawa niato kiani o Yerusaleeme ma kotaka dika ka idadi o nyawa yomahuba Ma Jouiye." 21 De o Yesusu wopaluhu munangika wato, "Hobata, ahi demo naa kiani nangaku, ahao naga ma oraha iboa abe ngini nimahuba o Babaiye ko o lokuokaua de ko o Yerusaleemokaua. 22 De ngini o Samaria ma nyawa ko niwihiorikuahi Una gea abe niato nimahuba-huba Unangika. Ma ngomi o Yahudi ma nyawa wiwihioriki Una gea mimahuba angamoi o duduhunu ma titi, abe ka idadi o nyawa yahihohe manga howonino, gea o Yahudi ma nyawaka de aino. 23 Masara, ma oraha ahao iboa, de igoungu naa adonokau ma oraha, abe o nyawa yomahuba o Babaiye de ma titi iwihioriki ma gou-goungu. De Ma Jou ai Womaha yaduhunu hiadono yomahuba itiai. Ho ona yomahuba Unangika ma titi iwihioriki igou-goungu de o nyawa hokogea abe Ma Jou walingiri. 24 Mangale Ma Jou o Baba, Una gea o Womahino dika, ko iwa ai badanga, ho nako o nyawa yomahuba Unangika kiani iwihioriki igou-goungu. De kiani to Una ai Womaha ma kuaha yapake hiadono itiai Unangika yomahuba." Hokogea o Yesusu womihitararono. 25 De ahao o ngofeka gea motemoli mato, "Ngohi tohioriki ahao naga o Mesia woboa abe iwifetongo o Kristusu de nako una woboaka de ahao mata-mata womihitararono ngomino." 26 De o Yesusu wotemoli munangika wato, "Ngohi naa naga abe homakoketemo. Abe una gea nifetongo nato o Mesia, gea Ngohi naa."
O Yesusu Iwinii-niiki yoboali Unangino
27 Ka de gea wotemoka de ona o Yesusu iwitobaniiki iwigilio ma humuino de duru yoheranga angamoi iwimake yomakoketemo Una de o ngofeka gea. De duru manga hiningaka imulaenge ipuda ato iwileha hokonaa, "Muna moperelu o kia ngonaika?" De "Adodoa ho nimaketeade-ade de muna gea?" Manga hiningaka hokogea ipuda masara ko ihidadiuali yoleha. 28 De o ngofeka gea mosobo ami akere ma ngi manoaika genangoka de molio o kapongika. Ho momahiadonika o kapongoka de o nyawa genangoka muna mahokino. 29 De mahigaro onangika mato, "Niaino! Nihiniiki ngohi! Gea una doka naga nanga humuoka wogogeruku wohihingahu abe hokokia ahi datoro mata-mata. Abeika la nginioo niwilega, bote una gea o Mesia eko sarakia?" 30 Ho ona manga ngoe yosoboka. Manga kapongo yanoaika la o Yesusika yoikoka. 31 Ka de ona doka o kapongoka yoiki de ma humuoka naga ona abe o Yesusu iwitobaniiki iwihileha la wolomo ato, "Mia Guru, iti ma hohutulu nolomohi." 32 Masara o Yesusu wapaluhu onangika wato, "Naga ngohioka o inomo abe ngini ko nihiorikua." 33 Ho gea ona yomakokeleha ato, "O marai naga o inomo iwidotakoka o nyawa, eko sarakia?" 34 Ho angamoi yomakokeleha hokogea, o Yesusu wahingahu onangika wato, "To ngohi ahi inomo, gea ahi hingounu to Una ai mauika abe wohihidingotino. Abe naga o karajaanga wohihidoaka ngohino de kiani gea tabootokahi, ho ahi karajaanga gea to ngohi ahi inomo." Hokogea o Yesusu wahitararono ona iwitobanii-niikika. 35 De wohigila-gila wohiketero onangika wato, "Ngini biaha nia redi nidatomo ibooto de niato, 'O mede iatohi o gugutuku ma oraha.' Ma ngohi naa tinihingahu nginika tato, nimaboaiye de nimalega ma redika angamoi ikuratioka ho ka idadi hautuku! 36 Abe ona yautuku gea manga karajaanga de ma utumoka angamoi manga hasili gea amake o wowango ka hiado-adonika. De ngaro ona yodatomo eko ona yautuku ma, manga garago imakadaene manga hasilino gea. 37 De gea igoungu, hoka o nyawa ihitobaade-ade ato, 'Utu hodatomo de utu houtuku.' 38 De abeika ngini naa, tinihuloko la niutuku gea abe ko ti nginiua nia kangelaino. Naga o nyawa utu yohira yokarajaanga hiadono nginioo ma, niamake o utumu manga karajaangino gea."
O Samaria ma nyawa manga ngoe iwingaku o Yesusika
39 De o Samaria ma nyawa abe yogogere o Sikara ma kapongoka gea ko manga ngoe iwingaku o Yesusika mangale to muna ami demo abe mato, "Una gea wohihingahu ngohino ahi datoro mata-mata." 40 Ho ka de o Samaria ma nyawa gea yoboa o Yesusino de duru yogahoko la iwitumungu genangoka, ato, "Hobata, nenangoka minitumungohi, wahiohi nogila-gila." Ho o Yesusu womahidodogumohi onangoka o futu hinooto ai dekana onangoka. 41 De abe ma dihira iwingaku ma titi ma ngofeka ami demo, de ona abe ahao iwingaku ma titi to Yesusu ma hirete ai demo, ka onangohi yowoe iwingaku Unangika. 42 De ahao yotemo o ngofekaika gea ato, "Ma titi abe ngona ihira nomihingahu hiadono ngomi wiwingaku, masara naa wiwingaku angamoi ngomi ma hirete wiwimake de miihene ai demo abe Una ma hirete womihingahu. Ho naa duru mihiorikoka abe igoungu Una gea o nyawa o duniaka wahihohe manga howonino."
O Yesusu wihitogumu o poparetaino ai ngofaka
43 Ho o futu hinooto ipahaika o Yesusu wogogere o Sikara ma kapongoka gea de wosobo wogila-gila o Galileaika. 44 De genangika ai tonakika woiki angamoi ma dihira Una ma hirete wotemoka, wato, "Abe nako naga womatengo Ma Jou ai uru ma dodofanga de to una ai nyawa ai kapongoka ko iwa manga horomati unangika." 45 Ma gea womahiadonoka o Galilea ma tonakika de o Galilea ma nyawa gea iwidafongo de manga garago. Yosanangi iwidafongo angamoi ma titi nengokadauino onangoo naga o Yerusaleeme ma kotaka, abe o Totilakuru ma Rame-rame gea onangoo yaniiki, ho genangoka mata-mata abe o Yesusu wodiai onangoo iwimakeoka. 46 Ho o Yesusu womahiadonika o Galilea ma tonakoka de woikoli watutumu o Kana ma kapongika abe ma duruino genangoka o akerino wohidadi o angguru ma teongo. Ho o Yesusu naga o Kana ma kapongoka de o kapongo moiinoli ma romanga o Kapenaumu naga genangoka womatengo o popareta wokurutiye de to una ai ngofaka duru iwigogama. 47 Ho una o poparetaino gea wigihene o Yesusu o Yudeaka woikoka ho woboainoli o Galilea ma tonakino ho naga o Kana ma kapongoka o Yesusu. Ka de gea wigihene o Yesusu naga o Kana ma kapongoka de woiki wato wile o Yesusu. Ho o Yesusino womahiadoninoka de duru wohigali-gali witataiti wato, "Ahi ngofaka ngade-ngade wohonenge ho kiani ngona nomataitino angamoi nako ko nomataitua ko nidaenua." 48 De o Yesusu wopaluhu wato, "Masara ngini nako o heheranga de o dodunguu ko niamakeua gea ko nihingakuau. 49 De una o popareta wotemo wato, "Ahi Baluhu, kiani nomataitino noboa done ahi ngofaka abe duru tidora ko nidaenua." 50 Hokogea wotemo de o Yesusu wihuloko unangika gea wato, "Nolio dika, ani ngofaka ka wowangohi, de ko wohonengua." Hokogea o Yesusu wotemoka de una o popareta ka wolio ai tauika, angamoi o Yesusu ai demo wangaku ho wosoboka. 51 De ma dawangeino una ko womahiadonuahi ai tauika de ona abe ai tauoka iwiduhu-duhunu, ona gea iwibuhuku o ngekomino de iwihitodokanika ato, "Ani ngofaka womomikoka!" 52 Ho iwibuhu-buhuku gea iwihingahuoka ai ngofaka womomikoka, de ahao unangoli waleha onangika wato, "Ho o takoro muruono de wotogumu?" De ona iwipaluhu ato, "Kanugono ahao ifufutuku abe o takoro tumidi de ai hauku ihagaka." 53 Ka de hokogea iwihingahu de una wohiorikoka abe doka o Yesusu wihuloko wato, "Nolio dika, ani ngofaka ko wohonengua." Abe duru o takoro tumidoka o Yesusu wotemo hokogea de duru imakadaene ai ngofaka wotogumoo ma takoro gea, abe hoka kanugono o Yesusu wotemo. Ho ma titi hokogea o Yesusu ai ngofaka wihitogumu hiadono ai baba de ona mata-mata ai tauoka o Yesusu iwikokingakuoka. 54 Ho naa ma hinooto o Yesusu o Yudea ma tonakoka de waika wogilio o Galilea ma tonakika de ai buturungu womahitunguu de o heheranga abe wodiai.
O Yesusu wihitogumu womatengo o Betesa ma taagaka
1 Ho gea ipaha de naga o rame-rame moi, abe o Yahudi ma nyawa manga agama ma rame-rame, de o Yesusu woikoli o Yerusaleeme ma kotaika la ka idadi waniiki manga rame-rame gea. 2 De o Yerusaleeme ma kota naga ihigilolitino de o dadaduhu iputurungu ho o ngorana muruono naga de naga ma ngorana moi ihiromanga o Domba ma Ngorana. De ka de o nyawa yowohama o Domba ma Ngoranino de manga datekoka yamake o taaga ma amoko abe yobaakino genangoka abe o Yahudioka manga demo ihiromanga o Betesa abe ma titi o dora ma hiokoo ma taaga. De ma taaga gea ihigilolitoka o tau motoa, ma gea hoka o tau ma punga dika imadiai. 3-5 De naga o nyawa yokokangela genangoka manga ngoe yogogere, abe manga panyake irupa-rupa, ho utu naga yorafioka, naga utu yolugu, de naga utu manga badanga ma hononga ihonenge. De genangoka naga womatengo de ai panyakeoka hiadono ai dekana wogogere genangoka ai taongo moruange de tufange. 6 De o Yesusu wihioriki ai kangela ma dekanoka, ho ka de wimake una gea de wileha unangika wato, "Sarakia Hobata, noigo notogumu?" 7 De una wofikiri o Yesusu woleha hokogea de ma titi nako wouti o akeruku ma oraha o malaekata aluluaka ma akere de ka idadi wouti o akeruku gea la wotogumu ho wipaluhu o Yesusika wato, "Ahi Baluhu, duru toigo masara ma oraha o akere aluluaka ahi dodiawo ko iwa abe ka idadi ihiduhunu touti ma akeruku. Ho ngaro tomaliara tato o akeruku touti la totogumu ma o nyawa utu yohiraka hiadono ngaro tato touti la totogumu ma ko tomahidae-daenua." 8 Ka de ai demo gea woihene de o Yesusu wihuloko unangika wato, "Nomaokoiye! Ani nanao nagoraka de nomaloiki." 9 Ka de hokogea o Yesusu wotemo ibooto de ka dau de womaokoiye angamoi ka itodokanino wotogumoka de angamoi ka idadioka wotagi-tagi ho ai nanao wagoraka de womulaenge wotagi. De gea o Yesusu wihitogumu o Hiaini ma Wangeoka. 10 Ho naga o Yahudi ma nyawa manga balu-baluhu ahao una abe wotogumoka gea iwimake ai nanao wao de iwitaere ato, "Adodoa ho hiadono o Hiaini ma Wangeoka de ani nanao gea nao. Angamoi naga Ma Jou ai behehongo ma bukuoka ato ufa o Hiaini ma Wangeoka hokarajaanga. Ho gea ma titi nanga bohono naga abe nanga kiahonanga ko idadiua hao o wange naa." 11 Masara una wopaluhu wato, "Ma naga womatengo wohihuloko ho hiadono ahi nanao tagoraka de tao nenangino. Abe una wohihitogumu ahi kangelaino de ahao wohihuloko wato, 'Ani nanao nagoraka de nomaloiki." 12 Ka de ai demo gea yoihene de o Yahudi ma nyawa manga balu-baluhu gea iwilehali ato, "Onaguna gea wonihuloko la hiadono nagoraka de nao ani nanao gea?" 13 Masara una wotogumoka gea duru ko wihiorikua onaguna gea wihitogumu angamoi o Yesusu ko womafetongua de ka de wihitogumoka de o nyawa manga ngoe manga hidogoronaika o Yesusu wowohamoka. 14 Masara ipahaika de yomakamakeoli Ma Jou ai Tauoka ho o Yesusu una wihitogu-togumika witemo de o hitiari wato, "Abeika, ngona nosanangioka e? Naa ani buturungu ilioka. Ho nomatotoihene naa abe tonihingahu, ibootoka nahowonoli angamoi ngaro ma dihiraino ani kangela duru ilamoko masara o howono ma hohowonohi, ka enangohi duru ilamoko ma kangela."
O wowango ka hiado-adonika ihititi o Yesusoka
15 De ahao una wotogumoka gea woiki manga balu-baluhika gea abe nengokaino iwileha onaguna wihitogumu. Gea onangika woiki, de ahao wahingahu wato, "Una gea wohihitogumu ai romanga o Yesusu." 16 De mangale ma titi gea o Hiaini ma Wangeoka o Yesusu wihitogumu una gea, ho hiadono iwihikangela o Yahudi ma nyawa manga balu-baluhu. 17 Ma o Yesusu wahingahu onangika wato, "Ko ma iwahi ma oraha ahi Baba ko wokarajaangua ho Ngohioo o wange-wangeiye ahi karajaanga ko itoa-toakua." 18 Ho ka de o Yesusu ai demo gea yoihene de o Yahudi ma nyawa manga balu-baluhu gea duru idogo iwidohata hiadono iwihidee ato kiani iwitoma. Ona iwihidee ato iwitoma angamoi ma titi hinooto, moi manga bohono watilakuroka abe ko idadiua yokarajaanga o Hiaini ma Wangeoka. De utuohi o Yesusu wifetongo Ma Jou, wato "Ahi Baba" hoka ma titi womahingahu wato yomatoteroino Una de Ma Jou. Gea ma titi hiadono ona yomakoketemo ato, "Kiani hitoma la hiadono wohonenge." 19 De ahao o Yesusu wapaluhu onangika wato, "Naa duru tagou-goungu tinihingahu, ko moiua Ngohioka de tomahohiningaiye dika de todiai. Masara gea ena abe Ahi Baba wodiai hokogenangoo imakadaene Ngohi naa todiai. Nako ngohi dika ahi mau de todiai, gea ko todiaiua angamoi gea tamake o Baba wodiai, gea dika ka idadi Ngohioo todiai. 20 Angamoi ahi Baba duru wohidora Ngohino ho wohihimatokoka to Una ai karajaanga mata-mata ingodumu Ngohino. Masara utuohi ilamoko wohihikarajaanga Ngohi naa hiadono ngini ahao niamake gea todiai de ko idadiokaua nitemo angamoi ka niherangaholi. 21 Abeika, o nyawa yohonengoka Ma Jou o Baba ka idadi wahimomiki, abe manga honengino wahiwangoli, de duru imaketero hokogea Ngohioo naa ai ngofaka ka idadi onagonaika dika toigo tahidoaka o wowango de ka idadi tahidoaka. 22 De o Baba wohihidoaka o kuaha Ngohino la Ngohi ai ngofaka dika ka idadi o nyawa manga datoro tatailako ma titi tahohowono eko tahidoaka o wowango. Gea to ngohi dika ahi hiaturu abe o hiaturu gea una wato ngohi dika todiai, una ma hirete ko wodiaiua. 23 Hokogea wohiaturoka la hiadono Ngohino o nyawa manga horomati idadi duru imaketero hoka o Babaika iwihoromati. De angamoi gea Ma Jou o Baba wohihidingoto Ngohi naa ho onagona dika ko ihihoromatiua Ngohino, gea Ma Jou o Babaoo ko iwihoromatiua." Hokogea o Yesusu womahingahu onangika. 24 De o Yesusu ko womatogumuahi wotemo onangika wato, "Naa duru tagou-goungu tinihingahu nginika, gea Ma Jou o Baba wohihidingoto Ngohi naa. De onagona dika abe ihigihene ahi demo hiadono duru iwingaku Ma Jou o Babaika, ona gea yamakeoka o wowango ma ngango abe ka hiado-adonika. De mangale ma titi o nyawa abe ko ihingakuahi Ngohino ona gea manga wowango ma honenge ho ka de ihingaku de manga wowango aturuuruoka abe idadi o wowango ma ngangoli. De ona gea ahao o hone-honenge ma hohowono ko yadaenokaua angamoi o wowango ma ngango nagau onangoka. 25 De nenangoo duru tagou-goungu tinihingahu, naga ma oraha, de igoungu ma oraha gea adonoka naa, abe o nyawa ngaro yohonengoka ma ka idadi Ngohi Ma Jou o Ngofaka ahi ilingi yoihene. Ho ahi demo de ma kuahaka hiadono ona gea abe ngaro yohonengoka ma ka de ahi ilingi yoihene de yomomiki yowangoli. 26 Angamoi duru imaketero hoka o wowango ma titi ahi Babaka, Una wohihidoaka ai kuaha Ngohino hiadono hokogenangoo o wowango ma titi Ngohioka. 27 De gea ai kuaha wohihidoaka Ngohino la o nyawa manga datoro tatailako, abe ma titi tahohowono eko tahidoaka o wowango, de ahi kuaha gea mangale Ngohi naa o Nyawa ma Ngofaka." 28 De o Yesusu wohigila-gilali womahingahu o Yahudioka manga balu-baluhika gea wato, "De ufa niheranga ahi demoika naa. Ma oraha ahao naga de ona yohonengoka mata-mataika ngaro o kiaka dika yohonengoka ma ka ihigihene ahi ilingi. 29 Ho ahao yokokimomiki manga honengino de ona abe manga datoro itiai yodomomikino o wowangoino, masara ona abe manga datoro itorou yomomikino la manga hohowono dika yamake. 30 Masara duru ko moiua todiai abe Ngohi tomahohiningaiye dika de todiai. Masara gea o nyawa manga datoro tatailako, abe tahohowono eko tahidoaka o wowango onangika, gea taniiki duru imakadaene abe toihene ahi Babaino. Ho o nyawa tahohowono itiai angamoi ko to Ngohiua dika ahi mau taniiki masara duru to ahi Baba ai mau dika taniiki angamoi gea Una wohihidingoto Ngohi." O Yesusu ka womahitararonohi hokogea o Yahudioka manga balu-baluhika gea.
O Nyawa iwihitaana o Yesusu unangoo Ma Jou
31 De ahao o Yesusu ka wahitararonohi onangika wato, "Ma nako to Ngohi dika ahi demo tapake la tomahitaana ngini marai ko niangakua. 32 Masara naga womatengo, Unangoo wohihingahu ma titi Ngohi naa, de gea Ma Jou o Baba de to Una ai demo gea duru igoungu. 33 "De naga womatengoli gea o Yohanese. Abeika, ti ngini nia nyawa niahidingotoka o Yohanesika de gea ma titi Ngohi naa winihingahu de una duru wagoungu. 34 De mata-mata naa Ngohi tinihihohininga ko ma titiua kiani naga o nyawa manga demo la hiadono ihihitaana Ngohi naa. Ma, naa tinihihohininga abe to ona manga demo gea tapake la nginioo ahao Ma Jou ka idadi winihihohe nia hohowonino. 35 O Yohanese, una gea ka idadi hihiketero de o hilo abe ma oraha itokara ngaro ko itedekanua ma o nyawa ka yahitararono. De imaketero hokogea ngaro ma oraha jai-jaiino dika ma nginioo nisanangi niodogarago o dararonika gea abe niamake o Yohanesino." 36 De o Yesusu ka wahitararonohi o Yahudioka manga balu-baluhika gea wato, "Masara abe ngohi naa todiai, ena gea ihihitaana abe Ngohi naa Ma Jouoka de taino. Ho ngaro o Yohanese ai hingahu gea itiai ma titi Ngohi, masara naga abe ka enangohi abe duru ihihitaana de gea ma karajaanga abe Ma Jou wohihibehehongo la tabooto todiai. Ho genangoo la ihihitaana Ngohi abe Ma Jou dika wohihidingoto nginino. 37 De o Baba ma hirete ka ma dihirainohi wohihingahuokau ma titi Ngohi naa de ai hidee abe ahao wohihidingoto o duniauku. Ngini naa ko ma moiuahi niihene to Una ai ilingi de ko ma moiuahi niwimake abe ai rupa. 38 Masara to Unangoo ai demo gea de ko niodafongua ho hiadono to Una ai demo-demo ko imanoaua ti ngini nia hiningaka angamoi ko ningakua abe wohihidingotino Ngohi naa. 39 Ngini naa o balu-baluhu de duru inimagawe nimadotoko Ma Jou ai Demo-demo angamoi niato ai Demo-demoino niamake o wowango ka hiado-adonika. Masara ngaro Ma Jou ai Demo-demo gea inihingahu ma titi Ngohi naa, 40 ma, ngini nioluku Ngohino niboa la niamake o wowango ma gou-goungu gea." Hokogea o Yesusu wataere o Yahudi ma nyawa manga balu-baluhika. 41 De o Yesusu wohigila-gila to una ai hininga onangika, wato, "Ngohi ko tolingirua o nyawa manga higiriiri Ngohino. 42 Masara ngohi duru tinihioriki ngini, abe nako nia dora Ma Jouika ena gea duru ko iwa nia hiningaka. 43 Ngohi naa toboa de ahi Baba ai romanga tapake angamoi ka de to Una dika ai kuahaino toboa masara ngini ko nihidafongua Ngohi. Masara de o nyawa utu yoboa nginino, ngaro de to ona dika manga kuaha, ma, ka de nia sanangi niadafongo ona gea. 44 Ngini naa duru nisanangi nimakokogorakiye la o nyawaino dika manga higiriiri nimalingiri. Masara ko nimalingirua o higiriiri ma gou-goungu Unangino gea abe Una dika Ma Jou. Ho nako hokogea ti ngini nia hininga, done sarakia de ka idadi nihingaku Ngohi naa?" 45 De o Yesusu wotemo-temo onangika naa ma baha wato, "Ma ufa ngini niafikiri niato bote Ngohi ahao o Baba titutumu la tinihingahu Unangika ma titi nia howono. Koua, ko Ngohiua tinikalaki, ma gea o Musa abe naa o Babaika wihingahu ngini naa nidiai ko itiaiua. Abeika, ngini niato o Musa niwingaku, ho duru nimahinganono unangino abe o duduhunu. 46 Masara nako igoungu niwingaku gea kiani Ngohioo nihingakuoka angamoi ma titi o Musa wotulihi, ma titi Ngohi naa. 47 Ho nako to una ai demo gea wotulihukuoka ko niangakua, done sarakia niangaku to Ngohi ahi demo?" Hokogea o Yesusu de ai demo wahitaana o Yahudi ma nyawa manga balu-baluhu manga hiningaika.
O Yesusu wahiolomo o nyawa yasana motoa yofoloi
1-2 De gea ipahaino de ma moioli o Yesusu naga o Galilea ma akere ma ngooto ma ngigoroka, de ma ngooto gea abe ihiromangoli o Tiberia ma akere ma ngooto. De ma oraha gea o nyawa duru ko manga ngoe iwiniiki o Yesusu. De gea yoigo iwiniiki angamoi yamake o heheranga wodiai o nyawa yopopanyakeika. 3 De o Yesusu de iwitobaniiki yangimoi de yahinooto ahao yaika yodoa o loku yakeleforika de ahao o loku ma geleforino yogogeruku. 4 De ma oraha gea o Yahudi ma nyawa manga Totilakuru ma Rame-rame itigioka. 5 Ho gea o Yesusu de iwitobaniiki yogogeruku o loku ma geleforoka gea, de o Yesusu womaboaiye de o nyawa ko manga ngoe wamake yotowongi Unangino, ho o Yesusu wotemo o Filipusika wato, "Filipusu, abeika manga ngoe naa, ho o kiaino ka idadi homaija o roti la hahiolomo ona mata-mata gea?" 6 O Yesusu ai demo gea ko ma titiua ko wohiorikua gea ahao wodiai, masara witaili dika o Filipusu ho hiadono wileha unangika hokogea. 7 De o Filipusu wopaluhu o Yesusika wato, "Ahi Baluhu, ngaro de o tiwi ma amoko imakadaene de o nyawa manga hewa abe yokarajaanga o wange ratuhu hinooto ma dekana, de ngaro ma tiwi gea mata-mata hapake la homaija o roti dika, masara ko hahikegetongua. Ona abe yoboaino naa ka yowoeholi ho ngaro hahikokidoaka ma hutu ma hutu dika ma ko hahikawedonua." 8 De iwitobaniikino naga to Simono Peturusu ai dodoto, ai romanga o Andareasa, de o Andareasa gea wihingahu o Yesusika wato, 9 "Naga o ngofaka womatengo naa ai bilaono naga, masara ai roti biaha abe ma gahumu motoa dika, de nagali ai nawoko ma ka o ngai hinooto dika ho duru ko kiaua adaene de o nyawa naa manga ngoe." 10 De o Yesusu wahuloko iwitobaniikika wato, "O nyawa mata-mata naa ngini niahiaturu la yokokigogeruku." Hokogea wahuloko de angamoi o ruruubu o loku ma geleforoka gea duru irorahai ho ka idadi yokokigogeruku o ruruubu ma lokuoka gea ngaro ma hoanoka. De ona manga ngoe, ngaro ka o nau-nauru dika, ma ngade-ngade yasana motoa manga ngoe. 11 Ho naa ka de yokokigogerukuoka de o Yesusu waleino o roti motoa gea de wohitarimakaseokahi Ma Jouiye, de ahao wahidoaka Iwinii-niikika ho ona yahidoaka homoi-homoiika o nyawa mata-mataika hiadono masara yamatakaua. De o nawokoli o Yesusu wahiaturu yahikokidoaka homoi-homoiika o nyawa mata-mataika hiadono yakokipunuhoka. 12 Ho naa yakokipunuhoka de o Yesusu wahulokoli iwitobaniikika wato, "Kiani nanga hou o roti ma bela-belaka gea niakokitoomuino la ufa hiadono o inomo gea parahaja." 13 Ho yakokitoomuinoka ma bela-belaka de yonoauku o tupauku hiadono o tupa ngimoi de hinooto aomanga. Abeika yapake o roti motoa de idadi ma hou o tupa ngimoi de hinooto angamoi ngaro o nyawa gea duru ko manga ngoe aolomo ma ko amataua. 14 De ai dodunguu naa o Yesusu wodiai duru yowoe-woe gea manga himangoka de yoheranga hiadono yomakoketemo ato, "Maraioka Una naa Ma Jou ai uru ma dodofanga abe nengokaino Ma Jou wohibehehongoka wato ahao woboa o duniauku." 15 De ona yomahikagaro, ato, "Ibootohi hodamaa. Ho naa ma oraha adonokau abe ka idadi hiao la hihidadi nanga koano!" Ho ka de wohioriki manga hininga gea, de o Yesusu womadohuku onangino de woiki womatengo dika o lokuikali.
O Yesusu wotagi-tagi o gahi ma lokuika
16-17 Ho ahao ihumuririhuku de o Yesusu ko iwiwainohi iwitobaniikino ho ona yokokihupuoka o dowongioko de yokokifarenoka o ngotiroko la ato yomahora doka o Kapenaumika. De naa yafutuoka ho ngaro o Yesusu ko woboauahi onangino ma ka yosobo. 18 De naa yomahioru yomahora masara manga dodagi ma goronaka duru italoko kohabuturungu hiadono ma lulu duru itetoruku. 19 Yomahioru de manga buturungu ma gahumu! De naa ona manga gurutoko modukua o kilo motoa eko butaangaoko de naa o kia gea yamake? Duru yatodokana angamoi gea o Yesusu woboaino wotagi-tagi o gahi ma lokuino. Ho wotigioka manga ngotirino de duru yatomomonoka. 20 Masara o Yesusu wotemo onangika wato, "Ibootohi nihawana, naa ngohi ho!" 21 De ona gea duru yogarago wofarene manga ngotiruku. De ka de wofarenuku manga ngotiruku de duru ka itodokanino manga dumutika o Kapenaumika yomahiadonoka. 22-24 Masara ona yowoe-woe abe wahiolomo o roti, ona manga dingiiokahi o loku ma geleforoka hiadono ma dawangeino. De ahao naga o ngotiri muruono naga yoboaino o Tiberia ma kapongino de duru o loku ma geleforo ma timiuku yokokiutiha. De ona abe wahiolomo yowoe-woe gea yomakoketemo ato, "Abeika, o Yesusu ko iwiwa nenangoka de kanugono Una ko himakeua wofarene o ngotiri moioko gea la waniiki ai dodiawo yangimoi de yahinooto. Ma ngaro ngone ko himakeua wofarene o ngotiroko masara kiani hilingiri doka o Kapenaumika angamoi ko iwiwa nenangoka. Ho o ngotiri muruono naga abe naa iboaino irahai ngone utu habarene la haniiki doka o Kapenaumika la ngoneoo hahiduru o Yesusu iwitobaniiki bote Unangoo naga doka." Ho ma ngotiri mata-mata abe iboaino gea ona yokokibarene de yongotiri o Kapenaumika iwilingiri o Yesusu.
O Yesusu o roti o wowango
25 Ho ka de yomahiadonika doka o Kapenaumoka de iwimake o Yesusu genangoka de iwileha ato, "Guru, ka furuono noboaino nenangino?" 26 De o Yesusu wopaluhu onangika wato, "Naa duru tagou-goungu tinihingahu, ngini ko mangaleua ahi dodunguu hiadono nihilingiri ngohi naa. Masara mangale ma titi o roti gea niaolomoka hiadono inikokipunuhoka, gea ena dika ma titi ho ka nihilingirohi. 27 Ufa o roti abe ka iwedere dika nialingiri, ma kiani nialingiri o roti abe ko iwederua la gea inihiwango ka hiado-adonika. De o wowango gea ahao ngohi o Nyawa ma Ngofaka ka idadi tinihidoaka, angamoi Ma Jou ahi Baba wohihitunguuokau Ngohino de ai kuaha abe duru wohisanangi ngohino." 28 De ahao ona iwileha o Yesusika ato, "Nako ngomi Ma Jou ai mau mianiiki done hokokia kiani midiai la mia karajaangino wiwihisanangi?" 29 De o Yesusu wopaluhu onangika wato, "Naa moi duru Ma Jou ai mau ngini nidiai, de gea Ngohi dika nihingaku abe gea Ma Jou wohihidingoto nginiuku naa." 30 De ona gea iwilehali o Yesusika ato, "Ho ngona ka o heheranga o kia ngomino nodiai la o dodunguu gea miamake hiadono miningaku? Ho o kia nodiai? 31 Abe hoka ma dihira to ngomi mia totofora o mana yaolomo o tonaka ma kakaahaka duru imaketero hoka ihitulihukuoka ato, "Una wahidoaka onangika o roti o Horogauku la ka yaolomo.” 32 De o Yesusu wotemo onangika wato, "Naa duru tagou-goungu tinihingahu nginika, o roti o Horogaino gea abe onangika wahidoakoka, gea ko o Musainoua, masara gea ahi Babaino, de ma oraha naa Una winihidoaka nginika o roti ma gou-goungu o Horogaino. 33 De o roti Ma Jouino gea abe winihidoaka naa, gea Ngohi abe touti o Horogauku la o nyawa o duniaka ka idadi tahidoaka o wowango ma ngango." Hokogea wahitararono onangika. 34 De ona yogahoko o Yesusika ato, "Mia Baluhu, o roti gea, iti ka ihikaika nomihidoaka." 35 De o Yesusu wopaluhu onangika wato, "Ngohi naa tomahiromanga o Roti o Wowango angamoi imaketero hoka o nyawa o roti yaolomo la yowango, duru hokogenangoo onagona dika yoboa ngohino de ihingaku, ona gea yamakeoka o wowango ma ngango. Ho ka de gea yamake de ko yahafinokaua, de manga ngomaha ko yodudungokaua. 36 Masara naa idadioka hoka tinihingahuoka tato ngini ahao ko nihingakua. De igoungu ngaro nihimake o heheranga todiai ma ngini ko nihingakua. 37 Masara o nyawa mata-mata abe o Baba wohihidoaka Ngohino, de onagona dika abe yoboa Ngohino, ona gea duru ko moiua de ka idadi taoluku. 38 Angamoi Ngohi o Horogauku ko toboaua ma titi to Ngohi dika ahi hininga tato taniiki abe toigo todiai, masara naa toboa ma titi Ma Jou ai mau taniiki la todiai, abe gea Una wohihidingoto. 39 De to Baba ai mau la o nyawa abe wohihidoakoka Ngohino ko moiua de yahihanga, ma, mata-mata tahimomiki ma oraha gea ihiromanga o wange ma baha. 40 Angamoi ahi Baba ai mau la ona mata-mata abe yomalega Ngohino, ma titi ihingaku Ngohino, gea ona yamake o wowango ka hiado-adonika de tahimomiki o wange ma bobahaka gea." Hokogea o Yesusu wahiree-reeika wahingahu.
O Yahudi ma nyawa ko iwingakua abe o Yesusu o Horogaino
41 Masara ka de o Yesusu ai demo gea yoihene de o Yahudi ma nyawa gea iwihigurubungu angamoi wotemo wato, "Ngohi naa ma roti abe iuti o Horogauku." 42 De ona yomakoketemo ato, "Sarakia, Una naa ko o Yusupua ai ngofaka? Una naa o nyawa dika angamoi ai baba de ngoi meme hahioriki. Ho done sarakia ai domoroini naa hiadono wotemo wato, 'Ngohi naa o Horogauku toboa'?" 43 Ho, manga demo gea o Yesusu wapaluhu wato, "Ibootohi ngini nikokikurubungu hokogea. 44 O Baba wohihidingoto Ngohi naa. Ho o nyawa ko moiua yoboa Ngohino nako ko o Babaua waoino Ngohino. De ona abe yoboa Ngohino ahao tahimomiki o wange ma bahaika gea. 45 Naga itulihukuoka Ma Jou ai Behehongo ma Bukuoka abe ai uru ma dodofanga womatengo ai hingahu, wato, 'O nyawa mata-mata ahao Ma Jou ma hirete wadotoko.' Hokogea ai demo ho o nyawa mata-mata abe yomadotoko o Babaino de iwihigihene, ona gea yoboa Ngohino. 46 Ho ngini iti ufa niataoko ihowono ma titi ahi hingahu naa hiadono nia hiningaka niato naga o nyawa iwimakeoka o Baba. Angamoi ko moiua de iwimake o Baba de manga lako. Naga womatengo dika wimakeoka de gea Ngohi naa abe ma dihira Ngohi Ma Jouoka de taino." 47 De o Yesusu wohigali-gali wahitararono onangika wato, "Naa, duru tagou-goungu tinihingahu, onagona dika ihingaku Ngohino, yamakeokau o wowango ka hiado-adonika. 48 Ngohi naa o Roti o Wowango. 49 Ma dihira ngaro ti ngini nia totofora o roti o mana yaolomo o tonaka ma kakaahaka, ma, ahao yokokihonenge. 50 Masara imakohowono o roti naa abe o Horogauku iutiuku angamoi o roti naa nako o nyawa yaolomo gea ko yohonengua. 51 Ngohi naa o roti ma ngango abe o Horogauku iutiuku ho o nyawa gea abe o roti naa yaolomo, gea ahao manga wowango ko iwa ma baha. O roti gea to ngohi ahi roehe de ena gea ahao tahidoaka o dunia ma nyawaika la o wowango ma ngango yamake." 52 Gea o Yesusu wotemo ibooto de o Yahudi ma nyawa gea duru yomulaenge yomaketeribuutu ato, "Ho done sarakia o nauru naa wotemo wato ai roehe wonahidoaka de wato ena gea kiani haolomo?" 53 Hokogea manga demo ho o Yesusu wohigalioli wahitararono ma titi ai hingahu gea wato, "Naa duru tagou-goungu tinihingahu, ngohi naa o Nyawa ma Ngofaka de nako ahi roehe ngini ko niaolomua de ahi awunu ko niaokerua gea o wowango ma ngango ko niamakeua. 54 Onagona dika ahi roehe yaolomo de ahi awunu yaokere, gea yamake o wowango ka hiado-adonika ho ona ahao tahimomiki o wange ma bahaika. 55 Angamoi to ngohi ahi roehe o wowango ma inomo ma gou-goungu, de to ngohi ahi awunu o wowango ma akere ma gou-goungu. 56 Onagona dika yaolomo ahi roehe de yaokere ahi awunu gea duru ka ihikaika mimahidogogere moi ona de ngohi. 57 Abe imaketero hoka o Baba Una duru o wowango ma titi de gea Una wohihidingoto Ngohi ho o wowango gea naga Ngohiokaoo. De hokogenangoo ona abe ihiolomo Ngohi naa abe hokogea ona ahao igoungu tahiwango. 58 Gea ma titi ahi demo abe tato o roti o Horogauku iutiukuoka. Abe o mana gea ngaro nia totofora gea yaolomo ma ka yohonengohi. Masara ona abe yaolomo o roti naa ahao yowango ka hiado-adonika. Gea duru ma titi ahi demo naa." 59 Hokogea o Yesusu ai dodotoko ma hitararono de gea wadotoko o Yahudi ma nyawa manga dodotoko ma tauoka o Kapenaumu ma kapongoka.
O Yesusu iwinii-niiki utu iwinoaka
60 Masara o nyawa manga ngoe abe manga biaha iwinii-niiki o Yesusu, ka de yoihene ai hitararono gea de yomakoketemo ato, "Ou! O dodotoko naa ma titi ka itubuhoholi! Onagona de yapoa yodafongo nako hokogea o dodotoko ma dubuho, done moioo de ko yapoaua yodafongo!" 61 Ma ngaro manga demo o Yesusu ko woihenua ma ona iwitobaniiki gea manga gurubungu wahiorikokau ho waleha onangika wato, "Marai ahi demo naa niihene de nia hiningaka inihihuha e? 62 Done sarakia hongoli nako nihimake ngohi o Nyawa ma Ngofaka tolio dakuiye ahi ngiiye abe ma dihira genangoka togogere! 63 Gea o Womaha Ma Jouino abe wahiwango o nyawa. Ko iwa manga utumu ahi roehino masara ahi hiketero ma demo kangano, gea Ma Jou o Womahino. Gea ma titi ho hiadono ahi demo hokogea, de ahi demo gea ka idadi ngini inihiwango ka hiado-adonika. 64 Masara naga ngini utu ko niangakua." Hokogea o Yesusu wotemo angamoi ma dihiraino de wihiorikoka una abe ko wingakua de gea una abe ahao wifukunu ai musuika. 65 Ho o Yesusu wohigila-gila de ai hitararono wato, "Hokogea ho tinihingahu tato ko moiua yapoa yoboa Ngohino nako o Baba ko waduhunua."
O Peturusu duru wihitaana gea o Yesusu o Mesia
66 Ho ma oraha gea de idadi o nyawa abe manga biaha o Yesusu iwiniiki utu manga ngoe yomaleloro de yokokilio, ko iwiniikokaua. 67 Ho o Yesusu waleha yangimoi de yahinootoika genangoka wato, "Ho sarakia, nginioo nia hininga la niato nilio de ko nihiniikokaua?" 68 De o Simono Peturusu wipaluhu o Yesusika wato, "Mia Baluhu, done onagonaika miloiki? Angamoi, o demo abe inahihira o wowango ka hiado-adonika, o demo gea naga ngonaka dika igogere. 69 Ngomi naa miningaku abe duru minihioriki ngona naa o Mesia, abe Ma Jou womadingakoka de naa wonihidingotukuoka ngomiuku." 70 De o Yesusu wopaluhu wato, "De gea ngohi ma hirete tiniiriki ngini iningimoi de inihinooto naa. Ma, ngaro hokogea naga nginioka womatengo o Ibilihi iwipake." 71 Hokogea o Yesusu wahingahu onangika de ma titi o Yudasa, abe ai baba o Simono ai fam Isikarioto, gea to una ai ngofaka ma titi, angamoi una gea ahao o Yesusu wifukunu ngaro una naga yangimoi de yahinootoka gea.
O Yesusu ai doo-dodoto iwihuloko la ai buturungu wohimatoko
1 De ipahaino o Yesusu waika waino o kapo-kapongika abe o Galilea ma tonakoka dika angamoi naga o Yahudi ma nyawa manga balu-baluhu o Yudea ma tonakoka iwihidee ato iwitoma. Ho ngaro ma dihira wotagi-tagi o kapo-kapongika o Yudea ma tonakoka ma naa ko woikua genangika. 2 Masara ahao itigioka o Yahudi ma nyawa manga rame-rame abe ihiromanga o Hijai-jai ma Tau ma Rame-rame. 3 De o Yesusu ai doo-dodoto iwihigaro ato, "Kiani ngona o Galilea ma tonaka naa nanoa la noiki o Yudeaikali. Genangoka ahao naga manga ngoe ka idadi inikokimake o heheranga ngona nodiai la hiadono onangoo ininiiki. 4 Abe hoka ani biaha nodiai, gea kiani nahimatoko o dunia ma nyawa mata-mataika! Abe hohiketero hoka nako naga womatengo duru woigo womahingahu o nyawa manga ngoeika, gea ko womahitobahipongonua." 5 Hokogea o Yesusu ai doo-dodoto iwihuloko Unangika angamoi ngaro ngone hato o Yesusu ai doo-dodotohi duru iwingaku ma onangoo ko iwingakuahi abe duru ko ihiorikuahi abe Una gea manga Mesia. 6 Ho o Yesusu wapaluhu onangika wato, "Ngaro ngini o wange-wangeiye niapake nia oraha abe nitagi o kiaika dika ma ka idadi. Masara nako Ngohi o wange naa ko adonuahi ahi oraha abe Ngohi totagi genangika. 7 De hokogea angamoi nako ngini naa ko iwa ma titi hiadono o dunia ma nyawa inidohata masara Ngohi naa ihidohata angamoi ka ihikaika tahidumutu manga datoro itorou ho hiadono ihidohata Ngohino. 8 Ngini naa niloiki dika o rame-rameika gea, Ngohi o wange naa ko toikuahi ho ngini nihira dika angamoi ko adonuahi ahi oraha toiki ngohi naa." 9 Hokogea o Yesusu womahingahu ai doo-dodotika de ahao Una womagoo-gogere dika genangoka o Galilea ma tonakoka. 10 Ho ai doo-dodoto yopahaka yoiki o rame-rameika gea de ahao o Yesusoli woiki wahiduru, ma gea hoka womatohiki dika la ufa hiadono o nyawa iwihioriki. 11 Ho o Yesusu wotagi-tagi ma hoanokahi. De Una ko womahiadonuahi, de naa gea doka, abe manga rame-rameoka, naga o Yahudi ma nyawa manga balu-baluhu duru o Yesusu iwilingi-lingiri ho yoiki yaleha-leha o nyawaika ato, "O kiaka Una gea?" 12 De o nyawa manga ngoe ihikokaika yomatoo-toomuino manga rame-rameoka gea. De onangoo yomakoketemo ma titi o Yesusu ma ka yomakokuhudu dika de utu naga ato, "Una o nyawa ma owa." Masara utu ato, "Koua, Una gea duru o nyawa watobabudi la woigo wahirehene." 13 Masara o Yahudi ma nyawa gea ko moiua yamoroini yaamo-amokiye yotemo angamoi duru yamodongo manga balu-baluhika. 14 O rame-rame idadiokau de ahao o Yesusu woboa waniiki, abe o wange muruono naga idadioka ho duru o rame-rame ma gogiriaka de woboaino Ma Jou ai Tauino gea. De ma wange gea womulaenge o nyawa wadotoko. 15 De o Yahudi ma nyawa manga balu-baluhu duru yoheranga ai dodotokika hiadono yomakokeleha ato, "Onagona iwidotoko hiadono ai dodotoko ma tobahioriki hokonaa? Angamoi Una gea ko ma moiuahi womadotoko onangino abe yotobadoto-dotoko o Musa ai Paretaino." 16 De o Yesusu wapaluhu onangika wato, "Naa tinidotoko ma titi ko tomahohiningaiyeua de todotoko, masara Una abe wohihidingoto, mata-mata Unangoka de aino ahi dodotoko naa. 17 De ngini ka idadi nihioriki ahi dodotoko Ma Jouoka de aino. Angamoi ngaro onagona dika ma nako yairiki la ato yaniiki to Ma Jou ai hininga, gea ka de yoihene ma titi abe tadotoko onangika de ihioriki gea Ma Jouino dika de ma dodotoko gea ko Ngohinoua dika ma titi. 18 Abe naga o nyawa utu de manga dodotoko ma demo igoungu masara, utu ko igoungua manga dodotoko ma demo. Abe ko igoungua gea to ona manga dodotoko abe ma titi to ona dika manga tobahiorikino abe ona ma hirete yomadiai la hiadono o nyawa yagorakiye. Masara abe manga dodotoko ma demo duru igoungu, ona gea aniiki to Una ai mao abe wahikarajaanga la o nyawa yadotoko. Ho o demo ma dutu dika abe duru iwigorakiye. De angamoi nako hokogea o nyawa yadotoko ahao, ona abe yoihene manga dodotoko gea, ko iwa manga hiningaka abe ka idadi manga guru gea iwitae. 19 Hoka o Musa, ngini mata-mata niato Ma Jou ai pareta winihidoaka o Musaino e? Masara ko moiua nginioka abe nia wowangoka de aino abe duru inihitaana nianiiki itiai ai pareta gea! Ho adodoa ho nihihidee niato nihitoma Ngohi naa?" Hokogea o Yesusu waleha onangika abe naga genangoka la ai dodotoko yoihene. 20 De ahao ona yomatoomuino genangoka iwipaluhu o Yesusika, ato, "Ei! Marai inikitokata ngona! Onagona ato initoma?" 21-23 De ahao o Yesusu wapaluhu onangika wato, "Ngohi ma dihira o heheranga moi todiai hiadono duru nikokiheranga. Masara hiadono naa duru nihingamo ngohino ma titi o Hiaini ma Wangeoka de tihitogumu womatengo gea ai badanga ma gahumino tihitogumu. Ma abeika ngini, nako naga nia ngofaka womaboa la hiadono ai huhuna ma gahe o Hiaini ma Wangeoka adaene, gea de ngini niwihuna o Hiaini ma Wangeoka. De ngini niato hokogea nidiai la ufa hiadono nia bohono niatilakuru abe niamake o Musaino. Masara gea ko o Musaua winihidoaka o huhuna ma pareta, o pareta gea ti ngini nia totoforaino. 24 Ibootohi ngini o nyawa niahohowono abe ma titi duru ko niatailakoikauahi de ka niahohowono. Ufa nisabaranga o nyawa niahohowono, kiani nimakeleha ma diaiohi bote igoungu eko ko igoungua. Nako igoungu tahowono ka idadi ngohi nihihohowono, ma nako ko igoungua ngaro ufa de nihihohowono." 25 Ka de o Yesusu ai demo gea yoihene de naga o Yerusaleeme ma nyawa yomakoketemo ato, "Marai gea Una, abe nanga balu-baluhu ihitaili iwitoma, e? 26 De abeika Una naa ngaro duru nanga ngoe nanga himangoka ma wotomoroini wotemo. Masara nanga balu-baluhu moioo de ko iwa iwipaluhu. Marai nanga balu-baluhu iwihioriki hiadono onangoo ato Una gea o Mesia, eko sarakia? 27 Masara to Una ai kapongo ka hohioriki. Ma, nako o Mesia igou-goungu tanu ko iwa o nyawa de iwihioriki ai kapongo abe genangoka de waino." Hokogea o nyawa manga demo genangoka. 28 De gea o Yesusu ka wodotokohi genangoka Ma Jou ai Tau ma pungaka de duru waamo-amokiye waleha wato, "Ho ngini igoungu, nihihioriki e? De niato ahi kapongoo ma ka nihioriki e? Ma, ngohi naa toboaino ko ma titiua to ngohi dika ahi mau hiadono toboa. Gea o Baba wohihidingoto naangino de Una duru wagou-goungu ho Una ka idadi niwingaku masara Una gea duru ngini ko niwihiorikuahi. 29 Ma nako ngohi, duru tihioriki angamoi gea Una wohihidingoto Ngohi naa abe Unangoka de taino." 30 Ka de ai demo gea yoihene de o Yahudi ma nyawa genangoka duru ihitaili iwitaoko o Yesusu masara ko moiua ka idadi iwiso angamoi ma oraha ko adonuahi abe o nyawaino ka idadi iwitaoko. 31 De manga ngoe genangoka iwingaku o Yesusika abe Una Ma Jou ai Behehongo, ato, "Angamoi ko ma iwa utu abe ka idadi yodiai o heheranga hokonaa ma ngoe, ho maraioka Una gea o Mesia!"
Ma Jou ai Tau ma gogoana yaduhuloko la o Yesusu iwitaoko
32 Hokogea o nyawa yotemo yomakokuhudu dika ma titi o Yesusu, masara manga demo gea naga yoihene o Farisi manga doomuino ma nyawa. Ho o Farisi ma nyawa gea de o Hidemo Ma Jouika yomakoketemohi abe hokokia yodiai la ibootohi o Yesusu wodotoko hokogea. Ho yomakoketemo ibooto de ahao yomakiniiki yoiki onangika abe yogoa-goana Ma Jou ai Tau de yahuloko onangika ato, "Niloiki, o Yesusu gea kiani niwitaokoka!" Ho ona gea yogoa-goana Ma Jou ai Tau yaduhuloko la ato iwitaoko o Yesusu. Masara ona ko yamoroinuahi iwitaoko. 33 De o Yesusu wahingahuohi ona mata-mataika wato, "Ko itedekanokaua Ngohi naga nginioka de ahao Unangikali tolio abe Una gea wohihidingoto gea Unangika tolio. 34 De ma oraha gea ahao ngini niolingiri o duduhunu Ngohino masara gea nikokapaanga, ko nihimakeokaua Ngohi naa. Angamoi ma ngioka gea abe Ngohi naga genangoka, ngini ko idadiua niboa genangika." 35 Ka de o Yesusu ai demo gea yoihene de o Yahudi ma nyawa yomakoketemo ato, "O kiaika wato woiki hiadono ko idadiua himake genangoka? Bote woiki la womahikasapurika nanga dutuoka abe naga yahikabarihikaka nanga tonaka ma poretoka? Ho ahao o Yunani ma nyawa abe ko o Yahudi ma nyawaua, marai ona gea manga hidogoronaka wogogere la wato onangoo wadotoko, eko sarakia?" 36 De utuohi manga hininga ihuha ato, "De o kia ma titi o Yesusu ai demo gea wato ahao holingiri o duduhunu Unangino masara hokokapaanga? De wato ai ngioka ko idadiua hoboa genangika. Ai demo gea ma titi marai duru ko hohiorikua." Hokogea manga demo. 37 Ho ahao adonoka o wange gea manga rame-rame ihibobaha, ho ato kiani yongodumu, de o Yesusu womaokoino de duru waamo-amokiye wato, "Onagona dika abe manga ngomaha yodudungu ka idadi yoboaino Ngohino de Ngohi tahiokere. 38 De ahao idadi onangika duru imaketero hoka ihitulihukuoka Ma Jou ai Demo-demoka. Abe onagona dika ihingaku Ngohino naa ona gea ahao naga o akere ma ngango ibubungiye manga badanga ma goronaka. Ho manga badangoka de ihahurino o akere gea abe genangino o nyawa yamake o wowango ma ngango ka hiado-adonika." 39 O Yesusu ai demo gea ma titi Ma Jou o Womaha ahao wogogere onangoka abe iwingaku o Yesusika. Masara o Yesusu ko wigorakiyeuahi ho Ma Jou o Womaha ko wihidingotuahi onanguku. 40 Ma ka de o Yesusu ai demo gea yoihene de naga o nyawa utu manga ngoeino gea yotemo ato, "Maraioka naa Una Ma Jou ai uru ma dodofanga womatengo abe Ma Jou wato duru ai hininga adaene unangika." 41 De o nyawa utu ato, "Marai una gea Ma Jou ai Behehongo hihiromanga o Mesia." Ma, naga ona utu yoleha ato, "Ho done sarakia o Mesia gea o Galilea ma nyawa? 42 Ngini ko nihiorikua naga itulihukuoka Ma Jou ai Demo-demoka abe o Mesia kiani nanga koano o Dautu ai totoforaukuino? De ko nihiorikua abe o Dautu ai kapongo o Beteleheeme? Ho kiani Una Ma Jou ai Behehongo gea o Beteleheemino ma nyawa." 43 Hokogea o Yahudi ma nyawa duru yomaketeliliarino manga ngoe genangoka. 44 De utu naga ato kiani o Yesusu iwitaoko masara ko moiua de ka idadi iwiso.
O Yahudi ma nyawa manga balu-baluhu o Yesusu ko iwingakua
45 De ona yogoa-goana Ma Jou ai Tau abe iwiduhuloko la o Yesusu iwitaoko ngaro onangoo ma ko iwitaokua. Ho ma oraha yolio o Farisi ma nyawaika de manga hidemo Ma Jouika de manga hidimono utu duru yataere Ma Jou ai Tau ma gogoanika gea ato, "Ei, Una gea ko niwiaoinoua? Adodoa ho ko niwitaokua?" 46 De ona yomademo manga balu-baluhika ato, "Una gea ai demo ko iwa moi imakadaene de to ngone nanga demo! Duru ko ma moiuahi naga o nyawa yotemo-temo hoka Unangoli wotemo-temo." Hokogea ona Ma Jou ai Tau ma goa-goana yomademo. 47 De o Farisi ma nyawa gea yataeroli Ma Jou ai Tau ma gogoanika gea ato, "Adoo, nginioo winibudioka ka hiadono winihirehenoka! 48 Abeika ngomi naa, o Farisi ma nyawa, sarakia, naga ngomioka abe wiwingaku, eko naga nanga balu-baluhu utu abe iwingaku? Ko moiua! 49 O nyawa yowoe-woe gea yomatoomuino ona gea ko kia-kiaua ihioriki. Ona o kokawaaha biaha dika, de ko yomadotokua Ma Jou ai Demo-demoino ho manga hohowono Ma Jouino yadaenokau nako to Una ai demo yodafongo." Hokogea yataere. 50 Masara o Nikodemusu naga genangoka de unangoo o Farisi ma nyawa abe o Yahudi ma nyawa manga hidimono moi yamoritumidino abe duru yokokurutiye o Yahudi ma nyawaka. O Nikodemusu gea una abe ma dihira witutumu o Yesusu o fufutuoka. 51 Ho una gea widemo o Yesusu wato, "Nanga pareta abe inahidumutu o kia itiai de o kia ko itiaiua naga e? De nako o pareta gea haniiki, sarakia, itiai o nyawa hahohowonoka ngaro ngone ko hitailakouahi abe hokokia wodiai hiadono wahowono? Koua, hokogea ko itiaiua!" Hokogea o Nikodemusu watemo ai dodiawoika. 52 Masara ona iwipaluhu ato, “Ngaro ngona ma hirete duru nolingiri Ma Jou ai Demo-demoka, masara ahao ko namakeua ai Bukuoka ma titi ai uru ma dodofanga abe una woboaino o Galilea ma tonakino." Hokogea o Yahudi ma nyawa manga hohidimono yomaketeribuutu. 53 De ahao ipaha o nyawa mata-mata abe yaniiki manga rame-rame genangoka yokokilio manga kokitau-tauika.
O ngofeka momatengo imihidataoko ami howono ma goronaka
1 Ho o Yahudi ma nyawa manga ngoe abe yomatoomuino Ma Jou ai Tauoka yokokilio manga tau homoi-homoiika masara o Yesusu woiki o Saitunu ma lokuika. 2 De ahao ma dawangeino duru wongorumika Ma Jou ai Tauika de genangoka o nyawa ko manga ngoe yoboa Unangino. Ho o Yesusu wogogeruku de womulaenge wadotoko ona gea abe yomatoomuino Unangoka. 3 De ahao ma moioli naga abe yotobadoto-dotoko o Musa ai Paretaino de o Farisi manga doomuino ma nyawa onangoo yamuruono naga yoboaino. De naa ona yoboa ma titi imiaoino o ngofeka momatengo abe imihidataoko ami howono ma goronaka. De muna gea imiaoino o Yesusu ai himangoka de imihuloko munangika ato, "Mia himangoka nomaokoino de nomihimangino!" 4 De ahao ona iwihingahu o Yesusika ato, "Mia guru, muna naa miahidataoko ma oraha muna de o nauru abe ko ami rokatua de yomakitigi ho muna modiai itorou. 5 Ho kiani ngone homihakaru, ka hiadono mohonenge. Angamoi o ngofeka abe hokogea manga howono, nanga pareta o Musaino itemo kiani hokogea homihohowono. Ho sarakia Ngona, nako to Ngona ani hininga hokokia kiani hodiai munangika naa?" 6 Hokogea ona iwibole ma goa-goa o Yesusika angamoi iwitaili dika ato wotemo sarakia onangika la genangino ihititi la ka idadi iwitae ato walawana Ma Jou ai paretaika. Masara o Yesusu ko wotemoua womaponuku dika wotuli-tulihi o tonakuku de ai hagaraara. 7 Ma, ona ka ihikaika iwileha-leha ho womatogumu wotulihi de womaokoiye de watemo onangika, wato, "Onagona dika naga nginioka abe ko iwa nia howono, ngini gea ka idadi naa nimulaenge nimihakaru." 8 Hokogea wotemo ibooto de ahao womaponukuoli de wohigila-gila wotuliholi o tonakuku. 9 Masara ka de o Yesusu ai demo gea yoihene, gea de ka dau yomulaenge yokokiloiki. De o nau-nauru gea utu yaperekioka ona gea yokokihira yoiki de utu yototuruika ho hiadono yomamataka, homoi-homoi yoiki yomahikabarihi. Ho jai-jai dika de o Yesusokahi naga genangoka de o ngofeka imitao-taokino gea, ho onangokahi dika genangoka. 10 De ahao o Yesusu womarikotiyeoli de womileha munangika wato, "Kangano nenangoka o nau-nauru ona o kiaikaka? Ko moiokaua naga abe ato kiani inihohonenge?" 11 De muna mopaluhu Unangika mato, "Ahi Baluhu, ihihohonenge eko koua ko tohiorikua angamoi naa ko yaiwa, yokokilioka." De o Yesusu wato, "Nako gea Ngohioo naa ko tonihohowonua. Ho ngona naa nolio de ani howono itorou gea ibootohi nodiai, kiani gea nanoaka." Hokogea o Yesusu wohimatoko o nyawaika ai dora munangika.
O Yesusu womahiromanga o dunia ma dararono
12 De ahao o Yesusu wahingahuoli onangika abe naga utuohi genangoka wato, "Ngohi naa o dunia ma dararono abe o nyawa tahitararono manga wowango. Ho onagona dika ihiniiki Ngohi naa, ona ko yogila-gilakaua o fufutuika masara yamake manga wowango ma ngekomo abe duru de ma dararonoka." 13 De abe naga genangoka, utu o Farisi ma nyawa de ona ka de o Yesusu ai demo gea yoihene de yotemo ato, "Ho naa idadioka to ngona dika ani demo napake de genangino nomahitaana abe ko idadiua miangaku ani demo gea." 14 De o Yesusu wapaluhu onangika wato, "Ngaro to Ngohi dika ahi demo tapake la tomahidumutu itaana, ma gea ka idadi angamoi Ngohi tohioriki o kiaino toboa de o kiaika ahao tolio, gea ngini ko nihiorikua masara mata-mata gea Ngohi tohiorikokau ho ahi demo igoungu. 15 Angamoi ngini nia biaha o nyawa niahohowono de niapake o pareta o nyawaino dika. Ma, Ngohi naa o nyawa ko moiua tahohowono hokogea abe hoka ti ngini nia hohowono niapake o nyawaika. 16 Mangale Ngohi naa de o Baba mimaketerimoi ho nako hiadono Ngohi o nyawa tahohowono gea ahi hohowono itiai angamoi Ngohi ko tomatengoinoua dika de o nyawa tahohowono. Gea o Baba ai hiaturu de to Ngohi ahi hiaturu idadioka moi angamoi Una wohihidingoto. 17 Hoka ti nginioo nia pareta moi gea abe itulihukuoka itemo ato nako naga womatengo niwiurusu kiani naga o nyawa yahinooto inihingahu nginika hokokia wodiai la hiadono manga demo iwihitaana ai howono naga eko koua. 18 "Hongoli Ngohi naa ihihitaana ka imaketero hoka nia pareta gea abe ihira Ngohi ma hirete tomahitaana totemo tato ahi datoro itiai. De ahi Baba abe wohihidingoto, unangoo wohihitaana wato ahi datoro itiai. Ho gea imihinooto, ho ka idadi niangaku mia demo gea." 19 De ahao ona iwileha o Yesusika ato, "Ho mode o kiaka ani Baba?" De o Yesusu wapaluholi onangika wato, "Ngini naa ko nihihiorikuahi Ngohi naa ho ahi Babaoo ko niwihiorikuahi. Abe nako nihihiorikoka Ngohi naa, gea ka idadi ahi Babaoo niwihioriki." 20 O Yesusu ai demo-demo mata-mata naa wahingahu Ma Jou ai Tau ma goronaka ma honongaka abe genangoka akelenga o nyawa manga hidoaka ma tiwi ma ngi. Tanu ma oraha gea o nyawa ato iwitaoko masara ma oraha ko adonuahi abe iwihohonenge, ho ko iwihidadiuahi iwitaoko. 21 Ma moioli o Yesusu wahingahu onangika wato, "Ngohi ahao toiki tininoa de ahao ipahaino ngini duru nihilingiri masara ka nihonenge nia howono ma goronaka dika. Angamoi o ngioka abe ahao Ngohi naga genangoka, ngini ko idadiua niboa genangino." 22 Hokogea o Yesusu ai demo hiadono o Yahudioka manga balu-baluhu gea yomakokeleha ato, "O kia gea wotemo? Una gea marai wato womahohonenge, hiadono wotemo hokogea, eko sarakia? Marai hokogea ma titi hiadono wato ko idadiua ngoneoo genangika hoboa, eko sarakia?" Hokogea yomakokeleha. 23 Masara ahao o Yesusu wohigila-gila ai demo onangika wato, "Ngini naa o duniaka ma nyawa masara Ngohi daku o Horogaka de tauku. Abe ngini nimaboa o dunia ma lokuoka masara Ngohi hokogenangua. 24 Gea ho hidutu tinihingahu tato ahao nihonenge nia howono ma goronaka angamoi nako ko nihingakua. Abe itiai tomahingahuoka de ma romanga Ngohi Naga angamoi Ngohi Ma Jouoka de taino, nako gea ngini ko niangakua, gea itaana de ahao de nia howono nihidohonenge." 25 Ka de gea o Yesusu wotemo ibooto de ona iwiribuutuohi ato, "Kiani nomihingahu itiai abe ngona naa onaguna." De o Yesusu wapaluhu onangika wato, "Tato bote naga ka ma dihirainohi tinihingahuoka abe ma titi Ngohi naa, de hiadono ma oraha naa de ka ihikaika tohigali-gali tomahingahu nginika. 26 De naga ma titi ma ngoe abe ka idadi Ngohi tapake de tinihihohowono. Masara Una gea wohihidingoto naangino, Una duru wagou-goungu ho ma titi abe Unangoka de aino, ma titi gea dika abe naa tahingahu-ngahu o dunia ma nyawa mata-mataika." Hokogea o Yesusu wahingahu o Yahudi ma nyawaika gea. 27 Masara ona yataoko ihowono angamoi ngaro ai demo ma titi ma dumutu Ma Jou o Baba, masara ma titi gea ona ko ataokua. 28 Ho o Yesusu wotemo, wato, "Ahao adonoka ma oraha o Nyawa ma Ngofaka niwihidoaiyeoka o gotaka, ma oraha gea de ahao ngini nihihioriki igoungu Ngohi Naga abe Ngohi Ma Jouoka de taino. Ho ma oraha gea de ahao nihihiorikoo duru ko moiua todiai abe Ngohioka dika de tomahohiningaiye, ma, totemo dika abe o Baba wohidotokoka, gea dika ahi demo. 29 Gea una wohihidingoto de ka ihikaika Una naga Ngohioka. De mangale duru ka ihikaika tihisanangi ho ko ma moiuahi wohinoa." 30 De o Yesusu ai demo gea ka wotemo-temohi de naga o nyawa manga ngoe genangoka iwingaku.
Ma titi o Abarahaama ai ngofa-ngofaka
31 Ho o Yahudi ma nyawa abe iwingaku-ngakuika gea o Yesusu wahingahuoli onangika wato, "Nako ahi dodotoko ka ihikaika ngini nimadoihene la nia wowango niao itiai, gea nimahitaana nidadioka nihinii-niiki igou-goungu. 32 De ahao niamake mata-mata abe inihimatoko Ma Jou ai hininga nginika la hiadono duru niwihioriki. De o tobahioriki gea hohiromanga ma gou-goungu. Ho ka de ma gou-goungu gea ngini nihioriki de ena gea inihihupuoka o huhuloko ma papakitino." Hokogea o Yesusu wahitararono iwingaku-ngakuika gea. 33 De ahao naga o nyawa utu iwileha o Yesusika ato, "O kia ani demo gea ma titi? Ngomi naa o Abarahaama ai totoforauku de ko ma moiuahi naga o nyawa imihidadi to ona manga huhuloko hiadono imihidapakitoka onangika la to ona dika manga hikaaturu kiani mianiiki. Ho ma titi o kia gea nato ahao naga abe imihihupu o huhuloko ma papakitino?" 34 De o Yesusu wapaluhu onangika wato, "Naa duru tagou-goungu tinihingahu nginika, onagona dika yahowono gea yodadioka o howono ma huhuloko abe yahidapakitoka manga howonika ho ko idadiokaua yomaputuhu angamoi manga howono dika yahipareta. 35 Naa o hiketero moi todiai abe o nyawa to ona manga huhuloko de manga ngofaka ma dutu tahikohowono. Abe manga huhuloko gea, nako o tau ma dutu manga hiningaka itemo ato to una ai papakiti manga tauoka atoaka, gea ka idadi atoaka. Masara to ona manga ngofaka ma dutu to una ai papakiti naga abe ko idadiua atoaka angamoi una to ona manga ngofaka ka hiado-adonika. 36 Ho nako Ma Jou o Ngofaka winihihupu nia howono ma papakitino gea nia kangelaino inihihupuokau. 37 Ngini naa tinihioriki abe igoungu ngini to Abarahaama ai totoforauku. Ma ngaro hokogea, masara abeika, nimahidiaioka la niato Ngohi nihitoma! Ngini ko nianiikua abe tinidotokoka ho nihihidee dika niato nihitoma. 38 Ngohi ma dihira togogere daku o Babaka ho mata-mata wohihimatoko Ngohino, gea tinihingahu nginika. De nginioo nidiaioka abe hoka homoi-homoiika niihenoka ti ngini nia babaino." 39 De ona yopaluhu ato, "To ngomi mia baba gea o Abarahaama." De o Yesusu wato, "Nako ngini nimahiromanga o Abarahaama ai ngofa-ngofaka, gea ahao ti ngini nia datoroo imaketero hoka o Abarahaamoli ai datoro. 40 Ma naa ngini duru nihihidee itorou niato nihitoma Ngohi naa, de gea ngaro toigo tinihingahu ma gou-goungu abe tamake Ma Jou o Babaino. Hokogenangua o Abarahaama wodiai. 41 Ngini naa nidiai duru imaketero hoka ti ngini ma hirete nia baba idiai." De o Yahudi ma nyawa gea yopaluholi ato, "Notemo hokogea marai nato ngomi o homoa ma ngofaka e? Masara nako ngomi, ko o homoaua ma ngofaka ngomi naa! To ngomi mia Baba moi dika de Una gea Ma Jou."
O Yesusu wahitararono o Ibilihi ma ngofaka
42 De o Yesusu wahitararono onangika wato, "Nako ngini niagoungu niato ti ngini nia Baba Ma Jou, gea tanu nihiao irahai Ngohi naa, angamoi Ngohi Ma Jouoka de taino hiadono naa naga. De gea toboa ko ma titiua Ngohi dika taputuhu tato toboa. Masara ma titi naa toboa gea Ma Jou o Baba waputuhu wato wohihidingoto hiadono toboa nenanguku naa. 43 Masara adodoa ho ko nimangaratiiua ahi demo hiadono ko nihiorikua ma titi Ngohi naa? Masara ena nena ma titi, angamoi niaoluku ahi demo ho ko nihigihenua. 44 Igoungu, o Ibilihi idadioka ti ngini nia baba, de gea ho nioigo to ena ma mau dika nihigihene. De hokonaa o Ibilihi ma hininga. Ma dihiraino ena gea o nyawa yatobatoma. Duru ko iwa ma gou-goungu enangoka ho ioluku aniiki o kia dika abe ma gou-goungu. O Ibilihi duru itobaeluku ho ena gea o ngelu-ngeluku ma baba. Ho gea ka ihikaika ielu-eluku angamoi o ngeluku ma demo gea to Ibilihi ma demo. 45 Masara to Ngohi naa duru ahi demo ma gou-goungu. De angamoi ngini o Ibilihi nianiiki ho ahi demo gea niaoluku hiadono Ngohioo ko nihingakua! 46 Masara ngini niato Ngohi tahowonoka e? Sarakia naga nginika abe ka idadi nihihitaana abe ma moiokau tahowonoka? Ho nako tagou-goungu dika totemo, gea kiani Ngohi nihingaku e? 47 Mangale ngini ko Ma Jouokaua de niaino, gea ma titi hiadono ngini nioluku Ma Jou niwihigihene. Masara nako naga womatengo Ma Jouoka de waino una gea Ma Jou wihigihene." Hokogea o Yesusu womahitararono onangika. 48 De ahao o Yahudi ma nyawa gea iwipaluholi o Yesusika ato, "Mode ko miagoungua minifetongo miato ngona o Samaria ma nyawa de miato inikitokata? Gea ngomioo miagoungu e?" 49 De o Yesusu wapaluhu onangika wato, "Ngohi ko ihikitokatua Ngohi naa. To Ngohi ahi demo ihiboa o horomati ahi Babaiye, masara ti ngini nia demo niapake la idadi o hohedu ma demo Ngohino. 50 Gea tinihitaana totemo nginika tato nia horomati ko iwa Ngohino, ko ma titiua Ngohi ma hirete tomalingiri la o nyawa ihigorakiye. Koua, ko enangua, masara naga womatengo abe duru woigo la Ngohi wohigorakiye. De gea Una abe o nyawa manga hininga watailako nako itiai eko ko itiaiua. 51 De naa tagou-goungu tinihingahu onagona dika tadotokoka de ihihigihene hiadono manga datoro imakiniiki de ahi dodotoko gea, de ahao o nyawa gea ko yohonengokaua." 52 Ka de hokogea o Yesusu wotemo de o Yahudi ma nyawa iwipaluhu unangika, ato, "Gea ho itaana ngona naa inikitokata! Ani demo hokogea de minihiorikoka! O Abarahaama wohonengoka de Ma Jou ai uru ma dodofangoo yokokihonengoka. Ho mode sarakia hiadono ngona naa nomihingahu nato nako o nyawa inihigihene gea ko yohonengua. 53 Nako hokogea ani demo miataoko ma titi hoka nako ngona de o Abarahaama, ka ngonahi nokurutiye. Mode ngona onaguna hiadono notemo hokogea? Angamoi o Abarahaama wohonengoka de hokogenangoo Ma Jou ai uru ma dodofanga." 54 De o Yesusu wapaluhu onangika wato, "Nako Ngohi ma hirete tomagorakiye, gea ahi higiriiri ko iwa ma titi. Masara Una abe ngini niwifetongo niato, 'Mia Jou', Una gea wohigoraka Ngohi, de ai higiriiri ka ihikaika itagi Ngohino angamoi Una gea to Ngohi ahi Baba ma dutu. 55 Ho ngaro ngini ko niwihiorikua Una gea, ma, Ngohi duru tihioriki. Nako Ngohi totemo tato ko tihiorikua gea Ngohioo toeluku hoka nginioli nieluku, ma naa tagoungu Ma Jou tihioriki, de ai demo-demo mata-mata tohingounu. 56 Ngaro ma dihira abe ti ngini nia tofora o Abarahaama, ma una gea wohiorikokau ahao Ngohi toboa ho ngaro ka womahohininga dika ma titi Ngohi de ai garago imaketero hoka wohimakeoka." Hokogea o Yesusu womahitararono onangika. 57 De o Yahudi ma nyawa gea ka yomaketeribuutuohi de o Yesusu hiadono yotemoli ato, "Ngona ani ngumuru ko adonuahi ani taongo moritoa de nato o Abarahaama nimakeoka!" 58 De o Yesusu wapaluhu onangika wato, "Naa duru tagoungu tinihingahu nginika, o Abarahaama gea ko womaboauahi de Ngohi Naga." 59 Ka de hokogea o Yesusu wotemo de o Yahudi ma nyawa gea manga hakaru yomulaenge yomagoraka ato iwihohonenge masara ka de hokogea yomagoraka o hakaru de ka itodokanino de o Yesusu ko iwimakeokaua angamoi woiki, Ma Jou ai Tauoka de waino wohupuoka.
Womatengo worafi ka womahidoboainohi ahao o Yesusu widuhunu la ka idadi womahioriki
1 Ahao o Hiaini ma Wange moioli de o Yesusu wotagi-tagi de wimake womatengo abe ka womahidoboainohi worafioka. 2 De ona o Yesusu iwitobaniiki iwileha Unangika ato, "Mia Guru, naa moi minileha abe naa una ka womahidoboainohi de worafioka, gea ma titi to una ai howono eko ai dimonoka to ona manga howono hiadono worafi hokogea?" 3 De o Yesusu wopaluhu onangika wato, "Masara ko ma titiua to una ai howono eko ai baluhu manga howono hiadono womaboa de worafioka. Hokonaa idadi unangika la ka idadi o nyawa yamake Ma Jou ai buturungu ai wowangoka. 4 Ma oraha adonoka abe ngone ka idadi hodiai to Una ai karajaanga abe wohihidingotino naa. Imaketero hoka o nyawa manga biaha yokarajaanga o wangeoka masara o futu-futu ko yokarajaangua, hokogenangoo de Ma Jou ai karajaanga. Abe nako ngoneoo hodamaa la Ma Jou ai karajaanga hato hokarajaanga nanga wowango ma bahaika, gea hokokapaanga. 5 De Ngohi naa o dunia ma dararono ho ma oraha Ngohi togogerohi o duniaka naa, o nyawa ka tahitararonohi manga wowangoka." 6 Hokogea o Yesusu wotemo ibooto de ahao o tonaka ma tau-tauluku waobiruku o Yesusu, de ai kibiri wohikaruwaeino de o tonaka ma tau-taulu gea. Hokogea wodiai hiadono idadi hoka o hibauru de ahao womulaenge wohiehe worafi-rafi ai laku ma lokuino. 7 Gea o Yesusu wodiai ibooto de ahao wihuloko worafi-rafika gea wato, "Naa noiki o Siloama ma taagaika de nomamahau o akeruku gea." Abe ma romanga o Siloama nako to ona manga demo gea ma titi o hidingoto. Hokogea o Yesusu wihuloko de o rafi-rafi gea wihingounu ho woiki o Siloama ma taagaika. Ka de womamahau de womahiorikoka ho wolio ai tauika. a 8 Ho ona yogogere worafi-rafi ai tau ma datekoka de o nyawa utu abe ma dihirainohi iwimake womagaho-gahoko, ona genangoka yomakokeleha ato, "Naa una gea abe ma dihiraino worafi e? Abe ma ngoe himake wogogeruku la gea womagaho-gahoko ngoneino." 9 De naga utu ato, "Iya, marai una gea." Masara naga utu ato, "Ou, ko unangua! Marai yomakadaene dika manga himanga masara, ko unangua!" De ahao worafi-rafi, una ma hirete womahingahu wato, "Naa Ngohi!" 10 De ahao ona iwihuloko ato, "Abeika, nomiade-ade abe hokokia idadi ani lako gea itiaioka ka hiadono ka idadi nomahioriki." 11 De una woade-ade onangika wato, "Kangano naga womatengo, ai romanga o Yesusu, gea Una wodiai. Abe o tonaka imakadaene hoka o hibauru wodiai, de gea wodiai ibooto de ahao wohiehe ahi lako ma lokuino. Gea ka de wohiehe ibooto de ahao wohihuloko wato, 'Noiki o Siloama ma taagaika de nomamahau o akeruku gea.' Ho gea toiki tomamahau hoka wohihulokoka de idadioka tomahioriki." Hokogea dika woade-ade. 12 Ho ona iwilehali ato, "Ho ma nauru gea o kiaka?" De wapaluholi wato, "Aiaho, bote Una naa o kiaka naga." 13 De ahao ona yogahoko unangika abe ma dihira worafi-rafika ato, "Abeika, nominiiki o Farisi ma nyawaika." Ho iwiao o Farisi ma nyawaika la ato iwihimatoko onangika la ka idadi ai lako yamake. 14 De naa mata-mata idadi o Hiaini ma Wangeoka. Abe o Yesusu o tonaka ma tau-taulu wohidadi hoka o hibauru gea ma titi genangino wapake la ka idadi womahioriki worafi-rafi, gea mata-mata idadi o Hiaini ma Wangeoka. 15 Ho ka de o Farisi ma nyawa onangoo iwileha de onangikaoo wapaluhu wato, "Una gea wodiai abe ma rupa hoka o hibauru o tonakino, de gea wohiehe daku ahi lako ma lokuino ibooto de ahao wohihuloko la tomamahau. Ho tomamahau ibooto de ka itodokanino tomahioriki. Hokogea dika ai hiaturu Ngohino." 16 De o Farisi ma nyawa utu gea yotemo ato, "Masara nako hokogea wodiai o Hiaini ma Wangeoka gea Una ko Ma Jouinoua angamoi to ngone nanga pareta watilakuroka." Masara naga utu yotemo ato, "Ma, abeika ai dodunguu duru inahiheranga, nako Una o howo-howono ma nyawa ko idadiua wodiai hokogea." Hokogea utu yotemo hiadono o Farisi ma nyawa gea duru yomaketeliliara. 17 Ho ona ma bahaika worafi-rafika iwileha unangika ato, "Ho, ngona gea, sarakia? Angamoi gea ma titi to ngona ani lako ho ani hininga Unangika sarakia?" De worafi-rafi gea wopaluhu wato, "Nako ngohi ahi hiningaka tanu Ma Jou wihiakunu ho ngohi tato Una gea Ma Jou ai uru ma dodofanga." 18 Masara ngaro hokogea wahingahu ma, o Yahudioka manga balu-baluhu ko yongakua, ato bote ka ma dihirainohi de womahioriki. Ho hiadono ai baba de ngoi memeika yabehehongo ho naga o nyawa yangotaka onangika. 19 Ho ona ahao yaleha ai baluhika gea ato, "Sarakia, una naa ti ngini nia ngofaka, o nauru naa? De nako una gea nia ngofaka, igoungu ka de womahidoboainohi de worafioka? De nako hokogea adodoa ho naa ka idadi womahioriki?" Hokogea manga leleha ko itoa-toakua. 20 Ho ahao gea ai baba de ngoi meme yopaluhu ato, "Masara, igoungu, una naa mia ngofaka. De ka womahidoboainohi de duru ko womahiorikua. 21 Masara ngomioo duru ko mihiorikua hokokia idadi hiadono ka idadi womahioriki de o nyawa abe iwihifelanga ai lako onangoo ko miahiorikua. Masara una wobaluhoka ho kiani unangika dika niwileha de una ahao ka idadi winihingahu abe hokokia idadi ai lakoika gea." 22 Hokogea dika ai baluhu yopaluhu angamoi yamodongo manga hidimonika. Yamodongo onangika angamoi ihioriki o Yahudi ma nyawa manga hidimono gea yoputuhoka ato onagona dika yotemo ato, "O Yesusu Una gea o Mesia," gea ona ko yahigunoakaua yowohama manga dodotoko ma tauika. 23 Gea ma titi hiadono worafi-rafi ai dimono gea yopaluhu ato, "Masara una wobaluhoka ho kiani unangika dika niwileha." 24 Ho ka de hokogea ai baba de ngoi meme yopaluhu ibooto de worafi-rafi yomulaengoli iwiahoko la wahimanga. Ho naa ma hinooto iwileha-leha ma titi ato, "Duru kiani Ma Jou dika nigorakiye ho kiani nohibehehongo Ma Jou ai himangoka la ufa nomahipongono. Ngona kiani de ani demo ma gou-goungu nomahingahu angamoi ngomi wiwihiorikoka Una wonihifelanga ani lako, de Una gea o howo-howono ma nyawa." 25 De worafi-rafi gea wapaluhu onangika wato, "Ngohi ko tihiorikua nako Una o howo-howono ma nyawa eko koua. Masara naa duru tohioriki, ngaro ma dihira torafioka ma naa tomahiorikoka!" 26 Ho ona iwilehali ato, "Ho wadodoa ani lakoika? Hokokia wodiai wohifelanga ani lako hiadono ka idadi nomahioriki?" 27 De una wapaluhu onangika wato, "Tato bote tinihingahuoka masara ko nihingakua ho adodoa ho ka nihilehahi? Sarakia, ngini ko nihigihenua abe tinihingahuoka? Eko marai nginioo niato o Yesusu nioigo niwinii-niiki?" 28 Ka de gea wotemo ibooto de ona worafi-rafika iwihidokengino ato, "Marai ngonaoo hoka onangoli abe o Yesusu iwitobaniiki nodadioka! Masara nako ngomi, ani baluhu naa, koua! Ngomi o Musa dika wiwinii-niiki abe Ma Jou ai behehongo hamakeoka o Musaino, gea dika mianiiki ngomi. 29 Angamoi nako o Musa, igoungu, Ma Jou wotemo unangika, gea mihioriki. Masara o nauru gea, Una o kiaino ma nyawa hiadono ngomi ko wiwihiorikua!" 30 Ho una wapaluholi onangika wato, "Ngohi gea nia demo duru ka toherangaholi hiadono kanganohi tanu totemo ma duru toheranga hiadono ko idadiua totemo! Una gea wodiai la ka idadi tomahioriki masara ngini niato ngaro Una gea o kiaino ma nyawa ma ko niwihiorikua! 31 Ma ngone naa hohioriki nako o howo-howono ma nyawa ngaro yomaniata ma, manga gogahoko Ma Jou ko wahigihenua. Ma ona abe iwihigiriiri de yaniiki to Ma Jou ai mau, gea ona wahigihene. 32 Abeika naa, ka de o dunia idadioka de hiadono ma oraha naa de ko ma iwahi o nyawa yoihene o ade-ade ma gou-goungu abe hokonaa. Abe o nyawa ka de yomahidoboainohi yorafioka de ahao naga o nyawa yodiai hiadono ka idadi yomahioriki. 33 Nako Una wohiduhunu gea ko Ma Jouinoua duru ko kia-kiaua wakunu wodiai." 34 Ka de worafi-rafi gea wotemo hokogea de ona duru iwitaere ato, "Ou, ngona ka de nomahidoboainohi de duru nodadiokau o howo-howono ma nyawa! Mode ngona onaguna hiadono nato nomidotoko ngomino hokonaa?" Hokogea o Farisi ma nyawa iwitaere ibooto de ahao de manga dohata, manga dodotoko ma tauoka worafi-rafi gea iwihihupuoka ma hoanika.
O Yesusu wahitararono ma titi o nyawa yorafioka Ma Jouika
35 Ka de o Yesusu woihene manga dodotoko ma tauoka iwiumoka ma hoanika de wilingiri worafi-rafi gea. Ho gea ka de wimake de o Yesusu wileha unangika wato, "Sarakia, nako o Nyawa ma Ngofaka ngona ningakuoka Unangika?" 36 De una wipaluhu wato, "Ahi Baluhu, nako o Nyawa ma Ngofaka gea onaguna? Irahai nohihingahu la ka idadi tingaku Unangika." 37 De o Yesusu womahingahu wato, "Marai ngona nimakeoka abe o Nyawa ma Ngofaka gea Una abe wonitemo-temo ngonaika ma oraha naa." 38 De worafi-rafi gea duru wihidogaragoholi o Yesusika ho womamotumuku ai himangoka de duru ka de ai doraka wotemo wato, "Ahi Baluhu, duru toningaku." 39 De o Yesusu wihingahu unangika wato, "Ngohi naa toboa o duniauku naa la ka idadi o nyawa manga howono tahidumutu onangika. Hokogea tahitararono manga howono la ona yorafioka ka idadi yomahioriki de abe ona yomagoraka ato yomahioriki, gea ona yorafioka." Hokogea o Yesusu wohiketero ma titi o nyawa manga howono wahidumutu. 40 Masara o Farisi ma nyawa genangoka yoihene ai demo gea de iwileha ato, "Ho gea ma titi o kia notemo, done ngomioo nato mirafi?" 41 De o Yesusu wapaluhu onangika wato, "Nako de ma titi nginioo hoka nirafioka, abe igoungu ko niwihiorikua Ma Jou, gea ko iwa nia howono hiadono inihohowono. Masara angamoi ngini nimagoraka niato ma gou-goungu abe Ma Jouino duru nihioriki, ngaro ko nihiorikua, gea nimahitaana ti ngini nia hohowono nagahi." Hokogea o Yesusu wahidumutu manga sade onangika.
O Yesusu o Domba ma Gogoana ma Rorahai
1 O Yesusu wohiketero wotemo wato, "Naa duru tagou-goungu tinihingahu nginika, o nyawa abe o domba ma kurungaika yowohama ma, ko yaniikua ma kurunga ma ngorana, ona gea ko yodadiua o domba ma gogoana. Abe ona ma homoaino dika yoboa hiadono ma goronaika yowohama de o nyawa gea yotobatohiki de yotobaora-ora. 2 Masara una abe wowohama waniiki o kurunga ma ngorana, una gea o domba ma gogoana ma dutu. 3 Ho ka de una woboa o kurunga ma ngoranino de womatengoli abe naga wogoana ma ngoranoka, una ka wibelengali o ngorana la wowohama dika o domba ma gogoana ma dutu gea. Ho de womahiadonika o ngorana ma goronaka de ai ilingi o domba gea iwigihene. De ahao to una ai domba ma romanga homoi-homoi wafetongo de homoi-homoi ikokiboaino de ahao wohihira-hira la wohihupu ma kurungaino. 4 Ho ka de ai domba wohikokihupuoka de ahao wohihira-hira de ai domba mata-mata iwikokiniiki angamoi duru ai ilingi ihioriki. 5 Masara ai domba gea nako o homoaino ma nyawa duru ko yaniikua. Angamoi ko ma gogoanua ho to una ai ilingi ko ihiorikua ho ko yaniikua, ka iloara dika ma domba angamoi ko ihiorikua ai ilingi.” 6 Hokogea o Yesusu wohiketero la wahitararono abe una hoka onangua abe yoboa yotobabudi. Masara o Yesusu ai hiketero gea ko yataokua ma titi. 7 Ho o Yesusu ka wotemohi onangika wato, "Naa duru tagou-goungu tinihingahu nginika, ma ngorana abe ka idadi o domba yowohama o kurunga ma goronaika, gea Ngohi naa. 8 Ma dodihirainohi, Ngohi ko toboauahi de naga ona abe yoboa o guru abe yodotoko ko ma gou-goungua. Ho abe ma dihira yoguru hokogea, ona mata-mata yotobatohiki de yotobaora-ora. Masara o domba gea ko yahigihenua to ona manga ilingi. 9 Ngohi naa ma ngorana, ho onagona dika Ngohino yoboa la yowohamika, ona gea ko yoboditoua. De ka idadi yohupu yowohama de yomamake o inomo. 10 Masara nako ona gea yotobatohiki yoboaino la ato yotohiki de yotoma de yahibinaaha, gea dika to ona manga hininga ma dumutu. Masara Ngohi hokogenangua. Ngohi toboa la ahi domba-domba o wowango ma ngango yamake ka hiado-adonika. De manga wowangoka gea ka ihikaika yamake o hiowa ma hohailoa." 11 De o Yesusu ka womahiketerohi wato, "Ngohi naa o domba ma gogoana ma rorahai. De o domba ma gogoana ma rorahai gea Una abe womahidoaka ai wowango la ai domba ka yowango. 12 Ma nako o nyawa abe iwihewa dika la o domba wagoana, una ka woara dika ma oraha wamake o fuhuku ma kaho iboaino, ho o domba gea wanoaika angamoi una o gogoana ko idodutua, iwihewa dika. Ho o fuhuku ma kaho iboa la o domba yagoli de o domba ma duduono gea ihikabarihoka. 13 O nauru gea ka woara de ma domba wodogunoaika angamoi iwihewa dika angamoi ma domba gea ko wodoraua. 14 "Ngohi naa o domba ma gogoana ma rorahai ho to Ngohi ahi domba duru tahikokioriki de ahi dombaoo ihihioriki Ngohi. 15 Gea mimahikoriki Ngohi de ahi domba imaketero hoka o Baba de Ngohi duru mimahikoriki abe Una duru wohihioriki Ngohi de Ngohioo duru tihioriki o Baba. De gea ma titi hiadono tomahidoaka ahi wowango la ahi domba ka yowango. 16 De to Ngohi ahi domba utuohi naga abe ko iwainohi o duduonino naa. De onangoo kiani taoino abe to Ngohi ahi ilingi ihigihene. Ho ahao ahi domba mata-mata idadioka o duduono moi de manga gogoana moi dika. 17 De gea ma titi ahi Baba duru wohidora mangale hiadono tomahidoaka ahi wowango la ngaro hokogea tohonenge ma ahi wowango ka iwangoli. 18 Ko moiua de ihiora ahi wowango, ma, Ngohi dika ahi mau hiadono tomahidoaka. De angamoi to Ngohi ahi kuaha de ma buturungoka hiadono ka idadi takunu ahi wowango takelengauku jai-jai de ahao tohigilioli ahi wowango ma titi ahi kuaha de ma buturungoka. De gea taniiki todiai angamoi ahi Baba wohihibehehongoka Ngohino wato, "Hokonaa ahao ngona nodiai." 19 Ka de hokogea o Yesusu ai demo yoihene de o Yahudi ma nyawa duru yomaketeliliarokali. 20 Naga utu manga ngoe yotemo ato, "Ou, Una gea iwikitokata, abeika, iwitogohangoka ho ngaro ibootohi hihigihene." 21 Masara naga ona utu yomaketetaere ato, "Iya gea, masara to Una ai demo imakohowono de abe yakitokata manga demo. De sarakia, ka idadi o tokata idiai hiadono o nyawa yorafioka de ka idadi yomahioriki? Koua, o tokata ko idadiua idiai hokogea."
O Yahudi ma nyawa o Yesusu iwioluku
22 De adonoka ma oraha o maata de o Yerusaleeme ma kotaka naga o rame-rame moioli ma romanga Ma Jou ai Tau Iwidingakoka ma Rame-rame abe yomahohininga ma oraha Ma Jou ai Tau iwidingakoka Unangika ho ma titi gea ihirame-rame. 23 De o Yesusu naga genangoka Ma Jou ai Tau ma honongaka abe ihiromanga o Saloomo ma punga, de genangoka wotagi-tagi o Yesusu. 24 Ka ai dodagi ma goronaka de o Yahudi ma nyawa yamuruono naga ka de iwimake de yoboa iwihigilolitoka de iwileha o Yesusika ato, "Adodoa ho naa ma dekanino Ngona nomihipongonohi ma titi ma gou-goungu abe Ngona igoungu o Mesia eko ko o Mesiaua? Kiani de ani demo ma gou-goungu nomihingahu ngomino la ufa hiadono miataoko ani demo ma titi ko itiaiua." 25 De o Yesusu wapaluhu onangika wato, "Ngohi tinihingahuoka masara ahi demo gea ngini ko nioigoua niangaku. Abeika o heheranga todiai, gea todiai duru imaketero hoka ahi Baba wato kiani todiai, ho o heheranga gea ihihitaanoka nginika. 26 Masara gea ngini ko nioigoua niangaku angamoi ngini ko to Ngohiua ahi domba abe naga o duduono moioka. 27 Nako to Ngohi ahi domba ona gea duru tahikokioriki de ahi ilingi ona ihigihene ho ihiniiki Ngohi. 28 De onangika tahikokidoakoka o wowango ka hiado-adonika ho ona duru ko idadiua yobinaaha. De angamoi ona naga ahi giama ma hoatoka ho ko moiua yakunu ihiora ahi giama ma hoatino. 29 Angamoi Una abe ona gea wohihidoaka Ngohino, gea ahi Baba de to Unangohi ai buturungu imahilaku ho ko moiua yakunu iwiora ahi Baba ai giamoka abe womahitounangoka. 30 De Ngohi naa de o Baba ngomi hoimoi." 31 Ka de o Yesusu ai demo gea yoihene wato, "Ngohi naa de o Baba ngomi hoimoi," de o Yahudi ma nyawa gea ma moioli o hakaru yomadorakino la ato iwihakaru hiadono wohonenge. 32 Masara o Yesusu waleha onangika wato, "Ngohi naa tinihimatokokau o heheranga ma ngoe abe o Babaka de aino, ho ma titi ahi heheranga o kia hiadono niato kiani nihihakaru?" 33 De ona yopaluhu ato, "Koua, ko ma titiua ani heheranga masara, ma titi ani ngelo angamoi Ngona duru o nyawa biaha dika ma gea ani demo hoka nomahidadi Ma Jou. Hokogea Ngona ningelo Ma Jou ho gea ma titi hiadono kiani nohonenge." Hokogea ona ihititi la ato o Yesusu iwitoma. 34 Masara o Yesusu wapaluhu wabole-bole onangika wato, "Sarakia, ko niohiningakaua Ma Jou ai Demo-demo moi abe naga ti ngini nia pareta ma bukuoka? Angamoi naga genangoka Ma Jou wotemo onangika abe wahidadi la ona o nyawa yahihohowono, wato, 'Ngohi tinihiromanga abe naga nginioka Ma Jou.' 35 Hokogea Ma Jou ai demo-demo itemoka ho nako naga o nyawa abe Ma Jou wahikuaha hiadono wahiromanga wato, Una Ma Jou naga onangoka, gea angamoi ai demo-demo naga onangoka. De gea ko o ngeloua ma demo, done hokokia de ngini nihititi ho niato Ngohi tingelo Ma Jou? Angamoi to Una ai demo moioo de ko iwa ko idadiua. Ho kiani naga o nyawa utuoo abe naga onangoka Ma Jou. 36 De utuohi hokogea nako ma titi naa Ngohi. Abe Ngohi naa o Baba womadingakoka Unangika de wohihidingoto o duniauku naa. Ma, ka de tinihingahu tato, 'Ngohi naa Ma Jou ai Ngofaka,' de ngini niato tingelo Ma Jou. Adodoa ho nihitae niato tingelo Ma Jou? 37 De nako Ngohi ko todiaiua gea abe ahi Baba dika ka idadi wodiai, gea ufa nihingaku Ngohino. 38 Masara ngaro ngini ko nihingakua, ma nako todiai gea abe o Baba wohihikarajaanga, kiani niangaku ahi karajaangika gea. Abe ka idadi nimadotoko ahi karajaangino gea hiadono nihioriki abe Ngohi naga o Babaka de o Baba naga Ngohioka ho ngomi hoimoi." 39 Ka de o Yesusu ai demo gea ona yoihene de ma moioli ihitaili iwitaoko masara ngaro yomulaenge iwitaoko ma ka itodokanino de ka aiaho angamoi wogila-gilaka. 40 De ahao o Yesusu wolio doka o Yorodani ma akere ma honongaika, ma ngiika woiki abe ma dihira o Yohanese genangoka womahidodogumu de o nyawa waohiki, genangika woiki. Ho o Yesusu womahiadonika o ngioka gea de ahao genangoka wogogere. 41 De ahao naga o nyawa ko manga ngoe yokokiboaino o Yesusu ai ngiino gea. De ona abe yoboaino de abe to ona manga demo ato, "O Yohanese ko wodiaiua o dodunguu abe inahiheranga. Masara Una naa ai dodunguu ma ngoe ho duru igoungu o Yohanese ai demo mata-mata abe ma titi o Yesusu Ma Jou ai Mesia." 42 Hokogea manga demo de naga o nyawa manga ngoe iwingaku o Yesusika ai ngioka gea.
O Yesusu ai dodiawo o Lasarusu wohonenge
1 Naga o Yesusu ai dodiawo womatengo iwigogama ai romanga o Lasarusu. Una wogogere o Betania ma kapongoka de naga ngoi firanga yahinooto manga romanga o ngo Marata de o ngo Maria. De ona o ria-dodoto yogogere o tau moioka. 2-3 De ngoi firanga o ngo Maria, gea muna abe ahao naga ma oraha o Yesusu mituagi de o minya ma bounu duru ihailoa de ai lou maehe de ami tadauru. De gea manga iranga o Lasarusu iwigogama ho o ngo Maria de o ngo Marata gea o nyawa yahidingoto la yoiki iwihingahu o Yesusika ato, "Mia Baluhu, una abe duru ani dodiawo, gea una naga iwigogama." 4 De gea manga hingahu o Yesusu woihenoka de ahao Unangoli wohidingoto ai demo onangika wato, "Ngaro iwigogama nia iranga gea masara ko wohihonongaua hiadono wohonenge. De angamoi o panyake abe iwidaene la ahao idadi Ma Jou ai buturungu wahimatoko o nyawaika hiadono iwigorakiye. De Ma Jou ai Ngofakoo ahao Unangoo iwigorakiye ma titi to Unangoo ai kuaha ilaku." Hokogea o Yesusu ai babaluhu ma demo. 5 De igoungu o ngo Marata, de ngomi dodoto o ngo Maria, de manga iranga o Lasarusu o Yesusu duru wadora. 6 Ma ngaro woihenoka o Lasarusu iwigogama ma ko woikuahi onangika, ho o futu hinootohi ai dingiioka de ahao woiki. 7 Ho ka de o futu hinooto ipahaika de ahao o Yesusu wotemo ona iwitobaniikika wato, "Hosobo, hoikoli o Yudeaika." 8 De iwitobaniiki yopaluhu o Yesusika ato, "Mia guru, abeika naa ko itedekanuahi ngone naga o Yudeaka de o Yahudi ma nyawa genangoka ato inihakaru, ho done Ngona naa noigo hoikoli genangika?" 9 De o Yesusu wopaluhu onangika la ihioriki ko kia-kiaua ahao idadi onangika ma dorou nako ma oraha ko adonuahi Ma Jou wahigunoa la yamake. Abe Una wotemo, wato, "Sarakia ka o wangeohi naa naga? Nako o nyawa yotagi-tagi o wange-wangeoka ngaro o kia dika naga ma ko yoduhuputua. De imaketero hokogea ona abe yahitararono de Ma Jou ai mau ko idadiua manga wowango ihihanga Unangoka. 10 Ma nako o nyawa abe ko yahitararonua de Ma Jou ai mau, gea imaketero hoka yotagi-tagi o fufutuoka ho o kiahonanga ka yoduhuputu." 11 Hokogea o Yesusu wotemoka de ahao wahingahu onangika wato, "Nanga dodiawo o Lasarusu womaiduoka. Masara naa Ngohi toiki unangika la tihimomiki." 12 De ona o Yesusu iwitobaniiki yotemo ato, "Nako womaiduoka ahao itaiti wotogumu." 13 Masara o Yesusu ai demo gea ma titi o Lasarusu wohonengoka. De ona iwitobaniiki yataoko ihowono ai demo ma titi abe ona ato bote ai demo ma titi ka iwikiookoka dika. 14 Ko yomangaratiiua ho gea o Yesusu ka wahiree-reeika onangika wato, "O Lasarusu wohonengokau! 15 De ngaro o wange gea wohonenge Ngohi ko ihiwa, ma tosanangi dika ko tidaenua, angamoi naga ma titi gea idadi de gea la ngini nimangaratii abe nia ngongaku kiani ka Ngohino dika." De ahao wotemoli wato, "Hosobo, hoiki unangika." 16 De o Tomasa, abe iwihiromangoli o Hago, una wotemo ai dodiawoika wato, "Hosobo, Una hiniiki la ngoneoo homahidohonenge de Una." 17 De o Yesusu woboa o Betania ma kapongino de naga iwihingahu ato o Lasarusu wohonengokau, de ai futu iata moduku iwingotakokau ai lungunika abe o arukoka. 18-19 De o Betania ma kapongo de o Yerusaleeme ma kota ko ikurutikaua imakitingaka, abe ma hoana ma gurutika ko adonua o kilo hange. Ho naga o Yahudi ma nyawa manga ngoe yoboaino la ato yalaru o ngo Maria de o ngo Marata angamoi manga iranga wohonengoka. 20 De gea o ngo Marata moihenoka o Yesusu woboaka ho moiki mibuhuku. Masara o ngo Maria ka momagoo-gogere dika manga tauoka. 21 Ho ka de o ngo Marata o Yesusu mibuhuku de motemo mato, "Ahi Baluhu, nako Ngona naga nenangoka tanu ahi iranga ko wohonengua. 22 Masara ngaro hokogea, ma Ngohi tohioriki nako Ngona nogahoko Ma Jouiye o kia dika ani mauino de gea Una ahao wonihidoaka." 23 De o Yesusu womipaluhu munangika wato, "Ahao ani iranga womomikoli." 24 Ho o ngo Marata mopaluhu mato, "Iya, tohioriki una ahao womomikoli ma oraha gea ihiromanga o wange ma baha." 25 De o Yesusu wotemoli munangika wato, "Ngohi naa o momomiki de o wowango, onagona dika ihingaku Ngohino ngaro yohonengoka ma ahao yowangoli. 26 De onagona dika yowango abe ihingaku Ngohino, ona ko yohonengua ka hiado-adonika." De womileha munangika wato, "Nako ngona naa ka nongaku?" 27 Ho o ngo Marata mopaluhu unangika mato, "Ahi Baluhu, igoungu, duru tangaku Ngona naa o Mesia, Ma Jou ai Ngofaka, abe Una Ma Jou wohibehehongoka wato ahao woboa o duniauku, gea Ngona naa." 28 Gea o ngo Marata motemo ibooto de ahao moiki momigilio ngomi dodotika, o ngo Maria gea, de momitauru de momihihuduika dika munangika mato, "Nanga Guru woboaka de wonibehehongo." 29 Ho o ngo Maria ka de moihene, ka dau de momaokoiye mato moiki Unangika. 30 Ma gea o Yesusu ko wogila-gilauahi o kapongino ho abe kangano genangoka o ngo Marata mibuhukika, genangokahi o Yesusu womagoo-gogere. Ho o ngo Maria genangika moiki mitutumu. 31 De o Yahudi ma nyawa, abe naga imilaru manga tauoka, ka de imimake muna momataiti mohupu de imihiduru angamoi ato bote moiki o lungunika, maika moari genangoka, masara muna o Yesusika dika moiki. 32 De o ngo Maria momahiadonoka o Yesusika de matilabukuku ai louoka de motemo mato, "Ahi Baluhu, nako Ngona naga nenangoka tanu ahi iranga ko wohonengua." 33 Ho gea o Yesusu womimake moari de o Yahudi ma nyawa abe iminiiki onangoo yoari, de ai hininga itagi manga huhaika gea ho hiadono to Unangoo ai hininga duru ihuha. 34 De waleha wato, "O kiaka niwikelengauku?" De yopaluhu ato, "Mia Baluhu, abeika nomalega." 35 De gea o Yesusu woarioka. 36 Ho o Yahudi ma nyawa genangoka iwimake woari de ato, "Abeika duru wihininga, hiokoo!" 37 Masara naga o nyawa utu yomakokeleha ato, "Sarakia gea nako widaene ka wadadi wihitogumu la ko wohonengua, abe hoka una worafioka wihitogumu la womahioriki, eko sarakia?"
O Yesusu wihimomiki o Lasarusu
38 De gea o Yesusu o Lasarusu ai lungunoka waika de ai hininga duru ihuhaholi. De o lungunu gea o aruku ho ma biono gea atatokoka de o hakaru ma amoko. 39 De o Yesusu wahuloko o nyawaika abe naga genangoka wato, "O hakaru gea nialuluoka." Masara o Lasarusu ngoi firanga o ngo Marata mitaere mato, "O, mia Baluhu, ufa! Una womelaka ho ko idadiua, ai futu iata moduku wohonengoka ho duru womelaka." 40 De o Yesusu wopaluhu munangika wato, "Marai, ngona nawohangoka abe tonihingahu kangano, tato nako ngona nangaku ahao namake Ma Jou ai buturungu ma medebini itotiai?" 41 Hokogea wotemo ho o hakaru gea ma bionoka yaluluoka. De o Yesusu womamatagaiye o Horogaiye de wotemo wato, "Tarimakase Baba, Ngona nohihigihenoka. 42 De Ngohi tohiorikoka ka ihikaika Ngona nohihigihene, ma Ngohi totemo hokonaa la o nyawa ihigilolitino naa ka de yoihene de yangaku abe Ngona nohihidingoto Ngohi naa." Hokogea ai gogahoko ma demo. 43 Ho ka de ai gogahoko gea ipaha de o Yesusu duru waamo-amokiye wiahoko, wato, "Lasarusu nohupuino!" 44 De o Lasarusu ai honengino wohupuoka. Masara ai giama de ai lou mata-mata adeho-dehorinohi de o ngoere ma belaka, de ai peaoo adehorokahi de o ngoere. De o Yesusu wahuloko onangika wato, "O ngoere gea niwihoheoka la niwihiluasika!"
Iwihidee ato o Yesusu iwitoma
45 Ho o Yahudi ma nyawa abe hoka yoboaino o ngo Mariaino ma titi yoigo imilaru, ona ka de iwimake gea o Yesusu wodiai de manga ngoe duru iwingaku. 46 Masara naga utu ona yoiki o Farisi manga doomu ma nyawaika de yoade-ade gea abe o Yesusu wodiaioka. 47-48 Ho o Farisi ma nyawa yoihene manga ade-ade gea de ahao manga hidemo ma nyawa Ma Jouiye manga hohidimono yomakahoko la yomatoomuino ato yomahikaaturu. Ho gea yomatoomuinoka de yomakokeleha ato, "O kia ahao hodiai? O nauru gea ka ihikaika wodiai o heheranga ma ngoe ho nako hinoaika dika ahao o nyawa mata-mata ka iwingaku. De nako idadi hokogea o Roma ma nyawa ahao yoboaino de to ngone nanga ngi ma debi-debini naa akilianga de nanga tonaka inaora. Ho naa sarakia hodiai o Yesusika?" 49 Hokogea manga demo masara manga hidimono o Kayafasa watemo onangika angamoi ma oraha gea una o hohidemo Ma Jouiye manga hidimono wokokurutiye, de watemo ona mata-mataika wato, "Ngini ko kia-kiaua nihioriki! 50 Mode sarakia hiadono ngini ko nihiorikuahi ma ngekomo abe inihiutumu? Abeika, Una womatengo dika de koaho o nyawa moi dika wohonenge la ufa hiadono inahibinaaha ngone o Yahudi ma nyawa mata-mataika." 51 Masara o Kayafasa ai demo gea ko to unangua ai hiningaka de aino idadi. De ma oraha gea una o hohidemo Ma Jouiye manga hidimono wokokurutiye. Ho ma titi ai tagongo Ma Jouika gea hiadono Ma Jou wipake la wahingahu abe o Yesusu kiani ahao wohonenge la waduhunu o Yahudi ma nyawa mata-mataika. Abe o Yesusu ko wohonenguahi de kiani o Kayafasa wapake o himatoko ma demo gea angamoi una Ma Jou ai uru ma dodofanga. 52 De ko ma titiua o Yahudi ma nyawa dika manga utumu hiadono o Yesusu wohonenge masara ma titi Ma Jou ai ngofa-ngofaka mata-mataika la ngaro yahikabarihoka o ngi ma ngoeika masara wohonenge la ona ka idadi wakokitoomuino de wahidadi moi. 53 Ho ma wange gea abe o Kayafasa wotemo wato, "Koaho o nyawa moi dika wohonenge la ufa hokokibinaaha," duru o wange gea de yomulaengoka duru yolingiri ma ngekomo la ka idadi yamake ma titi hiadono iwihidadi iwitoma o Yesusu. 54 De mangale manga hidee gea hiadono o Yesusu ko idadiokaua wotagi-tagi hoka ai biaha o Yahudi ma nyawa manga hidogoronaka abe hiadono o nyawa iwihioriki o kiaka waika. Ho woiki o ngi moiika imakadateke de o tonaka ma kakaahaka de genangoka Una de yangimoi de yahinooto iwitobaniiki yogogere o kapongo moioka ma romanga o Efaraimi. 55 De ahao ma oraha itigioka o Yahudi ma nyawa manga Totilakuru ma Rame-rame de naga o nyawa ko manga ngoe manga kapo-kapongoka yokokiloikoka o Yerusaleeme ma kotaika. Gea yoboa o Yerusaleeme ma kotaino la ka idadi yaniiki manga hiaturu abe ato kiani gea yaniiki la yomahidiai yorame-rame. Manga wowango ihidiai la ato iti ko yomulaenguahi ihirame-rame o Totilakuru ma Rame-rame de manga wowango itebinoka Ma Jou ai himangoka. 56 De ona o Yerusaleemoka gea ka ihikaika iwilingiri o Yesusu ho hiadono naga Ma Jou ai Tauoka yomakokeleha ato, "Sarakia, ngona nato bote o Yesusu woboa eko ko woboaua? Marai nanga rame-rame ko waniikua e?" 57 Masara o Farisi ma nyawa de o hohidemo Ma Jouiye abe yokokurutiye ahao manga kokawaahaika yahibehehongo ato, "Nako o Yesusu niwimake kiani nimataiti nimihingahu la ka idadi wiwitaoko." Hokogea o Yahudi ma nyawa utu iwingaku de utu ko iwiigoua.
O Betania ma kapongoka
1 Ma moioli o Yesusu woboali o Betania ma kapongino, gea o Lasarusu ai kapongo abe gea una ma dihira o Yesusu wihimomikino. De ma oraha gea o wange butaangahi de ahao o Totilakuru ma Rame-rame idadi. 2 De ona yogogere o Betania ma kapongoka gea o Yesusu iwihiolomo la ato iwihoromati. Ho o Lasarusoo naga de o Yesusu de ona utu abe yomakutuono yolomo ka yomahidu-iduiye o meja ma datekino de o ngo Marata maleleani. 3 De ahao o ngo Maria maino de mao o minya ma bounu duru ihailoa de ko asapuruahi ho duru kohahali. De o minya gea done o litere ma hononga ma amoko, ho ka de maoino de o Yesusu ai louuku mihituagi de o minya gea, de gea ena mohiehe ai louuku de ami tadauru. Ho o tau ma goronaka gea idadioka ma bounu duru irahai angamoi o minya ma bounu duru ihailoa gea. 4-5 Masara o Yesusu witobaniiki womatengo, abe ahao o Yesusu wifukunu, ai romanga o Yudasa Isikarioto, una gea womitaere o ngo Mariaika wato, "Gea o tiwi kohaamoko! Ko nahiningaua o huha ma nyawa abe ka idadi haduhunu de o tiwi ma amoko gea nako ma minya gea nafukunu?" Hokogea womitaere angamoi o minya gea ma ija imaketero de o nyawa wokarajaanga o taongo moi ai hewa ma tiwi. 6 Masara o Yudasa ai demo gea ko mangaleua o huha ma nyawa wahininga, ma, woboi o tiwi mangale una wotobatohi-tohiki ho hiadono wotemo hokogea. De angamoi o Yesusu iwitobaniiki manga tiwi yagogono unangoka de ma dihiraino ma moi ma moi womadohiki manga doomu ma tiwino gea. 7 De o Yesusu witaere o Yudasika wato, "Nominoaika dika muna gea! Gea idadi modiai hokonaa Ngohino mangale o minya gea naga la ihihiehe ma oraha ihilungunu Ngohi. 8 O huha ma nyawa ka ihikaika naga nia hidogoronaka abe ka idadi niaduhunu masara Ngohi ko ihikaikaua nginioka." Hokogea o Yesusu witemo o Yudasika.
O Lasarusoo iwihidee ato iwitoma
9 De ma oraha gea o Yahudi ma nyawa ko manga ngoe yoihene o Yesusu naga genangoka ho yoboaino o Betania ma kapongino la ato o Yesusu iwitutumu de duru yoigo o Lasarusoo iwimake abe wihimomikino ai honengino. 10-11 De naga o Yahudi ma nyawa ka yodogo-dogo manga ngoe abe manga baluhu yahidogunoaika angamoi iwingakuoli o Yesusika ma titi o Lasarusu gea. Ho mangale manga kokawaaha gea ko yaniikokaua ho hiadono manga hohidemo Ma Jouiye abe ka onangohi yokokurutiye yaputuhoka ato, "Kiani o Lasarusoo wohonenge." Ho unangoo iwihidee ato iwitoma hoka o Yesusoli ato iwitoma.
O hilaku ma dodunguu yodiai o Yesusika ma oraha woboa hoka manga koano o Yerusaleeme ma kotaika
12 Ho o Yesusu iwihiolomo o Betania ma kapongoka de ahao ma dawangeino woiki wogila-gila o Yerusaleeme ma kotaika. De genangoka o nyawa duru ko manga ngoe abe yoboainokau la yaniiki o Totilakuru ma Rame-rame naga yomahikokangahuoka ato, "Bootino o Yesusu woboaino." 13 De ona ato yoiki iwibuhuku ho o biso ma hoka yomakokigoto de yoikika o Yesusu iwikokibuhukika de yopoa-poaka ato, "Hihigogiriiri Ma Jou! Una woboaino naa Ma Jou ai uru ma dodofanga! Una naa o Isiraele ma Nyawa manga Koano, ho higahoko ma owa Ma Jouino!" Hokogea iwihigiriiri o Yesusu. 14 De gea o Yesusu wamakeokau o keledai ma ngofaka de wobarene ma poretuku ho idadioka duru imaketero hoka ma dihira itulihukuoka Ma Jou ai Demo-demoka ato, 15 "Ngaro ka ibootohi nia hawana naga, Ngini o Yerusaleeme ma nyawa. Abeika, gea nia koano woboainoka, De womahitipokouku abe wobarenoka o keledai ma ngofaka ma poretoka." Hokogea Ma Jou ai uru ma dodofanga ma dihira yotulihukuoka! 16 Masara ma oraha abe mata-mata gea idadi de ona o Yesusu iwitobaniiki ko ihiorikuahi ma titi. Ahao o Yesusu womomikinoka ai lungunino de ai horomati ma gahumu wamake o Horogaka de ahao ka idadi ona gea yomahohininga abe mata-mata gea idadi o Yesusika duru imaketero hoka ma dihirainohi itulihukuoka Ma Jou ai Demo-demoka. 17 De abe ma oraha o Yesusu wihimomiki o Lasarusu ai honengino, naga o nyawa manga ngoe genangoka ho ona yowoe gea ahao ka ihikaika yoade-ade ma titi abe hokokia wiahoko o Lasarusu ai lungunino, gea ihigali-gali yomaketeade-ade. 18 De angamoi o nyawa yowoe yoihene o Yesusu ai dodunguu gea hiadono duru ko manga ngoe yoiki iwibuhuku o ngekomika. 19 Ho ka de o Farisi manga doomuino ma nyawa yamake manga ngoe iwibuhuku gea de yomakoketemo, ato, "Abeika! Nako ka ihikaika hokonaa itagi, gea ko idadiokaua ngone holaku. Abeika manga ngoe yomakiniiki gea, ngade-ngade o dunia ma nyawa yomamataka iwiniiki o Yesusu."
O Yesusu wahingahu abe adonoka ma oraha wohonenge
20 De naga utu abe ko o Yahudi ma nyawaua abe ona o Yunani ma nyawa, onangoo yoiki o Totilakuru ma Rame-rameika gea, la ato onangoo yomahuba genangoka. 21 De ona yoboaino o Filipusino, una o Galilea ma nyawa abe ai kapongo o Besaida, de yogahoko unangika ato, "Mia Baluhu, nako ka idadi duru mioigo mimaketerihimangino de o Yesusu." 22 Ho ahao o Filipusu woiki o Andareasika de manga gogahoko gea wihingahu unangikali. De ahao ona yahinooto iwitutumu o Yesusu de iwihingahu Unangika abe yamuruono naga o Yunani ma nyawa yoigo yomaketerihimangino de Una. 23 Ka de manga gogahoko gea woihene de o Yesusu wahingahu ona mata-mataika wato, "Ma oraha adonoka Ma Jou ai horomati ma gahumu Ngohino, Ngohi o Nyawa ma Ngofakino, gea Ma Jou wahimatoko o nyawaika. 24 Naa duru tagou-goungu tinihingahu tohiketero, nako o pine ma mui moi ko haotakua o tonakuku, la ka iwedere, gea imagogogere o mui moi dika. Ma nako o pine ma mui gea haotaka la iwedere o tonakoka gea de ahao ihofoko la idadi naga iwoe. 25 De imaketero hokogea o nyawa abe nako to ona manga wowango dika duru yoigo yapaliara, gea manga wowango ko iwa ma utumu. Ma onagona dika abe manga wowango o duniaka naa yoluku gea hoka yodatomo hiadono idadi o wowango ka hiado-adonika. 26 Ma onagona dika yairiki la Ngohi todadi manga baluhu, gea kiani ka ihikaika ihiniiki Ngohi la ngaro o kiaka dika Ngohi naga ma onangoo naga genangoka. De ona gea abe ihihigihene Ngohino itiai, ahao manga karajaanga gea ahi Baba wabalaha de ai horomati onangika." 27 De o Yesusu wohigila-gila wotemoli wato, "Ahi hininga naa duru ihuha! Ho o kia togahoko ahi Babaika, tato, 'Baba, tomagahoko la nohihihupu ahi kangelaino naa.' Koua, ko togahokua hokogea mangale duru ma titi Ngohi toboa la naa tohimanga ahi kangela ma oraha naa adonoka." 28 De ahao o Yesusu wotemo ai Babaika wato, "Baba, iti to Ngona dika ani buturungu abe de ma dararono imahilaku nahimatoko o nyawaika." De ahao naga o ilingi o Horogauku itemo ato, "Ahi buturungu o nyawaika tahimatokokau de ahao tahimatokoli ahi buturungu ma medebini itotiai gea." 29 De o nyawa ko manga ngoe genangoka utu yotemo ato, "Yokuruuhu!" De utu ato, "Koua, ko yokuruuhua, gea o malaekata iwitemo Unangika." 30 De o Yesusu wahingahu onangika wato, "O demo gea ko ma titiua la ihiduhunu Ngohi masara la iniduhunu ngini. 31 Adonoka ma oraha o dunia ma hohowono, abe ma oraha naa de idadi Ma Jou wohikala ena gea abe o dunia apareta. 32 Masara ka de Ngohi o nyawa ihihidoaiyeoka, ho o duniaka ihihitingakoka, de ahao o nyawa mata-mata tataurino Ngohino." 33 Hokogea o Yesusu ai demo la wahingahu onangika ahao iwihohonenge hokokia. 34 De ona yowoe-woe gea iwitemoli Unangika ato, "Gea nato nohonenge? Masara ngomi miihenoka abe itemo Ma Jou ai Behehongo ma Bukuoka ato, nako o Mesia ka hiado-adonika ko wohonengua ho adodoa ho ngona nato o Nyawa ma Ngofaka kiani iwihidoaiye? Kiani nomihitararonohi ma titi o Nyawa ma Ngofaka abe Una onaguna." 35 De ahao o Yesusu wapaluhu onangika wato, "O dararono ko itedekanokaua naga nginioka. Ho ma oraha nenangohi kiani niaguroka la nitagi-tagi o dararonoka ma oraha nagahi nginioka done ma oraha o fufutu iboa de inihidufutuokahi. Angamoi o nyawa abe o fufutuoka yotagi-tagi ko yomahiorikua o kiaika dika yoiki. 36 Ho kiani ningaku o dararonika ma oraha nagahi nginioka la gea nidadioka o dararono ma nyawa." Ka de hokogea o Yesusu wotemo ibooto de woikoka de ahao womagogonoka ho ko iwimakeokaua.
O Yahudi ma nyawa ko yongakuahi
37 De ngaro o Yesusu wodiai ai dodunguu duru o Yahudi ma nyawa manga himangoka abe duru yahiheranga masara ona yolukohi iwingaku Unangika. 38 De idadi hokogea la duru imaketero idadi hoka ma dihira Ma Jou wihiakunu ai uru ma dodofanga o Yesaya wotemo, wato, "Ahi Baluhu, onagona yangaku gea abe miahingahuoka? De onagonaika ahi Baluhu wahimatoko onangika to Una ai buturungu?" 39 Hokogea ho hiadono ona ko idadiua yongaku angamoi naga ihitulihukuoka Ma Jou ai Bukuoka ai demo abe enangoo ai uru ma dodofanga o Yesayaino, wato, 40 "Ngohi todiai la manga lako irafioka, De manga hininga tahitogowinoka, la ko idadiua yomalega de yomahioriki, De ko idadiua manga hiningaka yomangaratii done yomangali Ngohino hiadono tahitogumu." 41 Hokogea o Yesaya wotemo angamoi ma oraha ma dihira gea de wamakeoka o Yesusu duru de ai horomati ma gahumu abe de ma dararonoka, ho hiadono wotemo. 42 De ngaro o Yahudi ma nyawa manga balu-baluhu utu ko iwingakua o Yesusika, ma naga manga ngoe utu iwingaku. Masara ona ko yamoroinua yahingahu o nyawaika abe iwingakuoka o Yesusika mangale yamodongo manga dodiawo o Farisi ma nyawa. Angamoi nako yahingahu done yatingakoka hiadono onangoo ko yahigunoakaua yowohama manga dodotoko ma tauika ma titi o Yesusu iwingakuoka. 43 Hokogea manga hawana done o higiriiri o nyawaino ko yamakeokaua angamoi ngaro o higiriiri yamake Ma Jouino ma, ka o higiriiri o nyawainohi duru yoigo ngaro o Yesusu iwingakuoka. 44 De hoka o Yesusu duru waamo-amokiye wahingahu o nyawaika wato, "Onagona dika ihingaku Ngohino ufa yafikiri manga ngongaku Ngohino dika, abe ka de Ngohino ihingaku de Una abe wohihidingoto, Unangikaoo gea iwingakuokau. 45 Abe ka de o nyawa ihimake Ngohi de Una abe wohihidingoto, Unangoo iwimakeoka. 46 Ngohi toboa o duniauku naa hoka o dararono abe o nyawa tahitararono la ona ihingakuoka ko yomanoakaua o fufutuoka. 47 De o nyawa abe ahi demo yoihene ma ko ihingounua, ona gea Ngohi ko tahohowonua angamoi Ngohi toboaino mangale ko ma titiua tahohowono o dunia ma nyawa, masara ma titi ona tahihohe manga hohowonino. 48 Ma, ona abe ihioluku Ngohi de ahi demo ko ihigihenua, to ona manga hohowono naga. Abe ma oraha ihiromanga o wange ma baha de ahao gea ahi demo ma dihira Ngohi totemokau, gea ena yahohowono o binaahaika. 49 Angamoi ahi demo gea ko ma titiua tomahohiningaiye dika de totemo. Ma, angamoi gea o Baba wohihidingoto, ho to Ngohi ahi demo imakadaene hoka o Baba ai behehongo Ngohino, ho gea dika ahi demo. 50 De Ngohi duru tohioriki gea ena o Baba wohihibehehongoka la kiani todiai, todiai gea ma titi la o nyawa o wowango ma ngango yamake ka hiado-adonika. Ho ma titi gea hiadono mata-mata Ngohi totemo duru imakadaene de gea o Baba wohihingahuoka." Hokogea o Yesusu womahitararono duru waamo-amokiye wotemo.
O Yesusu waihoro ona iwitobaniiki manga lou
1 Ngade-ngade adonoka o Totilakuru ma Rame-rame abe ma dawangeino de o Totilakuru ma inomo yolomo de o Yesusu wohioriki ai gahe adonoka abe kiani o dunia wanoa la wolio ai Babaiye. De o nyawa o duniaka abe yodadioka to Una ai nyawa ko iwa ma oraha la o Yesusu ko wadoraua masara naa de ahao wahimatoko to Una ai nyawaika abe ai dora ma gahumu onangika hiadono ngaro wohidohonenge duru ko itoakua ai dora. 2 Ho ifufutuku de yolomo de naga Unangoka ona abe o Yesusu iwitobaniiki yangimoi de yahinooto. Masara hokokanganoinohi de o Ibilihi idiaiokau hiadono o Yudasa, ai baba o Simono abe ai fam Isikarioto, una doka ai hiningaka imatemo ato, "Ngohi ka idadi o Yesusu tifukunu." 3 Masara o Yesusu wohioriki ai Baba o kuaha wihidoakoka Unangika la hiadono ko iwa moi abe ko idadiua wohipareta. De naa o Yesusu wohininga abe Una Ma Jouoka de waino de naa itigioka Una wolio Ma Jouika. 4 Ho naa o Yesusu de iwitobaniiki manga gogiriaka yolomo de o Yesusu womaokoino de ai baju wahuputu de wakelengauku jai-jai de ahao o handoko womagorakino de womahipakitino ai goronaino. 5 Gea ai handoko womahipakitoka ibooto de o akere waleino de wauhe o mokoluku de womulaenge waihoro ona iwitobaniiki manga lou de wohiehe de ai handoko abe womahipakitino gea. 6 Ka de womahiadono o Simono Peturusu ai louoka de o Peturusu wileha o Yesusika, wato, "Ahi Baluhu, done sarakia de hiadono nato to ngohi ahi lou naihoro?" 7 De o Yesusu wopaluhu unangika wato, "Ngona ko nohiorikuahi ma titi naa todiai masara, ika-ika de ahao ma titi nohioriki." 8 De o Peturusu womademo wato, "Ko idadiua. Duru ko iwa ma oraha tonihigunoa to ngohi ahi lou naihoro." De o Yesusu wipaluhu o Peturusika wato, "Nako Ngohi ko tonihorua, ani gogao Ngohino ko iwaka." 9 De ahao o Simono Peturusu wotemoli wato, "Nako hokogea ufa ahi lou dika ma kiani ahi pea de ahi giamoo naihoro!" 10 De o Yesusu wihingahuoli o Peturusika wato, "Nako o nyawa yomaohikoka gea manga badanga itebinoka ho manga louokahi yoperelu aihoro la manga badanga ma gahumu itebinoka. De ngini naa nitebinoka ma ko ngini mata-mataua." 11 Hokogea o Yesusu wahingahu onangika angamoi Una wihiorikoka, abe onaguna ahao wifukunu ho gea ma titi ai demo wato, "Ngini nitebinoka ma ko ngini mata-mataua." 12 Ho ka de ona iwitobaniiki manga lou waihoro ibooto de ahao o Yesusu ai baju wagoraka de womahinoali de wolio ai gogogerika o mejaka. De ahao walehali onangika wato, "Sarakia gea todiaioka nginika, gea ma titi nihioriki? 13 Abeika, ngini naa nihihiromanga niato, "Mia Guru," eko "Mia Baluhu," nako hokogea nitemo Ngohino de gea nihihitaana igoungu. 14 De angamoi Ngohi nia baluhu de nia guru, ho abe todiai ibooto naa, nia lou takokiihoroka, ho nginioo kiani nimakokiihoro ti ngini homoi-homoiika nia lou. 15 Angamoi hiadono Ngohi todiai hokogea la tinihimatokoka nginika hokokia nginioo nimaketeleleani imaketero hoka Ngohi tinileleani nginika. 16 Naa duru tagou-goungu tinihingahu, o nyawa abe yodadioka o huhuloko ko idadiua yotemo ato, 'Nako ngohi de una gea wohihuloko, ka ngohiohi tokurutiye,' ko idadiua hokogea yotemo. De hokogenangoli o nyawa yahuloko manga dodiawoika ato, 'Noiki ahi demo nototaka la nahingahu onangika hoka tonihibehehongoka,' ho una abe woiki wohingahu ko idadiua ahao womagoraka wato nako o demo ma dutu de una, ka unangohi wokurutiye. 17 De naa ngini nihiorikokau ahi behehongo gea ho duru niamake ma owa ma gou-goungino nako nimaketeleleani abe hoka tinihimatokoka." Hokogea o Yesusu wahitararono ona iwitobaniikika.
O Yesusu wahingahu ona iwitobaniikika ahao iwifukunu
18 De o Yesusu ka wahingahuohi ona iwitobaniikika wato, "Ma titi nena tinihingahu naa gea ti ngini nia howono Ma Jouika taofioka. Masara ko ngini mata-mataikaua ma dumutu angamoi o nyawa abe tairikoka Ngohi duru tahioriki ona gea. De ma titi nena tinihingahu la ahao idadi duru imaketero hoka ma dihira itulihukuokau, abe Ma Jou ai Demo-demoka itemo ato, 'Womatengo abe miolomo mimahidodai moi, una gea wodadioka ahi musu.' 19 "Ho abe itulihukuokau gea ko idadiuahi ma dumutu tinihingahu nginika la ka de ma oraha gea idadi de ahao Ngohino nihingaku abe tomahiromanga Ngohi Naga abe Ngohi Naga. 20 Ho nenangoli tagou-goungu tinihingahu, ona abe Ngohi tahidingoto o nyawaika, nako o nyawa yadafongo, ngaro onagona dika, ma gea Ngohioo ihidafongoka. De onagona dika ka de ihidafongo Ngohi naa de gea Unangoo iwidafongoka abe wohihidingoto Ngohi naa." 21 Gea o Yesusu wahingahu ona iwitobaniikika ibooto de ai hininga duru ihuha de wahingahuoli onangika wato, "Naa tagou-goungu tinihingahu, naga womatengo nginioka ahao wohihidoaka ahi musuika." 22 Ka de o Yesusu ai demo gea yoihene de ona iwitobaniiki duru yomaketedamaanoka de doka manga hiningaka imatemo ato, "Onaguna ma titi hiadono hokogea ai demo?" 23 De naga womatengo iwitobaniikino abe duru o Yesusu widora una womahiduiye hiadono womahitangonika o Yesusu ai aluoko. 24 Ho o Simono Peturusu widomatagaiye unangika gea de wihuloko unangika wato, "Abeika, nileha onaguna." 25 Ho una ai datekoka womatangonika o Yesusu ai aluoka wileha wato, "Ahi Baluhu, gea onaguna wonihidoaka ani musuika?" 26 De o Yesusu wopaluhu wato, "Abe o roti tihitabuoka, gea una." Ho ka de hokogea wotemo de o Yesusu o roti ma belaka wagorakino de wihitabuoka o hudeuku de wihidoaka o Yudasika, abe to Simono ai ngofaka abe manga fam Isikarioto, unangika wihidoaka. 27 Ho ka de o Yudasa ma roti gea wodafongo ibooto de o Ibilihi imahipootekoka unangika. De o Yesusu wotemo unangika wato, "Gea abe nato nodiai, nomataiti nodiaiou." 28 Hokogea wotemo o Yesusu masara ona o meja ma datekoka gea ko moiua de ataoko itiai ma titi ai demo o Yudasika gea. 29 De angamoi manga doomu ma tiwi naga o Yudasoka ho utu doka manga hiningaka imatemo ato, "Marai nanga rame-rame ma inomo woiki wonaija," de naga utu manga hiningaka imatemo ato, "Bote wihidingoto la o tiwi wahidoaka o huha ma nyawaika." 30 Ho ka de o Yudasa ma roti gea wodafongo ibooto de wosoboka. Gea o futu-futu de wohupu o tauino gea. 31 Ho ka de o Yudasa woikoka de o Yesusu wahingahu ona iwitobaniikika wato, "Naa de ahao Ngohi o Nyawa ma Ngofaka duru ihigorakiye abe o nyawa ka idadi yamake ahi buturungu ma medebini itotiai. De angamoi Ngohi Ma Jouoka ho tahimatoko to Unangoo ai buturungu ma medebini itotiai ho hiadono Unangoo o nyawa iwigorakiye. 32 De nako Ma Jou iwigorakiye, gea ma titi Ngohi Ma Jou o Ngofaka naga Unangoka, itararonoka gea Ma Jou o Baba abe wohigorakiye Ngohi ai Ngofaka naa, de gea ka jai-jai dika de wohigorakiyeoka ahi Baba. 33 De o Yesusu wotemoli wato, "De naa ahi ngofa-ngofaka, kiani nihioriki ko itedekanokaua de Ngohi ko ihiwa nginioka. De ngini ahao nihilingiri masara hoka ma dihira tahingahuoka o Yahudi ma nyawa manga balu-baluhika, de naa ma titi gea nginikali tinihingahu abe ko idadiuahi ngini nihiniiki abe genangika ahao Ngohi toiki. 34 De naga o pareta ma hungi tinihidoaka nginika, kiani nimakodora. Duru imaketero hoka Ngohi tinidora, hokogenangoo kiani ngini nimakodora. 35 Ho mangale nia dora gea ho hiadono o nyawa mata-mata ahao inihioriki ngini nidadioka to ngohi ahi hidingoto mangale nimakodora itiai." Hokogea o Yesusu wahibehehongo onangika. 36 De o Simono Peturusu wileha o Yesusika wato, "Ahi Baluhu, o kiaika noiki?" De o Yesusu wipaluhu wato, "Abe genangika naa toiki ngona ko napoauahi nohiniiki, masara naga ma oraha de ngonaoo ahao nohihidoduruino abe naa etoiki genangika." 37 De o Peturusu wilehali o Yesusika wato, "Ahi Baluhu, adodoa ho nato ko tapoauahi toniniikohi ngohi naa? Ngaro kiani ahi wowango tomahidoaka la toniduhunu ma tosanangi dika." 38 De o Yesusu wipaluhu o Peturusika wato, "Sarakia gea nagoungu noigo nohonenge la nato nohiduhunu? Ngohi duru tagou-goungu tonihingahu, bootino abe o kuru-kuru ma nauru ko atailuahi de ngona gea o nyawa manga himangoka nohioluku ma hangeou!" Hokogea o Yesusu ai tobahioriki womahitaana.
O Yesusu walaru ona iwitobaniikika
1 De o Yesusu wahingahu ona iwitobaniikika wato, "Ngini naa ufa nia hininga ihuha, hokogea Ma Jou niwingaku, Ngohioo nihingaku. 2 Daku ahi Baba ai tau o Horogaka naga o ngi ma ngoe angamoi nako ko iwa hokogea tanu ka tinihingahuoka. Ho naa toikohi ahi Baba ai tauiye la tinihidiai ti ngini homoi-homoiika nia ngi. 3 De gea toiki de tinihidiai ti ngini nia ngi ibooto de ahao toboali de tiniao la tinihigogere Ngohioka la ngini naga de de Ngohi genangoka. 4 De ngini naa nihiorikoka ma ngekomo abe genangika toiki."
O ngekomo o Babaiye gea o Yesusu dika
5 De o Tomasa wileha o Yesusika wato, "Masara gea, mia Baluhu ngomi naa ko mihiorikua o kiaika noiki ho done sarakia hiadono nato ngomi ma ngekomo gea mihiorikoka?" 6 De o Yesusu womahingahu onangika wato, "Ngohi naa ma ngekomo Ma Jouika, de Ngohioka ma titi ma gou-goungu, de Ngohioo o wowango ma ngango ma titi. Ho ko moiua yoboa ahi Babaiye nako ko Ngohinoua yoboa. 7 Nako ngini duru nihihiorikoka Ngohi naa, gea ahi Babaoo niwihiorikoka. Gea ho hiadono Ngohi tato ma oraha naa niwihiorikoka de niwimakeoka." 8 De o Filipusu wogahoko o Yesusika wato, "Mia Baluhu, nako Ma Jou o Baba nomihimatoko ngomino gea de ahao imiwedono." 9 De o Yesusu wipaluhu unangika wato, "Filipusu, naa ma dekanino homakokiniiki de mode ko nohihiorikuahi? Angamoi onagona dika ihimakeoka Ngohi, gea ahi Babaoo iwimakeokau. Ho adodoa ho nogahoko Ngohino hokogea nato, 'Nomihimatoko Ma Jou o Baba'? 10 Ho abe ma titi Ngohi de ahi Baba, Una wogogere Ngohioka de Ngohi naga ahi Babaka marai gea ngini ko niangakuahi e? Ma gea ahi demo ma titi ufa niafikiri to Ngohi dika ahi hiningaka de aino de tinihingahu. Masara mangale o Baba naga Ngohioka ho gea to Una ai karajaangino ma titi mata-mata todiai Ngohi. 11 Ngini kiani ahi demo niangaku abe hoka totemoka tato, 'Ngohi togogere ahi Babaka de ahi Baba wogogere Ngohioka.' Abe ngini naa ma dekanino nihinii-niiki ho ahi dodunguu o Babaino todiai niamakeoka. Ho ngaro ahi demo ko niangakua ma nginioo nihimake abe o heheranga todiaioka de gea to Unangoo ai dodunguu niamakeoka. 12 De naa duru tagou-goungu tinihingahu nginika, onagona dika duru yagou-goungu ihingaku Ngohino, onangoo ka idadi yodiai hoka Ngohioli todiai. De igoungu gea yodiai hoka Ngohioli todiai ma utuohi yodiai irahai idogo angamoi Ma Jou o Womaha wahidogo nako Ngohi toliokahi ahi Babaiye. 13 De angamoi Ngohi naga nginioka ho tinihibehehongo nginika tato o kia dika nimagahoko, abe ahi hininga nianiiki hiadono ahi romanga niapake, gea duru tosanangi todiai. De gea toigo todiai la gea Ngohi Ma Jou o Ngofaka tohiboa ahi Babaiye o higiriiri. 14 Gea ho o kia dika nimagahoko la todiai de niapake to Ngohi ahi kuaha angamoi nihiniiki Ngohi de gea Ngohi tosanangi todiai."
O Yesusu wahibehehongo wato ahao Ma Jou o Womaha woboa
15 De o Yesusu ka wotemohi ona iwitobaniikika, wato, "Ho ngini nako nihidora Ngohi maraioka duru nihihigihene ahi behehongo nginika ngaro o kia dika tinihibehehongoka. 16 De ahao tinigahoko ahi Babaika la winihidoaka o Duduhunu womatengoli, ho ahao Una woboa la wogogere nginioka ka hiado-adonika. 17 De ti ngini nia Duduhunu gea o Womaha abe ahao winihimatoko Ma Jou ai hininga hiadono duru niwihioriki. De winihidumutu nginika abe hohiromanga ma gou-goungu. Masara ona abe manga hininga ma dumutu o duniaika dika abe ko ihiniikua ko idadiua iwidafongo Una angamoi ko iwihiorikua de ona ko yamakeua gea abe Ma Jou o Womaha wokarajaanga. Masara ngini ahao ka niwihioriki mangale Una naga winidogogere ngini homoi-homoiika nia badanga ma goronaka. 18 De abe ma oraha tininoa, Ngohi ko tininoaikaua hiadono niato nidadioka hoka o gohihi ho niato ka nginiokahi dika. De naga ma oraha ahao Ngohi toboali nginino. 19 Ko itedekanokaua de o dunia ma nyawa ko ihimakeokaua, ma ngini ahao nihimakeokali de angamoi Ngohi ahao towangoli. De angamoi to Ngohi ahi wowango ko iwa ma bobaha ho nginioo ahao niamake o wowango ma ngango ma gou-goungu. 20 Ho o wange gea Ngohi towangokali de ahao ngini duru nihioriki Ngohi naga ahi Babaka, de ngini naga Ngohioka, de Ngohi naga nginiokaoo. 21 De o nyawa onagona dika abe ahi behehongo naga onangoka de ihingounu, gea ona abe ihidora igou-goungu. De ahao ahi Babaoo wadora onangika, de ngohioo tadora de tomahimatoko onangika hiadono ona ka idadi ihimao abe Ngohi igoungu naga onangoka." Hokogea o Yesusu womahingahu onangika. 22 De ahao ona iwitobaniiki womatengoli ai romanga o Yudasa, masara una ko o Yudasa Isikariotoua, una wotemo wato, "Masara ahi Baluhu ko tomangaratiiua adodoa ho nomahimatoko ngomino dika de adodoa ho o dunia ma nyawa mata-mataika ko nomahimatokua?" 23 De o Yesusu wopaluhu unangika wato, "Onagona dika ihidora Ngohino gea ahi behehongoo ihingounu ho ona gea ahi Baba duru wadora de Una de Ngohi ahao miboa onangika de mimahidogogere onangoka homoi-homoioka. 24 Angamoi ona abe ko ihidoraua gea ahi demo ko ihigihenua. De ahi demo ko to Ngohiua dika masara gea ahi Baba abe wohihidingoto Ngohi naa, gea to Una ai demoino tapake. 25 "De ahi demo mata-mata naa tinihingahu ma oraha naa abe Ngohi nagahi de de ngini. 26 Masara ahao o Duduhunu naga winiduhunu, gea Ma Jou o Womaha abe o Baba wihidingoto nginiuku. Gea wihidingoto angamoi ngini nidadioka to Ngohi ahi nyawa. Ho Ma Jou o Womaha winiduhunu abe winihihohininga ka ihikaika mata-mata abe tinihingahuoka de winidotoko utuohi Ma Jou ai gou-goungino abe kiani nihioriki. 27 De ahi hidoaka nginika gea o dame, gea to Ngohi ahi dora ma dame tinihidoaka nginika. Ahi hidoaka gea ko imakadaenua abe hoka niamake o duniaka. Ho ngaro ufa nimahigunoa nia hininga ma dumutu o huhaika de abe ahao niohimanga ngaro ufa niomodongo genangika." 28 "Ho ufa niawohanga gea kangano tinihingahuoka, ngaro naa etoiki ma ahao toboali nginino. Ma, naa ko nisanangiua ho marai ko nihidoraua angamoi nako nihidora tanu duru nisanangi Ngohi naa toiki ahi Babaiye. Una ma hirete wohigorakiye de ka idadi Unangika tinigahoko utuohi ma rorahai angamoi nako Ngohi de o Baba, Unangohi wokurutiye. 29 Naa mata-mata ko idadiuahi de tinihingahuokau la ma oraha idadi de nimahihohininga ahi demo naa abe tinihingahuoka. Ho ngini kiani niangaku genangika abe ahao idadi la nia ngongaku ko ikelu-kelua. 30 Ho naa Ngohi ko itedekanokaua de ko tinihitararonokaua abe hokonaa tinihitararono angamoi ena gea abe o dunia yapareta itigioka iboa nginika, ma ena gea ko idadiua ihipareta Ngohino. 31 Abe o nyawa o duniaka naa kiani ihioriki Ngohi duru o Baba tidora ho duru taniiki ai behehongo Ngohino hiadono todiai duru imaketero hoka ahi Baba wohibehehongoka. De naa adonoka ngone hosobo."
O Yesusu womahiketero de o angguru o datomino
1 O Yesusu wahitararono ona iwitobaniikika de o hiketero abe ngone hingaku-ngakuoka de hokonaa wohiketero de wapake o angguru abe o datomino. Una wato, "Ngohi naa o angguru ma roehe ma dutu de ahi Baba Una womatengo dika ai angguru wapaliara abe wogoana de wokarajaanga. 2 De o angguru ma jaga mata-mata abe naga ngohioka wogoana de nako hiadono naga o jaga moi abe ko iwa ma hasili gea kiani watobiki. De hokogea ma jaga mata-mata abe ko ihofokua wakokitobiki. Masara o angguru ma jaga mata-mata abe ihofoko gea wakabiiri de woodebini la idogo iwoe ma hofoko. 3 Ngini naa nitebinokau mangale ahi demo abe tinihingahuoka gea ena inihitebini. 4 Ho ngini ka ihikaika nigogere Ngohioka, la gea Ngohioo naga nginioka. Angamoi imaketero hoka o gota ma jaga ko idadiua ihofoko nako ma wowango ko amakeua ma ayo ma roehino, hokogenangoo ti ngini nia wowango ko iwa ma hasili nako ko nigogerua Ngohioka. 5 Ngohi naa hoka o angguru o lifunu moi de ngini nidadioka hoka o angguru gea ma jaga-jaga ho nako nigogere Ngohioka de Ngohi naga nginioka, gea nia wowango de ma hofoko kohangoe, ma nako ko nigogerua Ngohioka gea ko kia-kiauahi nidiai abe Ma Jou wato itiai angamoi Ngohi ko idadiua tiniduhunu. 6 Ho o nyawa abe ko yogoanua manga gogere Ngohioka, ona ka idadi tahiketero de o gota ma jaga abe ko iwa ma hasili ho o nyawa manga biaha ato ma gota gea aumo dika. Yaumoika hiadono imaai de ahao atoomuino de aumo o ukuika ho youkuoka ma jaga-jaga gea ma titi ko iwa ma hasili. 7 Ma nako ka ihikaika nia gogere Ngohioka gea niogoana, gea ahi demo-demo ka ihikaika imanoa nginioka ho ngaro o kia dika nimagahoko o Babaiye gea ahao wodiai. 8 Hokogea nia wowangoino o nyawa yamake ahi Baba ai buturungu ma medebini itotiai hiadono onangoo Ma Jou iwigorakiye. Ho Ngohi tohiketero hokonaa tato nia wowangoka naga de ma hofoko kohangoe de gea nimahitaana abe nihinii-niiki Ngohi igou-goungu mangale niogoana nia gogere Ngohioka. 9 Ngini naa tinidora abe imaketero hoka o Babali wohidora Ngohino. Ho ngini kiani ka ihikaika nimanoa ahi dora ma goronaka. 10 De gea kiani nihihingounu. Ngohi tohingounu ahi Baba ai behehongo mata-mata ho ka ihikaika tomanoa ai doraka. De imaketero hokogea nginioo ka ihikaika nimanoa ahi doraka iti ahi behehongo nihingounu. 11 Mata-mata naa tinihitararono nginika la o garago abe naga Ngohioka gea homoi-homoiika ingodumoka nginiokaoo." 12 De o Yesusu ka wahingahuohi ona iwitobaniikika wato, "De naa duru ahi behehongo nginika, kiani nimakodora imaketero hoka Ngohi tinidora. 13 De abeika, nako naga womatengo wato, 'Ngohi ahi dora itagi ahi dodiawoika ho ngaro tomahidoaka la ka idadi taduhunu, ma ka taduhunu." Naa una abe ai hininga hokogea to una ai dora duru o dora ma gou-goungu de ko iwa o dora utu abe hatoli ilamoko. 14 De ngini naa nidadioka ahi dodiawo nako nidiai hoka tinihibehehongoka. 15 Ho abe tomahiketero hoka Ngohi o angguru ma roehe de ngini ma jaga-jaga, gea ma titi hiadono ko tinihiromangokaua ahi huhuloko masara tinihiromangoli ahi dodiawo angamoi nako o huhuloko ma dutu, una ko wahingahua ai huhulokika ai hininga ma dola mata-mata. Masara Ngohi hokogenangua ahi hininga hiadono mata-mata abe o Baba wohihingahuoka Ngohino, gea Ngohioo tinihingahuoka nginika. 16 De ko ma titiua ngini nihiiriki Ngohi masara Ngohi tiniiriki ngini de tinihikarajaanga de o karajaanga moi abe ma hasili duru itongohono. Ho nikokiloiki la nikokihofoko nia wowangoka la o karajaanga gea abe tinihidoakoka nginika duru de ma hasiloka. De nako gea dika nia wowango ma dumutu de ahao o Baba wodiai o kia dika nimagahoko de niapake ahi romanga. 17 Hokogea Ma Jou o Baba ai mau hiadono naa ahi behehongo nginika, tato kiani nimakodora. 18 De o Yesusu ka wahingahuohi ona iwitobaniikika wato, "De abe ma oraha o dunia ma nyawa inidohata ufa niawohanga abe ka ma dihirainohi de Ngohino ihira ihidohatoka. Ho nginioo ahao inidohata hoka Ngohioli ihidohata. 19 Nako ngini nimaketehiningamoi de o dunia ma nyawa ona gea inisanangi nginika angamoi nginioo nianiiki o duniaka ma biaha. Masara Ngohi naa tiniirikoka de tinihitingakoka o dunia ma biahaino de gea ma titi hiadono naga inidohata nginika. 20 Ho ufa niawohanga ahi demo nginika abe tato, nako o huhuloko de o huhuloko ai dutu, ko idadiua o huhuloko gea wato ka unangohi wokurutiye. De ahi demo gea naa moioli ma titi abe nako Ngohi todadioka ti ngini nia Baluhu naa de o kangela ihidaene, ufa niafikiri nginika ko inidaenua, ona ahao nginioo inihikangela. Abe nako naga o nyawa ko ihihigihenua Ngohi, gea ti nginioo nia demo ko ihigihenua. 21 Hokogea yodiai nginika angamoi nihingakuoka ho ahi romanga niapake. De ma titi naga inahikangela, ona gea ko iwihiorikua Ma Jou o Baba abe gea Una wohihidingoto Ngohi naa. 22 Masara Ngohi toboaino tahidumu-dumutoka onangika abe yomahitaanoka manga howono ma titi ihioluku Ngohi. Ho sarakia, ka idadi yomahititi ato ko ihiorikua manga howono gea? Ko idadiua yomahipongono hokogea angamoi ma dihira tahingahuokau. 23 De onagona dika ihidohata Ngohino, gea ahi Babaoo iwidohata. 24 De gea ihidohata ngaro ahi buturungu Ngohi tomahitunguuoka manga himangoka de o heheranga ma ngoe abe ko ma moiuahi o nyawa utu yodiai. Nako hokogenangua tomahitunguu de gea naga ma titi abe ka idadi yomademo la manga hohowono yakuranga. Ma angamoi yamakeoka o heheranga abe ihihitaana Ngohi naa, de ona ka ihidohatohi de ahi Babaoo iwidohata, ho manga hohowono ko idadiua yakuranga. 25 Ma kiani hokogea la idadi duru imaketero hoka itemo Ma Jou ai behehongo ma bukuoka abe naga genangoka, itemo ato, ‘Ona Ma Jou iwidohata masara ko iwa moi ma titi angamoi Una ka iwihidutugaika dika.'" 26 De o Yesusu wahitararonohi ona iwitobaniikika wato, "Ahao Ngohi tihidingoto Una tihiromanga o Duduhunu, abe Una o Babaka de wauku nginiuku. Una gea o Womaha abe o nyawa wahidumutu Ma Jou ai gou-goungika ho ma oraha o duniauku woboaka de ahao wahingahu-ngahu o nyawaika ma titi Ngohi. 27 De nginioo kiani niahingahu-ngahu o nyawaika ma titi Ngohi naa angamoi ka ma dodihirainohi, abe ka de tomulaenge o nyawa tadotoko, de ngini naga de de Ngohi.”
1 De o Yesusu wotemo-temohi ona iwitobaniikika wato, "Mata-mata naa tinihingahuoka la ma oraha gea idadi inihikangela de ufa nia ngongaku ikelu-kelu hiadono ngini ko nihiniikokaua Ngohi. 2 Angamoi ahao naga o nyawa inihihupu nia dodotoko ma tauino ma titi nia ngongaku Ngohino hiadono inioluku. De igoungu naga ma oraha ahao iboa de ngini o nyawa initoma, ato kiani hokogea la iwihisanangi Ma Jou. 3 Hokogea yodiai angamoi ona gea o Baba ko iwihiorikua de Ngohioo ko ihihiorikua. 4 Ahi demo naa tinihitihiraka la ma oraha mata-mata gea idadi de ka idadi nimahihohininga abe nia kangela gea Ngohi tinihingahuokau. Ma dihira ko tinihingahuahi angamoi Ngohi nagahi nginioka de manga dohata ma dumutu ka Ngohino dika."
Ma Jou o Womaha ai karajaanga
5 De o Yesusu wahingahuohi ona iwitobaniikika wato, "De naa Unangikali tolio, abe Una gea wohihidingotino, gea Unangika tolio. De kiani ahi hingahu gea inihigarago masara homoi-homoiika nia hininga akokilufungoka de nia huha. Tinimake ngini naa hoka ko nisanangiua homakoketemo ma titi abe tato tolio ahi Babaika. 6 Adodoa ho ko nihilehaua ma owa gea? Ngini hokogea mangale niamao itubuhoholi nia hininga ma huha ma titi o kangela gea tinihingahuoka abe ahao niamake. 7 Masara naa tagou-goungu tinihingahu, ka de tininoa de gea tinihiowa abe ahao utuohi nia utumu angamoi nako Ngohi ko toikua Una tihiromanga o Duduhunu, Una gea Ma Jou o Womaha, ko woboaua nginiuku. Ma gea toiki de Una ahao tihidingoto nginiuku. 8 Gea Una naanguku woboaka de o dunia ma nyawa manga hiningaka wahitararono duru itaana abe ma titi o howono, de ma titi o totiai ma gou-goungu, de ma titi o hohowono o bobinaahaika. 9 Abe ma titi o howono, gea Ma Jou o Womaha wahitararono duru itaana abe ko ihingakua Ngohino ho gea yahowonoka Ma Jouika. 10 De ma titi o totiai ma gou-goungu enangoo kiani Ma Jou o Womaha wahitararono duru itaana. Angamoi Ngohi naa toiki o Babaiye ho ngini o duniaka ko nihimakeokaua ho ahi totiai enangoo o nyawa ko amakeokaua. 11 De ma titi o hohowono o binaahaika enangoo Ma Jou o Womaha wahitararono duru itaana. Abe o Ibilihi Ma Jou wahohowonoka o binaahaika de angamoi o Ibilihi gea o dunia ma nyawa yapareta ho onangoo ahao wahohowono o bobinaahaika.” 12 De o Yesusu wahingahuohi ona iwitobaniikika wato, "Naga ma ngoeohi toigo tinihingahu masara ma oraha naa ko niapoauahi. 13 Masara ka de woboaka o Womaha abe wohimatoko ma gou-goungu Ma Jouino dika, de gea Una winihihira-hira ma gou-goungika gea. De ai hitararono gea ko ma titiua womahohiningaiye dika de wotemo, masara gea dika abe woihene Ma Jou o Babaino, gea ena dika winihingahu. De abe ika-ika ahao idadi o duniaka, ngaro ko idadiuahi, de ngaro ma titi gea o nyawa ko yoihenuahi, masara enangoo gea ahao Ma Jou o Womaha winihingahu nginika. 14 De Una ahao wohiboa o higiriiri Ngohino. Abe o nyawa yamake Ma Jou ai buturungu ma medebini itotiai ho iwihigiriiri angamoi gea Ma Jou o Womaha wahimatoko onangika." 15 De o Yesusu wotemoli wato, "Mata-mata abe ahi Baba wotemo, gea to Ngohioo ahi demo. De gea ma titi hiadono tato Ma Jou o Womaha ahao mata-mata abe wamake Ngohioka, gea ahao winihitararono nginikali."
O huha ma titi ahao idadi o garago ma titi
16 De o Yesusu wahigila-gilahi wahitararono de ma titi abe ahao idadi wato, "Ma, naa ko itedekanokaua de ngini ko nihimakeokaua, masara topahaika de ahao ko itedekanuahi de ngini nihimakeokali." Hokogea o Yesusu wahingahu ona iwitobaniikika. 17 De ahao ona utu gea yomakeleha ato, "Gea o kia ma titi ai demo wato, 'Naa ko itedekanokaua de ngini ko nihimakeokaua?' De ahao wato, 'De gea topahaika ko itedekanua de nihimakeokali.' Ho adodoa ho ai demo utu gea wato, 'Angamoi naa tolio o Babaiye'? 18 De o kia ma titi gea wato 'ko itedekanokaua?' Marai ai hingahu naa ma titi ngomi ko mimangaratiiua." 19 O Yesusu wahioriki abe hokokia itagi manga hiningaka abe yoigo iwileha ho Una wato, "Marai nioigo nihileha ma titi ahi demo gea tato, naa ko itedekanokaua de ngini ko nihimakeokaua de ahao topahaika ko itedekanua de nihimakeokali. Marai ahi demo gea ko nimangaratiiuahi ho hiadono nimakokeleha e? 20 Naa duru tagou-goungu tinihingahu, ngini naa ahao nia hininga duru ihuha mangale gea abe ahao idadi Ngohino de hiadono duru niari ngaro o dunia ma nyawa yopoa-poaka de manga sanangi dika. Ma ngaro ngini naa igoungu duru nia hininga ihuha masara nia huha gea ahao aturuuru hiadono idadi nia garago. 21 Abe hoka o ngofeka de ami badangoka, nako ami gahe adonoka ho ka de ami pokoro igoli de ami hininga ihuha. Masara ka de ami ngofaka imaboaka de ami huha gea mawohangoka angamoi aturuuruoka de ami garago ma titi naga o nyawa moioli yomaboaka o duniaka. 22 De imaketero hokogea idadi nginioka abe naa ma oraha nginioo nia hininga duru ihuha masara ahao homakamakeokali de duru nia hininga akokilufungoka de o garago de ko moiua ka idadi apoa iniora nia garago gea. 23-24 Ho o wange gea homakamakeokali de nia leleha Ngohino ko iwaka angamoi nigaragokaholi. De gea nigarago angamoi ka idadiou ngini ma hirete nimagahoko o Babaiye abe de ahi romanga niapake. Ma dihira ko ma moiuahi nimagahoko de ahi romanga niapake ma naa ka idadi angamoi ngini nihingakuoka. De Ngohi naa duru tagou-goungu tinihingahu nginika ngaro o kia dika nimagahoko de to Ngohi ahi romanga niapake gea ahao ahi Baba winihidoaka la gea nia garago duru ingodumoka.” 25 De o Yesusu womahingahuohi ona iwitobanii-niikika wato, "Ngaro Ngohi ma dihiraino ma ngoe o hiketero tapake la de gea tinihitararono, ma itigioka ma oraha de o hiketero ko tapakeokaua ho ahao tinihingahu ma titi ahi Baba de tapake dika o demo abe duru igapanga niataoko ma titi. 26 Ho ka de ma oraha gea iboa de ahao ngini nimagahoko de ahi romanga niapake. Gea ko ma titiua abe ahao Ngohi kiani tinigahoko o Babaika. 27 Koua, naa nihingaku abe Ngohi Ma Jouoka de taino. Ho to Baba ai mau la naa ngini ma hirete nimagahoko angamoi Una duru winidora mangale ngini nihidora Ngohi. 28 Abe Ngohi naa toboakau de gea duru Ma Jouoka de tauku o duniauku naa. Ho o dunia tanoa naa de tolio o Babaiye." Hokogea o Yesusu wahingahu ona iwitobanii-niikika. 29 De ahao ona yopaluhu ato, "Naa igoungu hoka naa miamake ani demo abe duru igapanga miataoko ma titi! De gea angamoi o hiketero ko napakeua. 30 Ho naa duru itararono ngomino abe Ngona igoungu mata-mata duru nohioriki abe o nyawa ko inilehauahi de manga leleha gea Ngona nohiorikokau. Ho gea mingaku abe igoungu Ma Jouino noboa." 31 De o Yesusu wopaluhu onangika wato, "Naa ma dekanino de ahao ahi hingahu gea ningaku! 32 Ma naa nitotoihene e? Ahao naga ma oraha, iya, igoungu ma oraha gea adonoka, abe ngini ahao nimahikabarihi hiadono nikokilio nia kokitauika. De Ngohi ahao nihinoaika hiadono duru tomatengoka. Masara gea igoungu, ko tomatengoua angamoi ka ihikaika ahi Baba naga Ngohioka." 33 "Ahi hingahu mata-mata naa tinihingahu nginika la ti nginioo nia hininga de ma miriidi angamoi nigogere Ngohioka. Ho nia miriidi gea naga ngaro nigogerohi o duniaka naa, de ngaro kiani o huha niamake. Ho ufa nia hininga aliko o huhaika gea! Kiani nikokisanangi dika! O dunia ma kangela naa Ngohi tohikalaka la nginioo ka idadi nilaku."
O Yesusu womaniata
1 Ka de o Yesusu ai behehongo gea wahingahu ona iwitobaniikika ibooto de ahao womamatagaiye o Horogaiye de womaniata wato, "Ahi Baba, ahi kangela ma oraha adonoka! Ho Ngohi ani ngofaka naa ahi buturungu ma medebini itotiai nahimatoko o nyawaika! Nodiai la gea ka idadi to Ngonali ani buturungu ma medebini itotiai Ngohi ani ngofaka tahimatoko onangika. 2 De gea itiai nahimatoko ahi buturungu ma medebini itotiai onangika mangale nohihidoakino Ngohino ani kuaha o nyawa mata-mataika la ka idadi tahiwango ona gea abe nohihidoakino Ngohino la ihiniiki Ngohi. De gea ma titi manga wowango ka hiado-adonika naga Ngoneoka abe ka idadi Ngohi tahidoaka. 3 Angamoi o wowango ka hiado-adonika gea o wowango ma gou-goungu abe ma titi inihioriki Ngona dika Ma Jou ma gou-goungu. De ona ihihiorikoo Ngohi naa ani Mesia o Yesusu abe nohihidingoto onanguku. 4 O Baba to Ngona ani buturungu ma medebini itotiai tapaliara la Ngona dika o duniaka tonigorakiye hiadono tabootoka ahi karajaanga mata-mata abe nohihidoakino Ngohino. 5 Ma dihira homahidogogerohi abe Ngona de Ngohi de ngaro o dunia ko idadiuahi ma, ahi buturungu ma medebini itotiai gea nagau. Ho naa Baba togahoko la nohigilio Ngohino ahi buturungu ma medebini itotiai abe duru de ma dararonoka imaketero hoka ma dihirali." O Yesusu ona iwitobaniiki wagahoko 6 "Ahi Baba, ona ihinii-niiki naa, ona to Ngona ani nyawa abe nohihidoakoka Ngohino hiadono o dunia ma biahaino nahikatingakoka. De onangika tadotoko la Ngona nodadi to onangoo manga baba, de Ngohi ani mau enangoo tahimatoko onangika ka hiadono ma oraha naa manga hingounu naga ani demoika. 7 Ho naa, o Baba, ona ihiorikoka abe mata-mata yamake Ngohino gea igoungu Ngonaka dika de aino nohihidoaka. 8 Ho abe ani demo nohihidoaka Ngohino gea tahidoakoli onangika de gea yodafongo itaana hiadono ona duru ihioriki Ngona dika nohihidingoto abe Ngohioo Ngonaka de taino. 9 Ho Baba ona abe tagahoko naa, gea ona abe ko yaniikokaua o dunia ma biaha. Ma oraha naa ko tagahokua o dunia ma nyawa mata-mataika. Masara Ngohi tagahoko ona gea abe yodadioka to Ngona ani nyawa mangale ma titi ona nohihidoakoka Ngohino. 10 Angamoi o nyawa mata-mata Ngohioka ona gea to Ngona, de imakadaene ona mata-mata Ngonaka de hokogenangoo yodadi to Ngohioo ahi nyawa. De ahi buturungu ma medebini itotiai onangoo yahimatoko o nyawa utuikali. De gea angamoi ona ihiniiki Ngohi ho hiadono de manga wowango ma datoro yahimatoko o nyawaika to Ngohi ahi buturungu. 11 “De Ngohi naa ko itedekanokaua de ko togogerokaua o duniaka angamoi tolio toboa Ngonaiye, masara ona kiani yogogerohi o duniaka, ho ahi Baba Notebi-tebini, ona naa tagahoko la nagoana. Ma titi gea ani romanga Notebi-tebini ho hiadono Ngona de ani buturungoka la ka idadi ona nagoana. De Ngona Ma Jou Notebi-tebini, gea to Ngohioo ahi romanga, ho ona tagahoko la nahidadi moi imaketero hoka Ngona de Ngohi ka ma dodihirainohi de hodadi moi. 12 Naa ahi dekanino onangoka Ngohi ka ihikaika tagoana angamoi Ngohioo ahi romanga hoka to Ngonali ho ko kia-kiaua idadi onangika abe nohihidoakoka Ngohino. Masara naga womatengo dika, una gea iwihihanga abe ai romanga idadioka o Naraka ma ngofaka, de ani demo-demo ma dihirainohi itemokau hokogea womangiriki ho hiadono hokogea idadi unangika la ani demo-demo ingodumu." 13 "O Baba, naa ma oraha adonoka etolio Ngonaiye ho ahi gogahoko hokonaa tohiboa Ngonaiye ngaro Ngohi naga o dunia ma lokuokahi togogere. Abe ona naa tagahoko la manga garago ingodumu angamoi toigo la manga hiningaka yalufungoka de to Ngohi naa ahi garago. 14 To Ngona ani demo-demo Baba tahidoakoka onangika, ho o dunia ma nyawa yadohata onangika angamoi imaketero hoka Ngohi ko o dunia ma nyawaua, ho onangoo yaniikokaua o dunia ma biaha. 15 Baba, Ngohi naa ko tagahokua la ona nagoraka o duniaino masara ahi gogahoko la nadatoko o Ibilihino, gea ena duru itobatualonoholi, ho enangino gea kiani Ngona nagoana. 16 Angamoi Baba ona ko aniikokaua o dunia ma biaha imaketero hoka Ngohioli ko taniikua o dunia ma biaha. 17 Ho naa ona abe natingaka nomadingaka Ngonaino tagahoko la nahitebini de ani demo-demoino. Abe ma gou-goungu o duniaka gea to Ngona dika ani demo-demo ho de gea ena nahiwango to ona manga wowangoka. 18 Angamoi abe hoka Ngona nohihidingoto o duniauku naa, imaketero hokogea onangoo naa Ngohi tahidingoto o dunia ma nyawaika. Abe imaketero hoka Ngona nohihikarajaanga ho onangoli naa ihigila-gila ani karajaanga gea. 19 Ho Baba, ma titi ona hiadono Ngohi naa tomahidoaka la duru tomahitaana tomatingakoka Ngonaika. De hokogea Ngohi la onangoo yomahidoaka abe manga wowangoka yomahitaana yagou-goungu ani mau yaniiki.”
Abe iwingaku-ngakuika ona mata-mataika o Yesusu wakokigahoko
20 "De Baba, Ngohi togahoko naa ko ma titiua ona dika abe ihinii-niiki ma oraha naa masara onangoo tagahoko abe ahao Ngohino ihingaku. De gea ihingaku Ngohi mangale yoihenoka abe ihinii-niikino to ona manga demo-demoino. 21 Ho Baba ona gea takokigahoko la duru yodadioka moi Ngoneoka imaketero hoka Ngona naga Ngohioka de Ngohi naga Ngonaka. Hokogea tagahoko la ka de yodadi moi Ngoneoka de o dunia ma nyawa yamake manga rimoi manga wowangoka de yangaku abe Ngona igoungu nohihidingoto Ngohi. 22 Ahi buturungu ma medebini itotiai tahidoakoka ihingaku-ngakuika abe duru imakadaene de ani buturungu ma medebini Ngona nohihidoakino Ngohino. Gea onangika tahidoaka la onangoo yodadi moi imaketero hoka Ngona de Ngohi ka ma dodihirainohi de hodadi moi. 23 Ho Ngohi naga onangoka de Ngona naga Ngohioka. Ho toigo nanga rimoi duru itiai la gea o dunia ma nyawa mata-mataika ka idadi duru ihioriki gea Ngona Baba nohihidingotuku o duniauku naa. Iti ona ihiorikoo ani dora itagi ihingaku-ngakuika imaketero hoka itagi Ngohinoo. 24 "O Baba, ona gea nohihidoakoka Ngohino duru toigo la ngaro o kiaka dika Ngohi naga ma onangoo naga genangoka. Abe Ngohi duru toigo la ona ahao ihimake Ngohi de ahi horomati abe de ma dararonoka. O dunia idadiuahi de duru nohidoraka hiadono nohihidoaka Ngohino ani horomati de ma daronoka gea. 25 "Ngona Baba duru nototiai! De ngaro o dunia ma nyawa ko inihiorikuahi ma Ngohi tonihioriki. De ona naa abe ihingaku Ngohino ona ihioriki gea Ngona nohihidingoto. 26 De Baba Ngona tonihimatokoka onangika. De ahao ka ihikaika tohigali-gali to Ngona ani hininga tahimatoko onangika. Ngohi toigo la ihioriki abe duru nohidora Ngohino de la ihiorikoo Ngohi ka ihikaika tadora onangika. De ahi dora abe ka ihikaika itagi onangika imaketero hoka ani dora abe itagi Ngohino. Gea ma titi ho ka ihikaika togogere onangoka." Hokogea o Yesusu ai niniata ma demo ai Babaiye.
O Yesusu iwitaoko
1 Ho ka de o Yesusu womaniata hokogea ibooto de yoiki Una de ona iwitobaniiki. Ona youtiuku o Kidono ma akeruku de doka ma honongaiye yodoa o rediye moi abe genangoka o nyawa yodatomo o saitunu ma gota. Genangika yoiki o Yesusu de ona iwitobaniiki. 2 Ma redi gea o Yudasa duru wohioriki ma ngi gea angamoi o Yesusu de ona iwitobaniiki ma moi ma moi yomatoomuino genangoka. De itigioka to una ai hidee wohidagi abe wato o Yesusu wifukunu ai musuika. 3 Ho naa o Yudasa gea wahihira o Roma manga tentara o doomu moi o redika gea. De naga yasapurika onangoka yamuruono naga yogoa-goana Ma Jou ai tau. Ona gea yaniiki o Roma manga tentara ma doomu gea angamoi onangoo yaduhuloko la ato o tentara yaduhunu iwitaoko o Yesusu. De gea manga hohidemo Ma Jouiye de o Farisi manga doomuino ma nyawa abe yahuloko la yomakiniiki de o tentara gea. Ho yomakutuono yoboaino de yomagao manga hilo abe utu ma rupa hoka o lobe de utu hoka o oboro. De yomagao manga dae irupa-rupa. 4 Ho mangale o Yesusu wohiorikokau mata-mata abe ahao idadi Unangika ho Una woboaino onangika la wabuhuku de ahao waleha onangika wato, "Ho naa onagona ngini nialingiri?" 5 De naga o nau-nauru yopaluhu ato, "O Yesusu, o Nasaretino ma nyawa gea." De o Yesusu wato, "Ngohi naa o Yesusu." De o Yudasa, abe wifukunu ai musuika gea, una naga manga hidogoronaka. 6 Ka de o Yesusu wotemo dika wato, "Ngohi naa o Yesusu," de itodokanino o nau-nauru manga ngoe gea ihidepewanga hiadono o tonakuku yokokiruba. 7 De ahao o Yesusu walehali onangika wato, "Ho naa onagona ngini nialingiri?" De ona yopaluholi ato, "O Yesusu, o Nasaretino ma nyawa gea Una wiwilingiri." 8 De o Yesusu wotemo wato, "Tinihingahuoka gea Ngohi naa, ho nako Ngohi dika nihilingiri kiani ahi dodiawo naa niahigunoa la ona yoikoka." 9 Hokogea idadi la o Yesusu ai demo ma dodihiraka duru itaana abe wotemoka wato, "Baba, o nyawa abe nohihidoakoka ngohino ko moiua la ka idadi ahihanga.” 10 De o Simono Peturusu naga de ai diaka wasoino ho womatengo wioto hiadono ai ngauku ai nirakoka wapahahangoka. Una gea ai romanga o Makusu, abe una o gilaongo abe wileleani o Isiraele ma nyawa manga hohidemo Ma Jouiye manga haeke. Ho una wokokurutiye to una ai gilaongo o Makusu gea. 11 De o Yesusu o Peturusika witaere wato, "Peturusu, ani dia naharumoka! Bote ngona nato ngohi ko tapoaua tale o kangela naa abe o Baba wohihidoakoka?"
O Yesusu iwiao o Ananiasika
12 Ho o Roma ma nyawa manga tentara ma doomu de manga dimono gea, de manga dodiawo o nau-nauru yamuruono naga abe Ma Jou ai tau yogoa-goana, ona gea o Yesusu iwitaoko de ai giama apakiti-pakitino. 13 Ka de iwipakitoka de iwiao o Ananiasika, una o Kayafasa ai toroa ma goo abe ngoi fekata ami baba. De o Kayafasa ma oraha gea una o hidemo Ma Jouiye manga hidimono abe ka unangohi duru wokurutiye. 14 De gea una abe ma dihira watemoka o Yahudi ma nyawa manga dimo-dimonika wato, "Koaho womatengo dika wohonenge la ufa hiadono o Roma ma nyawa inahibinaaha ngone o Yahudi ma nyawa mata-mataika."
O Peturusu womulaenge o Yesusu wioluku
15 Gea o Yesusu iwiao de o Simono Peturusu de womatengoli iwinii-niikino ona yahinooto gea iwihidoduruino. De angamoi o Peturusu ai dodiawo gea yomahikoriki de o Ananiasa ho ka idadi iwihigunoa la una winiiki o Yesusu hiadono unangoo wowohamika o Ananiasa ai tau ma loaka. 16 Masara o Peturusu ko wowohamua genangika ho una womaokoino dika o pagara ma ngoranoka abe naga o ngofeka o pagara ma ngorana ma gogoana. Masara ai dodiawo una wowohamoka ho wigilio o Peturusika de angamoi una wihioriki o tau ma dutu ho o Peturusu wihidemo o ngofekaika abe muna ma gogoana o pagara ma ngoranoka. De gea ma titi hiadono ka idadi o Peturusu wowohama ma ngoranino. 17 Masara muna o ngorana ma gogoana mileha o Peturusika mato, "Abe iwitao-taokino naa, marai ngona to Una ai dodiawo abe ani biaha ngona ninii-niiki?" De o Peturusu wopaluhu wato, "Koua, ko ngohiua." 18 De duru imaata o futu gea ho naga o uku yomadauliye o tau ma loaka gea abe o nyawa yomarau-raukika genangoka. De naga yomarauku o ukuika o Yahudi ma nyawa manga dimo-dimono de yamuruono naga abe yoleleani o tauoka gea. De o Peturusoo womahisapurika onangoka ho unangoo womaraukika.
O Ananiasa witailako o Yesusika
19 De doka manga honongaka manga hidemo Ma Jouiye o Ananiasa abe unangoo wokurutiye, una o Yesusika wileha, wato, "Ona abe manga biaha initobaniiki onagona honanga manga romanga? De ma titi o kia abe ani biaha nadotoko o nyawaika?" 20 De o Yesusu wipaluhu unangika wato, "Ngohi ka ihikaika totemo la o nyawa mata-mata abe yoigo yoihene ka idadi yoihene. De ngaro o kiaka dika o nyawa yomatoomuino la yomadotoko, ngaro Ma Jou ai Tauoka eko o dodotoko ma tau-tauoka, ma genangokaoo ka ihikaika o Yahudi ma nyawa tadotoko. Ho ko ma moiuahi tomagogono o nyawa tadotoko. 21 Ho adodoa ho hiadono ahi dodotoko ma titi nohileha ngohino? Itiai naleha onangika abe yoihenoka ahi dodotoko. Marai ihiorikoka ahi demo ona gea." Hokogea o Yesusu wipaluhu o Ananiasika. 22 Ma ka de o Yesusu wopaluhu hokogea de naga womatengo abe o gogoana una o Yesusu wipoka ai himangoko de witaere wato, "Adoo, una naa nanga hidimono wokurutiye Ma Jou ai himangoka de Ngona gea onaguna hiadono nato ka idadi notemo hokogea unangika?" 23 De o Yesusu wopaluhu wato, "Nako ngohi totemo ihowono nofetongo ahi demo ma howono. Ma nako ahi demo igoungu adodoa ho nohipoha?" 24 Hokogea o Yesusu wotemo de o Ananiasa o Yesusu wihidingoto dika o Kayafasika. Ho o Yesusu nagahi ai papakiti de wihidingoto o Ananiasa ai toroaika abe ma oraha gea o Kayafasohi manga hidemo Ma Jouika abe duru wokurutiye.
O Peturusu o Yesusu wioluku ma hinooto de ma hange
25 De ma oraha o Kayafasa unangoo wileha o Yesusika de o Peturusu naga womaraukikahi o ukuoka gea de naga o nyawa utu iwileha unangika ato, "Igoungu ngona eko ko ngonaua abe biaha de ani dodiawo ngini niwinii-niiki o Yesusu gea?" De o Peturusu woluku womahingahu ho wopaluhu wato, "Ko ngohiua." 26 De naga womatengoli o Ananiasa ai gilaongo genangoka ai tau ma loaka abe una o Makusu ai dutu adaene. O Makusu gea una abe ai ngauku kangano o Peturusu wapahahanga, de naa to una ai dutu abe unangoo wileha o Peturusika wato, "Masara ngona ka tonimake o Yesusoka o Saitunu ma redioka e?" Hokogea wileha o Peturusika. 27 De ma moioli o Peturusu womahipongono wato "Koua!" Masara ka de manga demo gea waoluku de imulaenge o kuru-kuru ihorene.
O Yesusu iwiao o Pilatusika
28 Ho ka de o Yahudi ma nyawa manga hohidimono yaputuhoka ato o Yesusu wahowonoka de ona duru o ngoru-ngorumino iwiao manga gubernuurika abe una o Romaino de ai romanga o Pilatusu. Ho yomahiadonoka o tauika abe o Pilatusu naga genangoka ma ko yogila-gilaua yowohama. De angamoi ona ato done yatilakuru manga agama ma bohono hiadono yahowonoka Ma Jouika de ko idadiokaua o Totilakuru ma inomo yaolomo. 29 Ho naga o Pilatusu o tau ma goronaka de waino wohupu la ona wabuhuku de waleha onangika wato, "Ho Una naa ai howono o kia ho hiadono niato kiani ngohi tiurusu?" 30 Ma ona yopaluhu ato, "Mia Baluhu, mode wiwiaoino ngonaino nako ko iwihitaanuahi wodiaioka duru itotorou?" 31 Masara o Pilatusu wato, "Masara ti ngini nia pareta naga ho gea niapake la ngini dika niwiurusu." De o Yahudioka manga dimo-dimono gea ko yosanangiua ai demoika gea ho iwipaluhu o Pilatusika ato, "Mimahilooa mia Baluhu, ma ngini o Romaino to ngomi mia popareta de ngini niato ngomi ko idadiua o nyawa miahohowono de o hone-honenge, ti ngini dika nia kuaha gea." 32 Hokogea manga hiaturu la idadi duru imakadaene de gea ma dodihiraino o Yesusu womahingahuoka abe ma titi hokokia ahao wohonenge. 33 Ho ka de ona yotemo hokogea de o Pilatusu wowohamoka ma tauika gea de ahao o Yesusu wibehehongo. Ho o Yesusu ahao woboa o Pilatusika de o Pilatusu wileha Unangika wato, "Igoungu, Ngona o Yahudi ma nyawa manga koano?" 34 De o Yesusu wipaluhu unangika wato, "Sarakia ani leleha gea to ngona dika ani hiningaiye ipuda eko naga o nyawa utu inihuloko?" 35 De o Pilatusu wopaluhu wato, "Ho! Ngona nato bote ngohioo o Yahudi ma nyawa? Gea to Ngona ani nyawa de ti ngini nia dimo-dimono yokokurutiye abe initobahidemo nia Jouiye, gea ona inihidoaka ngohino. Ho naa o kia Ngona nodiai hiadono ona ko inigoua ma titi nomafetongo dika nato ngona to ona manga koano?" 36 De o Yesusu wihingahu o Pilatusika wato, "Ahi kuaha ko o duniakaua de aino la hiadono ka idadi o nyawa tahikoano. Angamoi nako hokogea ahao naga ahi gogoana ka idadi yapoa ihiduhunu la ufa ahi gogianongoru o Yahudi ma nyawa naa ihitaoko hokonaa. Masara to ngohi ahi kuaha ko o duniainoua, ma, o ngi moiokali de aino hiadono ka idadi o nyawa tahikoano." 37 De o Pilatusu wilehali wato, "Ho igoungu, Ngona o koano?" De o Yesusu wihingahu wato, "Ngona nagoungu nohifetongo nato Ngohi o koano. Abe Ngohi naa toboa o duniauku, de hiadono tomaboa naangoka, gea mangale ma titi la o demo ma gou-goungu ka idadi tahingahu-ngahu o nyawaika. De onagona dika yoigo ma gou-goungu, ona gea ihihigihene." 38 Ka de o Yesusu ai hingahu gea woihene de o Pilatusu wohihomoaika wato, "Ho o demo ma gou-goungu gea o kia?" Hokogea wotemo ibooto de wohupuoka o Yahudi ma nyawa watutumu de wahingahu onangika wato, "Ngohi naa duru ko tamakeua Unangoka ai howono abe ka idadi tohititi la tihohowono. Hokogea wotemo ibooto o Pilatusu de wohupuoka o Yahudi ma nyawa watutumu de wahingahu onangika wato, "Ngohi naa duru ko tamakeua unangoka ai howono abe ka idadi tohititi la tihohowono. 39 Masara naga ti ngini nia biaha ma oraha nia Totilakuru ma Rame-rameoka abe niato ngaro womatengo ngomi wiwibuioka kiani tihihupu nginika la ibooto ai hohowono. Ho sarakia nako ti ngini nia koano naa Una dika tihihupu nginika la ibooto ai hohowono." 40 Masara o Yahudi ma nyawa gea duru yopoa-poaka ato, "Koua, ko Unangua! Kiani o Barabasa dika nomihidoaka!" De o Barabasa, abe iwiiriki gea, una o nyawa ma dorou abe duru watobalawana o nyawaika.
O Yesusu iwihohowono ato kiani iwidide o gota isosalioainoka
1 Ho o Pilatusu wahuloko ai tentaraika la o Yesusu iwiao de iwipoha-poha de o hohonenge ma boboha kiani yapake. 2 De gea o Roma manga tentara iwipoha ibooto de ahao o gumi-gumini abe de ma hihikaka yagale-galeino la iwihinoauku ai peauku abe yodiai hoka o kokoano manga sapeo. De ahao iwihinoaukuoli o baju moi ma wuu-wuu la ato iwihidadi hoka o koanoli ai rupa. 3 Ho gea yodiai ibooto de ahao o tentara gea yomakawalimi iwipoka ai himangoko de iwihohedu ato, "Duru tonigahoko ma owa, o Yahudioka manga koano!" 4 Ho gea o Yesusu iwipoha de iwihohedu ibooto de ahao o Pilatusu ai tau ma goronaka de waino, wohupu wabuhukoli o Yahudi ma nyawa abe yomatoomuino genangoka. De watemo onangika wato, "Abeika! Naa Una gea tinihimatoko la ka idadi niwimake de nihioriki moioo de ko tamakeua ai howono abe hiadono kiani tihohowono." 5 Ho ka de o Yesusu wohupuino de ona iwimake de ai sapeo o hihikaino de ai baju ma wuu-wuu. De o Pilatusu ko waniikua manga hininga ho wotemo la wato ngaro ufa iwitoma wato, "Abeika niwimake o nauru naa, ai buturungu duru ko iwa!" 6 Ma ka de o Yesusu iwimake de ona o hohidemo Ma Jouiye abe ka onangohi yokurutiye de ona yogoa-goana Ma Jou ai tau yomulaenge yokokipoa-poaka ato, "Niwidide! Niwidide dika! Niwihidapakuika o gota isosalioainoka!" De o Pilatusu wapaluhu onangika wato, "Ngini dika niwile de niwidide la iti ngini niwihidapaku angamoi nako ngohi ai howono moioo de ko tamakeua." 7 Masara o Yahudi ma nyawa manga ngoe gea iwiribuutu o Pilatusika ato, "Masara naga to ngomi mia pareta abe nako o nyawa iwingelo Ma Jouika kiani yohonenge ho kiani haniiki mia pareta gea angamoi Una womafetongokau wato, 'Ngohi naa Ma Jou ai ngofaka.'” 8 De o Pilatusu wohawanoka o Yesusu wihohonenge, ma ka de woihenoli o Yesusu ai demo abe wato Una Ma Jou ai ngofaka de ai hawana ka idogo. 9 Ho wowohamokali ai tau ma goronaika gea de wileha o Yesusika wato, "Ngona naa o kiaino?" Masara o Yesusu ko wopaluhua. 10 Ho o Pilatusu wilehali wato, "Adodoa ho ngohino de noluku nopaluhu? Ko nohiorikua ahi kuaha naga la ka idadi tonihiluasa eko tonihidapakuika o gota isosalioaikaka?" 11 De ahao gea o Yesusu wopaluhu o Pilatusika wato, "Ngona ko kia-kiaua Ngohino nodiai nako ko Ma Jouua wonihidoaka ani kuaha ngonaika. Ho o nyawa gea abe Ngohi ihihidoa-doaka ngonaino naa, nako ona de ngona ka to onangohi manga howono ilamoko." 12 Ka de o Pilatusu woihene o Yesusu ai demo gea de wolingiri ma ngekomo la wato o Yesusu wihiluasa ai kangelaino. Ma ka de wohupuoli o tauino de o Yahudi ma nyawa ihigali-gali yopoa-poaka iwihihawana unangika ato, "Unangoo hoka womahidadioka ti nginioo nia koano ho Una o Kaisara ai musu, ho done sarakia de ngona nato noigo la o Yesusu gea nihiluasa?" 13 Ho ka de iwidanauru hokogea de o Pilatusu o Yesusu wihihupu ma tauino de ahao o Pilatusu wogogeruku o hohowono ma kaderaka. Ai kadera gea yakelenga o ngi moioka hoka o mehele masara o hakaru dika yatatorika ihidowoatika de nako o Yahudioka manga demo ma ngi gea ihiromanga o Gabata. 14 De gea duru o ngoru-ngorumino abe ngade-ngade o takoro butaanga o Jumati ma Wangeoka. De ma wange gea ihiromanga o Hidiai ma Wange angamoi ma dawangeino adaene manga hiaini ma wange. De utuoli manga hidiai naga angamoi o minggu gea ahao ihirame-rame o Totilakuru ma Rame-rame. Ho wogogerukuoka o hohowono ma kaderaka de ahao o Pilatusu wahidumutu o Yahudi ma nyawa manga ngoeika gea wato, "Abeika, ti ngini nia koano naa." 15 Ma, ka de yoihene o Yesusu widemo hokogea de o Yahudi ma nyawa duru yopoa-poaka ato, "Niwiaoka! Itaiti niwiaoka! Niwihidapakuika dika o gota isosalioaika!" De o Pilatusu waleha onangika wato, "Mode nia koano tihidapakuika o gota isosalioaika?" De ona manga hohidemo Ma Jouiye abe yokurutiye ona yopaluhu ato, "To ngomi mia koano wiwihioriki womatengo dika de gea o Kaisara!" 16 Ho ma bahaika o Pilatusu waniikoka manga hininga de o Yesusu waniiki dika to ona manga mau de wihidoaka onangika abe ahao ka idadi iwidide o gota isosalioaika.
O Yesusu iwidide o gota isosalioaika
17 De ahao o Roma ma nyawa manga tentara iwihiaturu, ho o Yesusu iwihimoku ai didide o gota isosalioaino. De ahao wohupu o Yerusaleeme ma kotaino de woiki o loku ma etetekika gea ihiromanga o Nyawa Manga Pea ma Kabelanga ma Ngi. Abe nako o Yahudioka manga demo ma ngi gea ihiromanga o Gologota. 18 De genangoka o Yesusu iwihidapaku o gota isosalioaika gea de o gota gea ihigokoiye la iwidide genangoka. De hokogenangoo yodiai de o dorou ma nyawa yahinooto ho yahiketehimomoiika yadide. De yahinooto gea yahidotidideuku o Yesusu ai datekoka arihonongaka, ho o Yesusu naga manga hidogoronaka. 19 De o Pilatusu wahitulihi ma titi o Yesusu ai hohowono de ma dodunguu gea yodiai ibooto de ahao ihidapakuika daku o Yesusu ai didideoka. De wohitulihi ma dodunguuoka wato, "O Yesusu o Nasaretino, Una o Yahudi ma nyawa manga Koano." 20 De naga o Yahudi ma nyawa manga ngoe yobasa o dodunguu gea angamoi o Yesusu iwidide imahidigi-digino de ma kota. De ma dodunguu gea ihitulihi de o bahasa hange abe ihira yapake o Yahudioka manga demo, de ahao yapake o Roma ma nyawa manga demo de ma bahauku yapake o Yunani manga demo. 21 De naga o Yahudi ma nyawa manga hohidemo Ma Jouiye duru, ko yosanangiua de abe wotulihika ho yoiki o Pilatusika de manga hininga ma huha iwihingahu unangika ato, "Mia Baluhu, ufa ai dodunguu gea itemo ato, 'O Yahudi ma nyawa manga Koano,' masara nohitulihuku hokonaa: 'Una gea womafetongo wato, Ngohi naa o Yahudi ma nyawa manga Koano.'" 22 Masara o Pilatusu wapaluhu onangika wato, "Abe ngohi taputuhoka totulihi, gea dika ma dulihi!" 23 Ho o Yesusu o tentara ma nyawa iwidide ibooto de ahao ai pakeanga mata-mata abe kanganohi akokihuputuku ahao naa o tentara yaiata yomahikodoku ho yomaketemomoi yamake. De ai baju abe ai badangika idateke ena gea ihidatahumuku abe ko iwa ma dabi angamoi yodumo daku de auku hiadono ma barenuku. Ho ai baju genangoo yaleoka la yomahitoona. 24 Masara o tentara ma nyawa gea yomakoketemo ato, "Ngaro ufa naa ena hakakihi masara koaho homakamaihi la onaguna iwidaene ma mamaihi, una gea wamake ai baju naa." De hokogea o tentara yaiata gea yodiai la ingodumu abe ma dodihiraka atulihuku Ma Jou ai Bukuoka ato, "Ahi pakeanga yomahikodoku masara de ahi baju yomakamaihi la ihioriki onaguna ahao wamake." 25 De naga o Yesusu ai didide ma datekoka yomaokoino o Yesusu ngoi meme, de to muna ngomi ria-dodoto momatengo, de o ngo Maria abe o Kelopasa ngoi fekata, de o ngo Maria Madalena. 26 De o Yesusu womimake ngoi meme de genangoka wimakeoli womatengo winii-niikino abe duru widora de wotemo ngoi memeika wato, "Ele, ahi dodiawo gea ahao wodadi hoka to ngona ani ngofaka." 27 De ahao witemo winii-niikika gea wato, "Olo, nomigoana nomihidodiai hoka to ngona ma hirete ngoni meme." Ho duru ma oraha gea de o Yesusu ngoi meme o Yohanese womiao to una ai tauika la ka idadi mogogere genangoka.
O Yesusu wohonenge
28 Ka de wahibehehongoka onangika hokogea ibooto de o Yesusu wohiorikoka ai karajaanga abe o nyawa waduhunu, naa mata-mata wabootoka. De naa o Yesusu wotemo de ai demo duru imakadaene abe ma dihira Ma Jou ai uru ma dodofanga ihitulihukuoka Ma Jou ai Demo-demoka, abe wotemo wato, "Ngohi ahi ngomaha yodudungu." 29 De naga genangoka o mangko moi de o angguru ma gohaka ma suka-suka. Ho yaleino o pahi ma diburu abe ka idadi afifihi ma teongo gea de atonouku o angguru ma suka-sukauku gea. De gea yodiai ibooto de ahao ma diburu gea yatobeika de o gota o hisopo ma jaga de ahao iwihitanaiye o Yesusu ai uruiye. 30 De o Yesusu ka de wafifihi o angguru ma suka-suka gea de wotemo wato, "Naa ibootokau!" De womaponuku de ai wowango womahidoakoka. 31 De gea o Hidiai ma Wange abe itebini o Yahudi ma nyawa manga hiaini ma wange ho kiani yomahidiaiohi. De o Hiaini ma Wange gea ihiromanga o wange ma amoko angamoi duru adaene o Totilakuru ma Rame-rame. Ho mangale gea naga manga dimo-dimono yoiki o Pilatusika de yogahoko ato, "Mia baluhu, itebini mihiromanga o Wange ma Debi-debini. Ho ngomi naa miboa migahoko la yadideuku gea ufa manga honenge naga manga didide ma gotaka o Wange ma Debi-debinoka. Ho duru migahoko la abe yadideuku o gotaka gea nohuloko la manga lou akokipoha la manga kobongo ikokitobikoka la itaiti yohonenge. Hokogea kiani nohiaturu la manga honenge ka idadi o wange naa dika de ihikokigutioka. 32 Ho o Pilatusu wohuloko hokogea. De o tentara ma nyawa yoiki iwitihira womatengoika, abe yahidotidideuku de o Yesusu, de to una ai harepa ma kobongo yapoha ho yakokitobikoka, de ahao yoiki womatengoli ai honongaka de to unangoo ai harepa ma kobongo yakokitobikoka. 33 Masara ka de yoboa o Yesusino de iwimake wohonengokau, ho ai harepa ko yapohaua. 34 Masara la duru ihioriki wohonengoka o tentara ma nyawa womatengo wihakara o Yesusu ai gumurukika de ai hokiiki, de ka de wihakara de o awunu de o akere iuihi ai gumurukino. 35 De ngohi naga genangoka ho de ahi lako hinooto tamake mata-mata gea yodiai o Yesusika, ho toade-ade naa duru tagou-goungu tinihingahu la nginioo ka niangaku. 36 De mata-mata naa idadi duru imakadaene abe ma dihira Ma Jou ai uru ma dodofanga ihitulihukuoka Ma Jou ai Bukuoka ato, "Ai kobongo moioo de ko yatobikua." 37 De naga Ma Jou ai Demo-demo utu abe ma dodihiraka yatulihukuoo, de gea itemo ato, "De ona gea duru iwilega-lega unangika abe iwihakaroka."
O Yesusu iwilungunu
38 Ho gea ipaha de o Yusupu, abe o Arimatea ma kapongino, una woiki o Pilatusika de wogahoko la o Yesusu ai honenge wile la ka idadi iwinoaika o ngioka ma rupa o aruku. O Yusupu gea unangoo winii-niiki o Yesusu masara ko womahingahu-ngahua angamoi wamodongo o Yahudi ma nyawa manga balu-baluhu. Ho ka de o Pilatusu wihigunoa wato, "Ka idadi" de o Yusupu wosobo la o Yesusu ai honenge ale. 39 De naga womatengo o Yusupu widuhunu ai romanga o Nikodemusu, una gea abe ma dihiraino woboa o Yesusino o futu-futuoka. Ho ona yahinooto yomakiniiki ma oraha o Yesusu ai honenge ale. De o Nikodemusu wao o muuru de o gaharu ihikasapuroka abe ena gea manga biaha yapake la yahiehe o honengika. O muuru de o gaharu iwigao gea ma dubuho ngade-ngade o kilo moruange de iata. 40 Ho yahinooto gea o Yesusu ai honenge yaleoka de naga o ngoere ma rorahai ma bela-belaka abe ma guru-gurutu de enangoo iwigao abe o Yahudioka manga biaha yapake la manga honenge ihihawo. Ho o muuru de o gaharu gea ka ma moi iwihidahawo de o ngoere ma bela-belaka. Hokogea yodiai de o Yesusu ai honenge iwihihawoka hoka ihirahi o Yahudi ma nyawa yodiai nako yalungunu o nyawa manga honenge. 41 De ma ngi gea o kiaka o Yesusu iwidide ena gea imaritonakika de o redi moi. De ma redioka gea naga o lungunu moi abe ma rupa hoka o aruku afaitoka o hakaruika de o lungunu gea ma hungiohi abe ko ma moiuahi o nyawa manga honenge yanoaika genangoka. 42 De angamoi o wange gea o Yahudi ma nyawa yomahidiai abe itebinino gea o Hiaini ma Wange, de mangale ma lungunu abe hoka o aruku gea imahidigi-digino ho ka genangoka o Yesusu iwihingohama doka ma goronaika de iwikelengauku.
O Yesusu ko iwiwa ai lungunoka
1 De o Gareja ma Wangeoka ma ka ifufutuohi de o ngo Maria Madalena ka mongorumika o Yesusu ai lungunika. Ho ka de muna momahiadonika de mamake o aruku ma bionoka gea ko iwaka ma dadatoko. Abe o hakaru ma amoko gea yapake la ai lungunu ma biono atatokoka, masara ma dadatoko ma hakaru gea ihikitingakoka de ma bionoka. 2 Ka de gea mamake de o ngo Maria gea momapopaata moiki mahingahu o Peturusu de una winii-niiki womatengoli, abe una gea duru o Yesusu widora. Ho ka de moboa manga ngiika de mahingahu onangika mato, "Iwitohikoka! Gea nanga Baluhu ai honenge iwigorakoka de ko mihiorikua o kiaka iwikelenga!" 3-4 Ka de ami demo gea woihene de o Peturusu wosoboka de ai dodiawo winiiki. De ona yomapopaata yomakiniiki o lungunika masara o Peturusu ai dodiawo unangohi wopalesa ho una wohira womahiadono o lungunu ma bionika. 5 De una womangaurika la witutumu o aruku ma goronaika de wamake o Yesusu ai honenge ma hahawo, abe o ngoere ma bela-belaka gea, naga genangoka. Masara una ko wogila-gilaua wowohama o aruku ma goronaika gea. 6 De o Peturusu woturuino womahiadono masara una ka wogila-gila wowohama o lungunu ma goronaika. De gea o Peturusu wotailako de wamake o Yesusu ai honenge ma hahawo dika naga genangoka. 7 De ko imatoomuinoua abe ai pea ma hahawo atupukorinoka de imakitingakika de ai badanga ma hahawo. 8 Gea de ahao ai dodiawo, abe wohira womahiadonika o lungunoka, unangoo wowohamika de mata-mata gea wamakeoka de wangaku o Yesusu womomikoka. 9 Abe ma dihira ko yomangaratiiuahi Ma Jou ai Demo-demo abe itemo ato kiani o Yesusu womomiki ai honengino.
O Yesusu womahimatoko o ngo Maria Madalenaika
10 Ho o Peturusu de ai dodiawo yolio homoi-homoi manga tau-tauika. 11 De o ngo Maria Madalena munangoo naa moboali mahidodurino ma lungunino masara muna ko maniikua ma oraha yolio, moari-ari dika o lungunu ma poretoka de ahao munangoo momangaurika matutumu doka o lungunu ma goronaika. 12 De muna mamake naga o malaekata yahinooto yogogeruku o kiaka ma dihira o Yesusu iwikelengauku ho ai pea ma dingiioka wogogeruku o malaekata womatengo de naga womatengoli ai lou ma dingiioka wogogeruku. 13 De o malaekata yahinooto gea imileha munangika ato, "Adodoa ho ngona noari?" De o ngo Maria Madalena mapaluhu mato, "Angamoi ahi Baluhu ai honenge iwiaoka de ko tihiorikua o kiaka iwikelenga" 14 Muna motemo ibooto de gea momaidulu de o Yesusu naga womaokoino ami datekoka masara ko mihiorikua abe gea Una. 15 De o Yesusu womileha munangika wato, "Adodoa ho ngona noari? Onagona nalingiri?" De angamoi muna mato bote Una o redi gea ma gogoana, ho muna mitemo Unangika mato, "Hobata, nako Ngona niaoka duru togahoko la nohihingahu o kiaka nikelenga la ngohi ahao tile." 16 Masara una gea o Yesusu ho womiahoko ami romangika wato, "Maria." Ka de womifetongo hokogea de duru midodiaiika mihimanga o Yesusika de motemo de o garago ma demo mato, "O Rabuni!" abe nako o Yahudi ma nyawa manga demo, o romanga gea duru de ma horomatioka abe yapake manga guruika. 17 De ahao o Yesusu womihingahu wato, "Maria, ko idadiuahi nohigagaoika hokonaa angamoi Ngohi ko toliouahi o Babaiye. Ho naa ngona noikohi abe ahi doo-dodotika natutumu de naga ahi demo abe nadotaka onangika. Ho ngona nahingahu nato, "Nanga Baluhu wato, ‘Ngohi ahao togoraka daku to Ngohi ahi Babaiye de ti nginioo nia Babaiye.’ Hokogea ahi behehongo abe toigo la ngona nadofanga onangika." 18 Hokogea o Yesusu womihibehehongo de o ngo Maria Madalena moiki matutumu ona iwitobaniikika. Ho ka de muna maika onangoka de mahingahu de ami garago mato, "Nanga Baluhu wowangokali de ngohi timakeoka! De wohihibehehongo la ai hingahu ma demo tadofanga nginika wato, 'Ngohi ahao togoraka daku to Ngohi ahi Babaiye de ti nginioo nia Babaiye.' Hokogea ai behehongo nginika."
O Yesusu womahimatoko iwinii-niikika
19 De duru o wange gea o Gareja ma Wangeoka abe ahao ifutuku de o Yesusu watutumu ona abe naa ma dekana iwitobaniiki. O futu gea ona yomatoomuino o tau moioka de angamoi yamodongo o Yahudi ma nyawa manga balu-baluhika ho o tau ma ngorana yakokikusioka. Masara itodokanino de o Yesusu naga o tau ma goronaka gea, womaokoino manga hidogoronaka de walaru onangika wato, "Ngini koaho nigaragoka, angamoi naa ahi dora ma dame ma miriidi niamakeoka!" 20 Ka de hokogea wotemo de ahao wahimatoko onangika ai bokeke abe naga ai giama arihonongaka de ai gumurukoka. Ho gea manga Baluhu iwimakeoka de duru ona yogarago. 21 De o Yesusu wohigalioli walaru wato, "Ngini koaho nigaragoka angamoi ma oraha naa ahi dora ma dame ma miriidi niamakeoka! De imaketero hoka o Baba wohihidingoto Ngohi la o nyawa tahingahu-ngahu ai demo-demo onangika, hokogenangoli nginioo naa tinihidingoto." 22-23 Ka de wotemo hokogea de o Yesusu waduwuwu onangika de ai hininga ma hohailoa de wahibehehongo onangika wato, "Ngini niwidafongo Ma Jou o Womaha. De nako niato o nyawa abe manga howono Ma Jou waapongoka, gea manga howono igoungu waapongoka. De ona abe niato o nyawa manga howono Ma Jou ko waaponguahi ona gea nagahi de manga howonokahi."
O Yesusu womahimatoko o Tomasika
24 Masara yangimoi de yahinootoino womatengo ai romanga o Tomasa abe, ai romanga hinooto de ai romanga moi o Hago, una ko iwiwa genangoka ma futu gea o Yesusu watutumu ona iwitobaniikika. 25 De ma oraha o Tomasa wolioinoka de ona iwihingahu unangika abe o Yesusu watutumu ato, "Ngomi wiwimakeoka Nanga Baluhu!" Masara o Tomasa gea wapaluhu onangika wato, "Nako Una naga to ngohi ahi himangoka nia demo gea tangaku masara ko ihiwa ngohi ho gea ko tiningakuahi! Kiani tamakeokahi ai giama iwihidapaku, abe nako to ngohi ahi hagaraara ai bokekika ko tohingohamuahi gea ko tongakuahi. De nako ai gumuruku ma bokekika ko tohingohamuahi ahi giama, gea ko tongakuahi abe ka wowangokali." Hokogea o Tomasa ai hininga hinooto womahingahu. 26 De naa ma futu tumidi ipahaika ho o Gareja ma Wangeokali abe ifufutukuoli de ona iwitobaniiki o Yesusu yongodumu yomatoomuinoli o tauoka gea de o Tomasa unangoo naga onangoka. De ngaro yomahidukusiokahi ma goronaka masara ma moioli o Yesusu woboa de womaokoino manga hidogoronaka de wotemo wato, "Ngini koaho nigaragoka angamoi naa ahi dora ma dame ma miriidi niamakeoka!" 27 De ahao witemo o Tomasika wato, "Tomasa, abeika ahi giama naa, nainohi de ani hagaraara natubuku, de ani giama nohidoaka la nohingohama ahi gumurukino. Ufa ka nomahohiningahi nohingaku, kiani nagoungu nohingaku." 28 De o Tomasa wipaluhu o Yesusika wato, "To ngohi ahi Baluhu de to ngohi ahi Jou!" 29 De ahao o Yesusu wihingahu unangika wato, "Ngona naa nongaku tomomikoka angamoi ma titi nohimakeoka, masara ona abe ko ihimakeua de manga lako de ona yongaku ma titi tomomikoka, ka onangohi duru de manga garagoka." Hokogea o Yesusu ai demo.
Ma titi hiadono o Yesusu ai ade-ade naa atulihuku
30 De o Yesusu womahitunguu de o heheranga utuohi iwoe abe wodiai ona iwitobaniiki manga himangoka masara utu naga abe ngohi ko tatulihukua o Yesusu ai ade-ade ma bukuoka naa. 31 Masara ai ade-ade utu naga o bukuoka naa, de gea tatulihukuoka la gea nginioo ka idadi niwingaku o Yesusu Una o Mesia de Unangoo Ma Jou o Ngofaka. Abe o Yesusoka de aino ngini niamake o wowango ma ngango ka hiado-adonika.
O Yesusu womahimatokoli ona iwitobaniikika de wahiheranga de o nawoko
1 De ipahaino o Yesusu womahimatoko ma moioli ona iwitobaniikika o Tiberia ma akere ma ngooto ma datekoka abe ihiromangoli o Galilea ma akere ma ngooto. De ma oraha womahimatoko hokonaa ma ade-ade: 2 Naga ona o Yesusu iwitobaniiki yatumidi yomatoomuino de ona abe naga yomakiniiki o Simono Peturusu, de o Tomasa abe iwiahoko o Hago, de o Natanele, una o Galilea ma nyawa, abe ai kapongo o Kana, de naga o Yohanese de o Yakobusu abe manga baba o Sebedeusu, de nagali yahinootoli o Yesusu iwitobaniikino. 3 De o Simono Peturusu womahingahu wato, "Marai ngohi naa ahi homa tatonohi o akeroko." De ona abe iwidodiawo ato, "Nako gea ka idadi ngomioo mininiiki." Ho gea yoiki o ngooto ma ngigorika de yofarene manga ngotiroko. Masara manga futu moiino yomahoma hiadono yahidetebiniye masara ko yamakeua o nawoko. 4 Ho duru o ngoru-ngorumino yolio de yoboaiha de o Yesusu naga dina o dowongioka ho iwimake womaokoino genangoka masara ona ko iwihiorikuahi gea Una. 5 De o Yesusu wahoko onangoko wato, "Hobata, marai nia nawoko ko iwa e?" De ona yopaluhu ato, "Igoungu, ko iwa." 6 De ahao o Yesusu wahuloko, wato, "Hobata, nia homa niaumoli o ngotiri ma nirakuku de ahao niamake o nawoko." Ho gea yaumoli de o nawoko kohangoe yongohama manga homaika hiadono gea ko idadiokaua ihidatauru angamoi iwoeholi ma nawoko. 7 De una iwitobaniikino abe duru o Yesusu widora, wotemo o Peturusika wato, "Maraioka gea Una nanga Baluhu!" Ka de gea woihene de o Peturusu ai baju wagorakoka de womahidubuluino de ai baju ka ma moi angamoi manga karajaanga ma goronaka ho kanganoino ai baju wahuputoka. Ho womabajuku ibooto de womangumoka ma akeruku de o Yesusiha wotiboko. 8 Masara, o Peturusu ai dodiawo utu iwihidoduruiha de manga ngotiri yomahioru ho manga homa ka ma moi ihidatauru angamoi aomangoka de o nawoko. Ma ko ikurutihaua ihidatauru manga homa angamoi kangano manga gurutoko ngade-ngade o metere o ratuhu moi dika. 9 Ka de ona youtiha de yamake o uku genangoka abe ma ngabohokahi de naga o ukuoka o nawoko iharongika de nagali o roti. 10 De o Yesusu wahuloko onangika wato, "Nia nawoko abe niahomaino, gea utu niaoino." 11 Ho o Peturusu manga ngotiroko wofarene de manga homa o akerokahi ho wahohe la ka ma moi de ma nawoko wohidatauru o dowongiha. De duru aomangoka manga homa de o nawoko ma ago-agomo hiadono naga o ratuhu moi de moritoa de hange o nawoko ma ago-agomo masara ngaro hokogea ma ngoe, ma, manga homa ko akakihua. 12 De ahao o Yesusu wahoko wato, "Niaino la ngini mata-mata, la holomo." De onangoka ko moiua yamoroini iwileha Unangika, "Ngona naa onaguna?" Angamoi naa iwihiorikoka Una gea manga Baluhu. 13 De ahao o Yesusu o roti gea waleino de homoi-homoiika wakokabelaka. Ka de o roti wahikokidoaka ibootino de ahao ma nawokoli gea wagorakino de wahikokidoakoli. 14 Gea o Yesusu womomikoka ai honengino de naa ma hange ibooto womahimatoko ona iwitobaniikika.
O Yesusu wihingahu o Peturusika ai karajaanga
15 Ho gea yolomo ibooto de o Yesusu wileha o Peturusika wato, "Simono, to Yohanese ai ngofaka, sarakia, nako ngona de ani dodiawo mata-mata naa, gea ka ngonahi nagou-goungu nohidora?" De o Peturusu wopaluhu o Yesusika wato, "Ahi Baluhu, Ngona nohioriki igoungu tonidora." De o Yesusu wotemo wato, "Ona abe ihiniiki tahiketero hoka o domba ma ngofaka ho naa kiani onangika natofo." 16 Ka de gea wotemo ibooto de o Yesusu wilehali o Peturusika wato, "Simono, to Yohanese ai ngofaka, "Igoungu ngona nohidora Ngohi?" De o Peturusu wipaluholi o Yesusika wato, "Ahi Baluhu, Ngona nohioriki igoungu tonidora." De o Yesusu wihibehehongo o Peturusika wato, "To Ngohi ahi domba napaliara." 17 Ma ka de wihulokoli hokogea ibooto de o Yesusu wilehali o Peturusika wato, "Simono, to Yohanese ai ngofaka, "Ngona nagoungu nohidora Ngohi?" De o Peturusu naa ai hininga duru ihuhaka ma titi naa ma hangeou o Yesusu wileha wato, "Igoungu, ngona nohidora Ngohi?" Ho o Peturusu wopaluhu o Yesusika wato, "Ahi Baluhu ko iwa moi la Ngona ko nohiorikua, ho ka Ngonahi nohioriki abe tagoungu tonidora." De o Yesusu wihibehehongoli wato, "Ngona kiani ahi domba natofo." 18 De o Yesusu ka wihingahuohi wato, "Peturusu, naa duru tagou-goungu tonihingahu, ma dihira abe ma oraha ngona ka o goohi, de ngona ma hirete ani baju nomahidapakitino, de ngona nomaputuhu o kiaika notagi-tagika. Ma naga ma oraha abe ahao iniperekioka, de ani giama ahao nomamongooika, de naga o nyawa utu inihidapakitika, abe iniao genangoka abe ko noigoua noiki." 19 Hokogea o Yesusu ai hingahu o Peturusika la itararono womahioriki abe hokokia ahao wohonenge la gea wohiboa o higiriiri Ma Jouika. De ahao o Yesusu wotemoli wato, "Peturusu, iti ngona ka ihikaika nohiniiki Ngohi!" 20 Ma oraha gea o Yesusu de o Peturusu yotagi-tagi yomakiniiki de o Peturusu womadogilioro de wimake ai dodiawo abe duru o Yesusu widora naga wahidoduruino. Naa una abe ma futu gea yomatoomuino yolomo de una naga womahiduiye hiadono womahitangonika o Yesusu ai aluoko de wileha wato, "Ahi Baluhu, gea onaguna wonihidoaka ani musuika?" Ho naa una gea abe o Yesusu de o Peturusu wahidoduruika. 21 Ho ka de una gea o Peturusu wimake de wileha o Yesusika wato, "Ahi Baluhu, sarakia una gea ma oraha unangoo wohonenge?" 22 De o Yesusu wopaluhu wato, "De ufa nafikiri ma titi una gea abe hokokia ma oraha wohonenge. Nako Ngohi toigo la wowango hiadono toboali gea ko to ngonaua ani putuhu. Iti ngona nagoungu nohiniiki ngohi." 23 Ho de ma titi o Yesusu ai demo gea hiadono naga o ade-ade itagi manga gogianongoruika ato naga womatengo ona o Yesusu iwitobaniikino abe una ko wohonengua. Masara ko enangua o Yesusu ai demo ma titi. Una ko wotemoua ko wohonengua ma wato, "Nako Ngohi toigo la wowango hiadono toboali gea ko to ngonaua ani putuhu." 24 De womatengo iwitobaniikino gea abe yoade-ade ato bote ko wohonengua, gea ngohi abe totulihi ma ade-ade naa. De mata-mata totulihi o bukuoka naa angamoi ngohi ma hirete de ahi lako hinooto tamake. Ho abe totulihuku to Yesusu ai ade-ade mata-mata naa duru ma gou-goungu mata-mata. 25 De naga ma ngoeohi o Yesusu wodiai abe ka idadi hoade-ade ma nako ai ade-ade mata-mata gea hotulihuku ngohi tato bote o buku ma ngi ko awedonua o duniaka naa angamoi ai ade-ade ma buku kiani kohangoeholi nako mata-mataika hoade-ade.