The New Testament of our Lord and Saviour Jesus Christ
1:1 'Jituh jereh tahtu ajuh Yesus Kristus, lihit Dawid lihit Abraham. Tahkan Abraham nyiring Dawid, karon-aran tahtu ajuh Yesus kolou pongotuh. 1:2-6a Abraham, Isaak, Yakub, Yahuda tutang konduang-konduangoh, Peres tutang Serah (inai iro, arai Tamar), Hesron, Ram, Aminadab, Nahason, Salmon, Boas (inaioh iorih Rahab), Obed (inaioh iorih Rut), Isai, tutang Lahca Dawid. 1:6b-11 Tahkan Lahca Dawid, nyiring kotihka uhtus Israel tonawan nokuh Babel tonyurat karon-arai uli tuh: Salomo (inaioh anai awan oruh Uria), Rehabeam, Abia, Asa, Yosapat, Yoram, Usia, Yotam, Ahas, Hiskia, Manasye, Amon, Yosia, Yekhonya tutang konduang-konduangoh. 1:12-16 Tahkan uhun lihit Israel tonawan nokuh Babel, nyiring Yesus konanak tonyurat karon-aran kolou uli tuh: Yekhonya, Sealtiel, Serubabel, Abihud, Elyakim, Asur, Sadok, Ahim, Eliud, Eleasar, Matan, Yakub, Yusep bosai Maria. Tutang tahkan Maria orih konanak Yesus ijo konohawot Kristus. 1:17 Jadi tahkan Abraham johcok Dawid paringoh anai ohpat balas liting. Tahkan Dawid johcok uhun lihit Israel tonawan nokuh Babel anai ohpat balas liting. Tahkan kotihka ulun lihit Israel tonawan nokuh Babel johcok Yesus konanak anai hino ohpat balas liting. 1:18 Koloutuh sorihta, tohou nganak Yesus Kristus. Inai-Oh iorih Maria kisok-ain Yusep. Tahpi hounumba iro kawin, korinah Maria ius botohi. Yusep eam kota'an ijo Maria botohi, tului kobasan Roh Pohotala. 1:19 Yusep kisokoh rih anai ihcobehti ulun ijo toturus te'et umba hukum agama. Jadi io kani ngombalang kisokoh rih tahpi honong toni-tonih, mangat Maria eam norima komia ang baun ulunaro. 1:20 Pondehan Yusep ngihtu-ngihtung aang orih, io nuhpi. Ang nuhpiuoh rih, io nohto ihcobehti molehkat Tuhan ijo homauh umba io, "Yusep uhtus Dawid a'ai mihkoh kawin umba Maria; tului anak ijo aang kotohiu orihrih nyolung bain kowasan Roh Pohotala. 1:21 Maria ahkan nganak ihcobehti anak bahkas. Anak orih pahtut ihko napa arai Yesus, tului Io ahkan nyolamat ulun-ukup-Oh tahkan dusan'ndo." 1:22 Paringoh rih nyolung kodorih, mangat nyolung inon ijo tonuhtui Tuhan nguha nabi-Oh, iorih, 1:23 "Ihcobehti dala ahkan botohi tutang nganak ihcobehti anak bahkas. Anak orih ahkan konohawot Imanuel." (Imanuel orih basa Ibrani ijo rimai, "Pohotala anai hihco ihto".) 1:24 Uliorih Yusep monyun io molalus inon ijo tonuhtui molehkat Tuhan rih ahkaioh. Io kawin umba Maria. 1:25 Tahpi kotahin Maria jaha nganak anakoh rih, Yusep eam hihco umba Maria. Tutang uli anakoh rih konanak Yusep napa araioh Yesus.
2:1 Yesus konanak ang lowu Betlehem ang tana Yudea, ang kotihka pomoretah Lahca Horodes. Ang ohkot rih pira-pira ahli ilmu potion tahkan hila Timur lombut nokuh Yerusalem. 2:2 Iro ngisok ang amo-amoh, "Ang umoh Anak orih, ijo konanak ahkan monjadi Lahcan ulun Yahudi? Ihkai nohto potion-Oh, lombut ang hila Timur, tutang ihkai lombut ahkan nyembah Io." 2:3 Kotihka Lahca Horodes ngonih auh orih, io tokohcit samasino, kodorih ka'a paring ulun ang Yerusalem. 2:4 Mahka io nyuhu imam-imam kopala tutang guru-guru agama ulun Yahudi lombut hopuhpung. Turus io ngisok umba iro, "Ang amoh ahkan konanak Lahca ijo tonobowot Pohotala?" 2:5 Iro muhtah, "Ang lowu Betlehem ang tana Yudea. Tului kolou atuh jari tonyurat bain ihcobehti nabi, 2:6 'Ihko Betlehem, ang tana Yahuda, Ihko samasino bohkonoh pongokoik aang louk lowu-lowu ijo bosewut ang Yahuda. Tului tahkan ihko ahkan lombut ihcobehti okon ijo ahkan okon ijo ahkan ngokon uhkup-Ku Israel.' " 2:7 Uli dahpot kotorangan orih, Horodes na'ah ahli-ahli potion tahkan Timur rih socara toni-tonih. Turus io ngisok umba iro mira pasoh potion rih nopara gitan. 2:8 Uliorih io nyuhu iro nokuh Betlehem hawui pohtoh tuh, "Tulak, ngurah Anak orih hawui toliti. Tutang amat ihkam sombang Io, nuhtui ahkak'ku, mangat ahku ka'a tulak nyembah Io." 2:9-10 Turus tulak iro. Iro nohto hino potion ijo iro nohto lomoi ang hila timur. Eam inon kojorih'ndo nohto potion rih! Potion rih nosolu iro, turus tondo pas ang ngosan unuk Anak orih. 2:11 Iro nyolong ahkan luwang lohpou orih, tutang nohto Anak rih umba Maria inai-Oh. Iro suhkun tu'ut tutang nyembah Anak rih, turus nguap unuk ponahtou'ndo, tutang nonga ahkai-Oh bulou, manyan, tutang mur. 2:12 Pohotala ningak iro ang nuhpin'ndo mangat a'ai huli nokuh Horodes. Nyolung iro buli nguha jalan bohkon. 2:13 Uli lihkut ahli-ahli potion rih tulak, molehkat Tuhan ngorinah aropoh ahkan Yusep ang nuhpiouoh. Molehkat rih nuhtui, "Horodes nohuang ngurah Anak rih, ahkan munu Io. Tului orih monyunlah, ngomin Anak rih tutang inai-Oh pindah nokuh Misir. Mohcon ang anan, nyiring Ahku mander hino ahkan'mu." 2:14 Yusep monyun, tutang ngolomi orih ka'a io ngomin Anak orih honong inai-Oh mokila nokuh Misir. 2:15 Iro mohcon ang anan nyiring Horodes mahtoi. Kodorih nyolung inon ijo konohawot Tuhan hopatau nabi-Oh, koloutuh, "Ahku na'ah Anak-Ku tahkan Misir." 2:16 Kotihka Horodes ngotaan ijo ahli-ahli potion tahkan hila Timur rih ngobalik io, io bosingi samasino. Turus io moretah nyuhu munu paring anak bahkas ijo umuroh duo toun nokuh pinda, ang Betlehem tutang hokodilingoh. Jorih tohorong umba kotorangan ijo dahpotoh tahkan ahli-ahli potion rih tohou ohkotoh potion rih gihtan. 2:17 Kodorih nyolung inon ijo pu'u tonuhtui bain Nabi Yeremia, iorih, 2:18 "Ang Rama konahan auh-tahtum, korunguh-korahing tutang tangih. Rahel nahtum anak-anakoh; io eam kani tongoto'u tului iro jari eam aro." 2:19 Uli Horodes mahtoi, kotihka Yusep ang Misir ihcobehti molehkat Tuhan ngorinah aropoh hino ahkan Yusep ang nuhpiu. 2:20 Molehkat rih nuhtui, "Ulun-ulun ijo kani munu Anak rih ius mahtoi. Tului orih monyun, ngomin Anak rih honong inai-Oh tutang buli nokuh Israel." 2:21 Yusep ka monyun turus ngomin Anak rih hawui Maria buli nokuh Israel. 2:22 Tahpi uliorih Yusep ngonih, ijo Arkelaus, anak Horodes jari ngati amaioh monjadi Lahca tana Yudea. Jadi Yusep mihkoh tulak nokuh anan. Uli io dahpot pohtoh Tuhan hototurus a'ang nuhpiuoh, io tulak nokuh tana Galilea. 2:23 Ang anan io mohcon ang lowu ijo arai Nasaret. Hawui kodorih nyolung inon ijo tonuhtui bain nabi-nabi tohou Anak rih: "Io ahkan konohawot Ulun Nasaret."
3:1 Ang ohkot orih lombut Yohanes Popondus ang padang balambah ang Yudea tutang nopara bokotbah. 3:2 "Hubah tahkan dusa-dusan'kam" hioioh, "tului Pohotala ahkan jion moretah kolou Lahca!" 3:3 Yohanes tuhrih ulun ijo kohondak bain Nabi Yesaya aang auh-auhoh tuh, "Anai ulun ijo na'ah-na'ah ang padang balambah, 'Nyodiaohrih jalan ahkan Tuhan; morahta jalan ahkai-Oh.' " 3:4 Yohanes hapapokahjan bulun unta. Pohtong kahangoh tahkan uhpak, tutang ukuioh mokalap tutang oling-lawung. 3:5 Aro ulun tahkan Yerusalem, tahkan kodiling tana Yudea tutang tahkan tana-tana ang kodiling Sungoi Yordan, lombut nokuh Yohanes. 3:6 Iro mongahku karon-dusan'ndo, tutang Yohanes mopondus iro ang Sungoi Yordan. 3:7 Aro ka'a ulun Parisi tutang Saduki lombut nokuh Yohanes ahkan tonopondus. Tahpi ohkot io nohto iro lombut, io nuhtui umba iro, "Ihkam ulun ja'at! Iai ijo nuhtui, ijo ihkam duon boliwus tahkan hukum Pohotala ijo ahkan lombut? 3:8 Ngorinah hapan ang gawin'kam ijo ihkam ius hubah tahkan dusa-dusan'kam. 3:9 A'ai ngohu ihkam dahpot liwus tahkan hukuman tului homauh ijo Abraham anairih tahtu ajuh'kam. Ingat, tahkan bahtu-bahtu tuh ka Pohotala sanggup napa lihit ahkan Abraham! 3:10 Otak jari sodia ahkan nowong bahtang kahju nyiring uhat-uhatoh. Nyinong bahtang ijo eam mua ijo pios, ahkan tonowong tutang tonyahkah nokuh luwang baho. 3:11 Ahku mopondus ihkam umba danum, ahkan ngorinah ijo ihkam jari hubah, tahkan dusa-dusan'kam; tahpi ijo ahkan lombut uli ahku, ahkan mopondus ihkam umba Roh Pohotala, tutang baho. Io ijo hajo umba ahku. Ahkan nguwat talin sopahtu-Oh ka ahku eam gunai. 3:12 Ang longoi-Oh anai tahap hapai ngiap paring paroi-Oh nyiring borasih. Usin paroi ahkan tonipun baiu-Oh nokuh koraking, tahpi paring ahpihoh ahkan sonaha-Oh, aang baho ijo eam tou bolop." 3:13 Ang ohkot orih Yesus tulak tahkan Galilea nokuh Sungoi Yordan. Ang anan Io lombut nokuh Yohanes tutang nyawot tonopondus. 3:14 Tahpi Yohanes mocuba nulak sawot Yesus rih. Yohanes nuhtui, "Ahku ijo kopahtutoh tongopondus bain Amai. Huntuh malah Amai ijo lombut nokuh ahku." 3:15 Tahpi Yesus muhtah, "Nauhoh ih ahkan uhuntuh tului umba kolouorih ihto jari nguan paring ijo tongohondak Pohotala." Jadi Yohanes mopondus Yesus. 3:16 Uli tonopondus, Yesus jeleng soluka tahkan danum ang Sungoi rih. Songela langit bokuap tutang Yesus nohto Roh Pohotala nosuluh kolou bulung dala nokuh ngosan kuhung-Oh. 3:17 Uliorih konahan auh Pohotala nuhtui, "Jituh Anak-Ku ijo Ahku ngasih-Oh. Io ngojorih ahtoi-Ku."
4:1 Uliorih Yesus konitot bain Roh Pohotala nokuh padang balambah ahkan tonihkos bain sehtan. 4:2 Ohpat pulu ondou ohpat pulu ngolomi Yesus eam kuman. Turus Io komo bolo'u. 4:3 Sehtan lombut tutang nuhtui, "Ihko Anak Pohotala, kowa? Nah, nyuhu bahtu-bahtu tuh monjadi luhte." 4:4 Yesus mutah, "Ang luwang Surat Borasih tonyurat: Ulun eam tou bolum tahkan luhte ih, tahpi ka'a tahkan nyinong auh ijo konohawot bain Pohotala." 4:5 Uliorih sehtan ngomin Yesus nokuh Yerusalem lowu brasih, tutang ngina Io, ang ngosan bohuwung Lohpou Tuhan. 4:6 Turus sehtan nuhtui umba Io, "Ihko Anak Pohotala, kowa? Amat kodorih nomarang nokuh pinda; tului ang luwang Surat Borasih anai tonyurat koloutuh, 'Pohotala ahkan nyuhu molehkat-molehkat-Oh ngolindung Ihko, iro ahkan noharang Ihko umba longon'ndo, mangat pa'am ka eam totungging ang bahtu.' " 4:7 Yesus mutah, "Tahpi ang luwang Surat Borasih tonyurat ka'a, 'Ara ihkam nikos Tuhan Pohotalan'kam.' " 4:8 Pongohuli sehtan ngomin Yesus hino nokuh puruk ijo isung tu'u tutang nunjuk ahkan-Oh paring kolahca'an ang kolunon tutang paring kotahtouoh. 4:9 Turus sehtan nuhtui umba Yesus, "Paringoh tuh ahkan ahku nonga ahkan-Mu, amat Ihko suhkuntu'ut nyembah ahku." 4:10 Yesus mutah, "Hahtun ihko, o ponihkos! Ang luwang Surat Borasih tonyurat: Nyembah Tuhan Pohotalan'kam, tutang nonga horomat ahkai-Oh ih!" 4:11 Kojoriaioh sehtan nohtah Yesus, tutang molehkat-molehkat ka lombut mohalu Yesus. 4:12 Kotihka ngonih ijo Yohanes ponosolong ang luwang sipir, Yesus mokila nokuh Galilea. 4:13 Io nohtah Nasaret, turus mohcon ang Kapernaum, ang saran Danou Galilea, ang tana Zebulon tutang Naftali. 4:14 Tului Yesus nguan aang orih, nyolung inon ijo tonuhtui bain Nabi Yesaya: 4:15 "Tana Zebulon tutang tana Naftali ang jalan nokuh danou, pohoi Sungoi Yordan, Galilea tana bohkon Yahudi! 4:16 Uhtus ijo bolum ang luwang kopindong jari nohto koboloang ijo ngorolondang! Bagi ijo mohcon a'ang lowun kopindong popahtoi jari lombut koloang ngorolondang!" 4:17 Tahkan ohkot orih Yesus nopara mborihta, "Hubah tahkan dusa-dusan'kam, tului Pohotala ahkan jeleng moretah kolou Lahca!" 4:18 Kotihka Yesus beteng nyalan ang saran Danou Galilea, Io nohto duo behti pongohcin, iorih Simon (ijo pongo hino konohawot ka'a Petrus) doro arioh Andreas. Iro beteng nawan ohcindanum ang danou rih umba jala. 4:19 Yesus nuhtui umba iro, "Olai, umba Ahku, Ahku ahkan majar ihkam monjala kolunon." 4:20 Nyolung iro nohtah jala'ndo, turus nutut umba Yesus. 4:21 Yesus nyalan turus, turus nohto hino duo behti ulun hokonduang ijo bohkon, iorih Yakobus tutang Yohanes anak-anak Sebedeus. Iro hihco hombo-homboh umba amai'ndo, rahat ngorong jala ang luwang alut, Yesus na'ah iro ka'a, 4:22 tutang iro hunrihka'a nohtah alut tutang amaioh turus ngohasu Yesus. 4:23 Ang Galilea, Yesus mongodiling ang sohopus tana tutang majar ang lohpau sombayang. Io mborihta Kabar Hinut, ijo Pohotala ahkan moretah. Tutang Io ka'a ngopios ulun-ulun mondam tutang cacat. 4:24 Kabar tohou Yesus rih tosiar johcok ang hapus tana Siria, nyiring aro ulun lombut nokuh Io. Iro ngomin ulun-ulun ijo ngarot mahca-mahcam koporos tutang kosusah. Ulun-ulun ijo tonyorupang roh ja'at, ijo poros nyo'on, tutang ijo bolomukaet paringoh konopios bain Yesus. 4:25 Aro samasino ulun ijo ngohasu Yesus aang ohkot orih. Anai ijo lombut tahkan Galilea, anai ijo tahkan Sopulu Lowu, tahkan Yerusalem, tahkan Yudea, tutang anai hino ijo tahkan lowu ang pohoi Yordan.
5:1 Ohkot Yesus nohto ulun aro rih, Io nuhkat nokuh pupung lukuh. Uli Io tuot, murid-murid-Oh lombut doni umba Io, 5:2 turus Io nopara majar iro: 5:3 "Kosanangsolamat ahkan ulun, ijo mokomo eam badaya tutang tihkas bohapang ang Tuhan ih; iro rih anai anak-ukup ain Pohotala! 5:4 Kosanangsolamat ahkan ulun ijo poros ahtoi; Pohotala ahkan ngojorih iro! 5:5 Kosanangsolamat ahkan ulun ijo randah ahtoi; Pohotala ahkan molalus bowot-Oh ahkan'ndo! 5:6 Kosanangsolamat ahkan ulun ijo jolik nguan aang ijo kohondak Pohotala; Pohotala ahkan medabolai iro! 5:7 Kosanangsolamat ahkan ulun ijo ngasi ulun bohkon; Pohotala ahkan ngasi iro ka'a! 5:8 Kosanangsolamat ahkan ulun ijo borasih ahtoioh; iro ahkan kosono Pohotala. 5:9 Kosanangsolamat ahkan ulun ijo ngomin kobuah ang louk kolunon; Pohotala ngahku iro kolou anak-Oh! 5:10 Kosanangsolamat ahkan ulun ijo ngarot koporos tului nambit konohuang Pohotala; iro monjadi anak-ukup ain Pohotala! 5:11 Kosanangsolamat ahkan ihkam amat tonosalan, tonoporos tutang tongonja'at tului Ahku. 5:12 Nabi-nabi ijo bolum hounumba ihkam ka'a jari tongoporos kodorih. Jorih tutang jerah ihkam, tului hajo upah aang soruga ijo tonyodia Tuhan ahkan ihkam." 5:13 "Ihkam anairih tonyu ahkan kolunon. Amat tonyu jari tawah, tou ka'a konomohit huli? Eam anai gunaioh hino, molekan tongondian tutang tonihcak-nihcak ulun. 5:14 Ihkam anairih koloang kolunon. Lowu ijo tomangun ang pupung puruk eam dapot tonyuhuk. 5:15 Eam aro ulun ijo molihkit sumbu turus nuhtup sumbu rih umba potoran. Io malah ahkan ngina sumbu rih, ang unuk sumbu, mangat nonga koloang ahkan nyinong ulun ang luwang lahpou. 5:16 Kodorih ka'a koloang'kam, harus nyingah ang toharep ulun, mangat iro nohto gawin-gawin'kam ijo pios, turus monara Amai'kam ang soruga." 5:17 "A'ai ngohu ijo Ahku lombut ahkan ngudap hukum Museh tutang ajar nabi-nabi. Ahku lombut eam ahkan ngudapoh, tahpi ahkan mongorinah rimai ijo kotu'uioh. 5:18 Ingat! Kotahin langit tutang tana magun anai, ihco hurup ata'ai tihtik ijo pongokoik ka, ang luwang turat rih, eam ahkan tongudap, amat paringoh jaha nyolung! 5:19 Bain kotului orih, ia-iai molanggar anai ihco, tahkan louk poretah-poretah orih, oluka ijo pongokoikoh tutang majar ulun nguan kodorih ka'a, ahkan jadi ijo paling pongokoik ang louk uhkup ain Pohotala. Sobalikoh, ia-iai molalus poretah-poretah orih tutang majar ulun bohkon nguan kodorih ka'a, ahkan monjadi hajo ang louk uhkup ain Pohotala. 5:20 Jadi ingatrih: Ihkam eam touharapan, monjadi uhkup ain Pohotala, amat eam molowi umba guru-guru agama tutang ulun-ulun Parisi a'ang hal nguan konohuang Pohotala!" 5:21 "Ihkam ngotaan ijo ang tahtu ajuh ihto anai ajar kolou tuh: Ara munu; iaibewe munu, harus tonosara. 5:22 Tahpi huntuh, Ahku nuhtui ahkan'kam, ia-iai bosingi umba ulun bohkon, ahkan tomosara; tutang ia-iai hololea ulun bohkon ahkan tomosara ang toharep Majelis Agama. Tutang ia-iai ngohawot umba ulun bohkon, 'Uong', harus tonyahkah nokuh ahpui norahka. 5:23 Bain kotului orih, amat anai ihcobehti ang louk ihkam ijo betengoh nyarah ponongaoh ahkan Pohotala, turus toingat ijo anai ihcobehti ulun ijo poros ahtoioh toharep io, 5:24 kopiosoh io nohtah houn pononga orih ang baun mesbeh, turus tulak hokobuah umba ulun rih. Uliorih, dahpot io huli tutang nyorah ponongaoh ahkan Pohotala. 5:25 Jahkaoh anai ulun ngadu ihkam nokuh majelis hakim, hokobuah umba io amat magun anai ohkot sounumba johcok ang majelis. Amat eam, ulun rih, ahkan nyarah ihkam nokuh hakim, ijo ahkan monyorah ihkam ahkan polisi. Turus polisi orih posolong ihkam nokuh luwang sipir. 5:26 Tutang ingat: Musti ihkam eam ahkan duon soluka tahkan sipir rih, hounumba paring donda'kam lunas samasino." 5:27 "Ihkam ngotaan puna anai ajar koloutuh: Ara hobandung. 5:28 Tahpi huntuh Ahku nuhtui ahkan'kam: iai ka'a nopahjah ihcobehti bawi tutang lombut kojolik ahtoioh, ulun rih jari hobandung umba ulunbawi orih rih aang ahtoioh. 5:29 Amat mahta hila kotoun'kam, kotuluioh ihko bodusa, ngoruit tutang dian mahtam rih! Pios nihou ihco pokakas behtin'kam, amattahkan sohopus behtin'kam konindiu nokuh luwang norahka. 5:30 Amat longom kotoun'kam, kotului orih ihko bodusa, totok tutang dian longom rih! Labih pios nihou silai longom, tahkan nyinong behtin'kam nyolong nokuh norahka." 5:31 "Anai ka'a ajar koloutuh: Nyinong ulun ijo nulang oruhoh pahtut nonga surat kotulang ahkaioh. 5:32 Tahpi huntuh Ahku nuhtui ahkan'kam: ia-iai ijo nulang oruhoh padahar bawi orih eam nyoleweng, kotuluioh oruh rih hobandung, amat oruhoh rih kawin hino. Tutang ia-iai ijo kawin umba ulunbawi ijo tonulang bosaioh rih, io hobandung ka'a." 5:33 "Ihkam ngotaan ijo a'ang tahtu ajuh ihto, anai ajar koloutuh: Ara mungkir bowot. Inon ijo ius ihkam mbowotoh umba tulut ang toharep Pohotala, harus ihkam nguaioh. 5:34 Tahpi huntuh Ahku nuhtui ahkan'kam: ara samasino nulut, pios aang langit, tului langit rih unuk pododusan Pohotala, 5:35 oluka aang tana, bain tana orih anai lahpik pa'ai-Oh; ata'ai aang Yerusalem, bain Yerusalem rih lowun Lahca hajo. 5:36 Ara ka'a hotulut aang kuhung'kam, kotului ihko bongom eam ta'am napa balou monjadi puti tutang mitom, olu tihkas ihco kolihit ka. 5:37 Nuhtui iou, amat 'Yo' ata'ai 'Eam' -- molowi umba orih, polombutoh tahkan sehtan." 5:38 "Ihkam ngota'an puna anai ka'a ajar koloutuh: Mahta tokiri mahta, nyihpo tokiri nyihpo. 5:39 Tahpi huntuh Ahku nuhtui ahkan'kam: ara malos kohiri toharep ulun ijo nguan koja'at umba'kam. Sobalik'oh amat ulun ngahpek kohcom'kam hila kotoun'kam nauh io ngahpek kohcom hila komuloi'kam ka'a. 5:40 Tutang amat ulun ngadu ihkam nokuh hakim tutang nutut hatin'kam, nonga ka'a ahkaioh kolombi ombu'kam ka'a. 5:41 Amat ihcobehti pongowasa maksa ihkam ngohtun ramuioh ijo kahcuioh ihco kilomehter, ngohtunoh iou komahcu duo kilomehter. 5:42 Amat ulun nyawot aangihco umba'kam tonga ahkaioh. Tutang ara ka'a nulak ulun ijo kani nginyam aangihco tahkan ihko." 5:43 "Ihkam ngotaan ijo anai ka'a ajar koloutuh: kasih umba injah-injah'kam tutang nyingi musuh-musuh'kam. 5:44 Tahpi uhuntuh Ahku nuhtui ahkan'kam: kasih musuh-musuh'mu tutang bodo'a bagi ulun-ulun ijo ngarana ihkam, 5:45 mangat ihkam monjadi anak-anak Amai'kam ijo ang soruga. Kotului Pohotala poloang mahtanondou-Oh, bagi ulun ijo nguan ijo pios, tutang bagi ulun ijo nguan koja'at ka'a. Io noposuluh uhjan bagi ulun ijo nguan komorong, tutang bagi ulun ijo nguan koja'at ka'a. 5:46 Kotului amat ihkam ngasih baya umba ulun ijo ngasih ihkam ih, ahkan inon Pohotala harus malos gawin'kam rih? Eamkah ponagih-ponagih pajak ka'a mahi nguan ang kolouorih? 5:47 Tutang amat ihkam nonga tabe tihkas ahkan injah-jolahan'kam ih, inon kolowiuoh? Ulun-ulun ijo eam ngosono Pohotala ka nguan kodorih! 5:48 Amai'kam ijo ang soruga ngasih paring ulun hawoi soporuna. Ihkam harus kodorih ka'a."
6:1 "Ngingat, ara ihkam nguan kopahtut agama ang toharep ulunaro, mangat tonopahjah ulun iu. Amat ihkam nguaioh kodorih, ihkam eam ahkan tononga upah bain Amai'kam ang soruga. 6:2 Jadi amat ihkam nonga sodakah ahkan ulun porosbolum, ara ngembar-ngembor hal rih, kolou ijo konuan bain ulun-ulun pura-pura. Iro ijo kani nguan orih ang luwang lohpou sombayang, tutang ang jalan-jalan hajo, mangat tonohoromat ulun. Ingat, iro jari norima upahoh. 6:3 Tahpi ihkam, amat ihkam nonga sodakah, nonga honong toni-tonih, nyiring eam aro ijo ngotaan. 6:4 Nauh, gawin'kam rih, eam kota'an bain ia-iai ka, kocoali Amai'kam ang soruga. Io nohto gawin'kam ijo toni-tonih rih tutang ahkan nonga upah ahkan'kam." 6:5 "Amat ihkam bodo'a, ara kolou ulun-ulun ijo jolik pura-pura. Iro jolik bodo'a hawui tombok ang lohpou sombayang tutang sapang jalan mangat tonohto ulun. Ingat, orih upah ijo'ndo jari norimaoh. 6:6 Tahpi amat ihkam bodo'a nyolong nokuh tahkun tutang ngatop bauntukang, turus bodo'a ahkan Amai'kam ijo eam gihtan rih. Mahka Amai'kam ijo nohto ang konuan'kam ijo toni-tonih orih ahkan nonga upah ahkan'kam. 6:7 Amat ihkam bodo'a, a'ai dulangduli, kolou ulun-ulun ijo eam ngosono Tuhan. Iro ngohu, ijo tonyawot iro ahkan konahan, tului do'a'ndo ijo ombu orih. 6:8 Ara kolou iro. Amai'kam jari kota'an inon ijo ihkam poruluoh, hounumba ihkam nyawotoh. 6:9 Jadi bodo'arih koloutuh, 'Amai ihkai ang soruga: Ihko Pohotala Ijo Tukan. Keleh Ihko tonyembah tutang tonohoromat. 6:10 Ihko Lahcan ihkai. Keleh Ihko moretah ang tana tutang kohondak-Kam tonuhit kolou ang soruga. 6:11 Nonga aang ondou tuh ukun ijo ihkai poruluoh. 6:12 Ngapunrih ihkai tahkan kosalan'kai, kolou ihkai jari ngapunoh ulun ijo bosala umba ihkai. 6:13 Ararih mohonou ihkai nihou porocaya aang ohkot ihkai tonihkos tahpi nguwat ihkai tahkan kowasa ang ja'at. Ihkorih Lahca ijo bokowasa tutang tonohoromat nyiring turus-jahamoh. Amen.' 6:14 Amat ihkam ngapun ulun, ijo bosala umba ihkam, Amai'kam ang soruga ka ahkan ngapun kosalan ihkam. 6:15 Tahpi amat ihkam eam ngapun kosalan ulun bohkon, Amai'kam ang soruga ka eam ahkan ngapun kosalan'kam." 6:16 "Amat ihkam puasa, ara boum mosom kolou ulun ijo jolik bopura-pura. Iro ngubah tapan baui, mangat paring ulun ngota'an ijo iro puasa. Ingat, orih-rih upah ijo iro jari norimaoh. 6:17 Tahpi amat ihkam puasa, porasih boun'kam tutang nyuruioh balou'kam, 6:18 mangat eam aro ijo kota'an, ijo ihkam bopuasa, kocoali Amai'kam ijo eam gihtan orih iou. Io nohto gawin'kam ijo bosuhuk rih, tutang ahkan nonga upah ahkan'kam." 6:19 "Ara nipun ponohtou ahkan arop'kam ang kolunon tuh, ang amoh busuk tutang tagar tou morusakoh, tutang ponahkou lombut nahkouoh. 6:20 Labih pios nipun ponohtou ang soruga, ang amoh busuk tutang tagar eam morusakoh, tutang ponahkou eam lombut nahkouoh. 6:21 Kotului ang umoh ponahtou'kam, ang anan ka'a ahtoi'kam!" 6:22 "Mahta anairih sumbu ahkan behti. Amat mahtan'kam tokining, sohapus behtin'kam tarang-boloang. 6:23 Tahpi amat mahtan'kam kabus sohapus behtin'kam pindong-kihtop. Jadi amat sumbu ijo anai aang arop-mi orih pindong, eaminon kotingi-tingitoh kopindong rih!" 6:24 "Earo ihcobehti ka dahpot bogawi bagi duo behti tuan. Tului io ahkan labih ngasih ijo ihco, tahkan ijo bohkon. Ata'ai io labih te'et umba tuan ijo ihco, tahkanumba ijo bohkon. Kodorih ka'a umba ihkam. Ihkam eam duon bogawi bagi Pohotala tutang bagi ponahtou-ponuhan ka'a. 6:25 Kotului orih ingat; ara mihkoh tohou pombolum'kam, iorih inon ijo ahkan ihkam kumai tutang ngorih, ata'ai inon ijo ahkan ihkam hapaoh. Eamkah pombolum ijo molowi umba ukun, tutang behti molowi umba hahtin? 6:26 Topahjah ohcin na'ang pinda langit. Iro eam ngombulan tutang ngohtom, tutang eam ka'a nipun bua umoioh a'ang luwang koraking. Oluka kodorih Amai'kam ijo ang soruga mohaga iro! Eamkah ihkam molowi borega umba ohcin na'ang rih? 6:27 Iai tahkan ihkam ijo tului kihkohoh duon ngombu umuroh oluka honjiot? 6:28 Ombai ihkam mihkoh tohou hatin'kam? Notuneng dolak-dolak bahkung ijo bolum ang padang. Dolak-dolak orih eam bogawi tutang eam natanghatiu; 6:29 tahpi Lahca Salomo ijo kodorih kotahtou ka, eam hopokajan ijo molowi kopiosoh tahkan dolak-dolak orih! 6:30 Uru ang padang, tumbu ondou tuh, tutang hawun sonyaha opah. Kodorih Pohotala jari ngopiosoh uru rih, kodorih kopiosoh. Inonhino ihkam! Tahpi ihkam kurang porocaya! 6:31 Ara mihkoh tutang nuhtui 'Inon ijo ahkan ihto kumai' ata'ai 'Inon ijo ahkan ihto ngorih' ata'ai 'Inon ijo ahkan ihto hapaoh'? 6:32 Hal-hal orih turus konurah, bain ulun-ulun ijo eam kosono Pohotala. Podahar Amai'kam ijo ang soruga kota'an, ijo ihkam porulu paring orih. 6:33 Jadi, ngurahjalan houn, mangat Pohotala moretah ngosan pombolum'kam, tutang nguan iou kohondak-Oh. Mahka paring ijo bohkon, ahkan tononga Pohotala ka'a ahkan'kam. 6:34 Bain tului orih, a'ai mihkoh tohou ondou hawun. Kotului ondou hawun anai hino kihkoh aiu bongoi. Ondou tuh jari suhkup kosusahoh, eam usah ndahang hino."
7:1 "A'ai mosara ulun bohkon, mangat ihkam bongom ka'a, ara tomosara bain Pohotala. 7:2 Kotului koloukuwoh ihkam mosara ulun bohkon, kodorih ka'a Pohotala ahkan mosara ihkam. Tutang tihpong ijo ihkam hapa bagi ulun bohkon, ahkan tonohapan ka'a bain Pohotala bagi ihkam. 7:3 Ombai ihkam nohto poruhukkahju ang mahtan konduang'kam, hunanai tohtokkahju luwang mahtan'kam bongom, eam ihkam nohtoanioh? 7:4 Koloukuwoh ihkam dahpot nuhtui umba konduang'kam, ''Kan'toi ahku polua poruhukkahju rih tahkan mahtan'mu,' hunanai ang mahtan'kam bongom anai tohtokkahju? 7:5 Oi ulun pura-pura! Dian houn tohtokkahju tahkan mahtan'kam bongon, punan ihko nohto honong botarang, tutang dahpot dian poruhukkahju tahkan mahtan konduang'kam. 7:6 Ara nonga ramu ijo borasih ahkan asu, mangat asu rih ara ngulos turus nosahap ihkam. Tutang ara nonga hitan ahkan urak, mangat urak rih ngihcak-ngihik hitan orih." 7:7 "Nyawot, mahka ihkam ahkan norima. Ngurah, mahka ihkam ahkan nyombang. Negah bauntukang, mahka bauntukang konuap bagi ihkam. 7:8 Tului ulun ijo nyawot ahkan norima; ulun ijo ngurah ahkan nyombang; tutang ulun ijo negah, ahkan konuap bauntukang. 7:9 Ang louk ihkam, kuwoh anai amai ijo nonga bahtu ahkan anakoh amat io nyawot luhte? 7:10 Ata'ai nonga lohi amat io nyawot ohcin? 7:11 Oluka ihkam ja'at, ihkam tou ka'a nonga ijo hinut ahkan anak-anak'kam. Mahi hino Amai'kam ang soruga! Io molowi hino ahkan nonga ijo hinut ahkan ulun ijo nyawot umba Io. 7:12 Nguan ulun bohkon, kolou ihkam jolik tononguan bain iro. Orihrih usin hukum Museh tutang ajar nabi-nabi." 7:13 "Nyolong nguha bauntukang ijo sihki, tului bauntukang tutang jalan ijo nitu nokuh norahka hajo tutang lumbah, tutang aro ulun ijo nitoioh. 7:14 Tahpi sihki tutang bohali bauntukang tutang jalan ijo ngomin ulun nitu pombolum. Tutang baya honjiot rih ulun ijo nyombang orih." 7:15 "Rondo-rondong toharep nabi-nabi polasu. Iro lombut nokuh ihkam hobukus bulu tobiri, tahpi iro kotu'ui kolou horomaung ijo bosiak. 7:16 Ihkam ahkan ngosono iro tahkan bua gawinoh. Ruwut duhi eam ahkan polua bua anggur tutang bahtang duhi eam momua bua sikun. 7:17 Tahkan bahtang ijo subur anaimua bua ijo pios, tutang tahkan bahtang ijo eam pios anaimua bua ijo ja'at. 7:18 Bahtang ijo subur eam dahpot mua bua ijo maram, tutang bahtang ijo ja'at eam duon mua bua ijo pios. 7:19 Nyinong bahtang ijo eam mua bua ijo pios, tonowong tutang tonyaha. 7:20 Kodorih hino umba nabi-nabi pobula. Ihkam ahkan ngosono iro tahkan bua gawiuoh." 7:21 "Eam paring ulun ijo na'ah Ahku, 'Tuhan, Tuhan', ahkan nyolung anak uhkup Pohotala, tahpi baya ulun-ulun ijo numbun kohondak Amai-Ku ijo ang soruga. 7:22 Ang Ondou Kiamat aro ulun ahkan nuhtui umba Ahku, 'Tuhan, Tuhan, eam umba aran-Mu ihkai jari mborihta pohtoh Pohotala? Tutang eamrih umba aran Tuhan ka'a ihkai jari muhko roh-roh ja'at hawui nguan aro tandahelan?' 7:23 Tahpi Ahku ahkan muhtah, 'Ahku eam pu'u ngosono ihkam! Hahtun tahkan ohtoi, ihkam ijo nguan koja'at!' " 7:24 "Nah, ulun ijo ngonih auh-Ku tuh, tutang numbun orih, sama kolou ulun horati ijo nombok lohpouoh ang ngosan bahtu. 7:25 Ang ohkot uhjan borohos, tutang danum suhu lombut, hawui bahiu karas nihtu lohpou rih, lohpou rih eam bolukang tului jari tonombok ang ngosan bahtu. 7:26 Tutang ulun ijo ngonih auh-Ku tuh, tahpi eam numbunoh io sama kolou ulun baleh ijo nombok lohpouoh ang ngosan baras. 7:27 Ang ohkot uhjan borohos tutang danum suhu lombut hawui bohiu hajo nihtu lohpou rih, lohpou rih bolukang. Tutang korusakoh karas samasino!" 7:28 Kolaiuoh Yesus tondo majar, tutang ulun-ulun ijo anai ang anan, helan samasino ngonih ajar-Oh. 7:29 Tului Io majar umba pongaroh eam kolou guru-guru agama ain iro.
8:1 Yesus mosuluh tahkan pupung puruk tutang aro ulun ngohasu Io. 8:2 Ang ohkot orih lombut ihcobehti ijo hoponyahkit belang ijo ngoli. Io suhkuntu'ut ang toharep Yesus hawui nuhtui, "Amai, amat Amai kani, Amai dahpot ngopios ahku." 8:3 Yesus nambit ulun rih hawui nuhtui, "Ahku kani. Pios ihko!" Uhun orih ka'a ponyahkitoh nihou. 8:4 Turus hion Yesus umba io, "Ingat! A'ai nyorihta ahkan ia-iai ka'a. Tahpi tulak nokuh imam, tutang nyawot ang io ahkan kopastianoh ihko jari pios. Uliorih nonga pononga ijo tomoretah Museh, kolou bukti ahkan ulun-ulun ijo ihko tu'u-tu'u jari pios!" 8:5 Ohkot Yesus nyolong nokuh Kapernaum, ihcobehti porowira Ruma lombut nyombang Io, tutang nyawot dohop umba Io. 8:6 "Amai" hion porowira rih, "Pohalu'ku mondam ang lohpou. Io kaling pale-palek ang unukoh tiruh tutang ngarot samasino." 8:7 Hion Yesus, "Ahku ahkan tulak ngopios io." 8:8 "Eam usah Amai," hion porowira rih, "ahku eam pahtut norima Amai ang lohpou'ku. Amai moretah ih. Noin pohalu'ku rih pios. 8:9 Tului ahku ka'a harus minda poretah ijo diang. Tutang ang pinda ahku anai karon-sorodadu ijo harus minda poretah'ku. Amat ahku nyuhu ihcobehti sorodadu, 'Tulak!' io ka tulak. Ahku nuhtui ahkan ijo bohkon, 'Nokuh ohtoi!' io ka nokuh; tutang amat ahku moretah pohalu'ku, 'Nguan tuh!' io ka nguaioh." 8:10 Ohkot Yesus ngonih inon ijo tonuhtui bain porowira rih, Io helan samasino. Turus Io nuhtui ahkan ulun-ulun ijo anai homboh Io, "Eam inon ulun tuh. Ang louk ulun Israel ka jaha pu'u Ahku nyombang kaporocaya kohajon tuh! 8:11 Tu'u-tu'u! Aro ulun ahkan lombut tahkan timur tutang barat ahkan jorih-jirah homboh Abraham, Isaak, tutang Yakub aang Kolunon Bohua Ain Pohotala. 8:12 Padahal ulun-ulun ijo soharusoh monjadi uhkup ain Pohotala ahkan tongindiu nokuh kopindong ang konaha. Ang anan iro ahkan nangih tutang ngarot." 8:13 Turus Yesus nuhtui umba porowira rih, "Buli ih, inon ijo ihko porocayaoh rih ahkan nyolung." Tutang uhun orih ka'a pohaluoh rih pios. 8:14 Yesus tulak nokuh lohpou Petrus. Ang anan Io nohto opu Petrus beteng ngarot pondamoh ang unukoh tiruh. 8:15 Yesus nambit longoi, turus pondamoh nihou, io borigas tutang nopara mohalu Yesus. 8:16 Ang ohkot kani sohit, ulun ngomin ahkan Yesus aro ulun ijo sonyalung roh ja'at. Tutang umba ihco kotihkap auh, Yesus duon muhko roh-roh ja'at rih, tutang ngopios ka'a paring ulun ijo poros. 8:17 Yesus nguan paringoh rih, tutang umba rih nyolung inon ijo tonuhtui bain Nabi Yesaya, io-rih, "Io ngohtun karot ihto tutang ngopios ponyahkit ihto." 8:18 Tohko aro samasino ulun ang kodiling Yesus. Ohkot Yesus nohto iro paringoh. Io nyuhu murid-muridoh mitah danou. 8:19 Turus ihcobehti guru-agama lombut nokuh Io tutang nuhtui, "Amai Guru, ahku kani umba Amai nokuhamoh ka'a!" 8:20 Yesus mutah, "Tohotung anai lowangoh, tutang bulung anai kosalahoh, tahpi Anak Ulun eam aro unukoh kaling." 8:21 Turus ihcobehti murid-Oh ijo bohkon nuhtui, "Amai, nonga poromusi ahku buli holu ahkan nanom amai'ku." 8:22 Tahpi Yesus mutah, "Umba Ahku, tutang nauhoh ulun mahtoi, ngolowong ulun mahtoioh bongoi." 8:23 Yesus jahkat nokuh alut tutang murid-murid-Oh homboh Io. 8:24 Songela lombut sawung-bahiou ijo bokorinah, ngamuk danou rih, nyiring alut tonahpi luhcak. Aang ohkot orih Yesus rahat tiruh. 8:25 Mahka murid-murid-Oh tulak nokuh Io, tutang ngoponyun Io. "Amai! Dohop! Ihto colahka!" hion'ndo. 8:26 "Ombai ihkam mihkoh?" hion Yesus, "Ihkam kurang porocaya umba Ahku!" Uliorih Yesus kuat, tutang ningak sawung-bahiou tutang danou rih. Turus danou orih rih monjadi teneng tu'u. 8:27 Murid-murid Yesus helan. Iro nuhtui, "Ulun inon Io tuh, nyiring sawung-bahiou tutang lucak danou ka'a numbun auh-Oh!" 8:28 Yesus johcok ang pohoi danou ang tana Gadara. Ang anan duo behti ijo sonalung roh ja'at lombut nokuh Io. Koduo behti rih basiak samasino, nyiring eam ihcobehti ka bohanyi nguha ang anan. 8:29 Iro soluka tahkan luwang kolowong tanom tutang ngoriak, "Anak Pohotala, ahkan Ihko nguan inon umba ihkai? Inonkah Ihko nohuang ngoporos ihkai olu ka jaham johcok ohkotoh?" 8:30 Eam mahcu tahkan anan, anai aro kawan urak rahat ngurah ukun'ndo. 8:31 Roh-roh ja'at rih nyawot umba Yesus, "Amat Ihko ahkan nyuhu ihkai soluka, nyuhu ihkai nyolong luwang urak-urak atuh." 8:32 "Tulak!" hion Yesus. Roh-roh ja'at rih tulak tahkan koduo ulun rih, turus nyolong luwang urak-urak. Tutang urak-urak rih ka nokoru tutang nokehcuk tahkan kuhung kowang nokuh danou, turus korobonyop. 8:33 Pongindoi-pongindoi urak rih nokoru nokuh lowu, tutang ngesah paring ang kojadian rih, ka'a tohou inon ijo jari nyolung umba koduo ulun ijo sonorupang roh ja'at rih. 8:34 Mahka paring ulun ang lowu rih ka'a tulak nyopohpak Yesus. Ohkot iro nohto Yesus, iro nyawot hawui paham, mangat Io hahtun nohtah daerah'ndo.
9:1 Yesus jahkat nokuh luwang alut, turus mitah danou, buli nokuh lowu-humai-Oh. 9:2 Ang anan ulun ngomin nokuh Io, ihcobehti bolomu ijo kaling ang kahcangoh. Ohkot Yesus nohto eam inon kohajon koharap ulun-ulun rih. Io nuhtui umba ulun bolomu rih, "Tabah iou anak-Ku! Dusa-dusan'mu ius tongapun." 9:3 Pira-pira guru-agama ijo anai ang anan nuhtui aang ahtoi, "Ulun tuh mohina Pohotala!" 9:4 Yesus kota'an tiruk'ndo, nyolung Io nuhtui, "Ombai tiruk'kam koja'at orih? 9:5 Umoh ijo labih hinut, ngohawot, 'Dusan'mu ius tongapun', ata'ai nuhtui, 'tombok tutang nyalan'? 9:6 Tahpi huntuh Ahku ahkan ngorinah ahkan'kam, ijo ang ngosan tana tuh Anak Ulun bokowasa ahkan ngapun dusa." Turus Yesus nuhtui umba ulun bolomu rih, "Kuat ngohtun kahcang'mu tutang buli!" 9:7 Ulun bolomu rih ka kuat, tutang buli nokuh lohpouoh. 9:8 Ohkot ulun-ulun nohto ang nyolung rih, iro mihkoh tutang monara Pohotala, kotului Pohotala ius nonga kowasa ijo kodorih hajo ahkan kolunon. 9:9 Pongohuli Yesus nohtah unuk rih. Pondehan nyalan, Io nohto ihcobehti ponagih pajak bogare Mateus, rahat tuot ang kantor pajakoh. Yesus nuhtui umba io, "Olai, umba Ahku!" Mahka Mateus tombok tutang ngahasu Yesus. 9:10 Kotihka Yesus rahat kuman ang lohpou Mateus, lombut aro ponagih pajak, tutang ulun-ulun ijo tongohu eam pios, bain ulun aro, umba kuman hombo-homboh Yesus tutang murid-murid-Oh. 9:11 Tohko ulun-ulun Parisi ijo nohto hal orih. Turus iro ngisok umba murid-murid Yesus, "Ombai sababoh guru'kam kuman hombo-homboh umba ponagih pajak tutang ulun-ulun eam pios?" 9:12 Yesus ngonih kisok'ndo turus mutah, "Ulun ijo borigas eam perulu dokter, tihkas ulun ijo ngarot iou. 9:13 Solidik iou inon rimai ayat Surat Borasih tuh, 'Ahku nohuang kasihsayang tutang eam porahpah ohcin'. Kotului Ahku lombut eam ahkan na'ah ulun ijo ngohu aropoh ius pios, molekan ulun ijo ngohu aropoh hina." 9:14 Uliorih murid-murid Yohanes Popondus lombut nokuh Yesus. Turus iro ngisok, "Ombai ihkai tutang ulun-ulun Parisi puasa, tahpi murid-murid Amai eam?" 9:15 Yesus mutah, "Koloukuwoh tiruk'kam? Tou karon pakin ang pesta kawin poros ahtoi'ndo amat pongaten bahkas magun anai hihcoumba iro? Tatu eam! Tahpi ahkan johcok ohkot ponganten bahkas rih tonomin tahkan iro. Ohkot rih punan iro puasa. 9:16 Eam aro ulun ijo nupang hatiu ijo jari usang, umba ihco benang ijo magun bohua. Kotului benang tupang rih ahkan ngorunyut tutang morutat hatiu rih, nyiring kojoriaioh rutat hatin ijo labih kohajoioh. 9:17 Kodorih ka'a eam aro ulun ijo nyuang anggur bohua, aang tolehkunguhpak ijo usang. Tului tolehkung rih ahkan borutat tutang rusak, turus angguroh botuhak. Anggur ijo bohua harus tonyuang ang tolehkunguhpak ijo bohua ka'a, mangat koduo-duooh tohtap tahan." 9:18 Pondehan Yesus bopander umba murid-murid Yohanes Popondus lombut ihcobehti okon lohpou sombayang. Io suhkuntu'ut ang husuk Yesus hawui homauh, "Anak aik'ku ijo bawi, punai iou palus. Tahpi sudikah lombut ahkan nambitoh mangat ia bolum huli." 9:19 Yesus kuat tutang homboh murid-murid-Oh tulak umba ulun rih. 9:20-21 Ang beteng jalan, anai ihcobehti bawi ijo jadi duo balas toun kotahiu poros tongondaha ijo lombut ngondoni Yesus tahkan hila lihkut. Tului io niruk, "Asar ahku nokawet jubah-Oh ih, ahku musti pios." Turus io nokawet lain jubah Yesus. 9:22 Uhunrih, Yesus ngulos tutang nohto bawi orih turus nuhtui umba io, "Tanggar ahtoi'mu anak-Ku! Tului ihko porocaya umba Ahku, ihko pios!" Ang ohkot orih ka'a ulunbawi rih pios. 9:23 Pongohino Yesus johcok ang lohpou okon lohpou sombayang rih. Kotihka Io nohto pomain-pomain musik kindoiotu tutang aro ulun ijo paham boho, 9:24 Io nuhtui umba iro, "Soluka ihkam paring! Anak tuh eam palus tahpi io tuh tihkas tiruh iou." Iro paringoh ngotao Yesus. 9:25 Uli ulun-ulun rih soluka, Yesus nyolong nokuh tahkun anak rih tutang nambit longoioh. Turus kuat anakbawi rih. 9:26 Kabar rih tosiar'kanhopus tana rih. 9:27 Yesus tulak tahkan anan tutang ang beteng jalan anai duo behti bobulen ngahasu Io. Iro ngoriak, "Anak Dawid, masi ihkai!" 9:28 Kotihka Yesus nyolong nokuh lohpou, koduo behti bobulen rih lombut nokuh Io. Yesus ngisok umba iro, "Inon ihkam porocaya ijo Ahku dahpot ngopios ihkam?" "Porocaya Amai!" hion'ndo. 9:29 Turus Yesus ninjok mahtan iro hawoi nuhtui, "Tului ihkam porocaya, nyolung, inon ijo ihkam harapoh." 9:30 Mahka iro tou nohto. Yesus pingat iro honong karas, mangat ara monyiar borihta hal orih ahkan iai ka'a. 9:31 Tahpi iro tulak nyiar borihta tohou Yesus nokuh hopus tana orih. 9:32 Ohkot koduo ulun rih tulak, tohko ihcobehti bisu ijo konowasa bain roh ja'at omin ulun nokuh Yesus. 9:33 Yesus muhko roh ja'at rih tutang ang uhun orih rih ka'a ulun rih tou bopander hino. Ulun aro rih helan tutang nuhtui, "Jaha pu'u ihkai nohto kojadian sama koloutuh ang Israel!" 9:34 Tahpi ulun-ulun Parisi nuhtui, "Kopala roh-roh ja'at ijo nonga Ahkai kobasa ahkan muhko roh-roh ja'at rih." 9:35 Kodorih Yesus tulak hokodiling, tahkan ihco lowu ahkan lowu ijo bohkon tutang tahkan ihco dukuh nokuh dukuh ijo bohkon. Io mongajar ang lohpou-lohpou sombayang, tutang momborihta Kabar Hinut tohou koloukuwoh Pohotala moretah kolou Lahca. Io ngopios ulun-ulun ijo ngarot kokaro mahcam ponyahkit tutang cahcat behtiu. 9:36 Ohkot Yesus nohto ulun aro rih, Io masi umba iro, tului iro torongong tutang eam anai koba'asoh, kolou tobiri ijo eam aro sokahtikoh. 9:37 Turus Yesus nuhtui umba murid-murid-Oh, "Aangkonohtomoh aro tahpi ulun pongohtomoh tihkas honjiot. 9:38 Tului rih nyawot umba tepun umo rih mangat ngirim ulun pongohtom ahkan ngohtom hasil umoioh."
10:1 Ang ihco ondou Yesus na'ah duo balas murid-Oh hopuhpung. Turus Io nonga ahkan'ndo kowasa ahkan muhko roh-roh ja'at tutang ngopios mahca-mahcam ponyahkit, tutang mahca-mahcam cahcat behti. 10:2 Aran koduo balas rasul rih, iorih: Pahtukoh Simon (ijo konohawot ka'a Petrus) tutang konduangoh Andreas, turus Yakobus tutang konduangoh Yohanes, iro rih anak-anak Sebedeus. 10:3 Pongohuli Pilipus tutang Bartolomeus, honong Tomas tutang Mateus, ponagih pajak, hawui Yakobus anak Alpeus, tutang Tadeus; 10:4 turus ko'ohpahoh Simon Patriot, tutang Yudas Iskariot ijo ngarana umba Yesus. 10:5 Koduo balas rasul orih pongohuli sonuhu bain Yesus tutang norima potunjuk-potunjuk tuh, "Ara tulak nokuh daerah ulun-ulun bohkon Yahudi. Ara ka'a nokuh lowun-lowun ulun Samaria. 10:6 Tahpi tulak nokuh ulun-ulun Israel, khususoh ahkan iro ijo lahcat. 10:7 Nyiarkabar ahkan'ndo, ijo Pohotala ahkan jeleng moretah kolou Lahca. 10:8 Ngopios ulun-ulun ijo poros, ngombolum ulun-ulun ijo mahtoi; ngopios ulun-ulun ijo boponyahkit belang 'jo ngoli, tutang muhko roh-roh ja'at. Ihkam jari norima paringoh tuh honong eam tomoli. Jadi nonga ka'a hawui eam bojual. 10:9 Ara ngomin duit bulou, duit perak, ata'ai ka duit tombaga. 10:10 Ara ka'a ngomin kambut-derma, ata'ai duo lambar hahtin'kam ang ponomuoi'kam, ata'ai sorupah, ata'ai ka suhkah. Tului ulun ijo bogawi, puna harusoh tonyodia karon koporluanoh. 10:11 Amat ihkam johcok ang lowu, ata'ai desa, ngurah ulun ijo kani norima ihkam. Mohcon umba io nyiring ihkam tulak hino. 10:12 Ohkot ihkam nyolong lohpou, kohawot auh tuh, 'Keleh Tuhan momborehkat ihkam.' 10:13 Amat ulun-ulun ang lohpou rih norima ihkam, nauhoh taben'kam orih mohcon ang iro. Tahpi amat iro eam norima ihkam, nguhutoh huli tabe'kam rih. 10:14 Amat anai lohpou, ata'ai lowu ijo eam kani norima ihkam, ata'ai eam kani ngonih auh ihkam, nohtah unuk orih tutang nohkah awun tana tahkan bolak-pa'an'kam. 10:15 Ingatrih! Ang Ondou Kiamat, ulun-ulun ang lowu Sodom tutang Gomora ahkan labih jeleng tongahpun bain Pohotala tahkan ulun-ulun ang lowu orih!" 10:16 "Nohtoanirih auh'ku tuh: Ahku nyuhu ihkam kolou tobiri, ijo eam aro borodaya, nokuh tohun-tohun horomaung bosiak. Ihkam harus borondong kolou lohi, tutang morong ahtoi kolou bulung dala. 10:17 Jaga-jaga, tului ihkam ahkan tonawan, tutang ahkan tonohimooh ang lohpou-bosara. Ihkam ahkan tonosiksa ang lohpou-lohpou sombayang. 10:18 Ihkam ahkan tongomin nohkuh toharep pongowasa-pongowasa tutang lahca-lahca tului ihkam murid-Ku. Tutang orihrih kosapet ahkan'kam, nonga kosaksian tohou Ahku ahkan'ndo, tutang ahkan ulun-ulun ijo eam kosono Pohotala. 10:19 Tahpi amat ihkam konomin ahkan ponosara, a'ai mihkoh tohou inon ijo ihkam harus ngohawotoh, ata'ai koloukuwoh ihkam harus bopander. Kotului inon ijo ihkam harus ngohawot orih, ahkan tonyorihta ahkan'kam ang ohkotoh. 10:20 Tului inon ijo ahkan ponander'kam ang ohkot rih, bohkon ihkam, molekan Roh Amai ijo ang soruga, nguha ihkam. 10:21 Ahkan nyolung ijo ulun ahkan nyorah konduang-kuhungoh bongoi ahkan tomunu. Tutang rih ka ijo ahkan nyolung holat amai umba anakoh. Anak-anak ahkan ngolawan inai-amaioh, tutang nyarah iro ahkan tomunu. 10:22 Ihkam ahkan tongohiri bain paring ulun, tului ihkam murid-Ku. Tahpi ulun ijo tehen nyiring laiuoh ahkan tonyolamat. 10:23 Amat ihkam tonoporos ang ihco lowu, tulak nokuh lowu ijo pongo. Ahku mborihta ahkan'kam: Sounumba ihkam ngopah masap paring lowu-lowu Israel, Anak Ulun jari lombut. 10:24 Murid eam labih hajo tahkan guruoh, tutang pohalu eam labih hajo tahkan tepuioh. 10:25 Jari suhkup, amat ihcobehti murid sama kolou guruoh, tutang ihcobehti pohalu sama kolou tepuioh. Amat kopala ihcojolahan jadi konohawot Baalsebul, inon hino ihco koluwang lohpouoh. Iro ahkan konohawot arai ijo labih ja'at hino!" 10:26 "Ararih mihkoh umba kolunon. Eam aro ijo bosuhuk, ijo eam ahkan gihtan, tutang eam anai ijo tongulimoh ijo eam ahkan bokuap. 10:27 Inon ijo Ahku nuhtuioh ahkan'kam, a'ang pindong, harusrih ihkam nokodulioh ang luwang koloang tohun ondou. Tutang inon ijo tongosinokoh ang tolingan'kam, nyiarohrih nokuh umo-umoh-iou! 10:28 Ara mihkoh umba iro ijo duon munu behti, tahpi eam kowasa munu mboruan. Tahpi mihkoh umba Pohotala ijo kowasa morusak, pios behti kanika mboruan ang luwang norahka. 10:29 Duo kungan bulung opit dahpot tomoli umba ihco kobilap duit ijo paling koik. Oluka kodorih eam aro ihcokungan ijo tou nokah nokuh tana amat eam kohondak Amai'kam. 10:30 Balou-balou ang kuhung'kam, ka jadi tongiso paringoh. 10:31 Tului orih ara mihkoh! Ihkam labih borega umba bulung-bulung opit rih!" 10:32 "Ia-iai ijo mongahku Ahku ang toharep ulun aro, ijo io murid-Ku, Ahku ka ahkan mongahku io ang toharep Amai-Ku ang soruga. 10:33 Tahpi ia-iai ijo eam ngahku Ahku ang toharep ulun aro ijo io orih murid-Ku, Ahku ka'a ahkan eam ngahku io ang toharep Amai-Ku 'jo ang soruga." 10:34 "Ara ngohu Ahku ngomin kobuah nokuh kolunon tuh. Ahku eam ngomin kobuah, tahpi kolawan. 10:35 Ahku lombut, kotuluioh anak bahkas ngolawan amaioh, anak bawi ngolawan inaioh, tutang monatuioh ijo bawi ngolawan opuoh ijo bawi. 10:36 Io ijo ahkan monjadi musuh ijo hajo, anairih ukup jolahan ihto bongon. 10:37 Ulun ijo ngasih amaioh ata'ai inaioh, labih tahkanumba Ahku, io eam pahtut monjadi murid-Ku. Kodorih ka'a, ulun ijo ngasih anakoh ihco bahkas ata'ai ihco bawi, labih tahkanumba Ahku. 10:38 Tutang ulun ijo eam kani ngohtun sopolahkioh tutang ngahasu Ahku, io eam pahtut monjadi murid-Ku. 10:39 Ulun ijo podehen pombolumoh, ahkan nihou pombolumoh tahpi ulun ijo nihou pombolumoh, kotului tehen umba Ahku ahkan dahpot pombolumoh." 10:40 "Ulun ijo norima ihkam, norima Ahku ka'a. Tutang ulun ijo norima Ahku, norima Io ijo nyuhu Ahku. 10:41 Ulun ijo norima nabi tului io nabi, ahkan norima upah ihcobehti nabi. Tutang iai ijo norima ihcobehti ijo morong, tului io morong, ahkan norima upah ihcobehti ijo morong. 10:42 Ia-iai ijo nonga korih, olu tihkas danum sorongin borangai ahkan anai ihcobehti tahkan ulun-ulun jo hinasusah, kotului io murid-Ku, porocaya ih io musti norima upahoh!"
11:1 Uliorih Yesus nonga potunjuk-potunjuk ahkan koduo balas murid-Oh, Io nohtah unuk rih. Io tulak majar tutang monyiar pohtoh tahkan Pohotala ang lowu-lowu ijo doni ang anan. 11:2 Yohanes Popondus ijo rahat hukum ang sipir ngonih tohou gawin Kristus. Turus io nyuhu pira-pira muridoh tulak nokuh Yesus ahkan ngisok, 11:3 "Amairih ulun ijo ahkan lombut numbun bowot Pohotala, ata'ai harusrih ihkai ngindoi ulun bohkon?" 11:4 Yesus mutah, "Buliih nokuh Yohanes tutang mborihta ahkai, inon ijo ihkam ngonih tutang nohto'. 11:5 Ulun bobulen tou nohto, ulun bolomu tou nyalan, ulun bobelang ijo ngoli pios; ulun borengen dahpot ngonih; ulun ijo mahtoi hoduli bolum; tutang Kabar Hinut tahkan Pohotala tonyiar ahkan ulun-ulun ijo porosbolum. 11:6 Kosanangsolamat ahkan ulun ijo eam aro sokehtaoh nulak Ahku!" 11:7 Uliorih soruhan-soruhan Yohanes rih tulak buli. Yesus nopara mander ahkan ulun aro tohou Yohanes, hioi-Oh, "Ihkam tulak nokuh padang bolambah ahkan nohto inon? Bahtang poring ijo tonahpi bahiu? 11:8 Ihkam tulak ahkan nohto inon? Ihcobehti ijo hopokajan pioskah? Ulun-ulun ijo hopokajan kodorih mohcon ang istana! 11:9 Jadi ombai ihkam tulak nokuh padang bolambah? Ahkan nohto ihcobehti nabirih? Tu'u, malah labih hajo umba ihcobehti nabi. 11:10 Tului Yohanes orihrih ijo titun ang ayat Surat Borasih tuh, 'Jituh soruhan-Ku, hion Pohotala, Ahku nyuhu io labih houn, tahkan umba Ihko, mangat io nandang jalan ahkan-Mu.' 11:11 Ingatrih! Ang kolunon tuh eam aro ulun ijo labih hajo tahkan umba Yohanes Popondus. Oluka kodorih ulun ijo pongokoikoh ang louk ukup ain Pohotala, labih hajo umba Yohanes. 11:12 Tahkan Yohanes monyiar borihtaoh johcok ang uhuntuh, ukup ain Pohotala tongolawan bain ulun-ulun ijo bousaha nguwasaoh hapan kokaras. 11:13 Johcok polombut Yohanes, paring hukum Museh tutang ajaran nabi-nabi, monujum tohou hal-hal ijo ahkan nyolung. 11:14 Tutang amat ihkam kani porocaya, Yohanes orih Elia, ijo polombutoh lomoi tonujum. 11:15 Amat anai tolinga pios io ngonih! 11:16 Umba inon Ahku harus nindung ulun-ulun jaman tuh? Iro kolou anak-inyam ijo tuot ang pasar. 'Cokopulou, hotota'ah umba ijo bohkon, 11:17 'Ihkai newah lagu kojorih ahkan'kam, tahpi ihkam eam kani nasai! Ihkai monyanyi lagu koporosahtoi, tutang ihkam eam kani nangih!' 11:18 Yohanes lombut -- io puasa tutang eam ngorih anggur; tutang ulun-ulun ngohawot io, 'Io sonalung sehtan!' 11:19 Huntuh Anak Ulun lombut -- Io kuman tutang ngorih; turus ulun-ulun ngohawot io, 'Nohto ulun tuh! Bokora, pombosou, hojolahan umba ponagih pajak, tutang hojolahan umba ulun bodusa.' Oluka kodorih, kopihtar Pohotala gihtan tahkan bua gawiouoh." 11:20 Turus Yesus nopara nosalan lowu-lowu ang umoh Io paling aro nguan tandahelan. Bain ulun-ulun ang lowu-lowu orih eam kani hubah tahkan dusa-dusan'ndo. 11:21 "Colahka ihko Korazim! Tutang colahka ka'a ihko Betsaida! Jahkaoh karon-tandahelan ijo konuan aang tohun'kam, tonguan ka'a ang Tirus tutang Sidon, musti ulun-ulun ang anan jadi tahi hubah tahkan dusa-dusan'ndo, tutang hapan pokahjan koporosahtoi hawui ngina korawu ang ngosan kuhung'ndo. 11:22 Ingatrih, ang Ondou Kiamat, ulun-ulun Tirus tutang Sidon ahkan labih jeleng konapun Pohotala, tahkan ihkam! 11:23 Tutang ihko Kapernaum! Kuwoh ihko ahkan tongahtang johcok nokuh soruga? Eam! Malah ihko ahkan dian nokuh norahka! Tului jahkaoh karon-tandahelan ijo konuan ang tohun-tohun'kam rih, jari konuan ang Sodom, Sodom rih magun anai nyiring uhuntuh! 11:24 Ingatrih! Ang Ondou Kiamat ulun Sodom ahkan labih jion tonapun Pohotala tahkan umba ihkam!" 11:25 Ang ohkot rih Yesus bodo'a, "Amai, Tuhan ijo ngowasa langit tutang tana! Ahku ngohawot torimakasih umba Ihko, tului paringoh orih ihko ngulimoh tahkan ulun-ulun, ijo pitar tutang bosokula, tahpi ihko ngorinahoh ahkan ulun-ulun ijo eam sokula. 11:26 Orihlah ijo ngojorih ahtoi Amai." 11:27 Turus Yesus nuhtui, "Ko-paring ang'co, jadi tononyorah Amai ahkak-Ku. Eam aro ihcobehti ka kosono Anak, bohkon umba Amai. Eam aro ka'a ijo ngosono Amai bohkon umba Anak, tutang ulun-ulun ahkan iai Anak rih mongosono Amai. 11:28 Lombut nokuh Ahku ihkam paring ijo bo'o, tutang nanyam bahatoh puat, Ahku ahkan nonga komangat ahkan'kam. 11:29 Numbun poretah-Ku tutang bajar tahkan Ahku, tului Ahku tuh bolomu lembai tutang randah ahtoi, mahka ihkam ahkan nginyam komangat. 11:30 Tului poretah-poretah-Ku monyanang ahkan'kam tutang puat ijo Ahku muatoh ngosan ihkam, mohian."
12:1 Ang ihco ondou Sabat, kotihka Yesus nguha umo gandum, murid-murid-Oh nopara ngohtom gandum, turus nguai, kumai, tului iro bolo'u. 12:2 Kotihka ulun-ulun Parisi nohto orih, iro nuhtui umba Yesus, "Topahjah! Murid-murid-Mu molanggar hukum agaman ihto hawui nguan ijo ngohana ang ondou Sabat." 12:3 Yesus mutah, "Jaha pu'u ihko mombasa Surat Borasih tohou inon ijo gawin Dawid uhun io tutang karo-jolahai bolo'u? 12:4 Io nyolong ahkan Lohpou Pohotala; turus kuman luhte ijo jari tonyorah ahkan Pohotala. Padahar numbun Torat agaman eto, io, oluka karo-jolahaioh eam to'u kuman luhte rih -- baya imam-imam ih ijo tou. 12:5 Ata'ai jaha pu'u ihkam ngombasa ang luwang Torat Museh ijo nyinong ondou Sabat imam-imam ijo bogawi ang Lohpou Tuhan, molanggar poroturan ondou Sabat, tahpi eam tonosalan? 12:6 Nohtoani inon ijo Ahku jari nuhtuioh tuh: ang ohtoi anai ijo labih hajo umba Lohpou Tuhan. 12:7 Ang luwang Surat Borasih sonurat: Pongasih ijo Ahku hondakoh; eam porahpah usin-ohcin. Amat jahkaoh ihkam tu'u-tu'u solembang auh tuh, musti ihkam eam ahkan nosalan ulun ijo eam bosala. 12:8 Tului Anak Ulun kowasa umba ondou Sabat." 12:9 Yesus nohtah unuk orih, turus tulak nokuh ihco lohpou sombayang. 12:10 Ang anan, anai ulun ijo longoioh mahtoi silai. Pira-pira ulun ijo kani ngurah kosalan Yesus, ngisok umba Io, "Kuwoh tou ngopios ulun ang ondou Sabat?" 12:11 Yesus muhtah, "Jakaoh tohko ihcobehti tahkan louk ihkam tepun ihco kungan tobiri, tutang ang ondou Sabat tobiri orih botahak ang lowong ijo timbon; kuwoh tepun tobiri rih eam ahkan ngurah jalan polua tobiri orih, tahkan lowong rih? 12:12 Nah, kolunon labih borega tahkan tobiri! Jadi amat kodorih, tou mondohop ulun ijo poros a'ang ondou Sabat." 12:13 Pongohuli Yesus nuhtui umba ulun ijo longoioh mahtoi silai orih rih, "Nyuhcuoh longon'mu." Ulun rih nyuhcu longoioh, tutang longoi rih pios kolou longoi ijo silaioh. 12:14 Tahpi ulun-ulun Parisi nohtah lohpou sombayang orih, turus mohaum ahkan munu Yesus. 12:15 Yesus ngotaan ijo ulun-ulun Parisi rih, niat ja'at tohimo arop-Oh. Jadi Io tulak tahkan unuk orih tutang aro ulun ngahasu Io. Turus Io ngopios paring ulun, ijo boponyahkit rih. 12:16 Tahpi Io baca iro mborihta tohou Io ahkan ulun bohkon. 12:17 Honong kodorih nyolung ijo tonuhtui Pohotala nguha Nabi Yesaya, 12:18 "Tuhrih soruhak-Ku ijo Ahku ngopilioh, ulun ijo Ahku ngasih-Oh, tutang ijo kojorih ang ahtoi-Ku. Roh-Ku, ahkan Ahku nonga ahkai-Oh, komorong-Ku ahkan tonosiar baiu-Oh ahkan uhtus-uhtus ulun. 12:19 Io eam ahkan hojawab ata'ai ngoriak, ata'ai monarang ang jalan-jalan hajo. 12:20 Poring ijo niwoi, eam ahkan tomolot-Oh sumbu ijo tiu-tiui, eam ahkan tongombolop-Oh. Io ahkan ngolawan, nyiring ko-morong nyolung; 12:21 uhtus-uhtus ulun ahkan ngina koharapoh umba Io." 12:22 Pongohuli anai omin nokuh Yesus ihcobehti ulun bobulen tutang bisu tului sonorupang bain roh ja'at. Yesus ngopios ulun orih, nyiring io dahpot hopander tutang nohto. 12:23 Paring ulun helan tutang nuhtui, "Puna morong tu'u Io tuh Anak Dawid ijo tonobowot orih?" 12:24 Kotihka ulun-ulun Parisi ngonih orih, iro mutah, "Ulun tuh tihkas tou muhko roh ja'at, tului Baalsebul, okon roh-roh ja'at, jari nonga kowasa rih ahkai-Oh." 12:25 Yesus ngotaan tiruk ulun-ulun Parisi rih. Jadi Io nuhtui umba iro, "Amat ihco nogara hopisah a'ang hobarih-hobarih ijo saling homusuh, nogara orih eam ahkan tehen. Tutang ihco lowu ata'ai jolahan-ulun, ijo hopisah-pisah tutang hokohiri sama aropoh ahkan bokahkas. 12:26 Kodorih ka'a, ang luwang kolahca'an Sehtan rih, amat ihco kopulou muhko pulou ijo bohkon, mahka kolahcan Sehtan rih ijo jari pisah pinja, tutang ahkan bokahkas. 12:27 Ihkam nuhtui ijo Ahku muhko roh ja'at tului kowasa Baalsebul. Amat kodorih umba kowasa iai murid-murid'kam rih muhko roh ja'at. Murid-murid'kam bongoi ijo ngorinah ijo ihkam sala! 12:28 Tahpi Ahku muhko roh ja'at umba kowasa Roh Pohotala. Tutang tului orih, rimai ijo Pohotala jari nopara moretah ang louk ihkam. 12:29 Koloukuwoh ulun dahpot nyolong, nokuh lohpou ulun ijo ba'as, ahkan nyilou ponahtouoh, amat io eam houn manga ulun ba'as rih? Uliorih, punai io duon nyilou ponahtouoh. 12:30 Ulun ijo eam barih aik-Ku, kotu'ui io ngolawan Ahku. Tutang ulun ijo eam umba Ahku kotu'ui io morusak gawik-Ku! 12:31 Bain tului orih, ngota'an ih, amatanai ulun nguan dusa tutang ngohawot auh ijo mohina, io dahpot tonapun! Tahpi amat io, mohina Roh Pohotala io eam duon tonapun! 12:32 Amatanai ulun ngohawot aangco ngolawan Anak Ulun, io duon tonapunoh, tahpi amat io mohina Roh Pohotala, io eam duon tonapun, pios huntuh, oluka ang ahirat!" 12:33 "Ahkan dahpot bua ijo pios, bahtangoh pahtut bosiwuh. Amat bahtangoh eam bosiwuh, buaoh eam pios ka'a. Bosiwuh eamoh ihco bahtang kahju, tongota'an tahkan buaoh. 12:34 Ihkam ulun ja'at, koloukuwoh ahkantou ihkam dahpot ngohawot hal-hal ijo pios amat ihkam ja'at? Inon ijo konohawot tahkan baun'kam, 'orih ijo nyalut tahkan ahtoi! 12:35 Ulun ijo pios ngohawot hal-hal ijo hinut, tului io tuwi umba kohinut. Sobalikoh, ulun ijo ja'at ngohawot hal-hal ijo ja'at, tului io tuwi umba koja'at. 12:36 Jadi, ingatrih: ang Ondou Kiamat nyinong ulun harus nanggung-jawab, ngosan nyinong auhoh ijo konohawot, ijo eam boguna. 12:37 Tului auh-auh'kam bongom ijo ahkan tohapan unuk momuhtus, ijo ihko bosala ata'ai eam." 12:38 Uliorih pira-pira guru agama tutang ulun-ulun Parisi nuhtui, "Amai Guru, ihkai jorik nohto Amai nguan tandahelan." 12:39 "Eaminon koja'atoh tutang dorhakaoh ulun-ulun jaman tuh!" hion Yesus. "Ihkam nyawot Ahku nguan tandahelan? Ihkam eam ahkan tononga ihco tandahelan ka, kocoali tandahelan Nabi Yona. 12:40 Yona mohcon tolu ondou tolu malom ang luwang buhtui ohcin hajo. Kodorih ka'a Anak Ulun ahkan mohcon tolu ondou tolu malom ang luwang buhtui tana. 12:41 Ang Ondou Kiamat ponduduk Niniwe ahkan bolum huli homboh ulun-ulun jaman tuh, tutang mondawa iro. Bain ulun-ulun Niniwe orih jari hubah, tahkan dusa-dusan'ndo, kotihka Yona ngonorangan ahkan'ndo. Tahpi ang ohtoi, huntuh, anai ijo labih hajo tahkan Yona! 12:42 Ang Ondou Kiamat Lahtu tahkan tana Solahtan ahkan bolum homboh ulun-ulun jaman tuh tutang mondawa iro. Tului ahkan ngonih ajar Salomo ijo pitar, lahtu rih nguan ponyalan ijo mahcu samasino tahkan topahkan kolunon. Tahpi ang ohtoi huntuh anai jo hajo tahkan Salomo!" 12:43 "Amat roh ja'at nohtah ihcobehti ulun, roh orih hokodiling nokuh karo-unuk ijo tojahkoring, ahkan ngurah unuk nondokobo'ooh, tahpi io eam nyombangoh. 12:44 Bain tului orih io nuhtui, 'Ahku ahkan huli nokuh lohpou ijo ius ahku nohtahoh.' Kotihka io johcok ang anan, lohpou orih buhang, borasih, tutang toahtur. 12:45 Turus io tulak ngomin pihtu roh bohkon ijo labih ja'at tahkan io. Pongohuli iro nyolong koluwang ulun orih, turus mohcon ang anan. Tutang kojoriaioh ulun rih monjadi lobien koja'atoh umba asaroh. Ijorih ka'a ijo ahkan nyolung umba ulun-ulun ja'at jaman tuh." 12:46 Beteng Yesus magun bopander umba ulun aro rih, lombut inai tutang konduang-konduang Yesus. Iro tombok ang konaha sambir ngurah jalan ahkan dahpot bopander umba Io. 12:47 Ihcobehti tahkan ulun aro rih nuhtui umba Yesus, "Amai, inai tutang konduang-konduang Amai anai ang kanaha. Iro jolik hopander umba Amai." 12:48 Turus Yesus mutah, "Iai inai-Ku? Iai konduang-konduang-Ku?" 12:49 Turus Io nunjuk umba murid-murid-Oh tutang nuhtui, "Tuhrih inai-Ku tutang konduang-konduang-Ku. 12:50 Ulun ijo nguan kohondak Amai-Ku ijo ang soruga, iorih konduang-Ku bahkas, tutang bawi, tutang inai-Ku."
13:1 Ang ondou rih Yesus nohtah lohpou orih turus tulak nokuh saran danou tutang tuot ang anan. 13:2 Aro samasino ulun ijo hopuhpung ang kodiling Yesus, tului orih Io tuot ang luwang alut, mahka ulun aro rih tombok ang kowang. 13:3 Turus Yesus majar aro hal ahkan'ndo hapan porobasa. "Ihcobehti ulun pongumo tulak nuhkan bonyiu," kodorih hion Yesus nopara kesah-Oh. 13:4 "Kotihka uhun nuhkan, anai bonyi torotuhkan ang tohun jalan. Turus bulung lombut tutang bonyi orih iro kumai nyiring lingih. 13:5 Anai ka'a tonuhkan ang tana ijo hobahtu liang ijo tanaoh honjiot. Bonyi-bonyi rih jeleng hoduring, tului kurang tana. 13:6 Tahpi ohkot mahtan ondou jari nyoput, uhat-uhatoh nopara molanyu, turus koring tutang mahtoi, tului uhatoh eam timbon ang tana. 13:7 Anai hino bonyi ijo tomonyi ang tohun ruwut duhi. Ruwut duhi rih hoduring moruwut during bonyi rih nyiring mahtoi. 13:8 Tahpi anai ka'a bonyi ijo tomonyi ang tana ijo bosiwuh, turus momua; anai ijo solahtus, anai ijo onom pulu, tutang anai ijo tolun pulu lihpet karoioh." 13:9 Uli ngesah porobasa orih Yesus nuhtui hino, "Amat anaingina tolinga, pios ngonih!" 13:10 Pongohuli murid-murid Yesus lombut tutang ngisok umba Io, "Ombai Amai hapan porobasa amat hopander umba ulun aro rih?" 13:11 Yesus mutah, "Tului ihkam ius tononga pononga ahkan ngotaan rahasia tutang koloukuwoh Pohotala moretah, rahatoh iro eam. 13:12 Tului ulun ijo ius anaingina, ahkan tononga labih aro hino, tutang io ahkan bokolabihoh. Tahpi ulun ijo eam anaingina ino-inon, mahka honjiot, ijo anai ang io malah ahkan tonomin. 13:13 Orih kotuluioh Ahku hapan porobasa amat hopander umba ulun aro, tului iro nohto, tahpi kolou ulun ijo eam nohto; iro ngonih, tahpi kolou ulun ijo eam ngonih tutang eam solembang. 13:14 Honong orih nyolung ijo tonujum Nabi Yesaya, 'Pohotala nuhtui: Iro ahkan toturus ngonih tahpi eam horahti; iro ahkan toturus nopahjah tahpi eam kota'an ijo nyolung. 13:15 Tului tiruk ulun-ulun tuh ius monjadi tapak, tolingan iro ius monjadi borengen tutang mahtan iro jari tongomihcop. Orih nyalung, mangat mahtan iro ara nopahjah, tolingan iro ara ngonih, tiruk iro ara horahti, tutang ara hoduli ahkak-Ku, turus Ahku ngopios iro.' " 13:16 "Tahpi eam-inon ko-utungoh ihkam," hion Yesus umba murid-murid-Oh, "kotului ihkam tu'u-tu'u nohto tutang ngonih. 13:17 Ingatrih, aro nabi tutang ulun ijo te'et umba Pohotala, jolik nohto ijo ihkam nohto uhuntuh, tahpi iro eam nohtooh. Iro jolik ngonih ijo ihkam ngonih uhuntuh, tahpi iro eam ngonihoh." 13:18 "Ngonihrih, inon rimai porobasa tohou pongumo rih. 13:19 Bonyi ijo tonuhkan ang jalan, nindung ulun-ulun ijo ngonih Kabar Hinut, tohou koloukuwoh Pohotala moretah, tahpi eam solembang. Ang ja'at rih lombut tutang mosuwit inon ijo ius tomonyi ang ahtoi'ndo. 13:20 Bonyi ijo tonuhkan ang unuk ijo bobahtu liang, nindung ulun-ulun ijo ngonih Kabar Hinut orih, jion norimaoh hawoi jolik ahtoi. 13:21 Tahpi kabar orih eam muhat timbon ang ahtoi'ndo tului orih eam tahan tahi. Kodorih iro ngarot kosusah ata'ai tonoporos bain Kabar Hinut orih, nyolung iro murtad. 13:22 Bonyi ijo tonuhkan ang tohun ruwut duhi, nindung ulun-ulun ijo ngonih kabar orih, tahpi mihkoh tohou pombolum iro tutang jolik bolum molowi. Tului orih kabar tahkan Pohotala tonohahpit ang luwang ahtoi iro nyiring eam momua. 13:23 Tutang bonyi ijo tomonyi ang tana ijo bosiwuh, nindung ulun-ulun ijo ngonih kabar orih, tutang ngumangoh. Iro mua aro, anai ijo solahtus, anai ijo onom pulu, tutang anai ijo tolun pulu lihpet buaoh." 13:24 Yesus ngesah hino ihco porobasa ahkan ulun aro, hioi-Oh, "Amat Pohotala moretah, ang-konuai kolou porobasa tuh: Ihcobehti pongumo miwit bonyiu ijo pios ang umoioh. 13:25 Ang sino ngolomi, uhun paring ulun uras ngarok, musuh ulun pongumo orih lombut, morawuh paung tingon ang louk gandum rih, turus nohtahoh. 13:26 Kotihka karo-kombulan orih bolum tutang during-duringoh nopara soluka, gihtan ka'a tingon-tingon rih. 13:27 Turus ulun-ulun upahan ain pongumo rih lombut nokuh tehpun umo tutang nuhtui, 'Tuan, eamkah Tuan ijo miwit bonyi ijo pios ang umon Tuan? Koloukuwoh konjadioh, nyiring anai tingon-tingon ang anan?' 13:28 Pongumo rih mutah, 'Orih ang konuan musuh.' Turus ulun-ulun upahan pongumo rih ngisok hino, 'Tuan, kani ihkai tulak morunatmawau tingon rih?' 13:29 'Ara,' hioioh, 'tului amat tingon-tingon rih tongomawou noin gandumoh tosohpit. 13:30 Nauhoh tingon-tingon rih bolum hombo-homboh nyiring uhun kohtom. Noin Ahku ahkan nuhtui umba ulun-ulun ijo ngohtom: Nipun ih soun tingon-tingonoh, mohtong, turus nyahaoh. Uliorih nipun gandumoh, turus nginaoh ang luwang koraking.' " 13:31 Yesus nyorihta hino ijo porobasa ahkan ulun aro, hioioh, "Amat Pohotala moretah ang konuaioh kolou porobasa tuh: Ihco luang sosawi omin bain ihcobehti ulun, turus konombulan ang umoioh. 13:32 Luang sosawi orih, luang bonyi ijo paling koik. Tahpi amat jari hoduring, io monjadi ihco pokohajoi ang louk karo-kombulan. Io monjadi bahtang, nyiring bulung-bulung lombut ngosalah ang da'ai-da'aioh." 13:33 Anai ihco porobasa bohkon ijo ngesah Yesus ahkan ulun aro. "Amatmira Pohotala moretah, koada'aioh kolou ragi ijo omin bain ihcobehti ulunbawi, turus pohicooh umba ohpat pulu tahkar golahpung gandum nyiring kamir paringoh!" 13:34 Paringoh tongajar Yesus ahkan ulun aro honong hapan porobasa. 13:35 Tului kodorih nyolung ijo tonuhtui bain nabi, "Ahku hapan porobasa amat hopander umba iro; Ahku ahkan momborihta hal-hal ijo bosuhuk tahkan uhun tona'oioh tana tuh." 13:36 Uliorih Yesus nohtah ulun aro rih, turus nyolong lohpou. Murid-murid-Oh lombut tutang ngisok, "Tou Amai narang ahkan 'kai, riman porobasa orih tohou tingon ang louk gandum rih." 13:37 Yesus mutah, "Ulun ijo miwit bonyi ijo pios orihrih Anak Ulun. 13:38 Umo rih, iorih kolunon tuh. Bonyi ijo pios rih io rih ulun-ulun ijo monjadi ukup ain Pohotala. Tingon orihrih ulun-ulun ijo hobarih hihco sehtan. 13:39 Musuh ijo morawuh luang tingon, orih rih Sehtan. Ohkot kohtom io rih Ondou Kiamat, tutang ulun-ulun ijo ngohtom orihrih molehkat-molehkat. 13:40 Koloumba tingon-tingon ijo tonipun tutang tonyaha ang luwang baho, kodorih ka'a ang Ondou Kiamat noin. 13:41 Anak Ulun ahkan nyuhu molehkat-molehkat-Oh nipun tahkan louk ukup aiuoh paring ijo kotuluioh ulun nguan dusa, tutang paring ulun bohkonoh ijo nguan koja'at. 13:42 Iro paring ahkan tonyahkah nokuh luwang tuku hobaho ijo bohu-bohung; ang anan iro ahkan nangih tutang ngarot. 13:43 Tutang ulun-ulun ijo nguan kohondak Pohotala ahkan ngorolondang kolou mahtan ondou ang luwang Kolunon Bohua Ain Pohotala, Amai iro. Jadi amat anaingina tolinga, ngonihoh!" 13:44 "Amat Pohotala momoretah, koada'aioh kolou porobasa tuh: anai ponahtou ijo bosuhuk ang luwang tana, turus tonyombang bain ihcobehti ulun, tutang sonuhukoh huli nokuh luwang tana. Pongohino tului kojorihoh, ulun rih tulak bodagang opah ponahtou-ponahtou aiouoh, turus hoduli tutang moli tana rih." 13:45 "Amat Pohotala moretah, ijo koada'aioh kolou porobasa tuh: Ihcobehti podagang ngurah mutiara-mutiara ihco borega. 13:46 Kotihka io nyombang ihcokoluang mutiara ijo luar biasa kokomokoh, jeleng io tulak tutang bodagang paring ponahtou aiouoh turus moli mutiara ijo ihco rih." 13:47 "Amat Pohotala moretah, koada'aioh kolou porobasa umba jala ijo tonimbai nokuh danou, turus ngondahpot aro mahcam ohcin. 13:48 Uli jala rih tuwi, jala orih konuhut nokuh isung tana, bain pongohcin-pongohcin umba-ohcin. Pongohuli iro tuot tutang ngopili ohcin-ohcin orih: Ijo pios, konina iro aang potoran, tutang ijo eam pios dian'ndo. 13:49 Kodorih haloh ang Ondou Kiamat, molehkat-molehkat ahkan tulak ngopili ulun-ulun ijo ja'at tahkan ulun-ulun ijo numbun kohondak Pohotala. 13:50 Pongohuli ulun-ulun ja'at orih tonyahkah nokuh luwang baho. Ang anan iro ahkan nangih tutang ngarot koporos." 13:51 "Inon ihkam solembang paringoh rih?" Yesus ngisok. "Solembangrih Amai!" hion'ndo. 13:52 Turus Yesus nuhtui, "Bain orih nyinong guru agama, ijo ius monjadi barih Pohotala, sama umba ihcobehti tepun lohpou mopolua tahkan unuk ponahtouoh, ponahtou-ponahtou bohua tutang usang." 13:53 Ulirih Yesus umbot mongesah porobasa rih, Io nohtah unuk orih, 13:54 turus hihkas nokuh lowu-humai-Oh. Ang anan Io tulak majar ang lohpou sombayang, tutang ulun-ulun ngonih Io ang anan, helan samasino. Iro nuhtui, "Tahkan umoh ulun tuh, duon kosolembang koloutuh? Tutang tahkan amoh Io duon kowasa ahkan nguan karo-tandahelan? 13:55 Eamkowa Io anak tuhkang kahju? Eamkowa Maria inai-Oh tutang konduang-konduang-Oh orihrih Yakobus, Yusep, Simon tutang Yudas? 13:56 Tutang eamkah konduang-konduangoh bawi, mohcon ang ohtoi louk ihto ka'a? Tahkan amoh Io duon paring orihrih?" 13:57 Mahka iro nulak Yesus. Turus Yesus nuhtui umba iro, "Ihcobehti nabi tomohoromat ang amo-amoh, kocoali ang lowu-humaoh, tutang ang lohpou-kosalah aiu bongoi." 13:58 Tului orih Yesus eam nguan aro tandahelan ang anan bain iro eam porocaya.
14:1 Aang uhun orih Horodes, pongowasa tana Galilea ngonih, tohou Yesus. 14:2 Horodes bopander umba okon-okonoh, "Musti tuh Yohanes Popondus ijo jari bolum hoduli! Orih kotuluioh Io tepun kowasa napa tandahelan." 14:3 Tului sounumba rih Horodes jari nyuhu nawan Yohanes tutang mangaoh turus posolongoh nokuh luwang sipir. Horodes nguan kolouorih tului Herodias oruh konduangkuhungoh iorih Pilipus. 14:4 Bain pu'u Yohanes nuhtui kolihtuh umba Horodes, "Eam tou ihko kawin umba Herodias!" 14:5 Kotu'uioh Horodes jolik munu Yohanes, tahpi io mihkoh umba ulun-ulun, bain iro ngohu Yohanes nabi. 14:6 Ang ohkot Horodes pesta ang ondou ulang tounoh, anak bawi Herodias narinasai ang toharep ulun tipen. Tarinasai orih paham ngojorih ahtoi Horodes, 14:7 nyiring Horodes mbowot umbaoh hapan tulut, inon beweu ijo io nyawot ahkan tononga ahkaioh. 14:8 Tului sonuhu bain inaioh, anakdara rih ngohawot, "Ahku nyawot kuhung Yohanes Popondus tonga ahkak'ku huntuh ka'a ang ngosan talam!" 14:9 Ngonih sawot orih, Horodes sedih samasino. Tahpi tului io jari nulut aropoh ang toharep uluntipenoh, io moretah numbun sawot anakdara rih. 14:10 Io nyuhu ulun tulak nokuh sipir ahkan nohtok kuhung Yohanes. 14:11 Pongohuli kuhung Yohanes rih, onin nyolong ang ngosan talam tutang nonga ahkan anakdara rih. Turus anak dala rih ngominoh kuhung Yohanes Popondus ahkan inaioh. 14:12 Uliorih rih murid-murid Yohanes lombut ngomin buhkang Yohanes tutang nanomoh. Turus iro tulak tutang narung hal rih ahkan Yesus. 14:13 Kotihka Yesus ngonih tarung rih, Io jahkat alut bongoi tutang nohtah unuk orih, turus tulak nokuh ihco unuk ijo tonih. Tahpi kotihka ulun-ulun ngonih tohou hal orih, iro nohtah lowun-lowun'ndo tutang tulak ngohasu Yesus nyuru jalan tana. 14:14 Ohkot Yesus jahkat tahkan alut tutang nohto ulun aro rih, Io ngasi umba iro. Turus Io ngopios ulun-ulun ijo mondam ang louk iro. 14:15 Cohit ondouoh, murid-murid Yesus lombut tutang nuhtui umba Io, "Ondou jari cohit, tutang unuk tuh mahcu. Labih pios Amai nyuhu ulun-ulun tuh tulakbuli, mangat duon moli ukun ang desa-desa." 14:16 "Eam usah iro buli," hion Yesus, "ihkam iou nonga iro ukun." 14:17 "Ihkai tihkas ngina limo luhte tutang duo ohcin!" mutah murid-murid Yesus rih. 14:18 "Omin kanohtoi," hion Yesus. 14:19 Pongohino Yesus nyuhu ulun aro rih tuot ang ngosan uru. Turus Io ngomin limo luhte tutang duo ohcin rih, turus nokara nokuh langit tutang ngohawot torimakasih ahkan Pohotala. Ulimbarih Io nyila-nyila luhte rih umba longoi-Oh, tutang nonga orih ahkan murid-murid-Oh ahkan'ndo mbagi-mbagioh ahkan ulun aro rih. 14:20 Iro rih paringoh, kuman nyiring bosuh. Ulijadi murid-murid Yesus nipun kolowin ukun ulun aro rih, anai duobalas tahcung tuwi. 14:21 Ijo kuman ang ohkot orih, anai kira-kira limo kujan behti, jaha tongiso ulunbawi tutang anak-inyam. 14:22 Uliorih rih Yesus nyuhu murid-murid-Oh jahkat alut tutang houn mihtah danou, pondehan Io nyuhu ulun aro rih buli. 14:23 Ulimba ulun aro rih buli, Yesus nuhkat ihco puruk, bongoi, kani bodo'a. Kotihka ondou kani pindong, Yesus magun anai ang anan bongoi iou. 14:24 Pondehan orih alut ijo tongojahkat murid-murid Yesus jari mahcu ang tohun-tohun danou. Alut rih kulak-kalik tonahpi luhcak, tului alut rih nohusung bahiu. 14:25 Holang jam tolu umba jam onam topolaoi, Yesus lombut nokuh iro nyalan ang ngosan danum. 14:26 Kotihka murid-murid-Oh nohto Io nyalan ang ngosan danum, iro tokohcit samasino. "Otu!" koriak'ndo mihkoh. 14:27 Tahpi Yesus turus na'ah iro, "Tenengrih! Ahku Yesus. A'ai mihkoh!" 14:28 Turus Petrus nuhtui, "Amat ihko puna Yesus, nyuhu ahku nokuh nyalan ang ngosan danum." 14:29 "Nokuhrih," hion Yesus. Mahka Petrus nusuluh tahkan alut, nyalan ang ngosan danum tutang nokuh Yesus. 14:30 Tahpi uhun Petrus nohto eaminon kohajon lucak bohiu ang danou orih io mihkoh, tutang nopara bolonyot, "Tuhan, dohop!" kociakoh. 14:31 Yesus jeleng notahjuk longoi-Oh, tutang nambit io hawui nuhtui umbaoh, "Petrus, Petrus ihko tuh kurang porocaya. Ombai ihko bembang nokuh Ahku?" 14:32 Turus Yesus doro Petrus jahkat alut tutang bohiu ka tondo. 14:33 Mahka murid-murid-Oh suhkuntu'ut nyembah Yesus. Iro nuhtui, "Tu'u-tu'u Io Tuhan Anak Pohotala!" 14:34 Ohkot iro johcok ang pohoi danou, iro jahkat ang kowang Genesaret. 14:35 Tutang kotihka ulun-ulun ang anan, nohto ijo io ijo lombut rih, Yesus, iro narung borihta rih nokuh paring daerah ang kodiling lowu rih. Turus paring ulun poros tongitot nokuh Yesus. 14:36 Tutang iro nyawot umba Io mangat dahpot ngaweng jubah-Oh, olu baya putingoh. Turus paring ijo ngawengoh nyolung pios.
15:1 Ihcokobarih ulun Parisi tutang pira-pira guru agama tahkan Yerusalem lombut nokuh Yesus. Iro ngisok umba Io, 15:2 "Ombai murid-murid-Mu molanggar hadat tahtu ajuh ihto? Uhun ahkan kuman, iro eam muhi longon'ndo labih houn numbun aturan!" 15:3 Yesus mutah, "Tutang ombai ka'a ihkam molanggar poretah Pohotala tului kani nambit hukum hadat tahtu ajuh'kam? 15:4 Tului Pohotala nuhtui, 'Horomatlah amai tutang inai'kam,' tutang, 'Ia-iai nulat ngonja'at amai inaioh, harus tonohukum mahtoi.' 15:5 Tahpi ihkam majaroh, amat ulun nuhtui ahkan ulun oko'kam, 'Inon ijo koharusoh ahku nonga akan amai tutang inai, ius ahku nyorahoh ahkan Pohotala,' 15:6 mahka ulun rih eam hino kopahtutoh ahkan mohoromat ulun okooh. Jadi kotului hadat-dasar tahtu ajuh'kam, ihkam pohian auh Pohotala. 15:7 Ihkam ulun pura-pura! Tohorong samasino inon ijo tonujum Yesaya tohou ihkam, yorih, 15:8 'Koloutuh hion Pohotala: Ulun-ulun orih tihkas nyembah Ahku honong tuhtui-tuhtui, tahpi ahtoi'ndo mahcu tahkan Ahku. 15:9 Ngahus iro nyembah Ahku, tului hukum kolunon iro ngajar rih kolo-kolou orih poroturan-Ku.' " 15:10 Ulipongo Yesus na'ah ulun-ulun tutang mander ahkan'ndo, "Ngonihrih mangat solembang! 15:11 Ijo nyolong nokuh nyaman'kam eam nguan ulun orih pali, baya ijo soluka tahkan nyaman'kam, orih ijo monjadi io pali." 15:12 Turus murid-murid Yesus lombut tutang pander umba Io, "Ta'anrih Amai ijo ulun-ulun Parisi rih tosinggung ohkot ngonih Amai nuhtui kodorih?" 15:13 Yesus mutah, "Nyinong kombulan ijo eam konombulan bain Amai-Ku ang soruga ahkan tonyohpit. 15:14 Eam usah nohtoani ulun-ulun Parisi orih. Iro rih okon-okon bobulen; tutang amat ulun bobulen niting ulun bobulen koduo-duooh ahkan bolinang nokuh luwang parit." 15:15 Petrus nuhtui, "Dohop monarang porobasa rih ahkan 'kai, Amai!" 15:16 Yesus mutah auh'ndo, "Inon ihkam ka'a jaham solembang? 15:17 Eam kota'an rih ihkam ijo, ijo nyolong nokuh luwang nyama, mosuluh nokuh luwang butui, tutang uliorih bolua hino? 15:18 Tahpi ijo soluka tahkan nyama, asaroh tahkan ahtoi, tutang orih ijo nguan ulun monjadi pali. 15:19 Kotului tahkan ahtoi lombut tiruk-tiruk ja'at, ijo kotuluioh ulun munu, hobandung, nguan kihal, nahkou, nonga saksi alik tutang mopitnah injahoh. 15:20 Hal-hal orihrih ijo kotuluioh ulun monjadi pali, tutang eam kuman umba longo ijo eam tomuhi." 15:21 Pongohuli Yesus nohtah unuk orih tutang tulak nokuh daerah doni lowu Tirus tutang Sidon. 15:22 Ihcobehti bawin Kanaan; tahkan daerah rih, lombut nokuh Yesus hawui io na'ah, "Anak Dawid ngasirih ahku! Anak bawi'ku sonorupang roh ja'at. Koada'aioh ngarot samasino." 15:23 Yesus eam mutah auh ulunbawi rih. Turus murid-murid Yesus lombut nokuh Io tutang nyawot, "Amai, nyuhu ulunbawi orih tulak. Io baya ngomboho ihto iou ang lihkut 'to!" 15:24 Yesus mutah, "Ahku sonuhu tihkas ahkan uhtus Israel, ijo mombahtang ahkan iro ijo lacat." 15:25 Ulunbawi orih lombut turus suhkuntu'ut ang toharep Yesus tutang nuhtui, "Dohop ahku Tuhan." 15:26 Yesus mutah, "Eam hinut ngomin ukun anak-inyam tutang nyahkah rihoh ahkan asu." 15:27 "Tu'u, Tuan," hion ulunbawi orih, "tahpi asu ka kuman pahpat ijo bolinang tahkan meja tepui." 15:28 Turus Yesus nuhtui umba io, "Inai, tu'u-tu'u hajo kaporocaya'an'mu! Nauhoh nyolung inon ijo ihko jolikoh!" A'ang kotihka rih ka'a anak bawi rih pios. 15:29 Yesus nohtahoh unuk rih, turus nyalan nyuru saran danou Galilea. Pongohino Io nuhkat nokuh ihco puruk, turus tuot ang anan. 15:30 Aro ulun lombut nokuh-Oh, ngomin ulun-ulun ijo tipang, ijo bobulen, ijo bolomu, ijo uong, tutang aro hino ulun poros ijo bohkon. Iro ngina ulun-ulun orih ang toharep Yesus, tutang Io ngopios ulun-ulun rih. 15:31 Ulun aro ijo anai ang anan helan samasino, ohkot iro nohto ulun uong duon nuhtui, ulun tipang duon nyalan, tutang ulun bobulen duon nopahjah. Turus iro monara-nara Pohotalan uhtus Israel. 15:32 Pongohino Yesus na'ah murid-murid-Oh, turus nuhtui, "Ahku ngasi umba ulun aro tuh. Jari tolu ondou kotahin iro homboh Ahku, tutang huntuh iro eam aro ukun. Ahku eam kani mohonou iro buli, hawui butuioh bolo'u, noin iro tohaot ang jalan." 15:33 Turus murid-murid Yesus ngisok umba-Oh, "Ang umoh ihto tou dahpot ukun ang daerah ijo mahcu tuh, ahkan ulun karon-tuh?" 15:34 "Anai pira luhte aang ihkam?" Yesus ngisok umba iro. "Pihtu," hion'ndo, "tutang ohcin koik anai pira-pira kungan." 15:35 Mahka Yesus rih, nyuhu ulun tuot ang ngosan tana. 15:36 Turus Yesus ngomin kopihtu luhte tutang ohcin rih, pongohuli ngohawot torimakasih ahkan Pohotala. Uliorih rih Io ngiwak-ngiwak luhte orih, tutang ohcin rih umba longoi-Oh, turus nonga orih ahkan murid-murid-Oh. Tutang iro magi-milahoh ahkan ulun aro rih. 15:37 Paring ulun rih kuman nyiring bosuh. Uliorih rih murid-murid Yesus nipun kolowin ukun rih. Paringoh anai pihtu tahkin tuwi. 15:38 Jamalah ulunbahkas iou anai ohpat kuhjan behti, jaha tongiso ulunbawi tutang anak-inyam. 15:39 Pongohuli Yesus nyuhu ulun aro rih buli. Io bongoi jahkat ihco alut tutang tulak nokuh tana Magadan.
16:1 Anai pira-pira ulun Parisi tutang ulun Saduki lombut nokuh Yesus kani nyokohtung Io. Iro nyawot Io nguan tandahelan ahkan ngorinah ijo Io lombut tahkan Pohotala. 16:2 Yesus mutah, "Amat mahtanondou uhun bolop, ihkam nuhtui, 'Cuaca pios, tului langit bohandang.' 16:3 Tutang ang ngohkos ondou, ihkam nuhtui, 'Ondou tuh kani uhjan, tului bohandang hawoi kundum.' Nah, ihkam duon moramal cuaca, umba nohto koada'an langit, padahar tanda-tanda jaman, eam tou ihkam ramaloh!" 16:4 "Eaminonrih koja'atoh tutang dorhakaoh ulun-ulun jaman tuh. Ihkam nyawot Ahku nguan tandahelan ka kocoali tandahelan Nabi Yona." Uli io nuhtui kodorih Yesus nohtah iro turus tulak. 16:5 Kotihka murid-murid Yesus johcok ang pohoi danou, punan kota'an bain iro, ijo iro tolingou ngomin luhte. 16:6 Yesus nuhtui umba iro, "Bua-buah toharep ragin ulun-ulun Parisi tutang Saduki." 16:7 Ngonih auhtuhtui Yesus rih, murid-murid-Oh nopara hopander ihco sama ijobohkon, "Io nuhtui kodorih tului ihto eam ngomin luhte." 16:8 Yesus kota'an inon ijo iro manderoh. Jari, Io nuhtui, "Ombai ihkam hotokian tohou eam aro luhte? Ihkam kurang porocaya! 16:9 Magun jaha solembang ihkam? Inon ihkam eam ingat limo luhte rih ijo Ahku molah-molahoh ahkan limo kuhjan behti? Pira tahkin kolowin luhte ijo ihkam nipuioh? 16:10 Tutang koloukuwoh hino umba pihtu luhte ahkan ohpat kuhjan behti rih? Pira tahkinkolowin ukun, ijo ihkam nipui? 16:11 Ombai nyiring ihkam eam solembang ijo Ahku eam nuhtui umba ihkam tohou luhte? Bua-buah toharep ragi ulun-ulun Parisi tutang Saduki!" 16:12 Kojoriaioh murid-murid Yesus rih solembang ijo Yesus nyuhu iro bua-buah, eamoh toharep ragi ijo hapan ahkan napa luhte, tahpi toharep ajaran-ajaran ulun-ulun Parisi tutang Saduki. 16:13 Yesus tulak nokuh tanah doni lowu Kaisarea Pilipi. Ang anan Io ngisok murid-murid-Oh, "Numbun hion ulun, Anak Ulun orih iai?" 16:14 Murid-murid-Oh mutah, "Anai ijo nuhtui Yohanes Popondus. Anai ka'a ijo ngohawot Elia. Ijo bohkon ngohawot Yeremia, ata'ai anai ihcobehti nabi." 16:15 "Tahpi numbun ihkam bongom, Ahku tuh iai?" kisok Yesus umba iro. 16:16 Simon Petrus mutah, "Amai anai Lahca Ponyolamat, Anak Pohotala Ijo Bolum." 16:17 "Utung sino ihko, Simon anak Yona!" hion Yesus. "Tului eamoh kolunon ijo nyarihta hal rih ahkan'kam, molekan Amai-Ku ijo ang soruga. 16:18 Tului orih kota'an'kam, ihko anai rih Petrus, bahtu ijo tehen. Tutang ang ngosan galang bahtu tuh, Ahku ahkan mangun Gereja-Ku, ijo eam dahpot tomokalah; olu bain popahtoi! 16:19 Ahku ahkan nonga ahkan'mu kuhci tahkan Kolunon Bohua Ain Pohotala. Inon ijo ihkam baca ang ngosan tana, ka'a tonobaca ang soruga. Tutang inon ijo ihko ngomorong rih ang ngosan tana, ka'a ahkan tonomorong ang soruga." 16:20 Uliorih rih Yesus mopingat murid-murid-Oh, mangat iro eam nyiaroh ahkan iai ka ijo Iorih Lahca Ponyolamat. 16:21 Nopara tahkan ohkot orih, Yesus nuhtui turus tarang ahkan murid-murid-Oh, ijo Io harus tulak nokuh Yerusalem tutang nyuru aro ngarot tahkan okon-okon, imam-imam kopala, tutang guru-guru agama. Io ahkan buah punu, tahpi ang ondou kotolu Io ahkan bolum hoduli. 16:22 Turus Petrus nguhut longon Yesus kosaro tutang ningak Io, hioi, "Mudah-mudahan Pohotala ngomahcu hal orih, Tuhan! Ara nyiring hal orih nyolung ang Tuhan!" 16:23 Yesus ngulos turus nuhtui umba Petrus, "Hahtun tahkan ohtoi Ponihkos! Ihko mohala-halang Ahku. Tiruk'mu rih tiruk kolunon, bohkon tiruk Pohotala!" 16:24 Pongohuli Yesus nuhtui umba murid-murid-Oh, "Ulun ijo kani nutut Ahku, harus nolingou kogunan aropoh bongoi, ngohtun sopolahkioh, tutang turus nutut Ahku. 16:25 Tului ulun ijo kani nahan pombolumoh, io ahkan nihou pombolumoh. Tahpi ulun ijo nyorah pombolumoh ahkak-Ku, ahkan ngondahpotoh. 16:26 Inon utungoh bagi ihcobehti, amat paring kolunon tuh monjadi aiuoh, tahpi io nihou pombolumoh? Duon pombolum orih tonokiri umba angihco? 16:27 Eam tahi hino Anak Ulun ahkan homboh umba molehkat-molehkat-Oh, ahkan lombut hapan kowasan Amai-Oh. Ang ohkotrih Io ahkan malos nyino-nyinong ulun sorurui umba gawiuoh. 16:28 Kota'anrih! Tahkan louk ihkam ang ohtoi anai ijo eam mahtoi, hounumba nohto Anak Ulun lombut kolou Lahca."
17:1 Onom ondou pongohino, Yesus ngomin Petrus tutang Yakobus tutang konduangoh Yohanes, bongon'ndo nokuh ihco pupung puruk ijo isung. 17:2 Ang toharep'ndo, Yesus boubah tapai. Bauioh monjadi boloang kolou mahtan-ondou tutang hatiu-Oh puti mokilap. 17:3 Pongohuli kototolu murid dih nohto Museh tutang Elia hopander umba Yesus. 17:4 Turus Petrus nuhtui umba Yesus, "Tuhan, mangat tu'u ihto ang ohtoi. Amat Tuhan jolik ahku nombok tolu kemah ang ohtoi; ihco ahkan Tuhan, ihco ahkan Museh, tutang ihco ahkan Elia." 17:5 Pondehan Petrus magun hopander baunondou ijo boloang sino ngapuh'ndo tutang tahkan baunondou rih konahan auh ijo nuhtui, "Tuhrih Anak-Ku ijo Ahku ngasih-Oh, Io nyanang ahtoi-Ku. Ngonih Io!" 17:6 Ohkot murid-murid Yesus ngonih auh orih, kodorih iro mihkoh nyiring tosumbou ahkan tana. 17:7 Tahpi Yesus lombut nigung'ndo, "Tombok," hioi-Oh, "ara mihkoh!" 17:8 Kotihka'ndo nopahjah, 'ndo eam nohto ia-iai ka kocoali Yesus bongoi ih. 17:9 Ohkot endo nosuluh tahkan pupungpuruk rih, Yesus mopingat endo, "A'ai momborihta ahkan ia-iai ka inon ijo ihkam nohtooh nanai, sounumba Anak Ulun tongomonyun tahkan popahtoi." 17:10 Murid-murid Yesus ngisok umba Io, "Ombai guru-guru agama nuhtui ijo Elia pahtut lombut labih soun?" 17:11 Yesus mutah, "Puna Elia ahkan lombut tutang io ahkan mberes kokaro aang'co. 17:12 Tahpi Ahku nuhtui umba ihkam, Elia jari lombut, tahpi ulun-ulun eam kosono io; iro nguan io numbun konohuang iro ih. Tutang kodorih ka'a iro ahkan nguan Anak Ulun." 17:13 Turus murid-murid-Oh solembang ijo Yesus nuhtui tohou Yohanes Popondus. 17:14 Kotihka Yesus tutang kototolu murid-Oh rih buli nokuh ulun aro rih, ihcobehti ulunbahkas lombut, suhkuntu'ut ang toharep Yesus, 17:15 tutang nuhtui, "Amai, ngasi ah anak'ku. Io poros nyo'on. Nyo'onoh nyarang io korinah kopahamoh nyiring io bojoin tu'u botahak nokuh baho, tutang bojoin ka'a tahpuk danum. 17:16 Ahku ius ka'a ngomin io nokuh murid-murid Amai, tahpi iro eam dahpot ngopios io." 17:17 Yesus mutah, "Eam inon ihkam tuh! Ihkam tu'u-tu'u ulun-ulun ijo nyahpang tutang eam porocaya. Nyiring mira Ahku harus mohcon umba ihkam tutang sabar toharep ihkam? Ngomin anak orih 'kanohtoi!" 17:18 Turus Yesus moretah roh ja'at ijo ang luwang anak rih, soluka. Tutang roh ja'at rih soluka, turus anak orih pios ang ohkot rih ka'a. 17:19 Pongohuli murid-murid Yesus lombut nokuh-Oh cara bongoi tutang ngisok umba-Oh, "Amai, bain inon ihkai eam duon muhko roh ja'at orih?" 17:20 Hion Yesus, "Bain ihkam kurang porocaya. Ingatrih! Amat ihkam anai kaporocaya kohajon luang sawi, ihkam duon nuhtui umba puruk tuh, 'Hahtunrih nokuh anan!' musti puruk tuh ahkan hahtun. Eam aro angihco ka ijo eam duon ihkam nguaioh! 17:21 Tahpi roh ja'at ijo koloutuh, tihkas duon tomuhko hapan do'a tutang puasa iou." 17:22 Kotihka murid-murid Yesus hopuhpung ang Galilea, Yesus nuhtui umba iro, "Eam tahi hino, Anak Ulun ahkan tonyorah ahkan pongowasa kolunon. 17:23 Io ahkan tomunu, tahpi ang ondou kotolu Io ahkan monyun." Maka murid-murid-Oh monjadi sedih samasino. 17:24 Ohkot Yesus tutang murid-murid-Oh johcok Kapernaum ponagih-ponagih pajak Lohpou Tuhan lombut nokuh Petrus tutang ngisok, "Guru'kam mombayar pajak Lohpou Tuhan ata'ai eam?" 17:25 Petrus mutah, "Bayar!" Kotihka Petrus buli, Yesus mander io labih soun, "Simon, koloukuwoh tiruk'mu? Iai ijo harus bayar bea ata'ai pajak ahkan lahca-lahcan kolunon tuh? Rayat ata'ai ulun bohkonuhtus?" 17:26 "Ulun bohkonuhtus," hion Petrus. "Amat kodorih," hion Yesus, "rayat eam porulu mbayar. 17:27 Tahpi ara rih ihto nyinggung pokomon ulun-ulun rih. Ayu, tulak nokuh danou ahkan mosi. Ngomin ohcindanum ijo pahtuk ihko nawanoh. Ang luwang baui rih ihko ahkan nyombang ihcokobilap duit ijo sukup ahkan pajak ihto duo. Omin duit rih tutang bayar ahkan'ndo pajak eto ahkan Lohpou Tuhan."
18:1 Ang ohkot rih murid-murid Yesus lombut nokuh Io tutang ngisok Io, "Iai ijo tongohu pokohajoi ang louk ukup Pohotala?" 18:2 Yesus na'ah ihcobehti anakkoik, tutang nguan io tombok ang toharep iro. 18:3 Turus Yesus nuhtui, "Porocayarih! Tihkas amat ihkam hubah tutang monjadi kolou anak-anak tuh, ihkam ahkan monjadi anak ukup Pohotala. 18:4 Ulun ijo porandah aropoh tutang monjadi kolou anak-inyam tuh, io rih ijo hajo ang louk ukup Pohotala. 18:5 Tutang ulun ijo norima anak ijo koloutuh tului Ahku, rimai io norima Ahku ka'a." 18:6 "Iai ijo kotuluioh, anai ihco tahkan ulun-ulun ijo koik tuh, eam porocaya hino umba Ahku, labih pios amat bahtu hajo mohtong ang uhcatoh, tutang io tomolohtong ang tasik ijo timbon. 18:7 Eam inon colahkaoh kolunon tuh tului hal-hal ijo kotuluioh ulun bodusa. Puna hal-hal kolouorih ahkan hototurus anai, tahpi colahkaoh ulun ijo ngotuluirihoh! 18:8 Amat longon'kam ata'ai pa'an'kam nguan ihko bodusa, nohtok tutang ndianrih. Labih pios ihkam bolum hihco Pohotala eam holongo silai, ata'ai hopa'a silai, tahkanoh ihko ndian ahkan luwang baho norahka, homboh koduo longon'mu tutang pa'an'mu. 18:9 Tutang amat mahtan'mu, kotului ihko nguan dusa, ngoruit tutang dianrih. Labih pios ihko bolum umba Pohotala eam aro ihco mahtan'mu, tahkanoh tondian nokuh luwang baho norahka, homboh koduo mahtan'mu." 18:10 "Awas! Ara ngonja'at ihcobehti tahkan ulun-ulun ijo koik tuh. Tului ingat rih molehkat-molehkat'ndo toturus anai ang baun Amai-Ku ang soruga. 18:11 Tului Anak Ulun lombut ahkan monyolamat ulun ijo lacat! 18:12 Koloukuwoh tiruk'mu? Jahkaoh anai ihcobehti ijo tepun solahtus kungan tobiri, turus ihcokungan tahkan tobiri-tobiri orih nihou, inon rih ijo ahkan konuan bain tepui rih? Musti io ahkan nohtah tobiri ijo sioi pulu sioi kungan rih ang puruk tutang hihkas ngurah ijo nihou orih. 18:13 Tutang amat io sombang tobiri orih -- porocaya umba Ahku -- io ahkan labih jorih umba tobiri ijo ihcokungan orih, tahkan umba sioi pulu sioi kungan putaioh ijo eam nihou. 18:14 Kodorih ka'a Amai'mu ijo ang soruga eam kani anai ihcobehti tahkan ulun-ulun ijo punai porocaya umba Ahku tuh lacat." 18:15 "Amat konduang'kam bodusa toharep ihkam, tulak nokuh io tutang nuhtui ahkai kosalaioh. Nguan kolouorih umba tonih-tonih, holat bongon boro iou. Amat io numbun karo-auh'mu, mahka anai hasiroh ihko nyombang konduang'mu buli. 18:16 Tahpi amat eam, ngomin ihco ata'ai duo behti hino. Bain luwang Surat Borasih tonyurat, 'Sokurang-kurangoh duo ata'ai tolu saksi ahkan duon ngotaan ihcobehti ulun 'jo bosala.' 18:17 Amat io eam norima tingak ulun-ulun rih, nyiar orih rih ahkan ukup. Tutang kojoriaioh, amat io eam kani norima tingak, ukup, mohonou io kolou ponagih pajak tutang 'cobehti ijo eam kosono Pohotala." 18:18 "Ngota'an rih: Inon ijo hion ihkam ngahana ang kolunon, ahkan ngahana ang soruga. Tutang inon ijo hion'mu ngomorong ang kolunon, ka'a morong ang soruga. 18:19 Tutang ngotaan rih ka'a: Amat ang louk ihkam ang kolunon tuh duo behti jari hopahkat tohou inon ka'a, tutang bodo'a mahka do'a iro rih ahkan norima bain Amai-Ku ang soruga. 18:20 Bain ang umoh duo ata'ai tolu behti bodo'a sama-sama, tului Ahku, Ahku anai ang tohun iro." 18:21 Pongohuli Petrus lombut nokuh Yesus tutang ngisok, "Tuhan, amat konduang'ku bodusa umba ahku, nyiring pira tikat ahku ngapun io? Nyiring pihtu tikat?" 18:22 Yesus mutah, "Eam, eam nyiring pihtu tikat, tahpi pihtu pulu tikat pihtu tikat! 18:23 Tului amatmira Pohotala moretah koada'aioh kalou a'ang porobasa tuh: Ihcobehti lahca kani molunas utang-utang karo-jihpoioh. 18:24 Ohkot io nopara tuot moriksa, tonyarah ahkaioh ihcobehti jihpon ijo bohutang bojuha-juha, 18:25 tutang eam duoi molunasoh. Jadi, lahca orih moretah, ahkan jihpon rih ponodagang homboh umba anak, oruhoh, tutang kokaron ponahtou aiuoh, ahkan mombayar utangoh rih. 18:26 Jihpon rih suhkuntu'ut ang toharop lahca rih tutang nyawot apun, 'Tuan sabar umba ahku. Ahku ahkan molunas paring utang'ku.' 18:27 Lahca rih masi umba io nyiring io, ngudap paring utangoh. 18:28 Kotihka jihpon rih soluka, io hosombang umba jolahaioh, 'cobehti jihpon ka'a, ijo anai utangoh umba io pira-pira kuhjan. Io nambit jolahai orih, nyeok io tutang nuhtui, 'Bayarih paring utang'mu!' 18:29 Turus jolahaiohrih suhkuntu'ut ang toharepoh hawoi nyawot, 'Sabar houn sobat, paring utung'ku ahkan ahku bayaroh!' 18:30 Tahpi jihpon rih nulak. Mala-malah, io posolong jihpon orih aang sipir nyiring io mombayar utangoh. 18:31 Kotihka jihpon-jihpon ijo bohkon nohto, inon ijo jari nyolung, iro porosahtoi, tutang ngadu ang rih ahkan lahca. 18:32 Mahka lahca rih na'ah jihpon ijo ja'at orih tutang nuhtui umba io, 'Jihpon ijo ja'at! Koparing utang'mu jari ahku ngudapoh tului ihko nyawot apun umba ahku. 18:33 Eamkah, ihko ka'a harus anai kasihan umba injah'mu kolou ahku jari anai kasihan umba ihko?' 18:34 Lahca rih paham sangit. Jihpon ijo ja'at orih ponosolongoh koluwang sipir nyiring io molunas paring utangoh." 18:35 Yesus ngohpah kesah-Oh hapan tuhtui tuh, "Kodorih ka'a Amai-Ku ang soruga ahkan nguan ihkam nyinong behti, amat ihkam eam mongapun konduang'mu honong ihlas."
19:1 Uli Yesus ngopah nuhtui paringoh rih, Io nohtah Galilea turus tulak nokuh tana Yudea ang pohoi Sungoi Yordan. 19:2 Aro ulun ngohasu Io, tutang Io ngopios iro ang anan. 19:3 Turus ulun-ulun Parisi lombut unuk nyokohtung Io. Iro ngisok, "Numbun hadat agaman 'to, inon tou ulun misah oruhoh tului alasan inon ka'a?" 19:4 Yesus mutah, "Inon ihkam jaham mombasa ang Surat Borasih, ijo Pona'oi tutang ijo napa ulun, ang pahtukoh napa iro bahkas tutang bawi? 19:5 Tutang uliorih Io nuhtui, 'Orih kotuluioh ulunbahkas nohtah inai-amaioh tutang hihco umba oruhoh, mahka doro monjadi ihco.' 19:6 Jadi iro eam hino duo behti tahpi ihco. Bain orih inon ijo jari tomohihco bain Pohotala eam tou nulang bain ulun." 19:7 Turus ulun-ulun Parisi ngisok umba Io, "Amat kodorih ombai Museh nyuhu ulun nonga surat hopisah ahkan oruh ijo tomisahoh?" 19:8 Yesus mutah, "Museh nonga ijin ihkam pisah umba oruh'kam tului ihkam bohali toningak. Tahpi kotu'ui eam kodorih ang ijo pahtukoh. 19:9 Jadi, ngonih tuh: Iai misah oruhoh -- podahar oruhoh rih eam nyapang -- Pongohuli ngoruh hino umba bawi bohkon, ulun rih hobandung." 19:10 Mahka murid-murid Yesus nuhtui umba Io, "Amat soal kohihco bosai tutang oruh anai kolou orih, labih pios eam usah ngoruh." 19:11 Yesus mutah, "Eam paring ulun duon norima karo auh orih rih, tihkas ulun-ulun ijo jari tonahtap bain Pohotala. 19:12 Tului anai ulun ijo eam duon ngoruh, bain iro puna konanak kodorih. Anai ka'a ijo eam duon ngoruh tului io napa kolourih bain ulun bohkon. Tutang anai hino ijo mihtih bongoi, ahkan eam ngoruh ata'ai ngomosai, ahkai tou mohalu Pohotala. Ulun ijo sanggup norima auh ajar tuh, nauh io norimaoh." 19:13 Anai ulun-ulun ngomin anak-inyam nokuh Yesus mangat Io ngina longoi-Oh ang ngosan kuhung'ndo tutang bodo'a ahkan'ndo. Tahpi murid-murid Yesus baca ulun-ulun rih. 19:14 Mahka Yesus nuhtui umba murid-murid-Oh, "Nauh anak-anak inyam rih lombut nokuh Ahku! Ara baca iro, bain ulun-ulun ijo koloutuh ijo monjadi ulun ukup ain Pohotala." 19:15 Turus Yesus ngina longoi-Oh ang ngosan kuhung anak-anak rih tutang momborehkat iro. Pongohuli Io tulak tahkan anan. 19:16 Ang ihco ondou, ihcobehti ulunbahkas biou lombut nokuh Yesus, "Amai Guru," hioioh, "gawi pios 'jo umoh harus ahku nguai ahkan duon norima pombolum ijo sojahti tutang kototahiu?" 19:17 Yesus mutah, "Ombai ihko ngisok umba Ahku tohou inon ijo pios? Tihkas anai Ihco, ijo pios. Amat ihko jolik bolum, ihko pahtut te'et numbun poretah-poretah Pohotala." 19:18 "Poretah ijo umoh rih?" kisok ulun rih. Yesus mutah, "Ara munu, ara hobandung, ara nahkou, ara nuhtui kobalik, 19:19 hormat amai tutang inai'mu; tutang ngasih sosama'mu ulun, kolou ihko ngasih arop'mu bongom." 19:20 "Paringoh rih jari ahku nguai," hion ulun biou rih. "Inon hino ijo porulu?" 19:21 Yesus nuhtui umba io, "Amat ihko kani monjadi soporuna, tulak modagang paring ain'mu. Tonga duitoh ahkan ulun porosbolum, tutang ihko ahkan norima ponahtou ang soruga. Ulirih rih, lombut rih ngahasu Ahku!" 19:22 Ngonih auh-auh orih, ulun biou rih tulak homboh porosahtoioh tului io tahtou samasino. 19:23 Turus Yesus nuhtui umba murid-murid-Oh, "Ahku nuhtui ahkan ihkam, bohali samasino ulun tahtou monjadi anak ukup ain Pohotala. 19:24 Tutang tuh hino ijo kani Ahku nuhtui ahkan'kam; murah ihcokungan unta nyolong luwang doih, tahkan umba ihcobehti uluntahtou nyolong ang Kolunon Bohua Ain Pohotala." 19:25 Uhun murid-murid-Oh ngonih auh Yesus rih, iro helan. "Amat kolourih," hion'ndo, "iai ijo tou solamat?" 19:26 Yesus nopahjah iro turus nuhtui, "Ahkan ulun, orih mustahel! Tahpi ahkan Pohotala, paringoh tounyolung." 19:27 Turus Petrus nuhtui, "Nohto rih, ihkai jari nohtah kokaro-paringoh ahkan ngohasu Amai. Tutang inon ijo ihkai norima?" 19:28 Yesus nuhtui umba iro, "Porocayarih: Ang Kolunon Ijo Bohua, Anak Ulun ahkan tuot ang ngosan pododusai-Oh ijo hajo. Ang uhun rih ihkam murid-murid-Ku ahkan tuot ang ngosan duo balas pododusan tutang mosara koduo balas suku uhtus Israel! 19:29 Tutang nyinong ulun ijo jari nohtah lohpou, ata'ai konduangoh bahkas ata'ai bawi, ata'ai inai amai, ata'ai anak-anak, ata'ai umoi tului Ahku, ulun rih ahkan norima hoduli sorahtus lihpet. Tutang io ahkan norima ka'a pombolum sojahti tutang kototahiu. 19:30 Tahpi aro ulun ijo, huntuh tuh pahtuk ahkan monjadi ijo kolain tutang ijo uhuntuh tuh kolain, ahkan monjadi ijo pahtukoh."
20:1 "Amat Pohotala moretah, koada'aioh kolou porobasa tuh: Ihcobehti tepun pombulan anggur soluka uhun ngohkos ngurah ulun ahkan bogawi ang pombulan angguroh. 20:2 Uli io muhtus setuju upah'ndo, ihco duit perak, ihco ondou, io nyuhu iro bogawi ang pombulan angguroh. 20:3 Pukul sioi ngohkos, tepun pombulan rih tulak hino, nokuh pira-pira ulun ijo kuhang-kihui ang pasar. 20:4 Mahka nuhtui rih io umba iro, 'Tulak rih ihkam bogawi aang pombulan anggur aik'ku. Ahku ahkan ngupah ihkam umba upah ijo pahtut.' 20:5 Iro ka tulak. Pukul duo balas tohun ondou tutang ka'a pukul tolu cohit, tepun pombulan rih soluka nguan hal ijo sama. 20:6 Tutang kira-kira pukul limo cohit, io soluka hino tutang nohto magun anai ulun ijo kuhang-kihui. Turus io ngisok umba iro, 'Ombai ihkam tombok turus nyihing ihcoondou ang ohtoi tutang eam aro bogawi ino-inon?' 20:7 Ulun-ulun rih mutah, 'Eam aro ulun ijo ngupah ihkai bogawi ino-inon.' 'Amat kolourih,' hion tepun pombulan rih, 'tulak ihkam bogawi ang kombulan anggur aik'ku.' 20:8 Cohit ondou tepun pombulan rih nuhtui umba mandoroh, 'Na'ah rih ulun-ulun ponggawi rih tutang bayar rih upah'ndo nyinong behti, nopara tahkan ulun ijo bogawi pokopongooh, johcok umba ijo bogawi pahtukoh.' 20:9 Turus lombut rih ponggawi-ponggawi rih, ijo pongo bogawi, nopara tahkan pukul limo cohit. Iro nyino-nyinongbehti norima ihco duit perak. 20:10 Pongohuli rih, lombut hino ponggawi-ponggawi ijo konupah tahkan ngohkos. Iro niruk iro ahkan norima labih aro. Padahar iro tihkas tononga ihco duit perak ka'a. 20:11 Kotihka norima duit orih iro bokuhtuk umba tepun pombulan rih: 20:12 'Ponggawi-ponggawi ijo lombut pongorih baya bogawi ihco jam. Sadang ihkai bogawi ihcoondou ang minda totang mahtan ondou, tahpi Tuan mbayar upah iro sama umba upah ekai!' 20:13 Tepun pombulan anggur rih mutah ahkan auh ihcobehti tahkan iro, 'Sobat, ahku eam sala toharep 'ko. Eamkah ihko jari sotuju norima upah ihco duit perak ahkan upah gawin'mu ihcoondou? 20:14 Nah, omin upah'mu tutang tulak iou. Ahku puna jolik nongaoh ahkan ulun ijo nyolong pokopongo rih, upah ijo sama umba ijo ahku nongaoh ahkan'mu. 20:15 Inon ahku eam tou nguan numbun kokani'ku umba ijo aik'ku? Ata'ai rih ihko bohiri, tului ahku pios ahtoi?' " 20:16 Turus Yesus nuhtui hino, "Kolourih ka'a ulun-ulun ijo kolaiou, ahkan monjadi ijo pahtukoh, tutang ulun-ulun ijo pahtukoh monjadi ijo kolaiou." 20:17 Kotihka Yesus nihtu nokuh Yerusalem, ang beteng jalan Io na'ah duo balas murid-Oh, hopuhpung bongon'ndo. Turus Io nuhtui umba iro, 20:18 "Ngonihoh! Ihto uhuntuh nihtu Yerusalem. Ang anan Anak Ulun ahkan tonyarah rih ahkan imam-imam kopala tutang guru-guru agama. Turus Io ahkan tomohukum mahtoi, 20:19 pongohino rih tonyarah ahkan ulun-ulun bohkon Yahudi. Iro ahkan hololea Io, ngoporos Io, tutang nyopolahki Io. Tahpi aang ondou tolu Io ahkan monyun hoduli." 20:20 Pongohino oruh Sebedeus lombut honong anak-anakoh nokuh Yesus. Ang toharop Yesus io nyembah tutang nyawot angihco. 20:21 "Inai kani inon?" hion Yesus. Ibu rih mutah, "Ahku jolik koduo anak'ku tuh, tuot ang komuloi tutang kotoun Amai, amat Amai monjadi Lahca noin." 20:22 "Ihkam eam kota'an inon ijo ihkam nyawotoh," hion Yesus umba iro. "Sanggup ihkam ngorih tahkan sakir koporos ijo harus Ahku ngorih?" "Sanggup," hion'ndo. 20:23 Yesus nuhtui, "Puna ihkam ahkan ngorih ka'a tahkan sakir-Ku. Tahpi tohou iai ijo tuot ang komuloi tutang kotouk-Ku orih eam Ahku ijo bohak nuhkasoh. Unuk-unuk rih anairih ahkan ulun-ulun, ijo jari tonuhkas bain Amai-Ku." 20:24 Kotihka kosopulu murid ijo bohkon ngonih hal orih, iro bosingi umba koduo behti hokonduang rih. 20:25 Tului orih Yesus na'ah iro paring turus nuhtui, "Ihkam kota'an, ijo okon-okon uhtus ijo eam kosono Pohotala mononyok rayatoh. Tutang ulun hajo nenyek iro. 20:26 Tahpi ihkam eam tou kolouorih. Sobalikoh, ulun ijo kani monjadi hajo aang louk ihkam, harus monjadi pohalu'kam. 20:27 Tutang ulun ijo kani monjadi ijo pahtukoh ang louk ihkam harus monjadi jihpon'kam. 20:28 Sama kolou Anak Ulun rih ka'a; Io lombut eam ahkan tonohalu, tahpi ahkan mohalu, tutang nyorah hasong-Oh ahkan momordehka aro ulun." 20:29 Kotihka nohtah Yerikho, aro ulun ngahasu Yesus. 20:30 Duo behti bobulen beteng tuot ang saran jalan. Kotihka iro ngonih ijo Yesus nyihing, iro bokociak, "Anak Dawid, ngasiohrih ihkai!" 20:31 Ulun aro ijo anai ang anan bosingiumba iro, tutang nyuhu iro tonih. Tahpi iro bokociak labih muhing hino, "Tuan, Anak Dawid, ngasiohrih ihkai!" 20:32 Turus Yesus tondo tutang na'ah iro. "Inon ijo ihkam jolik Ahku nguai ahkan'kam?" kisok Yesus. 20:33 Iro mutah, "Tuan, ihkai jolik nohto!" 20:34 Yesus ngasi umba iro, turus ninjok mahtan'ndo. Uhun rih ka'a doro dahpot nopahjah. Turus iro ngohasu Yesus.
21:1 Ohkot jari doni Yerusalem, iro johcok ang Betpage ang Puruk Zaitun. Ang anan Yesus nyuhu duo behti murid-Oh nyalan labih houn. 21:2 "Tulak nokuh lowu ijo ang boun ahi," pohtoh Yesus umba iro. "Jeleng ihkam ahkan nohto ihcokungan keledai sonuhkau tutang anakoh. Nguwat orih koduo-duooh tutang ngomin ahkan ohtoi. 21:3 Amat anai ulun ngisok ang ihkam, nuhtui ahkaioh, 'Tuhan kani hapaoh,' mahka ulun rih jeleng nyuhu tutang mohonou keledai rih tongomin." 21:4 Hal orih kodorih mangat nyolung rih inon ijo tonuhtui bain nabi kolou pongo, 21:5 "Mborihtarih ahkan Sion, Lahca'kam, rahat lombut ahkan'kam. Io randah ahtoi tutang nunggang, ihcokungan keledai, ihcokungan anak keledai ijo biou." 21:6 Pongohuli koduo-duo murid-Oh rih tulak tutang nguan kolou ijo tomohtoh Yesus umba iro. 21:7 Iro ngomin keledai rih hawui anakoh. Turus iro ngolahpik ngosan lihkut keledai-keledai rih umba jubah'ndo. Uliorih Yesus nunggangoh. 21:8 Aro ulun ang anan mbirang jubah-jubah'ndo ang jalan, kodorih ka'a ulun bohkon nuhtuk da'an kahju tutang nahtaioh ang tohun jalan. 21:9 Ulun ijo nyalan ang hila boun tutang hila lihkut Yesus uras molahap-lahap, "Bolum Anak Dawid! Tomborehkat Io ijo lombut ngosan aran Tuhan! Tara rih ahkan Pohotala Ijo Mahaisung!" 21:10 Turus, kotihka Yesus nyolong Yerusalem, hopus kohta rih monjadi rami. "Jituh iai?" kisok ulun-ulun kohta rih. 21:11 "Io Nabi Yesus, tahkan Nasaret ang Galilea," puhtoh ulun aro ijo nutut Yesus. 21:12 Pongohino Yesus nyolong nokuh Lohpou Tuhan, tutang muhko paring ulun ijo bodagang aang anan. Io nombalikmokila meja-meja unuk ulun nokiri duit, tutang bangku-bangku podagang bulung dala. 21:13 Turus Io nuhtui umba ulun-ulun rih, "Ang luwang Surat Borasih tonyurat, ijo Pohotala nuhtui, 'Lohpou-Ku ahkan konohawot lohpou unuk bodo'a,' tahpi ihkam monjadioh kosalah ponyilou!" 21:14 Ulun-ulun bobulen tutang bolomu lombut nokuh Yesus ang Lohpou Tuhan, tutang Io ngopios iro. 21:15 Tahpi imam-imam kopala tutang guru-guru agama bosingi nohto tandahelan-tandahelan ijo konuan bain Yesus. Tutang iro bosingi ka'a ngonih anak-inyam molahap-lahap ang Lohpou Tuhan, "Bolum Anak Dawid!" 21:16 Iro nuhtui umba Yesus, "Ihko kanaham inon ijo hion'ndo ngohawotrih?" "Yo, kanahak-Ku," puhtah Yesus, "jaha pu'urih ihkam mombasa ayat Surat Borasih tuh: 'Anak-inyam tutang anak-ngoa jari Ahku ngajaroh ahkan ngohawot tara ijo soporuna?' " 21:17 Pongohuli Yesus nohtah iro, turus soluka tahkan kohta rih nokuh Betania tutang bomalom ang anan. 21:18 Homboh-ngohkos hawun ondouoh, ang ponyalaioh hoduli ahkan kohta Yesus bolo'u. 21:19 Io nohto ihcokobahtang pu'un sikun ang saran jalan. Io tulak nokuh pu'un rih, tahpi eam aro nyombangoh ihcokoluang-buaoh ka'a, kocoali karon-daui iou. Turus Yesus nuhtui umba pu'un sikun rih, "Ihko eam ahkan mua hino!" Hunrih pu'un sikun rih molanyu. 21:20 Aang uhun murid-murid Yesus nohto angnyolung rih, iro helan samasino, "Koloukuwoh pu'un sikun rih tou turus mahtoi paringoh?" hion'ndo. 21:21 "Kotu'ui," puhtah Yesus, "amat ihkam porocaya tutang eam bembang, ihkam duon nguan inon ijo ius Ahku nguai toharep pu'un sikun rih. Tutang eam baya orih iou, malah ihkam ahkan duon nuhtui umba puruk tuh, 'Kuat tutang hahtun nokuh luwang tasik'; mahka hal orih ahkan nyolung. 21:22 Inon beweu ijo ihkam nyawot ang do'a'mu, ihkam ahkan norimaoh, asar ihkam porocaya." 21:23 Pongohino Yesus hoduli nokuh Lohpou Tuhan, turus nyolong tutang majar ang anan. Ohkot Io uhun majar, imam-imam kopala tutang okon-okon Yahudi lombut nokuh Io tutang ngisok, "Ngosan galang inon Ihko duon nguan paringoh rih? Iai ijo nonga hak rih ahkan-Kam?" 21:24 Yesus mutah, "Ahku ka'a kani ngisok umba ihkam. Tutang amat ihkam mutahoh, Ahku ahkan nuhtui ahkan'kam hapan hak, iai Ahku nguan hal-hal tuh. 21:25 Yohanes mopondus umba hak iai? Pohotala ata'ai ulun?" Turus imam-imam kopala tutang okon-okon Yahudi rih hopahkat sama arop'ndo, "Amat ihto nuhtui, 'Hapan hak kowasa ain Pohotala,' Io ahkan nuhtui, 'Amat kodorih ombai ikam eam porocaya umba io?' 21:26 Tahpi amat ihto ngohawot, 'Hapan hak kowasa kolunon,' ihto mihkoh umba ulun aro, tului ulun aro ngohu Yohanes rih ihcobehti nabi." 21:27 Jadi iro mutah, "Ihkai eam kota'an." Turus Yesus nuhtui umba iro, "Amat kolourih Ahku ka eam ahkan mander ahkan'kam hapan hak kowasa iai Ahku nguan paringoh tuh." 21:28 "Huntuh, koloukuwohoh tiruk'mu tohou hal tuh?" hion Yesus turusoh, "Anai ihcobehti amai, ijo ngina duo anak bahkas. Ulun rih, tulak nokuh anakoh ijo oko, tutang nuhtui, 'Nak, tulak rih bogawi ang pombulan anggur ondou tuh.' 21:29 'Ahku eam kani,' hion anak rih. Tahpi pongohino, io hubah tirukoh tutang tulak nokuh pombulan anggur rih. 21:30 Pongohuli rih amaioh tulak nokuh anakoh ijo koduo, tutang nuhtui umba auh ijo sama. 'Piosrih, Amai,' hion anak ijo koduo rih. Tahpi io eam tulak. 21:31 Olai, tahkan iro duo anak rih, umoh ijo numbun konohuang amaioh?" "Ijo okoi," puhtah imam-imam tutang okon-okon Yahudi rih. Mahka Yesus nuhtui umba iro, "Porocayarih: Ponagih-ponagih pajak tutang bawi-bawi luteu ahkan paling houn monjadi uhkup ain Pohotala hounumba'kam. 21:32 Tului Yohanes Popondus lombut, tutang ngorinah ahkan'kam cara bolum numbun kohondak Tuhan, tahpi ihkam eam kani porocaya aang ajaranoh; tahpi ponagih-ponagih pajak tutang bawi-bawi luteu porocaya umba io. Tahpi oluka ihkam jari nohto paring aang rih, ihkam eam ka'a ngubah tiruk'kam tutang eam porocaya umba Tuhan." 21:33 "Ngonih, porobasa ijo ihco tuh hino," hion Yesus. "Ihco tuan tana, ngombulan ihco kolambar pombulan anggur. Io nombok pahkotoh hokodiling, io nguan unuk pokakas mohamih anggur, pongohino rih nombok gardu jaga. Uliorih rih io nyewaoh pombulan anggur rih ahkan ponggawi-ponggawi, turus tulak nokuh lowu bohkon. 21:34 Kotihka jari johcok musim nguhtoi bua anggur, tuan tana rih ngirim pohalu-pohaluoh nokuh ponggawi-ponggawi pombulan anggur rih ahkan norima bagian aiuoh. 21:35 Tahpi ponggawi-ponggawi pombulan orih nawan'ndo pohalu-pohalu tuan tana orih: Ijo 'cobehti tonahop'ndo, ijo bohkon tomunu, tutang ijo bohkon hino tomuhkah'ndo umba bahtu. 21:36 Tuan tana rih ngirim hino pohalu-pohalu bohkon, labih aro hino umba 'jo pahtuk tikatoh. Tahpi iro tononguan honong cara ijo sama. 21:37 Kojoriaioh tuan tana rih ngirim ahkan iro anak aiuoh bongoi. 'Pasti anak'ku ahkan tomohoromat'ndo,' tirukoh. 21:38 Tahpi kotihka ponggawi-ponggawi pomulan anggur rih, nohto anak tuan tana orih, iro nuhtui ihco sama ijo bohkon, 'Nah, ahtuh io, ahli warisoh. Olai ihto munuoh, mangat ihto tepun warisoh!' 21:39 Mahka anakoh rih tonawan, turus tonyahkah'ndo nokuh konaha turus io tomunu." 21:40 Yesus ngisok, "Nah, amat tepun pombulan anggur rih buli, io ahkan nguan inon toharep ponggawi-ponggawi pombulan orih?" 21:41 Iro mutah, "Musti io ahkan munu ulun-ulun ja'at orih, turus moposewaoh kombulan anggur rih ahkan ulun bohkon ijo kani nonga bagi bua tana rih ahkaioh ang ohkotoh." 21:42 Mahka Yesus nuhtui umba iro, "Jaha ihkam pu'u mombasa ijo tonyurat a'ang Surat Borasih? 'Bahtu ijo eam hapan bain tuhkang pangun jari monjadi bahtu ijo mombahtang. Tuhrih ang konuan Tuhan; ijo dalou kohinutoh!' " 21:43 "Jadi ingatrih," hion Yesus, "paring hak kolou ukup ain Pohotala ahkan konomin tahkan'kam tutang tononga ahkan ihco uhtus, ijo ahkan nguan karon-poretah Pohotala. 21:44 Ulun ijo tocahap ang bahtu rih, ahkan luhtek; tutang ulun ijo nopahas bahtu rih ahkan tokole'et jadi korawu." 21:45 Ang ohkot imam-imam kopala tutang ulun-ulun Parisi ngonih karo-porobasa Yesus rih, iro kota'an ijo Yesus nyindir tohou iro. 21:46 Jadi iro ngurah jalan nawan Io. Tahpi iro mihkoh umba ulun-ulun aro, tului ulun aro rih ngohu Yesus ihcobehti nabi.
22:1 Yesus bopander hino umba ulun aro honong hapan porobasa, 22:2 hioi-Oh, "Amat Pohotala moretah, koada'aioh kolou porobasa tuh: Ihcobehti lahca nguan pesta kawin ahkan anakoh. 22:3 Lahca rih nyuhu pohalu-pohalu tulak ngomin ulun aro ijo jari tomorawe nokuh pesta kawin rih. Tahpi dolang tomorawe rih eam kani lombut. 22:4 Uli hino lahca rih nyuhu pohalu-pohalu ijo bohkon, hioioh umba iro: 'Mander ih ahkan tomorawe rih. Ukun-ukun pesta jari sadia. Sahpi tutang anak-anak sahpi'ku ijo bolomak ius tonyombalih. Paringoh uras sodia. Olai, lombut nokuh pesta kawin!' 22:5 Tahpi ulun-ulun ijo tomorawe rih eam podulioh. Iro tulak nokuh gawiu nyinong-behti, -- tongai iro nokuh umoioh, 'jo bohkon nokuh unuk usahaoh; 22:6 tutang ijo bohkonoh hino nawan pohalu lahca rih, turus nahup tutang munu iro. 22:7 Kotihka lahca rih ngonih naing orih, io bosingi samasino. Io ngirim sorodaduoh ahkan munu pomunu-pomunu orih, tutang nyaha lowun'ndo. 22:8 Uliorih rih io na'ah pohalu-pohaluoh turus nuhtui, 'Pesta kawin jadi uras sadia, tahpi ulun tomorawe eam pahtut. 22:9 Tulak uhuntuh ka'a, nokuh jalan-jalan rami, tutang morawe ngohpah ulun aro rih, nokuh pesta kawin tuh.' 22:10 Mahka pohalu-pohalu rih ka tulak. Iro tulak nokuh jalan-jalan hajo tutang mohalu paring ulun ijo tobarung umba iro ang anan, ijo pios oluka ijo ja'at. Mahka tuwi lohpou unuk pesta kawin rih, umba ulun-ulun tomorawe. 22:11 Pongohuli lahca rih nyolong nohto-nohto tomorawe. Io nohto ihcobehti ang pesta rih ijo eam hapan pokahjan pesta. 22:12 Turus io ngisok umba ulun rih, 'Sobat koloukuwohrih ihko tou nyolong nokuh ohtoi eam hapan pokahjan pesta?' Ulun rih eam duon numbah ino-inon. 22:13 Turus lahca rih nuhtui umba pohalu-pohaluoh, 'Ngahut pa'ai tutang longoi ulun tuh, tutang nyakah io nokuh luar ahi unuk ijo pindong. Ang anan ahkan anai tangih tutang kokarot.' " 22:14 Turus Yesus ngohpah porobasa rih kolihtuh, "Aro ijo tona'ah, tahpi honjiot ih ijo konopili." 22:15 Pongohuli ulun-ulun Parisi tulak hopahkat sama-sama hotohou koloukowuh iro tou nyokohtung Yesus umba karo-kisok'ndo. 22:16 Mahka iro nyuhu murid-murid'ndo nokuh Yesus homboh pira-pira ulun barih Horodes. Ulun-ulun rih nuhtui umba Yesus, "Amai Guru, ihkai ta'an Amai morong. Amai majar ulun hapan auh torus-tarang tohou kohondak Pohotala umba ulun, eam aro poduli tiruk iai beweu. Tului Amai eam nopahjah kolouului. 22:17 Tului orih cuba Amai nuhtui ahkan 'kai: Numbun poroturan agaman eto, tou mombayar pajak ahkan Kaisar ata'ai eam?" 22:18 Yesus ngota'an konohuang'ndo ijo ja'at orih, jadi Io nuhtui, "O, ulun pura-pura! Ombai ihkam kani nyokohtung Ahku? 22:19 Cuba, pokarah ahkak-Ku ihcokobawak duit ijo hapan ahkan mbayar pajak!" Turus iro nonga ahkai-Oh ihcokobawak duit perak. 22:20 Yesus ngisok umba iro, "Gambar tutang aran iairih tuh?" 22:21 "Kaisar," puhtah'ndo. Mahka Yesus nuhtui umba iro, "Amat kolourih, nongarih ahkan Kaisar ijo ain Kaisar, tutang tonga ahkan Pohotala inon ijo ain Pohotala." 22:22 Ohkot iro ngonih kotorangan orih, iro monjadi helan. Mahka iro tulak nohtah Yesus. 22:23 Ang ondou orih ka'a, pira-pira ulun Saduki lombut nokuh Yesus. Iro anairih barih ijo moniruk, ijo ulun mahtoi eam ahkan monyun hoduli. 22:24 "Amai Guru," hion'ndo, "Museh majar koloutuh: Amat ihcobehti bahkas mahtoi, tutang io eam nohtah anak, konduangarioh harus kawin umba baluoh mangat nonga koturunan ahkan ulun ijo jari mahtoi rih. 22:25 Pu'u anai pihtu behti hokonduang ijo mohcon ang ohtoi. Ijo ohko kawin turus mahtoi eam anai nohtah anak. Mahka baluoh tonohtah ahkan konduangariohrih. 22:26 Konduangarioh rih pongohino mahi mahtoi ka'a eam anai nohtah anakoh. Hal ijo sama nyolung ka'a umba konduangarioh ijo kotolu tutang turu-turusoh nyiring kopihtuoh. 22:27 Laiouoh bawi rih mahi mahtoi ka'a. 22:28 Nah, ang ohkot ulun mahtoi tonombolum huli, oruh iai bawi orih? Tului kopihtu-pihtuoh uras kawin umba io." 22:29 Yesus mutah, "Ihkam koliru samasino, bain ihkam eam solembang umba Surat Borasih, oluka kowasan Pohotala. 22:30 Tului 'matmira ulun mahtoi noin monyun huli, iro eam ahkan kawin hino, molekan iro ahkan bolum kolou molehkat ang soruga. 22:31 Jaha pu'u rih ihkam mbasa inon ijo tongohawot Pohotala tohou ulun mahtoi tonombolum huli? Pohotala nuhtui, 22:32 'Ahku rih Pohotalan Abraham, Pohotalan Isaak, tutang Pohotalan Yakub.' Pohotala rih, eam Pohotalan ulun mahtoi. Io Pohotalan ulun bolum!" 22:33 Ohkot ulun aro rih ngonih kotorangan Yesus, iro kagum samasino umba ajaran-Oh rih. 22:34 Ang ohkot ulun-ulun Parisi ngonih ijo Yesus jari ngagum ulun-ulun Saduki eam duon nuhtui ino-inon hino, iro bohaum. 22:35 Ihcobehti tahkan iro, yorih ihcobehti guru agama, mocuba nyokohtung Yesus umba ihco kisok. 22:36 "Amai Guru," hioioh, "poretah umoh ijo paling mombahtang ang luwang hukum agama?" 22:37 Yesus mutah, "Ngasih Tuhan Pohotalan'kam hapan kotuwi ahtoi'kam, hapan sohopus homboruan'kam, tutang hapan paring ahkal'kam. 22:38 'Jorih poretah ijo ngomahtang tutang boguna! 22:39 Poretah ijo duo sama umba ijo pahtuk orih: Ngasih sama arop'kam kolou ihko ngasih arop'mu bongom. 22:40 Koparing hukum agama ijo nonga Museh tutang ajaran nabi-nabi uras hogalang ang koduo poretah rih." 22:41 Pondehan ulun-ulun Parisi magun bohaum ang anan, Yesus ngisok umba iro, 22:42 "Koloukuwoh tiruk'kam tohou Lahca Ponyolamat? Uhtus iai Io?" "Uhtus Dawid," hion'ndo. 22:43 "Amat kolourih," hion Yesus, "bain inon Roh Pohotala mongowasa Dawid unuk ngohawot Lahca Ponyolamat, 'Tuhan'? Tului Dawid nuhtui, 22:44 'Tuhan nuhtui umba Tuhan'ku: tuot ihko ang silan kotouk-Ku, nyiring Ahku nguan musuh-musuh-Mu monyorah umba Ihko.' 22:45 Jadi amat Dawid ngohawot Lahca Ponyolamat rih, 'Tuhan', koloukuwoh Io konohawot uhtus Dawid?" 22:46 Eam ihcobehti ka duon muhtah auh Yesus. Tutang nopara ondou orih, eam aro ihcobehti bohanyi ngisok ino-inon hino umba Yesus.
23:1 Turus Yesus nuhtui ahkan ulun aro tutang ahkan murid-murid-Oh, 23:2 "Guru-guru agama tutang ulun-ulun Parisi duon kowasa ahkan monapsir hukum Museh. 23:3 Tului orih mone'et tutang numbun paringoh ijo tomoretah'ndo. Tahpi ara nguan, inon ijo tonguan'ndo, tului iro eam nguan gawiu kolou ijo tongajaroh. 23:4 Iro nyawot hal-hal ijo bohali, tutang nonga poroturan-poroturan ijo bahat, tahpi honjiot ka, iro eam dohop ulun nguaioh. 23:5 Paring ijo tonguan'ndo baya unuk ponopahjah ulun ih. Iro ha'at hapan tali sombayang ijo lumbah, tutang pokombu rumbai-rumbai jubah iro! 23:6 Iro jolik unuk ijo pio-piosoh ang pesta-pesta, tutang korusi ijo tamam ang lohpou-lohpou sombayang. 23:7 Iro sanang tu'u tomohoromat bain ulun ang pasar-pasar, tutang tona'ah, 'Amai Guru.' 23:8 Tahpi ihkam ara kani tona'ah, 'Amai Guru,' bain Guru'kam, tihkas anai ihco tutang ihkam paring hokonduang. 23:9 Tutang ara ihkam tona'ah ihcobehti ka ang kolunon tuh, 'Amai' bain Amai'kam tihkas ihco, iorih Amai ijo ang soruga. 23:10 Tutang ara ihkam kani tona'ah ulun 'Okon', tului okon tihkas anai ihco, io rih Lahca Ponyolamat ijo tonobowot bain Pohotala. 23:11 Ulun ijo pongohajo ang louk ihkam koharusoh monjadi pohalu'kam. 23:12 Ulun ijo ngondiang aropoh ahkan tongopinda, tutang ulun ijo ngominda aropoh ahkan tongahtang." 23:13 "Colahka ihkam guru-guru agama tutang ulun-ulun Parisi! Ihkam guru pura-pura. Ihkam ngapeng ulun monjadi uhkup ain Pohotala. Ihkam bongom eam kani monjadi anak uhkup ain Pohotala, tutang ulun bohkon ijo kani, ihkam ngapengjalaioh. 23:14 Colahka ihkam guru-guru agama tutang ulun-ulun Parisi: Ihkam tuhkang pura-pura. Ihkam ngobalik balu-balu tutang morapas lohpouoh, tutang ahkan nuhtup koja'at orih, ihkam bodo'a ombu-ombu. Tului orih hukum ihkam noin bahat! 23:15 Colahka ihkam guru-guru agama tutang ulun-ulun Parisi! Ihkam tuhkang pura-pura! Ihkam tulak mahcu-mahcu mihtah tasik, tutang nomuoi soup tanadanum baya tihkas ahkan nguan ihcobehti nyolong agama'kam. Tutang uli ulun nyolong agaman'kam, ihkam nguan io bakal nyolong norahka ijo duo tikat molobien koja'atoh tahkanumba ihkam bongon! 23:16 Colahka ihkam okon-okon ijo bobulen! Ihkam majar tuh, 'Amat ulun nulut aropoh nitu Lohpou Tuhan, ulun orih eam bocahu ang tulutoh; tahpi amat io nulut aropoh nitu bolou ang Lohpou Tuhan, io bocahu tului tulutoh rih.' 23:17 Ihkam ulun-ulun uong ijo bobulen! Umoh ijo labih boguna: bulouoh ata'ai Lohpou Tuhan ijo ngonjorian bulou rih borasih? 23:18 Ihkam majar jituh ka'a, 'Amat ihcobehti monulut nitu mesbeh, ulun rih eam bocahu bain tulutoh rih; tahpi amat io monulut nitu pononga ang ngosan mesbeh rih, io bocahu bain tulutoh rih.' 23:19 Eam inon kobobulenoh ihkam! Umoh ijo molobien gunaioh? Ponongaoh ata'ai mesbeh ijo ngonjorian pononga rih borasih? 23:20 Bain orih, amat ihcobehti monulut nitu mesbeh rih, rimai io monulut aang aran mesbeh, tutang aang aran paring pononga ijo anai ang ngosanoh. 23:21 Tutang amat ihcobehti monulut nitu Lohpou Tuhan rih, rimai io monulut aang aran Lohpou Tuhan rih tutang aang aran Pohotala ijo mohcon ang anan. 23:22 Tutang amat ihcobehti monulut nitu soruga, orih rimai io monulut aang aran pododusan Tuhan, tutang ang aran Pohotala ijo tuot ang pododusan orih. 23:23 Colahka ihkam guru-guru agama tutang ulun-ulun Parisi! Ihkam tuhkang pura-pura. Karo-rarampah kolou selasih, adas manis, tutang jintan ka, ihkam nonga sepersopuluoh ahkan Tuhan. Padahar hal-hal ijo boguna ang hukum-hukum agama, kolou jahkaoh: Koadilan, balos kasih, tutang kosotiaan, eam ihkam podulioh. Padahar orih ijo koharusoh ihkam nguai, eam mohonou ijo bohko-bohkon ka'a. 23:24 Ihkam okon-okon ijo bobulen! Langou ijo ang korih'mu ihkam nyaringoh, podahar unta bolu-bolum ihkam nolonoh! 23:25 Colahka ihkam guru-guru agama tutang ulun-ulun Parisi! Ihkam tuhkang pura-pura! Pikan-pikan tutang piring-piring'kam, ihkam muhioh borasih-rasih hila luaroh, padahar luwangoh kojilok samasino umba hal-hal ijo ihkam dahpotoh hapan kokarasan tutang kokuhu'kam. 23:26 Parisi bobulen! Muhi soun borasih-rasih hila luwangoh tahkan pikan-pikan tutang piring-piring'kam, mangat hila luaroh monjadi borasih ka'a! 23:27 Colahka ihkam guru-guru agama tutang ulun-ulun Parisi! Ihkam tuhkang pura-pura! Ihkam kolou tanom-tanom ijo bosahpu puhti; ang luaroh topahjahoh tamam, tahpi ang luwangoh tuwi kobain tulang tutang paringoh ijo maram-buhok. 23:28 Kodorih ka'a ihkam. Tahkan luaroh ihkam, topahjahoh pios ahkan ulun; tahpi ang luwang ahtoi, ihkam tuwi umba alik tutang polanggaran-polanggaran." 23:29 "Colahka ihkam guru-guru agama tutang ulun-ulun Parisi! Ihkam tuhkang pura-pura! Ihkam mangun lowong-tanom pios ahkan nabi-nabi, tutang mihtik tugu-tugu pongingat, tahkan ulun-ulun ijo pombolumoh pios. 23:30 Tutang ihkam nuhtui, 'Jahkaoh ihkai bolum ang jaman tahtu ajuh 'kai lomoi, ihkai eam ahkan umba ulun ijo munu nabi-nabi.' 23:31 Jadi ihkam mongahku bongon ijo ihkam uhtus ulun-ulun ijo munu nabi-nabi! 23:32 Amat kolourih, toturusoh tutang ngonyolung dusa-dusa ijo jari tonopara bain tahtu ajuh'kam rih! 23:33 Ihkam ja'at tutang puna uhtus ulun ja'at! Koloukuwoh ka'a ihkam duon monyolamat arop'kam tahkan hukuman ijo ang norahka? 23:34 Ngonihrih tu'u-tu'u: Ahku ahkan ngirim nabi-nabi, ulun-ulun pitar tutang guru-guru; ihcokobarih tahkan iro ahkan ihkam munuoh, tutang ihcokobarih ijo bohkon, ahkan ihkam nyalipoh. Anai ijo ahkan ihkam nyiksaoh ang lohpou-lohpou sombayang, tutang ihkam hodulu-duluoh tahkan ihco lowu nokuh lowu ijo bohkon. 23:35 Tului orih, ihkam ahkan tomohukum tului pomunu ijo konuan'kam toharep paring ulun ijo eam bosala -- nopara tahkan pomunuoh Abel ijo eam bosala, nyiring pomunuoh Sakharia anak Berekia, ijo ihkam munuoh ang holat Lohpou Tuhan, umba mesbeh. 23:36 Porocayarih: Paringoh rih ahkan tongohtun bain ulun-ulun jaman tuh!" 23:37 "Yerusalem, Yerusalem! Nabi-nabi ihko munuoh. Suruhan-suruhan Pohotala ihkomukah umba bahtu nyiring mahtoi. Jari pira tikat Ahku jolik ngohihco paring ulun ponduduk'kam kolou pohukmanuk nguhkup anak-anakoh ang pinda ilatoh, tahpi ihko eam kani! 23:38 Tului rih Pohotala eam hino homboh'kam. 23:39 Kota'an iou: Nopara tahkan huntuh ihko eam ahkan nohto Ahku hino nyiring ihkam nuhtui, 'Tomborehkat rih Io ijo lombut ngosan aran Tuhan.' "
24:1 Kotihka Yesus nohtah Lohpou Tuhan, murid-murid-Oh lombut nokuh Io tutang nunjuk nokuh pangun-pangun Lohpou Tuhan rih. 24:2 Yesus nuhtui umba iro, "Inon rih ihkam nohto paringoh rih? Kota'an'kam eam aro ihco bahtu ka tahkan pangun-pangun orih ahkan mohcon hosusun aang unukoh. Paringoh ahkan boduruh." 24:3 Pongohuli Yesus tulak ko Puruk Zaitun, tutang rahat Io tuot murid-murid-Oh lombut ahkan hopander umba Io tihkas bongon'ndo. "Ngesah ahkan 'kai mira paringoh rih ahkan nyolung," hion'ndo umba Io. "Tanda-tanda inon ijo ngorinah polombut Amai tutang lain jaman?" 24:4 Yesus mutah, "Bua-buah, ara nyiring ihkam buah kobalik. 24:5 Bain aro ulun ahkan lombut honong hapan aran aik-Ku tutang nuhtui, 'Ahku Lahca Ponyolamat!' Iro ahkan monihpu aro ulun. 24:6 Ihkam ahkan ngonih naing-naing hokolahi tutang borihta-borihta parang, tahpi ara mihkoh. Bain hal-hal orih harus nyolung, tahpi orih eam rimai ijo jari ohkotoh kiamat. 24:7 Uhtus ijo ihco ahkan parang ngolawan uhtus ijo bohkon, tutang nogara ijo ihco ahkan nyarang nogara ijo bohkon. Ang umo-umoh ahkan monjadi kosusah bolo'u tutang tana moroguh. 24:8 Paringoh rih punai pahtukoh ih, kolou koporos ijo tongarot ihcobehti ulunbawi ijo ohkot kani nganak rih. 24:9 Pongohuli ihkam ahkan tonawan, tutang tonyarah ahkan tonyiksa, tutang tomunu. Hopus kolunon ahkan bosingi ihkam, tului ihkam murid-Ku. 24:10 Aang ohkot orih aro ulun ahkan murtad, tutang ngarana umba injahoh hawui hokosingi jolahan ihco umba ijo bohkon. 24:11 Aro nabi-nabi pobula ahkan lombut, tutang ngobula aro ulun. 24:12 Koja'at ahkan nyoli kodorih hebatoh nyiring aro ulun eam duon hino mongasih. 24:13 Tahpi ulun ijo tehen johcok laiuoh, ahkan tonyolamat. 24:14 Tutang Kabar Hinut, tohou koloukuwoh Pohotala moretah ahkan tonyiar nokuh hopus kolunon, mangat paring ulun ngonihoh. Uliorih rih ndai punai rih lombut ondoukiamat." 24:15 "Ihkam ahkan nohto 'Koja'at ijo mopolumatoh,' kolou ijo tonuhtui bain Nabi Daniel, tombok ang unuk ijo borasih. (Catatan ahkan ijo mombasaoh: Niruk inon rih rimaioh!) 24:16 Aang kotihka orih, ulun ijo anai ang Yudea pahtut buhou nokuh puruk-puruk. 24:17 Ulun ijo anai ang diang sahpou lohpou ara nosuluh ahkan ngomin aang'co tahkan luwang lohpou. 24:18 Ulun ijo anai ang umo ara buli ahkan lowu, ngomin jubahoh. 24:19 Eaminon ngolioh ondou-ondou orih ahkan ulun-ulun bawi ijo botohi, tutang inai ijo magun ngoposu nguaoh! 24:20 Bodo'a iou, mangat ara nyiring ihkam harus buhou ang musim uhjan ata'ai aang ondou Sabat! 24:21 Aang ondou-ondou ijo kongori-ngori rih, ahkan anai kosusahan hajo, kolou ijo jaha pu'u nyolung tahkan pahtuk kolunon nyiring uhuntuh, tutang eam hino ahkan nyolung huli. 24:22 Jahkaoh Pohotala eam ngoliwak ohkotoh; mahka eam aro ihcobehti ka ijo solamat. Tahpi tului uhkup aiu-Oh, Pohotala ngoliwak wayah rih. 24:23 Aang ohkot orih rih amat anai ihcobehti nuhtui umba ihkam, 'Nohto, Lahca Ponyolamat rih anai ang ohtoi!' ata'ai 'Io anai ang anan!' -- ara rih ihkam porocayaoh umba ulun orih. 24:24 Bain ahkan lombut ponyolamat pobula tutang nabi-nabi pobula. Iro ahkan nguan gawi-gawiu ijo luar biasa, tutang tandahelan-tandahelan ahkan mobula, amat touduon, taput uhkup ain Pohotala ka'a. 24:25 Jadi ingat rih! Ahku jari nyiar ahkan'kam labih soun, houn umba ang rih nyolung. 24:26 Amat ulun nuhtui umba'kam, 'Nohto, Io anai ang ahi ang padang tonih!' -- ara ihkam nokuh anan. Ata'ai amat iro nuhtui, 'Nohto, Io nyuhuk luwang tahkun ang ohtoi!' -- ara ihkam porocaya. 24:27 Bain polombut Anak Ulun kolou koboloang kilat ngorolondang tahkan timur, tutang koboloangoh nyiring nokuh barat. 24:28 Ang umoh anai otunaang, ang anan anai bulung-bulung, ijo kuman otunaang." 24:29 "Eam tahi ulimba kosusahan-kosusahan wayah orih, mahtan ondou ahkan nyolung pindong, tutang bulan eam hino boloang. Potion-potion ahkan botahak tahkan langit, tutang pongowasa-pongowasa alamraya ahkan nyolung howui-hobureh. 24:30 Ulimba rih tanda Anak Ulun ahkan gihtan ang langit. Aang ohkot rih paring uhtus ang tana ahkan nangih. Iro ahkan nohto Anak Ulun lombut ang ngosan baunondou hapan kowasa tutang kohajoi ijo hajo. 24:31 Sorunai hajo ahkan tomohpos muhing tutang Anak Ulun ahkan nyuhu molehkat-molehkat-Oh nipun uhkup-Oh, tahkan ko ohpat puhting kolunon, tahkan topahkan langit 'jo ihco, johcok topahkan langit ijo bohkon." 24:32 "Ngomin rih sutu ajaran tahkan pu'un sikun. Amat pahting-pahtingoh nyuluh tutang bolomu, tutang nopara nyohondik, ihkam kota'an ijo musim notang jari doni. 24:33 Kolouorih ka'a amat ihkam nohto hal-hal rih nyolung, ihkam kota'an ijo ohkotoh jari doni samasino. 24:34 Kota'anrih iou! Hal-hal orih ahkan nyolung, hounumba ulun-ulun ijo bolum huntuh, mahtoi paringoh. 24:35 Langit tutang tana ahkan dilap, tahpi karoauh-Ku mohcon turus-jaham." 24:36 "Eam aro ijo kota'an mira ondouoh tutang jamoh, molehkat-molehkat ang soruga ka'a eam, Anak Pohotala ka eam, tihkas Amai iou ijo kota'an. 24:37 Amatmira Anak Ulun lombut noin, koada'anoh kolou aang jaman Noah lomoi. 24:38 Aang ondou-ondou sounumba danum sopurak hajo rih, ulun-ulun kuman ngorih, tutang kawin. Kolou orih toturus nyiring ang ondou Noah nyolong koluwang bonamaoh. 24:39 Ang ohkot danumsopurak orih polonyot iro paring, punan rih iro borondong, umba inon ijo rahat nyolung. Kodorihrih ka'a koada'aioh noin amat Anak Ulun lombut. 24:40 Aang ohkot rih, duo behti rahat bogawi ang umo: Ihcobehti ahkan omin tutang ihcobehti ahkan tonohtahoh. 24:41 Duo behti bawi rahat muhca gandum: Ihcobehti ahkan tongomin tutang ihcobehti hino tonohtahoh. 24:42 Jadi borondongrih, tului ihkam eam kota'an mira Tuhan'kam ahkan lombut. 24:43 Ingat rih tuh! Jahkaoh tuan lohpou kota'an jam pira ang ngolomi ondou ponahkou ahkan lombut, io eam ahkan tiruh mangat ponahkou eam nyolong nokuh lohpouoh. 24:44 Bain orih, ihkam ka'a harus bosodia-sodia. Tului Anak Ulun ahkan lombut aang wayah ijo eam ihkam kota'aioh." 24:45 Hion Yesus hino, "Amat kolourih pohalu ijo umoh rih ijo bokehtep tutang piosbosaraoh? Io rih ijo tongopili bain tuanoh monjadi okon pohalu-pohalu bohkon, mangatoh nonga iro ukun ang ohkotoh. 24:46 Eam inon kosanangoh pohalu orih amat tuanoh buli tutang sombang io rahat nguan gawiuoh. 24:47 Porocayarih, tuan orih ahkan moharap io ngina ponahtou-ponahtouoh aang pohalu rih. 24:48 Tahpi amat pohalu rih ja'at, ijo io ahkan nuhtui ang ahtoioh, 24:49 'Tuan'ku magun tahi kolawui buli,' turus io nopara nahup karon-pohalu ijo bohkon, tutang kuman ngorih umba ulun-ulun pombusou. 24:50 Pongohino tepuioh ahkan lombut ang ondou tutang jam ijo eam io ngohuoh. 24:51 Mahka pohalu ijo kolourih ahkan tonahup soko'opah, bain tepuioh, tutang ndian io nokuh unuk ulun-ulun pura-pura. Iro ahkan nangih tutang ngarot ang anan."
25:1 "Amatmira Anak Ulun lombut kolou Tuhan, koada'ai kolou a'ang porobasa tuh: Sopulu anakdara naharang ponganten nyinong-behti ngomin sumbu, turus tulak naharang ponganten bahkas. 25:2 Limo behti tahkan iro rih uong tutang limo behti ijo bokonoh pihtar. 25:3 Kolimo anakdara ijo uong ngomin sumbuoh, tahpi eam ngomin minyak ahkan bosodia. 25:4 Kolimo anakdara ijo pihtar ngomin sumbuoh homboh umba minyak bohahtiu. 25:5 Ponganten bahkas rih lombut dandah, jadi karon-anakdara nopara nundu turus tiruh. 25:6 Tohun ngolomi, kolawui konahan auh lahap, 'Ponganten bahkas lombut! Has naharang io!' 25:7 Sopulu anakdara rih monyun, tutang nutang sumbu'ndo. 25:8 Anakdara-anakdara ijo uong rih nuhtui umba ijo piosbosara, 'Magirih minyak'kam honjiot ahkan ihkai, tului sumbu ain ihkai jari kani bolop.' 25:9 'Eam tou!' hion anakdara-anakdara ijo piosbosara rih, 'bain noin ihto paringoh eam aro cukup minyak. Tulak molioh ang toko.' 25:10 Mahka anakdara-anakdara ijo baleh rih tulak moli minyak. Pondehan iro tulak, ponganten bahkas lombut. Kolimo anakdara ijo jari bohahtiu rih nyolong hombo-homboh umba pongaten bahkas nokuh unuk pesta, tutang bauntukang konohuit! 25:11 Pongohuli anakdara-anakdara ijo baleh orih johcok. Iro na'ah, 'Tuan, Tuan, nguap bauntukang ahkan ihkai.' 25:12 Tahpi ponganten bahkas mutah, 'Ahku eam kosono ihkam!' " 25:13 Turus Yesus ngo'opah porobasa-Oh rih koloutuh, "Bain tului orih jaga-jagarih, bain ihkam eam kota'an ondouoh ata'aika jamoh." 25:14 "Amatnoin Anak Ulun lombut kolou Tuhan koada'aioh ka'a kolou a'ang porobasa tuh: Ihcobehti ulunbahkas kani tulak nokuh unuk ijo mahcu. Io na'ah pohalu-pohaluoh, turus nonga kowasa modagang ponahtouoh ahkan'ndo. 25:15 Ahkan nyinong pohalu rih io nonga numbun kosanggupoh nyinong-behti. Ahkan ihcobehti io nonga limo kuhjan duit bulou. Ahkan ijo bokonoh io nonga duo kuhjan duit bulou. Tutang ahkan ihcobehti hino io nonga sokuhjan duit bulou. Turus io tulak. 25:16 Pohalu ijo norima limo kuhjan duit bulou rih jeleng tulak bodagang, turus norima utung limo kuhjan duit bulou hino. 25:17 Kolourih ka'a pohalu ijo norima duo kuhjan duit bulou rih norima utung duo kuhjan duit bulou hino. 25:18 Tahpi pohalu ijo norima sokuhjan duit bulou rih tulak molowong ang tana, turus nyuhuk duit tuanoh ang anan. 25:19 Tahi tu'u uliorih rih, tuan tahkan pohalu-pohalu rih buli, tutang nopara holehken umba iro. 25:20 Pohalu ijo norima limo kuhjan duit bulou orih lombut, tutang nyarah sopulu kuhjan duit bulou. 'Tuan,' hioioh, 'Tuan nyarah limo kuhjan duit bulou ijo ahkak'ku. Nohtooh, ahku duon utung limo kuhjan hino.' 25:21 'Hinut,' hion tuan rih, 'ihko tuh pohalu ijo pios tutang sotia tului ihko duon konoharap umba ijo isut, ahku ahkan morocaya ihko ijo aro ahkan'mu. Nyolongrih tutang umbarih jorih-jorih homboh ahku!' 25:22 Turus pohalu ijo norima duo kuhjan duit bulou orih lombut, tutang nuhtui, 'Tuan, Tuan jari nyarah duo kuhjan duit bulou ahkak'ku. Nohtooh, ahku bohasir duon utung duo kuhjan duit bulou hino.' 25:23 'Hinut,' hion tuan rih, 'ihko jihpon ijo morong tutang sotia. Tului ihko duon konoharap umba ang isut, ahku morocaya ijo aro ahkan'mu. Nyolongrih tutang umbarih jorih-jorih homboh ahku!' 25:24 Pongohuli pohalu ijo norima sokuhjan duit bulou orih lombut tutang nuhtui, 'Tuan, ahku kota'an tuan ulun ijo karas. Tuan nguhtoi bua ang unuk tuan eam ngombulanoh, tutang ngomin hasil ang unuk ijo eam tuan nuhkan bonyioh. 25:25 Ahku mihkoh, jadi ahku tulak nyuhukoh duit tuan rih ang luwang tana. Tuh io duit tuan!' 25:26 'Ihko pohalu ijo ja'at tutang bokolas!' hion tuan rih. 'Eamkah ihko ta'an ijo ahku nguhtoi bua ang unuk ahku eam ngombulan, tutang ngomin hasil ang unuk ahku eam noburan bonyi? 25:27 Amat kolourih koharusoh ihko ngina duit rih ang bank, mangat ang kotihka ahku buli, ahku duon norima huli duit aik'ku rih tutang anakoh. 25:28 Tului orih omin duit rih tahkan io, tutang nonga ahkan ulun ijo tepun sopulu kujan duit bulou orih. 25:29 Tului ulun ijo jari anaingina, ahkai tononga labih aro hino tutang io ahkan molobien tu'u. Tahpi ulun ijo eam anaingina, isut ijo magun anai aang io ahkan tongomin ka'a. 25:30 Tutang pohalu ijo eam boguna rih, dian ahkan luwang unuk pindong ang konaha. Ang anai io ahkan nangih tutang mongarot!' " 25:31 "Amatnoin Anak Ulun lombut kolou Lahca tongitot molehkat-molehkat-Oh. Io ahkan tuot ang ngosan pododusan aiou ijo hajo. 25:32 Uhtus-uhtus ahkan tonipun ang toharop-Oh. Turus Io ahkan ngobohkon iro monjadi duo kobarih kolou sokahtik mombarih tobiri tahkan kombing. 25:33 Ulun-ulun ijo molalus konohuang Pohotala ahkan konina ang sila koto'ui-Oh tutang ijo bohkon ang sila komuloi-Oh. 25:34 Pongohuli Lahca rih nuhtui umba ulun-ulun ang hila koto'ui-Oh, 'Nokuhohtoi ihkam ijo tomorehkat bain Amai-Ku. Nyolong nokuh Kolahca'an ijo tonyodia ahkan'kam tahkan pahtuk kolunon. 25:35 Tului ang kotihka Ahku bolo'u, ihkam nonga Ahku ukun, tutang ang uhun Ahku tojahbolai, ihkam nonga Ahku korih. Ahku ihcobehti bohkonuhtus, ihkam norima Ahku ang lohpou'kam. 25:36 Ahku eam hopokajan, ihkam nonga Ahku hahtin'kam, Ahku poros ihkam mohaga Ahku, Ahku ang sipir, ihkam nyonguk Ahku.' 25:37 Turus ulun-ulun orih ahkan nuhtui, 'Tuhan, mira ihkai pu'u nohto Tuhan bolo'u turus ihkai nonga Tuhan ukun, ata'ai tojahbolai, turus ihkai nonga Tuhan korih? 25:38 Mira ihkai pu'u nohto Tuhan kolou ulun bohkonuhtus, turus ihkai nyambut Tuhan nokuh luwang lohpou 'kai? Mira Tuhan pu'u eam hopokajan, turus ihkai nonga Tuhan hahtin? 25:39 Mira ihkai pu'u nohto Tuhan poros ata'ai tonyipir, turus ihkai dohop Tuhan?' 25:40 Lahca rih ahkan mutah, 'Kota'an ih; ohkot ihkam nguan hal orih sinoka umba anai ihcobehti, tahkan konduang-konduang-Ku ijo paling hina, rimai ihkam jari nguaioh umba Ahku!' 25:41 Turus Lahca rih ahkan nuhtui umba ulun-ulun ang hila komuloi-Oh, 'Hahtun tahkan ohtoi, jahanam! Nyolong nokuh luwang baho ijo eam tou bolop, ijo jari nyodia ahkan sehtan tutang molehkat-molehkatoh! 25:42 Tului ang ohkot Ahku bulou, ihkam eam nonga Ahku ukun, ang uhun Ahku tojahbolai, ihkam eam nonga Ahku korih. 25:43 Ahku ihcobehti bohkonuhtus, ihkam eam norima Ahku nokuh luwang lohpou'mu. Ahku eam aro hatik, ihkam eam nonga Ahku hahtin. Ahku poros tutang tonyipir, ihkam eam masap dohop Ahku.' 25:44 Turus iro ahkan nuhtui umba-Oh, 'Tuhan, mira ihkai nohto Tuhan bulo'u, ata'ai tojahbolai, ata'ai kolou ihcobehti bohkonuhtus, ata'ai eam hopokajan, ata'ai poros, ata'ai tonyipir, tutang ihkai eam dohop Tuhan?' 25:45 Lahca rih ahkan mutah, 'Kota'an'kam: ang ohkot ihkam eam kani dohop, anai ihcobehti ijo hina tuh, rimai ihkam eam aro kani dohop Ahku.' 25:46 Mahka ulun-ulun rih ahkan tomohukum umba hukuman ijo kototahiuoh, rahatoh ulun-ulun ijo numbun kohondak Pohotala ahkan ngomo pombolum ijo morong tu'u tutang kototahiu."
26:1 Ohkot Yesus ngopah ajaroh tohou paring hal rih, Io nuhtui umba murid-murid-Oh, 26:2 "Ihkam kota'an duo ondou hino Ondou Hajo Paska, tutang Anak Ulun ahkan tonyarah ahkan tonahpak ang sopolahki!" 26:3 Ang ohkot orih rih imam-imam kopala tutang okon-okon Yahudi mohaum ang istana Imam Hajo, Kayapas. 26:4 Iro bohaum ahkan nawan Yesus hapan cara toni-tonih, turus ahkan munu Io. 26:5 "Tahpi," hion'ndo, "ara nguan aang kolorih ang uhun Ondou Hajo Paska, tului noin, napa korusuh ang louk ulunaro." 26:6 Kotihka Yesus anai ang Betania, ang lohpou Simon ijo houn ngarot ponyahkit bobelang ijo mopihkoh, 26:7 ihcobehti ulunbawi lombut nokuh Yesus, io ngomin ihco kasa pualam, bosuang minyak buanhorum ijo borega. Aang kotihka Yesus beteng tuot kuman, ulunbawi rih nusuh minyak buanhorum rih aang kuhung Yesus. 26:8 Murid-murid Yesus nohto aangjadinyolung orih tutang turus bosingi, "Inon gunaioh gawi koloutuh ngoraus ih?" hion'ndo. 26:9 "Minyak atuh tou tomodagang hapa lega ijo larang, tutang duitoh nonga ahkan ulun porosbolum!" 26:10 Yesus kota'an tiruk'ndo, turus Io nuhtui, "Ombai ihkam nyala ulunbawi tuh? Io nguan ang'co ijo Hinut tutang horomat ahkak-Ku. 26:11 Ulun porosbolum toturus anai ang louk ihkam, tahpi Ahku eam hototurus jaham hihco ihkam. 26:12 Tului nusuh minyak buanharum rih ang behtik-Ku, io mohalu Ahku nitu kolowong-Ku, 26:13 Porocayarih! Ang sohapus kolunon, ang amohrih Kabar Hinut tahkan Pohotala tonyiar, anggawin bawi tuh, ahkan tonyiar ka'a monjadi pongingat ahkaioh." 26:14 Turus ihcobehti tahkan murid Yesus, ijo bogare Yudas Iskariot, tulak nokuh imam-imam kopala. 26:15 Yudas nuhtui umba iro, "Inon ijo tononga'kam ahkak'ku amat ahku monyorah Yesus ahkan'kam?" Mahka iro morehken tolun pulu koluang duit perak, turus nonga duit orih ahkan Yudas. 26:16 Nopara tahkan ohkot orih Yudas ngurah kosapet ijo pios ahkan monyarah Yesus. 26:17 Ang ondou ijo pahtukoh, aang Pesta Luhte Eam Boragi, murid-murid Yesus lombut nokuh Io. Iro ngisok, "Ang umoh Amai jolik, ihkai nyodia ukun Paska ahkan Amai?" 26:18 Yesus mutah, "Tulak nokuh ihcobehti ang lowu tutang nuhtui umba io, 'Hion Amai Guru, jari johcok ohkotoh ahkak-Ku: Ahku kani napa pesta Paska ang lohpou'mu homboh umba murid-murid-Ku!' " 26:19 Murid-murid Yesus numbun inon ijo sonuhu Yesus ahkan'ndo. Iro tulak monyodia ukun Paska rih. 26:20 Uli ngolomi, Yesus tutang koduo-balas murid-Oh tuot kuman. 26:21 Pondehan iro kuman, Yesus nuhtui, "Ngonih'kam: ihcobehti tahkan louk ihkam ahkan ngarana Ahku." 26:22 Ngonih orih, murid-murid Yesus monjadi porosahtoi'ndo. Turus iro ihcobehti honong ihcobehti nopara ngisok Yesus, "Tontu bohkon Ahku ijo Amai nituoh?" 26:23 Yesus mutah, "Ulun ijo ninjok luhte kohuang pihkan homboh Ahku, iorih ahkan ngarana Ahku. 26:24 Punaoh Anak Ulun ahkan mahtoi kolou ijo tonyurat ang luwang Surat Borasih. Tahpi colahkalah ulun ijo ngarana Anak Ulun! Labih pios ahkan ulun rih, amat io eam pu'u konanak samasino!" 26:25 Turus Yudas pongorana rih nuhtui, "Tontu bohkon ahku ijo hion Amai Guru nituoh?" Yesus mutah, "Kolourih hion'mu!" 26:26 Kotihka iro ulikuman, Yesus ngomin luhte, turus ngohawot do'a torimakasih. Pongohuli Io molah-molah luhte rih umba longoi-Oh, turus nongaoh ahkan murid-murid-Oh hawoi hioi, "Ngomin tutang kumai; jituh behtik-Ku." 26:27 Uliorih rih Io ngomin ihco sahkir anggur, turus ngohawot do'a torimakasih ahkan Pohotala. Uliorih Io nonga sahkir orih ahkan murid-murid-Oh, hawui nuhtui, "Ngorih rih ihkam paring. 26:28 Tului tuhrih daha-Ku ijo monsah bowot Pohotala -- daha ijo tonusuh ahkan aro ulun ahkan pongapun dusan'ndo. 26:29 Porocayarih: Ahku eam ahkan ngorih anggur tuh hino nyiring ang ohkot Ahku ngorih anggur ijo bohua homboh umba ihkam ang Kolunon Bohua Ain Amai-Ku." 26:30 Pongohuli rih iro monyanyi ihco nyanyi tara. Tutang uliorih rih iro tulak nokuh Puruk Zaitun. 26:31 Turus Yesus nuhtui ahkan murid-murid-Oh, "Aang ngolomi tuh ihkam paring ahkan nokoru nohtah Ahku; tului aang Surat Borasih tonyurat: Pohotala nuhtui, 'Ahku ahkan munu sokahtik orih, tutang kawan tobirioh ahkan bororawuh.' 26:32 Tahpi uli Ahku tongombolum huli, Ahku ahkan tulak hounumba ihkam nokuh Galilea." 26:33 Petrus nuhtui umba Yesus, "Nauhoh paring ijo bohkonoh nohtah Amai, ahku samasino eam!" 26:34 "Ingat," hion Yesus umba io, "ngolomi tuh ka'a, hounumba dalung manuk nandu, tolu tikat ihko eam ngahku Ahku." 26:35 Petrus mutah, "Sinoka jaka ahku harus mahtoi homboh Amai, ahku eam ahkan nuhtui ijo ahku eam kosono Amai!" Tutang paring murid ijo bohkon, nuhtui kolourih ka'a. 26:36 Uliorih rih Yesus tulak homboh murid-murid-Oh nokuh ihco unuk ijo bogare Getsemane. Ang anan Io nuhtui umba iro, "Tuotrih ang ohtoi, pondehan Ahku tulak bodo'a." 26:37 Turus Yesus ngomin Petrus tutang koduo anak Sebedeus tulak homboh umba Io. Io nopara nanyam ngoli tutang bolisah. 26:38 Io nuhtui umba murid-murid-Oh, "Ahtoi-Ku ngoli samasino, anyamoh kolou ahkan mahtoi ih. Mohcon ihkam ang ohtoi tutang hawui bojaga-jaga umba Ahku." 26:39 Pongohuli Yesus tulak ngomahcu aropoh honjiot, turus Io nyundop ahkan tana tutang bodo'a. "Amai," hioi-Oh, "amat tou, dian tahkan Ahku kokarot ijo Ahku harus nyuruoh tuh. Tahpi a'ai numbun konohuang-Ku, molekan numbun konohuang Amai iou." 26:40 Uliorih rih Yesus huli nokuh tolu murid-Oh tutang sombang iro rahat tiruh. Io nuhtui umba Petrus, "Tihkas ihco jam iou ihkam tolu eam duon bojaga umba Ahku? 26:41 Bojaga-jagarih, tutang bodo'a mangat ihkam ara buah tihkos. Puna Roh'kam kani nguan ijo morong, tahpi ihkam eam sanggup, tului dasar ulun tuh bolomu." 26:42 Sino huli Yesus tulak bodo'a, hioi-Oh, "Amai, amat koporos tuh harus Ahku nyuruoh, tutang eam duon dian tahkan Ahku, nauhoh konohuang Amai ijo nyolung." 26:43 Uliorih Yesus huli hino tutang sombang murid-murid-Oh magun ka'a tiruh, tului iro karas nundu. 26:44 Sino hino Yesus nohtah iro tutang bagi kotolu tikatoh bodo'a hawui ngohawot auh-auh ijo sama. 26:45 Uliorih rih Io huli hino nokuh murid-murid-Oh tutang nuhtui, "Magunrih ihkam tiruh tutang ngorong hasong? Nohto, jari johcok ohkotoh Anak Ulun tonyarah ahkan kowasa ulun-ulun bodusa. 26:46 Kuat ndai, has ihto tulak. Topahjah ulun ijo modagang Ahku jari lombut!" 26:47 Pondehan Yesus magun bopander, Yudas, ihcobehti tahkan duo balas murid-Oh rih lombut. Hombo-homboh umba io, lombut ka'a aro ulun ijo ngomin padang tutang tohtok kahju. Iro sonuhu bain imam-imam kopala tutang okon-okon Yahudi. 26:48 Pongorana rih jari tonyorihta ahkan'ndo tanda tuh, "Ulun ijo ahku ngohcomoh, orih uluioh. Nawan Io!" 26:49 Kodorih johcok ang unuk orih Yudas turus tulak nokuh Yesus, tutang nuhtui, "Tabe, Amai Guru!" turus io mongohcom Yesus. 26:50 Yesus ngisok, "Konduang, ahkan inon konduang lombut ahkan ohtoi?" Pongohuli ulun aro rih miar, tutang nawan Yesus. 26:51 Anai ihcobehti murid Yesus, ijo anai ang anan, umba Yesus, nyohpit podangoh tutang moriwih jihpon imam hajo nyiring bosaping tolingaioh. 26:52 Yesus nuhtui umba murid-Oh orih, "Ngupang huli podang'mu nokuh luwang salungoh, tului paring ulun ijo mongguna podangoh ahkan mahtoi bain podang ka'a. 26:53 Ihko ngira Ahku eam tou nyawot dohop umba Amai-Ku, tutang Io jeleng ahkan ngirim molobien umba duo balas ponokawan sorodadu molehkat? 26:54 Tahpi amat kodorih, eam tou nyolung kolou ijo jari tonujum ang Surat Borasih ijo puna harus nyolung kolou ijo ang huntuh tuh?" 26:55 Turus Yesus nuhtui umba ulun aro rih, "Kuwoh Ahku tuh ponyilou, nyiring ihkam lombut hawui ngomin podang tutang tohtokkahju ahkan nawan Ahku? Nyinong ondou Ahku mongajar ang Lohpou Pohotala, tutang ihkam eam nawan Ahku! 26:56 Tahpi puna jari koharusoh kodorih ahkan nyolung inon ijo tonyurat bain nabi-nabi ang luwang Surat Borasih." Uliorih rih, paring murid-murid Yesus bororawuh nohtah Yesus. 26:57 Ulun-ulun ijo nawan Yesus ngonin Io nokuh Lohpou Imam Hajo Kayapas. Ang anan guru-guru agama tutang okon-okon Yahudi jari hopuhpung. 26:58 Petrus ngahasu Yesus tahkan mahcu nyiring konaha Lohpou Imam Hajo. Turus Petrus nyolong nokuh dohopan rih, tutang tuot hihco pongawal-pongawal. Io jolik kota'an koloukuwoh paring orih johcok laiu noin. 26:59 Imam-imam kopala tutang paring Majelis Agama ngurah jalan ngonduon kosaksian alik ahkan duon muhtus hukum mahtoi buah Yesus. 26:60 Tahpi iro eam duon ihcobukti ka, oluka aro ijo maju kolou saksi alik. Laiuoh anai duobehti maju nokuh boun. 26:61 Iro nuhtui, "Ulun tuh nuhtui, 'Ahku duon ngahkas Lohpou Pohotala, tutang aang tolu ondou duon mangunoh hoduli.' " 26:62 Turus imam hajo tombok tutang ngisok umba Yesus, "Inon Ihko eam mutah dawa ijo nitu arop-Mu rih?" 26:63 Tahpi Yesus tonih ih. Sino hino imam hajo ngisok umba Io, "Honong Pohotala ijo bolum, nuhtuirih ahkan 'kai. Inon Ihko Lahca Ponyolamat Anak Pohotala?" 26:64 Yesus mutah, "Kolouorih hion'mu. Tahpi porocaya iou: nopara uhuntuh ihkam ahkan nohto Anak Ulun tuot ang sila koto'un Pohotala Ijo Mahakowasa, tutang lombut ang ngosan baunondou ang langit!" 26:65 Mahka imam hajo rih morutat hahtiu, tutang nuhtui, "Io nohonya Pohotala! Eam usah hino saksi. Ihkam paringoh uras ngonihoh bongon'kam auh-auhoh ijo nohonya Pohotala. 26:66 Huntuh koloukuwoh tiruk ihkam?" Iro mutah, "Io sala tutang pahtut mahtoi." 26:67 Turus iro ngoluhca boun Yesus, tutang nahup Io. Anai hino ijo napar Io 26:68 tutang nuhtui, "Cuba ngurah tutang nuhtui ahkan 'kai, o Lahca Ponyolamat! Iai ijo napar Ihko?" 26:69 Petrus rahat tuot ang konaha, ang dohopan. Anai ihcobehti pohalu bawi lombut, tutang ngisok umba Petrus, "Eamkah ihko ka'a hihco umba Yesus ulun Galilea rih?" 26:70 Tahpi Petrus eam ngahku ang toharep iro paringoh. "Ahku eam ngosono inon ijo hion'mu," hion Petrus, 26:71 turus io tulak nokuh bauntukang dohopan. Ihcobehti pohalu bawi ijo bohkon hino nohto Petrus, tutang nuhtui umba ulun-ulun ang anan, "Ulun tuh nanai ka'a homboh umba Yesus tahkan Nasaret rih." 26:72 Turus Petrus eam ngahku hino, tutang nulut aropoh. "Ahku tu'u-tu'u eam kosono ulun orih!" hion Petrus. 26:73 Eam tahi uliorih, ulun-ulun ijo tombok ang anan lombut nokuh Petrus, tutang nuhtui, "Musti ihko anai ihcobehti tahkan iro. Orih kontara samasino tahkan auh'mu nuhtui." 26:74 Turus Petrus nulungocahu aropoh, tutang nuhtui, "Ahku eam ngosono ulun orih!" Uhun orih ka'a dalung manuk nandu. 26:75 Tutang Petrus toingat ijo Yesus jari nuhtui umba io, "Hounumba dalungmanuk nandu, ihko tolu tikat eam ngahku Ahku." Turus Petrus bolua, tutang nangih honong porosahtoioh.
27:1 Homboh ngohkos samasino, paring imam kopala tutang okon Yahudi duon koputusan ahkan munu Yesus. 27:2 Iro manga Io tutang ngomin Io, turus nyarah-Oh ahkan Pilatus, gubernur pomoretah Ruma. 27:3 Kotihka Yudas ngorana rih, nohto ijo Yesus buah hukum, io monyasal. Turus Yudas nyarah huli tolun pulu duit perak rih, ahkan imam-imam kopala tutang okon-okon Yahudi. 27:4 Io nuhtui, "Ahku ius bodusa ngorana ulun ijo eam bosala, nyiring Io kona hukum mahtoi!" Tahpi iro mutah, "Poduli inon ihkai? Orih urusan'mu!" 27:5 Yudas nyakah kambut duit rih nokuh Lohpou Tuhan, turus io tulak tutang ngahtung aropoh. 27:6 Imam-imam kopala nipun duit rih tutang nuhtui, "Duit tuh duit daha. Numbun hukum agama, duit rih eam tou posolongoh unuk pononga ang Lohpou Tuhan." 27:7 Turus uli iro bohaum, iro ngomin duit rih unuk moli tana ijo konohawot Tana Tuhkang Kobali. Tana rih gunai unuk ngolowong ulun-ulun bohkonuhtus. 27:8 Kotului orih nyiring ondou tuh tana rih konohawot "Tana Daha." 27:9 Honong kodorih, nyolungrih inon ijo tonuhtui bain Nabi Yeremia, iorih, "Iro norima tolun pulu duit perak, jorih regan ijo nyotuju bain ulun Israel kolou bayaran ahkai-Oh. 27:10 Tutang duit orih iro hapai unuk moli Tana Tuhkang Kobali, kolou ijo tomoretah Tuhan ahkak-Ku." 27:11 Kotihka Yesus noharep Pilatus, gubernur daerah orih, Pilatus ngisok, "Inon Ihko Lahcan Ulun Yahudi?" "Kolouorih hion'mu," hion Yesus. 27:12 Tahpi uhun imam-imam kopala tutang okon-okon Yahudi nonga aro dawa toharep Yesus, Io eam mutah samasino. 27:13 Tului orih Pilatus nuhtui umba Yesus, "Kuwoh Ihko eam ngonih paring ijo iro ndawa umba Ihko rih?" 27:14 Tahpi Yesus eam mutah honjiot ka nyiring gubernur rih helan samasino. 27:15 Ang nyinong pesta Paska gubernur moliwus ihcobehti ulun tonyihpir numbun pitih ulun aro. 27:16 Ang kotihka orih anai ulun konohukum ijo bosewut. Araioh Yesus Barabas. 27:17 Jadi uhun ulun aro hopuhpung, Pilatus ngisok umba iro, "Iai ijo ihkam kani ahku moliwusoh ahkan ihkam? Yesus Barabas ata'ai Yesus ijo konohawot Kristus?" 27:18 Pilatus nuhtui kolou orih tului io kota'an, ijo pongowasa Yahudi monyarah Yesus ahkaioh tului kohiri ahtoi'ndo. 27:19 Ang kotihka Pilatus rahat tuot ang balai bosara, oruhoh ngirim pohtoh tuh ahkaioh, "Ara ihko umba-umba porokara ulun ijo eam bosala rih, bain tului Io, ahku duon nuhpi ijo ja'at tu'u ondou tuh." 27:20 Tahpi imam-imam kopala tutang okon-okon Yahudi hototurus ngihit ulun aro rih ahkan nyawot umba Pilatus mangat Barabas ijo tonoliwus tutang Yesus Kristus tonohukum mahtoi. 27:21 Turus gubernur rih ngisok umba iro, "Tahkan koduo ulun rih, iai ijo ihkam kani ahku moliwusoh ahkan'kam?" "Barabas," hion'ndo. 27:22 "Amat kolouorih, ahku harus nguan inon umba Yesus ijo konohawot Kristus?" Pilatus ngisok umba iro. "Mahpak Io!" hion iro paringoh. 27:23 "Tahpi inon koja'at-Oh?" Pilatus ngisok. Turus iro ngoriak muhi-muhing hino, "Mahpak Io!" 27:24 Kojoriaioh Pilatus borondong ijo io eam tou nguan ino-inon hino tutang ijo ulun-ulun rih puna tou ahkan borontak. Jadi Pilatus ngomin danum, turus ang toharep ulun aro rih io muhi longoioh hawui nuhtui, "Ahku eam nanggung-jawab ngosan popahtoi ulun tuh! Orih urusan'kam!" 27:25 Paring ulun aro rih mutah, "Yo, nauhoh ihkai tutang anak-anak 'kai nanggung hukuman ngosan popahtoi-Oh!" 27:26 Turus Pilatus molopas Barabas ahkan iro, tutang nyuhu ulun mahcat Yesus; tutang nyarah Yesus ahkan tomahpak. 27:27 Pongohino sorodadu-sorodadu Pilatus ngomin Yesus nyolong nokuh istana gubernur, tutang paring kawansorodadu kupur aang kodiling Yesus. 27:28 Iro nguap hahtin Yesus, tutang makehpan ahkai jubah ungu. 27:29 Iro nguan ahkur ijo tahkan bojahkah boduhi, turus nokehpaioh aang kuhung Yesus. Pongohuli iro ngina ihco doroh kahju ahkan sukahoh ang longoi koto'ui-Oh, turus sutup ang toharep-Oh hawui'ndo ngojea Io. "Daulat Lahcan Ulun Yahudi!" hion'ndo. 27:30 Iro ngoluhca baui-Oh, tutang ngomin sukah rih, turus nahup Io ang kuhung-Oh. 27:31 Uli iro ngonjea Io, iro nguhkoi jubah-Oh ungu rih turus kehpan hahtin Aiu bongoi. Pongohuli Io konomin bolua ahkan tomahpak. 27:32 Aang beteng jalan iro hosombang umba ihcobehti tahkan Kirene bogare Simon. Iro nyuhu Simon rih ngohtun sopolahkin Yesus. 27:33 Pongohuli iro johcok ang ihco unuk ijo konohawot Golgota, ijo rimaioh "Unuk Bangon Kuhung." 27:34 Ang anan iro nonga ahkan Yesus korih anggur ijo capur poru. Tahpi uli Yesus nyurup anggur rih, Io eam norimaoh. 27:35 Pongohino iro nyopolahki Io, tutang hobagi-bilah hahtiu-Oh hapan tenung. 27:36 Ulimba iro tuot monjaga Io ang anan. 27:37 Ang diang kuhung-Oh iro nokehpan surat tohou dawa toharep Io, yorih: "Jituh Yesus Lahcan Ulun Yahudi." 27:38 Hombo-homboh umba Io, iro mahpak ka'a duo behti ponyilou; ihcobehti ang sila koto'ui, ihcobehti hino ang sila komuloi-Oh. 27:39 Ulun-ulun ijo nyihing ang anai ngiling-ngiling kuhung, tutang ngoluhca nohanya Yesus. 27:40 Iro nuhtui, "Ihko ijo kani ngahkas Lohpou Pohotala, tutang mangunoh hino ang tolu ondou! Amat Ihko Anak Pohotala, mosuluh rih tahkan sopolahki rih, tutang nyolamat arop'mu!" 27:41 Kolouorih ka'a imam-imam kopala tutang guru-guru agama tutang okon-okon Yahudi ngonjea Yesus. Iro nuhtui, 27:42 "Io monyolamat ulun bohkon, podahar arop-Oh bongoi Io eam duon nyolamatoh! Amat Io Lahcan Israel, piosrih Io uhuntuh mosuluh tahkan sopolahki orih, punan ihkai porocaya umba-Oh. 27:43 Io porocaya umba Pohotala tutang nuhtui ijo Io Anak Pohotala. Orih, olai ihto nohto-Oh inon rih Pohotala kani monyolamat Io uhuntuh." 27:44 Ponyilou-ponyilou ijo tonyalib homboh Io rih ka malah umba ngonjea Io ka'a kolourih. 27:45 Ang tohun ondou, kotahin tolu jam sohopus tana rih monjadi pindong. 27:46 Pukul tolu cohit, Yesus ngombak honong auh muhing, "Eli, Eli, lama sabakhtani?" ijo rimai, "O Pohotala-Ku, Pohotala-Ku, ombai Ihko nohtah Ahku?" 27:47 Pira-pira ulun ang anan ngonih kombak-Oh, tutang nuhtui, "Io na'ah Elia!" 27:48 Ihcobehti tahkan iro jonyo-jonyo tulak ngomin dolak karang tutang nuhcomoh aang anggur mosom. Pongohuli io nusukoh ang topahkan owuh kahju turus nohtahcukoh nokuh biwih Yesus. 27:49 Tahpi ulun-ulun ijo bohkon nuhtui, "Ngindoi, olai ihto nohto inonrih Elia lombut nyolamat Io!" 27:50 Pongohuli Yesus ngombak hino honong auh muhing, turus mahtot hasong-Oh ijo pongopahoh. 27:51 Dindingbenang ijo moholat, ang luwang Lohpou Tuhan borutat sila duo tahkan diang johcok pinda. Tana moruguh tutang puruk-puruk bahtu bosila. 27:52 Luwang kolowong bokuap, tutang aro ukup Pohotala ijo jari mahtoi tongombolum huli. 27:53 Iro soluka tahkan tanom-tanom uli Yesus bolum tahkan louk ulun mahtoi, tutang iro nyolung nokuh Yerusalem bohua. Tutang ang anan aro ulun nohto iro. 27:54 Kopala pasukan hombo-homboh umba karon-sorodadu ijo rahat monjaga Yesus uras mihkoh samasino ohkot nohto tana moruguh tutang paring ang nyolung rih. Iro nuhtui, "Tu'u-tu'u Io tuh Anak Pohotala!" 27:55 Ang anan aro ka'a ulunbawi ijo rahat nohto tahkan mahcu. Iro rih ijo jari ngohasu Yesus mangat dohop Io, nopara tahkan Galilea. 27:56 Ang loukoh, iorih Maria Magdalena, Maria inai Yakobus tutang Yusep, tutang inai anak-anak Sebedeus. 27:57 Ang ngolomi orih lombut rih ihcobehti ulun tahtou tahkan Arimatea, ijo araioh Yusep. Io ka'a murid Yesus. 27:58 Io tulak nokuh Pilatus, tutang nyawot otun Yesus. Turus Pilatus moretahoh mangat otun Yesus tonongaoh ahkaioh. 27:59 Mahka Yusep ngomin otun Yesus rih, tutang muhkusoh umba benang pomukusotu tahkan benang lena ijo bohua. 27:60 Turus io pokaling otun Yesus ang luwang tanom aiuoh bongoi, ijo tonapaoh ang luwang ihco puruk bahtu. Uliorih io molinang ihcokobawak bahtu hajo nuhtup boun luwang tanom rih, turus tulak. 27:61 Maria Magdalena tutang Maria ijo bohkon mohcon tuot ang anan noharep tanom rih. 27:62 Ngokos ondou hounumba ondou Sabat, imam-imam kopala tutang ulun-ulun Parisi tulak hombo-homboh nokuh Pilatus 27:63 tutang nuhtui, "Tuan, ihkai ingat ohkot pomunga orih magun bolum, Io pu'u nuhtui, 'Ulimba tolu ondou, Ahku ahkan bolum.' 27:64 Tului orih, nyuhu ulun monjaga tanom rih pio-pios nyiring ondou ijo kotolu, ahkan murid-murid-Oh eam duon nahkou otui-Oh, turus nuhtui umba ulun-ulun ijo Io jari bolum hoduli tahkan popahtoi. Tutang punga ijo laiu tuh ahkan paling ja'at umba ijo pahtukoh." 27:65 "Ihkam anai sorodadu pongawal," hion Pilatus umba iro, "tulak monjaga tanom rih sorapat touduon." 27:66 Turus iro tulak nokuh tanom, nyegel bahtu ponuhtupoh, tutang ngina ponjaga ang bauioh, mangat eam anai ijo nganggu kolowong rih.
28:1 Kotihka ondou Sabat jari nyihing ang ondou Minggu ngohkosjowujowuk samasino, Maria Magdalena tutang Maria ijo bohkon rih ka'a tulak nohto lowong rih. 28:2 Songela nyolung tana moruguh ijo monyangit. Ihcobehti molehkat Tuhan nosuluh tahkan soruga turus molinang bahtu atop lowong tanom orih hawoi tuot ang ngosanoh. 28:3 Kolou molehkat rih sama kolou kilat tutang hahtiuoh puhti samasino. 28:4 Sorodadu ponjaga ijo ngindoi ang anan korinah kihkoh'ndo nyiring iro nohcot, tutang ngola kolou ulun mahtoi. 28:5 Molehkat rih nuhtui umba ulun-ulun bawi orih, "Ara mihkoh! Ahku ta'an ihkam ngurah Yesus ijo jari tomahpakoh rih. 28:6 Io eam aro ang ohtoi. Io jari bolum, kolou ijo jari tonuhtui-Oh soun. Nokuh ohtoi nohto unukoh Io tomokaling. 28:7 Uhuntuh tulak jele-jeleng, monyiaroh ahkan murid-murid-Oh, 'Io jari bolum tutang huntuh Io tulak labih soun umba ihkam, nokuh Galilea. Ang anan ihkam ahkan nohto Io!' Ngingat iou, inon ijo jari tonuhtui-Oh ahkan'kam." 28:8 Jele-jeleng ulun-ulun bawi rih nohtah kolowong rih. Honong nanyam mihkoh sapur jorih, iro nokoru ahkan monyiaroh hal orih ahkan murid-murid Yesus. 28:9 Songela Yesus lombut hosombang umba ulun-ulun bawi orih tutang nuhtui, "Tabe!" Turus iro nokuh ngondoni Io, uli rih ngohawon pa'ai-Oh tutang nyembah Io. 28:10 "Ara mihkoh," hion Yesus umba iro, "tulak nuhtui ahkan konduang-konduang-Ku, mangat'ndo tulak nokuh Galilea; ang anan iro ahkan nohto Ahku." 28:11 Pondehan ulun-ulun bawi rih tulak, pira-pira tahkan sorodadu pongawal ijo ngindoi tanom rih buli nokuh lowu, tutang ngonorangan ahkan imam-imam kopala, paring ijo jari nyolung. 28:12 Imam-imam kopala rih bohaum umba okon-okon Yahudi, turus nonga jombalah hajo duit ahkan sorodadu ponjaga rih, 28:13 tutang nuhtui, "Ihkam harus nuhtui ijo murid-murid Yesus lombut ang ngolomi ondou, tutang nahkou otui-Oh ohkot ihkai rahat tiruh. 28:14 Tutang amat gubernur ngonih hal orih, ihkai ahkan ngata'u io mangat ihkam eam buah hukum konuaioh." 28:15 Mahka sorodadu ponjaga rih, ngomin duit rih, tutang nguan kolou ijo tomohtoh ahkan iro. Bain tului rih kesah rih magun tosiar ang louk ulun Yahudi nyiring aang ondou tuh. 28:16 Kosobalas murid Yesus rih tulak nokuh Galilea sorurui umba ijo ponoretah Yesus ahkan iro. 28:17 Ang ohkot iro nohto Yesus ang anan, iro suhkuntu'ut nyembah Io. Tahpi anai ang louk iro ijo bembang. 28:18 Yesus ngondoni iro tutang nuhtui, "Paring kowasa ang soruga tutang ang ngosan tana jari tonyorah ahkak-Ku. 28:19 Tului orih, tulakrih ahkan kokaron uhtusulun ang sohapus kolunon, ngonjodian iro monjadi murid-murid-Ku. Mopondus iro honong ngohawot aran Amai, tutang Anak, tutang Roh borasih Pohotala. 28:20 Mongajaroh iou iro mone'et paring ijo jari Ahku moretah umba'kam. Tutang ingat rih Ahku ahkan hototurus homboh ihkam nyiring lain jaman."
1:1 Tuhrih Kabar Hinut tohou Yesus Kristus, Anak Pohotala. 1:2 Kabar Hinut rih pahtukoh kolou ijo tonyurat bain Nabi Yesaya, koloutuh, " 'Tuhrih ijo sonuhu-Ku,' hion Pohotala; 'Ahku nyuhu io, labihhoun tahkanumba-Mu mangat Io nawas jalan ahkan-Mu.' 1:3 Anai ulun ijo na'ah ang padang balambah, 'Nahtapohrih jalan ahkan Tuhan; morahta jalan-jalan ijo ahkan tononguha-Oh.' " 1:4 Kolou ijo tonyurat orih, kolouorih rih ka'a lombut Yohanes ang padang balambah. Io mopondus ulun tutang momborihta borihta tahkan Pohotala. "Ihkam harus hubah tahkan dusa-dusan'kam tutang harus ponopondus, mangat Pohotala ngapun ihkam," kolourih hion Yohanes. 1:5 Paring ulun tahkan tanah Yudea tutang lowu Yerusalem tulak ngonih Yohanes. Iro ngahku dusa-dusan'ndo, tutang Yohanes mopondus iro ang Sungoi Yordan. 1:6 Yohanes nokehpan hatiu tahkan bulun unta. Pohtong kahangoh tahkan uhpak, tutang ukuioh mokalop tutang oling lawung. 1:7 Io narung borihta tuh, "Noin ulimba ahku, ahkan lombut ulun ijo labih hajo tahkanumba ahku. Ahkan nyundop nguwat talin soruhpah-Oh ka, ahku eam anaigunaioh. 1:8 Ahku mopondus ihkam umba danum, tahpi Io mopondus ihkam umba Roh Pohotala." 1:9 Ang ohkot orih Yesus lombut tahkan Nasaret ang tana Galilea, tutang Yohanes mopondus Io ang Sungoi Yordan. 1:10 Kodorih Yesus kuat tahkan sungoi rih Io nohto langit bokuap tutang Roh Pohotala mosuluh kolou bulung dala nokuh ngosan Yesus. 1:11 Pongohuli konahan auh Pohotala nuhtui, "Ihkorih Anak-Ku ijo Ahku ngasih-Oh. Ihko ngojorih ahtoi-Ku." 1:12 Toturus ulimba rih Roh Pohotala ngomin Yesus tulak nokuh padang balambah. 1:13 Ohpat pulu ondou Io anai ang anan, Io tonihkos bain Sehtan. Ohcin-ohcin boliar anai ka'a sama-sama umba Io ang anan, tutang molehkat-molehkat mahalu Io. 1:14 Uliorih Yohanes ponosolong ang sipir, Yesus tulak nokuh Galilea, tutang nyiar Kabar Hinut tahkan Pohotala ang anan. 1:15 Hioi-Oh, "Pohotala ahkan jeleng moretah. Hubah ihkam tahkan dusa-dusan'kam, tutang porocayarih umba auh Kabar Hinut ijo tahkan Pohotala!" 1:16 Kotihka Yesus nyalan ang saran Danou Galilea, Io nohto duo behti pongohcin, iorih Simon tutang arioh Andreas. Iro rahat nawan ohcin ang danou rih umba jala. 1:17 Yesus nuhtui umba iro, "Ngahasurih Ahku, Ahku ahkan majar ihkam monjala ulun." 1:18 Hunrih iro nohtah jala'ndo turus ngohasu Yesus. 1:19 Yesus nyalan turus, turus nohto hino duo behti hokonduang ijo bohkon, yorih Yakobus tutang Yohanes anak-anak Sebedeus. Iro anai ang luwang alut ngorong jala'ndo. 1:20 Yesus turus na'ah iro. Tutang iro nohtah amai'ndo ang luwang alut hihcoumba ulun-ulun upahan'ndo. Turus iro tulak ngahasu Yesus. 1:21 Yesus tutang murid-murid-Oh johcok ang lowu Kapernaum. Ang ondou Sabat pongooh, Yesus nyolong nokuh lohpou sombayang tutang nopara majar. 1:22 Ulun-ulun ijo ngonih-Oh helan umba cara-Oh Io mongajar. Tului, Io mongajar hapan pongaroh eam kolou guru-guru agama. 1:23 Ang ohkot orih ihcobehti ijo tonyalung roh ja'at nyolong luwang lohpou sombayang, tutang ngoriak, 1:24 "O, Yesus ulun Nasaret, Ihko nguan inon umba ihkai? Ihko lombut ahkan morusak ihkai? Ahku kota'an iai Ihko: Ihko suruhan ijo borasih tahkan Pohotala!" 1:25 "Tonih!" korahang Yesus umba roh ja'at orih, "soluka ihko tahkan ulun tuh!" 1:26 Mahka roh ja'at orih ngunde-nguhap ulun orih paham-tu'u, pongohuli bolua tahkan ulun rih sambir ngociak. 1:27 Paring ulun helan samasino, nyiring iro hoponuhtui sama aropoh, "Bah, inon tuh? Ihco ajaran ijo bohua! Umba pongaroh tutang kowasa, Io moretah roh-roh ja'at soluka, tutang iro te'et umba-Oh!" 1:28 Mahka kabar tohou Yesus turus tosiar honong jeleng johcok hokodiling tana Galilea. 1:29 Yesus tutang murid-murid-Oh nohtah lohpou sombayang rih, tutang tulak nokuh lohpou Simon tutang Andreas. Yakobus tutang Yohanes tulak ka'a homboh iro. 1:30 Ohpu Simon rahat ngarot poros darom ang unukoh tiruh. Jadi uhun Yesus tutang murid-murid-Oh nyolong nokuh lohpou rih, Yesus tonarung tohou hal rih. 1:31 Mahka Yesus tulak nokuh ohpu Simon, tutang nambit longoioh turus dohop io kuat. Pondam orih nihou, tutang io ka nopara nyorungan'ndo. 1:32 Sohit ondouoh, ulimba mahtanondou bolop, ulun-ulun ngomin ahkan Yesus paring ulun ijo poros tutang ijo tonyalung roh ja'at. 1:33 Paring ulun-ulun lowu rih, ngorumbung ang boun lohpou rih. 1:34 Turus Yesus ngopios aro ulun ijo ngarot aro mahcam koporos rih tutang muhko ka'a aro roh ja'at. Io eam nyuhu roh-roh ja'at rih nuhtui, tului iro rih ta'ai, iai Io. 1:35 Ngohkosoh hondouoh, ohkot magun bota-botat, Yesus monyun turus nohtah lohpou rih. Io tulak nokuh unuk ijo tonih ang lihkut lowu, tutang bodo'a ang anan. 1:36 Tahpi Simon tutang injah-injahoh tulak ngurah Io. 1:37 Tutang ulimba iro nyombang Io, iro nuhtui, "Paring ulun rahat tuh ngurah Amai." 1:38 Tahpi Yesus mutah, "Ayu ihto noturus ponyalan ihto nokuh lowu-lowu bohkon ang kodiling ohtoi. Ahku harus bokotbah ang anan ka'a, kotului orih konohuangoh Ahku kanohtoi." 1:39 Tului orih Yesus tulak koumo-umoh ang hopus Galilea, tutang bokotbah ang lohpou-lohpou sombayang hawui muhko roh-roh ja'at. 1:40 Ihcobehti ijo boponyahkit belang ijo mopihkoh lombut nokuh Yesus. Ulun orih suhkuntu'ut, tutang nuhtui, "Amat Amai kani, Amai duon ngopios ahku." 1:41 Yesus ngasi umba ulun orih. Jadi, Io ninjok ulun rih hawui nuhtui, "Ahku kani, pios iou!" 1:42 Wayah orih ka'a ponyahkitoh nihou tutang io pios. 1:43 Turus Yesus nyuhu io tulak tutang pohtoh tuh, 1:44 "Bua-buah, ara ihko mander umba iai beweu, tahpi tulak nokuh imam, tutang nyawot io ahkan momasti, ijo ihko jari pios. Turus ahkan kopios'kam rih, nyarah porahpah numbun ijo ponohto Museh, monjadi kahta ahkan ulun-ulun ijo ihko tu'u-tu'u ius pios." 1:45 Tahpi ulun rih tulak, tutang hototurus monyiar ijo monjadi orih, koumo-umoh nyiring Yesus eam duon nyolong lowu honong tarang-tarangan. Io tihkas mohcon ang ruar lowu ang unuk-unuk benyem. Olukakolourih ulun hototurus iou lombut nokuh Io tahkan umo-umoh ka'a.
2:1 Pira-pira ondou pongohuli Yesus tulak buli nokuh Kapernaum. Mahka tosiar borihta ijo Io rahat ang lohpou. 2:2 Turus aro ulun lombut. Iro hokorumbung ang anan nyiring eam anai hino unuk. Ang bauntukang ka tuwi umba ulun. Turus Yesus nyiar borihta tahkan Pohotala ahkan iro. 2:3 Pondehan Io bopander, ohpat behti ngohusung ihcobehti ulun mahtoibehtiu, ngomin io nokuh Yesus. 2:4 Tahpi tului ulun dalou karoi, iro eam duon ngonohkin Yesus. Jadi, iro nguap sahpou tohorong ang isun unuk Yesus tuot. Uliorih iro nguluh ulun mahtoibehtiu rih tutang kahcangkarukoh. 2:5 Kotihka Yesus nohto kolourih kohajon koharap'ndo, Io nuhtui umba ulun ijo mahtoibehtiu rih, "O, anak-Ku, dusa-dusan'mu jari tongapun." 2:6 Pira-pira guru agama ijo anai tuot ang anan nopara anai ngiso-ngisok a'ang ahtoi'ndo, 2:7 "Bahanyi morong ulun tuh nuhtui kolourih! Io mohina Pohotala. Iai ijo tou ngapun dusa-dusa, amat eam Pohotala bongoi?" 2:8 Aang ohkot rih ka'a Yesus ngota'an tiruk'ndo. Turus Io nuhtui, "Ombai ihkam anai niruk kolourih ijo ang luwang ahtoi'kam? 2:9 Umoh ijo paling jeleng: nuhtui, 'Dusa'mu jari tonapun,' ata'ai nuhtui, 'Hihkat ih, ngohtun kahcangkaruk'mu tutang nyalan'? 2:10 Tahpi huntuh Ahku ahkan ngorinah ahkan'kam ijo ang ngosan tana tuh Anak Ulun bokowasa ngapun dusa." Turus Yesus nuhtui umba ulun ijo mahtoibehtiu rih, 2:11 "Hihkat, ngohtun kahcangkaruk'mu tutang buli!" 2:12 Io kuat tutang jeleng ngonin kahcangkarukoh turus bolua tonyaksi bain iro paring. Ulun-ulun rih helan turus nara Pohotala. Hion'ndo, "Jaha pu'u ihto nohto angjari koloutuh!" 2:13 Yesus buli hino nokuh saran Danou Galilea. Aro ulun lombut nokuh Io, tutang Io majar'ndo. 2:14 Pondehan Yesus nyalan ang anan, Io nohto ihcobehti ponagih pajak bogare Lewi anak Alpeus, rahat tuot ang kantor pajak, "Ngahasu rih Ahku," hion Yesus umba io. Mahka Lewi kuat tutang ngahasu Yesus. 2:15 Ohkot Yesus beteng kuman ang lohpou Lewi, lombut aro ponagih pajak tutang ulun aro ijo tongohu eam pios bain ulun aro, umba kuman homboh Yesus tutang murid-murid-Oh. Tului aro ang louk iro ngohasu Yesus. 2:16 Pira-pira guru agama tahkan barih Parisi, nohto Yesus kuman homboh umba ponagih-ponagih pajak tutang ulun-ulun ijo tongohu eam pios rih. Jadi iro ngisok umba dolang murid Yesus, "Ombai Guru'kam kuman hihco umba ponagih-ponagih pajak tutang ulun-ulun ijo eam pios rih?" 2:17 Yesus ngonih kisok'ndo rih, turus mutah, "Ulun ijo borigas eam boguna nokuh dokter; tihkas ulun ijo poros iou. Ahku lombut eam ahkan na'ah ulun ijo ngohu aropoh jari pios, molekan ulun ijo ngohu aropoh hina." 2:18 Ang ihco ohkot, murid-murid Yohanes Popondus tutang ulun-ulun Parisi beteng puasa. Turus anai ulun lombut nokuh Yesus tutang ngisok, "Ombai murid Yohanes Popondus tutang murid ulun-ulun Parisi puasa, tahpi murid Amai eam?" 2:19 Yesus mutah, "Aang pesta kawin, inonrih ulun tipen eam kuman? Amat pongaten ijo bahkas magun hihco'ndo, puna iro kuman. 2:20 Tahpi ahkan lombut ohkotoh pongaten bahkas rih kononin tahkan louk'ndo. Ang ohkot rih kolawun'ndo eam kuman. 2:21 Eam aro ulun ijo nupang kolambi usang umba ihcokolambar benang bohua. Tului benang tupang orih ahkan ngolonyut, tutang morutat kolambi rih nyiring napa rutatoh ijo labih hajo. 2:22 Kolourih ka'a eam aro ulun ijo nyuang anggur bohua nokuh luwang tolehkung uhpak ijo usang. Tului anggur bohua rih, ahkan monyabab tolehkung uhpak rih pusit. Kotului orih kododuooh rusak nihou. Anggur ijo bohua pahtut nyuang nokuh luwang tolehkung uhpak ijo bohua ka'a!" 2:23 Aang ihco ondou Sabat, kotihka Yesus nyuru ihco umo gandum, murid-murid-Oh nopara ngohtom gandum. 2:24 Turus ulun-ulun Parisi nuhtui umba Yesus, "Ombai murid-murid-Mu molanggar hukum agaman ihto, songola nguan ijo pali aang ondou Sabat?" 2:25-26 Yesus mutah, "Jaha pu'urih ihkam mombasa inon ijo konuan Dawid, ohkot Abyatar rahat nguan gawiu monjadi imam agung. Ohkot rih Dawid tutang ulun-ulun aiu ijo bolo'u, tutang eam aro ukun, io nyolong nokuh Lohpou Tuhan, tutang kuman luhte ijo ius sonyorah ahkan Pohotala. Tutang luhte rih tonongaoh ka'a ahkan ulun-ulun aiuoh. Padahar numbun hukum agaman ihto, tihkas imam-imam iou ijo tou kuman luhte rih." 2:27 Turus Yesus nuhtui hino, "Ondou Sabat anai napa ahkan ulun; eam ijo ulun ahkan ondou Sabat. 2:28 Jadi, Anak Ulun bokowasa, mahi ka ngosan ondou Sabat."
3:1 Yesus huli hino nokuh lohpou sombayang. Ang anan anai ihcobehti ijo longoi mahtoi silai. 3:2 Ang anan aro ulun-ulun ijo kani ngurah kosalan Yesus, mangat'ndo duon ngadu Io. Jadi iro turus ngolinda Io, inonrih Io ahkan ngopios ulun ang ondou Sabat. 3:3 Yesus nuhtui umba ulun ijo longoioh mahtoi silai rih, "Has tombok ang ohtoi, ang boun." 3:4 Turus Yesus ngisok umba ulun-ulun ijo tohko ang anan, "Numbun agama ihto, tou nguan inon ka ang ondou Sabat? Nguan ang pios ata'ai nguan ang ja'at? Monyolamatoh ulun ata'ai munu?" Iro tonih iou. 3:5 Honong kosangitoh Yesus nohto hoponyila Io, tahpi Io porosahtoi ka'a, tului iro dalou mahang ahtoi'ndo. Turus Io nuhtui umba ulun rih, "Nuhcu longon'mu." Ulun rih nuhcu longoioh ka tutang longoi pios. 3:6 Mahka ulun-ulun Parisi nohtah lohpou sombayang rih, turus jeleng bohaum umba pira-pira ulun barih Horodes, ahkan munu Yesus. 3:7 Yesus tutang murid-murid-Oh tulak mundur arop'ndo nokuh Danou Galilea. Mahka aro samasino ulun tahkan Galilea ijo tulak ngahasu Yesus. Aro ka'a ijo lombut tahkan Yudea, 3:8 tahkan Yerusalem, tahkan tana Idomea, tutang tahkan tana ang hila timur Yordan tutang tahkan kodiling lowu-lowu, ang Tirus tutang Sidon. Iro paringoh lombut nokuh Yesus, tului iro ngonih tohou hal-hal ijo jari konuai-Oh. 3:9 Ulun-ulun rih, kolourih karoioh, nyiring Yesus nyuhu murid-murid-Oh nyodia alut ahkai-Oh, tului ara-ara Io noin tonyihki bain ulun-ulun rih. 3:10 Io ngopios kodorih aro ulun, nyiring paring ulun ijo poros hokosihki ngurah jalan ngondoni-Oh mangat duon ngendeh Io. 3:11 Tutang ulun-ulun ijo sonorupang roh ja'at, nyinong tikat nohto Io, turus iou suhkuntu'ut ang boui-Oh tutang ngociak, "Ihkorih Anak Pohotala!" 3:12 Tahpi Yesus ngohana samasino roh-roh ja'at rih ngohawot iai Io. 3:13 Pongohuli Yesus nuhkat nokuh ihco puruk, tutang na'ah ulun-ulun ijo unuk konohuang-Oh. Ulun-ulun rih lombut, 3:14 turus Io ngopili tahkan louk iro duo balas behti. Hioi-Oh, "Ahku ngopili ihkam, mangat'kam homboh Ahku, tutang Ahku nyuhu ihkam, ahkan monyiar Kabar Hinut tahkan Pohotala, 3:15 tutang ihkam ahkan norima kowasa ahkan muhko roh-roh ja'at." 3:16 Tuhrih aran koduo balas murid orih: Simon (ijo konohawot-Oh ka'a Petrus), 3:17 Yakobus tutang Yohanes konduangoh, iorih anak-anak Sebedeus (iro tuh konohawot-Oh arai Boanerges, rimaioh "anak duhung"), 3:18 Andreas, Pilipus, Bartolomeus, Mateus, Tomas, Yakobus anak Alpeus, Tadeus, Simon Salutes, 3:19 tutang Yudas Iskariot ijo dorhaka umba Yesus. 3:20 Pongohuli Yesus buli nokuh lohpou. Tahpi ulun aro lombut hino hokorumbung, nyiring Yesus tutang murid-murid-Oh eam sapet kuman. 3:21 Ulun-ulun nuhtui, "Io jadi gila!" Tutang kotihka jolahai-Oh ngonih hal orih, iro tulak ahkan ngomin Io. 3:22 Guru-guru agama ijo lombut tahkan Yerusalem nuhtui, "Io sonyalung Baalsebul! Kopala roh-roh ja'at, orihrih ijo nonga kowasa ahkai-Oh duon muhko roh ja'at." 3:23 Mahka Yesus na'ah ulun aro rih, tutang monyorihta ahkan'ndo hapan pira-pira porobasa. "Koloukuwoh tou roh ja'at muhko roh ja'at," hion Yesus. 3:24 "Amat ihco nogara bobolah a'ang hobarih-hobarih, ijo toturus homusuh, nogara orih eam ahkan botahan. 3:25 Tutang amat a'ang ihco jolahan eam anai kohihco tutang ului-uluioh saling hokohiri, jolahan orih ahkan bokahkas. 3:26 Amat ang luwang kolahca'an sehtan nyolung bobolah tutang kojajong, kolahca'an rih eam tehen tahi tutang musti ahkan nihou. 3:27 Eam aro ihcobehti ka nyolong ahkan luwang lohpou ihcobehti ulun ijo ba'as, tutang monyilou ponahtouoh, amat io eam labih houn masung ulun ba'as rih. Uliorih kolowun io duon monyilou ponahtou ulun rih. 3:28 Kota'an'kam! Amatmira ulun nguan dusa tutang ngohawot auh mohina, io duon tongapun. 3:29 Tahpi amatmira io mohina Roh Pohotala, io eam duon tongapun! Tului pohina rih anai dusa ijo kototahiu." 3:30 (Yesus ngohawot kolourih, tului anai ulun ijo nuhtui, ijoYesus sonyalung roh ja'at.) 3:31 Uliorih inai tutang konduang-konduang Yesus lombut. Iro ngindoi ang konaha tutang nyuhu ulun bohkon na'ah Yesus. 3:32 Kotihka orih aro ulun rahat tuot ang kodiling Yesus. Iro nuhtui umba-Oh, "Amai, inai tutang konduang-konduang Amai anai ang konaha. Iro ngurah Amai." 3:33 Yesus mutah, "Iai inai-Ku? Iai konduang-konduang-Ku?" 3:34 Pongohuli Io nopahjah nokuh ulun-ulun ijo tuot hokodiling Io, turus nuhtui, "Tuhrih inai tutang konduang-konduang-Ku! 3:35 Ulun ijo nguanoh konohuang Pohotala, iorih konduang-Ku bahkas konduang-Ku bawi, tutang inai-Ku."
4:1 Yesus majar hino ang saran Danou Galilea. Aro samasino ulun hopuhpung ngodiling Io. Tului rih Io tulak tuot ang luwang ihco alut ang ngosan danum, tutang ulun aro rih tombok ang saran danou. 4:2 Turus Yesus majar aro hal ahkan iro, hawui umba porobasa ka'a. Koloutuh Io majar iro. 4:3 "Ngonihrih! Anai 'cobehti pongumo tulak monyi bonyiu. 4:4 Kotihka io uhun nuhkan, anai bonyi rih ijo toponyi ang tohun jalan. Turus lombut bulung tutang bonyi rih konukun'ndo nyiring opah. 4:5 Anai ka'a yo toponyi ang unuk hobahtu-liang ijo tanaoh nihpih. Bonyi-bonyi rih jeleng ijo bolum, tului kurang tanaoh, 4:6 tahpi kotihka mahtan ondou notang, during-during bonyi rih nopara molanyu uliorih koring tutang mahtoi tului uhatoh eam timbon. 4:7 Anai hino bonyi ijo toponyi ang unuk pulou ruwut-duhi. Ruwut duhi rih bolum tutang ngohuwut karon-during bonyi rih nyiring eam duon mua. 4:8 Tahpi anai ka'a bonyi ijo toponyi ang tana ijo bosiwuh. Bonyi orih tumbu monjadi hajo, turus mua, anai ijo tolun pulu, anai yo onom pulu, anai ijo solahtus lihpet buaioh." 4:9 Uli nyorihta dolang porobasa orih, Yesus nuhtui, "Amat ihkam anai tolinga, pios ngonihoh!" 4:10 Kotihka Yesus bongoi, ulun-ulun ijo jari ngonih karon-ajar-Oh, lombut nokuh Io homboh koduo balas murid-Oh. Iro nyawot Io monarang riman porobasa rih. 4:11 Mahka Yesus nuhtui umba iro, "Ihkam jari tononga pononga, mangat ngota'an dolang bokulim tohou koloukuwoh Pohotala moretah. Tahpi ulun-ulun ijo luar, tonongajar umba porobasa, 4:12 mangat, 'Iro ahkan turus ngorondongoh tahpi eam kota'an inon ijo nyolung, iro ahkan toturus ngonih, tahpi eam iro horahtioh, tuh nyolung mangat iro ara nohto tutang horahti tutang ara lombut nokuh Pohotala tutang Pohotala ngapun iro.' " 4:13 Pongohuli Yesus nuhtui umba iro, "Amat ihkam eam horahti porobasa rih, koloukuwoh ihkam horahti porobasa-porobasa ijo bohkon? 4:14 Pongumo orih, iorih ulun ijo mborihta kabar tahkan Pohotala. 4:15 Bonyi ijo tomonyi ang jalan nindung ulun-ulun ijo ngonih borihta tohou koloukuwoh Pohotala moretah. Kolourih ngonih, sehtan lombut tutang ngomin inon ijo jari konombulan luwang ahtoi iro. 4:16 Bonyi ijo tomonyi ang tana bahtu liang, tanaoh nihpih nindung ulun-ulun ijo ngonih kabar rih, tutang turus norimaoh honong jorih ahtoi. 4:17 Tahpi kabar rih eam nguhat timbon aang ahtoi'ndo, nyiring eam tahan tahi. Kodorih iro ngarot kosusah ata'ai tongoporos bain norima kabar rih, turus iro murtad. 4:18 Bonyi ijo toponyi ang tohun unuk ruwut duhi rih, nindung ulun-ulun ijo ngonih kabar rih, 4:19 tahpi mihkoh tohou pombolum iro tutang jolik bolum labih tahtou. Kojolik ahkan mahca-mahcam hal, nyolong nokuh luwang ahtoi'ndo. Tului rih kabar tahkan Pohotala, tongohuwut ang luwang ahtoi'ndo, nyiring eam momua. 4:20 Tutang bonyi ijo toponyi ang tana ijo bosiwuh rih, nindung ulun-ulun ijo ngonih kabar orih tutang norimaoh, iro mua aro, anai ijo tolun pulu, anai ijo onom pulu, anai ijo solahtus tikat lihpet karon-buaoh." 4:21 Turus Yesus nuhtui hino, "Pu'u ulun nuhtang sumbu turus nyokulopoh umba potoran ata'ai nginaoh ang pinda kahtil? Kuwoh io eam ngina sumbu orih ang owuhoh? 4:22 Eam aro ijo bosuhuk ino-inon ijo eam ahkan tonohto; tutang eam anai ijo bokulim ijo eam ahkan botarang. 4:23 Tului orih amat anai tolinga hinut io ngonih!" 4:24 Turus Yesus nuhtui hino, "Nohtoanirih, inon ijo ihkam ngonihoh tuh! Tihpong ijo hapan ihkam nihpong ulun bohkon, ahkan hapan ka'a bain Pohotala ahkan nihpong ihkam -- tutang mahi molowi karoi hino. 4:25 Tului ulun ijo jari anaingina, ahkan tononga labih aro hino; tahpi ulun ijo eam arongina, isut ijo anai ang io ahkan kononin ka'a." 4:26 Yesus nutung tuhtui-Oh hino, "Amat Pohotala moretah kolou Lahca, koada'anoh tou tonindung kolou ihcobehti ijo nawur bonyiu ang umoioh. 4:27 Ngolomi ondou io tiruh; boloangondou io monyun. Tutang pondehan orih, bonyi-bonyi rih turus bolum tutang nyolung hajo. Tahpi koloukuwoh caraoh, bonyi-bonyi orih bolum tutang monjadi hajo, ulun orih eam kota'an. 4:28 Tana orihrih ijo honong bongoi nonga hasir: ang pahtu-pahtuk pahtingoh, uliorih luangoh, turus buaoh. 4:29 Tutang amat gandum rih jari botuo, ulun rih ka'a nopara ngohtom, tului jari ohkotoh ahkan ngohtom." 4:30 "Amat Pohotala moretah, umba inon ihto duon nindungoh?" Yesus ngisok hino. "Sutu inon ijo tou ihto hapaoh ahkan monarang orihrih? 4:31 Amat Pohotala moretah, ang konuai kolou porobasa tuh: Ihco koloang sosawi kononin bain ihcobehti pongombulan turus tonanomoh ang tana. Luang sosawi rih luang ijo pongokoikoh ang kolunon tuh. 4:32 Tahpi amat jari bolum, io monjadi ijo pongohajoi ang louk komulan-komulan. Da'ai-da'aioh kodorih borakap, nyiring bulung-bulung duon lombut, tutang napa kosalahoh ang da'ai, ang pinda kosingouoh." 4:33 Kolouorih Yesus majar ulun honong hapa aro porobasa kolou rih, komahcu umoh iro duon horahti. 4:34 Yesus turus mohapan porobasa amat Io majar ulun-ulun rih. Tahpi amat Io bongoi honong murid-murid-Oh, Io monarang paringoh ahkan iro. 4:35 Aang ngolomi ondou rih ka'a, Yesus nuhtui umba murid-murid-Oh, "Olai rih, ihto bolayar mihtah nokuh pohoi danou." 4:36 Mahka Yesus jahkat alut tutang murid-murid-Oh, nohtah ulun-ulun aro ang saran danou, turus jahkat alut ijo sama. Alut-alut bohkon anai ka'a ang anan. Pongohuli Yesus tutang murid-murid-Oh nopara bolayar. 4:37 Eam tahi pongohuli lombut bahiu bolowut. Lucok nopara nahpuk alut tutang nyolong nokuh luwang, manyou alut rih nyiring tuwi umba danum. 4:38 Ang komburi alut rih, Yesus rahat tiruh, tutang kuhung-Oh ang isun karuk. Murid-murid-Oh ngomonyun Io. Iro nuhtui, "Amai Guru, inonkah Amai eam poduli, ihto colahka?" 4:39 Yesus kuat, turus nokonyat bohiu rih, tutang nuhtui umba danou, "Tondo, tenengrih!" Bahiou ka tondo, tutang danou monjadi paham teneng. 4:40 Turus Yesus nuhtui umba murid-murid-Oh, "Ombai ihkam mihkoh? Ombai ihkam eam porocaya umba Ahku?" 4:41 Mahka iro monjadi mihkoh tutang nuhtui umba sama aropoh, "Iairih kotu'uioh ulun tuh, nyiring bahiu tutang lucok ka'a te'et umba auh-Oh."
5:1 Pongohuli Yesus tutang murid-murid-Oh johcok ang pohoi Danou Galilea, ang tana Gerasa. 5:2 Kodorih Yesus nosuluh tahkan alut, Io tonokuh ihcobehti ulunbahkas ijo bohua tahkan kolowong tanom. 5:3 Ulun orih tongowasa bain roh ja'at tutang mohcon ang kolowong tanom. Io jari eam duon tonomanga hino; olu umba ratai. 5:4 Jari bojoin pa'ai tutang longoioh tomanga, tahpi toturus ratai-ratai rih ponahtotoh, tutang sonaman ang pa'aioh ponolotoh. Io kolourih ba'as, nyiring eam aro ihcobehti ka'a duon nahan io. 5:5 Hondou ngolomi io kumbang-kumbanga ang kolowong tutang aang puruk-puruk, hawui bokociak-ciak tutang pohimang behtiuoh umba bahtu. 5:6 Kotihka tahkan mahcu io nohto Yesus lombut, turus nokoru suhkuntu'ut ang tohimo Yesus. 5:7 Umba auh ijo muhing io bokociak, "Yesus, Anak Pohotala Ijo Pahamisung! Ahkan ihko nguaninonoh ahku tuh? Aang aran Pohotala, ahku nyawot, ararih nyiksa ahku!" 5:8 (Ulun rih nuhtui kolouorih, tului Yesus nuhtui umba io, "Rohja'at solukarih tahkan ulun tuh!") 5:9 Turus Yesus ngisok umba io, "Iai aran'kam?" Ulun rih mutah, "Aran'kai 'Legion' -- tului ihkai tuh aro samasino!" 5:10 Dulang-duli io nyawot hawoi paham, mangat Yesus ara nyuhu roh-roh ja'at rih soluka tahkan daerah anan rih. 5:11 Doni unuk rih anai aro kawanurak ijo rahat ngurah uhkui ang beteng korong puruk. 5:12 Roh-roh ja'at rih nyawot umba Yesus, "Nyuhu ihkai nyolong nokuh luwang urak-urak rih." 5:13 Tutang Yesus sotuju. Jadi, roh-roh ja'at rih soluka tahkan ulun rih turus nyolong nokuh luwang urak-urak rih. Paring kawan urak rih nokoru, tutang nyohowu tahkan saran kowang, koluwang danou turus bolonyot -- paringoh anai kira-kira duo kujan urak. 5:14 Pongindoi-pongindoi urak rih nokoru, monyiar kabar rih nokuh lowu tutang dukuh hokodilingoh. Turus ulun-ulun soluka nohuang nohto inon ijo jari nyolung. 5:15 Iro lombut nokuh Yesus, turus nohto ulun nanai ijo tonyalung roh ja'at rih beteng io tuot ang anan, io jari hopokajan tutang tirukoh ka'a jari borondong. Mahka iro paringoh monjadi mihkoh. 5:16 Ulun-ulun ijo ius monyaksi bongoi kojodian ijo nyolung tohou ulun rih, tutang urak-urak rih, nyorihtaoh inon ijo jari nyolung. 5:17 Turus ulun-ulun daerah orih nyawot umba Yesus mangat nohtah daerah rih. 5:18 Ohkot Yesus jahkat ahkan luwang alut, ulun ijo nanaioh ijo tonyalung roh ja'at rih, nyawot umba Yesus, mangat tou umba Io. 5:19 Tahpi Yesus eam sotuju, hioi-Oh, "Bulirih tutang nyiar ahkan injah-jolahan'mu inon ijo ius konuan Tuhan ahkan'kam tutang eaminon kopiosoh Io tohimo ihko!" 5:20 Ulun rih ka tulakbuli, tutang nopara monyiaroh, ahkan daerah Sopulu Lowu rih, inon ijo jari konuan Yesus umba io. Paring ulun helan ngonihoh. 5:21 Yesus buli hino nokuh pohoi danou. Ang saran danou rih aro ulun lombut hokorumbung ang kodiling Yesus. 5:22 Lombutrih ihcobehti ijo bogare Yairus. Io orih ihcobehti ohkon lohpou sombayang ang lowu rih. Kotihka io nohto Yesus, io suhkuntu'ut ang tohimo Yesus, 5:23 tutang nyawot honong paham, "Amai, anak bawi aik'ku poros paham. Kanirih kowa lombut ahkan nambitoh, mangat io pios tutang eam mahtoi!" 5:24 Mahka Yesus ka'a tulak homboh Yairus. Aro ulun ngohasu Io tutang ngonohkin Io tahkan kokaro hila. 5:25 Ang loukoh iro anai hino ihcobehti ulunbawi ijo jari duo balas toun tongondaha ijo hotuhtung umba polombutbulanoh. 5:26 Paring ponahtouoh jari ohpah hapaoh ahkan bayar dokter-dokter, tahpi eam aro ijo duon ngopios io, ponyahkitoh botambah malah koporosoh mondahang hototurus. 5:27 Ulunbawi rih jari ngonih aro tohou Yesus. Mahka ang tohun ulun aro orih, io ngasak aropoh ngondoni Yesus tahkan lihkut, 5:28 tului io niruk, "Asar ahku ngorimas kolambiu-Oh, ahku ahkan pios!" 5:29 Io ngendeh jubah Yesus, tutang kotihka orih ka'a tongondahaoh tondo. Io nginyam ijo io jari pios. 5:30 Aang wayah rih ka'a Yesus nginyam anai ihcokowasa ijo soluka tahkan arop-Oh. Mahka Io ngulos nokuh ulun aro rih tutang ngisok, "Iai ijo ngendeh jubah-Ku?" 5:31 Murid-murid-Oh nuhtui, "Amai nohto bongon, anai koloutuh aro ulun ijo ngasak. Tutang Amai magun ngisok iai ijo ngendeh Amai?" 5:32 Tahpi Yesus turus iou nohto hokodiling-Oh ahkan ngurah ulun ijo jari ngendeh-Oh. 5:33 Ulunbawi orih ijo kota'an inon ijo jari nyolung umba aropoh hawoi hogenjeh tutang kihkoh io suhkuntu'ut ang tohimo Yesus tutang ngahku paringoh. 5:34 Turus Yesus nuhtui umba ulunbawi rih, "O anak-Ku tului ihko porocaya umba Ahku, ihko pios! Tulak honong solamat. Ihko jari pios samasino!" 5:35 Pondehan Yesus bopander, pira-pira ulun ijo sonuhu tahkan lohpou Yairus, "Anak tuan jari palus," hion iro umba Yairus. "Eam usah tuan ngobo'o Amai Guru hino." 5:36 Earo poduli inon ijo tonuhtui ulun-ulun rih, Yesus nuhtui umba Yairus, "Ara mihkoh, porocaya iou!" 5:37 Turus Yesus nyalan hototurus, tahpi Io eam nyuhu ihcobehti ka umba Io, tihkas Petrus doro Yakobus tutang Yohanes konduangoh. 5:38 Kotihka iro johcok ang lohpou Yairus, Yesus nohto ulun-ulun surang-siruk, tutang ngonih tangih tutang tahtum ijo paham. 5:39 Turus Yesus nyolong tutang nuhtui umba iro, "Ombai dalou boho tutang nangih? Anak rih eam palus; io baya tiruh!" 5:40 Iro ngota'o auh Yesus. Mahka Io nyuhu iro paring soluka. Turus Yesus ngomin inai-amai anak rih tutang iro tolu murid-Oh nyolong nokuh luwang tahkun anak rih. 5:41 Yesus nambit longon anak orih turus nuhtui umba io, "Talita kum," ijo rimai, "Anak bawi, Ahku nuhtui umba'ko, kuat!" 5:42 Anak bawi rih jeleng kuat, tutang nyalan. (Umuroh jari duo balas toun.) Paring ijo nyaksi kojadian rih paham helan! 5:43 Tahpi Yesus honong paham baca iro monyiar hal orih ahkan ia-iai ka. Turus hioi-Oh, "Nonga anak rih kuman."
6:1 Tahkan unuk rih, Yesus buli hombo-homboh umba murid-murid-Oh nokuh lowu humai-Oh. 6:2 Aang ondou Sabat Io nopara majar ang lohpou sombayang. Anai aro ulun ang anan. Ohkot ulun-ulun rih ngonih pongajaran Yesus, iro helan samasino. Iro nuhtui, "Tahkan umoh ulun tuh dahpot paringoh rih? Kopihtar mahcam inon tuh ijo tohko ang Io? Koloukuwoh Io nguan kahtahelan? 6:3 Eamrih Io tuh tuhkang kahju anak Maria, tutang konduang tahkan Yakobus, Yoses, Yudas tutang Simon? Iorih konduang-konduang-Oh bawi mahi tohko mohcon ang ohtoi ka'a." Tului rih iro nulak Io. 6:4 Turus Yesus nuhtui umba'ndo, "Ihcobehti nabi tonohoromat ang umo-umoh, kocoali ang lowu humaioh tutang ang louk ari konduangoh tutang injah jolahaioh." 6:5 Ang unuk rih Yesus eam kani nguan angihco kahtahelan ka'a, tihkas ngopios pira-pira ulun poros tutang ngina longoi-Oh ang ngosan iro. 6:6 Io helan iro eam porocaya. Pongohino Yesus tulak nokuh lowu-lowu ang hokodiling anan, tutang majar. 6:7 Io na'ah koduo balas murid-Oh, turus nyuhu iro homboh duo, tutang nonga kowasa ahkan iro duon muhko roh-roh ja'at. 6:8 Io nonga potunjuk tuh ahkan iro, "Ara ngomin ino-inon ahkan ponomuoi'mu, kocoali sukah. Ara ngomin ukun ata'ai kambut pononga, ata'ai ka duit. 6:9 Hapa ka'a sorupah, tahpi ara ngomin duo lambar pokahjan." 6:10 Io hino nuhtui, "Amat ihkam nyolong nokuh ihco lohpou, mohcon ang anan, nyiring ihkam nohtah lowu rih. 6:11 Tahpi amat ihkam johcok ang ihco unuk, tutang ulun-ulun ang anan eam kani norima tutang ngonih auh'kam, nohtahrih unuk rih. Tutang nohka awun tana tahkan tapa pa'an'kam kolou pongingat toharep iro!" 6:12 Mahka koduo balas murid Yesus rih hihkas. Iro hihkas monyiar kabar ijo ulun harus hubah tahkan dusa-dusan'ndo. 6:13 Murid-murid Yesus rih muhko aro roh ja'at, ngasak undus ang ulun ijo poros tutang ngopios iro. 6:14 Kabar-kabar tohou paring ang ijo nyolung rih, johcok ka'a ang Lahca Horodes, tului aran Yesus jari bosewut ang umo-umoh. Anai ulun ijo nuhtui, "Yohanes Popondus jari bolum hoduli! Iorih kotuluioh Io anai tepun kowasa nguan kahtahelan rih." 6:15 Tahpi ulun-ulun bokon nuhtui, "Io Elia." Anai ka'a ijo nuhtui, "Io nabi, kolou ihcobehti nabi jaman lomoi." 6:16 Kotihka Horodes ngonih orih, io nuhtui, "Musti jituh Yohanes Popondus ijo soun jari ahku nyuhu nohtok kuhungoh. Huntuh io jari bolum hoduli!" 6:17 Tului soun tahkan orih, Horodes nyuhu ulun nawan Yohanes, tutang posolong io ahkan luwang sipir. Horodes nguan hal kolourih, tului Herodias, oruh konduangoh bongoi, iorih Pilipus. Bain Horodes nukun Herodias, 6:18 tutang tohou hal rih Yohanes jari dulangduli ningak Horodes koloutuh, "Eam tou ihko kawin umba oruh konduang'mu rih!" 6:19 Orih bainoh Herodias mondandam umba Yohanes rih tutang jolik munu Yohanes, tahpi io eam duon nguai hal rih tului baca bain Horodes. 6:20 Tului Horodes nyuhu ulun monjaga Yohanes bua-buah ahkan kosolamatan Yohanes ang sipir, tului io mihkoh umba Yohanes. Io kota'an Yohanes ihcobehti ulun morong ijo sonuhu bain Pohotala. Tutang puna, amat Yohanes nuhtui, Horodes jorih ka'a ngonihoh, oluka io toturus golisah samasino kotuluioh. 6:21 Kojoriaioh Herodias duon kosapet aang ondou pongingat ondou-konanak Horodes. Kotihka orih Horodes nguan pesta tutang mara paring pojabat isung ang kolahca'an aiu, porowira-porowira tutang tokoh-tokoh masyarakat Galilea. 6:22 Ang pesta rih anak bawi Herodias monari, tutang tari orih rih karas ngonjorih ahtoi Horodes tutang ulun-ulun ponara. Mahka Horodes nuhtui umba anakdara rih, "Ihko jolik inon, nyawotrih. Ahku ahkan nongaoh ahkan'mu!" 6:23 Turus Horodes hobowot umba anakdara rih umba tulut. Horodes nuhtui, "Inon ka'a ijo ihko nyawot, ahkan ahku nongaoh, oluka nyiring soparu tahkan kolahcak'ku tuh ka'a!" 6:24 Mahka dara orih nyolong tutang ngisok inaioh, "Inai, inon sopahtutoh ijo ahku nyawot?" Inaioh mutah, "Nyawot iou kuhung Yohanes Popondus." 6:25 Dara orih jeleng soluka nokuh Horodes tutang nuhtui, "Ahku nyawot kuhung Yohanes Popondus tononga uhun ituh ka'a ang ngosan ihco talam!" 6:26 Ngonih sawot kodorih Horodes poros ahtoioh. Tahpi io eam duon nulak sawot orih tului io jari nulut aropoh ang toharep ulun-ulun aro ijo ponaraoh. 6:27 Jadi, io turus moretah ihcobehti pongawaloh ngomin kuhung Yohanes Popondus. Mahka sorodadu rih tulak nokuh sipir, turus nohtok kuhung Yohanes. 6:28 Pongohuli sorodadu ngomin kuhung orih ang ngosan talam tutang monyarahoh ahkan dara orih. Tutang dara orih nongaoh hino ahkan inaioh. 6:29 Kotihka murid-murid Yohanes ngonih hal orih, iro tulak ngomin buhkang Yohanes, turus ngolowongoh. 6:30 Rasul-rasul ijo sonuhu bain Yesus rih, pongohuli buli hino, tutang hihco umba Yesus. Iro nyorihta ahkan Yesus paring ijo jari iro nguai tutang majaroh. 6:31 Aro samasino ulun ijo lombut tutang tulak, nyiring uhun ahkan kuman ka, Yesus tutang murid-murid-Oh eam sapet. Tului orih Yesus nuhtui umba murid-murid-Oh, "Olai ih, ihto tulak nokuh unuk ijo tonih, tutang ang anan ihto tou bongon 'to tutang ihkam tou ngorong-hasong pondehan." 6:32 Mahka iro ka tulak hapan alut, nokuh ko-unuk ijo tonih. 6:33 Tahpi aro ulun jari nohto iro nohtah unuk orih, tutang kota'an nokuh umoh iro. Jadi, tahkan paring lowu ang wilayah orih, ulun-ulun nokoru nyuru jalan isuntana nosolu Yesus tutang murid-murid-Oh. 6:34 Kotihka Yesus jahkat tahkan alut, Io nohto ulun aro. Io masi umba iro, tului iro kolou tobiri ijo eam aro ulun nyokahtikoh. Mahka Io ka'a nopara majar aro hal ahkan iro. 6:35 Kotihka jari sohit, murid-murid Yesus nuhtui umba Yesus, "Tuh jari doni pindong tutang unuk tuh tonih benyem. 6:36 Labih pios Amai nyuhu ulun-ulun tuh tulak, mangat iro duon moli ukun ang dukuh-dukuh dangou tutang lowu-lowu ang kodiling tuh." 6:37 Tahpi Yesus mutah, "Ihkam iou nonga iro ukun." "Bah, inonrih ihkai harus tulak moli luhte ihco legai duo lahtus duit perak ahkan nonga ukun ulun-ulun tuh?" kolou orih hion murid-murid Yesus rih. 6:38 Turus Yesus ngisok, "Anai pira luhte ang ihkam? Suba tulak nohtooh." Uli iro tulak nohtooh, iro nuhtui, "Anai limo luhte, tutang anai duo ohcin ka'a." 6:39 Turus Yesus nyuhu paring ulun rih tuot hopulou-hopulou ang uru ijo bohijou. 6:40 Ulun-ulun rih ka tuot hawui morong, hopulou-hopulou. Anai ijo sorahtus behti 'cokopulou, tutang anai ka'a ijo limo pulu behti ang ihcokopulou. 6:41 Pongohuli Yesus ngomin limo luhte tutang duo ohcin rih, turus nokara nokuh langit, tutang ngohawot torimakasih ahkan Pohotala. Uli rih Io milat-milat luhte rih umba longoi-Oh, tutang mbilah orih ahkan murid-murid-Oh, nyuhu magioh ahkan ulun aro rih. Tutang duo ohcin rih tonomagi ka'a, ahkan ulun aro paring. 6:42 Iro kuman nyiring bosuh. 6:43 Pongohuli kolowin uhkun ulun aro rih tonipun bain murid-murid Yesus -- paringoh anai duo balas tahkin tuwi. 6:44 Ulunbahkas ijo kuman luhte rih anai kira-kira limo kuhjan. 6:45 Uliorih Yesus jeleng nyuhu murid-murid-Oh tulak hapan alut nosolu Io nokuh Betsaida ang pohoi danou, pondehan orih Io nyuhu ulun-ulun buli nokuh unukoh. 6:46 Uli nulak ulun-ulun aro rih, Yesus tulak nokuh pupung puruk ahkan bodo'a. 6:47 Kotihka jari ngalomi, alut murid-murid Yesus jari anai ang tohun danou, uhun rih Yesus magun anai ang isun tana. 6:48 Yesus nohto iro ujuh tu'u meseu alut rih tului bahiu hokolawan umba ulung alut. Tului rih kira-kira holang jam tolu tutang jam onom topolaoi, Yesus lombut nokuh iro nyalan ang isun danum. Tutang Io nyalan turus kolo-kolou nokalou iro. 6:49 Kotihka iro nohto ijo Io nyalan ang isun danum, iro ngira Io otu, 6:50 nyiring iro ngoriak mihkoh. Bain iro paringoh nohto Io tutang iro tokohcit. Tahpi turus Yesus nuhtui umba iro, "Tonih ihkam! Ahku Yesus. Ara mihkoh!" 6:51 Turus Io jahkat ahkan alut iro, tutang bahiu tondo. Murid-murid Yesus helan samasino. 6:52 Kahtahelan hapan limo buhtup luhte rih, jaha hino kosonan iro. Bohali bagi iro ahkan nyolembangoh. 6:53 Ohkot johcok ang pohoi danou iro tondo ang saran-kowang Genesaret. 6:54 Kotihka iro jahkat tahkan alut, ulun-ulun nohto ijo lombut orih Yesus. 6:55 Turus iro nokoru nokuh umo-umoh ang hopus tana rih, tutang ngomin ulun-ulun poros ang ngosan kahcangoh nokuh Yesus. Amat iro ngonih ijo Yesus anai ang ihco unuk, iro ngomin ulun-ulun poros rih nokuh anan. 6:56 Ang umoh ka'a Yesus lombut -- pios ang desa, ang lowu, ang dukuh -- ang anan ulun toturus lombut tutang ngina ulun-ulun mondam ang alun-alun. Turus iro nyawot honong paham, mangat ulun-ulun mondam-poros rih nyawot poromisi ngendeh jubah Yesus, olu baya puhtingoh. Paring ijo ngendehoh nyolung pios.
7:1 Ihcokobarih ulun Parisi tutang pira-pira guru agama tahkan Yerusalem, lombut nokuh Yesus. 7:2 Iro nohto pira-pira murid Yesus kuman hapan longoi eam tomuhi borasih socara agama, iorih eam labih houn muhi longoi numbun poroturan agama Yahudi. 7:3 Ulun-ulun Parisi, kolourih ka'a paring ulun Yahudi, te'et samasino numbun hadat istiadat tahtu ajuh'ndo. Iro eam ahkan kuman hounumba muhi longoi numbun cara-cara botantu. 7:4 Inon ijo tomoli ang pasar eam ahkan'ndo kumai, amat jaha tomuhi labih soun. Tutang aro poroturan bohkon tahkan tahtu ajuh iro, ijo iro nambit tehen; kolou, jahkaoh hadat muhi sakir, pikan tutang pokakas-pokakas tahkan tombaga. 7:5 Tului orih ulun-ulun Parisi tutang guru-guru agama rih ngisok umba Yesus, "Ombai murid-murid-Mu rih kuman, padahar longon iro ijo eam tomuhi? Inon buhkui iro eam numbun hadat istiadat tahtu ajuh ihto?" 7:6 Yesus mutah, "Ihkam ulun-ulun pura-pura! Tahorong samasino inon ijo tonujum Yesaya tohou ihkam, iorih, 'Koloutuh hion Pohotala, Ulun-ulun rih tihkas nyembah Ahku umba auhtuhtui, tahpi ahtoi iro mahcu tahkan Ahku. 7:7 Porocuma iro nyembah Ahku, tului hadat ulun, iro ngajaroh kolo-kolou orih poroturan-Ku!' 7:8 Poretah-poretah Pohotala ihkam mohonauoh, tutang poroturan-poroturan ulun, ihkam nambit ba'a-ba'as." 7:9 Turus Yesus nuhtui hino, "Ihkam ahpik samasino nulak poretah Pohotala, mangat tehen umba ajaran'mu bongom. 7:10 Museh jari nonga poretah tuh, 'Hormatrih amai tutang inai'mu,' tutang 'Ia-iai ngombihtak umba inai-amaioh, harus hukum mahtoi.' 7:11 Tahpi ihkam mongajaroh: Amat ulun nuhtui umba ulun okooh, 'Inon ijo soharusoh ahku nongaoh ahkan amai tutang inai, jari ahku nongaoh ahkan Pohotala,' 7:12 mahka ihkam moliwusoh ulun rih tahkan kopahtutoh ijo dohop amai-inaioh. 7:13 Jadi umba ajaran ihkam bongom, ijo ihkam nonga ahkan ulun-ulun, ihkam ngondian auh Pohotala. Magun aro hal koloutuh ijo ihkam nguaioh." 7:14 Turus Yesus na'ah ulun aro rih sino hino tutang nuhtui ahkan'ndo, "Ngonihrih mangat solembang! 7:15 Eam anai angihco tahkan luar, ijo nyolong ahkan nokuh luwang ulun, ijo nguan ulun orih pali. Tobalikoh, ijo soluka tahkan ichobehti, orihrih ijo nguan io pali. 7:16 Jadi, amat anaingina tolinga, pios io ngonihoh." 7:17 Kotihka Yesus nohtahoh ulun aro rih tutang nyolong lohpou, murid-murid-Oh ngisok umba Io tohou porobasa rih. 7:18 Mahka Yesus pander umba'ndo, "Inonrih ihkam jaha ka'a solembang? Inonrih ihkam eam tou solembang ijo, ijo nyolong nokuh luwang ihcobehti eam tou kotuluioh ulun rih monjadi pali? 7:19 Tului ijo nyolong rih eam nyuru ahtoi, tahpi nyuru butui, tutang pongohuli soluka hino." Umba auh-auh rih Yesus ngorinah ijo paring uhkun rih borasih. 7:20 Turus Yesus nuhtui hino, "Ijo soluka tahkan ulun, orihrih ijo ngonja'at io. 7:21 Tului tahkan luwang, yorih tahkan luwang ahtoi, lombut tiruk ja'at, ijo kotuluioh ulun nguan kosundal, nahkou, munu, 7:22 hobandung, ngobalik, ngarana, hawoi nguan kokaro ang'co ijo ja'at hawoi sorahkah, eam mia, bohiri, bojuhu tutang bohali majaroh. 7:23 Paring ijo ja'at rih lombut tahkan luwang, tutang orihrih ijo kotuluioh monjadioh ulun pali." 7:24 Pongohino Yesus nohtah unuk rih, tutang tulak nokuh daerah doni lowu Tirus. Io nyolong nokuh luwang ihco lohpou, tutang eam kani ijo ulun kota'an Io anai ang anan. Tahpi Io eam duon mosuhukoh arop. 7:25 Ihcobehti inai, ijo anak bawioh sonyalung roh ja'at, ngonih tohou Yesus, io lombut nokuh Yesus tutang suhkuntu'ut ang tohimo-Oh, 7:26 sambil nyawot mangat Yesus muhko roh ja'at tahkan anakoh rih. Ulunbawi rih bohkon ulun Yahudi, konanak ang tana Penisia ang Siria. 7:27 Yesus nuhtui umba io, "Anak-anak harus tononga ukun labih soun. Eam pios ngomin ukun anak-anak turus nyahkahoh ahkan asu." 7:28 "Tuan," hion ulunbawi orih, "asu-asu ang pinda meja ka kuman pahpat-pahpat ijo ngonyahtu konuan anak-anak rih!" 7:29 Turus Yesus nuhtui umba io, "Tului ihko mutah kodorih, buli iou; roh ja'at rih jari nyoluka tahkan anak'mu!" 7:30 Inai orih buli. Ang lohpou io nyombang anakoh rahat kaling ang unuk ngaruk, tutang roh ja'at moro-morong jari soluka tahkan anakoh rih. 7:31 Pongohino Yesus nohtah daerah Tirus, tutang noturus ponyalai-Oh nyuru Sidon nokuh Danou Galilea. Io ngomin jalan nyuru daerah Sopulu Lowu. 7:32 Ang anan ulun ngomin ahkai-Oh 'cobehti ijo bisu borengen. Iro nyawot Yesus ngina longoi-Oh aang ngosan ulun rih. 7:33 Yesus ngomin ulun rih, bongon doro tahkan ulun aro. Turus nginaoh iking nokuh luwang tolingan ulun orih. Turus Yesus ngoluhca, tutang ngoruit jola ulun rih. 7:34 Uliorih rih Yesus nokara nokuh langit, nguhut hasongoh ba'a-ba'as tutang nuhtui umba ulun rih, "Epata," ijo rimai-Oh "Bokuap!" 7:35 Tolingan ulun rih tokuap tutang jolaioh monjadi bolomu huli, tutang io nopara pander honong murah. 7:36 Turus Yesus baca iro paring ahkan monyiar hal orih ahkan ia-iai beweu. Tahpi mahimahi Io baca, mahi-mahi hino iro monyiaroh. 7:37 Tutang paring ulun ijo ngonih rih helan samasino. Iro nuhtui, "Paringoh konuai-Oh honong pios! Mahihino Io nguan ulun borengen duon ngonih, tutang ulun bisu duon pander!"
8:1 Eam pira kotahiu pongohuli, anai hino ihcokopulou ulun aro lombut hopuhpung. Tului iro eam anai ukun, Yesus na'ah murid-murid-Oh tutang nuhtui, 8:2 "Ahku ngasi ahkan ulun aro tuh. Jari tolu ondou kotahiu iro homboh-umba Ahku, tutang uhuntuh iro eam anai ukunoh. 8:3 Amat Ahku nyuhu iro buli honong butui buang, iro ahkan lousiong ang beteng jalan. Inonhino ang louk iro anai ijo lombut tahkan mahcu." 8:4 Murid-murid Yesus mutah, "Ang unuk ijo benyem koloutuh, ang umohrih ulun tou dahpot sukup ukun ahkan paring ulun tuh?" 8:5 "Anai pira karon luhte aang ihkam?" hion Yesus. "Pihtu," hion'ndo. 8:6 Mahka Yesus rih nyuhu ulun aro tuot ang ngosan tana, turus ngomin kopihtu luhte rih tutang ngohawot torimakasih ahkan Pohotala. Pongohuli Io milat-milat luhte rih umba longoi-Oh tutang nonga-Oh ahkan murid-murid-Oh mangat hobagi-bagi ahkan ulun-ulun. Mahka murid-murid-Oh nguanangrih. 8:7 Iro anaingina pira-pira kungan ohcin koik ka'a. Yesus ngohawot torimakasih ahkan Pohotala ngosan ohcin-ohcin rih, turus nyuhu murid-murid-Oh hobagi-bagi ohcin-ohcin rih ka'a. 8:8-9 Iro kuman nyiring bosuh -- anai kira-kira ohpat kuhjan behti ijo kuman. Pongohuli murid-murid Yesus nipun kolowiu ukun -- pihtu tahkin tuwi. Turus Yesus nyuhu ulun-ulun rih buli, 8:10 tutang Io homboh murid-murid-Oh turus jahkat alut tutang tulak nokuh daerah Dalmanuta. 8:11 Pira-pira ulun Parisi lombut nokuh Yesus, tutang nopara bodebat umba Yesus, ahkan nyokohtung-Oh. Iro nyawot Yesus napa kahtahelan kolou tanda ijo Io lombut tahkan Pohotala. 8:12 Yesus ngotu'uh turus mutah, "Bain inon ulun-ulun uhuntuh nyawot Ahku napa kahtahelan? Eam! Ahku eam nonga kahta kolou rih ahkan iro!" 8:13 Turus Yesus nohtah iro, tutang turus jahkat ahkan luwang alut; pongohuli tulak mihtah nokuh pohoi danou rih. 8:14 Murid-murid Yesus tolingou iro ngomin sukup luhte. Iro tihkas anai ngina luhte ihcokobuhtup ang alut. 8:15 "Bua-buahrih toharep ragi ulun-ulun Parisi tutang ragi ulun ain Horodes," hion Yesus umba iro. 8:16 Mahka murid-murid Yesus rih nopara momander, hal orih. Iro nuhtui, "Io nuhtui kolourih, tului ihto eam aro ngina luhte." 8:17 Yesus kota'an inon ijo iro momanderoh. Tului orih Io ngisok iro, "Ombai ihkam bopander tohou eam anai luhte? Inon ihkam eam ta'an tutang jaha solembang ka'a? Kolourih tahpakkah tiruk'kam? 8:18 Ihkam anai mahta -- ombai eam nohto? Ihkam anai tolinga -- ombai eam ngonih? Eamkah ihkam bingat 8:19 ahkan limo luhte rih ijo Ahku jari mbagi-milahoh ahkan limo kuhjan behti? Pira ohcong tuwi, kolawin ukun ijo ihkam nipunoh?" "Duo balas ohcong," mutah iro. 8:20 "Tutang ohkot Ahku mbagi-milatoh pihtu kobawak luhte ahkan ohpat kuhjan behti," kisok Yesus hino, "pira ohcong kolowiu ukun ijo ihkam nipuioh?" "Pihtu," mutah iro. 8:21 "Orih, jahakah ihkam solembang ka'a?" hion Yesus hino. 8:22 Iro johcok ang Betsaida. Ang anan ulun ngomin ihcobehti ulun bobulen nokuh Yesus, tutang nyawot mangat Io ninjok ulun bobulen rih ahkan ngopios io. 8:23 Mahka Yesus nambit longon ulun bobulen rih, tutang niting io nyoluka lowu rih. Pongohuli Yesus ngoluhca mahtan ulun rih. Io nginarih longoi-Oh ang mahtan ulun rih, turus ngisok umba io, "Duon ihko nohto aangco huntuh?" 8:24 Ulun rih nohto ahkan boun, turus nuhtui, "Yo, ahku nohto ulun nyala-nyalan; tahpi iro topahjahoh kolou pu'un kahju." 8:25 Yesus ngina hino longoi-Oh ang mahtan ulun rih. Sino tuh ulun rih bousaha nohto sodahpot-dahpot. Mahtaioh pios, tutang io nohto paringaoh, honong jelas samasino. 8:26 Turus Yesus nuhtui umba io, "Buli iou, tutang ara hoduli nokuh lowu orih." 8:27 Yesus tutang murid-murid-Oh tulak nokuh dukuh-dukuh ang kodiling Kaisarea Pilipi. Ang beteng jalan Yesus ngisok umba iro, "Numbun hion ulun, iairih Ahku tuh?" 8:28 Hioniro mutah, "Anai ijo nuhtui: Yohanes Popondus; anai ka'a ijo nuhtui, Elia; tutang ijo bohkon hino, nuhtui: anaiihco ihcobehti nabi." 8:29 "Tahpi numbun ihkam bongom, Ahku tuh, iai?" hion Yesus. Petrus mutah, "Amai anairih tuh Lahca Ponyolamat!" 8:30 Turus Yesus mopingatoh iro, mangat eam iro momborihtaoh ahkan iai ka tohou arop-Oh. 8:31 Ulioh rih, Yesus nopara majar murid-murid-Oh ijo Anak Ulun musti ngarot aro, tutang ahkan tonolawan bain okon-okon, imam-imam kopala, tutang guru-guru agama. Io ahkan tomunu, tahpi aang ondou tolu Io ahkan bolum hoduli. 8:32 Honong jelas samasino Yesus monyorihtaoh hal orih ahkan murid-murid-Oh. Mahka Petrus nguhut Yesus nokuh saro, hawui ningak Io. 8:33 Tahpi Yesus ngulos tutang nopahjah murid-murid-Oh, turus ningak Petrus, "Hahtun tahkan ohtoi, Ponihkos! Tiruk'mu rih tiruk ulun; bohkon tiruk Pohotala!" 8:34 Pongohino Yesus na'ah ulun aro ijo anai ang anan hombo-homboh umba murid-murid-Oh. Turus Io nuhtui umba iro, "Ulun ijo kani ngohasu Ahku, harus nolingou kogunanoh bongoi, pongohuli ngohtun sopolahkioh, tutang turus ngohasu Ahku. 8:35 Tului ulun ijo kani ngondehen pombolumoh, ahkan nihou pombolumoh. Tahpi ulun ijo nyarah pombolumoh ahkak-Ku tutang ahkan Kabar Hinut tahkan Pohotala, ahkan monyolamat pombolumoh. 8:36 Inon utungoh ahkan ihcobehti, amat sohopus kolunon tuh monjadi io tehpui, tahpi io nihou pombolumoh? 8:37 Duonkah pombolum orih tonokiri umba angihco? 8:38 Amat ihcobehti mia ngahku Ahku tutang ajaran-Ku ang jaman dorhaka tutang ja'at tuh, Anak Ulun ka'a ahkan mia ngahku ulun rih, ang ohkot io lombut noin honong kowasa Amai-Oh, tohomboh molehkat-molehkat ijo borasih."
9:1 "Kota'anrih!" hion Yesus, "tahkan louk ihkam ang ohtoi anai ijo eam ahkan mahtoi, sounumba nohto Pohotala moretah honong kowasa!" 9:2 Onom ondou pongohuli Yesus ngomin Petrus tutang Yakobus tutang konduangoh Yohanes, bongoniro nokuh ihco puruk ijo isung. Ang tohimo mahtan iro Yesus hubah tapai. 9:3 Hahtiu-Oh monjadi puhtiletah mokilat. Eam aro ihcobehti muhpuk hatin ka ang kolunon tuh ijo duon borasih kolou kopuhtiletah orih. 9:4 Pongohuli iro tolu behti murid-Oh rih nohto Yesus bopander umba Elia tutang Museh. 9:5 Mahka Petrus nuhtui umba Yesus, "Amai Guru, momih samasino, ihto ang ohtoi. Pios ihkai nombok tolu kemah: ihco ahkan Amai, ihco ahkan Museh, tutang ihco hino ahkan Elia." 9:6 Kotu'uioh Petrus eam ta'an, inon ijo io harus nuhtuioh, tului io tutang koduo injahoh rih, rahat mihkoh samasino. 9:7 Pongohuli bounondou ngolindung iro tutang tahkan bounondou rih konahan auh ijo nuhtui, "Tuhrih Anak-Ku, ijo Ahku ngasihoh. Ngonih Io!" 9:8 Jele-jeleng iro, nohto kodiling iro, tutang eam hino nohto, iai beweu, ang anan hihco iro, sobali Yesus iou. 9:9 Ohkot iro mosuluh tahkan puruk rih Yesus mopingat iro, "Ara momborihta ahkan iai ka, inon ijo ihkam jari nohtooh nanai, sounumba Anak Ulun tonokuat tahkan popahtoi." 9:10 Iro tehen umba pohtoh orih, tahpi ang louk iro bongoi, iro nopara hokisok inon konohuang Yesus umba "bolum hoduli tahkan popahtoi." 9:11 Mahka iro ngisok umba Io, "Ombai guru-guru agama nuhtui ijo Elia lombut labih houn?" 9:12 Yesus mutah, "Elia puna lombut labih soun, ahkan ngomorong karo aangihco. Tahpi koloukuwoh haloh umba Anak Ulun? Inon sabab ang luwang Surat Borasih tonyurat, ijo Io ahkan aro ngarot tutang konohina ulun? 9:13 Tahpi Ahku nuhtui umba'kam: Elia jari lombut, tutang ulun-ulun nguanumba io numbun konohuang iro. Orih hotohorong umba ijo jari tonyurat luwang Surat Borasih tohou aropoh." 9:14 Kotihka Yesus tutang kotolu murid-Oh jari anai hoduli hihco murid-murid-Oh ijo bohkon, iro nohto aro ulun ang anan. Pira-pira guru agama rahat hojawab umba murid-murid Yesus rih. 9:15 Kodorih ulun-ulun rih nohto Yesus, iro torongong, turus nokoru naharang Io. 9:16 "Inon ijo ihkam nyoal jawaboh umba guru-guru agama rih?" hion Yesus umba murid-murid-Oh. 9:17 Ihcobehti tahkan louk ulun aro rih mutah, "Amai Guru, ahku ngomin anak'ku nokuh Amai. Io bisu tului nyorupang roh ja'at. 9:18 Amat roh rih nyalung io, behtiuoh tomingas-manduk kotana, bauioh hole'e, nyihpoioh ngoret tutang sohopus behtiuoh monjadi kohejang. Ahku nyawot murid-murid Amai muhko roh ja'at orih, tahpi iro eam duon nguanumbaoh." 9:19 Mahka Yesus nuhtui umba iro, "Eaminon ihkam tuh! Ihkam tu'u-tu'u ulun ijo eam porocaya. Johcok mira Ahku harus mohcon hihco ihkam tutang bosabar nohimo ihkam? Ngomin anak rih nokuh ohtoi!" 9:20 Iro ka'a ngomin anak orih ahkan Yesus. Kodorih roh ja'at rih nohto Yesus, io nguan behtin anak orih konyereng-kohejang nyiring anak orih ngonyahtu pole-polek ang tana. Nyamaioh hole'e. 9:21 Turus Yesus ngisok umba amaioh, "Jari pira kotahiu io koloutuh?" "Tahkan io honong koik!" hion amaioh. 9:22 "Jari bojoin roh ja'at rih kani munu io tuh, hawui monahakoh nokuh luwang baho ata'ai nokuh luwang danum. Tahpi amat Amai duon dohop, sudirih Amai masi ihkai tutang dohop ihkai!" 9:23 "Inon hion'mu? Amat Amai duon?" hion Yesus. "Koparing orih duon, amat ulun tu'u-tu'u porocaya!" 9:24 Toturus amai orih ngociak, "Tuhan, ahku porocaya tahpi kaporocaya'ku rih tahpas. Dohoprih ahku mangat labih porocaya hino!" 9:25 Ohkot Yesus nohto ijo ulun aro nopara lombut hopuhpung, Io moretahoh roh ja'at rih honong tuhtui, "Roh borengen tutang bisu, Ahku moretahoh ihko soluka tahkan anak tuh, tutang ara samasino nyolong huli nyorupang io!" 9:26 Roh ja'at rih ngociak, turus nguan behtin anak rih konyereng-kohejang, pongohino soluka tahkan anak rih. Anak orih topahjah kolou mahtoi, nyiring paring ulun nuhtui, "Io jari mahtoi!" 9:27 Tahpi Yesus nambit longoi-Oh tutang dohop io kuat. Anak orih rih ka kuat. 9:28 Uli Yesus jari nyolong ahkan lohpou, murid-murid-Oh lombut toni-tonih nokuh Io tutang ngisok, "Inon kotului ihkai eam duon muhko roh ja'at rih?" 9:29 Yesus mutah, "Roh ja'at rih eam duon tomuhko umba cara inon ka'a, bohkonumba hapan do'a." 9:30 Yesus tutang murid-murid-Oh nohtah unuk rih tutang noturusoh ponyalan nyuru Galilea. Yesus eam kani ulun kota'an ang umoh Io anai, 9:31 kotului Io beteng majar murid-murid-Oh, "Anak Ulun ahkan tonyarah nokuh kowasan kolunon," kolourih hion Yesus, "tutang Io ahkan tomunu, tahpi aang ondou ijo kotolu Io ahkan tonombolum!" 9:32 Murid-murid-Oh eam solembang inon ijo tonyorihta bain Yesus, tahpi iro mihkoh ngisok umba Io. 9:33 Iro johcok ang Kapernaum. Uli ang lohpou, Yesus ngisok umba murid-murid-Oh, "Ihkam hojawab tohou inon ang beteng jalan nanai?" 9:34 Iro eam mutah, tului ang beteng jalan iro hojawab tohou iai ijo palinghajo. 9:35 Yesus tuot, turus na'ah koduo balas murid-Oh rih. Io nuhtui umba iro, "Ulun ijo kani monjadi ijo numur ihco, io harus monjadi ijo laiu tutang harus monjadi pohalu paring ulun." 9:36 Pongohuli Yesus ngomin ihcobehti anak-inyam, tutang potombok anak-inyam rih ang tohun, tohimo iro paring. Yesus kihpit anak orih rih tutang nuhtui umba murid-murid-Oh, 9:37 "Ulun ijo monorima 'cobehti anak koloutuh tului Ahku, rimai norima Ahku. Tutang ulun ijo norima Ahku, io eam norima Ahku beweu, tahpi norima ka'a Io ijo nyuhu Ahku." 9:38 Turus Yohanes nuhtui umba Yesus, "Amai Guru, ihkai nohto ihcobehti muhko sehtan hapan aran Amai. Tutang ihkai baca io, bain io eam tahkan ihto." 9:39 Tahpi Yesus nuhtui, "Ara baca io, tului eam ihcobehti ka ijo nguan kahtahelan ngosan arak-Ku, duon toturus ngonjilok-njilok Ahku. 9:40 Tului ulun ijo eam hokolawan umba ihto, rimai hobarih umba ihto. 9:41 Ingat ih! Ulun ijo nonga korih ahkan'kam tului ihkam murid Lahca Ponyolamat, io musti ahkan norima uhpahoh." 9:42 "Iai kotuluioh anai ihco tahkan ulun-ulun ijo koik tuh, eam porocaya hino umba Ahku, labih pios amat bahtu hajo ngahut ang ujatoh, tutang io ponolahtong nokuh luwang tasik. 9:43 Amat longon'mu nguan ihko bodusa, tohtok longo orih! Labih pios ihko bolum umba Pohotala earo longom silai tului tahkan ihko anai duo hososila longon'mu nyolong nokuh norahka, iorih baho ijo kototahiu. 9:44 Ang anan baho eam dahpot bolop tutang ulot eam tou mahtoi. 9:45 Tutang amat pa'an'mu nguan ihko rih bodusa, nohtok pa'am rih. Labih pios ihko bolum umba Pohotala earo silai pa'an'mu, tahkanumba ihko anai koduo kososila pa'an'mu todian ihko nokuh luwang norahka. 9:46 Ang anan baho eam tou bolop tutang ulot eam tou mahtoi. 9:47 Amat mahtan'mu, kotuluioh ihko bodusa, ngoruit dian orih! Labih pios ihko nyolong Kolunon Bohua Ain Pohotala eam aro ihcoluang mahtan'mu, tahkan ihko anai koduo luang mahtan'mu todian nokuh luwang norahka. 9:48 Ang anan baho eam duon bolop tutang ulot eam duon mahtoi. 9:49 Nyinong ulun ahkan konorasih umba baho, kolou pononga ijo konorasih umba tonyu. 9:50 Tonyu rih pios, tahpi amat monjadi tawah, dahpotrih konomohit huli? Jadi, kohondakoh ihkam monjadi kolou tonyu -- bolum hopahkat tutang hokobuah."
10:1 Pongohuli Yesus nohtah unuk rih, tutang tulak nokuh tana Yudea, tutang tana ang pohoi Sungoi Yordan. Ulun aro lombut hino ngorumbung hokodiling Yesus. Tutang kolou bahut, Yesus mongajar iro. 10:2 Pira-pira ulun Parisi lombut ka'a ahkan nyokohtung Yesus. Iro ngisokoh, "Numbun hukum hadat agaman ihto, inonrih tou ulun nulang oruhoh?" 10:3 Yesus mutah, "Museh nonga poretah inon ahkan ihkam?" 10:4 "Museh nongaijin, ulun tou nulang oruhoh, asar nyurat surat hotulang houn," hion'ndo. 10:5 "Museh nyurat poretah orih, tului ihkam paham bohali tonongajar," hion Yesus umba'ndo. 10:6 "Tahpi aang pahtukoh, aang ohkot Pohotala naoi kolunon, konohawot ijo 'Pohotala napa iro bahkas tutang bawi. 10:7 Orih kotuluioh ulunbahkas ahkan nohtah inai-amaioh tutang hihco umba oruhoh, 10:8 mahka kododuooh monjadi ihco.' Jadi, iro eam hino duo behti, tahpi ihco. 10:9 Orih kotuluioh, inon ijo jari ponohihco bain Pohotala, eam tou tonulangoh bain ulun!" 10:10 Uli iro nyolong lohpou, murid-murid-Oh ngisok umba Yesus tohou hal orih. 10:11 Yesus nuhtui umba iro, "Iai monulang oruhoh turus kawin umba bawi bohkon, ulun orih hobandung tohimo oruhoh ijo pahtok rih. 10:12 Kolourih ka'a ulunbawi ijo monulang bosaioh turus kawin umba ulunbahkas bohkon, io ka'a hobandung." 10:13 Anai ulun-ulun ngomin anak-inyam nokuh Yesus, mangat Io nambit tutang momborehkat iro. Tahpi murid-murid Yesus baca ulun-ulun rih. 10:14 Nohto hal orih, Yesus ningak iro turus Io nuhtui umba murid-murid-Oh, "Nauhoh anak-inyam rih lombut ahkak-Ku! ara baca iro, bain ulun-ulun ijo kolou iro tuh, ijo monjadi anak ukup ain Pohotala. 10:15 Ingat tuh! Iai eam nohimo Pohotala kolou ihcobehti anak-inyam, eam ahkan monjadi anak ukup ain Pohotala." 10:16 Uli nuhtui kolouorih Yesus nyokahpu anak-inyam rih, pongohino Io nginaoh longoi-Oh ang ngosan kuhung nyino-nyinong iro tutang mborehkat iro. 10:17 Ohkot Yesus noturus hino ponyalai-Oh, ihcobehti lombut nokoru nokuh Yesus. Ulun orih suhkuntu'ut ang tohimo Yesus tutang ngisok, "Guru ijo morong, ahku harus nguan inon, mangat dahpot norima pombolum ijo sojahti tutang kototahiu?" 10:18 "Ombai ihko ngohawot Ahku morong?" hion Yesus. "Eam aro ijo morong, bohkonumba Pohotala bongoi. 10:19 Ihko jari kota'an poretah-poretah Pohotala, 'Ara munu, ara hobandung, ara nahkou, ara bosaksi alik, ara mobula, horomat amai tutang inai'kam.' " 10:20 "Amai Guru," hion ulun rih, "paring poretah orih jadi ahku numbui tahkanuhun kobiou'ku." 10:21 Yesus nohto ulun rih tutang masi umba io turus nuhtui, "Bototah ihco hal hino, ijo ihko porulu nguai. Tulak buli, modagang paring ponahtou'mu; nonga orih duitoh ahkan ulun porosbolum, tutang ihko ahkan dahpot ponahtou ang soruga. Uliorih rih lombutrih ngohasu Ahku." 10:22 Ngonih Yesus nuhtui kolourih, ulun rih kocewa, turus nohtah unuk orih, honong poros ahtoi, kotului io tahtou samasino. 10:23 Mahka Yesus nopahjah murid-murid-Oh, turus nuhtui umba iro, "Bohali samasino ahkan ulun tahtou monjadi anak ukup ain Pohotala!" 10:24 Murid-murid-Oh helan ngonih tuhtui Yesus rih. Tahpi Yesus nuhtui hoduli, "Anak-anak-Ku, puna bohali ahkan monjadi anak ukup ain Pohotala! 10:25 Labih murah 'cokungan unta nyolong luwang doih tahkan ihcobehti uluntahtou nyolong Kolunon Bohua Ain Pohotala." 10:26 Auh-auh Yesus rih, nguan murid-murid-Oh helan, nyiring iro hokisok sama arop'ndo, "Amat kolouorih, iai ijo tou solamat?" 10:27 Yesus nohto iro tutang mutah, "Ahkan kolunon rih mostahel, tahpi eam mostahel ahkan Pohotala; paringoh touurasoh bagi Pohotala." 10:28 Turus Petrus nuhtui, "Amai nohtorih ihkai, jari nohtahoh kokaro-karonoh ahkan ngohasu Amai." 10:29 Hion Yesus, "Porocaya iou: ulun ijo jari nohtah lohpou kosalahoh, ata'ai konduangoh ijo bahkas, ata'ai bawi, ata'ai inaioh, ata'ai amaioh, ata'ai anak-anakoh, ata'ai ka'a umo totounoh tului ngohasu Ahku tutang tului Kabar Hinut tahkan Pohotala, 10:30 ulun rih ahkan norima labih aro ang wayah huntuh tuh. Io ahkan duon solahtus lihpet labih aro lohpouoh, konduang bahkas, konduang bawi, inai, karon-anak, umo totoun, -- tutang koporos ka'a. Tutang noin ang jaman ijo ahkan lombut, ulun rih ahkan monorima pombolum ijo sojahti tutang kototahiu. 10:31 Tahpi aro ulun ijo uhuntuh tuh, pahtukoh ahkan mojadi ijo laiu, tutang aro ijo uhuntuh tuh laiu, ahkan monjadi ijo pahtukoh." 10:32 Yesus tutang murid-murid-Oh rahat a'ang ponyalan nokuh Yerusalem. Yesus nyalan ang baun, tutang murid-murid-Oh poros ahtoi paringoh. Tutang ulun-ulun ijo ngohasu pongo umba Io ka nanyam mihkoh. Pongohuli rih Yesus na'ah murid-murid-Oh bongon'ndo, tutang nyorihta ahkan iro inon ijo ahkan nyolung noin ngosan arop-Oh. 10:33 "Ngonihrih," hioi-Oh, "ihto huntuh rahat nihtu Yerusalem. Ang anan Anak Ulun ahkan tonosorah ahkan imam-imam kopala tutang guru-guru agama. Io ahkan tomohukum munu, pongohuli tonyorah ahkan ulun-ulun, bohkon Yahudi. 10:34 Iro ahkan ngonjea-jea Io, ngoluhca Io, monyiksa Io, tutang nyopolahkioh Io. Tahpi aang ondou tolu Io ahkan bolum hoduli." 10:35 Turus Yakobus tutang Yohanes, yorih anak-anak Sebedeus, lombut nokuh Yesus. "Amai Guru," hion'ndo, "anai ihco hal, ijo ihkai jolik Amai nguai ahkan'kai." 10:36 "Inon ijo ihkam jolik Ahku nguai ahkan'kam?" hion Yesus. 10:37 Iro mutah, "Ihkai jolik tuot ang kotou komuloi Amai, amatmira Amai tuot moretah ang kolahca'an tutang tonohoromat." 10:38 "Ihkam eam ta'an inon ijo ihkam nyawot," hion Yesus umba iro, "Sangguprih ihkam ngorih tahkan sakir kokarot ijo ahkan Ahku ngorih tutang nyolong nokuh ang luwang kancah kokarot ijo ahkan Ahku nyolongoh?" 10:39 "Sanggup," hion'ndo. Mahka Yesus nuhtui ahkan iro hino, "Puna ihkam ahkan ngorih tahkan sakir kokarot ijo ahkan Ahku ngorih, tutang nyolong ahkan ang luwang kancah ijo Ahku ahkan nyolongoh. 10:40 Tahpi tohou iai ijo ahkan tuot ang koto'u ata'ai komuloi-Ku, orih eam Ahku ijo bohak ngahtuh. Pohotala ijo ngahtuhoh ia-iai ijo ahkan tuot ang unuk-unuk orih." 10:41 Kotihka sopulu murid Yesus ijo bohkon ngonih hal orih, iro sangit umba Yakobus tutang Yohanes. 10:42 Jadi, Yesus na'ah iro paringoh, turus nuhtui, "Ihkam kota'an ijo okon-okon uhtus ijo eam kosono Pohotala mohonyok rayatoh. Tutang ulunhajo-ulunhajo iro nihkin'ndo. 10:43 Tahpi ihkam eam tou kolourih! Tobalikoh, ulun ijo kani monjadi hajo ang louk'kam, io harus monjadi pohalu'kam. 10:44 Tutang ulun ijo kani monjadi pahtukoh ang louk'kam, harus monjadi jihpon bagi paring. 10:45 Tului Anak Ulun ka eam lombut ahkan tonohalu, Io lombut ahkan mohalu tutang ahkan nyorah hasong-Oh ahkan momorodehka aro ulun." 10:46 Iro johcok ang Yerikho. Tutang ohkot Yesus honong murid-murid-Oh hawui ulun aro nohtah lowu rih, ihcobehti ulun bobulen, rahat tuot nyodahkah ang saran jalan. Araioh Bartimeus, anak tahkan Timeus. 10:47 Kotihka io ngonih ijo, ijo rahat nyihing orih anairih Yesus ulun Nasaret, io ngociak, "Yesus, Anak Dawid! Masi ahku!" 10:48 Io tonyangit bain aro ulun tutang tonyuhu tonih. Tahpi io labih muhing hino ngociak, "Anak Dawid, masi rih ahku!" 10:49 Mahka Yesus tondo, turus nuhtui, "Na'ahrih io." Jadi iro na'ah ulun bobulen rih. Iro nuhtui umba io, "Teneng rih! Ihko tona'ah Yesus, kuat!" 10:50 Ulun bobulen rih ka nyahkah jubahoh, turus jele-jeleng kuat, tutang tulak ahkan Yesus. 10:51 "Inon ijo ihko jolik Ahku nguan ahkan'mu?" hion Yesus umba io. Ulun bobulen rih mutah, "Amai Guru, ahku jolik nohto." 10:52 "Tulakrih," hion Yesus, "tului ihko porocaya umba Ahku, ihko pios." Aang wayah orih ka'a ulun rih tou nohto. Turus io ngahasu Yesus ang jalan.
11:1 Ohkot doni Yerusalem iro johcok ang lowu Betpage tutang Betania, ang kowang Puruk Zaitun. Ang anan duo behti murid-Oh tonyuhu labihsoun bain Yesus. 11:2 "Tulakrih, nokuh lowu ijo anai ang tohimorih," hion Yesus umba iro. "Kolourih ihkam nyolong lowu rih, ihkam ahkan nohto ihcokungan anak keledai rahat tonyuhkui, ijo jaha pu'u tonunggang ulun. Nguwatohrih keledai rih tutang omin 'kanohtoi. 11:3 Tutang amat anai ulun ngisok umba'kam, ahkan inon'kam nguwat suhkui keledai rih, mutah'kam, 'Tuhan kani hapaoh, tutang Io jeleng ngitotoh hino.' " 11:4 Koduo murid Yesus rih ka tulak, tutang nyombang 'cokungan anak keledai ijo rahat nyuhkui aang bauntukang lohpou ang saran jalan. Mahka iro nguwatoh suhkui keledai rih. 11:5 Ulun-ulun ijo tombok ang anan ngisok umba iro, "Oi, rahat inon ihkam? Ombai nguwatoh suhkui anak keledai rih?" 11:6 Iro mutah kolou inon ijo jari tonyuhu bain Yesus umba iro. Mahka ulun-ulun rih mohonou iro ngomin keledai rih. 11:7 Ohkot iro johcok unuk Yesus, ngosan lihkut keledai rih iro molahpikoh umba jubah iro, turus Yesus nunggang ang ngosanoh. 11:8 Aro ulun mombirang jubah'ndo ang jalan, anai hino ijo nahtai ang tohun jalan pahting-pahting pu'un ijo iro ngomiou tahkan umo. 11:9 Ulun-ulun ijo nyalan ang tohimo tutang ulun-ulun ijo ngahasu tahkan lihkut, paringoh molahap, "Tararih Pohotala! Tomorehkatrih io ijo lombut ngosan aran Tuhan! 11:10 Bolumrih pomoretah-Oh ijo ahkan lombut -- pomoretah Dawid tahtu ajuh ihto! Tara ahkan Pohotala Ijo Mahaisung!" 11:11 Kolaiuoh Yesus johcok Yerusalem, turus nyolong nokuh Lohpou Tuhan. Ang anan Io monopahjah hokodiling-Oh. Tahpi tului jari doni sohit, Io pongohuli tulak nokuh Betania hombo-homboh umba koduo balas murid-Oh. 11:12 Anghawun ondouoh, kotihka iro rahat nyalan soluka tahkan Betania, Yesus bulo'u. 11:13 Tahkan mahcu Io nohto 'cokobahtang pu'un sikun ijo daui labat. Jadi, Io tulak nokuh pu'un sikun rih ahkan nohto bua-Oh. Tahpi kotihka Io johcok ang pu'ui rih, Io eam nyombang ino-inon, tihkas daui-daui iou, tului aang ohkot rih jaha musim bua sikun. 11:14 Turus Yesus nuhtui ahkan pu'un sikun rih, "Nopara tahkan uhuntuh, eam anai ihcobehti ka ijo ahkan kuman bua, tahkanumba ihko hino!" Murid-murid Yesus ngonih auhtuhtui orih. 11:15 Pongohuli iro johcok ang Yerusalem, tutang Yesus tulak hino nokuh Lohpou Tuhan. Ang anan Io nopara muhko paring ulun ijo bodagang bopoli, ang unuk rih. Io mbalik-nokila meja-mejan ulun pohurup duit, tutang baku-baku podagang bulung dala. 11:16 Tutang eam ihcobehti ka ijo tou tonong ijin baiu-Oh ngomin inon iou nyuru boun Lohpou Tuhan rih. 11:17 Pongohuli Yesus majar ulun-ulun ang anan. Io nuhtui, "Ang luwang Surat Borasih tonyurat koloutuh: Pohotala nuhtui, 'Lohpou-Ku ahkan konohawot lohpou unuk bodo'a ahkan paring uhtus ulun.' Tahpi ihkam ngonjoriaioh kosalah ponyilou!" 11:18 Imam-imam kopala tutang guru-guru agama ngonih auh pander rih. Mahka iro nopara ngurah jalan ahkan munu Yesus. Iro mihkoh umba-Oh, kotului paring ulun kagum ngonih ajaran-Oh. 11:19 Amat jari ngolomi, Yesus tutang murid-murid-Oh nohtahoh lowu rih. 11:20 Homboh-ngohkos anghawun ondouoh, ohkot iro nyihing pu'un sikun rih, iro nohto pu'un orih jari mahtoi nyiring kouhat-uhatoh. 11:21 Turus Petrus toroingat ahkan aangnyolung ihcoondou hounoh. Mahka Petrus nuhtui umba Yesus, "Amai Guru, cuba nohto! Pu'un sikun ijo Amai nulutoh rih, jari mahtoi!" 11:22 Yesus mutah, "Porocayaiou ahkan Pohotala. 11:23 Tu'u-tu'u ihkam dahpot nuhtui umba puruk tuh, 'Hogahtangrih, tutang tongodian rih, nokuh tohun tasik!' mahka hal rih ahkan nyolung ahkan ihkam; asar ihkam eam bembang, tutang ihkam porocaya ijo, ijo ihkam ngohawotoh orih moro-morong nyolung. 11:24 Bain orih, ingatrih tuh: Amatmira ihkam bodo'a tutang nyawot angihco, porocayarih ijo Pohotala jari nonga ahkan'mu, inon ijo ihkam nyawot, mahka ihkam ahkan monorimaoh. 11:25 Tutang amat ihkam bodo'a, tahpi ahtoi'mu eam sanang nohimo ihcobehti, ngapunrih ulun rih houn, mangat Amai'mu ang soruga ka'a ngapun dusa-dusan'kam. 11:26 Amat ihkam eam ngapun ulun bohkon, Amai'kam ijo ang soruga ka'a eam ngapun dusa-dusan'kam." 11:27 Iro hoduli hino nokuh Yerusalem, tutang aang ohkot Yesus nyalan bokodiling ang luwang Lohpou Tuhan, imam-imam kopala, guru-guru agama tutang okon-okon Yahudi lombut nokuh Io. 11:28 Iro ngisok Io, "Ngosan galang inon Ihko nguanoh hal-hal tuh? Iai ijo nonga hak rih ahkan-Mu?" 11:29 Yesus mutah, "Ahku ka'a kani ngisok umba ihkam. Mutahrih, tutang Ahku ahkan nuhtuioh ahkan'kam, umba hak iai Ahku nguan hal-hal tuh. 11:30 Yohanes mopondus umba hak iai, Pohotala ata'ai kolunon?" 11:31 Turus imam-imam kopala tutang okon-okon Yahudi nopara bahaum hawui arop'ndo. Iro nuhtui, "Amat ihto nuhtuioh, 'Umba hak Pohotala,' Io ahkan nuhtui, 'Ombai eam porocaya umba Yohanes?' 11:32 Tahpi bohali ka'a ahkan ngohawot, 'Umba hak kolunon,' " Tului iro mihkoh ahkan ulun aro, tului paring ulun ngohu Yohanes rih nabi. 11:33 Jadi iro mutah, "Ihkai eam kota'an." Turus Yesus nuhtui umba iro, "Amat kolourih, Ahku ka eam kani nuhtui ahkan'kam umba hak iai Ahku nguan paringoh tuh."
12:1 Pongohino Yesus nopara bopander honong porobasa ahkan imam-imam kopala, guru-guru agama tutang okon-okon Yahudi rih. Yesus nuhtui, "Anairih ihcobehti ulun, ijo ngombulan ihcokolambar kombulan anggur, turus kehpan pahkotoh ang kodilingoh. Ulilimbah rih io ngali lowong unuk pokakas mohahpit anggur rih, turus io nombok ihco lohpou jaga. Ulilimbah rih io posewa pombulan anggur rih, ahkan pira-pira ponggawihasil, turus io tulak nokuh lowu bohkon. 12:2 Kotihka jari ohkotoh musim mutik bua anggur, ulun rih ngirim ihcobehti pohaluoh nokuh ponyewa-ponyewa rih, ahkan norima bagianoh. 12:3 Tahpi ponyewa komulan anggur rih, nawan pohalu rih. Pongohino iro nahup kuhung pohalu rih, turus nyuhu io buli ngomin longo buang. 12:4 Turus tepun komulan rih, ngirim hino ihcobehti pohaluoh ijo bohkon. Tahpi ponyewa pombulan anggur rih, mohpah kuhung pohalu rih turus muhkooh hawui hololea io. 12:5 Tepun pomulan rih ngirim hino ihcobehti pohalu ijo bohkon. Tahpi iro munu pohalu rih. Tutang kolourih toturusoh iro nguan aro pohalu ijo bohkon hino: anai ijo ponohpah'ndo tutang anai ka'a ijo ponunu'ndo. 12:6 Iai rih hino ijo tou tongirim huntuh bain tepun komulan rih? Tihkas mohcon ihcobehti, yorih anak aiu bongoi ijo unuk kosayangoh. Jadi, kojoriaioh io ngirim anakoh orih ahkan ponggawi-ponggawi. 'Musti anak'ku tuh ahkan tomohoromatoh,' tiruk tepun pombulan. 12:7 Tahpi ponggawi-ponggawi rih hopahkat sama aropoh, 'Tuh io ahli warisoh. Has ihto munu io, mangat ihto duon warisoh tuh!' 12:8 Mahka anak orih tonawan, turus tomunu. Otui iro dian nokuh luar pomulan rih." 12:9 Turus Yesus ngisok, "Inon ijo ahkan konuan bain tepun pomulan rih? Musti io ahkan lombut tutang munu ponggawi-ponggawi rih turus monyarahoh kombulan orih ahkan ponggawi-ponggawi ijo bohkon. 12:10 Ihkam tatuoh pu'u mbasa ayat tuh a'ang Surat Borasih, 'Bahtu ijo eam tohapa bain tuhkang-tuhkang pomangun jari monjadi bahtu ijo mombahtang. 12:11 Tuhrih aangkonuan Tuhan; eaminon kopioioh!' " 12:12 Mahka dolang bosewut uhtus Yahudi, ijo ngonih porobasa rih, ngurah jalan nawan Yesus, tului iro kota'an porobasa rih, tonituoh Yesus ahkan iro. Tahpi iro mihkoh ulun aro. Jadi, iro tulak nohtah Yesus. 12:13 Pira-pira ulun Parisi tutang pira-pira ulun barih Horodes sonuhu nyokohtung Yesus umba kisok-kisokoh. 12:14 Iro lombut nokuh Yesus tutang nuhtui, "Amai Guru, ihkai kota'an Amai morong tutang eam norimaoh tiruk ulun bohkon ka. Amai mongajar torus-tarang tohou kohondak Pohotala bagi ulun, kotului Amai eam nopahjah ului. Nah cuba Amai nuhtui ahkan ihkai, 'Numbun poroturan agaman ihto, toukah bayar pajak ahkan Kaisar ata'ai eam? Harusrih ihto bayar pajak rih, ata'ai eam?' " 12:15 Yesus ngota'an kopura-puraan'ndo. Io mutah, "Inon buhkui ihkam kani nyokohtung Ahku? Cuba pokarah ahkak-Ku ihcokobilap duit perak." 12:16 Mahka iro nonga ahkai-Oh ihcokobilap duit perak. Turus Yesus ngisok iro, "Gambar iai tutang aran iai tuh?" "Kaisar," hion'ndo. 12:17 "Nah, amat kolourih," hion Yesus, "bayar ahkan Kaisar inon ijo ain Kaisar, tutang ahkan Pohotala inon ijo ain Pohotala." Iro helan ngonih Io. 12:18 Pira-pira ulun tahkan barih Saduki lombut nokuh Yesus. (Iro anairih barih ijo niruk tohou ulun mahtoi eam ahkan bolum hoduli.) 12:19 "Amai Guru," hion iro umba Yesus, "Museh nyurat hukum tuh ahkan ihto: 'Amat ihcobehti bahkas mahtoi, tutang io eam anai nohtah anak, mahka konduangarioh kawin umba baluioh mangat nonga lihit ahkan ulun ijo jari mahtoi rih.' 12:20 Pu'u anai pihtu ulun hokonduang, ijo pongoko kawin, turus mahtoi eam aro nohtah anakoh. 12:21 Pongohino 'jo koduooh kawin umba baluioh, tahpi io ka mahtoi eam aro nohtah anak. Hal ijo sama nyolung ka'a umba konduang ijo kotolu, 12:22 tutang toturusoh nyiring hawui ijo kopihtu iro. Kolaiuoh ulunbawi rih bongoi mahtoi ka'a. 12:23 Aang ondou ulun mahtoi bolum hoduli, ahkan oruh iai ulunbawi rih? Bain kopihtu-pihtuoh jari kawin umba io!" 12:24 Yesus mutah, "Ihkam koliru samasino. Kotului ihkam eam solembang auh Surat Borasih, oluka kowasan Pohotala. 12:25 Tului amatmira ulun-ulun mahtoi bolum hoduli, iro eam ahkan kawin hino, molekan iro ahkan bolum kolou molehkat ang soruga. 12:26 Tutang tohou ulun mahtoi tongombolum hoduli, jaha pu'ukah ihkam mambasa ang luwang Surat Borasih Museh, tohou ruwut ijo ngonjelak rih? Ang luwang ayat-ayat rih, tonyurat ijo Pohotala nuhtui ahkan Museh, 'Ahku tuh Pohotalan Abraham, Pohotalan Isaak, Pohotalan Yakub.' 12:27 Pohotala rih, eam Pohotalan ulun mahtoi. Io Pohotalan ulun bolum. Ihkam koliru samasino!" 12:28 Turus lombut iou ihcobehti guru agama ngonih tuhtui holat Yesus umba ulun-ulun tahkan barih Saduki rih. Guru agama rih nohto ijo Yesus jari mutah auh ulun-ulun rih hawui pios. Mahka io ngisok umba Yesus, "Poretah umohrih, ijo paling boguna tahkan paring poretah?" 12:29 Yesus mutah, "Poretah ijo pahtukoh iorih: 'Ngonihrih, oi uhtus Israel! Tuhan Pohotalan ihto, Tuhan rih Tukan. 12:30 Sita Tuhan Pohotalan'kam hapan kotuwi ahtoi'kam, tutang hapan koparing homboruan'kam, hapan sohopus ahkar'kam, tutang honong kokaro koba'as'mu.' 12:31 Poretah koduo, iorih: 'Sitarih sosama'kam, kolou ihko monyita arop'mu bongom.' Eam aro hino poretah bohkon ijo labih boguna tahkan koduo poretah rih." 12:32 Turus guru agama rih nuhtui umba Yesus, "Kona samasino Amai Guru! Puna morong inon ijo Amai nuhtuioh: Tuhanrih Pohotala ijo Tukan, tutang eam anai hino Pohotala ijo bohkon. 12:33 Tutang ulun harus sita Pohotala hapan kotuwi ahtoioh, tutang hapan sohopus ahkaroh, honong umba kokaro koba'asoh. Tutang io ka'a harus hokasih sosamaoh kolou nyita aropoh bongoi. Orih labih pios tahkan umba ponyorahan pononga tomahpong tutang pononga-pononga bohkonoh ahkan Pohotala." 12:34 Yesus nohto ijo guru agama rih jari mutah hapan pios samasino. Tutang Yesus nuhtui umba io, "Ihko ius doni monjadi anak ukup ain Pohotala." Uliumba rih eam ihcobehti ka ijo bohanyi hino nyurung kisokoh umba Yesus. 12:35 Pondehan majar ang Lohpou Tuhan, Yesus ngisok, "Koloukuwohrih guru-guru agama duon nuhtui ijo Lahca Ponyolamat rih lihit Dawid? 12:36 Podahar Dawid bongoi -- kotului tongorinah bain Roh Pohotala -- nuhtui, 'Tuhan homauh umba Tuhan'ku: tuot ihko ang silan kotouk-Ku nyiring Ahku nguan musuh-musuh-Mu ngominda umba Ihko.' 12:37 Jadi, amat Dawid bongoi ngohawot io Lahca Ponyolamat rih, 'Tuhan,' koloukuwoh tou Io tahkan lihit Dawid?" Ulun aro ijo anai ang Lohpou Tuhan rih sanang ngonih Yesus majar. 12:38 Io nuhtui umba iro, "Ati-atirih tohimo guru-guru agama. Iro jolik nyala-nyalan umba jubah ijo ombu tutang jolik tomohoromat ang pasar-pasar. 12:39 Iro jolik unuk-unuk ijo tomohoromat ang luwang lohpou sombayang tutang ang pesta-pesta. 12:40 Iro monihpu baluranda tutang mosuwit lohpouoh. Tutang ahkan ngolindung koja'at iro rih, iro bodo'a ombu-ombu. Hukuman iro noin bahat!" 12:41 Ohkot tuot hotopohoi umba pahti porahpah ang Lohpou Tuhan, Yesus nohtoani ulun-ulun posolong duit iro ahkan luwang pahti rih. Aro ulun tahtou posolongoh aro duit; 12:42 turus ihcobehti balu ijo porosbolum lombut ka'a. Io posolong duo bilap duit tombaga, iorih duit pokokoik regaioh. 12:43 Mahka Yesus na'ah murid-murid-Oh turus nuhtui umba iro, "Nohtoani tuh: balu ijo porosbolum rih posolong ahkan luwang pahti orih, labih aro tahkanumba ijo tomosolong bain paring ulun-ulun bohkonoh. 12:44 Bain iro paring nonga tahkan kolowin ponahtouoh. Tahpi balu rih nonga, sinoka, paham porosbolum, io nonga paring ijo anai aang io -- oluka ijo io poruluoh bagi pombolum."
13:1 Kotihka Yesus nohtah Lohpou Tuhan, ihcobehti tahkan murid-murid-Oh nuhtui, "Amai Guru, cuba nohto pangun-pangun rih. Nohtoani bahtu-bahtuoh. Eam inon kopiosoh!" 13:2 Yesus mutah, "Ihko nohto pangun-pangun ijo hajo rih, kowa? Earo ihco bahtu ka tahkan pangun-pangun rih ijo ahkan mohcon hotilap ang unukoh. Paring ahkan konahkas." 13:3 Pongohuli Yesus hihkas nokuh Puruk Zaitun, tutang tuot ang unuk ijo hotohimo umba Lohpou Tuhan. Turus Petrus, Yakobus, Yohanes tutang Andreas lombut nokuh Io mangat bopander umba Io cara bongon. 13:4 "Cuba Amai nyorihta ahkan ihkai," hion iro umba Io, "mira paringoh rih ahkan nyolung? Tutang kahta-kahta inonrih ijo ngorinah ijo jari ohkotoh?" 13:5 "Borondongrih," hion Yesus, "ara nyiring ihkam tonoalik. 13:6 Aro ulun lombut hawui mohapan arak-Ku tutang nuhtui, 'Ahku tuh Io!' turus ngobalik aro ulun. 13:7 Amat ihkam ngonih auh-auh kolahi tutang borihta-borihta poporangan ara mihkoh. Hal-hal orih harus nyolung, tahpi orih eam rimai ijo jari ohkotoh kiamat. 13:8 Uhtus ijo ihco, ahkan boparang molawan uhtus ijo bohkon. Nogara ijo ihco ahkan nyarang nogara ijo bohkon. Ang umo-umoh ahkan nyolung tana moruguh tutang bohaya kolou. Paring orih punai pahtuk iou, kolou koporos ijo tokinyam ihcobehti ulunbawi botohi, ijo kani nganak. 13:9 Ihkam harus ati-ati, bain ihkam ahkan tonawan tutang konuhut nokuh balai bosara. Ihkam ahkan ponohpah ang lohpou-lohpou sombayang. Ihkam ahkan tongomin noharep pongowasa-pongowasa tutang lahca-lahca tului ihkam murid-Ku. Tutang orihrih kosapet bagi'kam, dahpot nonga saksi tohou Ahku ahkan iro. 13:10 Kabar Hinut tahkan Pohotala rih, musti ahkan tonosiar soun, ahkan kokaro uhtus ulun. 13:11 Tutang amat ihkam tonawan tutang konomin ahkan ponosara, ara mihkoh tohou inon ijo harus ihkam nuhtuioh. Amat jari johcok ohkotoh ahkan pander, nuhtui iourih inon ijo jari tonyorihtaoh ahkan'kam aang ohkotoh. Tului pander-pander ijo ihkam ngohawotoh rih eam auh tuhtui emu bongom, molekan lombut tahkan Roh Pohotala. 13:12 Ulun ahkan mondorhaka konduangoh bongoi mangat tomunu. Orih ka ijo ahkan nyolung holang amai umba anakoh. Anak-anak ahkan molawan inai-amaioh, tutang nyorah iro ahkan tomunu. 13:13 Ihkam ahkan ngohiri bain paring ulun, tului ihkam murid-Ku. Tahpi ulun ijo botahan nyiring ko-opah ahkan tonyolamat." 13:14 "Ihkam ahkan nohto 'Koja'at ijo mopolonyuh' tombok ang unuk ijo tongobaca ahkaioh. (Catatan ahkan pomasa: Nohto tu'u-tu'u inon rimaioh!) Ang ohkot rih ulun ijo anai ang Yudea pahtut nokoru nokuh karon-puruk. 13:15 Ulun ijo anai ang ngosan sahpou lohpou ara mosuluh tutang nyolong koluwang lohpou ahkan ngomin aang'co. 13:16 Ulun ijo anai ang umo ara buli lowu ahkan ngomin pokajai. 13:17 Eaminon kongorioh aang ondou-ondou rih bagi bawi ijo botohi tutang inai ijo magun nyusu anakoh! 13:18 Bodo'arih, mangat hal-hal orih ara nyolung ang uhun uhjan. 13:19 Ang ondou-ondou ijo ngoli rih, ahkan anai ihco kosusah ijo jaha pu'u nyolung, tahkan umba Pohotala naoi tana nyiring uhuntuh, tutang eam hino ahkan nyolung huli. 13:20 Jaka eam Pohotala mopoiwak wayah orih, mahka eam anai ihcobehti ka'a ijo tonyolamat. Tahpi kotului ukup-Oh, Pohotala mopoiwak wayah orih rih. 13:21 Ang ohkot orih rih, amat ihcobehti nuhtui umba ihkam, 'Nohto Lahca Ponyolamat rih anai ang ohtoi!' ata'ai 'Nohto, Io anai ang anan!' -- ara ihko porocaya umba auh ulun rih. 13:22 Tului ponyolamat-ponyolamat bobalik, tutang nabi-nabi bobalik ahkan lombut. Iro ahkan nguan gawi-gawi ijo luar biasa, tutang kahtahelan-kahtahelan, ahkan ngobalik amat duon, ukup Pohotala ka'a. 13:23 Jadi, bojaga-jagarih! Paring orih jari Ahku nyorihtaoh ahkan'kam, hounumba hal orih nyolung." 13:24 "Uli wayah kosusah rih, mahtan-ondou ahkan monjadi pindong, tutang bulan eam hino koloang. 13:25 Potion-potion ahkan botahak tahkan langit tutang pongowasa-pongowasa pinda langit ahkan nyolung sampur-baur. 13:26 Aang ohkot orih Anak Ulun ahkan gihtan lombut ang ngosan baunondou hapan kowasa hajo tutang kohajoi-Oh. 13:27 Io ahkan nyuhu molehkat-molehkatoh ahkan nipun ukup konopili Pohotala, tahkan ko-ohpat puhting tana tahkan topahkai nokuh topahkan langit." 13:28 "Omin polajaran tahkan pu'un sikun. Amat pahting-pahtingoh bohijou tutang nyolundik, tutang nopara bodoun biou, ihkam kota'an ijo uhun tojah jari doni. 13:29 Kolourih ka'a amat ihkam nohto hal-hal orih nyolung, ihkam kota'an ijo ohkotoh jari doni samasino. 13:30 Kota'anrih! Paring ang-nyolung rih, ahkan nyolung eam hounumba ulun-ulun ijo bolum uhuntuh, mahtoi paringoh. 13:31 Langit tutang tana ahkan dilap, tahpi auh-Ku tehen kototahiuoh." 13:32 "Oluka kolourih, eam ihcobehti ka kota'an, mira ondouoh ata'ai jamoh. Karon-molehkat ang soruga eam, tutang Anak ka eam, tihkas Amai iou ijo kota'an. 13:33 Jadi ihkam harus bojaga-jaga tutang botahtap tului ihkam eam kota'an mira ohkotoh. 13:34 Koada'aioh, nindung ihcobehti ulun, ijo nohtah lohpouoh turus tulak nokuh unuk ijo mahcu. Io nyarah ahkan pohalu-pohalu mohaga lohpouoh, tutang nonga karon-gawi ahkan iro nyino-nyinong behti. Ahkan pongindoi bauntukang, io mohtoh ahkan ngindoi moro-morong. 13:35 Tului orih ihkam harus bojaga-jaga, bain ihkam eam kota'an mira tepun lohpou orih ahkan buli -- mihkohtou aang sohit ondou, mihkohtou aang tohun ngolomi, mihkohtou aang ohkot topolaoi, ata'ai mihkohtou aang ohkot mahtanondou lombut. 13:36 Amat io lombut songola, ara nyiring io nyombang ihkam rahat tiruh. 13:37 Inon ijo Ahku nuhtuioh tuh ahkan'kam, Ahku ka'a nuhtui ahkan paring ulun: Bojaga-jagarih hototurus!"
14:1 Duo ondou hino Ondou Paska tutang Pesta Luhte Eam Boragi. Imam-imam kopala tutang guru-guru agama rahat ngurah jalan ahkan nawan Yesus cara toni-tonih, tutang ahkan munu Io. 14:2 "Tahpi ara ihto nguaioh rih aang ohkot pesta," hion iro, "bain mopolombut koridu." 14:3 Kotihka Yesus anai ang Betania, ang human Simon ijo lomoi kona ponyahkit bolang ijo ja'at, ihcobehti bawi lombut nokuh-Oh. Io ngomin ihco kasa pualam bosuang minyak buanharum ijo borega, tonapa tahkan uhat buanharum. Ohkot Yesus rahat tuot kuman, ulunbawi rih nguap kasa pualam rih tutang nohta minyak buanharum rih ngosan kuhung Yesus. 14:4 Pira-pira ulun ijo anai ang anan monjadi bosingi tutang nuhtui sama arop iro, "Inon gunaioh minyak buanharum rih tongondian? 14:5 Minyak rih duon tonodagang umba regai, molowi tahkan tolu lahtus duit perak, tutang duitoh nonga ahkan ulun porosbolum!" Mahka iro bosingi umba ulunbawi rih. 14:6 Tahpi Yesus nuhtui, "Nauhoh io! Ombai ihkam monyusahahtoioh bawi tuh? Io nguanoh aang'co ijo pios tutang tonara ang tohimok-Ku. 14:7 Ulun porosbolum toturus anai ang marak ihkam. Nyinong kotihka amat ihkam kani, ihkam duon dohop iro. Tahpi Ahku eam hototurus hihco umba ihkam. 14:8 Ulunbawi tuh jari nguaioh inon ijo dahpot io nguaioh. Io jari monyodia ahkak-Ku umba minyak buanharum ahkan ponanom-Ku sounumba ohkotoh. 14:9 Porocayarih! Ang sohopus kolunon, ang umoh iou Kabar Hinut tahkan Pohotala tonokabarih, angkonuan ulunbawi tuh ahkan tonyorihta ka'a kolou pongingat ahkaioh." 14:10 Turus Yudas Iskariot ihcobehti tahkan koduo balas murid Yesus, hihkas nokuh imam-imam kopala, honong nohuang ngarana Yesus ahkan iro. 14:11 Iro sonang samasino ngonih pohaumoh rih, tutang mbowot ahkan nonga duit ahkan Yudas. Mahka Yudas ka nopara ngurah kosapet ahkan monyarah Yesus. 14:12 Aang ondou 'jopahtok a'ang Pesta Luhte Eam Boragi -- aang ohkot ulun nyombolih tobiri Paska -- murid-murid Yesus ngisok umba Io, "Ang amohrih Amai jolik ihkai nahtap ukun Paska ahkan Amai?" 14:13 Mahka Yesus nyuhu duo behti tahkan iro, "Tulakrih nokuh lowu, ang anan ihcobehti bahkas ijo rahat ngomin burung bosuang danum, ahkan hosombang umba ihkam. Kohasurih ih io 14:14 nokuh lohpou ijo io nyolongoh tutang nuhtui iouoh umba tepun lohpou rih, 'Amai Guru ngisok, ang amoh unuk Io tutang murid-murid-Oh ahkan kuman ukun Paska.' 14:15 Ulun orih ahkan nunjukoh ahkan'kam ihco ruangan ang diang ijo hajo. Takun orih jari tohoragu, sukup umba puatoh. Nyodiaoh rih paringoh ang anan bagi ihto." 14:16 Turus koduo behti murid Yesus rih hihkas nokuh lowu. Ang anan iro nyombang paringoh kona kolou ijo tonuhtuioh bain Yesus. Turus iro ka nahtap ukun Paska. 14:17 Ngolomioh Yesus lombut homboh koduo balas murid-Oh. 14:18 Tutang pondehan iro tuot kuman, Yesus nuhtui, "Ngonih iou, ihcobehti tahkan marak ihkam, ijo huntuh kuman homboh Ahku ahkan motanah Ahku." 14:19 Ngonih orih, murid-murid Yesus monjadi paham porosahtoi. Turus ihcobehti hawui ihcobehti nopara ngisok umba Yesus, "Mihkoh bohkon ahku ijo hion Amai hirahoh?" 14:20 Yesus mutah, "Io ihcobehti tahkan ihkam 'jo duo balas tuh ijo kuman hihco piring umba Ahku. 14:21 Puna Anak Ulun ahkan mahtoi kolou ijo tonyurat ang luwang Surat Borasih. Tahpi eam inon kocolahkaoh ulun ijo motanah Anak Ulun rih! Labih pios ahkan ulun orih amat io eam pu'u konanak samasino!" 14:22 Kotihka iro rahat kuman, Yesus ngomin luhte tutang ngohawot do'a torimakasih ahkan Pohotala. Pongohuli Io mbolah luhte orih honong longoi-Oh, turus nongaoh ahkan murid-murid-Oh hawui nuhtui, "Onin tutang kumairih tuh behtik-Ku." 14:23 Ulimba Io ngomin ihco sakir anggur. Io ngohawot do'a torimakasih ahkan Pohotala, turus nongaoh sakir orih ahkan murid-murid-Oh. Pongohuli iro paringoh ngorih anggur rih. 14:24 Ulimba Yesus nuhtui, "Tuhrih dahak-Ku ijo mondehen bowot Pohotala, daha ijo tonusuh'ku ahkan aro ulun. 14:25 Porocayarih: Ahku eam ahkan ngorih anggur tuh hino, johcok aang ohkot Ahku ngorih anggur ijo bohua homboh ihkam ang Kolunon Bohua Ain Amai-Ku." 14:26 Pongohuli io monyanyi ihco nyanyi tara. Tutang ulimba rih iro tulak nokuh Puruk Zaitun. 14:27 Pongohino Yesus nuhtui umba iro, "Ihkam paring ahkan nokoru nohtah Ahku. Tului luwang Surat Borasih tonyurat, 'Pohotala ahkan munu sokahtikoh, tutang kawan tobirioh ahkan rawu-riai.' 14:28 Tahpi uli Ahku bolum hoduli, Ahku ahkan hihkas hounumba ihkam nokuh Galilea." 14:29 "Eam," mutah Petrus, "nauhoh iro paring nohtah Amai, ahku samasino eam." 14:30 "Ingat," hion Yesus, "ngolomi tuh ka'a, hounumba manuk dalung nandu duo tikat, ihko tolu tikat ngulim Ahku." 14:31 Petrus mutah hawui tegas, "Nauh ahku harus mahtoi hombo-homboh umba Amai, samasino ahku eam ahkan nuhtui ijo ahku eamkosono Amai!" Tutang murid-murid ijo bohkon nuhtui kolouorih ka'a. 14:32 Iro johcok ang ihco unuk ijo araioh Getsemane, tutang Yesus nuhtui umba murid-murid-Oh, "Tuotrih ang ohtoi pondehan Ahku hihkas bodo'a." 14:33 Turus Yesus ngomin Petrus, Yakobus tutang Yohanes, hihkas hombo-homboh umba Io. Io nopara nginyam sedih tutang golisah. 14:34 "Ahtoi-Ku sedih samasino," hion Yesus umba iro, "anyam'ku kolou kani mahtoi iou. Mohcon rih ang ohtoi tutang bojaga-jagarih!" 14:35 Yesus hihkas labih mahcu honjiat, turus nolehku ang tana tutang bodo'a. A'ang do'a-Oh Io nyawot, amat tou Io eam usah nyuru wayah kokarot rih. 14:36 "Amai, yo Amai," hioi-Oh, "eam anai angihco ka ijo mustahel bagi Amai. Ngahtang kokarot tuh tahkan Ahku. Baya ararih numbun konohuang-Ku, molekan konohuang Amai." 14:37 Ulimba rih Yesus hoduli tutang nyombang murid-murid-Oh rahat tiruh. Io nuhtui umba Petrus, "Simon tiruhrih ihko? Baya ihco jam iou ihko eam duon bojaga-jaga?" 14:38 Turus Yesus nuhtui umba iro, "Bojaga-jaga iou, tutang bodo'a ahkan ihkam eam kona tihkos. Puna roh'kam kani nguan ijo morong, tahpi behtin'kam eam sanggup, tului dasar ulun rih bolomu." 14:39 Sino hino Yesus hihkas bodo'a tutang ngohawot auh-auh ijo sama ka'a. 14:40 Ulimba Io hoduli hino nokuh murid-murid-Oh, tutang nyombang iro magun ka'a tiruh, tului iro karas nundu. Mahka iro eam ta'an inon ijo harus iro nuhtuioh ahkan Yesus. 14:41 Kotihka Yesus hoduli nokuh iro ang 'jo kotolu tikatoh, Io nuhtui, "Magunrih ihkam tiruh tutang ngorong-hasong? Sukuprih! jari johcok ohkotoh Anak Ulun tonosarah nokuh longon ulun-ulun bodusa. 14:42 Kuatrih, olai ihto hihkas. Nohto! Ulun ijo motanah Ahku jari lombut!" 14:43 Pondehan Yesus magun pander, lombut Yudas, ihcobehti tahkan koduo balas murid orih. Hombo-homboh umba io, lombut ka'a aro ulun ijo ngomin padang tutang gagada. Iro sonuhu bain imam-imam kopala, guru-guru agama tutang okon-okon Yahudi. 14:44 Ulun potanah rih nonga ihco tanda ahkan iro, "Ulun ijo ahku ngohcomoh," hioi umba iro, "iorih ului-Oh. Nawan Io, tutang omin Io, umba ponjagaan ijo bua-buah." 14:45 Aang ohkot rih Yudas lombut, io turus hihkas nokuh Yesus tutang nuhtui, "Amai Guru!" pongohino io ngohcom Yesus. 14:46 Turus ulun-ulun ijo lombut hombo-homboh umba Yudas rih nawan Yesus tutang masung Io. 14:47 Tahpi anai ihcobehti ijo anai ang anan nyilak padangoh tutang molong jihpon imam hajo nyiring bosaping tolingaioh. 14:48 Turus Yesus nuhtui umba iro, "Inonkah Ahku tuh ulun ja'at, nyiring ihkam lombut ngomin padang tutang gagada ahkan nawan Ahku? 14:49 Nyinong ondou Ahku mongajar ang Lohpou Tuhan ang tohimo ihkam, tutang ihkam eam nawan Ahku. Tahpi puna jari koharusoh kodorih, mangat nyolung inon ijo tonyurat ang Surat Borasih." 14:50 Paring murid-Oh nokoru rawu-riai nohtah Yesus. 14:51 Ihcobehti ulunbiou, ijo baya hapan ihcokolambar benang ahkan ponuhtup behtiu, ngahasu Yesus. Ulun-ulun rih kani nawan io, 14:52 tahpi io nguhkoi benang orih, turus nokoru sambir hoborang. 14:53 Yesus konomin nokuh lohpou imam hajo. Ang anan paring imam kopala, okon Yahudi, tutang guru agama rahat hopuhpung. 14:54 Petrus ngohasu Yesus tahkan mahcu nyiring nyolong luwang kanaha lohpou imam hajo. Tutang ang anan io tuot ngindu aropoh, doni baho homboh umba pongawal-pongawal. 14:55 Imam-imam kopala tutang paring Okon Bosara Agama ngurah jalan ngondahpotoh bukti-bukti ijo nosalan Yesus, mangat duon momuhtusoh hukuman mahtoi ahkan Yesus. Tahpi iro eam ngondahpot ihco bukti ka. 14:56 Aro saksi ijo tona'ah ahkan nonga kosaksian alik toharep Yesus, tahpi kosaksian iro rih hokolawan ihco umba ijo bohkon. 14:57 Turus pira-pira saksi tombok, tutang nonga kosaksian alik tuh tohou Yesus, 14:58 "Ihkai pu'ungonih ulun tuh nuhtui, 'Ahku ahkan ngahkas Lohpou Pohotala tuh ijo konuan bain ulun, tutang uli tolu ondou, Ahku ahkan nombok ijo bohkon ijo eam tonapa ulun.' " 14:59 Tahpi kotorangan ulun-ulun rih ka hokolawan ihco umba ijobohkon. 14:60 Mahka imam hajo tombok ang boun iro paring tutang ngisok umba Yesus, "Inonrih Ihko eam mutah dawa-dawa ijo tonitu ahkan-Mu?" 14:61 Tahpi Yesus tonih ih. Io eam mutah samasino. Turus Imam Hajo rih ngisok sino hino umba Yesus, "Inon Ihko Lahca Ponyolamat, Anak Pohotala Ijo Borasih?" 14:62 "Ahku rih Io," mutah Yesus, "tutang ihkam paring ahkan nopahjah Anak Ulun tuot ang sila kotoun Pohotala Ijo Pahamkowasa tutang lombut ang baunondou ang langit!" 14:63 Mahka imam hajo morutat-rutat kolambiuoh tutang nuhtui, "Eam usah hino saksi! 14:64 Ihkam jari ngonih bongon auh-auh-Oh ijo monulat Pohotala. Uhuntuh inon koputusan'kam?" Iro paringoh mutusoh ijo Yesus sala, tutang harus tomohukum mahtoi. 14:65 Turus pira-pira ulun nopara ngoluhca Yesus tutang iro nuhtup mahtai-Oh tutang nahup Io, turus nuhtui, "Cuba ngohawot iai ijo nahup Ihko?" Pongawal-pongawal ka'a umba napar Yesus. 14:66 Pondehan Petrus magun anai ang kanaha, anai ihcobehti pohalu bawi tahkan imam hajo lombut koanan. 14:67 Kotihka nohto Petrus ngindu behtiuoh ang doni baho, io nohtoani tu'u-tu'u boun Petrus tutang nuhtui, "Eamrih ihko ka'a hombo-homboh Yesus ulun Nasaret rih?" 14:68 Tahpi Petrus ngalawan, "Ahku eam ta'an tutang eam horahti inon ijo konohuang'mu," hioioh umba pohalu rih. Turus Petrus nokuh bauntukang lohpou imam hajo rih. Ang wayah rih, manuk dalung nandu. 14:69 Pohalu bawi rih nohto Petrus hino, tutang nuhtui huli umba ulun ang anan, "Io puna anai ihcobehti tahkan iro!" 14:70 Tahpi Petrus ngolawan hino. Eam tahi uli hino, ulun-ulun ang anan nuhtui hino umba Petrus, "Eam duon ngolawan hino ihko, puna anai ihcobehti tahkan marak iro, tului ihko tahkan Galilea!" 14:71 Turus Petrus nopara nulut aropoh tutang nuhtui, "Ahku eam kosono umba ulun ijo hion ihkam rih!" 14:72 Ang ohkot rih ka'a manuk dalung nandu ahkan koduo tihkatoh. Tutang Petrus topoingat, ijo Yesus nuhtui ahkaioh, "Hounumba manuk dalung nandu duo tikat, ihko tolu tikat eamngahku Ahku." Mahka Petrus ka'a nangih sira-sirak.
15:1 Homboh-ngohkos samasino, paring Okon Bosara Agama tutang imam-imam kopala, okon-okon Yahudi tutang guru-guru agama hopahkat jele-jeleng. Iro momasung Yesus, pongohuli ngihtot Io tutang monyorah Io ahkan Pilatus. 15:2 Pilatus ngisok umba Yesus, "Tu'u Ihko Lahcan Ulun Yahudi?" "Kolouorih hion'mu," putah Yesus. 15:3 Imam-imam kopala monyorihta aro dawa tohimo Yesus. 15:4 Turus Pilatus ngisok hino umba Yesus, "Eam kanirih Ihko mutah? Cuba nopahjah, pira-pira dawa-dawa ijo iro nujuoh tohimo Ihko!" 15:5 Tahpi Yesus eam kani samasino mutah hino nyiring Pilatus helan. 15:6 Aang nyinong pesta Paska, koharusoh Pilatus moliwus ihcobehti ulun hukuman numbun sawot ulun aro. 15:7 Ang luwang sipir, ang louk ponyilou-ponyilou ijo monjadi pomunu ang ohkot korusuh, anai ihcobehti bogare Barabas. 15:8 Ulun aro hopuhpung tutang nyawot umba Pilatus ahkaioh moliwus ihcobehti tohukum kolou kopahtutoh. 15:9 Pilatus ngisok umba iro, "Kani ihkam, ahku moliwus lahcan ulun Yahudi rih ahkan'kam?" 15:10 Tului Pilatus ngosono ijo imam-imam kopala nyarah Yesus ahkaioh tului hiri ahtoi'ndo. 15:11 Tahpi imam-imam kopala ngihit ulun aro mangat nyawot Pilatus moliwus Barabas ahkan'ndo. 15:12 Maka Pilatus nuhtui hino umba ulun aro rih, "Amat kodorih ahku harus nguan inon umba ulun ijo ihkam ngohawotoh Io lahcan ulun Yahudi rih?" 15:13 Iro paringoh bokociak, "Mahpakoh Io!" 15:14 "Tahpi inon kosalai-Oh?" hion Pilatus. Turus iro bokociak labih muhing hino, "Mahpakoh Io!" 15:15 Pilatus jorik monyanang ulun aro rih, io polua Barabas ahkan iro. Pongohino io nyuhu ulun mahcat Yesus, turus nyorah-Oh mangat tonomahpakoh. 15:16 Yesus omin kobain sorodadu-sorodadu nokuh balai bosara ang istana gubernur. Pongohino paring ponokawan tona'ah hopuhpung. 15:17 Turus iro mokehpan jubah ungu aang Yesus tutang napa ahkur tahkan akah-akah duhi, pongohino kehpai ang kuhung Yesus. 15:18 Pongohuli iro nonga tahbe ahkai-Oh, "Sembah Lahcan Ulun Yahudi!" hion iro. 15:19 Iro mohpah kuhung Yesus umba sukahoh, turus iro ngoluhca-Oh. Iro nyembah nyundop ang tohimo-Oh. 15:20 Uli iro ngonjea Yesus, iro nguhkoi jubah ungu rih turus mokehpan huli pokahjan aiu bongoi. Pongohino rih Io omin'ndo bolua lowu ahkan tomahpak. 15:21 Ang beteng jalan iro hojojuan ihcobehti ngohtun sopolahkin Yesus. Ulun orih toborung punai tahkan dukuh kani nyolong nokuh lowu. (Araioh Simon, -- asar tahkan Kirene -- amai ain Aleksander tutang Rufus.) 15:22 Yesus omin nokuh ihco unuk ijo bogare Golgota, rimaioh, "Unuk bakongkuhung." 15:23 Ang anan iro kani nonga ahkai-Oh anggur ijo capur mur, tahpi Yesus eam kani ngorih anggur rih. 15:24 Pongohuli iro mahpak Io, tutang hobagi hatiu-Oh tutang batenong mangat ngota'an bagiu nyinong behti. 15:25 Pomahpak Io rih nyolung pukul jalatien ngohkos. 15:26 Ang ngosan sopolahki-Oh tonokehpan surat tohou dawa toharop Io rih, "Lahcan Ulun Yahudi!" 15:27 Hombohumba Yesus iro mahpak duo behti ponyilou; ihcobehti ang sila koto'u tutang ihcobehti hino ang sila komuloi-Oh. 15:28 Kotului kolourih nyolung auh surat ang Surat Borasih iorih: "Io tongohu iro monjadi barih ulun ja'at." 15:29 Ulun-ulun ijo nguha ang anan ngeleng-ngiling kuhungoh, tutang mohina Yesus. Iro nuhtui, "Uh, Ihko ijo kani ngahkas Lohpou Pohotala, tutang nombokoh ang tolu ondou. 15:30 Cuba nosuluh tahkan sopolahki rih tutang nyolamat arop-Mu!" 15:31 Kodorih ka'a imam-imam kopala tutang guru-guru agama hololea Yesus. Iro bopander sama aropoh, "Io monyolamat ulun bohkon, tahpi arop-Oh bongoi Io eam duon monyolamatoh! 15:32 Amat Io lahcan Israel, Lahca Ponyolamat, pios ih Io uhuntuh nosuluh tahkan sopolahki orih, mangat ihkai nohtooh tutang porocaya umba Io!" Ulun-ulun ijo nyopolahki homboh Yesus rih ka'a hololea Yesus. 15:33 Aang tohun ondou, kotahin tolu jam sohopus lowu rih monjadi pindong. 15:34 Tutang ang pukul tolu cohit, Yesus ngombak umba auh ijo muhing, "Eloi, Eloi, lama sabakhtani?" ijo rimai, "Yoh, Pohotalak-Ku, yoh, Pohotalak-Ku, ombai Ihko nohtah Ahku?" 15:35 Pira-pira ulun ang anan ngonih kombak orih, tutang nuhtui, "Ngonih'kam Io na'ah Elia!" 15:36 Ihcobehti tahkan iro jele-jeleng hihkas ngomin dolak karang turus ngucomoh aang anggur mosom. Pongohino dolak karang iro ngowuhoh hapan owuh poring, turus tonuhcuoh nokuh biwih Yesus, sambir nuhtui, "Ngindoi, has ihto nohto, inon Elia lombut moposuluh Io tahkan sopolahki atuh." 15:37 Turus Yesus ngombak hino tutang palus. 15:38 Dindingbenang ijo toniring ang luwang Lohpou Tuhan bolah monjadi duo tahkan diang nyiring pinda. 15:39 Komandan ijo tombok ang doni sopolahki rih nohto koloukuwoh Yesus palus. Komandan rih nuhtui, "Puna tu'u ulun tuh Anak Pohotala!" 15:40 Ang anan anai ka'a pira-pira ulunbawi ijo rahat nohto paringoh rih tahkan mahcu. Ang marak iro rih anai Salome, Maria Magdalena, tutang Maria inai Yakobus ijo biou tutang Yoses. 15:41 Iro rih ulun-ulun bawi ijo ngohasu tutang ndohop Yesus kotihka Io anai ang Galilea. Tutang anai aro hino ulunbawi bohkon ang anan ijo ius lombut nokuh Yerusalem hombo-homboh umba Yesus. 15:42-43 Ondou jari nopara pindong kotihka Yusep tahkan Arimatea lombut. Io barih ulun Basara Agama ijo tonohoromat. Io ka'a rahat ngindoi wayahoh Pohotala nopara moretah kolou Lahca. Ondou rih ondou Bosodia, (yorih ondou hounumba ondou Sabat). Tului rih hawui kohanyi Yusep, nohimo Pilatus tutang nyawot otun Yesus. 15:44 Pilatus helan ijo ngonih Yesus rih jari mahtoi. Nyolung io nyuhu ulun na'ah komandan pasukan, tutang ngisok umba io inon Yesus jari tahi mahtoi. 15:45 Uli ngonih laporan komandan rih, Pilatus mangijin Yusep tou posuluh tutang ngomin otun Yesus. 15:46 Turus Yusep moli benang pomukusotu tahkan benang lena pongopiosoh, tutang uli rih posuluh otun Yesus, io mukusoh umba benang lena rih. Pongohino rih io pokalingoh otui rih ang luwang ihco tanom ijo tonguai ang luwang puruk bahtu. Uliorih rih io molinang ihco bahtu hajo ponuhtup bauntukang tanom rih. 15:47 Pondehan rih Maria Magdalena tutang Maria inai Yesus nohtoani ang umoh Yesus ponokaling.
16:1 Kotihka ondou Sabat jari nokalou, Maria Magdalena, Maria inai Yakobus tutang Salome hihkas moli minyak ngaramas otun Yesus. 16:2 Homboh-ngohkos samasino ohkot mahtan-ondou boloang, ang ondou ijo pahtok minggu rih iro hihkas nokuh tanom. 16:3-4 Ang behteng jalan iro pander sama aropoh, "Iai ijo dohop ihto molinang bahtu ahtop aang baunlowong tanom?" Tului bahtu rih hajo samasino. Tahpi sojohcokoh ang anan iro nohto bahtu rih jari hokisat. 16:5 Turus iro nyolong koluwang tanom rih. Ang luwangoh, sila kotou, iro nohto ihcobehti ulunbiou ijo hapan jubah puhti rahat tuot tutang iro tokohcit. 16:6 Ulunbiou rih nuhtui, "Ara mihkoh! Ahku kota'an ihkam ngurah Yesus ulun Nasaret ijo jari tonyopolahki. Io eam aro ang ohtoi. Io jari bolum! Nohtorih iou, tuh lohkun unuk ulun pokaling Io. 16:7 Uhuntuh tulakrih nyiar iou kabar tuh ahkan murid-murid-Oh, ahkan Petrus. Manderrih, 'Io tulak hounumba ihkam nokuh Galilea. Ang anan ihkam ahkan nohto Io ijo jari tomohtoh-Oh ahkan'kam.' " 16:8 Mahka iro soluka tahkan tanom rih turus nokoru tului tokohcit tutang mihkoh. Iro eam momander ino-inon ahkan iai ka, tului mihkoh. 16:9 Uli Yesus monyun tahkan louk ulun mahtoi, homboh ngohkos ang ondou Minggu, Io pahtok-Oh pokarah arop-Oh ahkan Maria Magdalena. (Tahkan Maria orih pu'u Yesus muhko pihtu roh ja'at.) 16:10 Mahka Maria Magdalena tulak nyiaroh kojodian rih ahkan injah-jolahan Yesus, ijo rahat porosahtoi tutang nangih. 16:11 Tahpi kotihka iro ijo ngonih Yesus bolum, tutang ijo Maria jari nohto Io, iro eam porocaya. 16:12 Uliorih rih Yesus ngorinah arop-Oh ahkan duo behti murid-Oh umba cara ihco bohkon. Orih nyolung kotihka koduo behti murid-Oh nyalan nokuh ihco lowu. 16:13 Turus iro hoduli tutang momborihta hal orih ahkan ijo bohkonoh. Tahpi iro eam porocaya. 16:14 Kojoriaioh Yesus ngorinah arop-Oh ahkan murid-murid-Oh sobalas behti, kotihka iro beteng kuman. Io ningak iro bain iro kurang porocaya, tutang turus mahang ahtoi'ndo, nyiring eam porocaya umba ulun-ulun ijo jari nohto bongoi ijo Yesus bolum. 16:15 Turus Yesus nuhtui umba iro, "Tulak'kam, nokuh sohapus kolunon, tutang momborihta ohrih Kabar Hinut tahkan Pohotala rih, ahkan paring ukup kolunon. 16:16 Ulun ijo eam porocaya ahkan tonohukum, tahpi ulun ijo porocaya tutang tonopondus ahkan solamat. 16:17 Monjadi kahta ijo iro porocaya, ulun-ulun rih ahkan muko roh ja'at ngosan arak-Ku; iro ahkan hopander a'ang basa-basa ijo eam iro pu'ungosonooh. 16:18 Amat iro nambit lohi ata'ai ngorih sowui, iro eam ahkan buah colahka. Amat iro ngina longoi ang ngosan ulun-ulun ijo poros, ulun-ulun rih ahkan pios." 16:19 Limbah Tuhan Yesus hopander umba iro, Io hogahtang ahkan soruga. Ang anan Io moretah hihco umba Pohotala. 16:20 Mahka murid-murid-Oh tulak momborihta Kabar Hinut tahkan Pohotala nokuh umo-umoh. Tutang Tuhan ka umba bogawi homboh umba iro, tutang ngorinah nguha kahtahelan-kahtahelan, ijo tononyiar iro rih tu'u. 16:9 Ulun-ulun bawi tulak nokuh Petrus tutang injah-injah, turus nyorihtaoh honong iwak, paring ijo jari tonyorihtaoh ahkan iro bain ulun biou rih. 16:10 Uliorih Yesus bongoi nguha murid-murid-Oh, momborihta tahkan timur nokuh barat, borihta ijo borasih tutang abadi orih tohou kosolamatan ijo kototahiu.
1:1 Teofilus ijo randah ahtoi, Aro ulun jari bousaha nyurat tutang monyusun tohou karon-kojodianrih ijo jari nyolung ang tohun ihto. 1:2 Iro nyurat hotohorong umba ijo jari tomorihta ahkan ihto bain ulun-ulun ijo nohto bongoi karonaang nyolung orih tahkan pahtukoh, tutang pongohino mborihtaoh kabar orih. 1:3 Uli ahku honong nolihtioh moriksa paring orih tahkan pahtukoh, ahku ngira pios mangat nyurat ihco laporan ijo tosusun ahkan'kam. 1:4 Ahku nguan orih mangat'kam kota'an ijo inon ijo jari tomara ahkan Ihkam puna morong. 1:5 Kotihka Horodes monjadi lahca tana Yudea, anai ihcobehti imam, bogare Sakharia. Io tame barih imam-imam Abia. Oruhoh bogare Elisabet, ka'a lihit imam. 1:6 Pombolum lohpouawu orih rih ngojorih ahtoi Pohotala. Koduooh bokehtep umba paring poretah tutang Hukum Tuhan umba ko opah ahtoi'ndo. 1:7 Iro eam aro anak tului Elisabet tomanang tutang doro rih jari oko. 1:8 Aang sino ondou, ohkot barih Abia duon gilir, Sakharia konopili nguan gawi, kolou imam ang nohimo Pohotala. 1:9 Umba tenung ijo kopahtutoh konuan bain imam-imam, Sakharia tonunjuk ahkan nyolong nukuh luwang Lohpou Tuhan tutang mahpong manyan. 1:10 Pondehan upacara mahpong manyan io nguai, ulun aro bodo'a ang luar. 1:11 Ang ohkot orih, molehkat Tuhan ngorinah aropoh ahkan Sakharia. Molehkat rih tombok ang sila kotou meja unuk mahpong manyan rih. 1:12 Ohkot Sakharia nohto molehkat rih, io tokonyat tutang mihkoh. 1:13 Tahpi molehkat rih nuhtui, "Ara mihkoh Sakharia! Pohotala jari ngonih do'a'mu. Oruh'mu Elisabet ahkan nganak ihcobehti anak bahkas. Ihko harus nonga araioh Yohanes ahkaioh. 1:14 Ihko ahkan paham jorih, tutang aro ulun ahkan jorih jirah amat anak rih konanak noin! 1:15 Io ahkan monjadi ulun hajo numbun topahjah Tuhan, tutang io eam ahkan ngorih anggur ata'ai korih ijo mombusou. Tahkan io konanak, io ahkan konowasa bain Roh Pohotala. 1:16 Aro ulun Israel tonitingoh buli nokuh Pohotala, Tuhan iro. 1:17 Io ahkan monjadi soruhan Tuhan ijo ba'as tutang bokowasa kolou Elia. Io ahkan ngobuah amai umba anak, tutang ulun eam te'et tonitingoh buli aang jalan tiruk ijo morong. Honong kolourih io nahtap ihco ukup ijo jari tahtap ahkan Tuhan." 1:18 "Koloukuwoh ahku ta'an ijo kolourih ahkan nyolung?" hion Sakharia umba molehkat rih, "ahku jari oko, tutang oruh'ku ka'a jari oko." 1:19 Molehkat rih mutah, "Ahku tuh Gabriel. Ahku pohalu Pohotala tutang Iorih ijo nyuhu ahku nyapaioh kabar hinut tuh ahkan'mu. 1:20 Inon ijo ahku nuhtuioh, ahkan nyolung ang ohkotoh. Tahpi tului ihko eam porocaya, ihko noin eam duon pander ihko ahkan bisu nyiring inon ijo ahku nuhtuioh tuh nyolung." 1:21 Pondehan rih ulun-ulun ijo toturus ngindoi Sakharia. Iro helan ombai io kolourih kotahiuoh ang luwang Lohpou Tuhan. 1:22 Tutang ang ohkot io soluka, io eam duon pander umba iro. Io turus ih nonga tanda umba longoioh, tutang tahtap io bisu. Mahka ulun-ulun ka kota'an ijo io jari nohto aangihco ponopahjah ang luwang Lohpou Tuhan. 1:23 Ulirih opah ohkot gawiouoh ang Human Tuhan, Sakharia buli nokuh lohpouoh. 1:24 Eam pira kotahiu ulirih rih, Elisabet oruhoh botohi turus ngurung aropoh ang lohpou limo potion kotahiuoh. 1:25 Io nuhtui, "Kojoriaioh Tuhan dohop ahku tutang ndianoh kohina'ku." 1:26 Kotihka Elisabet jari botohi onom potion, Pohotala nyuhu molehkat Gabriel hihkas nokuh Nasaret ihcokobawak lowu ang tana Galilea. 1:27 Gabriel soruhan nokuh ihcobehti anakdara, bogare Maria. Bujangteme orih jari konisok bain ihcobehti bogare Yusep lihit Lahca Dawid. 1:28 Molehkat rih lombut ahkan Maria hawoi nuhtui, "Kosanangsolamat ahkan'mu ijo tomborehkat Tuhan paham kopioi! Tuhan hihco ihko!" 1:29 Ngonih tuhtui molehkat rih Maria tokohcit, nyiring hokisok umba a'ang ahtoi, inon rimai tabe rih. 1:30 Mahka molehkat rih nuhtui umba io, "Ara mihkoh Maria, tului ihko unuk kojorih ahtoi Pohotala. 1:31 Ihko ahkan botohi, tutang nganak ihcobehti anak, ijo harus ihko nonga araioh Yesus. 1:32 Io ahkan monjadi ulunhajo tutang ahkan konohawot Anak Pohotala Ijo Mahaisung. Tuhan Pohotala ahkan ngonjorian Io Lahca kolou Lahca Dawid, tahtu ajuh-Oh. 1:33 Tutang Io ahkan morehtah kolou Lahca ang ngosan uhtus Yakub turus-jahamoh. Kolahcai-Oh eam ahkan opah." 1:34 "Tahpi ahku magun bujangteme," hion Maria umba molehkat rih, "koloukuwoh hal orih duon nyolung?" 1:35 Molehkat rih mutah auh, "Roh Pohotala ahkan lombut ahkan'mu, tutang kowasan Pohotala ahkan monyokuwung ihko. Orihrih kotuluioh anak ijo ahkan konanak'mu rih, ahkan konohawot Borasih, Anak Pohotala. 1:36 Ingat, Elisabet konduang'mu 'cotahtu rih, jari botohi onom bulan, oluka io jari oko, tutang ulun jari ngohawot io tomanang. 1:37 Tului bagi Pohotala eam aro ijo mustahel." 1:38 Turus Maria nuhtui, "Ahku tuh jihpon Tuhan, nauhoh ijo nyolung ahkak'ku, kolou ijo ihko nuhtui." Turus molehkat orih tulak nohtah Maria. 1:39 Jeleng uliorih rih, Maria tulak nokuh ihco lowu ang Yudea ang tana hopuruk-puruk. 1:40 Io tulak nokuh lohpou Sakharia, tutang kotihka io nyolong, io ngohawot tabe ahkan Elisabet. 1:41 Tutang kolourih Elisabet ngonih tabe Maria, anak ijo ang luwang butui Elisabet rih jorih. Mahka Elisabet konowasa bain Roh Pohotala, 1:42 turus nuhtui, "Ihko ijo paling tomorehkat ang louk paring ulunbawi! Ponorehkat anak ijo ahkan ihko nganakoh rih! 1:43 Iai ahku nyiring inai Tuhan lombut masap ahku? 1:44 Kolourih ahku ngonih tahbe'mu, anak ijo luwang butui'ku jorih. 1:45 Sanangsolamat ihko, tului porocaya ijo inon tonuhtui Tuhan ahkan'mu rih ahkan nyolung!" 1:46 Maria nuhtui, "Ahtoi'ku monara Tuhan, 1:47 tutang moruak'ku paham kojorihoh, tului Pohotala Ponyolamat'ku. 1:48 Io ingat ahku jihpoi-Oh ijo hina! Nopara huntuh paring uhtus nuhtui ijo ahku ulun sanangsolamat. 1:49 Tului Pohotala Ijo Palingkowasa nguan hal-hal hajo ahkak'ku. Borasih tu'u arai-Oh. 1:50 Lihit honong lihit Tuhan ngina porokasih ahkan ulun ijo mihkoh umba Io. 1:51 Umba longoi-Oh ijo ba'as Io morawu-riaioh ulun bojuhu, tutang nderoh rancana iro. 1:52 Lahca-lahca posuluhoh tahkan ponuot tutang ulun hina tonongahtang-Oh. 1:53 Ulun bolo'u konombosuh-Oh umba kokaron kopios, ijo tohtou tomuko honong mapih. 1:54 Io ngawat Israel jihpoi-Oh, numbun bowot ijo konuai-Oh umba tahtu ajuh ihto. 1:55 Tuhan eam nolingou bowot-Oh, Io randah ahtoi ahkan Abraham tutang lihitoh nyiring turus-jahamoh." 1:56 Kurang labih tolu potion kotahiuoh Maria mohcon umba Elisabet, punai io buli nokuh lohpouoh. 1:57 Johcok ohkotoh bagi Elisabet ahkan nganak. Io nganak ihcobehti anak bahkas. 1:58 Injah bobuhai hokodiling tutang ari konduangoh ngonih eam inon kopiosoh Tuhan toharep Elisabet, tutang iro ka umba jorih homboh io. 1:59 Ohkot longa orih boumur jalu ondou, iro lombut ahkan monyunat io. Iro kani napaoh aran longa rih Sakharia, numbun aran amaioh, 1:60 tahpi inaioh homauh, "Eam! Io harus tonapa araioh Yohanes." 1:61 "Eam ihcobehti ka tahkan ari konduang'mu arai kolourih," hion iro umba Elisabet. 1:62 Turus umba tanda iro ngisok umba Sakharia, aran inon ijo kani tonongarihoh ahkan anakoh. 1:63 Sakharia nyawot ihcokobilap bahtu surat turus nyurat, "Araioh Yohanes." Iro paringoh helan. 1:64 Aang ohkot rih ka'a Sakharia dahpot pander hino tutang monara Pohotala. 1:65 Dolang injahjolahai paringoh mihkoh, tutang kabar rih tosiar nokuh hapus purukhotinggang ang Yudea. 1:66 Paring ulun ijo ngonih hal orih ngisok a'ang ahtoi'ndo, "Jarian inonrih anak rih noin?" Tului Tuhan homboh io. 1:67 Sakharia, amai anak orih, duon tokowasa bain Roh Pohotala, nyiring io nyiaroh pohtoh tahkan Tuhan. Io nuhtui, 1:68 "Has ihto monara Tuhan, Pohotalan uhtus Israel! Io jari lombut ndohop ukup-Oh tutang moliwusoh iro. 1:69 Io nonga ihto ponyolamat, ijo meteng-mamut lihit Dawid, jihpoi-Oh. 1:70 Jaman lomoi nguha nabi-nabi ijo konopili-Oh, Tuhan jari nonga bowot-Oh 1:71 mangat monyolamat ihto tahkan musuh'to tutang tahkan kowasa ulun-ulun ijo mohiri ihto. 1:72 Ahkan ngorinahoh kotoun ahtoi-Oh ahkan uhtuslihit ihto, bowot-Oh ijo borasih orih ahkan tongonyolung-Oh. 1:73-74 Io nulut umba Abraham amai ihto, tutang hobowot, ahkan nyolamatoh ihto tahkan musuh ihto, mangat ihto earo mihkoh mohalu Io 1:75 turus nehpu umbaoh tutang nyanang ahtoi-Oh kotahin ihto bolum. 1:76 Ihko, o anak'ku ahkan konohawot nabi Pohotala Ijo Mahaisung. Ihko tonyuhu nosolu baun Tuhan ahkan nandang jalan ahkai-Oh, 1:77 mangat momborihta ahkan ukup-Oh ijo iro ahkan tonyolamatoh, amat Pohotala jari mongapun dusa-dusan iro. 1:78 Tuhan ihto bolomu ahtoi hawui ponyayang; gunan monyolamat ihto Io lombut. Kolou mahtanondou lombut ang ngohkos ondou, 1:79 kolourihrih Io nongaoh koloang-Oh ahkan paring ulun ijo bolum ang luwang kopindong tutang kihkoh. Io niting ihto aang jalan ijo nitu kobuah." 1:80 Anak Sakharia rih sasar hajo tutang sasar ba'as rohoh. Io mohcon ang padang balambah, nyiring johcok ohkotoh io ngorinahoh aropoh ahkan uhtus Israel.
2:1 Ang ohkot rih Kaisar Agustus momoretahoh, mangat paring warga nogara Kolahca'an Ruma molihting aropoh ahkan tongiso. 2:2 Tongiso ijo pahtukoh tuh tolalusoh ohkot Kirenius monjadi gubernur tana Siria. 2:3 Paring ulun aang ohkot rih, tulak mangat tomolihting ang lowuioh nyinong behti. 2:4 Yusep ka tulak tahkan Nasaret ang Galilea, nokuh Betlehem ang Yudea, unuk Lahca Dawid konanak; tului Yusep lihit Dawid. 2:5 Yusep molihting aropoh homboh Maria kisokoh ijo rahat botohi. 2:6 Kotihka iro ang Betlehem, johcok ohkotoh bagi Maria ahkan nganak. 2:7 Io nganak ihcobehti anak bahkas, anakoh ijo pongoko. Anak rih konohuwutoh umba benang laping, turus ponokaling ang luwang julang tongolahpikoh umba kojugu; tului iro earo nyumbang lohpou ijo unuk iro nginap. 2:8 Aang ngolomi orih anai sokahtik-sokahtik ijo rahat ngindoi karon-tobirioh ang padang uru ang tana rih. 2:9 Songela molehkat Tuhan ngorinahoh arop akan iro, tutang kolondang koloang tahkan Tuhan monyingah ngoloang iro, tutang iro paham mihkoh. 2:10 Tahpi molehkat rih nuhtui, "Ara mihkoh! Tului ahku lombut ngitot kabar hinut ahkan'kam -- kabar ijo paham moposanang paring ulun. 2:11 Ondou tuh ang lowun Dawid jari konanak Lahca Ponyolamat'mu iorih Kristus, Tuhan. 2:12 Tuhrih tandaoh ahkan ihkam: ihkam ahkan nyombang ihcobehti Anak longa konohuwut umba benang lapin, tutang ponokaling ang luwang julang." 2:13 Songola molehkat rih homboh umba karon-molehkat bohkon ijo monara Pohotala. Hion'ndo, 2:14 "Tara ahkan Pohotala ang langit ijo palingdiang! Tutang ang isung tana kosanangsolamat rih ahkan ulun ijo ngojorih ahtoi Tuhan!" 2:15 Uli karon-molehkat nohtah iro tutang buli nokuh soruga, sokahtik-sokahtik rih pander sama aropoh, "Olai ihto nokuh Betlehem tutang nohto dolangang ijo nyolung rih, ijo tonuhtuioh Tuhan ahkan ihto." 2:16 Iro jeleng tulak, turus nyombang Maria tutang Yusep honong anak longa rih, ijo rahat kaling ang luwang julang. 2:17 Kotihka dolang sokahtik nohto anak longa rih, iro nyorihta inon ijo tonuhtui karon-molehkat tohou anak longa rih. 2:18 Tutang paring ulun helan ngonih borihta tahkan sokahtik orih. 2:19 Tahpi Maria ngina paring auh rih ang luwang ahtoioh tutang ngumangoh. 2:20 Sokahtik-sokahtik rih buli nokuh padang uru sambir monara tutang pohajo Pohotala, tului paring ijo jari iro ngonih tutang nohto, horong kolou ijo tonuhtui bain molehkat. 2:21 Uli umur jalu ondou, Anak rih tonyunat. Tutang iro ngohawot arai-Oh Yesus, aran ijo tononga molehkat ahkai-Oh hounumba Io tonohi inai-Oh. 2:22 Johcok wayahoh Yusep tutang Maria molalus hadat mporasih numbun Hukum Museh. Jadi iro ngitot Anak rih nokuh Yerusalem ahkan tonyorah ahkan Tuhan. 2:23 Tului ang luwang hukum Tuhan, tonyurat koloutuh, "Nyinong anak bahkas ijo pokookoioh, harus tonosorah ahkan Tuhan." 2:24 Iro ka'a nohuang monyorah pononga, iorih ihco pasang bulung tokukur ata'ai duo kungan bulung dala ijo biou, kolou ijo tonahtap a'ang hukum Tuhan. 2:25 Aang ohkot rih ang Yerusalem anai ihcobehti bogare Simeon io ulun hinut ijo mihkoh umba Pohotala tutang rahat ngindoi wayahoh Pohotala nyolamat Israel. Roh Pohotala hihco io, 2:26 tutang Roh Pohotala jari monyorihta ahkaioh ijo io eam ahkan mahtoi, amat jaha nohto Lahca Ponyolamat ijo nobowot Tuhan. 2:27 Bain toniting Roh Pohotala, Simeon nyolong ang Lohpou Tuhan. Aang ohkot rih, Yusep tutang Maria ngitot nyolong Yesus, ijo magun koik rih, ahkan nguan upacara ijo tomoretah hukum agama. 2:28 Mahka Simeon ngomin Anak rih tutang nyokahpu Io, turus monara Pohotala, 2:29 "Uhuntuh, Tuhan, Ihko jari ponyolung bowot-Mu. Nauhoh jihpon-Mu tuh palus honong komangat. 2:30 Tului umba mahta'ku bongok, ahku jari nohto Ponyolamat ijo lombut tahkanumba Ihko. 2:31 Ponyolamat rih Ihko jari nahtapoh ahkan kokaro uhtus: 2:32 kolouoh koloang, ijo mopoloang jalan, bagi uhtus-uhtus ijo bokon, ahkan lombut nokuh-Mu; iorih koloang ijo polombut horomat ahkan ukup-Mu Israel." 2:33 Amai tutang inai Anak orih helan ngonih inon ijo tonuhtui Simeon tohou Anak'ndo. 2:34 Simeon mborehkat iro tutang nuhtui ahkan Maria, inai Anak rih, "Anak tuh jari tomitih bain Pohotala, ahkan morusak tutang ahkan monyolamat aro ulun Israel. Io ahkan monjadi tanda ahkan Pohotala, ijo ahkan tonolawan bain aro ulun, 2:35 tutang honong kolourih bokahkas atoi bua iro. Koporos ahtoi ahkan newek ahtoi'mu kolou padang ijo monyo'ot." 2:36 Anai hino ihcobehti nabi bawi ijo jari oko samasino. Araioh Hana, anak Panuel, tahkan lihit Asyer. Uliumba pihtu toun kawin, 2:37 Hana monjadi balu, tutang uhuntuh umuroh jalu pulu ohpat toun. Eam pu'u io nohtahoh Lohpou Tuhan. Handou homalom io te'et ang anan umba Pohotala homboh bodo'a tutang puasa. 2:38 Horong aang ohkot rih ka'a io lombut, turus monara Pohotala tutang nuhtui tohou Anak rih ahkan paring ulun ijo ngindoi wayahoh Pohotala momorodehkaoh Yerusalem. 2:39 Ulimba Yusep tutang Maria nguan paring ijo harus numbun Hukum Tuhan, iro buli nokuh Nasaret ang Galilea. 2:40 Anak rih sasar hajo tutang ba'as. Io horahti samasino tutang paham tonokasih Pohotala. 2:41 Nyino-nyinong toun ulun oko Yesus tulak nokuh Yerusalem mangat umba pesta Paska. 2:42 Tutang kotihka Yesus johcok umur duo balas toun, iro hihkas nokuh pesta rih tohorong kopahtuh. 2:43 Umbot pesta orih rih iro buli, tahpi Yesus, Anak rih magun mohcon ang Yerusalem, tutang amai inai-Oh eam kota'an. 2:44 Iro ngohu Io umba homboh kawaninjah-Oh. Ulimba iro nyalan ihcoondou punaioh iro ngurah Io, ang louk ari-konduang tutang injah-jolahan'ndo. 2:45 Tahpi iro eam nyombang-Oh, jadi iro ngulos nokuh Yerusalem ngurah Io. 2:46 Ulirih tolu ondou, iro nyombang Io ang Lohpou Tuhan. Io rahat tuot ngonih guru-guru agama tutang monyapai aro kisok. 2:47 Paring ulun ijo ngonih Io helan tului karon-putah-Oh ijo tohorong. 2:48 Ulun oko-Oh helan nohto Io. Inai-Oh nuhtui umba Io, "Anak, ombai Ihko nguan koloutuh ahkan ihkai? Amai-Mu tutang Inai-Mu porosahtoi ngurah Ihko!" 2:49 Yesus mutah, "Ombai amai tutang inai ngurah Ahku? Inon amai tutang inai eam kota'an ijo Ahku harus anai ang luwang lohpou Amai-Ku?" 2:50 Tahpi iro eam horahti umba putah Yesus rih. 2:51 Pongohuli Yesus buli homboh iro nokuh Nasaret, tutang te'et umba iro. Paring hal orih ngina bain inai-Oh ang luwang ahtoioh. 2:52 Yesus mahi ndahang hajo tutang tambah horahti, tutang unuk kojorih bain Pohotala tutang unuk konojolik bain kolunon.
3:1 Aang toun kolimo balas tahkan pomoretah Kaisar Tiberius, Pontius Pilatus monjadi gubernur ang Yudea, tutang Horodes moretah ang Galilea. Pilipus, konduang Horodes moretah ang daerah Iturea tutang Trakhonitis, kolourih ka'a Lisanias moretah ang Abilene. 3:2 Ijo tuot nambit imam-imam hajo iorih Hanas tutang Kayapas. Aang toun orihrih Pohotala nuhtui umba Yohanes, anak Sakharia, ang padang bolambah. 3:3 Mahka Yohanes tulak nokuh umo-umoh ang hopus daerah Sungoi Yordan, tutang monyiar Kabar Hinut tahkan Pohotala, Yohanes na'ah, "Hubah ihkam tahkan dusa-dusan'kam, tutang ihkam harus tonopondus, mangat Pohotala ngapun ihkam." 3:4 Orih horong umba ijo tonyurat ang luwang buhku Nabi Yesaya: "Anai ulun ijo na'ah ang padang bolambah, 'Nahtap jalan ahkan Tuhan, morahta jalan ahkai-Oh. 3:5 Nyinong tanaluou ahkan tonimbun, nyinong puruk tutang lukuh, tonusut. Jalan ijo kulak-keluk harus pobujuroh, tutang jalan ijo ruakrahken tonimbuk. 3:6 Ulun-ulun ang hopus kolunon, ahkan nohto Pohotala nyolamatoh kolunon!' " 3:7 Aro ulun lombut nokuh Yohanes ahkan tonopondus. Yohanes nuhtui umba iro, "Ihkam ulun ja'at! Iai ijo nuhtuioh, ijo ihkam tou ngolindas tahkan hukum Pohotala ijo ahkan lombut? 3:8 Ngorinahrih umba ang konuan'mu, ijo ihkam jari hubah tahkan dusa-dusan'kam! Ara hino nuhtui ijo Abraham orih tahtu ajuh 'kai. Pios ngingat: Tahkan bahtu-bahtu tuh ka Pohotala sanggup napa lihit ahkan Abraham! 3:9 Kahpak jari ngindoi ahkan nowong pu'un nyiring johcok uhat-uhatoh. Nyino-nyinong pu'un ijo eam polua bua ijo hinut, ahkan tonowong tutang dian ahkan luwang baho." 3:10 "Jadi, inon ijo harus ihkai nguai?" kisok ulun-ulun rih, umba Yohanes. 3:11 Yohanes mutah, "Ulun ijo anaingina duo kolambar kolambi, harus nonga ihcokolombar ahkan injah ijo eam ngina, tutang ulun ijo anai ukui harus io magioh." 3:12 Ponagih-ponagih pajak ka'a lombut nokuh Yohanes ahkan tonopondus. Iro ngisokoh, "Amai guru, inon ijo harus ihkai nguai?" 3:13 Yohanes mutah, "Ara nagih molowi umba inon ijo jari tonahtap." 3:14 Anai ka'a sorodadu ijo ngisok, "Koloukuwoh umba ihkai? Inon ijo harus ihkai nguai?" Yohanes mutah, "Ara mohenyek iai ka, tutang ara morapas duit tutang dawa-dawa alik. Cukup umba gajih'kam!" 3:15 Aang ohkot rih ulun-ulun nopara hokisok hawoi aropoh, inon Yohanes Lahca Ponyolamat ijo iro ngindoioh. 3:16 Orih kotuluioh Yohanes pander ahkan iro paring, "Ahku mopondus ihkam umba danum, tahpi noin ahkan lombut Ulun ijo labih hajo tahkanumba ahku. Nguhkoi talin soruhpah-Oh ka ahku eam gunai, Io ahkan mopondus ihkam umba Roh Pohotala tutang baho. 3:17 Ang longoi-Oh anai tahap ahkan ngiap paring gandum-Oh nyiring borasih. Gandum ahkan nipun-Oh ang luwang kolakingoh, tahpi paring apih ahkan tomahpong-Oh ang luwang baho ijo eam tou bolop!" 3:18 Kolourihrih Yohanes ningak ulun-ulun, umba mahca-mahcam cara aang ohkot io monyiar Kabar Hinut. 3:19 Tahpi Horodes pongowasa Galilea, toningak bain Yohanes tohou pongawinoh umba Herodias, oruh konduangoh, tutang paring koja'at ijo bohkon ijo jari tonapaoh. 3:20 Tahpi Horodes malah ndahang dolang koja'atoh honong posolong Yohanes ahkan luwang sipir. 3:21 Uli paring ulun rih tonopondus, Yesus ka'a tonopondus. Tutang kotihka Io rahat bodo'a langit bokuap, 3:22 tutang Roh Pohotala mosuluh nokuh ngosan-Oh kolou bulung dala. Turus konahan auh Pohotala nuhtui, "Ihkorih Anak-Ku ijo Ahku ngasihoh. Ihko ijo ngojorih ahtoi-Ku." 3:23 Aang ohkot Yesus nopara nguangawiu-Oh, Io boumur kurang labih tolu pulu toun. Numbun hion-ulun, Io anak Yusep, anak Eli, 3:24 anak Matat, anak Lewi, anak Malkhi, anak Yanai, anak Yusep, 3:25 anak Matica, anak Amos, anak Nahum, anak Hesli, anak Nagai, 3:26 anak Maat, anak Matica, anak Simei, anak Yosekh, anak Yoda, 3:27 anak Yohanan, anak Resa, anak Serubabel, anak Sealtiel, anak Neri, 3:28 anak Malkhi, anak Adi, anak Kosam, anak Elmadam, anak Er, 3:29 anak Yesua, anak Elieser, anak Yorim, anak Matat, anak Lewi, 3:30 anak Simeon, anak Yahuda, anak Yusep, anak Yonam, anak Elyakim, 3:31 anak Melea, anak Mina, anak Matata, anak Natan, anak Dawid, 3:32 anak Isai, anak Obed, anak Boas, anak Salmon, anak Nahason, 3:33 anak Aminadab, anak Admin, anak Arni, anak Hesron, anak Peres, anak Yahuda, 3:34 anak Yakub, anak Isaak, anak Abraham, anak Terah, anak Nahor, 3:35 anak Serug, anak Rehu, anak Peleg, anak Eber, anak Salmon, 3:36 anak Kenan, anak Arpakhsad, anak Sem, anak Noah, anak Lamekh, 3:37 anak Metusalah, anak Henoh, anak Yared, anak Mahalaleel, anak Kenan, 3:38 anak Enos, anak Set, anak Adam, anak Pohotala.
4:1 Yesus konowasaoh bain Roh Pohotala ang ohkot Io nohtah Sungoi Yordan. Roh Pohotala niting Io nokuh padang bolambah. 4:2 Ang anan Io tonihkos bain sehtan, ohpat pulu ondou kotahiou. Kotahin ohkot rih, Io eam kuman ino-inon. Jadi ang laiuoh Io komo bolo'u. 4:3 Sehtan nuhtui umba Io, "Ihko Anak Pohotala, kowa? Olai nyuhurih bahtu tuh monjadi luhte." 4:4 Yesus mutah, "Ang luwang Surat Borasih, tonyurat, 'Ulun eam dahpot bolom tahkan luhte iou.' " 4:5 Turus sehtan ngomin Yesus nokuh unuk ijo isung, tutang aang 'cokopijep mahto sehtan ngorinah ahkai-Oh, paring kolahca'an ang kolunon. 4:6 "Paring kowasa tutang ponahtou tuh ahkan ahku nyarahoh ahkan-Mu," hion sehtan umba Yesus, "tului paringoh jari tononga ahkak'ku, tutang ahku nonga ahkan iai bewe ijo ahku jolik umba io. 4:7 Paringoh tuh ahkan monjadi ain-Mu, amat Ihko suhkuntu'ut nyembah ahku." 4:8 Yesus mutah, "A'ang Surat Borasih, anai tonyurat, 'Nyembahrih Tuhan, Pohotalan'mu tutang mohalu io iou.' " 4:9 Turus sehtan ngomin Yesus nokuh Yerusalem tutang ngina Io ang ngosan bohuwung Lohpou Tuhan tutang nuhtui umba Io, "Ihko Anak Pohotala, kowa? Jadi nokohjuk tahkan ohtoi. 4:10 Tului ang luwang Surat Borasih anai tonyurat, 'Pohotala ahkan nyuhu molehkat-molehkat-Oh mohaga Ihko pio-pios.' 4:11 Tutang ka'a, 'Molehkat-molehkat ahkan nyambut Ihko honong longon iro, mangat pa'an-Mu eam totuhking ang bahtu.' " 4:12 Yesus mutah, "Ang luwang Surat Borasih, tonyurat, 'Ara nikos Tuhan Pohotalan'mu.' " 4:13 Uli sehtan tondo nikos Yesus hapan kokaron mahcam cara, io nohtah Yesus tutang ngindoi ohkot ijo pios. 4:14 Pongohuli Yesus buli nokuh Galilea; tutang Io tongowasa bain Roh Pohotala. Tarung tohou arop-Oh johcok nokuh sohapus tana rih. 4:15 Io majar ang lohpou sombayang, tutang paring ulun monara Io. 4:16 Yesus hihkas hino nokuh Nasaret, unuk Io tonohajo. Aang ondou Sabat, numbun kopahtutoh Io tulak nokuh lohpou sombayang. Io tombok ahkan mbasa Surat Borasih, 4:17 tutang tononga ahkai-Oh surat Nabi Yesaya. Io nguap balun surat rih, turus Io nyombang ayat tuh, 4:18 "Roh Tuhan anai aang Ahku, tului Io jari ngahtang Ahku ahkan mborihtaoh Kabar Hinut ahkan ulun porosbolum. Io nguhtus Ahku ahkan monyiar koliwus bagi ulun tonotawan tutang kopios ahkan ulun ijo bobulen; ahkan momorodehkaoh ulun tohenyek 4:19 tutang monyiar polombutoh wayah Tuhan monyolamat ukup-Oh." 4:20 Yesus mbalun huli buhku rih, tutang ngombulioh ahkan ijo nginaoh, tutang turus tuot. Paring ulun ang lohpou sombayang rih, uras nopahjah Io. 4:21 Tutang Yesus nopara bopander umba iro koloutuh, "Ayat-ayat Surat Borasih tuh, ang ondou tuh nyolung aang rahat ihkam ngonih-Oh." 4:22 Auh-auh ijo konohawot-Oh hinut samasino, nyiring iro helan tutang momihak Io. Iro nuhtui, "Eamkah Io tuh anak Yusep?" 4:23 Mahka Yesus mutah auh'ndo, "Musti ihkam ahkan hapa tindung tuh tohimo Ahku, 'Dokter, ngopiosrih arop'mu bongom. Kahtahelan ijo ihkai ngonih Ihko nguai ang Kapernaum, nguai ka'a ang lowuhuman-Mu bongom.' " 4:24 Yesus mondahang auh hino, "Ingatrih, eam anai nabi ijo tomohoromat ang lowui humaioh bongoi. 4:25 Tahpi ngonihrih: Aang jaman Elia, kotihka eam aro nosuluh uhjan tolu sotengah toun kotahiuoh, nyolung lo'u ijo paham ang paring lowu. Aang ohkot orih anai aro balu-balu ang Israel. 4:26 Oluka kolourih, Pohotala eam nyuhu Elia tulak nokuh ahkan ihco tahkan marak balu-balu rih, molekan tihkas ahkan ihcobehti balu ang Sarfat ang daerah Sidon. 4:27 Kolourih ka'a, ang jaman Nabi Elisa anai aro ulun ang Israel boponyahkit belang, ijo mopihkoh, tahpi eam ihcobehti ka'a tahkan iro tongopios, kocoali Naaman ulun Siria rih." 4:28 Paring ulun ang lohpou sombayang rih bosingi samasino ohkot ngonih hal rih. 4:29 Iro tombok turus muhko Yesus nokuh luar lowu, tutang ngitot-Oh nokuh kowangkorong, ang umoh lowun iro tonombok. Iro nohuang nonjuhung Io nyolong nokuh kowang korong. 4:30 Tahpi Yesus nyolat aropoh holat ulun aro rih turus hihkas. 4:31 Pongohuli Yesus hihkas nokuh lowu Kapernaum ang Galilea. Ang anan Io majar ulun-ulun ang ondou Sabat. 4:32 Iro helan nohto caraoh, Io majar, tului Io bopander hawui pongaroh. 4:33 Ang anan ang lohpou sombayang rih anai ihcobehti ijo sonorupang roh ja'at ulun rih bokociak-kociak, 4:34 "O Yesus, ulun Nasaret, Ihko kani nguan inon umba ihkai? Ihko lombut ahkan morusak ihkai? Ahku ta'an iai Ihko: Ihko sonuhu ijo borasih tahkan Pohotala!" 4:35 "Tonih!" Karahang Yesus ahkan roh ja'at rih. "Solukarih ihko tahkan ulun tuh!" Turus roh ja'at rih moropihtan ulun rih, ang tohimo ulun aro, pongohino soluka tahkan ulun rih tahpi eam ngoporosoh. 4:36 Paring ulun helan, tutang nuhtui hawoi aropoh, "Eam inon auh-auh-Oh. Umba bopongaroh tutang kowasa Io moretahoh roh-roh ja'at rih soluka, tutang iro soluka ka'a!" 4:37 Mahka kabar tohou Yesus johcok ang sohapus tana hokodiling. 4:38 Yesus nohtah lohpou sombayang rih, turus tulak nokuh lohpou Simon. Opu Simon rahat poros mondam, tutang ulun-ulun nyorihtaoh hal rih ahkan Yesus. 4:39 Yesus hihkas nokuh unuk opu Simon kaling, turus muhko darom orih. Darom rih nihou, tutang opu Simon rih turus kuat tutang nohalu iro. 4:40 Kotihka mahtanondou rahat bolop, paring ulun ngomin ahkan Yesus, konduang-konduangoh ijo poros mahca-mahcam ponyahkit. Yesus ngina longoi-Oh nokuh ngosan kuhung iro nyino-nyinong tutang ngopios iro paring. 4:41 Roh-roh ja'at ka soluka tahkan aro ulun, hawoi ngombak-ngoriak, "Ihko Anak Pohotala!" Tahpi Yesus ngorahang iro tutang eam aro nonga ijin iro nuhtui kolourih, tului iro kota'an ijo Io Lahca Ponyolamat. 4:42 Aang ohkot mahtanondou punai lombut Yesus nohtah lowu rih, turus tulak nokuh ihco unuk ijo tonih-benyem. Ulun-ulun nopara ngurah Io, tutang kotihka iro nyombang Io, iro ngurah-jalan, mangat Io ara nohtah iro. 4:43 Tahpi Yesus nuhtui, "Kabar hinut tohou koloukuwoh Pohotala moretah, harus Ahku mborihta ka'a ang nyinong karon-lowu bohkon, tului ahkan orih rih, Pohotala nyuhu Ahku nokuh kolunon." 4:44 Tului orih Yesus bokotbah ang luwang lohpou-lohpou sombayang ang sohapus tana Yudea.
5:1 Aang ihco ohkot, Yesus tombok ang saran Danou Genesaret. Aro ulun hokosihki-kupuroh ahkan ngonih borihta tahkan Pohotala. 5:2 Yesus nohto duo alut ang tohpin rih; ulun-pongohcinoh jari jahkat tahkan alut-alut rih, tutang beteng muhi jala'ndo. 5:3 Yesus jahkat nokuh ihco alut, iorih alut Simon, turus nyuhu Simon nulak alutoh rih, isut mahcu tahkan saro. Yesus tuot ang luwang alut rih tutang majar ulun aro. 5:4 Uli tondo mongajar, Io nuhtui umba Simon, "Meseurih nokuh unuk ijo timbon, tutang nimbai jala'mu ahkan nawan ohcin." 5:5 "Amai Guru," hion Simon, "'Cokombun ngolomi ihkai bogawi paham, tahpi eam duon ino-inon! Tahpi tului Amai nyuhu, olai, ahku ahkan nimbai jala hino." 5:6 Ulimba iro nguanoh rih, iro ngondahpot kolourih karo ohcin nyiring jala'ndo nopara boruhtat. 5:7 Tului orih iro nyawot dohop umba injah-jolahan iro ang alut ijo bohkon. Injah-jolahan iro rih lombut, turus iro sama-sama nyuang koduo alut rih tuwi umba ohcin, nyiring alut-alut rih nyiring kahom. 5:8 Ohkot Simon nohto rih, io nyembah suhkuntu'ut ang tohimo Yesus, turus nuhtui, "Nohtah ahku, Tuhan! Tului ahku ulun ijo bodusa!" 5:9 Simon tutang paring ulun ijo homboh io helan nohto arooh ohcin ijo iro nyalaoh. 5:10 Kolourih ka'a umba injah-jolahan Simon, iorih Yakobus tutang Yohanes, anak-anak Sebedeus. Yesus nuhtui umba Simon, "Ara mihkoh! Nopara uhuntuh, ihko ahkan monjadi ponjala ulun." 5:11 Simon tutang injah-jolahaioh nguhut alut-alut rih ahkan isun kowang, pongohino nohtahoh paringoh turus iro ngohasu Yesus. 5:12 Aang sino ondou, Yesus anai ang ihco lowu. Ang anan anai ihcobehti bahkas ijo behtiouoh tuwi umba ponyahkit belang ijo mongolioh. Kotihka io nohto Yesus, io suhkuntu'ut nyembah ang tohimooh hawoi nyawot, "Amai, amat Amai kani, Amai duon ngopios ahku!" 5:13 Yesus nambit ulun rih hawoi nuhtui, "Ahku kani, piosrih ihko!" Wayah rih ka'a ponyahkit orih nihou. 5:14 Turus Yesus baca io nyiar aang orih ahkan ia-iai ka, hion Yesus, "Tulak nokuh imam, tutang nyawot io ahkan momasti ihko jari pios. Turus tulak nonga pononga kolou ijo ponoretah Museh, kolou kopahtut ahkan ulun-ulun ijo ihko jari tu'u-tu'u pios." 5:15 Tahpi kabar tohou Yesus rih tosiar nokuh umo-umoh, tutang aro ulun lombut ahkan ngonih-Oh, tutang ahkan konopios tahkan ponyahkit iro. 5:16 Uliorih rih Yesus tulak bodo'a nokuh unuk ijo tonih. 5:17 Aang sino ondou kotihka Yesus mongajar, anai pira-pira ulun Parisi tutang guru-guru agama tuot ang anan. Iro lombut tahkan Yerusalem tutang tahkan lowu-lowu ang Galilea tutang Yudea. Kuwasa Tuhan anai ang Yesus unuk ngopios ulun-ulun poros. 5:18 Aang ohkot rih pira-pira ulun lombut ngitot ihcobehti ijo mahtoibehtiu ijo kaling ang ngosan kahcangoh. Iro ngurah jalan ngitot ulun rih, nokuh luwang lohpou, mangat dahpot ngina io ang tohimo Yesus. 5:19 Tahpi tului ulun rih paham aro ang anan, iro eam duon ngitotoh nyolong. Bain tului orih iro ngohtun io nokuh diang sahpou lohpou. Turus iro ngahkas sahpou, tutang monosuluh io sama-sama umba kahcangoh ang tohimo Yesus, ijo ang tohun ulun aro rih. 5:20 Kotihka Yesus nohto eam inon kohahjoioh porocaya iro, Io nuhtui umba ulun rih, "Konduang, dusa'mu jari tonapun." 5:21 Guru-guru agama tutang ulun-ulun Parisi nopara hopander sama arop iro, "Iai ulun tuh ijo bohanyi ngonja'at Pohotala? Iai ijo duon ngapun dusa-dusa, bohkon umba Pohotala bongoi?" 5:22 Yesus ta'an pongisok iro. Jadi Io nuhtui, "Ombai ihkam hokisok kolourih ang luwang ahtoi ihkam? 5:23 Umoh ijo labih jeleng, nuhtui, 'Dusa'mu jari tonapun,' ata'ai nuhtui, 'Kuatlah tutang nyalanrih!'? 5:24 Tahpi huntuh Ahku ahkan ngorinah ahkan'kam ijo ang ngosan tana tuh Anak Ulun bokowasa ahkan ngapun karon-dusa." Turus Yesus nuhtui umba olun mahtoibehtiu rih, "Kuatlah, ngohtun kahcangkaruk'mu tutang buli iou!" 5:25 Bojeleng ulun rih kuat ang tohimo iro paring, turus ngahtang kahcangkarukoh, tutang buli honong monara Pohotala. 5:26 Iro paringoh helan samasino, turus monara Pohotala. Tutang hawui nanyam ijo mihkoh, iro nuhtui, "Helan samasino aang jari, ijo ihto nyaksioh ondou tuh!" 5:27 Ulirih Yesus soluka tutang nohto ihcobehti ponagih pajak, bogare Lewi, rahat tuot ang kantoroh. Yesus nuhtui umba io, "Ngohasu Ahku." 5:28 Lewi tombok tutang nohtah paringoh, turus ngohasu Yesus. 5:29 Uliorih rih Lewi nguan pesta ang lohpouoh ahkan Yesus. Aro ponagih pajak tutang ulun-ulun bohkon umba kuman homboh umba iro. 5:30 Papira ulun Parisi tutang guru-guru agama, nanyam eam sanang turus nuhtui umba murid-murid Yesus, "Ombai ihkam paringoh kuman ngorih umba ponagih pajak tutang ulun-ulun ijo eam pios?" 5:31 Yesus mutah, "Ulun ijo borigas eam porulu dokter, tihkas ulun ijo poros iou. 5:32 Ahku lombut eam ahkan na'ah ulun-ulun ijo nanyam aropoh jari hinut, molekan ulun-ulun ijo bodusa, mangat'ndo hubah tahkan dusa-dusan'ndo." 5:33 Ulun-ulun nuhtui umba Yesus, "Murid Yohanes tutang murid ulun-ulun Parisi bojoin puasa tutang bodo'a. Tahpi murid-murid'mu kuman tutang ngorih." 5:34 Yesus mutah, "Inonrih ihkam duon nyuhu ulun pomasap, puasa ang pesta kawin, kotahin pongaten bahkas masih sama-sama iro? Puna eam! 5:35 Tahpi ahkan johcok ohkotoh, pongaten bahkas rih ahkan konomin tahkan iro. Aang ohkot orih rih iro ahkan puasa." 5:36 Turus Yesus monyorihta ahkan iro porobasa tuh, "Eam aro ulun ijo nupang kolambi ijo oko umba 'cokarabit benang tahkan kolambi bohua rih. Tului kolambi ijo oko borutat bain benang ijo bohua rih. Mahihino benang tupangoh ihco bohua rih eam cuhcuk umba kolambi ijo soun rih. 5:37 Kolourih ka'a eam aro ulun ijo nyuang anggur bohua nokuh luwang tolehkung uhpak ijo oko, tului anggur bohua orih ahkan kotuluioh tolehkung usang rih pusit. Mahka anggur orih botusuh, tutang tolehkungoh rusak. 5:38 Anggur ijo bohua harus nyuang ang tolehkung ijo bohua. 5:39 Kolourih ka'a eam aro ulun, ijo kani ngorih anggur ijo bohua, uli ngorih anggur ijo usang. 'Anggur ijo usang rih labih nyoling,' hioioh."
6:1 Aang sino ondou Sabat, kotihka Yesus nyuru ihco umo gandum, murid-murid-Oh ngohtom gandum rih. Iro ngoluhpotoh gandum rih umba longoi, tutang turus kumaioh. 6:2 Pira-pira ulun Parisi nuhtui, "Ombai ihkam molanggar hukum-hukum agaman ihto, tului nguan ijo ngohana aang ondou Sabat?" 6:3 Yesus mutah, "Jaha pu'uoh ihkam mbasa tohou ijo konuanoh Lahca Dawid, kotihka io tutang ulun aiu bolo'u? 6:4 Io nyolong ahkan luwang lohpou Tuhan tutang ngomin luhte ijo jari tonyorahoh ahkan Pohotala, turus kumaioh. Pongohuli tonongaoh ka'a ahkan ulun aiuoh luhte rih. Podahal numbun hukum agaman ihto, imam beweu ijo duon kuman luhte rih." 6:5 Turus Yesus nuhtui, "Anak Ulun bokowasa isun ondou Sabat!" 6:6 Aang sino ondou Sabat ijo bohkon, Yesus tulak mongajar ang lohpou sombayang. Aang anan, anai ulun ijo longoi silaioh mahtoi. 6:7 Pira-pira guru agama tutang ulun Parisi kani ngurah kosalan Yesus, ahkan iro tou ngadu Io. Jadi iro turus nohtoani, inon Io ahkan ngopios ulun ang ondou Sabat. 6:8 Tahpi Yesus kota'an tiruk iro. Mahka Io nuhtui umba ulun ijo mahtoi longoi silai orih, "Olai, tombok ang ohtoi ang boun!" Ulun rih kuat, turus tombok ang anan. 6:9 Pongohino Yesus ngisok umba ulun-ulun ijo anai ang anan, "Numbun agaman ihto, tou nguan inon ang ondou Sabat? Nguan ijo hinut ata'ai nguan ijo ja'at? Monyolamat ulun ata'ai moncolahka ulun?" 6:10 Yesus nohto hokodiling ahkan iro paring, turus nuhtui umba ulun rih, "Nyulukohrih longon'mu." Ulun rih nyulukoh longoioh, tutang longoi ka pios. 6:11 Tahpi guru-guru agama tutang ulun-ulun Parisi rih bosingi samasino, tutang nopara bohaum tohou inon ijo tou iro nguai nohimo Yesus. 6:12 Aang ohkot rih Yesus nuhkat nokuh pupung puruk kani bodo'a. Aang anan Io bodo'a ahkan Pohotala sokombun ngolomi rih. 6:13 Amat ondou jari boloang, Io na'ah murid-murid-Oh, turus ngopili duo balas behti tahkan iro. Io napa aran koduo balas behti rih, karon-rasul. Iro anairih: 6:14 Simon (ijo konohawot-Oh Petrus), tutang Andreas konduang Simon rih, Yakobus tutang Yohanes, Pilipus tutang Bartolomeus, 6:15 Mateus tutang Tomas; Yakobus anak Alpeus, tutang Simon (ulun Selot), 6:16 Yudas anak Yakobus, tutang Yudas Iskariot ijo pongo hino, monjadi pongorana Yesus. 6:17 Pongohino Yesus mosuluh tahkan puruk rih, homboh umba rasul-rasul rih, turus tondo tutang tombok ang ihco unuk ijo ngondahtah. Aang anan anai ka'a ijo kopulau hajo murid-murid-Oh ijo bohkon, tutang aro ulun ijo lombut tahkan umo-umoh tahkan hapus Yudea, tutang Yerusalem, tutang lowu-lowu Tirus tutang Sidon ijo saran tasik. 6:18 Iro lombut kani ngonih auh Yesus, tutang ahkan konopios tahkan karon-ponyahkit'ndo. Iro ijo sonorupang roh ja'at lombut ka'a tutang tonopios. 6:19 Paring ulun ngurah jalan nokaweh Yesus, tului anai kowasa ijo bolua tahkan behtin Yesus, ijo ngopios iro paring. 6:20 Yesus nopahjah murid-murid-Oh, turus nuhtui, "Kosanangrih ihkam ulun-ulun porosbolum, tului ihkam anairih anak ukup ain Pohotala! 6:21 Kosanangrih ihkam ijo bolo'u uhuntuh; ihkam ahkan konombosuhoh! Kosanangrih ihkam ijo nangih uhuntuh; ihkam ahkan ngota'o! 6:22 Kosanangoh ihkam, amat konohiri ulun, tonulak, tonohina tutang tonopitnah bain tului Anak Ulun! 6:23 Nabi-nabi aang jaman houn tononguanoh kolourih ka'a. Amat hal orih nyolung, hondakleh ihkam sanang ahtoi tutang nari honong jorih, tului hajo upah tonahtap ahkan ihkam ang soruga. 6:24 Tahpi colahkarih ihkam ijo tahtou uhuntuh; tului ihkam jari nginyam komomih-kopioioh! 6:25 Colahkarih ihkam ijo bosuh huntuh; tului ihkam ahkan bolo'u! Colahkarih ihkam ijo ngota'o huntuh; tului ihkam ahkan poros ahtoi, tutang nangih! 6:26 Colahkarih ihkam, jahka paring ulun monara ihkam; tului kolouorih ka'a tahtu ajuh iro monara nabi-nabi pobula jaman lomoi." 6:27 "Tahpi ahkan ihkam ijo ngonih Ahku huntuh, Ahku nonga pohtoh tuh: Ngasi musuh-musuh'kam, tutang nguan kopios umba ulun ijo bosingi ihkam. 6:28 Mborehkat ulun ijo tatai nulat'kam, tutang bodo'a ahkan ulun ijo ja'at tohimo'kam. 6:29 Amat ulun ngahpek kohcom'kam ijo sila koto'u, nyuhu io ngahpek kohcom'kam sila komuloi hino. Amat jubah'kam tononyilou, nonga ka'a kolambi'kam. 6:30 Amat ulun nyawot aangihco tahkan ihko, nonga rih ahkaioh; tutang amat ramun'kam tononyilou, ara ihko nyawotoh huli. 6:31 Nguan umba ulun bohkon, kolou ijo ihkam jolik ulun bohkon nguai umba ihkam. 6:32 Amat ihkam ngasih ulun-ulun ijo ngasih ihkam beweu, inon gunaioh? Ulun bodusa ka'a ngasih ulun ijo ngasih iro! 6:33 Tutang amat ihkam nguan kopios umba ulun-ulun, ijo nguan kopios ahkan'kam beweu, inon balos'kam? Ulun bodusa mahi nguan kolourih! 6:34 Tutang amat ihkam nyahaman duit baya ahkan ulun-ulun ijo tou nahuroh, inon balos'kam? Ulun bodusa ka'a nyahaman duit ahkan ulun bodusa, turus nyawotoh nahuroh! 6:35 Koharusoh eam kolourih! Ihkam sobalikoh harus ngasih musuh'kam, tutang nguan aang hinut ahkan iro. Ihkam harus nonga pohonjaman, tutang ara harapoh tou buli. Amat kolourih uhpah'kam ahkan hajo, tutang ihkam ahkan monjadi anak-anak Pohotala Ijo Maha Isung. Tului Pohotala hinut ahtoi nohimo ulun ijo eam ta'an torimakasih, tutang tohimo ulun ijo ja'at ka'a. 6:36 Hondakoh ihkam monjadi pongasih kolou Amai'kam ijo tuwi umba pongasih!" 6:37 "Ararih mosara ulun bohkon, mangat ihkam bongom ka'a eam tomosara bain Pohotala. Ararih mohukum ulun bohkon mangat ihkam bongon ka'a ara tomohukum Pohotala. Ngapunrih ulun bohkon, mangat Pohotala ka'a ngapun ihkam. 6:38 Tongarih ahkan ulun bohkon, mangat Pohotala ka'a nonga ahkan'kam; ihkam ahkan norima pononga ijo labih molowi, ijo jari tonakar sito-siton ahkan'kam. Tului tahkar ijo ihkam hapaoh ahkan ulun bohkon, ahkan tohapa Pohotala ahkan'kam." 6:39 Pongohuli Yesus monyorihta ahkan iro porobasa pongo tuh, "Amat ulun bobulen niting ulun bobulen ijo bohkon, musti koduo-duooh rih ahkan botahak nokuh luwang lowong. 6:40 Eam anai murid ijo labih hajo tahkanumba guruoh. Tahpi murid ijo jari opah ajaroh, ahkan monjadi sama kolou guruoh. 6:41 Ombai ihkam nohto poruhuk luwang mahtan konduang'kam, rahatanaioh tohtokkahju ijo ang mahta'kam bongom eam ihkam nontoanioh? 6:42 Koloukuwoh ihkam duon ngohawot ahkan konduang'kam, 'Olai, konduang, ahku polua poruhukkahju atuh rih tahkan mahtan'kam,' Rahatanaioh ang luwang mahtan'kam bongom, tohtokkahju ijo eam ihko nohto? O ulun pura-pura! Poluarih soun tohtokkahju ijo anai ang mahtan'kam bongom. Punan rih ihkam duon nohto honong tarang tutang dahpot mopolua poruhukkahju tahkan mahtan konduang'kam." 6:43 "Pu'un ijo bosiwuh eam mua bua ijo ja'at. Kolourih ka'a pu'un ijo eam bosiwuh eam mua bua ijo pios. 6:44 Nyinong pu'un, ulun ngosonooh tahkan buaoh. Ruwut duhi eam tou mua bua sikun, tutang ruwut duhi eam mua bua anggur. 6:45 Ulun ijo pios poluaoh hal-hal ijo hinut, tului ahtoioh tuwi umba kohinut. Ulun ijo ja'at nguan hal-hal ijo ja'at tului ahtoioh tuwi umba koja'at. Tului inon ijo konohawot bain nyama jorih ijo momujar tahkan ahtoi." 6:46 "Ombai ihkam na'ah Ahku, 'Tuhan, Tuhan,' tahpi eam molalus inon ijo Ahku nuhtui ahkan'kam? 6:47 Umba iaikah dahpot ihto nyamaoh ulun ijo lombut ahkak-Ku, tutang ngonih auh-auh-Ku, honong molalusoh? -- Piosrih Ahku, pokarahoh ahkan'kam --. 6:48 Io kolou ulun ijo kotihka nombok lohpou, ngali timbo-timbon, turus napa galangoh umba bahtu. Aang ohkot anai danum ba'ah noturung lohpou rih, lohpou orih eam duon hogunde tului jari tonombok ang ngosan galang ijo pios. 6:49 Tahpi ulun ijo ngonih auh-auh-Ku tutang eam molalusoh, jorih kolou ihcobehti ulun ijo nombok lohpouoh eam anai galangoh. Amat danum ba'ah noturung lohpou rih, lohpou rih jeleng bolihang; tutang rusakoh hajo samasino!"
7:1 Umbot jari nuhtui hal-hal orih ahkan ulun aro, Yesus tulak nokuh Kapernaum. 7:2 Ang anan anai komandan sorodadu Ruma ijo anai tepun jihpon ijo paham ponokasihoh. Jipoi rih mondam karas nyiring kani palus. 7:3 Aang ohkot komandan rih ngonih tohou Yesus, io nyuhu pira-pira okon ulun Yahudi tulak nokuh-Oh ahkan nyawot mangat Io lombut tutang ngopios jihpoi rih. 7:4 Kotihka johcok umba Yesus, ulun-ulun rih nyawot honong paham mangat Yesus dohop komandan rih, "Komandan tuh punatou dahpot pondohop bain Amai," hion'ndo umba Yesus, 7:5 "tului io ngasih uhtus ihto, tutang jari mangun lohpou sombayang ahkan ihkai." 7:6 Mahka Yesus tulak homboh umba iro. Kotihka Yesus kani johcok ang lohpou rih, komandan rih nyuhu injah-injahoh ahkai nuhtui, "Eam usah Amai uyu-uyuh nokuh lohpou'ku. Ahku eam pahtut norima Amai ang lohpou'ku. 7:7 Orih kotuluioh ahku bongok eam bohanyi nyombang Amai. Jadi nonga iou poretah mangat jihpok'ku pios. 7:8 Tului ahku ka'a minda umba poretah ijo isung umba ahku, tutang ang pinda ahku anai ka'a karon-sorodadu ijo harus numbun aang poretah'ku. Amat ahku moretah ihcobehti sorodadu, 'Tulak!' io ka tulak; tutang amat ahku moretah umba ijo bohkon, 'Olai kohtoi!' io ka lombut. Tutang amat ahku moretah jihpok'ku, 'Nguan tuh!' io ka nguaioh." 7:9 Yesus helan ngonih orih. Io ngulos tutang nuhtui umba ulun aro ijo rahat nuhtut Io, "Eam inon ulun tuh. Ang louk uhtus Israel ka jaha pu'u Ahku nyombang koporocaya kohajon tuh!" 7:10 Kotihka ulun-ulun ijo tonyuhu rih buli ahkan lohpou komandan rih, jihpoi orih jari pios. 7:11 Eam tahi pongohuli, Yesus hihkas nokuh lowu Nain. Murid-murid-Oh tutang ulun aro hihkas homboh Io. 7:12 Ohkot Yesus johcok ang doni boun bauntukang lowu, ulun-ulun rahat ngihtot otu nokuh luar lowu. Ijo mahtoi orih, yorih anak bahkas, anak tukan ihcobehti bawi balu. Aro ulun lowu homboh inaioh rih. 7:13 Kotihka Tuhan Yesus nohto ulunbawi rih, Io ngasianyam umba io turus nuhtui, "Ara nangih, inai!" 7:14 Pongohuli rih Yesus ngondoni tobala otun anak rih, tutang nambit tobalaoh. Mahka ulun ijo ngohtun tobala rih tondo. Yesus nuhtui, "O anakbiou, Ahku nyuhu ihko monyun!" 7:15 Anakbiou ijo jari mahtoi rih monyun, tuot tutang nopara pander. Mahka Yesus nongaoh ahkan inaioh. 7:16 Paring ulun mihkoh tutang nopara monara Pohotala. Iro nuhtui, "Ihcobehti nabi hajo jari lombut ang tohun-louk ihto! Pohotala jari lombut ahkan monyolamat ukup-Oh!" 7:17 Kabar tohou Yesus rih tosiar ang sohapus Yudea tutang karon-lowu hokodilingoh. 7:18 Murid-murid Yohanes monyorihta ahkan Yohanes paring angjadinyolung orih. Mahka Yohanes na'ah duo behti muridoh 7:19 turus nyuhu iro hihkas nokuh Tuhan Yesus tutang ngisok Io, "Amairih ulun rih ijo ahkan lombut numbun bowot Pohotala, ata'ai harus ihkai ngindoi 'cobehti bohkon?" 7:20 Koduo murid Yohanes rih tulak nokuh Yesus tutang nuhtui, "Yohanes Popondus nyuhu ihkai ngisok umba Amai, inonrih Amai ulun ijo lombut numbun bowot Pohotala, ata'ai harus ihkai ngindoi ulun bohkon?" 7:21 Ohkot rih, Yesus ngopios aro ulun, tutang muhko aro roh ja'at tutang nguan aro ulun bobulen tou nohto. 7:22 Jadi Yesus mutah, "Bulirih nokuh Yohanes tutang mander ahkaioh, inon ijo ihkam ngonih, tutang nohto: ulun bobulen tou nopahjah, ulun mahtoipa'ai tou nyalan, ulun ijo boponyahkit belang ijo mokorieng pios, ulun borengen ngonih, ulun mahtoi bolum huli, tutang Kabar Hinut tahkan Pohotala, jari tonyiar ahkan ulun-ulun porosbolum. 7:23 Kosanang rih ahkan ulun ijo eam anai porokehtoi ahkan nulak Ahku." 7:24 Uli ulun-ulun sonuhu Yohanes rih buli, Yesus nopara bopander umba ulun aro tohou Yohanes, hioi-Oh, "Ihkam tulak nokuh padang bolambah, ahkan nohto inon? Ijo kopu'un poring ijo tonahpi bahiu? 7:25 Ihkam tulak ahkan nohto inon? Ihcobehti ijo hopokajan bohinoi? Ulun-ulun ijo hopokajan kolourih tutang ijo bolum molobien mohcon aang istana lahca! 7:26 Jadi ihkam bolua ahkan nohto iai? Ahkan nohto ihcobehti nabikah? Tu'u, malah anai labih tahkanumba ihcobehti nabi. 7:27 Tului Yohanes orihrih ijo konohuang luwang ayat Surat Borasih tuh, 'Tuhrih ulun sonuhu-Ku,' hion Pohotala, 'Ahku ahkan nyuhu io labih houn tahkanumba-Mu, ahkai io nawas jalan ahkan-Mu!' " 7:28 "Ingatrih!" hion Yesus hino, "ang kolunon tuh eam pu'u anai ulun ijo labih hajo tahkan Yohanes Popondus. Tahpi ulun ijo paling koik ang louk ukup Pohotala, labih hajo tahkan Yohanes Popondus." 7:29 Paring ulun -- Tahput ponagih-ponagih pajak -- ngonih Yesus nuhtui hal rih; iro ulun-ulun ijo jari mone'et sawot kohondak-kohondak Pohotala, tutang kani tonopondus bain Yohanes. 7:30 Tahpi ulun-ulun Parisi tutang guru-guru agama eam kani norima rancana Pohotala ahkan arop'ndo. Iro eam kani tonopondus bain Yohanes. 7:31 Turus Yesus bopander hino, hioi-Oh, "Umba inon harus Ahku nindung ulun-ulun jaman tuh? Kolou inonkah iro? 7:32 Iro kolou anak-anak ijo tuot ang pasar; ihcokopulou na'ah umba ijo bohkon, 'Ihkai ngonyahpi lagu jorih ahkan ihkam, tahpi ihkam eam kani narinasai! Ihkai nyanyi ihco lagu koporosahtoi tutang ihkam eam nangih!' 7:33 Yohanes Popondus lombut -- io bopuasa tutang eam ngorih anggur -- tutang ihkam nuhtui, 'Io nyalung sehtan!' 7:34 Anak Ulun lombut -- Io kuman tutang ngorih -- turus ihkam nuhtui, 'Topahjah ulun rih! Bokora, pombusou, hojolahan umba ponagih pajak, tutang hojolahan umba ulun bodusa.' 7:35 Oluka kolourih, kolomunahtoi Pohotala gihtan tahkan paring ulun ijo norima Oh." 7:36 Ihcobehti ulun Parisi, bogare Simon, na'ah Yesus kuman. Yesus tulak nokuh lohpouoh tutang tuot kuman. 7:37 Ang lowu rih anai ihcobehti bawi ijo bolum ang dusa. Ohkot io ngonih ijo Yesus beteng kuman ang lohpou ulun Parisi rih, io lombut hawoi ngomin ihco kasa pualam bosuang minyak buanharum. 7:38 Io tombok ang sila likut Yesus doni pa'ai-Oh tutang nangih homboh misa pa'an Yesus hapa danum mahtaioh. Uli hino pa'an Yesus tongapitoh umba balouoh turus ngarokoh tutang nahtaoh umba minyak buanharum. 7:39 Kotihka ulun Parisi ijo morawe Yesus nohto ang rih, io nuhtui ang ahtoioh, "Jahka Io tuh Nabi, puna Io ta'an iai ulunbawi tuh ijo ngendeh Io, tutang ijo ulunbawi rih bolum a'ang dusa!" 7:40 Turus Yesus nuhtui umba Simon, "Simon, anai aangihco ijo kani Ahku mander ahkan ihko." "Yo, Amai Guru," hion Simon, "nuhtuirih." 7:41 Yesus nuhtui, "Anai duo behti ijo nguhtang umba ulun ijo nyohaman duit. Ijo'cobehti nguhtang limo lahtus duit perak, tutang ijo'cobehti hino limo pulu duit perak. 7:42 Koduo-duooh eam duon mbayar uhtangoh rih, mahka uhtang iro tomotihouoh. Orih, iai tahkan iro duo behti rih ahkan labih mongasih umba ulun ijo monjohamanoh duit rih?" 7:43 "Ahku niruk ulun ijo paling aro tomotihou hutangoh!" hion Simon. "Tiruk'mu tu'u," hion Yesus. 7:44 Turus Yesus nopahjah umba ulunbawi rih, tutang nuhtui umba Simon, "Ihko nohto ulunbawi tuh? Ahku lombut nokuh lohpou'mu, tutang ihko eam nyodia danum hapa muhi pa'ak-Ku; tahpi ulunbawi tuh jari muhi pa'ak-Ku umba danum mahtaioh, tutang ngahpitoh umba balouoh. 7:45 Ihko eam nyambut Ahku hawui ngarok, tahpi ulunbawi tuh eam tondo ngarok pa'ak-Ku, tahkan Ahku lombut ang ohtoi. 7:46 Ihko eam nusuh minyak ang kuhung-Ku, tahpi ulunbawi tuh jari nusuh minyak buanharum ang pa'ak-Ku. 7:47 Tu'u-tu'u: pongasihoh ijo hajo rih bokorinah ijo dusaioh ijo aro jari dahpot apun! Amat ulun tonapun honjiot, io ahkan pongasioh honjiot ka'a." 7:48 Turus Yesus nuhtui umba ulunbawi rih, "Dusa-dusan'mu jari tonapun." 7:49 Ulun-ulun bohkon ijo tuot kuman homboh umba Yesus nopara nuhtui sama arop'ndo, "Iai Ulun tuh nyiring duon ngapun karon-dusa?" 7:50 Tahpi Yesus nuhtui umba ulunbawi rih, "Tului ihko porocaya umba Ahku, ihko tonyolamat. Tulak rih honong kosanang!"
8:1 Eam tahi pongohuli, Yesus tulak nokuh lowu-lowu tutang kapung-kapung, mangat mborihtaoh Kabar Hinut, ijo Pohotala nopara moretah kolou Lahca. Duo balas murid-Oh homboh umba Io. 8:2 Kolourih ka'a pira-pira ulunbawi ijo jari tongopios tahkan kowasa roh ja'at tutang ponyahkit. Iro rih Maria ijo konohawot Magdalena (pihtu roh ja'at jari dian tahkan io); 8:3 ka'a Yohana oruh Khuza, pogawai istana Horodes; Susana, tutang aro hino ulunbawi bohkon. Umba mbolanja aropbongoi, iro ndohop Yesus tutang murid-murid-Oh. 8:4 Ulun-ulun turus iou lombut nokuh Yesus tahkan pira-pira lowu. Tutang aang ohkot, jari aro ulun hopuhpung, Yesus mborihta ahkan iro porobasa uli tuh: 8:5 "Ihcobehti ulunpongumo tulak nuhkan bonyioh. Kotihka io rahat nuhkan, anai bonyi ijo tonuhkan ang jalan. Tongai toninjak ulun, tutang ijo tongai konukun bulung. 8:6 Anai ka'a tonuhkan ang unuk ijo bobahtu liang. Aang ohkot hoduring bonyi rih molanyu tului tanaoh koring. 8:7 Anai hino bonyi ijo tonuhkan ang tohun ruwut duhi. Ruwut rih bolum homboh bonyi rih, tutang moruwutoh nyiring mahtoi. 8:8 Tahpi anai hino bonyi ijo tonuhkan ang tana ijo subur, turus bolum tutang momua buaoh solahtus lihpet." Uli mborihta porobasa rih, Yesus nuhtui, "Amat anai tolinga pios ngonih!" 8:9 Murid-murid Yesus ngisok umba Io riman tahkan porobasa rih. 8:10 Yesus mutah, "Ihkam jari tononga pononga ahkan ngota'an ijo bokulim, tohou koloukuwoh Pohotala moretah kolou Lahca. Tahpi ulun-ulun bohkon tongajar umba porobasa, mangat iro nohtoanioh, tahpi eam ta'an inon ijo nyolung; tutang iro ngonih, tahpi eam solembang." 8:11 "Tuhrih rimai porobasa rih: Bonyi rih iorih auh Pohotala. 8:12 Bonyi ijo nuhkan aang jalan nindung ulun-ulun ijo ngonih auh orih. Tahpi Sehtan lombut tutang nahkou auh orih tahkan ahtoi iro, ahkan iro ara porocaya tutang tonyolamat. 8:13 Bonyi ijo tonuhkan ang unuk ijo bobahtuliang, nindung ulun ijo aang ohkot ngonih Kabar Hinut rih, norimaoh hawui sanang ahtoi. Tahpi Kabar Hinut rih eam muhat timbon ang ahtoi'ndo. Iro porocaya honjulu iou, tutang ang ohkot tihkas lombut, iro murtad. 8:14 Bonyi ijo nuhkan ang tohun ruwut duhi nindung ulun ijo ngonih Kabar Hinut rih, tahpi mihkoh tohou pombolum'ndo, hawui jolik bolum molowi tutang sanang ang luwang kolunon tuh. Paringoh mohahpit ahtoi'ndo nyiring eam aro momua bua ihco jadi. 8:15 Bonyi ijo tonuhkan ang tana ijo subur nindung ulun ijo ngonih Kabar Hinut rih, turus nginaoh luwang ahtoi ijo hinut tutang morong. Iro tahanngarot nyiring nihpun buaoh." 8:16 "Eam anai ulun ijo nutang sumbu turus nyokulopoh pindaluwang potoran, ata'ai nginaoh ang pinda kahtil. Tahpi Io ahkan nginaoh ang owuhoh, ahkan ulun paring nyolong, duon nohto koloangoh. 8:17 Eam anai ijo bosuhuk ijo eam ahkan tonopahjah; tutang eam anai ijo konongulim ijo eam ahkan tonguap tutang tongota'an. 8:18 Tului rih nohtoaniohrih pio-pios, inon ijo ihkam ngonih. Tului ulun ijo jari anaingina aang'co, ahkan tononga labih aro hino; tahpi ulun ijo eam anaingina aang'co, honjiot ijo magun anai aang io ahkan konomin ka'a." 8:19 Inai tutang konduang-konduang Yesus lombut nokuh Io, tahpi iro eam tou nyolong nokuh Io tului ulun dalou aro. 8:20 Mahka anai ihcobehti ijo nuhtui ahkan Yesus, "Amai, inai-Mu tutang konduang-konduang Amai anai ang kanaha. Iro jolik nyombang umba Amai." 8:21 Tahpi Yesus nuhtui umba iro, "Ulun-ulun ijo ngonih auh Pohotala tutang numbun orih, iro rih inai tutang konduang-konduang-Ku." 8:22 Ang sino ondou Yesus tutang murid-murid-Oh jahkat alut. "Olai, ihto tulak nokuh pohoi danou," hion Yesus umba iro. Mahka iro turus ka'a tulak. 8:23 Aang ohkot iro rahat bolayar, Yesus tiruh. Songela bahiu bolowut paham napuh danou rih. Danum nopara nyolong nokuh luwang alut nyiring mocolahka iro paringoh. 8:24 Murid-murid Yesus hihkas nokuh-Oh ngomonyun Io. Iro nuhtui, "Amai Guru, Amai Guru, ihto colahka!" Yesus monyun turus ningak bahiu tutang lucak ijo rahat holucak rih. Bahiu tutang lucak rih ka'a tondo turus danou nyolung teneng tu'u. 8:25 Turus Yesus nuhtui umba murid-murid-Oh, "Ombai ihkam eam porocaya umba Ahku?" Iro monjadi helan tutang mihkoh. Tutang hopander iro sama arop'ndo, "Iai kotu'ui ulun tuh nyiring nonga poretah ahkan bahiu tutang lucak, tutang Io ka tonote'et!" 8:26 Yesus tutang murid-murid-Oh, turus bolayar johcok tanah daerah Gerasa, ang pohoi Danou Galilea. 8:27 Aang ohkot Yesus sohowu ahkan kowang, Io tonokuh bain ihcobehti bahkas ijo sonorupang roh ja'at. Ulun rih tahkan lowu. Jari tahi io eam hopokajan tutang eam kani mohcon ang lohpou. Io tihkas kani mohcon ang lowong-lowong unuk tanom. 8:28 Kotihka io nohto Yesus, io ngoriak turus suhkuntu'ut nyembah ang toharep Yesus honong na'ah, "Yesus Anak Pohotala Ijo Ijo Palingisung! Ahkan Ihko inonoh ahku tuh? Ahku nyawot ara monyiksa ahku!" 8:29 Ulun rih nuhtui kolourih, tului Yesus moretah roh ja'at rih, soluka tahkanumba io. Jari bojoin io konowasa roh ja'at rih, nyiring oluka longoi tutang pa'aioh jari masung umba ratai bosi tutang io tomojaga tu'u-tu'u, io magun ka'a duon mahtot ratai bosi rih turus omin roh ja'at rih nokuh padang balambah. 8:30 Yesus ngisok umba ulun rih, "Iai aran'kam?" "Arak'ku 'Legiun'," putah ulun rih -- tului anai aro roh ja'at ijo jari nyolung kohuang behtiuoh. 8:31 Roh ja'at rih nyawot honong paham, mangat Yesus ara muko iro nokuh luwang Lowong Popahtoi. 8:32 Doni unuk rih anai aro samasino urak ijo rahat ngurah uhkui ang kowang puruk. Roh-roh ja'at rih nyawot honong paham umba Yesus mangat nongaijin nyolong nokuh luwang kawan urak rih. Tutang Yesus sotuju. 8:33 Mahka roh-roh ja'at rih soluka tahkan ulun rih, tutang nyolong koluwang kawan urak rih. Turus urak-urak rih nokoru tutang nomarang tahkan saran korong nokuh luwang danou, pongohino bolonyot. 8:34 Ulun-ulun pengindoi urak rih nohto, inon ijo jari nyolung. Mahka iro nokoru tutang monyiar kabarrih nokuh lowu tutang duhkuh kodilingoh. 8:35 Turus ulun-ulun soluka ahkan nohto inon ijo nyolung. Iro lombut nokuh Yesus, tutang ang anan iro nyombang ulun ijo jari, bokuhkoi tahkan roh-roh ja'at rih, rahat tuot doni pa'an Yesus. Io jari hopokajan tutang tirukoh jari morong. Iro monjadi mihkoh. 8:36 Iro ijo nohto kojodian rih, nyorihta ahkan ulun-ulun, koloukuwoh ulun orih konopios. 8:37 Turus paring ulun hapus tanah Gerasa rih, nyawot honong paham mangat Yesus nohtah unuk rih, tului iro paring mihkoh samasino. Jadi, Yesus lupat alut kani buli. 8:38 Ulun ijo jari bokuhkoi tahkan roh-roh ja'at rih nyawot umba Yesus, mangat io tou ngohasu. Tahpi Yesus nyuhu io tulak buli, hioi-Oh, 8:39 "Bulirih tutang nyiar ahkan iai, inon ijo jari konuan Pohotala ahkan'kam." Mahka ulun orih hihkas monyiar nokuh hapus kodiling lowu, inon ijo jari konuan Yesus umba io. 8:40 Kotihka Yesus buli nokuh pohoi danou, Io tonoharang honong jorih-jirah bain ulun-ulun tului iro ngindo-ngindoi Io. 8:41 Turus lombut ihcobehti kopala lohpou sombayang ang anan. Araioh Yairus. Io suhkuntu'ut ang tohimo Yesus tutang nyawot honong paham, mangat Yesus lombut nokuh lohpouoh, 8:42 tului ihco-ihcooh anak bawioh ijo boumur duo balas toun, doni palus. Podehan Yesus nyalan nokuh lohpou Yairus, ulun-ulun paham nyihki Yesus tahkan hoponyila. 8:43 Ang loukoh anai hino ihcobehti ulunbawi ijo jari duo balas toun poros tongondaha ijo hotutung umba kobulanan. Io jari ngo'opah karon-ramuioh tului botawas umba dokter, tahpi eam aro ijo tou ngopios io. 8:44 Ulunbawi rih ngondoni Yesus tahkan hila lihkut, turus nokawet lain jubah Yesus. Ang kotihka orih tongondaha ulunbawi rih tondo. 8:45 Yesus ngisok, "Iai ijo nokawet Ahku?" Paring ulun eam ngahku. Turus Petrus nuhtui, "Amai anai aro ulun nyihki, ang kodiling Amai; iro monyihki Amai!" 8:46 Yesus nuhtui, "Tahpi anai ulun ijo nokawet Ahku. Ahku ta'an orih, tului anai kowasa ijo soluka tahkan behtik-Ku." 8:47 Ulunbawi rih borondong, ijo konuaioh jari kota'an. Io nokuh tutang tohcotoh, turus suhkuntu'ut ang pa'an Yesus. Mahka io ngahku ang toharep paring ulun, ombai io nokawet Yesus, tutang ijo ponyahkitoh pios aang wayah rih ka'a. 8:48 Yesus nuhtui umba io, "Anak-Ku, tului ihko porocaya umba Ahku, ihko pios. Tulak honong solamat." 8:49 Podehan Yesus magun hopander, ihcobehti ulun tonyuhu lombut tahkan lohpou Yairus. Io nuhtui umba Yairus, "Anak bawi tuan jari palus. Eam usah tuan ngombo'o Amai Guru hino." 8:50 Kotihka Yesus ngonih orih, Io nuhtui umba Yairus, "Ara mihkoh. Porocaya iou tutang anak'mu ahkan pios." 8:51 Uli johcok ang lohpou Yairus, Yesus em mongijin ihcobehti ka nyolong umba Io, tihkas Petrus, Yohanes tutang Yakobus tutang inai amai anak-inyam orih beweu. 8:52 Paring ulun uhun nangih tutang nahtum tului kopahtoi 'nakinyam orih. Tahpi Yesus nuhtui, "Ara nangih, 'nakinyam tuh eam mahtoi, io baya tiruh!" 8:53 Iro ngota'o auh Yesus, tului iro kota'an anak bawi orih jari palus. 8:54 Pongohino Yesus nambit longon anak rih tutang nuhtui, "Monyun ihko anak!" 8:55 Hasong 'nakinyam rih huli ahkan 'nakinyam rih, tutang ang kotihka rih ka'a io kuat. Pongohino Yesus nyuhu nonga ukun ahkan anak rih. 8:56 Ulun oko 'nakinyam rih helan samasino. Tahpi Yesus baca iro mborihta angjarinyolung rih ahkan iai ka.
9:1 Yesus na'ah koduo balas murid-Oh, turus nonga ahkan'ndo kowasa ahkan muhko roh ja'at tutang ngopios ponyahkit. 9:2 Pongohuli Io nyuhu iro tulak ngopios ulun ijo poros tutang monyiar borihta tohou koloukuwoh Pohotala moretah kolou Lahca. 9:3 "Ara ngomin ino-inon ang ponomuoi'mu," hion Yesus umba iro. "Ara ngomin sukah, ata'ai kambut derma, ata'ai ukun, ata'ai duit, ata'ai ka duo lambar pokajan. 9:4 Ang umoh iou ihkam tonorima, mohcon ang anan nyiring ihkam nohtah lowu rih. 9:5 Tutang ang umoh ihkam eam tonorima, aang ohkot ihkam nohtahoh lowu rih nokahohrih korawu tahkan bolak pa'an'mu, mangat monjadi pongingat tohimo iro." 9:6 Murid-murid Yesus tulak, turus nitu karon-lowu, mangat mborihta Kabar Hinut rih, tutang ngopios ulun poros ang umo-umoh. 9:7 Kotihka Horodes ijo moretah ang Galilea, ngonih tohou paring ang nyolung rih, io bingung. Tului anai ijo nuhtui Yohanes Popondus jari bolum huli. 9:8 Anai ka'a ijo nuhtui ijo Elia jari lombut hino. Ulun bohkon hino nuhtui, anai ihcobehti nabi tahkan nabi-nabi ijo jaman lomoi jari bolum hoduli. 9:9 Horodes nuhtui, "Ahku jari nyuhu ulun nohtok kuhung Yohanes. Tahpi ulun tuh iai komorongoh Io? Anai aro ijo jari ahku ngonahan tohou Io." Mahka Horodes ngurah jalan ahkan dahpot nohto Yesus. 9:10 Rasul-rasul Yesus buli tutang nyorihta ahkan Yesus paring ijo iro jari nguaioh. Yesus nakihit iro, turus tulak hombo-homboh, iro bongon'ndo nokuh lowu Betsaida. 9:11 Tahpi kotihka ulun-ulun kota'an tohou hal rih, iro ngohasu Yesus. Io norima iro, turus bopander umba iro, tohou koloukuwoh Pohotala moretah kolou Lahca. Tutang Io ka'a ngopios ulun poros ang louk iro. 9:12 Kotihka mahtanondou kani bolop, koduo balas murid Yesus lombut nokuh Io turus nuhtui, "Amai unuk tuh mahcu. Labih pios Amai nyuhu ulun-ulun tuh hihkas, mangat iro duon ngurah ukun tutang unuk iro mohcon ang kapung-kapung tutang lowu-lowu ang kodiling tuh." 9:13 Tahpi Yesus mutah, "Ihkam beweu nonga iro ukun." Murid-murid Yesus nuhtui, "Ihkai baya ngina limo luhte tutang duo kungan ohcindanum. Inonrih ihkai harus tulak moli ukun ahkan ulun paring tuh?" 9:14 (Anai kurang labih limo kujan ulunbahkas ang anan.) Yesus nuhtui umba murid-murid-Oh, "Nyuhurih ulun-ulun tuh tuot hopulou-hopulou kurang labih limo pulu behti aang ihco kopulou." 9:15 Murid-murid Yesus rih, nguan inon ijo nyuhu Yesus umba'ndo. 9:16 Turus Yesus ngomin limo luhte tutang duo ohcin rih, uliorih nokara nokuh langit tutang ngohawot torimakasih ahkan Pohotala. Pongohino Io milah-milat luhte tutang ohcin rih hapan longoi-Oh, turus nongaoh ahkan murid-murid-Oh mangat magi-milah ahkan ulun aro rih. 9:17 Iro paringoh kuman nyiring bosuh. Turus murid-murid Yesus nipun kolowiu ukun rih karoi duo balas tahkin. 9:18 Aang sino ondou, kotihka Yesus bodo'a bongoi, murid-murid-Oh lombut nokuh Io. Yesus ngisok umba iro, "Numbun hion ulun, Ahku tuh iai?" 9:19 Iro mutah, "Anai ijo nuhtui Yohanes Popondus. Anai ka'a ijo nuhtui Elia, ijo bohkon hino nuhtui tahkan ihcobehti nabi jaman lomoi ijo jari bolum huli." 9:20 "Tahpi numbun ihkam bongom, Ahku tuh iai?" hion Yesus. Petrus turus mutah, "Amai anai Lahca Ponyolamat ijo nobowot Pohotala." 9:21 Turus Yesus nuhtui umba murid-murid-Oh, "Ara samasino nyorihta hal rih ahkan iai ka." 9:22 Yesus nuhtui ka'a, "Anak Ulun puna harus aro konoporos tutang konolawan bain okon-okon, tutang imam-imam kopala, tutang guru-guru agama. Io ahkan tomunu, tahpi a'ang ondou tolu ia ahkan tonombolum hoduli." 9:23 Pongohino Yesus nuhtui umba paring ulun ijo anai ang anan, "Ulun ijo kani nutut Ahku, harus nolingou kogunanahkaioh bongoi, ngohtun sopolahkioh nyinong ondou, tutang turus nutut Ahku. 9:24 Tului ulun ijo kani potahan pombolumoh, ahkan nihou pombolumoh. Tahpi ulun ijo mohonou pombolumoh bain tului ahkak-Ku, ahkan monyolamat pombolumoh. 9:25 Inon utungoh amat ihcobehti tepun hapus kolunon tuh, tahpi io rusak tutang nihou pombolumoh? 9:26 Amat ulun mia ngahku Ahku tutang bara-Ku, Anak Ulun ka'a mahi mia ngahku ulun rih ang ohkot Io lombut noin honong kowasa-Oh, tutang honong kowasa Amai-Oh, tutang kowasa molehkat-molehkat ijo borasih! 9:27 Ngota'an beweu: tahkan louk ihkam ang ohtoi anai ijo eam ahkan mahtoi, amat jaham io nohto Pohotala moretah." 9:28 Kurang labih ihco menggu uli Yesus majar hal-hal rih, Io ngomin Petrus, Yohanes, tutang Yakobus nokuh ihco pupung puruk mangat bodo'a. 9:29 Podehan Yesus bodo'a ang anan, baui-Oh hubah tutang pokahjai-Oh puhti mokilat boloang. 9:30-31 Songela duo behti, iorih Museh tutang Elia ngorinah aropoh honong koloang tahkan soruga. Iro nuhtui umba Yesus tohou popahtoi-Oh, ijo eam tahi hino ahkan tonihtoi-Oh ang Yerusalem. 9:32 Aang ohkot rih Petrus tutang karon-injahoh tiruh, tahpi songola monyun, nohto Yesus boloang tutang duo behti rih tombok umba Io. 9:33 Aang ohkot duo behti rih kani nohtah Yesus, Petrus nuhtui umba Yesus, "Amai Guru, momih samasino ihto ang ohtoi. Piosrih ihkai nombok tolu kemah, ihco ahkan Tuan, ihco ahkan Museh, tutang ihco ahkan Elia." (Petrus nuhtui kolourih eam kota'an inon ijo tonuhtuioh.) 9:34 Pondehan Petrus magun nuhtui, lombut buhtup baunondou tutang nyokulop iro, nyiring iro mihkoh. 9:35 Pongohuli tahkan buhtup baunondou rih konahan auh ijo nuhtui, "Io Tuhrih Anak-Ku ijo Ahku mitih-Oh. Ngonih auh-Oh!" 9:36 Uli auh orih rih tondo, iro nohto Yesus bongoi iou ang anan. Murid-murid-Oh tonih beweu tohou paring orih, tutang eam nyorihta ahkan iai ka, inon ijo jari iro nohtooh. 9:37 Aang ngohkosoh ondouoh Yesus tutang kotolu murid-Oh dih mosuluh tahkan pupung puruk rih, tutang ulun aro lombut nokuh Yesus. 9:38 Ihcobehti bahkas tahkan tohun ulun aro rih ngoriak, "Amai Guru, dohop nohto anak'ku -- io tihkas ihco-ihcooh anak'ku! 9:39 Amat roh ja'at nyarang io, io songela ngombak tutang behtiuoh konyereng-kohejang nyiring bauioh hopuhtak. Roh rih turus nyarata io tutang eam kani soluka tahkan io! 9:40 Jari ahku nyawot umba murid-murid Amai muhko roh ja'at rih, tahpi iro eam dahpot." 9:41 Yesus mutah, "Eam inon ihkam tuh! Ihkam tu'u ulun-ulun ijo nyapang tutang eam porocaya! Johcok mira Ahku harus mohcon umba ihkam tutang bosabar toharep ihkam? Ngomin anak'mu rih ahkan ohtoi!" 9:42 Pondehan anak rih nyalan nokuh Yesus, roh ja'at rih mingas io tutang nguan behtiuoh konyereng-kohejang. Tahpi Yesus moretahoh roh ja'at rih soluka tutang piosrih anak orih. Turus anak orih tonyarah huli ahkan amaioh. 9:43 Paring ulun helan nohto kowasan Pohotala ijo kolourih kohajoioh. Ang ohkot ulun-ulun magun aang kohelan'ndo nohto paring ijo konuaioh, Yesus nuhtui umba murid-murid-Oh, 9:44 "Nohtoani pio-pios tutang ara nolingou tuhtui-tuhtui-Ku tuh: Anak Ulun ahkan tonosorah, ahkan kowasan kolunon." 9:45 Tahpi murid-murid Yesus rih eam paham umba auhoh rih. Hal rih tongulim ahkan'ndo, mangat'ndo eam solembang. Tahpi iro mihkoh ngisok hal rih umba-Oh. 9:46 Ang louk murid-murid Yesus lombut solisihpander tohou iai tahkan iro ijo hajo. 9:47 Yesus ta'an tiruk'ndo, tului orih Io ngomin ihcobehti anak-inyam tutang nyuhu 'nakinyam rih tombok ang silan-Oh. 9:48 Turus Io nuhtui umba murid-murid-Oh, "Ulun ijo norima anak tuh tului Ahku, rimai norima Ahku. Tutang ulun ijo norima Ahku, Io norima ijo nyuhu Ahku. Tului ulun ijo paling koik ang louk ihkam, iorih ijo paling hajo!" 9:49 Yohanes nuhtui, "Ihkai nohto ulun muko sehtan hapa aran Tuan, tutang ihkai baca io, tului io eam barih ihto." 9:50 "Ara baca io," hion Yesus umba Yohanes tutang murid-murid Yesus ijo bohkonoh, "tului ulun ijo eam ngolawan ihkam, rimai hobarih umba ihkam." 9:51 Kotihka jari doni ohkotoh Yesus ahkan konahtang nokuh soruga, Io ngomin koputusan mangat tulak nokuh Yerusalem. 9:52 Mahka Io nyuhu ulun tulak nosolu Io. Ulun-ulun ijo sonuhu-Oh rih tulak, turus nyolong nokuh ihco lowu ang Samaria unuk nyodia aang'co bagi Yesus. 9:53 Tahpi ulun-ulun ang lowu rih eam kani norima Yesus, tului ta'an sosino, Io rahat nitu Yerusalem. 9:54 Mahka ang ohkot murid-murid Yesus, iorih Yakobus tutang Yohanes ta'an tohou hal rih, iro nuhtui, "Tuhan, inonkah Tuhan kani, ihkai nyawot baho tahkan langit, unuk polumus ulun-ulun tuh?" 9:55 Yesus ngulos, turus ningak iro. 9:56 Uliorih iro tulak nokuh lowu bohkon. 9:57 Pondehan Yesus tutang murid-murid-Oh noturus ponyalan'ndo, anai ulun nuhtui umba Yesus, "Amai, ahku kani ngohasu Amai, nokuh umoh ponyalan Amai ih!" 9:58 Yesus mutah, "Horomaung anai luwangoh, tutang bulung anai kosalahoh, tahpi Anak Ulun eam aro unuk pokaling kuhung-Oh." 9:59 Turus Yesus nuhtui umba ihcobehti ijo bohkon, "Ngohasu Ahku." Tahpi ulun rih nuhtui, "Amai, ahku poromisi buli houn ahkan nanom amai'ku." 9:60 Yesus mutah, "Nauh ulun mahtoi ngolowong ulun mahtoioh bongoi. Tahpi ihko ngohasu Ahku tulak tutang nuhtui borihta ijo Pohotala jari nopara moretah." 9:61 Anai ka'a ihcobehti bohkon ijo nuhtui, "Amai, ahku kani ngohasu Amai, tahpi ahku buli houn ahkan poromisi umba injah-jolahak'ku." 9:62 Yesus nuhtui umba ulun rih, "Ulun ijo nopara moluku turus ngulos nopahjah likutoh, eam gunai monjadi anak ukup Pohotala."
10:1 Uliorih Tuhan mitih pihtu pulu murid hino, turus nyuhu iro duobehti-duobehti nosolu Io nokuh nyinong lowu tutang unuk ijo kani tomasap-Oh. 10:2 "Bua ijo tongohtom aro," hioi-Oh umba iro, "tahpi ponggawi ahkan ngohtomoh baya honjiot. Tului rih nyawot umba Tepui umo rih, mangat Io ngirimoh ponggawi mangat ngohtom bua umoi-Oh. 10:3 Olai, tulak ih! Ahku nyuhu ihkam kolou tobiri nokuh marak horomaung. 10:4 Ara ngomin ehpok ata'ai kambut pononga, ata'ai ka sorupah. Ara tondo ang beteng jalan ahkan nunga tabe ahkan ihcobehti ka ka'a. 10:5 Amat ihkam nyolong ihco lohpou, ngohawot ohrih labih holu, 'Keleh kosanangrih luwang lohpou tuh.' 10:6 Amat ang anan anai ulun ijo rajin hokobuah, tabe hokobuah'mu rih ahkan tehen aang oh; amat eam, nguhutrih huli tabe kobuah'mu rih. 10:7 Mohcon ang ihco lohpou iou. Norima inon ijo nyorunganoh ang anan ahkan'mu, tului ulun ijo bogawi bohak norima upahoh. Ara kindah-kondaha tahkan ihco lohpou nokuh ihco lohpou bohkon. 10:8 Amatmira ihkam lombut ang ihco lowu, tutang ang anan ihkam tonoharang hapan kopios, kumanrih inon ijo nyorunganoh ang anan ahkan'mu. 10:9 Nawas ulun-ulun ijo mondam ang lowu rih, tutang nyorihta ahkan ulun-ulun ang anan, 'Pohotala pohos ahkan nopara moretah kolou Lahca ang tohun ihkam.' 10:10 Tahpi amat ihkam lombut ahkan ihco lowu, tutang ang anan ihkam eam tonorima, bolua nokuh jalan tutang nuhtuiohrih, 10:11 'Molekan korawun tana lowun'mu ijo lehket ang tapapa'an 'kai, ihkai ngopohitoh monjadi pongingat ahkan'mu. Tahpi kota'anrih ijo jari doni wayahoh Pohotala nopara moretah kolou Lahca ang marak tohun ihkam!' 10:12 Ingatrih, aang ondou kiamat, ulun Sodom ahkan labih murah tongapun Pohotala tahkan iro ulun lowu orih!" 10:13 "Colahkarih ihko, Korazim! Tutang colahkarih ihko, Betsaida! Jahkaoh kahtahelan-kahtahelan ijo tonapa ang tohun-louk'kam rih jari tonapa ang lowu Tirus tutang Sidon, musti ulun-ulun ang anan jari tahi hubah tahkan dusa-dusan iro, tutang hapa pokahjan tandaporosahtoi hawui ngina awu ang ngosan kuhung'ndo. 10:14 Aang ondou kiamat, ulun-ulun Tirus tutang Sidon ahkan labih murah duon konapun Pohotala tahkan ihkam. 10:15 Tutang ihkam, Kapernaum! Ihko niruk, ihko ahkan konahtang johcok nokuh soruga? Eam! Malah ihko ahkan tondian nokuh norahka!" 10:16 Turus Yesus nuhtui umba murid-murid-Oh, "Ulun ijo ngonih ihkam, io ngonih Ahku ka. Ulun ijo nulak ihkam, io nulak Ahku, ka'a nulak Io ijo jari nyuhu Ahku." 10:17 Kopihtu pulu murid rih buli tutang jorih samasino. "Tuhan," hion iro, "roh-roh ja'at ka te'et umba ihkai inonmira ihkai moretahoh iro ngosan aran Tuhan!" 10:18 Yesus mutah, "Ahku nohto sehtan nosuluh tahkan langit kolou kilap. 10:19 Ngota'anrih! Ihkam jari Ahkunonga kowasa ahkan ihkam duon nihjak lohi tutang kahtipkala tutang molot kokaro koba'as musuh, earo anai angihco ka ijo duon mocolahka ihkam. 10:20 Oluka kolourih, ararih jorih tului roh-roh ja'at te'et umba ihkam. Labih hinut ihkam jorih tului aran'kam tonyurat ang soruga." 10:21 Aang ohkot rih ka'a, Yesus jorih tului konowasa bain Roh Pohotala. Yesus nuhtui, "Amai, Tuhan ijo mongowasa langit tutang tana! Ahku norimakasih ahkan-Mu, tului paring orih Ihko ngulimoh tahkan ulun-ulun ijo pitar tutang boilmu, tahpi Ihko ngorinah ahkan ulun-ulun ijo eam pitarhorahti. Orih ijo ngojorih ahtoi Amai. 10:22 Karon aang'co jari tonosorah Amai ahkak-Ku. Eam ihcobehti ka ngosono Anak, bohkonumba Amai. Eam anai ka'a ijo ngosono Amai bohkonumba Anak; tutang ulun-ulun ahkan iai Anak rih ka'a nokosono Amai." 10:23 Turus Yesus ngulos nopahjah murid-murid-Oh, pongohuli nuhtui umba iro bongoi, "Boutungrih ihkam tului jari nohto ijo ihkam nohto uhunituh tuh. 10:24 Tului ingat: Aro nabi tutang lahca jolik nohto ijo ihkam nohto hunituh tuh, tahpi iro eam nohtooh. Iro jolik ngonih, ijo ihkam ngonih hunituh tuh, tahpi iro eam duon ngonihoh." 10:25 Pongohino ihcobehti guru agama lombut kani nyokohtung Yesus. Io ngisok, "Amai Guru, ahku pahtut nguan inon mangat duon norima pombolum ijo sojahti tutang kototahiu?" 10:26 Yesus mutah, "Inon ijo tonyurat ang Surat Borasih? Koloukuwoh tiruk'mu tohou hal rih?" 10:27 Ulun rih mutah, " 'Ngasihrih Tuhan Pohotala'mu honong koohpah ahtoi'mu tutang koparing mboruan'mu, tutang umba kokaro koba'as'mu, tutang umba koparing akar'mu,' tutang, 'Ngasih umba sosama'mu kolou ihko ngasih umba arop'mu bongom.' " 10:28 "Putah'kam rih morong," hion Yesus, "nguan orih mahka ihko ahkan bolum." 10:29 Tahpi guru agama rih kani ngomorong aropoh. Io ngisok, "Iai hawui jolahak'ku rih?" 10:30 Yesus mutah, "Anai ihcobehti bahkas mosuluh tahkan Yerusalem nokuh Yerikho. Ang beteng jalan io tonyarang ponyilou, tonorapas kokaro ijo io tepuioh, io tonahup sotengah mahtoi, turus io tonohtah, pale-palek ang tohun jalan honong, ngarot ringan paham. 10:31 Tobarung ihcobehti imam nyalan ka'a nyuru jalan orih. Kotihka tonohtooh ulun rih io ngoliut tahkan silan jalan, noturus ponyalaioh. 10:32 Kolourih ka'a umba ihcobehti ulun Lewi ijo nyalan ang anan; kotihka tonohtooh ulun rih io ngondoni tutang nokilikoh. Tahpi io ka ngoliut nokuh pohoi jalan turus nyalan turus. 10:33 Tahpi pongohuli ihcobehti Samaria ijo rahat nomuoi, nyuru ka'a ang anan. Kotihka tonopahjahoh ulun rih, paham ngasi ahtoioh tului kosihan. 10:34 Mahka tongondonioh ulun rih, turus muhi ringan-ringanoh umba anggur tutang nawasoh umba minyak, pongohuli mohtong ringan-ringanoh rih. Uliorih io ngahtang ulun rih nokuh lihkut keledaioh bongoi, turus ngomiuoh nokuh ihco lohpou ponginapan tutang mohaluoh. 10:35 Anghawun ondouoh hino io ngomin duo kobilop duit perak tutang nongaoh ahkan tepun lohpou ponginapan rih tutang nuhtui, 'Ihkam mohalu io, tutang amat anai karon-kotahpas ukus bohkon, ahkan ahku bayar noin amat ahku huli nokuh ohtoi.' " 10:36 Pongohuli Yesus nondo karon-panderoh rih tutang ngisok numbun tuh, "Tahkan kotolu-tolu behti rih, ijo umoh numbun tiruk'kam, ijo nguai kolou hawuiarop umba ulun ijo tonyilou rih?" 10:37 Guru agama ijo tongisok orih mutah, "Ulun ijo jari mondohop ulun rih." "Olai, tulak tutang nguan kolouorih ka'a!" hion Yesus. 10:38 Pongohino Yesus tutang murid-muridoh noturus ponyalan'ndo, tutang johcok ang ihco lowu. Ang anan ihcobehti bawi bogare Marta, marawe Yesus masap nokuh lohpouoh. 10:39 Marta anai ngina konduang bawi bogare Maria. Maria rih tuot doni Tuhan Yesus ngonih ajaran-ajaran-Oh. 10:40 Tahpi Marta deroh samasino umba gawiu ang lohpou rih, io tulak nokuh Yesus tutang nuhtui, "Tuhan, inonrih Tuhan eam poduli Maria mohonou ahku nguan ang bongok'ku iou? Nyuhu io dohop ahku!" 10:41 "Marta, Marta!" hion Tuhan. "Ihko mihkoh tutang deroh niruk ijotuh tutang ijoorih; 10:42 padahal ijo hajo gunai tihkas ihco. Tutang Maria jari mitih ijo hinut, ijo eam ahkan tongomin tahkan io."
11:1 Ang sino ondou Yesus bodo'a ang ihco unuk. Opah bodo'a, anai ihcobehti tahkan murid-murid-Oh nuhtui, "Tuhan, cuba majar ihkai bodo'a, kolou Yohanes majar murid-muridoh bodo'a." 11:2 Mahka Yesus nuhtui umba iro, "Amat ihkam bodo'a, nuhtuiohrih kolouituh, 'Amai, Ihko ih Pohotala tihkas Ihco. Pios Ihko tonyembah tutang tomohoromat. 11:3 Nonga nyinong ondou ukun ijo ihkai poruluoh. 11:4 Apun karon-dusan ihkai, tului ihkai ka'a ngapun nyinong ulun ijo bosala umba ihkai. Tutang ararih mohonouoh ihkai nihou koporocaya aang ohkot ihkai tonihkos.' " 11:5 Yesus nuhtui umba murid-murid-Oh, "Jahkaoh ihcobehti tahkan louk ihkam tulak nokuh lohpou injahoh ang tohun ngolomi tutang nuhtui, 'Konduang, pokuhtang ahku luhte tolu kobawak, 11:6 tului injah'ku ijo rahat a'ang ponyalaioh, punai ih tondo ang lohpou'ku tutang ahku eam aro ukun ijo tononga'ku ahkaioh!' 11:7 Jahkaoh injah'kam ijo ihko nokuh orih mutah koloutuh, tahkan luwang lohpouoh, 'Ara nderoh ahku! Bauntukang jari tongulin tutang ahku hawui karon-anak'ku jari tiruh. Ahku eam duon kuat tutang nonga ino-inon ahkan'kam.' " 11:8 "Turus koloukuwoh?" hion Yesus huli, "Ahku nuhtui, yo! Oluka ihko anairih injahoh, io eam ahkan monyun tutang nonga aangihco ahkan'kam. Tahpi tului ihko eam nanyam mia ahkan nyawot umba io hototurus, mahka io ahkan kuat ka'a tutang nonga ahkan'kam, inon ijo ihko poruluoh. 11:9 Jadi, Ahku nuhtui umba ihkam: Nyawotrih, mahka tononga ahkan ihkam; ngurahrih, mahka ihkam ahkan duon; ngahtokrih, mahka bauntukang ahkan tonguap ahkan'kam. 11:10 Tului ulun ijo nyawot ahkan norima; ulun ijo ngurah ahkan sombang, tutang ulun ijo ngahtok, ahkan konuap bauntukang. 11:11 Ang louk ihkam inon anai amai ijo nonga lohi ahkan anakoh amat io nyawot ohcin? 11:12 Ata'ai nonga kahtipkala amat io nyawot kotoluh? 11:13 Oluka ihkam ja'at, ihkam ta'an ka'a nonga ijo pios ahkan anak'kam. Mahihino Amai'kam ijo ang soruga! Io ahkan nonga Roh-Oh ahkan iro ijo nyawot umba Io!" 11:14 Ang sino ondou Yesus muhko roh ja'at soluka tahkan ihcobehti bisu. Uli roh ja'at rih soluka tahkan ulun rih nopara dahpot nuhtui. Aro ulun helan, 11:15 tahpi anai ijo nuhtui, "Io duon muhko roh ja'at orih, tului kowasa Baalsebul, kopala roh ja'at rih." 11:16 Anai ka'a ulun-ulun bohkon ijo kani nyokohtung Yesus, jadi iro nyawot Io nguan kahtahelan ahkan tanda ijo Io lombut tahkan Pohotala. 11:17 Tahpi Yesus ngota'an konohuang iro. Mahka Io nuhtui umba iro, "Amat ihco nogara bobolah a'ang habarih-habarih ijo saling homusuh, nogara rih eam ahkan tahan. Tutang ihco bobuhan ijo bobolah-bolah tutang homusuh ihco sama bohkon, ahkan lonyuh. 11:18 Kolourih ka'a aang kolahca'an Sehtan; amat ihco barih hokolahi umba barih ijo bohkon, kolahca'an rih ahkan bokahkas. Ihkam nohou ijo Ahku muhko roh ja'at rih bain kowasa Baalsebul. 11:19 Amat kolourih, hapan kowasa iai murid-murid'kam muhko roh-roh ja'at rih? Murid-murid-Mu rih bongoi ijo ngorinah ihkam ijo sala! 11:20 Tahpi Ahku muhko roh ja'at rih umba kowasan Pohotala, tutang orih rimai ijo Pohotala jari nopara moretah ang marak ihkam. 11:21 Amat ihcobehti ijo ba'as, tutang bosonjata cukup, ngindoi lohpouoh bongoi, paring ramuioh ahkan solamat. 11:22 Tahpi amat ihcobehti, ijo molowi ba'as monyarang tutang mopokalah io, mahka ulun ijo molowi ba'as rih ahkan ngomin paring sonjata ijo konina bain tehpun lohpou rih, turus hobagi-bagi paring ramui-ramuioh. 11:23 Ulun ijo eam barih Ahku, kotu'uioh molawan Ahku tutang ulun ijo eam dohop Ahku, kotu'ui io ngakas gawik-Ku!" 11:24 "Amat jari roh ja'at nohtah ihcobehti, roh ja'at rih kodiling ngurah unuk-unuk ijo tojah ngurah unuk ngoronghasongoh, tahpi io eam nyombangoh. Tului orih io nuhtui, 'Ahku ahkan buli nokuh lohpou ijo jari ahku nohtahoh!' 11:25 Ohkot io johcok ang anan, io nyombang lohpou rih borasih tutang tosusun pios. 11:26 Turus io tulak tutang ngomin pihtu roh bohkon, ijo paham koja'atoh tahkan io. Pongohino rih iro nyolong nokuh luwang ulun rih turus mohcon ang anan. Tutang kojoriaioh ulun rih monjadi paling ja'at tahkan pahtukoh." 11:27 Uli Yesus nuhtui kolourih, ihcobehti bawi tahkan louk ulun aro rih nuhtui umba Yesus, "Tu'u-tu'u kosanang ulunbawi ijo nganak tutang potusu Ihko!" 11:28 Tahpi Yesus mutah, "Labih sanang hino ulun ijo ngonih auh Pohotala tutang norimaoh!" 11:29 Pondehan ulun-ulun ngorumbung Yesus, Yesus turus ka'a nuhtui, "Eam inon koja'at ulun-ulun zaman tuh. Iro nyawot ihco kahtahelan mangat iro dahpot porocaya umba Ahku, tahpi iro eam ahkan tononga ihco kahtahelan ka'a, kocoali kahtahelan Nabi Yona. 11:30 Samakolou Nabi Yona ijo mopohelan bagi ulun-ulun kohta Niniwe, kolourih ka'a Anak Ulun ahkan monjadi ihco kohelanan bagi ulun-ulun jaman tuh. 11:31 Aang ondou kiamat, Ratu lowu Solahtan ahkan tombok homboh ulun-ulun jaman tuh, tutang ndawa iro. Tului ahkan ngonih ajaran Salomo ijo pihtar, Ratu rih nguan ponomuoioh ijo mahcu samasino tahkan saran tana. Tahpi ang ohtoi uhuntuh anai ijo labih hajo tahkan Salomo! 11:32 Aang ondou kiamat ulun lowu Niniwe ahkan tombok homboh ulun-ulun jaman tuh, tutang ndawa iro, tului ulun Niniwe rih hubah tahkan dusa-dusan'ndo, kotihka Yona kotbah ahkan'ndo. Tahpi ang ohtoi uhuntuh anai ijo molowi hajo tahkan Yona!" 11:33 "Eam anai ulun ijo nutang sumbu turus monyuhukoh ata'ai nuhtupoh umba potoran. Io ahkan ngina sumbu rih ang pa'an sumbu, mangat ulun ijo nyolong duon nohto koloangoh. 11:34 Mahta anairih sumbu ahkan behti. Amat mahta'kam tokining hapus behtin'kam boloang-ngorolondang. Tahpi amat mahtan'kam kabus, behtin'kam nyolung pindong-kihtop. 11:35 Tului orih, bua-buah, ara nyiring koloang ijo anai ang ihkam rih monjadi pindong. 11:36 Amat sohopus behtin'mu, boloang, tutang eam aro 'cobagian ka ijo pindong, mahka sohapus behtin'kam rih boloang ngorolondang kolou ngorolondang koloang sumbu." 11:37 Uli Yesus tondo hopander, ihcobehti ulun Parisi morawe Io kuman ang lohpouoh. Mahka Yesus tulak kuman ang anan. 11:38 Ulun Parisi rih helan nohto Yesus kuman tutang eam aro muhi longoi-Oh soun, numbun aturan agama. 11:39 Tului rih Tuhan nuhtui umbaoh, "Punaioh ihkam ulun-ulun Parisi kopahtuhoh muhi pihkan tutang piring hila luar iou, tahpi ang luwang aropoh bongoi tuwi umba kokaras tutang koja'at. 11:40 Ihkam bobaleh! Eamrih jari Pohotala ijo nguan hila luar orih, nguan hila luwangoh ka'a? 11:41 Ijo anai luwang pihkan tutang piring'kam rih, iorih ihco harus ihkam nongaoh ahkan ulun-ulun porosbolum. Umba cara kolourih, paringoh ahkan monjadi borasih ahkan'kam. 11:42 Colahka ihkam, ulun-ulun Parisi! Bua komulan'kam kolou tindungoh selasih tutang enggu tutang rorampah-rorampah bohkonoh, ihkam nonga sepersopuluoh ahkan Pohotala, tahpi koadilan tutang ngasih umba Pohotala eam ihkam nohtoani. Podahal orih ijo koharusoh ihkam nguai, tutang eam mohonou ijo bohkon-bohkonoh ka'a. 11:43 Colahka ihkam, ulun-ulun Parisi! Ihkam jolik unuk-unuk ijo horomat ang luwang lohpou sombayang, tutang jolik duon horomat ang pasar-pasar. 11:44 Colahka ihkam! Ihkam sama umba kolowong ijo eam aro nisan, ijo tongihik-ngihik ulun hawoi earo ngota'an." 11:45 Ihcobehti guru agama nuhtui umba Yesus, "Amai Guru, umba auh-auh orih, Amai mohina ihkai ka'a!" 11:46 Yesus mutah, "Colahka ihkam ka'a, guru-guru agama! Ihkam nyuhu nguan hal-hal ijo bohali, tutang nonga aturan-aturan ijo bahat, tahpi ihkam bongom, isut ka eam kani dohop ulun bohkon nguaioh. 11:47 Colahka ihkam! Ihkam mangun tanom ahkan karon-nabi, ijo orih tomunu bain tahtu ajuh'kam bongom. 11:48 Jadi ihkam bongom ngahku ijo ihkam sotuju inon ijo jari tonguan bain tahtu ajuh'kam; tului puna iro ijo munu karon-nabi rih, tutang ihkam ijo mangun tanom'ndo. 11:49 Orih tuluioh, Kopihtar Pohotala nuhtui, 'Ahku ahkan ngirim ahkan iro nabi-nabi tutang suruhan-suruhan-Ku; tongai tomunu tutang tongai tonoporos!' 11:50 Pohotala nguan kolourih, mangat ulun-ulun jaman tuh tomohukum tului munu ijo konuai tohimo paring nabi tahkan kolunon tona'oi, 11:51 pahtukoh tahkan munu umba Abel johcok aang tomunuoh Sakharia, ijo nyolung ang holat mesbeh tutang Lohpou Tuhan. Porocaya ih: Ulun-ulun jaman tuh, musti ahkan tomohukum tului paring orih. 11:52 Colahka ihkam, guru-guru agama! Kuhci hapa nguap bauntukang pongotaan sonuhuk bain ihkam, tahpi ihkam bongom eam kani nyolong nokuh luwang mangat ngurah pongosono rih. Tobalikoh ihkam ngolapong lapong jalan ulun-ulun ijo kani nyolong ahkan luwangoh!" 11:53 Kotihka Yesus nohtah unuk rih, guru-guru agama tutang ulun-ulun Parisi bosingi mongecam Yesus honong paham. Iro nopara mosi-mosi Io, mangat Io kani nuhtui nohou aro hal. 11:54 Tutang pondehan orih iro, nohtoani Io moro-morong, mangat nawan aangihco ijo sala konohawot-Oh.
12:1 Bokuhjan-kuhjan ulun-ulun ngorumbung Yesus nyiring anai ijo nihcak-ngihik pa'an injahoh. Pondehan ulun-ulun rih hokorumbung, Yesus nuhtui umba murid-murid-Oh, "Bua-buah toharep ragin ulun Parisi, maksud-Ku kopura-pura'ndo. 12:2 Eam anai ijo bosuhuk ijo eam ahkan gihtan, tutang eam anai ijo tongulim ijo eam ahkan ponokarah. 12:3 Ijo ihkam nuhtuioh ang ohkot ngolomi ahkan konahan ang ohkot koboloang; tutang ijo ihkam mongosinok ang tolingan ulun ang luwang tahkun bokatop, ahkan tonosiar ulun nokuh umo-umohoh." 12:4 "Ingatrih, karon-jolahak-Ku! Ara mihkoh umba iro ijo munu behti, tahpi eam duon nguan labih tahkanumba orih. 12:5 Piosrih Ahku ngorinah ahkan'kam, iai ijo harus ihkam mihkohoh. Mihkohrih umba Pohotala! Tului amat uli munu, Io bokowasa ka'a ngondian nokuh norahka! Porocayarih, Io ijo harus ihkam mihkohoh. 12:6 Limo kungan bulung opit tomorahkang legai duo duit ijo pokokoikoh. Oluka kolourih eam ihcokungan ka tonolingou Pohotala. 12:7 Balou ang kuhung'mu jari tongihtung paringoh, tului orih ara mihkoh; ihkam labih borega tahkan bulung-bulung opit rih!" 12:8 "Ingat tu'u-tu'u: Ulun ijo ngahkuoh ang tohimo ulun aro tului io murid-Ku, io ahkan tomongahku ka'a bain Anak Ulun ang tohimo molehkat-molehkat Pohotala. 12:9 Tahpi ulun ijo ngulim ang tohimo ulunaro ijo io murid-Ku, io ahkan tongulim ka'a bain Anak Ulun ang tohimo karon-molehkat Pohotala. 12:10 Amatmira ulun ijo nuhtui aang'co ngolawan Anak Ulun, io duon tongapun; tahpi amatmira io mohina Roh Pohotala, io eam duon tongapunoh. 12:11 Amat ihkam konomin nokuh karon-lohpou sombayang ahkan tomosara ang tohimo pomoretah ata'ai pongowasa, ararih mihkoh tohou koloukuwohoh ihkam harus mombela arop, ata'ai tohou inon ijo harus ihkam nuhtuioh. 12:12 Tului inon ijo harus ihkam nuhtuioh rih ahkan tomara bain Roh Pohotala ahkan'kam ang ohkotoh." 12:13 Ihcobehti tahkan louk ulun aro nuhtui umba Yesus, "Amai Guru, cuba Amai nyuhu konduang'ku nonga ahkak'ku ihcobagian tahkan ponahtou ijo tonohtah amai ihkai." 12:14 Yesus mutah, "Konduang, iairih potuot Ahku monjadi hakim ata'ai tuhkang magi waris ahkan ihkam duo?" 12:15 Pongohuli, ahkan paring ulun ijo anai ang anan Yesus nuhtui, "Bua-buahrih, tutang borondong, ara nyiring ihkam bokuhu. Tului pombolum ulun eam bogatung umba ponahtouoh, oluka ponahtouoh holowi-holea." 12:16 Turus Yesus nyorihta porobasa tuh, "Anairih ihcobehti ulun tahtou, io tepun tana ijo nonga aro hasir. 12:17 Ulun tahtou rih nopara moniruk hino a'ang ahtoi, 'Jadi eam arondai unukoh ngina hasir tana'ku. Inon ahkar'ku huntuh?' 12:18 Pongohuli io moniruk hino tutang nuhtui umba aropoh bongoi, 'Olai, ahku anai ahkar; koraking-koraking'ku ahkan ahku nyuhu ngahkasoh, turus ahku mangun ijo paling hajo. Ang anan ahku ngina paring gandum'ku tutang ponahtou-ponahtou'ku ijo bohkon. 12:19 Pongohino ahkan ahku bopander honong arop'ku bongok: Ihko boutung! Kokaron ijo pios jari ahku tepuioh, tutang eam ahkan opah pira-pira toun. Nondo-bo'o iou uhuntuh! Kuman ngorih iou tutang nginyamohrih komomih pombolum'mu!' 12:20 Tahpi Pohotala nuhtui umba io, 'Oi uong! Ngolomi tuh ka'a ihko ahkan mahtoi, turus iairih ijo ahkan tepun paring ponahtou'kam ijo jari tonipun'kam ahkan arop rih?' 12:21 Kolourih kojoriai umba nyinong ulun ijo bousaha monjadi tahtou ahkan arop, tahpi eam bousaha monjadi tahtou ang mahtan Pohotala." 12:22 Turus Yesus nuhtui umba murid-murid-Oh, "Orih kotuluioh Ahku nuhtui, 'Ara mihkoh tohou pombolum'kam, iorih inon ijo ahkan ihkam kumai, ata'ai inon ijo ahkan ihkam hapaoh.' 12:23 Pombolum anairih labih boguna tahkan ukun, tutang behti labih boguna tahkan pokahjan. 12:24 Nohtoanirih bulung-bulung okak! Iro eam ngombulan, tutang ngohtom, eam ka'a tepun gudang ata'ai koraking. Tahpi Pohotala mohaga iro! Ihkam labih borega umba bulung-bulung! 12:25 Iai tahkan louk ihkam ijo tului kihkohoh duon ngombu umuroh oluka honjiot? 12:26 Amat hal 'cokokoik orih mahi eam duon ihkam nguaioh, ombai mihkoh tohouumba hal-hal bohkon? 12:27 Nohtoanirih koloukuwoh dolak-dolak bahkung bolum; dolak-dolak rih eam bogawi, eam ka'a monatangbenang. Tahpi Lahca Salomo ijo kolourih kotahtouoh ka eam hapa pokahjan ijo kolou kopion dolak bahkung rih! 12:28 Uru ang padang bolum ondou tuh, tutang ondou hawon tononyoha lingis. Tahpi Pohotala ngopion uru rih kolouorih kopioioh. Mahihino ihkam! Tahpi ihkam kurang porocaya! 12:29 Jadi, ararih mihkoh tutang bimbang tohou inon ijo ahkan ukun'kam tutang korih'kam. 12:30 Hal-hal kolourih ngodulu bain ulun ijo eam kosono Pohotala. Padahal Amai'mu ta'an ijo ihkam porlu paring orih. 12:31 Tahpi ihkam pahtut bousaha mangat Pohotala moretah ngosan pombolum'kam, mahka ijo bohkon orih ahkan tononga Pohotala ka'a ahkan'kam." 12:32 "Ihkam ijo tihkas koik jamalahoh ara mihkoh! Tului Amai'kam sanang nonga ahkan'kam borehkat tahkan Pomoretah-Oh. 12:33 Modagangoh ponahtou'mu, tutang nongarih duitoh ahkan ulun porosbolum. Naparih ahkan'kam kambut ijo eam dahpot kupit, iorih ponahtou ijo tongina ang soruga. Ponahtou rih eam tou nihou bain ponahkou eam duon ngomiuoh, tutang somahtoi eam duon morusakoh. 12:34 Tului ang amoh ponahtou'kam, ang anan ka'a ahtoi'kam!" 12:35 "Bojaga-jaga nohimo nyinong hal. Ihkam harus hototurus botahtap hopokajan tutang sumbu'kam hototurus bolum, 12:36 sama kolou pohalu-pohalu ijo rahat botahtap ngindoi tuanoh buli tahkan pesta kawin. Amat tuan rih buli tutang ngahtok bauntukang, iro ahkan jeleng nguap bauntukang. 12:37 Eaminonrih koutungoh pohalu orih ijo sombang rahat ngindoi ang ohkot tuanoh lombut. Porocayarih: tuan orih ahkan botahta-tahtap tutang nyuhu pohalu-pohaluoh rih tuot, turus io nahalu iro. 12:38 Eaminonrih koutungoh pohalu-pohalu orih, amat tuanoh rih nyombang iro rahat tahtap ngindoi, oluka tuan rih lombut ang tohun ngolomi ata'ai labih dandah umba orih! 12:39 Ingatrih tuh! Jahkaoh, tuan lohpou rih ta'an jam pira ponahkou lombut, io ahkan monjaga mangat ponahkou eam duon nyolong nokuh luwang lohpouoh. 12:40 Tului orih ihkam ka'a harus bojaga-jaga, tului Anak Ulun ahkan lombut aang ohkot ijo eam ihkam mongira-ngiraoh." 12:41 "Tuhan, inon polajaran rih Tuhan nituoh ahkan ihkai ata'ai umba paring ulun?" hion Petrus. 12:42 Tuhan mutah, "Iai pohalu ijo te'et tutang pihtar, nyiring potuot bain tuanoh monjadi kopala, ngosan karon-pohalu bohkon ahkan io nonga iro ukun ang ohkotoh? 12:43 Eaminonrih kosanangoh pohalu orih amat tuanoh buli tutang sombang io rahat nguan aang-konuai! 12:44 Porocayarih: tuan rih ahkan morocaya ngina karon-ponahtouoh ahkan pohalu orih. 12:45 Tahpi amat pohalu orih ngira aang ahtoioh, 'Tuan'ku magun tahi kolawui buli,' turus io nopara nahup paring pohalu bohkon tutang kuman ngorih nyiring bobusou, 12:46 mahka tuanoh ahkan buli aang ondou tutang jam ijo eam tongohu-ngohu. Tutang pohalu rih ahkan duon hukuman ijo bahat bain tuanoh, tutang ngindiu hihco umba ulun-ulun ijo eam te'et ahkan Pohotala. 12:47 Pohalu orih ijo kota'an konohuang tuanoh, tahpi eam botahtap tutang eam nguan konohuang tuanoh rih ahkan tonomahcat ijo karas. 12:48 Tahpi pohalu ijo eam ngota'an konohuang tuanoh, pongohino nguan angihco ijo sala nyiring harus tonopahcat, honong mohian ih. Tului ulun ijo tononga aro ahkan tonyawot aro ka'a. Tutang ulun ijo jari morocaya aro, tahkan io tonyawot aro hino." 12:49 "Ahku lombut ahkan polombut ponyaha ang kolunon tuh. Eaminon kopiosoh amat bahooh jari ngonyelak! 12:50 Magun anai koporos paling bahat ijo harus Ahku nyuruoh. Tutang ahtoi-Ku bolisah samasino sounumba orih nyolung. 12:51 Kuwohrih ihkam ngohu Ahku lombut ahkan ngomin kobuah, nokuh kolunon? Eam, bohkon kobuah, molekan hokolawan. 12:52 Nopara tahkan uhunituh, jolahan anairih tahkan limo behti ahkan hokolawan, tolu molawan duo, ata'ai duo molawan tolu. 12:53 Amai ahkan ngolawan anakoh bahkas, tutang anak bahkas molawan amaioh. Inaioh ngolawan anakoh ijo bawi, tutang anak bawi ahkan ngolawan inaioh. Upuoh ahkan ngolawan monatuioh ijo bawi, tutang monatui ijo bawi ahkan ngolawan upuoh." 12:54 Yesus nuhtui ka'a ahkan ulun aro, "Amat ihkam nohto bounondou nuhkat ang hila barat, turus ihkam ngohawot, 'Ahkan uhjan.' Tutang morong tu'u uhjan. 12:55 Amat ihkam komo bohiu lombut tahkan hila solahtan, ihkam ngohawot, 'Ahkan notang.' Tutang morong tu'u notang. 12:56 Ihkam ijo jolik pura-pura! Ihkam duon nujum totang ondou tutang nohto kolou langit tutang tana. Ombai tanda-tanda jaman tuh eam tou ihkam nujumoh?" 12:57 "Ombai ihkam eam mutusoh bongom inon ijo morong? 12:58 Amat anai ulun ngadu ihkam nokuh bosara, bousaha soduo-duonoh ahkan ngombuah porokara orih umba io houn, pondehan ihkam magun ang beteng jalan. Amat eam, noin io nunda ihkam nokuh nohimo hakim, tutang hakim rih ahkan nyarah ihkam nokuh polisi, tutang polisi posolong ihkam ahkan luwang sipir. 12:59 Porocayarih! Ihkam eam ahkan soluka tahkan sipir, hounumba danda'kam lunas."
13:1 Aang ohkot rih ulun mborihta ahkan Yesus tohou pira-pira ulun Galilea ijo ponunu Pilatus, kotihka iro rahat nonga pononga ahkan Pohotala. 13:2 Norima kabar orih, Yesus nuhtui, "Tului ulun-ulun Galilea ijo ponunu kolourih, ihkam ngira orih buktioh iro paling bodusa, tahkan paring ulun Galilea ijo bohkon? 13:3 Samasino eam! Tahpi ingatrih: amat ihkam eam hubah tahkan dusa-dusan'kam, ihkam paring ahkan mahtoi ka'a kolou iro. 13:4 Koloukuwoh ka'a umba jalu balas ulun ijo palus ang Siloam kotihka candi rih nopahas iro? Ihkam ngohu rih korinah iro paling bodusa tahkan paring ulun-ulun bohkon ijo mohcon ang Yerusalem? 13:5 Samasino eam! Sino hino Ahku nuhtui: Amat ihkam eam hubah tahkan dusa-dusan'kam, ihkam paring ahkan mahtoi ka'a kolou iro." 13:6 Uliorih Yesus nyorihta ka'a porobasa tuh, "Anai ihcobehti anaingina pu'un sikun ang kobun angguroh. Sino ondou io tulaklah ngurah buaoh ang pu'un rih, tahpi eam nyombangoh ihcoluang buaoh. 13:7 Jadi, io nuhtui umba tuhkang kobunoh, 'Nohto, jari tolu toun ahku lombut ngurah buaoh sikun tuh, tahpi eam mua ihcokoluang ka'a. Towongrih pu'un tuh! Io tihkas ngohpah zat ukun tahkan tana!' 13:8 Tahpi tuhkang kobun orih mutah, 'Nauh ih io bolum ihcotoun tuh hino, tuan. Ahku ahkan nyangkul tana hokodilingoh tutang ngina pupuk. 13:9 Mihkoh sino huli io tou mua toun noharep. Tahpi amat eam, tou tuan nyuhu ulun nowongoh.' " 13:10 Aang sino ondou Sabat, Yesus majar ang ihco lohpou sombayang. 13:11 Ang anan anai ulunbawi ijo jari jalu balas toun poros, tului anai roh ja'at ang luwang behtiuoh. Ulunbawi rih nyohkot, tutang samasino eam duon tombokmorong. 13:12 Kotihka Yesus nohtooh, na'ahrih Io umbaoh, "Ibu, ihko pios tahkan ponyahkit'mu!" 13:13 Turus Yesus ngina longoi-Oh nokuh ngosan bawi rih, tutang aang uhun orih ka'a io tombokmorong, turus monara Pohotala. 13:14 Kopala lohpou sombayang rih bosingi, kotului Yesus ijo ngopios ulun ang ondou Sabat, tului orih io nuhtui umba ulun-ulun, "Anai onom ondou ahkan bogawi; lombutrih ang ondou-ondou rih ahkan ngopios, ararih ang ondou Sabat!" 13:15 Tuhan mutah, "Pura-pura ihkam tuh! Aang ondou Sabat paring ulun molohpas sapi ata'ai keledaioh tahkan pahkotoh tutang ngitot soluka ahkan nunga korih akaioh. 13:16 Nah, ang ohtoi uhuntuh anai ihcobehti bawi lihit Abraham ijo jari jalu balas toun kotohiuoh konongarut bain Sehtan. Inon io eam tou tonguwat tahkan karutoh rih ang ondou Sabat?" 13:17 Putah Yesus rih nguan polawan-polawan Yesus mia samasino; tahpi paring ulun-ulun bohkonoh jolik nohto karonaang ijo helan ijo konuan Yesus. 13:18 Yesus ngisok, "Amat Pohotala moretah, koloukuwoh koada'aioh? Umba inon ka'a Ahku nindungoh? 13:19 Koada'aioh kolou porobasa ulituh. Ihco luang sawi omin bain ihcobehtiulun, turus ngomulanoh ang komulan. Luang rih bolum turus monjadi pu'un, tutang bulung-bulung nguan kosalahoh, ang da'an-da'an pu'un rih." 13:20 Sino hino Yesus ngisok, "Amat Pohotala moretah, umba inon Ahku nindung koada'aioh? 13:21 Koada'aioh kolou ragi ijo konomin bain ihcobehti bawi turus ngoluhtotoh umba opat pulu lihter galapung, nyiring kamir paringoh." 13:22 Aang ponyalaioh nokuh Yerusalem Yesus nyuru lowu-lowu tutang desa-desa sambir majar. 13:23 Turus anai ulun ngisok umba Io, "Amai, inon baya isut ih ulun ijo ahkan tonyolamat?" Yesus mutah, 13:24 "Bousaharih ahkan nyolong nyuru bauntukang ijo sihki. Tului, ingat! Aro ulun ngurah jalan nyolong, tahpi eam tou. 13:25 Aang ohkot tuan lohpou monyun tutang ngatop bauntukangoh, ihkam magun tombok ang luar tutang nopara ngahtok-ngahtok sambir nuhtui, 'Tuan nguap bauntukang ahkan ihkai!' Tuan rih ahkan mutah, 'Ahku eam ngota'an ihkam lombut tahkan umoh!' 13:26 Ihkam ahkan mutah, 'Ihkai jari kuman ngorih homboh Tuan tutang Tuan jari majar ahkan ihkai ka'a ang jalan-jalan lowun ihkai!' 13:27 Tahpi Tuan rih ahkan nuhtui hino, 'Ahku eam ngota'an ihkam lombut tahkan umoh. Hihkas tahkan ohtoi, ihkam ijo nguan koja'at!' 13:28 Aang ohkot ihkam nohto Abraham, Isaak, tutang Yakub homboh paring nabi hokojorih mohcon ang Tana Bohua Ain Pohotala, ihkam ahkan nangihnongok tutang ngarot, tului ihkam bongom tomuhko nokuh luar! 13:29 Ulun-ulun ahkan lombut tahkan timur tutang barat, tahkan utara tutang solahtan, tutang ahkan hokojorih mohcon ang Tana Bohua Ain Pohotala. 13:30 Punakotu'uioh, anai ulun ijo pongo ahkan monjadi ulun ijo pahtuk, tutang anai ulun ijo pahtuk ahkan monjadi ulun ijo pongo." 13:31 Aang ohkot rih ka'a, anai pira-pira ulun Parisi lombut nokuh Yesus tutang nuhtui, "A'ai mohcon ang ohtoi! Tulakrih nokuh unuk bohkon, tului Horodes kani munu Ihko." 13:32 Yesus mutah, "Hihkas nuhtui ahkan ulun ijo eam anai gunaioh rih, 'Ondou tuh tutang hawun Ahku muhko roh ja'at tutang ngopios ulun poros, tahpi ang ondou kotolu, Ahku ahkan ngohpahoh gawik-Ku.' 13:33 Oluka kolourih Ahku harus noturusoh ka'a ponyalak-Ku ondou tuh, hawun tutang uli hawun, tului eam pios ihcobehti nabi tonomunu ang luar Yerusalem. 13:34 Yerusalem, Yerusalem! Nabi-nabi ihko munuoh! Ulun-ulun soruhan Pohotala ihko muhkahoh umba bahtu nyiring mahtoi! Jari pira tikat Ahku jolik ngoraup paring ulun'mu kolou pohuk ngolindung karon-anakoh ang pinda ilatoh, tahpi ihko eam kani! 13:35 Tului orih Pohotala eam kani ngohomboh ihko. Ngota'anrih, nopara tahkan huntuh ihko eam nohto Ahku hino, nyiring ihko nuhtui, 'Tomorekat Io ijo lombut a'ang aran Tuhan.' "
14:1 Aang sino ondou Sabat Yesus tulak kuman ang lohpou ihcobehti tokoh Parisi. Aang anan ulun-ulun nohtoani Yesus honong tolihti. 14:2 Mahka lombut nokuh Yesus ihcobehti ulun ijo bolatung ijo pa'ai longoioh, loting-loting. 14:3 Turus Yesus ngisok umba guru-guru agama tutang ulun-ulun Parisi ijo anai ang anan, "Numbun hukum agaman ihto, tou ihto ngopios ulun poros ang ondou Sabat ata'ai eam?" 14:4 Guru-guru agama tutang ulun-ulun Parisi rih tonih ih. Turus Yesus na'ah ulun rih, tutang ngopios io, pongohino rih nyuhu io tulak. 14:5 Uliorih rih Yesus nuhtui umba ulun-ulun, "Jahkaoh ihcobehti tahkan ihkam, anaingina ihcobehti anak, ata'ai ihcokungan sahpi, ijo botahak nokuh aang luwang sumur ang ondou Sabat, inon io eam ahkan bojoin nguhutoh bolua anak orih ata'ai sahpi orih, ondou orih ka'a?" 14:6 Tahpi eam ihcobehti ka duon mutah auh Yesus tohou hal orih. 14:7 Yesus nohto aro ulun tipen ijo mitih unuk-unuk ijo paling pios. Tului orih Io nonga ajar tuh ahkan iro paring. 14:8 "Amatmira ihkam torawe tipen nokuh pesta kawin, ara tuot ang korusi ijo horomat. Tului ara-ara lombut ihcobehti bohkon ijo labih tohoromat tahkan'kam jari torawe ka'a, 14:9 nyiring tuan lohpou ijo jari morawe boro rih, toropaksa lombut nokuh'kam tutang nuhtui, 'Apun konduang, unuk tuh jari tonahtap ahkan amai atuh.' Mahka honong paham komia ihko topaksa tuot ang unuk ijo paling lihkut. 14:10 Tului orih, amatmira ihkam tonorawe, mitihrih unuk ijo paling lihkut, mangat tuan lohpou ahkan lombut tutang nuhtui umba'kam, 'Aring, has tuot ang unuk ijo labih pios.' Umba kolourih ihkam tohoromat, ang tohimo ulun aro tipen ijo bohkon. 14:11 Tului nyinong ulun ijo ngondiang aropoh ahkan tongopinda, tahpi ijo ngopinda aropoh ahkan tongondiang." 14:12 Turus hion Yesus umba tuan lohpou rih, "Amat ihko morawe ulun ahkan pesta kuman hondou ata'ai kuman ngolomi, ara morawe injah-jolahan'kam, ata'ai aring-konduang'kam, ata'ai ka'a jolahan'kam ijo tahtou. Tului noin iro ahkan morawe ihko hino, tutang hapan kolouorih ihko norima balos ngosan anggawin'kam. 14:13 Jadi, amat ihko nguan pesta, morawerih ulun porosbolum, ulun cahcat, ulun kaet-kehcang tutang ulun bobulen. 14:14 Ihko ahkan tomorehkat, tului ulun-ulun rih tutang eam ahkan duon mbalasoh kopios'kam rih. Kopios'kam orih ahkan tomalos bain Pohotala aang ohkot ulun-ulun ijo morong monyun huli tahkan popahtoi." 14:15 Aang ohkot anai ihcobehti ijo kuman homboh ang anan ngonih auh Yesus, io nuhtui, "Utung samasino ulun ijo ahkan kuman homboh umba Pohotala, amat Io lombut kolou Lahca!" 14:16 Tahpi Yesus nuhtui umba ulun orih rih, "Aang ihco ohkot anai ihcobehti nguan pesta ijo hajo tutang morawe aro ulun. 14:17 Kotihka jari ohkotoh ahkan nopara pesta, ulun rih nyuhu pohalu tulak nokuh ulun-ulun torawe tutang nuhtui, 'Has lombut, paringoh jari botahtap!' 14:18 Tahpi iro paringoh, mihco honong mihco nopara nyawot apun. Ijo pahtuk nuhtui umba pohalu orih rih, 'Ahku punai ih moli ihco kolambar tana, tutang perulu ahku tulak njongukoh. Apunrih ahku.' 14:19 Ijo bohkon nuhtui, 'Ahku punak'ku moli limo pasang sahpi tutang kani mocubaoh sahpi-sahpi rih, apunrih ahku.' 14:20 Ijo bohkon hino nuhtui, 'Ahku punak kawin, tului orih ahku eam duon lombut.' 14:21 Pohalu orih buli tutang monyorihta hal rih ahkan tuanoh. Tuan rih bosingi samasino, tutang nuhtui umba pohaluoh, 'Jeleng, hihkas nokuh jalan-jalan tutang hontas-hontas ang kohta. Ngomin nokuh ohtoi ulun porosbolum, ulun cahcat, ulun bobulen tutang ulun mahtoi behtiu.' 14:22 Pongohino jihpon rih nuhtui, 'Tuan, poretah tuan jari ihkainguai, tahpi unuk magun aro.' 14:23 Turus tuan rih nuhtui, 'Tulak nokuh jalan-jalan hajo tutang jalan koik ang luar kohta tutang hojojuan ulun-ulun lombut nyiring lohpou'ku tuwi. 14:24 Ingatrih! Eam ihcobehti ka tahkan louk ulun-ulun torawe ijo jari tomorawe rih, ahkan komokomomih ukun'ku ang pesta tuh!' " 14:25 Aro ulun homboh nyalan homboh Yesus. Yesus ngulos nohto kolihkut tutang nuhtui umba iro, 14:26 "Amat ulun lombut nokuh Ahku, tahpi io labih masi inaioh ata'ai amaioh, oruhoh, anakoh, konduang-konduangoh, malah aropoh bongoi, io eam dahpot monjadi murid-Ku. 14:27 Ulun ijo eam kani ngohtun sopolahkioh tutang ngohasurih Ahku, eam tou monjadi murid-Ku. 14:28 Amat ihcobehti tahkan ihkam kani nombok ihcokobawak candi, botantu io ahkan tuot ngihtung houn, bolanjaoh mangat io ngota'an, inon duitoh suhkup ahkan pojadioh candi rih ata'ai eam. 14:29 Tului amat nyahta eam duon pojadioh, podahar kahlangoh jari tonapa, mahka paring ulun ijo nohto ang konuai rih ahkan ngonjea io. 14:30 Iro ahkan nuhtui, 'Iih, ulun tuh mangun, tahpi eam duon mopojadi!' 14:31 Amat ihcobehti lahca, ijo anai anaingina sopulu kujan sorodadu, kani parang umba lahca bohkon ijo anai duo pulu kujan sorodadu, botantu lahca rih tuot ngitung holu, inon io cukup ba'as ahkan molawan musuhoh rih. 14:32 Amat io kota'an ijo io eam ba'as, tontu ang ohkot musuh mahcu, io ahkan ngirim soruhan aiuoh ahkan nyawot hokobuah." 14:33 Kolaiouoh hino Yesus nuhtui, "Kolourih ka'a umba ihkam, eam kani ihcobehti ka tahkan ihkam duon monjadi murid-Ku, amat io eam monongaoh kokaro-karooh." 14:34 "Tonyu rih pios, tahpi amat tonyu rih monjadi tawah duon kah ulun ngomohitoh huli? 14:35 Eam anai gunai hino, pios ahkan umo oluka ahkan pupuk. Jadi tondian ih. Amat anai tolinga pios ngonihoh!"
15:1 Aang sino ondou, aro ponagih pajak tutang ulun-ulun ijo konohawot eam pios bain ulun aro, lombut ngonih Yesus. 15:2 Ulun-ulun Parisi tutang guru-guru agama nopara bokuhtuk. Iro nuhtui, "Cis, Ulun tuh norima ulun-ulun bodusa ijo eam pios tutang malah kuman homboh iro!" 15:3 Tului orih Yesus monyorihta ahkan iro porobasa tuh. 15:4 "Jahka ihcobehti tahkan ihkam anai mohaga soratus kungan tobiri, turus io konihou ihcokungan -- inon ijo ahkan kononguaioh? Musti io ahkan nohtah tobiri ijo sioi pulu sioi kungan rih ang padang uru, tutang tulak ngurah ijo nihou rih nyiring dahpot. 15:5 Tutang amat io nyombangoh huli tobiri rih, io kolourih jorih, nyiring tongohtunoh tobiri rih ang bahaioh, 15:6 turus ngomiu buli. Pongohuli io na'ah dolang injah tutang jolahaioh kodiling tutang nuhtui, 'Kanohtoi ihto jori-jorih. Tobiri aik ijo nihou jari sombang huli!' 15:7 Nah, kolourih ka'a ang soruga anai kojorih ijo paling hajo ahkan ihcobehti ulun bodusa ijo hubah, labih tahkan sioi pulu sioi ulun ijo pios tutang eam gunai hubah." 15:8 "Ata'ai jahka ihcobehti ulunbawi anai anaingina sopulu duit perak, turus nihou ihco kobitap -- inon ijo ahkan konuaioh? Io ahkan nutang sumbu tutang mahpas lohpouoh hawui ngurah ang umo-umoh nyiring io nyombangoh duit orih. 15:9 Aang ohkot io nyombangoh duit rih, io na'ah dolang injah-jolahai tutang karon-aring konduang turus nuhtui, 'Ahku jorih samasino jari nyombang huli duit'ku ijo nihou. Has ihto jori-jorih!' 15:10 Kolourih ka'a molehkat-molehkat Pohotala paham kojorihoh amat anai ihcoulun ja'at hubah tahkan dusa-dusan iro. Porocaya bewe!" 15:11 Yesus nuhtui hino, "Anai ihcobehti amai ijo anaitepun duo behti anak bahkas. 15:12 Ijo busu nuhtui umba amaioh, 'Amai, nonga ahkak'ku huntuh bagik'ku tahkan kotahtou ihto.' Mahka amaioh magi ponahtouoh rih ahkan koduo anakoh rih. 15:13 Pira-pira ondou pongohino anak busu rih morahkang bagin warisoh rih, turus tulak nokuh lowu ijo mahcu. Ang anan io bokora umba duitoh hawui bolum numbun kojolik ahtoi. 15:14 Kotihka duitoh jari ohpah paring, nyolung ang tana orih sino lo'u ijo hajo, nyiring io nopara molarat. 15:15 Turus io tulak ngomin upah aang ihcobehti ponduduk ang anan, ijo nyuhu io nokuh umo ngindoi urakoh. 15:16 Kolourih io bolo'u nyiring jorik nyuang buhtuioh umba ukun babi-urak rih. Oluka io kolourih kobolo'uoh, eamanai ihcobehti ka'a nunga ukun ahkaioh. 15:17 Kojoriaioh io borondong tutang nuhtui, 'Ulun-ulun ijo bogawi aang unuk amai'ku holowi-lowi uhkuioh, tutang ahku ang ohtoi nyiring mahtoi bolo'u! 15:18 Ahku ahkan hihkas tutang nokuh ahkan amai'ku, tutang nuhtui umba io: Amai, ahku jari bodusa tohimo Pohotala tutang tohimo Amai. 15:19 Eam pahtut hino ahku konohawot anak Amai, ngohu iou ahku barih kolou ulun ijo pongawi Amai.' 15:20 Mahka hihkas io buli nokuh amaioh. Magun mahcu tahkan lohpou, io soun tonohto bain amaioh. Honong paham kotoharuoh, amaioh nokoru naharang io ngohawon tutang ngarok io. 15:21 'Amai,' hion anak rih, 'ahku jari bodusa tohimo Pohotala tutang tohimo Amai. Eam pahtut hino ahku konohawot anak Amai.' 15:22 Tahpi amaioh na'ah pohalu-pohaluoh tutang nuhtui, 'Jeleng! Ngomin hatiu ijo paling pios, tutang nokehpanohrih ang io. Posolong tisim ang ikingoh, tutang sopahtu ang tapaoh. 15:23 Uliorih ngomin anak sahpi ijo monyak tutang nyombalih orih rih. Ihto ahkan kuman tutang jori-jorih. 15:24 Tului anak'ku tuh jari mahtoi, huntuh bolum huli; io ijo nihou, huntuh tosombang huli.' Turus nopara iro bopesta. 15:25 Pondehan rih anak ijo oko anai ang umo. Kotihka io buli tutang johcok ang doni lohpou, io ngonih auh musik tutang tari-tarian. 15:26 Io na'ah ihcobehti tahkan pohalu-pohalu rih, turus ngisok io, 'Anai inon tuh ang lohpou?' 15:27 Pohalu rih mutah, 'Ari Tuan buli! Tutang amai Tuan jari nyuhu nyombolih anak sahpi ijo monyak, tului io jari nyombang huli anakoh a'ang koada'ai solamat!' 15:28 Anak ijo oko rih bosingi samasino, nyiring io eam kani nyolong ahkan lohpou. Turus amaioh soluka tutang ngoto'u io nyolong. 15:29 Tahpi io nuhtui, 'Botoun-toun kotahiuoh ahku nguan aang mahto-mahtoi ahkan Amai. Eam pu'u ahku molawan poretah-poretah Amai. Tutang inon ijo Amai nonga ahkak'ku? Ihcokungan kambing ka jaha pu'u Amai nonga ahkak'ku bopesta umba sobat-sobat'ku! 15:30 Anak Amai rih jari ngopah ponahtou Amai, umba bawi sundal, tahpi kolourih io buli, Amai nyombolih anak sahpi ijo monyak ahkaioh!' 15:31 'Anak'ku,' hion amaioh, 'ihko turus anai ang ohtoi hihco ahku. Paring ijo ahku tepui anairih ihko tepui ka'a. 15:32 Tahpi ihto harusbopesta tutang jori-jorih, tului ari'mu orih rih jari mahtoi bolum huli; io jari nihou, tahpi huntuh jari sombang huli.' "
16:1 Yesus nuhtui umba murid-murid-Oh, "Anai ihcobehti ulun tahtou. Io anai tepun ihcobehti pogawai ngatuhduitoh ijo ngurus ponahtou ponuhanoh. Ulun tahtou rih norima laporan ijo pogawai ngatuhduit rih aro bokora umba duitoh. 16:2 Jadi io na'ah pogawai ngatuhduit orih tutang nuhtui, 'Inon tuh ijo konahak'ku tohou ihko? Uhuntuh, nyorah ahkak'ku laporan suhkup tohou aangkonuam ngatuh ponahtou'ku. Ihko eam tou huli monjadi pogawai ngatuhduit'ku.' 16:3 Mahka pogawai ngatuhduit rih niruk, 'Ahku harus nguan inon huntuh? Tuan'ku kani potondo ahku. Nyangkul, ahku eam ba'as; nyodahkah, ahku mia. 16:4 Ahku anai ahkar; amat ahku jari tonondo, ahku harus anai aro jolahan ijo kani norima ahku ang lohpou iro!' 16:5 Jadi, pogawai ngatuhduit rih na'ah nyinong ulun ijo anai utangoh umba tuanoh orih. Ahkan ijo pahtukoh, io nuhtui, 'Pira utang'mu umba tuan'ku?' 16:6 Ulun rih mutah, 'Soratus kasa undus sawit.' Pogawai rih nuhtui umba io, 'Tuh nyurat utang'mu. Tuot tutang jeleng nyurat: limo pulu.' 16:7 Pongohino rih io nuhtui umba ulun 'jo koduo, 'Tutang konduang, pira utang konduang?' Ulun rih mutah, 'Sokujan kapil gandum.' Pogawai ngatuhduit rih nuhtui umba io, 'Tuh, nyurat utang'mu. Nyuratrih: jalu rahtus.' 16:8 Mahka tuan tahkan pogawai ngatuhduit ijo eam morong rih, monara pogawai orih tului dolang gawin ijo cerdik orih; tului ulun-ulun ang kolunon tuh labih pitar ngatuh urusan aiuoh, tahkan ulun-ulun ijo bolum ang koloang." 16:9 Turus Yesus nuhtui hino, hioi-Oh, "Ngonihrih! Haparih ponahtou kolunon tuh unuk ngurah jolahan, mangat amat ponahtou kolunon tuh jari eam aro regai hino, ihkam ahkan tonorima ang unuk mohcon ijo kototahiuoh. 16:10 Ulun ijo duon tomorocaya a'ang hal-hal ijo koik, duon ka'a io tomorocaya a'ang hal-hal hajo. Tahpi ulun ijo eam duon tomorocaya a'ang hal-hal ijo koik, eam duon ka'a tomorocaya a'ang hal-hal hajo. 16:11 Jadi, amat tohou ponahtou kolunon tuh, ihkam jari eam duon tomorocaya, iai kani momporocaya ahkan'mu ponahtou rohani? 16:12 Tutang amat tohou ramu, ijo ain ulun bohkon, ihkam botarang eam duon tomorocaya, iai kani nonga ahkan'mu inon ijo monjadi ain'mu? 16:13 Eam ihcobehti ka duon bogawi ahkan duo Tuan; tului io ahkan labih masi ihco tahkan ijo bohkon, ata'ai io ahkan labih sotia umba Tuan ijo ihco, tahkan ijo bohkon. Kolourih ka'a umba ihkam, ihkam eam duon bogawi ahkan Pohotala, tutang ahkan ponahtou ponuhan ka'a." 16:14 Ulun-ulun Parisi ngonih paring ijo tonuhtui bain Yesus. Turus iro ngota'o Io, tului iro jolik umba duit. 16:15 Tahpi Yesus nuhtui umba iro, "Ihkam tuh ulun ijo ang toharep ulun bohkon, topahjahoh morong, tahpi Pohotala kota'an usin ahtoi'mu. Tului inon ijo tongohu isung bain ulun, topahjahoh pinda bain Pohotala. 16:16 Hukum ijo tononga bain Museh tutang ajaran nabi-nabi tahtap nyolung johcok aang uhun Yohanes Popondus. Tahkan ohkot orih Kabar Hinut tohou koloukuwoh Pohotala moretah kolou Lahca borihtaoh toturusoh. Tutang ulun maksa aropoh ahkan monjadi anak ukup ain Pohotala. 16:17 Tahpi labih jeleng langit tutang tana nihau, tahkan ihco hurup aang torat Pohotala monjadi eam nyolung. 16:18 Iai ijo nulang oruhoh, turus kawin umba bawi bohkon, ulun rih hobandung. Tutang ulun ijo kawin umba ulunbawi ijo jari tunulang bosaioh, io hobandung ka'a." 16:19 "Anai ihcobehti uluntahtou. Pokajaioh hajolegai, tutang pombolumoh holowi nyinong ondou. 16:20 Ang baun bauntukang lohpouoh tuot ihcobehti ulunporosbolum arai Lasarus. Behtiuoh tuwi umba kerai-bagai. 16:21 Io jolik nyuang buhtuioh umba papat uhkun ijo nyahtu tahkan meja ulun tahtou rih. Asuka ijo lombut ngonjelap kerai bagaioh rih. 16:22 Ulun porosbolum rih pongo mahtoi turus tongomin molehkat nokuh unuk tohoromat ang bambai Abraham ang soruga. Ulun tahtou rih mahtoi ka'a tutang tonanom. 16:23 Ang lowu liou io mondorihta samasino. Tutang aang ohkot io nopahjah tahkan anan nokuh diang, io nohto Abraham ang unukoh ijo mahcu tutang Lasarus anai ang mambai Abraham, 16:24 'Amai Abraham!' hion ulun tahtou rih, 'Ngasirih ahku. Nyuhu Lasarus nguhcom ikingoh ang danum, turus nokuh ngomisa jela'ku. Ahku ngarotkoporos samasino ang luwang baho tuh!' 16:25 Tahpi Abraham mutah, 'Mingatrih anak'ku: kotahin umur pombolum'mu, ihko jari ngondahpot paring ijo pio-pios, rahatoh Lasarus ngondahpot ijo ja'at-ja'at. Uhuntuh io sanang ang ohtoi, tutang ihko ngarotkoporos. 16:26 Bohkontahkan orih, ang holang ihko umba ihkai, jari tonapa ihco luwang ijo hajo, mangat ulun tahkan ohtoi eam duon nokuh anan, tutang ulun tahkan anan eam duon nokuh ohtoi!' 16:27 'Amat kolourih, Amai,' hion ulun tahtou rih, 'ahku nyawot honong paham Amai nyuhu Lasarus nokuh lohpou amai'ku. 16:28 Anai limo konduang'ku ang anan. Nyuhu Lasarus mopingatoh iro, mangat ara nyiring iro ka ngonyahtu nokuh unuk nyiksa tuh.' 16:29 Abraham mutah, 'Iro anai ngina torat Museh tutang buhku nabi-nabi! Nauh iro numbun inon ijo sonurat a'ang buhku-buhku orih!' 16:30 Tahpi ulun tahtou rih mutah, 'Orih eam sukup Amai Abraham. Tahpi amat anai ulun mahtoi bolum huli tutang lombut ahkan iro, iro ahkan hubah tahkan dusa-dusan'ndo.' 16:31 Tahpi Abraham nuhtui, 'Amat iro eam mohonau poretah Museh tutang nabi-nabi, musti iro eam ahkan porocaya ka'a, oluka anai ulun mahtoi ijo bolum huli.' "
17:1 Yesus nuhtui umba murid-murid-Oh, "Hal-hal ijo kotuluioh ulun nguan dusa musti ahkan anai. Tahpi colahkarih ulun ijo kotuluioh ulun nguan dusa! 17:2 Labih pios amat buhtup bahtu konarut aang uhcatoh, turus io ngondian nokuh luwang tasik, tahkanumba baiuoh ihcobehti tahkan ulun-ulun ijo koik tuh napa dusa. 17:3 Tului orih rondo-rondong ih! Amat konduang'mu bodusa, ningak io. Amat io nyasal, ngapunrih io. 17:4 Amat io bodusa umba ihko, pihtu tikat ihcoondou tutang nyinong tikat lombut nokuh 'ko, tutang nuhtui, 'Ahku nyawot apun', apunrih io." 17:5 Rasul-rasul nuhtui umba Tuhan Yesus, "Tuhan, ngoba'as koporocaya ihkai." 17:6 Tuhan mutah, "Amat ihkam anaingina koporocaya kohajon luang sosawi, ihkam duon nuhtui umba pu'un musai tuh, 'Bosohpit ihko tutang totanom ang tasik,' musti pu'un tuh ahkan numbun poretah'mu." 17:7 "Jahka ihcobehti tahkan ihkam anaingina pohalu ijo mombajak ang umo ata'ai nyokahtik tobiri. Amat pohalu rih buli, inon ijo io nuhtui umbaoh, ''Kan ohtoi jeleng kuman'? 17:8 Puna eam! Tombalikoh io ahkan nuhtui umba io, 'Nahtap ukun ahkak'ku. Haparih pokahjan ijo borasih, tutang ngindoirih ahku pondehan ahku kuman tutang ngorih; uliorih ihko tou kuman.' 17:9 Pohalu rih eam usah tonara tului jari numbun poretah tuanoh, kowa? 17:10 Kolourih ka'a ihkam. Amat ihkam jari nguan paring ijo ponoretah ahkan'mu, tuhtuioh, 'Ihkai tihkas pohalu ijo bahut; ihkai tihkas nguanoh kopahtut ihkai.' " 17:11 A'ang ponyalai nokuh Yerusalem, Yesus nyuru tana holang Samaria tutang Galilea. 17:12 Ohkot nyolong ihco lowu, Io tonokuh bain sopulu behti ijo boponyahkit belang ijo ngoli. Iro tombok tahkan mahcu 17:13 tutang ngombak, "Yesus! Tuan! Ngasirih ihkai!" 17:14 Uhun Yesus nopahjah iro, Io nuhtui, "Tulak nokuh imam-imam, nyawot iro momoriksa behtin'kam." Pondehan iro nyalan, nihou ponyahkit'ndo. 17:15 Kotihka ihcobehti tahkan iro borondong ijo io jari pios io hoduli honong bososurak monara Pohotala. 17:16 Turus ang tohimo Yesus, io suhkuntu'ut tutang ngohawot torimakasih umba Yesus. Ulun rih 'cobehti Samaria. 17:17 Pongohino Yesus nuhtui, "Eamkah sopulu behti ijo konopios? Ang umoh ijo sioi behti hino? 17:18 Ombai tihkas ulun luar tuh ijo huli ngohawot torimakasih ahkan Pohotala?" 17:19 Turus Yesus nuhtui umba ulun rih, "Hihkat beweu, tutang hihkasrih. Tului ihko porocaya umba Ahku, ihko pios." 17:20 Pira-pira ulun Parisi ngisok umba Yesus, mira Pohotala lombut ahkan moretah. Yesus mutah, "Pomoretah Pohotala eam nopara umba tanda-tanda ijo duon tonohto ulun, 17:21 nyiring ulun duon nuhtui, 'Kanohtoi nohto, tuh io!' ata'ai 'Ang anan io!' Tului Pohotala jari nopara moretah ang tohun-tohun ihkam." 17:22 Uliumba rih Yesus nuhtui umba murid-murid-Oh, "Ahkan lombut ohkotoh ihkam jolik nohto ihco ondou, tahkan ondou-ondou Anak Ulun, tahpi ihkam eam duon nohtooh. 17:23 Noin ulun nuhtui umba'kam, 'Nohto, ang anan!' ata'ai 'Nohto, ang ohtoi!' Tahpi ara ihkam soluka ngurah io. 17:24 Sama kolou kilap mokilat ang langit, tutang ngoloang tahkan puting dahpot puting, kolourih ka'a noin polombut Anak Ulun aang ondou-Oh. 17:25 Tahpi aang pahtukoh io harus aro ngarotporos tutang eam tonorima bain ulun-ulun jaman tuh. 17:26 Aang ondou Anak Ulun tongorinah noin koada'anoh kolou jaman Noah lomoi. 17:27 Ulun kuman ngorih tutang kawin; kolouorih hototurus johcok Noah nyolong koluwang bonamaoh tutang danum ba'ah lombut hawui molonyot ulun-ulun rih paring. 17:28 Ka'a kolou ang jaman Lot. Ulun kuman ngorih, hoborahkang hopoli, ngumo-ngombulan tutang mangun lohpou. 17:29 Tahpi kotihka Lot soluka tahkan Sodom, ang ondou orih, baho tutang sondawa mosuluh tahkan langit tutang morusak iro paring. 17:30 Kolouorih rih koada'anoh noin aang ondou Anak Ulun tongorinah. 17:31 Aang ondou orih ulun ijo uhun anai ang diang sahpou lohpouoh, a'ai mosuluh ahkan ngomin karon-ramuioh ijo ang luwang lohpou. Kolourih ka'a ulun ijo rahat ang umo a'ai ka'a buli nokuh lohpouoh. 17:32 Ingat beweu, inon ijo nyolung umba oruh Lot! 17:33 Ulun ijo bousaha nyolamat pombolumoh, ahkan nihou pombolumoh. Tahpi ulun ijo nihou pombolumoh ahkan monyolamat orih. 17:34 Porocayarih iou: Aang ngolomi orih, duo behti rahat tiruh ang ihco ranjang, ihcobehti ahkan konomin tutang 'cobehti hino tonohtah. 17:35 Duo behti bawi rahat muhca gandum, ihcobehti ahkan tongomin tutang ihcobehti hino tonohtah. 17:36 Duo behti rahat bogawi ang umo, ihcobehti ahkan konomin, tutang ihcobehti hino tonohtah." 17:37 Murid-murid Yesus ngisok, "Ang umoh orih ahkan nyolung, Tuhan?" Yesus mutah, "Ang umoh anai otunaang, ang anan anai bulung ijo kuman otunaang."
18:1 Uliorih Yesus monyorihta ihco porobasa ahkan majar murid-murid-Oh mangat'ndo hototurus bodo'a tutang a'ai putus asa. 18:2 Yesus nuhtui, "Ang ihco lowu, anai ihcobehti hakim ijo eam mihkoh umba Pohotala, tutang eam poraba umba ia-iai beweu. 18:3 Ang lowu rih anai hino ihcobehti balu, ijo pira-pira tikat noharep hakim orih, nyawot porokaraoh tongomorong, 'Dohop ahku noharep musuh aik'ku,' hion balu rih. 18:4 Pira-pira kotihka kotahiu hakim rih eam kani dohop balu rih. Tahpi ang kolaiouoh hakim rih niruk, 'Olu ahku eam mihkoh umba Pohotala tutang eam poraba umba ia-iai ka'a, 18:5 tahpi tului balu tuh hototurus ih ngorasi ahku beweu, labih pios ahku ngomorong porokaraoh. Amat eam, io ahkan hototurus lombut tutang ngorasi ahku.' " 18:6 Turus Tuhan nuhtui, "Nohtoaniohrih, inon ijo tonuhtuioh bain hakim ijo eam adil rih! 18:7 Orih, inon Pohotala eam ahkan ngomorong porokara ukup-Oh bongoi ijo nyawot dohop umba Io hondou tutang ngolomi? Inon Io ahkan nguluh kotihka ahkan ndohop iro? 18:8 Porocayarih: Io ahkan jeleng ndohop porokaran iro! Tahpi amat Anak Ulun lombut, inon magun anai tonyombang ulun ijo porocaya umba-Oh Io ang tana tuh?" 18:9 Yesus monyorihta ka'a porobasa tuh, ijo tonuju-Oh ahkan ulun ijo nopahjah hina ulun bohkon, tahpi yahkin ijo aropoh bongoi pios. 18:10 Hion Yesus, "Anai duo behti ijo tulak nokuh Lohpou Tuhan ahkan bodo'a. Ijo ihco ulun Parisi, ijo bohkonoh ihcobehti ponagih pajak. 18:11 Ulun Parisi rih tombok bongoi hawui bodo'a, 'Pohotala, ahku ngohawot torimakasih ahkan-Mu, tului ahku eam kolou ulun bohkon, ijo bokuhu, curang, ata'ai hobandung. Ahku botorimakasih, tului ahku eam kolou ponagih pajak orih rih. 18:12 Ahku puasa honduo tikat a'ang ihcominggu, tutang ahku nonga ahkan-Mu sepersopulu tahkan paring ijo pongonduok'ku.' 18:13 Tahpi ponagih pajak rih tombok a'ang unuk mahcu-mahcu tutang molahan eam bohanyi nokara nokuh langit. Hawui nehkap husukoh io nuhtui, 'Pohotala, ngasirih ahku, ulun bodusa tuh!' " 18:14 "Porocayarih," hion Yesus, "aang ohkot buli nokuh lohpou ponagih pajak orih ijo tonorima Pohotala, tutang bohkon ulun Parisi rih. Tului nyinong ulun ijo ngondiang aropoh ahkan tongopinda; tutang nyinong ulun ijo ngopinda aropoh ahkan tonongahtang." 18:15 Anai ulun-ulun ngomin anak-inyam koik nokuh Yesus mangat Io nambit tutang mborehkat iro. Kotihka murid-murid Yesus nohto orih, iro ngohana ulun-ulun rih. 18:16 Tahpi Yesus na'ah anak-inyam rih, turus nuhtui umba murid-murid-Oh, "Nauhoh dolang anak-inyam lombut nokuh Ahku! Ara baca iro, tului ulun somahcam ituh ijo monjadi anak ukup Pohotala. 18:17 Ingatrih! Ulun ijo eam noharep Pohotala kolou ihcobehti anak-inyam, io eam ahkan monjadi anak ukup Pohotala." 18:18 Ihcobehti okon ulun Yahudi ngisok umba Yesus, "Amai Guru ijo pios, ahku harus nguan inon mangat duon norima pombolum sojahti tutang kototahiu?" 18:19 "Ombai ihko ngohawot Ahku pios?" kisok Yesus umbaoh. "Eam anai ijo pios, amatbohkon Pohotala bongoi. 18:20 Ihko jari ta'an karon-poretah Pohotala: 'Ara hobandung, ara munu, ara nahkou, ara mander alik, tutang horomat umba amai tutang inai'kam.' " 18:21 "Paring poretah orih jari ahku molalus tahkan biou," hion ulun tahtou rih. 18:22 Ngonih orih, Yesus nuhtui, "Magun anai ihco hal, ijo harus ihko nguaioh: Modagangrih paring ramun'kam, nongarih duitoh ahkan ulun porosbolum, tutang ihko ahkan duon ponahtou ang soruga. Uliorih lombut ngahasu Ahku." 18:23 Tahpi kotihka ulun orih ngonih auh rih, io porosahtoi tului io tahtou samasino. 18:24 Yesus kota'an ulun rih porosahtoioh, tului orih io nuhtui, "Bohali samasino ahkan ulun tahtou monjadi anak ukup ain Pohotala! 18:25 Labih murah ihcokungan unta nyolong luang doih, tahkan ihcobehti uluntahtou nyolong Kolunon Bohua Ain Pohotala." 18:26 Ulun-ulun ngonih Yesus nuhtui kolourih iro ngisok, "Amat kolouorih iai ijo tou solamat?" 18:27 Yesus mutah, "Ijo eam aroharapan aang ulun, uras harapan aang Pohotala!" 18:28 Turus Petrus nuhtui, "Topahjahrih! Ihkai jari nohtah lohpou kosalah mangat ngahasu Amai." 18:29 "Porocayarih!" hion Yesus, "Ulun ijo jari nohtahoh lohpouoh tutang oruhoh ata'ai aring-konduangoh, ata'ai amai-inaioh, ata'ai anak-anakoh tului io mohalu Pohotala, 18:30 ulun orih ahkan ponalos bolihpet-lihpet aang kotihka tuh, tutang aang jaman ijo ahkan lombut, io ahkan tononga pombolum ijo sojahti tutang ijo kototahiu." 18:31 Yesus muhpung koduo balas murid-Oh bongon'ndo, turus nuhtui, "Ngonihoh tuh! Ihto huntuh nitu Yerusalem. Ang anan, paring ijo sonurat nabi-nabi tohou Anak Ulun ahkan nyolung. 18:32 Io ahkan tonyarah ahkan ulun-ulun bohkon Yahudi, ijo ahkan tongonjea, mohina tutang ngoluhca Io. 18:33 Iro ahkan nyiksa tutang munu Io, tahpi ang ondou tolu Io ahkan monyun." 18:34 Paring orih eam duon tonopaham isut ka bain murid-murid Yesus orih. Rimai tahkan tuhtui-tuhtui Yesus rih tonokulim tahkan iro. Iro eam kota'an Io pander tohou inon. 18:35 Kotihka Yesus kani johcok ang lowu Yerikho, ihcobehti bobulen rahat tuot nyodahkah ang saran jalan. 18:36 Kotihka io ngonih ulun aro rih nguha. Io ngisok, "Anai inon?" 18:37 "Yesus ulun Nasaret rih, nguha," hion iro umba io. 18:38 Mahka ulun bobulen rih ngoriak, "Yesus, anak Dawid! Masilah ahku!" 18:39 Ulun-ulun ijo ang baun nyangit io, tutang nyuhu io tonih. Tahpi io ngoriak paham muhing hino, "Anak Dawid! Masilah ahku!" 18:40 Yesus tondo tutang nyuhu ulun ngomin ulun bobulen rih nokuh Io. Ohkot io johcok, Yesus ngisok io, 18:41 "Inon ijo ihko jolik Ahku nguai ahkan'kam?" "Tuan," hion ulun bobulen rih, "ahku jolik nohto." 18:42 "Amat kolourih, nohtorih! Tului ihko porocaya umba Ahku, ihko pios." 18:43 Kotihka orih ka'a io duon nohto, turus io nutut Yesus hawui ngohawot torimakasih ahkan Pohotala. Kotihka ulun aro nohto hal nyolung rih paringoh monara Pohotala.
19:1 Kotihka Yesus johcok ang Yerikho, Io nyalan turus nyuru tohun lowu rih. 19:2 Ang lowu rih anai ihcobehti kopala ponagih pajak ijo tahtou. Araioh Zakheus. 19:3 Io jolik nohto iai Yesus rih, tahpi tului ulun paham aro tutang io ulun iwak, mahka io eam duon nohto Yesus. 19:4 Jadi, io nokoru nosolu ulun-ulun, turus nuhkat ihco pu'un kahju, mangat duon nopahjah Yesus ijo honjulu hino ahkan nguha ang anan. 19:5 Kotihka Yesus johcok ang pinda pu'un kaju rih, Io nokara nokuh diang turus nuhtui, "Zakheus, mosuluh jeleng! Tului Ahku harus masap nokuh lohpou'mu ondou tuh." 19:6 Zakheus jio-jion mosuluh tutang nyambut Yesus honong umbot kojorihoh. 19:7 Paring ulun ijo nohto hal orih nopara bokuhtuk. Iro nuhtui, "Ceh! Io tulak masap ang lohpou ulun ijo eam pios!" 19:8 Pongohino rih ang lohpouoh, Zakheus tombok tutang nuhtui umba Yesus, "Tuhan soparu tahkan ponahtou'ku ahkan ahku nyadahkahoh ahkan ulun porosbolum; tutang iai beweu ijo pu'u ahku nihpuoh, ahkan ahku bayar huli ahkaioh opat kali lihpet!" 19:9 Turus hion Yesus, "Aang ondou tuh ihko tutang paring jolahan'mu tonyolamat bain Pohotala tutang nonga pombolum ijo bohua, tului ihko ka'a lihit Abraham. 19:10 Anak Ulun lombut ahkan ngurah tutang monyolamat ulun ijo lacat." 19:11 Pondehan ulun magun ngonih auh Yesus nuhtui, Io monyorihta ihco porobasa. Tului, ang ohkot orih, Io anai doni Yerusalem, tutang ulun ngohu ijo Pohotala pohos ahkan moretah kolou Lahca ang kolunon. 19:12 Yesus nuhtui, "Anai ihcobehti bongsawan ijo tulak nokuh lowu mahcu ahkan tomotuot monjadi lahca, pongohino buli. 19:13 Soun tahkan hihkas, io na'ah sopulu behti pohalu, turus mbagi ahkan iro nyinong behti ihcokobawak duit bulou. 'Bodagang umba duit tuh, pondehan ahku tulak,' hioioh umba iro. 19:14 Tahpi ponduduk lowu orih bohiri umbaoh. Jadi, uli io tulak iro ngirim soruhan ahkan nuhtui, 'Ihkai eam kani ulun tuh monjadi lahcan ihkai.' 19:15 Tahpi ulun uhtusbongsawan rih tomotuot monjadi lahca, pongohino io huli nokuh lowuioh. Jeleng io na'ah pohalu-pohaluoh noharep, ahkan ngota'an pira utung ijo jari iro dinui. 19:16 Pohalu ijo pahtuk lombut tutang nuhtui, 'Tuan, ihco duit bulou ijo Tuan nonga orih, jari ahku dinui sopulu.' 19:17 'Pios,' hion Tuan rih, 'ihko pohalu ijo morong! Tului a'ang hal-hal ijo koik ihko duon tomorocaya, ahku ahkan notuot ihko pongowasa sopulu lowu.' 19:18 Pohalu koduo lombut tutang hioi, 'Tuan, ihco duit bulou ijo Tuan nongaoh lomoi, jari ahku ngondinuioh limo.' 19:19 Umba pohalu orih lahca rih nuhtui, 'Ihko ahkan monjadi pongowasa isung limo lowu.' 19:20 Pohalu ijo bohkon lombut turus nuhtui, 'Tuan, tuh duit Tuan; ahku ngina luwang saputangan. 19:21 Ahku mihkoh umba Tuan, tului Tuan ulun ijo karas. Tuan ngomin inon ijo bohkon ain Tuan nihpun hasir ang unuk ijo eam tonombulan bain Tuan.' 19:22 Lahca rih nuhtui umba io, 'Ihko pohalu ijo ja'at! Tohorong umba tuhtui-tuhtui'mu bongom, ahku ahkan mohukum ihko. Ihko kota'an ahku ulun ijo karas: ahku ngomin inon ijo ahku eam tepui tutang nipun hasir ijo eam ahku ngomulanoh. 19:23 Amat kolourih ombai ihko eam posolong duit orih nokuh bank mangat amatmira ahku buli ahku duon norima duit orih tutang anakoh?' 19:24 Pongohino lahca rih nuhtui umba ulun-ulun ijo tombok ang anan, 'Ngomin duit orih tahkan io, tutang nonga ahkan pohalu ijo tepun sopulu duit bulou rih.' 19:25 Tahpi ulun-ulun rih nuhtui, 'Tuan, io jari tepun sopulu.' 19:26 Lahca rih mutah, 'Ingat, ulun ijo jari tepun ahkaioh tononga labih aro hino. Tahpi ulun ijo eam anaitepun aangihco, inon ijo anai aang io ahkan konomin hino tahkan io. 19:27 Tutang huntuh ngomin ahkan ohtoi karon-musuh'ku rih ijo eam kani ahku monjadi lahcaoh. Munu iro paring ang toharep'ku!' " 19:28 Uli Yesus nuhtui paring orih Io nyalan nosolu boun iro nitu Yerusalem. 19:29 Kotihka johcok tahkin Betpage tutang Betania ang Puruk Zaitun, Io nyuhu duo behti murid-Oh tulak labih soun. 19:30 "Tulakrih nokuh kampung ijo ang boun rih," hion Yesus umba iro, "amat ihkam nyolong ang anan, ihkam ahkan nohto ihcokungan anak keledai tonyuhkui. Keledai rih jaha pu'u tonunggang ulun. Nguwatrih keledai rih, tutang ngomin nokuh ohtoi. 19:31 Amat ulun ngisok umba ihkam, 'Ombai ihkam nguwat suhkui keledai rih?' Hion'kam, 'Tuhan kani hapaoh.' " 19:32 Koduo murid Yesus rih hihkas tutang sombang paringoh tohorong umba ijo tonuhtui-Oh. 19:33 Pondehan iro nguwat suhkui anak keledai rih, tepuioh nuhtui umba iro, "Ahkan inon ihkam nguwat keledai rih?" 19:34 Iro mutah, "Tuhan kani hapaoh." 19:35 Turus iro ngomin anak keledai rih ahkan Yesus. Pongohino iro mirang jubah'ndo ang lihkut keledai rih turus dohop Yesus jahkat kongosanoh. 19:36 Pondehan Io nguha jalan hawui nunggang keledai rih, ulun-ulun mirang jubah iro ang jalan. 19:37 Kotihka Yesus doni johcok ang Yerusalem, ang jalan ijo mosuluh tahkan Puruk Zaitun, paring murid-murid-Oh ijo aro rih bosurak-surak monara Pohotala tutang ngohawot torimakasih ahkai-Oh tului paring kahtahelan ijo jari iro nyaksioh. 19:38 Iro bosurak, "Mborehkatrih Lahca ijo lombut a'ang aran Tuhan! Kojorih ang soruga tutang horomat ahkan Pohotala!" 19:39 Pira-pira ulun Parisi tahkan louk ulun aro rih nuhtui umba Yesus, "Amai Guru, nyuhu murid-murid Amai tonih." 19:40 Yesus mutah, "Porocayarih! Amat iro tonih, bahtu-bahtu tuh noin ahkan ngoriak." 19:41 Kotihka Yesus mahi nahpi lowu Yerusalem, tutang nohto lowu orih, Io nangihoh. 19:42 Hion Yesus, "Ngasi-ngasi, paham kopiosoh amat ondou tuh ihkam kota'an, inon ijo duon mopolombut kobuah! Tahpi huntuh ihko eam duon nohtooh. 19:43 Ihko ahkan nginyam ihco wayah, ang amoh musuh'mu nguan pohalang-pohalang ang kodiling'kam; iro ahkan ngahpung ihko, tutang ngohapit'kam tahkan kokaro puting. 19:44 Iro ahkan molutek ihko hawui ulun-ulun punduduk'mu; tutang eam ihco bahtu ka ahkan iro mohonouoh mohcon hosusun ang unukoh, tului ihko eam nohtoani wayah kotihka Pohotala lombut ahkan nyolamat ihko!" 19:45 Yesus nyolong nokuh Lohpou Tuhan tutang nopara muko podagang ang anan. 19:46 "Ang luwang Surat Borasih," hion Yesus umba iro, "tonyurat koloutuh: Pohotala nuhtui, 'Lohpou-Ku ahkan monjadi unuk bodo'a.' Tahpi ihkam napaoh monjadi kosalah ponyilou!" 19:47 Nyinong ondou Yesus majar ang luwang Lohpou Tuhan. Imam-imam kopala, guru-guru agama, honong okon-okon Yahudi jolik munu Io, 19:48 tahpi eam nyombang jalan ahkan nguan hal orih, tului paring ulun toturus beweu ngonih Io, tutang totarik umba dolang auh-Oh.
20:1 Aang sino ondou, Yesus rahat mongajar tutang mborihtaoh Kabar Hinut tahkan Pohotala ahkan ulun-ulun ang luwang Lohpou Tuhan. Imam-imam kopala, guru-guru agama, hawui okon-okon Yahudi lombut 20:2 tutang nuhtui umba Yesus, "Cuba monyorihta ahkan ihkai ngosan galang inon Ihko nguan paringoh tuh? Iai ijo nonga hak rih ahkan'mu?" 20:3 Yesus mutah, "Ahku jolik ngisok. Cuba nonga ahkak-Ku, 20:4 Yohanes mopondus hapan hak iai? Pohotala ata'ai kolunon?" 20:5 Mahka nopararih iro hopahkat, "Amat ihto nuhtui, 'Umba hak Pohotala,' Io ahkan nuhtui, 'Amat kolourih ombai ihkam eam porocaya umba Io?' 20:6 Tahpi amat ihto nuhtui, 'Umba hak ulun,' paring ulun ahkan mukah ihto hapan bahtu, tului iro porocaya ijo Yohanes ihcobehti nabi." 20:7 Jadi iro mutah, "Ihkai eam kota'an." 20:8 Mahka Yesus nuhtui umba'ndo, "Amat kolourih Ahku ka'a eam ahkan nuhtui ahkan'kam hapan hak iai Ahku nguan paringoh tuh." 20:9 Yesus mander ahkan ulun-ulun rih, porobasa pongo tuh, "Anai ihcobehti ijo ngomulan ihcokolambar kobun anggur. Io monyewaoh kobun rih, ahkan pira-pira ponggawi-ponggawi, turus botulak nokuh lowu bohkon, tutang mohcon tahi ang anan. 20:10 Kotihka jari ohkotoh nguhtoi bua anggur, tepun kombulan rih ngirim pohaluoh nokuh ponggawi-ponggawi orih ahkan norima hasir ahkaioh. Tahpi ponggawi-ponggawi rih nahup pohalu orih tutang nyuhu io buli hawui longoi buang. 20:11 Mahka tepun kobun rih, ngirim hino pohalu ijo bohkon; tahpi pohalu orih ka tonahup ka'a tutang tomohina bain ulun ijo ponggawi-ponggawi orih, turus nyuhu buli hawui longoi buang. 20:12 Pongohino tepun kobun rih ngirim pohalu ijo kotolu. Tahpi pohalu orih ka tonahup ka'a bain ponggawi-ponggawi pomulan rih, tutang ngindiou soluka kobun rih. 20:13 Kojoriaioh tepun kobun rih nuhtui, 'Ahku harus nguan inon hino? Ahku ahkan ngirim anak'ku bongok, ijo ahku ngasioh. Musti io ahkan iro mohoromatoh!' 20:14 Tahpi kotihka ponggawi-ponggawi pomulan rih, nohto anak tepun kobun rih, iro hotohou sama aropoh, 'Atuh io ijo mowarisoh. Olai ihto munu io, ahkan ihto ngomin warisoh.' 20:15 Mahka iro nawan tutang ngomin io nokuh luar kobun orih turus munu io." Turus Yesus ngisok, "Nah, amat tepun kobun orih buli, io ahkan nguan inon nohimo ponggawi-ponggawi pombulan rih? 20:16 Musti io ahkan lombut tutang munu ponggawi-ponggawi pomulan rih, turus nyarah pomulan rih ahkan ponyewa-ponyewa pumbulan ijo bohkon." Ngonih orih, nuhtuirih ulun-ulun ahkan Yesus, "Samasino eam!" 20:17 Yesus nopahjah iro turus nuhtui, "Amat kolourih, inon rimai ayat Surat Borasih tuh? 'Bahtu ijo eam gunai bain tuhkang mangun, jari monjadi bahtu ijo pahtukoh.' 20:18 Paring ulun ijo ngonyahtu notarang bahtu orih ahkan lonyuh; tutang iai ijo tonopahas bahtu rih ahkan tokole'et monjadi korawu." 20:19 Guru-guru agama tutang imam-imam kopala ta'an ijo porobasa orih tonitu Yesus ahkan iro. Tului orih iro jolik nawan Io uhun orih ka'a, tahpi iro mihkoh umba ulun aro. 20:20 Jadi, iro ngurah kosapet ijo pios. Iro nyuruk ulun mangat nguan kolou ulun ijo ihlas, tutang nyuhu ulun-ulun rih nyokohtung Yesus umba kisok-kisok, mangat iro duon monyarah Yesus nokuh wewenang tutang kowasa gubernur. 20:21 Mahka ulun-ulun ijo jari kuman suruk rih nuhtui umba Yesus, "Amai Guru, ihkai kota'an, paring ijo Amai ngohawot tutang majaroh rih morong. Ihkai kota'an ka'a Amai majar hapan torus-tarang tohou kohondak Pohotala ahkan ulunkolunon, tului Amai eam nopahjah kolunoi. 20:22 Tului orih cuba Amai nuhtui ahkan ihkai, numbun hadat agama ihto, toukah mombayar pajak ahkan Kaisar ata'ai eam?" 20:23 Tahpi Yesus ta'an orih tihkos iro. Tului orih Io nuhtui, 20:24 "Cuba pokarah ahkak-Ku ihcokobitap duit perak. Gambar tutang aran iai tuh?" "Kaisar!" hion'ndo. 20:25 "Amat kolourih," hion Yesus umba iro, "nonga ahkan Kaisar inon ijo ain Kaisar, tutang ahkan Pohotala inon ijo ain Pohotala." 20:26 Gihtan aang tohimo ulun aro rih, iro eam duon nyombang ihco kosalan ka aang Yesus. Iro tihkas tonih beweu tutang kagum tului putah Yesus orih. 20:27 Pira-pira ulun tahkan barih Saduki lombut nokuh Yesus. (Iro anai barih ijo niruk ijo ulun mahtoi eam ahkan bolum huli.) Iro ngisok umba Yesus. 20:28 "Amai Guru, Museh nyurat hukum tuh ahkan ihto: Amat ihcobehti bahkas mahtoi, tutang io eam anai anak, mahka konduangoh harus kawin umba baluioh rih mangat nonga koturunan ahkan ulun ijo jari mahtoi rih. 20:29 Pu'u anai pihtu ulun hokonduang. Ijo pongoko kawin, turus mahtoi eam anai anak. 20:30 Pongohuli 'jo koduo kawin umba balu rih, tahpi io ka'a eam anai duon anak. 20:31 Hal ijo sama nyolung ka'a umba konduang ijo kotolu tutang hototurusoh johcok ijo kopihtu. 20:32 Kojoriaioh ulunbawi rih mahtoi ka'a. 20:33 Aang ondou ulun mahtoi tonombolum huli, oruh iai bawi rih? Tului kopihtu-pihtuoh uras kawin umba io." 20:34 Yesus mutah, "Ulun-ulun ijo bolum uhuntuh tuh kawin, 20:35 tahpi ulun-ulun ijo pahtut ahkan tongombolum uli mahtoi, tutang bolum ang jaman ijo ahkan lombut, iro eam kawin. 20:36 Iro sama kolou molehkat, tutang eam tou mahtoi. Iro orih paringoh anak-anak Pohotala, tului iro jari tongombolum huli tahkan kopahtoi. 20:37 Museh bongoi jari nyorihta honong botarang ijo ulun mahtoi ahkan tonombolum huli. A'ang suratoh tohou ruwut ijo ngonjelak rih io ngohowut Tuhan monjadi, 'Pohotalan Abraham, Pohotalan Isaak, tutang Pohotalan Yakub'. 20:38 Nah, Pohotala rih, eam Pohotalan ulun ijo mahtoi! Io Pohotalan ulun-ulun ijo bolum! Bain bagi Pohotala paring ulun bolum." 20:39 Pira-pira guru agama homauh, "Putah Amai Guru morong sama sino." 20:40 Tului orih iro eam bahanyi hino ngisok aangihco umba Yesus. 20:41 Yesus ngisok umba iro, "Koloukuwoh dahpot tonuhtui ijo Lahca Ponyolamat lihit Dawid? 20:42 Padahar Dawid bongoi nuhtui a'ang buhku Masmur, 'Tuhan nuhtui umba Tuhan'ku: Tuotrih aang sila kotouk-Ku, 20:43 nyiring Ahku nguan musuh-musuh-Mu monyarah umba Ihko.' 20:44 Jadi amat Dawid ngohawot Lahca Ponyolamat rih 'Tuhan' koloukuwoh tou Io lihit Dawid?" 20:45 Beteng ulun-ulun ngonih Yesus bopander, Io nuhtui umba murid-murid-Oh, 20:46 "Buah bojagarih toharep guru-guru agama. Iro jolik nyala-nyalan hapan jubah ijo ombu, tutang jolik ngurah horomat ang pasar-pasar. Iro jolik unuk-unuk ijo tomohoromat ang luwang lohpou sombayang tutang ang pesta-pesta. 20:47 Iro nihpu balu-balu tutang ngomin lohpou'ndo. Tutang nuhtup kosalan iro rih, iro bodo'a paham ombu! Hukum ijo bahat notai iro!"
21:1 Aang Lohpou Tuhan, Yesus nopahjah ulun-ulun tahtou ngipos duit'ndo nokuh luwang pohti pononga. 21:2 Io nohto ka'a ihcobehti balu ijo paham porosbolum, ngipos duo bilap duit tombaga. 21:3 Turus Yesus nuhtui, "Ngonihoh: balu tuh ngipos labih aro tahkan paring ijo bohkon. 21:4 Tului iro paring nonga tahkan kolowin ponahtouoh. Tahpi balu tuh, oluka io porosbolum, io nonga paring ijo anai aang io ijo boguna ahkai bongoi bagi pombolum." 21:5 Anai ulun-ulun ijo nuhtui tohou koloukuwoh kopiosoh Lohpou Tuhan, tonawas umba bahtu ijo pio-pios tutang umba ramu-ramu ijo tononga ahkan Pohotala. Mahka Yesus nuhtui umba iro, 21:6 "Noin anai wayahoh, paring ijo ihkam nohto tuh ahkan bokahkas; eam anai ihco bahtu ka ang ohtoi ijo ahkan mohcon hosusun ang unukoh!" 21:7 Iro ngisok umba Yesus, "Amai Guru, mirarih aang rih ahkan nyolung? Tutang inon tandaoh amat jari johcok ohkotoh hal orih rih ahkan nyolung?" 21:8 Yesus nuhtui, "Rondo-rondongrih, ara nyiring ihkam tongobula. Aro ulun ahkan lombut tutang mahapa arak-Ku, tutang nuhtui, 'Ahku tuh Io!' tutang 'Johcok ohkotoh.' Tahpi a'ai ihkam ngohasu iro. 21:9 A'ai ka'a mihkoh amat ihkam ngonih kabar tohou hokolahi tutang asang. Paringoh rih harus nyolung soun. Tahpi orih eam rimai ijo johcok ohkotoh kiamat." 21:10 Turus Yesus noturus tuhtui-tuhtui-Oh, hioi-Oh, "Uhtus ijo ihco ahkan bokolahi ngolawan uhtus ijo bohkon, tutang nogara ijo ihco ahkan mongolahi nogara ijo bohkon. 21:11 Ang umo-umoh ahkan nyolung moruguh tana ijo hebat, bahaya bolo'u, tutang wabah ponyahkit. Ahkan nyolung hal-hal ijo kongori-ngori tutang mopihkoh ang langit. 21:12 Tahpi soun paringoh orih nyolung, ihkam ahkan tonawan tutang tonoporos. Ihkam ahkan ponosara ang lohpou-lohpou sombayang tutang ponosolong nokuh luwang sipir. Tutang ihkam ahkan tonyeret nokuh toharep lahca-lahca, tutang pongowasa-pongowasa, kotului ihkam rih murid-Ku. 21:13 Orih rih kosapet ahkan'kam, ahkan mborihta Kabar Hinut tahkan Pohotala. 21:14 Tehkadlah ijo ihkam eam ahkan bembang tohou inon ijo harus ihkam nuhtui ahkan mombela arop. 21:15 Ahku bongok ahkan nonga bagi'mu auh-auh tutang kopiosbudi bosara orih, nyiring eam ihcobehti ka tahkan musuh-musuh'kam duon ngolawan ata'ai nulak inon ijo ihkam nuhtuioh. 21:16 Ihkam ahkan tongorana bain inai-amai'mu, bain konduang-konduang'mu, bain ari bobuhan'mu, tutang bain injah-jolahan'mu. Ihcokobagi tahkan ihkam ahkan ponunu bain iro. 21:17 Ihkam ahkan tonyingi bain paring ulun, tului ihkam konohawot murid-Ku. 21:18 Tahpi ihcokolambar balou ka tahkan kuhung'mu eam ahkan tosohpit. 21:19 Amat ihkam tahan tutang sabar, ihkam ahkan solamat." 21:20 "Amatmira ihkam nohto Yerusalem tongodiling sorodadu, ihkam ahkan kota'an lowu orih, eam ahkan tahi hino ahkan tonolingis. 21:21 Aang ohkot rih harusrih ulun ijo anai ang Yudea nokoru nokuh puruk-puruk. Iro ijo anai ang luwang lowu ara iro soluka, tutang iro ijo ang luar lowu ara nyolong koluwang lowu. 21:22 Tului aang ondou-ondou rih anai, 'Ondou-ondou Hukum Tomuhtus,' mangat umba kolourih nyolung inon ijo jari tonyurat aang Surat Borasih. 21:23 Eaminonrih ngorioh aang ondou-ondou rih ahkan ulunbawi ijo botohi tutang inai ijo magun nyusu ngoaoh! Lowu tuh ahkan buah kosusahan ijo hajo, tutang Tuhan ahkan mohukum uhtus tuh. 21:24 Anai ijo tomunu umba padang, anai hino ahkan tungomin kolou tawanan, nokuh lowun-lowun ulun; tutang ulun-ulun ijo eam kosono Pohotala ahkan nihcak-ngihik Yerusalem nyiring opah ohkot ijo jari tonahtap bain Tuhan ahkan iro." 21:25 "Noin aang mahtanondou, bulan, tutang potion-potion ahkan gihtan tanda-tanda. Ang tana, uhtus-uhtus ahkan mihkoh tutang bingung noharep guruh tutang riak tasik. 21:26 Kolunon ahkan mihkoh sotongah mahtoi noharep inon ijo ahkan nyolung, ang sohapus kolunon tuh tului pongowasa alam raya ahkan monjadi kahcau-balau. 21:27 Aang ohkot orih Anak Ulun ahkan lombut ang baunondou homboh kowasa tutang kohajoi ijo hajo. 21:28 Amatmira hal-hal orih nopara nyolung, kuat tutang ngahtang kuhung'mu, bain honjulu hino ihkam ahkan tonyolamat." 21:29 Turus Yesus mborihta ahkan iro porobasa pongo tuh, hioi-Oh, "Topahjah pu'un sikun tutang paring pu'un ijo bohkon. 21:30 Amat suluh-suluhoh nopara nyoluhtih, ihkam kota'an ahkan jari doni ohkot ondou tojah. 21:31 Kolourih ka'a amat ihkam nohto hal-hal orih nyolung, ihkam ahkan ta'an ijo Pohotala jeleng ahkan moretah kolou Lahca. 21:32 Kota'anrih! Hal-hal rih ahkan nyolung sountahkan ulun-ulun ijo bolum uhuntuh mahtoi paringoh. 21:33 Langit tutang tana ahkan lilap, tahpi tuhtui-tuhtui-Ku tahtap kototahiuoh." 21:34 "Jagarih arop'kam ara nyiring ihkam dalou kaurderoh umba pesta-pesta tutang minum-ngorih mombusou, ata'ai toturus niruk soal soal pombolum'mu, nyiring ihkam eam botahtap kotihka Ondou orih lombut hawui nyolonga. 21:35 Tului ondou rih ahkan lombut kolou sokohtung ngindoi aang paring ulun ang danum kolunon tuh. 21:36 Bojaga-jagarih, tutang bodo'a toturus ahkan ihkam ba'as noharep paring-hal ijo ahkan nyolung tutang ihkam duon noharep Anak Ulun." 21:37 Yesus majar ang Lohpou Tuhan ang tohun ondou, tutang ngolomi ondouoh, Io hihkas ahkan Puruk Zaitun tutang mohcon ang anan. 21:38 Nyinong ngohkos paring ulun lombut nokuh Lohpou Tuhan ahkan ngonih tuhtui Yesus mongajar.
22:1 Pesta Luhte Eam Boragi ijo konohawot Paska jari dohkin. 22:2 Imam-imam kopala tutang guru-guru agama uhun ngurahjalan ahkan munu Yesus cara toni-tonih, tului iro mihkoh umba ulun aro. 22:3 Pongohino sehtan nyolong Yudas ijo konohawot Iskariot, iorih 'cobehti tahkan koduo balas murid Yesus. 22:4 Tului orih Yudas tulak tutang bohaum umba imam-imam kopala tutang dolang kopala pongawal Lohpou Tuhan tohou koloukuwoh io duon nyarahoh Yesus ahkan iro. 22:5 Iro jorih samasino tutang hobowot ahkan nongaoh duit ahkaioh. 22:6 Yudas ka sotuju tutang nopara ngurah kosapet ahkan monyarah Yesus ahkan iro tahpi ara kota'an ulun. 22:7 Johcok ondouoh ang Pesta Luhte Ijo Eam Boragi Io tobiri ahkan ukun Paska tonyombalih. 22:8 Mahka Yesus nyuhu Petrus tutang Yohanes, "Tulak'kam nyodia ukun Paska ahkan ihto." 22:9 "Ang amoh Amai nyuhu ihkai monyodiaoh?" kisok iro. 22:10 Yesus mutah, "Aang ohkot ihkam nyolong nokuh lowu, ihcobehti ulunbahkas ijo beteng ngomin ihcokobawak kandi, bosuang danum, ahkan hosombang umba ihkam. Ngahasu io nokuh lohpou ijo tonyolongoh, 22:11 tutang nuhtuirih ahkan tepun lohpou rih: Guru nuhtui, 'Ang umoh unukoh mangat murid-murid-Ku tutang Ahku kuman ukun Paska?' 22:12 Tepun lohpou rih ahkan pokarah ahkan'kam ihcotahkun aang luteng ijo hajo, sodia honong puatoh. Nyodia paringoh ang anan." 22:13 Mahka tulak Petrus tutang Yohanes, turus nyombang paringoh sorurui kolou ijo jari tonuhtui bain Yesus. Iro ka nyodia ukun Paska rih. 22:14 Kotihka jari ohkotoh ahkan kuman ukun Paska rih, Yesus tuot homboh murid-murid-Oh ang unuk ukunpesta rih. 22:15 Turus Yesus nuhtui umba iro, "Ahku jorik samasino kuman ukun Paska tuh homboh ihkam sounumba Ahku ngarotporos! 22:16 Tului, porocayarih: Ahku eam ahkan kuman tuh hino, nyiring riman tahkan ukun tuh bakorinah ang Kolunon Bohua Ain Pohotala." 22:17 Uliorih Yesus ngahtang sakir anggur, turus ngohawot do'a torimakasih ahkan Pohotala, pongohuli nuhtui, "Ngomin tuh, tutang magi-magiohrih; 22:18 tului kota'anrih: nopara uhuntuh Ahku eam ahkan ngorih anggur tuh hino, nyiring Pohotala jari bokowasa honong kotuwi-Oh." 22:19 Umbotrih rih Yesus ngomin luhte. Tutang uli ngohawot do'a torimakasih, Io mbagi-mbagi luhte rih umba longoi-Oh, turus nongaoh ahkan iro, tutang nuhtui, "Jihtuh behtik-Ku ijo tonyarah ahkan ihkam. Nguanohrih koloutuh ahkan mingat Ahku." 22:20 Kolourih ka'a uli kuman, Io nonga sakir anggur rih ahkan iro tutang nuhtui, "Sakir tuh anairih bowot Pohotala ijo bohua, ijo tonosah umba dahak-Ku -- daha ijo tonusuh ahkan ihkam." 22:21 "Tahpi nohto! Ulun ijo ngorana umba Ahku anai ang ohtoi hihco Ahku! 22:22 Anak Ulun puna ahkan mahtoi kolouumoh jari tongatuh bain Pohotala; tahpi colahka ulun ijo ngorana Ahku!" 22:23 Mahka iro nopara hokisok ihco umba ijo bohkon, iai tahkan louk iro ijo ahkan ngorana rih. 22:24 Aang louk murid-murid Yesus lombut tokian tohou iai tahkan iro ijo harus tongohu paling hajo. 22:25 Yesus nuhtui umba iro, "Lahca-lahcan uhtus ijo eam kosono Pohotala mohenyek rayatoh, tutang pongowasa-pongowasaoh konohawot 'Polindung rayat'. 22:26 Tahpi ihkam eam tou kolourih. Sobalikoh, ulun ijo hajo ang louk'kam harus kolou ijo pokokoikoh, tutang okon harus monjadi kolou pohalu. 22:27 Iai ijo labih hajo: Ulun ijo tuot kuman ang meja, ata'ai ulun ijo nahalu io? Puna ulun ijo tuot rih. Tahpi Ahku tohko ang louk ihkam kolou pohalu. 22:28 A'ang kokaro kosusah-Ku ihkam toturus sama-sama umba Ahku. 22:29 Kolou ka'a Amai jari nonga ahkak-Ku hak ahkan moretah, kodorih ka'a Ahku ahkan nonga ahkan'kam hak rih. 22:30 Umba kolouorih ihkam duon umba jorih-jirah hihco Ahku ang ohkot Ahku monjadi Lahca. Tutang ihkam ahkan tuot ang ngosan duo balas pododusan ahkan moretah koduo balas lihit uhtus Israel." 22:31 "Simon, Simon, ngonih! Sehtan duon ijin ahkan nikos ihko; kolou gandum ngobohkon umba apihoh, nyiring ijo pios ngobohkon umba ijo ja'at. 22:32 Tapi Ahku jari bodo'a ahkan'mu, Simon, ahkan koporocaya'mu ara luntur. Tutang amat ihkam jari huli ahkak-Ku ihko harus ngoba'as konduang-konduang'mu." 22:33 Petrus mutah, "Tuhan, ahku bosodia nyolong sipir tutang mahtoi homboh Tuhan!" 22:34 "Porocayarih, Petrus," hion Yesus, "Sounumba dalung manuk nandu ondou tuh, ihko tolu tikat eam ngahku Ahku." 22:35 Uliorih rih Yesus nuhtui umba iro, "Soun kotihka Ahku moretah ihkam hawui eam nyuhu ihkam ngomin ehpok, kambut ata'ai sopahtu, inonrih ihkam kurang ino-inon?" "Eam!" hion'ndo. 22:36 "Tahpi huntuh," hion Yesus, "iai ijo anaingina ehpok ata'ai kambut, pahtut ngomiuoh; tutang iai eam anaingina padang, harus monjual jubahoh mangat moli padang. 22:37 Tului porocayarih, ayat Surat Borasih ijo auh koloutuh, 'Io mongohu kolou 'cobehti ponyirou,' harus nyolung ngosan arop-Ku. Tului inon ijo tonyurat a'ang Surat Borasih tohou Ahku uhun nyolung huntuh tuh." 22:38 "Tuhan," hion murid-murid Yesus, "topahjah ang ohtoi anai duo padang." "Jadirih!" hion Yesus. 22:39 Yesus nohtah lowu tutang hihkas kolou bahutoh nokuh Puruk Zaitun, tutang murid-murid-Oh tulak ka'a homboh Io. 22:40 Kotihka johcok ang anan, Io nuhtui umba iro, "Bodo'arih mangat ihkam ara bodusa, amat ihkam tonihkos." 22:41 Pongohuli rih Io tulak labih mahcu isut tahkan iro, kira-kira komahcu pukah bahtu, turus nolehku-kalopoh tutang bodo'a. 22:42 "Amai," hioi-Oh, "amat tou ngomahcuohrih tahkan Ahku karotporos ijo harus Ahku nyuruoh tuh. Tahpi ara numbun konohuang-Ku, molekan numbun konohuang Amai ih." 22:43 Ihcobehti molehkat lombut nokuh Io tutang ngoba'as-Oh. 22:44 Yesus karas ngarot cara mboruai, nyiring Io mahi tu'u-tu'u bodo'a. Horas-Oh kolou daha mohceu nokuh tana. 22:45 Tondo bodo'a, Yesus hoduli hino nokuh murid-murid-Oh. Io nyombang iro rahat tiruh, tului paham poros ahtoi. 22:46 Turus Io nuhtui umba iro, "Ombai ihkam tiruh? Monyun tutang bodo'a mangat ihkam eam kona tihkos." 22:47 Pondehan Yesus magun pander, lombut ihcokokawan ulun. Iro konokon bain Yudas, tahkan ihcobehti murid Yesus. Ulihino Yudas tulak nokuh Yesus turus ngarok Io. 22:48 Tahpi Yesus nuhtui umba io, "Yudas, inon umba karok orih ihko kani ngorana Anak Ulun?" 22:49 Kotihka murid Yesus ijo anai ang anan, nohto inon ijo ahkan nyolung, iro nuhtui, "Tuhan, keleh ihkai nyarang iro hapan padang!" 22:50 Turus ihcobehti tahkan iro molong jihpon imam hajo hapan padang nyiring bosaping tolingai koto'uioh. 22:51 Tapi Yesus nuhtui, "Umbotrih!" Turus Io ngomin tolingan ulun rih tutang ngopiosoh. 22:52 Pongohuli rih Yesus nuhtui umba imam-imam kopala tutang komandan-komandan pongawal Lohpou Tuhan tutang okon-okon Yahudi ijo lombut nokuh anan mangat nawan Yesus, "Inon Ahku tuh ponyilou, nyiring ihkam lombut hapan padang tutang tohtok kaju ahkan nawan Ahku? 22:53 Nyinong ondou Ahku anai ang louk ihkam ang Lohpou Tuhan, ihkam eam nawan Ahku. Tapi huntuh johcok ohkotoh ihkam nguaioh, kotihka kowasa kopindong nguan gawiu." 22:54 Iro nawan Yesus tutang ngomin Io nokuh lohpou imam hajo, Petrus ngohasu tahkan mahcu. 22:55 Ang tohun kanaha rih anai pohunbaho jari tomohun tutang Petrus ngondoni tuot umba ulun-ulun ijo tuot ang kodilingoh pohun baho rih. 22:56 Anai ihco pohalu bawi nohto Petrus tuot ang kodilingoh pohunbaho rih; turus pohalu bawi rih nolihti Petrus, pongohuli nuhtui, "Ulun tuh ka'a nanai, anai hihco umba Yesus!" 22:57 Tahpi Petrus eam ngahku. Io nuhtui, "Ahku eam kosono ulun tuh!" 22:58 Eampira pongohuli ihcobehti bohkon nohto Petrus tutang nuhtui, "Ihko ka'a anai ihcobehti tahkan iro!" Tahpi Petrus nuhtui, "Eam, bohkon ahku!" 22:59 Kira-kira ihco jam pongohuli, ihcobehti bohkon hino nuhtui tutang hajo auh, "Puna ulun tuh murid Yesus, tului io ka'a ulun Galilea!" 22:60 Tahpi Petrus mutah, "Inon hion'mu, ahku eam ta'an!" Uhun rih ka'a, rahat Petrus magun hopander, dalung manuk nandu. 22:61 Yesus ka'a nopoliou tutang nopahjah Petrus. Turus Petrus ingat Tuhan jari nuhtui umba io, "Hounumba dalung nandu ondou tuh, ihko tolu tikat eam ngahku Ahku." 22:62 Mahka Petrus soluka tahkan anan tutang nangih sungu-sungut. 22:63 Ulun-ulun ijo rahat monjaga Yesus, ngonjea tutang nahup Io. 22:64 Iro nuhtup mahtai-Oh tutang ngisok umba Io, "Cuba ngohu iai ijo nahup Ihko?" 22:65 Aro hino auh-auh mohina ijo iro muatoh ahkai-Oh. 22:66 Ang ngohkos ondouoh, okon-okon Yahudi, imam-imam kopala, tutang guru-guru agama bohaum, turus Yesus omin'ndo nokuh tohun Balai Bosara Agama iro. 22:67 "Nyorihtaoh ahkan ihkai," hion iro umba Yesus, "inonrih Ihko tuh Lahca Ponyolamat?" Yesus mutah, "Amat Ahku nyorihta ahkan'kam, ihkam tuh eam ahkan porocaya. 22:68 Tutang amat Ahku ngisok umba'kam, ihkam ka eam ahkan mutah. 22:69 Tahpi nopara tahkan huntuh, Anak Ulun ahkan tuot ang hila kotoun Pohotala Ijo Mahakowasa." 22:70 Iro paringoh nuhtui, "Amat kolourih, Ihko tuh Anak Pohotala?" Yesus mutah, "Kolourih hion ihkam." 22:71 Mahka iro nuhtui, "Eam usah hino saksi! Ihto jari ngonih tahkan auh-Oh bongoi!"
23:1 Paring ijo hopuhpung rih tombok, turus ngitot Yesus noharep Pilatus. 23:2 Ang anan iro nopara mondawa Io. Iro nuhtui, "Ihkai nyombang ulun tuh molahcat rayat. Io ngihit ulun mangat ara mbayar pajak ahkan Kaisar, tului Io nuhtui Io Kristus ihcobehti Lahca." 23:3 Turus Pilatus ngisok umba Yesus, "Tu'u Ihko Lahca ulun Yahudi?" Yesus mutah, "Kodorih hion'mu." 23:4 Mahka hion Pilatus umba imam-imam kopala tutang ulun aro rih, "Ahku eam nyombang ihco kosalai ka aang ulun tuh mangat mohukum Io." 23:5 Tahpi iro labih hojojuan hino, "Umba ajar-Oh, Io ngihit ulun ang hapus Yudea; pahtukoh ang Galilea, tutang huntuh jari johcok hino nokuh ohtoi." 23:6 Kotihka Pilatus ngonih orih rih, io ngisok, "Inonrih ulun tuh ulun Galilea?" 23:7 Uli tonyorihta Yesus asaroh tahkan tanah ijo anai ang pinda kowasan Horodes, Pilatus ngirim Yesus ahkan Horodes ijo kotihka orih anai ka'a ang Yerusalem. 23:8 Horodes jorih samasino kotihka nohto Yesus, tului jari tahi io ngonih tohou Yesus tutang jorih nohto Io. Io moharap dahpot nyaksi Yesus nguan kahtahelan. 23:9 Tului orih Horodes aro nonga kisok umba Yesus, tahpi Yesus eam mutah samasino. 23:10 Imam-imam kopala tutang guru-guru agama noharep ka'a ang anan tutang ndawa Yesus karas tu'u. 23:11 Horodes tutang kawan-kawan sorodaduoh ngonjea tutang mohina Yesus, turus mokahjan Io hapa pokahjan hajo, uliorih rih ngirim Io buli nokuh Pilatus. 23:12 Aang ondou orih ka'a Horodes tutang Pilatus, ijo sounoh homusuh, nopara hokobuah hino. 23:13 Pilatus muhpungoh imam-imam kopala, dolang okon Yahudi, tutang ulun aro, 23:14 turus nuhtui umba iro, "Ihkam ngomin ulun tuh ahkak'ku tutang nuhtui ijo Io monyosatoh ulun-ulun. Huntuh ang toharep ihkam ahku jari moriksa Io, tahpi ahku samasino eam nyombang ihco kosalai ka ijo ihkam ndawa nitu Io. 23:15 Kolourih ka'a ponyombang Horodes, tului io ka'a jari mongirim Yesus tuh buli nokuh ihkai. Uluntuh eam nguanoh aangihco ka'a ijo harus tonohukum umba hukum mahtoi. 23:16 Tului orih ahku mahcat Io uliorih moliwus Io." 23:17 Aang nyinong pesta Paska, Pilatus harus moliwus ihcobehti ulun hukuman bagi rayat. 23:18 Paring ulun ijo hopuhpung ang anan ngoriak, "Munu Io! Lohpas Barabas ahkan ihkai!" 23:19 (Barabas tonosolong ahkan sipir tului monjadi asang ijonyolung ang lowu tutang tului munu.) 23:20 Pilatus kani moliwus Yesus, bain rih io nuhtui sino hino umba ulun aro rih. 23:21 Tahpi iro ngoriak muhing, "Mahpakrih Io! Mahpakrih Io!" 23:22 Turus ahkan kotolu tikatoh Pilatus na'ah umba iro, "Tahpi inon kosalai-Oh? Ahku eam nyombang ihco kosalai ka'a ang Io ijo pahtut tomohukum hapa hukum mahtoi! Ahku ahkan mahcat Io, turus moliwus-Oh." 23:23 Tahpi iro turus ngoriak tambah muhing ijo Yesus harus tomahpak. Kojoriai koriak iro bohasir. 23:24 Mahka Pilatus muhtus hukuman mahtoi ngosan Yesus tohorong umba konohuang ulun-ulun rih, 23:25 tutang moliwus ulun ijo iro nyawotoh, iorih ulun ijo tomohukum tului mborontak tutang munu. Pongohino Yesus tomosarahohrih mangat molalusoh konohuang iro. 23:26 Mahka Yesus ka tonomin bain'ndo. Ang beteng jalan, iro hosombang umba ihcobehti ijo bogare Simon, ijo asaroh tahkan Kirene, ijo rahat nyolong nokuh lowu. Iro nambit io, turus hojojuan io ngohtun kahju sopolahki rih, nutut ang lihkut Yesus. 23:27 Aro ulun nutut nyalan ang lihkut Yesus -- ang loukoh anai ka'a pira-pira ulunbawi. Bawi-bawi rih nangih tutang nahtum Yesus. 23:28 Tahpi Yesus ngulos nitu iro tutang nuhtui, "Dolang bawin Yerusalem! Ara nangih Ahku. Tangihrih arop'mu bongom tutang anak-anak'mu. 23:29 Bain ahkan lombut ohkot ulun ahkan nuhtui, 'Koutungoh ulun-ulun bawi ijo eam pu'u botohi, ijo eam pu'u nganak tutang eam pu'u ngoposu anakoh!' 23:30 Aang ohkot orih ulun ahkan nuhtui umba puruk-puruk, 'Nopahasrih ihkai!' Tutang umba puruk-puruk, 'Ngawukrih ihkai!' 23:31 Bain amat nohimo kaju ijo magun bolum, ulun jari nguan koloutuh, inon hino ijo ahkan konuan iro nohimo kaju ijo jari koring!" 23:32 Anai hino duo behti ulun bohkon -- koduo-duooh ponyilou -- ijo tonomin'ndo ahkan tomohukum mahtoi hombo-homboh umba Yesus. 23:33 Kotihka johcok unuk ijo konohawot "Bangonkuhung," iro mahpak Yesus tutang koduo ponyilou rih -- ihcobehti ang hila koto'ui tutang ihcobehti hino ang hila komuloi Yesus. 23:34 Turus Yesus bodo'a, "Amai, ngahpunrih kosalan iro! Iro eam kota'an inon ijo konuan'ndo." Pokahjan Yesus iro magi-mbilahoh ang anan, ang louk iro hapan tenung. 23:35 Ulun-ulun tombok ang anan hawui nopahjah, pondehan okon-okon ulun Yahudi ngonjea Yesus tutang nuhtui, "Io jari nyolamat ulun bohkon; cubarih huntuh Io nyolamatoh arop-Oh bongoi, amat Io tu'u-tu'u Lahca Ponyolamat ijo tomitih bain Pohotala!" 23:36 Dolang sorodadu ka ngonjea Io. Iro lombut tutang nonga anggur mosom ahkai-Oh 23:37 hawui nuhtui, "Amat Ihko Lahca ulun Yahudi, nyolamat ih arop-Mu!" 23:38 Ang hila diang kuhungoh ang kaju sopolahkin Yesus, tonyurat auh-auh tuh, "Io tuh Lahca Ulun Yahudi." 23:39 Anai ihcobehti ponyilou ijo tomahpak ang anan mohina Yesus. Io nuhtui, "Ihko Lahca Ponyolamat, kowa? Nah, nyolamatoh rih arop-Mu tutang ihkai!" 23:40 Tahpi ponyilou ihco hino ningak injahoh rih, hioioh, "Inon ihko eam mihkoh umba Pohotala? Ihko sama-sama tomohukum mahtoi kolou Io. 23:41 Tihkas hukum ihto duo puna sotimpal umba gawiu ihto. Tahpi Io samasino eam aro kosalai!" 23:42 Turus io nuhtui umba Yesus, "Yesus, ingatrih ahku, amat Ihko lombut huli kolou Lahca!" 23:43 "Porocayarih," hion Yesus umba io, "ondou tuh ihko ahkan hihco Ahku ang Pirdaus." 23:44 Kurang-labih pukul duo balas tohun ondou, mahtanondou eam boloang, tutang sohapus lowu rih kahputpijem samasino nyiring pukul tolu sohit. 23:45 Dindingbenang ijo ahkan poholat Lohpou Tuhan borutat monjadi bolah duo. 23:46 Turus Yesus ngombak umba auh muhing, "Amai! Nokuh a'ang longon-Mu Ahku monyarah arop-Ku!" Uli nuhtui kolourih, Io ka palus. 23:47 Kotihka komandan sorodadu nohto, inon ijo jari nyolung, io monara Pohotala. Turus io nuhtui, "Tu'u-tu'u, Io tuh eam aro bosala!" 23:48 Ulun aro ijo lombut ang anan ahkan nonton, nohto inon ijo nyolung. Iro paring buli honong ahtoi ijo paham monyasal. 23:49 Tutang paring injah-jolahan Yesus, hawui ulunbawi-ulunbawi ijo homboh Io tahkan Galilea, tombok tahkan mahcu tutang nohto paringoh rih. 23:50-51 Anai ihcobehti bogare Yusep ijo boasar tahkan lowu Arimatea ang tana Yudea. Io ihcobehti pios ijo tohoromat ulun, tutang ijo rahat ngindoi ohkotoh Pohotala nopara moretah kolou Lahca. Oluka io anggota Majelis Agama, io eam sotuju umba koputusan tutang tindakan anggota majelis rih. 23:52 Yusep rih tulak nohimo Pilatus tutang nyawot mangat otun Yesus sonarah ahkaioh. 23:53 Pongohino io monosuluh otun Yesus tahkan kaju sopolahki, turus mukus-Oh umba benang pomukusotu tahkan lena. Uliorih rih io pokaling-Oh ang luwang kolowong ijo napaoh ang luwang puruk bahtu -- kolowong rih jaha pu'u hapan. 23:54 Ondou rih ondou Jomahat; tutang ondou Sabat doni nopara. 23:55 Ulunbawi-ulunbawi ijo lombut homboh Yesus tahkan Galilea nutut Yusep tutang nopahjah kolowong rih. Iro nohto ka'a koloukuwoh otun Yesus ponokaling ang luwang tanom. 23:56 Pongohino rih iro buli turus nahtap kasairorapah tutang minyak buanharum ahkan ngasai otun Yesus. Aang ondou Sabat, iro tondo bogawi ahkan mone'et hukum agama Yahudi.
24:1 Aang ondou Minggu, homboh-ngohkos, ulunbawi-ulunbawi rih tulak nokuh tanom ngomin kasairorapah ijo jari iro nyodiaoh. 24:2 Ang tanom, iro dahpot bahtu ponuhtup kolowong jari konokila. 24:3 Turus iro nyolong ahkan luwang lowong rih, tahpi eam nyombang otun Tuhan Yesus ang anan. 24:4 Pondehan iro tombok ang anan tutang torongo-rongong niruk hal rih, songela duo behti honong pokahjan puhti tombok doni iro. 24:5 Iro mihkoh samasino, turus nyembah suhkuntu'ut ang tana, pondehan koduo ulun rih nuhtui ahkan'ndo, "Ombai ihkam ngurah ulun bolum ang louk ulun mahtoi? 24:6 Io eam anai ang ohtoi. Io jari monyun! Ingat, inon ijo jari tonuhtui-Oh ahkan'kam ang ohkot Io magun ang Galilea, 24:7 ijo, 'Anak Ulun harus tonosarahoh ahkan ulun bodusa, turus tomahpak, tutang aang ondou ijo kotolu Io ahkan monyun.' " 24:8 Mahka topoingat ulunbawi-ulunbawi rih ahkan tuhtui-tuhtui Yesus. 24:9 Uli buli tahkan tanom rih, iro monyorihtaoh paring ang nyolung orih ahkan kosobalas rasul rih, tutang paring murid-murid-Oh ijo bohkonoh. 24:10 Ulunbawi-ulunbawi rih ijo monyiaroh paring orih ahkan murid-murid Yesus, iorih: Maria Magdalena, Yohana tutang Maria inai Yakobus, honong ulunbawi-ulunbawi bohkonoh ijo homboh umba iro. 24:11 Tahpi rasul-rasul rih ngohu ulunbawi rih tihkas momander ijo eam-eam ih. Iro eam porocaya umba auh ulunbawi-ulunbawi rih. 24:12 Tahpi Petrus hihkat tutang nokoru nokuh tanom. Honong njonguk ahkan luwang lowong turus nohto, tihkas benang pombungkus otu ang anan. Petrus helan samasino, turus buli honong aro kisokoh ang luwang ahtoioh, tohou inon ijo jari nyolung. 24:13 Aang ondou orih ka'a, duo behti murid Yesus rahat nyalan nokuh ihco desa ijo bogare Emaus, kira-kira sobalas kilomehter komahcuioh tahkan Yerusalem. 24:14 Sambir nyalan iro bopande-pander tohou karon angihcojari ijo nyolung rih. 24:15 Pondehan iro bopande-pander tutang ngurahtiruk, Yesus songela lombut tutang nyalan homboh iro. 24:16 Iro nohto Yesus, tahpi anai angihco ijo nguan iro eam kosono Io. 24:17 Turus Yesus nuhtui, "Inon ijo ihkam manderoh ang beteng jalan tuh?" Iro tondo pander tutang bauioh mosom. 24:18 Turus ihcobehti tahkan iro ijo bogare Kleopas, ngisok umba Yesus, "Amairih ihcobehti ulun bohkonuhtus ang Yerusalem ijo eam kota'an karon angihcojari ijo nyolung ang anan aang lainondou tuh?" 24:19 "Angihcojari inon?" hion Yesus. "Angihcojari ijo nyolung umba Yesus, ulun tahkan Nasaret orih," mutah iro, "Io Nabi. Auhtuhtui-Oh tutang karon gawi-gawi-Oh bokowasa samasino -- pios numbun topahjah Pohotala, oluka numbun topahjah paring ulun. 24:20 Imam-imam kopala tutang okon-okon utus ihto nyarah Io ahkan tomohukum mahtoi, tutang iro mahpak Io! 24:21 Podahal ihkai moharap ijo Iorih, ijo ahkan moliwus Israel! Tutang ondou tuh ondou kotolu tahkan hal orih nyolung. 24:22 Mahi hino, pira-pira ulunbawi tahkan barih ekai jari nguan ihkai tokohcit. Homboh ngohkos samasino iro nokuh kolowong, 24:23 tahpi eam nyombang otui-Oh ang anan. Turus iro buli tutang nuhtui ijo iro nohto molehkat, tutang molehkat-molehkat rih nuhtui ijo Yesus bolum. 24:24 Pira-pira ulun tahkan barih ekai turus hihkas ahkan tanom tutang nyombang ijo inon, ijo tonuhtui ulunbawi-ulunbawi orih puna kolourih, baya iro eam nohto Yesus." 24:25 Turus Yesus nuhtui umba iro, "Ihkam puna balehoh! Dalou dandah ihkam porocaya paring ijo jari tonuhtui nabi-nabi! 24:26 Eamkah Lahca Ponyolamat harus komo houn karot rih, punai norima kohajoi-Oh?" 24:27 Pongohino Yesus nyorihta ahkan iro inon ijo tonyurat ang luwang koparing Surat Borasih tohou arop-Oh, nopara tahkan buhku Museh tutang buhku nabi-nabi. 24:28 Pondehan orih iro ngondoni lowukoik titun iro. Yesus nguan kolou-kolouoh kani nyalan toturus, 24:29 tetapi iro nahan Io, "Mohcon ang unuk ekai," hion iro umba Io, "uhuntuh jari doni cohit, tutang jari nopara ngalomi ka'a." Mahka Yesus nyolong ahkan umba tiruh ang unuk rih. 24:30 Aang ohkot tuot kuman homboh iro, Yesus ngomin luhte, ngohawot torimakasih ahkan Pohotala, mbola-bolah luhte rih umba longoi-Oh, turus nonga ahkan iro. 24:31 Pongohino iro borondong ijo orih Yesus. Tahpi Io dilap tahkan topahjah iro. 24:32 Hion iro, ihco umba ijo bohkon, "Eamkah nanyam ahtoi ihto kolou jorihtu'u, kotihka Io bopander umba ihto ang beteng jalan, tutang monyorihta usin Surat Borasih ahkan ihto?" 24:33 Uhun orih ka'a iro kuat turus buli nokuh Yerusalem. Ang anan iro nyombang kosobalas murid Yesus rih beteng hokupur umba ijo bohkon. 24:34 Iro rih nuhtui, "Puna morong Tuhan jari bolum huli! Io jari ngorinah arop-Oh ahkan Simon!" 24:35 Koduo murid Yesus ijo punai lombut rih turus mborihta ang posuru iro ang beteng jalan, tutang koloukuwoh iro ngosono Tuhan aang uhun Io mbola-mbolah luhte. 24:36 Pondehan iro magun hopander, songela Yesus bongoi tombok ang tohun iro tutang nuhtui, "Kosanang ahkan'kam!" 24:37 Iro tokohcit tutang mihkoh, tului ngohu iro nohto otu. 24:38 Tahpi Yesus nuhtui, "Ombai ihkam mihkoh? Ombai lombut kobembang-bembang ang ahtoi'kam? 24:39 Topahjah longok-Ku, tutang topahjah pa'ak-Ku. Ngota'anrih ijo Ahku bongokrih tuh! Gayaprih tutang nohto, tului otu eam anai usiou ata'ai tulang, kolou ijo ihkam nohto aang Ahku." 24:40 Yesus nuhtui kolourih hawui pokarah ahkan iro longoi tutang pa'ai-Oh. 24:41 Tutang pondehan iro magun jaham duon porocaya, tului karas kojorih tutang kohelan, Yesus ngisok iro, "Inon ihkam anai ngina ukun ang ohtoi?" 24:42 Iro nonga ahkai 'cokungan uhcin goreng. 24:43 Yesus ngomin ohcin rih, turus kumai-Oh ang toharep iro. 24:44 Uliorih Io nuhtui ahkan'ndo, "Tuhrih hal-hal ijo jari Ahku manderoh ahkan'kam ohkot Ahku magun hihcoumba ihkam: ijo nyinong hal ijo tonyurat tohou Ahku aang buhku-buhku Museh, tutang nabi-nabi tutang Masmur, harus nyolung." 24:45 Pongohuli Yesus nguap tiruk iro ahkai horahti kohondak Surat Borasih. 24:46 Turus Io nuhtui umba iro, "Ang Surat Borasih tonyurat tohou Lahca Ponyolamat harus ngarot, tutang harus monyun huli tahkan popahtoi aang ondou ijo kotoluoh. 24:47 Ka'a ijo ngosan aran Lahca Ponyolamat rih koharusoh tomborihta ahkan uhtus-uhtus, ijo ulun harus hubah, tutang ijo Pohotala ngapun dusa-dusa. Tutang borihta rih harus tomborihta nopara tahkan Yerusalem. 24:48 Ihkamrih saksi-saksi tahkan paringoh rih. 24:49 Tutang Ahku bongok ahkan ngirim ahkan'kam inon ijo jari tonobowot bain Amai. Tahpi ihkam harus tahtap ngindoi ang lowu tuh, nyiring kowasa tahkan Pohotala monyokuwung ihkam." 24:50 Uliorih Yesus ngomin iro nokuh luar lowu johcok Betania. Ang anan Yesus ngahtang longoi-Oh, turus momborehkat iro. 24:51 Pondehan Io nguan orih rih, Io hogahtang nokuh soruga, turus hopisah tahkan iro. 24:52 Iro suhkuntu'ut nyembah Io, pongohuli rih buli nokuh Yerusalem hawui ahtoi ijo jorih-jirah samasino, 24:53 tutang hototurus monara Pohotala, ang luwang Lohpou Tuhan.
1:1 Aang pahtukoh, sounumba kolunon tonapa, Auh jari anai. Auh anai hihco Pohotala tutang Auh sama umba Pohotala. 1:2 Tahkan pahtukoh Io hihco Pohotala. 1:3 Kokarooh tonapa nguha Io, tutang tahkan kokaro ijo anai, eam ihco ka tonapaoh earo Io. 1:4 Auhrih tohasak pombolum, tutang pombolum nonga koloang ahkan kolunon. 1:5 Koloang rih monyingah luwang kopindong, tutang kopindong eam dahpot mombolopoh. 1:6 Lombut rih ulun ijo tonyuhu Pohotala, Yohanes araioh. 1:7 Io lombut momborihtaoh tohou koloang rih, mangat paring ulun porocaya. 1:8 Io bongoi bohkon koloang orih, io baya momborihtaiuoh. 1:9 Koloang sojahti ijo mopoloang paring kolunon, lombut nokuh kolunon. 1:10 Auh anai ang kolunon, kolunon tonapa nguha Io, tahpi kolunon eam kosono-Oh. 1:11 Io lombut nokuh lowui-Oh bongoi tahpi uhtus-Oh eam norima Io. 1:12 Olukolouorih anai ka'a ulun ijo norima Io tutang porocaya umba-Oh; iro tononga-Oh hak monjadi Anak Pohotala, 1:13 ijo tonganakoh bohkon tahkan ulun, tului bolum bohua rih tahkan Pohotala asaroh. 1:14 Auh jari monjadi ulun, Io mohcon ang louk ihto, tutang ihto jari nohto kohajoi-Oh. Kohajoi orih tonorima-Oh kolou anak tukan Amai. Nguha Io ihto nohto Pohotala tutang kasih-Oh ahkan ihto. 1:15 Yohanes lombut kolou saksi-Oh, io momborihta rih: "Tuhrih Io ijo ahku nuhtuioh: Io ahkan lombut labih pongohuli tahkan ahku, tahpi labih hajo tahkan ahku, kotului sounumba ahku anai, Io jari anai." 1:16 Io tuwi umba kasih; earo kotondooh, Io mborehkat ihto. 1:17 Hukum Tuhan ihto torima nguha Museh. Tahpi kasih tutang kotehen Pohotala tongorinah nguha Yesus Kristus. 1:18 Eam aro ijo pu'u nohto Pohotala bohkonumba anak tukan Amai, ijo sama umba Amai tutang lehket sino umba Io. Iorih ijo ngorinah Amai ahkan ihto. 1:19 Dolang pongowasa Yahudi ang Yerusalem nyuhu imam-imam tutang ulun-ulun Lewi tulak nokuh Yohanes tutang ngisokoh umba io, "Ihko tuh iai?" 1:20 Yohanes mongahku honong torus-tarang, "Ahku bohkon Lahca Ponyolamat." 1:21 "Amat kolourih ihko tuh iai?" kisok iro. "Inonrih ihko Elia?" "Bohkon," putah Yohanes. "Inonrih ihko Sang Nabi orih?" iro ngisok hino. "Bohkon," putahoh. 1:22 "Amat kolouorih, nuhtuiohrih ahkan ihkai, iai ihko tuh," hion iro, "mangat ihkai dahpot nonga putah ahkan ulun-ulun ijo nyuhu ihkai. Inon hiom tohou arop'mu bongom?" 1:23 Yohanes mutah, "Ahkurih io ijo tonuhtuioh bain Nabi Yesaya: 'Ulun ijo na'ah-na'ah ang padang balambah: Ngomorongohrih jalan ahkan Tuhan.' " 1:24 Ulun-ulun ijo tonyuhu bain ulun Parisi orih 1:25 ngisok, "Amat ihko bohkon Lahca Ponyolamat, bohkon Elia, bohkon ka'a Sang Nabi orih, ombai ihko mopondus?" 1:26 Yohanes mutah, "Ahku mopondus umba danum. Tahpi anai anglouk tohun ihkam, anai Ulun ijo eam ihkam kosonooh. 1:27 Io lombut labih pongo tahkan ahku, tahpi ahkan nguwat kahut soruhpah-Oh ka ahku eam pahtut." 1:28 Paringohrih nyolung ang Betania, hila timur Sungoi Yordan unuk Yohanes mopondus. 1:29 Anghawun ondouoh Yohanes nohto Yesus lombut ahkaioh. Turus Yohanes nuhtui, "Nohto, orihrih Anak Tobirin Pohotala ijo ngapit dusan kolunon. 1:30 Iorih ijo ahku nuhtuioh ahkan lombut pongo tahkan ahku, tahpi labih hajo tahkan ahku, tului hounumba ahku konanak, Io jari anai. 1:31 Sounumbaoh, ahku eam ta'an iai Io rih. Podahar ahku lombut mopondus umba danum, mangat uhtus Israel ngosono Io." 1:32 Yohanes ka'a nonga kosaksian tuh, "Ahku nohto Roh Pohotala mosuluh, kolou bulung dala tahkan langit, turus mohcon ang ngosan-Oh. 1:33 Ohkot rih ahku jaha ta'an iai Io. Tahpi Pohotala ijo nyuhu ahku mopondus umba danum, jari nuhtui umba ahku, 'Amat ihko nohto Roh Pohotala mosuluh, turus mohcon ang ngosan ihcobehti Iorih ahkan mopondus umba Roh Pohotala.' 1:34 Ahku jari nohto-Oh bongok," hion Yohanes, "tutang ahku nonga kosaksian ijo Io rih Anak Pohotala." 1:35 Anghawun ondouoh Yohanes anai ang unuk rih hino homboh duo behti muridoh. 1:36 Kotihka io nohto Yesus nguha, io nuhtui, "Topahjah! Orihrih Anak Tobirin Pohotala." 1:37 Koduo behti murid Yohanes rih ngonih karon-auh orih, turus hihkas ngohasu Yesus. 1:38 Yesus ngulos nokuh lihkut, tutang nohto iro rahat ngahasuoh Io. Io ngisok, "Ihkam ngurah inon?" Mutah iro, "Rabi, ang umohrih Rabi mohcon?" (Tuhtui 'Rabi' rimaioh guru.) 1:39 "Olai nohtooh bongom," hion Yesus. Iro tulak homboh Io tutang nohto umoh unuk Io mohcon. Ohkot rih jam ohpat sohit. Ondou rih iro mohcon umba Io. 1:40 Anai ihco tahkan koduo behti ijo jari ngonih, inon ijo tonuhtuioh bain Yohanes, tutang pongohuli tulak ngahasu Yesus, anairih Andreas, konduang Simon Petrus. 1:41 Jio-jion Andreas ngurah Simon, konduangoh, tutang nuhtui umba io, "Ihkai jari hosombang umba Mesias!" (Mesias sama umba Kristus, iorih: Lahca Ponyolamat.) 1:42 Andreas ngitot Simon nokuh Yesus. Yesus nutuneng Simon, hawui nuhtui, "Ihko Simon anak Yona. Ihko ahkan konohawot Kefas." (Kefas sama umba Petrus, rimaioh: puruk bahtu.) 1:43 Anghawun ondouoh Yesus monuhkasoh ahkan tulak nokuh Galilea. Io hosombang umba Pilipus, tutang nuhtui umba io, "Olai, ngahasu Ahku!" 1:44 Pilipus asaroh tahkan Betsaida, yorih unuk mohcon Andreas tutang Petrus. 1:45 Pilipus monyombangoh umba Natanael tutang nuhtui umbaoh, "Ihkai jari nyombangoh ulun ijo konohawot bain Museh a'ang buhku Turat Pohotala, tutang ijo tomborihta bain nabi-nabi. Iorih Yesus tahkan Nasaret, anak Yusep." 1:46 Tahpi Natanael mutah, "Duonrih angihco ijo pios lombut tahkan Nasaret?" "Olai, nohto bongom," hion Pilipus. 1:47 Yesus nohto Natanael lombut, turus nuhtui tohou io, "Nohto, orih ulun Israel sojahti. Eam aro pobula aangoh." 1:48 "Koloukuwoh Amai ngosono ahku?" Natanael ngisok umba Yesus. Yesus mutah, "Sounumba Pilipus na'ah ihko, Ahku jari nohto ihko ang pinda batang sikun rih." 1:49 "Amai Guru," hion Natanael, "Amai anairih Anak Pohotala! Amai rih Lahca uhtus Israel!" 1:50 Yesus nuhtui, "Ihko porocaya, baya tului Ahku nuhtui rih ijo Ahku jari nohto ihko ang pinda batang sikun orih? Hal-hal ijo mahcu labih hajo tahkan orih ahkan ihko nohto!" 1:51 Hion Yesus huli, "Tu'u-tu'u, porocayalah, ihko ahkan nohto langit bokuap, tutang molehkat-molehkat Pohotala nuhkat nosuluh aang Anak Ulun."
2:1 Duo ondou pongohuli anai pesta kawin ang lowu Kana ang Galilea, tutang inai Yesus anai ang anan. 2:2 Yesus honong murid-murid-Oh tonorawe nokuh pesta orih. 2:3 Kotihka anggur korih jari opah, inai-Oh nuhtui umba Yesus, "Iro tumoslingis anggur." 2:4 Yesus mutah, "Ine, ara nyuhu Ahku. Jaha johcok ohkotoh Ahku ngorinahoh arop." 2:5 Tahpi inai Yesus nuhtui umba pohalu-pohalu, "Nguanrih iou, inon ijo tonuhtui-Oh ahkan'kam." 2:6 Ang anan anai onom potoran ijo tonyodiaoh ahkan gunan pomuhipa'a numbun hadat Yahudi. Potoran rih nyino-nyinong suangoh kira-kira sorahtus lihter. 2:7 Yesus nuhtui umba pohalu-pohalu orih, "Suangrih potoran-potoran orih umba danum." Iro nyuangoh nyiring uras tuwi. 2:8 Turus Yesus nuhtui umba iro, "Huntuh onin honjiot danum orih, tutang ngitotoh ahkan okon pesta." Iro ngomin danum orih ahkan okon pesta, 2:9 tutang io nginyamoh danum ijo jari boubah monjadi anggur korih. (Io eam ta'an tahkan umoh anggur orih, baya pohalu-pohalu ijo nyuang danum orih io ijo ta'ai.) Mahka okon pesta rih nokuh pongahten bahkas, 2:10 turus nuhtui umbaoh, "Bahutoh ulun nyorunganoh anggur korih ijo paling pias labih houn, tutang amat dolang porawe jari peda ngorih, kolouumoh anggur korih ijo bahut. Tahpi konduang jari anaingina anggur ijo paling pios nyiring huntuh!" 2:11 Orih rih tandahelan topahtukoh ijo tonapaoh Yesus. Io nguanoh orih ang Kana ang Galilea. Honong tanda orih Io ngorinahrih kohajoi-Oh. Mahka murid-murid-Oh porocaya umba Io. 2:12 Uliumbarih Yesus tulak nokuh Kapernaum hombo-homboh umba inai-Oh, konduang-konduang-Oh hawui murid-murid-Oh. Iro mohcon ang anan papira ondou kotahiuoh. 2:13 Kotihka Ondou Pesta Paska ulun Yahudi jari doni, Yesus tulak nokuh Yerusalem. 2:14 Ang Lohpou Tuhan ang Yerusalem Io sombangrih umba podagang-podagang sahpi, tobiri, tutang bulung dala; ka'a pohurup-pohurup duit tuot ang anan. 2:15 Yesus napa ihco pahcat tahkan tali, turus muhko paring ohcin rih, pios tobiri, olu ka sahpi, tahkan luwang Lohpou Tuhan. Meja-meja pohurup duit tomokulop-Oh nyiring duit iro kosoburan koamo-amoh. 2:16 Turus Io nuhtui umba podagang bulung dala, "Ngahtang paringoh tahkan ohtoi. Ara ngonjorianoh Lohpou Amai-Ku unuk bodagang!" 2:17 Mahka murid-murid-Oh toringat ahkan ayat Surat Borasih tuh, "Kasih-Ku ahkan Lohpou-Mu, yo Pohotala, ijo monyaha ahtoi-Ku." 2:18 Pongowasa-pongowasa Yahudi molawan Yesus, hion iro, "Cuba nguan tandahelan kolou tanda ahkan ihkai, ijo Ihko bohak botindak koloutuh." 2:19 Yesus mutah, "Ngahkasohrih Lohpou tuh, tutang a'ang tolu ondou Ahku ahkan nombokoh hoduli." 2:20 Turus iro nuhtui, "Ohpat pulu onom toun kotahiu tomorulu ahkan mangunoh Lohpou Tuhan tuh. Tutang Ihko kani mangunoh hoduli aang tolu ondou?" 2:21 Tahpi Lohpou Tuhan ijo konohuangoh Yesus anairih behtiu-Oh bongoi. 2:22 Jadi pongohuli, ulimba Yesus tonomonyun tahkan popahtoi, toingat murid-murid-Oh ijo hal rih pu'u tonuhtui-Oh. Mahka porocayarih iro ahkan inon hal ijo tonyurat luwang Surat Borasih tutang ahkan inon ijo tonuhtuioh bain Yesus. 2:23 Pondehan Yesus anai ang Yerusalem ang ohkot Pesta Paska, aro ulun porocaya ahkai-Oh, tului tandahelan-tandahelan ijo konuai-Oh. 2:24 Tahpi Yesus bongoi eam porocaya iro, kotului Io kosono paring ulun. 2:25 Eam porulu ulun nonga kotorangan ahkai-Oh tohou iai ka, tului Io bongoi ta'an inon ijo anai ang luwang ahtoi kolunon.
3:1 Anai ihcobehti tokoh agama tahkan barih ulun Parisi ijo bogare Nikodemus. 3:2 Aang sino ngolomi io lombut nokuh Yesus tutang nuhtui, "Amai Guru, ihkai kota'an Amai tonyuhu Pohotala. Tului eam ihcobehti ka duon nguan tandahelan kolou ijo Amai nguai, amat Pohotala eam homboh io." 3:3 Yesus mutah, "Porocayarih, eam ihcobehti ka duon monjadi anak uhkup Pohotala, amat io eam konanakrih hoduli." 3:4 "Kuwohtou ulun oko dahpot konanak hoduli?" hion Nikodemus umba Yesus. "Duontourih io nyolong hoduli nokuh luwang poronahkan inaioh tutang tonganak hoduli hino?" 3:5 Yesus mutah, "Tu'u morong hiok-Ku tuh: amat ulun eam tonganakoh tahkan danum tutang tahkan Roh Pohotala, ulun orih eam duon monjadi anak uhkup Pohotala. 3:6 Kolunon socara behtiu konanakrih bain ulun oko, tahpi cara rohani konanakrih bain Roh Pohotala. 3:7 Ara helan amat Ahku nuhtui: ihkam paringoh harus konanakrih hoduli. 3:8 Bahiu nahpi nokuh umoh io kani; ihto ngonih auhoh, tahpi eam kota'an tahkan umoh polombutoh, tutang nokuh umoh tituioh. Kodorih ka'a umba ulun ijo tonganakrih bain Roh Pohotala." 3:9 "Koloukuwoh rih duon nyolung?" Nikodemus ngisok. 3:10 Yesus mutah, "Ihko guru ang Israel; ombairih ihko eam kota'an? 3:11 Porocayarih: ihkai nuhtui tihkas tohou inon ijo ihkai kota'an, tutang ihkai nonga kosaksian tihkas tohou inon ijo jari ihkai nohtooh; tahpi ihkam eam kani monorima kosaksian ihkai. 3:12 Ihkam eam porocaya amat Ahku monyorihtaoh ahkan'kam tohou hal-hal tahkan kolunon tuh; koloukuwoh ihkam duon porocaya, amat Ahku monyorihtarih ahkan'kam hal-hal tohou soruga? 3:13 Eam ihcobehti ka pu'u nuhkat nokuh soruga, bohkontahkan Io ijo nosuluh nokuh kolunon, iorih Anak Ulun. 3:14 Sama kolou Museh ngahtangoh lohi tombaga ang tuhtuk doroh kahju ang padang balambah, kodorih ka'a Anak Ulun ahkan konahtangoh, 3:15 mangat paring ulun ijo porocaya ahkai-Oh, ahkan duon pombolum ijo sojahti tutang kototahiu." 3:16 Kotului Pohotala kodorih ngasih ulun ang kolunon tuh, nyiring Io nonga Anak-Oh ijo tukan, mangat nyino-nyinong ulun ijo porocaya umba Io eam binasa, molehkan norima pombolum sojahti tutang kototahiu. 3:17 Tului Pohotala ngirim Anak-Oh eam ahkan momosaraoh kolunon tuh, tahpi ahkan monyolamatoh. 3:18 Ulun ijo porocaya umba-Oh eam tomohukum, tahpi ulun ijo eam porocaya ius tomohukum bain Pohotala, tului io eam porocaya umba Anak Pohotala ijo tukan. 3:19 Io tonyawot hogalang hal tuh: Koloang rih ius lombut nokuh kolunon, tahpi ulun labih jorik umba kopindong tahkan koloang, tului konuan iro ja'at. 3:20 Nyinong ulun ijo nguan koja'at, bosingi umba koloang; io eam kani lombut nokuh koloang, mangat gawiouoh ijo ja'at rih ara gihtan. 3:21 Tahpi ulun ijo nguan kohondak Pohotala, lombut nokuh koloang mangat monjadi korinah inon ijo konuaioh rih anairih numbun kohondak Pohotala. 3:22 Ulirih Yesus tutang murid-murid-Oh hihkas nokuh Yudea. Io mohcon ang anan pira-pira kotahiuoh, umba iro tutang mopondus. 3:23-24 Aang ohkot orih Yohanes jaha nyolong sipir. Io mopondus ang Ainon eam mahcu tahkan Salim, tului ang anan aro danum. Ulun-ulun lombut ahkaioh, tutang io mopondus iro. 3:25 Pira-pira murid Yohanes hosomba'anauh umba ulun Yahudi tohou aturan muhiarop. 3:26 Iro tulak nokuh Yohanes, tutang nuhtui, "Amai Guru, inon Amai magun ingat ulun ijo homboh Amai ang pohoi Sungoi Yordan orih, ijo Amai nunjukoh ahkan 'kai lomoi? Io huntuh mopondus ka'a, tutang paring ulun tulak nokuh Io!" 3:27 Yohanes mutah, "Kolunon eam duon anaingina ino-inon amat eam tononga Pohotala ahkaioh. 3:28 Ihkam bongom ius ngonih ahku nuhtui, 'Ahku bohkon Lahca Ponyolamat. Ahku sonyuhu hounumba Io.' 3:29 Pongahten bawi rih anairih ain pongahten ijo bahkas. Sahabat pongahten bahkas rih tihkas tombok mambai tutang ngonih, tutang io sonang amat ngonih auh pongahten bahkas. Kodorih ka'a umba ahku. Uhuntuh ahku sonang samasino. 3:30 Iorih ijo harus mahi-mahi boguna, tutang ahku mahi-mahi sasaream boguna." 3:31 Ijo lombut tahkan diang molowioh paringoh. Ijo lombut tahkan kolunon nyolongbarih ulun kolunon tutang mander hal-hal kolunon. Io ijo lombut tahkan diang molowi paringoh. 3:32 Io pander tohou inon ijo ius tonohto tutang konahai-Oh, tahpi eam ihcobehti ka porocaya aang kosaksian-Oh. 3:33 Ulun ijo porocaya aang kosaksian-Oh rih, mongahku ijo Pohotala morong. 3:34 Tului ulun ijo sonuhu Pohotala monyiar auh-auh Pohotala, kotului Roh Pohotala jari tononga ahkai-Oh sotuwioh. 3:35 Amai sita Anak-Oh, tutang jari nyarah paring ahkai kowasa-Oh. 3:36 Ulun ijo porocaya ahkan Anak rih ahkan monorima pombolum ijo sojahti tutang kototahiu. Tahpi ulun ijo eam te'et ahkan Anak rih eam ahkan duon pombolum. Io tomohukum Pohotala nyiring kototahiuoh.
4:1 Ulun-ulun Parisi ngonih ijo Yesus ngonduon tutang mopondus labih aro murid-Oh tahkan Yohanes. 4:2 (Kotu'uioh Yesus bongoi eam mopondus, molekan murid-murid-Ohiou.) 4:3 Kotihka Yesus kota'an ijo ulun-ulun Parisi ius ngonih tohou hal orih, Io tulak tahkan Yudea buli nokuh Galilea. 4:4 A'ang ponyalaioh orih Io harus nyihing Samaria. 4:5 Mahka johcokrih Yesus aang ihco lowu ang Samaria ijo bogare Sikhar, eam mahcu tahkan tana ijo lomoi tononga Yakub ahkan Yusep anakoh. 4:6 Ang anan todahpot sumur Yakub. Yesus bo'o samasino tului ponyalan, bain rih Io tuot ang saran sumur. Ohkot orih kira-kira pukul duo balas tohun ondou, 4:7-8 tutang murid-murid Yesus jari tulak nokuh lowu ahkan moli ukun. Pongohuli lombut ihcobehti bawin Samaria nohuang ngalap danum. Yesus nuhtui umba io, "Ine, tou Ahku nyawot danum korih?" 4:9 Ulunbawi rih mutah, "Tuan ulun Yahudi, ahku ulun Samaria; ombai Tuan nyawot korih tahkan ahku?" (Tului ulun-ulun Yahudi eam aro hokopahtuh umba ulun Samaria.) 4:10 Yesus mutah, "Jahkaioh ihko kota'an ponongan Pohotala tutang iai ijo nyawot korih umba ihko, musti ihko bongom ijo nyawot danum umba-Oh, tutang Io ahkan nonga ahkan'kam danum bolum." 4:11 Hion ulunbawi rih, "Tuan eam anai hapangalap, tutang sumur tuh timbon tu'u. Tahkan umoh Tuan duon danum bolum? 4:12 Yakub, amai tahtu ajuh ihkai, nonga ihkai sumur tuh. Io bongoi ngomin danum korihoh tahkan ohtoi; kodorih hino anak-anakoh tutang ohcin-ohcin konombolumoh. Inon Tuan ngohu, Tuan hajo tahkan Yakub?" 4:13 "Ulun ijo ngorih danum tuh ahkan tojahbolai hino," hion Yesus, 4:14 "tahpi ulun ijo ngorih danum ijo ahkan Ahku nongaoh, io eam ahkan tojahbolai hino nyiring kototahiu. Tului danum ijo ahkan Ahku nongaoh rih ahkan monjadi lowong danum ang luwang aropoh ijo ngombuhak soluka tutang nongarih ahkaioh pombolum ijo sojahti tutang kototahiu." 4:15 Hion ulunbawi rih, "Tuan, nongarih ahku danum rih, mangat ahku eam tojahbolai hino; tutang eam usah hoduli nokuh ohtoi mangat ngalap danum." 4:16 "Tulak ihko na'ah bosai'kam, turus hoduli nokuh ohtoi," hion Yesus. 4:17 "Ahku eam anai bosai," hion ulunbawi rih. "Puna morong hiom," hion Yesus. 4:18 "Tului ihko ius kawin limo tihkat, tutang bahkas ijo bolum hihco ihko uhuntuh eam bosai'kam." 4:19 "Uhuntuh ahku kota'an Tuan ihcobehti Nabi," hion ulunbawi rih. 4:20 "Tahtu ajuh 'kai nyembah Pohotala ang pupungpuruk tuh, tahpi uhtus Tuan nuhtui ijo baya ang Yerusalem iou unukoh ulun nyembah Pohotala." 4:21 "Porocayalah," hion Yesus umba io, "ihco ohkot ulun ahkan nyembah Amai, bohkon hino ang pupungpuruk tuh, tutang bohkon ka'a ang Yerusalem. 4:22 Ihkam ulun Samaria nyembah ijo eam ihkam ngosonooh, tobalikoh ihkai ulun Yahudi nyembah Io ijo ihkai ngosonooh, tului kosolamatan lombut tahkan ulun Yahudi. 4:23 Tahpi ohkotoh ahkan lombut, molahan jari lombut, ijo umba kowasa Roh Pohotala ulun-ulun ahkan monyembah Amai, kolou Pohotala ijo morong, kolou ijo kononjolik Amai. 4:24 Tului Pohotala rih Roh, tutang tihkas umba kowasa Roh Pohotala ulun-ulun dahpot nyembah Amai, ijo kolouamah Io anai." 4:25 Ulunbawi rih nuhtui umba Yesus, "Ahku ta'an Lahca Ponyolamat (ijo konohawot Kristus) ahkan lombut. Amat Io lombut Io ahkan momborihta kokaron angihco ahkan ihto." 4:26 "Ahku tuh Io," hion Yesus, "Ahku ijo huntuh rahat bopander umba ihko." 4:27 Ang kotihka orih murid-murid Yesus jari buli. Iro helan nohto Yesus bopander umba ihcobehti bawi. Tahpi eam ihcobehti ka tahkan iro ijo ngisok umba ulunbawi rih, "Inai perulu inon?" ata'ai ijo ngisok umba Yesus, "Ombai Amai bopander umba ulunbawi rih?" 4:28 Mahka ulunbawi rih nohtah burungalapoh ang anan turus nokoru nokuh lowu tutang nuhtui umba ulun-ulun ang anan, 4:29 "Olai nohto ulun ijo monyorihta ahkak'ku kokaron aang'co ijo pu'u ahku nguai. Toumorongrih Io rih Lahca Ponyolamat?" 4:30 Mahka ulun-ulun rih ka nohtahrih lowu turus hihkas nokuh Yesus. 4:31 Pondehan orih murid-murid-Oh ngomin Yesus kuman, "Amai Guru," hion'ndo, "has kuman." 4:32 Tahpi Yesus mutah, "Anai ukun aang Ahku, ijo eam ihkam ta'ai." 4:33 Mahka murid-murid-Oh nopara saling ngisok, "Inon anai ulun ngomin ukun ahkai-Oh?" 4:34 Turus Yesus nuhtui, "Ukun-Ku anairih numbun kohondak Io ijo nyuhu Ahku, tutang ngo-opahoh gawi ijo tonyorah-Oh ahkak-Ku. 4:35 Ihkam nuhtui, 'Ohpat bulan hino rahat ngohtom.' Tahpi Ahku nuhtui umba ihkam: Topahjah umo-umo ijo ius londa-londang masak, sodia ahkan tongohtomoh! 4:36 Ulun ijo ngohtom ius nopara norima uhpahoh tutang nipun buaoh ahkan pombolum ijo sojahti tutang kototahiu. Mahka ulun ijo nuhkan tutang ulun ijo ngohtom dahpot ngandah hombo-homboh. 4:37 Porobasa tuh morong ka'a, 'Ijo ihco ngombulanoh, tutang ijo bohkon ngohtomoh.' 4:38 Ahku nyuhu ihkam tulak ngohtom ang umo ijo eam ihkam mousahaoh; ulun bohkon ius bogawi ang anan, tutang ihkam monorima koutungoh tahkan gawin'ndo." 4:39 Aro ulun Samaria ponduduk lowu rih porocaya umba Yesus, tului ulunbawi rih nuhtui, "Io nyorihta ahkak'ku kokaro aangihco ijo pu'u ahku nguai." 4:40 Mahka kotihka ulun-ulun Samaria rih hosombang umba Yesus iro nyawot hawui paham, mangat Io mohcon honong iro. Jadi Yesus mohcon ang anan duo ondou kotahiuoh. 4:41 Pongohuli labih aro hino ulun porocaya umba Yesus tului inon ijo tongajar-Oh bongoi ahkan iro. 4:42 Iro nuhtui umba ulunbawi rih, "Ihkai porocaya uhuntuh, eam kotului inon ijo ihko nuhtuioh ahkan'kai, tahpi kotului ihkai bongon jari ngonih Io, tutang kota'an ijo Io puna Ponyolamat kolunon." 4:43 Uliopah duo ondou mohcon ang Sikhar, Yesus tulak nokuh Galilea. 4:44 Yesus bongoi jari nuhtui, "Ihcobehti nabi eam ahkan duon horomat ang lowuioh bongoi." 4:45 Tahpi kotihka Io johcok ang Galilea, ulun-ulun ang anan nyambut Io honong jorih ahtoi'ndo, tului iro anai ang Yerusalem, aang Ondou Pesta Paska, tutang jari nohto paring ijo konuan Yesus. 4:46 Pongohuli Yesus buli nokuh Kana ang Galilea, ang anan Io pu'u ngubah danum monjadi anggur. Ang lowu rih anai ihcobehti pogawai pomoretah, anakoh rahat mondam ang Kapernaum. 4:47 Kotihka io ngonih ijo Yesus jari lombut nokuh Galilea tahkan Yudea, io tulak nokuh Yesus tutang nyawot, Yesus lombut nokuh Kapernaum mangat ngopios anakoh ijo jari doni palus. 4:48 Yesus nuhtui umba pogawai pomoretah orih, "Amat ihkam eam nohto tandahelan-tandahelan, ihkam eam porocaya." 4:49 "Tuan," hion pogawai pomoretah orih, "jelengrih lombut hounumba anak'ku palus." 4:50 Hion Yesus umba io, "Tulakrih anak'mu pios." Ulun orih porocaya ahkan auh Yesus, turus io buli. 4:51 Ang beteng jalan, pohalu-pohaluoh lombut nokuhoh tutang ngabar, "Anak tuan jari pios." 4:52 Turus io ngisok umba iro pukul pira anak'ku rih nopara pios. Iro mutah, "Malom kurang labih jam ihco tohun ondou pondamoh nihou." 4:53 Turus amai anak-inyam rih toingat ijo aang kotihka orih Yesus nuhtui umba io, "Anak'mu pios." Mahka io tutang paring jolahaioh porocaya umba Yesus. 4:54 Tuhrih tandahelan ijo koduo ijo tonguan Yesus ang Galilea ulimba polombutoh tahkan Yudea.
5:1 Ulimba rih anai pesta ulun Yahudi, mahka Yesus hihkas nokuh Yerusalem. 5:2 Ang Yerusalem doni "Bauntukang Tobiri," anai ihcokobawak tolaga, ijo a'ang basaulun Ibrani tonohawot Betesda. Ang anan anai limo tombiran. 5:3 Ang tombiran-tombiran rih aro ulun poros kaling; anai ijo bobulen, anai ijo botipang, anai ijo bolomu. Iro paringoh ngindoi danum ang tolaga rih holucak. 5:4 Tului anai wayahoh molehkat Tuhan nosuluh nokuh luwang tolaga rih tutang ngolucakrih danumoh. Tutang ulun poros ijo pahtukoh nyohowunyolong tolaga rih, ohkot danum holucak ahkan pios tahkan-ponyahkitoh, inon beweu mahcam ponyahkitoh. 5:5 Ang unuk orih anai ihcobehti bahkas ijo jari poros tolun pulu jalu toun kotahiuoh. 5:6 Yesus nohto io kaling anan, tutang ta'an ijo io jari tahi samasino poros; mahka Yesus ngisok umba io, "Kani ihko pios?" 5:7 Ulun poros rih mutah, "Amai, eam anai ulun ang ohtoi ahkan posohowu ahku nokuh luwang tolaga ohkot danumoh holucak. Tutang pondehan ahku nokuh tolaga, ulun bohkon jari sohowu labih soun." 5:8 Mahka Yesus nuhtui umba io, "Hihkatrih, ngahtang kahcangkaruk'mu, tutang nyalan." 5:9 Aang wayah orih ka'a ulun orih pios. Io ngahtang kahcangkarukoh, tutang nyalan. Hal orih nyolung aang ondou Sabat. 5:10 Kotului orih dolang okon Yahudi nuhtui umba ulun ijo punai pios rih, "Ondou tuh ondou Sabat, ihko eam tou ngahtang unuk karuk'kam." 5:11 Tahpi ulun rih mutah, "Ulun ijo jari ngopios ahku nanai nyuhu ahku ngahtang kahcang'ku tutang nyalan." 5:12 "Iai Io ijo nyuhu ihko ngahtang kahcang'mu tutang nyalan?" hion'ndo. 5:13 Tahpi ulun ijo jari pios rih eam kota'an iai uluioh, kotului Yesus jari dilap ang tohun ulun aro rih. 5:14 Pongohuli Yesus hosombang umba ulun rih ang Lohpou Tuhan tutang nuhtui umba io, "Uhuntuh ihko jari pios. Ararih bodusa hino, mangat eam nyuru hal ijo labih ja'at." 5:15 Mahka tulakrih ulun orih turus mander ahkan dolang pongowasa Yahudi, ijo Yesusrih jari ngopios io. 5:16 Tutang tului orih iro nopara ngonyusah Yesus, tului Io ngopios ulun aang ondou Sabat. 5:17 Tahpi Yesus nuhtui umba iro, "Amai-Ku turus bogawi nyiring uhuntuh, tutang Ahku ka bogawi." 5:18 Tuhtui-tuhtui orih nguan dolang pongowasa Yahudi mahi-mahi ngurah jalan ahkan munu Io. Iro nguan orih eam baya kotului Io molanggar hadat agama ondou Sabat, tahpi tului Io nuhtui ijo Pohotala rih Amai-Oh; rimai Io monyama arop-Oh honong Pohotala. 5:19 Yesus mutah ulun-ulun rih koloutuh, "Porocayarih, Anak eam dahpot nguaioh ino-inon hapan kowasa aiu bongoi. Io tihkas nguanrih inon ijo Io nohto tonguan Amai-Oh. Kobain inon ijo tonguan bain Amai, orih ka'a ijo tonguan bain Anak. 5:20 Kotului Amai ngasih umba Anak-Oh tutang ngorinah ahkai-Oh paring ijo konuai-Oh bongoi. Malah Amai ahkan ngorinah ahkai-Oh gawiu-gawiu ijo labih hajo hino, nyiring ihkam helan. 5:21 Amai rih ngomonyun ulun mahtoi, tutang nonga ahkan iro pombolum sojahti tutang kototahiu; kodorih ka Anak nonga pombolum ijo kototahiu ahkan ulun ijo kani tononga-Oh pombolum. 5:22 Amai bongoi eam mosara iai ka. Paring kowasa ahkan mosara jari tonyorahoh ahkan Anak-Oh. 5:23 Amai nguanoh rih mangat paring ulun mohoromat Anak kolou iro mohoromatoh Amai. Ulun ijo eam mohoromatoh Anak eam ka'a mohoromatoh Amai ijo nyuhu Anak. 5:24 Tu'u morong auh-auh-Ku tuh: Ulun ijo ngonih auh-auh-Ku, tutang porocaya umba Io ijo nyuhu Ahku, tepun pombolum sojahti tutang kototahiu. Io eam ahkan tonohukum; io jari morodehka tahkan popahtoi tutang dahpot pombolum. 5:25 Porocayarih: Ahkan lombut ohkotoh -- malah jari johcok ohkotoh -- ulun mahtoi ahkan ngonih auh Anak Pohotala. Tutang ulun ijo ngonih-Oh ahkan bolum. 5:26 Kolou Amai bongoi tohasak pombolum, kodorih ka Io ponjadi Anak-Oh tohasak pombolum ka'a. 5:27 Io jari nonga ahkan Anak-Oh hak ahkan mosara, tului Io Anak Ulun. 5:28 Ara ihkam helan ngonih hal tuh, tului ohkotoh ahkan lombut, ijo paring ulun ijo jari mahtoi ngonih auh-Oh, 5:29 turus soluka tahkan kolowong. Ulun ijo jari nguan kohinut ahkan monyun bagi pombolum. Tahpi ulun ijo jari nguan koja'at ahkan monyun bagi tonohukum." 5:30 "Ahku eam dahpot nguan ino-inon ngosan konohuang-Ku bongok. Ahku tihkas mosara numbun ijo ponoretah Pohotala. Tutang puhtusan-Ku rih adil, tului Ahku eam numbun konohuang-Ku bongok, molekan konohuang Amai ijo nyuhu Ahku. 5:31 Amatjahka Ahku nonga kosaksian tohou arop-Ku bongok, kosaksian-Ku rih eam dahpot tonoharap. 5:32 Tahpi anai ulun bohkon ijo nonga kosaksian tohou Ahku, tutang Ahku ta'an ijo kosaksiaioh rih morong. 5:33 Ihkam jari ngirim soruhan nokuh Yohanes, tutang io jari nonga kosaksian ijo morong tohou Ahku. 5:34 Hal tuh Ahku nuhtuioh eam tului Ahku perulu kosaksian tahkan kolunon, tahpi mangat'kam tonyolamat. 5:35 Yohanes rih sama umba sumbu ijo honjala tutang ngorolondang koloangoh. Bagi pondehan ohkot ihkam sanang norimaoh koboloang rih. 5:36 Tahpi kosaksian-Ku labih hajo umba kosaksian Yohanes. Inon ijo huntuh Ahku nguaioh tuh, ijo orih gawi ijo tononga Amai ahkak-Ku, mbuktioh ijo Amai jari nyuhu Ahku. 5:37 Tutang Amai ijo nyuhu Ahku ka'a nonga kosaksian tohou Ahku. Ihkam jaha pu'u ngonih auh-Oh ata'ai nohto tapai-Oh. 5:38 Auh-auh-Oh eam lehket luwang ahtoi'kam, tului ihkam eam porocaya umba Ahku ijo tonyuhu-Oh. 5:39 Ihkam bolajar Surat Borasih, tului nanyam'kam ijo umba cara orih ihkam anai ngina pombolum sojahti tutang kototahiu. Tutang Surat Borasih rih bongoi nonga kosaksian tohou Ahku. 5:40 Tahpi ihkam eam kani lombut nokuh Ahku bagi dahpot pombolum kototahiu. 5:41 Ahku eam ngurah tara tahkan kolunon. 5:42 Ahku ngosono ihkam. Ahku ta'an ihkam eam mongasih Pohotala luwang ahtoi'kam. 5:43 Ahku lombut umba kowasa Amai-Ku, tahpi ihkam eam norima Ahku. Tahpi amat ulun bohkon lombut umba kowasa aiu bongoi ihkam kani norima io. 5:44 Koloukuwoh ihkam dahpot porocaya, amat ihkam ngurah tara tahkan sama arop'kam, tutang eam bousaha ngurah tara tahkan Pohotala ijo Ihco? 5:45 Ara ngohu Ahku ahkan nosalan ihkam ang tohimo Amai. Mahka ijo ahkan monosalan ihkam anai rih Museh, io ijo ihkam harapoh. 5:46 Amatjahka ihkam porocaya umba Museh, ihkam porocaya umba Ahku, tului tohou Ahku rih io nyurat. 5:47 Tahpi amat ihkam eam porocaya ahkan inon ijo tonyurat bain Museh, koloukuwoh ihkam dahpot porocaya umba inon ijo Ahku jari nuhtuioh?"
6:1 Papira ohkot pongohuli Yesus tulak nokuh pohoi Danou Galilea, ijo konohawot ka'a Danou Tiberias. 6:2 Kojohcokoh ang anan, aro ulun ngahasu Io tului iro jari nohto tandahelan ijo konuai-Oh honong ngopiosoh ulun-ulun poros. 6:3 Yesus nuhkat nokuh ngosan lukuh, turus tuot anan tutang murid-murid-Oh. 6:4 Aang ohkot orih jari doni Ondou Pesta Paska ulun Yahudi. 6:5 Ohkot Yesus nopahjah hokodiling-Oh, Io nohto ulun huru-hurun lombut nokuh-Oh. Mahka Io nuhtui umba Pilipus, "Ang umoh ihto dahpot moli ukun, mangat paring ulun tuh duon kuman?" 6:6 (Yesus jari ta'an inon ijo ahkan konuai-Oh, tahpi Io nuhtuikolourih Io kani monguji Pilipus.) 6:7 Pilipus mutah, "Luhte regai duo rahtus duit perak eam sukup ahkan ulun-ulun tuh, oluka nyinong behti baya dahpot honjiot iou." 6:8 Ihcobehti murid Yesus ijo bohkon, iorih Andreas, konduang Simon Petrus, nuhtui, 6:9 "Ang ohtoi anai anak-inyam bahkas tepun limo kobilap luhte tutang duo ohcin. Tahpi eam bahkaoh ahkan ulun karon-tuh?" 6:10 "Nyuhu ulun-ulun rih tuot," hion Yesus. Mahka ang anan aro uru, jadi ulun-ulunrih tuot ang uru -- paringoh anai kira-kira limo kuhjan behti ulun-ulun bahkas. 6:11 Pongohuli Yesus ngomin luhte rih, turus ngohawot torimakasih ahkan Pohotala. Ulimbarih Io magi-magioh luhte rih ahkan ulun aro. Pongohuli Io magi-magioh ohcin rih, tutang iro kuman sobosuh-bosuhoh. 6:12 Ulijari paringoh ulun rih kuman nyiring bosuh, Yesus nuhtui umba murid-murid-Oh, "Nipunohrih kolowin ukun rih; ara nyiring anai ijo todian." 6:13 Turus iro nipun putan ukun rih, duo balas tahcung tuwi kolowin ukun tahkan limo kobilap luhte, ijo tokuman bain ulun aro rih. 6:14 Kotihka ulun aro nohto gawi aneh rih ijo konuan bain Yesus, iro nuhtui, "Tu'u-tu'u, tuhrih Nabi ijo tonoharap lombut nokuh kolunon!" 6:15 Yesus ta'an iro kani lombut mangat hojujuan Io monjadi Lahcan iro. Tului orih hihkasrih Io mokila nokuh daerah puruk. 6:16 Kotihka ondou nopara pindong, murid-murid Yesus nosuluh nokuh danou. 6:17 Turus iro jahkat alut mitah danou rih, ngohimat Kapernaum. Ondou jari pindong, tahpi Yesus jaha ka'a lombut nokuh iro. 6:18 Pondehan orih danou nopara holucak tului bahiu karas. 6:19 Ulimba bolayar, limo ata'ai onom kilomehter, iro nohto Yesus lombut nokuh alut tutang nyalan ang ngosan danum. Iro mihkoh samasino. 6:20 Tahpi Yesus nuhtui umba iro, "Ara mihkoh, tuh Ahku!" 6:21 Turus honong sanang ahtoi'ndo norima Io jahkat nokuh luwang alut, tutang uhun orih ka'a alut iro rih johcok ang unuk konohimat. 6:22 Anghawunrih ondouoh ulun aro ijo magun mohcon ang pohoi danou, borondong ijo nanaioh tihkas anai ihco alut ang anan. Iro ta'an ijo murid-murid Yesus jari tulak hapa alut rih, tutang Yesus eam aro homboh. 6:23 Pongohino pira-pira alut tahkan lowu Tiberias lombut tutang tuli doni unuk ulun aro rih kuman luhte, uli Tuhan ngohawot torimakasih. 6:24 Kotihka ulun aro rih nohto, ijo pios Yesus oluka murid-murid-Oh eam aro ang anan, iro ka'a jahkat alut-alut rih tutang tulak nokuh Kapernaum ngurah Yesus. 6:25 Kotihka ulun-ulun rih hosombang umba Yesus ang pohoi danou, iro ngisok umba Io, "Amai Guru, mira Amai johcok ang ohtoi?" 6:26 Yesus mutah, "Tu'u-tu'u, ihkam ngurah Ahku, eam kotului ihkam jari horahti maksud tandahelan-tandahelan ijo jari Ahku nguai, tahpi tului ihkam jari kuman nyiring bosuh. 6:27 Ara bogawi mangat dahpot ukun ijo tou opah tutang maram. Bogawirih mangat ngondahpot ukun ijo eam tou maram tutang ijo nonga pombolum sojahti tutang kototahiu. Ukun rih ahkan tononga bain Anak Ulun ahkan'kam, tului Io jari tonotuot bain Pohotala Amai." 6:28 Turus iro ngisok umba Io, "Ihkai harus nguan inon mangat nguaioh kohondak Pohotala?" 6:29 Yesus mutah, "Tuhrih ijo ngonjolik Pohotala tahkan ihkam: porocayarih umba Io ijo tonyuhu Pohotala." 6:30 "Amat kolourih," hion'ndo, "tanda inon ijo dahpot Amai ngorinah ahkan ihkai, mangat ihkai nohtooh tutang porocaya umba Amai? Inon ijo ahkan Amai nguaioh? 6:31 Tahtu ajuh ihkai, jari kuman manna ang padang bolambah, kolou ijo tonyurat ang luwang Surat Borasih, 'Io nonga iro luhte tahkan soruga.' " 6:32 Turus Yesus nuhtui umba iro, "Porocayarih: Eam Museh, molekan Amai-Ku rih ijo nonga ahkan'kam luhte ijo kotu'uioh tahkan soruga. 6:33 Tului luhte ijo tononga Pohotala anai rih, Io ijo mosuluh tahkan soruga tutang nonga pombolum ahkan ulun ang kolunon." 6:34 "Amai," hion iro, "nongarih ahkan ihkai luhte rih hototurus." 6:35 "AHKU RIH LUHTE IJO NONGA POMBOLUM," hion Yesus umba iro. "Ulun ijo lombut nokuh Ahku eam ahkan bolo'u hino nyiring kototahiuoh. Tutang ulun ijo porocaya umba Ahku hototurus io eam ahkan tojahbolai hino, nyiring kototahiuoh. 6:36 Tahpi kolou jari Ahku nuhtui ahkan'kam, oluka ihkam jari nohto Ahku, ihkam eam porocaya. 6:37 Paring ulun ijo tononga Amai ahkak-Ku ahkan lombut nokuh Ahku. Ahku eam ahkan nulak iai ka ijo lombut nokuh Ahku. 6:38 Tului Ahku mosuluh tahkan soruga, bohkon ahkan nguanoh konohuang bongon, molekan konohuang Io ijo nyuhu Ahku. 6:39 Tutang tuh rih konohuang Aiu ijo nyuhu Ahku: mangat tahkan paring ulun ijo tononga ahkak-Ku, eam 'cobehti ka nihou; tahpi mangat Ahku ngombolum iro ang Ondou Kiamat. 6:40 Puna tuhrih kojolik Amai-Ku: Mangat paring ijo nohto Anak tutang porocaya umba-Oh tepun pombolum sojahti tutang kototahiu, tutang Ahku ngombolumoh huli aang Ondou Kiamat." 6:41 Ulun-ulun Yahudi nopara bokuhtuk nohimo Yesus, kotului Io nuhtui: "Ahku luhte ijo mosuluh tahkan soruga." 6:42 Hion'ndo, "Eamkah tuh Yesus, anak Yusep? Ihkai kosono inai amai-Oh! Koloukuwoh Io dahpot nuhtui ijo Io nosuluh tahkan soruga?" 6:43 Turus Yesus nuhtui umba iro, "A'ai bokuhtuk. 6:44 Eam ihcobehti ka dahpot lombut nokuh Ahku, amat Amai ijo jari nyuhu Ahku, eam ngomin io ahkak-Ku; tutang ia-iai ijo lombut, ahkan Ahku ngombolumoh aang Ondou Kiamat. 6:45 Ang luwang Buhku Nabi-nabi tonyurat koloutuh: 'Paring ulun ahkan tongajar bain Pohotala.' Jadi paring ulun ijo ngonih Amai tutang bolajar tahkan Io, lombut nokuh Ahku. 6:46 Orih eam borimai ijo anai ulun ijo jari nohto Amai. Tihkas Io ijo lombut tahkan Pohotala, jari nohto Amai. 6:47 Kota'anrih: Ulun ijo porocaya, ahkan tepun pombolum ijo sojahti tutang kototahiu. 6:48 AHKU RIH LUHTE IJO NONGA POMBOLUM. 6:49 Tahtu ajuh'kam kuman manna ang padang bolambah tutang iro mahtoi ka'a. 6:50 Tahpi eam kolouorih umba luhte ijo nosuluh tahkan soruga; ulun ijo kuman luhte rih eam ahkan mahtoi. 6:51 Ahkurih luhte ijo nosuluh tahkan soruga -- luhte ijo nonga pombolum. Ulun ijo kuman luhte tuh ahkan bolum kototahiuoh. Luhte ijo ahkan Ahku nongaoh, ahkan pombolum ulun ang kolunon, anai rih usi-Ku." 6:52 Ngonih orih, ulun-ulun Yahudi hosuat ihco sama bohkon. "Koloukuwoh ulun tuh dahpot nonga usiou-Oh ahkan ihto mangat tokumaioh?" hion'ndo. 6:53 Turus Yesus nuhtui umba iro, "Porocayarih: Amat ihkam eam kuman usin Anak Ulun tutang ngorih daha-Oh, ihkam eam ahkan moro-morong bolum. 6:54 Ulun ijo kuman usi-Ku tutang ngorih daha-Ku, io tepun pombolum sojahti tutang kototahiu, tutang Ahku ahkan ngobolumoh aang Ondou Kiamat. 6:55 Kotului usi-Ku tu'u-tu'u ukun, tutang daha-Ku tu'u-tu'u korih. 6:56 Ulun ijo kuman usi-Ku tutang ngorih daha-Ku, io hihco honong Ahku, tutang Ahku honong io. 6:57 Amai ijo bolum rih nyuhu Ahku, tutang Ahku ka bolum tahkan Amai. Kolouorih ka'a ulun ijo kuman usi-Ku ahkan bolum tahkan Ahku. 6:58 Tuhrih luhte ijo nosuluh tahkan soruga: eam luhte kolou ijo ukun tahtu ajuh'mu. Kotului uli kuman luhte orih, iro mahtoi ka'a. Tahpi ulun ijo kuman luhte tuh ahkan bolum nyiring turus-jaham." 6:59 Paringoh tuh tonuhtui bain Yesus, kotihka Io majar ang lohpou sombayang ang Kapernaum. 6:60 Uliopah iro ngonih auh-auh Yesus rih, aro ang louk murid-Oh nuhtui, "Auh ajar tuh tokalou bahat. Iai ijo duon norimaoh!" 6:61 Yesus bongoi kota'an ijo murid-murid-Oh bokuhtuk tohou hal orih. Mahka Io nuhtui, "Inonrih ihkam tosinggung ahtoi tului auh-auh orih? 6:62 Koloukuwoh kojoriaioh noin amat ihkam nohto Anak Ulun nuhkat huli nokuh unuk-Oh ijo asar? 6:63 Ijo nguan ulun bolum iorih Roh Pohotala. Koba'as ulun eam aro gunaioh. Auh-auh ijo tonuhtui-Ku ahkan'kam tuh, anairih auh-auh Roh Pohotala tutang auh-auh ijo nonga pombolum. 6:64 Tahpi anai ka'a ang louk ihkam ijo eam porocaya." (Yesus jari ta'an tahkan pahtukoh ia-iai ijo eam kani porocaya, tutang iai ijo ahkan ngarana umba-Oh.) 6:65 Turus Yesus nuhtui hino, "Orihrih kotuluioh Ahku monyorihtaoh ahkan'kam, ijo eam ihcobehti ka dahpot lombut nokuh Ahku, amat Amai eam toungoduonohrih." 6:66 Nopara uhun rih ka aro murid-Oh nohtahrih Io, tutang eam kani nututoh Io hino. 6:67 Turus Yesus ngisok umba koduo balas murid-Oh, "Inonrih ihkam ka'a kani nohtahoh Ahku?" 6:68 "Tuhan," hion Simon Petrus umba Io, "nokuh umoh ihkai ahkan tulak? Tuhtui Tuhan nonga pombolum ijo sojahti tutang kototahiu. 6:69 Ihkai jari porocaya tutang yahkin ijo Tuhanrih soruhan borasih tahkan Pohotala." 6:70 Yesus mutah, "Eamkah Ahku ijo ngopili ihkam duo balas behti tuh? Mahka ihcobehti ang louk ihkam anairih sehtan!" 6:71 Ijo konohuang Yesus iorih, Yudas anak Simon Iskariot. Kotului, oluka Yudas ihcobehti tahkan koduo balas murid Yesus, io ahkan ngarana Yesus.
7:1 Uliorihrih Yesus tulak kodiling nokuh umo-umoh ang Galilea. Io eam kani nokuh tana Yudea, bain okon-okon Yahudi ang anan bomaksud ahkan munu Io. 7:2 Ang uhun orih jari doni Ondou Pesta Tikap Doun. 7:3 Mahka konduang-konduang Yesus nuhtui umba Io, "Nohtah ohrih unuk tuh tutang tulak nokuh Yudea, mangat murid-murid-Mu, dahpot nohto ka'a gawin-Mu. 7:4 Eam aro ulun ijo ahkan monyuhukoh inon ijo io nguaioh, amat io jolik monjadi botarung. Amat Ihko nguanoh hal-hal koloutuh, sohapus kolunon harus ta'an!" 7:5 (Kotului konduang-Oh bongoi ka'a eam porocaya umba Io.) 7:6 "Jaha ohkotoh ahkak-Ku," hion Yesus umba iro, "tahpi ahkan'kam nyinong ohkot uras tou. 7:7 Kolunon tuh eam harapan nyingi ihkam. Tahpi Ahku puna tonyingi bain kolunon, kotului Ahku toturus ngorinah ahkan kolunon ijo konuaioh ja'at. 7:8 Tulak ihkam nokuh pesta orih, Ahku eam tulak, tului jaham ohkotoh ahkak-Ku." 7:9 Kodorih auh Yesus umba konduang-konduang-Oh, tutang Io ka mohcon ang Galilea. 7:10 Uli konduang-konduang-Oh tulak nokuh pesta rih, toni-tonih Yesus tulak bongoi eam ta'an ulun. 7:11 Kotahin pesta orih, karon-okon Yahudi ngurah Io tutang hokisok, "Ang umoh Io?" 7:12 Aro ulun nopara hosinok tohou Io. Anai ijo nuhtui, "Io ulun hinut." Anai tongai ijo nuhtui, "Eam! Io molahcat ulun aro." 7:13 Tahpi eam aro ihcobehti ka bohanyi nuhtui muhi-muhing tohou Io, tului iro mihkoh umba dolang okon Yahudi. 7:14 Tohun-tohun rahat pesta, Yesus nyolong nokuh Lohpou Tuhan, turus nopara majar ulun. 7:15 Okon-okon ulun Yahudi helan samasino tutang hion'ndo, "Koloukuwoh ulun tuh dahpot kota'an aro, podahar Io eam pu'u sokula?" 7:16 Yesus mutah, "Ijo Ahku majaroh tuh bohkon ajaran aik-Ku, tahpi ajaran Io ijo nyuhu Ahku. 7:17 Ulun ijo kani numbun konohuang Pohotala, ahkan ta'an inon rih ajaran-Ku lombutoh tahkan Pohotala ata'ai tahkan Ahku bongok. 7:18 Ulun ijo nonga ajaranoh bongoi, ngurah horomat ahkan aropoh bongoi. Tahpi ulun ijo ngurah horomat bagi Io ijo nyuhuoh, ulun rih bujur, eam aro alik aangoh. 7:19 Eamrih Museh jari nonga poretah-poretah Pohotala ahkan'kam? Tahpi ang louk ihkam eam aro ijo numbun poretah-poretah rih. Ombai ihkam kani munu Ahku?" 7:20 Ulun aro rih mutah, "Ihko bobucon! Iai kani munu Ihko?" 7:21 Yesus mutah, "Tihkas ihco gawi Ahku nguai aang ondou Sabat, tutang ihkam helan. 7:22 Museh nonga ihkam poroturan ahkan bosunat -- oluka sunat rih kotu'ui eam asaroh tahkan Museh, tahpi tahkan amai-amai tahtu ajuh ijo hountahkan Museh. Tului orih, aang ondou Sabat ka ihkam kani nyunat ulun. 7:23 Amat ihkam nguan orih mangat ara molanggar aturan Museh tohou sunat, ombai ihkam bosingi umba Ahku, tului ngopiosoh ulun paring ang ondou Sabat? 7:24 Ara mosara ulun hogalang ijo gihtan, tahpi hogalang koadilan." 7:25 Pongohuli anai pira-pira ulun Yerusalem nuhtui, "Eamkah Io tuh uluioh ijo rahat konurah mangat tomunu? 7:26 Nohtorih Io nuhtui umba kohandak-Oh ang tohimo ulun aro, tutang eam aro ijo nuhtui ino-inon umba Io! Inonrih pongowasa-pongowasa'ndo puna jari borondong ijo Io tuh Lahca Ponyolamat? 7:27 Tahpi amat Lahca Ponyolamat rih lombut, eam ihcobehti ka ta'an tahkan umoh asar-Oh! Podahar ihto ta'an tahkan umoh asaroh ulun tuh." 7:28 Pongohuli rahat Yesus majar ang luwang Lohpou Tuhan, Io na'ah umba auh ijo muhing, "Jadi ihkam ta'an iai Ahku tuh, tutang tahkan umoh asar-Ku? Ahku eam lombut ngosan konohuang-Ku bongok. Ahku tonyuhu bain Io ijo bohak nyuhu Ahku, tutang Io dahpot tomorocaya. Tahpi ihkam eam ngosono Io. 7:29 Ahku ngosono Io, tului Ahku asar tahkan Io, tutang Iorih ijo nyuhu Ahku." 7:30 Aang wayah rih iro jolik nawan Yesus, tahpi eam aro ijo bohanyi nambit Io, tului jaham johcok ohkotoh. 7:31 Aro ang louk ulun-ulun rih nopara porocaya umba Yesus, tutang nuhtui, "Amat Lahca Ponyolamat rih lombut, inonrih Io duon nguan labih aro tandahelan tahkanumba ulun tuh?" 7:32 Ulun-ulun Parisi ngonih koloukuwoh ulun aro rih hokosino-sinok tohou Yesus. Tului orih, homboh umba imam-imam kopala iro nyuhu tongai pongawal Lohpou Tuhan tulak nawan Yesus. 7:33 Yesus nuhtui umba ulun aro ang luwang Lohpou Tuhan, "Tihkas honjulu iou Ahku magun hihco umba ihkam. Ulirih Ahku tulak ahkan ijo nyuhu Ahku. 7:34 Ihkam ahkan ngurah Ahku, tahpi eam dahpot nyombangoh Ahku; tului ihkam eam dahpot lombut nokuh unuk ang umoh Ahku anai." 7:35 Turus dolang pongowasa Yahudi hoponuhtui sama aropoh, "Ulun tuh tulak nokuh amoh, nyiring ihto eam dahpot nyombang Io? Inonrih Io kani tulak ahkan ulun-ulun Yahudi ijo mohcon ang tana bohkon louk uhtus yonani, tutang majar ulun Yunani? 7:36 Inon maksudoh umba tuhtui, ijo ihto ahkan ngurah Io tahpi eam dahpot nyombang-Oh, tutang ijo ihto eam dahpot nokuh unuk ang umoh Io anai?" 7:37 Aang ondou lain tahkan pesta rih, iorih ondou ijo paling mbahtang, Yesus tombok ang luwang Lohpou Tuhan turus na'ah, "Ulun ijo tojahbolai pios io nokuh Ahku mangat ngorih. 7:38 Tohou ulun ijo porocaya umba Ahku, tonyurat a'ang Surat Borasih: 'Tahkan luwang ahtoioh nyalut danum ijo nonga pombolum.' " 7:39 (Yesus ngohawot auh rih tohou Roh Pohotala ijo tonorimabain ulun-ulun ijo porocaya umba Io. Kotului ang ohkot orih Roh Pohotala jaham tononga; tului Yesus jaham konohajo honong popahtoi-Oh.) 7:40 Aro ulun ngonih inon ijo konohawot bain Yesus, tutang tahkan louk iro rih anai ijo nuhtui, "Ulun tuh musti Nabi rih!" 7:41 Ijo bohkon nuhtui, "Tuhrih Lahca Ponyolamat!" Tahpi anai ka'a ijo nuhtui, "Ho, mira tou Lahca Ponyolamat lombut tahkan Galilea? 7:42 A'ang Surat Borasih tonyurat ijo Lahca Ponyolamat anairih lihit Dawid tutang ahkan lombut tahkan Betlehem, iorih lowu lohpou Dawid." 7:43 Laiuoh ulun-ulun nopara hosomba'an tohou Yesus. 7:44 Anai ijo kani nawan Io, tahpi eam ihcobehti ka nambit Io. 7:45 Kotihka dolang pongawal Lohpou Tuhan ijo sonuhu tulak nawan Yesus lombut hoduli, imam-imam kopala, tutang ulun-ulun Parisi rih ngisok umba iro, "Ombai ihkam eam ngomin Io nokuh ohtoi?" 7:46 Dolang pongawal rih mutah, "Akaine, jaha pu'u anai ulun bopander naing Io!" 7:47 "Inonrih ihkam ka'a jari ponolacatoh baiu-Oh?" hion ulun-ulun Parisi rih. 7:48 "Anaikah okon-okon ito ata'ai ulun Parisi ijo porocaya umba Io? 7:49 Tahpi ulun aro tuh, iro eam kosono hukum Museh, tutang koloukuwoh ka ka'a iro jari tonulut." 7:50 Anai ihcobehti ang louk ulun-ulun Parisi rih, anairih Nikodemus ijo pu'u lombut nokuh Yesus. Nikodemus rih nuhtui umba ulun-ulun Parisi ijo bohkon, 7:51 "Numbun hukum, ihcobehti eam dahpot tomohukum sounumba porokaraoh tongonih tutang konuaioh rih tomoriksa." 7:52 "Inonrih ihko ka'a tahkan Galilea?" hion'ndo. "Poriksarih houn Surat Borasih! Ihko ahkan nohto ijo eam anai Nabi ijo asar tahkan Galilea!" 7:53 Uliorih rih, paring ulun buli nokuh lohpou'ndo.
8:1 Tahpi Yesus hihkas nokuh Puruk Zaitun. 8:2 Ang hawun ondouoh homboh ngohkos, Io hihkas hino nokuh Lohpou Tuhan, tutang aro ulun lombut nokuh Io. Yesus tuot turus nopara majar ulun aro. 8:3 Pondehan orih, guru-guru agama tutang ulun-ulun Parisi ngomin ahkai-Oh ihcobehti bawi ijo sombang rahat hobandung. Iro nyuhu ulunbawi orih tombok ang tohu-tohun, 8:4 turus nuhtui umba Yesus, "Amai Guru, ulunbawi tuh jari sombang rahat hobandung. 8:5 Ang luwang hukum Museh anai poroturan amat ihcobehti bawi somahcam rih harus tomukah umba bahtu nyiring mahtoi. Uhuntuh koloukuwohoh hion Amai?" 8:6 Iro ngisok kolou orih ahkan nyokohtung Io, mangat iro duon nandah-Oh. Tahpi Yesus nyundop nyurat umba iking-Oh ang tana. 8:7 Kotihka iro turus jua-juan, Io ngahtang kuhung-Oh tutang nuhtui umba iro, "Ulun ijo eam aro dusaioh ang louk ihkam, nauh rih io ijo pahtuk mukah bahtu nokuh ulunbawi atuh." 8:8 Uliorih Yesus huli nyundop, tutang nyurat hino ang tana. 8:9 Uli ngonih Yesus nuhtui kolourih, tulak iro nohtah unuk orih, mihco honong mihco nopara tahkan ijo oko. Laiuoh Yesus botohtah bongoi ang anan, tutang ulunbawi orih ijo magun tombok ang unukoh. 8:10 Turus Yesus ngahtang kuhung-Oh tutang nuhtui umba ulunbawi orih, "Koumoh iro paringoh 'nai? Eam anairih ijo mohukum ihko?" 8:11 "Eam, Amai," hioioh mutah. "Hinutrih," hion Yesus, "Ahku ka'a eam mohukum ihko. Uhuntuh ihko buli, ara nguan dusa hino." 8:12 Yesus bopander hino umba ulun aro rih, hioi-Oh, "Ahku tuh koloang kolunon. Ulun ijo nutut Ahku eam ahkan nyalan aang kopindong, tahpi anaitepun koloang pombolum." 8:13 "Uhuntuh Ihko nonga kosaksian tohou arop-Mu bongom," hion ulun-ulun Parisi rih umba-Oh, "kosaksian-Mu rih eam morong." 8:14 Yesus mutah, "Oluka Ahku nonga kosaksian tohou arop-Ku bongok, kosaksiak-Ku rih morong; tului Ahku ta'an tahkan umoh Ahku lombut tutang nukoh umoh Ahku tulak. Ihkan eam ta'an tahkan umoh Ahku lombut tutang nokuh umoh Ahku tulak. 8:15 Ihkam mosara ulun umba cara kolunon; Ahku eam mosara ulun olu ihcobehti ka. 8:16 Tahpi jahkaioh Ahku mosara ulun, mahka koputusak-Ku rih morong, tului Ahku eam bongok; Amai ijo nyuhu Ahku anai hihco Ahku. 8:17 Ang luwang hukum Museh tonyurat koloutuh: Kosaksian ijo morong iorih kosaksian duo behti. 8:18 Ijo nonga kosaksian tohou arop-Ku anai duo -- Ahku tutang Amai ijo nyuhu Ahku." 8:19 "Amai-Mu rih ang umoh?" hion'ndo. Yesus mutah, "Ihkam eam kosono Ahku, mahika kosono Amai-Ku. Amatjahkai ihkam ngosono Ahku, musti ihkam kosono Amai-Ku ka'a." 8:20 Paring orih tonohawot Yesus aang ohkot Io rahat majar ang Lohpou Tuhan doni pohti unuk pononga. Tahpi eam aro ihcobehti ka ijo nawan Io, tului jaham johcok ohkot-Oh. 8:21 Yesus nuhtui hino umba iro, "Ahku ahkan tulak, tutang ihkam ahkan ngurah Ahku, tahpi ihkam noin mahtoi ang luwang dusa'kam. Nokuh unuk Ahku tulak, ihkam eam dahpot lombut." 8:22 Mahka dolang pongowasa Yahudi, "Mihkoh Io nohuang munu arop-Oh, tului Io nuhtui, 'Nokuh unuk Ahku tulak, ihkam eam dahpot lombut.' " 8:23 Turus Yesus nuhtui umba iro, "Ihkam lombut tahkan pinda; tahpi Ahku lombut tahkan diang. Ihkam tahkan kolunon; Ahku eam tahkan kolunon. 8:24 Kotului orih Ahku nuhtui ahkan'kam, ijo ihkam ahkan mahtoi ang luwang dusa-dusa'kam. Tutang puna ihkam ahkan mahtoi a'ang dusa-dusan'kam, amat eam porocaya ijo, 'Ahku tuh Io ijo konohawot AHKU ANAI,' " 8:25 "Ihko iai kotu'uioh?" hion'ndo. Yesus mutah, "Ahkan inon mander hino umba ihkam! 8:26 Magun aro hal tohou ihkam ijo kani Ahku nuhtuioh tutang mosaraoh. Tahpi Io ijo nguhtus Ahku dahpot tomorocaya. Tutang Ahku momborihta ahkan kolunon, inon ijo Ahku ngonih tahkan Io." 8:27 Iro eam solembang ijo Io rahat nuhtui umba iro tohou Amai. 8:28 Kotului orih Yesus nuhtui umba iro, "Noin amat ihkam jari mopoisung Anak Ulun, ihkam ahkan ta'an ijo, 'Ahku rih Io ijo tonohawot AHKU ANAI,' tutang ihkam ahkan ta'an ijo eam anai ihco ka ijo Ahku nguai tahkan arop-Ku bongok. Ahku tihkas nuhtui inon ijo tomajar Amai ahkak-Ku. 8:29 Tutang Io ijo nyuhu Ahku anai hihco Ahku. Io eam pu'u mohonouoh Ahku bongok-Ku, tului Ahku hototurus nguan inon ijo monyanangoh ahtoi-Oh." 8:30 Ulimba Yesus nuhtui paringoh rih, aro ulun porocaya umba Io. 8:31 Pongohuli Yesus nuhtui umba ulun-ulun Yahudi ijo jari porocaya umba Io, "Amat ihkam bolum numbun ajaran-Ku ihkam tu'u-tu'u murid-Ku, 8:32 mahka ihkam ahkan ngosono Pohotala ijo morong, tutang bain kotului orih ihkam ahkan tomorodehka." 8:33 "Ihkai tuh lihit Abraham," hion'ndo. "Jaham pu'u ihkai monjadi jihpon iai ka! Inon maksud-Mu umba tuhtui, 'Ihkam ahkan tomorodehka?' " 8:34 "Tu'u morong auh-Ku tuh," hion Yesus ahkan iro. "Ulun ijo monguan dusa, anairih jihpon dusa. 8:35 Tutang ihcobehti jihpon eam anai unuk mohcon ijo tahtap ang luwang ukupjolahai, rahatoh anak turus-jahamoh anai unuk luwang ukupjolahai. 8:36 Kotului orih, amat Anak momorodeka ihkam, ihkam tu'u-tu'u morodeka. 8:37 Puna Ahku ta'an ihkam tuh lihit Abraham. Tahpi ihkam kani munu Ahku, tului ihkam eam kani norima ajaran-Ku. 8:38 Inon ijo Ahku nohto aang Amai-Ku, orihrih ijo Ahku nuhtuioh. Rahatoh ihkam nguan inon ijo tongajaroh amai'kam ahkan'kam." 8:39 Iro mutah, "Amai ihkai iorih Abraham." "Jahkaioh ihkam puna tu'u anak Abraham," hion Yesus, "puna ihkam nguan inon ijo tonguan bain Abraham. 8:40 Ahku nuhtui ahkan'kam kotu'u ijo Ahku ngonihoh tahkan Pohotala, tahpi ihkam kani munu Ahku. Abraham eam nguan kolou orih! 8:41 Ihkam nguan inon ijo tonguan bain amai'kam bongom." Hion'ndo, "Ihkai eam anak-anak lacun. Amai ihkai tihkas ihco, iorih Pohotala bongoi." 8:42 Turus Yesus nuhtui ahkan iro, "Jahkaioh Pohotala rih Amai'kam, ihkam ahkan mongasih Ahku, tului Ahku lombut tahkan Pohotala. Ahku eam lombut hapan konohuang-Ku bongok, tahpi Io jari nyuhu Ahku. 8:43 Ombai ihkam eam solembang inon ijo Ahku nuhtui? Kotului ihkam eam tahan ngonih auh ajaran-Ku. 8:44 Sehtanrih amai'kam, tutang ihkam kani numbun konohuang amai'kam. Tahkan topahtukoh sehtan rih pomunu. Io eam pu'u umbabarih komorong, tului eam aro komorong a'ang io. Amat io bobalik orih pahtut, tului puna kolourih sipatoh. Io bobalik tutang puna asar kokaro alik. 8:45 Tahpi Ahku nuhtui komorong, tutang kotului orih ihkam eam porocaya umba Ahku. 8:46 Iai ang louk ihkam tuh ijo dahpot mombukti tohko dusa aang Ahku? Amat Ahku nuhtui komorong, ombai ihkam eam porocaya umba Ahku? 8:47 Ulun ijo asar tahkan Pohotala, ngonih auh Pohotala. Tahpi ihkam eam tahkan Pohotala, kotului orih ihkam eam kani ngonih." 8:48 Ulun-ulun Yahudi rih mutah auh Yesus, "Eam rih morong auh 'kai ijo ngohawat Ihko ulun Samaria ijo sonorupang sehtan?" 8:49 Yesus mutah, "Ahku eam sonorupang sehtan, Ahku nonga horomat ahkan Amai-Ku, tahpi ihkam motanah Ahku. 8:50 Ahku eam ngurah horomat tahkan arop-Ku bongok. Anai ihco ijo ngurah kohoromatan bagi-Ku, tutang Io ijo mosara. 8:51 Kotu'ui morong auh-Ku tuh, ulun ijo numbun auh-Ku kototahiu io eam ahkan mahtoi." 8:52 Turus ulun-ulun Yahudi rih, nuhtui umba Yesus, "Huntuh ihkai ta'an Ihko tu'u-tu'u sonorupang sehtan! Abraham bongoi jari mahtoi, kodorih ka'a paring nabi-nabi. Tahpi Ihko nuhtui, 'Ulun ijo numbun auh-Ku, kototahiuoh eam ahkan mahtoi.' 8:53 Amat Abraham bongoi jari mahtoi, tutang nabi-nabi paringoh ka'a jari mahtoi, Ihko tuh iai? Kuwohrih Ihko labih hajo umba amai 'kai Abraham!" 8:54 Yesus mutah, "Jahkaioh Ahku ngurah horomat ahkan arop-Ku bongok, kohoromatan-Ku rih eam aro rimaioh. Ijo mohoromat Ahku anairih Amai-Ku, ijo ihkam ngohu Pohotalan'kam, 8:55 podahar ihkam eam kosono Io. Tahpi Ahku kosono Io. Jahkaioh Ahku nuhtui ijo Ahku eam ngosono Io, mahka Ahku ihcobehti bobalik, sama umba ihkam. Ahku ngosono Io, tutang bokehtep umba auh-Oh. 8:56 Amai'kam Abraham sanang sino ijo io ahkan nohto ondou-Ku. Io jari nohtooh tutang io sanang!" 8:57 Turus ulun-ulun Yahudi mutah auh Yesus, "Umur-Mu jaham johcok limo pulu toun, tutang Ihko jari nohto Abraham?" 8:58 Yesus mutah, "Kotu'ui Ahku nuhtui umba'kam: hounumba Abraham konanak, Ahku jari anai." 8:59 Turus ulun-ulun Yahudi rih ngomin bahtu kani medak Io; tahpi Yesus nyuhukoh arop, turus soluka nohtahoh Lohpou Tuhan.
9:1 Ohkot Yesus nyalan, Io nohto ulun bobulen tahkan io konanak. 9:2 Murid-murid-Oh ngisok umba Yesus, "Amai Guru ombai ulun tuh tonganak bobulen? Inonrih kotului io bongoi bodusa ata'ai tului inai-amaioh bodusa?" 9:3 Yesus mutah, "Io bobulen eam kotului dusaioh bongoi ata'ai inai amaioh bodusa, tahpi mangat ulun tou nohto kowasan Pohotala bogawi aang aropoh. 9:4 Kotahin magun hondou, ihto harus monguan gawin Io ijo jari nyuhu Ahku. Pindong ahkan lombut, tutang ihcobehti ka eam ahkan tou bogawi. 9:5 Kotahin Ahku ang kolunon tuh, Ahku rih koloang kolunon." 9:6 Uli nuhtui kolouorih Yesus ngoluhca kotana, turus ngoluhtok luhca-Oh orih umba tana. Pongohuli Io ngasakoh ang mahtan ulun orih, 9:7 turus nuhtui ahkaioh, "Tulak muhi arop'mu ang Tolaga Siloam." (Siloam rimai ijo 'Sonuhu'.) Mahka ulun bobulen orih tulak muhi bauimahtaioh. Ohkot io hoduli, io jari dahpot nohto. 9:8 Dolang injah-jolahai, tutang ulun-ulun ijo soun nohto io nyodahkah, paringoh nuhtui, "Eamkah io tuh ulun ijo bahutoh tuot monyodahkah?" 9:9 Anai ijo nuhtui, "Puna io." Tahpi anai hino ijo nuhtui, "Eam, io baya mirip uluiorih." Tahpi ulun rih bongoi nuhtui, "Ahkurih io." 9:10 "Koloukuwoh nyalungoh nyiring ihko tou nohto?" hion iro umba io. 9:11 Io mutah, "Ulun ijo bogare Yesus rih, nguan honjiot luhtektana, turus ngasakoh ang mahtak'ku tutang nuhtui, 'Tulak muhi baunmahtan'mu nokuh Tolaga Siloam.' Turus ahku tulak. Tutang kotihka ahku muhi baukmahtak'ku, ahku tou nohto." 9:12 "Ang umoh ulun orih?" hion'ndo. Io mutah, "Eam ta'an." 9:13-14 Ondou rih anai ondou Sabat, kotihka Yesus ngoluhtok tana umba luhca-Oh, mangat nguan ulun bobulen orih duon nohto. Mahka ulun ijo nanaioh bobulen rih konihtot nokuh ulun-ulun Parisi. 9:15 Iro ka'a ngisok umba io koloukuwoh io dahpot nohto. Io mutah, "Io ngasak luhtok ang mahtak'ku, turus ahku muhioh tutang ahku tou nohto." 9:16 Pira-pira tahkan ulun-ulun Parisi rih nuhtui, "Eam touharapoh ulun ijo nguan tuh asaroh tahkan Pohotala, tului Io eam mopoduli ondou Sabat." Tahpi ulun bohkon nuhtui, "Umoh touharap ulun bodusa nguan katahelan-katahelan koloutuh?" Turus lombut kosuat ang louk iro. 9:17 Mahka ulun-ulun Parisi rih ngisok hino umba ulun rih, "Inon numbun ihko, tohou Io ijo duon nguan ihko nohto?" "Io nabi," hion ulun orih. 9:18 Tahpi dolang okon Yahudi rih eam kani porocaya, ijo ulun rih puna bobulen sounumbaoh konanak tutang uhuntuh dahpot nohto. Tului orih iro na'ah ulun okooh, 9:19 tutang ngisok, "Morongkah io tuh anak'mu, ijo hion'mu konanak bobulen? Koloukuwoh io tou nohto uhuntuh?" 9:20 Inai-amai ulun rih mutah, "Puna io tuh anak ihkai; tutang io puna bobulen tahkan tonganak. 9:21 Tahpi koloukuwoh io tou nopahjah uhuntuh, ihkai eam ta'an. Tutang iai ijo nguan io tou nohto, orih ka ihkai eam ngota'an. Ngisok iou umba io tului io jari anaikokoi; io dahpot mutah bongoi." 9:22 Inai-amai ulun orih nuhtui kodorih, kotului iro mihkoh umba dolang okon Yahudi; kotului iro rih jari pahkat, iai ulun ijo ngahku Yesus kolou Lahca Ponyolamat, eam tou hino nyolong nokuh lohpou sombayang. 9:23 Orih kotuluioh inai-amai ulun orih nuhtui, "Io umbot kokoi; ngisok iou umba io." 9:24 Turus iro na'ah hino ulun ijo nanai bobulen, tutang nuhtui ahkaioh, "Monulutrih ijo ihko ahkan nuhtui ijo morong. Ihkai kota'an ulun orih ulun bodusa." 9:25 "Inon Io ulun bodusa ata'ai eam," hion ulun orih, "ahku eam ta'an. Tahpi ihco hal ahku ta'an; buha ahku bobulen tahpi uhuntuh ahku tou nohto." 9:26 Turus iro nuhtui hino umba io, "Io nguan inon ahkan'mu? Koloukuwohoh Io nguan ihko nohto?" 9:27 Ulun orih mutah, "Jari ahku nuhtui ahkan'kam tahpi ihkam eam kani ngonih. Ombai ihkam kani ngonihoh hino? Mihkohino ihkam kani monjadi murid-murid-Oh ka'a?" 9:28 Turus iro ngonjea io, tutang nuhtui, "Ihkorih murid-Oh; ihkai tuh bohkon! Ihkai tuh murid Museh. 9:29 Ihkai ta'an ijo Pohotala jari nuhtui umba Museh. Tahpi tohou ulun orih ihkai eam ta'an tahkan umoh asar-Oh." 9:30 Ulun orih mutah, "Helan samasino ijo ihkam eam ta'an asar-Oh, mahka Io jari nguan mahtak'ku tou nohto. 9:31 Ihto ta'an ijo Pohotala eam ngonih ulun bodusa, molekan ulun ijo mohormat Pohotala, tutang nguairih kohondak-Oh. 9:32 Tahkan kopahtuk kolunon eam pu'u ihto ngonih anai ulun nguan ulun ijo tonganak bobulen tou nohto. 9:33 Amat ulun rih eam tahkan Pohotala, Io eam ahkan dahpot nguan ino-inon." 9:34 Putah iro, "Inon? Ihko ijo tuwi umba dusa tahkan konanak, ihko kani majar ihkai?" Mahka tahkan wayah orih iro baca io nokuh lohpou sombayang. 9:35 Yesus ngonih ijo ulun aro jari baca ulun orih nyolong lohpou sombayang. Io ngurah ulun rih turus nuhtui umba io, "Inonrih ihko porocaya umba Anak Ulun?" 9:36 Ulun orih mutah, "Iai Io, Tuan? Dohop nyorihta ahkak, mangat ahku porocaya umba Io." 9:37 "Ihko jari nohto Io," hion Yesus, "Io rih ijo uhuntuh, rahat bopander umba ihko." 9:38 "Ahku porocaya, Tuhan," hion ulun orih, turus io suhkuntu'ut ang toharep Yesus. 9:39 Yesus nuhtui, "Ahku lombut nokuh kolunon tuh mosara; mangat ulun ijo bobulen tou nohto, tutang ulun ijo tou nohto, monjadi bobulen." 9:40 Pira-pira ulun Parisi ijo anai ang anan ngonih Yesus nuhtui kodorih, turus iro ngisok umba Yesus, "Konohuang'Mu ihkai tuh bobulen ka'a?" 9:41 Yesus mutah, "Jahkaioh ihkam bobulen, ihkam eam bodusa. Tahpi tului ihkam nuhtui, 'Ihkai nohto,' orih rimai ihkam magun bodusa."
10:1 "Tu'u-tu'u morong tuhtui-Ku tuh: Ulun ijo kani nyolong nokuh luwang korambang tobiri nuhkat nguha pahkot, tutang eam nguha bauntukang, tahpi nuhkat nyuru jalan bohkon, io rih ponahkou tutang ponyilou. 10:2 Tahpi ulun ijo nyolong nguha bauntukang, iorih sokahtik tobiri. 10:3 Ponjaga korambang, nguap bauntukang bagi io tutang tobiri-tobiri ngohasu auhoh, aang ohkot io na'ah iro, umba arai nyinong-behti tutang nihting iro soluka. 10:4 Ulimba tobiri-tobiri rih ngitot nokuh luar, sokahtik rih nyalan ang boun tutang tobiri-tobiri rih ngohasu io, kobain iro ngosono auhoh. 10:5 Iro eam ahkan kani ngohasu ulun bohkon, malah ahkan buhou tahkan ulun rih, tului eam ngosono auhoh." 10:6 Yesus nyorihta porobasa rih, tahpi iro eam solembang inon ijo konohuang-Oh. 10:7 Mahka Yesus nuhtui sino hino, "Tu'u-tu'u morong auh-Ku tuh: AHKU TUH BAUNTUKANG BAGI TOBIR 10:8 Paring ijo lombut sounumba Ahku, anairih ponahkou tutang ponyilou, tahpi tobiri-tobiri eam ngonihoh auh'ndo. 10:9 AHKU TUH BAUNTUKANG. Iai ijo nyolong nguha Ahku ahkan solamat; io soluka, nyolong tutang ngondahpot ukuioh. 10:10 Ponahkou lombut tihkas ahkan nahkou, ahkan munu tutang ahkan morusak. Tahpi Ahku lombut mangat ulun dahpot pombolum -- ijo molowi-lowi. 10:11 AHKU TUH SOKAHTIK IJO HINUT. Sokahtik ijo hinut nonga hasongoh bagi tobiri-tobirioh. 10:12 Ulun konuhpah ijo eam sokahtik, tutang eam ka'a tepun tobiri-tobiri orih, ahkan buhou nohtah tobiri-tobiri orih, amat io nohto horomaung lombut. Mahka tobiri-tobiri orih ahkan tonosahap tutang ngorawu riai horomaung. 10:13 Ulun konuhpah rih buhou, tului io bogawi ahkan uhpah, eam mopoduli tobiri-tobiri orih. 10:14-15 AHKU TUH SOKAHTIK IJO HINUT. Sama kolou Amai ngosono Ahku tutang Ahku kosono Amai, kolourih ka'a Ahku ngosono tobiri-tobiri-Ku tutang tobiri-tobiri-Ku ngosono Ahku. Ahku nyarah hasong-Ku ahkan'ndo. 10:16 Magun anai tobiri-tobiri bohkon ijo ka'a aik-Ku tahpi eam barih aang kawan tobiri tuh. Iro ka'a pahtut Ahku ngihtotoh, tutang iro ahkan ngonih auh-Ku. Iro paringoh ahkan nyolung ihco kokawan umba ihco sokahtik. 10:17 Amai mongasih Ahku, kotului Ahku nyarah hasong-Ku, mangat norimaoh hoduli. 10:18 Eam aro ihcobehti ka duon ngomiuoh tahkan Ahku. Ahku nyarahoh ngosan konohuang-Ku bongok. Ahku bokowasa ahkan nyarahoh, tutang bokowasa ngomiuoh huli. Orihrih gawik'ku ijo Ahku torima tahkan Amai-Ku." 10:19 Kotului Yesus nuhtui kolourih, ulun-ulun Yahudi nopara hosuat. 10:20 Aro ijo nuhtui, "Io sonorupang sehtan! Io bobucon! Ahkan inon ihkam ngonih Io?" 10:21 Tahpi anai ka'a ijo nuhtui, "Ulun ijo sonorupang sehtan, eam Io nuhtui kolorih! Duon kowa sehtan mopolenang mahtan ulun bobulen mangat tou nohto?" 10:22 Ang Yerusalem ulun-ulun rahat pesta peresmian Lohpou Tuhan. Ang ohkot rih wayah sorongin. 10:23 Yesus rahat nyalan ang Sa'oh Salomo ang luwang Lohpou Tuhan, 10:24 kotihka ulun-ulun Yahudi lombut ngorumbung ang hokodiling Yesus. Iro nuhtui, "Johcok miraoh Ihko kani mohonouoh ihkai bimbang? Nuhtuiohrih turus tarang, amat Ihko puna tu'u Lahca Ponyolamat." 10:25 Yesus mutah, "Ius Ahku nuhtui ahkan ihkam, tahpi ihkam eam porocaya. Gawi-gawi ijo Ahku nguai ngosan aran Amai-Ku, nonga bukti tohou Ahku. 10:26 Ihkam eam porocaya tului ihkam eam barih tobiri-tobiri-Ku rih. 10:27 Tobiri-tobiri-Ku ngonih auh-Ku. Ahku ngosono iro, tutang iro ngohasu Ahku. 10:28 Ahku nonga iro pombolum ijo sojahti tutang kototahiu, tutang turus-jahamoh iro eam ahkan rusak. Eamanai ihcobehti ka dahpot ngorabut iro tahkan longok-Ku. 10:29 Amai-Ku, ijo ius nongaoh iro ahkak-Ku, molowiumba koparingoh. Tutang eam ihcobehti ka dahpot ngorabut iro tahkan longon Amai. 10:30 Ahku tutang Amai anairih ihco." 10:31 Turus ulun-ulun Yahudi ngomin hino bahtu nohuang medak Yesus. 10:32 Tahpi Yesus nuhtui umba iro, "Ihkam ius nohto Ahku nguan aro gawi hinut, ijo sonyuhu Amai ahkak-Ku. Tahkan paring gawi orih, umoh ijo kobainoh ihkam kani medak Ahku?" 10:33 Ulun-ulun Yahudi orih mutah, "Eam kotului konuan-konuan-Mu ijo pios rih ihkai kani muhkah Ihko umba bahtu, tahpi kotului Ihko ngarana Pohotala. Ihko ihcobehti kolunon kani ngonjorian arop-Mu Pohotala." 10:34 Turus Yesus mutah, "Eamkah ang Buhku Tourat'mu tonyurat: Pohotala nuhtui, 'Ihkam anairih pohotala'? 10:35 Ihto ta'an ijo inon ijo tonyurat ang luwang Surat Borasih ahkan nyolung turus-jahamoh. Jadi, amat Pohotala nonga kohawot 'pohotala' ahkan ulun-ulun ijo norima auh-Oh, 10:36 ombai ihkam nuhtui Ahku ngarana Pohotala, tului auh-Ku Anak Pohotala? Molekan Ahku tongopili bain Amai, tutang sonuhu nokuh kolunon. 10:37 Amat Ahku eam nguan gawi ijo ponoretah Amai, ara porocaya umba Ahku. 10:38 Tahpi tului Ahku nguaioh, porocaya iou ihkam umba inon ijo Ahku nguai orih, oluka ihkam eam kani porocaya umba Ahku. Honong kolourih ihkam kota'an tutang solembang ijo Amai tahtap hihco umba Ahku, tutang Ahku tahtap hihco umba Amai." 10:39 Iro ngurahjalan hino nawan Yesus, tahpi Io ngoliuk tahkan tohun iro. 10:40 Yesus huli nokuh pohoi Sungoi Yordan, ang unuk Yohanes houn mopondus, turus mohcon ang anan. 10:41 Aro ulun lombut nokuh Io. Iro nuhtui, "Yohanes eam nguan tandahelan-tandahelan, tahpi paring ijo tonuhtuioh tohou ulun tuh morong." 10:42 Turus aro ulun ang anan porocaya umba Yesus.
11:1 Ihcobehti bogare Lasarus mohcon ang Betania hihco umba konduangoh Maria tutang Marta. 11:2 Maria, iorih ulunbawi ijo nusuh minyak buan harum aang pa'an Yesus tutang ngapitoh umba balouoh. Ang sino kotihka konduangoh Lasarus kaling-mondam. 11:3 Koduo bohtouoh rih ngabaroh ahkan Yesus, "Tuhan, konduang 'kai ijo Tuhan ngasihoh rih mondam." 11:4 Kotihka Yesus ngonih kabar orih, Io nuhtui, "Ponyahkit tuh eam ahkan kobainoh popahtoi. Tuhrih nyolung mangat Pohotala konohajooh, tutang mangat kobainoh Anak Pohotala ka'a konohajo." 11:5 Yesus ngasih Marta, Maria tutang Lasarus. 11:6 Tahpi kotihka Yesus ngonih kabar ijo Lasarus mondam, Io ha'atoh mohcon ang unuk-Oh duo ondou hino. 11:7 Uliorih kolawui Io nuhtui umba murid-murid-Oh, "Olai ihto huli nokuh Yudea." 11:8 Iro mutah, "Amai Guru, punan iou ulun-ulun Yahudi kani medak Amai umba bahtu, tutang huntuh Amai kani huli hino nokuh anan?" 11:9 "Eamrih hondou ondou kotahiuoh duo balas jam?" hion Yesus, "ulun ijo nyalan ang ohkot hondou, eam io totarang tului io nohto koloang kolunon tuh. 11:10 Tahpi amat ulun ijo nyalan ang ohkot pindong io totarang, tului eam aro koloang aang io." 11:11 Kodorihrih hion Yesus. Pongohuli Io nuhtui hino, "Sobat ihto, Lasarus jari tiruh, tahpi Ahku ahkan tulak ngomonyun io." 11:12 Murid-murid Yesus nuhtui, "Tuhan, amat Lasarus tiruh noin io ahkan pios." 11:13 Konohuang Yesus, iorih ijo Lasarus jari mahtoi. Tahpi iro ngahu konohuang Yesus anairih ijo Lasarus tiruh bahut. 11:14 Tului orih, Yesus nuhtui umba iro hawui botarang, "Lasarus jari mahtoi. 11:15 Tahpi Ahku sanang ka'a, Ahku eam anai ang anan, kotului labih pios ahkan'kam, mangat ihkam dahpot porocaya. Olairih ihto tulak uhuntuh nokuh Lasarus." 11:16 Tomas ijo konohawot "Anak tahtup" nuhtui umba injah-injahoh murid-murid Yesus, "Olai ihto umba, nauhoh ihto mahtoi homboh Io!" 11:17 Kotihka Yesus johcok ang unuk orih, Lasarus jari ohpat ondou kotahiuoh ang tanom. 11:18 Betania rih doni Yerusalem, kira-kira tolu kilomehter kahcuioh. 11:19 Aro ulun Yahudi jari lombut masap Marta tutang Maria ahkan mahpung iro tului popahtoi konduangoh. 11:20 Kotihka Marta ngonih Yesus lombut, io soluka naharang Yesus, tahpi Maria mohcon ang lohpou. 11:21 Hion Marta umba Yesus, "Tuhan, jahkaioh Tuhan anai ang ohtoi ohkot orih, musti konduang'ku eam mahtoi. 11:22 Olu kodorih ahku ta'an, ijo huntuh ka'a Pohotala ahkan nonga inon iou ijo Tuhan nyawot umba Io." 11:23 "Konduang'mu ahkan bolum huli," hion Yesus umba Marta. 11:24 Marta mutah, "Ahku ta'an Lasarus ahkan bolum huli amat ulun mahtoi paringoh tonomonyun ang Ondou Kiamat." 11:25 "AHKU TUH IJO NONGA POMBOLUM TUTANG NGOMONYUN ULUN MAHTOI," hion Yesus umba Marta. "ULUN IJO POROCAYA UMBA AHKU AHKAN BOLUM, OLU KA IO JARI MAHTO 11:26 Tutang ulun bolum ijo porocaya umba Ahku, kototahiuoh eam ahkan mahtoi. Porocaya ihko umba hal rih?" 11:27 "Tuhan," hion Marta, "ahku porocaya Tuhan Anak Pohotala, Lahca Ponyolamat ijo ahkan lombut nokuh kolunon tuh." 11:28 Ulimba Marta nuhtui kodorih, io tulak na'ah Maria, konduangoh hawui sino-sinok umba io, "Amai Guru anai ang ohtoi; Io ngisok ihko." 11:29 Ngonih rih, Maria jio-jion hihkas, turus tulak nyopohpak Yesus. 11:30 Ohkot rih Yesus jaha nyolong nokuh desa. Io magun anai ang unuk Marta nyopohpak Io. 11:31 Ulun-ulun Yahudi ijo rahat mahpung Maria ang lohpou, nohto Maria kuat tutang jio-jion soluka; jadi iro tulak ngahasu io, tului iro ngohu io nokuh tanom, ahkan nangih. 11:32 Ohkot Maria johcok ang unuk Yesus tutang nohto Io, suhkun tu'ut io ang tohimo Yesus tutang nuhtui, "Tuhan, jahkaioh Tuhan anai ang ohtoi ohkot rih, pasti konduang'ku eam ahkan palus." 11:33 Kotihka Yesus nohto Maria nangih, tutang ulun-ulun Yahudi ijo lombut homboh Maria orih ka'a nangih, ahtoi-Oh sedih, tutang Io nanyamngasi samasino. 11:34 Mahka ngisok rih Io umba iro, "Ang umoh ihkam ngolowong io?" "Olai nohtooh, Tuhan," hion'ndo. 11:35 Turus Yesus nangih. 11:36 Mahka ulun-ulun Yahudi rih nuhtui, "Nohtorih eaminon kasih-Oh umba Lasarus!" 11:37 Tahpi anai ang louk iro ijo nuhtui, "Io nguan ulun bobulen tou molenang, ombai Io eam tou ngahana mangat Lasarus ara mahtoi?" 11:38 Yesus paham nanyamngasi hino, turus Io tulak nokuh tanom. Tanom rih tonapa tahkan lowong guha ijo konahtop umba bahtu hajo. 11:39 "Ngahtun bahtu orih," hion Yesus. Marta konduang ulun ijo mahtoi rih, mutah, "Tahpi Tuhan, io jari ohpat ondou tuh ang tanom. Punaoh jari buan maram!" 11:40 Yesus nuhtui umba Marta, "Eamrih jari Ahku nuhtui ahkan'kam: Amat ihko porocaya, ihko ahkan nohto kodorih kohajoi kowasan Pohotala!" 11:41 Mahka iro ngahtun bahtu orih. Pongohino Yesus nokara nokuh langit tutang nuhtui, "Torimakasih Amai, tului Ihko jari ngonih Ahku. 11:42 Ahku ta'an Ihko toturus ngonih Ahku, tahpi Ahku nuhtui tuh, bagi ulun-ulun ijo anai ang ohtoi; mangat'ndo porocaya ijo Ihko rih ijo nyuhu Ahku." 11:43 Ulimba Io nuhtui kodorih, Yesus na'ah muhing auh-Oh, "Lasarus soluka!" 11:44 Mahka soluka ulun ijo mahtoi rih. Longoi tutang pa'aioh magun tomohtong benang bukus otu, tutang baui totuhtup umba benang bukus bau. "Nguwat ohrih benang bukusotu, mangat io morodeka nyalan," hion Yesus umba ulun-ulun ang anan. 11:45 Aro tahkan ulun-ulun Yahudi ijo lombut masap Maria, porocaya umba Yesus, ohkot iro nohto angjadi rih. 11:46 Tahpi pira-pira ang louk iro, hihkas nokuh ulun Parisi tutang ngabarohrih inon ijo jari konuan Yesus. 11:47 Tului orih ulun-ulun Parisi tutang imam-imam kopala nguan rahpat umba Majelis Bosara Agama. Iro nuhtui, "Ihto harus nguan inon? Ulun tuh nguan aro tandahelan! 11:48 Amat ihto mohonou Io nguan turus koloutuh, paring ulun ahkan porocaya umba Io. Tutang laiuoh pongowasa Ruma ahkan lombut tutang ngahkas Lohpou Tuhan tutang ko-paring uhtus ihto!" 11:49 Ihcobehti tahkan iro ijo bogare Kayapas, imam hajo aang toun orih, nuhtui, "Ihkam eam ta'an ino-inon. 11:50 Inon ihkam eam borondong, ijo ahkan kogunan rayat, labih pios ihcobehti mahtoi tahkanumba paring uhtus lonyuh?" 11:51 Kotu'uioh Kayapas ngohawot orih, eam tahkan tirukoh bongoi. Tahpi kolou imam hajo toun orih, io nujum ijo Yesus ahkan mahtoi bagi uhtus Yahudi. 11:52 Tutang eam bagi uhtus Yahudi beweu, tahpi ka'a ahkan muhpungoh tutang mopohihco anak-anak Pohotala ijo bilang-bahas. 11:53 Nopara ondou orih pongowasa-pongowasa Yahudi bohaum ahkan munu Yesus. 11:54 Kotului orih Yesus eam hino mokarah ang baun ulunaro, ang marak ulun Yahudi. Io nohtah Yudea, turus tulak nokuh lowu ijo konohawot Epraim, doni padang bolambah. Ang anan Io mohcon sama-sama murid-murid-Oh. 11:55 Aang ohkot rih jari doni Ondou Pesta Paska ulun Yahudi. Aro ulun tahkan lowu koik jari tulak nokuh Yerusalem mangat molalus upacara moporasih aropoh houn umba pesta orih. 11:56 Iro ngurah Yesus, tutang ohkot hopuhpung ang Lohpou Tuhan, iro bopander sama arop'ndo, "Koloukuwoh tiruk'kam? Touhirah Io eam lombut nokuh pesta tuh." 11:57 Iro ngohawot kolouorih, bain imam-imam kopala tutang ulun-ulun Parisi ius polua poretah ijo ulun ijo ta'an ang umoh Yesus anai, harus nyorihtaoh, mangat Io dahpot tonawan.
12:1 Onom ondou hounumba Ondou Pesta Paska, Yesus tulak nokuh Betania. Ang unuk rih mohcon Lasarus ijo jari konombolum bain Yesus tahkan popahtoi. 12:2 Ang anan Yesus tonyorungan bain iro tutang Marta nohaluoh. Lasarus tutang pomasap-pomasap tuot kuman homboh umba Yesus. 12:3 Pongohino Maria lombut ngomin kira-kira sotengah lihter minyak buanharum narwastu ijo borega samasino. Io nohtaoh minyak buanharum rih nokuh pa'an Yesus, turus ngapitoh umba balouoh. Sohapus lohpou rih monjadi buanharum, kobain minyak buanharum rih. 12:4 Tahpi Yudas Iskariot, ihcobehti murid Yesus -- ijo pongo ngarana umba Yesus -- nuhtui, 12:5 "Ombai minyak buanharum rih eam ponodagangrih umba rega tolu lahtus duit perak, tutang duitoh rih tononga ahkan ulun porosbolum?" 12:6 Yudas nuhtui kodorih eam kotului io nohtoani ulun porosbolum, tahpi kotului io ponahkou. Io bojoin ngomin duit tahkan kas ulun aro ijo konipos ang io. 12:7 Tahpi Yesus nuhtui, "Nauhoh ulunbawi rih! Io nguan tuh ahkan ondou tonanom-Ku. 12:8 Ulun porosbolum hototurus anai ang parak ihkam, tahpi Ahku eam." 12:9 Aro ulun Yahudi ngonih ijo Yesus anai ang Betania, jadi iro tulak nokuh anan. Iro tulak eam tului Yesus, tahpi ka'a tului iro kani nohto Lasarus ijo jari konombolum tahkan popahtoi, kobaiu-Oh. 12:10 Orih kotului imam-imam kopala kani munu Lasarus ka'a; 12:11 tului io kotuluioh aro ulun Yahudi nohtah iro tutang porocaya umba Yesus. 12:12 Angngohkos ondouoh ulun aro ijo jari lombut mangat parami Pesta Paska ngonih, ijo Yesus rahat aang ponyalan nokuh Yerusalem. 12:13 Mahka ulun aro ngomin doun-doun koruma turus hihkas naharang Io hawui bososurak, "Tararih Pohotala! Tomorehkatrih Io ijo lombut ngosan aran Tuhan. Tomorehkatrih Lahca Israel!" 12:14 Yesus ngondahpot ihcokungan keledai biou, tutang nunggangoh. Mahka nyolung ijo tonyurat ang Surat Borasih: 12:15 "Ara mihkoh, putri Sion! Nohto Lahca'kam lombut, nunggang ihcokungan keledai biou!" 12:16 Ang ohkot rih murid-murid Yesus jaha solembang paringoh rih. Tahpi uli Yesus konohajo umba popahtoi-Oh, kolawun'ndo toroingat ijo ijo konuan ulun aro tohimo Io jari tonyurat luwang Surat Borasih tohou Io. 12:17 Ulun-ulun ijo anai ang anan ohkot Yesus na'ah Lasarus soluka tahkan tanom tutang ngombolum io tahkan popahtoi, turus nonga kosaksian tohou hal orih. 12:18 Orih kotuluioh ulun aro tulak nokuh Yesus, tului iro ngonih ijo Io rih jari nguan tandahelan rih. 12:19 Mahka ulun-ulun Parisi hopander ihco sama bohkon, "Ihto eam duon nguan ino-inon! Topahjah iou, paring kolunon tulak ngahasu Io!" 12:20 Ang louk ulun-ulun aro ijo tulak nokuh Yerusalem, nohuang sombayang ang ohkot pesta orih anai ka'a popira behti Yunani. 12:21 Iro lombut nokuh Pilipus tutang nuhtui, "Konduang, amat dahpot, ihkai jolik tu'u hosombang umba Yesus." (Pilipus rih tahkan Betsaida ang Galilea.) 12:22 Mahka Pilipus tulak nuhtui hal orih ahkan Andreas, tutang pongohuli iro duo monyorihtaohrih ahkan Yesus. 12:23 Yesus nuhtui umba doro, "Jari ohkotoh Anak Ulun konohajo. 12:24 Tu'u morong auh-Ku tuh: Amat ihcokoluang paroi eam tongombulan ang luwang tana tutang mahtoi, io ahkan tohtap mohcon ihcokoluang. Tahpi amat luang paroi rih mahtoi kolawun io ahkan momua tutang aro paroi. 12:25 Ulun ijo mongasih pombolumoh ahkan nihou pombolumoh. Tahpi ulun ijo mohonouoh pombolumoh luwang kolunon tuh, ahkan mohagaoh bagi pombolum sojahti tutang kototahiu. 12:26 Ulun ijo kani mohalu Ahku harus ngahasu Ahku; mangat pohalu-Ku duon hihco Ahku, ang umoh Ahku anai. Ulun ijo mohalu Ahku ahkan tonohoromat Amai-Ku." 12:27 "Ahtoi-Ku sikinanyamoh; inon ijo harus Ahku nuhtuioh uhuntuh? Koharusrih Ahku nuhtui orih, 'Amai, mokilarih Ahku tahkan uhuntuh?' Tahpi kopunaoh ahkan nyuru wayah kokarot tuh rih Ahku lombut. 12:28 O Amai pohajoohrih aran Aim!" Mahka konahan auh tahkan langit nuhtui, "Ahku jari mopohajo-Oh, tutang Ahku ahkan mopohajo-Oh hino." 12:29 Ulun aro ijo tohko ang anan ngonih auh orih. Iro nuhtui, "Orih auh duhung!" Tahpi anai ka'a ijo nuhtui, "Eam! Molehkat ijo hopander umba Io!" 12:30 Turus Yesus nuhtui umba iro, "Auh orih konahan eam ahkan koguna Ahkak, tahpi ahkan kogunan'kam. 12:31 Uhuntuh jari ohkotoh kolunon tomosara; uhuntuh pongowasa kolunon tuh tomolinangoh. 12:32 Tahpi Ahku tuh, amat Ahku jari tonongahtang ang ngosan tana, Ahku ahkan nguhut paring ulun Ahkak-Ku." 12:33 Io nuhtui kodorih ahkan ngorinah koloukuwoh caraoh Io ahkan mahtoi. 12:34 Ulun aro rih nuhtui umba Io, "Numbun Buhku Hukum ihkai, Lahca Ponyolamat ahkan bolum turus-jahamoh. Koloukuwoh Ihko tou nuhtui ijo Anak Ulun harus tongondiang ang ngosan tana? Iai Anak Ulun orih?" 12:35 Yesus mutah, "Baya ahkan pondehan iou koloang rih anai ang louk ihkam. Jadi, nyalanrih ihkam kotahin koloang rih magun anai, mangat ihkam ara tonopahas kopindong. Ulun ijo nyalan ang luwang kopindong, eam kota'an nokuhumoh io tulak. 12:36 Porocayarih umba koloang rih, kotahin koloang rih magun anai aang ihkam, mangat'kam monjadi anak-anak koloang." Ulijadi Yesus nuhtui kodorih, Io hihkas tahkan anan tutang eam kani pokarah arop-Oh ahkan'ndo. 12:37 Oluka jari aro tandahelan ijo konuan Yesus ang husuk iro, iro eam porocaya umba Io. 12:38 Mahka nyolung ka'a, inon ijo jari tonuhtui Nabi Yesaya, "Tuhan, iairih ijo porocaya umba kabar ekai? Ahkan iairih kowasa Tuhan tongorinah?" 12:39 Tului orih iro eam duon porocaya, tului Yesaya jari nuhtui ka'a, "Pohotala nuhtui, 12:40 'Ahku ngombulenoh mahtan iro, nguan iro mahang ahtoi; mangat mahtan iro ara nohto, tiruk iro ara solembang. Mangat iro ara hoduli nokuh Ahku, turus Ahku ngopios iro.' " 12:41 Yesaya nuhtui kodorih tului io jari nohto kohajon Yesus, tutang bopander tohou Io. 12:42 Oluka kodorih, aro ulun bohkon ang louk pongowasa Yahudi porocaya umba Yesus. Tahpi iro eam bahanyi ngahku orih torus-tarang, tului iro mihkoh ara-ara ulun Parisi baca iro nyolong lohpou sombayang. 12:43 Iro labih jolik ngondahpot tara tahkan kolunon, tahkanumba ponorega Pohotala. 12:44 Turus Yesus na'ah, "Ulun ijo porocaya umba Ahku, eam umba Ahku io porocaya, tahpi ahkan Io ijo nyuhu Ahku. 12:45 Tutang ulun ijo nohto Ahku, nohto Io ijo nyuhu Ahku. 12:46 Ahku lombut nokuh kolunon tuh kolou koloang, mangat paring ulun ijo porocaya umba Ahku, ara mohcon ang luwang kopindong. 12:47 Ulun ijo ngonih ajaran-Ku, tahpi eam numbui-Oh -- bohkon Ahku ijo mohukum io. Kotului Ahku lombut, eam ahkan mosara kolunon tuh, tahpi ahkan nyolamatoh. 12:48 Ulun ijo nulak Ahku tutang eam ngonih auh-Ku, jari anairih ijo mosaraoh. Auh ijo Ahku nyiaroh, orihrih ijo ahkan mosaraoh ang Ondou Kiamat. 12:49 Kotului Ahku eam bopander tahkan konohuang-Ku bongok; Amai ijo nyuhu Ahku, Io iou ijo moretah ahkak-Ku inon ijo harus Ahku nyiaroh tutang nuhtuioh. 12:50 Tutang Ahku ta'an ijo poretah-Oh rih nonga pombolum sojahti tutang kototahiu. Mahka Ahku mborihtaoh kolou ijo tongajar Amai ahkak-Ku."
13:1 Ihcoondou sounumba tahkan Ondou Pesta Paska, Yesus jari ta'an ijo jari ohkotoh Io ahkan nohtah kolunon tuh ahkan buli nokuh Amai-Oh. Io ngasih umba ulun-ulun ijo monjadi aiu-Oh ang kolunon tuh, tutang Io tohtap ngasih iro nyiring ko-opahoh. 13:2 Yesus tutang murid-muridoh rahat kuman ngolomi. Sehtan jari nyolong nonga tiruk ang luwang ahtoi Yudas anak Simon Iskariot ahkan ngarana Yesus. 13:3 Yesus ta'an ijo Amai jari nonga paring kowasa ahkai-Oh. Io ta'an ka'a ijo Io lombut tahkan Pohotala tutang ahkan buli nokuh Pohotala. 13:4 Kotului orih Io tombok nguhkoi kolambiombu-Oh, tutang mohtong handuk aang kahang-Oh. 13:5 Uliorih Io nusuh danum nokuh luwang gadur, turus nopara muhi pa'an murid-murid-Oh, tutang ngapitoh umba handuk ijo tomohtong aang kahang-Oh. 13:6 Johcokrih Io ang gilir Simon Petrus, ijo nuhtui, "Tuhan, kuwohrih Tuhan ijo muhi pa'ak'ku?" 13:7 Yesus mutah, "Uhuntuh ihko eam solembang, inon ijo Ahku nguaioh tuh, tahpi noin ihko ahkan solembang." 13:8 "Ara, Tuhan," hion Petrus umba Yesus, "ara sosino Tuhan muhi pa'ak'ku!" Tahpi Yesus mutah, "Amat Ahku eam muhi ihko, ihko eam aro kohihco umba Ahku." 13:9 Simon Petrus nuhtui, "Amat kodorih, Tuhan, ara baya pa'ak'ku tahpi longok tutang kuhung'ku ka'a!" 13:10 "Ulun ijo jari mondus, jari borasih sohopusoh," hion Yesus umba Petrus. "Io eam usah tonorasih hino, kocoali pa'aioh. Ihkam tuh jari borasih, tahpi eam paringoh." 13:11 (Yesus jari ta'an iai ijo ahkan ngarana Io. Kotului orih Ionuhtui, "Ihkam tuh jari borasih, tahpi eam paringoh.") 13:12 Uli Yesus muhi pa'an iro. Io mokehpan huli jubah-Oh tutang tuot hino. Turus Io nuhtui umba iro, "Solembangrih ihkam inon ijo punak iou Ahku nguai ahkan'kam? 13:13 Ihkam na'ah Ahku Guru tutang Tuhan. Tutang puna kolourih. 13:14 Amat Ahku kolou Tuhan tutang Gurun'kam muhi pa'an'kam, ihkam puna harus ka'a hotolinjam muhi pa'a. 13:15 Ahku nonga sutu tuh ahkan'kam, mangat ihkam ka'a nguan inon ijo jari Ahku nguai ahkan'kam. 13:16 Tu'u-tu'u morong hiok-Ku tuh: Ihcobehti jihpon eam labih hajo umba tepuioh, tutang ihcobehti sonuhu eam labih hajo umba ijo nyuhuoh. 13:17 Amat ihkam jari ta'an paringoh tuh, sananglah amat ihkam nguaioh. 13:18 Inon ijo Ahku nuhtuioh tuh, eam rih tohou ihkam paring. Ahku ta'an ia-iai ijo jari Ahku mitihoh. Tahpi inon ijo tonyurat luwang Surat Borasih harus nyolung, iorih 'Ulun ijo kuman homboh Ahku, ahkan ngolawan Ahku.' 13:19 Hal orih Ahku mborihtaoh ahkan'kam uhuntuh, hounumba nyolung, mangat amat hal orih nyolung noin, ihkam ahkan porocaya ijo Ahku tuh Io, ijo konohawot AHKU ANA 13:20 Tu'u morong auh'Ku tuh: Iai norima ulun ijo Ahku nyuhuoh, ulun orih norima Ahku ka'a. Tutang iai ijo norima Ahku, norima Io ijo nyuhu Ahku." 13:21 Uliumba Yesus nuhtui kodorih, Io sihkinanyam sasino. Turus Io nuhtui, "Tu'u morong hiok-Ku tuh: Anai ihcobehti tahkan louk ihkam ahkan ngarana Ahku." 13:22 Murid-murid-Oh hotopahjah sama arop iro hawui paham helan kotului eam ta'an iai ijo konohuang. 13:23 Murid ijo tongasih Yesus, tuot ang silan Yesus. 13:24 Simon Petrus nonga tanda ahkaioh, mangat io ngisok umba Yesus iai ijo titun konohuangoh. 13:25 Mahka murid-Oh rih morateparopoh aang Yesus, tutang ngisok, "Iai io Tuhan?" 13:26 Yesus mutah, "Ulun ijo Ahku nonga luhte ijo Ahku ninjokoh nokuh luwang pikan, iorih uluioh." Mahka Yesus ngomin ihcokobitap luhte, ninjokoh nokuh luwang pikan; turus nongaoh ahkan Yudas anak Simon Iskariot. 13:27 Tona'a uliumba Yudas norima luhte rih, sehtan nyolong nokuh luwang ahtoioh. Turus Yesus nuhtui umba io, "Nguaiohrih jeleng iou inon ijo kani ihko nguaioh." 13:28 Eam ihcobehti ka tahkan iro ijo tuot kuman ang anan solembang auh orih, ombai Yesus nuhtui kodorih umba Yudas. 13:29 Anai ijo ngohu Yesus nyuhu Yudas moli angihco ijo tomorulu ahkan pesta rih, ata'ai nonga honjiot isut duit ahkan ulun-ulun porosbolum -- tului Yudas nambit duit kas iro. 13:30 Uliumba Yudas kuman luhte rih, io cahpat soluka. Ondou jari pindong. 13:31 Uliumba Yudas hihkas, Yesus nuhtui, "Huntuh Anak Ulun konohajooh, tutang Pohotala konohajo nguha Io. 13:32 Amat Pohotala konohajo nguha Io, Io ka'a ahkan konohajo bain Pohotala nguha arop-Oh bongoi. Malah Pohotala ahkan mopohajo Io honong jeleng. 13:33 Anak-anak-Ku, Ahku eam ahkan mohcon tahi hino umba ihkam. Ihkam ahkan ngurah Ahku, tahpi kolou ijo jari Ahku nuhtuioh ahkan dolang okon Yahudi, kodorih ka'a Ahku nuhtui ahkan ihkam; nokuh unuk Ahku tulak, ihkam eam dahpot lombut. 13:34 Poretah bohua Ahku nongaoh ahkan'kam: Hokasih ihco umba 'jobohkon sama kolou Ahku ngasih ihkam, kodorih ka'a ihkam harus saling hokasih. 13:35 Amat ihkam saling mongasih, paring ulun ahkan ta'an ijo ihkam murid-murid-Ku." 13:36 "Tuhan, Tuhan kani hihkas nokuh umoh?" hion Simon Petrus ngisok umba Yesus. Mutah Yesus, "Nokuh amoh Ahku hihkas, ihko eam duon umba huntuh. Ihko ahkan ngahasu Ahku pongohino." 13:37 "Tuhan, ombai ahku eam duon ngahasu Tuhan huntuh?" kisok Petrus hino, "Ahku rela mahtoi bagi Tuhan!" 13:38 Yesus mutah, "Tu'u-tu'urih ihko rela mahtoi bagi-Ku? Ngota'an iou, sountahkan dalungmanuk nandu noin, ihko jari tolu tihkat nuhtui ijo ihko eam ngosono Ahku!"
14:1 "Ara ahtoi'kam bimbang," hion Yesus umba iro. "Porocayarih umba Pohotala, tutang porocayarih umba Ahku ka'a. 14:2 Ang lohpou Amai-Ku anai aro unuk mohcon. Ahku tulak nokuh anan ahkan monyodia unuk bagi'kam. Ahku eam ahkan nuhtui kodorih ahkan'kam, jahkaioh orih eam kolourih. 14:3 Uliumba Ahku tulak nahtap unuk ahkan'kam, Ahku hoduli hino tutang ngomin ihkam, mangat ang umoh Ahku anai, ang anan ka'a ihkam anai. 14:4 Nokuh unuk Ahku tulak ihkam ta'an jalanoh." 14:5 Turus Tomas nuhtui umba Yesus, "Tuhan, ihkai eam ta'an nokuh umoh Tuhan tulak, koloukuwoh ihkai ta'an jalanoh?" 14:6 Yesus mutah, "AHKU TUH JALAN AHKAN NGOSONO POHOTALA TUTANG NGONDAHPOT POMBOLUM. EAM ARO IHCOBEHTI KA DAHPOT LOMBUT NOKUH AMAI AMAT EAM NOKALOU AHKU. 14:7 Jahkaioh ihkam ngosono Ahku, musti ihkam ahkan ngosono Amai-Ku ka'a. Huntuh ihkam ahkan ngosono Io, tutang jari nohto Io." 14:8 Mahka Pilipus nuhtui umba Yesus, "Tuhan, pokarahohrih Amai ahkan 'kai, mangat ihkai umbothuang." 14:9 Tahpi Yesus mutah, "Jari kolourih kotahiu Ahku hihco umba ihkam, tutang jaha ka'a ihkam ngosono Ahku, Pilipus? Ulun ijo jari nohto Ahku, jari ka'a nohto Amai. Koloukuwoh ihko dahpot nuhtui, 'Pokarahohrih Amai ahkan 'kai'? 14:10 Pilipus! Eamkah ihko porocaya, ijo Ahku hihco umba Amai tutang Amai hihco umba Ahku? Inon ijo Ahku nuhtuioh ahkan'mu, eam Ahku nuhtui tahkan arop-Ku bongok. Amai ijo tohtap hihco honong Ahku, Iorih ijo nguanoh paringoh orih. 14:11 Porocayarih honong Ahku ijo Ahku hihco honong Amai, tutang Amai hihco umba Ahku. Ata'ai soea-eamoh, porocayarih tului inon ijo jari Ahku nguaioh. 14:12 Tu'u morong hiok-Ku tuh: Ulun ijo porocaya umba Ahku, ahkan nguanoh inon ijo Ahku jari nguaioh, -- malah io ahkan nguan ijo labih hajo hino -- tului Ahku tulak nokuh Amai-Ku. 14:13 Tutang inon ijo ihkam monyawotoh a'ang arak-Ku, orih ahkan Ahku nonga ahkan'kam, mangat Amai konohajo nguha Anak. 14:14 Inon iou ijo ihkam monyawot ngosan arak-Ku ahkan Ahku nguai." 14:15 "Amat ihkam ngasihoh Ahku, ihkam ahkan molalusoh poretah-poretah-Ku. 14:16 Ahku ahkan nyawot ahkan Amai, tutang Io ahkan nonga ahkan'kam Pondohop bohkon, ijo ahkan mohcon dahang ihkam nyiring turus-jahamoh. 14:17 Io rih Roh Pohotala ijo ahkan ngorinah komorong tohou Pohotala. Kolunon eam dahpot norima Io, kotului eam nohto ata'ai eam ngosono-Oh. Tahpi ihkam ngosono Io, kotului Io mohcon umba ihkam, tutang ahkan ihco honong ihkam. 14:18 Ihkam eam Ahku ahkan nohtahoh bongon, kolou anak nulo. Ahku ahkan hoduli nokuh'kam. 14:19 Mohcon honjulu iou kolunon eam ahkan nohto Ahku hino. Tahpi ihkam ahkan nohto Ahku. Tutang tului Ahku bolum, ihkam ka ahkan bolum. 14:20 Amat lombut ondou orih, ihkam ahkan kota'an ijo Ahku hihco honong Amai, ihkam hihco honong Ahku, tutang Ahku hihco honong ihkam. 14:21 Ulun ijo norima poretah-poretah-Ku, tutang nguaioh iorih ijo ngasihoh Ahku. Amai-Ku ahkan ngasih ulun ijo ngasihoh Ahku. Ahku ka ahkan ngasihoh ulun orih tutang ngorinahoh arop-Ku ahkaioh." 14:22 Hion Yudas (bohkon Yudas Iskariot) ngisok umba Yesus, "Tuhan, ombai Tuhan kani ngorinahoh arop-Mu ahkan ihkai tutang eam ahkan kolunon?" 14:23 Yesus mutah, "Ulun ijo ngasih Ahku, ahkan numbunoh ajaran-Ku. Amai-Ku ahkan ngasihoh io. Amai tutang Ahku ahkan lombut nokuh io, tutang mohcon hihco io. 14:24 Ulun ijo eam ngasih Ahku, tutang eam numbun ajaran-Ku. Ajaran ijo konahan'kam orih, bohkon tahkan Ahku, molekan tahkan Amai ijo nyuhu Ahku. 14:25 Paring orih Ahku nuhtui ahkan'kam, kotahin Ahku magun hihco ihkam. 14:26 Tahpi Roh Pohotala, Pondohop ijo ahkan sonuhu Amai ngasan arak-Ku, Iorih ijo ahkan majar ihkam, koparingoh tutang mopingatoh ihkam ahkan paring ijo jari Ahku monyorihtaoh ahkan'kam. 14:27 Kosanangkomangat Ahku nohtahoh ahkan ihkam. Kosanangkomangat aik-Ku bongok ijo Ahku nongaoh ahkan ihkam. Ijo Ahku nonga rih eam kolou ijo tongan kolunon ahkan'kam. Ara galisah ara mihkoh. 14:28 Ihkam jari ngonih Ahku nuhtui, 'Ahku ahkan tulak, tahpi Ahku ahkan lombut hoduli ahkan ihkam.' Amat ihkam ngasih Ahku, ihkam sanang Ahku tulak nokuh Amai, tului Amai labih hajo tahkan Ahku. 14:29 Ahku mborihta rih ahkan'kam huntuh, sounumba paringoh nyolung, mangat amat nyolung noin, ihkam ahkan porocaya. 14:30 Ahku eam ahkan bopander labih aro hino umba ihkam, tului jari ohkotoh okon kolunon tuh lombut. Tahpi io eam bokowasa ngosan arop-Ku. 14:31 Tahpi oluka paring rih harus nyolung, mangat kolunon borondong ijo Ahku sita Amai tutang nguanoh kokaron ijo ponoretah Amai ahkak-Ku. Nah, olai ihto tulak tahkan ohtoi."
15:1 Hion Yesus hino, "AHKU TUH PU'UN ANGGUR IJO MORONGTU'U, TUTANG AMAI-KU ANAI TUHKANG KOBUNOH. 15:2 Nyinong da'an aang Ahku ijo eam pomua, tonuhtuh-Oh, tutang nyinong da'an ijo pomua diai honjiot dauioh mangat labih aro hino buaoh. 15:3 Ihkam jari borasih tului ajaran ijo Ahku nongaoh ahkan'kam. 15:4 Tohtaprih hihco umba Ahku tutang Ahku ka'a ahkan tohtap hihco a'ang ihkam. Da'an bongoi eam tou momua, kocoali amat io tohtap aang batangoh. Kodorih ka'a ihkam tihkas tou momua, amat tohtap hihco a'ang Ahku. 15:5 AHKU TUH PU'UN ANGGUR, TUTANG IHKAM RIH DA'AI-DA'AIOH. Ulun ijo tohtap hihco honong Ahku, tutang Ahku honong io, ahkan momua aro; tului earo Ahku, ihkam eam tou monguanoh ino-inon. 15:6 Ulun ijo eam tohtap hihco honong Ahku ahkan ndian kolou da'an, turus jadi koring. Da'an-da'an ijo kolouorih ahkan tonipun tutang tonyakah nokuh baho turus bopahpong. 15:7 Amatmira ihkam tohtap hihco honong Ahku, tutang ajaran-Ku mohcon aang ahtoi'kam, nyawotrih umba Amai, inon iou ijo ihkam kani; sawot'kam rih ahkan tononga. 15:8 Amat ihkam mua aro, Amai-Ku konohajo; tutang honong kodorih ihkam tu'u-tu'u monjadi murid-Ku. 15:9 Kolou Amai ngasihoh Ahku, kodorih ka Ahku ngasihoh ihkam. Hondakrih ihkam tohtap bolum kolou ulun ijo Ahku ngasihoh. 15:10 Amat ihkam molalus poretah-poretah-Ku, ihkam tohtap te'et ahkan kasih-Ku, sama kolou Ahku tohtap te'et umba kasih Amai tului molalus poretah-poretah-Oh. 15:11 Paringoh tuh Ahku mborihtaoh ahkan ihkam, mangat kojorih-Ku anai luwang ahtoi'kam, tutang kojorih'kam monjadi soporuna. 15:12 Tuhrih poretah-Ku: Ngasih ohrih ihco sama 'jobohkon, sama kolou Ahku jari ngasih ihkam. 15:13 Ulun ijo paling mongasihoh sobat-sobatoh, anairih ulun ijo nonga pombolumoh bagi iro. 15:14 Ihkam tuh uras sobat-sobat-Ku, tului ihkam nguanoh inon ijo Ahku moretahoh ahkan'kam. 15:15 Ihkam eam hino Ahku na'ah jihpon, tului jihpon eam ta'an inon ijo rahat tonguan tepuioh. Ihkam Ahku na'ahoh sobat kotului paring ijo Ahku ngonih tahkan Amai, jari Ahku nyorihtaoh ahkan'mu. 15:16 Eam ihkam ijo mihtih Ahku. Ahku tuh ijo ngopili ihkam, tutang nyuhu ihkam tulak mangat ihkam momua aro -- bua-bua ijo eam dahpot rusak. Mahka Amai ahkan nonga ahkan'kam inon ka'a ijo ihkam nyawot umba-Oh, ngosan arak-Ku. 15:17 Tuhrih poretah-Ku ahkan'kam: Hokasihrih sama arop'kam." 15:18 "Amatmira kolunon ngohiri ihkam, pios ingat ijo Ahku jari labih houn tongohiri bain kolunon. 15:19 Jahkaioh ihkam puna ain kolunon, ihkam ahkan tonokasih bain kolunon rih kolou puna aiuoh. Tahpi Ahku jari ngopili ihkam tahkan kolunon tuh, jadi ihkam eam hino punaain kolunon. Orihrih kotuluioh kolunon ngohiri ihkam. 15:20 Ingatlah inon ijo jari Ahku nuhtui ahkan'kam, 'Jihpon eam labih hajo tahkan tepuioh.' Amat iro jari ngarana Ahku, iro ahkan ngarana ihkam ka'a. Amat iro numbun auhajar-Ku iro ahkan numbun ajaran ihkam ka'a. 15:21 Paringoh rih ahkan iro nguaioh toharep ihkam, tului ihkam murid-Ku, bain iro eam ngosono Io ijo nyuhu Ahku. 15:22 Jahkaioh Ahku eam lombut tutang eam nuhtui paringoh rih ahkan iro, iro eam bodusa. Tahpi huntuh iro eam aro pahkingoh hino bagi dusan iro. 15:23 Ulun ijo ngohiri Ahku, ngohiri Amai-Ku. 15:24 Jahkaioh ang tohun-tohun iro, Ahku eam nguanoh hal-hal ijo jaha pu'u tonguan ulun bohkon, iro eam bodusa. Tahpi huntuh iro jari nohto inon ijo Ahku nguaioh, tutang iro ngohiri Ahku kanika Amai-Ku. 15:25 Punajari koharusoh kodorih, mangat nyolung inon ijo tonyurat a'ang Buhku Torat iro, yorih: 'Iro ngohiri Ahku earo pahkingoh.' 15:26 Ahku ahkan nyuhu nokuh'kam Pondohop ijo asar tahkan Amai. Iorih Roh ijo ahkan ngorinah komorong tohou Pohotala. Amat Io lombut, Io ahkan nonga kosaksian tohou Ahku. 15:27 Tutang ihkam ka'a harus nonga kosaksian tohou Ahku, tului ihkam jari hihco Ahku tahkan pahtukoh.
16:1 Paringoh rih Ahku nuhtui ahkan'kam, mangat ihkam ara murtad. 16:2 Ihkam ahkan tonyoluka tahkan lohpou-lohpou sombayang. Tutang ahkan lombut ohkotoh ijo ulun ijo munu ihkam, ahkan ngohu io mongabdi ahkan Pohotala. 16:3 Iro nguan orih ahkan ihkam, tului iro jaha ngosono Amai kanika Ahku. 16:4 Tahpi huntuh Ahku nuhtui rih ahkan'kam, mangat amat orih nyolung noin, ihkam mongingat ijo Ahku jari mborihtaohrih ahkan ihkam." "Hal tuh eam Ahku mborihtaoh ahkan'kam tahkan pahtukoh, kotului Ahku magun hihcoumba ihkam. 16:5 Tahpi huntuh, Ahku ahkan tulak nokuh Io, ijo jari nyuhu Ahku; tutang eam aro ihcobehti ka, tahkan ihkam ngisok nokuh umoh Ahku tulak. 16:6 Huntuh malah ahtoi'kam monjadi sedih, tului Ahku nuhtui hal orih ahkan'kam. 16:7 Tahpi Ahku nuhtui ijo morong ahkan'kam: Labih pios bagi ihkam, amat Ahku hihkas; tului amat Ahku eam hihkas, Pondohop orih eam ahkan lombut bagi ihkam. Tahpi amat Ahku hihkas, Ahku nyuhu Io ahkan ihkam. 16:8 Amat Io lombut, Io ahkan ngorinah ahkan kolunon riman ijo komorongoh tahkan dusa, tahkan inon ijo morong, tutang tahkan torat Pohotala. 16:9 Io ahkan ngorinah ijo eam porocaya ahkak-Ku orih dusa; 16:10 ijo Ahku morong, kotului orih Ahku hihkas nokuh Amai, tutang ihkam eam ahkan nohto Ahku hino; 16:11 tutang ijo Pohotala jari nopara mohukum, kotului okon kolunon tuh jari tonohukum. 16:12 Aro hino ijo kani Ahku nuhtuioh ahkan'kam, tahpi uhuntuh ihkam jaha sanggup norimaoh. 16:13 Tahpi amat Roh orih lombut, yorih Io ijo ngorinah komorong tohou Pohotala, ihkam ahkan toniting-Oh ahkan ngosono paring komorong. Io eam ahkan bopander tahkan arop-Oh bongoi, tahpi nuhtui inon ijo jari konahan-Oh, tutang Io ahkan mborihtaoh ahkan'kam, inon ijo ahkan nyolung ang ondou pongo. 16:14 Io ahkan mopohajo Ahku, tului inon ijo tonyiar-Oh ahkan'kam, tonorima-Oh tahkan Ahku. 16:15 Paring ijo anai ang Amai anairih aik-Ku. Orih kotuluioh Ahku nuhtui ahkan'kam ijo inon ijo tonyiaroh Roh ahkan'kam, tonorima-Oh tahkan Ahku." 16:16 "Puta sinowayah iou, ihkam eam ahkan nohto Ahku hino, tutang ka'a puta sinowayah hino ihkam ahkan nohto Ahku." 16:17 Pira-pira murid Yesus nopara hokisok hawui arop'ndo, "Inon konohuangoh Io nuhtui umba ihto: 'Puta sinowayah iou, ihkam eam ahkan nohto Ahku, tutang puta sinowayah iou ihkam ahkan nohto Ahku'? Inon hino konohuang-Oh umba: 'Ahku tulak nokuh Amai'?" 16:18 Iro hokisok toturus, "Inon rimai orih, 'Puta sinowayah iou'? Ihto eam horahti Io nuhtui tohou inon!" 16:19 Yesus ta'an iro kani ngisok umba Io. Jadi Io nuhtui, "Nanai Ahku nuhtui, 'Puta sinowayah iou, ihkam eam ahkan nohto Ahku, tutang ka'a, puta sino ohkot iu ihkam ahkan nohto Ahku.' Orih rih ihkam hopander ang louk ihkam? 16:20 Porocayalah, ihkam ahkan nangih tutang nahtum, tahpi kolunon ahkan jorih. Ihkam ahkan susah ahtoi, tahpi kosusahan ahtoi'kam rih ahkan hubah monjadi kojorih. 16:21 Amat ihcobehti ulunbawi ijo jonyo kanak, io susah ahtoi, kotului johcok ohkotoh io ngarot. Tahpi kodorih anakoh konanak, ulunbawi rih tolingouoh karotoh, tului kojorihoh bain ihcobehti longa konanakoh nokuh luwang kolunon. 16:22 Kodorih ka'a umba ihkam: Huntuh ihkam susah ahtoi, tahpi Ahku ahkan hosombang hino umba ihkam, mahka ahtoi'kam ahkan paham kojorihoh; tutang eam ihcobehti ka duon ngomin kojorih rih tahkan ahtoi'kam. 16:23 Aang ondou orih, ihkam eam ahkan ngisok ino-inon hino umba Ahku. Porocayalah: Inon iou ijo ihko nyawot umba Amai ngosan arak-Ku, orih ahkan tononga Amai ahkan'mu. 16:24 Nyiring ohkot tuh ihkam jaha nyawot ino-inon ngosan arak-Ku. Nyawot iou, mahka ihkam ahkan monorima, tului kojorih'kam jari soporuna." 16:25 "Paringoh tuh Ahku nuhtui ahkan'kam umba tindung. Tahpi ahkan johcok ohkotoh, Ahku eam hapan tindung hino, tahpi nuhtui torus-torang ahkan'kam tohou Amai. 16:26 Aang ohkot orih, ihkam ahkan nyawot umba Amai ngosan arak-Ku; ngota'anrih, Ahku eam nyawot tahkan Amai ahkan ihkam, 16:27 kotului Amai bongoi ngasih ihkam. Amai ngasih ihkam tului ihkam ngasih Ahku, tutang porocaya ijo Ahku lombut tahkan Pohotala. 16:28 Puna Ahku asaroh tahkan Amai, tutang jari lombut nokuh luwang kolunon. Tahpi huntuh Ahku nohtahoh kolunon ahkan buli nokuh Amai." 16:29 Turus murid-murid Yesus nuhtui umbaoh, "Huntuh Tuhan nuhtui torus-torang tutang eam umba tindung, 16:30 tutang ihkai ta'an ijo Tuhan ta'an paringoh. Eam usah ihcobehti ka ngisok ino-inon umba Tuhan. Kotului orih ihkai porocaya Tuhan lombut tahkan Pohotala." 16:31 Yesus mutah auh'ndo, "Jadi porocayalah ihkam huntuh? 16:32 Ingat! Ohkotoh ahkan lombut, puna jadi lombut, ihkam ahkan tonopisoh-pinjaoh. Ihkam ahkan buli nokuh lohpou nyinongbehti tutang nohtah Ahku bongok-Ku. Tahpi Ahku eam bongok-Ku tului Amai anai hihco Ahku. 16:33 Paringoh rih Ahku nuhtui, mangat ihkam ngondahpot kosanangkomangat tului hihco umba Ahku. Ang kolunon ihkam ahkan mongarot. Tahpi tabahohrih ahtoi'kam! Ahku jadi mongalah kolunon!"
17:1 Uli hopander kolouorih, Yesus nokara nokuh langit tutang nuhtui, "Amai, huntuh jari johcok ohkotoh. Pohajoohrih Anak-Mu, mangat Anak-Mu ka mopohajo Amai. 17:2 Amai jari nonga kowasa ngosan sohopus ukup kolunon ahkan Anak, mangat Io nonga pombolum sojahti tutang kototahiu, ahkan paring ulun ijo Amai nongarih ahkai-Oh. 17:3 Tuhrih pombolum ijo sojahti tutang turus-jaham; mangat ulun ngosono Amai, puna ihco-ihcooh Pohotala ijo morong, tutang ngosono Yesus Kristus ijo sonuhu bain Amai. 17:4 Ahku jari mopohajorih Amai ang ngosan tana tuh, hapan ngumbotoh konuak-Ku ijo Amai nyuhu ahkak-Ku. 17:5 Amai! Pohajoohrih Ahku uhuntuh aang Amai, honong kohajo ijo Ahku tepui hihco Amai sounumba kolunon tuh tona'oi. 17:6 Ahku jari pokosonorih Amai ahkan ulun-ulun tahkan kolunon tuh, ijo jari Amai nongaoh ahkak-Ku. Iro anairih ain Amai, tutang Amai jari nongaoh iro ahkak-Ku. Iro jari numbunoh auh Amai. 17:7 Uhuntuh iro ta'an ijo paring ijo Amai nongaoh ahkak-Ku, asaroh tahkan Amai. 17:8 Jari Ahku nuhtuioh ahkan iro auh ijo Amai nongaoh ahkak-Ku; tutang iro jari norimaoh. Iro ta'an ijo Ahku moro-morong tahkan Amai tutang iro porocaya ijo Amairih ijo jari nyuhu Ahku. 17:9 Ahku bodo'a bagi iro. Ahku eam bodo'a bagi kolunon, molekan bagi ulun-ulun ijo jari Amai nongaoh ahkak-Ku, tului iro anairih ain Amai. 17:10 Paring aik-Ku anairih ain Amai ka'a; tutang paring ain Amai orih anairih aik-Ku ka'a. Ahku tonohajo ang louk iro. 17:11 Uhuntuh Ahku kani lombut nokuh Amai. Ahku eam mohcon hino ang kolunon; tahpi iro anai ang kolunon. Amai ijo borasih! Jaga rih iro umba kowasan aran Amai, io orih aran ijo jari Amai nongaoh ahkak-Ku -- mangat iro monjadi ihco, sama kolou Amai tutang Ahku ka'a ihco. 17:12 Ang ohkot Ahku magun hihco umba iro, Ahku jari mohaga iro umba kowasa aran Amai -- aran ijo Amai nongaoh ahkak-Ku. Ahku jari mohaga iro tutang eam ihcobehti ka tahkan iro nihou, kocoali io ijo puna jari kopahtutoh nihou; mangat honong orih nyolungrih inon ijo tonyurat a'ang Surat Borasih. 17:13 Uhuntuh Ahku lombut nokuh Amai. Paringoh tuh Ahku nuhtuioh pondehan Ahku magun ang kolunon; mangat iro umba kotuwioh nginyamoh kojorihaik-Ku. 17:14 Ahku jari nyiaroh ahkan iro auh Amai, tutang kolunon bosingi umba iro, tului iro eam ain kolunon, sama kolou Ahku ka'a eam ain kolunon. 17:15 Ahku eam nyawot, mangat Amai ngomin iro tahkan kolunon tuh, tahpi Ahku nyawot mangat Amai mohaga iro tahkan ijo Ja'at. 17:16 Sama haloh, kolou Ahku eam ain kolunon, iro ka eam ain kolunon. 17:17 Jadiohrih iro ain 'cokobilah Amai, nguha komorong; auh Amai orih puna komorong. 17:18 Kolou Amai jari nyuhu Ahku nokuh kolunon, kodorih ka'a Ahku nyuhu iro nokuh kolunon. 17:19 Bagi gunan iro, Ahku nyorahoh arop kolou ain 'cokobilah Amai, mangat iro ka monjadi 'cokobilah ain Amai nguha kotu'u. 17:20 Eam baya ahkan iro tuh iou Ahku bodo'a. Ahku ka'a bodo'a ahkan ulun-ulun ijo ahkan porocaya umba Ahku, bain kosaksian iro tuh. 17:21 Ahku nyawot, Amai, mangat iro paringoh monjadi ihco, kolou Amai hihco umba Ahku, tutang Ahku hihco umba Amai. Keleh iro monjadi ihco umba Ihto, mangat kolunon porocaya ijo Amai ijo nyuhu Ahku. 17:22 Ahku jari nongarih iro kohajo ijo Amai nongaoh ahkak-Ku, mangat iro monjadi ihco, sama kolou Ihto ka'a ihco; 17:23 Ahku umba iro, tutang Amai umba Ahku; mangat iro moro-morong ihco. Mahka kolunon akan ta'an, ijo Amai iou ijo nyuhu Ahku, tutang ijo Amai ka'a ngasih iro, kolou Amai ka'a ngasih Ahku. 17:24 Amai, Ahku jolik mangat iro, ijo Amai nongaoh ahkak-Ku, anai hihco Ahku ang unuk Ahku anai, mangat iro nohto kohajon aik-Ku; iorih kohajon ijo Amai nongaoh ahkak-Ku, kotului Amai ngasih Ahku sounumba kolunon tuh tona'oi. 17:25 Amai ijo adil! Kolunon eam kosono Amai, tahpi Ahku ngosono Amai; tutang ulun-ulun tuh ta'an ijo Amai nyuhu Ahku. 17:26 Ahku jari ngorinah aran Amai ahkan iro; tutang Ahku ahkan toturus nguai kodorih, mangat kasih Amai ahkak-Ku tohtap ang luwang ahtoi iro tutang Ahku hihco umba iro."
18:1 Ulijadi Yesus bodo'a kodorih, Io tutang murid-murid-Oh tulak nokuh pohoi Sungoi Kidron. Ang anan anai ihco kombulan, tutang Yesus honong murid-murid-Oh nyolong nokuh kombulan orih. 18:2 Yudas pongorana rih, ta'an unuk orih; tului Yesus bojoin hopuhpung ang anan umba murid-murid-Oh. 18:3 Mahka Yudas tulak nokuh unuk rih, hawui ngomin ihcokawan sorodadu Romawi, tutang pira-pira ponokawan Lohpou Tuhan ijo sonuhu bain imam-imam kopala tutang ulun-ulun Parisi. Iro bosonjata, sumbu kurung tutang soho'an. 18:4 Yesus ta'an paring ijo ahkan nyolung aang arop-Oh. Jadi Io soluka ngondonioh ulun-ulun orih tutang ngisok, "Ihkam ngurah iai?" 18:5 "Yesus ulun Nasaret," hion iro. "Ahku tuh Io," hion Yesus. Yudas ijo pongorana tombok ang anan umba iro. 18:6 Kotihka Yesus nuhtui umba iro, "Ahku tuh Io," iro paringoh surutlihkut turus bolukang nokuh tana. 18:7 Sino hino Yesus ngisok umba iro, "Ihkam ngurah iai?" "Yesus ulun Nasaret," hion iro. 18:8 "Jari Ahku nuhtui, Ahku tuh Io," hion Yesus. "Tutang amat puna Ahku ijo ihkam ngurahoh, nauhoh iro ijo bohkon tuh tulak." 18:9 (Honong nuhtui kolou orih nyolung inon ijo jari tonuhtui Yesussounumbaoh: "Amai, tahkan ulun-ulun ijo Amai nongaoh ahkak-Ku, eam ihcobehti ka ijo nihou.") 18:10 Simon Petrus ijo naking padang, nyohpitoh, turus molong jihpon imam hajo, nyiring bosaping tolingai koto'uioh. Aran jihpon orih Malkus. 18:11 Mahka Yesus nuhtui umba Simon Petrus, "Ngupang huli padang'mu nokuh luwang kupangoh! Kuwah ihko niruk, Ahku eam ahkan ngorih sakir kongarot ijo tononga Amai ahkak-Ku?" 18:12 Turus sorodadu-sorodadu Romawi honong porowira tutang ponokawan-ponokawan ulun Yahudi, nawan turus manga Yesus. 18:13 Aang pahtukoh iro ngitot Yesus noharep Hanas, tului iorih opu Kayapas, Kayapas anairih imam hajo aang toun orih. 18:14 Tutang io ijo jari mopingat dolang okon Yahudi ijo labih pios ihcobehti mahtoi tahkan hapus uhtus. 18:15 Simon Petrus tutang ihcobehti murid bohkon nutut Yesus. Murid ijo bohkon tuh kosonan bain imam hajo; jadi io umba nyolong turus nutut Yesus, nokuh laoh lohpou imam hajo, 18:16 Rahatrih Petrus ngindoi ang konaha ang bauntukang. Pongohuli murid ijo bohkon rih soluka, tutang nuhtui umba pohalu bawi ijo ngindoi ang bauntukang, turus ngomin Petrus nyolong nokuh luwang. 18:17 Pohalu bawi ijo ngindoi ang bauntukang, nuhtui umba Petrus, "Oi, eamkah ihko ka'a anai ihcobehti murid ulun orih?" "Bohkon," hion Petrus. 18:18 Aang ohkot rih bahiu sorongin, jadi pohalu-pohalu tutang ponokawan imam jari nohun baho umba buring, tutang iro ngindu behtin'ndo ang anan. Petrus tulak nokuh anan tutang tombok ngindu hihco iro. 18:19 Imam hajo ngisok Yesus tohou murid-murid-Oh tutang tohou ajaran-ajaran-Oh. 18:20 Yesus mutah, "Ahku hototurus nuhtui tutang tarang-tarangan ang toharep ulun aro. Ahku hototurus majar ang lohpou-lohpou sombayang tutang ang Lohpou Pohotala, unuk ulun Yahudi bahutoh hopuhpung. Eam pu'u Ahku nuhtui dolang inon aang tonih benyem. 18:21 Jadi ombai Tuan ngisok Ahku? Ngisokrih iro ijo jari ngonihoh Ahku majaroh. Musti iro ta'an inon ijo jari Ahku nuhtuioh." 18:22 Kotihka Yesus nuhtui kodorih, anai ihcobehti ponokawan ang anan napar-Oh tutang nuhtui, "Bahanyi samasino Ihko mutah kodorih umba imam hajo!" 18:23 Yesus mutah, "Amat Ahku nuhtui ang'co ijo sala, nuhtuiohrih ang ohtoi inon kosalaioh! Tahpi amat ijo Ahku nuhtui rih puna morong, ombai ihko napar Ahku?" 18:24 Pongohuli Hanas nyuhu ulun ngitot Yesus honong pangaoh nokuh Imam Hajo Kayapas. 18:25 Simon Petrus magun tombok ka'a ngindu ang anan. Ulun-ulun nuhtui umba io, "Eamkah ihko ka'a murid ulun rih?" Tahpi Petrus eam ngahku, hioioh, "Bohkon!" 18:26 Ihcobehti pohalu imam hajo, iorih jolahan tahkan ulun ijo tolingaioh tonehcep Petrus, hioioh, "Eamkah ahku nohto ihko ang komulan rih hihco umba Io?" 18:27 Turus Simon Petrus eam ngahku hino, "Eam," -- tutang pas ang ohkot rih manuk dalung nondu. 18:28 Homboh ngohkos samasino iro ngomin Yesus tahkan lohpou Kayapas nokuh istana gubernur. Ulun-ulun Yahudi paringoh eam nyolong nokuh luwang istana, mangat iro eam buah pali cara agama kotului iro kani umba kuman ukun Paska. 18:29 Tului orih Pilatus tulak nokuh kanaha noharep iro hawui ngisok, "Inon auh dawa'kam tohimo ulun tuh?" 18:30 Iro mutah, "Jahkaoh Io eam bosala, ihkai eam ahkan ngomin Io nokuh Amai Gubernur." 18:31 Pilatus nuhtui umba iro, "Omin Io, tutang mosara Io numbun hukum'kam bongom!" Tahpi ulun-ulun Yahudi orih mutah, "Ihkai eam tou mosara ngopahtoi ulun." 18:32 (Tuh monjadi, mangat nyolung inon ijo tonuhtui Yesus tohoucaraoh Io ahkan mahtoi.) 18:33 Pilatus nyolong huli nokuh istana, tutang na'ah Yesus, turus ngisok, "Inon rih Ihko Lahca ulun Yahudi?" 18:34 Yesus mutah auh Pilatus, "Inon kisok tuh tahkan ihko bongom, ata'ai anai ulun bohkon ijo jari nyorihta ahkan'mu tohou Ahku?" 18:35 Pilatus mutah auh Yesus, "Inon ahku tuh ulun Yahudi? Ijo nyarah Ihko ahkak'ku anai rih uhtus-Mu bongom, tutang imam-imam kopala. Inon ijo jari Ihko nguaioh?" 18:36 Yesus mutah, "Kolahcak-Ku eam tahkan kolunon tuh. Jahkaoh kolahcak-Ku tahkan kolunon tuh, ulun-ulun aik-Ku ahkan ngolawan mangat Ahku ara tonyorah ahkan okon-okon ulun Yahudi. Tahpi puna kolahcak-Ku eam tahkan kolunon tuh!" 18:37 Mahka Pilatus ngisok umba Io, "Amat kodorih Ihko Lahca?" Yesus mutah, "Ihko bongom nuhtui ijo Ahku tuh Lahca. Ahku konanak tutang lombut nokuh kolunon ahkan ihco konohuang, iorih nonga kosaksian tohou komorong. Ulun ijo tahkan komorong rih ngonih Ahku." 18:38 Pilatus ngisak umba Io, "Inon rimaioh komorong?" Turus Pilatus soluka hino tahkan istana, tutang nuhtui umba ulun-ulun Yahudi, "Ahku eam sombang ihco kosalan ka aang Io. 18:39 Tahpi numbun hadat'kam, ahku moliwus ihcobehti ulun tahkan luwang sipir aang Ondou Pesta Paska. Kanikah ihkam mangat ahku moliwus Lahca ulun Yahudi ahkan'kam?" 18:40 Iro mutah tutang bokociak muhing, "Eam, ara ijo Io, tahpi Barabas!" (Barabas orih rih ihcobehti ulun ponyilou.)
19:1 Pongohuli hino Pilatus nyolong, turus nyuhu ulun mahcat Yesus. 19:2 Sorodadu-sorodadu nguan ihco ahkur lahca tahkan akah duhi turus nokehpai ang ngosan kuhung Yesus. Uliorih iro mokahjan Io jubah kolawu, 19:3 turus dulangduli lombut nokuh Io, tutang nuhtui, "Bolum Lahca ulun Yahudi!" Pongohuli iro napar baui-Oh. 19:4 Ulimba rih Pilatus soluka sino hino tutang nuhtui umba ulun aro rih, "Nohto! Ahku ngomin Io soluka ahkan'kam, mangat'kam ta'an ijo ahku eam nyombang ihco kosalai ka aang Io." 19:5 Mahka Yesus soluka hawui hapa ahkur akah duhi tutang jubah kolawu. Pilatus nuhtui umba iro, "Nohto ulun rih." 19:6 Kotihka imam-imam kopala tutang pongawal-pongawal rih nohto Yesus, iro ngociak, "Mahpak Io! Mahpak Io!" Pilatus nuhtui umba iro, "Omin rih Io, tutang mahpak Io bain'kam bongom, ahku samasino eam aro sombang ihco kosalan ka aang Io." 19:7 Ulun-ulun Yahudi rih mutah, "Numbun Tourat 'kai, Io harus tonohukum mahtoi, tului Io ngahku arop-Oh Anak Pohotala." 19:8 Kotihka Pilatus ngonih auh'ndo kodorih, io labih mihkoh hino. 19:9 Mahka io nyolong hoduli nokuh istana tutang Yesus huli kononin nyolong, Pilatus ngisok umba Io, "Ihko asar tahkan umoh?" Tahpi Yesus eam kani mutah auhoh. 19:10 Jadi Pilatus ngisok hino, "Ihko eam kani mutah auh'ku? Kota'ankah Ihko, ahku tepun kowasa moliwus Ihko, tutang kowasa nyopolahki Ihko!" 19:11 Yesus mutah, "Amat Pohotala eam nonga kowasa rih ahkan'mu ihko samasino eam tepun kowasa ngosan Ahku. Tului orih ulun ijo nyarah Ahku ahkan'kam, labih hajo dusaioh tahkanumba ihko." 19:12 Kotihka Pilatus ngonih auh orih, io ngurahjalan ahkan ngoliwus Yesus. Tahpi ulun-ulun Yahudi bokociak hajo, "Amat Tuan moliwus Io, Tuan eam jolahan Kaisar! Ulun ijo ngahku aropoh Lahca, anai rih musuh Kaisar!" 19:13 Kotihka Pilatus ngonih auh-auh orih, io ngomin Yesus soluka turus tuot ang koruci hakim ang unuk ijo konohawot Saoh Bahtu. (Ang bahasa Ibrani araioh Gabata.) 19:14 Ohkot orih doni jam duo balas tohunondou, ondou sounumba Ondou Pesta Paska, Pilatus nuhtui umba ulun-ulun rih, "Tuh lahcan'kam!" 19:15 Iro bokociak-ciak, "Munu Io! Munu Io! Mahpak Io!" Pilatus ngisok, "Pahtutkah ahku mahpak lahcan'kam?" Imam-imam kopala mutah, "Tihkas Kaisar ihco-ihcooh ijo puna lahcan ekai!" 19:16 Mahka Pilatus nyarah Yesus ahkan iro ahkan tomahpak. Iro ngomin Yesus, turus ngitot Io tulak. 19:17 Yesus soluka hawui ngohtun bongoioh kahju sopolahki-Oh nokuh unuk ijo konohawot, "Bangon Kuhung." (Aang bahasa Ibrani konohawot Golgota.) 19:18 Ang anan Io tomahpak. Homboh umba Io anai ka'a duo behti bohkon ijo tomahpak; ihcobehti ang sila komuloioh, ihcobehti ang sila koto'uioh tutang Yesus ang tohun. 19:19 Ang kahju sopolahkin Yesus, Pilatus nyuhu nyurat tuh: "Yesus tahkan Nasaret, Lahca Ulun Yahudi." 19:20 Aro ulun Yahudi ngomasa surat rih, tului unuk Yesus nyopolahki rih eam mahco tahkan lowu. Surat rih a'ang bahasa Ibrani, Latin, tutang Yunani. 19:21 Imam-imam kopala nuhtui umba Pilatus, "Ara nyurat, 'Lahcan ulun Yahudi', molekan nyurat iu, 'Ulun tuh nuhtui, Ahku Lahcan ulun Yahudi.' " 19:22 Tahpi Pilatus mutah, "Ijo jari ahku nyurat nauhoh tosurat." 19:23 Uli sorodadu-sorodadu rih nyopolahki Yesus iro ngonin pokahjai-Oh. Pokahjai orih tobagi ohpat: nyinong behti ngondahpot ihco bagian. Iro ngonin ka'a jubah-Oh. Jubah orih eam anai tonusuk -- tononawai tahkan diang nyiring pinda. 19:24 Sorodadu-sorodadu bohaum sama aropoh, "Ara ihto nohtok mbagioh jubah tuh. Olai, ihto botenung, ahkan ta'antuhkas iai ihto ijo tuo ngondahpotoh." Hal orih nyolung, mangat monjadi inon ijo tonyurat a'ang Surat Borasih, yorih: "Iro ahkan hobagi-hobilah hahtik-Ku, tutang botenung ahkan jubah-Ku." Tutang puna sorodadu-sorodadu rih nguan kolouorih. 19:25 Ang doni sopolahkin Yesus, tombok inai Yesus, konduang bawi inai-Oh, Maria oruh Klopas, tutang Maria Magdalena. 19:26 Kotihka Yesus nohto inai-Oh, tutang murid-Oh ijo kokasih-Oh tombok ang anan, Yesus nuhtui umba inai-Oh, "Ine, orih anak Ine." 19:27 Pongohuli Yesus nuhtui umba murid-Oh rih, "Orih inai'mu." Pondehan rih murid norima inai Yesus ahkan mohcon ang lohpouoh. 19:28 Yesus ta'an ijo uhuntuh paringoh jari genep, tutang mangat inon ijo tonyurat a'ang Surat Borasih dahpot nyolung, Io nuhtui, "Ahku tojahbolai." 19:29 Aang anan anai ihco makuk tuwi umba danum anggur ijo mosom. Mahka ihco kambang karang tonocolop luwang danum anggur rih, turus nutung umba owuh hisop turus notahjukoh nokuh biwih Yesus. 19:30 Yesus ngonyelap danum anggur rih, turus nuhtui, "JARI SUHKUP!" Turus Io nuhkom kuhung-Oh tutang palus. 19:31 Okon-okon Yahudi eam kani otun ulun-ulun ijo tonyopolahki rih tahtap kua-kuak ang kahju sopolahki ang ondou Sabat, mahihino sino tuh Sabat rih Ondou Pesta ijo ngomahtang. Tului ondou ohkot Yesus nyopolahki rih kona sounumba ondou Sabat rih, ulun-ulun Yahudi nyawot poromisi umba Pilatus ahkan molot pa'an-pa'an ulun ijo jari nyopolahki tutang nohka otun-otun ulun rih tahkan kahju sopolahki. 19:32 Mahka sorodadu-sorodadu rih tulak tutang molot labih houn pa'an tahkan duo behti ijo tonyopolahki homboh Yesus. 19:33 Kotihka iro johcok Yesus, iro nohto Io jari palus. Jari iro eam molot pa'ai-Oh. 19:34 Tahpi kombuhang Yesus tonyadop hapan lunju bain ihcobehti tahkan sorodadu-sorodadu rih, tutang cohpat soluka daha tutang danum. 19:35 Ulun ijo nohto bongoi kojodian rih, iorih ijo mborihta hal orih, mangat ihkam ka'a porocaya. Tutang kosaksianoh rih morong tutang io ta'an ijo orih morong. 19:36 Hal orih nyolung, mangat monjadi inon ijo tonyurat aang Surat Borasih, yorih, "Eam ihco ka tahkan tulang-tulang-Oh ahkan tonopolotoh." 19:37 Ang Surat Borasih ka'a tonyurat, "Iro ahkan nopahjah Io ijo jari iro nyadopoh." 19:38 Uliorih Yusep tahkan Arimatea nyawot poromisi umba Pilatus ahkan ngomin otun Yesus. (Yusep anairih ihcobehti murid Yesus tahpi toni-tonih, tului io mihkoh umba dolang okon Yahudi.) Pilatus nonga ijin ahkaioh jadi io tulak ngomin otun Yesus. 19:39 Nikodemus ijo lomoi pu'u lombut masap Yesus ang ngolomi, tulak ka'a homboh Yusep. Nikodemus ngomin ramunhokuhku mur tutang garu -- paringoh tolu pulu kilogram karoioh. 19:40 Koduo ulun rih ngomin otun Yesus, turus mukusoh umba benang bukusotu hombo-homboh umba ramunhokuhku rih numbun hadat ponanom ulun Yahudi. 19:41 Ang unuk Yesus tonyopolahki anairih ihco kombulan. Ang luwang kobun orih anai ihco tanom bohua, ijo jaha pu'u tohapa ahkan monanom ulun. 19:2042 Tului kolowong orih doni, tutang ondou Sabat doni nopara, iro nanom Yesus ang anan. 20:1 Aang ondou Minggu ngohkos, ohkot magun bota-botat, Maria Magdalena tulak nokuh tanom. Io nohto bahtu pongatopoh jari tokisat tahkan bauntanom rih. 20:2 Mahka io nokoru ngurah Simon Petrus tutang murid ijo unuk sitan Yesus, tutang nuhtui umba iro, "Tuhan jari kononin ulun tahkan tanom tutang ahku eam ta'an ang umoh Io toniwa." 20:3 Turus Petrus tutang murid ijo bohkon rih tulak nokuh kolowong. 20:4 Koduooh nokoru, tahpi murid ijo bohkon rih tokang nokoru tahkan Petrus, tutang io johcok soun ang tanom. 20:5 Io nokilik koluwang tanom tutang nohto benang bukusotu koniwa ang anan, tahpi io eam nyolong. 20:6 Simon Petrus ngohasu tahkan lihkut, io turus nyolong koluwang tanom rih. Io nohto benang bukusotu koniwa ang anan, 20:7 tahpi benanghoras ijo tomohtong ang kuhung Yesus eam aro ang donioh molekan botihpok aiubongoi. 20:8 Pongohuli murid ijo labih soun johcok ang tanom, nyolong ka'a. Io nohto tutang porocaya. 20:9 (Nyiring aang ohkot rih iro jaham solembang inon ijotonyurat a'ang Surat Borasih ijo Io harus bolum tahkan popahtoi.) 20:10 Ulijari rih murid-murid Yesus rih buli. 20:11 Maria Magdalena tombok ang baun tanom rih hawui nangih. Pondehan nangih, io ngonyungat koluwang lowong, 20:12 turus nohto duo molehkat hopokajan puhti. Iro rih tuot ang lohkun unuk otun Yesus, ijo ihco ang hila kuhung-Oh, tutang ijo bohkonoh ang hila pa'ai. 20:13 Molehkat-molehkat rih ngisok, "Ine, ombai ihko nangih?" Maria mutah, "Tuhan'ku jari tonomin tutang ahku eam ta'an Io koniwa ang umoh." 20:14 Ulirih nuhtui kodorih, io ngulos nohto hila lihkutoh tutang nohto Yesus tombok ang anan. Tahpi Maria eam ngosono ijo iorih Yesus. 20:15 Yesus ngisok umba io, "Ine, ombai ihko nangih? Ine ngurah iai?" Maria ngohu rih tuhkang komulan, jadi io nuhtui, "Amai, amat Amai ijo ngindah Io tahkan ohtoi, dohop nuhtui ahkak'ku ang umoh Amai ngiwa Io, mangat ahku dahpot ngomiu-Oh." 20:16 Yesus nuhtui umba io, "Maria!" Maria ngulos nohto Yesus turus nuhtui aang tuhtui Ibrani "Rabuni!" (Rimai "Guru".) 20:17 "Ara nambit Ahku," hion Yesus umba io, "tului Ahku jaha tulak nuhkat nokuh Amai. Tahpi tulak iou nokuh konduang-konduang-Ku, tutang momborihta ahkan iro ijo Ahku uhuntuh nuhkat nokuh Amai-Ku tutang Amai'kam, Pohotalak-Ku tutang Pohotalan ihkam." 20:18 Mahka Maria tulak nyorihta ahkan murid-murid Yesus ijo io jari nohto Tuhan, tutang ijo Tuhan jari nuhtui paringoh rih ahkaioh. 20:19 Aang ondou Minggu orih ka'a, kotihka jari pindong, murid-murid Yesus hopuhpung ang ihco lohpou, hawui bauntukang ijo tongulin, tului iro mihkoh umba dolang okon Yahudi. Songela Yesus lombut tutang tombok ang tohun iro tutang nuhtui, "Tabe kosanangkomangat ahkan'kam." 20:20 Ulimba nuhtui kodorih, Io pokarah ahkan iro longoi tutang kombuhang-Oh. Aang ohkot nohto Tuhan, iro jorih samasino. 20:21 Turus Yesus nuhtui umba iro sino hino, "Tabe kosanangkomangat bagi'kam. Kolou Amai nyuhu Ahku, kodorih ka'a Ahku nyuhu ihkam." 20:22 Turus Io ngomusik hasong-Oh ahkan iro turus nuhtui, "Torimarih Roh Pohotala. 20:23 Amat ihkam ngapun dusa ihcobehti ulun, Pohotala ka'a ngapunoh. Amat ihkam eam ngapun kosalan ihcobehti ulun, Pohotala ka'a eam ngapunoh." 20:24 Tomas (ijo konohawot "hotahtup") ihcobehti tahkan koduo balas murid Yesus, eam anai hihco iro bohkon, kotihka Yesus lombut. 20:25 Mahka murid-murid ijo bohkon nuhtui umba Tomas, "Ihkai jari nohto Tuhan!" Tahpi Tomas mutah, "Amat ahku jaha nohto luwang pahku aang longoi-Oh, jaha ngina iking'ku ang lohkun-lohkun himang pahku rih, tutang jaha ngina longok'ku aang kombuhang-Oh, samasino ahku eam kani porocaya." 20:26 Ihcominggu pongohuli murid-murid Yesus anai hino ang unuk orih, tutang Tomas tohko ka'a. Paring bauntukang tongulim. Tahpi Yesus lombut tutang tombok ang tohun-tohun iro hawui nuhtui, "Tabe kosanangkomangat ahkan'kam." 20:27 Pongohuli Yesus nuhtui umba Tomas, "Nohto longok-Ku, tutang ngina iking'mu ang ohtoi. Ngonjuluk longon'mu tutang nginaoh ang kombuhang-Ku. Ara bembang hino, tahpi porocaya iou!" 20:28 Tomas nuhtui umba Yesus, "Tuhan'ku tutang Pohotala'ku!" 20:29 Mahka Yesus nuhtui umba io, "Ihko porocaya kotului jari nohto Ahku, kowa? Kosanangsolamatrih ulun ijo porocaya oluka eam nohto Ahku!" 20:30 Magun aro hino gawihelan-gawihelan bohkon ijo konuan Yesus ang toharep murid-murid-Oh, tahpi eam tonyurat ang luwang buhku tuh. 20:31 Tahpi paringoh tuh tonyurat, mangat ihkam porocaya ijo Yesus anairih Lahca Ponyolamat, Anak Pohotala, tutang tului porocaya umba Io, ihkam ngondahpot pombolum.
21:1 Uliorih Yesus ngorinah arop-Oh sino hino ang Danou Tiberias ahkan murid-murid-Oh. Kolihtuh konyolungoh: 21:2 Ihco ondou Simon Petrus, Tomas ijo konohawot hotahtup, Natanael tahkan Kana ang Galilea, anak-anak Sebedeus, tutang duo murid Yesus ijo bohkonoh rahat hopuhpung. 21:3 Hion Simon Petrus umba ijo bohkon, "Ahku kani hihkas ngurah ohcin." "Ihkai umba," hion iro umba io. Mahka hihkasrih iro jahkat alut. Tahpi kotahin ihco ngolomi orih iro eam dahpot ino-inon. 21:4 Kotihka mahtan ondou kani boloang, Yesus tombok ang kowang, tahpi iro eam ngosono ijo io orih Yesus. 21:5 Yesus nuhtui umba iro, "Anak-anak-Ku, inon ihkam anai ohcin?" "Eam aro," hion'ndo. 21:6 Yesus nuhtui umba iro, "Nimbailah jala'mu nokuh hila kotoun alut, noin ihkam ngondahpot ohcin." Turus jala rih iro nimbaioh tahpi eam sanggup tonguhut huli kotului kodorih karoioh ohcin ang luwangoh. 21:7 Murid ijo unuk konasih Yesus nuhtui umba Petrus, "Orih Tuhan!" Kotihka Simon Petrus ngonih ijo orih Tuhan, io mokehpan hahtiouoh (tului io eam hokolambi) turus nyohowu nokuh luwang danum. 21:8 Murid-murid ijo bohkon ngahasu nokuh kowang umba alut, sambil nguhut jala ijo tuwi umba ohcin rih. Iro eam pira kahcui tahkan kowang, kira-kira solahtus mehter iou. 21:9 Kotihka iro jahkat tahkan alut, iro nohto anai barah baho ang anan, hawoi ohcin ang ngosanoh tutang luhte. 21:10 Yesus nuhtui umba iro, "Cuba ngomin nokuh ohtoi honjiot ohcin ijo bohua ihkam nawaioh." 21:11 Simon Petrus jahkat alut, turus nguhut jalaoh nokuh kowang. Jala rih tuwi umba ohcin ijo hajo-hajo; paringoh anai solahtus limo pulu tolu kungan. Tutang oluka karokaron orih, jalaoh eam borutat. 21:12 Yesus nuhtui umba iro, "Has kuman." Eam aro ihcobehti ka tahkan murid-murid-Oh rih petah ngisok, "Amai tuh iai?" Kotului iro ta'an ijo Io Tuhan. 21:13 Pongohino Yesus ngondoni iro, ngomin luhte rih, tutang nonga ahkan iro. Io nguan kodorih ka'a umba ohcin rih. 21:14 Tuhrih ijo kotolu tikatoh Yesus ngorinah arop-Oh ahkan murid-murid-Oh, uli Io bolum tahkan popahtoi. 21:15 Ulimba iro kuman, hion Yesus umba Simon Petrus, "Simon anak Yona, kuwohkah ihko molowi mongasih Ahku, tahkanumba iro tuh mongasih Ahku?" "Morong, Tuhan," hion Petrus, "Tuhan ta'an ahku mongasih Tuhan." Hion Yesus umba io, "Nyokahtik anak-anak tobiri-Ku." 21:16 Bagi koduo tikatoh Yesus ngisok umba io, "Simon anak Yona, inonkah ihko mongasih Ahku?" "Morong, Tuhan," hion Petrus, "Tuhan ta'an ahku mongasih Tuhan." Hion Yesus umba io, "Nyokahtik tobiri-tobiri-Ku." 21:17 Bagi ijo kotolu tikatoh Yesus ngisok hino umba io, "Simon anak Yona, kuwohkah ihko mongasih Ahku?" Petrus monjadi porosahtoioh kotului Yesus ngisok umbaoh nyiring kotolu tikat. Mahka Petrus mutah hino, "Tuhan, Tuhan ta'an kopari-paringoh, Tuhan ta'an ahku mongasih Tuhan!" Turus Yesus nuhtui umba io, "Nyokahtik tobiri-tobiri-Ku. 21:18 Tu'u morong hiak-Ku tuh: Kotihka ihko magun biou, ihko bongom mohtong kahang'mu, tutang tulak nokuh umoh bewe ihko nohuang. Tahpi amat ihko jari oko noin, ihko notahjuk longon'mu, tutang ulun bohkon ijo ngohut ihko tutang ngomin ihko nokuh umoh ihko eam kani nokuhoh." 21:19 (Umba auh-auh orih Yesus ngorinah koloukuwoh Petrus ahkan mahtoi noin ahkan mopohajo Pohotala.) Uliorih Yesus nuhtui umba Petrus, "Ngahasu Ahku!" 21:20 Kotihka Petrus ngulos, Petrus nohto ang lihkutoh murid ijo tonokasih Yesus. (Io ijo tuot doni Yesus beteng'ndo kuman tutang ijo ngisok umba-Oh, "Tuhan, iai ijo ahkan ngarana Tuhan?") 21:21 Nohto io, Petrus ngisok umba Yesus, "Tuhan, koloukuwoh umba io tuh?" 21:22 Yesus mutah, "Jahkai Ahku kani io mohcon bolum johcok Ahku lombut, orih eam urusan'kam. Tahpi ihko ngahasu Ahku!" 21:23 Mahka tosiar borihta ang marak murid Yesus, ijo murid orih eam ahkan mahtoi. Padahal Yesus eam nuhtui ijo murid rih eam ahkan mahtoi, molekan: "Jahkaioh Ahku kani io bolum nyiring Ahku lombut, orih eam urusan'kam." 21:24 Murid orihrih ijo nonga kosaksian tohou ang'conyolung-ang'conyolung tuh. Iorih ka'a ijo jari monyuratoh. Tutang ihto ta'an ijo inon ijo tonuhtuioh rih morong. 21:25 Magun aro hal bohkon ijo konuan bain Yesus. Jahkaanai paringoh rih tonyurat mihco-mihco, ahku nginyam eam aro sukup unukoh ang hapus tana unuk muat paring buhku ijo ahkan tonyurat orih.
1:1 O, Teofilus ijo piosbudibosara, Ang luwang buhku'ku ijo pahtukoh, jari ahku ngonorangan paringoh ijo konuanoh tutang auh ajaroh bain Yesus tahkan Io nopara ang gawiu-Oh, 1:2 johcok ang ondou Io konahtang nokuh soruga. Sounumba Io nuhkat nokuh soruga umba kowasan Roh Pohotala Io nonga potunjuk-potunjuk ahkan rasul-rasul ijo konopili. 1:3 Uliumba Io mahtoi, kotahin ohpat pulu ondou Io bojoin ngorinah arop-Oh umba cara ijo bokorinah samasino ahkan rasul-rasul rih ijo Io puna tu'u bolum. Iro nohto Io, tutang Io hopander umba iro tohou koloukuwohoh Pohotala moretah kolou Lahca. 1:4 Tutang aang ohkot Io hihco umba iro, Io nonga poretah tuh ahkan iro, "Ara tulak tahkan Yerusalem. Ngindoi ang anan nyiring Amai nonga inon ijo jari tonobowot-Oh, iorih ijo jari Ahku nyorihta ahkan'kam houn. 1:5 Tului Yohanes mopondus umba danum tahpi pira-pira ondou hino ihkam ahkan ponopondus umba Roh Pohotala." 1:6 Kotihka rasul-rasul rih hopuhpung sama-sama Yesus, iro ngisok Io, "Tuhan, inonrih huntuh Tuhan kani nombok huli Pomoretah uhtus Israel?" 1:7 Yesus mutah auh'ndo, "Amai-Ku bongoi ijo nuhkas ondouoh tutang ohkotoh. Orih eam usah ihkam kota'ai, tului orih hak Amai. 1:8 Tahpi ihkam ahkan duon kowasa, amat Roh Pohotala jari lombut ahkan'kam. Tutang ihkam ahkan monjadi saksi-saksi ahkak-Ku ang Yerusalem ang hapus Yudea, ang Samaria tutang nyiring topahkan tana." 1:9 Uliius Yesus nuhtui kodorih, Io hogahtang nokuh soruga ang toharep iro paring tutang indongondou nuhtup Io tahkan topahjah'ndo. 1:10 Pondehan iro magun nopahjah ahkan langit, angohkot Yesus hogahtang, solonga duo behti hopokajan puhti tombok ang silan iro. 1:11 "O, ulun-ulun Galilea," hion koduo behti rih, "ombai ihkam tombok iou ang anan nokara nokuh langit? Yesus ijo ihkam nohto hogahtang nokuh soruga rih ang toharep'kam, ahkan huli hino umba cara orih ka'a, kolou ijo ihkam nohtooh nanai." 1:12 Pongohuli, rasul-rasul buli ko Yerusalem tahkan Korong Zaitun. Korong rih anai kira-kira ihco kilomehter kahcuioh tahkan Yerusalem. 1:13 Ang Yerusalem iro tulak nokuh lohpou unuk iro nginap, turus nuhkat nokuh tahkun ijo ang diang. Rasul-rasul rih, iorih Simon Petrus tutang Yohanes, Yakobus tutang Andreas, Pilipus tutang Tomas, Bartolomeus tutang Mateus, Yakobus anak Alpeus, Simon Patriot tutang Yudas anak Yakobus; 1:14 paringoh toturus umba hihcoahtoioh hopuhpung ahkan bodo'a. Iro bodo'a homboh ulun-ulun bawi tahput Maria inai Yesus tutang konduang-konduang Yesus. 1:15 Ang ihco ondou kotihka iro rahat hopuhpung -- anai kowa solahtus duo pulu behti ijo dumah -- Petrus tombok mangat bopander umba ulun aro. Io nuhtui, 1:16 "Konduang-konduang! Inon ijo tonyurat ang Surat Borasih, orih uras nyalung. Lomoi hopatau Lahca Dawid Roh Pohotala jari nujum tohou Yudas, okon ulun-ulun ijo nawan Tuhan Yesus rih. 1:17 Yudas anairih anai ihcobehti tahkan ihto, tutang io jari tonopili ka'a ahkan umba bogawi hombo-homboh umba ihto." 1:18 (Yudas tuh jari duon tana kolowongoh tahkan upahpotanahoh ijo ja'at. Io ngonyahtu tutang mahtoi honong butuioh borutat nyiring usin tonoiuoh soluka paringoh. 1:19 Paring ulun ijo mohcon ang Yerusalem, kota'an tohou hal orih. Orih kotuluioh a'ang basa iro, iro ngohawot tana rih Akeldama, ijo rimai 'Tana Daha'.) 1:20 "Tului ang luwang buhku Masmur anai tonyurat koloutuh, 'Nauh unuk mohconoh monjadi tonih; ara ihcobehti ka mohcon ang loukoh.' Anai tonyurat koloutuh ka'a, 'Nauhoh unuk ponuotoh onin bain ulun bohkon.' 1:21-22 Tului orih harus anai ihcobehti ijo hihco umba ihto monjadi saksi ijo Tuhan Yesus jari bolum hoduli tahkan popahtoi. Ulun orih harusoh anai ihcobehti, tahkan louk ulun-ulun ijo hototurus sama-sama umba ihto tahkan ohkot ihto ngahasu Tuhan Yesus 'kan umo-umoh, pahtuk Yohanes nopara mopondus nyiring aang ohkot Yesus konahtang nokuh soruga tahkan tohun-tohun ihto." 1:23 Mahka ulun-ulun ijo tuot aang anai nunjuk duo behti, iorih Yusep ijo konohawot ka'a Barsabas (io konohawot Yustus ka'a) tutang Matias. 1:24-25 Turus iro bodo'a. Iro nuhtui, "Tuhan Ihko kota'an ahtoi paring ulun. Yudas jari bokisat tahkan ponuotoh, kolou rasul tutang jari mahtoi. Jadi ngorinah ahkan ihkai iai tahkan duo behti tuh ijo Tuhan mitih ahkan tononga gawi orih ngatioh Yudas." 1:26 Uliorih koduo aran rih tonenung, turus tenung ngonyahtu buah Matias. Jadi io ponotuot monjadi rasul ahkan umba hombo-homboh kosobalas rasul ijo bohkonoh rih.
2:1 Kotihka jari johcok Ondou Pentakosta, paring ulun ijo porocaya hopuhpung ang ihco unuk. 2:2 Songela konahan auh tahkan langit kolou bahiu ijo guhtu-guhtuk monyangit. Lohpou ang umoh ulun-ulun rih rahat tuot, sohapusoh tuwi kobain auh rih. 2:3 Mahka iro nohto jola-jola kolou jelak baho nyoli nokuh umo-umoh tutang nahpekaropoh aang iro nyinong behti. 2:4 Iro paring konowasa bain Roh Pohotala tutang nopara hopander a'ang hokobohkon basa. Iro pander numbun inon ijo tononga Roh rih ahkan iro mangat konohawotoh. 2:5 Aang ohkot orih ulun Yahudi tahkan mahca-mahcam lowu ang hapus kolunon, mohcon ang Yerusalem. Iro anairih ulun-ulun ijo bokehtep umba Pohotala. 2:6 Kotihka ngonih auh orih, aro sino ulun lombut hopuhpung. Iro paringoh tokocit ngonih ulun-ulun porocaya rih hopander hapan basa iro nyino-nyinong. 2:7 Hawui helan tutang torongo-rongong iro nuhtui, "Ulun-ulun ijo hopander tuh paringoh ulun-ulun Galilea, kowa? 2:8 Koloukuwoh nyolungoh nyiring ihto ngonih iro tou hopander ang luwang basa lowun ihto nyinong behti? 2:9 Ihto ulun-ulun tahkan Partia, Media, Elam; tahkan Mesopotamia, Yudea tutang Kapadokia; tahkan Pontus tutang Asia, 2:10 tahkan Prigia tutang Pamfilia, tahkan Misir tutang karon-daerah Libia doni Kirene, anai louk ihto ijo lombut tahkan Ruma, 2:11 anai ulun-ulun Yahudi tutang anai ka'a ulun-ulun uhtus bohkon ijo jari nyolong agama Yahudi; anai ka'a ijo lombut tahkan Kreta tutang Arab. Ihto paring ngonih iro hopander a'ang basa ihto nyino-nyinong tohou hal-hal ijo helan ijo konuan bain Pohotala!" 2:12 Hawui helan tutang torongo-rongong iro paringoh ngisok sama aropoh, "Inon rimaioh tuh?" 2:13 Tahpi anai ka'a ulun ijo hololea. Iro nuhtui, "Ah ulun-ulun tuh tihkas busou ih!" 2:14 Turus Petrus tombok homboh sobalas rasul ijo bohkon, pongohuli nuhtui ahkan ulun aro rih. Hapan auh ijo muhing io nuhtui, "Konduang-konduang ulun-ulun Yahudi tutang paring ijo mohcon aang Yerusalem ngonih bua-buah! Tului hal ituh porulu ahku ngonarang ahkan'kam. 2:15 Ulun-ulun tuh eam busau kolou ijo hion ihkam ngohu. Tului huntuh punan jam jalu ngokos. 2:16 Tahpi tuh jari tomborihta bain Pohotala hopatou Nabi Yoël: 2:17 Pohotala nuhtui, 'Ang lain jaman Ahku ahkan nusuh Roh-Ku nokuh isun paring ulun. Anak-anak'kam ijo bahkas tutang anak-anak'kam ijo bawi ahkan mborihta ahkan'kam hal-hal ijo Ahku mborihtaoh ahkan'ndo. Ulun-ulun biumu ahkan nohto hal-hal ijo Ahku ngorinahoh ahkan iro. Ulun-ulun oko'kam ahkan nuhpi dolang nuhpi ijo Ahku nonga ahkan'ndo. 2:18 Ahkan jihpok-jihpok-Ku ka -- pios bahkas kanika bawi --, ahkan Ahku nusuh Roh-Ku ang ondou-ondou rih. Iro ahkan mborihtaoh hal-hal ijo Ahku jari mborihta ahkan'ndo. 2:19 Ahku ahkan nguanoh kahtahelan-kahtahelan ang diang ahi aang langit, tutang hal-hal ijo luar biasa ang pinda ohtoi ang tana; ahkan anai daha tutang ahpui, sopuluk tutang asep. 2:20 Mahtanondou ahkan monjadi pindong, tutang bulan monjadi bohandang kolou daha sounumba Ondou Tuhan, ondou ijo hajo tutang horomat rih lombut. 2:21 Aang ohkot orih, ulun ijo na'ah ahkan Tuhan ahkan tonyolamat.' 2:22 Konduang-konduang, ulun-ulun Israel! Ngonihrih inon ijo ahku nuhtuioh tuh: Yesus ulun Nasaret rih jari nonga tugas bain Pohotala ahkan konduang. Orih korinah sasino aang kahtahelan-kahtahelan tutang hal-hal luar-biasa ijo Pohotala nguaioh ang louk ihkam hopatou Yesus Kristus. Paring ohrih konduang bongon jari kota'an. 2:23 Hosorurui umba rancana-Oh bongoi, Pohotala nuhkas ahkan nyorahoh Yesus ahkan'kam. Tutang kotihka Io tonyarahoh, ihkam munu Io honong mohonou ulun-ulun ja'at mahpak Io. 2:24 Tahpi Pohotala ngoponyunoh Io huli tahkan louk ulun-ulun mahtoi. Io tonolon bain popahtoi, tahpi Pohotala moliwus-Oh, tului eam anaiharapan Io konowasa toturus bain popahtoi. 2:25 Tohou Yesus tuh Dawid pu'u nuhtui, 'Ahku nohto Tuhan toturus ang toharep'ku; Io mambaioh ahku, mangat ahku eam tohungge bain inon ka'a. 2:26 Orih kotuluioh ahtoi'ku jorih-jirah, nyamak'ku ngohawot auh tara-tara: tutang behtik'ku tuh ahkan ngindoi honong benyem ang luwang kolowong. 2:27 Tului Ihko Tuhan eam mohonau homboruak'ku mohcon ang lowun ulun mahtoi. Ihko eam mohonauoh jihpon-Mu ijo bokehtep rih lonyuh tutang dilap. 2:28 Ihko jari ngorinah ahkak'ku jalan ijo nuju pombolum ijo sojahti. Kojorih'ku momurai-murai tului Ihko anai hihco ahku.' 2:29 Konduang-konduang ahku ijinrih ahku bopander umba ihkam torus tarang tohou Dawid amai lolohor eto rih. Io jari mahtoi tutang jari tonolowongoh ka'a; kolowongoh magun anai ang tohun-tohun ihto nyiring huntuh. 2:30 Pohotala jari nobowot ahkan Dawid honong tulut ijo anai ihcobehti tahkan lihitoh ahkan ponotuot bain Pohotala monjadi lahca. Tului Dawid kota'an ahkan bowot orih, tutang tului io ihcobehti nabi ka'a, 2:31 io kota'an hino, inon ijo ahkan konuan bain Pohotala. Jadi io jari nujum ijo Lahca Ponyolamat ijo tonobowot bain Pohotala ahkan bolum huli tahkan popahtoi. Dawid nuhtui, 'Io eam tomohonau botohtah ang luwang kolunon ulun-ulun mahtoi; behtiu-Oh eam ahkan monjadi lonyuh tutang lingis.' 2:32 Yesus tuhrih ijo tonombolumoh hoduli tahkan louk ulun mahtoi bain Pohotala. Ihkai paring jari monyaksioh bangon 'kai hal orih. 2:33 Io hogahtang nokuh ponuotoh ijo isung tutang ahkai tononga kowasa bain Pohotala, turus norima Roh Pohotala ijo jari tonobowot bain Amai. Tutang ijo ihkam huntuh, tuh ngonih tutang nohto anairih, Roh rih ijo Io nusuhoh ahkan ihkai. 2:34 Dawid bongoi eam nuhkat nokuh soruga, tahpi Dawid ka'a jari nuhtui, 'Tuhan nuhtui umba Tuhan'ku: 2:35 Tuotrih ihkam ang hila kotouk-Ku, nyiring Ahku nguan musuh-musuh-Mu monyarah ahkan-Mu!' 2:36 Orih kotuluioh paring ulun Israel pahtut kota'an moro-morong ijo Yesus, ijo ihkam mahpakoh rih. Yesus rih ka'a ijo jari tomotuot Pohotala monjadi Tuhan tutang Lahca Ponyolamat!" 2:37 Kotihka ulun-ulun rih ngonih hal orih, ahtoi'ndo paham bolisah. Turus iro ngisok umba Petrus tutang rasul-rasul ijo bohkon. "Konduang-konduang, ihkai harus nguan inon?" 2:38 Petrus mutah, "Hubahrih, tahkan dusa-dusan'kam. Tutang pios ihkam nyinong behti ponopondus aang aran Yesus Kristus mangat dusa-dusan'kam tongapun. Mahka konduang-konduang ahkan norima ponongan Roh Pohotala tahkan Pohotala. 2:39 Tului ijo jari tonobowot bain Pohotala rih anai ahkan'kam tutang ahkan lihit-lihit'kam hawui ahkan ulun-ulun ijo anai ang unuk-unuk ijo mahcu -- iorih paring ulun ijo tona'ah bain Pohotala Tuhan ihto ahkan lombut ahkai-Oh." 2:40 Kodorih Petrus monarang kotbah ahkan iro. Tutang umba aro tuhtui ijo bohkon ka'a io nyuhuoh ahkan iro, mangat iro moliwus arop'ndo tahkan uhtus ijo ja'at tuh, ijo ahkan tonohukum bain Pohotala. 2:41 Aro ulun ijo porocaya ahkan ijo tonuhtui bain Petrus turus iro ponopondus. Mahka jumbalah ulun ijo porocaya ang ondou orih botambah hino umba tolu kujan behti. 2:42 Hawui kokehtep iro bajar tahkan rasul-rasul rih, tutang toturus hopuhpung hombo-homboh. Iro kuman hombo-homboh tutang bodo'a hombo-homboh. 2:43 Aro samasino kahtahelan ijo konuan bain rasul-rasul rih nyiring paring ulun helan tutang mihkoh. 2:44 Ulun-ulun ijo porocaya rih turus hihcoahtoi, tutang inon ijo iro tepui, iro hapaoh sama-sama. 2:45 Iro modagang karon-ramui tutang ponahtou ain'ndo, turus magi duitoh, ang louk iro paringoh numbun koporulu nyinong behti. 2:46 Nyinong ondou iro turus hopuhpung ang Lohpou Tuhan; hawui kuman hombo-homboh, tutang jorih hawui randah ahtoi ang lohpou-lohpou'ndo. 2:47 Iro turus nara-nara Pohotala tutang tongonjorih paring ulun. Nyinong ondou jumbalah iro turus botambah. Tului Tuhan nonga rahat iro ulun-ulun ijo puna ahkan tonyolamat.
3:1 Ang ihco ondou Petrus tutang Yohanes tulak nokuh Lohpou Tuhan aang jam tolu sohit iorih rahat ulun ohkot unuk bodo'a. 3:2 Ang anan ang baun gerbang ijo konohawot "Bauntukang Bohinoi," anai ihcobehti ulunbahkas ijo bolomu tahkanpahtukoh konanak. Nyinong ondou ulun orih omin nokuh anan mangat nyodahkah nokuh ulun-ulun ijo nyalan nokuh Lohpou Tuhan. 3:3 Kotihka ulun rih nohto Petrus tutang Yohanes kani nyolong Lohpou Tuhan, io nyawot iro, nongaoh angihco ahkaioh. 3:4 Mahka iro nuneng io, pongohuli Petrus nuhtui, "Nohtoani ihkai!" 3:5 Turus ulun orih nohtoani iro honong moharap ahkan ngodahpot angihco tahkan iro. 3:6 Tahpi Petrus nuhtui umba io, "Ahku eam aro tepun duit samasino. Tahpi inon ijo anai aang ahku, orih ahkan ahku nongaoh ahkan'mu: Umba kuwasa Yesus Kristus ulun Nasaret rih, nyalanrih ihko!" 3:7 Turus Petrus nambit longo kotoun ulun ijo bolomu rih tutang dohop io kuat. Homboh orih pa'an ulun ijo bolomu rih tutang bola hukupoh monjadi ba'as. 3:8 Turus io nomarang tombok, tutang nopara nyalan ahkan umo-umoh. Pongohuli io nyolong nokuh Lohpou Tuhan hombo-homboh Petrus doro Yohanes hawoi nyalan io nokoru-nokehcuk tutang monara Pohotala. 3:9 Paring ulun nohto io nyalan tutang monara-nara Pohotala. 3:10 Turus iro borondong ijo iorih tukang sodakah ijo tatai tuot ang, "Bauntukang Bohinoi" ang Lohpou Tuhan. Iro helan samasino tutang torongo-rongong nohto inon ijo jari nyolung ahkaioh. 3:11 Ulun rih turus iou ngohasu Petrus doro Yohanes. Tutang ohkot iro tolu johcok ang saoh ijo konohawot "Saoh Salomo", paring ulun lombut mongorumbung aang iro tului kagum. 3:12 Uhun Petrus nopahjah ulun-ulun rih io nuhtui umba iro, "O ulun-ulun Israel, ombai Konduang-konduang helan umba hal orih? Ombai ihkam nohto turus aang ihkai? Inon ihkam ngohu ulun tuh duon nyalan tului anai kowasa aang ihkai ata'ai tului ihkai te'et umba Pohotala? 3:13 Pohotala ijo tonyembah bain Abraham, Isaak, Yakub, orih Pohotala tahtu ajuh ihto. Pohotala rih jari mohoromat Jihpoi-Oh iorih Yesus. Yesus orih ijo ihkam nyarah ahkan pihak pongowasa, tutang ihkam nuduh io ang toharep Pilatus, aang ohkot Pilatus kani moliwus Io. 3:14 Io borasih tutang hinut, tahpi ihkam ngolawan Io tutang hojojuan mangat Pilatus ahkan moliwus ihcobehti pomunu ahkan ihkam. 3:15 Konduang-konduang munu Io, padahar kopunaoh Io rih luwang tohasak pombolum ahkan paring ulun. Tutang Pohotala jari ngombolum Io huli tahkan popahtoi. Ihkai jari monyaksi bongon 'kai hal rih. 3:16 Konduang-konduang jari nohto tutang monyaksioh, inon ijo nyolung umba ulun bolomu tuh. Io jari nyolung ba'as tutang pios huli kotului io porocaya umba Yesus tutang kowasa-Oh. Tului porocaya ahkan Yesus mahka ulun tuh jari monjadi pios huli, aang toharep Konduang-konduang paring. 3:17 Konduang-konduang! Huntuh ahku kota'an ijo inon ijo ihkam tutang okon-okon'kam nguaioh toharep Yesus, orih ihkam nguaioh, tului ihkam eam kota'an inon ijo ihkam rahat nguai. 3:18 Tutang tului orihrih nyolung ka'a inon ijo jari nuhtui bain Pohotala soun lomoi hopatau nabi-nabi-Oh ijo Lahca Ponyolamat ijo tonobowot rih harus ngarot. 3:19 Bain tului orih konduang-konduang hubahrih tahkan dusa-dusa'kam tutang buli nokuh Pohotala mangat Io potihou dusa-dusa'kam. 3:20 Tuhan ahkan lombut ahkan'kam tutang ihkam nginyam komonyun rohani. Tutang Tuhan ahkan nyuhu Yesus lombut ahkan'kam, tului Io jari tonuhkas bain Pohotala monjadi Lahca Ponyolamat ahkan'mu. 3:21 Io harus mohcon ang soruga nyiring Pohotala monjorian paringoh bohua. Kolou ijo tonuhtuioh bain Pohotala hopatou nabi-nabioh ang jaman lomoi. 3:22 Museh pu'u nuhtui, 'Pohotala Tuhan'kam ahkan nyoruhan ahkan'kam ihcobehti nabi tahkan uhtus'kam bongom, kolou Io nguhtus ahku. Ihkam harus ngonih paring ijo tonuhtuioh bain nabi rih ahkan'kam. 3:23 Ulun ijo eam nohtoani inon ijo tonuhtui bain nabi rih, ulun rih ahkan tonyarooh tahkan ukup Pohotala tutang tomorusak.' 3:24 Nabi-nabi ijo pu'u nyiar mborihta tahkan Pohotala nopara tahkan Nabi Samuel tutang nabi-nabi bohkon ijo lombut pongohuli, paringoh mborihta tohou jaman tuh. 3:25 Bowot-bowot tahkan Pohotala ijo tonyiar bain nabi-nabi, anairih ahkan Konduang-konduang. Aang bowot ijo Pohotala napa umba tahtu ajuh'kam, Pohotala nuhtui umba Abraham numbun tuh, 'Tahkan lihit'mu Ahku ahkan mborehkat karon uhtus ang kolunon.' Bowot orih anairih ahkan ihkam ka'a. 3:26 Orih kotuluioh Pohotala ngopili Jihpoi-Oh turus nyuhu Io lombut nokuh ihkam paling houn, mangat Io mborehkat ihkam. Caraoh Io mborehkat ihkam, iorih, hawui nguan Konduang-konduang paring hubah tahkan cara pombolum ijo ja'at."
4:1 Pondehan Petrus doro Yohanes magun bopander umba ulun-ulun rih, imam-imam kopala tutang komandan, ponokawan Lohpou Tuhan hawui ulun-ulun Saduki lombut nokuh Petrus doro Yohanes. 4:2 Iro bosingi tului Petrus doro Yohanes ngonorangan ahkan ulun-ulun ijo Yesus rih jari bolum huli tahkan popahtoi. Tutang orih mombukti ijo ulun mahtoi ahkan tongombolum huli. 4:3 Mahka iro nawan duo rasul rih turus posolong ang luwang sipir. Tutang tului jari ngolomi, mahka Petrus doro Yohanes tonahan ang anan nyiring ngohkosoh. 4:4 Tahpi ulun-ulun ijo jari ngonih ajar rasul-rasul rih aro ijo porocaya. Mahka jumbalah iro botambah nyiring johcok monjadi kira-kira limo kujan behti. 4:5 Ang ngokosoh okon-okon Majelis Agama, okon-okon Yahudi tutang guru-guru agama hopuhpung ang Yerusalem. 4:6 Iro monyombang umba Imam Hajo Hanas tutang Kayapas, Yohanes Aleksander, tutang paring ijo barih jolahan imam hajo rih. 4:7 Petrus tutang Yohanes omin noharep iro, turus iro ngisok, "Koloukuwoh cara'kam ngopios ulun bolomu rih? Umba koba'as tahkan amoh, ata'ai umba kowasa tahkan iai, ihkam nguan ang orih?" 4:8 Petrus, ijo tokowasa Roh Pohotala, mutah, "Tuan-tuan okon uhtus Israel tutang Tuan-tuan okon Majelis Agama! 4:9 Ihkai, ponosara ondou tuh tului nguan aang hinut ahkan dohop ihcobehti ulun bolomu tutang tului tuan-tuan kani ngota'an koloukuwoh ulun tuh tongopios. 4:10 Nah Tuan-tuan paringoh harus ngota'an tutang paring uhtus Israel ka, harus ngota'an ijo ulun tuh tombok huntuh honong behtiu ijo sehat ang toharep Tuan-tuan, tului koba'as tutang kowasa tahkan Yesus Kristus ulun Nasaret rih. Tuan-tuan jari nyopolahki Yesus rih, tahpi Pohotala jari ngombolum Io huli tahkan louk ulun mahtoi. 4:11 Yesus ijo orih rih tonohou bain ayat Surat Borasih tuh, 'Bahtu ijo eam hapan bain ihkam tuhkang mangun lahpou korinah orih, monjadi bahtu ijo mombahtang.' 4:12 Tihkas nguha Yesus iou ulun duon solamat. Tului ang sohapus Kolunon, ang louk ulun eam aro ihcobehti bohkon ka ijo ngonduon kowasa tahkan Pohotala ahkan monyolamat ihto." 4:13 Okon-okon puhpung bosara rih helan nohto kohanyin Petrus doro Yohanes, mahihino iro jari kota'an ijo duo behti rasul rih sama umba ulun-ulun aro ijo eam aro sokula, turus iro borondong ijo koduo rasul rih, anairih ulun-ulun ijo hihco umba Yesus. 4:14 Tahpi iro eam tou nuhtui ino-inon, tului ulun ijo jari konopios rih anai tombok ang toharep'ndo homboh umba Petrus doro Yohanes. 4:15 Mahka iro nyuhu koduo rasul rih soluka tahkan tohun majelis rih, pongohuli iro bohaum. 4:16 Iro nuhtui, "Ihto harus nguan inon toharep iro duo tuh? Paring ulun ijo mohcon ang Yerusalem jari ngota'an, kahtahelan ijo luar biasa tuh, konuan bain doro rih. Ihto eam duon ngulimoh orih. 4:17 Tahpi mangat hal rih ara tosiar saup samai hino ang louk ulun-ulun, olai ihto ngahtap iro duo, ijo iro samasino eam tou hino bopander umba ihcobehti ka honong hapan aran Yesus." 4:18 Mahka iro na'ah koduo rasul rih nyolong huli, tutang nuhtui ijo iro samasino eam tou ngohawot ata'ai majar umba aran Yesus. 4:19 Tahpi Petrus doro Yohanes mutah, "Nirukrih bongon inon ijo morong ang toharep Pohotala: Numbun poretah Tuan-tuan ata'ai numbun poretah Pohotala. 4:20 Tului ihkai eam tou tondo mborihta tohou inon ijo jari ihkai nohto tutang konahan 'kai." 4:21 Okon-okon bosara rih eam duon sombang ihco alasan ka'a mangat mohukum Petrus tutang Yohanes. Jadi iro ngahtap koduo rasul rih turus moliwus doro rih, tului paring ulun mohormat monara Pohotala tului aangjadi rih. 4:22 Ulun ijo nginyam kopios ijo helan rih, jari labih tahkan ohpat pulu toun umuroh. 4:23 Uli Petrus tutang Yohanes konoliwus iro huli nokuh injah-jolahan'ndo tutang nyorihta paring ijo tonuhtui bain imam-imam kopala tutang okon-okon Yahudi rih ahkan'ndo. 4:24 Limbah injah-jolahan'ndo ngonih rih iro hombo-homboh bodo'a hihco ahtoi ahkan Pohotala. Hion iro: "Tuhan, Ihkorih ijo ngonjorianoh langit tutang tana tutang tasik hawui paring suangoh. 4:25 Umba Roh-Mu, Ihko pu'u nuhtui umba tahtu ajuh Ihkai, Dawid, jihpon-Mu; Ihko nuhtui, 'Ombai ulun-ulun, ijo eam kosono Tuhan, sangit; ombai uhtus-uhtus ulun hotohou ijo earo gunaioh? 4:26 Lahca-lahcan kolunon samai nahtap aropoh ahkan hokolahi, tutang dolang okon hihco ngolawan Tuhan tutang Lahca Ponyolamat.' 4:27 Tului puna Horodes tutang Pontius Pilatus jari hotohou umba ulun-ulun ijo eam kosono Tuhan tutang umba ulun-ulun Israel ang lowu tuh. Iro bohaum ahkan ngolawan Yesus Jihpon-Mu ijo borasih rih; ijo jari ihko potuotoh monjadi Lahca Ponyolamat. 4:28 Iro hihco ahkan nguan kokaro aang'co, ijo Ihko jari nyodiaoh labih houn, jarih ahkan nyolung. Tutang Ihko nahtap orih isun kowasa tutang kokani-Mu bongom. 4:29 Huntuh, Tuhan, nohtorih koloukuwoh iro ngahtap ihkai. Tutang ngijinohrih ihkai jihpon-jihpon-Mu tuh mborihta Kabar Hinut-Mu hawui eam mihkoh. 4:30 Nongaohrih pondohop-Mu mangat ulun poros tonopios, tutang tandahelan-tandahelan hawui hal-hal ijo luar biasa nyolung, nguha kowasa tutang koba'as tahkan aran Yesus, Jihpon-Mu ijo Borasih rih." 4:31 Ulijadi iro tondo bodo'a, unuk iro mohcon rih tonyuhkuh iro paringoh konowasa bain Roh Pohotala tutang nopara nuhtui homboh bohanyi tu'u mborihta tohou Kabar Hinut tahkan Pohotala. 4:32 Paring ulun ijo porocaya rih bolum hihcoahtoi hihcohomboruanoh. Eam aro ihcobehti ka tahkan iro ngohu ijo inon, ijo io tepuioh, anai aiuoh bongoi. Paring aang'co ijo anai aang iro, paring iro hapaoh sama-sama. 4:33 Honong kowasa ijo, hajo rasul-rasul rih nonga kosaksian ijo Yesus jari bolum hoduli. Mahka Pohotala mborehkat iro. 4:34 Tutang eam aro ihcobehti ka tahkan louk iro anai kotahpas ino-inon. Mahka iro ijo tepun tana ata'ai lohpou, iro modagang tana ata'ai lohpou rih; turus duitoh tahkan podagang rih iro ngitot, 4:35 tutang iro nyorahoh ahkan rasul-rasul. Pongohino duit rih magioh ahkan nyinong ulun ijo poruluoh. 4:36-37 Kodorih ka'a umba Yusep. Io ka modagang tana aiuoh, turus duit ponjualan rih io ngitot tutang nyorahoh ahkan rasul-rasul. Yusep rih anai ihcobehti lihit Lewi tahkan Siprus; rasul-rasul ngohawot io Barnabas (rimai Ngonjorih).
5:1 Tahpi anai ihcobehti bahkas bogare Ananias. Io tutang oruhoh bogare Sapira, modagang ihcokolambar tana ain doro. 5:2 Duit ponjualan tana rih, ihcokobagi iro nyuhukoh tutang ihcokobagi tonyorahoh ahkan rasul-rasul. Io nguan gawi rih ngota'an oruhoh. 5:3 Mahka Petrus nuhtui umba io, "Ananias, ombai ihko mohanouoh sehtan ngowasaoh ahtoi'mu nyiring ihko ngobalik ahkan Roh Pohotala, honong tonih-tonih monahan ahkan arop'mu bongom ihcokobagi tahkan duit ponjualan tana rih? 5:4 Tana rih ihko tehpui hounumba ihko modagangoh. Tutang uli tana rih ponodagang ka, duitoh magun ihko tehpui ka'a. Jadi ombai anai konohuang ahtoi'mu ahkan nguan aang kolouorih? Bohkon ulun, ijo ihko ngobalikoh tahpi Pohotala!" 5:5 Kodorih Ananias ngonih auhtuhtui orih, io bolukang, turus mahtoi. Paring ulun ijo ngonih tohou angnyolung rih uras mihkoh. 5:6 Mahka ulun-ulun biou lombut mukus otun Ananias turus ngitotoh soluka ahkan ngolowongoh. 5:7 Kira-kira tolu jamkowa pongohuli oruhoh lombut nyolong. Io eam ngota'an inon ijo punai nyolung. 5:8 Petrus nuhtui umba io, "Cuba nuhtui ahkak'ku: Inon tana ijo ihko tutang bosai'mu modagang rih, karon tuh ih legaioh?" "Tu'u orih legaioh," mutah oruh Ananias. 5:9 Turus Petrus nuhtui umba io, "Ombai ihko hawui bosai'mu bohaum ahkan nikos Roh Pohotala? Ngonihrih tuh! Ulun-ulun ijo ngolowong bosai'mu jari buli. Iro ahkan ngitot ihko nokuh konaha ka'a." 5:10 Kotihka rih ka'a oruh Ananias rih bolukang tutang, mahtoi ang baun Petrus. Tutang uhun orih ka'a ulun-ulun biou rih nyolong iro nyundou io ka'a jari mahtoi. Turus iro ngitot otui soluka lowu tutang ngolowong io, mambai lowong bosaioh. 5:11 Mahka paring ulun-ulun ijo porocaya rih tutang ulun-ulun bohkonoh ijo jari ngonih tohou ang'co nyolung rih uras mihkoh. 5:12 Tului pohalu rasul-rasul, mahka aro kahtahelan tutang hal-hal ijo molobien nyolung ang louk ulunaro. Hawui hihcoahtoi paring ulun porocaya hopuhpung ang Saoh Solomo ang Lohpou Tuhan. 5:13 Tutang ulun luar eam aro ijo bohanyi lombut hopuhpung umba ulun-ulun ijo porocaya rih. Tahpi ulun-ulun porocaya rih paham tonohoromat bain ulunaro. 5:14 Tutang sasar tahi mahi botambah aro, ulun-ulun ijo porocaya ahkan Tuhan -- pios bahkas oluka bawi. 5:15 Sasar koada'ai monjadi kodorih kolou, nyiring ulun-ulun poros konina ang isun katir ata'ai kacang, turus ngitot nokuh jalan, ahkan iro paling isut tou kona kolingon Petrus, amat Petrus nyihing ang anai. 5:16 Moru-morung ulun-ulun lombut tahkan lowu-lowu kodiling Yerusalem. Iro ngitot ulun-ulun poros tutang ijo sonalung roh ja'at. Tutang ulun-ulun rih konopios paringoh. 5:17 Kojoriai imam hajo tutang paring injah-jolahaioh, yorih barih ulun-ulun Saduki, nopara botindak, tului iro hiri ahtoi. 5:18 Rasul-rasul rih tonawan turus posolongoh koluwang sipir ulunaro. 5:19 Tahpi ngolomi, ihcobehti molehkat Tuhan nguap bauntukang-bauntukang sipir turus ngomin rasul-rasul soluka. Molehkat orih nuhtui umba rasul-rasul rih, 5:20 "Kuatrih, tombok ang Lohpou Tuhan tutang monyiar ahkan ulun-ulun tohou pombolum ijo bohua tuh." 5:21 Mahka rasul-rasul rih ka numbun potoh molehkat rih. Homboh ngokos samasino iro tulak nokuh Lohpou Tuhan tutang nopara majar ang anai. Pondehan orih imam hajo tutang dolang ponokawanoh lombut, turus napa pupung bosara umba dolang okon Yahudi. Pongohino iro nyuhu ulun tulak ngomin rasul-rasul rih, tahkan sipir ahkan tongitot toharep iro. 5:22 Tahpi uhun ulun-ulun ijo sonuhu rih johcok ang sipir, iro eam nyombang rasul-rasul ang anan. Jadi iro buli mander hal orih ahkan majelis. 5:23 "Aang kotihka ihkai johcok ang sipir," hion iro umba majelis, "ihkai nyombang bauntukang sipir rih konuci pios-pios, tutang ponjaga-ponjaga tahtap monjaga aang bauntukang. Tahpi aang ohkot ihkai nguapoh bauntukang rih, ihkai eam nyombang ihcobehti ang luwangoh." 5:24 Kotihka komandan ponokawan Lohpou Tuhan tutang imam-imam kopala ngonih tuhtui rih iro torongong tohou rasul-rasul, tutang mihkoh ahkan inon ijo tou nyolung. 5:25 Pongohino lombut ihcobehti bahkas ngomin kabar tuh, "Ngonihoh ihkam! Ulun-ulun ijo Tuan-tuan posolong ang sipir rih, uhuntuh beteng majar ulun aro ang Lohpou Tuhan!" 5:26 Mahka komandan ponokawan Lohpou Tuhan rih tutang karon-ponokawanoh tulak ngomin rasul-rasul rih huli. Tahpi iro eam hapa kokaras, tului iro mihkoh umba ulun aro; ara-ara ulun aro rih noin mukah iro umba bahtu. 5:27 Rasul-rasul rih konomin nyolong noharep bosara. Turus imam hajo moriksa iro. 5:28 Io nuhtui, "Ihkai jari baca ihkam honong karas mangat ara majar tohou Ulun rih. Tahpi uhuntuh cuba nohto inon ijo ihkam nguai! Ihkam nyiar pongajaran'mu rih, ang sohapus Yerusalem, tutang ihkam malah kani ndawa ijo ihkailah ijo kotuluioh popahtoi Ulun rih." 5:29 Petrus tutang rasul-rasul ijo bohkon mutah, "Ihkai harus numbun konohuang Pohotala tutang eam numbun konohuang ulun kolunon. 5:30 Yesus ijo ihkam tomahpakoh rih bolum hoduli tahkan popahtoi, bain Pohotalan tahtu ajuh ihto. 5:31 Tutang Pohotala jari nonga ahkai-Oh ponuot tutang kowasa ijo isung monjadi Okon tutang Ponyolamat; mangat uhtus Israel tononga kosapet ahkan hubah tahkan dusa-dusaoh, tutang ngonduon pongapunan. 5:32 Ihkai tuh saksi-saksioh tohou paring orih rih -- ihkai tutang ka'a Roh Pohotala ijo tononga bain Pohotala ahkan ulun-ulun ijo numbun poretah-Oh." 5:33 Kotihka okon-okon Majelis Agama ngonih auh orih, iro sangit samasino tutang iro hopahkat ahkan munu rasul-rasul rih. 5:34 Tahpi ang louk okon-okon majelis rih anai 'cobehti parisi araioh Gamaliel. Io guru agama ijo paham tomohoromat bain paring ulun. Io tombok turus monyuhu ulun ngomin rasul-rasul rih soluka honjulu. 5:35 Pongohino io nuhtui umba okon-okon Majelis Agama rih, "Konduang-konduang, ulun-ulun Israel! Nirukrih moro-morong tohou inon ijo ahkan konduang-konduang nguaioh umba ulun-ulun tuh. 5:36 Tului houn jari pu'u lombut Teudas ijo ngohu aropoh ulun hajo, nyiring kira-kira ohpat ratus behti monjadi muridoh. Tahpi io tomunu, tutang paring muridoh bilang-bahas, hawui pihak iro ka nihou. 5:37 Ulimba rih, aang ohkot anai pongihtung ulun Israel, lombut Yudas ulun tahkan Galilea. Kotolui pongarohoh, aro ka'a ulun ijo mihak io. Tahpi io ka'a tomunu tutang paring murid-muridoh bilang-bahas. 5:38 Jari huntuh, umba ang'conyolung rih ahku ningak ihkam, iorih: Ara nguan ino-inon toharep ulun-ulun tuh nouhoh iou iro. Tului amat ajaran tutang pihak iro tuh anairih tahkan kolunon, mahka ajaran tutang pihak iro rih ahkan nihou. 5:39 Tahpi amat orih lombut tahkan Pohotala mahka Konduang-konduang eam ahkan dahpot ngalahoh iro. Malah tou ahkan gihtan ijo Konduang-konduang molawan Pohotala." Tingak Gamaliel rih tonorima bain Majelis. 5:40 Mahka rasul-rasul rih tona'ah, turus ponahcat, pongohuli iro tobaca ngajar hino tohou Yesus, ulijari punan iro konoliwusoh. 5:41 Rasul-rasul nohtah Majelis Agama rih tutang hawui kojorih tului Pohotala jari ngohu iro harus ahkan dahpot hinaan kotului Yesus. 5:42 Tutang nyinong ondou iro ang Lohpou Tuhan tutang ang lohpou-lohpou ulun, iro hototurus ngajar tutang mborihta Kabar Hinut tohou Yesus ijo Io Lahca Ponyolamat ijo tonombowot rih.
6:1 Murid-murid Yesus sasar tahi sasar mondahang aro. Aang ohkot rih ulun-ulun Yahudi ijo hapa basa Yunani, monjadi eam sanang toharep ulun Yahudi asli. Ijo basa Yunani rih nuhtui, "Bawin-bawin ihkai ijo jari balu eam duonbagian pondohop ukus nyinong ondou ijo tomagi-magioh ahkan ulun-ulun." 6:2 Bain tului orih koduobalas rasul rih muhpung paring murid tutang nuhtui umba iro, "Eam pios amat ihkai tondo mborihtaoh Kabar Hinut auh Pohotala, tului harus ngurus soal-soal ukun. 6:3 Jadi pios Konduang-konduang ngopili tahkan louk ihkam pihtu behti ijo anai aran morong, konowasa Roh Pohotala tutang piosbosara, ijo duon ihkai nyuhuoh mongurus soal-soal tuh; 6:4 tului ihkai kani bodo'a tutang mborihtaoh auh Pohotala iou." 6:5 Paring ulun rih, sotuju umba tuhtui tahkan rasul rih. Turus iro mitih Stepanus, ihcobehti ijo porocaya sasino umba Yesus, tutang konowasa Roh Pohotala. Ka'a konopili: Pilipus, Prokhorus, Nikanor, Timon, Parmenas tutang Nikolaus tahkan Antiokhia; io eam ulun Yahudi, ijo nyolong agama Yahudi. 6:6 Kopihtu ulun rih, tongusul umba rasul-rasul mondo'a iro, turus rasul-rasul rih bodo'a tutang nyawotoh borehkat Tuhan ahkan iro. 6:7 Kolouorihrih Kabar Hinut tahkan Pohotala mahi-mahi tosiar nokuh tutang murid-murid Yesus ang Yerusalem ka mahi mondahang. Tutang aro hino imam-imam ijo porocaya ahkan Yesus. 6:8 Stepanus paham toborehkatoh bain Pohotala, nyiring io nguan aro kahtahelan tutang hal-hal luar biasa, ang louk ulunaro. 6:9 Tahpi anai ulun-ulun ijo ngolawan io; iro anairih anak-ukup ijo konohawot Lohpou Sombayang Ulun Bebas. Anak-ukup ulun ang lohpou sombayang rih, anai ulun-ulun Yahudi tahkan Kirene tutang Aleksandria. Iro homboh ulun-ulun Yahudi tahkan Kilikia tutang Asia hotokiantiruk umba Stepanus. 6:10 Tahpi iro eam duon monjawab, inon ijo konohawot bain Stepanus, kotului Roh Pohotala nonga ahkai kopiosbosara ahkan nuhtui kodorih. 6:11 Bain tului orih iro nonga suruk ahkan pira-pira ulun ahkan nuhtui, "Ihkai ngonih ulun tuh ngonja'at Museh tutang Pohotala!" 6:12 Kodorihrih iro ngihit ulun aro tutang okon-okon Yahudi tutang guru-guru agama. Turus iro tulak nawan Stepanus, pongohino ngitot io noharep Majelis Agama. 6:13 Tutang iro potohimo ka'a saksi-saksi ijo nonga kotorangan-kotorangan ijo eam tu'u tohou Stepanus. Saksi-saksi rih nuhtui, "Ulun tuh toturus ngonja'at Lohpou Tuhan ijo borasih tutang mohina poretah-poretah Pohotala ijo nuhtui bain Museh. 6:14 Ihkai jari ngonih io nuhtui: ijo Yesus tahkan Nasaret rih ahkan morusak Lohpou Pohotala tuh, turus ngubah paring hadat ijo nonga Museh ahkan ihto!" 6:15 Paring ulun ijo anai tuot ang sidang Majelis Agama rih uras nuneng Stepanus. Tutang aang ohkot orih baun Stepanus, topahjahoh kolou baun molehkat Tuhan.
7:1 Imam hajo ngisok Stepanus, "Inon paring aang tonuhtui ulun-ulun rih tu'u?" 7:2 Stepanus nuhtui, "Konduang-konduang tutang Amai-amai! Cuba ngonih ahku! Sounumba tahtu ajuh ihto Abraham hatun nokuh Haran ang ohkot io magun mohcon aang Mesopotamia, Pohotala ijo tonohoromat lombut nokuh io 7:3 tutang nuhtui, 'Nohtahohrih lowun'kam tutang aring-konduang'kam. Tulakrih nokuh lowu ijo ahkan Ahku nunjukoh ahkan'kam.' 7:4 Abraham nohtah lowu Kasdim, turus hatun nokuh Haran. Uli amai Abraham mahtoi. Pohotala nyuhu Abraham mindah nokuh lowu tuh, ijo Konduang-konduang hawui Amai-amai paring mohcon ohtoi huntuh tuh. 7:5 Aang ohkot orih eam aro 'cokabagi ka tahkan tana lowu tuh ijo Pohotala nonga ahkan Abraham tutang monjadi ain Abraham; ihco tahpapa'a mahieamaro tononga ahkaioh. Tahpi Pohotala hobowot ijo Pohotala nonga ahkan Abraham ahkan monjadi ain Abraham hawui lihit-lihitoh. Ohkot orih Abraham eam aro tepun anak. 7:6 Tahpi tuhrih ijo tonuhtui Pohotala ahkaioh, 'Lihit'mu ijo ahkan mohcon ulun bohkonuhtus ang lowun ulun bohkon. Ulun-ulun lowu rih ahkan monjajah iro tutang monyangitnguan iro honong kejam nyiring ohpat lohtus toun kotahiu. 7:7 Tahpi Ahku ahkan mohukum uhtus ijo hojihpon iro, tutang iro ahkan soluka tahkan lowu orih tutang nyembah Ahku ang unuk tuh.' 7:8 Uli nuhtui kolouorih kahut bowot rih tono-sah bain Pohotala, umba upacara sunat. Mahka uli Isaak anak Abraham konanak, Abraham nyunat io ang ohkot io umur jolu ondou. Pongohino Isaak nyunat ka'a anakoh, iorih Yakub. Tutang Yakub ka'a nyunat duo balas anakoh, ijo monjadi amai-amai tahtu ajuh'kam uhtus Yahudi. 7:9 Amai-amai laluhur ihto rih ngobohu umba Yusep nyiring iro modagang io monjadi jihpon ang Misir. Tahpi Pohotala homboh io, 7:10 tutang moliwus io tahkan kokaron kosusahoh. Pohotala nonga ahkai hadat tutang kopios bosara aang ohkot io noharep Parou lahca Misir, nyiring Parou potuot io monjadi gubernur lowu Misir tutang ngowasa istana Parou. 7:11 Pongohuli nyolung ihco wayah, lo'u ijo hajo lombut, hopus tana Misir tutang Kanaan, nyiring ulun ngarot samasino. Tahtu ajuh ihto eam tou duon ukun. 7:12 Mahka kotihka Yakub ngonih anai gandum ang Misir io nyuhu bola-anakoh, tahtu ajuh ihto tulak nokuh anan bagi pahtuk tikat. 7:13 Ohkot iro tulak ang koduo tikatoh Yusep nyorihta aropoh ahkan Konduang-konduang orih rih ijo iorih Yusep. Punanoh ohkot rih lahca Misir ngota'an tohou injahjolahan Yusep. 7:14 Pongohino Yusep ngirim kabar ahkan amaioh, iorih Yakub, unuk nyawot io, tutang sohapus injah-jolahai, hantun nokuh Misir -- paringoh anai pihtu pulu limo behti karon'ndo. 7:15 Mahka Yakub hahtun nokuh Misir tutang aang anan io tutang tahtu ajuh ihto mahtoi. 7:16 Otun iro pongohino rih omin huli nokuh Sikhem tutang tonolowongoh ang tanom ijo jari tomoli umba sojumbalah duit bain Abraham tahkan lihting uhtus Hemor ang Sikhem. 7:17 Kotihka jari doni ohkotoh Pohotala monyolung bowotoh umba Abraham, uhtus ihto ang Misir, jari sasar mondahang aro. 7:18 Kojoriaioh ihcobehti lahca bohkon, ijo eam ngosono Yusep ijo moretah ang Misir. 7:19 Lahca rih ngoahcam umba uhtus ihto tutang kejam toharep tahtu ajuh ihto. Io maksa iro dian anaklonga iro ijo bohua konanak, mangat sorata turus mahtoi. 7:20 Aang wayah orihrih ka'a Museh konanak; io anaklonga ijo bohinoi kolouoh. Tolu potion kotahiu, io ponosuhuk ulun okooh ang lohpou'ndo, inai-amaioh, 7:21 tutang uli io dian'ndo, putri Parou ngomin io, turus mohaga io kolou anakoh bongoi. 7:22 Karon ilmu uhtus Misir uras duoi tahkan ulun Misir ijo tomara ahkaioh tutang io monjadi ulun ijo paling bokowasa a'ang tuhtui tutang konuai-konuaioh. 7:23 Ohkot Museh umur ohpat pulu toun, lombut kojolikoh a'ang ahtoioh, kani tulak nohto koada'an uhtusoh ulun Israel. 7:24 Turus io nohto ihcobehti tahkan iro konoporos bain ihcobehti Misir; mahka io dohop ulun ijo konoporos rih tutang munu ulun Misir rih. 7:25 Museh ngohu uhtusoh ahkan solembang ijo Pohotala rahat hapa io ahkan morodehka iro. Tahpi korinah iro eam solembang. 7:26 Ngohkosoh io nohto hino duo behti ulun Israel hokolahi, turus Museh ngurah jalan mongobuah iro, io nuhtui, 'Ihkam tuh hokonduang! Ombai ihkam sama arop hokolahi?' 7:27 Tahpi ulun ijo nahup injah orih nyuhung Museh nokuh saro turus nuhtui, 'Iai ijo potuot ihko monjadi okon tutang okon ihkai? 7:28 Kuwoh ihko kani munu ahku ka'a kolou ihko munu ulun Misir orih malom?' 7:29 Kotihka Museh ngonih inon ijo tonuhtui bain ulun rih, Museh hahtun tahkan Misir, turus mohcon ang lowun ulun Midian. Ang anan io dahpot duo behti anak. 7:30 Ohpat pulu toun uliorih, ihcobehti molehkat Tuhan lombut nokuh Museh ang padang bolambah doni Puruk Sinai. Molehkat rih lombut ang luwang baho ang ruwut ijo rahat ngonjelak. 7:31 Museh helan nopahjah hal orih, nyiring io tulak doni-doni, mangat ngota'an inon orih. Turus io ngonih auh Tuhan nuhtui, 7:32 'Ahku Pohotalan tahtu ajuh'mu. Ahku Pohotalan Abraham, Isaak, tutang Yakub.' Museh ngorukuh mihkoh nyiring eam bohanyi hino nopahjah nokuh ruwut rih. 7:33 Pongohuli Tuhan nuhtui hino, 'Nguhkoioh sorupah'mu ijo hapan'mu rih, tului ang tana unuk ihko tombok rih, anai tana ijo borasih. 7:34 Ahku jari nohto tutang nohtoani, kopoitoh kokarot uhkup-Ku ang Misir. Ahku jari ngonih komunguh iro tutang Ahku nosuluh ahkan momorodehka iro. Uhuntuh, olai! Ahku ahkan nyuhu ihko buli nokuh Misir.' 7:35 Museh tuh, Museh ijo eam tongahku bain uhtus Israel tutang ijo tonulak hapa auh tuh, 'Iai ijo potuot ihko monjadi okon tutang hakim ihkai?' Tahpi kodorih iorih ulun, ijo sonuhu Pohotala monjadi okon tutang ponyolamat, honong pondohop tahkan molehkat ijo lombut ahkai, ang ruwut ijo ngonjelak rih. 7:36 Museh rih ijo okon uhtus Israel soluka tahkan tana Misir honong nguan tandahelan-tandahelan tutang hal-hal molobien ang Misir, aang Tasik Bohandang, tutang aang padang bolambah kotahin ohpat pulu toun. 7:37 Io rih ka'a Museh ijo nuhtui umba uhtus Israel, 'Pohotala ahkan nonga ahkan'mu ihcobehti nabi, ijo konopili tahkan aang louk ihkam bongom, sama kolou Io jari ngopili ahku.' 7:38 Musehrih ijo ang tohun uhtus Israel ang padang bolambah monjadi poholat ahkan molehkat ijo pander umba io ang Puruk Sinai, umba tahtu ajuh ihto. Iorih ijo norima tahkan Pohotala kabar ijo bolum, ahkan tonosiar ahkan ihto. 7:39 Sinoka kodorih tahtu ajuh ihto eam kani te'et umbaoh. Iro nulak io tutang jolik buli nokuh Misir. 7:40 Iro nuhtui umba Aron, 'Nguanrih dewa-dewa ahkan 'kai, mangat dewa-dewa rih monjadiokon ihkai. Tului ihkai jari eam kota'an hino, inon ijo nyolung umba Museh rih ijo ngomin ihkai soluka tahkan Misir!' 7:41 Turus aang ohkot orih iro nguan sopundu anak sahpi, pongohuli iro nyorah porahpah ahkan sopundu rih. Tutang nguan pesta, ahkan mohoromat ramu tapan longon iro bongoi. 7:42 Mahka Pohotala nohtah iro tutang mohonau iro nyembah potion-potion ang langit. Orih sorurui umba inon ijo tonyurat ang buhku nabi-nabi. Koloutuh, 'O, ulun-ulun Israel! Eam ahkak-Ku, ihkam nyombolih tutang porahpah ohcinkombolum kotahin ohpat pulu toun ang padang bolambah. 7:43 Kemah dewa Molokhrih ijo ihkam ngomiou-ngomiouoh hombo-homboh umba hopahtung, pation dewa'mu, iorih Refan; orih rih hopahtung ijo ihkam napa ahkan tonyembahoh. Bain kotului orih rih Ahku ahkan dian ihkam nyiring mahcu nokuh pohoi ang lowu Babel.' 7:44 Kemah unuk Pohotala lombut ahkan ulun tosombang ang tahtu ajuh ihto ang padang bolambah. Kemah rih tonapa numbun poretah Pohotala ahkan Museh tutang numbun sutuoh, ijo pokarah Pohotala ahkan Museh. 7:45 Pongohino kemah rih konomin toturusoh bain tahtu ajuh 'to, aang ohkot iro umba Yosua tulak ngorabut lowun ihto tuh, tahkan kowasaan uhtus-uhtus ijo tomuko Pohotala ang toharep iro. Kemah rih anai ang anan johcok jaman Dawid. 7:46 Dawid ijo monyanang ahtoi Pohotala tutang nyawot umba-Oh, mangat io tongijinoh napa ihco lohpou ahkan Pohotala ijo tonyembah Yakub rih. 7:47 Tahpi Solomorih ijo nombok lohpou ahkan Pohotala. 7:48 Olukodorih Pohotala Ijo Mahaisung eam mohcon ang luwang lohpou ihco tonapa ulun; tului ang luwang buhku nabi tonyurat koloutuh, 7:49 'Langit anairih pododusan-Ku, tutang tana lahpik tapa-Ku. Lohpou inonrih ijo kani ihkam nombokoh unuk-Ku? Aang umoh unuk Ahku nondobo'o-Ku? 7:50 Eamkah Ahku bongok ijo jari ngonjorianoh karon aang'co?' Kodorihrih hion Pohotala. 7:51 Eam inon komahang kuhung ihkam Konduang-konduang tutang kodorih kopura-pura ihkam te'et umba Pohotala! Tolingan'kam borengen samasino toharep auh Pohotala! Ihkam sama umba tahtu ajuh'kam toturus molawan Roh Pohotala! 7:52 Kuwoh anai ihcobehti nabi ijo eam konoporos bain tahtu ajuh'kam? Iro munu soruhan-soruhan tahkan Pohotala ijo jaman houn lomoi jari monyiar ijo Jihpon Pohotala ijo morong rih ahkan lombut. Tutang huntuh ihkam ngarana tutang munu Jihpon Pohotala rih. 7:53 Molehkat-molehkat jari monyiar poretah-poretah Pohotala ahkan'kam, tahpi ihkam eamkani numbuioh!" 7:54 Kodorih okon-okon Majelis Agama rih ngonih paringoh ijo tonuhtui bain Stepanus, iro poros ahtoi tutang sangit samasino umbaoh. 7:55 Tahpi Stepanus ijo jari konowasa bain Roh Pohotala nopahjah nokuh langit. Io nohto kohajon Pohotala tutang Yesus tombok ang unuk kowasa ang hila kotoun Pohotala. 7:56 "Nohto," hion Stepanus, "ahku nohto soruga bokuap tutang Anak Ulun tombok ang hila kotoun Pohotala!" 7:57 Okon-okon majelis rih nuhtup tolingan'ndo hawui ngoriak, turus hombo-homboh nyarang Stepanus. 7:58 Iro ngomin io bolua lowu turus mukah io umba bahtu. Ulun-ulun ijo monyaksi angijonyolung rih nyorah hahtiu aang'cobehti biou ijo bogare Saulus. 7:59 Pondehan iro mukah Stepanus umba bahtu, Stepanus na'ah, "Tuhan Yesus norimaoh roh'ku!" 7:60 Turus io suhkuntu'ut homboh na'ah hajo tu'u, "Tuhan ararih dusa tuh tonyombaharih nokuh isun iro!" Opah nuhtui kodorih io bolukang palus.
8:1 Tutang Saulus jorih ka'a ngosan popahtoi orih. Ondou orih ka'a ukup-ukup ang Yerusalem, nopara tohoduru-duru nyiring paring ulun porocaya kocoali, rasul-rasul rawu-riai nokuh hopus tana Yudea tutang Samaria. 8:2 Ulun-ulun ijo mihkoh umba Pohotala nanom Stepanus tutang nangih io honong paham sedih. 8:3 Tahpi Saulus toturus iou ngurah jalan polonyuh ukup. Io tulak tahkan lohpou nokuh lohpou tutang nguhut soluka ulun-ulun porocaya turus posolong iro nokuh luwang sipir. 8:4 Ulun-ulun porocaya ijo rawu-riai rih mborihta Kabar Hinut tahkan Pohotala rih nokuh umo-umoh ka'a. 8:5 Pilipus tulak nokuh lowu Samaria tutang mborihtaoh, ahkan ulun-ulun tohou Lahca Ponyolamat, ijo tonobowot Pohotala. 8:6 Kotihka ulun-ulun ngonih Pilipus hopander tutang iro nopahjah tandahelan-tandahelan helan ijo konuaioh, aro tahkan iro ijo nohtoani inon ijo tonuhtui bain Pilipus. 8:7 Kotului roh-roh ja'at jari soluka tutang ngoriak-riak tahkan aro ulun ijo sonorupang sehtan. Ulun-ulun bolomu, ulun tihpang ka'a aro ijo konopiosoh. 8:8 Mahka ulun-ulun ang Samaria rih jorih sasino. 8:9 Aang lowu rih anai ihcobehti ulunbahkas bogare Simon ijo pira-pira ohkot kotahiuoh nguan ulun-ulun Samaria torongong ahkan ilmu seheroh. Io ngohawot ahkan iro, ijo io ulun ijo luar biasa. 8:10 Mahka paring ulun ang lowu rih, tahkan paring lapisan ulun aro paham nohtoani io. "Ulun tuh anai koba'as Pohotala ijo bosewut, kolou 'Koba'as Hajo' rih," hion iro. 8:11 Jari tahi tu'u io norongong ulun-ulun umba koba'as sihiroh nyiring iro paham nohtoani io. 8:12 Tahpi Pilipus mborihta ahkan'ndo tohou Kabar Hinut, tohou koloukuwoh Pohotala ahkan moretah kolou lahca, tutang tohou Yesus Kristus Lahca Ponyolamat rih. Mahka iro porocaya ahkan kabar ijo tonyiar bain Pilipus, turus iro ponopondus pios ulunbahkas oluka ulunbawi. 8:13 Simon bongoi ka'a porocaya. Tutang uli ponopondus io turus nutut Pilipus. Tandahelan-tandahelan ijo nyolung, nguan Simon tohelan-helan. 8:14 Rasul-rasul ang Yerusalem ngonih ijo ulun-ulun Samaria jari norima auh Pohotala. Bain tului orih iro nyoruhan Petrus tutang Yohanes nokuh anan. 8:15 Kotihka Petrus tutang Yohanes johcok, iro bodo'a ahkan ulun-ulun Samaria rih mangat, iro ngondahpot Roh Pohotala, 8:16 tului Roh Pohotala jaha lombut ngowasa ihcobehti ka tahkan iro; iro punan ponopondus aang aran Tuhan Yesus iou. 8:17 Turus Petrus doro Yohanes nginaoh longoi iro ngosan kuhung ulun-ulun Samaria rih; mahka iro norima Roh Pohotala. 8:18 Amat Simon nohto ijo tului longon rasul-rasul nginaoh ngosan ulun-ulun Samaria rih, Roh Pohotala tononga ahkan iro. Tului orih Simon ngomin duit ahkan Petrus doro Yohanes, 8:19 turus nuhtui, "Nonga ahkak'ku kowasa rih ka'a, mangat amat longok'ku konina ang iai iou, ulun rih ahkan norima Roh Pohotala." 8:20 Tahpi Petrus mutah, "Colahkarih ihko tutang duit'mu! Ihko ngohuoh ponongan Pohotala duon ponoli umba duit? 8:21 Ihko earo hak ahkan umba ang nguan gawin ihkai, tului ahtoi'kam eam morong toharep Pohotala. 8:22 Tului orih nohtahohrih kohondak ahtoi'mu kolouorih ijo ja'at rih tutang nyawotrih umba Tuhan mangat Io ngapun tirukahtoi'mu ijo ja'at orih! 8:23 Tului ahku kota'an ihko tuwi umba kohiri ahtoi, tutang tonojihpon bain koja'at." 8:24 Turus Simon nuhtui umba Petrus tutang Yohanes, "Dohop nyawot umba Tuhan mangat eam ihco ka tahkan ijo Konduang-konduang nuhtui orih nyolung ang ahku." 8:25 Uli Petrus tutang Yohanes nonga kosaksian tutang mborihta auh Tuhan, Petrus doro Yohanes buli nokuh Yerusalem. Tutang aang ponjolanan iro mborihta Kabar Hinut rih ang aro lowu-lowu Samaria. 8:26 Ihcobehti molehkat Tuhan nuhtui umba Pilipus, "Has, hihkas! Tulak nokuh hila solahtan, nokuh jalan ijo nyambung Yerusalem umba Gasa." Jalan rih tonih. 8:27-28 Mahka Pilipus rih hihkas. Aang ohkot rih anai ihcobehti pogawai istana Etiopia ijo rahat a'ang ponyalai buli nokuh lowuioh. Ulun rih 'cobehti pogawai isung ijo mongowasa botanggung-jawab ngosan paring ponahtou Kandake, rahtu lowu Etiopia. Ulun rih jari tulak nokuh Yerusalem mangat sombayang ahkan Pohotala, tutang huntuh, rahat io buli hapa kolehtakuda. Pondehan tuot ang kolehtaoh rih, io mbasa surat Nabi Yesaya. 8:29 Roh Pohotala nuhtui umba Pilipus, "Tulak ngondoni kolehta orih rih." 8:30 Mahka Pilipus tulak ngondoni kolehta kuda rih, turus io ngonih ulun rih mbasa Buhku Nabi Yesaya. Pilipus ngisok umba io, "Kuwoh Tuan solembang umba ijo Tuan mbasaoh rih?" 8:31 Ulun rih mutah, "Koloukuwoh ahku solembang, amat eam aro ulun ijo monarangoh ahkak'ku?" Turus io ngonin Pilipus jahkat kolehtaoh tutang tuot doni io. 8:32 Tuh io ayat ijo konomasaoh rih, "Io kolou tobiri ijo onin ahkan tonyombalih, kolou anak tobiri ijo eam ngoriak amat buluioh tonguting, kodorih ka'a io eam nuhtui ihco kotihkap auh ka. 8:33 Io tongorana tutang konuan hawui eam adil. Hasong-Oh tonguhut tahkan isun tana nyiring ihcobehti ka, eam anai ijo duon mander tohou uhtus lihit-Oh." 8:34 Pogawai isung tahkan Etiopia rih nuhtui umba Pilipus, "Cuba nyorihtaoh ahkak'ku, iai ijo hion nabi tuh? Aropoh bongoi ata'ai ulun bohkon?" 8:35 Mahka Pilipus ka nopara pander; io hapa ayat-ayat rih kolou pahtuk ahkan mborihta Kabar Hinut tohou Yesus ahkan pogawai isung rih. 8:36 Ang beteng jalan iro johcok ihco unuk ijo tohko danumoh. Pogawai isung rih nuhtui, "Topahjah orih anai danumoh! Inon hino ijo magun kurang ahkan mopondus ahku?" 8:37 Pilipus nuhtui, "Amat Tuan porocaya umba kotuwi ahtoi, Tuan tou ponopondus." "Ahku porocaya Yesus Kristus orih Anak Pohotala" hion pogawai isung tahkan Etiopia rih. 8:38 Turus pogawai isung rih nyuhu potondo kolehtaoh, pongohuli iro duo Pilipus tutang pogawai rih, nyohowu nyolong 'kan luwang danum tutang Pilipus mopondus io. 8:39 Kotihka iro bolua tahkan aang danum, Roh Pohotala ngomin Pilipus tahkan anan. Pogawai isung tahkan Etiopia rih eam nohto Pilipus hino. Homboh kojorihoh pogawai isung rih noturus ponyalaioh. 8:40 Songolata'an Pilipus jari anai ang Asdod. Tutang kotihka io noturus ponomuoioh io mborihta Kabar Hinut tohou Yesus ang paring lowu nyiring johcok ang Kaisarea.
9:1 Pondehan orih Saulus turus ih jolik ngoporos tutang munu murid-murid Tuhan Yesus. Io tulak nokuh imam hajo, 9:2 tutang nyawot surat kowasa ahkan tulak nokuh okon-okon lohpou sombayang ulun Yahudi ang Damaskus, mangat amat io sombang ang anan ulun-ulun ijo porocaya umba Yesus, io tou nawan iro, turus ngomin iro nokuh Yerusalem. 9:3 Pondekan nihtu nokuh Damaskus kotihka jari doni umba lowu rih, songela anai koloang tahkan langit ngorolondang ang kodiling Saulus. 9:4 Io ngonyahtu kotana turus ngonih auh nuhtui umba io, "Saulus! Saulus! Inon kotuluioh ihko ngoporos Ahku?" 9:5 "Iairih Ihko Tuan?" hion Saulus mutah. Auh rih mutah, "Ahkurih Yesus ijo ihko nyorataoh. 9:6 Tahpi huntuh kuatrih, tombok tutang turus ih nokuh lowu. Aang anan ahkan tonyorihtarih ahkan'kam, inon ijo harus ihko nguaioh." 9:7 Ulun-ulun ijo umba hombo-homboh Saulus tokohcit nyiring eam duon pander; tului iro ngonih auh orih, tahpi iro eam nohto 'cobehti ulun ka. 9:8 Turus Saulus kuat tutang ngomilat mahtaioh, tahpi mahtaioh jari eam tou nohto ino-inon hino. Jadi iro nambit longoi tutang niting io nyolong nokuh Damaskus. 9:9 Tolu ondou kotahiu io eam tou nohto, tutang kotahin orih io eam kuman ata'ai ngorih samasino. 9:10 Ang Damaskus anai ihcobehti murid Tuhan Yesus arai Ananias. Ang sino ponohto Tuhan nuhtui umba io. Tuhan nuhtui, "Ananias!" "Ahku Tuhan!" Ananias mutah. 9:11 Tuhan nuhtui, "Has ihko hihkas huntuh. Tulak nokuh lohpou Yudas ang Jalan Bujur. Ngisok ang anan ulun ijo bogare Saulus ijo asaroh tahkan kota Tarsus. Ulun rih beteng bodo'a, 9:12 tutang ang ponopahjahoh io nohto ihcobehti ulunbahkas bogare Ananias lombut nokuh io tutang ngina longoi ang ngosanoh mangat io duon nohto hoduli." 9:13 Ananias mutah, "Tuhan ahku jari aro ngonih ulun pander tohou ulun tuh, pahtukoh tohou sorahta-sorahta ijo io nguai tohimo ukup-Mu ang Yerusalem. 9:14 Tutang huntuh io jari lombut 'kan ohtoi, duon ijin tahkan imam-imam kopala, ahkan nawan paring ulun ijo porocaya umba Tuhan." 9:15 Tahpi hion Tuhan umba Ananias, "Tulak ih! Tului Ahku jari ngopili io ahkan mborihta tohou Ahku ahkan uhtus-uhtus ulun bohkon, ijo eam nambit Agama Yahudi tutang ahkan lahca-lahca hawui ahkan ukup Israel ka'a. 9:16 Tutang Ahku bongok ahkan ngorinah ahkaioh, paring sorata, ijo harus io nginyam kotului Ahku." 9:17 Mahka Ananias tulak nokuh lohpou rih tutang ngina longoi ang ngosan Saulus, "Konduang Saulus," hion Ananias, "Tuhan Yesus ijo Konduang nohto ang beteng jalan kotihka Konduang rahat ahkan ohtoi, Iorih ijo nyuhu ahku lombut, mangat ihko duon nohto hino tutang tongowasa bain Roh Pohotala." 9:18 Uhun rih ka'a anaiangihco kolou singap ohcin botahak tahkan mahtan Saulus tutang io duon nohto hoduli. Mahka io ka kuat, turus ponopondus. 9:19 Tutang ulirih kuman, io monjadi ba'as hino. Saulus mohcon ang Damaskus, umba murid-murid Yesus pira-pira ondou kotahiuoh. 9:20 Io turus tulak nokuh karon-lohpou sombayang tutang nopara mborihtaoh ijo Yesus orihrih Anak Pohotala. 9:21 Paring ulun helan ngonih borihta Saulus. Iro nuhtui, "Eamkah io ijo ang Yerusalem jari munu paring ulun ijo porocaya umba Yesus? Io lombut nokuh ohtoi kopuna unuk nawan tutang ngomin iro ahkan imam-imam kopala!" 9:22 Tahpi Saulus sasar ba'as pongarohoh. Tanda-tanda ijo io nyorihtaoh tohou Yesus kodorih moyakinoh ijo Yesus rih Lahca Ponyolamat, nyiring ulun-ulun Yahudi ijo mohcon ang Damaskus eam duon samasino molawan. 9:23 Uli nokolou pira-pira ohkot kotahiuoh ulun Yahudi bohaum kani munu Saulus. 9:24 Tahpi rancana'ndo ta'an bain Saulus. Hondou homalom iro ngindoi ang bauntukang kotalowu Damaskus ahkan munu io. 9:25 Aang sino ngolomi murid-murid Saulus ngomin io, posuluhoh umba tali ang koranjang, nguha diang kotalowu rih. 9:26 Saulus tulak nokuh Yerusalem tutang aang anai io ngurah jalan pohihco aropoh umba murid Yesus. Tahpi iro mihkoh umba io, tului iro jaha porocaya ijo io moro-morong ius monjadi murid Yesus. 9:27 Pongohino Barnabas lombut nyombang Saulus, turus ngomin io nokuh rasul-rasul. Barnabas pander ahkan iro koloukuwoh Saulus nohto Tuhan ang beteng jalan, tutang koloukuwoh Tuhan nuhtui umba io. Barnabas mander ka'a, tohou koloukuwoh bohanyioh Saulus majar tutang bopander ang Damaskus hapan aran Tuhan Yesus. 9:28 Mahka orih Saulus mohcon umba iro, tutang bosaksi honong komotongoh ang hopus lowu Yerusalem hapan aran Tuhan Yesus. 9:29 Saulus hopander tutang hojawab ka'a umba ulun-ulun Yahudi ijo hapa basa Yunani, tahpi iro ngurah jalan munu io. 9:30 Kotihka ulun-ulun porocaya ijo bohkon ngota'an tohou hal orih, iro ngomin Saulus nokuh Kaisarea, pongohuli ngirim io nokuh Tarsus. 9:31 Mahka ukup-ukup ang hopus Yudea, Galilea tutang Samaria nyolung boranai. Aang pondohop Roh Pohotala, homboh mihkoh umba Tuhan ukup-ukup rih botambah ba'as tutang mondahang aro. 9:32 Petrus tulak nokuh umo-umoh masap ukup-ukup. Aang ihco ondou io masap ukup Tuhan ijo mohcon ang Lida. 9:33 Ang anan io hosombang umba ihcobehti bahkas bogare Eneas, ijo mahtoibehtiu tutang eam duon io kuat-kuat tahkan unuk kalingoh kotahin jalu toun. 9:34 Petrus nuhtui umba Eneas, "Eneas, Yesus Kristus kani ngopios ihko. Kuat tutang ngohtun unuk kaling'mu rih." Ohkot rih ka'a Eneas kuat. 9:35 Paring ponduduk lowu Lida tutang Saron nohto Eneas, turus iro paringoh porocaya umba Tuhan. 9:36 Ang Yope anai ihcobehti ulunbawi bogare Tabita. Io ihcobehti ulun ijo porocaya umba Tuhan Yesus. (Araioh aang bahasa Yunani, iorih Dorkas, ijo rimaioh uhcang.) Io toturus ih nguan hal-hal ijo pios, tutang ndohop ulun porosbolum. 9:37 Aang ohkot rih io mondam turus mahtoi. Uli otuioh tongopondus numbun hadat, otuioh ponokaling ang tahkun ijo ang diang. 9:38 Yope eam pira kokahcui tahkan lowu Lida. Jari ang ohkot murid-murid Yesus ang Yope ngonih Petrus anai ang Lida, iro nyuhu duo behti tulak nokuh Petrus homboh pohtoh tuh, "Jele-jeleng lombut nokuh ohtoi." 9:39 Petrus turus tulak hawui homboh iro. Kojohcokoh ang anan, io konomin iro nokuh tahkun ijo ang diang. Paring balu ang anan ngorumbung Petrus tutang nangih, tutang pokarah ahkaioh hahtiu-hahtiu, tulang jubah-jubah ijo tonusuk Dorkas ahkan iro ohkot io magun bolum. 9:40 Petrus nyuhu iro paringoh soluka, turus Petrus nehku tu'utoh tutang bodo'a. Pongohuli io nohimo otun Dorkas tutang nuhtui, "Tabita, monyun!" Mahka Dorkas nguap mahtaioh, tutang kotihka io nohto Petrus, io turus tuot. 9:41 Turus Petrus nambit longoioh, tutang dohop io tombok. Pongohino rih Petrus na'ah ulun-ulun ijo porocaya ang anan homboh umba balu-balu rih, turus nyarah Dorkas ijo jari bolum huli rih ahkan'ndo. 9:42 Kabar tohou angjadi rih tosiar nokuh hopus Yope, nyiring aro ulun porocaya umba Yesus kolou Lahca Ponyolamat ahkan'ndo. 9:43 Petrus mohcon ang anan pira-pira ondou hino ang lohpou ihcobehti ponyamak uhpak ohcin ijo bogare Simon.
10:1 Ang Kaisarea anai ihcobehti bahkas bogare Kornelius. Io ihcobehti kapten "Posukan Italia." 10:2 Io ulun ijo mihkoh umba Pohotala tutang koparing jolahaioh sombayang ahkan Pohotala. Io aro dohop ulun-ulun Yahudi ijo porosbolum tutang io toturus bodo'a nokuh Pohotala. 10:3 Aang ihco ondou kira-kira jam tolu hondou io nohto botatu, a'ang sino ponopahjahoh, ihcobehti molehkat Pohotala lombut tutang na'ah io, "Kornelius!" hioi. 10:4 Kornelius nopahjah molehkat rih honong mihkoh turus nuhtui, "Anai inon Tuan?" Molehkat rih nuhtui, "Do'a'mu, tutang kotounbosara ahtoi'mu jari tonorima bain Pohotala tutang Pohotala ingat umba'mu. 10:5 Uhuntuh nyuhurih ulun tulak nokuh Yope na'ah Simon ijo arai urasoh Simon Petrus. 10:6 Io rahat mohcon ang lohpou ihcobehti ponyamak uhpakohcin bogare Simon, mohcon ang saran tasik." 10:7 Uliius molehkat rih ijo bopander umba Kornelius rih hihkas, Kornelius na'ah duo behti pohalu ijo ang lohpouoh, tutang ihcobehti sorodadu ponjagaoh ijo borasih. 10:8 Kornelius nuhtui ahkan'ndo inon jo jari nyolung, turus nyuhu iro nokuh Yope. 10:9 Aanghawun ondouoh kotihka iro beteng jalan tutang kani sapai ang Yope, Petrus nuhkat nokuh isung lohpou ahkan bodo'a. 10:10 Turus Petrus bolo'u samasino tutang jolik kuman. Pondehan ukun jaham tahtap, io duon sino topahjah. 10:11 Io nohto langit bokuap tutang aang'co kolou benang ijo lumbah tomosuluh nokuh tana, anai tali aang ohpat puhtingoh. 10:12 Ang luwangoh anaisombang aro mahcom ohcin hopa'a ohpat kokaron ohcin nyoli tutang bulung-bulung ijo pomolos. 10:13 Turus anai auh nuhtui umbaoh, "Petrus Kuat! Nyombolihrih tutang kumaioh!" 10:14 Petrus mutah, "Eam Tuhan! Jaha pu'u ahku kuman ino-inon ijo pali ata'ai kojilok." 10:15 Tahpi auh orih nuhtui hino umba io, "Inon ijo jari tonuhtui borasih bain Pohotala, ara ihko ngohuoh kojilok." 10:16 Topahjahoh rih dulangduli, nyiring tolu tikat, pongohino benang rih tonguhut nokuh soruga. 10:17 Petrus torongo-rongong niruk riman tahkan topahjahoh rih. Pondehan Simon Petrus niruk ang orih, ulun-ulun ijo nyuhu bain Kornelius, sombang lohpou Simon, tutang iro jari anai ang baun bauntukang. 10:18 Turus iro na'ah ulun ang lohpou turus ngisok "Kuwohkah ang ohtoi anai bohkonuhtus ijo nginap ijo bogare Simon Petrus?" 10:19 Pondehan Simon Petrus magun iou turus ngurah kosolembang riman tahkan tonopahjahoh rih. Roh Pohotala nuhtui umba io, "O Petrus, anai tolu behti rahat ngurah ihko. 10:20 Has jion nosuluh nokuh pinda tutang ara bimbang homboh iro, tului Ahku ijo nyuhu iro." 10:21 Mahka Petrus nosuluh nokuh pinda tutang nuhtui umba ulun-ulun rih, "Ahku tuh io ijo Konduang-konduang ngurah. Konduang-konduang lombut ahkan inon?" 10:22 Iro mutah, "Kapten Kornelius nyuhu ihkai nokuh ohtoi. Io ihcobehti ijo hinut tutang mihkoh umba Pohotala, tutang paham tomohoromat bain paring ulun Yahudi. Ihcobehti molehkat Tuhan nyuhu io nyawot tuan masap nokuh lohpouoh, tului kolou putah ngosan do'aoh io sonuhu ngonih, inon ijo ahkan Tuan nuhtui ahkaioh." 10:23 Mahka Simon Petrus nyuhu iro nyolong ahkan nginap ang anan. Ngohkosoh Petrus monyun tutang tulak homboh iro. Pira-pira ulun porocaya tahkan Yope ka homboh ka'a. 10:24 Ihcoondou ulimba iro johcok lowu Kaisarea. Ang anan iro jari tongindoi bain Kornelius homboh karo ari-konduang tutang injah jolahai, aringoh ijo jari ponaraoh. 10:25 Kotihka Petrus johcok, Kornelius tulak naharang io hawui nehku suhkuntu'utoh nyembah ang toharep Petrus. 10:26 Tahpi Petrus dohop io tombok huli turus nuhtui, "Tombok! Ahku bongokka kolunon ka'a." 10:27 Pondehan hopander umba Kornelius, Petrus turus nyolong lohpou. Ang anan io nohto aro ulun jari hopuhpung. 10:28 Turus Petrus nuhtui umba iro, "Konduang-konduang, bongon kota'an, ijo ulun Yahudi ngahana bain agamaoh ahkan masap ata'ai hihco umba ulun-ulun tahkan uhtus bohkon. Tahpi Pohotala jari pokarah ahkak'ku, ijo ahku eam tou ngohuoh iai ka'a kojilok tutang pali. 10:29 Orih kotuluioh, kotihka Tuan nyawot mangat ahku lombut, ahku eam bahat anyamoh lombut. Jari huntuh ahku, jolik kota'an ombai Tuan-tuan nyawot ahku lombut." 10:30 Kornelius nuhtui, "Tolu ondou ijo soun, kira-kira aang ohkot koloutuh ahku rahat bodo'a ang lohpou, aang jam tolu cohit. Songela ihcobehti bahkas tombok ang tohimo'ku pokahjan ulun orih rih ngorolinjap. 10:31 Io nuhtui, 'Kornelius! Pohotala jari norima do'a'mu tutang mingat ahkan kopiosbosara ahtoi'mu. 10:32 Jadi nyuhurih ulun nokuh Yope na'ah ulun ijo bogare Simon Petrus. Io rahat mohcon ang lohpou ihcobehti ponyamak uhpakohcin ijo bogare Simon, lohpouoh doni saran tasik.' 10:33 Orih kotului orih ahku jion, nyuhu ulun tulak na'ah tuan. Tutang Tuan tu'u-tu'u ulun hinut ahtoi kani lombut nokuh ohtoi. Huntuh ihkai paring hopuhpung ang ohtoi ang tohimo Pohotala, ahkan ngonihoh paring ijo Pohotala nyuhu Tuan nuhtuioh, ahkan ihkai." 10:34 Turus Petrus hopander, "Uhuntuh ahku tu'u-tu'u borondong ijo Pohotala eam mihtihkolou paring ulun. 10:35 Ulun ijo mihkoh ahkan Pohotala, tutang nguan ijo morong ulun orihrih tonorima bain Pohotala, eam poduli io tahkan uhtus inon. 10:36 Konduang-konduang jari kota'an usin borihta ijo Pohotala johcokoh ahkan uhtus Israel. Borihta orih, anairih Kabar Hinut tohou kobuah nguha Yesus Kristus, yorih Tuhan paring ulun. 10:37 Ihkam kota'an inon ijo jari nyolung ang hopus Yudea, yorih ijo nopara tahkan Galilea uliumba popondus ijo sonuhu bain Yohanes. 10:38 Ihkam ngota'an ijo Pohotala jari mitih Yesus ulun Nasaret rih tutang nonga ahkai-Oh roh Pohotala tutang kowasa, Ihkam kota'an ka'a ijo Yesus rih, tulak nokuh umo-umoh ahkan nguan ijo hinut; Io ngopiosoh paring ulun ijo tongowasa sehtan, tului Pohotala jari homboh Io. 10:39 Ihkai tuh ulun-ulun ijo jari nohto bongon aang'co, ijo Io nguaioh ang lowun ulun Yahudi tutang ang Yerusalem. Oluka kodorih iro mahpakoh tutang munu Io. 10:40 Tahpi aang ondou ijo tolu Pohotala ngomonyunoh Io hino tahkan popahtoi, tutang ngorinah Io ahkan ulun; 10:41 eam ahkan paring ulun, molekan tihkas ahkan ihkai ijo jari tongopili bain Pohotala, labih soun, ahkan monjadi saksi-saksi-Oh: ihkai kuman hawui ngorih umba Io, uliius Io monyun tahkan popahtoi. 10:42 Tutang Io nyuhu ihkai mborihta Kabar Hinut rih ahkan ulun-ulun tutang nonga kosaksian, ijo Io rih jari konahtang bain Pohotala, monjadi hakim ulun-ulun ijo magun bolum, tutang ulun-ulun ijo jari mahtoi. 10:43 Paring nabi-nabi momander tohou Io. Iro nuhtui ijo paring ulun ijo porocaya umba Yesus, ahkan duonapun dusaoh honong kowasa tahkan Yesus." 10:44 Pondehan Petrus magun nuhtui Roh Pohotala nosuluh tutang ngowasa paring ulun ijo ngonih kabar orih. 10:45 Ulun-ulun Yahudi ijo porocaya umba Yesus, tutang iro ijo jari homboh Petrus masap Kornelius rih tahkan Yope paringoh helan, nohto Pohotala nongaoh ka'a Roh-Oh ahkan ulun-ulun uhtus bohkon ijo eam Yahudi. 10:46 Tului iro ngonih ulun-ulun rih hopander a'ang aro-mahcam auh tutang monara-nara kohajon Pohotala. Turus Petrus nuhtui, 10:47 "Cuba nohtooh, ulun-ulun tuh jari norima Roh Pohotala kolou ihto. Jari dahpotrih ulun ngapeng-ngapeng iro ahkan tonopondus umba danum?" 10:48 Mahka Petrus nyuhu iro ponopondus umba danum ngosan aran Yesus Kristus. Uliorih rih iro nyawot umba Petrus mohcon hihco iro pira-pira ondouhino kotahiuoh.
11:1 Rasul-rasul tutang ulun-ulun ijo porocaya ahkan Yesus ang sohopus Yudea ngonih ijo ulun-ulun, ijo eam boagama Yahudi ka jari norima auh Pohotala. 11:2 Pongohuli Petrus tulak nokuh Yerusalem ulun-ulun Yahudi ka ijo jari porocaya ahkan Yesus rih mosalan Petrus. 11:3 Iro nuhtui ahkan Petrus, "Ombai ihko tulak nokuh lohpou ulun-ulun ijo eam tonyunat? Nyiring ihko kuman ka'a homboh umba iro!" 11:4 Bain tului rih Petrus nonga monyorihtaoh ahkan'ndo paringoh ijo jari nyolung nopara tahkan pahtukoh Petrus nuhtui, 11:5 "Ahku rahat bodo'a ang lowu Yope turus ahku nohto ihco pongorinah. Ahku nopahjah anai angihco kolou ihcokolambar benang bolambah, ponosuluhrih tahkan langit, tonokuak aang ohpat putingoh, pongohuli tondo ang silan ahku. 11:6 Ohkot ahku nokilik nokuh luwangoh ahku nohto ohcin-ohcin hopa'a ohpat, ohcin-ohcin molos, ohcin-ohcin ijo nyoli, ohcin-ohcin naang ijo molos. 11:7 Turus ahku ngonih ihco auh nuhtui ahkak'ku, 'Has kuat Petrus! Nyombolih orih tutang, kumai!' 11:8 Tahpi ahku mutah, 'Eam, Tuhan! Jaha pu'u ahku kuman ukun ijo kojilok tutang pali.' 11:9 Tahpi auh orih nuhtui hino tahkan langit, 'Ramu ijo jari tongorinah borasih bain Pohotala ararih ihko ngohawotoh kojilok.' 11:10 Ahku nohto hal rih nyiring tolu tikat tutang kojoriaioh paringoh hogahtang hoduli nokuh soruga. 11:11 Tohorong aang ohkot orih ka'a, kototolu behti tahkan Kaisarea ijo sonuhu nokuh ahku, ang lohpou unuk ahku mohcon. 11:12 Turus Roh Pohotala nyuhu ahku tulak homboh iro hawui eam bimbang. Koonom behti Konduang tuh ka'a, umba homboh ahku nokuh Kaisarea, tutang ihkai paringoh nyolong nokuh luwang lohpou Kornelius. 11:13 Pongohino Kornelius nyorihta ahkan ihkai, koloukuwoh io nohto ihcobehti molehkat tombok ang lohpouoh tutang nuhtui, 'Nyuhu ulun nokuh Yope na'ah ihcobehti bahkas bogare Simon Petrus. 11:14 Io ahkan monyorihta ahkan'kam borihta ijo ahkan monyolamat ihko tutang injah-jolahan'mu.' 11:15 Tutang aang ohkot ahku nopara nuhtui kodorih," kolouorih Petrus noturusoh sorihtaoh, "Roh Pohotala lombut ka'a ngosan iro, sama kolou ijo nyolung aang ihto lomoi aang pahtukoh. 11:16 Turus ahku ingat Tuhan nuhtui, 'Yohanes mopondus umba danum, tahpi ihkam ahkan ponopondus umba Roh Pohotala.' 11:17 Jari botarang Pohotala nongaoh ka'a ahkan ulun-ulun ijo eam nambit agama Yahudi rih, pononga ijo sama, ijo Io nongaoh ahkan ihto aang ohkot ihto porocaya umba Tuhan Yesus Kristus. Tului orih kuwoh tou ahku ngohana Pohotala!" 11:18 Ulirih ngonih auh orih iro eam nosalan io hino. Turus iro monara Pohotala. Iro nuhtui, "Amat kolouorih ulun-ulun bohkon Yahudi ka tononga kosapet bain Pohotala ahkan hubah tahkan dusa-dusan iro tutang ngenang pombolum ijo sojahti!" 11:19 Uliius Stepanus tomunu, ulun-ulun ijo porocaya umba Yesus nopara tohoduru-duru, nyiring iro rawu-riai nokuh umo-umoh. Anai ijo nokoru dahpot nokuh Penisia, tutang anai hino ijo johcok Siprus tutang Antiokhia. Iro mborihta kabar tahkan Pohotala tihkas ahkan ulun-ulun Yahudi iu. 11:20 Tahpi tahkan louk ulun-ulun porocaya rih, ijo asar tahkan Siprus tutang Kirene, anai ka'a ulun-ulun ijo tulak nokuh Antiokhia tutang mborihta Kabar Hinut tohou Yesus rih, ahkan ulun-ulun ijo eam nambit agama Yahudi ka'a. 11:21 Kowasa Tuhan anai ang iro, nyiring aro ulun monjadi porocaya tutang nyarahoh arop ahkan Tuhan. 11:22 Sorihta-sorihta tohou ang'conyolung-ang'conyolung tuh johcok ka'a ahkan ukup ang Yerusalem. Mahka iro nyuhu Barnabas nokuh Antiokhia. 11:23 Tutang kotihka Barnabas johcok ang anan, tutang nohto koloukuwoh Pohotala mborehkat ulun-ulun rih, io jorih samasino. Turus io nyawot mangat iro tu'u-tu'u bokehtep umba Tuhan hawui kotuwi ahtoioh. 11:24 Barnabas tuh ulun ijo hinut ahtoioh tutang konowasa bain Roh Pohotala hawui paham porocaya umba Tuhan, nyiring aro ulun nutut Tuhan. 11:25 Pongohino Barnabas tulak nokuh Tarsus ngurah Saulus. 11:26 Uliius io nyombang umba Saulus, io ngomin Saulus nokuh Antiokhia, tutang ihco toun tuwi, iro hopuhpung umba ukup aang anan sambil majar aro ulun. Ang Antiokhia orihrih ulun-ulun ijo porocaya umba Yesus aang pahtuk tikat konohawot Ulun-ulun Kristen. 11:27 Aang uhun orih anai pira-pira nabi lombut tahkan Yerusalem nokuh Antiokhia. 11:28 Ang loukoh anai ihcobehti bogare Agabus. Tului hojojuan Roh Pohotala io nuhjum, ijo ang hopus kolunon ahkan nyolung wayah bolo'u ijo paham. (Tutang hal rih tu'u nyolung ka'a, aang ohkot Kaisar Klaudius moretah.) 11:29 Mahka paring murid Yesus rih pahkat ahkan ngirim pononga ahkan konduang-konduang ijo mohcon ang Yudea; nyinong-behti nonga numbun koduonoh. 11:30 Kopahkat rih iro molalusoh ka'a, turus Barnabas tutang Saulus sonyuhu ahkan ngihtot pononga rih ahkan okon-okon ukup.
12:1 Aang wayah orih ka'a Lahca Horodes nopara mohenyek anak-anak ukup. 12:2 Ngosan poretahoh Yakobus, konduang Yohanes tomunu umba padang. 12:3 Kotihka Horodes nohto ijo ang-konuai rih ngojorih ahtoi ulun-ulun Yahudi, io nguai hino ijo kolou orih; io nyuhu ulun nawan Petrus ka'a. Hal rih nyolung ang ohkot Ondou Hajo Luhte Eam Boragi. 12:4 Uli tonawan, Petrus ponosolong'ndo nokuh luwang sipir. Ohpat kokawan sorodadu sonuhuoh ahkan monjaga Petrus ang anan -- nyino-nyinong kokawan anai ohpat behti sorodadu. Uli ondou Pesta Paska hopus, punan Horodes mosara Petrus ang tohimo ulun aro. 12:5 Jadi Petrus tonahan ang sipir; tahpi anak ukup toturus iou bodo'a umba kotu'un ahtoi'ndo ahkan Tuhan nihtu Petrus. 12:6 Aang ngolomi houn umba Horodes ahkan mosara Petrus aang tohimo ulun aro, Petrus tiruh tomanga umba duo koliting ratai ang holang duo sorodadu ponjaga. Ang bauntukang sipir ponjaga-ponjaga bohkon ka'a sama monjaga sipir. 12:7 Solenga molehkat Tuhan tombok ang anan tutang ihco koloang ngorolondang luwang kamar sipir. Molehkat rih nigung-nigung Petrus nyiring io monyun. Turus molehkat rih nuhtui, "Olai jeleng monyun!" Uhun rih ka'a ngonyahtu ratai bosi tahkan longon Petrus. 12:8 Uliorih molehkat rih nuhtui, "Kehpan hahtim tutang mohtong tali sorupah'mu." Mahka Petrus kehpan hahtiuoh tutang mohtong tali sorupahoh. Pongohuli molehkat rih nuhtui hino, "Kehpan jubah'mu tutang nututrih ahku." 12:9 Mahka Petrus nututoh molehkat rih soluka tahkan sipir. Tahpi Petrus eam borondong, ijo inon ijo rahat konuan bain molehkat rih, anairih, angihco ijo tu'u-tu'u nyolung. Petrus ngohu orih ponopahjahoh budas. 12:10 Aang ohkot iro jari nyihing unuk pojagaan ijo pahtukoh tutang ijo koduo, iro johcok bauntukang sonaman ijo nihtu lowu. Bauntukang rih bokuap honong bongoi, turus iro soluka tutang nyalan nyuru ijo jalan koik. Solenga molehkat rih nohtah Petrus. 12:11 Uliorih punan Petrus borondong, ahkan inon ijo jari nyolung aang io; turus io nuhtui, "Huntuh ahku kota'an ijo Tuhan tu'u-tu'u jari ngirim molehkatoh ahkan moliwus ahku tahkan kowasa Horodes tutang tahkan dolang aangihco ijo ahkan konuan bain uhtus Yahudi umba ahku." 12:12 Uliorih io borondong umba koada'ai rih, Petrus turus tulak nokuh lohpou Maria inai Yohanes ijo konohawot ka'a Markus. Aang anan aro ulun hopuhpung tutang rahat bodo'a. 12:13 Petrus ngahtok bauntukang konaha, turus ihcobehti jihpon bawi bogare Rode nokuh kani nguap bauntukang. 12:14 Turus io kosono auh Petrus. Kotului kojorihoh, io jele-jeleng nyolong huli eam sahpet nguap bauntukang turus mborihta ahkan ulun-ulun ang anan, ijo Petrus anai ang kanaha. 12:15 "Ihko gila!" hion iro. Tahpi Rode jua-juan ka, ijo orih puna tu'u Petrus. Mahka hion'ndo, "Orih molehkatoh!" 12:16 Pondehan orih, Petrus toturus ngahtok bauntukang. Mahka kotihka iro nguap bauntukang, tutang nohto Petrus, iro helan samasino. 12:17 Petrus nonga tanda umba longoi, mangat iro benyem, pongohuli io monyorihta, koloukuwohoh Tuhan jari ngomin io soluka tahkan sipir. Turus io nuhtui, "Nyorihta ohrih tuh ahkan Yakobus tutang Konduang-konduang bohkon ka'a." Uliorih Petrus nohtah unuk rih tutang tulak ahkan unuk bohkon. 12:18 Ngokos hawunoh, nyolungrih koboho ang louk sorodadu ponjaga rih. Iro torongong samasino tohou inon ijo jari nyolung umba Petrus. 12:19 Turus Horodes nyuhu ulun ngurah Petrus, tahpi iro eam tou nyombang io. Jadi Horodes moretah mangat sorodadu ponjaga rih tongisok turus munu iro. Uliorih Horodes tulak tahkan Yudea tutang mohcon pira-pira ondou ang Kaisarea. 12:20 Horodes sangit samasino umba ulun-ulun Tirus tutang Sidon. Bain tului orih iro hombo-homboh lombut noharep io. Pahtukoh iro ngoto'u Blastus ijo ngopala istana Horodes nyiring io hobarih umba iro. Pongohino iro noharep Horodes turus nyawot hokobuah, tului lowun iro duon ukun tahkan lowun Horodes. 12:21 Ang ihco ondou ijo jari iro tonuhkasoh, Horodes hapa pokahjan hajo lahca, turus tuot ang koruci kolahca'an. Tutang nopara podahtu ang toharep ulun-ulun aro. 12:22 Ulun aro ijo ngonih auh orih iro bosurak, "Jihtuh auh dewa bohkon auh ulun!" 12:23 Aang ohkot rih ka'a molehkat Tuhan napar Horodes, tului io eam nonga horomat ahkan Pohotala. Horodes konukun hondalai turus mahtoi. 12:24 Mahka auh Pohotala sasar konahan ang umoh-umoh tutang mahi ba'as. 12:25 Uli Barnabas doro Saulus ngumbot gawin'ndo iro buli tahkan Yerusalem tutang ngomin Yohanes Markus hombo-homboh iro.
13:1 Ang luwang ukup ang Antiokhia anai nabi-nabi tutang guru-guru iorih Barnabas, Simeon ijo konohawot Anak Mitom, Lukius tahkan Kirene, Menahem ijo tomohajo homboh Lahca Horodes tutang Saulus. 13:2 Kotihka iro rahat sombayang ahkan Tuhan tutang puasa, Roh Pohotala nuhtui umba iro, "Ngopili Barnabas doro Saulus, mbarih ahkak-Ku, mangat iro nguan gawi ijo jari Ahku nuhkasoh ahkan iro." 13:3 Uli bopuasa tutang bodo'a iro ngahtang longoi ang ngosan Barnabas doro Saulus turus nyoruhan doro. 13:4 Tului tonyoruhan bain Roh Pohotala, Barnabas tutang Saulus botulak nokuh Seleukia. Tahkan anan iro bolayar nokuh pulou Siprus. 13:5 Kotihka johcok ang Salamis, iro mborihta auh Pohotala ang lohpou-lohpou sombayang ulun Yahudi. Yohanes Markus dohop iro a'ang ponomuoi'ndo. 13:6 Sohopus pulou rih, iro ngumbangoh johcok nokuh Pafos. Ang anan iro hosombang umba ihcobehti ulun Yahudi, bogare Bar Yesus. Io tuhkang sihir ijo mongahku aropoh nabi. 13:7 Sergius Paulus, gubernur pulou orih, anai jolahan doni umba tuhkang sihir rih. Gubernur rih ulun solembang tutang piosbosara. Io na'ah Barnabas tutang Saulus, tului io jolik ngonih auh Pohotala. 13:8 Tahpi Barnabas tutang Saulus konolapong bain Elimas okon sihir rih, tului Elimas (orihrih araioh ang tuhtui Yunani) ngurah-jalan ahkan gubernur ara nyiring porocaya umba Yesus. 13:9 Tahpi Saulus -- ijo konohawot ka'a Paulus -- konowasa bain Roh Pohotala, nyiring io nopahjah okon sihir rih, 13:10 turus nuhtui, "O pobula tamam, anak jahanam! Ihko musuh kokaron ijo morong. Ombai ihko eam kani tondo morusak rancana Pohotala ahkan nyolamat ulun? 13:11 Huntuh topahjah, Tuhan kani mohukum 'ko! Ihko ahkan monjadi bobulen, nyiring ihko eam duon nohto koloang mahtan ondou hino honjiot ohkot." Ohkot orih ka'a Elimas komo anai la'a ijo mihtom nuhtup mahtaoh, nyiring io nyalan kajang kahkap ngurah ulun ahkan niting io. 13:12 Kotihka gubernur rih nohto inon ijo jari nyolung rih io porocaya umba Yesus; tului io kagum samasino ahkan ajaran tohou Tuhan. 13:13 Tahkan Pafos, Paulus tutang injah-injahoh bolayar nokuh Perga ang Pamfilia. Ang anan Yohanes Markus nohtahoh iro, turus buli nokuh Yerusalem. 13:14 Tahkan Perga iro noturus ponyalan nokuh Antiokhia ang Pisidia, pongohuli ang ondou Sabat iro tulak tuot luwang lohpou sombayang. 13:15 Uliorih Buhku Museh tutang buhku nabi-nabi tonombasa, okon-okon lohpou sombayang rih nyuhu ulun ngisok umba Paulus tutang injah-injahoh, "Konduang-konduang, amat konduang anai angihco nasehat ahkan ulun-ulun tuh, olairih ihkam nyapai nasehat rih." 13:16 Paulus ka tombok, turus nonga tanda umba longoioh, pongohuli nuhtui, "Konduang-konduang'ku uhtus Israel tutang paring konduang-konduang ijo bohkonoh ang ohtoi ijo te'et umba Pohotala! Cuba ngonih auh'ku: 13:17 Pohotala uhtus Israel jari ngopili tahtu ajuh ihto, tutang monjadi uhtus tuh, uhtus ijo hajo, ohkot iro mohcon aang Misir kolou ulun bohkonuhtus. Pongohino tului kowasa ijo hajo, Pohotala ngomin iro soluka tahkan Misir. 13:18 Pohotala sabar toharep hadat-dasar'ndo ang padang balambah ohpat pulu toun kotahiuoh. 13:19 Pihtu uhtus, Io polumusoh tahkan tana Kanaan, mangat mbagi-bagioh tana rih ahkan uhtus Israel, mangat tana rih monjadi ain iro. 13:20 Paringoh rih nyolung ohpat rahtus limo pulu toun kotahiuoh. Ulimba mbagi tana Kanaan rih, Pohotala nongaoh ahkan iro hakim-hakim. Hakim pokolaiuoh iorih Nabi Samuel. 13:21 Pongohino uhtus Israel nyawot ihcobehti lahca. Pohotala nonga ahkan iro Saul anak Kis tahkan lihit uhtus Benyamin, mangat monjadi lahcan iro kotahin ohpat pulu toun. 13:22 Uliorih Pohotala mindah io tahkan ponuotoh, Pohotala potuot Dawid monjadi lahcan iro. Tutang tuhrih ijo tonuhtui Pohotala tohou Dawid, 'Ahku jari sombangoh Dawid anak Isai rih, ihcobehti ijo ngojorih ahtoi-Ku. Iorih ulun ijo ahkan nguanaang konohuang-Ku.' 13:23 Tahkan uhtus Dawid orih Pohotala nahtap ahkan uhtus Israel ihcobehti Lahca Ponyolamat, kolou ijo jari tonobowot-Oh. Tutang Yesus rih Lahca Ponyolamat orih. 13:24 Sounumba Yesus nopara molalus gawiu-Oh, Yohanes jari nyiar ahkan ulun-ulun Israel, mangat iro hubah tahkan dusan iro tutang ponopondus. 13:25 Tutang doni lain gawiuoh, Yohanes nuhtui umba ulun-ulun, 'Iairih ahku tuh numbun tiruk'kam? Ahku eam Ulun ijo konindo-nindoi bain ihkam. Ingat, Ulun orih ahkan lombut uliumba ahku; ahkan nguwat talin soruhpah-Oh ka'a ahku eam pahtut.' 13:26 Konduang-konduang lihit Abraham, tutang paring Konduang-konduang ijo ulun bokonoh, ang ohtoi ijo te'et umba Pohotala! Pohotala jari ngirim ahkan ihto kabar solamat rih; 13:27 tului ulun-ulun ijo mohcon ang Yerusalem, tutang okon-okon iro eam ngota'an ijo Io rih Ponyolamat. Iro eam solembang ajar nabi-nabi, ijo toturus tonombasaoh nyinong ondou Sabat, nyiring iro mohukum Yesus. Tahpi oluka umba nguanoh ijo kodorih, iro kotuluirih inon ijo tonujum bain nabi-nabi jari nyolung. 13:28 Oluka iro eam tou nyombangoh aang'co ka, aang Io ijo pahtut tonohukum umba hukum mahtoi, mahi iro nyawot umba Pilatus mangat Io tomunu. 13:29 Tutang uli iro ohpah nguan paringoh, ijo jari tonyurat ang Surat Borasih tohou Io, iro posuluhoh otuioh tahkan kahju sopolahki turus pokaling otui-Oh aang luwang tanom. 13:30 Tahpi Pohotala jari ngomonyun Io hoduli tahkan popahtoi. 13:31 Pongohino nyinong-ondou kotahiuoh Io lombut tutang ngorinah arop-Oh ahkan ulun-ulun ijo jari lombut umba Io tahkan Galilea nokuh Yerusalem. Iro orihrih ijo huntuh monjadi saksi-saksi bagi Io ahkan uhtus Israel. 13:32 Jari huntuh ihkai tuh ngihtotoh Kabar Hinut rih ahkan ihkam: Inon ijo Pohotala jari nobowotoh ahkan tahtu ajuh ihto, 13:33 orih jari Io nguaioh aang ihto honong ngombolumoh Yesus hoduli tahkan popahtoi. Tului ang luwang Surat Masmur ijo koduo anai tonyurat koloutuh: 'Ihko tuh Anak-Ku, ang ondou tuh Ahku jari monjadi Amai-Mu.' 13:34 Pohotala jari mombolum Io hoduli tahkan popahtoi. Huntuh Io eam ahkan hino nginyam popahtoi ang luwang tanom. Tohou hal orih Pohotala nuhtui, 'Ahku ahkan nonga ahkan-Mu bowot borasih ijo musti nyolung ijo jari Ahku nobowotoh umba Dawid.' 13:35 Kodorih ka'a ang ayat ijo bokon tonuhtui, 'Ihko eam ahkan mohonauoh Jihpon-Mu ijo te'et rih maram ang luwang tanom.' 13:36 Dawid jari mahtoi tutang tongolowong ka'a sama-sama umba tahtu ajuhoh, ulimba io nguan inon ijo Pohotala nyuhu io nguai. Otun Dawid ka ius opah lonyuh paringoh. 13:37 Tahpi Yesus, ijo Pohotala ngombolum hoduli tahkan popahtoi, Yesus rih eam opah lonyuh. 13:38-39 Tului orih Konduang-konduang harusrih ihkam kota'an, ijo nguha Yesus tuh borihta tohou pongapun dusa tonyiarrih ahkan'kam; ihkam harus kota'an, ijo nyinong ulun ijo porocaya umba Io bokuwat tahkan kokaro dusa ijo eam duon ngudapoh nguha poretah-poretah Pohotala ijo nyorihta bain Museh. 13:40 Orih kotuluioh ihkam harus nohtoanioh pios-pios, ara nyiring nyolung aang ihkam, inon ijo bola nabi nuhtui auh tuh, 13:41 'Nohtoani pio-piosoh ihkam ulun-ulun ijo jolik ngonja'at injahoh! Ihkam ahkan gagum, turus mahtoi! Tului ang jaman tuh Ahku rahat nguan ang'co ijo ihkam bongom eam ahkan porocayaoh, oluka anai ulun mborihtaoh ahkan'kam.' " 13:42 Kotihka Paulus doro Barnabas nohtah lohpou sombayang rih, ulun-ulun ang lohpou sombayang rih nyawot iro hoduli hino ang ondou Sabat pongooh, ahkan monarang sambung tohou hal-hal orih. 13:43 Uli ulun-ulun soluka tahkan lohpou sombayang rih, Paulus doro Barnabas konohasu bain aro ulun Yahudi tutang ulun uhtus bohkon ijo jari nyolong agama Yahudi. Mahka rasul-rasul rih ningak iro, mangat iro turus nyikuh ang pononganasi Pohotala. 13:44 Aang ondou Sabat pongooh, nyiring paring ulun ang lowu rih lombut ngonih auh Tuhan. 13:45 Kotihka ulun-ulun Yahudi nohto ulun aro rih, iro hiri ahtoi samasino. Iro ngorana Paulus tutang molawan paring ang tonuhtuioh. 13:46 Tahpi hawui labih bohanyi Paulus doro Barnabas pander torus-tarang. Iro nuhtui, "Auh Pohotala puna harus tonyapai ahkan ihkam houn. Tahpi tului ihkam eam kani norimaoh, ihkam jari nuhkasoh bongom, ijo ihkam eam pahtut norima pombolum sojahti tutang kototahiu. Tutang huntuh ihkai nohtah ihkam, tutang tulak nokuh uhtus bohkon. 13:47 Tului tuhrih poretah Tuhan ahkan ihkai. Tuhan nuhtui, 'Ahku jari ngahtuh ihkam monjadi ihco koloang ahkan ulun-ulun uhtus bohkon ijo eam Yahudi, mangat ihkam mopolombut solamat ahkan paring kolunon.' " 13:48 Ang ohkot ulun-ulun uhtus bohkon ijo eam Yahudi ngonih orih, iro jorih ahtoi samasino, turus monara-nara auh Tuhan. Tutang ulun-ulun ijo jari konahtuh bain Pohotala ahkan norima pombolum sojahti tutang kototahiu, ulun-ulun rih porocaya. 13:49 Tuhtui Tuhan jari ka tosiar nokuh umo-umoh ang hopus tana rih. 13:50 Tahpi okon-okon lowu rih, tutang ulun-ulun bawi tahkan barih ulun-ulun isung ijo mihkoh umba Pohotala, tongihit bain ulun-ulun Yahudi. Iro polombut komusuh toharep Paulus tutang Barnabas, tutang muhko doro tahkan tana rih. 13:51 Mahka rasul-rasul rih nokah awun tapa iro ang toharep ulun-ulun rih ahkan pongingat, turus tulak nokuh lowu Ikonium. 13:52 Murid-murid ang Antiokhia karas jorih tutang konowasa Roh Pohotala.
14:1 Paulus tutang Barnabas nginyam hal ijo sama ang Ikonium. Iro tulak nyolong lohpou sombayang ulun Yahudi tutang pander ang anan, kolouorih kolou nyiring aro ulun Yahudi tutang ulun bohkon Yahudi monjadi porocaya umba Yesus. 14:2 Tahpi ulun-ulun Yahudi ijo eam kani porocaya ngihit ulun-ulun ijo eam ulun Yahudi, nyiring nguan iro ngohiri ulun-ulun ijo porocaya umba Yesus rih. 14:3 Tului orih Paulus tutang Barnabas mohcon tahi ang anan. Tutang honong kohanyi iro nuhtui tohou Tuhan Yesus. Mahka Tuhan ka ngorinahoh ijo kabar bain iro tohou kasih-Oh rih morong; Io nonga ahkan iro kowasa ahkan nguan tandahelan-tandahelan tutang hal-hal luar biasa. 14:4 Tahpi ulun-ulun lowu rih hokolawan ihco umba ijo bohkon; anai ijo kobarih umba ulun-ulun Yahudi, tutang anai ijo kobarih umba rasul-rasul rih. 14:5 Turus ulun-ulun Yahudi umba okon-okonoh hombo-homboh umba ulun-ulun bohkon Yahudi hopahkat ahkan ngoporos tutang muhkah rasul-rasul rih umba bahtu. 14:6 Tahpi rasul-rasul rih borondong umba koada'an orih turus mokila nokuh Listra tutang Derbe, iorih lowu-lowu ang Likaonia tutang nokuh tana hokodilingoh. 14:7 Ang anai iro mborihta hino Kabar Hinut rih. 14:8 Ang Listra anai ihcobehti bahkas ijo pa'aioh bolomu tahkan pahtokoh konanak, nyiring io eam pu'u duon nyalan, tului pa'aioh paham bolomu. 14:9 Ulun rih tuot ang anan ngonih Paulus nuhtui. Paulus nohto ijo ulun rih porocaya, tutang kotului orih io duon konopios. Mahka Paulus nopahjah io 14:10 tutang hawui auh ijo muhing Paulus nuhtui, "Tombok morong!" Ulun rih nokoru tombok turus nyalan. 14:11 Kotihka ulun aro nohto inon ijo ius konuan bain Paulus, iro ngoriak a'ang basa Likaonia, "Dewa-dewa ius mosuluh nokuh kolunon kolou behtin ulun." 14:12 Turus Barnabas iro monggareoh Zeus, tutang Paulus iro monggareoh Hermes, tului Paulus ijo pander. 14:13 Imam dewa Zeus, ijo kuiloh (karamat) anai ang bauntukang lowu lombut ngomin sahpi-sahpi dalung tutang dolak-dolak, nokuh bauntukang lowu. Io kani homboh ulun aro rih nonga pononga ahkan rasul-rasul rih. 14:14 Kotihka Barnabas doro Paulus ngonih, inon ijo kani tononguan bain ulun-ulun rih, iro nisah-nisim hahtin'ndo, iro tombok tohun ulun aro rih turus ngoriak, 14:15 "Oi, ombai ihkam nguanang tuh? Ihkai tuh ulun ka'a, kolou Konduang! Ihkai anai ang ohtoi ahkan mborihta Kabar Hinut ahkan'kam, mangat ihkam nohtah hal-hal ijo eam boguna tuh, tutang ngulos nokuh Pohotala ijo bolum ijo jari naoi langit tutang tana tutang tasik tutang paring ijo anai ang luwangoh. 14:16 Aang wayah ijo nokalou Pohotala mohonou uhtus-uhtus ulun, ijo bolum numbun konohuang iro bongon-bongon. 14:17 Tahpi Io eam nolingou nonga tanda-tanda tohou arop-Oh iorih umba nguan ijo Hinut. Io nonga ahkan'kam uhjan tahkan langit tutang nonga bua tana ang wayahoh. Io nonga ukun ahkan'kam tutang ngojorih ahtoi'kam." 14:18 Tahpi honong auh-auh orih ka magun bohali ka'a rasul-rasul rih, baca ulun-ulun rih, nyarahoh pononga ahkan doro. 14:19 Pira-pira ulun Yahudi ijo lombut nokuh Listra tahkan Antiokhia ang Pisidia tutang tahkan Ikonium mopongaruh ulun aro rih, nyiring ulun aro rih hobarih umba iro. Iro muhkah Paulus hapan bahtu pongohuli nguhut io nokuh luar lowu. Iro ngohuoh io jari mahtoi, 14:20 tahpi kotihka ulun-ulun ijo porocaya ang anan tombok ngodilingoh, io kuat tutang nyolong nokuh lowu. Ngokosoh iro tulak nokuh Derbe homboh umba Barnabas. 14:21 Ang Derbe, Paulus doro Barnabas mborihta Kabar Hinut rih tutang aro ulun nyolung porocaya umba Yesus. Uliorih iro hoduli hino nokuh Listra, pongohino nokuh Ikonium, turus nokuh Antiokhia ang Pisidia. 14:22 Aang lowu-lowu rih iro ngoba'as ahtoi murid-murid Yesus tutang mopingat murid-murid rih porocaya ahkan Yesus, "Ihto harus aro ngarot houn, punan ihto nginyam kosanangoh Ang Kolunon Bohua Pohotala," kodorih rasul-rasul rih majar murid-murid Yesus ang lowu-lowu rih. 14:23 Tutang ang nyino-nyinong ukup, Paulus tutang Barnabas potuot okon-okon ang ukup-ukup rih. Turus hawui bodo'a tutang puasa iro nyarah okon-okon rih ahkan Tuhan ijo iro morocayaoh rih. 14:24 Uliorih rih Paulus tutang Barnabas noturus ponyalan iro nguha tana Pisidia tutang johcok nokuh Pamfilia. 14:25 Tutang uliorih iro mborihtaoh auh Pohotala ang Perga, iro tulak nokuh Atalia. 14:26 Tahkan anai iro bolayar hoduli nokuh Antiokhia. Orih rih lowu unuk iro houn tonosarah ahkan ponongaasi Pohotala, ahkan iro nguan gawi ijo huntuh ius iro ngohpahoh. 14:27 Kotihka johcok ang Antiokhia iro mohaum ulun-ulun tahkan ukup rih, turus mborihta paringoh ijo ius konuan bain Pohotala nguha iro. Iro nyorihta ka'a tohou koloukuwoh Pohotala jari nguap jalan mangat ulun-ulun ijo bohkon Yahudi, porocaya umba Yesus. 14:28 Ang lowu rih Paulus tutang Barnabas mohcon tahi hihco ulun-ulun ijo porocaya.
15:1 Pira-pira ulun tahkan Yudea lombut nokuh Antiokhia tutang majar ulun-ulun porocaya ang Antiokhia rih, ijo amat iro eam tonyunat numbun hukum Museh, iro eam duon solamat. 15:2 Paulus tutang Barnabas ngolawan paham umba tiruk ulun ijo kolourih. Kojoriaioh tonuhkas mangat Paulus doro Barnabas hawui pira-pira ulun bohkon, tahkan Antiokhia tulak nokuh Yerusalem ahkan hotohou masalah orih umba rasul-rasul tutang okon-okon ukup ijo ang anan. 15:3 Ukup ang Antiokhia ngitot iro johcok nokuh luar lowu, pongohino iro tulak nguha Penisia tutang Samaria. Ang anan iro mborihta koloukuwoh ulun-ulun bohkon Yahudi jari nyarah aropoh ahkan Pohotala. Borihta rih paham ngojorih ulun-ulun porocaya ang anan. 15:4 Kotihka iro johcok ang Yerusalem iro noharang honong hinut bain ukup tutang bain rasul-rasul hawui okon-okon, turus iro mborihta ahkan ulun-ulun rih tohou paringoh ijo jari konuan Pohotala nguha iro. 15:5 Tahpi pira-pira ulun tahkan barih Parisi ijo jari porocaya tombok tutang nuhtui, "Ulun-ulun uhtus bohkon, ijo jari porocaya, harus tonyunat tutang nambit hukum Museh." 15:6 Turus rasul-rasul tutang okon-okon hopuhpung ahkan mahkat masalah orih. 15:7 Tahi sino iro pohihco tiruk. Kojoriai Petrus tombok hawui nuhtui, "Konduang-konduang! Ihkam bongon kota'an ang pira-pira ohkot ijo houn Pohotala ngopili ahku tahkan louk ihkam ahkan mborihta Kabar Hinut rih, ahkan ulun-ulun bohkon Yahudi, ahkan iro ka'a ngonih tutang porocaya. 15:8 Tutang Pohotala ijo ngosono ahtoi ulun jari ponokarahoh ijo Io norima iro; Pohotala pokarah hal-hal orih hawui nonga ahkan iro Roh Pohotala, sama kolou ijo jari tononga-Oh ahkan ihto ka'a. 15:9 Pohotala eam ngobohkon ihto umba iro, Pohotala morasih ahtoi iro, tului iro porocaya. 15:10 Orih, inon sababoh ihkam kani ngolawan Pohotala uhuntuh hawui ihkam nonga poretah ijo bahat ahkan murid-murid tuh, padahal tahtu ajuh ihto tutang ihto bongon ka eam sanggup nguanaang orih? 15:11 Sobalikoh, ihto porocaya tutang ihto tonyolamat tului sita asi tahkan Yesus Kristus Tuhan; kodorih ka'a iro." 15:12 Mahka tonihrih paring ulun ijo hopuhpung ang anan. Pongohuli iro ngonih Barnabas tutang Paulus mborihta hoduli paring ang helan tutang hal-hal luar biasa ijo jari konuan bain Pohotala nguha doro ang louk ulun-ulun ijo bohkon Yahudi. 15:13 Uliumba iro opah pander Yakobus nuhtui, "Konduang-konduang! Cuba ihkam ngonih auh'ku. 15:14 Simon punai ih mborihta koloukuwoh Pohotala aang pahtukoh pokarah konohuang-Oh umba ulun-ulun bohkon Yahudi, honong konohuang ngopili tahkan iro ulun-ulun bohkon ijo ahkan monjadi ukup-Oh. 15:15 Orih tohorong umba ijo jari nujum bola-nabi lomoi. Tului anai tonyurat koloutuh, 15:16 'Uliorih Ahku ahkan lombut hino,' hion Tuhan, 'Ahku ahkan nombok huli lohpou Dawid ijo jari bokahkas, tutang ngobuah ijo bokahkas rih, turus nombokoh huli; 15:17 mangat paring ulun ijo putai rih ngurah Tuhan, homboh paring uhtus ijo bohkon Yahudi ijo jari Ahku na'ahoh monjadi ukup-Ku.' Kodorihrih hion Tuhan, 15:18 ijo jari mborihta ang rih pahtukoh lomoi." 15:19 "Jadi numbun tiruk'ku," hion Yakobus, "ihto ara monyusah iro ulun bohkon Yahudi rih, ijo nyarah aropoh ahkan Pohotala. 15:20 Tahpi ihto harus mitik surat ahkan iro, tutang ningak iro ahkan iro ara kuman ukun ijo pali, ijo jari tonyarah ahkan songiang, ata'ai kuman usin ohcin ijo mahtoi mudar, ata'ai kuman daha. Tutang ka'a ahkan iro ngomahcu aropoh tahkan gawi-gawi ijo eam hobahtek kihal. 15:21 Tului hukum Museh jari anai tahkan lomoi konowasa tutang konahan nyinong ondou Sabat ang lohpou-lohpou sombayang tutang mborihta nyinong paring lowu." 15:22 Rasul-rasul tutang okon-okon, hombo-homboh hawui paring anak ukup rih, muhtus ahkan mitih pira-pira ulun tahkan iro ijo ahkan sonuhu nokuh Antiokhia homboh umba Paulus tutang Barnabas. Mahka iro mitih Silas doro Yudas ijo konohawot ka'a Barsabas. Duo behti tuh, anai tahkan ulun-ulun ijo bosewut aang louk ulun-ulun porocaya ang Yerusalem. 15:23 Hombo-homboh umba soruhan-soruhan rih, iro ngirim ka'a ijo surat ijo auhoh naing tuh, "Ahkan paring konduang-konduang ijo asar tahkan uhtus bohkon Yahudi, ijo mohcon ang Antiokhia, Siria tutang Kilikia. Tabe tahkan ihkai, rasul-rasul tutang okon-okon, iorih konduang-konduang'kam. 15:24 Ihkai ngonih anai pira-pira ulun tahkan louk ihkai, ijo jari tulak ahkan'kam tutang nderoh hawui mbingung ihkam, umba ajaran-ajaran iro. Padahal ihkai eam aro nyuhu iro nguan orih rih. 15:25 Orih kotuluioh ihkai bohaum tutang paringoh sotuju ahkan mitih pira-pira behti, tutang nyoruhan iro nokuh ihkam. Iro ahkan tulak hombo-homboh umba konduang ihto Barnabas tutang Paulus ijo ihkai ngasihoh. 15:26 Koduo behti tuh tohko ulun-ulun ijo jari nyarah hasong iro tului Tuhan ihto Yesus Kristus. 15:27 Jadi, ihkai nyuhu Yudas doro Silas nokuh Konduang-konduang. Irorih ijo ahkan nyorihtaoh bongoi hapan pander ahkan'kam borihta ijo tonyurat aang surat tuh ka'a. 15:28 Roh Pohotala jari sotuju -- tutang ihkai ka'a sotuju -- ahkan ihkam ara tononga kopahtut-kopahtut ijo labih bahat tahkan kopahtut-kopahtut ijo puna porulu tuh ih: 15:29 ararih kuman ukun ijo jari tonyarahoh ahkan songiangdewa; ara kuman daha, ara kuman usin ohcin ijo mahtoi mudar, tutang ngomahcu arop'kam umba gawi-gawi ijo eam hobahtek. Amat ihkam ngomahcu arop'kam tahkan hal-hal orih, ihkam jari nguanoh ijo morong. Nyiring tuh iou, solamat!" 15:30 Uli nuhtuitulak iro ijo tonyoruhan rih, tulak nokuh Antiokhia. Ang anan iro na'ah paring anak ukup turus nonga surat rih. 15:31 Kotihka anak-anak ukup ngonih uli ngomasaoh, iro jorih ahtoi, tului auh surat rih ijo nyanang ahtoi'ndo. 15:32 Yudas tutang Silas ijo puna nabi ka'a, tahi tu'u bopander umba Konduang-konduang ijo porocaya ang Antiokhia rih, ahkan nonga koba'as tutang kohanyi ahkan'ndo. 15:33 Ulimba Yudas doro Silas mohcon ang anan pira-pira kotahiu, ulun-ulun porocaya ang Antiokhia rih, ngirim iro buli tutang nyuhu iro nyapai tabe ahkan ulun-ulun ijo nyoruhan iro. 15:34 Tahpi Silas mutus aropoh ahkan mohcon ang Antiokhia. 15:35 Paulus tutang Barnabas ka'a mohcon pira-pira kotahiu ang Antiokhia ang anan iro majar tutang mborihta auh Tuhan hombo-homboh umba ulun-ulun bohkon. 15:36 Eam tahi pongohino Paulus nuhtui umba Barnabas, "Has ihto masap huli Konduang-konduang ijo porocaya umba Yesus ang paring lowu-lowu ang amoh ihto jari mborihta auh Tuhan; mangat ihto nohto koloukuwoh koada'an'ndo." 15:37 Barnabas jolik ngomin Yohanes Markus umba iro, 15:38 tahpi Paulus mokomo eam pios ngomin Yohanes Markus tului io eam kani bogawi homboh umba iro tutang nohtah iro ang Pamfilia. 15:39 Mahka Paulus tutang Barnabas hojawab paham, nyiring laiuoh doro hobomilang: Barnabas ngomin Markus ahkan jolahai nomuoi tutang turus bolayar homboh io nokuh Siprus. 15:40 Paulus mitih Silas, turus tulak umba io, ulijari Konduang-konduangoh ijo anai ang Antiokhia rih, bodo'a nyarah iro ahkan pononganasi pohaga Tuhan. 15:41 Iro ka ngodiling tana Siria tutang Kilikia; ang anan iro ngoba'as koporocayan anak-anak ukup.
16:1 Paulus noturus ponjalanoh nokuh Derbe, ulihino nokuh Listra. Ang anan anai ihcobehti murid Yesus bogare Timoteus, inaioh ihcobehti ulun Yahudi, ijo porocaya umba Yesus; tahpi amaioh ulun Yunani. 16:2 Aang louk ulun-ulun porocaya umba Yesus, ijo mohcon ang Listra tutang Ikonium, Timoteus ulun bosewut kolou ulun ijo morong. 16:3 Paulus jolik mangat Timoteus homboh umba io, tului orih io nyunat Timoteus. Io nguan kodorih tului ulun-ulun Yahudi ang tana rih paringoh ngota'an ijo amai Timoteus ihcobehti ulun Yunani. 16:4 Aang nyino-nyinong lowu ijo iro masapoh, iro nyiar ahkan ulun-ulun ijo porocaya koputusan-koputusan ijo ius tonuhkas bain rasul-rasul tutang karon-okon ukup ang Yerusalem. Iro ningak Konduang-konduangoh ijo jari porocaya rih mangat numbun aturan-aturan rih. 16:5 Mahka anak-ukup rih tambah ba'as koporocayaoh tutang nyinong ondou turus botambah aro jumbalahoh. 16:6 Roh Pohotala, eam mongijin Paulus doro Silas mborihta auh Pohotala ang Propinsi Asia. Jadi ponyalan iro turus nokuh tana Pirigia tutang Galatia. 16:7 Kotihka johcok ang holat Misia, iro cuba nyolong Propinsi Bitinia, tahpi Roh Yesus ngohana iro nokuh anan. 16:8 Jadi iro nihti Misia tutang turus nokuh Troas. 16:9 Homalomoh ang Troas, Paulus nohto ihco pongorinah. Io nohto ihcobehti ulun Makedonia tombok ang toharepoh sambir nyawot honong paham mangat io tulak nokuh Makedonia ahkan dohop iro. 16:10 Uliius Paulus norima topahjah rih, ihkai turus botahta-tahtap ahkan tulak nokuh Makedonia. Tului honong yakin ihkai ngomin koputusan, ijo Pohotala nyuhu ihkai mborihta Kabar Hinut rih, ahkan ulun-ulun ang anan. 16:11 Ihkai nohtah Troas tutang bolayar turus nokuh Samotrake, tutang hawunoh hino nokuh Neapolis. 16:12 Tahkan anan ihkai nokuh Pilipi, ihco lowu ang distrik ijo pahtukoh ang Makedonia. Pilipi anairih ihco jajahan kolahca'an Ruma. Ang anan ihkai mohcon pira-pira ondou. 16:13 Ang ondou Sabat, ihkai tulak nokuh saran sungoi, ijo ang luar bauntukang lowu, tului ihkai komo ang anan anai unuk sombayang ahkan ulun Yahudi. Turus ihkai tuot tutang bopander umba ulun-ulun bawi ijo hopuhpung ang unuk rih. 16:14 Ihcobehti tahkan louk iro anai podagang benang ungu, araioh Lidia tutang asaroh tahkan Tiatira. Io sita Pohotala mahka Roh Tuhan nggerek ahtoioh, mangat io norima inon ijo Paulus ngajar ahkaioh. 16:15 Lidia tutang 'cakojolahan ang lohpouoh ponopondus. Uli ponopondus io morawe 'kai, io nuhtui, "Amat Konduang-konduang komo ahku tu'u-tu'u jari porocaya umba Tuhan Yesus, olai mohcon ang lohpou ehkai." Turus io hojojuan, mangat ihkai kani numbun auh sawotoh. 16:16 Ang sino ondou kotihka ihkai rahat tulak nokuh unuk bodo'a ihkai hosombang umba ihcobehti bawi; iorih jihpon. Ulunbawi rih tongowasa bain roh ja'at, ijo duon ponuneng ang'conyolung-ang'conyolung ijo ahkan lombut. Umba monuneng nasib ulun, bawi rih nonga utung ijo hajo ahkan Tuan-tuanoh. 16:17 Ulunbawi rih turus ih ngohasu Paulus tutang ihkai hawui ngoriak, "Ulun-ulun tuh jihpon Pohotala Ijo Mahaisung! Iro lombut ahkan mborihta ahkan Konduang-konduang koloukuwoh caraoh ihkam duon solamat!" 16:18 Pira-pira ondou kotahiuoh ulunbawi rih turus ngociak-ciak, kodorih Paulus nihou kosabaroh, nyiring io ngulos turus nuhtui umba roh ja'at rih, "Aang aran Yesus Kristus ahku moretah ihko soluka tahkan ulunbawi tuh!" Ohkot orih ka'a roh ja'at rih nohtah ulunbawi rih. 16:19 Kotihka tuan-tuanoh borondong, ijo kosampet iro ahkan dahpot duit jari nihou, iro nawan Paulus doro Silas, turus nguhut doro nokuh alun-alun noharep ijo bokowasa. 16:20 Iro potoharep Paulus tutang Silas ahkan okon-okon pomoretah Ruma, pongohuli nuhtui, "Ulun-ulun tuh, ulun Yahudi. Iro monder ang lowun ihto. 16:21 Iro nyuhu ulun nguan hadat-dasar ijo hokolawan umba hukum-hukum eto ulun Romawi. Ihto eam duon norima ata'ai numbun hadat dasar'ndo!" 16:22 Ulun aro ka umba ngolawan Paulus doro Silas; tutang okon-okon pomoretah, morutat hatin'ndo tahkan behtin kododuo rasul rih turus nyuhu ulun mahcat doro. 16:23 Uliius doro ponahcat monyangit, iro posolong doro nokuh luwang sipir. Kopala sipir nyuhu njaga iro bua-buah. 16:24 Tului poretah rih, kopala sipir rih, ngina iro ang tahkun sipir paling tohun, tutang manga pa'an'ndo aang panga. 16:25 Kira-kira tohun ngolomi kowa Paulus tutang Silas bodo'a tutang monyanyi auh tara ahkan Pohotala. Ulun-ulun tonahan ijo bohkonoh ka rahat ngonih iro monyanyi. 16:26 Songela nyolung tana tonyukuh tana ijo karas samasino, nyiring galang sipir rih taput ka tonyukuh. Paring bauntukang sipir rih bokuap, tutang rahtai-rahtai ijo manga paring ulun ijo nahan ka lohpas. 16:27 Kopala sipir rih tokohcit turus kuat. Kotihka io nohto bauntukang-bauntukang sipir rih bokuap, io nyilak padangoh kani munu aropoh, tului io ngohuoh ulun-ulun ijo tonahan jari nokoru paringoh. 16:28 Tahpi Paulus na'ah muhing auhoh hioi, "Ara munu arop'mu! Ihkai paring anai ang ohtoi!" 16:29 Kopala sipir rih nyawot sumbu turus nokoru nyolong nokuh luwang, hawui nohcot io suhkuntu'ut ang toharep Paulus tutang Silas. 16:30 Pongohino rih io ngomin doro soluka, tutang nuhtui, "Tuan-tuan, inon ijo pahtut ahku nguai, mangat ahku tonyolamat?" 16:31 Paulus tutang Silas mutah, "Porocayarih, umba Tuhan Yesus! Ihko ahkan solamat -- ihko tutang paring ulun ijo ang lohpou'mu!" 16:32 Turus Paulus doro Silas monarang auh Tuhan ahkan kopala sipir tutang ahkan paring ulun ijo anai ang lohpouoh rih. 16:33 Aang tohun ngolomi rih ka'a kopala sipir rih ngomin doro turus muhi tutang nawas dingan doro. Mahka io tutang paring ulun ijo anai ang lohpouoh turus ponopondus. 16:34 Pongohino io ngomin Paulus tutang Silas nokuh lohpouoh tutang nyorungan ukun ahkan doro. Io tutang paring injahjolahai jorih samasino tului iro huntuh porocaya umba Pohotala. 16:35 Hawun ngohkosoh, okon-okon pomoretah Ruma nyuhu polisi nokuh sipir, ahkan nyapai poretah, mangat Paulus tutang Silas konoliwus ih. 16:36 Kopala sipir rih nyorihta hal orih ahkan Paulus. Io nuhtui, "Tuan-tuan pojabat-pojabat pomoretah Ruma jari nonga poretah ahkan moliwus Tuan-tuan. Huntuh Tuan-tuan tou buli. Solamat jalan!" 16:37 Tahpi Paulus nuhtui umba karon-polisi rih, "Ihkai warga nogara Ruma. Earo ponosara ihkai jari ponahcat ang toharep ulun aro, tutang posolong ahkan luwang sipir. Tutang huntuh iro nyuhu ihkai tulak honong toni-tonih? Ihkai eam kani! Nyuhu pojabat-pojabat pomoretah rih lombut bongoi nokuh ohtoi moliwus ihkai." 16:38 Kawan-kawan polisi rih, nuhtui auh ang rih, ahkan pojabat-pojabat pomoretah Ruma. Kotihka pojabat-pojabat pomoretah Ruma rih ngonih, ijo Paulus doro Silas warga nogara Ruma, iro monjadi mihkoh. 16:39 Turus iro nokuh, tutang nyawot apun umba Paulus tutang Silas. Pongohino ngitot doro soluka sipir hawui nyawot umba doro, mangat doro turus tulak nohtah lowu rih. 16:40 Paulus tutang Silas nohtah sipir rih, turus tulak nokuh lohpou Lidia. Uli hosombang umba ulun-ulun porocaya ang anan, tutang nonga koba'as ahkan'ndo, Paulus tutang Silas tulak nohtah lowu Pilipi.
17:1 Paulus tutang Silas noturus ponomuoi'ndo nguha Ampipolis tutang Apolonia turus johcok Tesalonika. Ang anan anai lohpou sombayang ulun Yahudi. 17:2 Mahka Paulus ka tulak nokuh lohpou sombayang rih -- kolou ijo bahutoh io nguaioh amat anai lohpou sombayang ulun Yahudi -- turus hokurah-tiruk umba ulun-ulun ang anan tohou ayat-ayat Surat Borasih. Io nguan kolourih, tolu ondou Sabat hototurus. 17:3 Hogalang ayat-ayat Surat Borasih, io monarang tutang pokarah ijo Lahca Ponyolamat ijo tonobowot bain Pohotala puna mongarot nyiring mahtoi, tahpi Io bolum hoduli tahkan popahtoi. "Yesus ijo ahku mborihtaoh ahkan'kam rih, Io rih Lahca Ponyolamat ijo tonobowot," hion Paulus. 17:4 Pira-pira ulun monjadi porocaya turus homboh Paulus doro Silas; kodorih ka'a jumbalah hajo ulun-ulun Yunani ijo mihkoh umba Pohotala, tutang aro hino bawi-bawi bosewut. 17:5 Tahpi ulun-ulun Yahudi hiri ahtoioh. Turus iro muhpung ulun-ulun ijo bororangai ang jalan-jalan, tutang napa ulun-ulun gorombolan porusuh. Turus iro moridu aang hopus lowu rih, tutang nyarang lohpou ihcobehti ulun porocaya ijo bogare Yason kani ngurah Paulus tutang Silas, tului iro kani ngomin Paulus doro Silas nokuh luar noharep ulun aro. 17:6 Tahpi kotihka iro eam sombang umba Paulus doro Silas, iro nunda Yason tutang pira-pira ulun porocaya ijo bohkonoh, nokuh toharep okon-okon ijo bokowasa ang lowu rih. Iro bokoriak, "Ulun-ulun tuh moridu ang umo-umoh! Huntuh lowun ihto ka tonokuh bain iro, 17:7 tutang Yason tuh jari norima iro ang lohpouoh. Iro paring molanggar aturan-aturan Kaisar Ruma, tului iro mborihta anai hino lahca bohkon ijo bogare Yesus." 17:8 Umba auh-auh orih iro nguan ulun aro tutang okon-okon ang lowu rih monjadi boho-hombo. 17:9 Turus pongowasa-pongowasa ang lowu rih nyuhu Yason tutang ulun-ulun ijo porocaya ijo bohkonoh nonga duit jaminan. Uliorih punan iro konoliwus. 17:10 Ngolomi orih ka'a ulun-ulun ijo porocaya umba Yesus ang lowu rih nyawot Paulus doro Silas tulak nokuh Berea. Amat johcokoh ang anan Paulus doro Silas nokuh lohpou sombayang ulun Yahudi. 17:11 Ulun-ulun Berea labih bokuap ahtoi'ndo, tahkan ulun-ulun ang Tesalonika. Honong sanang ahtoi iro ngonih borihta tohou Yesus tutang nyinong ondou iro moriksa Surat Borasih ahkan ngota'an inon ajar Paulus rih morong. 17:12 Aro ang louk iro porocaya umba Yesus, tutang eam isu-isut hino ulun Yunani ijo bosewut, ijo porocaya; pios bawi oluka bahkas. 17:13 Kotihka ulun-ulun Yahudi ang Tesalonika ngonih tohou Paulus mborihta ka'a auh Pohotala ang Berea, iro ka lombut ang Berea tutang ngihit tutang nguan ulun-ulun ang anan monjadi bimbang. 17:14 Jele-jeleng konduang-konduang ang Berea rih ngitot Paulus nokuh pantai, rahatoh Silas doro Timoteus tehtep mohcon ang lowu rih. 17:15 Uli iro ngitot Paulus johcok Atene, konduang-konduang rih buli nokuh Berea hawui ngomin potoh Paulus ahkan Silas doro Timoteus ngahasu io soduonjeleng. 17:16 Pondehan Paulus ngindoi Silas doro Timoteus, ahtoioh sedih nohto lowu rih tuwi umba karon kopahtung dewa. 17:17 Ang lohpou sombayang Paulus pander ngurah tiruk umba ulun-ulun Yahudi, tutang ulun-ulun bohkonoh ijo nyembah Pohotala ang anan. Kodorih ka'a ang pasar-pasar nyinong ondou Paulus hokurah-tiruk umba nyinong ulun ijo anai ang anan. 17:18 Guru-guru aliran Epikuros tutang aliran Stoa hokolawan ka'a umba io. Pira-pira tahkan iro nuhtui, "Ulun tuh kota'an inon? Pongotaanoh baya honjiot, tahpi aro nyamaioh!" Pira-pira ijo bohkon nuhtui, "Kolouoh io mborihta tohou dewa-dewa uhtus bohkon." Iro nuhtui kolouorih, tului Paulus pander tohou Yesus, tutang tohou bolum hoduli uli mahtoi. 17:19 Turus iro ngomin Paulus nokuh puhpung ang Puruk Areopagus. Ang anan iro nuhtui umba io, "Ihkai jolik kota'an ajar bohua ijo mborihta bain ihkam rih. 17:20 Tului ihko nyorihtaoh hal-hal ijo konahan aneh ang tolingan 'kai. Bain tului rih ihkai jolik ngota'an rimaioh." 17:21 (Tului paring ulun Atene tutang ulun-ulun bohkonuhtus ijomohcon ang anan paham pohias ngohpah ohkot kotuhkoi ahkan ngonih tutang pander, tohou hal-hal ijo bohua.) 17:22 Aang ohkot Paulus tombok ang toharep ulun-ulun ijo hopuhpung ang Areopagus rih, Paulus nuhtui, "O, ulun-ulun Atene! Ahku nohto ijo a'ang hal-hal ihkam puna tu'u-tu'u boagama. 17:23 Tului kotihka ahku nyala-nyalan ang kodiling lowun'kam tutang nolihti unuk-unuk sombayang ihkam. Ahku nohto ka'a ihco unuk ihkam nonga porahpah; ang unuk orih tonyurat, 'Ahkan Pohotala Ijo Eam Kosonan 'kai.' Orih, Pohotala ijo ihkam nyembah tapi eam ngosono-Oh, Iorih ijo ahku mborihtaoh ahkan'kam. 17:24 Pohotala ijo ngonjorian kolunon tuh hawui kokaro usiouoh, Iorih Tuhan ijo ngosan langit tutang tana. Io eam mohcon ang luwang lohpou-lohpou dewa ijo tonapa bain kolunon. 17:25 Io ka'a eam ngurah pondohop ulun, tului Iorih ijo nonga pombolum tutang hasong, tutang kokaron aang'co ahkan ulun. 17:26 Tahkan ihcobehti kolunon Io ngonjorian kokaron uhtus, tutang nyuhu iro mohconoh nyuang hopuskolunon. Io ka'arih ijo nuhkasoh tahkan pahtukoh, mira tutang ang umoh iro tou bolum. 17:27 Pohotala nguan ohrih mangat iro ngurah Io. Ayau-ayauoh iro sombang umba Io aang ohkot iro ngurah-ngurah Io. Tahpi kotu'ui Pohotala eam mahcu tahkan ihto nyinong-behti. 17:28 Kolou ijo tonuhtui ulun, 'Ihto bolum, ihto guet-gehta tutang mohcon ang kolunon tuh tului kowasa Aiu-Oh.' Sama ka'a umba ijo tonuhtui bain pira-pira ponyair'kam. Iro nuhtui, 'Ihto paringoh anairih anak-anak-Oh!' 17:29 Nah, tului ihto anairih anak-anak Pohotala, ihto eam tou ngohu Pohotala sama kolou hopahtung tahkanumba bulou ata'ai perak ata'ai bahtu ijo tonapa numbun kopihtar ulun. 17:30 Wayah kobureng ihto rih jari nolingou bain Pohotala, tahpi huntuh Io nyuhu paring ulun ang hopus kolunon hubah tahkan dusa-dusan iro. 17:31 Tului Io jari nuhkasoh sino ohkotoh mosara hopus kolunon tuh honong koadiloh. Gawi rih ahkan tonguan bain ihcobehti ijo jari ngopili Pohotala ahkan orih. Tutang ahkan paring ulun jahkin ahkan hal rih. Pohotala jari mombolumoh hoduli ulun rih tahkan popahtoi!" 17:32 Kotihka ulun-ulun rih ngonih tohou bolum hoduli uli popahtoi, anai tahkan louk iro ngota'oauh Paulus rih. Anai ka'a ijo nuhtui, "Ihkai jolik ngonih Konduang mborihta hino tohou hal orih." 17:33 Turus Paulus nohtah puhpung rih. 17:34 Tahpi anai ang louh iro, ijo hobarih umba Paulus tutang porocaya umba Yesus, tahkan louk iro rih: Dionisius anggota majelis Areopagus, tutang ihcobehti bawi ijo bogare Damaris, tutang pira-pira behti ulun hino.
18:1 Uliorih Paulus nohtahoh lowu Atene tutang tulak nokuh Korintus. 18:2 Ang anan io hosombang umba ihcobehti Yahudi bogare Akwila, boasar tahkan lowu Pontus. Akwila punai lombut tahkan Italia, doro oruhoh Priskila. Iro lombut nokuh Korintus tului Kaisar Klaudius jari nyuhu paring ulun Yahudi, soluka tahkan Ruma. Paulus hihkaslombut masap dororih, 18:3 turus mohcon ang anan umba iro, tutang bogawi sama-sama umba iro, tului ijo nyotiar iro sama kolou gawin Paulus, iorih napa kemah. 18:4 Tahpi aang nyinong ondou Sabat, Paulus tulak bopande-pander ang lohpou sombayang ahkan nguan ulun-ulun Yahudi, tutang ulun-ulun Yunani, porocaya umba Yesus. 18:5 Uliorih Silas tutang Timoteus johcok tahkan Makedonia, Paulus mongguna koparing ohkotoh ahkan mborihta tahkan Pohotala ahkan ulun-ulun Yahudi, ijo Yesus orihrih Lahca Ponyolamat ijo tonobowot bain Pohotala. 18:6 Tahpi tului ulun-ulun rih toturus ih ngolawan tutang nosalan auhoh, mahka Paulus hobirik korawu tahkan hahtiuoh kolou kahta ahkan ngingat iro umba kosalan'ndo. Paulus nuhtui, "Amat ihkam colahka, kosalan'kam bongom! Ahku borasih tahkan ang orih! Nopara uhuntuh ahku ahkan tulak nokuh ulun-ulun bohkon Yahudi." 18:7 Turus Paulus nohtah iro tutang tulak, mohcon ang lohpou ijo ang silan lohpou sombayang rih. Lohpou rih lohpou ihcobehti ijo bohkon Yahudi, tahpi io nyembah Pohotala. Aran ulun rih Titius Yustus. 18:8 Tahpi Krispus, kopala lohpou sombayang rih tutang paring jolahaioh porocaya umba Tuhan Yesus. Tutang aro ka'a ulun-ulun Korintus bohkonoh, ngonih Kabar ijo popander Paulus ahkan'ndo, tutang iro porocaya umba Yesus turus ponopondus. 18:9 Ang sino ngolomi, ang ponopahjahoh, Tuhan nuhtui umba Paulus, "Ararih mihkoh! Bopander toturus tutang ara tonih. 18:10 Tului Ahku homboh ihko. Eam aro ihcobehti ka duon nguan ang ja'at umba ihko, tului aro ulun ang lowu tuh anairih ulun-ulun aik-Ku." 18:11 Bain tului orih Paulus mohcon ihco sotengah toun kotahiuoh tutang majar auh Pohotala ahkan iro. 18:12 Kotihka Galio monjadi gubernur ang Akhaya, ulun-ulun Yahudi hihco ngolawan Paulus tutang ngomin io nokuh bosara. 18:13 Iro ngadu ang bosara rih, "Ulun tuh mopongaroh ulun aro mangat nyembah Pohotala, umba cara ijo hokolawan umba poretah Museh!" 18:14 Kodorih Paulus kani mutah, Galio jari houn nuhtui umba ulun-ulun Yahudi, "O ulun-ulun Yahudi! Amat ijo tongohu ihkam tuh ihco polanggaran ata'ai ihco koja'at, puna kopahtutoh ahku sabar ngonih pongaduanoh ihkam tuh. 18:15 Tahpi tuh anairih hokolawan tohou auh-auh tutang aran-aran hawui hukum-hukum'kam bongom! Jadi ihkam ijo harus mongobuahoh mohaumoh. Ahku bahat nanyamoh muhtus hal-hal kolouorih!" 18:16 Turus Galio muhko iro nokuh luar. 18:17 Mahka iro nawan Sostenes, kopala lohpou sombayang rih, tutang mahcat io ang boun meja bosara. Tahpi Galio samasino eam poduli hal kolourih. 18:18 Ulimba Paulus magun mohcon tahi ang Korintus. Pongohino io ngohawot solamat mohcon ahkan ulun-ulun porocaya ang anan, turus bolayar homboh Akwila doro Priskila nokuh Siria. Ang Kengkrea, Paulus nohtok balouoh ijo jari tohonouoh monjadi ombu, tului anai miatoh umba Tuhan. 18:19 Kotihka johcok ang Epesus, Paulus nohtahoh Priskila doro Akwila, turus nyolong lohpou sombayang tutang hokurah-tiruk umba ulun-ulun Yahudi ang anan. 18:20 Iro nyawot mangat Paulus kani mohcon labih tahi umba iro, tahpi io eam kani. 18:21 Oluka kodorih, ang ohkot Paulus hihkas, io nuhtui, "Amat Pohotala ijo ngahtuhoh, ahku ahkan hoduli hino nokuh ohtoi." Uliumba nuhtui kodorih, io hihkas tahkan Epesus. 18:22 Uliumba nosuluh ang Kaisarea, io tulak nokuh Yerusalem ahkan nonga tabe ahkan ukup ang anan, noturus ponyalai nokuh Antiokhia. 18:23 Uliumba mohcon ang anan pira-pira kotahiu, io tulak hino masap tana Galatia tutang Prigia ahkan ngomba'asoh koporocaya ulun-ulun porocaya. 18:24 Pondehan rih, lombutrih nokuh Epesus ihcobehti ulun Yahudi konanak ang Aleksandria bogare Apolos. Io pihtar bopander tutang paham solembang usin Surat Borasih, 18:25 hawui jari tobajar ahkan kosono ajaran tohou Yesus. Mahka umba somangat ijo honong karas tu'u io mongajar toliti tohou Yesus, oluka punan popondus Yohanes iou ijo kosonaioh. 18:26 Honong bohanyi Apolos nopara nuhtui ang lohpou sombayang, tutang ang ohkot Priskila doro Akwila ngonih auh ajaranoh, iro ngomin io nokuh lohpouoh. Ang anan iro nyorihta ahkaioh, umba labih metuk hino, tohou rancana Pohotala ahkan monyolamat ulun, nguha Yesus. 18:27 Pongohuli Apolos nohuang tulak nokuh Akhaya. Mahka ulun-ulun ijo porocaya umba Yesus ang Epesus nyurat surat ahkan konduang-konduang ijo porocaya ang Akhaya, mangat iro kani norima Apolos. Tutang ohkot Apolos johcok Akhaya, pondohopoh bokorinah paham gunai ahkan ulun-ulun ijo tului ponongaasi Pohotala jari porocaya umba Yesus. 18:28 Tului honong pongaroh Apolos duonmongalah ulun-ulun Yahudi a'ang soaljawab-soaljawab ang toharep ulun aro. Tutang io mombuktioh umba ayat-ayat tahkan Surat Borasih ijo Yesus rih Lahca Ponyolamat ijo tonobowot.
19:1 Pondehan Apolos anai ang Korintus, Paulus rahat nomuoikodiling podalaman tana rih turus johcok ang Epesus. Ang anan io hosombang umba pira-pira ulun ijo jari porocaya umba Yesus. 19:2 Paulus ngisok umba iro, "Jarikah Konduang-konduang norima Roh Pohotala, kotihka ihkam porocaya umba Yesus?" Iro mutah, "Jaham. Malah ihkai eam pu'u ngonih ijo tohko Roh Pohotala." 19:3 "Amat kodorih umba popondus ijo umoh ihkam ponopondus?" kisok Paulus. "Umba popondus Yohanes," hion'ndo. 19:4 Turus Paulus nuhtui, "Yohanes, mopundus ulun ahkan ngorinah, ijo ulun-ulun rih jari hubah tahkan dusa-dusaoh. Tahpi pondehan rih ka'a Yohanes mborihta ahkan ulun-ulun Israel, ijo iro harus porocaya umba ulun ijo ahkan lombut pongo tahkan io, iorih Yesus." 19:5 Kotihka iro ngonih auhrih, iro turus ponopondus aang aran Tuhan Yesus. 19:6 Tutang aang ohkot Paulus ngina longoioh ang ngosan iro, Roh Pohotala ngowasa iro, turus iro nopara ngohawot bahasa ijo helan, hawui monuhtui borihta tahkan Pohotala. 19:7 Jumbalah iro paringoh anai kira-kira duo balas behti. 19:8 Kotahin tolu bulan Paulus mborihta honong bohanyi umba ulun-ulun ang lohpou sombayang tutang soaljawab umba iro ahkan moyahkinoh iro tohou koloukuwoh Pohotala moretah kolou Lahca. 19:9 Tahpi pira-pira ang louk ulun-ulun rih, mahang kuhungoh tutang eam kani porocaya. Ang toharep paring ulun ijo hopuhpung ang anan, iro nosalan ajaran tohou rancana Pohotala ahkan monyolamat kolunon nguha Yesus. Tului bain orih Paulus nohtah iro, turus tulak homboh murid Yesus nokuh luwang kuliah Tiranus. Ang anan nyinong ondou io hokurah-tiruk umba ulun-ulun. 19:10 Io nguan ang kodorih hototurus duo toun kotahiu johcok paring ulun ijo mohcon ang Propinsi Asia, pios io ulun Yahudi oluka ulun uhtus bohkon, paringoh ngonih auh Tuhan. 19:11 Pohotala nguan tandahelan-tandahelan helan ijo luar biasa nguha Paulus. 19:12 Amat sopu tangan tutang benang pohtong kahangoh ijo pu'u hapan Paulus, omin ulun tahkan io turus nginaoh ang isun ulun-ulun poros, ponyahkit iro nihou, tutang roh sehtan ka soluka tahkan iro. 19:13 Anai pira-pira duhkun Yahudi ijo tulak nokuh umo-umoh, muhko roh ja'at tahkan ulun-ulun. Duhkun-duhkun rih cuba-cuba ka'a hapan aran Tuhan Yesus ahkan muhko roh-roh sehtan rih. Iro nuhtui umba roh-roh sehtan rih, "Aang aran Yesus ijo mborihta bain Paulus rih, ahku muhko ihko!" 19:14 Anai pihtu anak bahkas ihcobehti imam kopala ijo bogare Skewa, ijo nguan hal kolouorih. 19:15 Tahpi roh sehtan rih nuhtui umba iro, "Ahku kosono Yesus tutang ahku kosono Paulus ka, tahpi ihkam tuh iai?" 19:16 Turus ulun ijo sonalung sehtan rih nokehcuk tutang nocahap iro, honong bosiak samasino nyiring iro nokehcuk tahkan lohpou rih honong bohima-himang hawui hoburang, tului hahtin iro tomorutat tahkan behtin iro. 19:17 Paring ulun Yahudi tutang ulun-ulun uhtus bohkon ijo mohcon ang Epesus ngonih tohou kojodian rih turus iro monjadi mihkoh. Mahka aran Tuhan Yesus mahi tonara-nara. 19:18 Aro ulun ijo jari porocaya ahkan Yesus, lombut ngahku ang toharep ulunaro, gawin-gawin iro ang wayah houn. 19:19 Tutang iro ijo bahut molalus kahji koruhoi nipunah buhku-buhku iro tutang mahpong orih ang boun ulun aro. Regan buhku-buhku rih amat tonyombalah paringoh limo pulu kujan duit perak. 19:20 Kolouorih honong ijo hebat rih auh Tuhan mahi tosiar, tutang mahi-mahi ba'as pongarohoh. 19:21 Uliumba kojodian-kojodian orih, Paulus nuhkas ahkan tulak nokuh Makedonia tutang Akhaya turus hototurus nokuh Yerusalem. "Uliumba nokuh anan," hion Paulus, "ahku harus tulak nokuh Ruma ka'a." 19:22 Mahka Paulus nyuhu duo behti tahkan pohalu-pohaluoh iorih Timoteus tutang Erastus ahkan tulak nokuh Makedonia, pondehan io mohcon pira-pira ohkot kotahiuoh hino ang Propinsi Asia. 19:23 Kira-kira aang ohkot orihrih nyolung kokihcuh ijo hajo ang Epesus tului ajaran tohou Yesus. 19:24 Tului ang lowu rih anai ihcobehti tuhkang perak bogare Dimetrius, ijo napa lohpou-koramat dewa ahkan Dewi Artemis. Usaha ulun rih polombut hasil ijo hajo ahkan ponggawi-ponggawioh. 19:25 Bain tului rih io muhpung ponggawi-ponggawioh sama-sama umba ponggawi-ponggawi tohkang perak bohkonoh, turus nuhtui, "Konduang-konduang! Konduang kota'an ijo ihto duon hasil tahkan gawi ihto tuh. 19:26 Uhuntuh Konduang jari nohto tutang ngonih bongon, inon ijo konuan bain Paulus rih. Io nuhtui ijo dewa-dewa ijo tonapa bain kolunon samasino eamrih dewa. Tutang io jari bohasir nguan aro ulun porocaya umba ajaroh, eam tihkas ang ohtoi ang Epesus, tahpi bilak ang hapus tana Asia ka'a. 19:27 Bohayaoh iorih, ijo usaha ihto tuh ahkan norima aran ja'at. Tutang eam baya orih, molekan lohpou Dewi Artemis ka ahkan tonongohu remeh, honong kohajoioh tonihcak-nihcak; podahal io dewi ijo tonohoromat bain paring ulun ang Asia tutang hapus kolunon!" 19:28 Kodorih ulun-ulun rih ngonih auh orih ahtoi iro monjadi panas, turus iro ngoriak-ngorahang, "Bolum Artemis dewi ulun Epesus!" 19:29 Mahka kokihcuh orih monanyap hapus lowu. Pongohino pulou pongihcuh-ngihcuh rih, nawan Gayus tutang Aristarkhus yorih ulun-ulun Makedonia ijo mongawal Paulus ang ponomuoioh, turus nunda iro nokuh alun-alun lowu rih. 19:30 Paulus kani nyolong ngahasu iro, tahpi ulun-ulun ijo porocaya ahkan Yesus ang anan ngohana io. 19:31 Pira-pira ulunhajo Propinsi Asia rih ka, ijo hosohabat umba Paulus nyuhu ulun mborihta ahkan Paulus, mangat io ara pokarah aropoh ang alun-alun orih. 19:32 Pondehan rih ulun-ulun ijo hopuhpung ang alun-alun rih, monjadi boho-bombo. Anai ijo ngoriak koloutuh, anai ijo ngoriak kodorih. Tului topoaro tahkan iro eam ngota'an, inon sabab iro hopuhpung ang anan. 19:33 Ihcokobarih tahkan ulun-ulun rih ngohu Aleksander biang koladioh, tului io ijo tongonyuhung nokuh baun, bain ulun-ulun Yahudi. Mahka Aleksander nonga tanda umba longoi, nyawot nonga kosapetahkai tou mombela aropoh ang toharep ulun-ulun rih. 19:34 Tahpi kodorih iro nohto ijo io ulun Yahudi, hombo-homboh iro ngoriak muhi-muhing, "Bolum Artemis, dewi ulun Epesus!" 19:35 Kojoriaioh jurutulis lowu bohasir potonih ulun aro rih hawui io nuhtui, "O Ulun Epesus! Nyinong ulun kota'an ijo Epesus tuh lowu ijo mohaga lohpou dewi Artemis tutang bahtu boapuah ijo ngonyahtu tahkan langit. 19:36 Eam aro ihcobehti ka'a duon ngolawan hal rih. Tului orih tonih houn tutang ara nguan aangihco honong sombarang. 19:37 Ulun-ulun tuh, ihkam ngomiu ahkan ohtoi eam kotului iro jari nyirou lohpou dewi'kam ata'ai tului iro jari mohina dewi eto. 19:38 Amat Dimetrius tutang ulun-ulun ponggawioh rih, anai dawa'an tohimo ihcobehti, naohoh iro ngomin dawaoh rih nokuh bosara. Bosara bokuap bagi orih tutang okon-okon pomoretah ka toturus anai. 19:39 Tahpi amat magun anai hino aangihco ijo bohkon, ijo ihkam jolikohrih, harus ngobuahoh ang puhpung ulun aro ijo sah. 19:40 Tului inon ijo nyolung ondou tuh, tou morusak ihto. Ihto tou tongohu nguan pomborontak, tului ihto eam aro ngina ihco alasan ka'a ahkan ngomorongoh koboho-bombo tuh." 19:41 Uliumba nuhtui paringoh rih, jurutulis lowu rih nyuhu ulun-ulun aro rih buli.
20:1 Uli koada'an ang Epesus benyem huli, Paulus na'ah anak ukup hopuhpung tutang ngomba'as iro porocaya. Pongohuli io ngohawot solamat mohcon, tului io noturus ponomuoioh nokuh Makedonia. 20:2 Io masap tanah-tanah Makedonia, tutang nonga aro tingak ahkan ulun-ulun ijo porocaya umba Yesus Kristus ang anan, ahkan ngomba'as koporocayan'ndo. Pongohino io tulak nokuh Yunani. 20:3 Tolu bulan kotahiu io mohcon ang anan. Turus kotihka Paulus rahat botahta-tahtap ahkan bolayar nokuh Siria, anai kabar ijo ulun-ulun Yahudi rahat hopahkat ahkan munu Paulus. Bain tului rih io nuhkas, ahkan hoduli nguha Makedonia. 20:4 Sopater anak Pirus ijo asaroh tahkan Berea tulak homboh io; tutang kodorih ka'a Aristarkhus doro Sekundus ulun Tesalonika tutang Gayus ulun Derbe. Ka'a Timoteus, Tikhikus tutang Trofimus, ulun-ulun tahkan Propinsi Asia. 20:5 Iro nosolu ihkai, turus ngindoi ihkai ang Troas. 20:6 Ulirih ondou Pesta Luhte Eam Boragi, ihkai bolayar nohtah Pilipi. Limo ondou pongohino ihkai hihco hino umba iro ang Troas. Ang anai ihkai mohcon ihco minggu. 20:7 Ngalomi minggu ihkai hopuhpung mangat kuman hombo-homboh kolou hokonduang. Paulus pande-pander umba ulun-ulun tului ngohkosoh ngewak tulak. Nyiring tohun ngolomi Paulus pander toturus. 20:8 Luwang tahkun ang tikat diang, unuk ihkai hopuhpung rih aro sumbu. 20:9 Ihcobehti ulunbiou ijo bogare Eutikus, tuot ang boun pambau. Tului Paulus eam tondo-tondo bopander ulunbiou rih nundu samasino, turus topotiruh ang pambau rih, turus io botahak kopinda tahkan tikat tolu. Ohkot iro ngahtang io, io jari palus. 20:10 Tahpi Paulus nosuluh nokuh pinda turus nga'ap aropoh isun ulunbiou rih, tutang ngahawonoh. Paulus nuhtui, "Ara takut, io magun bolum!" 20:11 Pongohuli Paulus nuhkat nokuh diang turus mombagi luhte tutang kuman hombo-homboh. Uliumba tahi bopander umba ulun-ulun rih, nyiring ngohkos, Paulus botulak. 20:12 Ulun-ulun ngitot buli ulunbiu rih, nokuh lohpouoh. Mahka ahtoi iro jorih tutang paham tomahpung. 20:13 Ihkai tulak nokuh kapal turus bolayar labih houn nokuh Asos ahkan ngomin Paulus nokuh kapal ang anan. Io jari ngahtuh kodorih, tului io ahkan koanan nguha jalan isuntana. 20:14 Ulijari hosombang ang Asos, Paulus jeleng jahkat kapal turus ihkai bolayar nokuh Metilene. 20:15 Tahkan anan ihkai bolayar hino, tutang ngohkosoh johcok ang unuk ijo hotoharep umba Khios. Ulihawun johcok ang Samos tutang ihcoondou pongohino ihkai ang Miletus. 20:16 Paulus jari nuhkas eam ahkan tondo ang Epesus, mangat ara nihou ohkot ang tana Asia. Tului konohuangoh jeleng johcok Yerusalem ang Ondou Pesta Pentakosta. 20:17 Tahkan Miletus Paulus ngirim kabar nokuh Epesus ahkan nyawot okon-okon ukup ang anan lombut nyombang umba io. 20:18 Kotihka iro johcok Miletus, mahka Paulus nuhtui umba iro, "Konduang-konduang ngota'an koloukuwoh ahku bolum kotahin tuh, ang louk ihkam. Nopara ang ondou ijo pahtukoh ahku johcok ang Asia. 20:19 Honong randah ahtoi tutang aro nusuhdanum mahta, ahku bogawi ahkan Tuhan, ang tohun-tohun karot ijo ahku nginyamoh tului tiruk ja'at ulun-ulun Yahudi. 20:20 Konduang ngota'an ijo ahku eam aro kihkoh mborihta ahkan ihkam inon ijo boguna ahkan'kam. Ahku majar ihkam ang puhpung-puhpung ulunaro tutang ang lohpou-lohpou. 20:21 Pios umba ulun-ulun Yahudi oluka umba ulun-ulun uhtus bohkon, ahku toturus nonga pongingat mangat iro hubah tahkan dusa-dusan iro, tutang lombut nokuh Pohotala, hawui porocaya ahkan Tuhan Yesus. 20:22 Huntuh ahkan te'et umba poretah Roh Pohotala, ahku hihkas nokuh Yerusalem. Tutang ahku eam kota'an inon ijo ahkan nyolung buah ahku ang anan. 20:23 Ahku tihkas ngota'an, ijo ang nyino-nyinong lowu, Roh Pohotala jari tarang monyorihta ahkak'ku, ijo ahku ahkan nyolong sipir tutang ahkan ngarot. 20:24 Tahpi ahku eam poduli umba pombolum'ku tuh, asar ahku duon ngohpah gawi-gawi ijo tomorocaya bain Tuhan Yesus ahkak'ku, tutang asar ahku te'et nyiring ang lain pombolum'ku ahkan mborihta Kabar Hinut rih tohou pononganasi Pohotala. 20:25 Ahku ius masap Konduang-konduang paringoh, tutang mborihta ka'a tohou koloukuwoh Pohotala moretah kolou Lahca. Huntuh ahku nanyam eam ahkan hosombang hino umba Konduang-konduang. 20:26 Bain tului orih honong tarang ahku nuhtui ahkan ihkam ondou tuh, ijo amat anai ang louk ihkam ijo binasa noin, orih eam sala ahku. 20:27 Eam pu'u ahku buhou tahkan angkonuak'ku, ngonorangan ahkan ihkam koparing, rancana Pohotala. 20:28 Hondakrih ihkam monjaga arop tutang monjaga ka'a sohopus ukup ijo jari tonosarah Roh Pohotala ahkan'kam ahkan tonojaga. Tului ihkam jari konahtang monjadi ponuneng ukup rih. Pios ihkam jorih monjaga ukup Pohotala rih kolou sokahtik monjaga tobiri-tobirioh. Tului Pohotala jari ngonjorian ukup rih aiu-Oh bongoi, nguha popahtoi Anak-Oh bongoi. 20:29 Soponulakoh ahku, musti ahkan lombut kokaro harimaung ijo bosiak nokuh tohun ihkam. Tutang ulun-ulun ijo ihkam monjaga rih ahkan ukun harimaung-harimaung rih. 20:30 Malah tahkan louk Konduang-konduang bongon ka, ahkan lombut ulun-ulun ijo ahkan monyiar borihta ijo eam morong. Iro nguan kodorih ahkan ulun-ulun ijo jari porocaya umba Tuhan Yesus Kristus monjadi lacat tutang nutut iro. 20:31 Tului orih bojaga-jaga! Ingat ijo tolu toun kotahiu hawui aro danum mahtotumbak, hondou homalom ahku eam pu'u tondo majar nyinong ulun tahkan ihkam. 20:32 Huntuh ahku nyarah ihkam ahkan Pohotala mangat Io ijo monjaga ihkam, tutang mangat ihkam nambit aang kabar pononganasi Pohotala. Pohotala tepun kowasa ahkan ngomba'asoh ihkam, tutang nonga ahkan'mu borehkat-borehkat ijo jari tonahtap-Oh ahkan paring ukup Aiu. 20:33 Jaha pu'u ahku jolik duit ata'ai hahtin tahkan ihcobehti ka. 20:34 Konduang bongon kota'an ijo umba koba'as bongok'ku, ahku bogawi nyuhkup ijoboguna ahkak'ku tutang injah-jolahak'ku ijo homboh umba ahku. 20:35 A'ang paring porokara ahku jari nonga sutu ahkan'kam ijo umba gawi karas koloutuh, ihto harus ndohop ulun-ulun ijo eam ba'as. Tului ihto harus ingat, ahkan inon ijo Tuhan Yesus bongoi jari nuhtui, 'Labih sanangmangat nonga, tahkanumba norima.' " 20:36 Ulijari Paulus ngumbot panderoh, io suhkuntu'ut umba iro paringoh turus bodo'a. 20:37 Iro paringoh nangih tutang ngahawon Paulus, ngohawot solamat jalan. 20:38 Iro karas porosahtoi'ndo, mombahtang Paulus nuhtui ijo iro eam ahkan nohto io hino. Turus iro ngihtot io johcok kapal.
21:1 Ihkai kopisah umba okon-okon ukup tahkan Epesus rih, pongohino nohtahoh iro. Turus ihkai bolayar turus nokuh pulou Kos; tutang ngohkosoh ihkai johcokoh ang pulou Rodos. Tahkan anan ihkai bolayar turus nokuh polobuhan Patara. 21:2 Ang Patara ihkai sombang kapal ijo kani nokuh Penisia. Mahka ihkai jahkat kapal rih turus hihkas 21:3 tutang bolayar nyiring ihkai nohto pulou Siprus, ang sila komuloi 'kai; tahpi ihkai turus bolayar nitu Siria. Ihkai jahkat nokuh tana ang Tirus, tului ang anai kapal ijo ihkai hombohoh rih, ahkan polua puatoh. 21:4 Ang unuk rih ihkai tulak masap ulun-ulun ijo porocaya umba Yesus, turus mohcon umba iro kotahin ihco minggu. Ngosan potunjuk tahkan Roh Pohotala iro nuhtui umba Paulus, mangat a'ai tulak nokuh Yerusalem. 21:5 Tahpi ulijari umbot ohkotoh ihkai mohcon ang anan, ihkai nohtah iro tutang noturus ponyalan ihkai. Iro paringoh, honong anak oruhoh iro ngihtot johcok luar lowu. Ang anan ang saran kowang ihkai paring suhkuntu'ut tutang bodo'a. 21:6 Uliorih ihkai hotabe, turus ihkai jahkat nokuh kapal, tutang iro ka buli nokuh lohpouoh. 21:7 Ihkai bolayar turus tahkan Tirus johcok nokuh Ptolemais. Ang anan ihkai masap Konduang-konduang ijo porocaya Yesus, ahkan nonga tabe ahkan iro turus mohcon ihco ondou umba iro. 21:8 Hawunoh ihkai tulak hino, turus johcok ang Kaisarea. Ang anai ihkai tulak nokuh pomborihta ijo bogare Pilipus, turus mohcon ang lohpouoh. Io anai ihcobehti tahkan pihtu behti ijo konopili ang Yerusalem. 21:9 Ohpat behti anak dalaoh jari tononga kodahpot bain Pohotala ahkan mborihta Kabar Hinut tahkan Pohotala. 21:10 Ulijari pira-pira kotahiu ihkai ang anan, lombut tahkan Yudea ihcobehti nabi ijo bogare Agabus. 21:11 Io lombut nokuh ihkai, turus ngomin pohtong kahang Paulus. Umba potong kahang rih, io mohtong pa'ai tutang longoi bongoi hawui nuhtui, "Tuhrih ijo tonuhtui bain Roh Pohotala: Tepun pohtong kahang tuh, ahkan ponohtong koloutuh ang Yerusalem, bain ulun-ulun Yahudi, tutang tonosarah ahkan ulun-ulun bohkon Yahudi." 21:12 Kotihka ihkai ngonih orih, ihkai tutang paring konduang ijo mohcon ang Kaisarea rih, nyawot hawui paham umba Paulus, mangatoh ara tulak nokuh Yerusalem. 21:13 Tahpi ia mutah, "Inon gunaioh Konduang-konduang nangih koloutuh, nyiring nguan ahtoi'ku lonyuh? Ahku ius sodia eam tihkas baya tonawan ang anan, tahpi ka'a ahkan mahtoi sinoka kotului Tuhan Yesus." 21:14 Paulus eam kani ngonih tingak ihkai, mahka ihkai tondo ngohana io. "Nauhoh, konohuang Tuhan Pohotala bewe ijo nyolung," hion 'kai. 21:15 Ulijari mohcon ang anan pira-pira kotahiu, ihkai nahtap puat-puat hahtin ihkai, turus tulak nokuh Yerusalem. 21:16 Pira-pira konduang tahkan Kaisarea tulak ka'a homboh umba ihkai ahkan ngitot ihkai nokuh lohpou Manason, tului ang lohpouoh ihkai ahkan mohcon. (Manason anai ihcobehti ulun Siprus ijo jari tahi monjadi murid Yesus.) 21:17 Ohkot ihkai johcok ang Yerusalem, konduang-konduang ang anan noharang ihkai umba jorih ahtoi. 21:18 Ngohkosoh Paulus tulak homboh ihkai masap Yakobus; tutang hawui paring okon-okon ukup ijo anai ang anan ka'a. 21:19 Uli ngohawot solamat ahkan'ndo, Paulus nyorihta ahkan iro kokaro angihco ijo ius konuan Pohotala nguha io, ang louk ulun-ulun bohkon Yahudi. 21:20 Kotihka kami ngonih sorihta Paulus rih, iro paringoh monara Pohotala. Pongohino iro nuhtui umba Paulus, "Konduang Paulus! Konduang harus ta'an, ijo jari bokuhjan-kuhjan ulun Yahudi ijo porocaya ahkan Yesus. Iro paring tohkorih ulun-ulun ijo bokehtep numbun hukum Museh. 21:21 Tutang huntuh iro ngonih ijo Konduang mongajar paring ulun Yahudi, ijo mohcon ang louk uhtus bohkon, mangat molopas hukum Museh. Konduang ningak iro, mangat iro a'ai nyunat anak-anak iro ata'ai numbun adat dasar Yahudi. 21:22 Huntuh ulun-ulun Yahudi ijo jari porocaya rih, puna ahkan ngonih, ijo Konduang jari anai ang ohtoi. Jadi, koloukuwoh huntuh? 21:23 Kopiosoh numbun rih tingak ihkai. Anai ohpat behti ang ohtoi ijo jari nguan bowot ahkan Tuhan. 21:24 Olai, konohuangoh Konduang tulak nguan upacara morasih arop hombo-homboh umba iro, tutang nahkung ongkos'ndo, mangat bolau'ndo duon tonguting. Umba kodorih ahkan korinah bagi paring ulun, ijo inon ijo iro ngonih tohou Konduang eam morong, tului Konduang bongon ka numbun hukum Museh. 21:25 Tahpi tohou ulun ijo bohkon uhtus Yahudi, ijo jari porocaya ahkan Tuhan Yesus, ihkai jari ngirim surat ahkan iro tutang koputusan ihkai ijo iro eam tou hino kuman ukun ijo jari tonyarah ahkan songiang, eam tou kuman daha, ata'ai kuman ohcin mahtoi mudar; tutang ara hino nguan-nguan ijo kihal." 21:26 Mahka Paulus tulak umba ko'ohpat behti rih, turus nguan upacara porasiharopoh, sama-sama iro ang ngohkosoh. Pongohuli iro nyolong Lohpou Tuhan ahkan mborihta pira-pira ondou hino, punan upacara porasih rih ohpah, tutang pononga bagi iro nyinong behti tonosarahoh. 21:27 Kotihka tihkas ohkot pihtu ondou rih doni umbot, pira-pira ulun Yahudi tahkan Asia nohto Paulus ang Lohpou Tuhan. Turus iro ngihit ulun aro, uliorih nawan Paulus 21:28 hawui ngoriak-ngoriak, "Oi ulun-ulun Israel dohop! Tuhrih uluioh ijo tulak ko umo-umoh mongajar ahkan paring ulun ajaran-ajaran ijo molawan uhtus Israel, molawan hukum Museh, tutang molawan Lohpou Tuhan tuh. Tutang huntuh io malah ngomin ulun-ulun bohkon Yahudi nyolung nokuh luwang Lohpou Tuhan tutang napa pali unuk ijo borasih tuh!" 21:29 (Iro nuhtui kodorih tului iro jari nohto Trofimusulun Epesus rih ang kota homboh Paulus; tutang iro ngohu Paulus jari ngomin io nokuh Lohpou Tuhan.) 21:30 Soup lowu monjadi boho-bombo tutang paring ulun nokoru puhpu-puhpung. Iro nawan Paulus tutang nunda io soluka tahkan Lohpou Tuhan. Ohkot rih ka'a bauntukang Lohpou Tuhan konahtop. 21:31 Pondehan korusuh-korusuh rih ngurah jalan munu Paulus, ulun mborihta ahkan komandan kawan sorodadu Ruma ijo soup Yerusalem rahat rusuh. 21:32 Hunrih ka'a komandan ngomin pira-pira porowira tutang sorodadu turus jele-jeleng tulak hawui iro nokuh unuk porusuh rih. Aang ohkot ulun aro rih nohto komandan rih honong kawan sorodaduoh iro tondo matu Paulus. 21:33 Komandan rih tulak nokuh Paulus turus nawan io, tutang nyuhu ulun manga io. Pongohuli komandan rih ngisok, tohou iai Paulus rih, inon ijo jari konuaioh. 21:34 Tongai tahkan ulun aro rih, mutah koloutuh, anai mutah kolourih. Koada'an kolourih deroh, nyiring komandan rih eam tou ta'an inon kotu'uioh ijo jari nyolung. Bain tului rih io moretah mangat Paulus omin nokuh markas. 21:35 Kotihka iro ngomin io johcok nokuh tangga, porusuh-porusuh rih, ngomuk kodorih konyangitoh nyiring Paulus harus konohtun bain sorodadu-sorodadu. 21:36 Iro tongohasu tahkan lihkut bain ulun porusuh-porusuh rih, hawui ngoriak-ngombak, "Munu io!" 21:37 Kodorih kani nyolong ahkan luwang markas, Paulus nuhtui umba komandan rih, "Touleh ahku nuhtui honjulu umba Tuan?" "Kuwoh ihko tou bahasa Yunani?" hion komandan rih. 21:38 "Amat kodorih, ihko eam ulun Misir rih ijo soun ondou napa borotak ngomin buhou ohpat kujan ulun nguan korusuh bosonjata nyolong padang balambah?" 21:39 Paulus mutah, "Ahku ulun Yahudi; ahku warga kota Tarsus, kota ijo mombahtang ang Kilikia. Nonga ahkak'ku poromisi pander umba ulun-ulun atuh." 21:40 Mahka uli Paulus tononga poromisi pander, Paulus tombok ang lapathejan turus nonga tanda umba longoioh. Paring ulun uras benyem. Pongohuli Paulus hopander umba iro hapan bahasa Ibrani. Paulus nuhtui,
22:1 "Amai-Amai tutang Konduang-konduang paringoh! Ahku ahkan nonga bela'ku ahkan ihkam. Cuba ngonih houn!" 22:2 Kotihka iro ngonih Paulus hopander ang bahasa Ibrani iro labih tonih samasino. Mahka Paulus noturus panderoh. 22:3 "Ahku tuh ulun uhtus Yahudi," hion Paulus, "ahku konanak ang Tarsus ang tana Kilikia. Tahpi ahku konohajo ang ohtoi ang Yerusalem tutang sokula honong cermat bain guru hajo Gamaliel aang hukum ijo ius tononga Museh ahkan tahtu ajuh ihto. Sama kolou Konduang-konduang paringoh ang ohtoi ondou tuh, ahku ka paham giat ahkan Pohotala. 22:4 Ahku ngoporos-ngosingon nyiring mahtoi murid-murid ajaran bohua orih. Iro paringoh, pios bahkas olu bawi, ahku nawan tutang posolong iro nokuh luwang sipir. 22:5 Imam hajo bongoi, tutang soup Majelis Agama dahpot nonga kosaksian ijo ahku puna eam bobalik. Tului iro orihrih ijo jari nonga ahkak'ku surat kotorangan ijo tonitu ulun-ulun Yahudi ang Damaskus. Tului surat rih ahku dahpot nawan ang anan, ulun-ulun ijo porocaya umba ajar orih tutang ngomin iro nokuh Yerusalem ahkan'ndo tonohukum." 22:6 "Ohkot ahku rahat aang beteng jalan tutang nyiring johcok ang Damaskus, ohkot tohun ondou, ihco koloang ijo tarang solonga ngorolondang tahkan langit ang kodiling ahku. 22:7 Ahku botahak nokuh tana, turus ahku ngonih ihco auh nuhtui umba ahku, 'Saulus! Saulus! Ombai ihko ngosingon Ahku?' 22:8 Turus ahku ngisok, 'Iai Ihko, Tuan?' 'Ahku Yesus ulun Nasaret rih, ijo ihko ngosingoioh,' hioioh. 22:9 Ulun-ulun ijo anai ang anan ijo homboh ahku nohto koloang rih tahpi iro eam ngonih auh ijo hopander umba ahku. 22:10 Turus ahku ngisok hino, 'Ahku harus nguan inon Tuhan?' Tuhan Yesus mutah, 'Kuatrih tutang nyolong lowu Damaskus. Ang anan noin ihko ahkan duon borihta tohou paring ijo Pohotala kani nyuhu ihko nguai.' 22:11 Ahku nyolung bobulen tului koloang ijo monyilou mahtak'ku. Jari jolahak-jolahak'ku niting ahku nyalan nokuh lowu Damaskus. 22:12 Ang anan tohko ihcobehti bogare Ananias. Io ihcobehti ijo borasih tutang tuhit molalus hukum Museh. Paring ulun Yahudi ijo mohcon ang Damaskus uras hormat umba io. 22:13 Io lombut masap ahku, turus tombok ang doni ahku, hawui nuhtui, 'Konduang Saulus, pahtut ihko nopahjah huli!' Ohkot io nuhtui kodorih ka'a, ahku ngahtang bouk'ku turus duon nohto io. 22:14 Pongohuli io nuhtui ahkak'ku, 'Pohotalan tahtu ajuh ihto, mitih ihko, mangat ihko kota'an konohuang-Oh, tutang nohto Yesus; Jihpon Pohotala orih ijo nguan konohuang Pohotala hawui ngonih auh tuhtui Yesus bongoi. 22:15 Ihko ahkan monjadi saksi, tutang momborihta ahkan paring ulun, inon ijo ihko jari nohto tutang ngonih. 22:16 Huntuh, ara hino ngindoi dalou tahi. Kuatrih, tombok tutang tongarih arop'mu ponopondus. Na'ahrih umba Tuhan mangat ihko liwus tahkan dusa-dusa'mu.' " 22:17 "Ahku hoduli nokuh Yerusalem tutang kotihka ahku uhun bodo'a ang Lohpou Tuhan, ahku konowasa Roh Pohotala. 22:18 Ahku nohto Tuhan; Io pander umba ahku, 'Jele-jeleng nohtah Yerusalem, tului aro-ulun ang ohtoi eam kani norima kosaksian'kam tohou Ahku.' 22:19 Ahku nuhtui, 'Tuhan iro kota'an tu'u ijo ahku jari nyolong lohpou-lohpou sombayang ahkan nawan iro tutang mahcat ulun-ulun ijo porocaya umba Tuhan. 22:20 Kodorih ka'a kotihka saksi Tuhan, Stepanus rih iro mopahtoi, ahku bongok anai ang anan tutang jorih gawi munu rih. Malah ahku ijo ngindoi hahtin ulun-ulun ijo munu Stepanus.' 22:21 Tahpi Tuhan nuhtui hino umba ahku, 'Tulakrih iou, tului Ahku ahkan nyuhu ihko tulak nokuh unuk ijo mahcu ahkan ulun-ulun bohkon uhtus Yahudi.' " 22:22 Ulun-ulun magun toturus ngonihoh Paulus pander, tahpi ang kalimat auhoh ijo laiuoh iro ngoriak somuhing-muhingoh, "Munu ih ulun ijo kolou orih. Io eam pahtut bolum!" 22:23 Sambir ngoriak, iro hoburup jubah'ndo tutang morawuh korawu tana nokuh diang. 22:24 Mahka komandan tutang kawansorodadu Ruma rih, nyuhu Paulus tonomin nokuh luwang markas, mangat io tomoriksa ang anan hawui paksa mangat iro ngota'an, tului inon ulun-ulun Yahudi ngoriak kodorih toharep io. 22:25 Tahpi ohkot Paulus jari ponohtong ahkan ponahcat. Paulus nuhtui umba komandan ijo tombok doni anan, "Inonrih punatoukah ponahcat ihcobehti warga kelahcan Ruma soun umba io ponosara?" 22:26 Ngonih orih porowira rih tulak nokuh komandan sorodadu turus nuhtui, "Inon tuh ijo ahkan Amai nyuhu nguaioh?" hion'ndo, "ulun rih warga nogara Ruma!" 22:27 Mahka komandan ponokawan rih tulak nokuh Paulus hawui ngisok, "Cuba nyorihta ahkak'ku, inon ihko warga nogara Ruma!" "Yo," hion Paulus, "ahku warga nogara Ruma." 22:28 Komandan rih nuhtui hino, "Ahku monjadi warga nogara Ruma umba mbayar aro samasino!" Paulus mutah, "Tahpi ahku konanak kolou ulun warga nogara Ruma." 22:29 Wayah rih ka'a kawan-kawan sorodadu ijo kani moriksa Paulus rih balang, tutang komandan rih ka nyolung mihkoh tului io jari manga Paulus, padahal Paulus warga nogara Ruma. 22:30 Komandan ponokawan Ruma rih jolik samasino ngota'an inon kotu'ui ijo kotuluioh ulun-ulun Yahudi nosalan Paulus. Bain tului rih, ngohkosoh komandan na'ah imam-imam kopala, tutang Majelis Agama, mangat iro hopuhpung. Turus Paulus konoliwus tahkan pangaoh, pongohuli omin noharep iro paring.
23:1 Paulus notuneng okon-okon majelis rih, turus io nuhtui, "Konduang-konduang'ku! Nyiring ang ondou tuh, ahku eam komo bosala umba Pohotala, ang luwang ahtoi bua'ku, tohou pombolum'ku." 23:2 Ohkot Paulus nuhtui kolourih, Imam Hajo Ananias nyuhu ulun ijo tombok doni umba Paulus nehpak baun Paulus. 23:3 Mahka Paulus nuhtui umba imam hajo rih, "Pohotala noin nehpak ihko, ulun holi'ou ijo pura-pura borasih! Ihko tuot ang anan mosara ahku numbun hukum Museh, podahal ihko bongom ijo molanggar hukum rih, hawui nyuhu ulun nehpak ahku!" 23:4 Ulun-ulun ang bambai Paulus nuhtui umba Paulus, "Ihko ngonja'at imam hajo Pohotala!" 23:5 Paulus mutah, "Oh ahku eam ngosono. Konduang-konduang ijo io imam hajo. Puna tu'u ang Surat Borasih anai tonyurat, 'A'ai ihko ngonja'at okon uhtus'kam.' " 23:6 Paulus nohto ijo ihcokobarih tahkan anggota-anggota majelis rih tahkan ulun Saduki tutang anai ihcokobarih hino tahkan ulun Parisi. Tului orih io hopander umba majelis rih, "Ihkam Konduang-konduang! Ahku ihcobehti ulun Parisi, ahku uhtus Parisi. Ahku ponosara ang ohtoi bain tului ahku porocaya, ijo ulun-ulun mahtoi ahkan bolum huli." 23:7 Kotihka io nuhtui kodorih, ulun-ulun Parisi tutang ulun-ulun Saduki rih nopara hokolawan, nyiring puhpung'ndo rih bobolah monjadi duo kobarih. 23:8 (Tului ulun-ulun Saduki niruk, ijo ulun mahtoi eam ahkanbolum hino, ijo molehkat eam aro, tutang roh-roh ka'a eam aro; tahpi ulun Parisi porocaya ahkan anaioh paringoh orih.) 23:9 Mahka lombutrih keridu ijo paham, pira-pira ulun Parisi ijo monjadi guru agama tombok homboh molawan tu'u-tu'u. Iro nuhtui, "Numbun ihkai ulun tuh eam aro kosalai honjiot ka! Mihkoh puna anai Roh ata'ai Molehkat ijo mander ahkaioh!" 23:10 Koboho orih rih monjadi kodorih pahamoh, nyiring komandan pasukan Ruma rih mihkoh jaka Paulus ahkan konorubut bain'ndo. Jadi io nyuhu karon-sorodaduoh rih tulak ngomin Paulus tahkan tohun ulun-ulun rih tutang ngomin io mosuhukoh ang markas. 23:11 Ngolomi pongooh Tuhan Yesus tombok ang silan Paulus tutang nuhtui, "Ngoba'asoh ahtoi'mu! Ihko jari nonga kosaksian tohou Ahku ang Yerusalem. Ihko noin pahtut bosaksi ka'a ang Ruma." 23:12 Homboh-ngohkos ang-ngohkos ondouoh ulun-ulun Yahudi nopara nguan haumpahkat, monulut eam ahkan kuman tutang ngorih amat iro jaha munu Paulus. 23:13 Anai labih tahkan ohpat pulu behti ijo nguan haumpahkat rih. 23:14 Iro tulak nokuh imam-imam kopala tutang okon-okon Yahudi hawui nuhtui, "Ihkai jari nulut-arop sama-sama, eam ahkan kuman, ngorih, ino-inon amat ihkai jaha munu Paulus rih. 23:15 Nah, huntuh Konduang-konduang honong anggota-anggota Majelis Agama, hondakoh ngirim surat ahkan komandan pasukan Ruma rih, ahkan nyawot io ngomin Paulus huli noharep ihkam, jahka kolou-kolouoh ihkam kani moriksa hino porokaraoh honong labih tolihti. Tutang ihkai sodia ahkan munu io, houn io johcok ang ohtoi." 23:16 Tahpi anai anak tahkan konduang ijo bawi Paulus, ngonih rancana pahkat orih rih. Mahka io tulak nokuh markas sorodadu Ruma, hawui nyorihta pahkat ulun rih ahkan Paulus. 23:17 Mahka Paulus na'ah ihcobehti porowira hawui nuhtui, "Omin anak-inyam tuh nokuh komandan; io kani nyorihta aangihco ahkaioh." 23:18 Porowira rih ngitot anak-inyam rih, noharep komandan honong nuhtui, "Paulus, ulun tohanan rih na'ah ahku, tutang nyawot ahku ngitot anak-inyam tuh nokuh Amai; io kani nyorihta aangihco." 23:19 Komandan rih nambit longon anak-inyam orih, turus ngomin io bongoi, nokuh saro tutang ngisok io, "Ihko kani nyorihta inon umba ahku?" 23:20 Anak-inyam rih mutah, "Ulun-ulun Yahudi jari haumpahkat ahkan nyawot Tuan ngomin Paulus noharep Majelis Agama hawun, kolo-kolou iro kani mosara hino porokara Paulus honong labih tolihti. 23:21 Tahpi ararih Tuan numbun konohuang'ndo, tului anai labih tahkan ohpat pulu behti ijo rahat mosuhuk ahkan ngipa io ang jalan. Iro paringoh jari nulut-aropoh eam ahkan kuman ngorih, amat iro jaha munu Paulus. Uhuntuh ka iro jari sodia mohcon ngindoi auh putah Tuan ih." 23:22 Komandan rih nuhtui, "Ara nyorihta ahkan iai ka ijo ihko jari mborihta rih ahkak'ku." Turus komandan rih nyuhu anak-inyam rih buli. 23:23 Pongohuli komandan rih na'ah duo behti porowira, turus io nuhtui umba iro, "Nyodia duo rahtus sorodadu, homboh pihtu pulu sorodadu hapa kuda tutang duo rahtus sorodadu hapa lunju, ahkan tulak jam sioi ngolomi tuh ka'a nokuh Kaisarea. 23:24 Nahtap ka'a kuda ahkan tonunggang Paulus tutang ngitot io honong solamat johcok ahkan Gubernur Pelik." 23:25 Turus komandan rih nyurat surat ijo auh koloutuh, hioi, 23:26 "Ijo Horomat Gubernur Pelik. Tabe tahkan Klaudius Lisias! 23:27 Ulun tuh ius tonawan bain ulun-ulun Yahudi tutang manyou ih iro tomunuoh, amat ahku eam lombut umba kawan sorodadu tutang monyolamat io; tului ahku ngonih ijo io warga nogara Ruma. 23:28 Tului ahku jolik ngota'an inon kotu'uioh kosala'an ijo iro ndawaoh ahkaioh. Mahka ahku ngomin io nokuh majelis agama iro. 23:29 Korinah io eam nguan angihco ka ijo io kona hukum tutang hukum munu ata'ai nyipir. Dawa iro ahkaioh tihkas hotitu tohou hukum-hukum agaman'ndo bongoi. 23:30 Pongohuli ahku, tonyorihta ijo anai pahkat ja'at, tahkan ulun-ulun Yahudi toharep io. Jadi toturus ahku ngihtot io nokuh Tuan Gubernur. Tutang ahku jari nyuhu iro dolang pondawaoh ngomin pongaduan'ndo toharepoh ahkan Tuan." 23:31 Mahka kawan-kawan sorodadu rih molalus gawin iro. Iro ngitot Paulus turus ngomin io ngolomi rih johcok Antipatris. 23:32 Hawunoh iro mohonouoh posukan hapakuda ijo noturus ponyolanan honong Paulus, tutang iro bongon buli nokuh markas. 23:33 Kotihka posukan hapakuda rih johcok ang Kaisarea, iro nonga surat rih ahkan gubernur, turus nyarah Paulus ahkaioh. 23:34 Ulimba gubernur rih mbasa surat orih, io ngisok umba Paulus tahkan umoh asaroh. Kotihka io ta'an Paulus asaroh tahkan Kilikia, 23:35 io nuhtui, "Piosrih! Ahku ahkan moriksa porokara'mu, amatmira ulun-ulun ijo ngadu ihko jari johcok ang ohtoi." Turus io momoretah mangat Paulus tonahan ang luwang istana Horodes.
24:1 Limo ondou pongohuli Imam Hajo Ananias tutang okon-okon ulun Yahudi tulak nokuh Kaisarea, homboh ihcobehti ponosehat hukum ijo bogare Tertulus. Iro noharep Gubernur Pelik tutang monyapai pongaduan iro nitu Paulus. 24:2 Kotihka Tertulus tona'ah kobaun nuduh Paulus koloutuh, "Tuan Gubernur ijo Horomat! Aang pinda poretah Tuan lowun ihkai pios tentram. Tutang ang ngosan kopiosbosara Tuan ka jari aro nguan komorong ijo tonolalus ahkan uhtus ihkai. 24:3 Paringoh rih ihkai nyambut toturus hawui norimakasih tutang moregaoh ijo soisung-isungoh tu'u-tu'u, ang umoh ka ka'a. 24:4 Tahpi mangat ara dian aro ohkot Tuan, ahku nyawot umba Tuan, ngonih dawa ihkai ijo liwak tuh. 24:5 Ihkai nyombang ulun tuh porusuh ijo morusak. Ang amo-amoh io mopolombut kokihcuh ang louk ulun-ulun Yahudi, tutang io monjadi okon gerakan ulun-ulun Nasaret. 24:6 Io malah jari mocuba nguan kopali ang Lohpou Tuhan, tahpi ihkai nawan io. Ihkai nohuang mosara io numbun hukum agaman ihkai bongon. 24:7 Tahpi komandan Lisias ngorabutoh tahkan ihkai, 24:8 tutang moretah mangat pongadu-pongadu noharep Tuan. Amat Tuan moriksa ulun tuh, Tuan bongon ahkan ngonih tahkan io, komorong tahkan paringoh ijo ihkai ngaduoh tuh tohimo io." 24:9 Ulun-ulun Yahudi ijo anai ang anan ka'a umba ndawa Paulus tutang ngomorong paring ijo tonuhtui bain Tertulus. 24:10 Turus gubernur rih nonga tanda ahkan Paulus ijo io tou hopander. Mahka Paulus nuhtui, "Ahku kota'an ijo Tuan jari monjadi hakim lowu tuh botoun-toun kotahiuoh. Orih tului ahku komo sanang nyapai mombela arop'ku tuh ahkan toharep Tuan. 24:11 Tuan duon nolihti bongon, ijo eam labih tahkan duo balas ondou ijo houn ahku tulak nokuh Yerusalem ahkan sombayang. 24:12 Tutang eam pu'u ulun-ulun Yahudi rih nyombang ahku hokolawan umba ihcobehti ka, ata'ai muhpung ulun ahkan nguan kokihcuh, pios ang Lohpou Tuhan oluka ang lohpou-lohpou sombayang ata'ai amo-amoh iou ang luwang lowu. 24:13 Iro ka mahi eam duon mombukti dawa-dawaoh ijo iro nyapaioh ahkan Tuan toharep ahku. 24:14 Puna ahku harus mongahkuoh umba Tuan, ijo ahku nyembah Pohotala tahtu ajuh ihkai numbun ajaran Yesus ijo iro ngohuoh sala. Tahpi ahku magun porocaya ahkan paringoh ijo tonyurat ang luwang Buhku Museh tutang Buhku Nabi-nabi. 24:15 Sama kolou iro, ahku ka'a anaingina koporocaya ahkan Pohotala, ijo paring ulun ahkan bolum hoduli, ulijari mahtoi -- ulun-ulun morong, oluka ulun-ulun ja'at! 24:16 Orih kotuluioh, ahku toturus ngurahjalan ijo somoro-morongoh, mangat ahtoi bua aik'ku borasih, tohimo Pohotala tutang borasih toharep kolunon. 24:17 Ulijari pira-pira toun eam anai ang Yerusalem, ahku huli nokuh anan, turus ngihtot duit pondohop ahkan uhtus'ku tutang ahkan nonga porahpah ahkan Pohotala. 24:18 Aang ohkot ahku rahat nguan orih, iro nyombang ahku ang Lohpou Tuhan, ulimba ahku ngopah upacara-upacara porasih arop. Eam anai ulun aro homboh ahku, tutang eam anai ka'a kokihcuh ang anan ang ohkot rih. 24:19 Tihkas anai pira-pira ulun Yahudi ang anan tahkan Propinsi Asia. Iro rih ijo soharusoh anai ang anan ahkan nonga pongaduan iro ahkan Tuan, amat iro anai aangihco pongaduan nohimo ahku. 24:20 Ata'ai, nauhoh ulun-ulun rih bongoi monyaksi koja'at inon ijo iro sombangoh aang ahku kotihka ahku potohimo iro ang Majelis Agama. 24:21 Iro monyombang baya kalimat ijo ihco tuh iou, ijo ahku nuhtuioh ang toharep iro, iorih kalimat tuh: Ahku ponosara ondou tuh, bain kotului ahku porocaya ijo ulun-ulun mahtoi ahkan ponombolum huli." 24:22 Turus Pelik ijo kota'an aro tohou ajaran Yesus nuhtup puhpung porokara tuh, "Ahku ahkan muhtus porokara tuh," hion Pelik, "amat komandan Lisias jari lombut." 24:23 Turus Pelik nonga poretah ahkan porowira ijo botanggung-jawab tohimo Paulus rih, mangat tehtep nahan Paulus, tahpi sambir ka'a nonga honjiot kosoruah ahkaioh. Tutang nonga ijin ahkan injah-injahoh nonga ahkai, inon ijo io poruluoh. 24:24 Pira-pira ondou pongohuli Pelik lombut, homboh umba oruhoh ijo bogare Drosila; io ijobehti Yahudi. Turus Pelik nyuhu ulun ngomin Paulus, pongohino Pelik ngonih Paulus nuhtui tohou porocaya umba Yesus Kristus. 24:25 Tahpi kotihka Paulus noturus panderoh tohou komorong, tutang tahan kojolikbolai, tutang tohou hukum ang Ondou Kiamat, mahka Pelik monjadi paham mihkoh turus nuhtui, "Ihko tou tulak huntuh. Ahku ahkan na'ah ihko hino amat anai kosapet." 24:26 Pondehan rih Pelik moharap ahkan duon duit tahkan Paulus. Orih kotuluioh io pira-pira tikat nyuhu ulun ngomin Paulus mangat hopander umba io. 24:27 Ulijari duo toun kotahiu Perkius Festus ngati Pelik monjadi gubernur. Tutang tului Pelik kani ngomin ahtoi ulun Yahudi, io mohonou Paulus mohcon ang luwang sipir.
25:1 Tolu ondou ulimba Festus johcok ang tana rih io tulak tahkan Kaisarea nokuh Yerusalem. 25:2 Ang anan imam-imam kopala tutang okon-okon ulun Yahudi nyurung ahkaioh pongaduan'ndo toharep Paulus. Iro toturus iou ngotou Festus, 25:3 mangat ngosan kopios ahtoioh umba iro, io kani nyuhu ulun ngomin Paulus nokuh Yerusalem; Tului iro jari hopahkat ahkan munu io ang beteng jalan. 25:4 Festus mutah, "Paulus uhun tonahan ang Kaisarea; tutang ahku bongok ka eam tahi hino ahkan buli. 25:5 Jadi, nauhoh ulun-ulun bosewut ang louk ihkam tulak homboh ahku nokuh Kaisarea tutang moporokara io ang anan, amat puna io jari nguan aang'co kosalan." 25:6 Ulijari mohcon ang Yerusalem kira-kira jolu ata'ai sopulu ondou hino, Festus buli ahkan Kaisarea. Hawonoh io nguan puhpung bosara tutang momoretah mangat Paulus noharep. 25:7 Kotihka Paulus johcok, ulun-ulun Yahudi ijo jari lombut tahkan Yerusalem tombok ang kodiling io, tutang nopara nyurung kadu-kadu ijo bahat toharepoh. Tahpi iro eam duon nongabukti kadu-kadu rih. 25:8 Aang pombelaoh, Paulus nuhtui, "Ahku eam nguan aangihco ka ijo sala toharep hukum Museh ata'ai toharep Lohpou Tuhan ata'ai ka toharep Kaisar Ruma." 25:9 Tahpi Festus kani ngoto'u ahtoi ulun Yahudi. Maka io ngisok umba Paulus, "Kanirih ihko tulak nokuh Yerusalem mangat ponosara ang anan ang toharep ahku tohou kadun-kadun iro rih?" 25:10 Paulus mutah, "Ahku rahat tombok ang toharep Majelis Kaisar Ruma; tutang ang unuk orih ahku harus ponosara. Tuan bongon kota'an, ijo ahku eam bosala toharep ulun Yahudi. 25:11 Amat ahku jari molanggar hukum tutang nguan aangihco ijo harus tomohukum umba hukum mahtoi, ahku sodia mahtoi. Tahpi amat kadun-kadun iro eam morong eam ihcobehti ka tou nyarah ahku ahkan iro. Ahku nyawot tomosara ang balaibosara Kaisar!" 25:12 Ulijari hopahkat umba ponosehat-ponosehatoh, Festus nuhtui, "Ihko nyawot tomosara ang balaibosara Kaisar, jadi ihko harus tulak noharep Kaisar." 25:13 Eam pira-pira kotahiu uliorih, Baginda Agripa tutang Barnike masap nokuh Kaisarea ahkan ngohawot solamat ahkan Festus. 25:14 Ulijari iro anai pira-pira ondou ang anan, Festus nyorihta porokara Paulus ahkan Baginda Agripa. Festus nuhtui, "Anai ang ohtoi ihcobehti tohanan ijo tonohtah bain Pelik. 25:15 Ohkot ahku anai ang Yerusalem, imam-imam kopala tutang okon-okon Yahudi nyurung kadun'ndo toharep ulun rih tutang nyawot umba ahku, mangat ahku momuatoh hukum ahkaioh. 25:16 Tahpi ahku mutah ijo ulun Ruma eam tou tonyarah kodorih bewe, ihcobehti tonodawa ahkan tomohukum, amat ulun tonodawa rih, jaha hotohimo umba pondawa-ponodawaoh, tutang nonga kosapet tou mombela aropoh. 25:17 Jadi ohkot iro lombut ahkanohtoi ahku eam ngindoi tahi-tahi. Hawunoh ahku turus napa puhpung bosara tutang moretah mangat ulun rih konomin noharep. 25:18 Kotihka dolang pondawa rih tombok monyurung dawa'ndo, iro eam monyurung aangihco koja'atoh ka, kolou ijo ahku ngohuoh, iro ahkan nyurungoh. 25:19 Iro baya hokobohkon paham umba io tohou agaman iro bongoi tutang tohou ihcobehti ijo bogare Yesus. Ulun orih jari mahtoi, tahpi Paulus mborihta ijo behtin Yesus rih jari bolum hoduli. 25:20 Tului rih ahku bingung tohou koloukuwoh ahku tou duon kotorangan-kotorangan tohou porokara orih, ahku ngisok umba Paulus inonrih io kani tulak nokuh Yerusalem tutang ponosara ang anan ngosan porokara rih. 25:21 Tahpi Paulus nyawot naik banding; io nyawot mangat io tahtap ang ponjara nyiring porokaraoh tomuhtus bain Kaisar. Bain tului orih ahku moretahoh mangat io tonahan turus nyiring ahku duon kosapet ahkan ngirim io ahkan Kaisar." 25:22 Turus Agripa nuhtui umba Festus, "Ahku bongok ka jolik ngonih auh pander ulun orih." "Hawun Tuan duon ngonihoh," hion Festus. 25:23 Hawunoh Agripa tutang oruhoh Barnike lombut hapan pokahjan lahca. Iro nyolong nokuh ruang puhpung rih homboh umba okon-okon hajo angkatan parang tutang ulun-ulun basewut ang lowu rih. Ngosan poretah Festus, Paulus tonomin nyolong. 25:24 Turus Festus nuhtui, "Baginda Agripa tutang dolang pomasap! Ulun tuh jari tonondawa ahkak'ku, bain hopus uhtus Yahudi, pios ijo ang Yerusalem, oluka ijo ang ohtoi. Iro nutut tutang ngoriak-ngoriak ijo io eam pahtut tomohonou bolum. 25:25 Tahpi ahku eam aro nyombang aangihco ka ijo jari konuaioh ijo dahpot tonohukum umba hukum mahtoi. Tutang bain kotului io bongoi, jari nyawot porokaraoh ponosara aang balaibosara Kaisar, ahku jari nuhkas mangat ngirim io nokuh Kaisar. 25:26 Tahpi ahku eam dahpot aangihco kotorangan ijo tegas tohou aropoh mangat tonyurat luwang surat aik'ku ahkan Kaisar. Orih kotuluioh ahku potoharep io umba Tuan-tuan paringoh, pahtukoh sasino ahkan ijo tohoromat Baginda Agripa! Konohuang'ku iorih amat uli pomoriksa tuh anai bahan ahkak'ku unuk nyurat. 25:27 Tului numbun nanyam'ku eam rih anai unukoh ngirim ihcobehti tahanan amat eam aro umba surat ijo ngorinah kosalai-kosalaioh ijo tomondawaoh ahkaioh."
26:1 Agripa nuhtui umba Paulus, "Ihko tongijin bopander mangat mombela arop'mu." Mahka Paulus ngahtang longoi turus monyapaioh belaanoh kolou pongotuh, 26:2 "Ijo Tomohoromat Baginda Agripa! Ahku mokomo boutung sasino duon nyurung pombelaan arop'ku, mahi hino ang toharep Baginda, tohou paring pongaduan ijo tonyurung bain ulun-ulun Yahudi nitu ahku; 26:3 ijopahtukoh sino tului Baginda kota'an morong adat istiadat tutang masalah-masalah ulun Yahudi. Bain tului orih ahku nyawot kosodiaan Baginda ngonih kotorangan tahkan ahku hawui kosabar. 26:4 Paring ulun Yahudi kota'an koloukuwoh ahku bolum tahkan ahku biou. Iro kota'an ijo nopara tahkan ahku jadi ulunbiou, ahku jari bolum ang louk uhtus aik bongok ang Yerusalem. 26:5 Jari tahi iro ngota'an tohou ahku. Tutang amat iro kani, iro duon nonga kosaksian ijo tahkan pahtukoh ahku jari bolum monjadi ulun Parisi, honong numbun paring poroturan'ndo ijo paling sihtong ang luwang agaman ihkai. 26:6 Tutang huntuh ahku tombok ang ohtoi ahkan ponosara tului ahku porocaya ahkan bowot ijo tonapa Pohotala umba tahtu ajuh ihkai. 26:7 Bowot orih ka'a ijo tomorocaya bain koduo balas suku uhtus Israel, nyiring iro bosorah sombayangnyembah umba Pohotala iou hondou tutang homalom. Tutang mahihino bain ahku porocaya ahkan bowot orih, Baginda Ijo Tomohoromat ahku tonosalanoh bain ulun-ulun Yahudi. 26:8 Ombai konduang-konduang ulun-ulun Yahudi eam duon porocaya ijo Pohotala jari mombolum hoduli ulun mahtoi? 26:9 Sounoh ahku bongok ka niruk ijo ahku harus nguan koparing-paringoh mangat molawan Yesus tahkan Nasaret rih. 26:10 Tutang puna kodorih ijo jari ahku nguai ang Yerusalem. Umba surat kowasa tahkan imam-imam kopala ahku jari posolong nokuh luwang sipir aro ulun-ulun ijo bokehtep umba Pohotala. Ahku malah umba ka'a sotuju, ijo iro tonuhkas hukum mahtoi. 26:11 Bojoin tu'u ahku nyiksa iro ang lohpou-lohpou sombayang, mangat momaksa iro ngulim koporocaya ijo inon iro jari porocayaoh. Kodorih kolasut ahtoi'ku toharep iro, nyiring nokuh lowu-lowu bohkon ka ahku tulak ahkan hodulu iro ang anan." 26:12 "Honong konohuang orihrih ka'a ahku ngomin surat kowasa tahkan imam-imam kopala tutang tulak nokuh Damaskus. 26:13 Tutang aang ohkot ahku ang beteng jalan, ohkot tohun ondou, Baginda Ijo Tomohoromat, ahku nohto ihco koloang tahkan langit ijo labih boloangoh tahkan mahtan ondou. Koloangrih ngorolondang kodiling ahku, tutang kodiling ulun-ulun ijo nyalan hombo-homboh ahku. 26:14 Ihkai paringoh botahak nokuh tana. Turus ahku ngonih auh nuhtui ahkak'ku, ang luwang bahasa Ibrani, 'Saulus, Saulus! Ombai ihko toturus iou ngoporos Ahku? Ihko ahkan nginyam koporos bongom, amat ihko turus iou molawan ponambit-Oh, ijo monjadi Tuhan'kam.' 26:15 Mahka ahku nuhtui, 'Iai Ihko, Tuan?' Tutang Tuhan Yesus mutah, 'Ahkurih Yesus ijo ihko ngoporosoh. 26:16 Kuatiou tutang tombok! Ahku ngorinahoh arop ahkan'kam, hawui konohuang ahkan potuot ihko monjadi pohalu-Ku. Ihko harus monjadi pomborihta Kabar Hinut ahkan ulun bohkon, inon ijo ihko nohtooh ondou tuh tohou Ahku, tutang tohou inon ijo Ahku ahkan ngorinahoh ahkan'kam noin, aang ohkot ijo ahkan lombut. 26:17 Ahku ahkan moliwusoh ihko tahkan uhtus Israel tutang tahkan uhtus-uhtus bohkon ijo bohkon Yahudi. Ahku kani nyuhu ihko tulak nokuh iro 26:18 ahkan polenangoh mahtan'ndo, mangat iro soluka tahkan kopindong, tutang nyolong nokuh luwang koloang, mangat iro liwus tahkan kowasan Sehtan, turus konowasa bain Roh Pohotala. Mahka tului porocaya umba-Ku, dusa-dusan iro ahkan tongapun tutang iro ahkan monjadi ukup-ukup Pohotala ijo mihtih.' " 26:19 "Tului orih, Baginda Agripa, ahku turus tehtep te'et umba ponopahjah ijo ius ahku norima tahkan Pohotala rih. 26:20 Honong torus-tarang ahku mborihta ahkan ulun-ulun ijo iro harus hubah tahkan dusa-dusan iro tutang nyarah aropoh ahkan Pohotala, honong ngorinah aang pombolum iro, ijo iro jari hubah tahkan dusa-dusan iro. Ahku mborihta hal orih, pahtukoh ang Damaskus, pongohino ang Yerusalem tutang ang sohopus Yudea tutang louk ulun ijo bohkon Yahudi. 26:21 Mahka tului orihrih ulun-ulun Yahudi nawan ahku ang Lohpou Tuhan tutang ngurah jalan munu ahku. 26:22 Tahpi nyiring uhuntuh ahku tongolindung bain Pohotala, johcok ahku duon tombok ang ohtoi, ahkan nonga kosaksian aik'ku ahkan paring ulun -- hajo ata'ai ka koik. Inon ijo ahku nuhtui tuh eam bohkon tahkan inon ijo jari tonujum bain nabi-nabi tutang Museh; 26:23 yorih ijo Lahca Ponyolamat, ijo tonobowot Pohotala rih harus ngarot, tutang monjadi ulun ijo pahtukoh bolum hoduli uliius mahtoi; mangat honong rih Io duon mborihtaoh koloang -- iorih kosolamatan -- pios ahkan ulun-ulun Yahudi oluka ahkan ulun-ulun bohkon Yahudi." 26:24 Pondehan Paulus nyapai pombelaoh rih, Festus ngorahang, "Ihko jari bobucon Paulus! Ilmu'mu ijo aro rih jari nguan ihko bobucon!" 26:25 Tahpi Paulus mutah, "Ahku eam bobucon, Ijo Tonohoromat. Auh-auh ijo ahku ngohawot orih morong tutang soluka tahkan tiruk ijo hinut. 26:26 Baginda Agripa bongoi ngota'an tu'u ahkan hal-hal orih. Orih kotuluioh ahku bohanyi pander ang toharep Baginda hapan turus-tarang. Ahku yakin, eam ihco ka tahkan hal-hal orih, ijo jaha ngota'an bain Baginda, tului paringoh rih eam nyolung ang unuk-unuk ijo bosuhuk. 26:27 Ijo Tohoromat Baginda Agripa, inonkah Baginda porocaya umba inon ijo tonuhtui bain nabi-nabi rih? Ahku nginyam Baginda jari porocaya!" 26:28 Turus Agripa nuhtui umba Paulus, "Ihko madu gapang ahku jadi ulun Kristen, aang ohkot ijo iwak tuh?" 26:29 "Aang ohkot ijo iwak ata'ai aang ohkot ijo ombu," hion Paulus, "ahku bodo'a umba Pohotala, mangat Lahca tutang Tuan-tuan paringoh, ijo ngonih auh tuhtui'ku ondou tuh duon jadi kolou ahku -- sobali pasang tuh tontuoh!" 26:30 Kojoriaioh baginda lahca, gubernur tutang Barnike honong paring ijo bohkonoh kuat. 26:31 Ulijari anai ang konaha iro pander hawui aropoh, "Ulun tuh eam nguan ang'co ijo harus tonohukum umba hukum mahtoi ata'ai tonyihpir." 26:32 Turus Agripa nuhtui umba Festus, "Ulun tuh jari dahpot konuwat, jaka io eam nutut porokaraoh ponosara ang balaibosara Kaisar."
27:1 Uliius duonkopuhtusan ijo ihkai harus bolayar nokuh Italia, Paulus tutang pira-pira ulun tohanan ijo bohkon tonyarah ahkan Yulius, porowira posukan sorodadu Ruma ijo konohawot "Resimen Kaisar." 27:2 Ihkai jahkat kapal ijo lombut tahkan Adramitium, pongohuli tulak homboh kapal rih, ijo ius sodia tulak bolayar nokuh polobuhan-polobuhan ang Propinsi Asia. Aristarkhus ihcobehti tahkan Makedonia ijo lombut tahkan Tesalonika, bolayar ka'a hombo-homboh ihkai. 27:3 Ondouhawunoh ihkai johcok ang Sidon. Paulus tonojaga honong pios samasino bain Yulius. Io nongaijin masap injah-jolahanoh mangat iro nonga bohahtiu ijo porulu ahkan Paulus. 27:4 Tahkan anan ihkai bolayar turus. Tului bain bohiu hokolawan umba titun kapal, ihkai bolayar nyurusaran pulou Siprus ijo tou ngolindung honjiot tahkan bahiu. 27:5 Pongohino ihkai nyuru tohun laut ijo hopohoi umba Kilikia tutang Pamfilia turus johcok ang Mira ang lowu Likia. 27:6 Ang anan Komandan Yulius rih ngonduon ihco kapal tahkan Aleksandria ijo kani bolayar nokuh Italia. Mahka io mindah ihkai nokuh kapal rih. 27:7 Pira-pira ondou ihkai bolayar dandah tu'u tutang umba kobo'o, kojoriaioh ihkai johcok lowu Knidus. Pongohino tului bahiu magun ka'a ja'at, ihkai eam duon toturus bolayar nokuh titun asaroh. Mahka ihkai bolayar nokuh solahtan pulou Kreta nguha Tanjung Salmone mangat ang anan ihkai ngolindung tahkan bohiu. 27:8 Honong kehke hurus ihkai bolayar nyorurui saran pulou rih, nyiring kojoriaioh ihkai johcok ang ihco unuk ijo bogare Polobuhan Bohinoi, eam mahcu tahkan lowu Lasea. 27:9 Ang ohkot rih Ondou Pesta Hokobuah ulun Yahudi jari nyihing. Ihkai jari nihou aro ohkot, nyiring jari eam ohkotoh hino ahkan bolayar honong aman. Bain tului orih Paulus nonga tingak tuh umba iro, 27:10 "Konduang-konduang numbun nanyam aik'ku, anairih paham bohaya amat ihto bolayar toturus. Ihto ahkan nyuru korugi hajo, eam baya aang puatramun ihto tutang kapal ihto, tahpi hasong ihto ka muhitou nihou." 27:11 Tahpi Porowira Yulius rih labih porocaya ahkan pongomburi tutang kapten kapal tahkanumba auh-auh Paulus. 27:12 Polobuhan ang anan puna eam pios bagi kapal-kapal ngindoi ang wayah sorongin. Bain tului orih paham aro anak kapal sotuju ahkan bolayar hino nohtah polobuhan rih, tului iro kani ngurah jalan johcok ang Peniks tutang mohcon ang anan kotahiu wayah sorongin. Peniks anairih polobuhan ang Kreta ijo noharep Barat Daya tutang Barat Laut. 27:13 Aang ohkot rih bohiu solahtan mongius honong dandah. Mahka anak kapal ngohu iro ius duon bolayar hino. Jadi iro nguhut sauh bolayar nyorurui saran pulou Kreta. 27:14 Tahpi eam tahi pongohino lombut bahiubolowut -- iorih bahiu ijo konohawot bohiu Timur Laut -- mombolowut tahkan diang tana, 27:15 tutang napuh kapal ihkai rih. Bain tului orih eam harapan kapal bolayar nohusung bohiu, mahka ihkai bosarah bewe tutang mohonou kapal bohatung tonaput bohiu. 27:16 Ihkai kolindung honjiot, kotihka ihkai nguha ang hila solahtan pulou Kauda ijo koik rih. Ang anan kehkehurus ihkai bohasir mongowasa sokoci kapal ihkai. 27:17 Ulimba ius sokoci rih konahtang nokuh kapal, kapal rih bongon tongonahan honong ngahut hapa tali ijo ponohtong nyolu'ang kapal rih. Tului mihkoh sokarah ang isun baras Sirtis ijo tojah, layar ponosuluh, turus kapal tonohanou homboh bahiu. 27:18 Bahiu turus ngamuk nyiring ngohkos ondouoh, puat kapal nopara tonyahkah nokuh luwang tasik. 27:19 Ondou pongohino, anak-anak kapal rih, monyahkah hino pokahkas-pokahkas kapal nokuh lout umba longon ain iro bongoi. 27:20 Boondou-ondou kotahiu ihkai eam nohto mahtanondou tutang potion, tutang bohiu ka hototurus ngamuk. Kojoriai nihou koharapan ihkai ahkan duon solamat. 27:21 Pira-pira ohkot kotahiuoh ulun-ulun rih eam kuman. Mahka Paulus kuat tombok ang tohun iro hawui nuhtui hioi, "Konduang-konduang! Amat ihkam jari numbun tingak aik soun, tutang eam tulak bolayar tahkan Kreta, ihto eam monyuru paring korusakoh tutang korugioh koloutuh. 27:22 Tahpi huntuh ka ahku nyawot honong paham, mangat ihkam hajo ahtoi. Eam ihcobehti ka tahkan Konduang ijo ahkan mahtoi; ihto ahkan nihou tihkas kapal tuh bewe. 27:23 Tului ngolomi nanai molehkat tahkan Pohotala ijo ahku nyembah, iorih Pohotala ijo tepun ahku, lombut nokuh ahku. 27:24 Molehkat rih nuhtui, 'Ara mihkoh Paulus! Tului ihko ahkan noharep Kaisar. Tutang ngosan komorong ahtoi Pohotala ahkan'mu, paring ulun ijo bolayar homboh ihko, uras solamat kotului ihko.' 27:25 Bain tului orih, Konduang-konduang, kohondakoh Konduang hajo ahtoi! Tului ahku porocaya umba Pohotala ijo paringoh ahkan nyolung kolou ijo tonuhtui-Oh ahkak'ku. 27:26 Tahpi ihto ahkan sokarah noin ang saran ihco pulou." 27:27 Ang ngolomi ijo ko-ohpat balasoh ihkai rahat hanyu-hanyut ang tasik Adria. Kira-kira tohun ngolomi anak kapal komo kapal rahat ngondoni sarantana. 27:28 Jadi iro nguluh tali tuga, ahkan nihpong kondalom tasik rih. Ngota'an unuk rih nyiring ohpat pulu meter kondalomoh. Eam tahi uliorih iro nugaoh hino, turus ngondahpotoh laut ang unuk rih doni tolun pulu meter kondalomoh. 27:29 Iro mihkoh kapal ahkan sokarah ang bahtu karang jadi iro mosuluh ohpat kobawak sauh tahkan hila komburi kapal turus moharapoh amat tou jele-jeleng ondousawah. 27:30 Toni-tonih dolang anak kapal moncoba buhou tahkan kapal rih. Iro mosuluh sokoci nokuh danum, tutang nguan kolo-kolou kani posuluh sauh tahkan holuan kapal. 27:31 Tahpi Paulus nuhtui umba porowira tutang sorodadu-sorodadu ijo ang kapal rih, "Amat anak kapal tuh eam mohcon ang kapal, Konduang-konduang paringoh eam duon solamat." 27:32 Bain tului orih sorodadu-sorodadu rih nohtok huruk sokoci rih nyiring sokoci rih opah hanyut. 27:33 Ang ohkot jaha boloang Paulus, ngahtuh ahkan iro paringoh kuman. Paulus nuhtui, "Jari ohpat balas ondou kotahiu Konduang paringoh tihkas ngindo-ngindoi iou aang koada'an ngoli, tutang eam kuman ino-inon. 27:34 Ahku nganjuroh, kuman iou honjiot. Orih pios ahkan ihkam, mangat ihkam borigas huli. Tului Konduang paringoh ahkan solamat tutang eam aro tahpas ino-inon." 27:35 Uli nuhtui kodorih rih Paulus ngomin luhte turus nuhtui torimakasih ahkan Tuhan ang boun iro paringoh. Pongohino io mombagi-bagi luhte rih umba longoioh, turus iro kumaioh. 27:36 Mahka uli kuman iro paring komo korigas hoduli tutang umba kuman ka'a. 27:37 Paring ijo anai ang kapal rih, anai duo rahtus pihtu pulu onom behti. 27:38 Uli iro kuman nyiring bosuh, iro nyahkah puat gandum nokuh tasik mangat kapal orih rih mohian. 27:39 Ohkot ondou jari hondou, anak kapal nohto diangtana, tahpi iro eam ngota'an diangtana umoh rih. Iro nohto ijo toluk hawui banutoh. Jadi iro kani nondo kapaloh ang anan amat duon. 27:40 Mahka talin-talin sauh opah tonohtok iro, mohonou lohtong ang tasik. Sorurui umba rih ka'a iro nguwat tali ijo ngahut komuri-komuri. Pongohino iro mbirang layar ang hila urung kapal mangat bohiu nahpi kapal rih miar nokuh saro. 27:41 Tahpi kapal rih sokarah busung baras. Hila urungoh sokarah tutang eam duon hogerek, rahat hila laiuoh bokahkas tonapuh riak ijo karas. 27:42 Sorodadu-sorodadu ang kapal rih boniat kani munu paring ulun tohanan, tului iro mihkoh ara-ara anai ijo nangui nokuh isun tana turus nokoru. 27:43 Tahpi Komandan rih mbalang niat iro rih, tului io kani nyolamat Paulus. Io nyuhu paring ulun ijo duon nangui sohowu soun, tutang nangui nokuh saran kowang; 27:44 ijo bohkon bohkonoh uras ngohasu, tutang nambit ang pahpan-pahpan ata'ai sipak kapal rih. Umba jalan orih ihkai paring solamat johcok ahkan diangtana.
28:1 Uli nohkatkowang honong solamat, punan ihkai ngota'an ijo pulou rih bogare Malta. 28:2 Ponduduk pulou orih paham bojenta toharep ihkai. Iro noharang ihkai paringoh hawui pios, tutang nohun baho ahkan 'kai, tului jari nopara mosuluh uhjan, tutang bahiu paham sorongin. 28:3 Paulus nipun kahju, tutang nyahkah kahju-kahju rih nokuh ang luwang baho rih. Uhun io nguan hal orih ihcokungan lohi bolua tului lasut baho rih turus nunduk longoioh. 28:4 Kotihka ulun-ulun ijo mohcon ang pulou rih nohto lohi rih nguling longon Paulus, iro hopander sama arop'ndo, "Ulun tuh kopunaoh pomunu, tului oluka io luhput tahkan tasik, Dewi Koadilan eam mohonou io bolum." 28:5 Tahpi Paulus hobirik lohi rih nokuh luwang baho, tutang eam aro komo poros honjiot ka. 28:6 Iro niruk honjulu hino longon Paulus ahkan loting ata'ai solenga io ahkan bolukang mahtoi. Tahpi ulijadi ngindoi pira-pira kotahiuoh tutang eam anai aangihco luar biasa, turus iro nuhtui ijo Paulus anairih Dewa. 28:7 Eam mahcu tahkan unuk rih, anai tana ain Publius, pongowasa pahtukoh ang pulou rih. Honong bojenta ahtoi io noharang ihkai kolou pongasapoh kotahin tolu ondou. 28:8 Aang ohkot rih, amaioh rahat mondam tutang mani daha. Paulus tulak njonguk amaioh ijo mondam rih, turus bodo'a tutang nginaoh longoi nokuh ngosanoh, nyiring io pios. 28:9 Tului kojodian orih, paring ulun ijo poros ang pulou rih lombut nokuh Paulus, tutang iro tongopiosoh. 28:10 Iro nongaoh ahkan ihkai aro pononga, tutang kotihka ihkai kani bolayar, iro ngihtot nokuh kapal paring ijo ihkai poruluoh, ahkan ponyalan ihkai. 28:11 Uli tolu bulan ang anan, ihkai tulak tahkan pulou rih, jahkat ihco kapal ijo tahkan Aleksandria ijo kotahin musim sorongin botahan ang pulou rih. Kapal rih hapa lambang, "Dewa Kembar Kastor tutang Poluks." 28:12 Ihkai tondo ang kohta Sirakusa tutang mohcon ang anan tolu ondou. 28:13 Tahkan anan ihkai bolayar hino nyorurui saran pahtai Italia johcok ang kohta Regium. Hawunoh bohiu noparanahpi tahkan solahtan, nyiring a'ang duo ondou ihkai johcok ang lowu Putioli. 28:14 Ang anan ihkai hosombang umba pira-pira ulun ijo jari porocaya umba Tuhan Yesus, tutang tului porawe iro, ihkai mohcon umba iro kotahin ihcominggu. Turus ihkai tulak nokuh Ruma. 28:15 Konduang-konduang ang Ruma ijo porocaya ahkan Tuhan Yesus ngonih borihta tohou ihkai, nyiring iro lombut johcok nokuh pasar Apius tutang Pasanggrahan Tolu ahkan naharang ihkai. Kotihka Paulus hosombang umba iro, io ngohawot torimakasih ahkan Pohotala tutang ahtoioh jadi tabah. 28:16 Ohkot johcok ang Ruma, Paulus tomorodehkaoh mohcon bongoi hawui tomojaga bain ihcobehti sorodadu. 28:17 Uliius tolu ondou, Paulus na'ah okon-okon ulun Yahudi ijo bosewut ang anan. Tutang ulimba iro hopuhpung, Paulus hopander umba iro, "Konduang-konduang! Ahku puna eam bosala ino-inon toharep uhtus ihto, ata'ai molanggar adat kopahtuh ijo ihto norimaoh tahkan tahtu ajuh 'to. Oluka kodorih ahku tuh tonawan ang Yerusalem tutang tonyarah ahkan ulun Ruma. 28:18 Uliius porokara'ku tomoriksa, iro kani moliwus ahku, tului tonyombang ahku eam nguanoh ihco kosalan ka ijo pahtut tomohukum umba hukum mahtoi. 28:19 Tahpi tului ulun-ulun Yahudi molawan, ahku paksa monutut porokara aik'ku, ponosara ang balaibosara ain Kaisar Ruma. Ahku nguanoh rih eam kotului ahku anaingina dolang aangihco pongaduan toharep uhtus aik'ku bongoi. 28:20 Tutang orih kotuluioh ahku nyawot hosombang umba ihkam, mangat pande-pander umba ihkam; tului ahku tomasung kotului Ponyolamat ijo tonoharap-harap bain uhtus Israel." 28:21 Turus iro nuhtui umba io, "Ihkai ka'a jaha norima ihco surat ka tahkan Yudea tohou Konduang. Tutang eam aro ihcobehti Konduang ka tahkan anan ijo lombut ngomin kabar tohou Konduang ata'ai mander ijo ja'at tohou Konduang. 28:22 Tahpi ihkai jolik ka'a ngonih tohou koporocaya Konduang, tului ihkai paring jari ngonih, ulun moncela ajaran ijo Konduang nambit rih." 28:23 Mahka iro tutang Paulus monahtap ihco ondou ahkan hosombang. Aang ondou orih aro ulun lombut nokuh unuk Paulus. Tahkan ngohkos johcok sohit Paulus monyorihta tutang mborihtaoh ahkan'ndo tohou Kabar Hinut koloukuwoh Pohotala momorentah kolou Lahca. Hapan ayat-ayat tahkan Buhku Museh tutang Buhku Nabi-nabi, Paulus ngurah jalan nguan iro porocaya tohou Yesus. 28:24 Anai ijo porocaya ahkan inon ijo tomborihta Paulus, tahpi anai ka'a ijo eam porocaya. 28:25 Honong tiruk ijo hokolawan, iro nohtah unuk rih, uliius Paulus nuhtui ijo pongo tuh, umba iro, "Puna kona samasino, inon ijo tonuhtui bain Roh Pohotala nguha Nabi Yesaya ahkan tahtu ajuh ihkam! 28:26 Pohotala nuhtui, 'Tulakrih, nuhtuioh ahkan uhtus tuh: Ihkam ahkan toturus ngonih, tahpi eam solembang; ihkam ahkan toturus notunengoh tahpi eam kota'an inon ijo nyolung. 28:27 Tului tiruk uhtus tuh jari monjadi tapak, tolingan'ndo jari monjadi borengen tutang mahtan iro jari tongombuhtop. Tuh nyolung mangat mahtan'ndo ara nohto, tolinga iro ara ngonih, tiruk iro ara solembang, tutang ara hoduli Ahkak-Ku, turus Ahku ahkan ngopios iro.' " 28:28 Kojoriaioh Paulus nuhtui, "Konduang-konduang pahtut kota'an ijo kabar tohou solamat ijo tahkan Pohotala, huntuh jari mborihta ahkan uhtus-uhtus bohkon ijo bohkon Yahudi. Iro ahkan numbunoh!" 28:29 Uliius Paulus nuhtui kodorih, ulun-ulun Yahudi rih, nohtah unuk rih, sambir hokolawan ihco umba ijo bohkon. 28:30 Duo toun kotahiuoh Paulus mohcon ang Ruma, ang lohpou ijo tonosewaoh bongoi. Io jorih norima paring ulun ijo lombut masap io, ang unukoh. 28:31 Tutang honong bohanyi io mborihta ahkan iro, tohou koloukuwoh Pohotala moretah kolou Lahca, tutang tohou Tuhan Yesus Kristus. Paulus nguanoh orih honong bebas eam aro ulun bacaoh hino.
1:1 Konduang-konduang paring ang Ruma ijo tonokasih Pohotala tutang ijo jari tona'ah Pohotala ahkan monjadi ukup-Aiu. Pohotala jari mitih tutang ngahtang ahku khusus mangat mborihta Kabar Hinut tahkan Pohotala. 1:2 Kabar Hinut rih jari tonobowot bain Pohotala ang ohkot lomoi nguha nabi-nabi Aiu, tutang jari tonyurat luwang Surat Borasih. 1:3 Kabar Hinut rih tohou Anak Pohotala, Tuhan ihto Yesus Kristus. Socara kolunon Io anairih lihit Dawid, 1:4 tahpi socara ko-Pohotala-Oh Io korinah anairih Anak Pohotala. Orih nyahta umba kobasa ijo luar biasa nguha komonyun Aiu tahkan popahtoi. 1:5 Nguha Io ka'a Pohotala nonga ahkak'ku pononga monjadi rasul, mangat ahku -- ahkan mohoromat Kristus -- ngogalan ulun-ulun tahkan kokaron uhtus, mangat porocaya tutang te'et. 1:6 Ijo konohuangoh umba kokaron uhtus iorih ihkam ka'a ijo anai ang Ruma jari tona'ah mangat monjadi ukup Yesus Kristus. 1:7 Orih kotuluioh ahku nyurat ahkan'kam. Keleh Pohotala Amai ihto, tutang Tuhan Yesus Kristus nonga borehkat tutang kosanang ahkan'kam. 1:8 Pahtuk-pahtuk nguha Yesus Kristus, ahku monorimakasih ahkan Pohotala tului Konduang-konduang paringoh; tului sohopus kolunon jari ngonih ijo ihkam porocaya samasino umba Kristus. 1:9 Ahku toturus mingat ihkam amat ahku bodo'a. Pohotala nyaksioh, ijo inon ijo ahku nuhtui rih morong. Iorih Pohotala ijo ahku mohaluoh ang kotuwi ahtoi, hawui mborihta Kabar Hinut tohou Anak-Oh. 1:10 Ahku nyawot honong paham umba Pohotala, keleh Io kani mongijinoh ahku huntuh masap ihkam. 1:11 Tului ahku jolik samasino hosombang umba ihkam, mangat ahku duon mbagi umba ihkam, pononga tahkan Roh Pohotala ahkan ngoba'as ihkam. 1:12 Konohuang'ku iorih, tului ihto sama-sama jari porocaya umba Yesus Kristus, mahka ihto dahpot saling hokomba'as. 1:13 Konduang-konduang! Ahku jolik mangat ihkam kota'an ijo jari aro tikat ahku nohuang masap ihkam, tahpi toturus anai iou holanganoh. Ahku jolik mangat aang louk'kam ka, aangkonuak'ku anai buaoh. Koloukuwoh aangkonuak'ku jari mua ang louk ulun-ulun, ijo bohkon Yahudi, ang unuk-unuk ijo bohkon. 1:14 Tului ahku tepun gawi toharep karon uhtus: ijo jari bohadat tutang ijo eambohadat, ijo sokula ata'ai ijo eamsokula. 1:15 Orihrih kotuluioh ahku jolik samasino mborihta Kabar Hinut rih ahkan ihkam, ijo mohcon ang lowu Ruma ka'a. 1:16 Ahku porocaya samasino ahkan Kabar Hinut rih, tului kabar rih anairih kowasan Pohotala ahkan monyolamat paring ulun ijo porocaya; pahtuk pahtukoh ulun Yahudi, tutang uhtus bohkon ka'a. 1:17 Tului umba Kabar Hinut rih Pohotala ngorinah kolouinon caraoh kohihco kolunon umba Pohotala, monjadi hinut hoduli; caraoh iorih honong porocaya umba Pohotala, tahkan pahtuk nyiring laiuoh. Orih sama kolou ijo tonyurat luwang Surat Borasih, "Ulun ijo porocaya umba Pohotala nyiring kohihcooh umba Pohotala monjadi hinut hoduli, ulun orih ahkan bolum!" 1:18 Tahkan soruga Pohotala ngorinah kosingi-Oh toharep paring dusa tutang koja'at ulun, tului koja'at, pojajong kalunon ahkan ngosono ajaran morong tohou Pohotala. 1:19 Inon ijo duon ngota'an kolunon tohou Pohotala jari tarang ang luwang ahtoi bua kolunon, tului Pohotala bongoi jari ngorinahoh rih ahkan kolunon. 1:20 Tahkanpahtuk Pohotala na'oi kolunon, sipat-sipat Pohotala ijo eam gihtan, yorih koada'an-Oh kolou Pohotala tutang kowasa-Oh ijo abadi, jari duon toniruk bain ulun, nguha paring ijo jari tona'oioh. Jadi kolunon samasino eam anai alasan ahkan ngomorong aropoh. 1:21 Ulun ngosono Pohotala, tahpi ulun eamkani mohoromat Io kolou Pohotala, tutang eam ka'a botorimakasih ahkai-Oh. Tobalikoh kolunon nirukoh ijo bohko-bohkon; ahtoi iro jari kotinget. 1:22 Iro ngomo arop bobudi bosara podahal iro uong. 1:23 Bohkonoh Pohotala ijo abadi, ijo iro nyembah, molekan pahtung-pahtung ijo nyoruwa angbolum ijo tou mahtoi; yorih kolunon, bulung, ohcin ijo hopa'a ohpat, tutang ohcin ijo nyoli. 1:24 Bain tului orih Pohotala mohonau iro konowasa bain kojolik ahtoi'ndo, ahkan nguan ijo bejad, nyiring iro nguan hal-hal ijo kojilok toharep sama arop. 1:25 Pohotala ijo morong, iro ngatioh umba ang'co ijo palasu. Bohkon ijo pona'oi, molekan ijo tona'oi orih justru ijo tonyembah tutang ijo tonohalu bain iro. Podahal ijo pona'oioh orih rih ijo soharusoh tomonara turus-jaham! Amen. 1:26 Kotuluioh kolunon nguan ijo kodorih, mahka Pohotala mohonau iro numbun kojolik iro ijo hina. Bawin-bawin iro eam hino jolik umba ulunbahkas, kolou ijo lajimoh aang ulun, molekan karasjolik umba sama bawi. 1:27 Bahkas ka kodorih ka'a, iro eam hino socara lajimoh nguan kohihcoi umba ulunbawi, molekan jolik tohimo sama bahkas. Bahkas nguan gawiu ijo komia-mia toharep sama bahkas, nyiring iro norima balos ijo sotimpal umba gawin iro ijo ja'at rih. 1:28 Bain tului ulun eam komo porulu ngosono Pohotala, mahka Pohotala mohonau tiruk'ndo monjadi rusak, nyiring iro nguanoh hal-hal ijo iro eam tou nguaioh. 1:29 Ahtoi iro tuwi umba paring ijo ja'at, ijo eam morong; tuwi umba kokuhuahtoi; komaram tutang nanyam bohiri; tuwi umba kojolik ahkan munu, hokolahi, ngobula, tutang dandam. Iro rajin nohou ulun bohkon; 1:30 rajin ngonja'at-ja'at aran ulun bohkon; iro bojuhu tutang kurang ajar ijo bosingi umba Pohotala, tutang rajin mongolitar. Iro ahpik ngurah cara-cara bohua ahkan nguan koja'at. Iro molawan ulun oko, 1:31 iro eam kani ngorahti ulun bohkon, iro eam bokehtep tutang eam boperikemanusiaan. 1:32 Iro kota'an, ijo numbun hukum Pohotala, ulun ijo nguan paringoh rih, harus tonohukum mahtoi. Oluka kodorih, iro nguan ka'a hal-hal orih; tutang malah sotuju hino ulun bohkon nguaioh.
2:1 Bain tului orih, Konduang-konduang, Iairih Konduang, nyiring Konduang nosalanoh ulun bohkon? Konduang eam tepun ino-inon ahkan mombela arop! Tului amat Konduang nosalanoh ulun bohkon, podahar Konduang bongon nguanoh gawi ijo sama kolou iro; mahka Konduang ngohtunohhukum ngosan arop'mu bongor ka'a. 2:2 Ihto ta'an ijo amat Pohotala pomuat hukum nokuh ngosan ulun, ijo nguan gawi-gawi ijo kolouorih, koputusan Pohotala rih morong. 2:3 Tahpi ihkam, Konduang-konduang, nguanoh bongor ka'a hal-hal ijo ihkam ndawaoh ahkan ulun-ulun bohkon! Tutang ihkam niruk ihkam duon liwus tahkan hukum Pohotala? 2:4 Ata'ai ihkam nopahjah eambakaoh kotoun Pohotala tutang koboluhang ahtoi, hawui kosabar-Oh ijo kodorih kohajoi? Musti ihkam ta'an ijo Pohotala pokarahoh kohinut ahtoi-Oh, tului Io kani mangat ihkam hubah tahkan dusa-dusan'kam. 2:5 Tahpi ihkam mahang kuhung tutang eam kani hubah. Bain tului orih ihkam bongomrih ijo ngambot hukum'mu monjadi tambah bahat aang Ondou Kiamat, amat Pohotala ngorinah kosangit-Oh tutang momuatoh hukum ijo adil. 2:6 Tului Pohotala ahkan malos nyinong ulun sotimpal umba karon aanggawiuoh. 2:7 Pohotala nongaoh pombolum sojati tutang kototahiou ahkan iro ijo te'et nguan kopios ahkan dahpotoh ijo hinutbolega, ijo tomohoromat tutang ijo tohtapkototahiu. 2:8 Tahpi ulun-ulun ijo kogunan aropoh bongoi tutang eam kani te'et umba Pohotala, molekan nitoi jalan ijo ja'at, ulun-ulun orih ahkan paham kononyingi Pohotala. 2:9 Nyinong ulun ijo jolik nguan aangja'at, ahkan tongo poros tutang mongarot; ijo-pahtuk ulun Yahudi tutang ka'a, ahkan ulun-ulun uhtus bohkon. 2:10 Tahpi paring ulun ijo jolik nguan angpios, ahkan tononga kohajoi tutang tonohoromat hawui kosanang bain Pohotala; ijo-pahtukoh ahkan ulun-ulun Yahudi, kodorih ka'a ahkan ulun-ulun uhtus bohkon. 2:11 Tului Pohotala monguan paring ulun sama. 2:12 Ulun-ulun uhtus bohkon bodusa, earo ngota'an hukum agama Yahudi. Jadi iro tomohukum ang luar hukum orih. Tahpi ulun-ulun Yahudi bodusa, ulijari ngota'an hukum orih; tului orih iro tongohasu ka'a numbun hukum rih. 2:13 Tului ulun ijo hokohinut hoduli umba Pohotala, eam tului ulun orih jari kota'an hukum agama Yahudi, molekan tului io nguanoh inon ijo tomihtik ang hukum rih. 2:14 Ulun-ulun uhtus bohkon, eam ngosono hukum agama Yahudi. Tahpi amat iro ngosan konohuang bongoi, nguan inon ijo tomoretah bain hukum rih, ahtoi iro bongoirih ijo monjadi hukum rih ahkan iro, oluka iro eam ngosono hukum agama Yahudi. 2:15 Hadatdasar'ndo ngorinahoh, ijo inon ijo tomoretah bain hukum orih, sonurat aang ahtoi'ndo. Ahtoi bua'ndo ka mbukti hal rih, tului iro bongoi anai matmiraoh ponosalan, tutang anai matmiraoh konomorong tului tiruk'ndo. 2:16 Kodorih rih ijo ahkan nyolung noin aang ondou ijo jari tonahtapoh rih. Aang ondou orih -- numbun Kabar Hinut ijo ahku mborihtaoh -- Pohotala nguha Yesus Kristus, ahkan mosara kokaron kulim ahtoi, tutang tiruk paring ulun. 2:17 Tahpi huntuh koloukuwoh umba Konduang-konduang bongon? Konduang ngahku arop ulun Yahudi. Konduang ngahtung arop umba hukum agama Yahudi tutang Konduang tamam tului kohihco Konduang umba Pohotala. 2:18 Konduang norima ponunjuk-ponunjuk tahkan hukum rih, nyiring Konduang ngota'an konohuang Pohotala tutang ngota'an nuhkas, umoh ijo morong. 2:19 Konduang yakin ijo Konduang anai okon ulun bobulen tutang koloang bagi iro ijo mohcon ang luwang kopindong. 2:20 Konduang gurun ulun-ulun ijo bohadat randah, tutang gurun ulun-ulun ijo uong. Konduang yakin ijo ang luwang hukum agama Yahudi. Konduang tepun kokaron pongotaan tutang ajaran ihco morong. 2:21 Konduang majar ulun bohkon; Ho, ombai Konduang eam majar arop'mu bongom? Konduang majar ulun mangat a'ai nahkou, podahar Konduang bongon, nahkou! 2:22 Konduang majar ulun mangat a'ai hobandung! Podahar Konduang bongon, hobandung! Konduang bosingi umba dewa, podahar Konduang bongon, ngomin ramu-ramu tahkan pasah-pasah dewa. 2:23 Konduang monamam-namam, ijo Konduang nambit hukum Museh, podahar Konduang mohina Pohotala hawui eam numbun hukum-Oh. 2:24 Ang luwang Surat Borasih tonyurat koloutuh, "Tului ihkam, ulun-ulun Yahudi, mahka aran Pohotala kononja'at aang louk, uhtus-uhtus bohkon." 2:25 Amat Konduang tehen umba hukum agama Yahudi mahka sunat Konduang anai gunaioh ka'a. Tahpi amat Konduang eam duon tehen umba hal-hal ijo ponoretahoh aang hukum rih, mahka sunat Konduang eam aro gunai samasino. 2:26 Amat ihcobehti bohkon ulun Yahudi ijo eam tonyunat numbun hukum agama Yahudi, eamkah Pohotala jari ngohu kolou ulun rih ijo jari tonyunat? 2:27 Tutang ulun-ulun ijo eam tonyunat rih ahkan nosalan Konduang ulun Yahudi, tului Konduang anaingina hukum agama Yahudi, tutang Konduang tonyunat, tahpi Konduang molanggar hukum orih. Iro eam tonyunat, tahpi puna iro rih ijo tehentu'u umba hukum agama Yahudi. 2:28 Tului ulun Yahudi ijo sojahti, eamrih ulun ijo tihkas araioh iou ulun Yahudi; tutang ulun ijo tu'u-tu'u tonyunat, eamrih kolou ulun ijo tonyunat cara behtioh iou. 2:29 Tobalikoh ihcobehti Yahudi ijo sojahti anairih ulun ijo ahtoioh bohomboruan Yahudi; tutang sunat ijo sojahti, anairih sunat ang ahtoi ijo tonguan bain Roh Pohotala, eam ijo tonyurat ang buhku ih. Ulun somahcam orih monorima taraoh tahkan Pohotala, eam tahkan ulun.
3:1 Amat kodorih inonrih utungoh monjadi ulun Yahudi? Tutang inonkah rimaioh numbun aturan sunat? 3:2 Puna iou aro ka'a paedahoh! Pahtu-pahtukoh kotului ahkan ulun Yahudirih Pohotala momorocayaoh auh-auh Pohotala. 3:3 Tahpi koloukuwoh amat ihco kobagi ulun Yahudi eam tehen? Kuwoh, tului orih Pohotala monjadi eam tehen? 3:4 Puna eam! Tului tarangrih Pohotala toturus morong, oluka nyinong ulun ngobalik. Luwang Surat Borasih, tonyurat, "Konohuang-Oh ihko bobukti morong a'ang inon ijo ihko ngohawotoh tutang ihko manang aang ohkot ihko ponosara." 3:5 Tahpi amat komorong Pohotala jari mahi-mahi korinah, bain tului ihto nguan ijo eam morong, inonrih ijo kani ihto nuhtuioh? Ijo Pohotala eam adil amat Io mosara ihto? (Puna kisok orih wajar numbun kolunon.) 3:6 Samasino eam! Tului amat Pohotala eam adil koloukuwoh Io duon mosara kolunon tuh? 3:7 Tahpi amat tului konuan ulun ijo eam morong, inon ijo morong tohou Pohotala mahi-mahi lombut nyiring Io tonotara, ombai ulun ijo nguan koja'at rih magun tonosalan, kolou ulun bodusa? 3:8 Tutang ombai ihto eam tou nuhtui, "Piosrih ihto, nguan koja'at mangat lombut kopios?" Puna anai ulun-ulun ijo mohina ahku honong tuhtuioh ijo ahku jari nuhtui kodorih. Ulun-ulun somahcam rih kopahtut-Oh tonahukum bain Pohotala. 3:9 Nah, inon ponuot ihto kolou ulun Yahudi molowi kopioi tahkan ulun uhtus bohkon? Samasino eam! Jari ahku monarangoh, ijo, pios uhtus ulun Yahudi, oluka ijo uhtus bohkon paringoh ius konowasa bain dusa. 3:10 Kolou ijo tonyurat ang Surat Borasih, "Eam aro ihcobehti ka ijo morong, 3:11 earo ihcobehti ka ijo horahti tutang earo ihcobehti ka ijo nyembah Pohotala. 3:12 Paring ulun ius ngonyajongoh arop tahkan Pohotala; paringoh jari lacat. Earo ihcobehti ka nguan ijo tu'u; ihcobehti ka eam! 3:13 Bolokung iro kolou luwang tanom ijo hobangah. Alik, bula, nyalut tahkan jolan'ndo, tutang biwih'ndo nopurus pitnah kolou wisa lohi. 3:14 Baun'ndo tuwi umba kutuk-kunuk hawui kohiri. 3:15 Ikang'ndo cahpat amat kani ngoporos tutang munu ulun. 3:16 Kokahkas tutang kosusah tomorawuh'ndo ang umo-umoh. 3:17 Iro bobulen nitoi jalan kosanang-komangat, 3:18 tutang eam mohoromat Pohotala." 3:19 Huntuh ihto kota'an ijo paring ijo ius tonyurat luwang hukum agama Yahudi, anairih ahkan ulun-ulun ijo anai ang pinda hukum rih. Honong kodorih eam ihcobehti ka duon nonga alasan ino-inon hino, tutang paring kolunon duon tomokara bain Pohotala. 3:20 Tului earo ihcobehti ka ahkantou hokopios umba Pohotala, bain tului ulun rih, nguan hal-hal ijo sombang aang hukum agama. Podahar hukum rih tihkas pokarah ahkan ulun, ijo ulun bodusa. 3:21 Tahpi huntuh Pohotala ius nunjukoh jalan, koloukuwoh ulun tou hokopios umba Io: Tutang caraoh rih eam anai sakut pautoh umba hukum agama Yahudi. Buhku-buhku Museh tutang buhku-buhku nabi-nabi, justru ngorinah ang orih. 3:22 Ijo Pohotala nonga jalan ahkan ulun hokopios umba Io, tihkas amat ulun porocaya umba Yesus Kristus. Pohotala nguan hal orih ahkan paring ulun ijo porocaya umba Kristus; tului eam aro kobohkoioh. 3:23 Paring ulun jari bodusa tutang jajong tahkan Pohotala ijo kani monyolamatoh iro. 3:24 Tihkas tului pononganasi Pohotala ijo tonongaoh honong cuma-cuma, hokohihco ulun umba Pohotala monjadi pios hoduli, caraoh iorih; ulun tonoliwusoh bain Kristus Yesus. 3:25 Pohotala noparahpah Yesus Kristus, mangat honong popahtoi-Oh rih ulun tongorimahoh ius boliwus tahkan kosalaioh, amat iro porocaya umba Io. Pohotala nguan angkodorih ahkan ngorinah koadilan-Oh. Tului ang wayah ijo houn Pohotala ius nyolenankosabar ngindoi, toharep dusa-dusan ulun. Nyiring Io eam mohukum iro. 3:26 Tahpi huntuh Io botindak toharep dusa-dusan ahkan ngorinah komorong-Oh. Umba cara orih Io pokarahoh ijo arop-Oh morong, tutang nyinong ulun ijo porocaya ahkan Yesus, ponokarah-Oh kolou ulun ijo jari hokohinut hoduli umba Pohotala. 3:27 Bain kotului orih eam anai hino alasan, bagi ihto ahkan tama-tamam. Ombai kodorih? Inonrih, kotului ihto nguan ijo tomihtik a'ang hukum agama Yahudi? Eam. Tahpi tului ihto porocaya. 3:28 Kotului koputusaioh koloutuh: Ulun bokorinah jari hokohinut hoduli umba Pohotala, eam tului Io nguan inon ijo tomihtik a'ang hukum agama Yahudi, molekan tului Io porocaya umba Yesus Kristus. 3:29 Ata'aikah Pohotala rih Pohotalan ulun Yahudi bewe? Eamrih Io Pohotalan uhtus ulunbohkon ka'a? Yo. Puna Io Pohotalan uhtus bohkon ka'a! 3:30 Tului Pohotala tihkas Ihco. Io ijo nonga jalan ahkan ulun-ulun Yahudi hokohinut hoduli umba Pohotala, tului iro porocaya. Tutang Iorih hino nongajalan ulun-ulun uhtus bohkon ka tou hokohinut hoduli umba Pohotala. Orih ka'a tului iro porocaya. 3:31 Kuwohrih tuh rimai, ijo tului ihto porocaya umba Yesus Kristus, turus ihto dian hukum agama ulun Yahudi? Samasino eam kodorih! Malah justru koporocayan ihto orih, ihto moregaoh hukum rih.
4:1 Amat kodorih inon ijo duon ihto nuhtui, tohou Abraham tahtu ajuh uhtus ihto? Koloukuwohrih pongalamanoh? 4:2 Amat hal-hal ijo konuaioh kotuluioh orih Pohotala norima Io monjadi ulun ijo ngojorihoh ahtoi Pohotala, mahka anai ka'a alasan ahkaioh ahkan tama-tamam umba aropoh. Tahpi Io eam duon botamam ang toharep Pohotala. 4:3 Luwang Surat Borasih anai tonyurat: "Abraham porocaya umba Pohotala, tutang tului koporocayaoh rih Io norima bain Pohotala, monjadi ulun ijo ngojorih ahtoi Pohotala." 4:4 Ulun ijo bogawi, norima upah, tutang upahoh rih eam tongohuoh monjadi ihco pononga bewe, tahpi tului orih anairih hakoh. 4:5 Tahpi anai ulun ijo eam monggahtung aang gawiuoh bongoi io moporocayaoh aropoh ahkan Pohotala, ijo ngorinahoh ulun bodusa liwus tahkan kosalaioh. Hogalang koporocayaoh orih rih Pohotala norima ulun rih, monjadi ulun ijo ngojorih ahtoi Pohotala. 4:6 Kodorihoh tiruk Dawid ka'a; orih kotuluioh io ngohawot solamat, kosanang ahkan ulun ijo bain Pohotala jari tonorima monjadi ulun ijo ngojorih ahtoi-Oh, earo Pohotala nohtoani gawin-gawin ulun rih. Dawid nuhtui numbun tuh, 4:7 "Kosanangrih ahkan ulun ijo kosalai-kosalaioh tongapun tutang dusai-dusaioh ius tongapun Pohotala! 4:8 Kosanangrih ahkan ulun ijo dusai-dusaioh eam tonuhtut bain Tuhan!" 4:9 Inon tuhtui kosanang tuh tonihtu tihkas ahkan ulun ijo numbun poroturan sunat bewe? Ata'aioh ka'a ahkan ulun-ulun ijo eam numbun poroturan sunat? Jari ihkai ngohawotoh hounmbaoh, ijo Abraham tonorima bain Pohotala monjadi ulun ijo ngojorih ahtoi-Oh, tului Abraham porocaya umba Pohotala. 4:10 Nah, mirarih Pohotala ngorinah hal orih? Sounumba ata'ai uliumba Abraham tonyunat? Puna sounumba Io tonyunat eam uliumbaoh. 4:11 Io tonyunat pongohuli tutang sunat orih rih tihkas monjadi tanda ijo Pohotala jari norima io, monjadi ulun ijo ngojorih ahtoi Pohotala, tului porocaya umba Pohotala. Io tonorima bain Pohotala aang ohkot io magun jaha numbun aturan sunat. Tutang Abraham monjadi amai socara rohani bagi paring ulun ijo porocaya, ahkan Pohotala, tutang ijo kotuluioh jari tonorima bain Pohotala, monjadi ulun ijo ngojorih ahtoi-Oh, oluka iro eam nambit poroturan sunat. 4:12 Abraham ka'a amai rohani ahkan ulun-ulun ijo nuhtut poroturan sunat. Io amai rohani iro, eam baya tului iro nuhtut poroturan sunat, tahpi ka'a tului iro bolum honong porocaya umba Pohotala, sama kolou Abraham aang ohkot io jaha nuhtut poroturan sunat. 4:13 Pohotala nobowot ahkan Abraham tutang litingoh, ijo kolunon tuh ahkan monjadi ain Abraham. Pohotala hobowot kodorih, eam kotului Abraham te'et umba hukum agama Yahudi, tahpi kotului io percaya umba Pohotala; nyiring io tonorima bain Pohotala monjadi ulun ijo ngojorih ahtoi Pohotala. 4:14 Kotului amat baya ulun-ulun ijo bokehtep umba hukum-hukum agama Yahudi bewe, ijo ahkan norima inon, ijo tonobowotoh bain Pohotala, mahka porocaya umba Pohotala earo gunai samasino, tutang bowot Pohotala ka ngahus bewe. 4:15 Hukum agama Yahudi mopolombut hukum Pohotala. Tahpi amat aturan Pohotala eam aro, mahka polanggar ka'a eam aro. 4:16 Jadi bowot Pohotala rih, hogalangrih porocayaoh ulun ahkan Pohotala. Orih monjadi ihco jaminan ahkan paring lihit Abraham, ijo bowot rih tononga ahkan iro monjadi ihco pononga cuma-cuma tahkan Pohotala; eam tihkas mangat iro ijo bokehtep umba hukum agama Yahudi bewe, tahpi ka'a ahkan iro ijo porocaya umba Pohotala sama kolou Abraham porocaya umba Io. Tului Abraham orih rih amai ihto paring socara rohani. 4:17 Kotului Pohotala nuhtui koloutuh ahkan Abraham, "Ahku ius ngonjorian ihko amai bagi aro uhtus." Kolouorih Pohotala nonga bowot rih ahkan Abraham. Tutang Abraham porocaya umba Io. Io rih Pohotala ijo mombolum ulun mahtoi: Iorih ka'a Pohotala ijo honong nuhtui iu, napa inon ijo eam pu'u anai, monjadi anai. 4:18 Abraham toturus ih harap tutang porocaya oluka eam anai harapan hino. Tului orih io monjadi amai aro uhtus. Numbun ijo tonyurat ang Surat Borasih. "Lihit'mu ahkan monjadi aro samasino." 4:19 Abraham ang ohkot rih kota'an ijo io jari eam aro harapan hino anaitepun lihit, tului bihtiouoh jari nokalou oko hawui umuroh jari doni solahtus toun; mahi hino Sarah, oruhoh rih, tomanang. Tahpioh koporocaya Abraham eam monjadi bokurang. 4:20 Io tehtep porocaya tutang eam bembang ahkan bowot Pohotala. Malah koporocayaoh ngonjorian io botambah ba'as, nyiring io toturus monara-nara Pohotala. 4:21 Io porocaya samasino ijo Pohotala duon nguaioh inon ijo jari tonobowot-Oh. 4:22 Tului orih Abraham tonorima bain Pohotala monjadi ulun ijo ngojorih ahtoi Pohotala. 4:23 Tuhtui, "tonorima monjadi ulun ijo ngojorih ahtoi Pohotala," tonyurat eam tihkas ahkan Abraham bongoi bewe, 4:24 tahpi ka'a ahkan ihto. Ihto ka'a ahkan tonorima monjadi ulun ijo ngojorih ahtoi Pohotala, kotului ihto porocaya ahkan Pohotala ijo mombolum Yesus Tuhan ihto, tahkan popahtoi. 4:25 Yesus rih jari tonyorahoh ahkan tomunu tului dusa-dusan ihto; turus Io tonombolum hoduli bain Pohotala mangat nonga-jalan ihto hokohinut hoduli umba Pohotala.
5:1 Huntuh ihto ius hokohinut hoduli umba Pohotala, tului ihto porocaya. Tutang bain tului orih ihto bolum a'ang hokubuah umba Pohotala, nguha Tuhan ihto Yesus Kristus. 5:2 Bain tului ihto porocaya ahkan Yesus, mahka Io nguapjalanahkan ihto mongenang asin Pohotala tutang honong kasih orihrih ihto bolum huntuh. Tului orih ihto jorih-jorih ahtoi, tului ihto anaitepun koharap, ijo ihto ahkan nginyam kosanang ijo tononga Pohotala. 5:3 Tutang molowi tahkan orih, ihto ka jorih ang luwang kokarot, tului ihto kota'an ijo kokarot rih napa ulun monjadi bokehtep, 5:4 tutang kokehteprih mangat ngonjorian ulun tahan tihkos; tuhrih ijo mopolombutoh koharap. 5:5 Koporocaya ijo kolouorih rih eam ahkan poki'aoh ihto, tului ahtoi ihto ius sonuang bain Pohotala umba Asiu-Oh. Pohotala nguan orih rih honong nguha Roh-Oh, ijo jari tononga-Oh ahkan ihto. 5:6 Kotihka ihto a'ang koada'an eam aro daya, Kristus mahtoi ahkan ihto aang ohkot ijo kona, ijo tonuhkas bain Pohotala; podahal ihto ulun-ulun, ijo ngomahcuarop tahkan Pohotala. 5:7 Ahkan ihcobehtiulun ijo adil ka bahali ulun kani mahtoi. Mihkohhirah ahkan ihcobehti ijo pios, anai ka'a ulun ijo bohanyi mahtoi. 5:8 Tahpi Pohotala ngorinah Asiu-Oh ahkan ihto kotihka Kristus mahtoi ahkan ihto, aang ohkot ihto magun ulun bodusa. 5:9 Huntuh ihto jari hokopios hoduli umba Pohotala, nguha popahtoi Yesus Kristus; kotului rih musti ihto ahkan duon tonyolamat ka'a tahkan kosangit Pohotala, bain Kristus. 5:10 Amat anai wayah ihto homusuh umba Pohotala, ihto tongobuahoh umba Io nguha popahtoi Anak-Oh; mahihino huntuh ulimba kohihcon ihto umba Pohotala pios hoduli, puna ihto ahkan tonyolamat ka'a nguha pombolum Kristus. 5:11 Tutang molowi tahkanumba rih, ihto hokojorih ka'a ngosan kohinut Pohotala nguha Tuhan ihto Yesus Kristus. Tului nguha Yesus Kristus, ihto huntuh nginyam kohihco ijo morong rih honong Pohotala. 5:12 Dusa nyolong nokuh luwang kolunon nguha ihcobehti, tutang tahkan dusa orih lombut popahtoi. Kojorian popahtoi ijo nanyap aang paring ukup kolunon, tului paringoh ulun jari bodusa. 5:13 Sounumba hukum agama Yahudi tononga, dusa jari anai ang luwang kolunon. Tahpi dusa eam tonuhtut tului eam anai hukum ijo tou tonoturung. 5:14 Tahpi tahkan jaman Adam nyiring ang jaman Museh, popahtoi jari mongowasa paring ukup kolunon. Malah ulun-ulun ijo eam nguan toturung umba cara ijo sama, kolou ijo konuan bain Adam, ulun-ulun rih ka tahput ka'a konowasa bain popahtoi. Adam anairih gambar tahkanumba Io, ijo ahkan lombut pongohuli. 5:15 Tahpi ijo koduooh rih eam sama; tului ponongan Pohotala mahcu labih kohajoi, amat tonihpong umba kototurung ijo konuan bain Adam. Kototurung ihco behti, kotuluirih aro ulun mahtoi. Eam inon labih hajo hino kojorian tahkan pononganasi Pohotala, tutang ponongan solamat ijo tononga-Oh, ahkan kodorih karon ulun nguha kohinut ahtoioh ihcobehti, yorih Yesus Kristus. 5:16 Ponongan Pohotala ka'a mahcu labih hajo tahkanumba dusan ulun ijo ihco rih. Tului uliumba ihco behti nguan toturung, lombut ponis, "Bosala". Tahpi ulimba aro ulun nguan dusa lombutrih pononga tahkan Pohotala ijo bokorinahoh, "Eam Bosala". 5:17 Tului kototurung ihco behti, popahtoi nanyap koumo-umoh nguha ulun ijo ihco rih. Eam inon labih hajo hino, kojorian tahkan inon ijo tokonuanoh bain ihco behti ijo bohkon, yorih, Yesus Kristus. Nguha Io, Pohotala nusuh pononganasi-Oh ahkan kolourih karon ulun, tutang honong cuma-cuma, nguapjalan iro hokopios hoduli umba Pohotala; iro ahkan bokowasa ang kolunon tuh nguha Kristus. 5:18 Jadi, koloukuwoh kototurung ihco behti ngonjorian sohapus ukup kolunon tonohukum; kodorih ka'a gawin ihco behti ijo nuhtut kohondak Pohotala, mongonjorian paring ulun konoliwus tahkan kosala'an, tutang tononga pombolum. 5:19 Tutang koloukuwoh aro ulun monjadi ulun bodusa, kotului ihco behti eam te'et. Kodorih ka'a aro ulun duonjalan hokopios hoduli umba Pohotala, tului ihco behti te'et umba Pohotala. 5:20 Ijo nonga hukum agama Yahudi iorih Pohotala bongoi. Tahpi mahi-mahi ulun ngurah-jalan moneet hukum rih, mahi-mahi iro noturungoh tutang bodusa toharep Pohotala. Oluka kodorih, mahi-mahi ulun napa dusa, Pohotala mahi-mahi ka'a masi iro. 5:21 Ho, ihto harus mahtoi, tului ihto napa dusa. Tahpi Pohotala mongasih ihto tutang nonga jalan ahkan ihto mangat hokopios hoduli umba Io. Tutang tului kohihcon ihto umba Pohotala jari pios hoduli, Io nonga ka'a pombolum ijo sojahti tutang kototahiu ahkan ihto nguha Yesus Kristus, Tuhan ihto.
6:1 Amat kodorih inon ijo duon ihto nuhtuioh? Haruskah ihto toturus napa dusa mangat Pohotala mahi-mahi ngasi ihto? 6:2 Puna eam! Dusa eam hino bokowasa umba ihto, jadi, kuwoh tou ihto hototurus bolum hawui napa dusa hino? 6:3 Ngota'ankah Konduang-konduang ijo aang ohkot ihto ponopondus, ihto ponohihco umba Yesus Kristus? Tuh rimai ihto ponohihco umba popahtoi-Oh. 6:4 Umba pompondus orih, ihto tonanom umba Kristus tutang umba mahtoi homboh Io, mangat koloukuwohoh Kristus tonombolum tahkan popahtoi bain kowasan Amai ijo tonohoromat, kodorih ka ihto duon molalus ihco pombolum ijo bohua. 6:5 Amat ihto jari monjadi ihco umba Kristus, tului ihto umba mahtoi homboh Io, ihto ahkan monjadi ihco umba Io ka'a kotului ihto umba tonombolum hoduli kolou Io. 6:6 Ihto kota'an, ijo tobiat ihto ijo holu, kolou ulun jari mahtoi homboh Kristus ang kahju sopolahki, mangat kowasan tobiat ihto ijo bodusa rih tonoluhtek; hawui kodorih ihto eam hino tonojihpon bain dusa. 6:7 Kotului amat ihcobehti mahtoi, ulun rih tonoliwusoh tahkan kuwasa dusa. 6:8 Amat ihto jari mahtoi homboh Kristus, ihto porocaya ijo ihto ka, ahkan bolum homboh Io. 6:9 Kotului ihto ngota'an ijo Kristus jari tonombolumoh tahkan popahtoi, tutang Io eam ahkan mahtoi hino; popahtoi jari eam hino bokowasa ngosan arop-Oh. 6:10 Popahtoi ijo tonyuru Kristus, anairih popahtoi toharep dusa. Orih nyolung sino tikat iou ahkan turus-jahamoh. Tutang komonyun ijo tonitoi-Oh huntuh tuh anairih kobolum ahkan Pohotala. 6:11 Ihkam harus ka'a ngohu arop'kam mahtoi tahmo dusa, tahpi bolum a'ang kohico ijo tehen umba Pohotala, nguha Kristus Yesus. 6:12 A'ai hino mohonourih dusa mongowasa pombolum'kam ijo usang, Konduang ara numbun konohuang ihkam ijo ja'at. 6:13 A'airih ka'a Konduang nyorahoh ramun behtin'kam ahkan kowasa dusa, ahkan tohapaoh bagi konohuang-konohuang ijo ja'at. Tahpi nyorahoh rih arop'kam ahkan Pohotala monjadi ulun ijo jari hahtun tahkan popahtoi, nokuh pombolum. Nyorahoh arop'kam pari-paring ahkan Pohotala, mangat hapaioh ahkan nguanoh kohondak Pohotala. 6:14 Dusa eam duon ngowasa ihkam, tului ihkam eam hino ang pinda hukum agama Yahudi. Tahpi ihkam pinda hukum pononganasi ain Pohotala. 6:15 Huntuh, kuwoh koloputai-Oh? Toukah ihto bodusa, tului ihto eam hino ang pinda kowasa hukum agama Yahudi, molekan ang pinda kowasa pononganasi Pohotala? Samasino eam! 6:16 Kota'ankah ihkam ijo amat ihkam monyorah arop ahkan ihcobehti ulun, mangat nguanoh konohuangoh, mahka ihkam anairih jihpon ulun, ijo ihkam heretoh rih -- inonrih jihpon dusa ijo ngomin ihkam ahkan popahtoi ata'ai jihpon ijo heret umba Pohotala. Tutang honong kodorih, hokopios huli umba Pohotala. 6:17 Tahpi torimakasih ahkan Pohotala! Tului lomoi ihkam jihpon dusa, tahpi huntuh ihkam honong kotuwi ahtoi heret umba ajar komorong ijo jari tunongaoh ahkan'kam. 6:18 Ihkam ius tonoliwusoh tahkan dusa, tutang huntuh monjadi jihpon ahkan kohondak Pohotala. 6:19 Tului koba'as norima'mu kolourih bolomu, ahku hapa sutu-sutu kojihpon, mangat ihkam labih jeleng nyolembangoh. Lomoi ihkam nyorah arop'kam koparingoh, monjadi jihpon ahkan hal-hal kojilok tutang ijo ja'at, ahkan konohuang-konohuang ijo ja'at. Kodorih ka'a huntuh, hondakrih ihkam monyarahoh arop koparingoh, monjadi jihpon bagi kohondak ain Pohotala, nguan konohuang-konohuang Pohotala ijo khusus. 6:20 Ohkot ihkam tohonjihpon bain dusa, ihkam eam konowasa bain kohondak Pohotala. 6:21 Aang ohkot rih, koutungan inon ijo jari ihkam norimaoh tahkan hal-hal, ijo huntuh ihkam mia nguaioh? Gawi-gawi orih tihkas ngomin ihto nihtu popahtoi! 6:22 Tahpi huntuh ihkam jari konuwatoh tahkan dusa tutang monjadi jihpon Pohotala. Koutungan'mu iorih ijo Konduang bolum khusus ahkan Pohotala tutang hal orih, momuaoh pombolum sojahti tutang kototahiu. 6:23 Tului popahtoi orih rih uhpah tahkan dusa, tahpi pombolum sojahti tutang kototahiu hihco umba Kristus Yesus Tuhan ihto, anairih pononga ijo tonongaoh bain Pohotala honong cuma-cuma.
7:1 Konduang-konduang'ku! Konduang paringoh jari ngosono hukum. Jadi, ihkam kota'an ijo kowasan hukum ijo ngosan ihcobehti, touhapan kotahin ulun rih magun bolum. 7:2 Ihcobehti ulunbawi ijo ngomosai, porobasaoh, io konarut bain hukum umba bosaioh, tihkas kotahin bosaioh magun bolum. Amat bosaioh mahtoi, oruhoh rih tokuwat tahkan hukum ijo ngarut io umba bosaioh. 7:3 Amat ulunbawi rih bolum umba ulunbahkas ijo bohkon aang uhun bosaioh magun bolum, mahka ulunbawi rih konohawot hobandung. Tahpi amat bosaioh jari mahtoi, mahka numbun hukum io bolohkak. Tutang amat io kani kawin hino umba ulunbahkas ijo bohkon mahka io eam konohawot hobandung. 7:4 Kodorih ka'a hal-hal umba ihkam, Konduang-konduang'ku. Toharep hukum agama Yahudi ihkam jari mahtoi, tului ihkam ius ponohihco umba behtin Kristus, tutang monjadi barih Aiu, ijo ius tonombolum hoduli tahkan popahtoi. Io tonombolumoh tahkan popahtoi, ahkan ihto monjadi boguna bagi Pohotala aang pombolum ihto. 7:5 Tului, lomoi ihto bolum numbun sipat-sipat kolunon. Aang ohkot orih kojolik-kojolik ijo bodusa, ijo lombut kotului anaioh hukum agama, nambit paranan a'ang arop ihto. Orih kotuluioh ihto nguanoh hal-hal ijo kojoriaioh nitu popahtoi. 7:6 Tahpi huntuh ihto eam hino konarut ang hukum agama Yahudi. Ihto jari mahtoi toharep hukum ijo lomoioh ngowasa ihto. Ihto eam hino bosorah honong cara ijo usang, numbun hukum ijo sonurat. Huntuh ihto bosorah numbun cara ijo bohua ijo ngorinah bain Roh Pohotala ahkan ihto. 7:7 Amat kodorih, inon ijo tou ihto nuhtuioh? Ijo hukum agama Yahudi rih ja'at? Puna eam! Tahpi hukum rih ijo majar ahku tohou dusa. Ahku eam ahkan kota'an bokuhu rih inon, amat hukum agama rih eam nuhtui, "Ara bokuhu." 7:8 Nguha hukum agama, dusa sapet ahkan mopolombut kokaron mahcam kojolik ijo bokuhu ang luwang ahtoi'ku; kotului amat hukum agama eam aro, mahka dusa ka mahtoi. 7:9 Ahku lomoi bolum eamhapa hukum agama. Tahpi kotihka hukum agama lombut, dusa nopara bolum, 7:10 tutang tului rih ahku mahtoi. Mahka hukum agama rih, ijo pahtukoh tongohuangoh ahkan nonga pombolum, malah orih polombut popahtoi ahkak'ku. 7:11 Kotului nguha hukum agama rih, dusa sapet nyolong nihpu tutang munu ahku. 7:12 Hukum agama asaroh lombut tahkan Pohotala, tutang nyinong poretah luwang hukum rih lombut-Oh tahkan Pohotala, jari adil tutang pios. 7:13 Ho, Inonrih tuh rimai tului ijo pios rih mopolombut popahtoi ahkak'ku? Puna eam! Dusa iou ijo polombut popahtoi rih. Honong hapa ijo pios, dusa polombut popahtoi ahkak'ku, mangat sipat-sipat dusa gihtan honong tarang. Nguha poretah-poretah Pohotala rih bobuktirih, eaminon koja'atoh dusa. 7:14 Ihto kota'an ijo hukum agama Yahudi, asar tahkan Roh Pohotala, tahpi ahku tuh ulun bolomu. Ahku jari ponodagang monjadi jihpon dusa. 7:15 Tului ahku bongok eam solembang anggawik'ku. Hal-hal ijo ahku jolik nguaioh, orih eam ahku nguai; tahpi hal-hal ijo ahku nyingi, orih malah ijo ahku nguaioh. 7:16 Nah, amat ahku nguaioh hal-hal ijo hokolawan umba kojolikoh, orih rimai ahku ngahku ijo hukum agama Yahudi rih pios. 7:17 Jadi, eam hino ahku kotu'uioh ijo nguanoh orih molekan dusa ijo mongowasa arop'ku rih. 7:18 Ahku ta'an ijo eam aro aangihco ka ijo pios, ang luwang arop'ku, io rih luwang tobiat'ku, monjadi ulun. Tului anai kojolik aang ahku ahkan nguan kopios, tahpi ahku eam sanggup molalusoh. 7:19 Ahku eam nguan ijo pios, ijo ahku jolik nguaioh, tombalikoh ahku nguan hal-hal ijo ja'at, ijo ahku eam kani nguaioh. 7:20 Amat ahku nguaioh hal-hal, ijo eam ahku jolik nguaioh, orih rimai bohkon ahku ijo nguaioh hal-hal rih, molekan dusa ijo ngowasa behtik'ku dih. 7:21 Jadi ahku ngomin kobulatoh, ijo hukum tuhrih ijo nambit paranan; yorih ijo amat ahku jolik nguan ijo pios, mahka tihkas ijo ja'at bewe ijo lombut aang ahku. 7:22 Homboruak'ku jolik ahkan hukum ain Pohotala, 7:23 tahpi ahku sadar ijo luwang behtik'ku anai hino hukum bohkon ijo nambit paranan -- io rih hukum, ijo hokolawan umba hukum ijo konolik'ku bain akal dasar aik'ku. Orih kotuluioh ahku tojorat aang hukum dusa ijo nambit paranan ang luwang arop'ku. 7:24-26 Nah, koloutuhrih koada'ak'ku; ahku moneet hukum Pohotala umba akal dasar'ku, tahpi honong tobiat kolunok'ku, ahku kalah aang dusa. Pahamrih kocolahkaioh ahku tuh! Iai ijo kani monyolamat ahku tahkan behtik'ku tuh, ijo ngomin ahku nokuh popahtoi? Botorimakasih ahku ahkan Pohotala! Io kani monyolamat ahku nguha Tuhan Yesus Kristus.
8:1 Uhuntuh eam anai hino pohukuman toharep iro ijo bolum hihco umba Kristus Yesus. 8:2 Tului hukum Roh Pohotala ijo nguan ihto bolum hihco umba Kristus Yesus jari nguwat ahku tahkan hukum ijo kotuluioh dusa tutang popahtoi. 8:3 Inon ijo eam duon konuan bain hukum agama, kotului ihto ulun bolomu, orih jari konuanoh bain Pohotala. Pohotala ijo mongalah kowasa dusa luwang tobiat ulun, hawui ngirimrih Anak-Oh bongoi, ijo lombut aang koada'ai sama umba kolunon ijo bodusa, ahkan ngudap dusa. 8:4 Pohotala nguanoh orih, mangat kohondak-Oh ijo tongorinahoh aang hukum agama Yahudi rih duon tomolalus ang arop ihto ijo bolum numbun Roh Pohotala tutang eam numbun tobiat kolunon. 8:5 Ulun-ulun ijo bolum numbun tobiat kolunon, toturus niruk inon ijo tongojolikoh bain tobiat kolunon. Tahpi ulun-ulun ijo bolum numbun Roh Pohotala toturus niruk inon ijo tongojolikoh bain Roh Pohotala. 8:6 Amat tiruk'kam konowasa bain tobiat kolunon, mahka kojoriaioh popahtoi. Tahpi amat tiruk'mu konowasa bain Roh Pohotala, mahka kojoriaioh io rih bolum tutang damai umba Pohotala. 8:7 Ulun ijo tirukoh tongowasa bain tobiat kolunon, ulun rih homusuh umba Pohotala, kotului ulun rih eam tunduk umba hukum Pohotala; tutang puna io eam tou tunduk ahkan hukum Pohotala. 8:8 Ulun-ulun ijo bolum numbun tobiat kolunon, eam duon ngojorih ahtoi Pohotala. 8:9 Tahpi amat ihkam eam bolum numbun tobiat kolunon. Ihkam bolum numbun Roh Pohotala -- amat, puna kotuhkasoh, Roh Pohotala tu'u-tu'u nambit paranan ang luwang arop'kam. Ulun ijo eam anaitepun Roh Kristus, ulun orih bohkon ain Kristus. 8:10 Tahpi amat Kristus bolum ang luwang behtin'mu, mahka oluka behtin'kam ahkan mahtoi tului dusa, tahpika Roh Pohotala nonga pombolum ahkan'kam, kotului kohihco umba Pohotala jari pios. 8:11 Amat Roh Pohotala, ijo mombolum Kristus tahkan popahtoi, bolum ang luwang arop'kam, mahka Io ijo mombolum Kristus tahkan popahtoi rih, ahkan mombolum ka'a behtin'kam ijo dahpot mahtoi rih. Io nguan orih umba Roh-Aiou ijo bolum ang luwang'kam. 8:12 Orihrih kotuluioh, Ari-Konduang, ihto tepun tanggung-jawab; tahpi bohkon tanggung-jawab ahkan tobiat kolunon; ihto eam porulu bolum numbun kojolikoh. 8:13 Kotului amat ihkam bolum numbun tobiat kolunon, mahka ihkam ahkan mahtoi. Tahpi amat ihkam konowasa Roh Pohotala, ihkam toturus iou munu konuan-konuan'kam ijo bodusa, mahka ihkam ahkan bolum. 8:14 Ulun-ulun ijo toniting bain Roh Pohotala, anairih anak-anak Pohotala. 8:15 Tului Roh, ijo tonongaoh bain Pohotala ahkan ihkam, eamrih napa ihkam monjadi jihpon nyiring ihkam bolum ang luwang kihkoh. Tobalikoh Roh Pohotala rih, ngonjorian ihkam anak-anak Pohotala. Tutang honong kowasa Roh Pohotala rih, tona'ah Pohotala rih, "Abba, io Amai'ku!" 8:16 Roh Pohotala sama-sama umba Roh ihto, mongorinah, ijo ihto tuh anairih anak-anak Pohotala. 8:17 Nah, amat ihto anairih anak-anak-Oh, mahka ihto ka norima waris-Oh ijo tonahtap bain Pohotala ahkan anak-anak-Oh. Ihto ahkan norima hombo-homboh umba Kristus inon ijo jari tonahtap Pohotala ahkai-Oh, tului amat ihto ngarot umba Kristus, ihto ahkan tonohoromat ka'a homboh Io. 8:18 Paring kongarot ijo ihto nyuruoh huntuh numbun tiruk'ku eam dahpot, tonihpong samasino umba horomat ijo ahkan tongorinah bagin ihto. 8:19 Sohopus ijopindalangit ngindoi honong paham rindu umba wayahoh Pohotala ngorinah anak-anak-Oh. 8:20 Tului ijopindalangit jari tonohonouoh monjadi luhtek eam kotului konohuangoh bongoi, tahpi kotului Pohotala mohonouoh kodorih. Oluka kodorih anai ka'a horapan ihto tuh. 8:21 Ijo aang, ihco ohkot ijopindalangit ahkan konuwat tahkan kowasa ijo moluhtekoh tutang ahkan umba tomorodehkaoh tutang tonohajo; hombo-homboh umba anak-anak Pohotala. 8:22 Ihto kota'an ijo nyiring wayah tuh, sohopus kolunon ngorunguh tului kongarot, kolou ihcobehti inai ngarot aang ohkotoh nganak longa. 8:23 Tutang eamoh sohopus kolunon bewe ijo ngorunguh; ihto bongon ka ngorunguh ang luwang homboruan'to. Ihto jari norima Roh Pohotala, kolou ponongan Pohotala ijo pahtukoh, tahpi ihto magun ka'a ngindoi Pohotala nguwat arop ihto paringoh, tutang ngonjorian ihto monjadi anak-anak-Oh. 8:24 Tului umba koporocaya mahka ihto tonyolamatoh. Tahpi amat inon ijo ihto morocaya orih rih, jari ihto nohto-Oh, mahka orih eam hino porocaya. Kotului iaikah magun morocaya aang 'co ijo jari tonohtooh? 8:25 Tahpi amat ihto morocaya aang-'co, ijo jaha ihto nohtooh, mahka ihto ngindoi hawui sabar. 8:26 Kodorih ka'a Roh Pohotala lombut dohop ihto, amat ihto bolomu. Tului ihto eam kota'an koloukuwoh soharusoh, ihto bodo'a; Roh rih bongoi noharep Pohotala ahkan nyawot baginihto, hawui rindu ijo paham timbon nyiring eam duon konohawot. 8:27 Mahka Pohotala ijo ngota'an usin ahtoi ulun, horahtiu konohuang Roh rih. Tului Roh rih nyawot ahkan Pohotala, bagi ukup Pohotala tutang tohorong umba konohuang Pohotala. 8:28 Ihto kota'an, ijo Pohotala ijo ngahtur kokaron hal nyiring momua ijo pios ahkan ulun-ulun ijo ngasih Io, tutang ijo tona'ah-Oh, tohorong umba rancana-Oh. 8:29 Iro ijo jari konopili bain Pohotala, jari ka'a tonahtap tahkan toparai-Oh ahkan monjadi samakolou umba Anak-Oh, io rih Yesus Kristus. Honong kodorih, Anak rih monjadi ijo pahtuk ang louk aro Konduang-konduang-Oh. 8:30 Kodorihrih Pohotala na'ah iro ijo jari tonahtap-Oh labih soun; tutang iro ijo tona'ah-Oh rih, nongajalan-Oh hokopios hoduli umba Pohotala. Tutang iro ijo nongajalan Io hokopios hoduli umba Pohotala ngomin bagian a'ang pombolum ain Pohotala bongoi. 8:31 Inon ijo duon tonuhtui huntuh tohou paringoh orih? Amat Pohotala momihak aang ihto iairih duon molawan ihto? 8:32 Anak-Oh bongoi eam tonyayang-Oh, molekan tonosorah-Oh ahkan kogunan ihto paring, lehan Io eam ahkan nonga ahkan ihto paring-aang ijo bohkonoh? 8:33 Iairih ijo duon ngugat ihto ukup ihco konopili Pohotala, amat Pohotala bongoi ngorinah ijo ihto eam bosala? 8:34 Inonrih anai ulun ijo kani monosalan ihto? Kristus Yesus noin ijo ndohop ihto! Iorih ijo jari mahtoi, ata'ai malahan Iorih ijo jari tonobolum hoduli tahkan popahtoi, tutang anai hihco Pohotala, ang unuk ijo bokowasa. 8:35 Inonrih anai ijo duon mohalang Kristus ngasi ihto? Duonleh kosusah ngohanaoh rih, ata'ai kohali, ata'ai koporos, ata'ai bolo'u, ata'ai koporosbolum, ata'ai bohaya, ata'ai ka popahtoi? 8:36 Aang Surat Borasih tonyurat koloutuh, "Nyinong ondou ihkai bolum ang luwang bohaya mahtoi tului Ihko. Ihkai pononguaioh ulun kolou tobiri ijo ahkan sonomalih." 8:37 Eam! Malah ang luwang paringoh rih, ihto dahpot komanang ijo sompurna tu'u bain Io ijo ngasi ihto! 8:38 Tului ahku porocaya samasino ijo ang hopus kolunon, pios popahtoi oluka pombolum, pios molehkat oluka pongowasa, pios ancaman-ancaman huntuh oluka ancaman-ancaman ijo uhun ahkan lombut, ata'ai koba'as-koba'as ijo bohkonoh, 8:39 pios hal-hal ijo ang langit, oluka hal-hal ijo ang luwang ngosan tana, ata'ai inon ka ijo bohkon, paringoh eam dahpot mohalang Pohotala ngasi ihto. Kolou ijo jari tongorinah-Oh nguha Yesus Kristus, Tuhan ihto.
9:1 Inon ijo ahkan ahku nuhtuioh tuh, anairih morong, tului ahku ain Kristus. Ahku eam bobula. Ahtoi bua'ku ijo toniting bain Roh Pohotala, moyahkin ahku ka'a, ijo tuhtui'ku rih morong. 9:2 Ahku paham sedih tutang ahtoi'ku paham ngarot, 9:3 tului Konduang-konduang'ku ijo 'coutus umba ahku. Tului ahkan iro ahku bongok rela tonulat bain Pohotala tutang hopisah tahkan Kristus. 9:4 Iro anairih ukup ijo tonopili tutang Pohotala ngonjorian iro anak-anak Aiu bongoi, honong pokarah kowasa-Oh ahkan iro. Io poanaioh bowot umba iro, tutang nonga ahkan iro hukum agama. Pohotala mborihtaoh ahkan iro, koloukuwoh iro harus sombayang tutang iro jari norima hino bowot-bowot-Oh. 9:5 Iro anairih lihit tahkan tahtu ajuh ihto. Kristus socara kolunon asaroh tahkan uhtus iro rih. Io labih isun tahkan paringoh. Tonotararih ahkan Pohotala nyiring turus-jahamoh. Amen. 9:6 Ahku eam nohuang nuhtui, ijo bowot Pohotala jari eam hapan hino; tahpi, eam paring ulun Israel anairih ukup ijo konopili bain Pohotala. 9:7 Eam paring lihit Abraham anairih anak-anak Pohotala. Tului Pohotala nuhtui ahkan Abraham, "Tihkas lihit Isaak bewe ijo ahkan konohawot lihit'mu." 9:8 Orih rimai ijo lihit Abraham ijo monjadi anak-anak Pohotala, baya lihitoh ijo konanak tului bowot Pohotala. Tutang bohkon tahkan paring lihitoh. 9:9 Tului bowot Pohotala anai kolou pongotuh "Aang ohkot ijo tonahtapoh, Ahku ahkan hoduli, tutang Sarah ahkan anainorima ihcobehti anak bahkas." 9:10 Tutang tuh ka'a: Rabeka nganak duo behti anak bahkas tahkan ihco amai, yorih Isaak, tahtu ajuh 'to. 9:11 Sounumba duo behti anak rih konanak, Pohotala jari nuhkas pitih-Oh ahkan hototurusoh. Pitih Pohotala rih eam bogatung umba inon ijo duon konuan bain ulun, tahpi bogatung umba pona'ah Pohotala bongoi. Tului aang ohkot koduo anak bahkas Rabeka rih jaham duon nguan aang'co ijo pios ata'ai ijo ja'at. 9:12 Pohotala jari nuhtui umba Rabeka, "Ijo ohko ahkan mohalu ijo biou." 9:13 A'ang Surat Borasih tonyurat ijo Pohotala nuhtui koloutuh, "Yakub, Ahku ngasi io, tahpi Esau Ahku beleoh." 9:14 Kuwoh kobulatoh ihto huntuh? Ijo Pohotala rih eam morongkah? Jari puna tu'u Pohotala rih morong! 9:15 Tului Pohotala nuhtui umba Museh, "Ahku ahkan ngorinah Pononganasi ahkan ulun ijo Ahku kani ngorinah pononganasi, tutang Ahku akan ngorinah kasihsayang ahkan ulun ijo Ahku kani ngorinah kasihsayang." 9:16 Jadi, koputusan Pohotala rih eam, bogatung umba korela kolunon ata'ai ahkan usaha kolunon, molekan tahkan kopios ahtoi Pohotala bewe, toharep ulun ijo tonopili-Oh rih. 9:17 Tului ang Surat Borasih tonyurat, "Pohotala nuhtui umba lahca Misir, 'Ahku ngonjorian ihko lahca mangat ihco konohuang tuh bewe, yorih mangat umba ihko, Ahku ngorinah koba'as-Ku tutang napa arak-Ku bosewut ang hapus kolunon.' " 9:18 Jadi, Pohotala rih ngasikaras ahkan ihcobehti kolunon, amat Pohotala nohuang kodorih. Tutang Pohotala ngotului ihcobehti ulun monjadi karas kuhungoh, amat Pohotala nohuang kodorih ka'a. 9:19 Nah, Konduang ahkan nuhtui umba ahku, "Amat kodorih ombai Pohotala magun kani monosalan kolunon? Ombai eam ihcobehti ka duon mohalang konohuang Pohotala?" 9:20 Tahpi Konduang! Konduang baya ulun kolunon bewe. Tutang Konduang earo bohanyi numbah auh Pohotala! Tou potoran ngisok umba tuhkang ijo napa io? "Ombai ihko napa ahku koloutuh?" 9:21 Eamkah ulun tuhkang potoran rih bohak napa tana liat rih, napaoh numbun konohuang ahtoioh? Tahkan ihcokobuhtup tana liat rih, ulun rih bohak potoran napa duo mahcam, napa ihco paling pios, tutang napa ijo bohkon ijo kurang pios. 9:22 Kodorih ka'a umba inon ijo tonapa bain Pohotala. Io boniat ahkan timbun kosangit-Oh tutang mopotohto kowasa-Oh. Tahpi Io sabar toharep iro ijo harus tonohukum, tului nguan Io bosingi. 9:23 Pohotala ka'a boniat ngorinah ahkan ihto kosanangkomangat molowi-lowi ijo tonusuh-Oh ahkan ihto ijo ponokasih-Oh. Ihto jari tonahtap-Oh ahkan monorima kosanangkomangat rih. 9:24 Ihto ijo jari tona'ah-Oh, eam baya tahkan uhtus Yahudi, tahpi ka'a tahkan uhtus ulun bohkon. 9:25 Tului aang Buhku Nabi Hosea, Pohotala nuhtui, "Ulun-ulun ijo bohkon ukup-Ku, Ahku ahkan ngohawotoh 'Ukup-Ku'. Uhtus ijo eam Ahku ngasi-Oh, Ahku ahkan ngohawot 'Kokasih-Ku'. 9:26 Tutang ang unuk ang umoh tonuhtui ahkan ulun, 'Ihko bohkon ukup-Ku,' ang anan ulun-ulun rih ahkan konohawot anak-anak ain Pohotala ijo bolum." 9:27 Nabi Yesaya nuhtui hawui tegas tohou uhtus Israel, "Tu'u ka jombalah uhtus Israel karo baras saran tasik tihkas honjiot bewe ijo ahkan solamat; 9:28 tului Tuhan ahkan jeleng muhtus hukuman toharep suang kolunon." 9:29 Nabi Yesaya nuhtui koloutuh ka'a, "Jakaoh, Pohotala Ijo Mahakowasa, eam nohtah ahkan ihto lihit, musti ihto paring jari monjadi kolou lowu Sodom tutang Gomora." 9:30 Jadi koloputaioh io rih tuh, uhtus-uhtus bohkon ijo eam lihit Yahudi, eam bousaha mangat kohihco iro umba Pohotala monjadi pios hoduli. Tahpi kotului iro porocaya, mahka Pohotala, napa kohihcon iro umba Io, tutang monjadi pios hoduli. 9:31 Tobalikoh ulun-ulun Yahudi, toturus bousaha bokehtep umba hukum, mangat kohihcon iro umba Pohotala monjadi pios huli. Tahpi iro mahi-mahi eam aro bohasir? 9:32 Ombai iro eam aro bohasir? Kotului iro nguanoh rih eam nguha koporocaya umba Pohotala, molekan nguha usaha iro bongoi. Mahka iro ngonyatu tosahap aang "Bahtu Ponoturung." 9:33 Tohou bahtu dih ang luwang Surat Borasih jari tonyurat koloutuh, "Nuneng houn tuh: Ang Sion jari Ahku ngina ihco bahtu, ijo ahkan ngojorian ulun ponoturung; yorih ihcokobuhtup bahtu hajo ijo ahkan ngojorian ulun tosahap. Tahpi ulun ijo porocaya umba Io, eam ahkan kocewa."
10:1 Konduang-konduang! Ahku rindu samasino ahkan uhtus aik'ku dahpot tonyolamatoh. Tutang ahku tu'u-tu'u bodo'a ahkan Pohotala bagi iro. 10:2 Ahku bohanyi nuhtuioh ijo iro bosomangat samasino bosorah umba Pohotala. Tahpi somangat iro rih eam aro hogalangoh pongotaan ijo tahkan Pohotala. 10:3 Iro eam kota'an caraoh Pohotala napa kohihco ulun umba Io monjadi pios hoduli. Tutang tului iro kani numbun cara iro bongoi, mahka iro eam tunduk umba cara ijo pokarah Pohotala ahkan'ndo. 10:4 Hukum agama ius pononggenap bain Kristus. Jadi nyinong ulun ijo porocaya umba Kristus, kohihcooh umba Pohotala monjadi pios hoduli. 10:5 Museh nyurat ijo ulun, ijo hokopios umba Pohotala hogalangoh hukum agama, ulun rih ahkan bolum, tului bokehtep ahkan hukum agama rih. 10:6 Tahpi tohou cara ulun hokopios umba Pohotala hogalangoh koporocaya ahkan Pohotala. Surat Borasih monuhtuioh koloutuh, "Eam porulu ihko nuhtui ang luwang ahtoi'mu, 'Iairih ijo ahkan nuhkat nokuh soruga?' (rimaioh ngomin Kristus mosuluh), 10:7 ata'ai, 'Iairih ijo mosuluh nokuh tana unuk ulun mahtoi?' (Rimaioh ngahtang Kristus nuhkat tahkan popahtoi)." 10:8 Konohuangoh anairih koloutuh, "Kabar tahkan Pohotala rih doni samasino aang ihko; aang nyaman'kam tutang a'ang ahtoi'mu." Orih rih borihta ijo ihkai mborihtaoh; borihta ijo ulun harus porocaya. 10:9 Tului amat Konduang ngahku honong nyaman'kam ijo, "Yesus rih Tuhan," tutang Konduang porocaya luwang ahtoi'kam, ijo Pohotala jari mombolum Kristus Yesus tahkan popahtoi mahka Konduang ahkan solamat. 10:10 Tului honong ahtoioh ulun porocaya, nyiring Pohotala norima io kolou ulun ijo hokopios umba Pohotala. Tutang honong nyamaioh ulun ngahku, nyiring io tonyolamat. 10:11 Ang luwang Surat Borasih tonyurat, "Ulun ijo porocaya eam ahkan tonomia." 10:12 Orih nyolung toharep paring ulun, kotului eam aro bedaoh holat ulun Yahudi umba ulun-ulun uhtus bohkon. Pohotala ijo ihco orih anairih Tuhan ahkan paring ulun. Io nonga borehkat ijo molowi-lowi ahkan paring ulun ijo nyawot dohop umba Io. 10:13 Aang Surat Borasih tonyurat, "Paring ulun ijo na'ah umba Tuhan, ahkan solamat." 10:14 Tahpi koloukuwohoh ulun ijo na'ah umba Tuhan amat iro jaha porocaya? Tutang koloukuwohoh iro duon porocaya umba Tuhan, amat iro jaha ngonih tohou Io? Ka'a, koloukuwohoh iro duon ngonih tohou Tuhan, amat eam aro ijo mborihtaoh? 10:15 Tutang koloukuwohrih ulun duon ngomin borihta rih, amat iro eam tonyuhu? Ang aang Surat Borasih tonyurat koloutuh, "Eam inon kopioioh polombut ulun-ulun ijo ngomin Kabar Hinut tahkan Pohotala!" 10:16 Tahpi eam paring ulun norima Kabar Hinut rih. Tului Yesaya nuhtui, "Tuhan, iaikah ijo porocaya umba borihta tahkan ihkai?" 10:17 Orih kotuluioh ulun-ulun monjadi porocaya, tului iro ngonih borihta, tutang borihta rih konahan, tului anai ulun ijo mborihtaoh tohou Kristus. 10:18 Tahpi ahku ngisok: Kuwoh puna iro jaha ngonih borihta rih? Musti jari! Tului luwang Surat Borasih tonyurat koloutuh, "Auh iro jari ngua-nguak ang sohapus kolunon, tuhtui-tuhtui'ndo jari johcok nokuh topahkan kolunon." 10:19 Ahku ngisok hino. Kuwoh uhtus Israel jaha iro ngota'aioh? Nauh pokisok orih ijo pahtuk-pahtukoh tonumbah bain Museh. Museh nuhtui, "Koloutuh hion Pohotala, 'Ahku napa ihkam bohiri ahtoi umba ihco uhtus ijo bohkon ukup, tutang Ahku ahkan napa ihkam bosingi toharep ihco uhtus ijo uong!' " 10:20 Yesaya labih bohanyi hino. Io nuhtui, "Koloutuh auh Pohotala, 'Ulun-ulun ijo eam ngurah Ahku, jari monyombang Ahku; tutang Ahku mongorinahoh arop-Ku ahkan iro ijo eam mongisokoh tohou Ahku!' " 10:21 Tahpi nitu uhtus Israel Yesaya nuhtui, "Koloutuhrih auh Pohotala, 'Nyinong ondou Ahku nyuhcu longok-Ku ahkan ihco uhtus ijo mahang kuhungoh tutang eam sotia.' "
11:1 Ahku ngisok. Inonrih Pohotala jari dian ukup Aiu bongoi? Puna eam! Ahku bongok ihcobehti ulun Israel lihit Abraham, tutang tahkan lihting Benyamin! 11:2 Eam! Pohotala eam dian ukup Aiu ijo jari tongopili-Oh tahkan topahtuk. Konduang-konduang kota'an inon ijo tonyurat a'ang Surat Borasih tohou Elia, kotihka io ngadu soal Israel umba Pohotala. Elia nuhtui, 11:3 "Tuhan ulun-ulun jari munu nabi-nabi-Mu tutang moluhtek mesbeh-mesbeh porahpah ahkan-Mu. Mohcon ahku ihcobehti arop tutang mimas munu ahku." 11:4 Inonrih auhputah Pohotala ahkan Elia? Pohotala mutah, "Ahku jari ngina pihtu kujan behti ahkak-Ku bongok. Iro jaha pu'u nyembah Dewa Ba'al." 11:5 Kodorih ka'a huntuh tuh: Anai puhta honjiot ulun-ulun ijo jari tonopili bain Pohotala tului Pononganasi-Oh. 11:6 Io ngopili iro hogalang Pononganasi-Oh, tutang bohkon hogalangoh ang gawiuo. Tului amat kopili Pohotala rih hogalangoh gawin ulun, mahka pononganasi Pohotala rih eam hino pononganasi ijo sojahti. 11:7 Jadi, koloukuwoh? Ukup Israel eam ngonduon, inon ijo konurah. Ijo ngonduoioh tihkasrih bagian koik ulun-ulun ijo jari ponitih bain Pohotala. Ijo bohkon paringoh mahang kuhungoh toharep pona'ah Pohotala. 11:8 Tului ang luwang Surat Borasih tonyurat koloutuh, "Pohotala napa ahtoi tutang tiruk iro monjadi hobolulang; tutang nyiring huntuh, mahtan iro eam duon nohto, tutang tolingan iro eam duon ngonih." 11:9 Dawid nuhtui ka'a, "Nauhoh pestan-pestan iro monjadi sokohtung bagi iro bongoi, tutang monjadi lowong unuk iro ngonyahtu tutang luhtek! 11:10 Nauhoh topahjah iro monjadi pindong mangat iro eam duon nohto; tutang nauhoh iro monjadi hojokong turus-jahamoh." 11:11 Ahku ngisok hino. Kotihka ulun Yahudi nyahtu, kuwohrih rih nyolung mangat iro luhtek? Samasino eam! Tahpi tului iro bodusa, mahka uhtus bohkon malah tonyolamatoh, nyiring kotuluioh ulun Yahudi hiri ahtoioh toharep uhtus bohkon rih. 11:12 Tului uhtus Yahudi bosala tutang eam numbun konohuang Pohotala, mahka uhtus-uhtus bohkon tomorehkat bain Pohotala. Inon hino amat kohihcon uhtus Yahudi umba Pohotala monjadi pios huli; puna labih hajo borehkat ijo ahkan tononga bain Pohotala! 11:13 Tahpi huntuh piosrih ahku bopander umba Konduang-konduang ijo bohkon uhtus Yahudi! Kotahin tuh, kolou rasul ahkan uhtus-uhtus ijo bohkon Yahudi, ahku paham ngahtang isung tugas'ku. 11:14 Ahku moharap ahku dahpot polombut hiri ahtoi aang uhtus aik bongok, mangat umba jalan orihrih ahku duon nyolamat ihcokobagi tahkan iro. 11:15 Tului iro tonulak bain Pohotala mahka kohihcon kolunon umba Pohotala monjadi pios hoduli; inon hino amat iro tonorima bain Pohotala! Puna rih sama iou kolou ulun mahtoi bolum hoduli! 11:16 Amat ihcokohiris luhte ijo pahtuk rih jari tononga ahkan Pohotala, orih rimaioh sohapus luhteoh tononga ahkan Pohotala ka'a. Tutang amat uhat pu'un kahju anai ain Pohotala, orih rimai da'ai-da'aioh anairih ain Pohotala ka'a. 11:17 Ihcokobagi tahkan da'an-da'an zaitun -- yorih ulun-ulun Yahudi -- ius tonohtok. Tutang ang lohkun tohtok rih nutung umba da'an zaitun himba, yorih Konduang-konduang ijo bohkon uhtus Yahudi. Konduang tonutung ang anan, mangat Konduang nginyam karonaang ijo pios, tahkan pombolum rohani ulun-ulun Yahudi. 11:18 Bain tului orih, ara ihkam ngohu eteng iro ijo jari tonohtok kolou da'an rih. Ihkam harus ingat ijo ihkam tihkas da'an ih. Tutang eamoh da'an ijo nonga ukun ahkan uhat, molekan uhat ijo nonga ukun ahkan da'an. 11:19 Tahpi Konduang ahkan nuhtui, "Yo, tahpi da'an-da'an orih tonohtok mangat ahku duon tonyombungoh ang bahtang oh!" 11:20 Orih puna morong. Tahpi iro todian tului iro eam porocaya, rahatoh Konduang tonorima tului Konduang porocaya. Jadi ara Konduang monjadi bojuhu kotuluioh, sopunaoh Konduang pahtut komo kihkoh. 11:21 Tului amat Pohotala eam komo sayang ahkan ndian ulun Yahudi, ijo kolou da'an-da'an asli rih, ara ngohu Io ahkan komo sayang ahkan ndian Konduang! 11:22 Jadi ang ohtoi ihto nohto eaminon kopiosoh Pohotala, tutang eaminon mahangoh ka'a Io. Io botindak mahang toharep iro ijo bodusa, tahpi Io hinut ahtoi tohimo Konduang -- asar Konduang tehtep bolum tahkan kohinut-Oh. Amat eam, mahka Konduang ka'a ahkan konondian. 11:23 Tutang tohou ulun-ulun Yahudi rih, amat iro tondo morisang eam porocaya, mahka iro ahkan tonorima hoduli; tului Pohotala bokowasa ahkan norima iro hoduli. 11:24 Konduang ijo bohkon asal tahkan uhtus Yahudi, sama kolou da'an tahkan bahtang zaitun himba. Nah, amat Konduang, molawan umba sipat Konduang, duon tonyombung ang bahtang zaitun asli, mahi hino ulun-ulun Yahudi ijo tonindung umba da'an-da'an zaitun asli rih. Puna labih murah hino ahkan Pohotala duon mombuli iro aang pu'un zaitun iro bongoi. 11:25 Konduang-konduang! Ahku harap ihkam, ara komo jari kosono kokaro-karoioh. Tului anai ihco hal ijo konohuang bain Pohotala, tahpi ijo jaha ngota'an ulun. Tutang ahku kani ihkam ngota'an yorih tuh: Ihco kobagi tahkan ulun Yahudi mahang ahtoioh, tahpi sikap iro rih, ahkan toturus tihkas johcok jombalah ulun-ulun bohkon Yahudi ijo lombut ahkan Pohotala jari sukup. 11:26 Kodorihrih paring ulun Yahudi ahkan solamat. Tului ang luwang Surat Borasih tonyurat koloutuh, "Lahca Ponyolamat ahkan lombut tahkan Sion; Io ahkan ngudap kokaro koja'at tahkan lihit Yakub. 11:27 Ahku ahkan ngarut bowot tuh umba iro aang ohkot Ahku ngapun dosa-dosa iro." 11:28 Kotului ulun Yahudi eam kani norima Kabar Hinut tahkan Pohotala mahka iro monjadi musuh Pohotala; tutang orih puna monjadi koutungan bagi Konduang ijo bohkon Yahudi. Tahpi tului ngopili Pohotala, mahka ulun-ulun Yahudi rih tahtap ponongasi Pohotala tului tahtu ajuh iro. 11:29 Tului amat Pohotala mitih ulun tutang mborehkat ulun rih, Pohotala eam pu'u nguhut huli inon ijo ius konuai-Oh. 11:30 Lomoi ihkam eam tunduk umba Pohotala. Tahpi huntuh Pohotala jari ngorinah ijo ihkam liwus tahkan kosalan, tului ulun-ulun Yahudi eam tunduk. 11:31 Kodorih ka'a umba ulun-ulun Yahudi rih. Uhuntuh iro eam te'et umba Pohotala, mangat ihkam tongorinah liwus tahkan kosalan. Tahpi noin iro ka'a ahkan tongorinah liwus tahkan kosalan iro. 11:32 Tului Pohotala jari mohonau paring ukup ulun tongowasa bain koeamkote'etoh, mangat Io duon ngorinah pongasihan-Oh ahkan iro paringoh. 11:33 Tu'u-tu'u hebat kotahtou Pohotala! Tu'u-tu'u hajo kowasan kohorahti tutang pongotaan Aiu! Iaikah ijo dahpot nyolidik koputusan-koputusan-Oh? Iaikah ijo dahpot nyolembang cara-cara Io bogawi? 11:34 A'ang Surat Borasih tonyurat koloutuh, "Iaikah ijo ngota'an tiruk Tuhan? Iaikah ijo duon nonga tingak Ahkai-Oh? 11:35 Iaikah ijo pu'u nonga aang'co ahkan Tuhan nyiring duon nutut balos-Oh?" 11:36 Pohotala ijo naoi kokaron aangihco. Paringoh uras asar tahkan Pohotala tutang anairih bagi Pohotala. Ahkaioh horomat nyiring turus-jaham! Amen.
12:1 Konduang-konduang! Pohotala ngarinah asioh umba ihto. Orih kotuluioh ahku nyawot honong paham mangat ihkam monyorah arop'kam, kolou ihco porahpah ijo bolum, ijo khusus ahkan Pohotala tutang ijo ngojorih ahtoi-Oh. Sombayang'kam ahkan Pohotala koharusoh kolouorih. 12:2 Ara umba sipat-sipat kolunon tuh. Nauhoh Pohotala nguan sipatarop'kam monjadi bohua, mangat ihkam hubah. Honong kodorih ihkam sanggup ngota'an konohuang Pohotala -- yorih, inon ijo pios tutang ijo ngojorih ahtoi Pohotala tutang ijo soporuna. 12:3 Pohotala jari nonga pononganasi ahkak'ku. Orih kotuluioh ahku moningakoh Konduang-konduang paringoh: Ara komo arop labih isun tahkan ijo kotu'uioh. Hondakoh Konduang-konduang monilai koada'an arop'kam honong randah ahtoi; nyino-nyinong behti monilai aropoh numbun koduon ijo tonongaoh Pohotala ahkaioh bain kotului io porocaya ahkan Yesus. 12:4 Behtin ihto tepun aro ramui. Nyinong ramui anai gawin aiu bongoi. 12:5 Kodorih ka'a umba ihto. Oluka ihto paringoh aro, tahpi ihto kolou ihco kobehti tului ihto hihco a'ang Kristus. Tutang ihto nyino-nyinong hosambung ihco umba ijo bohkon kolou ramun-ramun tahkan ihco behti. 12:6 Ihto nyino-nyinong anaitepun pononga-pononga pohalu ijo hokobohkon. pononga-pononga rih tononga bain Pohotala ahkan ihto numbun pongasihan-Oh. Tului orih ihto harus hapa pononga-pononga rih. Ulun ijo tepun pononga ahkan mborihta Kabar Hinut tahkan Pohotala, harus mongabar bolihta tahkan Pohotala rih, numbun koba'as ijo anai aang io. 12:7 Ulun ijo tepun pononga mangat dohop ulun bohkon, harus tu'u-tu'u dohop ulun bohkon. Ulun ijo anai tepun pononga ahkan pongajar harus tu'u-tu'u majar. 12:8 Ulun ijo tepun pononga nonga somangat ahkan ulun bohkon, harus io tu'u-tu'u nonga somangat, ahkan ulun bohkon. Ulun ijo tepun pononga ahkan moronga umba ulun bohkon, inon ijo anai iotepuioh, harus nguaioh orih honong kolomun ahtoi numbun koharusoh. Ulun ijo tepun pononga ahkan monjadiokon, harus tu'u-tu'u monjadiokon ulun. Ulun ijo tepun pononga ahkan ngorinahoh pongasioh ahkan ulun bohkon pahtut molalusoh honong sanang ahtoi. 12:9 Ngasi honong ihlas. Bosingi umba ijo ja'at, tutang nambitoh ahkan inon ijo pios. 12:10 Konohuangoh Konduang-konduang saling mongasih ihco umba 'jobohkon honong mesra kolou ulun-ulun ijo hokonduang a'ang ihco kojolahan. Tutang konohuangoh ihkam saling hotosolu nonga horomat. 12:11 Bogawirih honong rajin. Ara kadian. Bogawirih ahkan Tuhan honong somangat tahkan Roh Pohotala. 12:12 Konohuangoh Konduang porocaya umba Tuhan hawui kojorih, sabar ang luwang kosusah, tutang bokehtep bodo'a. 12:13 Hodohoprih nyukupoh kotahpas ulun-ulun Kristen bohkon tutang nyambangrih Konduang-konduang 'cokoharap ijo eam Konduang ngosonooh, honong sanang ahtoi ang luwang lohpou'kam. 12:14 Nyawotrih ahkan Pohotala mangat Io nonga momborehkat ahkan ulun-ulun ijo kejam toharep ihkam. Yo, nyawot umba Pohotala mborehkat iro, ara monulut. 12:15 Umbarih jorih, honong ulun-ulun ijo jorih, tutang nangihrih honong ulun ijo nangih. 12:16 Bolum rukun ihco umba 'jobohkon. Ara pokarah isung ahtoi, tahpi nyama arop'kam umba ulun ijo pinda ponuotoh. Ara madu arop labih pitar tahkanumba ijo komorongoh. 12:17 Amat ulun nguan koja'at umba ihko, ara malosoh umba koja'at. Nguanrih inon ijo tongohuoh pios, bain paring ulun. 12:18 Tahkan sila ihko, ngurah jalan sodahpot-dahpotoh ahkan bolum hokobuah umba paring ulun. 12:19 Konduang-konduang! Ara samasino malos kohiri umba kohiri, nauh Pohotala ijo mohukum. Tului ang luwang Surat Borasih tonyurat, "Ahku iou ijo malosoh, Ahku iou ijo mohukumoh, hion Tuhan." 12:20 Tobalikoh, amat musuh'mu bolo'u, nonga io ukun, tutang amat io tohjah-bolaioh, nonga io korih. Tului umba nguan aang kodorih; Konduang nguan io monjadi mia. 12:21 Ara mohonou arop'kam kalah bain ijo ja'at, tahpi kohinutoh Konduang ngalah koja'at umba komorong.
13:1 Nyinong ulun harusrih tunduk umba pomoretah, tului eam aro pomoretah ijo eam dahpot kowasaoh tahkan Pohotala. Tutang pomoretah ijo tohko uhuntuh, molalusoh kowasaioh ngosan poretah tahkan Pohotala. 13:2 Orih kotuluioh ulun ijo molawan pomoretah sama iou umba molawan inon ijo jari tonahtap bain Pohotala. Tutang ulun ijo nguan kodorih ahkan norima hukum. 13:3 Tului ulun ijo nguan ang pios, eam usah mihkoh umba pomoretah. Baya ulun ijo nguan koja'at iou ijo pahtut mihkoh konohukum. Amat Konduang jolik, mangat Konduang eam komo kihkoh umba pomoretah, Konduang nguan kopios mahka Konduang ahkan tonara. 13:4 Tului pomoretah anairih jihpon Pohotala ijo bogawi ahkan kopios'kam. Tahpi amat Konduang nguan koja'at, puna Konduang harus mihkoh ahkaioh, tului eamoh sia-sia iou io bokowasa ahkan mohukum ulun. Io anairih jihpon Pohotala, ijo muhtusoh hukum Pohotala ahkan ulun-ulun ijo nguan koja'at. 13:5 Orih kotuluioh Konduang harus tunduk umba pomoretah -- eam tihkas kotului konduang eam kani tonohukum, tahpi ka'a tului auh ahtoi-bua'kam. 13:6 Orih ka'a alasanoh ombai Konduang bayar pajak, tului pomoretah anai pogawai Pohotala ijo molalus gawiu ijo khusus tuh. 13:7 Jadi bayarlah iou ahkan pomoretah inon ijo Konduang harus bayar ahkaioh. Bayar iou pajak, amat Konduang harus bayar pajak, bayar iou cuhkai amat Konduang harus bayar cuhkai. Morega iro ijo harus tomorega, tutang mohoromat iro ijo harus tomohoromat. 13:8 Ara tohutang inon ka, umba iai ka'a, kocoali tohutang kasih umba sama arop'kam. Tului ulun ijo mongasi sama aropoh jari molalus hukum Museh. 13:9 Tului hukum agama Yahudi, yorih: Ara hobandung; ara munu; ara nahkou; ara jolik tepun inon ijo ulun bohkon tepui; paringoh rih sama-sama umba hukum-hukum ijo bohkon, jari bulat monjadi ihco hukum iou, yorih, "Ngasirih sama ulun kolou ihko mongasi arop'mu bongom." 13:10 Ulun ijo mongasi ulun bohkon, eam ahkan nguan ang ja'at umba ulun rih. Jadi, ulun ijo mongasi sama aropoh, iorih ulun ijo jari molalus paring syarat hukum agama. 13:11 Bohkontahkan paringoh rih, ihkam ngota'an, ijo huntuh anai ohkot ahkan'kam, ahkan monyun tahkan tiruh. Tului ohkot ahkan ihto tonyolamat ius labih doni huntuh, tahkanumba ohkot ihto punan nopara porocaya. 13:12 Kopindong ius doni nokalou; tutang eam pira hino ahkan boloang. Jadi, pios ihto tondo nguan gawin-gawin kopindong rih. Ihto harus monyuhkup arop ihto umba pokahkas koloang. 13:13 Ihto harus nguan hal-hal tonohoromat kolou ijo kopu'uoh, konuan ulun aang koloang ondou. Ara pesta rami molowi bahtasoh, ata'ai nyiring bobusau. Ara ngihal, ata'ai tobiat eam morong. Ara rajin hokolahi, ata'ai hiri ahtoi. 13:14 Nauhoh Tuhan Yesus Kristus iou ijo nahtap inon ijo ihkam pahtut nguaioh. Tutang ara numbun tobiat ulun ijo bodusa ahkan momeda kojolikbolai.
14:1 Ulun ijo eam yahkin ahkan inon ijo tomorocayaoh harus tonorima honong kopios ahtoi ang louk Konduang-konduang. Ara hojawab umba ulun tohou pihkir-pihkiroh. 14:2 Anai ulun ijo ngohu ijo io tou kuman inon ka'a. Tahpi anai ulun ijo bolomu koyahkinanoh; io nanyam ijo io tihkas tou kuman ramunumo iou. 14:3 Ulun ijo kuman saraba-barangai iou, ara ngohu randah ulun ijo kuman tihkas ukun botatu iou; tutang ulun ijo makan tihkas ukun botatu iou, ararih nosalan ulun ijo kuman saraba-barangai, kotului Pohotala jari norima oi. 14:4 Iaikah Konduang, nyiring Konduang harus mosara jihpon ulun bohkon? Kuwoh jihpon rih tocahap ata'ai tombok, orihrih urusan tuan aiu. Tutang puna jihpon rih ahkan hihkat tombok, tului Tuhan sanggup nguanoh hihkat tombok. 14:5 Anai ulun ijo nginyam ihco ondou botatu labih gunaioh tahkan ondou-ondou bohkon, rahatoh ulun bohkon hino ngohu ijo ondou-ondou rih sama iou. Nauhoh nyino-nyinong ulun nahtap pihkir aiu bongoi. 14:6 Ulun ijo monguna ondou-ondou ijo botatu, ulun rih nguan kodorih, ahkan mohoromat Tuhan. Ulun ijo kuman boranga-rangaioh, nguan kodorih ahkan mohoromat Tuhan, kotului io norimakasih ahkan Pohotala ngosan ukun rih. Kodorih ka'a umba ulun ijo kuman tihkas ukun botatu iou; ulun rih ka'a mohoromat Tuhan tutang norimakasih ahkan Pohotala. 14:7 Eam ihcobehti ka tahkan ihto ijo bolum ahkan aropoh bongoi; tutang eam ihcobehti ka tahkan ihto ijo mahtoi ahkan aropoh bongoi. 14:8 Amat ihto bolum, ihto bolum ahkan Tuhan. Tutang amat ihto mahtoi, ihto ka mahtoi ahkan Tuhan. Jadi, bolum ata'ai mahtoi, ihto anai Ain Tuhan. 14:9 Kristus ius mahtoi tutang bolum hoduli. Orih kotuluioh Io monjadi Tuhan ahkan ulun-ulun ijo bolum tutang ka'a ahkan ulun-ulun ijo jari mahtoi. 14:10 Jadi, Konduang-konduang! Ahkan inon monosalan konduang'mu ijo sokoporocaya? Tutang ahkan inon Konduang ngohu io randah? Ihto paringoh ahkan noharep Pohotala ahkan ponosara. 14:11 Ang luwang Surat Borasih tonyurat, "Tu'u-tu'u," hion Tuhan "Nyino-nyinong ulun ahkan bosembah sujud ang toharep-Ku; tutang nyinong ulun ahkan mongahku ijo Ahku tuh Tuhan, Pohotala." 14:12 Jadi ihto nyino-nyinongoh harus nanggung-jawab kokaron gawin 'to, umba Pohotala. 14:13 Bain kotului orih ararih ihto saling monosalanoh. Tombolikoh ngurah jalan ahkan ihkam eam nguan aang'co ka ijo kotuluioh ihcobehti konduang sokoporocaya togoda tutang bodusa. 14:14 Kotului ahku hihco umba Tuhan Yesus, mahka ahku porocaya samasino ijo eam aro aang'co ka, ijo puna pali, tahpi hal rih pali ahkan ihcobehti, amat ulun rih mongohuoh pali. 14:15 Tahpi amat umba inon ijo Konduang kumai, mahka ihcobehti konduang sokoporocaya tongoporos ahtoioh, mahka Konduang eam hino molalus hogalangoh kasih. Amat Kristus jari mahtoi ahkan ihcobehti, ararih mohanouoh ulun rih rusak bain inon ijo Konduang kumai. 14:16 Orih kotuluioh ararih mohanouoh inon ijo pios ahkan ihkam, tongohu eam pios bain ulun bohkon. 14:17 Tului amat Pohotala momoretah pombolum ihcobehti, inon ijo io tou kumai ata'ai ngorihoh, eam hino boguna. Ijo boguna io rih ijo ulun rih numbun konohuang Pohotala, nanyam koteneng ahtoi tutang norima kojorih ijo tonongarih bain Roh Pohotala. 14:18 Ulun ijo mohalu Kristus cara kolourih, ulun rih ngojorih ahtoi Pohotala tutang tomorega bain ulun-ulun bohkon. 14:19 Tului orih titun ihto harusrih toturus ahkan hal-hal ijo ngonjorian kobuah tutang saling nguanang. 14:20 Araiou tului soal ukun, Konduang morusak inon ijo jari konuan bain Pohotala. Kokaron mahcamukun uras borasih ahkan konukun, tahpi amat inon ijo Konduang kumai, kotuluioh ulun bohkon bodusa, mahka Konduang konohawotsala. 14:21 Labih pios eam usah kuman usinaang, ata'ai ngorih anggur ata'ai nguan inon ka'a, amat hal orih ngotului ihcobehti konduang sokoporocaya monjadi bodosa. 14:22 Naohoh inon ijo Konduang morocaya rih, Konduang nguanoh ang toharep Pohotala iou ahkan Konduang bongon. Ulun ijo eam anaitepun alasan ahkan nanyam bosala ngosan inon ijo io ngohuoh morong, ulun rih sanang. 14:23 Tahpi ulun ijo nanyam ragu-ragu ahkan kuman aang'co, pongohuli ka tahtap kuman ukun rih, ulun rih tonosalan bain Pohotala; tului ulun rih eam botindak numbun koyahkinanoh tohou inon ijo morong tutang ijo sala. Tutang inon iou ijo konuan eam aro koporocaya, anai orih dusa.
15:1 Ihto ijo tu'u-tu'u yahkin, ahkan inon ijo ihto porocayaoh, harusrih sabar toharep kobahat-kobahatoh ulun bohkon ijo bolomu koporocayaoh. Ara ihto tihkas nyanang arop ihto bongon iou. 15:2 Tombolikoh ihto nyino-nyinong koharusoh monyanang ahtoi sosama konduang ihto ahkan kopiosoh, mangat koyakinanoh botambah ba'as. 15:3 Tului Kristus ka eam monirukoh kosanang arop-Oh bongoi. Ang luwang Surat Borasih anai tonyurat koloutuh, "Kokaron tosalan ijo tonitu ahkak-Ku jari tomuat ngosan ahku." 15:4 Paring ijo tonyurat ang luwang Surat Borasih anairih, mangat majar ihto. Tului ajaran ijo ihto torimaoh rih tahkan Surat Borasih ngonjorian ihto sabar tutang ba'as nyiring ihto tou bokoharap umba Pohotala. 15:5 Keleh Pohotala, ijo nonga kosabar tutang apung ahkan ulun, dohop ihkam ahkan bolum hihcoahtoi numbun sutu Kristus Yesus. 15:6 Honong ihcoahtoi Konduang paringoh hombo-homboh duon monara Pohotala, Amai Tuhan ihto Yesus Kristus. 15:7 Tului orih, hondakoh Konduang-konduang norima ihco umba ijo bohkon honong sanang ahtoi, sama kolou Kristus ka'a norima ihkam ahkan pohajo aran Pohotala. 15:8 Tului, ingatrih, ijo Kristus jari mohalu ulun Yahudi ahkan mongorinah ijo Pohotala sotia aang molalus bowot-bowot-Oh umba tahtu ajuh ihto. 15:9 Yesus ka'a monapa uhtus-uhtus bohkon monara Pohotala tului kohinut ahtoi-Oh ahkan iro. Ang luwang Surat Borasih tonyurat koloutuh, "Tului orih ahku monara Ihko ang louk karon uhtus, ahku kani monyanyi tara ahkan aran-Aim." 15:10 Anai ka'a tonyurat koloutuh hino, "Jori-jorih ihkam homboh ukup Pohotala ijo tongopili o karon-uhtus!" 15:11 Tutang tuh ka'a, "Tararih Pohotala, o paring uhtus kohondakoh paring ulun monara Io!" 15:12 Tutang tuh hino ijo tonuhtui bain Yesaya, "Tahkan lihit Isai ahkan lombut ihcobehti ijo ahkan moretah karon uhtus; umba Io karon uhtus rih ahkan porocaya." 15:13 Pohotala anairih, unuk ihkam porocaya. Keleh Io nyuang ahtoi'kam hapa kokaron kojorih tutang kasanang, tului ihkam porocaya umba Io, mangat umba kowasa Roh Pohotala ihkam mahi-mahi porocaya ahkan Pohotala. 15:14 Konduang-konduang! Ahku yahkin ijo anai aro samasino hal ijo pios aang ihko. Ihkam ka ngota'an kokaron paringoh tutang duon majar ihco umba ijobohkon ka'a. 15:15 Tahpi tohou hal-hal ijo botatu ahku mopingat ihkam hawui tegas aang surat tuh, tului Pohotala jari nyarah ahkak'ku gawi tuh. 15:16 Io ius ngojorian ahku monjadi pohalu Kristus Yesus ahkan sonuhu, ahkan nokuh uhtus-uhtus ijo bohkon Yahudi. Tutang ahku molalusoh kolou imam, ijo mborihta Kabar Hinut tahkan Pohotala, mangat ulun-ulun ijo bohkon Yahudi, monjadi ihco ponyorahan ahkan Pohotala, ijo dahpot tonorima baiou-Oh. Keleh Roh Pohotala napa iro monjadi ihco ponyorahan ijo khusus bagi Pohotala. 15:17 Jadi, kotului ahku jari hihco umba Kristus Yesus, mahka ahku duon nginyam tamam ngosan gawik'ku bagi Pohotala. 15:18 Ahku bahanyi nuhtui kolouorih tihkas tohou inon ijo jari konuan Kristus nguha ahku, mangat ngonjorian ulun-ulun ijo bohkon Yahudi, te'et ahkan Pohotala. Ahku nguan orih honong tuhtui-tuhtui oluka umba gawik'ku, 15:19 ijo pohayak kohelan-helan tutang hal-hal luar biasa, paringoh rih bain kowasa Roh Pohotala. Kabar Hinut tohou Kristus jari ahku mborihtaoh paringoh ahkan ulun-ulun, nopara tahkan Yerusalem johcok nokuh Ilirikum. 15:20 Cihta-cihta ahtoi'ku iorih mborihta Kabar Hinut tahkan Pohotala ang karon-unuk ang amoh ulun jaha ngonih tohou Kristus. Tului ahku eam kani nombok ang konuak'ku isun galang ijo konina bain ulun bohkon. 15:21 Ang luwang Surat Borasih tonyurat, "Ulun-ulun ijo jaha pu'u norima borihta tahou Io, ahkan nopahjah; tutang iro ijo jaha pu'u ngonih, ahkan horahti." 15:22 Orih kotului jari kinjap ahku tohalang ahkan masap ihkam. 15:23 Tahpi huntuh karon-gawik'ku ang daerah-daerah rih jari opah. Botoun-toun kotahiu ahku jolik masap ihkam. 15:24 Noin amat ahku nguha lowun'kam ang ponomuoi'ku ahkan Spanyol, ahku harap duon hosombang umba ihkam tutang jorih honyulu honong ihkam. Uliorih ahku harap ihkam duon dohop ahku ahkan ponyalak'ku nokuh Spanyol rih. 15:25 Tahpi huntuh ahku kani nokuh Yerusalem ahkan ngitot pononga ahkan ukup Pohotala ang anan. 15:26 Tului ukup-ukup ang Makedonia tutang Akhaya jari sotuju ahkan nonga pononga ahkan konduang-konduang ijo porosbolum ang louk ukup Pohotala ang Yerusalem. 15:27 Honong sanang ahtoi iro monahtap, ahkan nguan orih. Puna komorongoh, iro pahtut dohop konduang-konduang ijo porosbolum, ang Yerusalem rih, tului tahkan ulun-ulun Yahudi rih, ulun-ulun bohkon Yahudi rih ius norima borehkat-borehkat tahkan Pohotala. Jadi, ulun-ulun ijo bohkon Yahudi rih, pahtut ka'a dohop ulun-ulun bohkon Yahudi umba borehkat-borehkat ramuioh. 15:28 Amat ahku jari ngopah karon-gawik'ku tuh, tutang monyorah ahkan iro ijo ang Yerusalem rih, pononga ijo jari tonipunoh rih, mahka ahku ahkan tulak nokuh lowu Spanyol, nyihing lowun'kam. 15:29 Amat ahku lombut nokuh ihkam, pasti ahku lombut umba aro borehkat tahkan Kristus ahkan ihkam. 15:30 Aangaran Tuhan ihto Yesus Kristus, tutang aang asiu ijo tononga bain Roh Pohotala, ahku nyawot honong paham umba ihkam. Keleh ihkam umba bodo'a tu'u-tu'u, hombo-homboh ahku ahkan Pohotala, ahkak'ku. 15:31 Bodo'arih iou, ahkan Pohotala moliwusoh ahku tahkan longon ulun-ulun ijo eam porocaya ang Yudea, tutang mangat gawik'ku ahkan ngitot pononga nokuh Yerusalem, tonorima honong sanang ahtoi bain ukup Pohotala ang anan. 15:32 Honong kolouorih, amat Pohotala bokohondak, ahku dahpot lombut nokuh ihkam, hawui ahtoi ijo sanang. Tutang ahku ahkan nginyam toapung ang tohun ihkam. 15:33 Mudah-mudahan Pohotala ijo nongaoh kosanang ahkan ulun, pahahyak Konduang paringoh. Amen.
16:1 Ahku jorik pokosono konduang ihto ijo bawi, Pebe. Io ndohop ukup Pohotala ang Kengkrea. 16:2 Tonorimarih io kolou ihcobehti, tahkan ukup Tuhan ka'a. Puna kolourih ulun-ulun ijo porocaya umba Pohotala harus norima ihco umba ijobohkon. Dohop io amat io porulu pondohop tahkan ihkam, tului io bongoi jari dohop aro ulun -- tame ahku. 16:3 Nyampaioh tabe'ku ahkan Priskila tutang Akwila jolahak'ku ijo hombo-homboh bogawi ahkan Kristus Yesus. 16:4 Iro bilak mahtoi, tului kani monyolamat ahku. Ahku botorimakasih ahkan iro -- tutang eam ahku bongok iou, tahpi paring ukup uhtus bohkon ijo eam Yahudi ka'a botorimakasih umba iro. 16:5 Nyampaiohrih ka'a tabe'ku ahkan ukup ijo puhpung ang lohpou'ndo. Tabe ahkan Epenetus ijo ahku ngasihoh. Iorih ulun ijo pahtukoh porocaya umba Kristus ang tana Asia. 16:6 Tabe'ku ka'a ahkan Maria. Io bogawi kodorih karas ahkan'kam. 16:7 Nyampaioh ka'a tabe'ku ka'a ahkan Andronikus tutang Yunias. Iro ihcolihting uhtus umba ahku tutang pu'u nyolong sipir hombo-homboh ahku. Houn umba ahku porocaya umba Kristus, iro soun porocaya. Iro bosewut louk dolang rasul. 16:8 Tabe'ku ahkan Ampliatus ijo ahku ngasihoh, tului io sama-sama umba ahku jari hihco umba Tuhan. 16:9 Nyampaioh iou horomat'ku umba Urbanus, jolahan ihto ijo bogawi hombo-homboh umba ihto, ahkan Kristus. Ka'a horomat'ku ahkan Stakhis ijo ahku ngasioh. 16:10 Tabe ahkan Apeles. Kokehtepoh umba Kristus jari gihtan. Tabe'ku ka'a ahkan bobuhan Aristobulus, 16:11 tutang ahkan Herodion. Io ihcolihting uhtus umba ahku. Ka'a tabe'ku ahkan konduang-konduang sokoporocaya aang bobuhan Narkisus. 16:12 Tabe ahkan Tripena tutang Tripesa, ijo bogawi paham mohalu Tuhan, tutang ahkan Persis ijo ahku ngasioh. Io ka'a ius bogawi ahkan Tuhan. 16:13 Tabe ahkan Rufus tutang inaioh, ijo kolou inai'ku bongok. Rufus rih anairih ulun ponitih Tuhan, ijo tonara. 16:14 Nyampaiohrih tabe'ku ahkan Asinkritus, Plegon, Hermes, Patrobas, Hermas tutang paring konduang sokoporocaya ijo hombo-homboh umba iro. 16:15 Tabe ahkan Filologus tutang Yulia; ahkan Nereus tutang konduang bawioh; ahkan Ulimpas tutang ahkan paring ulun porocaya ijo hombo-homboh umba iro. 16:16 Hotabe-taberih cara jorih ijo mesra, kolou konduang Kristen. Paring ukup Kristus monyampaioh taben'ndo ahkan Konduang-konduang. 16:17 Konduang-konduang! Ahku nyawot umba'kam: Ati-atirih toharep ulun-ulun ijo polombut kopisah tutang monderoh koporocaya ulun ahkan Tuhan. Hal rih hokolawan umba inon ijo jari tongajar ahkan ihkam. Ngomahcurih iou, ulun-ulun kolou orih. 16:18 Tului ulun-ulun ijo nguan kodorih bohkonoh bogawi ahkan Kristus Tuhan ihto, molekan ahkan momeda kojolikahtoi'ndo bongoi. Honong bujukan tutang tuhtui ijo manih-monyak iro nihpu ulun-ulun ijo eam ngota'an ino-inon. 16:19 Paring ulun jari ngota'an ijo ihkam bokehtep ahkan ajaran tohou Kabar Hinut ijo tahkan Pohotala. Tutang ahku sanang ngosan hal orih tohou ihkam. Ahku jolik mangat ihkam solembang tohou hal-hal ijo pios; tutang uong tohou hal-hal ijo ja'at. 16:20 Pohotala ijo nonga kosanangkomangat ahkan ulun, ahkan jeleng ngina Sehtan pinda kowasai'mu tutang moluhtekoh. Keleh Konduang-konduang toturus tomorehkat bain Yesus Kristus Tuhan ihto! 16:21 Timoteus, jolahak'ku monyapai tabeoh ahkan ihkam. Kodorih ka'a Lukius, Yason tutang Sosipater, Ihcolihting uhtus umba ahku. 16:22 Ijo nyurat surat tuh ahku bongok, Tertius, Ahku ngohawot tabe hokoduang ahkan ihkam. 16:23 Gayus ngirim tabe ahkan'kam. Ahku mohcon ang lohpouoh, tutang unuk ukup sombayang ang anan. Erastus kopala nambitduit ponahtou lowu, ngirim tabeoh ahkan'kam. Kodorih ka'a konduang ihto Kwartus. 16:24 Keleh Tuhan ihto Yesus Kristus momborehkat Konduang paringoh. Amen. 16:25 Tonotararih ahkan Pohotala! Io bokowasa ngomba'as koporocaya Konduang sorurui umba Kabar Hinut tahkan Pohotala, ijo ahku mborihtaoh tohou Yesus Kristus. Ahku mborihtaoh Kabar orih sorurui umba inon ijo tongorinah bain Pohotala; iorih tohou rancana Pohotala ijo jari boabad-abad kotahiuoh eam tongota'an ulun. 16:26 Tahpi huntuh, ang poretah Pohotala ijo abadi, rancana rih jari tongorinah tutang tomborihta ahkan paring uhtus ulun nguha kokaron surat bola nabi, mangat iro paringoh porocaya tutang bokehtep umba Pohotala. 16:27 Io ihco-ihcooh Pohotala. Io Mahahorahti. Keleh Io konahtang isung turus-jaham nguha Yesus Kristus. Amen. Horomat ihkai, Paulus, jihpon Kristus Yesus
1:1-3 Konduang-konduang ukup Pohotala ang Korintus! Konduang jari tona'ah bain Pohotala ahkan monjadi ukup-Aiu, kobain Konduang ain Yesus Kristus, hombo-homboh paring ulun ang umoh ka'a ijo nyembah Tuhan ihto Yesus Kristus, iorih Tuhan iro tutang Tuhan ihto ka'a. Ahku, Paulus, tutang konduang ihto Sostenes, harap, keleh Pohotala, Amai ihto, tutang Tuhan Yesus Kristus nonga borehkat tutang kosanang komangat ahkan'kam. Ahku nyurat surat tuh, kolou rasul Kristus Yesus, ijo ponotuot bain Pohotala bongoi tutang kobain konohuang-Oh ka'a. 1:4 Ahku toturus botorimakasih ahkan Pohotala tohou ihkam, bain ihkam ius norima pononganasi tahkan Pohotala nguha Kristus Yesus. 1:5 Kotului ihkam monjadi ain Kristus, mahka pombolum'kam tahtou a'ang dolang hal. Pongotaan'kam tohou dolang angihco puna timbon, tutang ihkam ahpik ngajar pongotaan rih. 1:6 Orih nunjuk ijo borihta tohou Kristus jari kodorih nyalut nokuh luwang ahtoi'kam, 1:7 nyiring ihkam eam kurang ihco borehkat ka, pondehan ihkam ngindoi Tuhan ihto Yesus Kristus lombut, tutang gihtan kobain paring ulun. 1:8 Kristus bongoi ahkan monjamin ihkam nyiring aang kolaiuoh; mangat aang ohkot Io lombut hoduli, ihkam tonyombang-Oh eam aro kosalan. 1:9 Pohotala dahpot tomorocaya labihtuwioh. Iorih Pohotala ijo jari na'ah ihkam ahkan monjadi ihco umba Anak-Oh, iorih Yesus Kristus, Tuhan ihto. 1:10 Konduang-konduang! Ngosan aran Tuhan ihto Yesus Kristus, ahku nyawot mangat ihkam paringoh hihco pahkat puhtar; mangat ara anai kopisah ang louk ihkam. Hondakoh ihkam bulathihco, ihcoahtoi tutang ihcotiruk. 1:11 Kotului ulun-ulun tahkan bobuhan Kloë mander ahkak'ku, ijo anai soaljawab ang louk ihkam. 1:12 Ijo ahku ngonihoh iorih ijo ang louk ihkam anai ijo nuhtui, "Ahku umba Paulus," anai ka'a nuhtui, "Ahku umba Apolos," ijo bohkon nuhtui "Ahku umba Petrus," kodorih ka'a ijo bohkon hino nuhtui, hioi, "Ahku barih Kristus." 1:13 Kuwohrih Kristus tuh tobagi-bagi? Paulus eam mahtoi tonyalib ahkan'kam! Ihkam ka eam tonopondus ahkan monjadi murid-murid Paulus, kuwoh? 1:14 Torimakasih rih ahku, eam mopondus ihcobehti ka tahkan louk ihkam, bohkonumba Krispus tutang Gayus. 1:15 Ara nyiring ihcobehti ka nuhtui, ijo ahku jari mopondus io ahkan monjadi murid'ku. 1:16 (O yo, Stepanus tutang injah-jolahaioh puna ahku ijomopondus iro. Tahpi ijo bohkon tahkan rih, ang anaiingat'ku, eam aro hino ulun bohkon ijo ahku mopondusoh.) 1:17 Kristus nyuhu ahku, eam ahkan mopondus ulun, molekan ahkan mborihta Kabar Hinut tahkan Pohotala; tutang orih ka harus ahku nguai, eam aro hapan koahpik'ku bopander numbun kolunon, mangat kowasa tahkan popahtoi Kristus ang sopolahki, eam monjadi sia-sia. 1:18 Kotului ahkan ulun-ulun ijo nihtu korusak, borihta tohou popahtoi Kristus aang sopolahki, monjadi panderkouong. Tahpi ahkan ihto ijo nitu solamat kobain Pohotala, borihta rih puna tu'u caraoh Pohotala ngorinah kowasai-Oh. 1:19 Tului ang Surat Borasih, Pohotala homauh, "Kopihtar ulun pintar ahkan Ahku nderohoh, tutang kohorahtin ulun-ulun ahpik ahkan Ahku dianoh." 1:20 Nah, inon gunai ulun-ulun pintar rih? Inon gunai ulun-ulun ahpik rih? Inon gunai karon-ahli pikir ang tana tuh? Pohotala jari ngorinah kokaron kopihtar kolunon tuh, puna uras auh alik iou! 1:21 Kotului koloukuwoh ka kopihtaroh kolunon, io eam dahpot kosono Pohotala nguha kopihtaroh bongoi. Tahpi justru kobain Pohotala pihtar, mahka Io nohuang nyolamat ulun-ulun ijo porocaya umba Io, nguha borihta ijo ihkai nyiaroh ijo tongohu auh alik kobain kolunon. 1:22 Ulun Yahudi nutut tandahelan jadi bukti, tutang ulun Yunani mongguna kopihtar kolunon tuh. 1:23 Tahpi ihto tuh tihkas mborihta Kristus ijo mahtoi ang sopolahki. Borihta rih nyinggung pokomon ulun Yahudi, tutang tongohu tuhtui uong bain ulun-ulun bohkon Yahudi. Tutang ulun bohkon Yahudi ngohu orih ihco kouong. 1:24 Tahpi bagi ulun-ulun ijo jari tona'ah bain Pohotala -- pios io ulun Yahudi, kanika ulun bohkon Yahudi -- borihta rih kolou caraoh Pohotala ngorinah kowasa tutang kopihtar-Oh. 1:25 Kotului ijo gihtan ko-uong aang Pohotala, anai lobien pihtar tahkan kopihtaran kolunon; tutang ijo gihtaioh bolomu aang Pohotala, orih molowi ba'as tahkanumba koba'as kolunon. 1:26 Konduang-konduang! Cuba ingat koloukuwoh koada'an'kam ang ohkot Pohotala na'ah ihkam. Tihkas honjiot iou tahkan louk ihkam ijo horahti, ata'ai bokowasa, ata'ai boponuotoh diang numbun topahjah kolunon. 1:27 Tului puna Pohotala ha'at ngopili ijo tongohu uong kobain kolunon tuh, mangat ulun-ulun pihtar nyolung mia. Tutang Pohotala mitih ka'a ijo tongohu bolomu bain kolunon tuh, mangat ulun-ulun ijo ba'as gagah nyolung mia. 1:28 Pohotala ngopili ijo tongohu randah, hina, tutang malah ijo tongohu eam boguna bain kolunon tuh, mangat Pohotala morusakoh ijo tongohu boguna kobain kolunon tuh. 1:29 Honong kodorih eam ihcobehti ka dahpot namam aropoh ang toharep Pohotala. 1:30 Pohotala bongoi ijo napa nyiring Konduang hihco umba Kristus Yesus. Nguha Kristus, ihto monjadi horahti. Tutang nguha Io ka'a Pohotala nguan ihto hokopios hoduli umba arop-Oh, monjadi ihto ukup-Aiu ijo khusus tutang ngoliwus ihto. 1:31 Jadi kolou ijo tonyurat a'ang Surat Borasih, "Ulun ijo kani tama-tamam harus io namamoh ngosan inon ijo konuan Tuhan."
2:1 Konduang-konduang! Aang ohkot ahku lombut nohkuh ihkam tutang mborihta ahkan'kam tohou rancana Pohotala ijo jaha ngota'an kobain kolunon, ahku eam hapa kohorahtin kolunon tuh, ata'ai pander umba auh ijo muluk-muluk. 2:2 Tului ahku ius nehkat, ijo kotahin ahku anai hihco ihkam. Ahku eam ahkan monyorihta ino-inon, bohkon tohou Yesus Kristus; khususoh, ijo Io jari mahtoi nyopolahki. 2:3 Kotihka ahku anai umba ihkam, ahku bolomu tutang moruguh mihkoh. 2:4 Borihta ijo ahku nyiaroh ahkan'kam, eam ahku nyapaioh umba tuhtui monyak nyaling numbun kohorahtin ulun. Tahpi ahku monyiaroh rih umba cara ijo korinah, ijo Roh Pohotala bokowasa. 2:5 Ahku nguai kodorih, mangat koporocayan'kam umba Kristus, eam hogalang kohorahtin ulun, molekan hogalang kowasan Pohotala. 2:6 Oluka kodorih ang louk ulun-ulun ijo pombolum rohanioh jari botuo, ahku puna pander tohou kopihtar. Tahpi kopihtar tuh bohkon kopihtaran kolunon, ata'ai kopihtaran dolang pongowasaoh jaman tuh, ijo kowasaioh ahkan dilap. 2:7 Kopihtar ijo ahku nyorihtaoh tuh, iorih kopihtar tahkan Pohotala. Kopihtar rih eam tongota'an kobain kopihtaran kolunon, tahpi Pohotala jari nahtap ahkan kosanang ihto sounumba kolunon tuh jari tona'oi. 2:8 Eam ihcobehti ka tahkan pongowasa-pongowasa jaman tuh, ijo ngota'an tohou kopihtar rih. Kotului, jakaoh iro jari mongota'aioh, tontu iro eam ahkan nyopolahki Tuhan ihco tonohoromat rih. 2:9 Tombalikoh, hal rih, anai kolou auh ijo tonyurat aang Surat Borasih, "Inon ijo eam pu'u tonopahjah ata'ai konahan kobain ulun, tutang eam pu'u hino lombut aang tiruk ulun orih ijo tonahtap Pohotala ahkan ulun-ulun ijo sita Io." 2:10 Tahpi Pohotala jari ngorinahoh ahkan ihto hawui nguha Roh-Oh. Roh Pohotala moriksa dolang hal'co, nyiring umba dolang rancana Pohotala ijo paling bosuhuk samasino ka. 2:11 Kotului ijo mongota'an usin ahtoi ihcobehti, orihrih roh ulun rih bongoi, kowa? Kodorih ka'a tohou Pohotala. Ijo ngota'an usin ahtoi Pohotala tihkas Roh Pohotala rih bongoi! 2:12 Tutang ihto eam tononga roh kolunon tuh, molekan Roh ijo tahkan Pohotala, mangat ihto ngota'an, paringoh pononganasi Pohotala ahkan ihto. 2:13 Kotului rih, amat ihkai monarang dolang hal tohou Pohotala ahkan ulun-ulun ijo anaingina Roh Pohotala, ihkai eam monarangoh numbun kopihtaran kolunon, molekan numbun ajar Roh Pohotala. 2:14 Ulun ijo eam anaingina Roh Pohotala, eam dahpot monorima inon ijo ngorinah bain Roh rih. Kotului bagi ulun rih dolang hal konohawot kolou ihco kouong bewe. Ulun rih eam duon mohorahtioh, tului hal-hal rih tihkas duon tonilaioh numbun rohani. 2:15 Ulun ijo anaingina Roh Pohotala duon monilai paring a'angihco, tahpi eam ihcobehti ka, bohak monilai Io. 2:16 Luwang Surat Borasih tonyurat, "Iai ijo kota'an tiruk Tuhan? Tutang iai ijo duon moningak Io?" Ihto ijo tepun tiruk ijo sama umba Kristus.
3:1 Konduang-konduang! Kotu'uioh ahku eam duon bopander umba konduang, kolou umba ulun ijo tepun Roh Pohotala. Ahku tihkas duon bopander umba ihkam, kolou umba ulun ijo magun bolum numbun kojolik kolunon; kolou umba ulun ijo magun ngoa aang koporocayaoh umba Kristus. 3:2 Lomoi ahku baya duon nonga ahkan'kam ukun ngoa, eam ukun ulun oko; kotului ihkam jaha sukupba'as ahkan orih. Tahpi huntuhka ihkam, magun jaha ba'as ahkan orih, 3:3 kotului ihkam magun bolum numbun tobiat'kam cara kolunon. Kotului amat magun hiri ahtoi tutang hokolahi sama arop'kam, eamkah orih pokarah ijo ihkam magun numbun tobiat kolunon, kolou ulun-ulun ijo eam kosono Pohotala? 3:4 Amat anai ijo nuhtui, "Ihkai umba Paulus," tutang ijo bohkon nuhtui, "Ihkai umba Apolos," eamkah orih pokarah ijo Konduang bohadat kolou ulun-ulun kolunon? 3:5 Kotu'ui iai Apolos rih? Tutang iai Paulus rih? Ihkai tihkas dolang pohalu Pohotala, ijo ius niting ihkam ahkan porocaya umba Kristus. Ihkai baya molalus gawi ijo tonyuhu Tuhan ahkan ihkai nyinong behti. 3:6 Ahku ijo ngombulan, tutang Apolos ijo nyiramoh, tahpi Pohotala bongoi ijo nguan komulan rih bolum. 3:7 Jadi ijo boguna iorih Pohotala, tului Io ijo mombolumoh. Ijo ngombulan tutang ijo nyiramoh eam boguna. 3:8 Koduooh anai kosamaoh. Nyino-nyinong tihkas ahkan norima opah numbun hekabo'o iro. 3:9 Ihkai anairih ulun-ulun ijo hombo-homboh bogawi ahkan Pohotala; tutang ihkam anairih kolou umon Pohotala. Konduang-konduang anairih ka'a kolou lohpou Pohotala. 3:10 Umba kotoun ijo tononga Pohotala, ahku kolou ahli mangun, hawuiius ngina galang ahkan gedung rih, tutang ulun bohkon mangun gedung ang isun galang rih. Nyinong ulun harus nohtoanioh moro-morong koloukuwoh io mangunoh ang ngosan galang rih. 3:11 Tului Pohotala bongoi jari potuot Yesus Kristus kolou ihco-ihcooh, galang ahkan gedung rih; eam aro galang ijo bohkon. 3:12 Anai ijo mangun ang ngosan galang rih, hawui hapan bulou, anai ijo hapa perak, anai ijo hapa bahtu permata, anai hino ijo hapan kahju, anai ijo hapa uru koring ata'aika topilai. 3:13 Gawin nyinong ulun ahkan gitan noin ang uhun Kristus lombut hoduli. Kotului ang ondou orih baho ahkan nguan gawin nyino-nyinong ulun botarang. Baho ahkan nguji tutang nukas mutu tahkan gawi rih. 3:14 Amat gedung ijo tonombok ulun ang ngosan galang rih tahan pahpong baho, ulun rih ahkan norima upahoh. 3:15 Tahpi amat gawin ulun rih topahpong, io ahkan rugi; io bongoi ahkan solamat, io kolou ulun lolos nguha baho. 3:16 Kota'ankah Konduang, ijo ihkam anai Lohpou Pohotala? Tutang ijo Roh Pohotala mohcon ang luwang ihkam? 3:17 Amat anai ulun ijo morusak Lohpou Pohotala, Pohotala ka ahkan morusak ulun rih. Kotului Lohpou Pohotala anai khusus ain Pohotala iou, tutang ihkam Lohpou rih. 3:18 Ararih ihcobehti ka ngabalik aropoh bongoi. Amat anai ulun ang louk'kam, komo aropoh horahti numbun tihpong kolunon tuh, ulun rih harus kolou ulun uong, mangat io monjadi moro-morong horahti. 3:19 Kotului ijo ngohu aropoh horahti kobain kolunon, orih rih kouong ang toharep Pohotala. Aang Surat Borasih tonyurat, "Pohotala nyokohtung ulun-ulun horahti aang koahpik iro bongoi." 3:20 Anai tonyurat koloutuh ka'a, "Tuhan kota'an ijo tiruk ulun-ulun horahti orihrih tiruk ijo eam boguna." 3:21 Kotului orih, ara ihcobehti ka tonyanjung-nyanjung kolunon, tului kopari-paring oh jari tononga monjadi ain'kam: 3:22 Paulus, Apolos, Petrus, kolunon tuh, pombolum tutang popahtoi, jaman tuh ata'ai ka jaman ijo ahkan lombut, kopari-paringoh anai ain'kam. 3:23 Tutang ihkam anaioh, ain Kristus, tutang Kristus, ain Pohotala.
4:1 Ngohurih ihkai pohalu-pohalu Kristus ijo botanggung-jawab mborihtaoh rancana-rancana Pohotala ijo jaha tongota'an kolunon. 4:2 Ijo pahtu-pahtuk tonutut tahkan pohalu ijo kodorih, iorih ijo io bokehtep umba tuanoh. 4:3 Bagi ahku, eam jadi soal kuwoh ijo ihkam -- ata'ai iai ka -- ka'a tirukoh tohou arop'ku. Malah inon ijo ahku bongok nirukoh, tohou arop'ku bongok ka, eam monjadi soal. 4:4 Ahku eam komo bosala a'ang hal inon ka ka'a, tahpi orih eam bukti ijo ahku puna eam bosala. Tuhan bongoi ijo nuhkas ahku bosala ata'ai eam. 4:5 Kobain orih, tului jaha ohkotoh, ara ihkam joi-join nuhkas, ijo ihcobehti bosala ata'ai eam. Ngindoi iou nyiring Tuhan lombut noin. Io iou ijo ahkan nguap paring rahasia-rahasia, ijo bosuhuk a'ang kopindong. Iorih ijo ahkan ngahkas paring niat ijo hotuyuk ang luwang ahtoi ulunkolunon. Ang ohkot rih punai nyinong behti norima tahkan Pohotala tara ijo pahtut tonorimaoh. 4:6 Konduang-konduang! Ahkan gunan'kam, ahku jari kehpan paringoh rih ahkan Apolos tutang ahkan arop'ku bongok. Konohuangoh mangat tahkan sutu ihkai rih, ihkam dahpot bajar inon rimai auhtuh, "Nambitrih aang aturan ijo anai." Honong kodorih eam ihcobehti ka tahkan ihkam dahpot tara-tara umba ihcobehti, turus mohina ijo bohkon. 4:7 Iai ijo ngonjadi Konduang labih tahkan ulun bohkon? Eamlah dolang aang'co Konduang norimaoh tahkan Pohotala? Jadi ombai kani ngojuhu arop, kolo-kolou inon ijo anai aang Konduang rih, eam ang'co ijo tononga? 4:8 Puna ihkam eam porulu ino-inon hino! Ihkam jari tahtou! Ihkam jari monjadi lahca! Tutang ihkai eam. Eaminon kopiosoh amat ihkam tu'u morong monjadi lahca, mangat ihkai duon moretah homboh ihkam. 4:9 Kotului numbun tiruk'ku, ihkai karon-rasul, ius tonapa bain Pohotala, kolou tutunan ang boun ulun tutang bola molehkat. Ihkai kolou ulun-ulun hina ijo tonipa umba hukum mahtoi ang boun ulun aro tutang tonolahap kobain kolunon. 4:10 Kotului Kristus, ihkai anairih ulun ijo uong, tutang ihkam ulun Kristen ihco ahpik! Ihkai bolomu, ihkam ba'as! Ihkai tonocela, tutang ihkam tonyanjung-nyanjung. 4:11 Johcok uhuntuh ihkai nginyam kolou, tutang tohjahbolai! Hahtin ihkai tisa ijo ang behtin ihkai iou; ulun nyiksa ihkai; ihkai eam dahpot unuk ijo nehtep; 4:12 ihkai gawin paham ahkan ngurah napakah. Amat ihkai tonulut, ihkai malosumba borehkat, amat ihkai konoporos ihkai sabar. 4:13 amat ulun ngonja'at-ja'at ihkai, ihkai malosoh umba auh-auh ihco manih. Ihkai eam labih tahkan luhtik-puhuk kolunon tuh; nyiring uhuntuh ihkai magun tonongohu kolou luhtik-puhuk tana. 4:14 Ahku nyurat tuh ahkan'kam, eamrih ahkan nguan ihkam jadi ngomia, tahpi ahkan ningak ihkam kolou dolang anak aik'ku bongok. 4:15 Kobain ahku ijo monjadi amai ihkam, oluka tousama kolou ulun Kristen, ihkam ius tepun sopulu ribu guru. Ang luwang pombolum'mu kolou ulun-ulun ijo ihco umba Kristus, ahku ijo monjadi amai ahkan'kam, kotului ahku ijo ngomin Kabar Hinut tohou Kristus ahkan'kam. 4:16 Kotului orih ahku nyawot honong paham mangat ihkam, nuhtut sutu ahku. 4:17 Ahkan orihrih ahku jari nyuhu Timoteus masap ihkam. Monjadi murid Kristus, io sama kolou anak'ku bongok ijo ahku ngasioh. Io anak'ku ijo duon tomorocaya. Noin io ahkan mopingat ihkam, tohou cara bolum ijo ahku nihtoioh, ulijari porocaya umba Kristus, iorih cara bolum ijo ahku majaroh ang nyinong ukup, ang umoh ka'a. 4:18 Pira-pira ulun ang louk'kam, jari monjadi bojuhu, kobain iro eam ngohu, ahku eam ahkan lombut nakuh'kam. 4:19 Tahpi amat Tuhan mongijin, ahku ahkan lombut ka'a nokuh ihkam eam tahi hino. Noin ang ohkot orih rih, ahku ahkan nohto ka'a, inon ijo duon konuan kobain ulun-ulun ijo bojuhu orih; eam baya tuhtui iro iu. 4:20 Tului amat Pohotala moretah ang pombolum ihcobehti, hal orih tobukti ang koba'as pombolum ulun rih, eam bain tuhtui-tuhtuioh. 4:21 Jadi, ngopili iou inon ijo ihkam labih jolikoh! Inon ihkam kani ahku lombut mangat majar ihkam hawui karas, ata'ai ahku lombut majar hawui kolomun auh tutang ngasi nyayang?
5:1 Ahku kotu'ui jari norima borihta, ijo ang louk ihkam, anai karon-gawin kokihal ijo dalo-dalou. Anai tahkan louk Konduang ijo hobandung umba inai tirioh. Ulun-ulun ijo eam kosono Tuhan ka, eam nguan ang kolourih. 5:2 Oluka kodorih, Konduang magun isung ahtoi. Tobalikoh Konduang sopunaoh porosahtoi, tutang hobarih tahkan louk Konduang, ulun ijo nguan hal orih. 5:3-4 Cara ijo gihtan ahku mahcu tahkan ihkam, tahpi cara bahtin ahku anai ang tohun'kam. Jadi, ahku kani botindak koloujahka ahku anai ang louk'kam. "Ngosan aran Tuhan Yesus Kristus, ahku ngorinah ijo ulun ijo jari nguan gawiu ijo kodorih ja'at, harus tonohukum!" Amat ihkam hopuhpung, ngohu iou, ijo ahku anai tuot ang louk ihkam, tutang umba kowasan Tuhan ihto Yesus, 5:5 ihkam harus nyorahoh ulun rih ahkan Sehtan mangat behtin ulun rih rusak, tutang honong kodorih rohoh tonyolamat ang ohkot Tuhan lombut hoduli. 5:6 Eam pahtut ihkam komo bojuhu. Mihkohoh, ihkam jari kosono porobasa tuh, "Ragi ijo honjiot nguan hopus-golahpung kamir!" 5:7 Dian houn ragi ijo usang rih, iorih ragi dusa, mangat ihkam monjadi kolou golahpung ijo bohua, borasih tahkan ragi dusa ijo usang, tutang ahku kota'an ijo ihkam puna kodorih. Kobain, pesta Paska ihto jari sodia, tului Kristus ijo monjadi kolou tobiri Paska ihto, jari tomorahpah. 5:8 Jadi, olai ihto moporami pesta ihto rih, umba ruhte ijo boragi, iorih luhte ijo nindung koborasih tutang paringoh ijo kojorih ang ahtoi Pohotala. A'ai ihto moporami pesta Paska orih umba ruhte ijo hewui ragi ijo usang, iorih ragi dusa tutang koja'atoh. 5:9 Ang luwang surat'ku ijo soun, ahku mborihta ahkan'kam, mangat ara hojelut umba ulun ijo kihal. 5:10 Ijo ahku hondakoh eam ulun-ulun pongihal, ata'ai bokuhu, ata'ai pobalik, ata'ai nyembah dewa, ijo samasino eam kosono Pohotala. Eam! Ahku eam nohuangoh iro; kobain amat ihkam harus ngomahcuoh iro, mahka kopunaioh ihkam porulu soluka samasino tahkan kolunon tuh. 5:11 Konohuang'ku iorih, ijo ihkam ara pahkat umba ulun ijo ngahku aropoh ulun Kristen, tahpi ulun rih nguan kokihal, ata'ai bokuhu, ata'ai ponyembah dewa, ata'ai jorik ngonja'at-ja'at ulun bohkon, ata'ai pobusou, ata'aika ponahkou. Tuot kuman umba ulun rih ka a'ai! 5:12-13 Puna mosara ulun-ulun ijo bohkon Kristen, bohkon urusan aik'ku, Pohotala bongoi ijo ahkan mosara iro. Tahpi tohou anak-anak ukup'kam, eam kah ihkam bongom ijo harus mosara iro? A'ang Surat Borasih tonyurat, "Muhko iou ulun ja'at tahkan louk ihkam."
6:1 Ombai anai ang louk ihkam ijo bohanyi tulak nokuh hakim ijo eam kosono Pohotala, mangat ngadu konduangoh ihcoporocaya, amat io anai porokaraoh umba konduangoh rih? Ombai io eam nyawot ukup Pohotala ngobuah porokaraoh orih rih? 6:2 Kuwoh ihkam eam kota'an ijo ukup Pohotala, ahkan mosara kolunon tuh? Jadi, amat puna ihkam ahkan mosara kolunon tuh, kuwoh ihkam eam sanggup ngobuah, karon-porokara mosara ijo eam anai rimai? 6:3 Inon ihkam eam kota'an, ijo ihto ahkan mosara karon-molehkat? Mahi-mahi hino karon-porokara pambolum nyinong ondou! 6:4 Mahka amat lombut karon-porokara kolou orih, inon ihkam ngaduoh ahkan ulun-ulun ijo eam anai ponuotoh samasino ang ukup? 6:5 Tu'u-tu'u momi'a! Puna ang louk ihkam ihcobehti anai ulun piosbosara, ahkan ngobuah sokehta, louk konduang-konduang'kam, ijo sama-sama Kristen! 6:6 Tahpi tobalikoh, ihcobehti Kristen, tulak nokuh ulun ijo eam Kristen, ahkan ngadu porokaraoh toharep konduangoh ijo Kristen! 6:7 Ara samasino tulak hoporokara nokuh ulun ijo eam Kristen; Amat anai sokehta-sokehta ang louk ihkam ka, jari monjadi ihco kokalah'kam. Labih pios ihkam, konuan eam adil, ata'ai tonorugi iou! 6:8 Tahpi ihkam bongom, malah ijo nguan ulun bohkon hawui eam adil. Ihkam bongom ka'a morugi ulun bohkon. Tutang orih ihkam nguai, justru toharep konduang-konduang'kam ihcoporocaya! 6:9 Kota'ankah ihkam ijo ulun-ulun, ijo eam numbun konohuang Pohotala, eam ahkan monjadi anak ukup Pohotala? Ara kona alik! Ulun-ulun ijo nguan kokihal, ulun-ulun ijo nyembah songiang, ijo pohobandung, ijo nguan gawiou ijo momi'a toharep sama tapaioh, 6:10 ijo nahkou, ijo bokuhu, ijo pobusou, ijo jolik ngonjaat-jaat ulun bohkon, tutang mohamis ulun bohkon -- paring ulun kolourih eam ahkan monjadi anak ukup Pohotala. 6:11 Pira-pira ang louk'kam, lomoi hadatoh kolourih. Tahpi huntuh ihkam, tongorinah borasih tahkan dusa. Ihkam jari nyolung ain Pohotala ijo khusus. Ihkam jari hokopios huli umba Pohotala, tului ihkam porocaya umba Tuhan Yesus Kristus, tutang kotului kowasan Roh tahkan Pohotalan ihto. 6:12 Anai ijo nuhtui, ijo nyinong ulun dahpot nguan karon aang'co. Tahpi ahkak'ku eam paringoh boguna. Jadi, oluka ahku duon nguan aanginon iou, tahpi ahku eam kani mohanou arop'ku tokowasa bain inon ka. 6:13 Anai ka'a ijo nuhtui, ijo ukun anairih ahkan kono'i tutang kono'i tonahtap ahkan ukun. Tahpi koduo-duooh ahkan todian kobain Pohotala. Behtin ulun eam tou tohapa ahkan nguan ijo kihal, tahpi tihkas hapa mohalu Tuhan. Tutang Tuhan ahkan mohaga behti rih. 6:14 Pohotala jari mombolum behtin Tuhan Yesus tahkan popahtoi, kodorih ka'a Pohotala ahkan mombolumoh ihto, hapa kowasa-Oh. 6:15 Konduang-konduang kota'an ijo behtin'kam anai ramun behtin Kristus. Jadi, inon tou ahku ngomin ihco ramun behtin Kristus, turus monjadioh ramun behtin 'cobehti sundal? Samasino eam! 6:16 Ata'aioh, mihkoh ihkam jaha ngota'an, ijo ulun ijo hihco umba 'cobehti sundal, monjadi ihco umba sundal rih! Tului a'ang Surat Borasih tonyurat, "Duo behti orih rih monjadi ihco." 6:17 Tahpi ulun ijo pohihco aropoh umba Tuhan, Roh Tuhan umba roh ulun rih monjadi ihco. 6:18 Ngojajong karon-gawi ijo kihal. Kotului paring dusa bohkon, ijo konuan ulun, uras nyolung ang luar behtin ulun rih. Tahpi ulun ijo nguan ijo kihal, rimai nguan dusa toharep behtiu bongoi. 6:19 Ihkam harus ngota'an ijo behtin'mu anai unuk mohcon Roh Pohotala. Roh rih mohcon ang luwang ihkam. Tutang Pohotala bongoi ijo nonga Roh rih ahkan'kam. Behtin Konduang rih eam ain emu. Orih ain Pohotala. 6:20 Pohotala jari moli ihkam tutang jari mbayaroh hawui lunas. Kobain rih, hapa behtin'kam kodorih kolou, nyiring Pohotala tonohoromat.
7:1 Huntuh ahku kani bopander tohou masalah ijo ihkam ngohawotoh a'ang surat'kam. Amat ihcobehti ulunbahkas eam kawin, orih pios. 7:2 Tahpi mangat eam buah tihkos ahkan nguan hal-hal ijo eam pahtut, labih pios nyinong ulun-ulun bahkas anai oruhoh bongoi. Tutang nyinong ulunbawi anai bosaioh bongoi. 7:3 Bosai harus molalus kopahtutoh kolou bosai ngosan oruhoh, tutang oruhoh harus molalus kopahtutoh monjadi oruh toharep, bosoioh, nyino-nyinong behti molalus kopahtutoh toharep ijo bohkon. 7:4 Oruhoh eam bokowasa ngosan behtiu bongoioh, ijo bokowasa ngosan behtiuoh baya bosaioh. Kodorih ka'a bosaioh eam bokowasa ngosan behtiuoh bongoi, ijo bokowasa ngosan behtiuoh baya oruhoh. 7:5 Ararih ngojajong ihco umba ijo bohkon, socara bosai oruh. Tou ahkan pondehan ohkotoh, asar duo-duooh jari sotuju. Honong kodorih nyino-nyinong dahpot bodo'a, hawui eam hokoderoh. Tahpi pongohuli harusrih ihkam hoduli, saling hokodoni secara bosai oruh. Amat eam kolourih, noin ihkam tou numbun bujuk roh ja'at, tului ihkam eam ba'as nahan kojolik bolai. 7:6 Ahku nuhtui tuh eam monjadi poretah, tahpi monjadi tingak. 7:7 Kotu'uioh ahku labih jolik amat paring ulun monjadi kolou ahku. Tahpi nyinong behti ius norima pononga ijo khusus tahkan Pohotala. Ihcobehti tepun pononga tuh, ijo bohkon tepun pononga orih. 7:8 Ahkan ulun-ulun ijo jaha kawin tutang ahkan bawi-bawi ijo jari balu, jituh tingak tahkan ahku: Labih pios Konduang tehtep bolum bongon kolou ahku. 7:9 Tahpi amat Konduang eam duon monahan kojolikbolai, Konduang hondakoh kawin. Tului labih pios Konduang kawin tahkanumba kojolikbolai molambun. 7:10 Toharep iro ijo jari kawin jituh poretah: (Kotu'ui eam ahku, ijo nonga poretah orih rih Tuhan.) Ihcobehti bawi ijo jari kawin a'ai nohtah bosaioh. 7:11 Tahpi amat io jari nohtahoh, io harus tohtap ara ngomosai, ata'ai buli umba bosaioh. Tutang ihcobehti bosai eam tou nulang oruhoh. 7:12 Ahkan ijo dolang bohkon-bohkonoh tingak'ku iorih: -- jituh tingak tahkan ahku bongok, eam tahkan Tuhan -- amat ihcobehti ulun Kristen ngoruh ihcobehti bawi ijo eam porocaya umba Kristus, tutang oruhoh sotuju ahkan bolum hihco umba io, ulun kodorih eam tou nulang oruhoh rih. 7:13 Tutang amat ihcobehti bawin ulun Kristen, ngomosai ijo behti ulun ijo eam porocaya umba Kristus, tutang bosaioh sotuju nohuang hokombolum hihco umba io, mahka oruhoh rih eam tou nulang bosaioh rih. 7:14 Tului bosai ijo eam porocaya Kristus, mangat tou monjadi ukup ain Pohotala, tului pongawin iro umba oruhoh ijo jari monjadi ukup Pohotala. Kodorih ka'a oruhoh ijo eam porocaya mangat tou monjadi ukup ain Pohotala, kotului pongawin iro umba bosaioh ijo jari monjadi ukup ain Pohotala. Amat eam kodorih, anak-anak iro monjadi kolou anak-anak ulun kapir, podahal anak-anak orihrih tongohu kolou ukup ain Pohotala. 7:15 Tahpi amat ulun ijo eam porocaya rih nohtah oruhoh ata'ai bosaioh ijo Kristen, ara nahan io. A'ang hal tuh Konduangbawi ata'ai Konduangbahkas rih bebas, kobain Pohotala kani mangat Konduang bolum honong rukun. 7:16 Tului Konduang kolou oruh -- ijo jari porocaya umba Tuhan -- koloukuwoh Konduang tou kota'an honong pasti ijo Konduang eam duon nyolamat bosai'kam? Kodorih ka'a Konduang kolou bosai ijo Kristen, koloukuwohoh tou kota'an honong pasti ijo Konduang eam duon nyolamat oruh'kam? 7:17 Konohuangoh nyino-nyinong mohaga pombolumoh numbun toniting Tuhan, kolou ijo jari tonuhkas bain Pohotala ahkaioh, aang ohkot Pohotala na'ahoh ahkan porocaya umba Io. Orihrih poroturan ijo ahku majaroh ang nyino-nyinong ukup. 7:18 Pribasaoh, amat ihcobehti jari tonyunat ang kotihka io norima ta'ah Pohotala, mahka a'ai ulun orih rih ngurahjalan ngudapoh tanda-tanda sunat rih. Kodorih ka'a amat ihcobehti jaha tonyunat aang kotihka io norima ta'ah Pohotala, eam usah ulun orih rih nyawot tonyunat. 7:19 Tului nihtoi poroturan sunat, ata'ai eam nihtoioh koduo-duooh, sama-sama eam anai rimai ino-inon. Ijo mbahtang io rih numbun poretah-poretah Pohotala. 7:20 Konohuangoh nyinong ulun tehtep bolum a'ang koada'an kolou kotihka io norima ta'ah Pohotala. 7:21 Amat aang ohkot Konduang tona'ah, Konduang anairih ihcobehti jihpon, eam usah Konduang susa-susah niruk hal rih. Tahpi amat noin Konduang duon kosapet ahkan jadi morodehka, nguna kosapet rih. 7:22 Tului ihcobehti jihpon jari porocaya umba Tuhan, anairih monjadi ulun ain Tuhan ijo morodehka. Tutang ihcobehti morodehka ijo jari porocaya umba Tuhan, anairih jihpon Kristus. 7:23 Pohotala jari moli Konduang tutang lunas bayaroh. Tului orih, a'ai Konduang nyarah behti mangat monjadi jihpon kolunon. 7:24 Jadi, Konduang-konduang koloukuwohka koada'an'kam aang ohkot tona'ah, kohondakoh Konduang tehtep bolum kolourih hihco umba Pohotala. 7:25 Huntuh tohou ulun-ulun ijo jaha kawin. Tohou hal orih ahku eam norima poretah ino-inon tahkan Tuhan. Olu kodorih ulun ijo tului norima pononganasi Tuhan pahtut tomorocaya, ahku kani nonga tingak iou. 7:26 Mongingat karon kosusah ijo ahkan ngancam huntuh, ahku komo labih pios amat ulun tehtep nguan pombolumoh kolou koada'ai ijo huntuh. 7:27 Amat Konduang jari ngoruh, a'ai ngurahjalan bolohkak tahkan oruh orih rih. Amat Konduang jaha ngoruh eam usah ngurah oruh. 7:28 Tahpi amat Konduang kawin orih eam dosa. Kodorih ka'a amat ihcobehti dara kawin, eam rimaioh io bodusa. Tihkas, iro ijo kawin orih rih ahkan noharep aro kosusah. Tutang ahku jolik Konduang tokila tahkan kosusah-kosusah rih. 7:29 Titunhuang'ku koloutuh, Konduang-konduang: Ihto eam anai aro ohkot hino. Nopara tahkan huntuh, nyinong ulun ijo jari ngoruh, hondakoh bolum koloujahka io eam ngoruh; 7:30 ulun ijo nangih, bolum koloujahka io eam poros ahtoioh; ulun ijo ngota'o, koloujahka io eam jorih; ulun ijo jari moli koloujahka io eam ngina ino-inon; 7:31 tutang ulun ijo sohowu a'ang hal-hal kolunon, pahtut bolum koloujahka eam deroh bain hal-hal rih. Kobain eam tahi hino kolonon tuh, a'ang koada'ai ijo huntuh, ahkan dilap! 7:32 Ahku jolik mangat Konduang morodehka tahkan kosusah. Ulun ijo eam ngoruh, ahkan mbulat tirukoh aang hal-hal tohou Tuhan, kotului io jolik ngojorih Tuhan. 7:33 Tahpi ulun ijo jari ngoruh ahkan aro niruk hal-hal kolunon tuh ngojorih ahtoi oruhoh; 7:34 kojoriaioh karon-tirukoh tobagi-bagi. Ihcobehti bawi ijo eam ngomosai, ata'ai ihcobehti anakdara, ahkan aro niruk hal-hal tohou Tuhan, kotului io jolik mangat behtiu homoruaioh, monjadi ain Pohotala. Tahpi ihcobehti ulunbawi ijo jari ngomosai, io ngobulat tirukoh nitu hal-hal kolunon tuh, tului jolik io ngojorih ahtoi bosaioh. 7:35 Ahku nyurat paringoh rih, ahkan kopios'kam bongom, eam hawui nohuang ngohana 'jotuh, ngohana 'jo-orih. Ijo ahku jolik baya mangat Konduang nguan ijo morong tutang pahtut, tutang mangat Konduang duon ngombulat tiruk'kam ahkan Tuhan. 7:36 Amat ihcobehti komo eam molalus ijo kopahtutoh toharep kisokoh, amat io eam dahpot nahan kojolikbolaioh, tutang io komo perulu kawin umba dara orih rih. Nauhoh io nguan, inon ijo pokomooh pios; io eam bodusa, amat iro kawin. 7:37 Tahpi amat ihcobehti jari nguan koputusan ang luwang ahtoioh ahkan eam kawin umba kisokoh, tutang tuhkas orih rih eam toropaksa, mahka ijo konuai orih rih pios, asar io ba'as nahan aropoh. 7:38 Kolopuhtai, ulun ijo kawin pios gawiuoh, tutang ulun ijo eam kawin labih pios hino gawiuoh. 7:39 Ihcobehti bawi ijo jari kawin lehket umba bosaioh, tihkas kotahin bosaioh bolum. Amat bosaioh jari mahtoi, ulunbawi orih rih morodehka kawin hino umba ulun ijo kojolikoh; asar pongawin orih, pongawin Kristen. 7:40 Tahpi io ahkan labih utung amat eam kawin hino. Jorih auh tiruk'ku bongok, tahpi ahku komo ijo, 'jo konohawot'ku rih, lombut kobain kowasa Roh Pohotala.
8:1 Uhuntuh tohou ukun ijo jari tonyorah kolou pononga ahkan Songiangdewa. Puna morong kolou hion ulun "Ihto paringoh uras ahpik." Tahpi koahpik napa ulun monjadi bojuhu, rahatoh kasih mangun pribadi ulun. 8:2 Ulun ijo ngohu, ijo io jari ngota'an aro, kotu'uioh jaha ngota'an ijo puna paling kotimbon-timbonoh. 8:3 Tahpi ulun ijo tu'u-tu'u sita Pohotala, Io tongosono kobain Pohotala. 8:4 Tohou soal kuman ukun ijo jari tonyorah ahkan songiangdewa ihto ngota'an ijo songiang, gambar angihco ijo kotu'uioh, eam aro. Tutang ihto ngota'an ka'a ijo Pohotala tihkas ihco, eam aro ihco bohkon. 8:5 Puna aro ka'a, inon ijo konohawot pohotala tutang tuhan; pios ijo anai ang langit, oluka ijo anai ngosan tana. 8:6 Tahpi bagi ihto, Pohotala tihkas ihco. Io Amai ijo na'oi karon aang'co. Ahkai-Oh ihto bolum. Tutang Tuhan tihkas ihco ka'a, iorih Yesus Kristus. Nguha Io karon angihco tona'oi, tutang kotului Io mahka ihto bolum. 8:7 Oluka kodorih eam paring ulun ngota'an hal rih. Anai ijo lomoi kopahtuhoh nyembah songiangdewa. Jadi, kotului rih nyiring huntuh ka iro magun komo ijo ukun, ijo jari tonyorah ahkan songiangdewa, yorih ukun dewa. Mahka amat iro kuman ukun rih, iro komo bodusa; tului koporocaya iro jaha ba'as. 8:8 Kotu'ui ukun bongon eam nguan kohihco ihto umba Pohotala monjadi labih rapat. Amat ihto kuman ukun rih, ihto eam duon utung ino-inon. Tobalikoh amat ihto eam kumai ukun rih, ihto ka eam rugi ino-inon. 8:9 Tahpi, bua-buah! Ara nyiring nyolung, ijo ulun bohkon monjadi bodusa -- kotului koyahkinanoh jaha ba'as -- kobain tului Konduang bebas nguan inon iou. 8:10 Konohuang'ku koloutuh; Jahkaoh Konduang, ijo anai ngina koyahkinan ijo ba'as, uhun tuot kuman aang koramat dewa. Uliorih ihcobehti nohto Konduang tuot kuman ang anan. Amat koyahkinan ulun rih eam dehen, eamkah orih ahkan mawi ulun rih bohanyi kuman ukun ijo jari tononga ahkan songiang? 8:11 Tutang kotului rih, mahka koyahkinan Konduang nguan ulun ijo koyahkinanoh eam ba'as rih monjadi sosat. Podahal Kristus mahtoi ahkan ulun rih ka'a. 8:12 Tutang amat Konduang nguan kosalan kolourih toharep konduang-konduang Kristen -- iorih konduang morusak koyahkinan ulun bohkon, ijo bolomu -- mahka Konduang bodusa umba Kristus. 8:13 Orih kotuluioh, amat ukun kotuluioh rih konduang'ku bodusa, mahka ahku samasino eam ahkan kuman usinohcin hino. Tului, ara-ara konduang'ku bodusa tului ahku.
9:1 Eamkah ahku ulun morodehka? Eamleh ahku tuh rasul? Kuwoh ahku jaha pu'u nohto Yesus, Tuhan ihto? Kuwoh ihkam eam bua gawik'ku ahkan Tuhan? 9:2 Amatka ulun-ulun bohkon eam kani ngahku ahku kolou rasul, paling honjiot ihkam ngahku orih! Tului pombolum'mu kolou ulun Kristen, anairih bukti ahku ihcobehti rasul. 9:3 Amat ulun nosalan ahku, ahku ahkan mutah numbuntuh. 9:4 Inon ahku eam bohak, norima ukun tutang korih tului angkonuak'ku? 9:5 Kuwoh ahku eam bohak ngomin oruh'ku ijo Kristen homboh ahku aang ponomuoi'ku, kolou ijo konuan bain konduang-konduang Tuhan Yesus, tutang bain rasul-rasul bohkonoh, totame Petrus? 9:6 Ata'ai tihkas Barnabas tutang ahku iou ijo pahtut ngurah ukus'ku bongok? 9:7 Eam aro jolahan sorodadu ijo pahtut ngurah ukus aropoh bongoi, ang luwang posukan kolahi! Eam anai pongumo ijo ngombulan anggur ang pobulanoh, turus eam kuman bua anggur rih tahkan pombulan orih! Eam anai sokahtik ijo mohaga tobirioh, turus eam ngorih susu tahkan tobiri-tobirioh rih! 9:8 Ahku nohouang orih eam baya hogalang ijo kopahtutoh a'ang kopu'u nyinong ondou, tahpi tului Surat Borasih nohouohrih hal rih ka'a. 9:9 Ang luwang buhku Museh tonyurat, "Sahpi ijo rahat ngihik paroi ahkan ngihik luang paroi tahkan pahting ara mangop bauioh." Sahpirih ijo nohtoani Pohotala? 9:10 Ata'ai orih konohuangoh ahkan ihto? Puna orih tonyurat ahkan ihto. Tului ulun ijo nguan umo tutang ulun ijo morasih paroioh, jari kopahtutoh nguangawiu honong harapoh ahkan norima 'cokabagi tahkan bua gawiu rih. 9:11 Ihkai ius monyi bonyi Rohani ang luwang pombolum'kam. Mahka amat ihkai ngohtom borehkat-borehkat ramun kolunon tahkan ihkam, inon orih rimai ihkai nutut labih aro tahkan'kam? 9:12 Amat ulun-ulun bohkon anai hak bokoharap tuh tahkan ihkam, eamkah ihkai labih bohak hino tahkan iro? Tahpi ahku jaha nguna hak orih. Tobalikoh, ahku labih jolik ngohtun kokaron angihco, tahkan mopolombut angihco hal ijo mongapeng monyiar Kabar Hinut tohou Kristus. 9:13 Konduang puna kota'an ijo ulun ijo bogawi ang luwang Lohpou Pohotala norima ukun iro, tahkan Lohpou Pohotala. Tutang ulun-ulun ijo hogoguan unuk nonga porahpah, duon bagi tahkan porahpah ijo tonosorah ang anan. 9:14 Kodorih ka'a Tuhan jari nuhkas, ijo ulun ijo mborihtaoh Kabar Hinut rih koharusoh duon upahoh tahkan tomorihtaoh rih. 9:15 Tahpi jaha pu'u ahku hapa angihco ka tahkan hak-hak rih. Tutang ahku nyurat surat tuh, eam ka'a hawui konohuang mangat hal-hal rih, konuan uhuntuh toharep ahku. Labih pios ahku mahtoi tahkan nihou hal ijo ahku namamoh rih. 9:16 Tului, amat orih baya soal mborihta Kabar Hinut tahkan Pohotala, mahka ahku eam anai hak monamam-namamoh, kobain Pohotala jari nyuhu ahku ahkan nguaioh. Colahka ahku, amat ahku eam mborihta Kabar Hinut rih. 9:17 Jahkaoh ahku nguan gawik orih, ngosan konohuang'ku bongok, mahka ahku tou moharap ahkan dahpot upah. Tahpi ahku mborihta Kabar Hinut rih, puna tului koharusoh. Ahku sonuhu bain Pohotala ahkan nguan orih. 9:18 Amat kodorih upah'ku inon? Jituh upah'ku; ijo ahku dahpot mborihta Kabar Hinut rih, tutang eam ngombahat ihcobehti ka ahkan bohatik'ku, tului ahku eam nyawot hak-hak'ku, kolou numbun borihta Kabar Hinut rih. 9:19 Ahku tuh eam jihpon ia-iai ka; ahku morodehka. Oluka kodorih, ahku jari ngonjorian arop'ku tuh, jihpon ahkan paring ulun. Ahku nguan angrih mangat ahku duon ngonduon, sopira duon ulun ahkan Kristus. 9:20 Toharep ulun-ulun Yahudi, ahku nguanang kolou ulun Yahudi, mangat ahku tou, ngondahpot ulun Yahudi ahkan Kristus. Toharep ulun-ulun ijo bolum numbun hukum Museh, ahku nguanang koloujahka ahku konarut aang hukum rih, oluka ahku kotu'uioh eam konarut aangoh. Ahku duon nguan orihrih mangat ahku dahpot nguhut iro monjadi murid Yesus Kristus. 9:21 Toharep ulun bohkon Yahudi, ahku nguanoh kolou ihcobehti bohkon Yahudi, ijo bolum ang luar hukum Museh. Ahku nguan orih rih, mangat ahku tou nguhut iro monjadi murid Kristus. Tahpi orih eam rimai, ijo ahku eam te'et umba poretah-poretah Pohotala; ahku mahi-mahi konowasa bain poretah-poretah Kristus. 9:22 Ang tohun ulun-ulun ijo koyakinoh eam ba'as, ahku ka nguanang kolou ihcobehti ijo koyakinoh eam ba'as, mangat ahku duon nguhut iro monjadi murid Kristus. Pendekoh, ahku ngonjorian pari-paringoh ahkan paring ulun mangat umba jalan ijo koloukuwoh ka, ka'a ahku duon monyolamat ihcokobagi tahkan iro. 9:23 Paring orih rih ahku nguai kotului Kabar Hinut tahkan Pohotala rih, mangat ahku ka'a taput tomorehkatoh. 9:24 Konduang puna ta'an, ijo ang a'ang hosolanja, koparing ulun umba nokoru, tahpi baya ihcobehti ulun norima hadiah. Bain tului orih, nokoru kodorih kolouoh, nyiring Konduang norima hodiahoh. 9:25 Nyinong ulun ijo rahat a'ang bolatih, nahan arop a'ang kokaron hal-hal. Io nguan hal orih tului io jolik tonyaling umba modali hadiah rih, iorih modali ijo bojoin rusaknihou. Tahpi ihto tuh nahan arop aang kokaron hal, kotului ihto jorik tonyaling umba modali ijo eam duon rusaknihou. 9:26 Orih koluluioh ahku nokoru nihtu tihtui ijo botitu. Kolou aangulun hotanding botinju, ahku eam moninju borangai. 9:27 Ahku nolua behtik'ku bolatih honong karas nyiring ahku dahpot mongowasaoh. Ahku nguan kolouorih rih, tului ahku eam kani nyiring nyolung, ijo jari ahku ngihit ulun bohkon umba a'ang solanja rih, ahku bongok tonulak.
10:1 Konduang-konduang! Konduang kohondakoh, ingat inon ijo nyolung ahkan tahtu ajuh ihto, kotihka iro nutut Museh. Iro paring tonolindung bain bounondou, tutang solamat mihtah Tasik Bohandang. 10:2 Ahkan monjadi murid-murid Museh iro paringoh ponompondus ang luwang bounondou tutang ang luwang tasik rih. 10:3 Iro paringoh kuman ukun rohani ijo sama, 10:4 tutang ngorih, korih Rohani ijo sama. Iro paringoh ngorih tahkan puruk bahtu rohani ijo homboh iro; puruk bahtu orihrih Kristus bongoi. 10:5 Oluka kodorih, Pohotala eam sanang toharep anaiaro tahkan louk iro, tutang orihrih kotuluioh aro otun-otun iro hokolahpah ang padang balambah. 10:6 Paringoh orih rih monjadi sutu ahkan ihto uhuntuh, mangat mopingat ihto, mangat ara jolik hal-hal ijo ja'at kolou iro. 10:7 Ka'a mangat ihto ara nyembah songiangdewa kolou ijo konuan bain 'cokabagi tahkan iro. Aang Surat Borasih tonyurat, "Mahka uhtus rih nopara kuman ngorih, tutang monari ahkan nyembah songiangdewa." 10:8 Ihto eam tou nguan hal-hal ijo kihal, kolou ijo konuan 'cokabagi tahkan iro. Kotului, duo pulu tolu kujan behti tahkan louk iro mahtoi ang ihco ondou tului nguan orih. 10:9 Ihto eam tou niko-nikos Tuhan, kolou ijo tonguan bain 'cokabagi tahkan iro lomoi, nyiring iro mahtoi tonunduk lohi tada. 10:10 Ihto eam tou ka'a bokuhtuk, kolou ijo tonguan bain 'cokobagi tahkan iro lomoi, nyiring iro ponunu bain Molehkat Pomunu. 10:11 Paring hal rih nyolung ahkan iro mangat monjadi sutu bagi ulun-ulun bohkon. Tutang paring orih, tonyurat ka'a mangat monjadi pongingat ahkan ihto huntuh. Kotului ihto huntuh bolum aang ohkot lain jaman. 10:12 Ulun ijo ngohu aropoh tombok ba'as, konohuangoh bua-buah; a'ai nyiring io bolukang. 10:13 Nyinong tihkos ijo Konduang nyuruoh, jorih tihkos ijo kobahutoh tonyuru ulun. Tahpi Pohotala bokehtep aang bowot-Oh. Io eam ahkan mohonou Konduang tonihkos molowi tahkan kosanggup ihkam. Aang ohkot Konduang nopahas bain tihkos, Io ahkan nonga jalan ahkan'kam, ahkan nyolung ba'as mangat Konduang dahpot botahan. 10:14 Bain kotului orihrih, Konduang-konduang ijo ahku ngasihoh, hondakoh ihkam monyingi monyembah songiangdewa. 10:15 Ahku nuhtui ahkan'kam, kolou ahkan ulun-ulun ijo horahti. Kohondakoh ihkam nimbangoh bongom auh'ku tuh. 10:16 Aang ohkot ihto ngorih anggur honong ngohawot torimakasih ahkan Pohotala, eamkah orihrih korinah, ijo ihto hihco umba Kristus a'ang popahtoi-Oh? Tutang a'ang ohkot ihto milat nulat ruhte ahkan ukun hombo-homboh, eamkah orih korinah ijo ihto, anai hihco umba behtin Kristus? 10:17 Bain kotuluioh tihkas anai ihco ruhte, tutang ihto paringoh kuman, tahkan ruhte ijo ihco rih ka'a, mahka ihto ijo aro tuh, monjadi ihco kobereng. 10:18 Cuba nohtoanioh ulun-ulun Yahudi. Iro ijo kuman ukun ijo tonyorah ang ngosan unuk ponyorahan porahpah, anai ulun-ulun ijo hihco umba unuk rih. 10:19 Inon konohuang'ku umba orih? Songiangdewa ata'ai ka ukun ijo tonyorah ahkan songiangdewa rih eam ngina rimai samasino. 10:20 Inon ijo tonosorah ang unuk porahpah ahkan songiangdewa, eam tonyorah ahkan Pohotala, molekan ahkan roh-roh ja'at. Tutang ahku eam kani ihkam hihco umba roh ja'at rih. 10:21 Ihkam eam tou ngorih tahkan sakir anggur Tuhan, tutang homboh umba sakir anggur roh ja'at ka'a. Ihkam eam tou kuman ang meja Tuhan tutang kuman ang meja roh ja'at ka'a. 10:22 Ata'aikah ihto kani nguan Tuhan hiri ahtoi? Inonrih ihto labih ba'as tahkan Tuhan? 10:23 Hion ulun, "Ihto tou nguan anginon bewe ijo ihto kani." Tu'u! Tahpi eam paring ijo ihto kani rih boguna. "Ihto tou nguan inon iou ijo ihto kani." -- Tahpi eam paring ijo ihto kani orih rih, monombok pombolum ihto. 10:24 Ara ihcobehti ka bousaha ahkan gunan aropoh bongoi. Nyinong ulun harus bousaha ahkan gunan ulun bohkon. 10:25 Ihkam tou kuman inon bewe, tomodagang ang pasar usinohcin. Eam usah noliti, labih houn olu ka anai kobahat-kobahat a'ang nanyam ahtoi bua'kam. 10:26 Kotului a'ang Surat Borasih tonyurat, "Tana tuh hawui paring usiouoh uras ain Tuhan." 10:27 Amat ihkam tona'ah kuman bain ihcobehti ijo eam Kristen, tutang ihkam norima pona'ah rih, koman iou inon ijo tonyorungan ahkan'kam. Eam usah nohtoani tahkan umoh polombutoh ukun rih, mangat eam anai kobahat-kobahat ang luwang ahtoi bua'kam. 10:28 Tahpi amat anai ijo nuhtui ahkan'kam, "Ukun tuh jari tonyorah ahkan songiangdewa," a'ai kuman ukun rih, tului, gihtan kogunai ahkan ulun orih, tutang tului auh ahtoi bua. 10:29 Konohuang'ku, bohkon auh ahtoi bua'kam, tahpi auh ahtoi bua ulun orih. Mihkoh anai ijo ngisok, "Ho, ombai komordehka'ku harus tonihkas bain auh ahtoi-bua ulun bohkon? 10:30 Amat ahku kuman ukun honong botorimakasih ahkan Pohotala, ombai ulun harus nosalan ahku ngosan ukun rih, rahat ahku jari botorimakasih nitu Pohotala ngosan orih?" 10:31 Inon ka ijo Konduang nguai -- Konduang kumai ata'ai Konduang ngorihoh -- nguan paringoh orihrih ahkan mohoromat Pohotala. 10:32 Bolumrih kolouorih kolou, nyiring Konduang eam kotuluioh ulun bohkon nguan dosa; inonkah iro ulun Yahudi ata'ai ulun bohkon Yahudi, ata'ai ka ukup Pohotala. 10:33 Bolumrih kolou ahku. Ahku ngurahjalan ngojorih ahtoi paring ulun, a'ang kokaron angihco, earo konohuang-konohuang ijo kogunan arop bongon. Titun aik'ku anairih, mangat ahkan iro paringoh dahpot tonyolamat.
11:1 Nutut sutu ang ahku, kolou ahku ka nutut sutu ang Kristus. 11:2 Ahku nara ihkam, kobain ihkam toturus mingat ahku, tutang numbun auh ajar, ijo ahku nongaoh ahkan'kam. 11:3 Tahpi ahku jolik ihkam ngota'an ihco hal hino, iorih, ijo, 'jo nyolung kopala ngosan ulun-ulun bahkas iorih Kristus; ijo nyolung ngosan oruh iorih bosaioh, ijo nyolung ngosan Kristus iorih Pohotala. 11:4 Amat ihcobehti bahkas ang ohkot bodo'a, ata'ai aang ohkot nyapai borihta tahkan Pohotala ang toharep aro ulun, hapa tuhtup kuhung, mahka ulun rih mohina Kristus. 11:5 Tutang amat ihcobehti bawi ang ohkot bodo'a ata'ai ang ohkot nyapai borihta tahkan Pohotala ang husuk aro ulun, eam hapa tuhtup kuhung, mahka ulunbawi rih ngomia bosaioh ijo monjadi kopala ngosan aropoh. Orih sama ka'a kolou jahka kuhung bawi rih jari tongalit. 11:6 Kotului amat ihcobehti bawi eam kani hapa tuhtup kuhung, labih pios balouoh tonohtok. Tahpi amat ihcobehti bawi tonongalit kuhungoh ata'ai tonohtok balouoh, mahka orih ihco komia ahkaioh. Bain kotului rih labih pios io hapa tuhtup kuhung. 11:7 Ulun-ulun bahkas eam usah hapa tuhtup kuhung, tului io nyoramin aropoh, tutang kohajon Pohotala. Tahpi ulunbawi nyoramin kohajon ulunbahkas, 11:8 kotului ulunbahkas eam tonapa tahkan ulunbawi, tapi ulunbawi tonapa tahkan ulunbahkas. 11:9 Ulunbahkas eam hino tonapa ahkan gunan ulunbawi, molekan ulunbawi tonapa kogunan ulunbahkas. 11:10 Tului orih rih, ahkan ngojorih molehkat-molehkat, ihcobehti bawi harus hapan tuhtup kuhung, kolou tanda io ang pinda kuwasa bosaioh. 11:11 Oluka kodorih, aang pombolum ihto kolou ulun Kristen, ulunbawi eam bolum bongoi, lopas tahkan ulunbahkas, tutang ulunbahkas ka eam bolum bongoi, lopas tahkan ulunbawi. 11:12 Kotului oluka ulunbawi ijo pahtukoh tonapa tahkan ulunbahkas, tahpi uliorih ulunbahkas konanak tahkan ulunbawi, tutang paringoh ang 'co orih lombut tahkan Pohotala. 11:13 Cuba Konduang-konduang bongon nimbang hal-hal tuh: Kuwoh pios ihcobehti ulunbawi bodo'a ahkan Pohotala ang toharep ulun aro, eam hapa tuhtup kuhung? 11:14 Tahkan ponyombang ulun aro, ihkam jari tongajar, ijo amat ulunbahkas hobalou ombu, orih ang'co ijo kurang pahtut. 11:15 Tahpi bagi ulunbawi, balou tononga ahkaioh ahkan kolukup kuhungoh, tutang balou ombu anairih kobahinoioh. 11:16 Orih! Amat anai ijo kani hojawab tohou masalah tuh, ihco-ihcooh ijo ahku dahpot nuhtuioh, iorih ijo pios ihto oluka ukup-ukup Pohotala bohkon, aang ulunaro tihkas tepun ihco kopatuh rih ang ukup; bohkon tahkanumba rih eam anai. 11:17 Tohou ijo pongo tuh, ahku eam monara ihkam. Puhpung sombayang'kam, eamoh bobua ijo pios, molekan ijo eam pios. 11:18 Aang pahtukoh ahku ngonih, ijo ang luwang puhpung-puhpung'kam anai hobarih-hobarih ijo saling hokolawan. Tutang ahku ngohu isut aro Kabar rih morong. 11:19 Puna jari kopahtutoh lombut kopisah ang louk ihkam, mangat gihtan noin ia-iai ulun Kristen ijo sojahti. 11:20 Tahpi ang ohkot ihkam hopuhpung, ijo ihkam nguai rih, eam Ukunpesta Ain Tuhan. 11:21 Tului ang ohkot kuman, ihkam nyino-nyinong hosolanja ngomin ukunoh bongoi, nyiring anai ijo eam sahpet dahpot ino-inon, tutang ijo bohkonoh monjadi bobusou. 11:22 Ombai kodorih? Eamkah Konduang anai tepun lohpou? Konduang duon kuman ngorih ang anan! Ata'aikah Konduang kani mopomia ukup Pohotala tutang ngomia ulun-ulun porosbolum? Inon ijo harus ahku nuhtui ahkan ihkam? Haruskah ahku monara ihkam? Eam! Samasino ahku eam ahkan monara ihkam. 11:23 Tului ijo ahku majaroh ahkan'kam, iorih ahku torimaoh tahkan Tuhan bongoi; ijo ang ngolomi orih, kotihka Yesus Tuhan ihto tomotanah, Io ngomin ruhte, 11:24 tutang ulimba Io ngohawot torimakasih ahkan Pohotala ngosan ruhte rih, Io molah-molah ruhte rih umba longoi-Oh, turus nuhtui, "Jituh behtik-Ku ijo tonosarah ahkan'kam. Nguan ka'a tuh ahkan ngenang Ahku." 11:25 Kodorih hino ulimba opah kuman, Io ngomin sakir anggur hawui nuhtui, "Anggur tuh anairih, bowot Pohotala ijo bohua, tonosah umba dahak-Ku. Nyinong tikat ihkam ngorih tuh, nguanohrih tuh ahkan ngenang Ahku." 11:26 Puna nyinong tikat ihkam kuman ruhte tuh, tutang ngorih anggur tuh, ihkam mborihta popahtoi Tuhan, nyiring Io lombut. 11:27 Kobain tului orih, ulun ijo kuman ruhte Tuhan tutang ngorih anggur Tuhan, umba cara ijo eam pahtut, ulun rih bodusa toharep Tuhan, ijo jari monyarah behtiu tutang nusuh dahai-Oh. 11:28 Jadi, nyinong ulun harus moriksa aropoh houn, punai io tou kuman ruhte tutang ngorih anggur orih. 11:29 Kotului amat ulun kuman ruhte, tutang ngorih anggur, eam komo ijo Ukunpesta Tuhan rih, jorih behtin Tuhan, ulun rih kuman tutang ngorih ahkan norima hukum Pohotala ngosan aropoh bongoi. 11:30 Orih kotuluioh aro tahkan louk ihkam ijo poros tutang bolomu, tutang anai ka'a ijo mahtoi. 11:31 Tahpi amat ihto moriksa arop ihto labih houn, ihto eam ahkan tonohukum bain Pohotala. 11:32 Tahpi amat ihto tonohukum Pohotala Io ahkan mahcat ihto, mangat ihto ara buah hukum homboh kolunon tuh. 11:33 Kobain tului orih rih, Konduang-konduang'ku, amat ihkam puhpung ahkan kuman Ukunpesta Tuhan, ihkam harus hokindoi giliroh. 11:34 Amat anai ijo bolo'u io harus kuman houn ang lohpouoh. Amat ihkam nohtoani hal tuh, puhpung-puhpung sombayang'kam eam ahkan polombut hukum tahkan Pohotala ngasan arop'kam bongom. Tohou masalah-masalah ijo bohkon, ahkan ahku monoranganoh amat ahku lombut noin.
12:1 Huntuh tohou pononga-pononga ijo tononga Roh Pohotala. Tohou orih, ahku jolik Konduang-konduang ngota'an ijo kotu'ui. 12:2 Ingatlah ijo ang ohkot ihkam jaha kosono Tuhan, ihkam topongaruh ahkan umba nyembah dewa ijo bisu. 12:3 Ihkam harus kota'an, ijo ulun, ijo toniting Roh Pohotala eam tou nuhtui, "Tonulutrih Yesus!" Kodorih ka'a eam ihcobehti ka duon nuhtui, "Yesus rih Tuhan!" Amat ulun rih eam toniting Roh Pohotala. 12:4 Anai bomahca-mahcam pononga tahkan Roh Pohotala, tahpi paringoh tononga kobain Roh 'ijo ihco. 12:5 Anai bomahca-mahcam gawiou ahkan mohalu Tuhan, tahpi Tuhan ijo tonohalu rih Ihco ka'a! 12:6 Anai bomahca-mahcam cara nguan gawin Tuhan, tahpi ijo nonga koba'as, ahkan orih ahkan nyinong ulun anai rih Pohotala ijo ihco ka'a. 12:7 Ahkan kopios ihto paringoh, Roh Pohotala bogawi ang nyinong ulun umba cara bongo-bongoi. 12:8 Ahkan ijo ihcobehti, Roh rih nonga kosanggup ahkan bopander hawoi pongaroh. Ahkan ijo bohkon Roh ijo sama rih nonga kosanggup ahkan monarang tohou Pohotala. 12:9 Roh ijo ihco rih ka'a, nonga ahkan ulun ijo ihco, koduon ijo luar biasa ahkan porocaya umba Kristus; rahatoh ahkan ijo bohkon Roh rih nonga kowasa ahkan ngopios ulun. 12:10 Ahkan ihcobehti tononga kowasa ahkan napa kahtahelan, tutang ahkan ihco bohkon tononga pononga ahkan mborihta rancana-rancana Pohotala. Ahkan ijo bohkon hino, Roh rih nonga kosanggup ahkan mombeda-beda, amoh pononga ijo tahkan Roh Pohotala, tutang umoh ijo bohkon. Anai ijo tononga kosanggup ahkan bopander umba mahca-mahcam basa ijo ajaib, tutang anai hino tononga kosanggup ahkan monarang riman auh-auh rih. 12:11 Paringoh rih, konuan bain kowasan Roh ijo ihco rih ka'a; nyino-nyinong ulun tononga pononga ijo kobongoi, numbun konohuang Roh rih bongoi. 12:12 Kristus anai rih kolou behtin ulun; behti rih ihco, tahpi anai tahkan aro ramui. Paring ramui rih, oluka aro, monjadi ihco behtiu. 12:13 Kodorih ka'a ihto paringoh, pios ulun Yahudi, oluka ulun bohkon Yahudi, jihpon-jihpon oluka ulun morodehka; ihto paringoh jari tomopondus bain Roh ijo sama orih, mangat ihto monjadi ihco ang behtin Kristus rih. Ihto paring ka'a komo Roh ijo ihco rih kotuwioh. 12:14 Tului behti rih bongoi eam tonapa tahkan ihco ramui iou tahpi aro ramuioh. 12:15 Amat pa'a nuhtui, "Ahku bohkon longo, tului orih ahku bohkon barih tahkan behti rih," orih eam rimai ijo pa'a rih bohkon barih tahkan behti. 12:16 Tutang amat tolinga nuhtui, "Tului ahku eam mahta, mahka ahku eam barih tahkan behti," orih ka'a eam rimai ijo tolinga rih, eam barih tahkan behti. 12:17 Jahkaoh paring behti rih monjadi mahta iou, koloukuwoh behti rih tou ngonih? Ata'ai amat sohopus behti rih tolingo iou, koloukuwoh behti rih dahpot nyingut? 12:18 Ihto nohto ijo Pohotala, ijo ngina karon-ramui rih ang behti. Nyino-nyinong to-nginaoh ang unukoh bain Pohotala numbun konohuang-Oh. 12:19 Amat paringoh tihkas ihco ramui iou umoh ijo konohawot behti? 12:20 Jadi puna anai aro ramui, tahpi behti tihkas ihco. 12:21 Bain tului orih, mahta eam tou nuhtui umba longo, "Ahku eam porulu ihko!" ata'ai kuhung nuhtui umba pa'a, "Ahku eam porulu ihko!" 12:22 Tobalikoh ramu-ramui behti, ijo tongohu ihto bolomu rih, tahpi orih ijo ihto poruluoh samasino. 12:23 Tutang ramu-ramui ijo ihto ngohuoh eam kodorih borega, malah anairih ramu-ramui ijo ihto nonga labih aro ponorega. Ramun-ramun behti ijo eam gihtan bohinoi, malah labih ihto nohtoanioh. 12:24 Ramun-ramun behti, ijo eam gihtan pios, eam porulu tonohtoani ihto. Pohotala jari nyusun behtin ihto kodorih kolouoh, nyiring ramu-ramui ijo kurang borega tononga labih aro ponorega. 12:25 Honong kolourih, behti rih eam topisah-pisah; nyino-nyinong ramui nohtoani ihco umba ijo bohkon. 12:26 Amat ihco ramu ngarot paring ramu ijo bohkonoh, ngarot ka'a, amat ihco ramu tonara, paring ramui ijo bohkonoh pahir ka'a jorih. 12:27 Konduang paringoh sama-sama anairih behtin Kristus tutang ihkam nyinong-behti hino anai rih ramui tahkan behti rih. 12:28 Kodorih ka'a ang luwang ukup, Pohotala jari nahtap unuk ahkan mahca-mahcam ulun; Ijo pahtuk rasul-rasul, koduo nabi-nabi kotolu guru-guru, turus iro ijo nguan kahtahelan-kahtahelan, pongohuli iro ijo tononga pononga ahkan ngopios ulun, ata'ai ahkan ndohop ulun bohkon, ata'ai monjadi okonulun, ata'ai ka ahkan bopander umba mahca-mahcam basa ijo helan. 12:29 Iro eam paringoh rasul ata'ai nabi, ata'ai ka guru. Eam paringoh anai kowasa ahkan nguan kahtahelan, 12:30 ata'ai ahkan ngopios ulun, ata'ai ahkan bopander umba bomahca-mahcam basa ijo helan, ata'ai monyalin basa-basa rih. 12:31 Tului orih konohuangoh ihkam ngurah jalan tu'u-tu'u ahkan dahpot pononga-pononga ijo paling pahtukoh. Tahpi pongotuh, ahku pokarah ahkan'mu jalan ijo pokopiosoh.
13:1 Oluka ahku dahpot bopander umba bomahcam basan kolunon, nyiring umba basa karon-molehkat samasino ka, tahpi ahku earo mongasih ulun bohkon, mahka pander-pander'ku orih baya auh ijo muhing earo rimai. 13:2 Oluka ahku ahpik nyiar borita tahkan Pohotala rih, tutang horahti paring hal ijo timbon-timbon, tutang ngota'an kokaro aang'co hawui paham porocaya umba Pohotala, nyiring dahpot nguan puruk bokisat tahpi ahku eam ngasi ulun-ulun bohkon, mahka ahku eam aro rimai ino-inon! 13:3 Oluka paring ijo ahku tepuioh, ahku nyodahkahoh ahkan ulun-ulun porosbolum, tutang ahku nyarah behtik'ku ahkan tomahpong, tahpi ahku eam ngasi ulun-ulun bohkon, mahka paringoh rih eam anai gunaioh samasino. 13:4 Ulun ijo ngasi ulun bohkon; sabar tutang hinut ahtoi. Io eam nyambun umba kobehu, eam bobalik, eam bojuhu. 13:5 Io eam namamarop, eam kasar, io eam maksa ulun bohkon ahkan numbun konohuangoh bongoi, eam ka'a join tosinggung, tutang eam mondondam. 13:6 Ulun ijo pongasih umba ulun-ulun bohkon, eam sanang umba koja'at, io tihkas sanang umba kopios. 13:7 Io tahan noharep paring ang'co, tutang kani porocaya umba ijo hinut ang nyinong ulun; aang koada'an ijo koloukuwoh ka ka'a ulun ijo mongasih rih, eam pu'u nihou koharapoh, tutang sabar ngindoi kokaron ang'co. 13:8 Eam pu'u ahkan anai wayah, ang umoh ulun eam porulu saling hopongasih. Uhuntuh, tuh anai ulun ijo ahpik nyiar borihta tahkan Pohotala, tahpi noin io ahkan tondo nyiar borihta rih. Uhuntuh anai ijo ahpik bopander a'ang bomahcam basa ijo helan, tahpi noin io ahkan tondo bopander aang basa-basa rih. Huntuh anai ulun ijo ngota'an aro hal, tahpi noin inon ijo iro ngota'ai rih ahkan tonolingou. 13:9 Bain pongotaan ihto tutang kosanggup ihto ahkan nyiar borihta tahkan Pohotala, magun kurang soporuna. 13:10 Noin ahkan johcok ohkotoh, Pohotala nguan paringoh soporuna, tutang ijo eam soporuna rih ahkan dilap. 13:11 Ang ohkot ahku magun anak-inyam, ahku bopander kolou anak-inyam, ahku bopokomo kolou anak-inyam, tutang tiruk'ku kolou anak-inyam. Uhuntuh ahku jari oko, karon-hadat kolou anak-inyam jari ahku diaioh. 13:12 Inon ijo ihto nohtooh huntuh, tuh anai rih kolou kokolingon ijo kawus ang soramin. Tahpi noin ihto ahkan nohto korinah, hawui tarang. Uhuntuh ahku jaha kota'an paringaangoh, tahpi noin ahku ahkan ngota'an paringaangoh, sama kolou Pohotala ngota'an paringoh, tohou arop'ku. 13:13 Jadi, ahkan wayah tuh, anai tolu hal ijo ihto harus tehtep nguai: porocaya, bokoharap, tutang saling ngasih. Ijo paling boguna tahkan kotolu-tolu ohrih, iorih, pongasih ulun-ulun bohkon.
14:1 Hondakrih ihkam ngurahjalan ahkan mongasi ulun-ulun bohkon. Tutang ngurahjalan ka'a ahkan norima pononga-pononga ijo tonongaoh Roh Pohotala, pahtukoh samasino bosodia monyiar rancana-rancana ain Pohotala ahkan ulun kolunon. 14:2 Ulun ijo bopander a'ang basa ijo helan, ulun rih eamoh pander ahkan ulun; io bopander umba Pohotala. Eam aro ulun ijo horahti inon ijo io nuhtuioh, kotului Roh Pohotala ijo ngotuluioh io ngohawot hal-hal ijo tihkas ang tongota'an Pohotala. 14:3 Tobalikoh ulun ijo nyiar borihta tahkan Pohotala, io monyiaroh ahkan ulun, mangat ngoba'as'ndo, ahkan nonga somangat ahkan'ndo tutang ahkan mapung'ndo. 14:4 Ulun ijo bopander a'ang basa ijo helan tihkas hapan ngoba'as aropoh bongoi iou, rahatoh ulun ijo monyiar borihta tahkan Pohotala dohop ukup monjadi miar. 14:5 Pahamrih kohinutoh amat Konduang paringoh tou pander, umba bomahcam basa ijo helan. Tahpi ijo paling pios, iorih amat Konduang tou mborihta rancana-rancana ain Pohotala. Tului ulun ijo monyiar borihta tahkan Pohotala, labih hajo tahkanumba ulun ijo bopander umba bomahcam basa ijo helan; bohkon haloh, amat ulun ijo bopander a'ang bomahcam basa ijo helan rih, dahpot monarangoh inon ijo tonuhtuioh rih, mangat hopus ukup dahpot mopa'atoh. 14:6 Amat ahku, jahkaoh lombut nokuh ihkam, tutang ahku bopander a'ang bomahcam basa ijo helan, inon mopa'at rih ahkan ihkam? Eam aro mopa'at honjiot ka! Bohkon haloh, amat ahku ngorinah ihco kalimat tahkan Pohotala, ata'ai ahku monarang ang'co tohou Pohotala, ata'ai ahku nyiar borihta tahkan Pohotala, ata'ai ahku majar. 14:7 Pokakas-pokakas musik ijo earo hasongoh honjiot ka, kolou upamaoh suling tutang konyapi, amat lagu-laguoh eam tonowah hawui jelas, koloukuwoh ulun tou ngota'an lagu inon ijo tonowahoh? 14:8 Ihco sutu ijo bohkon hino: Amat tarompet himun bororangai, iai ijo monahtap aropoh tulak hokolahi? 14:9 Kodorih ka'a umba kosanggupan ihkam ahkan bopander umba aro mahcam basa ijo helan. Amat Konduang umba kosanggupan rih ngohawotoh auh-auh ijo eam tarang, eam anai ihcobehti ka ijo tou horahti, inon ijo Konduang nuhtuioh. Tuhtui-tuhtui emu rih nihou eam boromana. 14:10 Ang kolunon tuh anai papira aro basa, tahpi earo ihco ka tahkan basa-basa rih jo eam anai rimai. 14:11 Tahpi amat ahku eam horahti basa ijo tonohawot ihcobehti, mahka ulun ijo hapan basa rih sama kolou ulun bohkonuhtus toharep ahku; kodorih ka'a ahku toharep io. 14:12 Tohou ihkam bongom, ahku kota'an ihkam jolik samasino dahpot pononga-pononga tahkan Roh Pohotala. Tahpi ijo mombahtang samasino, harusrih ihkam ngurahjalan ahkan hapan kosanggup ijo dohop ukup monjadi miar. 14:13 Orih kotuluioh ulun ijo bopander a'ang basa ijo helan, harusrih nyawot umba Pohotala, mangat io tononga ka'a kosanggup ahkan monarang inon ijo tonuhtuioh rih. 14:14 Kotului amat ahku bodo'a umba basa ijo helan, roh'ku puna bodo'a, tahpi tiruk'ku eam bogawi. 14:15 Jadi ahku harus nguan inon? Ituh ijo ahkan ahku nguai: Ahku ahkan bodo'a honong roh'ku, tahpi ahku ahkan bodo'a ka'a umba tiruk'ku. Ahku ahkan monyanyi umba roh'ku, tahpi ahku kani monyanyi ka'a umba tiruk'ku. 14:16 Kotului amat Konduang ngohawot torimakasih ahkan Pohotala umba roh'mu iou, tutang anai ulun bohkon ijo eam horahti basa helan ijo tahkan Roh Pohotala rih, mahka ulun rih eam dahpot nuhtui "Ahku sotuju" toharep do'a torimakasih'mu rih, tului io eam kota'an inon ijo konduang nuhtuioh. 14:17 Oluka do'a torimakasih'mu ahkan Tuhan orih labih pios, tahpi do'a rih eam anai gunaioh samasino bagi ulun bohkon. 14:18 Ahku norimakasih ahkan Pohotala tului ahku bongok tou bopander ang mahca-mahcam basa ijo helan, labih tahkan Konduang paring. 14:19 Tahpi, ang luwang puhpung-puhpung ahkan nyembah Tuhan, ahku labih jolik hapan limo tuhtui ijo tou tohorahti ulun, tahkanumba hapan bokuhjan-kuhjan tuhtui a'ang basa ijo helan. Ahku labih jolik kodorih, mangat ahku tou majar ulun. 14:20 Konduang-konduang! Ara niruk kolou anak-inyam. A'ang hal koja'at, hondakrih ihkam tehtep kolou anak-inyam. Tahpi a'ang tiruk hondakrih ihkam monjadi ulun ijo oko. 14:21 A'ang Surat Borasih tonyurat koloutuh, "Tuhan nuhtui, 'Hawui nguha ulun-ulun ijo bopander umba basa ijo ganjil, Ahku pander umba ukup tuh. Molekan hawui nguha ulun-ulun bohkonuhtus, Ahku ahkan pander umba ukup-Ku, olu kodorih, iro eam kani ngonih karon-auh-Ku!' " 14:22 Jadi pononga ahkan pander umba bomahcam basa ijo helan, anairih kolou tanda ahkan ulun ijo eam porocaya, bohkon ahkan ulun ijo porocaya. Tutang pononga ahkan mborihta rancana Pohotala umba kolunon, anairih tanda ahkan ulun ijo porocaya, eam ahkan ulun ijo eam porocaya. 14:23 Kotului orih, amat jahkaoh, ang tohun puhpung ukup, hopus ukup pander a'ang bomahcam basa ijo helan, turus lombut pira-pira ulun luar, ata'ai ulun-ulun ijo bohkon Kristen, tontu ulun-ulun rih ahkan ngohu ihkam jari bobucon paringoh! 14:24 Tahpi amat Konduang paringoh nyiar borihta tahkan Pohotala, turus lombut ihcobehti ijo bohkon Kristen ata'ai ihcobehti luar, mahka hal-hal ijo tonyiar bain Konduang paringoh, ahkan ngorinah dusa-dusan ulun rih, tutang nguan io sadar ahkan dusai-dusaioh. 14:25 Hal-hal ijo bosuhuk ang ahtoioh ahkan tokorinah, nyiring io ahkan ngominda aropoh turus nyembah Pohotala. Io ahkan ngahku ijo Pohotala moro-morong anai ang tohun ihkam. 14:26 Jadi, Konduang-konduang, inon rimaioh paringoh rih? Amat ihkam hopuhpung ahkan nyembah Tuhan, anai ijo monyanyi, anai ijo majar, anai ijo mborihta angihco tahkan Pohotala, anai ijo bopander a'ang basa ijo helan, tutang anai ijo monarang inon ijo tonuhtui rih. Tahpi paringoh orih harus nguaioh mangat majar tutang mangat ahkan kopios paringoh. 14:27 Amat anai ijo kani bopander a'ang basa ijo helan, harusrih duo ata'ai paling aro tolu behti cara hotolinjam. Tutang harus anai ijo monarangoh, inon ijo tonuhtui bain ulun ijo bopander rih. 14:28 Amat eam anai ijo tou monarangoh, mahka ulun-ulun ijo bopander ang basa ijo helan rih, pahtut tonih ang puhpung orih. Nauh iro bopander a'ang ahtoi iou ahkan Pohotala. 14:29 Duo ata'ai tolu behti ijo anaingina borihta tahkan Pohotala, harus nyapai mborihta rih pondehan ijo bohkon, nimbang inon ijo tonuhtui rih. 14:30 Tahpi amat jahkaoh borihta tahkan Pohotala rih, lombut aang ihcobehti bohkon, ijo tuot a'ang puhpung rih, mahka ulun ijo rahat bopander rih, harus tondo. 14:31 Honong cara ijo kodorih, Konduang-konduang paringoh, mihco-mihco tou monyapaioh borihta tahkan Pohotala; mangat paringoh duon norima ajar tutang monjadi mahi porocaya. 14:32 Pononganasi tahkan Roh ahkan nyapai borihta tahkan Pohotala, dahpot tonomorong bain ulun ijo nyapai borihta rih. 14:33 Pohotala anai Pohotala ijo jolik ahkan tertib. Io bohkon Pohotala ijo jolik a'ang koridu. Kolou ijo monjadi ang tohun ukup Pohotala, 14:34 bawi harus tonih ang ohkot rapat ukup. Iro eam dahpot ijin bopander. Iro eam tou nambit gawinokon, orihrih hototurung umba hadat agama. 14:35 Amat iro kani mongota'an angihco, iro harus ngisok orihrih umba bosai iro ang lohpou. Paham mia amat ihcobehti ulunbawi bopander ang tohun puhpung ukup. 14:36 Inon auh Pohotala, lombut tahkan ihkam? ata'ai tihkas ahkan'kam iou auh rih tonyapaioh? 14:37 Amat anai ulun ijo nanyam anai pononga, ahkan nyiar mborihta tahkan Pohotala, ata'ai io anai pononga ijo bohkon, tahkan Roh Pohotala, ulun rih harus sadar, ijo inon ijo ahku nyuratoh tuh anairih poretah tahkan Tuhan. 14:38 Tahpi amat anai ijo eam norima tuh, ara poduli io. 14:39 Bain tului orih, Konduang-konduang ngurahjalan ahkan duon monyiar borihta tahkan Pohotala, tahpi a'ai ngohana ulun ijo kani bopander aang aro mahcam basa ijo helan. 14:40 Tahpi paringoh harus konuan honong pios tutang toahtur.
15:1 Tutang huntuh, Konduang-konduang ahku kani ihkam mingat huli ahkan Kabar Hinut tahkan Pohotala ijo ahku mborihta houn ahkan ihkam. Ihkam norimaoh tutang porocaya ahkan Kristus kotului Kabar Hinut rih. 15:2 Amat ihkam nambit tehen, aang inon ijo ahku mborihtaoh rih, mahka Kabar Hinut rih monyolamat ihkam; kocoali amat Konduang porocaya earo horahtioh. 15:3 Inon ijo ahku mborihtaoh ahkan Konduang-konduang, anairih ijo jari ahku norima ka'a. Ijo boguna, kolou ijo tonyurat a'ang Surat Borasih, ahku nyiaroh ahkan'kam ijo Kristus mahtoi kotului dusa-dusan ihto, 15:4 ijo Io tonanom, tahpi pongohino tonombolum hoduli aang ondou ijo kotolu. Orih ka'a tonyurat a'ang Surat Borasih. 15:5 Ahku mborihta ahkan'kam, ijo Kristus jari tonombolum hoduli rih, ngorinah ka'a arop-Oh ahkan Petrus, tutang pongohino ahkan koduo balas rasul. 15:6 Ulirih Io ngorinah arop hino, ahkan labih tahkan limo rahtus murid-Oh sinokotihka. Aroka tahkan ulun-ulun rih magun bolum nyiring huntuh, baya pira-pira behti ijo jari mahtoi. 15:7 Uliorih Kristus ngorinah arop ka'a ahkan Yakobus tutang pongohino ahkan paring rasul. 15:8 Paling laiou samasino, Io ngorinah arop-Oh ahkak'ku ka'a -- ahku ijo kolou longakelus, ijo eam suhkup ondouoh! 15:9 Ahku anairih rasul Tuhan ijo paling randah. Ahku eam pahtut konohawot rasul, tului ahku jari nyiksa ukup ain Pohotala. 15:10 Tahpi tului asin Pohotala ahku monjadi kolou ahku ijo uhuntuh. Tutang eam porocuma Pohotala ngapun ahku. Justru ijo bogawi labih karas tahkan paring rasul ijo bohkonoh. Tahpi orih kotu'uioh, bohkon usaha aik'ku, orih usaha Pohotala ijo ngasi ahku, tutang ijo bogawi hombo-homboh ahku. 15:11 Jadi, tahkan iai ka ihkam norima Kabar Hinut rih -- inon orih tahkan ahku ata'ai tahkan rasul-rasul ijo bohkon -- ohrih eam monjadi soal. Ijo boguna iorih ihkai mborihta Kabar Hinut rih tutang Konduang porocaya. 15:12 Amat ijo ihkai mborihtaoh rih, iorih Kristus jari tonombolum hoduli tahkan popahtoi, ombai anai tahkan louk'kam ijo nuhtui, ijo ulun mahtoi eam ahkan tonombolum hoduli? 15:13 Amat morong ulun mahtoi eam ahkan tonombolum hoduli, orih rimai Kristus ka'a eam tonombolum hoduli tahkan popahtoi. 15:14 Tutang amat jahkaoh, Kristus eam tonombolum hoduli tahkan popahtoi, mahka earo gunaioh ihkai mborihta ino-inon, tutang eam anai gunaioh hino ihkam porocaya, kotului koporocayan'kam rih eam ngina galang ino-inon. 15:15 Labih tahkan orih, bokorinah ijo ihkai bobalik tohou Pohotala, tului ihkai mborihta ijo Pohotala ius mombolumoh hoduli Kristus tahkan popahtoi, podahal Pohotala eam mombolum Io hoduli -- amat puna morong, ulun mahtoi eam tonombolum hoduli! 15:16 Tului amat ulun mahtoi eam tonombolum hoduli, mahka Kristus ka, eam tonombolum hoduli tahkan popahtoi. 15:17 Tutang amat Kristus eam tonombolum hoduli, mahka koporocayan'kam tihkas nuhpi bewe; orih rimai ihkam magun a'ang koada'an bodusa tutang eam ngina koharap samasino. 15:18 Orih rimai hino ijo ulun-ulun Kristen ijo ius mahtoi, ka'a eam anaingina koharap. 15:19 Amat koharap ihto umba Kristus, tihkas a'ang pombolum ihto ang luwang kolunon tuh iou, mahka tahkan sohopus umat kolunon ang ngosan tana tuh, ihto iou ijo paling bosial. 15:20 Tahpi korinahoh Kristus ius tonombolum hoduli tahkan popahtoi. Jituh monjamin ijo ulun-ulun ijo jari mahtoi ahkan tonombolum hoduli. 15:21 Kobain popahtoi nyolong nokuh luwang kolunon, honong tonoholat ihcobehti, kodorih ka'a pombolum lombut hoduli tahkan popahtoi tononga ahkan ulun, honong tonoholat ihcobehti hino. 15:22 Koloukuwoh sohopus kolunon uras mahtoi, kotului hobarih hihco umba Adam, kodorih ka'a paring ahkan tonombolum tului hobarih hihco umba Kristus. 15:23 Tahpi nyino-nyinong ahkan tonombolum numbun giliraiu; ijo pahtukoh Kristus, pongohuli noin ang ohkot Io lombut hino, nutut gilir ulun-ulun ijo barih ain Kristus. 15:24 Uliorih nyolung kiamat. Aang ohkot rih Kristus ahkan ngominda karon pomoretah, karon kowasa, tutang karon koba'as; turus Io ahkan nyorah kowasa-Oh kolou Lahca, ahkan Pohotala, Amai ihto. 15:25 Kristus harus turus momoretah, nyiring Pohotala nguan paring musuh Kristus, ngominda umba Kristus. 15:26 Musuh ijo pokolaiu ijo ahkan tongominda iorih popahtoi. 15:27 Aang Surat Borasih tonyurat koloutuh, "Pohotala jari nguan kokaron, angihco ngominda ahkai-Oh." Botarang ijo, 'jo konohuang umba, "kokaron aang'co," rih eam taput Pohotala bongoi, ijo nguan paring angihco rih, ngominda ahkan Kristus. 15:28 Tahpi ulijari paringoh tongominda nokuh pinda pomoretah Kristus, mahka Io bongoi, iorih Anak Pohotala, ahkan mongominda arop-Oh ahkan Pohotala, ijo ius nguan karo-karonoh ngominda ahkai-Oh. Mahka Pohotala bongoi ka ahkan moretah paringoh. 15:29 Amat ulun mahtoi eam tonombolum hoduli, ombai anai ulun tonopondus ahkan ulun mahtoi? Ahkan inon iro nguan hal rih? Amat puna ulun mahtoi samasino eam ahkan tonombolum hino, ahkan inon iro nguan hal orih? 15:30 Tutang ahkan inon ka'a ihkai kani noharep dolang koporos nyinong wayah? 15:31 Konduang-konduang! Nyinong ondou ahku tahan ngarot-koporos, kotului ahku namam ngosan pombolum'kam, tului ihkam jari porocaya umba Kristus Yesus, Tuhan ihto. 15:32 Amat orih baya tahkan hila kolunon iou, inon utungoh ahkak'ku umba kolahi, koloujahka molawan karon-ohcin bosiak ang lowu tuh, ang Epesus? Amat puna ulun mahtoi eam tonombolum hoduli. Nah, labih pios ihto numbun porobasa tuh: "Olai ihto kuman ngorih tutang jori-jirah, kobain hawon ihto tuh ahkan mahtoi." 15:33 Ara konaalik! Kopahkat ijo ja'at, morusak hadat ijo pios. 15:34 Borondongrih uhuntuh, tutang a'ai hino nguan dusa. Kopantasoh ihkam harus mia, ijo ang louk ihkam anai ijo jaha kosono Pohotala. 15:35 Mihkoh anai ijo ngisok, "Koloukuwoh ulun mahtoi tonombolum hoduli? Behti ijo koloukuwohrih ijo tononga ahkan iro, ulimba iro tonombolum hoduli?" 15:36 Uong samasino! Amat Konduang ngombulan bonyi ang luwang tana, bonyi rih eam ahkan tumbu, amat bonyi rih jaha mahtoi houn. 15:37 Tutang bonyi ijo Konduang tanom ang luwang tana rih -- mihkohoh bonyi gandum ata'ai bonyi bohkonoh -- anairih luang bonyi rih iou, eam paring kombulanoh ijo ahkan tumbu noin. 15:38 Pohotala bongoi ijo ahkan nonga, ahkan bonyi rih napai, ijo numbun topahjah-Oh pios ahkan komulan rih. Ahkan nyinong mahcam bonyi, Pohotala nonga tapai komulan-Oh rih bongoi-bongoi. 15:39 Behtin angbolum-angbolum ijo botohasong eam paringoh sama. Kolunon tepun tapan behtiu, ohcin-ohcin tana tepun tapan behtiu ijo bohkon, bulung-bulung bohkon hino tapan behtiuoh, tutang ohcin-danum bohkon hino tapan behtiuoh. 15:40 Kodorih ka'a umba ramu-ramu ijo ang langit tutang ramu-ramu ijo ang tana. Ramu-ramu ijo ang langit nyino-nyinongoh anaitepun kopiosoh bongoi, tutang ramu-ramu ijo ang tana ka kodorih ka'a. 15:41 Kopios mahtanondou, bohkon tahkan kopios bulan. Potion-potion ka anaitepun kopiosoh bongoi. Malah potion-potion rih nyino-nyinongoh hokobohkon ka'a kopiosoh. 15:42 Kolouorih haloh noin umba ulun-ulun mahtoi ijo tonombolum hoduli. Behti ijo tonanom rih, anai behti ijo tou maram, tahpi behti ijo tonombolum huli, anai behti ijo eam tou rusak. 15:43 Ang ohkot behti rih tonanom, behti rih maram tutang bolomu; tahpi ang ohkot io tonombolum hoduli, io anairih behti ijo pios tutang ba'as. 15:44 Ang ohkot tonanom, behti rih behti tahkan tana; tahpi uli bolum hoduli, mahka behti rih, behti ijo tononga bain Roh Pohotala. Anai behti ijo tahkan kolunon, anai ka'a behti ijo tahkan Pohotala. 15:45 Aang Surat Borasih tonyurat koloutuh, "Ulun ijo pahtukoh iorih Adam, monjadi angbolum ijo bolum," tahpi Adam ijo pokolaiu-Oh anai rih Roh ijo mononga pombolum. 15:46 Ijo lombut labih houn anairih jasmani, bohkon ijo rohani. Ijo rohani lombut pongohino. 15:47 Adam ijo pahtukoh tonapa tahkan tana, tahpi Adam ijo koduo asaroh tahkan soruga. 15:48 Ulun-ulun kolunon tuh uras kolou Adam ijo pahtukoh; ijo tonapa tahkan tana, tahpi ulun-ulun soruga uras kolou Io ijo lombut tahkan soruga. 15:49 Koloukuwoh ihto uhuntuh, anai kolou Adam ijo tonapa tahkan tana, mahka noin ihto ahkan monjadi kolou Io ijo tahkan soruga rih. 15:50 Konohuang'ku, Konduang-konduang, iorih; behti ijo tonapa tahkan daha tutang usi, eam dahpot nyolong Kolunon Bohua Ain Pohotala; tutang behti ijo dahpot mahtoi, eam dahpot monjadi abadi. 15:51 Nohtoanilah rahasia tuh: Eam paringoh ihto ahkan mahtoi, tahpi ihto paringoh ahkan boubah. 15:52 Hal rih ahkan nyolung solonga a'ang ihcokopicep mahto ang ohkot toropet tomohpos ahkan lain tikatoh. Tului ang ohkot rih konahan auh toropet rih, ulun-ulun mahtoi ahkan tonomonyun hoduli umba behtiu ijo abadi, tutang ihto paringoh ahkan tohubah. 15:53 Behtin ihto ijo dahpot mahtoi tuh, harus tonokiri umba behti ijo eam dahpot mahtoi, tutang behti ijo tahkan kolunon, harus tonokiri umba behti ijo tahkan Soruga. 15:54 Amat behti ijo dahpot mahtoi tuh jari tonokiri umba behti ijo eam dahpot mahtoi, tutang behti ijo tahkan kolunon tuh, tonokiri umba ijo tahkan soruga, ang ohkot rih punai nyolung inon ijo tonyurat a'ang Surat Borasih, "Popahtoi ius tonolon; komanang jari sapai!" 15:55 "O Popahtoi ang umohkah komanang'mu? O popahtoi, ang umoh wisa'mu?" 15:56 Wisa popahtoi iorih dusa, tutang dusa nguan gawiuoh nguha hukum agama. 15:57 Tahpi torimakasih ahkan Pohotala: Io nonga ahkan ihto komanang nguha Yesus Kristus Tuhan ihto! 15:58 Bain kotului rih, Konduang-konduang ijo tongasih, hondakrih ihkam ba'as tutang tehen. Bogawirih turus ahkan Tuhan honong tu'u-tu'u, bain ihkam ngota'an ijo paring ijo ihkam nguaioh ahkan Tuhan, eam ahkan ngohus!
16:1 Uhuntuh tohou duit ijo ihkam kani nongaoh ahkan sama ihto ulun Kristen, ahku pingat mangat ihkam nguai sorurui potunjuk ijo jari ahku nonga ahkan ukup-ukup ang Galatia. 16:2 Aang ondou pahtukoh, nyinong menggu, kopiosoh Konduang paringoh misah duit, nyinong behti sorurui umba kodahpotoh. Ngina duit orih nyiring ahku lombut, mangat aang ohkot rih eam porulu hino tonipun. 16:3 Noin amat ahku lombut, ahku ahkan nyuhu ulun-ulun ijo jari ihkam sotujuoh. Ahku ahkan nonga ahkan iro surat pongitot, mangat iro ngomin duit pononga rih nokuh Yerusalem. 16:4 Tutang amat topahjahoh pios, ijo ahku tulak ka'a umba iro, mahka ahku ahkan tulak homboh iro. 16:5 Ahku ahkan masap ihkam ulimba nguha Makedonia, bain ahku boniat ahkan nguha anan. 16:6 Tou ka'a ahku ahkan mohcon honjulu umba ihkam, mihkoh kotahin musim sorongin. Uliorih ihkam duon dohop ahku noturus ponyalak nokuh unuk ijo pongooh. 16:7 Ahku eam kani masap ihkam, sokadar tondo iou. Amat Tuhan ngijin, ahku jolik mohcon hawui tahi umba ihkam. 16:8 Pondehan rih ahku ahkan mohcon ang lowu tuh, ang Epesus, nyiring Ondou Pentakosta. 16:9 Aro kosapetoh ang ohtoi ahkan karon-gawi ijo boguna, olu ka aro ka'a ulun ijo molawan. 16:10 Amat Timoteus lombut, nyambut io honong pios, mangat io nginyam rajin ang louk ihkam, tului io kolou ahku ka'a bogawi ahkan Tuhan. 16:11 A'ai nyiring anai ijo moremeh io. Dohop io mangat io duon noturus ponyalaioh buli nokuh ahku hawui solamat, kotului ahku ngindoi polombutoh, homboh umba konduang-konduang ijo bohkonoh. 16:12 Tohou konduang ihto Apolos, jari pira tikat ahku nonga tiruk ahkaioh, mangat io homboh konduang ijo bohkonoh, tulak masap ihkam. Tahpi io jaha komo yakin, ijo io harus tulak uhuntuh. Olu kodorih, amat anai kosapet noin, puna io ahkan lombut. 16:13 Kohondakrih ihkam borondong tutang segah ang pombolum'mu kolou ulun Kristen. Nguanaang hawui bohanyi tutang jadi ba'as. 16:14 Paring ijo ihkam nguai, nguan rih hawui ngasi. 16:15 Konduang punaoh ngosono Stepanus tutang ukup jolahai; iro ijo pahtukoh monjadi ulun Kristen ang Akhaya. Iro honong kotuwi ahtoi, bogawi khusus ahkan mohalu ukup Pohotala. 16:16 Ahku nongatiruk honong tu'u-tu'u, mangat ihkam nutut okon ulun-ulun ijo kolourih, hawui ulun-ulun bohkon ijo bogawi sama tutang mohalu homboh iro. 16:17 Ahku sanang ngosan polombut Stepanus, Portunatus, tutang Akkaikus; Iro koloujahka tokirin ihkam ahkak'ku. 16:18 Iro jari napa ahtoi'ku monjadi jorih, kolou iro ngojorih ahtoi'mu. Ulun-ulun kolou orih harus tonorega. 16:19 Ukup-ukup ang Asia ngirim taben iro ahkan ihkam. Akwila tutang Priskila, hawui ukup ijo hopuhpung ang lohpou iro ka, ngirim taben Kristen ijo bolasut. 16:20 Paring konduang ang ohtoi ngirim tahbe ahkan ihkam. Hotabe-hotabe ijo mesra kolou konduang Kristen. 16:21 Ahku ndahangoh ang ohtoi, tabe ijo ahku nyuratoh bongok: Tahbe tahkan ahku, Paulus. 16:22 Ulun ijo eam sita Tuhan, nauhoh io buah tulut! MARANAHTA -- Tuhan ihkai, lombut iou! 16:23 Keleh Tuhan Yesus mborehkat Konduang. 16:24 Homboh kasih ahkan Konduang paringoh ijo hihco umba Kristus Yesus. Horomat ihkai, Paulus
1:1 Konduang-konduang ukup Pohotala ang Korintus, tutang sohopus ukup ain Pohotala ijo anai ang Akhaya. Ahku, Paulus, rasul Kristus Yesus ijo tonotuot tului kohondak Pohotala, hombo-homboh umba konduang ihto Timoteus, 1:2 bokoharap keleh Pohotala, Amai ihto tutang Tuhan Yesus Kristus nonga borehkat tutang kosanang ahkan ihkam. 1:3 Tara ahkan Pohotala, Amai tahkan Tuhan ihto Yesus Kristus. Io Amai ijo paham hinut ahtoioh, tutang Io Pohotala ijo nonga koba'as homboruan ahkan ulun. 1:4 Io ngoba'as homboruan ihkai ang nyinong kosusah ijo ihkai nyuruoh, mangat hapa koba'as rih ijo ihkai norimaoh tahkan Pohotala, ihkai ka dahpot ngoba'as homboruan paring ulun ijo a'ang kosusahan. 1:5 Karot-karot ijo tonyuru bain Kristus, jari aro ihkai nyuruoh ka'a. Tutang nguha Kristus hino, homboruan ihkai mahi-mahi konomba'as. 1:6 Amat ihkai nyuru kosusah, orih anairih ahkan ngoba'as homboruan ihkam, demi solamat'kam. Amat homboruan ihkai tongomba'as, mahka ihkam tahput tongomba'as nyiring ihkam monjadi tabah a'ang koporos-koporos, kolou ijo ihkai ka ngarot ka'a. 1:7 Ihkai toturus jakin tutang eam pu'u bembang tohou Konduang, tului ihkai kota'an ijo ihkam umba ngarot homboh ihkai. Tutang bain tului rih ihkam umba ka'a tongomba'as hombo-homboh ihkai. 1:8 Konduang-konduang! Ihkai kani ihkam ngotaan tohou kohali ijo ihkai nyuruoh ang tana Asia. Kokarot ijo ihkai ngohtui rih dalou bahat mohenyek ihkai, nyiring ihkai eam duon bokoharap hino ahkan bolum, 1:9 anyamoh kolou jari tomosara hukum mahtoi iou. Tahpi hal rih nyolung, mangat ihkai ara bosikuh ang koba'as ihkai bongon, molekan aang Pohotala ijo mombolum ulun mahtoi. 1:10 Iorih ijo jari nyolamat ihkai tahkan bohaya popahtoi ijo hajo rih. Tutang Iorih ka'a, ijo ahkan nyolamat ihkai noin, ang ondou-ondou pongohino, kotului umba Io ihkai bokoharap. 1:11 Ihkai yakin ijo umba do'a-do'a'kam ahkan ihkai, Pohotala ahkan monyolamat ihkai hino tahkan bohaya. Pohotala jorih mborehkat ihkai kolou puhtah ngosan do'a-do'a ahkan ihkai, tutang tului orih aro ulun ahkan ngohawot torimakasih ahkan Pohotala. 1:12 Ihkai tamam, tului ahtoi bua ihkai, moyakin ihkai, ijo pombolum ihkai ang kolunon tuh -- pahtukoh kohihco ihkai umba Konduang, ius ihkai nihtoioh hawui ihlas, tutang borasih. Ihkai nguan orih rih eam tului kohorahtin ulun, tahpi tului koulih ijo tononga Pohotala. 1:13-14 Ijo ihkai nyurat ahkan'kam, iorih tihkas tohou hal-hal ijo tou ihkam mbasaoh tutang horahtioh. Uhuntuh ihkam eam horahti tohou ihkai kourasoh, tahpi ahku harap noin ihkam ahkan tu'u-tu'u horahti ihkai. Honong kodorih, ang ohkot Tuhan Yesus lombut noin, ihkam ahkan tamam ngosan ihkai, numbun ihkai ka'a tamam tohou ihkam. 1:15 Tului koyakinan orihrih, mahka ahku aang pahtukoh borocana ahkan masap ihkam, mangat ihkam dahpot borehkat duo tikat. 1:16 Ahku nohuang masap ihkam a'ang ponomuoi'ku nokuh Makedonia tutang tondo hino masap ihkam ang ponomuoi'ku buli, mangat ihkam duon dohop ahku noturus ponomuoi'ku nokuh Yudea. 1:17 Tahpi ahku ius ngubah niat'ku rih; nah, inon rih ijo korinah ijo tiruk'ku eam dehen? Ohkot nguan rancana, inon ahku nguan rancana numbun konohuang'ku bongok, honjulu nuhtui "Yo" tutang honjulu "Eam"? 1:18 Aangaran Pohotala ijo dahpot tomorocaya, bowot'ku umba Konduang bohkonlah "Yo" tutang "Eam". 1:19 Kotului Yesus Kristus, Anak Pohotala, ijo tomborihta ahkan'kam bain Silas, Timoteus tutang bain ahku bongok, bohkon ulun "Yo" tutang "Eam". Sobalikoh Io monjadi puhtah "Yo", tahkan Pohotala. 1:20 Tului nguha Io, Pohotala jari nuhtui "Yo" toharep paring bowot-Oh. Hogalang orihrih ihto ngohawot "Amen" ahkan Pohotala kotului Yesus Kristus. Ihkai nguan kodorih mangat Pohotala tonohoromat. 1:21 Pohotala bongoi ijo nguan ihkai, tutang Konduang segah hihco umba Kristus: Iorih ka'a ijo mitih ihto khusus ahkan arop-Oh. 1:22 Ahkan orih Pohotala jari monsah ihto monjadi Aiou-Oh, tutang nonga Roh Aiu ang luwang ahtoi ihto kolou jaminan, ijo Io ahkan nonga ahkan ihto paring ijo tonobowot-Oh. 1:23 Pohotala saksi aik'ku -- tului Io taan usin ahtoi aik'ku -- ijo ahku eam jadi tulak nokuh Korintus, kotului ahku eam kani nguan ahtoi'kam sedih. 1:24 Ahku eam hojojuan ihkam, tohou inon ijo ihkam harus porocayaoh, tului ihkam jari paham porocaya umba Kristus. Ahku tihkas bogawi sama umba ihkam mangat ihkam mahi-mahi sanang.
2:1 Bain kotului orih ahku jari nguan koputusan, ahkan eam lombut hino nokuh'kam umba pasap ijo nguan ihkam sedih. 2:2 Tului amat ahku ngoporos ahtoi'kam, iai hino ijo dahpot mapung ahku amat bohkon ulun-ulun rih, ka'a ijo jari ahku ngoporos ahtoioh? 2:3 Orih kotuluioh ahku nyurat surat tuh ahkan'kam. Ahku eam kani masap'kam, turus tonoporos ahtoi bain ihkam, podahal ihkam ijo koharusoh ngojorih ahku. Tului ahku yakin ijo amat ahku jorih, mahka Konduang paringoh jorih ka'a. 2:4 Ahku nyurat ahkan'kam hawui ahtoi ijo poros tutang bahat tutang umba aro nusuh danum mahto. Konohuang'ku eam mangat ihkam monjadi poros ahtoi, tahpi mangat ihkam borondong ijo ahku paham ngasih ihkam. 2:5 Amat anai ulun ijo kotuluioh poros ahtoi, mahka aang rih io nguai eam toharep ahku, molekan toharep Konduang paringoh ata'ai paling eam toharep ihcokabagi tahkan Konduang. Ahku eam kani dalou karas toharep io. 2:6 Bagi ulun ijo mahcam orih, hukum ijo tononyok ahkaioh bain ulunaro ang louk Konduang jari sukup. 2:7 Uhuntuh ihkam harus mapun io tutang nonga juhung hino ahkaioh, mangat io a'ai dalou poros ahtoi nyiring puhtus asa. 2:8 Kotului rih ahku nyawot, mangat ihkam ngorinah hoduli ahkai ijo ihkam tu'u-tu'u ngasih io. 2:9 Ahku nyurat surat tuh ahkan'kam, mangat nohuang ahkan nguji ihkam, inon ihkam turus kani numbun karon-potunjuk tahkan ahku. 2:10 Amat ihkam mapun ulun ijo jari nguan kosalan toharep'kam, mahka ahku ka mapun ulun rih. Tului inon ijo jari ahku mapunoh -- amat puna anai ijo porulu tonahpun -- orih ahku ngapunoh ang toharep Kristus ahkan kopios ihkam. 2:11 Ahku nguan orih mangat Sehtan ara ngomin kosapetoh ahkan ngowasa ihto; tului ihto kota'an, rancana-rancanaoh. 2:12 Ang ohkot ahku johcok ang Troas, tutang nohuang ahkan mborihta oh Kabar Hinut tohou Kristus, Tuhan jari nguap jalan ahkak'ku ahkan bogawi ang unuk rih. 2:13 Tahpi ahku eam teneng tului eam hosombang umba konduang ihto Titus ang anai. Mahka ahku poromisi umba ulun-ulun ang anan, turus tulak nokuh Makedonia. 2:14 Torimakasih ahkan Pohotala! Io toturus niting ihkai ahkan umba aang pawai komanang Kristus, tului ihkai bolum hihco umba Io. Pohotala mohapa ihkai, mangat borihta tohou Kristus tosiar kolou buan harum ijo semerbak koumo-umoh. 2:15-16 Tului ihkai sama kolou buan manyan ijo harum, ijo tomahpong bain Kristus ahkan Pohotala. Toharep ulun-ulun ijo uhun nitu kolonyuhoh, ihkai tuh kolou buan popahtoi ijo tomunu, tahpi toharep ulun-ulun ijo rahat tunyolamat, ihkai kolou buan harum ijo ngomin pombolum. Nah, iai ijo dahpot nguan gawi tuh? 2:17 Ihkai eam kolou aro ulun mohapan borihta tahkan Pohotala monjadi ramun dagang iou. Tihtun-tihtun ihkai anai borasih, tului ihkai tonyuhu bain Pohotala. Tutang Pohotala bongoi nopahjah, ijo ihkai monyiaroh borihta orih, kolou pohalu-pohalu Kristus.
3:1 Kuwoh tuh topahjahoh, koloujahka ihkai tara-tara umba-arop 'kai hino? Ata'ai tou tu'u ihkai porulu surat tara ahkan ihkam, ata'ai tahkan ihkam, kolou ijo tomorulu bain ulun-ulun bohkon? 3:2 Konduang bongon ih monjadi surat taran ihkai, ijo tonyurat ang luwang ahtoi ihkai, tutang duon tongota'an tutang tonombasa bain nyinong ulun. 3:3 Iro bongoi dahpot nohto, ijo Konduang monjadi surat ijo tonyurat Kristus, ijo tonokirim nguha ihkai. Surat rih eam tonyurat umba dawat, tahpi umba Roh Pohotala ijo bolum; eam ka'a ang ngosan bahtu tulis tahpi ang ahtoi ulun. 3:4 Ihkai nuhtui kodorih, tului koyakinan ihkai toharep Pohotala nguha Kristus. 3:5 Ihkai eam tepun aangihco alasan ka, ahkan ngorinah ijo ihkai puna nyanggup nguan gawi tuh, tahpi Pohotala ijo nonga koulih rih ahkan ihkai. 3:6 Io iou ijo nguan ihkai nyanggup monjadi pohalu ahkan ihco bowot ijo bohua, bowot ijo bogatung tahkan Roh Pohotala, bohkon tahkan hukum ijo tonyurat. Tului ijo tonyurat orihrih ngomin popahtoi, rahatoh ijo Roh Pohotala rih nonga pombolum. 3:7 Ang ohkot bowot ijo ngomin popahtoi rih tonapa tutang tomihtik ang bindang bahtu, koloang Pohotala momancar honong ngorolondangsilou ang baun Museh, Koloang-Oh kodorih kosilouoh, nyiring uhtus Israel eam sanggup nopahjah baun Museh, oluka koloang ang bauioh jari nopara kawus ang ohkot rih. Nah, amat gawin bowot, ijo ngonin popahtoi orih ang resmioh umba korolondangsilou ijo kodorih kohajoioh, 3:8 tontu gawin bowot ijo bain Roh Pohotala, ang resmioh honong labih ngorolondangsilou hino. 3:9 Amat bowot ijo mohukum kolunon rih, kodorih ngolondangsilou, tontu labih ngolondangnyilou hino bowot ijo touduon ngopios ulun umba Pohotala. 3:10 Tou konohawot, ijo inon ijo lomoi kolondangsilou jari eam ngolondangnyilou hino tului kolondangsilou ijo huntuh tuh. 3:11 Amat aang'co ijo tahan baya pondehan, kodorih londangsilou, puna aang'co ijo abadi labih ngorolondangnyilou hino. 3:12 Bain kotului ihkai anaingina koharap kolourih, mahka ihkai bohanyi bopander kodorih. 3:13 Ihkai eam kolou Museh, ijo nuhtup bouoh umba sondurungoh, mangat uhtus Israel, eam nohto koloang Tuhan, uhun bolop tutang nihou tahkan bouioh. 3:14 Tiruk iro jari totutup. Tutang nyiring ang ondou tuh ka tirukihtung iro magun totutup umba sondurung ang ohkot iro mbasa surat-surat tohou bowot ijo tahi rih. Sondurung rih tihkas duon tokuop amat ulun hihco umba Kristus. 3:15 Huntuhka, amat iro mbasa surat-surat Museh sondurung rih magun monuhtup tirukihtung iro. 3:16 Tahpi amat ihcobehti lombut noharep Tuhan, sondurung rihka konuap tahkan boun ulun rih. 3:17 Nah, Tuhan ijo konohuangoh ang ohtoi, anairih Roh. Tutang ang umoh Roh Tuhan anai, ang anan ka'a anai komorodehkaan. 3:18 Huntuh boun ihto paringoh eam tonuhtup sondurung, tutang ihto nopulang kolondangsilou Tuhan Yesus. Tutang bain kotului orih ihto hototurus tongubah monjadi kolou Io; mahi tahi ihto monjadi mahi ngolondangsilou. Kolondangsilou rih tahkan Roh, tutang Roh rih anairih Tuhan.
4:1 Ihkai nguan gawi tuh, tului kosayang ahtoi Pohotala. Orih kotuluioh ihkai eam puhtus asa. 4:2 Ihkai eam hapa cara-cara kopindong ijo ngomia. Ihkai eam kani bogawi honong lihcik, ata'ai ngobulak-balik tihtunauh Pohotala. Ihkai mohalu Pohotala umba ahtoi ijo borasih numbun kohondak-Oh. Tului orih, ihkai harapoh paring ulun monilai ihkai honong pios ang luwang ahtoi buaoh. 4:3 Amat Kabar Hinut ijo ihkai mborihtaoh tuh, magun ka'a jaha tongosonooh, mahka baya ulun-ulun ijo rahat nihtu korusak iou ijo eam mongosonooh. 4:4 Hotala ja'at ijo ngowasa kolunon tuh, nuhtup tiruk ulun-ulun ijo eam porocaya rih. Iorih ijo ngapeng-ngahana iro, mangat iro eam nohto koloang tahkan Kabar Hinut rih, tohou kohajon Kristus ijo hosuhtu gambar Pohotala. 4:5 Borihta ijo ihkai nyiaroh rih, eam borihta tohou ihkai bongon. Borihta rih anai borihta tohou Yesus Kristus; ijo Io anairih Tuhan; tutang ihkai tuhrih jihpon-jihpon'kam kotului Io. 4:6 Pohotala ijo nuhtui, "Kohondakoh tahkan luwang kopindong lombut koloang," Pohotala orihrih ka'a ijo polombut koloang rih ang luwang ahtoi ihto, mangat tirukihtung ihto monjadi boloang tutang duon ngosono korolondang Pohotala ijo monyingah aang boun Kristus. 4:7 Tahpi ponahtou rohani ijo komok orih, ihkai ngomiuoh ang luwang arop ihkai ijo eam borega tuh, ijo tonapa tahkan tana. Honong kodorih korinah bain kohajon kowasa rih mohcon aang Pohotala tutang eam aang ihkai. 4:8 Ihkai tonyarang tahkan paring pihak, tahpi ihkai eam hahpit. Ihkai torongong, tahpi eam nyiring nihou koharap. 4:9 Aro ijo momusuh ihkai, tahpi eam pu'u ihkai botohtah bongon ihkai. Tutang oluka bojointu'u ihkai ponahcat nyiring tohaot, tahpi ihkai eam mahtoi. 4:10 Toturus ihkai tongipa popahtoi Yesus aang behtin ihkai, mangat pombolum-Oh ka monjadi korinah ang behtin ihkai. 4:11 Kotahin ihkai bolum, ihkai toturus tongipa bain pompohtoi tului Yesus, mangat umba kolourih pombolum Yesus ka tou korinah aang behtin ihkai ijo eambunggut tuh. 4:12 Jituh rimai ijo ang luwang arop ihkai popahtoi rahat giat molalus porananoh, tahpi ihkai jorih, ijo pombolumrih ijo rahat giat ang luwang behtin'kam. 4:13 Ang luwang Surat borasih sombang auh tuh, "Ahku porocaya, orih kotuluioh ahku bopander." Nah, umba somangat porocaya ijo kolourih ka'a, ihkai bopander tului ihkai porocaya. 4:14 Ihkai yakin, ijo Pohotala ijo jari ngombolum hoduli Tuhan Yesus, ahkan ngombolum ihkai ka'a honong Yesus, tutang ngomin ihkam tutang ihkai nokuh toharep-Oh. 4:15 Paringoh rih anaioh ahkan kogunan'kam. Tului mahi-mahi aro ulun nginyam kasih Pohotala, mahi-mahi aro hino do'a torimakasih ijo tonyapai ahkan Pohotala; honong kodorih Pohotala tonotara. 4:16 Orihrih kotuluioh, ihkai eam puhtus asa. Sinoka ihkai socara kolunon tuh mahi-mahi ndahang korusakoh, tahpi cara homboruan, ihkai tonapa bohua nyinong ondou. 4:17 Tutang kosusah ijo eam sopiraoh tuh, ijo ihkai nyuruoh tihkas pondehan, ahkan momua bagin ihkai ihco kosanang, ijo luar biasa tutang abadi. Kosanang orih mahcu labih hajo amat tonindung umba kosusahan rih bongoi. 4:18 Tului ihkai eam nohtoani hal-hal ijo gihtan, molekan ijo eam gihtan. Ijo gihtan puna baya pondehan tahpi ijo eam gihtan rih bunggut nyiring turus-jahamoh.
5:1 Tului ihkai kota'an ijo amat lohpou -- orihrih behti-ijo ihto mohconoh ang kolunon tuh konahkas, Pohotala ahkan nyodia bagi ihto ihco lohpou ang soruga, ijo konuan bain Pohotala bongoi tutang ijo tahan turus-jahamoh. 5:2 Ang luwang lohpou ijo huntuh tuh, ihto munguh tului ihto rindu samasino mohcon ang luwang lohpou ihto ijo ang soruga orih. 5:3 Lohpou orihrih, behtin ihto ijo bohua. 5:4 Kotahin ihto mohcon ang luwang lohpou ijo tahkan tana tuh, ihto munguh kotului puat ihto bahat. Eamoh kotului ihto jolik bolohkak tahkan behtin ihto ijo tahkan tana tuh. Tahpi tului ihto jolik mokehpanoh behtin ihto ijo tahkan soruga rih, mangat behtin ihto ijo tou mahtoi tuh, tongowasa bain ijo bolum. 5:5 Ijo monyodiarih ihto ahkan orihrih, anairih Pohotala bongoi, tutang Io nonga Roh-Oh ahkan ihto kolou jaminan. 5:6 Kotului orih ahtoi ihkai hototurus komo ba'as. Ihkai kota'an, ijo kotahin ihkai magun mohcon ang luwang behtin ihkai tuh, ihkai mahcu tahkan lohpou, ijo ahkan ihkai mohconoh homboh Tuhan. 5:7 Kotului ihkai bolum hogalang porocaya umba Kristus, eam hogalang inon ijo dahpot tonohto, 5:8 orih kotuluioh ahtoi ihkai tabah. Ihkai labih jolik bolohkak tahkan behtin ihkai tuh, mangat jeleng mohcon umba Tuhan. 5:9 Kotului orih ihkai bousaha tu'u-tu'u ahkan nyanang ahtoi-Oh, pios ohkot ihkai magun anai ang luwang lohpou ihkai ang ohtoi, ata'ai ka ang anan. 5:10 Kotului musti ihto paringoh ahkan konomin nokuh noharep bosaran Kristus, tutang nyino-nyinong ahkan dahpot balosoh, sorurui umba gawiuoh ang kolunon tuh -- gawi pios, ata'ai ka kaja'at. 5:11 Ihkai kota'an inon rimai mihkoh umba Tuhan; orih kotuluioh ihkai bousaha moyakin ulun tohou arop ihkai. Pohotala ngosono ihkai sotimbon-timbonoh tutang ahku harap ihkam ka, ngosono ihkai ang luwang ahtoi'kam. 5:12 Umba tuh ihkai eam nyawot, mangat ihkam monara arop ihkai. Ihkai baya kani nonga ihco alasan ijo pios ahkan'kam, ahkan monjadi tamam toharep ihkai, mangat ihkam ta'an, koloukuwoh ihkam harus mutah auh ulun-ulun ijo mongguna tapan ulun, tutang eam sipatoh. 5:13 Amat ihkai puna topahjahoh jari bobucon, orih anairih demi gunan Pohotala. Tutang amat ihkai gihtanoh waras, orih demi kogunai ahkan ihkam. 5:14 Sihtan Kristusih ijo mongowasa ihkai, tutang ihkai borondong, ijo amat ihcobehti jari mahtoi ahkan paring ulun, mahka orihrih rimai ijo paring ulun jari mahtoi. 5:15 Kristus mahtoi ahkan paring ulun, mangat paring ulun ijo bolum, eam hino bolum ahkai bongoi, molekan ahkan Kristus ijo jari mahtoi tutang tonombolum hoduli demi kogunan iro. 5:16 Bain kotului orih, ihkai eam hino nihpong ulun numbun tihpong kolunon. Puna ihkai pu'u nihpong Kristus tahkan sila kolunon, tahpi huntuh eam hino. 5:17 Ulun ijo jari hihco umba Kristus, monjadi kolunon bohua samasino. Ijo tahi jari eam aro hino -- paringoh jari monjadi bohua. 5:18 Paringoh rih tonapa bain Pohotala. Nguha Kristus, Pohotala nguan ihto hokopios hoduli umba Io, turus nyuhu ihto mangat ulun-ulun bohkon toudahpot hokopios ka'a umba Pohotala. 5:19 Ihkai mborihta ijo umba poholat Kristus, Pohotala nguan ulun hokopios huli umba arop-Oh. Pohotala nguan orih earo nutut kosalan-kosalan ijo jari konuan kolunon toharep arop-Oh. Tutang ihkai jari tonyuhu Pohotala ahkan mborihta kabar rih. 5:20 Jadi ihkai anairih monjadi pohalu-pohalu Kristus. Nguha ihkai Pohotala bongoi ijo nyapai pohtoh-Oh. Ngasan aran Kristus ihkai nyawot hawui paham, torima njuluk longon Pohotala ijo toudahpon ihkam hokopios umba Io. 5:21 Kristus eam bodusa, tahpi Pohotala nguan Io ngohtun dusan ihto, mangat ihto hokopios hoduli umba Pohotala, tului hihco umba Kristus.
6:1 Tului ihkai bogawi hombo-homboh umba Pohotala, mahka ihkai nyawot hawui tu'u-tu'u, a'ai ihkam mohonou kopios ahtoi Pohotala rih. 6:2 Luwang Surat Borasih, Pohotala nuhtui, "Ang ohkot ijo tonojorih, Ahku jari ngonih ihko, tutang ang ondou monyolamat, Ahku jari dohop ihko." Ingat pio-pios, uhuntuh, tuhrih ohkot ijo tonojorih rih. Uhuntuh, tuhrih ondou ahkan tonyolamat! 6:3 Ihkai eam kani, pohalu ihkai tonosalan. Kotului rih ihkai ngurahjalan eam nonga alasan, ahkan ihcobehti ka ahkan nguan hal rih. 6:4 Sobalikoh, a'ang kokaron hal, ihkai ngorinah ijo ihkai anairih jihpon-jihpon Pohotala. Tului, karon mahcam kosusah jari ihkai ngarotoh hawui sabar, 6:5 ihkai tonyiksa, tonyihpir, tutang tongorubut; ihkai bogawi paham, bojoin eam tiruh, tutang bojoin hino eam anai ukun. 6:6 Honong nguan kotulus, kopihtar, sabar tutang hinut ahtoi, ihkai ngorinah, ijo ihkai, anairih jihpon Pohotala. Ka'a hawui bohambin aang pondohop Roh Pohotala, tutang hawui kasih ijo ihlas, 6:7 homboh hawui mborihta kabar ijo tahkan Pohotala, tutang umba kowasan Pohotala, ihkai ngorinah ijo ihkai tuh anairih jihpon-jihpon Pohotala. Ihkai nambit aang kohondak Pohotala, kolou sanjatan ihkai ahkan nyarang, oluka ahkan mombela arop. 6:8 Ihkai tonohoromat, tahpi ihkai dahpot pohina'an ka'a, tonotara, tutang tonopitnah hino. Olu ka ihkai morong, tahpi tonondawa bobalik. 6:9 Ihkai tonongohu eam tongosono tahpi ihkai tongosono bain paring ulun. Ihkai tonongohu mahtoi, tahpi bokorinah ihkai magun bolum. Oluka ihkai tonoporos, ihkai eam mahtoi. 6:10 Oluka ahtoi ihkai tongoporos ahtoi, tahpi ihkai hototurus jorih ka'a. Ihkai topahjahoh porosbolum, tahpi ihkai jari nguan aro ulun monjadi tahtou. Topahjahoh ihkai eam anai ngina ino-inon tahpi kotu'ui ihkai jari ngina paring-aangoh. 6:11 Konduang-konduang ijo tongasih ang Korintus! Ihkai jari torus-torang ahkan'kam. Paring suang ahtoi bua ihkai jari ihkai nuhturoh. 6:12 Ihkai eam nuhtup ahtoi ahkan ihkam, tihkas ihkam iou ijo nuhtup ahtoi toharep ihkai. 6:13 Uhuntuh, nauhoh ahku bopander kolou umba karon-anak'ku bongok. Nguap ka'a ahtoi'kam toharep ihkai. 6:14 A'ai kani monjadi barih ulun-ulun ijo eam porocaya umba Yesus, orihrih eam cocok. Amoh dahpot kopios, hobarih umba koja'at. Eam mungkin koloang hobarih umba kopindong. 6:15 Eam duon Kristus hobarih umba Sehtan. Inon kosamaoh holat ulun Kristen, umba ulun eam Kristen? 6:16 Inon kobohkon holat Lohpou Tuhan umba lohpou dewa? Ihto tuh Lohpou Tuhan, iorih Pohotala ijo bolum. Pohotala bongoi nuhtui, "Ahku ahkan mohcon ang tohun-tohun iro, tutang kani bolum hihco umba iro. Ahku ahkan monjadi Pohotalan'ndo, tutang iro ahkan monjadi Ukup-Ku. 6:17 Tului orih, Nohtahrih iou ulun-ulun ijo eam ngosono Pohotala rih, tutang pisah ohrih iou arop'mu tahkan iro. Ara hojelut samasino umba ijo pali, mahka Ahku ahkan norima ihko. 6:18 Ahku ahkan monjadi Amai'mu, tutang ihkam ahkan monjadi anak-anak-Ku, kolouorih hion Tuhan Ijo Mahakowasa."
7:1 Konduang-konduang ijo tonokasih! Paring bowot rih tonitu ahkan ihto. Bain kotului orih kohondakoh ihto porasih arop tahkan kokaron ijo ngojilok homboruan behtin ihto. Kohondakoh ihto mihkoh umba Pohotala, mangat ihto tou bolum khusus ahkai-Oh hawui soporuna. 7:2 Naharangrih ihkai ang luwang ahtoi'kam. Ihkai eam bosala umba ihcobehti ka, tutang eam pu'u anai ulun ijo ihkai morugioh. Ihkai samasino eam nguhkut utung tahkan iaika. 7:3 Ahku nuhtui kodorih, bohkon ahkan nosalan ihkam. Kotului kolou ijo jari ahku nuhtuioh lomoi, ihkai paham ngasi ihkam, tutang ihto tuh anai kawan-kawan hokombolum mahtoi. 7:4 Ahku ngina koporocaya tuwi ahkan'kam. Malah ahku namam samasino toharep'kam! Oluka ihkai nyuru aro kosusah, ahtoi'ku paham konapung tului ihkam. Ahtoi'ku tu'u-tu'u jorih! 7:5 Kotihka ihkai johcok ang Makedonia ka, ihkai samasino eam sapet istirahat. Tahkan kokaro lahpak, ihkai dahpot kosusah; tahkan lahpak bohkon kolahi, tahkan luwang ahtoi bongon kihkoh. 7:6 Tahpi torimakasih, ahkan Pohotala hototurus pohajo ahtoi ulun ijo puhtus asa. Io nyanang ahtoi ihkai umba polombut Titus. 7:7 Ahtoi ihkai dahpot apung eam iou kotului Titus jari lombut, tahpi ka'a kotului io nyorihta, koloukuwoh ahtoioh tomapung bain ihkam. Io mborihta ahkan ihkai, ijo ihkam rindu samasino hosombang umba ahku; ijo ihkam monyasal ahkan gawin'kam lomoi, tutang huntuh rela dohop ahku. Hal rih nguan ahku labih jorih hino. 7:8 Oluka surat'ku nguan ahtoi'mu monjadi sedih, ahku eam monyasal nyurat surat tuh. Puna aang ohkot ahku nohto, ijo surat'ku tuh monjadi ihkam sedih -- oluka kosedihan'mu rih baya honjulu -- ahku anai ka'a konyasal. 7:9 Tahpi ahtoi'ku sonang huntuh -- eam tagal ahtoi'mu monjadi sedih -- molekan, kotului kosedihan'kam rih, ngonjorian hadat'kam hubah. Puna kosedihan'kam rih, tohorong umba kohondak Pohotala. Jadi ihkai eam morugi ihkam. 7:10 Tului kosedihan kolou orih momua kohubah ahtoi ijo mopolombut solamat. Tutang ulun eam ahkan monyasal ngosan hal orih. Sobalikoh kosedihan ijo baya sorurui umba kohondak kolunon momua popahtoi. 7:11 Cuba ihkam nohtoani inon buaoh aang'kam, bain kosedihan ijo sorurui umba kohondak Pohotala! Buaoh, iorih ihkam tu'u-tu'u ngurahjalan ahkan nokining kokoruh! Ihkam monjadi bosingi toharep dusa, ihkam mihkoh, ihkam rindu, ihkam monjadi bosomangat, ihkam rela mohukum ijo bosala! A'ang paring persoalan tuh ihkam jari ngorinah, ijo ihkam eam bosala. 7:12 Jadi, oluka ahku jari nyurat surat tuh, ahku nyurat eam kotului ulun ijo bosala rih. Eam ka'a kotului ulun ijo ngorot bain kotului kosala'an rih. Ahku nyurat surat rih, mangat ang toharep Pohotala, ihkam borondong bongom, eaminon kohajoioh konohtoani'kam toharep ihkai. 7:13 Orihrih kotuluioh ahtoi ihkai tonapung. Bohkonumba apung rih, ihkai mahi-mahi hino tongojorih kotului nohto kojorih Titus; ahtoioh tonapung bain Konduang paring. 7:14 Ahku puna jari kotama-tamam ihkam ahkaioh. Torimakasihrih, ihkam eam mopomia ahku. Paring ijo pu'u ihkai nuhtui ahkan'kam anairih morong. Kodorih ka'a, inon ijo ihkai nama-namamoh tohou ihkam ahkan Titus korinah morong hino. 7:15 Huntuh io mahi-mahi ngasih ihkam, tului io ingat koloukuwoh Konduang paringoh kani numbun auh kototiringoh tutang koloukuwoh ihkam norima io hawui horomat tutang te'et. 7:16 Ahku sanang samasino, kotului ihkam duon tomorocaya aang kokaro hal.
8:1 Konduang-konduang ihkai jolik ihkam ngota'an ka'a, tohou koloukuwoh piosoh Pohotala umba ukup-ukup ang Makedonia. 8:2 Iro ius touji umba kosusahan-kosusahan ijo bahat. Tahpi ang tohun-tohun kosusahan-kosusahan rih, iro jorih tutang paham sanang ahtoi a'ang mononga sumbangan ahkan dohop ulun bohkon, oluka iro bongoi porosbolum samasino. 8:3 Ahku dahpot momastioh ijo iro nonga numbun sodahpot iro, molekan molowi. Hawui eam anai ijo nyuhu iro, 8:4 iro nyawot honong paham umba ihkai, amat tou iro umba dohop nonga sumbangan ahkan ukup Pohotala ang Yudea. 8:5 Iro nonga mahcu labih tahkan ijo ihkai harapoh. Iro pahtu-pahtukoh monyorahoh arop ahkan Tuhan, pongohuli ahkan ihkai ka'a sorurui umba kohondak Pohotala. 8:6 Orih kotuluioh ihkai paham nganjur Titus -- ijo nopara usaha tuh -- mangat io noturus usaha, ijo pios tuh ang louk ihkam ka'a, 8:7 ihkam unggul a'ang pari-paringoh. Ihkam unggul a'ang hal kaporocaya, a'ang hal ngorinah tiruk, a'ang hal pongotaan, a'ang paring mahcam usaha, tutang a'ang sitan'kam umba ihkai. Kotului orihrih pios ihkam ka'a unggul ang luwang usaha ijo hinut tuh. 8:8 Ahku eam nganjur orih kolou ihco poretah. Tahpi honong ngorinah, eaminon giatoh ulun bohkon dohop sama aropoh, ahku ka'a jolik kota'an nyiring umoh sitan'kam. 8:9 Tului ihkam ngota'an tu'u, ijo ihto karas tonokasih kobain Yesus Kristus Tuhan ihto. Io tahtou, tahpi Io nguan arop-Oh monjadi porosbolum ahkan kogunan ihkam, mangat umba koporosbolum-Oh rih ihkam monjadi tahtou. 8:10 Numbun tiruk'ku, aang unukohrih ihkam ngoopah, inon ijo jari ihkam nopara toun houn. Tului ihkam ijo pahtu-pahtuk niruk tutang nopara gawi rih. 8:11 Ohrih, uhuntuh hondakrih ihkam noturus numbun koduon'kam. Hondakoh ihkam bosomangat ahkan ngoopah usaha rih, koloukuwoh ihkam houn ka bosomangat morocanaoh. 8:12 Amat ihkam rela nonga, mahka Pohotala ahkan norima ponongan'kam rih, hogalang inon ijo anai aang ihkam, eam hogalang inon ijo eam anai aangihkam. 8:13-14 Ahku samasino eam nohuang, ahkan moliwus ulun bohkon tahkan tanggung-jawab, tutang ngombahat ihkam. Tahpi kotului ihkam huntuh, tuh a'ang koada'an uras sukup, mahka jari sopahtutoh ihkam monyukupoh kotahpas iro. Noin amat ihkam bokotahpas, tutang iro a'ang koada'an uras sukup, mahka iro ahkan dohop ihkam. Honong kodorih kododuooh sama-sama tomohalu. 8:15 A'ang Surat Borasih tonyurat, "Ulun ijo anaipongulihoh aro, eam bokolowiuoh, tutang ulun ijo anaipongulihoh honjiot, eam bokotahpas." 8:16 Eaminon torimakasihoh ihkai umba Pohotala, tului Io jari napa Titus sogiat ihkai ahkan dohop ihkam! 8:17 Tului Titus eam baya rela numbun sawot ihkai, tahpi io ka'a kodorih giat kani dohop ihkam nyiring ngosan kohondak aiu bongoi, io mutus ahkan tulak nokuh ihkam. 8:18 Homboh umba io ihkai ngirim ka'a ihcobehti konduang, ijo tonohoromat ang paring ukup, kotului gawiuoh mborihta Kabar Hinut tahkan Pohotala. 8:19 Ang tahtup orihrih, ulun ijoorih jari topihtih ka'a, tutang tonuhkas bain ukup-ukup ahkan jolahan ihkai aang ponyalan 'kai. Kotului ihkai ahkan nguan ponyalan, ahkan ngihtot pononga rih, mangat Tuhan tonohajo, tutang mangat ihkam nohto, ijo ihkai rela dohop. 8:20 Ihkai paham ati-ati, mangat ara anai ulun ijo monosalan ihkai, a'ang hal ngihtot pononga ijo hajo tuh. 8:21 Ihkai kani botindak bujur eam tihkas ang toharep Tuhan, tahpi ang toharep kolunon ka'a. 8:22 Hombo-homboh umba Titus tutang konduang orihrih, ihkai ka'a ngirim ihcobehti konduang ijo bohkon. Ihkai jari nguji io papira tikat tutang korinah io turus pohias mondohop. Tutang huntuh, io labi-labih kani mondohop ihkam tului io ngina koharap ijo hajo aangihkam. 8:23 Tahou Titus, anairih jolahak'ku, ijo bogawi umba ahku, ahkan dohop ihkam. Tutang tohou koduo konduang rih, ijo hihkas homboh io, iro anairih ulun-ulun ijo sonuhu bain ukup-ukup tutang monjadi kotamam bagi Kristus. 8:24 Ihkai harap ihkam ngorinah sitan'kam ahkan iro, mangat paring ukup kota'an ijo ihkam ngasih iro, tutang ijo inon ijo ihkai naraoh tohou ihkam anairih morong.
9:1 Kotu'uioh eam porulu hino ahku nyurat ahkan ihkam tohou pondohop ijo rahat tongirim ahkan ukup Pohotala ang Yudea. 9:2 Ahku kota'an ihkam kani ndohop, tutang ahku jari monamamoh ihkam, umba ulun-ulun ang Makedonia. Ahku nuhtui ahkan iro ijo tahkan toun ijo nokalou konduang-konduang ang Akhaya ius tahtap ahkan nonga pondohop. Tutang somangat'kam jari ka'a himun somangat sobagian hajo tahkan iro. 9:3 Huntuh ahku nyuhu Titus tutang koduo konduang rih ahkan'kam, mangat inon ijo ihkai tara-tara tohou ihkam, ara kolou auh puang iou. Jadi, ihkam hondakoh jari sodia, tului ahku nuhtuioh ahkan iro ijo ihkam jari sodia ahkan orih. 9:4 Ahku mihkoh koloujahka anai ulun-ulun Makedonia ijo umba hombo-homboh ahku noin ang ohkot ahku lombut nokuh ihkam. Tutang amat iro nyombangoh ijo ihkam jaha sodia, akai, paham komiaoh ihkai noin, kotului jari nuhtui ijo ihkai porocaya samasino umba'kam! Tutang ihkam bongom-ka, ahkan mia ka'a. 9:5 Orih kotuluioh ahku komo porulu nyuhu iro rih ahkan'kam labih soun mangat ngurus sumbangan ijo ihkam mbowotoh rih. Ahku nguan rih, mangat noin amat ahku lombut, ponongan ihkam orih rih jari sodia. Hawui kolourih, karinah ijo ponongan'kam rih tononga honong sanang ahtoi, tutang eam kotului toropaksa. 9:6 Ingat! Ulun ijo noburan bonyi honjiot-honjiot, ahkan nipun buaoh ijo honjiot ka'a. Tahpi ulun ijo noburan bonyi aro-aro ahkan nipun buaoh ijo aro ka'a. 9:7 Nyinong ulun harus nonga numbun korela ahtoi. Ara io nonga hawui ragu-ragu ata'ai tului toropaksa, kobain Pohotala masi ulun ijo nonga hawui sanang ahtoioh. 9:8 Pohotala bokowasa nonga ahkan ihkam borehkat ijo molowi murai, mangat ihkam toturus anaingina inon ijo ihkam poruluoh; malahan ihkam ahkan labih aro ahkan nguan angpios tutang boamal. 9:9 Ang Surat Borasih tonyurat koloutuh, tohou Pohotala, "Io noburan-buran ahkan ulun porosbolum; kohinut ahtoi-Oh kototahiu turus-jahamoh." 9:10 Pohotala ijo nyodia bonyi ahkan ulun pongumo, tutang ukun ahkan ihto. Io ka'a ahkan nyodia tutang mopoaro inon jo ihkam noburanoh, mangat bua komorong ahtoi'kam botambah hino. 9:11 Honong kodorih ihkam ahkan serba sukup aang kokaro hal, nyiring ihkam turus dahpot nonga hawui murah ahtoi. Tutang pononga-pononga'kam, ijo ihkai magi-magioh, kotuluioh aro ulun ngohawot torimakasih ahkan Pohotala. 9:12 Kotului gawi pios ijo ihkam nguaioh tuh, eam tihkas monyukup kotahpas ukup Pohotala iou, tahpi ka'a ahkan kotuluioh aro ulun botorimakasih ahkan Pohotala. 9:13 Tutang tahkan kobajikan ijo ihkam ngorinahoh rih, aro ulun Kristen ang Yudea ahkan monara Pohotala kotului iro nohto kosotia'kam norima Kabar Hinut tohou Kristus ijo ihkam nututoh orih. Ka'a iro monara Pohotala, tului ihkam puna murah ahtoi ahkan mbagi-bagioh ahkan iro, tutang ahkan paring ulun bohkon, inon ijo anai ang ihkam. 9:14 Mahka iro ahkan mondo'akan ihkam umba nanyam kasihsayang, tului Pohotala karas hinut ahtoi ahkan'kam. 9:15 Hondaklah ihto norimakasih ahkan Pohotala ngosan pononga-Oh ijo luar biasa rih!
10:1 Uhuntuh ahku, Paulus, kani nyurung aang'co ahkan'kam. Ahku tuh, numbun hion ulun, bolomu-lembai amat hotoharep umba ihkam, tahpi bohanyi amat hokomahcu. Nah, kotului kolomukolembai tutang kopios ahtoi Kristus! 10:2 Ahku nyawot honong paham, a'ai nguan ahku toropaksa nguan kokaras toharep ihkam, amat ahku lombut noin. Kotului ahku boniat ahkan botindak tegas toharep ulun-ulun ijo nuhtui, ijo ihkai bogawi umba titun-titun kolunon. 10:3 Ihkai puna magun bolum ang luwang kolunon, tahpi ihkai eam hokolahi hogalang titun kolunon 'kai. 10:4 Pokahkas-pokahkas ijo ihkai ngunaoh ang luwang kolahin 'kai eamoh pokahkas kolunon tuh, tahpi pokahkas-pokahkas Pohotala ijo bokowasa. Honong pokahkas-pokahkas orihrih ihkai moluhtek unuk botahan; ihkai mokila hojawab-hojawab, 10:5 tutang polukang benteng-benteng kojuhu ijo tonombok, ahkan molawan pongotaan tohou Pohotala. Ihkai nawan tiruk ulun-ulun, tutang nguan iro monyorah nokuh Kristus. 10:6 Tutang amat ihkam jari te'et umba kotuwioh, ihkai bosodia ahkan mohukum paring ulun ijo eam te'et. 10:7 Hondakoh ihkam borendeng umba koada'an ijo kotu'uioh. Amat ihcobehti yakin, ijo io ain Kristus, hondakoh io mopingat aropoh bongoi, tutang borendeng ijo ihkai ka'a ain Kristus kolou io. 10:8 Ahku eam mia, amat ahku harus labih aro namam-namam umba kowasa ijo jari tononga Tuhan ahkan ihkai, kotului kowasa orih, tononga ahkan mangun ihkam, eam ijo ahkan ngahkasoh. 10:9 Ahku eam kani ihkam komo, ijo ahku mopiko-pikoh ihkam umba surat-surat'ku. 10:10 Ulun nuhtui, "Surat-surat Paulus rih tegas tutang bopongaroh, tahpi amat io bongoi anai ang tohun-tohun ihto, aropbongoioh bolomu tutang tuhtui-tuhtuioh eam borima ino-inon." 10:11 Hondakoh ulun ijo kolou orih borendeng, ijo amat ihkai anai ang tohun-tohun ihkam, tindakan ihkai kona, kolou inon ijo jari ihkai nyuratoh aang surat-surat 'kai. 10:12 Tontu bewe ihkai eam bohanyi nindung ata'ai ngina arop 'kai sodorajat umba ulun-ulun ijo ngohu aropoh isung. Eaminon kouongoh iro! Iro napa tihpong bongoi, tutang monilai aropoh bongon umba tihpong orih rih. 10:13 Ihkai eam kodorih. Amat ihkai monama-namam, ihkai eam nokalou tihkasoh. Ihkai mohcon ang luwang tihkas-tihkas daerah gawi ijo jari tonahtap bain Pohotala ahkan ihkai. Tutang ihkam tonyolong ang luwang daerah orih rih. 10:14 Jadi, kotihka ihkai masap'kam tutang ngomin Kabar Hinut tohou Kristus ahkan'kam, ihkai tu'u-tu'uoh eam nokalou tahkan tihkas-tihkas daerah gawin 'kai. 10:15 Ihkai eam ka'a monara arop, ngosan gawin ulun bohkon, ijo anai ang ruar tihkas ijo tonuhkas Pohotala ahkan ihkai. Sobalikoh ihkai tohtap ang luwang tihkas-tihkas, ijo tonuhkas Pohotala ahkan ihkai, tutang boharap ijo ihkam mahi-mahi porocaya umba Kristus, mangat ihkai dahpot nguan gawi ijo labih hajo ang louk ihkam. 10:16 Honong kolourih ihkai duon mborihta ka'a Kabar Hinut rih ang tanah-tanah bohkon, earo harus pohajo-pohajo arop ngosan gawi ijo jari konuan ang wilayah pohalu ulun bohkon. 10:17 Ang luwang Surat Borasih tonyurat, "Ulun ijo kani monamam angihco, hondakoh io namam inon ijo jari konuan bain Tuhan." 10:18 Tului ulun ijo botara, orihrih ulun ijo tonara bain Tuhan, eam ulun ijo monara aropoh bongoi.
11:1 Nyuhurih ahku nguan kolou uong honjiot. Tou, kowa? 11:2 Ahku rindu umba'kam, kolou Pohotala bongoi ka rindu umba'kam. Ihkam anai kolou ihcobehti anakdara bujang tindih, ihco magun borasih, ijo jari ahku mbowotoh, ahkan tonongawinoh umba ihcobehti bosai, iorih Kristus. 11:3 Tahpi ahku mihkoh tiruk'kam ahkan togoda, mangat eam tehen hino umba Kristus, sama kolou Hawa lomoi ka'a tonihkos bain alik lohi. 11:4 Kotului kolouoh ihkam sanang iou, norima ulun ijo lombut ahkan'kam, tutang majar tohou Yesus ijo bohkon -- eam Yesus ijo ihkai pokosonooh ahkan'kam. Tutang ihkam kani ka'a nyambut roh tutang "Kabar Hinut" ijo samasino hokobohkon umba Roh Pohotala tutang Kabar Hinut ijo pu'u ihkam norimaoh tahkan ihkai. 11:5 Ahku samasino eam komo labih randah tahkan "rasul-rasul" ijo luar biasa rih. 11:6 Mihkoh ahku kurang ahpik bopander, tahpi tohou pongotaan, ahku eam ulun palong. Orih jari ihkai mbuktioh ahkan ihkam luwang kokaro hal. 11:7 Ang ohkot ahku mborihta Kabar Hinut tahkan Pohotala ahkan'kam, ahku eam nyawot ihkam ngupah ahku honjiot ka; tutang honong kodorih ahku nguan arop'ku monjadi randah. Ahku nguan rih unuk ngahtang'kam. Inon orih ihco kosalak'ku toharep ihkam? 11:8 Ang ohkot ahku ngohalu ihkam, ahku duon bohata bain ukup-ukup bohkon. Tou tonohawot ahku morugi ukup-ukup rih mangat tou ndohop ihkam. 11:9 Amat ang ohkot orih ahku tahpas, ahku eam pu'u monyusah ihcobehti ka tahkan ihkam. Paring ijo ahku poruluoh, tonyodia bain konduang-konduang ijo lombut tahkan Makedonia. Ahku monjaga pio-pios mangat ahku eam monyusah ihkam a'ang hal inon ka, tutang ahku ahkan turus monjaga mangat orih tahtap kodorih. 11:10 Kotamam'ku tuh eam duon konudap ang umoh ka ka'a, ang hopus tana Akhaya, tului tahkan ajar Kristus ijo tu'u anai aang ahku. 11:11 Ombai ahku nuhtui kodorih? Inon bain kotului ahku eam mongasih ihkam? Pohotala kota'an ahku mongasih. 11:12 Inon ijo ahku nguai huntuh ahkan turus ahku nguai, mangat "rasul-rasul" ijo bohkon rih eam anai sokehta ahkan nama-namam aropoh, tutang nuhtui ijo iro bogawi kolou ihkai. 11:13 Ulun-ulun kolourih, anairih rasul-rasul alik. Iro ponggawi-ponggawi ijo nyoruwa ulun, umba nyamar kolou rasul-rasul Kristus. 11:14 Eam helan iro nguan kodorih, tului Sehtan bongoi ka nyoruwa kolou molehkat koloang! 11:15 Jadi eam aneh ka'a amat pohalu-pohalu sehtan, nyoruwa kolou pohalu-pohalu, ijo nguan kohondak Pohotala. Laiuoh iro ka'a norima balosoh ijo sopadan umba karon gawin iro. 11:16 Ahku ngulangoh sino hino: A'ai nyiring anai ijo ngohu ahku uong. Tahpi amat ihkam rih ngohu ahku kodorih, nyuhuohrih ahku ijo uong tuh monamam ka'a honjiot. 11:17 Pongo tuh, ahkan ahku ngohawot kotamam'ku, tahpi bohkon Tuhan ijo nyuhu ahku ngohawot orih. A'ang hal tuh ahku tu'u-tu'u pander kolou ulun uong. 11:18 Puna anai aro ulun ijo monamam hal-hal kolunon, jadi ahku kani botamam-tamam ka'a. 11:19 Ihkam hawui sanang ahtoi, bosabar toharep ulun ijo uong, kotului ihkam komo arop kodorih ahpik! 11:20 Ihkam mohonou ahku kolou ulun mohojihpon ihkam, ata'ai mohamih, tutang ngomin utung tahkan ihkam, ata'ai komo arop labih isung tahkan ihkam, tutang bohanyi napar'kam. 11:21 Ahku mia ngahku, ijo ihkai dalou bolomu, ahkan nguan kolou orih rih. Tahpi inon ijo ulun bohkon bohanyi tamam, ahku bohanyi ka'a! (Ahku bopander kolou ulun uong.) 11:22 Ulun Ibranikah iro? Ahku ka'a ulun Ibrani! Ulun Israelkah iro? Ahku ka'a ulun Israel! Lihit Abrahamkah iro? Ahku ka kodorih! 11:23 Pohalu-pohalu Kristuskah iro? Naingoh kolou ahku ius nihou ahkal, tahpi ahku puna pohalu ijo puna labih morong tahkan iro paringoh! Ahku bogawi labih karas, ahku labih bojoin ponosolong ang luwang sipir, ahku labih aro tonyiksa tutang bojoin nyiring mahtoi. 11:24 Jari limo tikat ahku tonyiksa bain ulun Yahudi, buah patu ponahcatsapu tolun pulu siou tikat. 11:25 Tolu tikat ahku ponahcat bain ulun-ulun Romawi; pu'u ka'a ahku tomukah umba bahtu. Tolu tikat ahku buah kahom kapal ang tasik, tutang sino ahku hanyut aang tasik kotahin duo pulu ohpat jam. 11:26 Aro tikat ahku nguan ponyalan'ku ijo bohaya; tongacam bohaya danum suhu, bohaya ponyilou, bohaya tahkan ulun Yahudi, olu tahkan pihak ulun bohkon Yahudi, bohaya ang luwang lowu, bohaya ang ruar lowu, bohaya ang tasik, tutang bohaya tahkan ulun-ulun ijo ngohawot arop kolou konduang Kristen, podahal bohkon. 11:27 Ahku ujuh uhat tulang, tutang mongolawan sotongah mahtoi, bojoin eam tiruh, eam kuman, eam ngorih, aro tikat ahku tonotah ang koada'an bolo'u, sorungin kotului kurang hatin, tutang eam aro anai unuk mohcon. 11:28 Ang bambai paringoh orihrih, nyinong ondou ahku mihkoh ka'a ahkan koada'an paring ukup. 11:29 Amat anai ijo bolomu, ahku ka umba komo kolomu ka'a. Amat anai ijo botahak ang luwang dusa, ahtoi'ku umba lonyuh. 11:30 Nah, amat ahku harus monamam angihco mahka ahku namam hal-hal ijo ngorinah kolomuk'ku rih. 11:31 Pohotala, Amai tahkan Tuhan Yesus kota'an, ijo ahku eam bobalik. Tonotara Arai-Oh turus-jahamoh. 11:32 Kotihka ahku anai ang Damaskus, gubernur ijo kowasa ang anan ang pinda pomoretah Lahca Aretas, nyuhu sorodadu monjaga nyinong bauntukang lowu rih ahkan nawan ahku. 11:33 Tahpi umba ihco koranjang ahku tonguluh nokuh pinda, nguha ihco luwang ang dinding kota. Kodorih ahku liwus tahkan longon gubernur rih.
12:1 Puna eam aro utungoh amat botamam. Tahpi ahku kani ka'a monamam hal-hal, ijo Pohotala ngorinahoh ahkak'ku a'ang pongorinah ata'ai a'ang ponopahjah. 12:2 Ahku ngosono ihcobehti Kristen ijo opat bolas toun ijo soun, tonongahtang nokuh unuk ijo pongoisungoh ang soruga. (Ahku eam ta'an inon behtiu oh moro-morong konahtang ata'ai rih tihkas ihco ponopahjah -- Pohotala iou ijo kota'an.) 12:3-4 Ahku ngulangoh sino hino. Ahku ta'an ijo ulun tuh konahtang nyolong nokuh Pirdaus. (Ahku eam kota'an kuwoh behtiuoh moro-morong konahtang ata'ai orihrih tihkas ihco ponopahjah iou -- Pohotala iou ijo kota'an). Ang anan ulun rih ngonih hal-hal, ijo eam duon tonguap bain ulun, tutang eam ka'a tonongaijin ahkan ulun, mangat ngohawotoh. 12:5 Tohou ulun orih ijo kani ahku namamoh, eam tohou arop'ku bongok. Tohou arop'ku, tihkas hal-hal ijo nunjuk kolomu aik'ku orihrih ijo kani ahku namamoh. 12:6 Jahkaoh ahku jolik ka'a monamam angihco, ahku eam kani monjadi panderngahus ijo auh puang; ahku ahkan ngohawot ijo morong. Tahpi ahku nahan arop, mangat eam anai ulun ijo ngohu ahku labih tahkanumba inon ijo jari io nohto ahku nguai, ata'ai ijo jari io ngonihoh ahku nuhtuioh. 12:7 Tahpi mangat ahku a'ai dalou bojuhu, tului topahjah-topahjah ijo luar biasa rih, ahku tononga kolou ihco ponyahkit aang behtik'ku ijo kolou pokahkas Sehtan. Ponyahkit rih tononga ahkan mahcat ahku mangat ahku eam monjadi bojuhu. 12:8 Tolu tikat ahku bodo'a ahkan Tuhan, mangat ponyahkit rih tongahtang tahkan ahku. 12:9 Tahpi Tuhan muhtah, "Ahku ngasih ihko tutang rih jari sukup ahkan'kam; tului kowasak-Ku, justru paling ba'as amat'kam ang koada'an bolomu." Orih kotuluioh ahku labih sanang namam umba kolomu-kolomu'ku, tului amat ahku bolomu, mahka justru, a'ang ohkot orihrih ahku komo Kristus ngolindung ahku umba koba'as-Oh. 12:10 Jadi, ahku jorih umba kolomu-kolomu'ku rih. Ahku ka'a jorih amat bain kotului Kristus ahku tonopitnah, ahku buah kohapit, toduru-duru tutang ahku nyuru kosusah. Tului amat ahku bolomu, mahka ang ohkot orih rih, justru ahku ba'as. 12:11 Tu'u ahku jari nguan 'jo kolou ulun uong -- tahpi ihkam ijo nguan ahku jari kolouorih. Kotu'uioh ihkam ijo harus monara ahku. Tului oluka ahku eam anai bororima ino-inon, ahku samasino eam kalah toharep "rasul-rasul" ijo luar biasa rih. 12:12 Tanda-tanda helan tutang hal-hal luar biasa hawoi gawi-gawi ijo hajo-hajo ius tongorinah honong sabar umba'kam ahkan mbukti ijo ahku ihcobehti rasul. 12:13 Aang hal inon ihkam kurang tonunengoh, tonindung umba ukup-ukup ijo bohkon? Pali-paling tihkas a'ang hal tuh; ijo ahku eam monyusah ihkam ahkan bolanjak'ku. Apunrih ahku ngosan kosala'an orih. 12:14 Uhuntuh, tuh jari ahkan kotolu tikatoh ahku sodia ahkan masap ihkam. Tutang ahku eam kani monyusah ihkam, tului ijo ahku jolik eam inon ijo ihkam tepuioh, molekan behtin'kam. Tului eam anak-inyam ijo harus ngurah bolanja ahkan ulun okooh, tahpi ulun okooh ijo harus ngurah bolanja ahkan pombolum anak-anakoh. 12:15 Tului orih, hawoi sanang ahtoi'ku rela moporahpah kokaro-karonoh ahkan'kam, malahan arop'ku bongok ka. Amat ahku kodorih ngasi ihkam, kuwohrih pahtut ihkam kurang ngasi ahku? 12:16 Nah, ihkam satuju ijo ahku eam pu'u nyusah ihkam. Tahpi anai ijo nuhtui ijo ahku tuh ulun bokolilit, ijo ahku dahpot utung tahkan ihkam tului tipu daya'ku. 12:17 Amoh tau! Kuwohkah nguha ulun-ulun ijo ahku nyuhuoh, nokuh ihkam rih ngoraut utung tahkan ihkam? 12:18 Ahku jari nyuhu Titus tulak masap ihkam, tutang ahku nyuhu konduang Kristen ijo bohkon rih, tulak homboh umba io. Kuwoh Titus ngomin utung tahkan ihkam? Tahpi ihkai boduo bogawi umba titun ijo sama, tutang monggawioh umba cara-cara ijo sama! 12:19 Dahpot jadi ihkam ngohu ihkai kotahin tuh, rahat bousaha mbela arop toharep ihkam? Ihkam koliru samasino! Pohotala ngota'an ijo paring ijo ihkai nuhtui orih anairih numbun kohondak Kristus. Tutang paring ijo ihkai nguai anairih ahkan mangun pombolum homboruan'kam. 12:20 Ahku kowatir ijo aang ohkot ahku masap ihkam noin, ahku nyombang ihkam eam kolou inon ijo ahku harapoh, tutang ihkam ka ahkan nyombang ahku eam kolou ijo ihkam harapoh. Ara-ara noin anai ijo hokolahi, hiri ahtoi, bolasut ahtoi, gunan ahkai bongoi, pinah-mopitnah, hasut-mohasut, bojuhu tutang monderoh. 12:21 Ahku mihkoh amat-amat aang ohkot ahku lombut noin Pohotala ahkan porandah ahku ang toharep'kam, tutang ahku ahkan nangih tului aro, ang louk ihkam ijo bodusa lomoi, eam hubah tutang eam tondo nguan gawin-gawin iro ijo kihal, kojilok tutang eam pantas.
13:1 Tuh anairih ahkan kotolu tikatoh ahku lombut masap ihkam. A'ang Surat Borasih tonyurat, "Nyinong porokara harus konombahat bain kosaksian duo ata'ai tolu behti saksi, punan porokara orih sah." 13:2 Ulun-ulun ijo ang ohkot tuh jari nguan dosa, tutang paring ulun bohkonoh, jari ahku mopingat, labih soun kotihka ahku masap ihkam ang koduo tikatoh. Huntuh, pondehan ahku hokomahcu umba'kam ahku mopingat hoduli, ijo amat ahku lombut hino, eam ihcobehti ka'a tahkan iro ijo ahkan lohpas tahkan hukum. 13:3 Mahka ihkam ahkan nyombang paring bukti ijo ihkam jorikoh ijo Kristus moro-morong bopander nguha ahku. Amat Kristus botindak toharep ihkam, Io eam botindak bolomu-lembai, sobalikoh Io ngorinah kowasai-Oh ang louk ihkam. 13:4 Puna ang ohkot Io tonahpak, Io bolomu. Tahpi huntuh Io bolum tului kowasan Pohotala. Ihkai ka'a bolumu aang pombolum ihkai ijo hihco umba Kristus, tahpi amat noharep ihkam, ihkai ka'a ba'as homboh Kristus tului kowasan Pohotala. 13:5 Cuba ihkam moriksa arop bongon, inonkah ihkam tu'u-tu'u bolum hogalang porocaya umba Kristus! Musti ihkam borondong ijo Kristus Yesus anai ang luwang ihkam! -- bohkon haloh amat puna ihkam eam tu'u-tu'u porocaya. 13:6 Ahku harap ihkam borondong, ijo ihkai eamoh ulun ijo eam tahan uji. 13:7 Ihkai bodo'a umba Pohotala, pios Io kani dohop ihkam mangat eam nguan kosalan. Eamoh ahkan pokarah, ijo ihkai tuh puna cakap nguan gawi, tahpi mangat ihkam nguan inon ijo Pohotala hondakoh -- nauh topahjahoh ihkai gagal, eam ombai! 13:8 Tului ihkai eam duon nguan angihco ka, ijo hokolawan umba ijo morong; ihkai harus numbun ijo morong. 13:9 Ihkai sonang amat ihkai bolomu, tutang ihkam ba'as. Ihkai bodo'a ka'a, mangat ihkam monjadi soporuna. 13:10 Orihrih kotuluioh ahku nyurat surat tuh, ang ohkot ahku jaha anai ang tohun ihkam. Honong kodorih, amat ahku lombut noin, eam usah ahku botindak karas toharep'kam, honong hapa kowasa ijo tononga Tuhan ahkak'ku. Kowasa orih tononga ahkan mangun ihkam eam ahkan morusak ihkam. 13:11 Laiuoh, Konduang-konduang, hondakih ihkam jorih tutang ngurahjalan monjadi soporuna. Torima iou karon tingak'ku. Hondakoh ihkam, hihco-ahtoi tutang bolum rukun. Pohotala Ijo Mahapongasi tutang Pongobuah rih ahkan homboh ihkam. 13:12 Hotabe-tabe rih umba sama arop socara mesra kolou konduang Kristen. Hopus ukup Pohotala ngirim tabe ahkan'kam. 13:13 Tuhan Yesus Kristus mborehkatrih ihkam, Pohotala ngasi ihkam, tutang Roh Pohotala ngonggulu ihkam paringoh! Horomat ihkai, Paulus
1:1-3 Konduang-konduang, ukup-ukup ang wilayah Galatia, Ahku Paulus, tutang paring konduang Kristen ijo homboh ahku, moharap, keleh Pohotala, Amai ihto tutang Tuhan Yesus Kristus nonga borehkat tutang kosanang ahkan'kam. Ahku monjadi rasul bohkon umba katuh kolunon ata'ai tului tonotuot bain ulun, molekan bain Yesus Kristus tutang Pohotala Amai ihto, ijo jari mombolum Io hoduli tahkan popahtoi. 1:4 Mone'et kohondak Pohotala, Amai ihto, Kristus monyorahrih arop-Oh monjadi porahpah bagi dusa-dusan ihto, mangat ihto tonyolamat tahkan jaman ijo ja'at tuh. 1:5 Tonotararih ahkan Pohotala turus-jahamoh! Amen. 1:6 Ahku helan tohou Konduang-konduang! Ihkam tona'ah Pohotala bain tului ponongaasin Kristus, tahpi huntuh ihkam kodorih jeleng nolihkut Pohotala tutang nutut "kabar pios" ijo bohkon tahkanmba Kabar Hinut ijo tahkan Pohotala. 1:7 Kotu'uioh eam anai "kabar pios ijo bohkon." Tihkas anai ulun-ulun ijo mborihta ahkan ihkam "kabar pios" tohou Kristus ijo iro mbalik mokilaoh nyiring ngihcuh ihkam. 1:8 Ulun ijo mborihta "kabar pios", ijo bohkon tahkan Kabar Hinut ijo jari ihkai mborihtaoh, nauh io tonohukum Pohotala -- oluka ulun rih ihkai bongon ata'ai molehkat tahkan soruga! 1:9 Ihkai jari nuhtuioh lomoi, uhuntuh ahku nuhtuioh sinohino: Ulun ijo mborihta ahkan'kam "kabar pios" ijo bohkon tahkanmba Kabar Hinut ijo jari ihkam torima tahkan ihkai, ulun rih hondakoh tonohukum Pohotala! 1:10 Inonrih umba orih topahjah ahku koloujahka moharap tongahku bain kolunon? Samasino eam! Ahku baya moharaprih pongahkuan tahkan Pohotala. Inonkah ahku rahat bousaha ngomin ahtoi ulun, mangat tongojorih ulun? Amat ahku magun nguan kodorih, ahku eam jihpon Kristus. 1:11 Konduang-konduang harus mongota'an ijo Kabar Hinut ijo ahku mborihtarih rih eam asaroh tahkan kolunon. 1:12 Ahku eam norima kabar rih tahkan kolunon, tutang eam ihcobehti ka ijo majaroh ahkak'ku. Yesus Kristus bongoi ijo nguaprihoh usin Kabar Hinut rih ahkak'ku. 1:13 Punai ihkam jari ngonih tohou pombolum aik'ku lomoi, kolou ihcobehti ponambit agama Yahudi. Ihkam kota'an koloukuwoh kejamoh ahku hogoguan ukup Pohotala tutang koloukuwoh kopahamoh ahku bousaha molonyuhoh. 1:14 A'ang hal molalusrih agama Yahudi, ahku molabih ulun-ulun Yahudi, ijo samaokoi umba ahku. Ahku bosomangat samasino a'ang hal-hal tohou hadat-dasar tahtu ajuh ihkai. 1:15 Tahpi kotului kopios ahtoi Pohotala, Io ngopili ahku hounmba ahku konanak, tutang na'ah ahku ahkan mohalu Io. 1:16 Pohotala ngorinah Anak-Oh ahkak'ku, mangat Kabar Hinut tohou Anak-Oh dahpot ahku mborihtaoh ahkan ulun-ulun bohkon Yahudi. A'ang ohkot rih, ahku eam tulak ahkan ihcobehti ka ahkan nyawot nasehat. 1:17 Ahku eam ka'a tulak ahkan ulun-ulun ang Yerusalem, ijo jari labih soun, tahkan ahku monjadi rasul. Tahpi ahku tulak nokuh tana Arab, turus tahkan anan huli nokuh Damaskus hino. 1:18 Tolu toun pongohino, ahku tulak nokuh Yerusalem, ahkan hokosono umba Petrus. Ahku mohcon umba io tihkas limo balas ondou kotahiu. 1:19 Ahku eam hosombang umba rasul-rasul ijo bohkon kocoali Yakobus, konduang Tuhan. 1:20 Inon ijo ahku nyurat tuh puna morong. Pohotala ta'an ijo ahku eam bobalik! 1:21 Uliorih ahku tulak nokuh daerah-daerah ang Siria tutang Kilikia. 1:22 Nyiring ang kotihka rih ukup-ukup Kristen ang Yudea magun jaha kosono ahku cara hotoharep. 1:23 Iro tihkas ngonih ulun nuhtui, "Ulun ijo lomoi ngoporos ihkai, uhuntuh mborihta koporocaya ijo lomoi kani ponihouoh." 1:24 Mahka iro monara Pohotala tului ahku.
2:1 Opat balas toun pongohino, ahku hoduli nokuh Yerusalem homboh Barnabas hawui ngomin Titus ka'a. 2:2 Ahku tulak nokuh Yerusalem, tului Pohotala jari ngorinah ahkak'ku ijo ahku pahtut tulak. Tutang aang ihco puhpung ijo khusus, umba okon-okon ang anan, ahku monarang ijo ahku mborihta Kabar Hinut, ahkan ulun-ulun bohkon Yahudi. Tului ahku eam kani usaha'ku ijo houn, oluka ijo uhuntuh, baya sia-sia. 2:3 Titus ijo homboh umba ahku io anairih ihcobehti Yunani, tahpi io eam tonopaksa umba poroturan sunat. 2:4 Oluka anai ulun-ulun ijo hojojuan hal rih. Iro anairih ulun-ulun ijo nosolat nokuh luwang barih ihto, tutang nyoruwa kolou konduang. Iro nyolong honong toni-tonih ahkan nyolidik komorodehka ijo anai aang ihto, kotului ihto hihco umba Kristus Yesus. Iro kani mombuli ihto, aang koada'an ijo pahtuk lomoi kolou jihpon, 2:5 tahpi ihkai eam monyorah honjiot ka ahkan iro, kotului ihkai kani monjaga mangat Kabar Hinut rih tahtap borasih ahkan ihkam. 2:6 Olu kodorih, eam anai hal-hal bohua ijo tonyawot tahkan ahku bain ulun-ulun ijo tongohu bosewut -- ahkak'ku earo kobohkoi amat iro bosewut ata'ai eam, kotului Pohotala eam nopahjah baui. 2:7 Sobalikoh ulun-ulun ijo tongohu bosewut rih mongahku ijo Pohotala jari nyuhu ahku ahkan mborihta Kabar Hinut rih ahkan ulun bohkon Yahudi, sama kolou Io jari nyuhu Petrus, ahkan mborihta Kabar Hinut rih ahkan ulun Yahudi. 2:8 Kotului Pohotala nonga ahkan Petrus koulih ahkan monjadi rasul ulun Yahudi, nongarih ka'a ahkak'ku koulih ahkan monjadi rasul ulun bohkon Yahudi. 2:9 Yakobus, Petrus tutang Yohanes ijo gihtanoh ijo monjadi okon-okon ukup, mongahku ijo Pohotala jari nonga ahkak'ku tugas khusus tuh. Mahka iro hojuluk longo umba Barnabas tutang ahku, kolou tanda bosohabat. Turus iro tutang ihkai sotuju, ijo ihkai ahkan bogawi ang holat uhtus-uhtus ijo bohkon Yahudi, tutang iro ang tohun ulun Yahudi. 2:10 Ihco-ihcooh ponyawot iro, iorih, mangat ihkai nohtoani ulun porosbolum. Tutang ahku puna sanang nguan hal orih. 2:11 Kotihka Petrus lombut nokuh Antiokhia, ahku nantang io hawui tara-tarang, kotului tindakoh sala. 2:12 Aang pahtukoh io tuot kuman hombo-homboh konduang-konduang ijo bohkon ulun Yahudi. Tahpi uli ulun-ulun sonyuhu Yakobus lombut, io njayong aropoh tahkan konduang-konduang orih ijo bohkon ulun Yahudi, tutang eam kani hino kuman umba iro, tului mihkoh toharep ulun-ulun ijo kani, mangat paring ulun tonyunat. 2:13 Konduang-konduang ulun Yahudi ijo bohkon ka'a, umba pura-pura kolou Petrus, nyiring Barnabas ka topongaroh ahkan sihkap kolou iro. 2:14 Kodorih ahku nohto ijo iro eam bosihkap sorurui umba komorong Kabar Hinut rih, ahku nuhtui umba Petrus ang husuk paring ulun ijo tuot ang anai, "Amat Konduang kolou ulun Yahudi jari bolum kolou ulun bohkon Yahudi, ombai Konduang uhuntuh hojojuan ulun-ulun bohkon bolum kolou ulun Yahudi?" 2:15 Puna numbun ihkaikonanak, ihkai tuh anairih ulun Yahudi tutang eam, "Ulun bohkon Yahudi ijo bodusa." 2:16 Oluka kodorih ihkai ta'an, ijo ulun hokopios hoduli umba Pohotala, baya tului porocaya umba Yesus Kristus tutang eam tului molalus hadat agama. Ihkai bongon ka, porocaya umba Yesus Kristus, mangat ihkai hokopios umba Pohotala nguha koporocayan 'kai rih, eam kotului ihkai molalus hadat agama. Tului umba molalus hukum agama, eam ihcobehti ka duon hokopios hoduli umba Pohotala. 2:17 Ihkai bousaha hokopios huli umba Pohotala nguha pombolum hihco umba Kristus. Tahpi amat ulirih nguan ijo kolouorih, korinah ihkai magun "ulun-ulun bodusa," ka'a kolou ulun-ulun bohkon Yahudi; inonrih tuh rimaioh ijo Kristusrih ijo kotuluioh ihkai bodusa? Botantu iou eam! 2:18 Amat ahku nopara nombok hoduli pola hukum agama ijo jari ahku ngahkasoh, mahka ahku ngorinahrih ijo ahku jari monjadi polanggar hukum. 2:19 Tahpi ahku jari mahtoi toharep hukum agama -- tomunu bain hukum rih bongoi -- mangat ahku dahpot bolum bagi Pohotala. Ahku jari tomahpak umba Kristus. 2:20 Uhuntuh bohkon hino ahku ijo bolum, tahpi Kristus ijo bolum luwang behtik'ku. Pombolum tuh ijo ahku ngumangoh huntuh, anairih pombolum bain porocaya umba Anak Pohotala ijo ngasih ahku, tutang ijo jari nyorah arop-Oh, ahkak'ku. 2:21 Ahku eam nawah pononganasi Pohotala. Amat kohihcon ulun umba Pohotala monjadi pios hoduli, kotului molalus hukum agama rih, rimai popahtoi Kristus eam anai gunaioh!
3:1 Konduang-konduang ulun-ulun Galatia! Ihkam kotu'ui uong! Inonrih ihkam jari kona pongaroh iai? Pompahtoi Kristus ang sopolahki jari ahku monarangoh hawui botarang-tu'uoh ahkan'kam. 3:2 Cuba nyorihta ahkak'ku ihco hal tuh; Kuwohrih ihkam jari norima Roh Pohotala tului molalus hukum agama, ata'airih tului ihkam jari ngonih Kabar Hinut tahkan Pohotala, tutang porocaya umba Yesus Kristus? 3:3 Ombai ihkam kolourih uong! Ihkam jari nopara bolum bohua umba Roh Pohotala, ombai uhuntuh ihkam kani dahpot kosoporunaoh, umba koba'as ihkam bongom? 3:4 Ngahus iourih paring ijo ihkam ngomooh rih? Ombairih ngahus! 3:5 Pohotala nonga Roh-Oh ahkan'kam, tutang nguan kohelan-kohelan ang louk ihkam. Inonrih Pohotala nguan orih kotului ihkam numbun hukum Agama, ata'ai kotului ihkam ngonih Kabar Hinut rih tutang porocaya umba Kristus? 3:6 Orih sama kolou ijo tonyurat ang Surat Borasih tohou Abraham -- koloutuh, "Abraham porocaya umba Pohotala tutang kotului koporocayaoh rih io tonorima bain Pohotala kolou ulun ijo ngojorih ahtoi Pohotala." 3:7 Jadi, hondakrih ihkam borondong, ijo ulun ijo moro-morong lihit Abraham anairih ulun ijo porocaya umba Pohotala. 3:8 Surat Borasih jari nohto labih soun, ijo Pohotala mongonduon ulun-ulun bohkon Yahudi, hokopios hoduli umba Pohotala, amat iro porocaya umba Io. Kabar Hinut rih tonyorihta labih houn ahkan Abraham ang bowotoh tuh, "Nguha ihko, Pohotala ahkan mborehkat paring ukup kolunon, ang isun tana." 3:9 Abraham porocaya mahka io tomborehkat. Kodorih ka'a paring ulun ijo porocaya ahkan tomborehkat hombo-homboh Abraham. 3:10 Ulun-ulun ijo mokuak aropoh umba hukum agama, paringoh bolum ang pinda tulut. Tului luwang Surat Borasih tonyurat, "Ulun ijo eam bokehtep, molalus paring ijo tonyurat ang Buhku Hukum Agama tonulut Pohotala!" 3:11 Eam ihcobehti ka ijo hokopios umba Pohotala bain kotului molalus hukum agama. Hal orih jari tongorinah ang Surat Borasih, "Baya ulun ijo porocaya umba Pohotala, nyiring kohihcooh umba Pohotala hokopios hoduli, ahkan bolum!" 3:12 Tahpi hukum agama eam tonogalang ngosan porocaya. Ang Surat Borasih tonyurat, ijo ulun ijo molalus hukum agama, ahkan bolum tului hukum rih. 3:13 Tahpi Kristus momorodehka ihto tahkan tulut hukum agama. Io nguan rih hawui mohonou arop-Oh tonulut tului ihto. Tului ang Surat Borasih tonyurat, "Tonulut ulun ijo mahtoi tonokuak ang kahju." 3:14 Kristus nguan kodorih mangat borehkat ijo tobowot Pohotala ahkan Abraham tononga ka'a ahkan ulun-ulun bohkon Yahudi. Honong kodorih, ihto ka'a ijo porocaya umba Pohotala, dahpot norima Roh ijo tonobowot bain Pohotala rih. 3:15 Konduang-konduang! Piosrih ahku hapa sutu tahkan ponyombang nyinong-ondou. Amat ulun nguan ihco ihkatan bowot, tutang bowot rih jari tonosah, mahka eam aro ihcobehti ka duon mbalangoh bowot rih ata'ai ndahang angihco ka ahkaioh. 3:16 Bowot-bowot Pohotala tonapa bain Pohotala bagi Abraham tutang bagi ulun lihit Abraham. A'ang Surat Borasih eam tonyurat, "Tutang bagi ulun-ulun lihit Abraham," ijo rimai aro ulun. Ijo tonyurat ang anan anairih "tutang bagi ulun lihit'mu," rimai ihcobehti iou, iorih Kristus. 3:17 Ijo kani ahku nyorihtaoh ang ohtoi, iorih tuh; bowot Pohotala jari konuan tutang tonosyah labih houn. Hukum Agama ijo tononga 430 toun pongohino, eam duon mombatal ponosahoh hawui ngudap bowot Pohotala rih. 3:18 Tului amat ponongan Pohotala bokuak umba hukum agama, mahka orih, bohkon hino pononga ijo tonobowot. Molekan tului Pohotala jari monobowotoh ahkan Abraham, mahka Pohotala nongaoh orih ahkaioh. 3:19 Amat kodorih, ahkan inon hukum agama tononga? Puhtahoh iorih ijo hukum rih tondahangoh unuk ngorinah polanggaran ulun. Hukum Agama rih hapan, baya nyiring lombutoh ihcobehti lihit Abraham, ijo konohawot ang luwang bowot Pohotala ahkan Abraham. Hukum Agama rih tonuhtui bain molehkat-molehkat umba poholat ihcobehti kolunon. 3:20 Nah, harus anai duo pihak, punai porulu ihcobehti poholat. Tahpi Pohotala eam porulu poholat, tului Io bongoi ijo ngatuhoh. 3:21 Kuwohrih orih, rimaioh ijo hukum agama bolawan umba bowot Pohotala? Punai iou eam! Tului amat hukum agama tononga, ahkan monyorah pombolum ahkan kolunon, mahka ulun duon hokopios umba Pohotala nguha hukum agama. 3:22 Tahpi ang luwang Surat Borasih tonyurat ijo paring ukup kolunon anai ang pinda kowasan dusa. Tului rih pononga ijo tonobowot hogalang koporocaya umba Yesus Kristus, tononga ahkan iro ijo porocaya. 3:23 Sounumba johcok ohkotoh ahkan porocaya umba Kristus, ihto tonojaga rapat bain hukum agama; ihto kolou topahkot nyiring ijo koporocaya rih korinah. 3:24 Honong kodorih hukum agama monjadi kolou pongawas ihto, johcok Kristus lombut, ahkan nguan ihto hokopios hoduli umba Pohotala, kotului ihto porocaya umba Yesus Kristus. 3:25 Huntuh, kotului jari ohkotoh kolunon dahpot porocaya umba Kristus, mahka ihto eam hino tonongawas bain hukum agama. 3:26 Tului ihkam porocaya umba Kristus Yesus, mahka ihkam hihco umba Io; tutang bain kotului orih ihkam monjadi anak-anak Pohotala. 3:27 Ihkam paringoh jari tonopondus ngosan aran Kristus, jadi ihkam jari norima aang arop'kam sipat-sipat Kristus bongoi. 3:28 A'ang hal tuh, eam hino anai kobohkon holat ulun Yahudi tutang ulun bohkon Yahudi, holat jihpon tutang ulun morodehka, holat ulunbahkas tutang ulunbawi. Konduang paringoh ihco tului Kristus Yesus. 3:29 Amat ihkam ain Kristus, mahka ihkam anairih lihit Abraham. Tutang ihkam ahkan norima inon ijo tonobowot Pohotala.
4:1 Tahpi porulu ahku mongingatoh: Kotahin ihcobehti ahli warih magun pinda umur, anai ulun ijo nohtoani io, tutang hogoguan inon kogunan-kogunan aiu nyiring io johcok umur ijo tonahtap bain amaioh. 4:2 Io tonohaga kolou ihcobehti jihpon, olu ka kotu'ui io tepuioh tahkan paring ponahtou rih. 4:3 Kodorih ka'a umba ihto: Kotahin ihto magun jaha oko, ihto tonojihpon bain roh-roh ijo bokowasa ang kolunon tuh. 4:4 Tahpi ang ohkotoh ijo kona, Pohotala nyuhu Anak-Oh nokuh kolunon. Anak-Oh rih tonganak bain ihcobehti bawi, tutang bolum ang pinda kowasan hukum agama. 4:5 Honong kodorih, Io momorodehka ulun-ulun ijo bolum ang pinda kowasan hukum agama; mangat ihto ka dahpot monjadi anak-anak Pohotala. 4:6 Kotului ihkam anairih anak-anak Pohotala, Pohotala nyuhu Roh Anak-Oh nyolong nohkuh ahtoi Konduang tutang ahtoi'ku, iorih Roh ijo na'ah, "Amai, yoh Amai-Ku." 4:7 Jadi ihkam eam hino jihpon molekan anak. Tutang kotului ihkam anak Pohotala, mahka Pohotala ahkan nonga ahkan'kam paring angihco, ijo tonyodia-Oh ahkan anak-anak-Oh. 4:8 Lomoi ihkam eam kosono Pohotala, orih kotuluioh ihkam monjadi jihpon tahkan kowasa-kowasa ijo ihkam ngohu kolou pohotala, tahpi kotu'uioh bohkon Pohotala samasino. 4:9 Tahpi uhuntuh ihkam ngosono Pohotala, ata'ai labih kona hino, Pohotala ngosono ihkam. Nah, ombai ihkam kani buli hino ahkan roh-roh kolunon tuh, ijo bolomu tutang porosbolum? Ombai ihkam kani nohojihpon hino bain roh-roh rih? 4:10 Ihkam pesta ang ondou-ondou ijo botitu, bulan-bulan ijo botitu, tutang toun-toun ijo botitu. 4:11 Ahku kowatir, ara-ara koheka koujuh'ku, ahkan ihkam nyia-nyia iou. 4:12 Konduang-konduang! Ahku nyawot honong paham mangat ihkam monjadi kolou ahku. Kotului ahku ka'a jari monjadi kolou ihkam. Ihkam eam nguan angihco ka, ijo sala toharep ahku. 4:13 Ihkam puna magun ingat inon ijo kotuluioh ahku ang pahtukoh mborihta Kabar Hinut rih ahkan'kam. Kotuluioh, iorih, tului ahku buah koporos. 4:14 Ang ohkot rih ihkam eam ngomo kojilok toharep ahku, oluka koada'an behtik'ku kolou tihkos ijo hajo bagi'kam. Ihkam malah norima ahku kolou norima molehkat Pohotala ata'ai kolou norima Kristus Yesus bongoi. 4:15 Ihkam sanang sino aang ohkot rih. Tahpi uhuntuh ang umoh kosanang rih? Ahku kota'an ijo aang ohkot rih ihkam rela ngoruit mahtan'kam bongom, ahkan nongaoh ahkak'ku amat orih duon tononguan. 4:16 Inonrih ihkam uhuntuh jari ngohu ahku kolou musuh, tului ahku ngorinah ijo tu'u ahkan'mu? 4:17 Ulun-ulun ijo bohkon rih, umba tuwi somangat ngurah ihkam, tahpi maksud-maksud iro eam pios. Iro baya jolik mahtot kohihco umba ihkai, mangat ihkam nutut iro umba tuwi somangat. 4:18 Puna pios ahkan bosomangat, a'ang hal-hal ijo pios, asar toturus kodorih tutang a'ai baya amat ahku, anai sama-sama umba ihkam. 4:19 Anak-anak'ku ijo tonokasih! Ahku uhuntuh ngarot hino tului ihkam. Ahku ngarot, kolou ihcobehti inai ngarot ang ohkot nganak anakoh. Ahku ahkan hototurus ngarot, amat sipat-sipat Kristus jaha totanom ang arop'mu! 4:20 Ahku rindu sino, tohko ang tohu-tohun ihkam uhuntuh, mangat ahku dahpot bopander umba'kam, umba auh ijo bohkon, tului ahku jari eam ta'an, kani nguan inon hino umba ihkam! 4:21 Konduang-konduang ijo kani bolum ang pinda kowasan hukum-hukum agama, cuba ngonih ahku! Ahku ahkan nyorihta ahkan'kam inon ijo kotu'uioh tonyurat a'ang Surat Hukum Museh. 4:22 Ang anan tonyurat, ijo Abraham tepun duo behti anak. Inai tahkan anak ijo ihco, anairih ihcobehti jihpon; tutang inai tahkan anak ijo bohkonoh rih, anairih ihcobehti ijo morodehka. 4:23 Anak tahkan bawi ijo monjadi jihpon, konanak biasa tului kohondak ulun. Tahpi anak ijo konanak tahkan bawi ijo morodehka, konanak kotului tonobowot Pohotala. 4:24 Tuh dahpot tohapa kolou tindung. Duo behti bawi rih tonindung umba duo bowot: ijo ihcooh boasar tahkan puruk Sinai -- orihrih Hagar; anak-anakoh konanak kolou jihpon. 4:25 Jadi, Hagar orihrih puruk Sinai, ang lowun ulun Arab. Io nopengan umba kota Yerusalem, umba paring pondudukoh ijo uhuntuh ius monjadi jihpon. 4:26 Tahpi Yerusalem ijo ang soruga rih, anairih Yerusalem ijo morodehka, tutang, iorih inai ihto. 4:27 Kotului ang luwang Surat Borasih tonyurat, "Jori-jorih ihko o bawi tomanang, ijo eam pu'u nganak! Bororami hawui bososurak-molahap O ihko ijo eam pu'u komo poros nganak! Bain bawi ijo tonohtah bosaioh ahkan dahpot labih aro anak, tahkanmba bawi ijo bolum umba bosaioh." 4:28 Konduang-konduang! Ihkam bongom anai rih anak-anak ain Pohotala ijo konanak tului bowot Pohotala; ihkam sama kolou Isaak. 4:29 Ang ohkot rih anak ijo konanak numbun konohuang kolunon, ngoporos anak ijo konanak kotului konohuang Roh Pohotala. Kodorih ka'a uhuntuh. 4:30 Tahpi inonrih ijo tonyurat luwang Surat Borasih? Ang anan tonyurat koloutuh: "Muhko jihpon bawi rih homboh anakoh, kobain anak tahkan jihpon bawi rih, eam ahkan monjadi ahli warih homboh anak tahkan bawi morodeka rih." 4:31 Jadi, Konduang-konduang; ihto tuh bohkonoh anak-anak tahkan ihcobehti jihpon bawi; tahpi ihto anai anak-anak tahkan bawi morodehka rih.
5:1 Ihto uhuntuh morodehka! Tului Kristus jari momorodehka ihto! Tului rih potahanohrih komorodehka'kam, tutang ara kani tonojihpon hino. 5:2 Ingat! Amat ihkam nyawot tunyunat orih rimai Kristus eam anai gunaioh bagi ihkam. Ijo nuhtui tuh, anai ahku bongok, Paulus. 5:3 Sino hino ahku nonga pongingat ahkan ulun ijo nyawot tonyunat, ijo io puna wajib molalus paring hukum agama! 5:4 Amat ihkam ngurahjalan hokopios umba Pohotala, nguha hukum agama orih rimai kohihco'kam umba Kristus jari pahtot. Honong kodorih ihkam bolum ang ruar barih tonganasin Pohotala. 5:5 Tahpi bagi ihkai, ihkai bokoharap, ijo honong pondohop Roh Pohotala tutang hogalang koporocayan ihkai umba Kristus, Pohotala touduonrih ahkan ihkai hokopios umba Io. 5:6 Kobain amat ihto ius hihco umba Kristus Yesus, hal numbun ata'ai eam numbun poroturan sunat, eam monjadi soal hino. Ijo boguna tihkasrih porocaya umba Kristus, tutang orih korinah aang kasih ihto umba ulun bohkon. 5:7 Lomoi ihkam hokolahi honong pios! Huntuh ombai ihkam eam te'et hino umba konohuang Pohotala? Iai jari mbujuk ihkam? 5:8 Musti ijo nguan rih, eamrih Pohotala ijo jari na'ah ihkam! 5:9 "Ragi ijo honjiot ahkan ngamir paring galapung." hion ulun. 5:10 Oluka kodorih ahku magun porocaya ijo ihkam eam nambit podirian bohkon, bain ihto jari ihco umba Kristus. Tutang ahku yahkin, ijo iai ka ijo nderoh tiruk'kam ahkan tonohukum Pohotala. 5:11 Tohou ahku, Konduang-konduang, ombai ahku toturus iou tongohiri, amat ahku magun mborihta ijo hukum sunat rih perulu? Amat ahku puna mborihta kolouorih, mahka pomborihtak'ku tohou sopolahki Kristus eam polombut persoalan. 5:12 Labih pios ulun-ulun ijo nderoh tiruk'kam rih langsung iou bolua sino tahkan ukup! 5:13 Konduang jari tona'ah, ahkan monjadi ulun ijo morodehka. Tahpi ara hapa komorodehka orih ahkan hototurus nguan inon iou ijo ihkam jolik nguai. Sobalikoh ihkam saling mongasih tutang saling mohalu. 5:14 Sohopus hukum agama, koloputai a'ang poretah ijo ihco tuh. "Hondakoh ihkam mongasih sama-sama ulun, kolou ihko ngasih arop'kam bongom." 5:15 Tahpi amat ihkam saling hokoramak, awas noin ihkam hombo-homboh lonyuh. 5:16 Kohondak koloutuh: Nauhoh Roh Pohotala niting ihkam tutang ara bolum numbun kojolik tobiat kolunon. 5:17 Tului kojolik kolunon hokolawan umba kojolik Roh Pohotala, tutang kojolik Roh Pohotala hokolawan umba kojolik kolunon. Kododuooh saling hokolawan, nyiring ihkam eam dahpot nguan inon ijo ihkam jolikoh. 5:18 Tahpi amat Roh Pohotala ijo niting ihkam, mahka ihkam eam tokowasa bain hukum agama. 5:19 Kojolik tobiat kolunon korinah ang karon-gawiu ijo kihal, ja'at tutang eam pahtut; 5:20 aang nyembah songiangdewa tutang koruhoi, a'ang bomusuh-musuh, hokolahi, hokobohu, jeleng bosingi, tutang kogunan aropoh bongoi; kopusit tutang bopihak-pihak, 5:21 hawui hiri ahtoi, bobusau, pesta borami-rami tutang ijo bohkonoh. Toharep paringoh orih, ahku mopingat ihkam, huntuh koloukuwoh ahku mopingat ihkam lomoi ka'a, ijo ulun-ulun ijo nguan hal-hal kolourih eam ahkan monjadi anak ukup Ain Pohotala. 5:22 Sobalikoh, amat ulun-ulun toniting bain Roh Pohotala, buaoh iorih: Iro saling hokasih, iro jorih, iro ngina koteneng ahtoi, iro sabar tutang hobudi, iro pios toharep ulun bohkon, iro te'et. 5:23 Iro randah ahtoi tutang sanggup ngowasa aropoh. Eam anai hukum agama ijo ngohana hal-hal kolourih. 5:24 Ulun-ulun ijo ius monjadi ain Kristus Yesus, ulun-ulun rih ius munu tobiat kolunoioh hawui kokaron bolai tutang kojolikoh. 5:25 Roh Pohotala ius nonga ahkan ihto pombolum ijo bohua; bain kotului rih Io ka'a harus mongowasa pombolum ihto. 5:26 Ihto eam tou monjadi bojuhu, tutang saling ngoporos ahtoi, honong hiri ahtoi ihco sama ijo-bohkon.
6:1 Konduang-konduang! Amat ihcobehti sombang nguan ihco dusa, hondakoh ihkam ijo bolum numbun Roh Pohotala, niting ulun rih buli nitoi jalan ijo morong. Tahpi ihkam harus nguan orih umba bolomu lembaiahtoi, tutang bojaga a'ai nyiring ihkam bongom taputtonihkos ka'a. 6:2 Hondakoh ihkam saling hokodohop ngohtun puat ulun bohkon ka'a mangat umba kolourih ihkam moneet poretah Kristus. 6:3 Amat ihcobehti ngohu aropoh boguna, podahal eam, ulun rih ngobalik aropoh bongoi. 6:4 Nyinong ulun harus moriksa bongoi inonrih hadatdasaroh rih pios ata'ai ja'at. Amat pios io tou komo tamam ngosan hal rih. Tahpi eam usah io monyamaoh umba inon ijo tonguan ulun bohkon. 6:5 Kotului nyino-nyinong ulun harus ngohtun puat aiu bongoi. 6:6 Ulun ijo norima ajar Kristus, hondakoh hobagi umba guruoh, paring ijo pios, ijo jari anai aang io. 6:7 A'ai konobalik. Pohotala eam duon tongonjea! Inon ijo tongombulan orih ka ijo ahkan tongohtom. 6:8 Amat ulun ngombulan numbun tobiat kolunoioh, io ahkan ngohtom popahtoi tahkan tobiatoh rih. Tahpi amat io ngumbulan numbun totiring Roh Pohotala, io ahkan ngohtom pombolum sojahti tutang kototahiu tahkan Roh Pohotala. 6:9 Kotului rih, ara ihto monjadi peda nguan hal-hal ijo pios; bain amat ihto eam tondo nguan hal-hal rih, sino jaha ihto ahkan ngohtom buaoh. 6:10 Jadi, kotahin anai kosapet bagi ihto, hondakrih ihto nguan ang pios ahkan paring ulun, mombahtang sino ahkan konduang-konduang ihto ijo hihco koporocaya. 6:11 Nontoani pio-pios bagian tuh, ijo ahku nyurat bongok umba hurup 'jo hajo-hajo. 6:12 Ulun-ulun ijo kani nyuhung aropoh umba hal-hal carakonanak, iro ijo bousaha, jojuan ihkam numbun poroturan sunat. Tahpi iro nguan rih baya mangat iro eam tonoporos ulun Yahudi bain kotului sopolahkin Kristus. 6:13 Ulun-ulun ijo nutut poroturan sunat ka eam molalus hukum agama. Tahpi iro kani ihkam tonyunat, mangat iro dahpot monamamoh, ijo ihkam te'et umba poroturan rih. 6:14 Tahpi ahku samasino eam kani monamam inon ka, bohkonumba Tuhan ihto Yesus Kristus ijo jari mahtoi tomahpak. Kobain orihrih, kotului Io jari mahtoi tomahpak mahka kolunon eam hino bororima ino-inon bagi'ku. Tutang toharep kolunon tuh, ahku ka'a kolo-kolou ius mahtoi. 6:15 Tonosunat ata'ai eam tonosunat, orih eam boguna. Ijo boguna io rih monjadi ulun bohua. 6:16 Bagi ulun-ulun ijo bolum umba tiruk rih, tutang kodorih ka'a bagi paring ukup ain Pohotala, ahku harap Pohotala ahkan nonga kosanang tutang ponongaasi-Oh. 6:17 Toturusoh, a'ai ihcobehti ka nyusah ahku hino, tului ang behtik'ku anai tanda-tanda ijo ahku murid Yesus. 6:18 Keleh Tuhan ihto Yesus Kristus hototurus mborehkat Konduang-konduang. Amen. Horomat ihkai, Paulus
1:1 Ukup Pohotala ang Epesus, ijo bokehtep umba Kristus Yesus! 1:2 Ahku, Paulus, rasul Kristus Yesus ngosan kohondak Pohotala, moharap, keleh Pohotala, Amai ihto tutang Tuhan Yesus Kristus nonga borehkat tutang kosanang ahkan ihkam. 1:3 Tara ahkan Pohotala, Amai Tuhan ihto Yesus Kristus! Io mborehkat ihto umba kokaron borehkat rohani ang luwang soruga, tului ihto hihco umba Kristus. 1:4 Sounumba kolunon tuh tona'oi, Pohotala ius mitih ihto nguha Kristus umba maksud, mangat ihto monjadi ulun-Aiu-Oh ijo khusus, tutang eam cahcat ang toharep-Oh. Tului sitan Pohotala, 1:5 mahka Io ius ngahtuh labih sounlomoi ijo nguha Yesus Kristus, Io ahkan potuot ihto monjadi anak-anak Aiu bongoi. Tutang puna orih rih ijo jolik tononguai-Oh. 1:6 Tonotararih ahkan Pohotala ijo Hajo, kotului nguha Anak-Oh ijo tongasih Io paham ngasih ihto. 1:7 Tului, bain popahtoi Kristus, ihto tomorodehka bain Pohotala, rimai Io jari ngapun ihto tahkan dusa-dusan ihto. 1:8 Io nguan orih tului Io paham ngasih ihto, tutang asiu rih tonosorah-Oh ahkan ihto, honong tuwi kopitar tutang kohorahti. 1:9 Numbun konohuang-Oh bongoi, Pohotala ngorinah ahkan ihto rahasia rancana-Oh; Io ius momuhtusoh ijo rancana-Oh rih ahkan tongopahoh nguha Kristus. 1:10 Rancana orih, iorih, mangat kokaron angihco, pios ijo ang soruga, oluka ijo ang tana, monjadi ihco umba Kristus kolou kopala. Tutang hal orihrih ahkan tonongopah bain Pohotala amat ius johcok ohkotoh. 1:11 Pohotala monguan kokaron aangihco, numbun kojolik-Oh tutang kopuhtusai-Oh bongoi. Tahkan pahtuk Io jari mitih ihto, tului Io jolik mangat ihto monjadi ukup-Oh kotului hihco umba Kristus. 1:12 Nauhoh ihto, ijo pahtu-pahtukoh bokoharap umba Kristus, monara Pohotala tului kohajoi-Oh! 1:13 Ihkam ka ius monjadi ukup Pohotala ang ohkot ihkam ngonih pohtoh Pohotala, iorih Kabar Hinut ijo mononga kosolamatan ahkan'kam. Ihkam porocaya umba Yesus Kristus, kotului orih Pohotala nonga tanda Aiu-Oh ahkan'kam, iorih Roh-Oh ijo tonobowot-Oh. 1:14 Roh orihrih njaminoh ijo ihto ahkan norima inon ijo jari tonobowot Pohotala ahkan ukup-Oh. Tuh nonga koyakinan ahkan ihto ijo Pohotala ahkan momorodehka ukup-Oh. Tonotararih Pohotala kotului kohajoi-Oh! 1:15 Tului rih, tahkan ahku ngonih ijo ihkam porocaya umba Tuhan Yesus, tutang ihkam ngasih paring ukup Pohotala, 1:16 ahku eam pahtot-pahtotoh botorimakasih ahkan Pohotala tohou ihkam. Toturus ahku ngohawot aran ihkam ang ohkot ahku bodo'a. 1:17 Ahku nyawot mangat Pohotala, Tuhan ihto Yesus Kristus, Amai ijo tonohoromat nonga Roh-Oh ahkan'kam. Roh orih ahkan monjadian ihkam pitar, tutang ahkan mongorinah Pohotala ahkan'kam, nyiring ihkam ngosono Io. 1:18 Ahku nyawot mangat Pohotala nguap tiruk'kam nyiring monjadi boloang; mangat ihkam horahti inon ijo ihkam dahpot harapoh tahkan Pohotala ijo na'ah ihkam. Ka'a mangat ihkam ta'an eaminon botusuh borehkat-borehkat ijo bohinoi ijo tonahtap Pohotala ahkan ukup-Oh, 1:19 tutang eaminon kohebatoh Pohotala bogawi homboh kotuwi kowasa ang luwang ihto ijo porocaya. Kowasan Pohotala rih, sama kolou kowasa luar biasa, 1:20 ijo tohapa-Oh kotihka mombolumoh hoduli Kristus tahkan popahtoi tutang nonga ahkai-Oh ponuot pongoisung hihco umba Pohotala ang soruga. 1:21 Ponuot Kristus rih mahco labih isungoh tahkanumba ponuot kokaron pomoretah, kokaron kowasa, kokaron okon, kokaron tuan-tuan tutang iai ka ka'a jari tononga ponuot isung; pios ijo bolum ang jaman tuh, oluka ijo bolum ang jaman ijo ahkan lombut. 1:22 Pohotala mopopinda paringoh ahkan pinda kowasan Kristus, tutang nonga Kristus ahkan ukup, kolou kopala tahkan kokaron aangihco. 1:23 Ukup anai behtin Kristus, tonyoporuna bain Io ijo nyoporuna kokaron aangco ang amoh ka ka'a.
2:1 Lomoi ihkam mahtoi socara rohani tului ihkam bodusa tutang noturung poretah-poretah Pohotala. 2:2 Ang ohkot rih ihkam nutut tobiat-tobiat kolunon tuh; rimai ihkam te'et umba kowasa ang pinda langit, iorih roh ijo huntuh mongowasa ahtoi, ulun-ulun ijo eam te'et umba Pohotala. 2:3 Lomoi ihto paringoh sama ka'a umba iro; ihto bolum numbun tobiat kolunon ihto, tutang nguan inon ijo monyanang behti tutang tiruk ihto. Ang ohkot rih ihto anairih ulun-ulun ijo kona kosangit Pohotala ka'a, sama kolou ulun-ulun bohkon. 2:4 Tahpi eaminon kohajoi kolomun ahtoi Pohotala! Io kodorih ngasi ihto, 2:5 nyiring ang ohkot ihto magun mahtoi socara rohani kotului koturung-koturung ihto, Io mombolum ihto hoduli hombo-homboh umba Kristus. Jadi tihkasrih kotului kopiosoh ahtoi Pohotala, ihkam tonyolamat kobaiu-Oh. 2:6 Kotului ihto hihco umba Kristus Yesus, Pohotala ngomonyun ihto hoduli hombo-homboh Io, mangat ihto moretah ka'a hombo-homboh Io ang luwang soruga. 2:7 Pohotala nguan orih, mangat aang jaman ijo ahkan lombut kolunon dahpot nopahjah eaminon kohajoioh asin Pohotala. Asiu rih tongorinah Pohotala, nguha kohinut ahtoi-Oh ahkan ihto, umba poholat Kristus Yesus. 2:8-9 Pohotala mongasih ihkam, orih kotuluioh Io kani nyolamat ihkam, kotului ihkam porocaya umba Yesus. Kosolamat ihkam rih, eam tahkan bua usaha'kam bongom. Orih anairih ponongan Pohotala. Jadi, eam aro ihcobehti ka ijo dahpot mopojuhu aropoh tohou hal orih. 2:10 Ihto anairih tona'oi Pohotala, tutang nguha Kristus Yesus, Pohotala napa ihto, mangat ihto nguan hal-hal ijo hinut ijo jari tonahtap baiu-Oh ahkan ihto. 2:11 Konduang-konduang ijo bohkon ulun Yahudi! Ingatrih pombolum'kam aang ohkot lomoi. Ihkam konohawot "ulun eam bosunat", bain ulun Yahudi ijo ngahku arop tonosunat (maksudoh ijo ius ngondahpot tanda ijo tonapa ulun ang behtin iro). 2:12 Aang ohkot rih ihkam eam hihco umba Kristus; ihkam anairih ulun bohkonuhtus, ijo eam tosolong ukupjolahan konopili Pohotala. Ihkam eam nyolong a'ang pohtong bowot ijo tonapa Pohotala umba ukup-Oh. Ihkam bolum luwang kolunon tuh, eamanai harapan tutang eamanai Pohotala. 2:13 Tahpi huntuh, kotului ihkam jari hihco umba Kristus Yesus, ihkam ijo lomoi mahcu, jari nokondoni bain popahtoi Kristus. 2:14 Kotului Kristus bongoi anai pongobuah ihto. Io mompohihco ulun-ulun Yahudi tutang ulun-ulun bohkon Yahudi, monjadi ihco uhtus. Dinding pomisah, holat iro, iorih komusuh, jari tongolonyuh bain Kristus honong nyorah arop-Oh bongoi. 2:15 Hukum agama Yahudi hawui poretah-poretah tutang aturan-aturan-Oh jari tongudap bain Kristus, mangat duo uhtus rih monjadi ihco uhtus kolunon bohua, ijo hihco umba Io. Umba cara orihrih Kristus ngonjorian kobuah. 2:16 Kobain popahtoi-Oh ang sopolahki, Kristus mopohihco duo uhtus rih, tutang ngobuah iro umba Pohotala, nyiring dilaprih komusuh rih. 2:17 Orih kobainoh Kristus lombut ahkan mborihta Kabar Hinut tohou kobuah rih ahkan'kam; pios ahkan ihkam ulun bohkon Yahudi ijo lomoi mahcu umba Pohotala, oluka ahkan ulun Yahudi ijo doni umba Pohotala. 2:18 Umba poholat Kristus ihto paring -- pios ulun Yahudi, oluka ulun bohkon Yahudi -- kobain Roh Pohotala ijo ihco, dahpot ngondoni Amai. 2:19 Kobain orih, ihkam eam hino barih ulun bohkonuhtus ata'ai ulun luar. Ihkam huntuh anairih sama-sama uhtus ukup ain Pohotala. Ihkam anairih anak-anak jolahan Pohotala. 2:20 Ihkam ka tonombok ang ngosan galang, ijo tongina bain rasul-rasul tutang nabi-nabi, hawui Kristus Yesus kolou bahtu ijo mombahtang. 2:21 Iorih ijo nyusun sohopus pangun orih monjadi Lohpou Pohotala ijo khusus ahkan Tuhan. 2:22 Tului bolum hihco umba Kristus, ihkam ka'a rahat topangun, homboh ulun-ulun bohkon monjadi ihco kobawak lohpou ahkan Pohotala; ang anan Pohotala mohcon umba Roh Aiu.
3:1 Orih kobainoh ahku, Paulus, tonyihpir kotului Kristus Yesus ahkan gunan ihkam ijo bohkon Yahudi. 3:2 Botatu ihkam jari ngonih ijo Pohotala, tului kohinut ahtoi-Oh ius nonga ahkak'ku gawi tuh demi gunan'kam. 3:3 Pohotala ngorinah rahasia rancana-Oh tutang mborihta orihrih ahkak'ku. (Tohou hal tuh jari ahku nyuratoh ang diang honong iwak, 3:4 tutang amat ihkam mombasaoh, ihkam ahkan ngumang rahasia tohou Kristus kolou ahku ngumangoh.) 3:5 Lomoi rahasia orih eam pu'u tomborihta ahkan ulun, tahpi huntuh Roh Pohotala ius ngorinahohrih ahkan rasul-rasuloh tutang nabi-nabi-Oh. 3:6 Rahasia rih, iorih tuh: Nguha Kabar Hinut rih, ulun bohkon Yahudi umba nginyam borehkat-borehkat Pohotala, ijo lomoi tonahtap tihkas ahkan ulun Yahudi. Ulun-ulun bohkon Yahudi jari monjadi ramu tahkan behti ijo sama, tutang umba norima inon ijo tonobowot Pohotala nguha Kristus Yesus. 3:7 Pohotala nonga ahkak'ku pononga -- iotuh gawi -- ahkan mborihta Kabar Hinut rih. Ahku norima pononga rih nguha kowasan Pohotala ijo bogawi ang luwang arop'ku. 3:8 Ang louk paring ukup Pohotala, ahkurih ijo paling hina. Tahpi Pohotala nonga ahkak'ku pononga tuh, gawi ahkan mborihta ahkan ulun-ulun bohkon Yahudi, Kabar Hinut tohou kotahtou Kristus ijo eam anai koopahoh; 3:9 tutang ka'a mangat nguha ahku paring ulun taan, koloukuwoh Pohotala, Pona'oi aangpindalangit tuh, molalus rancana-Oh ijo tahkan hounlomoi tonosuhuk ahkan kolunon. 3:10 Maksud Pohotala iorih, mangat huntuh, nguha ukup, paring ijo nambit kokuwasa'an ang pindalangit ngota'an kopihtaran Pohotala, a'ang dolang mahcam tapaioh. 3:11 Pohotala nguan rih tohorong umba rancana-Oh ijo kototahiu, ijo tononguai-Oh hawui nguha Kristus Yesus Tuhan ihto. 3:12 Honong porocaya umba Kristus tutang kotului hihco umba Io, ihto tononga komorodehka ahkan ngondoni Pohotala honong tuwi koporocayaan. 3:13 Kobain rih sawot'ku iorih; a'ai mihkoh tohou inon ijo ahku ngarot tului ihkam, bain paringoh rih anairih ahkan kopios'kam. 3:14 Bain kotului orihrih ahku suhkuntu'ut ang toharep Amai. 3:15 Tahkan Iorih nyinong jolahan ang soruga tutang ang tana norima sipat-Oh ijo khusus. 3:16 Ahku bodo'a keleh Pohotala ijo tonohoromat jorih ahkan ngomba'as homboruan'mu umba Roh Aiu. 3:17 Keleh kotului ihkam porocaya umba Kristus, Kristus mohcon ang luwang ahtoi'kam tutang pombolum'kam hogalang tutang konowasa kobain kasih. 3:18 Ahku bodo'a keleh hombo-homboh umba paring ukup Pohotala, ihkam dahpot nosotoh, eaminon kolombahoh, tutang kombuioh hawoi isungoh, tutang kotimboioh sitan Kristus, 3:19 ijo umba akal kolunon eam duon tongumang sotimbon-timbon-Oh. Keleh ihkam kosono sitan Kristus rih, nyiring ihkam tuwi umba pombolum Pohotala ijo soporuna. 3:20 Umba kowasan Pohotala ijo giat bogawi ang luwang arop ihto. Pohotala dahpot nguan mahcu labih aro, tahkan inon ijo dahpot ihto nyawot ata'ai nirukoh. 3:21 Hondakoh Pohotala tonohoromat turun tomurun ang luwang ukup, nguha Kristus Yesus. Tararih ahkan Pohotala turus-jahamoh. Amen.
4:1 Bain orih ahku -- ihcobehti tonahan, ijo tonahan kotului mohalu Tuhan -- nyawot hawui paham umba'kam; bolum sorurui umba ponuot'mu, kolou ulun ijo ius tona'ah bain Pohotala. 4:2 Hondakrih ihkam turus randah ahtoi, bolomu-lembai, tutang sabar. Ngorinahohrih asin'kam, honong hokodohop ihco umba ijo bohkon. 4:3 Bousaha tu'u-tu'u ahkan bolum honong kobuah, mangat kohihco ijo tona'oi bain Roh Pohotala tohtap tonojaga. 4:4 Tihkas anai ihco bereng tutang ihco Roh. Kodorih ka'a ihkam, tona'ah ahkan ihco koharap ijo sama. 4:5 Tihkas anai ihco Tuhan, ihco koporocaya, ihco pompandus, 4:6 tutang ihco Pohotala ijo monjadi Amai paring ulun. Iorih Tuhan ang-pinda langit, ijo bogawi nguha paringoh, tutang bokowasa ang luwang paringoh. 4:7 Ihto nyino-nyinong norima ihco pononga, numbun inon ijo tononga bain Kristus. 4:8 Ang Surat Borasih tonyurat, "Kotihka Io nuhkat nokuh unuk ijo diang, Io ngomin aro towanan tutang Io nonga karon-pononga ahkan kolunon." 4:9 Nah, amat konohawot "Io nuhkat" rimai Io pahtukoh jari nosuluh johcok nokuh unuk ijo paling pinda ang tana tuh. 4:10 Tutang Io ijo jari nosuluh rih, Iorih ka'a ijo nuhkat johcok nokuh unuk ijo mahcu labih diang, tahkan kokaron langit nyiring sohopus pinda langit bosuang umba koanaipolombut-Oh. 4:11 Iorih ijo "nonga pononga-pononga ahkan kolunon"; 'cokobarih tonuot-Oh monjadi rasul, ijo bohkon monjadi nabi, ijo bohkon hino monjadi pomborihta Kabar Hinut rih, tutang ijo bohkon hino tonuot-Oh monjadi guru-guru tutang pohaga ukup. 4:12 Tuh tononguai-Oh mangat ukup Pohotala tonyukup paringoh mangat dahpot mohalu Tuhan, tutang mangun bereng Kristus. 4:13 Honong kodorih ihto paringoh monjadi ihco, bain koporocaya ijo sama, tutang kohorahti ijo sama tohou Anak Pohotala. Tutang ihto monjadi ulun-ulun ijo dewasa, ijo mahi tahi mahi botambah kosoporuna kolou Kristus. 4:14 Mahka ihto eam monjadi anak-inyam hino ijo kuhtang-kitui tutang hanyu-hanyut konomin ko-anan-ko-ohtoi bain rohusan mahca-mahcam ajar tahkan ulun-ulun ijo lihcik. Iro nyosat ulun umba tihpu muslihat iro. 4:15 Eam! Sobalikoh ihto harus ngorinah hal-hal ijo morong, umba ahtoi ijo tuwi pongasih, nyiring a'ang kokaro hal ihto mahi tahi mahi monjadi soporuna, kolou Kristus, ijo monjadi kopala ihto. 4:16 Ang pinda totiring-Oh paring ramun behtiu rih tosusun rahpi, tutang saling hotutung bain sambung-sahpanoh nyinong-nyinong. Tutang amat nyino-nyinong ramunbehtiu rih bogawi kolou ijo koharusoh, mahka sohopus behtiu rih ahkan tumbu monjadi dewasa tutang ba'as nguha kasih. 4:17 Kotului rih demi aran Tuhan, tuhrih ijo ahkan ahku nuhtui tutang tegas; ara hino bolum kolou ulun-ulun ijo eam kosono Pohotala, tutang niruk ijo eam-eam. 4:18 Tiruk iro jari pindong. Iro eam ngosono pombolum ijo tononga bain Pohotala, tului iro samasino eam anaingina pongotaan ino-inon tohou Pohotala. Iro kodorih, tului mahang kuhungoh. 4:19 Iro jari eam anaingina anyam mia hino, nyiring iro nutut kokaron kojolik bolai tutang, bolum ngihal sokohondak ahtoioh. 4:20 Tahpi Kristus Yesus ijo ihkam kosono eam kodorih! 4:21 Ihkam ius ngonih tohou Io! Tutang kolou murid-murid-Oh, ihkam jari tonongajar ka'a tohou sipat-sipat Pohotala ijo anai aang Io! 4:22 Kotului orih molokakohrih ko-ulun hounumba pola pombolum lomoi, ijo rahat tonorusak bain kojolik-kojolikoh ijo monyosat. 4:23 Kohondakrih ahtoi tutang tiruk'kam tobahua koparingoh. 4:24 Kohondakrih ihkam bolum kolou kolunon bohua ijo tona'oi numbun pola Pohotala; iorih umba tobiat ijo morong, bujur tutang borasih. 4:25 Tului orih Konduang-konduang paringoh, ara hino bobalik. Nguanrih kobujur, ijo ihco umba ijo bohkonoh, kobain ihto paringoh anairih sama-sama ramun behtin Kristus. 4:26 Amat ihkam sangit, ararih mohonou kosangit rih, kotuluioh ihkam bodusa. A'airih bosingi sohopus ondou, 4:27 mangat sehtan a'ai dahpot kosapetoh. 4:28 Ulun ijo biasa nahkou harus tondo nahkou. Sobalik io harus bogawi mangat ngonduon bolanjaoh honong bujur tutang duon dohop ulun ijo bokotahpas. 4:29 Amat ihkam pander ara hapa tuhtui-tuhtui ijo ja'at. Hapa iourih tuhtui-tuhtui ijo majar tutang nonga pondohop ahkan ulun bohkon. Tuhtui-tuhtui kolourih ahkan mompolombut komorong ahkan ulun-ulun ijo ngonihoh. 4:30 A'airih monyedihoh ahtoi Roh Pohotala. Ihkam jari tonyegel umba Roh monjadi ain Pohotala. Roh rih ka'a monjadi jaminan, ijo Ondou Komorodehka ahkan lombut ahkan'kam. 4:31 Dianohrih karon anyam koporos ahtoi, dondam tutang kosingi. A'ai hino bokociak-ciak tutang mongajea-jea. Ara hino anai anyam hiri ata'ai anyam bohkon ijo sama mahcam orih. 4:32 Sobalikoh, pios ihkam hinut ahtoi tutang tuwi sita-asi 'cobehti toharep ijo bohkon, tutang saling ngapun kolou Pohotala jari ngapun ihkam nguha Kristus.
5:1 Ihkam anairih anak-anak Pohotala ijo tonokasih-Oh, kobain orih ihkam harus ngurahjalan monutut sutu Pohotala. 5:2 Pombolum'kam kohondakoh bohomboruan bain kasih, kolou Kristus ka ngasih ihto. Io moporahpah arop-Oh ahkan ihto, kolou ihco pononga ijo buanharum tutang monyanang ahtoi Pohotala. 5:3 Ihkam anairih ukup ain Pohotala. Kobainrih gawi-gawi ijo kihal, tutang ijo eam sanonoh, ata'ai ka kokuhurih ijo eam pahtut anai, ang tohun-tohun'kam. Ara nyiring ulun bohkon anaingina alasan ahkan nuhtui ijo ihkam nguan hal-hal kolourih. 5:4 Eam ka'a pahtut ahkan'mu ngohawot tuhtui-tuhtui ijo kojilok, ijo kihal, tutang ijo eam pantas. Sobalikoh hondakrih ihkam ngohawot torimakasih ahkan Pohotala. 5:5 Nohtoani pio-pios; ulun ijo hadatdasar kihal, ata'ai eam sanonoh, ata'ai bokuhu, (hadatdasar kodorih sama iou umba nyembah dewa) ulun rih eam tou monjadi anak ukup ijo tomoretah bain Kristus tutang Pohotala. 5:6 Ara ihkam tonihpu bain pander-pander ijo buang. Kobain hal-hal atuh, ijo polombut kosangit Pohotala, toharep ulun-ulun ijo eam te'et umba Io. 5:7 Jadi, ara ihkam hojelut samasino umba ulun-ulun kolourih. 5:8 Ihkam bongom lomoi anai ang luwang kopindong. Huntuh ihkam jari monjadi ukup Tuhan, jadi ihkam anai ang luwang koloang. Bain kotului rih ihkam harus bolum ang luwang koloang rih. 5:9 Kobain tahkan koloang rih, lombut karon mahcam angkonuan ijo hinut, bujur tutang tehtek aang topahjah Pohotala. 5:10 Ngurahjalan ngosono, inon ijo ngojorih ahtoi Tuhan. 5:11 A'ai nguan gawi-gawi ijo eam boguna ijo tonguan kobain ulun-ulun ijo bolum ang kopindong. Tobalikoh, hondakrih ihkam momburang hal-hal mahcam orih. 5:12 (Kobain hal-hal ijo iro nguai hawui benye-benyem rih,ahkan tomander ka jari komia.) 5:13 Paring angihco ijo tonyingah luwang koloang, ahkan tonopahjah honong korinah. 5:14 Bain paring ijo dahpot tonopahjah hawui torang, anairih koloang. Orih kotuluioh tonuhtui, "Monyun O ihko ijo ngarok, tutang kuat tahkan popahtoi! Kristus ahkan mopoloang ngosan'kam." 5:15 Tului orih nohtoanioh pio-pios cara pombolum'mu. A'ai bolum kolou ulun-ulun uong; bolum iou kolou ulun-ulun pihtar. 5:16 Ngunaohrih sopios-pios nyinong kosapet ijo anai ang ihko, tului huntuh puna kotihka ihco ja'at. 5:17 A'ai uong, tahpi nolihti inon ijo tongohondak Tuhan. 5:18 Ara ihkam busou bain anggur, kobain rih ahkan morusak ihkam. Sobalikoh, hondakrih ihkam konowasa bain Roh Pohotala. 5:19 Hapa tuhtui-tuhtui tahkan Masmur, monyanyi karon-tara tutang lagu rohani a'ang pander-pander'mu. Hondakrih ihkam hawui ahtoi ijo jorih monyanyi karon-tara ahkan Tuhan. 5:20 Toturus tutang tohou inon ka ka'a, pios ihkam ngohawot torimakasih ahkan Pohotala, Amai, ngosan aran Yesus Kristus Tuhan ihto. 5:21 Ahkan mohoromat Kristus pios ihkam tunduk ihco umba ijo bohkon. 5:22 Oruh, mindarih umba bosai'mu kolou umba Tuhan. 5:23 Kotului bosai anai kopala, ngosan oruhoh, sama kolou Kristus monjadi kopala ngosan ukup tutang Io bongoi ka'a Lahca Ponyolamat bagi ukup, ijo monjadi bereng Aiu. 5:24 Sama kolou ukup ka'a tunduk umba auh Kristus kodorih ka'a aang kokaron hal oruh harus tunduk ahkan bosaioh. 5:25 Bosai, ngasih oruh'mu, sama kolou Kristus ngasih ukup hawoi nyarah arop-Oh ahkan ukuprih. 5:26 Kristus nguanohrih, mangat Io duon moporasih ukup rih, umba ajar-Oh tutang nguha danum popondus, mangat pongohuli Io dahpot monyarah-Oh ahkan Pohotala. 5:27 Honong kolourih Kristus nguan ukup rih tombok hawui ponohajo tutang borasih ang husuk-Oh, earo cahcat ata'ai sala inon ka. 5:28 Kodorih ka'a bosai harus sita oruhoh kolou io sita aropoh bongoi. 5:29 (Eam pu'u anai ulun ijo bosingi umba behtin Aiu bongoi.Sobalikoh io mohaga tutang monjagaoh kolou Kristus ka'a mohaga ukup-Oh. 5:30 Ito kota'an rih, tului ihto anai ramun-ramun behtin Kristus.) 5:31 Luwang Surat Borasih tonyurat, "Bain orih ulunbahkas ahkan nohtah amai-inaioh ahkan hihco umba oruhoh, tutang kododuooh ahkan monjadi ihco." 5:32 Ayat jorih bosuang rimai ijo timbon. Tutang ahku ngaitoh rih umba tutungoh, holat Kristus tutang ukup. 5:33 Tahpi ayat orih rih anai hosambungoh ka'a umba ihkam: Kohondakrih nyinong bosai ngasih oruhoh, kolou io ngasih aropoh bongoi, tutang kohondakrih nyinong oruh bousaha ahkan mohoromat bosaioh.
6:1 Anak-anak! Kolou murid ain Kristus, tee-te'et umba ulun oko'kam, tului orihrih ijo pahtut nguaioh. 6:2 "Horomat rih amai'mu, tutang inai'mu," anairih poretah 'jo pahtukoh tahkan Pohotala hawui bowot, 6:3 yorih: "Mangat ihko sanang tutang ombu umur'kam ang tana". 6:4 Konduang-konduang ijo monjadi amai! Ara monguan anak-anak'mu numbunorih kolou, nyiring iro monjadi bosingi. Sobalikoh mompohajo iro umba tata-tertib tutang ajaran Tuhan. 6:5 Konduang-konduang ijo monjadi jihpon! Numbunrih poretah tepun'kam ijo ang kolunon tuh. Nguan orih orih umba nanyam horomat tutang ponumbun hawui umba tu'u-tu'u, koloujahka ihkam nguai orih ahkan Kristus bongoi. 6:6 A'ai nguan angkodorih tihkas ang ohkot ihkam tonopahjah, tihkas ahkan dahpot tara tahkan ulun. Tahpi hondakrih ihkam nguaioh, kolou jihpon Kristus ijo rahat numbun kohondak Pohotala honong kotuwi ahtoi. 6:7 Gawi ijo ihkam nguai kolou jihpon rih, hondakrih ihkam nguai umba ahtoi ijo jorih, kolou jahka Tuhan ijo ihkam mohaluoh, tutang eam baya ulun iou. 6:8 Ingatrih ijo nyinong ulun, pios jihpon, kanika ulun morodehka, ahkan norima balosoh tahkan Tuhan, ahkan hal-hal pios ijo konuaioh. 6:9 Konduang-konduang ijo monjadi Tepui! Hondakrih ihkam nguan kodorih ka'a toharep jihpon-jihpon'kam. A'ai hino hapa ngancam-mongancam. Ingat ijo ihkam tutang jihpon-jihpon'kam rih sama-sama anaingina ihco tuan, iorih Tuhan ijo ang soruga. Io eam nopahjah baui. 6:10 Laiuoh ihkam pios monjadi ba'as, umba koba'as ijo ihkam dahpot tahkan kowasa Tuhan, tului ihkam hihco umba Io. 6:11 Hapanih paring pokahkas ijo tononga bain Pohotala ahkan'kam, mangat ihkam dahpot tahan molawan siasat-siasat bokolilit ijo paham tahkan Sehtan. 6:12 Tului ihto hokolahi eamoh molawan kolunon, molekan molawan koba'as kokaro sehtan-sehtan ijo ngowasa jaman ijo ja'at tuh. Ihto molawan koba'as roh-roh ja'at ijo bokowasa ang pinda langit. 6:13 Tului orih, huntuh, hapanih koparing pokahkas ain Pohotala, mangat aang ondou ijo ja'at, ihkam sanggup molawan sorangan-sorangan musuh. Tutang mangat uli ihkam hokolahi johcok laiuoh, ihkam magun ba'as meteng. 6:14 Hondakrih ihkam tahtap bojaga. Hapa kokehtep umba Pohotala, monjadi pohtong kahang'kam, tutang kotulus-ahtoi kolou baju sanaman'kam. 6:15 Hondakrih korelaan ahkan mborihta Kabar Hinut ijo ngomin kosanang monjadi soruhpah'kam. 6:16 Nyinong ohkot haparih koporocaya'kam umba Tuhan, kolou sonjata pokila; umba koporocaya rih ihkam dahpot mbolop paring anak panah baho tahkan 'jo ja'at. 6:17 Ominrih kosolamatan orih monjadi koluhkup baja, tutang tuhtui Pohotala kolou padang tahkan Roh Pohotala. 6:18 Nguanohrih paringoh rih sambil bodo'a ahkan nyawot pondohop tahkan Pohotala. Aang nyinong kosapet, bodo'a toturus koloukuwoh Roh Pohotala niting ihkam. Hondakrih ihkam toturus bojaga tutang ara monyorah. Bodo'a toturus ahkan paring ukup Pohotala. 6:19 Tutang bodo'a ka'a ahkak'ku mangat ang ohkot ahku mborihta, Pohotala nonga ahkak'ku tuhtui-tuhtui ijo kona. Tutang mangat ahku honong bohanyi dahpot mborihta rahasia Kabar Hinut rih. 6:20 Tului Kabar Hinut rih, ahku monjadi ihcobehti duta, tutang huntuh anai ang luwang sipir. Bodo'arih mangat ahku bahanyi mander tohou Kabar Hinut rih, koloukuwoh ahku harus manderoh. 6:21 Tikhikus, konduang ihto, tutang pohalu ijo te'et a'ang gawin Tuhan, ahkan mborihta ahkan'kam, kokaro angihco tohou ahku, mangat ihkam kota'an koada'ak'ku tutang gawik'ku. 6:22 Orihrih kotuluioh ahku nyuhu io nakuh ihkam, ahkan nyorihta koada'an ihkai, ahkan'kam paringoh, mangat mopohajo ahtoi'kam. 6:23 Keleh Pohotala, Amai, Tutang Tuhan Yesus Kristus, duontou paring ukup ahkan hihco, tutang saling hosita hawui porocaya umba Kristus. 6:24 Keleh Pohotala mborehkat Konduang paring, ijo sita Tuhan ihto Yesus Kristus honong asiu ijo eam dahpot bolop. Horomat ihkai, Paulus
1:1 Konduang-konduang ukup Pohotala, paringoh ijo mohcon ang Pilipi, tutang ijo jari hihco umba Kristus Yesus. Ka'a Konduang-konduang okon hawui pondohop ukup! Ahku, Paulus tutang Timoteus karon-jihpon Kristus Yesus, 1:2 bokoharap, keleh Pohotala, Amai ihto, tutang Tuhan Yesus Kristus, nonga borehkat tutang kosanang ahkan ihkam. 1:3 Nyinong tikat ahku ingat umba ihkam, ahku ngohawot torimakasih ahkan Pohotala. 1:4 Tutang nyinong tikat ahku bodo'a ahkan Konduang paringoh, ahku bodo'a honong sanang ahtoi. 1:5 Ahku botorimakasih ahkan Pohotala kotului tahkan ondou pahtukoh nyiring huntuh, ihkam jari dohop ahku mborihta Kabar Hinut tahkan Pohotala. 1:6 Pohotala bongoi ijo monopara gawi ijo pios rih aang'kam. Tutang ahku yahkin Io ahkan noturus karon gawi orih rih nyiring tondo aang Ondou Kristus Yesus lombut hoduli. 1:7 Puna aang unukoh ahku anai mokomo kolourih toharep ihkam, tului Konduang paringoh toturus doni ang ahtoi'ku. Ka'a bain ihkam umba norima hombo-homboh ahku, pononga ijo Pohotala nonga ahkak'ku, pios huntuh tuh pondehan ahku ang luwang sipir oluka ang ohkot ahku anai ang luar, ahkan mbela tutang tehen nyaksi Kabar Hinut rih. 1:8 Pohotala kota'an ijo ahku tu'u-tu'u rindu sino umba'kam, umba nanyam kasih-mesra tahkan Kristus Yesus bongoi. 1:9 Tuhrih do'a'ku ahkan ihkam; keleh ihkam mahi-mahi monyita Pohotala tutang hawuiarop tutang turus ndahang timbon pongotaan ijo morong tutang topahjah ijo kopihtar. 1:10 Honong kolourih ihkam ta'an mitih inon ijo kopiosoh, tutang pombolum'kam borasih tahkan cela'an, ata'ai dawa'an inon ka, ka'a ang ondou Kristus lombut hoduli. 1:11 Pombolum'kam ahkan momurai umba karogawi ijo tu'u-tu'u pios, ijo baya dahpot tomutik bain Yesus Kristus bongoi; mahka Pohotala ahkan tonohajo tutang tohonara-nara. 1:12 Ahku kani ihkam ngota'an, ijo hal-hal ijo ius nyolung aang ahku, justru kotuluioh labih aro ulun ngonih tutang porocaya ahkan Kabar Hinut rih. 1:13 Kojodiaioh, paring ponjaga istana tutang ulun-ulun bohkonoh, ang lowu tuh ngota'an, ijo ahku tonohukum tului ahku mohalu Kristus. 1:14 Tutang konohukum'ku, jari kotuluioh, arotu'u tahkan ulun-ulun Kristen ang lowu tuh, monjadi labih yahkin hino ahkan Tuhan, nyiring iro mahi bohanyi mborihtaoh pohtoh Pohotala honong eam aro mihko-mihkoh. 1:15 Puna anai pira-pira ang parak iro ijo mborihta Kristus tului hiri ahtoi, tutang kani hojawab, tahpi ijo bohkon mborihta Kristus, tului anai maksud ijo hinut. 1:16 Ulun-ulun tuh molalusoh tului iro mongasih Pohotala tutang ahku, bain iro ngota'an ijo Pohotala jari nyuhu ahku ahkan mongo ngorinah, ijo Kabar Hinut rih morong. 1:17 Tahpi ulun bohkon mborihta Kristus umba maksud ijo eam pios; iro mborihtaoh ahkan gunan aiubongoi. Umba orih iro, boharep dahpot nguan ahku labih susah ang luwang sipir. 1:18 Tahpi eam ombai! Kotului koloukuwohka ka'a, pios orih tonguan hawui maksud ijo borasih, oluka umba maksud ijo sala, tuh Kristus ijo tomborihta ka'a; jadi ahku sanang iou. Tutang ahku tahtap anyam kolouorih, 1:19 bain ahku ta'an ijo umba do'a-do'a'kam, tutang pondohop tahkan Roh Yesus Kristus, ahku ahkan tomorodehka. 1:20 Ijo ahku paham jolik tutang harapoh, iorih mangat ara sasino-sino ahku gagal a'ang tugas'ku. Sabalikoh ahku bokoharap mangat nyinong wayah, ijo mombahtang sino huntuh, ahku honong sikap bohanyi, nyiring hopus homboruak behtik'ku -- pios ahku bolum ata'ai ahku mahtoi -- Kristus tonohajo. 1:21 Tului ahkak'ku, tihtun pombolum aik'ku tihkas Kristus! Tutang mahtoi rimaioh utung. 1:22 Tahpi amat umba pombolum ang kolunon tuh, ahku dahpot nguan gawi ijo labih boguna, mahka ahku eam ta'an, amoh ijo harus ahku mihtih. 1:23 Ahku tonyomba'an tahkan duo pihak. Ahku jolik sino nohtah kolunon tuh, mangat tulak mohcon umba Kristus, kotului orihrih ijo paling pios. 1:24 Tahpi ahkan kogunan'kam, labih pios amat ahku te'et mohcon ang kolunon. 1:25 Ahku yahkin ahkan hal orih. Orih kotuluioh ahku ta'an, ahku ahkan tohtap mohcon umba Konduang paringoh; mangat dahpot dohop ihkam nyolung mahi ba'as, tutang mahi sanang a'ang porocaya umba Tuhan. 1:26 Kobain orih, amat ahku noin hoduli nokuh'kam, ihkam ijo jari hihco umba Kristus Yesus, ahkan anai labih aro hino sokehta ahkan komo tamam ngosan arop'ku. 1:27 Nah, ijo boguna huntuh iorih, ijo ihkam bolum sorurui umba inon ijo tonutut bain Kabar Hinut tohou Kristus rih. Honong kodorih, inonrih ahku dahpot hosombang umba ihkam ata'ai eam, ahku ahkan ngonih ijo ihkam ba'as angkohihco tutang kolahi sama-sama ahkan baya ihco maksud tutang ihco kojolik; yorih ahkan kepercayaan ijo sorurui umba Kabar Hinut tahkan Pohotala rih. 1:28 Hondakrih ihkam toturus bohanyi, a'ai mihkoh toharep polawan-polawan'kam. Honong kodorih ihkam ngorinah ijo iro musti ahkan kalah, tutang ihkam ahkan manang, kotului Pohotala bongoi ijo nonga komanangan ahkan'kam. 1:29 Kotului Pohotala jari nonga pononga ahkan'kam, eam tihkas ahkan porocaya umba Kristus, tahpi ka'a ahkan komo kokarot bagi Kristus. 1:30 Huntuh ihkam ka'a homboh umba ahku a'ang kolahi ijo sama iorih ijo ihkam pu'u nohto ahku ngalahioh lomoi, tutang ijo magun ahku tohtap ngalahioh johcok huntuh, kolou ijo ihkam huntuh ius ngonih.
2:1 Ihkam ba'as, kotului ihkam hihco umba Kristus. Tutang ihkam tonoapung kotului Kristus ijo ngasi ihkam! Ihkam toniting Roh Pohotala, tutang ihkam ka'a saling hosita tutang saling hobalos kasih ihco umba ijo bohkon. 2:2 Nah, cuba ihkam moro-morong nyanang ahtoi'ku umba hal-hal tuh: Bolum ihcoahtoi umba kasih ijo sama, umba tiruk ijo sama tutang titun ijo sama. 2:3 Ara nguan aang'co, tului kojuan kogunan arop bongon, ata'ai ahkan mopojuhu arop. Sobalikoh hondakrih ihkam nyino-nyinong honong randah ahtoi tutang ngohu ulun bohkon labih pios tahkan arop bongon. 2:4 Nohtoani kogunan ulun bohkon; ara tihkas kogunan ahkan arop bongon. 2:5 Kohondakrih ihkam, bo-homboruan kolou Yesus Kristus. 2:6 Aang dasaroh Io sama umba Pohotala, tahpi Io eam komo ijo koada'ai-Oh ijo kopohotalai rih harus tonohtahan-Oh. 2:7 Sobalikoh, Io molohkak paringoh turus monjadi sama kolou ihcobehti jihpon. Io monjadi kolou kolunon, tutang gihtan bolum kolou kolunon. 2:8 Io mogominda arop, tutang bolum honong te'et ahkan Pohotala nyiring mahtoi -- yorih mahtoi nyopolahki. 2:9 Tului orihrih Pohotala ngahtang Io soisung-isungoh, hawui nonga ahkai-Oh kowasa ijo labih hajo tahkan paring kowasa ijo bohkon. 2:10 Mahka bagi mohoromat Yesus, paring angbolum ijo ang soruga, tutang ijo ang tana, hawui ijo pinda tana, ahkan nyembah Io. 2:11 Iro paringoh ahkan mongahku ijo Yesus Kristusrih Tuhan; umba kodorih Pohotala, Amai tonohoromatoh. 2:12 Tului orih, Konduang-konduang ijo tonokasih, kolouumoh ihkam toturus te'et umba ahku, aang ohkot ahku anai ang louk ihkam, mahka labi-labih huntuh ang ohkot hokomahcu, hondakrih ihkam tahtap te'et umba ahku. Ihkam ius tonyolamat bain Pohotala, jadi ngurahjalan turus mangat kosanang'kam monjadi soporuna. Nguan ang orih rih honong horomat tutang ponumbun ahkan Pohotala, 2:13 kotului Pohotala bongoi, ijo bogawi ang luwang arop'kam, ahkan nguan ihkam rela tutang sanggup nyanang ahtoi Pohotala. 2:14 Nguan iou rih kokaron aangihco hawui ara bokuhtu-kuhtuk ata'ai hojawab. 2:15-16 Honong kodorih ihkam ngorinah, ijo ihkam anairih anak-anak Pohotala ijo eam bosala, ijo bolum honong tulus tutang morong ang tohun-tohun ulun ja'at tutang bodosa. Tutang aang ohkot ihkam monyiaroh ahkan ihro borihta, ijo nonga pombolum, hondakrih ihkam monjadi singah iro kolou koloang monyingah, kolunon. Amat ihkam bolum kolourih, noin anai alasan bagi'ku, ahkan komo tamam tohou ihkam, ang ohkot Yesus Kristus lombut huli. Orih buktioh ijo kolahik'ku eam sia-sia, tutang gawik'ku anai buaoh. 2:17 Mihkohtou ahku ahkan tomunu, tutang dahak'ku monjadi kolou porahpah tusuh ang ngosan inon ijo ihkam monyorahoh ahkan Pohotala, kolou tanda ijo ihkam porocaya umba Io. Amat puna orih harus kolourih, ahku norimakasih ngosan hal rih tutang umba jorih homboh ihkam. 2:18 Kodorih ka'a hondakoh ihkam ka nginyam sanang tutang umba kojorih honong ahku. 2:19 Ahku porocaya ijo umba pandohop Tuhan Yesus ahku jeleng dahpot nyuhu Timoteus nokuh ihkam, mangat ahku dahpot tohibur bain borihta tohou ihkam. 2:20 Tihkas Timoteus iou ihco-ihcooh ijo sojiwa umba ahku, tutang tu'u-tu'u niruk kosanang'kam. 2:21 Paring ijo bohkonoh baya urusan aiu bongoi iou, eam kogunan Yesus Kristus. 2:22 Ihkam bongom ius nohto buktioh ijo Timoteus boguna. Io ius bogawi paham homboh ahku, ahkan mborihta Kabar Hinut tahkan Pohotala. Ihkai duo kolou anak umba amai iou. 2:23 Bain kotului rih, jeleng ulimba ahku ngota'an kolouamoh porokara ahku kolaiu noin, ahku ahkan nyuhu io nokuh ihkam. 2:24 Ahku porocaya ijo umba pondohop Tuhan, ahku bongok ka eam tahi hino ahkan masap ihkam ka'a. 2:25 Tohou konduang ihto Epafroditus ijo ihkam nyuhu mangat dohop ahku, ahku komo porulu ahkan nyuhu io hoduli ahkan ihkam. Io ius mambai ahku a'ang gawi tutang kolahik'ku. 2:26 Io rindu sino umba Konduang paringoh, tutang io, gelisah, kotului ihkam jari dahpot kabar ijo io mondam. 2:27 Puna tu'u io mondam nyiring kani palus. Tahpi Pohotala masi umba io; tutang eam tihkas ahkaioh iou tahpi ahkak'ku ka'a, mangat ahku ara monjadi labih sedih hino. 2:28 Orih kotuluioh, mahi hajo ka'a kojolik'ku ahkan nyuhu io buli nokuh'kam, mangat ihkam jorih hino amat ihkam hosombang umba io, tutang ahtoi'ku ka monjadi teneng. 2:29 Jadi, nyambutrih io umba paring kojorih ahtoi kolou ihcobehti konduang ijo ihco koporocaya. Moregaiou paring ulun ijo kolou io. 2:330 Ahkan gunan gawin Kristus, io korenga iou mahtoi; io nyarah hasongoh, ahkan nonga pondohop ahkak'ku, ngosan aran ihkam. 3:1 Laiuoh, Konduang-konduang'ku hondakrih ihkam hokojorih kotului ihkam jari hihco umba Tuhan. Ahku eam nanyam bahat ahkan nokoduli inon ijo jari ahku nyuratoh ahkan'kam houn; kotului hal orih pios ahkan kosolamat'kam. 3:2 Rondo-rondong toharep ulun-ulun ijo nguan hal-hal ijo ja'at, ulun-ulun ijo pantas tonohawot 'asu'. Iro hojojuan mangat ulun-ulun tonyunat. 3:3 Podahar ihto ulun-ulun ijo jari norima sunat ijo sojahti, bohkon iro. Ihto nyembah Pohotala hawui toniting Roh Pohotala bongoi, tutang ihto norimakasih kotului ihto bolum hihco umba Kristus Yesus. Ihto eam bokuak umba upacara ijo bosipat 'jogihtan. 3:4 Kotu'uioh ahku dahpot iou bokuak umba upacara orih. Bain amat anai ihcobehti, ijo nanyam io anai alasan ahkan bokuak umba upacara ijo bosipat 'jogihtan, ahku labih hino. 3:5 Ahku tonyunat ohkot umur jalu ondou. Ahku konanak kolou ihcobehti Israel, tahkan lihit Benyamin; ahku ulun Ibrani asli. A'ang hal kote'et aang hukum-hukum agama Yahudi, ahku anairih 'cobehti barih Parisi. 3:6 Ahku malah kolourih bosomangat, nyiring ahku ngoporos ukup. Amat morehken tahkan hila hukum agama Yahudi, ahku anai ihcobehti ulun pios ijo eam bosala. 3:7 Tahpi tului Kristus, mahka paringoh ijo houn ahku ngohuoh, kolou angihco ijo nongautung, huntuh monjadi angihco ijo morugioh iou. 3:8 Eam baya hal-hal orihrih; tahpi malah hal-hal ijo ahku ngohuoh kolou hal-hal ijo baya morugi iou. Ijo ahku tepui huntuh anairih labih borega, yorih kosono Yesus Kristus, Tuhan'ku. Kotului Kristus, mahka ahku jari molohkakoh paring-paringoh. Ahku ngohu paringoh rih, kolou puhuk iou, mangat ahku tou ngondahpot Kristus, 3:9 tutang tu'u-tu'u hihco umba Io. Kohihco ijo pios umba Pohotala eam hino ahku usaharih bongok umba jalan te'et ahkan hukum agama. Huntuh ahku anairih kohihco ijo pios umba Pohotala, kotului ahku porocaya umba Kristus. Jadi, kohihco ijo morong rih lombut tahkan Pohotala, tutang hogalang porocaya umba Yesus Kristus. 3:10 Ihco-ihcooh ijo ahku jolikrih, iorih mangat ahku kosono Kristus, tutang nyuru kowasa ijo mbolum Io tahkan popahtoi. Ahku jolik umba karot homboh Io, tutang monjadi sama kolou Io aang popahtoi-Oh. 3:11 Tutang ahku boharap ijo ahku bongok, ahkan tonombolum hoduli tahkan popahtoi. 3:12 Ahku eam nuhtui ijo ahku jari bohasir, ata'ai jari monjadi soporuna. Tahpi ahku toturus iou ngurahjalan nyomba'an pononga ijo tonahtap bain Kristus Yesus. Ahkan orihrih Io jari nyomba'an ahku tutang napa ahku aiu-Oh. 3:13 Botatuoh, Konduang-konduang, ahku tu'u-tu'uoh eam komo ijo ahku jari bohasir nyomba'an hodiah rih. Ahkan tahpi anai ihco hal ijo ahku nguai, yorih ahku nolingou inon ijo anai ang lihkut'ku, tutang ngurahjalan paham ngojohcok inon ijo anai ang baun. 3:14 Orih kobaiuoh ahku nokoru toturus nitu titui laiu, ahkan duon komanang, yorih pombolum ijo ang soruga; ahkan orihrih Pohotala na'ah ihto nguha Kristus Yesus. 3:15 Ihto paringoh ijo jari oko cara rohani, harusrih bogawi kodorih. Tahpi amat ang marak ihkam anai ijo niruk bohkon, mahka Pohotala ahkan monarangoh ka'a ahkan'kam. 3:16 Oluaang hal tuh, hondakoh nohtoani: Ihto harus magun bolum numbun poroturan ijo jari ihto umbaoh, nyiring wayah tuh. 3:17 Konduang-konduang paring! Numbunrih sutu angahku. Ihkai jari nonga sutu ijo morong, tului rih nohtoanirih pio-pios ulun-ulun ijo nutut sutu ihkai rih. 3:18 Ahku ius kinjap tikat mborihta ahkan'kam, tutang huntuh ahku nokolulioh hino hawui nangih, ijo anai aro ulun ijo pombolumoh morusak riman popahtoi Kristus ijo nyopolahki. 3:19 Pombolum ulun-ulun kolourih ahkan kolaiou honong koluhtek, tului pohotalan iro anairih kojolik bereng iro bongoi. Hal-hal ijo mopomia, justru ijo orihrih ijo iro monamamrih, kotului iro niruk baya hal-hal ijo tohorong umba kolunon tuh iou. 3:20 Tahpi ihto anai rih waris kolahcan soruga. Tahkan anan ka'a Lahca Ponyolamat ihto, Tuhan Yesus Kristus, ahkan lombut. Iorih ijo ihto ngindo-ngindoi honong rindu. 3:21 Behtin ihto ijo bolomu tutang duon maram tuh, ahkan konubah bain Kristus monjadi kolou behtin Aiu bongoi ijo borasih. Io dahpot nguan orih kotului Io anai-ngina kowasa duon pominda kokaro aangihco.
4:1 Tului orih, Konduang-konduang'ku ijo tonokasih, kolouorih hondakoh ihkam bolum hawui tu'u-tu'u porocaya umba Tuhan. Ahtoi'ku rindu umba'kam! Ihkam monamam ahku ijo nguan ahku jorih. 4:2 Konduangbawi Euodia tutang Konduangbawi Sintike! Ahku nyawot hawui paham umba ihkam, ahkan Konduangbawi hihcoahtoi kolou ulun-ulun ijo bokoporocaya. 4:3 Ahkan jolahak'ku ijo tehen, ahku nyawot ka'a mangat Konduang dohop koduo ulunbawi rih. Iro jari nguan gawiu paham umba ahku ahkan mborihta Kabar Hinut tahkan Pohotala, sama kolou Klemen tutang paring iro bohkon ijo bogawi hombo-homboh ahku. Aran-aran iro anai tonyurat luwang Buhku Ulun Bolum. 4:4 Keleh ihkam toturus jorih, kotului ihkam jari bolum hihco umba Tuhan. Sino hino ahku nuhtui, "jorihih". 4:5 Hondakrih paring ulun duon nohto sikap'kam ijo pios ahtoi. Tului eam tahi hino Tuhan ahkan lombut. 4:6 Ara kowatir tohou inon ka'a. A'ang kokaro hal, bodo'a tutang nyapai sawot'kam ahkan Pohotala. Inon ijo ihkam kani, sumanorih toturus ahkan Pohotala hawui ngohawot torimakasih. 4:7 Mahka kosanang tahkan Pohotala ijo eam haraptou dahpot tohorahti kolunon, ahkan monjaga ahtoi tutang tiruk'kam ijo jari hihco umba Kristus Yesus. 4:8 Laiuoh, Konduang-konduang, nyuangrih tiruk'kam umba hal-hal borega, ijo pahtut tonara, yorih hal-hal ijo morong, ijo tonohoromat, ijo adil, borasih, manih, tutang pios. 4:9 Nitoioh rih, inon ijo ihkam bolajaroh tutang torima tahkan ahku; pios tahkan tuhtui-tuhtui, oluka tahkan konuak-konuak'ku. Pohotala tohasak kosanang ahkan homboh ihkam. 4:10 Aang pombolum'ku ijo hihco umba Tuhan, ahku nginyam sanang sino, tului ulijari kodorih kotahiou, huntuh ihkam sapet hino niruk koada'an'ku. Maksud'ku eamoh ijo ihkam jari nolingou ahku, tahpi eam anai kosapet ahkan mongorinahoh. 4:11 Ahku nyorihta tuh eam tului ahku tahpas, tului ahku jari bolajar nanyam puas umba inon ijo anai. 4:12 Ahku jari nyuru pombolum serba tahpas, tutang ka'a bolum umba kolowi. Ahku jari ngosono rahasiaoh ahkan noharep, koada'an ijo koloukuwoh ka ka'a; pios koada'an makmur oluka koada'an porosbolum, pios koada'an molowi; oluka koada'an kotahpas. 4:13 Umba kowasa ijo tononga Kristus ahkak'ku, ahku anai koba'as ahkan noharep kokaron kolou koada'an. 4:14 Tahpi ihkam jari dohop ahku ang luwang kosusah'ku tutang inon ijo ihkam nguai rih puna pios. 4:15 Konduang-konduang ulun Pilipi! Ihkam bongom kota'an tu'u ijo kotihka ahku nohtah Makedonia lomoi, ang ohkot Kabar Hinut rih ahku nyiaroh aang pahtuk tikatoh, ihkam tihkas ihco-ihcooh ukup ijo dohop ahku; ihkam ihco-ihcooh ijo umba nginyam utung rugi hombo-homboh ahku. 4:16 Kotihka ahku ang Tesalonika tutang porulu pondohop, jari labih tahkan sino tikat, ihkam ngirim pondohop ahkak'ku. 4:17 Orih eam rimai ahku baya jolik norima pononga. Ijo ahku jolikoh iorih, mangat ahku duon nohto bua-bua ijo mondahang koutung'kam. 4:18 Ahku jari norima paringoh -- malah molowi tahkanmba sukup! Paring pononga ijo ihkam ngirim ahkak'ku, jari ahku torima tahkan Epafroditus. Huntuh ahku anai ngina paring ijo ahku poruluoh. Pononga-pononga tahkan ihkam rih, anairih kolou buanharum ijo tonyorah ahkan Pohotala tutang ijo tonorima bain Pohotala honong sanang ahtoi. 4:19 Pohotala ijo ahku nyembah, ijo nusuh tahkan kotahtouoh a'ang Kristus Yesus, ahkan monuwi kokaro koporulu'kam. 4:20 Tonotara ahkan Pohotala Amai ihto turus-jaham. Amen. 4:21 Nyapaiohrih tabe aik'ku ahkan sohopus ukup Pohotala ijo hihco umba Yesus Kristus. Tutang norima hino tabe tahkan konduang-konduang ijo anai homboh ahku ang ohtoi. 4:22 Paring ukup Pohotala ang lowu tuh, ijo pahtukoh iro ijo tahkan istana Kaisar, ngirim tabe ahkan ihkam. 4:23 Keleh Tuhan Yesus Kristus mborehkat Konduang paringoh. Horomat ihkai, Paulus tutang Timoteus
1:1-2 Konduang-konduang ukup Pohotala ang Kolose ijo bokehtep hihco umba Kristus! Kolou Rasul Kristus Yesus -- ngosan ponotuot Pohotala -- Ahku, Paulus, hombo-homboh umba Konduang ihto Timoteus, bokoharap keleh Pohotala, Amai ihto nonga borehkat tutang kosanang ahkan ihkam. 1:3-4 Ihkai jari ngonih ijo ihkam porocaya ahkan Yesus Kristus tutang ihkam mongasihoh paring ukup Pohotala. Orih rih kotuluioh ang ohkot ihkai bodo'a ahkan'kam, ihkai toturus ngohawot torimakasih ahkan Pohotala, Amai Tuhan ihto Yesus Kristus. 1:5 Ihkam porocaya tutang ihkam pongasih, tului ihkam harap ahkan inon ijo tonyodia ang soruga bain Pohotala ahkan'kam. Ihkam ius ngonih tohou hal orih kotihka Kabar Hinut ijo morong tonyapai ahkan'kam. 1:6 Kabar tahkan Pohotala rih tomborihta nokuh sohopus kolunon, tutang pombolum ulun turus tomborehkat bain kabar rih, sama kolou pombolum'kam tomborehkat, tahkan beteng ihkam ngonih tohou pononganasi Pohotala tutang moro-morong ngumangoh. 1:7 Hal orih tonyapai ahkan Konduang bain Epafras, jolahan ijo ihkai ngasihoh. Io anairih ponggawi Kristus ijo te'et bogawi ahkan kogunan ihto. 1:8 Tahkan iorih ihkai ngonih ijo honong kowasa, tahkan Roh Pohotala ihkam dahpot saling mongasih. 1:9 Orihrih kotuluioh ihkai turus bodo'a ahkan ihkam, tahkan ihkai ngonih tohou ihkam. Ihkai nyawot umba Pohotala mangat Roh Pohotala nonga ahkan'kam kopihtar tutang kohorahti, nyiring ihkam kota'an hawui soporuna inon konohuang Pohotala. 1:10 Honong kolouorih ihkam dahpot bolum numbun konohuang Pohotala, tutang turus monyanang ahtoi-Oh, nyiring a'ang kokaro ang'co ihkam dahpot mohasilrih hal-hal ijo pios. Tutang pongotaan ihkam, tohou Pohotala ka ahkan botambah ka'a. 1:11 Keleh umba kowasa tahkan Pohotala ijo pokohajoi, ihkam tonomba'as, nyiring ihkam duon tahan ngarot kokaro ang'co honong sabar tutang sanang ahtoi, 1:12 tutang hawui ngohawot torimakasih ahkan Amai. Kotului Amai orihrih ijo nguan ihkam harus norima inon ijo tonyodia Pohotala ahkan ukup-Oh ang luwang kolahca'ai-Oh ijo boloang. 1:13 Io jari momorodehka ihto tahkan kowasan kopindong, tutang ngahtun ihto nokuh luwang kolahca'an Anak-Oh ijo tonokasih-Oh. 1:14 Bain Anak-Oh rih ihto tomorodehka; bororima dusa-dusan ihto jari tonapun. 1:15 Kristus anairih gambar ijo korinah gihtan tahkan behtin Pohotala ijo eam gihtan; Kristus anairih anak ijo poohkooh, labih mombahtang tahkan kokaro ijo tona'oioh. 1:16 Tului nguha Iorih Pohotala monaoioh karo ang'co ang soruga tutang ang ngosan tana, karo ang'co ijo gihtan tutang ijo eam gihtan, nyakum ka'a roh-roh ijo bokowasa tutang ijo moretah. Sohopus aangpindalangit tuh tona'oi nguha Kristus tutang ahkan Kristus. 1:17 Sounumba kokaron ang'co anai, Kristus ius labih houn anai. Tutang tului Iorih ka'a mahka karo ang'co anai ang unukoh nyino-nyinong. 1:18 Iorih kuhung tahkan behtiuoh, yorih ukupoh, kotului Io tohasak pombolum ukup rih. Iorih anak ijo poohkooh ijo pahtuk-pahtuk tonombolum hoduli tahkan popahtoi, mangat Io bongoi iou ijo monjadi boguna tahkan kokaro aang'co. 1:19 Pohotala bongoirih ijo mongohondakoh, mangat kokaro ang'co ijo tonyombang aang arop Pohotala, tonyombang ka'a honong sukup ang arop Anak-Oh. 1:20 Tutang nguha Anak rih hino Pohotala momutusoh ahkan nguan kokaro ang'co hokopios hoduli umba Io, pios kokaro ang'co ijo ang tana, kanika ijo ang soruga. Pohotala nguan orih nguha popahtoi Anak-Oh ang kahju sopolahki. 1:21 Lomoi ihkam mahcu tahkan Pohotala. Ihkam momusuh Io, kotului hadatdasar tutang tiruk'kam ijo ja'at. 1:22 Tahpi huntuh, umba popahtoi Anak-Oh, Pohotala napa sambung ihkam umba Io, monjadi pios hoduli. Umba cara orih ihkam dahpot tonomin noharep Pohotala a'ang koada'an borasih, molinyou tutang earo salai. 1:23 Tahpi kopunai ihkam harus tohtap te'et porocaya tutang tombok tehen aang koporocayan'kam. Ara nyiring ihkam molohkak koharap ijo jari tononga ahkan'kam, kotihka ihkam norima Kabar Hinut tahkan Pohotala. Kabar rih jari tomborihta ahkan nyinong ulun ang hopus kolunon. Tutang ahkan orihrih ka'a ahku Paulus jari monjadi pohalu. 1:24 Huntuh ahku sanang mongarot ahkan kogunan ihkam. Tului umba kongarot behtik'ku, ahku nyuhkup inon ijo magun harus tongarot bain Kristus ahkan ukup-Oh yorih behtiu-Oh. 1:25 Pohotala nyuhu ahku monjadi pohalu ukup-Oh, ahkan kogunan'kam. Ahku harus monyapai borihta tahkan Pohotala, koparingoh; 1:26 yorih borihta ijo kotahin boabad-abad ijo mohalou; tomorahasia bain Pohotala ahkan paring ulun, tahpi huntuh tongorinah ahkan ukup Aiu. 1:27 Ahkan ukup Aiu rih, Pohotala kani ngorinahoh eaminon kopiosoh tutang kohajooh rahasia-Oh rih bagi sohopus ukup kolunon. Rahasia orihrih, iorih: Kristus anai luwang arop'kam, ijorimai ihkam ahkan hawui nginyam kohajon Pohotala. 1:28 Kristus orihrih ijo ihkai mborihtaoh ahkan nyinong ulun. Ihkai mepingatoh tutang majar iro paringoh umba kokaro kopihtar. Titun ihkai iorih, mangat nyinong ulun dahpot tongitot ahkan Pohotala, kolou ulun ijo oko a'ang hal-hal rohani, kotului jari hihco umba Kristus. 1:29 Ahkan monyapai hal rih, ahku bogawi paham. Ahku molawan honong paring koba'asarop ijo tononga Kristus ahkak'ku, tutang ijo bogawi luwang arop'ku hawui kotuwi kowasa.
2:1 Ahku jolik ihkam mongota'an koloukuwoh kohebatoh ahku ngokolahi ahkan'kam, tutang ahkan iro ijo ang Laodekia, hawui paring ijo eam ngosono ahku socara porobadi. 2:2 Paringoh tuh ahku nguaioh, mangat ahtoi iro monjadi ba'as tutang iro saling mongasih, nyiring iro lehket hihco. Umba kodorih iro tu'u-tu'u horahti tutang yahkin hawui ngosono rahasia Pohotala, yorih Kristus bongoi. 2:3 Kristusrih ijo monguapoh kokaro kopihtar tutang kohorahtin Pohotala ijo jamanlomoi tosuhuk. 2:4 Ahku monyorihtaoh tuh, mangat ihkam a'ai tonihpu bain iaika ka'a ijo baui manih ahkan'kam. 2:5 Kotului oluka ahku mahcu tahkan ihkam, ngohurih ijo ahku anaiumba ang louk ihkam. Tutang ahku jorih nohto ihkam hihcoahtoi tutang tehen porocaya umba Yesus Kristus. 2:6 Konduang-konduang jari norima Kristus Yesus monjadi Tuhan. Bain orih hondakrih ihkam bolum hihco umba Io, 2:7 tutang muhat ang a'ang Io. Kohondakrih ihkam nombok pombolum'kam umba Kristus kolou galangoh. Kohondakrih ihkam mahi porocaya umba Kristus, numbun inon ijo jari tongajar ahkan'kam. Tutang hondakrih ahtoi'kam nopusak-pusak hawui ngohawot torimakasih. 2:8 Hondakrih ihkam harus hati-hati a'ai nyiring anai ijo njorat ihkam umba pilsapat-pilsapat kolunon ijo eam boguna, molekan baya nyosatih. Pilsapat-pilsapat orih eam tahkan Kristus molekan tahkan tiruk ulun iou, tutang tahkan roh-roh pongowasa kolunon. 2:9 Kotului paring porobadi Pohotala mohcon ang Kristus, yorih aang kolunoi-Oh. 2:10 Tutang tului bolum hihco umba Kristus ihkam ka tononga pombolum sotuwioh. Kotului Kristus anai kopala ngosan nyinong roh, ijo bokowasa tutang ijo moretah. 2:11 Kotului hihco umba Kristus, ihkam jari tonyunat, eam umba sunat ijo tonguan bain longon ulun, molekan umba sunat ijo konuan bain Kristus, ijo momorodehka ihkam tahkan kowasan tobiat ijo bodusa. 2:12 Kotului ang ohkot ihkam ponopondus, ihkam tonanom homboh Kristus; tutang hawui popondus orih ka'a, ihkam umba tonombolum hoduli hombo-homboh Kristus, kotului ihkam porocaya ahkan kowasan Pohotala ijo jari ngombolum Kristus tahkan popahtoi. 2:13 Lomoi, ihkam jari mahtoi socara rohani, tului ihkam jari bodusa, tutang tului ihkam eam tonyunat socara koulun. Tahpi huntuh Pohotala ngombolum ihkam hombo-homboh umba Kristus, Pohotala jari mongapun dusa-dusan ihto, 2:14 tutang ngobalang surat-surat uhtang toharep ihto, ijo toturus mongancam ihto, umba sarat-sarat ijo bahat. Hawui nyopolahki surat rih ang kahju sopolahki, Pohotala ngudap paring dawa toharep ihto. 2:15 Aang sopolahki rih, Kristus nguan kokaro roh-roh ijo moretah tutang bokowasa monjadi eam bodaya hino. Iro jadi tutunan ulun aro, ang ohkot Kristus mongiring iro kolou tawanan a'ang pawai komanang-Oh. 2:16 Kobain rih a'airih mohonau ulun nosalan ihkam tohou ukun ata'ai korih, ata'ai tohou ondou-ondou pesta agama, ata'ai pesta-pesta bulan bohua, ata'ai tohou ondou Sabat. 2:17 Paringoh rih tihkas kokolingon iou, tahkan hal-hal ijo ahkan lombut, tahpi korinah tahkan hal-hal rih, iorih Kristus. 2:18 A'airih ihkam mohonau arop'kam, tonorugi bain ulun ijo pura-pura ngominda aropoh, tutang ijo nyembah molehkat-molehkat. Ulun rih bojuhu umba tiruk-tirukoh ijo cara kolunonoh, tutang monamam-namam pongorinah-pongorinah ijo khusus, 2:19 nyiring eam hino monambit aang Kristus, ijo monjadi kopala A'ang pinda totiring Kristus sohopus behtiu tonohaga tutang tonohihco bain sahpan-sahpanoh, hawui bolum numbun konohuang Pohotala. 2:20 Ihkam ius mahtoi hombo-homboh Kristus, tutang jari tomorodehka tahkan roh-roh ijo bokowasa ang pindalangit tuh. Nah, ombai ihkam bolum kolou ulun ijo magun konowasa bain kolunon tuh? Ombai ihkam tunduk umba poroturan-poroturan koloutuh? 2:21 "Ara nambit tuh", "Ara nginyam orih", "Ara nigung tuh"? 2:22 Paring poroturan rih, anairih tohou hal-hal ijo kodorih tohapa, eam aro boguna hino. Orih baya poroturan-poroturan tutang pongajaran-pongajaran ijo tonapa bain kolunon. 2:23 Puna topahjahoh, hal rih kopihtar, hawui anjuranoh, mangat ulun nyembah molehkat, ngominda rih arop, tutang nyiksa arop; tahpi paringoh rih eam boguna ahkan ngomburi kojolikbolai kolunon.
3:1 Ihkam jari tonombolumoh hoduli hombo-homboh umba Kristus. Bain orih harus ihkam bousaha ahkan ngondahpot hal-hal ijo ang soruga, ang amoh Kristus moretah hihco umba Pohotala. 3:2 Potoharep tiruk'kam aang hal-hal ijo ang anan, ara aang hal-hal ijo ang kolunon. 3:3 Kotului ihkam ius mahtoi, tutang pombolum ihkam bosuhuk hihco Kristus ang a'ang Pohotala. 3:4 Nah, tohasak pombolum'kam ijo sojahti orihrih Kristus, tutang amat Io korinah noin, ihkam ka'a ahkan lombut hombo-homboh umba Io a'ang kohajoi-Oh! 3:5 Kotului rih munuoh rih kojolik-kojolik kolunon ijo monderoh arop'kam, kolou kokihal, hal-hal ijo eam sanonoh, kojolikbolai, konohuang ijo ja'at, tutang kokuhu (tului kokuhu anairih kolou umba nyembah dewa). 3:6 Hal-hal somahcam orihrih ijo mopolombut kosangit Pohotala toharep ulun-ulun ijo eam mone'etoh. 3:7 Lomoi ihkam bongon ka, numbun kojolik-kojolik rih, ang ohkot ihkam konowasa baiuoh. 3:8 Tahpi huntuh hondakrih ihkam dian hal-hal ijo ja'at tahkan arop'kam; a'ai hino bosingi, ata'ai ngamuk, ata'ai ngina nanyam bohiri toharep ulun bohkon. Ara samasino nyoluka tahkan nyaman'kam auh-auh cahci mahki, ata'ai auh ijo kojilok. 3:9 Ara mobula ihco umba ijo bohkon, kotului pombolum ijo lomoi umba kokaro sipat-Oh ius ihkam molohkakoh. 3:10 Ihkam huntuh jari tononga pombolum ijo bohua. Ihkam anairih kolunon bohua, ijo rahat tombohua toturus bain Pona'oioh, yorih Pohotala, numbun tapai-Oh bongoi. Maksudoh iorih mangat ihkam ngosono Pohotala honong soporuna. 3:11 Kolou akibat tahkanmba rih dilaprih kokaron kobohkon-kobohkon holat ulun Yahudi tutang bohkon Yahudi, ulun bosunat, tutang ulun ijo eam bosunat, eam anai hino kobohkonoh, holat ulun bohkonuhtus tutang ulun biadab holat jihpon tutang ulun morodehka, tului Kristus anairih koparing-paringoh tutang Io hihco umba iro paringoh! 3:12 Konduang anairih ukup Pohotala. Pohotala ngasih ihkam tutang mitih ihkam ahkan monjadi aiu-Oh ijo khusus. Iorih, kotuluioh ihkam harus pokarah balos ngasi, ihkam harus pios ahtoi, randah ahtoi, bolomu lembai, tutang ba'as ngarot. 3:13 Ihkam harus sabar, ihco umba ijo bohkon, tutang saling ngapun amat anai ijo ngina dondam toharep ijo bohkon. Tuhan hawui sanang ahtoi ngapun ihkam, jadi ihkam ka harus kani ngapun ihco umba ijo bohkon. 3:14 Tutang ijo boguna, iorih: Ihkam harus saling mongasih. Kotului kasih orihrih ijo pohihco Konduang-konduang paringoh nyiring monjadi soporuna. 3:15 Hondakrih koputusan-koputusan'kam konahtuh bain kobuah ijo tononga bain Kristus, ang luwang ahtoi'kam. Tului Pohotala na'ah ihkam ahkan monjadi ramun ihco bereng mangat ihkam bolum a'ang kobuah tahkan Kristus orih. Hondakrih ihkam botorimakasih. 3:16 Hondakrih ajar-ajar Kristus ijo tuwi borehkat nyorap ahkan luwang ahtoi'kam. Hondakrih ihkam saling majar tutang saling nonga tingak sokopihtar soduondahpot. Monyanyioh rih masmur tutang tara-tara hawui lagu-lagu rohani; monyanyi iou ahkan Pohotala, honong nanyam norimakasih ang luwang ahtoi'kam. 3:17 Kokaro inon ijo ihkam nguaioh ata'ai nuhtuioh, harus rih tonguan tutang tonuhtui ngosan aran Tuhan Yesus. Botorimakasih ahkan Pohotala, Amai, ahkan inon ijo tonguan Yesus bagi'kam. 3:18 Konduang-konduang ijo monjadi oruh! Te'etrih umba bosai'kam, tului kodorih rih koharusoh konuan'kam kolou ulun Kristen. 3:19 Konduang-konduang ijo monjadi bosai! Ngasi-nyayang oruh'mu. A'ai kasar toharep iro. 3:20 Anak-inyam! Anairih koharus ihkam kolou ulun Kristen ahkan toturus te'et umba amai inai, tului orihrih ijo ngojorih ahtoi Pohotala. 3:21 Konduang-konduang ijo monjadi Amai! Ara ngoporos ahtoi anak-anak'kam nyiring iro monjadi putus asa. 3:22 Konduang-konduang ijo monjadi jihpon! A'ang kokaro hal pios ihkam te'et umba tepun'kam ijo ang kolunon tuh. Ara te'et ahkan iro baya ang ohkot iro rahat nontoani ihkam, tului ihkam jolik tonara. Ngote'etrih iro umba ahtoi ijo ihlas, kotului ihkam mohoromat Tuhan. 3:23 Gawi inon iou ijo tononga ahkan'kam, hondakrih ihkam nguaioh umba kotuwi ahtoi, koloujahka Tuhanrih ijo ihkam haluoh, tutang eam baya ulun. 3:24 Ingatrih ijo ihkam ahkan norima upah tahkan Tuhan. Inon ijo tonahtap Tuhan ahkan ukup Aiu, orihrih ijo ahkan tononga ahkan'kam. Kotului tepun, ijo kotu'uioh rahat tohalu bain ihkam, anairih Kristus bongoi. 3:25 Tutang iai ka ijo nguan kosalan, ahkan ngohtun kosalan-kosalanoh rih; tului Tuhan eam nopahjah baui.
4:1 Konduang-konduang ijo monjadi tuan! Hondakrih ihkam moretahgawi jihpon-jihpon'kam umba komorong tutang adil. Ingat, ijo ihkam ka tehpun ihcobehti tuan'kam ijo ang soruga. 4:2 Hondakoh ihkam bodo'a, hawui tehen tutang jaga-jaga hawui botorimakasih ahkan Pohotala. 4:3 Bodo'a ka'a ahkan ihkai mangat Pohotala nonga ahkan ihkai kotihka ijo pios ahkan monyiaroh, borihta tohou rahasia Kristus. Kotului hal orihrih mahka ahku huntuh anai ang luwang sipir. 4:4 Bodo'a iou mangat ahku duon monarangoh rahasia orihrih sotarang-tarangoh kolouamoh mustioh. 4:5 Ang luwang kohihco ihkam umba ulun-ulun ijo eam porocaya, hondakrih ihkam bolum pihtar tutang nguna nyinong kosapetan umba sopios-piosoh. 4:6 Hondakrih hal-hal ijo ihkam ngohawotoh toturus monyanang tutang monarik. Hondakrih ihkam kota'an kolouamoh soharusoh ihkam mutah karon-kisok ulun. 4:7 Tikhikus, konduang ihto ijo tonokasih, ahkan momborihta ahkan ihkam karo angco tohou ahku. Io te'et bogawi hombo-homboh ihkai ahkan Tuhan. 4:8 Ahku nyuhu io nohkuh'kam honong alasan mangat ihkam kota'an koada'an ihkai ohtoi tutang ihkam sanang ahtoi. 4:9 Onesimus ahkan tulak hombo-homboh umba Tikhikus: io ihcobehti tahkan barih ihkam. Io ulun ijo te'et tutang ihkai sita io. Io tutang Tikhikus ahkan mborihta ahkan'kam kakaro-karooh ijo nyolung ang unuk ahku tuh. 4:10 Aristarkhus, ijo anai luwang sipir hombo-homboh ahku ngirim tahbe ahkan ihkam. Kodorih ka'a Markus konduang ihcotahtu Barnabas. (Ihkam jari konokirim kabar ahkan naharang io, amat io lombut ahkan'kam.) 4:11 Tahbe hino tahkan Yesus ijo konohawot Yustus ka'a. Tahkan ulun-ulun Yahudi ijo jari porocaya ahkan Tuhan Yesus, tihkas iro botolu iourih ijo huntuh bogawi homboh umba ahku ahkan nguan gawiu tahkan Pohotala. Iro tu'u-tu'u, paham dohop ahku. 4:12 Tahbe tahkan Epafras. Io ka'a tahkan barih'kam. Io jihpon Kristus Yesus ijo toturus bodo'a hawui tehen ahkan ihkam. Io nyawot honong paham ahkan Pohotala, mangat koyahkin'kam monjadi ba'as tutang ihkam moro-morong kolou ulun oko, mangat ihkam hawui soporuna bokehtep umba konohuang Pohotala. 4:13 Ahku nyaksioh bongok ijo io ius bogawi paham ahkan ihkam tutang ahkan ulun-ulun ijo ang Laodekia tutang Hierapolis. 4:14 Dokter Lukas ijo ihto sitaoh, tutang Demos ngirim tahbe ahkan ihkam. 4:15 Nyapaiohrih tahben ihkai ahkan konduang-konduang Kristen ang Laodekia; ka'a ahkan Nimfa, tutang ahkan ukup ijo sombayang ang lohpouoh. 4:16 Ulimba surat tuh tonombasa ahkan'kam bousaha iou mangat orih tonombasa ka'a ahkan ukup ijo ang Laodekia. Kodorih ka'a ihkam bongom, pahtut mbasa surat ijo ahkan konokirim tahkan Laodekia ahkan ihkam. 4:17 Tutang nyorihta iou ahkan Arkhipus: "Ngopah karon gawiu ijo tononga ahkan'kam guna mohalu Tuhan." 4:18 Tahbe tahkan ahku Paulus. Ahku bongok ijo nyurat bagi tuh. A'ai nolingou ijo ahku magun ang luwang sipir! Keleh Tuhan mborehkat ihkam paringoh. Horomat ihkai, Paulus
1:1 Konduang-konduang ukup ang Tesalonika, ijo monjadi ukup ain Pohotala, Amai, tutang Tuhan Yesus Kristus. Ihkai, yorih Paulus, Silas tutang Timoteus moharap, keleh Pohotala nonga berkat tutang kosanang ahkan ihkam. 1:2-3 Ihkai toturus norimakasih ahkan Pohotala, tului Konduang paringoh. Nyinong tikat ihkai bodo'a ahkan Pohotala tutang, Amai ihto, ihkai toturus mingat ihkam. Ihkai toturus mondo'akan'kam. Ihkai ngingat koloukuwoh ihkam pokarah a'ang konuan, ijo ihkam porocaya ahkan Kristus, koloukuwoh ihkam ngasi ulun bohkon nyiring mohalu iro. Tutang koloukuwoh ihkam boharap honong tehen ahkan Tuhan ihto Yesus Kristus. 1:4 Ihkai ta'an, Konduang-konduang, ijo Pohotala mongasih ihkam tutang ius mitih ihkam monjadi ulun-Aiu ijo khusus. 1:5 Kotului ihkai monyiar Kabar Hinut ahkan'kam, eam hapan tuhtui-tuhtui iou, tahpi ka'a umba kowasa tutang umba Roh Pohotala. Tutang ihkai yahkin sino ahkan komorong tahkan Kabar Hinut rih. Ihkam ta'an koloukuwoh ihkai bolum ahkan kogunan'kam, kotihka ihkai anai ang tohun-tohun ihkam. 1:6 Ihkam nutut sutun ihkai tutang sutun Tuhan. Oluka ihkam paham ngarot, ihkam noharang hawui jorih borihta ijo ihkai mborihtaoh ahkan'kam. Kojorih orih tononga bain Roh Pohotala. 1:7 Umba orih ihkam monjadi sutu ahkan paring ulun Kristen ijo ang Makedonia tutang Akhaya. 1:8 Kotului nopara tahkan ihkam, borihta tohou Tuhan, jari tosiar nyiring nokuh Makedonia tutang Akhaya. Tutang eam tihkas orih iou, mahihino borihta tohou koloukuwoh ihkam porocaya, umba Pohotala jari johcok nokuh umoh-umoh, nyiring ihkai eam porulu hino nuhtui ino-inon. 1:9 Paring ulun rih bopander, tohou koloukuwoh ihkam monorima ihkai, kotihka ihkai lomoi lombut ahkan'kam. Iro mander tohou koloukuwoh ihkam nohtah dewa-dewa, tutang lombut ahkan tihkas-ihcooh Pohotala ijo bolum ahkan tehen umba Io. 1:10 Iro mander ka'a, tohou koloukuwoh ihkam moharapoh polombut Anak Pohotala tahkan soruga, yorih Yesus, ijo jari tonombolum bain Pohotala tahkan popahtoi. Yesus orihrih ka'a ijo monyolamat ihto tahkan kosingin Pohotala ijo ahkan lombut.
2:1 Konduang-konduang! Ihkam bongon ta'an ijo pasap ihkai nokuh ihkam eam ngohus. 2:2 Ihkam ta'an ijo, sounmba ihkai lombut ahkan'kam ang Tesalonika, ihkai jari tonoporos tutang tonohina ang Pilipi. Tahpi oluka, aro ulun molawan ihkai, Pohotalan ihto jari nonga ihkai kohanyi ahkan mborihta ahkan'kam Kabar Hinut ijo asar-Oh tahkanmba-Oh. 2:3 Poimbit kai ahkan'kam eamoh angihco koliru; ka'a eam umba konohuang ijo eam morong ata'ai ahkan monihpu. 2:4 Eam! Ihkai eam mander ahkan monyanang ahtoi ulun, molekan monyanang ahtoi Pohotala, ijo mocoba ahtoi ihkai. Kotului ihkai tongohu layak bain Pohotala ahkan mborihta Kabar Hinut rih. 2:5 Ihkam bongom ta'an, ijo eam pu'u ihkai honyama manih, ata'ai tihpu-tihpu umba ihkam, ahkan monyuhuk konohuang-konohuang ijo bokuhu. Pohotala saksioh! 2:6 Ihkai eam ka'a ngurah jalan, ahkan ngondahpot tara tahkan ulun -- pios tahkan ihkam, oluka tahkan ulun bohkon. Komorongoh kolou rasul Kristus, ihkai tou iou nutut aang'co tahkan ihkam. 2:7 Tahpi ihkai bohadat bolomu lembai uhun anai ang tohun ihkam, kolou ihcobehti inai mohalu anak-anakoh. 2:8 Tului ngasi nyayang ihkai, ihkai bosodia nonga ahkan'kam, eam iou Kabar Hinut ijo tahkan Pohotala rih, tahpi pombolum ihkai ka'a. Tului ihkai paham ngasi ihkam paring! 2:9 Tontu ihkam magun ingat, koloukuwoh kokarasoh ihkai bousaha tutang hokolawan. Hondou ngolomi ihkai bogawi, mangat ihkai eam nyusah ihcobehti ka tahkan ihkam, 'co-ohkot ihkai mborihta Kabar Hinut ijo tahkan Pohotala rih ahkan'kam. 2:10 Ihkai bolum honong borasih, morong tutang eam anai cela toharep ihkam, ijo jari porocaya ahkan Kristus. Ihkam holeam saksin-saksin ihkai, kodorih ka'a Pohotala. 2:11 Ihkam ta'an, ijo ihkai mohaga ihkam nyino-nyinong, kolou ihcobehti Amai mohaga anak-anakoh. 2:12 Ihkai ningak ihkam, ihkai nonga juhung ahkan ihkam, tutang ihkai hojojuan mangat ihkam bolum kodorih kolou, nyiring monyanang ahtoi Pohotala. Tului Pohotala ius na'ah ihkam, monjadi warga Kolunon Bohua ain Pohotala tutang nginyam karon-kohajoi-Oh. 2:13 Anai hino ihco hal bohkon, ijo napa ihkai toturus norimakasih ahkan Pohotala. Hal rih iorih, ijo ang ohkot ihkai monyapai borihta tahkan Pohotala ahkan'kam, ihkam ngonih tutang norima borihta rih, eam kolou borihta tahkan ulun, tahpi kolou borihta ijo moro-morong tahkan Pohotala. Iorih ijo rahat bogawi a'ang arop'kam ijo porocaya umba Kristus. 2:14 Konduang-konduang! Hal ijo ihkam nyuruoh, jari tonyuru ka'a bain ukup-ukup Pohotala ang Yudea ijo jadi ain Kristus Yesus. Ihkam monyuru karot tahkan hila uhtus'kam bongom, sama kolou ijo tonyuru bain ukup-ukup Pohotala ang Yudea rih tahkan sila ulun-ulun Yahudi. 2:15 Ulun-ulun orih ijo munu Tuhan Yesus tutang nabi-nabi, hawui ngoporos ihkai. Iro momusuh paring ulun, tutang Pohotala, samasino eam sanang umba iro. 2:16 Dahanghino iro mohalang-halang ihkai, ahkan mborihta ahkan uhtus-uhtus bohkon Yahudi, borihta ijo dahpot monyolamat uhtus-uhtus orih. Honong kodorih ulun-ulun Yahudi orih, mondahang toturus dusa-dusan iro, nyiring jombalahoh sukup. Tutang huntuh iro kolaiuoh nopahas tulut Pohotala! 2:17 Tahpi Konduang-konduang tahkan ihkai hombilang pondehan ohkot tahkan ihkam -- hombilang ang mahto, tahpi eam ang ahtoi -- ihkai mahin rindu ahkan'kam, tutang bousaha tu'u-tu'u ahkan hosombang hino umba ihkam! 2:18 Ihkai boniat tulak masap ihkam; tutang ahku jari monyobaoh sino duo tikat, tahpi Sehtan mohalang ihkai. 2:19 Punatu'u ihkamrih koharap tutang kojorih ihkai. Tului noin amat Tuhan Yesus lombut, tutang ihto noharep-Oh, mahka ihkamrih ijo ahkan monjadi kotamam ihkai! 2:20 Puna kodorih ihkam monjadi kotamam tutang kojorih ihkai!
3:1 Laiuoh, korinduan ihkai eam duon tonahan hino. Tului orih ihkai niruk labih pios ihkai tonohtah bongon'kai ang Atene, 3:2 pondehan ihkai nyuhu konduang ihto Timoteus. Io ihcobehti pohalu Pohotala, ijo bogawi homboh ihkai ahkan momborihta Kabar Hinut tohou Kristus. Ihkai monyuhu Timoteus ahkan'kam, mangat io ngomba'as ihkam tutang juhung ihkam, ahkan labih porocaya hino umba Kristus. 3:3 Honong kodorih eam ihcobehti ka, tahkan ihkam ijo undur aropoh tului karot-karot ihto tuh. Ihkam bongon kota'an ijo karot-karot rih nyolong luwang rancana Pohotala ahkan ihto. 3:4 Ang ohkot ihkai magun hihco ihkam, ihkai jari mborihta ahkan'kam labih houn, ijo ihto ahkan ngarot. Tutang kopuna rih moro-morong ius nyolung, ihkam bongon kota'anoh. 3:5 Orihrih kotuluioh ahku nyuhu Timoteus, tului ahku jolik sasino ta'an koloukuwoh komiar'kam a'ang porocaya umba Kristus. Ahku mihkoh Sehtan bohasir nihkos ihkam nyiring paring koheka kouyuh ihkai monjadi ngahus. 3:6 Huntuh Timoteus jari buli, tutang jari nyorihta ahkan ihkai borihta kojorih, tohou koloukuwoh amoh ihkam porocaya umba Kristus tutang saling ngasih. Io nyorihta ahkan 'kai, ijo ihkam toturus anaingina kenang-kenangan ijo pios tohou ihkai ang ahtoi'kam. Tutang ihkam jolik hosombang umba ihkai, sama kolou ihkai ka jolik hosombang umba ihkam. 3:7 Orih rih kotuluioh, Konduang-konduang, ang luwang kokaro kosusah tutang kokarot ihkai, ihkai dahpot apung bain borihta tohou ihkam. Koporocayaan'kam ahkan Kristus mopohajooh ahtoi ihkai, 3:8 nyiring huntuh ihkai nginyam tu'u-tu'u pombolum, asar ihkam tehtep tombok segah hihco umba Tuhan. 3:9 Eaminon hajooh torimakasih ihkai umba Pohotala ngosan paring kojorih ijo ihkai nyuruoh ang toharep-Oh, kotului ihkam. 3:10 Hondou ngolomi ihkai nyawot umbaroh, honong kotuwiahtoi, mangat ihkai dahpot hosombang bongon umba ihkam, ahkan monyukup inon ijo ihkam poruluoh ahkan porocaya ahkan Kristus koloukuwoh kopahtutoh. 3:11 Keleh Pohotala, Amai ihto bongoi tutang Tuhan ihto Yesus Kristus ngorahta jalan bagi ihkai ahkan hosombang umba ihkam! 3:12 Keleh Tuhan nguan ihkam mahimahi mongasih ihco sama ijobohkon, tutang mahi ka'a ngasi paring ulun, nyiring kasih'kam rih botambah-tambah toturus, sama kolou kasih ihkai umba ihkam. 3:13 Honong kodorih Tuhan ahkan ngomba'as ahtoi'kam, nyiring ihkam borasih, tutang eam aro kosalai ang toharep Pohotala, Amai ihto, ang ohkot Tuhan ihto Yesus Kristus lombut homboh paring ulun ijo monjadi Aiu-Oh.
4:1 Laiuoh Konduang-konduang, ihkai jari nonga sutu ahkan'kam, tohou koloukuwoh ihkam harus bolum ahkan ngojorih ahtoi Pohotala. Kopuna ihkam jari bolum kolourih. Tahpi huntuh ngosan kowasan Tuhan Yesus, ihkai nyawot honong paham umba'kam, tutang nyuhu ihkam mangat paham bousaha hino a'ang hal orih! 4:2 Tului ihkam jari kota'an, potunjuk-potunjuk ijo jari ihkai nongaoh ahkan'kam, ngosan kowasan Tuhan Yesus. 4:3 Tuhrih kohondak Pohotala: Mangat ihkam bolum khusus ahkai-Oh, borasih, ngomahcu kokaro gawi ijo kihal. 4:4 Nyinong ulunbahkas ang louk ihkam, pahtut ngota'an, koloukuwoh bolum hihco oruhoh, umba cara ijo ngojorih ahtoi Pohotala tutang kolunon. 4:5 Ara bolum nutut kojolik, jolikbolai toharep oruh'kam, kolou ijo konuan bain ulun-ulun ijo eam kosono Pohotala. 4:6 A'ang hal kolouorih, a'ai ihcobehti ka nguan kosalan umba konduangoh ata'ai ka monihpuoh. Lomoi ihkai jari nonga tingak ijo paham ahkan'kam, ijo Tuhan ahkan mohukum ulun-ulun ijo nguan kosalan-kosalan kolouorih. 4:7 Pohotala na'ah ihto, eam mangat ihto bolum kihal, molekan mangat ihto bolum umba cara ijo ngojorih ahtoi-Oh. 4:8 Ulun ijo nulak ajaran tuh, eamoh nulak ulun molekan nulak Pohotala, ijo nonga Roh-Oh ijo borasih ahkan'kam. 4:9 Eam gunai hino ihkai nyurat ahkan'kam, tohou koloukuwoh ihkam harus ngasi konduang-konduang ijo 'cokoporocaya. Ihkam bongon jari tongajar bain Pohotala ahkan ngasih ihco umba ijobohkon. 4:10 Tutang hal tuh jari ihkam pokarahoh toharep paring konduang 'cokoporocaya ang hopus Makedonia. Tahpi, Konduang-konduang, ihkai nyawot hawui paham mangat pombolum'kam monjadi labih pios hino. 4:11 Bousaha iou bolum honong teneng tutang eam umba sampur posoalan ulun bohkon. Hondakrih ihkam bogawi ngurah napakah bongon, koloukuwoh ihkai lomoi jari moretah'kam. 4:12 Amat ihkam bolum kodorih, ihkam eam bohambin umba ia-iai ka'a, tutang ulun-ulun eam porocaya umba Kristus, ahkan mohoromat ihkam. 4:13 Konduang-konduang ihkai jolik mangat ihkam kota'an ijo kotu'ui tohou ulun-ulun ijo jari mahtoi; mangat ihkam eam sedih ahtoi kolou ulun-ulun bohkon ijo eam anai koharapan. 4:14 Ihto porocaya ijo Yesus jari mahtoi tutang bolum hoduli. Orih kotuluioh, ihto porocaya ka'a, ijo Pohotala ahkan mbolum hoduli paring ulun ijo porocaya umba Yesus, tutang jari palus, mangat iro bolum homboh Io. 4:15 Tohou hal orih tuhrih ajar Tuhan ijo ihkai kani nyapaioh ahkan'kam: Ang ohkot Tuhan Yesus lombut, ihto ijo magun bolum eam ahkan nosolu ulun-ulun ijo jari mahtoi labih houn. 4:16 Noin molehkat hajo ahkan na'ah umba auh ijo muhing, tutang sorunai Pohotala tomohpos kolou tanda aba-aba. Turus Tuhan Yesus bongoi ahkan nosuluh tahkan soruga, tutang ulun-ulun Kristen ijo jari mahtoi ahkan tongomonyun labih soun. 4:17 Uliorih ihto ijo magun bolum ang ohkot rih ahkan hombo-homboh hogatang umba iro nohkuh luwang bounondou-bounondou ahkan hosombang umba Tuhan ang diang. Turus ihto ahkan mohcon umba Tuhan turus-jahamoh. 4:18 Tului rih, hondakrih ihkam saling ngomba'as ahtoi honong hapan tuhtui-tuhtui tuh.
5:1 Konduang-konduang eam porulu ihkai nyurat ahkan'kam mira ohkotoh ijo kona hal-hal rih ahkan nyolung. 5:2 Kotului ihkam bongon kota'an honong jelas, ijo Ondou polombut Tuhan rih ahkan johcok kolou ponyilou lombut a'ang ngolomi ondou. 5:3 Amatmira ulun nuhtui: "Paringoh aman tutang tentram," mahka aang ohkot rih solenga iro ahkan tonopahas korusak tutang eam ihcobehti ka duon lolos. Hal orih ahkan nyolung songola, kolou anyam poros nganak, ijo nopahas ihcobehti bawi ijo ahkan nganak. 5:4 Tahpi ihkam eamoh ulun ijo bolum ang luwang kopindong, nyiring ondou orih nokonyat ihkam, kolou polombut ponyilou. 5:5 Konduang paringoh anairih ulun ijo bolum luwang koloang, ihkam barih aang hondou ijo boloang. Ihto eam ulun ijo bolum luwang kopindong ata'ai ijo barih ang ngolomi ijo pindong. 5:6 Tului rih ihto eam tou tiru-tiruh iou kolou ulun bohkon. Ihto harus bosodia tutang tiruk ihto harus boloang. 5:7 Aang ngolomi ondou ulun tiruh, tutang a'ang ngolomi ondou ka'a ulun monjadi bobusou. 5:8 Tahpi ihto tuh, ulun-ulun ijo barih aang hondou ijo boloang; tului rih tiruk ihto harus boloang. Ihto harus tehtep porocaya umba Tuhan tutang ngasi ulun-ulun bohkon hawoi bokoharap honong yakin, ijo Pohotala ahkan monyolamat ihto. Orihrih sonjata ijo ngolindung ihto a'ang kolahi molawan kopindong. 5:9 Pohotala mitih ihto eam ahkan tonohukum, tahpi ahkan tonyolamat, nguha Tuhan ihto Yesus Kristus. 5:10 Io mahtoi ahkan ihto mangat aang ohkot Io lombut noin -- inon ihto magun bolum, inon ihto jari mahtoi -- ihto dahpot bolum hihco Io. 5:11 Tului orih, kohondakoh ihkam botahtap, saling hojuhung saling hokomba'as, sama kolou ijo ihkam rahat nguai huntuh. 5:12 Konduang-konduang, ihkai nyawot hawui paham, mangat ihkam morega ulun-ulun ijo bogawi ang tohun-tohun ihkam, iorih iro ijo jari tomitih bain Tuhan ahkan niting tutang ningak ihkam. 5:13 Piosnguanrih iro honong sohoromat-horomatoh, tutang umba kasihsayang kotului ingat, inon ijo iro nguaioh. Bolum toturus hawui rukun. 5:14 Ihkai nyawot ka'a. Konduang-konduang, ningakrih iou hawui kopios umba ulun ijo eam kani bogawi, tabahrih ahtoi ulun ijo pomihkoh, dohoprih ulun ijo porulu tondohop, tutang sabarrih toharep paring ulun. 5:15 Jagarih mangat ara anai ijo malos koja'at umba koja'at. Bousaharih toturus ahkan nguan ang pios, ihcobehti ahkan ijo bohkon tutang ahkan paring ulun. 5:16 Hondakrih ihkam turus tongojorih, 5:17 tutang bodo'a hototurus. 5:18 Aang kokaro koada'an, hondakrih ihkam norimakasih, kotului orihrih ijo Pohotala jolik tahkan ihkam, kolou ulun ijo bolum hihco umba Kristus Yesus. 5:19 Ara nahan Roh Pohotala. 5:20 Ara ngohu enteng auh kabar-kabar ijo tononga bain Roh Pohotala. 5:21 Kokaro ang'co harus tonguji, tutang ijo pios harus tonumbun. 5:22 Ngomahcurih, iou tahkan kokaro mahcam gawi ja'at. 5:23 Keleh Pohotala bongoi ijo nonga ahkan ihto kosanang, ngonjorian ihkam ulun ijo tu'u-tu'u bolum khusus ahkan Pohotala. Keleh Pohotala monjaga arop'kam poringoh, pios roh, homboruan, oluka behtin'kam, nyiring eam anai cahcatoh ang ohkot Tuhan ihto Yesus Kristus lombut hoduli. 5:24 Pohotala ijo jari na'ah ihkam, ahkan nguan hal orih rih kotului Io sotia. 5:25 Bodo'a ahkan ihkai, Konduang-konduang! 5:26 Botabe-tabe paring, cara mesra kolou konduang Kristen. 5:27 Ngosan kowasan Tuhan, ahku nyawot hawui paham, mangat ihkam mbasa surat tuh ahkan paring konduang ijo 'cokoporocaya. 5:28 Keleh Tuhan ihto Yesus Kristus mborehkat ihkam. Horomat ihkai, Paulus
1:1 Konduang-konduang ukup ang Tesalonika, ijo monjadi ukup ain Pohotala, Amai ihto, tutang Tuhan Yesus Kristus! Ihkai, yorih Paulus, Silas tutang Timoteus, 1:2 moharap, keleh Pohotala, Amai, tutang Tuhan Yesus Kristus, nonga borehkat tutang kosanang ahkan ihkam. 1:3 Konduang-konduang, ihkai toturus pahtut ngohawot torimakasih ahkan Pohotala kotului ihkam. Tutang puna kopahtutoh ihkai nguan kodorih, kotului ihkam mahi-mahi porocaya umba Kristus tutang ihkam mahi ngasi ihco umba ijobohkon. 1:4 Orihrih kotuluioh ombai ihkai bopander tohou ihkam nyinong tikat ihkai masap ukup-ukup Pohotala. Honong tamam ihkai monyorihta, koloukuwoh ihkam tohtap tehen porocaya umba Kristus, ang parak tonoporos tutang ngarot ijo ihkam nyuruoh. 1:5 Tutang ang ohtoi rih korinah eaminon adiloh bosara Pohotala: Ihkam jari ngarot kotului Kolunon Bohua Ain Pohotala, tutang tului orih ihkam ahkan tongohu layak ahkan nyolong nokuh luwangoh. 1:6 Io ahkan monguanoh inon ijo adil, tutang ahkan mombalos kokarot ahkan ulun ijo nguan ihkam mongarot. 1:7 Tutang ahkan'kam ijo uhuntuh ngarot -- kodorih ka'a umba ihkai -- Pohotala ahkan nonga kosoroah aang ondou Tuhan Yesus nosuluh tahkan soruga, tutang ngorinah arop-Oh hawui molehkat-molehkat Aiu ijo motong, 1:8 tutang honong baho ijo ngonjelak-jelak. Io mosuluh ahkan mohukum ulun-ulun ijo eam poduli Pohotala, tutang ijo eam kani bolum sorurui umba Kabar Hinut tohou Yesus Tuhan ihto. 1:9 Ulun-ulun rih ahkan norima hukum korusak turus-jahamoh todian nokuh ruar tahkan barih Tuhan tutang tahkan kowasai-Oh ijo hajo, 1:10 paringohrih ahkan nyolung ang ondou Io lombut noin ahkan tongohajo bain ukup-Oh, tutang ahkan tonohoromat bain paring ulun ijo porocaya. Ihkam ka ahkan anai ang louk ukup ain Pohotala rih, kotului ihkam jari porocaya umba kabar ijo ihkai ngitotoh ahkan'kam. 1:11 Orih kotuluioh ihkai toturus bodo'a ahkan'kam. Ihkai bodo'a mangat Pohotala ngonjorian ihkam layak ahkan bolum numbun kohondak-Oh; ahkan orih rih Io na'ah ihkam. Keleh Pohotala umba kowasa-Oh, molalus kojolik-Oh, ahkan nguan kopios. Tutang nyoporuna paring gawi ijo ihkam nguaioh, tului porocaya umba Kristus. 1:12 Honong kodorih Tuhan ihto Yesus Kristus tonohajo bain ihkam, tutang ihkam ka tonohajo bain Yesus, kotului kopios ahtoi Pohotalan ihto tutang Tuhan Yesus Kristus.
2:1 Tohou polombut Tuhan ihto Yesus Kristus tutang tohou ahkan tomupungoh ihto ahkan mohcon hihco Io, tuhrih ijo ahku nyawot hawui paham umba ihkam. 2:2 A'ai jele-jeleng bingung, ata'ai golisah kotului anai borihta ijo jari johcok ondou-Oh Tuhan Yesus lombut hoduli. Punatou borihta rih pahtukoh tahkan ihco tujum; ata'ai tahkan ihco ajaran; ata'ai toujadi anai ijo nuhtui ijo ihkai pu'u nyurat ijo kodorih ang luwang ihco surat 'kai. 2:3 Koloukuwoh ka ka'a, ara mohonou ulun monihpu ihkam. Kotului sounumba palombut Ondou Tuhan rih, harusrih nyolung hal tuh labih houn: Aro ulun ahkan murtad, ngobele Kristus, tutang kolunon Ja'at ijo tonakdir ahkan nyolong nokuh norahka, ahkan mopokarah aropoh. 2:4 Honong bojuhu io ahkan molawan tutang ngoisung arop-Oh, ang ngosan paring ijo tonyembah bain ulun, ata'ai paring hotala ijo iro ngohuoh Pohotala bain kolunon. Dahang io ahkan tuot ang luwang Lohpou Pohotala tutang momborihta ijo Io anairih pohotala. 2:5 Ingatrih ijo ahku jari pu'u mborihta paringoh rih ang ohkot ahku magun hihco ihkam. 2:6 Tutang ihkam kota'an, inon ijo huntuh, magun monahan nyolungoh paringoh rih. Noin aang ohkot ijo jari tonahtap bain Pohotala. Kolunon Ja'at rih ahkan lombut. 2:7 Koba'as ijo monggawi koja'at orih jari nopara bogawi, cara bosuhu-suhuk, tahpi magun tonaha-nahan. Noin amat ijo monahanoh orih jari tonosaro, 2:8 punai gihtan kolunon Ja'at orih rih. Mahka mira Tuhan Yesus lombut, Io ahkan munu kolunon ja'at orih umba hasong tahkan baui-Oh, tutang morusakoh umba korolondang polombut-Oh. 2:9 Kolunon ja'at orih ahkan lombut umba ihco kowasa ijo hajo tahkan Sehtan. Io ahkan monapa kokaro mahcam kahtahelan tutang hal-hal luar biasa ijo tuwi umba karon-alik. 2:10 Io ahkan mongguna kokaro tipu muslihat ijo ja'at, ahkan monyosat ulun-ulun ijo ahkan binasa. Iro ahkan binasa kotului nulak, tutang eam rajin umba borihta ijo tu'u tahkan Pohotala ijo dahpot nyolamat iro. 2:11 Orihrih kotuluioh Pohotala mopolombut aang iro ihco kowasa ijo monyosat nyiring iro porocaya ahkan inon ijo eam morong. 2:12 Akibatoh, paring ulun ijo jolik ahkan dusa, tutang eam porocaya umba ijo morong rih, ahkan tonohukum. 2:13 Konduang-konduang ijo tonokasih Tuhan! Toturus ihkai harus, ngohawot torimakasih ahkan Pohotala tohou ihkam, tului tahkan pahtuk-Oh Pohotala, jari mitih ihkam ahkan tonyolamat. Hal orih rih nyolung bain inon ijo tonguan Roh Pohotala ang ihkam, ahkan ngonjorian ihkam ukup Pohotala ijo borasih, tutang bain kotului ihkam porocaya umba Kabar ijo morong tahkan Pohotala. 2:14 Ahkan orihrih Pohotala na'ah ihkam nguha Kabar Hinut ijo ihkai mborihta-Oh ahkan'kam. Pohotala na'ah ihkam, kotului Io kani, mangat ihkam umba nginyam kohajon Tuhan ihto Yesus Kristus. 2:15 Bain Kotului orih, Konduang-konduang, tombok segah tutang nambit hototurus ahkan ajaran-ajaran, ijo jari ihkai nonga ahkan'kam pios socara tuhtui oluka socara surat. 2:16-17 Keleh Tuhan ihto Yesus Kristus bongoi, tutang Pohotala, Amai ihto, nonga ampung tutang koba'as ang ahtoi'kam, mangat ihkam duon bogawi tutang mborihta inon ijo pios. Tului Pohotala ngasi ihto, tutang tului kohinut ahtoi-Oh, Io napa ihto tohtap tabah hawui bokoharap umba ijo hinut.
3:1 Laiuoh, Konduang-konduang, bodo'arih ahkan ihkai. Bodo'a mangat borihta tahkan Tuhan dahpot toturus tayap hawui jion tutang tonorima honong pios, sama kolou ijo jari nyolung aang ihkam soun. 3:2 Bodo'arih ka'a, mangat Pohotala nyolamat ihkai tahkan ulun-ulun ijo bejad tutang ja'at. Kotului eam paring ulun porocaya ahkan borihta tahkan Tuhan rih. 3:3 Tahpi Tuhan sotia. Io ahkan ngomba'as ihkam tutang nolawang ihkam tahkan Si Ja'at. 3:4 Tutang ihkai porocaya towi ahkan Tuhan tohou ihkam, ijo ihkam rahat nguanrih tutang ahkan turus nguanrih, inon ijo ihkai ngajaroh ahkan ihkam. 3:5 Keleh Tuhan niting ihkam ahkan labih horahti ijo Pohotala ngasi ihkam tutang ijo Kristus nonga kotabah ahkan'kam. 3:6 Konduang-konduang, ngosan kowasa Tuhan Yesus Kristus, ihkai moretah mangat ihkam njayong arop umba Konduang ijo bolum noka-nokas, tutang ijo eam numbun ajaran-ajaran ijo ihkai nongarih ahkan iro. 3:7 Ihkam bongom kota'an, ijo ihkam harus numbun sutun ihkai. Ihkai eam noka-nokas, kotihka ihkai anai ang louk ihkam. 3:8 Ihkai eam kuman ukun ulun tutang honong eam molioh. Sobalikoh, hondou ngolomi ihkai bogawi hapa longon 'kai, mangat ihkai eam nyusah iai ka ka'a tahkan louk ihkam. 3:9 Ihkai nguan orih, eam tului ihkai earo bohak monutut mangat ihkam dohop ihkai. Tahpi kotului ihkai kani monjadi sutu bagi'kam. 3:10 Aang ohkot ihkai magun anai ang tohun ihkam, ihkai nonga paraturan tuh: "Ulun ijo eam kani bogawi, ara io kuman." 3:11 Ihkai mander tuh, kotului ihkai ngonih, ijo anai ulun-ulun ang louk'kam ijo bolum noka-nokas. Iro eam bogawi angihco ka, kocoali deroh nyampur, urusan ulun bohkon. 3:12 Ngosan kowasa Tuhan Yesus Kristus ihkai poretahoh ulun-ulun rih tutang nonga pongingat, mangat iro bogawi, honong tentram tutang ngurah bolanja iro bongoi. 3:13 Tahpi ihkam ara peda nguan kopios. 3:14 Mihkohhino noin, anai ulun ijo eam kani numbun, inon ijo ihkai nuhtuirih ang surat tuh. Bojaga toharep ulun kolourih, tutang a'ai bogaul umba io, mangat io mia. 3:15 Tahpi a'ai nguan io kolou musuh; tihkas ningak io kolou ihcobehti Konduang. 3:16 Tuhan anairih luwangtohasak kosanang ihto. Keleh Io turus nonga ahkan'kam kojorih ang kokaron hal. Keleh Tuhan hihco Konduang paring-Oh. 3:17 Tahbe tahkan ahku, Paulus. Ahku bongok ijo nyurat bagian tuh. Tuhrih tanda ijo ahku ngina ang paring surat aik. 3:18 Keleh Tuhan ihto Yesus Kristus, mborehkat Konduang paring-Oh. Horomat ihkai, Paulus
1:1-2 Timoteus, anak'ku ijo sojahti ang luwang Tuhan! Surat tuh tahkan ahku, Paulus, rasul Kristus Yesus ngosan poretah Pohotala, Ponyolamat ihto, tutang ngosan poretah Yesus Kristus koharap ihto. Keleh Pohotala, Amai, tutang Yesus Kristus Tuhan ihto nonga borehkat, pononganasi tutang kosanang ahkan'kam. 1:3 Ahku jolik mangat ihko tahtap mahcon ang Epesus, kolou ius ahku nahtap ahkan'kam, ang ohkot ahku tulak nokuh Makedonia. Kotului, ang Epesus anai pira-pira ulun ijo monyiar ajaran ijo eam morong, tutang ihko harus nondorih iro. 1:4 Nuhtui umba iro mangat a'ai hino rajin ngonih a'ang korimoi-korimoi, tutang sosana-sosana, asal-usul ijo eam pahtot-pahtotoh. Paringoh rih tihkas tou mpolombut kosangit iou, tutang eam mpomiar rancana Pohotala, ijo baya dahpot tongosono, nguha porocaya umba-Oh. 1:5 Titun tingak'ku tuh, anairih mangat ulun dahpot ngina ahtoi ijo hinut tutang ahtoi bua ijo tu'u borasih, hawui tu'u-tu'u porocaya umba Tuhan, tutang honong kodorih iro dahpot hosita sama aropoh. 1:6 Anai 'cokobagi ulun ijo jari eam bolum kolou orih hino, tutang sosat a'ang soaljawab-soaljawab ijo eam anai gunaioh. 1:7 Iro kani monjadi guru-guru agama padahal iro bongoi eam paham auh-auh ijo iro hapai ata'ai hal-hal ijo iro nyorihtarih umba kodorih yahkinoh. 1:8 Ihto kota'an ijo hukum agama puna pios, amat mohaparih kolouinon mustioh. 1:9 Kopunaoh harus tongingat, ijo hukum tonapa eam toharep ulun pios, molekan toharep ulun polanggar hukum, bola ponyilou, ulun rusak bejad, toharep ulun bodusa, ulun ijo eam boagama, ulun cara kolunon, toharep ulun ijo pomunu amaioh ata'ai inaioh, dolang pomunu aang paringoh, 1:10 toharep ulun-ulun kihal, bahkas ngoruh bahkas, ponahput, pobula, monjadi saksi-saksi alik, tutang inon iou ijo nguan hal-hal ijo hokolawan umba ajaran ijo morong. 1:11 Ajaran rih ihto sombangoh ang luwang Kabar Hinut ijo monyiaroh tomorocaya ahkak'ku, yorih Kabar Hinut tahkan Pohotala ijo hajo tutang harus tonara. 1:12 Ahku ngohawot torimakasih ahkan Kristus Yesus Tuhan ihto. Io jari nonga koba'as ahkak'ku ahkan mohalu Io, tutang Io ijo ngohu ahku layak ahkan gawi orih, 1:13 oluka soun ahku mopitnah tutang ngoporos hawui mohina Io. Tapi Pohotala mongasih ahku, kotului ang ohkot orih ahku jaha porocaya, jadi ahku eam kota'an inon ijo ahku nguai. 1:14 Tutang ahku malah tonopuhak umba ponongaasi Tuhan ihto. Io nonga ahkak'ku kodahpot ahkan porocaya umba Oh tutang ngasi sosama ulun. Kodahpot orih tononga ahkan ihto paring ijo jari hihco umba Kristus Yesus. 1:15 Tu'u-tu'u morong auh tuh -- bain orih pahtutrih tonorima tutang tomorocaya holowioh, "Kristus Yesus lombut nokuh kolunon tuh ahkan nyolamat ulun bodusa." Tutang ahku rih ulun bodusa ijo paling ja'at. 1:16 Tahpi justru bain kotului orih rih, Pohotala ngasi ahku, mangat Kristus Yesus duon monunjukoh paring kosabaran-Oh toharep ahku, ulun ijo paling bodusa tuh. Tutang tuh monjadi ihco sutu ahkan paring ulun ijo noin ahkan porocaya ahkai-Oh tutang dahpot pombolum sojahti tutang kototahiu. 1:17 Pohotala, Lahca kokaron jaman, pahtut tonohoromat tutang tonotara hototurus, kotului Io ijo kototahiu, ijo eam gihtan, tutang tihkas Tukan! Amen. 1:18 Timoteus anak'ku! Gawik'ku tuh, ahku morocayaoh umba'kam mongingat ahkan pohtoh Pohotala ijo tonuhtui bain nabi-nabi aang ukup tohou arop'kam. Kohondakrih pohtoh rih monjadi bohahti bagi'kam, a'ang kolahi ijo hinut. 1:19 Hokolahi sambil nambit aang koporocaya ijo morong tutang umba ahtoi bua ijo borasih. Anai ulun-ulun ijo eam poduli ahkan auh ahtoi buaoh, nyiring lonyuh koporocayaan iro. 1:20 Ang marakndo iorih Himeneus tutang Aleksander. Koduo behti rih jari ahku hukum hawui nyorah iro nokuh Sehtan, mangat iro bajar ahkan tondo ngonja'at Pohotala.
2:1 Pahtu-pahtukoh, ahku nyawot honong paham, mangat sawot, sombayang, tutang do'a sapa'at hawui kohawot torimakasih tonyapai ahkan Pohotala ahkan paring ulun, 2:2 ahkan lahca-lahca, tutang ahkan paring ulun ijo nambit kowasa. Nyawotrih, mangat ihto duon bolum teneng tutang tentram ahkan Pohotala umba hadat ijo pahtut. 2:3 Orihrih ijo pios tutang ngojorih ahtoi Pohotala, Ponyolamat ihto. 2:4 Io kani, mangat paring ulun tonyolamat, tutang ngota'an ijo morong. 2:5 Kotului, tihkas anai ihco Pohotala, tutang tihkas anai ihco ulun poholat, holat Pohotala umba ulunkolunon, yorih Kristus Yesus. 2:6 Io ihcobehti kolunon, ijo jari monyarah arop-Oh ahkan momordehka paring ulun, tahkan kahut dusa-dusan iro. Umba orih Pohotala ngorinah aang ohkot ijo metuk, ijo Io jolik mangat paring ulun tonyolamatrih. 2:7 Tutang orihrih kotuluioh, ahku tonyuhu tulak nokuh ulun-ulun bohkon Yahudi mangat mborihta ahkan iro borihta tohou koporocaya ijo morong. Ijo ahku monyiaroh tuh anairih morong, ahku eam ngobalik. 2:8 Ahku kani mangat ang umoh ka ka'a barih bahkas bodo'a umba ahtoi ijo borasih, earo kosangit ata'ai kopaut. 2:9 Hondakrih ka'a barih bawi mokahjan aropoh honong sederhana, tutang hapa pokahjan ijo pantas. Ara hapa tohtok balou ijo molobien, ata'ai pokahjan-pokahjan bulou ata'ai itan, ata'ai pokahjan ijo hajo regaioh. 2:10 Sobalikoh ulunbawi pios mokahjan aropoh umba gawi-gawi ijo pios, koloukuwoh ijo pahtut ahkan ulunbawi ijo sombayang ahkan Pohotala. 2:11 Ulunbawi harus bajar, hawui nonih aropoh, tutang ponumbun. 2:12 Ahku eam ngomorong ulunbawi majar, ata'ai ka moretah ulunbahkas; iro harus tonih. 2:13 Tului ijo pahtu-pahtuk tonapa bain Pohotala anairih Adam, pongohuli punai Hawa. 2:14 Tutang eamoh Adam, molekan ulunbawi ijo totihpu, nyiring molanggar poretah Pohotala. 2:15 Oluka kodorih, ulunbawi ahkan solamat kotului nganak anak, asar io honong randah ahtoi, tehtep porocaya umba Kristus, tutang tehtep ngasih ulun bohkon, hawui bolum khusus ahkan Pohotala.
3:1 Tu'u-tu'u morong auh tuh, "Ulun ijo jolik monjadi pohalu ukup, ngojolik ihco gawi ijo paham borega." 3:2 Ihcobehti pohalu ukup harusrih ulun ijo earo kosalai, tutang tihkas ihco iou oruhoh, ngota'an nahan aropoh, pihtar, tutang tertib, io jolik norima ulun ang luwang lohpouoh, tutang tou majar ulun, 3:3 ara ulun ijo pombusou, ata'ai ijo rajin hokolahi. Sobalikoh, io harus bolemu lembai tutang jolik ahkan kobuah. Io eam tou mahta duitan. 3:4 Io harus ta'an ngahtur lohpou awuoh honong pios, tutang mondidik anak-anakoh mangat te'et, tutang io horomat ahkaioh. 3:5 Tului amat ulun eam tou ngahtur lohpou awuoh bongoi koloukuwohrih io tou ngahtur ukup Pohotala? 3:6 Ihcobehti pohalu ukup, eam tou ulun ijo bohua iou monjadi Kristen, tului noin io monjadi bojuhu, turus tonulut kolou Sehtan lomoi. 3:7 Io harusrih ulun ijo anai aran pios a'ang ulunaro, bain amat eam kodorih, mahka io ahkan tonohina ulun, nyiring ngonyahtu nokuh pinda sokohtung Sehtan. 3:8 Pondohop ang ukup harusrih ka'a ulun ijo pios tutang tulus; eam mahta duitan tutang eam jolik ngorih paham aro tuak. 3:9 Iro harus nambit ba'a-ba'as umba ahtoi homboruan ijo borasih aang ajar koporocayaan Kristen, ijo jari tongorinah bain Pohotala. 3:10 Hondakoh iro ponoriksa houn, tutang amat korinah iro earo kosalai, punanrih iro duon jadi pondohop ang luwang ukup. 3:11 Oruh iro ka harus ulun ijo hinut, eam ulun ijo jolik mandernohou desas-desus. Iro harus kota'an nahan aropoh tutang jujur a'ang kokaro hal. 3:12 Pondohop ukup harus ngina tihkas ihcobehti iou oruhoh, io harus ta'an majar anak-anakoh tutang lohpou awuoh honong pios. 3:13 Ulun-ulun ijo pondohop honong pios, ang luwang ukup, ahkan tonohoromat tutang monjadi mahi-mahi bohanyi bopander tohou koporocayaan iro ahkan Kristus. 3:14 Ahku bokoharap, eam tahi hino ahku ahkan masap ihkam. Oluka kodorih, ahku nyurat ka'a surat tuh ahkan'kam, 3:15 mangat amat ahku rakah, ihko jari ta'an koloukuwoh ihto harus bolum kolou bobuhan Pohotala, yotuh ukup Pohotala ijo bolum. Ukup jituh kolou johi tombok tutang nyuku ajaran ijo morong tahkan Pohotala. 3:16 Eam ihcobehti ka dahpot molawan, eaminon kohajoioh rahasia agaman ihto, Io ngorinah arop a'ang tapan kolunan, tutang tongorinah morong bain Roh Pohotala, hawui gihtan bain dolang molehkat. Borihtaoh uras konahan ang tohun uhtus-uhtus, tutang Io toporocaya ang hopus kolunon tutang konahtang nokuh soruga.
4:1 Roh Pohotala honong tegas nuhtui, ijo ang ohkot-ohkot ijo ahkan lombut, 'cokobagi ulun ahkan murtad, ngobele Kristus. Iro ahkan ponumbun umba roh-roh ijo monyosat tutang nutut ajaran-ajaran roh ja'at, 4:2 ijo tonyiar nguha ulun-ulun monapik ijo ngobula. Ahtoi homboruan ulun-ulun orih rih jari pindong. 4:3 Iro majar ulun ahkan eam kawin tutang eam kuman ukun ijo botatu. Podahal ukun rih tona'oi Pohotala, ahkan tonukun umba ngohawot torimakasih ahkan-Oh, bain ulun-ulun ijo jari porocaya umba Kristus, tutang jari kosono ajaran ijo morong tahkan Pohotala. 4:4 Kokaro angihco ijo tona'oi bain Pohotala orih borasih, tutang eam anai ihco ka ijo harus ngohuoh pali, amat jari norimaoh homboh ngohawot torimakasih ahkan Pohotala. 4:5 Kotului borehkat tahkan Pohotala tutang do'a, nguan ukun orih rih monjadi borasih. 4:6 Amat ihko mongajarrih paringoh rih, ahkan konduang-konduang ihco porocaya, ihko ahkan monjadi pohalu Kristus Yesus ijo bogawi honong pios. Tutang ihko ahkan turus nyiram mboruan'mu umba auh Pohotala ijo ihto porocayaoh, tutang umba ajaran-ajaran ijo morong, ijo jari ihko nututoh kotahin tuh. 4:7 Ngomahcu sosana-sosana tohayul ijo eam boguna. Hondakrih ihko molatih arop'mu ahkan pombolum ijo bosombayang. 4:8 Molatih behti honjiot iou gunaioh, tahpi bolatih ahkan homboruan aro gunai a'ang karo hal, kotului bosuang bowot ahkan pombolum aang uhuntuh tutang uhun ijo ahkan lombut. 4:9 Hal orih morong tutang pahtut tonorima hawui tomorocaya sotuwioh. 4:10 Orihrih kotuluioh, ihto kolahi tutang bogawi paham, kotului ihto moharap sotuwioh umba Pohotala ijo bolum; Iorih Ponyolamat paring ulun, kopahtukoh sosino ulun-ulun ijo porocaya. 4:11 Majarohrih paringoh rih, tutang nyuhu ulun-ulun numbunoh. 4:12 Ara mohanau ihcobehti ka ngohu ihko randah kotului ihko magun biou. Sobalikoh hondakrih ihko monjadi sutu bagi ulun-ulun porocaya a'ang pander'mu tutang hadat'mu, a'ang cara ihko mongasih sosama tutang porocaya umba Yesus Kristus, tutang umba pombolum'mu ijo borasih. 4:13 Pondehan rih nyiring ahku lombut noin, ihko harus tu'u-tu'u mbasa Surat Borasih ahkan ulun-ulun, tutang njuhung hawui ngajar iro. 4:14 Ara ihko langak hapa pononga tahkan Roh Pohotala ijo tononga ahkan'mu, ang ohkot okon-okon ukup ngina longon iro ang ngosan kuhung'mu, tutang nabi-nabi monyiar pohtoh Pohotala tohou arop'mu. 4:15 Nguaniourih paringoh rih umba tu'u-tu'u mangat komiar'mu tonopahjah bain paring ulun. 4:16 Poriksa arop'mu tutang poriksa ka'a ajaran'mu. Hondakrih ihko te'et nguan paringoh rih, kotului umba kodorih ihko ahkan tonyolamat; pios arop'mu bongom, oluka ulun-ulun ijo ngonih'mu.
5:1 Ara ihko bosingi honong paham umba ulun ijo labih oko tahkanumba ihko, molekan mahkatiou io ngonih auh-auh'mu, koloujahka io amai'mu. Nguanumbarih iro ulun-ulun biou, kolou konduang'mu, 5:2 tutang bawi-bawi oko kolou inai. Bawi-bawi biu hondakoh ihko kolou ari'mu, umba sihkap'mu ijo borasih. 5:3 Horomatrih balu-balu ijo moro-morong bolum ihcobehti bongoi. 5:4 Tahpi amat ihcobehti bolu, anai anak-anakoh ata'ai osui-osuioh, iro orihrih ijo pahtu-pahtukoh harus tononga pongosono ijo iro wajib nohtoani injah jolahan iro, tutang malos budi ulun oko tutang tahtu iro. Kotului hal orihrih ngojorih ahtoi Pohotala. 5:5 Balu ijo tu'u-tu'u ihcobehti bongoi tutang eamanai ia-iai ijo dahpot mohaga io, tihkas boharap ahkan Pohotala. Hondou ngalomi io turus bodo'a ahkan Pohotala ahkan nyawot pondohop-Oh. 5:6 Tahpi balu ijo jolik bolum jorih-jirah, jari mahtoi oluka io magun bolum. 5:7 Nyapairih potunjuk-potunjuk tuh ahkan iro, mangat iro bolum earo kosalai. 5:8 Tahpi amat anai ulun ijo eam mohaga aring-konduangoh, labi-labih jolahaioh bongoi, ulun rih ngulim koporocayaoh; io labih ja'at tahkan ulun ijo eam porocaya. 5:9 Tihkas balu ijo sorurui syarat-syarat pongo tuh tou posolong koluwang daptar balu-balu; umuroh patut eam kurang tahkan onom pulu toun, houn tihkas sinotikat kawin, 5:10 bosewut kolou ulunbawi ijo nguan hal-hal ijo pios, kolou misaroh; jari pohajo anak-anakoh honong pios, sanang norima bohkonuhtus nginap ang lohpouoh, mohalu ulun-ulun porocaya, mondohop ulun-ulun ijo susah, tutang nguan rih hawui tu'u-tu'u, kokaro mahcam gawi ijo pios. 5:11 Ara posolong ang luwang daftar rih, balu-balu ijo magun biou. Kotului amat anyam jolikbolai iro monjadi paham tu'u, iro kani kawin hino, tutang nohtah Kristus. 5:12 Mahka iro bosala tului mokila bowot ijo tononga ahkaioh. 5:13 Mahihino iro jari ponihou kotihka, tutang soluka nyolong lohpou ulun. Tutang ijo labih ja'at hino, iorih ijo iro bolajar mopitnah aran ulun bohkon, tutang sampur urusan ulun, hawui momander hal-hal ijo eam pahtut tonomander. 5:14 Orihrih kotuluioh ahku kani, mangat balu-balu biou pios kawin hino, dahpot anak hino tutang hogoguan lohpou kosalahoh, mangat musuh-musuh ihto eam dahpot kosapetoh ahkan ngoja'at-ja'at aran ihto. 5:15 Kotului anai balu-balu ijo jari sosat umba Sehtan. 5:16 Tahpi amat ihcobehti bawi Kristen, anai anak jolahai ijo ius monjadi balu, io harus dohop balu-balu rih; ara mahanou ukup ijo nanggung iro. Honong kodorih ukup dahpot dohop balu-balu ijo samasino eam aro aring-konduang. 5:17 Okon ukup ijo molalus gawiuoh honong pios, pahtut nonga porega duo kalilipet; pahtuk sasino, iro ijo rajin kotbah tutang majar. 5:18 Kotului luwang Surat borasih tonyurat, "Sahpi ijo rahat nihcak-ngihik gandum mekak luang gandum tahkan pahtingoh, ara mangop boui," ka'a, "Ulun ijo bogawi anai hak dahpot uhpahoh." 5:19 Ara norima tuduhan toharep ihcobehti okon ukup, kocoali amat tongondehen bain duo behti saksi ata'ai labih. 5:20 Ulun ijo nguan dusa harusrih toningak ang toharep hopus ukup, mangat ijo bokon monjadi mihkoh. 5:21 Ang toharep Pohotala, Kristus Yesus tutang molehkat-molehkat ijo tonopili, ahku nyawot honong paham mangat ihko numbun potunjuk-potunjuk tuh, earo tongohu toharep iai ka, tutang earo hopihak-pihak. 5:22 Ara dalou join ngina longo ngosan ihcobehti ulun, guna nahtap ponuotoh kolou pohalu Tuhan. Amat ulun bohkon bodusa, ara umba taput a'ang dusa orih. Jaga arop'mu mangat tahtap borasih. 5:23 Ara hino ngorih danum iou; ngorih ka'a honjiot anggur ahkan dohop polonyuh suang usin konoin'mu, tului ihko bojoin poros-poros. 5:24 Dusa 'cokobagi ulun, hounumba ponosara, jari gihtan honong tarang. Tahpi dusan ulun bohkon, punai tongota'an ulioh. 5:25 Kodorih ka'a gawi-gawi pios nyolung gihtan. Tutang ijo murah gihtan sinoka, eam tou toturus tonyuhuk.
6:1 Ulun-ulun Kristen ijo monjadi jihpon, harus ngohu ijo tuan iro pahtut tonohoromat, mangat ulun eam tou ngonjaat aran Pohotala ata'ai pongojaran ihto. 6:2 Jihpon-jihpon ijo tuanoh ulun Kristen, eam tou mopohian tuanoh, tului iro sama-sama ulun Kristen. Malah iro koharusoh mohalu tuan iro rih honong labih pios hino, tului tuan ijo tonohaluoh umba pios orih rih uras sama-sama ulun porocaya ijo tonokasih. Koparingoh tuh harusrih ihko majar tutang ningakrih. 6:3 Ia-iai ngajar ajaran ijo bohkon tahkanmba orih, tutang eam sotuju umba ajaran ijo morong tahkan Tuhan ihto Yesus Kristus, tutang umba ajaran agaman ihto, 6:4 anairih ulun ijo bojuhu, tutang eam kota'an ino-inon! Ponyahkitoh iorih jolik bodebat tutang hojawab, tohou istilah-istilah nyiring mopolombut hiri ahtoi, kopusitoh, pitnah, hokobohu ijo eam pios, 6:5 tutang hosolisih ijo eam tou ohpa-ohpah. Jalan tiruk ulun-ulun orih, jari kahput tutang earo hino komorong. Iro ngohu tou monjadi tahtou tahkan agama. 6:6 Puna agama nonga koutung ijo hajo, amat ulun komo sukup umba inon ijo io anai tonginaoh. 6:7 Tului earo angihcoka, ijo ihto ngomiu nokuh luwang kolunon tuh, tutang earo angihco ka, ka'a ijo dahpot ihto ngomiu nokuh ruar! 6:8 Jadi amat anai ukun tutang pokahjan, orih jari sukup. 6:9 Tahpi ulun ijo kani monjadi tahtou, tonihkos tutang tojorat bain bomahca-mahcam kojolikoh, ijo uong tutang ijo morusak. Kojolik-kojolik orih nguan ulun monjadi lonyuh tutang colahka. 6:10 Kotului tahkan kasih umba duit, lombut karo mahcam koja'at. Anai 'cobagian ulun ijo hodulu duit nyiring jari eam numbun hino ajaran Kristen, turus iro tonopahas aro kokarot ijo molonyuh ahtoi'ndo. 6:11 Tahpi ihko anairih ulun ain Pohotala, jadi ihko harus ngomahcu paringoh rih. Bousaha monjadi ulun ijo morong ang mahtan Pohotala, ijo mongabdi umba Pohotala, porocaya umba Kristus, mongasih sosama, tahan a'ang kokarot, tutang sihkap bolomu lembai. 6:12 Hokolahi tu'u-tu'u ahkan bolum kolou ulun Kristen, mangat ihko nyomba'an hodiah pombolum sojahti tutang kototahiu. Kotului ahkan orihrih Pohotala na'ah ihko, ang kotihka ihko ngahku ang toharep aro ulun, ijo ihko porocaya umba Kristus. 6:13 Tutang huntuh, ang toharep Pohotala ijo nonga hasong ahkan karo ang'co, tutang ang toharep Kristus Yesus, ijo nonga kosaksian ijo morong ahkan Pontius Pilatus, ahku nyawot tuh tahkanaang ihko. 6:14 Ne'etrih umbaparing poretah orih socara brasih, tutang eam sala johcok ang ondou Tuhan ihto Yesus Kristus lombut hoduli. 6:15 Polombut-Oh ahkan tonuhkas ang ohkot ijo metuk bain Pohotala bongoi. Io rih Pongowasa ihco-ihcooh; Io hajo, Lahca karon lahca, tutang Tuhan karon tuan. 6:16 Iorih iou ijo eam tou tonokowasa bain popahtoi; Io bolum ang koloang ijo eam dahpot tongondoni bain iaika ka'a. Eam aro ihcobehti ulunka ijo pu'u nohto-Oh, ata'ai dahpot nohto-Oh. Ahkai-Oh horomat tutang kowasa ahkan turus-jahamoh! Amen. 6:17 Ahkan ulun-ulun ijo tahtou ang kolunon tuh, hondakrih ihko nyawot, mangat iro ara bojuhu, tutang ara bokoharap ahkan ramui-ramui ijo eam bunggut -- kolou haloh umba ponahtou. Iro harus bokoharap ahkan Pohotala, ijo nonga karon aang'co ahkan ihto honong molowi, mangat ihto komonanyamoh. 6:18 Nyawotrih ahkan iro, mangat nunjuk kopios, ahkan aro nguan hal-hal ijo pios, murah ahtoi, tutang rajin mononga. 6:19 Honong kodorih iro nipun ponahtou, ijo monjadi puhku ijo pios, ahkan ohkot ijo ahkan lombut. Tutang umba orih rih iro ahkan ngondahpot pombolum kototahiu, io orih pombolum ijo sojahti. 6:20 Inon ijo jari tomorocaya ahkan'mu, ngina orih pio-pios. Timoteus! Ngomahcu pander-sorihta ijo eam bogunaioh tutang soal-jawab tohou hal-hal ijo cara koliru, konohawot "Pongotaan". 6:21 Kotului anai ulun-ulun ijo ngohawot ijo iro tepun pongotaan rih, nyiring mohiwang tahkan ajaran-ajaran Kristen ijo iro porocaya lomoi. Keleh Tuhan mborehkat Konduang-konduang! Amen. Horomat ihkai, Paulus
1:1-2 Timoteus anak'ku ijo tonongasih! Ahku, Paulus, nyurat surat tuh ahkan'mu tutang bokoharap, keleh Pohotala, Amai tutang Tuhan ihto Kristus Yesus nonga borehkat, pononganasi tutang kosanang ahkan'mu. Ngosan konohuang Pohotala, ahku tonotuot monjadi rasul Kristus Yesus, tutang tonyuhu ahkan mborihta, tohou pombolum ijo tonobowot Pohotala. Pombolum orih ihto torima tului kohihco umba Kristus Yesus. 1:3 Ahku ngohawot torimakasih ahkan Pohotala, ijo ahku mohaluoh umba ahtoi-bua ijo borasih, kolou ijo konuan tahtu ajuh'ku ijo lomoi. Ahku toturus ngohawot torimakasih ahkan Pohotala, nyinong tikat ahku mingat ihko ang do'a, pios hondou kanika ngolomi. 1:4 Ahku ingat ahkan kosedihan ahtoi'mu. Orihrih kotului-Oh ahku jolik samasino hosombang umba ihko, mangat ahku tou moro-morong monjadi jorih. 1:5 Ahku ingat ahkan koporocayaan'mu ijo tu'u-tu'u umba Kristus, sama kolou koporocayaan ajuh'mu Luis tutang inai'mu Eunike. Tutang ahku yahkin ihko ka porocaya kolou orih. 1:6 Tului orih ahku mingat ihko ahkan mongombolum pononga ijo tononga Pohotala ahkan'mu, ang ohkot ahku ngina longok'ku nokuh ngosan kuhung'mu. 1:7 Kotului Roh ijo Pohotala nonga ahkan ihto, eam rih Roh ijo mawi ihto monjadi pomihkoh. Tobalikoh Roh Pohotala orih nguan ihto monjadi ba'as, tuwi umba kasih tutang dahpot nahan arop. 1:8 Kotului orih ara maha'an nonga kosaksian tohou Tuhan ihto, tutang ara ka'a maha'an tohou ahku, ijo tonohukum tului Io. Sobalikoh, hondakrih ihko umba koba'as tahkan Pohotala, umba karot ahkan Kabar Hinut rih. 1:9 Pohotala monyolamat ihto, tutang na'ah ihto, mangat monjadi ukup-Oh bongoi. Io nguan rih eam hogalang inon ijo ihto jari nguai, molekan hogalang rancana-Oh bongoi, tutang pononganasi-Oh. Io nonga ihto pononganasi-Oh nguha Kristus Yesus sounmba kolunon tuh tona'oi. 1:10 Tutang huntuh Pohotala ngorinah pononganasi-Oh rih ahkan ihto, umba polombut Lahca Ponyolamat ihto Kristus Yesus. Yesus ijo mongalah kowasan popahtoi tutang ngomin pombolum ijo abadi nguha Kabar Hinut rih. 1:11 Ahkan mborihta Kabar Hinut orihrih Pohotala nyuhu ahku monjadi rasul tutang guru. 1:12 Orihrih kotuluioh ahku ngarot paringoh tuh, tahpi ahku tahtap yahkin, tului ahku ta'an tu'u, iai ijo ahku porocayaoh. Ahku yahkin, ijo inon ijo jari Io morocayaoh ahkak'ku. Io sanggup ka'a monjagaoh johcok aang Ondou Kiamat. 1:13 Nutut iou umba tu'u-tu'u ajaran morong ijo jari ahku nonga ahkan'mu. Tutang pios ihko tahtap nambit koporocaya tutang kasih ijo monjadi ain ihto tului hihco umba Kristus Yesus. 1:14 Umba pondohop tahkan Roh Pohotala ijo bolum ang luwang ihto, hondakrih ihko njaga pio-pios hal-hal borega ijo jari tomorocayarih ahkan ihkam. 1:15 Ihko ta'an ijo paring ulun ang wilayah Asia jari nohtah ahku, kodorih ka'a Pigelus tutang Hermogenes. 1:16 Tahpi jolahan Onesiforus jari pira-pira tikat ngojorih ahtoi'ku. Keleh Tuhan kani mononga ponunjuk balos kasih umba iro. Oluka ahku ang luwang sipir, Onesiforus eam mia ahkan koada'an'ku rih. 1:17 Kodorih johcok ang Ruma, io turus bousaha ngurah ahku, nyiring io sombang umba ahku. 1:18 Tutang ihko ta'an ijo ang Epesus, io aro samasino dohop ahku. Keleh Tuhan nunjuk balos kasih ahkaioh aang ondou Tuhan mosara paring ukup kolunon.
2:1 Timoteus, anak'ku! Hondakrih ihko monjadi ba'as, bain pononganasi ijo tononga ahkan ihto, kotului ihto hihco umba Kristus Yesus. 2:2 Ajaran ijo houn jari ihko ngonih tahkan ahku, ang toharep ulun aro, hondakoh rih ihko porocaya iou hawui ulun-ulun ijo duon tonoharap tutang ijo cahkap ngajar ulun bohkon. 2:3 Ihko harus umba ngarot kolou sorodadun Kristus Yesus ijo te'et. 2:4 Ihcobehti sorodadu ijo rahat botugas eam ahkan nderohoh aropoh, umba urusan-urusanoh bongoi, kotului io jolik ngojorih ahtoi pokolimaoh. 2:5 Ihcobehti olahragawan eam ahkan monjadi juara ang luwang ihco unuk botanding, amat io eam mone'et poroturan-poroturan. 2:6 Pongumo ijo jari bogawi paham, io ijo sulak-noparaoh bohak norima bua kombulan. 2:7 Ngumang ohrih, inon ijo ahku monyapaioh rih, kotului Tuhan ahkan nonga ahkan'mu kosanggupan ahkan horahti paringoh. 2:8 Ingatrih tuh: Kabar Hinut ijo ahku mborihtaoh rih anairih kabar tohou Yesus Kristus, lihit Dawid; Io rih Kristus ijo jari bolum hoduli tahkan popahtoi. 2:9 Tului mborihta Kabar Hinut orihrih, ahku ngarot; malah nyiring ahku tonoratai kolou 'cobehti ponyilau. Tahpi auh Pohotala eam dahpot tonoratai. 2:10 Orihrih kotuluioh ahku tabah ngohtun paringoh rih, bain boguna ahkan ulun-ulun, ijo jari tomitih bain Pohotala, mangat iro ka ngondahpot kosolamatan ijo tononga nguha Kristus Yesus, tutang ijo tonohomboh umba kohajoi ijo abadi. 2:11 Tu'u-tu'u morong auh tuh: "Amat ihto jari mahtoi homboh Io, ihto ahkan bolum ka'a homboh Io. 2:12 Amat ihto tohtap tabah, ihto ahkan moretah ka'a homboh Io. Amat ihto ngulim Io, Io ka ahkan ngulim ihto. 2:13 Amat ihto eam te'et, Io tohtap te'et, tului eam dahpot Io hokolawan umba arop-Oh bongoi." 2:14 Hondakrih ihko mopingat ulun-ulun tohou paringoh tuh. Ang toharep Pohotala, ningakohrih iro mangat a'ai somba'an tohou istilah-istilah. Orih eam anai gunaioh, malahan tihkas nderoh ulun-ulun ijo ngonihoh. 2:15 Hondakrih ihko bousaha tu'u-tu'u mangat tongahku bain Pohotala, kolou ulun ijo layak bogawi bagi-Oh. Bousaha iou mangat ihko eam mia tohou gawin'mu, molekan majar hawui kona ajaran-ajaran morong tahkan Pohotala. 2:16 Ngomahcurih panderan-panderan, ijo eam anai gunaioh tutang ijo mohina Pohotala. Panderan-panderan kolou orih tihkas napa ulun mahi-mahi ja'at. 2:17 Ajaran ulun-ulun orih, nyoli kolou ponyahkit kaker ijo bosiak. Ang louk iro, nyolung Himeneus tutang Piletus. 2:18 Iro jari nyapang tahkan ajaran ijo morong, tutang monderoh koporocaya 'sobagi ulun. Iro nyorihta ijo komonyun tahkan popahtoi jari nyolung. 2:19 Tahpi galang segah ijo tonapa bain Pohotala eam dahpot hungge. Ang ngosanoh tonyurat tuh: "Tuhan ngosono ulun-ulun ijo aiou-Oh," tutang "Ulun ijo nuhtui ijo io ain Tuhan, ulun orih harus tondo nguan gawi ijo sala." 2:20 Ang luwang lohpou ijo hajo, todahpot mahca-mahcam pokahkas. Anai ijo tonapa tahkan perak, ata'ai bulou, tahpi anai ka'a ijo tahkan kahju, ata'ai tana. Anai ijo tohapan ahkan gunan ijo mombahtang, tutang anai ka'a tohapan ahkan koporluan bahut. 2:21 Ulun ijo porasih aropoh tahkan paring ijo ja'at, ulun rih tohapan ahkan gunan ijo mombahtang. Io monjadi ain ijo khusus tutang boguna ahkan tuanoh. Io tonahtap ahkan tohapan bagi nyinong gawiu ijo pios. 2:22 Ngomahcuohrih komangat-komangat ulun biou. Bousaha ahkan bolum numbun kohondak Pohotala, te'et aang ajaran-Oh, tutang hopasi sama arop, hawui anaingina koteneng ahtoi. Bolumrih kodorih hihco iro ijo na'ah nyawot pondohop ahkan Tuhan umba ahtoi ijo borasih. 2:23 A'ai umba a'ang kosomba'anauh ulun-ulun uong ijo eam ta'an ino-inon. Ihko ta'an ijo paring orih tihkas mopolombut kolahiauh. 2:24 Ulun ijo bogawi ahkan Tuhan eam pahtut hojawab, io harus bojenta toharep paring ulun, tutang dahpot majar ulun honong pios tutang sabar. 2:25 Io harus bolomu lembai majar ulun-ulun ijo rajin hokolawan; mudah-mudahan Pohotala nonga kosapet ahkan ulun-ulun orih ahkan hubah tahkan dusa-dusan iro, tutang ngosono ajaran ijo morong. 2:26 Honong kodorih iro monjadi borondong hoduli, tutang liwus tahkan sokohtung Sehtan, ijo jari nawan iro, tutang maksa iro numbun konohuangoh.
3:1 Ingatrih tuh: Ang ondou-ondou kolaiou ahkan anai aro kosusah. 3:2 Ulun ahkan kogunan aropoh bongoi, sipatoh mahta duitan, bojuhu tutang jolik mombual. Iro rajin mohina ulun, borontak toharep ulun ohko, eam ta'an botorimakasih, tutang bosingi hal-hal rohani. 3:3 Iro eam mongasi samaarop, eam rajin nonga apun, iro jolik ngonja'at-ngonja'at aran ulun bohkon, rajin hapa kokarasan, iro kejam, tutang eam ngojolik komorong. 3:4 Iro rajin dorhaka, bojuhu ahtoi, tutang eam moniruk ombu. Iro labih rajin aang kosanang kolunon tahkanumba numbun Pohotala. 3:5 Mahika socara koului iro te'et monjalanoh kowajiban agama, namun nulak usiou tahkan agama rih bongoi. Jayongohrih ulun-ulun ijo kolourih. 3:6 Anai ang louk iro, ijo jari nyusup nokuh lohpou-lohpou, turus njorat bawi-bawi bolomu, ijo ngina aro samasino dusai tutang konowasa bain mahca-mahcam kojolik. 3:7 Ulunbawi-ulunbawi rih turus hototurus nyawot tongajar, tahpi eam pu'u dahpot ngosono ajaran ijo morong tahkan Pohotala. 3:8 Samakoloukuwoh rih Yanes tutang Yambres molawan Museh lomoi, kodorihrih ka'a ulun-ulun orihrih molawan ajaran tahkan Pohotala. Tiruk iro jari rusak, tutang koporcaya iro jari sokarah. 3:9 Tahpi iro eam ahkan ngondahpot ino-inon, tului kouong iro ahkan tongota'an bain paring ulun, kolou ijo tonyuru bain Yanes tutang Yambras ka'a. 3:10 Tahpi ihko jari nutut ajaran-ajaran tahkan ahku, hadat aik'ku, tutang tihtun pombolum'ku, ihko jari nohto bongom, koloukuwoh ahku tu'u-tu'u porocaya umba Yesus Kristus, tutang ngasih sosama kolunon. Ihko ka'a ta'an kosabaran tutang kotabah'ku. 3:11 Ihko jari nohto ahku tonoporos tutang ahku ngarot. Ihko ta'an paring ijo nyolung toharep ahku ang Antiokhia, ang Ikonium, tutang ang Listra, tutang ihko ta'an paring ijo ahku ngarot! Tahpi Tuhan monyolamatoh ahku tahkan paringoh rih. 3:12 Puna paring ulun ijo kani bolum sombayang tutang bolum hihco umba Kristus Yesus ahkan tongoporos, 3:13 rahatoh ulun-ulun ijo ja'at tutang ulun-ulun ponihpu ahkan mahi-mahi ja'at. Iro nihpu ulun bohkon, padahar iro bongoi ka totihpu ka'a. 3:14 Tahpi tohou ihko, Timoteus, hondakrih ihko tohtap nambit aang ajaran-ajaran ijo morong ijo jari tonongajar ahkan'kam tutang ijo ihko porocaya sotuwioh, tului ihko kota'an iai guru-guru'mu. 3:15 Ihko harus ingat, ijo tahkan koik, ihko jari kosono Surat Borasih. Surat Borasih rih dahpot nonga ahkan'kam horahti ahkan dahpot solamat, nguha porocaya umba Kristus Yesus. 3:16 Paring ijo tonyurat luwang Surat Borasih ijo tonoilham bain Pohotala, tutang boguna ahkan majar ijo morong, ahkan ningak tutang ngobuah ijo sala, tutang ahkan majar ulun mangat bolum numbun konohuang Pohotala. 3:17 Umba Surat Borasih rih, ulun ijo mohalu Pohotala dahpot tonyuhkup honong soporuna ahkan kokaron mahcam gawi ijo hinut.
4:1 Kristus Yesus ahkan lombut hino nokuh kolunon tuh, ahkan mosara ulun-ulun ijo bolum tutang ijo mahtoi; tutang Io ahkan lombut ahkan moretah kolou Lahca. Bain kotului rih ahku nyawot hawui paham ahkan'mu ang toharep Pohotala tutang Kristus Yesus. 4:2 Hondakrih ihko monyiaroh, borihta tahkan Pohotala rih, tutang turus hojojuan, mangat ulun ngonihoh, inonrih iro kani ata'ai eam. Hondakrih ihko moyakinoh ulun, nunjuk kosalai, tutang nonga juhung ahkan iro. Ngajarohrih ulun honong kosabar sodahpottou. 4:3 Tului ahkan johcok ohkotoh, ulun eam hino norima ajaran ijo morong. Tobalikoh, iro ahkan numbun kojolik iro bongoi, tutang mupung aro guru, guna majar hal-hal ijo momih konahan ang tolingan'ndo. 4:4 Iro ahkan mangop tolingai toharep ijo morong, tahpi ahkan nguap tolingaioh toharep solihta-solihta kolimoi. 4:5 Oluka kodorih, ihko harus ngowasaoh arop'mu a'ang koada'an koloukuwoh ka. Tabahrih a'ang kokarot lalusrihiou tugas'mu kolou pomborihta Kabar Hinut rih, tutang molalusoh rih honong ko-hinu-hinutoh, kopahtut'mu ahkan mohalu Pohotala. 4:6 Tohou arop'ku, jari johcok ohkotoh, ahku ahkan mahtoi kolou porahpah ahkan Pohotala. Honjiot hino ahku ahkan nohtah kolunon tuh. 4:7 Ahku jari umba solanja honong sohinu-hinutoh, tutang jari johcok garis laiu. Ahku tohtap te'et umba Kristus, johcok laiu. 4:8 Tutang huntuh hodiah komanang ngindoi ahku. Aang Ondou Kiamat, Tuhan, Hakim ijo adil rih ahkan monyarah hodiah orih ahkak'ku, tului ahku bolum hokopios umba Pohotala. Tutang eam ahku iou ijo ahkan norima hodiah rih, tahpi ka'a paring ulun ijo ngindoi polombut Tuhan hawui paham rindu. 4:9 Bousaha lombut masap ahku sodahpottou. 4:10 Tului Demas jari nohtah ahku, kotului nyayang kolunon tuh. Io ius tulak nokuh Tesalonika. Kreskes jari tulak nokuh Galatia, tutang Titus nokuh Dalmatia. 4:11 Tihkas Lukas ijo mohcon umba ahku. Omin Markus tutang ngomin io homboh ihko, tului io dahpot dohop a'ang gawik'ku. 4:12 Ahku jari nyuhu Tikhikus tulak nokuh Epesus. 4:13 Amat ihko lombut, ngomin mantel ijo ahku nohtah ang Troas, ang lohpou Karpus. Omin ka'a buhku-buhku aik'ku, mombahtang buhku-buhku ijo tonapa tahkan korahtas uhpak. 4:14 Aleksander, tuhkang tombaga rih jari nguan hal-hal ijo ja'at samsino toharep ahku. Tuhan ahkan malos io numbun anggawiuoh. 4:15 Ihko bongom harus bua-buah toharepoh bain io ngolawan kabar ihto. 4:16 Ang ohkot ahku sino tikat, nonga pombela arop'ku, eam anai ihcobehti ka ijo mambai ahku; paringoh nohtah ahku. Mudah-mudahan Pohotala eam nosalan iro a'ang hal tuh! 4:17 Tahpi Tuhan mambai ahku, Io nonga koba'as, nyiring ahku sanggup mborihta paring Kabar Hinut rih, mangat konahan bain paring ulun bohkon Yahudi. Tutang ahku liwus tahkan bohaya popahtoi. 4:18 Puna Tuhan ahkan moliwus ahku, tahkan nyinong gawi ijo ja'at toharep ahku. Io ahkan ngomin ahku honong solamat, nokuh luwang Kolahca'an-Oh ang soruga. Hondakrih Io tonohajo turus-jahamoh! Amen. 4:19 Tahbe tahkan ahku ahkan Priskila tutang Akwila tutang ahkan jolahan Onesiforus. 4:20 Erastus mohcon ang Korintus tutang Trofimus ius ahku nohtahoh a'ang koada'an mondam ang Miletus. 4:21 Bousahaiou sauli-ulihoh ahkan lombut soun tahkan wayah sorongin. Ebulus, Pudes, Linus, tutang Klaudia ngirim taben iro ahkan'kam; kodorih ka'a paring konduang ihcoporocaya ijo bohkonoh. 4:22 Keleh Tuhan mambai ihko. Keleh Tuhan mborehkat Konduang-konduang! Horomat ihkai, Paulus
1:1 Anak'ku Titus! Ahku, Paulus, nyurat surat tuh kolou jihpon Pohotala tutang rasul Yesus Kristus. Ahku tonopili, tutang tonyuhu, ahkan dohop ulun-ulun ijo tonopili Pohotala, mangat monjadi ba'as a'ang koporocayan iro. Ahku ka'a harus ngagalan iro mangat kosono ajaran ijo morong ijo tongajarrih bain agaman ihto. 1:2 Ajaran rih hogalang koharap, ijo ihto ahkan norima pombolum sojahti, tutang kototahiu. Pohotala jari mbowotoh pombolum rih hounumba pahtuk jaman -- tutang Pohotala eam pu'u bobalik. 1:3 Ang ohkot ijo kona, Pohotala ngorinah bowot-Oh rih a'ang pohtoh-Oh. Pohtoh orih jari tomorocaya ahkak'ku, tutang ahku mborihtaoh bain poretah Pohotala Ponyolamat ihto. 1:4 Titus, ihko puna anairih anak'ku, kotului ihko tutang ahku, sama-sama ius porocaya umba Kristus. Ahku moharap, keleh Pohotala, Amai, tutang Kristus Yesus Lahca Ponyolamat ihto, nonga borehkat tutang kosanang ahkan'mu. 1:5 Ahku nohtah ihko ang Kreta mangat ihko dahpot hogoguan hal-hal ijo magun porulu ngobuah: Ka'a mangat ihko mitih ponotua-ponotua ang ukup, ang nyinong lowu. Tutang ingat iou potunjuk-potunjuk tahkan ahku tuh: 1:6 Ihcobehti ponotua ukup hondakrih ihcobehti ijo eamanai kosalaioh: Io tihkas ngina ihcobehti oruhoh, anak-anakoh harus jari porocaya umba Kristus tutang eam ijo bosewut kolou anak brandal tutang ijo eam dahpot tongahtur. 1:7 Okon ukup, anai ulun ijo hogoguan gawin Pohotala, io eam tou josala-sala. Io eam tou bojuhu, ata'ai ponyingi, ata'ai pobusou, ata'ai jolik hokolahi, ata'ai jolik mahta duitan. 1:8 Io harus sanang norima ulun ang lohpouoh, jolik ahkan hal-hal ijo pios, duon nahan aropoh, morong, borasih tutang toahtur. 1:9 Io harus nambit segah aang ajaran ijo dahpot ulun tomorocaya, kolou ijo jari tongajarrih ahkaioh. Honong kodorih io sanggup moningak ulun hogalang ajaran ijo morong, tutang ngorinah kosalan ulun-ulun ijo molawanoh. 1:10 Tului aro ulun ijo jolik mohiwang, pahtuk ulun-ulun ijo nanaioh boagama Yahudi; iro monihpu ulun bohkon umba pander puang iro. 1:11 Ulun-ulun kolouorih harus tomangop bauioh, tului iro monderohrih aro bobuhan umba ajaran-ajaran ijo eam-eam. Iro nguan orih, tihkas kotului kani ngurah utung ijo eam pantas! 1:12 Pu'u ihcobehti nabi iro bongon, ijo asaroh tahkan Kreta ka'a, nuhtui, "Ulun-ulun Kreta toturus pobalik tutang kolou ohcin bosiak ijo bobongo tutang kodian." 1:13 Inon ijo tonuhtui bain nabi rih puna morong. Orih kotuluioh ihko harus ningak iro hawui tegas; mangat iro tohtap nambit ang ajaran ijo morong, 1:14 tutang eam hino nambit ang kolimoi-kolimoi Yahudi, ata'ai aturan-aturan ijo tonapa bain ulun-ulun, ijo nulak ajaran ijo morong rih. 1:15 Kokaron ang'co, anairih borasih ahkan ulun-ulun ijo borasih. Tahpi bagi ulun-ulun ijo tirukoh ja'at tutang ijo eam porocaya, eam anai ang'co ka ijo borasih, tului tiruk tutang ahtoi-bua iro jari ja'at! 1:16 Iro nuhtui ijo iro kosono Pohotala, padahar gawin iro ngobeleoh. Iro ngojilokoh, tutang iro eam kani te'et; iro anairih ulun-ulun ijo eam dahpot nguan ang'co ijo hinut.
2:1 Tahpi ihko, Titus, hondakrih ihko mongajar, ajaran ijo kona. 2:2 Ningakrih ulun-ulun bahkas ijo ohko, mangat iro nahan aropoh, bijaksana tutang bolum kolou ulun ijo pahtut tonohoromat. Iro harus ka'a nambit aang ajaran ijo morong tahkan Pohotala, mongasih honong soporuna, tutang ngarot honong tabah. 2:3 Kodorih ka'a hondakrih ihko ningak ulun bawi-bawi ijo oko, mangat hadat iro hotohorong umba inon ijo pahtut, bagi ulun ijo bolum khusus ahkan Pohotala. Iro eam tou mopitnah ulun bohkon, tutang eam tou kotagihan ngorih ijo mbusouoh. Iro pahtut majar hal-hal ijo pios, 2:4 mangat umba orih iro dahpot mondidik bawi-bawi biou mangat nyayang bosaioh tutang anak-anak, 2:5 monjadi pihtar, bolum borasih, tutang kolou inai ang lohpou kosalahoh ijo pios, ijo tunduk umba auh bosaioh. Honong kodorih eam anai ulun ijo dahpot nosala borihta tahkan Pohotala. 2:6 Kodorih ka'a, ningakohrih ulun-ulun biou mangat iro monjadi ulun bijaksana. 2:7 A'ang kokaron hal, hondakrih ihko monjadi sutu hadat ijo hinut. Amat ihko majar, ihko harus bujur tutang tu'u-tu'u. 2:8 Haparih tuhtui-tuhtui ijo bijaksana, ijo eam duon nosalan bain ulun, mangat musuh-musuh'mu jadi mia, tului eam anai hal-hal maram ijo duon iro nuhtui tohou ihto. 2:9 Jihpon-jihpon harus tunduk umba tuan'ndo, tutang ngojorih ahtoioh a'ang kokaro hal. Iro eam tou molawan, 2:10 ata'ai nahkou. Hondakrih iro pokarah ijo iro toturus honong sihkap pios tutang te'et, mangat umba sihkap iro rih, ulun monara ajaran tohou Pohotala, Ponyolamat ihto. 2:11 Tului Pohotala jari pokarah ponongaasi-Oh, guna nyolamat paring ukup kolunon. 2:12 Pononganasi Pohotala rih mondidik ihto, mangat eam hino bolum hokolawan umba kohondak Pohotala, tutang eam numbun kojolik kolunonoh. Ihto todidik ahkan bolum luwang kolunon tuh hawui ta'an nahan arop, bujur tutang te'et umba auh Pohotala. 2:13 Uhuntuh ihto rahat ngindoi Ondou, ijo ihto paham mohara-harapoh rih; ang Ondou orih rih kolunon ahkan nohto kohajon Yesus Kristus, yorih Pohotala Mahahajo tutang Lahca Ponyolamat ihto. 2:14 Io jari moporahpah arop-Oh bagi ihto, ahkan momorodehka ihto tahkan kokaro koja'at, tutang ngonjorian ihto ihco ukup ijo morodehka tahkan dusa, tutang ijo monjadi Aiu-Oh iou, hawui ijo rajin nguan ang hinut. 2:15 Majarohrih iou paringoh tutang ningakoh hawui pingat dolang pongonih ajaran'mu, tutang tuwi pongaroh. A'ai mohonau ihcobehti ka, nopahjah ihko pinda.
3:1 Mopingatrih anak-anak ukup'mu, mangat iro tunduk umba okon-okon tutang pongowasa nogara, hawui te'et tutang bosodia nguan nyinong hal ijo hinut. 3:2 Nuhtuirih ahkan iro mangat ara mopitnah ata'ai hojawab umba iai ka ka'a molekan mangat bojoin bojenta. Pios iro bojoin bolomu lembai toharep paring ulun. 3:3 Kotului soun ihto bongon ka'a uong, lahcat tutang eam te'et. Ihto tohojihpon bain mahca-mahcam bolaiusi tutang kojolik; ihto bolum umba niat-niat ja'at, tutang hiri ahtoi, hawui saling hokosingi. 3:4 Tahpi Pohotala, Ponyolamat ihto ngorinah kasih tutang kohinut ahtoi-Oh ahkan ihto. 3:5 Io monyolamat ihto, eam kotului ihto jari nguan aang'co ijo pios, molekan kotului Io bongoi mongasihan ihto. Io nyolamat ihto nguha Roh Pohotala, ijo nonga ihto konanak bohua, tutang bolum bohua, umba jalan muhi kosalan ihto. 3:6 Pohotala nusuh Roh-Oh ahkan ihto honong poholat Yesus Kristus, Lahca Ponyolamat ihto. 3:7 Mangat bain pononganasi Yesus, ihto hokopios hoduli umba Pohotala tutang ihto dahpot pombolum ijo sojahti tutang kototahiu ijo ihto mohara-harap-Oh. 3:8 Auh tuh tu'u-tu'u morong. Ahku kani ihko monihkin hal-hal tuh, mangat ulun-ulun ijo porocaya umba Pohotala tu'u-tu'u bousaha, ahkan nguan gawi-gawi ijo pios tutang boguna ahkan paring ulun. 3:9 Mokila tahkan hotokian-tokian ijo eam anai gunai, sosana-sosana asal-usul, hokosingi tutang hokolahi tohou hukum agama. Paring orih eam anai gunaioh, tutang eam anai utungoh. 3:10 Ulun ijo kotuluioh kopusit ang ukup pios ihko ningaksino, duo tikat; uliorih rih ara hino pahkat umba io. 3:11 Ihko ta'an ijo ulun somahcam rih bijat tutang dusai-dusaioh monanda ijo io bosala. 3:12 Jeleng ulimba ahku nyuhu Artemas ata'ai Tikhikus ahkan'mu, bousaha jeleng jiontou ahkan lombut nokuh ahku ang Nikopolis, bain ahku boniat mohcon ang anan kotahin musim sorongin. 3:13 Bousaharih tu'u-tu'u ahkan mondohop Senas, ahli hukum rih, tutang Apolos, mangat iro tou tulak tutang eam tahpas ino-inon. 3:14 Ulun-ulun iro harus bolajar nguan hal-hal ijo pios, mangat duon nyukup koporoluan-koporoluan ijo paham baguna, a'ai nyiring iro bolum eam gunai. 3:15 Paring konduang ijo anai hihco ahku, ngirim tabe ahkan'mu nyiaroh iou taben ihkai ahkan injah-jolahan ihto ijo hihco koporocaan. Keleh Tuhan mborehkat Konduang paring. Horomat ihkai, Paulus
1:1 Konduang Pilemon, jolahan tutang sobat ihkai! Ahku, Paulus, ihcobehti ulun tohukum kotului Kristus Yesus, homboh umba konduang ihto Timoteus, nyurat surat tuh ahkan'mu, 1:2 tutang ahkan ukup ijo hopuhpung ang lohpou'mu; ka'a ahkan konduang bawi Appia, tutang injah hihcokolahin ihto Arkhipus. 1:3 Ihkai moharap, keleh Pohotala, Amai ihto, tutang Tuhan Yesus Kristus, nonga borehkat tutang kosanang ahkan'mu. 1:4 Nyinong tikat ahku bodo'a ahku ngohawot aran Konduang tutang ngohawot torimakasih ahkan Pohotala. 1:5 Bain ahku ngonih ijo Konduang tu'u-tu'u porocaya umba Tuhan Yesus tutang mongasih paring ukup Pohotala. 1:6 Ahku bodo'a keleh pongonduang ihto, kolou ulun-ulun porocaya, ahkan momua kohorahti, ijo labih hajo, ngosan kokaron borehkat ijo ius ihto nginaoh kotului hihco umba Kristus. 1:7 Konduang Pilemon, kasih'mu rih toharep paring ukup Pohotala, ngojorih ahku tutang nonga ngojuhung ahkak'ku! Paring ulun ukup Pohotala jari monjadi jorih tului Konduang. 1:8 Bain kotului rih, kolou ihcobehti konduang ijo porocaya, ahku tou iou moretah Konduang ahkan nguan inon ijo harus Konduang nguaioh. 1:9 Tahpi tului ahku ngasih Konduang, ahku tihkas nyawot iou. Ahku ihcobehti oko, tutang huntuh rahat tonahan ang luwang sipir kotului Kristus Yesus. 1:10 Ahku, Paulus, nyapai ihco ponyawot umba'mu tohou Onisimus anakaik'ku a'ang Kristus. Kotului ang luwang sipir tuh ahku jari nyolung amai rohanioh. 1:11 Lomoi io eam anai boguna ahkan'mu, tahpi huntuh io anai gunai, eam iou tihkas ahkan'mu, tahpi ahkak'ku ka'a. 1:12 Uhuntuh ulun ijo ahku mongasihoh rih, ahku ngirim hoduli ahkan'mu. 1:13 Kotu'uioh ahku jolik nahan io hihco ahku kolou tokirin ihko, mangat io tou dohop ahku, kotahin ahku tonahan luwang sipir tuh, tului mborihta Kabar Hinut tahkan Pohotala. 1:14 Tahpi ahku eam kani nguan ino-inon, amat Konduang jaha nonga sotujuoh. Ahku labih jolik, amat Konduang nguaioh hawui rela-ahtoi bongon; ahku eam kani hojojuan'mu. 1:15 Punatou Onisimus hombilang tahkan Konduang ahkan pondehan kotihka, mangat Konduang tou dahpot io hoduli ahkan kototahiuoh. 1:16 Huntuh io eam baya ihcobehti jihpon ahkan Konduang; io labih tahkan orih. Io anairih samasama ulun Kristen ijo tonokasih. Io aro gunai samasino ahkak'ku, inonhino ahkan'mu! Botatu io arogunai samasino pios kolou jihpon, mahika kolou ihcobehti konduang a'ang Tuhan! 1:17 Bain kotului orih, kotului Konduang ngohu ahku jolahan sosama Kristen, torima hoduli Onisimus monjadi kolou Konduang norima ahku. 1:18 Amat io bosala, ata'ai anai utangoh umba ihko, nauh ahku ijo nahkung paring orih. 1:19 Nah, piosrih ahku nyurat bongok ang ohtoi: Ahku, Paulus, ahkan molunas paringoh.(Puna eam perulu ahku mingatoh ijo Konduang bongon anaingina utang umba ahku, io rih pombolum'mu ijo bohua kolou ulun Kristen.) 1:20 Kotului rih, a'ang aran Tuhan cubalah dohop ahku, ngojorih ahtoi'ku kolou konduang ang luwang Kristus. 1:21 Ahku nyurat surat tuh kotului yahkin ijo Konduang ahkan molalus inon ijo ahku nyawot. Molekan ahku ta'an Konduang ahkan nguan labih tahkan orih. 1:22 Pondehan rih, dohop nahtap tahkun ahkak'ku ang lohpou'mu, tului ahku harap Pohotala molalus do'a, Konduang-konduang paringoh, tutang ngomin ahku hoduli nohkuh ihkam. 1:23 Epafras, ijo anai hihco ahku ang sipir tului Kristus Yesus ngirim tabeoh ahkan'mu. 1:24 Torima ka'a tabe jolahak-jolahak'ku Markus, Aristarkhus, Demas tutang Lukas. 1:25 Keleh Tuhan Yesus Kristus mborehkat ihkam. Horomat ihkai, Paulus
1:1 Aang jaman lomoi aro tikat Pohotala hopander umba tahtu ajuh ihto nguha nabi-nabi tutang hapa mahca-mahcam cara. 1:2 Tahpi ang jaman laiou tuh, Io nuhtui umba ihto nguha Anak-Oh. Nguha Anak-Oh Pohotala naoi aangpindalangit tuh. Tutang Pohotala ius nahtap ijo Anak-Oh tuhrih ka'a ijo bohak tepun kokaro aangihco. 1:3 Io ijo nyingahoh kohajon Pohotala ijo gilang-gomilang; Io rih gambar ijo ngorinah tahkan behtin Pohotala bongoi. Io ka'a ijo mohaga kotehen angpindalangit tuh umba auh-Oh, ijo paham kowasai. Ulijari Io nongajalantou ulun ahkan tomorodehka tahkan dusa-dusan iro, Io monuot ang pododusan pomoretah ang soruga, samasama umba Pohotala, Pongowasa ijo palingdiang. 1:4 Anak rih ngondahpot ponuot, ijo mahcu labih diang umba molehkat-molehkat, tutang aran ijo tononga Pohotala ahkai-Oh ka'a mahcu labih horomat tahkanumba aran ijo tononga ahkan molehkat. 1:5 Eam pu'u Pohotala nuhtui koloutuh, ahkan ihcobehti molehkat ka, "Ihkorih Anak-Ku; aang ondou tuh Ahku monjadi Amai'mu." Eam pu'u hino Pohotala nuhtui koloutuh, tohou molehkat ijo amohka, ka'a, "Ahku ahkan monjadi Amaioh tutang Io ahkan monjadi Anak-Ku." 1:6 Tahpi ang uhun Pohotala monyuhu Anak-Oh ijo pongoko nokuh kolunon tuh, Pohotala nuhtui koloutuh, "Paring molehkat Pohotala, pahtut nyembah Anak rih." 1:7 Tohou molehkat-molehkat, Pohotala nuhtui tumun tuh, "Pohotala napa molehkat-molehkat-Oh monjadi bahiu, tutang pohalu-pohalu-Oh monjari jelak baho." 1:8 Tahpi ahkan Anak rih Pohotala nuhtui, "Pododusan-Mu yo Pohotala ahkan kototahiu turus-jahamoh! Pomoretah-Mu anairih pomoretah ijo Adil. 1:9 Ihko jolik ahkan koadilan, tutang bosingi umba ijocurang. Orihrih kotuluioh Pohotala, Pohotalan-Mu, ngopili Ihko tutang nonga ahkan-Mu kohoromatan ijo mopolombut jorihjirah molowi injah-injah-Mu." 1:10 Pohotala nuhtui ka'a, "Ihko, Tuhan, aang pahtukoh naoi tana, tutang Ihko bongom napa langit. 1:11 Paringoh rih ahkan dilap, tutang monjadi ruhtus kolou pokahjan; tahpi Ihko eam ahkan boubah. 1:12 Angpindalangit tuh ahkan Ihkomolipet kolou pokahjan, tutang ahkan Ihkonakiri umba ijo bohkon. Tahpi Ihko eam pu'u ahkan boubah, tutang pombolum-Mu eam ahkan bolaiu." 1:13 Pohotala eam pu'u nuhtui koloutuh ahkan ihcobehti molehkat ka, "Tuotrih angsila kotouk-Ku nyiring musuh-musuh'mu Ahku ngominda umba ihko." 1:14 Amat kolourih molehkat-molehkat rih, inon kotu'uioh? Iro anairih roh-roh ijo mohalu Pohotala, tutang ijo sonuhu Pohotala ahkan dohop ulun-ulun ijo ahkan norima kosolamatan.
2:1 Orihrih kotuluioh ihto harus labih tu'u-tu'u nambit aang ajaran-ajaran ijo jari ihto ngonihoh, mangat ihto ara nohtah koporocayan ihto. 2:2 Pohtoh-pohtoh ijo tonyiar bain molehkat-molehkat ahkan tahtu ajuh ihto korinah morong tutang ulun ijo eam numbunoh ata'ai ngote'etoh, norima hukum ijo sotimpal. 2:3 Mahihino umba kosolamatan ijo labih hebat tahkan pohtoh-pohtoh rih! Amat ihto eam anai poduli toharep kosolamatan rih, ihto puna botatu eam ahkan luhput tahkan hukuman. Tului Tuhan bongoirih ijo pahtu-pahtukoh mborihta kosolamatan rih, tutang ulun ijo sula-sulak lomoi ngonihoh, jari mombuktioh komorongoh ahkan ihto. 2:4 Ang bambai orih, Pohotala umba ngondehen kosaksian ulun-ulun rih, hawui nahtap karo mahcam tandahelan tutang hal-hal luar biasa honong mbagi-bagioh pononga-pononga tahkan Roh Pohotala numbun konohuang-Oh bongoi. 2:5 Molehkat-molehkat eam dahpot kowasa tahkan Pohotala ahkan moretah kolunon bohua ijo ahkan lombut, yorih kolunon ijo rahat ihto manderoh tuh. 2:6 Sobalikoh, aang ihco kobagi ang luwang Surat Borasih tonyurat koloutuh, "Kolunon rih inon, yo Pohotala, nyiring Ihko kani mongingatoh? Kolunon tihkas kolunon iou tahpi Ihko nohtoanioh! 2:7 Ahkan ohkot ijo honjiot ihko ngojorian Io honjiot labih pinda tahkanumba molehkat. Ihko nongaoh ahkaioh, ponuot ijo isung tutang tonohoromat, 2:8 honong ngojorian io pongowasa isun kokaro angihco." Nah, amat tonuhtui ijo Pohotala nguan kolunon, "pongowasa isun kokaro angihco," orih rimai, ijo eam anai angihco ka, ijo eam ang pinda kuwasan kolunon. Oluka kodorih, ihto eam nohto huntuh ulun bokowasa ngosan karo angihco. 2:9 Tahpi ihto jari nohto Yesus bokowasa! Io tonguan honjiot, labih pinda tahkan molehkat, ahkan ohkot ijo iwak, mangat ngosan kopios ahtoi Pohotala, Io dahpot mahtoi ahkan paring ukup kolunon. Ihto nohto Io uhuntuh, tononga ponuot ijo isung tutang torohoromat, kotului Io jari ngarot nyiring mahtoi. 2:10 Puna jari kopahtutoh Pohotala -- ijo naoi kokaro angihco ahkan konohuang-Oh bongoi -- monapa Yesus ponyolamat ijo soporuna nguha kokarotrih. Honong orih Pohotala dahpot na'ah aro ulun ahkan umba tonohajo homboh Yesus. Tului Io ponguap jalan bagi iro, mangat tou tonyolamat. 2:11 Yesus muhioh ulunkolunon tahkan dusa-dusan'ndo; tutang Io ijo muhioh, hawui iro ijo tomuhioh rih, sama-sama anaitepun ihco Amai. Orihrih kotuluioh, Yesus eam mia ngahku iro rih kolou konduang-konduang-Oh. 2:12 Yesus pander umba Pohotala, "Ahku ahkan mborihtaoh ahkan konduang-konduang-Ku tohou Ihko. Ahku ahkan monara Ihko ang a'ang puhpung iro." 2:13 Yesus pander ka'a, "Ahku ahkan ngina koharap-Ku ahkan Pohotala." Tutang Io nuhtui ka'a, "Ituhrih Ahku, homboh anak-anak ijo jari tononga Pohotala ahkak-Ku." 2:14 Bain kotului ulun-ulun ijo Io ngohawot, anak, rih, anairih mahluk kolunon ijo dahpot mahtoi, mahka Yesus bongoi monjadi sama, umba iro, tutang bolum a'ang koada'an ulun. Io nguan kolorih, mangat umba popahtoi-Oh, Io dahpot moluhtek Sehtan ijo mongowasa popahtoi. 2:15 Umba cara orih, Io momordehka ulun-ulun ijo kotahin bolum tohojihpon, tului mihkoh ahkan popahtoi. 2:16 Korinahrih ijo eam molehkat ijo todohop-Oh molekan lihit Abraham. 2:17 Jituh rimai ijo Io harus monjadi sama umba konduang-konduang-Oh a'ang kokaro hal. Tutang umba orih Io dahpot monjadi Imam Hajo ijo bokehtep tutang pongasiponyayang. Umba pohalu-Oh rih dusan kolunon dahpot tonapun. 2:18 Tutang kotului Io bongoi pu'u mongarot tutang tonihkos. Io dahpot ndohop ulun-ulun ijo kona tihkos, kotului Io bongoi pu'u tonihkos tutang mongarot.
3:1 Konduang-konduang sosama Kristen ijo jari tona'ah ka'a bain Pohotala! Cuba nirukrih timbon-timbon tohou Yesus tuh! Pohotala nyuhu Io khusus, ahkan monjadi Imam Hajo a'ang agama ijo ihto nambit. 3:2 Io bokehtep umba Pohotala ijo jari ngopili Io ahkan gawi rih, kolou ka'a Museh lomoi bokehtep nguan gawiuoh ang Lohpou Tuhan. 3:3 Tahpi Yesus pahtut mondahpot kohoromatan ijo labih hajo tahkanumba Museh. Kotului ulun ijo mangun lohpou pahtut duon kohoromatan labih hajo tahkanumba lohpou rih bongoi. 3:4 Puna nyinong lohpou anai ijo mangunoh, tahpi ijo mangun kokaro aang'co anairih Pohotala bongoi. 3:5 Museh bokehtep tehen kolou jihpon ang Lohpou Tuhan, tutang nyiar hal-hal ijo ahkan tomorihtaoh bain Pohotala ang kotihka ijo ahkan lombut. 3:6 Tahpi Kristus bokehtep kolou Anak, ijo botanggung-jawab ngosan Lohpou Pohotala. Tutang ihto tuhrih Lohpou Pohotala, amat ihto tahtap bosomangat tutang tahtap yakin ahkan ngondahpot inon ijo ihto harapoh. 3:7 Bain rih, kolou hion Roh Pohotala, "Amat aang ondou tuh ihkam ngonih auh Pohotala, 3:8 ara rih ihko ngomahang kuhung, kolou tahtu ajuh'kam, kotihka iro mborontak toharep Pohotala, tutang nyuba Pohotala ang padang balambah. 3:9 'Ang anan tahtu ajuh'kam nihkos Ahku, tutang nyuba Ahku,' hion Pohotala, 'podahar iro ius nohto konuak-Ku ohpat pulu toun kotohiuoh.' 3:10 Orihrih kotuluioh Ahku bosingi toharep iro tutang Ahku nuhtui, 'Iro turus eam bokehtep, tutang nohkas mone'et poretah-poretah-Ku.' 3:11 Ahku bosingi tutang monulut, 'Iro eam ahkan nyolong nokuh tana rih ahkan dahpot nondobo'o homboh Ahku.' " 3:12 Konduang-konduang bua-buah, ara nyiring anai ang louk'kam ihcobehti ijo ahtoioh kolorih koja'at, tutang eam porocaya, nyiring io ngulos tutang ngomahcu Pohotala ijo bolum! 3:13 Jadi, mangat eam anai ihcobehti ka tahkan louk'kam, ijo tonihpu bain dusa nyiring molawan Pohotala, hondakrih ihkam saling hotingak nyinong ondou, kotahin ihto magun bolum, ang jaman ijo konohawot "Ondou Tuh" a'ang Surat Borasih. 3:14 Ihto paring anairih injah ihcohokolahi homboh Kristus, asar ihto johcok laiu nambitoh lehket koyakinan ijo ihto tepui tahkan pahtukoh. 3:15 Jituhrih ijo tonyurat luwang Surat Borasih, "Amat aang ondou tuh ihkam ngonih auh Pohotala, ararih ihkam ngomahang kuhung, kolou tahtu ajuh'kam, ohkot iro mborontak toharep Pohotala." 3:16 Nah, iairih ulun-ulun ijo ngonih Auh Pohotala, turus mborontak toharep-Oh? Orihrih paring ulun, ijo toniting bain Museh soluka tahkan Misir, kowa? 3:17 Tutang toharep iairih, Pohotala bosingi ohpat pulu toun kotahiuoh? Toharep iro ijo bodusa, ijo bolihang mahtoi ang padang bolambah, kowa? 3:18 Kotihka Pohotala nulut koloutuh, "Iro eam ahkan nyolong ahkan tana rih ahkan dahpot nondobo'a homboh Ahku" -- iai hino ijo konohuangoh bain Pohotala? Ijo konohuangoh yorih ulun-ulun ijo mborontak toharep Pohotala, kowa? 3:19 Huntuh ihto horahti ijo iro eam dahpot nyolong, tului iro eam porocaya umba Pohotala.
4:1 Nah, bowot Pohotala magun tohapan, tutang ihto ahkan tononga nondobo'o ijo tonobowot-Oh. Jadi, hondakrih ihto bojaga, mangat ara anai ihcobehti ka tahkan louk ihkam, ijo korinah eam komo nondobo'o-Oh ijo tonobowot orih. 4:2 Kotului Kabar Hinut rih jari tomborihta ahkan ihto, sama kolou ahkan iro. Tahpi ahkan iro borihta rih eam anai gunaioh. Kotului kotihka iro ngonihoh iro eam porocaya. 4:3 Tahpi ihto ijo porocaya norima nondobo'o ijo tonobowot Pohotala rih. Orih tohorong umba inon ijo tonuhtui Pohotala koloutuh. "Ahku bosingi tutang nulut. 'Iro eam ahkan nyolong ahkan norima ponondobo'o homboh Ahku.' " Pohotala nuhtui koloutuh, oluka gawiu-Oh ius ohpah, tahkan Io naoi kolunon tuh. 4:4 Tului tohou ondou kopihtu, anai tonyurat ang Surat Borasih koloutuh, "Ang ondou pihtu, Pohotala nondobo'o tahkan paring gawiu-Oh." 4:5 Tohou hal orih tonyurat hino koloutuh, "Iro eam ahkan nyolong nokuh tana rih, ahkan dahpot nondobo'o homboh Ahku." 4:6 Jadi iro ijo pahtu-pahtuk-Oh ngonih borihta tohou Kabar Hinut rih, eam norima tondobo'o rih, kotului iro eam porocaya. Amat kolouorih jadi tarang, ijo anai ulun-ulun bohkon, ijo tou norima kotondobo'o rih. 4:7 Kotului Pohotala jari nuhkas ihco ondou ijo bohkon hino, ijo konohawot, "Ondou Tuh". Botoun-toun pongo hino, Pohotala nuhtui tohou hal rih nguha Dawid, a'ang ayatoh ijo ngohtib nanai, "Amat ang ondou tuh, ihkam ngonih auh Pohotala, ara ihkam ngomahang kuhung." 4:8 Amat jahkaoh Josua, jari nonga ulun-ulun rih nondobo'o ijo tonobowot Pohotala, mahka Pohotala eam ahkan mander hino tohou ihco ondou ijo bohkon. 4:9 Jadi bagi ukup Pohotala, magun anai bowot, ahkan nondobo'o, kolou Pohotala jari nondobo'o, ang ondou ijo kopihtu rih. 4:10 Tului ulun ijo norima tondobo'o ijo nobowot Pohotala ahkaioh rih, ahkan nondobo'o ka'a, tahkan paring gawiuoh sama kolou Pohotala. 4:11 Kotului orih, olairih ihto bousaha tu'u-tu'u ahkan norima nondobo'o ijo nobowot Pohotala rih. Ara nyiring ihcobehti ka tahkan ihto gagal kolou iro lomoi, kotului eam porocaya ahkan Pohotala. 4:12 Auh Pohotala anairih auh ijo bolum tutang ba'as; labih bonyihi tahkan padang bonyihi hososila. Auh rih nusuk nyiring nokuh tihkas holat homboruan tutang roh; johcok nokuh tihkas holat sambung-sambung tutang tulang utok, nyiring ngota'an kotimbon-timbonoh tiruk tutang niat ahtoi kolunon. 4:13 Eam aro ihco mahluk ka ijo bosuhuk tahkan ponopahjah Pohotala. Kokaron angihco paring hoburang tutang bokuap ang husuk-Oh. Tutang ihto harus nonga tanggung-jawab ahkai-Oh. 4:14 Orih rih kotuluioh ihto harus botambit tehen aang pongahkuan koporocayan ihto. Kotului ihto anaitepun Imam Hajo ijo hajo, ijo jari nyolong johcok nokuh husuk Pohotala -- Iorih Yesus Anak Pohotala. 4:15 Imam hajo ain ihto rih, bohkon tahkan imam ijo eam dahpot umba nginyam kolomun-kolomun ihto. Sobalikoh, Io jari tonihkos a'ang karo hal, sama kolou ihto bongon; tihkas Io eam napa dusa! 4:16 Tului rih, olairih ihto umba kotuwi bohanyi noharep Pohotala ijo moretah umba hinut ahtoi. Pohotala ahkan mongasih ihto tutang mborehkat ihto, mangat ihto norima pondohop, metuk aang ohkotoh.
5:1 Nyinong imam hajo tonopili tahkan louk ukup, tutang tonotuot ahkan mohalu Pohotala kolou wakil iro. Gawiouoh iorih, monyorah ahkan Pohotala pononga-pononga tutang porahpah-porahpah ijo ahkan ngapun dusa. 5:2 Imam hajo rih bongoi bolomu a'ang karo hal, tutang kotului orih io tou nguan kolomu lembai, toharep ulun-ulun ijo eam ta'an ino-inon, tutang ijo sosat jalaioh. 5:3 Tutang kotului io bongoi bolomu, mahka io harus nyorah porahpah, eam bewe tului dusa-dusan ukup, tahpi ka'a kotului dusa-dusanoh bongoi. 5:4 Eam anai ihcobehti ka, ijo potuot aropoh bongoi, monjadi imam hajo. Ulun monjadi imam hajo, amat Pohotala na'ah io ahkan orih -- sama kolou Aron. 5:5 Kodorih ka'a Kristus. Io eam potuot arop bongoi monjadi Imam Hajo. Pohotala bongoirih ijo potuot Io. Pohotala nuhtui umba Io, "Ihko tuh Anak-Ku aang ondou tuh Ahku monjadi Amai-Mu." 5:6 Ang unuk bohkon Pohotala nuhtui ka'a. "Ihko anairih Imam turus-jahamoh kolou Imam Melkisedek." 5:7 Ang wayah Yesus bolum ang kolunon tuh, Io bodo'a tutang nyawot umba auh kombak tutang tangihoh ahkan Pohotala, ijo sanggup monyolamat Io, tahkan popahtoi. Tutang kotului Io tunduk umba Pohotala honong tuwi horomat, mahka Io tongonahanoh. 5:8 Yesus rih anairih Anak Pohotala, tahpi oluka kolourih, Io bolajar monjadi te'et nguha kokarot-Oh. 5:9 Mahka uliius Io tomonjadi ponyolamat ijo soporuna, Io monjadi luwangtohasak solamat ijo kototahiu bagi paring ulun ijo te'et umba Io, 5:10 tutang Pohotala ka, ngorinah Io kolou Imam Hajo, kolou Imam Melkisedek! 5:11 Tohou ponuot Yesus kolou Imam Hajo, anai aro ijo porulu ihkai mborihtarih ahkan'kam, tahpi bohali ahkan monarangoh kotului ihkam borakah sino horahti. 5:12 Kotu'uioh jari ohkotoh ahkan'kam ahkan monjadi guru, tahpi korinahoh ihkam puna porulu bolajar tahkan ulun bohkon, tohou asas-asas kopahtuk ajaran tahkan Pohotala. Ihkam jaha dahpot norima ukun ijo mahang, ihkam magun pahtut ngorih susu iou. 5:13 Ulun ijo magun ngorih susu, rimai io magun ngoa, io jaha anai aro pongalamoh, tohou inon ijo morong tutang inon ijo sala. 5:14 Ukun ijo mahang tohko ahkan ulun oko, ijo tului pongalaman jari dahpot ngobohkon-bohkon umoh ijo pios tutang umoh ijo ja'at.
6:1 Kotului rih, olai ihto miar nokuh polajaran-polajaran ijo labih ombu tohou kookooh pombolum Kristen, tutang ara tihkas nuneng ajas-ajas pahtuk ajaran agaman ihto. Ara ihto nokoluli hino ajaran dasar, ijo ulun harus tondo nguan hal-hal ijo eam boguna, tutang harus porocaya ahkan Pohotala, 6:2 ata'ai ajaran dasar tohou popondus ata'ai tohou ngahtang longo ngosan ulun, ata'ai tohou bolum hoduli limbah mahtoi, ata'ai hukuman ijo kototahiuoh. 6:3 Olairih ihto, jahka Pohotala nongaijinoh miar nokuh ajaran-ajaran ijo labih ombu! 6:4 Tului ulun-ulun ijo jari murtad, eam harapan toniting hoduli. Iro lomoi jari anaimohcon ang luwang koloang tahkan Pohotala, tutang jari nginyam ponongan Aiu. Iro jari ka'a umba konowasa bain Roh Pohotala. 6:5 Iro kota'an tahkan pongalaman iro, ijo auh Pohotala rih hinut, iro jari nginyam pononga-pononga ijo tuwi kowasa tahkan jaman ijo ahkan lombut. 6:6 Tahpi uliorihrih iro murtad! Umah harapan niting iro buli ahkan hubah hino, tahkan dusa-dusan iro. Kotului iro rahat nyopolahki hino Anak Pohotala tutang nguan Io tonohina ang toharep ulunaro. 6:7 Tana ijo nomot danum uhjan, ijo bojoin nosuluh nokuh ngosanoh, turus polombutbua kombulan-kombulan ijo boguna ahkan ulun ijo manggawioh, tana rih tomborehkat bain Pohotala. 6:8 Tahpi amat tana rih polombutbua tingan tutang tumbu ruwut duhi, mahka tana orih eam anai gunai tutang noin ahkan tonulut bain Pohotala tutang laiuoh tonyaha lingis. 6:9 Tahpi Konduang-konduang ijo ahku ngasihoh, olu sinoka ihkai nuhtui kolourih, tahpi ihkai yakin tohou ihkam. Ihkai yakin ijo ihkam ius monorima hal-hal labih pios, iorih borehkat-borehkat ijo kolou bagian tahkan kosolamat'kam. 6:10 Pohotala eamoh Pohotala ijo eam adil. Io eam nolingou, inon ijo ihkam nguairih bagi-Oh, tutang asi ijo ihkam nunjukrih ahkai-Oh, angohkot ihkam dohop konduang-konduang samakoporocaya, ijo houn tutang uhuntuh. 6:11 Ihkai jolik sino, mangat ihkam nyinong-behti turus bosomangat johcok laiu, nyiring ihkam norima inon ijo ihkam moharap-harapoh rih. 6:12 Ihkai eam kani, ihkam monjadi nohkas. Tahpi ihkai jolik, mangat ihkam bolum kolou ulun-ulun, ijo norima inon ijo nobowot Pohotala, tului porocaya umba Io, tutang tului ngindoi honong kosabar. 6:13 Kotihka Pohotala nobowot ahkan Abraham, Io bonulut ijo Io ahkan monguan inon ijo jari tonobowot-Oh. Tutang tului eam anai ijo labih isung tahkanumba Pohotala, mahka Io botulut ang arop-Oh bongoi. 6:14 Io nuhtui, "Ahku nobowot ahkan mborehkat Ihko tutang ngonjorian lihit'mu monjadi aro." 6:15 Abraham ngindoi honong sabar, mahka io norima inon ijo jari tonobowot ahkaioh. 6:16 Amat ulun botulut, io botulut ngosan aran ulun bohkon ijo labih isung tahkanumba io, mahka tulut rih nondo kokaro kopaut. 6:17 Pohotala kani nuhkasrih ahkan ulun-ulun ijo norima bowot-Oh, ijo Io eam ahkan ngubah rancana-Oh. Orihrih kotuluioh Io ndahang tulut aang bowot-Oh rih. 6:18 Duo hal orih eam dahpot boubah, Pohotala eam harapan ngobalik tohou bowot tutang tulut-Oh. Tului orih, ihto ijo jari bokolindung aang Pohotala, tononga juhungan ba'as, ahkan nambit tehen aang koharap ijo tohampar ang husuk ihto. 6:19 Koharap ihto rih, kolou sauh ijo tokelem paham timbon tutang monjadi ponambit ijo segah tutang sanang ahkan pombolum ihto. Koharap rih morutat dindingbenang, Ruang Ijo Mahaborasih ang Lohpou Tuhan ang soruga. 6:20 Yesus jari nandang jalan nokuh unuk rih ahkan ihto, tutang jari nyolong nokuh anan, monjadi Imam Hajo ahkan ihto, ahkan turus-jahamoh, kolou Imam Melkisedek.
7:1 Melkisedek tuh iorih lahca tahkan Salem tutang imam Pohotala Ijo Mahaisung. Ohkot Abraham buli tahkan hokolahi mongalahoh lahca-lahca, Melkisedek lombut noharang Abraham tutang mborehkatoh. 7:2 Mahka Abraham nonga ahkan Melkisedek, sepersopulu tahkan karo inon ijo ngorabutoh. (Aran Melkisedek rimai ijo-pahtuk, "Lahca Koadilan"; tutang tului io lahca tahkan Salem, mahka araioh rimai ka'a "Lahca Komangat".) 7:3 Tohou Melkisedek tuh eam anai kotorangan ang umoh ka, ijo io anai amai ata'ai inai ata'ai tahtu ajuh; eam anai ka'a kotorangan tohou konanakoh ata'aika popahtoioh. Io sama kolou Anak Pohotala; io rih anairih imam ijo kototahiu. 7:4 Jadi ihto nohto ang ohtoi, eaminon kohajoioh Melkisedek rih; io kolourih kohajoioh nyiring Abraham, amai tahtu ajuh uhtus ihto, nonga ahkaioh sepersopulu tahkan kokaro angihco ijo tongorabutoh tahkan kolahi orih. 7:5 Ang luwang hukum agama Yahudi, tonahtap ijo imam-imam uras tahkan lihit Lewi, pahtut ngomin sepersopulu tahkan pongulih ukup Israel, yorih konduang-konduang iro bongoi, oluka iro sama-sama lihit Abraham. 7:6 Melkisedek eam lihit Lewi, tahpi io norima ka'a sepersopulu tahkan kokaro ijo tongorabut Abraham, tutang mborehkatoh hino Abraham, ijo justru norima bowot-bowot tahkan Pohotala. 7:7 Puna eam tou tonolawan ijo ulun ijo tomorehkatoh, monjadi ulun ijo labih randah tahkanumba Io ijo mborehkatoh. 7:8 Imam-imam ijo norima topunan sepersopulu rih, anairih ulun ijo tou mahtoi. Tahpi numbun Surat Borasih, Melkisedek ijo norima pononga sepersopulu rih, io rih ulun ijo tohtap bolum. 7:9 Duon tonohawot, ijo Lewi -- ijo lihitoh ijo nopunan sepersopulu kobagi, tahkan ukup Israel -- mbayar ka'a bagian rih nguha Abraham, aang ohkot Abraham mbayaroh ahkan Melkisedek. 7:10 Oluka Lewi jaha konanak, tahpi tou tonohawot io ius anai ang luwang behtin Abraham tahtu ajuhoh, ang ohkot Melkisedek hosombang umba Abraham. 7:11 Ang pinda okon imam-imam ulun Lewi, hukum agama Yahudi tononga ahkan ukup Israel. Tului imam-imam Lewi lomoi rih eam dahpot nguan rih hawui soporuna, inon ijo harus tonguan'ndo, mahka harus anai imam bohkon, yorih ijo kolou Imam Melkisedek, tutang eam tahkan barih Imam Aron hino! 7:12 Nah, amat ponuot imam-imam boubah, hukum agama Yahudi ka boubah ka'a. 7:13 Ijo konohuang ang ohtoi iorih Tuhan ihto. Io tahkan lihit bohkon, tutang jaha pu'u ihcobehti ka tahkan suhku-Oh nguangawi kolou imam. 7:14 Paring ulun ta'an ijo Tuhan ihto ijo asar tahkan lihit Yahuda, tutang Museh eam pu'u ngohawot suhku rih, ang ohkot io nuhtui tohou imam-imam. 7:15 Hal ijo tomander tuh monjadi labih jelas hino, honong lombutoh ihcobehti imam bohkon ijo kolou Melkisedek. 7:16 Io tonotuot monjadi imam, eam hogalang aturan-aturan ulun molekan hogalang pombolumoh ijo bokowasa tutang ijo eam anai laiuoh. 7:17 Kotului ang luwang Surat Borasih tonuhtui, "Ihko tuh anairih imam turus-jahamoh, kolou Imam Melkisedek." 7:18 Jadi, uhuntuh poroturan ijo soun jari tonyarooh, tului eam ba'as, tutang eam boguna. 7:19 Hukum agama Yahudi, eam dahpot nguan angihco ka menjadi soporuna. Orih kotuluioh ihto uhuntuh tononga ihco koharap ijo labih hinut; honong rih ihto duon ngondoni Pohotala. 7:20 Mahihino, paringoh rih tonohomboh umba tulut tahkan Pohotala. Eam aro tulut kolourih, ang ohkot imam-imam ijo bohkon rih tonotuot. 7:21 Tahpi Yesus tonotuot monjadi imam hapa tulut, ohkot Pohotala nuhtui umba Io, "Tuhan ius bonulut tutang Io eam ahkan ngubah tirukahtoi-Oh. 'Ihko anai rih imam turus-jahamoh.' " 7:22 Umba tuh hino, Yesus monjadi jaminan ahkan angihco bowot ijo paling hinut. 7:23 Anai hino ihco hal; imam-imam ijo bohkon rih, anai aro, tului iro nyino-nyinongoh mahtoi, nyiring eam dahpot hototurus nambit pangkatoh. 7:24 Tahpi Yesus bolum turus-jahamoh, jadi pangkat-Oh numbun imam eam tokiri umba ulun bohkon. 7:25 Bain kotului rih ahkan turus-jahamoh, Yesus dahpot nyolamat, ulun-ulun ijo lombut, nokuh Pohotala nguha Io, kotului Io bolum turus-jahamoh, ahkan monyapai sawot ahkan Pohotala, bagi ulun-ulun rih. 7:26 Jadi, Yesus orihrih Imam Hajo ijo ihto poruluoh. Io Borasih; aang Io eam dahpot kosalan ata'ai dusa inonka. Io tongobohkon tahkan ulun-ulun ijo bodusa, tutang tongahtangrih nyiring nokuh unuk ijo labih diang tahkan kokaro langit. 7:27 Io eam kolou imam-imam hajo ijo bohkon, ijo nyinong ondou harus monyorah pononga kotului dusa-dusan iro bongoi lomoi, punai tului dusa-dusan ukup. Yesus nyorah porahpah tihkas sino tikat ahkan turus-jahamoh, ohkot Io monyorah arop-Oh bongoi monjadi porahpah. 7:28 Hukum agama Yahudi, potuot ulun ijo eam soporuna monjadi imam hajo. Tahpi pongohino tahkan aturan rih, Pohotala napa bowot honong tulut, ijo Io potuot kolou Imam Hajo, Anak ijo ius monjadi Ponyolamat ijo soporuna ahkan turus-jahamoh.
8:1 Pu'un tahkan paring pander tuh, iorih: Ihto anai tepun Imam Hajo ijo kolourih, ijo tuot moretah homboh Pohotala Paling Hajo ang soruga. 8:2 Io monguan gawi kolou Imam Hajo ang Ruang Palingborasih, yorih ang luwang Kemah Tuhan ijo sojahti, ijo tonombok bain Tuhan, eam bain ulun. 8:3 Nyinong imam hajo tonuot ahkan nyorah porahpah ata'ai ponyorahan ahkan Pohotala. Kolourih ka'a Imam Hajo ihto; Io harus tepun angihco ahkan tonosorahoh. 8:4 Jahkaohtou Io anai ang kolunon tuh, Io eam ahkan monjadi imam, kotului jari anai imam ijo monyorah porahpah ijo tonyawot ang hadat agama Yahudi. 8:5 Gawi ijo iro nguaioh kolou imam rih, kotu'uioh tihkas ihco gambar tutang kokolingon tahkan inon ijo anai ang soruga. Orih jari tomborihta bain Pohotala ahkan Museh lomoi, kotihka Museh kani nombok Kemah Tuhan. Pohotala nuhtui koloutuh ahkan Museh, "Ingat! Paringoh tuh harusrih ihkonguai numbun sutu ijo tongorinah ahkan'kam ang ngosan puruk." 8:6 Tahpi huntuh Yesus dahpot tugas imam ijo mahcu labih horomat tahkanumba ijo konuan bain imam-imam rih. Kotului bowot ijo tonapa-Oh holat Pohotala tutang kolunon, anairih bowot ijo labih pios kotului hogalang bowot ahkan hal-hal ijo labih pios. 8:7 Jahkatou eam anai kotahpasoh aang bowot ijo pahtuk, mahka eam gunaioh tonapa bowot ijo koduooh. 8:8 Tahpi Pohotala jari nyombang kosalaioh ang ukupoh nyiring Pohotala nuhtui: "Ingat, ahkan lombut ohkotoh, Ahku ahkan nyodia bowot ijo bohua, umba uhtus Israel, tutang umba uhtus Yuda. 8:9 Eam kolou bowot ijo Ahku nguai umba tahtu ajuh iro, ang ohkot Ahku niting iro, soluka tahkan tanah Misir. Iro eam te'et umba bowot ijo Ahku napa umba iro, orihrih kotuluioh Ahku eam nohtoani iro. 8:10 Tahpi huntuh, tuhrih bowot ijo ahkan Ahku nguai umba ukup Israel, ang ondou-ondou ijo ahkan lombut hion Tuhan: Ahku ahkan ngina hukum-Ku ahkan luwang tiruk iro tutang nyuratoh aang ahtoi iro, Ahku ahkan monjadi Pohotalan iro, tutang iro ahkan monjadi ukup-Ku. 8:11 Iro eam usah majar injah-jolahaioh ata'ai mborihta ahkan konduangoh 'Kosono bewe Tuhan.' Tului iro paring, hajo, koik, ahkan kosono Ahku. 8:12 Ahku ahkan ngapun kosalan-kosalan iro tutang eam mingat huli dusa-dusan iro." 8:13 Honong monyapaioh angihco bowot ijo bohua, Pohotala monapa bowot ijo pahtukoh rih, monjadi rutus tutang usang; tutang inon ijo jari rutus, ahkan jeleng hino dilap.
9:1 Bowot ijo pahtuk anaingina poroturan-poroturan sombayang, tutang anaingina ka'a unuk sombayang tapan kolunon. 9:2 Ihcokobawak Kemah tonombok, ijo hila baun, konohawot Ruang Borasih. Ang anan anai owuh unuk polihta, tutang anai ka'a meja hawui ruhte, ijo tonyorah ahkan Pohotala. 9:3 Ang hila luwangoh, yorih ang lihkut dindingbenang ijo koduo, anai tahkun ijo konohawot Ruang Palingborasih. 9:4 Ang luwang tahkun orih anai mesbeh, ijo tonapa tahkan bulau unuk mahpong garu, tutang anai ka'a Pohti Bowot ijo sohopusoh tonokolap umba bulau. Ang luwang Pohti rih anai koniwa potoran bulau bosuang manna, sukah Arun ijo jari ngondolak tutang duo bindang bahtu surat, ijo ang ngosanoh tonyurat sopulu poretah tahkan Pohotala. 9:5 Ang ngosan tuhtup Pohti rih anai duo Kerub, yorih angbolum boilat ijo ngambar kolombut Pohotala. Ilat tahkan koduo aangbolum rih kolouna'ang ang ngosan tuhtup Pohti, yorih unuk pongapun dusa. Tahpi paringoh rih eam dahpot tonarangrih huntuh socara mihco-mihco. 9:6 Kolourih rih paringoh tosusun. Nyino-nyinong ondou imam-imam nyolong koluwang hila baun kemah rih ahkan molalus gawin iro. 9:7 Ijo nyolong nokuh hila paling luwang tahkan kemah rih, tihkas imam hajo iou. Io molalus rih baya sinotikat ihco toun. Orih tonguaioh, hawui ngomin daha ahkan tonyorahoh, ahkan Pohotala, tului aropoh bongoi, tutang tului dusa-dusa ijo tonguan eam sadar bain ukup-Oh. 9:8 Umba poroturan orihrih, Roh Pohotala ngorinah hawui jelas, ijo kotahin kemah hila baun rih magun tombok, jalan nyolong koluwang Ruang Palingborasih rih jaha tokuap. 9:9 Jituh gambar jaman huntuh; rimai ijo ponyorah-ponyorah tutang porahpah-porahpah ohcin ijo tonyorah ahkan Pohotala, eam duon monyoporunaoh ahtoi bua ulun ijo ngomin ponyorahai. 9:10 Bain upacara-upacara rih, tihkas konahomboh umba ukun, korih, tutang mahca-mahcam upacara muhi. Paringoh tihkas poroturan-poroturan ijogihtan, ijo hapan baya johcok ohkotoh Pohotala nguan pombohua. 9:11 Tahpi Kristus jari lombut kolou Imam Hajo, tahkan hal-hal ijo hinut ijo jari anai. Kemah Tuhan, ang umoh Io nguan gawiu-Oh kolou Imam Hajo, anairih kemah ijo labih hajo, tutang labih soporuna. Orih eam tonguan bain ulun; rimaioh eam boasar tahkan kolunon ijo tona'oioh tuh. 9:12 Kristus nyolong Ruang Palingborasih ang luwang kemah rih tihkas sino iou turus-jahamoh. Ang ohkot rih Io eam ngomin dahan kambing dalung ata'ai dahan anak sahpi ahkan tonosorahoh; Io ngomin daha Aiu bongoi, tutang umba orih Io momorodehka ihto ahkan turus-jahamoh. 9:13 Daha tahkan kambing tutang sahpi dalung hawui awu tahkan pononga anak sahpi, hapa ahkan nyahki ulun-ulun ijo pali, numbun poroturan agama, mangat iro monjadi borasih. 9:14 Orih, amat daha tutang awu rih, duon ngomuhi kopalin ulun-ulun rih, mahihino dahan Kristus! Nguha Roh ijo abadi, Kristus monyorah arop-Oh bongoi ahkan Pohotala, kolou porahpah ijo soporuna. Daha-Oh muhi ahtoi-bua ihto tahkan upacara agama ijo eam boguna, mangat ihto dahpot mohalu Pohotala ijo bolum. 9:15 Orihrih kotuluioh, Kristus monjadi Poholat, ahkan ihco bowot ijo bohua, mangat ulun ijo jari tona'ah bain Pohotala, dahpot norima borehkat-borehkat abadi, ijo jari tonobowot bain Pohotala. Paringoh orih dahpot nyolung, kotului jari anai ijo mahtoi, yorih Kristus; tutang popahtoi-Oh rih morodehka ulun tahkan kosalai-kosalai ijo iro nguaioh ang ohkot bowot ijo pahtuk magun hapan. 9:16 Amat anai surat warisan, harus ka'a anai buktioh ijo ulun ijo napa surat rih jari mahtoi. 9:17 Kotului surat warisan eam boguna, amat ulun ijo napaoh magun bolum. Surat rih boguna, tihkas limbah ulun rih mahtoi. 9:18 Tului rih bowot ijo pahtuk ka harus tonosahrih umba daha. 9:19 Sula-sulak Museh nonga paring poretah hukum Pohotala ahkan uhtus Israel. Pongohuli rih Museh ngomin dahan anak sahpi tutang dahan kambing dalung, turus moloukoh umba danum, pongohino nyahkioh aang Buhku Hukum-hukum tahkan Pohotala, tutang aang paring uhtus Israel, hawui hapa pahting hisop tutang bulun tobiri warna bohandang oko. 9:20 Sambil nguanoh rih Museh nuhtui, "Tuhrih daha ijo tonosah bowot tahkan Pohotala ijo harus ihkam mone'etoh." 9:21 Pongohuli umba cara ijo sama, Museh hobirik daha rih ka'a aang Kemah Tuhan, tutang aang paring pokahkas ahkan sombayang. 9:22 Puna numbun hukum agama Yahudi, bilak kokaro angihco tomuhiborasih umba daha; tutang dusa tihkas tou tonahpun, amat anai tusuh daha. 9:23 Umba cara kolourih, ramu-ramu ijo monggambar hal-hal ijo ang soruga, porulu tomorasih. Tahpi ahkan hal-hal ijo ang soruga rih bongoi, mongguna porahpah ijo mahcu labih hinut. 9:24 Kotului Kristus eam nyolong nokuh Ruang Borasih tapan kolunon, ijo baya jadi gambar Ruang Borasih ijo kotu'uioh. Kristus nyolong nokuh soruga bongoi; ang anan Io huntuh noharep Pohotala ahkan kogunan ihto. 9:25 Imam hajo ain Yahudi nyino-nyinong toun nyolong nokuh Ruang Palingborasih ang luwang Lohpou Tuhan hawui ngomin dahan ihcokungan ohcin. Tahpi Kristus eam nyolong ahkan monyorah arop-Oh dulangduli. 9:26 Tului amat kolourih, orih rimai: Io jari dulangduli ngarot, tahkan kolunon tuh tona'oi. Tahpi korinahoh, huntuh aang jaman laiu tuh, Io lombut sinotikat iou ahkan mongapit dusa hawui monyorah arop-Oh bongoi. 9:27 Pohotala jari nuhkas ijo ulun mahtoi sinotikat iou tutang iro uli rih tomosara bain Pohotala. 9:28 Kolourih ka'a, Kristus sinotikat nyorah arop monjadi porahpah ahkan mongapit dusan aro ulun. Io ahkan lombut hino aang koduo tikatoh, eam hino ahkan ngobuah soal dusa, tahpi ahkan nyolamat ulun-ulun ijo ngindoi polombut-Oh.
10:1 Hukum agama Yahudi baya nonga gambaran ijo kawu-kawus, tutang hal-hal ijo hinut ijo ahkan lombut, tutang eam gambar ijo kotu'uioh tahkan hal-hal orih. Eam mustitou hukum orih dahpot nyoporuna ulun ijo lombut nyembah Pohotala tutang ngomin ponyorahan, oluka nyinong toun toturus tonyorah porahpah-porahpah ijo sama. 10:2 Jakaauh ulun-ulun ijo nyembah Pohotala rih moro-morong jari tomorasih tahkan dusa, iro eam hino ahkan anaingina nanyam bodusa, tutang porahpah eam ahkan tonosorah hino. 10:3 Tahpi korinahoh porahpah-porahpah ijo tonosorah nyinong toun rih, justru mopingat ulun ahkan dusa-dusan iro, 10:4 bain puna dahan sahpi tutang dahan kambing dalungoh rih eam duon muhi dusa. 10:5 Orihrih kotuluioh ang ohkot Kristus nyolong nokuh kolunon, Io nuhtui umba Pohotala, "Ihko eam nohuang porahpah tutang ponyorahan; sombalikoh, Ihko jari monyodia behti bagi-Ku. 10:6 Ihko eam ngilak porahpah 'jo ponahpong, ata'ai porahpah ahkan ngapun dusa. 10:7 Turus Ahku nuhtui, 'Jituhrih Ahku, yo Pohotala! Ahku lombut ahkan nguanrih kohondak-Mu, kolou ijo tonyurat tohou arop-Ku ang luwang Surat Borasih.' " 10:8 Sula-sulak Kristus nuhtui, "Ihko eam mohondakoh porahpah tutang ponyorah; Ihko eam ngilak ahkan porahpah ohcin ijo tonomahpong, kolou ponyorah tutang porahpah ahkan apun dusa." Kristus nuhtui kolourih, oluka karo porahpah rih tonyorah numbun hukum agama Yahudi. 10:9 Ulirih rih Kristus nuhtui, "Jituh Ahku, yo Pohotala! Ahku lombut ahkan monyolung kohondak-Mu," Jadi Pohotala ngindiu karo porahpah ijo lomoi rih, tutang monokirioh umba porahpah Kristus. 10:10 Yesus Kristus jari nguan inon ijo tongohondak Pohotala tutang nyorah arop-Oh monjadi porahpah. Umba ponyorahan rih, ijo konuai-Oh tihkas sino iou ahkan turus-jahamoh, ihto paring tonomuhi tahkan dusa. 10:11 Nyinong imam Yahudi molalus gawiuoh, kolou imam nyino-nyinong ondou, tutang dulang duli Io monyorahrih porahpah-porahpah ijo sama. Tahpi porahpah-porahpah rih samasino eam dahpot ngudaprih dusa. 10:12 Sobalikoh Kristus, monyorah baya sino porahpah ahkan pongapun dusa, tutang porahpah rih nyolung ahkan turus-jahamoh. Ulijari monyorahoh porahpah rih, Yesus tuot ang sila kotoun Pohotala tutang moretah sama-sama umba Io. 10:13 Tutang huntuh Kristus ngindoi nyiring Pohotala nguan musuh-musuh-Oh nyembah umba Io. 10:14 Jadi umba ihco porahpah, Kristus nyoporuna ulun-ulun, ijo jari tonomuhioh tahkan dusa. 10:15 Tohou hal rih Roh Pohotala nongaoh ka'a kosaksian-Oh ahkan ihto. Roh Pohotala nuhtui, 10:16 " 'Jituhrih bowot ijo ahkan Ahku napa umba iro aang ondou-ondou ijo ahkan lombut,' hion Tuhan, 'Ahku ahkan ngina hukum-hukum-Ku nokuh luwang ahtoi iro tutang nyuratoh ko luwang tiruk iro.' " 10:17 Pohotala ka'a nuhtui, "Ahku ahkan nolingou dusa-dusa tutang koja'at-koja'at iro." 10:18 Jadi, dusa-dusa tutang koja'at-koja'at rih jari tonapunoh, mahka eam usah hino monyorah porahpah ahkan pongapun dusa. 10:19 Nah, Konduang-konduang, kobain popahtoi Yesus rih, ihto huntuh bohanyi nyolong Ruang Palingborasih. 10:20 Yesus jari nguap ihco jalan, ijo bohua bagi ihto, yorih jalan ijo nonga pombolum. Jalan rih nguha dindingbenang, yorih behtin Yesus bongoi. 10:21 Tutang ihto huntuh tepun ihcobehti Imam ijo Hajo, ijo botanggung-jawab ngosan Lohpou Pohotala. 10:22 Bain orih, olairih ihto ngondoni Pohotala umba ahtoi ijo tulus tutang koporocaya ijo segah; umba ahtoi ijo jari borasih tahkan pokomo ijo sala, tutang umba behti ijo jari ponorasih umba danum ijo kotining. 10:23 Kohondakrih ihto nambit segah aang koharap ijo ihto ngahkuoh, kobain Pohotala dahpot tomorocaya tutang Io ahkan ngonyolung bowot-Oh. 10:24 Tutang hondakrih ihto saling nohtoani, mangat saling hotonga hojuhung ahkan ngasi sosama tutang nguan hal-hal ijo hinut. 10:25 Hondakrih ihto tohtap hopuhpung hombo-homboh, tutang ara langak kolou ulun bohkon. Ihto justru harus labih te'et, saling komba'as, bain ihto ta'an ijo eam tahi hino Tuhan ahkan lombut. 10:26 Kobain amat borihta ijo morong tahkan Pohotala, jari tonyampairih ahkan ihto, tahpi ihto tahtap iou nguan dusa, hawui songaja, mahka eam anai hino porahpah hapa muhi dusan ihto. 10:27 Ihco-ihcooh ijo anai bagi ihto, yorih noharep bosaran Pohotala tutang baho kosangit-Oh ijo ahkan mahpong ohpah ulun-ulun ijo molawan Io! 10:28 Ulun ijo eam mone'et hukum ijo tononga bain Museh, tonohukum mahtoi, earo apun, amat ngosan kosaksian duo tolu behti, io tobukti bosala. 10:29 Eaminon labih bahat hukuman ijo harus tongonyahtu ngosan ulun ijo nihcak-ngihik Anak Pohotala. Ulun rih ngohu hina daha bowot Pohotala, jorih popahtoi Kristus ijo ngomuhi-Oh tahkan dusa. Io mohina Roh nonga pononganasi. 10:30 Ihto ta'an, iai Io ijo nuhtui, "Ahku ahkan malos! Ahku ahkan mohukum!" tutang ijo nuhtui, "Tuhan ahkan momuhtus ukup-Oh." 10:31 Eaminon kongolioh amat ngonyahtu ang longon Pohotala Ijo Bolum! 10:32 Ingat rih koloukuwoh koada'an Konduang-konduang ang ohkot ijo nokalou. Ang ohkot rih, ulijari koloang Pohotala nyingah'kam, ihkam aro mongarot; tahpi ihkam tohtap molawan umba kogigih. 10:33 Anai wayahoh ihkam tongohina tutang tononguanrih honong eam pios ang husuk ulunaro. Anai sosinooh ka'a ihkam ahkan nginyam kokarot umba iro ijo tononguan kolourih, 10:34 tutang ihkam umba ka'a nginyam poros ahtoi ulun ijo ang sipir. Tutang kotihka paring ijo ihkam tepui tonosuwit, ihkam norima orih honong sanang ahtoi, tului ihkam ta'an, ijo ihkam magun tepun angihco ijo paling hinut, ijo ahkan botahan turus-jahamoh. 10:35 Bain kotului orih, ara putus-asa, kotului amat ihkam bokehtep porocaya, mahka anai upah ijo hajo ahkan orih! 10:36 Ihkam harus sabar, mangat ihkam duon nguan kohondak Pohotala, tutang honong kolourih norima inon jo tonobowot-Oh. 10:37 Kotului luwang Surat Borasih tonyurat, "Tihkas honjulu iou hino mahka Io ijo ahkan lombut rih, ahkan bojoin lombut; Io eam ahkan nguhu-nguhut polombut-Oh. 10:38 Tutang ukup-Ku ijo morong ahkan porocaya tutang bolum; tahpi amat anai ang louk iro ijo undur, mahka Ahku eam ahkan sanang umbaoh." 10:39 Ihto tuh eam ukup ijo undur tutang lahcat. Tombalikoh, anairih ukup ijo porocaya umba Pohotala tutang ijo tonyolamatoh.
11:1 Koporocaya rimai yahkin tu'u-tu'u ahkan hal-hal ijo tonoharap, rimai anaingina kopastian ahkan hal-hal ijo eam tonohto. 11:2 Tului koporocaya, mahka ulun-ulun jaman nokalou tonojorih bain Pohotala. 11:3 Tului koporocaya, mahka ihto horahti ijo pindalangit tuh tona'oioh bain auh Pohotala; jadi, inon ijo duon tonohto, nyolung tahkan inon ijo eam dahpot tonohto. 11:4 Kotului porocaya Abel monyorah ahkan Pohotala porahpah ijo paling hinut tahkanumba porahpah Kain. Tului porocayaoh rih, Abel tonorima bain Pohotala, kolou ulun ijo hinut, kotului korinah rih ijo Pohotala norima ponongaoh. Abel ius palus, tahpi tului porocaya rih mahka io magun bopander nyiring huntuh. 11:5 Kotului porocaya, mahka Henoh eam mahtoi, molekan tongahtang tutang tonomin ahkan Pohotala. Eam ihcobehti ka duon nyombang io, tului io jari tongahtang bain Pohotala. Luwang Surat Borasih tonyurat, ijo sounumba Henoh tongahtang io ngojorih ahtoi Pohotala. 11:6 Earo porocaya, eam ihcobehti ka duon ngojorih ahtoi Pohotala. Bain ulun ijo lombut nokuh Pohotala harus porocaya ijo Pohotala tohko, tutang ijo Pohotala nonga balos ahkan ulun ijo ngurah-Oh. 11:7 Kotului porocaya, mahka Noah tonyorihta bain Pohotala tohou hal-hal ijo ahkan nyolung pongohino, ijo eam dahpot tonohto baiuoh. Noah mone'et Pohotala, nyiring io napa ihco bonama ijo pongohino korinah monyolamat aropoh homboh ukupjolahaioh. Honong kolourih kolunon tonohukum, rahat rih Noah bongoi kotului porocayaoh, tongorinah bain Pohotala kolou ulun ijo kopios. 11:8 Kotului porocaya, mahka Abraham mone'et Pohotala, kotihka Pohotala na'ah io, tutang nyuhuoh tulak nokuh tanah, ijo Pohotala mbowot ahkaioh. Turus Abraham tulak honong eam ta'an nokuh umoh ahkan ponulak. 11:9 Honong porocaya, Abraham mohcon kolou ulun bohkonuhtus, ang tanah ijo tonobowot Pohotala ahkai rih. Abraham mohcon ang anan ang luwang kemah. Kolourih hino Isaak tutang Yakub, ijo norima bowot ijo kolou orih tahkan Pohotala. 11:10 Kotului Abraham rahat ngindo-ngindoi lowu ijo torocana tutang tonombok bain Pohotala umba galang ijo segah. 11:11 Kotului porocaya, mahka Abraham tou dahpot lihit tahkan Sarah, uloka Abraham jari dalou oko tutang Sarah bongoi tomanang. Abraham yahkin ijo Pohotala ahkan monyolung bowot-Oh. 11:12 Oluka Abraham ang uhun orih, kolou ulun ijo jari mahtoi behtiuoh, tahpi io nuhtuh aro lihit, ijo karaioh eamduon tonorehken -- kolou potion-potion ang langit tutang baras ang saran tasik. 11:13 Paring ulun rih tahtap porocaya nyiring mahtoi. Iro eam norima hal-hal ijo tonobowot bain Pohotala, tahpi baya nohto tutang naharangoh tahkan mahcu. Tutang honong rih iro ngorinah, ijo iro baya ulun bohkonuhtus tutang ponomuoi ang kolunon tuh. 11:14 Ulun ijo nuhtui kolourih nunjuk honong jelas, ijo iro rahat ngurah lowu, ijo monjadi ahkan tanadanum'ndo. 11:15 Bohkon lowu, ijo ius iro nohtahoh rih ijo iro ngena-ngenangoh. Tului amat kolourih, mahka jari aro kosapet ahkan iro, buli nokuh lowui rih. 11:16 Tahpi korinahoh, iro rindu umba 'cokobawak lowu ijo labih hinut, iorih lowu ang soruga. Orihrih kotuluioh Pohotala eam mia amat iro ngohawot Io Pohotalan'ndo, bain Pohotala jari nahtap ihcokobawak lowu bagi iro. 11:17 Kotului porocaya ka'a, mahka Abraham monyorah Isaak monjadi porahpah kotihka io tonguji Pohotala. Ahkan Abrahamrih Pohotala nonga bowot-Oh, tahpi Abraham rela nonga anakoh ijo baya ihco-ihcooh rih. 11:18 Pohotala jari nuhtui umba Abraham, "Nguha Isaak jituh, ihko ahkan ngondahpot lihit ijo Ahku jari mbowotrih ahkan ihkam." 11:19 Abraham yahkin ijo Pohotala sanggup mbolum huli Isaak tahkan popahtoi -- jadi tou tonohawot Abraham jari norima huli Isaak tahkan popahtoi. 11:20 Kotului porocaya, mahka Isaak mbowot borehkat ahkan Yakub doro Esau ahkan wayah noharep. 11:21 Kotului porocaya, mahka sounumba Yakub palus, io nonga borehkatoh ahkan anak-anak Yusep -- honong nyandar ang kuhung sukahoh tutang nyembah Pohotala. 11:22 Kotului porocaya, mahka Yusep uhun doni nohtah kolunon -- bopander tohou solukaoh ukup Israel tahkan Misir, tutang nohtah pohtoh tohou inon ijo harus konuan iro umba otuioh. 11:23 Kotului porocaya ulun oko Museh, monyuhukrih tolu bulan kotahiuoh uli konanak. Iro nohtooh io ihcobehti anak ijo pios, tutang iro eam mihkoh molawan poretah lahca. 11:24 Kotului porocaya, mahka Museh jari hajo, eam kani konohawot anak tahkan putri lahca Misir. 11:25 Io labih jolik ngarot, hombo-homboh umba ukup Pohotala, tahkanumba ahkan pondehan ohkot nginyam komangat, tahkan bolum ijo bodusa. 11:26 Museh komo, ijo mahcu labih borega, ahkan norima tongohina demi Lahca Ponyolamat, ijo tonobowot Pohotala rih, tahkanumba ngondahpot karo ponahtou, tana Misir, tului Museh moharap upah ang ondou pongohuli. 11:27 Kotului porocaya, mahka Museh nohtah Misir, eam komo kihkoh toharep kosingin lahca Misir. Museh miar nitu titunbaui koloujahka io jari nopahjah Pohotala ijo eam gihtan rih. 11:28 Kotului porocaya, mahka Museh nguan Paska tutang moretah, mangat ponalit daha aang johin bauntukang, nyinong lohpou ulun Israel, mangat molehkat Popahtoi ara munu anak-anak pongoko iro. 11:29 Kotului porocaya, mahka ulun-ulun Israel dahpot mitah tasik bohandang, koloujahka iro nyalan ang ngosan tana ijo tojah, rahatoh ulun-ulun Misir tonolon bain tasik rih kotihka iro mocuba mitah ka'a. 11:30 Kotului porocaya, ulun-ulun Israel nguan dinding kohta Yerikho, bolukang uli iro ngodilingoh kotahin pihtu ondou. 11:31 Kotului porocaya ka'a, mahka Rahab, bawin sundal rih eam kona punu, homboh umba ulun-ulun ijo molawan Pohotala; kotului io norima hawui bojenta, umba pongolahti-pongolahti Israel. 11:32 Nah, ahku tou iou toturus pander, tahpi ohkot eam sukup ahkak'ku. Bain ahku jaha hino ngohawot Gideon, Barak, Simson, Yepta, Dawid, Samuel, tutang nabi-nabi. 11:33 Kotului porocaya, mahka iro jari ngalahoh kolahcan-kolahca'an. Iro nguan inon ijo morong, nyiring norima inon ijo tonobowot Pohotala. Iro mangop nyaman-nyaman singa, 11:34 mbolop baho ijo hebat, tokila tahkan tewek padang. Iro bolomu tahpi nyolung ba'as; iro bolinga ang poporangan nyiring mopokalah posukan sorodadu uhtus bohkon. 11:35 Kotului porocaya, mahka ulun-ulun bawi ngonduan hoduli ulun-ulun ijo jari mahtoi. Anai hino ijo rela tonosiksa nyiring mahtoi, tutang nulak ahkan tonoliwus, kotului kani tonombolum hoduli bagi ihco pombolum ijo labih pios. 11:36 Anai ijo tongonjea-jea, tomahcat, nyuhkui umba ratai, tutang anai ijo ponosolong ahkan luwang sipir. 11:37 Iro tomukah umbabahtu nyiring mahtoi, anai ijo tonohtok umba gergaji, tutang ijo tomunu umba padang. Iro mongombara hapan hahtin tahkan upak tobiri ata'ai upak kambing; iro porosbolum, tonoporos tutang tonyiksa. 11:38 Kolunon tuh eam unuk ijo layak bagi iro. Iro mongombara ang padang balambah tutang ang puruk-puruk, hawui mohcon ang luwang guha-guha tutang luwang lowong-lowong tana. 11:39 Eaminon kohajoioh komanang ijo ngondapot bain paring ulun rih, tului porocaya iro! Tahpi ka'a iro eam norima inon ijo tonombowot Pohotala, 11:40 kotului Pohotala anai rancana ijo labih pios ahkan ihto. Rancana-Oh, iorih ijo tihkas hihco umba ihto, iro ahkan monjadi soporuna.
12:1 Nah, tohou ihto bongon, ang kodiling ihto anai aro sino saksi! Tului orih, olai ihto dian paring ijo ngombahat ihto, tutang dusa ijo turus lehket aang ihto. Tutang olai ihto honong bokehtep nyuru kosolanja ijo anai ang toharep ihto. 12:2 Hondakrih topahjah ihto nitu umba Yesus, bain Io ijo mbolum porocayan ihto tutang mohaga tahkan pahtuk nyiring laiu. Yesus tahan ngarot, ang kahju sopolahki! Io eam poduli ijo mahtoi, ang kahju sopolahki rih anairih angihco hal ijo ngomia. Io tihkas ingat ahkan kojorih ijo ahkan tonginyam-Oh pongohuli. Huntuh Io tuot ang sila kotuon pododusan Pohotala tutang moretah hihco umba Io. 12:3 Cuba nirukrih, koloukuwoh koporosoh Yesus noharep ulun-ulun bodusa, ijo molawan-Oh hawui kolourih sangit! Bain rih ara kuik ahtoi tutang putus asa. 12:4 Kotului a'ang kolawan'kam umba dusa, ihkam jaha pu'u hokolawan nyiring harus nusuh daha. 12:5 Tutang ara nolingou tingak Pohotala tuh, ijo tononga ahkan'kam kolou anak-anak-Oh: "Anak-Ku nohtoanioh pio-pios ajaran Tuhan, tutang ara koik ahtoi amat Io nyingi ihko. 12:6 Tului Tuhan mohajar nyinong ulun ijo tonokasih-Oh, tutang Io mahcat nyinong ulun ijo tonongahku-Oh kolou anak-Oh." 12:7 Hondakrih ihkam norima pahcat tahkan Pohotala, kolou ihco ajaran tahkan ihcobehti amai. Tului inonrih, pu'u ihcobehti anak eam konohukum bain amaioh? 12:8 Amat ihkam eam umba, tonohukum kolou paring anakoh ijo bohkon tuh, rimai ihkam eam anak sah, molehkan anak ijo eam sah. 12:9 Ihto anaitepun amai ang kolunon. Io majar ihto, tutang ihto mohoromatoh. Nah, inonhino toharep Amai homboruan ihto ijo ang soruga, puna ihto pahtut labih nyembah umba Io mangat ihto bolum. 12:10 Ulun oko ihto ijo ang kolunon, majar ihto tihkas aang ohkot ijo botihkas, numbun inon ijo iro nanyam pios. Tahpi Pohotala majar ihto ahkan kopios ihto bongon, mangat ihto dahpot monjadi borasih hombo-homboh umba Io. 12:11 Puna aang ohkot ihto tongajar, hukum orih eam nyanang ahtoi ihto, molekan baya ngoporos iou. Tahpi pongohino tahkan orih, bagi ihto ijo jari tongajar hukum rih, kotuluirih ihto bolum, numbun konohuang Pohotala, tutang mohasilrih pokomo mangat aang ihto. 12:12 Tului rih, ngomba'asohrih longon'kam ijo bolomu, tutang tu'ut'kam ijo nohcot rih! 12:13 Nyalanrih turus ang jalan ijo rahta, mangat pa'an'kam ijo tipang rih, ara tolehcok, tahpi malah monjadi pios. 12:14 Bousaharih, ahkan bolum ruhkun umba paring ulun. Bousaharih ka'a bolum borasih, khusus ahkan Tuhan. Tului eam ihcobehti ka dahpot nohto Tuhan, amat io eam bolum kolourih. 12:15 Bojagarih, ara nyiring anai ihcobehti ka ijo soluka tahkan barih kopios ahtoi Pohotala, mangat ara anai ijo monjadi kolou kombulan bosowui ang tohun-tohun ihkam nyiring polombut kosusah tutang korusak aro ulun bain sowuioh. 12:16 Jagarih, mangat ara anai ijo bolum kihal ata'ai eam morega hal-hal rohani, kolou ijo konuan bain Esau. Io morahkang hakoh kolou anak ijo oko, tihkas bagi ihco pikan ukun. 12:17 Ihkam ta'an ijo pongohino, Esau jolik dahpot borehkat rih tahkan amaioh, tahpi io tonulak. Tului sinoka umba tangihoh io ngurah jalan ngobuah kosalaioh, kosapet ahkan orih eam anai hino. 12:18 Konduang-konduang eam lombut noharep aangihco, kolou ijo tonoharep bain uhtus Israel lomoi. Iro noharep angihco ijo tou ngayap. Yorih Puruk Sinai honong bahooh ijo ngonjelak-jelak; iro noharep kopindong, kotinget tutang bohiu pusukmonyawung; 12:19 iro noharep auh sorunai, tutang konahan auh tuhtui ijo hebat. Kotihka ulun-ulun Israel ngonih tuhtui rih, iro nyawot hawui paham, mangat auh rih eam pander hino ahkan iro. 12:20 Kotului iro eam tahan ngonih poretah ijo tonyapai bain auh rih. Kotului auh rih nuhtui, "Paring ijo nigung puruk tuh, eam poduli, inon rih ohcin, ata'ai iai ka ka'a harus medak umba bahtu nyiring mahtoi." 12:21 Inon ijo tonohto bain ulun-ulun Israel rih, kolourih hebat nyiring Museh nuhtui, "Ahku mihkoh tutang hogenjeh!" 12:22 Tombalikoh ihkam jari lombut nokuh Puruk Sion tutang Lowun Pohotala ijo bolum, io rih Yerusalem ijo ang soruga umba bokuhjan-kuhjan molehkatoh. 12:23 Ihkam umba ihco puhpungpulou ijo rami -- puhpungpulou rih ain anak-anak pongoko ain Pohotala, ijo arai-araioh tonoliting ang luwang soruga. Ihkam lombut noharep Pohotala. Hakim paring ukup kolunon. Ihkam noharep roh-roh, karo ulun-ulun hinut, ijo jari nyolung soporuna. 12:24 Ihkam lombut noharep Yesus, Poholat ahkan bowot ijo bohua rih; ihkam noharep daha ponalit, ijo monjamin hal-hal ijo labih hinut, tahkanumba ijo tojamin bain dahan Abel. 12:25 Tului rih bua-buahrih, ara nyiring ihkam eam kani ngonih Io ijo pander rih. Iro ijo eam kani ngonih Io ijo jari lombut nokuh tana, tutang monyiar borihta tahkan Pohotala, eam duon mokila arop. Inonhino ihto tuh, ijo ngonih Io ijo bopander tahkan soruga! Amat ihto eam kani ngonih-Oh, Amoh ahkantou ihto duon luhput! 12:26 Aang ohkot rih, auh-Oh nokonyat tana. Tahpi uhuntuh Io nobowot, "Sino hino, Ahku ahkan nokonyat, eam baya tana, tahpi langit ka'a." 12:27 Hioioh, "sino hino" nunjuk ijo paring kolunon ijo jari tona'oi ahkan moruguh tutang tonyaro, mangat ijo bototah, bayarih ijo eam dahpot konorukuh. 12:28 Kotului orih, hondakoh ihto ngohawot torimakasih ahkan Pohotala, kotului ihto norima tahkan Io ihco kolahca'an ijo eam dahpot tonoruhkuh. Hondakrih ihto norimakasih tutang sombayang ahkan Pohotala hawui horomat tutang mihkoh, numbun cara ijo tongojolik baiu-Oh bongoi. 12:29 Kotului Pohotalan ihto kolou baho ijo monyaha.
13:1 Hondakrih ihkam bokehtep hosita ihco sama 'jobohkon kolou ulun-ulun Kristen ijo hokonduang. 13:2 Ara mihkoh norima ang lohpou'mu ulun-ulun ijo jaha ihkam kosono. Tului honong nguan ijo kolourih, pu'u ulun, earo ngorondongoh, jari norima molehkat ang lohpouoh. 13:3 Ingatrih ulun-ulun ijo ang luwang sipir, koloujahka ihkam ka'a anai ang luwang sipir hihco iro. Tutang ulun-ulun, ijo kononguanbainulun sokohondak'ndo, hondakrih ihkam mingat umba iro, koloujahka ihkam ka'a kononguanbainulun kolourih. 13:4 Paring ulun harus nunjuk sikap horomat, toharep pongawin, orih kotuluioh hondakrih bosai-oruh, te'et ihco sama'jobohkon. Ulun ijo kihal tutang ulun ijo hobandung, ahkan tomosara bain Pohotala. 13:5 Ara pombolum'kam tongowasa, bain sinta ahkan duit, tahpi hondakrih ihkam sukup umba inon ijo anai aang'kam. Kotului Pohotala ius nuhtui, "Ahku eam mohonau ata'ai ahkan nohtah ihko." 13:6 Tului rih ihto bohanyi nuhtui, "Tuhan orih rih anai Pondohop'ku ahku eam mihkoh. Inon ijo tou ulun nguai toharep ahku?" 13:7 Ara nolingou umba okon-okon'kam ijo monyorihta pohtoh Pohotala ahkan'kam. Nohtoani rih koloukuwoh iro bolum, tutang koloukuwoh iro mahtoi, tutang nyuturih koporocaya iro. 13:8 Yesus Kristus tohtap sama, pios lomoi, uhuntuh, tutang nyiring turus-jahamoh. 13:9 Ara mohonau kokaro mahcam ajaran ijo helan-helan monyosat ihkam. Ahtoi ihto harus tonomba'as bain kohinut ahtoi Pohotala, orihrih ijo pios; ara bain poroturan-poroturan tohou ukun. Ulun-ulun ijo lomoi monte'et poroturan-poroturan rih eam ngondahpot paedahoh. 13:10 Ihto anaingina ijo kobawak mesbeh unuk monyorah porahpah ahkan Pohotala. Tutang imam-imam ijo mohalu ang luwang Kemah Tuhan, eam bohak kuman porahpah ijo anai ang ngosan mesbeh rih. 13:11 Dahan ohcin ijo nyorah kolou porahpah ahkan pongapun dusa, konomin bain imam hajo nokuh Ruang Paling Borasih, tahpi otun ohcin rih bongoi tomahpong ang luar kemah. 13:12 Orihrih kotuluioh Yesus ka'a mahtoi ang luar bauntukang lowu ahkan muhi ukup-Oh tahkan dusa umba daha-Oh bongoi. 13:13 Tului rih, olai ihto tulak nokuh Io ijo ang luar puloukemah tutang umba tonohina homboh Io. 13:14 Tului ang tana, eam aro unuk mohcon ijo kototahiu ahkan ihto; ihto ngurah unuk mohcon ijo ahkan lombut. 13:15 Kotului rih, honong poholat Yesus, hondakrih ihto toturus monyanyi tara ahkan Pohotala; orih samakolou porahpah torimakasih ihto ahkai-Oh, ijo ihto monyorah nguha auh biwih ahkan mohoromat arai-Oh. 13:16 Ara nolingou, nguan ang pios, tutang saling hodohop, tului jituh porahpah-porahpah, ijo ngojorih ahtoi Pohotala. 13:17 Umba rih poretah okon-okon, tutang tunduk umba iro. Kotului iro toturus nohtoani homboruan'kam, tutang iro pahtut nanggung-jawab ahkan Pohotala. Amat ihkam te'et ahkan iro, iro dapot bogawi honong sanang ahtoi; amat eam, mahka iro ahkan bogawi umba poros ahtoi, tutang orih eam nongautung ahkan ihkam. 13:18 Toturus iou bodo'a ahkan ihkai. Ihkai yakin ahtoi bua ihkai brasih, kotului aang karo hal ihkai turus kani nguan inon ijo morong. 13:19 Khususoh ahku nyawot honong paham, mangat ihkam mondo'a ahku mangat Pohotala jion ngomin ahku buli umba'kam. 13:20 Pohotala ius mombalum Tuhan ihto Yesus Kristus, tahkan popahtoi. Tului popahtoi-Oh rih Io huntuh monjadi Sokahtik Hajo bagi ihto, yorih tobiri-tobiri-Oh. Popahtoi-Oh rih ka'a monsah bowot kototahiu ijo konuan Pohotala umba ihto. 13:21 Keleh Pohotala tohasak kosanang orih monyuhkup ihkam umba kokaron ijo hinut ijo ihkam poruluoh ahkan nguan kohondak-Oh. Keleh hawui nguha Yesus Kristus, Pohotala bogawi ang luwang ihto, inon ijo tongojolik-Oh. Hondakrih Kristus tomohoromat turus-jahamoh. Amen. 13:22 Ahku nyawot mangat ihkam nohtoani tingak-tingak'ku tuh hawui sabar, bain surat'ku tuh eam dalau ombu. 13:23 Kopahtutoh ihkam kota'an ijo konduang ihto Timoteus jari bolua tahkan sipir. Amat io jari nokuh unuk'ku tuh ahku ahkan ngomin io ohkot ahku masap ihkam noin. 13:24 Nyiarohrih tahben ihkai ahkan paring okon'kam tutang ahkan paring ukup Pohotala. Torima ka'a tabe tahkan konduang-konduang ang Italia. 13:25 Pios Tuhan mborehkat Konduang paringoh.
1:1 Konduang-konduang ukup Pohotala paringoh ijo kosoburan ang sohapus kolunon! Tahbe tahkan ahku, Yakobus, jihpon Pohotala tutang jihpon Tuhan Yesus Kristus. 1:2 Konduang-konduang! Amat ihkam nyuru mahca-mahcam ujian, hondakrih ihkam komo borutung. 1:3 Bain ihkam ta'an, ijo amat ihkam tohtap porocaya umba Tuhan ang ohkot nyuru ujian, akibatoh, iorih; ihkam monjadi tabah. 1:4 Jagarih mangat kotabah ahtoi'mu rih, turus mondahang nyiring ihkam tu'u-tu'u soporuna, hawui eam kotahpas a'ang hal inon ka. 1:5 Amat anai ihcobehti ang louk'kam ijo kurang pihtar, hondakrih io nyawotoh tahkan Pohotala, mahka Pohotala ahkan nonga kopihtaran ahkaioh; kotului ahkan nyinong ulun, Pohotala nonga umba murah ahtoi tutang umba pokomo kasihsayang. 1:6 Tahpi ulun ijo nyawot, harus porocaya; io eam tou ragu-ragu. Kotului ulun ijo ragu-ragu anairih kolou luhcak ang laut ijo tonahpi bahiou nokuh anan nokuh ohtoi. 1:7-8 Ulun ijo kolourih eam tahtap tirukoh; io eam duon mongomin koputusan ino-inon a'ang kokaron ang'co ijo kunuaioh. Tului orih, eam usah ka'a io moharap ahkan duon ino-inon tahkan Tuhan. 1:9 Ulun Kristen ijo porosbolum, kopiosoh nginyam kojorih, amat Pohotala ngahtangoh. 1:10 Tutang ulun Kristen ijo tahtou, hondakrih nginyam kojorih ka'a, amat Pohotala mopopindaoh. Bain ulun tahtou ahkan dilap kolou dolak uru. 1:11 Aang ohkot mahtanondou lombut honong kopodih ijo monyahap, mahka uru rih ahkan monjadi bolanyu nyiring ngonyahturih dolakoh, tutang nihau hino kobohinoioh. Kolorih ka'a umba ulun ijo tahtou; io ahkan luhtek, ang ohkot io hun nguan karonang gawiuoh. 1:12 Kosanangrih ulun ijo tabah, ang ohkot io nyuru tihkos. Kotului uli io bohasir botahan a'ang tihkos rih, io ahkan norima upahoh, io rih pombolum ijo jari nobowot Pohotala ahkan ulun-ulun ijo ngasih Pohotala. 1:13 Amat ihcobehti tobujuk bain tihkos ijo mahcam orih, ara io homouh, "Bujukan tuh lombut tahkan Pohotala," tului Pohotala eam dahpot tonobujuk bain koja'at, tutang eam ka'a nihkos ihcobehti ka. 1:14 Tahpi ulun ijo tobujuk, amat io tonguhut tutang tojorat bain kojolikoh bongoi ijo ja'at. 1:15 Pongohuli, amat kojolik ijo ja'at rih tonumbunrih mahka nganak dusa; tutang amat dusa jari botuo, mahka akibatoh iorih popahtoi. 1:16 Ara ihkam totihpu, Konduang-konduang'ku ijo tongasih. 1:17 Nyinong pononga ijo pios, tutang hadiah ijo soporuna, lombutoh tahkan soruga, tonosuluh bain Pohotala, Pona'oi kokaro koloang ang langit. Io rih Pohotala ijo eam boubah, tutang eam hino kotuluirih kopindong inon ka. 1:18 Ngosan konohuang-Oh bongoi, Io ngojorian ihto anak-anak-Oh nguha auh-Oh ijo morong. Io monguanohrih, mangat ihto ngondahpot unuk ijo mbahtang ang louk paring angbolum ijo tona'oi-Oh. 1:19 Nohtoaniohrih tuh pio-pios, Konduang-konduang ijo tonokasih. Nyinong ulun harus bojoin ahkan ngonih, tahpi borakah ahkan nuhtui, tutang borakah ahkan bosingi. 1:20 Ulun ijo bosingi, eam dahpot nguan ijo hinut, ijo ngojorih ahtoi Pohotala. 1:21 Tului rih, dianrih nyinong kopahtuh ijo kojilok tutang ja'at. Torimarih umba randah ahtoi auh ijo tonombolam bain Pohotala ang luwang ahtoi'mu, kotului auh rih anaingina koba'as ahkan nyolamat ihkam. 1:22 Kohandakrih ihkam nguanrih inon ijo tonuhtui bain Pohotala, ara baya ngonihoh iou, nyiring hawui kolouorih ihkam monihpu arop bongon. 1:23 Ulun ijo ngonih auh Pohotala, tahpi eam molalusoh, anairih kolou ulun ijo rahat nopahjah bauioh ijo komorongoh ang soramin. 1:24 Limbah io nopahjahoh pio-pios, io ka'a tulak tutang turus nolingou koloukuwoh bauioh rih. 1:25 Hukum Pohotala soporuna, tutang anaingina koba'as ahkan momorodehka kolunon. Tutang ulun ijo monoliti tutang nohtoani pio-pios hawui molalusoh hukum-hukum rih, tutang eamoh ngonih iou turus nolingouoh, ulun rih ahkan ponorehkat Pohotala a'ang nyinong hal ijo tonguaioh. 1:26 Amat anai ihcobehti, ijo ngomo aropoh ihcobehti ijo te'et boagama, tahpi io eam monjaga ilatoh, mahka io ngobula aropoh bongoi; sombayangoh eam anai gunaioh. 1:27 Kote'et boagama, ijo borasih tutang sojahti numbun topahjah Pohotala, Amai iorih; mondohop anak-anak nulo uhus tutang balu-balu ijo ngarot, tutang monjaga arop bongon mangat ara tonorusak bain kolunon tuh.
2:1 Konduang-konduang! Kolou ulun ijo porocaya umba Tuhan Yesus Kristus, Tuhan Ijo Mahahoromat, ara ihkam ngobohkon-bohkon ulun hogalang hal-hal koului. 2:2 Tului amat anai ihcobehti ulun tahtou, ijo hapa isim bulau tutang pokahjan pios, lombut nokuh pesta'mu, turus lombut hino ihcobehti ulun porosbolum ijo hapa pokahjan tumpang-tambing, 2:3 mahka ihkam labih, mohoromat ulun ijo hopokajan pios rih. Ihkam nuhtui ahkaioh, "Turus Tuan, tuot ang koruci ijo kopios rih." Tahpi ahkan ulun, ijo porosbolum ihkam nuhtui, "Tombok ang anan," ata'ai "Tuot ang saoh ang ohtoi." 2:4 Honong nguan kolourih, ihkam nguan kobohkon ang louk sosama arop'kam tutang monilai ulun hogalang tiruk ijo jaat. 2:5 Ingatrih, Konduang-konduang ijo tonokasih. Ulun ijo porosbolum ang kolunon tuh, tonopili Pohotala ahkan monjadi ulun ijo tahtou a'ang kaporocaya. Ulun-ulun rih ahkan monjadi ukup ain Pohotala, kolou ijo tonobowot Pohotala ahkan ulun ijo mongasih-Oh. 2:6 Tahpi ihkam malah mohina ulun porosbolum, podahal ulun-ulun tahtou rih ijo mohonyok ihkam tutang nunda ihkam nokuh akan bosara! 2:7 Iro rih, ijo mohina aran ijo tonohoromat, ijo ihkam torima tahkan Pohotala! 2:8 Ihkam nguan ijo morong, amat ihkam molalus hukum Kolahca'an ijo tonyombang luwang ayat Surat Borasih tuh, "Ngasirih sama arop'mu kolou ihko ngasih arop'mu bongom." 2:9 Tahpi amat ihkam ngobohkon-bohkon ulun hogalang hal-hal kouluioh ihkam nguan dusa, tutang hukum Pohotala ngorinahoh, ijo ihkam anairih polanggar hukum. 2:10 Ulun ijo molanggar anai ihco tahkan hukum-hukum Pohotala, rimai molanggar paringoh. 2:11 Kotului ijo homauh, "Ara hobandung," Io rih ka'a ijo nuhtui, "Ara munu." Jadi, amat ihkam eam hobandung, tahpi munu, mahka ihkam anairih polanggar hukum ka'a. 2:12 Bopanderrih tutang molalusohrih kolou ulun ijo ahkan ponosara numbun Hukum Pohotala ijo momorodehka kolunon. 2:13 Tului Pohotala eam ahkan monunjukoh balos kasih ahkan ulun ijo eam kosono balos kasih. Tahpi balos kasih labih ba'as tahkan hukum! 2:14 Konduang-konduang! Inon gunaioh ulun nuhtui, "Ahku ulun ijo porocaya," amat io eam ngorinahoh umba gawiuoh? Dahpot-rih koporocaya somahcam rih monyolamatoh? 2:15 Jahkaioh, ihcobehti konduang bahkas, ata'ai konduang bawi porulu hahtin tutang eam aro ukun ahkan nyinong-ondou. 2:16 Inon gunai ihkam nuhtui ahkaioh, "Sana-sanang hapa hahtin ijo bolasut, tutang solamat kuman!" -- amat ihkam eam nonga ahkaioh inon ijo tomoruluoh ahkan pombolumoh? 2:17 Kolourih ka'a umba koporocaya, jahka eam ngorinahoh umba gawi, mahka koporocaya rih eam anai gunaioh. 2:18 Mihkohtou anai ijo homouh, "Anai ulun ijo bosikuh umba koporocaya, tutang anai hino ulun ijo bosikuh umba gawiuoh." Ahku ahkan mutah, "Pokarahiou rih ahkak'ku, koloukuwoh ulun dahpot anaingina koporocaya earo gawiu, tutang ahku ahkan ngorinah umba gawi ijo ahku anaingina koporocaya." 2:19 Ihkam porocaya ijo Pohotala tihkas ihco, kowa? Nah, roh-roh ja'at ka porocaya tutang iro kitik genjeh mihkoh! 2:20 Ihkam bobaleh samasino! Inonrih porulu mombukti ahkan'kam ijo eamanai gunai anaingina koporocaya earo gawiu? 2:21 Topahjah iou Abraham tahtu ajuh ihto. Io tonorima pios bain Pohotala tului gawiuoh, yorih ang ohkot io nyorah Isaak, anakoh, ahkan Pohotala ang ngosan mesbeh. 2:22 Ang ohtoi korinah ijo koporocaya harus mokarah umba gawiu mangat monjadi soporuna. 2:23 Orih tohorong umba ayat Surat Borasih tuh, "Abraham porocaya ahkan Pohotala, tutang tului koporocayaoh rih Pohotala monorimaoh kolou ulun ijo molalus kohondak Pohotala." Orih kotuluioh Abraham konohawot, "Sobat Pohotala". 2:24 Korinahrih uhuntuh, ijo ulun tonorima pios bain Pohotala, kotului inon ijo konuan bain ulun rih, tutang eam baya tului porocayaoh iou. 2:25 Nohto ka'a aang Rahab, bawi sundal rih. Io tonorima pios bain Pohotala, kotului gawiuoh, yorih kotihka io norima ang luwang lohpouoh ulun-ulun pongolahti ain uhtus Israel tutang dohop iro nasah nguha jalan bohkon. 2:26 Nah, koloukuwoh behti eam-anai roh anai rih behti ijo mahtoi, kolourih ka'a koporocaya eamanai gawiu iorih porocaya ijo mahtoi.
3:1 Konduang-konduang! Ara aro-aro tahkan louk'kam ijo kani monjadi guru. Ihkam kota'an, ijo ihto ijo monjadi guru ahkan tomosara umba labih paham tahkan ulun bohkon. 3:2 Ihto paringoh bojoin nguan kosalan. Tahpi ulun ijo eam pu'u nguan kosalan umba tuhtui-tuhtuioh, io ulun ijo soporuna, ijo duon mongowasa hopus aropoh. 3:3 Amat ihto kehpan tali gandali ang boun kuda mangat io numbun konohuang ihto, mahka ihto dahpot ngondali hopus behtin kuda rih. 3:4 Ominrih ka'a kapal kolou sutu. Oluka kapal anairih angihco ijo kolourih kohajoioh, tutang omin bain bahiu ijo paham, tahpika io tongondali bain pohipit ijo paling koik, numbun konohuang tuhkangngomburi. 3:5 Kolourih ka'a umba ilat ihto, oluka ilat ihto rih koik, tahpi amat io dahpot mopojuhu aropoh tohou hal-hal ijo hajo-hajo. Ngenangrih, eaminon kolumbah himba, dahpot tononyaha bain baho ijo paling koik! 3:6 Ilat sama kolou baho. Ang behtin ihto, io sama kolou tahasak koja'at, ijo moponanyap koja'at ahkan hopus behtin ihto. Umba baho ijo asaroh tahkan norahka, io monyaha sohopus pombolum ihto. 3:7 Kokaron mahcam ohcin bosiak, bulung, ohcin nyoli, tutang ohcindanum, dahpot bolinok, tutang jari ka'a tonolinok bain kolunon. 3:8 Tahpi ilat kolunon eam dahpot tonolinok bain ihcobehti ka'a. Ilat rih ja'at tutang eam dahpot tongowasa; tuwi umba sowui ijo mopahtoi. 3:9 Ihto monggunaoh ahkan ngohawot torimakasih ahkan Tuhan, tutang Amai ihto, tahpi ka'a ahkan nulat sosama ulun, ijo jari tona'oi numbun tapan Pohotala. 3:10 Tahkan nyama ijo sama, soluka auh-auh torimakasih, tutang auh-auh tulat. Soharusoh eam kolourih! 3:11 Inonkah anai luwang danum, ijo nyoluka danum botawah tutang danum poit, tahkan luwang ijo sama? 3:12 Pu'un sikun, Konduang-konduang'ku, eam tou mohasil bua Zaitun, tutang pu'un anggur, eam dahpot mohasil bua sikun. Luwang danum ijo mohit eam tou ka'a polua danum tawah. 3:13 Amat ang louk ihkam, anai ulun ijo pihtar tutang bobudi hondakrih io pokarahoh umba pombolum hinut, tutang hawui nguan hal-hal ijo hinut, ijo honong korandah ahtoi tutang kopihtar. 3:14 Tahpi amat ihkam ngobohu, poros ahtoi, tutang ngohu arop bongon, a'airih namam kopihtar arop rih, kotului umba orih ihkam mutarbalik borihta ijo morong tahkan Pohotala. 3:15 Kopihtaran mahcam orih eam asar tahkan soruga. Io asar tahkan kolunon, tahkan kojolik ulun tutang tahkan sehtan! 3:16 Ang amoh anai kobohu, tutang sipat kogunan arop bongon, ang anan ka'a sombang korusuh, tutang karo mahcam gawi ijo ja'at. 3:17 Tahpi ulun ijo anaingina kopihtaran ijo lombut tahkan diang, io sula-sulak samasino borasih, pongohuli jolik hokobuah, bojenta, tutang ponumbun. Io tuwi umba balos kasih tutang mua gawi-gawi ijo pios. Io eam bopihak tutang eam pura-pura. 3:18 Puna kopiosoh anairih bua tahkan bonyi kobuah ijo tonuhkan bain ulun ijo nyita kobuah!
4:1 Tahkan umoh asaroh karon kolahi, tutang botengkar ang louk ihkam? Eamorih rih asar tahkan kojolik-kojolik'kam, ijo turus iou hokolahi ang luwang behtin'kam, ahkan dahpot kosanang kolunon! 4:2 Ihkam jolik, tahpi eam ngondahpot, mahka ihkam kani munu! Ihkam bosomangat, tahpi eam mondinu inon ijo ihkam ngurah, mahka ihkam botengkar tutang hokolahi. Ihkam eam ngondahpot ino-inon kotului ihkam eam nyawot umba Pohotala. 4:3 Tutang amatka ihkam jari nyawotoh, ihkam ka eam ngondahpotoh, tului titun ponyawot'kam sala; inon ijo ihkam nyawotoh bayarih ahkan kosanang arop'kam bongon. 4:4 Ihkam anairih ulun ijo eam tehtep! Kota'anrih ihkam, ijo amat ihkam hopahkat umba kolunon, mahka ihkam monjadi musuh Pohotala? Jadi dolangiai kani monjadi sobat kolunon tuh, io ngonjodian aropoh musuh Pohotala. 4:5 Ara ngohu ijo Surat Borasih earo alasan nuhtui, "Ang luwang arop ihto, Pohotala ngina Roh ijo karas kojolikoh." 4:6 Oluka kolourih, pononganasi Pohotala ijo tononga ahkan ihto labih ba'as, tahkanumba kojolik-kojolik roh ihto rih. Orihrih kotuluioh ang luwang Surat Borasih tonyurat ka'a, "Pohotala ngolawan ulun ijo bojuhu, tahpi sobalikoh, Io ngasih ulun ijo randah ahtoi." 4:7 Kotului orih tunduk umba Pohotala, tutang lawanrih Sehtan, mahka Sehtan ahkan nokoru tahkan ihkam. 4:8 Ngondonirih Pohotala, tutang Pohotala ka'a ahkan ngondoni ihkam. Muhiohrih longon'mu, ihkam ijo bodusa! Tutang nokiningoh rih ahtoi'mu, ihkam ijo holambang ahtoi! 4:9 Hondakrih ihkam tu'u-tu'u monyasal tutang nangih hawoi nahtum; hondakoh kota'on'mu monjadi tangih, tutang kojorih'mu monjadi koporosahtoi! 4:10 Hondakrih ihkam morandah arop ang toharep Tuhan, mahka Tuhan ahkan ngahtang ihkam. 4:11 Konduang-konduang, ara saling moncela ata'ai monosalan. Ulun ijo moncela ata'ai nosalan konduangoh ijo sama-sama Kristen, io moncela ata'ai nosalan hukum Pohotala. Tutang amat ihkam nosalan hukum Pohotala, orih rimai ihkam eam numbun hukum-hukum rih, molekan monjadi hakimoh. 4:12 Padahal tihkas ihco ijo bohak nonga hukum ahkan ulun tutang momuhtus ulun. Iorih Pohotala ijo bokowasa monyolamat tutang morusakoh. Jadi, iairih ihkam, nyiring ihkam kani nosalan sosama kolunon? 4:13 Konduang-konduang ijo homouh, "Hondou tuh, ata'ai hawun ihkai ahkan tulak nokuh lowu Anu, tutang mohcon anan ihco toun kotahiuoh ahkan borahkang tutang ngurah duit," -- ngonih rih tingak'ku tuh. 4:14 Inon ijo ahkan nyolung umba pombolum'mu hawun, ihkam bongom ka eam mongota'aioh! Ihkam tihkas kolou asep ijo honjulu iou gihtan, pongohino dilap. 4:15 Soharusoh ihkam ngohawot koloutuh, "Amat Tuhan bokohandak ihkai ahkan bolum tutang nguan tuh ata'ai orih." 4:16 Tahpi uhuntuh ihkam tuh bojuhu tutang mombual. Paring bualan kolourih sala. 4:17 Tului orih, ulun ijo ta'an inon ijo hinut ijo harus io tononguaioh, tahpi eam tononguaioh, ulun rih bodusa.
5:1 Konduang-konduang, ulun-ulun tahtou! Ngonihohrih tingak-Ku. Kohandakrih ihkam nangih tutang nahtum tului ihkam ahkan ngarot koporos! 5:2 Ponahtou'mu jari maram. Hahtin'mu jari tokuman gagat. 5:3 Bulau tutang perak'mu jari totuhtup tagar; tagaroh ahkan jadi saksi molawan ihkam, tutang ahkan kuman opah behtin'kam kolou baho. Ihkam ius nunyuk ponahtou ang jaman monitu laiu. 5:4 Ihkam eam bayar uhpah ulun-ulun, ijo bogawi ang umon'mu. Huntuh ngonih auh komonguh iro! Ulun-ulun ijo nipun bua umon'mu ngoriak nyawot dohop, tutang koriak iro jari johcok nokuh tolingan Pohotala, Tuhan Ijo Pahamkowasa. 5:5 Ihkam ius bolum molowi tutang nginyam kosanang ang kolunon tuh. Ihkam koloujahka rahat pomonyak arop, ahkan ondou ponyombalih. 5:6 Ihkam mohukum tutang munu ulun-ulun ijo eam bosala, tutang iro eam molawan ihkam. 5:7 Bain orih, bosabarrih Konduang-konduang'ku, nyiring Tuhan lombut. Nohto rih koloukuwoh sabaroh ihcobehti Pongumo ngindoi, nyiring umoioh polombut buaoh ijo borega ahkaioh. Umba kosabar io ngindoi uhjan musim ngonyahtu tutang uhjan musim dolak. 5:8 Kohandakoh ka'a ihkam bosabar tutang hajo ahtoi, tului ondou polombut Tuhan jari doni. 5:9 Ara bokuhtuk tutang saling hotosalan, mangat ihkam eam kona hukum bain Pohotala. Ingat! Hakim ius doni, tohtap ahkan lombut. 5:10 Konduang-konduang, ingatrih dolang nabi ijo nuhtui ngosan aran Tuhan. Iro sabar tutang tabah ngarot. Jadi, omin iro monjadi sutu. 5:11 Iro konohawot sanangmangat tului iro tabah. Ihkam ius ngonih tohou kosabar Ayub, tutang ihkam ta'an koloukuwoh Tuhan ang laiuoh momborehkat Io. Tului Tuhan paham kasihsayang tutang hinut ahtoi. 5:12 Ijo pahtukoh samasino, iorih: Ara nulut pios demi langit, kanika demi tana, ata'ai demi inonka iou. Ngohawotrih iou, "Yo" amat konohuang'mu yo, tutang "Eam" amat konohuang'mu eam; mangat ihkam ara tonopahas hukum bain Pohotala. 5:13 Amat ang louk'kam anai ijo rahat susah, kopiosoh io bodo'a. Amat anai ijo jorih, handakrih io monyanyi monara Pohotala. 5:14 Amat anai ijo poros, hondakrih io na'ah ponotua-ponotua ukup. Tutang handakrih ponotua-ponotua ukup rih, bodo'a ahkan ulun ijo poros rih, tutang ngasakoh umba undus ang aran Tuhan. 5:15 Amat do'a iro tongojohcokoh honong koyakinan, Tuhan ahkan ngopios ulun ijo poros rih, tutang ngapun dusai-dusai, ijo jari tonguaioh. 5:16 Kotului orih, handakrih ihkam saling ngahku kosalan ihco umba ijo bohkon, honong saling bodo'a, mangat ihkam konopios. Do'a ulun ijo numbun konohuang Pohotala, tepun kowasa ijo hajo. 5:17 Elia, sama-sama kolunon kolou ihto. Io bodo'a honong tu'u-tu'u, mangat uhjan eam boduruh, mahka uhjan ka'a eam boduruh kotahin tolu sotengah toun. 5:18 Pongo-huli io bodo'a hino, turus langit monduruh uhjan, nyiring tana nonga buaoh hino. 5:19 Konduang-konduang'ku! Amat ang louk ihkam anai ihcobehti ijo eam monutut hino ajar tahkan Pohotala, turus ihcobehti ijo bohkon ngomin, ulun rih hoduli nokuh Pohotala, 5:20 ingat auh ayat tuh: Ulun ijo ngomin ulun bodusa ngulos tahkan jalaioh ijo sala, ulun rih nyolamat homboruan ulun bodusa rih, tahkan popahtoi, tutang kotuluioh aro dusa tonapunoh.
1:1-2 Konduang-konduang ukup ponitih Pohotala, ijo bororawu ang ponomuoi ang tana Pontus. Galatia, Kapadokia, Asia tutang Bitinia! Ahku Petrus rasul Yesus Kristus, moharap, keleh Pohotala nonga berkat tutang kosanang ahkan'mu nyiring momujar-mujar. Ihkam ponitih monjadi ukup Pohotala, tohorong umba rancana Pohotala, Amai. Tutang Roh Pohotala jari monjodian ihkam ukup ijo borasih, khusus ahkan Pohotala, mangat ihkam te'et umba Kristus tutang tonomuhi bain daha-Oh. 1:3 Olailah ihto norimakasih umba Pohotala, Amai, Tuhan ihto Yesus Kristus! Io paham mongasih ihto, orih kotuluioh Io nonga ahkan ihto pombolum ijo bohua, hawui mombolum hoduli Yesus Kristus tahkan popahtoi. Tuh mononga'kan ihto harapan ijo segah. 1:4 Ihto bokoharap ahkan anaitepun borehkat-borehkat ijo tonyodia Pohotala ahkan ukup-Oh, yorih borehkat-borehkat ijo tongina-Oh ang soruga, nyiring eam dahpot rusak, ata'ai monjadi maram, ata'ai ka luntur. 1:5 Paringoh rih anairih ahkan'mu, tului ihkam porocaya umba Pohotala. Mahka ihkam tonojaga umba kowasan Pohotala, mangat ihkam monorima kosolamatan ijo sodia tongorinah aang lain jaman noin. 1:6 Kotului orih hondakrih ihkam jorih ahtoi, oluka huntuh bagi pondehan ohkot, ihkam harus monjadi sedih tului ihkam nyuru mahca-mahcam tihkos. 1:7 Tituioh iorih, ahkan mbukti inon ihkam tu'u-tu'u porocaya, umba Tuhan ata'ai eam. Bulou ijo duon rusak ka, tonguji umba baho. Nah, porocaya ihkam anairih labih borega tahkan bulou, jadi harus tonguji ka'a mangat monjadi segah. Tutang honong kolourih, ihkam ahkan tonara tutang tonohoromat, hawui tonongahtang ang ondou Yesus Kristus lombut hoduli. 1:8 Ihkam ngasih Io, oluka soun ihkam eam nohto Io. Tutang ihkam porocaya umba Io, oluka houn ihkam eam nohto-Oh. Orih kotuluioh ihkam jorih, tutang nginyam kojorih ijo hajo tutang eam duon tonyorihta. 1:9 Tului titun koporocaya'kam johcok, yorih, kosolamatan homboruan'mu. 1:10 Kosolamatan tuhrih ijo tonolihti tutang tonyolidik bain dolang nabi, tutang iro nujum tohou borehkat ijo tononga Pohotala ahkan'mu. 1:11 Iro nyolidik koloukuwoh, tutang mira hal orih ahkan nyolung, ijo konohuangoh bain Roh Kristus ijo anai ang luwang arop iro. Ang ohkot rih, Roh-Oh monujum ahkan iro, tohou karot-karot ijo harus tonyuru bain Kristus tutang tohou kohajoi-Oh ijo ahkan nutut ulimba rih. 1:12 Ahkan nabi-nabi rih Pohotala momborihta, ijo inon ijo iro nguai eam ahkan gunan iro, molekan bagi'mu; yotuh hal-hal ijo uhuntuh, tuh ihkam ngonih honong korinah, tahkan dolang pomborihta Kabar Hinut tohou Yesus Kristus. Iro monyiar hal-hal rih bagi'mu umba kowasa Roh Pohotala ijo tongirim-Oh tahkan soruga. Mahihino molehkat-molehkat ka jolik ka'a ngota'an kabar ijo iro nyiaroh rih. 1:13 Bain rih, hondakrih ihkam siap sodia. Bojaga iou tutang boharaprih sotuwioh aang borehkat ijo ahkan tononga ahkan'mu aang ohkot Yesus Kristus lombut noin. 1:14 Te'etiou umba Pohotala, tutang ara bolum numbun konohuang'mu ijo houn, aang ohkot ihkam magun jaha kosono Pohotala. 1:15 Sombalikoh, hondakrih ihkam borasih a'ang kokaro angihco ijo ihkam nguai, sama kolou Pohotala ijo na'ah ihkam rih borasih. 1:16 A'ang Surat Borasih tonyurat, "Hondakrih ihkam borasih tului Ahku borasih." 1:17 Ihkam ngohawot Pohotala rih Amai, aang ohkot ihkam bodo'a nitu Io. Nah, Pohotala orihrih ijo ahkan mosara kolunon tohorong umba gawiu nyinong-behti, eam nohto kolunoi. Tului rih kotahin ihkam magun anai ang kolunon tuh, hondakrih ihkam mopohajo Pohotala a'ang pombolum'mu. 1:18 Ihkam ta'an inon ijo jari tonombayaroh ahkan momorodehka ihkam tahkan pombolum ijo sia-sia, ijo tonowaris bain tahtu ajuh'mu. Bayaranoh, eamrih angihco ijo tou rusak, kolou perak ata'ai bulou, 1:19 molekan angihco, ijo paham borega; iorih behtin Kristus bongoi, ijo monjadi kolou tobiri ijo toporahpah ahkan Pohotala, eam aro cahcat ata'ai celaoh. 1:20 Kristus tonopili bain Pohotala hounumba kolunon tona'oi. Tutang aang ondou-ondou donisapai laiu jaman tuh, Io lombut nokuh kolunon mangat ihkam tonyolamat-Oh. 1:21 Nguha Iorih ihkam porocaya ahkan Pohotala, ijo jari ngombolum Io hoduli tahkan popahtoi, tutang mopohajooh. Jadi, Pohotalarih ijo ihkam porocayaoh tutang ahkan Pohotalarih ka'a ihkam ngina koharapan. 1:22 Tului ihkam te'et umba ajaran tahkan Pohotala, mahka ihkam moporasih arop, tutang ihkam ngasi ulun-ulun porocaya socara ihlas. Kobain rih, kopiosrih ihkam sita ihco umba ijobohkon, umba sotuwi ahtoi. 1:23 Kotului nguha auh Pohotala ijo bolum tutang ijo abadi ihkam ius tonojadioh kolunon bohua, ijo eamoh konanak tahkan kolunon, molekan tahkan Amai ijo abadi. 1:24 A'ang Surat Borasih tonyurat koloutuh, "Paring ukup kolunon, kolou uru, tutang kokaro kohajoioh, kolou dolak uru. Uru molanyu, dolakoh ka boduruh; 1:25 tahpi auh Tuhan tehen ahkan turus-jaham." Auh orih Kabar Hinut ijo ius tonosiar ahkan'mu.
2:1 Kotului orih, dianrih tahkan arop'mu kokaro ang ja'at; ara hino hobalik, tutang ara bopura-pura. Ara bohiri ahtoi, tutang ara mohina ulun bohkon. 2:2 Hondakrih ihkam monjadi kolou ngoa ijo punan konanak toturus haus ahkan susu rohani ijo hinut. Honong kolourih ihkam ahkan bolum tutang tonyolamat. 2:3 Ang luwang Surat Borasih tonyurat koloutuh, "Ihko jari nginyam bongom eaminon kopiosoh Tuhan." 2:4 Kotului orih, lombutrih nokuh Tuhan. Io kolouoh bahtu ijo bolum, bahtu ijo todian bain kolunon, kotului tongohu eam boguna; tahpi ijo tonopili bain Pohotala, kolou bahtu ijo borega. 2:5 Ihkam kolou bahtu-bahtu ijo bolum. Kobain orih hondakrih, ihkam kani tonohapa bagi pangun Lohpou Pohotala ijo rohani. Honong kolourih ihkam monjadi imam-imam, ijo bolum khusus bagi Pohotala, tutang ijo nguha Yesus Kristus, moposorah ahkan Pohotala, porahpah rohani ijo kokilak ang ahtoi Pohotala. 2:6 Tului ang luwang Surat Borasih tonyurat koloutuh, "Ahku ius ngopili ihcokobawak bahtu borega, ijo Ahku nginaoh ang Sion monjadi bahtu mombahtang; tutang ulun ijo Porocaya ahkai-Oh eam ahkan tongocewaoh." 2:7 Bahtu rih paham borega ahkan ihkam ijo porocaya. Tahpi bagi ulun-ulun ijo eam porocaya, nyolung ayat-ayat Surat Borasih pongo tuh. "Bahtu ijo eam hapan bain tuhkang-tuhkang pomangun rih bokorinah monjadi bahtu ijo mombahtang." 2:8 Tutang "Iorih bahtu ijo nguan ulun totuhking, bahtu ijo nguan iro tosahap." Iro totuhking bain iro eam Porocaya ahkan ponuhtui Pohotala. Kolourih ius tonahtap bain Pohotala tohou iro. 2:9 Tahpi ihkam anai uhtus ijo tonopili, imam-imam ijo mohalu lahca, uhtus ijo borasih, khusus ahkan Pohotala, ukup Pohotala bongoi. Pohotala mitih ihkam, tutang na'ah ihkam soluka tahkan luwang kopindong, ahkan nyolong nokuh luwang koloang-Oh ijo gomilang honong konohuang, mangat ihkam monyiar kabar tohou karon-gawiu-Oh ijo luar biasa. 2:10 Lomoi ihkam eam ukup Pohotala, tahpi huntuh ihkam anairih ukup Pohotala. Lomoi ihkam eam tonongasi bain Pohotala, tahpi huntuh ihkam norima kasihsayang-Oh. 2:11 Konduang-konduang ijo kokasih! Ihkam anai rih ulun bohkonuhtus tutang ponomuoi ang kolunon tuh. Kotului rih ahku nyawot hawui paham mangat ihkam ara numbun kojolik bolai kolunon ijo toturus hokolahi molawan homboruan. 2:12 Hadatdasar'mu, ang tohun ulun ijo eam kosono Tuhan harusrih labih pios, nyiring amat iro mopitnah ihkam, kolou ulun ja'at, iro ka'a harus ngahku angkonuan'mu ijo pios, nyiring iro ahkan monara Pohotala ang ondou polombut-Oh. 2:13 Ang aran Tuhan, hondakrih ihkam tunduk umba nyinong pongowasa kolunon; pios ahkan Kaisar ijo monjadi pongowasa ijo mombahtang, 2:14 oluka ahkan gubernur ijo tonunjuk bain Kaisar, ahkan mohukum ulun ijo nguan koja'at tutang ahkan mohoromatrih ulun ijo nguan kohinut. 2:15 Kotului Pohotala kani, mangat honong karon-gawin'kam ijo hinut ihkam mangup baun ulun ijo bopander baleh. 2:16 Hondakrih ihkam bolum kolou ulun marodehka, tahpi ara hapa komorodehkaan'mu rih ahkan hapa monyuhuk koja'at, molekan bolumrih kolou jihpon Pohotala. 2:17 Moregarih paring ulun, ngasirih konduang-konduang'mu sama Kristen. Mihkohrih umba Pohotala, tutang horomatrih umba Kaisar. 2:18 Konduang-konduang ijo monjadi pohalu, tunduk umba tepun'mu honong sohormat-horomatoh; eam tihkas ahkan iro ijo pios ahtoi tutang bojenta, tahpi ka'a umba iro ijo kejam. 2:19 Pohotala ahkan mborehkat ihkam, amat ihkam kotului borondong umba konohuang Pohotala, sabar ngarot konuanoh, baingawi ijo eam adil. 2:20 Kotului inonrih istimewaoh, amat ihkam sabar ngarot hukuman, ijo soharusoh ihkam nanggung, kotului bosala? Tahpi amat ihko honong sabar nanggung karot ijo nopahas'kam tului nguan ijo morong, mahka Pohotala ahkan momborehkat'mu. 2:21 Bagi orihrih Pohotala jari na'ah ihkam. Bain Kristus bongoi jari mongarot ahkan'kam, tutang umba orih Io nonga ahkan'kam ijo sutu, mangat ihkam nutut lohkui-Oh. 2:22 Io eam pu'u nguan dusa, tutang eam pu'u ihcobehti ka'a, ngonih Io ngohawot alik. 2:23 Ang ohkot Io konocahci mahki, Io eam malos umba cahci mahki. Ang ohkot Io ngarot, Io eam mangancam; Io baya monyorah porokara-Oh ahkan Pohotala, Hakim ijo adil rih. 2:24 Kristus bongoi ngohtun dusa-dusan ihto aang arop-Oh ngosan kahju sopolahki, mangat ihto morodehka tahkan kowasan dusa, tutang bolum numbun konohuang Pohotala. Himang-himang Kristusrih ijo ngopios ihkam. 2:25 Lomoi ihkam kolou tobiri ijo lahcat, tahpi huntuh ihkam jari tongomin hoduli ahkan nutut Sokahtik tutang Pongindoi homboruan'mu.
3:1 Kolourih ka'a ihkam, oruh-oruh, pahtut minda auh bosai, mangat amat ang tohun ihkam anai, ijo eam porocaya ahkan borihta tahkan Pohotala, hadat dasar'mu duon nguan iro monjadi porocaya. Tutang eam porulu ihkam nuhtui ino-inon ahkan iro, 3:2 kotului iro nohto hadat dasar'mu ijo hinut tutang saleh. 3:3 Ara kobohinoi'mu tihkas bohinoi'mu ang ruar, kolou tindungoh, ndare balou, ata'ai hapa pokahjan ijo hajo regai. 3:4 Tombalikoh, hondakrih kobohinoi'mu lombut tahkan luwang ahtoi, budi basa ijo bolomu luwah tutang teneng; orih rih kobohinoi abadi ijo paham borega numbun ponopahjah Pohotala. 3:5 Umba cara tuhrih ang jaman houn bawi-bawi boagama ijo porocaya umba Pohotala, mompohinoi aropoh hawui tunduk umba bosai iro. 3:6 Sarah ka, kolourih ka'a, io te'et umba Abraham, tutang ngohawot io tuanoh. Konduang huntuh, anairih anak-anak Sarah, amat ihkam nguan hal-hal ijo hinut, tutang eam mihkoh umba iai ka. 3:7 Tutang ihkam ka'a, bosai-bosai, hondakrih bolum honong tuwi umba pongosono toharep oruh'mu, tutang hawui borondong ijo iro anairih barih ijo bolomu. Horaguohrih iro hawui horomat, tului iro hihco umba ihkam, ahkan norima ponongan pombolum ijo sojahti tahkan Pohotala. Nguan ohrih tuh, mangat eam anai ijo mohalang do'ako. 3:8 Kolopuhtaioh iorih; hondakrih Konduang-konduang soiyoh sotutui tutang hihco-nanyam. Hondakrih ihkam saling ngasi-sayangoh kolou ulun-ulun ijo hokonduang. Tutang hondakrih ihkam saling hobalos-ngasihan rih, tutang sikap randah ahtoi. 3:9 Ara malos koja'at umba koja'at, ata'ai cahci-mahki umba cahci mahki; sobalikoh malos rih umba nyawot borehkat tahkan Pohotala. Bain Pohotala na'ah ihkam, justru mangat ihkam norima borehkat tahkan umba-Oh. 3:10 Ang luwang Surat Borasih tonyurat koloutuh, "Ulun ijo kani monginyam pombolum tutang kani monyuru ondou-ondou ijo pios, harus mohaga nyamaioh mangat eam momanderoh hal-hal ijo ja'at tutang eam ngohawotoh hal-hal ijo alik. 3:11 Io harus ngomahcuoh ijo ja'at tutang nguanohrih ijo pios; hondakrih io kolahi tu'u-tu'u ahkan mondahpot kobuah. 3:12 Kotului Tuhan toturus nohtoani ulun-ulun ijo numbun konohuang-Oh, tutang Tuhan toturus ngonih do'a-do'a iro; tahpi Tuhan molawan ulun-ulun ijo nguan koja'at." 3:13 Iairih ijo kani nguan koja'at ahkan'mu, amat ihkam sanang nguan kopios? 3:14 Tahpi sinoka ihkam harus ngarot kotului nguan hal-hal ijo hinut, ihkam botuah! Ara mihkoh umba iai ka, tutang ara kowatir. 3:15 Tahpi ang luwang ahtoi'mu, hondakrih ihkam nunga ahkan Kristus kohoromatan ijo khusus, ijo tohorong umba ponuot-Oh, kolou Tuhan. Tutang hondakrih ihkam toturus bosodia, ahkan nonga auhputah ahkan nyinong ulun, ijo ngisok tohou koporocaya ijo ihkam nginaoh. 3:16 Tahpi nguanohrih honong bolomu luwah tutang horomat. Tutang hondakrih ahtoi bua'mu borasih, mangat amat ihkam tonopitnah, kotului ihkam bolum hawui hinut kolou murid Kristus, mahka ulun ijo mopitnah rih ahkan monjadi mia bongoi. 3:17 Labih pios ngarot kotului nguan hinut -- amat orih anairih kohondak Pohotala -- tahkanumba karot kotului nguan ijo ja'at. 3:18 Kotului Kristus bongoi mahtoi tihkas sino iou, ahkan turus-jahamoh kotului dusan kolunon -- ihcobehti ijo eam bosala, mahtoi ahkan ulun ijo bosala. Kristus nguan ohrih rih, mangat Io dahpot nihting ihkam nokuh Pohotala. Io tomunu socara behtiuoh, tahpi tonombolum hoduli socara rohani. 3:19 Aang koada'an rohani Io tulak monyiar borihta tahkan Pohotala ahkan roh-roh ijo tonosipir: 3:20 yorih roh, ulun-ulun ijo eam te'et umba Pohotala ang jaman Noah. Ang ohkot orih, Pohotala ngindoi honong sabar, kotahin Noah nguan bonamaoh. Tihkas ulun-ulun ijo ang bonama iou -- paringoh jalu behti -- ijo tonyolamat nguha danumsuhu hajo rih. 3:21 Nah, kojodian rih kolou tindung, tahkan pompondus ijo huntuh monyolamat ihkam. Pompondus tuh, eamrih ihco upacara momuhi behti tahkan paring ijo kojilo-jilok, molekan kolou bowot'mu umba Pohotala tahkan ahtoi bua ijo pios. Pompondus rih monyolamat ihkam kotului Yesus Kristus, jari bolum hoduli tahkan popahtoi, 3:22 tutang jari nuhkat nokuh soruga. Huntuh Io bokowasa hihco umba Pohotala, tutang moretah paring molehkat, paring pongowasa honong paring koba'as.
4:1 Tului Kristus jari ngarot socara behtiu, ihkam ka'a harus ngoba'as arop, umba tiruk ijo kolourih. Kotului ulun ijo ngarot socara behtiu, eam hino nguan dusa. 4:2 Kobain orih, hondakrih ihkam bolum toturusoh ang kolunon tuh, numbun konohuang Pohotala, tutang eam numbun kojolik kolunon. 4:3 Aang wayah ijo nokalou, ihkam jari sukup tahi nguan inon ijo jolik tonguan bain ulun-ulun ijo eam kosono Tuhan. Ihkam bolum eam hinut. Ihkam numbun kojolik bolaiusi, bobusou-busou, koramin-pesta, ngorih-ngorih tutang nyembah dewa socara pongojilokoh. 4:4 Huntuh ulun ijo eam kosono Tuhan, helan, ijo ihkam eam umba bolum kolou iro, nginyam dusa eam aro tihkas. Orihrih kotuluioh iro mohina ihkam. 4:5 Tahpi iro noin, harus nonga tanggung-jawab ahkan Pohotala, ijo jari sodia ahkan mosara ulun, ijo bolum tutang ijo mahtoi. 4:6 Orihrih baiuoh Kabar Hinut jari tomborihta ka'a ahkan ulun-ulun mahtoi. Konohuangoh mangat iro, ijo jari tomosara a'ang koada'an behtiuoh -- kolou haloh paring ulun ahkan tomosara -- duon bolum socara rohani, numbun kohondak Pohotala. 4:7 Kokaro aang'co jari doni koopahoh, tului rih hondakrih ihkam ngowasa arop tutang bosodia, mangat ihkam dahpot bodo'a. 4:8 Labih tahkanumba kokaro-karooh, hondakrih ihkam tu'u-tu'u mongasi ihco umba ijobohkon, kotului hawui saling masi ihkam ahkan bosodia ka'a ahkan saling mongapun. 4:9 Hondakrih, ihkam norima ihco umba ijobohkon, ang lohpou nyinong-nyinong eam bokuhtuk. 4:10 Ihkam nyino-nyinong jari norima pononga-pononga ijo hokobohkon tahkan Pohotala. Kotului orih kolou ponggawi ijo pios tahkan ponongan-ponongan Pohotala, hondakrih ihkam monggunaoh pongonduon rih ahkan kogunan sama-sama. 4:11 Ulun ijo monyiar borihta, harusrih monyiar borihta tahkan Pohotala, ulun ijo mohalu ulun bohkon, harusrih mohalu umba koba'as ijo tahkan Pohotala, mangat a'ang kokaro hal, Pohotala dahpot ponohajo nguha Yesus Kristus. Iorih ijo bokowasa tutang harus ponohajo ahkan turus-jahamoh. Amen. 4:12 Konduang-konduang ijo ponokasih! Ihkam uhuntuh paham ngarot kotului rahat tonguji. Tahpi ararih komo helan, koloujahka anai aangihco ijo luar biasa nyolung ahkan'mu. 4:13 Malah, hondakrih ihkam nanjam sanang, kotului umba ngarot hihco umba Kristus. Mahka noin amat kohajon Kristus tongorinah, ihkam ahkan tongojorih. 4:14 Ihkam botuah amat ihkam tonohina, kotului ihkam murid Kristus. Orih rimai Roh ijo tohoromat yorih Roh Pohotala anai aang ihko. 4:15 Ara ihcobehti ka tahkan tohun ihkam ngarot tului io pomunu, ata'ai ponahkou, ata'ai ponyilau, ata'ai tului io sampur urusan ulun bohkon. 4:16 Tahpi amat ihkam ngarot bain ihkam ulun Kristen, ara mia tului hal rih. Botorimakasihrih umba Pohotala, ijo ihkam ngomin aran Kristus. 4:17 Jari johcok ohkotoh Pohotala mosara kolunon. Tutang ukup Pohotala bongoi, ijo ahkan tomosara labih houn. Nah, amat Pohotala ahkan nopara umba ihto, koloukuwohrih kojadioh noin, umba ulun-ulun ijo eam porocaya, umba Kabar Hinut tahkan Pohotala rih? 4:18 Luwang Surat Borasih tonyurat koloutuh, "Amat ulun-ulun ijo pios ka'a jari bohali ahkan tonyolamat, inon hino ijo ahkan nyolung umba ulun-ulun bodusa ijo eam ngosono Tuhan!" 4:19 Bain orih, amat anai ulun-ulun ijo ngarot tului Pohotala ngohondak kolourih, hondakrih ulun-ulun rih bolum hawui morong tutang moporocaya arop umba Pona'oi iro. Io ahkan turus molalus bowot-Oh.
5:1 Ahku nyawot monohtoani, dolang okon ukup'mu. Ahku nyurat tuh kolou jolahan okon, tutang kolou ulun ijo jari monyaksioh bongoi kongarot Kristus, tutang ijo ahkan umba ka'a konohajooh, amat noin kohajon Kristus tongorinah ahkan ulun. Ahku nyawot hawui paham, 5:2 mangat ihkam nyokahtik kawan tobiri ijo tonosorah Pohotala ahkan'kam. Nyokahtikohrih iro hawui jorih ahtoi koloukuwoh ijo tonojolik bain Pohotala, tutang ara umba bahat ahtoi. Ararih hino nguanrih gawin'mu ahkan dahpot utung, molekan kotului ihkam tu'u-tu'u jolik mohalu. 5:3 Ararih nguaioh kolou pongowasa toharep iro, ijo tomorocaya ahkan'mu, molekan monjadi sutu ahkan iro. 5:4 Tutang ang ohkot Sokahtik Hajo rih lombut noin, ihkam ahkan norima mahkota ijo gomilang, ijo eam ahkan kawus kogomilangoh. 5:5 Kodorih ka'a Konduang, ulun-ulun biou. Tunduk ahkan ulun-ulun ijo oko. Konduang paringoh harus ngominda arop, tutang saling mohalu honong randah ahtoi. Kotului luwang Surat Borasih tonyurat koloutuh, "Pohotala noharep ulun ijo bojuhu, tahpi kasih umba ulun ijo randah ahtoi." 5:6 Tului rih, ngominda arop'mu, ang pinda longon Pohotala ijo ba'as, mangat Io ngahtang ihkam amat jari johcok ohkotoh. 5:7 Sorahohrih karon kowatir'kam ahkan Pohotala, kobain Io ahkan mopoduli'ko. 5:8 Hondakrih, ihkam waspada tutang tohtap bojaga! Bain Sehtan anairih musuh'kam. Io kolou singa, nyalan koanan koohtoi sambil ngaum ngurah ang tonosahapoh. 5:9 Lawan io umba koporocaya ijo segah, tului ihkam kota'an ijo konduang-konduang sosama Kristen bohkonoh, ang sohopus kolunon ka'a ngarot kolou ihkam. 5:10 Tahpi uli ihkam ngarot pondehan, Pohotala bongoi ahkan nguan ihkam nyolung soporuna. Io ahkan monombok tutang ngomba'asoh ihkam hawui podehen ihkam. Bain Io anairih Pohotala ijo paham pios ahtoi, ijo ius na'ah ihkam umba mokomo kohajoi-Oh ijo abadi nguha Kristus. 5:11 Iorih ijo bokowasa nyiring turus-jahamoh! Amen. 5:12 Surat'ku ijo iwak tuh, ahku nyurat ahkan'kam umba pondohop Silas, ijo ahku ngohu io ihcobehti konduang Kristen ijo te'et. Ahku jolik nonga juhungan ahkan'kam tutang moyahkin ihkam, bain inon ijo ahku nyurat tuh, borihta ijo tu'u, tohou pononganasi Pohotala. Hondakrih ihkam nambit segah ang ponongaasi rih. 5:13 Sobat-sobat ihcoukup ang Babilon, ijo ka'a konopili bain Pohotala, ngirim tabe ahkan'kam; kolourih ka'a anak'ku Markus ijo tonyita. 5:14 Botabe-tabe rih ihco umba ijobohkon, umba kotuwi asi kolou konduang Kristen. Keleh Tuhan nonga kosanang ahkan Konduang paringoh ijo monjadi ain Kristus. Horomat ihkai, Petrus
1:1 Konduang-konduang ijo tu'u-tu'u porocaya kolou ihkai! Yesus Kristus iorih Pohotala, tutang Lahca Ponyolamat ihto, nguandahpot ihto porocaya umba Io, tului Io monguan ijo morong. Surat tuh tahkan Simon Petrus, ijo behti jihpon tutang rasul Yesus Kristus. 1:2 Keleh Pohotala nonga borehkat tutang kosanang ahkan'mu hawui momurai, bain ihkam ngosono Pohotala tutang Yesus, Tuhan ihto. 1:3 Pohotala jari hapan kowasa ko-Pohotalai-Oh, ahkan nunga ahkan ihto karo aang'co ijo porulu ahkan pombolum bosombayang. Io nguan tuh, nguha inon ijo ihto kota'aioh tohou Yesus Kristus, ijo ius na'ah ihto ahkan nginyam kohajoi tutang kopios-Oh. 1:4 Umba cara orihrih Pohotala monyarah ahkan ihto, borehkat-borehkat ijo paham luar biasa, tutang borega ijo jari tonobowot-Oh. Umba borehkat-borehkat rih ihkam duon tokuwat tahkan kojolik-kojolik ja'at, ijo morusak ang kolunon tuh, tutang ihkam norima sipat Pohotalai. 1:5 Bain kotului orih bousaha tu'u-tu'u, mangat ihkam tehtep porocaya umba Kristus tutang koporocaya'mu rih, tonyukah bain pombolum ijo pios. Ang bambai pombolum ijo pios, ihkam porulu monjadi ulun ijo anai pongotaan, 1:6 tutang ang bambai pongotaan, ihkam harus ka'a dahpot mongowasa arop. Tutang bohkonumba dahpot mongowasa arop, hondakrih ihkam ka'a momupuk arop, ahkan tabah noharep kokaron aang'co. Ang bambai tabah noharep kokaron aang'co, ihkam harus ka'a bolum numbun konohuang Pohotala. 1:7 Tutang bolum numbun konohuang Pohotala harus ka'a tonyukup umba kasihsayang'kam umba konduang-konduang ihcokoporocaya. Koturus-Oh hondakrih kasihsayang ahkan konduang-konduang ihcokoporocaya, ndahang umba ngasi toharep paring ulun. 1:8 Paringoh rih anairih sipat-sipat ijo ihkam poroluoh. Amat sipat-sipat orih anai a'ang ihkam hawui momurai, ihkam ahkan monjadi giat tutang bohasir, tutang kosono Yesus Kristus Tuhan ihto honong labih pios hino. 1:9 Tahpi ulun ijo eam anaingina sipat-sipat rih, topahjahoh pihcik; io eam tou nohto, tutang io nolingou ijo dusa-dusaoh ijo tokalou jari tonomuhi-Oh. 1:10 Kotului orih, Konduang-konduang, bousaha iou labih ba'as mangat ta'ah Pohotala tutang pitih-Oh ngosan arop'mu rih monjadi mahi segah. Amat ihkam nguan rih, ihkam eam ahkan murtad. 1:11 Umba kolourih ihkam ahkan tononga hak tuwi ahkan nyolong Kolahca'an ijo kototahiu tahkan Tuhan tutang Lahca Ponyolamat ihto Yesus Kristus. 1:12 Tului orih, ahku toturus nonga mopingat'kan ihkam tohou hal kolourih, oluka ihkam ius ngota'aioh tutang porocaya samasino ahkan ajaran tahkan Pohotala ijo jari ihkam torima rih. 1:13 Kotahin ahku magun bolum, ahku komo pahtut mopingat'kan ihkam, ahkan hal-hal orih. 1:14 Bain ahku ta'an ijo eam tahi hino ahku ahkan nohtah kolunon tuh, kotului Tuhan ihto Yesus Kristus jari nyorihtaoh hawui jelas umba ahku. 1:15 Mahka ahku ahkan bousaha, mangat uli ahku palus ka, ihkam toturus mingat hoduli hal-hal tuh. 1:16 Ang ohkot ihkai momborihta ahkan'kam, eaminon kohajoioh polombut Tuhan ihto Yesus Kristus, ihkai eam bohahpang aang dongeng-dongeng kabar-alik bain kolunon. Kohajon Yesus Kristus rih jari ihkai nohtooh umba mahta kuhung bongon. 1:17 Ihkai anai ang anan, kotihka Io tohoromat, tutang tonohajo bain Pohotala, Amai. Ang ohkot rih konahan auh tahkan Ijo Mahahoromat ijo homouh umba Io, "Tuhrih Anak-Ku ijo Ahku ngasih-Oh. Io ngonjorih ahtoi-Ku!" 1:18 Ihkai bongon ngonih auh orih ijo lombut tahkan soruga, kotihka ihkai anai homboh Io, ang isun puruk ijo borasih rih. 1:19 Orih kotuluioh ihkai labih yahkin hino umba pohtoh Pohotala ijo tonujum bain nabi-nabi. Kopiosoh ihkam nohtoani pohtoh rih, kotului pohtoh rih kolou sumbu ijo nyingah ang unuk ijo pindong, nyiring kaloang ngorolondang tutang kotarang potion tahkan timur nyingah ang luwang ahtoi'mu. 1:20 Mambahtang samasino, hondakrih ihkam ingat tuh; pohtoh Pohotala ijo tonyapai bain kokaron nabi eam tou tonafsir numbun tiruk bongon. 1:21 Tului eam pu'u, pohtoh tahkan Pohotala tomborihta tihkas numbun konohuang ulun. Tahpi Roh Pohotala mongowasa ulun rih, ahkan monyiar pohtoh tahkan Pohotala bongoi.
2:1 Ang ohkot ijo tokalou, ang louk ukup Pohotala, jari lombut nabi-nabi polasu. Kolourih ka'a ang marak ihkam, ahkan lombut guru-guru polasu. Iro ahkan moposolong ajaran-ajaran ijo eam tu'u, ijo morusak ulun. Tutang iro ahkan ngorana Pongowasa ijo jari moliwus iro. Honong kolourih, iro mopolombut korusak ngosan aropoh bongoi, ijo ahkan nopahas iro hawui jion. 2:2 Oluka kolourih, aro ulun ahkan nutut cara pombolum guru-guru polasu rih, ijo tongowasa bain kojolik bolai iro. Tutang gawin guru-guru rih ahkan nguan aro ulun motanah Jalan Komorong ijo nitu ahkan Pohotala. 2:3 Tului iro bokuhu, mahka guru-guru polasu rih ahkan monyorihta ahkan'kam sorihta-sorihta ijo tonongarang bongoi ahkan ngomin utung tahkan ihkam. Tahpi bosara ahkan monopahas hukuman ahkan ngosan iro jari tahi tonyodia, tutang korusak jari tonahtap ahkan iro, rahat ngindoi iro. 2:4 Molehkat-molehkat ijo bodusa ka'a eam Pohotala mohanau liwus tahkan hukum, molekan tongondian ahkan luwang norahka. Iro ponosolong ahkan luwang guha ijo pindong, ahkan tonahan ang anan nyiring Ondou Ponosara. 2:5 Kolourih hino umba kolunon jaman ijo lomoi. Pohotala eam mohonau liwus tahkan hukum. Pohotala ngirim danumsuhu hajo nokuh kolunon, ulun-ulun ijo ja'at ang ohkot rih. Tihkas Noah homboh umba pihtu behti bohkonoh iou, ijo tonyolamatoh, Tului Noah monyiar kabar tohou pombolum ijo ngojorih ahtoi Pohotala. 2:6 Sama ka'a haloh umba lowu Sodom tutang Gomora; Pohotala polumusoh lowu-lowu rih umba baho, mangat monjadi sutu, tohou inon ijo ahkan nyolung, ahkan ulun-ulun ijo ja'at. 2:7 Tahpi Lut tonyolamat, tului io numbun konohuang Pohotala; io paham ngarot, kotului hadat ijo eam sononoh tahkan ulun-ulun bejad. 2:8 Ang tahun-tohun ulun-ulun somahcam orih, Lut ijo pios rih bolum umba homboruan tonosiksa, tului nyinong ondou io nohto tutang ngonih gawin-gawin iro ijo ja'at. 2:9 Jadi, Tuhan ta'an, koloukuwoh nyolamat'kan ulun-ulun ijo numbun konohuang-Oh, amat iro noharep tihkos-tihkos. Tutang Tuhan ngota'an, koloukuwoh ngina ulun-ulun ijo ja'at ahkan tonosiksa ang Ondou Ponosara, 2:10 khususoh ulun-ulun ijo numbun kojolik-kojolik bolai iro ijo kojilok tutang ijo mohina kowasan Pohotala. Kolourih kohanyi tutang kojuhuoh guru-guru polasu rih nyiring iro eam teka-tekan mohina dolang aangbolum ijo tonohoromat ang soruga ka! 2:11 Rahatrih molehkat-molehkat ijo mahcu koba'asoh tutang kowasaoh tahkan guru-guru polasu rih eam ndawa dolang aangbolum ijo tonohoromat rih, umba auh-auh pohina ang toharep Tuhan. 2:12 Tahpi guru-guru rih eam inon! Iro kolou ohcintana ijo konanak ahkan tonawan tutang tomunu iou. Iro eam bopikir, tahpi baya nguai numbun pokomo iou, nyiring iro nyarang hal-hal ijo eam ngosonooh umba auh-auh pohina. Kotului orih, bain karon-gawin iro bongoi, iro ahkan rusak kolou ohcintana-ohcintana bosiak. 2:13 Kolou palos ngosan karot ijo jari iro kotuluioh, iro ahkan ngarot koporos. Bagi iro, hal ijo nyanang ahtoi iorih nguan inon iou, ang tohun ondou, ahkan meda konohuang behtin iro. Amat iro tuot hombo-homboh ihkam a'ang pesta kuman, cara iro kojilok, kotului iro bobusou bain kojorik bolai. 2:14 Iro eam peda-peda nguan dusa, tutang kojolik iro iorih nopahjah bawin sundal. Tutang ulun ijo punai porocaya, tutang magun kurang yakin, iro jorat. Ahtoi iro jari pahtuh umba kokuhu. Iro anairih ulun-ulun ijo tonulut! 2:15 Tului iro eam kani nitoi jalan ijo morong, mahka iro sosat. Iro ngomin jalan ijo tonitoi bain Bileam anak Beor lomoi. Bileam orih jolik samasino dahpot duit, tahkan gawiou ijo ja'at. 2:16 Tahpi io dahpot tingak ijo paham toharep koja'atoh rih, kotihka keledaioh pander hapa auh ulun. Mahka nabi rih tohojojuan ahkan nondo gawiouoh ijo gila rih. 2:17 Guru-guru polasu rih, anai kolou mahtan danum ijo tohjah, tutang kolou ombun ijo tonahpi bain bahiu blowut. Pohotala jari monyodia bagin iro, ihco unuk ijo paham pindong. 2:18 Iro nguan korinah-korinah ijo tama-tamam tutang buang; bolaiusi ijo nyundal orih hapan bain iro, mangat nombohos ulun-ulun ijo punai iou nopara toliwus tahkan barih ulun ijo bolum lahcat. 2:19 Guru-guru polasu rih, mbowot komorodehka ahkan ulun-ulun rih, rahatoh iro bongoi nohojihpon bain kopahtuh-kopahtuh ijo morusak ulun. Tului amat ulun tonokalah bain angihco, mahka io jihpon tahkan ijo mopokalahoh rih. 2:20 Ulun ijo ngosono Tuhan tutang Ponyolamat ihto Yesus Kristus, jari morodehka tahkan kowasan-kowasan kolunon ijo nyowui ulun. Tahpi amat pongohino io tojorat huli, nyiring tonokalah bain kowasa-kowasa rih, mahka akibat ulun rih ang laiuoh, labih ja'at tahkan io hounumbaoh. 2:21 Labih pios ulun-ulun somahcam rih eam pu'u ngosono jalan komorong tahkan Pohotala, tahkanumba iro ngosonooh, tahpi pongohuli eam kani nutut poretah-poretah ijo tononga Pohotala ahkan iro. 2:22 Inon ijo iro nguaioh, mombukti komorong paribasa tuh, "Asu ahkan kuman hoduli inon ijo jari tonguhtaoh," tutang "Urak ijo jari tonopondusoh, ahkan huli ngolobangan ang luwang luhtak."
3:1 Konduang-konduang ijo ahku sitaoh! Tuhrih surat'ku ijo koduo ahkan'kam. Ang luwang koduo surat tuh ahku bousaha ngomonyun tiruk-tiruk ijo borasih aang ihkam. 3:2 Ahku nyuhumopingat mangat ihkam bingat, ahkan auh-auh ijo lomoi tonohawot bain nabi-nabi Pohotala, tutang poretah-poretah tahkan Tuhan, Lahca Ponyolamat, ijo tonyorihtaoh ahkan'kam nguha rasul-rasul. 3:3 Sula-sulakoh ihkam harus ngota'an, ijo aang ondou-ondou laiu, ahkan lombut ulun-ulun ijo pombolumoh konowasa bain kojolik bolai iro bongoi. Iro ahkan hololea ihkam 3:4 honong nuhtui koloutuh, "Hioioh, Tuhan nobowot ahkan lombut! Uhuntuh umoh Io? Amai-amai tahtu ajuh lomoi jari palus, tahpi kokaron-karonoh magun sama iou kolou tahkanuhun tona'oioh pindalangit!" 3:5 Iro ha'atoh eam kani ngahku ijo sounlomoi Pohotala, naoi langit tutang tana ngosan auhoh. Tana ngojadian-Oh tahkan danum, tutang umba danum, 3:6 tutang umba danum ka'a -- yorih danum tahkan ba'ah hajo -- kolunon sounlomoi rih tonorusak. 3:7 Tahpi langit tutang tana ijo anai uhuntuh, tonohaga bain auh Pohotala, rih ka'a ahkan tongondian umba baho noin. Uhuntuh langit tutang tana magun tonohaga johcok aang ondou ulun-ulun ijo ja'at tonohukum tutang tongondian. 3:8 Tahpi konduang-konduang'ku, ihco hal tuh ararih ihkam nolingouoh ijo aang topahjah Tuhan, ihco ondou eam aro kobohkoi umba sokuhjan toun -- koduo-duooh sama iou bagi-Oh. 3:9 Tuhan eam borahkah nonga inon ijo jari tonobowot-Oh, oluka anai ihco ngohu kolourih. Sobalikoh Io sabar toharep'kam, kotului Io eam kani ihcobehti ka rusak. Io jolik mangat paring ulun hubah tahkan dusai-dusaioh. 3:10 Tahpi Ondou polombut Tuhan ahkan johcok kolou ponahkou. Ang Ondou rih, langit ahkan dilap honong auh ngorutung, tutang ramun-ramun ang langit ahkan lingis bosaha, tutang tana hawui paring ijo anai ang luwangoh ahkan dilap. 3:11 Kotului paringoh rih ahkan tonolonyuh umba cara ijo kolou rih, koloukuwohrih koharusoh ihkam bolum? Ihkam pahtut bolum borasih, tutang khusus ahkan Pohotala, 3:12 kotahin ihkam ngindoioh tutang morinduoh polombutoh Ondou Pohotala. Aang Ondou rih langit ahkan opah bosaha, tutang tului kopodioh, mahka ramu-ramu ijo ang langit ahkan lonyuh. 3:13 Tahpi ihto ngindoi inon ijo jari tonobowot Pohotala, yorih langit ijo bohua, tutang tana ijo bohua, ang amoh sombang koadilanoh. 3:14 Kotului orih, Konduang-konduang ijo tonosita, pondehan ihkam ngindoi Ondou rih, bousaha tu'u-tu'u ahkan bolum borasih tutang earo kosalai ang toharep Pohotala. Tutang mohaga kohihco ijo hinut umba Pohotala. 3:15 Ngohurih kosabar Tuhan ihto kolou kosapet ijo tononga-Oh ahkan'kam, mangat dahpot solamat. Paulus, konduang ihto ijo tonokasih, jari nyurat ijo kolourih ka'a ahkan'kam. Io nyurat rih umba kopihtaran ijo tononga Pohotala ahkaioh. 3:16 A'ang paring suratoh, Paulus turus nyurat tohou hal orih. Puna anai pira-pira hal rih ijo bohali tongumang luwang surat-suratoh rih. Tutang bagian orih tomutar-balik bain ulun-ulun ijo eam ngota'an ino-inon, tutang ijo eam segah koporocayaoh. Hal orih earo mohelan, kotului tahkan bagian-bagian bohkon, tahkan Surat Borasih tononguan kolourih ka'a bain iro. Inon ijo iro nguai orih tihkas ngojorian kolonyuh iro bongoi. 3:17 Tahpi ihkam, Konduang-konduang ijo tononyita, ius ngota'an tohou hal rih. Kotului rih, bojaga-jaga iou, ara nyiring ihkam toomin-omin nokuh luwang kolahcat, ulun-ulun bejad nyiring ihkam ngonyahtu tahkan unuk'mu botihcak ijo segah. 3:18 Hondakrih ihkam mahi-mahi anai nginyam pononganasin Yesus Kristus, Tuhan tutang Lahca Ponyolamat ihto, tutang hondakrih ihkam ka'a mahi-mahi kosono Io. Tararih Io, tahkan huntuh tutang nyiring turus-jahamoh! Amen. Horomat ihkai, Petrus
1:1 Usin surat tuh tohou Auh ijo mononga pombolum, yorih Auh ijo jari anai tahkan pahtuk nopara. Ihkai jari ngonihoh, tutang ihkai jari nohtooh, umba mahtan ihkai bongon. Ihkai jari nopahjahoh, tutang jari nambitoh umba longon ihkai. 1:2 Kotihka pombolum rih tongorinahoh, ihkai nohtooh. Orihrih kobaiuoh ihkai nonga kosaksian tohou Io. Ihkai mborihta ahkan ihkam tohou pombolum ijo sojati tutang kototahiu, ijo anai hihco Amai tutang ijo jari ngorinah ahkan ihkai. 1:3 Inon ijo jari ihkai nohtooh, orih ka'a ijo ihkai monyiaroh ahkan ihkam, mangat ihkam homboh ihkai umba ngenang pombolum hihco umba Amai, tutang umba Anak-Oh Yesus Kristus. 1:4 Ihkai nyurat tuh, mangat ahtoi ihto tu'u-tu'u jorih. 1:5 Tuhrih borihta ijo jari ihkai ngonih tahkan Anak-Oh, tutang ijo ihkai monyiaroh ahkan ihkam; Pohotala rih koloang, tutang aang Io eam anai kopindong samasino. 1:6 Amat ihto nuhtui ijo ihto bolum hihco umba Io, padahal ihto bolum ang kopindong, mahka ihto bobalik, pios umba auh-auh kanika umba gawi. 1:7 Tahpi amat ihto bolum ang luwang koloang, koloukuwoh Pohotala anai ang luwang koloang, mahka ihto bolum heret, rukun ihco sama ijobohkon, tutang dahan Yesus, Anak-Oh muhi ihto tahkan kokaro dusa. 1:8 Amat ihto nuhtui ijo ihto eam bodusa, ihto nihpu arop ihto bongon; tutang Pohotala eam mohcon ang luwang ahtoi ihto. 1:9 Tahpi amat ihto ngahku dusa-dusan ihto ahkan Pohotala, Io ahkan molalus bowot-Oh, tutang nguan inon ijo adil. Io ahkan ngapun dusa-dusan ihto tutang ngomuhi ihto tahkan karo gawin ihto ijo sala. 1:10 Tahpi amat ihto nuhtui ijo ihto eam bodusa, ihto ngohu soahkan-ahkan Pohotala bobalik tutang ihto eam anai auh Pohotala ang ahtoi ihto.
2:1 Anak-anak'ku! Ahku nyurat tuh ahkan ihkam, mangat ihkam ara nguan dusa. Tahpi amat anai ijo nguan dusa, mahka ihto anai ihcobehti pondohop, yorih Yesus Kristus ijo adil rih; Io ahkan nyawot bagi ihto ang toharep Amai. 2:2 Honong poholat Yesus Kristus orih rih, dusa-dusan ihto tonapunoh. Tutang eamoh dusa-dusan ihto iou, molekan dusan paring ukup kolunon ka'a. 2:3 Amat ihto te'et umba poretah-poretah Pohotala, orih tandaoh ijo ihto ngosono Pohotala. 2:4 Ulun ijo homouh, "Ahku kosono Pohotala," tahpi eam te'et umba poretah-poretah-Oh ulun rih bobalik, tutang Pohotala eam anai ang luwang ahtoioh. 2:5 Tahpi ulun ijo te'et umba auh Pohotala, ulun orih sita Pohotala honong soporuna. Orih rih tandaoh ijo ihto bolum hihco umba Pohotala. 2:6 Ia-iai nuhtui ijo Io bolum hihco umba Pohotala, Io harus bolum nutut lohkun Kristus. 2:7 Konduang-Konduang ijo ahku nyitaoh! Ijo ahku nyurat tuh eamrih ihco poretah ijo bohua. Tuhrih poretah tahi ijo jari tonyiar ahkan'kam tahkan ihkam pahtuk porocaya ahkan Kristus, yorih borihta tahkan Pohotala, ijo jari ihkam ngonih sounumbaoh. 2:8 Oluka kolourih, poretah ijo ahku nyuratoh tuh punai ka'a; tului kotu'uioh dahpot tonohto aang arop Kristus, tutang aang arop ihkam. Tului kopindong mahi-mahi dilap, tutang koloang ijo tu'u jari nopara monyingah. 2:9 Ulun ijo nuhtui ijo io anai ang luwang koloang, tahpi ulun rih magun bosingi konduangoh, ulun rih magun mohcon ang kopindong nyiring huntuh. 2:10 Ulun ijo ngasih Konduangoh, bolum luwang koloang, nyiring eam anai angihco ka aangoh, ijo ahkan kotuluioh ulun bohkon ngonyahtu luwang dusa. 2:11 Tahpi ulun ijo bosingi konduangoh mohcon luwang kopindong. Io nyalan luwang kopindong tutang eam ta'an nokuh umoh io tulak, kotului kopindong rih nguan io eam dahpot nohto. 2:12 Ahku nyurat ahkan'kam, Anak-inyam, bain dusan'kam jari tonapunoh, tului Kristus. 2:13 Ahku nyurat ahkan'kam, Amai-amai, tului ihkam kosono Io ijo jari anai tahkan pahtuk nopara. Ahku nyurat ahkan'kam, Ulun-ulun biou, bain ihkam jari ngalahrih ijo Ja'at. 2:14 Ahku nyurat ahkan'kam, anak-inyam, tului ihkam ngosono Pohotala, Amai. Ahku nyurat ahkan'kam, Amai-amai, tului ihkam ngosono Auh ijo jari anai tahkan pahtuk nopara. Ahku nyurat ahkan'kam ulun-ulun biou, bain ihkam ba'as. Auh Pohotala anai ang luwang ahtoi'kam, tutang ihkam jari mongalah ijo Ja'at. 2:15 Ara ngasih kolunon tuh, ata'ai inon ka'a ijo anai ang luwang kolunon tuh. Amat ihkam ngasih kolunon, ihkam eam ngasih Amai. 2:16 Kokaron angihco anai ang luwang kolunon tuh -- ijo tongojolik bain tobiat ulun ijo bodusa, ijo tonohto turus tongojolik tutang ijo tonama-namamoh -- paringoh anairih hal-hal ijo eam asar tahkan Amai molekan tahkan kolunon. 2:17 Kolunon tutang kokaro aang'co ang luwangoh ijo tongojolik bain ulun, rahat dilap. Tahpi ulun ijo numbun konohuang Pohotala, tehtep bolum nyiring turus-jahamoh. 2:18 Anak-anak'ku, lain jaman jari doni! Jari tonyorihta ahkan ihkam hounoh ijo Musuh Kristus ahkan lombut; tutang uhuntuh jari lombut, aro ulun ijo momusuh Kristus. Orih tandaoh ijo lain jaman jari doni. 2:19 Musuh-musuh Kristus rih, anairih ulun-ulun ijo jari nohtah ihto, tului iro kotu'uioh puna eam ulun-ulun ihto. Amat iro ulun-ulun ihto, tontu iro tahtap hihco umba ihto. Tahpi iro nohtah ihto, mangat korinahrih ijo eam ihcobehti ka tahkan iro, ijo tu'u-tu'u barihihto. 2:20 Tahpi ihkam jari monorima Roh Pohotala, ijo tonusuh bain Yesus Kristus, tutang orih kotuluioh ihkam paringoh kosono ajar ijo morong rih. 2:21 Jadi, ahku nyurat tuh ahkan'kam, eamoh tului ihkam eam kosono ajaran ijo morong, tahpi malah bain ihkam jari ngosonooh, tutang ihkam ka'a kota'an ijo eam anai alik a'ang ajaran ijo morong rih. 2:22 Ijo bobalik anairih ulun ijo nuhtui, ijo Yesus bohkonoh Lahca Ponyolamat ijo tonobowot bain Pohotala. Ulun rih Polawan Kristus; io eam mongahkuoh Amai mahika Anak. 2:23 Ulun ijo eam ngahku Anak, rimai eam monorima Pohotala rih Amai ka'a. Tutang ulun ijo mongahku Anak, rimai norima Amai ka'a. 2:24 Bain orih, borihta ijo jari ihkam ngonihoh, toparan ihkam pahtu-pahtukoh porocaya, harus ihkam mohagaoh pio-pios ang luwang ahtoi'kam. Amat borihta tuh ihkam mohaga pio-pios, ihkam ahkan toturus bolum hihco umba Anak tutang umba Amai. 2:25 Tutang Jituh ijo tonobowot Kristus bongoi ahkan ihto; bolum sojahti tutang kototahiu. 2:26 Ahku nyurat tuh ahkan'kam, tohou ulun-ulun ijo rahat bousaha monihpu ihkam. 2:27 Tahpi tohou ihkam bongon, Kristus jari nusuh Roh-Oh aang'kam. Tutang kotahin Roh-Oh anai aang ihkam, eam usah ulun bohkon hino majar ihkam. Bain Roh-Oh majar ihkam tohou kokaro aangihco; tutang inon ijo tongajar-Oh rih morong, eam alik, Bain orih hondakrih ihkam te'et, ahkan inon ijo tongajar bain Roh rih, tutang hondakrih ihkam tahtap bolum hihco umba Kristus. 2:28 Jadi, anak-anak'ku, tahtaprih bolum hihco umba Kristus, mangat noin ang ohkot Io lombut, ihto noharep Io honong tuwi kohanyi, tutang eam nyuhuk arop tului mia. 2:29 Ihkam jari ta'an ijo Kristus bolum numbun konohuang Pohotala. Tului orih ihkam harus ta'an hino, ijo nyinong ulun ijo bolum numbun kohondak Pohotala anai rih anak Pohotala.
3:1 Nohtorih, eaminon Pohotala masi ihto, nyiring ihto tongahku kolou anak-anak-Oh. Tutang puna ihto anai rih anak-anak Pohotala. Orihrih bainoh kolunon ijo ja'at tuh eam kosono ihto, kotului kolunon eam ngosono Pohotala. 3:2 Konduang-konduang ijo tonyita! Ihto huntuh anairih anak-anak Pohotala, tahpi koada'an ihto noin, jaha korinah. Tahpi ihto ta'an ijo amat Kristus lombut, ihto ahkan nyolung kolou Io, kotului ihto ahkan nohto Io a'ang koada'an-Oh ijo komorongoh. 3:3 Paring ulun ijo anai koporocaya tuh toharep Kristus, monjaga aropoh, mangat tu'u-tu'u borasih, borasih tahkan dusa sama kolou Kristus ka'a borasih. 3:4 Ulun ijo nguan dusa, molanggar hukum Pohotala; kotului dusa anairih molanggar hukum Pohotala. 3:5 Ihkam ta'an, ijo Kristus lombut ahkan muhi dusa-dusan kolunon, tutang ijo eam aro dusa aang arop-Oh. 3:6 Paring ulun, ijo bolum hihco umba Kristus, eam hototurus nguan dusa. Ulun ijo hototurus nguan dusa, eam pu'u nohto Kristus ata'ai ngosono-Oh. 3:7 Anak-anak'ku, ara mohonau iai ka ka'a monyosatoh ihkam. Ulun ijo nguan kohondak Pohotala anairih Anak Pohotala, kolouumoh Kristus anairih Anak Pohotala. 3:8 Tahpi ulun ijo hototurus nguan dusa anairih anak Sehtan, kotului Sehtan bodusa tahkan pahtuk. Ahkan tuhrih Anak Pohotala lombut yorih ahkan polonyuh gawin Sehtan. 3:9 Ulun ijo jari monjadi Anak Pohotala, eam hototurus nguan dusa, kotului sipat Pohotala bongoi anai luwangoh. Tutang kotului Pohotala rih Amaioh, mahka io eam duon hototurus nguan dusa. 3:10 Tuhrih kobohkoioh holat anak-anak Pohotala umba anak-anak Sehtan; ia-iai eam nguan kohondak Pohotala, ata'ai eam masi konduangoh, io bohkon Anak Pohotala. 3:11 Tahkan pahtuk jari tonyiar borihta tuh ahkan'kam: Ihto harus masi ihco umba ijobohkon. 3:12 Ara ihto kolou Kain, ijo monjadi anak Sehtan tutang munu konduangoh bongoi. Inon kotuluioh Kain munu konduangoh rih? Bain hal-hal ijo konuaioh anairih sala, tahpi hal-hal ijo konuan konduangoh anairih morong. 3:13 Bain orih, Konduang-konduang'ku, ara helan amat ulun-ulun kolunon tuh bosingi ihkam. 3:14 Ihto ta'an ijo ihto jari soluka tahkan popahtoi, tutang jari hahtun nokuh pombolum. Ihto ta'an rih kotului ihto masi hawui konduang ihto. Ulun ijo eam masi, rimai magun konowasa bain popahtoi. 3:15 Ulun ijo bosingi konduangoh, ulun rih pomunu, tutang ihkam ta'an, amat ihcobehti pomunu eam norima pombolum sojahti tutang turus-jahamoh. 3:16 Umba jalan tuhrih ihto mongota'an cara masi sama arop; Kristus jari monyorah pombolum-Oh bagi ihto. Kobain orih ihto ka'a harus monyorah pombolum ihto bagi konduang-konduang ihto! 3:17 Amat ihcobehti ijo pombolumoh sukup nohto konduangoh anai kotahpas, tahpi eam kani dohop konduangoh rih, koloukuwoh ulun rih dahpot homauh ijo io sita Pohotala? 3:18 Anak-anak'ku! Ararih ihto ngasi baya ang nyama, ata'ai tihkas umba kohawot iou. Hondakrih ihto ngasi umba kasih ijo sojahti, ijo tongorinah umba gawin ihto. 3:19 Kolouorih caraoh ihto ta'an ijo ihto angbarih anak-anak Pohotala ijo morong, tutang ahtoi ihto dahpot teneng ang toharep Pohotala. 3:20 Ihto ta'an, ijo amat ihto tonosalan bain ahtoi ihto, pongotaan Pohotala labih hajo, tahkan pongotaan ahtoi ihto, tutang ijo Io ta'an koparing-paringoh. 3:21 Jadi, Konduang-konduang ijo tonyita, amat ahtoi ihto eam nosalan ihto, ihto dahpot noharep Pohotala honong kohanyi. 3:22 Tutang inon ijo ihto nyawot tahkanumba-Oh, ihto norimaoh, tului ihto te'et umba poretah-poretah-Oh, tutang nguan inon ijo ngojorih ahtoi-Oh. 3:23 Ijo Io moretahoh ahkan ihto; iorih, ihto harus porocaya ahkan Anak-Oh, yorih Yesus Kristus, tutang ihto harus saling ngasi kolou ijo jari ponoretah Kristus ahkan ihto. 3:24 Paring ulun ijo te'et ahkan poretah-poretah Pohotala, bolum hihco umba Pohotala, tutang Pohotala hihco umba iro. Tutang ihto ta'an amat Pohotala bolum hihco umba ihto, kotului Io jari nonga Roh-Oh ahkan ihto.
4:1 Konduang-konduang ijo tonyita! Ararih porocaya ahkan paring ulun ijo mongahku arop anaingina Roh, Pohotala, tahpi ngujirih houn iro, ahkan mongota'an, inonrih roh ijo anai aang iro rih asar tahkan Pohotala ata'ai eam. Bain aro nabi polasu jari bokumbang nokuh umo-umoh. 4:2 Koloutuhrih caraoh ihkam ta'an inonrih rih Roh Pohotala, ata'ai eam: Ulun ijo mongahku Yesus Kristus lombut ahkan kolunon kolou ulun, ulun rih ijo anaingina Roh ijo lombut tahkan Pohotala. 4:3 Tahpi ulun ijo eam ngahkuoh, hal tuh tohou Yesus, io eam anaingina Roh Pohotala. Ulun rih anaingina roh tahkan musuh Kristus. Konduang jari ngonih ijo roh rih ahkan lombut, tutang huntuh io jari anai ang luwang kolunon tuh. 4:4 Tahpi anak-anak'ku, ihkam ain Pohotala. Ihkam jari ngalah nabi-nabi polasu, tului Roh ijo anai aang'kam labih bokowasa tahkanumba roh ijo anai aang ulun-ulun ain kolunon tuh. 4:5 Nabi-nabi polasu rih nuhtui tohou hal-hal kolunon, tutang kolunon ngonih auh iro, tului iro ain kolunon. 4:6 Tahpi ihto anairih anak-anak Pohotala; tutang ulun ijo kosono Pohotala ngonih auh ihto. Ulun ijo bohkon ain Pohotala, io eam ngonih auh ihto. Kolourihrih caraoh ihto ngota'an kobohkon holang Roh ijo nonga ajar ijo morong, tutang roh ijo monyosat. 4:7 Konduang-konduang ijo tonyita! Olairih ihto hokasih ihco umba ijobohkon, bain kasih asaroh tahkan Pohotala. Ulun ijo mongasih anairih Anak Pohotala, tutang io ngosono Pohotala. 4:8 Ulun ijo eam mongasi, io eam ngosono Pohotala; kotului Pohotala anairih pongasih. 4:9 Pohotala ngorinah ijo Io mongasih ihto, hawui nyuhu Anak-Oh ijo tukan nokuh luwang kolunon, mangat ihto ngondahpot pombolum nguha Anak-Oh rih. 4:10 Tuhrih kasih: Bohkon ihto ijo jari ngasi Pohotala, tahpi Pohotala ijo ngasi ihto, tutang nyuhu Anak-Oh, mangat nguha Io ihto mondahpot pongapunan ngosan dusa-dusan ihto. 4:11 Konduang-konduang ijo tonyita, amat Pohotala kolourih mongasih ihto, ihto ka harus ngasih ihco umba ijobohkon. 4:12 Eam anai ihcobehti ka ijo pu'u nohto Pohotala, tahpi amat ihto saling hosita, tanda Pohotala hihco umba ihto, tutang asi-Oh monjadi soporuna luwang arop ihto. 4:13 Bain kotului Pohotala jari nonga ahkan ihto Roh-Oh, mahka ihto ta'an ijo ihto jari bolum hihco umba Pohotala, tutang Pohotala bolum hihco umba ihto. 4:14 Ihkai bongon jari nohto Anak Pohotala, tutang ihkai mongabaroh ijo Yesus rih tonyuhu bain Amai, ahkan monjadi Lahca Ponyolamat kolunon tuh. 4:15 Ia-iai mongahku ijo Yesus rih Anak Pohotala, Pohotala bolum hihco umba ulun rih, tutang ulun rih ka'a bolum hihco umba Pohotala. 4:16 Ihto bongon ta'an, tutang porocaya, ahkan kasih Pohotala ahkan ihto. Pohotala rih pongasih. Ulun ijo pombolumoh konowasa bain kasih, ulun rih hihco umba Pohotala, tutang Pohotala hihco umba io. 4:17 Kasih monjadi soporuna luwang arop ihto, mangat ihto tepun kohanyi ang Ondou Ponosara. Ihto ahkan tepun kohanyi, tului pombolum ihto ang kolunon tuh, sama kolou pombolum Kristus. 4:18 Ulun ijo nginyam asin Pohotala, eam mokomo anyam anai kihkoh; tului kasih ijo soporuna moponihou kokaro nanyam kihkoh. Jadi, korinah rih ijo ulun bolum nginyam sitan Pohotala honong soporuna amat ulun rih mihkoh noharep Ondou Ponosara. 4:19 Ihto mongasih, tului Pohotala jari labih houn mongasih ihto. 4:20 Amat ihcobehti nuhtui, "Ahku ngasih Pohotala," tahpi io eam mongasih konduangoh, ulun rih bobalik. Kotului ulun ijo eam mongasih konduangoh ijo gihtaioh, eam harapan tou mongasih Pohotala ijo eam tonohto baiuoh. 4:21 Kotului rih, tuhrih poretah ijo tononga Kristus ahkan ihto: Ia-iai ngasih Pohotala harus ngasih konduangoh ka'a.
5:1 Ulun ijo porocaya ijo Yesus anairih Lahca Ponyolamat ijo tonobowot Pohotala, ulun orih anairih Anak Pohotala. Ulun ijo mongasih ihcobehti amai, mongasih anakoh ka'a. 5:2 Umba jalan tuhrih ihto ta'an, ijo ihto mongasi anak-anak Pohotala: Ihto mongasi Pohotala tutang te'et umba poretah-poretah-Oh. 5:3 Tului mongasih Pohotala rimai te'et ahkan poretah-poretah-Oh. Tutang poretah-poretah-Oh eamrih bahat ahkan ihto, 5:4 tului nyinong anak Pohotala sanggup pokalah kolunon ijo ja'at tuh. Tutang ihto mongalah kolunon umba koporocayan ihto. 5:5 Iaikah duon ngalahoh kolunon? Tihkas ulun ijo porocaya, ijo Yesus anairih Anak Pohotala. 5:6 Yesus Kristusrih ijo lombut nokuh kolunon umba danum popondus-Oh, tutang umba dahan popahtoi-Oh. Io lombut eam tihkas umba danum iou, tahpi umba danum tutang daha. Tutang Roh Pohotala bongoi, nonga kosaksian ijo orih morong, tului Roh eam pu'u bobalik. 5:7 Anai tolu saksi: 5:8 Roh Pohotala, danum tutang daha -- kotolu-toluoh nonga kosaksian ijo sama. 5:9 Ihto porocaya umba kosaksian kolunon, tahpi kosaksian Pohotala labih ba'as hino. Tutang orihrih kosaksian ijo jari tononga bain Pohotala tohou Anak-Oh. 5:10 Kotului orih, ulun ijo porocaya ahkan Anak Pohotala jari norima kosaksian rih ang luwang ahtoioh; tahpi ulun ijo eam anai koporocaya umba Pohotala, jari ngohu soahkan-ahkan Pohotala pobalik. Tului io eam porocaya, inon ijo tonuhtui Pohotala tohou Anak-Oh. 5:11 Tuhrih kosaksian rih: Pohotala jari nonga ahkan ihto pombolum sojahti tutang kototahiu, tutang Anak-Oh anairih tohasak pombolum rih. 5:12 Ulun ijo anaitepun Anak Pohotala io anaitepun pombolum rih; tutang ulun ijo eam anaitepun Io, eam anaitepun pombolum rih. 5:13 Ahku nyurat ahkan ihkam ijo porocaya ahkan Anak Pohotala, mangat ihkam ta'an ijo ihkam jari anaingina pombolum sojahti tutang kototahiu. 5:14 Tutang ihto bohanyi noharep Pohotala, tului ihto yahkin Io monorima do'a ihto, amat ihto nyawot inon iou, ijo tohorong umba kohandak-Oh. 5:15 Tului ihto ta'an ijo Io ngonihoh ihto, amat ihto nyawot umba-Oh, mahka ihto ta'an ka'a, ijo Io nongaoh ihto, inon ijo ihto nyawot tahkan Io. 5:16 Amat ihkam nohto anai ihcobehti sosama Kristen, nguan dusa ijo eam ngonjorian ulun rih nihou pombolum sojahti tutang kototahiu, kohondakrih ihkam bodo'a ahkan Pohotala, tutang Pohotala ahkan nonga pombolum rih ahkaioh. Tuh hokokona umba iro, ijo dusaoh eam ngonjorian iro nihou pombolum rih. Tahpi anai dusa ijo ngonjorian ulun nihou pombolum rih. Tohou hal rih ahku eam nuhtui ijo ihkam harus bodo'a umba Pohotala. 5:17 Paring gawi ijo sala anairih dusa, tahpi anai dusa ijo eam ngonjorian ulun nihou pombolum sojahti tutang kototahiu rih. 5:18 Ihto ta'an ijo paring ulun ijo jari monjadi anak-anak Pohotala, eam hototurus mawi dusa, tului Anak Pohotala ngolindungoh, tutang si Ja'at eam dahpot mawi ino-inon tohimo io. 5:19 Ihto ta'an ijo ihto ain Pohotala, oluka hopus kolunon tuh ang pinda kowasan Si Ja'at. 5:20 Ihto ta'an ijo Anak Pohotala jari lombut, tutang jari nongaoh kohorahti ahkan ihto, mangat ihto kosono Pohotala ijo morong. Ihto bolum hihco umba Pohotala ijo morong, tutang bolum hihco umba Anak-Oh Yesus Kristus. Tuhrih Pohotala ijo morong, tutang tuhrih pombolum ijo sojahti tutang kototahiu. 5:21 Anak-anak'ku, ngomahcuohrih arop'kam tahkan dewa-dewa!
1:1 Ahkan Ine ijo tonopili bain Pohotala, tutang ahkan anak-anak Ine. Surat tuh tahkan ahku, ponotua ukup ijo tu'u-tu'u ngasih ihkam. Eam tihkas ahku tahpi paring ulun ijo ngosono Pohotala ijo morong, ijo ngasih ihkam ka'a. 1:2 Bain Pohotala mohcon ang luwang ahtoi ihto, tutang ahkan toturus anai umba ihto turus-jahamoh. 1:3 Keleh ihto tononga borehkat, pononganasi tutang kosanang bain Pohotala, Amai, tutang Yesus Kristus Anak Amai rih. Keleh paringoh ihto ngina, hawui ahtoi ijo tulus tutang honong kasih. 1:4 Ahku jorih samasino ngota'an, ijo anai anak-anak Ine ijo bolum numbun ajaran Pohotala, kolou ijo jari tonoretah Pohotala, Amai, ahkan ihto. 1:5 Tului orih, Ine, ahku nyawot honong paham mangat ihto paring saling hokasih. Ijo ahku manderoh tuh eam rih ihco poretah, ijo bohua; poretah tuh jari tononga ahkan ihto, toparan ihto pahtu-pahtukoh porocaya. 1:6 Mongasih, rimai bolum numbun poretah-poretah Pohotala. Tutang poretah ijo ihkam jari ngonih tahkan pahtukoh, iorih, ijo ihkam harus bolum honong hokasih ihco sama bohkon. 1:7 Aro ponihpu jari bohambur nokuh hopus kolunon. Iro anairih, ulun-ulun ijo eam ngahku, ijo Yesus Kristus lombut nokuh kolunon, kolou ihcobehti ulun. Ulun somahcam orih anairih ponihpu, tutang Musuh Kristus. 1:8 Tului orih jagarih, ara nyiring ihkam nihou, inon ijo jari ihkai usahaoh ahkan ihkam. Bousaharih, mangat ihkam norima tahkan Pohotala upah'kam koparingoh. 1:9 Ulun ijo eam nambit aang ajaran Kristus, molekan nyapang tahkan inon ijo tonongajaroh bain Kristus, ulun orih eam anaingina Pohotala. Ulun ijo tahtap ang luwang ajaran Kristus, rimai, anaingina, kohinut Pohotala, Amai, oluka Anak. 1:10 Tului orih, amat anai ulun lombut tutang mborihtaoh ahkan'kam ajaran ijo eam tongajar Kristus, ara monorima ulun rih ang luwang lohpou'kam ata'ai nonga tahbe ahkaioh. 1:11 Kotului ulun ijo nonga tahbe, ahkan ulun ijo kolourih umba ka'a hihco ulun rih, aang nguan gawioh ijo ja'at. 1:12 Aro samasino ijo porulu ahku monyorihtaoh ahkan'kam tahpi anyamoh labih pios ara nguha surat. Ahku moharap dahpot masap tutang hopander bongok umba ihkam, mangat ahtoi ihto tu'u-tu'u jorih. 1:13 Anak-anak tahkan konduang bawi, Ine ijo tonopili Pohotala, ngirim tahbe ahkan Ine.
1:1 Konduang Gayus ijo tonokasih! Ahku okon ukup, ijo tu'u-tu'u mongasihi'ko, 1:2 bodo'a, keleh Konduang borigas-rigas tutang paringoh pio-pios honong ihko sama kolou homboruan'mu pio-pios iou ka'a. 1:3 Ahku sanang samasino, kotihka pira-pira Konduang Kristen johcok tutang mborihta ahkak'ku, eaminon kote'etoh, Konduang toharep Pohotala ijo morong, kotului puna Konduang toturus bolum numbun ajaran Pohotala. 1:4 Eam anai ijo dahpot monyababoh ahku labih jorih, tahkanmba ngonih ijo anak-anak'ku bolum numbun ajaran Pohotala. 1:5 Konduang'ku! Konduang kolourih kote'et a'ang gawi ijo Konduang nguai bagi sobat-sobat sosama Kristen; mahi-hino ulun Kristen ijo jaha Konduang ngosono ka, Konduang mohaluoh. 1:6 Iro jari momborihtaoh rih, ahkan ukup ang unuk ihkai, tohou sitan'kam. Dohop iro, mangat dahpot noturus ponyalan iro tutang honong kolourih ngojorih ahtoi Pohotala, 1:7 tului a'ang ponyalan ahkan mohalu Kristus, iro eam norima pondohop inon ka, tahkan ulun-ulun ijo eam kosono Pohotala. 1:8 Tului rih, ihto ulun-ulun Kristen harus ndohop sobat-sobat sama Kristen ijo kolou orih, mangat ihto dahpot umba a'ang usaha iro, ahkan mborihta ajaran ijo morong tahkan Pohotala. 1:9 Ahku jari nyurat surat ijo iwak ahkan ukup, tahpi Diotrefes ijo jolik monjadi okon, ang luwang ukup eam kani numbun ahku. 1:10 Noin amat ahku lombut, ahku ahkan ngarak karon aang'co ijo jari tonguaioh, yorih tohou hal-hal ja'at tutang alik ijo io mander tohou ihkai! Tahpi paringoh rih jaha sukup ahkaioh. Aang ohkot sobat-sobat sosama Kristen rih lombut, io eam kani norima iro. Malah io ngohana ulun-ulun ijo kani norima konduang-konduang rih, tutang io nyuhu ulun-ulun rih, soluka tahkan ukup! 1:11 Konduang ijo tonokasih ara nyutu inon ijo ja'at. Nyutu iou inon ijo hinut. Ulun ijo nguan kopios anairih ain Pohotala. Tutang ulun ijo nguan koja'at jaha ngosono Pohotala. 1:12 Paring ulun monara Dimetrius. Mahihino Pohotala ka monaraoh. Ihkai ka'a naraoh, tutang Konduang kota'an ijo inon, ijo ihkai nyiaroh, dahpot tomorocaya. 1:13 Aro samasino ijo porulu ahku manderoh ahkan ihkam, tahpi ahku nanyamoh labih pios ara nguha surat. 1:14 Ahku moharap eam tahi hino ahkan hosombang umba ihkam tutang ihto ahkan bopander hotoharep. 1:15 Keleh Tuhan momborehkat Konduang. Sobat-sobat'kam ang unuk ahku tuh, ngirim tahbe ahkan ihkam. Ngojohcok tehbe'ku ahkan paring sobat-sobat ihto mihco-mihco.
1:1 Konduang-konduang ijo jari tona'ah, tutang ijo paham tonongasih bain Pohotala, Amai, hawui tonojaga bagi Yesus Kristus. Kolou jihpon Yesus Kristus, ahku -- Yudas -- konduang tahkan Yakobus, 1:2 moharap: Keleh Pohotala nonga borehkat, pononganasi, tutang kosanang ahkan'kam honong bolowi-lowi. 1:3 Konduang-konduang ijo tonongasih! Ahku tu'u-tu'u bokohondak ngirim surat ahkan'kam, tohou solamat ijo ihto hombo-homboh jari nginyamoh. Tahpi huntuh ahku anyamoh tojuhung ahkan mopingat ihkam umba surat tuh, mangat ihkam turus ngolahi ahkan koporocaya ijo jari sino tikat tononga Pohotala ahkan turus-jahamoh ahkan ukup-Oh. 1:4 Kotului earo ihto ngota'anoh anai nyombihti-nyombihti ulun ijo botatu, ijo nosolat nyolong nokuh louk ihto. Iro ulun-ulun bejad ijo mutarmokilaoh borihta, tohou pononganasi Pohotalan ihto, ahkan dahpot kosapet momedaoh kojolik bolai iro. Tutang iro nulak Yesus Kristus, ijo ihco-ihcooh Pongowasa tutang Tuhan ihto. Tahkan lomoi hukuman ahkan iro jari tonujum luwang Surat Borasih. 1:5 Paring orih ihkam jari kota'an. Tahpi ahku jolik mopingat ihkam tohou koloukuwoh Tuhan monyolamat ukup Israel tahkan lowu Misir, tahpi pongohuli morusak ulun-ulun ijo eam porocaya ang marak iro. 1:6 Ingatrih, ka'a, dolang molehkat ijo nokalou holat-holat kowasan iro, nyiring tulak nohtahoh unuk mohcon iro. Pohotala masung molehkat-molehkat rih, umba rantai abadi, ang luwang unuk ijo pindong ang pinda tana. Ang anan iro tonahan turus johcok hukuman ijo tongonyahtu nokuh ngosan iro ang Ondou ijo hebat rih noin. 1:7 Ingatrih ka'a, lowu Sodom tutang Gomora, hawui lowu-lowu ang hokodiling, ijo rayatoh nguan hal-hal kolou ijo tonguan bain molehkat-molehkat orih. Iro nguan hal-hal ijo kihal tutang bejad, nyiring iro tonosiksa umba hukuman baho ijo kototahiu, ahkan monjadi pongingat bagi paring ulun. 1:8 Kolourih ka'a nyombihti-nyombihti rih, bohayal-hayal nyiring iro nguan dusa, toharep behtin iro bongoi. Iro nopahjah randah kowasan Pohotala tutang mohina kokaro angbolum ijo tonohoromat ang Soruga. 1:9 Mikhael bongoi, ijo mongopala dolang molehkat, eam pu'u nguan kolourih. Ang ohkot io hokolawan umba Sehtan a'ang hotokian tohou iai ijo ahkan ngondahpot otun Museh, Mikhael eam bohanyi mosara Sehtan umba auh-auh mohina. Mikhael tihkas nuhtui, "Tuhan ahkan ngorahang ihko!" 1:10 Tahpi umba pohina-pohina'an, ulun-ulun rih, nyarang kokaro ang'co ijo iro eam horahti. Iro sama kolou ohcin-ohcin ijo eam anai ahkaroh, ijo ngota'an hal-hal umba nanyamoh. Tahpi justru hal-hal orih, ijo kotuluioh kolonyuh iro. 1:11 Colahka iro! Iro jari nitoi jalan, ijo tonyuru bain Kain. Mangat dahpot duit, iro nombohos arop luwang dahtah kolahcat, sama kolou Bileam. Tutang iro ka tolonyuh, tului molawan kolou Korah. 1:12 Aang ohkot ihkam napa pesta ukun, hadat ulun-ulun rih mombusou ang marak ihkam. Tului iro kuman hawui kobongo eam aro mia-mia, tutang tihkas kogunan aropoh bongoi. Iro kolou baunondou ijo tonahpi bain bahiu, tahpi eam mosuluh uhjan. Iro ka'a kolou pu'un ijo eam mohasil bua, oluka musim bua-mamua, pu'un-pu'un ijo jari tojawut uhatoh tutang jari mahtoi samasino. 1:13 Sama kolou luhcak ijo nyawung ang tasik, polombut puhtak, kolourih ka'a iro hopohtak gawiu-gawiu ijo ngomia. Iro anairih kolou potion-potion ijo kindah-kondaha, tutang ijo jari tonyodia unukoh bain Pohotala, ang luwang kopindong, ijo paling paham ahkan turus-jahamoh. 1:14 Henoh, lihit ijo kopitu tahkan Adam, lomoi pu'u nujum tohou ulun-ulun rih. Henoh homouh, "Nohto, Tuhan ahkan lombut umba bokuhjan-kuhjan molehkat-molehkat-Oh ijo borasih, 1:15 ahkan mosara paring ulun. Tuhan ahkan mohukum ulun-ulun ja'at tului gawin-gawin iro ijo bejad. Tutang Io ahkan mohukum ulun-ulun bodusa tutang bosala, kotului paring auh pohina'an ijo konohawotohrih." 1:16 Ulun-ulun rih toturus iou bokuhtuk tutang nosalan ulun bohkon. Iro bolum numbun kojolik-kojolik iro ijo bodusa. Iro panderalik tohou aropoh bongoi, tutang monjilat ulun mangat duon utung. 1:17 Tahpi Konduang-konduang'ku ijo tonongasih! Ingatrih ahkan inon ijo soun tomborihta, bain rasul-rasul Tuhan ihto Yesus Kristus. 1:18 Iro mborihta labih soun ahkan'kam, ijo doni lain jaman, ahkan lombut ulun-ulun ijo ahkan hololenge ihkam, io rih ulun-ulun ijo bolum numbun kojolik-kojolik iro ijo bodusa. 1:19 Iro tuhrih ulun-ulun, ijo polombut kopusit. Iro eam konowasa bain Roh Pohotala, molekan bain kojolik-kojolik hadat dasar kolunon tuh. 1:20 Tahpi ihkam, Konduang-konduang'ku, mbinaoh toturus pombolum ihkam hogalang porocaya'mu umba Yesus Kristus. Koporocaya'mu rih paham borasih. Pondehan rih bodo'a umba kowasa Roh Pohotala, 1:21 tutang bolumrih toturus ang pinda kosingou kasih Pohotala kotahin ihkam ngindoi pononganasin Yesus Kristus Tuhan ihto, ijo ahkan nonga ahkan'kam pombolum sojahti tutang kototahiu. 1:22 Toharep ulun-ulun ijo bembang ahtoioh, hondakrih ihkam ngorinah kasih mongasih. 1:23 Nguhut rih ulun-ulun soluka tahkan luwang baho, ahkan monyolamatoh iro. Toharep ulun-ulun bohkonoh, hondakrih ihkam ngorinah kasih mongasih tonohawui nanyam mihkoh, tahpi bosingirih nyiring hahtin iro ka ijo jari tongoluhtak umba kojolik iro ijo bodusa. 1:24 Pohotala ijo sanggup mojaga, mangat ihkam ara ngonyahtu, tutang ijo sanggup ngomin ihkam nokuh toharep-Oh ijo tohoromat honong kojorih tutang earo kosalai. 1:25 Iorih ihco-ihcooh Pohotala, Ponyolamat ihto nguha Yesus Kristus Tuhan ihto. Iorih Pohotala ijo tonohoromat Hajo, Bokowasa tutang Bopongaroh tahkan jaman houn lomoi nyiring huntuh tutang ahkan turus-jahamoh! Amen.
1:1 Suang surat tuh tohou inon ijo ngorinah bain Yesus Kristus tohou kojadian-kojadian ijo ahkan nyolung. Pohotala momborihtaoh ahkan Kristus, mangat Io ngorinahoh ahkan jihpon-jihpon Pohotala inon ijo jion harus nyolung. Kristus nyuhu molehkat-Oh nokuh Yohanes, jihpoi-Oh, ahkan momborihta kojadian-kojadian rih ahkaioh. 1:2 Mahka Yohanes ka'a momborihta paring ijo tonohtooh rih, tutang tuhrih ponuhtuioh tohou pohtoh tahkan Pohotala, ijo tonotehen bain Yesus Kristus nguha kosaksian-Oh. 1:3 Kosanangrih ahkan ulun ijo mombasaoh, tutang ulun ijo ngonih, borihta tujum surat tuh, hawui te'et umba inon ijo tonyurat ang luwangoh. Tului eam tahi hino paringoh tuh ahkan nyolung. 1:4 Konduang-konduang, ijo anai ang kopihtu ukup ang daerah Asia! Ahku, Yohanes, bokoharap ihkam tonongaoh borehkat tutang kosanang tahkan Pohotala -- yorih, Io ijo anai, tutang jari anai, tutang ijo anai toturusoh -- tutang ka'a tahkan kopihtu roh ijo anai ang boun pododusan Pohotala, 1:5 tutang tahkan Yesus Kristus, saksi ijo bokehtep. Io ijo sula-sulak tonombolum hoduli tahkan popahtoi, tutang Io rih pongowasa ngosan lahca-lahcan kolunon. Yesus mongasi ihto, tutang umba popahtoi Io momordehka ihto tahkan dusa-dusan ihto, 1:6 tutang ngonjorian ihto ihco uhtus khusus, imam-imam ijo mohalu Pohotala, Amai-Oh. Yesus Kristus orihrih, ijo hajo tutang bokowasa ahkan turus-jahamoh. Amen. 1:7 Nohto, Io lombut ngolindung bounondou! Paring ulun ahkan nohto Io, taput ka'a iro ijo jari nyadop Io. Karon uhtus ang tana ahkan nahtum tului Io. Yo, musti! Amen! 1:8 "Ahku rih ijo pahtuk tutang ijo kolaiu," hion Tuhan Pohotala, ijo anai, ijo jari anai, tutang ijo anai toturusoh, Ijo Mahakowasa. 1:9 Ahku Yohanes, konduang'mu ijo sonasib umba ihkam a'ang karot, ijo tonyuru nyinong murid Kristus. Ihto tabah angkokarot kolou ukup aiu-Oh. Ahku todian nokuh Pulou Patmos tului ahku monyiar pohtoh tahkan Pohotala, ijo konoba'as bain Yesus nguha kosaksian-Oh. 1:10 Aang ondou Tuhan, ahku konowasa bain Roh Pohotala turus ahku ngonih auh ijo muhing -- kolou auh trompet -- pander ang lihkut'ku. 1:11 Auh rih nuhtui, "Surat, inon ijo ihko nohtooh, tutang ngirim surat tuh ahkan pihtu ukup ijo pongotuh: Epesus, Simirna, Pergamus, Tiatira, Sardis, Piladelpia, tutang Laodekia." 1:12 Ahku nopoliou nokuh lihkut ahkan nohto iai rih ijo pander umba ahku. Turus ahku nohto pihtu owuh sumbu ijo tonapa tahkan bulou. 1:13 Ang tohun-tohun owuh-owuh sumbu rih tombok ihcobehti ijo topahjah kolou kolunon. Io hapa jubah ijo ombuoh nyiring ang pa'aioh. Ang husuk-Oh Io hapa ponuhtuphusuk tahkan bulau. 1:14 Balou-Oh puhti kolou bulu tobiri, kopuhti kapas. Mahta-Oh ngonjelak-jelak kolou baho; 1:15 pa'ai-Oh mokilat kolou tombaga ijo tonanak ang baho. Auh-Oh kolou nyahai danum sahai ijo hajo. 1:16 Longoi kotuui-Oh nambit pihtu potion, tutang tahkan nyamai-Oh soluka 'cokobilap padang bonyihi ijo konyihi hososila. Baui-Oh ngorolondang kolou mahtanondou nohtang ang tohun ondou koloang. 1:17 Ohkot ahku nohto-Oh, ahku toposuruk ang baui-Oh kolou ulun mahtoi. Tahpi Io ngina longoi kotaui-Oh aang ahku turus nuhtui, "Ara mihkoh! Ahku rih Io ijo pahtuk tutang ijo kolaiou. 1:18 Ahku rih Io ijo bolum! Ahku jari matoi, tahpi topahjahrih, Ahku bolum ahkan turus-jahamoh. Ahku bokowasa ngosan popahtoi, tutang ngosan kolunon ulun mahtoi. 1:19 Tului rih nyurat hal-hal ijo ihko nohto, iorih hal-hal ijo anai huntuh, tutang hal-hal ijo ahkan nyolung noin. 1:20 Tuhrih rahasia tahkan pihtu potion ijo ihko nohto ang longon kotouk-Ku, tutang tahkan pihtu owuh sumbu bulou, orih: Pihtu potion rih iorih molehkat-molehkat kopihtu ukup, tutang pihtu pa'an sumbu rih anairih kapihtu ukup rih."
2:1 "Ahkan molehkat ukup ang Epesus, nyurat koloutuh: Tuhrih pohtoh tahkan Io ijo nambit kopihtu potion ang longoi koto'ui-Oh, tutang nyalan ang holat kopihtu owuh sumbu bulou rih. 2:2 Ahku ta'an inon ijo ihkam nguai: Ihkam bogawi paham tutang ihkam tabah samasino. Ahku ta'an ijo ihkam eam nonga ahtoi ahkan ulun ja'at. Tutang ulun-ulun ijo ngahku aropoh rasul, padahal eam, jari ihkam nguji, tutang ihkam nyombang ijo iro bobalik. 2:3 Ihkam sabar, tutang ihkam ngarot tului Ahku, tutang ihkam eam puhtus asa. 2:4 Tahpi tuh kobahat-Ku toharep'kam: Ihkam eam hino mongasi Ahku kolou pahtuk. 2:5 Tului rih, ingatrih, eam-inon komahcu ihkam jari ngonyahtu! Hubah iou tahkan dusa-dusan'kam rih tutang nguanohrih iou inon ijo ihkam nguaioh pahtuk. Amat eam mahka Ahku ahkan lombut nokuh'kam tutang nyohpit pa'an sumbun'kam rih tahkan unukoh. 2:6 Tahpiolu anai aangihco ijo pios a'ang'kam, iorih: Ihkam bosingi gawin dolang murid Nikolaus ijo Ahku nyingi ka'a. 2:7 Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup! Iro ijo manang, ahkan Ahku ngijin kuman bua tahkan bahtang pombolum ijo tumbu ang Pombulan Pohotala." 2:8 "Ahkan molehkat ukup ang Simirna, nyurat koloutuh: Tuhrih pohtoh tahkan Io ijo pahtuk tutang ijo laiu ijo jari mahtoi tutang bolum hoduli. 2:9 Ahku ta'an kosusah-kosusah ihkam; Ahku ta'an ihkam porosbolum, tahpi kotu'uioh ihkam tahtou! Ahku ta'an patanah-patanah ijo tonyahkah toharep'kam bain ulun-ulun ijo ngahku aropoh Yahudi padahal eam, iro anairih ukup Sehtan. 2:10 Ara mihkoh umba karot ijo eam tahi hino ihkam harus nyuruoh. Ingat, Sehtan ahkan moposolong ihcokobagi tahkan ihkam, koluwang sipir ahkan mouji ihkam. Ihkam ahkan mongarot sopulu ondou kotahiuoh. Hondakrih ihkam bokehtep umba Ahku nyiring mahtoi, mahka Ahku ahkan nonga ahkan'mu pombolum sojahti tutang kototahiu kolou hadiah komanang. 2:11 Ia-iai dahpot ngonih, hondakrih nohtoanioh inon ijo tonuhtui bain Roh Pohotala ahkan ukup-ukup! Iro ijo manang, samasino eam ahkan ngarot ino-inon bain popahtoi ijo ambal duo." 2:12 "Ahkan molehkat ukup ang Pergamus, nyurat koloutuh: Tuhrih pohtoh tahkan Io ijo nambit padang bonjihi ijo hososila. 2:13 Ahku ta'an ang umoh ihkam mohcon, io-rih ang unuk sehtan bopododusan. Ihkam te'et umba Ahku. Malah kotihka Antipas, saksi aik-Ku ijo te'et rih, tomunu ang toharep ihkam ang luwang markas Sehtan, ihkam eam ngulim ijo ihkam porocaya umba Ahku. 2:14 Tahpiolu kolourih, anai pira-pira hal ijo Ahku eam ngojorihoh tahkan ihkam: Anai ihcokobagi ulun ang louk ihkam ijo nutut umba ijo tongajar, bain Bileam. Bileam majar Balak koloukuwoh nombohos ukup Israel koluwang dusa; honong ngota'u iro kuman ukun ijo jari tononga ahkan dewa tutang nguan gawi ijo kihal. 2:15 Kolourih ka'a anai ang louk ihkam, ulun-ulun ijo nambit aang ajar dalang murid Nikolaus. 2:16 Tului orih hubah tahkan dusa-dusan'mu! Amat eam, honjulu hino Ahku ahkan lombut nokuh ihkam tutang ngolahi ulun-ulun rih umba padang ijo anai ang nyamak-Ku. 2:17 Ia-iai dahpot ngonih, hondakrih nohtoanioh inon ijo tonuhtui bain Roh Pohotala ahkan ukup-ukup! Iro ijo manang, ahkan Ahku ngijin kuman manna ijo bosuhuk, tutang nyino-nyinong ahkan norima tahkan Ahku ihco koluang bahtu puhti. Aang bahtu rih tonyurat ihco aran ijo bohua, ijo eam tongota'an bain iai ka'a, bohkonumba bain ulun ijo norimaoh." 2:18 "Ahkan molehkat ukup ang Tiatira, nyurat koloutuh: Tuhrih pohtoh tahkan Anak Pohotala, ijo mahtai-Oh ngonjelak-jelak kolou baho, tutang pa'ai-Oh mokilat kolou tombaga tonanak. 2:19 Ahku ta'an paring ijo ihkam nguaioh -- Ahku ta'an ihkam ngasi sosama'mu, ihkam dehen, ihkam bogawi, tutang ihkam tahan ngarot. Ahku ta'an ihkam huntuh bogawi labih aro tahkan houn. 2:20 Tahpi tuh kobahat-Ku toharep'mu, Ihkam nonga ahtoi ahkan Isabel, ulunbawi ijo ngaku aropoh suruhan Pohotala rih. Jari aro jihpok-jihpok-Ku ijo tonoalikoh, tutang tongajaroh ahkan nguan kihal, tutang ahkan kuman ukun ijo jari tonyorah ahkan songiangdewa. 2:21 Jari Ahku nongaoh ahkaioh, kosapet ahkan hubah tahkan dusai-dusaioh, tahpi io eam jolik tondo, nguan hal-hal ijo kihal rih. 2:22 Ingatrih! Ahku ahkan mohopas io nyiring poros ang unukoh kaling. Ang anan io, tutang ulun-ulun ijo hobandung umba io, ahkan ngarot samasino. Paring orih ahkan Ahku nguai uhuntuh -- kocoali amat iro tondo nguaioh hal-hal ijo ja'at sama-sama umba io. 2:23 Dolang muridoh ahkan Ahku munu ka'a mangat paring ukup borondong ijo Ahku rih Io ijo nosot tiruk tutang ahtoi kolunon. Ihkam ahkan Ahku malos numbun gawin ihkam nyino-nyinong. 2:24 Tahpi ihkam ijo bohkon-bohkonoh ang Tiatira eam umba ajar ijo ja'at rih, tutang eam balajar ilmu-ilmu Sehtan. Ahku nuhtui, ijo Ahku eam ahkan nambah ahkan'kam puat ijo ngombahat. 2:25 Tahpi johcok ang ohkot Ahku lombut noin, hondakrih ihkam tohtap nutut inon ijo jari ihkam tepuioh. 2:26-27 Iro ijo manang, tutang ijo johcok laiu, turus nguan inon ijo Ahku ngohondakrih, ahkan Ahku nonga kowasa ijo sama kolou Ahku norima tahkan Amai-Ku. Iro akhan norima kowasa tahkanumba Ahku, ahkan moretah uhtus-uhtus umba suhkah bosi, tutang ahkan molonyuh uhtus-uhtus rih kolou kobali tana. 2:28 Iro ahkan norima potiontimur tahkanumba Ahku. 2:29 Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup!"
3:1 "Ahkan molehkat ukup ang Sardis, nyurat koloutuh: Tuhrih pohtoh tahkan Io ijo tepun kopihtu roh tahkan Pohotala tutang kopihtu potion rih. Ahku kota'an inon ijo ihkam nguaioh. Hioioh ihkam bolum, padahal ihkam mahtoi! 3:2 Tului orih, kuatrih, tutang ngomba'asiou, inon ijo magun anai ang ihkam, hounumba orih mahtoi samasino. Tului Ahku nyombangrih ijo inon ijo ihkam nguaioh, jaha ihco ka ijo soporuna ang toharep Pohotala. 3:3 Jadi, ingat rih hoduli ahkan inon ijo jari tongajar ahkan'kam lomoi, tutang inon ijo jari ihkam ngonih. Molalusohrih rih, tutang hubah iou tahkan dusa-dusan'kam. Amat ihkam eam kuat, Ahku ahkan lombut nokuh'kam kolou ponahkou; tutang ihkam eam ahkan kota'an, mira ohkotoh Ahku lombut. 3:4 Tahpi ang tohun-tohun ihkam ang Sardis, magun tohko ulun ijo bojaga, mangat kolambiuoh tahtap borasih. 3:5 Iro rih ahkan nyalan hombo-homboh Ahku hawui hopokajan puhti tului iro layak ahkan rih. Ahkan iro ijo manang, ahkan tomokahjan jubah puhti. Aran iro eam ahkan Ahku ngudapoh, tahkan Surat Ulun Bolum. Tutang ang toharep Amai-Ku, tutang molehkat-molehkat-Oh, Ahku ahkan ngahku ijo iro anairih aik-Ku. 3:6 Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup!" 3:7 "Ahkan molehkat ukup ang Piladelpia, nyurat koloutuh: Tuhrih tahkan Io ijo borasih tutang sojahti. Iorih ponambit kuhci ijo tongina Dawid; amat Io nguap, eam aro ihcobehti ka dahpot ngahtopoh, tutang amat Io ngahtopoh, eam ihcobehti ka dahpot nguapoh. 3:8 Ahku kota'an inon ijo ihkam nguai. Ahku kota'an ijo ihkam eam popira koba'as; ihkam, jari numbun ajar-Ku, tutang tehen umba Ahku. Bagin ihkam jari Ahku nguap ihco bauntukang, ijo eam dahpot tongahtop bain iai ka ka'a. 3:9 Ingatrih tuh: Ulun-ulun ijo monjadi ukup Sehtan rih, pobalik-pobalik ijo ngohawot aropoh Yahudi podahal bohkon, ahkan Ahkunguan, nyiring iro lombut suhkuntu'ut ang toharep'mu. Tutang iro ahkan kota'an ijo Ahku ngasi ihkam. 3:10 Bain kotului ihkam jari numbun poretah-poretah-Ku mangat bokehtep, Ahku ka ahkan ngolindung ihkam tahkan wayah kosusah, ijo ahkan nopahas sohopus kolunon. Hal orih ahkan nyolung unuk nikos paring ulun ang tana. 3:11 Ahku bojoin lombut! Jagarih pio-pios inon ijo ihkam anaitepuioh, mangat eam ihcobehti ka mosopit hadiah komanang'kam. 3:12 Ulun ijo manang ahkan Ahku ngonjorian kolou johi a'ang Lohpou Borasih Ain Pohotala-Ku, tutang io ahkan mohcon ang unuk rih turus-jahamoh. Aran Pohotalak-Ku, tutang aran lowun Pohotalak-Ku -- yorih Yerusalem bohua ijo ahkan nosuluh tahkan soruga, tahkan Pohotalak-Ku -- ahkan Ahku nyurat aang behtin ulun rih. Ka'a arak-Ku ijo bohua ahkan Ahku nyuratoh aang aropoh. 3:13 Ia-iai dahpot ngonih, hondakrih io nohtoani inon ijo tonuhtui bain Roh Pohotala ahkan ukup-ukup!" 3:14 "Ahkan molehkat ukup ang Laodekia, nyurat koloutuh: Tuhrih pohtoh tahkan Sang Amen, Saksi ijo bokehtep tutang morong tohasak kokaro aang'co, ijo tona'oi bain Pohotala. 3:15 Ahku kota'an inon ijo ihkam nguai; Ahku kota'an ihkam eam sorongin eam ka'a podih. Koharusoh ihkam anai ihcooh! 3:16 Tahpi ihkam podi-podih kuhku; podih eam, sorongin ka eam. Orih tuluioh ihkam, ahkan Ahku nokahakoh soluka, tahkan luwang nyamak-Ku. 3:17 Ihkam nuhtui, 'Ihkai tahtou tutang uras sukup; ihkai eam tahpas ino-inon.' Tahpi ihkam eam kota'an eaminon komolarat tutang eaminon kosedihoh koada'an'kam! Ihkam porosbolum, hoburang, tutang bobulen. 3:18 Tului orih Ahku ningak ihkam mangat moli tahkanumba Ahku bulou, yorih bulou ijo borasih, mangat ihkam monjadi tahtou. Moli ka'a pokahjan puhti ijo tahkan aang Ahku, mangat ihkam hopokajan, tutang nuhtup keada'an'kam, ijo hoburang tutang ngomia. Tutang molirih hino totamba ahkan tomalit ang mahtan'kam, mangat ihkam dahpot nopahjah. 3:19 Ulun-ulun ijo Ahku ngasioh; iro ijo Ahku ningak tutang Ahku mahcatoh. Tului orih hondakrih ihkam bosomangat, tutang hubah tahkan dusa-dusan'kam. 3:20 Nohto! Ahku tombok ang baun bauntukang tutang negah. Amat anai ulun ijo ngonih auh-Ku, tutang nguap bauntukang, Ahku ahkan nyolong nyombang io; Ahku ahkan kuman hombo-homboh io, tutang io kuman sama-sama Ahku. 3:21 Iro ijo manang, ahkan Ahku ngijin-Oh tuot ang pododusan Aik-Ku hihco Ahku, sama kolou Ahku bongok ka jari manang, tutang huntuh tuot hihco Amai-Ku ang pododusan-Oh. 3:22 Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup!"
4:1 Uliorih rih ahku dahpot pongorinah hino. Ahku nohto ihco bauntukang bokuap ang soruga. Pongohino konahan huli auh, ijo aang pahtukoh ius bopander, umba ahku kolou auh sorunai. Auh rih nuhtui, "Has nuhkat ahkan ohtoi. Ahku ahkan ngorinah ahkan'kam inon ijo ahkan nyolung noin." 4:2 Turus iou ahku konowasa Roh Pohotala. Turus ahku nohto ang soruga anai ihcokobawak pododusan, tutang anai ihcobehti tuot ang pododusan rih. 4:3 Muhka ulun rih ngorolondong kolou poromata baiduri pandan, tutang poromata delima. Ihco liu kolou zamrud ngodiling pododusan rih. 4:4 A'ang tapai ngolikar mongodiling pododusan rih, anai duo pulu ohpat pododusan ijo bohkon. Anan tuot duo pulu ohpat okon ijo hopokajan puhti, tutang hapa ahkur bulou. 4:5 Tahkan pododusan rih soluka koloang kilat, tutang auh duhung ijo ngorutung. Tutang ang baun pododusan rih anai pihtu obor ijo honyala, orih kopihtu Roh Pohotala. 4:6 Todahpot ka'a ang boun pododusan rih ang'co, kolou tasik soramin kotining kolou kristal. Ang kodiling pododusan, ang nyinong saraioh, anai ohpat angbolum, ijo hila ang baun tutang hila lihkutoh tuwi umba mahta. 4:7 Aangbolum ijo pahtukoh gihtan kolou singa. Ijo koduooh kolou sahpi dalung. Ijo kotoluoh anaingina baui kolou baun ulun. Ijo koohpatoh, gihtan kolou bulung rajawali ijo rahat na'ang. 4:8 Koohpat angbolum rih, nyinong-nyinong anai onom ilat, tutang hokodilingoh, tutang ang sila luwangoh tuwi umba mahta. Hondou homalom angbolum-angbolum rih, eam tondo-tondooh monyanyi, "Borasih, borasih, borasih Tuhan, Pohotala Mahakowasa; ijo anai, ijo jari anai, tutang ijo anai toturusoh." 4:9 Koohpat angbolum rih monyanyi lagu-lagu tara, horomat tutang torimakasih ahkan Io, ijo tuot ang pododusan rih, yorih Io ijo bolum ahkan turus-jahamoh. Tutang ang ohkot angbolum-angbolum rih monyanyi, 4:10 koduo pulu ohpat okon rih, nyuruk-nyundop ang boun ulun ijo tuot ang pododusan rih, turus iro nyembah Io ijo bolum turus-jahamoh. Uliorih iro nyahkah ahkur-ahkur iro, nokuh boun pododusan rih hawui nuhtui, 4:11 "Yo Tuhan, yo Pohotalan ihkai! Ihko iourih ijo pahtut norima tara, horomat, tutang kowasa. Kotului Ihko iou pona'oi karo ang'co, tutang ngosan kohondak-Mu ka'a karo ang ang'co rih jari nyolung tutang bolum."
5:1 Pongohuli, ahku nohto ijo balun surat, ang longon Io ijo tuot ang pododusan rih. Surat rih tuwi umba surat ang sila-ngosilaoh, tutang tonyegeloh umba pihtu segel. 5:2 Turus ahku nohto ihcobehti molehkat ijo mamut na'ah-na'ah umba auh ijo hajo, "Iai ijo pahtut musit segel-segel tuh, tutang nguap surat tuh?" 5:3 Tahpi pios ang soruga kanika ang tana, ata'ai ang pinda tana sinoka eam anai sombang ihcobehti ka'a ijo sanggup nguap surat tuh, tutang nohto koluwangoh. 5:4 Mahka ahku nangih sosoguk tului eam anai ihcobehti ka ijo pahtut nguap surat rih, tutang nopahjah ko luwangoh. 5:5 Turus anai ihcobehti tahkan louk okon-okon rih, nuhtui umba ahku, "Ara nangih! Nohto! Singa tahkan uhtus Yahuda, lihit Dawid ijo hajo, jari manang. Io sanggup musit pihtu segel tutang nguap surat rih." 5:6 Pongohino ahku nohto ihcokungan Anak Tobiri, tombok ang tohun pododusan-pododusan rih, tokodiling bain koohpat angbolum tutang paring okon rih. Anak Tobiri rih gihtanoh kolou jari tonyombolih. Io tepun pihtu tanduk tutang pihtu mahta; yorih pihtu roh tahkan Pohotala, ijo jari tonyuhu nokuh hopus kolunon. 5:7 Pongohuli Anak Tobiri rih miar, tutang ngomin balun surat rih, tahkan longon kotoun ulun ijo tuot ang ngosan pododusan. 5:8 Pondehan Anak Tobiri rih nguan kolourih, sembah-sukuh koohpat angbolum tutang koduo pulu ohpat ohkon rih ang husukoh. Iro nyino-nyinong nambit kocahpi tutang pihkan bulou ijo bosuang manyan, yorih do'a-do'a ukup Pohotala. 5:9 Iro monyanyi ihco lagu ijo bohua: "Ihko pahtut ngomin surat rih tutang musit segel-segeloh. Tului Ihko jari tomunu, tutang honong popahtoi-Mu, ulun tahkan kokaro lihting, bohasa, nogara tutang uhtus jari tonomoli bain'mu ahkan Pohotala. 5:10 Ihko jari ngonjodian iro ihco uhtus khusus imam-imam, mangat iro mohalu Pohotalan ihto tutang moretah ang ngosan tana." 5:11 Pongohuli ahku nohto hino. Ahku ngonih auh molehkat, ijo bo kuhja-kuhjan tutang bo laksa-laksa karoioh. Iro tombok ngodiling pododusan tutang koohpat angbolum, homboh okon-okon rih. 5:12 Tutang iro monyanyi umba auh ijo muhing, "Anak Tobiri ijo jari tonyombolih rih, pahtut ahkan norima kowasa, ponahtou, kopihtaran tutang koba'as; Io pahtut tonohoromat iou, tonohajo, tutang tonara-nara!" 5:13 Turus ahku ngonih angbolum-angbolum ang langit, ang tana, ang pinda tana, tutang ang luwang tasik -- kourusoh angbolum-angbolum rih ang hopus-pinda-langit tuh -- monyanyi, "Io ijo tuot ang ngosan pododusan, tutang Io Anak Tobiri rih, anairih tonara tutang tonohoromat, hawui ponohajo tutang bokowasa ahkan turus-jahamoh!" 5:14 Mahka koohpat angbolum rih numbah, "Amen!" Tutang okon-okon rih ka'a suhkuntu'ut tutang nyembah.
6:1 Uliorih rih ahku nohto Anak Tobiri rih musit segel, ijo pahtukoh ang louk kopihtu segel rih. Turus ahku ngonih ihco ang louk koohpat angbolum rih nuhtui, "'Kan otoi!" Auh tuhtuioh rih kolou auh duhung. 6:2 Mahka ahku nohto, turus gihtan ihcokungan kuda puhti. Ponunggangoh nambit ihco owuh panah, tutang ahkaioh tononga ihco ahkur. Io maju kolou ihcobehti ijo manang, ijo tulak nyomba'an komanang. 6:3 Pongohuli Anak Tobiri rih musit segel ijo koduo, tutang ahku ngonih angbolum ijo koduo rih nuhtui, "'Kan otoi!" 6:4 Turus ihcokungan kuda ijo bohkon nyoluka hino. Kuda rih bohandang kolouoh. Ponunggangoh tononga kowasa polonyuh koada'an damai tahkan ngosan tana, mangat ulun saling munu. Mahka io tononga ihco padang ijo hajo. 6:5 Turus Anak Tobiri rih musit segel ijo kotolu. Tutang ahku ngonih angbolum ijo kotolu nuhtui hioi, "'Kan otoi!" Ahku nohto, mahka gihtan ihcokungan kuda mitom. Ponunggangoh nambit ihco kopasang timbang ang longoioh. 6:6 Tutang ahku ngonih angihco ijo konahan kolou auh ijo na'ah, tahkan tohun-tohun koohpat angbolum rih. Auh rih nuhtui, "Ihco liter gandum, ijo pios boregai ahkan upah ihcoondou, tutang tolu liter gandum mahcam bohkon ijo borega upah ihcoondou ka'a. Tahpi ara morusakoh pu'un-pu'un zaitun tutang pombulan anggur!" 6:7 Pongohuli Anak Tobiri rih musit segel ijo koohpat. Tutang ahku ngonih angbolum ijo koohpat nuhtui, "'Kan otoi!" 6:8 Ahku nohto turus gihtan ihcokungan kuda ijo puhcat. Ponunggangoh bogare popahtoi. Tahkan lihkutoh, io tonutut doni-doni bain Lowun Popahtoi. Kowasaioh ngosan soporahpat tana tuh tonosorah ahkan iro, mangat iro dahpot munu nguha kolahi, nguha wayah bolo'u, nguha wabah pondamporos, tutang nguha ohcin-ohcin bosiak. 6:9 Uliorih rih Anak Tobiri rih musit segel ijo kolimo. Mahka ahku nohto ang pinda mesbeh, anai homboruan-homboruan ulun-ulun ijo mahtoi tomunu, bain iro ngondehen pohtoh tahkan Pohotala, nguha kosaksian iro. 6:10 Iro ngombak hawui auh ijo muhing, "Yo Tuhan Ijo Mahakowasa, ijo borasih tutang morong! Pira kotahiu hino punan Ihko mosara ulun kolunon, tutang mohukum iro, tului iro jari munu ihkai?" 6:11 Iro nyino-nyinong, tononga ihco kolambar jubah ijo puhti. Turus iro sonuhu ngerenghasong eamtahi hino, johcok jari sukup jumbalah, sobat-sobat sokolahi tutang konduang-konduang iro, ijo ahkan tomunu kolou iro. 6:12 Turus ahku nohto Anak Tobiri rih musit segel ijo koonom. Nyolung tana moruguh ijo karas. Mahtan ondou monjadi mitom, kolou benang mitom ijo kasar, tutang bulan bohandang kolou daha. 6:13 Potion-potion sokomedapboduruh tahkan langit nokuh ngosan tana, kolou bua sikun ijo nolahus boduruh tahkan da'aioh aang ohkot tonoruhkuh bain bahiu bolowut. 6:14 Langit dilap kolou korahtas tonombalun, tutang paring puruk tutang pulou-pulou tokisat tahkan unukoh. 6:15 Turus lahca-lahcan kolunon, ulun-ulun hajo, pongkolima-pongkolima, ulun-ulun tahtou, tutang ulun-ulun bokowasa, tutang ulun-ulun bohkonoh, pios jihpon kanika ulun ijo morodehka, paringoh nyuhuk arop ang luwang guha-guha, tutang ang holat-holat puruk bahtu. 6:16 Ahkan puruk-puruk tutang bahtu-bahtu rih iro bokohciak, "Nopahas ihkai! Posuhuk ihkai tahkan topahjah Tuhan ijo tuot ang ngosan pododusan tutang tahkan kosingi Anak Tobiri rih! 6:17 Ondou dahsyat ius lombut, uhuntuh iro nusuh kosangit iro, tutang eam ihcobehti ka sanggup botahan ang husuk iro!"
7:1 Uliorihrih, ahku nohto ohpat behti molehkat tombok ang koohpat puhting tana. Iro monahan koohpat mahtan bahiu ang tana, mangat ara anai bahiu ijo nahpi ang isun tana, ata'ai ang tasik, ata'ai ang pu'un-pu'un kahju. 7:2 Turus ahku nohto ihcobehti molehkat ihco bohkon, soluka tahkan sila timur, Io ngomin segel tahkan Pohotala ijo bolum. Umba auh ijo muhing molehkat rih na'ah koohpat molehkat ijo jari dahpot kowasa tahkan Pohotala ahkan morusak tana tutang tasik. 7:3 Molehkat rih nuhtui, "Ara houn morusak isun tana tutang tasik, ata'ai ka pu'un-pu'un kahju amat ihkai jaha nonga tanda segel ang likou jihpon-jihpon Pohotalan ihto." 7:4 Turus ahku tonyorihta, ijo anai ihco jombalah 144.000 behti ijo tononga tanda segel tahkan Pohotala ang likou iro. Ulun-ulun rih tongomin tahkan koduo balas suku uhtus Israel; 7:5 tahkan nyinong suku 12.000 behti. Yorih tahkan suku: Yahuda, Ruben, Gad, 7:6 Asyer, Naftali, Manasye, 7:7 Simeon, Lewi, Isakhar, 7:8 Zebulon, Yusep, tutang Benyamin. 7:9 Uliorih ahku nohto hino, turus gihtan tuyuk kolunon ijo holuhcak karoioh -- eam anai ihcobehti ka ijo dahpot ngise jombalahoh. Iro anairih ulun-ulun tahkan nyinong uhtus, suku, nogara tutang basa. Umba hopokajan jubah ijo puhti-puhti, tutang hawui nambit da'an daun korma ang longoi, noharep pododusan tutang noharep Anak Tobiri rih. 7:10 Turus umba auh ijo muhing iro bososurak, "Kosolamatan ihto, polombutoh tahkan Pohotalan ihto, ijo tuot ang ngosan pododusan; tutang tahkan Anak Tobiri rih!" 7:11 Paring molehkat tombok ngodiling pododusan, tutang okon-okon hawui koohpat angbolum rih. Molehkat-molehkat rih sohumbok ang baun pododusan turus nyembah Pohotala. 7:12 Iro bososurak, "Amen! Tara ahkan Pohotalan ihto ijo hajo tutang pihtar. Io pahtut tonusuh umba auh-auh torimakasih tutang kohoromatan. Io bokowasa tutang ba'as ahkan turus-jahamoh! Amen." 7:13 Anai ihcobehti tahkan okon-okon rih ngisok umba ahku, "Ulun-ulun ijo hapa jubah puhti tuh, iai iro tutang tahkan umoh iro lombut?" 7:14 "Ahku eam kota'an, Tuan, Tuan bongon ijo ta'an," mutah'ku. Mahka io nuhtui umba ahku, "Tuhrih ulun-ulun ijo jari hawui solamat nguha wayah konoporos ijo hebat. Iro jari muhi jubah iro tutang napaoh monjadi puhti umba dahan Anak Tobiri rih. 7:15 Orih kotuluioh iro tombok ang toharep pododusan Pohotala, tutang sombayang ahkai-Oh hondou ngolomi ang luwang Lohpou Pohotala. Tutang Io ijo tuot ang ngosan pododusan rih, ahkan lombut umba iro, ahkan ngolindung iro. 7:16 Iro eam ahkan hino nanyam kolou ata'ai tohjahbolai; mahtan ondou ata'ai ka'a kopodihoh eam hino ahkan mahpong iro, 7:17 kotului Anak Tobiri ijo tuot ang tohun-tohun pododusan rih nyolung sokahtik iro. Io ahkan ngitut iro nokuh tohasak danum ijo nonga pombolum. Tutang Pohotala ahkan ngapit karo danum mahto tahkan mahton iro."
8:1 Ohkot Anak Tobiri rih musit segel ijo kopitu, soruga monjadi tonih tutang kotahin kurang-labih sotongah jam. 8:2 Turus ahku nohto kopihtu molehkat ijo tombok ang toharep Pohotala, tutang ahkan iro tononga pihtu kobawak sorunai. 8:3 Ihcobehti molehkat bohkon, ijo ngomin dadupa bulou, lombut tutang tombok ang baun mesbeh. Ahkaioh tononga aro samasino manyan ahkan tomuwur ang do'a-do'a paring ukup Pohotala tutang ahkan tonyorah ang mesbeh bulou ijo anai ang baun pododusan. 8:4 Homboh umba do'a-do'a ukup-ukup Pohotala, asop duhpa ijo rahat bolum rih nyolobowuk nuhkat tahkan longon molehkat ijo tombok ang baun Pohotala rih. 8:5 Pongohuli molehkat rih ngomin dadupa orih, tutang nyuangoh umba baho tahkan mesbeh turus nyahkahoh nokuh ngosan tana. Mahka duhung ka'a ngorutung tutang kilat tutung-hotutung, tutang nyolung tana horuguh. 8:6 Uliorih, pihtu molehkat ijo nambit pihtu sorunai rih botahtap ahkan moposoh. 8:7 Molehkat pahtuk mopos sorunaioh, mahka uhjan es tutang baho sampur daha boduruh hawui pahamoh nokuh ngosan tana. Ihco pertolu tana opah bosaha, kolourih ka'a ihco pertolu tahkan pu'un-pu'un kahju, tutang nyinong uru ijo bohijou. 8:8 Turus molehkat koduo mopos sorunaioh, mahka angihco ijo paham hajo ijo gihtan kolou puruk ijo honjelak-honjelau tonyahkah koluwang tasik. Sepertolu tasik boubah monjadi daha, 8:9 tutang mahtoirih sepertolu karo angbolum ang tasik; kolou rih hino dilap ka'a sepertolu tahkan karon-kapal. 8:10 Uliorih molehkat kotolu mopos sorunaioh, mahka ihco kobawak potion ijo hajo, ijo honyala kolou sohowan, nyahtu tahkan langit, turus nopahas sepertolu tahkan sungoi-sungoi tutang kombuhak-kombuhak danum. 8:11 (Aran potion rih "Poit".) Mahka sepertolu tahkan danum monjadi poit, tutang mahtoi aro ulun kotului ngorih danum ijo jari monjadi poit rih. 8:12 Turus molehkat koohpat mopos sorunaioh. Mahka bokiwak sepertolu tahkan mahtanondou, sepertolu tahkan potion-potion, nyiring dilap sepertolu tahkan koba'as koloang iro. Ka'a sepertolu tahkan hondou eam boloang tutang kolourih ka'a sepertolu tahkan ngolumi. 8:13 Turus ahku nohto, mahka ahku ngonih ihcokungan bulung rajawali ijo rahat na'ang isung ang bounondou, na'ah, "Colahka! Colahka! Colahkarih paring ulun ang tana, amatmira ngonih kotolu molehkat bohkonoh mopos sorunaioh noin!"
9:1 Turus molehkat kolimo mopos sorunaioh, tutang ahku nohto ihco potion ngonyahtu tahkan langit kongosan tana. Potion rih tononga kuhci lowun popahtoi. 9:2 Mahka potion rih nguap lowun popahtoi rih, turus asop soluka tahkan luwangoh kolou asop tahkan dahpur hajo. Mahtanondou tutang angkasa monjadi pindong bain asep tahkan lobohurih. 9:3 Turus tahkan luwang asop rih, soluka mokalap-mokalap ijo nosuluh ahkan tana. Mokalap-mokalap rih, tononga kowasa ijo sama kolou ijo tononga ahkan kahtipkala. 9:4 Iro ngohana morusak uru, ata'ai pu'un-pu'un kahju, ata'ai kombulan-kombulan bohkonoh. Iro tihkas tou nyarang ulun-ulun ijo ang lihkouoh eam anai tanda segel tahkan Pohotala. 9:5 Mokalap-mokalap rih, eam tonongaijin munu ulun-ulun dih, molekan tihkas nyiksa iro kotahin limo bulan. Nyilu ijo kotuluioh bain siksa mokalap-mokalap rih sama kolou nyilu ijo kotuluioh bain kahtipkala. 9:6 Kotahin limo bulan rih, ulun-ulun rih bousaha mangat mahtoi, tahpi iro eam tou mahtoi; iro jolik mahtoi, tahpi popahtoi mahcu tahkan iro. 9:7 Tapan mokalap rih sama kolou kuda ijo tahtap ahkan parang. Ang kuhung iro anai ang'co, ijo topahjah kolou ahkur bulou. Mahka iro kolou boun kolunon. 9:8 Balou iro kolou balou ulunbawi, tutang nyihpon iro kolou nyihpon singa. 9:9 Husuk iro tonuhtup umba angihco, ijo mirip baju bosi. Auh ilat iro kolou auh, jombalah hajo korehta-korehta kuda ijo rahat monyarang a'ang kolahi. 9:10 Iro anaingina ikuh, tutang ngina butut kolou kala. Tutang ang luwang ikuh iro orihrih anai koba'as, ahkan nyiksa kolunon kotahin limo bulan. 9:11 Iro anaingina lahca ijo moretah iro, tutang lahca rih, iorih, molehkat ijo botanggung-jawab ngosan lowun popahtoi. Konohawotoh ang a'ang bahasa Ibrani, iorih Abadon; tutang ang a'ang bahasa Yunani konohawot Apolion (ijo rimaioh "Porusak!"). 9:12 Colahka ijo pahtuk jari nokalou. Uliorih rih, anai duo colahka hino ijo harus lombut. 9:13 Pongohuli molehkat ijo koonom, mopos sorunaioh. Mahka ahku ngonih auh lombut tahkan koohpat pahting mesbeh bulou ijo anai ang husuk Pohotala. 9:14 Auh rih nuhtui umba molehkat koonom rih, "Liwusiourih koohpat molehkat ijo ponohtong ang Sungoi Efrat rih!" 9:15 Koohpat molehkat rih ka toliwusoh. Iro jari tonyodia khusus, ahkan jam, ondou, bulan, toun rih, tutang ahkan munu sepertolu tahkan paring ukup kolunon. 9:16 Ahku tonyorihta ijo jumbalahoh kawan-kawan bokuda rih, anairih karoi duo ratus kuhjan. 9:17 Tutang a'ang pongorinah rih, ahku nohto kuda-kuda rih, tutang ponunggang-ponunggangoh. Ponunggang-ponunggangoh hapa baju bosi ijo warna bohandang ngonjolak, biru kolou bahtu nilam, tutang hendan sandawa. Kuhung kuda-kuda rih, kolou kuhung singa, tutang ang nyamaioh soluka baho, asop tutang sandawa. 9:18 Sepertolu tahkan ukup kolunon tomunu bain tolu porusak orih; iorih baho, asop tutang sondawa ijo soluka tahkan nyaman kuda-kuda rih. 9:19 Koba'as kuda-kuda rih anai ang nyamaioh tutang ka'a ang ikuhoh. Ikuh-ikuhoh, kolou lohi hokuhung. Umba ikuhoh rih, kuda-kuda rih monyiksa kolunon. 9:20 Tahpi putan ukup kolunon ijo eam tomunu bain porusak-porusak rih ka, eam hino nohtah gawin longon iro bongoi. Iro eam tondo nyembah roh-roh ja'at tutang dewa-dewa bulou, perak, tombaga, bahtu tutang kahju ijo eam dahpot nohto ata'ai ngonih, ata'ai ka nyalan. 9:21 Iro eam hino nohtah, gawin-gawin iro ijo ja'at, iorih pomunu, ilmu-ilmu seher, nyundal tutang ponahkou.
10:1 Turus ahku nohto ihcobehti molehkat mamut ijo bohkon nosuluh tahkan soruga. Io tongolindung bounondou tutang 'cobarih liu ngolikang kuhungoh. Bauioh momancar kolou mahtanondou, tutang pa'ai kolou buhtup baho. 10:2 Ang longoioh, anai ihco kobalun surat koik ijo bokuap. Pa'ai koto'uioh botihcak ang tasik, tutang pa'ai komuloioh botihcak ang diangtana. 10:3 Turus io na'ah umba auh ijo muhing kolou mongaumoh singa-singa. Uli molehkat rih na'ah, kopihtu duhung mutah umba auh ngorutung. 10:4 Kolourih kopihtu duhung rih homauh, ahku kani moncatatoh, tahpi ahku ngonih auh tahkan soruga nuhtui, "Rahasiaohrih inon ijo tonuhtui bain kopihtu duhung rih; ara moncatatoh!" 10:5 Turus molehkat ijo ahku nohtooh botihcak ang tasik tutang ang diangtana rih, ngahtang longoi koto'uioh nokuh langit. 10:6 Io botulut hapa aran Pohotala ijo bolum turus-jahamoh, ijo naoi langit, tana tutang tasik, umba kokaro ang'co, ijo anai ang luwangoh. Molehkat rih nuhtui, "Ohkotoh eam ahkan tonguhut hino! 10:7 Tahpi amatmira molehkat kopihtuoh mohpos sorunaioh, Pohotala ahkan molalus rancana rahasia-Oh, kolou ijo jari Io mborihtaoh ahkan jihpoi-jihpoi-Oh, yorih dolang nabi." 10:8 Pongohuli auh ijo jari ahku ngonih tahkan soruga rih, pander hino umba ahku. Io nuhtui, "Tulakiou, omin balun buhku ijo bokuap, ang longon molehkat ijo monihcak ang tasik tutang ang diangtana rih." 10:9 Mahka ahku ka tulak, nokuh molehkat rih, tutang nyawot, mangat io nonga balun koik rih ahkak'ku. Io mutah, "Ominrih tutang kumairih tuh. Ang luwang butui'mu io ahkan monjadi poit, tahpi ang luwang nyaman'mu io manih kolou oling." 10:10 Ahku ngomin balun koik rih tahkan longoioh turus kumaioh. Ang nyamak anyamoh kolou oling, tahpi uli ahku nolonoh, ang luwang butui'ku io monjadi poit. 10:11 Pongohino ahku tonyuhu, "Nyiariourih sino hino borihta tahkan Pohotala tohou uhtus-uhtus, nogara-nogara, basa-basa, tutang lahca-lahca."
11:1 Uliorih rih, ahku tononga cokotohtok kahju ijo mirip doroh sukah ponihpong, turus tonyuhuoh, "Tulak nihpong Lohpou Pohotala tutang mesbeh. Lehkenrih pira ulun-ulun ijo sombayang ang luwangoh. 11:2 Tahpi ara nihpong konaha ang sila luar Lohpou Pohotala rih, tului bagian orih jari tonosorah ahkan ulun-ulun ijo eam kosono Tuhan. Iro ahkan nihcak-ngihik lowu ijo borasih rih, kotahin ohpat pulu duo bulan. 11:3 Ahku ahkan nyuhu duo behti saksiaik-Ku ijo hapa pokahjan bidak, tutang iro ahkan mborihta Kabar Hinut tahkan Pohotala, kotahin, sokuhjan duo rahtus onom pulu ondou." 11:4 Duo saksi rih anai duo bahtang pu'un zaitun tutang duo totahan pa'an sumbu ijo dahpot ang toharep Tuhan semesta alam. 11:5 Amat ulun mocoba nguan ang'co ijo eam pios, toharep iro, mahka tahkan nyaman iro bolua baho, ijo morusak musuh-musuhoh. Umba cara kolourih, paring ulun ijo kani ngoporos iro ahkan tomunu. 11:6 Iro anaingina kowasa ahkan ngahtop langit, mangat ara uhjan kotahin iro mborihta, borihta tahkan Pohotala. Iro anaingina ka'a kowasa ngosan paring sahai danum, tutang ngubah danum monjadi daha. Tutang iro anaingina hino kowasa ahkan nahup tana umba mahca-mahcam porusak, mira iou iro tou nguaioh. 11:7 Uli iro ohpah mborihta borihtan iro, ohcin ijo bolua tahkan lowun popahtoi ahkan molawan iro. 11:8 Tutang otun iro, ahkan borolatung ang jalan rami lowu hajo, ang amoh Tuhan iro tomahpak. Aran tindung lowu rih Sodom ata'ai Misir. 11:9 Ulun-ulun tahkan paring nogara, suku, basa, tutang uhtus, ahkan nohto otun iro kotahin tolu sotongah ondou, tutang eam mongijin otu-otu rih tonanom. 11:10 Ponduduk tana ahkan hokojorih ngosan popahtoi koduo saksi rih. Iro ahkan mestaoh tutang saling mongirim hadiah, tului koduo behti nabi rih, mopolombut aro siksa ahkan paring ulun ang tana. 11:11 Uli tolu sotongah ondou, lombut hasong bolum tahkan Pohotala, tutang nyolong hino koluwang koduo behti nabi rih. Iro ka hikat tombok, nyiring paring ulun ijo nohto iro, nyolung mihkoh samasino. 11:12 Pongohuli koduo behti nabi rih, ngonih auh hajo ijo na'ah iro tahkan soruga, "Olai, nuhkat nokuh ohtoi!" Turus ang toharep mahtan musuh-musuh iro, iro ka'a hogahtang nokuh soruga, tongolindung bain bounondou. 11:13 Mahka ang ohkot rih nyolung tana moruguh ijo paham. Sepersopulu kobagi tahkan lowu rih luhtek, tutang pihtu kuhjan behti palus, bain tului tana moruguh rih. Ulun-ulun bohkonoh nyolung mihkoh samasino, turus iro monara kohajon Pohotala ang soruga. 11:14 Colahka ijo koduooh jari tonguha. Tahpi nohto hino! Colahka ijo kotolu eamtahi hino ahkan ngahasu. 11:15 Turus molehkat ijo kopihtu mohpos sorunaioh, mahka ang soruga konahan auh-auh muhing samasino ijo nuhtui, "Kokuwasa'an ahkan moretah kolunon, anai huntuh a'ang longon Tuhan ihto, tutang Lahca Ponyolamat, ijo tonobowot-Oh. Io ahkan moretah ahkan turus-jahamoh!" 11:16 Mahka koduo pulu ohpat okon, ijo tuot ang pododusan iro ang tohimo Pohotala, suhkuntu'ut tutang nyembah Pohotala. 11:17 Iro nuhtui, "Tuhan, Pohotala Mahakowasa, ijo anai, tutang ijo jari anai! Ihkai botorimakasih ahkan-Mu kotului Ihko jari hapa kowasan-Mu ijo hajo, tutang jari nopara moretah! 11:18 Ulun-ulun ijo eam kosono Tuhan, ngamuk kotului jari ohkotoh Ihko nusuh kosangit-Mu, tutang jari hino ohkotoh Ihko mosara ulun-ulun mahtoi. Tuh rih wayahoh ahkan nonga upah ahkan jihpon-jihpon-Mu nabi-nabi, tutang ahkan paring ukup-Mu, yorih paring ulun ijo sombayang ahkan-Mu hajo oluka koik. Tuh rih ohkotoh ahkan molonyuh ulun-ulun ijo molonyuh tana!" 11:19 Mahka tokuaprih Lohpou Pohotala ang soruga, tutang gihtanrih Pohti Bowot ang luwangoh. Turus nyolung kilat tutung-hotutung, tutang auh duhung guhu-guhup tutang ngorutung, hawui tana hogerek tutang uhjan es ihco labat.
12:1 Turus gihtan ang langit ang'co ijo helan, tutang luar biasa. Ihcobehti bawi ijo hapa mahtanondou kolou hahtiuoh, rahat tombok ang ngosan bulan. Ang kuhungoh dahpot ihco ahkur ijo tonawas tahkan duo balas potion. 12:2 Ulunbawi rih uhun botohi, tutang kotului jari ohkotoh ahkan nganak, mahka io norahing poros humi. 12:3 Turus gihtan hino ang langit ang'co ijo helan. Anai ihcokungan naga bohandang ijo hajo samasino, ijo anaingina pihtu kuhung, tutang sopulu tanduk. Nyinong kuhungoh hapa ihco ahkur. 12:4 Umba ikuhoh io mohaer sepertolu tahkan potion-potion ang langit, tutang nyakahoh nokuh tana. Naga rih tombok hila boun ulunbawi ijo kani nganak rih, honong nohuang nolon anakoh, kolourih io nganak. 12:5 Turus ulunbawi rih nganak ihcobehti anak bahkas, ijo ahkan moretah paring uhtus umba sukah bosi. Tahpi anak rih, tonosuwit tahkan ulunbawi rih, turus tonomin nokuh Pohotala tutang noharep pododusai-Oh. 12:6 Mahka ulunbawi rih nokoru, ahkan padang balambah, nokuh unuk ijo jari tonahtap bain Pohotala bagioh. Ang unuk rih io ahkan tonojaga sokuhjan duo rahtus onom pulu ondou kotahiuoh. 12:7 Turus ang soruga nyolung kolahi, Mikhael umba molehkat-molehkatoh kolahi molawan naga rih. Tutang naga rih ka'a ijo dohop bain molehkat-molehkatoh, molawan Mikhael. 12:8 Tahpi naga rih tonokalahoh. Io tutang molehkat-molehkatoh eam tononga ijin hino mohcon ang soruga. 12:9 Naga ijo hajo dih dian nokuh luar! Iorih lohi oko orih, ijo bogare Sehtan ata'ai Roh Ja'at, ijo ngobalik sohopus kolunon. Io ndian nokuh kolunon hawui kokaro molehkatoh. 12:10 Turus ahku ngonih auh ijo muhing ang soruga nuhtui, "Uhuntuh ohkotoh Pohotala monyolamat ukup-Oh! Uhuntuh Pohotala ngorinah kowasai-Oh kolou Lahca! Uhuntuh Lahca Ponyolamat ijo tonobowot rih, ka'a ngorinah, kowasa-Oh! Tului ijo mondawa konduang-konduang ihto ang toharep Pohotala hondou tutang ngolomi, jari tonyoluka tahkan soruga. 12:11 Konduang-konduang, ihto jari mongalah io umba dahan Anak Tobiri rih, tutang honong borihta morong tahkan Pohotala ijo iro mborihtaoh. Iro rela monyorah hasongoh nyiring mahtoi. 12:12 Kotului rih, hondakoh soruga tutang paring ijo mohcon ang luwangoh bojori-jorih! Tahpi colahka tana tutang tasik, kotului Sehtan jari mosuluh ahkan'kam hawui bosingi ijo paham hajo, tului io ta'an ijo ohkotoh mohcon honjiot hino." 12:13 Aang ohkot naga rih borondong, ijo io jari ndian ahkan tana io nopara hodulu ulunbawi, ijo jari nganak anak bahkas rih. 12:14 Tahpi ulunbawi rih tononga duo ilat bulung rajawali ijo hajo, mangat io na'ang nokuh unukoh ang padang balambah, ang anan io ahkan tonojaga kotahin tolu setongah toun, tomokila tahkan tonyarang naga. 12:15 Mahka naga rih monopurus tahkan nyamaioh aro samasino danum nitu ulunbawi rih, ahkan ngohanyutoh. 12:16 Tahpi tana dohop ulunbawi rih, tana nguap nyamaioh tutang nolon danum ijo bolua tahkan nyaman naga rih. 12:17 Naga rih monjadi bosingi samasino umba ulunbawi rih, nyiring io tulak nyarang lihit ijo bohkon tahkan ulunbawi rih, yorih paring ulun ijo mone'et poretah-poretah Pohotala, tutang ijo nonga kosaksian tohou Yesus tutang Kowasa-Oh. 12:18 Turus naga rih tombok ang saran pantai.
13:1 Pongohuli ahku nohto ihcokungan ohcin lombut tahkan luwang tasik. Io anaingina sopulu tanduk tutang pihtu kuhung. Aang nyinong tandukoh anai ihcokobawak ahkur, tutang ang nyinong kuhungoh tonyurat aran mopohina toharep Pohotala. 13:2 Ohcin ijo ahku nohto rih tapaioh kolou mahcan tutul tutang pa'ai kolou pa'an bohuang tutang somoyongoh kolou somoyong singa. Turus ohcin rih nonga bain naga rih koba'asoh bongoi, tutang pododusaioh tutang karokowasa-Oh ijo hajo. 13:3 Ihco tahkan holat kopihtu kuhung a'ang ohcin rih, topahjahoh kolou himang parah samasino, tahpi himang rih jari pios. Sohopus tana ngohasu ohcin rih hawui nanyam hebat. 13:4 Tutang iro momuji naga rih, tului io jari nonga kuwasaioh ahkan ohcin rih. Tutang iro momuji ohcin rih ka'a. Iro nuhtui, "Eam aro ijo sama umba ohcin tuh! Eam aro ijo dahpot hokolahi molawan io!" 13:5 Ohcin rih tongohonou ngohawot hal-hal ijo paham angkuh tutang mohina Pohotala. Io tihkastou moretah ohpat pulu duo bulan kotahiuoh. 13:6 Turus io nopara mohina Pohotala, tutang aran Pohotala. Kolourih hino unuk mohcon Pohotala, tutang paring ijo mohcon ang soruga ka tonohinaoh. 13:7 Io tihkastou ka'a molawan ukup Pohotala hawui ngalah iro. Tutang kokowasa ngosan paring lihting nogara, basa, tutang uhtus tononga ahkaioh. 13:8 Ohcin rih ahkan tononyembah bain paring ulun ijo bolum ang ngosan tana, kocoali ulun-ulun ijo araioh jari tonoliting hounumba kolunon tona'oi, ang luwang surat ulun bolum ain Anak Tobiri ijo ius tonyombolih. 13:9 Tului rih amat ihkam sanggup ngonih, ngonih rih borihta tuh, 13:10 "Ulun ijo harus tonawan, musti ahkan tonawan. Tutang ulun ijo harus tomunu umba padang, musti ahkan tomunu umba padang. Orih rih kotuluioh ukup Pohotala pahtut tabah tutang bokehtep." 13:11 Turus ahku nohto ihcokungan ohcin bahkon lombut tahkan luwang tana. Io anaingina duo tanduk, kolou tanduk anak tobiri. Auhoh kolou auh naga. 13:12 Ang husuk ohcin ijo pahtukoh rih, io hapa kowasaan ijo hajo ijo ngondahpotoh tahkan ohcintana rih ka'a. Sohopus tana tutang paring ijo mohcon ang ngosanoh, tohojojuanoh nyembah ohcin ijo pahtukoh rih, ijo bohimang parahoh jari pios. 13:13 Ohcin ijo koduo rih, nguan tandahelan-tandahelan ijo hajo. Ang husuk paring ulun, io napa baho mosuluh tahkan langit nokuh tana. 13:14 Tutang paring ulun ijo bolum ngosantana tongoalikoh, umba tandahelan-tandahelan ijo tou tonguaioh ang husuk ohcin ijo pahtuk orih. Tutang iro paringoh tonyuhuoh nombok ihco kopahtung tahkan ohcin ijo jari bohimang bain padang, tahpi magun bolum. 13:15 Ohcin ijo koduo rih, tongoduonoh nonga hasong ahkan kopahtung rih, nyiring kopahtung rih dahpot bopander, tutang munu paring ulun ijo eam kani nyembahoh. 13:16 Paring ulun hajo, tutang koik, tahtou tutang porosbolum, jihpon tutang ulunmorodehka, hojojuan nyembah kopahtung bain ohcin rih, ahkan norima tanda aang longon kotaun iro ata'ai ang likou iro. 13:17 Eam ihcobehti ka dahpot moli ata'ai borahkang angihco, amat io eam anaingina tanda rih, iorih aran ohcin rih bongoi, ata'ai angka ijo pokarah aran rih. 13:18 Ang ohtoi porulu anai hikmat. Ulun ijo bijaksana dahpot morehken rimai tahkan angka ohcin rih, tului angka rih anai aran ihcobehti ulun. Angkaoh iorih 666.
14:1 Pongohino ahku nohto, turus gihtan Anak Tobiri rih tombok ang isun Puruk Sion. Homboh Io anai solahtus ohpat pulu ohpat kuhjan behti, ijo aang likou nyino-nyinong tonyurat arai-Oh tutang aran Amai-Oh. 14:2 Turus ahku ngonih auh tahkan langit, mongguruh kolou danum sahainyalut ijo hajo, tutang kolou korutung duhung ijo hebat. Auh rih konahan, kolou auh musik, tahkan pomain-pomain kocahpi ijo rahat nowah kocahpioh. 14:3 Ang baun pododusan tutang koohpat angbolum hawui dolang okon, ang kodiling pododusan rih 144.000 behti rih, monyanyi ihco nyanyian ijo bohua. Nyanyi orih eam dahpot tonyokula bain ihcobehti ka, bohkonumba tahkan 144.000 behti rih, ijo jari tomorodehkaoh tahkan tana. 14:4 Iro rih ulun-ulun ijo tahtap brasih kolou anakdara, tului eam nguan kohihco umba ulunbawi. Iro nutut Anak Tobiri rih, nokuh umoh iou Io tulak. Tahkan louk sohopus ukup ulun, irorih ijo jari tomorodehka kolou ponyorahan pahtukoh ahkan Pohotala tutang ahkan Anak Tobiri. 14:5 Eam pu'u iro ngobalik; tutang eam anai kosalan honjiot ka aang iro. 14:6 Turus ahku nohto ihcobehti molehkat bohkon, ijo na'ang ang langit. Molehkat rih ngomin borihta, tohau Kabar Hinut ijo abadi ahkan tonosiar, ahkan kolunon ang tana, yorih ahkan paring uhtus, lihting, basa tutang nogara. 14:7 Molehkat rih na'ah umba auh ijo muhing, "Mihkohrih ahkan Pohotala, tutang momuji kohajoi-Oh! Kotului jari ohkotoh Pohotala mosara kolunon. Nyembahrih Io ijo naoi langit, tana, tasik, tutang paring tohasak danum!" 14:8 Molehkat koduo ngohasu molehkat ijo pahtuk sambil na'ah, "Jari ngonyahtu! Lowu Babel ijo hajo jari ngonyahtu! Io jari nguan karo uhtus monjadi busou umba danum anggur -- yorih tahkan bolai kihaloh!" 14:9 Ihcobehti molehkat kotolu ngohasu duo molehkat rih, sambil na'ah umba auh ijo muhing, "Ulun ijo momuji ohcinrih honong kopahtungoh, tutang anaingina tanda ohcin rih aang likou ata'ai ang longoioh, 14:10 ulun rih ahkan ngorih anggur Pohotala, yorih anggur kosangit-Oh ijo jari tonusuh-Oh koluwang kondarah-Oh, eamanai tongurang honjiot ka! Paring ulun rih ahkan tonosiksa, aang luwang baho tutang sondawa, ang toharep molehkat-molehkat brasih tutang ang toharep Anak Tobiri rih. 14:11 Asop tahkan baho ijo monyiksa ulun-ulun rih, ahkan nyolobuwuk hototurus ahkan turus-jahamoh. Hondou, ngolomi, eam anai tondo-tondooh, iro tonosiksa yorih, iro ijo nyembah ohcin rih tutang pahtungoh, paring ulun ijo anaingina tanda aran ohcin rih." 14:12 A'ang hal tuh ukup Pohotala, ijo bokehtep umba poretah-poretah Pohotala, tutang tehen umba Yesus, porulu monjadi tabah. 14:13 Turus ahku ngonih auh tahkan soruga nuhtui, "Nyuratrih tuh: Nopara huntuh, kosanangrih ulun-ulun ijo mahtoi rahat hino mohalu Tuhan!" "Morong!" putah Roh Pohotala. "Iro ahkan tondo bogawi paham, tului bua pohalu iro, toturus ahkan homboh iro." 14:14 Pongohuli ahku nohto, mahka gihtan ihco bounondou ijo puhti. Ang ngosan bounondou rih, tuot ihcobehti, ijo topahjahoh kolou kolunon. Ang kuhung-Oh 'jokobawak ahkur bulou, tutang ang longoi-Oh anai ihcokobilap getukohtom ijo bonyihi. 14:15 Pongohuli ihcobehti molehkat bohkon soluka tahkan Lohpou Tuhan. Umba auh ijo muhing, io na'ah umba Io ijo tuot ang ngosan bounondou rih, "Ngohtomohrih umba getu-Mu rih, tutang ngohtomrih huntuh, tului jari ohkotoh ahkan panen: Kolunon jari masak ahkan tongohtom!" 14:16 Turus Io ijo tuot ang ngosan bounondou rih, ngohtom umba getu-Oh nokuh tana, mahka tana ka tokohtom. 14:17 Pongohino ahku nohto ihcobehti molehkat ijo bohkon hino, soluka tahkan Lohpou Pohotala ang soruga. Io ka nambit ijo getu ijo bonyihi. 14:18 Uliorih rih, ihcobehti molehkat bohkon, ijo bokowasa ngosan baho, lombut tahkan mesbeh. Umba auh ijo muhing io na'ah, umba molehkat ijo nambit getu ijo bonyihi rih, "Ngohetepohrih umba getu'mu rih, tutang ngohetep bua-bua pu'un anggur ang tana, tului bua-buaoh jari masak!" 14:19 Mahka molehkat rih ngohetep umba getuoh, nokuh tana tutang mohetep bua-bua anggur tahkan pu'unoh, turus nyahkahoh nokuh luwang pohamih anggur kosangit Pohotala, ijo moluap-luap. 14:20 Bua-bua anggur orih tonohamih ang luar lowu, tutang tahkan pokahkas pohamih anggur rih, nyalut daha kolou sungoi, komahcu tolu rahtus kilomehter, tutang kotimbonoh korenga duo mehter.
15:1 Pongohuli ahku nohto ang langit aang'co ijo helan, tutang luar biasa hebatoh. Anai pihtu molehkat hawui pihtu kosusah ijo laiuoh. Tuhrih koapah tikatoh Pohotala nusuh kosangit-Oh. 15:2 Uliorih ahku nohto ang'co, ijo topahjahoh kolou tasik soramin sampur baho. Ahku nohto ka'a ulun-ulun ijo jari manang ngosan ohcin tutang kopahtungoh, tutang manang ngosan-ulun ijo araioh tononanda honong angka. Ulun-ulun ijo manang rih, tombok ang saran tasik soramin honong nambit kocahpi ijo tononga bain Pohotala ahkan iro. 15:3 Tutang iro monyanyi, nyanyian Museh, jihpon Pohotala, tutang nyanyin Anak Tobiri. Koloutuh auhoh, "Tuhan, Pohotala Mahakowasa, eaminon kohajoi tutang kohelanoh gawin-gawin-Mu! Lahca kokaron uhtus, eaminonrih adil tutang morong tindakan-tindakan-Mu! 15:4 Iairih ijo eam mihkoh umba-Mu Tuhan? Iairih ijo eam kani mborihta kohajon-Mu? Ihko iourih ijo borasih. Paring uhtus ahkan lombut nyembah Ihko tului tindakan-tindakan-Mu ijo adil jari tonohto bain paring ulun." 15:5 Uliorih ahku nohto Lohpou Tuhan ang soruga buap, tutang Kemah Tuhan anai ang luwangoh. 15:6 Turus kopihtu molehkat rih, honong kopihtu kosusah rih, soluka tahkan Lohpou Pohotala. Hahtin iro tahkan benang lena ijo borasih tutang ngorolondang. Tutang iro mohapan ponutup husuk ijo tonawas umba bulou. 15:7 Pongohuli anai ihco tahkan ohpat angbolum rih, nonga ahkan kopihtu molehkat rih, pihtu bawak kondarah bulou, ijo tuwi umba kosangit Pohotala -- Pohotala ijo bolum turus-jahamoh. 15:8 Mahka Lohpou Pohotala rih tuwi umba asop, tahkan kohajon tutang kowasa Pohotala. Tutang kotahin kopihtu kosusah ijo tonomin bain kopihtu molehkat rih jaha kolaiu, eam anai ihcobehti ka ijo dahpot nyolong nokuh luwang Lohpou Pohotala.
16:1 Turus ahku ngonih auh hajo tahkan luwang Lohpou Pohotala, nuhtui umba kopihtu molehkat rih. "Tulak tutang nusuh usin kopihtu kondarah kosangit Pohotala rih nokuh ngosan tana!" 16:2 Molehkat ijopahtuk tulak tutang nusuh suang kondarahoh nokuh tana. Mahka lombut baha-baha ijo hebat, tutang paham podih aang paring ulun ijo ngina tanda ohcin rih, tutang aang ulun-ulun ijo nyembah pahtungoh. 16:3 Uliorihrih molehkat koduo nusuh suang kondarahoh nokuh tasik. Mahka danum tasik ka malik kolou dahan kolunon mahtoi, tutang uras mahtoi paring angbolum, ijo bolum ang luwang tasik. 16:4 Pongohuli molehkat ijo kotolu nusuh suang kondarahoh nokuh sungoi-sungoi, tutang nokuh tohasak-tohasak danum, Mahka paring danumoh monjadi daha. 16:5 Ahku ngonih molehkat ijo bokowasa ngosan danum nuhtui, "Hukuman ijo Ihko ngonyahtu anairih adil, yo Mahaborasih, Pohotala ijo anai, tutang ijo jari anai! 16:6 Iro jari nusuh dahan ukup Pohotala, tutang dahan nabi-nabi, huntuh Ihko nguan iro ngorih daha. Puna kopahtutrih rih ahkan iro!" 16:7 Turus ahku ngonih auh tahkan mesbeh, nuhtui, "Tuhan, Pohotala Mahakowasa, morong tutang adil hukum-hukumanoh ijo Ihko ngonyahtuoh!" 16:8 Uliorih molehkat koohpat nusuh suang kondarahoh nokuh mahtanondou, mahka mahtanondou ka ngonduon nyaha kolunon umba kolasutoh ijo hebat rih. 16:9 Kolunon tosaha bain lasut podioh, tutang iro nulut aran Pohotala, ijo bokowasa ngosan kosusah-kosusah rih. Oluka kolourih, iro eam kani hubah tahkan dusa-dusan iro, tutang eam kani momuji kohajon Pohotala. 16:10 Turus molehkat ijo kolimo nusuh suang kondarahoh nokuh pododusan ohcin rih. Mahka sohopus pododusan ohcin rih monjadi pindong, tutang ulun mongirut jola tului koporos. 16:11 Turus iro nulutoh Pohotala ang soruga, tului iro tongoporos tutang tului baha-baha iro. Tahpi iro eam ka'a hubah tahkan konuan-konuan iro ijo ja'at. 16:12 Uliorih molehkat koonom nusuh suang kondarahoh nokuh Sungoi Efrat ijo hajo rih. Mahka sungoi rih tohjah nyiring lahca-lahca tahkan hila timur duon nyalan nguhaoh. 16:13 Turus ahku nohto tolu roh ja'at, ijo tahpaioh kolou bokatak. Nyino-nyinong bokatak rih soluka tahkan nyaman naga, tahkan nyaman ohcin tutang tahkan nyaman nabi polasu. 16:14 Iro anairih roh-roh ja'at, ijo napa tandahelan-tandahelan. Kototolu roh rih tulak nokuh paring lahca ang sohopus kolunon tutang mupung iro ahkan hokolahi ang Ondou Ijo Hajo, yorih, Ondou tahkan Pohotala Mahakowasa. 16:15 "Ngonihrih! Ahku lombut kolou ponahkou! Kosanangrih ulun ijo tahtap bojaga tutang mohaga hahtiuoh, nyiring io eam nyalan, hawui hoburang tutang monjadi mia, ang boun ulunaro!" 16:16 Pongohuli roh-roh rih mupung lahca-lahca rih ang unuk, ijo a'ang basa Ibrani, tonohawot Harmagedon. 16:17 Opahrih molehkat ijo kopihtu monusuh suang kondarahoh nokuh udara. Mahka konahan auh ijo muhing tahkan pododusan ang Lohpou Pohotala, ijo nuhtui, "Jari genep!" 16:18 Turus nyolung kilat tutung-hotutung tutang auh duhung mongguruh tutang ngorutung, hawui kogerek tana ijo paham. Eam pu'u monjadi kogerek tana kolourih tahkan ulun tona'oi. Tuhrih kogerek tana ijo paling paham! 16:19 Lowu ijo hajo rih pusit monjadi tolu kobagi, tutang lonyuh rih ka'a lowu-lowu paring nogara ang kolunon. Turus Pohotala mingat ahkan Babel ijo hajo rih. Mahka Pohotala nguan io ngorih anggur tahkan kondarah anggur Pohotala -- iorih anggur kosangit-Oh ijo nyambun-nyambun. 16:20 Paring pulou nihou, tutang paring puruk ka dilap. 16:21 Uhjan eh hajo ijo nyino-nyinong bahatoh limo pulu kilogram, ngonyahtu tahkan langit nopahas ulun-ulun. Mahka iro nulut Pohotala tului kosusah uhjan eh ijo paham rih.
17:1 Uliorih rih anai ihcobehti, tahkan kopihtu molehkat ijo nambit pihtu kondarah rih, lombut nokuh ahku tutang nuhtui, "Olai, ahku ahkan ngorinah bagi'mu, koloukuwoh sundal ijo hajo rih ahkan tonohukum, iorih lowu hajo rih, ijo tonombok ang doni sungoi-sungoi. 17:2 Lahca-lahcan kolunon nguan nyundal umba io, tutang ijo mohcon ang tana monjadi bobusou, kotului ngorih anggur kosundaloh." 17:3 Turus Roh Pohotala mongowasa ahku, tutang molehkat rih ngomin ahku nokuh padang balambah. Ang anan ahku nohto ihcobehti ulunbawi tuot ang ngosan ihcokungan ohcin ijo warna bohandang botuo, tutang ijo tuwi surat umba aran-aran mohina Pohotala. Ohcin rih ngina pihtu kuhung, tutang sopulu tanduk. 17:4 Ulunbawi rih hapa baju ijo warna ungu tutang bohandang botuo, hawui tonawas umba pokahjan-pokahjan bulou, poromata-poromata tutang itan. Ang longoioh, io nambit pikan bulou ijo tuwi umba hal-hal kojilok, tutang koja'at, bua tahkan kosundaloh. 17:5 Aang likouoh tonyurat ihco aran, ijo anai rimai ijo bosuhuk. Aran rih iorih, "Babel Ijo hajo, inai paring sundal tutang ulun bijat ang kolunon." 17:6 Turus ahku nohto, ijo ulunbawi rih busou umba daha ukup ain Pohotala, tutang dahan ulun-ulun ijo tomunu tului bokehtep umba Yesus. Kotihka ahku nohto ulunbawi rih, ahku monjadi tohelan-helan. 17:7 Turus molehkat rih nuhtui umba ahku, "Inon kotului ihko helan? Pios ahku nyorihta ahkan'mu ijo rahasia tohou ulunbawi rih tutang ijo rahasia tohou ohcin ijo tonunggangoh rih, iorih ohcin ijo ngina pihtu kuhung tutang sopulu tandukoh. 17:8 Ohcin rih lomoi pu'u bolum, tahpi huntuh eam bolum hino. Io honjulu hino ahkan soluka tahkan lowang popahtoi tutang ahkan tulak nitu korusak. Ulun-ulun ijo bolum ang tana ijo araioh eam tonolihting luwang Surat Ulun Bolum hountahkan kolunon tona'oi ahkan helan amat nohto ohcin rih. Tului ohcin rih, lomoi pu'u bolum. Huntuh io eam bolum hino, tahpi io ahkan lombut hoduli. 17:9 A'ang hal tuh porulu anai hikmat tutang pongotaan. Pihtu kuhung rih iorih pihtu puruk; yorih puruk-puruk unuk ulunbawi rih tuot. Tutang pihtu kuhung rih ka'a anai rih pihtu lahca. 17:10 Limo tahkan iro jari ngonyahtu, ihco magun moretah tutang ijo ihco hino jaha lombut. Amat io lombut noin, io harus moretah honjulu iou. 17:11 Tutang ohcin ijo lomoi pu'u bolum, tahpi huntuh eam bolum hino, anairih lahca ijo kojalu. Io anairih tahkan ihco kopihtu lahca rih ka'a, ijo huntuh rahat tulak nitu korusak. 17:12 Sopulu tanduk ijo ihko nohtooh rih, iorih sopulu lahca ijo jaha nopara moretah. Tahpi iro ahkan tononga kowasa ahkan moretah kolou lahca hombo-homboh umba ohcin rih kotahin ihco jam. 17:13 Kosopulu lahca rih, paringoh anaingina tihtui ijo sama; iro paringoh monyorah koba'as tutang kokowasan iro ahkan ohcin rih. 17:14 Iro ahkan hokolahi molawan Anak Tobiri rih. Tahpi, Anak Tobiri rih umba murid-murid-Oh ijo bokehtep, ijo jari tona'ah-Oh tutang jari tonopili-Oh rih ahkan mongalah lahca-lahca rih, kotului Io Tuhan kokaro Tuan, tutang Lahca kokaro lahca." 17:15 Molehkat rih nuhtui ka'a, "Danum ijo ihko nohto rih, unuk sundal rih tuot, iorih uhtus-uhtus rayat-rayat, nogara-nogara tutang basa-basa. 17:16 Sopulu tanduk ijo ihko nohto, tutang ohcin rih ahkan monyingi sundal rih. Iro ahkan mosuwit kokaro angihco, ijo aiuoh, tutang nguan io monjadi hoburang. Iro ahkan kuman usiouoh tutang morusak io umba baho. 17:17 Tului Pohotala jari monggerek ahtoi iro, ahkan molalus rancana ain Pohotala. Pohotala nguan iro hopahkat, ahkan monyorah ko kowasan iro ahkan ohcin rih, mangat ohcin rih moretah johcok nyolung inon ijo tonuhtui bain Pohotala. 17:18 Ulunbawi ijo ihko nohto orih, iorih lowu hajo, ijo moretah lahca-lahca ang tana."
18:1 Uliorih rih ahku nohto ihcobehti molehkat bohkon nosuluh tahkan soruga. Io anai bokowasa ijo hajo tutang sewutoh nguan hopus tana monjadi boloang. 18:2 Umba auh ijo hajo, io na'ah, "Jari bolinangoh! Babel hajo jari bolinang! Huntuh io monjadi unuk sehtan-sehtan tutang roh-roh ja'at. Ang luwangoh bolum mahca-mahcam bulung ijo pali tutang ijo kobele ulun. 18:3 Kotului kokaron uhtus jari ngorih anggur kojorikbalai ponyundalanoh. Lahca-lahcan kolunon nguan sundal umbaoh, tutang podagang-podagang ang tana monjadi tahtou bain kojolikbolaioh ijo eam duon tongondalioh." 18:4 Turus ahku ngonih auh bohkon, tahkan soruga nuhtui, "Soluka, ukup aik-Ku! Soluka tahkan luwangoh! Ara ihkam ngohasu dusa-dusan iro, tutang umba ngohtun hukumoh! 18:5 Tului dusaioh botuyuk-tuyuk johcok nokuh langit, tutang Pohotala ingat ahkan koja'atoh. 18:6 Nguanohrih io koloukuwoh io jari monguanoh ihkam; malosrih io duo tikat lihpet ahkan paring ijo jari tonguaioh. Nyuang pihkanoh umba korih ijo duo tikat labih kokarasoh tahkanumba korihoh, ijo tonyodiaoh ahkan ihkam. 18:7 Tongarih ahkaioh kongarot tutang koporosahtoi, ijo sama karoioh umba kohajoi tutang kolobienoh ijo tonongaoh ahkan aropoh bongoi. Tului io hototurus iou nuhtui umba aropoh, 'Ahku tuh lahtu ijo momoretah! Ahku tuh eam balu; ahku eam ahkan nyuru kokarotahtoi!' 18:8 Kotului hal orihrih, mahka aang ihco ondou iou io ahkan tonopahas kosusah, -- ponyahkit, kosedihan, tutang bolo'u. Tutang io ahkan tomahpong umba baho, kotului bokowasarih Tuhan Pohotala ijo mosaraoh rih." 18:9 Lahca-lahcan kolunon ijo umba a'ang gawin-gawin kosundal orih, tutang kojolikbolai ulunbawi rih, ahkan nangih tutang nahtum lowu rih, amatmira iro nohto asep nyolobuwuk tahkan baho ijo mahpongoh rih. 18:10 Iro ahkan tombok tahkan mahcu, tului iro mihkoh tokona karotporosoh. Iro nuhtui, "Akai, eam inon colahkaoh lowu ijo bosewut rih -- lowu Babel ijo ba'as! A'ang ihco jam iou hukum'mu jari nyolung!" 18:11 Dolang podagang ang tana ka nangih tutang nahtum tului ulunbawi rih, bain eam anai ihcobehti ka hino, ijo moli ramun-ramun podagang iro. 18:12 Eam aro ijo moli bulou, perak, bahtu poromata, tutang mutiara iro, ka'a benang lena, benang ungu, sutara tutang benang bohandang botuo, dolang mahcam kahju ijo jarang tonyombang; ramu-ramu tahkan gading, tutang tahkan kahju ijo hajo regai, tahkan tombaga, bosi tutang pualam; 18:13 uhpak kahju manis, karon-rorapah, setanggi, minyak mur, tutang manyan, anggur, tutang undus, gelapung tutang gandum, sahpi tutang tobiri, kuda tutang korehta, jihpon-jihpon, dahang hino hasong ulun ka. 18:14 Dolang podagang nuhtui umba ulunbawi rih, "Paring ijo ihkai jolik tepuioh jari earo hino, tutang kokaro kolobienoh, tutang kobohinoi'mu jari dilap. Ihko eam ahkan monyombangoh hino!" 18:15 Dolang podagang ijo jari monjadi tahtou, tului bodagang ang lowu rih, ahkan tombok tahkan mahcu, tului iro mihkoh kona kokarotoh. Iro ahkan nangih tutang nahtum, 18:16 turus nuhtui, "Akai, eam inon colahkaoh lowu ijo bosewut tuh! Bahutoh io hapa pokahjan benang lena, benang ungu tutang benang bohandang botuo; bahutoh io tuwi umba pokahjan bulou, poromata tutang itan! 18:17 Tahpi aang ihco jam iou io jari dilap dolang ponahtouoh rih!" Paring ijo nahoda kapal, ponumpang, tutang anak kapal, hawui paring ulun ijo ngurah usahaoh ang tasik, tombok tahkan mahcu. 18:18 Tutang bokociak, ang ohkot iro nohto asep nyolobuwuk, tahkan baho ijo mahpong lowu rih. Iro na'ah, "Eam pu'u anai lowu bohkon kolou lowu ijo hajo tuh!" 18:19 Mahka iro noburan awu ang kuhung iro, kolou tanda iro porosahtoi, turus nangih tutang bokocia-ciak, "Akai, eam inon colahkaoh lowu ijo hajo rih! Ponahtouoh jari napa paring ulun ijo anaingina kapal-kapal ang tasik monjadi tahtou! Tahpi a'ang ihco jam iou io jari dilap paringoh!" 18:20 Oh soruga, jori-jorih iou ihko ngosan kolonyuh lowu hajo rih! Oh ukup Pohotala, rasul-rasul tutang nabi-nabi jori-jorih iou! Kotului Pohotala jari mohukum io, kolou pombalos ngosan inon ijo tononguaioh toharep ihkam! 18:21 Uliorih rih, ihcobehti molehkat ijo mamut ngahtang ihcokobuhtup bahtu -- kohajon bahtu gilingan ijo hajo -- turus nyakahoh nokuh luwang tasik hawui hioioh, "Koloutuh caraoh lowu Babel ijo bosewut rih ahkan tonyahkah hawui paham nyiring ahkan eam duon tonyombang hino. 18:22 Auh musik tahkan ponowah kocahpi, tahkan dolang ponyanyi, tahkan pomohpos suling, tutang tahkan pomohpos sorunai, eam ahkan konahan hino ang luwang'mu! Eam ahkan tonyombang ka'a, ihcobehti ulun ponggawi ahli ka ang anan, tutang auh bahtu monggiling ka, eam ahkan konahan hino. 18:23 Ulun eam ahkan nohto hino koloang sumbu ang luwangoh; tutang eam ahkan hino konahan korami pesta pongawin ang anan. Podagang-podagang'mu anairih ulun-ulun ijo paham bosewut ang tana, tutang honong ilmu-ilmu gaib'mu, ihko mobalik kokaro uhtus ang kolunon!" 18:24 Babel tonohukum, bain ang luwang lowu rih jari tosombang daha nabi-nabi, dahan ukup ain Pohotala -- pandakoh dahan paring ulun ijo jari tomunu ang ngosan tana.
19:1 Uliorih rih ahku ngonih angihco kolou auh koridu ulun aro tahkan soruga ijo bososurak, "Tara Pohotala, Pohotalan ihto anairih Pohotala ijo monyolamatoh; Io Pohotala ijo hajo tutang bokowasa! 19:2 Pomosara-Oh adil tutang bijaksana! Io jari ngonyahtu hukum-Oh ngosan sundal ijo hajo ijo morusak kolunon umba kosundaloh. Pohotala jari mohukum sundal rih, tului io munu jihpon-jihpon Pohotala." 19:3 Turus auh ulun aro rih bososurak hino, "Tara ahkan Pohotala! Asop tahkan baho ijo mahpong lowu hajo rih ahkan nyolobuwuk eam tondo-tondooh!" 19:4 Mahka koduo pulu ohpat okon, tutang koohpat angbolum ijo kodiling pododusan rih suhkuntu'ut tutang nyembah Pohotala ijo tuot ang ngosan pododusan. Iro nuhtui, "Amen! Tara Pohotala!" 19:5 Turus konahan, tahkan pododusan rih naing auh ijo nuhtui, "Tara Pohotala, o paring jihpon Pohotala, tutang paring ulun -- hajo, koik -- ijo nyembah Pohotala!" 19:6 Uliorih ahku ngonih angihco kolou auh ihco ko pulou ulun ijo aro samasino; naingoh kolou golombang ijo holuhcak, tutang kolou auh duhung mongorutung. Ahku ngonih iro nuhtui, "Tara Pohotala! Tului Tuhan, Pohotalan ihto Ijo Mahakowasa rih huntuh moretah! 19:7 Olairih ihto jori-jorih tutang sanang; olairih ihto momuji kohajoi-Oh! Kotului jari johcok ondou pongawin ijo nambit galar Anak Tobiri rih, tutang pongahten-Oh jari tahtap molalus pongawin-Oh. 19:8 Pokahjan lena ijo hogining jari tononga ahkai-Oh ahkan tongepai." (Pokahjan lena rih anairih gawi-gawi hinut ijo konuan bain ukup ain Pohotala.) 19:9 Turus molehkat rih nuhtui ahkak'ku, "Nyurat tuh: 'Kosanang rih ulun ijo tonorawe nokuh pesta pongawin Anak Tobiri rih.' " Pongohuli molehkat rih monambah hino, "Tuhrih kabar hinut tahkan Pohotala." 19:10 Ahku tosuhkutu'ut ang husuk molehkat rih kani nyembahoh, tahpi io nuhtui umba ahku, "Ara! Ara nyembah ahku, sembah rih Pohotala! Kotului ahku ka jihpon sama kolou ihko, tutang kolou paring konduang'mu, ijo nambit segah ang kosaksian Yesus." Tului kosaksian Yesus orihrih ijo moilham ulun-ulun ijo monujum. 19:11 Pongohuli ahku nohto soruga bokuap, turus gihtan ihcokungan kuda puhti. Ponunggang-Oh konohawot Ijo Bokehtep tutang Ijo Morong. Io adil a'ang mutusoh hukum, tutang a'ang kolahi ijo tonolalus-Oh. 19:12 Mahta-Oh kolou konyelak baho, tutang ang kuhung-Oh Io hapa aro ahkur. Ang behtiu-Oh tosurat ihco aran, tutang tihkas Io bongoi ijo ngota'an aran rih. 19:13 Kolambipanjang ijo tohapa-Oh jari tocolop a'ang daha. Tutang Io konohawot, "Auh Pohotala". 19:14 Kawan kolahi soruga, ngahasu Io honong nunggang kuda-kuda puhti, tutang hopokajan lena ijo puhti borasih. 19:15 Tahkan nyamai-Oh soluka 'cokobilap padang ijo bonyihi, tutang umba padang orih, Io ahkan pokalahoh uhtus-uhtus, tutang Io ahkan moretah iro, umba sukah bosi. Io ahkan mohapit anggur, ang luwang pokahkas pohapit anggur kosangit Pohotala Ijo Mahakowasa. 19:16 Aang jubah-Oh, tutang aang sahpak-Oh tosurat aran rih, "Lahca kokaron lahca, tutang Tuhan kokaron tuan." 19:17 Turus ahku nohto ihcobehti molehkat tombok ang ngosan mahtanondou. Umba auh ijo muhing io na'ah, umba paring bulung ijo na'ang ang udara, "Olai, hopuhpung umba tihpen pesta hajo ijo ain Pohotala! 19:18 Olai kuman usin lahca-lahca, usin pokolima-pokolima, tutang usin pohlawan-pohlawan; olai kuman usin-usin dolang ponunggang kudaoh, hawui usin karon-kudaoh, tutang usin ukup-ukup kolunon, hajo tutang koik, jihpon tutang morodehka!" 19:19 Pongohuli ahku nohto ohcin rih, tutang lahca-lahcan tana, honong kawan-kolahi iro, hopuhpung ahkan tulak hokolahi molawan Io, ijo nunggang kuda puhti rih, tutang karo kawan-kolahi-Oh. 19:20 Mahka ohcin rih, totawan homboh umba nabi alik ijo jari nguan tandahelan-tandahelan ang toharep ohcin rih. (Umba tandahelan-tandahelan orihrih ohcin rih, mobalik ulun-ulun ijo anai tanda ohcin rih, tutang ulun-ulun ijo nyembah kopahtung ohcin rih.) Turus ohcin rih tutang nabi alik rih ndian bolu-bolum nokuh tohun tasik baho ijo ngonjelak umba sondawa. 19:21 Tutang kawan kolahi, iro tomunu umba padang ijo soluka tahkan nyaman ponunggang kuda puhti rih. Mahka bulung-bulung ka lombut tutang kuman honong lingih usin iro ijo tomunu orih.
20:1 Uliorih rih ahku nohto ihcobehti molehkat nosuluh tahkan soruga. Ang longoioh, io nambit kuhci lowun popahtoi tutang ihcokoliting rataipasung ijo hajo. 20:2 Turus io monawan naga rih, lohi oko -- yorih Sehtan ata'ai Roh Ja'at rih -- tutang momasungoh ahkan sokujan toun kotahiuoh. 20:3 Pongohuli molehkat rih, ngondian naga rih, nokuh lowun popahtoi, turus nguhci lowun rih, hawui monyegeloh, mangat naga orih eam hino dahpot ngobalik uhtus-uhtus, hounumba ohkot sokujan toun rih opah. Uliorih io harus tonoliwus ahkan ohkot ijo honjiot. 20:4 Turus ahku nohto pododusan-pododusan, tutang ulun-ulun ijo tuot, ang pododusan-pododusan rih tononga kowasa ahkan mutusoh mohukum. Ahku nohto ka'a homboruan-homboruan, ulun-ulun ijo jari tonohtok kuhungoh tului iro nonga kosaksian tohou Yesus, tutang mborihta pohtoh Pohotala. Ulun-ulun rih eam nyembah ohcin, ata'ai ka kopahtungoh. Iroka eam pu'u norima tanda ohcin rih, aang likou ata'ai aang longon iro. Mahka iro bolum hoduli, tutang moretah kolou lahca homboh Kristus kotahin sokujan toun. 20:5 Tuhrih tahap pahtukoh ulun-ulun mahtoi konombolum huli. (Tahpi ulun-ulun mahtoi bohkonoh eam konombolum kotahin sokujan toun rih.) 20:6 Kosanangrih ahkan ulun-ulun ijo umba tonombolum hoduli ang tahap pahtuk rih. Iro puna monjadi ukup Pohotala. Popahtoi tahap koduo eam bokowasa ngosan iro. Iro ahkan monjadi imam-imam ain Pohotala tutang imam-imam ain Kristus; tutang iro ahkan moretah homboh Io sokujan toun kotahiuoh. 20:7 Ulirih opah sokujan toun rih, Sehtan ahkan tonoliwusoh tahkan sipiroh, 20:8 tutang io ahkan tulak ngobalik uhtus-uhtus ijo bororawuh ang sohopus kolunon, yorih Gog tutang Magog. Sehtan muhpung iro ahkan kolahi, angihco jumbalah ijo hajo samasino, sokaro baras angsaran tasik. 20:9 Mahka iro ka'a kosoburan nokuh sohopus kolunon, turus ngahpung kemah ukup Pohotala, tutang lowu ijo tonokasih Pohotala. Tahpi baho mosuluh tahkan langit tutang polumat iro. 20:10 Pongohuli Sehtan ijo mobula iro rih, tonyahkah nokuh luwang tasik baho tutang sondawa. Ang anan unukoh ohcin tutang nabi pobula rih tondian labih houn. Iro ahkan tonyiksa hondou ngolomi ahkan turus-jaham. 20:11 Uliorih ahku nohto ihco pododusan puhti ijo hajo tutang Io ijo tuot ang ngosanoh. Langit tutang tana dilap tahkan husuk-Oh, nyiring eam gihtan hino. 20:12 Tutang ahku nohto ulun-ulun mahtoi, hajo, koik, tombok toharep pododusan rih. Mahka surat-surat ka tonomirang. Turus ihco kobalun surat ijo bohkon tonomirang, yorih Surat Ulun Bolum. Pongohuli hukum tongonyahtu nokuh ngosan ulun-ulun mahtoi, hotohorong umba dolang gawin iro, numbun ijo tosurat luwang surat-surat rih. 20:13 Turus tasik hololian ulun-ulun mahtoi ijo anai ang luwangoh. Popahtoi tutang Lowun Popahtoi ka monyorah ulun-ulun mahtoi ijo anai ang luwangoh. Tutang ulun-ulun mahtoi rih paringoh tokona hukum hotohorong umba gawin iro. 20:14 Pongohuli Popahtoi tutang Lowun Popahtoi ndian ahkan luwang tasik baho. (Tasik baho tuh anairih popahtoi bahagian koduo.) 20:15 Ulun-ulun ijo eam tosurat araioh ang luwang Surat Ulun Bolum, io ndian nokuh luwang tasik baho rih.
21:1 Turus ahku nohto langit ijo bohua, tutang tana ijo bohua. Langit pahtuk tutang tana pahtuk ka nihou, hawui tasik dilap. 21:2 Mahka ahku nohto lowu borasih rih, yorih Yerusalem ijo bohua, nosuluh tahkan soruga tahkan Pohotala. Lowu rih jari tonyodia kolou ihcobehti pongahten bawi ijo tomokahjan ahkan nyombang pongahten ijo bahkas. 21:3 Turus ahku ngonih auh tahkan pododusan rih na'ah honong muhing, "Uhuntuh unuk mohcon Pohotala anairih sama-sama umba ulun! Io ahkan bolum umba iro, tutang iro ahkan monjadi ukup Aiu. Pohotala bongoi ahkan anai umba iro ahkan monjadi Pohotalan iro. 21:4 Io ahkan ngapit karon-juhun mahto tahkan mahton iro. Popahtoi eam ahkan anai hino; porosahtoi, tangih, ata'ai ponyahkit ka ahkan eam aro hino. Hal-hal ijo tahilomoi jari dilap." 21:5 Turus Io ijo tuot ang ngosan pododusan rih nuhtui, "Uhuntuh Ahku nguan paringoh bohua!" Io nuhtui ka'a umba ahku, "Nyuratrih tuh, tului auh-auh tuh tu'u tutang dahpot tomorocaya." 21:6 Turus Io nuhtui, "Jari genep! Ahku rih ijo pahtukoh, tutang ijo laiu; Ahkurih Tuhan tahkan Kopahtuk nyiring Pongolaiu. Nyinong ulun ijo tohjahbolai, ahkan Ahku nonga korih honong cuma-cuma tahkan tohasak danum, ijo nonga pombolum. 21:7 Ulun-ulun ijo manang ahkan norima hal-hal rih tahkanumba Ahku. Ahku ahkan monjadi Pohotalaioh, tutang io monjadi anak-Ku. 21:8 Tahpi ulun ijo pomihkoh, pondoruhaka, ulun bejad, pomunu, ulun ponyundal, ulun ijo hapa ilmu-ilmu gaib, ponyembah songiangdewa, tutang paring pabula, ahkan tonondian nokuh luwang tasik baho tutang sondawa ijo honyelak-honjelou, yorih popahtoi ijo ambal duo." 21:9 Ihco tahkan louk kopihtu molehkat, ijo jari nambit kondarah-kondarah ijo tuwi, umba kopihtu kosusah ijo laiu rih, lombut ahkak'ku tutang nuhtui, "Olai! Ahku ahkan ngorinah ahkan'mu Pongahten, yorih oruh Anak Tobiri." 21:10 Mahka Roh Pohotala mongowasa ahku, tutang molehkat rih ngomin ahku nokuh pupung puruk ijo paling isung. Io nunjuk ahkak'ku, Yerusalem lowu borasih rih, lowu rih nosuluh tahkan soruga, tahkan Pohotala, 21:11 hawui somarak tutang kohajon Pohotala. Lowu rih ngorolondong kolou bahtu poromata, kolou bahtu baiduri pandan, ijo kotining kolou kristal. 21:12 Dinding kota lowu rih hokodilingoh isung hajo, umba duo balas bauntukang, tutang konindoi bain duo balas molehkat. Aang bauntukang-bauntukang lowu rih anai tonyurat aran-aran duo-balas lihit Israel. 21:13 Anai tolu bauntukang lowu ijo noharep nokuh nyinong titui; tolu noharep hila timur, tolu noharep hila solahtan, tolu noharep hila utara, tutang tolu noharep hila barat. 21:14 Dinding kotalowu rih tonombok ang ngosan duo balas bahtu galang. Aang bahtu-bahtu galang rih tonyurat aran-aran koduo balas rasul Anak Tobiri rih. 21:15 Molehkat ijo bopander umba ahku rih, anaingina sukah ponihpong tahkan bulou, ahkan nihpong lowu rih, bauntukang-bauntukang lawangoh tutang dindingoh. 21:16 Lowu rih tahpai holapak ohpat -- kombuioh sama kolou kolombahoh. Mahka molehkat rih, nihpong lowu rih umba sukah ponihpongoh, korinah kombuioh 2400 kilomehter kolumbahoh tutang koisungoh sama kolou panjangoh. 21:17 Kotihka molehkat rih nihpong dindingoh, korinah isung korambang rih onom pulu mehter. Tihpong ijo hapan bain molehkat rih anai tihpong ijo tohapan bain ulun. 21:18 Dinding lowu rih, tonapa tahkan bahtu baiduri pandan, rahatbahtang lowuoh bongoi tahkan bulou borasih, kotining kolou soramin. 21:19 Bahtu-bahtu galang lowu rih tonawas umba kokaron mahcam bahtu poromata. Bahtu galang ijo pahtuk tonawas tahkan bahtu baiduri pandan, ijo koduo tahkan bahtu nilam, kotolu tahkan bahtu yakut, koohpat tahkan bahtu zamrud, 21:20 kolimo bahtu unam, koonom ahkik bohandang, kopihtu tahkan bahtu pirus, kojolu arsak, kosioi tahkan yakut bohenda, kosopulu tahkan bahtu ahkik bohijou, kosobalas tahkan bahtu pusparagam, ijo koduo balas tahkan bahtu kocubung. 21:21 Koduo balas bauntukang lawangoh anai tonawas tahkan duo balas itan, nyino-nyinong bauntukang tonapa tahkan ihco itan. Jalan ang lowu rih tonawas tahkan bulou borasih, kotining kolou soramin ijo mokilat. 21:22 Ahku eam nohto Lohpou Pohotala anai luwang lowu rih, tului Lohpou Pohotalaioh iorih Tuhan bongoi, Pohotala Ijo Mahakowasa, tutang Anak Tobiri rih. 21:23 Lowu rih eam usah ngorolondang mahtanondou ata'ai bulan, bain kohajon Pohotala ijo ngoloangoh, tutang Anak Tobiri rih anairih ahkan sumbuoh. 21:24 Uhtus-uhtus ang kolunon ahkan nyalan ang luwang koloangoh, tutang lahca-lahca ka'a ahkan ngomin ponahtou iro nokuh luwang lowu orih. 21:25 Bauntukang-bauntukang lawang lowu rih ahkan hobangah hondou ngolomi, eam ahkan tonuhtup, tului eam anai ngolomi ang anan. 21:26 Kohajon tutang ponahtou uhtus-uhtus ahkan tonomin nokuh luwang lowu rih. 21:27 Tahpi ulun ijo nguan hal-hal ijo kojilo-jilok, ata'ai ulun ijo pobula -- pandakoh inon ka ijo pali, samasino eam ahkan nyolong nokuh luwangoh. Ijo ahkan nyolong tihkas ulun ijo araioh tonyurat luwang Surat Ulun Bolum, buhku Anak Tobiri rih.
22:1 Molehkat rih ka'a ngorinah ahkak'ku, sungoi ijo danumoh nonga pombolum. Sungoi rih mongorinjap kolou kristal, tutang nohasak tahkan pododusan Pohotala, tutang Anak Tobiri rih. 22:2 Ang beteng-beteng jalan ijo ang lowu rih. Ang saran sungoi rih, aang hososilaoh, anai pu'un tohasak pombolum, ijo mua duo balas tikat ihcotoun, yorih sino tikat ihcobulan. Dauioh hapa ahkan ngopios uhtus-uhtus. 22:3 Ang luwang lowu rih eam todahpot aang'co ka ijo buah tulut Pohotala. Pododusan Pohotala tutang Anak Tobiri rih, ahkan anai ang luwang lowu rih. Jihpoi-jihpoi-Oh ahkan sombayang ahkai-Oh, 22:4 tutang turus nopahjah baui-Oh. Arai-Oh ahkan tosurat ang likou iro. 22:5 Iro eam ahkan porulu sumbu ata'ai koloang mahtanondou, tului ngolomi eam anai hino, tutang Tuhan Pohotala bongoi ahkan ngoroloang iro. Mahka iro ahkan moretah kolou lahca ahkan turus-jahamoh. 22:6 Turus molehkat rih nuhtui umba ahkak'ku, "Tuhtui-tuhtui tuh tu'u tutang dahpot tomorocaya. Tuhan Pohotala ijo nonga Roh-Oh ahkan nabi-nabi, jari nyuhu molehkat-Oh mangat ngorinah ahkan jihpoi-jihpoi-Oh inon ijo bojoin harus nyolung." 22:7 "Nohtoani tuh!" hion Yesus, "Ahku ahkan bojoin lombut. Sanangmangat ulun ijo mote'etoh auh-auh tujum luwang surat tuh!" 22:8 Ahku Yohanes jari ngonih paringoh tuh. Uli ahku jadi ngonih tutang nohtooh, ahku suhkuntu'ut ang boun molehkat rih, ijo jari ngorinah paringoh rih ahkak'ku, tutang ahku hondak nyembah io, 22:9 tahpi io nuhtui umba ahku, "Ara! Ara nyembah ahku! Nyembah iou Pohotala! Kotului ahku ka'a sama kolou ihko, tutang kolou konduang-konduang'mu, nabi-nabi, tutang paring ulun ijo te'et umba pohtoh-pohtoh luwang surat tuh!" 22:10 Turus io nuhtui hino, "Ara ngulim auh tujum luwang surat tuh, kotului jari doni ohkotoh, paringoh tuh ahkan nyolung. 22:11 Ulun ijo ja'at, nauhoh toturus nguan koja'atoh; ulun ijo kojilok, nauhoh ngojilok aropoh; ulun ijo numbun konohuang Pohotala, nauhoh turus numbun konohuang Pohotala, tutang ulun ijo bolum khusus ahkan Pohotala nauhoh io bolum khusus ahkan Pohotala." 22:12 "Nohtoaniohrih tuh!" hion Yesus, "Eam tahi hino Ahku ahkan lombut, ahkan ngomin upah, ahkan malos nyinong ulun numbun inon ijo jari io nguaioh. 22:13 Ahku tuh ijo pahtukoh tutang ijo kolaiuoh, ahku tuh Tuhan tahkan Pahtukoh nyiring Laiuoh." 22:14 Kosanangrih, ulun ijo muhi jubahoh nyiring borasih, nyiring iro dahpothak, kuman bua tahkan pu'un pombolum, tutang nyolong nokuh lowu rih nguha bauntukang lowuoh. 22:15 Tahpi ulun-ulun ijo jari nguan hal-hal ijo kojilok, ijo hapa ilmu-ilmu gaib, ulun-ulun rih ijo nguan gawiu-gawiu ijo nyundal, ijo munu, ijo nyembah songiangdewa, tutang ulun-ulun ijo ngobalik, pios umba auh-auh, oluka umba gawiu-gawiu, paring ulun rih unukoh ang luar lowu rih. 22:16 "Ahku, Yesus jari mongirim molehkat-Ku ahkan ihkam, mangat io momborihta hal-hal tuh ahkan kogunan ukup-ukup. Ahku tuh lihit Dawid; Ahku tuh potion tahkan timur ijo boloang rih." 22:17 Roh Pohotala tutang Pongahten Bawi homouh, "Kanohtoi!" Nyinong ulun ijo ngonih tuh harus ka'a homouh, "Kanohtoi!" Iai ijo tohjahbolai pios io lombut! Tutang iai ijo ngojolikoh, pios io ngomin danum, ijo nonga pombolum rih, honong cuma-cuma. 22:18 Ahkan nyinong ulun ijo ngonih tuhtui-tuhtui tujum ang surat tuh, ahku, Yohanes, nonga pongingat tuh; amat ulun ndahang ang'co aang tuhtui-tuhtui tujum tuh, mahka Pohotala ahkan ndahang hukum ulun rih umba kosusah-kosusah ijo tomihtik luwang surat tuh. 22:19 Tutang amat ulun monahpas angihco tahkan tuhtui-tuhtui tujum ang surat tuh, mahka Pohotala ka'a ahkan monahpas bagiu-Oh ijo tomihtik luwang surat tuh -- yorih bagian tahkan pu'un pombolum tutang tahkan lowu borasih rih. 22:20 Io ijo mborihtaoh paring borihta tuh homouh, "Morong, Ahku ahkan bojoin lombut!" Amen! Lombut iou o Tuhan Yesus! 22:21 Pios Tuhan Yesus nonga borehkat-Oh ahkan paring ukup Pohotala!