/1 Bisperas na adto han Pyesta han Paglabay; Maaram na hi Jesus nga inmabot na an iya takna pagbaya hini nga kalibutan ngan pagkadto han Amay; Ginhigugma niya pirme an iya mga sakop dinhi ha kalibutan, ngan ginhigugma niya hira tubtob gud ha kataposan. Ngan tikang kan Jesu-Cristo, an matinumanon nga saksi, an suhag nga Anak nga lalake nga ginbanhaw, nga amo man liwat an punoan han mga hadi han tuna. Kay ginhigugma gud han Dyos an kalibutan, nga iginhatag niya an iya bugtong nga Anak, basi diri unta mamatay an ngatanan nga nasarig ha iya, kundi makaangkon han dayon nga kinabuhi. Pinmakita ako ha ira ha hirayo; Katawhan han Israel, pirme ako naghigugma ha imo, sanglit nagpapadayon ako pagpakita ha imo han akon dayuday nga paghigugma.

/2 Waray makakaglirong han pagkadako han tinago han aton tinuohan! Pinmakita hiya ha hitsura hin tawo, iginpakita nga matadong pinaagi han Espiritu, ngan hinkit-an han mga anghel; Iginwali hiya ha mga nasod, gintuohan ha kalibutan, ngan ginbayaw ngadto ha langit. Nakakita na han Amay an bisan hin-o nga nakakita ha akon; Sanglit kay-ano nga nasiring ka, Ipakita ha amon an Amay?. Diri ka ba natuo, Felipe, nga aada ako han Amay ngan an Amay aadi ha akon? Nagsiring hi Jesus ha iya mga tinunan, Diri natikang ha akon an mga pulong nga iginhimangraw ko ha iyo; Nagbubuhat an Amay nga aadi ha akon han iya kalugaringon nga mga buruhaton. Han waray pa hihimoa an kalibutan, nakada na an Pulong; Kausa han Dyos an Pulong, ngan Dyos gud an pulong. Nahimo nga tawo an pulong, ngan nagukoy tampo ha aton; Hinkit-an naton an iya pagkagamhanan nga puno hin gugma ngan kamatuoran; Amo ini nga kagamhanan an kinarawat niya han iya pagkabugtong nga Anak han Amay.

/3 Nagbaton an anghel, Makunsad ha imo an Espiritu Santo, ngan magpapabilin ha imo an gahom han Dyos; Tungod hini, tatawgon nga Anak han Dyos an baraan nga bata. Nag-uukoy dida ha Dyos an bisan hin-o nga nagpapahayag nga amo hi Jesus an Anak han Dyos, ngan nag-uukoy man an Dyos dida ha iya. Natawo ha aton in bata! Iginhatag ha aton in anak nga lalake! Tatawgon hiya nga Makinaadmananon nga Magsaragdon, Gamhanan nga Dyos, Amay ha Kadayonan, Hadi han Kamurayaw. Kay nag-uukoy dida kan Cristo, ha iya pagkatawhanon, an kabug-usan han dyosnon nga kinaiya. Han nagyayakan pa hiya, linindungan hira hin masilaw nga dampog, ngan nagsiring in tingog tikang han dampog, Amo ini an akon kalugaringon nga Anak nga hinigugma, nga akon nalilipayan gud; Pamatii niyo hiya!.

/4 Sanglit nagsiring liwat hi Jesus, Susumatan ta kamo hin tinuod: Amo ako an purta han mga karnero. Nagsumat hi Jesus ha ira, Amo ako an pagkaon nga nahatag han kinabuhi; An napakadi ha akon diri na gud gugutomon; ngan an nasarig ha akon diri na gud uuhawon. Gintatawag ako niyo nga Magturutdo ngan Ginuo, ngan matuod ito, kay amo gud man ako. Nagbaton hi Jesus, Susumatan ko kamo hin tiuod: Han waray pa katatawo hi Abraham, Amo-na-Ako!. Nagsiring hi Jesus ha iya, Amo ako an pagkabanhaw ngan an kinabuhi; Mabubuhi an bisan hin-o nga nasarig ha akon, bisan kon mamatay hiya. Nagbaton hi Jesus, Tikang kamo dinhi ha tuna, kundi tikang ako ha langit. Tikang kamo hini nga kalibutan, kundi diri ako tikang hini nga kalinbutan.

/5 Nakabati in duha nga buta nga nalingkod ha ligid han dalan, nga naagi hi Jesus, sanglit nagtikang hira pagguliat, Anak ni David! Kaluoyi gadman kami, Sir!. Naluoy hi Jesus ha ira, ngan ginkamkam an ira mga mata; dida dayon nakakita hira, ngan sinmunod hira ha iya. Pinapanlingkod niya an mga tawo ha kabanwaan; kinuha niya an lima nga tinapay ngan duha nga isda, ngan hinmangad hiya ha langit pagpasalamat han Dyos. Ginpinitpinit niya an tinapay ngan iginhatag ha mga tinun-an, ngan igindurot ito ha mga tawo; Nangaon an ngatanan ngan nagkabubusog. Katapos, gintirok han mga tinun-an an mga salin nga nakapuno hin dose ka alat; Lima ka yukot nga kalalaken-an an nangaon, labot han kababayen-an ngan han kabataan. Binmaton hi Simon, Agaron, nagkabudlay kami ha bug-os nga gab-i, ngan waray gud kami nadakop; Kundi kon amo man an imo siring, itutunod ko an mga pukot. Gintunod nira an mga pukot, ngan nakadakop hin damo hin duro nga isda, nga haros magisi na an mga pukot.

/6 Kasasarigan an Dyos nga nagtawag ha iyo nga magin kausa han iya anak nga Jesu-Cristo nga aton Ginuo. Kay namatay ngan nabanhaw liwat hi Cristo, basi magin Ginuo hiya han mga buhi ngan han mga patay. Kay pinaagi ha iya ginhimo han Dyos an ngatanan didto ha langit ngan dinhi ha tuna, an kinikita ngan an diri kinikita nga mga butang, lakip an gahom nga espirituhanon, mga ginuo, mga punoan, ngan mga magburuot; Pinaagi ha iya ngan para ha iya, ginhimo han Dyos an ngatanan. Gintuha han Dyos an ngatanan nga mga butang pinaagi han Pulong; Sanglit waray nahimo nga bisan usa han ngatanan nga binuhat, nga diri pinaagi ha iya.

/7