Lat Inan John.angan Ump

John 1

Nil Jesus-a, Ke' WIK Anman Ngampar

1 Keenkanaman-a, aak ke'an yippakan wun-a, nil WIKan aak nathpalman wun-wun, murkanim anman, nilam Jesus.an. (Than Jesus.an waa'in nunang ke' WIK anman ngampar, puth nil wik God.antaman waa'-waa' ngampar, a' nilan waa'-waa' ngampar nil God.an want-wanttakan nila.) Niliy-a, ke' God anman. 2 Nil angman wun-wun God.antangan. Aak nathpalmana, nil God.antang wun-wun, pul karp. 3 Nil WIK alangan-a, yuk way min ma'mangkam yump, puth nil God.an thaw nungant yimanangan yumpow. Nilwey ke'an yumpiy-a, aakan-a, ya'-ya'am wuniy. An nil yuk way min ma'mangkam yump. 4 Nil WIK alangan ngangk thee' ngampar man-yetham iiyanakan, a' puth-a, nilaman ke' nganth yimanangan iiy-iiyan pam wanchantan ngampar, nil puth ke' woyan engkan yumpan ngampar. 5 Nil nganthaniy-a, aak ngaa'angan-a, yaam park-parkan. Nungkway aak ngaa' nyiman wunan-a, nil nganthan yaam anman pench-penchan, ke'aman uthaman, ya' anman. 6 Anpalan-a, nil God.anganiy-a, pam kuchan, paman namp-a, John. 7 Nil wamp yipam waa'ow thant pam wanchantan Jesus.an wampowa ke' nganth yimanangan thanta, than yotamang yipam wik ngeeyayn nunang a' ngangk punch-aakam thee'ayn nungant Jesus.ant. 8-9 Nil puth Jesus.an-a, ke' nganth pi'an paththam ngampara, nilan aak iikanakan uk, woyan minan engkan yump ngampar pam wanch yotamant. Puth nil John.an-a, ke' nganth many anman, nilan wampa yipam Jesus.an ke' nganth pi'an waa'owan thant, pam wanchantan. 10 Nilaniy-a, WIKaniy-a, aak ingan wun-wun. Nil yuk way min ma'mangkam yump, puth nil God.an thaw nungant yimanangan yumpow. Puth nungkway nil ma'mangkam yump-a, than pam wanch al-alangan ngoongk-ngoongkam nilan ma'mangkam yump, thanan ke'am ngaantam-ngeeyin nunang nilan wik God.antaman kal-kal, ke'am thiichin nunang, ya'a. 11 Nil aak nungantamak uk, puth pam wanch kampan nungantaman thaa'nganth thanaman, than ke'am ngangk min iiyin nungant. 12 Puth puungk wiy ep-paththam, ngangk min iiyin nungant, ngangk punch-aakam thee'in nungant. Thantaniy-a, pam wanch al-alantan-a, nil Jesus.an thaw thant than puk nhengk God.antam ngul weenina. 13 Nil God.an ke' piip wunpanam ngamparam inangan ya'a. A' puth ke' pam wanch ngamparam inangan ma' pam wanchang puk manyan uwowpul, ya'a! An nil-nil, puth nil God.angan waa' thanang ke' puk nhengk nungantam yimanangan. 14 Nil WIK anan-a, ngurp ke' ngamp yimanangan wamp, a' ngamparang aak ingan wun-wun. Ngan thathan nunang pam pi'ana a' min-minam paththam, nil ke' pam wiy yimanangan ya'a; nil puth ngangk minangam iiy-iiy thant pam wanchantan, wik kan-kanam anman thaw-thaw thant. Nil yimanangan iiy-iiy nilan puth nhengk God.antam, nhengk kaa'-thonam anman nungantam. 15 Nil John.angan-a, Jesus.an waa'-waa' thant. Nil thaa'-ay thaw-thaw thant, “Pam nil inmana, ngay ka'athaman waa'-waa'angan niiyant, ‘Nil mangk ngatharangan wampow, nil pam pi'ana, ngay ya'a, ngay pam many; nil puth aak nathpalman man-yetham wun-wun, ngay ke'aman yippak aak-ngeeyangan.’ ” 16 Nil Jesus.aniy-a, ngangk minangam paththam kaangk wunan ngampar, nil ngangk min-minangam iiy-iiyan ngamparak, nil ma'-yotam ma'-aath-aathan ngampang, a' yuk way min yot thee'-thee'an ngampar. 17 Aak keenkanaman-a, nil God.angan wik thayan nungantaman Moses.ant waa', a' Moses.anganiy-a, pam wanchant waa'-waa' thant. Puth nil Jesus.anganiy-a, meenath ngampar nil God.an want-wanttakana, puth nil ngangk minangam iiy-iiy ngampar a' wik God.antaman waa'-waa' ngampar, wik kan-kanam anangan. 18 Ngamp puth God.an ke' thathanam. Nil nhengk nungantamangan puk nungantam kaa'-thonamangan ep meenath ngampar nil God.an want-wanttakan, nilan puth God.antang nathpalman wun-wun Jesus.aniya.

Nil John.angan Wik Kuch Pam Pi'an Al-Alantan

19 Anpalaniy-a, than pam pi'an Jews.antam al-alangan-a, aak Jerusalem anpalan-a, pam priests-a, puth Levites anangan kuchin thanang pam John alantan, than yipam wikakan engkayn nungant. A' than thawin nungant, “Nint in wee'a?” 20 Nil John.an wik engkanangam thaw thant, nil wik ke'am thenchanaman pi'-pi', nil thaw, “Ngay pam anan ya'a God.angan keenkanaman kaa'ngak kuchowan ngampara!” 21 A' than putham thawin nungant, “In nint wee' ee? Nint Elijah ey?” Nil John.an thaw thant, “Ya'am a! Ngay pam Elijah anan ya'a!” A' than putham ngul engkin nungant, “Nint in pam prophetan ey? Pam God.antaman nganan kuup-kuupanan nungant ey?” Nil John.an thaw thant, “Ya'am a!” 22 Than thawin nungant, “Puth nint waa'ān ngant nint pam in wee' ee? ngan yipam wik koyaman kalān thant, nganangan kuchin. Puth nint ngantan waa'ān nungkamang pam in nint wee'-nathan a?” 23 Puth nil John.an thaw, “Ngay pam anman nil pam prophet Isaiah alangan keenkanaman waa' ngayang, wik yimanangan thaw, ‘Nil paman iiy-iiyow, pech-pechow aak pintalangan wik inangan thaw-thawow, “Niiy aak woyan min-minam paththam yumpān nungant, Lord.antana! A' puth minam ngaantam-ngeey-ngeeyāna, nil Lord wampow ngulan-a, niiyan yipam wik ngeeyān nunang.” ’ ” 24 Pam wiy anangan-a, pam pi'an Pharisees anangan angman than-thanin thanttang. 25 A' than thawin nungant, John.antan, “Puth nint pam anan God.angan kaa'ngak kuchowan-a, ya' thawangan, a' nint puth Elijah anan ya' thawangan, a' puth nint pam God.antam prophet anan-a, ya' thawangan. Nint puth wanttak ngakangan kuchek kuungk-kuungkangan thanang a?” 26 Nil John.an puth thaw thant, “Ngay ngakang thonakam kuchek kuungk-kuungkang thanang, puth pam thonam aak yamamana, niiyantangan than-thanan, niiy puth ke' mee'miy nunang, ya'a. 27 Nil pam anmana, mangk ngatharangan wampan, puth nilaniy ep-paththam pam wuut pi'an, ngay ya'a, ngay pam many. Ngayan tha' murrukan nungantam tha'aman ke' thapathing, ya'a, puth ngay pam pi'an ya'a.” 28 Than pam anangan John.antan engk-engkin-a, aak namp Bethany.ang angan. Aak Bethany.aniy-a, wonk pal kaawangk Jordan River.aman, aak angan nil John.angan kuchekan kuungk-kuungk thanang.

Nil John.angan Waa' Nunang Jesus.an Ke' Minh Sheep Manya

29 Ngaa' thon ngulan-a, nil John.angan thath nunang Jesus.an anpal um nungant wampant, a' nil thaw pam wanch al-alantan, “Ayyang, niiyalang, paman nanan thathāna! God.angan kuch nunanga. Ngamp minh sheep manyiyan mul-mulathanamp nil God.angan yipam ke'-ngul ngaantam-ngeeyow way ngampan keenkan yump-yumpampa. Nil pam inana ke' sheep many ngul uthamow ngamparaka. 30 Pam nil inana, ngay ka'athaman waa'-waa'angan niiyant, ‘Nil mangk ngatharangan wampow, nil pam pi'an, ngay ya'a, ngay pam manya; nil puth aak nathpalman man-yetham wun-wun, ngay ke'aman yippak aak-ngeeyangan.’ 31 Ngay ka'athaman ke' mee'miy nunang pam nil wee'-nathana, ya'a, puth ngay wampang niiyant, ngakang kuungk-kuungkang niiyang, niiy pam wanch inangan aak Israel punchan, niiy yipam mee'miy nunang puth nil puk nhengk God.antaman.” 32 Anpalaniy-a, nil John.an thaw thant, “Ngay Ngeen-Wiy Min God.antaman thathang uk-uk ke' minh kolat yimanangan, anpal kenyan uk nungant Jesus.ant, a' angman nungantang nyiin-nyiin. 33 Ngay ka'athaman mee'miy nunang ya'a, nil Jesus.an wee'-nathana, puth nil God.an-a, nilan kuch ngayang ngakangan kuungk-kuungkāng niiyang-a, thaw ngathar, ‘Nint Ngeen-Wiy Min ngatharaman ngul thathān ukowa, a' pam thonam alantangan nyiin-nyiinow ngul. Pam alangamana, nilan Ngeen-Wiy Min ngatharaman ngul wunpow thant, ngangkangan yipam ngoonchow thanttang.’ 34 Wik anangan God.angan waa' ngathar-a, nungantam Jesus.antaman-a, ngay puth kanam mee' ngayam thathang, a' puth-a, ngay inan tham waa'āng niiyant, niliy-a, puk nhengk God.antama.”

Pam Ko'alamang Jesus.an Monkan-Wakin Nunang

35 Ngaa' thon ngulan-a, John-a, puth-a, ngurp nungantam kucham, than angman than-thanin, 36 a' nil John.angan Jesus.an thath nunang woyanangan iiy-iiy. Nilan thaw pulant, ngurp nungantamakan, “An thathow a! Pam anan kan thathanip nunang ey? Nil God.angan kuch nunang. Nil ke' minh sheep many yimanangan ngul uthamow ngampara.” 37 Pam kucham anangan-a, ngurp John.antaman pul-a, wik inangan ngeeypul-a, a' pulan-a, Jesus.an monkan-wakpul nunang. 38 Nil Jesus.an weent-a, thath pulang monkan-wak-wakpul nunangan, a' engk pulant, “Nip ngeenak a?” Pul thawpul nungant, “Ayyang, Teacher-ang, nint aak wanttin wunangan a?” (Wik teacher inan-a, wik thanttamangan waa'antan Rabbi.) 39 Nil Jesus.an thaw pulant, “Nip pal iiyow a! Thathow a!” Pam pul ananganiy-a, iiypul ngul nungantang, a' aak nungantaman thathpul, nil wanttingan wun-wun. Aak anganiya kinch-way-wayang four o'clockan wampin aak Jesus.antamangan. Pam pul al-alangaman-a, angman kinch ukath pul Jesus.antang nyiin-nyiinpul. 40 Nil-nungant pam thonaniy-a, wik ka'athaman John.antaman ngeey-a, a' puth Jesus.antangan iiy-iiy ngul-a, an nil Andrew.anga, Simon Peter alantaman kuuncha. 41 Nil erkam paththam iiy, wenk-wenk kuunch nungantamak, Simon Peter alantan, a' uw nunang, a' waa'ant, “Ayyang! Nganan pam Messiah.an kanam uwan nunanga! pam anan nil God.angan kaa'ngak kuchowana.” (Messiah.aniy-a, namp thonangan nungant Christ.) 42 A' nil Andrew.angan-a, Simon Peter.an-a, wampath nunang, Jesus.antan. Nil puth Jesus.angan-a, thath nunang, a' thawant, “Nint in Simon, nhengk nungantam John.antaman. Namp nungkar-a, inan ngul wunow, Cephas.” (In ke' namp anman, Peter yimanangan waa'-waa'anamp. Wik ngamparamanganiy-a, kunttow waa'anamp.)

Nil Jesus.angan Pam Kucham Ump Pulang

43 Ngaa' thon ngulan-a, nil Jesus.angan ngaantam-ngeey aak Galilee.akan iiyow. Nil iiy-a, a' Philip ngul uwan, a' thawant, “Nint ngayang monkan-wakāna!” 44 (Nil Philip.an-a, aak Bethsaida anpalan wamp, aak town anman pul Andrew.ang-a, Peter.angan wun-wunpul.) 45 Nil Philip.an-a, iiy, pam namp Nathanael alantan wenk-wenkant. A' nil uw nunang, a' thawant, “Ngan kanam uwan nunang, pam anman Moses.angan keenkanaman waa' ngampar lat ngench thayanangan, a' puth-a, pam prophets al-alangan waa'-waa'in nunang thampan. Nil pam alantan namp-a, Jesusa, nhengk Joseph.antamana aak Nazareth punchanantam.” 46 Nil Nathanael.an thawant, “Ngul nil pam min wampiy aak Nazareth anpalan ey? An ya'a!” Nil puth Philip.an thawant, “Yaa, pal iiy a! Nint mee' nungkaramangam thathān nunang a!” A' pul iiypul. 47 Nil Jesus.angan thath nunang Nathanael.an um nungantan iiy-iiy-a, a' nil Jesus.an thaw thant wiy al-alantan, “Pam nanan thathiy nunanga! Pam nil Jew min-minam paththama; nil man-thonama, man-uuy ya'a!” 48 Nil Nathanael.an engkant, “Nint ngul want-wanttak mee'miy ngayangan a?” A' nil Jesus.an puth thawant, “Ngay ka'atham anman thathangan nintang, yuk kom pek-pekaman nyiin-nyiinan, nil Philip ke'aman yippak thaw nungkar.” 49 Nil Nathanael.an thawant, “Ayyang, Teacher-ang, nint in nhengk God.antam a! Nint in pam pi'an a! King pam wanch aak Israel punchan al-alantamana!” 50 Nil Jesus.an puth thawant, “Nint kan-ngul ngaantam-ngeeyangan ngayang ey? ngay nhengk God.antaman ey? ngay puth waa'angan nungkara ngay nintang yuk kom pek-pekaman thathangan ey? Inan work many yippak thathan, ngulan-a, an nint work pi'-pi'anam ngul thathāna.” 51 A' nil Jesus.angan-a, wik thonangan ngul waa' thant, “Ngay wik kan-kanam thawang niiyant. Niiy aak in kenyan aak God.antaman ngul thathān, puth-a, niiy ngaantiyongk God.antam anangan ngul thathān thanang kenyaman matayn-a, a' puth pekaman ukayn ngatharangana, ngay pam inan nil God.angan kuch ngayang.”

John 2

Pam Komp-a, Wanch Komanangan Ngentuwpul

1 Ngaa' thonang ngulan-a, pam komp-a, wanch koman pul aak Galilee.angan ngentuwpul, aak namp Cana angan. Thanan may pi'an yumpin wedding aakanakan. Nil kaath Jesus.antamana iiy thamp aakanakan may pi'anakan. 2 A' than thawin thant, Jesus-a, a' puth ngurp nungantam al-alantan, aakanakan iiyayn, may pi'anakan, a' than angman wampin thant. 3 Ngulaniy-a, may wine.an-a, ya'-ngul minch thanttam. A' kaath Jesus.antaman iiy nungant, Jesus.ant, a' thawant, “Ayyang, may wine.an ya'-ngul, kan minchathin a!” 4 A' nil Jesus.an thawant, “Ayyang, wik nintan ngaantam-ngeeyangan-a, an nint-nint; wik ngayan ngaantam-ngeeyang-a, an ngath-ngath. Aak ngatharan ke'am yippak wampar, work iiyanakan.” 5 A' nil kaath Jesus.antaman thaw pam al-alantan workan iiy-iiyin, “Nil Jesus wanttakanwey thawow niiyant-a, niiy wik ngeeyān nunang a!” 6 Six jars pi'-pi'anam angman than-thanin, than puth kunttowam yumpin thanang, ngakan pi'-pi'in. Jars anangan-a, pi'-pi'anam ke' drums yimanangan. Than Jews al-alangan ngak jars anpalan ma' kaaw-kaawin thanttakam, puth aak thantan yimanangan wun. 7 A' nil Jesus.aniy-a, pam al-alantan thaw thant, workan iiy-iiyin, “Niiy ngak uwān a! jugs manyiy il-ilangan, a' pal kalān, jars pi'anang ingan yeech-yeechān, thaa' piimpanakaman.” A' than ngakan uwin, yeech-yeechin jars pi'-pi'anang angan, a' thaa' mul ngul maay. 8 A' nil Jesus.an thaw thant ngul, “Manyam empāna jar amanaman, a' niiy kalān moom alantan, mayan pi'-pi'an.” A' than puth kalin nungant, moom alantan. 9 Nil moomangan paath-a, puth ngak ya', an wine paththama, puth nil Jesus.angan ngakam anpalan wine.ak yump. Nil mooman puth ngoongk-ngoongkama, ke'am thiich Jesus.angan ngakaman yump wine.akan. Than wiy al-alangan ep, pam workan iiy-iiyin, than ep mee'miy. A' nil moomangan ump nunang, pam nil nyiingkan wanch ngenta, 10 a' thawant, “Than wiyangan may pi'an yumpantan-a, may wine man-pathan ka'athaman thee'antan thant. Wine pi'an kanan mungkantan-a, wine chil way ngul thee'antan thant. Puth nintan-a, wine minaniy-a, pi'an ngampar, koy-koyyuwak.” 11 Nil Jesus.anganiy-a, work pi'-pi'anam yot yump thanang, min-miniya. Work min nil ka'athaman yump thant-a, inan, ngakaman yump wine.ak, aak Galilee.angan, aak Cana angan. Work pi'an inan yump-a, an meenath thant nil Jesus.an pam pi'an, nil-nil, ke' pam wiy yimanangan ya'a. Anpalana, ngurp nungantam al-alangan-a, kan-kanam ngaantam-ngeeyin nunang, God.angan kuch nunang. 12 May pi'an kanaman minch-a, nil Jesus.an-a, kaath-kunch-a, a' kuunch nungantam-a, a' puth ngurp nungantam anangan aak Capernaum.ak ngul iiyin, ma'-ko'alam angan wunin.

Nil Jesus.an Iiy Ngul Aawuch Ngench Thayanakan

13 Aakan thinth-thinth ngul wampan thant, may pi'anan yumpayn aak Jerusalem angan. May pi'an inan-a, Passover.an waa'antan. Nil puth Jesus.an aak Jerusalem aakanakan iiy. 14 Nil wamp-a, nil aawuch ngench thayan aakanakan iiy. Nil pek ngoonch a' pam anangan thath thanang, minh bullocks thakan sellimpung-pungin thant, pam wanch wiy al-alantan, minh bullocks-a, minh sheep-a, a' putha minh panch munkiyang thakan sellimpung-pungin thant. A' nil Jesus.anganiy-a, pam wiy anangan thath thanang, table.angan nyiin-nyiinin wukal thampan, yipam wukal wiyantaman epankathayn thant. 15 Nil Jesus.ang inangan thath thanang-a, a' whip yump, kuuyam, ke' stockwhip yimanangan. A' nil whipan maaya, kenth thanang. Yotan-a, paa pankin, yoon kamp mo'-mo'in, pam anangan-a, a' minh anangan, sheep-a, bullocks thakan. A' nil tablesaniy-a, wukal thampaniy-a, wonk thon wew thee' thanttam. Wukal thakan-a, ya' yaarkath thanttam, aakang keek-keekin. 16 A' nil thaw thant, pam al-alantan minh munkiyang anangan sellimpung-pungin, “Minhan puy kalān a! Niiy aawuch piip ngatharamantaman ke' wayathān a! In aak store ya'a!” 17 Ngurp nungantam al-alangana wik ngeeyin nunang Jesus.an thawa, a' wik David.antam anangan kuchekangam wamp thant, nil keenkanaman thaw piip God alantan lat ngench thayanangan umpin, “Ayyang, Piip-ang, ngay aawuch nungkaramakan kaangk wunang paththama, a' ngay ngangk wayamang aawuch nungkaram anpalana.” 18 A' than Jews wiy al-alangan kanan thathin-a, pam anangana puth minh thakan pent-pentinan-a, aawuch ngench thayanaman-a, than thawin nungant, Jesus.ant, “Nil wee' thaw nungkar pam wanch ananganiy kenthān thanang a? Nint work pi'an yumpān ngant puth nganan yipam ngaantam-ngeeyān God.an thaw nungk kenthān thanang.” 19 A' nil Jesus.an puth thaw thant, “Niiy aawuch God.antam inan thuthinwey-a, ngay ma'-ko'alamangan-a, koyam ngul kaachinga.” 20 Puth than Jews anangan-a, thawin nungant, Jesus.ant, “Ayyang, in nint wanttak thaw-thawangan e? Ma'-ko'alamangan wunow-a, nint aawuch ngench thayanan koyam erkam paththam ngul kaachin ey? Puth aawuch inan-a, kaap thon-thonang kaach-kaachin, kaap forty-sixang wantan, inaniy yump-yumpin.” 21 Puth nil Jesus.angan-a, aawuch paththaman ke'am waa', ya'a; nil nungantakaman waa', ke' aawuch God.antam yimanangan. 22 Ngul-ngulan-a, nil Jesus.an kanan mulaman ek-a, wik inangan nungantaman-a, kuchekangam wamp thant, ngurp nungantamak. A' than wik inangan nil Jesus.an thaw-a, a' puth wik lat ngench thayanaman ngaantam-ngeeyin an wik kan-kanamana. 23 Nil Jesus.an angman yippakan wun-a, may pi'an Passover.an yumpin-a, pam wanch yot al-alangan ngaantam-ngeeyin nunangan pam pi'an God.antam, than puth work pi'an thathin nilan yump-yump. 24 Puth nil Jesus.anganiy-a, kan ngaantam-ngeey thanang erkam ngul kon-ngathow thanang, nunangan ke'-ngul ngaantam-ngeeyayn, puth nil yotaman kan thiich thanang. 25 Nilan puth ep ngangk pal pekkuwam thath thanang, pam wanch yot anangan, an puth pam wiy al-alangan ke' waa'iythan nungant pam wanch want-wanttakan iiy-iiyantan, puth nil kanam thiich thanang.

John 3

Inan Wik Kath Nicodemus.antam

1 Nil pam Nicodemus.an-a, nil pam pi'an iiy-iiy thant, Jews al-alantan, pam nil ke' councillor yimanangan. Nilan-a, pam Pharisee thamp iiy-iiy. 2 Nil aak ngutang wamp Jesus.ant, a' thawant, “Ayyang, Teacher-ang, ngan kan mee'miy God.angan kuch nintang, yipmam thaa'-aath-aathān nganang. Nil God.angan ke'wey ma'-aathiw nintang-a, an nint work pi'-pi'anam min-miniy ke' yumpin ya'a.” 3 Nil Jesus.an thawant, Nicodemus.antan, “Ngay nungk in kan-kanam thaw-thawanga; niiywey putham ke'an mee'-penchin-a, niiy ma' God.antang ke' iiyin, ya'a.” 4 Nil puth Nicodemus.an thawant, “Ngan puth pam wanch inangan want-wanttak mee'-penchāna kaath nganttamantamana? Ngan koyaman ke' thipang ngoonchin kaath nganttamantangana, puthaman ke' aak-ngeeyin, ya'a!” 5 Nil Jesus.an thaw nungant, “Ngay wik kan-kanam thawang nungk. Nil paman ke'wey puthaman mee'-penchiy-a, ngak alantamana a' puth Ngeen-Wiy Min God.antam alantaman-a, nil ma' God.antang ke' wuniy ya'a. 6 Piipiy niiyantamangan wunpin niiyang, an nil-nil. Puth inan-a, niiy puthaman aak ngeeyin-a, an nil Ngeen-Wiy Min God.antaman ngangkangan ngoonchow niiyantang, a' angman wun-wunow. 7 Nint ke' mee' ikāna, puth ngay nungkar wik inan waa'ang, ‘Niiy puthaman aak-ngeeyān a!’ 8 Nil wuntan wanttinakan wunpan-a, an nil wunpan. Niiy wuntan ngeeyaniy-a, puth niiy ke' thathaniy wanttinpalan ka'athaman wunpan, a' puth wanttinak ngulan wunpow. Pam wanch wee'-wee'anangan puthaman aak-ngeeyantan Ngeen-Wiy Min God.antam alantaman-a, inan ke' yimanangana niiy nunangan ke' thathin, ya'a. Niiy puth anangan ep thathin thanang woyan min God.antaman wak-wakantan ngul!” 9 Nil Nicodemus.an thaw, “In-ngul want-wanttak aa?” 10 Nil puth Jesus.an thawant, “Nint puth pam pi'ana, teachera, Jews.antama! Nint puth wik inangan ke' thiichangan ey? 11 Ngay nungkar kan-kanaman wik thawanga. Wik nganan waa'-waa'anan-a, an ngay mee'miyang waa'-waa'anan; ngan puth mee' nganaman thathan. Puth pam yam wee' ngangk minangaman wik ngeey-ngeeyiw nganttamana? Ya'a. 12 Ngay puth wik kanam waa'ang niiyant yuk way min aak imanam thakan, niiy puth wik ke' ngeeyaniy ngayang, ya'a. Ngay wik inpal kenyan waa'ing niiyantwey-a, niiy puth want-wanttak wik ngeeyin ngayanga? 13 Pam wanch puth aak heavenakan ke'am yippak matina, ya'a; nil pam thonam thonak epa, nil God.angan kuch nunang pam wanchantan, nil ep ang kenyan wun-wun God.antang, puth nilam uk ngula aak iikanakan.” 14 Keenkanaman-a, nil Moses.angan-a, yuk thuuk brassaman yump, a' yuk thapangan wunpan, a' kenyam ngulan waanchan aak pintalangan. Inan-a, ke' yimanangan ngul wunow: pam nil God.angan kuch nunang-a, than ngul yimanangan waanchayn nunang, 15 yipam than pam wanch wee'-wee'anangan ngangk punch-aakaman thee'ayn nungant-a, than ngangk aak umpuyaman ngul wunayn nungantang. 16 Puth nil God.an kan-kanam kaangk wunan ngampar pam wanchant, an ngangk pal pekkuwam kaangk wunan ngampar, ke'-paal nilan nhengk nungantam kaa'-thonaman kuch nunang, than yipam wee'-wee'anangan ngangk punch-aakamaniy thee'ayn nungant-a, an than ngangk aak umpuyaman wun-wunayn nungantang, God.antang, nil ke' kuchiy thanang nungantam anpalan. 17 Puth nil God.angan nhengk nungantam aak iikanakan kuchan yipam pam wanch kaa'-piichanathow way thanttam anpalan, nil ke'am kuch nunang yipam way waa'-waa'ow ngampangan, ya'a. 18 Than pam wanch wiyangan kaangk ke' ngangk thanttaman punch-aakam thee'ayn Jesus.antan. Nil puth God.an ka'athaman kan thaw thananiy ke'-ngul wunayn nungantanganiya, than puth ngangk punch-aakam ke'am thee'in nhengk kaa'-thonam nungantamakan. Puth thant wiy al-alantan ep yimanangan ke' thawow thant than puth ngangk punch-aakam thee'in nungant, Jesus.antan. 19 Nil Jesus.an-a, ke' nganth pi'an aak iikanakan wamp, puth pam wanch wiy anangan kaangk ke' nungantam, than kaangk ke' woyan nungantaman wakayn, ya'a, than kaangk woyan way thanttam anman wak-wakayn. Than ananganiy-a, ke' nganth ke'anang iiy-iiyantan, ke'-paal nil God.angan pam wanch wayanang waa'an thanang. 20 Than wee'-wee'anangan way anman yump-yumpantan-a, than Jesus.an ngangk-wayangam kal-kalantan nunang, than kaangk ke' thinthaman wampayn nungant, ya'a, puth than God.antam winynyang mo'-mo'antan, than ngaantam-ngeeyantan puth God.ang ngul wak thanang. 21 Puth than wee'-wee'anangan woyan minan wak-wakantan-a, an ep nganth pi'an Jesus.antam aakanakan wampantan, pam wanch wiy al-alangan yipam thathayn thanang, God.angan ma'-aath-aathan thanang minam iiyanakan.

Nil John.ang Jesus.an Pam Pi'anan Waa' Nunang

22 Anpalan-a, nil Jesus-a, ngurp nungantam anangana than karpam iiyin aak namp Judea aakanakan, a' angman wunin thanttang. Nil Jesus.angan angman kuchek ngakang kuungk-kuungk thanang, pam wanch wiy anangan. 23 A' nil John.angan-a, aak namp Aenon angan kuchek ngakang kuungk-kuungk thanang, aak Salim thinth, an puth ngak pi'an aak anganiya. Pam wanch anangan wamp-wampin nungant John.ant, a' nil kuchek ngakang kuungk-kuungk thanang. 24 (Than puth John.an yippak ke'am thenchin nunang, aak jailanganiy.) 25 A' than pam puungk wiy ngurp John.antam anangan, puth-a, pam Jew thonam, than wik thaw-thawin thanttakam, than nath wee'antan iiyayn kuchek kuungkanakana, nath John.antana, nath ya'a, nath Jesus.antana. 26 A' than ngurp John.antam anangan John.ant ngul iiyin, thawin nungant, “Ayyang, Teacher-ang! Nint pam anan kan ngaantam-ngeeyangan nunang ey? Pam anman ka'athaman nungkarangan iiy wo'uwayn Jordan River angana, pam anman nintan waa'-waa'an ngant -- nil an-ngula, kuchek ngakang kuungk-kuungkan thanang, than pam wanch yot ngul wamp-wampantan nunganta!” 27 Puth John.an thaw thant, “Nil God.angwey ke'an ma'-aathiy nunang-a, pam wanch anangan ke' wampiythan nungant, ya'a. 28 Niiy puth ngayang mee'miy ngay ka'athaman wik waa'ang niiyant, ‘Ngay pam anan ya'a God.angan keenkanaman kaa'ngak kuchowan ngampara. Nil God.angan keenk kuch ngayang niiyant, ngay yipam waa'āng nunang niiyantana.’ 29 Wik kath kan inan ngeeyāna pam kompantam-a, wanch komanantaman pulan ngentuwpul. Nil pam alangan wanchan maayan-a, an wanch nungantakam ngul pi'an. Puth kampan pam alantaman-a, thananiy-a, ngangk min paththam ngul wunin puth nil pam alangan wanchan maayan. In ke' yimanangan wunan ngathar. Ngay ngangk min paththam weemang nungantam Jesus.antaman puth pam wanch yot wamp-wampantan nungant. Mak monkan-wak-wakayn nunang, ngayangan ya'a, 30 puth nil Jesus.an ep pam pi'ana, ngay puth pam pi'an ya'a.”

Nil Jesus.an Pam Pi'an Paththama

31 Nil aak inpal kenyan uk-a, an nil pam moom wuut pi'an paththam, ke' pam wiy yimanangan ya'. Ngamp aak inpalman-a, ep aak ngampar inmana, puth ngamp wik thakan thawanamp aak imanaman. Nil anpal kenyan uk-a, an ep pam pi'an paththam, ke' pam wiy yimanangan ya'a. 32 Nil wikan waa'an, puth nilam mee' nungantamangan thath, a' puth kon nungantamangan ngeey. Puth pam wanch in ya'-ya'am kaangk ngangk minangaman wik ngeeyayn nungantaman. 33 Than wee'-wee'anangan kaangk ngangk minangaman wik ngeeyayn nungantaman-a, than ep meenathantan ngampar nil God.an wik kan-kanaman thaw-thawan. 34 Nil pam anan God.angan kuch nunang-a, Jesus.an-a, nil wik God.antaman waa'-waa'an thant, nil puth God.angan Ngeen-Wiy Min nungantaman kuch nungant, yipam ngangkang angman wun-wunow nungantang. 35 Nil piip nungantaman-a, kaangk wunan nhengk nungantamak Jesus.antan, a' nil thaw nungant moom pi'anan iiyow aak umyompanamakan. 36 Than wee'-wee'anangan nhengk God.antamak ngangk punch-aakaman thee'ayn nungant-a, than ep ngangk aak umpuyam wunayn nungantang. Puth than wee'-wee'anangan kaangk ke'an wik ngeeeyayn nungantaman-a, than ngangk aak umpuyam ke' wunayn aak nungantangan, puth God.angan ngangk kul pi'-pi'ow thant ngulakaman.

John 4

Nil Jesus.angan Wanch Samaria Punchan Uw Nunang

1 Than pam Pharisees al-alangan-a, wik thoo' ngeeyin pulantam, Jesus-a, John pulantamana, than pam wanch yotang ngul monkan-wakin nunang, Jesus.an, a' nil ngakang kuchek kuungk-kuungk thanang, puth John.an-a, ko'alamang thonakam monkan-wakin nunang, a' nil ko'alam anangaman kuchek ngakangan kuungk-kuungk thanang. 2 Puth nil Jesus.angan ya'a, ke'am ngakangan kuchek kuungk-kuungk thanang. Ngurp nungantam al-alangan ep kuungk-kuungkin thananga. 3 A' nil Jesus.angan wik ngeey thanang nunangan waa'-waa'in-a, aak Judea.an want ngul a' aak Galilee.ak ngul iiy, 4 Samaria wakanang iiy-iiy. 5 Nil aak Samaria.ang ngulan wamp-a, nil town manyang wamp, aak namp Sychar, aak paddock thinth. Paddock inan-a, nil Jacob.angan keenkanaman want, nhengk nungantamak, Joseph.antan. 6 Aak paddockangan-a, ngak pantam angman, nil Jacob.angan keenkanaman ngak pantam thee'. Ngak pantam pek-pekaman ngak mee' pich-pich. Nil Jesus.an-a, kinch keny ngak pantam aakanakan iiy. Nil kan-ngul kemp wir peey, puth aak kecham iiy-iiy. A' angman nyiin, ngak pantam thintha. 7-8 Nil-nilam nyiin, puth ngurp nungantam anangan townak kan iiyin, may yipam piiyayn thanttakam. Anpalana, wanch thonam ngul wamp ngakak, nil aak Samaria punchana. A' nil Jesus.an thaw ngul nungant, “Ayyang, nint ngak ngath thee'āna!” 9 Nil puth wanch ngulan thawant, “In nint pam Jew inan ngakak thaw-thawangan ngath ey? Ngay puth aak Samaria punchana!” (Puth than Jews al-alangan-a, yuk way min cups thakan thanttakam anman pi'-pi'in, ngakak thakaniy; than Samaria punchan ananganiya than-than, way min thanttakam pi'-pi'in. Than puth thaa' karp ke' mungk-mungkin ya'a.) 10 Nil Jesus.an thawant wanch alantan, “Nint ke'am thiichangan yuk way minan nil ngeen nathan God.angan kaangk thee'ow nungk, ya'a! A' nint ngayang ke'am thiichangan nil God.angan kuch ngayang, ya'a. Nint mee'miywey-a, nint ngathar ngakakwey thawina, a' ngayan nungk ngak anan thee'ing, ngak murkanim anmanan mee' pich-pichan.” 11 Nil wanchan ngul thawant, “Ayyang, nint puth bucket ke'anang a! Ngak pantam inana, pek kech a! Nint ngak wanttinpal uwān a? ngak murkanim anman mee' pich-pichana? 12 Keenkanaman-a, nil wuut mangk ngamparam alangan-a, Jacob.angan-a, ngak inman mungk-mungk, ngak pantam inpalman, nil-a, nhengk nungantam al-alangan a' minh bullocks nungantam al-alangan. Ngul-a, nil ngak pantam inaniy ngant ngul want, Jacob.angan. Nint ngaantam-ngeeyangan nungkarakam ke' pam pi'an iiy-iiyangan ey? Nil Jacob.an ya'a, pam many ey?” 13 Nil Jesus.an thawant, “Than wee'-wee'anangan ngak inan mungkayn-a, ngak pantam inpalman-a, ngul-ngulan-a, than putham ngul ngakam uthamayn. 14 Puth than wee'-wee'anangan ngak ngatharaman mungkayn ngayan thee'āng thant-a, than puth ngakam ke' uthamayn ya'a. Ngak ngayan thee'āng thant-a, ke' ngak bul-bul yimanangan pich-pichan, ngak mee' murkanim anman, than yipam ngangk aak umpuyam wunayn God.antang.” 15 Nil wanchan thawant, Jesus.antan, “Ayyang, nint puth ngak nanan thee'ānar, ngay yipam ngakaman ke'-ngul uthamāng, a' ke'-ngul yipmam wampāng iikanakan ngakakaniya.” 16 Nil Jesus.an thaw ngul wanch alantan, “Nint kan iiyān pam thum nungkaramant thawān pal wampowa. A' nip ingan wampow ngathara.” 17 Nil wanchan thawant, “Ngay pam thum ke'anang a!” Nil Jesus.an puth thaw wanch alantan, “Ee', kan-kanama. 18 Nint puth ka'athaman pam ko'alam maayana, anpalan-a, nint pam thonantang wun-wunangan, nint puth ke'am maayan nunang, nil pam nungk ya', nint yaan wun-wunangan nungantang. Nint puth kan-kanam thaw-thawangan ngath nint pam thum ke'anangana.” 19 Nil wanchan thawant, Jesus.antan, “Ngay kan ngaantam-ngeeyang nintang pam pi'an God.antama, propheta, nint puth kan thiichan ngayang. 20 Than wuut mangk ngatharaman aak in punchana, Samaria.aman aak yoyk ingman matin, yipam God.antan mee'-wuthanamayn. Puth niiy Jews il-ilangana aak Jerusalem.an waa'aniy aak min paththaman mee'-wuthanamanak God.antana.” 21 Nil Jesus.an thawant, wanch alantan, “Ayyang, kan in ngeeya! Ngay kan-kanam thawāng nungka. Aakan kan-kanang ngul wampana, pam wanch anangan aak yoyk ingman ke'-ngul mee'-wuth-wuthanamayn, piip God.antan, ya'-ngula, a' puth than ke'-ngul mee'-wuth-wuthanamayn nungant, aak angan Jerusalem.angan, an ya'-ngul. 22 Niiy pam wanch aak Samaria.aman-a, niiy ep mee'-wuth-wuthanamaniy God.ant, puth niiy ke'am thiichan nunang, God.an, ya'a; puth ngan Jews il-ilangan ep thiichan nunang, nganan mee'-wuth-wuthanamanan nungant. Puth pam nilan wamp pam wanch kaa'-piichanathanakan thanang-a, nil aak Jews.am anpalan wamp. 23 Aak inan kan-kanang wampana, than wee'-wee'anangan kaangk minam mee'-wuthanamayn nungant piip God.antan-a, than ngangkam mee'-wuthanamayn nungant, thaa'aman ya'a. Nil piip God.angan kaangk thanang pam wanch anangan yimanangan mee'-wuthanamayn nungant. Than in-inanganiy-a, nil piip God.angan kaangk thanang. 24 Nil God.an nil-nil; nil puth man-yetham anman iiy-iiyan, nil puth kemp ke' pam wanchang yimanangan ke'am kal-kalan, ya'a. Than wee'-wee'anangan kaangk minam mee'-wuthanamayn nungant piip God.antan-a, than ngangkam mee'-wuthanamayn nungant, thaa'aman ya'a.” 25 Nil wanchan thawant, Jesus.antan, “Ngay kan thiichang nil God.angan keenkanaman kaa'ngak ngampang pam pi'anan kuchow ngampar, than Christ.an waa'antan nunang. Nil wampowan ngampar-a, wik yot-yotam waa'ow ngampar, ma'mangkamana!” 26 Nil Jesus.an puth thawant, wanch alantan, “Ngay pam inman nintan waa'-waa'angana, ngay inman wik thaw-thawang nungkar.” 27 A' than ngurp nungantam anangana kan-ngul wampin. Than thathin pulang-a, thaniy-a, thaa'am ikin, puth Jesus.an wanch alantan thaw-thaw. Than ke'am thawin nungant wanch alantan, “Nint ngeenak wampan a?” A' Jesus.antan ke'am thawin nungant, “Nint ngeenak thaw-thawangan wanch ilantana?” 28 A' nil wanch alanganiy-a, jaran angam want, a' kan-ngul iiy townak a' pam wanch al-alantan pech thant, 29 “Niiyalang! Niiy kan ngatharang pal iiyān a! Niiy kan pam anan thathān nunang a! Nil nyiingk ngath waa'a yot ngayan way yump-yumpangan. Nil nath pam anan nil God.angan kaa'ngakan kuchowan ngampara!” 30 A' yotaniy pam wanch townaman-a, tul-thuth-thuthwin, aak-aakanakaman iiyin nungant, Jesus.ant. 31 Than pam wanch anangan kan-kanangan wamp-wampin Jesus.ant-a, ngurp nungantam anangan thawin nungant Jesus.ant, “Ayyang, Teacher-ang, nint kan may mungk ee!” 32 Puth nil Jesus.an thaw thant, “Ngay may thampa, may niiy ke'an mee'miy ngatharam.” 33 Ngurp nungantam al-alangan wik inangan ngeeyin-a, than thanttakam thaw-thawin, “May nungant yam wee'ang wampath ee?” 34 Nil puth Jesus.an thaw thant, ngurp nungantam al-alantan, “Ngay mak wik ngeeyāng nunang piip God.an, nilam puth kuchanya. Ngay mak minchathāng work nilan waa'ar. Work inan-a, ke' ngay mayan mungk-mungkang yimanangan. Wik inan waa'-waa'ang thant-a, an ngay othamanga, ke' mayan mungk-mungkang. 35-38 “Niiy thathān a! Pam wanch anangan nanpalan iiyantan a! Niiy nath ngaantam-ngeeyin thanang than wik God.antaman kaangk ke' ngeeyayn. Puth ya'a! Than wik God.antaman kaangk ngeeyayn, than puth ngul ngangk thee'ayn God.ant. “Niiyalang, kan niiy in ngeeyiy a! Ngay puth kan niiyant wik kath inan waa'āng may cornama. Niiy may cornan kan thathāna! May cornan kan-ngulan menchan weeman thuthanakana. Ka'athaman-a, pam wampin, may corn kaampanakan. Puth yimanang ngulan-a, pam wiy wampayn may corn thuthanakan. Than may corn kanan yal-yalmathayn-a, than al-alangan wukalan uw-uwayn, wagesan, a' ngangk min ngul iiyayn. Wik kath inan may cornaman yimanangan wun. Pam wanch wiyang wik God.antam kanam waa'in thant, pam wanch al-alantan, puth thanan many-manyim ngaantam-ngeeyin nunang God.an. Ngul yimanangan-a, than kaangk putham wik minan ngeeyayn. Ngay puth niiyang kuchāng, niiy yipam waa'ān thant wik God.antaman. Than wik ngeeyaynan-a, than ngul ngangk thee'ayn God.ant. Anpalan-a, than ngangk aak umpuyam ngul wunayn, God.antang. Niiyan puth ngangk min ngul iiyān, pam wanch al-alantaman. Niiyan puth karpam ngul ngangk min iiy-iiyān, niiy-a, puth pam wanch anangan ka'athaman wik God.antaman waa'in thant. Niiy karpam ngangk min ngul iiy-iiyān. Niiy puth ka'athaman ke'am waa'an thant, ya'a; than wiyang waa'in thant. Niiy work thanttaman minchathāna.” Nil Jesus.an yimanangan thaw thant. 39 Nil wanchan ka'athaman koyam iiy townakan-a, than pam wanch wiyangan kan-kanam ngul ngaantam-ngeeyin nunang Jesus.aniy wik nunangan wanchan ngeeyina,“Nil ngath waa'ar way yot ngayan yump-yumpang.” 40 A' than kanan wampin nungant Jesus.antan-a, than thawin nungant, “Ayyang, nint nganttang ingam ke' wunin ey?” Puth nil Jesus.an-a, “Ee'” thaw thant, a' nil ma'-kucham angman wun thanttang. 41 A' pam wanch yotangan kan-kanam ngul ngangk thee'in Jesus.ant, puth wik anpalan nilan thaa'-aath-aath thanang, wik min God.antam anangan. 42 A' than wanch alantan thawin ngul nungant, “Ngan ngangk kan thee'an nungant ngula, wik nungkaram anpalan thonakam ya'a, puth nganam ngulan wik nungantaman ngeeyan. Ngan kan ngaantam-ngeeyanan nunang nilan wamp ngampar yipam kaa'-piichanathowan ngampang yotaman, aak umyompanaman.”

Nil Jesus.ang Puk Wuutan Miyalath Nunang

43 Nil Jesus.an ma'-kucham kanan wun thanttang-a, aak Samaria angan-a, nil want thanang ngul, kan-ngul iiy, aak Galilee.ak. 44 Puth nilam Jesus.an ka'athaman thaw, “Nil pam prophet aak nungantamangan wuniywey-a, pam wanch al-alangan aakan punchanang ke' ngaantam-ngeeyiythan nunangan ke' pam pi'an yimanangana, ya'a.” 45 Nil Jesus.an kanan wamp aak angan Galilee.angan-a, pam wanch yot anangan umang iiyin nungant, ngangk min wunin nungant. Puth than ka'athaman iiyin aak Jerusalem.akan, may pi'anakan, Passover.an waa'antan, a' angan kan thathin nunang work pi'anan yump mee' thanttangan. 46 A' nil Jesus.an iiy aak many aakanakan, Cana.akan. Aak Cana.an aak angman Galilee.angan, aak nil angman yump ngakaman wine.akan thant. Nil pam pi'an thonamana, angman wun, aak Cana thinth, aak namp Capernaum angan, nil kingantan work iiy-iiy. Puk wuut many nungantamaniy-a, way-wayam wun. 47 Nil pam pi'an alangan wik thoo'an ngeey-a, Jesus.an nyiingk-nyiingkan wamp Galilee.akan aak Judea.aman-a, a' nil umang iiy nungant ngul, Jesus.ant, a' thawant, “Ayyang, nint ke' iiyin ey? Aak Capernaum.ak ey? Puth puk nhengk ngatharam way-wayam wunana, mul yip-yipam wunow. Nint ke' iiyin nungant ey? miyalathin nunang ey?” 48 Nil puth Jesus.an thawant, “Niiywey work pi'an min-miniy ke' thathinwey-a, mee' niiyantanganwey-a, niiy puth ke' ngaantam-ngeeyin ngayang God.angan kuch nganyang, ya'a.” 49 Nil puth pam pi'anan thawant, Jesus alantan, “Ayyang, nint pal iiy ngatharanga! Puk nhengk ngatharaman ngul uthama, way-wayam puth wunan.” 50 Nil Jesus.an thawant, “Yaa, nint kan iiy a! Puk nhengk nungkaram ngul miyalamow a!” A' nil pam alangan kan-kanam wik Jesus.antaman ngaantam-ngeeya, a' iiy ngul. 51 Nil iiy-iiy-aa, a' pam workan iiy-iiyin nungant-a, umang wampin nunganta. A' than thawin nungant, pam pi'an alantan, “Puk nhengk nungkaraman-a, kan miyalam ngul a!” 52 Nil thaw thant, “Aak ngeenwey miyalam a?” Than puth thawin nungant, “Peetanamana, kinch kenyan-a, kemp karkanan wun-a, an ya'-ngul want nunang, kan miyalam a!” 53 Nil piip-kunchangan ngaantam-ngeey nungantakaman, “Yaa! Puth an-aniyangan peetanaman-a, kinch kenyana, nil Jesus.an thawar, ‘Puk nhengk nungkaraman ngul miyalamow a!’ ” A' nanpalan-a, pam pi'an anman-a, nhengk nungantam-a, wanch thum nungantam-a, a' puth kampan nungantam ma'mangkam al-alangan ngangk ngul thee'in God.ant, min-minam ngaantam-ngeeyin nunangan. 54 Nil Jesus.an ka'athaman wamp aak Galilee angan-a, nil work pi'an yump thant. Nil putham ngulan wamp aak Judea anpalan-a, nil thonangan ngul yump, work pi'an inana, puk manyan miyalath nunang.

John 5

Nil Jesus.ang Pam Anan Miyalathan Nathpalman Way Wun-Wun

1 Anpalaniy-a, than Jews al-alangan may pi'an yumpin, aak Jerusalem angana, a' nil Jesus.an aak-aakanakan iiy. 2 Aak angman, Jerusalem.angan-a, thaa' gate wun, minh sheep anangan yipam ngoonchayn. Thaa' gate thinthan-a, ngak many ke' pool yimanangan, angman wun tham, a' verandahs five weentanam yumpin. Ngak inan-a, Jews al-alangan namp Bethzatha waa'in wik thanttamangan. 3 Pam wanch yot thaa'-wantanam wun-wunin, verandahs angman, pam wanch way anangan weech-weechan thanang. Wiy anangan-a, mee' ko'anch wunin; wiy anangan-a, kunp wunin; wiy anangan-a, makar yal-yalamin thant. 4 (Ngak kookam anmaniy-a, popam anman wun-wun; wiyiy-a, ep bul-bul-bul anman weentan. Ngeenama? Puth wiyaniy-a, ngaantiyongk God.antam ngakang ukan, a' ngak weentathan. Ngakan bul-bulan weent-weentan-a, wee'-nathan ka'athaman ngakangan ukow-a, an erkam miyal weenowa, ke'-ngul weechow nunang. Than pam wanch angman wun-wunin, than ngakakan kuup-kuupin, ngakan weent-weentowan-a, than yipam erkam ukayn a' miyal ngul weemayn.) 5 Pam thonam angmana, nathpalman weech-weech nunang, kaap thirty-eightang want nunang. 6 A' nil Jesus.angan thath nunang, angman wun-wun. Nil kan ngaantam-ngeey nunang pam alpanan nathpalman wun-wun, a' nil thawant, “Ayyang! Nint kaangk kemp miyal ngul iiyān ey?” 7 A' nil pam alpanan thawant, Jesus alantan, “Ayyang, ngak bul-bulan weent-weentan-a, an wee'angam ukathiy ngayang a? Ngay puth aak inan-a, pam wanch kampan ke'anangweya. Ngay puth ke' ukanakan-a, ngakangan-a, ana ya'angam, than puth wiy ananganiy ka'atham ukantan.” 8 Nil puth Jesus.an thaw nungant, “Ek a! Swag kan-ngul maayān a! Iiyān ngula!” 9 An erkam paththam ek, pamaniy, swag nungantaman maay, a' kan-ngul iiy. Aak ananiy-a, Saturday.angan minam yump nunang, Jesus.anganiy, 10 A' anpalana than moom Jews.antam al-alangan wakin nunang, pam nil Jesus.angan miyalath, a' thawin nungant, “Ayyang, aak inan-a, aak ngench thayan Saturday.an. Aak ngampar yimanangan ke' wun, swag ke'am kal-kalanamp Saturday.angan.” 11 Nil puth paman thaw thant, “Pam anan nilan miyalath ngayang-a, nil yimanangan thawar, ‘Nint ek a! Swagan kan-ngul maayāna! Iiyān ngula!’ ” 12 A' than pam pi'an anangan engkin nungant, “Pam nil wee'a, yimanangan thaw nungkar a?” 13 Puth nil pam alangan nampan ke'am thiich nunang, Jesus.an, nilan puth minaman yumpan-a, than pam wanch yot thaa'-wantanaman angman than-thanin, nil puth Jesus.an-a, erkam appench thanttam aak amanamana. 14 Anpalan-a, nil Jesus.angan aawuch ngench thayanangan uw nunang, pam nilan minam yumpan, a' thawant, “Ayyang, in ngeey a! Nint kan-ngul miyal ngula! Way nintan keenkan yump-yumpan-a, too ngul wantān a! Way ke'-ngul yumpān a! Nint ke'wey wayan wantin-a, an puy-puyam ngul weechow nintang, way-wayam ngul wunan.” 15 A' nil pam anman-a, aawuch ngench thayanan want ngul, a' Jews al-alantan waa', “An nilama, Jesus.ang ngayang miyalatha.” 16 Anpalan-a, than Jews al-alangan ngangk kul pi'-pi'in nungant, Jesus.ant, puth nil aak ngench thayanangan paman miyalath nunang. 17 Nil Jesus.an puth thaw thant, “Piip ngatharaman nil puth work anman iiy-iiyan, murkanim, a' ngay yimanangan work anman iiy-iiyāng.” 18 Than pam al-alangan wik inan ngeeyin-a, thanan ngangk kul puy-puyam wampin nungant Jesus.ant, ke' mulathiythan nunang. Ngeenama? Than puth thawin nil wik thayanan ke'am pi'-pi' aak Saturday anpalmana. Thon inana, nil Jesus.angan puth God.an piip nungantaman waa' nunang, nanpalan than ngaantam-ngeeyin nil waa'an nungamang ke' God.ang pul karp anman.

Nil Jesus.an Nhengk God.antamana, Pam Pi'ana

19 Nil Jesus puth thaw thant, “Ngay kan-kanam thawang niiyant: ngay piip ngatharaman thathangan nunang work nilan yump-yumpan, ke'-paal ngay yimanangan work yump-yumpang ke' nil anman yump-yumpan. Work ngayan yump-yumpangan-a, nil angman ngatharang, ngay-ngayaman ke' yumping, ngay moom ngatharakam ya'a. Nil piip ngatharamangan yump-yumpan-a, ngay nhengk nungantamangan-a, yimanang thamp yump-yumpang. 20 Nil piip ngatharaman-a, kaangk wun ngathara, nilan meenathan ngathar work yot anangan nilan yump-yumpan. Ngul-ngulan-a, nil work wuut pi'-pi'anam anangan ngul meenathow ngathar, ngay ngulan yipam yumpāng. Niiy puth ngul mee' ikān a! work pi'-pi'anam anangan thathāna. 21 “Wiyiy-a, nil Piip ngatharamangan pam wanch koyam mulaman ekathan, ngangkan koyam thee'an thant, yipam man-yethaman iiyayn. Ngayan yim-yimanangan pam wanch anangan man-yetham yumpāng thanang, wiy anangan ngayan kaangk man-yethaman yumpāng thanang. 22 Piip ngatharamangan work inangan thee'ar: ngay pam wanch umang thanathāng thanang, nil piip God.angan ya'a, nil work inangan ngathar waa' ngay yipam work iiyāng. 23 Nil piip God.angan puth ngeenak work inangan waa'ara? Nil puth kaangk pam wanchangan pam pi'anan ngaantam-ngeeyayn ngayang, ke' than nunang God yimanangan ngaantam-ngeeyantan pam pi'anan. Than wee'-wee'anangan ke'an ngaantam-ngeeyantan ngayang ngay pam pi'anan-a, yaa, than puth piip ngatharam thampan pam pi'an ke'am ngaantam-ngeeyantan nunang, nilan kuch ngayang. 24 “Ngay wik inangan kan-kanam thawang niiyant: than wee'-wee'anangan wik ngatharaman ngeey-ngeeyantan-a, a' ngangkangan pi'-pi'antan nunang nilan kuch ngayang-a, ngayiya thanttang iiy-iiyānga, thanan puth-a, ngulakam wun-wunayn ngatharang, ngay ke' kuching thanang aak wayak. Puth than woyan anman wak-wakantan ngangk aak umpuyam wunanakan God.antang, woyan thon anan-a, mul wunanakan-a, an too ngul wantin. 25 Ngay in kan-kanam puth thawang niiyant: aak inan kan-kanang ngul wampan thant, pam wanch al-alantan woyan God.antaman ke'aman wak-wakantan, than man awal ngatharaman nhengk God.antaman ngul ngeeyayn. Than wiyangan-a, min-minam ngul ngeeyayn, a' piip ngatharamantangan God.antangan ngul wunayn ngulakaman. 26 Nil piip ngatharam God.ana, a' puth ngaya nhengk nungantamana ngan man-yetham iiy-iiyan aak nathpalman a' ngan man-yetham ngulakam wun-wunān, pamang ke'am yumpin nganang, ya'a. A' ngan ngangk thee'anan pam wanchak thanan yipam aak umpuyam wunayn ang kenyan. 27 Piip ngatharamangan work inangan thamp thee'ar iiyāng: ngay pam wanch umang ngul thanathāng thanang, a' mep-mepāng thananga, ngay puth pam inman nil God.angan kuch ngayang. 28 Niiy ke' mee' ikāna, wik inpalan ngay nyiingkan thawangan niiyant, puth aakan ngul wampowa, than pam wanch mul anangan aak awarangan wuntan-a, than ngul man awal ngatharaman ngeeyayna. 29 A' than ngul ekayn, a' pentayn ngul, awar anpalan. Than wiy anangana than minaman iiy-iiyin-a, than ep ngangk aak umpuyangam wun-wunayn, God.antangan. Than wiy anangan wayan iiy-iiyin-a, pam wanch ananganiy-a, nil God.angan ngul kuchow thanang aak wayakan, kech yipam wunayn nungantaman.

Ngay Wik Piip Ngatharamantam Ngeey-Ngeeyang

30 “Ngay-ngayaman ke' work iiy-iiying aak ingana, ya'a, piip ngatharaman God.ana angman ngatharang. Ngay puth wik piip ngatharamantaman ngeey-ngeeyang a' ngay anman yump-yumpang ke' nilaman wik thaw-thawan. Ngay pam wanch umangan thanathāng thanangan-a, an ngay minam thaw-thawang thant ngay puth ngay-ngayam ke'am wik thaw-thawang, ya'a, ngay wik piip ngatharamantam ngeey-ngeeyanga. 31-32 Ngay mee'miy ngay wanttinpalan wampang niiyant, puth ngay ngatharakaman waa'-waa'ingwey-a, an puth niiy ke' ngeeyin ngayang, ya'a; wik wiyangan waa'iythan ngayangan-a, niiy wik thanttaman-a, ep ngeeyin. Yaa, nil piip God.angan kan waa'an ngayang, ngay wanttinpalan wampangana, a' ngay kan ngaantam-ngeeyangan nilan wik kan-kanaman waa'an ngayangan. 33-34 Niiy puth John.antan pam kan kuchan ngatharaman mepayn nunanga! A' nil John.angan-a, wik kan-kanaman waa'-waa' ngayangan niiyantana. Pam wiy al-alangan ke' waa'iythan ngayanga! Ngay puth mee'miy ep ngay wanttinpalan wampangana. Ngay puth wik John.antaman mak kon-aathāng niiyang niiyan yipam wampān piip God.antan, nil yipam kaa'-piichanathow niiyang, way niiyantam anpalan. 35 “Nil John.an-a, ke' nganth pench-penchana, park-parkan thampang. Niiyan-a, ka'athaman ngangk minangam monkan-wakan nunang wik ngeeyanakan, puth yaan manyama. 36 Puth work nil John.an iiy-iiy-a, wik thakan waa'-waa' niiyant-a, an manyama, work ngayan iiy-iiyang-a, an tha'iy paththam. Puth ngayan work iiy-iiyang piip ngatharamantan nilan waa'ar. Niiy work ngatharaman thath-thathaniy-a, an niiy ngul ngaantam-ngeeyān nil piip God.angan kuch ngayang aak iikanakan. 37 Nil ngayang thampan waa'-waa'an niiyant. Niiy man awal ke'am ngeeyan nunanga, a' kaa'wal ke'aman thathan nunanga, 38 puth niiy wik nungantaman-a, ngangkangan ke'am pi'-pi'aniy ya'a! niiy nanpalan ke'am ngaantam-ngeeyaniy pam ngay inman nilan kuch niiyantan. 39 Niiy lat ngench thayanangan ma'-yotam thath-thathaniy a! Niiy ngaantam-ngeey-ngeeyaniy ke' lat ngench thayanangan thath-thathaniy-a, niiyan ke' man-yetham ngulakam iiyān ey? God.antangan ey? Puth ya'a! Niiyan ke' ngaantam-ngeeyaniy ey? Than ngayangan keenkanaman waa'-waa'in lat ngench thayanangan a! 40 Puth niiyan kaangk ke' wampān ngathara, niiy yipam ngulakaman wunān piip God.antangan. 41 “Ngay ke'am ngaantam-ngeey-ngeeyangan work inangan iiy-iiyanga pam wanchangan yipam thaa'-kuump-kuumpayn ngayang, ya'a. 42 Ngay kaniy ngaantam-ngeeyang niiyang, niiy puth ke'an kaangk wunaniy nungant God.antan, ya'a. 43 Nil piip ngatharamangan kuch ngayang aak iikanakan, nilam thawar ngay iikanakan ukāng, niiy puth ngayang ke'am ngangk minangaman uwaniy ya'a. Nil pam wee'-nathan nil-nilaman wampiy-a, an niiy ep ey? erkam paththam umang wakin nunang ey? ke' kampan niiyantam yimanangana. Niiy puth nganyangan ep umang wakina, nil God.angan ngayang ep kuch. 44 Niiy puth niiyantakaman ep thaa'-kuumpwuniya. Niiy puth kaangk ke' nil God.angan thaa'-kuumpow niiyang ey? nilan God thonam anman thonakama! Niiy wanttak thayanathwuniya niiy kaangk ke' God.an ngangkangan pi'-pi'āna? 45 “Niiy ke' ngaantam-ngeeyāna yimanangan ke' ngay ngulan waa'āng niiyang piip ngatharamantana, an ya'a! Nil ep Moses.anganiy-a, ngul way waa'ow niiyangan piip ngatharamantan. Nil Moses.an-a, pam anman niiyan ngaantam-ngeeyaniy nunang ke' nil ngulan kaa'-piichanathow niiyang, puth ya'a. 46 Niiy puth wik nungantam Moses.antaman kan-kanaman ngaantam-ngeeyinwey-a, niiyan puth ngayangan yimanangan min-minam ngaantam-ngeeyin a! puth ya'a! Nil puth Moses.angan-a, keenkan-a, nganyangan ump, lat ngench thayanangan waa'-waa' ngayangana. 47 Puth niiyaniy-a, wik nungantaman-a, ke'am wik minam ngaantam-ngeeyaniy, ya'a, ke'-paal niiy wik ngatharam yimanaman ke'am min-minam ngaantam-ngeeyaniya, ya' paththam.”

John 6

Nil Jesus.angan Pam Wanch Thaa'-Wantanam May Aath Thanang, Five Thousand Anangan

1-2 Anpalaniya, nil Jesus.angan aak anan want ngul. A' nil koyam ngul iiy, wo'uwaynak, chukkunangan mo'a, Lake Galilee.angan. Kookam ananiy-a, pi'an we'ar thamp. Kookam alantaniy-a, namp kuchama, wiyangiy-a, Tiberias waa'in. Than pam wanch thaa'-wantanamang monkan-wakin nunang, Jesus.an, than puth kan thathin nunanganiy work pi'anan yump-yump, pam wanch wiy anangan miyalath thanangana. 3-4 Aak may pi'an mungkanakan thanttam Jews.antaman kan-kanang wamp-wampa, Passover.an waa'antan. Anpalan-a, nil Jesus-a, ngurp nungantam anangan yoykang matin, a' than angman karpam nyiin-nyiinin. 5 Nil Jesus.angan mee' pal-puy thath, a' pam wanch yot thaa'-wantanaman thath thanang wamp-wampin nungant. A' nil Philip.ant engk, “Ayyang! Ngamp may wanttinpal piiyāmp a? ngamp yipam may aathāmp thanang, pam wanch yot inangan a?” 6 Nil Jesus.an wik inangan thaw Philip.antan, nil yaan paath nunang, nil yipam ngeeyow Philip.an wanttakan thawow, nil puth Jesus.an ep mee'miy nungantakam nil wanttakan yumpowa. 7 Nil Philip.an thaw Jesus.ant, “Ayyang, nungkway ngamp wukal pi'an thee'imp may aakanakan thant-a, ke' two hundred dollars yimanangan-a, an ya'angam, than may many anman mungkiythan a!” 8-9 A' nil ngurp Jesus.antam thonanganana Andrew-a, kuunch Simon Peter.antaman, nil thawant Jesus.ant, “Ayyang, nil puk wuut inan than-than, may buns manyiy five pi'-pi'an a' puth minh nga' kucham thamp. Puth an ya', may many thant, an yotantakam puth ya'a. Puth wanttak mayan yaarkathimp thant a? ma'mangkam al-alantan a?” 10 Puth nil Jesus.an thaw thant, ngurp nungantam al-alantan, “Niiy thawān thant aakang nyiinayn.” Aak anana wakathiya. A' than pam wanch yot anangan aakang nyiinin ngul, an puth pam wanch thaa'-wantanam, five thousand anangan. 11 Nil Jesus.angan-a, mayaniy-a, ma'ang maay, a' mee'-wuthanam God.ant, thankyou thaw nungant may-a, minh aakanakan, a' mayan kan-ngul thee'-thee' thant, pam wanch al-alantan aakangan nyiin-nyiinin. A' nil minh nga'an thamp thee'-thee' thant, an than kan-kanam may-a, minhan mungk-mungkin ngul. 12 Than yot anangan thip oth kanan weemin-a, nil Jesus.an thaw thant, ngurp nungantam al-alantan, “May nhanth anangan yalmathān a! Ke' wantāmp aakanganiya!” 13 A' than ngurp nungantam al-alangan-a, may nhanth anangan yal-yalmathin, a' yuk basketang wunp-wunpina. May buns nhanth al-alangan baskets twelve thaa' mul maay, than pam wanchangan wantin, ke'aman mungkin. 14 Than pam wanch al-alangan thathin-a, work wuut pi'anan nil Jesus.angan yump-a, than thawin thanttakam, “Ee'a, in kan-kanama, nil pam pi'an God.antam, nil pam prophet anana thanan waa'in nunang nil palan wampow aak iikanakan.” 15 Nil Jesus.angan kanam thiich thanang thanan ke' angman mamiythan nunang, thaachiythan nunang kingan iiyiy thant. Ke'-paal nil-nilam ngulan iiy aak yoykakan.

Nil Jesus.an Ngak Pal Kenyuwan Iiy-Iiy

16-17 Aak ngaa' kan-ngulan weem-a, ngurp nungantam anangan pek ukin, kookamak, chukkun thanttamang ngul peyin, a' wo'uwayn ngul ench-enchin, aak Capernaum aakanakan. Ngaa' kanam ngulan chint-a, puth nil Jesus.an ke'am yippak wamp thant, 18-19 a' wunt pi'an ngul wunp-wunp, an puth ngak yeelalan ek-ek. Than ngurp nungantam anangan yaam ench-enchin chukkun thanttamangan, a' than Jesus.an thathin nunang, ngak kenyangkan iiy-iiy um thant, chukkun thanttam aakanakan. Than thathin nunangan-a, than ngangk ikin, a' winynyang mo'in nungantam. 20 Puth nil Jesus.an thaw thant, “Niiy ke' winynyang mo'ān a! In ngayam wampang niiyant a!” 21 Than wikan ngeeyin nunang-a, than ke'-ngul winynyang mo'in , puth ngangk minang thawin nungant nil chukkunangan thaa' peyow. Nil puth Jesus.an-a, chukkunang peya, a' kan-ngul nyiin. A' yaam ke'anam-a, than aakan erkam uwin, aak Capernaum.an.

Than Pam Wanch Anangan Jesus.ant Wenk-Wenkin

22 Than pam wanch yotam anangan ke' iiyin wo'uwaynakan, than aak angman paanthin, nil Jesus.an thankyou thaw God.ant may aakanakan, a' puth mayan mungkin. Than pam wanch al-alangan kan ngaantam-ngeeyin than ngurp nungantam anangan kanan iiyin chukkun thanttamangan, puth nil Jesus.an ke'am iiy thanttang. Ngaa' thonaniy-a, than pam wanch al-alangan chukkun thonam thonakam thathin thompanganiy. 23 Anpalan-a, than chukkun wiy anangan aak Tiberias amanaman wampin aak thomp thanttang thinthan. 24 Than puth Jesus-a, ngurp nungantam wee'anang ke'am thathin thanang, than pam wanch anangan puth chukkun al-alangan peyin, a' Capernaum.ak iiyin, Jesus.ant wenk-wenkin.

Nil Jesus.an Thaw Thant, “Ngay Ke' May Bread Min Yimanangana”

25 Anpalan-a, than uwin nunang ngul, wonk wo'uwayna, a' than thawin nungant, “Ayyang, Teacher-ang! Nint aak iikanakan aak ngeen wampana?” 26 Nil Jesus.an thaw thant, “Ngay wik inan kan-kanam thaw-thawang niiyant: niiy ngathar wenkaniy, puth niiy may breadan mungkan thip oth ngulan iiyana, nanpalan. Niiy ke'am ngaantam-ngeeyaniy ngayang puth nil God.angan thayanan yump ngayang work pi'an anan yumpānga! 27 Niiy mayakan work thonakam ke' iiy-iiyāna, may ngampan mungkanamp puth erkam kathaman, yaaman ke' min wunow, ya'a. Niiy puth work ep iiyāna, mayan yipam uwān ngangk niiyantamakan. May anan-a, ngay ngul thee'āng niiyant, ngay puth pam anman nil God.angan kuch, may ananiy thee'āng niiyant niiy yipam ngangk aak umpuyangaman wunāna God.antangan. Ngay may bread anan ep thee'ing niiyant puth nil God.angan work inan thee'ar.” 28 A' thanan engkin nungant, Jesus.antan, “Ngan puth wanttak yumpān ee? ngan yipam work nungant God.antan iiyān a?” 29 Nil Jesus.an thaw thant, “Nil God.angan kaangk thathow niiyang niiy work inan iiyāna: niiy ngangkang pi'-pi'ān nunang, pam anman nil God.angan kuch nunang.” 30 Than thawin nungant, “Nint work pi'an ngeen yumpāna? ngan yipam thathāna, a' ngaantam-ngeeyān nintangan nint kan-kanama puk nhengk God.antaman. Nint ngeen ngul yumpān ngant a? 31 Wuut mangk nganttam al-alangan keenkanaman-a, may manna anangan mungkin aak pintalang angan ke' anman lat ngench thayanangan waa'an, ‘Nil may breadan aak inpal kenyan thee' thant mungkanakan.’ ” 32 Nil Jesus.an thaw thant, “Ngay wik inan kan-kanam thawang niiyant: may nil Moses.angan thee' niiyant-a, an may manna anmana: puth nil piip ngatharamangan-a, may bread thonangan thee'ow niiyanta, inpal kenya, may inaniy-a, nil-nil, may min-minam paththam, may an min niiyant ngangk niiyantamakana. 33 Nil God.angan puth pam inpal keny kuch nunang, pam inman ke' may bread min-minam paththam niiyanta; ngamp yipam ngangk minangam wunāmp ngulakama, God.antanga.” 34 Thanan thawin nungant, “Ayyang, moom-ang, may bread anan-a, ngaa' thon-thonangan thee'-thee'ān ngant a!” 35 Nil Jesus.an thaw thant, “Pam ngay inmana ke' may bread min anmana, ngay nyiingkan waa'-waa'ang niiyant: ngayana ke' may bread niiyantan, ngangk aak umpuyangam wun-wunanakana, piip God.antangan. Nil wee'an wampow ngathar-a, ngangkangan pi'-pi'ow ngayang murkanim aak umpuyangaman-a, an nil ngangk min ngulakam iiy-iiyowa, ngangkam nyiinow ngul. 36 Ngay ka'athangaman kan puth waa'angan niiyant, wik inangan: nungkway niiy ngayangan kanam thathan-a, niiy puth wik ngatharaman ke' ngeey-ngeeyaniya, ya' paththama. 37 Nil piip ngatharamangan wee'-wee'anangan ma' ngatharangan want thanang-a, than ngul wampayn ngathar. Nil wee'an wampow ngathar-a, ngay ke' kenthāng nunang, ya'a. 38 Ngay puth inpal keny ukang aak iikanakana, yipam work iiyāng ke' nilaman piip ngatharamangan waa'ar, nilan naakanakan kuchanya, ngay puth ngatharakaman ke' ngaantam-ngeeyānga, ya'a, ngay puth kaangk piip ngatharaman ngangk min yumpāng nunanga. 39 Nil thawar ngay minam pi'āng thanang, ke' ma'aman wayathāng thanang pam wanch nilan ma' ngatharangan want thanang, puth ngul-ngulaniy-a, aakan minchowan-a, ngay mulaman ngul ekathāng thanang. 40 Puth nil piip ngatharamangan kaangk yimanangan thathow: than wee'-wee'anangan nhengk God.antaman thathantan nunangan-a, putha ngangkangan pi'-pi'antan nunangan-a, an than ngulakam wunayn nungantang, God.antangan; a' ngulaniy-a, ngayaniya, mulaman ngul ekathāng thanang aak inan kan-ngulan minchow.” 41 Anpalaniy-a, than Jews ananganiy-a, wik manya thuuchin nunangan waa'-waa'in, puth nilan wik yimanangan thaw, “Ngay ke' may bread yimanangan inpal kenyan ukang niiyant.” 42 Than yotan puth thawin, “Nil pam inan Jesus a! puk nhengk Joseph.antama! Ngamp yotam puth mee'miy kaath piip nungantam anangan pula! Nil puth wanttak thawan ee! nil inpal kenyan uk a!” 43 Nil Jesus.an thaw thant, “Niiy ngul ngeenak wik many thuuchaniy niiyantakamana? 44 Nil piip ngatharamangan ke'wey thaa'-palathiy thanang pam wanch anangan-a, an than ke' wampiythan ngathar, ya'a. Than wee'-wee'anangan wampiythan ngathar-a, an ep, ngay mulaman ngul ekathāng thanang, aak inan kanan minchowa. 45 Pam prophetsangan lat ngench thayanangan wik inangan keenkanaman umpina, ‘God.angan ngul thaa'-aathow thanang pam wanch ma'mangkaman.’ Than wee'-wee'anangan wik ngeeyantan nunang piip God.an-a, a' wik nungantam kuchekangan pi'-pi'antan-a, anangan ep wampantan ngathar. 46 Ngay ke' thawang niiyant ke' niiy God.an thathan nunang, yimanangan ya'a, niiy puth piip God.an ke' thathanam nunang ya'a. Nil pam thonam alangan ep thath nunang God.an, nil puth God.angan kuch nunang, aak inpal kenyan ukow niiyanta, aak iikanakan. 47 “Yaa, ngay in wik kan-kanam paththam waa'āng niiyant: than wee'-wee'anangan ngangkangan pi'-pi'antan ngayang-a, than aak umpuyangam wunayn God.antangan. 48 Ngay ke' may bread yimanangan niiyant, niiy yipam piip God.antangan ngulakam wunān. 49 Wuut mangk niiyantam al-alangan-a, keenkanaman may manna.an mungk-mungkin, aak pintalangan. May manna alangan man-yetham pi'-pi' thanang, puth ngulakaman ya'a, puth than uth-uthamin ngula. 50 Ngay puth may bread thonanganan ep waa'-waa'ang niiyanta, may bread inpal kenyan uka, an nil-nil. May breadanwey mungkiythan-a, an than ke' uthamiythan, ya'a. 51 Ngay ke' may bread min yimanangan, inpal kenyan ukang niiyant, may min anman wun-wuna, ke' may nyiingkanam anman wun. Than wee'-wee'anangan may inan mungkayn-a, murkanim anman man-yetham iiy-iiyayn. May bread inan-a, ke' kemp ngatharam ngay ngulan thee'āng niiyant; niiyantakam thonakam ya'a, puth pam wanch al-alantan thamp ngulan wunayn, than wee'-wee'anangan ngangkang pi'-pi'ayn ngayang.” 52 Anpalan-a, than Jews anangan-a, man kul wampin nungant than thaa' ngul thay-thayanamin wik nungantaman ngeeyin Jesus.an thaw. Than thawin thanttakaman, “In puth want-wanttak e? nil kemp nungantaman thee'iy ngampar mungkanakan ey?” 53 Nil Jesus.an thaw thant, “Ngay kan-kanam thawang niiyant: niiy ke'an kemp nungantaman mungkinwey-a, pam alantaman God.angan kuch nunang-a, a' niiy chaapar nungantam thamp ke'an mungkinwey-a, an nil piip God.an ngangk niiyantamangan ke' wuniya, ya'a. 54 Than wee'-wee'anangan kemp ngatharaman mungkayn-a, a' putha chaapar ngatharaman mungkayn-a, an than epa aak umpuyam wunayn nungantang, God.antangan, a' ngul-ngulan-a, aak inan kan-ngulan minchow-a, ngay ngul ekathāng thanang, koyaman mulaman man-yetham ngul iiy-iiyayn. 55 In puth kan-kanama, kemp ngatharamaniy-a, ke' may bread yimanangan niiyant; puth chaapar ngatharamaniy-a, ke' ngak min yimanangan niiyant. 56 Than wee'-wee'anangan kemp ngatharamana puth chaapar ngatharaman mungkayn-a, than anangan ngatharangan wunayn, puth ngayiy-a, thanttang wunāng. 57 Nil piip ngatharaman-a, man-yetham anman murkanim wun-wunan, nilan kuch ngayanga. Ngayiy puth-a, yim-yimanaman murkanim man-yetham anman wun-wunang nungantang, ngay puth pam inaniya nhengk nungantam, God.antam. Puth than wee'-wee'anangan kemp a' chaapar ngatharaman mungkayn-a, an ngay ngulakam man-yetham ngul pi'-pi'āng thanang. 58 Ngay nyiingkan waa'ang niiyant-a, may bread inaniy-a, inpal kenyan uk. An may bread nil-nila, ke' may manna yimanangan ya'a, than wuut mangk al-alangan keenkan mungk-mungkin. An puth ngangk aak umpuyangam ke'am pi'-pi' thanang, ya'a, puth ngul-ngulan-a, uth-uthamin ngul. Than wee'-wee'anangan may bread minan mungkayn ngatharaman-a, an than ep man-yetham aak umpuyangam wunayn.” 59 Nil Jesus.angan wik inangan thaa'-aath-aath thanangan-a, aakiy-a, ang churchang, aak angana, Capernaum.ang.

Nil Jesus.angan Wik Min Paththam Waa' Thant

60 Than ngurp nungantam yot al-alangan wik anangan ngeeyin-a, thanan-a, thawin thanttakaman, “Wik inangan thayan paththam ngampar, an ngamp ke' thiichimp wik anangan nil ngeenan waa'-waa'an ngampara. Ngamp ngul ngeenak ngeeyāmp nunang a?” 61 Nil puth Jesus.angan kanam thiich thanang ngurp nungantam anangan, than wik manyan thuuch-thuuchina, wik nungantam anpalana nilan thaw. A' nil puth thaw thant, “Wik inangan ngayan thawangan niiyant-a, niiy nanpalan ey? kaangk ke'-ngul monkan-wakān ngayang ey? 62 Niiywey nath thathin nunang-a, pam anman nil God.angan kuch nunang-a, nilwey koyaman matiywey aak-aakanakaman aak nilan ka'athangaman wun-wun-a, niiy an-aniyangan ep ey? ngaantam-ngeeyin nunang min-min ngul ey? 63 Wik inan thamp ngeeyāna: nil pam wee'-nath woyan God.antaman wak-wakiywey-a, nil woyanangan nungantakam wunpiy ey? An ya'a! Nil Ngeen-Wiy Min God.antamangan ngangkangan ngoonchow nungantangan-a, an ep nil woyan God.antaman ngul wak-wakow. Ngay wik inangan waa'ang niiyant nil Ngeen-Wiy Min God.antaman yipam ngangkang ngoonchow niiyantanga, a' niiy yipam God.antangan ngulakam wun-wunān, 64 puth niiy puungk wiyangiy-a, ke'am yippak ngaantam-ngeeyaniy ngayang a! ya' paththam.” (Nil puth Jesus.angan-a, nathpalman thiich thanang, than wee'-wee'anangan ke'aman monkan-wak-wakantan nunang, a' puth wee'angan theetathow nunangan pam way al-alantana.) 65 A' nil puth Jesus.an thaw thant ngul, “Ngay nanpalan nyiingkaniy thawangan niiyant: pam nil-nilaman puth ke' wampiy ngathar. Nil piip ngatharamangan ma'-aath-aathiy nunangan wampow ngatharan-a, an nil ep wampow ngathar.” 66 Anpalan-a, than wik inangan Jesus.an kanan ngeeyin nunang-a, than ngurp wiy al-alangan man-mangkam ngul thee'in nungant, ke'-ngul monkan-wakin nunang, ya'-ngul. 67 A' nil Jesus.an thaw thant, ngurp nungantamakan, pam twelve al-alantan. “Niiy il-ilangan thamp kaangk ngayang wantān yimanangan ey?” 68 Nil Simon Peter.an thaw nungant, “Ayyang, Lord-ang, ngan puth wee'ant ngul iiyān a? Nint puth wik min paththam thaa'-aath-aathangan nganang, aak umpuyangam wun-wunanak nungantang God.antangan a! 69 Ngan puth kan-ngul thiichanan, ngaantam-ngeeyanan nintangan, nint pam anmana, pam min-minam inpal kenyan ukan God.antamana, nint way thak ke' yumpanam.” 70 Nil Jesus.an thaw thant, “Ngay puth mi'ang niiyang ey! Niiy pam twelve inangan ey! Puth nil-niiyantiy-a, pam thonamaniy-a, oony way alantaman woyan wak-wakan a!” 71 Nil Jesus.anganiy-a, pam Judas anman waa'-waa' nunang, pam nhengk Simon Iscariot.antaman. Ngulaniy-a, pam ilangaman-a, ngurp nungantam Judas.angana, Jesus.ana theetathowan ngul thant pam way al-alantan.

John 7

Nil Jesus.ana Kuunch Nungantam Al-Alantan Wik Thaw

1 Anpalaniy-a, nil Jesus.an aak Galilee wakanang iiy-iiy; puth nilan kaangk ke' iiy-iiyow aak Judea wakanangan puth than moom Jews.antam anangan-a, woyan thath-thathina, kuup-kuupin nungant, than yipam mulathayn nunanga. 2 Aak may pi'an mungkanakan thanttam Jews.antaman kan-kanang wamp-wampa, Tabernacles.an waa'antan. 3 Kuunch nungantam Jesus.antam anangan-a, thawin nungant, “Ayyang, nint aak inan kan wantāna! Nint kan iiyāna aak Judea.aka ngurp nungkaram yotam al-alantan, than yipam thathayn work pi'-pi'anam anangan nintan yump-yumpangan. 4 Nil wee'-nathan kaangk pam pi'anan iiyow-a, nil work ke' ma'-mupam iiy-iiyow, ya'a. Nint nath kan-kanaman work pi'-pi'anam yump-yumpangan-a, yaa, nint puth mee' yotantangan work iiyāna, than yipam thathayn nintang, a' wik thoo' we'-we'arathayn nungkaramana.” 5 (Than puth kuunch nungantam anangan-a, wik inangan thawin nungant, than puth ke'am kan-kanaman ngaantam-ngeeyin nunangan nil-thantan puth nhengk God.antaman.) 6 Nil Jesus.an thaw thant, “Aak ngatharan ke'am yippak wamp aak Judea.akan iiyāng. Kaangk niiywey iiyanakan-a, yaa, niiy iiyāna. 7 Than puth pam wanchangan-a, niiyangan-a, ke' ngangk-wayangam kal-kalantana, ya'a, than ngayangan ep ngangk-wayangam kal-kalantan, ngeenam putha, inpalan, ngay mee'angam ma'-yotaman thaw-thawang thant thanan woyan way anman wak-wakantan. 8 Niiy may pi'anakan puy kan iiyān niiyama! Ngaywey ke' yippak iiying may pi'anakana, puth aak ngatharan ke'am yippak wampa.” 9 Nil Jesus.an-a, wik inangan thaw thant, kuunch nungantamakan, a' angman yippak wun, aak Galilee.angan.

Nil Jesus.an Koy-Koyyuw Ngul Iiy May Pi'anakana

10 Than kuunch nungantam anangan kanan iiyin may pi'anakan-a, nil Jesus.an-a, koy-koyyuw ngul iiy; nil mee' engkanangan ke'am iiy, ya'a, nil wuthanang anman iiy-iiy. 11 Aak angman-a, may pi'anan mungk-mungkin-a, than moom Jews.antam anangan-a, wenk-wenkin nungant, Jesus.antan. Than thawin thanttakaman, “Nil Jesus.an wanttin e?” 12 Than yotam anangan thaa' yaakangan engk-engkin thanttakaman nil Jesus.an wanttinana. Pam wiy anangan thawin, “An nil pam min a!” Puth wiy anangan thawina, “Appang! An ya'a! An nil pam waya! Nil woyan wayakan mee' wich-wichan thananga!” 13 Puth than kon yotantangan-a, ke'am waa'in nunang, Jesus.an, puth than winynyang mo'-mo'in thanttam, moom pi'an Jews.antam al-alantaman. 14 Ngaa' thonang ngulan-a, may pi'an kanan mungk-mungkin-a, nil Jesus.ana wamp ngul, aawuch ngench thayan aakanakan, a' kan-ngul thaa'-aath-aath thanang. 15 A' than moom Jews.antam anangan mee'am ikin, thawin thanttakaman, “Pam inan wanttak kuchek waap min-minam paththam a! Nil puth school pi'anakan ke'am iiy ey!” 16 Nil Jesus.an thaw thant, “Wik anangan ngayan thaa'-aath-aathangan niiyang-a, an wik ngatharam ya'a, ngay-ngayam ke'am wik maay-maayang thanang, puth wik inangan-a, wik nungantam piip God.antaman nilan kuch ngayang. 17 Than wee'-wee'anangan kaangk kan-kanaman wik God.antaman ngeeyayn-a, an than ngul ngaantam-ngeeyayn wik inangan ngayan thaa'-aath-aathang niiyanga, wik ngatharam puth ya'a, wik inangan-a, piip God.antaman waa'-waa'ang niiyant. 18 Nil pam wee'angan wik nungantam anangan thaa'-aath-aathow thanang-a, an nilana kaangk than yipam wiyangan thaa'-kuumpayn nunang. Puth nil wee'angweya kaangka pam wanch wiyangana pam thonanganana thaa'-kuumpayn-a, nilan kuch nunang ukow aak iikanakan-a, an nil pam koy'a a' man-thonam iiyow, ke' wik uuyamow thakan, ya'a! 19 Keenkanaman-a, nil wuut Moses.angan-a, wik thayan anangan nilan want niiyanta! Puth niiyan kaangk ke' ngeeyān wik thayan anangan a! Puth niiy ngeenam kaangk ngayangan mulathān e?” 20 Than pam wanch yot anangan-a, man kee'anang thawin nungant, “An oony wayan ngangkang ngoonch nungkar a! An puth wee'ang mulathow nintang e?” 21 Nil Jesus.an thaw thant, “Ngay work pi'an thonam yumpangan niiyanta, aak ngench thayan Saturday.angana, ngay puth pam alpan thonaman miyalathangana, a' niiy yotam inangaman mee'am ikana. 22 Puth niiy wik inangan ngaantam-ngeeyān a! Nil Moses.an keenkanaman thaw niiyant puk wuut many niiyantam anangan ngeen-wiy pe'anan ump-umpān thanang. (Nil Moses.an ka'athangaman ke'am thaw, ya'a, than wuut mangk ngamparamangan aak woyan inan wantin ngampara ngamp yipam yimanangan yumpāmpa.) Nungkway aak Saturday.an wunan-a, niiy ngeen-wiy pe'an puk wuut manyiy anangan ump-umpaniy thananga. 23 Niiy puth aak Saturday.angan ngeenak umpaniy thanang yimanangana? Yaa, wik Moses.antam anpalan ey? niiyan puth kaangk ke' wik nungantaman pipān ey? nilan ump lat ngench thayanangan, ‘Kinch eightangan wantow thanang wuut many anangan-a, an ep niiy ngeen-wiy pe'anana umpān thanang.’ Niiy puth ngeenam man kulan wampaniy ngathar a? puth ngay pam alpanan miyalathangan nunang aak Saturday.angan ey? 24 Niiy aak-ya'angana ke' waa'ān thananga, pam wanch wiy anangan, kan niiy thathān thananga, ngaantam-ngeeyān tham than yaaka' kan-kanam way yump-yumpantan, nath ya' yaaka', min nath yump-yumpantan.” Nil Jesus.an-a, wik yimanangan thaw thant.

Than Pam Wanch Anangan Engk-Engkin Thanttakam Nil Jesus Wee'ana

25 Pam wanch wiy anangan-a, aak Jerusalem.angan wuntan-a, thawin, “Nil paman inan ey? thanan kaangk mulathayn nunang ey? 26 In thathān nunang a! Nil kon yotantangan wik thaw-thawan a! puth than ke' waa'antan nunang, ya'a! Than pam moom al-alangan-a, kan-ngul ngaantam-ngeeyantan nunang pam nil God.angan kaa'ngak ngampara? 27 An ya' yaaka', ngamp puth ke' thiichimpa nil pam anan aak want-wanttinpalan wampow. Puth pam inana, ngamp yotamang mee'miy nunanga aak nilan wanttinpalan wamp.” 28 Nil Jesus.angan wikan thaa'-aath-aath thanang aawuch ngench thayanangan-a, nil wik othamayan thaw-thaw thant, “Niiy ngayangan kan-kanam thiichaniy ey? a' puth niiy kan thamp thiichaniy ngay aak wanttinpalan wampangan ey? Puth ngay-ngayaman ke'am wampangan aak iikanakan, ya'a. Nil ngayangan kuch-a, nil in-inman man-yetham iiy-iiyana, puth niiy pam wanch il-ilanganiya ke' mee'miy nunang ya' paththam. 29 Ngayiy-a, ep mee'miy nunang, ngay puth nungantam anpalan wampangan, a' puth nilaman kuch ngayang aak iikanakan.” 30 Anpalan-a, than wiy al-alangan ke' mamiythan nunang-a, puth ya'a, ngeenam putha, nungantan aak ke'am yippak wamp than pam way al-alangan mamaynan nunanga Jesus.an. 31 Puth pam wanch wiy anangan-a, angmanan than-thanin-a, an ep min-minam ngaantam-ngeeyin nunang, Jesus.an, a' thawin, “Pam nil anan wampowan God.angan kaa'ngak-a, an nil ep work pi'-pi'anam yump-yumpowa, puth nil pam ilangan yimanang thamp work pi'-pi'anam yump-yumpana!”

Than Pam Pi'an Al-Alangan Pam Kuchin Thanang Yipam Jesus.an Mamayn Nunang

32 Than pam Pharisees al-alangan-a, pam wanch anangan ngeeyin thanang wik thaa' yaakangan thaw-thawin, Jesus.an waa'-waa'in nunanga, a' than il-ilanganiya a' pam pi'an priests al-alangan thapangumpan anangan kuchin thanang Jesus.an yipam mamayn nunang. 33 Nil Jesus.an thaw pam wanch yotamant, “Ngay inana manyam ngul wunāng niiyantanga, a' ngay kan-ngul koyam iiyāng nungant, nilan kuch ngayanga. 34 Niiy ngathar ngul wenk-wenkān, ya'angamana, niiy ngayangan ke' uwāna. Niiyan ke' iiyin aak-aakanakan ngayan iiyānga.” 35 Than moom Jews al-alantaman thawin thanttakaman, “Nil pam inana, aak wanttinak ngul iiyow e? ngamp yipam ke'-ngul uwāmp nunangana? Aawuch pi'an Greeks.antam aakanakaman iiyow ey? than Jews wiy anangan wun-wuntan ey? Puth nil pam wanch Greeks anangan thaa'-aath-aathow thanang ngul ey? 36 Nil puth yimanangan thawa, ‘Niiy ngathar ngul wenk-wenkān, ya'angamana, niiy ngayangan ke' uwāna, ya'a,’ a' puth wik inangan tham thaw, ‘Niiyan ke' iiyin aak-aakanakan ngayan iiyānga.’ Puth nil wik inanganiy-a, wanttak thaw-thawan e?”

Nil Jesus.angana Ngak Min Paththaman Waa' Thant

37 May pi'anan kan-ngul minch-minch-a, aak aniy-a, pi'an wun thanta. Aak an-aniyangan-a, nil Jesus.an-a, ek, a' othamayan thaw thant, “Nil wee'-nathan ngakam uthamow-a, nil pal wampow ngathar a' ngay ngakan thee'āng nungant mungkanakan. 38 Lat ngenchangan yimanangan waa'an, ‘Nil wee'angan nath ngangkangan pi'-pi'ow ngayangan-a, an ke' ngak anmana, ngak mee'an pich-pichan anpal pekan ngangk nungantam anpalman, ngakaniy aak umpuyam anman pich-pichow.’ ” 39 (Nil Jesus.an wik inangan thaw-a, nil Ngeen-Wiy Min God.antaman waa'-waa', ke' ngak mee' anman pich-pichan. An puth than wee'-wee'anangan Jesus.an ngangkangan pi'-pi'antan nunang-a, ngul-ngulana nil Ngeen-Wiy Min God.antaman ngangkang ngul ngoonchow thanttangan. Nil puth yimanangan ke'am yippak ngangk thanttangan wun-wun, puth nil Jesus.an aak God.antamak ke'am yippak koyam mat, mee' yotantangan.)

Than Pam Wanch Anangan Wik Thaw-Thawin Jesus.antaman

40 Than wik inangan kanan ngeeyin-a, than pam wanch wiy anangan thawin, “Nil pam inan prophet kan-kanam ey?” 41 Puth than puungk wiy anangan thawin, “Nil pam inan God.angan kaa'ngak kuchowanan ngampara!” Puth than puungk wiy anangan thawin, “Nil pam anan God.angan kaa'ngak aak Galilee amanaman ke' wampiya, ya'a! 42 Puth than lat ngench thayanangan keenkanaman umpin wik yimanangan, ‘Pam anan nil God.angan kaa'ngak kuchowanan ngampar-a, wuut mangk nungantamaniya David a! A' aak Bethlehem.ang angman aak-ngeeyow, aak angman David.an wuut mangk nungantaman wun-wun.’ ” 43 Anpalan-a, wik amanaman nil Jesus.an thaw-thaw-a, pam wanch puungk wiy ananganiy-a, kaangk paththam wunin nungant, than puungk wiy ananganiy-a, ke' kaangk wunin nungant, ya'a. 44 Than wiy al-alangan-a, kaangk mamayn nunang, courtak kalayn nunang, puth ya' anman, than ke'am mamin nunang.

Than Pam Pi'an Jews.antam Al-Alangan Ke'am Ngaantam-Ngeeyin Nunang

45 Pam thapangumpan anangan-a, koyam iiyin pam pi'an priests al-alantan, a' putha pam Pharisees al-alantan. Thanan wikakan engkin thant, “Niiy puth ngeenam pam anan pal ke'am kalan nunang ngant a?” 46 Than pam thapangumpan anangan thawin, “Than pam wiyangana wik yimanangan ke'am waa'-waa'antan, nil pam ilangan ep wik min paththam waa'-waa'an!” 47 Than pam Pharisees anangan thawin thant, “An nil niiyang thamp muukamath ey? 48 Ngul pam pi'-pi'anam ngamparam al-alangan wik nungantaman ngeey-ngeeyantan ey? Ngul ngan Pharisees il-ilangan ngeeyān nunang ey? An ya'a! Ngan ke' wik ngeeyin nungantaman a! 49 Than puth pam wanch yot al-alangan wik thayan Moses.antamana ke'am yippak thiichina anpalana nil God.angan ngul wayathow thananga!” 50 Anpalan-a, nil Nicodemus.an wik thaw thant, nil Nicodemus inana, nil Pharisee thamp, nil Pharisees wiy al-alantangan iiy-iiy. Nil pam inman-a, keenkan ngutangan wamp nungant Jesus.antana. 51 Nilan wik inangan thaw thant, “Wik thayan ngamparaman-a, yimanangan wunana. Ngamp pam aak-ya'angan ke' kuchāmp mulathanakana, ngamp kan ka'athangaman wik ngeeyāmp nunanga, a' thathāmpa nil ngeen nathan way yump, Nil kan-kanam nathan way paththam yumpiy-a, an ep kuchāmp nunang mul wunanakana!” 52 A' thanan puth thawin nungant, “Nip ngul Jesus.angan aak thonam amanaman wampuw ey? aak Galilee anpalan ey? Yaa, nint min-min thathāna, lat ngench thayanangana, a' nint ngul ngaantam-ngeeyān pam thonam prophet aak Galilee.am ke'aman wampa, ya'a.”

John 8

Than Wanchan Thintham Uwin Nunang, Maarichangan

1 Anpalaniy-a, pam wanch yot anangan koyam iiyin, aak thanttamak. Puth nil Jesus.aniy yoyk Olives aakanakan iiy. 2 Ngaa' thonan-a, aak kanan pach-pacham-a, nil koyam ngul iiy aawuch ngench thayan aakanakan. Pam wanch thaa'-wantanam woonch-woonchin nungant, a' nil nyiin ngul, kan-ngul thaa'-aath-aath thanang. 3 Anpalaniy-a, than pam pi'an wik thayanan thaa'-aath-aathin-a, a' puth Pharisees al-alangana wanch wampathin nunang Jesus.ant, wiyang puth kan thintham uwin nunang, maarichan kee'-kee'. A' than umang thanathin nunang, mee' yotantangana. 4 A' than pam pi'an anangan thawin nungant, Jesus.ant, “Ayyang, Teacher-ang, wanch inana, wiyang thintham uwin nunang, maarichan kee'-kee'a! 5 Puth wik thayan ngampar yimanangana, Moses.angan want ngampar, ‘Nil wanch wee'an maarichan kee'ow-a, ngamp mulakam piikāmp nunang, kunttowangan.’ Puth nint wanttak ngaantam-ngeeyangan a?” 6 Than wik inangan yaan thawin nungant, Jesus.ant, nil yipam wanttakan thawow thant, than yipam way waa'ayn nunang courtangana. Puth nil Jesus.an-a, thuch, a' ma' pukangan aakang ump-ump. 7 Puth thananiy-a, angman than-thanin, mep-mepin nunang anman, Jesus.an. A' nil Jesus.an ek ngul, a' thaw thant, “Ayyang, niiy wee'-wee'anangan way ke'aman iiy-iiyan-a, niiy al-alangan ka'atham piikān nunang, kunttowangan.” 8 A' nil Jesus.an putham thuch, a' putham ngul ump aakangan. 9 Than wik nungantaman ngeeyin-a, than kan-ngul thon-thonaman iiy-iiyin koyam aak thanttamakan. Ka'athamaniy-a, pam wuut manth-thayan anangan iiyin, a' wiy anangan kul-kulam iiyin ngul. Than pokkapang wantin pulang Jesus-a, puth wanch anan nil ep angman than-than. 10 Nil Jesus.an ek ngul, a' nil thawant wanch alantan, “Ayyang, than pam anangan wanttinak ngul iiyin a? Than kaangk ke'-ngul nintang mulathayn ey? way nungkaram anpalan ey?” 11 Nil puth wanchan thaw Jesus.antan, “Ya'a! Than nath ngul kanam iiyina!” Nil Jesus.an thawant, “In ngeey a! Ngay tham kaangk ke' thathāng nintang mulan wunān way nungkaram anpalan. Nint kan-ngul iiyān a! A' puthaman way ke'-ngul yump-yumpāna!”

Nil Jesus.angan Waa' Nungamang Ke' Nganth Pi'an Yimanangan Thant

12 Anpalaniy-a, nil Jesus.an wik putham thaw thant, pam wanch yotam al-alantan, angman aawuch ngench thayanangan. Nilan yimanang thaw thant, “Ngay ke' nganth pi'an yimanangan, pam wanch yotamak niiyantana. Than wee'-wee'anangan monkan-wak-wakayn ngayang-a, an than aak ngaa'angan-a, ke'-ngul iiyayna, ya'a, puth ngayan ke' nganth pi'anang yimanang woyan God.antaman meen-meenathang niiyant yotamanta.” 13 Than Pharisees anangan-a, thawin nungant, “Ngan nungkaram wik ke' ngeeyina, nint puth nungkarakam thaa'-kuump-kuumpangan ke' pam pi'an yimanangana! Puth ya'a! Nint pam pi'an ya'a!” 14 Nil Jesus.aniy thaw thant, “Nungkway ngay ngatharakaman wik waa'ing-a, an kan-kanam waa'-waa'ing ngathamangan, ngay puth ep mee'miy, ngay wanttinpalan aak wampangana, puth-a, ngay aak wanttinak ngulan iiyānga. Niiy mee'miy ya'a ngay aak wanttinpalan wampangan, putha, ngay aak wanttinak ngulan iiyānga. 15 Niiy pam wanchantaman ngangk ke' thathina, ya'a; niiy puth aak-ya'angan waa'-waa'aniy thanang. Ngayaniy-a, pam wanch ke' waa'-waa'ang thanang, ya'a! 16 Ngaywey pam wanchan waa'ing thanang than want-wanttakan iiy-iiyantan-a, an ngay wik kan-kanam waa'ing thanang puth ngay-ngayaman ke' waa'ing thanang, ya'a; nil piip ngatharaman nilan kuch ngayanga inman ngatharang iiy-iiyan, ngay-ngayam ke'am iiy-iiyang ya'a, ngan karpam anman iiy-iiyanan. 17 In ngeeyān a! Than keenkanaman-a, wik inangan umpin lat ngench thayan niiyantamangan: pam kuchamangana nath wik karpaman waa'iypul-a, pam thon alantaman wayan yump-a, an puth pul thathpula, niiy pulangana ngeeyān pulang wik kan-kanaman waa'pul. 18 Ngay puth ngatharakaman-a, waa'ang ngay wanttinpalan wampangan, puth piip ngatharamangan-a, nilan kuchany-a, nil thampangan yimanangan waa'an ngayang, ngan kuchamangan karpam waa'-waa'an.” 19 Than thawin nungant, “Piip nungkaraman wanttin a?” Nil Jesus.an thaw thant, “Niiy puth ngayang ke' thiichaniya, ya' anman, a' puth piip ngatharaman yim-yimanangan niiy ke' thiichaniy nunang. Niiy ngayangwey thiichinan-a, yaa, niiy puth piip ngatharaman-a, yim-yimanang thamp thiichin nunanga.” 20 Wik inanganiy-a, nil Jesus.angan aawuch ngench thayanangan thaa'-aath-aath thanang, aak angana ik anangan wun-wunin, wukalana wunp-wunpina. Puth pam al-alangan ke'am mamin nunang, ya'a, puth aak nungant ke'am yippak wampant thanan mamayn nunangan.

Nil Jesus.an Thaw Thant, “Niiy Ngul Wenk-Wenkān Ngathar Ya'angama”

21 Anpalan-a, nil Jesus.an-a, putham ngul thaw thant, “Ngayan-a, aak inan kan-ngul wantānga; niiyaniy-a, puth ngul wenk-wenkān ngath, ya'angamana, niiy puth ngul uthamān way yump-yumpanang anman. Niiy puth ke' iiyin aak-aakanakan ngayan iiyāng, ya'a.” 22 Than moom Jews.antam anangan thawin thanttakaman, “Nil ngeenak ngampar yimanangan thawa ngamp ke'an iiyāmpa aak-aakanakan nilan iiyowa? Nilan wanttak ngaantam-ngeeyan nungamang, nil nath mulathow nungamang ey?” 23 Nil Jesus.an thaw thant, “Niiyaniy-a, aak imanam wampan, ngayaniy-a, aak inpal kenyan ukang niiyant aak iikanakan: aak inaniy-a, aak niiyantam epa, puth aak ngatharam ya'a! 24 Ngayan ke'-paal thawang niiyant niiy ngul uthamāna way yump-yumpanangan, niiy God.antangan aak ke' wunin, ya'a. Ngay ngatharakam wik kanam waa'ang niiyant, ngay inman nathpalman ngay man-yetham wunang. Niiy puth wik ke' ngeeyin ngayangwey-a, yaa, niiy ngul uthamān way yump-yumpanangan, niiy God.antangan ke' wunin ya'a.” 25 Thanan puth thawin nungant, “Nint pam wee'e?” Nil Jesus.an thaw thant, “Ngay wik nathpalman kan waa'-waa'ang niiyant ngay ngeenakan wampangana. 26 Ina, wik yot yippak ngay kaangk waa'āng niiyanta, a' puth wik mee'angam thawāng niiyant; puth ya'a, ngay puth wik God.antam anman waa'-waa'ang niiyant nilan kuch ngayanga, inpal kenyan aak iikanakan ukanga. Nil wik kan-kanam anman thaw-thawana. Ngay wik kon ngatharamangan ngeey-ngeeyang nunanga, a' ngay wik anangaman waa'-waa'ang nungantam niiyantaniya, aak inganiya.” 27 Thanan puth-a, kuchek thinhan, ke'am yippak min-minana ngaantam-ngeeyin nunangan wik nilan thaw-thaw thant, piip-kunchantaman waa'-waa'. 28 Nil puth Jesus.an thaw thant, “Niiy kan-ngulan kenyan waanchān nunang-a, pam anan nil God.angan kuchan-a, niiy ngul thiichān ngayang puth ngay-ngayaman ke' work yumping ya'a, puth ngayan wik thaw-thawang-a, an nilaman piip God.angan wik thaa'-aath ngayanga. 29 Nil in-inman iiy-iiyan ngatharangan, nil pokkapangan ke' wantan ngayang, ya'a, ngay puth murkanim min iiy-iiyang mee' nungantanga.” 30 Pam wanch yotangan wik inangan ngeeyin nunangan-a, ana min-minam ngul ngaantam-ngeeyin nunang, Jesus.an.

Nil Jesus.an Thaw Thant, “Niiy Ke'-Ngul Moom Way Alantangan Iiy-Iiyāna”

31 Nil Jesus.an-a, thaw thant Jews puungk wiy al-alantan than nunangan monkan-wak-wakin ngula, “Niiy wik ngatharaman ngeey-ngeeyinwey-a, yaa, niiyaniy puth-a, ngurp ngatharam paththam iiy-iiyān, 32 a' niiy ngul ngaantam-ngeeyān wik inan kan-kanama God.antamana a' wik ilangan way niiyantaman ngul ngangk pachathowa, niiy yipam ngangk minam iiy-iiyāna, ke' yipam moom way alantangan iiy-iiyāna.” 33 Than thawin nungant, “Wuut mangk nganttamaniya, Abraham a! Ngan puth pam moom alantan work ke'am iiy-iiyana. Nint puth wanttak thawana wik yimanangana, ‘Niiy ke'-ngul moom way alantangan iiy-iiyāna?’ ” 34 Nil Jesus.an thaw thant, “Ngay niiyant wik inangan kan-kanam thaw-thawang: than wee'-wee'anangan way anman yump-yumpayn-a, yaa, an ke' than work iiy-iiyantan yimanangan moom way alantana, puth way al-alangan-a, ngangk mungk-mungkan thanang, thanan puth ke' wantiythan, kaangk way anman yump-yumpayn. 35 In thamp ngeeyān a! Nil puk kaath piipantamana, an nil puk pulantam iiy-iiyan ngulakam. Puth nil pam workan iiy-iiyan pulant-a, an nil ke' nath work ngulakaman iiyiy pulanta, nil kaangkwey work wantowwey-a, nil wantow. 36 Nil nhengk God.antaman-a, anman murkaniman wunan piip-kunchantangan. Nilaniy-a, nhengk God.antamangan nath ngangk pachathiy niiyangwey-a, way niiyan yump-yumpana, yaa, niiy ngangk minam ngul iiy-iiyān, niiyan puth way ke'-ngul iiy-iiyān. 37 Ngay puth mee'miy nil Abraham.an wuut mangk niiyantaman, niiyan puth ke' mulathanak ngayang ngaantam-ngeeyaniy puth niiy kaangk ke' wik ngatharaman ngeeyāna! 38 Ngay wikan waa'-waa'ang niiyant-a, an nil piip ngatharamangan waa' ngathar ngayan yipam waa'āng niiyant puth niiyana anman iiy-iiyaniy ke' piip niiyantamangan waa'-waa'an niiyant.” 39 Thanan puth-a, thawin nungant, “Wuut mangk nganttamaniy-a, Abraham.” Nil puth Jesus.an thaw thant, “An ya'a! Puth wuut mangk niiyantaman Abraham.wey iiyiy-a, niiy puth min iiyin ke' nil anman min iiy-iiya. 40 Puth ngay iniy-a, nathpalman wik kan-kanam anman waa'-waa'ang niiyant, wik anman ngayan ngeey-ngeeyang piip ngatharamantaman. Puth niiyan ngaantam-ngeeyaniy ke' mulathanak ngayang a! Nil Abraham.aniy-a, puth yimanangan ke'am iiy a! 41 Niiy inanganiy way yump-yumpaniya, ke' piip niiyantamangan yump-yumpan a!” Thanan thawin nungant, “Ngan inangan puk meekantam ya'a! Piip nganttamiy-a, piip God, nilam thonam anman a!” 42 Nil puth Jesus.an thaw thant, “Nil puth God.an piipiy niiyantamwey-a, niiy puth kaangk wunin ngathar, puth ngay ina God.antam anpalan wampanga, aak iikanakan ukang niiyant. Ngay puth ngay-ngayam ke' wampang, ya'a, nilam kuch ngayang aak iikanakan. 43 Niiy puth wik ngatharaman min-min ke'am ngaantam-ngeeyaniy ngayan waa'-waa'ang niiyanta niiy puth kaangk ke' wik ngatharaman ngeey-ngeeyāna! 44 Niiy inanganiy-a, puk nhengk piip niiyantam alantaman, oony way pi'an alantaman. Nilaniy-a, kaangk woyan way anman wak-wakow, niiyan-a, kaangk yimanangan thamp iiy-iiyān woyan nungantam anman wak-wakāna. Puth nil keenkanam nathpalman pam way anman iiy-iiya, pam wanch yotam mul-mulath thanang. Nilan kaangk ke' wik kan-kanaman thawow, a' kaangk ke' tham wik minan ngeeyowa, nilan kaangk wik uuy-uuyamow anman, nil pam wik-uuy paththam a! Nil puth ma'-yotam yimanang wik uuy-uuyamana. Nil nathpalman wik-uuya iiy-iiy, pam wanch wiy anangana ke'-paal wik-uuy anman iiy-iiyantan, woyan nungantaman wak-wakantana, nil ke' piipiy thanttam yimanangan iiy-iiyan. 45 Ngayaniy-a, wik ke' uuyaming, ya'a, ngay wik kan-kanam anman thaw-thawang, niiy nanpalan kaangk ke' ngayangan ngangkangan pi'-pi'āna! 46 Niiyalang! Nil thonam yam ya' ey? nil ngayangan waa'ow ey? ngay nathwey kan-kanaman way yump-yumpangan a? Puth ya'a! Ngay wik kan-kanam anman ep thaw-thawanga, niiy puth min-minan ke'am ngaantam-ngeeyaniy ngayang a! Niiy man-ngeeyaniy ngayang anman a! 47 Than puk God.antam al-alangan-a, wik ep ngeeyantan nungantam. Niiyiy puth-a, puk God.antam ya'a, ke'-paal niiy kaangk ke' wik ngatharaman ngeeyān, ya'a.”

Nil Jesus.angan Abraham.an Waa'-Waa'

48 Than Jews anangan-a, thawin nungant, Jesus.antan, “Nganan kan-kanam thaw-thawanana nintan-a, pam aak Samaria punchan puth oony ngangkangan pi'-pi'angan a!” 49 Nil Jesus.an thaw thant, “Ngay oony ke'am ngangkangan pi'-pi'anga ya'a. Ngayaniy-a, piip ngatharaman pam pi'anan ngaantam-ngeey-ngeeyang nunang; puth niiyaniy-a, ngayangan pam pi'an ke'am ngaantam-ngeeyaniya, ya'a, niiy kaangk ke' ngatharam, thaa'-thengkathaniy thak ngayanga. 50 Ngay puth ke'am iiy-iiyang yipam pam wanchangan thaa'-kuumpayn ngayangan, ya'a. Nil thonamangan piip God alangan ep thaa'-kuump-kuumpan ngayang. A' puth nil thath-thathan ngayang, a' niiyang thamp, a' nil ngul waa'ow ngayang ngay minan iiy-iiyang. 51 Ngay wik inangan kan-kanam thaw-thawang niiyanta: than wee'-wee'anangan wik ngatharaman ngeeyayn-a, than ke' uthamiythan, ya'a.” 52 Puth than Jews anangan thawin nungant, “Yaa! Ngan puth nintang kan thiichana, nint oony way ngangkangan pi'-pi'angana. Nil Abraham.an ep uthama, puth-a, than prophets anangan uthamin tham. Nintiy puth thawangana than wee'-wee'anangan wik nungkaraman ngeeyayn-a, than ke' uthamiythan ya'a. 53 Puth wuut mangk ngamparam Abraham.an-a, kan utham. Nint ngaantam-ngeeyangan nungkarakam ey? ke' pam wuut pi'an yimanangan iiy-iiyangan ey? Nil wuut mangk Abraham.an-a, ke' pam many yimanangan ey? Puth-a, pam wiy pi'-pi'anam prophets anangan uthamin a! Puth nint in wee' ngaantam-ngeeyangan nungkamang a?” 54 Nil puth Jesus.an thaw thant, “Ngaywey thaa'-kuumping ngathamangwey-a, a' pam pi'anan thamp waa'ing ngathamang-a, an puth wik ngatharaman kan-kanam ya'a. Nil puth thonam alangan ep thaa'-kuumpan ngayanga, an piip ngatharam alangamana, pam nil anman niiyan God niiyantaman waa'-waa'aniy nunang. 55 Niiy ke' mee'miy nunang, ya'a, ngay ep mee'miy nunang. Ngaywey thawing yimanangana, ‘Ngay God.an ke' mee'miy nunanga, ya'a,’ ngayan puth wik uuy-uuyaminga ke' niiyan wik uuy-uuyamaniy. Ngay puth ep mee'miy nunang, a' wik nungantam ngay ngeey-ngeeyang paththam. 56 Wuut mangk niiyantaman Abraham.an-a, ngangk kuupam, nil puth mee'miy ngayang ngay aak iikanakan ukāng. A' nil kan-ngul thath ngayang aak iikanakan ukang, a' nilan ngangk min paththam ngul weema.” 57 Puth than Jews anangan thawin nungant, “Ayyang, nintangana kaap fiftyangan ke'am yippak uw a! Nint ke' komp nyiingkanamant e! Abraham.an aak keenkanam wun a! Nint ngul kan thathan nunang ey?” 58 Nil Jesus.an thaw thant, “Ngay in kan-kanam paththam waa'-waa'ang niiyanta. Abraham.ana ke'aman yippak aak-ngeey-a, ngay man-yetham iiy-iiyangan a!” 59 Than Jews al-alangan wik inangan ngeeyin nunang Jesus.an thaw thant-a, amanamaniy-a, than kunttow maayin, a' ke' piikiythan nunang, mulathiythan nunang, puth ya'a, nil putha thench nungamang, a' aawuch ngench thayanan-a, want ngul.

John 9

Nil Jesus.angan Mee' Min Yump Nunang, Pam Mee' Ko'anchan

1 Anpalaniy-a, nil Jesus.an iiy-iiy-aa, a' nil paman thath nunang mee' ko'anchan aak-ngeey. 2 Than ngurp Jesus.antam anangan engkin nungant, “Ayyang, Teacher-ang, nil wee' wayan iiy-iiya ke'-paal pam inan mee' ko'anchan aak-ngeey a? Nilam way iiy-iiy ey? Nath kaath piip nungantaman way iiy-iiypula!” 3 Nil Jesus.an thaw thant, “Way nungantam anpalan ya'a; a' puth way kaath piip-kunchantaman, ya'a. Nil ko'anch aak-ngeey than pam wanchangan yipam work pi'anan thathayn God.angan miyalathow nunang. 4 Ngamp kinchangan ep workak iiy-iiyanamp. Puth aak ngaa'angan-a, ngamp ke' workakan iiy-iiyanamp, ya'a. An ke' aak yimanangan wunana: ngamp in-inman mak work iiy-iiyāmp God.antan, puth ngulan-a, ngamp ke'-ngul work iiyāmpa, ya'a! 5 Ngay yippak aak ingman wun-wunang-a, ngay ke' nganth pi'an yimanangan iiy-iiyang niiyanta, pam wanch yotamant.” 6 Nil Jesus.an wik inangan thaw-a, nil aakangan thaa' theek thee', a' thaa' theekan nenchanath ngaanh alantangan. A' mee' ngul nampan pam ko'anchan, ngaanh mich alangan. 7 A' thawant pam mee' ko'anch alantan, “Yaa, nint kan iiyān a! Kaa'wal pungān nungkarakam a! ngak kookam Siloam angana.” (Aak namp Siloam inan wunana, wik ngamparamang yimanangan waa'anamp, “Kanam kuch.”) Pam ko'anchan-a, kan-ngul iiya, kaa'wal nungamangan ngakang pung. A' nil koyam ngulan iiy-a, nil kan-ngul aak thath-thath, pal-puyana, puth nil mee' min ngul weem. 8 Than pam wanch wiy al-alangan townam anpalan-a, ka'athaman thath-thathin nunanga, woyanangan nyiin-nyiin mayak thakan thaw-thaw thanta. Than thathin nunang mee' min ngulan iiy-iiy-a, than thawin thanttakam, “Pam nil inman ey? nilan woyanangan nyiin-nyiin ey? mayak thakan thaw-thaw thant ey?” 9 Than pam wanch wiy anangan thawin, “Ee'a, nil pam nanman a!” puth wiy anangan thawina, “An nil ya'a! Puth kaa'wal ke' nilama!” Puth nil pam alangan-a, nungantakaman waa', “Ee'a, in ngayama! pam anmana.” 10 Than engkin nungant, “Puth nint aak want-wanttak ngul thathangan iniy e? Want-wanttak mee' min ngul iiyangan e?” 11 Nil thaw thant, “Nil pam namp Jesus alangan ngaanh mich yump, a' mee' ngul namp ngayang, thaw ngul ngathar, ‘Nint ngak kookam Siloam aakanakan iiyāna, a' kaa'wal ngul pungān nungkarakama.’ A' ngay puth iiyang, kaa'wal pungang ngatharakam. Ngaya kaa'wal kanan pungang ngathamang-a, a' mee' min ngul paththam weemanga, aak kan-ngul thath-thathang.” 12 Than puth thawin nungant, “Nil puth Jesus.an wanttin e?” Nil puth paman thaw thant, “Ngee! Nil wanttin natha? Ngay ngoongk-ngoongkama.”

Than Paman Kalin Nunang Ngul Thant Pam Pharisees Al-Alantan

13 Anpalaniy-a, than pam anana, nil ka'athaman mee' ko'anchan iiy-iiy-a, kalin nunang, Pharisees al-alantan. 14 Nil puth Jesus.anganiy-a, aak ngench thayanangan Saturday.angan ngaanh mich yump, pam mee' ko'anch alantan, a' mee' min ngulan yump nunang. 15 A' than Pharisees anangan putham ngul engkin nungant pam alantan, “Nint puth want-wanttak mee' min ngulan iiy-iiyangan e?” A' nil waa' thant, “Nil Jesus.angan ngaanh michangan mee' namp ngayanga, a' ngayana mee' ngakang ngulan pungang ngathamangana, ana ngay aak paththam ngul thathang, mee' min ngul weemang.” 16 A' than Pharisees wiy al-alangan Jesus.an waa'-waa'in nunang, “Pam anana God.angan ke'am kuch nunang, ya'a, puth nil aak Saturday.an-a, aak ngench thayanan ke'am pi'-pi'an, ya'a.” Puth wiyiy-a, thaw-thawin, “Nil puth pam way ya'a! An nil way nath iiyiywey-a, nil puth work pi'-pi'anan ke' yumpiya, ke' nyiingkan yumpa, ya'a.” A' than Jesus.an wiyangana min waa'-waa'in nunang, than wiyanganiya, ep way waa'-waa'in nunang. 17 A' amanam ngulan-a, than putham ngul thawin pam alantan, “Puth nilan mee' minam yump nintang aa? Yaa, puth nintaman wanttak ngaantam-ngeeyangan nunanganiy a?” Puth nilan thaw thant, “Nil pam pi'an God.antam, propheta.” 18 Puth than Jews al-alangan-a, paman kaangk ke' ngeeyayn nunang, than man-ngeeyin nunang puth ka'athaman ko'anch iiy-iiy a' amanaman-a, mee' min ngulan iiy-iiy. Than puth kaath piip pam alantamak wik kuchin pulant wampowpul, 19 a' engkin pulant, “In puk niparam ey? An kan-kanam ey? nil mee' ko'anchan aak-ngeey ey? Nil puth want-wanttak ngula aak thathan a?” 20 A' kaath piip nungantaman thawpul, “Ngan mee'miy in puk nganttamana, a' ngan mee'miy nil anman mee' ko'anchan aak-ngeeya. 21 Ngan puth mee'miy ya'a, nil want-wanttak ngulan aak thathana? want-wanttak yaaka' mee' min ngulan weema? puth nil wee'ang nath mee' min ngulan yump nunang a? Niiy nungant engkān a! Nil puk many ya'a, nil pam ngula, puth nilam waa'ow nungantakam niiyantaniya.” 22 Kaath piip nungantam wik inangan thawpul, pul puth winynyang mo'pul thanttam, Jews.antam. Puth than Jews anangan-a, ka'atham thawin thanttakaman, wik yimanangan, “Than wee'-wee'anangan Jesus.an waa'ayn nunang nil pam anman nil God.angan keenkanaman kaa'ngak kuchowan-a, ngamp aak churchaman kenthāmp thanang, ke'-ngul ngoonchayn, ya'a.” 23 Nanpalan kaath piip nungantaman thawpul, “Nil puk many ya'a, nil pam ngul a! Niiy nungant engkāna!” 24 Anpalaniy-a, than Pharisees ananganiy putham ngul thawin nungant, pam alantan ko'anch ka'athaman iiy-iiy, “Awey, nint pal iiyān a!” Nilana wamp thant, a' than thawin nungant, “Nint mee' God.antang wik kan-kanam waa'ān ngant a! Ngan puth kan mee'miy nil Jesus.an pam way iiy-iiyana.” 25 Nil paman thaw thant, “Ngay ngoongk-ngoongkam nil nath way iiy-iiyana, nath ya', min nath iiy-iiyana. Puth ngay inan ep mee'miy; ngay ka'athaman-a, mee' ko'anch iiy-iiyangan, puth ngay inan ep ngula, aak minam thath-thathanga.” 26 A' than engkin nungant, “Nil puth wanttak mee'an yump nungk a? Nil want-wanttakan puth mee' minan yump nintang a?” 27 Nilan puth thaw thant, “Ngay ka'athaman niiyant kan waa'angan, puth niiy wik kaangk ke' ngeeyān ngayanga! Niiy ngeenak ngath puthaman engkaniy e? Niiy nath kaangk ngurp Jesus.antaman iiyān ey?” 28 Than Pharisees al-alangan paman ngangk kulangam waa'-waa'in nunang, a' thawin, “Nint ep ngurp nungantam, pam alantaman, ngan ep ya' a! Ngan inangan ngurp Moses.antam ep iiy-iiyanan a! 29 Ngan puth mee'miy God.an wikan thaw-thawant, Moses.antan. Puth pam ananiy-a, Jesus.aniya, ngan ke' mee'miy nunang ya'a, ngan ngoongk-ngoongkam nil wee'angan nath kuchana.” 30 Nil paman thaw thant, “In puth wanttak aa? Niiy ke' mee'miy ya' ey? Niiy ngoongk-ngoongkam nil wee'angan kuchan ey? Puth nil mee' min yump ngayang a! 31 Ngamp puth mee'miy God.angan wik ke'am ngeeyan thanang, pam wanch wayan iiy-iiyantan. Puth pam wanch wiy anangan-a, than ep God.an ngaantam-ngeeyantan nunang pam pi'an, a' than minam iiy-iiyantan ke' nilam God.angan kaangk than wanttakan iiyayna. Than inangamana nil God.angan wik ep ngeeyow thanttam. 32 Ngamp keenkam yimanangan wik kath pam ko'anchantam ke'am ngeeyampa pam thonam mee' ko'anch minan yumpin nunang, ya'a! 33 Nil puth God.angan pam inan Jesus.an ke'an kuchiy nunang-a, nil work pi'-pi'an yimanangan ke' yump-yumpiy, ya'a.” 34 A' than thawin nungant pam alantan, “Nint puk way aak-ngeeyana, a' way anman em-eman, anpalman way anman iiy-iiyan, puth nint nganang thaa'-aath-aathangan ey?” A' than kenthin nunang, aak churchaman.

Nil Pamangan Ngangk Ngul Thee' Nungant Jesus.antan

35 Anpalaniy-a, nil Jesus.angan wik thoo' kanam ngeey thanan pam anan kenthin nunang, aak churchaman. Nil Jesus.angan uw nunang, pamaniy, a' thawant, “Nint kan-kanam ngangkangan pi'-pi'angan nunang ey? pam nil God.angan kuchan ey?” 36 Nil paman thawant, “Ayyang, Teacher-ang, nint waa'ān ngathar nil wee'-nathana, pamaniya, God.angan kuch nunang, ngay yipam ngangk punch-aakam thee'āng nungant a!” 37 Nil Jesus.an thawant, “Nint puth kanam thathan nunang aa! Ina, ngay pam inman thaw-thawang nungkar.” 38 Nil pam ngulan thawant Jesus.ant, “Ayyang, Lord-ang, ngay kan-ngul ngangk punch-aakam thee'āng nungk a!” A' nil pungkang ngul nyiin nungant Jesus.antan, thaa'-kuump-kuump nunang. 39 Nil Jesus.an thawant, “Ngay aak iikanakan ukangan ngay yipam thathāng thanang God.an wee'-wee'anangan monkan-wak-wakantan nunang, a' puth than wiy al-alangan ke'aman monkan-wak-wakantan nunang, ya'ana. Than puth pam wanch wiy al-alangan ke'aman thiichantan nunang, God.an, than puth kan ngaantam-ngeeyantan thanttakam than ke'an mee'miy nunang, ya' anman, ngul-ngulan-a, an epa, than kaangk ngul wik ngeeyayn God.antaman, than yipam thiichayn nunang. Ngay al-alantan ngul waa'āng thant God.an nil want-wanttakan, than yipam thiichayn nunang. “Than wiyanganiy-a, wik God.antam kan ngeeyin, than puth puthaman kaangk ke' ngeeyayn, ya'a, than puth thawantan, ‘Ngay ep God.an kanam thiichang nunang.’ Puth ya'a, thanan yaan ulp-ulpanang thaw-thawantan. Than God.ana ngul kumayn nunang, an puth than ke' mee' ko'anch yimanangan iiyayn.” 40 Than Pharisees wiy anangan thinth angman than-thanin nungantang. Than ngeeyin nunang wik inangan thaw, a' engkin nungant, “Ayyang, Jesus-ang, nint nath ngaantam-ngeeyangan nganangan ke' mee' ko'anch yimanangan ey?” 41 Nil Jesus.an thaw thant, “Niiy God.an nunang ngoongk-ngoongkamwey-a, wik nungantam thakan ke' ngeeyinwey-a, puth ngay ke' niiyang pam wayan waa'ing niiyang, ya'a. Puth niiyan thawaniya, ‘Ngan epa, ngan God.an kan-kanam thiichanan nunang,’ niiyan ngaantam-ngeeyaniy niiyantakam niiy ke' pam min iiy-iiyaniy yimanangan ey? Puth ya'a, niiy pam wayanang paththam iiy-iiyaniy a!”

John 10

Nil jesus.angan Wik Kath Waa' Pam Alantaman Minh Sheepan Pi'-Pi'

1-5 Nil Jesus.angan wik kath waa' thant. Nil yimanangan thaw thant, “Kan inan ngeeyāna! Ngay wik kath inan waa'ang niiyant. Nil pam shepherdanganiy-a, minh sheep nungantaman pi'-pi'an thanang. Nil ngutangan-a, aak paddockangan ngoonchathan thanang, paanthathan thanang. Nil pam thonamangan-a, thaa' gate.an pi'-pi'ana aak paddockana. Nil pam shepherdana aak paddockangan ngoonchan-a, niliy-a, thaa' gate wakanangan ngoonchan, nil puth pamangan thaa' gate.an pi'-pi'ana, erkam paththam thapathan nungant, pam mooman yipam ngoonchow. Minh sheep nungantam al-alangan-a, man awal thiichantan nunang, moom thanttaman. Nilan namp-nampaman wichan thanang, a' yoon pentathan thanang, minh anangan. Nil kanan pentathan thanang yoonan-a, niliy-a, umputh iiy-iiyan thanttang, minh al-alangana koy-koyyuw monkan-wakantan nunang, puth than man awal nunangan kan thiichantan. Pam waywey wampiy-a, aak paddock aakanakana, nil thaa' gate.aman-a, ke' ngoonchiy. Niliy-a, fence wakanang matiy, anpalan ngoonchiy, minh sheep anangan yipam ma'-kuchathow. Puth than minh sheep al-alangan-a, ke' monkan-wakiythan nunang, ya'a, than winynyang mo'iythan nungantam, than puth man awal ke' thiichiythan nunang, pam thon anan nil moom thanttam ya'a.” 6 Jesus.angan wik kath inan waa' thant, puth than pam wanchangan ke'am min-min ngaantam-ngeeyin wik kath inangan want-wanttakan waa'-waa' thant.

Nil Jesus.angan Waa' Nungamang Nil Moom Min Ngamparaman

7 Nil puth Jesus.an-a, putham thaw thant, “Ngay inan kan-kanam thawang niiyant: ngay ke' thaa' gate yimanangan pam wanch ngatharam anangan yipam ngoonchayn aak piip ngatharamakan. 8 Keenkanaman-a, than pam pi'-pi'anam wiy anangan wampin, than ke' pam ma'-kuchan yimanangan wampin. Than puth pam wanchant waa'-waa'in thanttakam nil ke' God.angan kuch thanang, puth ya'a, yaan wik uuy-uuyamin. Pam wanch God.antam al-alangan-a, than wik ke'am ngeeyin thanang pam wayanang anangan, ya'a, ke' minh sheep al-alangana pam thonana moom thanttam ya'ana, than man awal ke'am thiichin nunang, ya'a. 9 Ngay ke' thaa' gate yimanangan. Than wee'-wee'anangan thaa' gate ngatharam wakanang anpalan ngoonchayn aak piip God.antamakan-a, yaa, ngayan ngul kaa'-piichanathāng thanang way thanttam anpalan, a' minam pi'-pi'āng thanang. Than ngangk min ngul iiy-iiyayn, ke' minh sheep anangan ngangk minan iiy-iiyantan moom thanttam al-alantangan, wak thak yot uw-uwantan mungkanakan. 10 Puth nil pam wayan wampowa, yipam minh sheep anangan ma'-kuchathow, a' mul-mulathow thanang. Puth ngayaniya ke' pam way anan ya'a, ngay aak iikanakan wampangana than pam wanchangan yipam piip God.an ngangk minangam paththam monkan-wak-wakayn nunang. 11 “Ngayiya moom min paththaman niiyantama, ngay ke' pam moom min anan nil minh sheep anangan min-minakaman pi'-pi'an thanang. Nil yimanangan ngaantam-ngeeyan nungantakam, ‘Ku' kulliy al-alangan mak mulathayn ngayang, than minh sheep ngatharam anangan yipmam man-yetham iiy-iiyayn.’ 12 Puth nil pam thon alangan nathwey minh sheep anangan yaanan nath pi'-pi'iy thanangan-a, nil moom ya'ana, nil yaan thonakaman workan iiy-iiy pam alantana. Nil ku' kulliy nathan wampiy-a, minh sheep anangan yipam mulathowan-a, an nil minh sheep anangan thaa' nung-nung too wantiy thanang, nil kamp mo'iy thanttamana. Nil ku' kulliyangan-a, minh sheep wiy anangan pathiy thanang, a' nath ngul wichiy thanang, a' wiy anangan nath-nath ngul yaarkamiythan. 13 Nil puth paman winynyang mo'an, a' too wantan thanang minh sheep anangan. Nil puth moom thanttam ya'a, nil minh sheep anangan meekantam yaan pi'-pi' thanang, ke'-paal nil min-miniyakam ke'am pi'-pi' thanang. 14-15 “Ngay ke' pam anan yimanangan ya'a. Ngay ke' moom thanttam min-minam paththam sheepantamana. Pam wanch ngatharam anangan-a, ke' minh sheep ngatharam yimanangan iiy-iiyantan. Ngay mee'miy thanang, a' than ngayangan-a, mee'miy thampa, ke' piip ngatharamangan yimanangan mee'miy ngayang, ngay puth yimanang thamp mee'miy nunang piip ngatharaman. A' putha, ngay ngul theetathāng ngatharakama, uthamāng niiyant, pam wanch ngatharamakana. 16 Pam wanch puungk wiy anangan-a, an ke' sheep ngatharam thamp, puth than ngatharangan yippak ke'am iiy-iiyantan ya'a. Ngay puth thanang thamp mak wampathāng, than wik ngatharaman ngul ngeeyayn. Anpalaniy-a, than yotam karpam ngul iiy-iiyayn ngatharangan, ke' minh sheep anangan moom thonamantangan iiy-iiyantan. 17 “Puth piip ngatharaman-a, kaangk wunan ngathar, puth anpalan ngayan kaangk theetathāng ngathamang, yipam mulan wunāng niiyantak. Puth anpalaniya, ngay koyaman ngul man-yetham weemāng. 18 Pam wanch wiyangan ke'am thaach-thaachin ngayang pal aak iikanakan wampāng, yipam uthamāngan niiyant, ya'a! Ngay iniya ngay-ngayam kaangk wunanga ngathamangan theetathāng yipam uthamāng niiyantak. Kaangk ngaywey theetathāng ngathamang-a, yaa, an ngath-ngath. Kaangk ngaywey koyaman man-yetham iiy-iiyāng-a, yaa, an yimananga ngath-ngatha. Puth inaniy-a, wik piip ngatharamantaman nilan thaw ngathar yimanangan iiyāng.” 19 Than wik nungantaman ngeeyin-a, than Jews anangan putham ngul wik thaw-thawin thanttakaman. Puungk wiy al-alangan-a, min waa'-waa'in nunang puth than wiy al-alanganiy-a, ep way waa'-waa'in nunang. 20 Than pam wanch yot anangan thaw-thawin, “Nil oony ngangkangan pi'-pi'an a! Nanpalan nil kuchek way wun-wunana! Niiy ngul ngeenak wik nungantaman ngeeyān a?” 21 Puth than pam wanch puungk wiy anangan thaw-thawin, “Pamang oonywey ngangkangan pi'-pi'iywey-a, wik min yimanangan ke' thaw-thawiy, ya'a! Puth nil oony wayangan mee' min ke' yumpiya! pam mee' ko'anchaniya! Ya' ey!”

Than Jesus.antan Man-Mangkam Thee'in

22 Anpalaniy-a, aak kan wamp may pi'anan mungkayn, aak Jerusalem angan, Dedication.an waa'antan. Aakaniy-a, onchan min, aakan kuchar ngul wun. 23-24 Nil Jesus.aniy-a, aawuch ngench thayanakan iiy, a' aak verandah.angan iiy-iiy, nil Solomon.angan keenkanaman yump. Than Jews anangan-a, angman weentanam thanin nungant, Jesus.antan, a' thawin nungant, “Ayyang, nint yaam wik wuthanang thaw-thawangan ngant ey? Nint wik engkanang waa'ān ngant a! nint ngul in pam anan ey? nil God.angan keenkanaman kaa'ngak kuchowan ey?” 25 Nil puth Jesus.an thaw thant, “Ngay puth kan waa'angan niiyanta, puth niiyan kaangk ke' ngeeyān, wik ngatharaman, niiy wanttak man-ngeeyaniy ngayang a! Puth work pi'-pi'anam ngayan yump-yumpang niiyantan-a, an piip ngatharaman thaw ngath yimanangan yumpāng. Work pi'-pi'anam il-ilangan-a, meen-meenathan niiyant, nil God.angan mi' ngayang aak iikanakan ukāng niiyant. 26 Puth niiyiy-a, pam wanch ngatharam ya'a, niiy ke'-paal kaangk ke' wik ngatharaman ngeeyān, niiy man-ngeeyaniy ngayang anman. 27 Pam wanch ngatharam al-alangan-a, wik ngatharaman-a, ngeeyantan, ke' minh sheep al-alangan man awal moom thanttaman ngeeyantan nunang, yimanangan. Puth ngayaniy-a, mee'miy thanang, a' than monkan-wak-wakantan ngayang. 28 Thananiy-a, ngangk aak umpuyangaman ngul wun-wunayn, an than ke'-ngul uthamiythan, ya'a; an puth wee'angam ma'am piiyiy ngayangana pam wanch ngatharam anangan a? Ya'a! An than ngath ngula! 29 Nil piip ngatharamangan-a, nilan thee' thanang ngathara, niliya wuut pi'an paththam, nil ke' pam wiy yimanangan ya'a! an puth wee'angam ma'am piiyiy piip ngatharamaniya thananga pam wanch ngatharam ananganiya? An ya'a! An thana ma' nungantang ngul wunayna! 30 Ngan piip ngatharamangan karpam iiy-iiyanan, ke' thonam anman.” 31 Than puth Jews al-alanganiy-a, putham ngul kunttow maayin nungant, ke' kunttowangan piikiythan nunang, Jesus.an. 32 Puth Jesus.an thaw thant, pam wanch al-alantan, “Ngay puth work pi'an yot mee' niiyantangan yump-yumpangana, nil piip ngatharaman thawar yumpānga. Work pi'an want-wanttinpala niiy ngayangan kaangk kunttowangan piikāna?” 33 Puth than Jews anangan thawin nungant, “Ngan kaangk kunttowang piikān nintang, ngeenama, putha work pi'an nintan yump-yumpangan anpalan ya'a, puth inpalana: nint ina ke' God.an waa'-waa'angan nungkamanga a' namp nungantaman way-wayathangan, God.antaman. Puth nintaniy-a, God ya' paththam, nint ke' pam ngan inmana yimanangan iiy-iiyangan a!” 34 Nil Jesus.an thaw thant, “Than wik inangan keenkanaman umpin lat ngench thayanangan, wik God.antaman nilan thaw, ‘Niiyiy-a, ke' moom wuut pi'an ke' God yimanangan.’ 35 Ngamp mee'miy wik lat ngench thayanangan-a, kan-kanam paththam ngulakam wunow. Yaa, puth God.angan moom wuut pi'an waa' thanang pam anangan nil wik nungantaman waa' thant. 36 Puth ngayangana nilam mi', aak iikanakan kuchanya. Niiy puth ngeenak waa'-waa'aniy ngayangan ke' ngay namp God.antaman way-wayathing puth anpalan ngay nhengk God.antaman waa'ang ngathamanga? 37-38 Niiy nath wik ngatharaman kaangk ke' ngeeyāna. Yaa, niiy puth work pi'-pi'anam ngatharam anangan ngayan meen-meenathang niiyanta, niiy ngaantam-ngeeyān a! Ngay puth work piip ngatharamantam ke'wey iiying-a, an epa niiy man-ngeeyin ngayanga. Puth ngay work nungantam anangan iiy-iiyingwey-a, yaa, niiy ngaantam-ngeeyāna, work il-ilangan puth meenathan niiyanta nil piip ngatharamana, inman ngatharangan, a' ngayiy putha, piip ngatharamantang anman.” 39 Than putham ngul ke' mamiythan nunanga, puth ya'a, nil Jesus.aniy-a, ma'am pent thanttam. 40 A' nil koyam ngul iiy wonk wo'uwayn aak Jordan River aakanakaman, aak anana nil John.angan kootran kuungk-kuungk thanang ngakangan, a' angman ngul wun. 41 Pam wanch yot wampin nungant, a' thawin thanttakam, “Pam John alanganiy-a, nil work pi'-pi'anam ke'am yump-yumpa, ya'a, puth wik yot anangan nilan waa'-waa' Jesus.antaman-a, an kan-kanam anman waa'-waa' nunang.” 42 Anpalan-a, pam wanch yotangan-a, ngaantam-ngeeyin nunang Jesus.an ngula, a' ngangkangam pi'-pi'in nunang ngul.

John 11

Nil Lazarus.an Utham Ngula

1 Nil pam namp Lazarus.an weech-weechan nunang, niliy-a, kuunch Martha-a, Mary pulantam. Than ma'-kuunchaman-a, aak Bethany angan wun-wunin. 2 (Mary inan-a, nil wanch ilangaman Jesus.an keenkan tha' kuungk nunang opar awal minangan, a' tha'ana yangan nungantamangan e'ath nunang. Nil kuunch nungantamana, Lazarus.an, weech-weechan nunang.) 3 Anpalan-a, wanch pul kuuncham al-alangana wik inangan kuchpul nungant Jesus.antaniy, “Lord-ang, ngurp nungkaraman weechan nunang, nil way-wayam ngul wun-wunana.” 4 Nil Jesus.angan wik inan ngeey-a, a' thaw, “Nil nanan weech-weechan nunang mulak ya'a, puth than pam wanchangan yipam thathayn nil God.an wuut pi'an paththaman, a' than puth yipam thathayn nil nhengk God.antaman pam wuut pi'an thamp!” 5 Nil puth Jesus.angan kaangk thanang ma'-kuuncham anangan, Martha-a, Mary-a, puth Lazarus wee'anangan. 6 Nil wikan ngeey-a, Lazarus way-wayaman wun-wun-a, nil puth aak angman wun ma'-kucham, nil ke'am iiy thant yippak. 7 Anpalan-a, nil thaw ngurp nungantam al-alantan, “Ngamp a! Ngamp koyam kan iiyāmp aak Judea.ak a!” 8 Than puth ngurp nungantam anangan thawin nungant. “Teacher-ang, aak peetanaman than puth Jews al-alangan ke' kunttowang piikiythan nintang mulakam a! Nint puth koyam ngul iiyān ey? aak-aakanakaman ey?” 9 Nil puth Jesus.an thaw thant, “In ke' aak kinch ongkant e? Nil pamwey kinchangan iiy-iiyiy-a, kinchan yippak angam kenyan wunan-a, an nil ke' keekiya, ya'a. 10 Puth nilwey aak ngaa'angan iiyiy-a, an nil ep keekiy, an puth nil nganth ke'anangan iiy-iiyan. In ke' aak yimanangan wunan: ngay mak work inman iiy-iiyāng God.antan. An ngay wik God.antaman ke'an ngeeying-a, an ngay ke' aak ngaa'ang iiy-iiying, aakangan keek-keeking yimanangan. Puth ya'a, ngay mak murkanim work iiy-iiyāng piip God.ant.” 11 Anpalan-a, nil Jesus.an thaw thant ngul, “Nil Lazarus ngurp ngamparaman weep thayan wun-wunana, ngay puth inan iiyānga, weep thayanamana ekathāng nunanga.” 12 Than puth ngurp nungantam anangan thawin nungant, “Lord-ang, nint puth thawan ngant nil weep wun-wunan ey! An puth nil weepaman kemp minam ngul ekiya.” 13 Nil puth Jesus.angan weep thayanan ke'am waa' thanta, nil anan waa' thant Lazarus.an kanaman mul wun. Puth than ngurp nungantamangan ngaantam-ngeeyin nil Jesus.angan waa' thant ke' Lazarus.an weep thayanan wun-wunan e! 14 Puth nil Jesus.angan wik engkanang ngul waa' thant, “Nil Lazarus.an ya'-ngula, kanaman uthama. 15 Ngay makalam aak angan ya'a nil way-wayaman wun-wuna. Ngay puth ngangk mina, ngay angan ya'ana, niiyan yipam ngayangan min-min ngaantam-ngeeyān. Ngamp puth inman kan iiyāmp nungant a!” 16 Anpalan-a, pam Thomas (Twin Puk Um Kuchaman waa'antan nunanga) nil thaw thant wiy al-alantan, “Ngamp yotam iiyāmp nungantanga, than ngampang yotam yipam angman mulathayn.”

Nil Jesus.an Kan-Ngul Iiy Lazarus.anta

17 Anpalaniy-a, nil Jesus-a, than ngurp nungantam wee'anangan karpam iiyin aak Bethany.akan. Than kan-ngulan wampin aak Bethany anganiy-a, than pam wanchangan wik umangam waa'in thant, “Ya'a! Lazarus.an kanam utham peetan anmana, inaniy kinch four ngul awaranganiy wun-wun a!” 18 Aak Bethany.an thinth wun Jerusalem.akaniy, kilometres ko'alam thonakam, an puth kech ke'anam. 19 Than puth pam wanch Jews yot anangan wampin aak Jerusalem anpalan Martha pulant Mary.ang, yipam ngangk min yumpayn pulang, anpalan kuunch pulantaman mulan wuna. 20 Nil Martha.angan wik thoo'an ngeey-a, nil Jesus.an wamp-wamp-a, nil aawuchaman pent, umang iiyant, chip-chipam uwan, puth nil Mary.an ep aawuchang angman nyiin-nyiin. 21 Nil Martha.ang Jesus.an kanan uwan-a, a' nil thawant Jesus.antaniy, “Ayyang, Lord-ang, nint anmanwey wampin-a, kuunch ngatharaman ke' mul wuniya, ya'a! 22 Puth ngay mee'miy nintwey inman God.antwey ngeenakan thawin nungantan-a, an nil ngul yumpow nungkara.” 23 Nil puth Jesus.an thaw nungant Martha.antan, “Kuunch nungkaraman mulaman ngul ekowa.” 24 Nil puth Martha.an thaw Jesus.antan, “Ee'a, ngay kan ngaantam-ngeeyang nil mulaman ngul ekowa aak an-aniyangana aak inan kan-ngulan minchowa, than pam wanch mulan wuntana, anangan ek-ekayn ngulan mulamana.” 25 Nil puth Jesus.an thaw Martha.antana, “Ngay ilangan pam wanch mulaman ek-ekathang thananga, yipam than ngangk aak umpuyangam wun-wunayn God.antangan. Than pam wanch wee'-wee'anangan ngangk punch-aakaman thee'ayn ngathar-a, nungkway than mulan wuniythan-a, an than ngangk aak umpuyangam ngul wunayn God.antangana. 26 A' puth than pam wanch wee'-wee'anangan ngangkangan pi'-pi'ayn ngayangan-a, a' nenchanayn ngatharang ngulan-a, an than ngangk aak umpuyangam wunayn nungantang, God.antang, nil ke' kuchiy thanang nungantam anpalan.” A' nil Jesus.an thaw nungant, “Ayyang, Martha-ang, nint ngul wik inangan kan-kanam ngaantam-ngeeyangan ey?” 27 A' nil Martha.an puth thawant, “Ee'a, Lorda, ngay kan ngaantam-ngeeyang nintang nint pam anman God.angan kaa'ngak kuchowan ngant, nint nhengk God.antamana, puth God.angan nintang mi' aak iikanakan wampān, nganang yipam kaa'-piichanathān.”

Jesus.an Peey Ngula

28 Nil Martha.an wik inangan kanan thaw-a, nil koyam iiy kuunch nungantamant, Mary.ant, malang ump nunang, a' pokkapang kal nunang, a' wik itangam thawant, “Ayyang, nil Jesus.an in wampa. Nilan wik kuch nungkara nint iiyān nunganta.” 29 Nil Mary.angan wik anan ngeey-a, nil wur ek, a' yoonan erkam pent, umang uwan, Jesus.an. 30 (Nil Jesus.an aak townangan ke'aman yippak wampa, nil puth aak angman yippak nil Martha.angan ka'athaman uw nunang.) Martha pul Mary.angana, angman wamppul nungant. 31 Than Jews ananganiy-a, angman nyiin-nyiininwey Mary.antangana, yipam ngangk minan yumpayn nunangana. Than thathin nunang Mary.an erkaman yoonan pent-a, thanan putha wur ek-ekin, a' monkan-wakin nunang, puth thanan ngaantam-ngeeyin nil ke' aak grave aakanakan iiyowa, ke' peeyanakan iiyow, puth ya'a. 32 Nil Mary.an kanan wamp Jesus.antan-a, nil pungkang nyiin tha' Jesus.antang angman, a' thaw nungant, “Ayyang, Lord-ang, nint anmanwey wampin-a, kuunch ngatharaman ke' mul wuniy, ya'a!” 33 Nil Jesus.angan Mary-a, Martha puth Jews wiy anangan thath thanang-a, othamayanan peey-peeyin-a, nil ngangk way-wayam paththam wun, man ulp ke' peeyanak. 34 Nil puth Jesus.an engk thant ngul, “Niiy wanttin wunpan nunang a?” Thanan puth thawin nungant, “Awey! Pal iiyān, Lorda! Nint ngul thathān a!” 35 A' nil Jesus.ang aakan thatha, a' peey ngul. 36 Than Jews al-alangan thathin nunang peey-peeyan-a, thanan puth thawin thanttakaman, “Ayyang! An thathiy nunang a! Nilan kan-kanam paththam kaangk wun nungant Lazarus.ant aa?” 37 Puth than wiy anangan thawin, “Nil puth pam ko'anchan mee' min paththam yumpan aa? Nil puth Lazarus.an anman miyalathiy nunang nil yipam ke' mul wuniy aa!”

Nil Jesus.angan Lazarus.an Mulaman Ekath Nunang

38 Nil puth Jesus.an putham ngul ngangk way-wayam paththam wun nungantam, ke' peey-peeyanaka. Anpalan-a, nil aak awarakan iiy, pam mul Lazarus.an thenchin nunangana. Than puth aak kunttow awarang thenchin nunang, a' kunttow pi'an thaa'angan wunpin. 39 Nil Jesus.an thaw ngul thant, “Kunttow thaa'aman tha'ān a!” Nil Martha kuunch pam mul alantaman thawant, “Ayyang, Lord-ang, an yimanangan nil kemp kath ngul unchana; an puth nil kinch fourakam mul wuna.” 40 Nil puth Jesus.an thawant, “Ngay puth nungk ke' kanan thawangan e? Nint ngatharang kon uthwey iiyin-a, nintan ngul thathina, nil God.an wuut pi'an paththamana.” 41 A' anpalana than pam wanchangan kunttow pi'anan thaa'aman thechathin. Anpalan-a, nil Jesus.angan keny thath, a' thaw, “Piip-ang, ngay nungk thankyou thawanga, puth nint wik ngatharaman kan ngeeyan. 42 Ngay puth mee'miy nint puth wik ngatharaman ma'-yotam ngeey-ngeeyangan, ngayan nungkar thaw-thawang; puth wik ngay nyiingkan thawang nungkara, than pam wanch il-ilangan yipam kan-ngul ngaantam-ngeeyayn ngayang, nintan kuchan ngayang aak iikanakan.” 43 Nil Jesus.an wik inangan kanan thaw-a, nil othamayan pech ngul, “Ay-ey! Lazarus-ang! Pal pent a!” 44 Nil Lazarus mulan wun-a, nil ek ngul, awaraman yoon pent, tha'-a, ma' bandage kathanam anman pent, a' putha kaa'wal nungantamaniya kathanam anman pent. Nil Jesus.an thaw ngul thant bandage.an thapathayn nungantaman a' kuchayn nunanga!

Than Wik Yumpin Jesus.an Mulathayn Nunanga

45 Than pam wanch Jews anangan ka'athaman wampin pulant Mary.angan-a, an than Jesus.an thathin nunanga, Lazarus.an mulaman ekath nunang. Puungk wiyangiy-a, ep ngangk thee'in nungant, Jesus.antan. 46 Puth wiy anangan-a, Pharisees.ant iiyin, wikan waa'in thant, nil Jesus.angan Lazarus.an mulaman ekath nunang. 47 A' than Pharisees-a, puth pam pi'an priests anangana pam councillors al-alantangan wik yumpin, a' than thawin thanttakaman, “Ngamp want-wanttak a? Nil pam ilangan work pi'-pi'anam min anangan yump-yumpan a! 48 Ngampwey kuchimp nunang yinangan anman yump-yumpiyan-a, than pam wanch yotangam monkan-wak-wakiythan nunang ngul a! a' than Roman soldiers anangan pal ngul wampayn, a' aawuch ngench thayan ngamparaman thuthayn, a' kenthayn ngampang ngul aak ngamparam inpalan.” 49 Nil pam pi'an Caiaphas.an angman, nilaniy kaap an-aniyangan pam moom pi'an priestsantam iiy-iiy. Niliya thaw thant, “Niiy ngoongk-ngoongkam a! Niiy puth kuchek waap ke'anang a! 50 Niiy ngul ke'am ngaantam-ngeeyaniy ey? An mina, pam thonaman uthamowa, pam wanch yotantakamana, an puth ngamp Jews yotaman ke' yipam mul wunimp a!” 51 Puth nil Caiaphas.angan wik anangan nilaman ke'am ngaantam-ngeey, ya'a; nilan puth pam moom pi'an priests al-alantam iiy-iiy kaap an-aniyangan, nanpalan nil God.ang wikan kuchekang wunpant, nil wik inanganiy thawow: nil Jesus.aniy mul wunow thant pam wanch yot Jews al-alantan, 52 puth pam wanch Jews al-alantakaman thonakam ya'a, pam wanch yotantakaman aak nath-nathan wun-wuntan, than yipam pam wanch wee'-wee'anangan God.antan ngangk thanttaman thee'ayn-a, an than ke' ma'-kuuncham ngul iiy-iiyayn. 53 Aak anpalman ngulan-a, than pam moom Jews al-alangan wik yump-yumpin thanttakaman than Jesus.an mulathayn nunang. 54 Nil puth Jesus.an pam wanch Jews yot al-alantangan thinthaman ke'-ngul iiy-iiy, ya'a, aak anan Judea.an want ngula. A' nil Jesus-a, a' puth ngurp nungantam anangan aak town Ephraim aakanakan iiyin, aak pintal thinth, angman than karpam ngul wunin. 55 Aak anan may pi'an mungkanakan Jews.antam kan-kanang thinth ngul wamp, Passover.an waa'antan, than puth pam wanch yot aak nath-nathpalan wampin Jerusalem.ak, than yipam pach-pachathwayn thanttakaman, kinch thon-thonanganiy-a, aak-aakanakamana, may pi'an mungkanakan aak wampow. 56 Than pam wanch yotam anangan Jesus.ant aak thath-thathin. Than aawuch ngench thayanangan yal-yalmathwin, a' thanan-a, engk-engkin thanttakaman, “Niiy wanttak ngaantam-ngeeyaniy e? An ya' yaaka'a! Jesus.an nath ke' wampiy may pi'anakana!” 57 Than puth pam pi'an priests al-alangan a' Pharisees al-alangan wik ka'athaman yumpin, a' thawin ngul than wee'-wee'anangan Jesus.an thathayn nunangan-a, an thananiya wik waa'ayn thant, than yipam mamayn nunang.

John 12

Nil Mary.angan Jesus.an Tha' Kuungkan Opar Awal Minangan

1 Nil aakan kan-kanang wamp-wamp, thanan may pi'anan mungkayn. Aak ma' sixangan wantow-a, an-aniyangan may pi'anan mungkayn, Passover.an waa'antan. Than pam wanch yot anangan aak Jerusalem.akan iiy-iiyin, puth-a, than Jesus-a, ngurp nungantam anangan-a, iiyin thamp, aak Jerusalem.akan. Than Jesus wee'anangan-a, chip-chipam aak Bethany.ang angan paanthin, aak anan Lazarus.an wun-wun, pam anman Jesus.angan mulaman ekath nunang. 2 Than pam wanch wiyangan may kiingkin Jesus.ant, a' Lazarus.an umpin nunang, puth pam wanch wiy tham umpin thanang mayakaniy. Nil Martha.angan mayan-a, thee'-thee' thant, pam wanchantan. 3 Anpalan-a, nil Mary.angan opar nga'alangk pi'anang kal, opar awal min paththam anangan kal nungant, a' tha' Jesus.antangan yeech, pi'anam yeech. Nil kanan tha'an kuungkan Jesus.aniy-a, nil tha'an e'athan, yangan ongk nungantam alangaman. Ngul than pam wanch yotam al-alangan awal minan nguuthin. 4 Ngul-a, ngurp thonam Jesus.antamana, Judas Iscariot.ana, pam nilan ngaantam-ngeey wik yumpow pam Pharisees al-alantangana Jesus.an mulathayn nunang-a, nilan thaw Mary.ant, 5 “Apey! Nint opar inan sellimpungin thant wiyanta, wukal anan-a, ngan yipam pam wanch wukal ke'anang al-alantan thee'in thanta. An puth wukal pi'an, kaap thonamak wukal ananiy wun-wuniy a!” 6 Puth nilan kan-kanam ke'am ngaantam-ngeey thanang pam wanch wukal ke'anang anangan, ya'a, an nilan yaan thawa, pam nil anman puth ma'-kuchanana. Nil Judas Iscariot alangaman wukal thanttam Jesus-a, ngurp nungantam al-alantaman boxang pi'-pi' thanttam, a' nil ma'-kuchanang wich-wichim thanttam. 7 Nil puth Jesus.an thawant, “Ke' wakān nunang a! Nil opar awal min inan ngathar pi'-pi', aak yimanangakan. Nil oparan tha'angan yeechar-a, an nil ngaantam-ngeeya, ngayan mul ngulan wunāng-a, than ka'athangaman-a, kemp nampayn ngayang, a' kan-ngul thenchayn ngayang awarangan. 8 Than pam wanch wukal ke'anangan-a, murkanim aak ingan wun-wuntan niiyantang, ngay puth ep yaam ingan ke' wuning aak inganiy niiyantangana.”

Than Wik Yumpin Lazarus.an Mulathayn Thamp

9 A' yaam ke'anam-a, than pam wanch yot anangan-a, aak Jerusalem.angan wun-wunin-a, wik thoo'an ngeeyin nil Jesus.an aak Bethany angan wamp, a' than pam wanch yotaman-a, iiyin nungant aak Bethany.ak. Thanan iiyin, Jesus.an thathayn nunang, puth nunangam thonakam ya'a, puth Lazarus tham thathayn nunang, nil Jesus.angan mulaman ekath nunang. 10-11 Than pam wanch yot al-alangaman-a, aak woyan Jews manth-thayan al-alantaman too ngul wantin. Thanan Jesus ngul monkan-wak-wakin nunang, puth nanpalan nil Lazarus.an-a, mulaman ekath nunang. Thanan puth pam pi'an priests al-alangan-a, than wik yumpin thanttakam, Lazarus.an thampang mulathayn nunang.

Nil Jesus.ana Ngangk Thayanam Iiy Jerusalem.akan

12 Ngaa' thonang ngulan-a, than pam wanch yot anangan may pi'an Passover.akan wampinan-a, than wikan ngeeyin thanttam Jesus-a, puth ngurp nungantam wee'anangan wamp-wampin aak Jerusalem.akan. 13 Than pam wanch yot al-alangan yuk punth yuk koyngkanantam anpalan thuthin, ma'ang kal-kalin, a' iiyin ngul umang nungant Jesus.antan, than pech-pechin, “Yeeey! Yeeey! Ngampan thaa'-kuumpāmp God a! Nil puth pam inan kuchana, nil pam pi'anan yumpow nunanga! Pam inan king nganttam Jews.antamana! Nil God.angan pam pi'an yumpowan a!” 14 Anpalan-a, nil Jesus.angan donkey uw, a' man-mangkang mat nungantang. Keenkanaman-a, nil pam prophet thonamang lat ngench thayananganiy-a, waa'-waa'an nunang nil Jesus.an donkey man-mangkangan matow. 15 Pam prophet anmananiy-a, wik yimanangan thaw, “Ayyang, niiyalang! Pam wanch aak Jerusalem.angan wunaniy a! Niiy ngangk minangam iiy-iiyān a! Niiy ke' winynyangan mo'ān a! Thathiy a! King niiyantaman nanpal wamp-wampan, nil donkey manyang man-mangkang iiy-iiyana.” 16 Nil Jesus.an aak Jerusalem.ak donkeyangan wamp-a, than ngurp nungantam al-alangan wik anangan ke'am ngaantam-ngeeyin ya'a, puth ngul-ngulan-a, nil Jesus.an mulaman kanan ek-a, a' koyam ngulan mat keny-a, puth thantan-a, kuchekangan kan-ngul wamp wik nungantam Jesus.antaman, keenkanaman waa', pam prophet alangan. A' than kan-ngul ngaantam-ngeeyin than pam wanch anangan ngangk kuupamanang wampin nungant, Jesus.antan. 17-18 Than pam wanch yotam anangan umangan iiyin nungantana, puth anpalan thanan wik thoo'an ngeeyin nungantam work pi'anan yump, wik othamayanan pech Lazarus.antan nil pentowan aak kunttow awar anpalan, a' nil mulaman ekath nunang ngula. Than puth pam wanch mee'miy al-alangan-a, mee' thanaman thathin nunang Jesus.an work pi'anan yump-a, than al-alangan wikan waa'in thant pam wanch wiy al-alantan. 19 Than pam Pharisees.angan thathin thanang pam wanch anangan umangan iiy-iiyin nungant-a, thanan thawin thanttakamana, “Apey, ngamp ke'am pam wanch anangan Jesus.antaman wayathamp thanang, ngampan wik ya'angam yump-yumpamp. Pam wanch yot anangan thathiy thanang a! Than ma'mangkamangan kan wantin ngampang, than an-ngul kan yalmathwuntan nunganta, Jesus.antan a!”

Than Pam Wanch Aak Greece Punchan Anangan Wenkin Nungant Ngul

20 Aak an-aniyangan-a, may pi'an Passover.an mungkin-a, Jews thonakam ke'am wampin aak anganiy, than pam wanch Greeks tham angman wampin aak Jerusalem.angan. Than tham wampin than yipam ngaantam-ngeeyayn nunang God.an, a' thaa'-kuumpayn nunang tham. 21 Than pam wanch aak Greece punchan wiy anangan iiyin nungant, Philip.ant, ngurp nungantam Jesus.antam alantan. Nil Philip.an aak town Bethsaida anpalan wamp aak angan Galilee.angan. Thanan thawin nungant, “Ayyang, ngan kaangk wik thawān nungant, Jesus.antan a!” 22 Anpalan-a, Philip.an iiy ngul, a' wikan-a, Andrew.ant waa' nungant, wik thanan thawin nungant, a' Philip-a, pul Andrew.angan karpam ngul iiypul, a' wikan waa'pul nungant, Jesus.antan. 23 Nil puth Jesus.an thaw pulant, “Aak anan kaniy wamp ngula, yipam pam wanch anangan kan-ngul mee'miy iiyayn nil pam anman God.angan kuch nunangana, an nil pam min a' pi'an paththam. 24 Ngay puth niiyant wik inan kan-kanam waa'āng: nil pamangwey may kaanch ke'wey kaampiy aakangan-a, an may kaanchan ke' emiy ya' anman, an nil anman may ke'anang wun-wuniy. Puth nil pamangan may kaanch aakanganwey kaampiy-a, anpalana, may kaanch pe'anan kathaman ngul, a' yiikanan pentan a' minam ngul emana, a' may yot ngul kal-kalan. 25 Inan wik yimanangan wunana: nil pamang nungantakamanwey kaangk-a, an nil wayathan nungamang. Nil puth pamang kaangk ke'an nungantakaman-a, puth aak ingman ma' God.antangan wantiy nungantakaman-a, an nil God.angan ngul kaa'-piichanathowan ngangk aak umpuyamakan. 26 Nil pamwey kaangkan work iiy-iiyow ngathar-a, nil puth ngayangan monkan-wak-wakow, a' wik ngatharaman ngeey-ngeeyow, nil yipam ngatharang angman iiy-iiyow, aak-aakanakan ngayan iiyāng. Nil ngathar yimanangan wee'an work iiy-iiyowar-a, piip ngatharamangan pam min paththam ngul ngaantam-ngeeyow nunang.”

Nil Jesus.angan Nungamang Waa' Mulan Wunow

27 Nil Jesus.an wik inangan thaw ngul, “Ngangk way-wayam ngul wunara. Ngay wanttak nath thawāng nungant piip ngatharamantan a? Ngay nath thawingan nunganta nil ngayang kaa'-piichanathowa yipam than ke' mulathayn ngayang, puth ya'a, ngay puth wampangan aak iikanakaniy than yipam way inangan yumpayn ngathara. 28 Piip-ang, than nintang yotamangan mak thathayn nint puth min-minam paththama, a' wuut pi'an thamp!” Anpalan-a, than wik ngeeyin, inpal kenyan thaw, “Than pam wanchangan kanam thathina, ngay min-minama, a' ngay wuut pi'an paththaman, an than puthaman ngul thathayn.” 29 Than pam wanch al-alangan, than Jesus.antangan thinth than-thanin-a, than thamp wik aniy ngeeyina. Than wiy anangan thawin, “An ngak peey-peeyana,” puth than wiy anangan thawin, “Ya'a, an ngaantiyongk thaw nunganta.” 30 Nil puth Jesus.an thaw thant, “Wik man awal niiy inaniy ngeeyan-a, wik yampal kenyan thaw-a, an puth ngatharakam thonak ya'a, an niiyant tham, niiy yipam ngeeyāna. 31 Niiy kan wik inan ngeeyāna; aakan kan wamp thanta, nil God.angan pam wanch yot anangan thath-thathow thanang than wee'-wee'anangan ngangkangan pi'-pi'antan nunang, nath ya' yaaka'a. Aak yimanang ngulana nil God.angan oony way pi'anan ngul maalathowan, moom pi'an aak imanaman, nil puth pam many ngul iiy-iiyow.” 32 Amanaman-a, nil Jesus.an thaw ngul, “Than ngayang kanan yukangan waanchayn-a, ngay ngangkang ngul thawāng thant pam wanch yotantan than yipam ngayangan ngaantam-ngeeyayn, than nath monkan-wakayn ngayanga, nath ya'a.” 33 Nil Jesus wik inangan thaw-a, nil nungantakaman ngaantam-ngeey nil want-wanttakan uthamow, yuk wuuyanangan waanchayn nunang. 34 Than pam wanch al-alangan wik inangan ngeeyin nunang-a, thanan thawin, “Ngan puth wik kan ngeeyan lat ngench thayanamana, nil pam anman nil God.angan keenkanaman kaa'ngak kuchowan ngamparan-a, nilan aak umpuyaman ngul wunow! Nint puth ngeenak thawangan pam nil God.angan kuch nunang-a, yukang kenyan waanchayn nunang e? Nil ngul pam inan wee'a, God.angan kuchan a?” 35 Puth nil Jesus.an thaw thant ngul, “Ngay ke' nganth ngangk niiyantamakana. Ngay puth ingan yaam ke' wuning ngula, ngay manyam thonakam wunāng niiyantanga. Niiy ngayang anman monkan-wak-wakān ngay yippak inman niiyantangana, niiy yipam nganth ke'anangan ke' iiyāna, niiy yipam woyan God.antaman ke' kumān ke' pam wanch anangan aak ngaa'angan yimanangan iiy-iiyantan. 36 Ngayan yippak niiyantangan iiy-iiyang-a, niiy kan-kanam ngangkangan pi'-pi'ān ngayanga, niiy yipam ke' ngay anman ngul iiy-iiyāna!”

Than Pam Wanchangan Ke'am Ngaantam-Ngeeyin Nunang

Nil Jesus.an wik inangan kanan thaw thantan-a, nil kan-ngul iiy, kaa'wal thench nungamang thanttaman, pam wanchantam. 37 Nungkway nil work pi'-pi'an min-miniy mee' thanttangan yump-yump-a, than puth pam wanch yotangan ke'am ngangkangan pi'-pi'in nunanga, ya'a. 38 Puth wik nil pam prophet Isaiah.angan keenkanaman ump-a, an kan-kanam waa'. Wik yimanangan umpa, “Lord-ang, ngul than wee'-wee'anang ngaantam-ngeeyin wik ngalan waa'-waa'al thant a? Nint puth nungkamangan kan meenathan thant nint wuut pi'anana! Puth ya'a, pam wanch thinhan, ke' ngeeyiythan, ya'a.” 39 Than pam wanchang nanpalan ngangkangan ke'am pi'-pi'in nunang, 40 nil puth Isaiah.angan wik thon thamp ngul waa', “An ke' God.ang mee' ko'anch yump thanang thanan yipam ke' thathayn nil God wanttakan. An ke' nil kuchek-thayan yump thanang, than kaangk ke'-ngulan minan iiy-iiyayn, than yipam ke'-ngul ngaantam-ngeeyayn nunangan, a' puth woyan way anman wak-wakayn, ke'-ngul wantiythan. Nil God.angan puth kaangk min yumpow thanang, puth ya'a, thananiy-a, kaangk ke' wampayn nungant.” 41 Nil Isaiah.angan wik inangan waa' puth nilan nathpalman kan ngaantam-ngeey nunang Jesus.an nil puk nhengk God.antaman, pam wuut pi'anan. A' nil wikan waa'-waa' nungantam Jesus.antaman. 42 Puth than pam pi'an Jews.antam wiy anangan epa, ngangk thee'in nungant, Jesus.antan, puth thanan wik pam wanch yotantang ke'am waa'-waa'in thanttakaman, ya'a, than puth winynyang mo'in thanttam, than puth ngul kenthin thanang church thanttam amanaman. 43 Than pam pi'-pi'anam Jews.antam al-alangan puth kaangk than pam wanch wiyangan min waa'ayn thanang, than puth ke'am ngaantam-ngeeyin nil God.angan nath min waa'ow thanang, nath ya'a.

Nil Jesus.angan Wik Thayanam Thaw Thant

44 Anpalaniy-a, nil Jesus.an thaa'-ay thaw, wik inangan, “Than wee'-wee'anangan ngayang ngangkangaman pi'-pi'antan-a, an than ngayang thonakam ke'am ngangkang pi'-pi'antan, ya'a, puth than nunang tham ngangkang pi'-pi'antan nilan kuch ngayang aak iikanakan. 45 A' than wee'-wee'anangan ngayangan thiichantan-a, an than nunang tham thiichantan nilan kuch ngayang aak iikanakan. 46 Ngay aak iikanakan wampangan, ke' nganth yimanangan, ngay yipam umputh iiy-iiyāng woyan wakanan, than pam wanchangan yipam thathayn, woyan min piip God.antamakan wun. Puth than wee'-wee'anangan ngangkangan pi'-pi'antan ngayang-a, an than aak ngaa'angan ke' wuniythan, nganth ke'anangan, an ya'a. 47 Than wee'-wee'anang wik ngatharam kanaman ngeeyin-a, puth than monkanam ngul iiyantan ngatharam-a, ngayana puth thawing thant, ‘Niiy pam way iiy-iiyaniya.’ Puth ya'a, ngay wik yimanangan ke' thawing, ya'a, puth ngay pal aak iikanakan wampangan pam wanch anangan kaa'-piichanathanakan thanang way thanttam anpalan. 48 Nil puth wee'an monkanamwey iiyiy ngatharam-a, a' puth wik ngatharaman kaangk ke'an ngeeyow-a, an nil pam way-wayam paththam iiy-iiyan. Aak inan kanan minchow-a, than pam wanch yotangan ngul thathayn, nil pam anman ke'aman wik ngatharaman ngaantam-ngeeya, an puth nil pam way-wayama, an nil aak God.antangan ke' wunow, ya'a. 49 Nil piip ngatharamang, nilan kuch ngayang-a, nil thawar ngay wik anangan waa'āng pam wanch yotamantan, wik inangan ngay-ngayam ke'am ngaantam-ngeeyang thanang, ya'a. 50 Ngay puth mee'miy than wee'-wee'anangan wik piip ngatharamantaman ngeey-ngeeyantan-a, an than ngangk aak umpuyangam ngul wunayn God.antang, ngay puth wik anman waa'angan nilaman thawar waa'anakan niiyanta.”

John 13

Nil Jesus.ang Tha'an Pung Thanang, Ngurp Nungantam Anangan

1 Aak anan kan wamp may pi'an Passover.akan. Nil Jesus.angan kan ngaantam-ngeey aakan thinth kan wamp-wamp nungant, nil aak inan kan-ngulan wantowa, koyam ngulan iiyow piip nungantamakan. Nil puth Jesus.an nathpalman kaangk wun thant pam ngurp nungantam al-alantan aak ingana, nil kan-kanam paththam ke'-ngoongkam anman kaangk wun-wun thant. 2 Anpalaniy-a, Jesus-a, a' than ngurp nungantam anangan kan-ngul nyiinin may mungkanakan. Nil oony way alangan kanam kuchek Judas.antangan wik wunp, nil yipam wik yumpow thanttang, pam way al-alantangan, Jesus.an mulathayn nunang. Nil Judas anan-a, nhengk Simon Iscariot.antam. 3 Nil puth Jesus.angan-a, kanam thiich nil God.angan work pi'anan ma' nungantangan want, pam wanch ma'mangkaman pi'-pi'ow thanang aak ingana. Nil kan mee'miy nil inpal keny piip God.antaman uk, a' puth keny koyam ngulan matow piip God.antan. 4 Anpalaniy-a, nil Jesus.an kan-ngul ek table.aman, a' coatan thapath, a' towelangan ompam kath nungamang. 5 A' nil ngakan basinang yeech, a' tha'an kan-ngul pung-pung thanang ngurp nungantam anangan. Anpalaniy-a, nil Jesus.angan tha'an e'-e'ath thanang ngul towel alangaman, nilan ompam kath nungamangan. 6 Nil Jesus.an Peter.ant ngulan wamp-a, ke' tha' nunangan pungiy-a, nil paththaman thaw, “Ayyang, Lord-ang, in-ngul nint tha' ngatharam inangan pungān ey?” 7 Nil puth Jesus.an thaw nungant Peter.antana, “Nint ke'am ngaantam-ngeeyangan ngay ngeenakan inan yumpanga, puth ngul-ngulan-a, an ep nintan ngaantam-ngeeyān ngul.” 8 Puth nil Peter.an thawant, “Nint ngayang tha'an ke' pungin a!” Nil ngul Jesus.an thawant, “Ngaywey tha' kucham nungkaram inangan ke'an punging-a, yaa, an nint puth ngurp ngatharam ke'-ngul iiy-iiyāna, ya'a.” 9 Simon Peter.an puth thaw Jesus.antan, “Lord-ang, nint puth ngayang tha' thonakaman ke' pungān a! Nint ma'-a, kuchek thampang pungān ngayang a!” 10 Nil puth Jesus.an thawant, “Nil pam may pi'anakan wampiywey-a, aawuch thonangan-a, an nil ka'athamaniy-a, muunchowa aak nungantamangan, an puth nil kemp pach ngul wampan, puth-puthaman nil ke'-ngul muunchiya, an ya'-ngul. An nil tha' thonakaman ngul pungow nungamang. Nil God.angan yotam ngangk pach kan yump niiyang, way niiyantam anpalana. Nil thonam thonakam ep ya'a, nil pam way iiy-iiyan.” 11 (Nil puth Jesus.angan kanam thiich nil pam wee'angan theetathowan; nil nanpalan thaw thant, “Niiy yotam inangan ngangk pach ngul iiy-iiyaniya, way niiyantam amanaman. Nil thonam thonakam ep ya'a, nil pam way iiy-iiyan.”) 12 Nil Jesus.ang kanan tha' pung-pung thanang ngurp nungantam anangan-a, nil coatan koyam ngoonch ngul, a' kan-ngul nyiin table.angan. Anpalan-a, nil thaw thant, “Niiy kan ngaantam-ngeeyaniy ey? ngay nyiingkan yumpangan niiyantangan ey? 13 Niiy puth ngayangan waa'aniya teacher a' puth Lord. An min ngathar niiy yimanangan waa'-waa'aniy ngayanga, an puth kan-kanam ngay teacher a' puth Lord niiyantam thamp. 14 Puth nungkway ngay Lord-a, puth teacher niiyantaman-a, ngay puth nyiingkan tha' yotam pung-pungang niiyangan. Niiyan puth yimanangan tha'an pung-pungwin niiyantakaman. 15 An ngay tha' nyiingkan pung-pungangan niiyang-a, ngay aak woyan min meenathangan niiyanta, niiy yipam minam iiy-iiyān niiyantakaman a' niiy yipam ma'-aath-aathwun niiyantakaman ke' ngay nyiingkan niiyangan ma'-aathangan. 16 Ngay wik inan kan-kanam waa'-waa'āng niiyant: pam nil workan iiy-iiyan-a, an nil pam pi'an ya'a, nil ke' moom nungantam yimanangan ya'a; a' puth nil pam wikan kal-kalan alangan-a, an nil pam pi'an tham ya'a, nil moom nungantam alangan nilan kuch nunangan-a, an ep nil pam pi'an. 17 Niiy puth kan mee'miy ngul, wik ngay nyiingkan niiyang thaa'-aath-aathangan; niiywey wik ngatharaman min-minam ngeey-ngeeyin-a, niiy puth ngangk min ngul iiy-iiyin. 18 “Ngay niiyang yotam inangan ke'am waa'-waa'ang ya'a; ngay thanang mee'miy ngay wee'-wee'anangan mi'angan thanang. Puth wikan kan-kanam paththam yipam wampow, than keenkanaman umpin lat ngench thayanangan, ‘Nil pam thonam alangan may ngatharangan mungkow-a, pam nil anman wayamow ngatharana.’ 19 Ngay wik inaniy umputh kan waa'angan niiyant. Way inangan wampayn ngathar ngulan-a, niiyan yipam kan-kanam ngul ngaantam-ngeeyān ngayang ngay pam inman nil God.angan kuch yipam pam wanch kaa'-piichanathāng niiyang. 20 Ngay niiyant wik kan-kanam thaw-thawang; than wee'-wee'anangan ngangk minangam iiy-iiyayn thant pam anangan ngayan kuchang thanang-a, an than ke' ngathar thamp ngangk minangam iiy-iiyantan; a' putha than wee'-wee'anangan ngangk minangaman iiy-iiyayn ngatharan-a, an ke' than nungant thamp ngangk minangam iiy-iiyantan, nilan kuch ngayang.”

Nil Jesus.angan Waa' Thant Nil Pam Thonamangan Theetathow Nunang Pam Way Al-Alantan

21 Nil Jesus.an wik inangan kanan thaw-a, nilan ngangk way-wayam paththam weem, a' nilan thaw ngul thant, wik engkanangam thaw thant, “Ngay niiyant kan-kanam thaw-thawang: nil pam thonamang, nil yamam nyiin-nyiinan niiyantanga, nil ngayangan theetathow pam way al-alantan.” 22 Than ngurp nungantam Jesus.antam anangan-a, than mee'am thathwin, than aak-way uwin, than ngaantam-ngeeyin thanttakam, “Nilana wee' waa'-waa'an nunang?” 23 Nil ngurp Jesus.antam thonaman-a, nil Jesus.an kaangk wun nungant-a, angman thinth Jesus.antang nyiin-nyiin. 24 Nil Simon Peter.ang ma' wunyathant, a' thaw pam alantan, “Kan nint engkān nungant, nil paman wee' waa'-waa'an nunang e?” 25 Nil puth pam anana, thinth-thinth ngul thuuch, Jesus.ant, a' thawant, “Lord-ang, an nil pam wee'ang a? theetathow nintang a?” 26 Nil puth Jesus.an thawant, “Ngay may breadan punchathāng may kam sauce.angan-a, a' ngay thee'āng nungant ngul pam alantan. Nil pam anmana.” Nil Jesus.angan may bread manyam thuth, a' punchath may kam sauce.angan a' Judas.ant thee' nungant, nhengk Simon Iscariot alantaman. 27 Nil Judas.ang mayan maman-a, Satan.an ngangkang ngoonch nungantang, oony way pi'anan. Nil puth Jesus.an thaw nungant, “Nint erkam paththam iiyān a! work nanan kan yumpān a!” 28 Than ngurp Jesus.antam wiy anangan table.angan nyiin-nyiinin-a, an than ke'am ngaantam-ngeeyin, nil Jesus.an ngeenakan yimanangan thaw nungant Judas.antan. 29 Nil puth Judas.ang bagan wukal thampan pi'-pi' thant, nanpalan than ngurp Jesus.antam wiy al-alanganiy-a, ngaantam-ngeeyin nil ke' Jesus.an thaw nungant may piiyanakan may pi'an Passover aakanakan. Than puungk wiy al-alanganiy-a, ngaantam-ngeeyin nil ke' Jesus.an yaaka' thaw nungant wukal wiy kalow thanta, pam wanch wukal ke'anang al-alantan, puth ya'a. 30 Nil puth Judas.ang may breadan kanan mam Jesus.antaman-a, nil yoon ngul pent. An puth aak ngaa' ngul wun.

Nil Jesus.angan Wik Thayanath Thanang

31-32 Nil Judas kanan pent-a, nil Jesus.an thaw ngul, “Nil God.ang kan-ngul meenathow nil pam anman God.angan kuchan, an nil pam pi'an paththama; a' than pam wanchangan thathayn nunang ngulan-a, than kan-ngul ngaantam-ngeeyayn nil God.an want-wanttakan. A' than kan-ngul ngaantam-ngeeyayn nil pam anan God.angan kuch nunang-a, pul God.angan karp anman, a' pula, min a' pi'an paththam thamp. Ngul-ngulan-a, nil God.angan kan-ngul meenathow thant pam wanchant nil pam anan God.angan kuchan-a, an nil pam pi'an paththam. 33 Ayyang, niiyalang! puk ngatharam-ang, kan in ngeeyān a! Ngay niiyantang yaam ke'-ngul wunānga. Niiy ngath ngul wenk-wenkāna, puth ngay niiyant wik inan waa'ānga, ngay wik inman ka'athaman kan waa'angan thant Jews.antan, ‘Niiy puth ke' iiyin ngatharang, ngay aak-aakanakan iiyāng, ya'a.’ 34 Puth ngay niiyangan ep wik thayanathānga! Niiy kaangk wunān niiy-niiyantakama. Ke' ngayan kaangk wunangan niiyant-a, an puth niiy yimanangan kaangk wunān niiy-niiyantakam. 35 A' niiywey kan-kanam paththaman kaangk wunān niiyantakaman-a, anpalana, than pam wanch wiyangan kan-ngul thiichayn, niiyan ngurp ngatharaman iiy-iiyaniy.”

Nil Jesus.an Thaw Nungant Peter Alantan, “Nint Ma'-Ko'alaman Ngul Wik Uuyaman”

36 Anpalan-a, nil Simon Peter.an Jesus.ant engk, “Lord-ang, nint wanttinak iiyangan ee?” Nil puth Jesus.an thawant, “Nint ngayang inan yippak ke' monkan-wakina, ngay wanttinakan iiyānga, ya'a, puth ngul-ngulan-a, an ep monkan-wakān ngayang.” 37 Nil Peter.an putham ngul thaw nungant Jesus.antan, “Lord-ang, ngay puth nintang inman ke' monkan-waking ey? Ngay puth nungkarang anman uthamāng a!” 38 Nil puth Jesus.an thaw nungant, “Nint ngul kan-kanam uthamān ngatharang ey? Ngay nungk inan kan-kanam thaw-thawang, an minh roosteran ke'an yippak pechow-a, nint ma'-ko'alaman ngul wik uuyamana, a' thawān thant, pam wanch wiyantan, nint ngayang mee'miy ya'ana.”

John 14

Nil Jesus.angan Wik Inan Waa' Thant Than Want-Wanttakan God.an Uwayn Nunanga

1 Nil Jesus.an wik inangan thaw thant, “Niiy ngangk wayan ke' wunān a! Niiy God.an ngangkangam pi'-pi'ān nunang a! Puth-a, niiy ngayang thamp ngangkangam pi'-pi'ān a! Puth ngay wik min inangan kan-kanam waa'āng niiyant. 2 Aak piip ngatharamantangan-a, aawuch yot than-thantan. An kan-kanama. An yimanangan ke'an than-thaniythan aawuch yotan-a, an ngay wik yimanangan ke' waa'ing niiyant, ya'a. An kan-kanam putha, aawuch yot anman than-thantan. Ngay puth keenk iiyāng aak yumpāng niiyant. 3 Ngay ngulan matāng-a, keny piip ngatharamantan-a, a' ngay aak thamp kanan yumpāng niiyantan-a, ngayan-a, palam ngul wampāng niiyant, a' yal-yalmathāng niiyang ngul ngatharakam, yipam aak ngayan wunāng-a, niiy angman wun-wunān ngatharang. 4 Niiy puth woyan mee'miy aak-aakanakan ngayan iiyānga.” 5 A' nil Thomas ngul thawant, “Ayyang, Lord-ang, ngan puth mee'miy ya'a aak-aakanakan nintan iiyāna. Ngan puth woyan want-wanttak thiichān a?” 6 Nil Jesus.an thawant, “In ngeey a! An puth ngayam ke' woyan niiyantaniya, niiy yipam kan-kanam God.an uwān nunang, a' kan-kanam thiichān nunang niiy yipam ngangk aak umpuyangam wunān God.antan. Than wee'-wee'anangana ngathar wampiythan-a, woyan ngatharaman wak-wakiythan-a, than ep woyan uwiythan, a' piip God.ant wampiythan. Than wee'-wee'anangana woyan thonan wak-wakiythan-a, than piip God.ant ke' wampiythan, ya'a. 7 Niiy ngayang min-min paththaman thiichinwey-a, niiy piip ngatharaman thiichin nunang thamp a! Aak inpalman-a, niiy kan-ngul thiichān nunang piip ngatharaman, puth niiy kan thathan nunang.” 8 Nil Philip.an thaw nungant, Jesus.antan, “Lord-ang, nint piip God.an-a, meenathān nunang ngant a! Ngan wik aakanakaman thonakam engkanan nungk a!” 9 Nil puth Jesus.an thawant, “Ngay niiyantang aak ingan nathpalman wun-wunangan; puth nint ngayang ngoongk-ngoongkam yippak, Philip ey? Than wee'-wee'anangan ngayangan thathin-a, an than piip ngatharaman kan thathin nunang tham. Nint puth wanttak ngul engkangan ngathar piip God.an meenathāng niiyant a? 10 Philip-ang, nint ngul ke'am ngaantam-ngeeyangan ey? ngay-a, puth piip ngatharamang ngan thonaman ey? Ngayaniy-a, ngangk piip ngatharamantang wun-wunang; puth piip ngatharamaniy-a, ngangk ngatharamang wun-wunan. Wik inangan ngayan thawangan nungk-a, an wik ngatharam ya'a, ngay-ngayam ke'am wik ngunchanga, puth wik inangan piip God.antama. Nilan-a, piip God.an ngangk ngatharangan inman wun-wunan-a, nilam work nungantam anangan yump-yumpan. 11 Niiy wik ngatharaman kan-kanam ngaantam-ngeeyāna! Ngay-a, puth piip ngatharamang ngan thonamana. Ngayaniy-a, ngangk piip ngatharamantang wun-wunang; puth piip ngatharamaniy-a, ngangk ngatharamang wun-wunan. Niiy puth wik inangan kan-kanam ngaantam-ngeey-ngeeyān, ngay puth kan waa'angan niiyant. Ya'wey-a, niiy work pi'-pi'anam anangan ngaantam-ngeey-ngeeyān ngayan yump-yumpang, a' wik anangan niiy kan-kanam ngul ngaantam-ngeey-ngeeyān. 12 Ngay puth kan-kanam niiyant thaw-thawāng wik inanganiya; than wee'-wee'anangan ngangk thee'ayn ngathar-a, an than work min anangan ngul yump-yumpayn, ke' ngay anman yump-yumpang. Than work min pi'-pi'anam paththam ngul yump-yumpayn, ngay puth kan-ngul iiyāng koyam piip ngatharamant. 13 Niiy ngeenak nathan thawin ngath-a, ngayan-a, wik niiyantam ngul ngeeyāng, niiyan puth ngathar wik minakan thawān ke' ngayan wik min thaa'-aath-aathangan niiyang. Ngay nhengk God.antamangan-a, ngul ma'-aathāng niiyang niiy yipam thathān piip God.an nil min-minam paththam, wuut pi'an, ke' wiy yimanangan ya'a. 14 Niiy ngeenak nathan thawin ngath-a, ngayan-a, wik niiyantaman ngul ngeeyāng, niiyan puth ngathar wik minakan thawān ke' ngayan wik min thaa'-aath-aathangan niiyang.

Nil God.angan Ngeen-Wiy Min Nungantaman Ngul Kuchow Niiyant

15 “Niiywey kan-kanaman kaangk wunin ngathar-a, niiy puth wik ngatharaman-a, ngeey-ngeeyān, wik ngayan thaw-thawang niiyant. 16 Ngay piip ngatharamant ngul engkāng nungant, nil yipam thonangan kuchow niiyant ma'-aathow niiyang yipam, ngangk niiyantang angman wun-wunow aak umpuyangam. An puth nil piip God.angan Ngeen-Wiy Min nungantaman ngul kuchow niiyant, nil yipam wik kan-kanaman waa'-waa'ow niiyant, wik God.antaman. 17 Than pam wanch wiy al-alangan ke'aman monkan-wak-wakantan nunang God.an-a, than ke' uwiythan nunang, Ngeen-Wiy Min nungantaman, ya'a, than puth kaangk ke' min-minan thiichayn nunang. Puth niiy ep mee'miy nunang, nil puth ngangk niiyantang inman wun-wunana. 18 Ngay ke' too wanting niiyangan, ngay palaman ngul wampāng niiyant. 19 Ngul-ngulan-a, than pam wanchangan ke'aman monkanan-wakantan ngayangan-a, an than ke'-ngul thathayn ngayang. Puth niiyan ep ngul thathān ngayang, a' ngangkangan pi'-pi'ān ngayang. Ngay puth nungantang God.antangan wun-wunang, puth nanpalan-a, niiy thamp ngangk aak umpuyangam ngul wun-wunān nungantang. 20 Aakan ngulan wampow-a, niiy ngul thiichān ngayan ngangk piip ngatharamantangan wun-wunang, puth niiyaniy-a, ngangk ngatharamang ngul wun-wunān; ngay tham yimanang ngangk niiyantang ngul wun-wunāng. 21 “Than wee'-wee'anangan wik ngatharaman ngeey-ngeeyayn-a, than anangaman kaangk wuntan ngathar. Nil piip ngatharaman ngul kaangk wunow thant than ngatharan kaangk wuntan; ngay thamp yimanangan ngul kaangk wunāng thant, a' ngay ngul meenathāng ngathamang thant.” 22 A' nil Judas.an thawant, -- pam Judas Iscariot.an ya'a, in Judas thonangan -- nilan thawant, “Ayyang, Lord-ang, in nint ngul ngeenak wik nyiingkan thawan e? nintan nungkamang ngulan meenathān ngant ey? puth pam wanch wiy al-alantan ya' ey? than ke'aman monkan-wak-wakantan nintang ey?” 23 Nil Jesus.an thawant, “Than wee'-wee'anangan kan-kanaman kaangk wuntan ngathar-a, than puth wik ngatharamana ngeey-ngeeyayn. Nil piip ngatharaman-a, ngul kaangk wunow thant, a' ngan piip ngatharamang ngul wampān thant, ngangk thanttang angman wun-wunān. 24 Than anangan kaangk ke' ngatharaman-a, than puth wik ngatharam ke' ngeeyantan, ya'a. Wik anangan ngayan waa'ang niiyant-a, an wik ngatharam ya'a, ngay-ngayam ke'am wik maayangan thanang, wik anangan, puth wik piip God.antama, nilan kuch ngayang. 25 “Ngay niiyant wik inangan kan waa'angan ngay yippak inman niiyantangan wun-wunang. 26 Puth ngul-ngulana nil piip God.angan-a, Ngeen-Wiy Min nungantaman ngul kuchow niiyant, yipam work ngatharamana nil ngul iiy-iiyow. Nil Ngeen-Wiy Min God.antam alangan ngul ma'-aath-aathow niiyang, a' wik ma'mangkam ngul thaa'-aath-aathow niiyanga, puth-a, kuchekang wunp-wunpow niiyantang, wik yot ngayan waa'-waa'angan niiyant. 27 “Ngay wantāng niiyangan-a, niiyan ngangk minangam iiy-iiyāna, ngayan putha ngangk min yumpāng niiyangana. Ngangk min ngayan yumpāng niiyang-a, an nil-nila, an ke' than pam wanch wiy al-alangan ngangk min yumpwuntan ya'a. Niiy ngangk wayan ke' wunān a! a' niiy ke' winynyangan mo'ān a! 28 Niiy puth kan ngeeyan ngayang, wik ngay nyiingkan thawangan niiyant, ‘Ngay kan wantāng niiyang, puth ngay palaman ngul wampāng niiyant.’ Niiywey kan-kanaman kaangk wunin ngath-a, niiyan puth ngangk min wunin ngay koyaman iiyāng piip ngatharamantana. Puth piip God.aniy epa, nil wuut pi'an paththam, ke' ngay yimanangan ya'a. 29 Ngay puth wik inangan kanam waa'angan niiyant nyiingkan, ngay ke'aman yippak piip ngatharamantan iiyang. Ngay kan-ngulan iiyāng nungant-a, niiy anman murkanim ngul yipam ngangkangan pi'-pi'ān ngayang. 30 Ngay yaaman-a, ke' wik thawing niiyant, an puth nil moom pi'an aak in wakanana, kan-ngul wampan. Nil puth moom pi'an ngatharam ya'a, ngay ma' nungantang ke'am iiy-iiyang, ya'a. 31 Ngayan piip God anman wik ngeey-ngeeyang nunang, than pam wanch wiy al-alangan yipam thathayn ngayang ngayan piip ngatharamak kaangk wun-wunang nungant, ngangk ngatharaman nung-nungantakam kaangka! Ngamp a! Ngamp kan-ngul iiyāmp a!”

John 15

Nil Jesus.angan Nungamangan Waa' Ke' Nil Yuk Think May Kaangkantam Yimanangan

1 “Ngay ke' yuk think may kaangkantam yimanangan, ke' yuk think min-minam paththam. Nil piip ngatharaman-a, nilan ke' may kaangk anangan em-emathan. Than pam wanch al-alangan monkanan-wak-wakantan ngayangan-a, an than ke' yuk punth may kaangkangan kuchan. 2 Yuk punth ngatharamangan may ke'an pi'iythan-a, an nil piip ngatharamangan punthan thalokang umpow thanang, a' piw thee'ow thanang. Puth punth wiy anangan may kanan pi'-pi'in-a, yuk punth manyiy kath anangan-a, an nil ump-umpan ngul thanang, yipam ngulan-a, yiikan nyiingkanaman pentayna, a' may yot-yotam ngulan kalowa. 3 Niiy wayan iiy-iiyan-a, nil God.angan ke'-ngul ngaantam-ngeeyow, puth ngangk niiyantaman nil kanam pachath, niiy puth kan ngeeyan wik ngatharaman, wik God.antaman kan waa'angan niiyant. 4 Niiy puth ngangk ngatharang wun-wunān a! A' ngayiy-a, ngangk niiyantamang wun-wunāng. Niiywey ngangk ngatharang ke'an wuninwey-a, niiy puth pam wanch min ke' iiyin, ya'a. An puth aak ke' yimanangan wunan: yuk punthan thuthiywey-a, an nil may ke'-ngul kaliy, ya' anman. Puth yuk punthan angman nath yuk pi'anang wun-wuniy-a, anpalan-a, nil yuk alanganiy may yot-yotam ngul kalow. 5 “Ngayaniy-a, ke' yuk think may kaangkantam yimanangan. Niiy puth-a, ke' yuk punth may kaangkangan yimanangan kuchan. Niiy wee'-wee'anangan ngangk ngatharang ingman wunin-a, a' puth ngayan ngangk niiyantamang wun-wuning-a, niiy minam anman ngul wun-wunin, ke' yuk punthangan may yotan kal-kalan. Niiy ngangk ngatharang ke'wey wun-wunin-a, niiy puth minan ke' iiy-iiyin, mee' God.antangan ya'a. 6 Than wee'-wee'anangan ngangk ngatharang ke'an wuniythan-a, nil God.angan ngul kenthow thanang, ke' pam al-alangan yuk punthan umpantan yuk anpalana, a' piw ngulan thee'antan thanang. Yuk punth kanan kathaman-a, than thumang ngul thee'antan, kiingkantan ngul. Puth nil God.angan kenthow thanang, pam wanch anangan ngangk ngatharang ke'aman wun-wuntan. 7 “Niiywey ngangk ngatharangan wun-wunin-a, a' wik ngatharam kuchekangaman pi'-pi'in-a, ngay wik ngul ngeeyāng niiyang niiy ngeenak nathan thawin ngath. 8 Niiy minam anmanwey iiy-iiyin-a, pam wanch wiyangan-a, piip ngatharaman ngul thathayn nunang nilan min a' wuut pi'an paththaman, ke' wiy yimanangan ya'a. Niiy minam anman iiy-iiyāna, anpalana than pam wanch wiyangan ngul thiichayn niiyang niiy ngurp ngatharaman iiy-iiyaniy. 9 Ngay kaangk wunang niiyant, ke' nil piip ngatharaman kaangk wunan ngathar. Niiy ngangk ngatharang wun-wunāna! ngay anman yipam kaangk wunāng niiyant. 10 Niiy ngayangan wik ngeey-ngeeyānwey-a, ngayan puth anman kaangk wun-wunāng niiyant, ke' ngay yimanangan piip ngatharaman wik ngeey-ngeeyang nunangan, an puth nilan anman kaangk wunan ngathara. 11 “Ngay wik anangan kan waa'angan niiyant niiy yipam ngangk min iiy-iiyāna ke' ngay yimanangan ngangk min iiy-iiyang, niiyan yipam ngangk min-minam paththam iiy-iiyān. 12 Ngay kan wik inan thawāng niiyant: niiy kaangk wunān niiy-niiyantakama, ke' ngay yimanangan kaangk wun-wunang niiyant. 13 Nil pam thonamwey ngurp nungantam al-alantan mul wuniy-a, an puth nil kaangk paththam thanang ke' pam wanch wiy yimanangan kaangk wuntan thanttakaman ya'a. 14 “Niiywey wik ngatharamwey ngeey-ngeeyin-a, an niiy ngurp ngatharam iiyin. 15 Ngay puth working men ke'-ngul waa'ing niiyang, puth than pam workan iiy-iiyantan than ngoongk-ngoongkam nil moom thanttamang ngeen nathan yump-yumpan. Ngay puth ngurp ngatharam waa'-waa'ang niiyang ngula, an puth ngay niiyant wik ma'mangkam kan waa'angan piip ngatharamangan ka'athaman waa'ar. 16 Niiy puth ngayangan ke'am mi'ana, ya'a, ngay ep mi'ang niiyang. Ngay niiyant kan thawangan, niiy work min God.antan iiy-iiyān, a' niiy wik God.antaman pam wanch wiyantan waa'-waa'ān. Nil God.angan work inan thee' ngampar than pam wanchangan yipam wik nungantaman ngulakam ngangkang pi'-pi'ayn ngul. Niiy ngeenak nathan thawin piip ngatharamantan-a, nilan-a, wik niiyantam ngul ngeeyow, niiy puth wik minakan thawān nungant, ke' ngayan wik min thaa'-aath-aathangan niiyang. 17 Ngay inan thawang niiyant: niiy kaangk wunān niiy-niiyantakam.

Pam Wanchangan Ngangk-Wayangam Kal-Kalayn Niiyanga

18 “Than pam wanch wiyang nath ngangk-wayangam kaliythan niiyangwey-a, niiy ngaantam-ngeeyān an than ngayangan yimanangan ngangk-wayangam kal-kalantan. 19 Than puth pam wanch il-ilangan ke'am monkan-wak-wakantan ngayang. Niiywey woyan thanttaman wakin-a, than niiyant kaangk wuniythan, ke' than thanttakaman kaangk wuntan. Puth ngay niiyang mi'angan niiy yipam woyan thanttaman ke' wakāna, niiyan puth yipam woyan God.antaman wak-wakāna. Than nanpalan ngangk-wayangam kalantan niiyang. 20 Niiy wik anan ngaantam-ngeeyān ngayan wik ka'athangaman waa'angan niiyant. Than pam workan iiy-iiyantan-a, an than pam pi'an ya'a. Nil moom thanttaman ep pam pi'an paththam iiy-iiyan. Ngayan puth moom niiyantaman. Thananiy-a, way thakan yump-yumpin ngathara, a' ngangk kulangaman kalin ngayang, an yimanangan than ngangk kul ngul pi'-pi'ayn niiyant, way thak yump-yumpayn niiyant. Than puth ngayangan wik ke'am ngeeyin, an yimanangan than niiyangan wik ke' ngeeyiythan, ya'a. 21 Niiy puth ngurp ngatharama, ke'-paal than ngulan way inangan yump-yumpayn niiyant, puth thanan God.an ke'am thiichantan nilan kuch ngayang. 22 Ngaywey ke'an wamping thant-a, wik God.antaman wik ke'an waa'ing thant-a, an puth ngayan pam wayanang ke' waa'ing thanang. Ngay puth kan wampangan thant, a' wik God.antaman kan waa'-waa'angan thant, puth nanpalan thanan ke' thawiythan ke' than ngoongk-ngoongkam than wayan iiy-iiyina. 23 Than wee'-wee'anangan ngayangan mee' kulangam kal-kalantan-a, than puth piip ngatharaman yimanang thamp mee' kulangam kal-kalantan nunang. 24 Ngaywey ke'an work pi'anan yumping mee' thanttangan-a, ke' keenkan work pi'anan ke'aman yump-yumpin-a, ngay thanangan ke' waa'ing than wayan iiy-iiyina. Puth than kan thath-thathin work pi'an ngayan yump-yumpang, than puth anman yippak mee' kulangam kal-kalantan ngayang, puth-a, piip ngatharaman. 25 Puth thanan mak ngangk-wayangam kalayn nganang, wik yipam kan-kanam ngul wampow, than pam prophets al-alangan keenkanaman umpin, lat ngench thayanangan, wik inangan, ‘Thanan ngayang aak-ya'angan ngangk-wayangam kal-kalin.’ 26 “Nil Ngeen-Wiy Min God.antaman ngulan wampow niiyant a' ma'-aath-aathow niiyang, a' wik kan-kanaman waa'-waa'ow niiyant, wik God.antaman, nil puth piip God.antam anpal keny wampow. Ngay puth ngul kuchāng nunang niiyant piip God.antam anpal keny, a' nil ngayangam anman waa'-waa'ow niiyant, Ngeen-Wiy Min God.antam alangan. 27 A' puth niiy thampang ngayangan ngul waa'ān thant, niiy puth nathpalman ngatharang iiy-iiyan.

John 16

1 “Ngay wik inangan kanam waa'angan niiyant niiy yipam woyan God.antaman-a, ke'-ngul wantān. 2 Than puth ngul kenth-kenthayn niiyang aak church thanttam anpalan. A' puth-a, aakan ngul wampowa, than wee'-wee'anangan nath mulathiythan niiyangan-a, an than ngaantam-ngeeyayn thanttakam ngul ke' work min iiy-iiyantan God.ant, puth ya'a. 3 Thanan ngul way inangan yumpayn niiyant -- ngeenam putha? -- than puth kaangk ke' thiichayn nganang piip ngatharamanganiy. 4 Ngay niiyant wik inangan kanam waa'angan, puth aak anan kan-ngulan wampow niiyant-a, niiy yipam ngaantam-ngeeyān ngul wik inangan ngayan waa'-waa'angan niiyant.

Nil Ngeen-Wiy Min God.antamana Work Min Iiyowa, Ma'-Aath-Aathow Niiyang

“Ngay ka'athaman wik inangan ke'am waa'angan niiyant, ngay puth niiyantang inman yippak wun-wunangan. 5 Ngay inan puth kan-ngulan iiyāng nungant nilan kuch ngayang; niiy puth yot inangan ke'am thawaniy ngath, ‘Nint wanttinak iiyangana?’, ya' anman. 6 Niiy puth ngangk way paththam wunaniy ngatharam, wik anpalan ngayan waa'angan niiyant. 7 Puth ngay wik kan-kanam thawāng niiyant: an min niiyant ngayan iiyāng koyam piip ngatharamantan. Puth ngay koyaman ke'an iiying-a, Ngeen-Wiy Min God.antaman puth ke' wampiy niiyant, ma'-aathanakan niiyang. Ngay iiyingan-a, an epa, Ngeen-Wiy Min God.antaman ngul kuchāng niiyant, yipam ma'-aathow niiyangan. 8 Nil wampowan-a, nil ngangkangan ngul thaw-thawow pam wanch al-alantangan kaangk ke'an monkan-wakayn nunang. Nil ngul meenathow thant than pam wanch wayan iiy-iiyantan, a' nil woyan min God.antaman ngul meen-meenathow thant; puth inan thampa, nil ngangkangan ngul waa'ow thant nil God.angan umangan thanathow thanang ngula. 9 Nil ngul meenathow than wayan iiy-iiyantan, than puth ngayangan ke'am monkan-wak-wakin, ya'a, 10 a' nil woyan min God.antaman ngul meen-meenathow thant, ngay puth in kan-ngul piip ngatharamant koyam iiyāng, niiyan puth kaa'wal ngayangan ke'-ngul thathān. 11 A' nil ngangkangan ngul waa'ow thant nil God.angan umangan thanathow thanang ngula, nil puth piip God.angan-a, oony wayan kanam umang thanath nunang, nil moom pi'an aak imanamana, a' aak way kul pi'an paththam ngul wampowant, oony way alantan. 12 “Ngay ke' wik yot-yotam waa'ing niiyant, niiy puth wik anangan ke' yippak min-minan ngaantam-ngeeyina, ya'a, an puth wik thayana, wik engkanang ya' yippak niiyant. 13 Nil puth Ngeen-Wiy Min God.antaman wampowan-a, nil wik kan-kanam anman waa'-waa'ow niiyant, wik min God.antaman thaa'-aath-aathow niiyang. Nil wik kuchek nungantam anpalan ke' waa'ow niiyant, nil puth wik nganttam piip God.ang anman waa'-waa'ow niiyant. A' nil wik anangan ngul waa'ow niiyant puy-pal ngeen ma' wampow ngatharan-a, puth niiyant thama. 14 Nil wik ngatharam anman ngul waa'-waa'ow niiyantana, nanpalan niiy ngul thathān ngayangan wuut pi'an paththaman. 15 Yot piip ngatharamangan pi'-pi'an-a, aak umyompanaman-a, ngay thampang anman pi'-pi'ang. Wik piip ngatharaman thaw-thawan-a, an wik anman ngayiy thaw-thawanga; ngay nanpalan thawang niiyant Ngeen-Wiy Min God.antam alangan wik ngatharam anman ngul waa'-waa'ow niiyantana.

Ngul-Ngulan-a, Niiy Ngangk Wayan Ke'-Ngul Iiy-Iiyāna

16 “Aakan thinth kan-kanang wampanara, niiy ngayangan kaa'wal ke'-ngulan thathāna; a' ngul-ngulan-a, niiy kaa'wal ep ngul thathān ngayang.” 17 A' ngurp nungantam wiy anangan thaw-thawin thanttakam, “An-ngul nil yimanangan wik ngeenak thawan ngampar a? Ngamp nunangan kaa'wal ke'-ngulan thathāmpa; a' ngul-ngulan-a, an ep, ngamp kaa'wal ngul thathāmpan ey? A' puth-a, nil wik inangan thaw, ‘Ngay puth kan iiyāng piip ngatharamaka.’ ” 18 Than puth thawin thanttakaman, “An ngeenak wik thaw e? aak thinth kan-ngulan wampan nungant e? Ngamp puth ke'am wik thiichanamp nilan thaw-thawan ngampar a!” 19 Nil Jesus.angan kanam thiich thanang thanan ke' engkiythan nungant, a' nil puth thaw thant, “Ngay puth ka'athaman thawangan niiyant, ‘Aakan thinth kan-kanang wampanara, niiy kaa'wal ngayangan ke'-ngulan thathāna; a' ngul-ngulan-a, niiy kaa'wal ngul ep thathān ngayang.’ Niiy wik inangan kan-ngul ngaantam-ngeeyaniy ey? wik anpalan thaw-thawaniy niiyantakaman ey? 20 Ngay niiyant inan kan-kanam thaw-thawanga: niiy puth ngul othamayanan peey-peeyān ngatharamana, a' thaa' yuk thuth-thuthān. Than puth pam wanch wiyang ke'aman monkan-wak-wakantan ngayang-a, than ep ngangkam ngul nyiinayn ngatharam. Ka'athaman-a, niiy ngangk way-wayam ngul wunān, amanam ngulan-a, niiy ngangk wayan ke'-ngul iiyān, ya'-ngul, an niiy ngangk min-minam ngul iiy-iiyān. 21 Inan ke' aak yimanangan wun: an nil ke' wanch iimpan pekan nunang, puk manyan kalow. Nil iimpanan pek-pekan nunang-a, puk manyakan-a, nilan kaa'wal wiy-wiyam ween, an kaa'wal minangaman ke'am nyiin-nyiinan, ya'a, nil thaa'-eenchanang nyiin-nyiinan, an puth aakan kan wamp nungant, puk manyan aak-ngeeyowant. Puth puk many nungantaman kanan aak-ngeeyan ngul-a, nil kaa'wal wiy-wiyaman ke'-ngul nyiinan, ya'-ngul, an puth nil ngangk min-minam paththam ngul wun-wun; an puth puk many nungantaman-a, kanam aak-ngeey, aak iikanakan. 22 Aakan yimanang ngulan wunow niiyant. Puth inman niiy yippak ngangk way-wayam iiy-iiyaniy, puth ngay puthaman ngul thathāng niiyang. Aak an-aniyangan-a, niiy ngangk min-minam paththam ngul iiy-iiyān, wiyangan puth ke' wayathiythan niiyang ya'a, niiy puth ngangk min ngul anman wun-wunān. 23 “Aakan wampowan-a, ngay koyaman iiyāng piip ngatharamantan-a, niiyan ke'-ngul wikakan engk-engkān ngath. Ngay niiyant inan kan-kanam thaw-thawanga: niiy ngeenak nathan thawin piip ngatharamant-a, nilan-a, wik niiyantam ngul ngeeyow, niiy puth wik minakan thawān nungant ke' ngayan wik min thaa'-aath-aathangan niiyang. 24 Nathpalman niiy wik minakan ke'am engkan nunganta, piip God.antan, wik min ke' ngayan thaa'-aath-aathangan niiyang, ya'am inman; puth niiy nath wik minakan engkin nungant-a, an nilan wik ngul ngeeyow niiyang niiy yipam ngangk min paththam ngul iiy-iiyān.

Niiyana Ngangk Thayanam Iiy-Iiyāna

25 “Ngay puth wik inangan kanam waa'angan niiyant, an wik kath aak imanaman waa'-waa'angan niiyant. Puth aak anan ngulan wampowa, ngayan wik kath ke'-ngulan waa'-waa'āng niiyant, puth ngayaniya wik engk-engkanang ngul waa'-waa'āng niiyanta, piip God.antaman. 26 Aak anan wampowan-a, niiy wik minakan ngul engkān nungant, wik min ke' ngayan thaa'-aath-aathangan niiyang. Ngay puth ke' thawing niiyant yimanangan, ‘Ngay ngul engkāng nungant piip God.antan wik niiyantakan,’ an ya'a, an niiyam engk-engkān nungant, 27 nil puth piip God.an-a, nil kaangk wunan niiyant. Niiy puth kaangk wunaniy ngathar, puth niiyan kan-kanam ngaantam-ngeeyaniy ngayang nil piip God.ang inpal kenyan kuch ngayang aak iikanakan, puth amanaman, nil piip ngatharam God.an-a, kaangk wunan niiyant. 28 Nil puth kuch ngayang, aak inpal kenyan aak iikanakan ukangan; puth ngay aak inan kan-ngul wantāng, a' ngay koyam ngul iiyāng piip ngatharamant.” 29 A' ngurp nungantam anangan thawin nungant, “Ayyang, nint wik engk-engkanang ngul kan thawangan ngant, nint puth wik kath aak inpalan thampang ke'am ngul waa'-waa'angan ngant a! 30 Ngan puth kan-ngul thiichanan nintang nintan puth yot ma'mangkaman mee'miy. An puth nint kan thiichangan nganang ngeenak nathan engkin nungkar. Nganan puth wikakan puth-puthaman ke' engk-engkin nungkar a! Puth namanaman-a, ngan kan-kanam ngaantam-ngeeyanan nintang God.angan kuch nintang.” 31 Nil Jesus.an thaw thant, “Niiy inan ngayang yippak monkan-wak-wakaniy, 32 puth aakan kan-kanang thinth ngul wampanar, niiy yotaman ngul paa we'araman ngatharam, aak niiyantamakan iiyān, puth-a, ngayangaman ngul too wantān pokkapang. An puth ngayan pokkapang ya'a, nil piip ngatharaman inman ngatharang, ngan karpam iiy-iiyanan. 33 Ngay wik inangan kan waa'angan niiyant, niiy yipam ngangk min paththam iiy-iiyān, ngay puth ngangk niiyantang wun-wunang. Than pam wanch wiy al-alangan-a, ngangk kulangam ngulan kal-kalayn niiyang, a' way-wayam ngul iiy-iiyayn niiyant. Puth niiyan-a, ngangk thayanam iiy-iiyān a! Ngay puth kan ya' maalathang thanang a! Than ke' pam manyiy ngul iiy-iiyantan a!”

John 17

Nil Jesus.an Mee'-Wuthanam Thant, Ngurp Nungantamakan

1 Nil Jesus.an wik inangan kanan thaw-a, nil um keny thath, a' thaw, “Ayyang, Piip-ang, aakan kan-ngul wampan ngathar mul wunanakana. Than mak kan-kanam thathayn ngayang nhengk nungkaraman min paththam iiy-iiyang, than yipam thiichayn ngul nintan-a, wuut pi'ana, minam paththam. 2 Nint puth thawan ngathar moom pi'an iiyāng thant pam wanch ma'mangkamant, aak umyompanam inana, ngay yipam ngangk aak umpuyam wunanakan thee'āng thant, wiy al-alantan, nintan mi'an thanang ngathara. Than puth ngangk aak umpuyam ngul wunayn nungkaranga, 3 than yipam kan-kanam thiichayn nintang ngul, nint puth piip God kan-kanama, nintam anman thonam, than puth yipam ngayang tham thiichayn, nhengk nungkaram inan, ngay Jesus Christ.an, nintan ngayang kuchan aak iikanakan. Ke' than kampan thanttaman thiichantan-a, than ngalangan yimanangan thiichayn. 4 Ngay aak ingan-a, work kanam minchathangan nintan waa'anar, a' than puth yotang kan ngaantam-ngeeyantan nintan wuut pi'an a' min paththam, ke' wiy yimanangan ya'a. 5 Piip-ang, keenkanaman-a, aak ke'an yippakan wun-a, ngay nungkarang nangman wun-wunangan, ngal puth-a, thonam anman, ngangk min anman. Nint ngayang minam ngaantam-ngeeyāna, ke' ngal keenkanaman wunala, yimanangan nganyang minam ngaantam-ngeeyān. 6 “Pam inangan nintan mi'an thanang ngathara, than yipam ngurp ngatharaman iiyayn. Than nungkar thampa, an puth nint mi'an thanang ngathar. Ngay puth aak ingan mee' thanttamang kanam wunangan, an puth thanan kan thathin, a' puth wik ngeeyin nint want-wanttakan. Than puth wik nungkaraman min-minakam ngeey-ngeeyantan. 7 Than puth kan-ngul ngaantam-ngeeyin ngayangan, yot ngayan yumpangan-a, thawangan thakan-a, an puth nintaman ma'-aath-aathan ngayang, puth thaa'-aath-aathan ngayang thamp. 8 Nint wik tham kuchan ngayang thant, ngay puth wikan kan waa'angan thant a' than ngangk minangam ngeey-ngeeyin, wik nungkaraman. Than kan-ngul thiichin ngayan puth nungkaram nanpalan wampang, puth nintam kuchan ngayang. 9 “Ngay pam il-ilantakaman mee'-wuthanamang. Ngay inman ke' mee'-wuthanamang pam wanch wiy al-alantana, ngay puth mee'-wuthanamang thant il-ilantakaman nintan mi'an thanang ngurp ngatharaman iiyayn. An puth pam inangan-a, nungkar thamp. 10 Ngal puth karp pi'-pi'anal thanang, than puth pam ngalantakam iiy-iiyantan. Than pam wanch wiy al-alangan thathayn thanang-a, ngurp ngatharam inangana, thanan ngul thaa'-kuumpayn ngayang. 11 Ngay puth inan kan-ngul puy iiyāng nungk, ngay aak inan kan-ngul wantāng. Puth thananiy-a, pam ngalantam inangan-a, an ep than aak ingman wunayn. Ayyang, Piip-ang, nintan-a, wuut pi'an a' min paththam, ke' wiy yimanangan ya'a, nint pam inangan thath-thathān thanang, ma' thayanangam pi'-pi'ān thanang, pam inangan nintan waa'an thanang ngurp ngatharaman iiyayn. Nint thath-thathān thanang, than yipam karpam ke' kuchek thonamang ngaantam-ngeeyayn nintangan, ke' ngal yimanang thonam anman. 12 Ngay ingman thanttang yippakan iiy-iiyangan-a, an ngay ma' thayanangam pi'-pi'angan thanang, nintan puth ma' ngatharang thanang wantan. Ngay thanang ma'mangkam minam pi'-pi'angan, ngay puth ke'am ma' wayathangan thananga, yotam minam anman pi'-pi'angan thanang. Nil pam thonamangan ep want ngayang. Nil uthamowan-a, ngangk nungantaman ma' nungkarang ke' wunow, ya'a. Kan-ngulan-a, wik thanan keenkanaman waa'in nunang-a, lat ngench thayanangan-a, kan-kanam ngul wampow nungant. 13 “Ngay inan kan-ngul puy iiyāng nungk, puth wik inangan kon ngurp ngatharamantang thaw-thawang aak ingana, than yipam ngangk minam paththam iiyayn, ngangk kuupamayn ngatharaman. 14 Ngay puth kanam wik nungkaraman waa'angan thant. An puth nanpalan than pam wiyangan ngangk-wayangam kal-kalin thanang ngurp ngatharam inangan. Than puth woyan pam wiyantaman ke'am wak-wakantan, ya'a, ke' ngay yimanangan woyan thanttaman ke'am wak-wakang, ya' anman. 15 Piip-ang, ngay nungk ke'am thawangan puy thechathān thanang pam wanch wiy way al-alantaman, ya'a, ngay inan nungk ep thawāng nint min-minam pi'-pi'ān thanang oony way pi'an alantaman, nil ke' yipam wayathow thanang. 16 Than puth woyan pam wanch wiyantam ke'am wak-wakantan, ya'a, ke' ngay yimanangan woyan thanttaman ke'am wak-wakang, ya' anman. 17 Nint puth pi'-pi'ān thanang nungkarakam, yipam woyan min nungkaram anman wak-wakayn, than puth wik nungkaraman kan ngeeyin, wik min anangan kan-kanam paththam. 18 Ngay kanam kuchang thanang work nungkaram yipam iiyayn thanttang, pam wanch wiy al-alantangan aak ingan wuntan, ke' nintan kuchan ngayang aak iikanakan. 19 Ngay inaniya ma' nungkarang wantang ngatharakamana, puth wiyantangan ya'a. In puth min thant ngurp ngatharam il-ilantana, than ngulan yipam ngangk punch-aakam thee'wayn nungkarana, nintangam anman monkan-wak-wakayn, wiyan ya'a. 20 “Piip-ang, ngay puth ngurp ngatharam il-ilantan thonakam ke' mee'-wuthanamāng, ya'a, puth thant wiy al-alantan thampang mee'-wuthanamāng, than wikan ngeeyayn thanttam, a' monkanan-wakayn ngayang ngulan. 21 Ngay inaniy thawang nungk piipa, thanan yipam karpam ke' kuchek thonamang ngaantam-ngeeyayn nintang. Thanan ngangk ngalantamangan mak wun-wunayn, ke' ngay ngangk nungkarangan wun-wunang, a' nintiy-a, ngangk ngatharamang wun-wunangan. Than mak thonamang ngul iiy-iiyayn, than pam wanch wiyangan yipam kan-ngul ngaantam-ngeeyayn nintan kuchan ngayang. 22 Nintan-a, pam min paththam waa'angan ngayang, a' ngay yimanangan pam wanch min paththam waa'angan thanang, nintangan yipam ngaantam-ngeeyayn ke' kuchek thonamang yimanangan, ke' ngal thonam anman. 23 Ngay puth ngangk thanttamangan kan wun-wunang, nintan puth yimanang ngangk ngatharang wun-wunangan, thanan puth yipam thonamang anman iiy-iiyayn, than yipam pam wanch wiyangan thiichayn ngul nintan kuchan ngayang, a' puth nintan kaangk wunangan thant ke' nint ngatharan kaangk wunangan. 24 “Piip-ang! Nint pam wanch inangan kanam mi'an thanang than ngayang yipam monkan-wakayn. Thanan mak ngatharang wunayn aak-aakanakan ngayan iiyāng, thanan yipam min-min thathayn ngayang angman nungkarang, nhengk nungkaraman, ke' nint yimanangan, wuut pi'an a' min paththam, puth nint ngathar kaangk wunangan aak nathpalmana, aak inan ke'aman yippak yumpala. 25 Piip-ang, nint min-minam paththama, minam anman iiy-iiyangan, way thonam ke' yumpanam. Than pam wanch al-alangan kaangk ke'an monkan-wakayn nintang-a, al-alangan ke'am thiichantan nintang, ya'a. Ngay ep piip nintang thiichangan, a' ngurp ngatharam il-ilangan kan thiichin nintang nint ngayangan kuchan aak iikanakan. 26 Than kan thathin ngayang aak ingan wun-wunangan, a' puth ngayan thaa'-aath-aathangan thanangan, puth than nintangan kan-ngul thiichin. A' ngay putham wik nungkaraman ngul thaa'-aath-aathāng thanang, nint yipam kaangk wunān thant, ngangkang ngoonchān thanttang, ke' nint ngatharan kaangk wunangan, a' ngay thampang yipam ngangkang ngoonchāng thanttangana.”

John 18

Than Jesus.an Mamin Nunang Ngul

1 Nil Jesus.an kanan mee'-wuthanam-a, nil-a, ngurp nungantaman kan iiyin, punth Kidron wakan wo'uwaynak. Aak wo'uwaynanganiy-a, yuk than-thanin, ke' orchard yimanangan. A' than Jesus wee'anang aak-aakanakan iiyin. 2 Than ka'athaman-a, ma'-yotam iiy-iiyin aak-aakanakaniy, nanpalan nil Judas.angan-a, aak anan mee'miy -- pam nilan wik yump pam way al-alantangan than yipam Jesus.an mulathayn nunang. 3 A' nil Judas.angan-a, pam yot anangan yalmath thanang, a' karpam kal thanang, orchard aakanakan. Than wiyaniy-a, soldiers; than wiyaniy-a, thapangumpan than puth aawuch ngench thayanan pi'-pi'in. Than pam inangan-a, pam pi'an priests al-alangan a' puth Pharisees al-alangan kuchin thanang. Than soldiers a' thapangumpan al-alangan kich nonham a' yuk muurkan a' nhengk-peempan thak kalin. 4 Nil Jesus.an kan mee'miy than ngeenan yumpayn nungant, nilan puth umang kal thanang, a' thaw ngul thant, “Niiy wee'ant wenk-wenkaniy a?” 5 Thanan thawin nungant, “Ngan nungant Jesus.ant wenk-wenkanan a!” Nil Jesus.an thaw thant, “Ngay ina!” Niliy-a, Judas.an-a, angman than-than thanttang, pam way al-alantangan, nil Jesus.an yipam ma'am thee'ow thant. 6 Nil Jesus.an wik yimanangan thaw-a, than mangkam kuunyin, a' aakang keekin. 7 A' nil Jesus.an-a, putham thaw thant, “Niiy wee'ant wenkaniy a?” A' than thawin, “Ngan nungant Jesus.ant wenk-wenkanan a!” 8 A' nil Jesus.an thaw thant, “Ngay puth ka'athaman kan waa'angan niiyant, ‘Ngay ina!’ Niiy ngathar wampan ey? Yaa, niiy ngurp ngatharam inangan-a, kuchān thanang, mak iiyayn!” 9 (Nil Jesus.an wik yimanangan thaw, yipam meenathow thant wik nil ka'athaman thaw piip nungantamant, an kan-kanam paththaman thaw, wik yimanangan, “Piip-ang, ngay minam kan pi'-pi'ang thanang, pam anangan nintan thawan than ngurp ngatharaman iiy-iiyayn. Ngay thanang ma'mangkam minam pi'-pi'angan thanang, ngay puth ke'am ma' wayathangan thananga, yotam minam anman pi'-pi'ang thananga.”) 10 A' nil Simon Peter.aniy-a, angman than-than, nhengk-peempan ongk kal-kal. Nil nhengk-peempanan-a, erkam wich, a' kon mal thalokang ump nunang, pam thonaman. Pam ananiy-a, namp nungant Malchus, nil workan iiy-iiy pam pi'an alantan, moom priestsantamak. 11 A' nil Jesus.an thaw Peter.ant, “Nint nhengk-peempanan koyam wunpān a! Nil God.ang puth ngayang kuch iikanakan, thanan mak kalayn ngayang. An way paththam ngathar, puth kana, than mak kalayn ngayanga.”

Than Jesus.an Kalin Nunang Pam Pi'an Alantan

12 A' nil Jesus.an wik inangan kanan thaw-a, thananiy-a, soldiers-a, a' pam thapangumpan al-alangan mamin nunang, a' ma' kathin nunang. 13 A' than pam pi'an alantan Annas.ant kalin nunang, Jesus.an. Nil Annas.an-a, kaal-aamp Caiaphas.antam. Nil puth Caiaphas.an-a, moom pi'an priestsantam. 14 Nil Caiaphas.an-a, ka'athaman anman thaw thant, councillors Jews.antam al-alantan, wik inaniya, “An min niiyant, than pam thonam mak mulathayn nunang niiy yotam yipam man-yetham iiy-iiyāna!”

Nil Peter.an Thaw Thant Nil Ke'an Mee'miy Nunang Jesus.an Ya'a

15-16 Anpalana Simon Peter.ang pul ngurp Jesus.antam thon alangan monkan-wakpul nunang Jesus.an aak-aakanakan aawuch pam pi'anantamak, pam moom priestsantam alantamakan. Nil Peter.an yoon than-than, thaa' gate thinth. Puth nil pam thonan-a, ep aakanak pek ngoonch, Jesus.antang, aak engkan um-menhang aakanakan, courtyardan waa'antan. Nil pam moom pi'anangan mee'miy nunang, nanpalan nil angan ngoonch. A' ngul-a, nil koyam ngul iiy, thaa' gate aakanakan, a' wanch komanant thaw, thaa' gate.an pi'-pi', “Nil Peter.an mak ngoonchowa.” A' nil Peter.an pek ngul ngoonch. 17 A' nil wanch komanan thaw ngul, Peter.ant, “Nint tham ngurp nungantam ya' ey? pam alantamaniy ey?” Nil Peter.an wik uuyam, a' thawant, “Ya'a!” 18 Aak angman-a, than pam wiy anangan than-thanin, thapangumpan a' pam workan iiy-iiyin. Than ka'athaman thum karkan kiingkin, puth aak kuchara. A' than pam ananganiy-a, thum thinth than-thanin, thumangan park-parkin. A' nil Peter.an iiy thant, nil thanttang angman than-than, thumangan park-park ngul.

Nil Pam Pi'an Alangana Mep-Mep Nunang Jesus.an

19 Anpalaniy-a, nil moom pi'an priest Annas.ana engk nungant, Jesus.antan, ngurp nungantam al-alantaman, a' puth wik anpalan engk nungant nilan thaa'-aath-aath thanang. 20 Nil Jesus.an thawant, “Ngay pam wanch yotaman kan thaa'-aath-aathang thanang mee' yotantangana, wiyiya, aawuch ngench thayanangan puth wiyiy-a, churches ngamparamang angan, aak angman ngamp Jews karpam yal-yalmathwump. Ngay wik mupam ke'am pi'-pi'ang, ya'a. 21 Nint ngeenak ngath engk-engkangan a? Nint thant engkāna, thanan wik ngayangan ngeeyin -- than ep thiichin wik ngayan thaa'-aath-aathang thanang.” 22 Nil Jesus.an wik inangan thaw-a, a' nil pam thapangumpan alangan wal-mant piik nunang, a' thawant, “Nint wik yimanangan ke' thawān a! pam moom pi'an nalantan a!” 23 Nil Jesus.an thawant, “Ngul wanttak iniy e? Wik ananiy ngul ngay way-wayak thawangan nungant ey? Nint waa'ān thant ngay wik way wanttakan thawangan. Puth ya'a, ngay wik min anman thawangan niiyant, puth nint ngayang ngeenam piikana?” 24 A' nil Annas.an thaw thant kalayn nunang, Caiaphas alantan, pam moom priests alantan. Than nunang Jesus.an yaam yippak ma' kathanang kalin nunang.

Nil Peter.an Putham Thaw Thant Nil Ke'an Mee'miy Nunang Jesus.an Ya'a

25 Than Caiaphas.antan kalin nunang Jesus.an-a, nil Peter.aniy-a, angman thum thinth than-than, a' park-park. A' than wiy anangan thawin nungant, “Nint ngurp nungantam ya' ey? pam alantamaniy ey?” Nil Peter.an wik uuyam thant, “Ya'a!” thaw. 26 A' pam thonam angman than, nilan work iiy-iiy pam moom priest alantan. Nil pam kampan Malchus.antam, Malchus pam anana, Peter.angan kon umpan. Nil thaw nungant, Peter.ant, “Ngay ke' nintangan thathangan ee! nungantang angan than-thanan, orchardang angan.” 27 Nil Peter.an-a, putham wik uuyam thant, “An ngay ya'am a!” thaw. Nil wik inangan thaw-a, minh roosteran pech-pech.

Than Jesus.an Umang Thanathin Pam Pi'an Pilate.antangan

28 Anpalaniy-a, mee'-ngutangaman-a, than Jesus.an kalin nunang aawuch Caiaphas.antam anpalan; amanaman-a, aak thonak ngul kalin nunang aak aawuch Pilate.antamakan. Pam inan Pilate aak Rome punchan, pam nil moom pi'an iiy-iiya, nil puth aak Jews.antam pi'-pi'. Than aawuch nungantamak Jesus.an kalin nunang. Than puth Jews anangan ke'am ngoonchin, aak anganiy, than yoon than-thanin, puth aak thinth ngul wamp may pi'an Passover.an mungkayn, an puth aak thant yimanangan wun; than nath ngoonchiythan aawuch pam wiyantamangan Jew ya'an-a, than may pi'an ke' mungkiythan. 29 Nanpalan nil Pilate.an yoon pent thant, a' thaw thant, “Niiyalang, pam nil alangan way ngeen yump niiyanta? Niiy ngeenam kalan nunang courtakana?” 30 Thanan puth thawin nungant, “Nil way ke'wey iiy-iiyiywey-a, nganan ke' kalin nunang nungkar.” 31 Nil Pilate.an thaw thant, “Niiyam kalān nunang court niiyantamakana! pam pi'an niiyantam thawayn nungant yipmam.” Than puth Jews anangan thawin nungant, “An ya'a, puth niiy Romans.an kan thawan pam pi'an nganttam al-alangan pam ke' kuchayn mulakan.” 32 (Ngul-ngulana, nil Pilate.angan ep kuch nunang Jesus.an mulakanweya, a' than yuk wuuyanangan waanchin nunang. Ka'athamana nil Jesus.angan nungantakam waa' nil want-wanttakan uthamow. Nil Pilate.an wik inangan thaw-a, an wik nungantamana kan-kanam ngul wamp.) 33 A' nil Pilate.an-a, koyam ngul ngoonch, aawuch nungantamang angan, a' thaw thant Jesus.an kalayn nunang. A' nil engkant, “Nint in king Jews al-alantaman ey?” 34 Nil Jesus.an thawant, “Wik inangan nintan engkanar-a, nint-nintaman ngaantam-ngeeyangan ngayang ey? nath ya'a, wiyangan waa'in ngayang nungkar ey?” 35 A' nil Pilate.an thawant, “Ngul ngay in Jew ey? Ngay Jew ya'a! An puth than pam wanch kampan nungkaramang a' pam pi'an priests al-alangan kalin nintang ngathar. Nint kan waa'ān ngathara, nint way ngeen yumpan a?” 36 Nil Jesus.an thaw, “Ngay ke' kings niiyantam yimanangan ya'a, ngay puth aak inpalman ke'am wampangan ya'a. Ngay nath aak inpalman wampingwey-a, an than ngurp ngatharam anangan-a, kul yumpiythan niiyant, ngatharam peeyanang, than moom Jews.antam al-alangan ke' yipam mamayn ngayang, than ke' yipam kuchayn ngayangan thant, Jews al-alantan. Puth ya'a, ngay aak inpalman ke'am wampangan, ya'a.” 37 A' nil Pilate.an engkant ngul, Jesus.antan, “Puth nint king kan-kanam ey?” Nil Jesus.an thawant, “Nint nan kan waa'angan ngayang, kingana. Ngay ukangan aak iikanakan ngay yipam wik kan-kanaman waa'āng niiyant. Puth wee'-wee'anangan kaangk wik anangan ngeeyayn-a, than al-alangaman wik ngeeyantan ngayang.” 38 Nil Pilate.an thawant, “Puth wik ngeen waa'angan wik kan-kanamaniy e?”

Than Kuchin Nunang Jesus.an Mul Yipam Wunow

Anpalaniy-a, nil Pilate.an koyam pent Jews al-alantan, thaw thant, “Ngay puth ep ngeeying nunang pam inaniy nil wayan ke'am iiy-iiy, ya'a. 39 Puth in ngeeyān a! Aak puth niiyantan yimanangan wun; kaap thon-thonangan-a, may pi'anan kiingkaniy Passover.an-a, ngay pam thon-thonam kuch-kuchang niiyant aak jail anpalan. Ngay pam inan-a, king niiyantaman kuchāngan ey?” 40 A' than pam anangan pechin nungant, “Ya'a! pam nanan ya'a! Nint pam Barabbas.an kuchān nunang a!” Pam nilan Barabbas.an puth kulliy, a' ma'-kuchan.

John 19

1 Anpalaniy-a, nil Pilate.an thaw thant kalayn nunang Jesus.an, piikayn nunang, whip alangan. A' than piik-piikin nunang. 2 A' than soldiers al-alangan yaan yumpin nunang ke' king yimanangan, than yipam thaa'-thengk-thengkathayn nunang. Than yuk waakamam yumpin nungant ke' crown yimanangan, a' kuchekang wunpin nungantang. A' than ngook ongk purple-one ngoonchathin nunang, 3 a' than thon-thonam wampin nungant, man-aath-aathin nunang, a' thaw-thawin nungant, “Ayyang! Nint inan moom pi'an ey! Jews al-alantaman ey? Nint yaam man-yetham anman wun-wunān ey?” A' than wal-mant ma'ang piik-piikin nunang. 4 Anpalan-a, nil Pilate.aniy-a, putham yoon pent, a' thaw thant, pam wanch Jews al-alantan, “Niiyalang, in ngeeyāna! Ngay Jesus.an kan palam pentathangan niiyant, niiy yipam thathān ngayan ep ngeeying nunang pam inaniy wayan ke'am iiy-iiy.” A' than soldiers al-alangan Jesus.an yoon ngul pentathin nunanga. 5 Nil yuk waakaman crownan-a, a' ngook purple-one.an thamp kal-kal yippak. Nil Pilate.an thaw thant, “In thathān a! Pam nilan inwey a!” 6 Than Jesus.an thathin nunangan-a, than pam pi'an priests anangan-a, puth thapangumpan anangan pech-pechin, “Yuk nailang pungān nunang yuk wuuyanangana! Yuk nailang pungān nunang yuk wuuyanangana!” A' nil Pilate.an thaw thant, “Niiyam puy kalān nunang a! Puth niiyam yuk nailang pungān nunang yuk wuuyanangana! Puth ngayan ep ngeeying nunang pam inaniy wayan ke'am iiy-iiy.” 7 Than pam wanch yotam anangan puth koyam pechin nunganta, “Wik thayan nganttaman yimanangan wunana, nilan mak mul wuniya, nil puth ke' pam nhengk God.antam yimanangan waa'-waa'an nungamanga.” 8 Nil Pilate.ang wik inangan ngeey thanangan-a, nil ngangk akangam than, winynyang mo'. 9 Pul Jesus.anga a' Pilate.angan koyam ngoonchpul, aawuch pi'anangan, a' nil Pilate.an thaw Jesus.ant, “Nint wanttinpal wampana?” Nil puth Jesus.an-a, popam than. 10 Nil Pilate.an thaw nungant, “Ngul nint ngathar wik ke' thawinar ey? In ngeey a! In work ngatha, puth ngay pam pi'an a! Ngaywey thawing thant minam kuchayn nintangan-a, an than kuchiythan nintang. Ngaywey thawing thant waanchayn nintang yuk wuuyanangan-a, an than waanchiythan nintang, ngay puth pam pi'ana.” 11 Nil Jesus.an thawant, “Nint kanak ke' pam pi'an iiy-iiyangan ngathar, puth God.an thaw nint yaan ke' pam pi'anan mak iiyān. Nil God.an ke'wey yimanang thawiy-a, an work nungkara ya'a. Nanpalana, nintaniy-a, way iiyangan puth nil pam anan nil ngayangan ma'am thee' nungkar, nilan way-wayam paththam iiy-iiyan.” 12 Nil Pilate.angan wik inangan ngeey-a, nil kaangk kan-kanam Jesus.an kuchowan, minam ngula. Puth than Jews anangan othamayan pech-pechin, “Nintwey minaman kuchān nunangan-a, an puth nint ngurp moom pi'an Caesar.antaman ya'a! Nil wee'angan waa'ow nungantakam nil moom pi'an kingan-a, an nil moom pi'an Caesar.an thaampan nunanga!” 13 Nil Pilate.angan wik inangan ngeey-a, nil puth Jesus.an yoon pentath nunang, a' yuk seat pam pi'an alantamangan nyiin aak namp “Kunttow Pamp” wik ngamparamangan waa'anamp. Puth than wik Hebrew.angan “Gabbatha” waa'antan. 14 Aak ananiy-a, Friday, kinch keny wun, ngaa' thonan puth may pi'an ngulan mungkayn Passover.an. A' nil Pilate.an thaw ngul thant pam wanchantan, “In thathiy a! Nil king niiyantamwey a!” 15 Thanan puth othamayan pech-pechin, “Mulathān nunanga! Mulathān nunanga! Yuk nailang pungān nunanga! yuk wuuyanangana!” A' nil Pilate.an engk thant, “Ngul niiy kaangk ey? Ngay king niiyantaman kuchāng nunang than yipam nailang pungayn nunang yuk wuuyanangan ey?” Than pam pi'an priests anangan thawin, “King nganttam thonam thonakama, Caesar.ana!” 16 A' nil Pilate.an thaw thant, pam pi'an priests al-alantan, “Yaa, niiyam puth kalān nunang yuk wuuyanakana, nailangan niiyam pungān nunang.”

Than Yuk Wuuyanangan Jesus.an Pungin Nunang

Amanaman-a, than puth kalin nunang Jesus.an, ma' thanttang ngul iiy. 17 Than yoon pentathin nunang, a' yuk wuuyan nungantan nilam Jesus.ang wich-wich, aak namp Golgotha aakanakana, puth kech ke'anam. Than wik Hebrew.angan Golgatha.an waa'antan; ngamp wik ngamparamangan-a, “Kuchek Kaanch” waa'anamp. 18 Aak angan-a, than nailang pungin nunang, Jesus.an, yuk wuuyanangan. Pam kucham thampangan-a, than angman nailang pungin pulang, yuk wuuyanangan waanchin pulang malang a' thakang. Nil Jesus.aniy-a, menhang pulantang waanchin nunang. 19 A' nil Pilate.angan-a, notice ump, a' thaw thant notice.an yuk wuuyanangan wunpayn. Nil wik inangan ump, “In Jesus, aak Nazareth punchana king Jews.antam.” 20 Nil wik ko'alamang ump, Hebrew.ang-a, Latin.ang-a, a' puth Greek.ang. Aak thanan nailangan pungin nunang yuk wuuyanangan-a, aakan kech ke'anam wun town anpalana, nanpalan than pam wanch Jews yotam al-alangan wikan readimpungin. 21 A' than pam pi'an priests Jews.antam anangan thawin nungant, Pilate.ant, “Nint wik yimanangan ke' umpān king Jews.antaman ya'a! Nint wik inan umpāna, ‘Pam ilangan ke' king Jews.antam waa'-waa'an nungantakama.’ ” 22 A' nil Pilate.an thaw thant, “Wik ngayan umpangan-a, an mak wunow, anman.” 23 Than soldiersang kanan nailang pungin nunang Jesus.an yuk wuuyanangan-a, than ngook nungantam thakan maayin, a' thon-thonam aath-aathwin thanttakam, than soldiers four al-alangan. A' than kulich maayin nungantam -- kulich inan-a, ke' umpanam, yimanangman yumpin. 24 Than soldiers anangan thawin thanttakam, “Ngamp ke' ikathāmp a! puth ngamp dice kee'āmp a! kulich nungantam yipam wee'ang nathan uwow.” Thana pam soldiers anangan dice ngul kee'-kee'in kulich Jesus.antamak, a' wik inan puth kan-kanam ngul wamp than keenkan lat ngench thayanangan umpin, “Than ngook ngatharam thakan thon-thonam aath-aathwin thanttakam, a' than gamble kee'-kee'in kulich ngatharamak yipmam wee'ang nathan uwowa.” 25 Than wanch anangan-a, Jesus.antang thinth than-thanin, yuk wuuyan thinth angana, than wanch inangan: kaath-kunch-a, kaath many-kunch-a, Mary wanch thum Clopas.antaman-a, a' puth Mary thonangan, aak Magdalene punchan. 26 Nil Jesus.angan thath pulang, kaath nungantaman a' pam ngurp nungantaman pul angman than-thanpul. Pam anman nil Jesus.an kaangkan wunant. A' nil kaath-kunchant thaw, “Ayyang! pam nanman-a, nungkarang thinthan than-thanan-a, nil ke' puk otham nungkar ngul iiyow.” 27 A' nil Jesus.an pam alantan ngul thaw, “Ayyang, wanch nanan-a, nint min-minakam pi'-pi'ān nunang ke' kaath nungkaram anman pi'-pi'ān nunangweya.” Anpalan-a, nil ngurp Jesus.antamangan kal nunang, Mary.an, aawuch nungantamak, ang-ngul pi'-pi' nunang.

Nil Jesus.an Utham Ngul

28 Anpalan-a, nil Jesus.an yuk wuuyanang wun-wun-a, a' nil ngaantam-ngeey nungantakam, “Yaa, work ngayan iiy-iiyang aak ingan-a, piip ngatharamangan waa'ar-a, an ya'-ngul, ngay kanam minchathang.” A' nil thaw thant, “Niiyalang! ngay ngakam uthamang a!” Nil wik inangan kanan thaw-a, an puth wik God.antaman kan-kanam ngul wamp than keenkan lat ngench thayanangan umpin. 29 Than jar many wine poch thampangan angman pi'-pi'in, a' than ragan punchathin may wine pochangan a' ragan-a, yuk ongkang wunpin, ke' yuk wunthang. A' than yuk ongkan keny maayin nungant, a' thaa'ang wunpin Jesus.antang, a' manyam mungk. 30 Anan nil mungkan-a, may wine pochan-a, a' thaw, “Ngay inman work ngatharaman kan minchathang, aak ingana.” A' nil kaakthuch a' utham ngul.

Nil Soldierangan Jesus.an Engk-Thaa' Kekangan Pung Nunang

31 Anpalaniy-a, than Jews anangan thawin nungant, Pilate.ant, ke' than yangk pip-pipiythan thanang pam yuk wuuyanang anangan, yipam than erkam mul wunayn, a' kan-ngul yipmam pam mul anangan ukathayn thanang yuk wuuyanaman, a' kaampayn thanang ngul, puth aak Saturday.an aak ngench thayan thantana ngaa' thonan wampowa. Aak thantan puth yimanangan wun: than puth kaangk ke' thathayn thanang pam mul anangan yuk wuuyanangan yaamaniy wunayn aak ngench thayanangana Saturday.angana. Puth may pi'an Passover.an kan-kanang wampan, ke'-paal Saturday inan wampow-a, an aak ngench thayan paththam thant. 32 A' than soldiers anangan iiyin thant, a' pam kucham anangan yangk pipin pulang, pam anangan Jesus.antangan waanchin yuk wuuyanangan, pul erkam yipam mul wunowpul. 33 A' than Jesus.ant ngulan wampin-a, thathin nunang nil kanam utham, than puth nanpalan yangk ke'am pipin nunang. 34 A' nil soldier thonamangan kek chawar maay, a' Jesus.an engk-thaa' pung nunang. Kek wich ngulan-a, chaaparan-a, ngak thampang pent nungantam. 35-37 Kan-ngulan-a, wik puth kan-kanam ngul wamp than keenkan lat ngench thayanangan umpin, “Than ke' kaanch pipiythan nunanga, puth ya'.” A' puth wik thonangan inan, “Than pam wanch al-alangan ngul thathayn nunang pam thanan pungin nunang kekangan.” (Pam nil alangan Jesus.an thath nunang mulan wun-a, nil wik kath inangan Jesus.antaman waa' ngul, niiy yipam ngangk punch-aakam thee'ān nungant. Nilan puth kan-kanam waa'an, puth nil mee'miyang wik inangan kan-kanam paththam waa'an.)

Than Jesus.an Awarangan Thenchin Nunang Ngul

38 Anpalaniy-a, pam namp Joseph aak Arimathea punchana Pilate.ant wamp nungant. Nil Joseph.angan-a, nathpalman monkan-wak-wak nunang Jesus.ana, nilan puth ke'am waa' thant, wiy al-alantan, puth nil winynyang mo'-mo' Jews al-alantaman. A' nil Pilate.ant thaw, “Ngay pam mulan ke' kaling nunang ey?” A' nil Pilate.an thawant, “Ee', kalān nunanga!” A' nil Joseph.an iiy, pam mulan kal nunang grave.akan. 39 A' pam nil Nicodemus.an wamp nungant, Joseph.ant, pam nil Nicodemus.an ka'athaman ngutangan wamp nungant, Jesus.antan. Nilan opar awal min wampath, yipam Jesus.an kemp nampowan. Opar pi'anam wampatha. Nil opar kucham anangan ka'athaman karpath pulang, myrrh-a, aloesan waa'antan. 40 A' pul pam mul Jesus.aniy kathpul nunang ngul, bandage pi'anang, opar thamp alangan, a' montanpekpul nunang. Puth aak thanttam Jews.antaman yimanangan wun, pam wanch mulan wunin. 41 Aak angan-a, Jesus.an yuk wuuyanangan waanchin nunang-a, yuk yot than-thanin, ke' garden yimanangan. Aak anganiy-a, kunttow awar nyiingkanaman wun, than pam mul keenk ke'aman thenchin. 42 Anpalaniy-a, pul Jesus.an aak angman thenchpul nunang aak kunttow awarangan puth aakan thinth wun, a' puth aak Saturday.an ngaa' thonan wampowa, aak ngench thayan Jews al-alantaman.

John 20

Than Kunttow Thaa'an Ya'-Ya'am Thathin

1 Aak Sunday ngulan wun-a, aakan kan-kanang pach-pacham-a, nil Mary Magdalene.an aak kunttow awar aakanak nguch, a' kunttow thaa'an ya'-ya'am thath, kunttow awaran thaa' pa'ant wun. 2 A' nil Mary.an kamp ngul mo', Simon Peter.ant, a' ngurp Jesus.antam thon alantan, pam nil Jesus.an kaangk wun nungant, a' nil waa' pulant, “Than moom ngamparam nath kalin nunang a! kunttow awar anpalan. Than wanttinak yaaka' kalin nunang a?” 3 A' pul Peter-a, ngurp thonangan Jesus.antaman kamp mo'-mo'pul kunttow awar aakanakan. 4 Pul karp kanan mo'-mo'pul-a, puth ngulan-a, Peter.an koy-koyyuw mo', nil-nungantan-a, umputh pent, ka'atham wamp kunttow awar aakanakan. 5 Nil thuch-a, iim, a' ngook nunangan kathin thath thanang angman wun-wunin, puth nil ke'am ngoonch. 6 A' nil Simon Peter.an ngul wamp, koy-koyyuw, a' nil pek wupam ngoonch, kunttow awar angan. A' nil thath-thath ngook anangan angman wun-wunin, 7 a' puth ngook kuchekan kathin nunang angman pokkapang montanpekan wun. 8 A' nil pam thonan-a, ka'athaman wamp kunttow awar aakanakan-a, nil ngul ngoonch. Nil ngook anangan thath-thath thanang, a' nil kan-ngul thiich Jesus.an kan-kanam mulaman ek. 9 Than puth ka'athaman wik Jesus.antaman min-min ke'am ngeeyin, wuthanang wun thant, wik lat ngench thayan anpalan, keenkanaman umpin, wik yimanangan: nil kan-kanam ngul ekow mulaman. 10 A' pul koyam iiypul aakak.

Nil Jesus.an Wamp Nungant Mary Magdalene Alantan

11 Pul kanan iiypul-a, nil Mary ngul wamp. Nil yoon than-than, kunttow awar thinth peey-peey. Nil thuch-a, peey-peey, pek thath-thath, kunttow awarang, 12 a' ngaantiyongk kucham God.antam thath pulang, ngook pachang nyiin-nyiinpul angman, aak mookang. Ngaantiyongk thonaniy-a, Jesus.an kuchek wun-a, aak angman nyiin; a' thonanganan-a, Jesus.an tha' wun-a, aak angman nyiin-nyiin. 13 Pul ngaantiyongk anangan thawpul nungant, Mary.ant, “Ayyang, nint ngeenam peey-peeyangan ee?” Nil Mary.an thaw, “Than moom ngatharaman maayin nunang a! Wanttin yaaka' kalin nunang a? ngay puth ngoongk-ngoongkam a!” 14 Nil wik inangan kanan thaw pulant-a, nil manyam weent, a' paman mee' kiirkang thathan nunang, kul-kulam than-than. Nil Mary.angan ke' pam thonangan yimanangan ngaantam-ngeey nunang, puth ya', nil Jesus anman kum-kuman. 15 A' nil Jesus.an thawant, “Ayyang, nint ngeenam peey-peeyangan ee? Nint wee'antak wenk-wenkangan ee?” Puth nil Mary.angan ngaantam-ngeey ke' pam gardenan pi'-pi'an, ke'-paal nilan thawant, Jesus.ant, “Ayyang, aak inpalan nint kalan nunang ey? Nintwey nath kalan nunang-a, nint waa'ānar aak wanttinakan kalan nunang, ngay yipam uwāng nunang.” 16 A' nil Jesus.an thawant, “Mary-ang!” A' nil weent um nungant Jesus.ant, a' wik Hebrew.ang thaw nungant, wik nungantamang, “Ayyang, Rabboni! In nintam ey!” Wik Rabboni.an-a, wik ngamparamangan-a, teacher waa'anamp. 17 A' nil Jesus.an thawant, “Ke' mamān ngayanga! puth ngay ke'am yippak kenya matangan piip ngatharamantan. Puth nint iiyān ngurp ngatharam al-alantan, than puth ke' kuunch ngatharam yimanangan, a' wik yimanangan thawān thant, ‘Ngay keny matāng God.ant, nilan puth piip ngatharama, puth piip niiyantam thampang, God ngatharama, a' puth God niiyantam thampang.’ ” 18 A' nil Mary Magdalene.an iiy ngul a' thaw thant, ngurp Jesus.antam al-alantan, “Ngay moom ngamparam kan uwangan nunang a!” A' wik nil Jesus.angan kuch thant-a, nil Mary.angan-a, waa'-waa' ngul thant.

Nil Ngurp Nungantamak Wamp Ngul

19 Sunday ngutang ngulan-a, ngurp Jesus.antam anangan thonamang yalmathwin, aawuch thaa' ngathanang nyiin-nyiinin. Than thaa'an-a, ngathin, yuk key.ang, than puth winynyang mo'in Jews al-alantaman. A' nungkway than aawuch thaa' ngathanangan nyiin-nyiinin-a, nil Jesus.an angman wamp thant, angman than, a' thaw thant, “Niiyalang! Niiy in ey?” 20 Wik inangan kanan thaw-a, nil ma' wench meenath thant, a' engk-thaa' wenchan meenath thant. Than Lord Jesus.an thathin nunangan-a, ngangk min paththam ngul wun thant. 21 A' nil Jesus.an thaw thant, “Ngangk min wunow niiyant a! Ke' piip ngatharamangan kuchany-a, ngay yimanang niiyangan kuchānga.” 22 Wik inangan kanan thaw-a, nil Jesus.an thaa' manyam ik, a' ngangkang thee' thant, Ngeen-Wiy Min God.antaman yipam ngangkang ngoonchow thanttang, a' nil thaw thant, “Ngeen-Wiy Min God.antaman ngangkang ngoonchow niiyantang a! 23 Anpalan-a, niiy nath thawin thant pam wanch al-alantan-a, ‘Kana, ngan ke'-ngul ngaantam-ngeeyān way niiyan iiy-iiyan, ya'a,’ an puth God.angan yimanang ke'-ngul ngaantam-ngeeyow way thanan iiy-iiyin. Puth niiy nath thawin thant-a, ‘Ya'a, nganang ke' kon-ngathow niiyan way iiy-iiyan,’ an puth God.angan yimanang ke' kon-ngathow thanan way iiy-iiyin.” A' nil Jesus.angan kan-ngul want thanang.

Nil Jesus.an Thomas.ant Ngul Thawa

24 Nil Jesus.an ka'athaman wamp thant ngurp nungantam al-alantan-a, nil Thomas.an ang ya'a. (Namp thon nungant-a, Puk Um Kucham, “Twinan” waa'antan.) 25 A' than ngurp wiy al-alangan waa'in nungant, Thomas.ant, “Ngan Lord kan thathan a!” A' nil Thomas.an thaw thant, “An ngay mee' ngatharamangan thathing ma' wench nailangan pungin nunang-a, a' ma' wunping wench thaa'anganwey-a, a' puth ma' engk-thaa'angan wunping nungantangwey-a, an ngay ep kan-kanam ngaantam-ngeeying nil mulaman kan ek. Nath ya'wey-a, ngay ke' ngaantam-ngeeying nil mulaman ek, ya'a.” 26 Week thonang ngulan-a, ngurp Jesus.antaman karpam nyiin-nyiinin aawuchangan. Nil Thomas.an-a, thanttang angman nyiin-nyiin. A' nungkway than aawuch thaa' ngathanangan nyiin-nyiinin-a, nil Jesus.an angman wamp thant, a' angman than, a' thaw thant, “Niiy in ey? Yaa, ngangk min wunow niiyanta.” 27 A' nil Jesus.an-a, Thomas.ant thaw ngul, “Ma' inangan thath a! A' ma' puk nungkaraman ma' wench thaa'ang ingan wunpān a! A' nint ma' pal ongkaratha, engk-thaa' ingan wunpān a! Nint ke'-ngul man-ngeeyān ngayang, ya'a! Nint kan-kanam ngul ngaantam-ngeeyān ngay mulaman ekangan a!” 28 A' nil Thomas.an thawant, “Nint in Lord ngatharama, God ngatharama!” 29 A' nil Jesus.an-a, Thomas.ant thaw, “Nint ngayang ngurp thathan, a' nanpalan nint ngaantam-ngeeyangan ngay mulaman ekangan. Nungkway than wiy al-alangan ngurp ke' thathayn ngayang-a, an than ngul ngaantam-ngeeyayn ngay mulaman ekangan. Than anangan-a, ngangk min paththam ngul wunayn.” 30 Nil Jesus.angan-a, work pi'an min-miniy anangan yump-yump yot anangan, mee' ngurp nungantam al-alantangan, puth wik kath wiy ke' umpanam lat ingan. 31 Wik kath inangan Jesus.antaman umpangan, niiy yipam kan-kanam ngaantam-ngeeyān nunang nilan puk nhengk God.antam, God.angan kuch nunang, a' puth-a, niiy yipam ngangk punch-aakam thee'ān nungant. Puth nil Jesus.an wamp aak iikanakan, yipam kaa'-piichanathow niiyang, niiy yipam ma' God.antang inpalman iiy-iiyān, a' puth ngul-ngulakam.

John 21

Nil Jesus.an Wamp Thant Ngurp Nungantam Seven Al-Alantan

1 Anpalaniy-a, nil Jesus.an putham wamp thant, ngurp nungantam al-alantan, meenath nungantakam thant, aak kookam angan, Lake Tiberias angan. 2 Nilan wamp thant-a, than wiy anangan karpam nyiin-nyiinin: Simon Peter-a, Thomas (namp thoniy nungant-a, Puk Um Kucham), a' Nathanael (nil aak Cana.am anpalan wamp, Cana.ana aak Galilee angman); a' nhengk Zebedee.antam anangan a' putha pul ngurp Jesus.antam kucham anangan thamp. Than pam seven inangan angman karpam nyiin-nyiinin. 3 A' nil Simon Peter.an thaw thant, wiy al-alantan, “Ngay minh nga'ak iiyāng a!” Than puth thawin nungant, “Ee'a, ngamp yotam iiyāmp a!” A' than yotam anangan iiyin, a' than peyin chukkunangan. Than ngut ongkan minh nga' ke'anang, anman thee'-thee'in. Puth minh ke'am wipin netanganiy, ya' paththam. 4 Anpalaniya, aak kanan pacham-a, nil Jesus.an thompang angman than-than. Thanan thathin nunang-a, thanan puth ngoongk-ngoongkam nilam Jesus.an than-than angman. Than ngaantam-ngeeyin nunang ke' pam thonan wamp thant a! 5 A' nil Jesus.an pech thant, “Niiyaleey! Niiy minh ke'am wichan ey?” “Ya' ow! Ngan ngut ongk ya'angam thee'-thee'an, puth minh nga' ke'am wichan, ya'a!” thanan thawin nungant. 6 Nil Jesus.an thaw thant, “Net niiyantamana wonk thon angan thee'ān a! Ma' mal niiyantang a! An niiy minh ngul wichān a!” Than netaniy-a, thee'in. A' ngul-a, minh thaa'-wantanam netang angan wipin. Thanan ke' keny wichiythan-a, a' chukkunangan wunpiythan-a, puth ya'angama, minh nga' thaa'-wantanam puth wipin. 7 A' nil pam anan-a, ngurp nungantaman nil Jesus.an kaangk wunant-a, thaw nungant, Peter.antan, “Ayyang, in nilam Lord a!” Nil Simon Peter.angan wikan ngeey-a, nilan shirtan ngoonch (nil puth shirt ke'anang iiy-iiy, kemp yoon), a' chang pey, ngakang angan. 8 Than ngurp wiy Jesus.antaman-a, chukkunang mo'in thomp aakanakan. Than net wich-wichin koy-koyyuw angan, minh yot thaman wichin, than puth kech ke'anam, thomp amanaman. 9 Kanan wampin thompang angan-a, than thum thathin, anman pench-pench, minh nga' thamp, angman wunin thum munthang, a' may damper tham. 10 A' nil Jesus.an thaw thant, “Minh nga' wiy pal kalān niiy nyiingkan wichana.” 11 A' puth-a, nil Simon Peter.an chukkunak iiy, a' netan pal wich-wich thompak, minh nga' pi'-pi'anam anangan tham, yota, thaa'-wantanaman, one hundred and fifty three. Nungkway minh yot thaa'-wantanaman wipin netang angan-a, netaniy-a, ke'am ik, ya'a. 12 Nil Jesus.an thaw thant, “Niiy pal iiyāna! may mungkāna!” Than ngurp nungantam al-alangan kan thiichin nunang Lord.ana, nanpalan thanan ke'am engkin nungant nil wee'ana. 13 Nil Jesus.an-a, thumak iiy, minh a' may damper maay, a' kan-ngul yaark-yaarkath thant. 14 Inaniy-a, nil Jesus.an ma'-ko'alam ngulan wamp thant ngurp nungantam al-alantan, nil mulaman ek.

Nil Jesus.an Peter.ant Ngul Thaw

15 May kanan minchathin-a, nil Jesus.an thaw nungant Simon Peter.ant, “Ayyang, Simon-ang! Puk nhengk John.antam-ang! Nint kan-kanam kaangk wunangan ngathar ey? Nint kan-kanam ngayangan ngangkangam pi'-pi'angan ey? Ya' nath, minh nga' anman konang wamp-wampow nungkar ey?” Nil Peter.an thawant, “Ee', Lord. Nint kan mee'miy ngay kaangk wunang nungkarana.” A' nil Jesus.an thaw nungant, “Nint minam pi'-pi'ān thanang pam wanch anangan ngayangan monkan-wak-wakantan.” 16 Ngul nil Jesus.an puthaman thawant, Simon Peter alantan, “Ayyang, Simon-ang! Puk nhengk John.antam-ang! Nint kan-kanam kaangk wunangan ngathar ey?” Nil Peter.an thawant, “Ee' Lord, nint kan mee'miy ngay kaangk wunang nungkara.” Nil Jesus.an thaw nungant, “Nint minam pi'-pi'ān thanang pam wanch anangan ngayangan monkan-wak-wakantan.” 17 A' nil Jesus.an-a, puth-putham thaw nungant Peter.ant, “Ayyang, Simon-ang! Puk nhengk John.antam-ang! Nint kan-kanam kaangk wunangan ngathara ey?” Nil Peter.angan wik inangan ngeey-a, nil ngangk waya, ngangk wiy-wiyam wun, puth nil Jesus.an ma'-ko'alaman ngul thaw nungant, “Nint kan-kanam kaangk wunangan ngathar ey?” Nil Peter.an thawant, “Nint puth yotam kan thiichangan, nint kan-kanam mee'miy ngathar ngay kan-kanaman kaangk wunang nungkara.” A' nil Jesus.an thawant, “Nint minam pi'-pi'ān thanang pam wanch anangan ngayangan monkan-wak-wakantan. 18 Ngay nungk inan kan-kanam thawāng, nint kan ngeeyān a! Nint pam kompaman iiy-iiyan-a, nint ngook ngoonchan, a' beltang nintam kathan nungkarakam, a' nint kaangk aak wanttinakan iiyān-a, an nint iiyan nathan. Ngul-ngulan-a, nint wuut ngulan weenān-a, nint ma' ngul we'aramān a' than ma' ngul kathayn nintang, a' aak-aakanakan kalayn nintang, aakan nint ke'an kaangk iiyān a!” 19 (Nil Jesus.an wik inangan thaw yipam waa'ow nil Peter.an want-wanttakan mul wunow. A' thon inan yipam waa'ow; than ngulan mulathayn nunang, Peter.an, nil puth Jesus.an monkan-wak-wakan nunang. Ngul-ngulan-a, than kanan mulathayn nunang Peter.an-a, than pam wanchangana God.an thaa'-kuump-kuumpayn nunang puth nil Peter.angan mulakam monkan-wak-wak nunang, Jesus.an.) A' nil Jesus.an thaw nungant, Peter.ant, “Nint monkan-wak-wakān ngayang a!”

Nil Jesus.an Thaw Ngul Pam Thon Alantan Nilan Kaangk Wunant

20 Anpalan-a, than kan iiy-iiyin, a' nil Peter.an ke' weentiy-a, a' ngurp thonangan Jesus.antam anan thathan, koy-koyyuw iiy-iiy nungantang. Pam alantan-a, nil Jesus.an kaangk wun nungant. Ka'athangaman-a, than mayan mungkin-a, pul karp nyiinpul Jesus.ang. A' nilan thawant Jesus.ant, “Ayyang, Lord-ang, nintang wee'ang ma'am thee'ow pam way al-alantan a?” Wik yimanangan ka'athaman thawant pam anan. 21 Nil Peter.angan thath nunang, pam anan, a' thaw nungant, Jesus.ant, “Ayyang, pam nil inan want-wanttak mul wunow a?” 22 Nil Jesus.an thawant, Peter.ant, “Ngay kaangkwey-a, nil man-yethaman iiy-iiyow-a, aak-aakanakaman ngay palam ngulan wampāng-a, in wik nungkar ya'a, in wik ngath-ngathar a! Nintiya, ngayang anman monkan-wak-wakān a!” 23 Nil Jesus.an wik inangan kanan thaw-a, than ngurp nungantam anangan-a, thanttakaman thaw-thawin, “Nil pam anan ke' uthamow ey? Nil puth man-yetham anman iiy-iiyow ey?” Than wik inanganiya, thon-thonant waa'-waa'in, thant al-alantan monkanan-wak-wakin nunang, Jesus.an. Nil puth Jesus.an yimanangan ke'am thaw. Nilan wik yimanangan ep thaw, “Ngay kaangkwey-a, nil man-yethaman iiy-iiyow-a, aak-aakanakaman ngay palam ngulan wampāng-a, in wik nungkar ya'a, an wik ngath-ngathara!” 24 Pam alangaman-a, thanan waa'-waa'in nunang nil ke'an uthamow-a, nilan waa'-waa' thant Jesus.antaman, a' latang thamp ump-ump. Ngampaniy-a, mee'miy wik nilan waa', a' ump thampang latanganiy, an wik kan-kanama. 25 A' puth nil Jesus.angan work wiy anangan yot yump-yump, puth than latangan-a, ke'am anangan umpin. Puth thanwey umpiythan-a, wik kath ma'mangkam Jesus.antaman-a, an puth wanttak a? An puth lat yot-yotam, ke' wuniythan aak ingana, aak umyompanamangana, puth aak many a! Anman kan.