Yesus ntar ni manglartar fat

Markus 1:16 Noak a ne, Yesus nmpan na twemul Galilea nof laran das. Ne i nkeban mangsinatwar du, ne ye Simon radu wain Andreas ma sir rfuat inar a na twemul dalam. 17 Ne Yesus nfalak ber sir feti, 'Milarat yakw! La yak kuftutu kmi ma miftutu Ratu ni ngribatnir ber nuse nema tomwatar a ne rlarat dedesar Ratu'. 18 Ne sir rasusan nir fuat a ne ma rnau, nema ralarat Yesus. 19 Ne Yesus nmpan naloran, ne i nkeban tomwatar du, Yakobus mla Yoanes Sebedeus angkir. Sir ramtoran kumal dalam ma rafyafin nir fuat. 20 Ne ye Yesus a ntar sir ma ralarat i. Ne rti a rtate amnir numur tomwat mangoskayar na kumal dalam, ne betno ralarat Yesus.

Yesus na dase snyompe dalam

21 Nof a ne, Yesus numur ni manglartar rait a pnu Kafernaum. Ne ler Sabat ma nma ne, Yesus a nti dase snyompe dalam ma nafbwotin Ratu ni ngribatnir ber nuse. 22 Tomwatar ratriat ma rdengar i, fali Yesus natanuk nof i dalam, to far bain i agamar ma ratanuk nof buku dalam. 23 Ne noak a ne, tomwat sa ma isnduan yatak nsung i lo namin dase snyompe dalam ma nafwayak feti, 24 "Oo, Yesus ma mof Nasaret, ko ma mose safe ber kam? Ko mwa ma mubyate kam? Yak kufai fali ko mangondmel botuan mof Ratu!" 25 Ne Yesus ntampu isnduan yatak a ne ma nfalak feti, "Mnwau ma mbwie tomwate ye!" 26 Ne isnduan yatak a ne nawawan tomwate ne ma nafwayak, betno nbie i. 27 Ne tomwatar ramriang ma rafalak ber sir feti, "O, safe ye? I natanuk nof ni arwaluk ma nfarete isnduan yatkar ma rlarat i!" 28 Ne nof a ne ibar nof Yesus a ne mandilak ma nsorw monuk far nus Galilea.

Yesus nafngamone tomwatar yadin

29 Ne Yesus numur ni manglartar rbie dase snyompe ne ma raktem Yakobus mla Yoanes rti Simon mla Andreas nir das. 30 Mpe Yesus nait das dalam, i ndengar feti Simon yanan nafanas silai. 31 Ne Yesus nti Simon yanan sedin ma nomat liman ma npote i, ne nangamon desar, ne nlangun ma nalange i ber sir. 32 Mpe ndondam a ne, ne nuse ron mangafansar mla tomwatar ma isnduan yatkar a rsung sir far Yesus sedin. 33 Ne pnue dalam rafburat sir a na dase soun lur. 34 Ne Yesus nafngamone tomwatar ma nir maningkyar mla nalin kalin isnduan yatkar ma rbie sir. Ne i nfalir desar ber isndunir a ne ma ratanuk feti sir rafai i lo feti i ye botuan.

Yesus nfil ni manglartar buti resin dyu

3:13 Ne ler famudi, Yesus nsail i far buburir sa das. Betno, i ntar tomwatar ma dalam i nmpeang, nema i nfil tomwat buti resin dyu nof sir. Ne tomwatar a ne rma Yesus sedin. 14-l5 Betno i nfalak feti, "Yak kfwil kof a kmi ma myor yakw ma keta mti mifwibar Ratu ni ngribatin ngafelar ber nuse; mla kal kuase ber a kmi ma mitian isnduan yatkar ma rbie tomwatar." 16 I ye ma tomwate buti resin dyu a ne sir ngarnir feti, Simon, ma lerfamudi e, Yesus nafngare i na Petrus. 17 Betno, Yakobus mla Yoanes, Zebedeus angkir. Ne Yesus nafngare sir feti "Boanerges", isin feti "tarpake angkir", 18 Andreas, Filipus, Bartolomeus, Mateus, Tomas, Yakobus Alfeus anak, Tadeus, Simon ma rtar feti "mangyayat", mla Yudas Iskariot ma keta lerfamudi e nfule nbali ma nfendi Yesus.

Yesus nafline mnaur arwaluk

4:35 Na lere ne ni lerdae, Yesus a nfalak ber ni manglartar feti, "Mya ma mfyangat kumal ye nema tbese tusi far twemul Galilea bali sya." 36 Mpa Yesus ni manglartar rfangat kumal a ne ma rti a rtate tomwatar yadin a ne na twemul serin, betno Yesus mla ni manglartar rose ma rtusi. Ne kumal walyetar ramin ane nbal ma rose ma rtusi rlarat far bali sya nbal. 37 Ne to dodo a nbal, mnaur arwalu mengarat a nbabal ma nsompir a nti kumal dalam mpa, kumal ketla nfen ber weye. 38 Na kumal tabun Yesus narwa ma ulun i namin karang ulu das. Ne manglartar rpangun i ma rfalak feti, "Amang Tuangguru, safe ma to mfwaduli keta kit tatloram?" 39 Ne Yesus npote i ma ntopu mnaur a ne, ne nfalak ber a twemul feti, "Mnwau! Mumlin motak!" Ne mnaur a ne ntolar i ma twemul a ne nose ma namlin desar. 40 Ne Yesus a nfalak ber ni manglartar a ne feti, "Fali safe mir kateman mimtaut? Fali mir kateman to milele yakw fuk?" 41 Ne nir kateman rmetriat ne rafalak ber sir feti, "Tomwate ye ise botuan? Ma mnaur mla nerar ye rlarat i a nbal."

Yesus nfane tomwatar yadin

6:30 Ne apostolar rbali sir far Yesus e sedin ma rafbwotin ma sir rose safe mla raftutu Ratu ni ngribatnir ber nuse. 31 Ne tomwatar yadin ti e ma e sir ma rwayat Yesus nor ni manglartar to rtame fuk mpa, Yesus nfalak ber ni manglartar feti, "Mya ma ti ain maline yo nema tsanari kit fen rufuk." 32 Ne sir koko sir rfangat kumal ma rtate ain i ne ma rti ain malinar sa. 33 Ne tomwatar yadin rsalan sir ma rti a rtate ain i ne mpa, nuse ma rof a pnuar yadin rma ma rbalun sir far a no. 34 La ma Yesus ntompur nof kumal a ne, ne nsalan tomwatar yadin ye, i nlompang resin sir, fali sir farlan dombar ma to rose ndunir. Ne Yesus a naftutu Ratu ni ngribatnir ber sir. 35-36 Titerik lerdae, Yesus ni manglartar rfalak ber i feti, "Ain ye maline desar mla ketla ndondam lo mpa, ni ngafele ye, muluan nuse ma rti rselir tnyame na pnuar serin bal dyu a no!" 37 Ne Yesus a nbali feti, "Kmi myal motak tnyamar a ne ber sir!" Ne sir rendat feti, "Keta kam mal doit ngayadin mof mpe ma la mselir tnyamar ber sir?" 38 Ne Yesus nendat feti, "Kmi mir rotyar fir? No mti mindiak!" Ne rof a ne rti rsalan ma rfalak feti, "Lan rotyar lim numur inar du!" 39 Ne Yesus naluru tomwatar a ne ma rafkobal mpane sir ma ramtoran bubutwar a ne. 40 Ne rafkobal sir ma ramtoran ma rlole sir, koplir ketnir ma rarat, ketnir ma butlilim. 41 Ne Yesus nal rotyar nenas inar a ne ma nmetngyade far langit ma nsompe ber e Ratu. Betno napuse rotyar a ne ma nandende ber ni manglartar ma rasaman ber tomwatar monuk. 42 Ne tomwatar monuk rtame ma rabotan. 43 Ne sir rafburat tnyam linyar a ne na botyar buti resin du ma rfen. 44 Nemla merwanar ma rtame fafa ribun limar sa ntafal batar mla kangir. 45 Ne Yesus naluan ni manglartar ma rfangat kumal ma rbalun rof i ma rti twemul balin sya na pnue Betsaida, nema i naluan nuse ma rbali sir far nir a pnuar. 46 La ma Yesus ntate tomwatar a ne, i nsail i far buburir sa das ma nsompe ber e Ratu.

Yesus nmpan nof weye das

47 Ne nait nal ndondam lo, Yesus ni manglartar na nir kumal dalam a ne lolone ramin na twemul twalelean, nemla Yesus koko i namin da retan. 48 Ne i nsalan ni manglartar ma nawar-nowir sir ma rbese kumal a ne fali mnaur arwaluk nangal sir. Ne sesedin ngalawar, i nti setnir ne i nmpan nof weye das. Ne i nmpan naloran farlan feti ma nlande sir. 49-50 La ma sir rkeban i ma nampan nof weye das, sir rafliak i feti isnduan mpa, rafwayak fali rmetriat mla ramtaut desar. Nempa Yesus natanuk nor sir ma nfalak feti, "Mifline kmi! Yakw ye io mpa, kete mimtaut!" 51 Betno i nfangat far nir kumal dalam, ne ye mnaur ntole i ma namlin a mpa, Yesus ni manglartar a ne ratriat ma ramriang desar. 52 Ne sir to rserap Yesus ni kuase rof ngrifaniak nof rotyar a fuk.

Yesus nfane tomwatar yadin

8:1 Noak a ne ye, tomwatar yadin rafburat sir a nbal. Fali sir to nir a tnyam, Yesus ntar ni manglartar ma nfalak feti, 2 "Yak klwompang resin nuse ne, fali lerar tel ye dalam sir dedesar ma ror yakw mpa, to nir tnyam lo. 3 Keta kuluan ma rbali sir e, rfuf na dalamtene leti fali ramlingw nir lafar lo. Numur a nbal, ketnir rma rof nus dodo desar". 4 Ne Yesus ni manglartar rfalak feti, "Tamin lolo sasapat ain ye, keta tal tnyamar tof mpe ma dengan ber tomwatar yadin-yodin ye?" 5 Ne Yesus a nendat feti, "Kmi miktem tomwatar ye myond rotyar fir?" Ne nuse ne raendat sir ma rabutin rotyar a ne. Ne Yesus ni manglartar rbali feti, "Kam monuk-monuk mam rotyar itw". 6 Ne Yesus naluan tomwatar a ne ma ramtoran ompak, betno nai rotyar itw ne ma nloik ma nsompe ber e Ratu. Ne betno npus rotyar a ne ma nandende ber ni manglartar a ne nema rasaman a rlole tomwatar. Ne manglartar a ne rose rlarat. 7 Ne si nir in angkir lolone nbal. Ne Yesus a nal in angkir a ne ma nloik ma nsompe ber e Ratu, betno naluan ni manglartar nema rasaman inar a ne nbal. 8-9 Ne tomwatar a ne rtame titerik ma rabotan. Ne ma dine rtame merwanar a ne fafa ribun fat ntafal batar numur kangkir. Ne Yesus ni manglartar a ne rafburat tnyam linyar a ne na botyar itw titerik ma rfen. Ne betno Yesus naluan tomwatar a ne ma rbali sir far si nir a pnuar. 10 Ne Yesus numur ni manglartar rfangat kumal ma rtate ain a ne ma rbes ma rlande twemul a ne ma rti yamrene Dalmanuta.

Yesus nmorip a nbal

16:1 La ma Yesus nmat, bobole ne na ler Sabat a ne ni ndondam, ne Maria Magdalena mla Maria Yakobus enan, numur Salome rselir ngule angat ngafelar ma ryefar na Yesus tenan farlan Yahudyar nir adat. 2 Ma ni ler minggu, rsok bobolisin dalam, ne rti Yesus ni kubur ma felan bange. 3-4 Ne fali sir rafai feti bange kubur a ne ni bat fyofolat arwaluk resin mpa, mpe lolone dalamtene leti, raendat sir feti, "Ise ma keta nlili kalin bat fyofolat i ne?" Nempa, mpe rait a ne, sir rkeban feti bat fofolat a ne nbie ain lo. 5 Betno, sir rsung a nti bange kubur dalam a ne, rkeban tabwer sya ma nfonak maloli mafuti melawas namtoran bali sya fian, ne sir rmetriat desar. 6 Ne tabweri ne nfalak ber sir feti, "Kete mimtaut! Kmi mindiak Yesus ma nof Nasaret, ma rfen I a na sangwalu ma rfele I a na ye. Msyalan motak ain ye-I to namin lo! Ratu nafmworip I nof mamate! 7 Mpa farane, mti mfyalak ber Yesus ni manglartar numur Petrus feti, 'I nbalun far Galilea. La mkyeban I a na no, farlan ma nfalak ber a kmi'". 8 Betno sir rafla rbie bange kubur a ne. Sir raruruku, fali ramtaut ma nlie nlengan desar. Ne sir to rasaur sasaf ber ise-nde-ise, fali ramtaut rut.