Ache Bible - Gospel of John

Juã 1

1 Nondjewe ache ekõmbymi, ĩma Djawugi; go Djawu rõ Apã Wachu djãwẽwa, go Djawu rõ Apã Wachu emi. 2 Nondjewe go Djawu ĩwe, ko wyche Apã Wachudji ĩ. 3 Go Djawudji rõ Apã Wachu djapopawe bue wywy, Apã Wachu dja etakrã djapollãwe bue wywy. 4 Go Djawu rõ manollãndy, Go Djawu manollãndy mema ache wywype djã bypeaty nonga. 5 Go krey rõ chãwã bypeaty, chãwã rõ praru, bype rõ chidja. 6 Ĩ endawe etakrã kbe'e bykuapyre Juã, Go rõ Apã Wachu buewe. 7 Go rõ ekõawe ache wywype bypedjiwa djawuwã, ache wywy bype rupi wata gatuwã, 8 Juã rõ bypeaty nongallã, Go rõ ekõawe bypeatygidjiwa kiuwã. 9 Kreyche nonga rõ ache wywype bypeaty, ekõma kowe ywype. 10 Go Djawu ĩ endawe kowe ywype; Go Djawu rõ kowe ywy djapoare, ache wywy wechã djepe kua djuellã emi idjape. 11 Dja ekõandype ekõmbu, dja ekõandy pua wywy prawollã idjape. 12 Go ache wywy idjape prawogi kua gatugi emi, gogipe djapomami Apã Wachu rayrã. 13 Go wywy rõ opollãwe krumi nonga ache ray nonga, go wywy rõ opowe Apã Wachu rupi. 14 Go Djawu rõ ekõ kowe ywype kbeche nonga, ekõ endawe nandje bychepe, ore wechãma idja chidja gatu, go chidja gatu Apã Wachu mewe dja raype, go dja ray etakrãeche. Idja rõ Apã Wachu prawowegi, idjadji Apã Wachu ury gatuechema, idja rõ ka inallãechegi emi. 15 Juã kiu reko go kbe'edjiwa, puka chidjabu inama: Kowe rõ go kbe'e cho djawuwe. Go rõ chidjaeche cho rõ praru, cho ekõ nonje go nondjewe ekõandy. 16 Go idja praru gatu rekodjiwa nandjepe kuwẽ tãrãma reko. 17 Apã Wachu rõ Moisepe mewe dja djawu parawe nandje kuawã, Jesukritope membyre prawo gatu, ka inallã nandje kuawã. 18 Apã Wachupe ache wywy wechãllãndy; go dja Ray etakrãeche e djãwẽ ekõandy go rõ wechãndy, dja Ray rupi nandje wechãma Apã Wachupe. 19 Judio ymachidjagi Jerusalẽ pua buema mondo pa'i wywy, lewita wywy emi Juã endape pranduwã idjape awa rõ go. Kowe rõ Juãdjiwa djawu, 20 Juã kiu gatuma mondo: Cho rõ Kritollã! 21 Gobu pranduma emi idjape: —Awa rõ dje? Dje mirõrã profeta Elia? Gobu Juã inama mondo: —Amaĩ cho. Gobu prandu wyche reko idjape: —Goburã, dje mirorã go Profeta ore warõandygi? Gobu Juã inama emi: —Go nongallã. 22 Gobu djawu wyche reko idjape: —Goburã? Kiu gami orepe ore kiuwã ore buearegipe. Bue rõ dje ina djedjiwa? 23 Juã ina gogi wywype: —Cho rõ kadji pukatygi: “Cho ekõma ape buwy gatu djapowã cho Rekoatygi lluãwã” go Profeta Isaia inawe nonga. 24 Go buepyregi Juãdji djawuwã fariseodjiwatygi. 25 Gogi wywy pranduma idjape: —Goburã, bue buare rõ dje y tõ pypy dje Kritollãmbu, dje Eliallãmbu, go Profetallãmbu emi? 26 Gobu Juã inama go wywype: —Cho ype tõ pypyatygi; pendje bychepe ĩ etakrã kbe'e pendje kuallãndy. 27 Cho rẽ ekõmbywe, cho rõ praru. Cho kuere rupi ekõngi rõ chidja, cho rõ krymballã idja pychãmbire ichã djurawã. 28 Kowe wywy ekõawe Betaniape, ypurã Jordã duwe embe rekuaty, go Juã achepe y tõ pypyarepe. 29 Go duwe kreybu Juã wechãma Jesupe ekõma bu idja endape, gobu inama: —Kowegi rõ go Apã Wachu wachupurã matãmbawãngi ache wywy djãwã puare bue buchã! 30 Godjiwa rõ cho djawuwe: “Cho rẽ ekõmbywe, cho kuere rupi ekõngi rõ chidjawe, go cho opo nondje idja ĩwe.” 31 Cho kuallãwe emi idjape, gobu idjape cho ype tõ pypywe Irael pua wywy kuawã, awa rõ go. 32 Juã ina emi: —Cho wechãwe go Krei Gatu edjybu ywadji baruku nonga idja djata llabu. 33 Cho kuallãwe emi awa rõ go; kowebu, go chope buewegi cho y tõ pypywã ype, Chope inawe: “Dje wechãmbu edjybu Krei Gatu etakrã kbe'e djata llabu, go rõ y tõ pypywerã Krei Gatupe.” 34 Cho wechãre idjape, cho kiu gatu emi guei go Apã Wachu Ray. 35 Go duwe kreybu, Juã ĩ endawe mirõ dja kuere mudjãndygidji, 36 Jesu wata obu go rupi, Juã wechãma idjape, inama: “Maĩ gami, kowegi rõ Apã Wachu wachupurã!” 37 Gobu Juã kuere mudjãndygi wendubu oma Jesu kuere rupi. 38 Jesu dja pyche rekuaty maĩmbu, wechãma go kbe'e mirõpe, gobu inama idjape: —Buerã pendje ekõ? Gobu kbe'e mirõ inama idjape: —Rabi, go inambyty “Kiuatygi,” maty rõ dje tapy ĩrã? 39 Jesu inama mondo: —Edjo kuãty wechãwã. Go oma wechãwã maty rõ dja ekõandy, go kbe'e go kreybu e djãwẽ ĩma; krey wycho roma djo. 40 Andre rõ Simõ Pedro pawe tywypurã, idja rõ mirõ byche puare Juã djawu wenduare, Jesu kuere rupima djo. 41 Andre oma dja pawe Simõ kuarawã, idjape dorobu inama: “Mesiape ore doroma, inambytygi Krito, Apã Wachu Prawowegi!” 42 Gobu dja pawepe eruma Jesu endape. Jesu maĩmbu idjadji, inama idjape: “Dje rõ Simõ, Jona ray, kowebu dje bykuapyre cho miwerã Pedro, inambyty ita.” 43 Go duwe kreybu Jesu oma Galilea rekuaty, gope doroma Felipepe, inama idjape: “Cho kuere rupi ga mudjã.” 44 Felipe rõ Betsaida puaty, Andre, Pedro go chupa puaty emi. 45 Gobu Felipe oma eruwã Natanaelpe, gobu ina idjape: —Ore doroma go kbe'e Moise parawe inawe nonga, Profeta wywy parawe inawe nonga emi, go rõ Jesu, Jose ray, Nasare pua. 46 Natanael inama: —Nasare puagidjiwa ko wẽwerã kbeigatugi? Felipe ina idjape: Edjo kuãty wechãwã. 47 Jesu wechãmbu Natanaelpe ekõma dja endape, inama: —Ekõma kowepe Etakrã Iraelita kbeigatugi, idja rõ ka inallã praru gatu emi. 48 Gobu rõ Natanael pranduma Jesupe: —Mawepe rõ dje chope kua? Gobu Jesu inama: —Cho wechãwe Felipe djepe puka nondje, dje ĩware go igo apo wydji. 49 Gobu Natanael inama idjape: —Kiuatygi, dje rõ guei Apã Wachu ray; dje guei Isrel ymachidja wachugi. 50 Jesu inama idjape: —Cho ina buare djepe cho wechãwe dje ĩware go higo apo wydji, go buare ko chope kua? Dje chope kua gatudjiwa wechãwerã wyche bue gatu wywy. 51 Jesu inama mondo go wywype: “Gorãeche cho ina pendjepe, pendje wechãwerã ywadjiwa pekapyre, go Apã Wachu buewegi wywy djopibu edjybu emi go Ache Ray llabu.”

Juã 2

1 Brewipychã krey wẽmbu ĩma udjawã tapy tãrã Kana Galilea chupape. Gope ĩ emi Jesu ei'i. 2 Jesu dja kuere mudjãndygi wywy pukapyre emi udjawãpe. 3 Gobu krãpĩma chipopurã lla ty udja puarã, gobu Jesu ei'i inama idjape: —Krãpĩma chipopurã lla ty’y! 4 Jesu inama mondo dja ei'ipe: —Kudjã, buerã dje puka cherã chope? Wẽllã wyche cho bitawã. 5 Gobu dja ei'i inama emi go pua buetygipe: —Djapopa ga mondo Jesu inawegi. 6 Gope ĩ wachapa baydja y djaratygi Iraelita wywy rekoty bue kuchĩwã dja religiõ djapoaty nonga. Baydja wywype y embe endaty etakrã tapa tapa (100 litros). 7 Gobu Jesu inama buepytygipe: “Embepa gami y baydjape” Gobu embepama mondo. 8 Gobu Jesu inama buepytygi wywype: “Kowebu ichakrã nuẽ mondo ra gami chipopurã lla ty bakupyre meandygi buawã.” Buepytygi wywy go nonga djapoma. 9 Go chipopurã lla ty warõandygi buãma chipopurã lla ty djapopyregi, kuallãdjiwa matyware, dja buetygi rõ kua gatu matyware, go wywy rõ nuẽwe y baydja puare, go buare chipopurã lla ty warõandygi pukama imerãngipe. 10 Go inama idjape: “Duwegi rõ mimbyare chipopurã lla ty kbeigatu go bakupyre u nondje, go pukapapyregi tyku tãrãmbu rõ mimami chipopurã lla ty buchã, dje rõ djono kowebu kbeigatueche.” 11 Jesu djapomami kowe etakrã bue wechãllãndygi ache wywy kuawã Apã Wachu Jesu djãwẽ ĩ, Kana Galilea chupape. Gope wechãma Jesu chidja gatu, dja kuere mudjãndygi wywy kua gatuma idjape. 12 Gobu Jesu oma dja ei'idji, dja pawe wywydji, dja kuere mudjãndygi wywydji emi go tapy tãrã pukapyty Kapernaũpe; gope ikẽ krey tãrã prowi. 13 Rypybechema Pakua judio wywy djapo rekoty Jerusalẽmpe, Jesu oma go tapy tãrãpe. 14 Go prellambatype wechãma bue meandygi wywype, ãchĩpurã meandygi, wachupurã meandygi, buaruku meandygi emi. Duwe wywy rõ wapygi buta pepywã emi duwe achepe. 15 Jesu wechãmbu bue wywy, djapoma etakrã pachoatygi gope nuembama mondo prellambaty pua wywype. Bue meandygi wywype, wachupurã wywype, ãchĩpurã wywype djapipama mondo, emi buta pepyatygipe. Gobu wyra chepe wywy, dja buta wywy emi djapipama mondo ywype. 16 Gobu inama emi buaruku meandygipe: “Ra ga mondo kowe pua bue wywy! Djapoeme kowepe bue tãrã meandy nonga cho Apã tapype!” 17 Gobu dja kuere mudjãndygi wywy kuama go Apã Wachu djawu parapyre inawedjiwa: “Dje tapy cho tã buare cho prandjã roma mondo tata keipawe nonga.” 18 Gobu judio wywy ymachidjagi pranduma Jesupe: —Awa djepe inare kowe djapowã ore wechãwã? 19 Gobu Jesu inama go wywype: —Itypa ga mondo kowe prellambaty, brewipychã krey wẽmbu cho puã mimbyrã prellambaty pou. 20 Gobu judio wywy inama Jesupe: —Chengypychã wachapa (46) ruy tãrãmbu kowe prellambaty djapopamami; dje ko puã miwerã brewipychã kreybu? 21 Jesu rõ djawuwe prellambaty dja echedjiwa. 22 Go buare Jesu manowedjiwa wẽ roma bu, dja kuere mudjãndygi wywy kua gatuma kowe inambyre nonga Apã Wachu djawu parapyrepe, Jesu inawe nonga emi. 23 Jesu ĩmbu Jerusalẽmpe go Pakuadjiwa djapobu, tãrã ĩwe kua gatugi Jesupe bue wechãllãndy djapo buare. 24 Jesu rõ kua gatu ache wywy djãwã, ache rõ ka bewã ury. 25 Jesupe ache kiullãndy ache wywy djãwã kuawã, idja rõ ache wywy djãwã kua gatu buare.

Juã 3

1 Ĩwe etakrã Fariseo pukapyty Nikodemo, judio wywy ymachidja, 2 Nikodemo oma chãwã rupi Jesu endape, inama idjape: —Kiuatygi, ore kua gatu Apã Wachu rõ djepe bueare orepe djawu kiuwã, ĩllã dje nonga kowe dje djapowe wechãllãndy, Apã Wachu djedji ĩllãmbu dje djapollã rawe. 3 Gobu Jesu inama: —Cho ka inallã djepe, ache wywy krumi opo pou nonga opollãmbu, go wechãllãwerã go Apã Wachu Chidja Llambaty. 4 Nikodemo pranduma Jesupe: —Manonga kbe'e ymagi opo pouwerã? Ikẽwerã ko kbe'e ymagi dja ei'i krape opo pouwã? 5 Jesu inama mondo: —Cho ka inallã djepe, Kreidji ydji emi opo poullãngi, ollãwerã Apã Wachu Chidja Llambatype. 6 Go krumi dja ei'i kra puare opowe go rõ ache, go Kreidji opowegi go rõ ache Krei llapogi. 7 Chã opoeme cho ina buare djepe: “Ache wywy opo pou ga mondo.” 8 Go wytu rõ pedju dja pedju djue rekuaty. Dje wendubu wytu pambu, dje kuallã maty rõ ekõ, maty rõ o emi. Kreidji opo pougi go nonga emi. 9 Jesupe Nikodemo prandu wyche reko: —Manonga go wẽwerã? 10 Jesu inama mondo: —Dje rõ Irael kiuatygi, dje kuallã wyche ko kowe? 11 Cho ka inallã djepe, ore kua gatudjiwa ore djawu, ore wechã rẽ ore kiu pendjepe. Pendje wendu djepe pendje kua djuellã ore djawuwe. 12 Pendje kua djuellãmbu cho djawu kowe bue ywy llabuwa wywydji, manonga ko pendje kuawerã cho djawubu ywadjiwa bue wywydji? 13 Ĩllã wyche ywadji obu, go ywadjiwa etakrã edjywegi, go rõ Ache Ray ekõwegi kowe ywype. 14 Kadji Moise puã miwe nonga wyradji membo ita broncedjiwa, go nonga emi Ache Raype upipyrã wyradji. 15 Ache wywy idjape kua gatugi rõ manombechewerã ywadji. 16 Apã Wachu prawo gatudjiwa ache wywype, buema bu dja ray etakrãeche, dja ray kuere rupi ache wywy mudjãmbu, go kuere mudjãngipe pacho puy wachullãwerã, go ywadji manombechewerã emi. 17 Apã Wachu buema dja raype ywy llabu ache wywype pacho puy wachullãwã, ache wywype kuwẽmbawã rõ buepyre. 18 Apã Wachu raype mudjãngi, tata wachupe djapillãwerã; go mudjãllãngipe rõ, djapipyrã tata wachupe kua djuellãdjiwa Apã Wachu Ray etakrãdji. 19 Kowe nongagipe rõ Apã Wachu mi buchãwerã, go bypeatygi ekõma ywype, ache wywy rõ chãwã prawo, bype gatu prawollã, bue buchã djapo djuedjiwa. 20 Bue buchã wywy djapogi rõ wata djuellã bype rupi, go bype rekuaty o djuellã, bue buchã djapobu ache wywy wechãllãwã. 21 Bue djapo gatugi rõ wata bype gatu rupi, bue gatu djapobu Apã Wachu inandy nonga ache wywy wechãwã. 22 Djawu krãpĩmbu Jesu oma dja kuere mudjãndygi wywydji Judaepe. Gope ikẽ tãrã prowi, y tõ pypy reko ache wywype emi. 23 Enompe emi Juã Bautita y tõ pypyma, tapy tãrã Salin djãwẽ, gope y gatudjiwa; go ache wywy opama y tõ pypywã. 24 Kowe rõ ekõawe Juã Bautita pypybechemi tapy djãwãllãpe. 25 Gobu Juã Bautita kuere mudjãndygi wywy djaka reko judiodji go kuchĩwãdjiwa judio religion djapoty nonga. 26 Gobu oma inawã Juã Bautitape: —Kiuatygi, go dje djãwẽwa ĩwegi Jordã y rekuaty, go dje djawu gatuwe orepe, kowebu y tõ pypy reko, ache tãrãma dja kuere rupima djo. 27 Gobu Juã Bautita inama mondo: —Ache bue rekollã rawe Apã Wachu idjape mellãmbu. 28 Pendje rõ wenduare cho inambu: Cho rõ Kritollã, cho rõ etakrã buepyregi Rekoatygi lluãwã miwã. 29 Go prawoty rekogi, go rõ kbe'e dja brekorã; imerã djawubu dja bygatutygi ury gatuma idjape wendubu; Go nonga emi kowebu cho ury gatuma Jesupe wendubu. 30 Jesu rõ chidja gatu owerã, cho rõ praru owerã. 31 Go ywadji ekõawegi chidja reko ache wywydji, ache ywy llabuwa bue wywy ywy llabuwadjiwa kua reko, go ywadjiwa ekõawegi chidja reko ache wywydji. 32 Go djawu reko dja wechãredjiwa, go dja wenduwedjiwa emi; go nonga djepe ache ywy pua wendu djuellã idja djawu. 33 Idja djawu wendugi kua gatu Apã Wachu rõ ka inallã. 34 Apã Wachu buewegi djawu go Apã Wachu djawu, go Apã Wachu tãllãwedjiwa mema dja Raype Krei Gatu chidja. 35 Apã Wachu prawo gatu teypurãpe, idjape chidja mema chidjawã bue wywydji. 36 Go teypurã kuere mudjãngi manombechewerã ywadji; Apã Wachu prandjã buchãwerã dja teypurã kuere mudjã djuellãngipe, tata wachupe djapipyrã.

Juã 4

1 Fariseo wywy wenduma Jesu rupi ache tãrã roma djo idja kuere mudjãwã. Juã Bautita y tõ pypy kawẽ emi kuere mudjãndygi reko kawẽ. Jesu rõ y tõ pypy tãrã, kuere mudjãndygi reko tãrã emi. 2 Jesu rõ y tõ pypyllã ache wywype, dja kuere mudjãndygi wywy rõ y tõ pypyaty. 3 Jesu wendubu fariseo djawu, wẽma o Judea puare Galileapema djo. 4 Dja obu owerã Samariape go rupi wachawerã. 5 Gobu Jesu wẽma djo Samariape, etakrã tapy tãrãpe pukapyty Sikar. Gope Jakob mewe go y ikua dja ray Josepe. 6 Gope ĩ y ikua Jakob wykowe. Jesu wata tãrã buaredjiwa, wapy ĩ y ikua djãwẽ, krey ywabu. 7 Gobu gope wẽma etakrã kudjã Samaria pua y rawã. Gobu Jesu inama kudjãpe: —Chope me gami y cho tykuwã. 8 Jesu kuere mudjãndygi wywy oma tapy tãrãpe bue upyrã eruwã. 9 Gobu go kudjã Samaria pua inama Jesupe: —Bue rõ dje puka chope y, dje rõ judio cho rõ kudja Samaria puaty? (Judio wywy rõ Samaria puadji djawullãndy). 10 Gobu Jesu inama kudjãpe: —Dje kua gatubu go Apã Wachu mewegi, awa rõ y djepe pukagi, dje puka rawebu chope, cho me rawe djepe y gatu krãpĩllãngi. 11 Kudjã inama Jesupe: —Cho Rekoatygi, dje rekollã baydja buepe rõ y dje nuẽwerã, go y ikua puku, maty rõ dje nuẽwerã y gatu krãpĩllãngi? 12 Ore apã Jakob djypywaregi rõ wedjawe orepe kowe y ikua, y dja tykuty, idja ray wywy tykuty emi, we wywy tykuty emi. Jakob chidja rekowe. Dje ko chidja gatu reko? 13 Gobu Jesu inama mondo: —Ache wywy tykubu kowe y’y, koẽmbu tyku djuewerã emi. 14 Ache wywy tykubu y cho mewãngi, y djuellãwerã emi. Y cho mewãngi tykubu idja rõ y upu gatu nongawerã, manombechewerã y gatu krãpĩllã nonga. 15 Gobu kudjã inama Jesupe: —Cho Rekoatygi, chope me gami go y, cho y djuellãwã, kowepe cho ekõllãwã y rawã emi. 16 Jesu inama mondo kudjãpe: —Amaty kua dje ime pukawã, kowepe eru. 17 Kudjã inama mondo Jesupe: —Cho ime rekollã. Gobu Jesu inama kudjãpe: Dje ina gatu dje ime rekollã; 18 dje rekowe ipo ime tãrã, kowebu dje rekogi dje imellã, go nongaeche dje ina. 19 Kudjã wendubu djawu, inama Jesupe: —Cho Rekoatygi, cho kua dje rõ Profeta. 20 Oredjiwa djypyware samaritano wywy rõ kmarãwe kowe kuãmbukupe Apã Wachu chã ruwa. Pendje judio wywy rõ ina Jerusalẽmpe kmarãwã Apã Wachu chã ruwa. 21 Jesu inama idjape: —Kudjã, chodji kua ga reko, mawebu pendje kmarãllãwerã Apã Wachu chã ruwa kuãmbuku Gerisimpe emi Jerusalẽmpe. 22 Pendje Samaritano wywy kuallã awa chã ruwa pendje kmarãndy; ore judío wywy kua gatu awa chã ruwa rõ ore kmarãndy. Ache kuwẽwãngi ekõma judio rupi. 23 Wẽwerã go krey, kowebu krey wẽma, Apã Wachupe kmarã gatutygi kmarãwerã Apã Wachupe dja Krei Gatu rupi ka bewãllã rupi emi. Apã Wachu rõ prawo dja kuere mudjãndygi go nonga djapobu. 24 Apã Wachu rõ Krei'i, idjape kmarã gatubu kmarã ga reko idja Krei rupi ka bewãllã rupi emi. 25 Gobu kudjã inama Jesupe: —Cho kua gatu emi Mesia ekõwã, idjape rõ pukapyty Krito, Apã Wachu Prawowegi. Go dja ekõmbu orepe kiuwerã bue wywydji. 26 Jesu inama kudjãpe: —Cho rõ Krito, djepe djawugi. 27 Gopema bu ekõma dja kuere mudjãndygi wywy, chã opo roma kudjãdji Jesu djawu rekobu, gobu dja kuere mudjãndygi wywy prandullã idjape buedjiwa rõ djawu reko kudjãdji. 28 Gobu kudjã dja baydja wedja roma djo, oma chupape ache wywype kiuwã. 29 —Cho rupi ga ekõ kbe'e wechãwã ina gatugi bue wywy cho djapopawe. Go mirõrã Krito? 30 Gobu ache wywy chupa puare wẽmba roma bu Jesu endape. 31 Ache wywy ekõ nondje dja kuere mudjãndygi wywy puka reko Jesupe, inama: —Kiuatygi, bakupyre ichakrã u ga mondo. 32 Jesu inama mondo dja kuere mudjãndygi wywype: —Cho reko cho uwã go pendje kuallã. 33 Dja kuere mudjãndygi wywy edji djawu reko: —Awa mirõrã eruare bakupyre dja urã? 34 Jesu inama mondo go wywype: Cho utygi rõ kowe: cho buearegi inawe nonga djapowã emi dja llapo wywy cho djapowã. 35 Ache wywy rõ inandy: “Chengypychã djachy mano ĩ wyche bue ã'ã wywy noãwã.” Cho rõ ina pendjepe: Maĩ ga mondo emi bue ã'ã pechepyredji kypepama noãmbawã. 36 Bue pechepyre noãndygipe membyrã dja llaporã buta bue dja bitawedjiwa. Go nonga emi Apã Wachu chã ruwa ache wywype erubu idjape membyrã dja llaporã. Go djapiatygi go pechepyre noãndygi urywerã edji. 37 Kowe djawu rõ ka bewãllã: “Etakrã rõ djapiatygi, duwe rõ pechepyre noãndygi.” 38 Cho rõ buewe pendjepe bue ã'ã noãmbawã pendje pechellãwepe; duwe wywy pechewe rõ pendje noã duwe tyrõmbawedjiwa. 39 Samaria chupa pua ache tãrã kuama Jesudji go kudjã inawedjiwa: —Chope inambama cho bue djapopawedjiwa. 40 Gobu Samaritano wywy wẽmbu Jesu endape pukama idjape owã go chupape, gope Jesu ikẽma mirõ kreybu. 41 Ache tãrã buchã ĩwe go chupape kua gatuma Jesu djawu wendubu. 42 Gobu ache wywy inama kudjãpe: —Dje kiu buare orepe Jesudjiwa ore kuama. Kowebu ore kua gatuma idja rõ ache wywy kuwẽandygi. Ore idjape wechãma, idja djawu ore wenduma emi. 43 Mirõ krey wẽmbu, Jesu wẽ roma djo Samaria puare go oma Galileape. 44 Gobu Jesu inama kowe nonga: —Go profetape byllãmbyty dja ekõandype. 45 Wẽmbu Galilea chupape go pua ache ury gatupe Jesu eche djuwyma reko. Gogi wywy kua gatu Jesupe ĩware Pakuadjiwa Jerusalẽmpe, go wywy wechãre bue wywy Jesu djapopawedjiwa. 46 Gobu Jesu oma chupa pukapyty Kana Galilea puagipe, go ydji djapowe chipopurã lla ty’y. Gope ĩ etakrã ymachidjagi dja ray etakrã eche achy rekogi. 47 Go ymachidjagi kuabu Jesu Judea chupa puare wẽma bu Galileape, ymachidjagi oma dja endape pukawã Jesupe owã dja tapype dja ray eche achy buchã kuwẽwã. Go mano ruwype roma ĩ. 48 Gobu Jesu inama ymachidjagipe: —Pendje wechãllãmbu bue wẽchãllãndygi pendje kuallãmbechewerã Apã Wachupe. 49 Go ymachidjagi puka omatã Jesupe: —Cho Rekoatygi, cho tapype ekõ gami cho ray mano ruwypema ni. 50 Gobu Jesu inama: —Dje tapype kua, dje ray manollãwerã. Go kbe'e kua gatuma Jesu inawe, dja tapypema djo. 51 Ymachidjagi dja tapype wẽmbu dja buepytygi wywy wechãmbu inama idjape: “Dje ray eche achyllãma!” 52 Gobu pranduma dja buepytygi wywype: —Manonga kreywatabu cho ray eche gatuma? Dja buetygi wywy inama idjape: —Kuẽ ikẽ wachabu kreywata etakrãmbu kandjãwe dja eche aku. 53 Go krumi apã kua gatuma Jesu krey etakrã wata wachubu inawe idjape “Dje ray manollãwerã.” Go buare idja emi dja tapy pua wywy kua gatuma Jesudji. 54 Kowe rõ Jesu Galilea chupape djapoma mirõ bue wechãllãndygi ache wywy kuawã Apã Wachu Jesu djãwẽ ĩ.

Juã 5

Juã 6

1 Gobu Jesu oma ypa wachu Galilea rekuatywa bykuapyre emi Tiberia, duwe embepe roma djo. 2 Ache tãrã opa roma Jesu kuere rupi wechãwedjiwa wechãllãndy achygi wywype kuwẽmbabu. 3 Gobu Jesu djopima kuãmbuku llabu wapyma gope dja kuere mudjãndygi wywydji. 4 Krey rypyllãma judio wywy djapowã Pakuadjiwa. 5 Gobu Jesu maĩmbu wechãma ache tãrã ekõmba roma bu dja kuere rupi, pranduma Felipepe: —Maty rõ nandje kuarawerã bakupyre ache wywy uwã? 6 Jesu buãma Felipepe kua djue bue rõ Felipe inawerã, Jesu kua gatueche bue rõ dja djapowã. 7 Gobu Felipe inama Jesupe: —Mirõ tapa tapa (200) denario ore rekobu djepe, mellãwerã wichakrã wywy wikytã ache tãrã u rekowã. 8 Gobu Andre, Simõ Pedro pawegi, go Jesu kuere mudjãndy emi, inama Jesupe: 9 —Kowepe ĩ krumi reko dja baydjape ipo wikytã cebadadjiwa djapopyre, mirõ pira emi: go wikytã pira emi tãrãllã go ache tãrã uwã. 10 Gobu Jesu inama: —Ina ga mondo ache wywype wapypawã. Djõrã gatupe ga wapy. Go ache wywy wapypawe ipowachu (5 .000) ache. 11 Gobu Jesu pychy roma dja ipope wikytã ury gatu mewã Apã Wachupe. Gobu mema dja kuere mudjãndygi wywype mewã ache wywy wapypawegipe. Gobu djapoma emi go nonga piradji, mema ache wywype, gobu ache wywy kra gatuma. 12 Ache tãrã kra gatupabu Jesu inama dja kuere mudjãndygi wywype: —Nuamba gami ache wywy pytarywe djapillãwã. 13 Gobu noãmba roma embe romami etakrã mirõ reytype ache pytarywe go ipo wikytã cebadadjiware mirõ piradjiware emi. 14 Go ache tãrã wechãmbu Jesu djapowe wechãllãndygi ache wywy kuawã Apã Wachu Jesu djãwẽ ĩ, inama: —Kowegi rõ Profeta ka bewãllãngi ekõwãngi kowe ywype. 15 Jesu rõ kuama ache wywy ra djuema idjape ymachidja wachugirã, go buare Jesu dja etakrãpe kandjã roma djo kuãmbukupe. 16 Go chãwãmbu Jesu kuere mudjãndygi wywy y wachu rekuaty roma djo. 17 Go djopima djo etakrã wyrakarape y wachu embepe wẽwã chupa Kapernaũpe. Gobu chãwã wachuma, gope Jesu ekõllã wyche. 18 Gobu wytu pambu wachu roma bu y kombo wachu roma bu emi. 19 Dja kuere mudjãndygi wywy oma wachapa kilometro nonga rupi, gobu wẽchãma Jesupe rypydji wata roma bu go y llabu, go rypyllãmbu wyrakara djãwẽ go wywy krymballã roma ni. 20 Gobu Jesu inama gogi wywype: —Krymballãeme! Guei cho! 21 Gobu gogi wywy ury gatupe pukama ikẽwã wyrakarape. Bitallã roma ra dja wẽwãpe. 22 Go duwe kreybu ache y wachu embe ĩngi kua roma Jesu kuere mudjãndygi wywy go wyrakara etakrãechepe roma djo, Jesu ollã go wywydji. 23 Gobu duwe wyrakara wẽma tapy tãrã Tiberia puare, go wikytã upyre llambawepe Jesu krandobuãware Apã Wachupe wikytãdji. 24 Ache go pua kuabu Jesu dja kuere mudjãndygidji ĩllãma duwe wyrakarape, ache wywy djopima djo wyrakarape emi oma chupa Kapernaũpe kuarawã Jesupe. 25 Ache wywy wẽmbu duwe y wachu embepe, gope doroma Jesupe pranduma emi idjape: —Kiuatygi, mawe nonga kreybu dje ekõ endawe kowepe? 26 Gobu Jesu inama go pua wywype: —Cho ka inallã pendjepe, pendje rõ kuara chope pendje kra gatu buare bakupyre me buare emi. Pendje rõ kua djuellã bue wechãllãndy cho djapowedjiwa. 27 Tyrõ tãrãeme bakupyre krãpĩwãngidji. Tyrõ ga reko bakupyre krãpĩllãwerãdji go pendjepe mewerã manollãndydjiwa ywadji. Kowe bakupyre rõ Ache Ray mewerã pendjepe. Apã Wachu rõ cho Apã, go rõ mema chope dja chidja gatu pendje wechãwã. 28 Gobu ache wywy pranduma Jesupe: —Manonga ore djapowerã Apã Wachu inandy nonga? 29 Jesu inama mondo emi gogi wywype: —Kowe nonga djapo gami: Kua gatu rekowã cho rõ Apã Wachu buewegi kowe ywype. 30 Gobu prandu reko idjape: —Bue wechãllãndy dje djapo ore kuawã Apã Wachu dje djãwẽ ĩ? Djapo gami ore wechãwã. 31 Ore irondy djypyware my wechãwe go bue wechãllãmbyty wechãma ka irõllãpe. Apã Wachu Djawu parapyrepe inambyre nonga: Apã Wachu mewe wikytã wywy ywadjiware upyrã. 32 Gobu Jesu ina idja wywype: —Cho ka inallã pendjepe: Moise rõ mellã wikytã ywadjiware, cho Apã rõ meare ywadjiwa wikytãechegi. 33 Apã Wachu wikytã krãpĩllã ywadjiwaty rõ edjyma kowe ywype, go kowebu manollãndy mema ache wywype. 34 Gobu ache wywy inama idjape: —Ore Rekoatygi, gorãwẽ me gami orepe wikytã ywadjiwa. 35 Gobu Jesu inama go wywype: —Cho rõ wikytã krãpĩllãngi. Go chope kua gatugi rõ llellãmbechewerã; go cho kuere rupi mudjãngi y tyku djuebechewerã emi. 36 Go cho inama pendjepe, pendje chope wechãmbu djepe, chope kua gatullã. 37 Ache wywy cho Apã prawowegi chope mudjãwã, ekõwerã cho endape. Go cho endape ekõngi, tokape cho djapibechewerã. 38 Cho ekõma ywadjiware djapowã chope buearegi djawu, cho djapollãwerã cho inandy nonga. 39 Go cho Apã rõ chope bueare cho djapowerã kowe. Go chope membyregi cho djapillãwerã ache etakrã djepe cho endape ekõngi, idja manombu cho puã mondowerã krey krãpĩmbu. 40 Cho Apã byty nonga kowe, ache wywy kua gatugi Apã Wachu Raydji idja kuere rupi mudjãmbu emi, idja manombu cho puã mondowerã krey krãpĩmbu, manombechewerã ywadji. 41 Gobu judio wywy djawu buchãma Jesudji. Jesu ina buare: “Cho rõ wikytã nonga ywadjiware ekõma.” 42 Gogi wywy inama: Guei mirõrã ko Jesu, go Jose ray? Nandje rõ kua dja apãpe dja eipe emi! Buerã kowe nonga idja djawu cherã ywadjiware ekõwe? 43 Gobu Jesu inama go pua wywype: —Djawu buchãeme. 44 Ache ekõllã rawe cho endape cho Apã chope buearegi erullãmbu idjape: idja manombu cho puã mondowerã wyche krey krãpĩmbu. 45 Profeta djypywaregi wywy my inawe nonga: “Apã Wachu kiupawerã ache wywype.” Go buare cho Apã djawu wendugi kua gatubu emi dja djawu, gobu cho kuere rupi mudjãwerã. 46 Ĩllã duwe Apã Wachupe wechãre. Apã Wachu djãwẽware ekõwegi rõ wechãre idjape. 47 Cho ka inallã pendjepe, go chope kua gatubu manollãwerã ywadji. 48 Cho rõ wikytã nonga krãpĩllãngi pendjepe mema manollãwã. 49 Pendje irondy djypyware my u rekoawe bakupyre ka irõllãpe, go uwe nonga manomba roma. 50 Cho kiu gatu pendjepe go wikytã ywadjiware ekõwegi; go ache wywy wikytã ugi manollãwerã. 51 Cho rõ go wikytã krãpĩllãechegi edjywe ywadjiware; go ache wywy wikytã ugi manombechewerã. Kowe wikytã membyrangi rõ cho eche o'o. Cho mewerã cho eche ache wywy kuwẽmbawã. 52 Gobu judio wywy djaka roma reko edji wywy pranduma reko: “Manonga rõ go kbe'e dja eche mewerã nandje uwã.” 53 Jesu inama mondo go pua wywype: Cho ka inallã pendjepe, pendje ullãmbu kbe'e Ray eche o tykullãmbu emi idja pirã, pendje manombu ollãwerã ywadji. 54 Go cho eche o ugi go cho pirã tykugi emi ywadji manollãwerã; idja manombu cho puã mondowerã krey krãpĩmbu. 55 Bakupyre rõ cho eche o'o, tykupyty rõ cho pirã emi. 56 Go cho eche o ugi, cho pirã tykugi emi, Go rõ cho djãwẽwa, cho idja djãwẽwa emi. 57 Go cho Apã chope buearegi idja rõ ywadjiwa manollãndy, go rupi cho manollãma emi; go nonga emi cho eche o ugi manollãwerã emi cho rupi. 58 Cho rõ go wikytã ekõwegi ywadjiware. Kowe wikytã rõ pendje irondy my ullãwe duwe wikytã rõ upyre, gogi wywy manombama emi duwe wikytã uaregi. Kowe wikytã ugi manollãwerã. 59 Jesu kiuma reko kowe nonga sinagogape go Kapernaũpe. 60 Kowe kiupyre wendubu, Jesu kuere mudjãndygi wywy inama: —Kowe dje kiuwe rõ djawu puy wachu. Awa rõ go djapowerã? 61 Gobu Jesu kua gatuma ache wywy djawu rekobu edji, pranduma emi: —Pendje prandjãma ko cho kiu buare? 62 Bue rõ pendje djapo rawe pendje wechãmbu go kbe'e ekõwegipe obu emi ywadji dja endawepe? 63 Go Krei rupi rõ ache manollãndy: ache rõ mellã manollãwã. Cho kiuwegi rõ Krei Gatudjiwa idja rupi rõ ache manollãndy. 64 Pendje bychepe ĩ wyche cho djawu kua djuellãngi. Jesu ina go nonga bue kua gatu rupi awa rõ idjape kua djuellãngi, idjape mewãngi emi duwe ipope. 65 Jesu ina wyche: Go buare cho kiuwe pendjepe, ache ekõllã rawe cho endape cho Apã erullãmbu idjape. 66 Go rupiwe ache tãrã Jesu kuere mudjãwegi mudjãllãma Jesu kuere rupi. 67 Gobu Jesu pranduma emi etakrã mirõ (12) dja kuere mudjãndygi wywype: —Pendjeba mudjã djuellãma emi chope? 68 Gobu Simõ Pedro inama Jesupe: —Cho Rekoatygi, awape rõ ore mudjãwerã? Dje etakrãeche rõ me djawu gatu ore manollãwã. 69 Ore kua gatuma djepe, dje rõ Krito, Apã Wachu manollãndy Ray. 70 Jesu inama mondo: —Cho rõ prawoma pendje etakrã mirõpe, Go nongabu djepe pendje bychepe ĩ etakrã krei buchã rekogi. 71 Jesu inama kowe nonga go Judadji, idja rõ Simõ Ikariote ray. Juda rõ Jesupe mewãngi duwe ipope. idja etakrã emi go etakrã mirõ Jesu kuere mudjãndygidjiwa.

Juã 7

1 Go krey tãrã wachapabu, Jesu wata reko chupa galilea rupi. Judea chupape idja ĩ djuellã, gope judio go pua wywy kuara reko idjape djuka djuedjiwa. 2 Krey rypyllãma djapowã tabernaculodjiwa, judio wywy ury rekowã. 3 Gobu Jesu pawe tywypurã wywy inama idjape: —Kowepe ĩeme; Judea chupape ga kua. Go dje kuere mudjãndygi wywy go pua wechãwã dje bue wechãllãndy djapobu. 4 Dje bybu ache wywy djepe kuawã bue wẽchãllãndy djemieme. Djapo mondo ache wywy chã ruwa go bue wywy kuawã emi! 5 Dja pawe tywypurã wywy rõ ina go nonga kua djuellã rupi Jesu djapowe. 6 Gobu Jesu inama dja pawe wywype: —Cho krey wẽllã wyche, pendje buãrã rõ krey wywy kbeigatu. 7 Ache wywy ywy pua pendjedji prandjãllã, chodji rõ prandjãmbyty, cho ina buare gogi wywype bue buchã djapoatydjiwa. 8 Kowebu amaty kua judio wywydji urywã; cho ollãwerã, cho krey wẽllã wyche. 9 Kowe djawu inambabu go pua wywype. Jesu ĩ wyche chupa Galileape. 10 Dja pawe tywypurã opabu urywãpe, Jesu oma emi urywãpe kiullã duwegipe dja owã. 11 Gobu judio wywy kuara roma reko Jesupe, inama: “Maty rõ go kbe'e enda?” 12 Go ury wachupe ache wywy ĩmbagi djawu reko edji. achedjiware ina: “go kbe'e rõ praru gatu”, duwegi ina emi: “Go kbe'e rõ praru gatullã, ka inagi ache wywype.” 13 Go nongabu, ache wywy rõ djawu papĩ reko edji krymballãdjiwa judio wywy ymachidja wywydji. 14 Go ury wachu bychebu Jesu ikẽma djo prellãbatype, gope kiuma reko ache wywype. 15 Gobu judio wywy chã opo roma reko, inama edji: “Awa rõ kowe kbe'e bue tãrã wywydji kua gatugi, awa rõ kiuare idjape, idja rõ ollã para endatype?” 16 Jesu inama mondo go pua wywype: —Kowe cho kiuwegi rõ cho tõdjiwa kua nongallã. Apã Wachu chope buearegi inawe nonga, cho kiuma emi pendjepe. 17 Go Apã Wachu djawu djapo djuegi, kuawerã go cho kiuwe Apã Wachu inawe nonga, kuawerã emi choba djawu cho etakrã kuaty nonga. 18 Go ache idjadji ka chidja buãngi kuara reko ache wywy idjape inawã “Chidja go ache”, cho kuara reko Apã Wachu chope buearegidji kua gatuwã go rõ chidjaeche, go buare cho ka inallã. 19 Moise mewe pendjepe go Apã Wachu djawu parapyre, go nongabu pendje wywy djapollã inambyre. Buerã pendje chope djuka djue? 20 Gobu ache wywy inama idjape: —Krei buchã mirõrã dje chã garawe enda. Awa rõ djepe djuka djue? 21 Jesu inama go pua wywype: —Go bue wechãllãndy etakrã cho djapowedjiwa pendje chã opowe. 22 Moise rõ pendjepe inare embo pire mondowã, (go Moise nondjechemawe djapopyty go nonga Abraã, Isaak, Jakob, Jose ekõware). Go pendje embo pire mondo bue djapollãndy kreybu emi. 23 Go nongabu rõ, pendje djampãllãwã go Moise inawe nonga embo pire mondowãdjiwa, pendje djapobu go krumi kbepurãngipe bue djapollãndy kreybu. Buerã go nongabu pendje prandjã chodji cho kuwẽ buare kbe'e achygipe bue djapollãndy kreybu? 24 Ka djawueme picha wywydji pendje bue wywy wechãwe nonga. Djawu ga mondo pichadji tõ gatuechepe prawo gatuechepe emi. 25 Gobu gogi wywy Jerusalẽ pua pranduma reko edji: —Kowe mirõrã ko kbe'e kuarapyty djuka ruwypytygi? 26 Awe go kbe'e djawu reko ache wywype, ĩllã idjape pychy djuegi. Nandje ymachidjagi wywy ko ina idja djãwãpe kowe kbe'e rõ Krito? 27 Nandje kuama matyware rõ kowe kbe'e ekõwe; go krey Krito ekõmbu kuallãwerã. 28 Go Jesu wendubu djawu rekobu idjadji, Jesu kiu rekobu tapy prellambatype djawu chidjama mondo: —Pendje ina kua chope matyware rõ cho ekõwe. Cho etakrã rõ ekõllã rawe, cho Apã rõ bueare chope. Pendje rõ kuallã chope buearegi, idja rõ kbeigatu kabewallãngi emi. 29 Cho kua gatu idjape, cho rõ ĩ buare idja djãwẽ, idja rõ chope bueare emi. 30 Gobu ache wywy pychy djuema idjape rawã tapy djãwãllãpe, ĩllã wyche idjape pychywã, idja krey wẽllã wyche emi. 31 Gobuma ache tãrã kua gatuma bue djapowedjiwa wechãmbu, inama emi: —Go Krito ekõmbu djapollãwerã ko kowe kbe'e djapowe nonga? 32 Fariseo wywy wendu roma ache wywy kiu rekobu Jesudjiwa. Gobu go wywy pa'i ymachidja wywy emi buema mondo dja buetygipe Jesupe pychywã rawã tapy djãwãllãpe. 33 Gobu Jesu inama: —Cho ĩ tãrãllãwerã pendje djãwẽ, cho owerã wyche go chope buearegi endape. 34 Pendje rõ chope kuara rekowerã, pendje djubechewerã emi, djuei pendje owã, obechewerã cho endarãpe. 35 Gobu roma judio wywy pranduma reko edji: —Mawe rekuaty rõ idja owerã nandje dorollãwerã rekuaty mekã? Owerã mekã kiuwã judio wywy duwe chupa rekuatywa ekõandy rupi, kiuwã emi judiollãngi wywype? 36 Mawe nonga rõ idja kiuwe nandjepe: —Pendje rõ chope kuara rekowerã, pendje dorobechewerã emi. Pendje obechewerã cho endarãpe? 37 Go ury wachu tabernaculodjiwa krey krãpĩ nondjemi, go krey rõ kbeigatuwe. Go krey rupiwe Jesu puã roma ni djawu chidjama mondo go wywype: —Go y tyku djuegi ekõ gami cho endape, go chope kua gatugi y tyku ga mondo. 38 Go chope kua gatugi, Apã Wachu djawupe inawe nonga wẽwerã idjadji: “Dja djãwã rupi wẽwerã ypurã gatu krãpĩllãngi nonga.” 39 Go nonga rõ Jesu ina: Krei Gatu mewerã ache wywype idjape kua gatubu. Go Krei Gatu ĩllã wyche ache wywy djãwẽ, Jesu manollã wyche, puãllã wyche manowegi byche puare emi, ollã wyche emi ywadji. 40 Ache wywy byche pua wendubu Jesu djawu, inama: —Guei kowe kbe'e Profeta mirõrã Apã Wachu buewegi. 41 Gobu duwe wywy ina emi: —Kowe rõ Krito mirõrã. Go duwe wywy inama reko: —Go Krito rõ Galilea puatyllã. 42 Apã Wachu djawupe inawe nonga: “Go Krito ekõwerãngi Dawi my irondywerã emi, go chupa Belempe opowerã Dawi my opo endawepe.” 43 Go nongabu ache wywy edji djawu buchãma reko Jesudjiwa. 44 Gobu duwe wywy ra djuema Jesupe tapy djãwãllãpe, go pychywã djuei'i. 45 Go buetygi prellambaty warõandygi djewyma bu fariseo wywy endape pa'i ymachidjagi wywy endape emi. Gogi wywy pranduma reko buetygi wywype: —Buerã pendje erullã Jesupe? 46 Go warõandygi wywy inama: —Ĩllã kowe kbe'e nonga tõ gatugi, ĩllã idja djawu nonga! 47 Gobu roma fariseo wywy inama idjape: —Pendjepe ka bewãma ko emi? 48 Go nandje ymachidjagi wywy fariseo wywy emi kua gatuma ko Jesudji? 49 Go kowe ache wywy kuallãechema mondo go Moise parapyre inawe nonga, go buare Apã Wachu pacho puy wachuwerã go ache wywype. 50 Go Nikodemo fariseodjiwa, o endawe Jesu endape chãwãmbu, inama dja irondy wywype: 51 —Nandje parawe, Moise miwe nonga inama: “Mi buchãllãwerã kbe'e etakrãpe wendubechemi idja djawu; kua gatu rẽ mondo bue rõ idja djapowe.” 52 Gobu dja irondy wywy inama Nikodemope: —Dje ko emi Galilea puaty? Maĩ byry ga reko Apã Wachu djawudji. Dje kuawerã Profeta opollãwe Galileape. 53 Gobu etakrã wywy djewyma bu dja tapype.

Juã 8

1 Gobu Jesu Oliwo kuãmbuku rekuaty roma djo. 2 Go duwe krey kuẽpadjebu ekõma tapy prellambatype. Ache wywy noã wachu roma Jesu djãwẽ. Gobu Jesu wapy roma kiu rekowã go pua wywype. 3 Gobu Moise parawe kiuatygidjiwa, Fariseo wywy emi eruma Jesu endape etakrã kudjã dja imepe ka inaregi meno buare duwe kbe'edji. Mima djono ache wywy bychepe go kudjãpe. 4 Gobu inama Jesupe: —Kiuatygi, kowe kudjãpe ore wechãma menombu duwe kbe'edji. 5 Go Moise parawepe inawe, kowe nonga kudjã djapogi itape bro mondo. Bue rõ dje inarã kowe kudjãdji? 6 Gogi wywy rõ ka prandu buã reko Jesupe mi buchãwã idjape. Go nongabu Jesu chã wycho roma djo ywyty, paramami dja ipo akãpe ywydji. 7 Go ache wywy rõ prandu ruwiallã reko idjape. Gobu Jesu puã roma djo, inama go pua wywype: —Pendje bychepe djapollãngi bue buchã idja rẽ pychy mondo ita bro djonowã kudjãpe. 8 Jesu chã wycho roma djo emi paramami emi ywydji. 9 Gogi wywy wendubu Jesu djawu djã pychopyre mi roma djo, gobu wẽmba roma ra chuepurã wywy krãpĩdji betagi wywy emi. Gobu kudjã Jesudji etakrãeche roma ni. 10 Gobu Jesu puã roma wechãma go kudjãpe etakrãeche rõ ĩ dja djãwẽ. Jesu inama kudjãpe: —Kudjã, maty rõ djopa djepe mi buchãregi wywy? Ĩllã djepe mi buchãngi. 11 Gobu kudjã inama Jesupe. —Ĩllã roma ache chope mi buchãregi. Gobu Jesu inama idjape: —Cho emi mi buchãllãwerã djepe; kowebu o dje tapype, bue buchã djapoeme. 12 Gobu Jesu djawuma emi ache wywype, inama: —Cho rõ krey bype gatu nonga kowe ywy llabu, go cho kuere rupi mudjãngi krey bype gatupe ĩwerã, ĩmbechewerã chãwã wachupe. Go nongape ekõngi manombechewerã. 13 Gobu Fariseo wywy inama Jesupe: —Dje rõ ka djawu, djedjiwa dje djawuwe rõ kbeigatullã. 14 Jesu inama mondo gogi wywype: —Cho djawu rõ kbeigatu cho djawubu emi chodji. Cho rõ kua gatu matyware rõ cho ekõwe, maty cho owerã emi. Pendje rõ kuallã wyche matyware rõ cho, maty cho owerã emi. 15 Pendje rõ pichape mi buchãndy, ache wywy mi buchãndy nonga. Cho rõ mi buchãllãndy pichape. 16 Go cho mi buchãmbu, cho djampãllãwerã mi buchãwã ache wywype, cho etakrã mi buchãllã, cho Apã chope buearegi chodji emi mi buchãwerã. 17 Pendje parawe miwepe rõ ina mirõ bue wechãregi pichadji djawubu, ka djawullãma. 18 Cho djawu gatu chodji, cho Apã chope buearegi emi djawu gatu chodji. 19 Gobu pranduma Jesupe: —Maty rõ dje apã ĩ? Jesu inama go pua wywype: —Pendje rõ kuallã wyche chope, cho Apãpe emi pendje kuallã. Pendje kuabu chope kua rawe emi cho Apãpe. 20 Kowe nonga Jesu kiu reko prellambatype, Apã Wachu buarã buta noãmbyty djãwẽ ĩmbu. Ĩllã Jesupe pychywãngi rawã tapy djãwãllãpe dja krey wẽllã wyche. 21 Gobu Jesu inama emi ache wywype: —Cho owerã, pendje kuara rekowerã chope. Pendje wywy rõ manombawerã wyche bue buchã djapotydjiwa. Go cho owã rekuaty pendje obechewerã emi. 22 Gobu roma ymachidja judio wywy ina reko edji: —Idjadji djukawerã mekã, go buare idja ina nandje ollãwerã dja owã rekuaty? 23 Gobu Jesu inama go pua wywype: —Pendje rõ ywy llabuwaty, cho rõ ywadjiwaty. Pendje rõ ache ywy puatygi, cho rõ ywy puatyllã. 24 Go buare cho ina pendjepe, pendje chope kua djuellãmbu awa rõ cho, pendje manowerã pendje bue buchã djapoatype. 25 Gobu pranduma Jesupe: —Awa rõ dje? Gobu Jesu inama mondo go pua wywype: —Cho djawu pybu cho kiu rekowe pendjepe awa rõ cho. Kowebu cho ina wyche pendjepe. 26 Cho bue tãrã reko pendjedji djawuwã, pendjepe mi buchãwã emi, go chope buearegi rõ ka inallã, cho kiuma ache wywype idja djawu cho wenduwe nonga. 27 Go ache wywy go puagi kuallã wyche Jesu djawu reko Apã Wachudjiwa. 28 Go buare Jesu inama go pua wywype: —Pendje kuawerã awa rõ cho, ache raype upibu wyra wachapyredji. Pendje kuawerã emi cho etakrã kuaty nonga cho djapollã, cho Apã kiuwe nonga chope cho kiuma pendjepe. 29 Cho Apã chope buearegi rõ cho djãwẽwaty. Cho Apã cho etakrãpe wedjallã, gorãwẽ cho djapo gatuty bue wywy cho Apãpe ury gatuwã. 30 Jesu kowe nonga kiu rekobu ache tãrã kua gatuma idjape. 31 Gobu rõ Jesu ina mondo go judio wywy dja djawu wendu gatuarepe: —Pendje cho djawu djapo gatubu, go nongabu pendje cho kuere mudjãndygiwerã. 32 Gobu pendje kuawerã Apã Wachu rõ ka bewãllã. Go Apã Wachu ka bewãllãngi rõ pendjepe matãwerã buetygi pachopytydjiware. 33 Gobu gogi wywy djawuma emi Jesupe: —Ore rõ Apã Abraã my irondy, ore rõ ekõllambyty duwe apã buetygirã. Buerã dje ina cherã kowe nonga orepe matãwerã buetygi pachopytydjiware? 34 Gobu Jesu inama mondo go pua wywype: —Cho ka inallã pendjepe go bue buchã djapoatygi rõ bue buchã buetygi. 35 Go buetygi ikẽ tãrãllãndy dja rekoatygi tapype. Go teypurã rõ gorãwẽ ekõandy dja apã tapype. 36 Go nongabu teypurã rupi matãmbyregi pendje ekõllãwerãma buepytygi nonga. 37 Cho kua pendje rõ Abraã my irondy; go buare pendje chope djuka djue cho kiuwe wendu djuellãdjiwa. 38 Cho rõ djawuma emi cho Apã inawe nonga chope, go nonga emi pendje djawuma pendje apã inawe. 39 Gogi wywy rõ djawu pepyma mondo emi Jesupe: —Abraã rõ ore apã! Gobu Jesu inama mondo go pua wywype: —Pendje Abraã irondybu djapo rawe Abraã djapowe nonga. 40 Cho kiuma pendjepe ka bewãllãdjiwa, cho Apã kiuwe nonga chope, go nongabu djepe pendje chope djuka djue. Abraã rõ djapollãwe go nonga! 41 Pendje rõ djapoaty go pendje apã djapowe nonga. Gogi wywy inama mondo Jesupe: —Ore rõ perõllãmbyre. Etakrãeche rõ ore apã, go rõ Apã Wachu. 42 Gobu Jesu inama go pua wywype: —Apã Wachu pendje apãmbu, pendje djembillã rawe chope. Cho rõ ekõma Apã Wachu enda puare kowebu cho ĩma kowepe. Cho etakrã rõ ekõllã rawe, Apã Wachu rõ chope bueare. 43 Bue buare rõ pendje kuallã cho kiuwegi? Pendje rõ wendu djuellã buare cho djawuwe. 44 Pendje apã rõ Andjãwẽ, pendje buã reko djapowã idja prawo nonga. Andjãwẽ rõ achepe djukaty nondjechemawe. Andjãwẽ rõ ka inandy emi, idja djawuwe wywy rõ ka ina, idja rõ ka inama ache wywype ka inawã emi pichape. 45 Cho ina pendjepe ka inallãdjiwa, go buare rõ chope pendje kua gatu djuellã. 46 Awa rõ pendje wywydjiwa inambu chodji cho reko djã buchã? Cho inambu pendjepe ka inallã, buerã go nongabu pendje chope kua gatu djuellã cherã? 47 Go Apã Wachu kuere rupi mudjãndygi wendu gatu go Apã Wachu djawu: Pendje rõ Apã Wachu kuere rupi mudjãllãngi, go buare rõ pendje wendu djuellã Apã Wachu djawu. 48 Gobu judio wywy inama Jesupe: —Go buare ore ka inallã inama djedji: Dje rõ samaritano, krei buchã rekoty emi. 49 Jesu inama mondo go pua wywype: —Cho rõ rekollãndy krei buchã. Cho djawu gatu cho Apãdji, pendje rõ djawu buchã chodji. 50 Cho rõ kuarallã mi gatuwã chodji. Go Apã Wachu kuara reko chope mi gatuwã, idja rõ cho djãwẽwaty. 51 Cho ka inallã pendjepe: Go djapogi cho djawu, go nongagi rõ manombechewerã. 52 Gobu judio wywy inama Jesupe: —Kowebu ore kua gatuma dje krei buchã rekoty. Abraã, Profeta wywy emi manombawe, go nongabu buerã dje ina cherã: “Cho djawu djapogi rõ manombechewerã.” 53 Dje ko chidjaechewe ore apã my irondy Abraãdji? Abraã, Profeta wywy emi manombawegi. Awa rõ djedji buãrã dje? Dje ina dje chidjaechegi ko? Go nongallã! 54 Jesu inama go pua wywype: —Cho djawu gatubu chodji, go nonga djapobu kbeigatullã. Go cho Apã chope buearegi rõ djawu gatu chodji, go pendje ina idjadji nandje Apã Wachuete, 55 cho ina pendjepe pendje rõ kuallã idjape. Cho rõ kua gatu idjape; cho inambu cho kuallã idjape cho ka ina buchã rawe pendje ka ina buchã nonga. Cho rõ kua idjape cho djapo emi idja djawu. 56 Abraã my rõ pendje irondy, urywe go cho krey wẽmbu, go ury gatupema ni. 57 Gobu roma emi judio wywy inama Jesupe: —Dje opowe rekollã wyche enda ipo tapa (50) ruybu. Buerã dje ina dje wechãma ore apã my Abraãmpe. 58 Jesu inama go pua wywype: —Cho ka inallã pendjepe, cho rõ Abraã my nondjecheweware. 59 Gobu rõ upima ra ita kytã djapi rawe Jesupe, idja rõ etakrãpe kandjã djo prellambaty puare ache wywy byche rupi wachama djo.

Juã 9

1 Jesu wata obu chupa wywy rupi gope wechãma etakrã kbe'e wapy ĩ chãllãdji opowe. 2 Gobu dja kuere mudjãndygi wywy pranduma Jesupe: —Kiuatygi, buerã go nonga kbe'e chãllã opo cherã? Dja apã bue buchã djapotydjiwa ko, go dja bue buchã djapotydjiwa ko? 3 Jesu inama go wywype: —Go nongallã dja apã bue buchã djapotydjiwa, go nongallã emi dja bue buchã djapotydjiwa. Kowe kbe'e opowe go nonga Apã Wachu bue wechãllãndy pendje wechãwã. 4 Go krey rãwe cho djapo rekorã go chope bueare djawudjiwa: chãwã wẽwerã wyche, gope duwe wywy rõ tyrõ rekollãwerã. 5 Cho ĩmbu kowe ywy llabu cho rõ krey bypeatygi ache wywype kowe ywype ĩngi. 6 Jesu inambabu dja embery kawoma ywype, dja emberydji djapoma mo’õ, gobu mima mo’õ djapopyre chãllãngi chãdji. 7 Gobu inama idjape: —Amaty kua chã kuchĩ go y kroupyre Siloepe (go rõ inambyty: “Buepyre”). Go chãllãngi oma chã kuchĩma emi, dja ekõmbu chã roma djo. 8 Gobu roma emi dja tapy djãwẽwa wywy, go nondjewaty chãllã wechãmbyty edji ina reko: —Kowe mirõrã go kbe'e wapywegi go puka omatãndygi bue wywy picha reko tãrãngipe? 9 Achedjiware inama: —Guei mirõrã go. Duwegi inama emi: —Duwe mekã, go kbe'e eche nongagi mirõrã. Go kbe'e chãllãwegi rõ ina: —Guei cho. 10 Gobu pranduma reko kbe'e chãllãwegipe: —Mawe nonga rõ kowebu dje chã roma bu? 11 Go kbe'e inama go pua wywype: —Go kbe'e bykuapyre Jesu djapowe mo’õ, gobu mima cho chãdji. Go rõ inare chope: “Amaty kua y kroupyre Siloepe gope kuchĩ ga mondo.” Cho wẽmbu, kuchĩmbare cho chã roma djo. 12 Gobu pranduma reko idjape: —Matyware rõ go kbe'e? Chãllãwegi inama: —Cho kuallã emi matyware mekã. 13 Gobu rama chãllãwegipe go Fariseo wywy endape: 14 Go bue djapollãndy kreybu Jesu djapo endawe mo’õdji, gobu kuwẽma chãllãngipe. 15 Gobu rõ go Fariseo wywy pranduma kbe'e chãllãwegipe: —Manonga rõ djapo djedji dje wẽchãwã? Gobu chãllãwegi inama go wywype: —Jesu rõ miwe cho chãdji mo’õ, cho kuchĩmbabu cho wechãma. 16 Gobu roma Fariseo wywy inama edji: —Go kbe'e kowe djapoaregi rõ Apã Wachu buellãwe idjape, idja rõ djampãma kuwẽ buare bue djapollãndy kreype. Go duwe wywy ina reko emi: —Manonga kbe'e bue buchã djapoatygi djapowerã bue gatu wechãllãndygi? 17 Gobu prandu reko chãllãwegipe: —Bue ko dje ina go dje chã kuwẽarepe? Go rõ inama: —Cho ina idjadji, idja rõ Profeta Apã Wachu buewe. 18 Gobu rõ emi judio wywy kua gatu djuellã kbe'e nondjebu chãllãwe kowebu wechãma. Gobu pukama kuwẽmbyregi apãpe dja ei'ipe emi. 19 Gobu pranduma reko kuwẽmbyregi apãpe dja ei'ipe emi: —Kowe kbe'e ko pendje ray, go pendje inawegi chãllã opowe? Mawe nonga kowebu chã roma djo? 20 Gobu dja apã dja ei'i inama emi: —Ore kua kowe rõ ore rayeche. Go rõ chãllãpe opowe. 21 Ore rõ kuallã mawe nonga rõ kowebu chãma. Ore kuallã emi awa rõ idjape kuwẽare. Pendje prandu mondo idjape; go rõ ymama idja djawu kuama idjadji. 22 Dja apã rõ inama go nonga krymballã buare, go judio wywy edji djawuma reko djapiwã sinagoga puare go Jesupe inambu go rõ Krito. 23 Go buare dja apã dja ei'i emi inama: “Prãndu mondo idjape. Go rõ ymama.” 24 Gobu puka roma reko go kbe'e chãllãwegipe, inama idjape: —Apã Wachu chã ruwa ka inallã ga mondo. Ore rõ kua go kbe'e bue buchã rekoty. 25 Gobu roma chãllãwegi inama gogi wywype: —Cho rõ kuallã go kbe'e bue buchã rekoty ko. Bue etakrãeche rõ cho kua: Cho chãllãwe kowebu cho chã roma! 26 Gobu prandu ruwiallã reko idjape: —Mawe nonga rõ djapo endawe djedji? Mawe nonga rõ djepe kuwẽwe dje wechãwã? 27 Go chãllãwegi inama gogi wywype: —Cho kiu tãrãma pendjepe, pendje rõ wendu djuellã. Bue rõ cho kiu tãrã cherã emi pendjepe? Pendje ko mudjã djue dja kuere rupi emi? 28 Gobu prandjã roma djo go pua wywy, inama idjape: —Dje ga mirõrã go kbe'e kuere mudjãndygi! Ore rõ Moise kuere mudjãndygi! 29 Ore rõ kua Apã Wachu djawuwe Moisepe, go kbe'e rõ ore kuallã matyware mekã! 30 Go kbe'e inama go pua wywype: —Kowe bue’e rõ nandje chã opowãngi: Pendje kuallã matyware rõ idja, go rõ chope kuwẽare! 31 Nandje rõ kua Apã Wachu wendullãeche bue buchã rekotygipe; go Apã Wachu rõ wendu gatu dja kuere mudjãndygipe, dja djawu djapoatygipe emi. 32 Nondjewe ĩmbeche, wendullãeche emi kuwẽwe go ache opoawe chãllãdji. 33 Kowe kbe'epe Apã Wachu buellãmbu, djapollã rawe bue wechãllãndy. 34 Gobu roma go pua wywy inama idjape: —Dje rõ bue buchãdji opo endawe, dje orepe kiullãwerã. Gobu djapima mondo idjape tapy sinagoga puare. 35 Jesu kuabu go chãllãwegipe djapipyre tapy sinagoga puare, go dorobu idjape pranduma: —Dje kua gatuma ko Ache Raype? 36 Go kbe'e chãllãwegi inama Jesupe: —Cho Rekoatygi, kiu gami chope awa rõ idja, idjape cho kua gatuwã. 37 Gobu Jesu inama idjape: —Dje wechãma idjape, go kowebu djawuma djedji. Guei cho. 38 Gobu kbe'e kmarã roma djo Jesu chã ruwa, inama idjape: —Cho kua gatuma cho Rekoatygi. 39 Gobu Jesu inama idjape: —Cho rõ ekõma kowe ywype mi buchãmbawã ache wywype. Go chãllãngi rõ chãwerã, go chãngi rõ chãllãwerã nonga. 40 Gobu Fariseo wywy ĩwe e djãwẽ, wendubu emi prandu roma Jesupe: —Ore ko chãllãngi kura emi? 41 Jesu inama mondo go wywype: —Pendje chãllãngibu, rekollã rawe bue buchã. Pendje ina buare pendje rõ chã gatu, kowebu pendje bue buchã reko wyche.

Juã 10

Juã 11

1 Ĩwe etakrã ache dja bykuapyre rõ Lasaro, go rõ achy buchãngi. Kowe kbe'e dja pawe kudjã mirõdji Marta, Maria emi ekõandy rõ chupa Betania pua. 2 Maria rõ Lasaro pawe kudjã, bue teiwu gatu kawoare Jesu pychãdji, dja tõ adji emi Jesu pychã piy endawe. 3 Dja pawe kudjã mirõngi buema mondo djawuwã Jesupe: —Cho Rekoatygi, dje bygatuty Lasaro achy buchã roma ni. 4 Jesu wendupabu inama: —Kowe kbe'e achy buchãngi manollãwerã, kowe achy wẽmbyregi rõ Apã Wachu chidja gatu wechãwã, ache wywy kuawã emi Apã Wachu Ray rõ chidja gatu. 5 Jesu by gatu Martape, Mariape dja pawe Lasarope emi. 6 Wendubu djepe Lasaro achy buchã, mirõ krey wẽmbu ĩ wyche dja llambawepe. 7 Brewipychã krey wẽmbu inama dja kuere mudjãndygi wywype: —Nandje endawe rekuaty Judeape owerã. 8 Dja kuere mudjãndygi wywy inama: —Kiuatygi, buerã dje o cherã gope, ymachidja judio wywy itape djepe djapi ruwy endawe. 9 Jesu djawuma mondo emi: —Krey wẽmbu bype gatu etakrã mirõ (12) kreywata wachu kreywapewe. Ache krey bype rupi watabu, wata gatuwerã ape rupi. 10 Ache chãwã rupi watabu, wapiwerã ape rupi chãwãdjiwa. 11 Gobu Jesu inama mondo: —Nandje bygatuty Lasaro ikẽwe enda, cho owerã mumbawã idjape. 12 Dja kuere mudjãndygi wywy inama: —Rekoatygi, Lasaro ikẽmbu rõ puã gatuwerã emi. 13 Jesu djawumami dja kuere mudjãndygi wywype Lasaro manowedjiwa, gogi wywy rõ kua mekã Lasaro djenowe kura. 14 Go buare Jesu ina gatuma: —Lasaro manoma. 15 Cho ury gatumami cho ĩllã buare gope, kowebu pendje kua gatuwerã chope. Nandje o ga mondo manowe wechãwã. 16 Mawebu Toma, go rõ bykuapyre “Tãrãdjiware opoaregi,” picha wywype djawuma mondo: “Nandje emi opawerã e djãwẽ manowã.” 17 Jesu wẽmbu chupa Betaniape djumami Lasaro mano endawe, chengypychã (4) kreyma dja echewe pechepyre. 18 Betania ĩ Jerusalẽ djãwẽ, brewipychã (3) rypy rupi go enda. 19 Tãrã judio oma Marta, Maria endape emi edji chinga rekowã dja pawe manowedjiwa. 20 Marta wendubu Jesu ekõware go chupape, oma Jesupe dorowã, dja pawe kudjã Maria rõ tapype wapy roma ĩ. 21 Gobu Marta inama mondo Jesupe: —Rekoatygi, dje ĩmbu kowepe cho pawe manollã rawe. 22 Cho kua gatu emi Apã Wachu membawerã bue wywy kowebu dje pukabu. 23 Gobu Jesu inama mondo Martape: —Dje pawe puãwerã manowedjiwa. 24 Marta inama emi Jesupe: —Cho kua gatu, puãmbawerã wyche manombawegi, go puãwerã krey krãpĩmbabu. 25 Gobu Jesu inama mondo Martape: —Cho rupi manowegi puãmbawerã, cho rupi manowegi manombechewerã emi. Chodji kua gatugi dja manombu djepe puãwerã wyche. 26 Ache wywy manollãngi kowebu, chodji kua gatugi go manombechewerã emi. Dje kua gatuma ko? 27 Marta inama Jesupe: —Go nonga, Rekoatygi. Cho kua gatu guei rõ dje Mesia, Apã Wachu Ray ekõwãngi kowe ywype. 28 Jesu djawu krãpĩmbu, Marta oma dja pawe kudjã Mariape pukawã, djawuma mondo Mariadji dja etakrãpe: —Go Kiuatygi kowepe ekõma, pukama djepe. 29 Maria wendubu puã roma djo Jesu wechãwã. 30 Jesu ekõllã wyche go chupape, Marta doro endawepe Jesu ĩ wyche. 31 Judio wywy Maria tapy puare ĩmbaregi, wechãmbu Maria puã obu, mudjã roma djo dja kuere rupi, gogi wywy kua reko o mombo kura dja pawe kuarewe llabu chingawã. 32 Maria wẽmbu Jesu djãwẽ, idja chã ruwa kmarã roma djo. Gobu inama Jesupe: —Rekoatygi, dje ĩmbu kowepe, cho pawe manollã rawe. 33 Gobu Jesu wechãma Maria chingabu, judio wywy Maria kuere rupi mudjãregi chingama emi, Jesu okryrallã buchãma emi, chingadjeky roma gogi wywydji. 34 Jesu pranduma mondo judio wywype: —Maty rõ Lasaro kuarewe ĩ. Judio wywy inama: —Rekoatygi, ore kuere rupi ga bu dje wechãwã Lasaro kuarewe. 35 Lasaro kuarewe llabu Jesu chinga roma ni. 36 Judio wywy djawu reko edji: —Wechã ga mondo Jesu prawo gatuware dja bygatuty Lasarope. 37 Duwe judio djawu reko emi: —Jesu djapo llambawe chãllãngi wechãwã, go nonga emi djapo rawe Lasaro manollãwã. 38 Jesu chinga roma emi Lasaro kuarewe llabu, go rõ pechepyre ita djãwãpe, ita wachupe peche mimbyre. 39 Jesu inama mondo: —Matã mondo ita wachu ita djãwã pechepyre! Marta, Lasaro pawe kudjã inama Jesupe: —Rekoatygi, chengypychã (4) kreyma idja mano endawe, teiwu buchã roma enda. 40 Jesu inama mondo: —Cho inallã ko djepe, chodji kua gatugi rõ wechãwerã Apã Wachu chidja. 41 Gobu ita wachu pechepyre matãma mondo, Jesu maĩmbu ywadji inama: —Cho Apã, cho ury gatuma dje chã ruwa dje rõ cho puka wendu gatu. 42 Cho kua gatu dje rõ cho puka wenduaty, cho djawuma go nonga kowe ache wywy cho djãwẽwagi kua gatuwã dje rõ chope bueare ywype. 43 Idja puka krãpĩmbu, Jesu djawu chidjama mondo: —Lasaro, tokape wẽ kua! 44 Lasaro, go manowegi, wẽ roma bu ita djãwã puare, idja tyru pukudjiwe wẽ roma bu, idja chãdji tyru mini muchãmbyre emi. Gobu Jesu inama mondo ache wywype: —Tyru chãdjiwa echedjiwa emi muchãmbyre djura mondo, kawãeme idjape. 45 Tãrã Judio wywy o endawe chupa Betaniape Mariadji chingawã, wechãma emi Jesu djapobu bue gatu, gobu kua gatuma Jesupe. 46 Duwe judio oma Fariseo wywy endape kiuwã bue rõ Jesu djapowe. 47 Gobu Fariseo wywy pa'i ymachidjagi wywy emi noãma reko noã llambatype, djawuma reko edji: —Bue rõ nandje djapowerã. Go kbe'e rõ tãrã bue wechãllãndy djapoma. 48 Nandje wedjabu go nonga, ache wywy opawerã dja kuere rupi, kua gatupawerã emi, go rõ Mesia. Go buare mawebu Roma pua ymachidjagi wywy ekõwerã djapipawã nandje prellambaty, nandje chupa wywy emi. 49 Go djawuare wywy bychepe ĩ Kaifa, pa'i ymachidjagiware go ruybu, gobu idja inama: —Pendje rõ bue kuabeche? 50 Pendje kua ga mondo, kbeigatuwe etakrã kbe'e manowã ache wywy pepy, go nonga ache wywy nandje chupa puagi manollãwerã. 51 Kaifa djawubu djawullã dja djawuty nonga, Apã Wachu djawu rõ Kaifa djawu, go rõ pa'i ymachidjagi buare ina go Jesu manowerã judio wywy kuwẽmbawã. 52 Jesu manombu judio irollãndygi wywype kuwẽmbapyrã emi, ache wywy duwe rekuatywa ekõngi wywype, ywy krãpĩ pua ekõngi wywy emi. 53 Djawu krãpĩmbabu noã llambatype, ymachidjagi wywy go rupiwe edji inama Jesupe djukawerã. 54 Go buare Jesu watabechema judio wywy byche rupi, Judea puare oma ka wachu embe rupi duwe chupa rekuaty go bykuapyre rõ Efrain, go chupape roma ni dja kuere mudjãndygi wywydji. 55 Rypyllã roma Pakuadjiwa judio wywy djapowã, tãrã ache oma Jerusalẽmpe urywã. 56 Gobu ache tãrã kuara reko Jesupe, go wywy kuara rekobu pranduma reko edji prellambatype: —Bue rõ pendje ina, Jesu ekõwerã ko Pakua urywã? 57 Fariseo wywy, pa'i ymachidjagi wywy emi ache wywype pukama mondo: —Pendje wechãmbu Jesupe, orepe kiu ga bu Jesupe pychywã.

Juã 12

1 Wachapa krey wẽmbu Pakua wẽ nondjemi, Jesu Betaniape roma djo Lasaro ekõandype. Go Lasaro rõ Jesu puãwegi manowedjiware. 2 Go tapype chãwãmbu bakumami bakupyre Jesudji urywã. Marta rõ bakupyre eruatygi wyrachepepe. Gope Lasaro wapy ni Jesu djãwẽ bakupyre edji uwã. 3 Maria eruma bue teiwu gatugi biribuchãngi, padje djapedji djapopyre, kawoma mondo Jesu pychãdji. Kawopabu Maria piyma dja adji, go tapy djãwãpe teiwupa roma mondo bue teiwu gatudji. 4 Gobu Juda Ikariote, Jesu kuere mudjãndygidjiwa, go rõ Jesupe mewãngi duwe ipope, inama: 5 —Buerã mellã cherã bue teiwu gatugi buta tãrã brewipychã tapa tapa (300) denariodji. Go buta tãrãdji nandje kuwẽ reko rawe bue rekollãngi wywype. 6 Juda rõ ka bewã, go rõ kuwẽ djuellã ache bue rekollãngipe, go narõdjiwa go nonga djawu reko. Idja rõ buta warõandygi, go rõ narõ reko buta noãmbyredjiwagi. 7 Jesu inama mondo Judape: —Kudjãpe djawueme! Idja rõ kawoma bue teiwu gatugi cho mano buarã. 8 Ache bue rekollãngi wywy ĩwerã gorãwẽ pendje djãwẽ, cho rõ mawebu ĩllãwerãma pendje djãwẽ. 9 Tãrã judio Jerusalẽ puatygi wywy kuama Jesu ĩware Betania chupape, gobu gogi wywy oma wechãwã Jesupe Lasarope emi, go rõ manowedjiwa Jesu puãre idjape. 10 Go nongabu pa'i ymachidjagi wywy djawuma reko edji djukawã emi Lasarope. 11 Tãrã judio pa'i wywy kuere rupi ollãma, Jesu kuere rupima djo bue gatu djapopawedjiwa. 12 Ache tãrã dyry roma ra Jerusalẽ tapy tãrãpe Pakuadjiwa urywã. Duwe krey wẽmbu wenduma Jesu ekõwerã wyche Jerusalẽ tapy tãrãpe. 13 Gobu ache wywy eruma tuei o wywy djonoma Jesu chã ruwa wata rabu. Go Jesu ekõmbu ache wywy puka chidja roma reko: Dje rõ chidja gatueche! Kbeigatu rõ ekõwegi Apã Wachu bykuapyrepe! Dje rõ ymachidja wachu Irael pua! 14 Jesu wẽ roma bu bepurã djacha llabu, Apã Wachu djawupe parapyre inawe nonga: 15 Krymballãeme Sion tapy tãrã puagi! Ekõma pendje ymachidja! Idja ekõma etakrã bepurã djacha llabu! 16 Jesu kuere mudjãndygi wywy kuallã buerã ache wywy djapo go nonga Jesu wẽmbu bepurã djacha llabu. Jesu manowe puãmbu, obu ywadji emi dja kuere mudjãndygi wywy kuama kowe bue wywy Apã Wachu djawu parapyrepe inambyre Jesudjiwa. 17 Ache wywy Jesu djãwẽ ĩmbawe wechãre Jesu puka chidjabu Lasarope puãwã dja manoware, kiuma mondo duwe ache wywype gogi wywy wechãmbawe. 18 Go buare ache wywy Jesu endapema djo, kua buare Jesu rõ djapowe bue wechãllãndy. 19 Fariseo wywy djawuma reko edji: —Pendje wechãmbama kowebu nandje chidjallãma idja chã ruwa. Maĩ, ache tachĩmbo roma djo dja kuere rupi! 20 Ache wywy oparegi Jerusalẽmpe Pakuadjiwa urywã Apã Wachupe krandobuãwã emi, go bychepe ĩ ache tãrã prowi Grecia puaty. 21 Kowegi ache Grecia puaty oma Galileape Felipepe wechãwã, go rõ Jesu kuere mudjãndygidjiwa etakrã, chupa Betsaida puaty. Go ache ekõaregi inama Felipepe: —Rekoatygi, ore wechã djue Jesupe. 22 Gobu Felipe oma kiuwã Andrepe, gobu go mirõ oma emi kiuwã Jesupe. 23 Jesu inama mondo: —Go kowe kreybu wẽma bu ache wywy kuawã Ache Raype. Idja manowerã, puãwerã emi manowe byche puare owã ywadji. 24 Pendje kua gatu trigo ã'ã pechellãmbu ywy tyrõmbyrepe, wẽllãwerã trigo ã'ã. Ã’ã etakrãeche ĩwerã. Pechebu ywy tyrõmbyrepe lla gatu tãrãwerã. 25 Ache wywy prawobu dja ekõndy nonga kowe ywy llabu, manombu ollãwerã ywadji. Ache prawollãmbu dja ekõndy nonga kowe ywy llabu, manombu ywadji owerã. 26 Go ache djapo djuegi cho djawu, cho rupi mudjã ga mondo. Go cho ĩngipe gope ĩwerã emi cho kuere mudjãndygi. Go cho djawu djapogi, gogipe rõ cho Apã chidja gatu membyrã. 27 Kowe kreybu cho uryllã buchã roma. Bue rõ cho inawerã? Cho inawerã ko cho Apãpe go nonga: “Cho Apã kuwẽ gami chope djuei buchã rekobu?” Cho djawullã kowe nonga, gorã cho ekõwe. 28 Go nonga cho inawerã: “Cho Apã, djapo mondo dje chidjadjiwa ache wywy wechãwã.” Jesu djawu krãpĩmbu wenduma ywadji djawuma bu, inama: —Cho chidja gatu ache wywy wechãma, kowebu wechãwerã wyche emi cho chidja gatu. 29 Ache wywy Jesu djãwẽ ĩmbawegi ina roma wenduwe chono pambu wachu nonga, duwe ache rõ ina: —Etakrã Apã Wachu buepytygi rõ djawuwe Jesudji. 30 Gobu Jesu inama: Go djawuaregi rõ djawullãma chodji buarã, pendje buarã djawuma, chodji pendje kua gatuwã. 31 Kowebu ache wywy kowe ywy puagipe pacho puy wachuwerã, kowebu Andjãwẽpe ymachidja wachu ywy pua ĩngi djapipyrã tokape. 32 Chope upibu wyra wachapyredji, chodji ache wywy kua gatupawerã. 33 Jesu inambu go nonga, kiuma manonga idja manowã. 34 Ache wywy pranduma Jesupe: —Moise parapyre rupi ore kua Krito manombechewerã gorãwẽ endarã. Buerã dje ina cherã go Ache Raype upipyrã wyra wachapyredji? Awa rõ go Ache Ray? 35 Jesu inama mondo ache wywype: —Kowebu cho ĩ wyche pendje bychepe krey bype gatu nonga. Cho o ruwyma cho ĩllãwerãma pendje djãwẽ. Wata ga mondo krey bype gatupe ĩ wyche pendje djãwẽ chãwãmbechemi, go chãwãmbu wata ekõngi kuallãechema maty dja lluãwã. 36 Cho, krey bype gatu nonga, ĩ wyche pendje djãwẽ, chodji ga kua gatu mondo pendje watawã krey bype gatu rupi. Jesu djawupabu oma, kandjãma djo gogi wywy byche puare. 37 Jesu djapowe tãrã bue wechãllãndy judio wywy chã ruwa, go wywy wechãmbare go nongabu rõ emi kua gatu djuellã idjape. 38 Kowe bue wywy wẽmbama, profeta Isaia parapyre inambyre nonga: Cho Apã, awa rõ wendu gatu nandje djawu? Awa chã ruwa rõ dje chidja gatu djapopyre wechãmbyrã? 39 Go buare ache wywy kua gatu djuellã, Isaia parapyrepe inawe nonga. 40 Apã Wachu rõ ache wywy chãpe pecheare djãpe krereare emi. Wechãllãwã idja chã rupi, kuallãwã idja djãpe emi, wedjallãwã idja bue buchã djapotygi, kua djuellãwã Apã Wachupe, Kuwellãwã idjape emi. 41 Isaia parawe go nonga: “Wechãware idja chidjadjiwa,” go buare djawu gatuma Jesudji. 42 Go nongabu rõ, tãrã judio kua gatuma Jesupe, tãrã prowi ymachidjagi emi, gogi wywy kiullã picha achepe krymballãdjiwa Fariseo wywydji, djapillãwã tapy sinagogape ĩmbu. 43 Go wywy wendu djue bue gatu ache wywydji, bue gatu wendu rawe Apã Wachudji. 44 Jesu djawu chidja roma mondo: Chope kua gatugi rõ cho Apãpe emi kua gatu. Go rõ chope bueare. 45 Go chope wechãngi, wechã emi cho Apãpe chope buearegi. 46 Cho rõ krey bype gatugi kowe ywype, cho ekõma ache wywype bypewã, chope kua gatugi rõ chãwãpe watabechewerã. 47 Cho ekõllã kowe ywype mi buchãwã ache wywy cho djawu wendu djuellãngipe, cho djawu djapollãngipe emi. Cho rõ ekõwe kowe ywype ache wywype kuwẽmbawã. 48 Cho djawudji byllãngi, djapo djuellãngi emi cho djawu, ĩma idjape mi buchãwã. Go cho djawuwe rõ mi buchãwerã go krey krãpĩmbabu. 49 Cho djawullã cho etakrã kuaty nonga, cho Apã chope bueare djawu rõ cho kiu reko ache wywype. Cho Apã djawu chope meare rõ cho kiu reko. 50 Cho kua, cho Apã djawu djapogi manombechewerã ywadji. Go buare cho kiupama pendjepe cho Apã inawe nonga chope.

Juã 13

1 Rypyllã roma bu Pakuadjiwa urywã, Jesu kuama dja o ruwyma ywadji dja Apã djãwẽ. Jesu gorãwẽ prawo gatu reko dja kuere mudjãndygi wywype kowe ywy pua, prawo gatueche gogi wywype dja manopewe. 2 Go bakupyre ubechemi, Andjãwẽ krei ikẽma djo Juda djãpe, go rõ Simõ Ikariote ray. Juda dja tõpe kua rekoma mewã Jesupe duwe ipope. 3 Apã Wachu rõ bueare Jesupe, Jesu rõ kua gatu, kua gatu emi dja owerã wyche ywadji Apã Wachudji ĩwã. Apã Wachu rõ dja Apã, membare dja Raype bue wywy. 4 Go buare, bakupyre u rekobu Jesu puã roma wyrachepe puare, dja tyru puku matãma mondo dja echedjiware, gobu kawãma tyru piytygi mima dja krytadji. 5 Gobu baydja chepepe y djonomami, dja kuere mudjãndygi wywy pychã kuchĩma reko, piyma mondo emi tyru piytygipe. 6 Simõ Pedro pychã kuchi ruwybu, Pedro inama Jesupe: —Cho Rekoatygi, dje ko kuchĩwerã cho pychã? 7 Jesu djawuma mondo Pedrope: —Kowebu dje kuallã buerã cho djapo, mawebu dje kuawerã wyche. 8 Gobu Pedro inama Jesupe: —Cho membechewerã cho pychã dje kuchĩwã dje rõ ymachidjagi! Jesu djawuma mondo emi: —Cho kuchĩllãmbu dje pychã dje ĩllãwerãma cho kuere mudjãndygi. 9 Simõ Pedro inama Jesupe: —Cho Rekoatygi, go nongabu rõ, kuchĩmba ga mondo cho pychã, cho ipo, cho tõ'õ emi. 10 Jesu djawuma mondo Pedrope: —Go y djo pouaregi eche kiabechema, tokape dja watabu pychã kuchĩmbyre kiawerã emi, gobu dja pychãechema kuchĩmbyrã. 11 Jesu kuama awa rõ mewã idjape duwe ipope, go buare Jesu djawuma mondo: —Pendje bychepe kuchĩllãngi ĩ wyche. 12 Jesu kuchĩmbabu dja kuere mudjãndygi wywy pychã, idja tyru puku pypyma wapyma emi dja wapy endawepe, wyrachepe djãwẽ. Gobu pranduma gogi wywype: —Pendje kua ko buerã cho djapo kowe nonga pendjedji? 13 Pendje rõ puka chope “Kiuatygi,” pendje puka emi chope “Rekoatygi.” Pendje pukabu chope go nonga, pendje djampãllã, guei cho rõ Kiuatygi, Rekoatygi emi. 14 Guei cho pendje Rekoatygi pendje Kiuatygi emi, cho rõ pendje pychã kuchĩare. Go nonga emi picha pychã kuchĩ ga mondo edji. 15 Kowe nonga cho djapoma pendje wechãwã, go nonga ga djapo mondo pichadji. 16 Cho ka inallã pendjepe: Kua gatu kowe nonga, go buepytygi rõ chidjallãwe, dja buetygi rõ chidja. Djawu ratygi emi chidjallã, go djawu meandygi rõ chidja. 17 Pendje kua gatubu kowe cho djawupawe, go nonga djapobu emi pendje ury gatuwerã. 18 Cho djawullã pendje wywydji, cho kua awa rõ cho pukawe cho djãwẽwarã. Go nongabu rõ wẽwerã Apã Wachu djawupe inambyre nonga: Cho djãwẽ bakupyre ugi, go rõ chope mewãngi duwe ipope djukapyrã. 19 Kowebu cho djawuma kowe nonga, go cho djawuwegi wẽmbu pendje kua gatuwã, guei rõ Cho. 20 Cho ka inallã pendjepe: Cho buewegidji pendje ury gatubu, pendje ury gatu emi chodji, chodji ury gatubu, pendje ury gatu emi cho buearegidji. 21 Jesu djawu krãpĩmbabu uryllã buchã roma djo, Jesu djawu roma mondo: —Cho kua gatu pendje bychepe ĩ chope mewãngi duwe ache ipope. 22 Jesu kuere mudjãndygi wywy picha chãdji maĩ roma reko, gogi wywy kuallã awadji rõ Jesu djawu cherã go nonga. 23 Jesu kuere mudjãndygi bychepe ĩ etakrã Jesu bygatutygi dja djãwẽ buapy ĩ bakupyre u rekobu chãwãmbu. 24 Simõ Pedro djawu papĩ reko Jesu djãwẽ wapygipe prãnduwã Jesupe awadji rõ Jesu djawu cherã go nonga. 25 Gobu Jesu djãwẽ roma djo, prandu roma mondo idjape: —Cho Rekoatygi, awa rõ go? 26 Jesu inama pranduaregipe: —Wikytã bakupyredji pirypyre cho mewerã idjape. Gobu wikytã pirywe mema mondo Juda uwã, Simõ Ikariote raype. 27 Gobu Juda wikytã pirypyregi kawãma mondo, go rupiwe Andjãwẽ ikẽma Juda djãpe. Gobu Jesu inama mondo: —Kowebu bitaeme ga mondo bue dje djapo djuegi. 28 Go puagi wywy bakupyre u rekobu kuabeche buerã Jesu go nonga djawu chẽrã. 29 Juda rõ buta noãmbyre rekoty, go buare go pua wywy kua reko Jesu bue eruwã kura Pakuadjiwa djapowã, go bue me kura emi ache bue rekollãngipe. 30 Juda wikytã upabu, tokape wẽma chãwã rupi roma djo. Ache wywy bue buchã chãwãmbu rõ djapo ury. 31 Juda wẽmbu tokape, Jesu djawuma mondo duwe dja kuere mudjãndygi wywype: —Kowebu ache wywy wechãwerã cho rõ Apã Wachu ray chidja gatu reko, cho rupi wechãwerã emi Apã Wachu chidja Gatu. 32 Cho rupi ache wywy wechãmbu Apã Wachu chidja gatu, go nongabu rõ ache wywy wechãwerã cho rõ chidja gatu Apã Wachu rupi, Apã Wachu djapo bitallãwerãma go nonga. 33 Cho bygatuty wywy, cho ĩllã ruwyma pendje bychepe, pendje rõ chope kuara rekorã, chope dorollãwerã, cho inawe nonga Judio ymachidjagipe, pendje o djuebu cho Llambatype djuei'i pendje owã. 34 Cho mema kowe djawu pou, wendu gami kowebu: Edji prawo gatu ga reko, cho prawo gatu nonga pendjepe. 35 Pendje picha prawo gatu rekobu, ache wywy wechãwerã pendje rõ cho kuere mudjãndygidjiwa. 36 Simõ Pedro pranduma Jesupe: —Cho Rekoatygi, maty rõ dje owerã? Jesu inama mondo Pedrope: —Kowebu dje ekõllãwerã cho rupi, mawebu cho rupi dje owerã. 37 Pedro ina wyche reko Jesupe: —Cho Rekoatygi, buerã kowebu dje kuere mudjã kaillã. Cho dje djãwẽ mano endarã, cho mewerã emi cho eche dje djãwẽ manowã! 38 Jesu inama Pedrope: —Dje ka inallã ko dje eche mewã cho djãwẽ manowã? Dje kuawã cho inawerã, dje ka inawerã: “Cho Jesupe kuallã” brewipychã urupurã puka nondje.

Juã 14

1 Pendje okryrallãeme, Apã Wachudji ga kua gatu reko, chodji ga kua gatu reko emi. 2 Cho Apã chupape rõ tãrã ĩ pendje endarã, tapy ĩllãmbu, cho inallã rawe pendjepe ywadji cho owerã pendje endarã djapowã. 3 Cho ywadji obu, djapopabu emi pendje endarã, cho ekõwerã wyche pendjepe rawã, go cho llambatype pendje ĩwerã cho djãwẽ. 4 Pendje kua gatu maty cho owerã, pendje kua gatu emi ape. 5 Gobu Toma inama mondo Jesupe: —Cho Rekoatygi, ore kuallã maty rõ dje owerã. Manonga rõ ape ore lluãwã? 6 Jesu djawuma emi Tomape: —Cho rõ ape, cho rõ ka inallãndy, manollãndy emi, cho rupieche rõ ache wywy owerã cho Apã endape. 7 Chope pendje kuabu, cho Apãpe emi pendje kua gatuwerã, kowebu pendje kuama idjape wechãredjiwa. 8 Gobu Felipe inama mondo emi Jesupe: —Ore Rekoatygi, dje Apãpe rõ ore wechã djue, eru gami ore wechãwã ore ury gatuwã emi. 9 Jesu djawuma mondo Felipepe: —Felipe, ikẽ tãrã cho ekuãndy pendje djãwẽ. Pendje kuallã wyche mekã chope? Chope wechãmbu, wechã emi cho Apãpe. Buerã chope dje puka cherã cho Apãpe wechãwã? 10 Dje kuallã wyche ko Apã Wachupe? Cho rõ emi Apã Wachu. Cho djawupawe wywy cho ka djawullã, cho Apã rõ cho djãwẽwaty go rõ meare dja djawu cho djawuwã. 11 Chope kua gatu gami, cho Apã ekõndy cho djãwẽ, cho ekõndy emi cho Apã djãwẽ; chodji pendje kua gatu djuellãmbu, kua gatu ga mondo bue gatu cho djapopawedjiwa. 12 Cho ka inallã pendjepe, chope pendje kua gatubu cho djapoty nonga pendje djapowerã emi, pendje djapowerã emi bue naina wachuwe chodji, cho owãdjiwa cho Apã endape. 13 Pendje pukabu cho Apãpe cho bykuapyrepe, cho mewerã, go nonga cho djapowerã ache wywy wechãmbawã Apã Wachu chidja gatu dja Ray rupi. 14 Cho mewerã bue wywy pendje pukabu cho bykuapyrepe. 15 Chope pendje prawobu, cho djawu pendje wendu gatuwerã emi. 16 Cho pukawerã cho Apãpe buewã Krei Gatu pendje kuwẽwã, gorãwẽ pendje djãwẽ llambarã. 17 Go rõ Krei Gatu ka inallãndy. Ache wywy Apã Wachupe kuallãngi rekollãwerã Krei Gatu. Go wywy rõ Krei Gatupe wechãllã, kuallã emi. Pendje rõ kua gatu idjape go rõ pendje djãwẽwaty, gorãwẽ pendje djãwẽ llambarã. 18 Cho wedjabechewerã pendjepe krãwegi nonga, mawebu cho ekõwerã wyche pendje djãwẽ ekõwã. 19 Rypyllã roma bu, ache wywy chope wechãmbechewã, pendje rõ chope wechãwerã, pendje puã mimbyrã cho puãwe nonga. 20 Mawebu cho ekõmbu cho rawã pendje wechãwã cho Apã, go cho djãwẽ ekuãndy. Gope pendje kuawerã, ore etakrã rõ ekuãndy edji, pendje emi etakrã llambarã. 21 Cho djawu wendugi emi djapo gatugi, cho urywã go djapo gatu, chope prawo gatudjiwa. Cho Apã prawowerã go chope prawogi, cho emi prawowerã chope prawogi wechãwã manonga rõ cho. 22 Gobu duwe Juda, (Juda Ikariote rõ duwe) go Jesupe djawuma mondo: —Ore Rekoatygi, buerã oreche rõ wechãwerã djepe, buerã duwegi djepe wechãmbechewerã. 23 Jesu inama emi: —Chope prawogi emi cho djawu djapogi, cho Apã prawowerã gope, ore edji ekõwerã go djãwẽ ekõwã. 24 Chope prawollãngi cho djawu wendullã emi. Cho djawu pendje wenduatygi rõ cho Apã chope buearegi djawu. 25 Cho djawupama kowe bue wywydjiwa pendje djãwẽ cho ĩmbu. 26 Apã Wachu buewerã Krei Gatu ĩwã pendjedji cho endawepe, Krei Gatu rõ ekõwerã pendje kuwẽwã. Pendjepe kiuwerã bue wywydjiwa, pendje kua rekowã emi cho kiupawe wywydjiwa. 27 Cho o nondje cho okryra gatu mema pendjepe okryrawã, ache wywy mellã okryra gatu cho mewe nonga. Uryllãeme, krymballãeme emi. 28 Pendje wenduare cho djawu cho owerãdjiwa, cho ekõwerã wyche emi pendjedji ĩwã. Pendje chope prawo gatubu, pendje ury gatu rawe chodji, pendje kuabu cho owerãdjiwa cho Apã endape, Go rõ ymachidjaeche chodji. 29 Kowebu cho inama pendjepe kowe wywy wẽmba nondje, go nonga wẽmbabu chope pendje kua gatu rekowã. 30 Kowebu cho djawu tãrãllãwerã pendjedji, rypyllãma bu Andjãwẽ ekõwã, go rõ kowe ywy llabuwa, go rõ chodji bue rekollãeche emi. 31 Go nongabu rõ ache wywy kuawã cho prawo gatudjiwa cho Apãpe, cho djapo emi idja inawe nonga chope. Jesu djawu krãpĩwã inama: —Puãmba ga mondo, duwe rekuaty nandje owerã.

Juã 15

1 Jesu inama emi dja kuere mudjãndygi wywype: —Cho rõ chipopurã apo gatu nonga, cho Apã rõ chipopurã kuwẽandygi nonga. 2 Chipopurã akãdji go llallãmbu, go akã cho Apã mondowerã, akãdjiwa llabu akã kio gatuwerã lla gatuwã, lla tãrãwã emi. 3 Pendjepe rõ kuchĩ gatuma akã kiopyre nonga lla gatuwã, pendje wendu gatuaredjiwa cho djawu. 4 Cho djãwẽ ga ĩ, cho ĩwe nonga pendje djãwẽ. Pendje kua gatu chipopurã akã lla rekollãwerã ĩllãmbu dja apodji. Go nonga emi pendje ĩllãmbu chodji pendje bue djapollãwerã. 5 Cho rõ chipopurã apo nonga, pendje rõ chipopurã akã nonga emi. Cho djãwẽ ĩngi, cho ĩ idja djãwẽ emi, go akãdji lla tãrã nonga pendje go nongawerã emi. Pendje ĩllãmbu chodji pendje bue djapobechewerã. 6 Chodji ĩ djuellãmbu, idjape djapi mimbyrã tokape, chipopurã akã mondopyre nongawerã, o piãndjãmbu mendypyrã tatape. 7 Pendje gorãwẽ ĩmbu chodji, cho kiupawe pendje djapo gatubu emi, bue wywy pendje pukabu cho Apãpe, go pendje prawo nonga Apã Wachu djapowerã. 8 Go nonga ache wywy kua gatuwerã cho Apãpe: pendje lla tãrãmbu. Go nonga djapobu pendje rõ cho kuere mudjã gatuechegi. 9 Cho Apã chope prawo gatu nonga, cho prawo gatu emi pendjepe, pendje gorãwẽ go nonga emi chope prawo ga reko. 10 Go pendje djapobu bue wywy cho pendjepe kiu gatuwegi, gorãwẽ pendje ĩwerã cho prawo gatupe. Cho djapo buare cho Apã djawu, cho ĩma cho Apã prawo gatupe. 11 Cho inama pendjepe go nonga, pendje ury gatuwã chodji, go pendje ury gatudji embewã. 12 Kowe rõ cho djawu pendje djapowã: Pichadji prawo gatu ga reko, cho prawo gatuty nonga pendjepe. 13 Go ache prawo gatuechegi dja bygatutygi wywype, go ĩma djonowã dja eche dja bygatutygi wywy pepy. 14 Pendje rõ cho bygatutygi wywy, pendje djapobu go cho kiuwegi pendjepe. 15 Cho pukallãwerã pendjepe “buepytygi wywy,” go buepytygi wywy rõ kuabeche dja rekoatygi djapoty. Cho pukawerã pendjepe “bygatutygi wywy,” cho kiupa buare pendjepe cho apã chope kiupawe wywy. 16 Pendje rõ matãllã chope pendjedji ĩwã, cho rõ pendjepe matãre gorãwẽ ĩwã chodji. Cho buema mondo pendjepe cho djawu kiuwã, ache tãrã kua rekowã chodji gorãwẽ ĩwã chodji emi. Go nonga djapobu, pendje pukabu cho Apãpe cho bykuapyrepe, go pendje prawo nonga Apã Wachu djapowerã. 17 Cho djawuwe nonga cho inama emi pendjepe: Pichadji prawo ga reko. 18 Gobu Jesu inama: —Ache wywy chope kuallãngi pendjepe byllã rekobu, kua ga mondo chope rẽ byllãmbyre. 19 Pendje ekõ rawebu ache wywy chope kuallãngi ekõ nonga, gogi wywy pendjepe prawo rawe, gogi wywy prawo buare dja irondy wywype. Cho matãma mondo pendjepe ache wywy bycheware cho djãwẽwarã, go buare ache wywy pendjepe byllãma reko pendje gogi wywy nongallã buare. 20 Kua ga reko go cho inambawegi, ĩllã buepytygi chidja rekogi, rekoatygi rõ chidjawãngi. Ache tãrã chope reko buchãmbyre, go nonga emi ache tãrã pendjepe reko buchãwerã emi. Ache tãrã cho djawu wendu gatupyre, go nonga emi ache tãrã pendje djawu wendu gatuwerã emi. 21 Kowe nonga wẽwerã pendjedji pendje rõ cho kuere mudjãndygi buare, ache wywy kuallã buare Apã Wachu rõ chope bueare. 22 Cho ekõllã rawebu ache wywype kiuwã, gogi wywy kuallã rawe bue buchãdjiwa. Cho ekõ buare ache wywy kuama dja bue buchã djapowedjiwa, go buare gogi wywy inallãwerã: “Ore kuallã.” 23 Ache chope byllã rekobu, cho Apãpe emi byllã reko. 24 Cho djapollã rawebu bue wechãllãndy ache wywy wechãwã, gogi wywy bue buchã rekobeche rawe. Gogi wywy bue wechãllãndy wechãmbama, go bue wechãredjiwa ache chope byllãma reko, cho apãpe emi byllã reko. 25 Kowe nonga wẽma, wẽmbawã Apã Wachu Djawu parapyrepe inawe nonga: “Ache wywy rõ chope byllãmbyre cho djapollãwedjiwa bue buchã.” 26 Cho buewerã duwe kuwẽandygi cho Apãdjiware Krei Gatu pendje endape, go rõ ka inallãndy, pendjepe kiuwerã cho djawu gatupawedjiwa, djawu gatuwerã chodji emi. 27 Pendje emi djawu gatu rekowerã chodji ache wywype, pendje rõ ĩmbyare chodji.

Juã 16

1 Cho kiuma kowe wywy pendjepe, cho kuere rupi prarullãwã. 2 Pendjepe djapipyrã tokape Sinagoga wywy puare, krey ekõwerã pendjepe byllã rekowã djukawã emi, gogi wywy go nonga djapobu pendjepe inawerã idja djãpe bue gatu djapoma Apã Wachupe buarã. 3 Gogi wywy djapowerã go nonga, kuallãdjiwa chope, kuallã emi cho Apãpe. 4 Cho inama kowe nonga pendjepe, go nonga wẽmbu pendje kua rekowã cho inawe nonga pendjepe. Pendje ĩmbyarebu chodji cho inallãwe pendjepe kowe wẽwerãdjiwa cho ĩware wyche pendjedji. 5 Kowebu rõ cho owerã emi go cho buearegi endape, pendje chope prandullã maty rõ cho owã. 6 Cho ina buare pendjepe kowe bue’e, pendje uryllãpema ĩmba. 7 Kowebu cho ka inallã pendjepe: Pendje puarã kbeigatuwerã cho obu. Cho ollãmbu ekõllãwerã emi duwe kuwẽandygi pendjedji ĩwã. Cho obu go Krei Gatupe cho buewerã pendjedji ĩwã. 8 Go Krei Gatu ekõmbu idja rupi ache wywy kuawerã brewipychã bue’e: Etakrã bue’e, awa rõ bue buchã djapoatygi; mirõ bue’e, awa rõ bue buchã djapollãndygi; brewipychã bue’e, awape rõ djapipyrã tata wachupe. 9 Kowebu cho kiuwerã pendjepe bue rõ kowe brewipychã bue’e inambyty: Etakrã bue’e, cho ina Krei Gatu rupi kuawerã awa rõ bue buchã djapoatygi, go rõ chope kua gatu djuellãngi. 10 Mirõ bue’e, cho ina Krei Gatu rupi kuawerã emi awa rõ bue buchã djapollãndygi, cho owerã buare cho Apã endape, gobu pendje wechãmbechewerãma chope. 11 Brewipychã bue’e, cho ina awape rõ djapipyrã tata wachupe: Andjãwẽpe rõ, kowe ywy pua ymachidjagi, tata wachupe djapipyrã. 12 Cho reko tãrã wyche cho kiuwã pendjepe, cho kiullãwerã pendjepe, kowebu rõ pendje kuallãwerã wyche bue rõ inambyty. 13 Go Krei Gatu ekõmbu, go rõ kiuwerã pendjepe ka inallãndydjiwa, pendje ĩwã ka inallãpe. Dja djãwã pua ĩngi djawullãwerã pendjepe, Apã Wachu djawu idja wendupawedjiwa kiuwerã emi pendjepe, kiuwerã emi pendjepe bue wẽmbawerãdjiwa. 14 Go Krei Gatu wenduwe bue wywy chodjiwa kiu rekowerã pendjepe, go nonga Krei Gatu djawu gatuwerã chodji. 15 Bue wywy cho Apã rekogi cho llapo wywy emi; go buare cho inama pendjepe, bue wywy wenduwe chodjiwa Krei'i rõ kiuwerã pendjepe. 16 Rypybechema pendje chope wechãllãwã; gobu pendje wechãwerã wyche emi chope cho o nondjemi ywadji. Gobu cho owerã cho Apã endape. 17 Gobu Jesu kuere mudjãndygi pranduma reko edji: —Bue rõ go Jesu inawe? Inama nandjepe rypybechema nandje wechãllãwã idjape, gobu nandje wechãwerã wyche emi, go owerãdjiwa idja Apã endape. 18 Bue rõ go inambyty “rypybechema”? Nandje kuallã buedjiwa rõ Jesu djawuwe. 19 Jesu kua gatuma dja kuere mudjãndygi wywy idjape prandu djue buare. Gobu Jesu inama gogi wywype: —Cho djawuwe pendjepe: “Rypybechema pendje wechãllãwã chope, gobu pendje wechãwerã wyche.” Pendje prandu reko cho djawuwedjiwa? 20 Cho ka inallã pendjepe, pendje uryllãpe llambarã, gobu pendje chingawerã emi. Ache wywy cho kuere mudjãllãngi ury gatupe llambarã. Go nonga pendje uryllãpe kowebu ĩ buare djepe, mawebu uryllã ury gatupe ruwawerã. 21 Go kudjã brawogi rõ chinga ruwy dja memby opowã wẽmbu; go krumi opobu achy kuabeche roma, ury gatuma krumi opobu kowe ywype. 22 Go nonga emi kowebu pendje uryllã buchã roma, cho obu cho ekõwerã wyche pendje endape, gobu pendje ury gatuwerã, go ury gatu pendje djãwã pua krãpĩmbechewerã. 23 Go krey cho manowe wẽmbu, pendje bue prandubechewerã chope. Cho ka inallã pendjepe, pendje bue pukabu cho Apãpe cho bykuapyrepe, cho Apã rõ mewerã pendjepe. 24 Kowebu wyche pendje bue pukallã wyche cho bykuapyrepe. Puka ga mondo, Apã Wachu pendjepe bue mewerã, pendje ury gatuechewã. 25 Ko wyche cho djawu wyche reko pendjepe djawupyty nonga rupi. Krey wẽwerã cho kiullãwã pendjepe djawupyty nonga rupi. Cho kiu gatuwerã pendjepe cho Apãdjiwa. 26 Go kreybu cho pukallãwerãma cho Apãpe pendjedjiwarã, go kreybu pendje rõ pukawerã cho Apãpe cho bykuapyrepe. 27 Cho Apã prawo gatu pendjepe, pendje prawo gatu buare chope, pendje kua gatu buare cho ekõwe cho Apã ywadjiwaty djãwẽware. 28 Cho Apã djãwẽware cho ekõwe kowe ywype, kowebu emi cho ĩllãwerã kowe ywype, cho owerã emi cho Apã endape e djãwẽwarã. 29 Gobu dja kuere mudjãndygi wywy inama Jesupe: —Kowebu dje djawu rõ kiu gatuma, djawupyty nongallãma! 30 Kowebu ore kua gatuma dje rõ bue wywy kua gatuechegi, djepe prandu nondje bue wywydjiwa, dje kuama. Go buare ore kua gatuma Apã Wachu rõ djepe bueare. 31 Gobu Jesu inama gogi wywype: —Pendje kua gatuma ko kowebu? 32 Krey wẽ ruwyma, kowebu wẽma pendje kandjãmba lluãwã duwe rekuaty wywy, chope wedja mimbyrã cho etakrãpe. Cho etakrãpe cho ĩllãwerã, cho Apã rõ cho djãwẽwã. 33 Kowe djawu wywy rupi cho inama pendjepe pendje okryrawã. Pendjepe byllã rekopyrã kowe ywy llabu; pendjepe byllã rekobu krymballãeme, kowe ywy puagi ĩma cho ipope, Andjãwẽ, dja ymachidjagi emi.

Juã 17

1 Jesu dja kuere mudjãndygi wywype djawu krãpĩmbabu, maĩma ywadji, inama emi: Cho Apã, rypyllãma cho owã dje djãwẽ. Djapo mondo dje chidja rupi ache wywy wechãwã cho rõ chidja gatu, go nonga emi cho djapowerã gogi wywy wechãwã dje rõ chidja gatu emi. 2 Dje rõ chope meare chidja gatu cho rekopawã ache wywy cho ipope, cho mewã cho kuere mudjãndygi wywype ĩwã gorãwẽ dje djãwẽ. Gogi wywy rõ dje mewe chope. 3 Ache wywy gorãwẽ ywadji llambarã dje djãwẽ, djedji kua gatubu dje etakrãeche rõ Apã Wachu ka inallãechegi, chope emi kua gatubu cho rõ Krito, dje prawowegi, dje buewegi kowe ywype. 4 Cho djapoma gogi wywy wechãwã dje rõ chidja gatu, cho djapopa buare dje inawe nonga chope. 5 Kowebu cho Apã, memba gami go chidja gatu cho rekowe dje djãwẽ cho ĩware go ywy djapo nondje. 6 Go ache dje matãwegi dje mewegi chope ache wywy byche pua, gogi wywype cho kiu gatuma awa rõ dje. Gogi wywy dje llapowe, dje mewe chope emi, gogi wywy rõ djapoma dje djawu. 7 Kowebu gogi wywy kuama bue wywy dje llapowe, dje rõ membawe chope, 8 cho kiuware dje djawu gatu gogi wywype dje inawe nonga chope, go buare gogi wywy wendu gatuma. Gogi wywy kuama, kua gatuma emi dje rõ chope bueare ywadjiware. 9 Cho pukama djepe cho Apã, cho wedjapama dje ipope cho kuere mudjãndygi wywy, cho pukallã djepe, cho Apã, ache wywy cho kuere mudjãllãngidji. Go dje mewegi chope godji rõ cho puka reko, gogi wywy rõ dje llapo. 10 Go cho llapo rõ dje llapo emi, go dje llapo rõ cho llapo emi; cho chidja gatu wechãmbama cho kuere mudjãndygi wywy rupi. 11 Cho ĩmbechewerãma kowe ywy llabu cho owerãdjiwa dje endape; Cho kuere mudjãndygi wywy rõ ĩwerã wyche kowe ywy llabu. Go buare cho pukama djepe, cho Apã praru gatugi, kuwẽ ga reko gogi wywype go chidja chope dje mewe rupi, gogi wywy ĩ gatuwã pichadji, nandje ĩ gatu nonga emi edji. 12 Cho ĩware gogi wywydji kowe ywy llabu, cho kuwẽ reko gogi wywype dje chidja gatu rupi chope dje mewegi, etakrã kandjãllã cho kuere rupi. Juda etakrãeche rõ kandjãma cho kuere ka mudjãre buare. Go nonga wẽma Apã Wachu djawu parapyrepe inawe nonga Judadji. 13 Kowebu cho owerã emi dje endape, cho o nondjemi ywadji cho inama kowe nonga, gogi wywy ury gatu rekowã go cho ury gatu nonga. 14 Cho kiuwe dje djawu gatu gogi wywype, go buare ache wywy byllã reko gogi wywydji. Gogi wywy djapollãma ache wywy bue buchã djapoty nonga, cho ache wywy nongallã emi. 15 Cho pukallã djepe dje rawã cho kuere mudjãndygi wywype kowe ywy llabuware, cho pukama djepe kuwẽ rekowã gogi wywype, emi bue buchã djapoatygi djapo buchãllãwã gogi wywydji. 16 Cho rõ ache wywy nongallã, go nongama emi cho kuere mudjãndygi wywy ache wywy nongallãma. 17 Dje djawu gatu rõ ka inallãndy; djapo mondo gogi wywy wendu gatuwã dje djawu gatu, kua gatuwã djedji emi. 18 Dje chope buewe nonga ache wywy bychepe, go nonga emi cho buema mondo gogi wywype ache wywy bychepe. 19 Gogi wywy puarã cho eche mimbama dje ipope, cho djapopama mondo emi dje inawe nonga, gogi wywy emi miwã dja eche dje ipope dje djawu gatu rupi. 20 Cho puka djepe gogi wywydji, cho pukama emi djepe duwegi wywy kua gatuwerãngidji gogi wywy kiu rekobu. 21 Cho pukama djepe gogi wywy ĩ gatuwã pichadji; nandje ĩ gatu nonga edji, gogi wywy ĩ gatuwã nandjedji emi. Gogi wywy go nonga djapobu ache wywy kua rekowã dje rõ chope bueare. 22 Dje chope chidja gatu mewedjiwa, cho mema emi chidja gatu gogi wywype, gogi wywy ĩ gatuwã pichadji, nandje ĩ gatu nonga edji. 23 Go nonga, cho Apã, cho ĩ gatu cho kuere mudjãndygidji, dje ĩ gatu nonga emi chodji, go nonga djapo gatuechema ache wywy kua rekowã dje rõ chope bueare, dje prawo gatudjiwa gogi wywype, dje chope prawo gatu nonga. 24 Cho Apã, dje rõ meare cho kuere mudjãndygi wywy cho ipope, cho ra djue gogi wywype cho llambarãpe cho djãwẽwarã, gogi wywy wechãwã dje chidja gatu chope mewedjiwa, dje chope prawodjiwa kowe ywy ĩ nondje. 25 Cho Apã, dje rõ djapo kbeigatuechegi, ache wywy kuallã djepe; cho rõ kua gatu djepe, kowebu cho kuere mudjãndygi wywy kuama emi dje rõ chope bueare. 26 Cho kiu gatuma gogi wywype awa rõ dje, cho kiu rekõwerã wyche gogi wywype ĩ gatuwã chodji, gogi wywy prawo gatuwã pichape, nandje prawo gatu nonga edji.

Juã 18

1 Gobu Jesu krandobuã krãpĩmbabu, oma dja kuere mudjãndygidji ywy tyrõmbyre gatu llambatype, Sedrõ ypurã embedji. 2 Juda, go Jesupe mewãngi, go rõ kua emi go ywy tyrõmbyre gatu llambaty rõ Jesu nuãndy dja kuere mudjãndygidji. 3 Gobu Juda gope wẽ roma bu Roma pua ymachidja tõ allãngi wywydji, ekõmbama emi go rupi prellambaty warõandygi wywy, pa'i ymachidjagi buewe, fariseo buewe emi. Gogi wywy tõ mũmbuwã nonga roma bu, rama djampẽ wywy, kripi chapi wywy emi dja ipope. 4 Jesu kuama bue rõ idjadji wẽwã, go buare pranduma gogi wywype: —Awape rõ pendje kuara? 5 Gogi wywy inama Jesupe: —Jesu Nasare puatygipe. Jesu inama gogi wywype: —Guei cho. Juda, go Jesupe mearegi, go ymachidja tõ allãngi wywy djãwẽwa emi. 6 Jesu inambu gogi wywype: “Guei cho” gogi wywy chã opo roma, ywype wapa roma djo. 7 Gobu Jesu pranduma wyche gogi wywype: —Awape rõ pendje kuara? Gogi wywy inama wyche: —Jesu Nasare puatygipe. 8 Gobu Jesu inama gogi wywype: —Cho ina gatuma pendjepe, guei cho. Chope pendje kuarabu, kowe cho kuere mudjãndygi wywype pychyeme. 9 Go nonga wẽ roma bu Jesu inawe nonga: “Cho Apã mewegi chope cho kuere mudjãwãngi, gogi wywy kandjãmbeche cho ipo pua.” 10 Gope Simõ Pedro pẽ buku reko, gobu mondoma mondo pa'i ymachidja wachu buetygi nambi llu rekoatywa, idja bykuapyre rõ Malko. 11 Jesu inama Pedrope: —Pypy mondo dje pẽ buku dja endawepe. Dje kuallã ko chope byllã rekopyrã cho Apã inawe nonga chope? 12 Gobu tõ allãngi ymachidjagi, tõ allãngi wywy emi prellambaty warõandygi wywy, pychyma Jesupe, dja ipo muchã romami. 13 Gobu rama Jesupe Anas tapype, go rõ Kaifa djywẽ, go ruybu Kaifa rõ pa'i ymachidja wachugi. 14 Go Kaifa rõ inawe judio ymachidjagi wywype, kbeigatuwerã etakrã kbe'e manombu duwegi wywydji. 15 Simõ Pedro, duwe Jesu kuere mudjãndygi emi mudjãma Jesu rupi. Go duwe Jesu kuere mudjãndygipe kua gatu pa'i ymachidjagi, go buare pypyma mondo Jesu rupi pa'i ymachidjagi wywy djãwẽ. 16 Pedro maĩ reko tokape tapy djãwã embe djãwẽ. Gobu duwe Jesu kuere mudjãndygi djawuma go kudjã tapy djãwã pecheatygipe pypywã Pedrope. 17 Gobu kudjã tapy djãwã pecheatygi pranduma Pedrope: —Dje ko Jesu kuere mudjãndygi? Pedro inama kudjãpe: —Amaĩ cho. 18 Ruyma gobu, go buetygi emi prellambaty warõandygi wywy tata mendymami gope, gope puã ni tata djãwẽ. Pedro gope roma djo emi gogi wywy djãwẽ. 19 Gobu pa'i ymachidja wachugi pranduma Jesupe awa rõ dja kuere mudjãndygi wywy, bue rõ dja kiuty emi. 20 Jesu inama gogipe: —Cho djawuty ache wywy chã ruwa; cho kiu rekoty Sinagoga wywy rupi, emi prellambatype, go rõ ache wywy Irael pua noã endaty. Cho djemillã cho djawu rekobu. 21 Buerã dje prandu cherã chope? Prandu gami go cho djawu wenduaregipe, inawã pendjepe go cho kiuwe nonga. Gogi wywy kua gatu go cho kiupawegi. 22 Inambu Jesu kowegi, etakrã ymachidja prellambaty warõandygi go pua, pachoma Jesu chãdji inama Jesupe: —Buerã dje djawu cherã go nonga pa'i ymachidja wachugipe? 23 Gobu Jesu inama: —Go cho djawuwe buchãmbu, kiu gami chope. Go cho djawuwe kbeigatubu, buerã dje pacho cherã chope? 24 Gobu Anas buema mondo Jesu ipo muchãmbyredji pa'i ymachidja wachugi Kaifa chã ruwa. 25 Gobu Pedro puã ni tata djãwẽ, go pua duwegi pranduma Pedrope: —Guei ko dje Jesu kuere mudjãndygi? Pedro ka inama emi: —Amaĩ cho. 26 Gobu pa'i ymachidja wachu buetygi, go kbe'e nambi mondopyregi irondydjiwa, inama Pedrope: —Cho wechãre djepe Jesu djãwẽ ywy tyrõmbyre gatu llambatype. 27 Pedro ka inama emi kuallã kura Jesupe. Gobu urupurã chingama. 28 Gobu pa'i ymachidjagi wywy rama Jesupe Kaifa tapy puare go ymachidjagi Roma pua Pilato chã ruwa. Gobu koẽpadjema, go buare judio wywy ikẽllã ymachidjagi Pilato tapype, Moise parawe inawe nonga djapowã: go ache judiollãngi tapype ikẽmbu Pakua nondjemi djapo buchãma, go nonga djapobu pakua bakupyredjiwa ullãwerã. 29 Gobu Pilato wẽma tokape djawuwã gogi wywype, inama: —Bue rõ pendje djawu buchã cherã kowe kbe'edji? 30 Judio wywy inama Pilatope: —Kowe kbe'e bue buchã djapollãmbu ore erullã rawe dje chã ruwa. 31 Gobu Pilato inama gogi wywype: —Kowe kbe'epe ra ga mondo, idjape pendje djapowã pendje parapyre miwe nonga. Judio wywy ymachidjagi inama Pilatope: —Moise parapyrepe ina: “Pichape djukaeme.” Ore djukallãwã idjape. 32 Go nonga wẽma Jesu inawe nonga idja manowerãdjiwa. 33 Pilato ikẽma emi tapy djãwãpe, pukama Jesupe, gobu pranduma: —Dje ko judio wywy ymachidja wachugi? 34 Jesu pranduma emi Pilatope: —Dje etakrã ko djawu go nonga, duwegi ko djepe djawuma chodjiwa? 35 Pilato inama Jesupe: —Djeba ina cho judio kura. Go judio wywy dje ekõandy pua, pa'i ymachidjagi wywy emi, djepe meare cho ipope. Bue rõ dje djapowe? 36 Gobu Jesu inama Pilatope: —Cho rõ kowe ywy pua ymachidjagi nongallã. Cho pendje nonga ymachidjabu, cho djãwẽwatygi wywy djepy rawe chope mellãwã judio wywy ymachidjagi ipope. Cho Llambaty ĩllã kowe ywype. 37 Gobu Pilato inama Jesupe: —Guei ko dje ymachidjagi? Jesu inama Pilatope: —Dje rõ ina cho ymachidja wachugi. Cho inallã. Cho opo endawe kowe ywype kiuwã bue ka inallãdjiwa. Go ka inallãdjiwa djapogi, go rõ cho djawu wendu gatu. 38 Pilato pranduma Jesupe: —Bue rõ ka inallãngi? Go nonga kiupabu Pilato wẽma emi tokape, inama judio wywype: —Cho wechãllã kowe kbe'edji dja bue buchã djapowe. 39 Pendje reko pendje djapoty nonga pakua nondjemi pendje puka chope puiwã etakrã kbe'e tapy djãwãllã pua. Cho puiwerã ko judio wywy ymachidja wachugipe? 40 Gogi wywy puka chidjama emi: —Go kbe'epe puieme! Barrabape ga pui mondo! Go Barraba rõ bue buchã djapotygi.

Juã 19

1 Gobu Pilato inama Jesupe pachowã. 2 Gobu tõ allãngi pypymami Jesu tõdji awã achĩdjiwa djapopyre. Pypymami emi Jesu echedji tyru pirã pukugi. 3 Gobu pachoma Jesu chãdji, djudjama reko idjadji: —Kowe rõ judio wywy ymachidjagi! 4 Pilato wẽma emi tokape, inama emi judio wywype: —Maĩ gami, kowe kbe'e cho eruma tokape pendje wechãwã, pendje kuawã emi cho bue buchã wechãllã idjadji. 5 Gobu Jesupe nuẽma tokape, awã achĩdjiwa djapopyre eruma idja tõdji, tyru pirã puku dja echedjiwa. Gobu Pilato inama judio wywype: —Maĩ kowe kbe'e! Cho djonoma pendje chã ruwa! 6 Gobu pa'i ymachidjagi wywy, prellambaty kuwẽandygi wywy emi Jesupe wechãmbu, puka chidja reko: —Gogipe djuka mondo wyra wachapyredji! Gogipe djuka mondo wyra wachapyredji! Pilato inama gogi wywype: —Cho djullã kowe kbe'edji bue buchã. Pendje ga ra idjape djukawã. 7 Go judio wywy inama Pilatope: —Oredjiwa djypyware djawu parapyrepe ina, kowe kbe'e manowerã, idja inawedjiwa “Cho rõ Apã Wachu ray.” 8 Pilato go nonga wendubu krymballã buchã roma ni; 9 ikẽma djo emi tapy djãwãpe, pranduma emi Jesupe: —Matyware rõ dje? Jesu djawubechema Pilatodji. 10 Gobu Pilato inama Jesupe: —Buerã chope dje djawullã? Dje kuallã ko cho rõ ymachidja wachu, cho reko chidja djukawã djepe wyra wachapyredji, djepe puiwã emi? 11 Jesu inama Pilatope: —Dje ĩllã rawe ymachidjagi Apã Wachu djepe millãmbu. Go buare, go chope mearegi dje ipope go rõ bue buchã djapo buchãechema, dje rõ bue buchã djapo prowi gogidji. 12 Gobu Pilato kuara reko manonga Jesupe puiwã; go judio wywy puka chidja reko, inama: —Dje puibu Jesupe dje bygatullã Sesarpe, ymachidja wachu Roma puagi! Ache inambu “cho rõ ymachidjagi,” go rõ Roma pua ymachidja wachu byllãndygi! 13 Pilato wendubu go nonga djawu, nuema mondo Jesupe tokape, wapyma ymachidjagi wapy endatype, go llambaty bykuapyre rõ Gabata, hebreo djawupe inambyty “Go llambaty itadjiwa chepepyre.” 14 Krey ywa roma, go duwe kreybu Pakua wẽwerã. Gobu Pilato inama judio wywype: —Cho eruma pendje ymachidjagi pendje chã ruwa! 15 Gogi wywy puka chidjama emi: —Llu! Amaty ra! Amaty ra! Djuka ga mondo wyra wachapyredji! Pilato pranduma judio wywype: —Choba djukawerã pendje ymachidjagipe wyra wachapyredji? Go pa'i ymachidjagi wywy inama Pilatope: —Etakrã ĩ ore ymachidja wachugi go rõ Sesa Roma puagi. 16 Gobu Pilato mema Jesupe gogi wywy ipope wyra wachapyredji djukawã. 17 Jesu wẽma o tokape djachima ra wyra wachapyre, go Golgota rekoaty, Hebreo djawupe inambyty “tõ gape endaty.” 18 Gope upima Jesupe wyra wachapyredji. Upima emi mirõ kbe'e edjãwẽ, etakrã kbe'e dja llachu rekoatywa duwe kbe'e dja llu rekoatywa, Jesu go byche pua. 19 Pilato inama mondo duwegipe parawã wyra chepe mini, miwã wyra wachapyre akãdji, gope ina: “Jesu Nasare pua, judio wywy ymachidja wachugi.” 20 Tãrã go judio wywydjiwa maĩ reko go parapyredji, gogi wywy rypyllã buare Jesu djuka endawedji. Go djawu parapyre brewipychã djawupe: Hebreo djawu, Griego djawu, Latĩ djawupe emi. 21 Go buare pa'i ymachidjagi wywy inama Pilatope: —Mĩeme go nonga “Judio wywy ymachidja wachugi.” Kowe nonga ga mi’ĩ: “Kowe kbe'e ina buare idjadji, cho rõ judio wywy ymachidja wachugi.” 22 Pilato inama gogi wywype: —Go parapyre cho parawe, go nonga cho wedjama. 23 Go tõ allãngi wywy upibu Jesupe wyra wachapyredji, matãma Jesu tyruwe, mondoma mondo bycheradji chengypychã tõ allãngi llaporã. Matãma emi Jesu echedjiware tyru puku; go tyru puku budjapyrellã buare, 24 go tõ allãngi wywy djawuma reko edji: —Kowe tyru puku mondoeme, nandje djapi buãwerã awa llaporã rõ kowe. Go nonga wẽma Apã Wachu djawu parapyrepe inawe nonga: Cho tyruwe mondopapyrã, djapi buãmbyrã emi cho tyru pukudji. Go nonga djapoma tõ allãngi wywy. 25 Wyra wachapyre Jesu manowe apodji ĩwe idja ei'i Maria, idja ei'i pawe tywypurã Maria, Kleofa breko, emi Maria Magdalena. 26 Jesu wechãmbu idja eipe ĩmbu dja kuere mudjãndygi dja prawo gatutygi djãwẽ, inama idja eipe: —Cho ei'i, dje djãwẽwa ĩngi dje memby. 27 Gobu emi inama dja kuere mudjãndygipe: —Dje djãwẽwa ĩngi dje ei'i. Gobu Jesu kuere mudjãndygi edji rama Mariape dja tapype. 28 Kowe wẽmbabu, Jesu kuama dja Apã inandy nonga djapowã, go djapopama. Go nonga, Apã Wachu djawu parapyrepe inawe nonga wẽmbawã, Jesu inama go nonga: —Cho ywe, cho y tyku djue. 29 Gope ĩ etakrã birupe chipopurã lla ty iro buchã, gope bue pirymami chipopurã lla ty iro buchãpe, muchãma takua pytadji budjamami Jesu djurudji. 30 Jesu chipopurã lla ty iro buchã tykubu inama: —Cho djapopama cho Apã inawe nonga chope. Gobu tõ wama manoma emi. 31 Go krey Pakua wẽ nondjemi, judio wywy wechã djuellã go wywy echewe wedja wyra wachapyredji bue djapollãndy kreybu, go bue djapollãndy kreybu rõ wẽwerã Pakua. Go buare pukama Pilatope go wywy kmakã kiowã, rudjywã emi wyra wachapyredjiware. 32 Oma tõ allãngi wywy, go Jesu djãwẽwa upipapyregi kmakã kioma mondo. 33 Ekõmbu Jesu djãwẽ wechãma Jesu manoma, go buare idja kmakã kiollã. 34 Go kmakã kiollã buare duwe etakrã tõ allãngi pychoma Jesu rukãdji pẽ bukupe, gobu pirã emi y wẽ roma bu. 35 Cho, Juã rõ kowe wechãregi pendjepe kiu gatuma. Cho rõ ka inallã, cho kua gatu cho inawe rõ ka inallã, pendje emi kua gatuwã. 36 Kowe bue’e wẽma Apã Wachu djawu parapyrepe inawe nonga: Kiollãmbyrã idja ikã etakrã djepe. 37 Ina emi Apã Wachu djawu parapyrepe: Gogi wywy wechãwerã go pychopyregipe. 38 Gobu Jose, Arimatea tapy tãrã puagi, pukama Pilatope rudjywã Jesu echewe. Go rõ djemipe Jesu kuere mudjãma, krymballãdjiwa judio wywy ymachidjagidji. Pilato mema gogipe, gobu Jose oma, rama Jesu echewe. 39 Nikodemo emi, go rõ chãwãmbu ekõaregi Jesu endape, eruma emi tãrã bue teywu gatugi, mirra aloedji budjapyre. 40 Gobu Jose, Nikodemo upima Jesu echewe piypama mondo Jesu echewedji bue teywu gatu, tyru puku idju gatu purapamami godji, judio wywy djapoty nonga manowegidji. 41 Go Jesu upi endawe djãwẽ, gope ĩ puty gatu wywy, gope ĩ emi ita ikua wyko mimbyre, manowegi wywy gope pechellã wyche. 42 Gope pechemami Jesu echewe, go ita ikua rõ rypyllãdjiwa, wẽ ruwyma emi bue djapollãndy krey’y.

Juã 20

1 Go bue djapollãndy krey krãpĩmbu, go domingo Maria Magdalena oma manowe endatype kuẽ upabechemi, chãwã wyche emi obu ape rupi, gobu wechãma ita pechepyre manowe pua peka roma ni. 2 Gobu kudjã myrõ roma djo Simõ Pedro endape, emi duwe Jesu bygatutygi endape, go rõ dja kuere mudjãndygi emi. Kudjã inama: —Jesu echewe ita djãwã puare rama mondo, ore kuallã maty rõ ĩ enda idja echewe. 3 Gobu Pedro emi duwe Jesu kuere mudjãndygi wẽ roma djo go manowe endatype. 4 Mirõ edji myrõ roma ra; go duwe Jesu kuere mudjãndygi myrõ takuã, nondje wẽ roma djo manowe endatype, dja kuere rupi Pedro wẽ roma bu. 5 Gobu ita djãwãdjiwe maĩma manowe endatype, go wechãma gope tyru Jesu echewedjiware djuwãmbyregi. Idja ikẽllã ita djãwãpe. 6 Idja tãpĩ rupi ekõma Simõ Pedro ikẽ roma djo ita djãwãpe, manowe endatype, idja emi wechãma tyru Jesu echewedjiware djuwãmbyregi; 7 Pedro wechãma emi go tyru Jesu tõdjiware puwãmbyregi ĩllãma go tyru djuwãmbyregidji, puwã gatupyre mima duwe rekuaty. 8 Gobu duwe Jesu kuere mudjãndygi ita djãwãpe ikẽma emi. Go wẽmbywe nondje manowe endatype, go wechãmbu bue wywy gope, kua gatuma. 9 Go wẽ nondje kuallãwe Apã Wachu djawu parapyrepe inambyrema Jesudjiwa, idja puãwerã manowe byche puare. 10 Gobu mirõ Jesu kuere mudjãndygi djewyma emi idja tapype. 11 Maria Magdalena ita djãwã embe djãwẽ ĩ tokape, chinga ekõ manowe endaty embedji, go chinga ekõmbu maĩma ita djãwãdjiwe go manowe endatype. 12 Gobu wechãma mirõ Apã Wachu buepytygipe tyru idju gatu wapy ĩ Jesu manowe endawepe; etakrã ĩ Jesu tõ miwe rekuaty, duwe emi ĩ Jesu pychã miwe rekuaty. 13 Gobu Apã Wachu buepytygi pranduma kudjãpe: —Kudjã, bue rõ dje chingaty? Gobu kudjã inama mondo: —Duwe ache rama enda cho Rekoatygi echewe, ore kuallã maty rõ enda. 14 Go kudjã djawupabu, djerebu dja pyche rekuaty wechãma Jesu gope ĩ, go kudjã kuallã go rõ Jesu. 15 Gobu Jesu inama kudjãpe: —Kudjã, bue rõ dje chingaty? Awape rõ dje kuaraty rã? Maria tõ djawu reko kbe'e manowe wãrõandygidjiwa kura, go buare Maria inama: —Ymagi, dje rawe mirõrã Jesu echewe, kiu gami chope maty rõ enda Jesu echewe cho owã eruwã. 16 Gobu Jesu inama: —Maria! Maria Jesupe maĩ gatubu, inama Hebreo djawupe: —Raboni! (Go inambyty “kiuatygi”). 17 Gobu Jesu inama: —Cho eche pokoeme, cho ollã wyche cho Apã endape ywadji. Kowebu o ga mondo kiupawã cho pawe wywype, cho owãdjiwa ywadji cho Apã endape, go rõ emi pendje Apã. Go rõ cho Apã Wachu, pendje Apã Wachu emi. 18 Gobu Maria Magdalena oma kiupawã Jesu kuere mudjãndygi wywype, go idja wechãwedjiwa Jesupe, emi kiuma mondo Jesu inawe nonga idjape. 19 Go domingo krey etakrã chãwãmbu, Jesu kuere mudjãndygi wywy noã roma ĩ. Go tapy djãwã peche gatumami krymballãdjiwa judio ymachidja wywydji. Gobu Jesu wẽ roma bu dja kuere mudjãndygi wywy bychepe, gobu Jesu djawu gatu mema: —Okryra gatu ga mi! 20 Dja inambabu, idja ipo emi idja rukã baycha romami. Gobu dja kuere mudjãndygi wywy ury gatuma wechãmbu dja Rekoatygipe. 21 Gobu Jesu inama emi: —Cho okryra gatu mema pendjepe! Cho Apã buewe nonga chope, cho buewerã emi pendjepe. 22 Gobu pedjuma dja kuere mudjãndygi wywype, inama emi: —Cho mema Krei Gatu pendje djãwẽwarã: 23 Pendje kuwẽmbu pichape bue buchã djapowedjiwa, Apã Wachu emi kuwẽwerã pendjepe. Pendje kuwẽllãmbu, Apã Wachu emi kuwẽllãwerã pendjepe. 24 Toma rõ go etakrã mirõdjiwa Jesu kuere mudjãndygi go rõ pukapyre “tãrãdjiware opowe”, go ĩllã dja djãwẽwatygi wywydji go Jesu ekõ buare gogi wywy bychepe. 25 Gobu duwe Jesu kuere mudjãndygi wywy inama Tomape: —Ore wechãma nandje Rekoatygipe! Gobu Toma inama mondo: —Cho wechãllãmbu dja ipo beta pachopyre, emi cho pokollãmbu dja ipo beta endawe, cho pokollãmbu emi idja djukã pychopyrepe, cho kua gatullãwerã. 26 Chãtapa krey wachabu, Jesu kuere mudjãndygi wywy noãma emi tapy djãwãpe, gope Toma ĩma emi dja djãwẽwatygi wywydji. Go tapy djãwã peche gatupyre, gobu Jesu wẽ roma bu go wywy bychepe, dja djawu gatu mema: —Okryra gatu gami! 27 Gobu Jesu inama Tomape: —Maĩ gami cho ipo beta endawe pypy ga mondo dje ipo cho ipodji beta endawepe, pypy ga mondo emi dje ipo cho djukã berakua endawepe. Dje kua gatu djuellã endawe; kowebu kua gatu ga mondo! 28 Gobu Toma inama: —Dje rõ cho Rekoatygi, cho Apã Wachu emi! 29 Gobu Jesu inama idjape: —Toma, dje kua gatuma chope wechã buaredjiwa. Ury gatuwerã chope kua gatugi chope wechãllãwedjiwa. 30 Jesu bue tãrã djapoma wechãllãmbytygi dja kuere mudjãndygi chã ruwa, go duwe wechãllãndydjiwa parallãmbyre kowe Apã Wachu djawupe. 31 Kowe rõ mimbyre pendje kua gatuwã Jesu rõ Mesia, go rõ Apã Wachu tey dja prawowe, pendje kua gatubu idjape pendje gorãwẽ ywadji llambarã Apã Wachu djãwẽ.

Juã 21

1 Go kowe bue wywy krãpĩmbabu, Jesu wẽ roma bu dja kuere mudjãndygi wywy chã ruwa Tiberia pua ypa embedji. Kowe nonga wẽma: 2 Gope edji wywy ĩ, go rõ Simõ Pedro, Tomas go rõ tãrãdjiware, Natanael go rõ chupa Kana puaty Galilea pua, Santiago emi Juã go rõ Sebedeo tey’y, duwe mirõ go Jesu kuere mudjãndygi emi. 3 Gobu Simõ Pedro dja djãwẽwatype inama: —Cho owerã pira nuewã. Gobu gogi wywy inama emi: —Ore owerã emi dje rupi. Edji wywy djopi roma djo wyrakarape; go chãwãmbu pira nuebeche. 4 Go kuẽmpadjebu, Jesu ypa embedji wẽmbu, dja kuere mudjãndygi kuallã awa rõ go. 5 Gobu Jesu pranduma: —Cho bygatutygi, pendje pira nuellã ko? Gobu gogi wywy inama: —Ore nuebeche. 6 Jesu inama gogi wywype: —Wyrakara llu rekuaty ity mondo pira matãndy pira nuewã. Gobu ityma mondo pira matãndy, pira tãrã buchãdjiwa puy djuka roma reko pira matãndy matã rekobu. 7 Gobu Jesu kuere mudjãndygi go bygatupytygi inama Pedrope: —Guei Jesu, nandje Rekoatygi! Simõ Pedro wendubu go rõ Jesu, idja tyru pypyma mondo idja echechedji ĩ buare, gobu ype wa roma djo. 8 Duwe dja kuere mudjãndygi wywy pira matãndygi embeche eru wyrakarape ypa embedji, ĩ buare rypy prowi ypa embedji. 9 Wyrakara puare edjypabu wechãma tata mendypyre ypa embedji, etakrã pira kaĩmbyre tata llabuwa, wikytã emi. 10 Gobu Jesu inama gogi wywype: —Eru gami duwe pira krewa pendje nuewe. 11 Simõ Pedro djopi roma emi wyrakarape pira matãndygi eruwã tokape, go pira matãndype pira wachu tãrã: etakrã ipo brewipychã (153) roma ĩ, pira tãrã buchã djepe ochollã pira matãndy. 12 Jesu inama gogi wywype: —Krey wẽma ekõ gami bue uwã. Dja kuere mudjãndygi prandullã idjape awa rõ go, kua gatudjiwa go rõ Rekoatygi. 13 Gobu Jesu wikytã emi pira kawãma, go wywype mema emi. 14 Jesu rõ brewipychã wẽma dja kuere mudjãndygi chã ruwa manowedjiware wẽmbu. 15 Go bakupyre upabu, Jesu pranduma Simõ Pedrope: —Simõ, Jona ray, djeba chope prawo gatuwe kowe wywygidji? Gobu Pedro inama: —Go nonga, cho Rekoatygi, dje rõ kua gatu cho prawo gatu djepe. Jesu inama idjape: —Kuwẽ ga reko cho kuere mudjãndygi wywype go wywy rõ wachupurã nonga! 16 Gobu Jesu pranduma mondo emi idjape: —Simõ, Jona ray, djeba chope prawo gatu? Pedro inama Jesupe: —Go nonga, cho Rekoatygi, dje kua gatu cho prawo djepe. Jesu ina wyche idjape: —Chope prawobu, kuwẽ ga reko cho kuere mudjãndygi wywype, go wywy rõ wachupurã nonga! 17 Gobu Jesu brewipychãma pranduma wyche reko idjape: —Simõ, Jona ray, djeba chope prawo gatueche? Gobu Pedro uryllã roma ĩ, idjape brewipychã prandu reko buare Jesupeba prawo. Gobu inama Jesupe: —Cho Rekoatygi, dje rõ kua gatu bue wywy. Dje rõ kua gatu emi cho prawo djepe. Jesu inama idjape: —Kuwẽ ga reko cho wachupurã wywype. 18 Dje kbuchuware, dje tyru pypywe dje wata djue rekuaty dje owe. Cho ka inallã djepe, dje chuebu dje djywa pouwerã, duwe dje tyru pypywã, djepe rawerã emi dje o djuellã rekuaty. 19 Kowe nonga ina Jesu, kuawã manonga rõ Pedro manowerã, go nonga emi ache wywy kua gatu rekowã Apã Wachupe. Jesu djawu krãpĩmbu inama Pedrope: —Cho rupi ga ekõ. 20 Pedro dja pyche rekuaty maĩmbu wechãma Jesu bygatupytygi o endawe emi gogi wywy kuere rupi. Go rõ Jesu djãwẽ wapy endawe pakuadjiwa bakupyre uware, go rõ Jesupe pranduare emi: “Ore Rekoatygi, awa rõ go duwe ipope djepe mewãngi?” 21 Pedro wechãmbu Jesu bygatupytygipe, pranduma Jesupe: —Cho Rekoatygi, bue rõ dje bygatupytygidji wẽwerã? 22 Gobu Jesu inama Pedrope: —Cho membu idjape ekõ bukuwã ywadjiware cho ekõmbu emi, buerã dje kua cherã? Dje ga, ekõ mondo cho kuere rupi. 23 Go kowe djawu wendubu Jesu kuere mudjãndygi wywy ina idja djãwãpe go Jesu bygatupytygi manollãwerã. Jesu inallã Pedrope dja bygatupytygi manollãwerã. Go nonga Jesu inawe: “Cho membu idjape ekõ bukuwã ywadjiware cho ekõmbu emi, buerã dje kua cherã?” 24 Go Jesu kuere mudjãndygi go bygatupytygi rõ kowe djawu inambare, dja parawe emi. Nandje kua gatuma kowe wywy rõ ka inallã. 25 Tãrã buchã ĩ wyche duwe bue wywy Jesu djapopawe kowe parapyrepe ĩllã. Parapabu bue wywydjiwa, cho kua gatu ĩllãwerã kowe ywy llabu go parapyre wywy endarã. Go.