TADICATAPOA AI DIA EAHUIQOIBOPO BIYOPO (Jénesi 1,2)

Dia eabetsotacatapo tseiñeo Tadicatapoa baepa, eohua eimea. Datsio eohuamo enaja bídyiloa pehue. Patai-apoda pome pehue epo, zeti, badi, tóhuaicana tsá-aihue pojo. Batso joda mimi: "Amae potaesahua." Atao, amae poíbo. Huada da dia eanipo ajaí eba. Da amaepomo "tseiñe papo" ea. Apodapomo "sisa papo" ea. Eabetsotapo tseiñeomo daocua pehue ea.

Hueno-isha dipa mimi: "Ena ma-ai baepao jataesahua." Atso huada ena ma-ai baepao eahuiquibo.

Hueno-ishamo dipa mimi: "Ena matsi-i pehue pajá. Datsihue-isha zada poi papo." Dipa mimio dia poánaibo. Da dipa apetso bisha dipa mimi: "Eiye, acuicana eohuao paponeti. Jajaipoípocana paponeti. Janacana paponeti." Dipa mimio acuicana, janacana dáocuacuahue neti pódada epo. Da dia eanipo ajaicata eba, Tadicatapoa.

Hueno-ishamo dipa mimi: "Amae poípocana baepao pa-ani, huada eohua pabiamaenetitapojo." Dipa huada zeti, badi, tóhuaicana imeame ea. Tseiñe amae papopojomo zeti dia a. Sisa amaemasha papopojomo badi, tóhuaicana dia ea. Dipahue badimo, tseiñetopoi poi ea. Dipa apetso da dia eanipocana ajaicata eba.

Hueno-ishamo dipa mimi: "Jaecana paneti, enao jáipocaha enao paja. Bónicana baepa emae paponeti." Dipa huada enaopocana imeame ea, bonicana imeame ea. Dipa imeanae huada jodacana ecuae: "Mesasatique. Ezoecana apamo meaque" ea.

Hueno-ishamo dipa mimi: "Eohuao huáenieana, tenaicana papoja." Dipa atso, huada mezimetse dácana eimeape. Dipa apetso huada dácana jaidyacata eba. Dipa atso, joda, hua todinae, shama jaidyaponae cana dipa mimi: "Cuádaja cuada batahue-ishapo imeatsobale. Tsédapocana imeatsobale, huada eohuao, huáenieana, bonicana, jáecana pacuiñatapojo." Potsohue huada tata peadahue eimea, mezimetse. Atso, huada joda jánamiquimehue ea. Eizeneti metso, "Adana" bánime ea. Joda Tadicatapo batahue masha cuaeso pocuae. Tadicataponae mimimane. Atso, Tadicatapoa lele jaidyacuemepo me-a, tata Adana poi. Edene eiyeo, manolaijiyo dia ea. Jodo janacana acuijajacana dáocuacuahue póneti pódada me-a. Lele doeteo, netimatamahue poípo acui peadahue ea. Dipahue dápejo jaidya poípocana masahue poípocana nimebamane poípo acui peadahue ea. Atso, huada tata Adana do nétime, huada joda lele pabiabatapojo. Dipa atso, dipa nime ea: "Tata Adana pehue netitsomo ajái pipoma." Dipa atso, Tadicatapoa huáenicana, ténaicana, bonicana Adananajo dócuaiñape. Docuaiñapetao, Adanaja jodacana bánipe. Hua eatsahuai poi jaipicatapomo bale tsa-ai. Dipa batso, Tadicatapoa Adana tahui-anamepasitso pé-atsa peadahue méjemi. Jodá pe-atsametse mama ea. Atso, huada joda Adana etia. Joda mama eimeatini batso Adana dipa mimi: "Ojomo quima etsoámetse, quima emimetse eimeatanipo. Ojomo 'mama' jejeme pó-ani, Tadicatapoa tataja pé-atsametse dia eatani batso" tata Adana epo.

Tadicatapoa dipa ea batso aisé tata, mama jemiquitso, huada huadi tadi méiyamasha, huánenae pehue panetidyea-ezae. Dipa huanei poánitsio peadahue cuicha poi batahue poanamane.

Tata Adanaja huahuane "Eba" bánime ea. Huatseda cuíchahue bime pibisoma, ai masahuepo pibabama pojo.

Tsio, Tadicatapoa huatseda dipa cuaeme ea: —Huócuatiyoa mepoque, eohua-idyadae tsédapocana panetipojo. Ojó eohua yama aiqui tsédapocanaja poi. Dácuichae pónetipocana danae dia ashapai. Jáecana, bonicana, huáenicana mecuñiaque. Jajai poipocana, janacana dáocuacuahue ya aja, tsédapocanaja paditapojo. Huáenicanaja, ténaicanaja, bonicanaja dipahue paditapojo da ya dia eani. Dácana mediaque. Léledoeteopo acui, masahue poípocana nimebamane poípo, joda jájamo pidyima atsobale. Joda ditsomo emanae jameiyatibo, tsédapo misiohua manoíbo-odi pótsaneibo.

Dipa apetso, huada joda imeataiquipocana shamanae "jaidyacue ya ai eani" epo. Dipa daocua 6 tseiñeme pehue ai eimeape. Huenomo jánahuatseiñe pehue Tadicatapo. Dipa huada jodá tseiñe pe-ishapo tseiñe poi ea.

JODA HUATSEDA, DIA EABETSOTAPO DETSE, DIA A-ATAISI EPOPO BIYOPO (Jénesi 3)

Tadicatapoa dipa apetao tata Adana, mama Ebanae Tadicatapoa eapo jaidyacuemepo leleo nétisa detse.

Dátsiomo nai pi-oloma polelajai. Nai a-odi pipoma epo. Tadicatapoa shalada metse pehue ai pónetipocana name-odi ea.

Datsio dipahue di-abolo, tsetseshapo shama, eohuao poja. Ai sipai jabatitso, bacuá poi potso, huada mama Eba huabea. Dipa huabeame atso huada mama Eba dipa cuaeme ea: —Joma acuijajacana diquemahue tocue metse ata, Tadicatapoa? —eaneti.

Bacuaja dipa cuaetao, mama Ebaja joda ecuae: —Cuipeádahue bale "pidyima aque" ata. Jodá sichotso, ditsomo manoíbo-odi pótsaneibo. Itsobabishapo pehue atsobime, dipahue. Dápejejepocana bale "poetihue dime meaque" tsema ata —ea.

Atao, bacuaja joda cuáecata: -Jime da ditsobime pimanoma po pohue tso dia bame. Da ditsocuichiji bahuepidyacata po pohue tso dipa. Tadicatapo-isha batahue poíbo. "Mipa atso ajaí, mipa atsobale masahue" bamehue po —dipanoshi cuaeme ea.

Dipa bacuaja cuaeme apetao, mama Ebaja acuijaja shámacata. Shamanae dipa nímeba: "Janapoi ajaicata sha? Quenaicata jaidyacueme batame ditso. Quenaicata abahuepia poi." Dipa atso sichotso disha. Atso, mama Ebaja tata Adana bisha tídyea-isha. Atao, huadabisha edia. Dipa dipeme atsohue huatseda cuíchahue jabatimehue poána. Bisojae poána. Potso, huatseada acui-iña apai-iyopo licuilicuiatso jaibadali ea.

Tsiohue eaponanio huatseada, Tadicatapo jodo leleo poyoa tsabajatso, acuicana dójojo lóbonetineti. Dyamo Tadicataponae aiyo bátini jabatitso dia epo. Tsio, Tadicatapoa mipa jejeme ea: —Tánibi tata Adana. Quetsoi po-o-eti.

Atao, Adanaja jeje: —Ohué ema. Midya tsabaiquitso, ema queoli poani. Cuíchahue jabatitso, dia poáni. Dipa jabatitso lóbotini.

mama-atacana peadajamo midya dipa asha-odi alelajaiposhili da mehueya méhuiquiataibo-ani. Midyaja bale huada a-odipo mehueyaibotoa pipoma —ea.

Atso, mama Eba bisha huada ecuae: —Midya dipa poeti batso, midya todilipi jaidyaohue eanitsio nedacueme mi balelajai e-ani. Dipahue miqueda eahuéami ilo-odi e-atani.

Atso, tata Adana bisha huada ecuae: -Yama eaniohue pehue pojaepoi poeti. Cuehuá miqueda huanea eataniohuecata po-o-eti. Dipa batso, yama eohua másati-aibo-ani mae. A-asapocana, cuizaipocana móloemepeibo-ani mae. Dyamo behuehue modotso sahuadoatso pehue midya ai díneti-odi pótsaneibo. Eizeneti tsonoime mi dia pó-ani. Dipahue, miqueda emei, mezimetse eapo, esichanatso mánoibo. Noahue mezipoi poíbo-isha —ea.

Dipa cuaeme apetsohue, Tadicatapoa huatseada poi jaibai me-a huáenibiqui metse. Atso dámetse jáibaeme. Dipa atso huada huatseda jodo jaidyacatapo léleomo shéhuihuiquibo. Huatseda shehuihuiquibotso, huada hua-eiloi shama beta jodo nétimeibo, joda lele pabiabatapojo, aiyaja netimatamahue poípo acuijaja noahue pidyiboma-isha pa-atapojo.