The New Testament of our Lord and Saviour Jesus Christ
Jesucristowa an ñamin kwal uztuzne iara
1 Jesucristowa kwal an ñamin kwal uztuza wian kit ka munara: Davidpa kwalkas Abrahampa kwalkas. 2 Abrahamne Isaacpa papihsh azi. Isaacne Jacobwa papihsh azi. Jacobne Judáwa papihsh azi. Uskas paiña aimpihshtuzpa papihsh azi. 3 Judáne Fareswakas Zarawakas papihsh azi. Tamarne uspawa akkuhsh azi. Faresne Esrompa papihsh azi. Esromne Arampa papihsh azi. 4 Aramne Aminadabpa papihsh azi. Aminadabne Naasónpa papihsh azi. Naasónne Salmónpa papihsh azi. 5 Salmónne Boozpa papihsh azi. Rahabne paiña akkuhsh azi. Boozne Obedpa papihsh azi. Rutne paiña akkuhsh azi. Obedne Isaíwa papihsh azi. 6 Isaíne katsa îninmika Davidpa papihsh azi. Katsa îninmika Davidne Salomónpa papihsh azi. Usne Uríaspa ashampara mîlta. Uríaspa ashampane Salomónpa akkuhsh azi. 7 Salomónne Roboampa papihsh azi. Roboamne Abíaspa papihsh azi. Abíasne Asawa papihsh azi. 8 Asane Josafatpa papihsh azi. Josafatne Jorampa papihsh azi. Joramne Uzíaspa papihsh azi. 9 Uzíasne Jotampa papihsh azi. Jotamne Acazpa papihsh azi. Acazne Ezequíaspa papihsh azi. 10 Ezequíasne Manaséspa papihsh azi. Manasésne Amónpa papihsh azi. Amónne Josíaspa papihsh azi. 11 Josíasne Jeconíaspakas paiña aimpihshtuzpakas papihsh azi. Sun payukin Babilonia suras awane Judío awaruza piznat kit uspawa surakima kal kin mîlnara. 12 Sun kitpane, Jeconíasne Salatielpa papihsh azi. Salatielne Zorobabelpa papihsh azi. 13 Zorobabelne Abiudpa papihsh azi. Abiudne Eliaquimpa papihsh azi. Eliaquimne Azorpa papihsh azi. 14 Azorne Sodocpa papihsh azi. Sodocne Aquimpa papihsh azi. Aquimne Eliudpa papihsh azi. 15 Eliudne Eleazarpa papihsh azi. Eleazarne Matánpa papihsh azi. Matánne Jacobpa papihsh azi. 16 Jacobne Joséwa papihsh azi. Joséne Maríawa ampu azi. Maríane Jesúspa akkuhsh azi. Jesúsne, Mesíaskas, Dios nîrîtmikakas, muntît. 17 Sunkanain catorce kwaltuzne Abramtas Davidtakima uzat kit ka munara. Davidtas Babilonia awa Judío awaruza piznat kit mîlnarakima, mamaz catorce kwaltuzne uzara. Sun payuras mamaz catorce kwaltuzne uzara, Dios nîrîtmika kawinakima.
Jesúsne kawimtu
18 Sunkana Jesucristone kawirît. Paiña akkuhshne Josékasa kasara kin namtît, pareju uztachasmin. Pareju uztachasmin, usne pîja wa wanmalta, Dios Sînam Izpul akwa. Dios Sînam Izpulne Maríara winta, sun pashpa mîlnapa. 19 Joséne, paiña ampune, uskasa kasara kin namtît. Wat awa azi. Mane María pîja warît mîrawane, usne sun awa iztakin Maríara kwaimtus kainanashitchi. Usne Maríara puintain kwaishimtu, awa piankamamanpa. 20 Sun mintuasmin, pitmîzta. José kainkizpamtuasmin, Anpatpa ángelne Joséra ka kaizta: —Mîza. Nune Davidpa kwal i. Nune Maríara mîlna ishkumun, up ashampa namnapa. Maríane sun painkul mîjanpai, Sînam Izpul akwa. 21 Usne maza painkul mîjanpai. Nune ussa Jesús munnaka. Awa ussa Jesús munaanazi, Judío awaruza watsat mîlnamtu akwa, kwail kiamanpa, ka kizta. 22 Sunkana kirît, wan awa Anpat kaizta aizpa nîjkulanapa. Dios kainammmikane ka kaizta: 23 “Nimpihsh ashampane pîja wanazi. Usne maza painkul mîjanazi. Uspane ussa Emanuel munanazi.” (Sun mun kizkane, “au Diosne aukasa uztu” kizmuspas.) 24 Kainkizpamtu izkultawane, Joséne Anpatpa ángel îninta aizpa kit kit Maríara mîlta, paiña ashampakana. 25 Uspane pareju pitpailtachi, pashpa mîlnakima. Pashpa mîlkane, Joséne ussa Jesús munta.
Wat piantuzne us tukin aat kit Jesústa wakpuj wainñamtu
1 Jesús Belén pîpulukin kawimîzkane, Herodesne Judea sura mikwa azi. Sun payu wat piantuzne, pãn puzmumans attuzne, katsa Jerusalén pîpulura piannara. Kîma izat akwa, uspane anza wat piankamara. 2 Uspane ka mîmaara: —¿Mîntama sun pashpa mîlta? Usne Judío awaruza îninnanazi. ¿Mîntama tui? Aune paiña kîma pãn puzmukin izanash. Sun akwa aune apain aanash, ussa wakpuj wainñana. 3 Katsa mikwa Herodeskas wan Jerusalén pîpulukin uztuzkas sun mîat kit ishkuara. 4 Suasne Herodesne wan pariya înintuzakas Moisés kaizta aizpa kamtamtuzakas akwanara, Cristo mînta kawishina kiz mîmana. 5 Uspane ka kaizara: —Belén pîpulukin, Judea sukin kawinazi. Sunkanain Dios kainammmikane ka parît: 6 “Belén pîpulune Judea sukin ainki pîpulu i. Akkwan awa an ainki pîpulukin uzamtuchikas, anza katsa mikwane sun pîpulukin kawinazi, ap Judío awaruza kiwainanapa.” 7 Suasne Herodesne kîma iztaruza puintain akwanat kit ka mîmanara: —¿Chi payuma kîma izanash? Mîmarawane, usne kîma kai izpanka piankamta. 8 Suasne usparuza Belén pîpulura îninnat kit ka kaiznara: —Ta îat kit an pashpa sairain. Ussa wanmaltawane, apain kail kit nawa kainanaka, nakas ussa wakpuj wainna, kiznara. 9 Mikwa kaizta aizpa mîarawane, kîma izmuruzne îamîzta. Paiña suras puztachasmin, pashpa tura îarachasmin, uspane sun kîmara pãn puzmukin ñamin izarît. 10 Kîma iztuasmin, uspane kwisha wat minñat kit 11 yalta nappat kit pashparakas Maríarakas, paiña akkuhshta, izara. Suasne uspane pashpa tukin wakpuj wainñara. Kwiztane uspa kara aizpa azpiz kit urukas inciensokas mamaz mirra piamkas ukkat kit ussa mîlaara. 12 Kwiztane kîmu izmuruz kainkizpamtuasmin, pittamtuasmin, Diosne usparuza kurunnara, Herodes tuwara kaiyamanpa. Suasne uspane uspa sura mamaz miwarain kaiyamîzta.
Uspane Jesústa Egipto sura mîlpailtu
13 Kîmu izmuruz kaiyarawane, Joséne kainkizpamtuazi. Anpatpa ángelne ussa izpan kit ka kaizta: “Kuhsakti. Nukas pashparakas paiña akkuhshtakas Egipto sura azain îrain. Sua nukkulti, na kaiznakima. Herodesne pashpara sainanpain, ussa piantana,” kizta. 14 Joséne kuhs kit pashparakas paiña akkuhshtakas munat kit amtawara pîpulukis puzat kit Egipto surakima îara. 15 Suain nukkulara, Herodes inakima. Egipto sura nukkultît akwa, uspane Anpatpa kainammmika kaizta aizpa kiarît. Sunkana kaizta: “Nane ap painkulta Egipto suras akwarau.”
Herodesne akkwan pashaparuza piantana îninnara
16 Herodes wat pianturuz awa kaiyarachi piankamtawane, usne kwisha pilchapuzta, uspa ussa kutkwarît akwa. Suasne Herodesne wan ampu pashparuza, kuna asmin paas añokima, Belén pîpulurakas kasharuzakas piantana îninnara. Sun kîma izaruzne, sun wat piantuzne, “paas año pînnapain,” kizara. 17 Suasne Jeremías kainammmikane parat aizpa sunkana kirît: 18 “Akkwan ashampa tînta azamtuasmin, wan ashampane Rama pîpulukin mîara. Wan Israel ashamparuzne azara, uspa painkul akwa. Uspa tayaltît akwa, mînminkas usparuza kiwainnasachi, uspa painkultuz iarît akwa.”
Uspane Egipto suras kaiyamtu
19 Herodes irawane, Joséne kainkizpanmîzta Egipto sura. Suasne Anpatpa ángelne ussa izpan kit ka kaizta: 20 “Kuhs kit pashparakas paiña akkuhshtakas mîl kit kail kit Israel surakima, pashpara piantashimtuz iarît akwa.” 21 Suasne Joséne kutpat kit pashparakas paiña akkuhshtakas mîl kit Israel sura kaiyara. 22-23 Arquelaone papihshkanain mikwa namîz kit Judea sura îninmîzta. Usne Herodespa painkul azi. Joséne Arquelaowa sun piankam kit Judea sura în ishkwarît. Mamasa José kainkizpamtuasmin, Diosne ussa Galilea sura înka kizta. Galilea sura pianatpane, usne Nazaret pîpulura uzna îrît. Dios kainammmika parît aizpa sunkana kirît: “Awane ussa Nazaret pîpulukis atmika mun munanazi”.
Juanne, pikin munnammikane, Dios pit kainanamtu
1 Sun payura Juanne, awaruza pikin munnammikane, Judea sura îrît. Awa sun pul sura îakane, Juanne usparuza Dios watsal pit kainanat 2 kit kaiznara: “U kwail kiarît aizpa maiztain, ma Dios awaruza îninnashimtu akwa. Diosne awaruza us kaizta aizpa mîanapa akwanamtu, au kwail kiamanpa.” 3 Ñamin Isaíasne, Dios kainammmikane, sunkana Juanpa parît: “Mînpazha pul sura awaruza tînta kwinta kinat kit ka kaiznanazi: ‘Uruzpain watsarain, Anpat kuruntu aizpa kianapa. Une Dios iztakin nil uzarawa,’ ” kizta. 4 Juanpa pïn kwara aizpa camello ashkasa sîpta. Aya tît pîjakin kuhtît. Ittalkanakas mishkikas kwat. 5 Jerusalén pîpuluras awakas wan Judea suras awakas wan Jordán pimakin uztuzkas puzat kit ussa mîna aara. 6 Uspane uspa kwail akwa tayalat kit uspa kwail kiarît aizpa kaizara, Dios usparuza wat kulninnanapa. Suasne Juanne usparuza Jordán pira munnanara. 7 Mînpazha Fariseo awaruza kanpamtuzkas mînpazha Saduceo awaruza kanpamtuzkas Juanta aara, usparuza munnanapa. Aakane, Juanne usparuza kaiznara: “¿Une apkin aamtumakkiwas? Une kain pîrail kaizmuruzkana mai. U kamtakana mai, sula kumtu akwa. U pit kaizamtu aizpa kamta pininukana mai. Dios kwail kirîttuza ilnamtu akwa, u kwail kiamtu aizpa chîhkarain. 8 Dios uruza iltachasmin, u kwail kiarît aizpa maiztawa, wan awa u Diosta kaiyarît piankamanapa. 9 Une ‘aumin Abrahampa kwal makpas’ kizamtu. Sun minñamtu akwa, Diosne uruza sapnamanazi. Diosne sun katsa ukkasa Abrahampa kwal namninnashina. 10 Diosne uruza ilnanapain. Mane une katsa tîkanain izarît, pippa wakainkanain. Wan tî pippa wakainne, tît kit ïnta kiain kit ïn paktarawa. 11 U kwail kiarît aizpa Diosta kaizarawane, Dios uruza wat kulninnarawane, nane uruza watcha pira kwazikasa munna kinanash. Na uruza pira kwazikasa munnanamtukas, mamazne nakin anza tînta anazi, sun pitmin kainanapa. Na uruza pira kwazikasain munnanamtukana, usne paiña Sînam Izpulta înninnazi, ukasa tuanpa, uruza kiwainanapa. Uskas kwail kimtuza ilnanazi. Usne wan awakin anza tînta mikwa namtît. Na uskana tînta chi akwa, nane paiña kiwainmikakana namtît ish, us kaizta aizpa kin. Us kwisha wat akwa, nane ussa wat kiwainnapa piankamsachish. 12 Usne tîkasa chara aya kihshkul kit tîmkasa suninapain. Sunkanain usne awaruza kwail kiarît aizpa kiznanazi. Wat awaruzne wat chara pippakanain wanmaktat kit mamaz yalta watsanazi. Awa chara aya impaktamtukanain, Jesúsne kwail awaruza naizninnanazi. Sun ïnne kwikain.” Sunkana Juanne Fariseo kampamtuzakas Saduceo kanpamtuzakas pilchashina.
Juanne Jesústa kwazikasa munnamtu
13 Suasne Jesúsne Galilea suras puz kit Jordán pirakima piannara, Juan ussa munnapa. 14 Juan ussa munna kishitchi akwa, Juanne Jesústa ka kaizta: —Nune nawa munna kinatkin. Nu nakima amtukas, nane nua chinkas mîlasachish, kizta. 15 Jesúsne ussa ka sînkara: —Mane nune nawa munna kinatpa, wan Dios aumîza kaizta aizpa kinpa. Suasne Juanne ussa pikin munnara. 16 Juan ussa kapal muntawane, Jesúsne piras puzta. Masain chiyu kai kultakane, Jesúsne Dios Izpulta izta. Sunne utkurukana chiyuras kihsh kit ussa taizta. 17 Suasne awane Dios chiyuras kaizka mîara. Dios ka kaizta: “Anne ap painkul i. Ussa pashimtus. Uskasa kwisha warish,” kizta.
Satanásne Jesústa kwail kininshimtu
1 Kwiztane Dios Izpulne Jesústa pul sura mîlta, Satanás ussa kwail kininshit akwa, Dios îninta aizpa kimanpa. 2 Jesúsne cuarenta payukima payuwarakas amtawarakas kwatchi. Kwiztane yak kimîzta. 3 Suasne Diablone ustukin pianara. Ussa kwail kininshimtu akwa, ussa kaizta: —Nu “na Dios Painkul ish” kiztune, suasne an ukkasa pan sari, kizta. 4 Jesúsne ussa sînkara: —Diosne paiña pînkîhta ka parît: “Awane kumirain kuat kit uzanazi. Kumira kwatkas, awane Dios pit para aizpa izarawa, an wat uzanapa.” 5 Suasne Diablone Jesústa Diospa pîpulura, Jerusalén pîpulura, mîl kit iglesia yal mitmal kunninta. 6 Sua ussa kaizta: —Nune “na Dios Painkul ish” kizta. Katmizna akkis pîlainti, awa nua izat kit nîjkulanapa. Dios pînkîhta ka parît: “Diosne paiña ángeltuza îninnanazi, nua kiwainanapa. Uspane uspa chihtîkasa nua sappaanazi, mittî ukta kilmanpa.” 7 Jesúsne sînkara: —Diosne pînkîhtakas ka parît: “Up Anpat Diosta kwail kinpa kishininmun”. 8 Mamasa Diablone Jesústa katsa înkal îzara mîl kit chiwal watsal sura ussa anta. Ussa wan pãn sun suras iznintawane, 9 Diablone ussa kaizta: —Nawa wakpuj waintane, nane nu iztu aizpa nua mîlanash, kizta. 10 Suasne Jesúsne ussa kaizta: —Satanás, nu akkis ît. Dios pînkîhta ka parît: “Anpat Diostain wakpuj waintawa, us kaizta aizpa kin. Mamazta wakpuj wainkain,” ka parît. 11 Suasne Satanásne Jesústas paimpa îrît. Sun urain ángeltuzne ussa kiwainñara.
Jesúsne Galilea sura paiña kal samîztu
12 Juanta kajchira sîptît mîrawane, Jesúsne Galilea sura kailta. 13 Nazaret pîpulukis puztawane, Jesúsne Capernaum pîpulura uzna îrît. Sun pîpulune pimamin uz. Sua Zabulón sukas Naftalí sukas kashain uz. 14 Diosne sun kinintît. Isaíasne, Dios kainammimikane, ñamin ka pat kit kaizta: 15 “Zabulón suras awakas Naftalí suras awakas Jordán pi kwakara, pãn puzmuras, uzamtu. Suane Judío awachiruzne Galilea pi kwakara uzamtu. 16 Diosta pianchi akwa, uspane tîlkwilkinkana uzara. Diosta piankamturuzne watsal kiarînazi, kaikinkana uzamtu akwa. Ñamin irît awakanain uzarakas, mane uspane kai kultît miwara chaamtu.” 17 Sun payuin Jesúsne kamtanamîz kit kaiznara: “Ayukta maiztain, an kwail kiamanpa, Dios awaruza mamin îninnashimtu akwa.”
Jesúsne ampara pishkaru îmmuruza akwanara
18 Galilea pimamin chamtuasmin, Jesúsne paas aimpihshta izta. Mazane Simónkas Pedrokas muntît. Mamazne Andrés muntît. Uspane pishkaru pizmuruz azi. Uspa pira îmmu kiainpailmîzta. 19 Suasne Jesúsne usparuza kaiznara: —Kanpazhain, ap kammuruz namanapa. Ñamin pishkaruin pizpailta. Kawarain makis nane uruza îninnanash, mamaz awaruza kamtananapa, ap kammuruz namanapa. 20 Masain uspane uspa îmmu chîhkat kit ussa kanpailta, kamanapa. 21 Ma pitchin îmtuasmin, Jesús mamaz paas aimpihshta izta. Uspane Santiagokas Juankas muntît. Uspane Zebedeowa painkul azi. Uspane paiña papihshkasa kanuara pishkaru sulmu putpailta. Jesúsne usparuza akwanara, uskasa wanmak kit în. 22 Masain uspane papihshta tuij ît kit kanuaras kihsh kit ussa kanpailta.
Jesúsne akkwan awara kamtananamtu
23 Jesúsne wan Galilea suwara îmîz kit wan Judío kammu yalta nap kit awara kamtanara. Usne Dios watsal pit kamtanara. Usne Dios awaruza înnashimtu kamtanara. Wan inturuzakas wan ishturuzakas kakulninnara. 24 Siria sura uztuzkas Jesúspa piankamara. Uspane wan inturuzakas wan ishturuzakas wan naizaruzakas Jesúspakin karaara, Jesús usparuza kakulninnanapa. Saliz piztîttuzakas ultu piztîttuzakas chasachiruzakas ussa karaara, Jesús usparuza kakulninnanapa. 25 Akkwan Galilea suras awane Jesús îmtumal aara. Mînpazha Decápolis pîpuluras awane aara. Mînpazha Jerusalén pîpuluras awane aara. Mînpazha Judea suras awane aara. Jordán pi kwakaras awakas, pãn puzmumals, aara.
Jesúsne înkal îzakis Dios pit kamtanamtu
1 Akkwan awa wanmakkarît iznarawane, Jesúsne înkal îzara nut kit sua uzta. Paiña kammuruzne ussa wanmakkara. 2 Usne paiña pit usparuza kamtanamîz kit sunkana kaiznara:
Mînma watsal kultît mai
3 “Diosta piankamshimturuzne Dios kaizta aizpa kiat kit watsal uzanazi. 4 Awa tayalamtukas, Diosne usparuza wat kiwainanazi, tayalamanpa. 5 Na mamazkin an warish kiztuchimikane an watsal uznazi, Dios an sukin pa kin namta akwa. 6 Nil kishimturuzkas wat kishimturuzkas an watsal uzanazi, Dios pashimtu aizpa kiamtu akwa. 7 Diosne mamaztuza kiwainmuruza kiwainnanazi, watsal uzanapa. 8 Ayukta kaijchura sînam sarîttuzne an watsal kulat kit Diosta izanazi. Dios ayukta kaijchura sînam saninnamtu akwa, uspane an wat kulat kit Diosta izanazi. 9 Awaruza kalpain uzanapa paninturuzne kalpain uzanazi. Diosne usparuza ‘u ap pashparuz mai’ kiznanazi. 10 Awa nil uztuzakas Dios kaizta aizpa kimtuzakas pizamtukas, awa usparuza kwail kiashimtukas, Diosne paiña îninturuza, paiña înintukin watsal uzninnanazi. 11 Une ap wat kanpamtuz mai. Mamaz awane na akwa ‘u kwail awa mai’ kizanazi. Awane na akwa uruza kwail kianazi. Uspane na akwa u kwail kiamtu pîrail appanazi. 12 Sunkana uruza kinakane, watsal kiat kit watsal nîjkultain. Diosne chiyura uruza watsal mîlam mîlananazi. Ñamin Dios kainammtuz uzasmin, awane kawarain usparuza naizninnara.”
Ñamkas impilkas
13 “Ñam ñara nîrane, ña pîtkain. Une ñamkanain wat uztain, awa an kwail kiamanpa. Wat ñam chine, ñara kulkain. Tîhwi. Ñam kultachine, kiakpîntîm, awa mittî kuliztînpa. 14 Une au sukin wat uztain, mamaz awara watsal kamtananapa, watsal uzanapa. Une impil kai aiztukanain nil uzarawa, awa nil uzna piankamanapa. Pîpulu malta uztane, wanne pîpulura kai izanazi. Kulasachi. 15 Kawarain alampara puttane, tîm ampal unanchi. Kancha alampara kwashta kantawa, wan awa tukin kai izanapa. 16 Kawarain une awa iztakin watsal uztain, awa u wat kiamtu aizpa izanapa. U wat kirît aizpa izarane, uspane u Taitta Dios chiyuras kwisha wari kizanazi.”
Jesúsne Dios înintu aizpa wari kizta
17 “Une nawa nil minñamtuchi. Une Moisés kaizta aizpakas Dios kainammtuz kamtara aizpakas piankamamtu. Uspa kamtara aizpa kwaimanash. Nane apa arau, u wan Dios kaizta aizpa watcha piankamanapa. 18 Nane watcha kaiznamtus. Aune chiyura iztumakpas. Aune an sura uztumakpas. Chiyukas an sukas azain pailsachi. Kawarain wan Dios înintu aizpa pailmanazi. Paiña pitkas paiña kamtamkas pailmanazi, wan chiwal kinkima. 19 Katmizna Dios înintu aizpa kimtuchimikane, Dios înintu aizpa kiman kamtamtumikane, Dios înintukin katsa awakana nammanazi. Dios înintu aizpa kimturuzkas mamaztuza sunkanain kinpa kamtamtuzkas, Dios înintukin an katsa awakana namanazi. 20 Uruza kainanamtus. Une Moisés kaizta aizpa kamtamtuzkinkas Fariseo awakinkas an watsal uzarawa. An watsal uzamtukine, une Dios înintukin nappasachi.”
Mamazta aliz kultane, kwail i
21 “Une ñamin uztuza kamtanara aizpa mîara. Usparuza ka kiznara: ‘Mamazta piantaman. Mînpazhara piantarîtmikane katsa mikwara kwail ilninna îtpa,’ kiznara. 22 Sunkana nain kaiznamtus: aimpihshkasa pilchapuztumikane mikwara ilninna îtpa. Mînpazha aimpihshta kwail pit parakane, katsa mikwara ilninna îtpa. Mînpazha aimpihshta nune ‘tîmpa i’ kiztamikane ïnta îrîshina. 23 Sunkana kirain. Diosta chiwazha mîlam mîlamtuasmin, aimpihshta kwail kirît nîjkulkane, up mîlan mîlkain. 24 Kancha up mîlan mîlamtukin tuij îtpa. An ñancha aimpihshkasa wat kultawa. Up aimpihshkasa wat kultawane, suasne kailtawane, up mîlan Diosta mîlatpa. 25 Mînpazha nu kwail kirît kizkane, katsa mikwara îmtuasmin, nune azain nu kwail kirît kizmumikakasa nîjkultawa, izmuruz namanapa. Katsa mikwane nua policíara îninshina, kajchira sîpninna. 26 Watcha kaiztus. Suain kajchiras puzsachi, nu wan pial tanakima.”
Jesúsne mamazpa ashampara sanachi kurunnamtu
27 “Une ñamin uruza kamtara aizpa mîara. Uruza ka kiznara: ‘Mamazpa ashampara sanachi,’ kiznara. 28 Sunkana nane uruza kaiznamtus. Mînpazha ashampara iztane, ashampara sashimtu mintane, usne me ashampara piz kit sarîtkana uztu. 29 Mane nune kasu waj. Mînpazha kwail aizpa kin iztumikane sunpa kwail kin min kit kwail kishina. Chinkas kwail aizpa kin izman, kwail minmanpa, kwail kishimanpa. Kasukasa kwail izturuzkas kwail kishimturuzne ïnta ianazi. Katmizna kwail aizpa kin izman, ïnta îamanpa. 30 Awane chihtî waj. Awane uspa chihtîkasa kwail kiashina. Chihtîkasa kwail kishimtuzne maizarawa, uspa chihtîkasa kwail kiamanpa. Paiña chihtîkasa kwail kishimtumikane ïnta îrînazi.”
Jesúsne ampu ashampawa mîjmikasha kamtamtu
31 “Sunkas une ñamin uruza kamtara aizpa mîara. Usparuza ka kiznara: ‘Mînpazha paiña ashampara kwairane, kwaina pînkîh pat kit ussa chîhkatpa,’ kiznara. 32 Me nain mamaz tuntu uruza kurunnamtus. Mînpazha ashampa mamaz ampukasa pittachimikasha kwairane, usne ashampara kwail kinintu. An ashampane mamazkasa uztînazi. Mînpazha ashampa kwairîtmikakasa kasara kimtune, uskas kwail kimtu.”
Sun kin namtu aizpa
33 “Sunkas une ñamin uruza kamtara aizpa mîara. Uruza ka kiznara: ‘U anpat iztakin sun kin namta aizpa maintachin kiarawa,’ kiznara. 34 Me nain mamaz tuntu uruza kurunnamtus. Kwinta kimtuasmin, nil pit paraarawa. Kain pit kaizman. Chiwazha kin namtuasmin, chiyura nu kaizta aizpa mîna akwanchi. Chiyura akwatne, nune Diosta akwantu, nu kaizta aizpa mînapa. 35 Chiwazha kin namtuasmin, au sukin nu kaizta aizpa mîna akwanchi. Sun au sura kaiztane, nune Diosta, paiña su înintukin, akwantu. Jerusalén pîpulura nu kaizta aizpa mîna akwanchi. Jerusalén pîpulura akwatne, Jerusalénpa katsa mikwasha nu kaizta aizpa mîna akwantu. 36 Chiwazha kin namtuasmin, up kîzpukasa sunkana kin nammun, up tîlkaya ash putchã ash chikninsachi akwa. 37 Nune ‘watchain’ kaizti. ‘Watcha chine, watcha chi’ kizti. Mamaz tuntu pit kaiztane, nune Diablo pit kaiztînazi.”
Mamaz nua kwail kitne, puija kiman
38 “Sunkas une ñamin uruza kamtara aizpa mîara. Uruza ka kiznara: ‘Kasukin kîzmumikane kwarain kîzmumikawa kasu uktawa. Sulakin kîzpianmumikane kawarain sula kîzpianmikawa sula uktawa.’ 39 Sunkana nain uruza kurunnamtus: Nua kwail kirîtmikasha puija kwail kinchi. Maza nua matsîhkin kuzkane, mamazpa matsîhkin kuzshina pianninti kizti. 40 Mînpazha mikwasha up kamisha uknapa îninkane, îsal kwam kamishakas ussa mîlatpa. 41 Mînpazha nua maza kilómetro kakwakima kwana îninkane, nune kutña kilómetrokima îtpa. 42 Mînpazha chiwazha paikukane, mîlatpa. Mînpazha chiwazha nua nampizkane, nammîlatpa, kaiztachin.”
Aliztuza wat kultawa
43 “Sunkas une ñamin uruza kamtara aizpa mîara. Uruza ka kiznara: ‘Izmuruza pashinarawa. Aliztuza aliz kultawa,’ kizara. 44 Me nain mamaz tuntu uruza kurunamtus. Aliztuza pashinarawa. Uruza kwail kimtuz akwa Diosta paikwatpa. 45 Sunkana kitne, une chiyura Taitta pashparuzkana uzanazi. Diosne kwail awaruzakas wat awaruzakas pãn malninamtu. Usne wat kimtuz surakas nilchi kimtuz surakas alu kinintu. 46 U uruza pashimtuzain pashinarakas, une uruza pashinamtuchiruza pashinarawa, Dios uruza chiwazha mîlananapa. Kwail kimtuzne usparuza pashinamturuzakas pashiamtu. 47 U izmuruzain ‘wat kîntîre’ kiznarane, une Diosta pianchiruzkana uzamtu. Diosta pianchiruzne usparuzpain kawarain kiamtu. 48 U chiyuras Papihshne chinkas kwail kit chi. Kawarain u chiyura Papihsh uztukanain watsal uz kit watsal kirain.”
Jesúsne watsal kal kinpa kamtanamtu
1 “U mamaz awa akwa watsal kal kikane, sun kal awa iztakin kinchi. Sunkana awa iztakin kitne, u chiyuras Papihshne uruza chinkas mîlanamanazi. 2 Katmizna we mîjtuza kiwainamtune, u kiamtu aizpa mînpazhara kainanachi. Awa iztakin an katsa namshimtumikane awa wanmakmukinkas awa pianamal chamtukinkas kianazi, mamaztuz paiña watsal kal kimtu aizpa izanapa, mamaztuz nua watsal kal kirît kizanapa. Uspane chiwazha mîlam me sapparît, awa uspa wat kiarît kizara akwa. 3 We mîjchiruza kiwainamtune, mînainkas u wat izmuruzakas kainanachi. 4 Mamaztuza kiwainamtune, puintain kitpa. U chiyuras Papihsh u puintain kiarît aizpa iztane, usne uruza chiwazha mîlam mîlananazi.”
Jesúsne Diosta paikwan kamtanamtu
5 “U Diosta paikuamtune, awa iztakin an katsa namshimtumikakana Diosta paikwanchi. Uspane awa Judío kammu yalkinkas pianamal awa wanmakkamtukinkas kunamtu, awa usparuza izanapa. Watcha kaiznamtus. Sunkasane uspane me wan mîlan mîj. 6 Sunkana nu Diosta paikwantune, kalmal nap kit pîjta sîp kit up chiyuras Papihshta paikwatpa. Usne nukasa tu. Up chiyuras Papihshne nu puintît paikwantu aizpa mît kit nua paiña mîlam mîlananazi. 7 Nu Diosta paikumtune, Diosta pianchiruzkana paikwanchi. Uspane akkwan kain pit kwinta kiamtu. Akkwan pit kwinta kiamtune, uspane Dios usparuza mîmtu minñamtu. 8 Uspakana kiamtu aizpa kinchi. Paikwatchasmin, u chiyuras Papihshne u we mîj aizpa me pian. 9 Katmizna une sunkanain Diosta paikwarain: ‘Nune au chiyura Papihsh i. Nu sînammika akwa, awane nua wakpuj wainñashina. 10 Apa anka, awaruza îninnana. Chiyura uztuasmin, nune wanta watsal îninta. Kawarain au sura uztuzakas at kit wan watsal îninti, apain nu kishimtu aizpa kianapa. 11 Payu aizpa au kumira we mîj aizpa kwinanaka. 12 Au kwail kiamtu aizpa sînam sananaka. Aune aumîza kwail kittuza wat kulshinamakpas. Kawarain nune au kwail kiamtu aizpa sînam sanaka. 13 Aumîza kiwainchain, kwail kiamanpa. Awara kwail kininmika aukin akane, aumîza watsat mîlnanaka, kwail kiamanpa. Nuin wanta îninnamtu. Nuin anza tîntamika i. Nuin an watsal iznazi, pailta payukima. Pailtu.’ 14 U uspa kwail kiarît aizpa wat kulnarane, kawarain u chiyuras Papihshkas u kwail kiarît aizpa wat kulninnanazi. 15 Mînpazha mamazpa kwail kiarît aizpa wat kultuchine, kawarain u Papihshne u kwail kiarît aizpa wat kulmanazi.”
Dios akwa pala kwatchin chan
16 “Dios akwa kumtukine, tayal kit chanchi. Une wat iztît awakana uzman. Uspane tayal kit matsîh kittachi chaamtu, awa uspa kuamtuchi izanapa. Nane watcha uruza kainanamtus. Uspane uspa mîlam mîj me. 17 Kancha Dios akwa kwashimtukine, matsîh kit kit watsal ularawa, 18 awa u Dios akwa kumtuchi izamanpa. U chiyuras Papihsh u kuamtuchi piankamnazi. U Papihshne, wan kularît aizpa izmumikane, Dios akwa kumtuchimikasha chiwazha mîlam mîlanazi.”
Awa chiyura kwazpa kulnintu
19 “Au sukinne kwazpa kulshiman. Kîriyune au sukin pïn tîttu. Apane wan pîttîmtu. Apane walkumkas nap kit walkuamtu. 20 Une chiyura kwazpa kulnintain. Suane kîriyune pïn tîtmanazi. Suane chinkas pîtkain. Suane walkumkas walkwan napkain. 21 Chiyurain wa aizpa pashimturuzne chiyurain wa aizpa minñat kit pashianazi.”
Kasune impilkana i, awa kai izanapa
22 “Kasu izkultane, awane kai izamtu. Kawarain kai iztamikane, wat kimtumikane, wat aizpa piankam kit wan wat kal nil kinazi. 23 Kasu kai iztuchimikane mîmtuchimikakana i. Suasne sun awa chiwazha watsal kal kisachi. Wat mîrachimakane tîlkwil chamtumikakana chanazi, wat kin pianchi akwa.”
Dioskas pialkas
24 “Mînminka paas anpatta kiwainasachi. Maza anpatta pashitne, mamazta pashimanazi. Maza anpatta kiwainshitne, mamazta kiwainsachi. Kawarain pialmin pashitmikane sun urain Diosta pashimanazi.”
Diosne paiña kwalta kiwainamtu
25 “Katne, nane uruza kurunamtus. Apa uzamtuasmin, kumira kwan kawa minman. Kwazi kwan kawa minman. Îmtura kamisha kwana kawa minman. Awa akkwan kumira mîjkas, nil uzna an wari. Awa wat camisha kwakas, nil uzna an wari. Suntuz mîjchikas, ishkuman, Dios uruza iznamtu akwa. 26 Chitchu îsalpara iztain. Chitchuruzne pippa wakain. Pippa pakkain. Îranchura pippa watsakain. Sunkana u chiyuras Papihshmin uspa kumira kwinamtu. Diosne chitchukin uruza anza wat kwinanazi, u chitchukin anza tînta mai akwa. 27 An katsa kawishimtumikane paas kwajta an aks kawisachi. 28 U we mîj aizpa kawa minñamtuasmin, u pïnmin akwa mintakiwa. Sun înkal wishta iz kit piankamtain. Wish kal kikainkas, pïnkas sîpkainkas, wishne watsal iztît. 29 Salomónne, katsa îninmikane, paiña watsal pïn kwaksham kwaara. Mane an kainanamtus. Wishne Salomónpa pïnkin anza watsal iztît. 30 Diosne wish kwiznintu, watsal iznapa. Maza payura wish chiktakas, wishne mamaz payura it kit pît kit impaktîm. U Diosta we nîjkulamtukas, Diosne mama uruza an wat kwira kinamtu. 31 Katmizna ishkuman. Kumira we mîjkas, ¿Chima kuwiznapai? kawa mîmanachi. Pïn kwaam we mîjkas, ¿Chima kwaan îpai? mîmanachi. 32 Diosta pianchiruzne sunmin min kit pashiamtu. U chiyuras Papihshne u we aizpa wan pian. 33 Katmizna une an ñancha Diosta paikwarain, Dios uruza paiña iztukin îninnanapa. Suasne Diosta paikwatpa, uruza paiña uztukin nil namninnanapa, watsal uzanapa. Kwiztane Diosne u wenamtu aizpa uruza mîlananazi. 34 Pailta payu awane akkwan tuntu kal kiarawa. Up kal tîlwara kishimtu aizpa kawa mintuasmin, sun kalpa tîlawara mintawa. Katmizna ma payu sun kalpa naizman.”
Katsa tî kasura naptu
1 “Une mamazta kwail kirît kiznachi, Dios uruza kwail kiarît kizmanpa. 2 Sun akwa nu mamazta nu kwail kirît kiztane, Diosne sunkanain nua kwail kirît kiznazi. Nu mamazpa kwail kirît mintane, Diosne sunkanain nu kwail kirît minnazi. 3 Ainki pak aimpihshpa kasura naptane, usne kai izsachi. Ñana tî up kasura naptane, nune izmanazi. Kawarain akkwan kwail kimtumikane we kwail kimtumikasha nu kwail kirît kizsachi. 4 Katsa tî up kasura waasmin, nune aimpihshpa ainki pak paiña kasura naptît aizpa uksachi. 5 Nu wat awakanain namtît chamtukas, nune maiztachi. An ñancha up kasuras katsa tî uktawane, suasne nune kai izshina, aimpihshpa ainki pak kasuras ukna. Sunkana kamtanamtus: Nune Diosta paikwatpa, Dios up kwail wat kulnapa. Kwizta nune mamazta kiwainanazi, Dios usparuza wat kulnanapa. 6 Une mîshimtuchiruza Dios watsal pitpa kaiznaman. Uspane aliz kwizakanain uruza kwashina. Une mîshimtuchiruza Dios pitpa kaiznaman. Uspane kuzukanain mai. Uspane wanta mittî tat kit kulamtu.”
Paikwat kit sait kit pîjtara tak tak kitpa
7 “U we aizpa Diosta paikwarain. Usne u wenamtu aizpa mîlananazi. U we aizpa sairain, wanmalna. Diosta akwarain. Pîjtakin tak tak kimtune, Diosne pîjtakin chîhtnanazi. 8 Paikwatmikane sapnazi. Saimtumikane wanmalnazi. Pîjtakin tak tak kikane, us akwa pîjta chîhtnanazi. 9 Papihshne painkulta kwira kinazi. Painkul kumira paikukane, papihshne uk kwinmanazi. 10 Painkul pishkaru paikukane, papihshne kamta kwinmanazi. 11 U kwail kiamtukas, une chiwazha wat mîlam aizpa pashparuza kwinnashina. Up chiyuras Papihshne paikumtuza an akkwan watsal mîlam kwinnanazi. 12 Awa uruza kiwainakane, une watsal uz. Kawarain une mamaztuza kiwainnarawa. Mamaztuza kiwainnarane, une Moisés kaizta aizpakas Dios kainammmika para aizpakas kiamîznazi.”
Sîp pîjtain
13 “Au sura uztuasmin, sîp pîjtakimin naptain, nil miwara înpa. Kancha mamaz aiz pîjta wa. Aiz pîjta naptawane, akkwan awane sun aiz miwara ïntakima îamtu. 14 Sîp pîjta wa akwa, pînmal mi akwa, awane sun sîp mira sayasachi. Akkwanchi awaruzne chiyura uzna nuasachi.”
Tîne paiña pippa wam
15 “Une kwail kamtamtuza kwiraruin cha izanaka, uspa kamtamtu aizpa mîamanpa. Uspane wat awakanain izat kit u uzkin wanmakkanazi. Wat awa makpas kizamtukas, uspane pîrail appat kit wan awara kwail kininnanazi. 16 Une kwail kamtamtuza piankamanazi, uspa kwail kiamtu akwa, watcha kamtamtuchi akwa. Kawarain tîrinul pu tîttas pakkain. Wankail tî pippa pu tîttas pakkain. 17 Sunkanain wat tîne wat pippa wam. Kwail tîne kwail pippa wam. 18 Wat tîne kwail pippa wakain. Sunkanakas kwail tîne wat pippa wakain. 19 Wan tî wat pippa wakainne, kwat kit ïnta paktam. 20 Kawarain une kwail kamtamtuza piankamanazi, uspa kwail kiamtu akwa.”
Wanne Dios înintukin nappamanazi
21 “Wan nawa ‘ap anpat’ kizmuruzne Dios înintukin nappamanazi. Chiyuras Papihsh kaizta aizpa kimturuzne nappanazi. 22 Sun payu taizkane, akkwan awane nawa ka kizanazi: ‘Ap wat Anpat, aumîza mîzhain. Nua akwantuasmin, aune Dios watsal pit kainaramakpas. Nua akwantuasmin, aune awaras saliztuza înintamakpas. Nua paikwantuasmin, aune akkwan iztasparît kal kitmakpas,’ kizanazi. 23 Suasne nane uruza sînkanat kit sunkana kaiznanash: ‘U nawa nîjkularachi akwa, nakis paimpa îrain. Une pailta payukima kwail kiarît,’ kiznanash.”
Paas tuntu yal samtu
24 “Katmizna wan na kaizta aizpa mîraruzkas na îninta aizpa kimtuzkas wat mîmturuzkana mai. Usne, yal samtumikane, ukkin sara, nainmanpa. 25 Katsa alu kimîzkane, pi kulmîz kit tînta inkwa pamîzta yalkin. Sunkana yalne naintachi, ukkin yal sarît akwa. 26 Na kaizta aizpa mîmtuchimikakas na îninta aizpa kimtuchimikakas tîmpa awakana i. Usne pi ksukin yal sammikakana i. 27 Katsa alu kimîztawane, pi kulmîz kit tînta inkwa pamîzta yalkin. Suasne pi wan kwara. Wan karît.” 28 Jesús wan kapal kamtarawane, wan awane us kamtara aizpa iztaspaarît. 29 Usne Moisés parît aizpa kamtamtuzkana kamtanarachi. Usne mikwakana tînta kamtanara.
Jesúsne aya pîttîtmikasha namtamtu
1 Jesús îzaras kihshkane, akkwan awane ussa kanpaara. 2 Aya pîttîtmikane Jesústa kasha at kit Jesús iztakin wakpuj wain kit ka akwara: —Anpat. Ap ña ishtu nawa namtashitne, namtazha, kizta. 3 Suasne Jesúsne paiña chihtîkasa ussa pat kit ka kaizta: —Watcha, nane nua namtashimtus. Me namtît, kizta. Sun kizkane, usne aya pîttîtmikara wat namnintît. 4 Jesúsne ussa kaizta: —Mîri. Nu wat parît aizpa mînainkas kainamman. Na kaiztu aizpa kitpa. Judío pariyara ît kit Moisés mîlan îninta aizpa mîlatpa. Sun kitpane, wan awane nu wat namtît piankamanazi.
Jesúsne suldaruwa kiwainmikasha namtamtu
5 Jesús Capernaum pîpulura piannakane, Romano suldaru îninmikane Jesústa at kit ka akwara: 6 —Anpat mîzha. Ap kiwainmumikane ap yalta kamara ishtu tui. Anne chasachi, kwisha ishtu akwa. Usne kwisha naiztu, kizta. 7 Jesúsne ussa ka kaizta: —Nane înash, ussa namtana, kizta. 8 Îninmikane ussa ka sînkara: —Anpat mîzha. Nane wat awakana chish, nu ap yalta napnapa. Ap kiwainmumikawa namtari kizkane, usne watcha namtît kirînazi. 9 Kawarain ap mikwane nawa înintu. Nakas aptuza îninnamtus. Mamazta “ît” kizkane, usne îm. Mamazta “anka” kizkane, usne am. Ap kiwainmumikasha “chiwazha kinpa” îninkane, kim. Katmizna nu ap kiwainmumikasha wat namtît kizkane, nane us wat namtînazi pianish. 10 Us kaizta aizpa mîrawane, Jesúsne iztaspat kit ussa kanpamtuza kaiznara: —Watcha kaiznamtus. An ampune Diosta wat nîjkultu. Mînminkas Israel awaruztas sunkana nîjkulamtuchi. 11 Nane uruza kaiznamtus. Akkwan Israel chi awane pãn puzmuwaraskas pãn payapmuwaraskas Dios înintukin piannanazi. Israel awaruz pianamtuchasmin, uspane an ñamin wanmakkanazi. Abrahamkasakas Isaackasakas Jacobkasakas uzat kit kuanazi. 12 Israel awaruzne, an ñancha akwattuzne mizurainkas Dios înintukin nappamanazi, nîjkularachi akwa. Tîlkwilta îninnarawane, uspane azat kit sula sît sît kianazi, naizamtu akwa. 13 Suasne Jesúsne îninmumikasha kaizta: —Up yaltain înka. Nu nîjkulta aizpa sunkana kirît. Sun urain paiña kiwainmumikane kakultît.
Jesúsne Pedrowa ashampawa akkuhsh kakultamtu
14 Jesúsne Pedrowa yalta ît. Suane usne Pedrowa suegrara kamara tu izta. Imu piztît tuazi. 15 Jesús paiña chihtîkasa ussa pizkane, imu kanintît. Usne kuhsak kit chiwazha kumira usparuza kumira kwinnamîzta.
Jesúsne akkwanta kakulninnamtu
16 Tîlparîkane, awane Jesús tukin akkwan saliz piztîttuza karaara. Jesúsne maza pit kaizkain salizta puzninnara. Wan inturuzakas kakulninnara. 17 Diosne sun kinintît. Isaías kainammmikane ñamin ka pat kit kaizta: “Usmin au ishtu aizpakas au naiztu aizpakas kaninta,” kizta.
Jesústa kanpashimtuzne sun kirain
18 Jesúsne akkwan awara iznara. Jesús tukin kasha aakane, Jesúsne paiña kammuruza pi kwakara îninnara. 19 Suasne Moisés kaizta aizpa kamtammikane at kit Jesústa ka kaizta: —Anpat mîri. Nane nua kanpashimtus, mînta îkwarakas up kammumika namna, kizta. 20 Jesúsne ussa sînkara: —Înkal kwizane paiña yal kul mîj. Chitchukas yal mîj. Nane ampu namtîtmika ish. Sunkana nane mînta kwaizkulna mîjchish. Mînpazha nawa kanpashitne, nane an sukin chinkas ussa kin namsachish. 21 Mamaz kanpammikane ussa kaizta: —Anpat mîri. Ap taitta irîkane, nane an ñancha ussa kamna înash. Ussa kamtawane, kwiztane nua kanpanash, kizta. 22 Jesús ussa sînkara: —Ma kanpazha. Diosta pianchiruzne awa irîtkanain uzamtu. Diosta pianchiruzne irîttuza kamarînazi.
Jesúsne inkwa kanintu
23 Jesúskas paiña kammuruzkas kanuawara waat kit îara. 24 Masain tînta inkwa pamîzta. Pine kanuara unainapain parît. Jesúsne pittît tuazi. 25 Suasne kammuruzne ussa kasha aat kit ussa izkulnin kit ussa kaizara: —Anpat mîzain. Aumîza watsat mîlchain. Aune kanua pi unainapainmakpas, kizara. 26 Usne kaiznara: —¿Une chikishma katne ishkupuspas? Une nawa wat nîjkulamtuchi, kiznara. Suasne usne kuhsak kit pirakas inkwarakas kaizta: “Inkwa pamun. Pi kialmun.” Suasne inkwakas parachi. Pikas kalpain parît. 27 Kanpanaruzne iztaspaat kit kaizara: —¿Usne mînma kasa? Inkwakas pikas us kaizta aizpa mîamtu, kizara.
Salizne paas awara pizta
28 Jesús pi kwakara, Gadara sura, piannakane, paas ampune pantióntas puzpail kit ussa kasha pianailta. Saliztuzne paasta pizarît. Paasas kwisha aliz warain. Mînminkas sun miwara pînsachi. 29 Jesústa ka kwianmîzpailta: —Nune Dios Painkul i. ¿Aumîza chima kishimtus? ¿Nune aumîza an ñancha naizninna amas? Ma payu narît payu chi, kizpailta. 30 Kashain akkwan kuzuruzne kuamtu pura. 31 Saliztuzne Jesústa ka paikwara: —Aumîza puznintane, kuzura îninchain, kuzura piznapa, kizara. 32 Jesúsne kaiznara: —Sua îrain, kiznara. Jesús saliztuza puzninkane, saliztuzne kuzura pizara. Usparuza piznarawane, masain wan kuzuruzne îzaras pirakima azain kihshat kit pira îat kit pi kwaarît. 33 Suasne kuzu izmuruzne ishkuat kit pîpulura azain îara. Pianarawane, uspane uspa izara aizpa awaruza kainanamîzta. Saliz puznintuzpa kainanamîzta. 34 Suasne akkwan pîpuluras awane Jesús tukin îara. Sua pianarawane, uspane Jesústa paikuara, uspa sukis înpa.
Jesúsne chasachimikara kakulnintu
1 Suasne Jesúsne kanuara waat kit pi kwak kit paiña pîpulura piannarît. 2 Sua uspane chasachi intura kamara tukin iptît muaara. Chasachi intura karattuza iznarawane, Jesúsne uspa wat nîjkulamtu piankam kit intura kaizta: —Ap painkul mîri. Tayalmun. Nane nu kwail kit aizpa me wat kultît, kizta. 3 Suasne mînpazha Moisés kaizta aizpa kamtamtuzne usparuzpain ka minñara: “Sun ampune paiña pitkasain Diospa kwail kiztu.” 4 Jesúsne uspa minñamtu aizpa piankam kit usparuza mîmanara: —¿Une chikishma katne kwail minñamtuas? 5 ¿Chikishma katne na kimtu aizpa mîmamuspas? “Nane paiña kwail kit aizpa wat kulshinas. Kawarain paiña kamakis kuhsninshinas.” 6 Nane uruza na kimtu aizpa annanash, ampu namtîtmika an sukin înintu piankamanapa. Nakas paiña kwail kirît aizpa wat kulninshinas. Nane au su uztuza îninshinamtu, kiznara. Suasne Jesúsne chasachi intumikara kaizta: —Kuhsak kit up kama mîl kit up yalta îrînka. 7 Chasachi intumikane kuhsak kit paiña yalta îrît. 8 Awa sun kirît aizpa izarawane, uspane ishkuamîzta. Dios an ampura watsal kal kinpa kiwainta akwa, uspane Dios kwisha wari kizara.
Jesúsne Mateora akumtu
9 Miwara îmtuasmin, Jesúsne maza awara, Mateo muntîtmikara, izta. Usne Roma gobierno pial sapmu yalkin kal kimtuazi. Ustukin piannakane, Jesúsne ussa kaizta: —Nawa kanpazha, ap kammumika namnapa. Suasne Mateone kuhsak kit ussa kanpara. 10 Sun payu Jesúskas paiña kammuruzkas Mateowa yalta kwan îara. Akkwan Roma gobiernowa pial sapmuruzkas mamaz kwail kimtuzkas piannaara, uspakasa kwan. Judío înintuzne “uspa kwail awa mai” minñara, Judío awa îninta aizpa mîarachi akwa. 11 Fariseo awa sun izarawane, uspane Jesústa kanpamtuza ka mîmaara: —¿Chikishma up kamtam pial sapmuruzkasakas mamaz kwail kimtuzkasakas kumtu? mîmanara. 12 Sun mîrawane, Jesúsne kaiznara: —Nane tuttulkana ish. Kwail kimmikane ishtumikana i. Imtuchiruzne tuttul pashikain. Imtuin tuttul pashimtu. 13 An watsal pit para aizpa piankamtain. Sun pit an ñamin Dios pînkîhta ka parît: “U wakara piantana karamtukas, nane sun mîlam pashitchish. Mamaztuza kiwainna an wari,” ka parît. Nane wat awa makpas mintuzne akwanamtuchish. Nane kwail kiarîttuza akwanamtus, kwail kiarîttuza wat kulnana.
Dios akwa pala kwatchin cha
14 Juan munnammikawa kammuruzne Jesústa îat kit mîmaara: —¿Chikitma up kanpamtuzne Dios akwa pala kwatchin payura kuamtu? Uspa akwa impa chi. Aukas Fariseo awakas pishta payu kuamtuchimakpas. Au akwa impa, kizara. 15 Jesúsne sînkanara: —Kasara pishtakin akwattuzne kasara kimtumika akwa tayalamtuchi. Usne usparuzkasa tuasmin, uspane kuamtu. Impachi. Kawarain ap kammuruz nakasa purasmin, uspane kuamtu. Impachi. Mamaz payura ap izmuchiruzne nawa pizara. Nane apain tuamanash. Sun payu taizkane, ap kammuruzne tayal kit kuamanazi. 16 Nane masas kamtam uruza kamtananamtu. Îlapawa kamtamkanachi. An masas kamtam mîmtumikane îlapawa kamtam mîkain. Paasas kamtam kiasachi. Sunkanain mînminkas pîtta pïnta yalsachi masas pïnkasa. Masas pïnkasa yaltane, masas sîpparawane, pîttît pïnne an pihsharîm. 17 Sunkanain masas chappi pîtta ayara ultuchi, sulnapa. Masas chappi pîtta ayara ultane, chappi sulkane, ayane pihshat kit chappi puz kit wan karînazi. Katmizna sultachasmin, masas chappi masas ayara wintawa, chappi sulnapa, paasas kamanpa.
Jairowa pashukas imtu ashampakas
18 Jesús sun kiznamtuasmin, Judío îninmikane ussa at kit us tukin wakpuj wain kit kaizta: —Ap pashune mamin ire. Nu at kit up chihtîkasa ussa parane, usne kakul kit mamasa uznazi, kizta. 19 Jesúsne kuhsak kit uskasakas kammuruzkasakas îamîzta. 20 Suasne maza intu ashampane Jesús tukin ît. Doce añokima paiña aimpi pulparachi akwa, usne kwisha naizta. Jesúspa kwizpa at kit Jesúspa kwaksham puntakin paara. 21 Usmin ka minta: “Paiña pïnta paarane, wat paakwarakas,” minta. 22 Jesúsne puij chat kit ashampara iz kit kaizta: —Ashampa mîzha. Tayalmun. Nu nawa wat nîjkulta akwa, nu wat pari, kizta. Ashampane sun urain wat parît. 23 Judío awa îninmikawa yalta piannakane, Jesúsne akkwan kanta usamturuzakas akkwan azamturuzakas iznara. Uspane aat kit pashpara izara. Ussa watsat taara, kamna înpain. Usne kaiznara: 24 —Akkis puztain, nimpihsh ashampa irachi akwa. Pittît tui, kiznara. Sun mîamtuasmin, uspane Jesústa ishanara. 25 Awaruza puzninnarawane, Jesúsne kalmalta nap kit nimpihsh ashampawa chihtî pizta. Suasne usne kuhsak kit kunta. 26 Wan awane sun sukin Jesús kit aizpa piankamara.
Jesúsne paas izsachiruza izkulnintu
27 Suas puztawane, paas kasu izsachiruzne ussa kanpail kit ussa tînta kwianpailta: —Aumîza mîzhain. Davidne up antikwa pampawa papihsh ara. Nu mikwa Davidpa kwal akwa, nu Diospa nîrîtmika akwa, aumîza kiwainchain, kizpailta. 28 Jesús yalkin napkane, paasas kasu izsachiruzne us tukin ailta. Jesúsne usparuza ka mîmara: —¿U nawa nîjkultukiwas. Na uruza izkulninshinaki? Uspane kaizpailta: —Watcha, Anpat. Aune nua nîjkultuas, au paikumtu aizpa kinpa, kizpailta. 29 Suasne Jesúsne uspa kasura paat kit kaiznara: —U nawa nîjkultu akwa, une masain wat izashinai. 30 Uspa kasune izkulpailta. Suasne Jesúsne “sun kit aizpa mînainkas kainanamun,” kizta. 31 Tas puzpailtawane, uspane wan awaruza Jesús uspa akwa kirît aizpa kainanamîzta.
Jesúsne paramtuchimikasha paranintu
32 Kasu izsachiruz puzpailkane, mînpazha Jesústukin aara. Uspane saliz piztît parasachimikasha karaara. 33 Jesús salizta puzninkane, parasachimikane, paramîzta. Awane iztaaspat kit kaizara: —Aune Israel sura mizurainkas sunkanane iztakimakpas. 34 Fariseo awane ka kaizamîzta: —Salizpa katsa mikwane Jesústa kiwaintu, mamaz saliztuza puzninnanapa, kizara.
Jesúsne awaruza kiwainashimtu
35 Jesúsne wan ainki pîpulurakas wan katsa pîpulurakas chamîzta, Judío kammu yalkin kamtanana. Usne Dios watsal pit kainanara, awa Dios înintukin uzanapa. Usne wan inturuzakas wan ishturuzakas kakulninnara. 36 Wan awaruza iznamtuasmin, Jesúsne usparuza kiwainnashira. Uspane kwisha tayalat kit kwaizarît. Uspane pîrikukana chaamtu, izmumika mîjchin. 37 Suasne Jesúsne paiña kammuruza kaiznara: —Akkwan pippa pakna wakas, akkwan kal kimtuzne purachi. 38 Katmizna pakmuwamikasha paikwarain, awaruza paiña pakmura pakninna îninnapa.
Jesúsne doce îninturuza akwanamtu
1 Suasne Jesúsne paiña doce kammuruza akwanat kit kiwainnara, kwail saliztuza puzninnanapa, wan tuntu intukas wan tuntu ishtukas kakulninarînpa. 2 Doce înintuzne ka munmazi: An ñancha akwatmikane paas tuntu muntît. Simónne Pedrokas muntît. Paiña aimpihshne Andrés muntît. Santiagokas Juankas aimpihshpara. Sun paasne Zebedeowa painkul azi. 3 Felipekas Bartolomékas purazi. Mamaz Tomáskas munazi. Mateone, Roma gobierno pial ñamin saptîtmikane, azi. Santiagone, Alfeo painkul, azi. Mamaz Tadeo muntît. 4 Simónne Cananeokas muntît. Judasne Iscariotekas muntît. Usne Jesústa Judío awa înintuza chîhkanara, Judío awa ussa pizanapa.
Jesúsne kammuruza Dios pit kainanapa îninnamtu
5 Jesúsne sun doce kammuruza sun watsal pit kainanapa îninnara. An ñamin usparuza ka kainanara: “Judío awachiruz uzamtukin îman. Samaria awawa pîpulura napman. 6 Mane Israel awaruza, sun pîriku karîtkana puraruza, an watsal pit kwinta kin îrain. 7 Diosne chiyuras îninana anpain. Kainawas îrain. 8 Intura kakulninnarain. Irîttuzakas kuhsninnarain. Pîrît aya ishturuza watsaninnarain. Saliztuza puzninnarain. Na uruza kain mîlanarît akwa, mamaztuza kain mîlanarain. 9 U pial tuhkin win kwaaman. 10 Kumirakas tuhta kwaaman. Maizmu kamishakas kwaaman. Mamaz zapatokas kwaaman. Tîwilkas muman. Yalpamikane Diospa kal kimmikasha mîlanarawa, us we mîj aizpa sappanapa. 11 Ainki pîpulurakas katsa pîpulurakas piannatpane, mînpazha wat awara sait kit yal mîlazha kiztain. Paiña yalta nukkultain, înkima. 12 Sun kwalpa yalta naptawane, wat kîntîre kiztain. U akwa Diosta paikwantus, Dios uruza kiwainnanapa, ka kiztain. 13 Nuri kizkane, yal mîlamtus kizkane, yalpamikane wat uznazi, nua sapta akwa. Yalpamika yal mîlamtus kizmakane, kakishapu kaizman. Diosta paikwantus, nua kiwainanapa kaizman. Usne wat uzmanazi, nua saptachi akwa. 14 Nuri kizmakane, u kaizara aizpa mîashimakane, sun yalkiskas sun pîpulukiskas puztain. Puzarawane, uspa iztakin mittî pil puhstîtne ulpiantawa, sun awa kwail kiarît piankamanapa. 15 Watcha kaiznamtus. Diosne an pîpuluras awaruza anza naizninnanazi, Dios kaizta aizpa mîarachi akwa. An ñamin Sodoma pîpulura uztuzkas Gomorra pîpulura uztuzkas akkwan kwail kiarakas, uspane an wewazha naizanazi.”
Jesústa piantuzne naizanazi
16 “Nawa mîzha. Mane nane uruza kwail awa uzamtukin îninnamtus. Uspane aliz awa pura. Uspane kwail awa mai. Uspane înkal kwizakana pura. Uruza kwail kiashimtu. Une uspawa nîj kit wat mintawa, uspa iztakin nil uzna. Sunkana une usparuzkasa waya kiman. 17 Sun aliz awaruza kwiraruin. Mînpazha aliz awane uruza îninmika tukin ilna mîlnanazi, u nawa piankamtu akwa, nawa kanpamtu akwa. Judío kammu yalkin mîlnanazi, tîwilkasa aim kianapa. 18 U nawa piankamtu akwa, uspane uruza piznat kit mikwarakas mamaz îninmikarakas chîhkananazi. U na akwa naizamtuasmin, une Judío awaruzakas Judío awachiruzakas na uruza kaizta aizpa parananazi. 19 Uruza mikwara chîhkanakane, miza paran kawa minman. Paramtu payu taizkane, au Diosne uruza sun watsal pit paraninnanazi. 20 Papihshpa Sînam Izpulne uruza kiwaininnanazi, paiña pit mikwaruza parananapa. 21 Aimpihshne aimpihshta mikwaruza chîhkanazi, piantaninnapa. Papihshne painkulta chîhkanazi. Painkultuzne papihshta mikwara chîhkanazi, piantaninnapa. 22 U nawa nîjkulamtu akwa, akkwan awane uruza pashinamanazi. Sunkana minpa payu sun naizmu tailchatne, une ap înintura nakasa uzanazi. 23 Mamaz awa uruza pîpulura pizashikane, tas puzat kit mamaz pîpulurakima îrain. Nane watcha kaiznamtus. Dios Painkul piannatchasmin, une wan Israel pîpulura îanazi, Dios watsal pit usparuza kainanapa. Wan pîpulura îtchasmin, Dios painkulne piananazi. 24 Kammumikane paiña kamtammikakin anza wat chi. Kiwainmikane paiña anpatkin an katsa chi. 25 Kammumikane kamtam uztakanain uztawa. Kiwainmikane anpatkanain namtawa. Awa nawa aliz kularîtne, Beelzebú nawa piztît kaizarîtne, uspane kawarain uruzpa kaizarînazi.”
Mamazta ishkwatpa
26 “Katmizna une aliz kulamtuza ishkuman. Awane chiwazha puintît aizpa chiwal piankamanazi. 27 Na uruza impara imparain kamtanamtukas, une na kamtarît aizpa mînpazhara îninnat kit tînta kainarain, wan mîanapa. Na uruza puintain paramtukas, une na parît aizpa wan awa uzkin mînpazhara îninnat kit kainarain. 28 Uruza piantashimtumikara ishkuman. Uruza piantamtukas, uspane up izpulta piantasachi. Diosmin awaruzakas uspawa izpultuzakas ïnta kaninshina. Ussa ishkuarawa. 29 Ainki chitchu painintane, une akkwan chin saptu. Maza chitchuin irîkane, u chiyuras Papihshne sunkas pian. Usne sunkana kinintu. Dioskas chiwazha kimtu aizpa pian kit aumîza iztu. 30 Usne au chiwal kîzpu ashkima wintît. Usne uruzpa wan pian. 31 Katmizna une ishkuman. Akkwan chitchu purakas, une wan chitchukin anza wat mai.”
Jesústa piantuz
32 “Mînpazha awaruza ‘Jesústa nîjkultus’ kiztane, nakas ap chiyuras Taittara ‘usne ap izmumika i’ kiznash. 33 Mînpazha ‘Jesústa nîjkultuchish’ kiztane, nakas ap chiyuras Taittara ‘usne ap izmumika chi’ kiznash.”
Jesúsne awaruza paimpa chamanara
34 “Nane an sukin arachish, wan awa kalpain uzanapa. Sunkana miman. Na at akwa, awane aliz kulamîz kit usparuzpain waya kianazi. 35 Na an sukin arît akwa, awane usparuzpain aliz kulanazi. Pashparuzne papihshkasa aliz kulanazi. Pashuruzne akkuhshkasa aliz kulanazi. Pashu kiznaruzne suegrakasa aliz kulanazi. 36 Awane uspa kwaltuzpain waya kianazi. 37 Papihshtakas akkuhshtakas nawakin an akkwan pashiamtumikane ap kanpammika namsachi. Painkultakas pashurakas nawakin an akkwan pashiamtumikane ap kanpammika namsachi. 38 Na akwa naizshimtuchimikane, na akwa ishimtuchimikane, ap kanpammika namsachi. 39 Na akwa ishimtuchimikane wan karînazi. Na akwa wan karîntumikane nakasa chiyura uznazi.”
Mîlam saptu
40 “Mînpazha u kaizta aizpa mîraruzne kawarain na kaizta aizpa mîanazi. Mînpazha na kaizta aizpa mîraruzne kawarain nawa înintumikara mîanazi. 41 Dios pit kainammmika akane, une Diospa kainammtuza wat kinarawa. Suasne ukas paiña mîlamkana sappanazi. Wat awa akane, une wat kimtuza wat kinarawa. Suasne ukas paiña mîlamkana sappanazi. 42 Ap an ainki kammumikasha tîh kwazi kwintamikane mîlam sapnazi.”
Juanne paiña kammuruza Jesústa îninamtu
1 Paiña doce kammuruza uspa kal kianapa kainanarawane, Jesúsne Galilea sukin uztuza ît kit Dios watsal pit awaruza kamtanara. 2 Sun payuin Juanne kajchira sîptît wa. Jesús kirît aizpa piankamtawane, Juanne mînpazha kammuruza îninnara, Jesúskasa kwinta kin. 3 Ka mîmaara: “¿Nune Dios înintamikakish? ¿Nune chiyuras atmikakish? Nu Dios înintachimakane, ¿Aune mamazta saishinasa?” mîmara. 4 Jesúsne sînkanara: “Juanta îat kit u izamtu aizpakas u mîamtu aizpakas ussa kainarain. 5 Sunkanain ussa kainarain. Kasu izsachiruzkas izamtu. Mittî chasachiruzkas chaamtu. Aya pîrît ishturuzkas wat paraamtu. Mîkaintuzkas mîamtu. Irîttuzkas kuhsaamtu. Awane Dios watsal pit puizaruza kainanamtu. 6 Nawa nîjkulmîztuzne watsal kianazi, u na kirît aizpa izara akwa. Katmizna Juan nawa nîjkulmîztune, usne watsal kinazi.” 7 Juanpa înintuz kaiyarawane, Jesúsne Juanpa awaruza kainanamîz kit mîmanara: “¿Chikishma pul sura Juan tukin îara? Une najtît awara izarachi. Usne pît tî inkwa pamtukana chi. Tîskana i. Ulpianmuchi. 8 Najtît awara izna îarakine, ¿Chikishma une îara? ¿Watsal pïn kwarîtmikara izna îamanas? Watsal pïn kwarîtmikane katsa mikwa yalkimin uztu. 9 Watsal pïn kwarîtmikara izna îkine, ¿Chima iziznash? ¿Dios kainammikara izna îamanas? Watcha. Une Dios kainammikara izara. Juanne wan Dios kainammtuzkin anza tînta i. 10 An ñamin Dios pînkîhta Juanpa ka parît: ‘Nane ap înintumikara, up îmtumal an ñancha îninnash, sun amtu payura wan watsat mîjanpa.’ 11 Watcha kaiznamtus. Makima mînminkas, Juan munnamikakin an tînta katsa uztachi. Dios înintukin an we tînta uztumikane Juankin an katsa i, Dios pit mîrît akwa. 12 Juan munnammika atkima ma payukima akkwan awane Dios pit mîashit kit Dios înintura nappashimtu. Dios înintura sîptîtkas, Dios pit mîashimturuzne sua wanmakkamîz kit nuppainashimtu, sua nappana. 13 Juan uztakima, wan Dios kainammtuzkas Moiséskas Dios înintu kinpa kainaara. Diosne apain îninnazi, kizara. 14 Na kaizta aizpa mîshitne, Elíaspa mîrain. An Juanne, Dios pit kainammmikane, Elías i. Diosne ussa îninna namta. 15 Katmizna na kaiznara aizpa mîrain. 16 Ma payu uztuza ¿Chima kizanasa? Uspane pashpakanain mai. Pîpulu salmukin salamtuasmin, uspa izmuruza ka kwiannamtu: 17 ‘Aune karaskwil uspusanash, kuki kianapa. Une kukitchi. Au tayaltît kanta kaiztuasmin, une mizurainkas azarachi,’ kiznaara. 18 Kawarain une uspakanain mai. Juan akane, mamazkasa kumira kwatchi akwa, mamazkasa chappi kwatchi akwa, une ‘ussa kwail saliz piztît’ kizamtu. 19 Mane nane, ampu namtîtmikane, arau. Na wan chiwal kumtu akwa, une nawa pirîtmin chammikakanakas kwisha kumtu chammikakanakas kizamtu. Une nawa ka kizamtu: ‘Ap izmuruzne kwail awa mai. Ap izmuruzne Roma gobierno pial sapmuruz mai,’ kizamtu. Watcha, u nil minñamtune, une na kaizta aizpa watcha i piankamanazi.”
Kwail awa
20 Jesúsne akkwan pîpuluruza akkwan iztaspaarît kal kirît. Awa uspa kwail kiarît aizpa maizarachi akwa, Diosta kaiyarachi akwa, Jesúsne usparuza pilchapuz kit ka kaiznara: 21 “Corazín pîpulukin uztuzkas Betsaida pîpulukin uztuzkas kwisha akkwan naizarînazi. Na uspa pîpuluruza akkwan iztasparît kal kitkas, uspane nawa nîjkularachi. Tiro pîpulukin uztuzkas Sidón pîpulukin uztuzkas sun iztasparît kal izaratne, uspane ñamin uspa kwail kiarît aizpa maizashinat kit Diostakas kaiyashinara. Tayalara akwa, uspane tîlkaya pïn kwaarîmashina. Tayalta akwa, uspane putchã imkas kîzpura sîntîrashina. 22 Katmizna, nane uruza ka kaiznamtus. Ilnam payu taizkane, une na kaizta aizpa mîrachiruzne an akkwan naizanazi. Tiro pîpulu uzturuzkas Sidón pîpulu uzturuzkas an wemin naizanazi. 23 Capernaum pîpulukin uztuzne au pîpulu anza watsal pîpulu i minñamtu. Kancha u pîpulu azpian kit wan karînazi. Wan irîttuzpa izpultuzne irîttukin îat kit kwisha naizarînazi. Une na iztasparît kal kirît aizpa izara. Sun iztasparît kal Sodoma pîpulukin kiaratne, Sodoma pîpulu uztuzne Diosta nîjkulashina, Dios uspa kwail kiarît aizpa wat kulnanapa. An pîpulune azpiansachiari. Sun iztasparît kal izaratne, Soldoma pîpulune makima tuashina. 24 Katmizna uruza kaiznamtus: Ilnam payu taizkane, Capernaum pîpulura uztuzne Sodoma pîpulu uztuzkin anza tînta naizarînazi.”
Nawa at kit kwaizkultain
25 An payu Jesúsne paiña Papihshta ka kaizta: “Nune wari. Nune Anpat i. Nune chiyurakas an surakas înintui. Nune sun kamtam puintît mîj, piankamtîttuz chi mîamanpa. Nu sun kamtam we piantuza piankamninnamtu akwa, nane nua kwisha wari kiztus. 26 Watcha, nune ap Taitta i. Sunkana kishirît. 27 Nu ap Taitta akwa, nune nu pashit aizpa nawa wan kinpa chîhkarît. Papihshmin Painkulta wat pian. Painkulminkas Papihshta wat pian. Painkulkas mamaztuza nanaat kit kiwainnamtu, Papihshta piankamîznapa. Paiña Papihshta sun kiztawane, usne awaruza ka kiznara: 28 Kwaiztîttuzkas an tailsachiruzkas nawa at kit nîjkulchain. Na u kwail kiarît aizpa wat kul kit kwaizkulninnanash. 29 Nawa azhain, na kamtara aizpa mîanapa. Nane uruza impara imparain paranamtus, piankamanapa. Nane aliz awa chish. Nane uruza kiwainanash, up kaijchu kwaizkulnapa. 30 Nane nawa kammuruza kiwainnanash. Na uruza kamtamtu aizpa kin samchi.”
Kammuruzne kwaizkultu payura pippa pakkamtu
1 Sun payura Jesúsne kwaizkultu payura sauwara îrît. Paiña kammuruzne yak kiamîz kit chara pippa pakkamîzta kwan. 2 Fariseo awa sun izarawane, Jesústa kaizara: —Izti. Up kammuruzne kal kiamtu. Kwaizkultu payura kal kinchi. 3 Usne sînkanat kit mîmanara: —Katsa mikwa Davidkas paiña izmuruzkas ñamin yak kiara. ¿Une uspa kiara aizpa pînkîhta izamanas? 4 Uspane Diospa yalkin nappat kit Diosta kwintît pan kuara. Uspa kiarît aizpa impa. Diospa pariyarain Diosta kwintît pan kuashina. Uskas paiña izmuruzkas sun pan kuashitchikas, Diosne usparuza ilnarachi. 5 Une Moisés pînkîhta parît aizpa piankamarachi. Pariyaruzne kwaizkultu payura Diospa yalkin kal kiamtu, kwaizkultachin. Uspane kwail kiarachi. 6 Nane uruza watcha kaiznamtus. Nane u iztakin chamtus. Nane Diospa yalkin anza tînta ish. 7 Une Dios pînkîhta parît aizpa piankamarachi. Pînkîhta ka parît: “Nane mamaztuza pashinanapa pashimtus, usparuza kiwainnana. U ampu wakara na akwa piantarakas, u nawa mîlamtu aizpa pashimanash.” Us kaizta aizpa mîaratne, une ap kammuruz kwail kiarît kaiznasachi. 8 Suas nane, ampu namtîtmikane, kain payukas kwaizkultu payukas înintus.
Maza ampu chihtî chîhpailtît waj
9 Suas Jesúsne tas ît kit pîpulura piannat kit Judío kammu yalta napta. 10 Suane maza chihtî chîhpailtît ampune tuara. Jesústa kwail kimtu kizshimturuzne pura. Uspane Jesústa mîmaara: —¿Nune kwaizkultu payura an intumikasha kakulninshimas? ¿Mîn nua îninta, an intura kakulninnapa? Moisés pînkîhta parîtkin kwaizkultu payura kakulninna parît chi. 11 Jesúsne sînkanara: —Kwaizkultu payura pîriku pil kulta taiztane, ¿pîrikura tainakna îmtukish? Watcha, nune pîrikura ît kit tainaknazi. 12 Maza ampune pîrikukin anza wari. Kwaizkultu payu taiztukas, mamaztuza wat kishina. 13 Suasne ishtura kaizta: —Up chihtî nil sari. Nil sakane, mamaz chihtîkanain wat parît. 14 Jesús ishtura kakulnintawane, Fariseo awaruzne puzat kit wanmakkat kit Jesústa piantana minñamîzta.
Diospa kiwainmumika
15 Sun piankamtawane, Jesúsne tas puzta. Akkwan awane ussa kanpaara. Usne wan inturuza kakultanara. 16 Usne usparuza kurunnara, mînainkas us intura kakulnintu kainammanpa. 17 Ñamin Isaíasne, Diospa kainammmikane, uz kit Jesúspa parat. Sun payura Jesúsne Isaías parît aizpa kirît. Isaíasne sunkana parît: 18 “Anne ap kiwainmika i. Nane ussa narau. Usne na pashimtumika i. Ussa narît akwa, nane kwisha warish. Nane ap Sînam Izpul îninnash, ussa kiwainnapa, wan Judío awachiruza ap watsal pit kainananapa. 19 Usne mînainkas waya kimanazi. Kwiantuchi akwa, mînminkas pîpulukin ussa mîamanazi. 20 Tîntachiruza kiwainanazi. We nîjkulturuzakas tayalturuzakas kiwainanazi, us nil kimtu aizpa pailnakima. 21 Akkwan Judío awachiruzne ussa tîrizat kit nîjkulanazi.”
Jesúskas salizkas
22 Suasne awane saliz piztîtmikara Jesús tukin karaara. Paiña kasu izsachi. Pitkas parasachi. Jesús ussa kakulnintawane, sun ampune kasu kai panintît. Parashina. Wat panintît. 23 Wan awane iztaspaat kit mîmaara: “¿Usne Davidpa kwal ki? ¿Dios înintamika ki?” 24 Fariseo awa sun mînarawane, kaizara: “Saliztuza puzninamtukas, sun ampune Beelzebú akwa, saliz îninmika akwa, puzninnamtu,” kizara. 25 Jesúsne uspa minñamtu aizpa piankamta. Suasne usne Fariseo awaruza ka kaiznara: “Înintuzkas uspa kiwaintuzkas usparuzpain waya kiamîzkane, uspane wan kaarînazi, uspa paimpa paimpa îamtu akwa. Pîpulura uztuzkas usparuzpain waya kimîztune, kwaltuzkas usparuzpain waya kiamîztane, wan kaarînazi. 26 Sunkanakas Satanáspa saliz saliztain puznintane, usparuzpain waya kiamîzkane, wan kaarînazi, uspa paimpa paimpa îamtu akwa. 27 Une nawa Beelzebú akwa salizta puznintu kizamtu. Na sun kitne, ¿Mînma u kanpamtuza kiwainamtui, salizta puzninnapa? Beelzebú usparuza sun kinpa kiwainnarachi akwa, une mîzkaiztu, Beelzebú nawa mizurainkas kiwainta chi akwa. Katmizna nilchi minñamtu. U kanpamtuzne uruza nil chi kiamtu kizanazi. 28 Diosne nawa nat kit îninta, paiña Sînam Izpul akwa saliztuza puzninnanapa. Katmizna na kamtamtu aizpa piankamtain. Diosne nawa apain îninta, umîza îninnanapa. 29 Ñamin yalpamikasha tîtkasa kuhtakine, mînminkas paiña yalta walkwan nappasachi. Yalpamikasha kuhtnintawane, walkummikane yalta napshina, walkwan. Na Beelzebúwa yalta napta akwa, Beelzebúra kuhta akwa, nane saliztuza puzninamîztus. 30 Nawa kanpamtuchimikane nawa aliz kulnazi. Ap kal kiwaintuchimikane ap kal kaninnazi. 31 Diosne chiwazha kwail kirîttuzakas chiwazha awara kwail kaiztîttuzakas wat kulninnanazi. Sunkana Diosne mizurainkas Sînam Izpulpa kwail pit kaiztumikasha wat kulmananzi. 32 Diosne ampu namtîtmikawa kwail pit kaiztumikasha wat kulninnazi. Me Diosne mizurainkas paiña Sînam Izpulpa kwail pit kaiztamikasha wat kulmanazi. Makas mamaz payurakas wat kulmanazi.”
Tîne paiña pippa wamtu
33 “Tî pippa wakane, une wat tîkas kwail tîkas pian. Wat tîne wat pippa wam. Kwail tîne kukain pippa wam. Sunkanain wattuzne wat kiamtu. Kwailtuzne kwail kiamtu. 34 Une kamtakanain mai, sula kuamtu akwa. U pit kaizara aizpa kamta pininukana mai. U kwail akwa, une wat pit paraasachi. U parakane, une ayuktas kwail minñamtu aizpa paranazi. 35 Wat awane ayukta wat minñamtu aizpa paranazi. Kwail awane ayukta kwail minñamtu aizpa paranazi. 36 Ilmu payu taizkane, wan awane uspa kain pit kaizara aizpa nîjkulanazi. Sun payura Diosne usparuza ilnanazi. 37 Wat pit paramturuzne uspa pit akwa naizamanazi, uspa wat awa akwa. Kwail pit paramturuzne uspa kwail pit akwa naizanazi, uspa kwail awa akwa.”
Kwail awane ussa paikuamtu, iztasparît kal kinpa
38 Suasne mînpazha Fariseoruzkas Moisés kaizta aizpa kamtamtuzkas ussa kaizara: —Kamtam, mîri. Nu chiwazha iztasparît kal kika, izshipuspas, au Dios nua îninta piankamanapa. 39 Jesúsne sînkanara: “Une, ma uztuzne, kwail awa mai. Une Diosta pashiamtuchi. Une nawa paikuamtu, iztaspat kal kinpa. Chinkas kimanash, awa izmanpa. Une Jonásta, Dios kainammmikasha, kirît aizpa izanazi. 40 Jonásne kutña payukas kutña amtakas katsa pikamta, pusunta, waara. Kawarain chiyuras Ampu namtîtmikane kutña payukas kutña amtakas pilta kamtît tuanazi. 41 Ilmu payu taizkane, Nínive pîpulura uztuzne ma payu uztuza kwail kiarîmti kiznanazi. Jonás Nínive pîpulu uztuza Dios pit kaiznakane, Nínive awane Jonás kaizta aizpa nîjkulat kit uspa kwail kiarît aizpa maizat kit Diosta kaiyara. Nane Jonáskin anza tînta ish. Une nawa nîjkulamtuchi. 42 Ilmu payu taizkane, Sabane, attish suras ashampa mikwane ma uztuza kwail kiarîmti kiznanazi. Sun ashampane Salomón tukin ît, us wat pian aizpa mîna. Nane Salomónkin anza tînta ish. Me une na kaiztu aizpa mîashimtuchi. 43 Maza saliz awaras puzkane, salizne pilchiwara saimtu cha, kwaizkulna. Kwaizkulna wanmaltakine, 44 sun awarain kailtînash mintu. Sun awarain kailshitne, sun awara wanmal kit ussa iztu. Mînminkas mama ussa piztachi. Yal charalkanain iztît uz. Usne pishkarît yalkana iztît. Ayukmal watsal iztît. 45 Suasne salizne ît kit siete anza kwail saliztuza kana îmtu, ussa pizanapa, sua uzanapa. Kwiztane sun ampune an anza kwail uznazi. Kawarain ma payu uztuzne an ñanchakin anza kwail uzanazi.”
Jesúspa akkuhshkas aimpihshtuzkas
46 Jesús awaruza paranamtuasmin, paiña akkuhshkas aimpihshtuzkas piannaara. Uspane yal pianamal nukkulat kit uskasa kwinta kishiara. 47 Mînpazha Jesústa kaizara: —Up akkuhshkas up aimpihshtuzkas pianamal pura. Nukasa kwinta kishiamtui, kizara. 48 Jesúsne ussa sînkat kit mîmara. —¿Mînma ap akkwa i? ¿Mînma ap aña i? kizta. 49 Suasne Jesúsne paiña kammuruza chihtî annat kit kaiznara: —Uspane ap akkwakanain mai. Uspane ap añakanain mai. 50 Ap chiyuras Taitta pashimtu aizpa kimtumikane ap akkwakanain i, ap añakanain i, ap kuakanain i, kiznara.
Pippa wammika kamtam kwinta
1 Sun payuin Jesúsne yaltas puz kit pimakin at kit uzta. 2 Akkwan awa us tukin wanmakkamtuasmin, Jesúsne kanuara wat kit uzta. Wan awane pi ksukin uzara. 3 Suasne Jesúsne akkwan kamtam kwintakasa ka kwinta kinara: “Pippa malmumikane pippa malna puzmîzta. 4 Malmîztuasmin, akkwan pippa chine mimakin taizara. Suasne chitchu aat kit sakkat kit kuara. 5 Anpa pippane uktainkas akkwan ainkih pilchirainkas taizara. Akkwan pil chi akwa, pippane azain chikkara. 6 Pãn malkane, tîne pul pat kit iarît, mujtît waj chi akwa. 7 Anpa pippane pu tîkin taizara. Pu pippane chikkat kit mamaz pippara îsal ipta, wamanpa. 8 Anpa pippane wat pilpara taizat kit akkwan pippa waara. Anpa tîne cien pippakima waara. Anpa tîne sesenta pippakima waara. Anpa tîne treinta pippakimain waara. 9 Na kaizta aizpa piankamshitne, piankamtain,” kiznara.
¿Chikiztama sun kamtam kwintakasa kamtanamtu?
10 Kwiztane kammuruzne Jesústakin kasha îat kit ussa mîmaara: “¿Chikitma awaruza kamtam kwintakasa paramtus?” 11 Usne sînkanara: “Diosne uruza impara imparain us kamtît aizpa piankamninnamtu. Mamaztuzne us kamtamtu aizpa piankamamanazi. 12 Diosne piantuza kiwainanazi, an akkwan piankamanapa. Na kaizta aizpa mîmtuchiruzne us pitchin piankamtu aizpa karînazi. 13 Katmizna kamtam kwintakasa usparuza paranamtus. Yawa na kimtu aizpa izamtukas, uspane nawa mîashimtuchi. Yawa na kaizta aizpa mîamtukas, uspane piankamashimtuchi. 14 Isaíasne, Dios kainammmikane, sun awa kiamtu aizpa ka parît: ‘Sun pit watcha mîrakas, une mîamanazi. Wan kiarît aizpa iztakas, une piankammanazi. 15 Sun awane Dios kaizta aizpa mîashimtuchi. Uspa kail sîptîtkana akwa, uspane nawa nîjkulamanazi. Uspane nawa kaiyamanazi, na usparuza kakulninnanapa, uspa kwail wat kulanapa.’ 16 Na kit aizpa izamtu akwa, umin mîat kit wat uzanazi. Na kaizta aizpa mîamtu akwa, umin piankamanazi. 17 Watcha kaiznamtus. Akkwan Dios pit kainammtuzkas wat awaruzkas an payura u izamtu aizpa izashiara. Uspane sun izarachi. Uspane u mîamtu aizpa mîshiara. Uspane sun mîarachi,” kiznara.
Mane sun maltu kamtam kwinta piankamninnamtu
18 “Mane une pippa maltu kamtam kwinta mîrain, piankamanapa. 19 Nane sun kamtam kwinta kwinta kinamtu, u miza Dios awaruza îninnamtu piankamanapa. Dios pit mîamtukas, uspane Dios kaizta aizpa mîmtuchiruzkana mai. Suasne Diablone amtu, pippa warît aizpa nakannapa, Dios pit kamtara aizpa mîamanpa. 20 Mamaztuzne pippa uk pilpara taizarakanain mai. Sun pit mîarawane, uspane sun pit sappat kit wat kulat kit sun pit kishiara. 21 Wat mîarachi akwa, sun awane akkwan payukima tailchaamtuchi. Sun pit akwa naizamtune, uspane an nîjkulamtuchi. 22 Sun pit kwayamtîmtu. Mamaztuzne pippa pu patmukin taiztakanain mai. Sun pit mîamtukas, uspane pailta payu usparuzpain minñat kit usparuzpa kal kiamtu. Pãn kulshiamîztu. Katmizna sun pit mîara aizpa usparuza wat uzna kiwainnamtuchi. 23 Mamaztuzne pippa wat pilkin taiztakanain mai. Sun pit mîarawane, uspane wat piankamara. Mîararuzne nil uzshiat kit wat kishiamîztu. Uspane wat pippakanain mai. Wat pippane cien pippakima puzta. Anpane sesenta pippakimain puzta. Anpane treinta pippakimain puzta.”
Chara pippakas kwail pîtkas kamtam kwinta
24 Kwiztane Jesúsne mamaz kamtam kwinta ka kwinta kinara: “Une Dios an sura uztuza îninnamtu piankamtain. Sunkana usne îninnamtu. Ampune nan pilta wat pippa malta. 25 Maza amta pittamtuasmin, aliz awane at kit chara pippakin kwail pippa wat kit ît. 26 Chara pippa chikkakane, pippa kwizakane, parejuin kwail tî pippakas kwizara. 27 Suasne sun izarawane, kiwainaruzne pamikara îat kit kaizara: ‘Anpat up nanmal maltane, aune wat pippa malwiznash. ¿Mizamaka kwail tîkas chara pippa tîkas puzamtu?’ mîmaamtu. 28 Pamikane kaiznara: ‘Mînpazha nawa aliz awa sun wara.’ Suasne kiwainturuzne an mîmaara: ‘¿Kwail tî puhsnawizna?’ kizara. 29 Usne sînkanara: ‘Ma puhsnachi. Kwail tî puhstane, parejuin chara tîkas puhsshina. 30 Parejuin chiknintawa, paknakima. Suasne kal kimtuza îninnanash, kwail tî an ñancha pakkanapa. Kwail tî pippa paktawane, wanku sat kit ïnta paktana îninnash. Kwiztane wat tî pak kit watsamkin watsanpa îninnash.’”
Ainki mostaza pippa kamtam kwinta
31 Jesúsne mamaz kamtam kwinta kwinta kinara: “Diosne apa sunkana îninnamtu. Maza ampune paiña nan sura mostaza pippa wana ît. 32 An pippane ainki i. Sun pippa wara chikkane, tîne mamaz tîkin an katsa kawirîmtu. Chitchune sun tî tailpurakin aat kit yal saamtu.”
Kiña kamtam kwinta
33 Jesúsne mamaz kamtam kwinta kwinta kinara: “Diosne apa sunkana îninnamtu. Maza ashampane pan sashimîztu, kutña waz chara pippa kîrîtkasa. Usne kiñakanain winta, wan sulnapa.”
Jesúsne kamtam kwinta kammuruza piankamninnamtu
34 Jesúsne kammuruza kamtam kwintakasain kwinta kinamîzta. Awaruza kamtanamtuasmin, usne kamtam kwintain paranamîzta. 35 Jesúsne Dios kainammmika para aizpa kirît. Sunkana parît: “Nane awaruza kamtam kwintakasa kwinta kinanash. Dios an su sarasmin, Diosne makima sun kamtam watsarît mîj. Mane nane sun kamtam kwinta kinanash.”
Jesúsne chara pippa kamtampa piankamninnamtu
36 Suasne Jesúsne awara “îru” kiz kit yalta napta. Kammuruz ussa kasha aakane, ussa ka kaizara: “Aumîza kwail pippa chikta kamtam kwinta piankamninchain,” kizara. 37 Suasne Jesúsne kammuruza kaiznara: “Nane, Dios Painkulne, wat pippa wammikane, ish. 38 Nan sune au sukana i. Wat pippane Dios îninturuzkana mai. 39 Kwail pippane aliz awakana mai. Kwail pippa wammikane Diablo i. Pakta payune minpa payukana i. Sun payura wan pailtînazi. Pakmuruzne ángelkana mai. 40 Pakmuruzne kwail tî nakkaat kit ïnta kiaintu, impaktanapa. Wan payu pailka, sunkanain kinazi. 41 Dios Painkulne paiña înintukish paiña ángeltuza îninnanazi, mamaztuza kwail kininturuzakas kwail kimturuzakas wanmakninnanapa. 42 Usne usparuza ïnta kiakpînanazi. Suane uspane azat kit sula sît sît kianazi. 43 Suasne kwiztane Dios kaizta aizpa kimturuzne Papihsh înintukin uzanazi. Uspane Dios iztukin wat kianat kit pãn aiztukanain puranazi. Na kaizta aizpa mîrain.”
Pial puintît kamtam kwinta
44 “Dios înintukin uztumikane akkwan puintît pial pilta sairamikana i. Sun puintît pial sairawane, an ampune suain mamasa puina îmtu. Watsal îmtuasmin, usne wan mîj aizpa painin kit sun su paintu, puintît pial ukkana.”
Watsal in kamtam kwinta
45 “Dios înintukin uztumikane watsal in saimtumikakana i. 46 Kwisha muin in wanmaltawane, usne wan mîj aizpa painin kit sun in paintu.”
Pishkaru sulmu kamtam kwinta
47 “Dios înintukin uzturuzne pishkarukanain mai. Sulmuruzne sulmura pira kiain kit akkwan tuntu pishkaru sulamtu. 48 Pishkaru sulmukasa sulkane, sulmuruzne sulmu piras tainaktu, pi ksurakima. Suasne uspane uzat kit pishkaru naantu. Uspane wat pishkarune tîmta win kit watsam. Kwailne kiakpîntu. 49 Minpa payura sunkanain kinazi. Ángeltuzne chiyuras puzat kit kwailtuzakas wattuzakas paimpa nanazi. 50 Uspane kwailtuza ïnta kiakpînnanazi. Suane azat kit sula sît sît kianazi.”
An ña kamtamkas masas kamtamkas
51 Jesúsne mîmanara: —¿Une sun kamtam wan mîamtukiwas? Uspane sînkaara: —Watcha. Mîanash, kizara. 52 Suasne Jesúsne kaiznara: —Dios pit kammumikane Diospa piankamtu. Sun Dios înintukin uztumikane paiña îninmika kamtamtu aizpa piankamnazi. Suasne usne yalpa mikakana namnazi. Yalpamikane masas kamtamkas an ña kamtamkas us watsarît aizpa kamtana ukkashina.
Jesúsne Nazaret pîpulura ît
53 Wan kamtam kwinta kainanarawane, Jesúsne suas ît 54 kit paiña sura, Nazaret pîpulura, piannat. Suane Jesúsne Judío kammu yalta kamtanamîzta. Awa iztaspaarît akwa, awane usparuzpain mîmaara: —Sun ampune sun pian aizpa ¿mînta kamta? Sun ampune sun iztasparît kal kimtu aizpa ¿Miza ka kimtu? kizara. 55 Usne tî kihtmumikawa painkul i. Paiña akkuhshne María mun i. Santiagokas Josékas Simónkas Judaskas paiña aimpihshtuzpain mai. 56 Paiña kwampihshtuzkas aukasa uzamtu. Usne ¿mînta wan kamta? 57 Katmizna uspane us kaizta aizpa mîashitchi. Me Jesúsne kaiznara: —Diosne kainammika mamaz suras akane, awane ussa wat minñamtu. Dios kainammika paiña suras akane, sun pîpulura uztuzne ussa an wekas minñamtu. Paiña yalta uztuzne ussa an we minñamtu. 58 Katmizna Jesúsne sun pîpulura akkwan iztasparît kal kitchi, uspa ussa wat nîjkularachi akwa.
Juanne, kwazikasa munna kimmikane, irît
1 Sun payune Herodesne Jesúspa mîra. Usne Galilea sura înin kit 2 paiña kiwaintuza kaiznara: “Anne Juan munnammika i. Usne irîttas kuhsta. Katmizna usne an iztasparît kal kimîzta,” kiznara. 3-4 Ñamin Herodesne Juanta pizna îninta, ussa kuh kit kajchira sîpna. Herodeskas Felipekas aimpihshtuzpain azi. Herodesne paiña aimpihshpa ashampara mîltît. Sun ashampane Herodías muntît. Herodías akwa Herodesne Juanta sîpninta. Juanne Herodesta kaiztît: “Sun ashampara, up kwiñara, mîlnachi,” kizta. 5 Juanta piantashimtukas, Herodesne ussa piantarachi, awa ishkumtu akwa. Wan awane Juan Dios kainammmika azi minñara. 6 Herodespa año kapal pishta taizkane, Herodíaspa pashune akwattuza iztakin puz kit kukin îrît. Herodesne wari min kit 7 nimpihsh ashampara kaizta: “Nane nu chiwazha paikumtu aizpa Dios iztakin nua mîlan namtus,” kizta. 8 Nimpihsh ashampane akkuhshta kwinta kin ît. Akkuhsh ussa kurunkane, nimpihsh ashampane Herodesta kaizta: “Mamazta îninti, Juan munammikawa kîzpu pîlattukin karanpa,” kizta. 9 Sun pit mîrawane, Herodesne tayalta. Tayaltukas, usne us paikwat aizpa mîlat. Pishta akwattuz us mîlan namta aizpa mîara akwa, Herodesne mamaztuza îninnara, us paikwara aizpa kin. 10 Suasne usne mamazta kajchira îninta, Juanpa kîzpura tîtnapa. 11 Suasne uspane pîlattura karaat kit nimpihsh ashampara mîlaara. Usne akkuhshta chîhkara. 12 Suasne Juanpa kammuruzne aat kit irîtta muat kit pilta kamaara. Kwiztane Jesústa kainana îara.
Jesúsne cinco mil awaruza pan kwinnamtu
13 Sun mîrawane, Jesúsne tas puz kit kanuara wat kit pul sura îrît. Mazainpain îrît. Jesúspa tukin piankamarawane, awane pîpulukis puzat kit mittîwara pimawara us tukin îamîzta. 14 Kanuakis kihshtawane, Jesúsne akkwan awara iznara. Usne usparuza kiwainshinat kit intuza kakulninnara. 15 Tîl pamîzkane, nashmîzkane, Jesúspa kammuruzne us tukin aat kit kaizara: —Nashtîmtui. Akkine mînminkas uzchi. Awaruza pîpulura îrain kiznari, chiwazha painapa kwan. 16 Jesúsne sînkanara: —Usparuza îninman. Umin usparuza kwinnari, kuanapa. 17 Uspane kaizara: —Akkine aune cinco panminkas paas pishkaruinkas mîjmakpas. 18 Jesúsne kaiznara: —U mîj aizpa nawa kararain, kiznara. 19 Suasne Jesúsne awaruza pîtkin uzanapa îninnara. Suasne usne cinco pankas paas pishkarukas sap kit chiyura izak kit Diosta aishtaish kizta. Kwiztane pankas pishkarukas kîz kit kammuruza mîlanara. Uspane awaruza nailnara. 20 Wan kuat kit tukkarît. Kwatpane, uspane pitti pitti tiztît sakkat kit doce tîmta winñara. 21 Cinco mil ampune kuara. Ashamparuzkas pashparuzkas wiantachin kuara.
Jesúsne pi îsalpara chamtu
22 Suasne Jesúsne kammuruza kanuara waanapa îninnara, an ñancha pi kwakara piannaanapa. Îamtuasmin, Jesúsne awaruza îru kiznara. 23 Usparuza “îru” kiznarawane, usmin malta nura, Diosta paikwan. 24 Tîl pamîzkane, us suain nukkultuasmin, kammuruzne kanuawara pi paizkakin îamtuazi. Îamtuasmin, katsa tînta inkwa kanuara nuppainmîzta. Pine tînta palakpîntu. 25 Tîlawain Jesúsne uspa tukin ît. Pi îsalparain mittîwara îmtuazi. 26 Uspa tukin pianamtuasmin, kammuruzne ussa pi îsalpara chamtu izara. Uspane ishkuat kit kwianara: —Irît izpul izpuspas, kizara. 27 Suasne Jesúsne usparuza parat kit kaiznara: —Une tînta kultain. Na ish. Ishkuman. 28 Suasne Pedrone sînkara: —Anpat. ¿Nu kish? Nu sua chamtuasmin, nawa chanpa înincha, nu kuntakima, pi îsalpara în. 29 Jesúsne kaizta: —Nawa at, kizta. Pedrone kanuaras kihsh kit pi îsalpara îmîzta, Jesús kuntakima. 30 Kwisha tînta inkwa iztuasmin, Pedrone ishkwat kit pira unainmîz kit ka kwianmîzta: —Anpat kiwaincha, kizta. 31 Îrattuin Jesúsne ussa piz kit tainak kit kaizta: —¿Chitma nawa wat nîjkulmas? 32 Kanuara nuilkane, inkwane pamtuchi parît. 33 Suasne kanua waruzne Jesús iztukin wakpuj wainñat kit kaizara: —Watcha. Nune Dios Painkul i, kizara.
Jesúsne Genesaret su imturuza kakulninnamtu
34 Uspane pi kwakkat kit Genesaret sura pianaara. 35 Sun suras awa Jesúspa piankamarawane, uspane wan awaruza Jesús pianarît kainanara. Piankamarawane, uspane Jesús tukin imturuza karaara. 36 Uspane Jesústa paikuara, ishturuz paiña pïnkin paanapa. Wan paiña pïnkin paararuzne kakularît.
Jesús an ñamin kamtam watchi kiztu
1 Suasne mînpazha Fariseo awaruzkas Moisés kaizta aizpa kamtamtuzkas Jerusalén pîpuluras puzat kit Jesústa tukin aat kit mîmaara. 2 —Up kammuruzne ¿Chikishma ñamin iarît kamtamtuz kainara aizpa mîamtuchi? Kuamîztune, uspane chihtî kittarazi, uspa kwail kiarît aizpa kihana. 3 Jesúsne sînkanat kit mîmanara: —Une ¿Chikishma Dios kaizta aizpa mîamtuchi? Umin u îlaparuz manta kiamtu aizpa minñamtu, Dios uruza manta kinamtu aizpa kiamanapa. 4 Diosne awaruza îninnat kit ka kaiznara: “Une papihshtakas akkuhshtakas wat nîjkulat kit wat kiarawa.” Kawarain “Mînpazha papihshtakas akkuhshtakas kwail paramtune, awa ussa piantarawa, inapa.” 5 Kancha umin papihshtuzpakas akkuhshtuzpakas ka kamtanamtu: “Papihshtakas akkuhshtakas mîlanashimtukine, une ka kizarawa: ‘Nane na papihshtakas akkuhshtakas mîlasachish, na wan mîj aizpa Diosta mîlat akwa.’ 6 U sun kamtamtu akwa, une ‘au papihshtuzakas au akkuhshtuzakas kiwainsachimakpas’ minñamtu. U sunkana kamtaamtune, u kwalta kiwaintuchine, une Dios manta kimtu aizpa kiamtuchi. U îlaparuz kamtanamtu aizpa mîashimtu akwa, une kwail kiamtu. 7 Upapihshtakas u akkuhshtakas kiwainamtuchi akwa, une we nîjkulamtu, Dios kaizta aizpa kiamtuchi akwa. Isaíasne, Dios kainammmikane, ñamin uruzpa nil kaiznara: 8 ‘An awa uspa pitkasain nawa wat kizamtukas, uspane nawa wat nîjkulamtuchi. 9 Nawa wakpuj wainñamtukas, uspane nawa piankamamtuchi. Kamtanamtuasmin, uspane “au kamtamne Diospa kamtam i” kizamtu. Sunkana chi. Uspane uspain kamtam kamtanamtu.’ ” 10 Sun kiztawane, Jesúsne akkwan awaruza wanmakninnat kit kaiznara: —Na kaiztu aizpa mîrain, piankamanapa. 11 Chiwazha kumira kumtukas, kumira kumtumikasha kwail namninmanazi. Me kwail pit kaiztamikane kwail kimmikakana namnazi. 12 Suasne Jesúspa kammuruzne us tukin aat kit kaizara; —Nu kaizta aizpa akwa, Fariseo awane nukasa aliz kulaarît. ¿Sun piankamtukish? kizara. 13 Usne sînkanara: —Ap chiyuras Taittane paiña kamtam chîhkanara. Usne nil chi kamtamtuzakas nilchi nîjkultuzakas pailnintînazi. Awane usparuza kwail tîkana puhstînazi. 14 Usparuza kurunnaman. Sun we pian kamtamtuzne mamaz we piantuza kamtanamtu. Wan karînazi. Sun kwail kamtamtuzne kasu izsachiruzkana mai. Kasu izsachimika kai izsachimikasha taintane, paasas kulkin taiziltînazi. 15 Pedrone Jesústa kaizta: —An kamtam kwinta aumîza piankamninchain. 16 Jesúsne mîmanara: —Une we piankaamtu. ¿Une mîsachimakkiwas? 17 ¿Kumira kwat aizpa pianchimakkiwas? Wan kumira kwat aizpa pusunmal wa. Kwiztane awaras puztu. 18 Awa chiwazha ayuk kaijchira minñamtukas, kwiztane awane pitkasa paramtu. Kwail pit kaiztamikane kwail kimtu. 19 Wan kwailne kaijchuras puzamtu. Kwail mintumikakas, awara piantamtumikakas, mamazpa ashampakasa pittumikakas mamazpa ampukasa pittumikakas, walkumtumikakas, pîrail kaiztumikakas, mamazta kwail pit paramtumikakas kaijchukin min kit chiwazha kwail kimtu. 20 Sunpawa kwail kimtumikane, Dios iztakin kwail kit kit ayukta sînam chi namnazi. Chihtî kittuchi kwatmikane Dios iztakin kwail kimtuchi. Usne ayukta sînam i.
Mamaz suras ashampane Jesústa nîjkulta
21 Tas puztawane, Jesúsne mamaz sura ît kit Tiro pîpulurakas Sidón pîpulurakas pianara. 22 Cananea suras ashampane sun sura uzta. Usne Judío awa chi. Usne Jesús tukin ît kit ka kwianta: —Anpat. Nawa mîzha. Nune ñamin înintamika Davidpa kwal i. Nawa kiwaincha. Kwail saliz ap pashura pizta akwa, ap pashune kwisha naizmîztui, kizta. 23 Jesúsne ussa sînkarachi. Suasne paiña kammuruzne Jesústa aat kit ka paikuara: —An ashampa paiña pashu akwa paikumtu akwa, us paikumtu aizpa kit kit ussa attishta îninti. Usne au kwizpa tînta kwiantu. 24 Suasne Jesúsne an ashampara kaizta: —Diosne nawa Israel awaruza îninta. Uspane pîriku karîtuzkanain uzamtu, pîriku izmumika mîjchi akwa. 25 Ashampane kasha ît kit us iztakin wakpuj wain kit kaizta: —Anpat mîzha. Kiwaincha, kizta. 26 Jesúsne ussa sînkara: —Nane Judío awaruza kiwainarawash. Sunkana pashpawa kumira nakasachish, kwizaruza kwinna. Kawarain nane Judío awaruza kiwainnarawash, Judío awachiruza kiwainnarachin. 27 Usne kaizta: —Watcha Anpat. Nu watcha i kaiztukas, kwizakas pamikawa misharîras pak taizka sak kit kum. Sunkana, na Judío awachi akwa, nawa pitchin kiwaincha, kizta. 28 Suasne Jesúsne ussa kaizta: —Ashampa mîzha. Nu kwisha wat nîjkultît akwa, nu pashimtu aizpa kinash, kizta. Sun urain paiña pashune kakultît.
Jesúsne akkwan inturuza kakulninnamtu
29 Jesúsne tas puz kit Galilea pimamin pianara. Kwiztane maza îzara nut kit sua uzta. 30 Kwisha akkwan awane us tukin aara. Uspane chasachiruzakas kasu izsachiruzakas pit parasachiruzakas sail puil patturuzakas pimpul kwail mîjtuzakas an akkwan inturuzakas karaara, Jesús kakulninnanapa. 31 Jesús kit aizpa izarawane, awa sun izararuzne iztaspaarît. Pit parasachiruzakas paraara. Sail puil patturuzne wat parît. Chasachiruzne chaara. Kasu izsachiruzne izara. Watsal iztasparît kal izarît akwa, uspane Israel awawa Dios kwisha wari kizamîzta.
Jesúsne ampara mil awara kumira kwinamtu
32 Suasne Jesúsne kammuruza akwanat kit kaiznara: —An awane nakasa kutña payukima chaamtu. Mane uspa kumira mîjchi akwa, kiwainashimtus. Nane usparuzpa yalta îninnashimtuchish, uspa kumira kwatchi akwa, miwara najarîn akwa. 33 Suasne paiña kammuruzne mîmara. Apain akkwan awa uzamtuchi akwa, —¿Mîntama kumira sayanapai? An sukinne mînminkas uz chi, chiwazha paina, kizara. 34 Jesúsne mîmanara: —Une ¿Yawa pan mîjmakpas? kiznara. Uspane kaizara: —Siete pankas akkwan pishkaruchikas mîjmakpas, kizara. 35 Suasne Jesúsne awaruza îninnara, pilta uzanapa. 36 Usne siete pankas pishkarukas sap kit Diosta aishtaish kizta. Suasne kîz kit kammuruza nailnara. Uspane awaruza nailnara. 37 Wanne tuktakima kuat. Wan kwatpane, uspane tiztît aizpa siete tîmta winñara. 38 Ampara mil ampune kuara. Ashampakas pashpakas winñamtachin kuara. 39 Kwiztane Jesús awara “îru” kiz kit kanuara wat kit Magdala sura îmîzta.
Fariseo awakas Saduceo awakas Jesústa chiyuras iztasparît kal kinpa paikuamtu
1 Fariseo awakas Saduceo awakas Jesústa îat kit paikuara, chiwazha chiyuras iztaspat kal kinpa. Us iztasparît kal kikane, uspane ussa kwail kimtu kizshiara, awa us akwa kwail minñanapa. 2 Jesúsne usparuza sînkanara: “Nashmîzkane, kwanam parîkane, une ‘tîlawa watsal kînnazi,’ kizamtu. 3 Kînmîzkane, ‘Une mane kwail payu anpai’ kizamtu, ‘wanish sîptît akwa, chiyu kwanam iztît akwa.’ U chiyura kimtu aizpa wat piankas, une ma payu na kimtu aizpa wat piankamasachi. 4 U kwail awa chiyuras iztasparît kal izshiamtukas, une Diosta an wat piankamashitchi. Diosta kanpaashimtuchi akwa, une kwail cha ashampakana chaamtu. Mane iztaspat kal u iztukin kimanash. Une mamaz tuntu kal izanazi. Une Jonásta kit aizpakana izanazi.” Suasne Jesúsne awaras îrît.
Fariseo awa kamtamtu aizpa kwail i
5 Pi kwakkarawane, kammuruzne pan mîlna mainñarît. 6 Suasne Jesúsne kaiznara: —Fariseo kamtamtu aizpakas Saduceo kamtamtu aizpakas kwiraruin. Uspa kamtamtu aizpa kiñakana i. Kiñane chiwazha sulnin kit wan chiwal maiznamtu. 7 Suasne kammuruzne usparuzpain kaizamîzta: —Au pan karatchi akwa, Jesúsne sunkana kaiztu. 8 Jesúsne uspa minñamtu aizpa nîjkul kit kaiznara: —¿Chikishma pan karazamanas kizamtuas? Une nawa wat nîjkulamtuchi. 9 ¿Na kaizta aizpa wat mîmtuchimakkiwas? Nane cinco pankasain cinco mil awara nailnarau. ¿Yawa pak tiztît tîmta winñara? ¿Nîjkultuchimakkiwas? 10 Nane siete pankasa ampara mil awara nailnarau. ¿Yawa pak tiztît tîmta winñara? ¿Nîjkultuchimakkiwas? 11 ¿Mizama na kaizta aizpa nîjkulamtuchi? Nane panpa paramtuchish. Kiñawa paramtuchish. Nane Fariseo kamtamtu aizpakas Saduceo kamtamtu aizpakas paramtus, u uspa kamtaamtu aizpa kiamanpa. 12 Suasne kammuruzne Jesús kaizta aizpa piankamarît. Jesúsne panpa kiña kamtanarachi. Usne Fariseo kamtampakas Saduceo kamtampakas kamtanara, uspa kamtamtu aizpa kiamanpa. Kuiraruin.
Pedrone Jesús Dios nîrîtmika i kiztu
13 Filipowa Cesarea sura pianatpane, Jesúsne kammuruza mîmanara: —Awane ampu namtîtmikawa paraamtu. Uspane ¿nane mînma i kizamtu? 14 Uspane sînkaara: —Mînpazha nune Juan munnammika i kizamtu. Mamaztuzne “nune Elías, ñamin Dios kainammmika i” kizamtu. Mamaztuzne nune Jeremías, ñamin Dios kainammmika, i kizamtu. Mînpazha “nune mamaz ñamin uztamika, Dios pit kainammmika i” kizamtu. 15 Suasne Jesúsne mîmanara: —Une ¿Chima minmuspas? Nane ¿mînma ish? 16 Suasne Pedrone kaizta: —Nune Dios nîrîtmika i. Nune Cristo muntîtmika i. Nune chiyuras Dios Painkul i, kizta. 17 Jesúsne Pedrora, Jonáspa painkulta, sînkara: —Nune watsal kianazi. Mînminkas nu pian aizpa nîjkulnintachi. Ap chiyuras Taittain sunmin nua nîjkulninta. 18 Nane up mun maizninnash. Ñamin nune Simón muntît. Nu nawa kaizta akwa, nane makis nua Pedro munnintus. Nu tînta akwa, mînminkas nua maizsachi. Nane wan nawa piantuzakas wan na kamtamtu aizpa mîmturuzakas kiwainnanash, na kaizta aizpa nîjkulanapa, an kamtam akwa tînta ukkana namanapa. Uspa purakis wan ïnkin saliztuzne nawa piantuza anuppasachi. 19 Nane nua îninmika namninnash, Dios kaizta aizpa mîmturuza kurunnanapa, nu Dios akwa parananapa. Nune awaruza chiwazha wat aizpakas chiwazha kwail aizpakas kamtananazi. Nu wat kimturuza u wat kiamtu kiznarane, Dioskas sunkana kiznazi. Nu kwail kimtuza u kwail kiamtu kiznarane, Dioskas sunkana kiznazi. 20 Suasne Jesúsne kammuruza ka kurunnara: —Mînainkas “nane Dios nîrîtmika ish” kizman.
Jesús nane irînash kiznamtu
21 Sun payuin Jesúsne paiña kammuruza “nane Jerusalén pîpulura îrînash” kainanamîzta. “Judío îlaparuzkas katsa pariya înintuzkas Moisés parît aizpa kamtamtuzkas nawa kwisha naizninanazi. Uspa nawa piantarawane, nane kutña payura irîttas kuhsnash.” 22 Pedrone Jesústa paimpa mit kit tînta pilchapuz kit kaizta: —Nu kaizta aizpa kaizmun. Nu kaizta aizpa nua kimanazi, kizta. 23 Jesúsne puijchat kit Pedrora kaizta: —Nakis paimpa îri. Nune Satanáskana mintu. Nune nawa kiwaintuchi, Dios pashimtu aizpa kin. Nu awakana mintu akwa, nune Dios mintukana mintuchi. 24 Suasne Jesúsne kammuruza kaiznara: —Mînpazha nawa kanpammika namshitne, usne usmin pashit aizpakin maintawa, Dios pashimtu aizpa kin. Naiztukas, kurishta irîmtukas, usne nawa kanpamîztawa. 25 Nawa kanpashitchimikakas au sura watmin uzshitmikakas paiña izpul karînazi. Na akwa irîtmikakas, na akwa uzshitmikakas, paiña izpul kamanazi. 26 Mînpazha wan sukin pura aizpa kana kitkas, izpul karîtmikane chinkas mîjchianazi. Kwazpamikane paiña izpul watsat mîlnana pial tasachi. 27 Nane, Ampu namtîtmikane, chiyuras anash. Na akane, ap Papihshne nawa paiña ángeltuzakas îninnanazi. Usne nawa piantuza chiwazha mîlam tananazi. Ap kal kimturuzne sun mîlam sappanazi. 28 Watcha kaiznamtus. Mînpazha ma payu uztuzne iamanazi, Ampu namtîtmika awaruza îninnamtu izanakima. Usne katsa mikwakana iztînazi.
Jesúsne kai sanazi
1 Seis payu pailkane, Jesúsne Pedrorakas Santiagorakas Juantakas, paas aimpihsh parain, paimpa akwanat kit kwash îzarakima minara. 2 Suane usne uspa iztakin mamaz tuntukanain maiztît. Paiña matsîhne pãn naztamkana malta. Paiña kwaksham impilkanain putchã iztît. 3 Masain uspane Moiséstakas Elíastakas izara. Uspa paas Jesúskasa kwinta kiamtazi. 4 Pedrone Jesústa kaizta: “Anpat, kwisha wat tumakpas akkine. Nu pashitne, nane kutña ainki yal sanash. Mazane up, mazane Moiséspa, mazane Elíaspa.” 5 Pedro paramtuasmin, naztam wanish taiz kit usparuza sîpnara. Diosne wanishkin kaiznara: “Anne ap painkul i. Ussa kwisha pashimtus. Usne ap narîtmika i. Us kimtu aizpa wari pianish. Us kaiztu aizpa mîrain.” 6 Sun mîrawane, kwisha ishkuamtu akwa, paiña kammuruzne matsîh pilta wainñara. 7 Suasne Jesúsne uspa purakin ît kit usparuza panat kit kaiznara. “Kuhsaktain. Ishkuman,” kiznara. 8 Kasu izkulakane, uspane mînainkas izarachi. Jesústain izara. 9 Kwash îzaras kihshamtuasmin, Jesúsne ka kurunnara: —U izara aizpa mînainkas kainamman, Ampu namtîtmika irîttas kuhsnakima. 10 Katmizna paiña kammuruzne Jesústa mîmaara: —Moisés parît aizpa kamtamtuzne “Elías Cristokin, Ampu namtîtmikakin, an ñancha anazi” kizamtu. ¿Chikishma sun kizamti? 11 Jesúsne sînkanara: —Watcha, Elíasne an ñancha atmika azi. Usne awaruza kurunnanazi, wan watsananapa. 12 Nane kaiznamtus. Awa ussa piankamarachikas, Elíasne me arît. Uspane uspa kwail kishiarît aizpa ussa kiarît. Sunkanain awane Ampu namtîtmikasha naizninat kit piantanazi. 13 Suasne paiña kammuruzne Jesús Juan munnammikawa kaizta piankaamara.
Jesúsne salizta puznintu
14 Awa purakin piannaakane, maza ampune Jesústa at kit us panakin wain kit kaizta: 15 —Anpat. Ap painkulta kiwainti. Usne ul kit kwisha naizmîztu. Kwisha akkwan pijikima ïntakas pirakas taizta. 16 Na up kammuruza karanarakas, uspane ussa kakulnintachi. 17 Jesúsne wan awaruza kaiznara: —Une mama nawa nîjkulamtuchi. Une watcha piankamashitchi. Nane ukasa akkwan payuchin uznash. Uruza tailchasachish. Up painkulta apa nawa karat, kizta. 18 Sun urain Jesúsne salizta tînta kaiz kit înin kit pashparas puzninta. Sun urain wat parît. 19 Kwiztane kammuruzne Jesúskasa paimpa kwinta kiat kit ka mîmaara: —¿Chitma aune saliz puzninsachimakpas? kizara. 20 Usne sînkanara: —Nawa we nîjlulamtu akwa, une salizta puzninsachi. Watcha kaiznamtus. Ma pitchin nîjkultumikane “sun îzara pi kwakara ît” kizshina. Suasne sun îza kwakara îrînazi. Wemin nîjkultumikane akkwan chiwazha kinazi. 21 Dios akwa pala kwatchin chamtuasmin, Diosta paikuamtuasmin, une sun tuntu salizta puzninshinai.
Jesúsne mamasa inash kiztu
22 Galilea suwara parejuin chaamtuasmin, Jesúsne kaiznara: —Kwail awaruzne nawa, Ampu namtîtmikara, pizat kit mamaztuza chîhkaanazi, nawa piantanapa. 23 Nawa piantarawane, kutña payura kuhnash. Us kaizta aizpa mîarawane, uspane kwisha tayalamîzta.
Judío wanmakmu yalkin pial tamtu
24 Jesúskas, paiña kammuruzkas, Capernaum pîpulura piannaakane, Dios yalkis awaruzne, pial sapmuruzne, Pedrora îat kit mîmaara: —Up kamtam Dios yalkin napkane, ¿Up kamtammikane pial tanasa? kizara. 25 Pedrone sînkanara: —Watcha. Usne pial sapmuruza pial tamtu. Kwiztane Pedrone Jesús tukin yalta napta. Pedro parachasmin, Jesúsne an ñancha ussa kaiz kit parat: —Pedro, nune ¿Chi mintus? Wan sukin katsa mikwaruzne gobiernowa pial sappamtu. ¿Mînmikama katsa mikwara pial tamtu? ¿Uspa sukin uztuzne pial taamtuki? ¿Mamaz suras anupparîttuzne pial taamtuki? kizta. 26 Pedrone sînkara: —Mamaz suras anupparîttuzne pial taamtu. Jesúsne kaizta: —Suasne, au Diosta piankamamtu akwa, Dios aumîza îninamtu akwa, aune Dios yalta napna sun pial taasachimakpas. Sun Dios yal îninturuz na kaizta aizpa piankamasachi akwa, taarawamakpas, usparuza aizappamanpa. 27 Mane na kaiztu aizpa nu kitpa, pial sapmuruz aliz kulamanpa. Pira ît kit ñampi pira kiainti. An ñancha pishkaru tainaktash. Nune pishkaru pitta pial wanmalnazi. Sun pialkasa na akwakas nu akwakas pial sapmuruza tanashina.
¿Mînma an tîntamika i?
1 Maza payune kammuruzne Jesústa îat kit mîmaara: —Dios înintukin ¿Mînma an tîntamika i? 2 Suasne Jesúsne pashpara akwat kit uspa paizkakin kunnin kit 3 kaiznara: —Watcha kaiznamtus. U mintu aizpa maizarachine, pashpakanain namarachine, une Dios înintukin nappamanazi. 4 Dios înintukin an tînta namtamikane “nane an warish” minmanazi. Usne an pashpakanain namtawa, “nane an tînta ish” mintachin. 5 Mînpazha na akwa an pashparakanain kiwainshimtune, nawakas wat min kit saptu.
Mamazta kwail kinintane, kwail i
6 “Mînpazha an pashparuzakanain, nawa we tînta nîjkultuza, kwail kininnarane, uspane kwisha naizarînazi. Mamazta kwail kimtuchasmin, ina an wari. Anza wari katsa kîmu ukkasa paiña tîmpukin kuh kit pi pînta kiakpînna. 7 Au sukin akkwan tuntu kwail wa. Mînpazha nawa nîjkulturuza kwail kininturuzne an sura kwisha naizarînazi. Apas awa mamaztuza kwail kininnamtukas, mamaztuza kwail kininturuzne an akkwan naizanazi, uspa kwail kiarît akwa. 8 Katmizna, uruzpain kwiraruin. Awane chihtîkas mittîkas waj. Uspa chihtîkasa kwail kimturuzkas kwail kin chamturuzkas maizarawa, uspa mittîkas kwail kiamanpa, awa kwail kiamtukin chamanpa. Chihtîkasa kwail kimtuzkas awa kwail kiamtukin chamturuzkas Dios uztukin nappasachi. Ðnta îanazi. 9 Awane kasu waj. Chiwazha kwail saimtumikane kwail min kit kinazi. Kwail kin saimtuchimikane Dios uztukin napnazi. Kasukasa kwail sait kit kimtumikane ïnta îrînazi. Katmizna kwail saiman, ïnta îamanpa.”
Pîriku karît kamtam kwinta
10 “Mîrain. Pashparuzpakas nawa wat we piantuzpakas kwail minñanachi. Watcha kaiznamtus. Ángeltuzne nawa we piantuza iznat kit au chiyuras Taitta iztakin pura. Uspane pailta payukima Diosta izamtu. 11 Ampu namtîtmikane apa at, ussa pianchiruzakas karîttuzakas watsat mîlnana. 12 Sun kwinta mîrain. Maza ampune cien pîriku mîj. Maza pîriku karîkane, pîrikuwamikane noventa y nueve pîrikuruza îzara kwaittarît kit maza pîriku karîtmikara saimîztu. 13 Karît pîrikura wanmaltane, usne sun pîriku akwa anza wat kultît uz. Usne noventa y nueve pîriku kaarachiruzpa wemin mintu. 14 Sunkanain au chiyura Papihshne nawa we piantuza, pashpakanaintuza, kiwainninnashimtu. Mazantuz karîntukas, usne usparuza watsat mîlnashimtu.”
Diosta piantuza wat kultawamakpas
15 “Mamaz awa nua kwail kikane, nune ussa paimpa ît kit us kwail kit aizpa piankamnintawa. Nu kaizta aizpa mîrane, usne up izmuruz namnazi. 16 Us nua mîshimakane, paastakas kutñarakas wanmaknintawa. Suasne nune uspa iztakin paiña kwail kit aizpa kainarawa, kutñaruz piankamnapa. 17 Suasne uruza mîshimakane, nune iglesia wanmakmuruza us kwail kit aizpa piankamninarawa. Iglesia wanmakmuruz kaizara aizpa mîshimakane, une ussa ka mintain: Nune Dios pianchimikakana i. Nune Diosta nîjkultuchikana i. 18 Watcha kaiznamtus. Une awaruza chiwazha wat aizpakas chiwazha kwail aizpakas kamtananazi. U wat kimtuza ‘u wat kiamtu’ kiznarane, Dioskas sunkana kiznazi. U kwail kimtuza ‘u kwail kiamtu’ kiznarane, Dioskas sunkana kiznazi. 19 Mamaz pitkas uruza kaiznamtus. An sukin paas awane nîjkul kit nîjkulpailshina. Diosta paikukane, ap chiyuras Taittane u pashimtu aizpa mîlananazi. 20 Paaskas kutñakas na akwa wanmakkakane, nane uspa paizkakin tuanash.”
Kiwainmumika mamazpa kwail wat kulshitchi
21 Suasne Pedrone Jesústa ît kit mîmara: —Anpat. Ap aña nawa kwail kitne, ¿Yawa pijikima paiña kwail kimtu aizpa wat kultawaish? ¿Ussa siete pijikima wat kultawaki? 22 Jesúsne sînkara: —Ussa siete pijikimain wat kulman. Nune aimpihshta an akkwankima, ciento cuarenta pijikima, ussa kwail kirît aizpa wat kultawa. 23 “Katmizna, nane maza kamtam kwinta kainanash, miza Dios înintu piankamanapa. Katsa mikwane paiña kiwainmuruza akwanara, paiña pialpa pui aizpa kwinta kin. 24 Paiña pialpa kwinta kimîztuasmin, mikwane mazara îninta, maza kwisha puimikasha karan. Usne 10.000 kilo pial puiara. 25 Paiña kiwainmika wan pial mîjchi akwa, usne paiña pui aizpa tasachi. Suasne pamikane paiña pit îninta, kiwainmikarakas paiña ashamparakas paiña painkultuzakas wan mîj aizpa paininnapa, pui aizpa taanapa. 26 Suasne kiwainmikane pamika iztakin wakpuj wain kit paikwat: ‘Anpat mîzha. Ma pitchin tîrizti, pial sainakima. Nua wan tanash,’ kizta. 27 Us akwa tayaltu akwa, pamikane ussa kiwainshit kit us wan pui aizpa wat kulta. Chinkas saptachin, ussa chîhtta. 28 Tas puztawane, sun kiwainmikane mamaz kiwainmikara wanmalta. Usne ussa we pui. Ussa kwilkin tulpiz kit kaizta: ‘Nu pui aizpa tazha.’ 29 Suasne paiña kiwainmikane us iztakin wakpuj wain kit kaizta. ‘Ma pitchin tîrizti. Na pui aizpa tanash,’ kizta. 30 Sunkana usne tîrizshitchi. Usne puimikara kajchira sîpninta, pui aizpa tanakima. 31 Mamaz kiwaintuz sun izarawane, uspane kajchira sîptîtmika akwa kwisha tayalat kit uspa pamikara sun kit aizpa kainanara. 32 Suasne pamikane an ñancha pui wat kultîtmikasha akwanpa înin kit kaizta: ‘Nune kwail kiwainmika i. Nu nawa paikwara akwa, nane wan nu pi aizpa wat kultau. 33 Nukas na nu pui aizpa wat kultîtkana mamaz kiwainmikasha wat kulkamtish.’ 34 Suasne anpatne kwisha pilchapuz kit ussa kajchira înin kit ussa sîpta, naiznapa, wan chiwal pui aizpa tanakima.” 35 Kapal kwinta kitpane, Jesúsne kaiznara: —Une u aimpihsh kwail kiat aizpa watcha wat kularakine, u chiyuras Taittane u kwail kiamtu aizpa wat kulmanazi.
Ashampa mîjne, ussa kwaikain
1 Kapal sun pit kamtanarawane, Jesúsne Galilea sukis puz kit Judea sura ît. Jordán pi pãn puzmumal piannara. 2 Kwisha akkwan awane ussa kanpaarît. Suane inturuza kakultanara. 3 Suasne mînpazha Fariseo awane Jesús tukin aara, ussa kwail kininna. Ussa ka mîmaara: —Ampu paiña ashampara an pashitkine, ¿Ampune chiwazha akwa ussa kwaishinaki? mîmaara. 4 Jesúsne sînkanara: —Une Dios paiña pînkîhta panintît aizpa izara. An ñamin awa sarawane, Diosne “ampurakas ashamparakas sara.” 5 Ankas kaiznara: “Sun akwa ampune paiña papihshtakas paiña akkuhshtakas paimpa înazi, paiña ashampara wanmakna. Paasas maza awakanain namnazi.” 6 Sunkana uspane paas awa chi. Maza awain. Katmizna Dios ampurakas ashamparakas wanmakninta akwa, mînminkas sun paasta kwainnachi, paimpa uzmanpa. 7 Suasne Fariseo awane Jesústa mîmaara: —Moisés ka parît: “Ashampara kwaishitne, ampune ashampara kwaina pînkîh chîhkatpa.” ¿Sunne chitka parît? 8 Jesúsne sînkanara: —U Dios pashit aizpa kiashimtuchi akwa, Moisésne kwaina pînkîh chîhkashina kiznara, ashampara kwainapa. An ñamin Diosne sunkana pashitchi. 9 Nane sunkana kaiznamtus. Ashampa mamaz ampukasa pittane, paiña ampune paiña ashampara kwaina kit chîhkashina. Paiña ashampa mamazkasa pittukine, usne paiña ashampara kwaisachi. Sun ampu paiña ashampa mamaz ampukasa pittachimikasha kwairane, sun ampune kwail kinazi, mamaz ashampara mîltane. Sun kwairît ashampara mîltumikane kwail kinazi. 10 Kammuruzne Jesústa kaizara: —Ampu paiña ashampara kwaisachine, anza wat ashampara mîlnachi, kizara. 11 Jesúsne sînkanara: —Wanne Dios kaizta aizpa piankamasachi. Diosne ashampara mîltumikasha kiwainnashina, paiña ashampakasa wat uznanpa. 12 Pashparasmin mînpazha ampune kasara kisachi. Awane mamaztuza kasara kininarachi. Mînpazha ampune ashampara mîlshitchi, Dios înintukin kal kinpa. Na kuruntu aizpa mîshimturuzne na kaizta aizpa piankamtawa.
Jesúsne pashparuza wat kinamtu
13 Suasne uspane mînpazha pashparuza Jesúspakin karaara, paiña chihtîkasa paat kit uspa akwa Diosta paikwanpa. Kammuruzne pashparuza karamtuza pilchaapuzta. 14 Suasne Jesúsne kaiznara: —Nakin pashpa karaman kizman. Awane an pashpakanain Dios înintukin uzanazi. 15 Pashparuza paiña chihtîkasa paanarawane, suas îrît.
Musittu kwazpamika
16 Maza musittune Jesúspakin ît kit mîmara: —Wat Anpat. ¿Chi wat kalma kinpai, chiyura pailta payukima uzna? kizta. 17 Jesúsne sînkara: —¿Chitma nawa wari kiztus? Diosmin wari. Sunkana chiyura uzshitne, Dios kaizta aizpa kiri, kizta. 18 Musittune kaizta: —¿Chima kinpai? Diosne akkwan pit îninta. Jesúsne sînkara: —“Awara piantamun. Mamaz ashampakasa pitmun. Walkumun. Mînainkas pîrail kaizmun. 19 Papihshpakas akkuhshpakas wat mintawa. Nuin pashimtukanain makin uztuza pashinarawa,” kizta. 20 Musittune sînkara: —Nane pashpa asmin nu kaizta aizpa kirau. ¿Anne chima kinpai? 21 Jesúsne kaizta: —Nu wan nil kishitne, nune wan mîj aizpa painin kit puizara mîlanarash. Sunkana kitne, nune chiyura pãn kulnazi. Kwiztane nakin at kit nawa kanpazha, kizta. 22 Sun mîrawane, musittune tayal kit îrît, kwisha kwazpa akwa. 23 Suasne Jesúsne kammuruza kaiznara: —Watcha kaiznamtus: “Kwazpamikane kwisha sam i, Dios înintukin napna.” 24 Mamasa kaiznamtus. Camellone chîhku kasura napsachi. Kawarain pãn kulshitmikane Dios înintukin napsachi. 25 Sun mîarawane, kammuruzne kwisha iztaspaat kit usparuzpain mîmaara: —Kwazpa awa Dios înintukin nappasachine, suasne mînminkas watsat mîlmanazi. 26 Jesúsne usparuza iznat kit kaiznara: —Awane usparuzpain watsat mîlnasachi. Diosmin chiwazha awaruza watsat mîlnashina. 27 Suasne Pedrone Jesústa kaizta: —Aune wan mîj aizpa chîhkarîtmakpas, nua kanpana. ¿Chima saptawaime? 28 Jesúsne sînkanara: “Watcha kaiznamtus. Mamaz payura Diosne wanta masas namnintînazi. Sun payura nane, Ampu namtîtmikane, Dios înintukin uz kit kwisha naztam malnash. Une, ap kanpamturuzne, doce înintukin nakasa uzanazi, doce Israelpa kwaltuza îninnana. 29 Nawa kanparamikane, mînpazha na akwa yalkas, aimpihshtakas, kwampihshtakas, papihshtakas akkuhshtakas painkultakas paiña sukas chîhkatmikane, apain an akkwan pijikima sappanazi. Kwiztane chiyura pailta payukima uzanazi. 30 An sukin an tîntaruzne Dios înintukin an we tîntakana namanazi. An sukin an we tîntaruzne Dios înintukin an tîntaruzkana namanazi.”
Kal kimmikawa kamtam kwinta
1 Suasne Jesúsne ka kamtanamîzta: “Dios îninkane, usne su pamikakana i. Su pamikane tîlawain ît kit kal kimtuza sainara, wankail pippa pakna. 2 Usne kal kimtuza pial tana namninnat kit paiña sura îninnara, kal kianapa. 3 Nueve urara pakane, usne awa wanmakchamkin ît kit awa kal kishimturuza sainara. 4 Usne kaiznara: ‘Ukas ap kal kin îrain. Nane nil tananash,’ kiznara. Uspane kal kin îara. 5 Pamikane mamasa paizka payu pakakas, kutña urakas puzta, kal kimtuza sainana. Usne sun pitmin kaiznat kit îninnara, paiña kal kianapa. 6 Cinco ura pakakas, usne awa wanmakchamkin puzta. Mamaz kal kimtuchiruza wanmaknat kit kaiznara: ‘¿Chitka une akki mansîh pura, kal kimtuchin?’ mîmanara. 7 Uspane kaizara: ‘Mînminkas aumîza kal kin namninnarachi.’ Suasne usne kaiznara: ‘Une ap sura kal kin îrain. U kal kit aizpa tananash,’ kiznara. 8 Tîlpamîzkane, pamikane paiña kal îninmikara kaizta: ‘Kal kimtuza akwanat kit pial tanamîzti. Kwizta piannattuzakas an ñancha tanamîzti. An ñancha pianattuzakas an kwizta tanamîzti,’ kizta. 9 Suasne cinco horara naptuzne îat kit maza payus kal kitkana sappara. 10 Kwiztane an ñancha mansîh naptuzne îara, uspa pial sappana. Uspane an akkwan sapnash minñara. Uspane maza payus kal kit kitkana kapal sappara. 11 Pial sapparawane, uspane pamikara pilchapuzamîz kit 12 kaizara: ‘An kwizta aaruzne maza urain kal kiarakas, nune usparuza aumîzakanain tanara. Aune mansîh kalkas ikas tailchatmakpas,’ kizara. 13 Pamikane sînkanat kit mazara kaizta: ‘Izmuruz. Nane nua kwail kain kinintachish. Nane nukasa sunpawa pial tana namtau. 14 Up pial sap kit ît. Nane kwizta kal kin atmikashakas nuakanain sun pawain tashimtus. 15 Nane ap pialkasa na pashit aizpa kishinash. Nane uspa akwa wat kinarau. Nune pilchapuznachi.’ Sun kwinta sunkana pailti. 16 Dios înintukin sunkanain anazi. An kwizta naptumikane an ñancha naptumikakana namnazi. An ñancha naptumikane an kwizta naptumikakana namnazi. Dios akkwantuza ussa kanpaana akwannarîtkas, usne akkwanchin nanarît.”
Jesúsne mamasa “nane inash” kainammtu
17 Jerusalén pîpulu miwara îmtuasmin, Jesúsne paiña doce kammuruza paimpa mîlnat kit kaiznara: 18 —Mane aune Jerusalén pîpulura numîztumakpas. Tane Judasne nawa, Ampu namtîtmikasha, pariya îninturuzakas Moisés kaizta aizpa kamtamtuzakas chîhkaanazi, na inapa kizanapa. 19 Uspane nawa Judío awachiruza chîhkaanazi, nawa ishaanapa, nawa aim kianapa, nawa tîra patpiantanapa. Kutña payu pailtîkane, nane mamasa kuhsnash, kiznara.
Santiagowakas Juanpakas akkuhshne Jesústa paikumtu
20 Suasne Santiagokas Juankas, aimpihsh parain, uspa akkuhshkasa Jesús tukin aara. Uspane Zebedeo painkul mai. Akkuhshne Jesús iztakin wakpuj wainta, chiwazha paikwan. 21 Jesúsne ussa mîmara: —Nune ¿Chima pashiras? Usne kaizta: —Na paikwantu aizpa kiri. Nane ap paas painkul u nukasa îninnapa pashirash, maza numal uznapa, mamaz kwiyamal uznapa. 22 Jesúsne aimpihshtuza sînkanara: —Une u paikuamtu aizpa pianchi. Nane kwisha naiztînash. ¿Une nakanain naizmu tailchashina? Uspane sînkailta: —Aune naizmu tailchashinawas. 23 Jesúsne kaiznara: —Watcha kaiznamtus. Une kwisha naizmu tailchailnazi, awa uruza kwisha naizninamtu akwa. Nakasa îninna uzashimtukas, nane uruza ap numalta ap kwiyamalta uznapa kizsachish. Ap Taittane apmamin uztuza nanarît me, kiznara. 24 Mamaz diez kammuruz sun mîarawane, uspane paas aimpihshtuza pilchapuzara. 25 Jesúsne kammuruza akwanat kit kaiznara: —Une katsa mikwawa wat pian. Judío awachi îninturuzne wan awaruza îninnamtu. Katsa mikwaruzne tînta îninnamtu, uspa kal kianapa. 26 Uruzpain sunkana kiman. Kancha sunkana kiarain. Uruzpain an katsa namshitmikane mamazta kiwainnarawa. 27 Mînpazha an ñancha îninmika namshitne, usne kiwainmikakana namshina, mamaztuza kiwainnana. 28 Kawarain Ampu namtîtmikane awaruza îninnana atchi. Awaruza kiwainnana azi. Usne awa akwa inna azi, akkwan awa sîptîttuza chîhtnana.
Jesúsne paas kasu izsachira kakulnintu
29 Jericó pîpuluras puzamtuasmin, akkwan awane Jesústa kanpaara. 30 Suane paas kasu izsachiruzne mikin uzpailta. Jesús pîntu mîmtazasmin, paasne kwianpailta: —Anpat. Nune Îninmika Davidpa kwal i. Aumîza kiwaincha. 31 Mamaz awaruzne usparuza chinkas kaizmun kiznara. Sun kaizarakas, uspane an tînta kwianpailta: —Anpat. Nune Îninmika Davidpa kwal i. Aumîza kiwainchain. 32 Suasne Jesúsne kun kit kasu izsachiruza akwat kit mîmara: —U akwa ¿Chima kinpai? 33 Uspane sînkailta: —Anpat. Au kasura izkulnincha. 34 Suasne Jesúsne usparuza kiwainshit kit uspa kasukin paanara. Sun urain sun paas izsachiruzne izkulpail kit Jesústa kanpailta.
Jesúsne Jerusalén pîpulura naptu
1 Jerusalén pîpulura piannanpain. Betfagé pîpulura piannachasmin, uspane Olivos îzara kunnara. Jesús paas kammuruza akwanat kit îninnat kit 2 kaiznara: —Au izkwakpara pîpulura îrain. Suane maza ashampa burra kantît wanmalpailnazi, ainki ampu burrokasa. Burrara chîht kit paasas nawa karaanaka. 3 Mînpazha uruza chiwazha kaizkane, ka kaiztain: “Anpatne paasas pashimtu. Masakin an kwizta kailninnanazi,” kiznaka. 4 Sunkana Dios kainammmika para aizpa kirît. Sunkana parît: 5 “Jerusalén pîpulu uztuza kaiztain: ‘Iztain. Up katsa mikwane amtui. Us wat akwa, kalpain uztu. Burrora anuztui. Ainki kwa kamtîtchi burrora anuztui.’ ” 6 Suasne paas kammuruzne îil kit Jesús kaizta aizpa kiilta. 7 Ashampa burrara pashpa burrokasa karailtawane, kammuruzne uspa pïn ainki burrora palkwanat. Jesúsne anuzta. 8 Akkwan wanmaktuzne uspa pïn mikin kîhamîzta. Mamaztuzne tî kîhwil tîttat kit Jesús pîntukin kîhamîzta, mi watsanapa. 9 An ña îmtuzkas an kwizta îmtuzkas ka kwisha watsal kwianamîzta: “An Diospa îninmikane, an Davidpa kwalmikane, kwisha wari. An ñamin Davidne mikwa azi. Au Anpatne kwisha wari. Chiyuras Diosne kwisha wari,” kizara. 10 Jesús Jerusalén pîpulura napkane, akkwan pîpulu uztuzne kwisha kwiat kit kaizara: —Sunne ¿mînma kai? 11 Awane kaiznara: —An kainammmikane Jesús i. Usne Galilea suras, Nazaret pîpuluras, ara.
Paininmuruz Diospa yalkin
12 Jesúsne katsa Diospa yalkin nap kit wan paininturuzakas paimturuzakas pianamal tînta îninnara. Pial maizmuruzpa misharîrakas utkuru paininmuruzpa uzmukas kiakpînnat 13 kit kaiznara: —Dios pînkîhta ka parît: “Diosne paiña yal sara, awa sua Diosta paikwanpa.” Une ap yalta nappamtu, awa mîj aizpa walkuana. 14 Kwiztane mînpazha kasu izsachiruzkas chasachiruzkas Jesús tukin aara. Usne kakultanara. 15 Katsa pariya înintuzkas Moisés kaizta aizpa kamtamtuzkas Jesús iztasparît kal kit aizpa izara. Pashparuzkas katsa Dios yalkin ka kwianara: “David îninmikawa pampa pashpane kwisha wari.” Judío awa înintuz sun mîarawane, uspane Jesústa aliz kulat 16 kit kaizara: —¿Uspa kizamtu aizpa mîmtukish? Jesúsne sînkanara: —Watcha mîmtus. ¿Une Dios pînkîh parît aizpa izarachimakkiwas? Ka parît: “Ainki pashparuzkas pashpa chitchu kumturuzkas Dios kwisha wari nil kizanazi.” 17 Suasne Jesúsne usparuza kwainat kit sun pîpuluras puz kit Betania pîpulura pitna napta.
Higuera tî pippa wachi
18 Tîlawain Jesúsne Jerusalén pîpulura kail kit yak kira. 19 Usne higuera tî mikin iz kit kashara ît. Tî kîhmin waj wanmalta. Suasne Jesúsne higuera tîra kaizta: —Mizurainkas pippa wamanazi. Sun payukis higuera tî pulpalmîzta. 20 Mamaz payura sun tî izarawane, kammuruzne iztaspaat kit mîmaara: —An tîne ¿mizamaka azain pulpaltîmtu? Me inapain iztît. 21 Jesúsne sînkanara: —Watcha kaiznamtus. Chiwazha Diosta paikukane, une Diosta wat nîjkularawa, us kaizta aizpa maintachin. Sun minñamîztane, ukas sunkana higuera tîra kiashinazi. Sunkana kalkas an tînta kalkas kiashina. Îzara îaninshimtune, “une îzara pirain îri” kizashina. Suasne îzane u înintu aizpa kinazi. 22 Diosta nîjkulturuz Diosta paikuakane, usne u paikuamtu aizpa kinazi.
Pariya înintuzne Jesústa mîmaamtu
23 Suasne Jesúsne Dios katsa yalkin nap kit kamtanamîzta. Katsa pariya înintuzkas îlapa Judío înintuzkas Jesústa îat kit mîmaara: —¿Chikishma sun kimtus? ¿Mînma nua îninta, sun kinpa? 24 Jesúsne sînkanara: —Nakas chiwazha uruza mîmanash. Na uruza mîmanara aizpa sînkaarane, katne nakas mînma nawa îninta ap kal kinpa sînkananash. 25 ¿Mînma Juan munnammikara îninta? ¿Diosne ussa înintaki? ¿Awane ussa înintaki? Uspane usparuzpain tînta kwinta kiamîz kit kaiznamîzta: “Aune Dios ussa îninta kisachimakpas. Au sun kizakane, usne sunkana aumîza kiznazi: ‘Suasne une ¿chikishma us kaizta aizpa nîjkularachi?’ 26 Aune ‘awa ussa îninta’ kizsachimakpas, awa aumîza ishkwinninnamtu akwa, wan awa Dios Juanta îninta minñamtu akwa. Au sun kizarane, awane aumîza chiwazha kiashina.” 27 Jesústa sînkaat kit kaizara: —Mînma Juanta îninta pianchimakpas. Suasne Jesúsne kaiznara: —Nakas mînma nawa îninta an kal kin uruza kainammanash.
Paas painkul kamtam kwinta
28 Jesúsne kaiznara: —An kamtam kwinta wat mîrain. Maza ampune paas painkul mîjara. Maza painkulta kaizta: “Painkul, ap wankail pippa warîtkin kal kirash.” 29 Painkulne ussa sînkara: “Kishitchish.” Kwiztane us minta aizpa maiz kit kal kin ît. 30 Suasne papihshne mamazta izna ît kit sunkanain kizta. Usne papihshta sînkara: “Watcha kal kinash.” Kwiztane usne îtchi. 31 ¿Mînmika papihsh pashit aizpa kirît? Uspane kaizara: —An ñanchamika papihsh pashit aizpa kirît. Suasne Jesúsne kaiznara: —Watcha kaiznamtus. Une kwiztamikakana mai. Gobierno pial sapmuruzkas kwail ashamparuzkas ukin an ñancha Dios înintura nappanazi. 32 Juan munnanammikane at kit uruza miza uzna kamtanara. Une us kaizta aizpa nîjkularachi. Kancha Gobierno pial sapmuruzkas kwail ashamparuzkas us kaizta aizpa nîjkulara. Wan sun izarakas, une maizarachi. Nîjkularachi.
Kwail kal kimtuz kamtam kwinta
33 Mamaz kamtam kwinta mîrain. “Su pamikane paiña sukin wankail pippa wana ît. Usne sun sukin kinta. Wankail pippa kîm yal sara. Usne kwash yal sara, izmumika wankail pippa sau iznapa. Suasne usne kal kimtuza unanat kit attishta îrît. 34 Paktu payu taizkane, su pamikane paiña kiwaintuza îninnara, paiña paimpa sapnapa. 35 Kal kimtuzne kiwaintuza piznara. Mazara aim kiara. Mamazta piantaara. Mamazta uk kiara. 36 Su pamikane anza akkwan kiwaintuza îninnara. Kal kimtuzne wanta sunkanain kinara. 37 Minpara usne paiña painkulta îninta. Usne ka minta: ‘Uspane ap painkul kaizta aizpa mîanazi.’ 38 Paiña painkulta amtuasmin, kal kimtuzne paiña painkulta izarawane, uspane usparuzpain kaizara: ‘Anne su sapmumika i. Ussa piantana îzhain, paiña su pakin.’ 39 Sunkana ussa pizat kit paiña sukis ukkat kit piantaara. 40 Suasne Jesúsne mîmanara: —Supamika akane, ¿Chima kinsa, sun kal kimtuzkasa? 41 Usne kaizara: —Usne sun kwail awaruza tînta naizninnanazi, inakima. Suasne usne mamaz kal kimtuza unananazi, paiña paimpa pippa sapnapa. 42 Suasne Jesúsne mîmanara: —¿Une Dios parît aizpa izarachimakkiwas? Sunkana parît: ‘Yal samturuzne an watsal uk kiakpînara. Kwiztane Diosne sun watsal ukkasa yal sarît. Aune us sarît aizpa kwisha wari minpuspas.’ 43 Katmizna kainammtus. U Diosta mîashimtuchi akwa, une Dios înintukin nappasachi, uskasa îninna. Diosne mamaztuza napninnanazi, uskasa uzanapa, uskasa îninnanapa. Dios kaizta aizpa kishimturuzne Dios înintura nappanazi. 44 An ukta naintumikane pak pak kîztînazi. Uk mînpazhara taiztane, ussa kîrînazi. Nane an ukkana ish. Nawa aliztuzne naizarînazi, pak pakkanain namanakima. Nawa kiakpînturuzne wan kaat kit polvokana namarînazi.” 45 Katsa pariya înintuzkas Fariseo awaruzkas Jesús kaizta aizpa mîarawane, uspane Jesús usparuza kamtam kwinta kitta piankamara. 46 Katmizna uspane ussa pizshiara. Akkwan awa Jesús Dios kainammmika i mîamtu akwa, înintuzne awa akwa ishkuat kit ussa pizarachi.
Kasara kin pishta kamtam kwinta
1 Jesúsne mamasa usparuza paramîz kit mamaz kamtam kwinta kiznara: 2 “Diosne paiña înintura sunkana kimtu. Katsa mikwane paiña painkul akwa kasara kin pishta sara. 3 Paiña kiwaintuz kasara pishtara akwattuza îninnarakas, uspane aashitchi. 4 Mamasa mamaz kiwaintuza, îninnara ka kaiznanapa: Akwarîttuza kaiztain: ‘Nane kumkin kapal sarît mîjash. Nane pîntît wakara piantarau. Wan kapal sarît me. Kasara kit pishtara aanaka.’ 5 Akwarîttuzne mîashitchi. Mazane paiña sura ît. Mamazne paiña chiwazha paininmîzta. 6 Mamaztuzne mikwawa kiwaintuza piznat kit aim kiara, piantanakima. 7 Suasne mikwane kwisha aliz kul kit paiña suldaruruza îninnara, paiña kiwaintuza piantamtuza piantanapa, uspa pîpulura impaktanapa. 8 Kwiztane paiña kiwaintuza kaiznara: ‘Wan kapal sarît, kasara kit pishta izna. Nawa paashitchi akwa, akwarîttuzne aasachi, na kaizta aizpa mîashitchi akwa. 9 Katmizna une pîpulu pianamal îrain. Wan puizaruzakas uspa wanmaltukin akwanarain, kasara kit pishta izaanapa,’ kiznara. 10 Kiwaintuzne pîpulura pianamal puzat kit wanmaltaruza wanmakninnara. Kwailtuzakas wattuzakas wanmakninnara. Uspane yalta nappara, yal punnakima. 11 Suasne mikwane yalta napta, akwarîttuza iznana. Usne maza ampu pishtara cham kamisha kwachira izta. 12 Usne ussa kaizta: ‘Izmumika. ¿Mizamaka naptau, pishtara cham kamisha kwachine?’ Usne puñain parît. 13 Suasne mikwane kumira nailmuruza kaiznara: ‘Ussa mittîkas chihtîkas kuh kit pianamal, tîlkwilmal, îninti. Suane azat kit sula sît sît kinazi.’ 14 Akkwan awaruz akwanarakas, Dios akkwan chin nanarît.”
Gobierno pial saptu
15 Suasne Fariseo awane suas îat kit wanmakkat kit usparuzpain kwinta kiara. Uspane usparuzpain nîjkulat kit Jesúskasa kwinta kishiara, Jesús kwail pit paraninnapa. 16 Sunkana uspane uspa kammuruzakas Herodespa kanpamtuzakas Jesústa îninnara, ka kaizanapa: —Anpat. Nu watcha kiztu akwa, nu wat awa i pianmakpas. Nune Dios înintu aizpa kamtanamtu, awa nil uzanapa. Nune awa minñamtu aizpa mîrachi. Nune wantuza nil kaiznamtu, ishkwatchin. 17 Nu mintu aizpa aumîza kainazhain. ¿Aune pial, Cesarta, Roma pîpulu katsa mikwara, tana watsa? 18 Jesúsne uspa kwail minñamtu aizpa piankamta. Uspane Jesústa kwail kizninshiara, awa us akwa kwail minñanapa. Usne kaiznara: —Une nil chammuruzkana uzamtuchi. ¿Chikishma kwail kiamtus nawa? 19 Une pial mikwara tamtu aizpa anchain. Uspane ussa maza pial karaara. 20 Pial iztawane, Jesúsne mîmanara: —Pialkin ¿mînpa matsîh makai? Pialkin ¿mînpa mun parît makai? 21 Uspane sînkaara: —Cesarpa matsîh, Roma mikwawa matsîh, pialkin uz, kizara. Suasne Jesúsne kaiznara: —Une apas sukin mikwara paiñawa mîlarawa. Ukas au Diostakas watcha paiñawa mîlarawa. 22 Sun mîarawane, uspane iztaspaat kit ussa tuij îara.
Uspane ¿irît kuhstu? mîmaantu
23 Sun payune mînpazha Saduceo awane us tura izna îara. Uspane irîtmika irîttas kuhstuchi kiz kamtaamtu. Katmizna uspane ussa kaizara: 24 —Kamtam, mîri. Moisésne sunkana pat kit kaizta: “Ampu ashampara mîltane, pashpa mîjki irakane, aimpihshne paiña aimpihsh irît ashampara mîltawa, pashpa mîjan. Pashpa kawirane, irît aimpihshpa pashpakanain kawirarawa.” 25 Mane auruzpain siete aimpihsh uzara. An îlapamikane ashampara mîl kit irît, pashpa mîjchin. Pashpa mîjchi akwa, aimpihsh kanmikane sun ashampara mîlta. 26 Aimpihsh kanmikakas sunkanain irît. Mamaz aimpihsh kanamikakas sunkana kirît. Wan siete aimpihshtuza sunkana kiarît. 27 Wan siete aimpihshkasa uztawane, ashampakas irît. 28 Mane irîttas kuhstu payura taizkane, ¿Mînmikama siete aimpihshtas ashampara mîlnasa? Wanne sun ashampara mîlarît. Sun akwa irîttuzne irîttas kuhsamanazi, kizara. 29 Sun akwa Jesúsne sînkanara: —Une ñanta kiarît, u Dios pînkîhta parît aizpa pianchi akwa. Une Dios kishimtu aizpa piankamarachi. 30 Awa irîttas kuhsarawane, ampune ashampara mîlmanazi. Pashurakas mîlmanazi. Wanne Diospa ángelkana chiyura puranazi. 31 Mane irîttuzne irîttas kuhsanazi. Watcha, une Dios parît aizpa izara. Sunkana kaiztît: 32 “Nane Abrahampa Dios ish. Isaacpa Dios ish. Jacobwa Dios ish,” kiznara. Abrampakas Isaackas Jacobkas ñamin iarîtkas, uspane Dioskasa uzamti. Diosne irîttuzpa Dios chi. Diosne uztuza îninnamtu, kiznara. 33 Jesús kamtamtu aizpa mîarawane, awane iztaspaarît.
An tînta înim
34 Jesúsne Saduceo awaruza nil sînkanat kit puña paninnarît, ussa mamasa mîmamanpa. Suasne sun mîarawane, Fariseo awane wanmakkara. 35 Mamaz Fariseone, Moisés kaizta aizpa kamtammikane, Jesústa kwail kizninshit kit mîmara: 36 —Kamtam mîri. Diosne akkwan înim pînkîhta para. ¿Mîn înimma an tînta i? 37 Jesúsne kaiznara: —“Une Anpat Diosta pashiarawa. Kaijchuras nîjkulat kit ussa pashiarawa. Wan izpulkasa ussa pashiarawa. Diospa minñamtuasmin, Diostain pashiarawa.” 38 An ñancha înimne tînta înim i. 39 Mamaz înimne an ñancha îninkana i. Sunkana parît: “Une u izmuruza pashinarawa, u uruzpain pashiamtukanain.” 40 An paas înim mîarane, une wan Moisés para aizpakas wan Dios kainammmika kamtara aizpakas kianazi.
Jesúsne Davidpa painkulkas Davidpa anpatkas i
41 Fariseo awa me wanmaktîttuasmin, 42 Jesúsne mîmanara: —Une ¿Chi Ampu namtîtmikawa minñamtu? Usne ¿Mînma painkul i? Uspane sînkaara: —Usne Davidpa kwalpa painkul i. Usne ñamin mikwa Davidpa kwaltas kawira. 43 Suasne Jesúsne kaiznara: —Dios Izpulne Davidta minninta, Cristo ap Anpat i kiznapa. ¿Chikishma sun kiztît? 44 Davidne ka kizta: “Diosne ap Anpatta ka kaizta: Nune nakasa ap înintukin uzti, Wan aliz awaruza îninnanakima.” 45 Davidne “Cristo ap Anpat i” kizta. ¿Davidpa painkulkas ashinaki? 46 Mînminkas us kaizta aizpa akwa maza pitminkas sînkaasachi. Sun payukis mînminkas ussa an mîmaarachi.
Jesúsne Fariseo awaruzakas Moisés kaizta aizpa kamtamtuzakas kwail kiamtu kiznamtu
1 Suasne Jesúsne wan puraruzakas paiña kammuruzakas ka kaiznara: 2 “Moisés para aizpa kamtamtuzkas Fariseo awaruzkas Moisés parît aizpa piankamat kit awaruza kamtananamtu. 3 Katmizna uspa kamtamtu aizpa mîat kit kiamîztawa. Uspa uzamtukana uzman. Uruza chiwazha kianapa kurunamtuasmin, uspane mamaz tuntu kiamtu. 4 Uspane awaruza uspain minñamtu aizpa kinpa kurunnamtu. Uspa kaizamtu aizpa kwisha sam. Uspa kaizamtu aizpa kwisha us kwakanain i. Uspane uspain kaizamtu aizpa kiashitchi. 5 Suntuzne chiwazha kiamtu, awa usparuza izanapa, awa uspawa wat minñanapa. Uspane Dios pit ainki pînkîhta pat kit ip kit ainki cajónta winñara. Suasne uspane sun ainki cajóntuza kînijkinkas sailkinkas akkal tîtkasa kanarît, awa usparuza an wat izanapa. Uspane mamaz awawa ainki cajónkin anza katsa cajón saara. 6 Awa pishtara îakane, uspane yalta îat kit anza wat uzmura sayamtu, awa usparuzpa wat minñanapa. Kammu yalta nappakane, uspane nappat kit an wat uzmura sayamtu, awa iztakin usparuza an tînta namninnana. Sun akwa aune mamaz awakinkas an wat makpas minñara. Uspakas watsal aks tît uspa kwaksham, kantît piltakima. Sun akwa aune mamaz awakinkas an wat makpas minñara. 7 Pîpulumal pîntuasmin, awa usparuza ‘kamtam kakishapu’ kizakane, uspane ‘an wat awa mai’ minñamtu. 8 Une uruzpain an katsa mika namninman, awa uruza kamtam i kizamanpa. Une aimpihshtuzpakanain mai. Une maza kamtammin mîj. Usne Cristo i. 9 Une an sukin mînainkas ‘ap taitta’ kizman. Une maza Taittain mîj. Usne chiyura uz. 10 Uruzpain mazara ‘kamtammika’ akwanchi. Une kamtammikane mîj. Usne Cristo i. 11 Wantuza kiwainmumikane uruzpain an tînta namtînazi. 12 Usmin an tînta namshimtumikane an wewazhain namtînazi. Usmin an wemin namtîmtumikane an tîntawazha namtînazi. 13 Moisés para aizpa kamtamtuzkas Fariseo awaruzkas mîzhain. Uruzmin awa iztakin wat awakana izninnamtukas, une ñanta kiamtu. Katmizna une kwisha naizarînazi, u kwail kiamtu akwa. Une chiyu pîjta sîppamtu, awa sua nappamanpa. Ukas sua nappashimtuchi. 14 U Moisés para aizpa kamtamtuzkas Fariseo awaruzkas na kuruntu aizpa mîzhain. Uruzmin awa iztakin wat awakana izninnamtukas, une ñanta kiamtu. Katmizna une kwisha naizarînazi, u kwail kiamtu akwa. Une ampu irîtpa ashampawa yal walkuamtu. Kwiztane une awa iztukin Diosta paikuamtu, awa uruza izanapa, u wari kizanapa. Sun kiamtu akwa, une an kwisha akkwan naizarînazi. 15 U Moisés para aizpa kamtamtuzkas Fariseo awaruzkas na kuruntu aizpa mîzhain. Uruzmin awa iztakin wat awakana izninnamtukas, une ñanta kiamtu. Katmizna une kwisha naizarînazi, u kwail kiamtu akwa. Wan suwara pînamtuasmin, akkwan ñam pira kwakkamtuasmin, une mazara sayamtu, u kamtamtu aizpa kinpa. An kammumikara kamtawane, usne ukin anza kwail nam kit ïnta an akkwan naiznazi. 16 Une kwisha naizarînazi. U kamtanamtukas, une kasu izsachimikakana mai, u kamtaamtu aizpa wat piankamamtuchi akwa. Une ka kamtamtu: ‘Mînpazha Dios katsa yal akwa chiwazha kin namtu. Usne sunpa Dios katsa yalkin kiztu, iztumika us kaiztu aizpa mînapa. Dios katsa yal akwa kin namtumikane us kin namtît aizpa kinchi. Mînpazha uru akwa Dios katsa yalkin chiwazha kin namtune, usne us kin namtu aizpa kitpa,’ u kizamtu. 17 Une tîmpa awakana mai. Une u kaizamtu aizpa wat mîamtuchi. Une kasu izsachiruzkana mai, u kamtamtu aizpa wat piankamamtuchi akwa. Dios katsa yalne urukin an tînta i, Diospa yal sun urura Dios akwa paimpa namnintît akwa. 18 Une ankas ka kizamtu: ‘Mînpazha Dios katsa yalkin mîlam misharî akwa chiwazha kin namtu. Usne sunpa Dios katsa yalkin kiztu, iztumika us kaiztu aizpa mînapa. Dios katsa yalkin mîlam misharî akwa kin namtumikane us kin namtît aizpa kinchi. Mînpazha chiwazha mîlam Diospa katsa yalkin mîlam misharîra tarane, sun mîlam akwa kin namtumikane us kin namtît aizpa kitpa,’ u kizamtu. 19 Une kasu izsachiruzkana mai, u kamtamtu aizpa wat mîamtuchi akwa. Dios katsa yalkin mîlam misharîne mîlamkin an tînta i, Dios paiña yalkin mîlam misharî sun mîlamtu aizpa sînam namnintu akwa. 20 Dios katsa yalkin mîlam misharî akwa kin namtumikane mîlam misharî akwa kin namtuchi. Mîlam misharî akwa kin namtumikane wan mîlam misharîkin îsalpara tarît akwa, kin namtu. 21 Mînpazha Dios katsa yal akwa kin namtumikane Dios katsa yal akwa kin namtuchi. Uskas Dios akwa kin namtu, us sua uztu akwa, us sua înintu akwa. 22 Chiyu akwa kin namtumikane Diospa uzmu akwa kin namtu, tas Dios înintu akwa, ta Dios uztu akwa. 23 U Moisés para aizpa kamtamtuzkas Fariseo awakas mîzhain. Uruzmin awa iztakin wat awakana izninnamtukas, une ñanta kiamtu. Katmizna une kwisha naizarînazi, u kwail kiamtu akwa. U chiwazha diez mîjne, une Diosta maza mîlamtu. Diez menta kîh mîjne, une maza kîh Diosta mîlamtu. Aniskas cominokas mîjne, une diezkis maza Diosta mîlamtu. U muinchi kîh Diosta mîlamtukas, une Dios kamtamtu aizpa mîashimtuchi. Diospa kamtamne u kamtamkin anza tînta i. Une nil uzarawa. Une mamaztuza kiwainnarawa. Une Diosta wat nîjkularawa. Une sunkana kiarawa, mamaz înimkas maintachin. 24 Une kasu izsachiruzkana mai, u kamtamtu aizpa wat piankamamtuchi akwa. Une we kamtamtu aizpa mîamtu. Une an tînta kamtamtu aizpa mîamtuchi. 25 U Moisés para aizpa kamtamtuzkas Fariseo awaruzkas na kuruntu aizpa mîzhain. Uruzmin awa iztakin wat awakana, kwail kitchiruzkana, izninnamtukas, une ñanta kiamtu. Katmizna une kwisha naizarînazi, u kwail kiamtu akwa. Une pîlatturakas tasarakas îsalpara kitmuruzkana mai. Une pîlattukas tasakas ayukman kittachin. U kwail kitchiruz awakanain namninamtukas, une ayukmal pil pattîtkanain mai, u walkuamtu akwa, u kwazpa kulashimtu akwa. 26 Fariseo awaruz mîzhain. Une kasu izsachiruzkana mai, u kamtamtu aizpa wat piankamamtuchi akwa. Une an ñancha uruzpain ayukmarain kihanintain. Ayukmaltain kiharawane, u pianamal kiharît manazi. 27 U Moisés para aizpa kamtamtuzkas Fariseo awaruzkas na kuruntu aizpa mîzhain. Uruz awa iztakin wat awakana izninnamtukas, une ñanta kiamtu. Katmizna une kwisha naizarînazi, u kwail kiamtu akwa. Une awa îrît kamkin yalkanain izarît. Awane sun yaltuza putchã nîarît, îsalpara watsal izanapa. Ayukmalne irît sîhkas wan kwailkas wakularît. 28 Une irît kamkin yalkanain mai. Une îsalpara awa iztakin sînam izarît. Une ayukmal kaijchumal kwail minñamtu. Sun akwa une kwail kiashimtu. 29 U Moisés para aizpa kamtamtuzkas Fariseo awaruzkas na kuruntu aizpa mîzhain. Uruzmin awa iztakin wat awakana izninnamtukas, une ñanta kiamtu. Katmizna une kwisha naizarînazi, u kwail kiamtu akwa. Ñamin Diospa kainammtuz iarîkane, u pamparuzne irît kamkin yal saara. Uspane irît awawa kamkin yalta îat kit uspa kamkin yal watsal sanara, uspa sun awaruza pashinat annanapa. 30 Ukas ka kaizamtu: ‘Au ñamin irît kwal uzta payura uzaratne, aune uspakana Dios pit kainammtuza piantarachimanatpas.’ 31 Sun pit kizamtuasmin, une u irîttuzpa kwal mai piankamamtu. Une u ñamin irît kwalkana mai, uspa Dios pit kainammtuza piantaarît akwa. 32 Une ñamin irîttuzpa kwalpa kwail kal kamamtu aizpa kiamîznazi, wan pailnakima. Une u pampawa kalkin anza kwail kianazi. 33 Une kamtakana mai, sula kumtu akwa. U pit kaizamtu aizpa kamta pininukana mai. U ïnta naizamtuasmin, une mizurainkas ïntas puzamanazi. 34 Katmizna nawa mîzhain. Nane u uzamtukin Dios pit kainaruzakas wat piantuzakas kamtamtuzakas îninnamtus. Une mînpazharuzakas kurishta patpian kit piantananazi. U uztukin aakane, une mînpazharuzakas kammu yalkin aim kianazi. Une mînpazharuzakas wan pîpulu aizpa sayanazi, usparuza pizanapa. 35 U ñamin uztît kwal wan wat awa piantarît akwa, une kwisha naizarînazi. U kwalne wat awaruza, wat Abeltakis Zacaríastakima piantaara. U kwalne sun unam misharîkin kasha Dios katsa yalta Zacaríasta, Berequíaspa painkulta, piantaara. 36 Watcha kaiznamtus. An ñamin uztuz wat awaruza piantanarîtkas, ma uztuzne uspa kiarît akwa kwisha naizarînazi.”
Jesúsne Jerusalén pîpulura uztuz akwa tayal kit aztu
37 “Jerusalén pîpulura uztuzne nawa mîzhain. Une Dios pit kainammtuza piantaara. Une Dios înintuza ukkasa aim kiara. Nane Jerusalén pîpulura uztuza wanmakshininnamîztau. Aral kamne aral pashpara ilsap ayukman wanmakninñamtu. Sunkanain nane uruza wanmakshinamîztau. Une sun pashiarachi. 38 Nawa mîzhain. U pîpulu azpiannapain. 39 Nane uruza ka kaiznamtu: ‘Une nawa akkwan payurakima izamanazi, na chiyuras kailnakima. Suasne une Dios înintamikane kwisha wari,’ kizanazi.”
Jesúsne Dios katsa yal azpiantînazi kiznamtu
1 Jesúsne Dios katsa yalkis puzta. Îamtuasmin, paiña kammuruzne ussa kasha aat kit ussa Dios katsa yalta anamîzta. 2 Jesúsne sînkanara: —Une ma payu sun wan izamtu. Na nua kaiztu aizpa watcha i. An Dios katsa yalkin wan uk taizanazi. Awane wan uk kiakpînanazi, wan azpiannapa.
Au su pailtînazi
3 Suasne Jesúskas paiña kammuruzkas Olivos tî kunkin îzara nuara. Jesús sua uzasmin, paiña kammuruzne paimpa kaizara: —Aumîza kainazhain. ¿Miza urama sun kirînsa? ¿Nu mamasa kailtuchasmin, au sukin chima kirînasa? Wan minpa payura ¿chima kirînsa? kizara. 4 Suasne Jesúsne kaiznara: “Kuiraruin uzizanaka, mînainkas uruza kain kiamanpa. 5 Akkwan awa nakana namashimtuasmin, uspane ‘Nane Dios nîrîtmika ish,’ kizanazi. Pîrail kaizamtu akwa, uspane akkwantuza kwisha kain kianazi. 6 Awane kasha surakas attishtas surakas waya kianazi. Sun awa waya kiamtu mîamtane, une ishkwaman. Sunkana watcha kianazi. Mama minpa payu taiztuchi. 7 Maza sura uztuzne mamaz sura uztuzkasa waya kianazi. Katsa mikwane paiña awa wanmaknat kit mamaz mikwakasa waya kianazi. Awane yak kiarînazi. Katsa ki puranazi. Wan su ulanazi. 8 Sunkasa awane naizamîznazi. 9 Suasne awane uruza înintuza chîhkanazi, uruza kwail kiat kit piantanapa. U nawa kanpaamtu akwa, wan awane uruza pashiamanazi. 10 Sun payune akkwan awane na kaiztu aizpa mama nîjkulamanazi. Usparuzpain pashiamtuchi akwa, uspane usparuzpain mamaztuza chîhkaanazi. 11 Akkwan nilchi kainammtuzne aat kit akkwan awaruza kain kianazi. 12 Akkwan kwail kiamtu akwa, awane usparuzpain pashiamanazi. 13 Nane minpa payurakima nawa kanpamtuza watsat mîlnanash. 14 Wan sura uztuzne Dios watsal pit mîanazi, us înintukin uzanapa. Kwiztane minpa payu taiznazi. 15 Daniel ñamin parît aizpa kirînazi. Kwail awane Dios sînam yalta nappat kit sua kwail kiarînazi, awa sua Diosta wakpuj wainñamanpa. ‘Uspane Dios iztakin kwisha kwail kianazi.’ Sun pînkîh izturuzne Daniel parît aizpa piankamtain. 16 Katmizna sun iztawane, Judea su uztuzne înkal îzara aza îarawa, usparuza kulanapa. 17 Yal îsalta kwaizkulturuzne ayukman napman, chiwazha ayukmal wa aizpa ukkana. 18 Nanmal kal kimturuzne yalta kailman, uspa pïn wa aizpa ukkana. 19 Sun payura ashampa pîja wararuzkas chitchu kwintaruzkas kwisha naizarînazi. 20 Diosta paikuamîztain, alu kimtu payurakas kwaizkultu payurakas îamanpa. 21 Sun payu taizkane, awane kwisha naizarînazi. Dios an su sarakima, awane sunkana naizarachi. Sunkanane mamasa awane an naizamanazi. 22 Diosne sun naizmu payu an azain pailninnazi, wan awa iamanpa. Dios narîttuza pashinamtu akwa, usne sun payura an azain pailninnazi. 23 Suasne sun payurane awane ‘Iztain, Dios înintamikane, Cristone, apa tui,’ kizanazi. ‘Iztain, Dios înintamikane, Cristone, sua tui,’ kizanazi. Mînpazha sun uruza kizakane, mîman. 24 Akkwan pîrail kaizmuruzne chaat kit ‘nane Dios nîrîtmika ish’ kizanazi. ‘Nane Diospa kainammmika ish’ pîrail kizanazi. Uspane iztasparît kal kianazi, Dios narîttuzakas kain kianapa. 25 Nane an ñamin uruza sun kurunnarau. 26 Katmizna usparuzakas kwiraruin. ‘Sua sak pul pilkin tui’ kizkane, sua îman. ‘Kalmain tui’ kizkane, ussa mîman. 27 Dios Painkul akane, awane ussa kai izanazi. Ippane azain pãn puzmukis, pãn payapmal, naztam kwankim. Sunkana Ampu namtîtmikane azain anazi, wan awa ussa izanapa. 28 Kalpa irîkane, pîkumtuzne irîttukin azain wanmakkanazi. Naiztîntu payu taizkane, sunkanane kwail kiarîttuzne naizarînazi. Awane sun urain wan kaarînazi.”
Jesúsne mamasa kailnash kiznamtu
29 “‘Wan naizmu payu pailtawane, sun payura pãnne malmanazi. Palapchakas aizmanazi. Kîmukas chiyuras taizanazi. Wanne chiyura wa aizpa ulanazi.’ 30 Suasne Ampu namtîtmikane chiyuras anazi, wan awa ussa izanapa. Suasne wan awane azanazi. Ampu namtîtmikane, katsa mikwakanain, wanishkasain anazi, wan awaruza tînta îninnana. Usne awa iztakin watsal iztît izpannanazi. 31 Iru karaskwil ustuasmin, usne paiña ángeltuza îninnanazi, wan narîttuza akwaninana. Uspane narîttuza wan chiwal suras wanmakninnanazi.”
Higuera tî kamtam kwinta
32 “Nane uruza higuera tî kamtam kwinta kainammtus. Sun piankamtain. Higuera tî kuna kîh kwizmîzkane, une pulpanapain pian. 33 Sunkana wan na kaizta aizpa izakane, minpa payu taiznapain piankamanazi. 34 Watcha kaiznamtus. Ma payu uztuz iarachasmin, wanne na kaizta aizpa kinazi. 35 Wan chiyukas wan pilkas pailtîmtukas, ap pitne, na kaizta aizpa, mizurainkas pailmanazi.”
Wat izkultain
36 “Na amtu payura mînpazha awainkas pianchi. Chiyuras ángelkas pianchi. Nane, Dios Painkulkas, pianchish. Taitta Diosmin na amtu payura pian. 37 Noé uzasmin, awane wan pashiat aizpa kiara. Ampu namtîtmika akane, awane kawarain kapal kianazi. 38 Sun payura an sukin pi pîntachasmin, awane kuamîz kit chappi kuamîz kit kasara kit kit pashu mîlaara, Noé katsa kanuara napta payukima. 39 Uspane pi pînmîztu payu pianchimara, alu kimtukima, wantuza pi kwanakima. Sunkanain awane uzanazi, Ampu namtîtmika kailtu payukima. 40 Sun amtu payune paas ampune nanmal tuwaiyanazi. Mazara mîlnazi. Mamazta tuij înazi. 41 Paas ashampane pia kîmtaînazi. Mazara mîlnazi. Mamazta tuij înazi. 42 Une iz kit tîriztain. Une Anpat amtu payu pianchi. 43 Yalpamikawa wat piankamtain. Walkummikane amtawara chamtu. Walkum amtu payura pianakane, yalpamikane izkultît tuanazi, pitnachin. Usne walkummikara paiña yalta walkwan napninnachi. 44 Katmizna kawarain ukas kapal sarain. Us amtuchi mintuasmin, sun payura Ampu namtîtmikane ashina.”
Wat kiwainmuruzkas kwail kiwainmuruzkas
45 “Wat kiwainmumikane anpat pashit aizpa min kit kimtu. Yalpamikane paiña yalta ussa kain tattîmtu, wanta wat urara kumira kwinnapa, wan mîj aizpa iznapa. 46 Anpat kailkane, paiña anpat kaizta aizpa kimtumikane wat kulnazi, anpat îninta aizpa kimtu akwa. 47 Watcha kaiznamtus. Anpatne wan mîj aizpa kiwainmikasha kain tattînazi, anpat mîj aizpa iznapa. 48 Sunkana kwail kiwainmumikane ‘anpat azain kailmanazi’ minmîznazi. 49 Suasne usne mamaz kiwaintuza kwail kinamîztu. Usne kumira kwat kit pirîttuzkasa chappi kumîztu. 50 Kiwaintuz sun amtu payu pianchi akwa, kiwaintuzne anpatta tîrizamtuchi. Suasne paiña anpatne sun payura kailnazi. 51 Anpatne ussa kwail awakasa uzna înin kit ussa tînta il kit ïnta naizninnazi. Suasne usne az kit sula sît sît kinazi, Diosta pianchiruzkasa ïnta naiztu akwa.”
Diez nimpihsh ashampa kamtam kwinta
1 “Suasne Diosne sunkana îninnazi. Diez nimpihsh kiwain ashamparuzne alampara muara. Uspane kasara kim pishta îara, ampura wanmalana. 2 Cinco kiwaintuzne wat minñarachi, uspa alampara putnapa watsaana. Mamaz cincoruzne wat minñara, uspa alampara putnapa watsaana. 3 Kapal sarîtchiruz alampara mîlarakas, uspane alampara pi mîlarachi, mamasa alampara ulna. 4 Kapal sarîttuzne alamparakas an alampara ulmu pikas mîlaara. 5 Ampu kanpain mîjmika azain amtuchi akwa, wan nimpihsh ashamparuzne pitshiamîz kit masain pittarît. 6 Kakwamta pakane, suasne awane ka kwianara: ‘Kanpain mîjmikane amtui. Puzat kit ussa wanmalnarain,’ kizara. 7 Diez nimpihsh ashampane izkulat kit uspa alamparara wat saarît, kai aiznapa. 8 Kapal sarachiruzne kapal sararîttuza kaizara: ‘Au alampara kwirîmtu. Pitchin alampara pi mîlazhain,’ kizara. 9 Kapal sarîttuzne sînkaara: ‘Mîlasachimakpas. Mîlatne, aune kapal mîjchiashinamakpas. An wat tintara ît kit umin paina îrain,’ kizara. 10 Cinco nimpihsh ashampa, kapal sarachiruz, alampara pi paina îamtuasmin, ampu kanpain mîjmikane at. Suasne nimpihsh ashamparuzne kapal sarîttuzne, uskasa kasara kit pishtara nappara. Suasne pîjta sîppara. 11 An kwiztane mamaz nimpihsh ashamparuzne aat kit ka akuamîzta: ‘Anpat. Anpat. Mîri. Pîjta chîhti,’ kizara. 12 Usne sînkanara: ‘Watcha kaiznamtus. U kapal watsaarachi akwa, une nappasachi. Uruza pianchish,’ kiznara. 13 Suasne Jesúsne ka kaiznara: ‘Wan kapal sawizanaka, u Ampu namtîtmika amtu payura pianchi akwa,’ kiznara.”
Pial kamtam kwinta
14 “Diosne sunkana îninnazi. Mamaz sura îtchasmin, maza ampune paiña kiwaintuza wanmakninnat kit paiña pial usparuza chîhkanarît, pial pamikawa kal kianpa. 15 Usne pakaish pakaish maza mazara uspa pial mîlanarît, us pashimtu aizpa kinpa. Usne mazara, wat kal kinpa pianmikasha, cinco mil pial mîlat. Mamazta, we kal kinpa pianmikasha, paas mil pial mîlat. Mamazta an we kal kinpa pianmikasha, maza milmin pial mîlat. Wanne pial sappara, sun pialkasa paiña kal kiana, an pial kana kiana. Pial chîhkarawane, pialpamikane masain mamaz sura îmîzta. 16 Cinco mil pial saptamikane sun pialkasa chiwazha pait kit paininta. Sunkana usne an cinco mil pial kana kira. 17 Paas mil pial saptamikane sunkanain kit kit an paas mil pial kana kira. 18 Pial pamikawa pial saptawane, maza mil pial saptamikane pil kul sat kit pial pilta puinta. 19 Akkwan payu pailtawane, anpatne kail kit sunpawa pial saptaruzkasa wianmîzta. 20 An ñancha cinco mil pial saptamikane at kit cinco mil pialkas cinco mil kana kit aizpakas pamikasha chîhkat kit kaizta: ‘Anpat. Nune nawa cinco mil chîhkaish. Nane an cinco mil kana kirau. Wan sapti,’ kizta. 21 Pamikane sînkara: ‘Kwisha wat. Nune kwisha nil kiwainmumika i. Nune na pashimtu aizpa nil kirît. Nu pitchinkasa wat kirît akwa, nane nua an akkwan chîhkattarînash. Nakasa at kit nakasa wat kulnaka.’ 22 Kwiztane paas mil pial saptamikane at kit pamikara kaizta: ‘Anpat, nune nawa paas mil pial chîhkaish. Nane an paas mil kana kirau. Wan sapti,’ kizta. 23 Pamikane sînkara: ‘Kwisha wat. Nune kwisha nil kiwainmumika i. Nune na pashimtu aizpa nil kirît. Pitchinkasa wat kirît akwa, nane nua an akkwan chîhkattarînash. Nakasa at kit nakasa wat kulnaka,’ kizta. 24 Minpa maza mil pial saptamikane at kit pamikara kaizta: ‘Anpat. Nane up kiwaintuza kwisha tînta îninnamtu pianish. Uspa up sukin kal kiamtu akwa, nune pial saptu. Uspa up sukin pippa pakkamtu akwa, nune uspa pippa paktu aizpa saptu. 25 Katmizna nane ishkwat kit up pial pilta puina îrau. Up pial sapti.’ 26 Pamikane sînkara: ‘Nune kwail kiwainmika i. Arakan i. Nune na kimtu aizpa nilchi mintu. Ap sukin na kal kimtuchikas, na pippa wamtuchikas, nane chiwazha pakta aizpa sapnash. Nune sun pian. 27 Sunkana mintane, nune ap pial watsamtukin watsakamtish, an pial kana kinpa. Sunkana nane ap pial kana kit aizpa sapshinas.’ 28 Pamikane sua puraruza kaiznara: ‘Ussa maza mil pial nakat kit diez mil pial mîjmikasha mîlari. 29 Akkwan mîjmikane an akkwan sapnazi, tiznakima. Pitchin mîjmikane us mîj aizpa karînazi. 30 An tînta kal kishimtuchimikasha tîlkwilmal înintain. Suane usne az kit sula sît sît kinazi, Diosta pianchiruzkasa naiztu akwa,’ kiznara.”
Jesúsne wan awaruza kwail kiamtu kiznamtu
31 “Ampu namtîtmika paiña ángeltuzkasa akane, usne watsal iz kit paiña uzmukin chiyura uznazi. 32 Wan suras awane paiña iztakin wanmakkanazi. Usne pîriku izmumikana i. Pîriku izmumikane pîrikuruzkas cabraruzkas paimpa îninnanazi. Kawarain Ampu namtîtmikane wan awaruza paimpa îninnanazi. 33 Usne wattuza paiña numalpara îninnanazi, uskasa tuanpa. Kwailtuza paiña kwiyamarain îninnanazi, usparuza ilnanapa. 34 Suasne mikwane numal kuntuza ka kaizazi: ‘Une arain. Diosne uruza wat kiwainnanazi, paiña înintukin puranpa. Au su sarachasmin, usne uruza wanmakninna minta, u uskasa uzanapa. 35 Na yak kikane, une nawa kwinñash. Na kwazi kilkane, une nawa kwazi kwinñash. Na u sura uzasmin, une u yal nammîlash. 36 Na pïn wekas, une nammîlash. Na ishtukas, une nawa iznash. Na kajchira warakas, une nawa iznash.’ 37 Suasne waruzne sînkanazi: ‘Anpat. ¿Miza urama aune nu yak kira iztamakpas? ¿Miza urama aune nua kumira kwintamakpas? ¿Miza urama aune nu kwazi kikka izaramakpas? ¿Miza urama nua kwazi kwintamakpas? 38 ¿Miza urama nu mamaz sura chamtu awakana iztamakpas? ¿Miza urama nua yal nammîlaramakpas? ¿Miza urama nu pïn we aizpa mîlaramakpas? 39 ¿Miza urama aune nua intura iztamakpas? ¿Miza urama aune nua kajchira wara izna îramakpas?’ 40 Îninmikane usparuza sînkananazi: ‘Watcha kaiznamtus. Une an we tîntaruza, nawa we piantuza, kiwainanara. Usparuza wat kiwainarît akwa, une nawa wat kiarît.’ 41 Suasne Mikwane kwiyamal puraruza kaiznanazi: ‘Nakis paimpa îmîztain. U kwail kiarît akwa, une ïnta îrain, sua pailta payukima uzanapa. Diosne ïnta sara, Diablokas paiña ángeltuzkas sua puranpa, sua naizanapa. 42 Na yak kirakas, une nawa kwinamash. Na kwazi kiktakas, une kwazi kwinamash. 43 Mamaz suwara charakas, une nawa yal nammîlaamash. Na pïn we mîjkas, une nawa pïn mîlaamash. Na inturakas, une nawa izaamash. Kajchira warakas, une nawa izaamash.’ 44 Suasne uspane mîmaanazi: ‘Anpat miza uruma aune nu yak kimta izaramakpas. ¿Miza urama nua kumira kwintachimakpas? ¿Miza urama aune nu kwazi kiktura izaramakpas? ¿Miza urama kwazi kwintachimakpas? ¿Miza urama nua mamaz sura izaramakpas? ¿Miza urama nua yal nammîlatchimakpas? ¿Miza urama nua pïn we aizpa izaramakpas? ¿Miza urama pïn mîlatchimakpas? ¿Miza urama aune nu intura izaramakpas? ¿Miza urama nua kajchira iztamakpas? ¿Miza urama nua kajchira izna îtchimakpas?’ 45-46 Mikwane usparuza sînkananazi: ‘Watcha kaiznamtus. Une an we tîntaruza nawa we piantuza, kiwainnarachi. Usparuza wat kiwainarachi akwa, kawarain une nawa wat kiwaintachi. Suasne suntuzne pailta payukima ïnta naizarînazi. Wattuzne Dios iztakin pailta payukima chiyura wat uzanazi.’ ”
Awane Jesústa piantana minñamtu
1 Wan kapal kaiznarawane, Jesúsne kammuruza kaiznara: 2 —Pa payu pailtîkane, une Pascua pishta taiztu pianmai. Awane Ampu namtîtmikara chîhkaanazi, tîra patpian piantanapa. 3 Sun payuin katsa pariya înintuzkas Moisés para aizpa kamtamtuzkas Judío îlaparuzkas Caifáspa katsa yal pianakin wanmakkara. Caifásne an katsa pariyamika azi. 4 Suasne uspane Jesúspa pîrail kaizninna minñashira, ussa piz kit piantana. 5 Uspane usparuzpain kaizara: —Pishta chasmin, ussa piznachiwamakpas, awa kwisha pilchapuzamanpa.
Maza ashampane Jesústa piam pih parantu
6 Jesúsne Betania pîpulura îra, Simónpa yalkin nukkulna. Simónne pîttît aya kakultîtmika azi. 7 Jesús misharîkin kumtuasmin, maza ashampane piam pih ulmu karat kit kashara at. An ulmune alabastro ukkasa sarît. An watsal piam pihne kwisha muin. Jesús uzasmin, an ashampane piam pih Jesúspa kîzpukin paranta. 8 Kammuruz sun izarawane, aliz pilchapuzat kit kaizamîzta: —¿Chikishka an piam pih kain pattarîmtu? 9 Akkwan pialkasa painninshinari, puizaruza kiwainnana. 10 Jesúsne uspa kaizamtu aizpa mît kit kaiznara: —¿Chikishka an ashampara kwail kizappamtu? Us nawa sun kirît aizpa wari. 11 Puizaruzne pailta payu uruzpain uzanazi. Nane ukasa pailta payura uzmanash. 12 An piam pih ap kîzpukin parantuasmin, an ashampane na imtu payura kapal sarît, nawa kamna. 13 Nane watcha kaiznamtus. Dios watsal pitne wan sura kainarînazi. Sun pit mîraruzne an ashampa kit aizpa mîat kit an ashampawa minñanazi.
Judasne Jesústa kwail awaruza chîhkan namtu
14 Mazane, doce kammuruztas, Judas Iscariotene muntît. Usne katsa pariya înintuzkasa kwinta kin ît 15 kit kaiznara: —Na uruza Jesústa chîhka namtune, ¿Yawa pialma nawa taanapas? Suasne uspane treinta pial tana namaara. 16 Sun payuras Judasne wat urain saimîzta, ussa usparuza chîhkan.
Au Anpatpa kumira nailtu
17 Sun Pascua pishtara awane pan kiñakasachin kuara. An ñancha pishta payura paiña kammuruzne Jesústa tukin aat kit mîmaara: —¿Mîntama Pascua kumira saanapai, an kumira kwan? 18 Usne sînkanara: —Sun pîpulura îat kit maza ampuwa yalta piannarain. Ussa kaiztain: “Anpatne ka kiztu: ‘Na imtu payu kasha panapain. Nane ap kammuruzkasa up yalta îmtus, Pascua pishta kumira kwan.’” 19 Kammuruzne Jesús îninta aizpa kiil kit Pascua kumira sailta. 20 Amta tîl parîkane, Jesúskas paiña doce kammuruzkas misharîkin uzaara. 21 Kuamtuasmin, Jesúsne kaiznara: —Watcha kaiznamtus. Maza uruztas nawa kwailtuza chîhkanazi. 22 Suasne uspane tayalmîz kit mazanta mazanta ussa mîmaamîzta: —Anpat. ¿Na sun kinsa? 23 Jesúsne sînkanara: —Na uruzkasa an kumira kumtukas, mazane, nakasa kumtumikane, nawa kwailtuza chîhkanazi. 24 Dios pînkîhkin Ampu namtîtmika irînazi parît. Us irîkas, ussa kwailtuza chîhkatmikane kwisha naiztînazi. An ampu kawirachiatne, an warashina. 25 Suasne Judasne, ussa kwailtuza chîhkatmikane, Jesústa mîmara: —Anpat. ¿Nane nua chîhkansa? Jesúsne sînkara: —Watcha. Nu sun kaizta aizpa kinazi. 26 Kuamtuasmin, Jesúsne pan piz kit Diosta aishtaish kizta. Pan kîztawane, usne kammuruza kwinat kit kaiznara: —Kwarain. An panne ap ña i. 27 Suasne usne maza vino waz piz kit Diosta aishtaish kizta. Waz annamtuasmin, kaiznara: —Une an waztain wan kwarain. 28 An vinone ap aimpi i. Na imtu akwa, Diosne ukasa masas contrato kin namtînazi. Ap aimpi puztu akwa, nane akkwan awa kwail kiarîttuza wat kulnanash. 29 Nane an vino kumanash, ap Taittawa înintukin napnakima. Suane aune mamasa kuiznawas.
Jesúsne Pedrora kaiztu: Nawa pianchish kiznazi
30 Kanta kizarawane, uspane Olivos tî kun îzara nuara. 31 Suasne Jesúsne kaiznara: —Ma amtane uruzne nakis paimpa îat kit nawa chîhkaamîznazi. Une Dios pînkîhta parît aizpa ka kianazi. “Nane pîriku pamikasha ininnash. Suasne pîrikuruzne paimpa maza mazain îanazi.” 32 Na irîttas kuhstawane, u Galilea sura îamtuchasmin, nane ukin an ñancha înash. 33 Pedrone ussa sînkara: —Wan nukis paimpa îamtukas, nane nukis îmanash. 34 Suasne Jesúsne ussa kaizta: —Watcha kaiztus. An amtain aral kayu aztuchasmin, nune kutña pijikima “ussa pianchish” kiznazi. 35 Pedro kaizta: —Na nukasain imtukas, nane “nua pianchish” kizmanash. Wan kammuruzne sunkanain kizara.
Jesúsne Getsemaní nanmalkin Diosta paikumtu
36 Suasne Jesúskas paiña kammuruzkas Getsemaní nanmalkin pianaara. Usne kaiznara: —Na an ta Diosta paikwan îmtuasmin, une apain uztain. 37 Usne Pedrorakas paas Zebedeo painkultakas ta mîlnara. Usne kwisha tayalmîz kit ishkwatkana mimîzta. 38 Suasne kaiznara: —Nane ayuktain, ap kaijchurain, kwisha tayaltus, inakima. Akkin nukkul kit nakasa izkultain. 39 Suasne Jesúsne an attishta ît kit matsîh pilta wain kit Diosta paikwat kit kaizta: “Ap Taitta mîzha. Na ishimtuchish. Nawa naizninmun. Na naiztukas, na pashimtu aizpa kimun. Nu pashimtu aizpa kiri,” kizta. 40 Suasne paiña kammuruz purakin ît. Usne usparuza pittît tu wanmalnat kit Pedrora kaizta: —¿Une maza urain nakasa izkulasachimakkiwas? 41 Izkulat kit Diosta paikwarain, kwail kiamanpa. Watcha kaiznamtus. Nil kiashimtukas, une tailchaamanazi. 42 Mamasa ît kit sunkana Diosta paikwat: “Ap Taitta mîzha. Na ishimtuchish. Nawa naizninmun. Na imanpa chîhshitne, sun kiri. Sun kisachine, mama nu pashit aizpa kiri. Na pashimtu aizpa kimun. Nuin pashimtu aizpa kiri.” 43 Suasne Jesúsne mamasa kail kit paiña kammuruz pittît pura wanmalnara. Uspane kwisha pittashira. 44 Usne usparuza tuij înat kit mamasa Diosta paikwat kit sun pitmin kaizta. 45 Suasne kammuruz purakin ît kit kaiznara: —Mane pit kit kwaizkultain. Iztain. Awane me aanapain. Uspane Ampu namtîtmikara kwail awaruza chîhkaanpain. 46 Kuhs kit îmîrachain. Nawa chîhkamtumikane me amtui.
Uspane Jesústa pizamtu
47 Jesús paramtuasmin, Judasne, maza kammumikane, piannat. Uskas kwisha akkwan awakas mashti kwizkasakas tîkasakas aara. Pariya îninturuzkas Judío awa îlapa îninturuzkas usparuza îninnara. 48 Judasne, sun chîhkatmikane, usparuza izpa sat kit kaiznara: “Nane mazara matsîhkin putchunnash. Sunne u saimtumika i. Ussa mîltain.” Sunkana ñamin kaiznara. 49 Suasne Judasne Jesústa kasha at kit kaizta: —Anpat. Kakishapu. Usne Jesústa matsîhkin putchunta. 50 Jesúsne sînkara: —Izmuruz. Nune nakin kakishapu kizna atchi. Nu minta aizpa kiri. Suasne awaruzne Jesústa kasha aat kit pizaat kit mîlaara. 51 Ussa mîlaamtuasmin, mazane Jesúspa kammumikane, paiña mashti kwiz ukkat kit katsa pariyawa kiwainmikasha kail yalta. 52 Suasne Jesúsne ussa kaizta: —Up mashti watsat. Mashtikasa waya kimikane sunkasa mashti kwizkasa inazi. 53 Na ap Taittara paikwatne, usne mamin nawa doce ángeltuzpa kwaltuza, îninshina, waya kit kit nawa kiwainapa. ¿Sun pianchikish? 54 Ma payu sun paikumanash, Dios pînkîhta parît aizpa kinpa. 55 Suasne Jesúsne awaruza kaiznara: —¿Chikishma mashti kwizkasakas tîkasakas aamtu, nawa pizna? Nane walkumchi ish. Nane pailta payu Dios katsa yalkin uruza kamtanamîztau. Suane une nawa pizamash. 56 Ma payu une wan kiamtu aizpa izamtu. Dios kainammtuz sunpa ñamin kwinta kiarakas, ma payu Diosne paiña pînkîhkin parît aizpa pailtîmtu. Suasne wan kammuruzne Jesústa chîhkaat kit îarît.
Jesúsne katsa mikwaruzkin tu
57 Jesústa piztaruzne ussa Caifás tukin mîlaara. Usne katsa pariya îninmika azi. Moisés kaizta aizpa kamtamtuzkas Judío îlaparuzkas sua wanmakkara. 58 Pedrone attishtas kanpara, katsa pariyawa yalta piannarakima. Piannarawane, usne nanmalta ît kit policía awaruzkasa uzta, chiwazha kimtu aizpa izna. 59 Katsa pariya îninturuzkas, îlaparuzkas, wan Judío îninturuzkas pîrail kaizmuruza sayamîzta, Jesús kwail kirît kizana. Judío înintuzne Jesústa piantana îninashira. 60 Akkwan awa aat kit pîrail kaizarakas, mînminkas Jesús kwail kirît nîjkularachi. Minparane paas pîrail kaizmuruzne ail 61 kit ka kaizpailta: —An ampune ka kaizta: “Katsa Dios yal azpiantawane, nane kutña payura mamaza sashinash.” 62 Suasne katsa pariya îninmikane kuhs kit Jesústa mîmara: —¿Sînkamankish? ¿Uspa kaizamtu aizpa nilki? 63 Jesúsne puñain parît. Suasne katsa pariyane ussa kaizta: —Diosne chiyura uz kit nu kaiztu aizpa mîmtu. ¿Nu Cristo muntîtmika kish? ¿Nu Dios Painkul kish? Dios iztukin aumîza watcha kaizchain. 64 Jesúsne sînkanara: —Watcha, na ish. Nane an uruza kaiznamtus. “Une Ampu namtîtmikara Diospa numal înintukin izanazi. Chiyuras wanishkasain amtuasmin, une ussa izanazi.” 65 Sun mîrawane, katsa pariyane aliz kul kit paiña pïn pshat kit awaruza kaiznara: —An ampune Diospa kwail pit paramtu. Mamaz awara saimtuchimakpas, us kwail kirît aizpa kizna. Une us Diospa kwail pit paramtu mîamtu. 66 ¿Miza minñamtuas? kizara. Uspane kaizara: —Kwail kiztu akwa, usne irawa, kizara. 67 Suasne uspane matsîhkin ilpi kiat kit chihtîkasa aim kiara. Mamaztuzne matsîhkin kuzat kit 68 kaizara: —Nune “nane Dios nîrîtmika ish” kiztu. Katmizna, Dios nua kiwaintu akwa, ¿mînma nua kuzamtu? kainazhain, kizara.
Pedrone Jesústa pianchish kiztu
69 Pedro pianamal uzasmin, maza ashampa kiwainmikane at kit Pedrora kaizta: —Nukas Jesúskasa, Galilea sura atmikakasa, chara. 70 Pedrone wan iztakin pîrail kiz kit kaizta: —Nu kaiztu aizpa pianchish. 71 Pedro pîjta napmura îmtuasmin, mamazne ussa iz kit puraruza kaiznara: —Jesús, Nazaret pîpuluras at mika, apa chamtuasmin, an ampukas Jesúskasa chara. 72 Mamasa Pedrone pîrail kiz kit kain kaizta: —Dios iztakin nane an ampura pianchish, kizta. 73 An kwizta puraruzne Pedrora kasha aat kit kaizara: —Watcha. Nukas usparuzkasa chatmika i. Nune usparuzkanain paramtu. 74 Suasne Pedrone akkwan piji kaizmîzta: —Na pîrail kaizmîztane, Diosne nawa ininshina. An ampura pianchish. Sun urain aral kayune azta. 75 Suasne Pedrone Jesús kaizta aizpa nîjkulta. Ñamin Jesúsne ussa kaizta: “Aral kayu aztachasmin, nune kutña pijikima, ‘ussa pianchish’ kiznazi.” Pedrone tas puz kit kwisha tînta azta.
Awane Jesústa Pilatora chîhkamtu
1 Kînmîzkane, wan pariya îninturuzkas Judío îlaparuzkas nîjkulat kit Jesústa piantana minñara. 2 Uspane Jesústa kuhat kit ussa Pilatora, Roma mikwara, chîhkara.
Judasne imtu
3 Judío îninturuzne awaruza paikwaara, Jesústa piantanapa. Sun piankamtawane, Judasne, Jesústa chîhkatmikane, tayalmîzta, awa Jesústa piantashit akwa. Usne pariya îninturuzakas Judío îlaparuzakas ît kit treinta pialkasa kail kit 4 kaiznara: —Nane kwail kirau, na kwail kitchimikasha innapa chîhkat akwa. Uspane sînkaara: —Nu ussa chîhkat akwa, nune nu kimtu aizpa mintawa. Nuin sun kirît. 5 Suasne Judasne tas puz kit Dios yalkin pial pattara. Suasne ît kit usmin kwil tît kuh kit usmin kan kit ira. 6 Pariya îninturuzne sun pial sakkat kit kaizara: —Judas an pialkasa ampura piantana paininta akwa, aune Diospa pial sapmukin taasachimakpas. 7 Suasne uspane sun pialkasa pil paina pashiara. Uspane pail sammikawa nanmal payara, mamaz suras awaruza kamnana. 8 Katmizna makima “sun pilne aimpi nanmal” muntît, an pialkasa awa mazara piantanapa pait akwa. 9 Jeremíasne, Dios kainammmikane, sun kirît aizpa ka pînkîhta parît: “Uspane treinta pial sappara. Israel awane sunpawa pial taana nîjkulara, awara paina. 10 Uspane sun pialkasa pail sammikawa nanmal payara. Uspane chiwazha Anpat nawa înintît aizpa kiara,” Jeremías kizta.
Pilatone Jesústa mîmamtu
11 Jesús Pilatokin panasmin, usne Jesústa mîmara: —¿Nune Judío awawa mikwa kish? Jesúsne ussa kaizta: —Nu kaizta aizpa watcha i. 12 Pariya îninturuzkas Judío îlaparuzkas us kwail kirît kizmîztuasmin, Jesúsne usparuza sînkanarachi. 13 Pilatone ussa mîmara: —¿Uspa nua kwail kizamtu aizpa mîmtuchikish? 14 Jesúsne ussa chinkas sînkamîztachi. Katsa îninmikane iztasparît.
Uspane Jesústa inapa kaizamtu
15 Pascua pishta tuasmin, Romano mikwane maza kajchira wamikara chîhtuazi. Usne awa narîtmikara chîhtshina. 16 Suane maza kwisha kwailmikane kajchira wara. Usne Barrabás muntît. Akkwan awane paiña kwail kirît aizpa piankaamara. 17 Awa wanmakkamtuasmin, Pilatone mîmanara: —¿Une chima pashiamtu, na kinpa? ¿Barrabásta chîhtawasa? ¿Jesústa, chîhtawasa? ¿Dios nîrîtmika muntîtmikara chîhtawasa? 18 Pilatone sun mîmara, Jesústa chîhtshimtu akwa. Awa Jesúskasa aliz kulamtu akwa, uspane Jesústa chîhkaara. Pilatone sun piankamta. 19 Pilato paiña înintukin uzasmin, paiña ashampane paiña pit ussa înin kit kaizta: “An ampukasa kimun. Usne wat awa i. Amtawara kainkizpamtuasmin, nane us akwa kwisha naiztau.” 20 Pariya înintuzkas Judío îlaparuzkas wan awaruza tînta kurunnara, Pilatora paikwan, Barrabás chîhtna, Jesústa piantanapa. 21 Katsa mikwane mamasa usparuzkasa paranat kit mîmanara: —¿Sun paastas mînmikama chîhtna pashiamtu? Uspane sînkaara: —Barrabásta chîhtti. 22 Pilatone mîmanara: —¿Jesúskasa chima kinpai? ¿Dios nîrîtmika muntîtmikakasa chima kinpai? Cristora munamtu. Wan awane sînkaara: —Ussa kurishta pat piantarawa. 23 Suasne Pilatone kaiznara: —¿Usne chi kwail kirît? Uspane an tînta kwianamîzta: —Ussa kurishta pat piantari. 24 Pilato kaizta aizpa mîarachi akwa, ussa kwisha pilchapuzara akwa, Pilatone kwazi kanapa înin kit awa iztakin paiña chihtî kit kit kainanara: —Nane an wat ampura piantanapa îninmanash. Umin ussa ininñaanazi. 25 Wan awane sînkaara: —Nu ussa inapa înintane, aune au paikwat aizpa nîjkulnamakpas. Au ussa kwail kiarîtne, aukas au pashparuzkas us akwa naizshinamakpas. 26 Suasne Pilatone Barrabásta chîhtta. Jesústa ilna înintawane, Pilatowa kiwainturuzne Jesústa Roma suldaruruza chîhkanara, kurishta pat pian kit piantanapa. 27 Suasne îninmikawa suldaruruzne Jesústa Roma îninmikawa yalta mîlara. Wan suldaruruzne Jesúspa mamin pîlsaarît. 28 Suasne uspane paiña pïn nakaat kit kwanamkana pïn, mikwawa kwakshamkana, kwaninñaara. 29 Uspane akkwan pu tît iptît kit mikwawa chuttakana saara. Suasne paiña kîzpukin sînaara. Maza mikwawa tîkana paiña numal chihtîkin pizninara. Suasne uspane us iztakin wakpuj wainñat kit ussa ishanat kit kaizara: —¡Nune Judío awara mikwa i! Wat kîntîre, kizara. 30 Uspane ussa ilpi kiat kit sun mikwawa tîkasa kîzpukin pianara. 31 Ussa ishanarawane, uspane kwanamkana pïn nakaat kit paiña pïn kwaninñara. Suasne ussa mîlaara, ussa kurishta patpian piantanapa.
Ussa kurishta pat pian piantaamtu
32 Puzamîztuasmin, Roma suldaruruzne maza Cirene suras ampura wanmalara. Usne Simón mun. Uspane ussa Jesúspa us kurish munana îninara. 33 Sunkanain uspane Gólgota îza munkin pianaara. Sun Gólgota îzane “irît kîzpukana iz kit ka muntît.” 34 Suane uspane Jesústa tain vino kwanpa kwinñara, ishmanpa. Kwaiztawane, usne chinkas kwashitchi. 35 Ussa kurishta inapa pat piantawane, suldaruruzpain ukkasa salara, Jesúspa pïn kana kin. Dios kainammmika kaizta aizpa sunkana kirît. Ka kizta: “Uspane salat kit ap watsal kwaksham kana kinazi. Uspane usparuza ap pïnkas naiyanazi,” kizta. 36 Suasne sua uspane uzara, Jesústa izana. 37 Uspane tî akkalta paat kit Jesúspa kîzpu îsal pattara. Sun pitne ka kizta: ANNE JESÚS I. USNE JUDÍO AWAWA MIKWA I. 38 Uspane uskasa paas walkummikarakas tîra pat pianara. Mazara paiña numal mamaz kurishta pattara. Mamazta paiña kwiyamal mamaz kurishta pattara. 39 Pînturuzne ussa kwail pit kizara. Uspa kîzpu kialtuasmin, uspane 40 ka kaizamîzta: —Nune akkwan pit kaizta. Nune an Diospa yal kutña payura mamaza sanash kizta. Katmizna nuin kiwainti. Nuin Dios painkul kane, nuin kurishtas kihshti. 41 Pariya înintuzkas Moisés kaizta aizpa kamtamtuzkas, Fariseo awaruzkas Judío îlaparuzkas ussa ishanat kit usparuzpain kaizara: 42 —Us mamaztuza watsat mîlnarakas, usmin watsat mîlsachi. Israel awa mikwa kane, usne kurishtas kihshshina, au us kaizta aizpa nîjkulanapa. 43 Diosta nîjkultune, usne makis Diosta ussa watsat mîlnapa paikwatpa. Dios ussa pashimtune, Diosne ussa kiwainshina, us “Dios painkul ish” kizta akwa. 44 Jesúskasa kurishta pat piantîtkas, an paas walkumtuzkas Jesústa kwail kaizpailta.
Jesúsne imtu
45 Paizka payukis kutña urakima wan sura tîlkwil paarît. 46 Sun kutña urain Jesúsne paiña Hebreo pitkasain tînta ka kwianta: “Eli, Eli, ¿lema sabactani?” (Au pitkasain ka kizta: “Ap Dios, Ap Dios. ¿Chishma nawa kwairît?”) 47 Mînpazha sua puraruzne mîat kit kaizara: —An ampune Elías kainammmikara akumtu. 48 Sun urain mazane usparuztas ãïn ît kit pimpuh kana ît. Pimpuhta tain vinokasa parantawane, an ampune pimpuh tîkin tat kit Jesústa kashara nuninta, tuknapa. 49 Mamaztuzne kaizara: —Sun kimun. Elías kiwaina amtuka, izanapas. 50 Jesús mamasa tînta kwiantawane, ira. 51 Sun urain nain pïn kantît Diospa yalkin kwashtas pihshara, piltakima. Sun nain pïn akwa, mamaz kanmal sîptît. Pilne ulta. Ukkas kîzara. 52 Pantiónpa yal azpianara. Akkwan Diosta piantuza irîttas kuhsara. 53 Kuhsarawane, pantión yalkis puzara. Jesús irîttas kuhstawane, an kuhsararuzne Diospa watsal Jerusalén pîpulura nappara. Suane akkwan awane usparuza izara. 54 Suasne suldaru îninmikakas Jesústa izmuruzkas ulmu mazara. Wan kiarît aizpa izara akwa, uspane kwisha ishkuat kit kaizara: —Watcha. An ampune Dios Painkul ara. 55 Suane akkwan ashampane attishtas izara. Uspane Jesústa kiwainat kit Jesústa Galilea suras kanpaara. 56 Maríakas Magdalena pîpuluras ara. Mamaz Maríakas ara. An Maríane Santiagowa akkuhshkas Joséwa akkuhshkas ara. Zebedeowa painkultuzpa akkuhshkas ara.
Jesústa kaamtu
57 Nashmîzkane, maza kwazpa ampune ara. An Arimatea pîpuluras awane José muntît. Uskas Jesústa kammumika azi. 58 Suasne usne Pilatora izna ît kit Jesús irîtta paikwara, ussa kamna. Suasne Pilatone ussa chîhkanpa îninnara. 59 Joséne irîtmika kurishtas mushat kit muin sînam pïn ip kit 60 paiñain masas uk kulta kamta. Suasne usne ñamin sun kul kapal sarît, ussa sua kamnapa. Katsa ukkasa sun kulta sîptawane, îrît. 61 Suane Magdalena suras Maríakas mamaz Maríakas kamkin izawara uzara.
Pariyawa kiwainmuruzne Jesús kamkin izamtu
62 Pascua pishta kapal watsarawane, tîlawarane, kwaizkultu payura, Sábado payura, pariya îninturuzkas Fariseo awaruzkas Pilatora izna îat 63 kit kaizara: —Mikwa, aumîza mîzhain. Uzasmin, an pîrail kaizmumikane “kutña payura irîttas kakulnash” kizta. 64 Katmizna up kiwaintuza kamkin izna îninnari kutña payurakima. Suasne paiña kammuruzne amtawara aamanazi, irîtta walkwan. Jesús uzasmin, “nane Dios înintamika ish” kizta. Paiña kammuruz “us irîttas kakultîre” kizarane, an minpa pîrail an ñancha pîrailkin anza kwail namnazi. 65 Pilatone kaiznara: —Une an kiwaim suldaruruza mîltain, kamkin anza wat izanapa, mînminkas nappamanpa. 66 Suasne uspane kamkin îat kit sîpmu ukkin watsal sîppara, mamaztuz nappamanpa. Suasne suldaru kiwaintuza chîhkanarît, izanapa.
Jesúsne irîttas kakultu
1 Kwaizkultu payu pînkane, domingo payu kînmîzta. An domingo payu kînmîzkane, Magdalena pîpuluras Maríakas mamaz Maríakas kamkin izna îilta. 2 Amtazasmin, masain pilpara tînta ul samîzta. Anpatpa ángelne chiyuras kihsh kit piannat kit uk sîptît tainkat kit ukkin uzta. 3 An ángelne ippakana naztam aizta. Paiña pïn putchã iztît. 4 Sun izarawane, suldaruruzne ulat kit ishkuara. Ishkuamtu akwa, uspane irîttuzkanain namarît. 5 Suasne ángelne ashamparuza kaiznara: —Ishkuman. Nane u Jesústa, piantarîtmikasha, saimtuas pianish. 6 Usne akki tuchi. Ukasa uzasmin, usne uruza kainanat kit us kaizta aizpa kirît. Usne me irîttas kuhsta. Mînta ussa kamtakin iztain. 7 Azain îat kit paiña kammuruza ka kaiznarain: “Irawane, usne me irîttas kuhsta. Galilea sura îrain. Usne ukin an ñancha îmtu. Sua ussa izanazi.” Nane apain atpaish, sun uruza kaiznana. 8 Suasne ashamparuzne azain kamkis îilta. Ishkuamtukas, wat minñara. Ãïn întazasmin, îil kit paiña kammuruza sun pit kainailta. 9 Îmtazasmin, Jesúsne usparuza kasha at kit “kakishapu” kizta. Suasne uspane Jesústa ail kit wakpuj wainpail kit chihtîkasa mittîkin ippailta. 10 Usne usparuza kaiznara: —Ishkuman. Ap kammuruza kainarain, Galilea sura îanapa. Tane uspane nawa izanazi, kizta.
Suldaruruzne pîrail kaizamîztu
11 Ashampa îmtazasmin, mînpazha suldaruruzne pîpulura îat kit pariya îninturuza sun kirît aizpa kaiznara. 12 An pariya îninturuzne Judío îlaparuzkasa kwinta kin îara, maza pitmin nîjkulana. Suasne uspane kwisha akkwan pial suldaruruza mîlanat 13 kit kaiznara: —Sunkana kaiztain: “Au amtawara pittamtuasmin, Jesúspa kammuruzne aat kit irîtta walkuara”. 14 Mikwa sun piankamtane, aune uruza kiwainshinamakpas, uruza ilnamanpa. 15 Suasne Suldaruruzne pial sappara, awa usparuza kaizara aizpa kin. Sunkana Judío awaruzne makima kaizamtu.
Jesúsne paiña once kammuruza kurunnanamtu
16 Suasne once kammuruzne Galilea sura îzarakima îat kit Jesús usparuza înintakin piannara. 17 Jesústa izarawane, uspane ussa wakpuj wainñara. Mînpazha ussa nil nîjkularachi. 18 Suasne Jesúsne usparuza kasha ît kit kaiznara: —Diosne nawa kiwainta, wan chiyurakas wan au sukinkas tînta îninnapa. 19 Katmizna wan awaruza îat kit kamtanarain, ap kammuruza namninnanapa. Sun nîjkulturuza kwazikasa munnarain, Taitta Diostakas Dios Painkultakas Sînam Izpultakas kanpaamtu akwa. 20 Na uruza kamtanara aizpa usparuza kamtanarain, na kainara aizpa kianpa. Sunkas nîjkultain. Nane wan payurakima ukasa tuanash, au su pailnakima. Pailti.
Juan munnammikane Dios pit kainammtu
1 Sunkana Dios watsal pit masamtu. Sun pitne Jesucristowa, Dios Painkulpa, kainarît. 2 Antikwain Isaíasne, Dios pit kainammmikane, kainat kit pînkîhta para. Jesúspa kiz kit pînkîhta ka para: “Mîrain. Diosne paiña îninmika îninnazi, an ñancha Jesúspa mi watsanapa. 3 Mazane pul sura ît kit akkwan awa tuchira ka tînta paranazi: ‘Au wat Anpatpa mi nil sarain,’ ” kiz kit ka para. 4 Suas Juanne pul sura, akkwan awa tuchira, akkwan awara munnanara. Ka akkwan piji kainanara: —U kwail kwizninnat kit munnarain, Dios u kwail kiarît aizpa kanintînpa, uruza maizanapa, kiznara. 5 Akkwan awane Judea suras Jerusalén pîpuluras Juanparakima taizara, ussa mîana. Uspane Diosta kaizara: —Watcha. Aune kwail kianashî. Sun kizakane, Juanne Jordán Pira usparuza munnanara. 6 Juanne kwaksham kwara. Mamaz kalpa, camello ashkasa kwaksham sîp kit kwara. Aya kîra ip kit kuhta. Usne pak, ittalkanakas, mishkikas kwarît. 7 Kamtanamtuasmin, Juanne kaiznara: “Mazane mamaz payura ap kwizpa anazi. Usne nakin anza tînta îninmika i. Nane paiña kiwainmika ish. Us an tînta namtît akwa, nane paiña zapato tît chîhtshitchish. Nane ussa wat kiwainnapa piankamsachish. 8 Nane watcha umîza kwazikasain munnanamtus. Usne umîza ayukta Sînam Izpul winnanazi,” kiznara.
Juanne Jesústa muntu
9 Mamaz payura Jesúsne Nazaret pîpuluras, Galilea suras, puz kit Jordán pira ara. Juanne Jesústa munnara Jordán Pira. 10 Mane Jesús piras salaktawane, chiyu azkane, Jesúsne Dios Izpulta utkurukana iztît. Dios Izpulne taiz kit ussa uzta. 11 Diosne chiyuras ussa kwianta: “Nune ap painkul i. Nua pashimtus. Nane nua narît,” kizta.
Diablone Jesústa kwail kishimtu
12 Mane Dios Izpulne ussa pul sura, awa tuchira, îninta. 13 Cuarenta payura pul sura, awa tuchira, tuazi. Satanásne Jesústa kwail kinashimtu, us kwail kinpa. Înkal kalpakasa tuazi. Ángeltuzkas purazi, ussa kiwaina.
Jesúsne kammuruza akwanamtu
14 Suldaruruz Juanta piz kit kajchira sîpparîkane, Jesúsne ît kit Galilea sura Dios watsal pit kainanara. 15 Awaruza ka kiznara: “Diosne sun payu narît, awaruza îninnanapa, usparuza watsat mîlnanapa. U kwail kwizninnat kit Dios watsal pit nîjkultain,” kiznara.
Jesúsne ampara pishkaru sulmuruza akwanamtu
16 Jesúsne Galilea Pimamin chamtuasmin, Jesúsne Simóntakas Andréstakas aimpihshtuzpain iznara. Uspane pishkaru îmmu kiainpailta. Pailta payu pishkaru sulpailta. 17 Jesúsne usparuza ka kaiznara: —Nakasa at kit piankamnarain. Ñamin pishkaru sulpailta. Kawarain awara akwananaka, Diosta piankamanapa. 18 Mane uspane pishkaru îmmu chîhkat kit ussa kanpailta. 19 Jesúsne pitchin an ñancha ît kit Santiagorakas Juantakas, Zebedeo painkulta iznara. Uspane katsa kanuara pishkaru îmmu yalpailta. 20 Mane usne usparuza akwanara. Uspane uspa papihshta, Zebedeora, chîhkailta. Usne kanuara kiwaintuzkasa nukkulara. Ussa kanpailta.
Kwail salizne ampura piztît
21 Uspane Capernaum pîpulukin pianaat kit nappara. Mane Jesúsne kwaizkultu payura Judío kammu yalkin nap kit awaruza kamtanamîzta. 22 Uspane paiña kammukasa iztaspaarît. Uspane ka kizara: —Nune katsa mikwakana tînta kamtanamtu. An Moisés kaizta aizpa kamtamtuzne sunkana kamtaamtuchi, kizara. 23 Ta Judío kammu yalta maza ampune, saliz piztîtmikane tuazi. 24 Usne kwian kit Jesústa Nazaret pîpuluras kiz mîmara: —¿Aumîzane chima kinash? ¿Amas, aumîza puzninnana? Nane nua pianish. Nune Diostas sînammika i, kizara. 25 Jesúsne ussa înin kit tînta kaizta: —¡Puñain! ¡Awaras puzti! kizta. 26 Kwail salizne awara ulnin kit tînta kwianta. Suasne Jesúsne salizta awaras puzninta. 27 Wan awane ishkuara. Usparuza ka mîmaara: —¿Anne chi i? Masas kammu i. Katsa mikwakana kamtamtu. Îninkane, kwail saliztuzne ussa mîamtu, kizara. 28 Azain sun awane, wan Galilea sura uztuzne, Jesúspa piankamaara.
Jesúsne Pedrowa suegrara wat panintu
29 Judío kammu yaltas puzarawane, suasne Simónpa yalkinkas Andréspa yalkinkas nappara, Santiagokasa Juankasa. 30 Sua Simónpa suegrane kamara immukasa ishtu tuazi. Uspane Jesústa kainaara: —Paiña suegra ishtu tuazi, kainaara. 31 Jesúsne at kit up chihtîra piz kit ussa kuhsakninta. Suasmesa immu kara. Suasne Simónpa suegrane usparuza kumira kwinnara.
Jesúsne akkwan awara wat paninnamtu
32 Amtane pãn payaptîkane, Galilea suras awane ishturuzakas kwail saliz piztîttuzakas ussa karaara. 33 Akkwan pîpulukis awane Jesús tukin pîjtakin wanmakkara. 34 Usne akkwan tuntu ishturuza wat paninnara. Usne akkwan kwail saliztuza puzninnara. Usne kwail saliz puznintîttuza chi paranintachi. Saliztuzne ussa piankam kit kaizara: “Jesúsne Dios Painkul i,” kizara.
Jesúsne Galilea sura Dios pit kainammtu
35 Tîlawain tîlkwilmin Jesúsne kuhsak kit awa tuchira ît kit Diosta paikwat. 36 Simónne mamaz awaruzkasa an kwizta kanpaara. 37 Uspane ussa sait kit kaizara: —Chiwal awaruzne nua sayamtu, kizara. 38 Usne usparuza kaiznara: —Îzhain, mamaz kasha pîpulurain, Dios pit kwinta kinpa. Katmizna chiyuras arau, kiznara. 39 Usne Judío kammu yalta Galilea suwara ît kit Dios pit kwinta kit kit saliztuza awaras puzninnara.
Jesúsne aya pîtta ishtumikara wat panintu
40 Maza ampune, aya pîttît ishtumikane, ussa at kit tînta paikwat kit wain kit kaizta: —Namtashitne, namtashina. Namtazha, kizta. 41 Us akwa mintane, Jesúsne paiña chihtîkasa ussa paat kit kaizta: —Nua namtanash. Nua wat pari, kizta. 42 Mane aya pîtta ishtu karît. Wat kultît. 43 Suasne mamin Jesúsne ussa paiña yalta înin kit ka tînta kainara: 44 —Nune wat parît. Mînainkas paranamun. Nu wat parît akwa, pariyara ît kit nua Diospa yal pariyara antash. Ussa Moisés ñamin kaizta aizpa mîltash. Usne nu akwa Diosta mîlnazi. Sunkana wan awane nu wat parît piankamanazi, kizta. 45 Sun ampune puz kit wanta sun namtît aizpa kwinta kinamîzta. Akkwan awa Jesús tukin wanmakkara akwa, Jesúsne awa iztakin pîpulukin napsachi. Attishta, awa tuchira, aara. Uspane pul sura ussa salkularît.
Jesúsne chasachi ishtumikara wat panintu
1 Mamaz payura us Capernaum pîpulura naptawane, awane us yalta tu piankamara. 2 Kwisha akkwan awa wanmakkarît akwa, mamazne nappasachi. Sun yal pîjtakin mînminkas nappasachi. Sua usne usparuza Dios watsal pit kwinta kinara. 3 Suasne mamaztuz aara. Sun ampara ampune chasachi intura Jesúspakin muat kit karaara. 4 Akkwan awa akwa Jesús tura nappasachikane, uspane yal îsalta nuara. Yal kîh uktawane, kul saara. Katsa kul saarawane, uspane ussa kamakasa inkihshaara. 5 Jesúsne ampara nîjkularît aizpa pian. Sunkana minñara: “Jesúsne ishtumikara watsashina,” minñamtu. Jesúsne chasachi intura ka kizta: —Painkul, mîzha. Up kwail wat kulninnash, kizta. 6 Mane mamaz Moisés kaiztît aizpa kamtamtuzne sua uzat kit usparuzpain, minñara: 7 “Jesúsne pîrail kaiztu. Usne usmin Dioskana namtu. Diosmin kwail kaninshinaka,” minñamtu. 8 Mane Jesúsne uspa minñarît aizpa ayukta piankamta. Katmizna usparuza ka kiznara: —¿Chikishma sunkana mipuspas? 9 Chasachi intura samchi kizna: “Up kwail wat kulnash.” Kawarain samchi kizna: “Kuhsakti. Up kama kuhsari. Chat,” kiznara. 10 Piankamtain. Diosne nawa, Ampu namtîtmikara, îninta, awara kiwainanapa. Katmizna u sura at kit u kwail wat kulninnamtus, kiznara. 11 Usne chasachi intura ka kizta: —Nane nua kaiztus. Kuhsakti. Up kama kuhsari. Îrash yaltakima, kizta. 12 Usne usmin kuhsak kit paiña kamakasa ip mut kit usparuztas puzta. Wan awaruzne iztaspaarît. Ka kizara: —Diosne kwisha wari. Diosne kwisha katsa i. Ñamin sunkanane iztakimakpas, kizara.
Jesúsne Levíra akwantu
13 Mamasa Jesúsne yaltas puz kit katsa pirakima îra. Akkwan awane ussa wanmakkara. Sua usne usparuza Dios pînkîh kamtanara. 14 Tas pimawarain pîntawane, usne Levíra, Alfeowa painkulta, izta. Sun awane Roma gobierno pial sapmukin uz kit kal kira. Jesúsne ussa ka kaizta: —Kanpazha, ap kammumika namnapa, kizta. Usne kuhsak kit Jesústa kwizpa îra. 15 Jesúsne Levíwa yalta ît kit uskasa kuantuazi. Akkwan Roma gobierno pial sapmuruzkas, kwail kimtuzkas misharîra uzat kit kuara, Jesúskasa paiña kammuruzkasa. An akkwan sun awakanane ussa kanpaat kit kamashimtu. 16 Jesúskas kwail kimtuzkas gobierno pial sapmuruzkas kuamtazi. Moisés kaizta aizpa kamtamtuzkas Fariseo awaruzkas tuat kit usparuza izara. Usparuza izarawane, ka Jesúspa kammuruza mîmanara: —¿Chikishma Jesúsne Roma gobierno pial sapmuruzkasa kwail kimtuzkasa kuamtui? mîmanara. 17 Sun mîrawane, Jesúsne usparuza kaiznara: —Ishtukine, tuttul pashikain. Ishtune, tuttul pashimtu. Nakas tuttulkana ish. Nane at kit awaruza sainarau, kwail awaruza wat paninnana. Wat awa makpas minturuza sainamtuchish, kiznara.
Kumira impa
18 Juan munnammikawa kammuruzkas Fariseo awaruzkas akkwan payurakima Diosta paikumtune, kuamtuchi. Impa. Uspane Jesústa aat kit kaizara: —Up kammuruz Diosta paikukane, kuamtu. Impachi. ¿Kwailchiki? Juanpa kammuruzkas Fariseo awaruzkas Diosta paikukane, kuamtuchi. Impa, kizara. 19 Jesúsne usparuza kaiznara: —Ampu ashampa kanpain mîjne, kasara kishitne, izmuruzne wanmakkamtu, kasara kimmikakasa watsal kulanapa. Kumira kwinkane, kuamtu. Sun payura izmuruzne kumira kuanazi. Impachi. 20 Ampu kasara kitpane, mamaz payura usne izmuruztas ukkanazi. Sun payura paiña izmuruzne kuamanazi. (Kawarain mamaz payura awane nawa ukkanazi. Nawa ukkarawane, ap izmuruzne izat kit piankamanazi. Sun payura kuamanazi, tayalamtu akwa.) Jesúsne an masas kamtam awara kamtanara, antikwain kamtam chîhkaanapa. 21 Usne ankas kamtanara: —Kwaksham pakkultane, mînchi masas liensokasa yaltuchi. Masas liensokasa yaltane, masasne sîpparîm. Suasne an pshat kit pakkultîm. 22 Kawarain chappi sultane, mînminkas chappi îlapa kalpa ayara wintu. Îlapa kalpa ayara wintane, chappi tain sultîm. Chappi tain sultawane, îlapa kalpa aya psharînazi. Chappikas puztînazi. Paasas karînazi. Chappi sulkane, masas kalpa ayara wintawa, kiznara.
Jesúsne kwaiztît payura cha
23 Kwaiztît payura Jesúsne chara sauwara îzi. Pînmîztune, paiña kammuruzne chara pippa pakkamîzta. 24 Fariseo awaruzne ussa kaizara: —Izti. Up kammuruz chara pippa pakkamtu. Antikwa kamtamne ka kizta: “Kwaizkultu payura kal kiman”, kiztu, kizara. 25 Jesúsne usparuza kaiznara: —Une Dios pînkîh izara. Ñamin Davidne paiña izmuruzkasa yak kiarît. 26 Usne Dios yalta napta. Abiatar katsa pariya uzkane, Abiatarne an pan Diosta tara aizpa ussa kwinta. Antikwa kamtam ka kizta: “Sun pan pariyaruzpain kuamtu. Mamazne kwasachi,” kizta. Davidne kwat kit izmuruza kwinnara. Usne kwail kitchi, kiznara. 27 Jesúsne ankas usparuza kaiznara: —Diosne an ñancha awa sara. Awa sarawane, Diosne kwaizkultu payu sara, awa kwaizkulanapa, kiznara. 28 Katmizna usne ka kiznara: —Nane, Ampu namtîtmikane, awara wanmak kit kiwainamtus. Nane kwaizkultu payura awaruza kurunnashina, chiwazha kinpa, kiznara.
Maza ampuwa chihtî chîhpailtît
1 Mamasa Jesúsne Judío kammu yalta napta. Maza ampune chihtî chîhpailtît tuazi. 2 Mînpazha Fariseo awane Jesústa izat kit ka minñara: “Jesúsne kwaizkultu payura ussa kakulninshinasa,” minñara. Sunkana minñara, ussa kwail kizanapa. 3 Suasne Jesúsne ampu chihtî chîhpailtîtmikasha kaizta: —Apain paizkakin kunanka, kizta. 4 Usne usparuza mîmanara: —Kwaizkultu payura ¿Chima kinpai? ¿Wat kin? ¿Kwail kin? ¿Kakulninna? ¿Piantana? ¿Chima kinpai? mîmanara. Sînkaashitchi akwa, uspane puñain paarît. 5 Usne usparuza iznat kit aliz paranara. Uspa akwa Jesúsne tayalta, uspa watcha mîashitchi akwa. Usne ampura kaizta: —Up chihtî nil sari, kizta. Sun ampune paiña chihtî nil sarît. Paiña chihtî mamaz chihtîkana namtît. 6 Tas Fariseo awaruzne puzarît. Uspane Herodes izmuruzkasa kwinta kiat kit usparuzpain kaizara: “¿Mizama ussa piantanapai?” kizara.
Akkwan awane katsa pimakin pura
7 Jesúsne paiña kammuruzkasa îarît katsa pirakima. Akkwan Galilea suras awakas kwizpa kanpaara. Judea suras awakas aara. 8 Akkwan awane Jesús sarît aizpa paraara. Jesúspa mîarawane, akkwan aara. Judea suras Jerusalén pîpuluras aara. Idumea pîpuluras aara. Akkwan awane Jordán Pi kwakaras aara. Akkwan awane Tiro pîpuluraskas Sidón pîpuluraskas aara. 9 Usne kammuruza ka kaizara: —Akkwan awane wanmakkamtui. Akkwan awa akwa ainki kanua watsarain, awa nawa nuppainmanpa. Nawa nuppainñarane, kanuara uznash, kiznara. 10 Ñamin akkwan ishturuza kakulnintawane, uspane nuppainñara, ussa paanapa. 11 Awa kwail saliz piztîttuzne sua aazi. Ussa izkane, kwail salizne awara wainnin kit kwianninñara: —Nune Dios Painkul i, kizara. 12 Jesúsne salizta kainanara: —Awaruza “nane Dios Painkul ish” kaizman, kiznara.
Jesúsne doce kammuruza nanamtu
13 Jesúsne kwash îzara nura. Mînpazha kanpashimturuza akwanara. Uspakas us uzkin nuara. 14-15 Sun doce ampuruza nanarawane, usne paiña înintuz munninnara. Jesúsne nanara, uskasa tuanpa, Dios pit kainanapa, Dios pitkasa salizta puzninnanapa, ishtura kakulninnanapa. 16 Jesúsne an doce ampura ka nanara. Mazane Simón mun. Jesúsne Simónpa mun maizta. Mane Pedro mun. 17 Mamazne Santiagokas Juankas aimpihshtuzpain. Sun paasne Zebedeo painkul azi. Jesúsne uspa mun maizta. Mane Boanerges muntît. (“Azain awa muntît.”) 18 Anpane Andrés, Felipe, Bartolomé, Mateo, Tomás, Santiago, Alfeo painkul, Tadeo, Simón, Cananeo suras, 19 Judas Iscariote munarît. Judas Iscariote kutña año pailtîkane, ussa kwail awara chîhkanara, ussa piantanapa.
Jesúsne salizta puznintu
20 Suasne Jesúsne maza yalta kail kit napta. Mamasa akkwan awane Jesústa paiña kammuruzkasa wanmakkara. Akkwan awa akwa, uspane kuasachi. 21 Paiña izmuruz sun kit aizpa mîrawane, îara, tas ussa mîlnapa. Uspane usparuzpain kizara: “Usne nukkukana paramtu,” kizara. 22 Moisés kaizta aizpa kamtamtuzne Jerusalén pîpuluras kihshat kit Jesúspa ka kizara: “Beelzebúwa salizne ussa piztît. Usne sun katsa saliz akwa mamaz salizta puznintu,” kizara. 23 Jesúsne usparuza akwat kit masas pit kamtamkasa kamtanara: “Satanásne paiña saliz puzninmanazi. 24 Mamaz suras awane usparuzpain waya kitne, sun awane pareju uzasachi. 25 Kwalne usparuzpain waya kitne, aliz paratne, sun kwalne pareju uzasachi. 26 Satanáskas paiña izmuruzkas paiña salizkas usparuzpain waya kit kit paimpa îakane, paiña katsa mikwa nukkulmanazi. Pailtînazi. 27 Tînta yalpamika paiña yalta uztane, mînminkas walkwan napsachi. An tînta awa at kit tînta yalpamikasha tît kuhtawane, paiña yalta nap kit us mîj aizpa walkwashina. (Kawarain nakas Satanásta kana kit kit paiña saliz awaras puznintus.) 28 An usparuza kaiznara: Watcha. Nane wan kwail kit aizpa, Diosta kwail kwinta kit aizpa, watkulnashinash. 29 Mînpazha Dios Izpulta kwail kwinta kitne, nane sun kwail ussa chi wat kulmanash. Sun kwailne wat kulsachiwal. Diosne usparuza pailta payu ïnta naizninnanazi,” kiznara. 30 Jesúsne sunkana kainanara, sun awa kwail saliz Jesústa piztît kizarît akwa.
Jesúspa akkuhshkas aimpihshtuzkas
31 Suas Jesúspa akkuhshkas aimpihshtuzkas aat kit pianamal kunara. Uspa pit înin kit Jesústa akwat. 32 Akkwan awane ussa sulmin uzat kit kaizara: —Izti. Up akkwakas up añaruzkas pianamal uzamtu. Uspane nua sait kit akwantu, kizara. 33 Usne usparuza sînkanat kit kaiznara: —¿Mînma ap akkwa i? ¿Mînma ap aña i? kiznara. 34 Suasne Jesúsne sulmin paiña uztukin iznat kit kaiznara: —Apain une ap akkwakana, ap añakana mai. 35 Mînpazha Dios ussa înintu aizpa kimtumikane ap añakana i, ap kuakana i, ap akkwakana i, kiznara.
Ampune chara pippa maltu
1 Mamasa Jesúsne pimakin kamtanamîzta. Kwisha akkwan awane wanmakkarît. Suasmesa usne kanuara wat kit uzta. Wan awane pimakin kunara. 2 Usne usparuza akkwan masas kamtamkasa kamtanara. Kamtamtune, usparuza ka kiznara: 3 “Mîrain. Maza awane îra, chara pippa malna. 4 Us maltakane, pitchinmin miwara taizara. Chitchuruzne aat kit kuara. 5 Pitchin pippane uk pilpara, akkwan pil tuchira, taizara. Ainkih pilchira taiztawane, pippane azain chik kit kwizara. 6 Pãn malkane, tî kwiz kit kiyarît, akkwan mujtît wajchi akwa. 7 An pitchin pippane patmu mujtîtpara taizara. Pippakas patmukas chikkara. Watchi kunkain. Chi wakain. 8 An akkwan pippane wat pilta taizat kit chikkat kit kunara. Chara watsal wakane, pakkarît. Maza tîrain treinta pippa puzara. Mamaz tîrain sesenta pippa puzara. Mamaz tîrain cien pippa puzara,” kiznara. 9 Suasne Jesúsne an kaiznara: “Piankamshitne, mîshitne, nawa mîzhain,” kiznara.
Jesúsne kamtam kwinta kimtu, awara kamtanapa
10 Akkwan awa kaiyarawane, doce kammuruzkas paiña izmuruzkas ussa kaizara: “Aumîza sun masas kamtam kwinta kainchanaka, mîanapa,” kizara. 11 Jesúsne usparuza ka kaiznara: “Nane, Dios înintamikane, umîza kamtanamtus, mîanapa, Dios uruza îninnashimtu piankamanapa. Nane Diosta mîashimtuchiruza masas kamtam kwintakasa kamtanamtus. 12 Yawa wat iztakas, piankamamanazi. Yawa wat mîrakas, mîamanazi. Wat mîamtuchi akwa, uspane Diosta kaiyasachi. Uspa kwail wat kulnasachi,” kiznara.
Jesúsne masas kamtam kwinta kamtanamtu
13 Jesúsne usparuza kaiznara: “An masas kamtam kwinta u mîamtuchi akwa, nane uruza mamasa kainananash. Watsal mîrain, an piankamanapa, wan masas kamtam kwinta piankamanapa. 14 Chara pippa malmumikakas Dios pit kwinta kimmikakas kawarain i. Sun pippane Dios pitkana i. 15 Pitchin pippane miwara taizara. Pippa miwara taiztawane, Satanásne kwizpa at kit pippa saktu, chiktachasmin. Kawarain awa Dios pit mîrawane, Satanásne at kit ayuktas Dios pit ukkamtu. 16-17 Mamaz pippane uk pilpara taizara. Uk pilpara taizarawane, katsa mujtît wajchi akwa, azain kiyarîm. Kawarain awa Dios pit saptawane, mîrawane, usne Dios pit ayukta watsakain. Awa ussa kwail kitpane, Dios pit akwa ussa iltawane, usne Dios pit kwait kit Dios pit mîshimtuchi. 18 Mamaz pippane patmu mujtîtpara taizara. Kawarain awane Dios pit mîmtu. 19 Dios pit mîrawane, kwizta sun awane wat mîshitchi. Chiwal pashimtu. Pialkas saimtu. Kwail kishimtu. Suasne Dios pit kwait kit maintîm. Uspane pippakana kunsachi, wakain. 20 Mamaz pippane wat pilta taizara. Sun pippane chik kit kun kit waara. Maza pipparain treintakima sesentakima cienkima puzara. Kawarain Dios pit mîmturuzne Diosta piankamat kit wat kianazi,” kizara.
Alampara unamtu kamtam kwinta
21 Jesúsne usparuza mîmanara: “¿Alampara tîm paltammuskiwas? ¿Alampara kamakasa paltammuskiwas? Tas alampara tapîlara unam, aiznapa, awa kai izanapa. 22 Kawarain ap kamtam pit puintîtkas, mamaz payura awa mîanazi. Ap kamtam pit mîashitchikas, mamaz payura awa piankamanazi. 23 Piankamshitne, mîshitne, mîrain,” kiznara. 24 An kaiznara: “Watsal mîrain. Pitchimin mîshitne, pitchimin piankamnazi. Watsal mîshitne, an akkwan piankamanazi. 25 Piankamshitne, Diosne usparuza kiwainamtu, an akkwan piankamanapa. Dios pit piankamshitkine, wan mîj aizpa kaninnazi,” kiznara.
Maza pippa chiktu kamtam kwinta
26 Jesúsne usparuza ka kamtanara: “Diospa gobiernone maza pippakanain i. Maza ampune pippa pilta maltu. 27 Pippa malmumika amtawara pittîttuasmin, payuwara izkultuasmin, sun pippane chik kit kunmu. Pippa malmumikane miza chikmu pianchi. Miza kunmu pianchi. 28 Pippane pilta kain chikmu. Pippa chiktawane, tî kunmu. Kuntawane, pippa waam. 29 Pippa inkane, usne awara mashtikasa înintu, pippa paknapa,” kiznara.
Mostaza pippa kamtam kwinta
30 Jesúsne an kaiznara: “Diosne awaruza sainamtu, usparuza îninnanapa. An kamtam kwinta mîrain. Diospa gobierno maza kwalkana aiztîm. Diospa kwal aiztîm. Masas kamtam kwintakasa kamtananash, awa piankamanapa. 31 Diospa gobiernone maza ainki pippakana i. Mamaz an ainki pippane wachi. 32 Sun pippa wakane, chikmu. Chiktawane, kwisha azain kawirîm. Katsa tailpura kawirîm, tî ayukmal chitchu yal sanapa. Sunkana Diospa kwal kawirîm,” kiznara.
Jesúsne kamtam kwintawa piankamninnamtu
33 Kawarain Jesúsne sun masas kamtam kwintakasa kamtanara, awa piankamanakima. 34 Jesúsne masas kamtam kwintakasa chi paranarachi. Jesúsne paiña kammuruza sun masas kamtam kwintara kamtanara, piankamanakima.
Jesúsne inkwa kanintu
35 Sun payura tîl pakane, Jesúsne kammuruza kaiznara: —Pi kwakara îzhain, kiznara. 36 Akkwan awaras puzarawane, paiña kammuruzne Jesúskasa kanuara waat kit kwakara îara. Akkwan kanuakas usparuzkasa îara. 37 Katsa tînta inkwa pamîzta. Inkwane pira nuppain kit kwazi kanuara palakpînta. Pi punmîzta. 38 Jesúsne kanua pîlmal tut kit kwakmura pitta. Uspane ussa izkulnin kit mîmaara: —Anpat. Aune pi kwaanapain makpas, kizara. ¿Nune nîjchimakish? 39 Usne izkul kit kuhsak kit inkwara kaizta: —¡Inkwa pamun! kizta. Pira kaizta: —¡Kialmun! ¡Kalpain! kizta. Inkwane pailta. Pine kalpain parît. 40 Usne kammuruza mîmanara: —¿Chitma ishkuanas? ¿Diosta nîjkultuchimakkiwas? Diosne umîza kwira kinanazi, kiznara. 41 Uspane kwisha ishkuarît. Usparuzpain kaizara: —¿Sunne mînma kai? Parakane, inkwane pailta. Parakane, pine kialta, kizara.
Jesúsne salizta puznintu
1 Uspane pi kwakkara îat kit Gerasa surakima pianaara. 2 Kanuaras puzarawane, maza ampune, pantiónpara chammikane, Jesús tukin ara. Salizne sun ampura pizta. 3 Sun ampune pantiónta uzta. Mînminkas ussa tît kuhsachi, cadenakasa kuhsachi. 4 Ñamin akkwan piji awane ussa pimpulkinkas cadenakasa kuhshira. Chihtîkinkas kuhshira. Usmin chihtîkin iru kuhta pakmalta. Pimpulkinkas iru kuhta pakmalta. Mînminkas ussa tak kamtasachi. 5 Pailta payukas amtakas pantiónparakas înkalparakas kwianta. Usne usmin ukkasa kiltît. 6 Jesústa attishtas iztawane, usne ãïn ît kit ussa wakpuj wainta. 7 Tînta kwian kit Jesústa ka mîmara: —¿Nawane chima kinash? Nune Jesús i. Nune an katsa Diospa Painkul i. Chiyura uztu. Nawa naizninmun, kiz kit paikwat. 8 Jesúsne kwail salizta akkwan piji kaiznara: —Awaras puzninti, kizta. Kwail salizne îshitchi. 9 Suasne Jesúsne ka mîmara: —¿Nune chi munish? kizta. Saliztuzne ka kizara: —Aune “akkwan” munmakpas. Aune akkwan makpas, kizara. 10 Sun saliztuzne Jesústa an tînta paikuaara: —Aumîza mamaz sura îninmun, kizara. 11 Kwisha akkwan kuzune kashain înkalta kuaamtuazi. 12 Sun saliztuzne ussa an tînta paikuaara: —Aumîza kuzuruza pizna îninchain, kizara. 13 Suasne usne usparuza kuzuruza îninnara. Wan kwail saliztuzne îat kit kuzuruza pizara. Suas sun paas mil kuzune ãïn pilchiraras taizarît. Pira taizat kit pi kwaarît. Iara. 14 Kuzu kwira kimtuzne ishkuat kit ãïn îat kit pîpuluras awarakas sun suras awarakas sun pit kainanara. Tas awane aara, Jesús kirît aizpa izana. 15 Uspane Jesúspakin aara. Sua uspane akkwan saliz piztît mîjatmikasha izara. Sun ampune uz kit wan kwat kit wat mintu. Pîpuluras awane ishkuara. 16 Saliz piztît mîjatmikasha izararuzne wan awaruza ka kainanara: —Saliz piztît mîjatmikane wat mintu. Saliztuz kuzuruza piznarawane, kuzune pi kwaara, kizara. 17 Suasne awane Jesústa an tînta paikuaamtu: —¡Au suras îmîzti! kizara. 18 Jesús kanuara wakane, saliz piztît mîjatmikane Jesústa paikwat: —Nukasa îshimtus, nukasa tuan, kizta. 19 Jesúsne ussa îninmai, uskasa kanpanapa. Ussa kaizta: —Up kwalta kailtînka. Usparuza “Dios saliztuza puzninnara” kainanana înka. Diosne nua kiwainta kiznarain, kizta. 20 Sun ampune tas ît kit Decápolis suras awaruza Jesús us akwa sarît aizpa kwinta kinara. Wan awane sun akwa iztaspaarît.
Maza pashpa irît. Maza ashampa ishtu
21 Jesús katsa pi kwakara kanuawara kwaktawane, akkwan awane ussa wanmakkara. Usne katsa pimamin nukkulta. 22 Sua maza awane, Jairo munmikane, at kit Jesúspa mittîkin wakpuj wainta. Usne Judío kammu yal manta kimika azi. 23 Usne ussa tînta paikwat kit kaizta: —Ap pashu ainki inapain i. At kit up chihtîkasa ussa paananka, wat panapa, uznapa, kizta. 24 Jesúsne uskasa îra. An akkwan awane kwizpa îat kit nuppain kit Jesústa wanmakkara. 25 Maza ashampane wan awakasa tuazi. Usne doce añokima paiña aimpi puz kit pul parachi. 26 Usne akkwan tuttulkasa kwisha naizta. Wan pial mîj aizpa tara. Wat parachi. Anpa piztît. 27 Awane ussa Jesúspa kwinta kiara. Ishtura wat panintu, kizta. An ashampakas Jesúspa mîra. Usne akkwan awakasa kwizpa aara. Usne paiña kwaksham paara. 28 Sunkana usmin minta: “Paiña kwakshammin paarane, usne nawa wat paninnazi,” minta. 29 Ussa paarawane, sun urain paiña aimpi pul parît. Usne ayukta paiña ishtu wat parît nîjkulta. 30 Jesúsne usmin mazainta wat panintît nîjkulta. Akkwan awa ustukin wanmakkarakas, usne ãïn puij chat kit mîmanara: —¿Mînma ap kwaksham paara? kiznara. 31 Paiña kammuruzne ussa kaizara: —Nune akkwan awara iznamtu. Uspane wanmakkat kit nua nuppainñara. “¿Mînma ap kwaksham paara? ¿Mîmamtukish?” kizara. 32 Usne wan awara iznamîzta, paiña kwaksham paarîtmikasha saina. 33 Sun ashampa ayukta wat parît nîjkulkane, at kit ishkwat kit ul kit ussa wakpuj wainta. Usne Jesústa kaizta: —Nane up kwaksham paarau. Wat paru, kizta. 34 Jesúsne ussa kaizta: —Nu nawa nîjkultît akwa, nane nua watcha wat paninnash. Watmin înka. Up ishtu wat pari, kizta. 35 Kwinta kimtuasmin, mazantuzne manta kimmikawa yaltas aat kit Judío kammu yal manta kimmikasha kaizara: —Up pashu me irît. Kamtammikasha, Jesústa, anne aizapmun, kizara. 36 Jesúsne uspa kaizara aizpa mîrachi. Usne Judío kammu yal manta kimmikasha kaizta: —Ishkumun. Watsal nîjkulti. Nane up pashura watsashinash, kizta. 37 Pedrokas Santiagokas Juankas, Santiagowa aimpihsh, Jesúskasa îara. Jesúsne mînainkas napninnarachi. 38 Manta kimmikawa yalta piannaakane, Jesúsne akkwan awara iznara. Uspane azat kit tînta kwianaara. 39 Naptawane, usne usparuza kaiznara: —¡Kwianman! ¡Azaman! kiznara. Sun awane manta kimmikawa pashu irît nîjkulara. Usne kaiznara: —Sun pashpane pittui. Uznazi, kiznara. 40 Sun kwinta kitpane, uspane Jesústa ishanaara. Jesúsne usparuza piannamal îninnara. Uskas papihshkas akkuhshkas paiña izmuruzkas pashpa tukin nappara. 41 Paiña chihtî piz kit ussa paiña pitkasa kaizta: —Talitta kumi, kizta. (Sunkana awa pit kizta: “Pashpa ainki, kuhsak kit kunti,” kizta.) 42 Sun urain sun pashpane kuhsak kit chara. Usne doce año pailtît. Main uspane kwisha iztaspaarît. 43 Usne pashpawa papihshtakas akkuhshtakas manta kit kit kaiznara: “Mînainkas u pashu wat parît, kaizman. Jesús ussa kuhsakta, uznapa, kaizman,” kiznara. Pashura chiwazha kwintain, kwanpa, îninnara.
Jesúsne Nazaret pîpulura pianamtu
1 Jesúsne suas ît kit paiña sura piannara. Paiña kammuruzne kwizpa kanpaara. 2 Kwaizkultu payura usne Judío kammu yalta ît kit kamtanamîzta. Kwisha akkwan awane ussa mîara. Kwisha akkwan pian akwa, iztaspaarît akwa, usparuzpain mîmaara: —¿Mînma an kamtam ussa kamtara? Iztain. Usne kwisha akkwan awaruza wat paninnamtu. 3 ¿Anne apas yal sammikaki? Usne Maríawa painkul i. Santiagokas, Josékas, Judaskas, Simónkas paiña aimpihshtuzpain apain uzamtu. Paiña kwampihshtuzkas au pîpulura uzamtu, kizara. Suasne uspane ussa aliz kulat kit izkiarachi. 4 Jesúsne usparuza ka kizanara: —Mamaz suras awane “Dios pit kainammmikane wari” minñamtu. Dios pit kainammmika paiña sura îtne, paiña su awakas, paiña kwalkas, paiña yalta uzturuzkas ussa wat minñamtuchi, kiznara. 5 Suane Jesúsne akkwan ishturuza wat paninnasachi. Pitchimin ishturuza chihtîkasa paat kit wat paninnara. 6 Usmin uspawa iztasparît, paiña pîpuluras awa Jesústa nîjularachi akwa.
Jesúsne paiña kammuruza îninnamtu, awara kamtananapa
Suasne usne akkwan ainki pîpuluwara chat kit awara kamtanara. 7 Usne sun doce kammuruza akwanat kit kaiznara: —Umîza paas paas îninnanash. Kwail saliztuza awaras puzninnarain, kiznara. 8 Usne usparuza ankas kaiznara: —Attishta îamtune, kasmin îwizanaka. Pankas, tuhkas, pialkas kwaman. Tîwilkasa îrain. 9 Zapato nuk kit îrain. Paas kamisha kwaman. 10 Yalta naptane, suain pitwizanaka, îmtu payukima. 11 Awane umîza uspa pîpulura napninamakane, up pit mîshiamakane, tas puztain. Uspa iztakin mittî pil puhstît ulpiantawa, uspa kwail kiarît aizpa piankamanapa, kiznara. 12 Suasne kammuruzne paas paas îat kit Dios pit kainanaara, awa kwail kiarît aizpa maizanapa. 13 Uspane akkwan kwail saliztuza puzninnara. Pihshpikasa ishturuza nînat kit usparuza wat paninnara.
Juanne, munnammikane, imtu
14 Herodesne manta kimmikane, awa Jesúspa kwinta kiarît aizpa mîra. Wantuzne Jesús ara kwisha wat pianmazi. Usne Jesúspa ñanta mît kit kaizta: —Juan munnammikane irîtkas, me kuhsta. Katmizna usne akkwantuza wat paninnamtu, kizta. 15 Mamaztuzne kaizara: —Usne Elías i. Mamaztuzne kaizara: —Dios pit kainammmika i. Usne ñamin Dios pit kainammmikakana i, kizara. 16 An mîrawane, Herodesne kaizta: —Juanne, na kîzpu tîttamikane, irît. Tas kuhsta akwa, ma uztu, kizta. 17-19 Ñamin Felipene, Herodespa aimpihshne, Herodíaskasa kasara kirît. Kwizta Herodesne paiña aimpihshpa ashampara kasara kirît. Herodías akwa Herodesne awara îninta, Juanta piznapa. Usne Juanta tîtkasa kuh kit kajchira sîpta. Herodíasne Juanta kwisha aliz kultît. Usne Juanta piantashina. Juanne Herodesta akkwan piji tînta kainara: “Paiña aimpihshpa ashampara kasara kitne, watchi,” kizta. 20 Herodíasne Juanta piantamanamtît. Herodesne uspa wat kwinta kit kit Juanta kwail kishitchi. Herodesne Juanta watsat kit kaizta: “Juanne wat awa i. Diosta pian i,” kizta. Katmizna paiña ashampane Juanta piantashininsachi. Herodesne Juanta impara impara mîra. Juanne ussa kaizta: “Wat uztuchi,” kizta. Herodesne ussa mîshira. Juanta mîrawane, Herodesne ayukta kwail minta. 21 Wat payura, us kawira payura, Herodesne akkwan gobierno awaruzakas, suldaru awaruzakas, Galilea suras anpattuzakas kumira kwinnara. Sun payura Herodíasne Juanta piantaninta. 22 Sun payura Herodíaspa pashune kumira unamkin nap kit ku kimîzta. Herodeskas paiña izmuruzkas kwisha wat kulazi. Katmizna sun manta kimmikane Herodíaspa pashura kaizta: —Chiwazha paikukane, sunpawa tanash, kizta. 23 Mamasa an tînta ussa ka kin namta: —Chiwazha paikukane, sunpawa tanash. Na kakwa mîj aizpa tanash, kizta. 24 Usne tas puz kit akkuhshta mîmara: —¿Chima paikwanash? kizta. Herodíasne pashura kaizta: —Juan munnammikawa kîzpu tît kit karanka, kizta. 25 Sun urain musittune manta kimmikakin ãïn nap kit paikwat kit kaizta: —Mamin Juan munnammikawa kîzpu pashu. Pîlattura unari, izna, kizta. 26 Sun manta kimmikane kwisha tayalta. Usne ussain minta: “Ap izmuruzne na kaizta aizpa mîara. Nane uspa iztakin na kaizta aizpa kimanash kaizsachish,” minta. 27 Suasne manta kimmikane suldaru awara îninta, Juanpa kîzpu karanpa. 28 Usne kajchira ît kit tîmpukin kîzpu tîtta. Usne pîlattura kîzpukasa karat kit musittura mîlat. Musittune akkuhshta mîlara. 29 Sun mîarawane, Juanpa kammuruzne îat kit ussa muat kit pilta kamaara.
Jesúsne cinco mil awara kumira kwinamtu
30 Mamaz sura kaiyarawane, sun doce înintuzne Jesús tura wanmakkat kit ussa chiwazha kiarît aizpakas chiwazha kamtanarît aizpakas kaizara. 31 Kwisha akkwan awa Jesús tukin aarît akwa, uspane kuasachi. Katmizna Jesúsne usparuza kaiznara: —Mamaz sura, awa tuchira, îzhain, pitchin kwaizkulana, kiznara. 32 Suasne Jesúskas paiña kammuruzkas kanuawara îara, pul surakima. 33 Akkwan awane uspa îamtura izat kit ussa piankaara. Sua pîpuluras awane mittîwara ãïn chaara, uspakin an ñancha piannaana. Uskasa wanmakkaara. 34 Kanuaras kihshtawane, Jesúsne akkwan awaruza iznat kit usparuza kiwainshinara, uspa pîrikukana izarît akwa, uspa kwira kimchiruzkana izarît akwa. Usne usparuza akkwan kamtanamîzta. 35 Nashtîmtuasmin, paiña kammuruzne ussa aat kit kaizara: —Sun sune pul i. Awa purachi. Nashtui. 36 Usparuza îninnari, îanapa, kasha sura kasha pîpulura chiwazha paitkuanapa, kizara. 37 Usne usparuza sînkanara: —Umin kumira kwinnari, kuiznapa, kiznara. Uspane ussa kaizara: —Sunpawa pan paitkwashitne, aune, paas cien payurakima kal kitpamakpas. Aune sunpawa pial mîjchimakpas, awaruza kumira kwinnana, kizara. 38 Usne usparuza mîmanara: —¿Yawa panma mîjmakpas? ¡Izna îrain! kiznara. Sairawane, uspane kaizara: —Aune cinco pankas paas pishkarukas mîjmakpas, kizara. 39 Suasne Jesúsne kaiznara: —Pîtkin uzninwizanaka, akkwantuzne apain akkwantuzne anta, kiznara. 40 Uspane sunpawa uzninnara, cienkimakas cincuentakimakas. 41 Usne cinco pankas paas pishkarukas sapta. Chiyura izak kit Diosta aishtaish kizta. Usne pan kîz kit kammuruza kwinnara, wanta nailnanapa. Usne paas pishkarukas wanta nailnara. 42 Wan awane kuat kit tukkarît. 43 Akkwan pitti pitti tizara. Kammuruzne doce tîmta pankasa pishkarukasa sap winñara. 44 Kwisha akkwan awane kuara. Usparuzpain cinco mil ampune kuara.
Jesúsne pi îsalpara cha
45 Suasne usne paiña kammuruza kanuara îninnara, uspa an ñancha kwakkanapa, Betsaida pîpulurakima. Kwiztane usne wanta îninnara uspa yaltakima. 46 Wantuza îninnarawane, usne îzara Diosta paikwan îrît. 47 Tîlkwil parîkane, kammuruzne kanuawara îat kit katsa pi paizkara piannaara. Jesúsne mazainpa piltain nukkultît. 48 Usne usparuza iznara, tînta tailtuasmin. Inkwane tînta pamtu akwa, uspane wat kwakkasachi. Tîlawain, tîlkwilmin usne usparuza mittîwarain pi îsal îsal atchara. Usne usparuza pînnash minta. 49 Uspane ussa pi îsal chara izarawane, usparuzpain minñat kit kwianñara: “Îra awa izpul iztumakpas,” kizara. 50 Wanne ussa izat kit ishkuarît. Mamin Jesúsne usparuza kwinta kit kit kaiznara: —Uruza kwira kinanash. Tînta kultain. Nane Jesús ish. Ishkuman, kiznara. 51 Jesús kanuara warawane, usne inkwa pailninta. Uspane us akwa ishkuat kit iztaspaarît. 52 Jesús pan wanta nailnarawane, uspane Jesús wan kit aizpa mîarachi.
Jesúsne ishtura wat panintu
53 Kwakara kwakkaarawane, uspane Genesaret sura piannaat kit kanuara pimamin kantaara. 54 Kanuaras kihsharawane, akkwan Genesaret pîpuluras awane Jesústa piannaara. 55 Sun awane wan surakima îat kit ishturuza kwaara, Jesús tukin piannankima. 56 Jesús ainki pîpulurakas katsa pîpulurakas înkalparakas îmtuasmin, awane ishturuza kwaat kit mikin taara. Uspane Jesústa paikuara: “Aune up kwaksham puntakin paashimtumakpas, wat panapa,” kizara. Ussa paakane, ishtune wat parît. Jesúsne ishturuza wat paninnarît.
Antikwain kamtam
1 Fariseo awakas mamaz Moisés kaizta aizpa kamtamtuzkas Jerusalén pîpuluras aat kit Jesústa wanmakkara. 2 Uspane Jesús kammuruza iznara. Sun kamtamtuz kuamtuasmin, uspawa chihtî kittarachi. Moisés kiarachi akwa, uspane Jesúspa kammuruza aliz paraara. 3 Uspa chihtîra akkwan piji kittakine, wan Judío awakas Fariseo kamtamtuzkas kuakain. Uspane antikwa pit, îlapa ampu kaizara aizpa, mîara. Uspane sunkana nil chi minñamtu: “An kumira kwatne, chihtî kittakine, uspane kwail kiamtu.” 4 Pîpuluras kaiyarawane, usparuza sînam kittakine, kuakain. An akkwan antikwa kamtam watsaamtu. Antikwa awa sunkana kizara: “Wan kittawa. Wazkas, pailkas, paiyittarakas misharîkas kittawa,” kizara. 5 Fariseo awakas mamaz Moisés kaizta aizpa kamtamtuzkas Jesústa kainaara: —Up kammuruz kuakane, chihtî kittamtuchi. Une îlaparuz kamtamtu aizpa watsaamtuchi. ¿Chikishma antikwa kamtamtu aizpa mîamtuchi? kizara. 6 Jesúsne usparuza sînkanara: —U akwa wat minñamtu akwa, une kwail kiamtu. Isaíasne, Dios pit kainammmikane, uwa paranara, u paas pit kwinta kiamtu akwa. Ñamin sunkana umîza kaiznara: “Sun awane uspa pitkasain ‘Diosta wat i’ kaizamtukas, uspa kaijchura Diosta pashiamtuchi. 7 Diosta paikuamtukas, Diosta wakpuj wainñamtukas, uspane Diosta pashiamtuchi. Uspain kamtam kamtaamtu.” 8 Une Dios pit kamtaamtuchi. Une Dios manta kit aizpa chîhkaarît, antikwa kamtam mîashimtu akwa, kiznara. 9 Jesúsne usparuza an kaiznara: —Une Dios kamtanarît aizpa chîhkaarît, antikwa kamtamtît aizpa kianpa, kiznara. 10 Ñamin Moisésne ka kaizta: “Papihshtakas akkuhshtakas wat kaiz kit kirain. Papihshtakas akkuhshtakas kwail kiztamikasha inintawa,” kiznara. 11 Me umin sunkana kamtat kit kaizamtu: “Pial mîjmikane papihshtakas, akkuhshtakas mîlatkiwa, paiña pial Dios akwa watsarît akwa. Katmizna usparuza kiwainnapa mîlanamtuchi.” 12 Sunkana une u pialkasa papihshtakas akkuhshtakas kiwainnasachi. 13 Katmizna antikwa kamtam awaruza kamtanamtuasmin, une Dios pitta kain kininamtu, kiznara. Sunkanain an akkwan antikwa kamtam kainanamtu.
Sînam chi awa
14 Usne awara akwanat kit usparuza kaiznara: —¡Une nawa mît kit piankamarain! 15 Awa akkwan piji chihtî kittakine, kumira kwatne, sun kumira ussa ayukta kwail kininsachi. Chiwazha ayukmal kaijchura min kit kirane, sunmin ussa kwail kinintu. 16 Na kuruntu aizpa mîrain. 17 Wan awa kaiyarawane, Jesúsne maza yalta napta. Sua paiña kammuruzne ussa masas kamtampa mîmaara. 18 Jesúsne usparuza mîmanara: —¿Une wat mîmtuchimakkiwas? Une sun awakana minñamtu. Diosne wan kumira kwintît, kwanpa. Chiwazha kumira kwatne, sun kumira ussa kwail kininsachi. 19 Sun kumira ayukta kaijchukin napkain. Pusunmal naptu. Naptawane, tas puzmu, kiznara. Sunkana Jesúsne kaiznara, awa piankamanapa, nil minñanapa. Diosne wan kumira sînam sarît, kuanapa. 20 Jesúsne an kaiznara: —Chiwazha ayukmal kaijchura min kit kwail kitne, sunmin ussa kwail kinintu. 21 Wan kwailne ayuktas, kaijchuras puztu. Kwail mintane, usmin kwail parîm. Ashampa kanpain mîj pittane, usmin kwail parîm. Walkumtumikane kwail parîm. Awara piantamtumikane kwail parîm. Mamazpa ashampakasa pittane, mamazpa ampukasa pittane, usmin kwail parîm. 22 Mamazkin an paashitne, usmin kwail parîm. Mamazta kwail kitmikane kwail parîm. Pîrail kaiztumikane kwail parîm. Pailta payu kwail kishit kit wat mîshitkine, usmin kwail parîm. Patna pashimtumikane kwail parîm. Mamazpa kwail kiztamikane kwail parîm. Nane mamazkin an warish mintamikane kwail parîm. Nilchi mintumikane, kwail kimtumikane kwail parîm. 23 Sun wan kwailne ayuktas puzamtu. Sunmin ussa kwail panintu, kiznara.
Jesúsne salizta pashparas puznintu
24 Tas Jesúsne kuhsak kit mamaz sura îra. Tiro pîpulukas Sidón pîpulukas sulmin uz. Usne yalta nap kit mara. Puintain napshira, sun awa piankamamanpa. Usne usmin kulasachi. 25 Sun urain maza ashampane ussa piankamta. Kwail salizne paiña pashura piztît. Suasmesa sun ashampane at kit Jesúspa mittîkin wakpuj wainta. 26 Usne mamaz suras ara. Usne Judío awaras chi. Griego pit kwinta kit kit Sirofenicia suras ara. Usne ussa paikwat: —Kwail salizne ap pashura pizta. Ussa puzninti, kizta. 27 Jesúsne ussa kaizta: —An ñancha au pashparuza kumira kwinnarawamakpas. Kumira tizkane, kwizara kwintawa. Kawarain an ñancha Judío awaruza kwira kinnarawa. Suasne kwiztane mamaz awaruza kwira kinnarawa, kizta. 28 An ashampane ussa sînkara: —Watcha, ap Anpat. Nakas kwizakana ish. Pashpa kukane, pitchin pak taizkane, kwizane tizka sak kum. Katmizna ap pashura wat paninnaka, kizta. 29 Jesúsne ussa kaizta: —Kwisha watsal sînkazi. Katmizna up yaltain kailtînka. Sun kwail salizne up pashuras me puzta, kizta. 30 Paiña yalta kailtawane, sun ashampane paiña pashura kamara tukin izta. Usne pashpara saliz puznintît wanmalta.
Jesúsne parasachimikasha, mîsachimikasha wat panintu
31 Suasne Jesúsne Tiro suras kail kit Sidón suras pînta. Usne Decápolis suras pînta Galilea Pirakima. 32 Sua awane maza ampura ussa karaara. Sun ampune mîsachi. Uskas wat kwinta kisachi. Awane us akwa Jesústa paikwara, paiña chihtîkasa ussa paanapa, wat panapa kizara. 33 Jesúsne ussa paimpa mit kit paiña chihtî tîppu kailkin napninta. Suasne Jesúsne paiña chihtî tîppura ilpi îtkularît kit parasachimikawa yankwijara paara. 34 Chiyura izaktawane, ayukta tînta pshtat kit paiña pitkasa kaizta: “¡Efatá!” kizta. (Sunne înkal awa pitkasa kiztu: “¡Pit îsakti!” kizta.) 35 Suasne sun urain usne mîra. Paiña yankwija chîhkultawane, wat kwinta kimîzta. 36 Usne awara kaiznara: —Anne mînainkas kaizman, kiznara. Akkwan piji mînainkas kaizman kiznarakas, sun awane mîashitchi. Jesús kaizman kiztakas, uspane an akkwan kaiznara. 37 Uspane kwisha akkwan iztaspaat kit kaizara: “Usne wan watsal kirît. Usne mîkaintuza mîninnashina. Usne parakaintuza paraninnashina,” kizara.
Jesúsne ampara mil awara kumira kwinamtu
1 Mamaz payura akkwan awane wanmakkara. Sun awa kumira mîjchi akwa, Jesúsne paiña kammuruza akwanat kit kaiznara: 2 —Nane sun awaruza kiwainashimtus. Kutña payukima nakasa puranash. Uspane chi kum mîjchimai. 3 Kumira mîjchine, uspa yaltakima îninnarane, miwara najarînazi. Maza mazain attishtas aara, kiznara. 4 Paiña kammuruzne ussa mîmaat kit sînkaara: —Apane, awa tuchira, ¿miza kumirama sun awara kwinnanapai? kizara. 5 Usne usparuza mîmanara: —¿Yawa panma mîjmakpas? kiznara. Uspane kaizara: —Siete pan mîjmakpas, kizara. 6 Usne wanta kaiznara: —Piltain uztain, kiznara. Siete pan saptawane, Diosta kaizta: —Aishtaish, kizta. Usne pan kîz kit kammuruza mîlanara, awara nailnanapa. Uspane panne wanta kwinnara. 7 Uspane pitchin pishkarukas mîjmara. Diosta aishtaish pishkaru akwa kiztawane, kammuruza kaiznara: —Sunkas wan awara kwinnarain, kiznara. 8 Uspane kuat kit tukkara. Kuarawane, pitti pitti tizara. Paiña kammuruzne pitti pitti siete tîmta winñara. 9 Ampara mil ampu kuaara. Kuarawane, Jesúsne usparuza uspa yalta îninnara. 10 Suasne Jesúsne paiña kammuruzkasa kanuara waat kit Dalmanutara sura îara.
Fariseo awane Jesústa paikuamtu
11 Fariseo awane aat kit ussa tînta kwinta kiara. Uspane us kwail kinpa ussa kaizara: —Nu Diostas atne, chiwazha iztasparît kal Diostas izninchain, kizara. 12 Jesúsne ayukta tînta pshtat kit uspa akwa tayal kit kaiznara: —Une chiwazha Diostas iztasparît kal izshiamtu. Dios nawa chiyuras înintakas, nane umîza chinkas izninnamanash. 13 Jesúsne sun awara tuij înat kit mamasa kanuara wat kit pi kwakara îra.
Fariseo kamtamtu aizpa kiñakana i
14 Kammuruzne pan mainñat kit karaarachi. Maza panmin kanuara mîjara. 15 Jesúsne usparuza manta kit kit kaiznara: —¡Mîrain! ¡Kwiraruin! ¡Kwail awakana uzman! Fariseo awaruzkas Herodes kamtamtuzkas nil kamtaamtuchi. Paiña kamtam kiñakana i. Kiñane chappira sulnintu. Paiña kamtamne kiñakana awara maizanazi. 16 Jesúspa kammuruzne usparuzpain sun kwinta kiat kit kaizara: —Pan mîjchimakpas. Katmizna Jesúsne sunkana kwinta kira, kizara. Jesúsne Fariseo kamtampa paranara. Uspane wat mîarachi. 17 Jesúsne uspa minñamtu aizpa piankamta. Uspane ussa mîasachi. Katmizna usparuza kaiznara: —¿Nîjkulamanas? ¿Mîamanas? ¿Izamanas? kiznara. 18 Une kasu wajmai. ¿Izmuskiwas? Une kail wajmai. ¿Mîmuskiwas? ¿Nîjkulmuskiwas? 19 Cinco pan kîztawane, cinco mil ampura nail kit kwinnarau. ¿Yawa pan tîzta tîmta winñanash? kiznara. Uspane ussa kaizara: —Doce tîmta winñanashî, kizara. 20 Ankas Jesúsne kaiznara: —Siete pan tîztawane, ampara mil awara nail kit kwinnarau. ¿Yawa pan tîzta tîmta winñanash? kiznara. Uspane ussa kaizara: —Siete tîmta winñanashî, kizara. 21 Usne usparuza kaiznara: —¿Mama nawa nîjkultuchimakkiwas? kiznara.
Jesúsne kasu izsachira izkulnintu
22 Kwiztane Jesúskas paiña kammuruzkas Betsaida pîpulukin aara. Mînpazha awane awa izsachira Jesústa karat kit tînta paikuat: —¡Ussa paari, kasu izkulnapa! kizara. 23 Jesúsne an awa izsachira chihtîra piz kit ussa pîpulukis mîlta. Sua ilpikasa paiña kasukin nîra. Paiña chihtîkasa ussa paarawane, ussa mîmara: —¿Mane izshinakish? kizta. 24 Sun awane izak kit kaizta: —Nane awara iztus. An awane tîkana chamtui iztus, kizta. 25 Suasne mamasa Jesúsne chihtîkasa kasukin pal pizta. Suas sun awane tînta iz kit wat izkulta. Wanta kai izta. 26 Jesúsne ussa paiña yalta înin kit kaizta: —¡Up yalta kailti! ¡Pîpulukin napmun! ¡Mînainkas kainammun! kizta.
Pedrone Jesúspa paramtu
27 Jesúskas paiña kammuruzkas akkwan ainki pîpulura îara. Kashara Filipowa Cesarea pîpulu uz. Îamtuasmin, usne paiña kammuruza mîmanara: —Uspa nawa parakane, ¿Nawa chima kizamtui? ¿Mînma na ish kaizamtui? kiznara. 28 Uspane ussa sînkaara: —Mamaztuzne “nune Juan munnammika i” kizamtu. Mînpazha “Nune Elías, Dios pit kainammmika, i” kizamtu. Mamaztuzne “Mamaz Dios pit kainammmika i, kizamtu,” kizara. 29 Usparuza mîmanara: —¿Une nawa chima kizamtu? ¿Nane mînma ish? mîmanara. Pedrone ussa sînkara: —Nune Dios nîrîtmika i. Diosne nua au sura înintît, kizta. 30 Jesúsne usparuza kaiznara: —Watcha. Nane Cristo ish. Sun mînainkas kaizman, kiznara.
Jesúsne kaiznara: —Inash
31 Usne usparuza kamtanamîz kit kaiznara: —Nane, Ampu namtîtmikane, awaruza kiwainanamtus. Awaruza kiwainashimtukas, nane kwisha naiznash. Îlapa ampuruzkas, katsa pariyaruzkas, Moisés kaizta aizpa kamtamtuzkas nawa kwayarînpas. Nawa piantarînpas. Nawa piantarawane, mamasa uznash. Kutña payura kuhsnash, kiznara. 32 Jesúsne us intu payuwa kaiznara, wan awa wat piankamanapa. Pedrone ussa paimpa mîl kit tînta kaizta: —¡Sunkanane paramun! kizta. 33 Jesúsne kail kit puijchat kit mamaz kammuruza iz kit Pedrora ka kaizta: —¡Nawa chîhkazha! Nune Satanáskana kwinta kimtu. Nune Dioskana mintuchi. Awakana mintu, kizta. 34 Tas Jesúsne wan awaruzakas paiña kammuruzakas ussain akwannat kit kaiznara: —Mînpazha ap kammuruz namashitne, ¡nakasa aat kit na kamtamtu aizpa piakamanaka! ¡U pashit aizpa chîhkawizanaka! Nawa kanpamtuzne naizarînazi. Nakanain uzwizanaka, naiznakima, kurishta innakima. Sunkana ap kwizpa awizanaka. 35 Wan uspain watsamturuzne iat kit wan kaarînazi. Mînpazha na akwa irane, Dios watsal pit akwa irane, Diosne usparuza uzninnanazi. 36 Wan su mîjne, wan pial mîjne, sunkanane awane chiyura uzasachi, irîtne. 37 Irîtmikane pial tasachi, chiyura uzna. 38 Mînpazha kwail awa iztakin, nil nîjkultachiruzkin, nawakas ap kamtampakas mîtsal kiarane, nane, Ampu namtîtmikane, usparuza mîtsal kinanash. Ap watsal Taittakas paiña sînam ángeltuzkas na amtu payura aanazi. Sun payura nane nawa mîtsal kirîttuza mîtsal kinanash.
1 Jesúsne ma pitchin usparuza ka kaiznara: —Watcha kaiznamtus. Mînpazha apa uzturuzne azain iamanazi, Dios awaruza îninnanakima. Mînpazha Dios awaruza îninnashimtu piankamanazi.
Kutña kammuruzne Jesúskasa îarît
2 Seis payu pailka, Jesúsne Pedrorakas Santiagorakas Juantakas kwash îzara minara. Usparuzpain purara. Jesúsne uspa iztakin maizta. 3 Paiña kwakshamne maiz kit an putchã, puztît. Akkwan piji pattane, paiña kwaksham an putchã puzsachi. 4 Suane paiña kammuruzne Elíastakas Moiséstakas izara. Ñamin apain uzpailta. Uspane chiyuras ail kit Jesúskasa kwinta kiilta. 5-6 Suane Pedrone Jesústa kwinta kimîzta. Us kaizta aizpa wat pianchi akwa, ishkwat akwa. Katmizna usne ka kaizta: —Kamtam, aune wat puramakpas. Kutña îranchu sazhain, ukas Moiséskas Elíaskas aukasa tuanpa, kizta. 7 Suasne wanish at kit wanta sîpnara. Diosne wanish ayukmalsîh kaiznara: “Anne ap painkul i. Nane ussa pashimtus. Ussa mîrain,” kiznara. 8 Sun urain kutñaruzne Elíastakas Moiséstakas izarachi. Dios kutñaruza kwinta kitpane, Jesústain izara. 9 Îzaras kaiyamtuasmin, Jesúsne usparuza kaiznara: —Une izarît aizpa mamaztuza kainanaman. Nane Ampu namtîtmika ish. Nawa piantarîkane, uspane nawa pilta kamanazi. Nawa kamtawane, nane piltas salaktînash. An kwiztane awara sunpa kainanarain, kiznara. 10 Uspane uspa izarît aizpakas Jesús kaizta aizpakas watsarît. Usparuzpain us parît aizpa mîmara: “¿Miza piltas kuhstîmtu?” kizara. 11 Uspane ussa kaizara: —Moisés kaizta aizpa kamtamtuzne ka kaizamtu: “Elíasne Cristokin ñancha anazi. Cristone an kwizta anazi. ¿Elías an ñancha atki?” kizara. 12 Jesúsne usparuza sînkanara: —Watcha. Mazane Elíaskana Cristokin ñancha ara, wan nil sanapa, awa Diosta kaiyanapa. Ñamin Dios pit ka parît: “Kwail awane nawa, ampu namtîtmikasha, ilninnanazi. Nawa izshiamanazi,” ka parît. 13 Nane umîza ka kaiznamtus: —Mazane Elíaskana watcha ara. Mamaz awane uspa kiashit aizpa kiat kit ussa piantaarît. Sunkana Dios pitta parît, kiznara.
Jesúsne kwail saliz pashparas puznintu
14 Îzaras kihsharawane, uspane sun nueve kammuruzkasa mamasa wanmakkaara. Akkwan awane sun nueve kammuruzkasa wanmakkaarît. Moisés kaizta aizpa kamtamtuzne usparuzkasa tînta kwinta kiarît. 15 Suasne wan awane Jesústa izat kit kwisha iztaspaarît. Uspane ussa îat kit kaizara: —Kai kîntîre, kizara. 16 Jesúsne usparuza mîmanara: —¿Uspakasa chima kwinta kiamtu? kiznara. 17 Mazane sun akkwantas Jesústa sînkara: —Kamtam. Nane ap painkul apa kararau. Salizne ussa piztît. Ap painkulne sun saliz akwa kwinta kisachi. 18 Ussa pizkane, sun salizne ap painkulta pilta nainnintu. Ap painkul ilpi puz kit sula sît sît kimtu. Pilta nain kit tîs pat kit kialtu. Nane up kammuruza kaiznarau: “Ap painkulta saliz puznintain,” kiznarau. Uspane saliz puzninsachi. Puzninna pianchi, kizta. 19 Jesúsne paiña kammuruza sînkanara: —Ukas an akkwan awakas Dios pit nîjkularachi. Na akwan payukima uruza kamtanarakas, une nawa mama mîamtuchi. Une Dios aumîza kiwainsachi, minñamtu. ¡Pashpara apa kararain! kaiznara. 20 Pashparane ussa karaarît. Kwail saliz Jesústa iztawane, salizne pashpara ulninta. Pashpane pilta nain kit tîzak pîn kit pittas ilpi puzta. 21 Jesúsne papihshta mîmara: —¿Yawa payukima sunkana uztu? mîmara. Usne kaizta: —Ainkiasmin. 22 Kwail salizne ussa akwan piji ïnta îninta, inapa. Pirakas îninta, pi kwanapa. ¡Aumîza kiwainchain! ¡Kiwainshitne, kiwainchain! kizta. 23 Jesúsne papihshta kaizta: —Diosne Dios pit nîjkulshimtumikasha kiwainshimtu. Diosne wan kishina, kizta. 24 Suasne papihshne kwian kit kaizta: —Dios pit nîjkultus. Kiwaincha, an akwan nîjkulna, kizta. 25 Akkwan awane Jesúspakin aat kit wanmakkara. Suasne Jesúsne salizta kaizta: —Nune pashpara mîmanpa kininta. Pashpara paramanpa kininta. ¡Pashpara chîhkat kit puzninti! ¡Ussa mamasa pizmun! kizta. 26 Tas sun salizne tînta kwian kit pashpara mamasa tînta ulnin kit puzta. Pashpane irîtkana iztît. Akkwan awane kaizara: —Pashpane irît, kizara. 27 Me Jesúsne paiña chihtî piz kit ussa kunninta. Pashpane kunta. 28 Jesús maza yalta naptawane, paiña kammuruzne paimpain ussa mîmaara: —¿Chikishma aune kwail salizta puzninsachimakpas? kizara. 29 Jesúsne usparuza kaiznara: —Diosta kwinta kitkine, Diosta paikwatkine, sun salizkanane puzsachi, kiznara.
Jesúsne mamasa kaiznara: Awane nawa mamaz payura ininanazi
30 Tas puzarawane, uspane Galilea sura kailnain îara. Jesúsne mînainkas uspa îamtura kainarachi, paiña kammuruza kamtanashimtu akwa. 31 Jesúsne ka kiznara: —Awane nawa, Ampu namtîtmikara, mamaztuza annanazi, nawa pizanapa. Nawa piantarawane, kutña payura mamasa kuhsnash. 32 Me uspane Jesús kaizta aizpa mîasachi. Ishkuarît akwa, uspane sunpa mîmaarachi.
¿Mînma an katsamika i? mîmaamtu
33 Capernaum pîpulukin piannaara. Yalta naptawane, Jesúsne usparuza ka mîmanara: —Miwara îamtuasmin, ¿chi kwinta kipuspas? mîmanara. 34 Uspa miwara îamtuasmin, uspane usparuzpain “mînma anza katsa azi” paraara kiz kit. Katmizna uspane puñain paarît. 35 Suasne Jesúsne uz kit sun doce kammuruza akwanat kit ka kaiznara: —Mînpazha katsa mikwakana namashitne, an ainki namtawa. Kiwainmumikakana namtawa, wanta kiwainnana, kiznara. 36 Jesúsne maza pashpara uspa iztakin kunin kit kaiznara: 37 —Mînpazha maza pashpara ap akwa saptane, nawakas sapnazi. Mînpazha nawa, Dios înintamikasha saptane, usne nawakas ap Taittarakas sapnazi, kiznara.
Izmuruza kiwainamtu
38 Juanne Jesústa kaizta: —Kamtam, aune maza ampura izanashî. Usne nu akwa akwan kwail saliztuza puzninnara. Usne au kwizpa kanpamtuchi. Ussa ka kizanashî: “Jesústa paikwat akwa, salizta puzninmun,” kizanashî, kizta. 39 Jesúsne sînkara: —Sunkanane kaizmun. Na akwa wat kimtumikane an kwizta nawa kwail parasachi. 40 Aukasa waya kishimtuchimikane aumîza kiwainamtu. 41 Watcha umîza kaiznamtus. Une Cristora piantuz mai. Katmizna mînpazha na akwa umîza kwazi kwintane, umîza wat kitne, usne Dios mîlamtu aizpa sapnazi, kiznara.
Kwail kiman
42 Jesúsne ka kaiznara: “Dios pit we mîramikasha kwail kinpa kininman. Dios pit we mîramikasha kwail kinpa kinintane, Diosne ussa naiznintînazi. An watshimasa katsa ukkasa paiña tîmpukin kuh kit ussa katsa ñam pira kiakpînna. 43-44 Up chihtîkasa kwail kirane, an watshimasa chihtî tizpianna, kwail kimanpa. An watshimasa maza chihtîkasain chiyura nap kit uzna. Kwail kimtumikane paas chihtîkasa ïnta napnazi. Sua naiztînazi. Sua ïnne kwikain. 45-46 Chat kit kwail kitne, an watshimasa mittî tizpianna, kwail kimanpa. An watshimasa maza mittîkasain chiyura nap kit uzna. An kwailshimasa paas mittîkasa ïnta nap kit uzna. Anne an kwail i. Sua kwail chatmikane naiztînazi. Sua ïnne kwikain. 47 Kasukasa iz kit kwail kitne, kasu uktawa, kwail kimanpa. An watshimasa maza kasukasain chiyura Dios înintura nap kit uzna. An kwailshimasa paas kasukasa ïnta nap kit uzna. Anne an kwail i. 48 Sua kwail kimtuzne naizarînazi. Sua ïnne kwikain. 49 Wan Diosta piantuzne naizarînazi, an wat namanapa. Sunkana kumira ñam sarane, kumira an wat puztînazi. 50 Ñamne wari. Ñamne kumira wintane, ñam kulmu. Ñam kultakine, tîh. Wat chi. Uruzpain wat kit kit kalpain uztain.” Sunkana Jesúsne kiznara.
Ashampa kwaikain
1 Suasne Jesúsne Capernaum pîpuluras puz kit Judea surakima îrît. Jordán pi kwakara tuazi. Akkwan awane ussa mamasa wanmakkara. Suasne Jesúsne usparuza mamasa kamtanamîzta. 2 Fariseo kamtamtuzne ussa kashara aat kit ka mîmaara, us kwail paranpa: —Ampune ashampa mîjne, ¿Ussa kwaishina watki? kizara. 3 Suasne Jesúsne usparuza sînkanara: —Ñamin Moisésne ¿Umîza chima kizkwin? kiznara. 4 Uspane ussa sînkaara: —Moisés ka kaizta, “Ashampa kwaishitne, kwairîm pînkîh pat kit ussa mîlatpa, kwaina,” kizara. 5 Suasne Jesúsne usparuza kaiznara: —Moisésne umîza ka kiznara, u Diosta chi mîashimtuchi akwa. 6 Ñamin Dios wan sarawane, usne ampukas ashampakas sara. 7 Katmizna ampu ashampara mîltane, usne paiña papihshtakas paiña akkuhshtakas chîhkatpa, paiña ashampakasa uzna. 8 Sun paas awane maza kwal namta. Suasmesa sun paasne mazakanain uznazi. 9 Katmizna Dios ampurakas ashamparakas wanmaktune, awane usparuza kwaikain, kiznara. 10 Yalta kaiyarawane, paiña kammuruzne mamasa ussa sunpa mîmaara. 11 Jesúsne usparuza kaiznara: —Mînpazha ashampa kwait kit mamazkasa kasara kitne, ampune Dios iztakin kwail kirîm, mamaz ashampakasa uztu akwa. 12 Mînpazha ampu kwait kit mamazkasa kasara kitne, ashampane Dios iztakin kwail kirîm, mamaz ampukasa uztu akwa, kiznara.
Jesúsne pashparuza paanara
13 Suasne awane pashparuza Jesústa karaara, paiña chihtîkasa paananapa, Dios usparuza kiwainanapa. Paiña kammuruzne usparuza kaiznara: —¡Jesúspakin karaman! kiznara. 14 Jesúsne sun iz kit usparuza aliz pat kit kaiznara: —Usparuza karaman, “kaizman” kiznara. Pashparuza kaiznara: —Nawa azhain. Diosne sun pashpa nawa mîamturuzkana akwanamtu, usparuza îninnana. 15 Watcha watsal kaiznamtus. Diosne umîza îninnashimtu. Pashparuzne Diosta watsal mîashimtu. Ukas pashpa Diosta mîamtukana mîrain. Kawarain Diosta mîrain, Dios umîza îninnanapa, kiznara. 16 Pashpara munat kit chihtî paanat kit Diosta uspa akwa akwannara, Dios usparuza kiwainanapa.
Maza musittune, kwazpa kultîtmikane, Jesústa kwinta kit
17 Jesús miwara îmtuasmin, maza ampune azain at kit ussa wain kit ka kaizta: —Nune wat kamtam i. ¿Chima kinpai, Dioskasa chiyura pailta payukima uzna? kizta. 18 Jesúsne ussa mîmara: —¿Nawane chitma wari kiztus? Diosmin wari, kizta. 19 Jesúsne ussa kaizta: Nune Dios manta kit aizpa pian: “Awara piantamun. Mamazpa ashampakasa pitmun. Walkumun. Awaruzpa kwail kizmun. Mamaz mîj aizpa pashimun. Up taittawakas up akkwawakas wat kaiznari,” kizta. 20 Sun ampune Jesústa sînkara: —Kamtam, pashpaasmin sunkana kirau, kizta. 21 Jesúsne ussa iz kit pashit kit kaizta: —Maza tuntune kitchi. We. Ît kit wan mîj aizpa painin kit sun pial puizaruza mîlananaka, chiyura Dios nua mîlamtu aizpa sapnapa. Tas ap kwizpa at kit nawa kanpazha, kizta. 22 Sun mîrawane, usne tayalmîzta. Paiña pampa pial akwa, sun ampune Jesústa mîshitchi. Tas kailta. 23 Awaruza iznamtuasmin, Jesúsne paiña kammuruza kaiznara: —Kwazpa kultîttuzne Dios înintukin wat nappasachi, kiznara. 24 Paiña kammuruzne paiña pit akwa iztaspaarît. Suasne Jesúsne usparuza mamasa kaiznara: —Izmuruz, mîzha. Kwisha sam i, Dios înintura napna. “Pãn kultumikane Dios înintura napnash,” minman. 25 Iyu chîhku kulta tîm. Maza kalpakanane, camello mun. Sun kalpane chîhku kulta tîsachi. Kawarain kwazpa kultîtmikane paiña pial akwa Dios înintura napsachi, kiznara. 26 Sunpa mîarawane, uspane kwisha iztaspaat kit usparuzpain kaizara: —Suasne mînminkas chiyura napsachi, kizara. 27 Jesúsne usparuza iznat kit kaiznara: —Awane usmin watsat mîlnasachi, Dios înintura uzna. Diosmin awaruza watsat mîlnashina, Dios wan chiwal kishimtu akwa, kiznara. 28 Pedro ussa ka kaizta: —¡Izti! Aune wanta chîhkat kit up kwizpa apuspas, piankamna, kizta. 29 Jesúsne sînkara: —Watcha kaiznamtus. Mazantuzne ap akwakas Dios watsal pit akwakas paiña yalkas paiña aimpihshkas paiña kwampihshkas paiña akkuhshkas paiña papihshkas paiña pashpakas up sukas chîhkaarît. 30 Diosne wan chîhkarîttuza an akkwan mîlananazi. Chiwazha chîhkarîtne, Diosne usparuza an akkwankima apain mîlananazi. Mamaz yalkas aimpihshkas kwampihshkas akkuhshkas pashpakas sukas mîlananazi. Na uruza wat kinamtukas, mamaz awane umîza naizninnanazi. Mamaz payura nane uruza chiyura pailta payukima uzninnanash. 31 An sukin uzamtuasmin, katsa mikwaruzne, apas awaruza îninnamtu. Katsa mikwaruzne an we katsa namanazi. Diosne apas kiwainamtuza katsa mikwakanain namninnanazi.
Jesúsne kaiznara: Mamaz payura inash
32 Jesúskas paiña kammuruzkas miwara Jerusalén pîpulura nuarîmtuazi. Jesúsne an ñancha îzi. Paiña kammuruzne iztaspaarît. An kwizta amturuzne ishkuara. Jesúsne doceruza paimpa mîlnat kit mamasa kaiznara: —Awane mamaz payura nawa kwail kianazi. 33 “¡Iztain! Jerusalén pîpulura îamîztumakpas. Suane Judío awane nawa, Ampu namtîtmikara, pizanazi, katsa pariyaruzakas Moisés kaizta aizpa kamtamtuzakas chîhkaanapa. Uspane nawa piantaana kizanazi. Tas uspane mamaz awara nawa chîhkaanazi. 34 Mamaz awane nawa ishananazi. Nawa pashiamtuchi akwa, nawa ilpi kianazi. Nawa iyanazi. Nawa piantaanazi. Kutña payu pailtawane, nane mamasa kuhsnash,” kiznara.
Santiagokas Juankas Jesústa chiwazha paikumtu
35 Santiagokas Juankas, Zebedeo painkultuzne, Jesús turakima îilt kit ussa kaizpailta: —Kamtam, au paasne nua chiwazha paikwashimtuas, chiwazha kinpa, kizpailta. 36 Jesúsne usparuza mîmanara: —¿Uruz akwa chima kinpai? kiznara. 37 Uspane ussa kaizara: —Nu chiyura nukane, aune nu înintukin nukasa uzshimtuas. Mazarane numal uzninti. Mamazta kwiyamal uzninti, kizpailta. 38 Jesúsne usparuza sînkanara: —Une u paikumtu aizpa wat pianchi. Nane naiztînash. ¿Une nakana naizshinamakkiwas? Nane naiz kit tailchannash. ¿Une nakana naiz kit tailchashinamakkiwas? kiznara. 39 Uspane ussa sînkaara: —Au paasne naizshinawas, kizpailta. Jesúsne usparuza kaiznara: —Une nakana naizpailnazi. Une nakana naiz kit tailchailnazi. 40 U nakana naizarakas, nane mazara up numal uzshina, mazara ap kwiyamal uzshina, kaiznasachish. Diosne narîttuza paiña numalkin paiña kwiyamalkin uzninanazi. 41 Mamaz diez kammuruz sun mîarawane, uspane Santiagorakas Juantakas aliz kulaara. 42 Jesúsne usparuza akwanat kit kaiznara: —Une miza mamaz awa îninnamtu pianmai. Sun îninturuzne usmin katsa mikwakana namamtu, an akkwan awaruza îninnanapa. Awaruza îninnakane, kwisha tînta îninnamtu. 43 Uruzpain îninmikakana namman. U anza katsa mikwakana namashitne, kiwainmumikakanain namtain, pailta awara kiwainnanapa. 44 Katsa mikwakana namashitne, ñamin ussain kiwainmumikakana namtawa, wanta kiwainnana. 45 Nain, Ampu namtîtmika ish. Nane atchish, awa nawa kiwainnapa. Nane apa arau, awara kiwainnana. Nane awa akwa inash, akkwan awa chiyura uzanapa.
Jesúsne kasu izsachimikara izkulnintu
46 Suasne Jesúskas paiña kammuruzkas Jericó pîpulura pianaara. Uspane akkwan awakasa Jericó pîpulura puzakane, izsachimikane mi mamin uzta. Puiza akwa usne chiwazha paikumtu azi. Usne Bartimeo mun. Usne Timeowa painkul azi. 47 Mînpazha ussa ka kizara: —Jesúsne, Nazaret pîpuluras, kasha amtui, kizara. An mîkane, Bartimeone kwian kit ka kaizmîzta: —¡Jesús, Davidpa pampa, nawa kiwaincha! kizta. 48 Akkwanne ussa kaizara: —Kwianmun. Puñain, kizara. Sun akwa an tînta kwian kit kaizta: —Davidpa pampa, nawa kiwaincha, kizta. 49 Jesúsne kun kit kaiznara: —Ussa akwarain, kiznara. Uspane Bartimeora akwat kit kaizta: —Ishkumun. Kuhsakti. Usne nua akwantu, kizara. 50 Usne paiña ijmu kiakpîn kit kuhsak kit Jesús turakima îra. 51 Jesúsne ussa mîmara: —¿Nu akwa chima kinpai? kizta. Izsachimikane ussa kaizta: —Kamtam, ¡Kasu izkulnincha! kizta. 52 Jesúsne ussa kaizta: —Nune “Jesús nawa izkulninnazi” nîjkulta. Katmizna nune wat parît. Îmîzti, kizta. Sun urain izkulninkwera. Kasu izkultawane, usne Jesústa kwizpa kanpara.
Jesúsne Jerusalén pîpulura piannamtu
1 Jesúskas paiña kammuruzkas kasharakima Jerusalén pîpulura pianaara. Betfagé pîpulukas Betania pîpulukas an kashain uz. Maza ainki îzane kaiwarain tu. Sua akkwan olivos tî warît. Jesúsne paas kammumikasha înin kit kaiznara: 2 —Sun pîpulura îrain. Pîpulura piannakane, mamaz ainki caballora kantît pana izpailnazi. Ñamin mînminkas caballora anuztachi. Caballo chîht kit tainñanka. 3 Mînpazha umîza ka mîmanazi: “¿Chikiztama caballo chîhtuas?” mîmanazi. Suas ussa kaiztain: “Ap Anpatne caballo pashimtui, anuzna. An kwizta usne umîza caballora kailninnanazi,” kiznara. 4 Sun paas kammuruzne îil kit caballo wanmalpailta. Pîjtakin kantît pana. Uspane caballo chîhtpailta. 5 Mînpazha kasha panaruzne usparuza kaiznara: —¿Chikishma caballora chîhtuas? kiznara. 6 Paas kammuruzne usparuza Jesús kaizta aizpa kaiznarawane, uspane caballora an paaskasa îninñara. 7 Uspa paasne Jesús turakima caballora tainpailta. Awaruzne caballo punsîhkin uspa pïn ampalara. Jesúsne caballora anuzta. 8 Akkwan awane mikin uspa pïn kîhara. Anpane akkwan kwazpil kîhkas chappil kîhkas tît kit mikin kîhtara, mi watsal puznapa. 9 Akkwan awane ussa an ñancha îara. Anpane kwizpa aara. Pailta awane ka kwianara: “Diosne kwisha wari. Diosne nua îninta, au Anpat namnapa. Nukas kwisha wari. 10 Diosne nua îninta, awaruza kiwainnapa. Nune au pampa David mikwakana îninnazi. Diosne, chiyura uzmikane, kwisha wari,” kizara. 11 Jesúsne Jerusalén pîpulura piannarawane, Dios katsa yalta napta. Wanta iznarawane, usne paiña doce kammuruzkasa Betania pîpulura kailta, nashtîmtu akwa.
Higuera tîra pippa wachi
12 Tîlawane Betania pîpuluras puzarawane, Jesúsne yak kira. 13 Jesúsne attishtas maza tîra izta. An tîne higuera mun. Kîh wa. Usne ît kit izta, pippa saina. Pianatpane, pippa iztachi. Kîhmin izta. Pippa wachi. 14 Jesúsne tîra kaizta: —An tîras mînminkas pippa kuamanazi, kizta. Paiña kammuruzne us kaizta aizpa mîara.
Jesúsne mamasa Dios katsa yalta îmtu
15 Jerusalén pîpulura piannakkara. Jesúsne Dios katsa yalta nap kit paininturuza pianamal îninnara. Paimturuzkas pianamal îninnara. Jesúsne pial maizmuruzpa misharî kiakpînara. Utkuru painintuzpa misharîkas kiakpînara. 16 Jesúsne wanta kaiznara: —Dios katsa yalpara kainsîh mîlnachi, kiznara. 17 Jesúsne usparuza kaiz kit ka kamtanamîzta: —Diosne ñamin pînkîhta ka panintît: “Wan suras awane ap katsa yaltakima aanazi, nawa paikwan.” Walkumtuzne katsa kulta kulaamtu. Une ap yalkin wanmakkamtu, awaruza walkwan, kiznara. 18 Jesús kaizta aizpa mîarawane, katsa pariyaruzkas Moisés kaizta aizpa kamtamtuzkas Jesúspa ishkuat kit Jesústa piantana minñara. Wan awane Jesúspa iztaspaarît, paiña kamtarît aizpa mîarît akwa. 19 An tîl pamîzkane, Jesúskas paiña kammuruzkas pîpuluras puzara.
Higuera tîne irît
20 Tîlawain miwara îamtuasmin, uspane sun higuera tîra izara. Tî kwalkas mujtîtkas irît. 21 Suasne Pedrone nîjkul kit ka kaizta: —Kamtam, ¡Izti! An higuera tîra nu “pippa wamanazi” kaizta aizpa irît, kizta. 22 Jesúsne usparuza sînkanara: —Diosta nîjkultain. 23 Watcha kaiznamtus. Diosta paikukane, Diosta watcha ka min kit nîjkultane, nune an înkalta ka kizshina: “An înkalta katsa pirakima înintus.” Ka kiztawane, an înkal înazi. Diosta kaijchukasa wat nîjkultane, Diosne nu tîriztu aizpa kinazi. “Dios nawa kiwainsachi” mintane, Diosne nu kaizta aizpa kimanazi. 24 Katmizna u chiwazha pashitne, Diosta paikwarain. Diosta nîjkultain, Dios nua mîlashimtu aizpa sapnapa. 25 Dios iztakin paikukane, umîza kwail kittîttuza wat kultain. U mamaz kwail kittîttuza wat kultane, u chiyuras Taittane umîza wat kulnanazi. U kwail kihananazi. 26 U mamazta wat kultukine, u chiyuras Taittane umîza wat kulnamanazi, kiznara.
Awane Jesústa mîmaara
27 Suasne Jesúskas paiña kammuruzkas Jerusalén pîpulura kaiyara. Jesúsne Dios katsa yalta piannakane, katsa pariyaruzkas Moisés kaizta aizpa kamtamtuzkas Judío îlapa ampuruzkas aara. 28 Jesús iztakin aat kit ka mîmaara: —¿Nua mînma îninta, Diospa yaltas awara kinakpîn îninna? mîmaara. 29 Jesúsne usparuza sînkanara: —Nakas uruza mîmananash. Sînkazhain. Sînkarane, nakas umîza mînma nawa îninta sînkananash. 30 ¿Mînma Juan munammikasha îninta? ¿Diosne ussa îninma? ¿Awa ussa îninma? ¡Sînkazhain! kiznara. 31 Uspane usparuzpain tînta kwinta kiat kit kaizara: “Aune Diosne ussa munnanapa îninta kaizsachimakpas. Sunkana kiztane, Jesúsne aumîza ka mîmananazi: ‘¿Chikiztama ussa nîjkulamanas? 32 Aune awa kaizsachimakpas, ussa munnanapa îninta.’ Sunkana kiztane, wan awane aumîza kwail paraanazi. Akkwan awane Dios Juanta îninta minñamtu. Uspane ‘Juan Dios pit kainammmika azi’ minñamtu,” ka usparuzpain kaizara. Uspa awawa ishkwarît akwa, 33 katmizna uspane Jesústa sînkaara: —Aune mînma Juanta îninta pianchimakpas, kizara. Jesúskas usparuza kaiznara: —Nakas mînma nawa îninta Dios yaltas awara kiakpîn îninna uruza kaiznamanash, kiznara.
Kwail kal kimtuz kwinta
1 Jesúsne katsa pariyaruzakas Moisés kaizta aizpa kamtamtuzakas îlapa ampuruzakas masas kamtam kwintakasa kamtanamîzta: “Maza ampune, su pamikane, wankail tît pippa paiña pilkin wara. Paiña pilkin kintît mîjazi. Pil kîht kit akkal alpara uk tarît, wankail pippa kuztît tulpiznapa. Ainki yalmin sara, wan su izna. Su pamika sun kal kimturuza nailnakin chîhkat kit attishta îrît. 2 Paktu payu akane, su pamikane paiña kiwainmumikasha paiña sura îninta, nail kit paiña paimpa sapnapa. 3 Su kal kimturuzne kiwainmumikasha pizat kit aim kiara. Uspane ussa chinkas mîlarachi. Uspane kainmin ussa îninaara. 4 Mamasa su pamikane mamaz kiwainmumikasha îninta. Uspane ussa pizat kit kîzpukin aim kiat kit ussa kwail kiarît. 5 Usne kwizta mamazta îninta. Uspane ussa piantaarît. An akkwanta îninnara. Uspane akkwanta ilnarît. Anparuza piantanarît. 6 Su pamikane paiña painkulkasa uzta. Ussa pashire. An kwizpane ussa îninta. ‘Ap painkulta kwail kiamanazi,’ minta. 7 Paiña painkulta izarawane, su kal kimturuzne usparuzpain kaizara: ‘Su sapmumikane amtui. Ussa piz kit piantana îzhain. Ussa piantarawane, aune paiña su pakiwiznapas,’ kizara. 8 Uspane ussa pizat kit piantaara. Irîkane, uspane ussa wankail pippa piltas pianmal kiakpînara, kiznara. 9 Suasne Jesúsne pariyaruzakas Moisés kaizta aizpa kamtamtuzakas îlapa ampuruzakas kaiznara: ‘¿Su pamikane chima kinazi? Usne paiña sura kail kit su kal kimtuza piantananazi. Suas paiña sukin mamaz kal kimtuza chîhkananazi,’ kiznara. 10 Jesúsne kaiznara: Une Dios pit pînkîhta izarît. Ka parît: ‘Yal sammikane wat uk kiakpîntît. An kwizta usne sun kiakpîntît uk sak kit sam wara, yal naina akwa. 11 Au Anpat Dios us kishit aizpa sarît akwa, Aune Dios kit aizpa kwisha wari kizmuspas,’ ka parît,” kiznara. 12 Sun awane Jesús sun kamtam kwintakasa usparuza paranamtu minñara. Uspa ussa pizshiarakas, uspane akkwan awa akwa ishkuat kit Jesús tukis îara.
¿Gobiernora pial tanansa?
13 Fariseo awaruzkas Herodes kanpamtuzkas mazantuza Jesústa îninñara, us nil chi kwinta kininpa. 14 Uspane ussa aat kit kaizara: —Kamtam. Aune nu watcha paramtu pianmakpas. Nune pailta awara kawarain paranamtu. Nune izmuruzakas aliz awaruzakas kawarain paranamtu, ishkwatchin. Nune awa Dios înintîtkana uzanapa kamtanamtu. Roma pîpulura Emperadorne katsa mikwa i. Usne apas awara îninnamtu. ¿Mizama kai? ¿Pial ussa tanapas? ¿Pial ussa tamanapas? kizara. 15 Jesúsne uspa minñamtu aizpa pian. Uspane nil chi minñara. Suasne Jesúsne usparuza kaiznara: —Une nawa kwail kiashinintu. ¡Maza pial kararain izna! kiznara. 16 Uspane ussa pial karaara. Usne usparuza mîmanara: —¿Mîn awa kîzpuma izamtuas? ¿Mîn munma pialta parît? kiznara. Uspane kaizara: —Au pîpulu Emperador mikwa kîzpura izamtuas, kizara. 17 Jesúsne usparuza kaiznara: —Emperadorpa pial ussa tarain. Emperador înintu aizpa kirain. Kawarain Diospa pial ussa tarain. Dios manta kit aizpa mîrain, kiznara. Uspane paiña pitkasa iztaspaarît.
Awa irîtne, ¿Mamasa kuhstuki?
18 Saduceo awaruzne Jesústa aara. Uspane nil chi min kit mamaztuza kamtanamtu. Awa irawane, mamasa kuhsamtuchi minñamtu. Uspane Jesústa sunpa mîmaara: 19 —Kamtam, Moisésne ñamin aumîza ka pattît, “Ampu irane, pashpa mîjchi irane, paiña ashampane mazain uz. An impara irîtmikawa aimpihshne paiña ashampara mîltawa, us akwa pashpa mîjan,” ka parît. 20 Siete aimpihshtuzpain uzara. Aimpihsh îlapamikane ashampa mîlta. Ashampa pashpa mîltachasmin, ampune irît. Usne pashpa mîjchi irît. 21 Suasne kanmika aimpihshne paiña ashampara mîlta. Uskas pashpa mîjchi irît. Kawarain kanmika aimpihshne pashpa mîjchi irît. 22 Sunkana siete aimpihshtuzne sun ashampara mîlara. Pashpa mîjchi iarît. An kwiztane sun ashampakas irît. 23 Awa irît mamasa kuhstane, ¿mînmika sun ashampara mîlnasa? wan siete aimpihshtuzpain ussa mîlarît akwa, ka kizara. 24-25 Jesúsne usparuza sînkanara: —Nune ñanta kiat kit Dios parît aizpa pianchime. Diosne wan kishina. Awa irîttuza kuhstawane, chiyura ashampane ampura mîlkain. Ampune ashamparakas mîlkain. Uspane ángelkanain puranazi. Ángelne ashampara mîlkain. Katmizna une nil minñamtuchi. 26 Nane awa irîttuzpa umîza kainanash, uspa kuhsamtu akwa. Une ñamin Moisés pînkîh parît aizpa pianmai. Suane Moisés impaktîmtu tîra iztuasmin, Diosne ussa ka kwinta kirît: “Nane Dios ish. Abrahampa Dios ish. Isaacpa Dios ish. Jacobwa Dios ish.” 27 Uspane an ñancha iarît. Uspa iarawane, Diosne usparuza kwinta kinara. Katmizna uspane ma payu uzamtu. Une awa irîttuz kuhsamtuchi kizamtu. Une ñanta minñamtu, kiznara.
Dios îninta pit anza tînta i
28 Jesús Saduceo awaruza wat sînkamtawane, Moisés kaizta aizpa kamtammikane kamtanarît aizpa mît kit Jesús tukin at kit mîmaara: —Nu usparuza watsal sînkanarît akwa, nawa sînkazha. Diosta akkwan înim pit para. ¿Chi îninta pit an wari? kizta. 29 Jesúsne sînkara: —Diosne an ñamin an watsal înim pit ka manta kinara: “Israel awa, mîrain. Au anpatne Dios i. Mamaz diosne uzchi. 30 Ka akwaizna u Anpatta, u Diosta pashirain u kaijchukin. Mintuasmin, Diosta pashirain. Kal kimtuasmin, Diosta pashirain.” 31 Suasne Diosne kwizta mamaz înim pitka manta kinara: “Up kwalta pashirain. Kawarain izmuruzakas pashinarain.” Mamaz an kwisha wat înim pit wachi, kizta. 32 Moisés kaizta aizpa kamtammikane ussa kaizta: —Kamtam. Nune nilkas watchakas sînkamtu. Diosne mazain i. Mamaz diosne uzchi. 33 Diosta pashitpa. U kaijchukin Diosta pashitpa. Mintuasmin, Diosta pashitpa. Kal kimtuasmin, Diosta pashitpa. Izmuruza pashitpa up kwalkana. Sunkana kiarane, une Dios înintu aizpa kianazi. Maintas une wakara paktana Diosta mîlara. Chiwazha Diosta mîlaarîtkas, Diostakas izmuruzakas pashinana anza wari, kizta. 34 Jesúsne sun Moisés kaizta aizpa kamtammika watsal sînkara minta. Katmizna Jesúsne ussa kaizta: —Nune Diospa înintukin kasha pianpain. Diosne nua îninshimtu, kizta. Tas mînminkas ussa mîmaashitchi.
¿Cristone, mîn painkulma i?
35 Jesúsne Dios katsa yalkin awara kamtanat kit kaiznara: —Moisés kaizta aizpa kamtamtuzne “Cristone Davidpa kwal i” kizamtu. ¿Chikishma sun kaizamtu? 36 Davidne, Dios Sînam Izpul akwa, ñamin kaiz kit “Cristone ap Anpat i”, parît: “Diosne Cristora ka kaizta: ‘Ap makin uzti, nakasa îninnapa, nua aliztuza anuppanakima,’ ” kiznara. 37 Ñamin Diosne Cristora ka kaizta: Davidne “Cristo ap Anpat i” kiztui. Katmizna Cristone Davidpa kwalkas Davidpa Anpatkas i, kiznara. Sunkana Jesúspa usparuza kamtanara akwa, kwisha akkwan awane ussa wat mîashira.
Jesúsne Moisés kaizta aizpa kamtamtuza tînta paranara
38 Jesúsne akkwan awa wanmaktîttuza kamtanat kit kaiznara: “¡Kwiraruin! Moisés kaizta aizpa kamtamtuzkana uzman. Uspane aks kwaksham kwashiamtu. Uspane sun kwakshamkasa pîpuluwara chashiamtu, awa usparuza ‘wat kîntîre’ kizanapa. 39 Uspane Judío kammu yalta akkwan awa purakin uzshiamtu. Uspane pishtara an ñancha chat kit an wat uzmura uzshiamtu. 40 Înkwa mîj aizpa walkwatpane, uspane tînta kukaizamtu, awa uspa pîrail appamtu minñamanpa. Diosne usparuza tînta ilnanazi, naiznanakima,” kiznara.
Înkwane, mazainpa chammikane, pial Diosta tamtu
41 Jesúsne Dios katsa yalta pial sapmukin kashain kunta. Akkwan awa pial taamtu aizpa izta. Pampa pial mîjtuzne akkwan pial taara. 42 Maza înkwane, mazainpa uzmikane, at kit pial sapmukin paas pialmin winta. 43 Suasne Jesúsne paiña kammuruza ussain akwanat kit ka kaiznara: —Watcha kaiznamtus. An înkwane kwisha puiza i. Usne pial sapmukin at kit wan tararuzkin an akkwan tara. Anpa kwazparuzne an wemin taara. 44 Anpa kwazparuzne pial tiztît mîj aizpa taarît. Puiza înkwane wan mîj aizpa tarît, kiznara.
Jesúsne awa Dios yalta azpian kit kiakpînnazi kiznamtu
1 Jesús Dios katsa yaltas puztawane, maza kammumikane Jesústa kaizta: —Kamtam. ¡An kalpial izti! Awane sun katsa yal katsa ukkasa saara, kizta. 2 Jesúsne ussa kaizta: —Nune an katsa yalta iztu. Mamaz awane kwizpa aat kit wan ukta azpianat kit kiakpînanazi, kizta.
Awane akkwan payurakima naizanazi
3 Jesúskas paiña kammuruzkas ainki îzara, akkwan olivos tî warîtkin piannaat kit uzara. Uspane ainki îzakis Dios katsa yalta izara. Pedrokas Santiagokas Juankas Andréskas paimpa ussa ka mîmaara: 4 —¿Chi payurama awane an Dios yal azpian kit kiakpînasa? Sînkazhain. Pailtîmtu payu taizkane, ¿Chima kirînsa? ¿Mizurama sun kirîmtu? Aune piankamshimtumakpas, kizara. 5 Jesúsne usparuza sînkanara: “Awane umîza kut kuanazi. Katmizna usparuza izizanaka. 6 Akkwan awane aat kit nil chi ka kizanazi, ‘Nane Dios namtîtmika ish. Diosne nawa îninta,’ nil chi kizanazi. Uspane akkwanta kut kuanazi. 7 Kasha uztuzkas attishta uztuzkas waya kianazi. Akkwan awa waya kiamtu mîakane, ishkuman. Waya kiamtukas, mama wan pailtuchi. Pitchin we. 8 Mamaz suras awane mamaz awakasa waya kianazi. Maza gobiernone mamaz gobiernokasa waya kianazi. Su ulmune akkwan sukin at kit ulnazi. Kumira pailmîztawane, awane yak kiarînazi. Awane sunkana naizarînazi. Sunkana kiarane, awane akkwan naizamîznazi. 9 Uruzpain iztain. Judío awane umîza uspa mikwaruza chîhkananazi. Uspane umîza Judío kammu yalkin na akwa iyananazi. Uspane umîza katsa mikwashakas ainki îninmikashakas na akwa chîhkaanazi. Suane une uspa mîrakin ‘Jesústa nîjkulamtumakpas’ kizanazi. 10 Wan pailtachasmin, Dios pit piantuzne Dios watsal pit wan awara kainnanarawa. An kwizta wan pailtînazi. 11 Ilmuruzne umîza piznat kit mikwasha chîhkaanazi. Usparuza sînkanamtuasmin, ishkuman. Sun payura paiña pit sînkarane, Diosne umîza kiwainnanazi, paiña pit sînkanapa. Sunkas Dios Izpulne umîza kiwainnanazi, paiña pit kwinta kinpa. 12 Aimpihshne paiña aimpihshta mamaz awara chîhkanazi, irînpa. Papihshne paiña painkulta mamaz awara chîhkanazi, irînpa. Pashparuzne papihshtakas akkuhshtakas aliz paranat kit piantaninnanazi. 13 Wan awane umîza na akwa aliz paraanazi. Imtu payurakima tailchatne, Diosne umîza watsat mîlnanazi. 14 Danielne, Dios pit kainammmikane, ñamin ka para: ‘Kwail awane Diablokana Dios yalta uzanazi. Sua usne uzasachi.’ Dios pînkîh izturuzne sunpa piankamtain. Sun iztawane, sua sun kwail awa Dios yalta uzakane, Judea suras îarawa, înkalta kulana. 15 Yal îsalta uzturuz sun mîrane, yal ayukmal napman. Chiwazha ayukta watsarît mîj aizpa ukkaman. 16 Saumal kal kimturuzne yalta pïn ukkana kailman. 17 Ashampa pîja waruzne, pashpa chitchu kwintaruzne, sun payura naizarînazi. 18 Sun payu akane, Diosta paikwatpa, alu kimanpa, 19 sun payura awa kwisha naizamtu akwa. Dios an su sarakima, awane sunkana naizarachi. An kwiztane awane sunkana naizamanazi. 20 Akkwan payurakima naizarane, akkwan awane uzamanazi. Katmizna Diosne naiztîmtu payu azain pailninnazi. Dios paiña narîttuza pashinamtu akwa, usne sun payura azain pailninnazi, usparuza watsarît mîlnana. 21 Awane ka kiznazi: ‘Izti. Apa Cristo tui. Izti. Sua tui.’ Sun kizkane, mîman. 22 Awane aanazi, ‘nane Cristo ish’ kish kit. Mînpazha ‘nane Dios pit kainammika ish’ pîrail kaizanazi. Uspane chiwazha wat kal kianazi. Uspa kal kiarît akwa, awane iztaspaanazi. Uspane Dios narîttuza kut kuashianazi. 23 Mîrain. Iztain. Naizamtuchasmin, nane sunta umîza kainanamtus.”
Ampu namtîtmikane anazi
24 “Sun naiztîmtu payu pailtawane, ‘pãnkas palapchakas malmanazi. 25 Kîmakas chiyuras taizarînazi. Wan chiyura pura aizpa ul kit taizarînazi.’ 26 Suasne wan awane nawa, Ampu namtîtmikara, izanazi. Nane wanishkasain chiyuras anash, katsa mikwakana îninnana. Kwisha watsal iztît anash. 27 Suasne nane ap ángeltuza îninnanash, Dios narîttuza wanmakninnanapa. Nane pailta suraskas chiyuraskas wanmakninnanash. 28 Nane chiwazha kamtananash. Sun sura higuera tî kîhne wan taizarîm. Tî kîhwil kwizmîzkane, alu pulparîm. 29 Kawarain awa naizamîzkane, nane chiyuras kailnapain ish. Na kaiztu aizpa piankamtain. 30 Watcha kaiznamtus. Ma uztuz iarachasmin, nane uruza kaiznamtu aizpa kianazi. 31 Wan chiyukas wan pilkas paiyarînazi. Ap pitne mizurainkas pailmanazi. Nane na kaizta aizpa watcha kinash. 32 Mamaz payura kailtînash. Chiyuras ángeltuzne sun payu pianchimai. Nakas, Dios Painkulne, sun pianchish. Ap Taitta Diosmin pian. 33 Ukas na kailtu payura pianchimai. Katmizna mîrain. Iztain. Diosta paikwarain. 34 Nane umîza kamtam kwinta kamtanamtus. Maza ampune attish sura îrîmtu. Paiña yaltas îrîkane, usne kiwaintuza akwanat kit îninnara, uspa kal kianapa. Usne yal watsammikasha, ‘Watsal iznaka,’ kizta. 35 Mînminkas sun su pamika kailtu payu pianchimai. Sunkanain kailnash. Katmizna iztain. ¿U anpatne miza urama anazi? ¿Nashka? ¿Kakwamta? ¿Tîlawain? ¿Payuin? Une pianchi. ¡Katmizna watsal izanaka! 36 Paiña kailtu payura tîrizamtuasmin, aune ussa sait kit paiña kal kiarawamakpas. 37 Umîzakas wantuzakas ka kaiznamtus. ‘Izanaka,’ ” kiznara.
Pascua pishta Jesústa pizshiamtu
1 Pascua pishta izna paas payu we. Sun pishta iztune, awane kuamtu. Pan sarane, kiña winkain. Katsa pariyaruzkas Moisés kaizta aizpa kamtamtuzkas Jesústa puñain sait kit ussa kut kuashit kit pizshiamtu, ussa piantana. 2 Uspane usparuzpain kaizara: —Jesústa pishta payura piztane, wan awane aukasa waya kianazi. Katmizna ussa pizamanawas, kizara.
Ashampane piam pih Jesúspa ashta nîmtu
3 Jesúsne Betania pîpulura ît kit Simónpa yalta napta. Simónne ñamin ish kit ña pîtta. Jesús misharî uz kit kumtuasmin, ashampane kwisha muin piam pih karara. Piam pihne nardo mun. Usne nardo winmura karara. Winmune alabastro ukkasa sarît. Usne winmu kîz kit Jesús kîzpura piam pih paranta. 4 Mînpazha sun ashampara aliz kulat kit usparuzpain kizara: —An piam pihne pattamtu. Sun pihne kwaiman. 5 Mazane piam pih paininshina. Kal kimmika añora kal kitne, sunpawa pial kana kimtu. Piam pih painintawane, sunpawa pial puizara mîlanashina, kizara. Uspane ashampara aliz kularît. 6 Jesúsne usparuza kaiznara: —Ussa aizapman. Ussa aliz kulaman. Usne nawa watsal kirît. 7 Puizaruzne ukasa pailta payu uzamtu. Puizara wat kishitne, wat kishina. Akkwan payuchikima nane ukasa uzmanash. 8 Sun ashampane wat kit kit nawa piam pih paranta. Na inapain akwa, usne an ñamin na imtu payura nawa piam pihkasa nîrît. 9 Watcha kaiznamtus. Wan suras awane an ashampa Jesústa kirît aizpa mîanazi. Dios watsal pit mîamtuz sun ashampawa mîakane, uspane ka kaizanazi: “Usne Jesústa kwisha wat kirît,” kizanazi.
Judasne pariyaruza îmtu
10 Suasne Judasne, Iscariotewa painkulne, Jesúspa doce kammuruzkasa charît. Usne katsa pariya înintuza ît kit usparuza kaiznara: —Nane umîza Jesústa annash, ussa pizanapa, kiznara. 11 Katsa pariyaruzne Judas kaizta aizpa mîashit kit ussa kaizara: —Aumîza kiwainshitne, Jesústa anchain, ussa pizna. Aune nua pial tanapas, kizara. Judasne Jesústa chîhkan nam kit ka minta: “Nane mamaz payu tîriznash, Jesústa annana, ussa pizanapa,” minta.
Jesúsne doce kammuruza kumira nailnamîztu
12 Mane pan kum pishta kasha taiztui. Sun pishtara pan sarane, kiña winkain. Sun Pascua pishtara pîriku piantam. An payura Jesúspa kammuruzne ussa mîmaara: —¿Aune mînpa îanapai, Pascua kumira ainana? kizara. 13 Jesúsne paas kammuruza îninnat kit kaiznara: —Pîpulura îrain. Suane maza ampura, kwazi winmu ultît kwaamikasha, wanmalnazi. Ussa kanparain. 14 Us yalta napkane, yalpamikasha kaiztain: “Kamtamne paiña pit înin kit ka nua kaiztu: Yal nammîlazha, ap kammuruzkasa Pascua kumira kuana,” sunkana kiztain. 15 Suasne usne umîza katsa îsaltît kalmal annanazi. Sun îsaltît kalmal watsarît. ¡Suane kumira sana îrain! kiznara. 16 Paas kammuruzne îil kit pîpulura piannailta. Wan Jesús kaizta aizpa wanmalpail kit sua Pascua kumira ainailta. 17 Tîl parîmtura Jesúsne doce kammuruzkasa piannat kit îsaltît kalmal nappara. 18 Uspa misharîkin kuamtuasmin, Jesúsne usparuza kaiznara: —Watcha kiznamtus. Mazane, apa nakasa kumtumikane, nawa kwail awara chîhkanazi, nawa pizanapa, kiznara. 19 Uspane tayalmîz kit maza mazain ussa mîmaara: —¿Na nua kwail awara chîhkanasa? kizara. 20 Jesúsne usparuza kaiznara: —Une doce purai. Mazane nakasa kumtumikane nawa kwail awara chîhkananazi, nawa pizanapa. 21 Dios pînkîhpa ñamin “Ampu namtîtmikane inazi” kiz parît. Mazane nawa, Ampu namtîtmikara, kwail awara chîhkanazi, nawa pizanapa. Diosne ussa ilnazi. Sun kwail ampu kawirarakine, an wat ashina, kiznara. 22 Kuamtuasmin, Jesúsne pan piz kit kîz kit Diosta aishtaish kizta. Usne usparuza kwinat kit ka kaiznara: —Anne saptain. An pan sap kumtune, ap ña irît nîjkultain. Katmizna an pan ap ña i, kiznara. 23 Suasne usne maza waz vinokasa piz kit Diosta aishtaish kiztawane, usparuza kwinnara. Wan kuara. 24 Usne usparuza kaiznara: —An vino sap kumtune, ap aimpi puztît mintain. Diosne ap aimpi akwa awaruza watsat mîlnanara, uspa kwail sînam sananapa. 25 Watcha kaiznamtus. Apane wankail vinone mamasa kumanash. Chiyura nurawane, nane Dios înintukin mamasa kwanash, kiznara.
Pedrone Jesústa pianchish kiztu
26 Kanta kizarawane, uspane ainki îzara nuara. Sun îzane Olivos mun. 27 Jesúsne usparuza kaiznara: —Ishkuamtu akwa, mîtsal kiamtu akwa, une nawa chîhkaanazi. Nawa mainarînazi. Ñamin Dios pînkîhta sunkana ka panintît: “Pîriku kwira kimmikasha piantarîkane, pîrikuruzne ishkuat kit îarînazi,” parît. 28 Nawa mamasa kuhstawane, suasne nane ukin an ñancha Galilea sura înash, kiznara. 29 Pedrone ussa kaizta: —Wan Jesústa pianchish kizaamtukas, nane sun kizmanash. Nane nua kanpanash, kizta. 30 Jesúsne ussa sînkara: —Watcha kaiznamtus. Ma amtane aral kayu aznazi. Aral kayo pakima aztuchasmin, nune kutña pijikima “Nane Jesústa pianchish,” kiznazi, kizta. 31 Usne Jesústa kwisha tînta kaizta: —Nawa piantashimtukas, nane Jesústa pianchish kaizmanash, kizta. Wantuzne kawarain kaizara.
Jesúsne Diosta paikuamtu
32 Jesúskas paiña kammuruzkas îara tî warîtta, Getsemaní munkin. Usne paiña kammuruza kaiznara: —Uapain purasmin, nane anta Diosta paikwan îru, kiznara. 33 Usne uskasa Pedrorakas Santiagorakas Juantakas minara. Jesúsne kwisha tayal kit kwisha ishkwat kit naizmîzta. 34 Usne usparuza kaiznara: —Na inapain akwa, nane kwisha tayaltus. Apain nukkultain. Izanaka, kiznara. 35 Suasne Jesúsne kasha ît kit piltakima wainta. Suane Jesúsne Diosta paikwara, naizmanpa, imanpa. 36 Suasne kaizta: “Ap Taittane, nune wan kishina, na imanpa. Nane naizshitchish. Nawa kiwaincha. Na pashit aizpa kimun. Nu kishit aizpa kiri,” kizta. 37 Jesúsne kutña kammuruz tura kailta. Uspane pittarît. Pedrora mîmara: —¿Simón, pittîmas? ¿Maza urakima izkulsachikish? 38 Izkulat kit Diosta paikwarain, kwail kiamanpa. U wat min kit wat kiashimtukas, une kwaizarît, kizta. 39 Suasne mamasa Jesúsne kail kit Diosta paikwat kit sum pitmin kaizta. 40 Mamasa kutña kammuruz tura kail kit iznara. Uspa kasu pittaara. Uspane Jesústa miza sînkana pianchi me. 41 Kutña pijikima kail kit kutña kammuruza mîmanara: —¿Pittarîmanas? ¿Kwaizkularîmanas? Pailtît me. Mane naiztînash. Mazane nawa, Ampu namtîtmikara, kwail kim awaruza chîhkaanazi, nawa pizanapa. 42 Kuhsmîztain. Îmarazhain. Nawa kwail kim awaruza chîhkammikane anpain, kiznara.
Jesústa pizamtu
43 Judasne, maza sun doce kammuruztas, Jesús kwinta kimtukin pianara. Akkwan awakas aara tî kwicharîtkasakas tîkasakas. Katsa pariyaruzkas Moisés kaizta aizpa kamtamtuzkas Judío îlapa înintuzkas usparuza îninnarît. 44 Judasne, kwail awaruza chîhkammikane, usparuza ñamin ka kaiznara: “Mazainta wat kîntîre kiz kit matsîhkin putchunnash. Ussa piz kit mîltain,” kiznara. 45 Kasha atpane, Judasne Jesústa ît kit putchun kit kaizta: —Wat kîntîre, kizta. 46 Suasne sun awane ussa pizat kit ussa mîlaara. 47 Maza sua panatmikane mashti uk kit katsa pariyawa kiwainmumikawa kail yalta. 48 Jesúsne usparuza sînkanat kit mîmanara: —¿Kwisha kwail awara sayamtukiwas? ¿Chikishma nakin tî kwicharîtkasakas tîkasakas nawa pizamtukiwas? 49 Pailta payu Dios katsa yalta umîza kamtanarau. Sua nawa pizamash. Ñamin Dios pit pînkîhta ka panintît: “Kwail awane Dios Painkulta pizanazi,” kiznara. 50 Suasne wan kammuruzne Jesústa tuij îat kit ãïn îara.
Musittune azain charît
51 Maza musittune pïn sayammin kwaat kit Jesús kwizpa kanpara. Mînpazha ussa pizshiara. 52 Sun musittune piltîm sat kit paiña sayam pïn tîwij îrît.
Akkwan katsa mikwaruzne Jesústa paraamtu
53 Sun awane Jesústa katsa pariyarakima taina îara. Suane wan katsa pariyaruzkas Judío îlaparuzkas Moisés kaizta aizpa kamtamtuzkas wanmakkarît. 54 Pedrone Jesúspa kwizpa kanpat kit katsa pariyawa yal piannamkin ara. Suane uskas suldarukas impuhskin uzat kit i kulara. 55 Wan katsa pariyaruzkas wan mikwaruzkas Jesúspa kwail kizmumikasha sayara, ussa piantanapa. Uspane mînainkas sayarachi. 56 Akkwan awa ussa pîrail kaizarakas, uspane kawara kaizarachi. 57 Mînpazha sua chat kit kunat kit ussa ka pîrail kaizara: 58 —Aune ussa kaizka mîanashî: “Awane an Dios yal saara. Awa an sarîtkas, nane azpian kit kiakpînnash. Kutña payura mamaz sanash. Awane sun yal saamanazi,” ka pîrail kizara. 59 Sun kwinta kittuzne kawara kizarachi. 60 Katsa pariyane paizkakin kun kit Jesústa mîmara: —¿Sînkamankish? ¿Nuwa kaizamtu aizpa mîmtukish? ¿Watcha nua kaizamtuki? mîmara. 61 Me Jesúsne puñain tuazi. Sînkarachi. Pariyane ussa mamasa mîmara: —¿Nune Cristo kish? ¿Nune au wat Dios Painkul kish? mîmara. 62 Jesúsne sînkara: —Nane Cristo ish. Une nawa, Ampu namtîtmikara, izanazi. Nane au katsa Diospa numal tuanash. Suane nane Dioskasa wattuza îninnanash. Na chiyuras kailkane, une nawa wanishta izanazi, kiznara. 63 Suasne katsa pariyane pilchapuz kit paiña pïn pihshara, aliz kularît akwa. Suasne usne kaizta: —Mamaz izmumikasha saishitchimakpas. 64 Une us Diosta kwail pararît aizpa mîara. ¿Ussa chima kianapai? kiznara. Wanne nîjkulat kit kaizara: —Ussa piantarawa, kizara. 65 Mînpazha ussa ilpi kiamîzta. Paiña kasu palpiz kit ussa aim kuzara. Suasne ussa kaizara: —Mane nune izsachi. ¿Mînma nua kuzzi? Kainazhain, kizara. Suldaruruzkas paiña matsîhta kuzara.
Pedrone Jesústa pianchish kiztu
66 Pedrone yal pianamal tuazi. Pariyawa kiwainmikane sua ara. 67 Usne Pedro impuhskin ikultuas izta. Kiwainmikane ussa iz kit kaizta: —Nukas Jesúskasa, Nazaret pîpuluras awakasa, chara, kizta. 68 Pedrone ussa kaizta: —Jesústa pianchish. Nu kwinta kit aizpa we pianish, kizta. Pedrone piannamkis puzta. Suasne aral kayu azta. 69 Kiwainmumikane Pedrora mamasa izta. Usne awa kasha puraruza kaiznara: —Sun ampune Jesúspa kammumika i, kiznara. 70 Pedrone mamasa kaizta: —Jesústa pianchish, kizta. Îrattura mamazne Pedrora mamasa kaizta: —Watcha. Nune uspakasa cha. Nune Galilea awa i. Nune Galilea suras awakana paramtu, kizta. 71 Suasne Pedrone mamasa pîrail apmîz kit kaizta: —Watcha kaiztukine, Diosne nawa naiznintawa. Sun ampura pianchish, kizta. 72 Sun urain aral kayu mamasa azta. Aral kayu azkane, Pedrone Jesús ussa kwinta kit aizpa nîjkulta. Jesúsne ñamin ka kaizta: “Aral kayu pakima aztuchasmin, nune ‘Jesústa pianchish’ kiznazi,” kizta. Suasne Pedrone tînta azmîzta.
Pilatone, katsa mikwane, Jesústa mîmamtu
1 Kînmîzkane, katsa pariyaruzkas Judío îlapa ampuruzkas Moisés kaizta aizpa kamtamtuzkas Judío awara înintuzkas wanmakkat kit usparuzpain kwinta kiara. Uspane Jesústa kuhat kit Pilato mikwara karaara. 2 Pilatone ussa mîmara: —¿Nune Judío awawa mikwa kish? kizta. Jesúsne ussa sînkara: —Nu kaiztu aizpa watcha i, kizta. 3 Katsa pariyaruz Jesús akkwan kwail kirît kizarîtkas, Jesúsne puñain parît. 4 Katmizna Pilatone ussa mamasa mîmara: —¿Sînkashichikish? Mîri. Uspane nua akkwan kwail kirît kizamtu, kizta. 5 Jesúsne Pilatora chinkas sînkarachi. Katmizna Pilatone wat iztasparît.
Uspane Jesústa piantarain, kizara
6 Pascua pishta iztuasmin, Pilatone maza kajchira sîptîtmikasha chîhtmu azi. Pilatone awa paikuamtumikasha kajchira chîhtmu azi. 7 Maza ampune, Barrabásne, kajchira sîptît wara. Uskas an akkwankas sîptît waara, uspa gobierno awakasa waya kit kit awara piantaarît akwa. 8 Akkwan awane wanmakkat kit Pilatora kaizamîzta: —An Pascua pishtarakas maza kajchira sîptîtmikasha chîhti, kizara. 9 Pilatone usparuza sînkanat kit mîmanara: —¿Na Judío awa mikwasha chîhshinaki? kiznara. 10 Pilatone katsa pariyaruz minñarît aizpa pian. Wan awane Jesústa pashiarît akwa, katsa pariyaruzne Jesústa aliz kulat kit Jesústa pizashira. 11 Katsa pariyaruzne awara wanmakninnat kit pilchapuzninnat kit kaiznara: —Jesústane pashitchimakpas. Barrabásta chîhtninti, kizara. 12 Pilatone usparuza mamasa sînkanat kit mîmanara: —¿An ampukasa chima kinpai? Une “Jesús Judío awara mikwa i” kizamtu, kiznara. 13 Suasne uspane tînta kwianara: —Ussa kurishta iru patpian kit piantarawa, kizara. 14 Pilatone usparuza mîmanara: —¿Chikiztama sun kizamtu? ¿Usne chi kwail kirît? kiznara. Uspane an akkwan kwianat kit kaizara: —Ussa kurishta iru patpian kit piantarawa, kizara. 15 Katmizna Pilatone Barrabásta chîhtninta, wan awa puñain puranpa. Jesústa tîtkasa iltawane, Pilatone ussa chîhtninta, suldaru kurishta iru patpian kit piantanapa. 16 Suldaruruzne ussa Roma mikwawa yaltakima taintawara karaara. An katsa yalne Pretorio muntît. Suane uspane wan suldaruruza wanmakninñara. 17 Uspane Jesústa ishtam kwakshamkasa kwaaninñara. Uspane pu tît ippat kit paiña kîzpu îsalta sînaara. 18 Uspane ussa ishanat kit ka kaizamîzta: —Judío awa mikwa, wat uznaka, kizara. 19 Uspane ussa tîwilkasa kîzpukin piannara. Uspane ussa ilpikas kiara. Uspane ussa ishanat kit wakpuj wainñara. 20 Ussa ishanarawane, ishtam kwaksham uknin kit paiña pïn ussa kwaninaara. Uspane ussa tainñara, kurishta iru patpian kit piantanapa.
Uspane Jesústa piantaamtu
21 Uspane Jesústa miwara tainñamîzta. Suane Simónne miwara pînmîzta. Cirene suras arît. Nantas arît. Simónne Alejandrowa papihsh azi. Usne Rufowa papihsh azi. Suldaruruzne Simónta kaizara: —Jesúspa kurish muri, kizara. 22 Uspane Jesústa ainki îzarakima miara. Ainki îzane Gólgota mun. (Mamaz pitkasa “kîzpu sîh” muntît.) 23 Mamazne ussa vino pihkasa kwinta. Sun pihne mirra mun. Usne kwashitchi. 24 Uspane ussa kurishta iru patpianara. Suldaruruzne ainki ukkasa salara, paiña kwaksham kana kinpa. Paiña pïn usparuzpain naiyara. 25 Nueve urara ussa kurishta iru patpian kit piantara, inapa. 26 Uspane tapîlara sun pit ka paara: JUDÍO AWAWA MIKWA I wan awa izanapa. Sun akwa uspane ussa piantaara. 27 Suldaruruzne paas walkumkas kurishkin iru patpian kit piantaara. Mazane Jesúspa numal patpianara. Mazane Jesúspa kwiyamal patpianara. 28 Ñamin Dios pînkîhta ka panintît: “Jesúsne kwail awakasa inazi,” parît. 29 Awa pînmuruzne ussa ishanat kit kîzpu kialat kit kwail kizara: —Nune katsa Dios yal azpian kit kiakpînnash. Azpiantawane, nune kutña payurakima mamaz yal sanash. 30 ¡Nuin sun kurishtas kihshti! uzna, ishanat kit kizara. 31 Katsa pariyaruzkas Moisés kaizta aizpa kamtamtuzkas usparuzpain ishanat kit kaizara: —Us mamaztuza uzninnarakas, usmin uzninsachi. 32 Cristone, Judío awawa mikwane, sun kurishtas kihshshina. Nu Cristo kane, kihshti, au izanapa. Kurishtas kihshtane, aune nua nîjkulanapas, kizara. Kurishta iru patpianmuruzkas ussa kwail kizpailta.
Jesúsne imtu
33 Paizka payukis kutña urakima pailta sura tîlkwil pamîzta. 34 Kutña urara Jesúsne Judío pitkasa ka tînta kwianta: “Eloi, Eloi, ¿lema sabactani?” kizta. (Awa pitkasa ka kiztu: “Ap Dios, Ap Dios, ¿Chikiztama nawa kwaias?” kizta.) 35 Mînpazha kasha panaruzne sun mîat kit kaizara: —Mîrain. Elíasta, Dios kainammmikasha, akwantu, kizara. 36 Mazane chihtî punta pimpuh karat. Usne vino tain pimpuhta paranta. Usne pimpuhta aks tîra tat kit ussa kwinta, vino tuk kwanpa. Ussa kwintawane, usne ussa tuij ît kit ka kaizta: —Ussa izwizsan. ¿Elíasne Jesústa kurishtas kihshninnasa? kizta. 37 Suasne Jesúsne tînta kwian kit ira. 38 Dios yalta nain pïn kintît kwashtas pihsharît. 39 Suldarune, Romano îninmikane, Jesústa izak kunta. Jesús irîka iztawane, ka kaizta: —Watcha. An ampune Dios Painkul i, kizta. 40 Mazantuz ashampakas attishtas aara. Magdalena pîpuluras Maríakas tuazi. Salomékas tuazi. Mamaz Maríakas tuazi. Usne paas painkul mîlta. Santiagone an ainkinmika i. Joséne an îlapamika i. 41 Jesús Galilea suwara chaasmin, sun ashamparuzne ussa kanpaat kit kiwainñara. An akkwan awakas Jesúskasa Jerusalén pîpulura aara.
Uspane Jesústa uk kulta kamna îara
42 Jesúsne viernes nashka irît. Viernes payura sun Judío awane kumira ainamîzmu, sábado payu ainamanpa. 43 Pãn pianaptîkane, Joséne, Arimatea suras, ara. Uskas Judío awa katsa mikwa azi. Uskas Dios înintu payura tîriztuazi. Us ishkumtuchi akwa, usne Pilatora ît kit kaizta: —Jesústa kamshimtus, kizta. 44 Pilatone iztaspat kit ka minta: —¿Me irîtki? kish mîmara. Usne suldaru îninmikasha înin kit kaizta: —¿Jesúsne me irîtki? mîmara. 45 Suldaru îninmikane Pilatora kaizta: —Ire, kizta. Suasne Pilatone Jesústa chîhkat kit Joséra kaizta: —Nune ussa kamnaka, kizta. 46 Joséne ñamin watsal pïn paira. Jesústa kurishtas kihshnintawane, pïn ussa ampal tara. Tas uk kulta nukta. Uk kulne ñamin sarît. Tas usne katsa uk pîjtakin nuppain kit sîpta. 47 Maríakas Magdalena pîpuluras, mamaz Maríakas Joséwa akkuhshkas us nuktukin izpailta.
Jesúsne mamasa kuhstu
1 Sábado kwaizkultu payu pailtawane, Maríakas Magdalena pîpuluras, Salomékas mamaz Maríakas, Santiagowa akkuhsh, piam pih pait karaara, Jesústa piam pihkasa nîttana. 2 Domingo payura tîlawain pãn malmîzkane, uspane kamkin îara. 3 Uspane usparuzpain mîmaara: —¿Uk kulkis mînma tainkulansa? kizara. 4 Uk kulta izarawane, uspane ukta paimpa izara. Sun katsa ukta kulkis tainkularît izara. Nakuhsarît. 5 Kulta napparawane, uspane ángelta, musittukana, izara. Usne putchã kwaksham kwaa. Numarain uzta. Uspane ishkuara. 6 Usne usparuza kaiznara: —Ishkuman. Une Jesústa Nazaret pîpuluras sayamtu. Une kurish patpian kit piantarîtmikasha sayamtu. Usne kuhsat kit uztu. Apane tuchi. ¡Us tuatkin iztain! 7 Paiña kammuruzakas Pedrorakas îat kit ka kaizanaka: “Jesúsne Galilea sura nukin an ñancha îrîmtu. Tane une ussa izanazi. Us kaiztakanain umîza kaiznamtus,” kiznara. 8 Sun ashamparuzne ulat kit ishkuat kit uk kultas puzat kit îara. Katmizna mînainkas chinkas kaizarachi.
Maríane, Magdalena suras, Jesústa iztu
9 Tîlawain, domingo payura, Diosne Jesústa kultas salakninta, mamasa uznapa. Suasne, Jesúsne an ñancha mamazta, Magdalena suras Maríara, izpanta. Ñamin Jesúsne ussa siete kwail saliztuza puzninta. 10 Maríane Jesúspa izmuruza ît kit usparuza Jesús uztu kiznara. Jesús irît akwa, uspane kwisha tayalat kit azarît. 11 Usne usparuza kaiznara: —Jesúsne uztui. Nane ussa iztau, kiznara. Uspane ussa nîjkulashitchi.
Paas kammuruzne Jesústa izpailta
12 Mamaz payura paas kammuruzne nanta îmîzpailta. Jesúsne usparuza kasha ara, uspakasa chan. Usne ñan iztît. 13 Uspa paasne anpa kammuruza kail kit kaizpailta: —Aune ussa iztamakpas, kiznara. Uspakas nîjkularachi.
Jesúsne paiña kammuruza îninnamtu
14 Mamaz payura once kammuruzne uzat kit kumira kuara. Suane Jesúsne usparuza îra, ussa izanapa. Dios watcha Jesústa mamasa kuhsnintîtkas, uspane izara aizpa nîjkulashitchi. Uspa Dios Jesústa mamasa kuhsnintît aizpa nîjkulashitchi akwa, Jesúsne usparuza tînta pilchashinara. 15 Suasne Jesúsne usparuza kaiznara: “Wan suwara îrain. Pailta awaruza Dios watsal pit kainarain. 16 U Dios watsal pit nîjkulturuza munnanarane, Diosne usparuza watsat mîlnanazi. Dios watsal pit nîjkultuchiruzne, paiña kwail akwa ïnta naizarînazi. 17 Dios pit nîjkultuzne, Jesústa paikumtuzne, kwail saliz puzninnanazi. Uspane mamaz pit paraanazi. Sunkanane Diosne usparuza kiwainanazi, awa Diosta piankamnanapa. 18 Kamta pizarane, usparuza kuamanazi, tañu kiamanpa. Pininu kwatne, usparuza kwail kiamanazi. Uspane ishtumikasha Diosta paikuat kit uspa chihtîkasa paanazi. Sunkanane uspane wat paarînazi,” kiznara.
Jesúsne chiyura numtu
19 Suasne Jesús, au Anpat, paiña kammuruza kwinta kinarawane, Diosne Jesústa chiyura nuninta. Suane Jesúsne Dios numal uz kit Dioskasa îninnamtu. 20 Paiña kammuruzne îat kit pailta suwara Dios pit kainanara. Jesúsne, au Anpatne, usparuza kiwainnara, ishturuza wat paninnapa, an watsal iztasparît kal kianapa. Katmizna akkwan awane Jesúspa mîarît aizpa Jesústa nîjkulara. Pailti.
Prólogo. An ñancha pit 1 Watcha i. Akkwan awane sun kwinta kirît aizpa awaruzpain pînkîh pashiara. 2 Chiwazha kirît aizpa izmuruzne, Dios pit kammuruzne, an ñamin sun kwinta aumîza kamtanarît. 3 An ñamin wan pînkîh Jesúspa parît aizpa iztau. Makima na sun kwinta watsal kamtît akwa, nakas nua, Teóþlora, pînkîh pashimtus. Na nua pashimtu akwa, nane impara imparain wan sun kirît aizpa pamtus, 4 nua wan kamtarît aizpa wat piankamnapa.
Maza ángelne Juan munnammika kawinazi kiztu
5 Herodes, Judío awaruzpa mikwa, Judea sukin uzasmin, maza pariyane, Zacarías muntîtmikane, uzta. Paiña ira pampa Abíasne pariya aramin. Paiña ashampane Isabel mun. Paiña ira pampa Aarónne pariya aramin. 6 Uspa paasne Dios iztakin wat uzpait kit wan Dios îninta aizpa mîilta. Mînminkas uspa paasta kwail kirît kizarachi. 7 Uspane pashpa mîjchiara, Isabel pashpa mîlsachi akwa. Usne îlapa azi; ashampakas înkwa azi. 8-9 Maza payune usne paiña pariya kwalkasa Dios yalta kiwaina îrît. Ussa narawane, Zacaríasne Dios yal ayukmal napta, wat piam incienso paktana. 10 Us ayukmal wat piam incienso paktamtuasmin, wan awane pianamal Diosta paikuara. 11 Suane Diospa ángelne Zacarías tukin kun kit ussa izpanta. Usne wat piam incienso paktamtukin, numal misharîkin kunta. 12 Ángelta iztawane, Zacaríasne iztaspat kit kun kirît. Chinkas kisachi. Ishkwarît. 13 Ángelne ussa kaizta: —Zacarías, an ishkumun, Dios nu paikwat aizpa mîra akwa. Up ashampane, Isabelne, ampu pashpa mîlnazi. Nune ussa Juan munnazi. 14 Nune kwisha wat kultînazi. Us kawira akwa, akkwan awane wat kularînazi. 15 Usne Dios iztakin tînta namnazi. Chappikas chappi tainkas kumanazi. Diospa Sînam Izpulne pashpara piznazi, mîltachasmin. 16 Usne Judío awaruza akwananazi, uspa Anpatta, uspa Diosta, kaiyanapa. 17 Diospa înintamika amtuchasmin, an Juanne ussa an ñancha înazi, wan watsanpa. Usne an ñancha Elías uzmikakanain uznazi. Dios Sînam Izpulne ussa kiwainazi, Diospa tînta paranpa. Usne papihshtuza ka kurunnanazi: “Up pashparuza paashirain. Usne kwail awaruza maizninnanazi, wat awakana uzanapa. Suasne awa sunkana kiat kit kamarane, awane Diospa înintamikasha mîat kit sappanazi.” 18 Zacaríasne ángelta mîmara: —¿Mizama ap ashampa pashpa mîlshina? Nane îlapa ish. Ap ashampakas înkwa i, kizta. 19 Ángelne ussa sînkara: —Nane Gabriel munish. Nane Dios uzkin kunish. Usne nawa nua kwinta kininpa îninchish, nu sun watsal pit mînapa. 20 Mane mîri. Nu na kaizta aizpa nîjkultachi akwa, nune paramanazi, up painkul kawinakima. Nueve mish pailka, sun kirînazi. 21 Sun kimtuasmin, awane pianamal kunat kit Zacaríasta tîrizara. Uspane usparuzpain minñara: “¿Chitma katne Dios yal ayukta tîriztu arau? ¿Chitma puzmas?” 22 Zacarías puztawane, usparuza paramanamta. Suasne uspane Zacarías chiwazha Diospa yal ayukmal izta nîjkulara. Awaruza paiña chihtîkasa annamtuasmin, usne puñain para. Ussa kirît aizpa parasachi. 23 Paiña kal Diospa yalta pailtawane, Zacaríasne paiña yalta kailta. 24 Mamaz payura paiña ashampane, Isabelne, pîja warît. Cinco mishtakima yalkimin uz kit ka minta: 25 “Ap Anpatne sun payura nawa kiwainzish, pîja wana. Mane nane awa iztakin mîtsal chiish.”
Maza ángelne kaiztu: Jesúsne kawinazi
26 Isabel pîja warawane, seis mish pailtîka, Diosne ángel Gabrielta Galilea sura, Nazaret pîpulura, îninta, 27 maza nimpihsh ashampara kwinta kinpa. Usne María munta. Mama ampukasa pittachi. Usne maza ampura kasara kin namtît azi. Sun ampune José munta. Paiña ira pampa Davidne mikwa arakwain. 28 Ángelne María tukin nap kit kaizta: —Kakishapu. Diosne nua wat kit kit kiwainshimtu. Anpatne nua pashit kit nukasa îmtu, kizta. 29 Ángelta iztane, Maríane ishkwat kit ángel kaiztu aizpa minta. “¿Usne chikishma sun nawa kwinta kimtu?” minta. 30 Suasne ángelne ussa kaizta: —María. Ishkumun. Diosne nua wat kit kit kiwainshimtu. 31 Mîri. Mane nune pîjakasa anpai. Painkul mîjanpai. Ussa Jesús munnaka. 32 Usne tînta namnazi, chiyuras amtu akwa. Usne chiyuras Dios Painkul munnazi. Anpat Diosne ussa Davidkin anza katsa mikwakana namnazi, Davidkanain îninapa. 33 Usne pailta payukima Israelpa kwalta îninnanazi. Paiña înintu aizpa pailmanazi, kizta. 34 Suasne Maríane ángelta mîmara: —Ampu mîjkine, ¿mizama painkul mîlnapai? kizta. 35 Ángelne ussa sînkara: —Diosne Sînam Izpul akwa nu tukin anazi. Katsa Diosne nua tînta kiwainazi, pashpa pîja wanapa. Katmizna up kawintu pashpane Dios pashimtu aizpa kinazi. Dios Painkulkas munnazi. 36 Na nua kaiztu aizpa mîri. Up kwal, Isabelne, înkwa i. Wan awane ussa “Pashpa wasachi,” kizara. Maneme usne seis mish pîja warît tu. 37 Diosne chikas wantain kishinai. 38 Suasne Maríane ussa sînkara: —Nane ap Anpatpa kiwainmumika ish. Watcha, nune nawa kaizta aizpa sari, kizta. Suasne ángelne îrît.
Maríane Isabelta kwinta kin ît
39 Sun payune Maríane wan watsat kit maza pîpulukin Judea înkal sura azain îrît. 40 Zacaríaspa yalta nap kit Isabelta kaizta: “Manta kail ish,” kizta. 41 Isabel Maríawa pit mîrane, paiña pashpa pîjakin kialta. Suasne Dios Sînam Izpulne Isabelta pizta. 42 Suasne usne tînta kaizta: —Diosne wan ashampakin nua anza watsal kiwainnazi. Diosne nu mîltu pashpara wat kiwainazi. 43 Ap Anpatpa akkuhsh nawa kwinta kin at akwa, kwisha wat kultus. 44 Mîri. Nu nawa kakishapu kiztawane, ap painkulne pîjara tînta kialta. Usne watsal kultuazi. 45 Ap Anpatne nua kin namtît aizpa kinazi. Nune wat kulnazi, us kin namtît aizpa nîjkulta akwa, kaizta. 46 Suasne Maríane min kit paiña kaijchuras kaizta: “Ap Anpat katsa i. 47 Ap Diosne, ap watsat mîlmumikane, kwisha wat i, nawa kwisha wat mintît akwa. 48 Usne nawa, paiña kiwainmumikasha, kiwainshira. Makis wan awane nawa kaizanazi: Diosne ussa wat ashampa namninta. 49 Ap katsa Diosne na akwa akkwan kirît. Usne sînammika muntît. 50 Usne wan Diosta wat minturuzakas Diosta wakpuj wainamtuzakas iznat kit kiwainanazi. 51 Usne katsa kal sara. Diosne anza katsa mintuza an ainkinkanain namninnara, uspa minñara aizpa kiamanpa. 52 Usne katsa mikwaruza uspa îninmukis taizninnanazi. Usne kiwaintuza watsat mîlnara. 53 Usne chiwazha we mîjtuza wan mîlanara. Usne kwazpa awaruza kîlmin îninnara. 54 Usne paiña Judío kwaltuza, paiña kiwaintuza, pailta payurakima kiwainnara. 55 Sunkanain usne au an ñancha ira kwaltakas Abrahamtakas Abrahampa kwizta kwal uzamturuzakas kin namnara.” 56 Isabelkasa kutña mish uztawane, Maríane papihshpa yalta kailta.
Juan munnammikane kawimtu
57 Sunpawa payu pailtîkane, ishtu kirîkane, Isabelne paiña painkul nishta. 58 Dios ussa wat kirît aizpa mîarawane, kasha izmuruzkas kwaltuzkas kaizara: “Au Anpatne nu wat kirît. Uspane uskasa wat kularît.” 59 Ocho payu pailtawane, uspane ampu pashpara muara, pashpa aya tîtnapa, circuncisión kinpa, Judío awaruza înintît aizpa kinpa. Uspane kaizara: “Usne Zacarías papihshkanain munnazi.” 60 Paiña akkuhshne kaizta: —Zacarías munnachi. Juan munnazi, kizta. 61 Uspane ussa sînkaara: —Up kwalne sun mun mîjchi, kizara. 62 Suasne papihshta saiaat kit mîmaara, ¿Miza munashinasa, awa piankamanapa? 63 Usne pînkîh paikwat kit para: “Usne Juan mun i.” Wan awane iztaspaarît. 64 Sun urain Zacaríasne paiña pit îsak kit paiña yankwija chîhkul kit kaizta: —Diosne kwisha wari, kizta. 65 Suasne wan kasha izturuzne iztaspaarît. Wan awane Judea înkal sura sun kirît aizpa wantuza kwinta kinara. 66 Sun kwinta mîmturuzne usparuzpain mîmaara: “Sun pashpane ¿Chima kinazi?” kizara. Dios ussa kiwainshimtu akwa, Diosne an pashpara an tînta namnazi.
Zacaríaspa kanta
67 Zacaríasne, pashpawa papihshne, Dioskasa paramtu uzta. Dios Sînam Izpulne ussa piz kit kiwainmîzta. Zacaríasne Dios akwa parat kit kaizta: 68 “Judío awawa Diosne, au Anpatne, kwisha wari. Usne apain at kit paiña kwaltuza watsat mîlnanazi. 69 Usne tînta watsat mîltamikasha îninta. Sun kiwainmikane ñamin pampa Davidpa kwal i. 70 An ñamin Diosne paiña kainammtuz akwa sun pit kin nam kit kaizta: 71 Usne aumîza watsat mîlnashina, aliz awa aumîza anuppamanpa, aumîza aliz kulamanpa. 72 Diosne sunkas kaizta: au ira kwaltuza nanat kit kiwainanash. Uruza kin namtît aizpa mainmanash. 73 Sun pitmin au papihshta, Abrahamta, sunkana tînta kaizta: 74 Usne aumîza watsat mîlnanazi, waya kimtuz aumîza chinkas kiamanpa. Usne aumîza paiña kiwainmu namninnanazi, paiña kal kianapa, ishkwatchin. 75 Dios iztakin uzamtuasmin, aune pailta payukima us wat kuruntu aizpa kiat kit Diosta wakpuj waintamakpas. 76 Mane nua, ap painkul pashpara paranash. Nune chiyuras kainammmika munnazi. Nukas up Anpatpa miwara an ñancha înazi, paiña mi watsanapa. 77 Nukas Dios paiña kwaltuza watsat mîlnana piankamninnanazi. Uspa kwail kiarît aizpa wat kulna piankamninnanazi. 78 Dios aumîza pashinamtu akwa, usne aumîza kiwain kit chiyuras amtumikasha îninnazi. Suasne wan awane ussa piankamashina. 79 Paiña înintumika akwa Diosne kwail kim uzturuzakas, irîn ishkumtuzakas, watsat mîlnanazi. Usne aumîza wat miwara îninanazi, kalpain uzanapa.” 80 An katsa kawimtuasmin, pashpane pailta payukima Diosta an pashimîzta. Wan kawirawane, usne pul sura ît kit uzta, Judío awaruz ussa piankamnakima. Kwiztane uspane us kaizta aizpa mîara.
Jesúsne kawintu
1 Sunkana kirît. Katsa mikwa Augustone paiña pit wan sura îninnara, wan awara wiannanapa. 2 Ma wiana masamtuasmin, ainki mikwa Cirenione, Siria sura îninta. 3 Katmizna wan awane uspa kwalpa pîpulura îara, wiantît puranpa. 4 Suasne Joséne Galilea suras Nazaret pîpuluras ît kit Judea sura nura, Belén pîpulurakima. Katsa mikwa Davidne ñamin sua kawira. Joséne Davidpa kwal azi. 5 Usne kanpa ashampakasa nuilta, wiantît puranpa. Maríane Josékasa kasara kin namtîtkas, usne me pîja warît. 6 Uspa paas Belén pîpulura tuasmin, Maríane ishtu kinpain pamîzta. 7 Suane usne an ñancha painkul pashpa mît kit pïnkasa ipkanat kit punkira winta. Mamaz yal nanchi akwa, usne wakara îranchura ît kit pashpara punkira winta.
Ángelkas pîriku izmuruzkas
8 Sun surane pîriku izmuruzne pît saukin pîrikura izara. Kînsîh uzkînnara. 9 Suasne Anpatpa ángelne azain at kit uspa paizkakin kun kit usparuza izpannara. Anpatne uspa uzkin kai malninta. Suas uspane kwisha ishkuara. 10 Ángelne usparuza kaiznara: “Ishkuman. Nane umîza watsal pit kainananamtus, wan awa kwisha wat kulanapa. 11 Mîrain. Ma payu watsat mîlmumikane Davidpa pîpulura nishta. Sun Anpatne Dios nîrîtmika i. 12 Ussa sayamtuasmin, une u izta aizpa piankamtain. Sunkanane sun pashpane pïnkasa kanat kit punkira izakpara tuanazi.” 13 Sun urain an ángelkas an akkwan ángelkasa chiyuras Diosta ka kaizara: 14 “Diosne kwisha wari. Chiyuras Diosne katsa i. Usne awaruza kiwainanazi, kalpain uzanapa.” 15 Ángel usparuzkis îarawane, chiyumarain kaiyarawane, sun pîriku izmuruzne usparuzpain kaizara: —Belén pîpulura îzhain, chiwazha kirît aizpa izna. Anpat aumîza kaiznarît aizpa piankamna îzhain. 16 Uspane azain îat kit Maríarakas Josérakas pashparakas sayat kit wanmalnara. Wanmaltawane, uspane pashpara punkira izakpara tu izara. 17 Pashpara izarawane, uspane ángel usparuza kaiznara aizpa Jesúspa papihshtuzakas wan awaruzakas kainanara. 18 Wan pîriku izmuruz kaizara aizpa mîraruzne iztaspaarît, watsat mîlmumikawa paarat akwa. 19 Maríane wan mîntu aizpa ayuk kaijchura watsat kit sunpa minta. 20 Pîriku izmuruzne kaiyat kit kaizara: —Au chiyuras Diosne kwisha wari, kizara. Chiwazha mîra aizpakas izta aizpakas sunkanain kirît.
Jesústa Diospa yalta mîltu
21 Ocho payu pailtawane, ampu pashpa aya tîttawane, circuncisión kitpane, uspane ussa Jesús munnara. An ñancha María pîjara wachasmin, ángelne sun mun ussa munta. 22 Pashpa kawirawane, Josékas Maríakas Moisés kaizta aizpa kiara, uspa sînam puranpa. Suas uspane pashpara Jerusalén pîpulura mîlarît, Taitta Diosta anna. 23 Sunkana Anpatne înin kit para: “Wan an ñancha ampu mîltamikasha Anpatta chîhkatpa. Diosne us akwa ussa paimpa akumtu,” ka parît. 24 Anpatne sunkana awaruza înin kit ka para: “Paas munkul mîlna mîjchine, awane paas pashpa utkuru piantana mîltawa. Paas pashpa utkuru mîjchine, awane paas munkul piantana mîltawa, ka parît. Katmizna Josékas Maríakas paas chitchu Diosta mîlta, Moisés înintît aizpa kinpa.” 25 Mane mîri. Maza ampune, Simeón munmikane, Jerusalén pîpulura uzta. Usne nil uz kit Diosta paikwara. Usne Dios nîrîtmika amtu payu tîrizta, us Israel awaruza kiwainnanakima. Diospa Sînam Izpulne ussa piz kit 26 sunpa ussa piankamninta. Ussa kaizta: “Irachasmin, nune Cristora, Anpat înintumikasha, iztînazi,” kizta. 27 Diospa Izpulne Simeónta Diospa yalta îninta. Kwiztane, Jesúspa papihshkas akkuhshkas Jesústa Simeón tukin karailta. Uspane Moisés îninta aizpa kishiailta. 28 Simeónne ussa sap kit mut kit “Diosne kwisha wari,” kiz kit kaizta: 29 “Ap Anpatne, nune nawa kin namta aizpa kirît. Mane nane, up kiwainmumikane, kalpain irînash, 30 na ap kasukasain up watsat mîlmumikasha iztît akwa. 31 Nune ussa watsarît mîj, wan awa ussa izanapa. 32 Usne Judío awachiruza kiwainnanazi, Diosta piankamanapa. Israel awaruzne us akwa wat kulanazi.” 33 Josékas Jesúspa akkuhshkas Simeón pashpawa kaizta aizpa kwisha iztaspailta. 34 Suasne Simeónne usparuza kaiznara: “Diosne uruza me wat kirît,” kiznara. Suasne usne Maríara, Jesúspa akkuhshta kaizta: “Izti. Sun pashpane Dios nîramika i. Us kaizta aizpa mîamtuchi akwa, akkwan Israel awaruzne wan kaarînazi. Usne mamaztuza, us kaizta aizpa mîmturuza, watsat mîlnanazi. Akkwan awane ussa nîjkulamanazi. Ussa kwail paraanazi. 35 Jesús usparuza kurunnakane, akkwan awane uspa kaijchukin Jesúspa minñamtu aizpa nîjkulanazi. Une ayukmarain kwisha naizanazi, tî kwiz kaijchukin pamtukanain,” kizta. 36 Suane maza ashampane, Dios pit kainammmikane, tuazi. Ana munta. Usne Fanuelpa pashu azi. Aserpa kwal azi. Mane usne kwisha înkwa azi. Nimpihshasmin kasara kirît. Siete año paiña ampukasa uztawane, Aserpa ampune irît. 37 Ochenta año amparakasa mazainpain Diospa yalta kashara uzta. Sua payuwarakas amtawarakas Anpatta kiwainmîz kit Diosta wakpuj wainmîzta. Diosta paikumtuasmin, usne pala kwatchi. 38 Sun urain Anane uspa tukin at kit Diosta aishtaish kiz kit wan awaruza Jesúspa kainanara. Uspane Diospa nîrîtmikasha tîrizat kit sayara, wan Israel awaruza watsat mîlnanapa.
Nazaret pîpulura kaiyamtu
39 Suasne Josékas Maríakas Dios îninta aizpa kiarawane, uspane Galilea sura usparuzpa pîpulura, Nazaret pîpulura, kaiyamîzta. 40 Sun pashpane kawit kit an tînta namtît. Kwisha wat pianmika nammîzta. Diosne ussa kwisha kiwainta.
Jesúsne Diospa yalta naptu
41 Mane paiña papihshkas paiña akkuhshkas año aizpa Jerusalén pîpulura îilta, Pascua pishta izna. 42-43 Jesús doce año pîntîkane, cham pishta taizkane, kutñaruzne Jerusalén pîpulura nuara. Pishta pailtawane, kailpailta. Pashpa Jesúsne Jerusalén pîpulurain nukkultît. Paiña kwalne Jesús nukkultît pianchi. 44 Uspane maza payus îara. Uskasa mamaz awakasa aamtuka minpailta. Uspa kwaltuzakas izmuruzakas sayara. 45 Ussa wanmaltachi akwa, Jerusalén pîpulura ussa saina kailpailta. 46 Kutña payu taiztawane, ussa Diospa yalta wanmalpailta. Usne kamtam purakin tuazi. Uspa kamtît aizpa mît kit usparuza mîmanara. 47 Us akkwan pian akwa, us usparuza sînkanarît akwa, wan mîraruzne us akwa iztaspaarît. 48 Paiña papihshkas akkuhshkas ussa iztawane, iztaspailta. Paiña akkuhsh ussa kaizta: —Ap painkul. ¿Chikishmaka aumîza sunkana kirau? Izti. Up taittakas nakas ishkuat kit nua sairamakpas. Aune nu karît min kit tayal kit kwisha tînta sairamakpas. 49 Suasne Jesúsne usparuza sînkanara: —¿Chikishmaka nawa sayamtuanas? Ap Papihshpa tukin tuatpaish, ap Papihsh kaiztu aizpa piankamna. ¿Une sun pianchiwail? 50 Us “Dios paiña papihsh i” paramtuasmin, uspane us kaizta aizpa mîarachi. 51 Suasne usne uspakasa Jerusalén pîpulukis kihsh kit Nazaret pîpulura nappara. Usne uspa kaizta aizpa mît kit kirît. Paiña akkuhshne sun kirît aizpa ayuk kaijchura watsat kit minta. 52 Sunmesa Jesúsne an katsa kawit kit an wat pianmika namta. Diosne ussa pashira. Awaruzne us akwa wat minñara.
Juanne, munnammikane, Dios Pit kainammtu
1 Katsa mikwane, Tiberione, quince añokima îninta. Sun payura usne an ampara ainki mikwaruza îninnara. Poncio Pilatone Judea sura îninta. Herodesne Galilea sura îninta. Paiña aimpihshne, Felipene, Iturea surakas Traconite surakas îninta. Lisaniasne Abilinia sura îninta. 2 Sun payuwara Anáskas Caifáskas, katsa pariyaruz, uzpailta. Suasne sun payura Diosne, Zacaríaspa painkulta, Juanta, pul sukin para. 3 Usne Jordán pimawarain chat kit akkwan pijikima sun pit awaruza tînta kainanara: “U kwail kiamtu aizpa maizat kit chîhkarain. U kwail kirît aizpa tayalamtune, Diosne uruza sînam saninnanazi. Suasne nane uruza munnanash,” kiznara. 4 An ñamin Isaíasne uzta. Sun Dios pit kainammmikane kaiz kit sunkana pînkîhta para: “Mazane pul sukis ka tînta paranazi: ‘Au Anpatpa mi watsaninnanaka, nil sanapa. 5 Mi pil piwail kirîkane, pil winnazi. Wan înkalkas wan îzakas sak sanazi. Kailsa mikas nil sanazi. Kwash mikas sak sanazi. Awa wan mi nil sashiana minñamtukas, Diosne wan awaruza wat namninnashimtu. 6 Wan awane Dios înintamikasha, watsat mîlmumikasha, izanazi.’ ” 7 Akkwan awane Juanpakin puzara, us usparuza munnanapa. Usne usparuza ka kiznara: “Une kamta kwalkana mai. Dios uruza ilna akane, une îkkainsachi. 8 Wat tîne wat pippain wamtu. Kawarain kwail kirît aizpa maiztumikane, paiña kwail chîhkamtumikane, awa iztukin wat kinazi, awa us maiztît piankamanapa. Uruzpain ka minman: ‘Aune Abrahampa kwal makpas, Dios uruza wat kinat kit sappanapa.’ Nane uruza watcha kaiznamtus. Dios pashpa kawirashimtune, kal chi. Usne sun ukkasa Abrahampa pashpa namninnashina. 9 Mînpazha mujtît tî kwalta pialpinkasa kwanapainsarît. Tî wat pippa wamtukine, kwat kit ïnta kiakpînnazi. Une sun tîkana mai. Diosne u minñamtu aizpa kaninnazi. Sunkanane Diosne kwail kirît aizpa chîhkamtuchiruza ilnashinazi.” 10 Suasne, akkwan awane ussa mîmaara: —¿Aune chima kianapai? kizara. 11 Juanne usparuza sînkanara: —Paas kamisha mîjmikane mamaz mîjchimikasha mîlatpa. Kumira mîjmikane mîjchimikasha nail kit kwintawa. 12 Roma gobiernowa pial sapmuruzne ussa îara, Juan usparuza munninnanapa. Juanta mîmaat kit kaizara: —Aune ¿Chima kianapai? kizara. 13 Juanne usparuza sînkanara: —Gobierno îninta aizpa an muin puisaman. 14 Mamaztuzkas suldaruruzkas ussa mîmaara: —Aune ¿chima kianapai? kizara. Usne usparuza sînkanara: —Mînainkas walkuman. Mamazta pîrail kaizman, us mîj aizpa ukkana. Gobierno awa pial nua takane, sun pialkasa wat kultain. 15 Wan awane chiwazha izna tîriztu purazi. Sunkas usparuzpain mîmat kit minñara: “¿Juanne Dios înintamika sa?” minñara. 16 Juanne wan usparuza sînkanara: “Nane uruza kwazikasa munnanash. Mazane nakin anza tînta anazi. Nane uskana watchish. Na paiña kiwainmikakas, nane an wat awa chish, ussa wat kiwainnapa piankamsachish. Sun amtumikane Diospa Sînam Izpulta îninnazi, ukasa tuanpa, uruza kiwainnanapa. 17 Awaruzne chara pippakanain pura. Uspane chara ayakasa narît. Chara aya kihshkultawane, wat awane tîmkasa ulpiannazi. Aya kihshkultukin pishkarawane, usne chara pippa wantat kit mamaz yalta watsanazi. Usne chara ayara impaktanazi. Sun ïnne kwikain,” kiznara. 18 Sunkana Juanne awaruza kurunnat kit kamtanat kit Dios watsal pit kaiznara. 19 Uskas Herodesta, îninmikasha, kaizta: “Nune kwail kirai, aimpihshpa ashampara mîltît akwa. Nukas an akkwan kwail kirai,” ussa kaizta. 20 An wan kwail kimtuasmin, usne mamaz kwail kirît. Usne kwizta Juantakas kajchira sîpninta.
Juanne Jesústa muntu
21 Mane akkwan awara munnarawane, Juanne Jesústakas munta. Jesús Diosta paikumtuasmin, chiyura kai izta. 22 Chiyuras Diospa Izpulne utkurukana iztît. Jesústa kihshta. Mazane chiyuras kaizta: —Nune ap painkul i. Nua nat kit pashimtus, nu na kishit aizpa kimtu akwa, kizta.
Jesucristopa irît kwal an ñancha uzara
23 Jesúsne treinta año panapain. Suasne usne kamtanamîzta. Awane ka “Jesúsne Joséwa painkul azi” minñara. 24 Joséne Elíwa painkul azi. Usne Matatpa painkul azi. Usne Levíwa painkul azi. Usne Melquiwa painkul azi. Usne Janawa painkul azi. Usne Joséwa painkul azi. 25 Usne Matatíaspa painkul azi. Usne Amóspa painkul azi. Usne Nahúmpa painkul azi. Usne Esliwa painkul azi. Usne Nagaiwa painkul azi. 26 Usne Maatpa painkul azi. Usne Matatíaspa painkul azi. Usne Semeiwa painkul azi. Usne Josecpa painkul azi. Usne Judáwa painkul azi. 27 Usne Joanánpa painkul azi. Usne Resawa painkul azi. Usne Zorobabelpa painkul azi. Usne Salatielpa painkul azi. Usne Neriwa painkul azi. 28 Usne Melquiwa painkul azi. Usne Adiwa painkul azi. Usne Cosampa painkul azi. Usne Elmadampa painkul azi. Usne Erpa painkul azi. 29 Usne Jesúspa painkul azi. Usne Eliezerpa painkul azi. Usne Jorimpa painkul azi. Usne Matatpa painkul azi. 30 Usne Levíwa painkul azi. Usne Simeónpa painkul azi. Usne Judáwa painkul azi. Usne Joséwa painkul azi. Usne Jonampa painkul azi. Usne Eliaquimpa painkul azi. 31 Usne Meleawa painkul azi. Usne Menawa painkul azi. Usne Matatawa painkul azi. Usne Natánpa painkul azi. 32 Usne Davidpa painkul azi. Usne Isaíwa painkul azi. Usne Obedwa painkul azi. Usne Boozpa painkul azi. Usne Salawa painkul azi. Usne Nassónpa painkul azi. 33 Usne Aminadabpa painkul azi. Usne Adminpa painkul azi. Usne Arniwa painkul azi. Usne Esrompa painkul azi. Usne Farespa painkul azi. Usne Judáwa painkul azi. 34 Usne Jacobpa painkul azi. Usne Isaacpa painkul azi. Usne Abrahampa painkul azi. Usne Taréwa painkul azi. Usne Nacorpa painkul azi. 35 Usne Serugpa painkul azi. Usne Ragaupa painkul azi. Usne Pelegpa painkul azi. Usne Heberpa painkul azi. Usne Salawa painkul azi. 36 Usne Cainánpa painkul azi. Usne Arfaxadpa painkul azi. Usne Sempa painkul azi. Usne Noéwa painkul azi. Usne Lamecpa painkul azi. 37-38 Usne Matusalénpa painkul azi. Usne Enocpa painkul azi. Usne Jaredpa painkul azi. Usne Mahalaleelpa painkul azi. Usne Cainánpa painkul azi. Usne Enóspa painkul azi. Usne Setpa painkul azi. Usne Adánpa painkul azi. Diosne Adánta sara.
Diablone Jesústa kwail kininshimtu
1 Sînam Izpul Jesústa piztawane, Jesúsne Jordán piras kailta. Diospa Izpulne ussa pul sura mîlta. 2 Cuarenta payukima Diablone ussa înin kit kwail kininshira. Sun payu kwatchi. Sunpawa payu pailnakima yak kira. 3 Suasne Diablone ussa kaiz kit mîmara: —¿Watcha Dios painkul kish? mîmara. Suasne sun ukkasa pan sari, kizta. 4 Jesúsne ussa sînkara: —Dios pînkîhta ka parît: “Awane pankasain uzasachi. Awane Dios kamtamtu aizpa pashiarawa,” parît. 5 Suasne Diablo ussa kwash înkal îzara mirawane, Diablone ussa azain wan chiwal sura izninta. 6 Diablone ussa kaizta: —Nane nua wan chiwal su mîlashinas, îninnapa, wat uznapa. Nu wan iztu aizpa nawa chîhkarît akwa, nane wan mîj aizpa mamazta chîhkashinas. 7 Nawa wakpuj wain kit paikwatne, nane nua wan mîlanash, kizta. 8 Suasne Jesúsne ussa sînkara: —Sunkana Dios pînkîhta ka para: “Nune up Diostain, up Anpattain, wakpuj wain kit ussain kiwainti,” para. e 9 Suasne Diablone ussa Jerusalén pîpulura mit kit ussa Diospa yal mitta kunninpanat. Suane ussa kaizta: —Nu Dios Painkulne, nuin mittas nain kit pilta taizti, kizta. 10 Dios pînkîhta ka parît: “Anpatne paiña ángeltuza îninnanazi, nua iz kit kiwainnapa. 11 Nua usparuzpa chihtîkasa sap mîlanazi, ukta taiz kit kilmanpa.” 12 Mane Jesúsne ussa sînkara: —Mamaz pitkas Dios pînkîhta ka para: “Up Diosta, up Anpatta, îninmun, nu pashit aizpa kinpa, kwail kinpa. Diosne nawa pashimtu akwa, na Diosta nîjkultu akwa, nane nu înintu aizpa kimanash.” 13 Suasne wan pailtawane, kapal Jesústa kwail kininshitpane, Diablone Jesústas paimpa ît kit akkwan payurakima atchi.
Jesúsne Galilea sura paiña kal kin masamtu
14 Jesúsne Galilea sura kailtuasmin, Dios Izpulne ussa tînta kiwainta. Sun suwarane akkwan awane Jesúspa kwinta kiara. 15 Jesúsne kammu yalta kamtanara. Awane kaizara: “Usne kwisha wat kirît”, kizara.
Jesúsne Nazaret pîpulura îmtu
16 Suasne Jesúsne Nazaret pîpulura, us kawira pîpulura, kail kit naptît. Usne kwaizkulmu payura kammu yalta us kamtît aizpa nap kit kun kit Dios pit izta. 17 Usne Isaías pînkîh parît aizpa sapta. Pînkîh nakuhsat kit sunkana izta: 18 “Anpatpa Izpulne nakasa îmtu. Katmizna usne nawa nara, puizaruza Dios watsal pit kainanapa, kajchira sîptîttuza chîhnanapa, kasu sîptîttuza mamasa izanapa, iltîttuza an naizamanpa, 19 sun watsal payura Dios awara kiwainanapa.” 20 Suasne Jesúsne pînkîh ip kit kammu yal kiwainmumikasha kailnin kit uzta. Wan kammu yalkin uztuzne ussa izara. 21 Usne usparuza kaiznamîzta: “U sun Dios pit parît aizpa iztuasmin, ma payu Diosne wan parît aizpa watcha kimîzta.” 22 Wan awane Jesúspa iztaspaat kit usparuzpain kaizara: “Usne nilkas watkas parara. Paramtuasmin, watsal pitmin kwinta kit. Watsal paramtukas, ¿usne Joséwa painkulmin ki?” mîmara. 23 Jesúsne usparuza kaiznara: “Une watcha nawa sunkana kizanazi: ‘Tuttulne, nuin watsari. Chiwazha Capernaum pîpulura kirît aizpa kawarain apain, up sukinkas, sari,’ ” kizara. 24 Ankas usparuza kaiznara: “Nane umîza watcha kaiznamtus: ‘Kamtammika paiña sura uztuzkas, sun pîpulura uztuzkas paiña pit mîashitchi.’ 25 Nane umîza watcha kaiznamtus: ‘An ñancha akkwan ampu irît ashamparuzne Israel sura uzara. Sun payu Elíasne tuazi. Kutña año kakwakasa alu kimakane, akkwan awane kwisha yak kiara. 26 Dios Elíasta Israel awaruza kiwainnanapa înintachikas, Diosne ussa Sarepta pîpulura îninta, maza ampu irît ashampara kiwainapa. Sidón pîpulune kasha uz. 27 Nane umîza an kwinta kiznanash. Eliseo, Dios pit kainammmika, uzasmin, akkwan aya pîtta ishturuzne Israel sura uzara. Sua turakas, usne usparuza sun ishtu wat paninnarachi. Usne Naamánmin Siria suras awarain paiña ishtu wat paninta.’” 28 Wan kammu yalkin Jesús kaizta aizpa mîraruzne Jesústa pilchapuzara. 29 Katmizna uspane kuhsak kit ussa pîpulukis pianamal tînta îninñara, pilchirarakima. Uspane Jesústa kwash pilchiramans kiakpînashira, inapa. 30 Uspa ussa pilchiramans kiakpîntachi akwa, usne uspa paizkakis puz kit îrît.
Salizne awara piztu
31 Suasne Jesúsne Capernaum pîpulura, Galilea sura, kihsh kit ît kit kwaizkulmu payura usparuzpa kammu yalta kamtanamîzta. 32 Katsa mikwakana kamtanara akwa, wan awane Jesúspa kamtampa iztaspaarît. 33 Maza ampune kammu yalta tuara. Salizne ussa piz kit ussa tînta ka kaizninta: 34 —Nune Jesús i. Nazaret pîpuluras i. ¿Aumîza naizninnamas? Nane nuwa pianish. Nune Diostas sînammika i, kizta. 35 Jesúsne ussa kaizta: —Sunkana kaizmun. Puñain. Ampuras puzti, kizta. Sun mîrawane, salizne ussa awa paizkakin piltain nainninta. Suasne ampuras îrît, ampura kwail kitchin. 36 Wan awane iztaspaat kit usparuzpain kaizara: —Jesúsne tînta paramtu. Us tînta akwa, usne salizta kaiz kit puzninta. Salizta înintawane, ampuras puzninta, kizara. 37 Sun suwarane akkwan awane Jesús kit aizpa piankamara.
Jesúsne Pedrowa suegrara wat panintu
38 Suasne Jesús kammu yaltas puztawane, Simón Pedrowa yalta napta. Suane Pedrowa suegra ishtu tuazi, imukasa. Uspane ussa paikuara, ussa wat paninnapa. 39 Jesúsne ussa ît kit iz kit imu kaninta. Sun urain wat parît. Usne kuhsak kit kumira sat kit usparuza kwinnara.
Jesúsne kwisha akkwan ishturuza wat paninnamtu
40 Sun payu pãn payaptîkane, awane akkwan tuntu ishturuza Jesústa karaara. Usne usparuza paanat kit wanta wat paninnara. 41 Jesúskas mînpazha saliztuza puzninnara. Puzarawane, salizne ka kwianara: —Nune Dios painkul i, kizara. Uspa Jesúspa pian akwa, Jesúsne usparuza paraninnarachi. Uspane Jesúsne Dios painkulpa azi pianmara.
Jesúsne Galilea sura uztuza Dios Pit kainanamtu
42 Kîntîkane, Jesúsne pîpulukis ît kit pul sura, awa tuchira, îrît. Awane ussa sayara. Ussa sayarawane, ustukin wanmalara. Uspane ussa “Akkis îmun” kaizara. 43 Jesúsne usparuza kaiznara: —Dios watsal pit mamaz pîpulukin uztuza kainanashimtus. Diosne awara îninnashimtu. Katmizna sun akwa Diosne nawa îninta. 44 Suasne usne Judea suwara ît kit kammu yalta Dios pit kamtanara.
Akkwan pishkaru sulmukasa pizamtu
1 Maza payune Jesúsne Genesaret pimamin tuazi. Akkwan awane aat kit ussa sîppanakima nuppainñaara, Dios pit mîana. 2 Jesúsne paas kanua pimamin pura izta. Pishkaru sulmuruzne kanuaras puzara, uspa îmmu kittana. 3 Usne Simónpa kanuara wat kit ussa kaizta: —Akkis nuppainti, attishchin. Usne kanuara wat kit Dios pit awaruza kamtanara. 4 Kapal kainanarawane, usne Simónta kaizta: —Kanuawara pi pînta ît kit îmmukasa kiaintawa, pishkaru sulna, kizta. 5 Simónne ussa sînkara: —Kamtam. Aune kînsîh pishkaru sultuanash, mazainkas piztachi. Pishkaru sulmarampailtakas, nu kaizta aizpa sulmukasa piznash. 6 Sun sulpailtawane, kwisha akkwan katsa pishkaru sulpailta, sulmu pihshanapain pawal. 7 Suasne uspane uspa kal kimtuza mamaz kanuara sayanara, aat kit kiwainapa. Uspane aat kit paas kanuara winñara, pira unainapain pawal. 8 Sun iztawane, Simón Pedrone Jesústa wakpuj wain kit kaizta: —Ap Anpatne, na tukis îtpa. Nane kwail kirîtmika ish, kizta. 9 Simónkas kal kimtuzkas ussa iztaspaara, kwisha akkwan pishkaru sulta akwa. 10 Santiagokas Juankas, Zebedeo painkul, Simónpa izmuruzne Simónkasa kal kimtuazi. Uspakas iztaspailta. Jesúsne Simónta kaizta: —Ishkumun. Ñamin pishkaru sulpailta. Kawarain makis nune awara akwananaka, Diosta piankamanapa, kizta. 11 Suasne pimamin kanuawara kaiyarawane, uspane wan mîjat aizpa chîhkat kit ussa kanpaara.
Jesúsne aya pîtta ishtumikasha wat panintu
12 Jesúsne maza pîpulura pîntuas. Suane ampune, aya pîtta ishtumikane, tuazi. Jesústa iztawane, usne at kit wakpuj wain kit ussa paikwara: —Ap Anpat. Nawa sînam sashitne, ap ishtu sînam sashina. 13 Jesúsne chihtîkasa nil sat kit ussa paat kit kaizta: —Nua sînam sanash. Me namtîre. Sun urain sun aya pîtta ishtumikane wat parît. 14 Jesúsne ussa kaizta: —Sunpa mînainkas paranamun. Ît kit nuin pariyara antash. Ussa Moisés ñamin îninta aizpa mîlti, awa Dios nua sînam sara aizpa piankamanapa. 15 Pailta payu an akkwan awane us kirît aizpa mîara. Kwisha akkwan awane wanmakkara, ussa mîanapa, usparuzpa ishturuza wat paninnanapa. 16 Jesúsne awakis ît kit nan sura, awa tuchira, mara, Diosta paikwan.
Jesúsne chasachi ishtumikasha wat panintu
17 Mamaz payura Jesúsne kamtanamtu tuazi. Kashara mînpazha Fariseo awaruzkas Moisés kaizta aizpa kamtamtuzkas uzara. Uspane Galilea su pîpuluraskas, Judea suraskas, Jerusalén pîpuluraskas aara. Diosne Jesústa kiwainta, awaruza wat paninnanapa. 18 Suasne mînpazha ampune chasachi ishtumikasha kamara muaara. Uspane ussa yalta napshiara, ishtumikasha Jesús tukin taana. 19 Uspane uskasa nappasachi, akkwan awa akwa. Suasne uspane yal kîh îsalta nuara. Kîhkin kul sarawane, uspane ussa kamarain Jesús tukin inkihshaara. 20 Jesúsne uspa nîjkultu aizpa pian. Sunkana minñara: “Jesúsne ishtumikasha wat paninshinaka,” minñara. Katmizna Jesúsne usparuza kaiznara: —Izmumika, mîzha. Nane up kwail kirît aizpa sînam sanash, kizta. 21 Suasne Moisés kaizta aizpa kamtamtuzkas Fariseo awaruzkas usparuzpain mîmat kit ka kaizara: “¿Sun awane mînma kai? Usne Diosta kwail kiztu. ¿Mînma kwail sînam sashimtu? Diosmin kwail kirît aizpa sînam sashina,” kizara. 22 Jesús uspa mîmara aizpa nîjkultawane, usne usparuza ka mîmanat kit sînkanara: —¿Une chikishma ayukta, u kaijchukin, minñat kit mîmaamtu? 23 Na “up kwail kirît aizpa sînam sanintus” kiztane, sunne samchi i kaizna. Na “kamaras kuhs kit kun kit chat” kiztane, sunne anza sam i kaizna. 24 Une sun piankamtawa. Diosne nawa, Ampu namtîtmikara, sun sura îninta, kwail kirîttuza sînam saninnanapa. Katmizna chasachi ishtumikasha kaizta: —Mîri. Kuhsak kit kun kit kama kuhsat kit yalta charash, kizta. 25 Sun urain usne paizkakis kuhsakta. Paiña kama us pitmukin kuhsat kit yalta îra “Diosne kwisha wari,” kiz kit. 26 Wan awane sunta iztaspaat kit ishkuat kit usparuzpain kaizara: —Diosne kwisha wari. Sunkanane an ñamin aune iztakimakpas, kizara.
Jesúsne Levíra akumtu
27 Pîpuluras puztawane, Jesúsne Levíra, Roma gobierno pial sapmu yalkin izta. Levíne Roma gobierno pial sapmumika azi. Jesúsne ussa kaizta: —Nakasa at. Nawa kanpazha, kizta. 28 Suasne Levíne tas kuhsak kit wansîh chîhkat kit ussa kanpara. 29 Suasne Levíne Jesús akwa paiña yalta pishta sat kit akkwan kumira sat kit akkwan pial sapmuruzakas mamaz awarakas nailnara, pareju kuanapa. 30 Sunkana Fariseo awaruzkas Moisés kaizta aizpa kamtamtuzkas paiña kammuruza pilchapuzara. Uspane Jesústa kammuruza kwail kaiznat kit mîmanara: —¿Chikishma une kuamtu sun Roma gobierno pial sapmuruzkasa kwail kimtuzkasa? mîmaanara. 31 Jesúsne usparuza sînkanara: —Ishtuchiruzkas wat parîttuzkas watsammikara pashikain. Ishturuzne watsammikara pashiamtu. 32 Nane wat kimtuza akwanamtuchish. Kwail kimtuza akwanamtus, uspa kwail kiarît aizpa maizanapa, uspa kwail kiamtu aizpa chîhkaanapa, Diosta kaiyanapa.
Awane Dios akwa pala kwatchi chaamtu
33 Uspane Jesústa kaizara: —Juanpa kammuruzkas Fariseowa awaruzkas kawarain akkwan piji tîlawain pala kwatchasmin, Diosta paikuamtu. Anpane, up kammuruzne kuamtu. 34 Jesúsne usparuza sînkanara: —Kasara kimtune, ampuwa izmuruzne kuanazi, kumira kwinkane. Impa chi. 35 Awa ashampa kanpain mîjmikasha piantarane, wanne tayalanazi. Mamaz payura, kwail awa nawa mîlarawane, ap kammuruzne tayalat kit pala kwatchin puranazi. 36 Usne usparuza mamaz kamtam kwinta paranara: —Pïn pîtta kwarane, pïn pakkultane, mînminkas masas pïn pshat kit îsalpara yalkain. Sunkana yaltane, pîtta pïn pihshanazi. Masas pïn pîttara yaltawane, pîtta pïnne watsal iztuchi. 37 Mînminkas masas vino pîtta kalpa ayara winsachi. Sunkana wintane, masas vinone aya pîttara pihshat kit vino puztîm. Ayakas karînazi. 38 Masas vino sultane, masas ayara wintawa. 39 Akkwan añokima vino sultît mîjne, mînminkas masas vino kukain. Tainne an wat kizmu, kizta.
Kammuruzne chara pippa pakkamtu
1 Jesúskas paiña kammuruzkas kwaizkulmu payura chara sauwara pînara. Kammuruzne chara pippa pakkat kit chihtîkasa nusat kit kuara. 2 Sun izarawane, Fariseo awaruzne Jesústa ka kizara: —Up kammuruzne kal kiamtu. Moisés aumîza kamtamnat kit aumîza ka kiznara: “Kwaizkulmu payu kal kiman,” kiznara. 3 Jesúsne usparuza sînkanara: —Au an ñamin mikawa Davidkas paiña izmuruzkas yak kiakane, uspane kuara. ¿Sun kwinta iztamakkiwas? 4 Usne Dios yalta nap kit pan Diosta tarît aizpa sap kit kwat kit izmuruza nailnara. Pariyain sun pan kuashina. Ñamin Moisés kamtamnat kit kaiznara: “Mamaz awara sun pan nailnamun,” kizta. 5 Jesúsne usparuza an sînkanara: —Nane, Ampu namtîtmika, ish. Kwaizkulmu payurakas chiwazha wat mintu aizpa kinash.
Ampu chihtî tuiltîtmikane wat parît
6 Mamaz kwaizkulmu payura Jesúsne Judío kammu yalta nap kit Dios pit kamtanamîzta. Mazane, numal chihtî tuiltîtmikane, tuazi. 7 Moisés kaizta aizpa kamtamtuzkas Fariseo awaruzkas Jesústa izara. “¿Kwaizkulmu payura ussa namtanasa?” minñara, Jesús kwail kimtu kizanapa. 8 Anpane Jesúsne uspa minñamtu aizpa pianara. Chihtî tuiltîtmikasha kaizta: —Kuhs kit paizkakin kunti, kizta. Usne paizkakin kuhs kit kunta. 9 Jesúsne usparuza mîmanara: —¿Kwaizkulmu payura awara chima kinpai? ¿Wat kin? ¿Kwail kin? ¿Kiwain kit wat sana? ¿Piantana? mîmanara. 10 Suasne Jesúsne wan awaruza iznat kit ishtumikara kaizta: —Up chihtî nil sari, kizta. Paiña chihtî nil sarawane, chihtî tuiltîtmikane wat parît. 11 Uspane Jesústa kwisha pilchapuzara. Usparuzpain chi kwail Jesústa kishiamtu aizpa minñara.
Jesúsne doce înintaruza nanamtu
12 Sun payu Jesúsne îzara Diosta paikwan îra. Kînsîh Diosta paikwara. 13 Kînmîzkane, Jesúsne kammuruza akwannara. Suasne doceruza nanarawane, Jesúsne usparuza paiña înintaruz munnara. 14 Sunkana uspane ka munnara. Simónpa mun maiztît. Mane usne Simón Pedro mun i. Mamazne, Simónpa aimpihshne, Andrés mun i. Santiagokas, Juankas, Felipekas, Bartolomékas, 15 Mateokas, Tomáskas, Santiagokas (Alfeowa painkul), Simón Celote munmikakas, 16 Judaskas (Santiagowa painkul), Judas Iscariotekas munnara. Usne, minpara munmikane, Jesústa annara, awa ussa pizanapa.
Jesúsne akkwan awara kamtanamtu
17 Jesúsne uspakasa îzaras kihshat kit sakkimin kunara. Akkwan kammuruzkas akkwan awakas wanmakkara. Judea suras awakas Jerusalén pîpuluras awakas aara. Tiro pîpuluras awakas Sidón pîpuluras awakas aara, ussa mîana, uspa ishturuza kakulninnanapa. 18 Usne awaras kwail saliztuza puzninnara. 19 Wan awane ussa mîshiara. Dios Jesústa kiwainta akwa, Jesúsne akkwantuza wat paninnara.
Awane wat puranazi
20 Jesúsne kammuruza iznat kit kaiznara: “Puizaruzne wat puranazi, Dios usparuza kiwainnat kit îninnamtu akwa. 21 Ma payu yak kimturuzne wat puranazi. Tukkanazi. Tayalturuzne wat puranazi. Ishananazi. 22 Awa umîza naizninamtukas, uruza pashinamtuchikas, uruza kwail kizamtukas, u munpa kwail minñamtukas, une wat puranazi, u ap kanpamtuz namarît akwa. 23 Sun payura watsal uzizanaka. Dios umîza chiwazha chiyura mîlanamtu akwa, wat puraizanaka. Kawarain uruzpa an ñancha kwalne Dios kainammtuzakas kwail kiara. 24 Ma payu uztuzne, kwazpa kultît uzturuzne, tayalanazi. Une apa wan wat sappat kit wat uzamtu. 25 Ma payu tukta kumturuzne tayalanazi. Mamaz payura yak kianazi. Ma payu ishanturuzne tayalat kit azanazi. 26 Akkwan awa u akwa wat paarakas, une naizarînazi. Wat uzizanaka. An ñamin awaruzne wat chi kamtamtuza kawarain wat pit kwinta kiara.”
Aliz awara pashirain
27 “Nane nawa mîmtuza kaiznamtus: U aliztuza pashirain. Umîza aliz kulkane, usparuza wat kirain. 28 ¡Umîza kwail kizkane, usparuza watsal pit pararain! Umîza kwail kikane, us akwa Diosta paikwarain. 29 Mînpazha up matsîhkin patkane, mamaz kanmal antain. Mînpazha up kamisha nakakane, mamaz kamisha ussa mîlarain. 30 ¡Mînpazha chiwazha paikukane, sunkanain mîlarain! Mînpazha nu mîj aizpa nakakane, na mîj aizpa kailnincha, kizman. 31 Sunkanain kitpa. Une wan awaruza wat kirain. Une mamaz awa uruza wat kinpa pashiamtu. Ukas mamaztuza kawarain wat kirain. 32 Nu up izmuruzain pashimtune, Diosta tîrizman, nua chiwazha mîlanapa. Dios uruza wat kiwainshimtu akwa, sunkana une wantuza wat kishinarawa. Kwail kimtuzkas mamaz kwail kimtuzakas kawarain pashiamtu. 33 Kawarain uruza wat kimturuzain wat kiamtune, une chinkas kana kisachi. Kainsîh. Wan kwail kimtuzne usparuzpain kawarain wat kiamtu. 34 Mamazta pui nammîlamtune, une mamaz payura nu puimîlat aizpa sapna tîriztu. Kainsîh. Sunkanane kwail kimtuzne kwail kimtuza pui nammîlamtu, kawarain sapna. 35 U aliz awaruza pashinat kit usparuza wat kinarawa. Usparuza pui mîlarain, sapna tîriznachi. Sunkana kitne, une u watsal mîlam sappanazi. Chiyuras Diosne uruza paiña kwalkanain namninnanazi, Dios kwail kimturuzakas aishtaish kiztuchiruzakas kiwain kit mîlanamtu akwa. Uskas sunkanain awaruza kiwainat kit mîlanarawa. 36 Au Taitta Diosne awaruza kiwain kit mîlanamtu. Ukas kawarain awara kiwainat kit mîlanarain.”
Nune mamazta kwail kirît kizmun
37 “Mamazta ‘nune kwail kirît’ kizmun. Sunkana kimtune, Diosne u kwail kirît aizpa kainananazi. Mamazpa kwail sînam sarane, Dioskas u kwail kiarît aizpa sînam sanazi. 38 Mamaz we mîjkane, ussa mîlarain. Dioskas umîza kwisha akkwan mîlananazi, tiznakima. Diosne u mamaz awara mîlamtukanain uruza mîlananazi.” 39 Suasne Jesúsne kamtam kwinta kammuruza kwinta kinara: “Kasu sîptîtmika mamaz kasu sîptîtmikasha chihtîkasa taintawane, paasas kulkin taizpailshina. 40 Kamtammikane an akkwan pian. Kammumikane an we pian. Kammumika na wan mîj aizpa kamarawane, usne kamtamkana namnazi. 41 Ainki tî pak u aimpihshpa kasura naptane, une sunta nîjkulamtu. Katsa pak u kasura naptane, une sunta nîjkulashitchi. 42 Katsa tî pak up kasura naptane, up kasu sîptawane, une u aimpihshta ka kaizsachi: ‘up kasuras an ainki tî pak uknash.’ Wat pit paratpane, une wat uzamtuchi. An ñancha katsa tî pak up kasuras uktawane, suasne ainki tî pak iz kit u aimpihshpa kasuras pak uktawa. Sunkana, Dios u kwail kiarît aizpa sînam sarawane, une mamaztuza kiwainashina.”
Tîne pippa wamtu
43 “Wat tîne kwail pippa wakain. Kawarain kwail tîne wat pippa wakain. 44 Katmizna pippa waakane, wamtumikane sun tîra pian. Mînminkas wat pippa palakkuppa tîras paksachi, kukain pippa akwa. Mînminkas wankail pippa kwail tîras paksachi, kwail pippa wamtu akwa. 45 Wat kimtumikane kaijchuras min kit wat kimtu. Kwail kimtumikane kaijchura kwail min kit kwail kimtu. Awane kaijchura wa aizpa paramtu.”
Paas tuntu yal samtu
46 “Nune ‘ap anpat i’ kiztumikane chiwazha na kaiztu aizpa mît kit kirain. 47 Nane uruza kamtam kwinta kinash. Nawa amtumikakas, ap pit mîmtumikakas, na kaizta aizpa kimtumikakas maza awakanain mai. 48 Sun awane yal sara. Ainkih kul uktakima kîhtawane, usne ukta yal sara. Pi pînkane, yal nainshina. Yal ukta sarît akwa, pine yal kwasachi. 49 Anpane na kaizta aizpa mîmtumika ap pit kimtuchine, mamaz awakanain uztu. Sun awane yal sashira. Pil îsalta yal sara. Pi pîntawane, yal nain kit pi kwarît. Wan karît,” kiznara.
Jesúsne suldaruwa kiwainmumikasha wat panintu
1 Awara paiña pit kwinta kit pailtawane, Jesúsne Capernaum pîpulura kail kit napta. 2 Suane maza suldarune uzta, paiña wat kiwainmikakasa. Suldarune ussa wat minta. Usne inapain tuazi. 3 Jesúspa mîrawane, suldarune Hebreo îlapa awaruza Jesús tura ka paikuan îninnara: “¿Ashimtukish ap kiwainmikasha wat kakulninna?” mîmaara. 4 Jesús tura aakane, uspane ussa kwisha tînta paikuat kit kaizara: —Sun suldarune kwisha wari. Ussa kiwaintawa, 5 us au Israel kwalta pashinamtu akwa, au kammu yal sarît akwa, kizara. 6 Suasne Jesúsne uspakasa îra. Jesús yal kashara akane, suldarune izmuruza Jesús tura îninnat kit ussa kaizara: —Ap Anpat, an kashara amun. Anne aizapmun. Nune ap yalta napmun. 7 Na tînta chi akwa, nane nua îtchish, nua saina. Katmizna ap kiwainmikasha “wat pari” kiztane, wat parînazi. 8 Mamaz an katsa mikwane nawa înintu. Nakas suldaruruza îninnamtus. Mamazta “ît” kizkane, îm. Mamazta “at” kizkane, am. Ap kiwainmikasha, “sun sari” kizkane, sam. Katmizna ap kiwainmikasha “wat pari” kiztane, wat parînazi. 9 Sun suldaru kaizta aizpa mîrawane, Jesúsne iztasparît. Kun kit akkwan kanpamtuza kaiznara: —Nane Israel awaruztas sun suldarukana iznarachish. Usne ap pit wat nîjkultu. Usne na kaiztu aizpa min kit piankamtu. 10 Înintîttuz kaiyarawane, uspane kiwainmikasha wat parît wanmalara.
Jesúsne ashampawa painkul irîttas mamasa kakulnintu
11 Sun kitpane, Jesúskas paiña kammuruzkasa akkwan mamaz awaruzkasa Naín pîpulura îara. 12 Pîpulu napmukin kashara piannakane, uspane ampu irîtta muamturuza izara. Akkwan pîpuluras awakas irîtmikasha kamna îara. Sun ampu irîtpa ashampane sun pîpulura uzta. Paiña painkulne irît. Maza painkulmin mîjazi. 13 Painkul irîtpa akkuhshta iztawane, Jesúsne us akwa tayal kit kiwainshit kit kaizta: —Azmun, kizta. 14 Suasne ît kit ataúdta paara. Ataúdta paamtuasmin, irîtta muamturuzne kunara. Suasne Jesúsne irîtta kaizta: —Musittu, kuhsakti, kizta. 15 Suasne irîtmikane kuhsak kit paramîzta. Jesúsne ussa akkuhshta chîhkara. 16 Sun izarawane, wanne ishkuat kit kaizara: —Diosne kwisha wari. Usne aumîza Dios pit kainammmikasha îninta. Diosne paiña kwalta kiwaina ara. 17 Wan awane Judea suraskas kasha suraskas Jesús kit aizpa piankamara.
Juan munammikawa kammuruz
18 Juanpa kammuruzne sunpa ussa kaizara. 19 Juanne ussain paas kammuruza akwara. Usne usparuza Jesús tukin îninnara ka mîmana: —¿Nune Diospa înintamikakish? ¿Mamazta tîrizanas? mîmaara. 20 Sun Juanpa kammuruzne Jesústa aat kit kaizara: —Juanne, sun munnammikane, aumîza îninara ka mîmaana: ¿Nune Diospa înintamikakish? ¿Mamazta tîriznas? mîmaara. 21 Sun urain Jesúsne Juanpa izmuruzpa iztakin akkwan ishturuza wat paninnara. Naizturuzakas wat paninnara. Saliztuza puzninnara. Akkwan kasu sîptîttuza kasu izkulninnara. 22 Suasne Jesús usparuza sînkanara: —Ît kit Juanta u izara aizpakas u mîara aizpakas ka kaiztain: “Mane kasu sîptîttuza kasu izkulninamtu. Chasachiruza chaninnamtu. Aya pîtta ishturuza sînam sanamtu. Mîkaintuza mîninnamtu. Irîttuza kuhsninnamtu. Puizaruzne Dios watsal pit mîamtu. 23 Chiwazha na kit aizpakas na kaizta aizpakas chîhkamtuchimikane, wat puranazi. Mama nawa nîjkulmîzti,” kiznara. 24 Juanpa înintuz tas puzarawane, Jesúsne awaruza akwanat kit Juanpa ka kiznamîzta: “Pul sura îarawane, ¿Chima izanas une? Tînta inkwane pakane, chiwazha pîtne ulpiantu. An ampune, Juanne, pîtkana ulpiantachi, tînta akwa. 25 Sua îarawane, ¿Chima izanas une? Sua ampura watsal pïn kwarît izarachi. Mîrain. Ampune watsal pïn kwaarîtkas akkwan wat kumira kwarîtkas gobierno awakana uzamtu. 26 Sua îarawane, ¿Chima izanas une? ¿Diospa kainammmikasha izamanas? Watcha. Une Dios kainammmikasha izara. Usne an katsa kainammmika azi. 27 Juanpa Dios pînkîhta ka parît: ‘Izti. Nane ap îninmikasha nukin an ñancha îninnash. Usne up mi watsanazi,’ ka parît. 28 Watcha kaiznamtus. Juanne wan awaruzkin an tînta i. Juan an tînta arakas, an we tîntamikane, Dios înintura uztumikane, Juankin anza tînta i,” ka kiztus. 29 Jesús kaizta aizpa mîarawane, akkwan awakas, gobierno pial sapmuruzkas us kaizta aizpa nîjkulat kit kaizara: “Dios watcha i.” Sun akwa, Juanne usparuza pira munnanarît. 30 Sunkana Juanne Fariseo pariya awaruzakas Moisés kaizta aizpa kamtamtuzakas pira munnanarachi, Dios usparuza kaizta aizpa mîashitchi akwa. 31 Suasne Jesúsne ka kwinta kinara: “¿Makis awane miza izarît? 32 Uspane pashpakana mai. Pashpane paizka pîpulura salat kit usparuzpain kaizara: ‘An música usturakas, une ku kiarachi. Au tayaltu kanta kiztakas, une azarachi,’ kiznara. 33 Juan, pira munnammika akane, usne akkwan kumirakas vinokas kwatchi. Sun akwa, une ‘Salizne ussa piztît,’ kaizamtu. 34 Ampu namtîtmikane kumirakas vinokas kwarît. Sun akwa, une uspa kaizamtu: ‘Izti. Usne akkwan kumira kumtu. Pirît cha. Paiña izmuruzne Roma gobierno pial sapmuruzkas kwail kimtuzkas mai,’ kizamtu. 35 Awane, Diospa piankammuruzne, Dios wari piankamanazi. Mamaz Diospa kainammtuza mîamtuchi akwa, uspane Diosta piankamasachi.”
Jesúsne Simónpa yalta îmtu
36 Maza Fariseo awane Jesústa akwara, uskasa kwan. Katmizna Jesúsne Fariseowa yalta kwan îrît. Jesúsne misharîkin uzta. 37 Suasne maza kwail kirît ashampane sun pîpulura uzta. Sun ashampa Jesús Fariseowa yalta naptît kamtawane, usne at kit piam pih alabastro uk winmura win kit karara. 38 Sun ashampa Jesúspa kwizpa, paiña mittîkin, kumtuasmin, azmîzta. Jesúspa mittîkin kappikasa pulishmîzkane, usne Jesúspa mittîra paiña ashkasa pulchaknin kit paiña mittîkin putchunta. Suasne paiña mittîra piam pih nîra. 39 Fariseo awane, Jesústa kwan akwatmikane, sun izta. Ayukta ka minta: “Sun ampune watcha Dios kainammmika tuatne, usne sun ashampawa piankamshina. Sun ashampane, ussa paramikane, kwail uz kit kwail kimtu,” minta. 40 Suasne Jesúsne ussa sînkara: —Simón, chiwazha nua kwinta kishimtus. Jesústa sînkara: —¡Kamtam, nawa kizshimtune, kainazha! kizta. 41 Jesúsne ussa kamtam kwinta ka kainara: —Kwazpa ampune paas awara pui mîlara. Mazainta quinientos pial pui mîlara. Mamazta cincuenta pial pui mîlara. 42 Sun paas pui saptîttuza tasachi akwa, suasne pui mîlatmikane paasta pui aizpa kaninta. Mane kainazha. ¿Mînma an kwazpamikasha an pashinasa? 43 Simónne ussa sînkara: —Anza pui kaninmikane ussa anza pashimtu. Jesúsne ussa sînkara: —Nune nil min kit kaizta. 44 Ashampara puijchatpane, Jesúsne Simónta ka kaizta: —An ashampara izti. Na up yalta naptakas, nune nawa kwazi karashitchi, ap mittîra kitna. Nu ap mittî kitna înintachikas, an ashampane paiña kappikasa ap mittîra pulishnin kit paiña ashkasa ap mittî pulchaktara. 45 Na up yalta naptane, nune nawa wat saptachi. Nune Israel awa wantuza kimtu aizpa kitchi. Nawa putchuntachi. Nune Judío awa kiamtu aizpa kitchi. Na up yalta naptakima, an ashampane ap mittîkin putchunmîzta. 46 Nune ap kîzpura piam pih parantachi. Sunkana usne ap mittîra piam pihkasa nîra. 47 Katmizna nua kaiztus. Dios paiña akkwan kwail kirît aizpa sînam sarît akwa, usne nawa akkwan pashimîztu. Dios mamazta pitchin kwail sînam sarane, usne akkwan pashikain, kizta. 48 Jesúsne ashampara kaizta: —Up kwail kirît aizpa sînam sarît, kizta. 49 Akwattuzne usparuzpain ka minñamîzta: —¿Anne mînmika ka i? Usne kwailkas sînam saninnamtu, minñara. 50 Usne ashampara kaizta: —Nu na kaizta aizpa nîjkulta akwa, Diosne up kwail sînam saninta. Diosne nua watsat mîltît. Watmin înka, kizta.
Ashamparuzne Jesústa kiwainñara
1 Sun kitpane, Jesúsne akkwan ainki pîpuluwarakas akkwan katsa pîpuluwarakas îra, Dios watsal pit kainaana, Dios doce awaruza îninnanapa. 2 Doce kammuruzkas mînpazha ashamparuzkas ussa kanpaara. Jesúsne sun saliztuz ashampa piztîttuztas puzninnat kit ishturuza wat paninnara. Usne Magdalena muntît Maríaras siete saliz piztîttuza puzninnara. 3 Juanane, Cuzawa ashampane, kanpara. Cuzane Herodespa kiwainmika azi. Susanakas an akkwan ashampakas usparuza uspa mîjat aizpa kiwainñara.
Pippa malmumika kamtam kwinta
4 Kwisha akkwan awane pîpuluras puzat kit wanmakkara, Jesústa mîana. Usparuza sun kamtam kwinta kinara: 5 “Malmumikane pippa malna îra. Pippa maltuasmin, chiwazha pippa miwara taizara. Suane awa miwara chamtuasmin, pippara mittî kulta. Chitchukas pippa sak kuara. 6 Mamaz pipparuzne ukta taizara. Chikkarawane, kwazi chi akwa azain pulparît. 7 Mamaz pipparuz pu tîtkin taizara. Chik kit kuntawane, pu tîtne pippara kawininkain. 8 Mamaz pipparuz wat pilpara taizat kit chikkat kit kunara. Wan pippa warawane, maza tîne maza cien pippakanain waara.” Sun kiztawane, usne tînta ka kwiannara: “U kail waj akwa, na kaizta aizpa wat minñat kit mîrain. Katmizna ap pit mîrain.”
Jesúsne kamtam kwinta piankamninnamtu
9 Paiña kammuruzne ussa paikuara, usparuza kamtam kwinta kamtananapa, piankamanapa. 10 Usparuza kaiznara: “An ñancha une miza Dios înintu pianchi. Mane na umîza kamtanashimtukas, nane mamaztuza kamtam kwintakasa kwinta kinamtus, izmuruz kamamanpa, mîmturuz piankamamanpa.”
Jesúsne malmumikawa kamtam kwinta kamtanamtu
11 “Sun kamtam kwinta sunkana i. Pippane Dios pitkana i. Miwara chakane, awane sun pit mîamtu. 12 Miwara îmmikane Dios pit mîmtu. Sunkana sun urain Satanáne kanpat kit Dios pit kaijchuras, ayuktas, ukkamtu, awa Dios pit nîjkulamanpa, Dios usparuza watsat mîlnamanpa. 13 Mamaz pippane uk pilpara taiztu. Uk pilpara îmturuzne Dios pit mîat kit watsal kulat kit sappara. Mujtît waj chi akwa, îrattukimain Dios pit mîarawane, uspane Dios pit mainñamtu, Satanás usparuza kwail kininnashimtu akwa. 14 Mamaz pippane pu pilpara taiztu. Pu pilpara îmturuzne Dios pit mîara. Uspa kal akwa, pial pashiara akwa, watmin uzshiara akwa, pippane Dios pitkanain kunkain. Dios pit pippakanain kwayarîm. 15 Mamaz pippane wat pilpara taiztu. Dios pit mîarawane, uspane Dios pit kwisha wat kaijchura watsamtu, pippa waanakima.”
Alampara kamtam kwinta
16 “Putmumikane alampara tîmkasa paltakain, tãn kîhkasa tamajarukasa paltakain. Sunkana putmumikane alampara kwash kanmu, napmuruz kai izanapa. Sunkana awane Dios kamtamtu aizpa piankamanazi. 17 Mamaz payura awane wan puintît aizpa nîjkulanazi. Awane chiwazha sîptît aizpa piankamat kit kai izanazi. 18 Katmizna, watsal mîrain. Akkwan kamtumikane an akkwan piankamnazi. We kammumikane us mintu aizpa, us mîj aizpa, karînazi.”
Jesúspa akkuhshkas aimpihshtuzkas
19 Jesúspa akkuhshkas aimpihshtuzkas ussa kashain aara. Akkwan awa akwa, ussa izarachi. 20 Mamazne kainara: —Up akkwakas up añaruzkas pianamal kunat kit nua izshiamtu. 21 Usparuza sînkanara: —Ap akkwakas ap añaruzkas pianamal kunamtukas, nane uspawa ap kwalkanain mintuchish. Wan Dios pit mîmturuzkas Dios kaizta aizpa kimturuzkas ap akkuhshkana mai, ap añakana mai.
Jesúsne inkwa pailnintu
22 Maza payune Jesúskas paiña kammuruzkas kanuara waara. Sua usparuza ka kaiznara: —Aiz pi kwakara îzhain. Suasne îara. 23 Aiz pi paizkara îamtuasmin, Jesúsne pittît tuazi. Tînta inkwa pira pamîzta. Pine kanuara palakpînmîzta. Kanua pira unainapain. 24 Suasne uspane ussa îat kit izkulninnat kit kaizara: —Kamtam. Kamtam. Pi kwanapainmakpas. Jesúsne kuhsak kit kaizta: —Inkwane, kari. Pine, kialmun, kizta. Inkwane karît. Pine kalpain parît. 25 Suasne kaiznara: —¿Nîjkultuchimakkiwas nawa? Uspane ishkuat kit iztaspaat kit usparuzpain ka kizara: “¿Mînma kai sunne? Jesús inkwarakas pirakas kaiz kit îninkane, inkwakas pikas ussa mîmtu.”
Salizne Gerasa suras awara piztu
26 Galilea suras puzarawane, uspane Gerasa sura kwakkaara. 27 Jesús kanuaras kihsh kit pilta kuntawane, maza pîpuluras awane, saliz pizarît ampune, ussa wanmalta. Akkwan payurakima pïn kwaarachi. Yalta uztachi akwa, pantióntain tuazi. 28 Jesústa iztawane, usne kwian kit ussa wakpuj wain kit ka kaizta: —¿Nawa chima kinash? Katsa Diosne chiyura uz. Nune Dios Painkul i. Nane nua paikumtus, nawa naizninmanpa, kizta. 29 Jesús saliztuza puztain kizarakas, salizne sunkana kaizamtuazi. An ñamin sun saliztuzne ussa akkwan piji piztît. Awane paiña chihtîkas mittîkas cadenakasa kantît mîjazi, ussa watsanpa. Kantîtkas, usne cadena pakalta, usmin chîhkulnapa. Suasne salizne ussa pul surakima, awa tuchira, mîltît. 30 Suasne Jesúsne salizta mîmara: —¿Une chi mun? Usne sînkara: —Akkwan mun makpas, ka kizta. Akkwan saliztuzne ussa pizarît. 31 Uspane ussa paikuara: “Ainkih kulta aumîza îninmun.” 32 Akkwan kuzune ainki îzamamim kumira sait kuamtu. Uspane kuzuruza napna paikuara. Jesúsne usparuza chîhkara, kuzuruza nappanapa. 33 Suasne saliztuzne ampuras puzat kit kuzuruza pizara. Wan kuzuruzne malpara ãïn kihshat kit pira taizara. Wanne pi kwaarît. 34 Sun kit aizpa izarawane, kuzu izmuruzne ishkuat kit sun kwinta pîpuluras awara, nantas awara, kainana îara. 35 Sun awane pîpuluras puzara, sun kit aizpa izana. Uspane Jesústa aat kit an ampura izara. Jesúsne an ampuras saliztuza puzninnara. Sun ampune Jesús panakin uz kit pïn kwat kit wat minta. Uspane ishkuara. 36 Sun kit aizpa izmuruzne nantas awaruza saliz puznintîtmika wat parît kainanara. 37 Suasne wan Gerasa suras awane Jesústa paikuara, usparuztas puztînpa, uspa ishkwarît akwa. Suasne kanuara warawane, Jesúsne kwakara kailmîzta. 38 Saliz mîjatmikane paikwara, uskasa în. Jesúsne ussa kaizta: —Nakasa îmun. 39 Up kwalta kail kit Dios nu akwa kit aizpa kainanaka. Ampune paiña kwalta kail kit paiña pîpulura uztuza Jesús us akwa kit aizpa kainanara.
Jairowa pashu. Ashampane Jesúspa pïnkin paara
40 Jesús pi kwakara kwaktawane, akkwan awane ussa tîrizat kit ussa watsal sappara. 41 Suane maza ampune, Jairo muntîtmikane, ara. Usne Judío awa kammu yal îninmika azi. Usne Jesúspa mittîkin wakpuj wain kit paiña yalta înpa paikwara, 42 paiña pashuin ishtu akwa. Usne doce añoin kawirît. Inapain azi. Jesús îmtuasmin, akkwan awane ussa sîpkimain nuppainñara. 43-44 Maza ashampane ussa kanpara. Usne doce añokimain paiña aimpi pulparachi. Mînminkas ussa wat panintachi. Usne kwizpa at kit Jesúspa pïn puntakin paara. Paiña pïnkin paamtuasmin, sun urain paiña aimpi puztît aizpa pul para. 45 Suasne Jesúsne ussa mîmara: —¿Mînma nawa paara? kizta. Mînminkas sînkarachi. Suasne Pedrone ka kizta: —Anpat, akkwan awane nua kashara sîpkimain nuppainñara, kizta. 46 Jesúsne kaiznara: —Mînpazha ap pïnkin paara. Nane mazara wat panintît pianish, kiznara. 47 Wat parît nîjkultuasmin, usmin kulamanamtîkane, sun ashampane Jesústa at kit ul kit wakpuj wainta. Usne wan awa izarakin “nane Jesústa paarau,” kaizta. Sun urain usne “nawa wat parît” kizta, wan awa mîanapa. 48 Jesúsne ussa sînkara: —Nawa nîjkultît akwa, wat pari. Watmin înka, kizta. 49 Jesús mama paramtuasmin, mînpazha îninmikawa yaltas at kit Jairora kaizta: —Up pashu irît. Kamtammikasha an kaizapmun, kizta. 50 Jesúsne sun mît kit Jairora kaizta: —Ishkumun. Nîjkulcha. Up pashune wat parînazi, kizta. 51 Jairowa yalta piannatpane, Jesúsne uskasa akkwanta napninnarachi. Usne yalta napta pitchinkasa, Pedrokasakas, Juankasakas, Santiagokasakas, paiña papihshkasakas paiña akkuhshkasakas. 52 Wanne azat kit tayalara, irît akwa. Jesúsne usparuza kaiznara: —Azaman. Irachi. Pittît tui, kiznara. 53 Uspane ussa ishanara, watcha irît piankamara akwa. 54 Suasne Jesúsne paiña chihtîra piz kit ussa tînta kaizta: —Pashpa, kuhsti, kizta. 55 Paiña izpul ussa naptawane, sun urain kuhsakta. Jesúsne chiwazha kwanpa kwintain kiznara. 56 Paiña papihshkas paiña akkuhshkas iztaspaarît kunara. Jesúsne kaiznara: —Mînainkas sun kit aizpa paranaman, kiznara.
Jesúsne doce kammuruza kamtana îninnamtu
1 Jesúsne doce kammuruza wanmakninnara. Usparuza kiwainnat kit katsa mikwakana namninnara, wan saliztuza puzninnanapa, wan ishturuza wat paninnanapa. 2 Usne usparuza îninnara, Dios awaruza îninnashimtu kainanapa, ishturuza wat paninnanapa. 3 Usne kaiznara: —Miwara îmtune, kîlmin îtpa. Tîwilkasakas, tuhkasakas, pankasakas, pialkasakas îman. Maizmu kamisha kwaman. 4 Chiwazha yalta naptane, suain pittain, îmtu payurakima. 5 Pîpuluras awakas nantas awakas umîza sappamakane, tas kaiyat kit wan awa iztakin pil mittî kiharain, uspa kwail kiarît aizpa piankamanapa. 6 Suasne uspane puzat kit wan pîpuluwara îara, Dios watsal pit kainana, ishturuza wat paninnana.
Juanne, kwazikasa munnammikane, imtu
7 Herodesne, katsa mikwane, Jesús kit aizpa mîra. Usne Jesúspa kwisha mintuara, mînpazha Juan mamasa uznintît kaizta akwa. 8 Mînpazha Elías, Dios kainammmika, iztît kizara. Mînpazha mamaz ñamin îlapa irît Dios kainammmika mamasa uzninta kizara. 9 Sun mîrawane, Herodesne ka kizta: —Juanta kîzpura tîtna înintau. Suasne ¿Sunne, mînmakai? Chiwazha Jesús kit aizpa mîrau. Katmizna usne Jesústa azain izshira.
Jesúsne cinco mil ampura pan kwinamtu
10 Tas kaiyarawane, înintaruzne ussa chiwazha uspa kiarît aizpa kaizara. Usne usparuzain Betsaida pîpulura minat kit îara. 11 Sun piankamarawane, akkwan awane ussa an kwizta kanpaara. Usparuza sapnat kit “wat kîntîre” kiznarawane, Jesúsne miza Dios awaruza îninnashimtu kainanara. Ishturuzakas kakulninnara. 12 Nashmîzkane, doce kammuruzne ussa aat kit kaizara: —Wan awara pîpulurakima nantakima îninnari, uspa kumira sayanapa, yalkas pitna sayanapa. Apane pul sukin chinkas wachi. 13 Usne usparuza kaiznara: —Une usparuza kumira kwinnarain. Uspane sînkaara: —Cinco pankas paas pishkarukasain mîjmakpas. Wanta kumira kwinnana, aune kumira paina îtpamakpas. 14 Sua cinco mil ampu wanmakkara. Jesúsne usparuza kaiznara: —Cincuentakimain wanmakkat kit uzninnari. 15 Suasne wanta pilta uzninnara. 16 Cinco pankas paas pishkarukas saptawane, Jesúsne chiyura izak kit Diosta “aishtaish” kizta. Sun wan pitti pittin kîztawane, kammuruza nailnara. Suasne kammuruzne wan awaruza nail kwinnara. 17 Wan awane kapal kuat kit tukkara. Sun kumira tiztît akwa, uspane doce tîmta winñara.
Pedro ka kiztu: Nune Dios nîrîtmika i
18 Maza payune Jesúsne paimpa Diosta paikumtu tuazi. Kasharane kammuruzne uzara. Ka mîmanara: —Awane ¿Mînma na ish kizamtu? 19 Ka sînkaara: —Mînpazha nune Juan munnammika i, kizamtu. Mamaztuzne nune Elías i kizamtu. Mamaztuzne nune ñamin îlapa Dios kainammmika i, kaizamtu. Sunne mamasa irîttas kuhsninta, kizamtu. 20 Usparuza mîmanara: —Une ¿Mînma na ish kaizamtui? Pedrone ka sînkara: —Nune Diospa nîrîtmika i, kizta.
Jesúsne inash kiznamtu
21-22 Jesúsne usparuza ka kaiznara: —Na uruza kaiztu aizpa mînainkas kainanaman. Diosne nawa, Ampu namtîtmikara, an sura îninta, awa akwa naiznapa. Îlapa Judío pariyaruzkas Moisés kaizta aizpa kamtamtuzkas katsa mikwara nawa chîhkaanazi, nawa piantaanapa. Kutña payu pailtîka, mamasa kuhs kit uznash. 23 Sun kainarawane, Jesúsne wanta kaiznara: —Nawa kanpashitmikane usmin mintu aizpa maintawa. Kurishta imtumikane wan chîhkamtu. Sunkanane ap kanpammikane wan chîhkanazi, nakasa chanpa. Nawa kanpazhain. 24 Mînpazha uspawain tînta kal kiamtu, wat uzanapa. Wat uzamtukas, iarînazi. Sunkana wan kaarînazi. Diosta kanpamtuzne Dios kuruntu aizpa mîanazi. Diosne paiña pit mîmtumikasha watsat mîlnazi. 25 Katmizna kwazpa kultumikane, chiwal mîjmikane, wansîh karînazi, irîka. 26 Mînpazha nawa mîtsal kitne, mînpazha na kaizta aizpa mîtsal kitne, nane, Ampu namtîtmikane, ussa mîtsal kinash. Na mamasa chiyuras akane, nane Diospa ángelkana Taitta Dioskana kai malnash. 27 Watcha kaiznamtus. Mînpazha akki uztuzpain iamanazi, miza Dios awaruza îninnamtu piankamanakima.
Kutña kammuruzne Jesúskasa îamtu
28 Ocho payu pailtawane, Jesúsne Pedrorakas Juantakas Santiagorakas înkal îzara minara, Diosta paikwan. 29 Diosta paikuamtuasmin, Jesúspa matsîh naztam malkwera. Paiña kwaksham putchãkana namtît. 30 Suane Moiséskas Elíaskas, paas an ñancha uzattuzkas, uskasa kwinta kiilta. 31 Sun paasas Jesús panakin naztam malkwera. Uspane Jesús irîmtu Jerusalén pîpulura kwinta kiilta. 32 Pedrokas paiña izmuruzkas pitshiara. Izkularawane, uspane Jesús naztam namtît izara. Paas awarakas Jesúskasa panara izara. 33 Paas ampu Jesústas îmtazasmin, Pedrone Jesústa ka kaizta: —Kamtam, watmin akki tumakpas. Kutña îranchu sanawas: mazane nu akwa, mazane Moisés akwa, mazane Elías akwa, kizta. Pedrone us kwinta kit aizpa pianchi. 34 Sun kwinta kimtuasmin, wanish usparuza sîpnara. Wanish usparuza sîptane, izmuruzne ishkuara. 35 Diosne wanish ayukmalsîh ka kiznara: “Anne ap painkul i. Ussa narau. Ussa mîrain,” kiznara. 36 Dios kaizta aizpa mîarawane, uspane Jesústa mazainpain pana izara. Uspane puñain paat kit uspa izara aizpa kainanarachi. Akkwan payurakima mînainkas izara aizpa kaiznarachi.
Jesús saliz piztît pashparas puznintu
37 Mamaz payura, Jesúskas paiña kammuruzkas înkaltas kihsharawane, akkwan awane ussa wanmakkara. 38 Maza ampune usparuztas ussa tînta ka kaizta: —Nane nua paikumtus, ap painkulta iznapa. Maza painkulmin mîjash. 39 Mîzha. Saliz ussa piztawane, usne tînta kwiantu. Salizne ussa ulnintu, ilpi puznakima. Saliz akkwan piji ussa pizkane, pashpane naiz kit kwisha kwaizta. 40 Nane up kammuruza saliz puzninnapa paikwarau. Puzninmanamarît, kizta. 41 Jesúsne sun payura uztuza sînkanara: —Une nawa nîjkulamtuchi. Une, ma uztuzne, kwail awa mai. Nane uruza wan payurakima tailchamanash. Nane uruza tailchasachish, kiznara. Suasne Jesúsne papihshta kaizta: —Up painkul nawa karash, kizta. 42 Pashpara amtuasmin, salizne ussa nainnin kit tînta ulninta. Jesúsne salizta parat kit pashparas puzninta. Jesúsne pashpara kakulnin kit paiña papihshta chîhkara. 43 Wanne Dios wat kirît akwa iztaspaarît.
Mamasa Jesúsne inash kiztu
Jesús chiwazha kirît akwa, wanne iztaspaarît. Suasne usne kammuruza ka kaiznara: 44 —An pit wat mîrain. Mînpazha nawa aanazi, Ampu namtîtmikara pizanapa, katsa mikwara chîhkanapa. 45 Kammuruzne Jesús kaizta aizpa piankamarachi. Diosne usparuza sun pit piankamninnarachi. Ishkuara akwa, uspane Jesús kaizta aizpa mîmaarachi, an piankamana.
¿Mînma an tînta i?
46 Paiña kammuruzne usparuzpain ka mîaamîzta: ¿Mînma an tînta i? kizara. 47 Jesúsne uspa minta aizpa nîjkul kit pashpara tain kit us tukin kunnin kit 48 usparuza ka kaiznara: —Une we tîntaruza an pashpakana sap kit kiwaintawa. We tîntaruza na akwa kiwaintumikane nawa sap kit kiwaintu. Nawa saptumikane ap Taittara, nawa înintamikasha saptînazi. Katmizna uruzpain an we tîntamikane an tînta namtînazi.
Aukasa chamtumikane aukasa aliz chi
49 Suasne Juanne ussa kaizta: —Kamtam. Aune saliz puzninmikasha iztamakpas. Us nua paikukane, usne saliztuza puzninnamtu, us tînta înim mîj akwa. Us aukanain nua kanpamtuchi akwa, aune ussa “Jesústa paikumun, saliztuza puzninnanapa,” kiztamakpas. 50 Jesúsne ussa kaizta: —Sunkana kaizmun. Aukasa aliz chimikane aumîza kiwainnamtu.
Jesúsne Santiagorakas Juantakas kurunnamtu
51 Chiyura nuna kasha pakane, Jesúsne Jerusalén pîpulumal în min kit îmîzta. 52 Usne mînpazharuza an ñancha îninnara. Uspane Samaria pîpulura îat kit nappara, pitmukin sayana. 53 Sun Samaria pîpulura uztuzne ussa yal nammîlannarachi, us Jerusalén pîpulumal pianashimtu akwa. 54 Paiña kammuruz, Santiagokas Juankas, sun nîjkulpailkane, Jesústa ka kizpailta: —Chiyuras uztuza paikuiznapas, ippa îninnapa, usparuza kuanapa, ianapa. 55 Suasne Jesúsne puij kit paasta pilchanara, uspa sun kaizta akwa. 56 Ampu namtîtmikane au sura atchi, awaruza piantana. Usne apain ara, awaruza watsat mîlnana. Suasne uspane mamaz pîpulura îara.
Jesústa kanpashimturuz
57 Miwara îamtuasmin, maza ampune Jesústa kaizta: —Anpat, mînta îkwara nua kanpashiras, kizta. 58 Jesúsne ussa sînkara: —Înkal kwizane pil kulta pitmu mîj. Chitchukas tîra pitmu mîj. Sunkana Ampu namtîtmikane pitmu kwaizkulna mîjchi. 59 Jesúsne mamazta kaizta: —Nawa kanpazha. Usne sînkara: —Anpat, an ñancha ap papihshta pilta kamshimtus, iraka. 60 Jesúsne ussa sînkara: —Diosta pianchimikane irîttuza kamshina. Nune sunkana kinchi. Ît kit awaruza Dios aumîza îninnashimtu kainanari. 61 Mamazne ussa kaizta: —Anpat, nane nua kanpashimtus. An ñancha ap kwaltuza îru kiznashimtus. 62 Jesúsne ussa sînkara: —Ap kal masamikane ap kal kitpa, pailnakima. Ap kal chîhkatmikane Dios înintura kiwainsachi.
Jesúsne setenta awaruza îninnara
1 Sun pailtawane, Anpatne an setenta paas awaruza nannara. Usne an ñancha us iztakin usparuza paas paas wan pîpuluwara îninnara. Usne an kwizta uspa tura îmîzta. 2 Usne usparuza kaiznara: “Kwisha akkwan pakna wa. Sunkana pakmuruzne we. Saupamikasha paikwatpa, saura an pakmuruza îninna, wan pakkanapa. 3 Une îrain. Mîzhain. Nane umîza, pîriku pashparuzkana îninnamtus, aliz awaruza, ishukanaruza, parananapa. 4 Pial tuh kwaman; tuh kwaman; mamaz zapato kwaman. Miwara îmtune, azain wat kîntîre kiznarain. 5 Chiwazha yalta naptane, an ñancha usparuza ‘wat kîntîre, watmin tuanka’ kizanaka. 6 Nu kaizta aizpa wat mîmturuzne watmin uzanazi. Nu kaizta aizpa wat mîmchiruzne watchi uzanazi. 7 Sun yaltain uz kit chiwazha kwintu aizpa kwarain. Kal kimmikane paiña kal kimtu akwa, chiwazha sapshina. Usne sua chi minta chi nukkultawa. Mamaz yalta mamaz yalta chi îman, awa nua yal nammîlamtune. 8 Pîpulura piannatpane, awa umîza yal nammîlakane, sun yalkimin nukkul kit chiwazha kumira kwintu aizpa kwarain. 9 Ishturuza kakulnin kit ka kiztain: ‘Apane Diosne umîza îninnashimtu.’ 10 Pîpulura piannatpane, awane umîza yal nammîlamtukine, tas îat kit usparuza ka kaiznarain: 11 ‘Sun pil pulpu au mittîkin puhsta aizpa mittîras ulpiantumakpas, au kaizta aizpa mîarachi piankamanapa. Anne piankamtain: Apane Diosne awaruza îninnashimtu.’ 12 Ankas umîza kaiznamtus: Diosne an pîpulu uztuza an akkwan naizninanazi. Sodoma pîpulukin uztuz an we naizarînazi.”
Mamaz pîpulura uztuzne Diosta mîarachi
13 “Corazín pîpulura uztuzne tayalanazi. Betsaida pîpulura uztuzne tayalanazi. Nane akkwan watsal iztasparît kal sun pîpuluruza kirau. Na watsal iztasparît kitkas, uspane Dios pit mîashitchi, uspa kwail kiarît aizpa sînam sananapa. Tiro pîpulura uztuzkas, Sidón pîpulura uztuzkas na kaizta aizpa mîaratne, uspane uspa kwail kiarît akwa tayalshinara. Ma payu uspa kwail kiarît aizpa wat kulnarachi. 14 Ilnamtu payu taizkane, Diosne Tiro pîpulura uztuzakas Sidón pîpulura uztuzakas an we naizninnanazi. Diosne umîza, ma uztuza, an ñancha uztakin an akkwan naizninnanazi. 15 Une, Capernaum pîpulura uztuzne, chiyura nuasachi. Une ïnta taizanazi. 16 Uruza mîmturuzne na kaiztu aizpa mîamtu. Uruza chîhkamturuzne nawa chîhkat kit na kaiztu aizpa mîamanazi. Nawa chîhkamturuzne, nawa înintamikasha, ap Taittara, chîhkat kit mîamanazi.”
Setenta paas awaruzne kaiyamîztu
17 Setenta paas awaruzne kaiyara. Uspane wat kulat kit kaizara: —Anpat. Au nua paikukane, saliztuzne au kaizta aizpa mîat kit kiara. 18 Usne usparuza kaiznara: —Nane Satanásta chiyuras ippakana taiztu iztau. 19 Mîrain. Nane umîza tînta kiwainamtus. Wat kamta kultane, tuil tuil kultane, uspane umîza kuamanazi. Diablokasakas paiña saliztuzkasakas waya kiarane, une anuppanazi. Chinkas uruza kwail kimanazi. 20 Nu salizta puznintakas, sun akwa akkwan wat kulamtuchi. Anza akkwan wat kultain, u Dioskasa chiyura uzamtu akwa.
Painkulkas papihshkas
21 Sun urain Dios Izpulne Jesústa wat kulninta. Suasne Jesúsne Diosta kaizta: “Nua aishtaish kiztus. Nune ap Taitta i. Nune chiyurakas an surakas îninta. Nune pariyaruzakas kamtamtuzakas nu kit aizpa piankamninnarachi. Uspawa puintît mîjara. Nune we piantuza kiwainara, nu kishimtu aizpa piankamanapa. Taittara aishtaish kiztus. Nu nara aizpakas nu kit aizpakas wari. 22 Ap Taittane chikas wantain nawa îninna chîhkarît. Mînminkas Painkulta pianchi. Papihshmin ussa pian. Mînminkas Papihshta pianchi. Painkulmin ussa pian. Painkulne mamaztuza kiwainamtu, Papihshta piankamanapa.” 23 Jesúskas kammuruzkas paimpa tuasmin, Jesúsne usparuza kaiznara: “U chiwazha kimtu aizpa izamtu akwa, une wat kianazi. 24 An ñamin akkwan Dios kainammtuzkas katsa mikwaruzkas u izara aizpa izshiara. Uspane izarachi. Uspane u mîara aizpa mîshiara. Sun mîarachi.”
Samaria pîpuluras awa kamtam kwinta
25 Suasne Moisés kaizta aizpa kamtammikane kun kit Jesústa mîmat kit kaizta: —Kamtam, ¿Chima kinpai, pailta payukima chiyura uzna? mîmara. 26 Usne ussa sînkat kit mîmara: —¿Dios pînkîhta chima parît? ¿Nune chi pînkîhta iztus? 27 Kamtammikane sînkara: —Une Anpat Diosta pashitpa, wan kaijchukasa, wan izpulkasa. Ussa tînta pashitpa. Mintuasmin, Diosta pashitpa. Une kasha uztuza uruzpain pashinamtukanain pashinarawa. 28 Jesúsne ussa kaizta: —Nil sînkash. Sunkana kitne, pailta payurakima chiyura uznazi, kizta. 29 Us sînkara aizpa nil azi mintuasmin, kamtamne Jesústa mîmara: —Ap kasha uztumika ¿mînmaka i? 30 Jesúsne ussa sînkat kit an kamtam kwinta ka kaizta: —Maza ampune Jerusalén pîpuluras miwara kihshtîmtu. Jericó pîpulura îmtuasmin, walkumtuzne ussa pizat kit pïn nakaat kit aim kiara. Irîtkanain tîwij îara. 31 Sun urain maza pariyane sun miwara pîntu. Ussa iztawane, us tumakin pîntît. 32 Kawarain maza ampune, Levíwa kwaltas, us tukin at kit ussa iztawane, us tumakin pîntît. 33 Mamaz Samaria pîpuluras awa îmtuasmin, us tukin ara. Ussa iztawane, usne us akwa tayal kit ussa kiwainshira. 34 Usne ampu tura ît kit us aim kirîtkin pihshpikas vinokas nîra, wat panapa. Us aim kirîtkin pïn iptawane, usne ussa paiña caballora uzninta. Pitmu yalta karatpane, usne ishtura kiwainta. 35 Mamaz payura kiwainmikane paas pial tuhtas ukkat kit yalpamikasha mîlat kit ussa kaizta: “Ussa kiwainti. Chiwazha pial wekane, kailtu payura tanash.” 36 Mane ¿Nune chima mintus? Kutñaruzne aim kiltîttukin pînara. ¿Mînmika walkwarîtmikasha kiwainta? ¿Mînmika izmumika namta? 37 Kamtamne kaizta: —Walkwarîtmikasha kiwainmikane izmumika namta. Jesúsne ussa kaizta: —Ît kit kawarain kitpa.
Jesúsne Maríakas Martakas aizpihshpa yalta naptu
38 Miwara îmtuasmin, Jesúsne ainki pîpulura napta. Suane ashampane, Marta muntîtmikane, uzta. Usne yal Jesústa nammîlara. 39 Martawa aizpihshne María muntît. Maríane, Jesúspa mittîkin at kit uzta, Jesús kamtamtu aizpa mîna. 40 Mane Martane kwisha patka akwa, Jesústa azain ît kit kaizta: —Anpat. Aune akkwan kal mîjmakpas. Ap aizpihshne nawa chîhkara, wan kal kinpa. ¿Wat ki? “Nawa kiwaincha,” kizti. 41 Anpatne ussa sînkara: —Marta. Nu kwisha kal mîj akwa, nune kwisha patka i. Chikas wantain kimtukas, 42 nune chiwazha we kimtu. Maríane nu we kimtu aizpa narît. Na kamtamtu aizpa mîmtu. Mînminkas sun ussa nakasachi.
Jesúsne kammuruza Diosta paikwan kamtanamtu
1 Mamaz payu Jesúsne mamaz nankin Diosta paikumtuazi. Paikwatpane, maza kammumikane ussa kaizta: —Anpat. Juanne paiña kammuruza paikwan kamtanara. Kawarain aumîza paikwan kamtazhain, kizta. 2 Usne usparuza ka kiznara: —Paikumtune, ka kiztain: “Au Taitta, nu chiyura uztu akwa, nu sînam akwa, aune nua wakpuj waintumakpas. Apain anka, awaruza îninnana. 3 Payu aizpa aumîza kumira kwinchain. 4 Au kwail kirît aizpa wat kulnazhain. Kawarain aune aumîza kwail kirîttuza wat kulnamtumakpas. Aumîza kiwainchain, kwail kimanpa.” 5-6 Suasne usne ma pitchin usparuza kaiznara: “Sunkana na paramtu aizpa mintain. Mamazpa izmumikane paiña yalta kakwamta attishtas pianara. Usne chinkas mîjchi, atmikasha kwinna. Suasmesa usne kasha uzmikasha ît kit ka kizta: ‘Kutña pan nammîlazha, ap izmumikasha kwinna.’ 7 Sun kasha uzmumikane paiña yal ayuktas, ¿chima sînkanazi? Sunkana kizmanazi: ‘Nawa aizapmun. Pîjta sîptît akwa, ap pashpakas nakas pittamtuas. Nane pan nammîlan kuhsaksachish. ¿Usne sunkana kiznasa?’ 8 Sunkana kizmanazi. Ap kasha uzmikasha nawa pan nammîlan kuhsshitchikas, usne kuhsak kit chiwazha pan nammîlanazi, na akwan piji paikwara akwa. 9 Umîza ka kiznamtus. Chiwazha wekane, paikwarain, Dios uruza mîlananapa. Chiwazha saishitne, sairain. Pîjtakin parakane, Diosne pîjta chîhtnazi. 10 Mînpazha chiwazha paikwatne, sapnazi. Mînpazha chiwazha sairane, sainazi. Mînpazha pîjtakin kuztane, Diosne usparuza pîjta chîhnazi. 11 Uruzpain papihsh wai. Painkul papihshta pishkaru paikwatne, ¿papihshne ussa kamta kwinnasa? Kamta kwinmanazi. 12 Painkul papihshta aral wipu paikwatne, ¿papihshne ussa tuil tuil kwinnasa? Tuil tuil kwinmanazi. 13 Mane une, kwail kimturuzne, chiwazha wat aizpa pashpara mîlashinanazi. Chiyuras Papihshne chiwazha anza wat mîlan uruza mîlananazi. U ussa paikukane, usne paiña Sînam Izpulne uruza mîlananazi.”
Jesúsne saliz puznintu
14 Saliz mîkain ampura piztît akwa, an ampune parakain parît. Jesús salizta puznintawane, ampune paramîzta. Awane sun akwa iztaspaarît. 15 Sun akwa, mînpazha ka kizara: “Usne salizta puzninmîztu, Beelzebú ussa kiwaintu akwa. Beelzebúne saliz îninmika i.” 16 Ussa izamtuasmin, mamaztuzne ussa ka kaizara: —Chiwazha chiyuras iztasparît kal izninchain. 17 Jesúsne uspa minñamta aizpa nîjkul kit usparuza ka kaiznara: “Wan gobierno awa usparuzpain waya kimtune, wan pailtînazi. Suasmesa uspa kal kiarît aizpa kaarînazi. 18 Kawarain Satanás paiña salizkasa waya kimtune, paiña gobiernone pailtînazi. Une na salizta Beelzebú akwa puznintît kizamtu. Nil chi kizara akwa, nane uruza sun kiznarau. 19 Na saliztuza Beelzebú akwa puzninmîztane, ¿Mînma u kanpamtuza kiwainamtui salizta puzninnapa? Beelzebú usparuza sun kinpa kiwainnarachi akwa, une mîz kiamtu, Beelzebú nawa mizurainkas kiwaintachi akwa. U kanpamtuzne uruza ‘nilchi kiamtu’ kiznanazi. 20 Dios nawa salizta puzninna kiwaintane, une Dios uruza îninnashimtu piankamashina. 21 Tînta yalpamika wantain watsarît mîjne, paiña yal wat iztune, usne kalpain uz kit wan watsanazi. 22 Mamaz anza tîntamika uskasa waya kikane, ussa anupparawane, usne us mîj aizpa nakanazi, waya kimanpa. 23 Mînpazha nawa kanpamtukine, nakasa aliz i. Usne Diablora kanpamtu. Mînpazha nawa awa wanmaknintukine, usne paimpa îninnamtu, awa nawa amanpa.”
Kwail salizne awara mamasa kailtu
24 “Kwail saliz awaras puznintawane, salizne uzmura chat kit kwaizkulna saimtu. Kwaizkulsachi akwa, ka mintu: ‘Na sunmin ampuras puztîtkas, nane mamasa ampurain kailmîztus.’ 25 Kailtawane, salizne ampura iztu. Maza yal pishkarîtkana iztît. Watsarît iztît. 26 Suasne sun salizne ît kit an siete anza kwail saliz karamtu. Ussa pizat kit nappara, sua uzana. An ñancha ampune naizta. An kwizta ampune anza akkwan naizmîznazi.”
Wat kultumika
27 Jesús sun kaiztuasmin, maza ashampane usparuzpain ussa tînta kwian kit kaizta: —Diosne nua pîja warammikashakas nua kawiramikashakas wat kulnazi. 28 Jesúsne kaizta: —Dios pit mîmturuzkas Dios kaizta aizpa kimturuzkas anza akkwan wat kulanazi, Dios kuruntu aizpa mîamtu akwa.
Awane Jesústa paikuamtu, chiwazha watsal iztasparît kal kinpa
29 Akkwan awa wanmakkakane, Jesúsne usparuza ka kaiznamîzta: “Ma uztuzne kwail kiamtu, chiwazha iztasparît kal sayamtu akwa. Une sun izamanazi. Diosne uruza Jonásta kirît aizpakana annanazi. 30 Jonásne Nínive pîpulura uztuza Dios pit kainanara. Kawarain Ampu namtîtmikane ma uztuza Dios pit kainanamtu. 31 An ñamin katsa mikwa ashampane mamaz attish suras Salomón tukin, Israelpa katsa mikwakin, ara, paiña wat pit pian aizpa mîna. Ilnamtu payu taizkane, Diosne ma payu uztuza kwail kiamtu kiznanazi. Sun ashampane kawarain kaiznanazi. Iztain. Nane Salomónkin anza tînta ish. 32 Ilnamtu payu taizkane, Nínive pîpulura uztuzne ma uztuza kwail kiamtu kiznanazi. Jonás usparuza Dios pit kaiznarawane, uspane mîat kit maizat kit kwail kiashitchi. Mane nane Jonáskin anza tînta ish.”
Alampara putmu
33 “Alampara puttawane, mînminkas pilkulta puinsachi, tîmkasa paltakain. Putmumikane alampara kwashta kanmu, napmuruz kai izanapa. 34 U kasune alamparakana i, wan kai izanapa. Kasu watne, wan kai iztu. Kasu kwailne, wan kai izsachi. 35 Katmizna, watmin na kaiztu aizpa mîrain, watmin piankamanapa. 36 Alampara aizkane, u kai izamtu. Kawarain na kaizta aizpa mîmtuzne wat piankamanazi, kwail kiamanazi.”
Jesúsne Fariseo awaruzakas Moisés kaizta aizpa kamtamtuzakas kwinta kinamtu
37 Jesús kwinta kitpane, Fariseo awane Jesústa paikwara, uskasa kwan. Îtpane, yalta nap kit misharî uzta. 38 Fariseo awane iztaspara, Jesús an ñancha paiña chihtî kittachi akwa. 39 Anpatne ussa kaizta: —U Fariseo awaruzne tasakas pîlattukas îsalpara kittamtu. Îsalpara kittamtukas, une ayukta kittamtuchi. U walkumtu aizpakas u kwail kimtu aizpakas kaijchura wa. Sun kwailne u kaijchuras puzamtu. 40 Une wat minñamtuchi. Une tîmpawazha mai. Wan sarîtmikane îsalparakas ayuktakas sarît. 41 Ayuktain kiharawane, une puizara mîlashina. Suasne u wan kiamtu aizpa sînam namanazi. 42 U Fariseo awaruzne tayalat kit kwisha naizanazi. Chiwazha diez mîjne, une maza Diosta mîlamtu. Une chiankwa kîhkas, immu pihshkas, wat kîhkas mîjam. Diez mîjne, une maza Diosta mîlamtu. Sunne wat. Sun kiamtuasmin, awaruzakas wat kiarawa. U chiwazha mîj aizpa Diosta mîlamtuasmin, ussa pashiarawa. Une masain paasas kiarawa. 43 U Fariseo awaruzne tayalat kit naizanazi. Une kammu yalta an wat uzmura uzshiamtu. Une pîpulu paizkara îashimtu, awa u chihtîra putchunnanapa. 44 U Moisés kaizta aizpa kamtamtuzkas Fariseo awaruzkas na kuruntu aizpa mîzhain. Uruz awa iztakin wat awakana izninnamtukas, une ñanta kiamtu. Une tayalat kit naizanazi. Une kamkin awa irîtkana mai. Awa irît kammukin izasachi akwa, awane îsalpara chaamtu, wan kwail ayukta pianchi akwa. 45 Moisés kaizta aizpa kamtammikane ussa ka sînkara: —Kamtam. Sun kiztuasmin, nune aumîzakas pilchanamtu. 46 Jesúsne sînkara: —U kamtamturuzne tayalat kit naizanazi. Une wan awaruza kwisha akkwan înim îninamtu, u pashit aizpa kianapa. Une usparuza kiwainamtuchi, u înintu aizpa kianapa. 47 Une tayalat kit naizanazi. U Dios kainammtuza kamanapa yal saarakas, uruzpa an ñancha papihshtuzne Dios pit kainammtuza piantanara. 48 Une uspa kiarît aizpa pian. Une uspa kiarît aizpa nîjkulara. Uspa Dios kainammtuza piantarawane, une uspa kamkin yal saamîztu. 49 Katmizna Diosne nil min kit ka parît: “Nane uruza Dios pit kainammtuzakas înintaruzakas îninnanash. Uspane, u irît Judío papihshtuzne, Dios pit kainammtuza piantananazi. Mazantuza naizninnanazi.” 50 Dios au sura sarakima, awane Dios pit kainammtuza piantanat kit kwail kinarît. Diosne ma uzturuza kwail kiarît kiznat kit usparuza culpa kinashina. 51 Sun Judío awane Abelkis Zacaríastakima piantara. Uspane unam misharîkin kasha Dios yalta piantaara. Nakas watcha kaiznamtus. Ma uztuzne culpa mîjanazi, Dios pit kainammturuza piantana nîjkulamtu akwa. Diosne uruza “kwail kiare” kiznanazi. 52 U Dios kaizta aizpa kamtamtuzne naizarînazi. Awaruza kiwainshinakas, une Diospa piankamtu aizpa puintît mîjazi, mamaztuza Dios pit piankamamanpa. U Diosta piankamshimtuchiasmin, une Diosta piankamshimturuza kiwainamtuchi. 53 Jesús yaltas puztuasmin, Moisés parît aizpa kamtamtuzkas Fariseo awaruzkas ussa kwisha aliz kulat kit ussa akkwan mîmaara, 54 akkwan tuntu kwinta kinpa, chiwazha kwail kizna kininnapa.
Fariseo awaruz kamtamtu aizpa watchi
1 Kwisha akkwan mil awa wanmakkamtuasmin, uspane usparuzain mittîkin kulnamîzta. Suasne Jesúsne kammuruza ka kaiznamîzta: “Wat uzizanaka. Fariseo awakana namman. Wat paramtukas, uspane wat kiamtuchi. Uspa kaijchune kwail i. 2 Awane chiwazha paltarît aizpa izanazi. Awane chiwazha puintît mîj aizpa sun ukkat kit piankamanazi. 3 U chiwazha amtawara kaizarane, awane payuwara mîanazi. Chiwazha impara imparain paimpa nankin kaiztane, mamazne yal kwashtas kwiannazi, wan awa mîanapa.”
Mînpazhara ishkuatpamakpas
4 “Nane uruza, ap izmuruza, kaiznamtus. Uruza piantamturuza ishkuman. Uruza piantarawane, uspane an kwizta u izpulta an kiasachi. 5 Nane umîza kurunnanash, mazainta, Diosta ishkwanpa. Uruza piantashinamikashakas, u izpul ïnta kiakpînshinamikashakas ishkwarain. Mamasa watcha kaiztus; ussa ishkwarain. 6 Cinco chitchu paas pialminkasa painim. Diosne mazain chitchuin mainkain. 7 Diosne u wan ash kîzpura waj aizpa wintît. Katmizna une ishkuman, Dios uruza akkwan chitchukin anza pashinamtu akwa.”
Jesúsne kammuruza kurunamtu, mîtsal kiamanpa
8 “Umîza kaiznamtus. Mînpazha wan awara ‘nane Diosta pianish’ kiztane, Ampu namtîtmikane ussa pianish Diospa ángel iztukin kaiznazi. 9 Sunkana mînpazha wan awara ‘nane Diosta pianchish’ kiztane, nane ussa pianchish Diospa ángel iztukin kaiznash. 10 Mînpazha Dios Painkulta kwail kiztane, paiña kwail wat kulnashina. Sunkanain mînpazha Dios Izpulta kwail kiztane, paiña kwail wat kulmanazi. 11 Awane uruza Dios yalkin kamtamtuzakas, katsa mikwaruzakas, mamaz mikwaruzakas tain mîlnanazi, uruza naizninnanapa. U miza pakpana minman. U miza kaizna minman. 12 Sun urarain Diospa Izpulne uruza sînkara aizpa kamtananazi.”
Kwazpamika
13 Mazane awaruztas Jesústa kaizta: —Kamtam, ap añara ap pitti su nail mîlazha kizti. 14 Jesúsne ussa kaizta: —Mînminkas nawa sun su nailnapa chîhkatchi. 15 Usne usparuza kaiznara: —Iztain. Mamazpa pashiman. Kwazpamika akkwan chiwazha mîjkas, usne us mîj akwa an akkwan payukima uzsachi. 16 Suasne usne usparuza kamtam kwinta kaiznara: “Paiña sura pippa maltawane, kwazpamikane paktu payura akkwan pippa pakta. 17 Usne usmin ka minta: ‘¿Chima kinpai? Nane mînta pippa watsam chinkas mîjchish.’ 18 Usmin kaizta: ‘Sunkana sanash. Ainki watsam yal azpiantawane, an katsa watsam yal sanash. Suasne wan pippakas wan chiwazha mîj aizpakas sua watsanash. 19 Suasne apminpain kaiznash: “Nane kwisha kwazpa ish. Nane na mîj aizpakasa akwan añokima uznash. Kwaizkul kit chiwazha kwat kit wat kulnash.” ’ 20 Suasne Diosne ussa kaizta: ‘Wat pianchi. Nune tîmpa awa i. An amtain irînazi. Irawane, ¿Mînma up watsarît aizpa sapmîlnasa?’ 21 Sunkanain an ampura kirînazi. Kwazpa awane, usmin watsat mîjmikane, wan kaarînazi. Chiwazha Dios pashit aizpa kimtuchimikakas wan karînazi.”
Diosne paiña kwalta kiwainamtu
22 Sun kaiztawane, Jesúsne paiña kammuruza kaiznara: “Uruza kaiznamtus: U we kumtu aizpakas chi minman. U we pïn kuamtu aizpa chi minman. 23 Uznane kumirakin anza tînta i. Awane pïnkin anza tînta i. 24 Katsa chitchuwa mintain. Uspane pippa wakain. Pippa wat pakkain. Uspane îranchukas katsa watsam yalkas sakain. Diosne usparuza kwinamtu. Une chitchukin anza tînta i. 25 Mînminkas usmin an aks namninsachi. 26 Sun pitchin kisachi akwa, une an akkwan chiwazha minman. 27 Wishta mintain. Miza chikkamtu iztain. Wishne pilta kal kikain. Wishne pïn sakain. Watcha uruza kaiznamtus. Salomónne kwisha watsal pïn kwarakas, an wishne Salomón pïnkin anza watsal iztît. 28 Diosne ma payu pîtta pilta watsal kwiznintu. Kuntawane, azain nain kit pulchaktat kit ïnta impaktarîm. U Diosta we nîjkulamtukas, Diosne umîza wishkin anza watsal izninnanazi. 29 Katmizna, wanta mintuasmin, ishkuman. Sunkana miman: ‘¿Chi kumirama kwanpai? ¿Chi kwazima kwanpai?’ 30 Wan an sura uzturuzne chiwazha wan wa aizpa sayamtu. U Dios Taittane u we aizpa pian. 31 Sun akwa, une an ñancha Diosta sayarawa, uruza îninnanapa. An kwizta Diosne u we aizpa uruza mîlananazi.”
Chiyura kwazpa kultu
32 “Uruz ap pîrikukana namarît akwa, ishkuman. U Taitta Diosne uruza kiwainnanazi, uskasa îninna. 33 Chiwazha mîj aizpa painintain. Puizaruza mîlanarain. Sunkana kimturuzne chiyura kwazpa kulanazi. Suane u pial tuh watsarawa. Suane walkumtuzne asachi. Suane kîriyukas tuh tîtsachi. 34 Chiyura kwazpa kulturuzne chiyuwa minñanazi, sua uzshiamtu akwa.”
Wan kapal watsarawa
35 “Wan pïn kwat kit watsarain, kal kin. Alampara put unatpa. 36 Une wat kiwainmikakanain uztain. Anpat pishtaras amtuasmin, une tîriz kit ussa izarawa. At kit pîjtakin piannapkane, masain wan pîjta chîhshina. 37 Kiwaintuzne izarawa, uspa anpatta izna. Sun kitne, wat kulanazi. Watcha kaiznamtus. Sun kapal sarîttuzne, ussa izmuruzne, anpatpa uzmura uzanazi. Uspa anpatne usparuza misharî kumira nailnanazi. 38 Anpatta tîrizamtuasmin, watsarît izmuruzne wat kulanazi, kakwamtakima tîlawainkimakas tîrizarakas. 39 An piankamtain. Walkum akane, yalpamikane sun urara piankamsachi. Sun ura piankamtane, izkul kit yal watsashina, walkum napmanpa. 40 Kawarain, une wan kapal sarain. Ampu namtîtmikane u tîrizamtuchi payura anazi.”
Wat kiwainmikakas kwail kiwainmikakas
41 Pedrone ussa mîmara: —Anpat, ¿Aumîza sun kamtam kwinta kaiznamtukish? ¿Wan awaruza kaiznamtukish? 42 Anpatne kaiznara: “Une wat kiwaintuza namtain, yalpamika înintu aizpa kianapa. Yalpamikane wat kiwainmumikasha wan kal chîhkamtu, wantuza kumira nailnana. 43 Kiwainmikane wat kulnazi, yalpamika kaizta aizpa sarane. Akane, yalpamikane us ka kimtu aizpa iznazi. 44 Watcha kaiznamtus. Kwiztane yalpamikane wan mîj aizpa ussa chîhkanazi. 45 Sunkana kiwainmumikane usmin ka min kit kaiznazi: ‘Ap anpatne azain kailtuchi.’ Suasne usne ampu kiwaintuzakas ashampa kiwaintuzakas aim kiamîztu. Usne akkwan kumira kwat kit chappi kumîztu, pinakima. 46 Kiwainmikane anpat kailtu payura pianchi. Anpatne sun kiwainmika tîriztuchi payura anazi. Katmizna yalpamika akane, yalpamikane ussa tînta ilnazi, mîmtuchiruzkasa puranpa. 47 Kiwainmikane anpat înintu aizpa wat pian. Anpat kaizta aizpa kitchine, wan kapal sarachine, anpatne ussa tînta ilnazi. 48 Anpat kaizta aizpa pianchimikane an we ilnanazi. Dios mînpazhara akkwan mîlatne, Diosne ussa paikumtu, an akkwan kailninna. Dios mînpazhara akkwan chîhkatne, usne ussa an akkwan paikwannazi.”
Jesúsne awaruza nailninnamtu
49 “Nane an sura arau, wan awara ilnana. Nane sun awara me naiznamtu pashiras. 50 Au sukin uztuza naizarachasmin, nane kwisha naiznash, wan kinkima. 51 Une ka minñamtu: ‘Nane an sura arau, wan awa kalpain uzanapa.’ Sunpa akwa atchish. Nane arau, awaruza nailnana. 52 Makismin maza kwalne usparuzain waya kianazi. Kutñaruzne paaskasa waya kianazi. Paasne kutñaruza waya kianazi. Cincoruzne paimpa naiyanazi. 53 Papihshne painkulta waya kinazi. Painkulne papihshta waya kinazi. Akkuhshne pashura waya kinazi. Pashune akkuhshta waya kinazi. Suegrane pashu kiznara waya kinazi. Pashu kiznane suegrara waya kinazi.”
Akkwan awara paranamtu
54 Jesúsne akkwan awaruzakas kaiznara: “Wanish sîpkane, ma payu alu kinazi. Suasne alu kimîztu. 55 Inkwa pakane, pãn malkane, i kinazi. Suasne i kimtu. 56 U ‘au piankamtumakpas’ kizamtukas, une wat piankamtuchi. Une suwakas chiyuwakas iznin kit wat pian. Sunkana mane une Dios ukin kimtu aizpa wat piankamamtuchi.”
Une aliz awara wat kirain
57 “Une uruzpain nil min kit nil aizpa narawa. 58 Sunkana kirain. Katsa mikwara miwara întazasmin, nune nammîlatmikasha pui aizpa kailnintawa. Pui aizpa kailnintukine, nammîlatmikane nua katsa mikwara tain înazi. Katsa mikwane nua policíawara chîhkanazi. Policía awane nua kajchira sîpnazi. 59 Watcha kaiznamtus. Nune kajchiras puzmanazi, wan pui aizpa tanakima.”
Kwail kirît aizpa maiztawa
1 Sun payurain mînpazha Jesústa ka kizara: —Galilea suras ampuruzne wakara kaarat kit piantara, Diosta mîlan. Suane Pilatone usparuza piantaninnarît. Sunkana usne uspa aimpikas wakara aimpikas naarît, kizara. 2 Jesúsne usparuza sînkanara: “¿Chima minñamtu une? Galilea suras irîttuzne, ¿mamaz Galilea awakin anza akkwan kwail kiarîtki? 3 Uspane an akkwan kwail kiarachi. Une kwail kiarît aizpa maiztachine, kawarain une iarînazi. 4 An kwiztane katsa uk yal kihsh nain kit diez y ocho Siloé awaruza appara. ¿Chi minñamtu une? Irîttuzne mamaz Jerusalén awakin ¿anza akkwan kwail kiarîtki? 5 An akkwan kwail kiarachi. Une u kwail kirît aizpa maizamtukine, une kawarain iarînazi.”
Higuera tî wamtuchi kamtam kwinta
6 Jesúsne sun kamtam kwinta kainanara: “Ampune higuera tî warît mîj wankail saura. Tîra pippa saina îkane, chinkas sairachi. 7 Suasne usne wankail sau kal kimmikasha kaizta: ‘Izti. Kutña añoin sun higuera tîra at kit pippa sairau. Chinkas saimas. Tî kwaari. Kainsîh kun.’ 8 Kal kimmikane ussa sînkara: ‘Anpat, mamaz añokima kawininti. Tî kwalkin pil kîhtawane, nane wakara pî winnash, kawinapa. 9 Mamaz añora pippa wamtune, an wari. Pippa wammakane, suasne tî kwaarawa.’”
Jesúsne sumtîtmin chamtu ashampara kakulnintu
10 Suasne kwaizkulmu payura Jesúsne kammu yalta kamtanamîzta. 11 Suane saliz piztît ashampane tuara. Salizne ussa nil kunsachi panintît. Diez y ocho añokima sumtîtmin chamtu akwa, usmin nil sasachi. 12 Ussa izkane, Jesúsne ussa akwat kit kaizta: —Ashampa, up ishtu kakulti. 13 Suasne paiña chihtî ussa paamtuasmin, sun urain usne nil kun kit Diosta kaizta: “Nune kwisha wari.” 14 Kammu yal îninmikane Jesústa pilchapuzta, Jesús kwaizkulmu payura kakulnintît akwa. Usne awaruza kaiznara: —Seis payukima kal kitpamakpas. Seis payukima ishturuza kakulnintawa. Kwaizkulmu payura kakulninkain, kiznara. 15 Suasne Jesúsne ussa sînkara: —Nune kwail minñamtu. Wat pit paratkas, nune wat kimtuchi. Up wakarakas mulakas pitmu yaltas chîhtawane, nune kwaizkulmu payura kwazira taina îm, kwazi kwinna. 16 An ashampane Abrahampa kwal i. Satanásne diez y ocho añokima sun ishtukasa ussa kuhtît mîjara. ¿An kwaizkulmu payura sun ishtumikasha kakulninshinaki? 17 Jesús sun kiztawane, ussa aliztuzne mîtsal kiamîzta. Jesús wat kal kit aizpa izarawane, mamaz awaruzne wat kulara.
Mostaza pippa kamtam kwinta
18 Suasne Jesúsne kamtam kwinta kaiznara: “Nane umîza an kamtam kwinta kainanamtus, miza Dios awaruza îninnamtu piankamanapa. 19 Dios kishimtu aizpa mostaza pippakana i. Ampune sun pippa paiña pilta wara. Warawane, chik kit katsa tî kunta. Akkwan chitchune aat kit tî tailpurara yal saara.”
Kiña kamtam kwinta
20 Mamasa kaiznara: “Nane umîza an kamtam kwinta kainammtus, miza Dios îninnamtu mîaiznapa. 21 Dios kishimtu aizpa kiñakana i. Ashampane kutña harina wazkasa pitchin kiñakasa nara, wan harina sulnin kit pan sana.”
Aiz pîjta
22 Jerusalén pîpulurakima îmtuasmin, Jesúsne ainki pîpulurakas katsa pîpulurakas nap kit awara kamtanara. 23 Mînpazha ussa mîmara: —Anpat. ¿Diosne akkwan awara watsat mîlnanasa? Usne ussa kaizta: 24 —Sîp pîjtakin, Dios înintukin, sait kit naptawa. An kaiznamtus. Akkwan awane napnash minñamturuzne nappamanazi. 25 Yalpamika kuhstawane, usne pîjta sîp kit kuhtu. Pianamal panaruzne, pîjtakin piannap kit Anpatta ka kaizanazi: “Pîjta chîhti”. Usne usparuza sînkananazi: “Nane u mîntas mai pianchish. Nane umîza mama wanmaltachish.” 26 Suasne une ussa kaizamîznazi: “Aune nukasa kuwiznashî. Nune aumîza au pîpulura kamtanara.” 27 Usne kaiznanazi: “Umîza kaiznamtus. Nane u mîntas mai pianchish. Mane uruza mama wanmaltachish. Paimpa îrain. Une wan kwail kimtuz mai.” 28 Suasne une Abrahamtakas Isaactakas Jacobtakas Dios pit kamtamtuzakas Dios înintukin izanazi. Tas kiakpîntawane, uruzne azat kit sula sît sît kiamîznazi, uspakasa uzsachi akwa. 29 Akkwan awane pãn payapmumal suraskas pãn puzmumal suraskas wan suraskas aanazi, Dios înintukin uzana. 30 Iztain. Kwizta kanpamtuzne an ñancha îanazi. An ñancha pianattuzne kwizpa kanpaanazi.
Jesúsne Jerusalén pîpulu akwa aztu
31 Sun payuin mînpazha Fariseo awane aat kit Jesústa kaizara: —Akkis îmîzti, Herodes nua piantashimtu akwa. 32 Usne kaiznara: —Herodesne înkal kwizakana i. Ussa ît kit ka kiztain: “Mîri. Makas tîlawakas saliz puzninmîztus. Ishturuza kakulninnamtus. Mamaz payura ap kal pailtînash.” 33 Sunkana nane makas tîlawakas kazilakas îmîztawash, ap kal pailnakima. An ñamin Dios pit kainammtuzne Jerusalén pîpulura iara. Nakas Jerusalén pîpulura irawash. 34 Jerusalén pîpulu uztuzne Dios pit kainammtuza piantaara. Une Dios înintaruza uk kiat kit piantaara. Aral kam kwaj kwaj kiztawane, paiña pashpane ilsîhman ayukmal nap uzarîm. Kawarain nane uruza akwanat kit wanmakninnashirau. Sunkana une nawa wanmakkashitchi. 35 Iztain. Diosne uruza kwayarînazi, paimpa uzanapa, kwairît yalkana. Mamasa umîza kaiznamtus. Une akwan payukima nawa izamanazi. Mamaz payura u nawa izakane, une ka kaizanazi: “Nune kwisha wari. Diosne nua îninta.” Sun kizarawane, mamasa une nawa izarînazi.
Jesúsne kiparît ampura kakulninta
1 Maza kwaizkulmu payura Jesúsne Fariseo îninmikawa yalta kwan îrît. Mamaztuzne us kimtu aizpa izara. 2 Suane Jesús iztakin kiparît ampune tuara. 3 Jesúsne Moisés parît aizpa kamtamtuzakas Fariseo awaruzakas mîmanara: —¿Kwaizkulmu payura ishtura kakulninshinaki? mîmanara. 4 Uspane puñain paarît. Suasne ussa piz kit parawane, Jesúsne ishtura kakulnin kit paiña yalta îninta. 5 Jesúsne usparuza mîmanara: —Up painkulkas up wakarakas kwaizkulmu payura pi kulta taiztane, sun urain, sun kwaizkulmu payura une ussa pil kultas tainnaknazi. 6 Uspane chinkas sînkamanamarît.
Kasara kin pishta
7 Pishtara akwattuzne ayukta nappat kit an wat uzmuruza naara. Jesús akwattuz an wat uzmukin naarît iztawane, Jesúsne an kamtam kwinta kaiznara: 8-9 “Mînpazha nua kasara kin pishta akwanakane, an wat uzmu narîtkin uzman. Nukin anza tînta ampu akane, akwatmikane ît kit nua kaizshina: ‘An anza tînta awane up uzmu narîtkin uznazi.’ Sun uzmukis puztawane, nune mîtsal kinazi, mamaz an we uzmura nana saimtuasmin. 10 Sunkana mînpazha nua pishtara akwanakane, ît kit minpa uzmura uztawa. Nu minpa uzmura uztuasmin, akwatmikane ka kizshinai: ‘Izmuruz. An wat uzmura uztain.’ Suasne wan akwarîttuzne nuwa anza tînta i minñamîznazi. 11 Mînpazha ussain anza tînta namtashitne, Diosne ussa an we tînta namnintînazi.” 12 Jesúsne an akwatmikasha kaizta: —Paizka payurakas nashkarakas kumira kwinnakane, izmuruzakas aimpihshtuzakas kwaltuzakas kwazparuza akwanamun, uspa nua kwan akwanashimtu akwa. Maizta maizta kuanazi. 13 Sunkana pishta kumira sarane, puizaruzakas, chasachi inturuzakas, mittî kwailtuzakas, kasu sîptîttuzakas akwanarain. 14 Sun kitne, une wat kulanazi. Uspane ukasa kumira maizasachi. Diosne wat uztuza kuhsninnanazi. Sun kuhstu payura Diosne umîza chiwazha mîlnanazi, nukasa chinkas maizsachiruza pishtara akwanarît akwa.
Katsa pishta kamtam kwinta
15 Mazane Jesúskasa misharîkin uzta. Us Jesús kaizta aizpa mîrawane, ussa kaizta: —Kumira kumtumikane Dios înintukin wat kulnazi. 16 Jesúsne ussa sînkara: —Maza ampune kwisha akkwan kumira sanin kit akkwan awara akwaninnara. 17 Kumira kumtu urara usne paiña kiwaintuza akwarîttuza îninnara ka kizna: “Arain. Kumira kapal sarît. Kwanpain.” 18 Sunkana wanne “nane asachish” kizamîzta. An ñanchamikane kiwainmikasha ka kaizta: “Nane mamaz su pairau. Nane izna îrîmtus. Îmtukine, up anpatta paikwatpa, nawa wat kulnapa.” 19 Mamazkas kaizta: “Nane diez wakara pairau. Nane usparuza izna îrîmtus, kal kiamtuasmin. Îmtukine, up anpatta paikwatpa, nawa wat kulnapa.” 20 Mamazkas kaizta: “Mamin nane ashampakasa kasara kirau. Katmizna nane îsachish.” 21 Suasne kiwainmikane paiña anpatta ît kit sun awa sînkara aizpa piankamninta. Suasne yalpamikane usparuza aliz pat kit kiwainmikasha kaizta: “Azain pîpulura katsa miwarakas ainki miwarakas îtpa. Tas puizaruzakas, chasachi inturuzakas, mittî kwailtuzakas, kasu sîptîttuzakas, yaltakima kararain, kuanapa.” 22 Kiwainmika tas kailtawane, kaizta: “Anpat. Nu kaizta aizpa kirau. Mama nan wai.” 23 Anpatne kiwainmikasha kaizta: “Attish miwara ainki miwara ît kit awara akwanat kit kararain, ap yalta akkwan awa punanapa. 24 Nane umîza kaiznamtus. An ñancha akwattuzne na kumira sarît aizpa kuamanazi.” Katmizna an ñancha pishtara akwattuzne Diosta saptuchiruzkana mai, anpatpa pishtara îarachi akwa.
Jesúspa kanpammika
25 Akkwan awane ussa kanpaara. Jesúsne puij kit usparuza kaiznara: 26 “Mînpazha ap kanpammika namshitne, usne nawa mamazpakin an akkwan pashitpa. Usne paiña papihshtakas akkuhshtakas ashamparakas pashparakas aimpihshtakas kwampihshtakas usminkas an we pashitpa. Usparuza nakin an pashimtumikane ap kammumika namsachi. 27 Ap kanpammikane nakana naizshitchine, ap kammumika namsachi. 28 Mînpazha katsa yal min kit sashitne, usne an ñancha yawa muin wian iztu. Usne usmin mîmamtu: ‘¿Kapal pailnapain mîjash?’ 29 Wan wiantuchine, yal sana masarawane, wan yal pailmanamtîkane, wan awane sun izat kit yal sammikasha ishananazi. 30 Ka kaizanazi: ‘Yal sana masaramikane, yal pailmanamtît.’ 31 An mîrain. Katsa mikwane mamaz katsa mikwara waya kishitne, an ñancha usne ka min kit mîmamtu: ‘Mamaz katsa mikwa veinte mil awa mîjne, ¿nane diez mil awakasa waya kitne, kana kishinasa?’ 32 Kana kimanamtîkane, mamaz katsa mikwa attishtas amtuasmin, usne paiña pit înin kit ussa paikumtu, izmuruz namnapa, waya kiamanpa. 33 Katmizna, mînpazha wan mîj aizpa chîhkamtukine, usne ap kanpammika namsachi.”
Kwail ñam
34 “Nawa kanpamtuchimakane tîh ñamkana i. Mane ñamne wari. Sunkana tîh ñamne, mamasa ñam kulsachi. 35 Kwail ñamne chiwa palichi. Awane sun kiakpîntîm. U kail waj akwa, na kaiztu aizpa mîrain.”
Pîriku karît kamtam kwinta
1 Wan Roma gobierno pial sapmuruzkas wan kwail kimtuzkas Jesústa kashara wanmakkara, ussa mîana. 2 Fariseo awakas Moisés parît aizpa kamtamtuzkas Jesústa kwail kizat kit kaizara: —An ampune kwail kimturuza akwanamtu, uspakasa kwan. 3 Suasne Jesúsne an kamtam kwinta kaiznara: 4 “Mînpazha cien pîriku mîjazi. Maza pîrikune înkalpara karît. Noventa y nueve pîriku chîhkarawane, pîrikuwamikane îmtu, pîriku karîtta sainakima. 5 Pîrikura sairawane, usne watsal kul kit sail waktamta tanak kit mumtu. 6 Yalta pianatpane, usne izmuruzakas makis uzturuzakas akwanat kit kaiznamtu: ‘Nakasa wat kularawa. Nane an pîriku karîtta sairau.’ 7 Kawarain kaiznamtus. Kwail kimmika paiña kwail kirît aizpa maizta akwa, chiyura uztuzne an wat kulanazi. Akkwan awa uspa kwail kiarît aizpa maizashimtuchine, chiyura uztuzne wat kulasachi.”
Pial karît kamtam kwinta
8 “Maza ashampane diez pial mîjazi. Maza pial karîtne, usne impil put kit yal pishkat kit pial saimtu, wanmalnakima. 9 Pial wanmaltawane, usne izmuruzakas kasha uztuzakas akwanat kit kaiznamtu: ‘Nakasa wat kultain. Nane sun pial karît aizpa wanmaltau.’ 10 Kawarain kaiznamtus. Diospa ángeltuzne wat kulanazi, kwail kitmika paiña kwail kirît aizpa maiztane.”
Painkulne papihshpa yalkis îmtu kamtam kwinta
11 Jesúsne mamaz kamtam kwinta kaiznara: “Maza ampune paas painkulkasa uzta. 12 An ainkimikane papihshta kaizta: ‘Taitta. Nawa paimpa su mîlazha. Papihshne uspa paasta sukas chiwazha saptu aizpakas mîlanara.’ 13 Akkwan payu chikima an ainkimikane paiña wan su painin kit attish sura îmîzta. Kwail kimtu uztuasmin, pane usne paiña su painintît pial wan pailta. 14 Wan pial mîj aizpa pailtawane, chinkas mîjchi kirît. Pane kumtu mîjchi akwa, akkwan awakas yak kiara. 15 Uskas yak kimtu akwa, usne sun su awara ît kit kal saira. Sun anpatne ussa paiña sura îninta, kuzu kwira kinpa. 16 Usne kuzu kum kumira kwashira. Sunkana mînminkas ussa kwintachi. 17 Usmin min kit nîjkul kit kaizta: ‘Ap taittane kwisha akkwan kiwaintuza îninnamtu. Uspane akkwan kumira mîj, tizawal. Nain akkin inapain ish, kumtuchi akwa. 18 Nane ap taitta uztukin kailtînash. Sua ka ussa kaiznash: Taitta. Nane Dios iztakinkas nu iztakinkas kwail kirît ish. 19 Nane wat chi ish. Nawa ap painkul i kizmun. Up kiwainmikakana kal kishimtus,’ minta. 20 Suasne usne kuhs kit papihshpa yalta kailta. Painkul amtuasmin, papihshne attishta ussa izta. Usne us akwa tayal kit ussa kiwainta. Papihshne ussa ãïn ît kit saiyakwaat kit putchunta. 21 Painkulne ussa kaizta: ‘Taitta. Nane Dios iztakinkas nu iztakinkas kwail kirît ish. Nane wat chi ish. Nawa ap painkul i kizmun,’ kizta. 22 Papihshne kiwaintuza kaiznara: ‘Azain an watsal pïn karatpa, us kwanapa. Sultikashkas paiña chihtî tîppura nuktawa. Zapatokas paiña mittîkin nuktawa. 23 Pîntît ainki wakara karat kit piantari. Kuwizsan. Pishta sawizsan. 24 Na ap painkul irîtka mintakas, usne uztu. Usne mamaz sumal ît kit karît. Manta wanmal ish.’ Suasne pishta saamîzta. 25 Painkul îlapamikane nanmal kal kimtuazi. Tas kail kit yalta kasha akane, usne música mîra. Kukiamtu izta. 26 Usne maza kiwainmumikasha akwat kit ka mîmara: ‘¿Sun awane chima kiamtui?’ 27 Usne ussa sînkara: ‘Up aña ainki kailtai. Watmin kailta akwa, up taittane pîntît wakara nakta.’ 28 Painkul îlapamikane aliz kul kit yalta napshitchi. Suasne papihshne ustukin ît kit kwisha akwara, napnapa. 29 Usne papihshta sînkara: ‘Izti. Akkwan añokima nua kiwaintuarau. Wan nu kaizta aizpa kirîtkas, nune nawa pîriku pashpa mîlamash, ap izmuruzkasa pishta sana. 30 Sunkana mane up painkul, kwail ashampakasa pittîtmika, u pial kwairîtmika piannakane, nune us akwa pîntît ainki wakara nakta.’ 31 Papihshne ussa kaizta: ‘Ap painkul, mîri. Nune wan payukima nakasa uztu. Wan na mîj aizpa up i. 32 Sunkana kwisha wari pishta sana, wat kulana. Aune up aimpihsh irîtka mintamakpas. Ma uztu. Usne mamaz sumal ît kit karît. Manta wanmal ish,’ ” kizta.
Kwail izmumika kamtam kwinta
1 Jesúsne kammuruza an kamtam kwinta kaiznara: “Kwazpa anpatne su izmumika mîjazi. Mamaztuzne anpatta kaizara: ‘Up su izmumikane nu mîj aizpa wat iztuchi. Up pialkas kain kwaimtu.’ 2 Suasne anpatne paiña su izmumikasha akwanin kit kaizta: ‘Nu kit aizpa mîrau. Nu pial tarît aizpakas wan nu kit aizpakas kainazha. Nune ap su izmumika an nammanazi.’ 3 Su izmumikane usmin minmîzta: ‘Ap anpat ap kal ukkarane, ¿chima kinpai? Nane pil kal kisachish. Mîtsalish pial paikwan. 4 Akkis puzkane, ap kal mîjchine, nane na kishimtu aizpa pianish, mamaz awa nawa sappanapa.’ 5 Suasne izmumikane anpatpa puiruza maza mazain akwanara. An ñancha puimikasha mîmara: ‘¿Yawama anpatta puikish?’ 6 Usne kaizta: ‘Nane cien pihshpi winmu pui ish.’ Usne ussa kaizta: ‘Apain uzti. Pui parît pînkîhta sap kit azain cincuenta winmu pui ish pat kit kizti.’ 7 Suasne mamaz puimikasha mîmara: ‘¿Yawama anpatta puikish?’ Usne ussa kaizta: ‘Nane cien chara tîm pui ish.’ Usne ussa kaizta: ‘Pui parît pînkîhta sap kit ochenta chara tîm pui ish pat kit kizti.’ 8 Anpatne kwail su izmumika kirît aizpa nîjkul kit ussa kaizta: ‘Nu yawa kwailkas, nune pîna pian, up wat kal pailnakima.’ Ma payu uztuzne tîmpa chi, uspa mîj aizpa an wat îninnashimtu akwa, uspa pashimtu aizpa kana kinpa. Masetne Diosta piantuzne an we kiamtu, mamaztuzkasa wat uzana, chiyura nuana. 9 Nane uruza ka kurunamtus. Sun izmumikane anpatpa pialkasa kwail kit kit izmuruz namnapa, an sura an akkwan payu uznapa. U pial mîj aizpa mamaztuza kiwainarain, Dios uruza sapnanapa. Wan pial pailtawane, imtu payura Diosne uruza pialkin an wat chiwazha chiyura mîlananazi. 10 Pitchin pial watsammikane an akkwan pialkas watsanazi, sun pial kain kasta kitchi akwa. Pitchin pial watsamtuchimikane an akkwan pialkas watsamanazi. 11 Apas pial watsamtukine, mînminkas uruza chiwazha chiyura mîj aizpa mîlanamanazi. 12 Patna nil watsamtukine, mînminkas uruzpa mîlamanazi. 13 Maza kiwainmikane paas anpatta kiwainsachi. Mazara pashitkine, mamazta pashinazi. Mazara kiwainshimtune, mazara kiwainmanazi. Mînpazha Diostakas pialtakas parejuin pashimanazi. Diosta pashit kit wakpuj waintane, pialta pashimtuchi.” 14 Fariseo awane, pial pashimturuzne, wan mîara. Uspane Jesúspa kwail ultimal kizara. 15 Usne usparuza kaiznara: “U awaruzpain wat awakana izninnamtukas, Diosne wan u minñamtu aizpa pian. Awa chiwazha tînta i mintuasmin, Diosne awa minñamtu aizpa kwail i,” kiztu.
Diosne awaruza îninnashimtu
16 “Awane Dios pînkîh para aizpakas kamtammika kaizta aizpakas kamtanara, Juan munnammika ankima. Sun payuin, Juan atpane, nane Dios watsal pit kamtanamîzta, awa Dios înintukin nappanapa. Mane Diosne akkwantuza îninnamtu, awa nappashimtu akwa. 17 Chiyukas au sukas karînazi. Dios anza ainki pitne kamanazi.”
Up ashampa kwaikain
18 “Mînpazha paiña ashampara kwait kit mamaz ashampakasa kasara kitne, an ampune Dios iztakin kwail kimtu. Ampu mamazpa kwairît ashampakasa kasara kitne, usne Dios iztakin kwail kimtu.”
Kwazpa ampukas Lázarokas
19 “Maza kwazpa ampune uzta. Usne muin ishtam pïnkas watsal pïnkas kwaara. Usne pailta payu kwisha watsal kumira kwara. 20 Maza puiza ampune, Lázaro muntîtmikane, kwazpa awa napmu pîjtakin uzara. Paiña ña pîttît ishtuazi. 21 Chiwazha kwazpawa misharîras pak taizka kwashira. Kwizakas ussa at kit paiña ishtu ña yakshira. 22 Puiza ampu irawane, ángeltuzne ussa Abraham tukin watsal chiyura sukin mîlarît. Kwazpa ampukas irawane, pilta kamta. 23 Irît uztukin naiztuasmin, kwazpamikane izak kit attishtain Abrahamta izta. Lázarokas uskasa uzara. 24 Kwazpamikane ka tînta kwianta: ‘Ap taitta Abraham. Nawa iz kit kiwaincha. Nawa Lázarora îninti, tîppu kwazira painnapa. Paiña tîppukasa kwazi pîtnin kit kwincha ap pitkin, tîh kinpa. An ïnkin naiztus.’ 25 Abrahamne ussa kaizta: ‘Ap painkul. Nu miza uzta nîjkulti. Nune chiwazha wat aizpa sapta. Kawarain Lázarone chiwazha kwail aizpa sapta. Mane usne apain wat uztu. Nune pa kwisha naiztu. 26 Ankas nîjkulti. Auruzpain katsa sanja tu. Apa uzmikane nu tukin kwakara kwaksachi. Pa uzmikane auruzakin kwaksachi.’ 27 Kwazpamikane kaizta: ‘Suasne, taitta, nua paikumtus, Lázarora ap taittawa kwalta îninnapa. 28 Sua cinco aimpihsh mîj ish. Usparuza kurunari, an naizmu sura aamanpa.’ 29 Abrahamne kaizta: ‘Uspane Moisés pînkîh para aizpakas Dios kamtamtuz pînkîh para aizpakas mîj. Uspane sun pînkîhkin parît aizpa izat kit mîat kit kiarawa.’ 30 Kwazpamikane sînkara: ‘Ap taitta Abram, mîzha. Uspane usparuza mîamanazi. Mînpazha irîtmika mamasa irîttas kuhstane, mînpazha usparuza apas îmtune, uspane mîat kit uspa kwail kiamtu aizpa maizanazi.’ 31 Sunkana Abrahamne ussa kaizta: ‘Moisés kaizta aizpakas Dios kamtamtuz kaizta aizpakas mîashitkine, uspane mamazta mîamanazi. Irît kuhstumika usparuza îmtukas, mîamanazi.’ ”
Mamazta kwail kininman
1 Jesúsne paiña kammuruza kaiznara: “Mînpazha mamazta kwail kininanazi. Sunkana mamazta kwail kininmikane kwisha naiztînazi. 2 Mamazta kwail kininmikane an watshimasa inna. Katsa kîmu ukkasa tîmpukin kuhtawane, awane ussa katsa ñam pira kiakpîntawa, Dios pit we mîmtumikasha kwail kimanpa. 3 Uruzpain kwiraruin. Aimpihsh kwail kitne, ussa ‘kwail kimun,’ kiztain. Paiña kwail kirît aizpa maiztane, nune paiña kwail kirît aizpa wat kultawa. 4 Mînpazha nua siete pijikima kwail kirîtne, us puij kit nua ‘ap kwail kit aizpa min kit chîhkamtus’ kiztane, nune paiña kwail kit aizpa wat kulnintawa.”
Nîjkultawamakpas
5 Jesúspa înintaruzne Anpatta kaizta: —Aumîza kiwainchain, Diosta an akkwan nîjkulana. 6 Anpatne kaiznara: —Dios kaizta aizpa nîjkul kit kitpa. Pitchinmin nîjkultane, une an katsa tîra ka parashina: “Piltas puhsnin kit pi pînta wari.” Sun kaiztawane, an tîne nu kaizta aizpa mîshina.
Kiwainmikawa kal
7 “Kiwainmika nantas akane, pil kîhtawane, pîriku iztawane, anpatne ka ussa kaizmanazi: ‘Azain at kit misharî kwan uzti.’ 8 Anpatne ussa sunkana ka kaiznazi: ‘Up kamisha maiztawane, ap kumira sari. Suasne nawa kumira nail kit kwincha, ap kumira pailnakima. An kwizta nuin kumira kwashina.’ 9 Usne kiwainmikasha aishtaish kaizkain, us anpat kaizta aizpa kirît akwa. 10 Kawarain u Dios îninta aizpa kiarawane, une ka kizarawa: ‘Aune watchi kiwainmika makpas. Aune au anpat kaizta aizpain kitmakpas.’ ”
Jesúsne diez aya pîttît ishturuza kakulninnamtu
11 Jerusalén pîpulura îmtuasmin, Jesúsne Samaria suwarakas Galilea suwarakas pînta. 12-13 Pîpulura naptuasmin, diez aya pîttît ishturuzne kunat kit attishtas Jesústa izara. Ussa paikuara: —Jesús. Au Kamtam. Aumîza iznat kit kiwainnaka. 14 Usparuza iznarawane, Jesúsne kaiznara: —Pariyara îrain, uruza iznanapa. Miwara îamtuasmin, uspane kakultît. 15 Wat parît nîjkultawane, mazain usparuztas kail kit ka tînta kwianta: “Diosne kwisha wari.” 16 Usne Jesúspa mittîkin wakpuj wain kit kaizta: “Aishtaish.” An ampune Samaria sura uzta. 17 Suasne Jesúsne mîmara: —Diez aya pîttît ishturuza kakulninnarau. ¿Mamaz nueve ampu mîntama purai? 18 An Samaria suras awain kailta, “Diosne wari” kizna. Au Israel kwalne “Diosne wari” kizashitchi. 19 Jesúsne ussa kaizta: —Kuhs kit îri. Na kaizta aizpa nîjkulta akwa, nune kakultît.
Dios înintu payu anazi
20 Fariseo awane Jesústa mîmaara: —¿Miza urama Dios ansa, awaruza îninna? Jesúsne usparuza sînkanara: —Mînminkas miza Dios înintu izamanazi. 21 Awane “Apain pura, sua pura,” kizamanazi. Dios îninakane, usne uruza, u kaijchura, îninnanazi. 22 Suasne usne kammuruza kaiznara: —Akkwan payukima apain uzamtuasmin, une Dios Painkul kailtu payura izshianazi. Une sun amtu payura ussa izamanazi. 23 Awane uruza ka kiznanazi: “Sua iztain. Sua tui. Apain iztain. Apain tui.” Ka kizarane, usparuza kanpaman. 24 Amta ippa aztune, ïn kwan kikimtu. Ippa kwan kikim. Kawarain Ampu namtîtmikane ippakanain azain anazi. 25 An ñancha usne akkwan naiztînazi. Ma payu uztuzne ussa kwayarînazi. 26-27 Noé uzasmin, wan awane tîrakukas kumirakas kuara. Ampukas ashampakas kasara kit kit uzara. Noé kanuara warawane, Diosne alu kinin kit pi pînninta, wan awa ianakima. Ampu namtîtmika mamasa akane, awane sunkana uzanazi. 28 Kawarain Lot uzasmin, wan awane tîrakukas kumirakas kuara. Uspane pait kit paininara. Pippa waara. Yal saara. 29 Sunkana an payura Lot Sodoma pîpuluras puzkane, Diosne ïnkas uk ïnkanakas chiyuras taizninnara, wan awa ianapa. 30 Dios Painkul akane, wan awane sunkana uzanazi. Sun payura uspane ussa izananzi. 31 Sun naizmu payura mînpazha yal îsalta puraruzne yal ayukta napman, chiwazha ukkana. Kawarain mînpazha nanta kal kitne, yalta kailman. 32 Lotpa ashampa nîjkultain. Us puij iztuasmin, usne ñam wan namta. 33 Us akwa uzshimtumikane wan karînazi. Na akwa imtumikane uznazi. 34 An kaiznamtus. Sun amtane paas ampu kamarain pitpailnazi. Diosne mazara chiyura nuninnazi. Mazara tîwij înazi. 35 Paas ashampane sulmin pia kîilnazi. Diosne mazara chiyura nuninnazi. Mazara tîwij înazi. 36 Paas ampune nanta kal kiilnazi. Diosne mazara nuninnazi. Mazara tîwij înazi. 37 Suasne uspane ussa mîmaara: —¿Anpat mînta sun kirînsa? Jesúsne usparuza sînkanara: —Kalpa irîttukin pîkumne kuana wanmakkanazi. Kawarain mînpazha kwail kikane, suain paiña kwail akwa naiztînazi.
Katsa mikwakas ampu irîtpa ashampakas kamtam kwinta
1 Jesúsne usparuza an kamtam kwinta kaiznat kit kamtanara, pailta payukima Diosta paikuanapa, Dios sînkanakima. 2 Usparuza kaiznara: “Katsa mikwane, Diosta ishkwatchimikane, mamaz pîpulura uzta. Wan awaruza wat nîjchiwal kinara. 3 An pîpulukimin maza ampu irît ashampakas uzta. Usne pailta payu katsa mikwara ît kit kaizta: ‘Kiwaincha. Na akwa nil kizha. Maza aliz ampune nawa kwail kirît.’ 4 Akkwan payukima katsa mikwane ussa kiwainshitchi. An ampu irît ashampa ussa kwail kizapta akwa, kwiztane usne ussa kaizta: ‘Diosta ishkwatchikas, wan awaruza wat nîjchiwal kinarakas, 5 akkwan payukima nawa amtu akwa, usne nawa kaizaptu. Katmizna nane nil kit kit ussa kiwainash, nawa an kaizapmanpa.’ ” 6 Anpatne an kaiznara: “Sun kwail katsa mikwa kaizta aizpa mîrain. 7 Diosne narîttuza nil kit kit kiwainashinazi. Diosne payuwara amtawara ussa paikumturuz paikuamtu aizpa sînkananazi. 8 Watcha kaiznamtus. Usne azain nil kit kit kiwainanazi. Sunkana ampu namtîtmika akane, ¿Dios pit nîjkulturuza wanmalnasa?”
Fariseo pariyakas gobierno pial sapmuruzkas kamtam kwinta
9 Jesúsne awara mamaz kamtam kwinta kiznara. Mamaztuzne usparuzpain wat makpas minñat kit mamaztuzpa kwail minñara. 10 Ka kaiznara: “Paas ampune Dios katsa yalta nuilta, Diosta paikwan. Mazane Fariseo awa azi. Mamazne Roma gobierno pial sapmumika azi. 11 Fariseo awane kun kit usminpain ka kwinta kirît: ‘Nane Diosta aishtaish kaiztus, na mamaz awakana chi akwa. Uspane walkumtuz mai. Uspane kwail kimtuz mai. Uspane mamazpa ashampa mîlamtuz mai. Nane an Roma gobierno pial sapmumikakana chi ish. 12 Nane domingo aizpa paas piji kumtuchish. Nane kana kit aizpa diez paimpa nail kit maza paimpa puizara mîlamtus.’ 13 Gobierno pial sapmumikane attishtain kun kit chiyurain izakshitchi. Us kwail tayaltu akwa, paiña pitchukin paat kit kaizta: ‘¡Dios. Nane kwail kirau. Nawa kiwain kit ap kwail kit aizpa kanincha!’ 14 Watcha kaiznamtus. Dios paiña kwail kit aizpa wat kultawane, gobierno pial saptumikane paiña yalta kailta. Mamazne, Fariseo awane, wat kultachin kailta. Mînpazha usparuzain anza tînta namtashitne, Diosne usparuza an we tînta namnintînazi.”
Jesúsne pashpara panara
15 Mane awane Jesústa pashparuza karaara, usparuza paninnanapa. Kammuruz sun izarawane, uspane awaruza kaiznara: “Pashpa Jesústa karaman.” 16 Sunkana Jesúsne pashparuza akwanat kit kaiznara: “Une pashparuza nawa anintain. Une ‘Jesústa îman’ kizman. Pashparuz Jesústa aashimtu akwa, Diosne usparuza îninnashina. Pashpakana uztain, Dios uruza îninnanapa. 17 Watcha kaiznamtus. Diosne uruza îninnashimtu. Pashparuzne Dios kaizta aizpa mîashimtu. Kawarain Diosta mîrain, Dios umîza îninnanapa.”
Maza kwazpa awa Jesúskasa kwinta kimtu
18 Maza katsa mikwane Jesústa mîmara: —Wat kamtam. ¿Chima kinpai, chiyura pailta payukima uzna? 19 Jesúsne ussa sînkara: —¿Chitma nawa wari kiztus? Diosmin wari. Mînminkas wat chi. 20 Nune Dios îninta aizpa pian: “Mamazpa ashampakasa pitmun. Piantamun. Walkumun. Mamazpa pîrail kaizmun. Up taittawakas up akkwawakas wat paranari.” 21 Katsa mikwane kaizta: —Nane ainkiasmin Dios wan îninta aizpa kirau. 22 Sun mîrawane, Jesúsne ussa kaizta: —Nune mama pitchin we kirît. Wan mîj aizpa painin kit puizara mîlanari, chiyura kwazpa kulna. Suasne at kit nawa kanpazha, kizta. 23 Sun mîrawane, usne tayalmîzta, akkwan pial mîj akwa. 24 Jesúsne ussa iz kit kaizta: —Kwazpamikane Dios înintura wat nusachi. Sua napna sam i. 25 Camellone caballokana i. Camellone chîhku kasura mizurainkas napsachi. Kawarain an sam i, kwazpamika Dios înintura napna. 26 Sun mîraruzne iztaspaat kit kaizara: —Katne, ¿Mînma watsat mîlshinasa? 27 Jesúsne sînkanara: —Diosne awa kimtuchi aizpa kishina. 28 Pedrone Jesústa kaizta: —Izti. Aune au mîj aizpa tîwij ît kit nua kanparamakpas. 29-30 Usne kaiznara: —Watcha kaiznamtus. Dios îninta aizpa mîmtumika yalkas, ashampakas, kwampihshkas, aimpihshkas, papihshkas, akkuhshkas, pashpakas tîwij îtne, Diosne apain an akkwan mîlananazi. Mamaz payura Diosne chiyura uzninanazi, pailta payukima.
Mamasa Jesúsne nane inash kiztu
31 Jesúsne doce kammuruza paimpa akwanat kit kaiznara: “Mane Jerusalén pîpulura numîzchain. Sua ñamin Dios kainammmika Ampu namtîtmikawa parît aizpa kinazi. 32 Uspane mamaz Judío awachiruza nawa chîhkaanazi. Uspane nawa ultimal kizanazi. Nawa kwail kizanazi. Nawa ilpi kianazi. 33 Nawa aim kiat kit piantaanazi. Sunkana kutña payu pailkane, nane kakulnash.” 34 Kammuruzne Jesús kaizta aizpa chinkas mîarachi. Jesús kaizta aizpa puintît akwa, piankamasachi.
Jesúsne kasu sîptîtmikasha izkulnintu
35 Jesús Jericó pîpulura kasha piannamtuasmin, kasu sîptîtmikane mimamin uz kit pial paikumtuazi. 36 Akkwan awa pînnamtu mîrawane, usne awara mîmanara: “Sun ampune ¿chima kimtui?” 37 Uspane ussa sînkaara: —Jesúsne, Nazaret pîpuluras, pîntu. 38 Suasne usne ka tînta akwara: —Jesús, nune au ñamin Davidpa pampa pashpa i. Nawa iz kit kiwaincha. 39 An ñancha îmturuzne ussa kurunaara, kalpain uznapa. Usne an tînta akwat kit kaizta: —Jesús, nune au ñancha Davidpa pampa pashpa i. Nawa iz kit kiwaincha. 40 Suasne Jesúsne kun kit kaiznara: —Une ussa nawa kararain. Us Jesúspa kasha piannakane, Jesúsne ussa ka mîmara: 41 —¿Chima nua kinpai? ¿Chima pashimtus? Usne ka sînkara: —Anpat. Kasu izkulnincha. 42 Jesúsne ussa kaizta: —Kasu izti. Nawa nîjkulta akwa, kasu izkulti. 43 Sun urain usne izkul kit Jesústa kanpat kit kaizta: “Diosne kwisha wari.” Sunta izamtuasmin, wan awane kaizamîzta: “Diosne kwisha wari,” kizara.
Jesúskas Zaqueokas
1 Jesúsne Jericó pîpulura nap kit pînmîztuazi. 2 Suane maza ampune, Zaqueo muntîtmikane, uzta. Usne Roma gobiernowa kal kit kit uspa katsa pial sapmumika azi. Uskas kwazpamika azi. 3 Usne Jesústa attishtain iz kit piankamshira. An tam awane akkwan awa akwa ussa izmanamtît. 4 Suasne usne an ñancha ãïn îra, Jesús sun miwara pîntu akwa. Suasne usne Jesústa izna tîra nut kit uzta. 5 Jesúsne us tukin pianat kit ussa izak kit kaizta: —Zaqueo. Azain kihshti. Mane nane nukasa up yalta nukkulnash, kizta. 6 Suasne Zaqueone azain tîras kihsh kit wat kul kit ussa paiña yalta mîlta. 7 Wan awa sunta izarawane, uspane usparuzpain Jesúspa kwail kizat kit ka kaizara: —Jesúsne kwail kimtuzkasa yalta nap kit nukkultu, kizara. 8 Kwiztane Zaqueone awaruzpa paizkakin kun kit Anpatta kaizta: —Anpat, izti. Ap kwail kit aizpa min kit chîhkat akwa, nane kakwa mîj aizpa puizara mîlanamtus. Na mamaztuztas an pînta saptane, na walkwat aizpa ampara pijikima kailninnanash. 9 Jesúsne ussa kaizta: —Mane Diosne nuakas up kwaltakas u kwail kiarît aizpa wat kulnat kit uruza watsat mîlnara. Une aukanain mama au pampa Abrahampa kwal mai. 10 Chiyuras ampune apain azi, awa karîttuza sainana, uspa kwail kiarît aizpa wat kulninnana.
Diez pial kamtam kwinta
11 Uspa sunta mîamtuasmin, Jesúsne mamaz kamtam kwinta kaiznamîzta. Usne Jerusalén pîpulura kasha tuazi. Uspane Dios awaruza îninna anpain minñara. 12 Katmizna Jesúsne kaiznara: “Ainki mikwane attish sura îmîzta, akkwan su sap kit akkwan awaruza îninna. Suasne mamaz payura kailshina. Kwizta sun sura saptawane, paiña su kailshina. 13 Îmtuchasmin, usne diez kiwainmuruza akwanara, wan awaruza akkwan pial mîlan. Usparuza kaiznara: ‘An pialkasa pait kit kana kitpa, na kailnakima.’ 14 Sunkana sun sukis awaruz ainki mikwasha izashitchi akwa, uspane uspa pit ainki mikwasha înin kit kaizara: ‘Sun ampura, sun ainki mikwasha, aumîza îninnanapa paashitchimakpas,’ kizara. 15 Sun sura kail kit saptawane, usne mikwakana îninmîzta. Paiña sura kailtawane, usne paiña kiwaintuza, paiña pial mîlattuza, akwanara. Usne yawa pial kana kiarît piankamshira. 16 An ñancha kiwainmikane us tukin ît kit kaizta: ‘Anpat. Up pialkasa nane mamaz diez pial kana kirau,’ kizta. 17 Katsa mikwane ussa kaizta: ‘Wat kirît. Nune wat kiwainmika i. Pitchin pialkasa nil kit akwa, nune diez pîpulura îninnazi,’ kizta. 18 An kwizta kiwainmikane us tukin ît kit kaizta: ‘Anpat. Nane up pialkasa mamaz cinco pial kana kirau,’ kizta. 19 Mikwane ussa kaizta: ‘Nukas cinco pîpulura îninnazi,’ kizta. 20 Mamaz kiwainmikane us tukin ît kit kaizta: ‘Anpat. Apain up pial mîj ish. Up pial pïntain iptît mîjarau. 21 Nu tînta înintu akwa, nane nua ishkumtuarau. Nu kal kimtuchikas, kana kimtu. Nu pippa mal tuchikas, pippa paktu,’ kizta. 22 Suasne ainki mikwane ussa kaizta: ‘Nune kwail kiwainmika i. Nu sun kaizta akwa, nane nua kwail kirît kiznash. Nune na awara tînta înintu pian. Kal kimtuchikas, kana kimtus. Pippa maltuchikas, pippa paktus. 23 ¿Chikishma ap pial winmukin chîhkamas, an akkwan kana kinpa? Suasne na kailtu payura ap pial ma pitchinkasa sapshinash.’ 24 Usne kasha kuntuza kaiznara: ‘Ap pial mîjatmikaras nakat kit an diez pial mîjatmikasha ap pial mîlarain.’ 25 Uspane ussa kaizara: ‘Anpat. Usne me diez pial mîja.’ 26 Katsa mikwane sînkanara: ‘Ap pit kaiznamtus. An akkwan mîjmikane an akkwan sap mîlanazi. We mîjmikane us wemin mîj aizpa nakarînazi. 27 ¿Mîntama nawa aliz awa purai? Uspane na usparuza îninnara pashiarachi. Usparuza apain karat kit na iztukin piantaninnarain,’” kiznara.
Jesúsne Jerusalén pîpulura naptu
28 Sun kiztawane, Jesúsne Jerusalén pîpulura numîzta. 29 Betfagé pîpulurakas Betania pîpulurakas kasha akane, Olivos îzara piannaara. Jesúsne paas kammuruza îninnat kit usparuza kaiznara: 30 —Sun pîpulura au izkwakpara naptain. Pîpulu pîjta naptukin une burra kantît wanmalpailnazi. Makima mînminkas ussa uztachi mama. Ussa chîht kit apain kararain. 31 Mînpazha “¿Chikishma burro chîhtuas?” mîmakane, “Anpatne ussa anuzshimtu,” kiztain. 32 Suasne kanpamtuzne îil kit Jesús kaizta aizpa wanmalpailta. 33 Burro chîhttuasmin, burrowamikane mîmara: —¿Chikishma burro chîhtuas? 34 Uspane sînkailta: —Anpatne ussa anuzshimtu. 35 Jesústa kararawane, uspane uspa pïnkasa caballo pashpara palkwanara. Suasne uspane Jesústa ussa anuzninpailta. 36 Jesús burrora anuztuasmin, akkwan awane uspa pïn mikin kîhaara, Jesústa wat minñamtu akwa. 37 Olivos îzara pînarawane, Jerusalén pîpulura piannamtuasmin, kwisha akkwan kammuruzne wat kulamîzta. Jesús iztasparît kal kit aizpa izara akwa, uspane ka tînta kaizara: “Diosne kwisha wari.” 38 Ankana kaizara: “Dios înintamikane kwisha wari. Katsa mikwa i. An chiyuras atmikane aumîza watsat mîlnamtu,” Dioskasa kalpain uzanapa. Aune chiyura Dios kwisha wari kizmuspas 39 Akkwan awane purara. Mînpazha Fariseo awaruzne kaizara: —Kamtam. Up kanpamtuza sun pit Diosta paramtu aizpa paraninman, kizara. 40 Jesúsne sînkanara: —Umîza kaiznamtus. Ap kammuruz puñain purane, chinkas kizarakine, an katsa ukne kawarain pit kwianshina. 41 Jerusalén pîpulura an kasha at kit iztawane, usne Jerusalén pîpulura uztuz akwa az kit usparuza kaiznara: 42 “U Jerusalén pîpulura uztuzne ma kimtu aizpa wat piankamasachi. Makima une watsal uzna we pian. Mane wan kimtu aizpa uruza puintît i, piankamamanpa. 43 Mamaz payura, aliz awane aat kit Jerusalén pîpulu pianamal uzanazi. Uspane apain uztuza salpîn titsaanazi. Uspane pîpulu piannakin waya kianazi. 44 Uspane yalkas pîpulu kalpialkas kiakpînanazi. Uspane wan pîpulura uztuza piantananazi. Wan chiwal uk azpian kit kiakpînanazi. Dios an pîpulura uztuza atkas, une ussa nîjkularachi, uruza watsat mîlnanapa. Katmizna na kaizta aizpa kirînazi.”
Jesúsne Dios katsa yalta naptu
45 Kwiztane Jesúsne Dios katsa yalta nap kit painintuza pianamal îninnara. Kwiztane Jesúsne 46 usparuza kaiznara: —Dios pînkîhkin ka parît, “Ap yaltain Diosta paikwashina.” Apain une ap yalta walkummikawa kulkana saara. 47 Pailta payu Jesúsne Dios katsa yalta kamtana îra. Katsa pariyaruzkas Moisés kaizta aizpa kamtamtuzkas, Judío pîpulu înintuzkas ussa piantashiara. 48 Wan awa ussa kwisha mîashimtu akwa, uspane Jesústa piantamanamara.
Jesústa mîmaamtu
1 Maza payu Jesúsne Dios katsa yalkin awara kamtanat kit Dios watsal pit kainanamtu tuara. Katsa pariyaruzkas, Moisés kaizta aizpa kamtamtuzkas, îlapa Judío îninturuzkas ussa îat kit 2 ka kaizara: —¿Miza tuntumaka kimtus? ¿Mînma nua îninta, nu kimtu aizpa kin? 3 Usne usparuza sînkanara: —Nakas nua mîmananash. Mane kainazha. 4 Juanne, awara munmu kimikane, apain azi. ¿Mînma Juanta munna îninta? ¿Diosne ussa înintaki? ¿Awane ussa înintaki? 5 Uspane usparuzpain kwinta kiat kit kaizara: “Au Dios Juanta înintît sînkaarane, Jesúsne aumîza ka mîmananazi: ‘¿Chikishma ussa nîjkulashitchi? ¿Chikishma us kaizta aizpa kiashitchi?’ 6 Awa Juanta înintît sînkaarane, apas awane aumîza uk kiamîznazi. Uspane Juan Dios pit kainammmika azi watcha minñamtu.” 7 Suasne uspane Jesústa sînkaara: —Aune mînma Juanta, munnammikasha, înintît pianchimakpas. 8 Suasne Jesúsne usparuza kaiznara: —Nakas uruza mînma nawa sun kin înintît kaiznamanash.
Kwail kal kimtuz kamtam kwinta
9 Jesúsne awara kamtam kwinta ka kainanamîzta: “Maza ampune wankail pîppa sau warît mîj. Usne mamaz kal kimmikasha paiña sukin unanara, pippa pak kit nailnapa. Suasne mamaz attish sumal îrît akkwan payukima. 10 Paktu payu taizkane, pamikane paiña kiwainmumikasha îninta, pamikawa wankail pippa sapnapa. Paiña su kal kimturuzne kiwainmumikasha aim kiat kit ussa chinkas mîjchi pianamal îninara. 11 Pamikane mamaz kiwainmumikasha îninta. Paiña su kal kimturuzne ussa aim kiat kit kwail pit kaiz kit kîlmin pianamal îninara. 12 Pamikane an kutña piji mamazta îninta. Uspane ussa aim kiat kit wankail pippa sauras nuppain îninñara. 13 Suasne wankail sau pamikane usmin minta: ‘¿Chima kinpai? Nane ap pashimtu painkulta îninnash. Ussa pashimtus. Uspane ussa kwail kin ishkuanazi.’ 14 Uspa ussa izarawane, kal kimturuzne usparuzpain kaizara: ‘Anne su sapmumika i. Ussa piantana îzhain, paiña su sapna, supamika namna.’ 15 Kal kimturuzne ussa su pianamal nuppainñat kit piantaara. Suasne Jesúsne usparuza mîmanara: ‘Supamikane su kal kimturuza, ¿Chima kirîsna? 16 Usne paiña sukin kailtînazi, su kal kimturuza piantanana. Kwiztane paiña su mamaz kal kimturuza chîhkanazi.’ ” Sun mîarawane, uspane kaizara: —Sunkana Dios kishimanazi. Aune sun kwail awakana chimakpas. 17 Jesúsne usparuza iznat kit kaiznara: —Une Dios pînkîhta para aizpa piankamtain. Sunkana parît: “Yal sararuzne an watsal uk kwairît. Kwiztane sun watsal uk kalpialkin wara, yal an tînta sana.” 18 Ukta taiztumikane pitti pittin kîztîshina. Uk mînpazhara taiztane, ukne ussa pak pak kirînazi. 19 Pariyawa înintuzkas Moisés kaizta aizpa kamtamtuzkas Jesús kaizta aizpa mîara. Jesús sun kamtam kwinta uspawa kwinta kinara akwa, uspane Jesústa sun payura pizshiara. Awara ishkuamtu akwa, uspane ussa pizasachi.
Gobierno awaruza pial puisamtu
20 Uspane awaruza îninnara, Jesústa izna. Uspane wat awakana namninashira, chiwazha Jesús kaizta aizpa mîanapa. Uspane Jesús ñanta pit kaizta aizpa saishiara, ussa katsa mikwara chîhkashinamtu akwa. 21 Uspane ussa ka kaizara: —Kamtam. Aune nu kaiztu aizpakas nu kamtamtu aizpakas nil i pianmakpas. Wan awara kawarain kinamtu. Nune Dios kaizta aizpa watcha kamtanamtu. 22 Suasne uspane Jesústa ka mîmaara: “Cesarne Roma pîpulu katsa mikwa i. ¿Miza makai? ¿Pial ussa tapuskiwas? ¿Tana watki?” 23 Jesúsne uspa kwail minñara aizpa pian kit kaiznara: 24 —Une nawa kwail kin kininshiamtu. Apas pial izna ancha. ¿Mînpa awa matsîhma an pialkin izamtuas? ¿Mînpa munma parît? Uspane sînkaara: —Katsa mikwa Cesarpa matsîh i. Paiña mun pialkin parît. 25 Usne kaiznara: —Watcha. Roma gobierno katsa mikwara pial tana kizamtune, sun pial Cesarta tarain. Kawarain Dios uruza kaiztu aizpa kirain. 26 Jesúsne uspa mîmaarît aizpa awa iztakin wat sînkanara. Uspane ussa kwail parît kizamanamarît. Uspane us sînkara aizpa iztaspaat kit puñain paarît.
¿Awane mamasa uztuki?
27 Mînpazha Saduceo awaruzne ussa aara. Uspane irîttuz mamasa uzamtuchi minñamtu. Uspane ussa kaizara: 28 —Kamtam. Moisésne aimpihshpa para. Aimpihsh irîtne, pashpa mîjkine, paiña aimpihshne aimpihsh irîtpa ashampara mîltawa, us akwa pashpa mîlna. 29 Siete aimpihshtuzpain uzara. An aimpihshne ashampa mîlta. Usne pashpa mîltachi irît. 30 Mamaz aimpihshne sun ashampara mîlta. Uskas pashpa mîjchi irît. 31 Mamaz aimpihshne sun ashampara mîlta. Uskas pashpa mîjchi irît. Chiwal siete aimpihshtuzne sun ashampara mîlat kit pashpa mîjchi iarît. 32 Kwiztane ashampakas irît. 33 Katmizna, awa mamasa uztawane, “¿Mînma an ashampara mîlshinasa, siete aimpihshtuzpain ussa mîlaara akwa?” 34 Jesúsne usparuza sînkanara: —An sukin ma uztuzne kasara kiamtu. Ampune ashampara mîltu. Ashampakas ampura mîltu. 35 Diosne nîjkulturuza nananazi, mamasa uzanapa. Irîttas uztawane, ampune ashampara mîlkain. Ashampakas ampura mîlkain. 36 Uspane sua mamasa iamanazi. Dios usparuza mamasa uzninnarawane, uspane Dios painkul manazi. Diospa ángelkanain manazi. 37 Watcha. Irîttuzne mamasa uzanazi. Ñamin Diosne Moisésta tî impaktîmtukin kwinta kira. Sun pînkîhta Anpatne ka kizta: “Nane Abrahampa Dios ish. Isaacpa Dios ish. Jacobwa Dios ish.” Ñamin iarîtkas, sun kutñaruz makima Dioskasa uzamtu. 38 Diosne usparuzpa Dios i. Diosne irît awaruza îninnamtuchi. Diosne wan awa uzamtu pian. Katmizna Diosne akwarîttuza uzninanazi, us iztakin uzanapa. 39 Suasne mînpazha Moisés kaizta aizpa kamtamtuzne ussa sînkaara: —Kamtam, nune nil kwinta kira. 40 Ishkumtu akwa, mînminkas ussa an mîmaarachi.
Dios narîtmika ¿Mîn painkul mai?
41 Jesúsne mîmanara: —¿Chikishma awane “Cristo Davidpa painkul i,” kizamtu? 42 Davidne sunkana kanta pînkîhta pat kit “Cristo Anpat i,” kizta. Ka parît: “Diosne ap Anpatta kaizta: ‘Nune ap makin uztui. 43 Nane nu akwa aliztuza waya kinash, usparuza anuppanakima, nu usparuza îninnanakima.’ ” 44 Davidne ussa “ap Anpat i” kizta. ¿Uskas pampa Davidpa painkul ki?
Jesúsne Moisés kaizta aizpa kamtamtuzpa tînta pilchanamtu
45 Wan awa ussa mîamtuasmin, Jesúsne paiña kammuruza kaiznara: 46 “¡Kwiraruin! Moisés kaizta aizpa kamtamtuza iztain, uspakana uzmanpa. Uspane aks kwaksham kwashiamtu, awa usparuzpa wat minñanapa. Uspane pîpuluwara chashiamtu, awa usparuza ‘wat kîntîre’ kizanapa. Uspane Judío kammu yalta nappat kit an ñancha wat uzmukin uzamtu, awa usparuzpa wat minñanapa. Uspane pishtara an ñancha chaamtu, an wat uzmura sayana, awa uspa an katsa namtît piankamanapa. 47 Ampuwa irît înkwa mîj aizpa walkwatpane, uspane awa iztakin akkwan pitkasain kukaizamtu. Uspane pîrail appamtu. Diosne usparuza tînta ilnanazi, akkwan naiznakima.”
Puiza ampu irîtpa ashampane pial Diosta tamtu
1 Jesús Dios katsa yalkin tuasmin, usne kwazparuza iznara. Uspane pial sapmukin kunat kit uspa pial sua kiainñara. 2 Usne puiza ampu irîtpa ashampara izta. Sun ashampane paas pialmin mîlara. 3 Jesúsne ka kizta: —Watcha kaiznamtus. An puiza ampu irîtpa ashampane kwazparuzkin an akkwan mîlara. Kwazparuzne an pitchinmin mîlaara. 4 Kwazparuz uspa pial tizta aizpa Diosta mîlaarakas, an puiza ashampane wan mîj aizpa mîlara.
Mamaz awa Dios katsa yalta azpian kit kiakpînanazi
5 Mînpazha kammuruzne Dios katsa yalpa ka kaizta: —Awane Dios katsa yal wat ukkasa sara, paiña watsal yal iznapa. Awane chiwazha Diosta mîlmu, Dios katsa yal awa iztakin watsal iznapa. Suasne Jesúsne kaiznara: 6 —Mamaz payura mamaz awane u wan chiwal izamtu aizpa azpianat kit kiakpînanazi, kiznara.
Awane akkwan payurakima naizarînazi
7 Kammuruzne ussa mîmaara: —Kamtam. ¿Chi payurama awane katsa yalta azpianninnazi? ¿An payura chima kirînsa, au an ñancha piankamanapa? 8 Jesúsne kaiznara: “Kwiraruin. Uruzpain iztain, awaruza ñanta kain kiamanpa. Akkwan awane ‘nane Cristo îninmika ish’ kizanazi. Mamaztuzne ka kizanazi: ‘Nane Cristo ish.’ Mamaztuzne kain pit kizanazi: ‘Mane Cristo anpain i,’ kizanazi. Usparuza mîman. Usparuza kanpaman. 9 Gobierno mamaz gobiernokasa waya kikane, awakas katsa mikwakasa waya kikane, ishkuman. An ñancha uspane waya kiarawa. Wansîhne pailtuchi mama.” 10 Suasne Jesúsne kaiznamîzta: “Mamaz suras awane mamaz suras awakasa waya kianazi. Katsa mikwane mamaz katsa mikwakasa waya kinazi. 11 Akkwan suwara tînta ulsamîznazi. Akkwan awane akkwan sura yak kiat kit naizanazi. Katsa kikas awaruza piznanazi. Awane akkwan iztasparît kal kasha chiyura izanazi, usparuza ishkuninnakima. 12 Sun kitchasmin, uspane uruza piznat kit naizninnanazi. Uspane uruza Judío kammu yaltakas kajchirakas sîpninnanazi. Nu nawa pian akwa, uspane uruza katsa mikwarakas ainki mikwarakas chihtîra piznat kit tainñanazi. 13 Sun payura une usparuza Dios watsal pit kainananazi. 14 Sunkanain piankamtain. An ñancha u miza mamaztuza sînkana minman. 15 Nane uruza kiwainanash, usparuza watsal pit kwinta kianapa. An aliz awane u wat pit kwayamanazi. Uspane u kaiztu aizpa ‘kwail i’ kizamanazi. 16 Papihshkas, aimpihshkas, kwalkas, izmuruzkas uruza gobiernora chîhkanazi. Uspane mînpazharuza piantaninanazi. 17 Akkwan awane na akwa uruza naizninnanazi. 18 Naizamtukas, u izpulne watsaarînazi. 19 Uruza tînta namnintain, umin watsat mîlnanapa. 20 Suldaruruzne Jerusalén pîpulura pîlzaakane, une awa an pîpulura azpiananapain piankamanazi. 21 Suasne Judea sukin uztuzne înkal îzara îarawa. Jerusalén pîpulura uztuzne tas puzarawa. Nanta uztuzne pîpulura napman. 22 Sun payura Diosne paiña narîttuza, Israel awaruza, naizninnanazi, Dios pînkîhta parît aizpa pailnakima. 23 Sun payura ashampa pîja waruzkas ashampa chitchu kwintaruzkas naizarînazi. Wan awane kwisha naizarînazi, Dios an sukin uztuza ilnamtu akwa. 24 Mînpazha iarînazi, mashtikasa waya kiamtu akwa. Uspane kajchira waruza mamaz sura mîlnarînazi. Mamaz suras awane, Judío awachiruzne, Jerusalén pîpulura wan chiwal azpiantînazi, wan Judío awachiruza înintu aizpa pailnakima, wan Dios pînkîhta parît aizpa pailnakima.”
Dios Painkul mamasa anazi
25 “Suasne awane parakas, palapcharakas, kîmarakas, iztasparît aizpa izanazi. Wan suras awane chiwazha kimtu aizpa piankamamanazi. Uspane ishkuarînazi, ñam pi aztu akwa, inkwa pi nuppaintu akwa. 26 An sura chi kirînsa minñamtuasmin, awane nainñarînazi, ishkwantu akwa. Wanne chiyura wa aizpa tînta ultînazi. 27 Suasne uspane Chiyuras Ampura izarînazi. Us wanishkin amtuasmin, usne uspa izarakin tînta nam kit kwisha watsal namtînazi. t 28 Na kaiztu aizpa kimîzkane, uruzpain tînta t 21.27 Dn 7.13 namtain. Chiyura izak kit watsal kultain, u akwa pui tarîtmikane anpain i, umîza chîhtna.” 29 Usne usparuz mamaz kamtam kwinta kinara: “Higuera tîrakas, wan tîrakas, iztain. 30 Kîh kwizkane, une pul panapain i piankamanazi. 31 Kawarain na kaiztu aizpa izakane, Diosne awaruza îninna anpain. Sun piankamtain. 32 Watcha kaiznamtus. Sun Judío awaruzkanain iarachasmin, na wan kaiztu aizpa kirînazi. 33 Chiyukas au sukas pailtakas, ap pit na kaiztu aizpa mizurainkas pailmanazi. 34 Iz kit nil uzizanaka. Uruzpain izkultain. Akkwan pishta iztane, kwisha akkwan chappi kwatne, nil minsachi. Sunkana kiman. Chappi kwat kit kumira kwatne, piman. Nîjmin uztain. Apain uzamtuasmin, kumirain minman. Pialmin minman. Maij sarane, chitchu tîttarane, azain niltîm. Aptane, iwal. Kawarain Chiyuras Ampu namtîtmikane azain anazi. 35 Chiyuras Ampu namtîtmikane wan su uztuza azain anazi, chitchu tît tarît niltukanain. 36 Pailta payu aizpa izkulat kit Diosta paikwarain, tînta kulanapa, an sukin kimtu aizpa uruza îamasanapa, Chiyuras Ampu namtîtmikakasa uzanapa.” 37 Jesúsne pailta payuwara Dios katsa yalta kamtanara. Amtawara usne pîpuluras puz kit Olivos îzara uzta. 38 Wan awane tîlawain Dios katsa yalta aara, ussa mîana.
Awane Jesústa pizshiamtu
1 Pascua pishta kasha pamtu. Sun pishtakin Judío awa pan sarane, kiña winkain. 2 Katsa pariyaruzkas Moisés parît aizpa kamtamtuzkas Jesústa kain sayat kit pizashimtuazi, ussa piantana. Wan awaruza ishkuara akwa, uspane Jesústa pizarachi. 3 Suasne Satanásne Judasta, Iscariote muntîtmikasha, pizta. Usne kammumika nam kit mamaz once kammuruzkasa chara. 4 Usne ît kit pariyaruzpa mikwaruzakasa Dios katsa yal izmuruzakasas kwinta kinara, Jesústa usparuza chîhkanapa. 5 Uspane wat kulat kit ussa pial taana namarît. 6 Usparuza chîhkan namtawane, usne wat payura saira, ussa akkwan awa tuchira chîhkanpa.
Jesúskas paiña kammuruzkas kuamtu
7 Suasne Pascua pishta taizta. Sun pishta izamtuasmin, pan samtu, kiña wintachin. Uspane pîrikukas piantam. 8 Jesúsne Pedrorakas Juantakas înin kit ka kaizta: —Ît kit Pascua pishta sarain, au kwan. 9 Uspane ussa mîmaara: —Aune ¿Mîntama pishta sanapai? 10 Usne usparuza sînkanara: —Mîrain. Pîpulura naptazasmin, une maza ampu kwazi kalpu kwamikasha wanmalpailnazi. Ussa kwizpa kanparain, paiña yalta napnakima. 11 Yalpamikasha ka kiztain: “Kamtamne aumîza ka mîmana îninta: ¿Mînta up kalmal tui? Suane nane Pascua kumira ap kammuruzkasa kwanash.” 12 Suasne usne umîza yalkin kwashta katsa kalmal ananazi. Suane pishta sarain. 13 Uspane îil kit us kaizta aizpa wanmalpail kit sua Pascua kumira sailta. 14 Kumtu ura taizkane, Jesúsne misharî uzta, paiña înintaruzkasa kwan. 15 Usne usparuza kaiznara: —Naiztuchasmin, nane ukasa an Pascua kumira kwashimtus. 16 Apain mamaz Pascua kumira kumanash. Chiyura, Dios paiña kwaltuza îninnapa akane, nane mamasa Pascua kumira kwanash. 17 Taza piztawane, Diosta aishtaish kiztawane, Jesúsne kaiznara: —An taza sap kit vino pi uruza nailtain. 18 Uruza kaiznamtus. Makis an sukin an vino pi kumanash, Dios ankima, Dios înintukin, paiña kwaltuza îninnana. Suasne sua mamasa sun kwanash. 19 Pankas saptawane, Diosta aishtaish kiztawane, Jesúsne pan kîz kit usparuza nail kit kaiznara: —An panne ap ña i. Na u akwa inash. Sun kirain, nawa nîjkulanapa. 20 Kapal kuarawane, usne taza piz kit kaiznara: —An vino pi ap aimpi i. Ap aimpi puzkane, nane u akwa irînazi, u kwail kiarît aizpa wat kulnana. Sunkana ñamin Diosne kin namta, u kwail kiarît aizpa wat kulnana. 21 Mane iztain. Nawa chîhkamtumikane an misharî nakasa kumtu. 22 Chiyuras Ampu namtîtmika irînpa narîtkas, nawa chîhkamtumikane kwisha tayal kit naiztînazi. 23 Uspane usparuzpain mîmaat kit ka kizara: “¿Mînma sun kinsa?”
¿Mînmikama an tînta mika i?
24 Uspane usparuzpain aliz kaizat kit mîmaara: “¿Auruzpain mînmikama an tînta mika i?” kizara. 25 Jesús usparuza kaiznara: “Mamaz suras katsa mikwane paiña suwara uztuza tînta îninnamtu. Mînpazha katsa mikwaruzne ka kizamtu: ‘Aune awara kiwain namtamakpas.’ 26 Katsa mikwa sunkana uzamtukas, une sunkana uzman. An katsaruzne an ainkimikakana namtawa. Înintaruzne kiwainmumikakana namtawa. 27 ¿Mînminkas an tînta i? ¿Misharî uzmumika an tînta mikaki? ¿Kumira karammika an tînta mikaki? Misharî uzmumika an katsakas, nane apain arau, awaruza kiwainnana. 28 Awa nawa naiznintukas, une nakasa maamtu. 29 Ap Taittane nawa nara, awaruza îninnanapa. Kawarain nane uruza nanamtus, nakasa îninnapa. 30 Suane une ap înintukin nakasa kuanazi. Suane ap înintukin une uzanazi, doce Judío kwaltuza mîmanapa, usparuza kaizapnapa.”
Jesúsne Pedrora kiztu: Nune nawa pianchish kiznazi
31 Jesúsne sun kaizta: —Simón, Simón. Izti. Satanásne Diosta paikwara, uruza ulmalnapa, Diosta an nîjkulamanpa. 32 Nane nu akwa Diosta paikwarau, nu Diosta nîjkulnapa, Dios pit mainmanpa. Nu nawa kailtawane, up añaruza, ap kammuruza, kiwainnari, an tînta namanapa. 33 Simónne ussa kaizta: —Anpat. Nane nu akwa kajchira înpain, inakima. 34 Jesúsne ussa kaizta: —Pedro, nane nua kaiztus. Ma payu aral kayu aztuchasmin, nune kutña pijikima “nane ussa pianchish” kiznazi.
Uspane ussa kwail kianapain
35 Suasne Jesúsne usparuza kaiznara: —An ñancha uruza îninnakane, nane uruza pial tuh mîjchikasakas tuh mîjchikasakas zapato nukchikasakas îninnara. ¿Une chiwazha wemakkiwas? Uspane ussa sînkaara: —Chinkas wechimakpas. 36 Usne usparuza kaiznara: —Makis, pial tuh mîjne, kwarawa. Kawarain tuh kwarawa. Mashti mîjkine, kwaksham painintawa, mashti paina. 37 Mane nane Dios pînkîhta na akwa parît aizpa ka kiznamtus: “Usne kwail awakana naizanazi.” Wan nawa parît aizpa kimtu. 38 Uspane kaizara: —Anpat. Izti. Apane paas mashti tu. Usne kaiznara: —Min kwinta kirain.
Jesúsne Olivos îzakin Diosta paikumtu
39 Jesúsne pîpuluras puz kit Olivos îzara nura. Sua sunkana îkamtît. Kammuruzne ussa kwizpa kanpaara. 40 Sua pianakane, usne usparuza kaiznara: “Diosta paikwarain, kwail kishiamanpa.” 41 Jesúsne usparuztas treinta sakima ît kit wakpuj wain kit Diosta kaizta: 42 “Ap Taitta. Nu nawa naizninshitchine, nawa naizninmun. Nu kishit aizpa sari. Na kishit aizpa samun,” kizta. 43 Maza ángelne chiyuras ara, ussa tînta kiwainna. 44 Akkwan naiztuasmin, Jesúsne an tînta Diosta paikwara. Usne kwisha katsa pairara pi pairamîzta. Kwisha katsa pairara pi aimpikana pilta taizara. 45 Paikwatpane, kuhs kit kammuruz purakin kailta. Uspa tayaltu akwa, pittarît. 46 Usne kaiznara: —¿Chikishma pittamtuas? Kuhs kit Diosta paikwarain, u kwail kishiamanpa.
Jesústa pizamtu
47 Jesús paiña kammuruzkasa kwinta kimtuasmin, akkwan awane ustukin aara. Judaskas, maza doce kammuruztas, an ñancha îra. Jesústa kasha ît kit paiña matsîhkin putchunta. 48 Jesús ussa kaizta: —Judas. ¿Nawa putchuntuasmin, nune nawa kwail kimtukish? ¿Nawa kwail awaruza chîhkamtukish? 49 Wan kit aizpa izamtuasmin, Jesúskasa uztuzne ussa mîmaara: —Anpat. ¿Mashtikasa waya kimuskiwas? 50 Mazane usparuztas katsa pariyawa kiwainmikasha pian kit numal kail yalta. 51 Jesúsne kaizta: —Sunkana kimun. Jesúsne kiwainmikawa kail sîn kit ussa namtara. 52 Suasmesa Jesúsne katsa pariyaruzpa mikwaruzakas, Dios katsa yalpa izmuruzakas, Judío îlapa înintuzakas kwinta kinara. Uspane ussa pizshiara, kajchira sîpna. Usne usparuza mîmanara: —¿Une mashtikasa tî salakasa aamuskiwas, wiyakimmikara pizna? 53 Nane pailta payukima Dios yalta ukasa tuarau. Suane une nawa pizarachi. Mane une nawa pizashimtu, Diablo tîlkwilta înintu akwa, paiña kwail kinpa.
Pedrone Jesústa pianchish kiztu
54 Suasne uspane Jesústa pizat kit katsa pariyawa yalta mîlara. Pedrone attishta kanpara. 55 Uspane yal pianamal ïn usap kit uzara. Pedrokas usparuzkasa uzta. 56 Suasmesa ashampa kiwainmikane Pedrora izta. Ðn usaptukin uzta. Ussa iztawane, usne kaizta: —An ampune uskasa tuarai. 57 Pedrone ussa kaizta: —Ashampa. Nane ussa pianchish, kizta. 58 An kwizta mamazne ussa iz kit kaizta: —Nukas Jesúspa kanpammika i, kizta. Pedrone sînkara: —Ampu. Nane ussa kanpammika chish, kizta. 59 Maza ura pailtawane, mamazne an tînta kaizta: —Watcha, an ampukas uskasa tuarai. Usne Galilea suras ara. 60 Suasmesa Pedrone kaizta: —Ampu. Nu kaiztu aizpa pianchish, kizta. Sun urain Pedro paramtuasmin, aral kayu azta. 61 Suasmesa Jesúsne puij kit Pedrora izta. Pedrone Anpat kaizta aizpa nîjkulta. Anpatne ussa ñamin ka kiztît: “Mane aral kayu aztachasmin, nune nawa kutña pijikima ‘ussa pianchish’ kiznazi.” 62 Yaltas puztawane, Pedrone tayal kit tînta azta.
Jesústa ishanamtu
63 Jesústa watsamturuzne ussa ishanat kit aim kiara. 64 Uspane Jesúspa kasukin pïn pal kit mîmaara: —¿Nune Dios pian aizpa piankish? Nu iztuchi aizpa kainazhain. ¿Mînma nua aim kiazi? kizara. 65 Uspane an akkwan kwail pit ussa kaizara. “Nune kwail awa i,” ussa paraara.
Jesúsne katsa mikwaruz izarakin kuntu
66 Kînmîzkane, wan Judío îlapa înintuzne wanmakkara katsa pariyaruzkasa, Moisés pînkîh parît aizpa kamtamturuzkasa. Uspane ussa katsa mikwaruzakima tain îara. Suane ussa mîmaara: 67 —¿Nune Dios nîrîtmika kish? Aumîza kainazhain. Jesúsne usparuza sînkanara: —Na Dios nîrîtmika ish kiztane, une nawa nîjkulamanazi. 68 Na umîza chiwazha mîmanarane, une nawa sînkaamanazi. Une nawa chîhamanazi. 69 Makis nane, Ampu namtîtmikane, katsa Dios îninmukin uznash. 70 Uspane ussa mîmaara: —¿Nune Dios Painkul kish? Jesúsne sînkanara: —Umin nawa Dios Painkul i kizamtu. 71 Uspane usparuza kaizara: —Masas pit wachi akwa, aune mamaz kainammmikasha mîshitchimakpas. Aune us kaizta aizpa mîapuspas.
Jesúsne Roma mikwa uztukin îmtu
1 Wan Judío îninturuzne kuhsat kit Jesústa Pilato iztukin, Roma ainki mikwa turakin, mîlara. 2 Uspane ussa kwail kizamîz kit Pilatora kaizara: —An ampuwa wan piankamtawane, aune an ampura piztamakpas. Usne au awaruza pilchapuzninnamtu. Usne auruza Roma mikwara, Cesarpa gobiernora, “pial taman” kiztu. Uskas “nane Dios nîrîtmika ish” kiztu. “Nane katsa mikwa ish” kiztu, kizara. 3 Suasmesa Pilatone ussa mîmara: —¿Nune Judío awawa katsa mikwa kish? Usne ussa sînkara: —Nuin sun kizta. Watcha i. 4 Pilatone katsa pariyaruzakas, wan awaruzakas kaiznara: —Nane an ampura chinkas kwail kitchi wanmaltau. 5 Uspane an tînta kaizamîzta: —Usne au awaruza pilchapuzninnamtu. Usne wan Judea sura uztuza kamtanamtu. Galilea suras kamtanamîzta, an pîpulurakima, kizara.
Jesúsne Herodes tukin îmtu
6 Sun mîrawane, Pilatone ¿Usne Galilea suras ki? kiz mîmara. 7 Suasne usne Jesús Galilea suras, Herodes înintu suras, tas azi kamta. An payura Herodes Jerusalén pîpulura tuasmin, Pilatone Jesústa Herodes tukin îninta. 8 Jesústa izkane, Herodesne wat kulta. Ñamin us akwa mîra akwa, Herodesne ussa akkwan payukima izshira, chiwazha iztasparît kal kinpa. 9 Suasmesa kwisha akkwan piji mîmarakas, Jesúsne ussa sînkarachi. 10 Katsa pariyaruzkas Moisés pînkîhta parît aizpa kamtamtuzkas kashara kunat kit ussa tînta kwail kirît kizamtuazi. 11 Suasne Herodesne paiña suldarukasa ussa kwail kiat kit ussa ishanara. Ussa kwisha watsal kwakshamkasa kwanintawane, Herodesne ussa ishan kit Jesústa Pilatorakima mamasa îninta. 12 Sun payura Herodeskas Pilatokas izmuruz nampailta. An ñamin uspane aliz.
Jesústa piantana kizamtu
13 Suasne Pilatone katsa pariyaruzakas Judío awaruza înintuzakas Judío awaruzakas akwanat kit 14 kaiznara: —Une an ampura nawa karaara. Une an ampu awaruza pilchapuzninnamtu kizamtu. Ussa u iztukin kwisha mîmarawane, nane an ampu chinkas kwail kitchi wanmaltau. U kaizara aizpa nilchi. 15 Herodeskas an ampu chinkas kwail kitchi wanmalta. Usne ussa aumîza kailninta. Iztain. Kwail kitchi akwa, nane ussa piantasachish. 16 Katmizna ussa chîhtachasmin, nane ussa aya tîtkasa ilninnash. 17 Pascua pishta iztuasmin, Herodesne maza kajchi sîptîtmikasha puznintawa. 18 Wan awane tînta ka kwianñara: —An ampura pizninti, ussa piantanapa. Barrabásta kajchiras puzninti, kizara. 19 An ñamin Barrabásne awara piantat kit pîpulu awaruza aizapninnara. Katmizna uspane ussa pizat kit kajchira sîppara. 20 Jesústa chîhtninshimtu akwa, Pilatone mamasa usparuza kwinta kinara. 21 Uspane mamasa tînta kwian kit kaizara: —Ussa piantari. Kurishta irukasa pat pian piantari, kizara. 22 Kutña pijikima usparuza kaiznara: —¿Chikishma? ¿Chi kwail kirît usne? Nane an ampu chinkas kwail kitchi wanmaltau. Katmizna ussa aya tîtkasain ilnintawane, ussa chîhnash. 23 Uspane an akkwan tînta kwianat kit paikuara, ussa kurishta irukasa pat pian piantana. Uspa kaizara akwa, pariya înintuz kaizara akwa, Pilatone uspa pashiat aizpa mînara. 24 Katmizna Pilatone uspa paikwat aizpa kira. 25 Suasne Pilatone kajchira sîptîtmikasha puzninta. Usne awaruza aizapninnat kit awara piantarît. Judío awa paikuara akwa, Herodesne usparuza mînara, uspa pashit aizpa kiana. Judío awa Jesústa piantashiamtu akwa, usne Jesústa usparuza chîhkanara.
Jesústa tîra patpianamtu
26 Roma suldaruruz ussa kurishta patpiantana tain mîlamtuasmin, Simónne Cirene nan suras piannamtuazi. Uspane Simónta kurish munninat kit Jesústa kwizpa kanpaninñara. 27 Kwisha akkwan awane ussa kanpaara. Akkwan ashampane kwizpa kanpaat kit kwisha tayalat kit us akwa tînta azaara. 28 Jesúsne usparuza kîzpu puij iz kit usparuza kaiznara: —U ashampa Jerusalén pîpulura uztuzne, mîzhain. Nawa azman. U akwakas u pashpa akwakas aztain. 29 Mîrain. Mamaz payura awane ka kizanazi: “Pashpa mîltuchimikakas pîja wachimikakas chitchu kwimchimikakas an wat kulanazi.” 30 Suasmesa uspane înkaltakas puttarakas kaizamîznazi: “Au îsalta taiztain. Aumîza kularain.” 31 Mîrain. Uspane uspa pashimtu aizpa nawa kiamîznazi. Kwiztane uspane uruza an kwail kiamîznazi. 32 An paas kwail kimtuza tain îninara, uskasa piantanapa. 33 Îamtuasmin, îzara piannaara. An îzane awa kîzpu sîhkana iztît. Suane uspane ussa kurishta irukasa patpiana panaara. Paas kwail kimtuzakas karaara. Uspane mazarakas paiña numal kurishta patpiana panaara. Mamaztakas paiña kwiyamal kurishta irukasa patpiana panaara. 34 Suasmesa ussa kurishta pat piantawane, Jesúsne kaizta: —Ap Taitta, mîzha. Uspa kwail kiarît aizpa wat kultain, uspa chiwazha kiamtu aizpa pianchi akwa, kizta. Suldaruruzne ainki ukkasa salara, paiña kwakshamkas mamaz pïnkas kana kinpa. 35 Awaruzne kasha kunat kit wan izara. Katsa mikwaruzkas ussa ishanat kit kaizara: —Usne mamaztuza watsat mîlnara, uznanapa. Usne usmin uzna kiwainsachi. Dios ussa kiwaintuchi akwa, usne Diospa nîrîtmika chi, Diospa narîtmika chi, kizara. 36 Suldaruruzkas ussa ishanat kit ussa tish vino kwinna îara. 37 Uspane ussa kaizara: —Nu Judío awawa katsa mikwane, nuin watsat mîlti. 38 Paiña kîzpu îsalkin ainki tapîlakin ka paarît: ANNE JUDÍO AWAWA KATSA MIKWA I. 39 Maza kwail kurishta irukasa patpiantîtmikakas ussa kwisha kwail ka kizta: —¿Nune Dios nîrîtmika kish? Nuin watsat mîlti. Aumîzakas watsaat mîlchain, kizta. 40 Mamazne ussa pilchapuz kit kizta: —Sunkana kizmun. Une Diosta ishkwatpa. Nukas, nakas, uskas kawarain naizpuspas, inakima. 41 Au paasne naizpuspas, au kwail kiarît akwa. An ampune chinkas kwail kit chi. 42 Usne ma pitchin Jesústa kaizta: —Jesús. Nu amtu payura, wanta tînta îninnakane, nawa nîjkulcha, kizta. 43 Jesúsne ussa sînkara: —Watcha, nua kaiztus. Mane nune nakasa watsal sura tuanazi.
Jesúsne imtu
44 Paizka payurain wan su tîl parît, kutña urakima. 45 Pãn maltachi. Dios katsa yalta pïn kantît paizkakin pshatkwera. 46 Suasmesa Jesúsne tînta kwian kit kaizta: —Taitta. Nane ap izpul nua chîhkamtus, kizta. Sunkana kiztawane, irît. 47 Suldaru îninmikane sun kit aizpa iz kit kaizta: —Diosne kwisha wari. Watcha, an ampune kwail kitchi. 48 Akkwan awane sun kirît aizpa izana wanmakkara. Sun kit aizpa izarawane, tayalamîzta. Uspa yalta kaiyamtuasmin, uspane uspa pecho aim kuzara, tayaltît akwa. 49 Jesúspa izmuruzkas Galilea suras ashampa arîttuzkas attishtain kunat kit sun kirît aizpa izara.
Jesústa uk kulta nukkamtu
50 Suane maza ampune, José muntîtmikane, tuarai. Usne Judea sura, Arimatea pîpulura, uzta. Uskas, mamaz Judío înintuzkasa, Judío awaruza îninnara. Usne nil uzta, wat awa akwa. 51 Usne Judío katsa înintuz kiarît aizpa nîjkultachi. Usne Dios amtu payu tîrizta, awaruza îninnanapa. 52 Usne Pilatora ît kit kaizta: “Jesúsne irît. Nawa chîhkazha, na ussa uk kulta kamna.” 53 Suasmesa Joséne ussa kurishtas utpiz kit ussa putchã pïnkasa ipta. Suasmesa usne ussa uk kulta kamta. Mînainkas an ñancha sun uk kulta tarachi. 54 Sun viernes payura awane chiwazha kal kiara, awa sábado payura kwaizkulmu akwa. Sun kal kiarawane, sun sábado kwaizkulmu payu mansara. Suasne Sábado tîlawain kînmîzta. 55 Ashampa uskasa Galilea suras arîttuzne ussa attishtas kanpaara. Uspane îat kit ira kam kulkin izara. Miza ussa tarît izara. 56 Suasmesa uspane uspa yalta kaiyat kit watsal piam pippa kîat kit watsal piam pihshkas saara, irîtmikasha nîna. Uspane Sábado payura kwaizkulara, Moisés înintît aizpa kiana. Sun kal kiarawane, sun ashamparuzne sábado payura kwaizkulara, Dios sun payura kal kimanpa ininta akwa.Sun kal kiarawane, sun ashamparuzne sábado payura kwaizkulara, Dios sun payura kal kimanpa îninta akwa.
Jesúsne irîttas kakultu
1 Domingo payura tîlawain kîntuasmin, uspakas mamaz ashamparuzkas kamkin îat kit watsal piam pih saarît aizpa mîlara. 2 Sun ashamparuz kamkin pianarachasmin, mînpazha katsa uk pîjtara kamtît kulkis tainkara. 3 Kamkin kulta nappamtuasmin, uspane Anpat Jesústa wanmalarachi. 4 Uspa izara aizpa minñamtuasmin, sun urain paas ampune uspa mamin kunpailta. Kwisha putchã pïn kwarît. 5 Ishkuamtu akwa, uspane pilkin wakpuj wainñara. Suasmesa paas ampune usparuza kaiznara: —¿Chima sayamtuas? Uztumikasha kamkin saiman. 6 Usne apain tuchi. Kuhsnintît. Galilea sura us kaizta aizpa nîjkultain. Ka kaiznara: 7 “Mînpazha Ampu namtîtmikasha chîhkanintawa, kwail awa ussa piantanapa. Uspane ussa kurishta irukasa patpian piantaanazi, inapa. Kutña payura irîttas kuhsnazi,” kizta. 8 Suasne uspane Jesús kaizta aizpa nîjkulara. 9 Kamtît kultas kaiyarawane, uspane sun izara aizpa once înintaruzakas wantuzakas kainanara. 10 Magdalena suras Maríakas, Juanakas, Maríakas, Santiagowa akkuhsh, mamaz ashamparuzkas uspa izara aizpa Jesús înintuza kainanara. 11 Jesúspa înintaruz sun pit kain i minñara akwa, uspane ashampa kaizara aizpa nîjkularachi. 12 Suasne Pedrone usparuztas puz kit kamtît kulta ãïn îra. Sum kirît kit ayukta iztuasmin, usne pïn mamarain tarît izta. Yalta kailtuasmin, usne iztasparît, sun kirît akwa.
Emaús pîpulura îm mi
13 Sun payuin paas kammuruzne Jerusalén pîpuluras puzpailta. Once kilómetro ît kit Emaús pîpulura piannanpain ara. 14 Uspane chiwazha kirît aizpa kwinta kiwas îmtuwaiyara. 15 Kwinta kiamtazasmin, uspa paas mîmamtazasmin, Jesúsmin uspa paaskasa wanmak kit chamîzta. 16 Jesústa izpailtakas, uspa paasne uspakasa chammikasha piankaamas. Diosne uspa paasta piankamnintachi. 17 Jesúsne usparuza mîmara: —Îmtazasmin, ¿chi kwinta kimtuas? Us sun paasta mîmara akwa, uspa paasne iztaspat kit kunat kit tayalpailta. 18 Mazane, Cleofas muntîtmikane, ussa mîmara: —Wan Jerusalén pîpulura piannattuzne an payura sun kit aizpa pian. ¿Mizama nuin sun kit aizpa pianchi? 19 Usne usparuza mîmanara: —¿Chi kirît? Uspane ussa sînkailta: —Jesúsne, Nazaret pîpulura uztamikane, ire. Usne Diospa an wat tînta kainammmika tuazi. Usne akkwan iztasparît kal kit kit kwisha watsal pit awaruza kwinta kinara. Wan awane Dios ussa îninta piankamara. 20 Au katsa pariyaruzkas au katsa mikwaruzkas Jesústa chîhkaara, Pilato ussa inazi kiznapa. Suasne usne ussa kurishta irukasa patpianninara. 21 Akkwan payukima aune Jesústa tîriznashî, Judío awaruza chîhtanapa, Roma awaruz usparuza îninamanpa. Jesús irîtkis, kutña payu pîntît. 22 Mînpazha aukasa cham ashamparuzne aumîza ishkwinñara. Uspa tîlawain kamtîtkin tuasmin, 23 Jesústa izarachi. Suasne uspane aumîza kaiyat kit “ángelta iztamakpas” aumîza kaizara. Ángelne “Jesús uzi” kizpailta. 24 Au izmuruzne, mamaz wanmaktuzne, ira kamtîtkin îat kit sunkanain ashampa kaizara aizpa wanmalta. Uspakas ussa izarachi. 25 Suasne Jesúsne usparuza kaiznara: —Une wat piankamarachi. Une Dios kainammmika kaizta aizpa wat mîarachi. Nîjkularachi. 26 Chiyura nurachasmin, Cristone sun kit aizpa naiznatkin, tînta namna. 27 Suasne Jesúsne usparuza wan Dios pit kamtanara. Usne usparuza ussa Moisés pînkîh parît aizpakas ussa wan Dios pit kainammtuz parît aizpakas kamtanara. 28 Îamtuasmin, uspane sun pîpulura piannanpain. Jesúsne ñancha îshimtukanain kira, pîpulura napmanpa. 29 Uspane ussa kwisha paikwat kit kaizpailta: —Aukasa mari. Me nashtîmtui. Me tîl parîmtui, kizpailta. Suasne usne uspakasa ît kit uspa yalta napta. 30 Misharî uspakasa uzkane, usne pan sap kit Diosta aishtaish kizta. Pan kîztawane, usne usparuza nailnara. 31 Dios uspa kasu izkulnintakane, uspane ussa piankampailta. Sun urain usne usparuztas kulara. Masain kakshihtît. 32 Uspane usparuzpain kaizpailta: —Us aukasa miwara kwinta kimtuasmin, us aumîza Dios pit kamtamtuasmin, aune kaijchura, ayukta, wat kultuanash. 33 Suasne sun urain kunat kit Jerusalén pîpulura kailmîzpailta, once înintuzakas mamaztuzakas wanmalmukin wanmakna. Sun wanmakmuruzne uspa paasta kaiznara: 34 —Watcha. Anpatne irîttas kuhsta. Pedrokas ussa izta. 35 Suasne miwara îamtuasmin, uspane usparuza kirît aizpa kwinta kinara. Jesús uspakasa pan kîztawane, uspane ussa piankamara, kizara. Sunkana kwinta kinara.
Jesúsne akkwan kammuruz purakin izpamtu
36 Uspa sunpa kwinta kiamtuasmin, Jesúsne uspa paizkakin kun kit kaiznara: —Dioskasa wat uzwizanaka. 37 Uspane kwisha ishkuarît, irît izpul izwiznas minñarît akwa. 38 Sunkana Jesúsne kaiznara: —¿Chikishma u izamtu aizpa ishkuamtuas? ¿Chikishma nilchi minñamtuas? ¿Chikishma u kaijchura sun kirît aizpa mîmaamtuas? ¿Chi kirît? 39 Ap chihtîrakas ap mittîrakas iztain. Na Jesús ish. Paazha. Iztain. Izpulne ñakas sîhkas wajchi. Nane ñakas sîhkas wajish, kiznara. 40 Sun kainanarawane, Jesúsne usparuza paiña chihtîkas paiña mittîkas annara. 41 Ussa izna wat kulamtukas, uspane mama us sun kaizta aizpa nîjkularachi. Awa ishkuamtu akwa, awa iztaspamtu akwa, usne mîmanara: —¿Kumira mîjchimakkiwas? 42 Suasne uspane pitti pishkaru iltakas mishkikas kwinñara. 43 Usne sap kit uspa paizkakin kwara. 44 Suasne usne kaiznara: —Na ukasa uzasmin, nane ap pit uruza kwinta kinara. Wanne nawa pattît aizpa me kirît. Moisés pînkîhta para aizpakas, Dios kainammtuz pînkîhta para aizpakas kanta pînkîhta para aizpakas kirît. 45 Suasmesa Jesúsne usparuza Dios pînkîhta patninta aizpa piankamninnara. 46 Ankas usne kaiznara: —Dios pînkîhta ka para: “Cristone, Dios nîrîtmikane, naiznatkin. Kutña payura irîttas mamasa kuhsnatkin.” 47 Une Jerusalén pîpuluras wan surakima awaruza Dios pit Jesúspa kainanarawa, kwail kimtuz uspa kwail chîhkaat kit maizanapa, Dios uspa kwail kiarît aizpa wat kulnanapa. 48 Une awaruza sun izara aizpa kainanarawa. 49 Ankas nane, ap Taitta kin namtît aizpa, paiña Sînam Izpulta, uruza îninnanash. Mane an pîpulukin nukkultain Dios Izpul uruza akane, usne uruza tînta namninnanazi.
Jesúsne chiyura numtu
50 Suasne Jesúsne usparuza pîpulu pianamal mîlnara, Betania pîpulurakima. Paiña chihtî anaktuasmin, usne uspa akwa Diosta paikwat kit kaiznara: —Dioskasa watmin îizanaka. 51 Usparuza watmin îizanaka kiztawane, Jesúsne usparuztas nurît, chiyurakima. 52 Ussa wakpuj wainñarawane, uspane wat kulat kit Jerusalén pîpulura kaiyara. 53 Uspane pailta payukima Dios katsa yalta nappat kit Dios kwisha wari kizara. Pailti.
Prólogo: Dios Painkulne awa namtu; Jesúsne Pitkas munazi
1 Au su sarachasmin, mazane, Pit muntîtmikane, uzazi. Usne Taitta Dioskasa uzazi. Usne Dioskasa kawarain azi. 2 Su sarachasmin, an Pit muntîtmikane, an ñancha Dioskasa sulmin uzazi. 3 Us akwa Diosne wan chiwal sara. Diosne an Pit muntîtmika akwa chiwal kirît. 4 An Pit muntîtmikane awaruza pailta payukima uzninamtu, awa watcha piankamanapa. 5 An Pit muntîtmikane tîlkwilta aizmu, impil kai aiztukana. Usne tîlkwilta chamturuza Diosta piankamninnanazi. Diablowa kwail mikwaruzne Dios kamtamtu aizpa anuppasachi. 6 Diosne maza ampura îninta. Usne Juan munazi. Awaruza pira munnara. 7 Anne at, awaruza aizmumikawa kainanana, us kaizta aizpa mîat kit piankamat kit an Pit muntîtmikasha nîjkulanapa. 8 Juanne kai aizmumika chi. Usmin at kit kai aizmumikawa kainanara. 9 An kai aizmumika watcha i. Anne at kit wan awara kai malninamtu. 10 An Pitne au sukin pianara. Diosne us akwa an su sara. An sukin uztuzne ussa piankamarachi. 11 Paiña sukin pianatkas, an sukin uztuzne ussa sapparachi. 12 Sunkana mînpazha ussa sappamturuzkas us kaizta aizpa nîjkulamturuzkas Dios painkul namashina. 13 Au sukin awaruz uspa pashparuza kawiamtukas, Diosne awaruza namashina, paiña pashparuza kawiranana. Ampune ussain Dios painkul kawirakana namninasachi. Diosmin awaruza paiña painkul namninnashina. 14 An Pit muntîtmikane awa namta. Usne awaruza pashinat kit kiwainnashimtu. Uskas aumîza nil kamtanara, Diosta piankamanapa. Usne aukasa an sukin uzta. Aune ussa iztamakpas. Usne kwisha wat kai puzta. Diosne paiña painkultain kwisha tînta namninta. 15 Juanne us akwa paranat kit kaizta: “Nane us akwa usparuza kainanarau. Us nawa kwizpa amtukas, usne nakin an ñancha uzta. Usne nakin anza tînta i.” 16 Usne aumîza akkwan wat kiat kit kiwainnamîzta. 17 Diosne Moisésta îninta, awa us kaizta aizpa kianapa. Mane aune Dios aumîza panashimtu piankamtumakpas, Dios Jesucristo îninta akwa, watcha aumîza kainanapa. 18 Mînminkas Diosta izarachi. Paiña painkulmin Papihshkasa sulmin uztu. Usne aumîza paiña Papihshta piankamninnarît.
Juan, munnammikane, Jesucristowa kainammtu
19 Jerusalén pîpuluras Judío awa îninturuzne pariyaruzakas kamtamtuzakas Juanta “¿nune mînmas?” mîmanapa îninñara. 20 Usne nil sînkanara: —Nane watsat mîlmumika chish, kiznara. 21 Suasne mamasa kaizat kit mîmaara: —¿Nune mînmas? ¿Elías, Dios pit kainammmikakish? Juanne kaiznara: —Nane chish. Kwizta ussa mîmaara: —Suasne, ¿Nune mamaz wat kainammumikakish? Usne sînkanara: —Nane chish. 22 Suasne ussa kaizara: —¿Mane nune mînmas? Aune au înintaruza sînkarawamakpas. ¿Nuwa chima kiztus? 23 Juanne Isaías kainammmika Juanpa kaizta aizpa sînkanara: —Nane pul suwara ka kainammtus: “Nane kwianmumika ish, Anpatpa mi nil saanapa.” 24 Fariseo awane uspa Fariseo awaruza Juanta kwinta kinpa îninnat kit mîmaat kit kaizara: 25 —Nu Dios watsat mîlmumika chine, Elías chine, kainammumika chine, ¿Chikishma munnanamtus? 26 Juanne sînkanat kit kaiznara: —Nane kwazikasa munnanamtus. Mazane u paizkakin kun. Une ussa pianchi. 27 Us nakin kwizpa amtukas, usne nakin an ñancha uzta. Usne an tînta îninmika namnazi. Nane paiña kiwainmumika ish. 28 Wanne sunkana kirît Betania pîpulukin. Sun pîpulune Jordán pi pãn puzmumakin uz. Suane Juanne awaruza munnanarît.
Jesúsne kwail kirîttuza wat kultanamtu
29 Tîlawara Juanne Jesústa izta. Jesús ussa amtuasmin, Juanne awaruza kaiznara: “¡Iztain! Anne Dios înintamika i. Usne ussa îninta, kwail kiarîttuza wat kultananapa. 30 Nane us akwa ñamin kaiztau: ‘Mazane ap kwizpa amtu. Usne nakin anza tînta înintamika i. Uskas nakin an ñancha uzta.’ 31 Nakas Dios an înintamikasha pianchi arau. Nane arau, kwazikasa munnana, Israel awaruz ussa piankamanapa.” 32 Sunkas Juanne kaiznara: “Nane Diospa Izpulta iztau. Sînam Izpulne chiyuras taiz kit ussa nukkulta. Sînam Izpulne utkurukana iztît. 33 Mama nane Dios ussa îninta pianchi arau. Nawa kwazikasa munnana îninmikane kaizta: ‘Nune Diospa Izpul maza ampura taiz kit nukkulka iznazi. An ampune awaruza Sînam Izpulkasa winninnanazi.’ 34 Na watcha sun izta akwa, nane uruza ka kaiznamtus: ‘Anne Dios Painkul i.’ ”
Jesúsne an ñamin kammuruza akwanamtu
35 Tîlawara Juankas paiña paas kanpamtuzkasa suain tuara. 36 Jesús pîntura iztuasmin, Juanne kaizta: —Iztain. Anne Dios înintamika i. Usne ussa îninta, awa kwail kiarîttuza wat kultananapa. 37 An paas Juanta kanpamtuzne sun kizka mît kit Jesústa kanpailta. 38 Jesúsne ussa kwizpa kanpaka iz kit kaizta: —¿Chima saimtuas? Uspane kaizpailta: —Kamtam, ¿Mîntama uzish? Usne sînkara: —¡Izna arain! 39 Uskasa îil kit us uzkin izpailta. Sun payuin uskasa mailta, ampara urara panapain akwa. 40 Mazane, Juanta mîramikane, Jesústa kanpara. Usne Andrés muntît. Usne Simón Pedrowa aimpihsh. 41 An mîmtuchasmin, Andrésne paiña aimpihshta, Simónta, saina ît kit kaizta: —Aune Dios watsat mîltamikasha, wanmaltawas. Anne Dios narîtmika i. Aune ussa Mesías muntawas. 42 Suasne Andrésne Simónta Jesús tura mîl kit Jesústa karara. Jesús ussa iztawane, kaizta: —Mane nune Simón muntît. Up taittane Juan muntît. Mane Cefas munnazi. (An munne Pedrokas ukkas kawarain mun).
Jesúsne Feliperakas Natanaeltakas akwanamtu
43 Tîlawarane Jesúsne Galilea sura îshira. Felipera wanmal kit kaizta: —Kanpazha, ap kammumika namnapa. 44 Felipene Betsaida pîpuluras azi. Suane Andréskas Pedrokas uzpailta. 45 Suasne Felipene Natanaelta sait kit kaizta: —Aune mazara wanmaltamakpas. Moisésne us akwa Dios înin pînkîhta parît. Dios kainammtuzkas us akwa paraara. An Jesúsne Joséwa painkul i. Usne Nazaret pîpuluras i. 46 Natanaelne kaizta: —Nasaret pîpuluras chinkas wat puzsachi. Felipene sînkara: —At kit ussa izti. 47 Natanael Jesús tukin kashara piannamtuasmin, Jesúsne ussa iz kit kaizta: —Ussa izti. Apa wat Israel awa amtui. Watcha kwinta kimtu akwa, usne mamaztuza kain kikain. 48 Natanaelne ussa mîmara: —¿Mizama nawa pianish? Jesúsne sînkara: —Felipe nua akwatchasmin, nane nu tukin piankamtau. Nune hiquera tî kwalkin uzta. 49 Suasne Natanaelne kaizta: —Ap kamtam. Nu kaiztît akwa, nane nu Dios painkul i pianish. Nune au Judío awawa înintamika i. 50 Jesúsne ussa kaizta: —Nu hiquera tî kwalkin uztuasmin, nane nu tukin piankamtau. Na sun kizta akwa, ¿nawa nîjkulmas? Nune ankin anza katsa kal iznazi. 51 Jesúsne ankas kaizta: —Watcha kaiznamtus. Mamaz payura, une chiyura izakkanazi. Wanish îkane, chiyu kai kinazi. Suane une Diospa ángeltuza izanazi. Uspane Jesús tukin, chiyuras ampu tukin, îanazi. Tas au sukin kihshanazi. Chiyuras ampu akwa, Dioskas awaruzkas usparuzain kwinta kianazi.
Kasara kimtu Caná pîpulura, Galilea sura
1 Kutña payura pailka, kasara kit pishta Caná pîpulura wa. Sun pîpulune Galilea sukin uz. Jesúspa akkuhshkas sua tuazi. 2 Pishta sammikane Jesústakas, awaruzakas, paiña kammuruzakas akwanarît, kasara pishta izanapa. 3 Vino pailtîkane, Jesúspa akkuhshne ussa kaizta: —Vino pailtît me. 4 Jesúsne ussa sînkara: —Akkwa, ¿Chitkishma nawa sunkana kaiztus? Kaizapmun. Wat aizpa nil urara kinash. 5 Maríane nailmuruza kaiznara: —¡Us kaiztu aizpa kirain! 6 Suane seis kwazi ulmu pura. Ukta sarît. Judío awane sun kwazikasa akkwan piji usparuza kitnara. Sun kiarît akwa, uspane Dios iztakin sînam namarît minñaara. Maza ulmu cien botellakima ultu. 7 Jesúsne nailmuruza kaiznara: —¡Ulmura kwazikasa ultain! Puntakima ulaara. 8 Ultarawane, Jesúsne usparuza kaiznara: —¡Mane pitchin ukkat kit pishta samtumikasha mîltain! Sunkana kiara. 9 Pishta sammikane kwazi vino namtîtta kwaizta. Usne mîntas puzta pianchi. Nailmuruzpain pianmazi. Uspane kwazi ulara. Pishta sammikane kanpain mîjmikasha akwat kit kaizta: 10 —An ñancha wan awa anza wat vino kwinnamtu. Akwarîttuz akkwan vino kuarîkane, suasne muinchi vino kwinamtu. Sunkana nune anza wat vino kwinna makima watsarît. 11 Jesúsne sunkana kira Caná pîpulukin, Galilea sura. Usne sun an ñancha iztasparît kal awara kamtana kira, awa ussa piankamanapa, kwisha wat kal kirît kizanapa. Suasne aune, paiña kammuruzne, ussa nîjkultamakpas. 12 Sun kitpane, Jesúsne Capernaum pîpulura kihshta, akkuhshkasa aimpihshtuzkasa kammuruzkasa. Suane uspane akkwan payuchin maara.
Jesúsne paininmuruza Diospa katsa yalkis îninnamtu
13 Judío awaruzpa Pascua pishta kasha taizkane, Jesúsne Jerusalén pîpulura îrît. 14 Diospa katsa yalta naptîkane, usne akkwan awaruza wanmalnara. Mînpazha ampu wakarakas, pîrikukas, utkurukas paininñara. Mamaztuzne misharî uzat kit awaruzpa pial maizara, awa wakarakas pîrikukas utkurukas paina, Diosta mîlanana. 15 Sun iztawane, Jesúsne ilmu tîtkasa sat kit wan awaruzakas pîrikuruzakas, wakararuzakas Dios yalkis pianamal îninnara. Usne pial maizmuruzpa pialtakas misharîkas kiakpîntara. 16 Utkuru painintuza kaiznara: —¡Akkis sun ukkat kit îrain! Ap Taittawa yalkin paininman. Paininmu yal chi. 17 Suasne paiña kanpamtuzne Dios pit pînkîhta para aizpa nîjkulara: “Na up yalta akkwan pashimtu akwa, awane nawa piantanazi.” 18 Suasne Judío awa îninturuzne ussa mîmaara: —¿Chishma sun kimtus? ¿Dios nua îninma, sun kin? Dios nua înintane, wat kal kit aumîza ancha. 19 Jesúsne sînkanara: —An Diospa yal azpiantane, nane kutña payura mamasa sanash. 20 Judío awa îninturuzne kaizara: —Awane cuarenta y seis añokima Diospa yal saara. ¿Nune an yal kutña payukima sanakish? 21 Dios yalpa kaizkane, Jesúsne paiña ña antu, Dios paiña ña irîttas kuhsninshimtu akwa. 22 Katmizna, Jesús irîttas kakultawane, paiña kanpamtuzne sun payu us kaizta aizpa minñat kit Dios pînkîhtakas us kaizta aizpakas nîjkulara.
Jesúsne wan awaruzra pian
23 Pascua pishta asmin, Jesúsne Jerusalén pîpulura tuazi. Akkwan awane us iztasparît kal kimtu aizpa izat kit ussa nîjkulara. 24 Wan awaruza pian akwa, Jesúsne usparuza nîjkulnarachi. 25 Jesús wan awa minñamtu aizpakas kiamtu aizpakas pian akwa, mînminkas ussa kamtanashimtuchi, wan awa ayukta minñamtu aizpa pian akwa. Awaruzne maizpa maizamtu.
Jesúskas Nicodemokas kwinta kimtas
1 Nicodemone Judío awaruza îninmika azi. Usne Fariseo awakana Diosta wakpuj wainta. 2 Usne maza amta Jesús tukin ît kit kaizta: —Kamtam. Aune Dios nua îninta pianmakpas, aumîza kamtanana. Dios nua kiwaintu akwa, nune akkwan iztasparît kal kimtu, awara kamtanana. 3 Suasne Jesúsne ussa kaizta: —Watcha nua kaiztus. Dios awara maiztukine, awane Dios awara mamasa kawirakanain namtachine, Dios înintukin uzna napsachi. 4 Nicodemone ussa mîmara: —¿Îlapane mizama mamasa kawishinai? Usne akkuhshpa pîjawara wasachi, mamasa kawina. 5 Jesúsne ussa sînkara: —Watcha nua kaiztus. Mînminkas Dios înintukin napmanazi, kwazi akwakas Sînam Izpul akwakas kawirachine. 6 Papihshkas akkuhshkas au sukin pashpa uznapa kawinintu. Diospa Sînam Izpulne awawa izpulta namnintu, chiyura uznapa. 7 Na “wan awa mamasa kawirawa” kizkane, nune iztaspamun. 8 Inkwane mînpa pamtu. Inkwa îka, mîm. Masetne pa îmtu. Masetne apa amtu. Mîntas amtu pianchimakpas. Mînta îmtu pianchimakpas. Kawarain aune miza Dios Sînam Izpul awaruza maizninna wat pianchimakpas. 9 Suasne Nicodemone mamasa ussa mîmara: —¿Mizama kai sun? 10 Jesúsne ussa sînkara: —Nune Judío awaruza kamtammika i. ¿Nune sun pianchikish? 11 Watcha nua kaiztus. Aune pian aizpa paramuspas. Izta aizpakas kwinta kimuspas. Une au kaizta aizpa nîjkulamtuchi. 12 Nane uruza an sukin kimtu aizpa kwinta kinarau. Nawa nîjkularachi. Chiyura kimtu aizpa kwinta kitne, une na kaizta aizpa nîjkulamanazi. 13 Mînminkas chiyura nurachi. Chiyuras Ampumin chiyura uz kit tas kihshta, awaruza chiyuwa piankamninna. 14 Moisés pul sak sura tuasmin, usne iru kamta sat kit tîra kanta, awa iru kamta izanapa, awa kamta akwa iamanpa. Sunkanain Chiyuras Ampune kurishta patpiannazi, awaruza watsat mîlnanapa, uspa kwail kiarît aizpa wat kultanapa. 15 Wan ussa nîjkulararuzne pailta payu uzanazi.
Diosne wan awaruza panashimtu
16 Diosne au sukin uztuza kwisha pashinara akwa, usne paiña painkulta, mazain mîjmikasha, au akwa apa îninta, ussa nîjkulararuz ïnta îamanpa. Ussa nîjkulararuzne pailta payukima wat uzanazi. 17 Diosne paiña painkulta awaruza ilnanapa înintachi. Piru usne ussa îninta, awaruza watsat mîlnanapa. 18 Diosne paiña Painkulta nîjkultumikasha ilninmanazi. Piru Diosne nîjkultuchimikasha ilnanazi, Dios Painkulta, mazain mîjmikasha, nîjkultachi akwa. 19 Sunkana Diosne awaruza ilnanazi. Usne paiña painkulta, impil aizmukanain îninta, awa ussa piankamanapa. Kwail kiara akwa, awane tîlkwiltain îashira, uspa kwail kiara aizpa kai izamanpa. Watcha pashiarachi. 20 Kwail kimtuzne kai aizmura uzna pashiamtuchi. Uspane watchara aashitchi, uspa kwail kiarît aizpa kai piankamamanpa. 21 Dios înintu aizpa kishiamtu akwa, watcha kimturuzne kai aizmura îamtu. Uspa Dios kaizta aizpa mîara akwa, wanne uspa kal kai izanazi.
Juanne, munnammikane, Jesúspa mamasa paramtu
22 Sun kitpane, Jesúskas paiña kanpamtuzkas Judea sura îara. Uspane sua pampa payu maara, awaruza munnana. 23 Juankas Enón pîpulura, kasha Salím pîpulura, munnamîzta. Suane akkwan kwazi wa. Awa us tukin wanmakkakane, Juanne usparuza munnanara. 24 Juanta kajchira sîptachasmin, sunkana kirît. 25 Mînpazha Juanta kanpamtuzne maza Judío awakasa tînta kwinta kiamîzta. Uspane yawa piji Judío awa kittamtu kwinta kiara, Dios iztukin sînam sana. 26 Yawa piji Judío awa kittamtu aizpa minñamtu akwa, uspane Juanta îat kit kaizara: —Kamtam, izti. Nune aumîza sun ampuwa wat kainarît. Usne, Jesús muntîtmikane, nukasa pãn puzmuwara, Jordán pinamin, chamtuazi. Mane usne akkwan awara munnanamtu. Uspane ussa kanpaamtu. 27 Juan sînkanara: —Dios awara kiwaintachine, awane anza tînta namsachi, paiña kal kin. 28 Une piankam kit na kaizta aizpa mîara. Ka kiztau: “Nane Dios narîtmika chi ish. Diosne nawa îninta, us iztakin an ñancha în.” 29 Na kaizta aizpa uruza piankamninnashimtu akwa, nane an kwinta kinash. Casara kit pishta samtune, ampu kanpain mîjmikane ashampa kanpain mîjmikasha mîj. Ampu kanpain mîjmikawa izmumikane makin mît kit kuntu. Sun parît aizpa mîrawane, watsal mintu. Nakas sunkanain mane watsal mintus, akkwan awa Jesústa îamtu akwa, us kaizta aizpa mîamtu akwa. 30 Usne anza tînta namtawa. Nane an we tînta namtawaish.
Kwashpas amtumika
31 Kwashpas amtumikane wan awakin anza tînta i. Au sukin kawiramikane an sukin kimtu aizpa paramtu. Kwashpas amtumikane wan awakin anza tînta i. 32 Usne iztît aizpakas mîrît aizpakas awara kainanamtu. Akkwan awaruzne us kaiztu aizpa nîjkulamtuchi. 33 Us kaizta aizpa nîjkultumikane Dios kaizta aizpa watcha i kiztu. 34 Dios înintîtmikane Dios pit paramtu, Dios ussa paiña Sînam Izpul mîlarît akwa. 35 Papihshne paiña painkulta pashit kit paiña kal ussa chîhkara, wan îninnapa. 36 Painkulta nîjkultumikane makis pailta payurakima unazi. Sunkana ussa nîjkultuchimikane sunkanain uzmanazi. Diosne usparuza ilnanazi.
Jesúskas Samaria pîpuluras ashampakas
1 Fariseo awaruzne Jesúspa mîara. Jesúsne Juankin an akkwan kanpamtuz mîjara. Uskas an akkwan awaruza munnaninnara. 2 (Jesús tukas, paiña kanpamtuzne awara munnanara. Usmin sun kitchi). 3 Fariseo awaruzne Jesús kimtu aizpa piankammara. Jesús usparuza pilchapuznashitchi akwa, Jesúsne Judea sukis puz kit mamasa Galilea sura kailta. 4 Îmtuasmin, usne Samaria suwara pînshimtuat kit 5 Sicar pîpulura piannara. An pîpulune mamaz sura kashain uz. Ñamin au irît kwal Jacobne paiña painkulta, Joséra, sun su mîlara. 6 Suane Jacobne kwazi kul sarît. Miwa îmtuasmin kwaiztît akwa, Jesúsne kwazi ukkam kulkin uzta. Paizka payu panapain. 7-8 Paiña kammuruz pîpulura chiwazha kumira paina îarîkane, Samaria pîpuluras ashampane kwazi kulkin ara, kwazi ukkana. Jesúsne ussa kaizta: —Kwazi kwincha. 9 Samaria pîpuluras ashampane iztasparît, au Judío awakas Samaria awakas usparuzpain chinkas naiyamtu akwa. Usne Jesústa ka kaizta: —Nune Judío awa i. Nane Samariakis ashampa ish. ¿Chikishma nawa kwazi paikumtus? 10 Suasne Jesúsne ussa sînkara: —Nune Dios mîlashimtu aizpa pianchi. Nune nawa kwazi kwincha kizmumikasha pianchi. Ussa kwazi kwan paikwatne, usne nua kwazi kwinazi, nu pailta payukima uznapa. 11 Ashampane ussa kaizta: —Anpat. Nune chinkas mîjki, kwazi ukkana. An kwazi kulne kwisha ainkih i. ¿Nune mîntas kwazima kwinnash, na uzna? 12 Au ñamin irît kwalne, Jacobne, an kwazi kul sat kit aumîza chîhkanarît. Uskas paiña painkultuzkas paiña kalpakas an kulkin kuara. ¿Nune Jacobkin anza tînta kish? Nune an Jacobkin aumîza kiwainsachi. 13 Jesúsne ussa sînkara: —An kwazi kwattuzne mamasa kwazi kiyanazi. 14 Na kwazi kwinka kwattuzne mizurainkas kwazi kiyamanazi. Nua na kwazi kwintu aizpa kwazi puzmu kulkana puznazi, pailtachin. An kwazine nua uzninnazi, pailta payukima. 15 Suasne ussa wat mîrachi akwa, ashampane kaizta: —Anpat, sun kwazi kwincha, na kwazi kilmanpa, an kwazi kulta amanpa, kwazi ukkana. 16 Jesúsne ussa kaizta: —An ñancha ît kit up ampura akwarash. Suasne akkin anka. 17 Usne kaizta: —Nane ampu mîjchish. Suasne Jesúsne kaizta: —Na ampu mîjchi kizkane, nune watcha kaiztui. 18 Makima nune cinco ampu mîjazi. Nu mîjmikane up ampu chi. Nu kaizta aizpa watcha i. 19 Sun mîrawane, ashampane ussa kaizta: —Anpat. Nu sun nawa pian akwa, nane nu Dios pit kainammmika i piankamtus. 20 Aune ¿Mîntama Diosta wakpuj wainñanapai? Au ñamin kwal uzasmin, uspane an îzakin Diosta wakpuj wainñara. Mane u Judío awane ka kaizamtu: “Jerusalén pîpulura Diosta wakpuj wainñarawa.” 21 Jesúsne sînkara: —Ashampa. Na kaiztu aizpa nîjkulti. Mamaz payura awane an îzara nuamanazi, Diosta wakpuj wainna. Kawarain uspane Jerusalén pîpulura îamanazi, Diosta wakpuj wainna. 22 Samaria pîpuluras awa Diosta wat pianchi akwa, une ussa wat wakpuj wainñasachi. Sunkana aune ussa wat pianmakpas. Diosne Judío awaruza paiña kwal namninnara, au sukin watsat mîlmumikasha îninnapa. Katmizna aune ussa wakpuj waina wat pianmakpas. 23-24 Sun payura Diosta wakpuj wainna me taiztît, wan awa wan suwara ussa wakpuj wainñanapa. Sînam Izpulne Taitta Dios watcha kaizta aizpa awaruza piankamninnanazi, an sukin Diosta wakpuj wainñanapa. Diosne Sînam Izpul i. Sun Sînam Izpulne awaruza kiwainnanazi, awa Diosta wakpuj an wat wainñanapa, watcha piankamanapa. 25 Ashampane ka kaizta: —Dios kin namtîtmikane, watsat mîlmumikane, piannanpain pianish. (Usne Cristo i). Us akane, usne aumîza chiwal kamtananazi. 26 Jesúsne ussa kaizta: —Nane Dios kin namtîtmikakas, watsat mîlmumikakas, ish. Nane nukasa paramtus. 27 Sun urain paiña kammuruzne aara. Jesús maza ashampakasa kwinta kimtu akwa, uspane iztaspaarît. Mînminkas an ashampa ¿Chima pashimtu? mîmaarachi. Mînminkas Jesústa ¿Chima an ashampara paramtus? mîmaarachi. 28 Suasne ashampane paiña kwazi ulmu chîhkat kit pîpulura kail kit awara ka kaiznara: 29 —Maza ampura izna arain. Usne wan chiwal piankam kit na kirît aizpa nawa kaizta. ¿Anne Dios kin namtîtmikaki? ¿Usne watsat mîlmumikaki? 30 Suasne awane pîpuluras puzat kit Jesús tukin aara. 31 Aamtuasmin, paiña kammuruzne Jesústa paikwat kit kaizara: —Kamtam. Chiwazha kwari. 32 Usne kaiznara: —Kumira pashitchi ish. Na kal kirît aizpa kumirakin an wari. An kumirawa une pianchi. 33 Paiña kammuruzne usparuzpain ka mîmaamîzta: —¿Mînma kumira ussa karatsa? kizara. 34 Jesúsne kaiznara: —Diosne nawa apa îninta, awaruza Diospa kainanapa. Nane us kaizta aizpa kishimtus, pailnakima. Na paiña kal kikane, nane kwisha warish. Kumira kwatkanain i. 35 Une sunkana minñamtu: “Mane au Judío awane Samaria su uztuza Dios pit kainammtuchimakpas. Mamaz payura aune Galilea su uztuza Dios pit kainanapas.” Apas awane akkwan piji sunkana kizamtu: “Ampara mish we, chara pippara pakna. Suasne kal kiaznapas.” Mane nane uruza kainammtus: “Umakin iztain. Paktu payukana i. Akkwan awa pura akwa, usparuza Dios pit kaizasan, su pit nîjkulanapa. 36 Chara pippa malmuruzne pial sappamtu, uspa kal akwa. Kawarain Dios Pit kainammtuzne sappanazi. Mînpazha sun pit kainammtu, mamaztuz sun pit mîanapa. Kwiztane suntuzne mamasa sun pit mîat kit nîjkulanazi. Diosne sun pit kainammtuza tananazi. Wan Dios pit kainammturuzne watsal kulanazi.” 37 Apas awane akkwan piji ka kizamtu: “Maza awa pippa warawane, mamazne sun pippa paktu.” 38 Sunkana kianazi. Mamazne ukin an ñancha Dios pit kainanara. Nane uruza îninnara, awaruza akwananapa, ap kwal namanapa. Katmizna sun awane ap kwal namarît, u Dios pit kainarît akwa. 39 Akkwan sun pîpulukin uztuzne Jesústa nîjkulara, Samaria pîpuluras ashampa kaizta aizpa akwa. Usne ka kaiznara: “Usne wan chiwal piankam kit na kirît aizpa nawa kaizta.” 40 Katmizna Samaria pîpulura uztuz Jesús tukin piannarawane, uspane ussa paikuara, usparuzkasa maanapa. Usne usparuzkasa paas payukima mara. 41 Sunkana an akkwan awane us kaizta aizpa mîat kit us Dios kin namtîtmika i, watsat mîlmumika i, nîjkulara. 42 Uspane an ashampara ka kaizara: —Mane aune ussa nîjkultumakpas. Nu Jesúspa kainarakas, mane aune us kaizta aizpa mîramakpas. Aune Dios ussa kin namtît pianmakpas. Usne au sukin uztuza watsat mîlmumika i.
Jesúsne gobierno îninmikawa painkulta kakulnintu
43 Paas payura Jesúsne Samaria pîpuluras puz kit Galilea surakima îmîzta. 44 Jesúsmin kammuruza kaiznara: “Ap sukin uztuzne nawa, Dios kainammikasha, nîjchi kiamtu.” 45 Sua ussa nîjchi kiarakas, Jesúsne Galilea sura piannakane, Galilea sukin uztuzne ussa wat sappat kit “kakishapu” kizara. Ñamin uspane Jerusalén pîpulura îara, Pascua pishta izana. Suane uspane Jesús wan kirît aizpa an pishtara izara. 46 Suasne Jesúsne Caná pîpulura, Galilea sura kailta. Ñamin usne sun pîpulukin kwazi vinora namninta. Suane mikwa îninmikane tuazi. Usne Capernaum pîpulura maza painkul imtu mîj. 47 Jesús Judea suras Galilea sukin pianakane, îninmikane Jesúspa mît kit izna ît kit ka paikwat: —Ap yalta îtpa, ap painkulta kakulninna. Inapain i, kizta. 48 Suasne Jesúsne kaizta: —Na chiwazha iztasparît kal kimtukine, une na Diostas at nîjkulamanazi. 49 Îninmikane kaizta: —Anpat. Ap painkul irachasmin, azain ussa izna anka. 50 Suasne Jesúsne kaizta: —Up yalta kailti. Up painkulne kakultu. An ampune Jesús kaizta aizpa nîjkul kit îra. 51 Paiña yalta pianatchasmin, paiña kiwaintuzne yaltas puzat kit ussa wanmalat kit kaizara: —Up painkulne kakulti. 52 Suasne usne miza paka kakulta mîmanara. Uspane sînkaara: —Anchik nashka maza urara immu kara. 53 Suasne papihshne sun urain paiña painkul kakulmîzta piankam kit Jesús kaizta aizpa ka nîjkulta: “Up painkul kakulti.” Katmizna uskas wan paiña kwalkas Jesústa, watsat mîlmumikara nîjkulara. 54 Judea suras Galilea surakima mamasa kailtawane, Jesúsne an kwizta iztasparît kal kira.
Chasachimikane ainki piwailta îmtu
1 Akkwan payuchirain Judío awaruz uspa pishta izamtuasmin, Jesúsne Jerusalén pîpulura kailta. 2 Jerusalén pîpulukin, pîriku pîjtakin, kwazi piwail uz. Judío awane sun piwail Betzata muntît. Cinco îranchu piwailmakin uzara. 3 Akkwan ishturuzkas, kasu izsachiruzkas, chasachiruzkas sîh pailtîttuzkas sun îranchura uzat kit sun piwail kialnapa tîrizara. 4 Masetne maza ángelne piwailta kihsh kit kwazi kialninta. Kwazi kialtuasmin, an ñancha naptamikane chiwazha ishtu mîj aizpa wat parît. 5 Mazane usparuztas treinta y ocho año ishtuazi. 6 Jesúsne us tukin izta. Us akkwan añokima sua tu pian akwa, Jesúsne ussa mîmara: —¿Ishtu wat pashimtukish? 7 Ishtumikane ussa sînkara: —Anpat, kwazi kialtukane, mînminkas nawa kiwainsachi, piwailta azain kihshninna. Na napshikane, mamazne an ñancha naptu. 8 Jesúsne ussa kaizta: —Kuhsakti. Up kama kuhsak kit chat. 9 Sun urain an ampune kakul kit paiña kama kuhsak kit chamîzta. An ampu kwaizkultu payura kakultît akwa, 10 Judío awa îninturuzne kakultîtmikasha kaizara: —Ma payu kwaizkultu payu i. Nune up kama mîlna îninsachi. 11 An ampune usparuza sînkanara: —Nawa kakulnintamikane nawa ka kaizta: “Up kama kuhsak kit chat.” 12 Suasne uspane ussa mîmaara: —¿Mînmika nua “Up kama kuhsak kit chat” kizta? 13 Kakultîtmikane ussa kakulnintamikasha pianchi, Jesús akkwan awa purakis karît akwa. 14 Kwiztane, Jesúsne ussa Dios katsa yalta wanmal kit kaizta: —Mîri. Mane nu kakultît akwa, mamasa kwail kimun, an kwail nua pizmanpa. 15 An ampune ît kit Judío awa îninturuza Jesús ussa kakulninta kainanara. 16 Katmizna Judío awa îninturuzne Jesústa kwail kishara, us kwaizkulmu payura sun kal kirît akwa. 17 Jesúsne usparuza sînkanat kit kaiznara: —Ap Taittane us kishimtu aizpa payu aizpakas sábado payu aizpakas kal kimtu. Sun akwa nakas payu aizpakas sábado payu aizpakas kal kishinash. 18 Katmizna, Judío awa îninturuzne Jesústa an piantashiara, uspa kwaizkulmu payu înintu aizpa mîshimtuchi akwa, Dios ap Papihsh i kizta akwa. Uskas Dioskasa kawarain namtît. Sun akwa uspane ussa piantashiara.
Dios Painkulne îninshina
19 Jesúsne usparuza Sábado payuwa, uspa kwaizkulmu payuwa, sînkanat kit kaiznara: “Watcha kaiznamtus. Nane, Dios Painkulne, apminpain kal kimtuchish. Nane ap Taitta kal kimtu aizpa iztus. Nakas ap Taitta kimtu aizpa kimtus. 20 Sunkana Taittane nawa paiña Painkulta pashimtu. Uskas an katsa iztasparît kal kinpa nawa kiwainnazi. Na sun chasachimikasha kakulnintakas, une sunkin an katsa iztasparît kal izaanazi. 21 Sunkana kirînazi. Taitta irîttuza kuhsninnamtu akwa, usparuza mamasa uzninnamtu akwa, paiña Painkulkas pashimturuza uzninnashina. 22 Taittane mînainkas kwail kirît kizmanazi, paiña Painkulta wan cîhkat akwa, awara kwail kiamtu kiznanapa, awaruza ilnanapa. 23 Suasne wan awane Painkultakas Taittarakas kawarain wat minñanazi. Painkulta, Dios înintamikasha, nîjchi kimturuzne Papihshtakas nîjchi kiamtu. 24 Watcha uruza kaiznamtus. Na kaizta aizpa mîmturuzne, nawa înintamikasha nîjkulturuzne pailta payukima uzanazi. Diosne uspa kwail kiarît aizpa ilmanazi, ïnta pakmanpa, Dioskasa uzanapa. 25 Watcha uruza kaiznamtus. Ma payu nîjkulturuzne na kaiztu aizpa mîat kit kianazi. Dios Painkul kaizta aizpa mîraruzne uzanazi. 26 Papihshmin awaruza uzninnashina. Sunkana Papihshne painkulta kiwainta, awaruza uzninnanapa. 27 Nane chiyuras ish. Diosne nawa narît, awa kwail kiarît kiznanapa, kwail kimtuza ilnanapa. 28 Na uruza kaiztu aizpa iztaspaman. Mamaz payura wan kamkin irîttuzne nawa mîanazi. Nane usparuza mamasa kuhsninnanazi. Sun payu taiznapain. 29 Wat kirîttuzne, irîttas kuhsanazi, pailta payu uzanapa. Kwail kirîttuzne irîttas kuhsak kit uspa kwail akwa naizanazi.”
Jesústa piantuzne us akwa wat kizamtu
30 “Ap minpain kal kisachish. Nane ap Papihsh nawa înintu aizpa kimtus, awaruza kwail kiarît aizpa kiznanapa. Kwailtuza ilnakane, nane nil aizpa kimtus. Na pashimtu aizpa kimtuchish. Ap Papihsh nawa înintît akwa, nane us pashimtu aizpa kishimtus. 31 Na uruza apminpain paratne, une na kaiztu aizpa watcha chi minñamtu. 32 Sunkana mamazne, ap Papihshne, nawa wat kainanazi. Us nawa kainammtu aizpa watcha i pianish. 33 Une mazantuza îninnara, Juanta, munnammikara mîmanapa. Us nawa sînkarît aizpa watcha azi. 34 Apas awa chiwazha kuruntu aizpa pashiamtukas, nane sunpa pashitchi ish. Mîshitchish. Nane uruza Juanpa, nawa watcha kainammmikawa, paranamtus, Dios uruza watsat mîlnanapa. 35 Juanne impil aiztukanain azi, u Dios wat miwara îanapa. Paiña pit kamtarît aizpa mîarît akwa, une us akwa akkwan payuchin watsal kulara. 36 Mamazne, ap Papihshne, na akwa wat kainammtus. Paiña pitne Juanpa pitkin anza tînta i, ap Papihsh nawa iztasparît kal kinpa, kiwainta akwa. Na sun kal kimtu akwa, une Dios nawa îninta piankamashina. 37 Papihshne, nawa înintamikane, nawa wat kainammtu. Une mizurainkas us uruza kaizta aizpa mîashitchi. Ukas mizurainkas ussa izarachi. 38 Une paiña pit u kaijchura watsamtuchi, u an Papihsh înintamikasha nîjkulamtuchi akwa. 39 Une Dios pînkîhta izamtu, an wat piankamna. Une Dios pînkîh izturuzne pailta payukima uzanazi ñanta minñamtu. Dios pit nawa paramtukas, 40 une nawa aashimtuchi, nawa nîjkulana, pailta payu uzana. 41 Awa nawa wat paramtukas, nane u watsal pit nawa paramtu aizpa mîshitchi ish. 42 Anpa nane uruza pianish. Une Diosta pashiamtuchi. 43 Dios nawa înintakas, une nawa sappamtuchi. Mamaz ukin akane, mamaz ussa înintuchikas, une ussa sappashina. 44 U uruzpain wat kizamtu akwa, une wat kulamtu. Diosne mazain uz. U Diosta piankamtuchi akwa, Diosne, mazain uzmikane, uruza wat awa mai kizmanazi. Katmizna une nawa nîjkulasachi. 45 Na uruza Papihshpa iztakin u kwail kiamtu kiznash minman. Sun kimanash. Une Moisésta tîrizamtu, uruza kiwainnanapa. Sunkana usne mizurainkas uruza kiwainmanazi, us u kwail kiamtu aizpa kiznamtu akwa. Une Moisés kamtarît aizpa kiashimtu, pailta payukima uznana. Sunkana une chiyura uzamanazi. 46 U Moisés kaizta aizpa mîaratne, une nawakas nîjkulashina, Moisés nawa pînkîhta para akwa. 47 U paiña pînkîh parît aizpa nîjkulamtuchine, une mizurainkas na paramtu aizpa nîjkulashitchi.”
Jesúsne cinco mil awara kumira kwinamtu
1 Kwiztane Jesúsne Galilea Pi kwakara îrît. Sun pine Tiberiaskas mun. 2 Kwisha akkwan awane ussa kanpaara, iztasparît kal kirît aizpa izara akwa. Akkwan ishturuza kakulninnara. 3 Suasne Jesúsne îzara nut kit sua uzta paiña kammuruzkasa. 4 Pascua pishta, Judío awaruzpa pishta, kasha pamtu. 5 Akkwan awa ussa kanpararuza iznarawane, Jesúsne Felipera kaiz kit mîmara: —¿Mîntama kumira paina îanapai, wan awa kuanapa? 6 Usne kaizta, sun Felipe chi kizkwarakas mîna. Jesúsmin us kishimtu aizpa wat pian. 7 Suasne Capernaum pîpulura îamtuasmin, Felipene ussa sînkara: —Mînpazha paas cien payu kal kitne, kumira paisachi, wanta pitchin nailnana. 8 Andrésne sua tuazi. Uskasa mamaz kammumika azi. Usne Simón Pedrowa aimpihsh. Suasne usne kaizta: 9 —Akkine maza ampu pashpa panai. Usne cinco chara pippa pankas paas pishkaru iltakas mîja. Sun nailtane, wan awa kuasachi. 10 Suasne Jesúsne ussa kaizta: —Wan awaruza uztain kiznari. Suain akkwan pît sau pura. Cinco mil ampuruzpain sua uzara. Ashamparuzkas pashparuzkas uspakasa uzara. 11 Suasne Jesúsne pan sap kit Diosta aishtaish kizta. Sun kiztawane, kammuruza kwinnara. Paiña kammuruzne wan uztuza nailnara. Kawarain pishkarukas nailnara, kwashimtu aizpa kuanapa. 12 Wan tukkarakane, Jesúsne paiña kammuruza kaiznara: —Chiwazha pitti pak tizka chaktain, chinkas kamanpa. 13 Cinco chara pippa sarît pantas tizat akwa, uspane pitti pitti sakkat kit doce tîmta winñara. 14 Suasne Jesús iztasparît kal kirît aizpa izarawane, awane kaizara: —Watcha. Usne Dios pit kainammmika i. Diosne ussa kin nam kit au sukin îninta. 15 Suasne Jesúsne awa minñamtu aizpa nîjkulta. Uspane ussa paiña mikwa namninashimtu. Usne mamasa kwash îzara usparuztas paimpa îrît, mazain tuan.
Jesúsne pi îsalpara chamtu
16 Amta parîka, Jesúspa kammuruzne aiz pira kihshat kit 17 maza kanuara waat kit aiz pi kwakkamîzta, Capernaum pîpulura piannana. Tîlkwil parît me. Jesúsne mama uspa tukin kailtachi. 18 Suasne tînta inkwa pamîzta. Aiz pikas tînta kialmîzta. 19 Cinco o seis kilómetros îarawane, uspane Jesústa kasha amtu izara. Usne pi îsalpara chara. Uspane ishkuara, ira izpulta izara mintît akwa. Jesús kwinta kinarawane, uspane ussa piankamara. 20 Jesúsne kaiznara: —Na ish. Ishkuman. 21 Suasne uspane ussa kanuara wat sappara. Sun urain sun pilta îamtura pianaara.
Awane Jesústa sayamtu
22 Tîlawara pãn puzmukin pimamin puraruzne kammuruz maza kanuawara îara pian. Suane maza kanua wa chi. Uspane Jesús uspakasa îtchira pian. 23 Sun urain mamaz kanuaruz Tiberias pîpulu suras pianaara. Sun sukin Jesúsne Diosta aishtaish kiz kit pan nailnara, awa pan kuanapa. 24 Jesúskas paiña kammuruzkas purachira piankamtawane, awane sun kanuaruza waat kit Capernaum pîpulura ussa saina îara.
Jesúsne, pankanain, awara uzninnanazi
25 Kwakara pianaakane, uspane Jesústa wanmalat kit mîmaara: —Kamtam, ¿Miza ura apa pianarau? 26 Jesúsne sînkanat kit kaiznara: —Watcha kaiznamtus. Une nawa sayamtu, u tuknakima kuat akwa. Nawa sayamtuchi, na iztasparît kal kirît aizpa piankamta akwa. 27 Chiwazha pailtîmtu aizpa saikain. Chiwazha pailmuchi aizpa sairain, uruza pailta payu uzninanapa. Nawa chiyuras Ampura sairain, u we mîj aizpa sappanapa, pailta payukima uzanapa. Ap Taitta Diosne nawa narît kit paiña kal kinpa kiwainta. 28 Suasne ussa mîmaara: —¿Aune chima kianapai, Dios pashimtu aizpa kin? 29 Jesúsne sînkanat kit kaiznara: —Dios pashimtu aizpa kiarawa. Une nawa, Dios înintamikasha, nîjkularawa. 30 Suasne sînkaara: —¿Chiwazha iztasparît kal izninchain, nua nîjkulanapa? ¿Chi kalma au akwa kinash? 31 Au an ñamin kwalne pul sukin maná kumira kuara. Sunkana Dios pînkîhta parît: “Diosne usparuza chiyuras kumira kwinnara.” ¡Au iztakin sunkana iztasparît kal kiri! 32 Jesúsne sînkanara: —Watcha kaiznamtus. Moisésne uruza chiyuras kumira kwinnarachi. Ap Taittain sun watcha chiyuras kumira uruza kwinnara. Sun pankana, nane awaruza chiyura uzninnashina. 33 Dios maná kumira kwinarakas, usne chiyuras kihshtamikasha îninta, awaruza uzninnanapa. 34 Suasne uspane paikuara: —Anpat. Aumîza an kumira kwinchain, pailta payukima uznapa. 35 Jesúsne kaiznara: —Nane Diostas kumirakanain ish. Nane uruza pailta payu uzninnashinas. Nawa amtumikane mizurainkas we nîjkulanazi, Diosta piankamtu akwa. Nawa nîjkultumikane pailta payukima Diospa kamshina, Diosta an piankamshimtu akwa. 36 Ñamin sunpa uruza kaiznara. Nawa izarakas, une nawa nîjkulamtuchi. 37 Wan ap Taitta nawa mîlamturuzne nawa aamtu. Nane nawa attuza sapnanash, usparuza ap izmuruz namanapa. 38 Nane chiyuras kihshtau. Na kishimtu aizpa kimtuchish. Ap Taitta nawa îninta akwa, nane us pashimtu aizpa kishimtus. 39 Ap Taitta nawa îninta aizpa kinash, us nawa mîlattuza kamanpa. Nane minpa payura usparuza irîttas kuhsninnanash. 40 Ap Taittane, nawa înintamikane, sun kishimtu, wan awa Dios painkulta izat kit nîjkulanapa, pailta payukima uzanapa. Suasne minpa payura usparuza irîttas kuhsninnanash. 41 Suasne Judío awa îninturuzne Jesúspa kwail kizamîzta, “Nane chiyuras taizta kumira ish” kizta akwa. 42 Usparuzpain kaizara: —An ampune Jesús i. Joséwa painkul i. Aune paiña papihshtakas akkuhshtakas pianmakpas. ¿Mizama ka kiztui, “Usne chiyuras kihshta?” 43 Suasne Jesúsne sînkanat kit kaiznara: —Uruzpain nawa kain kwail kizman. 44 Ap Taittane, nawa înintamika i. Dios awaruza nawa karamtukine, mînminkas nawa asachi. Nane nawa atmikasha minpa payura kuhsninnash. 45 Dios kainammmikane pînkîhta ka parît: “Diosne wanta kamtananazi.” Sunkana Taittara mîamturuzkas us kamtara aizpa piankamturuzkas nawa aanazi. 46 Mînminkas mizurainkas Taittara iztachi. Mazain, Diostas atmikain, Taittara izta. 47 Watcha kaiznamtus. Nawa nîjkulamtumikane pailta payukima uznazi. 48 Nane kumirakanain ish, awaruza uzninana. 49 U ñancha kwal pul sukin maná kumira kuarakas, wanne iarît. 50 Nane chiyuras kumirawa paranamtus. Mînpazha ussa saptane, mizurainkas imanazi. 51 Nane an kumira chiyuras taizta aizpa ish. Nawa saptumikane pailta payukima uznazi. Na kumira kwintu aizpa ap ña i. Nane ap ña kwinnanash, wan awa uznanapa. 52 Katmizna Judío awa îninturuzne Jesúspa tînta kwinta kiat kit usparuzpain kaizara: —An ampune ¿Mizama paiña ña kwinshina, au kuwiznapa? 53 Jesúsne kaiznara: —Watcha kaiznamtus. Na u akwa irîkane, ap aimpi puznazi. Nawa chiyuras ampura saptukine, une watcha uzamanazi. 54 Nawa saptumikane pailta payukima uznazi, na us akwa irît akwa, ap aimpi us akwa puztît akwa. Nane minpa payura ussa kuhsninnash. 55 Ap ñane watcha kumirakanain i. Ap aimpikas watcha kwazikanain i. 56 Na u akwa irît akwa, nawa saptumikane nakasa wanmaktu. Nakas uskasa wanmalnash. 57 Ap Taittane, nawa înintamikane, uztu. Nakas us akwa uztus. Sunkanain nawa sapturuzne na akwa uzanazi. 58 Nane chiyuras amtumikawa paramtus. Nane pankanain namtît ish. U ñancha kwal sun kumirakana kuarachi. Sun maná pan kuarakas, kwiztane iara. An chiyuras amtumikasha sapturuzne pailta payukima uzanazi. 59 Jesúsne Capernaum pîpulura Judío kamtam yalkin sun kamtanara.
Jesúspa pit awaruza uzninnamtu
60 Sun kamtam mîarawane, akwan Jesústa kanpamtuzne ka kaizara: —Ankamtam pit kwisha sam i sapna. ¿Mînma sun pit mîshinai? 61 Jesúsne paiña kanpamtuz kain kaizamtu aizpa piankam kit mîmanara: —¿Ap kamtam mîasachimakkiwas? ¿Nawa chîhkashimtumakkiwas? 62 Nane chiyuras ampune an ñamin ap uzmukin uztau. U mamasa nawa chiyura numtu izarane, ¿Chima minñamtuas? 63 Diospa Izpulmin awaruza uzninnamtu. Awain sun kisachi. Ap pit uruza kaiznamtu: “Diospa Izpulne awaruza uzninnashina.” 64 Mama mînpazha ukis nawa nîjkulamtuchi. An ñamin Jesúsne nîjkultuchiruzakas ussa chîhkamtumikashakas piankam 65 kit kaizta: —Sun akwa nane uruza ka kaiznarau: “Ap Taitta mazara karamtuchine, mînminkas nakin asachi.” 66 Sun urain akkwan paiña kanpamtuzne Jesústa kwaiyat kit uskasa cîhkaarazi. 67 Suasne Jesúsne paiña doce kammuruza mîmanara: —¿Ukas îshimuskiwas? 68 Simón Pedrone sînkara: —Anpat. ¿Mînama kanpana îpai? Up pitne aumîza uznintu. 69 Aune nua nîjkultamakpas me. Aune nua piankamtamakpas. Nune Cristo i. Nune Diospa sînammika i. 70 Jesúsne sînkanara: —Nane u doceruza nanaraish. Mazane ukis nawa alizmika i. 71 Sun kizka, Jesúsne Judas Iscariotewa, Simónpa painkulpa, paranara. Judasne doce kammuruztas azi. Jesústa kanpamtukas, ussa chîhkashina.
Jesúspa aimpihshne ussa nîjkulamtuchi
1 Sun kitpane, Jesúsne Galilea suwara chara. Judea sukin îshitchi, sua Judío awa înintuz ussa piantashiamtu akwa. 2 Judío awawa katsa pishta kasha pamîzta. Sun pishtara Judío awane ainki îranchu saat kit sua uzara. 3 Paiña aimpihshtuzne ussa kaizara: —Apain nukkulmun. Judea sura îtpa, nuwa kanpamtuz up kal kimtu aizpa izanapa. 4 Nu kimtu aizpa puinmun, akkwan awa nu kimtu aizpa piankamanapa. Nune kwisha watsal kal kimtu. Katmizna sun kitpa, wan awa up kal izanapa. 5 Paiña aimpihshtuzne us watsat mîlmumika i nîjkularachi. 6 Jesúsne kaiznara: —Ma payu nane Jerusalén pîpulura chamanash. Uruzne chiwazha urara îashinai. 7 Ma uztuzne uruza aliz kulamanazi. Uspane nawa aliz kulamtu, na usparuza kwail kiamtu kiznamtu akwa. Katmizna uspane nawa pashiamtuchi. 8 Une pishtara îrain. Nane îmtuchish, na ap wat îmtu payu taiztachi akwa. 9 Usparuza sun kiznarawane, Galilea sura nukkulta.
Jesúsne ainki îranchu samtu pishtara îmtu
10 Paiña aimpihshtuz îarawane, Jesúskas izpachin pishtara îzi. 11 Judío awa îninturuzne ussa pishtara sayat kit kaizara: —¿Sun ampune mîntama tusa? 12 Awa usparuzpain us akwa kwisha kwinta kiara. Mînpazha ka kizara: “An ampune wat amit.” Mamaztuzne ka kizara: “Usne watchi. Usne awaruza kain kinamtu.” 13 Sunkana mînminkas Jesúspa tînta pararachi, Judío awa îninturuzpa ishkuamtu akwa. 14 Pishta kakwa pamtîkane, Jesúsne katsa Dios yalkin nap kit awaruza kamtanamîzta. 15 Judío awane iztaspaat kit kaizara: —An ampune ¿Mizamaka wan piani, pînkîh kamtachine? 16 Jesúsne sînkanara: —Ap kamtamne apchi. Nawa înintamikane na kamtamtu aizpa nawa chîhkara. 17 Dios pashimtu aizpa kitmikane ap kamtampa piankamnazi. Dios nawa kamtamtu akwa, une Diospa piankamanazi. Na mintu aizpa kamtamtuchi. 18 Usminpain paramtumikane sunkana kimtu, awa ussa wari paraanapa. Kal kimtumikane paiña kal kitpa, awa ussa îninmumikasha wari kizanapa. Sun ampune watcha i. Mizurainkas pîrail kaiztuchi. 19 Moisésne uruza îninnara, paiña înintu aizpa kianapa. Une us kaiznara aizpa kiamtuchi. ¿Chitma une nawa piantashimuspas? 20 Awane sînkaara: —Salizne nua pizta. ¿Mînma nua piantashimtui? 21 Jesúsne sînkanat kit kaiznara: —Na maza iztasparît kal kwaizkultu payura kit akwa, une sunpa iztaspaarît. 22 Sunkana Moisésne uruza ampu pashpawa aya tîtnapa, circuncisión kitpa, îninnara. (Moisés sun îninnarachikas, u kwalne an ñamin sun kinanapa îninnara.) Katmizna une kwaizkulmu payurakas ampu pashpawa aya tîttamtu. Ankas kal i. 23 Une ampu pashpawa aya tîttamtu, Moisés kaizta aizpa kianapa. Une kwaizkulmu payura sun kiamtu. Na maza ampura kwaizkulmu payura kakulnintune, une ¿chitma nakasa aliz kulamtu? 24 U awa kiamtu aizpa izamtuasmin, usparuza “kwail kiarît” kizman. U awa kiamtu aizpa izakane, une uspawa watcha kainarawa.
¿Nu Cristokish? mîmamtu
25 Suasne mînpazha Jerusalén pîpulura uztuzne usparuzpain mîmamîzta: —¿Awane an ampura piantana sayamtuki? 26 Mane usne wan iztakin paranamtu. Mînminkas chinkas kizamtuchi. ¿Judío înintuzne an ampu Dios nîrîtmika i nîjkulamtuki? 27 Aune an ampu mîntas amtu pianmakpas. Dios narîtmika akane, mînminkas mîntas amtu piankamasachi. 28 Dios katsa yalta kamtanamtuasmin, Jesúsne sun mît kit tînta kaiznara: —Une nawa piankamamtu. Une na mîntas amti pian. Apminpain at chi ish. Usne, watchamika i, nawa îninta. Une ussa pianchi. 29 Nain ussa pianish, us nawa îninta akwa. Mane tas arau. 30 Suasne awa ussa piz kit sîpshiarakas, mînminkas ussa pizarachi. Mama ussa piztu payu taiztachi. 31 Akkwan awane us nîrîtmika i nîjkulara. Mamaztuzne kaizara: “Dios nîrîtmika akane, usne, an ampukana, anza iztasparît kal kimanazi.”
Policíara îninamtu, Jesústa piznapa
32 Fariseo awa Jesúspa kaizamtu aizpa mîarawane, uspakas pariya înintuzkas Dios katsa yalkis policíaruza îninnara, Jesústa piz kit mîl kit kajchira sîpnapa. 33 Suasne Jesúsne kaiznara: —Nane ukasa akwan payu chin tunash. Suasne nawa înintamikawarain kailtînash. 34 U nawa sayamtukas, une nawa wanmalamanazi. Mînminkas na îmtura îasachi. 35 Suasne Judío awane usparuzpain ka mîmamîzta: —¿Anne mînpa îrînsa? Usne au iztakis îsachi. ¿Usne Griego suwara Judío awaruza kamtana îrînsa? ¿Diosta pianchiruza kamtana îrînsa? 36 Us kaiztu aizpa piankamsachimakpas. Sunkana kaizta: “Nawa saiyanazi. Nawain wanmalamanazi. Une na îmtura îasachi.”
Diosne awaruza uzninnamtu
37 Minpa pishta payune anza katsa i. Sun payura Jesúsne kuhs kit tînta kaiznara: —Mînpazha kwazi kiltane, nawa anka. Nawa nîjkultumikane nawa atpa, kwanpa, uznapa. 38 Jesúsne sunpa kaiz kit kwaziwa kwinta kira, awa kwazi kiltu akwa. Awane kwazi kwanpa pashiamtu, au sukin uzna. Jesúsne ankas Dios pitpa kaiztu: Nawa nîjkultumikane kwazi kumtu mikakana i. Usne uznazi. 39 Sun kizkane, Jesúsne paiña Sînam Izpulpa kwinta kira. Paiña Sînam Izpulne Jesústa nîjkultuza sapnashinat kit uzninnanazi. Jesús mama irîttas kuhstachi akwa, Diosne paiña Sînam Izpulta mama înintachi, Jesústa an watsal namnapa.
Awaruzne paimpa îamtu
40 Jesús kaizta aizpa mîarawane, mînpazha awaruzpain kaizara: —An Dios kainammmikane i. 41 Mamaztuzne kaizara: —Anne Dios narîtmika i. Mamaztuzne mamaz tuntu kizara: —Cristone Galilea suras amanazi. 42 Dios pînkîhta ka parît: “Cristone Davidpa îninmikawa kwaltas puznazi. Usne Belén pîpulukin kawinazi.” 43 Awane Jesús akwa paimpa îara. 44 Mazakanane ussa pizshiara, kajchira sîpna. Mînminkas ussa pizarachi.
Judío înintuzne Jesústa nîjkulamtuchi
45 Dios katsa yalkis policíane îninturuz purakin kaiyara. Pariyaruza înintuzkas Fariseo policíaruzkas mîmanara: —¿Chikishma Jesústa karaamanash? 46 Policíane sînkanara: —Mînminkas an ampukana paratchi. 47 Suasne Fariseo awane mîmanara: —¿Jesúsne uruza kain kinamtukish? 48 Au Judío awaruza îninturuzne us Dios narîtmika i nîjkularachi. Fariseo awaruzkas us Dios narîtmika i nîjkularachi. 49 An awane Moisés îninta aizpa kanpamtuchiruzne wan karaanazi. Uspane Jesústa mîat kit ussa kanpaamtu. 50 Nicodemone, Jesústa amta izna îtmikane, Fariseo awaruztas azi. Usne kaiznara: 51 —Aumîza înintît aizpa pianmakpas. Aune mazara kwail kirît kizsachimakpas. An ñancha aune ussa mîrawamakpas, paiña kwail kirît aizpa piankamna. 52 Suasne sînkaara: —¿Nukas Jesúskana Galilea suras atkish? ¿Nu paiña kanpammika kish? Dios pînkîhta iztane, une Dios kainammika Galilea suras amtuchira piankamanazi. 53 Suasne wan chiwal usparuzpa yalta kaiyarît.
Kwail kimtu ashampara pizamtu
1 Uspa îarawane, Jesúsne Olivos îzara îrît. 2 Tîlawara kînkane, Jesúsne Dios katsa yalta kailta. Akkwan awane us tukin aara. Usne uz kit usparuza kamtanamîzta. 3 Suasne Moisés îninta aizpa kamtamtuzkas Fariseo awaruzkas maza ashampara, mamazpa ampukasa pittît wanmaltîtmikasha, Jesústa karaara. Uspane wan iztakin ussa kunninat 4 kit Jesústa kaizara: —Kamtam. Aune an ashampara, mamazpa ampukasa pittîtmikasha, wanmaltamakpas. 5 Moisés pînkîhta parat kit aumîza îninta, sun kwail ashampara ukkasa piantanapa. ¿Chima kiztus nune? kizara. 6 Uspane sun mîmaara, ussa kwail kizninna, ussa mikwa iztukin kwail kizninna. Suasne Jesúsne wain kit pul pilta chihtî tîppukasa pamîzta. 7 Ussa mîmaamîztuasmin, Jesúsne nil sat kit kaiznara: —¡Uruztas chinkas kwail kitchimikane ussa an ñanchain uk kirain! 8 Mamasa wain kit pul pilta pamîzta. 9 Jesús kaizta aizpa mîarawane, uspane uspa kwail kiarît aizpa minñara. Îlaparuzne an ñancha maza mazain puzat kit ashamparas îamîzta. Wan îarawane, Jesúsmin sun ashampakasain sua nukkulta. 10 Suasne Jesúsne nil sat kit ussa mîmara: —Ashampa, nua kwail kirît kizturuzne ¿mîntama purai? ¿Mînminkas nua kwail kirît kiztuchiki? 11 Usne ussa sînkara: —Anpat, mînminkas nawa kwail kirît kiztachi. Jesúsne kaizta: —Nane nu kwail kirît aizpa watkulnintus. Ît kit an kwail kimun.
Jesúsne impilkanain kai aiznintu
12 Jesúsne mamasa paranat kit Fariseo awaruza kaiznara: —Nane impilkanain ish, wan awaruz uspa kaijchukin minñamtu aizpa kai piankamanapa. Nawa kanpararuzne ap kammuruz namanazi. Tîlta chaamtuchi akwa, nane usparuza uzninnanash. Sun kai impil izarawane, uspane Dioskasa wat uzanazi. 13 Sun mîarawane, Fariseo awaruzne kaizara: —Nune up minpain paramtu. Nuin kaiztu aizpa kainsîh i. 14 Jesúsne sînkanara: —Nain paramtukas, na kaizta aizpa watcha i. Nane mîntas at pianish. Mînta îmtukas pianish. Une na mîntas amtukas mînta îmtukas pianchimai. 15 U na kimtu aizpa izamtukas, une awakanain minñat kit na kwail kimtu kizamtu. Nane mînainkas kwail kirît kiztuchish. 16 Mamazta kwail kirît kiztakas, na chiwazha kiztu aizpa watcha i. Nain mamazta kwail kirît kiznamtuchish. Nakas, ap Taitta nawa îninmikakas, awara kwail kiarît kiztuas. 17 Sun pit uruza înintu aizpa sunkana parît: “Paas awane kawarain nîjkulkane, uspa kaizta aiza watcha i.” 18 Mane nain na pian aizpa kaiztus. Mamazkas, ap Taittakas, nawa înintamikakas, us pian aizpa kawarain kaiztus. 19 Suasne uspane mîmaara: —¿Mîntama tui up Taitta? Jesúsne sînkanara: —Une nawakas ap Taittarakas pianchimai. Nawa piankamtaratne, une ap Taittarakas piankamashina. 20 Dios katsa yalkin pial sapmukin kamtanamtuasmin, Jesúsne sun kizta aizpa kaiznara. Mînminkas ussa pizshiarachi, paiña naiztu payu taiztachi akwa.
Jesúsne na îmtura îasachi kiznara
21 Jesúsne mamasa kaiznara: —Nane îru. Une nawa sayanazi. Kwail kiamtu akwa, une ianazi. Une na îmtura îasachi. 22 Suasne Judío îninturuzne kaizara: —U na îmtura îasachi kaiztu akwa, ¿Ussain piantamtuki? 23 Suasne Jesúsne kaiznara: —U an sukin pura akwa, une apas kal mîj. Na kwashpas at akwa, nane chiyuras kal mîj ish. Une an sukin uzamtu. Nane chiyuras atmika ish. 24 Katmizna uruza ka kiznarau: “Kwail kiamtu akwa, une ianazi. U na watsat mîltamika ish nîjkulamtukine, une kwail kiat kit ianazi.” 25 Suasne mîmaara: —¿Nune mîntas mas? Nune watsat mîltamika chi. Jesúsne sînkanara: —An ñamin uruza nane mînmika i kaiznarau. 26 Nane uruza akkwan pit kaiznawaish. U kwail akwa, nane uruza kwail kiamtu kiznat kit naizninnanazi. Nawa înintamikane watcha kaiztu. Nane us nawa kaizta aizpa uruza paranamtus. 27 Uspane Papihshpa paraka mîarachi. 28 Katmizna kaiznara: —Nawa chiyuras Ampura kurishta patpianka, une nawa piankamaanazi. Nane uruza mînma ish kiznarau. Apminpain kimtuchish, na ap Taitta nawa kamtara aizpa kamtanamtu akwa. 29 Nawa înintamikane nakasa tu. Ap Taittane nawa kwairachi, na us pashimtu aizpa kimtu akwa. 30 Jesús sun kizkane, kwisha akkwan awane ussa nîjkulara.
Diosta piantuzkas kwail kimtuzkas
31 Suasne Jesúsne Judío awa ussa nîjkultaruza kaiznara: —U na kamtara aizpa nil kiamîztane, une ap kammuruz namashina. 32 Suasne une watcha piankamanazi. An watcha pitne uruza kwailtas puzninnanazi, Dios uruza watsat mîlnamtu akwa. 33 Uspane ussa sînkaara: —Aune Abrahampa kwal makpas. Katmizna aune kwail aizpa kimtuchimakpas. Nune au kwail kiamtumakpas kizsachi. 34 Jesúsne kaiznara: —Watcha kaiznamtus. Wan kwail kimtuzne sun kiamtu, kwail kiashimtu akwa. 35 Kal kiwainmumikane pailta payu anpatpa yalta kal kimtu. Mînminkas ussa chîht îninsachi. Yalpamikakas, paiña kwalkas kal kiwaintuza chîht îninnashina. 36 Katmizna Dios Painkulne u kwail kiarît aizpa watkulninnashina, us Papihshkasa uztu akwa. Painkul uruza wat kulninnashimtune, usne u kwail kiarît aizpa wat kulninnashina, sunpa chîhtnapa. 37 Nane u Abrahampa kwal mai pianish. Na kamtara aizpa mîarachi akwa, une nawa piantaashimtu. 38 Nane ap Taitta nawa kamtara aizpa paranamtus. Une u Satanás taitta parat aizpa kiamîztu. 39 Uspane sînkaara: —Au taittane Abraham i. Jesúsne kaiznara: —U Abrahampa painkultuz watcha aratne, une Abrahamkanain Diosta kanpaashina. 40 Diosne nawa watcha kamtara. Na sun watcha uruza kiznarakas, une nawa piantaashimtu. Abrahamne mizurainkas sunkanain kitchi. 41 Une u taitta kirîtkanain kiamtu. U taittane Dios chi. U taittane Abraham chi. Suasne uspane kaizara: —Aune mamaz papihshtas pashpa kawirachimakpas. Au Taitta pianmakpas. Usne Dios i. 42 Jesúsne kaiznara: —Dios u Taitta watcha aratne, une nawa paashina. Na Diostas at akwa, akki tus. Apminpain atchish. Sunkana Diosne nawa îninta. 43 Na kaizta aizpa piankamamtuchi akwa, une ap pit mîasachi. 44 U taittane Diablo i. Une ustas puzat kit us pashimtu aizpa kiashimtu. Diablone pailta payukima awaruz ianapa pashira. Usne watcha kishitchi, watcha kaiztuchi akwa. Pîrail kaizkane, usne paiña kaijchuras paramtu. Usne pîrailmika i. Usne awaruza pîrail kaizanapa kininamtu. 45 Katmizna na watcha kaiznamtukas, une na kaizta aizpa nîjkulamtuchi. 46 Une na kwail kirît aizpa aansachi. Na watcha kaiznakane, ¿Chikishma na kaizta aizpa nîjkulamtuchi? 47 Diosta piantuzne Dios pit mîamtu. U Diosta pianchi akwa, une us kaizta aizpa mîamtuchi.
Abraham chasmin, Cristone uzta
48 Suasne Judío awane ussa kwail kizara: —Au kaizta aizpa watcha i. Nune Judío awa chi. Nune Samaria pîpuluras awakana i. Salizne nua piztît. 49 Jesúsne sînkanara: —Saliz nawa piztachi. Nane ap Taittara kwisha wari kiztus. Sunkana une nawa kwail i kizamtu. 50 Nane awaruza saimtuchi, nawa wari kiznapa. Diosne nawa wari kiznazi. Usne wan iz kit na akwa nil kiznazi. 51 Watcha kaiznamtus. Na kamtara aizpa kimturuzne mizurainkas iamanazi. 52 Sun mîarawane, Judío awane sînkaara: —Mane aune saliz nua pizta pianmakpas. Abrahamkas wan Dios pit kaiznamtuzkas iarît. Nune ka kiztui: “Na kamtara aizpa kimturuzne mizurainkas iamanazi.” 53 Au Taitta Abrahamne irît. ¿Nune au Taitta Abrahamkin an katsa kish? Dios kainammtuzkas iarît. ¿Nune mîntasmas? Nu kwail mintui, nu katsamika chi akwa. 54 Jesúsne sînkanara: —Nain watcha ish kaiztane, na kaizta aizpa kainsîh. Ap Taittane nawa wari kiztu. Ukas us au Dios i kizamtu. 55 Sunkana une mizurainkas ussa pianchi. Nain ussa pianish. Na pianchish kiztane, nakas ukanain pîrail kizshina. Nain ussa watcha pianish, us kaiztu aizpa kimtu akwa. 56 U taitta Abrahamne watsal kira, na amtu payuwa piankamtît akwa. Usne sun iz kit watsal kira. 57 Suasne Judío awaruzne Jesústa kaizara: —Nune cincuenta años mîjchi mama. ¿Nune Abrahamta iztakish? 58 Jesúsne sînkanara: —Watcha kaiznamtus. Abraham kawirachasmin, nane uzarau. 59 Suasne uspane uk chakkara, Jesústa kin. Jesúsne ussa kulat kit Dios katsa yaltas puz kit uspa paizkakis ît.
Jesúsne kasu izsachimikasha kakulnintu
1 Mamaz payura miwara îmtuasmin, Jesúsne maza ampu izsachi kawirîtmikasha izta. 2 Paiña kammuruzne mînpazha kwail kirît minñat kit mîmaara: —Kamtam. ¿Chikishma an ampu izsachi? ¿Papihshkas akkuhshkas kwail kirîtwailki? ¿Usmin kwail kirîtki? 3 Jesúsne sînkanara: —Us izsachikas, paiña kwail kirît akwa, kasu tîlkwil kirîtchi. Papishtuzkas kwail kiarachi. Usne izsachi kawira, awa Dios kal kimtu aizpa izanapa. 4 An payu asmin aune kal kipuspas. Tîl pakane, aune kal kisachimakpas. Sunkana pailta payukima nane ap Taittawa kal kitpaish, us paiña kal kinpa, nawa înintît akwa. 5 An sukin tuasmin, nane impilkanain ish, apas awa uspa kaijchukin minñamtu aizpa kai piankamanapa. 6 Sun kiztawane, Jesúsne pilta ilpi îtkulat kit ilpikasa pitchin pilkasa sain kit kasu îsalparain izsachimikasha nîra. 7 Kwiztane ussa kaizta: —Mane ît kit Siloé kwazi piwailta kittas. (Awa pitne Siloé “îninta” mun.) Suasne an ampune ît kit matsîhta kit kit paiña yalta iztu kailta. 8 Suasne makin uztuzkas ñamin kasu izsachi pial paikwatmikasha iztaruzkas kaizara: —¿An ampune pial paikwan uzatmikaki? 9 Mînpazha kaizara: —Watcha. Us i. Mamaztuzne kaizara: —Us chi. Uskanain iztît i. An ampune kaizta: —Watcha. Nane an pial paikumtuatmika ish. 10 Suasne ussa mîmaara: —¿Mizama mane izshinas? 11 Usne sînkanara: —Maza ampune, Jesús munmikane, pil sat kit îsalpara kasura pil nît kit kaizta: “Siloé kwazi piwailta ît kit kittash.” Îrau. Na kitpane, izshinarau. 12 Suasne ussa mîmaara: —¿Sun ampune mîntama tui? Usne kaiznara: —Pianchish.
Fariseo awane izsachimikasha, wat parîtmikasha, mîmaara
13 Suasne uspane izsachimikasha, wat parîtmikasha, Fariseo awa purakin mîlaara. 14 Jesúsne kwaizkulmu payura ilpikasa pil sat kit izsachimikasha wat paninta. 15 Suasne Fariseo awane mamasa an ampura ¿Mizama mane kasu izshinai? mîmaara. Usne kaiznara: —Usne pil kasu îsalpara nîish. Nane kasu kittau. Mane iztus. 16 Suasne mînpazha Fariseo awaruztas kaizara: —Sun kirîtmikane Diostas asachi. Usne kwaizkulmu payu nîjchiwal kimtu. Mamaztuzne kaizara: —Kwail kirîtmika kane, ¿Mizama akwan wat kal kishinai? Sun kizara aizpa akwa, uspane usparuzpain paimpa naiyara. 17 Mamasa kasu izsachimikasha mîmaara: —¿Nune chi kiztu kasu izkulnintamikawa? Usne kaiznara: —Usne Dios pit kainammmika i. 18 Judío awa îninturuzne sun ampu kasu izsachira nîjkulshiarachi, paiña kasu iztu akwa. Suasne uspane kasu izsachimika wat parîtpa papihshtakas akkuhshtakas akuat kit 19 mîmaara: —¿Anne u painkulki? ¿Us kasu izsachi kawirît kizamtuki? ¿Mizama mane iztui? 20 Papihshkas akkuhshkas sînkanara: —Aune au painkul i pianwas. Usne kasu izsachi kawirît. 21 Mane miza iztu pianchiwas. Mînma ussa kasu izkulninta pianchiwas. Ussa mîmarain. Îlapa wai. Usmin uruza kainashina. 22 Papihshkas akkuhshkas sun kizpailta, Judío îninturuza ishkwantu akwa. Uspane usparuzpain nîjkulara, Jesús Dios narîtmika i kizmuruza Dios kammu yalkis ukkat kit puzninnana. 23 Katmizna paiña papihshkas akkuhshkas sun kizpailta: “Ussa mîmarain. Îlapa wai.” 24 Suasne Judío awane mamasa an ñamin kasu izsachimikasha akwaat kit kaizara: —Dios iztakin watcha kaizti. Aune an ampu kwail kimmika i pianmakpas. 25 Usne sînkanara: —Us kwail kirîtne, pianchiish. Nain sun pianish. Nane kasu izsachiarau. Mane iztus. 26 Mamasa mîmaara: —¿Nua chima kizi? ¿Mizama kizi, up kasu izkulninna? 27 Sînkanara: —Uruza kaiznarau me. Une mîamtuchi. ¿Chishma sunmin mamasa mîashimtuwas? ¿Ukas ussa kanpashiamuskiwas? 28 Suasne ussa kwail kizat kit kaizara: —Nune sun ampura kanpam kit us kaiztu aizpa mîmtu. Aune Moisésta kanpam kit us kaiztu aizpa mîmtumakpas. 29 Aune Dios Moisésta parara aizpa pianmakpas. Anne mîntas at pianchimakpas. 30 Usne sînkanara: —U sun kaizamtu akwa, nane iztasparu. ¿Une sun ampu mîntas amtu pianchimakkiwas? Usne nawa kasu izkulninta. 31 Watcha i. Diosne kwail kimtuza mîmtuchi. Usne Diosta wakpuj waintuzainkas Dios îninta aizpa kimturuzainkas mînamtu. 32 Au su sarasmin, mînminkas sunpa mîarachi. Mizurainkas mînminkas kasu izsachi kawirîtmikasha izkulnintachi. 33 Sun ampu Diostas atchine, chinkas kisachi. 34 Uspane sînkaara: —Kawirasmin, nune kwail kira. ¿Nune aumîza kamtashimtukish? Uspane ussa Dios kammu yaltas ukkat kit puzninara.
Mînpazha kasu izsachimikakana tu
35 Awa kasu izsachimikasha kammu yalkis ukkat kit îninara. Jesús sunpa piankamtawane, usne ussa sait kit wanmal kit mîmara: —¿Nune chiyuras Ampura nîjkultukish? 36 Ampune sînkat kit kaizta: —Anpat. ¿Mînmas? Mînma i kaizcha, na ussa nîjkulnapa. 37 Jesúsne ussa kaizta: —Nune ussa iztît me. Nain ish. Nane nukasa paramtus. 38 Suasne ampu Jesústa wakpuj waintuasmin, kaizta: —Anpat. Nane nu Dios narîtmika i nîjkultus. 39 Suasne Jesúsne kaizmîzta: —Nane an sukin arau, awa uspa kwail piankamanapa, Dios usparuza watsat mîlnanapa, kwail kiamanpa. “Diosta pianmakpas” minturuzne Diospa watsat mîlmumikasha kwayanazi. 40 Suasne sun mîarawane, mînpazha Fariseo awaruztas us panatkin ussa mîmaara: —Aune watcha Diosta pianmakpas, kizara. 41 Jesúsne sînkanara: —U Diosta pianchine, u kwail kiarît aizpa pianchi. U Diosta pianmakpas kizamtukas, une kwail kiarît aizpa nukkultu.
Pîrikuwa izmumika kamtam kwinta
1 Suasne Jesúsne awaruza kamtanamîzta. “Watcha kaiznamtus. Pîrikuwa pîjtakin napmuchimikane, walkumkanakas mamaztuza kwail kishimmikakanakas mai, mamazpara naptu akwa. 2 Pîjtakin napmumikane pîriku izmumika i. Usne pîrikura kiwainamtu. 3 Pîjta iztumikane pîjta chîhtu, pîriku izmumika napnapa. Pîrikune us parîka piankam kit mîamtu. Usne pîrikuwa mun akwanat kit pîriku wakis ukkanamtu. 4 Paiña pîrikuruza puzninarawane, usne uspa purakin an ñancha îmtu, mi anna. Pîrikune ussa kanpaamtu, paiña pit piankamamtu akwa. 5 Uspane pianchiruza kanpaamtuchi. Katmizna uspane suntuztas îamtu, mamazpa pit pianchi akwa.” 6 Jesús sun kamtam kwinta kinarakas, uspane us kamtanara aizpa mîarachi.
Jesúsne wat pîriku izmumika i
7 Suasne Jesúsne mamasa kaiznara: “Watcha kaiznamtus. Nane pîjtakana ish, pîriku nappanapa. 8 Na iztakin attuzne walkumtuzkas awaruza kwail kiashimturuzkas mai. Pîrikuruzne uspa pit mîashitchi. 9 Nane pîrikuwa pîjtakana ish. Nawa saptumikane, nawa nîjkultumikane, sun pîjtakinkana napshina. Nane ussa sînam sanash. Usne pîrikukanain nap kit puz kit chiwazha we aizpa mîjanazi. 10 Walkummikane amtu, walkwan, piantana, wan azpianna. Nain arau, uruza uzninnanapa, chinkas wenamanpa. 11 Nane wat pîriku izmumika ish. Wat pîriku izmumikane pîriku akwa ishina, usparuza watsat mîlnana. 12 Diablo kwiza akane, kana kimtu mikane, pial sapmumikane, pîrikura chîhkanat kit ãïn îmtu, us pîriku izmumika chi akwa, pîriku paiña chi akwa. Suasne Diablo kwizane pîrikuruza piznat kit paimpa paimpa îninnamtu. 13 Pialmin pashit akwa, an ampune pîrikuras ãïn îmtu. Usne pîrikuruza wat izshimtuchi. 14-15 Nane wat pîriku izmumikakana ish. Pîrikuruzne nawa nîjkulamturuz mai. Ap Taittane nawa pian. Kawarain Taittara pianish. Sunkanain pîrikuruza, nawa nîjkulturuza pianish. Kawarain uspane nawa pian. Nakas uspa akwa ishinas, usparuza sînam sanana. 16 Mamaztuzne, sun Judío chi awaruzne, nawa nîjkulamtuchi. Nane usparuzakas karatpaish, na kaizta aizpa mîanapa. Nane wan nawa nîjkultuza maza kwain wanmakninnanash. Suasne nane, pîriku izmumikane, usparuza iznanazi, nawa nîjkularît akwa. 17 Na mamaztuz akwa imtu akwa, ap Taittane nawa pashimtu. Usne nawa mamasa uznninnazi. 18 Mînminkas nawa inintuchi. Nane nain chîhkashimtus, inna. Nakas nawain kuhsshinas, mamasa uzna. Ap Taittane nawa îninta, sun kinpa.” 19 Judío awa îninturuz us kaizta aizpa mîarawane, uspane usparuzpain paimpa îara. 20 Akkwanne kaizara: “Salizne ussa pizta. Nukku paramtu. ¿Chitma us kaiztu aizpa mîamtu?” 21 Mamaztuzne kaizara: “Mînminkas, sun kwail saliz piztîtmikane, sunkana parasachi.” Saliz piztîtmikane izsachimikasha izkulninsachi.
Judío awa îninturuzne Jesústa mîshiamtuchi
22 Alu kimtu akwa, Jerusalén pîpulura tîh pamtu. Judío awaruzne Dios katsa yalpa pishta iznara. 23 Jesúsne Dios katsa yalkin Salomónpa pîjtawara chamtazi. 24 Judío awa îninturuz ussa pîlzarawane, uspane mîmaara: —¿Yawa payukima tîrizish, aumîza nil kainarachin? Nu watsat mîlmumika kane, nil kainachain. 25 Jesúsne sînkanara: —Me ñamin uruza kainarît. Une na kaizta aizpa nîjkularachi. Ap Taitta nawa îninta akwa, nane us nawa kaizta aizpa kimtus. Na kirît aizpa izamtune, une nawa piankamashina. 26 U ap pîrikukana chi akwa, une nawa nîjkulamtuchi. 27 Ap pîrikuruzne, nawa nîjkulturuzne, ap pit mîat kit nawa kanpaamtu. Nane usparuza pianish. 28 Nane pailta payukima usparuza uzninnamtus, mizurainkas kaamanpa. Mînminkas usparuza nakis nakamanazi. 29 Ap Taittane, nawa suntuza chîhkarîtmikane, mamazkinkas anza katsa i. Mînminkas usparuza ap Taittaras nakasachi. 30 Ap Taittakas nakas sulmin was. 31 Suasne mamasa Judío awa îninturuzne uk chak kit Jesústa kishiamîzta. 32 Jesúsne kaiznara: —Ap Taitta nawa sun kal kin îninta akwa, nane u iztukin kwisha wat kal kirau. Na kal kit akwa, ¿une nawa uk kiashimtukiwas? 33 Judío awa îninturuzne sînkaara: —Nu wat kal kirît akwa, aune nua uk kiamtuchimakpas. Nu Diospa kwail kiztu akwa, sun kishiamtumakpas. Nune ampuin i. Nune Dios ish kiztu. 34 Suasne Jesúsne kaiznara: —Diosne paiña înim uruza îninnara. Ka parît: “Une dios mai.” 35 Aune Dios paninta aizpa watcha i pianmakpas. Paiña pit maiztuchi. Diosne paiña pit kainammtuza îninnat kit usparuza “dios” munnara. 36 Diosne nawa paimpa nat kit an sura îninta. Na Dios painkul ish kizkane, une na Diospa kwail kiztu kaizasachi. 37 Ap Taittawa kal kirît aizpa kimakane, nawa nîjkulman. 38 Us kal kikane, nawa nîjkulamtuchikas, na kimtu akwa nîjkularain, ap Taittakas nakas maza awakanain uzwas piankamanapa. 39 Suasne mamasa uspane Jesústa pizshiara, kajchira sîpna. Sunkana usne usparuztas kimasara. 40 Suasne Jesúsne mamasa pãn puzmumal Jordán Pira kail kit Juan an ñamin munnarakin nukkulta. 41 Akkwan awane ussa izna îat kit kaizara: “Juan chinkas iztasparît kal kitchikas, usne wan Jesúspa kwinta kira. Us kaizta aizpa watcha azi.” Kwisha akkwan awane sun sura ussa nîjkulara.
Lázaro imtu
1 Mane nane an ñamin ishtumikawa kwinta kinamtus. Usne Lázaro mun. Uskas paiña paas kwampihshkas Betania pîpulura uzara. Sun paasne Maríakas Martakas munwail. 2 An Maríane, Lázaro imtumikawa kwampihshne, watsal piam pihshpi Anpatpa mittîkin pattain kit paiña ashkasa pul chakninta. 3 Lázarowa kwampihshne paiña pit înin kit Jesústa ka kaizpailta: —Anpat. Up wat izmuruz imtu tui. 4 Sun mîrawane, Jesúsne kaizta: —Imtukas, Lázarone irît nukkulmanazi. Sunkana Lázaro akwa, awane Dios kwisha wari kizanazi. Sun irît akwa, awane Diospa painkul kwisha wari kizanazi. 5 Jesús Martarakas paiña aizpihshtakas Lázarorakas pashinarakas, 6 ussa Lázaro ishtu i kiztakas, Jesúsne us tukin an paas payu mara. 7 Sun kitpane, usne kammuruza kaiznara: —Mamasa Judea sura îzhain. 8 Uspane sînkaara: —Kamtam. Akkwan payu chin Judío awa îninturuzne nua uk kishiara. Nune imasara. ¿Mamasa ta îshimtukish? 9 Jesús kaiznara: —Pãn doce urakima kai maltu akwa, mînpazha au sukin chamtumikane, Taitta pashit aizpa kishiarawa. Na Dios pashit aizpa kimtuasmin, mînminkas nawa kwail kisachi. 10 Sunkana Diosta nîjkultuchimikane, amtawara chamtumikakana i. Diosta pianchimikane, Dios uztukin pianasachi, Dios kamtamtu aizpa kanpamtuchi akwa. 11 Sun kiztawane, Jesúsne an kaiznara: —Au izmumika Lázarone pirît tui. Sunkana nane ussa izkulninnash. 12 Suasne paiña kammuruzne kaizara: —Anpat. Pittane, usne suas kakultanazi. 13 Jesús Lázaro irîtpa paranamtuasmin, kammuruzne Lázaro pittîttu minñara. 14 Suasne Jesúsne usparuza nil kaiznara: —Lázarone me irît. 15 Na uskasa tuchikas, nane u akwa watsal kultus, u nawa nîjkulamîznapa. Ta ussa izna îzhain. 16 Suasne Tomásne, gemelo muntîtmikane, mamaz kammuruza kaiznara: —Aukas îzhain, an kamtamkasa ina.
Jesúsne Martakasa Maríakasa wanmaltu
17 Piannakane, Jesúsne Lázarora ampara payu uk kulta kamtît piankamta. 18 Betania pîpulune Jerusalén pîpulurakima kashawazhain uz. Kutña kilómetrokin uz. 19 Akkwan Judea suras awane Maríarakas Martarakas uzkînpainna îara, kiwainanapa, uspa tayalamanpa, nalpihsh irît akwa. 20 Jesús amtu piankamarawane, Martane ussa wanmalna ît. Sunkana Maríane yaltain nukkulta. 21 Martane Jesústa kaizta: —Anpat. Nu akki tuaratne, ap nalpihsh irakianai. 22 Sunkana nane nu chiwazha Diosta paikumtu aizpa Dios nua mîlanazi pianish. 23 Jesúsne kaizta: —Up nalpihshne mamasa uznazi. 24 Martane kaizta: —Nane nu kaizta aizpa watcha i pianish. Usne mamasa minpa payura irîttas kuhsnazi. 25 Suasne Jesúsne ussa kaizta: —Nane irîttas kuhsnintumika ish, awaruza uzninnanapa. Irakas, nawa nîjkultamikane mamasa uznazi. 26 Wan ka uztuzkas nawa nîjkultuzkas mizurainkas sunkanain iamanazi. ¿Sun nîjkultukish? 27 Ussa kaizta: —Watcha, Anpat. Nune Dios narîtmika i. Nune Dios painkul, au sura atmika i. Sun nîjkultus.
Jesúsne Lázaro irît kamkin aztu
28 Sun kiztawane, Martane aizpihshta, Maríara, akwana ît kit puintain kaizta: —Kamtammikane kashain tu. Usne nawa îninta, nua akwanpa. 29 Sun mîrawane, sun urain Maríane kuhsak kit Jesústa izna îmîzta. 30 Jesúsne pîpulura naptachi mama. Usne Marta uskasa wanmaltakin tuara. 31 Judío awane uskasa yalta purat kit uzkînnaara, us tayalmanpa. María kuhsak kit azain puzta izarawane, uspane ussa kanpaara. Us kamkin azna îmtuka minñara. 32 Jesús tukin pianarawane, Maríane paiña mittîkin wakpuj wain kit kaizta: —Anpat. Akki tuaratne, ap nalpihshne irakianai. 33 Maríakas Judío awa uskasa amturuzkas azara. Sun iznarawane, Jesúsne ayukta kwail maz kit tayal kit 34 mîmanara: ¿Mîntama ussa kamanas? Sînkaara: —Anpat. Us tukin izna îzhain. 35 Jesúsne azta. 36 Judío awane usparuzpain kaizara: —Usne ussa watcha pashira. 37 Sunkana mînpazha kaizara: —Usne kasu izsachimikasha izkulninta. ¿Usne chiwazha kishinaka, Lázaro imanpa?
Lázaro irîttas kuhstu
38 Jesúsne mamasa ayukta kwail maz kit tayal kit kamkin ara. An kamkin kul azi. Napmukin sîptît tu katsa ukkasa. 39 Jesúsne ka îninta: —Uk tainkarain. Martane, irîtmikawa kwampihshne, kaizta: —Anpat. Kwail piamka. Ampara payu i me kamtît. 40 Jesúsne sînkara: —Nane nua ka kaiztau: “Nawa nîjkultune, nune Dios kal kimtu aizpa piankamanazi.” 41 Suasne uspane uk tainkaara. Jesúsne chiyura izak kit tînta kaizta: —Ap Taitta. Aishtaish kiztus, pailta payukima nawa mîmtu akwa. 42 Nane nu nawa pailta payukima mîmtu pianish. Mane nane uspa puraruz akwa sun kiztus, nu nawa îninta nîjkulanapa. 43 Sun kiztawane, Jesúsne tînta kwianta: —Lázaro, suas puzti. Katsa ukta nupaintu Lázaro kamtîtkis 4 Irîtmikane chihtîkas mittîkas iptît tu puzta. Matsîhkas maza pïnkasa iptît. Jesúsne kaiznara: —Iptît pïn chîhttain, înpa.
Judío awane Jesústa pizshiamtu
45 Suasne sun izarawane, akkwan Judío awaruzne Jesústa nîjkulara. Uspane Maríara kanpanat kit Jesús kit aizpa izara. 46 Sunkana mînpazha usparuztas Fariseo awaruza îat kit Jesús kirît aizpa kainaara. 47 Suasne Fariseo awaruzkas pariya înintuzkas anza katsa Judío înintuzkasa wanmakkat kit kaizara: —¿Aune chima kianapas? An ampune akkwan iztasparît kal kimtui. 48 Sunkana us paiña kal kimîztune, au ussa chîhkatne, wanne ussa nîjkulanazi. Suas Romano awa mikwaruzne aanazi, Dios katsa yalta azpianna, au Judío awa kwalkasa waya kiana, wan chiwal piantanakima. 49 Sunkana mazane usparuztas, Caifás muntîtmikane, sun año pariya îninmika azi. Usne kaiznara: —Une sun kimtu aizpa pianchimai. 50 Une sun piankamtain. Maza ampu au wan Judío awa akwa irane, anza wari. Suasne Romano awaruzne au Judío awaruza piantaamanazi. 51 Sunkana Caifásne sun pit paiña minpain kaiztachi. Caifásne sun año katsa pariya azi. Diosne ussa an ñamin sun kimtu aizpa piankamnin kit kizninta: “Jesúsne Judío awaruz akwa inazi.” 52 Sun Judío awa akwa imtukas, usne mamaz sura uztukas inazi, Dios usparuza maza kwalkanain, Dios painkulkanain wanmakkanapa. 53 Sun payurain Judío îninturuzne Jesústa piantana nîjkulara. 54 Katmizna Jesúsne Judío awa îninturuz purakin izpanarachi. Usne Judea sukis puz kit Efraín pîpulura ît. Sun pîpulu pul su kashakin uz. Sua nukkulta paiña kammuruzkasa. 55 Judío awaruzpa Pascua pishta taiznapain. Pascua pishta taiztachasmin, akkwan awane nanmals Jerusalén pîpulura nuara, Dios iztakin sînam saninnanapa, Pascua pishta izanapa. 56 Uspane Jesústa sayara. Dios katsa yalta wanmakkamtuasmin, uspane usparuzpain ka mîmaara: —¿Chima minñamtu? ¿Usne pishtara ansa? 57 Pariya înintuzkas Fariseo awaruzkas wanta ka îninnara: —Mînpazha Jesús tura pianne, aumîza kainanazhain, ussa piz kit kajchira sîpna.
Maríane Jesúspa mittîkin piam pihshpi parantu
1 Seis payu Pascua pishta chasmin, Jesúsne Betania pîpulura, Lázaro uzatta, îra. Sua Jesúsne an ñamin ussa irîttas kuhsnintît. 2 Suane Jesúspa izmuruzne us akwa kumira saara. Lázaro uskasa misharî uz kit kuamtuasmin, Martane kumira nailnara. 3 Suasne Maríane maza kakwa botella piam pihshpi karara. Sun pihshpine nardo muntît. Kwisha muin azi. Jesúspa mittîkin pihshpi parantawane, usne paiña ashkasa pulchaktara. Yalnuras piam piara. 4 Judas Iscariotene, Simónpa painkulne, Jesústa kammumikane, tuazi. Usne Jesústa chîhkanmika azi. Usne kaizta: 5 —An muin pihshpi painane, mînpazhane maza añokima kal kitpa. ¿Chitma sun piam pihshpi painintachi, pialkasa puizaruza mîlanana? 6 Puizaruza kiwainshimtuchikas, usne sun kaizta, us walkwashimtu akwa. Usne Jesústa kammuruzpa pial tuh mîlta. Pial tuhta watsarakas, usne tas ukkara, us akwa painna. 7 Suasne Jesúsne ussa kaizta: —Ussa kaizapmun. Ap kamtu payuwa mintuasmin, usne sun na akwa kirît. 8 Pailta payukima puizaruzne uruzpain uzanazi. Sunkana nane pailta payukima ukasa uzmanash.
Lázarora piantashiamtu
9 Akkwan Judío awaruzne Jesús Betania pîpulura naptu piankamara. Jesústa izana îarakas, uspane Lázarorakas, Jesús irîttas kuhsnintamikashakas, izna îara. 10 Suasne pariya înintuzne Lázarorakas piantana nîjkulara. 11 Us akwa akkwan Judío awaruzne pariya înintuz kamtarat aizpa chîhkaara, Jesústa nîjkulana.
Jesúsne Jerusalén pîpulura naptu
12 Akkwan awane Jerusalén pîpulura Pascua pishta izna îara. Tîlawara Pascua pishta izmuruzne Jesús pîpulura pianamtu piankamara. 13 Suasne uspane kanarî kîh tît kit mikin taat kit puzat kit Jesústa wanmalat kit kwiannara: “Diosne kwisha wari.” “Aune Diosta kwisha wari kiztumakpas, paiña înintamika amtu akwa.” “Judío awa katsa mikwa kwisha wari.” 14 Jesúsne burrora wanmal kit ussa anuzta, Dios pînkîhta ka parîtkana: 15 “Jerusalén pîpulu uztuz ishkuaman. Izti. U mikwane sua amtui. Maza ainki burrora anuztu.” 16 An ñancha paiña kammuruzne sun parît aizpa mîarachi. Jesús kuhs kit Dios watsal uztukin kailtawane, kwizta uspane us akwa wan parît aizpakas ussa kiarît aizpakas nîjkulara. 17 Jesús Lázarora kamkis akwatkane, ussa irîttas kuhsninkane, Jesúskasa tuattuzne wan izara aizpa kainaara. 18 Katmizna awane puzat kit Jesústa wanmalara, iztasparît kal kirît aizpa piankamara akwa. 19 Suasne Fariseo awane usparuzpain kaizara: —Iztain. Mane aune ussa piantachimakpas. Wan awane ussa kanpaamtu.
Griego awane Jesústa sayamtu
20 Pishta tuasmin, akkwanne Jerusalén pîpulura îat kit Diosta wakpuj wainna nuara. Mînpazha Griego awakas nuara. 21 Suntuzne Felipera, Betsaida pîpuluras atmikasha, kashara îat kit paikuat kit kaizara: —Anpat. Jesústa izshimuspas, uskasa kwinta kin. 22 Felipene Andrésta ît kit sun kaizta. Uspa paasne Jesústa îil kit sun kainailta. 23 Jesúsne paasta sînkanara: —Nane inapain ish. Sun ura taizkane, Diosne awa iztukin chiyuras Ampura, izninnanazi, ussa wat minñanapa. 24 Watcha kaiznamtus. Chara pippa pilta taiztane, sun pippane chik kit akkwan pippa wamtu. Na awa akwa imtu akwa, nane akkwan awaruza watsat mîlnanash. 25 Usmin mîj aizpa pashimtumikane, usmin pashimtumikane, wan kat kit irînazi. Sunkana an sura uzasmin, Cristo pashimtumikane pailta payukima uskasa uznazi. 26 Mînpazha na înintu aizpa kishitne, nawa kanpazha. Uskas na tura tuanazi. Ap Taittane na înintu aizpa kishittuza kiwainat kit an tînta namninnanazi.
Jesúsne inash kiztu
27 Jesúsne ka kizta: —Mane nane ayukta tayaltu maztus. ¿Chima kiznapai? Ap Taittara ka kizsachish: “Kiwaincha, imanpa.” Sunkana kizsachish, na awa akwa ina at akwa. 28 Suasne kaizta: “Ap Taitta, wan awaruza kiwaintain, wan awa nu anza wari piankamanapa,” kizta. Suasne Diosne chiyuras sînkara: “Awa nu kimtu aizpa piankamarawane, suasne wan awane na anza wat ish piankamanazi. Mane mamasa sun kinash.” 29 Sua tuattuzne chiwazha azka mîat kit ippain azta kizara. Sunkana anpane ka kaizara: —Maza ángelne ussa kwinta kira. 30 Jesúsne sînkanara: —Aune sun pit mîaramakpas. Na akwain chi. Diosne uruza paranara, na Diostas at piankamanapa. 31 Mane Diosne uruza an pit piankamninnamtu. Diosne nawa nîjkulamtuchiruza ilnanazi, uspa kwil kiarît akwa. Makas ankas piankamtain. Diosne an sura îninmikasha, Satanásta, anupparît mîja. 32 Nawa kurishta irukasa patpiankane, sun tî pilta kunninkane, nane wan suras awaruza nawa akwananash, nawa nîjkulanapa. 33 Sun kainanamtuasmin, Jesúsne awaruza us sunkana imtu piankamninara. 34 Awaruzne sînkaara: —Moisés parît aizpa akwa, aune Dios narîtmika mizurainkas imanazi pianmakpas. Sunkana nune chiyuras Ampu kurishta patpiannazi kiznaru. ¿Chikishma sun kiztus? ¿An chiyuras Ampune mînma i? 35 Katmizna Jesúsne kaiznara: —Nane kai malnintumikane ish. Nakas awaruza na kamtamtu aizpa piankamninmika ish. Nane ukasa akkwan payukimain uzmanash. Na kaizta aizpa mîrain, piankamanapa, nil uzanapa. Na kaizta aizpa piankamtachiruzne tîlta chamturuzkana mai. Uspane wan kaarînazi. 36 Na ukasa uzasmin, na kaizta aizpa nîjkultain. An pit uruza kiwainnanazi, nil uzanapa, kaiwara chaanapa.
Judío awane Jesústa nîjkularachi
Sun kiznarawane, Jesúsne ît kit awaruztas kularît, ussa wanmalamanpa. 37 Jesús akkwan iztasparît kal usparuzpa izarakin kirîtkas, uspane ussa nîjkulashitchi. 38 Sunkana uspane Isaías, Diospa kainammika, parît aizpa kiarît. Ka parît: “Anpat, uspane au kaiznarît aizpa mîara. Uspa Dios iztasparît kal izarakas, uspane nîjkularachi.” 39 Uspane nîjkularachi, Isaíaskas an kaiz kit ka para akwa: 40 “Diosne usparuza kasu izsachimikakana namninnara, izamanpa. Usne usparuza nilchi mininnara, wat piankamanapa. Wat piankamtuchi akwa, uspane nawa kaiyasachi, na usparuza sînam saninnana. Katmizna nane usparuza kakulninasachish.” 41 Isaíasne sun pit kaiznara, Jesús ussa izpan kit paiña iztakin anza katsa namta. Katmizna usne Jesúspa parît. 42 Sun pit nîjkularachiruzpa parîtkas, akkwan Judío awaruza înintuzne Jesústa nîjkulara. Fariseo awaruz ishkuamtu akwa, uspane nîjkulara aizpa wan awaruza kwinta kinarachi, Fariseo awa usparuza kammu yaltas îninnamanpa. 43 Uspane awa uspawa minñara aizpa ishkuara. Sunkana uspane Dios uspawa mintu aizpa izkiamtuchi.
Jesús kaizta aizpa nîjkultuchimikane naiznazi
44 Jesúsne paiña pitkasa tînta kaiznara: “Nawa nîjkultumikane, nawainchi nîjkultu. Uskas nawa înintumikashakas nîjkultu. 45 Nawa iztamikane nawa înintumikashakas iztu. 46 Nane impilkanain ish. Nane awaruza na kamtamtu aizpa piankamninmika ish. Nane an sura arau, nawa nîjkulturuz kwail kiamanpa, Diosta pianchiruzkanain tîlkwilta chamturuzkanain uzamanpa. 47 Mînpazha ap pit mîamtukas, nane na kaizta aizpa kishitchiruza uspa kwail kiarît aizpa annamanash. Nane an sura atchish, awaruzpa kwail kiarît aizpa anninnana. Sunkana nane arau, wantuza watsat mîlnana. 48 Diosne nawa pashitchiruzakas, na kaizta aizpa mîmtuchiruzakas, uspa kwail kiarît aizpa piankamninnazi. Minpa payura Diosne awaruza ap pit akwa ilnanazi, ïnta îanpa. 49 Nane ap minpain paramtuchish. Taittane, nawa înintamikane, na sun kinpa chîhkarît, sun kiz kit kamtanapa. 50 Ap Taittane sun pit îninnara, awa nîjkulat kit pailta payukima uzanapa. Ap Taittane paiña pit nawa îninta, kainanapa. Katmizna sun pitmin paramtus.”
Jesúsne kammuruzpa mittî kitnamtu
1 Mane Pascua pishta taiznapain. Jesúsne us imtu payu taiznapain piankamta, an sukis puz kit papihsh uztukin kailna. Usne an sukin ussa nîjkulturuza pailta payukima kwisha pashinara. Usne us imtu payukima usparuza pashinara. 2 Sun payura Jesúskas paiña kammuruzkas kumira kuamtuchasmin, Diablone Judas Iscariotera, Simónpa painkulta, pizta, Jesústa kwail awaruza chîhkana înpa. 3-4 Jesúsne Diostas at piankamta. Diostakima kailmîztu uskasa uzna piankamta. Paiña Papihsh ussa wan îninnapa mîlatkas, Jesúsne kiwainmikakana misharîras kun kit paiña îsal kwaksham ukkat kit kiham pïnkas usmin pîjara ipta. 5 Kwiztane kwazi uk kit wazta paranta. Suasne paiña kammuruzpa mittî kitmîz kit pîjaras kiham pïn ukkat kit pulchaktamîzta. 6 Simónpa mittî kitmîzkane, Pedrone Jesústa kaizta: —Anpat, ap mittî kitsachi, kizta. 7 Jesúsne ussa sînkara: —Mane nune na kimtu aizpa pianchi. Sunkana kwiztane piankamnazi. 8 Pedrone ussa kaizta: —Mizurainkas ap mittî kitmanazi. Jesúsne ussa sînkara: —Na up mittî kittukine, nune ap kanmumika namsachi. 9 Suasne Pedrone ussa kaizta: —Anpat. Ap mittîin kitmun. Chihtîkas kîzpukas mittîkas kitcha, kizta. 10 Sunkana Jesúsne sînkara: —Nune wan pinachi. Pikamtîtmikane paiña mittîrain kittawa. Diosne u kwail kiarît aizpa watkulninnat kit u kaijchukin sînam sanara. Mazane sînam sarachi, paiña kwail kirît aizpa sînam kwiznintachi akwa. 11 Jesúsne mîn ussa chîhkamtumika pian. Katmizna ka kizta: “Mazane sînam sarachi, paiña kwail kirît aizpa sînam kwiznintachi akwa.” 12 Usparuzpa mittî kittawane, usne mamasa paiña kwaksham kuht kit misharîra uz kit usparuza ka mîmanara: —¿Une na uruza kit aizpa piankiwas? 13 Une nawa kamtamkas anpatkas munamtu. U kaizara aizpa nil kizamtui. 14 Nane u kamtammikakas u anpatkas ish. U sun piankas, nane, kwaimmikakana uruzpa mittîra kitnarau. Kawarain ukas, kiwainmumikakanain uruzpa mittî kitnarawa. 15 Nane an watsal kal u iztakin annarau, ukas sunkanain kianapa, na kirîtkanain kiamîznapa. 16 Watcha kaiznamtus. Kiwainmumikane paiña anpatkin anza katsa chi i. Kawarain înintamikane înintumikakin anza katsa chi i. Kawarain, na ukin anza katsa mika ish. Sun piankas, nane uruzpa mittî kitnarau. 17 Na kaizta aizpa mîarane, sun kiarane, une watsal kulanazi. 18 Nane wan uruzpa paramtuchish. Nane ap narîttuza pianish. Dios pînkîhta parît aizpa ka sunkana kirît: “Nakasa kumtumikane nawa aliz kul kit nawa kwail kimîzta.” 19 Sun kitchasmin, mane nane sun pit kaiznamtus, na pailta payukima uzatmika i nîjkulanapa. 20 Mane watcha kaiznamtus. Nawa înintumikasha saptumikane nawa sapnazi. Nawa saptamikane nawa înintamikasha sapnazi.
Jesúsne Judas ussa chîhkamtu kaiznamtu
21 Sun pit kiztawane, Jesúsne kaijchu ayukta tayal kit kwail maz kit kaiznara: —Watcha kaiznamtus. Mazane uruztas nawa kwail awaruza chîhkananazi. 22 Kammuruzne mamazta mamazta izamîzta. Uspane mînama paramta mîasachi. 23 Maza kammumikane, Jesústa kwisha pashitmikane, paiña makin uzta. 24 Simón Pedrone ussa puintain izpa sara, Jesústa mîmanapa, mînama paramtarau. 25 Sun kammumikane Jesústa an kasha ît kit mîmara: —Anpat. ¿Mînama paramtus? 26 Jesúsne ussa sînkara: —Pan pitti wazta wintawane, nane ussa kwinnash. An pan saptumikane sun kinazi. Sun urain usne pan pitti piz kit wazta win kit Judasta, Simón Iscariotewa painkulta, kwinta. 27 Judas an pan saptawane, Satanásne ussa pizta. Jesúsne ussa kaizta: —Nu kishit aizpa azain kiri. 28 Misharîkin uztuzne chikishma sun ussa paraka mîarachi. 29 Judasne auruzpa pial watsat kit tuhta mîlta. Mînpazha Judas chiwazha we pishta kumira paina îrîzi minñara. Mamaztuzne Judas puizara pial mîlan îrîzi minñara. 30 Pan pitti sap kit kwatpane, sun urain Judasne tas puzta. Amta tîl parît me.
Masas îninmu
31 Judas puztawane, Jesúsne kaizta: —Mane une nawa chiyuras Ampu anza tînta i piankamamîznazi. Us kimtu akwa, Diosne ussa u iztakin anza tînta namninnazi. 32 Chiyuras Ampu Dios anza tînta namnintane, Dioskas mamaztuzpa iztakin paiña painkulta us anza tînta namninnazi. Sun urain kinazi. 33 Une ap wat pashpakanain mai. Mîzha. Nane ukasa akkwan payu uzmanash. Nane Judío awa îninturuza kaiztakanain uruza kawarain kaiznanash. Nawa sayamtukas, une nawa na îmtura kanpaamanazi. 34 Nane uruza masas înimmu ka mîlanamtus: Mamazta mamazta pashinarawa. Na uruza pashimtukanain, ukas mamazta mamazta pashinarawa. 35 U mamazta mamazta sunkanain pashinamtune, wan awane u ap kammuruz mai piankamanazi.
Jesúsne ka kiztu: Pedrone nawa pianchish kiznazi
36 Simón Pedrone Jesústa mîmara: —Anpat. ¿Mîntama îmtus? Jesúsne ussa sînkara: —Ma na îmtura kanpamsachikas, nune nawa kwizta kanpanazi. 37 Pedrone ussa kaizta: —Anpat. ¿Chikishma nane nua kanpasachish? Nane nu akwa inapain ish. 38 Jesúsne ussa sînkara: —Nu na akwa inapain i kiztukas, Aral kayu kutña piji aztachasmin, nune “ussa pianchish” kiznazi.
Jesúsne mikanain i, Papihshpara în
1 Suasne Jesúsne usparuza kaiznara: “Tayalman. Ishkuman. Diosta nîjkulamtuasmin, nawakas nîjkultain. 2 Ap Taitta uzkinne kwisha akkwan uzmu wa. Akkwan uzmu wachiatne, nane uruza kaiznashina. Mane nane u akwa sun uzkin watsana îmîztus. 3 Sua îtpane, sun uzkin watsarawane, mamasa kailnash, uruzakas ta mîlnanapa, ukas na tukinmin puranpa. 4 Une me na îmtu mi pianmai.” 5 Tomásne Jesústa sînkara: —Anpat, nu îmtura pianchimakpas. ¿Aune mizama sun mi piankamshinai? 6 Jesúsne ussa sînkara: —Nune na akwa Dios uzkin piananazi. Nune na akwa Diospa watcha piankamnazi. Nane nua pailta payukima uznintus. Nawa nîjkultumikane ap Taitta uzkin piananazi. 7 Nawa wat piankamtu akwa, une ap Taittara piankamanazi. Une makis ussa piankamanazi, nawa izta akwa. 8 Suasne Felipene kaizta: —Anpat, Taittarain izshimtumakpas. Taittara izninchain. 9 Jesús ussa sînkara: “Felipe, na akkwan payukima nukasa uztakas, ¿Nawa mama pianchikish? Nawa iztamikane Taittarakas iztu. Katmizna ‘Taittara iznincha’ kizmun. 10 Ap Taittakas nakas maza awakanain was. ¿Sun nîjkultukish? Na wan uruza kamtara aizpa ap pitkis amtuchi. Ap Taittane sun pit nawa chîhkara. Taittane, nakasa uztamikane, nawa kiwaintu, us kishimtu aizpa kinpa. 11 Une na Taittakasa uztu nîjkultain. Kawarain Taitta nakasa uztu nîjkultain. Na uruza kaizta aizpa nîjkulamtukine, na kal kirît akwa nîjkultain. 12 Watcha kaiznamtus. Nawa nîjkulturuzne na kimtukana kianazi. Na ap Taittara îmtu akwa, une nakin anza akkwan kal kianazi. 13 Nawa kanpamtuzne nawa nîjkulamturuzne Diosta paikuanazi. Suasne nane uruza u paikumtu aizpa mîlananash, Taittara anza wari piankamanapa. 14 Nawa kanpamtuz chiwazha paikuarane, nane u paikumtu aizpa mîlananash.”
Jesúsne Sînam Izpulta îninna namtu
15 “U nawa pashiamtune, une na îninta aizpa kianazi. 16 Nakas Taittara paikwanash, uruza mamaz kiwainmikasha, paiña Sînam Izpulta, îninnanapa. Usne ukasa pailta payukima tuanazi. 17 Sînam Izpulne uruza watcha kurunnanazi. Diosta nîjkultuchiruzne ussa sappamanazi, ussa izasachi akwa, ussa piankamasachi akwa. Une ussa piankamamtu. Usne ukasa uz kit pailta payukima uruza kiwainanazi. 18 Nane uruza kwairît pashpakana kwaimanash. Mamasa kailnash, ukasa tuan. 19 An suras awaruzne, nawa nîjkultuchiruzne, akwan payuchikimain nawa izamanazi. Une nawa izanazi. Na uztu akwa, na mamasa kuhstu akwa, nane uruzakas uzninnanazi. 20 Sun payu taizkane, une nakas Taittakas maza awakanain was piankamanazi. Ukas nakas parejuin chaanapas, izmuruzkanain. 21 Na îninta aizpa pianmikane, na kaizta aizpa mîmtumikane, suntuzmin nawa pashimtu. Ap Taittane nawa pashitmikasha pashinazi. Nakas ussa pashit kit ussa nanash, nawa wat piankamnapa.” 22 Judasne, Judas Iscariotechine, ussa mîmara: —Anpat, nune aumîzain nuwa piankamninnara. ¿Chikishma anparuza nuwa piankamninnarachi? 23 Jesúsne sînkara: “Nawa pashimtumikane na kamtamtu aizpa kinazi. Ap Taittane ussa pashinazi. Taittakas nakas nawa pashimtumikakasa uzna amtuas. 24 Nawa pashitchimikane na kamtamtu aizpa mîshitchi. Ap pit u mîamtu aizpa ap pit chi. Ap Taittane, nawa înintamikane, sun pit îninta. 25 Na ukasa chamtuasmin, nane wan kamtam pit kaiznamtus. 26 Sunkana nane ap Taittara paikwanash, Sînam Izpulta, kiwainmikasha uruza îninnapa, uruza wan kamtanapa, na uruza kaizta aizpa mainmanpa. 27 Na îmtukas, une Dios akwa kalpain uzanazi. Nakas uruza kalpain uzninnanash. Sunkana an suras awane, nawa nîjkultuchiruzne, uruza kalpain uzninnasachi. Tayalman. Ishkuman. 28 Une an ñamin na kaizta aizpa mîat kit mamasa sun pitmin ka kaiznamtus: ‘chiyura nuna îrîmtukas, imtukas, mamasa kailnash, ukasa tuan.’ U nawa pashiamtune, une watsal kulanazi, na ap Taittara tukin îmtu akwa. Ap Taittane nakin anza tînta i. 29 Ma payu nane chiwazha kinamtu aizpa uruza kainanarau. Sun payu taizkane, une nawa nîjkulanazi. 30 Mane akkwan payuchikima uruzkasa paramanash, an sukin înintumika, Satanás, amtu akwa. Usne nawa anuppasachi. 31 Mane wan awane na ap Taittara pashimtu piankamanazi. Katmizna nane us nawa îninta aizpa kirau. ‘Kuhsaktain. Akkis îzhain.’ ”
Jesúsne wankail tîtkanain i
1 Suasne Jesúsne an kamtanamîzta: “Nane watcha wankail tîtkanain ish. Ap Taittane wankail nanta kal kimmikakana i. 2 Tî kuhia pippa wamakane, usne kuhiara kal piztu. Pippa wakane, usne watsal tîttu, an akkwan pippa wamîznapa. 3 Ukas ap tî sailkanain mai. U ap kamtam mîarît akwa, nane u kwail sînam sanarau. 4 Nawa wanmak uzchain. Nakas uruza wanmak uztus. Maza tî sailta tîttane, tî sailne wankail pippa wasachi, tîtta wanmaktachi akwa. Nawa wanmaktît uzmakane, kawarain, une watsal uzasachi. Chinkas kiasachi. 5 Nane tîtkanain ish. Une tî sailkanain mai. Nawa wanmak uztumikane kwisha wat kinazi, au wanmaktît uztu akwa. Nakasa wanmaktukine, une chinkas kiasachi. 6 Na kaizta aizpa mîrachimikane kwairît tît kuhiakana i. Tît kuhia pul parîkane, chak kit ïnta kiakpîntînazi, ïnta paktanapa. 7 U nawa wanmaktît uzamtune, u na kaizta aizpa mîarane, nane uruza chiwazha u paikumtu aizpa mîlannanash. 8 Ap kal kimtuzne, nil uztuzne, ap Taittara wat kulninnazi. Une awaruza ap Taitta an tînta i piankamninnanazi. Suasne awane ap watcha kammuruz namarît piankamanazi. 9 Nane uruza pashinamtus, ap Taitta nawa pashimtukanain. Na îninta aizpa kimîztain, na uruza pashinanapa. 10 U na îninta aizpa kiamtune, nane uruza pashinamîznash. Ap Taittakas nawa pashimtu, na us îninta aizpa kimtu akwa. 11 Nane sunkana paramtus, u na wat kulamtukanain uzanapa. 12 Nane uruza sunkana îninnamtus: ‘Une na uruza pashinamtukanain mamazta mamazta pashinarain.’ 13 Izmuruza pashitmikane uspa akwa ishinazi. Izmuruz akwa ishitmikane anza wat paiña izmuruza pashinamtu. 14 Na îninta aizpa kittuzne ap izmuruz mai. 15 Makis nane uruza ap kal kiwaintuz mai kizmanash, kal kiwainmumikane paiña îninmika mintu aizpa pianchi akwa. Nane u ap izmuruz mai kiznat kit ap Taitta nawa wan kaizta aizpa uruza kamtanarau. 16 Une nawa nanaarachi. Nain uruza nananarau, na akwa akkwan kianapa, na îninta aizpa kizanapa, u na akwa kiamtu aizpa pailmanpa. U sunkana nawa nîjkulamtune, ap Taittane uruza chiwazha paikumtu aizpa mîlananazi. 17 Nane maza pitmin uruza ka îninnash: ‘Mamazta mamazta pashinarain.’ ”
Jesústa nîjkultuchiruzne aliz kulaanazi
18 “Awa ukasa aliz kulamtune, an ñancha uspa nakasa aliz kulara piankamtain. 19 U nawa nîjkulamtuchiruzkasa wanmaktît uzaratne, uspane uruza uspa kwalkanain pashiara. Nane uruza nawa nîjkulamtuchiruztas nanarau, u nakasa tuanpa. Katmizna, uspane ukasa aliz kulamtu, usparuztas puzara akwa. 20 Na an ñamin kaizta aizpa nîjkultain: ‘Anpat naiztune, kal kiwainmikakas kawarain naizarînazi.’ Awa nakasa aliz kulamtune, uspakas ukasa aliz kularînazi. Na kamtara aizpa mîarane, uspane u kamtara aizpakas mîanazi. 21 Nawa înintamikasha piankamtuchi akwa, uspane nawa nîjkularuza naizninnanazi. 22 Na usparuza paranat akwa, uspane uspa kwail kiarît aizpa piankamara. Mane nawa nîjkulamtuchiruzne kwail kimtuchish kizasachi. Mînminkas uspa kwail wat puinsachi. 23 Nakasa aliz kulamturuzne ap Taittarakas aliz kulamtu. 24 Na uspa iztakin sun iztasparît kal kitkas, uspane uspa kwail kiarît aizpa maizashitchi. Mînminkas sunkana kal kitchi. Na kirît aizpa izaratkas, uspane nawakas ap Taittarakas aliz kulamtu. 25 Uspa înimkin ka parît: ‘Na chinkas kwail kitchikas, uspane nawa aliz kulamtu.’ Ma sun kirît me. 26 Nane Taittaras Sînam Izpulta, watcha kuruntumikasha, îninnash. An uruza kiwainmikane na akwa kainanazi. 27 Ukas nawa kainanazi, u nakasa an ñancha tuat akwa.”
1 Jesús an kamtanamîz kit kaiznara: “Nane chiwazha uruza kaiznamtus, mamaz miwara chamanpa, na kamtara aizpa nîjkulamîznapa. 2 Judío mikwaruzne uruza kammu yalkis paimpa îninnanazi, uspakasa puramanpa. Mamaz payura mînpazha uruza piantananazi. Uruza piantanamtukas, uspane Diosta kiwaintu minñarînazi. 3 Uspane uruza ka kianazi, ap Taittarakas nawakas pianchi akwa. 4 Sun payu taizkane, awane sunkana uruza kinanazi. Sun uruza kiamtuchasmin, nane uspa kiamtu aizpa kainanamtus. Kwiztane une na kaizta aizpa nîjkulanazi.” Sunkana Sînam Izpul kinazi “Ñamin nane uruza paranarachish, na ukasa tuat akwa. 5 Sunkana nane ap înintumikawarain kailtîmtus. Mînminkas uruztas nawa ¿Mînta îmtus? mîmamtuchi. 6 Na uruza sun kimtu aizpa kainanara akwa, une kwisha tayalmîztu. 7 Nane watcha kaiznamtus. Na îmtune, u akwa an wari. Na îmtuchine, u kiwaintumikane ukasa amanazi. Na îmtune, nane uruza kiwainmikasha îninnash, ukasa chan. 8 Dios Sînam Izpul akane, usne nawa nîjkultuchiruza uspa kwail kiarît aizpa piankamninnanazi. Usne awa miza nil uzna piankamninnanazi. Usne Dios wantuza uspa kwail akwa ilnamtu piankamninnanazi. 9 Nawa nîjkulamtuchi akwa, uspane kwail kiamtu. 10 Na an sura nil uztu akwa, nane ap Taittara kailtînash. Katmizna une an nawa izamanazi. 11 Diosne awaruza paiña pit îninta aizpa nil i piankamninnazi, nil uzanapa. Dioskas Satanásta, an sura înintamikasha, naizninnapa înintît me. 12 Na uruza an akwan pit kaizshinamtukas, mane une an akkwan pit mîasachi. 13 Sînam Izpul akane, watcha kurunmumika akane, usne uruza Diospa watcha piankamninnanazi. Usne uruza watcha kamtananazi. Paiña pitmin paramtuchi akwa, usne paiña Taitta ussa kaizta aizpa paranazi. Usne uruza mamaz payura kirîmtu aizpa piankamninnanazi. 14 Usne na watcha kaizta aizpa uruza kamtaninnanazi. Usne awa iztakin nawa an tînta namninnazi. 15 Nane chiwazha ap Taitta mîj aizpa mîjash. Katmizna paiña Sînam Izpulne, kiwainmikane, na kaizta aizpa uruza piankamninnanazi. 16 Une akkwan payuchikima nawa izamanazi. Suasne kwiztane une nawa mamasa izanazi.”
Kammuruz tayalamtukas, watsal kulanazi
17 Suasne mînpazha kammuruzne usparuzpain ka mîmaara: —Usne aumîza ¿Chima paramtusa? “Masetne akkwan payuchikima ussa izanapas,” kiztu. “Masetne kwiztane aune ussa mamasa iznapas,” kiztu. Ankas kiztu, “Ap Taitta uzmura îmtu akwa, aune ussa izamanapas.” 18 Uspane ka mîmaamîzta: “Akkwanchin payukima” kizkane, ¿Chima kizshimtusa? Aune us paramtu aizpa pianchimakpas. 19 Uspa mîmashimtu aizpa mintu akwa, Jesúsne usparuza kaiznara: “Akkwan payuchin nawa izamanazi. Kwiztane nawa mamasa izanazi. ¿Na kaizta aizpa nawa mîmashiamtukiwas une? 20 Nane uruza watcha kaiznamtus. U azat kit tayalamtuasmin, nawa nîjkultuchiruzne watsal kulanazi. U tayalamtukas, kwiztane une anza watsal kulamîznazi. 21 Pashpa mîltu payu taizkane, ashampane kwisha ishtu maz kit naizmîztu. Sunkana pashpa mîltawane, ashampane paiña ishtu main kit watsal kulmîztu, pashpa mîltît akwa. 22 Ukas sunkanane ma payu tayalmîznazi. Sunkana nane uruza izna kailnash. Sun urain une watsal kulamîznazi. Mînminkas uruza tayalninmanazi. 23 Sun payu taizkane, une nawa chinkas paikumanazi. Watcha uruza kaiznamtus. U nawa nîjkulamtu akwa, u chiwazha Taittara paikuakane, usne uruza mîlananazi. 24 Nawa nîjkularîtkas, makima une chinkas ap Taittara paikuarachi, u nawa kanparît akwa. Ussa paikwarain, us uruza mîlananapa, u kwisha watsal kulanapa.”
Jesucristone an sura anuppammika i
25 “Makima nane uruza mamaz kamtam pitkasa paranarau. Sunkana mamaz payura nane uruza kamtam pitkasa paramanash. Sun payura nane ap Taittawa uruza nil parananash, an wat piankamanapa. 26 Sun payu taizkane, u nawa nîjkulamtu akwa, nane u pashiamtu aizpa ap Taittara paikuanazi. Sun payura nane u akwa Taittara paikumanash, 27 Taittain uruza pashinamtu akwa. Usne uruza pashinamtu, u nawa pashinamtu akwa, u na Diostas at nîjkulamtu akwa. 28 Nane Taittaras puz kit an sura arau. Mane nane an sura tuij înash chiyura, ap Taitta uztukin, kailna.” 29 Kammuruzne ussa kaizara: —Mane nune aumîza nil paramtui, kamtam pitkasa chin, au piankamanapa. 30 Mane aune nu wan pian aizpa pianmakpas. Mane mînminkas nua chinkas mîmana pashimtuchi, nu awa minñamtu aizpa piankamtu akwa. Katmizna aune nu Diostas at nîjkultumakpas. 31 Jesúsne sînkanara: —Une mama nawa we nîjkulamtu. 32 Iztain. Une maza mazain nawa tuij îat kit uruzpa yalta îat kit nawa mazain chîhkaanazi. Sun kimtu aizpa kinpain. Sunkana nane mazain tukianash, ap Taitta nakasa tu akwa. 33 Nane sun wan uruza kaiznamtus, u watsal kulanapa, u nakasa wanmaktît akwa. An sukin uzamtuasmin, une naizarînazi. Ishkuman. Nane wan an sura îninturuza me anupparît ish. Nane Diosta aliz kulamturuzkin an tînta ish.
Jesúsne paiña kammuruz akwa Diosta paikumtu
1 An pit kiztawane, Jesúsne chiyura izak kit Diosta paikwara: “Taitta. An payu taiznapain i, awa iztukin up Painkul anza tînta namninnapa. Suasne up Painkulne awa iztakin nu anza tînta i namninnanazi. 2 Nune nawa up Painkulta narît, wan awaruza îninnanapa, wan nawa kammuruza pailta payukima uzninnanapa. Nune usparuza nawa mîlanara. 3 Pailta payukima uzshimturuzne nua, maza Diosta, watcha Diosta piankamtawa. Uspane nawakas, nu înintîtmikashakas, piankamtawa. 4 Nane an suras awaruza nu anza tînta i piankamninnara. Nane nu nawa înintît aizpa kin pailtît ish. 5 Mane, ap Taitta, nawa mîzha. An su sarachasmin, na nukasa uztuasmin, nune nawa anza tînta namninta. Up iztakin nawa mamasa anza tînta namnincha. 6 Nune an suras awaruza nanarît, nakasa tuan. Nane usparuza nuwa piankamninnarau. Uspane up kwalkanain namanazi. Nune usparuza îninnara, nakasa tuanpa. Uspane nu kamtara aizpa kiarît. 7 Mane, uspane wan na kaizta aizpa uptas puztu piankamamtu. 8 Nane nu nawa kaizta aizpa usparuza kamtanarît ish. Uspane sun pit mîat kit na uptas puztu watcha nîjkulamtu. Uspane nu nawa îninta nîjkulara. 9 Nane nua paikumtus, nu nawa înintîttuza kiwainnanapa. Nane wan an sukin uztuz akwa paikumtuchish. Nane nua piankamturuz akwa paikumtus, usparuza kiwainanapa. 10 Wan awa nu nawa înintîttuza ap i. Wan awa nawa arîttuza up i. Nawa kammuruzne na anza tînta i namninnara. 11 Îrattura nane an sukin tukianash, chiyura nuna. Na nu tukin uztuasmin, uspane an sukin puranazi. Nune, ap Taittane, sînammika i. Nu nawa kiwainta akwa, nua nîjkulturuza kiwainnari, wan nîjkulturuz wanmak uzanapa. Nakas nukas wanmak uztu akwa, usparuza kiwainnari, kawarain uzanapa. 12 Na usparuzkasa an sura uztuasmin, Diosne nawa tînta kiwainta. Nane usparuza iznat kit watsanarau, nawa nîjkulara akwa. Usparuza pakpiannamtuasmin, nane mînminkas usparuztas kanarachish. Mazain karît, Dios pitta parît aizpa nil kinpa. 13 Mane nane nu tura înash. Na an sura uztuasmin, nane an pit an sura uztuza kaiznamtus, uspa watsal kulanapa, nakanain watsal uzanapa. 14 Na up pit usparuza kaiznarîtkas, nawa nîjkulamtuchiruzne usparuza aliz kularît. Nawa nîjkulamturuzne an sukis awakana minñaramtuchi, nawa nîjkultuchiruz Satanás pashimtu aizpa kiamtu akwa. Nakas an sukis awakanain mintuchish. 15 Nane nua paikumtuchish, usparuza an sukis ukkanapa. Nane uspa akwa paikumtus, Satanás kwail kimika usparuza kwail kimanpa. 16 Nawa nîjkulamturuzne an sukis awakanain minñamtuchi, an sukis awa Satanás pashimtu aizpa kiamtu akwa. Nakas an sukis awakanain mintuchish. 17 Usparuza up watcha pit akwa sînam sanintain, up kalmin kianapa. Up pit paramtu aizpa watcha i. 18 Nune nawa an suras awakasa uzna îninta. Kawarain nane usparuza an suras awakasa uzna îninnanash, up pit kainanapa. 19 Nane nawa nîjkulturuzpa ishimtus, usparuz nua chîhkanapa. Suasne uspane up watcha pit akwa, sînam puranazi. 20 Nane uspa akwain paikumtuchish. Suntuzne mamaz awaruza Dios pit kainananazi. Nakas mamaz payura nawa nîjkulamturuzpa paikumtus. 21 Nua usparuzpa paikumtus, wan wanmak uzanapa. Nune, ap Taittane, nakasa wanmak uztu. Nane nukasakas wanmak uztus. Nane uspa wanmaktît aukasa uzanapa paikumtus, wan an suras awa nu nawa înintît nîjkulanapa. 22 Nu nawa anza tînta namninta akwa, nane sunkanain usparuza an tînta namninnanazi. Suasne uspane maza awakanain wanmak uzanazi. Kawarain nukas nakas wanmak uztuas. 23 Nakas nukas wanmak uztu akwa, usparuzkas nil wanmak uzshianazi. Suasne an suras awane nu nawa îninta piankamanazi. Uspane nu nawa pashinamtu piankamanazi. Nune nawa pashimtukanain usparuza pashinamtu. 24 Ap Taitta, mîzha. Nane nu nawa înintîttuz akwa paikwashimtus, uspa na tukin tuanpa, uspa nawa anza tînta i izanapa. An su sarachasmin, nune nawa pashit kit nawa anza tînta namninta. 25 Ap Taitta, nuin nil aizpa kimtu. An suras awane nua piankamamtuchi. Nain nua pianish. Mamaztuzkas, na iztakin uzturuzne, nu nawa an sura înintît piankamamtu. 26 Nane nuwa paranarau, uspa nua piankamanapa. Summin usparuza nuwa kwinta kimtanash, na nua pashinamtukanain mamaztuza pashianapa. Sunkanain nane usparuzkasa tunash. Pailti.”
Jesústa pizamtu
1 Sun paikwatpane, Jesúskas paiña kammuruzkas yaltas puzat kit Cedrón pi kwakkat kit olivos tî wamkin napparît. 2 Judasne, ussa chîhkashimtumikane, sun olivos tî wamkin pian, Jesúskas paiña kammuruzkas akkwan payu sua îarît akwa. 3 Katmizna Judasne Jesústukin olivos tî wamkin at kit akkwan awaruza sun miwara annara. Akkwan Roma pîpuluras suldarukas katsa pariyawa kiwainmuruzkas Fariseowa kiwainmuruzkas sun tî wamkin nappaara impilkasakas, mashtikasakas. 4 Jesús uspa kiashimtu aizpa pian akwa, Jesúsne usparuza wanmal kit mîmanara: —¿Mînama sayamtuas? 5 Uspane ussa sînkaara: —Jesústa, Nasaret pîpulura uzmikasha, saimtumakpas. Jesúsne kaiznara: —Na ish. Judasne, ussa chîhkamtumikane, uspakasa wanmakta. 6 Jesús “na ish” kizkane, uspane kwizta îat kit pilta nainñara, ishkuarît akwa. 7 Suasne Jesúsne mamasa mîmanara: —¿Mînama sayamtuas? Uspane sînkaara: —Jesústa, Nasaret pîpulura uzmikasha, saimtumakpas. 8 Jesúsne mamasa kaiznara: —Nane “na ish” kiznarau. Nawa sayamtune, ap kammuruza chîhtnarain, îarînpa. 9 Jesúsne sunkana kizta, paiña pit kaizta aizpa kirînpa. Ka kizta: “Nane ap Taitta akwattuza iznarau. Mînainkas kanintachish.” 10 Suasne, Simón Pedrone paiña mashti ukkat kit katsa pariyawa kiwainmumikawa numal kail yalta. Usne Malco muntît. 11 Sunkana Jesúsne Pedrora kaizta: —Up mashti watsari. Nawa mîzha. Nane ap Taitta nawa kinpa îninta kishimtus, naiznakima.
Jesúsne Anásta îmtu
12 Suldaruwa îninmikakas, wan suldarukas, Judío pariyawa kiwainmuruzkas Jesústa pizat kit paiña chihtîkin kuhtara. 13 Tas Anáspa yalta mîlaara. Anásne Caifáspa suegro azi. An añokin Caifásne anza katsa pariya azi. 14 An Caifásne ñamin Judío awa îninturuza ka kaiznara: “Maza ampu au wan Judío awaruzpa akwa irane, anza wari.” Suasne Romano awaruzne au wan Judío awaruza piantaamanazi, kizta.
Pedrone Jesústa pianchish kiztu
15 Simón Pedrokas mamaz kammumikakas Jesústa kanpailta. An kammumikane katsa pariyara wat piankam kit katsa pariyawa înintukin Jesúskasa napta. 16 Pedro pianamal pîjtakin kunasmin, mamaz kammumikane, katsa pariyara pianmikane, puz kit ashampa pîjta iztamikasha parat, Pedro napnapa. 17 Nimpihsh pîjta iztamikane Pedrora iz kit mîmara: —¿Nune an ampuwa kammumikakish? Pedrone sînkara: —Na chi ish. 18 Tîh pamtu akwa, kiwainmuruzkas pariyawa kiwainmuruzkas kunat kit imchaj ïn usappat kit ikulara. Pedrokas uspakasa ikul kit kunazi.
Katsa pariyane Jesústa mîmara
19 Katsa pariyane Jesústa paiña kammuruzpakas us kamtamtu aizpakas mîmara. 20 Jesúsne kaizta: —Nane wan awaruz iztakin paranarau. Nane Judío kammu yaltakas Diospa katsa yaltakas Judío wanmakkamtukinkas kamtanarau. Nane puinta paratchish. 21 ¿Chitma nawa mîmamtu? ¡Nawa mîraruza mîmarain! Uspane na kaizta aizpa nua kainanazi. Uspane na kaizta aizpa wat pianmai. 22 Jesús sun kiztawane, Dios katsa yalkin kiwainmumikane paiña chihtîkasa Jesústa aim kit kit kizta: —Katsa pariyara sunkana sînkamun. 23 Jesúsne sînkara: —Na kwail paratne, chi kwail parat aizpa kainazha. Na parat aizpa watne, ¿Chikishma nawa aim kimtus? 24 Suasne Anásne Jesústa kuh kit Caifás turakima, an katsa pariyara, îninta.
Pedrone mamasa Jesústa pianchish kiztu
25 Simón Pedro kun kit ikultuasmin, uspane ussa mîmaara: —¿Nune an ampuwa kammumikakish? Pedrone pîrail kiz kit kaizta: —Na chi ish. 26 Kwiztane mamaz katsa pariyawa kiwainmumikane sua uz. Ñamin olivos tî wamkin Pedrone paiña kwalpa kail yalta. Usne Pedrora kaizta: —Nane nua Olivos tî wamkin iztau. 27 Pedrone mamasa pîrail kaizta. Sun urain aral kayune azta.
Jesúsne Pilato tukin îmtu
28 Suasne uspane Jesústa Caifáspa yalkis tainñara, Romano awa îninturakima. Kînmîztu akwa, Judío awane înintukin napshiarachi, Pascua pishta taiznapain akwa. Judío awachi yalta napparane, uspane Dios iztakin sînamchi namninamtu minñara. Suasne Judío awane Pascua pishta izasachi, Pascua kumira kuasachi. Impa. 29 Katmizna Pilatone Judío awakasa paran puz kit kaiznara: —¿Chitma an ampura kwail kirît kizamtuas? 30 Uspane sînkaara: —Us kwail kitchine, aune nua chîhkasachimakpas. 31 Pilatone kaiznara: —Umin ussa mîltain.Uînimkasain paiña kwail kirît aizpa antain. Judío awane sînkaara: —Aune, Judío awane, mînminkas ininsachimakpas. Romano awain mamazta ininshina. 32 Jesúsne ñamin miza tuntu inasa kiznara. Sunkana us kaizta aizpa kirît. 33 Pilatone paiña înintukin mamasa nap kit Jesústa tainna înin kit ussa mîmara: —¿Nune Judío awawa îninmikakish? kizta. 34 Jesúsne sînkara: —¿Upminpain sun mîmamtukish? ¿Mamaz mîmanapa îninma? 35 Pilatone sînkara: —Nane Judío awa chi ish. Up Judío awakas pariyawa înintuzkas nawa chîhkat. Nune ¿Chima kwail kira? 36 Jesúsne sînkara: —Nane an suras înintuzkana înintuchish. Nane an suras îninna atchish. Na an suras aratne, ap kiwaintuzne na akwa waya kiashina, Judío awa îninturuz nawa chîhkamanpa. Sunkana nane an suras îninna atchish. 37 Suasne Pilatone mîmara: —Suasne ¿Nune îninmikakish? Jesúsne sînkara: —Nane îninmika ish. Nu kaizta aizpa watcha i. Nane an sura arau, watcha pit kamtana. Watcha pit piankamshimtumikane na kaizta aizpa mîmtu. 38 Pilatone kaizta: —Sun watcha pit ¿Chi mai? Mînminkas watcha pit piankamsachi.
Jesús innazi kizamtu
Ussa sun mîmarawane, Pilatone mamasa Judío awakasa paran puz kit kaiznara: —Uskasa paratpane, nane us kwail kirît kizsachish. 39 Pailta Pascua pishta taizkane, une nawa paikuamtu, na maza kajchira sîptîtmikasha chîhtnapa. Katmizna, ¿nane u akwa u Judío awawa mikwara chîhtshinasa? 40 Suasne uspane akkwan piji tînta kwianara: —¡Anne chîhtmun! Aune paikwashimtumakpas, Barrabásta chîhtnapa. An Barrabásne walkummika azi.
1 Suasne Pilatone Jesústa aim ilnapa îninta. 2 Suldaru awane pu tît ippat kit Jesúspa kîzpukin sînnat kit ishtam kwaksham kwaninta. 3 Uspane Jesús tura kasha aat kit ussa ishnat kit kaizara: —Wat kîntîre. Nune Judío awawa îninmika i, kizara. Uspane paiña matsîhkin kuzara chihtîkasa. 4 Pilatone paiña yalkis mamasa pianamal Judío awa tukin puz kit kaiznara: —Mîzhain. Mama suldaruruzne Jesústa ayuktas ukkanazi. Nane ussa u iztakin ukkamtu, u us chinkas kwail kitchira piankamanapa. 5 Jesús Pilato wakinkas, awaruzpa wakinkas pianarawane, uspane Jesús kîzpura pu tît sînat kit Jesústa ishtam kwaksham kwaninta. Pilatone usparuza kaiznara: —An ampura iztain. 6 Pariya înintuzkas Dios katsa yalkin kiwaintuzkas ussa izarawane, ka kwianamîzta: —Ussa kurishta patpiantari, kizara. Pilatone kaiznara: —Umin ussa pizat kit kurishta patpiantain. Nane us chinkas kwail kitchi kaiznamtus. 7 Judío awa îninturuzne ussa sînkaara: —Aune Moisés îninta aizpa mîjmakpas. Sun înimkin parît aizpa akwa, usne irawa, “nane Dios painkul ish” kiztu akwa. Us Dios painkul chi akwa, usne kwail kiz kit irawa. 8 Sun mîrawane, Pilatone an akkwan ishkwat. 9 Mamasa paiña înintukin nap kit Jesústa mîmara: —¿Nune mîntas mas? Jesúsne chinkas sînkarachi. 10 Katmizna Pilatone ussa kaizta: —¿Nawa sînkamtuchikish? Mîzha. Nane nua chîhtninshinas. Nakas nua tîra patpianninshinas. 11 Jesúsne sînkara: —Dios nua îninapa naratchine, nune nawa kwail kishinachi. Katmizna nawa chîhkatmikane nukin anza kwailmika i. 12 Sun urain Pilato Jesústa chîhtshimtukas, Judío awa îninturuzne ka kwiannamîzta: —An ampura chîhttane, nune, Roma pîpulura katsa mikwawa izmumika chi i. An Jesús muntîtmika mikwa namshimtune, nune Roma pîpulura katsa îninmikawa izmumika chi i. 13 Sun pit mîrawane, Pilatone ît kit paiña înimkin uzta. Usne paiña înimkin Jesústa kana înpa îninta. An înimne “sak uk” muntît. Judío awa pitta Gabata muntît. 14 Paizka payu azi. Mamaz payura Pascua pishta taiztu. Pilatone Judío awaruza kaiznara: —U mikwara iztain. Ussa sappamtuchikas, an kuntîtmikane u mikwa i. 15 Uspane ka kwianara: —Inapa, inapa. Tîra patpiantain. Pilatone mîmanara: —¿U mikwara tîra patpianshinasa? Pariyawa înintuzne sînkaara: —Aune mamaz mikwasha mîshimtuchimakpas. Au mikwane Cesar i. 16 Suasne Pilato Jesústa chîhkatpane, Roma suldaruruzne ussa mîlara, kurishta patpiannapa.
Uspane Jesústa tîra patpiamtu
17 Jesúsne Jerusalén pîpulukis puz kit kurish mut kit îzara nura. An îzane “KÎZPU SÎH” muntît. (Judíowa pitne Gólgota muntît.) 18 Suane uspane ussa kurishta patpianara. Mamaz paas awara Jesúspa pamals kurishta patpianara. 19 Pilatone an pit panapa îninta, kurishta patnapa. An pitne ka parît: AN JESÚSNE NASARET PÎPULURAS AZI. USNE JUDÍO AWAWA ÎNINMIKA I. 20 Uspane pîpulu kashara Jesústa tîra patpiantara. Katmizna akkwan Judío awane sun pit parît aizpa izara. Uspane sun pitta Judío awa pitparakas, Roma awa pitparakas, Griego awa pitparakas parît. 21 Katmizna Judío pariyawa înintuzne Pilatora kaizara: —“Judío awawa îninmika” pamun. Usne “nane Judío awawa mikwa ish kizta,” ka pari. 22 Pilatone sînkanara: —Na parît aizpa nukkultui. 23 Jesústa tîra patpianarawane, suldaruruzne paiña pïn sappat kit ampara suldaruruzpain naiyara. Uspane paiña kwaksham paimpa watsara. Kwakshamne sîptachin kwara. 24 Suldaruruzne usparuzpain kaizara: —Sun puttît pïn pihshpiztuchimakpas. Salna îzhain, mazain sun pïn kana kinpa. Sun kitpane, Dios pitta parît aizpa ka kirît: “Ap pïn usparuzpain naiyara. Salara ap puttît pïn kana kinpa.” Suldaruruzne sunkana kiara. 25 Jesúspa akkuhshkas paiña aizpihshkas Jesús tîra patpiantukin kunara. Maríakas, Cleofaspa ashampa, Maríakas Magdalena pîpuluras tuazi. 26 Jesúsne paiña akkuhshta izta. Nane, paiña kammumikane, kasha kun kirau. Usne nawa pashira. Suasne Jesúsne paiña akkuhshta kaizta: —Mîzha. Anne up painkulkana i. 27 Suasne Jesúsne nawa kaizta: —Mîzha. An ashampane up akkuhshkana i. Sun urain nane ussa mîlta ap yaltakima.
Jesúsne imtu
28 Sun kitpane, Jesúsne sun urain wan Dios ussa kinpa îninta aizpa pailtît piankamta. Suasne usne ka kaizta: —Kwazi kiltus, kizta, Dios pînkîhta parît aizpa kinpa. 29 Makin waz uzazi tish vinokasa. Suldaruruzne aks tî piz kit tîra pimpuh puntakimain ippara. Pimpuhta tish vino paran kit Jesúspa pitta panak kit tukninara. 30 Jesúsne vino kwaiz kit kaizta: —Mane na wan kishimtu aizpa kirît me. Kîzpu waintawane, ira.
Suldarune kuishtiyasta aks kwiz tîkasa para
31 Maza payu we, Pascua pishta izna. Pascua pishtane Judío awawa katsa pishta azi. Katmizna Judío awaruzne kurishta irîttuza kihshninshiara, kwaizkulmu payura kurishta tuamanpa. Katmizna uspane Pilatora paikuara, mazara îninna usparuzpa ñampîra tîkasa kalpianapa, an ãïn ianapa, tas tain kihshanapa. 32 Suasne suldaruruzne paas Jesúskasa tîra patpiantaruza aat kit usparuzpa ñampîra kalpianara. 33 Jesústa îakane, suldaruruzne ussa irîtta izara. Katmizna paiña ñampîra kalpianarachi. 34 Maza suldaruruztas Jesúspa kuishtiyaskin aks kwiz tîkasa para. Sun urain aimpikas kwazikas kuishtiyaskis puzta. 35 Nane, kainammmikane, wan izta aizpa parît ish. Na kaizta aizpa watcha i, ukas nîjkulanapa. 36 Sun kiarît, Dios pînkîhta parît aizpa kirînpa. Ka parît: “Paiña sîh kalamanazi.” 37 Mamaz pajte Dios pitta ka parît: “Uspane kuishtiyaskin aks kwiz tîkasa parîtmikasha izanazi.”
Uspane Jesústa kamamtu
38 Sun kitpane, Joséne, Arimatea pîpuluras atmikane, Pilatora paikwara, Jesústa mu kihshat kit kamnapa. Joséne, Jesúspa kammumika azi. Judío awa îninturuzpa ishkumtu akwa, usne ussa puinta puintîtkanain kanpara. Pilatone Joséra îninta, Jesústa mu kihshanapa. Joséne ît kit mamazkasa Jesústa muara. 39 Nicodemokas, an ñamin maza amta Jesústa paran îtmikakas, treinta kilowa piam pihshkasa ara. Mirrakas áloekas karat. 40 Suasne Josékas Nicodemokas Jesústa mut kit pïnkasa wat piam narît pihshkasa ippailta. Judío awane sunkanain irîttuza watsat kamanapa kiamîzta. 41 Jesústa kurishta patpiantît tukin, warît su kashakin azi. An sukinne masas uk kul sarît. Sun uk kulta mînminkas iramikara tarachi. Sînam. 42 Uspane Jesústa sun kasha uk kulta nukpailta, Judío awawa kwaizkulmu payura taiznapain akwa.
Jesúsne irîttas kuhstu 1 Maríane, Magdalena pîpuluras atmikane, Domingo payura, tîlkwilmin kamtîtkin ît. Sîptît ukne paimpa tu izta. Jesústa iztachi. 2 Suasne usne pîpulura ãïn kailmîzta, Simón Pedrorakas mamaz kammumikashakas, Jesús kwisha pashitmikasha, kainana. Usparuza kaiznara: —Mînpazha au Anpatta kamtît kultas mîlta. Mîntama ussa kamtamakka pianchimakpas. 3 Katmizna Pedrokas mamaz kammumikakas pîpuluras puzpail kit kamkin îilta. 4 Paasas ãïn îiltakas, mamazne Pedrokin an ãïn ît kit an ñancha kamtîtkin pianara. 5 Usne sumain kit ayukta izta. Iptît pïn attishtain izta, kulta naptachin. 6 Kwiztane Simón Pedrone at kit kulta masain napta. Uskas iptît pïn izta. 7 Mamaz pïnkas, Jesús kîzpu iptît pïnkas izta. Mamaz pïnkasain tuchi. Paimpa iptît tu izta. 8 Suasne mamaz kammumikane, an ñancha atmikane, nap kit sun kirît aizpa iz kit Jesús irîttas kuhsta nîjkulta. 9 Makima uspane Dios pînkîhta parît aizpa piankamarachi. Irîttas kakultu piankamarachi. 10 Katmizna kwiztane kammuruzne uspawa yalta kailpailta.
Jesúsne Magdala pîpuluras Maríara izpamtu
11 Suasne María uk kulkin kailta. Sunkana Maríane pianamal uk kul kamtîtkin kun kit azta. Aztuasmin, usne ayukta izna wain 12 kit paas ángelta putchã pïn kwa izta. Uspane Jesús tuatkin uzpailta. Mazane kîzpumal uzta. Mamazne mittîmal uzta. 13 Ángeltuzne ussa mîmara: —Ashampa, ¿Chitma aztus? Usne kaiznara: —Aztus, mînpazharuz ap Anpatta muarît akwa. Nane Jesús irît mînta taara pianchish. 14 Sun kiztawane, usne kîzpu izpujiat kit sua Jesústa izta, ussa piankamtuchin. 15 Jesúsne ussa mîmara: —Ashampa, ¿Chitma aztus? ¿Mînama saimtus? Usne warît su izmumika azi min kit ussa kaizta: —Anpat, nu ussa murîtne, Jesús irîtta mînta taarît kainazha, na ussa sait kit muna. 16 Suasne Jesúsne kaizta: —¡María! Jesús kaizta aizpa mîrawane, usne ussa piankam kit puij kit ussa Judío pitkasa kaizta: —¡Rabuni! (Sun pitta “kamtam” kizta.) 17 Jesúsne ussa kaizta: —Nawa pizmun. Ap Taittakasa wanmakna îtchish mama. Ît kit ap kammuruza “ap Taitta tura numtus” kaiztain. Usne u Taittakas i. Usne ap Dioskas u Dioskas i. 18 Suasne Maríane, Magdalena pîpuluras atmikane, ît kit kammuruza “Anpatta iztau” kiz kainanara. Usne Jesús ussa kaiztît aizpa kainanara.
Jesúsne kammuruza izpannara
19 Sun payuin tîlkwil pakane, domingo payu azi. Judío awa îninturuzpa ishkuarît akwa, kammuruzne pîjta sîppat kit wanmakkara. Wan pîjta sîpparîtkas, Jesúsne yalta nap kit kammuruzpa paizkakin kun kit kakishapu kiz kit kaiznara: —¡Watmin uztain! 20 Sun kiztawane, usne usparuza paiña chihtîkas paiña pîjarakas annara. Jesústa izarawane, uspane watsal kulara. 21 Suasne Jesúsne usparuza mamasa kaiznara: —¡Watmin uztain! Ap Taittane an sura nawa îninta. Sunkanain nakas uruza îninnanash. 22 Usne usparuza izpanat kit kaiznara: —Mane Diospa Sînam Izpulta saptain, uruza kiwainnanapa, ukasa parejuin chaanapa. 23 Katmizna Dios kwail kirîtmikasha wat kultune, ukas ussa sunkanain wat kultawa. Us kwail kirît aizpa karînazi. Dios kwail kirîtmikasha wat kultukine, ukas ussa sunkanain wat kulmanazi.
Tomásne irîttas kuhstît Anpatta iztu
24 Tomásne, maza doceras kammuruzne, gemelokas muntît. An ñamin Jesús akane, Tomásne usparuzkasa tuchi. 25 Kwiztane mamaz kammuruzne ussa kaizara: —Aune Anpatta iztamakpas. Sunkana Tomásne sînkanara: —Ussa iztukine, paiña chihtî iztukine, irukasa tîttît namtît iztukine, nîjkulmanash. Paiña chihtî tîttît namtîtkin ap tîppukasa parakine, paiña pîjakinkas ap chihtîkasa parakine, nîjkulmanash. 26 Ocho payu pailtawane, kammuruzne mamasa maza yalta wanmakkara. Sun payuin Tomáskas usparuzkasa wanmakta. Wan pîjta sîptîtkas, Jesúsne nap kit usparuzpa paizkakin kun kit kakishapu kaiz kit kaiznara: —Watmin uztain. 27 Suasne Tomásta kaizta: —Apain at kit up tîppukasa, ap chihtîra paat kit izti. Ap pîjara up chihtîkasa paari. Nune nîjkulshimtuchi. Mane nîjkulcha. 28 Suasne Tomásne kaizta: —Nune ap Anpatkas ap Dioskas i. 29 Jesúsne ussa kaizta: —Nawa iztu akwa, nîjkultîmtu. Nawa iztachikas, nawa nîjkultumikane watsal kulnazi.
Juanne chikishma sun pînkîh parît kiztu
30 Jesúsne paiña kammuruzpa iztakin an akwan iztasparît kal kirît. Wan iztasparît kal sun pînkîhta parachi. 31 Sunkana sunpawa iztasparît kal pînkîhta parît, ukas Jesús Dios narîtmika i nîjkulanapa, u Jesús Dios painkul i nîjkulanapa, ussa nîjkulturuz pailta payukima uzanapa.
Jesúsne siete kammuruza izpannara
1 Akkwan payuchin pailkane, Jesúsne mamasa paiña kammuruza Tiberias pimamin izpannara. Sunkana kirît: 2 Simón Pedrokas Tomáskas, Gemelo muntîtmika, Natanaelkas, Caná pîpuluras Galilea suras uzatmika, Zebedeowa painkultuzkas, an paas Jesúspa kammuruzkas wanmakkara. 3 Simón Pedrone kaiznara: —Nane pishkaru sulna îrîmtus. Uspane ussa sînkaara: —Aukas nukasa pishkaru sulna îrîmtumakpas. Uspane katsa kanuara înpa waara. Sun amtane chinkas sularachi. 4 Kînmîzkane, Jesúsne pimarain izpan kit kunta. Sunkana paiña kammuruzne Jesústa piankamarachi. 5 Jesúsne mîmanara: —Izmuruz. ¿Pishkaru sultakiwas? Uspane sînkaara: —Chinkas sultachimakpas. 6 Jesúsne kaiznara: —An îmmu kanuawa numal kiaintain, pishkaru sulnapa. Sulmu kiaintawane, uspane sulmu ukkaasachi, akkwan pishkaru wa akwa. 7 Suasne maza kammumikane, Jesús kwisha pashitmikane, Pedrora kaizta: —An pimamin kunmikane Anpat i. Anpat i mîrawane, pantalón tukukasain kuh akwa, Simón Pedrone paiña kwaksham kwat kit pira tizainta. 8 Mamaz kammuruzne cincuenta sa pi ksukis purazi. Sulmu pishkaru punta akwa, uspane tainñat kit kanuawara pi ksurakima pîlapta. 9 Pilta kihsharawane, uspane ïn usaptît izara. Sun ïnkin pishkaru iltît tuazi. Pankas sua tuazi. 10 Jesúsne kaiznara: —Mamin sulta pishkaruruz kararain. 11 Simón Pedrone kanuara wat kit sulmu puntît katsa pishkarukasa pi ksurakima tainta. Ciento cincuenta y tres katsa pishkaru wiantîtkas, sulmune pihsharachi. 12 Jesúsne kaiznara: —Aat kit kwanarain. Mînminkas kammuruzne “mînmaka” mîmashitchi, us Anpat i pian akwa. 13 Suasne Jesúsne kasha at kit pan piz kit usparuza nailnara. Usne pishkarukasa kawarain nailnara. 14 Irîttas kuhstawane, Jesúsne mamasa paiña kammuruza ussa izpannara. Makasa kutña pijikima izpannara.
Jesúsne Simón Pedrora paramtu
15 Kuarawane, Jesúsne Simón Pedrora ka mîmara: —Simón, Juanpa painkul, mîzha. An kammuruzne nawa pashiamtu. ¿Nune an kammuruzkin nawa anza pashimtukish? Pedrone ussa sînkara: —Watcha Anpat. Nune na nua pashimtura pian. Jesúsne kaizta: —Nawa nîjkulamturuza iznari. Uspane ap pîrikukana mai. 16 Jesúsne mamasa ussa mîmara: —Simón, Juanpa painkul, mîzha. ¿Nawa pashimtukish? Pedrone sînkara: —Watcha, Anpat. Nune na nua pashimtura pian. Jesús kaizta: —Nawa nîjkulamturuza iznari. Uspane ap pîrikukana mai. 17 Jesúsne kutña pijikima ussa mîmara: —Simón, Juanpa painkul, mîzha. ¿Nawa pashimtukish? Pedrone tayalmîzta, Jesús kutña pijikima “nawa pashimtukish” mîmara akwa. Suasne sînkara: —Anpat, nune wan chiwal pian. Nune na nua pashimtura pian. Jesúsne kaizta: —Nawa nîjkulamturuza iznari. Uspane ap pîrikukana mai. 18 Watcha nua kaiztus. Musittu asmin, nune up kwakshammin kwat kit nu îshimtura ît. Îlapa parîkane, nune up sail tîs panazi. Suasne mamazne nua pïn kwanazi. Mamazne nua nu îshimtuchira mîlnazi. 19 Sun pit paramtuasmin, Jesúsne Pedro miza imtu kainara. Pedro irîmtukas, awane “Dios kwisha wari” kizanazi. Sun kiztawane, Pedrora kaizta: —¡Nawa kanpazha!
Jesúskas Jesústa pashitmikakas
20 Pedrone puij kit Jesústa kwisha pashitmikasha izta. Usne Jesúspa kwizpa kanpara. Ñamin kammuruz Pascua pishta kuamtuasmin, usne Jesúspa mamin kumira kwan uz kit “Anpat, ¿mînma nua chîhkarînazi?” mîmara. 21 Nawa iztawane, Pedrone Jesústa mîmara: —Anpat, sunmikane ¿Chima kishinasa? 22 Jesúsne ussa sînkara: —Us na kailtîmtukima uztukas, nune na nua kaiztu aizpa mît kit kitpa. Nu nawa kanpazha. 23 Katmizna wan kammuruzne an kammumika imanazi minñara. Jesúsne imanazi kiztachi. Ka kizta: “Us na kailtîmtukima uztukas, nune na nua kaiztu aizpa mît kit kitpa.”
Minpa pit
24 An kammumikane sun kirît aizpa kainat kit parît. Us paramtu aizpa watcha i pianmakpas. 25 Jesúsne an akwan iztasparît kal kirît. Jesús wan kirît aizpa pînkîhta parîtne, mînminkas an sura wan pînkîh pana pailsachi. Pailtît i.
Diosne paiña Sînam Izpulta îninna namtu
1 Nane Lucas mun ish. Nua, Teóþlora, kakishapu kiz kit an pînkîh pamtus. An ñancha an pînkîhta Jesús wan kit aizpakas us kamtanara aizpakas parau, Jesús chiyura numtu payukima. 2 Nurachasmin, usne paiña Sînam Izpulkasa paiña narît înintaruza kamtaninnara, us kamtara aizpa kianapa. 3 Irîttas kakultawane, Jesúsne usparuza cuarenta payurakima, akkwan pijikima, izpannara, us uztu piankamanapa. Akkwan piji usparuza izpan kit Dios awaruza îninnashimtu kwinta kinara. 4 Mama uspakasa tuasmin, Jesúsne îninnat kit kaiznara: —Jerusalén pîpuluras îman. Suain tîriztain, ap Papihsh umîza kin namtît aizpa sappanakima. Nane sunpa uruza kaiznara. 5 Watcha Juanne uruza kwazikasain munnanara. Akkwan payuchin kawarain Sînam Izpulne uruza piznanazi.
Jesúsne chiyura numtu
6 Suasne kanpamtuzne Jesústa ka akkwan piji mîmaara: —Au Anpat, ¿An payura au Israel awara kiwainanakish, au sukin îninna? mîmaara. 7 Usne usparuza ka sînkanaara: —Uruzne an payu piankamamanazi. Au Taittain an payu nanarît, us kishit aizpa kin. 8 Diosne paiña Sînam Izpulta îninnazi, u ussa sappanapa. Usne uruza tînta kiwainnanazi, na akwa kamtananapa. Suasne une Jerusalén pîpulurakas wan Judea surakas Samaria surakas wan attish surakas îanazi, na akwa kainana. 9 Jesús sun kiztawane, awa izamtuasmin, Diosne ussa chiyura nuninta. Wanish at kit ussa pal kit sîpta. Ussa an izarachi. 10 Jesús numtuasmin, uspane chiyura kwashpa izakkaara. Suasne paas ángelne putchã kamisha kwa usparuza at kit uspakasa kunpailta. 11 Usparuza kaiznara: —Galilea suras awa, ¿Chikishmaka chiyura izakpuspas? An Jesúsmin uruztas nurîtmikain watcha mamasa sunkanain mamaz payura kailnazi.
Uspane Matíasta naanara, Judaspa kal kinpa
12 Suasne uspane Olivos îzakis kihshat kit Jerusalén pîpulura kaiyarît. Moisés usparuza îninta aizpa kiashit akwa, uspane kwaizkulmu payura maza kilómetrokima kashain îshiara. 13 Pîpulukin piannatpane, kwashtît yal pitmura nuarît. Pedrokas Juankas Santiagokas Andréskas Felipekas Tomáskas Bartolomékas Mateokas Santiago Alfeowa painkulkas Simón Celote munmikakas Judas Santiagowa aimpihshkas usparuzpain pura. 14 Wan wanmakkara Jesúspa aimpihshkasa paiña akkuhsh, Maríakasa mamaz ashamparuzkasa, Diosta payu aizpa paikuana. 15 Sun payune Pedrone Cristora nîjkulturuz paizkakin nil satkunta. Maza cien veintekasa awa purakin. Pedrone ka kaiznara: 16 “Cristora piantuz, mîzhain. Diosne chiwazha paiña pînkîhta panintît aizpa ka kirît. Sînam Izpulne Davidta Judaspa kwinta kininta. Usne an ñancha Judas kit aizpa kwinta kira. Usne Jesústa annara, awa ussa pizanapa. 17 Usne au izmumika azi. Aukasa kal kimika azi. 18 Kwiztane kwail kit akwa, Judasne pial sap kit sun pialkasa su paira. Usne kwashtas kîzpuwara taiz kit irît. Paiña pîja puzpian kit pîrît puzta. 19 Jerusalénkin uztuz sun piankamarawane, uspane sun su i Acéldama munara. Usparuzpa pitne ‘aimpi su’ mun. 20 Sun wan kanta pînkîhta ka parît: ‘Paiña kwairît yalta suane mînminkas uzmuchi.’ Ankas ka parît: ‘Mamazne paiña kal kitpa.’ 21-22 Katmizna aune mînpazha aukasa wanmakmumikasha nanarawash. Wanmakmumikane awara ka kizshina: ‘Au Anpat Jesús irîttas kakulta.’ Mama Jesús wan payu aukasa uzasmin, uskas aukasa wanmakta. Juan munnanakima, Jesús kakulnakima, usne aukasa chara.” 23 Suasne Dios pit piantuzne, wanmakmuruzne, paas awara nanara. Mazane paas mun muntît: José Barsabáskas Justokas. Mamazne Matías muntît. 24 Suasne uspane uspa Anpatta ka paikuara: “Nune miza wan awa minñamtu pian. Katmizna aumîza an paastas nu narîtmikasha izninchain, 25 mamaz îninmikawa kal kinpa. Judasne sun kal chîhkat kit us kwail akwa paiña miwara ît kit naizta.” 26 Suasne uspane awa wanmakkarawane, wankis an watmikasha naara. Sunkanain uspane Matíasta naat kit once înintaruzkasa wianara.
Sînam Izpulne amtu
1 Sun Pentacostés pishta payu taizka, wan Cristora piantuzne mazakwain wanmakkarît. 2 Azain chiwazha tînta az kit chiyuras taizta. Tînta inkwakanain pat kit wan yal ayukmal napta, awa uzkularîtkin. 3 Suasne uspane tî ïn aiztukanain izara. Sun ïn paimpa paimpain naiyarît. 4 Sun akwa Sînam Izpulne wan awaruza piznara. Suasne uspane mamaz kamtachi pit kwinta kiamîzta. Izpulne usparuza paraninnara. 5 Sun payura mamaz suras Judío awaruzne Jerusalén pîpulura pianara, Diosta wakpuj wain kit Diosta paikwan. Uspane wan suras aara. 6 Sun aztu mîarawane, akkwan awane wanmakkat kit iztaspaarît. Înintaruz kwinta kiamtuasmin, pakaish pakaish paiña pitmin mîara. 7 Uspane ishkuat kit iztaspaat kit usparuzpain ka mîmaara: —¿An paramtuzne Galilea suras awa ki? 8 ¿Mizamakai? Mane auruzpain usparuza mîpuspas. Uspane au pit pashpas kawira aizpa paramtu. 9 Apane awa purai: Partia suraskas Media suraskas Elam suraskas Mesopotamia suraskas Judea suraskas Capadocia suraskas Ponto suraskas Asia suraskas 10 Frigia suraskas Panþlia suraskas Egipto suraskas Libia suraskas kashara Cirene pîpulura Roma pîpuluras awakas apain pura. 11 Mînpazha usparuztas Judío awa azi. Mamaztuzne Judío awa namarît. An awakas Creta suraskas Arabia suraskas purai. Uspa paraka, aune wan Diospa watsal kal kirît aizpa au pitmin mîpuspas, kizara. 12 Wanne iztaspaat kit chi kizmanamara. Usparuzpain mîmaamîzta: —¿Chima kizshina sunne? 13 Mamaztuzne usparuza sun akwa ishanat kit ka kaizara: —Uspane chappi kuat kit piarai, kizara.
Pedrone awaruza kaiznara
14 Suasne Pedrone mamaz once înintaruzkasa nil satkun kit tînta parat kit ka paiña Judío kwaltuza paranamîzta: “Na kaiztu aizpa mîzhain. Judío awaruzkas, wan Jerusalén pîpulura uztuzkas, nawa wat mîrain, piankamanapa. 15 Uspane pirachimai, umin minñamtukanain. Mama tîlawain i. Nueve urain i. 16 Joelne, Dios pit kainammmikane, an ñancha sun kit aizpa ka kaizta: 17 ‘Diosne sun minpa payura kaiztu. Nane ap Izpul wan awara nail kit mîlananash. U painkulkas pashukas nawa kwinta kianazi. U musitturuzkas u îlaparuzkas kainkizpaanazi. 18 Sun minpa payura nane ap Izpul, ap kiwainmuruza ashamparuzakas ampuruzakas îninnat kit mîlananash. Uspane nawa kwinta kianazi. 19 Nane kwashpa chiyumal chiwazha watsal kal kinash. Nane uruza an izninnanash, piankamanapa. Wan pailtîmtuasmin, nane pilkin aimpikas ïnkas ishkas izninnanash. 20 Pãnne tîl parînazi. Palapchane kwanam tîlkwil aimpikanain namtînazi. An kwiztane an watsal payu taizkane, au Anpatne paiña kal kimîznazi. 21 Mînpazha Anpatta paikumtune, usne usparuza watsat mîlnanazi, ïnta îamanpa.’ ” 22 Pedrone sun paiña Judío kwaltuza kaizta: “Israel awa, na kaiztu aizpa mîrain: Diosne Jesústa, Nazarettas munmikasha nat kit uruza îninnara, akkwan tuntu iztasparît kal u iztakin kinpa. 23 Diosmin Jesústa uruza chîhkatchasmin, usne chiwazha kishimtu aizpa an ñancha pian. Suasne une kwail awaruz ussa îninnat kit kurishta iru patpian piantaninta. 24 Sunkana Diosne ussa irîttas kakulninta. Jesúsne irîtpa izpul îmtura nukkulsachi, kajchira sîptîtmikakana. 25 Davidkas Jesúspa kwinta kit kit ka kaizta: ‘Nane ap Anpatta na iztukin iztau. Usne ap makin uz, awa nawa ishkumanpa. 26 Katmizna ap kaijchu watsal ish. Mane watsal pit pararau ap pitkasa. Katmizna mane nakas Diosta tîriz kit wat kwaizkulnash. 27 Nune, ap Diosne, ap izpulta irîttukin kwaimanazi. Nune nawa, up kiwainmumikasha, pashit kit ap ñara pîtninmanazi. 28 Nune nawa chiyura num mi kamtara, pailta payu uznapa. Nune nakasa uz, na wat tuanpa,’ kizta. 29 Cristora piantuz mintain. Nane uruza Davidpa au irît Taittawa, nil kwinta kitpaish. Us irawane, uspane ussa kamara. Us kamkin aukasa kashain tu. 30 David uzasmin, usne Diospa kainammmika azi. Uskas Dios sun kin namta aizpa pianazi. Diosne ussa ka sun kin namta: ‘Up kwalne, Cristo munmikane, sun su sapmîlnazi, înninna.’ 31 Sunkanain Davidne Dios kimtu aizpa ñamin piankam kit Cristo irîttas kakulnazi ka kwinta kinara: ‘Paiña Izpulkas irîttuz îmtura nukkulmanazi. Paiña ñakas pîtmanazi.’ 32 Mane aune sunta izat kit uruza ka kizpuspas: ‘Diosne Jesústa irîttas kakulninta.’ 33 Sunkana Diosne ussa nuninta, us uzkin îninna. Paiña papihshne, Diosne, paiña Sînam Izpul sun kin namtît aizpa Jesústa mîlara. Jesúsne mamin sun wan izara aizpakas wan mîara aizpakas uruza izninnara. 34 Chiyura nurachikas, Davidmin Jesúspa ka kaizta: ‘Ap Diosne ap Anpatta kaizta: Na uzkin uzti, awa nua wat minñanapa. 35 Nane wan awaruza nu înintu aizpakas, nu kaiztu aizpakas kininnanash.’ 36 Une, Israel awane, mîat kit piankamtain. Nane Jesúspa watcha kaiztus. Une Jesústa iru patpian piantaara. Diosne ussa Anpatkas Cristokas munta.” 37 Pedro kaizta aizpa mîarawane, uspane uspa kaijchura kwail minñat kit Pedrorakas mamaz înintaruzakas mîmara: —Ap Israel kwal ¿Chima kianapai? 38 Suasne Pedrone sînkanara: —Kwail kiarît aizpa maiztain. Dios iztakin pailtara munnarain, Jesucristora kanpamtuz namanapa, Dios u kwail kiara aizpa mainninnanapa. Suas Diosne paiña Sînam Izpul uruza mîlananazi. 39 Diosne sun kin namnara aizpa uruzakas uspa pashparuzakas mamaz attishtas awaruzakas mîlananazi. Au Anpatkas au Dioskas wan awa narîttuzakas akwarîttuzakas sun mîlananazi. 40 Sunmin kwinta kinara. Pedrone an akkwan pitkasa kurunnat kit paranat kit kaiznara: —Diosta paikwarain, uruza watsat mîlnanapa, sun kwail awakasa naizamanpa. 41 Pedro kaizta aizpa mîraruzne munna îarît. Sun payura kutña mil awane, Dios înintamikasha, Cristora piantuzkasa wanmakkara. 42 Sun awaruzne înintaruz kamtanara aizpa mîamîz kit sulmin uzat kit Diosta parejuin kwinta kiara. Uspane wanmakkara, usparuzpain kumira nail kit kwan.
Diosta piantuzne wanmaktît uzamtu
43 Wan awane iztaspaara, înintaruz iztasparît kal kiara akwa. Uspane watsal iztasparît kal kiat kit akkwan awara kiwainara, Diosta piankamanapa. 44 Wan Cristora nîjkulturuzne wanmakkat kit chiwazha mîj aizpa wanta naiyara. 45 Uspane chiwazha mîj aizpa paininara, sun pial pailtara we mîjtuza nailna. 46 Uspane pailta payura Diospa yalta wanmakkara. Usparuzpa wan yalta kumira nail kit kuat kit wat kulara. Uspane usparuza kwinñara. 47 Uspane ka kaizara: “Diosne kwisha wari.” Wan awane Dios pit piantuzpa minñat kit kaizara: “An awane kwisha wari.” Au Anpat Jesús awaruza watsat mîlnamtuasmin, usne Dios pit piantuza pailta payu wiannara, uspakasa wanmakkanapa.
Maza mittî chasachimika kakultu
1 Mamaz payura Pedrokas Juankas Diospa katsa yalta kutña urara sulmin nuilta, awa Diosta paikumkin. 2 Maza ampune, mittî chasachimikane, ainkiasmin ka kawirît. Pailta payu suain tuara. Awane pailta payu ussa “watsal” muntît pîjtakin miara, Diospa katsa yal napmukin chihtî an kit amtuza pial paikwan. 3 Pedrokas Juankas Diospa katsa yalta nappailmîzkane, mittî chasachimikane usparuza iznat kit chihtî an kit pial paikwanara. 4 Suasne Pedrokas Juankas ussa izpailta. Pedrone ussa kaizta: —Aumîza iznaka. 5 Sun ampune usparuza iznat kit chiwazha mîlanazi minta. 6 Pedrone ussa kaizta: —Nane pialkas mîjchish. Urukas mîjchish. Na mîj aizpa mîlanash. Jesucristone Nazaret pîpuluras azi. Jesúsne nua kuhsninnazi, chanpa. 7 Suasne Pedrone paiña chihtî numal piz kit kuhspaninta. Azain paiña pimpulkas mittî impulkas wat parît. 8 Suasne mittî chasachimikane masain tizak kit mittîkin kun kit chamîzta. An kwiztane usne tizak kit uspakasa chat kit Dios katsa yalta naptît, “Dios kwisha wari” kizna. 9 Wan awane us chat kit Diosta kwisha wari kiztu izara. 10 Uspane iztaspaat kit ishkuara, chasachimika chamtu akwa. Uspane ussa impara imparain piankamamîzta. An chasachimikane an ñancha Diospa katsa yalkin “watsal” muntît pîjtakin tuazi, chihtî an kit pial paikwan.
Pedrone Diospa katsa yalkin paranamtu
11 Chasachimika Pedrorakas Juantakas chîhkashitchiasmin, wan awane iztaspaat kit Diospa katsa yalta azain îara, Salomón pîjta muntîtkin wanmakna. 12 Sun iztawane, Pedrone awara ka mîmanara: “Au Israel awa kwal, ¿Chikishma iztaspapuspas? ¿Chikishma aumîza kwisha izpuspas? Au paasne sun ampura au pit akwa wat panintachi. Aune ussa chanintachimakpas, au paasmin Diosta pian akwa. 13 Sunkanachi. Diosne sun kirît, awa ‘paiña painkul Jesús tînta namtîre’ kizanapa. Abrahamkas Isaackas Jacobkas an Diosta wakpuj wainñat kit paikuara. An Diosne au an ñancha irîtpa kwalpa Dios i. Une ussa Judío înintuza chîhkaara. Pilato Jesústa chîhtshimtuasmin, une Jesústa pashitchimakpas kizara. 14 Une Dios sînammikashakas nil uzmumikashakas chîhashitchi. Une maza awara, piantatmikasha, chîhshiara. 15 Sunkana une awaruza uzninmumikasha piantaara. Mane Diosne ussa irîttas kakulninta. Aune uruza sun piankamninnat kit kainanamtumakpas. 16 Jesústa nîjkultît akwa, an ampune wat parît. Une ussa izat kit pian. Jesústa nîjkultît akwa, an ampune kapal wat parît. Wan awane sun izamtu. 17 Sunkana ap Israel awa izmuruz, mîrain. Ukas u îninmuruzkas ussa piantaarîtkas, une u kiarît aizpa wat piankamarachi. 18 An ñancha Diospa kainammturuzne ka kizara: ‘Jesucristone naiznatkin. Sunkanain Diosne sun kirît.’ 19 Katmizna u kwail kimtu aizpa maiztain. Diostain kailtain, u kwail kiarît aizpa sînam kwizninnanpa. Sunkanane au Anpat Diosne chiyuras anazi, auruzpa izpulta kiwain kit kwaizkulninnapa. 20 Ankas Diosne Jesucristora an ñancha naramikasha uruza îninnara. 21 Mane Jesucristone chiyura nukkultawa, Dios wan chiwalta masas namtanakima. An ñancha Dios pit kainammtuzne sunpa kainanara. 22 Sunkana Moisésne au irît kwalta ka kaiznara: ‘U Anpat Diosne maza kainammmikasha, u kwaltas kawinintamikasha, nakana îninnazi. Wan us kaiznara aizpa mîarawa. 23 Mînminkas an kainammmika kaizta aizpa mîarakine, Diosne usparuza paiña kwaltas paimpa îninnanazi, ianapa.’ 24 Sunkana Samuel uzasmin, pailta kainammtuzkas kawarain an payu chi kirînsa kiz kit kainaara. 25 Une kainammtuzpa painkul mai. Diosne kainammtuz akwa uruza kaiznara, an ñancha kin namtît aizpa sappanapa. U an ñancha kwal uzasmin, Diosne Abrahamta ka kizta: ‘Nane up kwaltuza kiwainanash, wan awa an sukin uztuza wat kianapa.’ 26 Paiña painkulta kakulnintawane, Diosne ussa an ñancha îninta, uruza wat kiwainanapa. Usne uruza wat kinara, awa kwail kiarît aizpa maizanapa, wan awa kwail kiamanpa.”
Pedrokas Juankas Judíowa înintuzakin kunpailtu
1 Pedrokas Juankas wan awaruza paranamtuasmin, Judío awawa pariyaruzkas Diospa katsa yal izmu policíakas Saduceo awaruzkas aara. 2 Uspane aliz kulaarît, uspa paas awaruza kamtanara akwa. Ka kaiznara: “Jesús irîttas kakulta akwa, awakas irîttas kakulanazi.” 3 Katmizna uspane usparuza piznat kit nashtîmtura kajchira sîpnarît tîlawakima. 4 Akkwan awane, usparuztas sun pit mîraruzne, mîat kit wat nîjkulara. Dios pit mîraruza wiantawane, uspane cinco mil ampu panapain wianta. 5 Tîlawara kwizta Judío awa înintuzkas îlapa înintuzkas Moisés kaizta aizpa kamtamtuzkas Jerusalén pîpulura wanmakkara. 6 Anásne, pariyaruza îninmikane, tuara. Uskas Caifáskasa Juankasa Alejandrokasa wan pariyawa înintuz kwalkasa wanmakkara. 7 Suasne uspane Pedrorakas Juantakas kanapa îninnat kit “Paizkakin kuntain” kiznara. Uspane ka mîmanara: —Nune an chasachimikasha ¿Mizama kuhsninzi? ¿Mînma uruza sun kin îninzi? 8 Suasne Diospa Sînam Izpul ussa kiwaintuasmin, Pedrone usparuza ka kiznara: —Judío awa înintuzkas îlapa înintuzkas mîrain. 9 An ishtumikane kuhsak kit chamîzta. Une aumîza “¿Mînma ussa kuhsakninta?” kiz kit mîmaamtu. 10 Au paasne uruza, wan Israel awaruza, kainammpuspas, us wat parît kit miza tuntu kuhsaktît piankamanapa. Jesúsne, Nazaret pîpuluras mikane, ussa kuhsakninta. Une ussain iru patpian kit piantaara. Diosne ussa irîttas kakulninta. 11 An ñancha Diospa pit ka parît: “Jesúsne sam saktîkana i. Une, yal samtuzkana, ussa kwayarît, ussa paashitchi akwa. U ussa paashitchikas, usne awaruza watsat mîlnanashina.” 12 Mamaztuzne, mînminkas, aumîza watsat mîlnasachi. Diosne Jesústa îninta, aumîza watsat mîlnanapa. Apain mamazta înintachi. 13 Wanmakmuruzne iztaspaarît, Pedrokas Juankas ishwatchin paranara akwa. Uspa paas kammu pianchi minñara. Kain awain minñara. Suasne uspane Jesúskasa chamtu nîjkulara. 14 An ampu, kakultîtmika, sua uspakasa pana izamtu akwa, uspane chinkas sînkaarachi. 15 Suasne uspane uspa paasta wanmakmukis îninnat kit nukkulat kit usparuzpain kwinta kiara. 16 Ka usparuzpain kaizara: —¿Chima kianapai Pedrokasa Juankasa? Wan Jerusalén pîpulu uztuzne sun kwisha iztasparît kal kirît pian. Aune sun kirît aizpa kwail i kaizsachimakpas. 17 Mane usparuza kurunat kit tînta kainarawamakpas, an akkwan awa sun mîamanpa, mînainkas Jesúspa kwinta kiamanpa. 18 Suasne Pedrorakas Juantakas akwanat kit uspa pit îninnat kit kaiznara: —Jesúspa kwinta kiaman; kamtanaman. 19 Pedrokas Juankas sînkaailta: —Une minñarawa. U aumîza “Jesúspa kamtanaman” kaizamtukas, aune Diosta mîrawamakpas. 20 Aune izta aizpakas mîra aizpakas kwinta kimîztawamakpas. 21 An akkwan aliz pit pararawane, uspane usparuza chîhkaarît. Uspane usparuza ilmanamara, pailta awa Diosta kwisha wari kizara akwa, sun kit akwa. 22 Mamasa kuhsaktîtmikane cuarenta año mîjara.
Diosta piantuzne Diosta paikuamtu
23 Chîhtawane, Pedrokas Juankas uspa izmuruza îil kit Judío awa îninturuzkas îlapa îninturuzkas kaizara aizpa kainanara. 24 Sun mîarawane, wanne sulmin Diosta paikuat kit kaizara: “Au Anpat, nune sukas chiyukas pikas wan chiwalkas sara. 25 Nune Davidpa au kwalta kwinta kinara. Sînam Izpulne Davidta, Dios kiwainmikasha, ka paraninnara: ‘Diosta nîjkultuchiruzne waya kiamtu. ¿Judío awaruzne uspa kiashimtu aizpa kain minñamtu? 26 Au sukin înintuzkas wan pîpulukin înintuzkas wanmakkamtu, Anpattakas Dios narîttuzakas waya kianapa.’ 27 Watcha. Herodeskas Poncio Pilatokas Judío awachikasa Israel awakasa an pîpulukin up sînam kiwainmikasha waya kin wanmakkara. Jesúsne Dios naramika i. 28 Uspa sun kiarachasmin, nune an ñancha uspa minñara aizpa pian, nu mintu aizpa kianapa. 29 Maneme au Anpat, usparuza mîri. Uspane aumîza naizninanazi kizamtu. Aumîza kiwainchain, au ishkuamanpa, up pit kwinta kiana. 30 Nu tînta akwa, u kanpamturuza kiwainarain, ishturuza kakulninnanapa. U kiwainmuruzne up painkulta, sînam Jesústa, paikuanazi. Usparuza kiwaintain, chiwazha watsal iztasparît kal kianapa,” kizara. 31 Diosta paikuarawane, uspa uzamtukin ulmîzta. Sun urain Diospa Sînam Izpulne usparuza piznat kit Dios pit wan mîrakin kainana kiwainnara.
Uspane wan mîj aizpa wantuza naiyara
32 Akkwan Cristora nîjkulturuzne kawarain minñat kit sulmin kal kishiara. Mînminkas chiwazha mîj aizpa uspain watsarachi. Sunkana wanne chiwazha mîj aizpa usparuza mîlanaara. 33 Înintaruzne Anpat Jesús irîttas kakultît kwisha tînta kainanamîzta. Diosne wanta an akkwan kiwainnamîzta. 34 Mînminkas we mîjchi. Su mîjtuzkas yal mîjtuzkas painin kit pial karaat 35 kit înintaruza mîlanaara. Uspane an pial we mîjtuza nailnara. 36 Sunkana Joséne Levíwa kwal kirît. Usne Chipre pi paizka sukin kawira. Înintaruzne Joséwa mun maiz kit Bernabé munta, (us mamaztuza watsal pit kiz kit kiwainamtu akwa). 37 Sun ampune maza su painin kit înintaruza mîlanara, mamaztuza kiwainanapa.
Ananíaskas Saþrakas
1 Mamaz ampune, Ananías muntîtmikane, sua uzta. Usne paiña ashampakasa chiwazha su mîj aizpa paininpailta. Paiña ashampane Saþra muntît. 2 An ampune paiña ashampakasa pitchin pial paimpa mîjkultît. “Wan pial mîlarau” kiztuasmin, usne tiztît mîj aizpa înintaruza karara. Kainmin usparuza kishinara. Sînam Izpulne Ananías kit aizpa Pedrora piankamninta. 3 Suasne Pedrone ussa ka kaizta: —Satanásne nua piz kit napta, Sînam Izpulta pîrail kaizninna. Nune sun kishira, sun su paininta pial chiwazha watsan. 4 Sun su painintachasmin, up azi. Sun su painintawane, an pial up azi. ¿Chikishma sun kimtus? Nune Diosta pîrail kaizta. Awara chi, kizta. 5 Sun mîrawane, Ananíasne nain kit ira. Wanne sunta piankamara aizpa ishkuara. 6 Suasne musitturuzne nappat kit ussa pïn ippat kit muara, pilta kamna. 7 Kutña ura pailtawane, Ananíaspa ashampane Pedro tukin napta. Usne paiña ampura kirît aizpa pianchi. 8 Pedrone ussa mîmara: —Kaizcha. ¿Une supawakin sun su paininmanas? Usne ka kizta: —Watcha. Sunpawa muin. 9 Suasne Pedrone ussa kaizta: —Une nîjkulara, Dios Izpulta pîrail kaizna. ¿Chikishma sun kiwiznash? Up ampura mut kamtaruzne me aamtu. Uspane sunkanain nua muanazi, pilta kamna. 10 Sun urain usne Pedro panakin nain kit ira. Musitturuz nappakane, ussa irît wanmalara. Uspane ussa ampu kamkin kamna îara. 11 Wan Jesústa piantuzkas wan sunpa piankamturuzkas ishkuara.
Înintaruzne akkwantuza kakulninnamtu
12 Înintaruzne awa purakin watsal iztasparît kal kiat kit kwisha akkwan awara kakulninñara. Wanne Salomón muntît pîjtakin wanmakkara. 13 Awa usparuza wat minñat kit wat awa mai kizarakas, mînminkas uspakasa wanmakshiarachi. 14 Mazantuz ishkuarît akwa, akkwan ampukas ashampakas Anpatta nîjkulat kit Anpatta piantuza wanmakkara. 15 Sun akwa awane ishturuza pianamal karaat kit mikin kamakinkas pïnkinkas taara. Pedro miwara pîntuasmin, paiña izpul chamtukin usparuza îsalta pînnara. 16 Akkwan awane kasha pîpulukis Jerusalén pîpulura pianaara. Uspane ishturuzakas saliz piztîttuzakas karaara. Wanne kakularît.
Judío awane Pedrorakas Juantakas pizashimtu
17 Pariya îninmikakas Saduceo izmuruzkas înintaruza aliz kulaara, awa usparuza pashinamtu akwa. 18 Suasne uspane paas înintaruza pizat kit kajchira sîppara. 19 Anpatpa ángelne amtawara at kit kajchi pîjta chîh kit usparuza puzninnat kit kaiznara: 20 “Katsa Diospa yalta îrain. Suain wan awara Jesús awaruza uzninnamtu kainarain.” 21 Sun mîiltawane, tîlawain katsa Dios yalta nap kit awaruza kamtanamîzta. Katsa pariyakas paiña izmuruzkas wan Israel îlapa înintuza akwanara, wanmakkana. Uspane usparuza kajchiras kanapa îninñara. 22 Policía kajchira pianakane, kajchira usparuza wanmalnarachi. Suasne kaiyat kit usparuza 23 ka kainanara: —Piannakane, aune sun kajchi sam sîptît wanmalwiznash. Policíakas pîjtakin wat izappara. Pîjta chîhtkane, aune mînainkas ayukmal izkitchimakpas. 24 Sun mîarawane, katsa Diospa yal izmu policía îninmikakas katsa pariyaruzkas chi kirît aizpa pianchi. Usparuzpain chima kiarîzi mîmaara. 25 Sun urain maza ampune at kit kaiznara: —Mîrain. Sun paas ampune, u kajchira sîptîttuzne, Dios katsa yalta paizkakin uz kit awara kamtanamtu. 26 Suasne Diospa katsa yalta policíane mamaz policíakasa îat kit usparuza karaara. Awaruza ishkuamtu akwa, uspane usparuza kwail kiarachi, awa usparuza uk kiamanpa. 27 Karaarawane, policíane usparuza Israel îlapa înintuz wanmaktîtkin kunninnara. Katsa pariyane kaiznara: 28 —Aune uruza Jesúspa kamtanachi înintamakpas. ¿Chi kiarît une? Une wan Jerusalén pîpulukin uzturuza kamtanamtu. Une aumîza sun ampura piantaamakpas kizshiamtu. 29 Suasne Pedrokas mamaz înintaruzkas sînkaanara: —Diosta mîrawamakpas. Awara mîrakiwamakpas. 30 Au Diosne, au kwalpa Diosne, Jesústa irîttas kakulninta. Une ussa irukasa patpian kit tîra kan kit piantaara. 31 Diosne ussa kakulnin kit tînta namninta. Usne ussa îninmikakas au watsat mîlmumikakas namnintît, u Israel awa kwail kiarît aizpa maizanapa, u kwail kiarît sînam kulnanapa. 32 Aune uruza Dios kit aizpa kainapuspas. Diosne paiña Sînam Izpul akwa aumîza piankamninara. Usne paiña Izpulta paiña pit mîraruza îninamtu. 33 Sun mîarawane, uspane pilchapuzat kit usparuza piantashiara. 34 Gamalielne wanmakmuruztas azi. Usne Fariseo awa azi. Usne Moisés kaizta aizpa kamtanara. Wan awane us kwisha wat kirît minñara. Usne kun kit înintuza pianamal îrattukimain îninnara. 35 Kwiztane usne wanmakmuruza kaiznara: “Israel awa mîrain. An ampuruza u kiashimtu aizpa mamasa wat mintain. 36 Teudaspa nîjkultain. Akkwan payuchin usne at kit ‘nane wat awa ish’ kiznara. Suas ampara cien awane ussa kanpaara. Mînpazha ussa piantarawane, paiña kanpamtuzne wan kaarît. 37 An kwiztane awara wiantu payuin Judasne Galilea suras azi. Akkwanne ussa kanpaara, gobiernokasa waya kin. Awa ussa piantaarawane, paiña kanpamtuzne wan kaarît. 38 Katmizna nane uruza ka kurunamtus: Usparuza chinkas kiman. Usparuza chîhttain. Awa mintu aizpakas awa kal kimtu aizpakas pailtînazi. 39 Uspa Dios kaizta aizpa kiamtune, une usparuza kwayasachi. Dioskasa waya kiman, kiznara.” Uspane Gamaliel usparuza kainara aizpa kiara. 40 Suasne uspane înintaruza akwanara. Usparuza ilnarawane, uspane Jesúspa kwinta kiman kiznara. An kwiztane chîhtnarît. 41 Înintaruzne Israel înintuz wanmakmukis puzpail kit watsal kulpailta, Jesús akwa naizpailta akwa. 42 Uspane Diospa katsa yaltakas wan yaltakas Dios watsal pit kamtamîzta. Jesúspa, Dios îninmikawa, pailta payukima kwinta kiamîzta.
Siete awaruza nanarît
1 Payu aizpa kwisha akkwan awane Jesúspa nîjkulamîzta. Griego pit paramtuzne aliz kulaat kit Judío pit paramtuza kaiznara: “Une au ashampawa ampu irîttuza kumira kawarain nailnarachi.” 2 Suasne doce înintaruzne wan Jesúspa piankamturuza wanmakninnat kit kaiznara: “Aune Dios pit kainammîztawamakpas. Dios pit chîhkarachiwamakpas, kumira nailna. 3 Katmizna, ap Diosta piantuz mîzhain. Siete ampuruza sairain. Wat mintuza, wat piantuza, sairain. Sînam Izpul piztîttuza sairain. Usparuza sun kal kinpa chîhkarain. 4 Aune Diosta paikwat kit Dios pit awaruza kamtawamakpas,” kiznara. 5 Wanne sun nîjkulat kit awara nanara. Estebanne wat nîjkulta. Sînam Izpulne ussa pizta. Felipekas Prócorokas Nicanorkas Timónkas Parmenaskas naarît. Nicoláskas naarît. Usne an ñamin Antioquía suras at kit Judío awakana namtît. 6 An kwiztane uspane usparuza înintaruz purakin karanara. Înintaruzne uspa akwa Diosta paikuat kit uspa chihtî usparuza paanara, sun kal kianapa. 7 An akkwan awane Dios pit piankamamîzta. Jesústa piantuzne Jerusalén pîpulura wanmakkamîzta. Akkwan Judío pariyaruzkas Dios pit piankamat kit Jesústa nîjkulamîzta.
Uspane Estebanta pizamtu
8 Estebanne irîttuza kakulninnara. Ishturuza wat paninnara. Saliz piztîttuza puzninnara. Iztasparît kal kimîzta, awa Diosta piankamanapa. Diosne ussa nat kit tînta kiwainta, awa iztakin paiña iztasparît kal kinpa. 9 Suasne mînpazha Judío kammu yaltas Estebanta tînta mîmaamîzta. An kammu yalne chîhtmumikawa kammu yal muntît. Uspakas Cirene pîpuluras awakas Alejandría pîpuluras awakas Cilicia pîpuluras awakas Asia suras awakas sua wanmakkara. Sun ampuruzne Estebanta tînta kwinta kiamîzta. 10 Sînam Izpulne Estebanta kiwainta, usparuza nil kwinta kinpa. Uspane ussa wat sînkaarachi. 11 Suasne uspane mînpazhara pial tanara, pîrail kaizanapa. “Aune uspa kaizara aizpa mîramakpas. Usne Moiséspakas Diospakas kwail pit kwinta kira.” Sunkana kiztain. 12 Sunkana awakas îlapa înintuzkas Moisés kaizta aizpa kamtamtuzkas Estebanta pilchapuzamîzta. Uspane ussa azain îat kit pizat kit îlapa înintuzpa wanmaktîtkin mîlara. 13 Uspane pîrail kaizmuruza sayara, sunkana pîrail kaizanapa: “An ampune Diospa sînam yalkas Moisés îninta aizpakas kwail pit kwinta kimîztu. 14 Aune Jesús Nazaret pîpuluras kaizta aizpa mîramakpas. ‘Nane Diospa katsa yalta azpiannash,’ kizta. ‘Nane Moisés îninta aizpa maiznash, mamaz tuntu uzanpa,’ kizta. Sun mîramakpas,” kizara. 15 Suasne înintuzkas sua wan uztuzkas Estebanta izara. Ussa izamtuasmin, uspane paiña naztam matsîhta izara. Ángel matsîhkanain iztît izara.
Estebane kwinta kinamîztu
1 Suasne katsa pariyane Estebanta ka mîmara: “¿Nawa uspa kaizara aizpa watcha ki?” mîmara. 2 Usne usparuza ka sînkanara: “Au aimpihshtuzkas au Israel awaruza îninmuruzkas nawa mîzhain. An ñamin au taitta Abrahamne Mesopotamia sura uzta. Abraham Harán sura uztachasmin, au chiyuras Diosne ussa izpan kit 3 kaizta: ‘Up sukas up kwalkas chîhkat kit mamaz sura na antu aizpa înka.’ 4 Suasne Abrahamne Caldea suras puz kit Harán sura uzna îrît. Paiña papihsh irawane, Diosne ussa an sukin ma u uzkin karara. 5 Usne apain chinkas su ussa mîlatchi. Mînta uzna mîlatchi. Diosne an su mîlanash kizta. Nu irîka, paiña painkultuzne an su sappanazi kizta. Sun payune Abrahamne painkul mîjchiazi. 6 Anpane sun urain Diosne ‘up kwal mamazpa sura mamaz awakanain uzanazi’ kaizta. Kiwainmumikakana cuatro cientos añokima kal kianazi. Katsa mikwaruzne usparuza ilnanazi, kal kianapa. 7 Diosne ussa an kaizta: ‘Nane uruza naiznintuza ilnat kit naizninanash. An suras puzarawane, uspane apain nawa kiwainat kit nawa paikuanazi,’ kizta. 8 Diosne Abrahamkasa sun kin nam kit ka îninta: ‘Nawa nîjkultuasmin, nune up aya tît kit circuncisión kitpa.’ Katmizna Isaac kawirawane, Abrahamne maza domingora paiña painkulpa ayara tît kit circuncisión kira. Sunkanain Isaacne Jacobta paiña painkulta kira. Jacobkas sunkanain paiña painkultuza kinara. Uspane au doce Israel pamparuz mai. 9 Au Jacobpa painkultuzne au pampawa irît kwal mai. Uspa Joséra aliz kulat kit izashitchi akwa, uspane ussa mamaz awaruza paininñara, Egipto sura mîlnapa. 10 Diosne ussa kiwain kit wan kwailtas puzninta. Joséne piankam kit Faraónpa izmumika namta. An katsa mikwane Egipto sukin îninta. Usne Joséra nara, Egipto surakas paiñain yaltakas îninnapa. 11 Suasne Egipto surakas Canaán surakas kumira wachi akwa, awane yak kiat kit naizara. Suane au ñamin papihshtuzne chi kumanamara. 12 Jacob chara pippa Egipto sura wa mîrawane, usne paiña painkultuza, au an ñancha kwal uzturuza, îninnara. 13 Uspa paakima îarawane, Joséne paiña aimpihshtuza ussain piankamninta. Sunkanain Faraónne, Egiptokin katsa mikwane, Joséwa kwal piankamta. 14 Suasne Joséne papihshtakas paiña kwaltakas kanapa îninnara. Paiña kwal setenta y cinco awa wiantît. 15 Sunkanain Jacobkas paiña kwalkas Egipto sura uzna îarît. Uskas au an ñancha kwalkas ta iarît. 16 An kwiztane uspa kwaltuzne uspa iarît kwaltuza Siquem pîpulura muat kit kamara. An ñancha Abrahamne sun awa irît kamkin Siquem su paira. Hamorne Abrahamta sunpawa muin sun su paininta. 17 An ñamin Diosne Abrahamta sun su mîlan namta, sun su sapnapa. Sun payu taiznapain pakane, Israel awane Egipto sukin an akkwan namara. 18 Suasne mamaz mikwane, Joséra pianchimikane, Egipto sukin îninmîzta. 19 An mikwane au kwalta kain kinat kit naizninnara. Usne au kwalta îninnara, uspa mamin kawira pashaparuza pianamal talaij înanapa, sua iarînpa. 20 An payune Moisésne kawira. An pashpane kwisha watsal azi. Paiña papihshtuzne uspa yalkin kutña mishkima kawirara. 21 Kutña mish pailtawane, uspane Moisésta yal pianamal talaij înpa îninta. Faraónpa, Egipto mikwawa pashune ussa chak kit paiña painkulkanain kawirara. 22 Katmizna uspane Moisésta Egipto awa pian aizpa kamtaninta. Usne kwisha tînta awa namta. Paramtune, usne watsal kaizta. Chiwazha kal kitne, usne watsal kira. 23 Cuarenta año kawirawane, Moisésne min kit paiña Israel kwalta kwinta kin îshira. 24 Suasne usne maza Egipto awa paiña kwalta kwail kimtu izta. Katmizna Moisésne paiña kwalta pakpana îra. Usne Egipto awara il kit piantara. 25 Usne us kit aizpa paiña Israel aimpihshtuz mîanazi minta. Uspane Dios Moisésta usparuza kiwainna narît pianchi. 26 Tîlawara Moisésne paas Israel awa waya kimtu iznat kit kiwainashira, waya kimanpa. Usne usparuza kaiznara: ‘Une aimpihshparain i. ¿Chikishma uwarain kwail kimtuas?’ 27 Suasne izmumikasha kwail kimtuatmikane Moisésta makin nuppain kit mîmara: ‘¿Mînma nua au îninmikakana namzi? ¿Mînma nua au mikwa namzi, au kwail kirît aizpa kiznapa? 28 Nune anchik Egipto awara piantara. ¿Nawakas piantashimtukish?’ 29 Sun mîrawane, Moisésne ishkwat kit Madián sura îra. Suane mamaz awakanain uz kit paas painkul kawirara. 30 Moisésne pul sukin, kashara Sinaí îzakin, uzta. Cuarenta año pailkane, maza ángelne ussa pu tîra ïn aiztukin izpanta. 31 Moisésne us izta aizpa iztasparît. Tîra an wat izna îtpane, Moisésne Anpat Dios kaizka mîra. 32 Ka kaizta: ‘Nane up kwalpa Dios ish. Abrahamkas Isaackas Jacobkas na iztakin wakpuj wainñat kit paikuara.’ Suasne Moisésne ishkwat kit ulmîzta. Sunta izshitchi. 33 Anpat Diosne ussa kaizta: ‘Up zapato ukti. Sun su mittî kultukinne ap su i. 34 Nane ap awa Egipto sukin kwisha naizamtu pianish. Nane uspa azamtu aizpa mînat kit chiyuras kihshtau, usparuza chîhtnana. Nawa mîzha. Nane nua Egipto sura îninnash,’ kizta.
¿Mînma nua îninmika namninchi? ¿Mînma au mikwa namninchi, au kwail kirît aizpa iznapa?
35 Israel awa Moisésta izashitchi kizarakas, Diosne Moisésta ángelpara pu tî ïn aiztukin kwinta kit kit uspa îninmikakas uspa chîhtmumikakas namta. 36 Moisésmin au kwaltuza Egipto suras ukkat mîlnara. Dios ussa kiwainta akwa, usne Egipto surakas kwanam pimarakas pul surakas cuarenta añokima iztasparît kal kiara, uspa Diosta piankamanapa. 37 Moisésmin Israel awara kaiznara: ‘Diosne maza îninmikasha paiña kwaltas îninnazi, na înintukana îninnapa. Ussa mîrain.’ 38 Israel awa pul sukin wanmakkamtuasmin, Moisésne uspakasa uz kit ángelkasa Sinaí îzara kwinta kira. Suasne usne sun Dios watsal pit mîra, aumîza sun pitmin kamtananapa. 39 Au an ñancha kwalne Dios kaizta aizpa mîashitchi. Ussa izashitchi akwa, uspane Egipto surain kaiyashira. 40 Suasne uspane Aarónta paikwat kit kaizara: ‘Nune mamaz dios sari, au iztakin an ñancha înpa. Moisés aumîza Egipto suras mîlnarakas, aune ussa chima kirît pianchimakpas.’ 41 Suasne uspane chiwazha wakara pashpakana iztît saara. Pishta saat kit wakara piantat kit wakara pashpakana kunkin chiwazha mîlaara, sunta wakpuj wainñanapa. Uspa sarît aizpa wari minñara. 42 Katmizna Diosne usparuza paimpa chîhkanara, chiyu kîmara wakpuj wainñanapa. Sunkana Dios kainammmikane pînkîhta ka parît: ‘Israel awa mîrain. Pul sukin cuarenta añokima uzasmin, une na akwa wakara piantarachi. Nawa chinkas mîlaarachi. 43 Sunkana nawa wakara mîlarachikas, une dios Molocpa yal ukasa muara, sunta wakpuj wainñanapa. Ukas dios Refánpa kîmakas muara, sunta wakpuj wainñanapa. Umin suntuz sat kit wakpuj wainñara. Katmizna nane u suras uknanash,’ Babilonia sura îninnanapa. 44 Au an ñancha kwalne pul sukin mamaz ainki Dios yal mîjara, awa Dios uztu piankamanapa. Diosne Moisésta îninta, paiña ainki yal sanapa. Usne ussa an ainki yalkana izninta. Sun Dios yal sarawane, 45 au kwalne sun Dios yal sappat kit uspakasa mîlaara. An kwiztane au sura kaiyamîztune, au kwalne Josuékasa sun ainki yal karaara, uspa su nappamtukin. Mamaz awa sun sura uzarakas, Diosne sun sukis usparuza attishta îninnara. Diosne usparuza sun suras îninnara, au kwal sun su sappanapa. Sun ainki Dios yalne sun sukin nukkulta, David uzta payukima. 46 Au katsa îninmika David nil uzta akwa, Diosne ussa wat pashira. Usne Diosta paikwara, Diospa yal sashimtu akwa. Sua Jacobpa Diosne uzshira. Sua Israel awaruzne au Diosta wakpuj wainñat kit paikuashira. 47 Kwiztane Salomónmin Dios yal sara. 48 Au katsa Diosne awa sara yalkin uztuchi. Dios pit kainammmikane Dios kaizta aizpa ka kaizta: 49 ‘Nane chiyuras na wan sara aizpa îninnamtus. An sune na sara aizpa ainki i.’ Anpatne ka mîmanara: ‘¿Chi yalma saanapas apane? ¿Mîntama kwaizkulna înpai? 50 Nain wan sashit aizpa sarau.’ 51 Une Dios kaizta aizpa nîjkulamtuchi. Une Diosta pianchiruzkana mai. Une Dios kaizta aizpa mîarachi. Une Dios Izpul kaizta aizpa mîashitchi. Une u an ña kwal uztakanain uzamtu. 52 U an ña kwalne wan Dios kainammtuza naizninñara. Mamaztuzne Dios nil kimtumika anazi kizara. Uspane sun kainammtuza piantaara. Mane me une sun wat kimtumikasha kwail kiat kit kwail awara chîhkat kit piantaara. 53 Diosne ángeltuza îninnara, Moisés paiña pit uruza kwinta kinpa. Une sun pit mîashitchi.”
Estebanne imtu
54 Sun mîarawane, uspane pilchapuzaat kit Estebanta aliz pit paraara. 55 Sînam Izpul ussa piztuasmin, Estebanne chiyura izak kit Diosta naztamkana iztît izta. Usne Jesús pana Dios îninmakin izta. 56 Suasne Estebanne ka kaizta: —Iztain. Nane chiyura kai iztus. Nane Dios Painkulta Diospa mamin înintukin iztus, kizta. 57 Uspane kail palpizat kit tînta kwiannat kit masain wan ussa pizshiara. 58 Pîpulukis ussa ukkat kit uk kiamîzta, piantana. Uk kiamtuzne, ussa kwail kirît kainammtuzne, uspa kamisha musittu panakin taara. An musittune Saulo mun. 59 Uspa ussa uk kiamîztuasmin, Estebanne Diosta paikwat kit kaizta: “Ap Anpat Jesús, ap izpul sapti.” 60 Kwiztane Estebanne wakpuj wain kit tînta ka kwianta: “Ap Anpat. Uspa kwail kiara aizpa sînam kwizninnari.” Sun kiztawane, ira.
1 Saulone ussa piantana nîjkulta. Saulone sun payuin Jerusalén pîpulukin wan Cristora piantuza kwisha naizninara. Sun aliz awaruz akwa, wan Cristora piantuzne Judea surakimakas Samaria surakimakas îara. Înintaruzpain suain nukkulara.
Saulone Diosta piantuza naizninnamtu
2 Mînpazha awane, Diosta piantuzne, Estebanta kamat kit us akwa kwisha azara. 3 Sun kiamtuasmin, Saulone Diosta piantuza pizshinat kit wan yalta napta, ampurakas ashamparakas tainana, kajchira sîpnana.
Felipene Dios watsal pit Samaria sura kainammtu
4 Jerusalén pîpulukis îmturuzne mînta îamtuara Dios pit kainaara. 5 Felipene, maza usparuztas, Samaria pîpulura ît kit Cristowa kwinta kinamîzta. 6 Awane wanmakkat kit Felipe kaizta aizpa kwisha wat minñara. Felipene iztasparît kal kira, awa Diospa wat piankamanapa. 7 Felipene kwisha akkwan awara saliz piztîttuza puzninnara. Saliztuzne usparuztas puzat kit kwian kit îara. Usne kaniya nastuzakas wat mittî chasachiruzakas kakulninnara. 8 Sun akwa sun pîpulukis awane kwisha wat kulara. 9 Simónne Samaria pîpulura uzta. Sua akkwan añokima Samaria suwara tañu kimîzta. Usne wan awaruza kain kinat kit ishkwinnat kit “nane anza tîntamika ish” kiznara. 10 Wan we tîntaruzkas wan awaruza înintuzkas ussa wat mîashit kit kaizara: “An ampune an tînta i. Usne Diospa katsa kiwainmumika i,” ñanta kizara. 11 Uspane ussa wat mîat kit kanpaara, akkwan añokima usparuza kain kinat kit tañu kimtu akwa. 12 Felipene usparuza Dios awaruza îninnashimtu kainanara. Jesucristo awaruza watsat mîlnashimtu kamtanamtuasmin, akkwanne Jesucristora nîjkulara. Dios watsal pit mîarawane, Felipene ampuruzakas ashamparuzakas munninnara. 13 Simón nîjkulish kiztawane, Felipene ussa munta. Suasne usne Felipera kanpamîzta. Felipe iztasparît kal kirît akwa, usne iztasparît. 14 Înintaruzne Jerusalén pîpulura purara. Uspane Samaria awa Dios kaizta aizpa mîarît piankamat kit Pedrorakas Juantakas ta îninñara. 15 Samaria pîpulura piannatpane, uspane Diosta paikuara, Diosta piantuz Sînam Izpulta sappanapa. 16 Mama Sînam Izpulne usparuza pizna atchi. Anpat Jesústa nîjkularît akwa, Felipene usparuza munninnara. 17 Suasne Pedrokas Juankas uspa chihtî usparuza panamtuasmin, Sînam Izpulne usparuza piznara. 18 Înintaruz usparuza chihtî paanamtuasmin, Simónne Sînam Izpul usparuza piznamtu izta. Usne pial mîlashit kit usparuza 19 ka kaiznara: —Nawakas an iztasparît kal kin kiwaincha, na chihtî paaka, Sînam Izpul awaruza piznapa, kizta. 20 Suasne Pedrone ussa kaizta: —Up pialkas nukas parejuin karînazi. Nune Dios mîlamtu aizpa pialkasa painash nil chi mintu. 21 Nune Diosta pianchi. Aukasa sun kal kisachi. Diosne nu kaijchukin nu kwail mintu aizpa pian. Nu kishimtu aizpa nil chi. 22 Katmizna nune nu kwail kishimtu aizpa maiz kit chîhkari. Diosta paikwatpa, nu kwail mintu aizpa kaijchura wat kulnapa. 23 Nane nu kwail kishimtu aizpa pianish. Pial kana kishimtu akwa, nune ñan miwara îshimtu. 24 Suasne Simónne ka sînkara: —Anpat Jesústa na akwa paikwarain, nu kaizta aizpa, sun nawa kimanpa. 25 Awaruza Jesúspa kainanarawane, Dios pit kaiznarawane, Pedrokas Juankas Dios watsal pit akkwan Samariawa pîpulurakas kainana îilta. Suasne Jerusalén pîpulura kailpailta.
Felipekas etíope ampukas
26 Sun kitpane, Anpatpa ángelne Felipera ka kaizta: “Kuhs kit îmîzti. Jerusalén pîpuluras Gaza pîpulura miwara îtpa.” An mine pul sura pînmu. 27 Felipene kuhs kit ît kit miwara etíope ampura wanmalta. An katsa îninmikane Candace Etiopía suras ashampa mikwara kiwainta, uspa pial watsanpa. Usne Jerusalén pîpulura îra, Diosta wakpuj wain kit paikwan. 28 An ampune paiña sura kailtîmtuara. Paiña carro caballo îmtuasmin, usne Isaías pînkîh parît aizpa iztuara. 29 Suasne Sînam Izpulne Felipera kaizta: “Carro caballora kashara ît kit wanmakti,” kizta. 30 Kashara ît kit Felipne us Isaías pînkîh iztu mîra. Ussa mîmara: —¿Nu iztu aizpa mîmtukish? 31 Ampune ussa kaizta: —¿Mizama mînapai? Mînminkas nawa kainarachi. Usne Felipera paikwara, uskasa carrora nut kit uznapa. 32 Usne Dios pit ka iztu ara: “Uspane ussa pîrikukana mîlta, piantana. Usne pîriku pashpakana i. Pîriku ash tîtmumika ash tîttane, usne aztachi. Uskas puñain ara. 33 Us kwail kitchikas, uspane ussa nil aizpa kiarachi. Mînainkas ussa kiwainarachi. Mînainkas paiña kwalpa paramanazi. Paiña kwalne ussa piantaara, an sukin uzmanpa.” 34 Îninmikane Felipera mîmara: —Kainazha. An kainammmikane ¿Mînpama paramtus? ¿Uspa paramtuki? ¿Mamazpa paramtuki? 35 Suasne Felipene sunmin Dios pînkîh iztukin Dios watsal pit, Jesúspa pit, kamtamîzta. 36 Îmtuwaiyasmin, uspane kwazi wakin piannailta. Îninmumikane ussa kaizta: —Apane kwazi wai. ¿Nawa munnasachimakish? 37 (Felipene ka kaizta: —Nu Jesucristora up kaijchukin nîjkultane, kishina. Usne sînkara: —Nane Jesucristo Dios painkul i nîjkultus, kizta.) 38 Suasne îninmumikane carro caballo uzninnapa îninta. Paasas pira kihshtawane, Felipene ussa munnara. 39 Uspa kwaziras salaktawane, Anpatpa Izpulne masain Felipera mîlta. Îninmikane ussa anne me iztachi. Usne wat kul kit paiña miwara îra. 40 Felipene Azoto pîpulura tuat kit wan pîpulukin Dios watsal pit kainanara, Cesarea pîpulura piannankima.
Saulone Jesústa pianmika namtu
1 Sun urain Saulone “Anpatpa piantuza piantananash” tînta kainanamîzta. Katmizna usne katsa pariyara ît kit pînkîh paikwara, ussa Israel kammu yalta îninnannapa. 2 Sun pînkîhkasa Damasco pîpulura îshimtu ara, Dios miwara îmtuza piznana. Usne ampuruzakas ashamparuzakas Jerusalén pîpulura mîlshinara, usparuza sîpnana. 3 Kasha Damasco pîpulura miwara pianamtuasmin, masain Saulone chiwazha naztam chiyuras taiztîmtu izta. 4 Suasne Saulone pilta nainta. Mazane chiyuras ussa parat kit kaizta: “Saulo. Saulo. ¿Chikishma nawa naiznintus?” 5 Suasne Saulone mîmara: “Anpat ¿Mîn mas?” kizta. Usne sînkara: “Nane Jesús ish. Nu nawa piantuza piantamtu akwa, nune nawa naiznintu,” kizta. 6 Suasne Saulone ul kit ishwat kit sînkara: “Ap Anpat. ¿Chima kishiras, na kinpa?” kizta. Anpatne ussa sînkara: “Kuhs kit pîpulura napnaka. Suasne nane nua nu kishimtu aizpa kaiznash.” 7 Saulokasa îmtuzne ishkuara. Sun pitta mîarakas, uspane mînainkas izarachi. 8 Kwiztane Saulone piltas kuhsakta. Kasu izkultakas, izsachiwal. Îmturuzne paiña chihtîra pizat kit Damasco pîpulura tain îara. 9 Suane kutña payukima izmanamtît tuara. Kumira kwatchiwal. Kwazikas kwatchiwal. 10 Dios pit pianmikane, Ananías muntîtmikane, Damasco pîpulura uzta. Anpatne ussa kainkizpamnin kit ussa kaizta: “Ananías,” kizta. Usne ka sînkara: “Anpat. Nane akki tus,” kizta. 11 Suasne Anpatne ussa kaizta: “Kuhsak kit ‘Nil’ muntît miwara îmîzti. Judaspa yalta piannakane, Tarso suras awara, Saulo muntîtmikasha, mîmanaka. 12 Usne Diosta paikwat kit chiwazha kainkizpam izta. Kainkizpamtuasmin, Ananíasne sun yalta nap kit paiña chihtîkasa ussa paara, mamasa iznapa. Sunkana kainkizpamtu.” 13 Sun mîrawane, Ananíasne kaizta: “Anpat. Akkwanne nawa sun ampuwa kwinta kiara. Usne Jerusalén pîpulukin Jesústa piantuza akkwan kwail kinarît. 14 Mane akki amtui. Katsa pariyaruzne ussa pînkîhkasa îninta, Jesústa paikumturuza kajchira sîpnana.” 15 Anpatne sînkara: “Ît. Nane an ampura narau, nawa mamaz su uztuzakas uspa îninturuzakas Israel awaruzakas parananapa. 16 Nawa kanpashimtu akwa, usne naiznazi. Nane ussa sun naizmu annash.” 17 Suasne Ananíasne Saulo tura îra. Naptawane, usne paiña chihtîkasa ussa pat kit kaizta: —Aña Saulo. Nu miwara amtuasmin, Anpat Jesúsne, nua miwara izpamtamikane, nawa îninta, nu mamasa iznapa, Dios Izpul nua piznapa. 18 Sun urain chiwazha piachal iztîtkana kasuras taizakane, mamasa izta. Suasne Saulone kuhs kit munarît azi. 19 Kwiztane kwat kit mamasa tînta kulta. Usne akkwan payuchikima Diosta piantuzkasa Damasco pîpulura nukkulta.
Saulone Damasco pîpulura kamtanamtu
20 Kwiztane Saulone Israel kammu yalta kamtanamîz kit “Jesúsne Dios painkul i” kiznara. 21 Wanne us kaizta aizpa iztaspaat kit kaizara: —An ampune Jerusalén pîpulura Jesústa paikumtuza pizshinamtu. Usne, piznammikane, apain ara, Jesústa piantuza katsa pariyaruza mîlnana, usparuza sîppnana. 22 Saulone an tînta kainanamîzta, “Jesús Dios înintamika i” kiz kit. Paiña kamtît akwa, ussa Judío awa Damasco pîpulukin uztuza annuppanarît. Uspane Saulora sînkaarachi.
Saulone pizamasara
23 An imparane, Judío awaruzne nîjkulara, Saulora piantaana. 24 Mînpazha uspa minñamtu aizpa piankam kit Saulora kaizta. Uspane sun Damasco pîpulu katsa kalpialkin, pîjta puzmukin, purara. Uspane, aliztuzne, payuwarakas amtawarakas pîpulu pîjta puzmukin izat kit tîrizara, ussa piantaana. 25 Tîlpamîzkane, Dios pit piantuzne ussa katsa tîmta win kit katsa uk kalpialtas inkihshara. Sunkana pizamasara.
Saulone Jerusalén pîpulura îmtu
26 Jerusalén pîpulura piannatpane, Saulone Cristora nîjkulturuza wanmaknashira. Wanne ussa ishkuara. Uspane us Dios pit pianchimika minñara. 27 Suasne Bernabéne ussa kiwain kit înintaruza mîlnara. Usne Saulo Damasco miwara Anpatta izta aizpa kainara. Anpat ussa kwinta kira aizpa kainara. Damasco pîpulukin nukkultuasmin, usne sun awaruza Jesúspa kwinta kinara, ishkwatchin. Sunkana kainanara. 28 Suasne Saulone uspakasa nukkul kit Jerusalén pîpulura uspakasa chaara. Usne usparuza Anpatpa kwinta kinara. 29 Jesúspa kamtamtuasmin, mînminkas ussa kunkitchi. Usne ishkwatchi. Mazantuzne, Judío awaruzne, Griego pit paraara. Uspane tînta kwinta kiat kit ussa mîmaara. Uspane ussa piantashiara. 30 Sun piankamarawane, Diosta piantuzne Saulora Cesarea pîpulura miarît. Tas ussa Tarso pîpulura îninñara. 31 Suasne wanmakmuruzne Judea suraskas Galilea suraskas Samaria suraskas kalpain uzat kit Dios pit an kamamîz kit an tînta namara. Uspane Anpat kuruntu aizpa kishiara. Sînam Izpul usparuza kiwainara akwa, an akkwan awane Diosta piankamara.
Eneasne wat parît
32 Diosta piantuza iznamtuasmin, Pedrone Jesústa piantuza, Lida pîpulura uztuza, iznana îra. 33 Suane Pedrone Eneas munmikasha wanmalta. An chasachimkane ocho añokima kamarain tuara. 34 Pedrone kaizta: —Eneas. Jesucristone nua kakultanazi. Kuhsti. Up kama watsari, kizta. 35 Eneasne masain kuhsakta. Lida pîpulukin uztuzkas Sarón sukin uztuzkas ussa izara. Uspane an ñamin nîjkulara aizpa chîhkaat kit Anpatta nîjkulara.
Dorcasne irîttas kakul kit kuhstu
36 Mane Tapitane Dios pit piankam kit Jope pîpulura uzta. (Usne Griego pitta Dorcas muntît.) An ashampane pailta payu wat kinat kit we mîjtuza kiwainara. 37 Maza payune usne imtu kit kit irît. Îlaparuz aumîza kamtît akwa, aune irîtta sînam pinat kit ussa kwash pitmumal taara. 38 Jope pîpulune Lida pîpulura kasha uzara. Pedro Lida pîpulura uztuasmin, Dios pit piantuzne paas ampura Lida pîpulura îninnara, Pedrora ka paikwanpa, Jope pîpulura azain anpa. 39 Suasne Pedrone uspakasa îra. Piannaakane, uspane ussa irît tura anna îara. Wan ampu irît ashamparuzne ussa salpîn kunara. Azamtuasmin, uspane ussa kwakshamkas kamishakas anara. Ka uzasmin, Dorcasne pïn sîp kit usparuza mîlanara. 40 Suasne, Pedrone wanta puzninnat kit wakpuj wain kit Diosta paikwara. Irît ashampara iz kit ka kizta: —Tabita, kakulti. Suasne usne kasu izkulkwera. Pedrora iz kit kuhsak kit uzta. 41 Usne paiña chihtî piz kit kuhsninta. Kwiztane usne Diosta piantuzakas ampu irît ashamparuzakas akwanara, ussa izanapa. 42 Jope pîpulukin kwisha akkwan awane Jope pîpulukin sun piankamara. Sun akwa, akkwan awane Anpatta nîjkulara. 43 Pedrone an akkwan payura Jope pîpulura Simónpa yalta mara. Usne aya suintam sammika ara.
Pedrokas Corneliokas
1 Cornelione Cesarea pîpulura uzta. An suldarura îninmikane maza cien suldaruruza Italia suras îninnara. 2 An wat awane paiña kwalkasa Diosta wakpuj wainñat kit Diosta paikwashira. Usne akkwan pial Judío wenamturuza mîlanat kit Diosta pailta payu paikwara. 3 Maza payu nashka, kutña urara, chiwazha kainkizpara. Usne maza Diospa ángel us tukin napka izta. Ángelne ussa ka kaizta: “Cornelio,” kizta. 4 Cornelione ángelta iztaspat kit ishkwat kit mîmara: “¿Anpat, chima pashimtus?” Suasne ángelne ussa ka kaizta: “Diosne nu paikwat aizpa mîra. Usne, chiyura uzmikane, nu wenamturuza mîlanara aizpa piankam kit maintachi. 5 Maza awara Jope pîpulura îninnaka, Simónta akwanpa, up yalta karanpa. Pedrokas muntît. 6 Mamaz Simónne, aya suintam sammikane, paiña yal pimara mîj. Pedrone uskasa uztu. Usne nu kishimtu aizpa kaiznazi.” 7 Ángel kwinta kit kit kailtawane, Cornelione paas kiwainmuruzakas maza suldarura Diosta pianmikashakas, akwanara. 8 Us usparuza wan kwinta kinarawane, usne Jope pîpulura îninnara. 9 Tîlawara uspa miwara kashara Jope pîpulura îamtuasmin, Pedrone payu aizpa yal îsalmal nura, Diosta paikwan. 10 Yak kit kit kwashira. Paiña kumira ainamtuasmin, kainkizpamtuasmin, usne chiwazha izta. 11 Chiyura kai maltuasmin, Pedrone katsa pïn iztîtkana izta. Anne chiyuras piltakima katsa pïnkana taizta. 12 Sun katsa pïn iptîtkin, akkwan ampara mittî waj kalpakas kamtakas chitchukas waara. 13 Suasne Diosne ussa kaizta: “Pedro. Kuhsak kit piantat kit kwat,” kizta. 14 Pedrone sînkara: “Anpat, nane kumanash. Nane mizurainkas Dios chiwazha kwanchi kizta aizpa kwatchish.” 15 Suasne Diosne mamasa parat kit ka kaizta: “Nune chiwazha Dios sînam sarît aizpa kwashina. Dios sarît aizpa kwasachish kizmun,” kizta. 16 Sun pïn kutñakima taiztawane, katsa pïnne chiyurain kailta. 17 Pedro Dios ussa kamtashimtu aizpa mintuasmin, Corneliowa înintuzne pîjtakin aat kit Simónpa yal mînta tui kiz mîmaara. 18 Pianaarawane, uspane mînpazhara ka mîmaara: “Simóne, Pedro munmikane, ¿Mîntama tu? ¿Nune ussa yal nammîlamtukish?” 19 Pedro kainkizpamtu aizpa mama mintuasmin, Sînam Izpulne ussa kaizta: “Mîri. Kutña awa nua sayamtu. 20 Kuhs kit kihsh kit uspakasa kuntachin kanpanari. Nane usparuza îninnarau.” 21 Suasne Pedrone Corneliowa înintuz purakin kihsh kit kaiznara: —Nane, u sayamtumikasha ish. ¿Chinmaka awiznash? 22 Uspane ka sînkaara: —Aune Cornelio cien suldaru îninmika akwa awiznash. Usne wat awa i. Usne Diosta wakpuj wain kit paikumtu. Wan Judío awane ussa wat minñat kit pashiamtu. Diospa ángelne ussa ka kizta: “Pedrora înin kit akwatpa, paiña yalta înpa. Us kaizta aizpa mîrawa,” kizta. 23 Suasne Pedrone usparuza napninnat kit an amta yal nammîlanara. Tîlawarane Pedrone uspakasa îra. Mînpazha Jope pîpuluras Diosta piantuzkas ussa kanpaara. 24 Mamaz payurane Cesarea pîpulura nappaara. Pedrora tîriztuasmin, Cornelione paiña kwaltakas paiña izmuruzkas akwanara. 25 Pedro yalta putnatpane, Cornelione puz kit “wat kîntîre” kiz kit ussa wakpuj wainta, Dios ussa înintît akwa. 26 Pedrone ussa kuhsaknin kit kaizta: —Kunti. Nawa wakpuj wainkain. Nane nukana ampu ish. 27 Uskasa paramtuasmin, Pedrone nap kit kwisha akkwan awa wanmakkarîttuza iznara. 28 Suasne Pedrone kaiznara: —U na kaiztu aizpa pian. Judío awane Judío chi awaruzkasa wanmakkasachi. Uspa yalta nappasachi. Une sun Moisés îninta aizpa pian. Mane Diosne Judío chi awaruzkasa wanmakna impachi kamtash. Dios wan awaruza sapkane, aukas usparuza saptawamakpas. 29 Katmizna nu nawa akukane, masain chinkas kiztachi arau. Nane piankamshimtus: ¿Chikishma nawa akupuspas? 30 Suasne Cornelione sînkara: —Ampara payuin nane sun urara ap yaltain uz kit kumira kwatchish. Kutña urarain Diosta paikwarau. Suane maza ampune naztam pïn kwarît nawa izpanzi ish. 31 Nawa kaizish: “Cornelio. Diosne nu paikumtu aizpa mîra. Usne nu we mîjtuza kiwainnamtu nîjkulta. 32 Mazara Jope pîpulura îninti, Simónta kanapa. Usne Pedrokas muntît. Usne mamaz Simónpa yalta tu. Sun suintam aya sammikane pimakin uz. Pianakane, usne nukasa paranazi.” 33 Sunkana mamin înintau, nua saina. Nu wat kirît an. Mane Diosne aukasa uz. Anpat nua înintu akwa, aune wan Anpat aumîza kaizta aizpa mîshipuspas.
Pedrone Corneliowa kwalta kwinta kin namtu
34 Suasne Pedrone kwinta kit kit kaiznara: —Mane watcha nane Dios wan awara kawarain kinanapa mîmtus. 35 Diosne wan suras awaruzakas Diosta mîmtuzakas nil kimtuzakas kiwainat kit sapnanazi. 36 Diosne sun pit Israel awawa kwaltuza paranara. Usne watsal pit kainanara, awa Jesucristo akwa Dioskasa kalpain uzanapa. An Anpatne wanta îninashimtu. 37 Une wan Judea sura chiwazha kirît aizpa wat pian. Juanne, munnamtumikane, sun pit awara kainanara. Usne sun pit Galilea sura kainanamîz kit munana kainnanara. 38 Une Dios Jesústa, Nasaret pîpuluras atmikara, narît pian. Usne paiña Sînam Izpulta îninta, ussa kiwainnapa. An sukin uztuasmin, usne awaruza wat kinat kit ishturuza kakulninnat kit Satanás akwa naizturuza kakulninnara. Dios uskasa chamtu akwa, usne sun kirît. 39 Aune wan Jesús kit aizpa Judea surakas Jerusalén pîpulurakas iztamakpas. Kwiztane uspane ussa kurish tîra patpian kit piantaara. 40 Kutña payu pailtawane, Diosne ussa irîttas kakulat kit aumîza izpaninta. 41 Wan awaruza izpannintachi. Aumîzain izpaninta. Diosne aumîza ñamin nanarît, us kirît aizpa iznapa, sunpa mamaztuza kainanapa. Us irîttas kakultawane, uskasa kwatmakpas. 42 Usne aumîza îninnara, awara Dios pit kainanapa. Diosne Jesústain katsa mikwakana namnintît, wan awaruza, irîttuzakas uztuzakas, îninnanapa. Sun pit awaruza kainanaramakpas. 43 An ñancha Diospa kainammtuzne Jesúspa kwinta kiara. Awa Jesústa nîjkularane, Diosne uspa kwail kiarît aizpa wat kulninnanazi, kizara.
Sînam Izpulne Judío awachiruzakas piznamtu
44 Mama Pedro kwinta kimtuasmin, Sînam Izpulne wan paiña pit mîraruza piznara. 45 Judío awane, Dios pit nîjkulturuzne, Pedrokasa aarîttuzne, iztaspaarît, Sînam Izpul Judío awachiruza piznarît akwa. 46 Katmizna Judío awachiruzne mamaz pit parat kit “Dios kwisha wari” kizara. Judío awaruzne sun mîara. 47 Suasne Pedrone kaiznara: —Aune sun awaruza munnashinamakpas, Sînam Izpul usparuza aumîzakanain piznara akwa. 48 Usne usparuza munnanapa îninnara, Jesústa nîjkularît akwa. Kwiztane Pedrora paikuaara, uspakasa akkwan payuchikimain tuanpa.
Pedrone us kirît aizpa kwinta kinara
1 Înintaruzkas Judea suras Jesústa piantuzkas Judío awachiruzpa mîara. Uspane Dios pit piankamat kit Jesústa nîjkulara. 2 Pedro Jerusalén pîpulura nut kit kailtawane, Judío Jesústa nîjkulturuzne Pedrora tînta aliz kulat kit 3 ka mîmaara: —¿Chitmaka Judío awachiruza ît kit iznat kit uspakasa kwara? 4 Suasne Pedrone usparuza wan chiwazha kirît aizpa kamtanat kit kaiznara: 5 —Nane Jope pîpulura tuarau. Diosta paikumtuasmin, chiwazha iztau. Nane katsa pïnkana chiyuras kihshtu iztau. Ampara pïn punta iptît. Na tukin kihshmîzta. 6 Chi wa aizpa iztuasmin, nane ampara mittî waj kalpakas ishukas kamtakas chitchukas iztau. 7 Diosne nawa kaizzi ish: “Pedro kuhsti. Piantat kit kwat.” 8 Pedrone sînkara: “Anpat. Kumanash. Mizurainkas Dios chiwazha kuanchi kiztu aizpa kwattarakish.” 9 Suasne Diosne chiyuras mamasa kwinta kit kit kaizzi ish: “Nune chiwazha Dios sara aizpa kwashina. Dios sarît aizpa kwasachish, kizmun.” 10 Sun kutñakima iztawane, wanne chiyumarain nuara. 11 Sun urain kutña ampune Cesarea pîpuluras na tu yalkin pianazi. Uspane nawa sayara. 12 Sînam Izpulne uspakasa îninzi ish, kunkitchiwal. An seis Diosta piantuzkas nakasa îara. Wanne awawa yalkin nappanash. 13 Usne maza ángelta izta aumîza kainara. Usne paiña yalta kun kit kaizta: “Awara Jope pîpulura îninti, Simónta akwan. Usne Pedrokas muntît. 14 Usne Dios pit nua kaiznazi, Dios nuakas up yalkin uztuzakas watsat mîlnanapa.” 15 Na usparuza kaiztuasmin, Sînam Izpulne usparuza piznara, aumîza an ñancha piztakanain. 16 Suasne Anpat kaizta aizpa ka nîjkultau: “Watcha Juanne kwazikasa munnanara. Kawarain Sînam Izpulne uruza piznanazi.” 17 Diosne paiña Sînam Izpulta au Anpat Jesucristora piankamturuza mîlanara. Kawarain Diosne paiña Izpulta an awaruza mîlanashira, uspakas Jesústa nîjkulara akwa. Nane “Dios kishimtu aizpa kwail i” kizmanash. 18 Suasne Jesústa piantuz Jerusalén pîpulukin sun pit mîarawane, puñain paat kit Diosta kwisha wari kizat kit kaizara: —Sunkana Diosne Judío awachiruzakas kiwainamtu, kwail kiarît aizpa maizanapa, Diosta kanpanapa, chiyura uzanapa.
Antioquía pîpulura wanmakkamtu
19 Esteban irawane, mînpazha Jesústa nîjkulturuzne Fenicia surakas Chipre surakas Antioquía pîpulurakas îat kit naizmasara. Suane Dios watsal pit Judío awarain kainanara. Mamaz awara kainanarachi. 20 Mînpazha Jesústa nîjkulturuzne Chipre suraskas Cirene suraskas Antioquía pîpulura piannat kit Judío awachiruzakas Dios watsal pit au Anpat Jesúspa kwinta kinara. 21 Dios usparuza kwisha kiwainnara akwa, akkwanne antikwa pit kamtît aizpa chîhkaat kit Jesústa nîjkulamîzta. 22 Jerusalén pîpulura wanmakmuruz sun pit mîarawane, uspane Bernabéra îninñara Antioquía pîpulurakima. 23 Pianatpane, Bernabéne Dios usparuza wat kiwainarît nîjkul kit kwisha wat kulta. Usne wanta kurunnara, nil uzanapa, Anpatta kwaiyamanpa. 24 Bernabéne wat awa azi. Sînam Izpulne ussa pizta. Diosta wat nîjkulta. Sunkana akkwan awane Jesústa piankamara. 25 Suasne Bernabéne Tarso pîpulura îra, Saulora saina. Ussa wanmaltawane, Antioquíara mîlta. 26 Uspane maza año kapal Cristora piantuzpa wanmakmukin tuat kit kwisha akkwan awara kamtanara. An ñancha Antioquía pîpulukin, awane Jesústa piantuza, Cristora kanpamtuz munnara. 27 Sun payune mînpazha Dios pit kainammtuzne Jerusalén pîpulukis Antioquía pîpulura aara. 28 Mazane, Agabo muntîtmikane, Jesústa pianmikane, awa paizkakin kun kit Izpul ussa piankamninta aizpa kainanara. “Wan sura kumira pailnazi” kiznara. Claudio katsa mikwa înintuasmin, us kaizta aizpa kirît. 29 Suasne Antioquía pîpuluras Jesústa piantuzne pial wantaamîzta, Judea sura uztuza îninna, Jesústa piantuza kiwainanapa. Wanne uspa mîj aizpakima mîlaara. 30 Sunkana kiarawane, uspane sun pial Bernabékasa Saulokasa îninñara, Judío îlapa înintuza mîlanapa.
Santiagone imtu. Pedrora sîppamtu
1 Sun payune Herodesne, katsa mikwane, Jesústa piantuza piznamîzta, usparuza naizninnanapa. 2 Usne Santiagora, Juanpa aimpihshta, iru kwizkasa piantaninara. Pan kiñakasa kukain pishta taiznapain paka, usne sun kirît. 3 Sun kitpane, Judío awane wat kularît. Suasne Herodesne Pedrorakas pizna îninta. 4 Pedrora piztawane, ussa kajchira sîpninta. Ampara suldarune sulmin ussa izamtu pura. Kwiztakas an amparane kutña pijikima, ussa izamtu pura. Pascua pailka, usne ussa chîhtnash minta, awa ussa piantanapa. 5 Sunkana Pedro sam kuhtît kajchira tuasmin, Diosta piantuzne, wanmakmuruzne, Diosta tînta paikuamîzta.
Ángelne Pedrora kajchiras chîhttu
6 Herodes ussa chîhtachasmin, sun amtain Pedrone paas suldaruwa paizkakin pittît tuara. Pamals chihtî kuhtît tuara. Mamaz suldaruruzne kajchi sîpmu pîjtakin izamtu pura. 7 Masain maza Anpatpa ángel izpamtuasmin, kajchira kai malta. Usne Pedrora chihtîkin paat kit izkultat kit kaizta: “¡Kuhsakti azain!” Suasne iru cadenane Pedrowa chihtîkis chîhkulta. 8 Ángelne ussa kaizta: “Pïn mîlti. Mittî nukmu kuhti,” kizta. Pedro sun kuhtuasmin, ángelne ussa kaizta: “Up kwaksham kwat kit nawa kanpazha.” 9 Pedrone ángelpa kwizpa kajchiras puzta. Usne ángel kit aizpa wat pianchi. Chiwazha iztus minta. 10 Uspane paas izmuruzkimin pînpailta. Iru pîjtakin pianamal piannailkane, pîjtane kain chîhkularît, puzpailna. Pîpulu miwara îkane, ángelne usain mazantain panaij îra. 11 Suasne Pedrone nîjkul kit usmin kaizta: “Nane nawa kit aizpa watcha nîjkulish. Anpatne paiña ángelta îninta, nawa chîhtnapa, Herodeskas Judío awakas nawa kishiamtu aizpa kiamampa.” 12 Sun mintuasmin, Pedrone Maríawa yalta îra. Sun ashampane Juanpa akkuhsh ara. Juanne Marcoskas muntît. Sun yalkin kwisha akkwanne wanmakkara, Diosta paikwan. 13 Pedro pianamal pîjtakin piannapkane, maza ashampa pashpane, Rode muntîtmikane, mîntakas izna puzta. 14 Pedrowa pit nîjkul kit mîrawane, usne pîjta chîhtachi. Wat kul kit ãïnmin ayukmal naptît, Pedro pîjtakin panamtu kizna. 15 Suasne uspane ussa kaizamîzta: —Pîrail, kizara. Usne watcha kiznamîzta. Ussa mîarachi akwa, uspane kaizara: —Us chi. Paiña izpulmin izta. 16 Sun kwinta kimtuasmin, Pedrone pîjtakin piannapmîzta. Pîjta chîhtawane, uspane ussa izat kit ishkuara. 17 Usne chihtîkasa annara, puñain paarînpa. Usne Anpat ussa kajchiras chîhtît kainanat kit kaiznara: —Sunta Santiagorakas Diosta piantuzakas kainarain, kiznara. Suasne yaltas puz kit mamaz sumal îrît. 18 Kînkane, suldaruruzne ishkuat kit chi kirît pianchi. Uspane usparuzpain Pedrowa tînta kwinta kiamîzta, mînta Pedro îrît pianchi akwa. 19 Herodesne înninara, ussa saina. Saimanamarîkane, sun suldaruruza mîmanara. Suasne Herodesne suldaruruza piantanapa îninta. Kwiztane Herodesne Judea sukis puz kit Cesarea pîpulura uzna îra.
Herodesne imtu
20 Herodesne Tiro pîpulukin uztuzkasa Sidón pîpulu uztuzkasa aliz kulnarît. Maza mazain usparuzpain nîjkulat kit Blastora kwinta kin îara, usparuza kwainanapa. Blastone Herodespa kiwainmika azi. Blasto akwa uspane Herodeskasa waya kimanpa paikuara, kalpain uzanapa. Herodespa sukin kumira wa akwa, uspane sun sukin kumira paina îara. 21 Herodesne narît payura watsal pïn kwat kit kwash îninmikawa uzmukin uz kit usparuza watsal pit kwinta kinara. 22 Suasne wanmakmuruzne kwianamîzta: “Sun parammikane ampukanachi. Usne dioskana paramtui,” kizara. 23 Sun urain Anpatpa ángelne ussa imtu kininta, Herodes “Dios wari” kiztachi akwa. Suasne puil ussa kwat kit ira. 24 Sun payuin akkwan awane pailta sura Dios pit piankamamîzta. 25 Înintaruza pial chîhkarawane, Bernabékas Saulokas Jerusaléntas kailpail kit Juanta, Marcos muntîtmikasha mîlpailta.
Bernabékas Saulokas uspa kal kin mazamîztu
1 Mane Dios pit kainammtuzkas kamtamtuzkas Jesústa piantuzkasa Antioquía pîpulura wanmakkara. Bernabékas tuara. Simónkas, tîlapat muntîtmikakas, tuara. Luciokas Cirene suras tuara. Manaénkas, Herodeskasa Galilea sura kawiatmikakas, tuara. Saulokas tuara. 2 Anpat iztakin wanmakkat kit paikuamtuasmin, maza payura kumira kuarachi. Suasne Sînam Izpulne kaiznara: “Bernabérakas Saulorakas paimpa înintain, na îninta aizpa kal kianapa,” kiznara. 3 Suasne Diosta paikuarawane, kumira kuarawane, wanmakmuruzne usparuza chihtî panat kit “watmin îilnaka” kizara.
Înintaruzne Chipre sura Dios Pit kainaamtu
4 Kwiztane Sînam Izpul usparuza înintawane, Bernabékas Saulokas Seleucia pîpulura îilta. Tas katsa kanuara waat kit Chipre pi paizka sura îilta. 5 Salamina pîpulura pianailtawane, uspane Judío kammu yalta Dios pit kamtanamîzta. Juankas usparuza kiwaina îra. 6 Wan pi paizka sukin îiltawane, Pafos pîpulura piannailta. Sua uspane maza Judío awara wanmakpailta. Usne Barjesús munta. Usne tañu kinammika azi. Nane Diospa kainammika ish kiztakas, pîrail kaizta. 7 An tañu kimikane, Sergio Paulokasa, sun sukin mikwakasa tuazi. An mikwane wat minta. Mikwane Bernabérakas Saulorakas akwanpa îninta, Dios pit mîshimtu akwa. 8 Elimasne, tañu kim muntîtmikane, tuara. Usne usparuzkasa nîjkultachi. Usne uspa kaizta aizpa kancha kainara, Sergio Paulo înintuz kaizta aizpa mîmanpa. 9 Saulone Pablokas muntît. Suasne Sînam Izpul ussa piztuasmin, Pablone Elimasta tînta iz 10 kit kaizta: —Nune Diablowa kwalkana i. Nune wattuza aliz i. Nune kwisha akkwan kwail kishimtu. Nune Anpat kamtara aizpa maizshira, us kaiztu aizpa pîrail i kiznapa. Sun kimun. 11 Mane Anpatne nua ilnazi. Akkwan payukima izmananazi, pa izmanpa, kizta. Sun urain paiña kasu izsachi parît. Usne kai izmanamta. Usne mamazta saira, paiña chihtîra tain înpa, izsachi akwa. 12 Mikwa sun kit aizpa izkane, usne Diosta nîjkulta. Usne Anpatpa kamtampa iztasparît.
Pablokas Bernabékas Pisidia sura îilta
13 Pablokas paiña izmuruzkas Pafos sukis îat kit kanuara waat kit Panþlia sura îara, Perge pîpulurakima. Juanne usparuztas tîwij înat kit Jerusalén pîpulura kailta. 14 Kwiztane uspane Pergekis Pisidia sura pînara, mamaz Antioquía pîpulurakima. Suane uspane kwaizkulmu payura Judío kammu yalta nap kit uzpailta. 15 Suasne Moisés parît aizpakas Diospa kainammmika parît aizpakas izarawane, kammu yalpa îninmikane mazara ka kaiznapa îninta: —Aimpihshtuz, mîrain. Chiwazha pit awaruza kurunnamtune, ma pararain. 16 Suasne Pablone kun kit chihtîkasa anak kit puñain paikwat kit kaiznara: “Israel awa mîrain. Israel awachiruzkas Diosta piantuzkas nawa mîzhain. 17 Israel kwaltuzne Diosta wakpuj wainñara. An Diosne au Israel kwaltuza nanara, akkwan usparuza kawinana. Egipto sura mamaz awakana uzasmin, kwiztane usne usparuza tînta kiwainara, an sukis îanapa. 18 Usne usparuza pul sura kiwainat kit usparuza cuarenta añokima tailchanara. 19 Usne wan Canaán sura uztuza piantaninnara, au an ñancha kwal uspa su sappanapa. 20 Ampara cien año cincuenta añokasa pailtawane, uspane sun su sappara. Kwiztane Diosne înintuza îninnara, Israel awaruza îninnanapa, Samuel, Diospa kainammmika amtu payukima. 21 Suasne uspane an katsa mikwara Diosta paikuara, usparuzpain îninnanapa. Suas Diosne Saúlta nara, usparuza îninnanapa cuarenta añokima. Usne Cispa painkul azi. Usne Benjamínpa kwal azi. 22 Kwiztane Diosne Saúlta kwairît, îninnamanpa. Davidta mikwa namnin kit nat kit kaizta: ‘Nane Davidta, Isaípa painkulta, narît ish. Usne wat awa i. Usne na înintu aizpa kinazi.’ 23 Davidne Jesúspa pampa îlapa azi. Diosne Israel awara sun kin namta, Jesús usparuza watsat mîlnanapa. 24 Jesús atchasmin, Juanne wan Israel awara kainanat kit kaiznara: ‘U kwail kiarît aizpa maizat kit munnintain.’ 25 Irachasmin, Juanne kaiznara: ‘¿U nawa chi minpuspas? Nane Cristo chish. Mazane nakin anza katsamika ap kwizpa anazi. Nane ussa kiwainmumikakana ish, paiña mittî nukmu ukna,’ kizta. 26 Ap Israel aimpihshtuz, mîrain. Une Abrahampa kwal mai. Israel awachiruzkas Diosta piantuzkas, mîrain. Diosne pailta awaruza an pit kainanara, usparuza watsat mîlnanapa. 27 Jerusalénta uztuzkas uspa înintuzkas Jesústa piankamarachi. Dios kainammtuz kaizara aizpa mîarachi. Pailta kwaizkulmu payura Dios pit pînkîh izarakas, uspane mîarachi. Sunkana Jesústa kwainñamtuasmin, uspane Dios kainammtuz kaizara aizpa kiara. 28 Jesús kwail kitchikas, uspane piantaashit kit Pilatora paikuara, ussa piantaninnapa. 29 Suasne Jesúspa Dios pînkîhta para aizpa pailtawane, uspane kurishtas tain kihshat kit uk kulta kamara. 30 Diosne ussa irîttas kakulninta. 31 Akkwan payurakima Jesúsne Galilea suras kanpamtuzakas Jerusalén pîpuluras kanpamtuzakas izpanara. Uspain Israel awaruza uspa izarît aizpa Jesúspa kainaamtu. 32 Sunkana aune Dios watsal pit uruza kainapuspas. Diosne au ñancha kwaltuza sun watsal pit kwinta kin namnara. 33 Aune uspa kwal makpas. Mane Jesústa irîttas kakulnintawane, Diosne auruza kin namta aizpa kirît. Paas kanta pînkîhta ka parît: ‘Nune ap painkul i. Mane nane nua kawirau.’ 34 Diosne ussa irîttas kakultu aizpa kainarît, mamasa imanpa. Dios pînkîhta ka parît: ‘Nane Davidta sun wat kin namta aizpa uruza mîlananash.’ 35 Katmizna mamaz kanta pînkîhta ka parît: ‘Nune up pashimtumikasha paiña ña pîtninmanazi.’ 36 Dios kaizta aizpa kainarawane, paiña kwaltuza kiwainnarawane, Davidne irît. Usne papihsh kamkin kamat kit paiña ña pîttît. 37 Dios Jesústa kakulninta akwa, paiña ña pîttachi. 38 Aimpihshtuz, mîrain. Une Jesús kit aizpa piankamarawa. Aune Jesús akwa Dios u kwail kirît aizpa kaninshina kainapuspas. 39 Diosne Jesústa nîjkulturuza, us kaizta aizpa mîraruza uspa kwail kirît aizpa wat kulnashina. Diosne Moisés îninta aizpa kiamturuza uspa kwail sînam sanamanazi. 40 Katmizna, kuiraruin, u Dios kainammmika kaizta aizpa naizamanpa. Uspane ka kizara: 41 ‘Mîrain. Une Dios kaizta aizpa kwail i kizamtu. Une iztaspaat kit ianazi. Nane Dios ish. U uzamtuasmin, nane chiwazha iztasparît kal kinash. Na u iztakin iztasparît kal kimtukas, une nîjkulamanazi.’ ” 42 Pablokas paiña izmuruzkas Judío awa kammu yaltas puzarawane, Judío awachiruzne usparuza ka paikuara: “Mamaz kwaizkulmu payura aumîza sun kamtanaka.” 43 Wanmakmuruz Judío kammu yalkis puzarawane, akkwan Judío awaruzkas Judío awakana namtîttuzkas Pablorakas Bernabérakas kanpaara. Dios usparuza pashinamtu. Kamtanamtuasmin, uspane usparuza kurunnara, Diosta kanpaanapa. 44 Mamaz sábado payura, kwaizkulmu payura, pîpuluras awane, mîza wan chiwal wanmakkara, Dios pit mîana. 45 Judío awa kwisha akkwan awaruza iztawane, uspane Pablora aliz kulat kit pashiarachi. Pablo kaizta aizpa nil chi kizamîzta. 46 Suasne Pablokas Bernabékas tînta namat kit kaiznara: —Aune Dios pit Judío awaruza an ñancha kainanarawash. Une sun watsal pit mîashimtuchi. Katmizna une mizurainkas pailta payukima chiyura uzamanazi. Mane aune Judío awachiruza îiznapas, Dios pit kamtanana. 47 Mikwane sun pitkasa aumîza îninat kit kaizta: “Nane nua kai malmukana mamaz awaruza îninnarau, wan suras awaruza watsat mîlnanapa,” kizta. 48 Sun mîamtuasmin, Judío awachiruzne wat kulat kit Anpatpa pit kwisha wari kizamîzta. Dios narîttuzne Dios pit mîat kit nîjkulara, chiyura pailta payukima uzanapa. 49 Sunkana uspane Anpatpa watsal pit wan sura uzturuza kainanara. 50 Suasne Judío awaruzne sun pîpuluras kwazpa ashamparuzakas kwazpa ampuruzakas wanmakkat kit kwinta kinara, Pablokasa Bernabékasa waya kianapa, uspa sukis îanapa. 51 Suasne uspane mittî nukmu pul pil ulpian kit uspa kwail awakana mai annara. Suasne Iconio pîpulura îilta. 52 Jesústa kammuruzne kwisha wat kulara. Sînam Izpulkas usparuza piznara.
Pablokas Bernabékas Iconio pîpulura nappailta
1 Iconio pîpulukin Pablokas Bernabékas sulmin Judío awakasa kammu yalta nappailta. Kwinta kitpane, akkwan Judío awaruzkas Griego awaruzkas Dios pit mîat kit nîjkulara. 2 Judío awa mîashimtuchiruzne Judío awachiruza kwinta kinara, Jesústa piantuzpa kwail minñanapa. 3 Suain akkwan payurakima tut kit ishkwatchin Anpatpa pit kwinta kiilta. Anpatne usparuza kiwainnara, awa uspa kaizta aizpa piankamanapa. Uskas usparuza akkwan tuntu iztasparît kal kinpa kiwainnara. 4 Akkwan pîpulukis awaruzne nîjkularachi. Mînpazha Judío awakasa nîjkulara. Mamaztuzne Dios înintaruzkasa nîjkulara. 5 Suasne Judío awakas Judío awachiruzkas uspa îninturuzkas nîjkulara, usparuza kwail kizana, uk kiana. 6 Sun piankamarawane, pizamasakane, Pedrokas Bernabékas Licaonia surakas, mamaz kasha surakas, îilta, Listra pîpulurakimakas, Derbe pîpulurakimakas. 7 Akkwan surakima uspane Dios watsal pit kainanara.
Awane Pablora uk kiamtu Listra pîpulura
8 Listra pîpulukinne maza ampune, chasachimikane, tuara. Ka kawirît akwa, sua uzara. Usne mizurainkas chatchi. 9 Sun ampune Pablo kaizta aizpa mîmtuara. Pablone ussa iz kit us nîjkultu aizpa piankamta. Usne ka minta: “Usne nawa wat kakulninshinasa,” minta. 10 Suasne Pablone tînta ka kaizta: —Kuhsak kit mittî nil kunti, kizta. Sun ampune tizak kit chamîzta. 11 Akkwan awane Pablo kit aizpa izat kit Licaonia pitkasa ka kwianamîzta: —Diostuz awakana namarît. Uspane kwashtas aumîza taizara, kizara. 12 Uspane Bernabé “Zeus dios i” munara. Pablo akkwan kwinta kit akwa, usne “Hermes dios i” munara. 13 Zeuspa pariyane pîpulu napmukin paiña wanmakmu yal mîjara. Usne wakara ampuruzkas kwisha akkwan wishkas karara. Usne awakasa wakara ampuruza uspa akwa piantashit kit usparuza wakpuj wainñashimtuara. 14 Sun nîjkultazasmin, Pablokas Bernabékas uspa pïn pihshailta, uspa kiamtu aizpa watchi piankamanapa. Awaruzpain nappail kit kwianara: 15 —Awaruz, ¿Chikishma sun kipus? Aune ampu ukanain makpas. Aune at kit Dios watsal pit kainammpuspas, u sun kiamtu aizpa chîhkanapa. Chiwal palichi. U kiamtu aizpa chîhkat kit Dios chiyura uzmikasha mîat kit kanparain. Usne wan sara. Chiyukas pilkas pikas wan chiwal sara. 16 An ñamin Diosne pailta awara chîhkanara, uspain miwara naat kit chaanapa. 17 Mizurainkas usne aumîza chîhkanarachi. Dios wat aumîza kinamtu akwa, usne aumîza wat kinamtu, ussa piankamanapa. Diosne alukas chiyuras kininta, pippa pakkuwiznapa. Usne uruza akkwan kumira kwinnara, kuanpa, wat kulanapa. 18 Sun wan kwinta kitkas, awane mama uspa akwa wakara piantashiara, usparuza wakpuj wainñanapa. 19 Suasne mînpazha Judío awaruz Antioquía pîpuluraskas Iconio pîpuluraskas piannaakane, uspane uspa minñamtu aizpa maizara. Suasne uspane Pablora uk kiara. Us irît minñamtu akwa, uspane ussa tain kit kîninaara pîpulu pianamalkima. 20 Jesústa piantuz Pablo tukin wanmakkarawane, Pablone kuhsak kit mamasa pîpulura napta. Tîlawara usne Bernabékasa Derbe pîpulura îilta. 21 Dios pit kainanarawane, akkwan Derbe pîpulura uztuzne Jesústa piankamara. Kwiztane uspane Listrarakas Iconiorakas Antioquíarakas kailtailta. 22 Uspane wan surakima Jesústa piantuza kwisha kiwainat kit kurunara, Jesústa wat nîjkulamîznapa, us kaizta aizpa mîanapa. Dios înintukin nappashimturuzne kwisha naizarînazi kiznara. 23 Uspane îlaparuza nanara, wan pîpulura wanmakmukin Dios pit kamtananapa, Diosta piantuza kurunnanapa. Kumira kumtuchiasmin, Diosta paikuat kit Jesústa nîjkulturuza kurunara, Anpatpa miwara îanapa.
Pablokas Bernabékas Antioquía pîpulura kailtailta
24 Pisidia sukimin pînpailtawane, Panþlia sura pianailta. 25 Perge pîpulukin uzturuza sun pit kainanarawane, uspane Atilia pîpulura kihshtîilta. 26 Suane kanuara wail kit Antioquía pîpulura îilta. Sun pîpulukin an ñamin Jesústa piantuzne Diosta uspa akwa paikuara, Dios usparuza kiwainanapa. Suasne uspane paasta sun kal kinpa îninñara. Mane uspa kal kapal wan kirît. 27 Antioquía pîpulura piannailtawane, uspane wanmakmuruza wanmakninñara, Dios yawa usparuza kiwaintît aizpa kainananapa. Uspane Judío awachiruzkas Jesústa nîjkularît kainanara. 28 Suane Pablokas Bernabékas Cristora kanpamtuzkasa akkwan payukima nukkulpailta.
Jerusalén pîpulura wanmakkara
1 Sun payune mînpazha Judea sukis Antioquía pîpulura attuzne Diosta piantuza kamtanamîzta. Uspane ka kaiznara: “Moisés ampu pashpa aya tît kit circuncisión kiarawa kizara.” Moisés îninta aizpa kimtukine, Diosne uruza watsat mîlnamanazi kiznara. 2 Sun akwa, Pablokas Bernabékas uspakasa tînta kwinta kiara. Suasne wanmakturuzne Pablorakas Bernabérakas mînpazharakas nanara, Jerusalén pîpulura îanapa, înintaruzkasakas iglesiaras îlaparuzkasakas sunpa parananapa. 3 Antioquía pîpuluras wanmakmuruzne usparuza îninñara. Fenicia suwarainkas Samaria suwarainkas pînamtuasmin, uspane Judío awachiruz antikwa pit mîara aizpa chîhkarît kwinta kiara, Diosta kanpaanapa. Sun pit mîarawane, wan Cristora piantuzne watsal kulara. 4 Pablokas Bernabékas Jerusalén pîpulura piannailtawane, wanmakmuruzkasakas înintaruzkasakas îlaparuzkasakas wanmakkat kit Dios kit aizpa usparuza kainanara. 5 Mînpazha Fariseo awaruzne, Jesústa nîjkulturuzne, nil kuhspanak kit kaizamîzta: —Judío awachiruzne, Jesústa nîjkulturuzne, wan Moisés înintît aizpa kiarawa. Uspane uspa ampu pashparuza circuncisión kiarawa, kizara. 6 Suasne înintaruzkas îlapa înintuzkas wanmakkara, sun pit iz kit piankamana. 7 Kwisha kwinta kiarawane, tînta mîmarawane, Pedrone kuhs kit usparuza kaiznara: —U Diosta piantuz, mîrain. Une ñamin Dios uruztas nawa narît pian. Suasne Diosne nawa îninta, Dios watsal pit Judío awachiruza kainananapa, Anpatta nîjkulanapa. 8 Diosne wan awa kaijchukin minñamtu aizpa pian. Diosta pashinamturuza nanat kit Sînam Izpulta îninta, usparuza aumîzakanain piznanapa. 9 Usne aumîzakas usparuzakas kawarain kinarît. Uspa Diosta nîjkularît akwa, Diosne uspa kwail kiarît aizpa sînam kwizninnarît. 10 Mane, ¿Une Dios Judío awachiruza sun kianapa îninshimtumakkiwas? Une usparuza îninnasachi, chiwazha anza sam kianapa. Aukas au an ña kwaltuzkas sun kitsachimakpas. 11 Sunkana kiman. Aune Dios Jesús akwa aumîza watsat mîlnamtît nîjkultamakpas. Kawarain Diosne usparuza pashinat kit watsat mîlnara. 12 Suasne wanne puñain paat kit Bernabékas Pablokas kwinta kit aizpa mîara. Uspane Dios chiwazha watsal iztasparît kal kiarît aizpa Judío awachiruz iztakin kainanara. 13 Kwinta kitpane, Santiagone kaiznara: —U Diosta piantuz, mîzhain. 14 Simón Pedrone miza Dios Judío awachiruza ñamin kiwainara aumîza kainanara. Diosne usparuza nanara, paiña kwalkas namanapa. 15 Dios pit kainammtuz pararawane, uspane sun kwinta kiara. Dios pînkîhkin ka para: 16 “Sun kitpane, nane mamaz payura kailnash, mînpazhara, David mikwarakana, uzninnapa. Mazara, Davidpa kwalkis kakulninnash. Nukkultîtmikasha mamasa kakulanash. Nane kail kit Jesústa kakulninnash, 17 wan nukkultaruzkas wan Judío awachiruzkas Anpatta sayanapa, Diosta piantuzkasa wanmakkanapa, usparuza îninnanapa. 18 Anpatne, an ñamin kaiztamikane, sunkana paiña pit kaiz kit awaruza piankamninnara.” 19 Katmizna Santiagone min kit ka kurunnamîzta: Aune Judío awachiruza, Diosta piantuza, tînta înintachiwamakpas, Moisés Judío awaruza înintît aizpa mîanapa. Mane uspane ñamin nîjkularît aizpa chîhkaarawa, Diosta kanpaana. 20 Aune usparuza ka parawamakpas: “Awakanain iztît sarîtta tîra kumira unatne, kuman. Kasarakirîtne mamaz ashampara sanachi. Kawarain ashampane mamazpa ampukasa pitsachi. Chiwazha tît kuhtît kalpa irane, aimpi puztakine, ña kuman. Kalpa pi kwarîtne, kuman. Aimpikas kuman.” 21 Ñamin mînpazhane pailta kwaizkulmu payura Moisés kamtamtu aizpa iz kit wan pîpulura wan kammu yalta kamtanara.
Uspane pînkîh panat kit Judío awachiruza îninñara
22 Suasne înintaruzkas wan îlaparuzkas wan wanmakmuruzkasa mînpazharuza usparuztas naat kit Antioquía pîpulura îninnara Pablokasakas Bernabékasakas. Uspane Judas, Barsabás muntîtmikashakas, Silastakas îninñara. An paasne aimpihshtuztas katsa namtît. 23 Uspane uspakasa sun pînkîh îninñara: Aune, înintaruzkas, îlapa Diosta piantuzkas Judío awachiruzakas Antioquía pîpulura uztuzakas Siria sura uztuzakas Cilicia sura uztuzakas “kakishapu” kizpuspas. 24 Mînpazha auruztas îarakas, aune usparuza îninnarachimakpas. Uspane uruza uspa pitkasain kwail kizappat kit naaninnara, uspa Moisés kamtît aizpa mîanapa. 25 Katmizna au wanne nîjmin kit mînpazharuza auruztas nanaramakpas, uruza izna îanapa. Uspane, au paas wat aimpihshtuzkas, Bernabékas Pablokas, îanazi. 26 Awa usparuza piantashiarakas, au Anpat Jesucristone usparuza wat kiwainara. 27 Sun akwa, aune Judastakas Silastakas uruza înintamakpas, uspa pitkasa sunpa kwinta kianapa, u sun pînkîh para aizpa piankamanapa. 28 Sînam Izpulkas aukas nîjminmakpas, au uruza sunmin kuruntu aizpa kianapa. Aune uruza chinkas îninmanash. 29 Awakanain iztît sarîtta tîra ña unarîtne, kuman. Kawarain aimpikas kuman. Chiwazha kalpa tît kuhtît aimpi puztakine, ña kuman. Kasarakirîtne, mamaz ashampara sanachi. Kawarain ashampane mamazpa ampukasa pitsachi. Au kaizta aizpa kitne, une wat aizpa kianazi. Watmin îanaka. 30 Sunkana kiztawane, uspane masain îat kit Antioquía pîpulura piannaara. Suane uspane wanmakmuruzkasa wanmakkat kit pînkîh chîhkaara. 31 Aimpihshtuz pînkîhta izarawane, kwisha wat kulara, sun pînkîh usparuza kiwainara akwa. 32 Judaskas Silaskas Dios kainammmika tuasmin, uspane akkwan payukima uspa pitkasain Diosta pianturuz Dios pit kamtanat kit tînta kiwainnara, tînta namanapa. 33 Sua akkwan payu pailtîkane, aimpihshtuzne usparuza “îru” kiznara. “Watmin îanaka” kizkane, uspane înintaruzpara kaiyara. 34 Silasmin mama suain nukkulta. 35 Pablokas Bernabékas mamaz akkwan awakas Antioquía pîpulura nukkulara. Uspane awaruza kamtanamîz kit Anpatpa pit kainanamîzta.
Pablokas Bernabékas paimpa paimpa îilta
36 Akkwan payu taiztawane, Pablone Bernabéra kaizta: —Wan pîpulura ñamin îarîttain kailmîzpai, Diosta piantuza iznana. Anpatpa pit mîraruza îmîzpai, usparuza mamasa kiwainnana. 37 Bernabéne Juanta uspakasa mishira. Usne Marcoskas muntît. 38 Pablone ussa mishitchi, Panþlia pîpulura usparuza tîwij ît akwa, uspakasa mama kal kiwaintachi akwa. 39 Tînta kwinta kiarawane, tînta pilchapuzarawane, uspane paimpa paimpa îilta. Bernabéne Marcosta mit kit kanuara waat kit Chipre sura îilta. 40 Pablone Silasta nara, uskasa în. Aimpihshtuzne uspa akwa Diosta paikuara, Dios usparuza kiwainapa. Sun kitpane, îilta. 41 Uspane Siria suwarakas Cilicia suwarakas pînpailta, wanmakmukin izmuruza kamtailnapa, Dios pit an wat piankamanapa.
Timoteone Pablorakas Silastakas kanpara
1 Derbe pîpuluwara pîntawane, Pablone Listra pîpulura piannara. Suane usne mazakasa, Timoteo muntîtmikakasa, wanmalta. Usne Dios pit nîjkulta. Paiña Judío awa akkuhshne Jesústa nîjkultumika azi. Paiña papihshne Griego awa azi. 2 Jesústa piantuz Listra pîpulura uztuzkas Iconio pîpulura uztuzkas us akwa wat kwinta kiara. 3 Pablone Timoteora kanpazha kizta. Judío awa sun sura uzara akwa, Pablone paiña aya tîtnin kit circuncisión kira. Uspane Timoteowa papihsh Griego awa azi pian. Sun Griego awane sun circuncisión kitchi. 4 Wan pîpulura pînamtasmin, uspane Jesústa piantuza înintaruz nîjkularît aizpa kamtanara. Jerusalén pîpuluras îlapa înintuz kaizara aizpa kamtanara, wan wat mîanapa. 5 Sunkanane wanmakturuzne an nil kiat kit an wat nîjkulara. Jesústa piantuzne pailta payu an akkwan wanmakkamîzta.
Macedonia pîpulu awane Pablora izpanta
6 Sînam Izpulne Pablorakas paiña kanpamtuzakas Asia sura Dios pit kainana îninnarachi. Frigia suwarakas Galacia suwarakas pîntawane, 7 uspane Misia sumamin pianaara. Bitinia sura napna minñakane, Jesúspa Izpulne usparuza napninnarachi. 8 Suasne Misia suwara pînat kit Troas pîpulura pimara kihshara. 9 Suane Pablone amtawara chiwazha kainkizpara. Maza Macedonia suras awane ussa izpanta. Usne kun kit Pablora paikwat kit kaizta: “Macedonia sura anka, aumîza kiwainnapa,” kizta. 10 Pablo kainkizparawane, nane, Lucasne, Pablokasa wan watsaiznash, Macedonia sura în. Aune Dios aumîza îninta pianaiznash, Dios watsal pit kainanana.
Pablokas Silaskas Filipos pîpulura îmtuwaiyazi
11 Aune Troaskis kanuara nil îaiznash, Samotraciara pi paizka sura piannan. Tîlawara Neápolis pîpulura pianaiznash. 12 Suas Filipos pîpulura îaiznash. An pîpulune Macedonia sukin anza katsa azi. Akkwan Roma pîpulukis awaruzne sua uzara. Suane akkwan payuchikimain tumanash. 13 Aune kwaizkulmu payu pîpulukis pianamal puziznash pirakima, awa wanmakmukin piannan. Sua awane Diosta paikumkin îara. Sua aune uz kit ashampa wanmaktîttuza Dios watsal pit kwinta kianash. 14 Maza ashampane, usparuztas Lidia muntît. Usne Tiatira pîpulukis at kit sam ishtam pïn paininmika azi. Sun ashampane Diosta wakpuj wain kit paikwara. Uspa kaizara aizpa mîra. Anpatne ussa kiwainta, Pablo kamta aizpa nîjkulnapa. 15 Sun ashampakas paiña kwalkas munnarawane, usne aumîza paikwat kit kaizpailnash: —Nawa nil Anpatta nîjkultamika ish minñamtune, ap yalta uznarain, kiznara. Usne aumîza nukkulninpailnash. 16 Maza payune Diosta paikumkin au îamtuasmin, aune saliz piztît kiwaim ashampara wanmalaiznash. Salizne ussa kiwainta, iznakulan. Us iznakulamtu akwa, paiña anpattuzne akkwan pial kana kiara. 17 An nimpihsh ashampane Pablorakas aumîzakas kanpat kit kwian kit saliz akwa ka kaizta: —An ampuruzne an katsa Diosta kiwainñamtu. Uspane usparuza sun pit kainanamîztu, Dios uruza watsat mîlnanapa, kizta. 18 Nimpihsh ashampane sunkana kira akkwan payukima. Piztît ashampa ussa naizninta akwa, minpara Pablone salizta kaizta: —Jesús nawa kiwaintu akwa, nane nua puznintus, ashamparas puznapa. Sun urain salizne ustas tîwij îra. 19 Ashampara pamikaruzne ka minñat kit nîjkulara: “Saliz puztît akwa, aune an ashampakasa an pial kana kisachimakpas.” Sun minñarawane, uspane Pablorakas Silastakas pizat kit pîpulu înintuza nankin mîlara. 20 Uspane usparuza katsa mikwawakin karat kit kaizara: —An awaruzne aumîza kiwainamtuchi. Auruzpain pilchapuzamtu. Aumîza paimpa naiyamtu. An ampuruzne Judío awa mai. 21 Aune Roma awa makpas. Aune uspa kamtara aizpa sapsachimakpas. Uspa kamtara aizpa kisachimakpas. 22 Suasne awane usparuza aim kiamîzta. Katsa mikwane pïn uknapa îninnara, tîkasa pianna. 23 Kwisha aim kiarawane, kajchira sîppat kit kajchi izmumikasha usparuza kwisha wat izanapa îninta. 24 Sunkana kizkane, kajchi izmumikane usparuza anza ayukmal sîpnat kit mittî tîkulta nukninta. 25 Kakwamta panakima Pablokas Silaskas Diosta paikwamtuaiyasmin, Diosta kanta kiztuaiyasmin, mamaz sîptît waruzne mîara. 26 Suasne masain su ulmu amîzta. Kajchi yal saktî kwisha tînta ulmalta. Sun urain wan pîjta azkulara. Wan cadena kuhtîttuz sîpnaruza chîhtkul kit taizara. 27 Sun kirîkane, kajchi izmumikane sun kit aizpa izkulta. Kajchi pîjta chîhtkulara iztawane, usne paiña mashti pizta, usmin piantana. Maza sîptîtmika kajchiras puzkane, paiña mikwane, ussa kajchi izmumikasha, piantashina. Usne wan sîptîttuz kajchira waruza chîhtaraka minta. 28 Pablone ussa kwianta: —Nua kwail kimun. Wan akki puramakpas. 29 Suasne izmumikane impil paikwat kit kajchira ayukta ãïn ît kit napta. Ul kit ishkumtuasmin, Pablo tukinkas Silas tukinkas wakpuj wainta. 30 Usne usparuza tas ukkanat kit mîmara: —Anpattuz. ¿Chima kinpai, Dios nawa watsat mîlnapa? 31 Uspane sînkailta: —Anpat Jesucristora nijkultane, Diosne nua watsat mîlnazi. Up kwaltakas watsat mîlnanazi, kizara. 32 Pablokas Silaskas Anpatpa pit ussakas paiña yalkin uztuzakas kaizpailta. 33 Sun amtain izmumikane usparuza mamaz pîjtamal mîlnara, aim kirît kitna. Suasne uspane ussakas paiña kwaltakas munnanara. 34 Kwiztane paiña yalta mîlnat kit kumira kwinara. Uskas paiña kwaltuzkas kwisha wat kulara, Diosta nîjkulara akwa. 35 Tîlawain tîlawara mikwane policíaruza kajchi izmumikasha îninnara, paasta chîhtnanapa. 36 Suasne kajchi izmumikane Pablora ît kit kaizta: —Mikwane nawa îninziish, umîza chîhtnapa. Une puzshinai, puñain îilnapa. 37 Pablone policíaruza kaiznara: —Mikwane aumîza wan iztukin tîkasa piannara. Au Roma pîpulukis awa akwa, uspane amîza sunkana kinchi. Aumîza kwail kizarachasmin, uspane aumîza kajchira sîpparît. Mane uspane puintain aumîza chîhtashimtu. Sunkana kiasachi. Uspain anpa, aumîza puzninnapa, kiznara. 38 Policíane mikwaruza sun kainanara. Roma pîpulukis awara ilta akwa, uspane ishkuat 39 kit Pablorakas Silastakas îara, sun kwail kiarît kizna. Suasne kajchira aat kit usparuza paikwaara: “Pîpulukis îrain.” 40 Kajchiras puzpailtawane, Pablokas Silaskas Lidiawa yalta îilta. Izmuruza iznarawane, wantuza wat kiwaintawane, pîpulukis puz kit îilta.
Awane aliz kulamtu, Pablo kaizta akwa
1 Anfípolis pîpulukimin Apolonia pîpulukimin pînpailtawane, Pablokas Silaskas Tesalónica pîpulura piannailta, Judío awa kammu yalkinkima. 2 Pablone kammu yalta sunkana kamtît kamtanamîzta. Kutña domingokima pailta kwaizkulmu payura uspakasa kwinta kinat kit Dios pit kamtanara. 3 Usne Dios pit iz kit usparuza piankamninara: “Cristo naiznatkin. Irawane, mamasa kakulnatkin.” Ka kaiznara: “Sun Jesúsmin uruza na kaiztu aizpa Dios înintamika i.” 4 Suasne mînpazha Judío awane Jesústa nîjkulat kit Pablorakas Silastakas wanmakkara. Akkwan Griego awa Diosta wakpuj wainturuzkas akkwan kwazpa ashampa wat kirîttuzkas Jesústa nîjkulara. 5 Judío awa Jesústa nîjkultachiruzne aliz kulara, akkwan awa Pablo kaizta aizpa mîara akwa. Uspane mînpazha arakan awaruza wanmakninara, wan awa pilchapuzninamîznapa. Jasónpa yalta azain îat kit pîjta pakpak kiara, Pablorakas Silastakas sayat kit ukkat kit awaruza chîhkaanapa. 6 Sua usparuza wanmalmanamtîkane, Jasóntakas izmuruzakas pîpulu înintuzakima tain îat kit kwianara: “An awane wan sura maizninamtu; mane apakas ailta. 7 Jasónne usparuza paiña yalta nammîlara. Uspane au mikwa Cesar kaizta aizpa mîamtuchi. Mamaz an katsa mikwa îninna arît kizamtu. Usne Jesús muntît,” kizara. 8 Sun mîarawane, awakas înintuzkas pilchapuzara. 9 Jasónkas mamazkas usparuza pial tarawane, usparuza chîhtnara.
Pablokas Silaskas Berea pîpulura îmtas
10 Tîl pakane, izmuruzne Pablorakas Silastakas puznin kit Berea pîpulura îninñara. Piannailtawane, Judío kammu yalta îilta. 11 An Judío awane Tesalónica awakinkas anza wat mazi. Pailta payu Dios pit mîamtuasmin, uspane Dios pînkîhta parît aizpa izara. Pablo kaizta aizpa piankamshiara. 12 Katmizna akkwanne nîjkulara. Usparuztas akkwan kwazpa Griego awakas akkwan kwazpa Griego ashampa wat kirîttuzkas nîjkulara. 13 Pablone Berea pîpulura Dios pit kainanamîzta. Judío awa Tesalónica pîpuluras sunpa nîjkularawane, uspane ta îat kit awara pilchapuzninñara. 14 Paiña izmuruzne Pablora tîriztachi îninñara, katsa pimara tuanpa. Silaskas Timoteokas Berea pîpulura nukkultailta. 15 Pablora kanpararuzne Atenas pîpulurakima kanpaara. Pablone kailtaruza paiña pit îninta, Silaskas Timoteokas azain kail kit uskasa wanmaknapa.
Pablone Atenas pîpulura tu
16 Silastakas Timoteorakas tîriztuasmin, Pablone Atenas pîpulura mat kit kwisha tayalta, wan awa akkwan tî awakana sarîtta wakpuj wainñamtu akwa. 17 Katmizna usne Judío kammu yalta nap kit Judío awaruza tînta paranara. Mamaz Griego awaruzakas, Diosta piantuza paranara. Pailta payu kumira paininmukin, awa îmkin wanmakturuza paranara. 18 Mînpazha kamtamtuzne epicúreo munara. Mamaz kamtamtuzne estoicos munara. Uspane Pablokasa kwinta kiamîzta. Mînpazha usparuzpain mîmara: “An ampune kain paramtu. Usne nukkukana tînta paramtui.” Mamaztuzne ka kaizara: “Usne mamaz diospa kamtamtu. Uspane sun kwinta kiara, Pablo watsal pit Jesúspa kainara akwa. Uskas awa irîttas kakultu kainammîzta.” 19 Suasne uspane ussa Areópago îzakin, uspa wanmakmukin, mîlaara. Sua ussa ka mîmaara: 20 —¿Nu masas kamtam kamtamtu aizpa aumîza kamtashinakish? Nune aumîza mamaz tuntukanain kainammtu. Sun wan nu kainammtu aizpa piankamshipuspas, kizara. 21 Wan Atenas pîpulu awakas mamaz suras awa sua uztuzkas chiwazha masas kwinta kirît aizpa mîashimtu. Chiwazha masas pit mîamtu aizpa kwinta kiashimtu. 22 Suasne Pablone uspa paizkakin Areópago îzakin kun kit kaiznara: “Atenas uzturuz mîzhain. Nane u tî awakana sarîtkin wakpuj wainñamtu pianish. 23 Na u wakpuj waimtukin u wanmakmukin chasmin, nane u chiwazha katsa ukkasa sarîtkin wanmaltau. Sua sun pit ukkin parît: AN DIOSTA PIANCHIMAKPAS. U sun Diosta wakpuj wainñarakas, une ussa pianchi. Nane uruza sun Diospa kainanamtus. 24 An Diosne au su sara. Chiwazha an sura wa aizpa us sara. Usne chiyukas pilkas pamika i. Usne wakpuj wainmu yalkin awa sarakin uzchi. 25 Sun awa ussa kiwainsachikas, Diosne pailta awaruza uzninnara. Ishkas wan chiwalkas aumîza mîlanara. 26 Maza ampu sarawane, Diosne wan awara sara, wan chiwal sura uzanapa. Usparuza sarachasmin, Diosne an ñancha mînta awa uznakas yawa añora uznakas nanara. 27 Diosne sun kirît, awa ussa sayanapa. Ussa sayarane, une Diosta wanmalashina. Watcha Diosne au kashain uz. 28 Usne aumîza uzninamtu. Usne aumîza îninamtu. Us akwa uzmakpas. Mînpazha u kainammmikane ka kaizara: ‘Aune Diospa kwal makpas.’ 29 Aune Diospa kwal makpas kizamtune, aune Dios chiwazha sarîtkana kizsachimakpas. Dios urukasakas pialkasakas ukkasakas sarît i mintachiwamakpas. Awane uspain minñamtu aizpa sara. 30 An ñancha Dios wan kwail awa kirît aizpa ilnarachikas, mane Diosne wan awa pailta sura uzturuza îninnamtu, kwail kiarît aizpa maizanapa. 31 Katmizna Diosne maza payura nara, wan awaruza nil ilnana. Sun payu taizkane, Diosne Jesús akwa, us narîtmika akwa, wan awaruza ilnanazi. Diosne ussa irîttas kakulninta, wan awane ussa izat kit piankamanapa.” 32 Awa irîttas kakultu mîarawane, mînpazha sunta ishanara. Mamaztuzne ka kaizara: —Mamaz payu sun paraka mîaiznapas. 33 Suasne Pablone uspa paizkakis puzta. 34 Mînpazha awane ussa kanpaat kit nîjkulara. Dionisione, Areópago îninmikane, nîjkulta. Maza ashampakas, Dámaris muntîtmikakas, mamaztuzkas nîjkulara.
Pablone Corinto pîpulura Dios Pit kainammtu
1 Areópago îzakin kwinta kitpane, Pablone Atenas pîpuluras puz kit Corinto pîpulura îra. 2 Suane usne maza Judío awara wanmalta. Usne Aquila muntît. Usne Ponto suras arît. An ñamin akkwan payuchin uskas paiña ashampa Priscilakas Italia suras ailta. Katsa mikwane, Claudione, Roma pîpulukis wan Judío awara îninnara, wan puzanapa. Sun akwa, Aquilakas paiña ashampakas Corinto pîpulura pianailta. Pablone usparuza iznana îra. 3 Sun kalmin kal kiamtuasmin, usne usparuzkasa mara, sulmin nain pïnkasa yal sana. 4 Pailta kwaizkulmu payura Pablone Judío kammu yalta îra, tînta kwinta kinana. Usne Judío awaruzakas Judío awachiruzakas us kamta aizpa mîninnara. 5 Silaskas Timoteokas Macedonia suras piannailtawane, Pablone Dios pitmin kainanamîzta. Judío awaruza nil kiznara, Jesúsne Dios înintamika azi kiz kit. 6 Uspane ussa alizwazha sînkaamîzta. Kwail pit paraamîzta. Suasne Pablone paiña pïn ulpian kit Judío awaruza kwainattattînash kiz kit kiznara: —Une umin iashitne, une iashina. Nane sînam ish. Nane uruza kuruntu aizpa pianish. Makis nane Judío awachiruza kamtana îmtus, kiznara. 7 Judío awa kammu yaltas puz kit Ticio Justowa yalta napta. Usne kammu yalmamin uz kit Diosta paikwara. 8 Crispone, kammu yal îninmikane, paiña kwalkasa Anpatta nîjkulara. Akkwan Corinto awakas Dios pit mîarawane, uspane nîjkulat kit munarît. 9 Suasne Anpatne Pablora izpan kit kaizta: “Ishkumun. Dios pit kainanamîzti, puñachin. 10 Nane nukasa kiwainna înash. Mînminkas apa nua iyamanazi, nua kwail kin. An pîpulukin kwisha akkwanne nawa piankamanazi.” 11 Sunkana Pablone maza año kakwakasa Corinto pîpulura tut kit Dios pit usparuza kamtanara. 12 Sun payu Galiónne Acaya sukin katsa mikwa azi. Judío awaruzne wanmakkat kit Pablora aliz kulara. Ussa pizat kit katsa mikwakin mîlat kit 13 katsa mikwara kaizara: —An ampune wan awara kurunamtu cha, mamaz tuntu Diosta wakpuj wain kit Diosta paikwan. Moisés aumîza sunkana înintachi. Aune sunkana kisachimakpas, kizara. 14 Pablo kwinta kimtuasmin, Galiónne Judío awaruza kaiznara: —Us gobiernora kwail kitne, us awara kwail kitne, nane u Judío awaruz kaizara aizpa mîrawaish. 15 Une kamtampakas awawakas uruzpa înintu aizpakas paraamtu. Umin nil sarain. Nane nil aizpakas kwail aizpakas kaizmanash. Na u kamtamtu aizpakas u nîjkulamtu aizpakas we piankamtît akwa, nane chinkas kizsachish. 16 Galiónne usparuza pianamal îninnara. 17 Suasne wan Griego awane Sóstenesta, Judío kammu yal îninmikasha, pizat kit suain katsa mikawakin aim kiara. Galiónne sun izkitchi.
Pablone Antioquía pîpulura kailtu
18 Pablone Corinto pîpulura mama akkwan payukima nukkulta. Izmuruza “îru” kiznarawane, kanuara waat kit Siria surakima îra. Priscilakas Aquilakas îilta. Cencrea pîpulura, kanuara waarachasmin, Pablone paiña kîzpu ash chiwal kihta, us Diosta sun kin namta aizpa kin. 19 Éfeso pîpulura pianaarawane, Pablone Priscilarakas Aquilarakas tîwij ît kit Judío kammu yalta îra. Judío wanmakmuruza paranara. 20 Uspane ussa paikuara, an akkwan payukima tuanpa. Nukkulshitchi. 21 Suasne “îru” kiznat kit kaiznara: “(Nane Jerusalén pîpulurain tuatpaish, pishta izna). Dios nawa kiwaintane, mamasa kailnash, uruza iznana,” kiznara. Suasne kanuara waat kit Éfeso pîpulukis îra. 22 Cesarea pîpulura piannatpane, Pablone Jerusalén pîpulura îra, Dios pit piantuza iznana. Kwiztane Antioquía pîpulura îra. 23 Akkwan payuchi pailkane, Galacia surakas Frigia surakas wan pîpuluruza îra, wan Jesústa piantuza kiwainnana.
Apolosne Éfeso pîpulura uztuza Dios Pit kainanamtu
24 Sun payune Apolosne, Judío awane, Éfeso pîpulura piannara. Usne Alejandría pîpulura kawira. An wat kainanmikane Dios pit kwisha watsal parat kit Dios pit wat piankamta. 25 Mazane ussa Anpatpa miwa kamtara. Us pian aizpa kwisha wat kwinta kit kit Jesúspa nil kamtanara. Uspane sun payura Juan munnarît aizpa pianara. 26 Apolosne Judío kammu yalta kwinta kimîzta, ishkwatchin. Priscilakas Aquilakas ussa mîiltawane, uspane ussa paimpa mîlpail kit Diospa miwa an nil kamtanailta. 27 Suasne Apolos Acaya sura pînshimtuasmin, izmuruzne ussa kiwainashit kit maza pînkîh Jesústa piantuza paranat kit ussa “watsal sappanaka” kiznara. Acaya sura piannatpane, usne Diosta nîjkultuza kamtananara. Diosne ussa kwisha wat kiwainta, sun awa Jesúspa an piankamanapa. 28 Apolosne Judío awara tînta kwinta kinara. Usne wan awa iztakin Judío awa ñanta minñarît aizpa piankamninnara. Uskas Dios pit pînkîhpara “Jesúsne Dios înintamika azi” kiz kit kamtanara.
Pablone Éfeso pîpulura tu
1 Apolos Corinto pîpulura tuasmin, Pablone înkal îzara puz kit Éfeso pîpulura pianara. Suane Jesústa piantuza wanmal 2 kit Pablone mînanara: —Diosta nîjkulakane, ¿Paiña Sînam Izpul sappamanas? Uspane sînkaara: —Aune mizurainkas Dios paiña Sînam Izpulta înintu mîrachimakpas. 3 Suasne Pablone mîmanara: —¿Chima pianmakpas? ¿Miza tuntuma munnamtuas? Uspane sînkaara: —Aune Juan awaruza munnara pianmakpas. 4 Pablone kaiznara: —Watcha, Juanne kwail kirît maizturuzain munnanara. Uskas usparuza mamazta nîjkularawa kaiznara. Usne awaruza kamtanara, Jesústa, an paiña kwizta amtumikasha nîjkulanapa. 5 Sun mîarawane, Anpat Jesústa nîjkultuza munnarît. 6 Pablo paiña chihtî uspa kîzpukin paanakane, Sînam Izpulne usparuza piznara. Uspane mamaz tuntu pitkasa paraat kit Dios usparuza kaiznara aizpa kainaara. 7 Wan doce ampuruzne purazi. 8 Pablone kutña mishkima Judío kammu yalta îmîzta, Dios pit kainana. Wan awakasa ishkwatchin paranat kit Dios awaruza îninnashimtu aizpa piankamninnara. 9 Mînpazha ussa parashitchi. Jesústa mîashitchi. Uspane, Jesústa pianchiruzne, awa purakin Diospa miwa kwail paraara. Suasne, Pablone usparuztas paimpa îra. Jesústa piantuza Tiranowa kammu yaltakima mîlnara. Suane pailta payu kwinta kinara. 10 Sunkana paas añokima kamtanara. Wan Asia sura uztuzne Anpat Jesúspa pit mîara. Kawarain Judío awakas Judío awachikas mîara.
Escevawa painkultuz
11 Diosne Pablo akwa kwisha akkwan iztasparît kal kira. 12 Sunkana kirît. Awane pairara kihamkas uspa pïnkas karaara, Pablo sun pïn paanapa. Suasne uspane sun pïn inturuza mîlnara, usparuza kakulninnanapa. Piztîttuztas saliz puzninnara. 13 Mînpazha wat chi Judío awane, saliztuza puznintuzne, Anpat Jesúspa mun kizshiamtu, salizta puzninna. Uspane salizta kaizara: “Pablone Jesúspa kamtanara. Jesúspa mun kaiztu akwa, nakas uruza puzninnamtus,” kizara. 14 Siete painkulne ka kiara. Escevane, uspa Judío papihshne, pariya îninmika azi. 15 Sun kiakane, kwail salizne sînkanara: “Nane Jesústa pianish. Pablorakas pianish. ¿Une mînma makpas?” 16 Masain kwail saliz piztîtmikane usparuza tiznat kit wanta tînta piannara. Usne aimpi puznakima kwisha aim kinat kit uspa pïn pihshanara. Usne yaltas piltîm îara. 17 Wan Éfesora uzturuzne, Judío awakas Judío awachikas, sun piankamat kit ishkuara. Uspane Anpat Jesúspa wat minñat kit kwisha wari an akkwan piji kaizara. 18 Akkwan Jesústa nîjkulturuzne aat kit uspa kwail an ñancha kiara aizpa Diosta kainaara. 19 Akkwan tañu kimtuzne uspa payara pînkîh karaat kit wan awa iztakin ïnta paktaara. Uspa pînkîh sunpawa muin wiantawane, cincuenta mil pial muin. 20 Sunkana an akkwan awane Anpatpa pit mîashit kit an tînta Diosta nîjkulara. 21 Sun kitpane, Pablone min kit Macedonia surakas Acaya surakas îshira. Kwiztane Jerusalén pîpulura îshira. An kwiztane “nane Roma pîpulurakas îtpaish” kizta. 22 Suasne paasta, Timoteorakas Erastorakas, paiña kiwainmuruza Macedonia sura îninnara. Usmin akkwan payuchikima Asia sukin nukkulta.
Awane Éfeso pîpulura tînta pilchapuzamtu
23 Sun payune awane Dios watsal pit akwa, masas mi akwa pilchapuzara. 24 Demetrione, chiwazha putchã pialkasa sammikane, awara pilchapuzninnara. Sun ampukas paiña kiwaintuzkas pucha pialkasa ainki yal saara. An ainki yalne Dianawa katsa yalkana iztît. Uspane maza ashampa diosta, Dianara wakpuj wainñara. Uspane kwisha akkwan pial kana kiara, sun yalkin paininta akwa. 25 Usne usparuzakas sun ainki kal kittuzakas wanmakninat kit usparuza kaiznara: “Izmuruz. Une au kalkasa kana kimtumakpas pian, wat uzanapa. 26 Une Pablo kaizta aizpa mîara. An ampune au sarît diosne ‘Dios chi’ kiztu. Pablone sunkana kirît, au Éfeso pîpulurakas wan Asia surakas au sarît diosta mîamanpa. 27 Awa au kal kwail i kizarane, aune au kal kashinamakpas. Kawarain awane ashampa dios Dianawa yalta wakpuj wainshiamanazi. Watchi minñanazi. Awa Diana wat chi kizamîzkane, Dianawa yalta wakpuj wainna îamanazi. Mane watcha wan awa Asia sura uztuzkas wan awa mamaz sura uztuzkas ussa wakpuj wainñamtu.” 28 Demetrio kaizta aizpa mîarawane, uspane kwisha aliz kulat kit kwianara: “Au Diana, Éfeso pîpuluras, kwisha wari,” kizara. 29 Suasne an akkwan awane Éfeso pîpuluras kwianamîzta. Uspane Gayorakas Aristarcorakas, Macedonia suras arîttuza, piznara. An paasne Pablora kanpailta. Wanne uspa wanmakmu yaltakima usparuza tain kit îninnaara. 30 Pablone sua napshira, awara kwinta kinana. Jesústa pianturuzne ussa napninarachi. 31 Mînpazha înintuzne, Asia suras attuzne, Pablowa izmuruzkas uspa pit îninñara, sua napmanpa. 32 Wanmakmukin tuasmin, mamaztuzne chiwazha kwianara. Mamaztuzne mamaz pit kwianara. Wan awane pilchapuzara. Anza akkwan awane chikishma wanmakkamtu wat pianchi. 33 Mînpazha Judío awaruzne Alejandrora nuppainñara, awa paizkakin kunnat kit paranpa. Uspane Alejandrora paikuara, uspa akwa kwinta kin. Alejandrone chihtîkasa puñain kiznara, Judío awa akwa kwinta kin. 34 Us Judío awa i piankamarawane, uspane paas urakima ka kwianara: “Au Dianane, Éfeso pîpuluras, kwisha wari,” kizara. 35 Suasne pîpuluwa pînkîh pammikane wanta puñain paninat kit kaiznara: “Éfeso awaruz mîrain. Wan awane ashampa dios Dianawa pian. Aune Dianawa yalta iztumakpas. Sua awa wakpuj wainñamtu. An Dianawa uk chiyuras taizta pianmakpas. 36 Mînminkas sun kirîtchi kisachi. Puñain parain. Chiwazha kwail kitchasmin, wat minñarawa. 37 An ampuruzne, u karaarîttuzne, u diospa yalta kwail kizarachi. U ashampa diosta kwail paraarachi. 38 Katmizna Demetriokas uskasa kal kimtuzkas mînpazhara kwail kirît kizarane, katsa mikwara îarawa. Katsa mikwane u kaizamtu aizpa mînazi. Suain ît kit kwinta kitpa, mamazta kwail kirît kizna. 39 Mamaz tuntu kwinta kishitne, une katsa mikwa wanmakmukin îarawa. 40 Ma u sun kiarît akwa, Romano înintuzne aashina, u waya kiashimtu kizanapa. ‘Chikishma pilchapuzarît’ mîmaakane, aune kain sînkasachimakpas,” kiznara. 41 Sun kiztawane, wanne wanmaktukis îara.
Pablone Macedonia surakas Grecia surakas îmtu
1 Pilchapuztu pailtawane, Pablone Jesústa piantuza akwanat kit kurunnara, usparuza kiwainna. Suasne “îru” kiz kit saya kwat kit Macedonia sura îra. 2 Wan pîpuluwara îmtuasmin, usne kaiznat kit Jesústa piantuza kiwainnara. Kwiztane Grecia sura piannara. 3 Suane kutña mishtakima tuara. Siria sura kanuara înpain pakane, usne Judío awaruz ussa kwail kishiamtu piankamta. Katmizna min kit pilparain kailta. Mamasa Macedonia suwarain pînta. 4 Sópater, Pirrowa painkulkas, Berea pîpuluras, Aristarcokas, Segundokas Tesalónica pîpuluras, Gayokas Derbe pîpuluras, Timoteokas, Tíquicokas Asia suras, Tróþmokas Asia suras, ussa kanpaara. 5 Sun izmuruzne an ñamin îat kit Troas pîpulura aumîza tîrizara. 6 Pishta pan kiñakasa kumchi pailtawane, aune Filipos pîpulukis kanuawara puzwiznash. Cinco payura Troas pîpulura pianaiznash. Suane siete payu maaiznash.
Pablone Troas pîpulura uztuza iznana îmtu
7 Sábado amtane aune Diosta piantuzkasa wanmakaiznash, kumira kwan. Suane Pablone Jesústa piantuza kamtanara. Tîlawa îmtu akwa, kakwamtakima akkwan pit paramîzta. 8 Aune kwash yalta wanmaktît puranash. Suane akkwan impil aiztuara. 9 Euticone, musittune, kwashta izkulamkin uzta. Pablo akkwan urakima kamtamtuasmin, usne pitshimîzta. Kwisha tînta pittawane, usne kwashtas izkulamkis taizta. Uspane irîtmikasha piltas tainak kit kamara taara. 10 Suasne Pablone pulamal kihsh kit irîtmikasha îsalta tut kit sayakwara. Izmuruza kaiznara: —Ishkuman. Irachi. Ka. 11-12 Uspane musittu irîtmikasha kamin mîlat kit kwisha wat kulara. Suasne Pablone kail kit yalta napta. Kumira nailtawane, kuara. Pablone kînnakima kwinta kinara, înkima.
Troas pîpuluras Mileto pîpulura îamtu
13 Pablo pilpara îshimtuasmin, aune an ñancha kanuawara Aso pîpulura îaiznash, sua Pablora wanmalna. 14 Asora wanmaktawane, Pablone kanuara waat kit aukasa Mitilene pîpulura îaiznash. 15 Suas puzarawane, tîlawane Quío pîpulumara pînaiznash. Maza payu marawane, aune Samos pîpulura kanua pianamkin pîpulura pianaiznash. Trogilio pîpulura kwaizkultawane, aune Mileto pîpulura pianaiznash. 16 Asia sura akkwan payukima nukkultuchi akwa, Pablone Éfeso pîpulura îtchi. Usne masain Jerusalén pîpulura piannashira, Pentacostés pishta suain tuan.
Pablone wanmakmu înintuza Éfeso pîpuluras kainanamtu
17 Mileto pîpulura mamtuasmin, Pablone wanmakmu înintuza Éfeso pîpuluras akwanpa îninnara. 18 Pianaakane, ka kaiznara: “Na uruzkasa uztuasmin, une na miza uzta wat pian. Sun payura Asia sura piannatpane, 19 nane kiwainmumikakana pailta payu Anpatta kiwainmîztau. Ap Anpatpa kal kimtuasmin, nane aztau, Judío awa nawa kwail kiashimtu akwa. 20 Nane uruza wan kainanarau, uruza kiwainshimtu akwa. Wan awa purakinkas uspa yalkinkas Dios pit kainanat kit uruza kamtanarau. 21 Judío awaruzakas Judío awachiruzakas kainanarau, uspa kwail kiarît aizpa maizanapa, Anpat Jesucristora nîjkulanapa. 22 Mane Jerusalén pîpulura îshimtus, Sînam Izpul nawa kaizta aizpa kin. Sua awa nawa kishiamtu aizpa pianchish. 23 Wan pîpulura na îmtura, Sînam Izpulne nawa ka kaizchish: ‘Awa nawa kajchira sîp kit tînta naizninanazi.’ 24 Sun akwa, nane ishkumtuchish. Ishinas. Uzshinas. Chima kishinaka pianchish. Nane ap kal pailtau. Anpat Jesúspa kal wan nawa chîhkat aizpa kapal kirau. Dios watsal pit kainashinas, Dios awara wat kiwainanapa. 25 Mane mîrain. Nane uruza ît kit Dios miza uruza îninnashimtu kainanarau. Une nawa mamaz payura mizurainkas izamanazi. 26 Katmizna nane uruza wan Dios nawa chîhkarît aizpa kainanarau. Nane uruza wan kamtanarau. Mînminkas nawa kwail kirît kizsachi. 27 Nane uruza wan Dios kishimtu aizpa kainanarau. 28 Katmizna mane une uruzpain iztain. Sînam Izpulne sun kal uruza chîhkanarît, Diosta wanmakmuruza iznat kit kiwainanapa. Diospa painkul irawane, paiña aimpi puztawane, Diosne awaruza akwanara, wanmakkat kit paiña kwalkanain uzanapa. 29 Na îkane, mamaz kwail kamtamtuzne, înkal kwizakanane, anazi, Diosta piantuza kwail kianapa, nil chi kamtananapa. 30 Mînpazha uruzpain pîrail kaizat kit kamtaanazi, Jesústa piantuza watcha mîamanpa, usparuzain kanpaanapa. 31 Uruzpain iztain. Nîjkultain. Nane kutña añokima amtakas payukas wan uruza kurunarau. U akwa az kit naiztau. 32 Mane, Cristora piantuz mîrain. Minpara nane Diosta paikumtus, Dios uruza iznanapa. Diosta paikumtus, paiña watsal pit uruza nil uzninnanapa, us kin namtît aizpa sappanapa. Diosne ussa chîhkamturuza kiwainnanazi. 33 Nane mamazpa pialkas mamazpa urukas mamazpa pïnkas pashitchish. 34 Sunkana ap chihtîkasain tînta kal kirau, ap pialkasain chiwazha na we aizpa paina. Nakas ap izmuruz we aizpa usparuza mîlanarau. 35 Nane pailta payu uruza sunkana kamtanarau, kal kiaiznapa, we mîjtuza kiwainanapa. Anpat Jesúspa pit kaizta aizpa mîrain: ‘Mamaztuza mîlamtumikane anza wat kulnazi. Saptumikane anza wat kulmanazi.’ ” 36 Sunkana awara kaiznarawane, Pablone wakpuj wain kit Diosta uspa akwa paikwara. 37 Wantuzne azat kit Pablora saya kwaara, “îru” kizka. 38 U nawa chinkas izamanazi kiznara akwa, uspane kwisha tayalara. Suasne ussa kanpaara kanuarakima.
Pablone Jerusalén pîpulura îmtu
1 Izmuruza tîwij îtpane, aune kanuara waat kit Cos sura masain nil îaiznash. Tîlawara Rodas sura îaiznash. Suasne Pátarara pîpulura pianaiznash. 2 Suane Fenicia sura îmtu kanua wanmalaiznash. Waat kit îaiznash. 3 Chipre su pi paizkakin pîntuasmin, sun sura au puiyawara izat kit pînaiznash, Siria surakima. Kwiztane Tiro pîpulura pimakin pianaiznash, sua chiwazha kanuara wa aizpa chîhkan. 4 Aune Jesústa piantuza wanmal kit siete payukima maaiznash. Uspane Diospa Izpul kaizta aizpa Pablora kaizara: “Jerusalén pîpulura îsachi,” kizara. 5 Siete payu wan kapal marawane, Tiro pîpuluras îaiznash. Wan Jesústa piantuzne, wan ashampakasa pashpakasa auruza kanpaara pîpulumarakima. Suane pi ksukin wakpuj wainñat kit Diosta paikuanash. 6 Suasne saya kwaat kit “îru” kiztawane, kanuara waiznash. Uspane uspa yaltain kaiyara. 7 Tiro pîpuluras kanuawara îat kit minpara Tolemaida pîpulura pianaiznash. Suane aune Diosta piantuza “kakishapu” kizaiznash. Uspakasa maza payuin nukkulanash. 8 Tîlawara Pablokas uskasa îmtuzkas tas îat kit Cesarea pîpulura pianaiznash. Suane aune Felipewa yaltakima îaiznash, uskasa mana. Înintaruzne ussa naarît, Dios watsal pit kainammmika namnapa. Usne siete narîttuztas ara. 9 Felipene ampara pashu mîjara. Uspane kasara kiarachi. Uspane Dios kaiznara aizpa kainanara. 10 Akkwan payu chikima Cesarea pîpulura purasmin, Agabone, Dios kainammikane, Judea suras 11 aumîza iznana ara. Pablowa aya kîra piz kit paiña mittîkas paiña chihtîkas sun aya kîrakasa kuht kit kaizta: —Sînam Izpul ka kiztui: “Hebreo awane Jerusalén pîpulura aya kîrapamikasha kuht kit Judío awachiruza chîhkaanazi.” 12 Sun mîarawane, aukas Cesarea pîpulura uztuzkas Pablora paikuamîzta, Jerusalén pîpulura chi îmanpa. 13 Pablone sînkanara: —¿Chikishka azpuspas? Une nawa tayalnintu. Uspane nawa cadenakasa kuhshina. Nane kajchira înpain ish. Nane Anpat Jesús akwa Jerusalén pîpulukin inapain ish. 14 Pablo au kaizta aizpa mîshimtuchi akwa, puñain paarînash. Anne ussa kaizmanash. Minpara “Dios pashit aizpa kitpa” kizaiznash. 15 Sun kitpane, aune îmîzna watsaaiznash. Suas Jerusalén pîpulura îaiznash. 16 Mînpazharuzne Cesarea pîpuluras, Jesústa piantuzne, aumîza Mnasónpa yaltakima pitna kanpaara. Usne an ñancha Chipre suras at kit ñamin Jesústa piankamta.
Pablone Santiagora izna îmtu
17 Jerusalén pîpulura pianatpane, Diosta piantuzne aumîza wat sappara. 18 Tîlawara Pablone aukasa îat kit Santiagora izaiznash. Suane wanmakmu îlaparuzne purara. 19 Usparuza “kakishapu” kiznarawane, Pablone impara imparain usparuza paiña kal kirît aizpa kwinta kinara, Judío awachiruz Diosta piankamanapa. 20 Sun mîarawane, uspane “Dios kwisha wari” kizara. Suasne Pablora kaizara: —Au izmuruz, mîrain. Mane kwisha akkwan mil Judío awakas Jesústa nîjkulara. Wanne nil chaamtu. Moisés kamtara aizpa mama kiarawa kizara. 21 Uspane sunkana minñat kit kiznara. Nune Judío awaruza, mamaz sura uztuza, mamaz tuntu kamtanamîztu. Moisés kaizta aizpa kinchi kizamtu. Ampu pashparuza aya tîtnachi, circuncisión kinchi kizamtu. Judío awakana uznachi kizamtu. Sunkana nu kamtanarît aizpa kizamtu. 22 ¿Aune chima kinpai? Nu arît piamkamtane, wan awane wanmakkanazi. 23 Aune nua kurunaiznash, au kaiztu aizpa kinpa. Apainne ampara ampune aukasa pura. Uspane Diosta chiwazha kin namat kit Moisés înintît aizpa kishiamtu, Dios iztakin sînam kulanapa. 24 Nukasa usparuza minari. Uspakasa ît kit Dios iztakin sînam kulninti, Moisés înintîtkana. Chiwazha uspa pui aizpa pariyara tari. Sun kitpane, uspane kîzpu ash tîtninnashina. Sunkana kitne, wan Judío awane nu Moisés kamta aizpa kimtu piankamanazi. Suasne uspane uspa mîara aizpa watchachi nîjkulanazi. 25 Aune Judío awachiruzakas pînkîh paramakpas. Aune sun Jesústa nîjkulturuza kuruntamakpas, chiwazha ña dios awakana sarîtta mîlarît aizpa kuamanpa. Kalpa kuhtît aimpi puztakine, ña kuman. Aimpikas kuman. Ampuruzne mamazpa ashampara sanachi. Ashamparuzne mamazpa ampura sanachi.
Judío awane Dios katsa yalkin Pablora pizamtu
26 Suasne tîlawara Pablone ampara ampura uskasa mîlnat kit Moisés înintît aizpa kit kit Dios iztakin sînam kulninnara, uspa kin namtît aizpa kianapa. Kwiztane usparuzne Dios katsa yalta nappat kit pariyara miza payu sun sînam kulnintu payura pailtu kainara. Sun payura ampara ampune chiwazha Dios îninta aizpa mîlanazi. 27 Siete payu pailnapain. Mînpazha Judío awane, Asia suras awane, Pablora Dios katsa yalkin izara. Uspane Pablora pilchapuzat 28 kit kwianara: “Israel awa, kiwainchain. An ampune wan sura uztuza kamtanamtu cha. Usne au Israel awaruza aliz kulnarît. Usne Moisés kamtara aizpa mîshitchi. Uskas Dios katsa yalta sînamchi namnintît. Mane Griego awara apain karara, Dios katsa yalta napnapa. Sun akwa, usne sun sînam yalkin sînamchi namninta.” 29 Uspane sun kizara, ñamin Pablora Éfeso pîpulukin izara akwa. Sua Tróþmone, sun Griego awane, Pablokasa chara. Pablo ussa, sun Griego awara, Dios katsa yalta mîltît minñara. Griego awane sua napsachi. 30 Wan pîpuluras awane aliz pilchapuzat kit ãïnmin aara. Suasne Pablora pizat kit Dios katsa yaltas tain kînaara pianamalkima. Masain pîjta sîppara. 31 Wan Jerusalén pîpulukin uztuz pilchapuzamtuasmin, suldaru îninmikane me Pablora piantashimtu mîra. 32 Suasne usne paiña suldaru kiwaintuza wanmakninnat kit awa purakin ãïnmin pianaara. Suldaru îninmikashakas suldaruruzakas izarawane, Judío awane Pablora an aim kiarachi. 33 Suasne suldaru îninmikane kasha at kit Pablora piz kit “ussa cadena kuhti” kiznara. Kwiztane “¿nune mîn mas?” mîmara. “¿Nune chi kirît?” mîmara. 34 Judío awane mamaz mamazmin kwianara. Suldaru îninmikane chinkas mîsachiwal, pilchapuzamtu akwa. Usne Pablora suldaru kammu yalkin mîlninnara. 35 Suldaru kammu yal numkin piannatpane, suldarune Pablora kwat kit nuninta, aliz Judío awa ussa pizamanpa. 36 Wanne kwizta aat kit ka kwianara: “Usne irawa,” kizara.
Pablone wan awaruza us kit aizpa kainanamtu
37 Pablo Suldaru kammura naptuasmin, Pablone suldaru îninmumikasha kaizta: —Chiwazha kizshinash, kizta. Suldaru îninmikane sînkara: —¿Nune Griego pit paramtukish? 38 Suasne ¿Nune Egipto awa chikish? ¿Nune akkwan payu ñamin waya kininat kit ampara mil waya kimtuzkasa pul sura mîlnamas? 39 Suasne Pablone ussa kaizta: —Nane Judío awa ish. Cilicia suras at kit kwisha katsa wat Tarso pîpulura kawira. Nua paikumtus, na awaruza kwinta kinana. 40 Suldaru îninmikane ussa kwinta kininta. Pablone kammu yal numkin kun kit chihtîkasa awara puñain paninara. Puña parîkane, Pablone awaruza Hebreo pit kwinta kinat kit ka kaiznara:
1 “Israel awaruzkas an Israel awa papihshtuzkas nawa mîzhain. Nane na kit aizpa kainanash.” 2 Hebreo pit paraka mîarawane, uspane an akkwan puñain paarît. Pablone usparuza ka kaiznara: 3 “Nane Judío awa ish. Cilicia sura Tarso pîpulura kawiraish. Kwiztane Jerusalén pîpulukin kawirau. Apane Gamalielne, Judío îlaparuz kamtamtu aizpa nawa kamtash. Nane pailta payu Dios Judío awaruza kaizta aizpa kishirau. Kawarain ma payu une sunkas kiashimtu. 4 Nane ñamin Jesústa piantuza piznarau, piantanakima. Ampuruzakas ashamparuzakas piznat kit kajchira sîpnarau. 5 Pariya înintuzkas wan Judío îlapatuzkas nawa piankamara. Uspane nawa pînkîh mîlaara, Damasco pîpulura mîlnapa, Cristora piantuza piznanapa, au Judío îninmuruza chîhkanapa. Nane sua ît kit Jesústa piantuza sairau. Jerusalén pîpulukin karanarau, usparuza ilnana.”
Pablone miza Jesústa piankamtît kainanamtu
6 “Na miwara îmtuasmin, Damasco pîpulura piananpain arau. Sua paizka payu paka masain chiwazhane chiyuras pankanain kwisha malta. Sun iztawane, 7 pilta naintîrau. Suas mînpazha pit kaizka mîrau: ‘Saulo, Saulo. ¿Chikishma nune nawa kwail kimtus?’ kizta. 8 Suasne ussa mîmarau: ‘Anpat. ¿Nune mînmas?’ kiztau. Nawa sînkaish: ‘Nane Jesús Nazaret pîpuluras ish. Nuin nawa kwail kimtu,’ kizta. 9 Nakasa îmturuzne sun pankanain izat kit ishkuara. Uspane an pit nawa kwinta kit aizpa mîarachi. 10 Suasne kaiztau: ‘Ap Anpat, ¿Chima kinpai?’ Anpatne nawa kaizish: ‘Kuhsak kit Damasco pîpulura îmîzti. Tane nu wan kishimtu aizpa kiznash.’ 11 Sun pankana nawa aiztu akwa, nane izsachi parish. Katmizna ap kanpamtuzne nawa sailta tainñara, Damasco pîpulura piannankima. 12 Tane maza ampune, Ananías muntîtmikane, uzta. Usne Moisés kaizta aizpa wat kira. Wan Judío awa Damasco pîpulura uztuzne us akwa kwisha wat kwinta kiara. 13 Ananíasne nawa izna ara. Piannatpane, kaizish: ‘Saulo, ap izmumika, mamasa up kasu izkulti.’ Masain wan izkulkwerau. 14 Suasne nawa kaizish: ‘Au kwalpa Diosne ñamin nua narît, us kishimtu aizpa piankamnapa. Usne nua narît, nilmikasha izna, paiña pitmin mîna. 15 Mane nune awaruza nu Jesúspa piankamta aizpakas izta aizpakas nu mîra aizpakas kainammîztawa. 16 Mane an tîrizman. Kuhsak kit munti. Jesústa paikwari, up kwail kirît aizpa kwizninnapa.’ ”
Diosne Pablora Judío awachiruza îninnamtu
17 “Jerusalén pîpulura kailtawane, nane Dios katsa yalta nap kit Diosta paikwarau. Suane kainkizpamtuasmin, chiwazha iztau. 18 Nane Anpatta iztau. Usne nawa ka kaizish: ‘Jerusalén pîpuluras puz kit îri. Uspane nu nawa kaizta aizpa mîamanazi.’ 19 Suasne nane ussa kaiztau: ‘Anpat. Uspane na wan Judío kammu yalta îrît pian. Nane nua nîjkulturuza piznat kit kajchira sîpnarau. Nane usparuza aim kinarau. Uspane sun pian. 20 Estebanne up kiwainmika ara. Usne awaruza nuwa kainanara. Ussa piantaamtuasmin, nane sua kun kit ussa piantara aizpa nîjish. Nakas piantamturuzpa pïn iztau.’ 21 Suasne Anpatne kaizish: ‘Ît. Nane attishta Judío awachiruza îninnamtus.’ ”
Pablokas Roma suldaru îninmikakas
22 Judío awachira îmtus kizka mîarawane, wanne kwianamîzta: “Ussa piantarawa, an sukin uzmanpa,” kizara. 23 Uspane kwianamîzta kwisha. Aliz akwa, uspa pïn ulpianat kit pul pil kwash sunakninñara. 24 Suldaru îninmumikane suldaruruza îninara, Pablora suldaru kammu yalta mîlnapa. Usne ussa ilninshira, paranpa. Usne chikishma awa sunkana Pablora aliz kwianamtui kiz piankamshira. 25 Ussa tîtkasa kuhtawane, ussa ilnapain mara. Pablone katsa suldaru îninmikasha mîmara: —¿Romano pîpuluras awara iltukish? Nune nawa ilsachi, na Roma suras ara akwa. Mama nune nawa katsa mikwara mîlmas. Katsa mikwane nawa kwail kirît kiztachi. 26 Sun mîrawane, suldaru îninmumikane ît kit katsa suldaru îninmikasha sunpa parat kit kaizta: —Kuiraruin. An ampune Romano pîpuluras awa i. 27 Katsa suldaru îninmikane Pablo tukin pianat kit mîmara: —Kaizcha. ¿Watcha nune Romano awakish? Pablone sînkara: —Watcha i. 28 Suasne katsa suldaru îninmikane ussa kaizta: —Nane akkwan pial tarau, Romano awa namnapa. Pablone ussa kaizta: —Nane Romano awa ish, kawira akwa. 29 Sun mîarawane, Pablora ilshimturuzkas katsa suldaru îninmikakas Pabloras paimpa îara. Pablo Romano awa ara nîjkulakane, uspane ishkuara, ussa pizara akwa, ussa cadena kuhara akwa.
Pablone Judío katsa mikwakasa kwinta kimtu
30 Tîlawara katsa suldaru îninmumikane Pablowa piankamshira. Chikishma Judío awa Pablora kwail kirît kizamtu aizpa piankamshira. Pablowa cadena chîhtawane, usne pariya înintuzakas Judío katsa mikwaruzakas wanmakninnara. Suasne Pablora akwanat kit uspa purakin kunninta.
1 Pablone Judío katsa mikwaruza iznat kit kaiznara: —Ap aimpihshtuz, mîzhain. Nane makima Dios iztakin wat min kit wat uztau. 2 Suasne Ananíasne, pariyawa îninmumikane, Pablo kashara uztuza îninnara, Pablowa pitkin kuzanapa. 3 Pablone sînkara: —Diosne nua sunkanain kuznazi. Nune kwail awa i. Suain uztuasmin, nune Moisés para akwa nawa kwail kirît kiztu. ¿Chikishma nawa kuznapa îninnamtus? Nuin Moisés kaizta aizpa mîmtuchi. 4 Sua puraruzne ussa kaizara: —Nune Diospa katsa pariyara kwail kizmun. 5 Pablone kaiznara: —Aimpihshtuz. Nane an katsa pariya îninmumikasha pianchiarau. Dios pînkîhta ka parît: “Uspawa îninmumikasha kwail kizman.” 6 Suasne mînpazha Saduceo awakas Fariseo awakas wanmakkarît. Sun nîjkultawane, Pablone katsa mikwa wanmakturuza ka tînta kaiznara: —Ap aimpihshtuz, mîrain. Nane Fariseo awa ish. Ap kwalkas Fariseo awa mai. Uspane nawa kwail kirît kizamtu, na awa irîttas mamasa kakultu kamtamtu akwa. Watcha, Dios irîttuza mamasa kakulninnanazi nîjkultus. 7 Sun mîarawane, Fariseo awakas Saduceo awakas usparuzpain tînta kwinta kiamîz kit paimpa paimpa wanmakkara. 8 Saduceoruzne awa irîttas kakultuchi kizamtu. Ángelkas wachi; izpulkas wachi, kizamtu. Fariseoruzne sun wanta nîjkulamtu. 9 Wan tînta kwianamîzkane, mînpazha Fariseo awane, Moisés kaizara aizpa kamtamtuzne, kaiznara: —An ampune chinkas kwail kitchi. Ussa mîshipuspas. Sunkana maza izpul, maza ángel ussa kwinta kitka. 10 Tînta pilchapuzamtu akwa, Suldarura îninmumikane Pablo akwa ishkwara, awa ussa piantashiamtu akwa. Suasne suldaruruza îninara, Pablora usparuztas ukkanapa. Mamasa suldaruwa kammu yalkin mîlta. 11 Tîlawa amtane Anpatne Pablora izpan kit kaizta: “Pablo. Tînta kulti. Nune na akwa akki Jerusalén pîpulukin kwinta kira. Sunkanain Roma pîpulura na akwa kwinta kitpa.”
Mînpazha Pablora piantashimtu
12 Tîlawara mînpazha Judío awane wanmakkat kit nîjkulara, Pablora piantana. Uspane ka kin namara: “Aune chinkas kuaizamanapas, ussa piantanakima.” 13 Cincuenta panapain Judío ampuruzne sunkana kin namara. 14 Uspane pariya înintuzparakas Judío îlapa înintuzparakas îat kit kaiznara: —Aune chinkas kwanchi kin namtamakpas, Pablora piantanakima. 15 Mane ukas mamaz Judíowa mikwaruzkas suldarura înimmikwara paikwarain, tîlawara u purakin Pablora karanpa. Ussa ka kaizti: “Aune ussa an nil mîmapuspas.” Apa atchasmin, aune tîrîzaiznapas, ussa piantana. 16 Pablowa sobrinone sun piankam kit suldaru kammukin sunpa Pablora kainana îra. 17 Sun mîrawane, Pablone suldaru îninmumikasha akwat kit ussa kaizta: —An musittu suldarura îninmumikasha mîlti. Usne ussa chiwazha kizna mîja. 18 Suldaru îninmumikane katsa suldarura îninmumikasha ussa mîl kit kaizta: —Pablone, sîptîtmikane, nawa akwat kit paikwara, sun pashpara akkikima karanpa. Usne nua chiwazha kizna mîja. 19 Katsa suldarura îninmumikane sun pashpara chihtîkin piz kit mîl kit paimpa mîmara: —¿Chima kizshiras nawa? 20 Suasne pashpane kaizta: —Judío awaruzne nîjkulari, tîlawara nua paikwan, Judío îninmumika wanmaktukin Pablora mîlnapa. Uspane kaizanazi: “Aune Pablowa an nil mîmashipuspas.” 21 Usparuza mîmun. Cincuenta panapain Judío ampuruzne kularît tîrizamtu. Uspane chinkas kuamtuchimakpas kin namara, Pablora piantanakima. Mane uspane up sînkamtu aizpa tîrizat kit Pablora piantanapain. 22 Suasne Suldarura îninmumikane pashpara îri kiz kit mînainkas us kwinta kit aizpa kainanachi, kizta.
Suldarura îninmumikane Pablora Félixtakima înintu
23 Suasne katsa suldaru îninmikane paas ainki suldaru îninmumikasha akwanara, akkwan suldarura wanmakninnanapa. Paas cien suldaru mittîwarain îamtu wianta. Setenta suldaru caballowara anuzamtu wianta. Paas cien suldaru tî kwizkasa chaamtu wianta. Wan wanmakkarawane, uspane Cesarea pîpulura tîlpaka, nueve urara îanapain. 24 Ussa an îninnara, caballo watsanapa, Pablo anuznapa. Ussa mîlti, katsa mikwa Félixtakima, watmin piananapa. 25-26 Uspakasa sun pînkîh pat kit îninta: Nane Claudio Lisias mun ish. Nane “kakishapu” kiztus. Nune, Félix muntîtmikane, au kwisha wat katsa mikwa i. An pînkîh nua înintus. 27 Judío awane an ampura pizat kit piantanapain. Us Romano awa i piankamtawane, nane ap suldarukasa ît kit usparuztas nakanarau. 28 Nane chikishma kwail kizamtui kiz piankamshirau. Katmizna nane ussa Judío katsa înintuz wanmakkarît purakin mîltau. 29 Uspa înim akwa, uspane ussa kwail kirît kizamtu. Ussa piantana nilchi. Kajchirakas sîpna nilchi. 30 Judío awa ussa piantashimtu piankamtawane, nane nu tukin ussa azain înintau. Ussa kwail kirît kizmuruza kurunnarau, nu iztakin îanapa. Suane uspane us kwail kirît aizpa nua kizashina. Anne kaiztuchish. 31 Suasne katsa suldarura îninmumika înintu aizpa mîarawane, wan suldarune Pablora pizat kit amtawara ussa Antípatris pîpulurakima mîlara. 32 Tîlawara suldaru mittîwara îmtuzne suldaru kammu yalkin kaiyara. Caballokasa îmtuzne Pablokasa îamîzta. 33 Cesarea pîpulura piannaarawane, uspane katsa mikwara pînkîh chîhkara. Pablorakas sua tîwij îara. 34 Pînkîh iztawane, katsa mikwane Pablora mîmara: “¿Nune mîntas mas?” Cilicia suras arît piankamtawane, 35 ussa kaizta: “Nu kwail kirît kizmuruz aakane, nua mînash.” Suasne suldarura îninta, ussa izanapa, Herodespa înintu yalta.
Judío awane Pablo kwail kirît kizamtu
1 Cinco payu pailtawane, Ananíasne, katsa pariyawa îninmikane, Cesarea pîpulura pianara Judío îlapa înintuzkasa. Tértulone, awaruza pakpanammikane, pianara. Uspane katsa mikwa iztakin kwinta kiara, Pablora kwail kirît kizna. 2 Pablora karaarawane, usne Tértulora paranpa akwara. Suasne Tértulone us kwail kirît kizmîz kit Félixta kaizta: —Anpat. Nawa mîzha. Nune au katsa mikwa i. Nu kwisha wat min kit nil înintu akwa, aune akkwan payukima kalpain uzpuspas. Ukas au su uzturuza kiwainamtus. 3 Aune nu chiwazha au akwa kira aizpa aishtaish kizpuspas. 4 Nane nua kwisha kaizapmanash. Katmizna nua paikumtus, aumîza pitchin mînapa. 5 Aune sun ampura wanmaltîtmakpas. Usne katsa ki piztîtkanain iztît, awara kaizaptu akwa. Uskas wan sura Judío awara paimpa paimpa wanmakninnamtu. Uskas Nasareno awawa îninmika i. 6 Us Diospa katsa yalta sînamchi sanintu, Griego awa sua napnintît akwa. Sun impa. Katmizna aune ussa piztamakpas. Au mikwa kaizta akwa, aune ussa ilshiaiznash. 7 Suasne Lisiasne, katsa Suldaru îninmikane, akkwan suldarukasa aat kit ussa auruztas tînta ukkarît. 8 Suasne Lisiasne aumîza îninnara, up iztukin îanapa, Pablo kwail kirît kizna. Nuin ussa mîmashina. Suasne nune au kaizara aizpa watcha i piankamnazi. 9 Judío awa wanmakmuruzne kawarain watcha i kizara.
Pablone Félix iztakin paramtu
10 Suasne katsa Félix mikwane chihtîkasa Pablora anta, paranpa. Pablone ka kaizta: “Nane nu au sura akkwan añokima înintît pianish. Katmizna nane na kit aizpa nua parashimtus, piankamnapa. 11 Paas domingoin Jerusalén pîpulukin piannarau, Diosta wakpuj wain kit Diosta paikwan. Kawarain nune sun mîmashinai. 12 Uspane mînkasainkas tînta kwinta kimtu nawa wanmalarachi. Dios katsa yalkinkas Judío kammu yalkinkas mamaz pîpulukinkas mînainkas kaizaptu nawa wanmalarachi. 13 Na kwail kirît kizarakas, an awaruzne chinkas annasachi. 14 Nane nua watcha kaiztus. Nane Anpatpa masas miwara îmtus. Sun miwarain nakas au irît kwalkana sun Diostain wakpuj waintus. Uspane ‘sun mine kwail i’ kizamtu. Nane Moisés pînkîh para aizpakas Dios pit kainammtuz kaizara aizpakas nîjkultus. 15 Nakas uspakas kawarain Diosta tîrizpuspas, us kaizta aizpa kin. Diosne irîttuzakas kwailtuzakas wattuzakas kakulninnanazi. Sun tîrizpuspas. 16 Katmizna nane pailta payu wat min kit Dios iztakinkas awa iztakinkas nil uzshimtus. 17 Akkwan añochikimain mamaz sura chatpane, nane ap sumarain kailtau, Judío awara pial mîlan, wakara piantarîtkas Diosta mîlan. 18 Na sun kimtuasmin, mînpazha Judío awaruzne Asia suras aat kit Dios katsa yalta nawa wanmalash. Na Moisés înintît aizpa kitpane, Dios iztakin nawa sînam sanintawane, uspane sua nawa izara. Akkwan awa purachi. Mînminkas pilchapuzarachi. 19 Mînpazha atchiruzne na kwail kirît aizpa kizashira. Uspain aarawa, up iztakin na kwail kirît kizana. 20 Uspa na kwail kirît kizashitkine, katne akki puraruzne na kwail kit aizpa kiztain. Na Judío katsa mikwaruz iztakin kuntuasmin, ¿Chima kwail kizzi nane? 21 Uspa iztakin kuntuasmin, nane tînta ka kaiznarau: ‘Mane uspane na kwail kirît kizamtu, na Dios irîttuza kakulninnamtu kiztît akwa.’ ” 22 Félixne Anpatpa masas miwara wat pian. Usne Pablora kwail kirît kizshitchi. Katne usparuza kaiznara: —Lisias, katsa suldarura îninmumika, akane, nane na kishimtu aizpa uruza kaiznanash. 23 Suasne Félixne suldaru îninmumikasha îninta, Pablora iznapa. Ussa sîpnintachi. Pablowa izmuruzne ussa izashina, ussa kiwainapa.
Pablone Félixkasa Drusilakasa kwinta kimtu
24 Akkwan payuchin Félixkas Drusilakas, paiña Judío ashampakas, mamasa piannail kit Pablora akwanpa îninta, Pablo usparuza Jesúspa kamtanapa. Uspane Jesucristowa piankamshiilta, ussa nîjkulna. 25 Pablone usparuza ka kaiznara: —Wat uztain. Kwail kishitne, kiman. Mamaz payura Diosne anazi, kwail kimtuza ilnana. Pablo sun kizkane, Félixne ishkwat kit kaizta: —Îmîzti mane. Mamaz an wat payune mamasa nua akwanash. 26 Félixne Pablora akkwan piji akwara, uskasa kwinta kinpa. Usne Pablo pial tanapa tîrizta, ussa chîhtna. 27 Paas años sunkanain pailtawane, Félixne Pablora chîhtshitchi, Judío awaruz pashit aizpa kishimtu akwa. Suasne Félixne an katsa mikwakana puzta. Kwiztane Porcio Festone katsamikwa namta, Félix înimkin.
Pablone Festokasa kwinta kimtu
1 Suasne Festone at kit katsa mikwa namta. Kutña payu pailtawane, Cesarea suras Jerusalén pîpulura nura. 2 Suane pariya înintuzkas anza katsa Judío awaruzkas Festora îara, Pablo kwail kirît aizpa kizna. 3 Uspane ussa paikuara, Pablora Jerusalén pîpulura mîlnapa. Uspane ussa miwarain piantana minñara. 4 Festone Pablo kajchira wa Cesarea pîpulura sînkara. Us sua îshimtu akwa, 5 Festone kaiznara: “U îninturuzne nakasa Cesarea pîpulura îarawa. An ampu kwail kirîtne, une sua us chiwazha kwail kirît aizpa kizashina.” 6 Jerusalén pîpulura an diez payukimain marawane, Festone Cesarea pîpulura kihshta. Tîlawara paiña înim uzmura uz kit suldarura îninta, Pablora karanpa. 7 Pablo naptawane, Jerusaléntas Judío awaruzne ussa kashara aat kit kwisha akkwan kwail kirît ussa kizamîzta. Pablora akkwan kwail kirît kaizarîtkas, uspane paiña kwail annasachi. 8 Suasne Pabloin us akwa pakpara: —Nane chinkas kwail kitchish. Judío awawa îninta aizpara kwail kitchish. Dios katsa yaltakas kwail kitchish. Romano katsa mikwarakas kwail kitchish. 9 Festo Judío awara wat kinashimtu akwa, Pablora mîmara: —¿Jerusalén pîpulura îshimtukish? Suane nane nu kwail kirît aizpa izninnash. 10 Pablone sînkara: —Nane Romano katsa mikwa uzmukin tus. Apane nune nawa kwail kirît aizpa kiztawa. Nune Judío awaruza kwail kitchi ish wat pian. 11 Na Moisés kaizta aizpa kitchine, irawash. Na kwail kirîtne, nune nawa iltawa, inapa. Na uspa kaizara aizpa kitchine, mînminka nawa Judío awaruza chîhkasachi. Nane nua paikumtus, nawa katsa mikwa Cesarta, Roma pîpulura înintumikasha, îninnapa, nawa iznapa. 12 Suasne paiña kurunmuruzkasa kwinta kitpane, Festone kaizta: —Nune paikwara, katsa mikwara în. Katmizna katsa mikwara înazi, kizta.
Pablone Agripa îninmikasha kwinta kimtu
13 Akkwan payuchin pailtawane, Agripa katsa mikwakas paiña ashampa Berenicekas Cesarea pîpulura îilta, Festora “kakishapu” kizna. 14 Akkwan payuchin sua mantazasmin, Festone îninmumikasha Pablowa kwinta kit kit kaizta: —Akkine maza ampune tu. Félixne ussa sîptattît. 15 Na Jerusalén pîpulura tuasmin, pariya înintuzkas îlapa Judío înintuzkas nawa aat kit Pablo kwail kirît kizamîzta. Uspane nawa Pablora iyanapa paikuara. 16 Nane Romano înintuz kaizara aizpa kiz kit ka sînkanarau: —Au Roma awaruzne mînainkas piantamtuchi. An ñancha us kwail kirît kaizmuruzne wanmakkara, paiña iztakin paiña kwail kirît aizpa kizanapa. Awa us kwail kimtus kizamtukas, usmin pakpashina. 17 Suasne uspane nakasa apa aara. Tîriztachin, tîlawara nane ap înintukin uz kit Pablora kanapa îninnarau. 18 Us kwail kirît kaizmuruz akane, uspane ussa chinkas kwail kirît kizmanamara. Usne na mintu aizpa kitchi. 19 Uspakas Pablokas nîjkularachi, miza Diosta wakpuj wainna, Diosta paikwan. Pablone kaiztu: “Jesúsne, irîtmikane, uzi,” kiztu. 20 Uspa pilchapuzamtu akwa, nane we piankam kit chi kin pianchiarau. Katmizna nane Pablora ka mînmarau: “¿Jerusalén pîpulura îshimtukish? Tane uspane nu kwail kirît kizshianazi.” 21 Mane usne nawa paikwara, katsa mikwara înninnapa, awa ussa kwail kirît aizpa kizanapa. Nane ussa kajchira sîpnintau, na Augusto katsa mikwara îninnakima. 22 Agripane Festora kaizta: —Nakas an ampura mîshimtus. Festone sînkara: —Tîlawain ussa mînazi. 23 Tîlawara Agripakas Berenicekas watsal pïn kwaat kit pianail kit awa wanmakmukin nappailta. Katsa suldaru înintuzkas pîpulura înintuzkas purara. Awane sua kîh ulpianara. Suasne Festone Pablora kanapa înintawane, 24 kaiznara: —Mîrain. Au katsa mikwa Agripakas wan awa aukasa wanmakturuzkas mîrain. Une an ampura, au akki mîjmikasha izamtu. Us akwa kwisha akkwan Judío awaruzne Jerusalén pîpuluraskas an pîpuluraskas aat kit kwianta, nawa an ampu irawa kizanapa. 25 Nane paiña kwail kirît aizpa wat pianchish, ussa piantana. Mane usmin nawa paikwara, katsa mikwara, Cesarta, înninnapa, us kwail kirît aizpa kiznapa. Nane ussa katsa mikwara îninshimtus. 26 Makima nane Pablowa chinkas mîjchish, ap anpatta katsa mikwara pana. Katmizna nane ussa nu iztakin kararau. Nane nua, au mikwa Agripawain iztakin, kararau, ussa mîmanapa. Suasne nane chiwazha mîj aizpa Cesarta pînkîh panash. 27 Nane nil chi mintus, kajchira sîptîtmikasha îninnapa, us kwail kirît kiztachine.
Pablone usmin Agripakin pakpamtu
1 Suasne Agripane Pablora kaizta: —Nuin nu kit aizpa pakpashinai. Pablone chihtî anak kit ka paramîzta: 2 “Au îninmika Agripa, mîzha. Nane watsal kultus, nu iztakin tuan, na kit aizpa kaizna. Judío awane na kirît aizpa watcha kizamtuchi. 3 Nune miza au Judío awa uzamtu an wat pian. Judío awa nîjkulamtu aizpa wat pian. Katmizna nua paikumtus, nawa wat mînapa.”
Jesústa piantarachasmin, Pablone mamaz tuntu uzta
4 “Wan Judío awane nawa ainki asmin pian. Nane uspakasa Jerusalén pîpulurakas ap surakas uztau. 5 Na musittuasmin, nane Judío Fariseo awa kamtatîtkanain uztau. Uspane na nil uzta wat pian. Uspane na miza uzta nua kaizashina. 6 Diosne Judío awaruza sun kin namnara, irîttuza kakulninnana. Na sunpa nîjkultu akwa, uspane nawa karaarai, nawa kwail kirît kizanapa. Nakas au kwalkana Diosta tîriztus, us kin namta aizpa kinkima. 7 Au doce Judío kwaltuzne Dios sun kin namta aizpa tîrizamtu, sun kinkima. Katmizna uspane pailta payu Diosta wakpuj wainñamtu. Katsa mikwa Agripane, mîzha. Na Dios sun kinpa tîriztu akwa, an Judío awane nawa kwail kirît kizamîztu. 8 U Judío awa, mîzhain. ¿Chikishma Dios awara irîttas kakulnintu nîjkulamtuchi?”
Ñamin Pablone Jesústa piantuza piznara
9 “Ñamin nakas Jesústa aliz kulna mintu arau. Usne Nazaret pîpuluras ara. 10 Sunkana Jerusalén pîpulukin kirau. Judío pariyaruzne pînkîh paat kit nawa sun pînkîh chîhkat kit nawa îninñara, uspa kiashimtu aizpa kin. Nane kwisha akkwan Jesústa nîjkulturuza kajchira sîpnarau. Awa usparuza piantanamtuasmin, nakas nîjkultu arau. 11 Nane akkwan piji usparuza ilnarau, ‘Jesústa pianchish’ kaizanapa. Kawarain wan Judío kammu yaltakima sun kirau. Na usparuza kwisha pilchapuznara akwa, nane mamaz surakima usparuza piznashirau.”
Pablone mamasa Jesústa nîjkultus kiztu
12 “Katmizna sun kishimtu akwa, nane Damasco pîpulura îmîztau. Pariya înintuzne nawa pînkîhkasa îninñara, uspa paraara aizpa kin. 13 Îninmumika mîri. Miwara îmtuasmin, nane paizka payura impil chiyuras iztau. Impilne pa kinka anza kai nawakas ap izmuruzakas malta. 14 Suasne aune pilta nainaiznash. Suas nane mazara kwinta kika mîrau. Usne Hebreo pit paraka nawa kaizta: ‘Saulo, Saulo. ¿Chikishma nawa kwail kimtus? Nawa mîrakine, nune nuin kwail kimtu. Nune wakara ampukana i. Pamika wakarara tî kwizkasa papa kimtukana, usne mittî tînta kulmu. Nukas aliz kultu, na nua kuruntu aizpa mîshimtuchi akwa.’ 15 Suasne nane mîmarau: ‘Anpat, ¿Nune mînmas?’ Anpatne nawa kaizzi ish: ‘Nane Jesús ish. Nune nawain kwail kimtu. 16 Mane kuhsak kit kunti. Nane nua narît, nawa kiwainapa, nu izta aizpa kainanapa. Nane nua izpantau, an impara impara nu iztu aizpa awaruza kainanapa. 17 Nane nua Judío awaraskas mamaz awaraskas paimpa chîhtnash, uspa nua kwail kiamanpa. 18 Mane nane nua înintus, Judío awachiruz watcha piankamanapa. Nune tîlkwilta chamturuza, Satanás miwara îmturuza, kurunnarawa, kaira chaanapa, Dios miwara chaanapa. Suasne Diablone usparuza îninmanazi, uspa Diosta kaiyara akwa. Nawa nîjkulamtu akwa, nane uspa kwail kiarît aizpa wat kulnanash. Nakas Dios narîttuza chiwazha chiyura mîlananash, Dioskasa uzna.’ ”
Pablone Anpat kaizta aizpa kimtu
19 “Au Agripa mikwa, mîzha. Chiwazha chiyuras izpankane, nane Jesús kaizta aizpa mît kit kirau. 20 An ñancha nane Damasco pîpulura uztuza Dios pit kainanarau. Suasne Jerusalén pîpulura uztuzakas, wan Judea sura uztuzakas, Judío awachiruzakas Dios pit kainanarau. Nane usparuza akwanarau, uspa kwail kiarît maizanapa, Diosta kaiyanapa. Uspane wat kal kiarawa. Mamaz tuntu uzarane, awane uspa maizarît awakana uzamtu kizanazi. 21 Sun akwa, Judío awaruzne nawa Dios katsa yalkin pizat kit nawa piantashiamtu. 22 Dios nawa makima kiwaintu akwa, nane kun kit wan awaruza chiwal na pian aizpa kainanamtus. Nane Dios pit kainammtuz kaizta aizpakas Moisés kaizta aizpakas sunmin kaiztau. Nane uspa kaizara aizpa kawarain mamasa ka kaiztus: 23 ‘Dios narîtmikane ishina. Irawane, Diosne ussa irîttas an ñancha kuhsnazi. Katmizna Diosne Judío awaruzakas mamaz awaruzakas wat kakulninshina, usparuza watsat mîlnanapa. Jesús uztu akwa, Diosne Jesústa nîjkulturuza uzninnanazi.’”
Pablone Agripara kaizta: Jesústa piankamtawa
24 Pablo us akwa sun pakpakane, Festone ka kwianta: —Pablo. Nune nukku parît. Akkwan pînkîh iz kit nukku parît, kizta. 25 Pablone Festora sînkara: —Au wat mikwa, nane nukku chi ish. Sunkana na kaiztu aizpa watcha i. Nil i. 26 Apane katsa mikwane, Agripane tui. Usne na kaiztu aizpa wat pian. Katmizna nane us iztakin watsal paramtus, ishkwatchin. Uskas wan kiarît aizpa wat pian. Wan awane chiwazha kiarît aizpa pian. Chinkas kulamtuchi. 27 Katsa mikwa, Agripa, ¿Dios kaizmuruz parît aizpa mîmtukish? Watcha, nune uspa parît aizpa mîmtu. 28 Agripane Pablora kaizta: —Pitchin pit paramtuasmin, nune nawa Jesústa pianmikakana namninshina. 29 Suasne Pablone sînkara: —Watcha, nane pitchin pit pararau. An akkwan pit nua parashimtus. Nane Diosta paikumtus, nuakas wan awaruzakas, nawa mîmtuzakas Jesústa piankamanapa. Une nakana Jesústa piankamtakanain namashina, cadenakasa kuhtachin. 30 Pablo sun kiztawane, katsa mikwakas, îninmumikakas, Berenicekas, wan sua uztuzkas, kunat kit 31 paimpa sun kirît aizpa kwinta kin îara. Usparuzpain kaizara: —An ampune chinkas kitchi. Kajchira wasachi. Ussa piantasachi. 32 Agripane Festora kaizta: —Mane an ampu au Cesarta, katsa mikwara, în paikwarît akwa, aune ussa chîhtsachimakpas.
Uspane Pablora Roma pîpulura îninamtu
1 Minpa uspane aumîza Italia sura îninnashiara. Festone Pablorakas mamaz sîptîttuzakas Julio muntîtmikasha chîhkanara, usparuza iznanapa. Julione Augusto suldaru muntuza îninnara. 2 Suasne aune katsa kanuara waaiznash. An kanua pimamin Adramitio pîpuluras arît. An kanua Asia suwara pimawarain înpain. Aristarcokas aukasa tuazi. Usne Macedonia suras Tesalónica pîpuluras arît. 3 Tîlawara Sidón pîpulura pianaiznash. Suane Julione Pablora wat kira, izmuruzpara izna înpa, Pablora kiwainapa. 4 Sidón pîpuluras puzarawane, tînta inkwa pamtu akwa, aune Chipre su pi paizkakin mamarain pînaiznash, inkwa aumîza nuppainmanpa. 5 Katsa piwara îamtuasmin, aune Cilicia su makiminkas Panþlia su makiminkas pînaiznash. Mira pîpulura Licia sura pianarawane, aune kanuaras kihshaiznash. 6 Suane suldarura îninmumikane, Julione, Alejandría pîpuluras kanuara wanmalta. An kanua Italia sura îmtu akwa, aumîza kanuara waaninpailnash. 7 Tînta inkwa pamtu akwa, akkwan payukima impara impara îaiznash, kasha Gnido pîpulu makin piannankima. Tînta inkwa pamtu akwa, Salmona su makin pîn kit Creta su pi paizkakin pîlzaaiznash. 8 Puijna kal akwa, Creta su pimawarain imparain îaiznash, kanua piannamkin piannankima. Sun piannamkin Buenos Puertos muntît. Lasea pîpulu kashain uz. 9 Impara îamtu akwa, akkwan payu parît. (Sua tîriztuasmin, Pascua pishta taizta.) Katsa alu kishimtu akwa, inkwa tînta pashimtu akwa, piwara îashichi. Kanua paltainshina. Katmizna Pablone kurunnara: 10 —Izmuruz, nawa mîrain. U kanuawara îamîztune, akkwan kwail aumîza kirînazi. U kanuakas kanuara kwa aizpakas kashina. Aukas ishinamakpas. 11 Suldaru îninmumikane, Julione, Pablora mîrachi. Usne kanuawamika kuruntu aizpa mîra. Kanua puijmuruz kuruntu aizpa mîra. 12 Alu kimtu akwa, inkwa pamtu akwa, uspane an kanua piannamkin akkwan payu nukkulashitchi. Kwinta kimtuasmin, an akkwanne tas puzna minñara. Fenice kanua piannamkin Creta su pi paizkakin îshiara, ta piannashina. Uspane alu palnakima inkwa pailnakima sua mashiara. An kanua piannamkis mazane pamals puzshina. Pa payapmura kaiwarain azi.
Pira inkwa tînta pamtu
13 Suasne África suras inkwa impara pamîzkane, uspane în minñara. Pi ayuktas uk tainak kit kasha Creta suwara îamîzta. 14 Sun urain an tînta inkwa Creta suras pamîz kit kanuara nuppainta. Pa puzmumals pamtu. 15 Tînta inkwa pamîz kit kanuara paltainmîzkane, aune kanuara inkwa akwa puijsachimakpas. Au kanuara puijsachi akwa, inkwane nuppain kit aumîza mîlta. 16 Aune Cauda su pi paizkakin, inkwa tîntachi pamtukin, pînaiznash. Akkwan kal kitpane, aune ainki kanuara tain kit katsa kanuara watsaaiznash. 17 Ainki kanua katsa kanuara îsal nuarawane, katsa kanuara tîtkasa sam kuhara. Suasne Sirte ksuwara pul piwara îamtuasmin, uspane ishkuarît, inkwa nupamtu akwa. Uspane pïnkas taizninñara, an azain îmanpa. Suasne inkwain aumîza nuppainta. 18 Tîlawara inkwa tînta pamîztuasmin, uspane uspa chiwazha kanuara wintît aizpa kanuaras pira kiakpînamîzta. 19 Kutña payura uspane uspa chihtîkasain pïnkas wan tîkas tîtkas kiakpînara. 20 Akkwan payukima aune pakas kîmakas izamanash. Inkwa kwisha tînta pamîztuasmin, kanua paltainmîzta. Minpara aune auruzpain watcha inapain minaiznash. 21 Au kwisha akkwan payukima kuarachi akwa, Pablone uspa paizkakin kun kit kaiznara: —Izmuruz mîrain. Na kaiznara aizpa wat mîana watmare. Creta suras puzmanpa watmare. Mane aune naizpuspas. Une wan mîj aizpa kaarît. 22 U sun kiarîtkas, wat min kit tînta kultain. Mînminkas iamanazi. Kanuarain azpian kit karînazi. 23 Nane Diospa kiwainmika ish. Ma amta usne paiña ángelta nawa îninta. Nawa izpamtuasmin, 24 ángelne nawa kaizzi ish: “Pablo. Ishkumun. Nune katsa Romano mikwara, Cesarta, îtpa. Diosne nu akwa wan kanuara waruza kiwainanazi, iamanpa.” 25 Katmizna, ap izmuruz, ishkuman. Nane Diosta nîjkultus. Paiña ángel nawa kaizta aizpa watcha i pianish. 26 Inkwane aumîza mamaz su pi paizkara nuppainnanapas. 27 Paas domingo pîntawane, inkwane kanuara nuppainmîzta Adriático piwara. Kakwamtane kanua kiwaintuzne nîjkulara, pilta piannanpain. 28 Uk tîtkasa pi ayuktakima kiain izara, yawa ainkihkas anizna. Viente sa anizara. An kwiztane mamasa anizara. Quince sa anizara. 29 Katsa ukta patkirîn akwa, ishkuat kit ampara kwisha katsa uk kuh kit kanua pîlmal kiainñara, an azain chi îmanpa. Ishkuat kit tîrizara, kînnakima. 30 Kanua kiwaintuz kanuaras îashimtu akwa, uspane katsa kanua pitkis ainki kanua pira inkihshamîzta. Uk tît kuhtît kiaintukanain kiara. 31 Pablone Juliorakas, suldaru îninmikashakas, suldaruruzakas kainanat kit kaiznara: —Uspa katsa kanuara maarakine, une pilta pianasachi. 32 Suasne Suldaruruzne ainki kanuawa tît tîttat kit kanua pira taizninñara. 33 Tîlawain kînmîzkane, Pablone wanta kurunara, chiwazha kuaiznapa. Usparuza kaiznara: —Me paas domingo une tîrizamtu, pittarachikas, kuaarachikas. 34 Nane uruza paikumtus, chiwazha kuaiznapa. Une kuarawa, najamanpa. Mînminkas iamanazi. Chinkas naizamanazi. 35 Sun kiztawane, Pablone pan chihtîkin mut kit wan iztakin Diosta aishtaish kiz kit kuara. 36 Suasne pan nailtawane, wanne wat kulat kit kuamîzta. 37 Aune kanuara 276 awa wamanash. 38 Uspa kwashit aizpa kuarawane, uspane wan chara pippa pira kiakpînnara, kanua an îsalmin pîla kirînpa.
Kanua pi unaintu
39 Kînmîzkane, kanua kiwainmuruzne sun pil piankamarachi. Ainki pi wankin izamtuasmin, uspane kanuara puijshiara, pi ksurakima. 40 Katsa uk kuhtît tîttat kit pira taizninñara. Tailmu tîkas puijmu tîkas chîhtara. Suasne inkwa nupaim pïn kanua pitkin panaara, kanua pi ksurakima îmîznapa. 41 Paas pi wankin îmtuasmin, kanua pi ayukta ksura tînta uz kira. Kanua pitmalne pi ksura naptît. Îchiwal. Tînta inkwa pamtu akwa, pine kanua pîlmal azpianmîzta. 42 Suasne suldaruruzne kuhtîttuza piantashinara, pi kamtawara îamanpa. 43 Suldarura îninmikane, Julione, Pablora kiwainshira, imanpa. Katmizna ussa piantashitchi. Usne pi kammuruza an ñancha îninnara, pira taizanapa, pilta piannaanapa. 44 Kwiztane mamaztuza îninnara, tapîlara îanapa, kanua pittira îanapa. Sunkana wanne pilta watmin pianaara.
Pablone Malta su pi paizkakin tu
1 Pilta watmin purasmin, su pi paizkakinne Malta muntît piankamaiznash. 2 Malta sukin uzturuzne aumîza kwisha wat kiwainnara. Alu kimtu akwa, tîh pamtu akwa, uspane katsa ïn usappat kit aumîza akwanara, ikulanapa. 3 Suasne Pablone sî pul sak kit sî pul ïnta kiainmîzta. Sun kimtuasmin, ïn akwa kamtane sîras puz kit Pablowa chihtîkin kanta. 4 Malta sukin uzturuzne Pablowa chihtîra kamta kan kirît izat kit mamazta mamazta minñat kit kaizara: “An ampune mamaz awara piantamashinai. Pi kwamasarakas, au diosne, nil muntîtmikane, ussa uzninnasachi,” kizara. 5 Pablone kamtara ulpianta, ïnkin taiznapa. Ussa chinkas kitchi. 6 Wanne us kiparînazi minñamîzta. Usne irînazi minñamîzta. Kwisha tîrizarawane, ussa chinkas kitchi izakane, uspane mamaz tuntu minñat kit Pablowa kaizamîzta: —Usne maza dios i, kizara. 7 Au piannatkin an pi paizka sukin mikwane sua uzta. Usne kashara paiña su mîjara. Usne Publio muntît. Usne kutña payukima aumîza yal nammîlat kit kwisha wat kiwainta. 8 Publiowa papihshne pitmukin imtu tuara, imukasakas pîwikasakas. Pablone ussa izna îra. Diosta us akwa paikwatpane, ussa chihtîkasa paat kit ussa kakulninta. 9 Sun kitpane, mamaz imturuzne sun pi paizka sukis ussa aara. Wanta kakulninnara. 10 Uspane aumîza wat minñat kit kwiztane au we aizpa wantain mîlaara. Mamasa kanuawara îamtuchasmin, uspane au we aizpa aumîza mîlaara.
Pablone Malta suras puz kit Roma pîpulura piannamtu
11 Kutña mish pailtawane, aune kanuara waat kit su pi paizkakis îaiznash. Alu kimîzta akwa, an kanua an ñamin Alejandría pîpuluras at kit sua mara. Sun kanua pitkin paas dios kîzpukanain waj. An diosne Cástorkas Póluxkas muntît. 12 Siracusa kanua piannamkin pianarawane, aune kutña payukima maaiznash. 13 Suasne pimamin pîlzat kit Regio pîpulura pianaiznash. Tîlawara inkwa suras pamîzkane, aune paas payukanain Puteoli pîpulura pianaiznash. 14 Suane aune mînpazha Jesústa piantuzkasa wanmalanash. Uspane aumîza yal nammîlanara maza domingokima. Kwiztane Roma pîpulura îaiznash. 15 Roma pîpuluras izmuruzne au aamtu piankamat kit mimal aumîza wanmalnaara. Mînpazha Apio pîpulura muntîtkin îara. Mamaztuzne kutña pitmu muntîtkin îara. Pablone usparuza iznat kit Diosta aishtaish kizta. Usne kwisha wat kulta. 16 Roma pîpulukin piannatpane, suldaru îninmikane, wan kuhtîttuza kajchira chîhkanara. Pablone suldaru îninmikasha paikwara, paimpa uzna. Sua maza suldarune ussa izta.
Pablone Roma pîpulu uztuza Dios pit kainnanamtu
17 Kutña payu pailtawane, Pablone Roma pîpuluras Judío awa îninturuza akwanpa îninnara. Wanmakkarawane, kaiznara: —Añaruz, nawa mîrain. Nane Judío awaruza chinkas kitchish. Na au an ñancha kwal uztuza kwail kitchikas, Judío awaruzne Jerusalén pîpulukin nawa pizat kit Romano îninturuza chîhkaara. 18 Nawa mîmarawane, uspane nawa chîhtshiara, na kwail kitchi akwa. Na kwail kitchikas, uspane nawa piantashiara. 19 Judío awa nawa chîhtshiarachi akwa, nane Romano katsa mikwara îninnapa paikwarau, nawa iznapa, na kwail kirît aizpa kiznapa. Nane au awaruza kwail kiarît kiznamtuchish. 20 Katmizna, nane uruza akwanarau, uruza iz kit parananapa. Judío awaruzne Dios înintamikasha izshiat kit tîrizamtu. Na Jesúspa kwinta kimtu akwa, mane nane cadena kuhtît tus. 21 Suasne Judío awaruzne kaizara: —Aune Judea sura uzturuztas pînkîh nuwa sappamanash. Judío aimpihsh tas piannamtuzne nuwa kwail kizarachi. 22 Aune nu mintu aizpa mîshipuspas. Aune masas wanmakmuruzpa mîat kit Jesústa kanpamtuzpa piankamshimtumakpas. Wan awane masas wanmakmuruza aliz kulamtu. 23 Suasne maza payu ussa izna naarawane, kwisha akkwan awane Pablo tukin piannaara. Tîlawain nashnakima Pablone usparuza Dios awaruza îninshinamtui kiz kit nil kainanara. Usne usparuza kamtanat kit us kaizta aizpa watcha i mînninnashira. Usne Moisés kaizta aizpakas Dios pit kainammtuz kaizta aizpakas kamtanara, Jesústa piankamanapa. 24 Mînpazha Pablo kaizta aizpa nîjkulara. Anpane mîarachi. 25 Usparuzpain Pablo kaizta aizpa nîjkulamtuki akwa, îamîzta. Suasne Pablone minpa pit kaiznara: “Diospa Sînam Izpulne an ñancha kwalta watcha kainanara. Usne Isaías kainammmikasha ka paninta: 26 ‘An awara ît kit kaiznari: Dios kainammtuza mîarakas, une piankamamanazi. Uspa para aizpa izarakas, une nîjkulamanazi. 27 An awa piankamashitchi akwa, usparuzpa kailne mîasachikana parît, usparuzpa kasune sîppatîtkana parît. Katmizna nîjkulashitchi akwa, mîashitchi akwa, uspane piankamasachi. Uspane nawa kaiyamanazi, na usparuza watsat mîlnanapa.’ ” 28 Îamtuchasmin, Pablone kaiznara: “Mane une piankam kit mîrain. Makis Diosne paiña pit Judío awachiruza îninamtu, usparuza watsat mîlnanapa. Uspane watcha ussa mîanazi.” 29 (Pablo sun kiztawane, Judío awane îat kit usparuzpain tînta kwinta kiara.) 30 Pablone yal nampiz kit paiña yalta uzta. Paas añokima sua uz kit wan ussa iznamtuza napninnara. 31 Pablone Dios awaruza îninashimtui. Wanta kaiznat kit Anpat Jesucristowa kamtanara. Mînminkas ussa pilchapuzarachi. Pailti.
Kakishapu
1 Nane Pablo mun ish. An pînkîh uruza panamtus. Nakas Jesucristowa kiwainmika ish. Diosne nawa nat kit akwat kit paiña înintamika namta, paiña watsal pit akkwan awaruza kainananapa. 2 Diosne ñamin paiña watsal pit paranana namta. Suasne paiña kainammturuza Dios pit pînkîhta paninnara. 3-4 Sun pitne Dios Painkulpa, au Anpat Jesucristowa kainammtu. Awakanain kawira. Ñamin paiña pampane David munazi. Ñamin Davidne katsa mikwa azi. Diosne ussa Dios Painkul mun kit paiña Sînam Izpul akwa irîttuztas tînta kakulninta. 5 Cristo akwa, Diosne nawa kiwain kit paiña înintamika namta, paiña pit kainanapa, akkwan awa wan suras nîjkulat kit Dios îninta aizpa kianapa. 6 Diosne uruzakas, Roma pîpulura uztuzakas, akwanara, Jesucristora piankamanapa. 7 Nane uruza, Roma pîpulura uztuza, Diosta pashimturuza, an pînkîh panamtus. Mane nane au Diostakas au Anpat Jesucristorakas paikumtus, uruza wat kiwainanapa, kalpain uzanapa.
Pablone Diosta paikwat kit aishtaish kizta
8 An ñancha nane Diosta u akwa aishtaish kiztus, Jesucristo uruza tînta kiwainnara akwa. Nakas watsal ish, akkwan awa au sukin u Jesucristora nîjkulamtu aizpa mîamtu akwa. 9 Nane Diospa kal sap kit tînta kal kirau, Dios watsal pitkas paiña painkulpakas kainanapa, pailnakima. Pailta payukima Diosta paikumtasmin, nane uruza minamtus. Diosne na kiztu aizpa watcha i pian. 10 Nane Diosta paikumtus, na u uzkinkima piannan, sun minpa payura uruza iznana. Dios sun pashitne, kainchash îrînash. 11 Nane uruza kwisha iznashimtus, Dios Sînam Izpul uruza kiwainnamtu kamtanana. Suasne une u kaijchura an tînta namanazi. 12 Sunmin kaiznashimtus. Aune auruzpain kiwaintawamakpas. Une an tînta kulashina, na nîjkultu akwa. Nakas an tînta kulshinas, u nîjkulamtu akwa. 13 Cristora nîjkulturuz, na pampa payukima u uzkin pianashira piankamtain. Chiwazha nawa înintachi. Makima pianasachish. Nane u uzkin awaruza Jesucristora nîjkulninnashimtus. Mamaz sura sunkana kirau. 14 Nane kiwainmumika ish, wan awaruza kiwainana. Nane altîm awaruzakas musu awaruzakas kiwainashimtus. Nakas pînkîh pianchiruzakas pînkîh piantuzakas kiwainashimtus. 15 Katmizna nane uruzakas, wan Roma pîpulura uztuzakas, Dios watsal pit kainanashimtus.
Dios watsal pit tînta i
16 Nane Dios watsal pitpa mîtsal kimanash. Sun pitkasa Diosne wan Dios pit para aizpa nîjkulturuza watsat mîlnanashina. An ñancha Judío awaruzakas, an kwizta Judío chi awaruzakas watsat mîlnanashina. 17 Diosne paiña watsal pitkas aumîza mînninnamtu, nil uzanapa. Diosne Diosta nîjkulturuza nil uzninnashinai. Dios pit ka parît: “Diosne ussa nîjultumikasha nil namninnazi, pailta payukima uzanapa.”
Pailta awane Dios iztakin kwail kiarît
18 Chiyuras Diosne wan awaruza Dios kimtu aizpa mîninnamta. Awa Diosta nîjkularachi akwa, Diosne usparuza ilnanazi, uspa kwail kiarît akwa. Uspa kwail kiamtu akwa, uspane watcha Dios kaiztu aizpa sappashimtuchi. 19 Sun akwa Diosne usparuza ilnanazi. Uspane Diospa wat piankamara, us usparuza Diospa annara akwa. 20 Dios an su sarasmin, awane Dios tînta i piankamashina. Diosta izasachikas, Diostakas piankamashina, paiña kal an sukin kimtu akwa. Katmizna sun kwail awaruzne Dios iztakin uspa kiarît aizpa pakpaasachi. 21 Diospa mîamtukas, Dios uztu piankas, uspane Dios kwisha wari kizarachi. Diosta “aishtaish” kizarachi. Uspa minñakane, uspane Diospa minñashitchi. Kain minñamtu akwa, uspane tîmpa awakana minñara. Uspane wat chi minñara. 22 Akkwan pianmakpas kizamtukas, uspane tîmpa awakana mai. 23 Mane uspane Dios uzmikasha wakpuj wainñamtuchi. Tî awakana sarawane, sunta wakpuj wainñamtu. Katsa wamkanakas, kalpakanakas, piaintîkanakas saat kit wakpuj wainñara. 24 Katmizna tîmpa awa akwa, Diosne usparuza chîhkanarît, wan kwail minñashimtu aizpa kianapa. Usparuzpain akkwan tuntu mîtsal kwail kiarît, uspa ñakin kwail kiarakima. 25 Uspa watcha Diosta nîjkulashitchi akwa, uspane tîkasa sarît aizpa wakpuj wainñara. Sun tîne dios chi. Uspane wan dios sarît aizpa minñat kit wakpuj wainñara. Diosta, wan saramikasha, wakpuj wainñashitchi. Awane an wat Diostain pailta payukima wakpuj wainñarawa. Sunne watcha i. Ka. 26 Tîmpa awa sunkana kiamtu akwa, Diosne usparuza chîhkanarît, wan mîtsal kwail minñamtu aizpa kianapa. Paas ashampane parejuin pitshiilta. Mazane ampukanain namtu. Ashamparuzpain pit kit kwail kiamtu. Sunkana uzam. 27 Kawarain ampuruzne uspa ashamparuza chîhkamtu, ashampakasa pitmanpa, ampukasa pittana. Paas ampune parejuin pitshiilta. Mazane ashampakanain namtu. Ampuruzpain pit kit kwail kiamtu. Sunkana uzam. Sun kwailne mîtsal kiarît. Katmizna uspa sunkana uzamtu akwa, Diosne usparuza ilnanazi. 28 Diospa watmin minñamtuchi akwa, uspane Diosta piankamashitchi. Katmizna Diosne usparuza chîhkananazi, uspa kwail minñamtu aizpa kianapa. 29 Uspane wan tuntu kwail kiashimtu. Mamaztuza kwail kiashimtu. Mamaz mîjtuzkin an akkwan pashiamtu. Wan awaruza aliz kulamtu. Patna mîj aizpa pashiamtu. Mamaztuza piantashimtu. Mamazkasa waya kiamtu. Uspane mamaztuza pîrail appamtu. Akkwan tuntu kwail kiana minñamtu. Mamazpa parakane, kwail paraamtu. 30 Anparuzne mamaztuzpa kwail paramtu. Diosta aliz kulamtu. An we tîntamikasha aliz paramtu. Usparuzpain “aune an tînta makpas” kizamtu. Mamaztuza “aune an tînta makpas” kizamtu. Mamaztuza kwail kianapa minñamtu. Uspane papihshtakas akkuhshtakas mîashimtuchi. 31 Uspa minñarakas, mîashitchi. Uspa kin namtu aizpa kiamtuchi. Uspa kwaltuza pashiamtuchi. Mamaztuza wat kulashimtuchi. Naizturuz akwa chinkas mazamtuchi. 32 Sun awa Dios kaizta aizpa an wat piankas, Diosne sunkana kwail kimturuza iarînazi kiznara. Sun kwail kimturuzne mamaztuz kwail kiamtu aizpa wari kizamtu.
Diosne kwail kimturuza ilnana îninnamtu
1 Diosne Judío chi awaruza ilnanazi, uspa kwail kiamîztu akwa. Katmizna mînminkas uruztas Judío chi awaruza nu kwail kirît kaiznawachi. Judío awa Judío chi awaruza “nu kwail kirît” kizturuzne uruzpain Dios iztakin pakpasachi, nukas sun kwailmin kimtu akwa. 2 Dios kimtu aizpa watcha i pianmakpas. Dios Judío chi kwail kirîttuza ilnanapa îninkane, usne nil aizpa kimtu. 3 Nu Judío awane Judío chi kwail kimturuzkanain kimtu. Nune Judío chi awaruza “une kwail kiamtu” kiznamtu. Dios kwail kimturuza ilnana îninkane, Diosne watcha u Judío awaruzakas tînta ilnanazi. 4 Nune Diospa wat mintuchi. Usne wantuza kwisha wat kininnashimtu. Uskas uspa kwail akwa awaruza azain ilnamtuchi. Uskas uruza kwisha pashinamtu. Diosne nua wat kimtu, nu kwail kimtu aizpa chîhkanpa, nu Diosta anpa, Dios nua maiznapa. 5 Nu Dios kaiztu aizpa mîshimtuchi akwa, nune u kwail kishimtu aizpa chîhkamtuchi me. Nu Diosta kailtuchi akwa, Diosne nukasa aliz kultu, nu akkwan kwail kirît akwa. Dios kimtu aizpa watcha i. Katmizna nua ilna îninkane, Diosne nua an tînta naizninnazi. 6 Diosne wat kimturuza wat kiwainnanazi. Uskas kwail kimturuza ilnanazi, uspa kwail kiarît akwa. 7 Diosta saimturuzne mamaztuza wat kinanazi. Diosne suntuza “u watsal kiamti” kiznanazi. Diosne usparuza wat minñanazi. Diosne usparuza pailta payukima chiyura uzninnanazi. 8 Uskas waya kishimturuzakas watcha mîamtuchiruzakas kwail kiamturuzakas pilchapuznanazi. Usparuza tînta ilnanazi. 9 Diosne wan kwail kimturuza tînta naizninnanazi, kwisha ishnakima. An ñancha Judío awaruzne naizanazi. Kwizta Judío chi awaruzne naizanazi. 10 Diosne wan wat kimturuza “une watsal kiamti” kiznanazi. Usparuza wat minñanazi. Usparuza kalpain uzninnanazi. An ñancha Diosne Judío awaruzakas kwizta Judío chi awaruzakas watsal uzninnanazi. 11 Diosne pailta awaruza kawarain kinanazi. 12 Judío chi awaruzne Moisés îninta aizpa sapparachi. Moisés îninta aizpa mîjchikas, uspane kwail kiat kit mama iarînazi. Judío awaruzne Moisés îninta aizpa sappazi. Uspa kwail kiamtu akwa, Diosne usparuza Moisés parît akwa ilnanazi. 13 Diosne Moisés îninta aizpa mîmturuza wat paninnamanazi. Usne Moisés îninta aizpa kimturuza wat paninnanazi. 14 Diosne Judío chi awaruza Moisés îninta aizpa mîlanarachi. Awa Moisés îninta aizpa sapparachikas, mînpazha us îninta aizpa kimtune, usne Dios pashimtu aizpa piankam kit kimtu. 15 Kaijchura Dios îninta aizpa nîjkulamtu akwa, uspane sun îninta aizpa minñat kit kiamtu. Ayukta wa aizpa ussa kuruntu. Masetne kaijchura kwail kirau mintu. Masetne kaijchura wat kirau mintu. 16 Iltu payura taizkane, Diosne awa ayukta puintît mîj aizpa mîmanazi, usparuza ilnana. Sunkanane nane Jesucristowa watsal pit uruza kainannamtus.
Moisés îninta pitkas Judío awaruzkas
17 Mane u Judío awaruza parananash. Nune “Judío awa ish” kiztu. Nune “Dios ap Dios i” mintu. Nune “na an tînta ish” kiztu, Moisés îninta pit nuwa mîlarît akwa. 18 Nune “Dios pashimtu aizpa pianish” kiztu. Dios paiña pit nuwa kamtarît akwa, “Mane watmin nanash,” kiztu. 19 Nune “kamtammika namtus” kiztu, Diosta we piantuzakas Diosta wat nîjkultuchiruzakas kamtananapa. 20 Nune “pianchiruza kamtanashimtus” kiztu. Nune “Dios pînkîh panintît aizpa nîjchiruza piankamninamtus,” kiztu, watcha piankamanapa. Nu sunkana mintu aizpa kain. Nu salamtît. 21 Nu mamazta kamtamtukas, nune nu kamtamtu aizpa kimtuchi. Mamazta walkumun kiztukas, nune walkumtu. 22 Nu mamazpa ashampa mîlmun kiztukas, nune mamazpa ashampara nakat kit mîltu. Nu dioskana sarîtta wakpuj wainmun kiztukas, nune sun dios sarît uzkin nap kit pial tarît aizpa walkumtu. 23 Nune “nain an warish” mintu, nu Moisés îninta aizpa iztu akwa. Nu Moisés îninta aizpa iztukas, nune us înintu aizpa kimtuchine, Diosne nua ilnazi. 24 Dios pînkîhta ka parît: “Nu Judío awa Diosta izkitchi akwa, Judío chi awaruzne Diospa kwail paraamtu,” ka kizta. 25 Judío awa Moisés înintu aizpa mîmturuzne watsal kianazi. Judío awa Moisés înintu aizpa mîmtuchiruzne, Judío chi awa uztukanain uzamtu. Uspane Diospa kwal namamanazi, tîtta señal samtuchiruzkana, circuncisión kitchiruzkana. 26 Judío chi awa Moisés înintu aizpa mîmtune, usne Judío awakanain, tîtta señal samtumikakanain, circuncisión kirîtmikakanain, namnazi. Suasne Diosne ussa sapnazi, Dios îninta aizpa mît kit kirît akwa. 27 Sun tîtta señal samtuchimikane, circuncisión kirîtchimikane, Moisés îninta aizpa mîmtune, sun tîtta señal samtumikakana, circuncisión kirîtmikakanain, namnazi. Suasne sun Judío chi awaruzne Judío awaruza, tîtta señal samturuza, circuncisión kittuza, Moisés îninta aizpa saptîttuza “kwail kiare” kiznanazi, uspa Moisés îninta aizpa mîarachi akwa. 28 Judío awaruzne “aune Diospa kwal makpas” kizmumai. Une u Judío papihsh akwa, u Judío akkuhsh akwa Diospa kwal namasachi. Tîtta señal ñara samturuzne, circuncisión kirîttuzne, une sun akwa Diospa kwal namasachi. 29 Dios Izpulne awa ayukta, paiña kaijchukin, maiz kit Diospa kwal namnintu, Dios înintu aizpa kinpa. Diospa kwalne kaijchukin Diosta nîjkul kit us kuruntu aizpa kimtu. Diosne kaijchukin maiztîttuza “une wat awa mai” kiznanazi.
1 Na kaiztu aizpa mînaka. Dios Judío awaruza nanarît akwa, Diosne Judío awaruza, tîttît señal sarîttuza, circuncisión kirîttuza, wat iznamtu. 2 Uspane Diostas akkwan sappara. An ñancha Diosne usparuza akkwan pit kin nam kit Dios pit chîhkanara, wantuza kamtananapa. 3 Judío awa Dios pit sapparîtkas, mazantuzne us kaizta aizpa mîashitchi. Mazantuz us kaizta aizpa mîashitchikas, Diosne mizurainkas awakanain maizmanazi. Dios kin namtît aizpa kimanazi kizmanapas. Watcha Diosne au akwa us kin namtît aizpa kinazi. 4 Diosne mizurainkas wenammanazi. Wan awa pîrail kaizamtukas, Diosne pailta payu watcha kaiztu. Dios pitta ka parît: “Awa Dios paramtu aizpa piankamarawane, awaruzne ‘Dios kirît aizpa wan nil i’ kizanazi” 5 Mînpazha ñanta ka kaizshinamai: “Awa pailta payu kwail kimtuasmin, suasne Diosne pailta payu paiña kwail kimtu aizpa wat kulnazi. Suasne Dios kwisha wat akwa, usne nawa ilmanazi,” kizanazi. Sunkana awa mintukanain minman. Dios wan nil kimtu akwa, usne wan kwail kimturuza ilnanazi. 6 Diosta kain pit kaizman. Diosne mizurainkas wenammanazi. Dios kwail kiratne, usne an sukin kwail kimtuza ilshinamanazi. Dios nil kimtu akwa, Diosne kwail kimturuza uspa kwail kiamtu aizpa kaiznanazi. 7 Mînpazha ñanta kaizshinamai: “Na Dios înintu aizpa mîmtuchikas, Diosne nawa wan chiwal wat kulnazi. Suasne Dios awara wat kulna kin namtît akwa, awane kwisha wari kizanazi. Katmizna Diosne nawa ilnawachi.” 8 Suntuzne sunkana ñanta kaizamtu: “An akkwan kwail kitpamakpas, Dios an akkwan kwail kimtu aizpa wat kulnapa.” Uspane pîrail kaizat kit na sunkana kamtamtus kizamtu. Diosne sunkana kaizamturuza watcha naizninnanazi.
Wan awaruzne kwail kiarît
9 Sun akwa Judío awane Judío chi awakin an palichi mai. Judío awaruzkas Judío chi awaruzkas Dios iztakin kawarain mai, Dios u Judío awaruzkas Judío chi awaruzkas kwail kiarît kiznarît akwa. 10 Dios pitta ka parît: “Mînminkas nil kisachi. 11 Mînminkas mîsachi. Mînminkas Diosta saimtuchi. 12 Wantuzne Dios kuruntu aizpa chîhkaara. Uspane kwail kiamtu uzamtu. Mînminkas wat kimtuchi.” 13 “Kwail awa parakane, usne paiña pit îsak kit kwail pitmin paramtu.” “Uspane pîrail appamtu. Kamta awara kwatne, pininu akwa irînazi. Sunkana kwail paramturuzne awaruza kwail kirînanazi.” 14 “Awaruza kwail pit paramtuasmin, sun aliztuzne awaruza kwail kiashimtu.” 15 “Uspane azain îamtu, awara aim kiana, awara piantana. 16 Uspane mamaztuza kwail kiashit kit tayalninnamtu. 17 Uspane mamaztuza kalpain uzninnamtuchi.” 18 “Uspane Diosta mîkiamtuchi. Diosta mîkiamtuchi akwa, ussa ishkuamtuchi.” 19 Aune Dios paiña pit wantuza îninta pianmakpas. Katmizna mînminkas “nane kwail kitchish” kizsachi. Pailta awane Dios iztakin kunnat kit sua uspa kwail kiarît aizpa nîjkulanazi. 20 Diosne Moisés îninta aizpa mîashimturuza sapnamanazi. Uspa kwail kiamtu akwa, usne usparuza wat kulnamanazi. Dios paiña pit awaruza îninnarît akwa, awane uspa kwail kiamtu aizpa piankamashina, mînminkas wan înintît aizpa kit akwa.
Diosne Jesucristora nîjkulturuza watsat mîlnanazi
21 Mane mîzhain. Awane Moisés Judío awaruza îninta aizpa kiasachi, Dios usparuza wat kulnanapa. Awa Moisés îninta aizpa mîamtuchikas, Diosne awaruza sapnanazi, uspa kwail wat kulnanapa. Ñamin Dios kainammtuzne Dios pînkîhta “Dios awaruza sapnat kit wat kulnanazi” paarît. 22 Diosne wan Jesucristora nîjkulturuza sapnat kit uspa kwail kiarît aizpa wat kulninnamtu. Judío awaruzkas Judío chi awaruzkas Jesucristora nîjkularawa, Dios uspa kwail wat kultananapa. Judío awakas Judío chi awakas Dios iztakin kawarain mai. 23 Pailta awa kwail kiarît akwa, uspane Dioskis attish chaamtu. 24 Dios aumîza pashinamtu akwa, Diosne au kwail kiarît aizpa kainmin wat kulnarît, Diospa kwal namanapa. Jesucristo au akwa irît akwa, Diosne au kwail kiarît aizpa kaninnara, au kwail akwa naizamanpa. 25 Diosne Jesucristora wan awa akwa inapa îninta. Usne irît, Dios Cristora nîjkulturuza wat kultananapa, Dios awakasa pilchapuzmanpa. Diosne an ñamin uztuza tailchanat kit impara imparain kurunnara. Kwail kiarîtkas, mane Diosne Jesucristo akwa uspa kwail kiarît aizpa wat kulshinat kit nil namnara. 26 Ma payu Diosne kwail kimturuza naizninnat kit wantuza us wat kimtu aizpa ananamtu. Dios wat akwa, usne Cristora nîjkulturuza wat kulnashina, usparuza wat awa namanapa. 27 Mînminkas Dios iztakin “nane wat kulish” kizsachi. Awa wat kal kimtukas, Diosne awaruza uspa wat kal akwa wat kulmanazi. Awa Cristora nîjkulamtu akwa, Diosne awaruza wat kulnashina. Sunkana Diosne awaruza paiña kwal namninamtu. 28 Sun akwa aune sunkana minpuspas. Diosne Judío awaruza, Moisés înintît aizpa mîamturuza wat kulnamanazi. Usparuza sapnamanazi. Usne Cristora nîjkulturuzain sapnanazi, uspa kwail kiarît aizpa wat kulnanapa. 29 Diosne Judío awaruzain nanazi, paiña kwal namanapa. Usne Judío chi awaruzakas nanara, paiña kwal namanapa. Watcha Diosne Judío awaruzakas Judío chi awaruzakas kawarain nanara, Dios iztakin nil uzninnanapa. 30 Katmizna maza Dios uztu akwa, usne Judío awa nîjkulamturuzakas Judío chi awa nîjkulamturuzakas kawarain wat kulnanat kit paiña kwalkanain sapnanazi. 31 Cristora nîjkulturuzne Dios Moisésta înintît aizpa chîhkaapiznamanazi. Aune Dios înintît aizpa wari minpuspas.
Abrahampa kwinta
1 Mane Abrahampa, au ñamin irît kwalpa minñazsan. Abraham kamtît aizpa piankamasan. 2 Dios Abrahamta wat kultakas, ussa wat namtîtkas, Diosne ussa saptachi, paiña wat kal akwa. Katmizna Abrahamne Dios iztakin “Na kirît akwa, wat namish” kizsachi. 3 Dios pînkîhta ka parît: “Abraham Diosta nîjkultît akwa, Diosne ussa wat namnin kit paiña kwail kirît aizpa wat kultît.” 4 Kalpamikane kal kimmikasha pial tamtu, paiña kal kimtu akwa. Kalpamikane kain mîlamtuchi, kal kimtumika us saptu aizpa kana kimtu akwa. 5 Kawarain mînminkas paiña kal kisachi, Dios ussa wat namninnapa. Diosne sunkana awaruza kamtanamtuchi. Diosne kwail kimturuza, Diosta nîjkulturuza wat namninnat kit uspa kwail wat kulnanazi. Awa Diosta nîjkulamtu akwa, Diosne usparuza sapnat kit uspa kwail kaninnanashina. Awane chinkas kisachi, ussain watsat mîlnana. 6 Ñamin Davidne watsal kimtumikawa kainara. Awa Moisésta înintu aizpa kimtuchikas, Diosne awara wat namninshina. Wat namtîtmikane wat kulnazi. 7 Sunkana parît: “Diosne Dios înintu aizpa mîmtuchiruzakas ñanta kwail kimtuzakas wat kulninnamtu. Sun akwa uspane wat kularît maanazi. Uspane watsal maanazi, Dios uspa kwail kaninnamtu akwa. 8 Uspane wat kularît maanazi, Dios uspa kwail mainnintu akwa.” 9 Diosne Judío awa señal samturuzakas Judío awa señal samtuchiruzakas wat kularît maanazi. Mamasa ka kaiznamtus: “Abraham Dios kaizta aizpa nîjkultît akwa, Diosne ussa sap kit paiña kwail wat kul kit wat namninta.” 10 Diosne Abrahamta sap kit wat namnintît, Abraham Judío awa señal paiña ñara sarachasmin. Dios Abrahamta wat namnintawane, Diosne Abrahamta Judío awa señal paiña ñara sanapa îninta. 11 An ñancha Diosne Abrahamta wat namninta. Kwiztane Abrahamne Judío awa señal paiña ñara sanintît. Dios Judío awa sarachasmin, Dios Abrahamta sun señalkasa sanintachasmin, Abrahamne Diosta nîjkulta. Diosne wan ussa nîjkulturuza sapnat kit uspa kwail wat kulninnamtu. Wan Diosta nîjkulturuzne Abrahamta uspa papihshkanain mîjmazi. 12 Judío awa señal uspa ñara saamturuzne Abrahamta uspa papihshkanain mîjanazi, Abraham nîjkultakanain nîjkularane. Circuncisión kitchasmin, Abrahamne Diosta nîjkulta.
Diosne ussa nîjkulturuza mîlan namtu
13 Diosne Abrahamtakas paiña kwizta kwaltuzakas sun su sappanapa mîlan namnara. An sukin uztuasmin, Abraham Dios mîlan namtît aizpa saptachikas, usne Dios kaizta aizpa mîra. Diosta nîjkultît akwa, Diosne ussa wat namnin kit paiña kwail wat kulta. 14 Moisés îninta aizpa mîmturuzne “aune Dios mîlan namtît aizpa sappanapas” ñanta minñamtu. Katmizna Dios kin namtît aizpa uspa akwa kainsîh. Sunkana minñamtune, Diosta nîjkulna kainsîh. 15 Awa Moisés îninta aizpa mîarachi akwa, Diosne kwail awaruza aliz kulnat kit usparuza ilninnanazi. Dios sun pit îninnaratkine, awane sun pit mîasachiwal. Awa sun îninta pit pian akwa, uspane uspa kwail kiarît aizpa piankamat kit sun îninta pit mîashitchi. 16 Abraham Diosta nîjkultît akwa, Diosne ussakas paiña kwizta kwaltuzakas wat kinana namta. Watcha, Diosne us kin namtît aizpa mîlanana wenamanazi. Judío awaruzkas Judío chi awaruzkas Dios mîlan namtît aizpa kawarain sappanazi, Abraham nîjkultakanain nîjkulamtu akwa. Sunkana wan Diosta nîjkulturuzne Abrahamta, uspa papihshkanain mîjmanazi. 17 Dios pînkîhta ka parît: “Akkwan suras awaruzne Abrahamta ‘nune au papihsh i’ kizanazi.” Abrahamne Dios kaizta aizpa nîjkulta. An Diosne irîttuza mamasa kakulninnashina. An Diosne chiwazha an ñamin tuchi aizpa sashina. Sunkana Abrahamne Diosta nîjkulta. 18 We piankas, Abrahamne Diosta nîjkul kit tîrîzta, Dios sun kin namtît aizpa sapnakima. Diosne paiña kwal akkwan pashpa kawiranazi kizta. Dios pînkîhta ka parît: “U kwalne kwisha akkwan pashpa mîlnanazi.” 19 Cien año uztakas, kwisha îlapa parîtkas, Abrahamne Diosta nîjkulmîzta. Akkwan año mîj akwa, Abrahamkas Sarakas pashpa mîlsachiwailkas, Abrahamne Diosta nîjkulmîzta. 20 Abrahamne Dios kin namtît aizpa an tînta nîjkulmîz kit an tînta namta. Usne “Dios kin namtît aizpa kisachi” kaiztachi. Uskas “Dios kwisha wari,” kizta. 21 Diosta wat piankamtît akwa, usne sunkana minta: “Watcha, Diosne us kin namtît aizpa kishina.” 22 Katmizna Diosta nîjkultît akwa, Diosne Abrahamta wat namnin kit ussa wat kulninta. 23 Dios Abrahamta wat namtîtkas, Diosne an akkwantuzakas wat namninnashimtu. 24 Diosne au akwakas sun pit parît, ma payu Diosta nîjkulturuza wat namninnanapa, au kwail kiarît aizpa wat kulninnanapa. Aukas Dios au Anpat Jesústa irîttas kakulninta nîjkultumakpas. 25 Au kwail kiarît akwa, Diosne Jesústa chîhkarît, awa ussa piantaanapa. Diosne kwiztane ussa irîttas kakulninta, aumîza wat namanapa. Au Anpat Jesucristo akwa, Diosne aumîza chiyura pailta payukima uzninnanazi.
Diosne awaruza wat namninnamtu.
1 Mane au Diosta nîjkulamtu akwa, Diosne aumîza wat namninnat kit au kwail wat kulninnara. An Anpat Jesucristone aumîza Dios iztakin kalpain uzninnamtu. 2 Au Diosta nîjkulamtu akwa, Diosne aumîza sapnat kit watsal kiwainanamtu. Aune us au akwa kimtu aizpa pianmakpas, us aumîza wat uzninnamtu akwa. Aune Diosta tîriztumakpas, Dios aumîza uskanain namninnakima. Sun akwa, aune kwisha wat puramakpas. 3 Dios aumîza wat kinamtuasmin, aune wat kulanapas. Au parishiztukas, Dioskas aumîza wat kulninnashina. Parishiztuasmin, aune wan tailchamtumakpas, an tînta namana. 4 Diosne wan parishizmu tailchamturuza wat minñamtu. Dios au akwa wat minamtu akwa, aune us mîlan namtît aizpa sapna tîriztumakpas. 5 Sunkana Diosne us kin namtît aizpa tîrizturuza mîtsal chi kininmanazi. Usne aumîza pîrail kaizmanazi. Diosne paiña Sînam Izpulta au kaijchukin uznapa îninta, yawa Dios aumîza panashimtu piankamanapa. 6 Au tînta chi akwa, aumîzain kiwainarachi akwa, Cristone wan kwail kirîttuz akwa irît. Diosne Cristowa irîmtu payu narît. 7 Izti, auruzpain mînminkas mamaz akwa imanazi, kwail kirîtne. Kainchas mazane wat kimtumika akwa ishina. 8 Au kwail kiarîtkas, Diosne yawa aumîza pashinara annat kit Cristora au akwa inapa îninta. 9 Cristo au akwa irît akwa, Diosne aumîza wat namnat kit au kwail kiarît aizpa wat kulnara. Dios awaruza wat namninnarane, usne aumîza watsat mîlnashina, minpa payura parishizamanpa. 10 Aune Diosta aliz manashî. Diospa Painkul au akwa irît akwa, Diosne aumîza paiña izmuruz namninnara. Dios aumîza paiña izmuruz namninashimtune, manaz Diosne aumîza watsat mîlnashina, Cristo uztu akwa. 11 Dios aumîza watsat mîlnashimtu akwa, Diosne aumîza watsal kulninnanazi. Sunkana Jesucristone aumîza Diospa izmuruz namninnarît.
Adánkas Cristokas
12 An ñamin au sukin Adánne, maza awain, kwail kirît. Usne sun kwail kirît aizpa wantuza kwakninnara. Kwiztane wan awane Adánkana namarît. Us kwail kirît akwa, awane iamîzta. Sunkanane wan awa au sukin uzturuzne kwail kiat kit iamîznazi. 13 Moisés îninta pit pînkîhta parachasmin, wan awa an sukin uzturuzne kwail kiarît. Moisés pînkîhta parachasmin, Diosne awaruz kwail kiarît aizpa wiantachi. 14 Adánpa kwizpa uztaruzkas Moiséspa an ñancha uztaruzkas, iara, uspa kwail kiarît akwa. Adánpa kwizta uztaruzne Adán kwail kirîtkana kwail kiarachi. Adán paiña kwail kirît aizpa wantuza kwaknarakas, Cristone kwiztane at kit wantuza wat namninashina. 15 Nane uruza paas pit kamtanamtus. Une Adán mîz kit ñanta kirît piankamarawa. Adán kwail kira akwa, pailta awaruzne iarînazi. Ukas Dios wan awaruza wat kiwainashimtu piankamtawa. Adán kwail kitkas, Diosne awaruza pashinat kit Jesucristora îninta, awaruza kiwainnanapa, usparuza watsat mîlnanapa. Jesucristone Adánkin an wari, Dios Jesús akwa wan awaruza kwisha kiwainashimtu akwa. 16 Maza awa kwail kirît akwa, wan awane parishizanazi. Dios wan awara pashinamtu akwa, usne kwail awaruza wat namninnat kit uspa kwail kiamtu aizpa wat kulnanazi. Adánkin Dios kimtu aizpa anza wari, Dios awaruza paiña iztakin wat namninnamtu akwa. 17 Maza awa kwail kirît akwa, pailta awaruzne iarînazi. Dios wantuza pashinamtu akwa, Diosne Jesucristora piankamturuza sapnat kit uspa kwail kiarît aizpa wat kulnanazi. Dios kimtu aizpa Adánkin anza wari. Diosne Jesucristo akwa usparuza chiyura uzninnananzi. 18 Adán kwail kit akwa, wan awaruzne kwail namat kit uspa kwail akwa parishizanazi. Cristo au akwa irît akwa, aumîza wat kit akwa, Diosne wan Jesucristora nîjkulturza wat namninnashina, pailta payukima chiyura uzanapa. 19 Maza awa Dios îninta aizpa mîrachi akwa, pailta awaruzne kwail namarît. Sunkana Cristo paiña Papihsh kurunta aizpa kirît akwa, Cristo au akwa wat kit akwa, Diosne awaruza wat namninnashina, uskasa uzanapa. 20 Diosne paiña pit Moisésta îninnara, awa uspa kwail kiarît aizpa an piankamanapa. Awa an akkwan kwail kiamtuasmin, Diosne wan awaruza an akkwan wat kinashira, uspa kwail wat kulnanapa. 21 Minpa pit kaiznamtus. Awa kwail kiashimtu akwa, uspane iarînazi. Sunkanane Dios wan awaruza pashinamtu akwa, Diosne au Anpat Jesucristora au sukin inapa îninta, awaruza wat namninnanapa, uspa kwail wat kultananapa, pailta payukima uzanapa.
Cristora piantuzne kwail kinwachi
1 Aune ¿chima kizanapai? Aune an kwail kitchiwamakpas, Dios aumîza an akkwan wat kinanapa, Dios aumîza an wat kulnanapa. 2 Aune mizurainkas sunkana kwail kiasachimakpas. Aune kwail kin chîhkashimtumakpas, Dios iztakin kwail kiman. 3 Jesucristora piantuzne Cristowa munkasa munnara. Sunkana aune Cristokasa wanmaktîtmakpas. Au kwazikasa munkane, aune Dios iztakin Cristora kanpamtuzkanain namtamakpas, us aumîza mîlashimtu aizpa sappanapa. 4 Pira win kit Cristo munkasa munarît akwa, aune ussa kamtîtmakpas. Ussa kanpamtuasmin, aune us pashimtu aizpa kimtumakpas. Sun akwa aune kwail kitchiwamakpas. Au Taitta Dios kwisha tînta akwa, usne Cristora irîttas kakulninta, mamasa uznapa. Sunkana Diosne aumîza kiwainnashina, maiztît awakanain uzanapa, mamaz tuntu uzanapa. 5 Diosne Cristora wanmakturuza namninnarît, kwail kishiamanpa. Uskana namtîttuzne, uskasa wanmaktîttuzne, maizarît, nil uzana, kwail kiaman. 6 Aune an ñancha miza uzara pianmakpas. Aune kwail kaiznash. Mane Diosne au kwail kiashimtu aizpa kaninta. Cristo kurishta au akwa irît akwa, usne aumîza kiwainamtu, an kwail kiashimanpa. 7 Awa irîkane, usne kwail kin pailtît. Kawarain Diosne mazara maiz kit masas awakanain namnintu, an kwail kishimanpa. 8 Cristora piantuzne Cristokasa wanmakkarît. Cristo au akwa irît nîjkulamtu akwa, aune ma payu uskasa uziznapas pianmakpas. 9 Cristo irawane, aune Dios Cristora irîttas kakulnintît pianmakpas. Katmizna usne mamasa imanazi. Pailta payukima uznazi. 10 Cristo irîkane, usne masa piji kwail kirîttuz akwa ira. Ma chiyura uztuasmin, Cristone pailta payukima Dios akwa uz, ussa kiwainna. 11 Mane une sunkana kiarawa. Umin izizanaka. Mane kwail kin minman. U Cristora wanmaktît akwa, une Dios pashit aizpa kizanaka. 12 Katmizna an sukin uzamtuasmin, aune wan kwail kirît aizpa chîhkatpamakpas. Aune chiwazha ayukta kwail kinpa minñashimtu aizpa mîrakiwamakpas, sun kwail kimanpa. 13 U ayukta kwail mintu aizpa kiman. Kancha uruza Diosta chîhkatpa, wat kianapa. Une an ñamin irît awakanain mazi. Kwiztane Dios uruza uzninara akwa, une Dios wat pashimtu aizpa kiaiznaka. 14 Ma uzamtuasmin, u ayukta kwail minñamtu aizpa kiman. Dios Moisésta paiña înim pit înintakas, sun înim pitne, aumîza mizurainkas watsat mîlnamanazi. Dios aumîza kwisha wat kiwainashimtu, kwail kiamanpa.
Kiwainmumikawa kwinta
15 ¿Aune chima kizanapai? Aune an akkwan kwail kitchiwamakpas. Diosne awaruza wat kiwainnamtuchi, awa sun înim pit mîamtu akwa. Dios awaruza pashinamtu akwa, usne awaruza wat kiwainanazi. 16 Une anpatpakas kiwainmumikawakas wat pian. Kiwainmumikane anpat înintu aizpa mîmtu. Kwail kishimtumikane paiña kwail anpat înintu aizpa mînazi. Sun akwa usne Diostas attishta chanazi. Diosne us înintu aizpa mîshimtumikasha wat namninnat kit paiña kwail wat kulnazi. Sun akwa nil uznazi. 17 An ñamin une u kwail anpatta mîat kit kwail kiara. Mane Diosta aishtaish kiztus, u na kamtanara aizpa sapparît akwa. U sun watcha mîara akwa, une Dios kiwainmuruz namat kit us îninta aizpa kiara. 18 Diosne uruza chîhtnara, an kwail kin pashiamanpa. Dios uruza chîhtnara akwa, une Diospa kiwaintuz namara, nil uzanapa. 19 U we piankamamtu akwa, nane uruza an kamtananash, ap pit an mîanapa. Diosta piankamarachasmin, une sînam chi aizpa kiashit kit akkwan tuntu kwail kiashira. Mane Diosta piankamamtu akwa, une Dios wat înintu aizpa kiarawa, nil uzanapa, Dios pashit aizpa kianapa. 20 U akkwan tuntu kwail kiashikane, une Dios awaruza kurunara aizpa mîashitchi. Nil uzarachi. 21 An ñamin kwail kiamtuasmin, une sun kwail akwa mîtsal kiat kit chinkas kana kiarachi. Sun kwail kimturuzne paimpa iarînazi, Dios uzkin putnasachi akwa. 22 Dios au kwail kiashit aizpa kanintît akwa, usne aumîza paiña kiwaintuz namninnara. Usne aumîza sînam awakanain namninnamtu, pailta payukima chiyura uzanapa. 23 Kwail kimmikane chinkas sapmanazi, irîkane. Usne Dios uzkin uzmanazi. Diosne au Anpat Jesucristora pianturuza uskasa wanmaktuza pailta payukima chiyura uzninnanazi.
Kasara kin kwinta
1 Une Diosta piantuz mai. Na uruza kaiznamtu aizpa mîizanaka, uruza înintît aizpa piankamamtu akwa. An sukin uzturuzne chiwazha înim mîarawa, ianakima. 2 Ashampa ampu mîjmikawa kwinta kainanamtus. Ashampa ampu mîjmikane paiña ampukasa uztawa, sunkana înintît akwa. Usne paiña ampura kwaisachi. Paiña ampu irîkane, sun ashampane sun înintît aizpa mîmanazi, paiña ampu uztuchi akwa. 3 Paiña ampu uzasmin, mamaz ampukasa yaltane, sun ashampane kwail cham ashampa i. Ampu irîkane, sun ashampane paiña ampura wanmaksachi. Sun ashampa chîht akwa, usne mamaz ampura mîlshinai. Suasne usne kwail cham ashampa chi. 4 Une Diosta piantuz mîizanaka, na kaiztît aizpa piankamanapa. Cristo u akwa irît akwa, une Moisés înintît aizpa an mîarakiwa, u Cristora wanmakkarît akwa. Une Cristo înintu aizpa kiashina. Dios Cristora irîttas kakulnintît akwa, usne aumîza kiwainnanazi, paiña wat kal kianapa, us iztakin nil uzanapa. 5 Cristora piankamarachasmin, aune au uzashitkanain uzanashî. Moisés înintît aizpa izamtukas, aune au kwail kiashimtu aizpa kamanashî. Kwail minñamtuasmin, aune chiwazha kwail kishimtu aizpa kianashî. Au kwail kiamtu akwa, aune iarînapas. 6 Mane Diosne aumîza chîhtnarît, Moisés Judío awaruza îninnarît aizpa mîamanpa. Ñamin aune sun îninta pit mîramakpas. Aune sun îninta pit mainsachimakpas. Paiña Izpul aumîza kiwainamtu akwa, mane aune Diosta mîmtumakpas, watsal uzana.
Awane kwail kiamtu
7 ¿Aune chima kizanapai? Mane mînpazha Judío awaruza îninta aizpa kwail i minñashina. Sun îninta pitne kwailchi. Wari. Sun îninta pit akwa, nane kwail kimika ish pianish. Sun îninta pit pînkîhta ka parît: “Patna pashikain.” Katmizna nane patna pashimtumika kwail kimtu pianish. 8 Sun îninta pit iztuasmin, nane patna pashimîztuarau. Sun îninta pit wachiatne, nane sun kwail pura aizpa piankamsachish. 9 Na sun îninta pit piankamtachasmin, nane watsal uztus mintau. Dios îninta aizpa piankamtawane, nane ap kwail kishit aizpa nîjkultau. 10 Sun akwa nane Diostas attishta charau. Dios sun pit nawa uznapa înintakas, nane înintît aizpa kimanamtish. Na sun îninta pit kisachi akwa, nane Diostas attishta charau. 11 Na Dios înintît aizpa kisachi akwa, nane ap kwail kit aizpa nîjkultau. Sun akwa nane Diostas attishta charau. 12 Katmizna nane mamasa kaiznamtus: Sun înim pit Diostas at akwa, kwail chi mai. Watchakas watkas mai. 13 Aune “Dios înintît aizpa wari” pianmakpas. Kwail chi. Sun wat înim pit nawa Diostas attishta chaninta. Dios îninta aizpa piankamtawane, nane kwailpa piankamtau. Sun wat înninta pit akwa, nane ap kwail kirît aizpa tailchasachish. Nane Diostas attishta charau. Na kwail kishirît akwa, nane kwisha kwail namtît nîjkultau.
Masetne kwailkas watkas kishimtumakpas
14 Aune Dios Sînam Izpul sun înim pit aumîza îninnara pianmakpas. Dios îninta aizpa watkas, nane wan awakanain uz kit kwail kishimtus. 15 Watcha, na kimtu aizpa we pianish. Masetne wat kishimtu aizpa kimanash. Masetne kwail kishitchi aizpa kinash. 16 Na kwail kishimtuchi aizpa kitkima, nane na kwail kimtus nîjkultus. Suasne nane Dios înintît aizpa wari kiztawash. 17 Katmizna ap kaijchukin kwail wa akwa, nane kwail kishimtus. 18 Ap kaijchukin wat wachi pianish. Na wat kishimtukas, wat kisachish. 19 Nane wat kishimtu aizpa kimtuchish. Sunkana nane kwail kishitchi aizpa kimtus. 20 Suasne na sun kwail kishitchi aizpa kitkima, nane kwail kimîztus, kwail ap kaijchukin wa akwa. 21 Wan awaruzne nakanain uzamtu. Wat kishimtukas, nane kwailmin kimîzish, wat kimtuchin. 22 Nane ap kaijchukin watsal kultus, Dios paiña îninta pit nawa mîlat akwa. Sun pit mîshimtus. 23 An sukin uzasmin, nane mamaz tuntu pitkas nawa înintu pianish. Sun mamaz pitne nawa kwail kin kinintu. Sun kwail kimanash minkane, nane sun mamaz pit mîmtu, kwail kinpa. Sun mamaz pitne na mintu aizpa înintu, na kwail kinpa. 24 Sun akwa nane kwisha tayalish, wan awakana kwail kishimtu akwa. Anne tailchasachish. ¿Mînmika nawa kwainshina, na kwail kimanpa? 25 Diosmin nawa kiwainshina, kwail kin kishimanpa, kwail minmanpa. Katmizna nane Diosta aishtaish kiztus, Dioskas au Anpat Jesucristokas nawa kiwainshimtu akwa, us kuruntu aizpa mînapa. An sukin uztuasmin, nane kwail kin minshimtus. Minpa pit kainanamtus. Ukas nakas Dios înintît aizpa mîrawamakpas, kwail kimanpa.
Diospa Sînam Izpulne awaruza miza uzna kurunnamtu
1 Mane Cristo au akwa irît akwa, Diosne Jesucristora piantuza, Jesucristokasa wanmakturuza, uspa kwail akwa parishizninmanazi. 2 Sînam Izpulne Jesucristora piantuza mamaz tuntu uzninnat kit usparuza Jesucristokasa wanmakkamtu. Sun akwa usne nawa kwail kimanpa kiwainamtu. Mane nane ap kwail kirît akwa parishizmanash. 3 Awa Moisés înintît aizpa kiasachi akwa, uspane uspa kwail akwa wat namarachi. Diosmin awaruza wat namninashina. Diosne paiña painkulta au sukin îninta, apa kwail awa uztukin uznapa. Jesús an sukin awakanain uztuasmin, awakanain uzta, kwail kitchin. Usne awa akwa irît, Dios au kwail kiarît aizpa kaninnanapa. 4 Dios au akwa sun kirît akwa, Sînam Izpulne aumîza kurunnat kit Dios înintît aizpa mîninnamtu. Diosta pianchiruzne Dios îninta aizpa mîasachi. 5 Diosta pianchiruzne chiwazha ayukta kwail minñashimtu aizpa kiamtu. Sînam Izpul kuruntu aizpa mîmturuzne us kuruntu aizpa minñat kit ka kiashimtu. 6 Kwail kishiamtu aizpa minturuzne Diostas attishta uzanazi. Diosne Sînam Izpul kuruntu aizpa kishimturuza pailta payukima kalpain uzninnanazi, Dioskasa uzamtu akwa. 7 Kwail kishimturuzne Diosta aliz mai, mizurainkas Dios înintu aizpa miashimtuchi akwa. 8 Chiwazha kwail kin minturuzne Dios pashimtu aizpa kiasachi. 9 Une chiwazha kwail kiashimtuchi. Mînminkas uruza kwail kin kininsachi. Une Sînam Izpul kuruntu aizpa mîamtu, Sînam Izpul u kaijchukin uztu akwa. Cristowa Sînam Izpul mîjchiruzne Cristowa kwal namamtuchi. 10 Au kwail kiarît akwa, aune wan awakanain iarîrnawas. Au kwail kiarîtkas, Sînam Izpulne Cristora piantuza uzninnanazi. Paiña Izpulne au kaijchukin uztu akwa, usne au izpultuza uzninnat kit Dios iztakin aumîza nil namninnashina. 11 Diospa Izpulne Cristowa ña irîttas kakulninta pianmakpas. Sînam Izpulmin aukasa uz kit au ña minpa payura irîttas kakulninnanazi. Sînam Izpul au ayukta uztu akwa, Diosne au ña mamasa uzninnanazi. 12 Sun akwa, Diosta piantuz mîizanaka. Aune Dios Izpul aumîza kuruntu aizpa mîrawamakpas. Aune au kwail minñamtu aizpa kitkiwamakpas. 13 Kwail kin minturuzne watcha iat kit Diostas paimpa uzanazi. Dios Izpul u ayukta uztu akwa, usne uruza tînta kiwainanazi, kwail kiamanpa. 14 Diosne paiña Izpul kuruntu aizpa mîshimturuza paiña kwal namnashina. 15 Diosne aumîza paiña Sînam Izpulta mîlanarît, ussa ishkumanpa. Sînam Izpulne aumîza paiña pashparuzkanain kwininna namtu. Dios aumîza paiña kwal namnintît akwa, aune “Diosne au Taitta i” kiziznapas. 16 Diospa Sînam Izpulne au izpulkasa wanmaktu, au Diospa kwal makpas piankamninnanapa. 17 Dios aumîza paiña kwal namarît akwa, aune Dios aumîza kin namtît aizpa sapiznapas. Aune Cristokasa Dios wan watsarît mîj aizpa sapiznapas. Aune, Cristokana parishizturuzne, uskasa chiyura wat uziznapas.
Dios kin namtît aizpa sappiznapas
18 Ma an sukin uzamtuasmin, aune parishiziznapas. Awa an sukin parishiztukas, Diosne Diosta piantuza wat kiwainnanazi, kwisha watsal puranpa. An sukin parishizamtukas, aune mamaz payura Dios iztakin anza watsal manapas. 19 Dios an sura uztuza paiña kwal namninnashimtu akwa, uskas usparuza maiznat kit wat namninnanazi. Suasne awane Dios an su sarîtkin wat kianazi. Aune tîriztawamakpas, Dios wan sarît aizpa maiznakima. 20 An ñancha awa kwail kirît akwa, wan Dios an sukin sarît aizpa maizarît. Makima aune tîriztumakpas, Dios wan chiwal wat sanakima. 21 Makima wan sarît aizpa iamtu. Mamaz payura Diosne wan sarît aizpa maizninnanazi, mamasa iamanpa. Dios awaruza paiña kwal namnintawane, usne wan au sukin sarît aizpa mamasa wat namninnanazi. 22 Aune wan su sarîtkin parishizamtu pianmakpas. Makima wanne ashampa pashpa mîltukanain naizamtu, ishtu kanakima. 23 Wan an sukin sarît aizpa parishiztukas, aukas parishiztumakpas. Dios an ñancha paiña Sînam Izpulta aumîza mîlanarîtkas, aune parishiz kit ayukta pihshtaamtumakpas, Dios aumîza paiña pashpakanain sapnanakima. Dios aumîza paiña kwalkanain kwira kinamtu akwa, aune paiña kailtu payu impara imparain tîriztumakpas, aumîza irîttas kakulninnanapa, uskasa uzana. 24 Diosne aumîza watsat mîlnara, au ussa nîjkulamtu akwa. Ussa nîjkulamturuzne impara imparain tîrizamtu, us wan kin namtît aizpa sapnakima. Dios kin namtît aizpa saptamikane an sapna tîriztuchi, me us wan saptît akwa. 25 Au wan kin namtît aizpa sappamtuchi akwa, aune impara imparain tîrizat kit tailchamtumakpas, sun sapnakima. 26 Au Diosta tîrizamtuasmin, Sînam Izpulkas ayukta tînta pihshtat kit au akwa Diosta mamaz tuntu paikumtu. Au Diosta paikwan we pian akwa, Sînam Izpulne aumîza kiwainat kit Diosta au akwa nil paikumtu. 27 Dios au ayuk kaijchukin mintu aizpa pianasmin, uskas paiña Izpul mintu aizpa pian. Sun akwa Sînam Izpulne au Diosta piantuz akwa Diosta paikumtu, us Dios pashimtu aizpa wat pian akwa.
Aune anuppaiznapas
28 Aune Dios kimtu aizpa pianmakpas. Diosne au ussa pashimturuza wat kiwainamtu, chiwazha aumîza kimtu aizpa watsal puznapa. Diosne aumîza akwanat kit au akwa sunkana kimtu, us pashimtu aizpa kianapa. 29 An su sarachasmin, Diosne au ussa nîjkulamturuza nanara, paiña painkulkanain namanapa, Cristo uztakanain uzanapa. Diosne “Cristo an tînta i” kiz kit wan ussa piantuza sapnamtu, paiña kwal namanapa. 30 An su sarachasmin, Diosne au ussa pashimturuza nanarît. Suasne usne aumîza wat uzanapa akwanat kit au kwail kiarît aizpa kaninnara. Dios aumîza akwanamtuasmin, usne aumîza wat awakanain namninnat kit au kwail kiarît aizpa wat kulnarît. Au kwail kiarît aizpa wal kulnarît akwa, Diosne aumîza paiña Painkul uztukin watsal uzninnanazi. 31 ¿Aune chima kizanapai? U na kaizta aizpa nîjkulamtuasmin, ma pitchin mîizanaka. Dios paiña izmuruza kiwainamtukima, mînminkas aumîza anuppasachi. Aune kwailtuza ishkuamanapas. 32 Aune Dios paiña painkulmin au akwa irînpa chîhkarît pianmakpas. Sunkana usne au we aizpa aumîza kain mîlananazi, us pashimtu aizpa kianapa. 33 Mînminkas “Dios narîttuza wat kulmanazi” kaizsachi, Dios usparuza me wat kulnarît akwa. Diosne paiña narîttuza maizninnat kit uspa kwail kiarît aizpa kaninnara. 34 Mînminkas “usparuza kwail kiarît” parasachi, Cristo au kwail akwa irît akwa. Kwiztane Diosne ussa irîttas kakulninta. Mane usne Dios iztakin, Dios înintukin, uz kit au akwa Diosta paikumtu. 35 Cristone aumîza pailta payukima pashinanazi, pailtachin. Mînpazha aumîza parishiznintukas, usne aumîza pashinanazi. Mînpazha aumîza ilnamtukas, usne aumîza pashinanazi. Au yak kiamtukas, usne aumîza pashinanazi. Au pïn we mîjkas, usne aumîza pashinanazi. Au uzkin kwail purakas, usne aumîza pashinanazi. Awa aumîza piantamtukas, usne aumîza pashinanazi. 36 Sunkana Dios pitta ka parît: “Awane aumîza aliz kulat kit ussa piantuza pailta payu piantanashimtu. Uspane pîrikuruza piantamtukanain aumîza piantanashimtu.” 37 Au sukin chiwazha kwail parishiztuasmin, Cristone aumîza pashinat kit kiwainnashina, wan kwail anuppanapa. 38 Nane Dios aumîza watcha pashinamtu pianish. Au irakas, au irachikas, Diosne aumîza pashinamîznazi. Ángeltuzkas kwail chiyura mikwaruzkas aumîza Dios uzkis ukkasachi. Usne aumîza pashinamîznazi. Ñamin au kwail kiarîtkas, Diosne aumîza pashinamîznazi. Mamaz payura mamaztuz aumîza kwail kishiamtukas, Diosne aumîza pashinamîznazi. Chiyura tînta îninturuzne aumîza Dios iztakin ukkasachi. Usne aumîza pashinamîznazi. 39 Chiwazha chiyu kwashta uztuzkas chiwazha chiyu pulamal uztuzkas aumîza Dios iztakain ukkasachi. Diosne aumîza pashinamîznazi. Dios wan chiyurakas wan au sukin sarakas, usne aumîza chîhkamanazi. Dios au Anpat Jesucristora au sukin îninkane, Diosne yawa aumîza pashinamtu annara.
Diosne Israel awaruza nanarît
1 Na Cristora wanmaktît akwa, nane Cristora pianmika ish. Nane pîrail aptuchish. Diospa Sînam Izpulne nawa kurun kit na watcha kaiztu aizpa piankamnintu. 2 Nane Judío awa akwa kwisha tayaltus. Nane ap Judío kwal akwa ap kaijchura kwailpazha mintus. 3 Nane Diosta paikwanpain ish, Dios nawa parishizninnapa, ap Judío kwaltuza parishizninamanpa. Dios ap Judío awaruza sapnashitne, Cristora nîjkulashitne, usne nawa paimpa tashina, na Cristokasa uzmanpa. 4 Diosne usparuza Israel awa munnara. Usne usparuza paiña pashpakanain kwira kinarît. Israel awa pul suwara chamtuasmin, usne usparuza yawa watsal Dios i piankamninnara. Usne usparuza akkwan pijikima kin namnara, watsat mîlnanapa, Dios akwa uzanapa. Usne usparuza Sinaí înkalkin kwinta kinara, us înintît aizpa sappat kit mîanapa. Usne usparuza wanmakninnara, ussa wakpuj wainñanapa. Usne usparuza kwisha akkwan kin namnara, watsat mîlnanakima. 5 Abrahamkas, Isaackas, Jacobkas uspa ñamin kwal mazi. Anza tînta Cristokas Judío awa kwal azi. Dios Judío awaruza wat kinarît akwa, uspane Jesústa sapparachi. Sun akwa aune “Cristone Dios i” kizshinamakpas. Diosta “kwisha wari” kizanapas, Cristo wantuzakas wan sarîttuzakas îninnamtu akwa. 6 Akkwan Israel awa Cristora nîjkularachikas, Diosne usparuza paiña pitkin namtît aizpa kinarît. Wenamtachi. Dios Israel awaruza paiña kwal namninnarîtkas, usne an akkwan awaruza nanara, paiña kwalkas namanapa. 7 Sunkana wan Abraham pashparuzne Diospa kwal chi mai. Diosne Abrahamta ka kaizta: “Isaacpa pashparuzmin up kwal namanazi,” ka parît. 8 Katmizna wan pashpa au sukin kawimturuzne Diospa kwal namamanazi. Diosne Abrahamta maza painkul kawirana kin namta. Abrahamne Dios îninta aizpa mîra. Diosne ma payu Dios kin namtît aizpa mîmturuza paiña kwal namninnanazi. 9 Sunkana Diosne sun pit Abrahamta ka kin namta: “Maza año pailtuchasmin, Sarane, up ashampane, maza painkul mîlnazi, Dios nu akwa tînta kimtu piankamnapa.” 10 Mamaz kwinta kainanamtus. Isaacne, au ñamin irît papihshne, maza ashampara, Rebecara mîlta. Kwiztane Rebecane masain paas painkul mîl kit kawirara. 11-13 Paas pashpa mîltachasmin, uspa paas watkas kwailkas kirachasmin, Diosne Rebecara ka kainara: “Esaú an ñancha kawinazi. Kwizta kawiramikane, Jacobne, paiña aimpihsh îlapamikara îninnazi,” ka kizta. Dios pînkîhtakas ka parît: “Nane Jacobta an pashimtus. Esaúrakas an we pashimtus,” ka kizta. Sun paas pashpa kawirachasmin, Diosne sun pit ka kainara. Awa chinkas kitchasmin, Diosne awaruza nanamtu. Diosne sunkana min kit kimtu. 14 ¿Aune chima kizanapai? Dios paas painkultas mazara narîtkas, aune mizurainkas Dios “kwail i” kaizsachimakpas. Dios wari pianmakpas. 15 Diosne Moisésta ka kaizta: “Mamazta kiwainshitne, mamazta kiwainshinas. Mamazta wat kishitne, mamazta wat kishinas,” ka kizta. 16 Awa Diosta ussa wat kinpa saimtukas, Diosne ussa sapmanazi. Awa Dios ussa wat kinpa tînta kal kimtukas, Diosne ussa sapmanazi. Diosmin awaruza nanamtu, awaruza wat kiwainanapa. 17 Diosne pînkîhta ka patnin kit Faraónta, Egipto sura katsa mikwasha, ka kaizta: “Nane nua narau, ma payu uznapa, ap tînta kal piankamnapa. Suasne na kimtu akwa, akkwan an sukis awaruzne nawa piankamnanazi. Kwiztane awane na tînta ish piankamanazi.” 18 Katmizna Dios mînpazha awa wat kiwainshitne, usne wat kiwainshina. Diosne Diosta mîkaintuza maizninnashina, Dios kaiztu aizpa kiamanpa. 19 Mînpazha nawa ka kaizshina: “Dios sunkana kimtune, Diosne awaruza ilnasachi, Dios usparuza nîjkulninnarachi akwa,” ka kizshina. 20 Nu awakanain akwa, nune Diosta sunkana sînkasachi. Nune “Dios kit aizpa kwail i” kizsachi. Pil pail sammika pail samtukana, Diosne nua samtu. Mîzha. Pil pail sammikane akkwa tuntu pail sashina. Pailne pail sammikasha “nu nawa sunkana sanawachi,” kiznawachi. 21 Pail sammikane sam pil, pijtam pil, kwiat kit pail sashina. Pail samtuasmin, pail sammikane sun pilkasain masetne watsal pail sashina, awa izanapa. Masetne usne mamaz tuntu pail sun pilkasain samîztu, kumira ainat kit nailna. Kawarain Diosne us kishit aizpa awaruza kinashina. 22 Dios us kishit aizpa kishimtukas, usne awaruza Dios tînta i piankamninnat kit kwail kimtuza parishizninnanazi. Dios usparuza uspa kwail akwa ilnashimtukas, usne akkwan añokima kwail kimtuza impara imparain tailchanara. 23 Diosne impara imparain usparuza kurunnamtuasmin, uskas usparuza yawa Dios watsal iztît piankamninnara. Usne usparuza wat kiwainat kit an ñamin sun wat mintît aizpa aumîza kaiznanara, us uzmukin watsal uzanapa. 24 Diosne aumîza akwanara, aumîza watsat mîlnanapa. Usne Judío awaruzakas Judío chi awaruzakas akwanara. 25 Sunpa Diosne Oseasta pînkîhta panin kit ka kaizta: “Nane ap kwal chiruza akwananash, ap kwal namninnapa. Nane nawa pashinamtuchiruza akwananash, usparuza pashinana.” 26 “Diosne Judío chi awaruza, sun sura uztaruza, ‘une ap kwal chi’ kizta. Kwiztane Diosne, chiyura tînta uztumikane, usparuza akwanat kit paiña kwal namninnanazi.” 27 Isaíasne, Dios pit kainammmikane, Judío awawa ka kaizta: “Israel awane akkwan pashpa kawianazi. Uspa pashparuzne pi ksukana wanmakkanazi. Wantuza wiansachikas, Diosne akkwan watsat mîlnamanazi. 28 Au Anpatne me anpain pamtui, wan sukin uztuza uspa kwail kiamtu aizpa kainanapa, usparuza parishizninnanapa.” 29 An ñamin Isaíasne ka kaizta: “Diosmin an tînta mika i. Dios aumîza paiña kwal namnintakiatne, aune Sodoma pîpulukin uztaruz iarîtkanain iarîshinamakpas. Aune Gomorra pîpulukin uztaruz iarîtkanain iarîshinamakpas. Sun payuin, Diosne usparuza anuppanara, pailnakima.”
Israel awakas Dios watsal pitkas
30 Katmizna na kaiztu aizpa mamasa mîrain. Diosne Judío chi awaruza us iztukin nil namninnat kit uspa kwail kiarît aizpa wat kulnara. Judío chi awa Diosta sayarachikas, Diosne usparuza sapnara, ussa nîjkularît akwa. 31 Judío awaruzne sunkana kiashitchi. Uspane Moisés îninta aizpa mîshiara, Dios usparuza nil namninnanapa, Dios uspa kwail kiarît aizpa wat kulnanapa. Sun akwa Diosne usparuza sapnarachi. 32 ¿Diosne chikishma usparuza sapnarachi? ¿Diosne chikishma usparuza wat kulnarachi? Judío awa Diosta nîjkularachi akwa, Diosne usparuza nil namninnarachi. Uspane Moisés îninta aizpa kishiara, Dios usparuza sapnanapa. Sunkana chi. Katmizna uspane ñanta kiarît. Cristo kurishta irît akwa, Judío awaruzne Cristowa mîashitchi. Sun kammu pit sapparachi. Awa miwarain mittî ukta patkulamtukanain, Judío awaruzne Cristo akwa patkulat kit Cristora nakpînnara. 33 Mamasa Isaíasne pînkîhta panin kit ka kaizta: “Mîrain, nane Israel sukin mazara ukkana tanash. Awaruzne Cristo akwa, sun uk akwa, mittî patkulanazi. Awaruzne Cristo akwa, sun uk akwa, nîjkulamanazi. Ussa, an ukta, nîjkulturuzne mizurainkas Dios iztakin mîtsal kiamanazi, Dios usparuza nil namnarît akwa.”
1 Cristora piantuz Roma pîpulukin mîrain. Na ap kaijchukin Judío awaruza pashinamtu akwa, nane Diosta paikumtus, Judío awaruza watsat mîlnanapa. 2 Nane Judío awa Diosta kiwainashimtu pianish. Diosta kiwainashimtukas, uspane miza Diosta sayana we pian mai. 3 Uspane Dios kurunnarît aizpa mîashimtuchi, Dios usparuza wat kulninnanapa. Uspane we pian mai. Uspa kal kiashit akwa, usparuzpain wat namninnashira. Uspane Diosta nîjkulashitchi, Dios usparuza sapnat kit nil namninnanapa. 4 Dios Judío awaruza Moisés înintît aizpa chîhkanarîtkas, Cristone sun înim pit pailninta, uspa Cristora piantuza nil namninnanapa. Diosne Cristo kirît aizpa nîjkulturuza sapnat kit uspa kwail kiarît aizpa wat kulnanazi. 5 Mazantuzne sunkana minñashina: “Nane Moisés îninta aizpa kinash, Dios nawa nil namninnapa.” Awa ka minñamtukas, Moisés ka parît: “Wan înintît aizpa kishimtumikane wan înim pit kapal mîrawa, pailta payukima uzanapa,” ka parît. 6 Awa sunkana kisachikas, Diosne Jesucristo kirît aizpa nîjkultumikasha nil namninnazi. Cristora nîjkultumikane Moiséskana ka kaizmanazi: “Mazane chiyura nurawai, Cristora apa kailninnapa, aumîza Dios pit kainanapa, Cristo aumîza watsat mîlnanapa.” Sunkana minman, us me apa at akwa. 7 Cristora nîjkultumikane Moiséskasa ka kaizmanazi: “Mazane irît izpul tukin kihshtawai,” Cristora sayana. Sunkana minman, Cristo irîttas kakultît akwa. 8 Dios pitkin parît aizpa nîjkulturuzne Moiséskasa ka kaizashina: “Aune Dios pit mîjmakpas. Aune sun pit izshinamakpas. Au kaijchukin minshinamakpas.” Aune sun pitmin uruza kainammtumakpas, awa Cristora nîjkulanapa. 9 Mînpazha “Jesús ap Anpat i” mamaztuza kiztune, Diosne ussa watsat mîlnazi. Kawarain mînpazha paiña kaijchukin Dios Jesústa irîttas kakulninta nîjkultune, Diosne ussa watsat mîlnazi. 10 Mînpazha paiña kaijchukin Cristo kirît aizpa nîjkultune, Diosne ussa sap kit wat kulnazi. Sunkanain mînpazha Cristora nîjkultus mamaztuza kaiztune, Diosne ussa nil namnin kit watsat mîlnazi. 11 Mazane Dios pînkîhta ka Cristowa parît: “Ussa nîjkultumikane mizurainkas Dios iztakin mîtsal kimanazi, Dios ussa nil namtît akwa.” 12 Wan awane, Judío awaruzkas Judío chi awaruzkas, Dios iztakin kawarain mai. Wan Cristora nîjkulturuzne maza Anpatmin mîjmai. Sun akwa Diosne ussa paikumturuza kwisha wat kiwainnanazi. 13 Diosne paiña pînkîhta ka panintît: “Diosne au Anpatta paikumturuza watsat mîlnanazi.” 14 Cristora paikumtuchasmin, awane ussa nîjkularawa. Ussa nîjkultuchasmin, awane Cristowa mîarawa. Cristowa mîmtuchasmin, Dios pit kainammmikane uspa uzkin îtpa, sun Cristowa pit kamtananapa. 15 Dios pit kainammmika uspa uzkin îmtuchasmin, awane ussa înintawa. Dios pînkîhta ka parît: “Dios watsal pit kainammmika pianakane, awane kwisha watsal kianazi, Dios watsal pit mîamtu akwa.” 16 Mazantuz sun pit mîamtukas, wanne Dios watsal pit izkiamtuchi. Sunkana Isaíasne pînkîhta parît: “Anpat, akkwanne na kaiztît aizpa mîarachi.” 17 Sunkana awane sun watsal pit mîarawa, nîjkulanapa. Dios pit kainammmikane Cristowa pit awaruza kamtanamtu, awa sun pit mîanapa. 18 Mîzhain. Judío awa sun Cristowa pit mîarakas, uspane mîashitchi. Watcha, sun pit mîara. Dios pînkîhta ka panintît: “Dios pit kamtamturuzne awa uztukin kainana îara, awa sun pit mîanapa. Uspane wan suwara îat kit sun pit awaruza kainanara.” 19 Mîzhain. Judío awa sun watsal pit mîarakas, uspane watcha mîashitchi. Mamaz awaruz sun pit mîarachasmin, ñancha Moisésne sun pit pînkîhta ka parît: “Na Judío chi awaruza ap kwal namninnamtu akwa, Judío awaruzne uspawa kwail paraanazi. Sun Judío awaruzne kwisha pilchapuzanazi, Dios Judío chi awaruza, we mîmturuza, sapnarît akwa.” 20 Kwiztane Isaíaskas Dios kaizta aizpa pînkîhta para: “Nane nawa sairachiruza sapnanash. Nane nawa akwatchiruza akwananash, nawa piankamanapa.” 21 Isaíaskas Dios Judío awaruzpa kaizta aizpa ka parît: “Nane payu aizpa Judío awaruza akwanarau, nawa mîanapa. Na usparuza nawa kaiyanapa akwanarîtkas, uspane na usparuza kaizta aizpa mîashitchi.”
Dios Israel awaruza nanara
1 Mane mîzhain. Mînpazha Dios au Judío awaruza kwainarît kaizashina. Diosne paiña kwaltuza Israel awaruza mizurainkas kwainarachi. Nakas Israel awa ish. Abrahamkas Benjamínkas ap ñamin irît kwal mazi. 2 An ñamin Diosne Israel awaruza piankamninnat kit usparuza nanarît, paiña kwal namninnanapa. Diosne mizurainkas paiña kwaltuza, Israel awaruza, kwainarachi. Elíaspa kwinta Dios pînkîhta parît aizpa nîjkulizanaka. Diosta tînta paikumtuasmin, Elíasne Israel awaruza aliz kul kit Diosta kaizta: 3 “Anpat mîzha. Sun Israel awaruzne up pit kainammturuza piantanarît. Uspane awa Diosta wakpuj wainturuza piantaara. Uspane uspa Diosta paikumkin azpianara. Nane mazain nukkultît ish. Mane uspane nawa, nua nîjkultumikasha, up pit kainammmikasha piantaashipus ish.” 4 Sunkana Diosne Elíasta sînkara: “Nane an siete mil wakpuj wainturuza watsarît mîjash. Uspane Baal muntîtmikasha, dios chimikasha, kukaizamtuchi. Uspane Baal uzkin wakpuj wainñamtuchi.” 5 Kawarain ma payu mamaz Judío awaruz Diosta wanmakkamtu. Diosne akkwanchiruza nanat kit aumîza wat kinashimtu. 6 Dios usparuza nanarît akwa, usne usparuza wat kishinarît. Uspa wat kal kiarît akwa, Diosne usparuza nanarachi. Diosne mînminkas sapnamtuchi, awa wat kal kiamtu akwa. Usne awaruza kain kiwainnat kit usparuza wat kishinamtu. 7 Sunkana kirît. Judío awaruzne Dios pashimtu aizpa kiarachi. Judío awaruzne wat kal kiashira, Dios usparuza sapnanapa. Sun akwa, Diosne usparuza nil namninnarachi. Dios akkwan chin narîttuza wat kinarîtkas, Diosne mamaz Judío awaruza us kuruntît aizpa kwayanapa kininnara. 8 Dios pînkîhta ka parît: “Diosne usparuza mîmtuchiruzkana, nîjkultuchiruzkana, namninnara. Makima uspane Diosta piankamasachi. Uspane kasu izsachiruzkana namarît, Diosta piankamamanpa. Uspane mîsachiruzkana namarît, Diosta piankamamanpa.” 9 Davidkas Dios pînkîhta ka kaiztu: “Nane Diosta paikumtus, Diosta aliztuza naizanapa, ussa mîamtuchi akwa. Wan Judío awawa pishta izamtuasmin, uspane ‘aune kwisha wat makpas’ minñara. Uspa Diosta chîhkarît akwa, Diosne usparuza ilnanazi. 10 Diosne usparuza kamtachiruzkana namninnanazi, Diosta piankamamanpa. Diosne usparuza uspa kwail kiarît akwa ininnanazi.”
Diosne Judío chi awaruza watsat mîlnanamtu
11 Judío awa Dioskis paimpa îarîtkas, uspane Dioskis pailta payukima paimpa uzamanazi. Mamaz payura Diosne usparuza watsat mîlnanazi. Judío awa Dios îninta aizpa mîarachi akwa, kwail kiarît akwa, Diosne Judío chi awaruza akwanara, usparuza watsat mîlnana. Sun akwa Judío awaruza kiwainashimtu, Judío chi awa sapparît aizpa pashianapa. 12 Judío awa kwail kiat kit Dioskis paimpa îarît akwa, Diosne akkwan ñan awaruza wat kinamîzta. Judío awaruz Dios usparuza mîlashimtu aizpa sapparachikas, Diosne pampa Judío chi awaruza sapnat kit watsat mîlnara. Mamaz payura mînpazha Judío awaruzne Diosta piankamna kaiyanazi. Judío awa Cristora nîjkulakane, Diosne Judío awaruzpa akwa, an akkwan awaruza kwisha wat kinanazi. 13 Mane nane uruza, Judío chi awaruza, paranamtus. Dios nawa paiña înintamika namnintît akwa, us nawa Judío chi awaruza Dios watsal pit kainana înintît akwa, nane u akwa tînta kal kishimtus. 14 Ap Judío awa kwal ma payu Cristora nîjkulamtuchikas, nane u akwa tînta kal kimtus, uspa Dios uruza mîlanarît aizpa pashianapa, uspa ukanain Cristora nîjkulashianapa. Suasne Diosne mazantuz Judío awaruza watsat mîlnanazi. 15 Dios akkwan Judío awaruza kwainarîtkas, usne pampa ñan awaruza sapnat kit paiña izmuruz namninnara. Judío awaruz Cristora nîjkularawane, Diosne usparuza sapnat kit pailta payukima uskasa uzninnanazi. 16 Awa pan iltane, an ñancha wat puztane, wan kwizta pankas wat puzashina. Tî mujtît sam wajne, tîkas sam kun. Abrahamne sunkana i. Diosne Abrahamta nat kit Judío kwal namninta. Abraham wat akwa, Abraham Diospa kwal akwa, Abrahampa pashparuzkas Diospa kwal mai. 17 Judío awaruzne tî sailkana mai. Diosne usparuza tî sailkana wat tî kwalkis wizmalninnara. Sunkanane Diosne akkwan Judío awaruza kwainarît. U Judío chi awaruzne mamaz tî sailkana mai. Diosne uruza mamaz tî sailkana piznat kit wat tî kwalta ayukta pusninnara, sua chikkanapa. Sun akwa u Judío chi awaruzne Dios Judío awaruza kin namnarît aizpa sappashina, uruza wat kiwainnanapa. 18 Dios Judío awaruza kwainarîtkas, u Judío chi awaruzne Judío awakin anza wat chi. Uspa u nakmaltît tî sailkana mai nîjkultain. Une Judío awaruza Diosta piankamninnarachi. Kancha Judío awaruzne Judío chi awaruza Diosta piankamninñara. 19 Une ka kaizashina: “Diosne usparuza, tî sailkana, nakpalnarît, aumîza, Judío chi awaruza, sapnana, uspa nakpalnarîtkin pusninnana.” 20 Nane “sunne watcha i” sinkanash. Sun Judío awaruz Diosta nîjkularachi akwa, Diosne usparuza, tî sail nakpaltîtkana kwainarît. U Diosta nîjkulamtuasmin, Diosne uruza, paiña kwalkanain, watsarît mîlnanazi. Katmizna “aune Judío awakin anza watmakpas” minñanachi. Uruzpain izarawa. 21 Judío awa Diosta nîjkularachi akwa, Diosne usparuza tî sailkana nakpalninnat kit kwainara. Judío chi awaruz Diosta nîjkulamtuchine, Diosne tî sail nakpaltîtkana usparuzakas kwainanazi. 22 Dios mazantuza wat kinamtukas, usne mînpazharuza ilnanazi. Diosne ussa kanparachiruza, sun Judío awaruza, ilnat kit kwainarît. Diosne uruza, Judío chi awaruza, wat kinarît, ussa kanpaarît akwa. U Diosta mîashimtukine, Diosne uruzakas kwainanazi, uruza ilnana. 23 Judío awa Diosta kaiyakane, Diosta mamasa nîjkulakane, Diosne usparuza piznat kit mamasa sapnanazi, tî sail tî kwalta pusnintukanain. Dios tînta akwa, usne Judío awaruza sapnashina, pakmaltît sail tî kwalta pusnintukana, mamasa uzninnanapa. 24 Mamasa sun pitmin kainanash. Diosne uruza, Judío chi awaruza, paiña kwal chiruza, sapnat kit paiña kwal namninnara. Sunkanane Diosne Judío awaruza, paiña kwal kwairîttuza, mamasa sapnashina, Dioskasa uzanapa. Judío chi awaruzne sun kwail tî sailkana mazi. Diosne usparuza sapnara, sun kwail tî sail wat tî kwalta pusninnamtukanain. Judío awaruzne wat tî sailkana mai. Judío awa Diosta nîjkularachi akwa, Diosne usparuza tî sailkana nakpalnat kit kwainarît. Usne usparuza, Judío awaruza, mamasa sapnashina, paiña kwal mamasa namanapa.
Diosne Judío awaruza kakultananazi
25 Diosta piantuz, mîizanaka. Ñamin awane Dios kamtarît aizpa piankamarachi. Nane uruza sun kamtam pit kainanamtus, u “Judío awakin anza wat makpas” minñamanpa. Mînpazha Judío awaruz Dios kaizta aizpa mîashitchikas, anpane Diosta mîanazi. Judío chi awa Diosta kapal piankamarawane, Judío awaruzne, Dios narîttuzne, Diosta piankamamîznazi. 26 Sun kirîkane, Diosne akkwan Judío awaruza watsat mîlnanazi. Dios pînkîhta ka parît: “Watsat mîlmumikane chiyuras anazi. Usne Judío awa kwail kiarît aizpa sînam sananazi.” 27 Mamasa Diosne paiña pînkîhta kaizta: “Nane usparuza uspa kwail kiarît aizpa wat kultana namnarau.” 28 Judío awa Dios watsal pit mîashitchi akwa, Judío awaruzne Diosta aliz kularît. Katmizna Diosne paiña pit uruza, Judío chi awaruza, îninnara, u Diosta piankamanapa. Dios Judío awaruza mama aliz kulnarîtkas, Diosne usparuza mama pashinamtu, uspa ñamin papihshtuza akkwan kin namnarît akwa. 29 Dios mizurainkas maiztuchi akwa, paiña Judío awaruza kin namtît aizpa kinanazi. Usne usparuza mîlanarît aizpa nakamanazi. Usne wan akwarîttuza wat kinanazi. 30 An ñamin une, Judío chi awaruzne, Dios kaizta aizpa mîashitchi. Sun payu Judío awaruz Dios kaizta aizpa mîashitchiasmin, Diosne uruza, Judío chi awaruza, wat kishinamtu. 31 Sunkanane Judío awaruz Dios kaizta aizpa mîashitchi akwa, Diosne uruza wat kin minta. Mamaz payura Diosne usparuza, Judío awaruza, sapnat kit ukasa wat kinanazi. 32 Wan awa Diosta mîarachi akwa, Diosne wan Judío awaruzakas wan Judío chi awaruzakas uspa kwail kiarît aizpa piankamninnamtu. Awa Diosta nîjkulashikane, Diosne wan awaruza kawarain sapnat kit wat kiwainnanazi. 33 Anne piankamtain: Diosne wantuza kwisha wat kishina, us wan awara pian akwa. Usne wan chiwal pian. Mînminkas Dios pian aizpa piankamasachi. Mînminkas Dios kishimtu aizpa piankamsachi. 34 “Watcha, mînminkas au Anpat mintu aizpa piankamasachi. Mînminkas Diosta kurunsachi, us an tînta akwa.” 35 “Diosta chiwazha mîlamtumikane Diosta paikwasachi, Dios ussa chiwazha kailninnapa, Dios an ñancha wan us mîj aizpa ussa mîlat akwa.” 36 Diosne wan chiwal sarît. Uskas wan sarît aizpa watsamtu. Us akwa wan sarît aizpa purai. Katmizna aune “Dios kwisha wari” kizwizsan. Sunne watcha i.
Aune Dios kuruntu aizpa kitpamakpas
1 Mane nane uruza ma pitchin kurunnanash. U Diosta piantuz, mîrain. Dios aumîza kwisha wat kiwainarît akwa, nane uruza akwanamtus, u Diosta chîhkaamanpa, Dios u kaijchu sînam sananapa. An sukin uzamtuasmin, une Dios kaiztu aizpa mîarawa, us pashit aizpa kianapa. Sunkana minturuzne Diosta watsal wakpuj wainñanazi. Sunkana kitpamakpas. 2 U minñamtu aizpa maizarawa, Diosta pianchiruzkana uzamanpa. Diosne uruza u kaijchukin maiznashina, mamaz tuntu minñanapa, Dios pashit aizpa piankamanapa. Dios uruza kapal maizarawane, Diosne uruza kiwainanazi, wat kianapa, Dios pashit aizpa kianapa, an wat uzanapa. 3 Dios nawa wat kiwaintît akwa, usne nawa paiña înintamika namninta, wan u uzkin uzturuza kainanapa. “Aune mamaz awakin anza wat makpas” minman. Uruzpain wat min kit Diospa kal uruza chîhkarît aizpa piankamtain. Diosta nîjkulamtuasmin, une paiña kal uruza chîhkanarît aizpa us akwa kiarawa, pailnakima. 4 Wan awane maza ñakanain mai. Awa mittîkas pimpulkas, sailkas, chihtîkas, kîzpukas wan waji, sunkasa akkwan tuntu kal kin. Mazane wan kal kisachi. 5 Sunkana Diosta nîjkultuzkas akkwan purai. Au akkwan purakas, Cristone aumîza maza kwalmin namnintu. Cristo aumîza maza kwalmin namnintu akwa, ussa nîjkulturuzne wannakkanazi. 6 Diosne pailta awaruza chiwazha kal mîlanat kit usparuza uspa kal kianapa kiwainamtu. Sunkana Diosne mazantuza Dios pit kainana mîlanara. Diosta tînta nîjkulamtuasmin, Dios pit kainammmikane Dios watsal pit wat kainarawa. 7 Dios anparuza mamaz kal chîhkanara, awaruza kiwainnanapa. Suntuzne awaruza tînta kiwainñarawa. Dios mamazta paiña pit kamtanapa chîhkamtune, paiña watcha pit kamtammikane wantuza paiña pit tînta kamtanarawa. 8 Dios mamazta awaruza kurunna chîhkamtune, sun kuruntumikane awara wat kurunnarawa, awa wat kulanapa. Akkwan pialkas kumirakas mîjtuzne mamaz we mîjtuza nailnarawa. Iglesia îninmika awaruza îninnamtuasmin, usne wantuza watsal kwinta kinat kit paiña kal kitpa. Puizaruza kiwainturuzne usparuza watsal kiwainnara, tayaltachin.
Cristora piantuz na kaiztu aizpa kiarawa
9 Pailta awaruza watsal pashinarain. Kwail kin pashikain. Dios iztakin wat aizpa kirain. 10 Cristora piantuza u kwalkanain pashinarain. Une Cristora piantuza wat minñarawa. 11 Diospa kal kimtuasmin, arakan pamun. Diospa mintuasmin, au Anpat Jesucristowa kal tînta kal kirain. 12 Dios uruza wat kishinamtu akwa, us mîlashimtu aizpa tîriztain. Tîrizamtuasmin, watsal kultain. Awa uruza parishizninnamtuasmin, impara imparain wan tailcharain. Pailta payukima Diosta paikwarain. 13 Cristora piantuza, we mîjtuza, u mîj aizpa nailtain. Cristora piantuz attishtas akane, attuza yal nammîlarain. 14 Awa uruza parishiznintukas, Diosta uspa akwa paikwarain, Dios usparuza wat kinanapa. Usparuza sînkanamtuasmin, usparuza kwail pit paraman. 15 Awa watsal kulamtuasmin, usparuzkasa watsal kularain. Awa tayal kit aztuasmin, uspakasa tayaltain. 16 Wantuzpa kawarain mintain, wan awakasa kalpain uzanapa. “Nane mamazkin an warish” minmun. Tînta chiruzkasakas puizaruzkasakas wanmaktain. “Nane wan chiwal pianish” kizmun. 17 Maza nua kwail kitne, ussa kawara kwail kimun. Puija kimun. Awakasa uzamtuasmin, usparuza wat kinat kit uspa iztakin watsal uztain. 18 An sukin kwail uztuza tailchanamtukima, une wan awakasa kalpain uzmîztawai. 19 Dios ussa piantuza pashinamtu akwa, mîzhain. Maza uruza kwail kitne, sunkana kwail puija kinchi. Diosmin kwail kimtumikasha ilnazi. Dios pînkîhta ka parît: “Au Anpatne ka kizta: ‘Nane kwail kimtuza ilnanash. Nane uspa kwailkana kiarît aizpa usparuza kailninnanash, parishizanapa,’” ka au Anpat kizta. 20 Sunkas Dios pînkîhta ka parît: “Nu uzkin aliztuz aakane, yak kirît aakane, kumira usparuza kwinnarawa. Aliz kwazi kiltîttuz aakane, kwazi kwinnarawa. Sunkana aliztuza kwinnarane, sun aliztuzne mîtsal kiarînazi.” 21 Uruzpain wat iztain. Aliztuz uruza kwail kiamtukas, usparuza kwail puija kinchi. U aliztuza wat kiamtune, une izmuruz namashina. Aliztuza wat kirain, kwailtuza anuppananapa.
Diosta piantuzne gobierno mikwaruza mîarawa
1 Wan Diosta piantuzne gobierno mikwaruza mîarawa. Diosne sun mikwaruza namninnara, awaruza îninnanapa. Diosmin usparuza nanarît, an sukin uztuza îninnanapa. Uspane usparuzain îninna namarachi. 2 Dios mikwaruza namninnarît akwa, mikaruza mîmtuchiruzne Diostakas mîamtuchi. Diosne suntuza nanarît, mîmtuchiruza uspa kwail akwa ilnanapa. 3 Wat kimtumikane mikwara chi ishkukain. Kwail kimtuzne mikwara ishkuamtu. Katmizna u mikwara ishkwashitkine, watsalmin kirain, mikwa uruza “watmin kiamti” kiznapa. 4 Diosne sun mikwaruza namninnara, awaruza kiwainanapa. Kwail kimturuzne mikwara ishkuanazi, mikwa kwail kimtuza ilnamtu akwa. Mikwane Diosta kiwaintu, kwail kimturuza ilnanapa. 5 Katmizna une mikwa kuruntu aizpa mîarawa, uspa Dios akwa kwail kimturuza tînta ilnamtu akwa. Une mikwara mîarawa, us îninta aizpa wat akwa. Une u kaijchukin sun wari pianmai. 6 U sun wari pian akwa, une gobierno awaruza pial taamtu. Mikwaruz uspa kal kiamtuasmin, uspane Dios akwa kal kiamtu, Dios usparuza sun kal kin mîlanarît akwa. 7 Une gobierno awaruza we tarît aizpa tarawa. Suparuzkas uspa su akwa gobierno awaruza pial tarawa. Une wan mikwaruza wat minñat kit uspa akwa wat kaiztain.
Awa anparuza pashinarawa
8 Pial puimikane nammîlammikasha pial kailnintawa. U wan an sukin uztuzpa minñamtuasmin, wan Cristora piantuza pashinarawa. An sukin uztuza pashinamtumikane wan Dios înintît aizpa kinazi. 9 Diosne sunkana awaruza îninnara: “Patna ashampakasa pitkain. Patna ampukasa pitkain. Mamaz awaruza piantakain. Patna walkukain. Mamaz mîj aizpa pashikain.” Dios sun pit awaruza îninnarakas, usne mamaz pit awaruza îninnara, kianapa. Ka kaiznara: “Une uruzpain pashinamtukanain wan awaruza pashinarawa. Sunkana pashimtumikane wan Dios înintît aizpa kinazi.” 10 An sukin uzturuza pashinamtumikane usparuza kwail kimanazi. Katmizna awaruza pashinamtumikane Dios înintît aizpa mît kit sunkana kinazi. 11 Na kaiztît aizpa mît kit kirain, pailtîmtu payu anpain pamtu akwa. Na wan uruza kaiznarît aizpa nîjkulat kit Diospa kal tînta kirain. U Cristora nîjkularakima, akkwan payu pîntît. Cristone anpain. Usne piannanpain, aumîza watsat mîlnana. 12 Amta pailka, kînmîztui. Sunkana Cristone piananpain, aumîza watsat mîlnanapa. Awa amtawara kwail kimtukanain kiman. Une Diosta paikwarain, Dios uruza kiwainanapa, u ñamin kwail kiarît aizpa kiamanpa. Ma an sukin kwail kinintumika chamtuasmin, Diosta paikwarain, Dios uruza kiwainnanapa, kwail kinintumika kuruntu aizpa kiamanpa. 13 An sukin uzamtuasmin, aune wat awakanain watsal uztawamakpas. Aune pirît chamturuzkana uzamasan. Aune awa pishta kwiamtukanain izamasan. Ampune mamazpa ashampakasakas pitkain. Ashampane mamazpa ampukasa pitkain. Aune mamazkasa waya kiamasan. Aune mamaz mîj aizpa pashiamasan. 14 Cristo uztakana uzarawamakpas. Aune au Anpat Jesucristora paikwatpamakpas, us aumîza kiwainanapa, au kwail kiashimtu aizpa kiamanpa.
Diosta we piantuza sapnarain
1 Une Diosta nîjkulturuza sapnarain, uspa wan Dios kamtanarît aizpa mama we piankamamtukas. Diosta piantuz ukasa nîjkine, ukanain minñamtuchine, usparuza pilchapuzman, mamaz tuntu minñamtu akwa. 2 Maza kwinta kainanamtus. Mazantuzne wan ña kwashimtumakpas minñamtu. Anpa Judío awane “wan ña impa i” minñat kit kuamanazi. Diosta we nîjkultumikane “sun ña kumanash” mintu. Mînminkas ña kumtuchiruza kwail minman, Dios usparuzakas sapnara akwa. 3 Wan ña kumtumikane ña kumtuchimikawa kwail minachi. Kawarain ña kumtuchimikane wan chiwal kwashimtumikawa kwail minachi, Dios ussa saptît akwa. 4 Une mamazpa kiwainmikasha kwail kimti kaizman. Kiwainmikawa anpatne paiña wat kirît aizpakas paiña kwail kirît aizpa kainanazi. Kawarain Diosne paiña kwaltuza kiwainnanazi, us pashimtu aizpa kianapa. 5 Mamaz kwinta kainanamtus. Mazantuz maza payuin Diosta paikwatpamakpas minñamtukas, anparuzne wan payu kawarain mai minñamtu. Wan payuwa minñarawane, wan awaruzne chiwazha payu narawa, Diosta wakpuj waina. 6 Mînpazha maza payura Diosta wakpuj waina nashimtumikane sun payura au Anpatta paikwashina, Dios pashit aizpa kinpa. Chiwazha kumira kwashimtumikane Diosta aishtaish kiz kit au Anpat pashimtu aizpa kishina. Chiwazha kumira kwashimtuchimikane mamaz kumira kwashina. Usne au Anpatta aishtaish kiz kit au Anpat pashimtu aizpa kishina. 7 Mînminkas usmin pashimtu aizpa kin uztuchi. Kawarain mînminkas paiña imtu payura namtuchi. 8 An sukin uztuasmin, aune uzshimtumakpas, Dios pashimtu aizpa kin. Au inakima, aune Dios pashimtu aizpa kianapas. Au irîkane, aune Dioskasa wanmakkanapas. 9 Cristo irawane, Diosne ussa mamasa kakulninta. Katmizna Diosne ussa au Anpat namninta, uzturuzakas irîttuzakas îninnanapa. 10 Une Diosta piantuzpa kwail pit paraman, ukanain Diosta wakpuj wainñamtuchine. Une Diosta piantuzpa kwail minman. Mamaz payura wantuzne Dios iztakin kunanapas. Suane Diosne aumîza au kwail kiarît aizpakas au wat kiarît aizpakas kainananazi. 11 Sunkana Dios pînkîhta ka parît i: “Anpatne ka kaiztu: Une na uztui pianmai. Kawarain na kaiztu aizpa watcha i. Pailta awane na iztukin wakpuj wainñanazi. Wan awane nawa ‘usne Dios i’ kizanazi.” Katmizna mamaz ukanain Diosta wakpuj wainñamtuchine, uspawa kwail paraman. 12 Sunkanain aune, wan Diosta piantuzne, Dios iztukin kuntawamakpas, au kiarît aizpa Diosta sînkana.
Diosta piantuza kwail kinpa kininman
13 Katmizna Dios wan awa kiamtu aizpa pian akwa, aune mamaztuzpa kwail paratchiwamakpas. Aune Diosta piantuz iztakin nil uzana nanarawamakpas, usparuza kwail kininnamanpa. 14 Na Anpat Jesústa piankamtît akwa, uskasa wanmaktît akwa, nane chiwazha kumira wa aizpa wari pianish. Mînpazha chiwazha kumira impa i mintumikane an kumira impa aizpa kwanchi. Ussa kumira impa aizpa kwanka kizman. 15 U Diosta piantuza pashinamtune, une chiwazha impa aizpa kuamanazi, mamaz Diosta piantuza kwail kininnamanpa. U chiwazha kumira kwashimtukas, une sun kumira akwa Diosta piantuza kwail kininnashina. U uspa iztukin sun impa kumira kwatne, “awane chiwazha kwail kishimtumakpas” minñashina. U Diosta piantuza kwail kinintune, awane uruza “ukas kwail kiamtu” kizanazi. Diosta piantuz akwa sunkana kiman, Cristo uspa akwa irît akwa. 16 U chiwazha wari minñamtukas, mazantuzne u kiamtu aizpa kwail i minñashinai. Mazantuz u kiamtu aizpa kwail i minñarane, sunkana kiman, mazantuza kwail kininamanpa. Suasne mînminkas Diosta piantuzpa kwail minñamanazi. 17 Awa chiwazha impa kumira kuman kizamtukas, aune Dios pashimtu aizpa kiarawamakpas. Diosne Diosta piantuza îninashimtu. Suasne Diospa Sînam Izpulne uspakasa uznazi, nil awakana namninnanapa, mamaztuzkasa kalpain uzanapa, watsal kulanapa. 18 Cristora kiwainturuzne, us kaizta aizpa mîmturuzne, Dios pashimtu aizpa kianazi. Suasne awane uspawa wat minñanazi. 19 Aune wan Diosta piantuza wat kiwainnarawamakpas, wan wanmakkat kit kalpain uzanapa, Diosta an wat piankamanapa. 20 U chiwazha kumira kwashimtukas, sun kumira kuman, Diosta pianmikasha kwail kinintane. Dios ussa kamtarît aizpa kaninman. U wan kumira kwashiamtukas, une chiwazha kumira kwashikain, u mamazta kwail kinintane. U akwa usne impa kumira kwat kit paiña kaijchukin kwail kimtus minazi. 21 Une chiwazha wat aizpa kirain. Mînpazha impa kumira kwail i mintane, us iztukin kuman, mamazta kwail kininmanpa. Mînpazha vino kwail i mintane, us iztukin vinokas kuman, mamazta kwail kininmanpa. Diosta pianmikasha kwail kinintu aizpa kiman, Diosta kwayamanpa. 22 U wan kumira kuamtu akwa, une mamaz Diosta pianmikasha impa kumira kwanka kizman. U chiwazha kumira kuamtukas, Diosne u kuamtu aizpa piankam kit sun kumira impa i kizmanazi. Diosta piantuzne, uspa kiamtu aizpa wari nîjkulturuzne, wat kiarînazi, uspa Dios iztakin kwail kiamamtuchi pian akwa. 23 Impa kumira kwatmikane Dios iztakin kwail kirau minazi. Usne paiña kaijchukin “na kwail kirau” minazi. Dioskas ussa “kwail kiri” kiznazi, impa kumira kwat akwa. Diosne uruza wat aizpa piankamninnanazi. Dios iztakin nil aizpa kamarachiruzne kwail kiamtu.
Mamaztuza kiwainnarawa
1 Au Diosta an nîjkulturuzne, Diosta piantuza, we nîjkulturuza, tailchat kit tînta kiwainnarawamakpas. Au pashimtu aizpa kishimtuchiasmin, aune mamaztuza, we piantuza, wat kinarawa. 2 Aune wan Diosta piantuza wat kiarawamakpas, uspa nil uzanapa, Dios pit mîat kit ussa an wat nîjkulanapa. 3 Cristo an sukin uzasmin, usne aumîza us uztakanain kamtanara. Usne us pashit aizpa kitchi. Awa ussa kwail kizarîtkas, usne Dios pashit aizpa kishira. Dios pînkîhta paiñawa ka parît: “Diosta aliz pilchapuztaruzne nawakas aliz pilchapuzara.” 4 Diosne wan an ñancha paiña pînkîhta parît aizpa paninta, aumîza kamtananapa, sun pit piankamanapa. Au Dios pînkîhta iztuasmin, Diosne aumîza an tînta namninnashit kit kiwainnashina, au watsal kulanapa. Sun akwa aune Diosta tîriztumakpas, us mîlan namtît aizpa sapnakima. 5 Dios aumîza tînta namninnamtuasmin, usne umîza tînta kiwainanazi, Cristo uztakanain uzanapa. Usne uruza wanmakninnazi, uruzpain watsal uzanapa. 6 Sunkana kiarawane, une uruzpain wanmakkanazi, u “Dios kwisha wari” maza pitmin kaizanapa. Une sunkana au Anpat Jesucristowa Papihshta kaizanazi.
Judío chi awaruzkas Dios watsal pit mîamtu
7 Katmizna Cristo aumîza sapnarakanain, une wan Diosta piantuza sapnarain, awa “Dios kwisha wari” kaizanapa. 8 Na uruza kaiztu aizpa mainkain. Cristone chiyuras au sukin ara, Dios Judío awa kwaltuza, an ñamin uztuza, kin namtît aizpa kin. Cristone Judío awaruza kiwainana ara, awa Dios kin namtît aizpa watcha i nîjkulanapa. 9 Uskas akki ara, Judío awachiruza wat kiwainat kit watsat mîlnana, uspa “Dios kwisha wari” kaizanapa. Davidne sunpa Dios pînkîh parîtkin ka kaizta: “Nane Judío awa chi uztukin ‘Dios wari’ kaiznash. Nakas nua ‘Dios kwisha wari’ kanta kaiznash.” 10 Mamasa Dios pînkîhta ka parît: “Judío awachiruzne Dios narît kwalkasa, Judío awaruzkasa watsal kultain.” 11 Mamasa Dios pînkîhta ka parît: “Judío chi awaruz ‘Dios kwisha wari’ kaiztain. Chiwal awa ‘Dios kwisha wari’ kiztain.” 12 Mamasa Isaíne Dios pînkîhta ka parît: “Mamaz payura Isaíwa kwalne pashpa mîlnazi. Kawirawane, Judío awachiruza îninmîznazi. Uspane ussa tîrizanazi, Dios mîlan namtît aizpa sappanakima.” 13 U Diosta nîjkulamtu akwa, nane Diosta u akwa paikumtus, Dios uruza watsal kulninnanapa, Dios uruza kalpain uzninnanapa. Diospa Sînam Izpulne uruza tînta kiwainnanazi, Diosta an tîrizanapa, us uruza mîlan namtît aizpa sappanakima. 14 Diosta piantuza, mîazhanaka. Nane u nil uzamtu pianish, u mamaztuza wat kinamtu akwa. U Diosta kwisha wat piankamamtu akwa, une wantuza kurunnat kit kamtanashina. 15 An pînkîh uruza panamtuasmin, nane uruza mazantuz pit pananarau, sun piankamanapa. Nane uruza sun pit nîjkulninamtus, na kamta aizpa mainñamanpa. Dios an kal nawa kinpa chîhkarît akwa, nane uruza tînta kainanamtus. 16 Diosne nawa kwisha wat kiwainnat kit Jesucristowa paiña kiwainmumika namninta, Judío awachiruza Dios watsal pit kainananapa, Judío awachiruz Dios watsal pit piankamanapa. Judío awachiruz Dios pit mîarawane, Jesucristora nîjkularawane, Diosne usparuza sapnashina, paiña Sînam Izpul usparuza sînam saninnarît akwa. 17 Na Jesucristokasa wanmaktît akwa, nane Diospa kal kin watsal kultus. 18 Cristo paiña kal kinpa nawa kiwaintu akwa, nane uruza kainananash, u, Judío awachiruz, sun watsal pit nîjkulanapa. Dios paiña kal kinpa nawa kiwaintu akwa, na Judío awachiruza Dios pit kainanamtu akwa, Jesucristone usparuza Dios pit nîjkulninnamtu. 19 Dioskas paiña Sînam Izpulkas nawa tînta kiwainta, ñamin iztachi kalkanain kinpa. Nane Dios pit wan sukin uztuza kapal kainanara. Jerusalén pîpulura uztuzkas Iliria surakima uztuzkas, Dios pit mîat kit Cristora piankamara. 20 Dios watsal pit paramtuasmin, nane Cristora pianchi purakin îrau, Cristowa kamtanana. Nane mamaz awakasa kal kin sairachi ish, uspa kal kiamîztu akwa. Nane mînminkas îtchiruzkin kal kin îrau. 21 Nane Dios pînkîhta parîtkanain Diospa kal kirau: “Mînpazha sun pit mîrachiruza parananazi. Ñamin Dios pit mîmtuchiruzne paiña pit piankamanazi.”
Pablone Roma pîpulura înash mintu
22 Na u uztukin akkwan piji îshimtukas, nane ap kal akwa u uztukin pianatchish. 23 Mane nane ap kal an sukin me pailtîre, apain wan awa Cristowa mîarît akwa. Akkwan añora uruza izna îshimtukas, nane u uzkin mama pianashimtus. 24 Nane uruza izna tîriznamtus. España sura îmtuasmin, nane u uzkin putnanash, uruza iznana. Ukasa akkwan payukima nukkulshimtukas, nane ukasa akkwan payuchiin nukkultînash. Nane uruza nawa u yalkin sapnanapa paikwanamtus. Kwiztane une pialkasa kumirakasa nawa kiwainñashina, España sura piannankima. 25 España sura îmtuchasmin, an ñancha nane Jerusalén pîpulura îrîmtus, Diosta piantuza kiwainnanapa, usparuza mîlarît pial chîhkanapa. 26 Diosta piantuz Macedonia sura uzturuzkas Diosta piantuz Acaya sura uzturuzkas kain pampa pial wanmakninñara, Diosta piantuza kiwainashinanapa, sun pial puiza Jerusalén pîpulura uzturuza mîlananapa. 27 Uspain “sun pial kain wantaanash, usparuza mîlanana” minñara. Sun Judío awachiruzne Judío awaruza kiwainnarawa, Judío awaruz Judío awachiruza Dios pit kamtanara akwa. Mane sun Judío awachiruzne sun wantarît pial naiyarawa, puiza Judío awaruza kiwainanapa. 28 Na an kal pailtawane, wan pial wantara aizpa usparuza chîhkanarawane, nane Jerusalén pîpulukis puz kit España sura îrînash. España sura piannamtuchasmin, uruza izna îrîmtus. 29 Na u uzkin akane, nane Cristo nawa akkwan wat kinanazi pianish. 30 Au Anpat Jesucristora nîjkulamtu akwa, paiña Sînam Izpulne aumîza kiwainamtu, mamaztuza pashinanapa. Katmizna nane uruza kurunamtus, Diosta na akwa paikuanapa, us nawa kiwainnapa. 31 Dios nawa pakpanapa paikwarain, Judea sura uzturuz, Dios watsal pit nîjkultuchiruz, nawa kwail kiamanpa. Diosta piantuz akwa, Jerusalén pîpulura uzturuz akwa, Diosta paikwarain, na usparuza mîlanamtu aizpa sappanapa. 32 Dios nawa u uzkin îninshitne, Diosta paikwarain, piannanpa. Na u uzkin piannakane, nane watsal tuanash. Suasne nane ukasa wat kulnarînash. 33 Nane Diosta paikumtus, Dios uruza kalpain uzinnanapa, uruza kiwainnanapa, uruzkasa tuanpa. Ka.
Pablone wantuza kakishapu kiznamtu.
1 Nane uruza au wat kwampihsh Febera piankamnintus, ussa sappanapa. Cencrea pîpulura uzturuzne ussa Dios iglesiara kiwainnapa naara. 2 Us au Anpatta pian akwa, nane ussa sappanapa paikwanamtus. Us Cristora nîjkultu akwa, Diosta piantuzne ussa sappat kit us wenamtu aizpa mîlaarawa. Usne wat izmumika nam kit akkwantuzakas nawakas kiwainzish. 3 Priscilarakas paiña ampu Aquilarakas kakishapu kiznarain. Uspa paaskas nakas parejuin Jesucristowa kal kirîtmakpas. 4 Aliz awa nawa pizshiamtukas, uspane nawa pakpailta. Uspa paasne na akwa inapain azi. Uspane imasarilta. Nakas wan Judío awachi Cristora nîjkulturuzkas uspa paasta aishtaish kiztawamakpas, nawa kiwaintît akwa. 5 Nakas Diosta piantuza, uspa yalkin wanmakmuruza kakishapu kaiznamtus. Ap izmumika Epenetora, ap pashimtumikasha, kakishapu kizti. Usne Asia sura ñancha Cristora nîjkultamika ara. 6 Maríarakas kakishapu kizti. Cristowa kal kimtuasmin, usne uruza kwisha kiwainarît. 7 Andrónicorakas Juniarakas kakishapu kiztain. Uspane nakanain Judío awa mazi. Uspane nakasa kajchira sîptît wamazi. Sun paasne doce înintuzkanain kal kiilta. Na Cristora pianchasmin, uspa paasne Cristora nîjkulpailtazi. 8 Ampliatora kakishapu kizti. Us au Anpatta wat pian akwa, nane ussa pashimtus. 9 Urbanora kakishapu kizti. Usne nakasa Cristowa kal kirît. Estaquista, mamaz na pashimtumikasha, kakishapu kizti. 10 Apelesta kakishapu kizti. Awa ussa naizninnarîtkas, usne wan tailchat kit Cristora nîjkulmîztu. Aristóbulospa kwaltuza, paiña yalta uztuza, kakishapu kiztain. 11 Herodiónta, Judío awara, kakishapu kizti. Narcisowa yalta uzturuza kakishapu kiztain, au Anpat Jesústa nîjkulamtu akwa. 12 Trifenarakas Trifosarakas kakishapu kiztain. An paas kwampihshne kwisha akkwan Diospa kal kiilta. Au pashimtumikasha, Pérsidara, kakishapu kizti. Uskas akkwan Anpatpa kal kirît. 13 Ruforakas kakishapu kizti. Au Anpatne ussa narît, paiña kal kinpa. Usne au Anpatta nil kanpara. Rufowa akkuhshtakas kakishapu kizti. Paiña akkuhshne nawa painkultakanain sap kit watsal kira. 14 Asíncritorakas Flegonterakas Hermestakas Patrobastakas Hermastakas uspakasa wanmakmuruza kakishapu kiztain, Diosta nîjkulamtu akwa. 15 Filólogorakas Juliarakas Nereorakas paiña kwampihshtakas Olimpastakas wan Diosta piantuz uspakasa chamturuzakas kakishapu kiztain. Romanos 16 446 16 Wan Diosta piantuza watsal kwinta kinat kit kakishapu kiztain. Akkis Iglesiara wanmakmuruzne, Cristora nîjkulturuzne, uruza uspa pit îninnat kit kakishapu kiznamtu.
Pablone Diosta piantuza kurunnamtu
17 Nane Diosta piantuza kurunnamtus, nakanain kamtamtuchiruza mîamanpa. Mazantuzne Diosta piantuza naiyashimtu, usparuzpain waya kiamîznapa. Uspane Cristora piantuza mamaz ñanta kamtaamtu, au kamtarît aizpa mîamanpa. Uspane u Cristowa kamarît aizpa kamtaamtuchi. Usparuza mîman. Uspakasa chaman. 18 Sun ñanta kamtamturuzne au Anpat Jesucristora kiwainamtuchi. Paiña kal kiamtuchi. Uspane uspain kal kiashimtu aizpa kiamtu. Watsal pit paramtuasmin, uspane we piantuza pîrail appamtu, uspa minñamtu aizpa maizanapa. 19 Wan Cristora nîjkulturuzne u Diospa watsal pit mîamtu pianmai. U Diosta mîamtu akwa, watsal ish. Une Diosta paikwatpa, uruza kiwainñanapa pailta payu wat kianapa. Mizurainkas kwail kin pashikain. 20 Au Diosne Satanásta anuppanazi. Suasne Diosne aumîza kalpain uzninnanazi. Mane Diosta paikumtus, us uruza pailta payukima wat kiwainanapa. 21 Timoteone, nakasa kal kimmikane, uruza kakishapu kiznamtu. Luciokas Jasónkas Sosípaterkas, ap Judío izmuruzkas, uruza kakishapu kiznamtu. 22 Nane, Pablo akwa pînkîh pamtumikane, Tercio mun ish. Nakas uruza kakishapu kiztus. 23 Gayo muntîtmikakas uruza kakishapu kiztu. Na akki uztuasmin, usne paiña yal nawa nammîlarît. Diosta piantuzne paiña yalta wanmakkamtu. Erastokas uruza kakishapu kiztu. Usne an pîpuluwa pial watsammika i. Au aña Cuartokas uruza kakishapu kiztu. 24 Nane Diosta paikumtus, au Anpat Jesucristo uruza kiwainnanapa, ukasa tuanpa. Ka.
Pablone minpa pit kiznamtu
25 Aune “Diosne kwisha wari” kiziznapas. Au paiña watsal pit mîamtu akwa, usne aumîza an tînta namninnashina. Sun watsal pit uruza kainanamtuasmin, nane Jesucristowa uruza kainanarau. Dios an su sarakima, ñamin awane sun pit piankamarachi. 26 Mane awane sun kamtarît aizpa mîashina, Dios 447 Romanos 16 awaruza piankamninnarît akwa. Ñamin Dios pit kainammturuzne Cristowa pînkîhta parît. Au Diosne, pailta payukima uztumikane, aumîza sun watsal pit piankamninnat kit aumîza wan Judío awachiruza îninnara, usparuza kamtananapa, Dios kaizta aizpa mîanapa, Diosta nîjkulanapa. 27 Jesucristo aumîza watsat mîlnarît akwa, aune pailta payukima “Dios kwisha wari” kiztawamakpas. Usne wan chiwal pian. Usmin Dios i. Mamazne wachi. Sunne watcha i. Ka. Pailti.
Kakishapu kiztu
1 Nane, Pablo munmikane, an pînkîh uruza panamtus. Diosne nawa nara, Jesucristowa înintamika namnapa, paiña pit kainanapa. Sósteneskas, Cristora pianmikakas, paiña pitkas îninnamtu. 2 Nane Dios piantuza, Corinto pîpulura uztuza, an pînkîh panamtus. Diosne Jesucristo akwa uruza akwanara, paiña kwal namanapa, us akwa watsal uzanapa. Usne uruza sînam sanashimti. Uskas akkwan suras uztuza akwanamtu, usparuza sînam sananapa. Uspakas au Anpat Jesucristora paikuamtu. Jesucristone usparuzpa Anpat i. Uskas au Anpat i. 3 Aune Au Taitta Diostakas, au Anpat Jesucristorakas paikumtumakpas, uruza kiwainanapa, Dios iztakin kalpain uzanapa.
Jesucristo awaruza kiwainamtu
4 Dios uruza, ussa nîjkulturuza, kiwainamtu akwa, nane u akwa pailta payu Diosta aishtaish kiztus. Jesucristo akwa, Diosne sun kirît. 5 U Jesucristo kaizta aizpa mîamtu akwa, Diosne uruza kwisha kiwainnamti, paiña pit kainanapa, an wat piankamanapa. 6 Nane uruza Cristowa kaiznarau. U tînta namarît akwa, mane une wan iztakin wat uzamtui. 7 Katmizna au Anpat Jesucristowa amtu payu tîrizamtuasmin, une Dios mîlamtu aizpa wenamtuchi. 8 Diosne uruza tînta uzninnanazi, minpa payukima, au Anpat Jesucristo amtu payukima. Suasne mînpazha u kwail kiarît aizpa kaizamanazi, Dios uruza me wat kulninnarît akwa. 9 Diosne us kin namtît aizpa kinazi. Une ussa nîjkulashina. Usne uruza akwanara, paiña painkulkasa, au Anpat Jesucristokasa uzanapa.
Diosta piantuzne Corinto pîpulura wanmakmukin nîjkulamtu
10 Cristora piantuz, mîrain. Au Anpat, Jesucristo nawa înintu akwa, wan uruza akwanamtus, nîjkulanapa, maza pitmin kwinta kianapa. Mamaztuzkasakas watsal uztain. Watsal minñarawa, maza awakanain kal kianapa. 11 U Cristora piantuz namarît akwa, uruza kurunnamtus. Cloéwa kwaltuzne nawa ka kaizara: “Uruzmin aliz pit paraamtu.” Mamaz kaizka, une mîkain. 12 Mane uruza kurunnanash. Une akkwan pit paramtu. Mazantuzne ka kaizamtu: “Nane Pablora kanpammika ish.” Mazantuzne ka kaizamtu: “Nane Apolosta kanpammika ish.” Mazantuzne ka kaizamtu: “Nane Cefasta kanpammika ish.” Mazantuzne ka kaizamtu: “Nane Cristora kanpammika ish.” Ka kizamtu. 13 Cristowa mintain. Cristone wan ussa nîjkulturuza wanmakninnat kit îninnamtu. Nane Pablo ish. Nane u akwa kurishkin irachish. Mînminkas uruza munninnarachi, Pablowa kanpammika namnapa. 14 Nane Diosta aishtaish kiztus, na uruza munnarachi akwa. Nane paastain, Crisporakas Gayorakas, munnarau. 15 Mînminkas na mînpazhara muntus kainasachi, nawa kanpanapa. 16 Watcha. Nakas Estéfanaspa kwaltakas munnarau. Mamazta muntatne, pianchish. 17 Cristone nawa înintachi, awaruza munnanapa. Usne nawa îninta, Dios watsal pit kainanapa, awaruza watsarît mîlnanapa. Nane Diosta pianchiruzkana kainanamtuchish, uspa we pian akwa. Nane Cristo kurishta irît kainarawaish, sun pit tînta namnapa. Kain pit kainammtuchish.
Diosne Cristora pianmikakas tîntamikakas namninta
18 Na Dios watsal pit kainammtuasmin, nane ka kaiztus: “Cristone au akwa kurishta irît.” Wan kaarîttuzne “au paramtu aizpa kain pit i” kizamtu. Uspane wan kaarît kit ïnta îanazi. Diosne Cristora piantuza kiwainnanazi. Katmizna Cristo au akwa irît akwa, Dios tînta pitne aumîza watsat mîlninnanazi. 19 Diosne parît aizpa paiña watsal pînkîhta paninta: “Mazantuz wan chiwal pianmakpas kizamtukas, Diosne uspa pian aizpa pailtînazi. Mazantuz kwisha watsal pit paramtukas, Diosne uspa paramtu aizpa pailtînazi.” 20 Au sukinne mazantuzne “aune wan pit pianmakpas” kizamtu. Au sukinne mazantuzne “aune kamtamtuz makpas” kizamtu. Au sukinne mazantuzne “aune wan chiwal pianmakpas” kizamtu. Diosne kaizta: “Nane uspa wan pian aizpa tîmpa pitkanain namnintus” kiztu. 21 Diosne au sukin kwisha wat pian kit wan wat kimtu, awa ussa piankamanapa. Au sukin Diosta pianchiruz akkwan piankas, uspane uspa mîamtu akwa, Diosta piankamasachi. Jesústa pianchiruzne “au paramtu aizpa tîmpa i” kwinta kiamtu. Aune Jesústa pianchiruza Dios pit kainanamtumakpas, Dios, paiña pitpara, Jesústa nîjkultuza watsat mîlninnanapa, iamanpa. 22 Judío awane Dios iztasparît kal izana paikuamtu, sun pit nîjkulana. Sunkana Judío chi awane aumîza kamtana paikuamtu, sun pit nîjkulana. 23 Aune Cristo au kwail akwa kurishta irît kainarawamakpas. Judío awane sun pit mîashitchi. Sun akwa aliz kulara. Judío chi awane, usparuzpain “sun pit tîmpa i” kaizamtu. 24 Diosne Judío awaruzakas Judío chi awaruzakas akwanamtu, Cristora piankamanapa. Usne Cristora tînta namninta, wan narîttuza kiwainnanapa, au we pian aizpa kamtananapa. 25 Cristo kurishta irîkane, awane “Diosne sara aizpa tîmpa azi” kizara. Awakin Diosne anza wat pian. Cristo kurishta irîkane, awane Dios tînta chi kizara. Diosne awakin anza tînta i. 26 Cristora piantuz, mîrain. Diosne akkwan tuntu awaruza akwanara, Cristora nîjkulanapa. Akkwan kwisha wat piantuz au sukin uzamtukas, amturuzne u wat piantuz mai minñamtuchi. Dios uruza akwanamtuasmin, Diosne uruzpain, maza mazain wat piantuzain, akwanara. Usne maza mazain katsa mikwara akwanara. Usne maza mazain kwazpa awara akwanara. 27 Diosta pianchiruzne au sukin Dios kimtu aizpa mîasachi. Apas awa wat pianmakpas kizamtukas, Diosne uruza we piantuza, nanara, an piankamanapa, pian ish kizmumika mîtsal parînpa. Diosne najtîttuza nanara, tînta kulanapa, tînta ish kiztumika mîtsal parînpa. 28 Diosne au sura palichiruzakas tîntachiruzakas watchiruzakas nanara. Diosne awa watsal mintu aizpa pailnintînazi. 29 Mînminkas Dios iztakin mamaz awakin, “nane anza wat awa ish” kizsachi. 30 Diosmin uruza paiña kwal namninnara, Jesucristokasa uzanapa. Uskas Cristo akwa uruza ussa an wat piankamninnara. Uskas Cristo akwa au kwail kiarît aizpa kaninnarît. Uskas Cristo akwa uruza kiwainnanazi. Uskas Cristo akwa aumîza watsat mîlnara, iamanpa. 31 Sunkana Diosne paiña pînkîhta ka panintît: “‘Nane mamazkin an warish’ mintumikane ka kiztawa: ‘nane warish, ap Anpat nawa kwisha wat kirît akwa.’”
Pablone Corinto pîpulura uztuza Cristowa kainanamtu
1 Diosta piantuz, mîrain, Dios puintît pit mîanapa. U uzkin Diospa pit kainana îrîkane, nane uruza kain pit kaizmumikakana îtchish. Uruza katsa mikwa pit paramtukana paratchish. 2 Ukasa uzasmin, nane maza pitmin uruza kamtanashimtu arau. “Jesucristo kurishkin irîzi. Dios an watsat mîlmumika aukin înintakas, awane Jesucristora piantara.” Sunkanain kiztau. 3 Na u iztakin piannakane, nane tînta chi awakana uztau. Uruza paramtuasmin, nane ishkumtukanain uztau, u nawa mîashitchi mintu akwa. 4 Uruza sun pit kainammtuasmin, nane katsamikawa pitkasa paratchish, na kaizta aizpa mîanapa. Dios Sînam Izpulne uruza kurunnat kit tînta kiwainnara, sun pit wat mîanapa. 5 Sunkana nane sun pit kaiznarau, u Diostain tînta nîjkulanapa. Suasne Diosne uruza tînta kiwainnanazi. Mamaz kamtammika pit akwa Diosta piankamasachi.
Awane Diosta piankamshinai, paiña Sînam Izpul akwa
6 Aune watcha pitkasa Diosta wat piankamturuza kainapuspas, an wat piankamanapa. Au sukin kamtammika paramtukana kainammtuchimakpas. Uspakas wan au sukin mikwaruzkas, pailnapain. Uspa pian aizpakas pailtînazi. 7 Mane Dios pian aizpa kainapuspas. Diosne us pian aizpa wan puintît mîjazi, au sukin an ñamin uztuz sun pit mînakwa. Au su sarachasmin, Diosne us sashit aizpa wan pian. Usne au akwa an ñancha min kit aumîza watsat mîlnara, uskasa chiyura uzanapa. 8 Mînminkas katsa mikwa au sukin uztuzne sun pit mîarachi. Piankamarachi. Sun pit mîarachi akwa, uspane au watsal Anpat Jesucristora kurishta pat kit irukasa patkuzarît, sua inapa. 9 Sunkanain Dios pit ka kizta: “Diosne akkwan mîlan mîja, ussa pashimturuza mîlanana. Mînminkas us watsarît mîj aizpa pianchimai. Mînminkas us watsarît mîj aizpa minsachimai. Usne aumîza, ussa pashimturuza, chiwazha watsal aizpa mîlananazi.” 10 Diosne paiña Sînam Izpulta aumîza îninta, sun pit kaiztu aizpa mîninnanapa. Sun Sînam Izpulne wan piankamna izninnamtu. Uskas Dios mintu aizpa pian. 11 Sunkanain mînminkas awa nîjkultu aizpa piankamsachi. Au nîjkultu aizpa au izpulmin pian. Kawarain mînminkas Dios mintu aizpa piankamsachi. Paiña Sînam Izpulmin pian. 12 Au sukin uztuzne mamaz tuntu minñamtu. Sunkana minman. Diosne aumîza paiña Izpul îninta, aukasa uzna, Dios aumîza kain mîlashimtu aizpa piankamanapa. 13 Sînam Izpul aumîza kamtanara akwa, sunkanain, aune sun pit mamazta kamtapuspas. Aune kamtam pitkanain kainammtuchimakpas. Aune Sînam Izpul akwa sun pit kainapuspas. Suas Sînam Izpulkasa charuzne sun pit mîanazi. 14 Sînam Izpul mîjchiruzne Sînam Izpul kamtamtu aizpa sappasachi. Usparuzne an pit tîmpa pitkanain minñamtu. Uspane sun pit mîasachimai, Sînam Izpulta mîjarachi akwa. 15 Sînam Izpul mîjmikane wan chiwazhakas piankamshinai. Mînminkas us miza uzna kwail i kaizsachi. 16 Dios pit ka kiztui: “Mînminkas Dios mintu aizpa piankamsachi. Mînminkas Diosta chinkas kamtasachi.” Sunkana Dios Izpulne aumîza kiwainamtu, Cristo mintu aizpa piankamanapa.
Usparuzne wanmakkarachi
1 Mane, Diosta piantuz, mîrain. Na uruza kwinta kimtasmin, nane Diosta wat pianchiruzakana Diospa Sînam Izpul mîjchiruzakana kaiznarau. Uruzne Dios kaizta aizpa mîrachikana uzara. Une Cristowa we pian mai, apas awakanain mintu akwa. Une pashpakanain kamamîztu. 2 Nane uruza tînta chi pitkasa kamtanarau, mamaz pit mîasachi akwa. Nane uruza pashpakanain iznarau, u Cristora we pian akwa. Une sun kamtamtu payu an kamtamtu aizpa mîashitchi. Makas an kamtamtu aizpa mîashimtuchi. 3 Uruzne wan awakanain, Diosta pianchiruzkanain, uzamtu. Uruzpain pilchapuzamtu. Uruzne mamaz mîj aizpa pashiamtu. Uruzne, au sukin awakanain, Diosta pianchikanain, uzamtu. 4 Mazantuzne ka kaizamtu: “Nane Pablo pit kaiztu aizpa kanpanash.” Mînpazha ka kaizamtu: “Nane Apolos pit kaiztu aizpa kanpanash.” Awa kaizta aizpa kimturuzne au sukin uztuzkanain uzamtu. 5 Nane katsa mikwa chish. Nawa kanpaman. ¿Mînma nawa kanpamtu? Apolosne katsa mikwachi. Ussa kanpaman. ¿Mînma ussa kanpamtu? Au paasne Diosta kiwainmumikain wailwas, u au Anpatta nîjkulanapa. Au Diosne pakaish pakaish kal kinpa chîhkanara. Katmizna kal kimtuwailwas. 6 Na uruza sun pit kamtanamtuasmin, nane sun pit pippakanain warau. Suas Apolosne kwazi paranta, pippa chiknapa. Diosmin pippara chiknintu. 7 Sunkanain wammikakas kwazi paramtumikakas kawarain mai. Diosmin an tînta i, an pippa chiknintu akwa. 8 Suas wammikakas kwazi paramtumikakas maza awakanain kal kimtu. Diosne pakaish pakaish uspa kal kit aizpa tananazi. 9 Aune Dios kiwaintuzkanain kal kipuspas. Au pippa wamtu akwa, Diosne uruza nan sukanain namninnamtu, pippa wana. Diosne paiña yal saamtu, uruz sun watsal yalkanain namanapa. 10 Diosne nawa nat kit paiña yal sammikakana namninta, uruza kamtananapa. Us paiña kal nawa chîhkatpane, an ñancha nane ainkih kul sat kit saktî warau, yal nainmanpa. Nane yal sammikakanain an ñancha uruza kamtanarau, u tînta namanapa paiña pit akwa. Diosne uruza paiña yalkanain samîztu. Mamaz kamtamtuzne uruza kamtanat kit na kit aizpa îsalta sînamtu. Pakaish pakaish us kimtu aizpa wat iztain, watsal sana. 11 An ñancha nane Jesucristowa kainanarau. Sun akwa une tînta namara, sam saktîkana. U sun pit mîarawane, Diosne ukasa paiña yalkana samîzta. Une Jesucristowa kamtamtu aizpa mîarawa, sun pitmin uruza tînta namninnamtu akwa. 12 Sun yal samîztawane, yal sammikane akkwan tuntu ukkasa samîztawai. Mazantuzne uru ukkasa saamtu. Mazantuzne pial ukkasa saamtu. Mazantuzne watsal iztît ukkasa samtu. Mamaz yal sammikane mamaz tuntu yal samtu. Suntuzne kain tîkasa samtu. Anpane kain pîtkasa saamtu. Anpane kain chara tîkasa saamtu. 13 Cristo au sukin mamasa kailkane, usne wan awa kal kiarît aizpa kankwanazi. Usne pakaish pakaish kal kimtu aizpa ïnkasa kankwanazi, wat kiarîttakas kwail kiarîttakas izna. 14 Yal wat ukkasa sammikane chiwazha sapnazi, paiña yal paktachi akwa. Paiña yalta uzkultît. 15 Us sarît aizpa wan paktane, sammikane wan karînazi. Wan karîtkas, usmin ïnta imasarînazi. 16 Diosne uruza paiña yalkanain sanamtu, paiña Sînam Izpul ukasa uznapa. ¿Une sunne pianmakkiwas? 17 Mazantuz Diosta piantuza kwail kitne, Diosne usparuza kwisha naizninnanazi. Diosne uruza sînam sanat kit uzninnara. Une paiña yalkanain mai.
Minpa pit paramtu
18 Uruzpain kut kuman. Mînpazha au sukis wan chiwal kwisha wat pianmakpas minñamtu. Uruzne au sukin wat pit pian awaruz minñamtukanain uzman. Au sukin wat pit pian awakanain uztukine, une maizat kit wat pit piantuzkana namninñanazi. 19 Au sukin uztuzne akkwan wat pit pian. Uspa pian aizpa Dios iztakin tîmpa i. Sunkana Diosne paiña pit pînkîhta paninta: “Diosne au sukin wan wat pit pian minturuza piznamtu, uspa kishimtu aizpa kiamanpa, usparuza ilnanapa.” 20 Sunkas pînkîhta paninta: “Diosne wan awa minñamtu aizpa pian. Uspa wat pit pian aizpa tîmpa i,” kizta. 21 Ka akwaizna, sun kamtamtuz mamaz awakin an tînta mai minkain. Diosne aumîza akwanat kit wan chiwal u akwa sara, uruza kiwainanapa. 22 Nakas, Apoloskas, Pedrokas u akwa uzmakpas, uruza kiwainana. Diosne au sukin au akwa sara. U apa uzamtuasmin, Diosne umîza wat kiwainnanazi. U irane, u akwa an wat anazi. Apain u uzasmin, Diosne u akwa wat kiwainamtu akkwan payurakima. Une wan chiwal iztu aizpa mîj, îninnapa. 23 Une Cristora mîamtu. Cristokas Dios kaiztu aizpa kimtu.
Înintaruzpa kal
1 U au kutñaruzpa minñamtuasmin, une au Cristora kiwaintuz makpas minñarawa. Diosne aumîza nanara, paiña puintît pit mîjarît aizpa kamtananapa. 2 Kal saptamikane paiña kal wat kitpa. Suasne paiña mikwara nîjkulnazi. 3 ¿Une nawa mîmapuskiwas? Uruzkas mamaz awaruzkas na wat kimtu aizpa na kwail kimtu aizpa we pianmai. Katmizna na sun kirît aizpa mîmamtukas, nawa palichi. Na kimtu aizpa nawa mîmamtuchish. 4 Na miza uztu mintune, nane an nil uztus pianish. Na kwail kitchish mintukas, na mintu aizpa nawa sînam samtuchi. Anne nawa palichi, Diosmin na kwail kirît aizpa pian akwa. Na kwail kiratne, Diosmin nawa mîmashina. 5 Katmizna mamaztuz kwail kirît aizpa kiznanachi. Au Anpat atchasmin, “uspane kwail kiamtu” kizman. Au Anpat iztukin chinkas puintît wa chi akwa, au Anpatmin wan awa wat kimturuzakas kwail kimturuzakas mîmananazi. Anpatmin, wan chiwal awa minñamtu aizpa pian. Sunkana Anpatne us mîlashimtu aizpa pakaish pakaish mîlananazi. 6 Diosta piantuz, mîrain. Apolospakas Pablowakas paramtuasmin, na kaiztu aizpa u wat akwa kaiznamtus. Au uruza Dios Pit kamtanamtuasmin, une Dios kaiztu aizpa mîarawa. Suasne une awawa nil minñanazi. Maza kamtammikakin mamaz an wari, chi minman. Sunkana minñarane, une mamazkin an wat makpas minñat kit namshiamtu. 7 Sunkana, ¿une mamazkin an wat makkiwas? Diosne u wan pit mîra aizpa kamtanara. Dios uruza kamtanarane, une auminpain kamtaramakpas kaizsachi. 8 Dios pit piankamtukas, une nil chi minñamtu. Une me wan pianmakpas kizamtu. Une me kwazpa makpas minñamtu. Une me katsa mikwakana uzamtumakpas minñamtu, au umîza kamtanarakas. U katsa mikwakana uzaratne, aukas ukasa uzanapas îninna. 9 Sunkana mintus. Au mikwakana chamtuchikas, Diosne aumîza nanat kit paiña înintaruza namninnara, minparakima chan, wan awa aumîza izanapa. Aune kajchira warîttuzkana, inapaintuzkana, uztumakpas. Au sukinne wan awakas chiwal ángeltuzkas aumîza kimtu aizpa izamtu. 10 Au Cristora piankamta akwa, awane aumîza “une tîmpa mai” kizamtu. U Cristora piankamamtu akwa, une an wat piantuzkana namamtu. Awane aumîza “palichi” kizamtukas, une an tînta namamtu. Sun awa aumîza ishanamtukas, uspane uruza wat mai kizamtu. 11 Makima aune yak kiwa naiztumakpas. Pailta payu kwazi kiltumakpas. Kamisha kwam we mîjmakpas. Mamaz awane aumîza tîtkasa ilnamtu. Aune au yal mîjchimakpas, mînta pitna. 12 Au kal kiamtuasmin, aune kwaizarînash, u akwa tînta kal kimtu akwa. Awa aumîza pilchapuztakas, aune usparuza watsal pit sînkapuspas. Awa aumîza kwail kitkas, aune tînta tailchaanash. 13 Aumîza kwail paramtukas, aune usparuza wat pitmin kaizpuspas. Makima au sukin uztuzne “une tapail awa mai” kizamtu. “Une kain awa mai” kizamtu. 14 Sun pit uruza paramtasmin, nane uruza mîtsal kinashimtuchish. Na uruza pashinamtu akwa, nane uruza, ap pashpakanain kurunamtus. 15 Kwisha akkwan uruza Cristowa kamtanamtukas, une maza taittain mîjazi. U Jesucristora nîjkulakane, nane u taittakanain namtau, na ñancha Dios watsal pit uruza kainanara akwa. 16 Nane sunkana uruza na akwanamtus, na uztakanain uzanapa. 17 Katmizna, nane Timoteora u uzkin îninnamtus, au Taitta Dioskasa an wat uzanapa. Us Cristowa pitta mîra akwa, usne Cristora kanpat kit na pashimtu pashpakanain namta. Na wan wanmakmu yalkin îkane, nane Cristo nawa kurunta aizpa usparuza kamtanarau. Timoteone miza na Cristora kanpamtu uruza nîjkulninnanazi. 18 Mazantuzne u uzkin “aune Pablokin an wat pianmakpas” minñamtu. Sun minñamtuasmin, uspane na uruza izna ishkuamtu minñamtu. 19 Au Anpat nawa u uzkin azain îninshimtune, nane “sun an wat pianmakpas” kizmuruza mîmananash. Uspa pit paramtu aizpa mîshitchish. Nane uspa kal Dios akwa kiamtu aizpa izshimtus. 20 Mane Dios înintuzne kain pit chi paramanazi. Diosne usparuza tînta kiwainnanazi, uspa kaiztu aizpa kianapa. 21 Na u uzkin pianatne, ¿une chima pashiamtu? Nane uruza tînta pitkasa ashinas, uruza paranana. Nane uruza watsal kiwainana ashinas, pilchapuznarachin. ¿Na mizama piannanpai?
Ampu akkuhsh kiznara mîlta akwa, kwail kirît
1 Wan awane u watsal uzamtuchi kizamtu. Maza ampune paiña akkuhsh kiznara mîltît. Diosta pianchiruzne sunkana ashampara mîlkain. 2 U uruzpain an wat pian makpas minñamtukas, une tayaltawa, u kwail kiarît akwa, u kwail kirîtmikasha kurunarachi akwa. Sunkana manaz une sun kwail kirît chammikasha u wanmakmu yalkis ukkat înintawa. 3 Ma payu na u uzkin uztuchikas, paiña kwail kiarît aizpa mintus. Mainpa uzkas, nane sun kwail kirît aizpa mîmat kit ussa “kwail kire” kiztau. 4 U wanmakkakane, nawa minchain, na ukasa uzshimtu akwa. Au Anpat Jesucristone uruza tînta kiwainnanazi, us kishimtu aizpa kianapa. Au Anpat Jesús uruza tînta namninnamtu akwa, 5 une an kwail kirîtmikasha u wanmakmu yalkis ukkat kit înintawa. Ussa Satanás înimkin chîhatpa, paiña kwail mainnapa, impanapa, an kwail kimanpa. Suasne au Anpat Jesucristo amtu payu taizkane, Diosne paina izpul watsat mîlnanazi. 6 Awa u wanmakmukin kwail kiamtasmin, une mamaz awakin “aune anza wat awa makpas” minñasachi. Une au watsal uzamtumakpas kizasachi. Une sun pian. Pan sakane, pitchin pan kiñakasa wan chiwal sulmu. Kawarain kwail kimtumikane mamaztuza kwail kininnanazi. 7 Kiñane kwail kirît aizpakana mai. Une wan kwail sun kiñakana ukis ukkarawa, sînam awa namanapa. Katmizna, une sun kwail kirîtmikasha pianamal ukkat înintain, anpa sunkana kwail kiamanpa. U Cristora piantuzne sunkana kwail kiamtuchi, Dios uruza sînam kiharît akwa. Ñamin Pascua pishta payura Judío awaruzne pîriku piantaara. Au kwail kiarît akwa, Cristone, pîrikukana, kurishta irît, aumîza sînam sanana. 8 Sunkana manaz, Pascua pishta izamtuasmin, aune pailta payu kwail kiamasan. Wan kiña ukkarît akwa, wan kwail chîhkarît akwa, Pascua pishta iztuasmin, pailta payu wat minñat kit watcha pit kwinta kisan. Sunkana paramtumikane pan kiñakasa chi ka izpamtu. 9 Nane an ñancha pînkîh pat kit uruza înintau. Ka kaiznarau: Mînpazha patna ashampa mîltune, une uskasa wanmakkanachi. Maza ashampa Diosta pianish kizkane, patna ampu mîltane, une uskasa wanmakkanachi. 10 Nane au sukin Diosta pianchiruza kwinta kiman kiznarachish. Nane “Patna mîlmumikarakas, patna pial uktumikarakas walkumtumikarakas awa iztît panakin wakpuj waintumikarakas kwinta kiman” kiznarachish. Na ka kiztatne, une an sukis puzarîtpa me. 11 Sunkana manaz nane uruza an pînkîhta ka paranarau: Mînpazha nane Diosta pianish kizmumikane, ampu patna ashampa mîltane, ashampa patna ampu mîltane, usparuzkasa wanmakkain. Kawarain patna pial uktumikakasakas, tî awakana sarîtkin wakpuj waintumikakasakas, pilchapuztumikakasakas, awa pirîtkasakas, walkummikakasakas wanmakkain. Sun awakasane kwanchi. 12-13 ¿Miza masa? ¿Uspane kwail kiarîtki? Nane pianchish. Diosmin usparuza kwail kiarît kiznanazi. Dios wanmakmu yalkin wanmakkamtuasmin, une Diosta piantuza kwail kiarît kiznarawa. Katmizna une sun kwail kirîtmikasha uruzpa uzkis, sun wanmakmu yalkis ukkat kit înintawa.
¿Diosta piantuzne katsamikwa yalta îashina?
1 Mînpazha mamaz Diosta pianmikakasa kaizaptune, usne au sukin katsa mikwara mamazta mîlman. Uruzne Diosta piantuz uzkin mamazta mîltawa, kaizapnapa. 2 Une, Diosta piantuzne, au sukin uzturuza kwail kiarît kiznanazi. ¿Une sun pianchimakkiwas? U au sukin uzturuza kwail kiarît kiznamtuasmin, mane une chiwazha uruzpain wat paninnashina. 3 Cristo wan înintu akwa, aune uskasa wan ángel awaruzakas îninnapas. ¿Une sun pianchimakkiwas? Katmizna une au sukin Diosta piantuza kurunnarawa, wat paninnanapa. 4 Mînpazha uwarain chiwazha kwail kitne, mînpazha uwarain kaizaptune, Diosta pianchi mikwakin ussa mîlman, u Diospa kwaltuzkasa wanmakkashimtu akwa. 5 Nane an pit kaiznamtus, u mîtsal kianapa. ¿Uruzpain wat piantuza saisachimakkiwas? Une Diosta piantuzpain wat pianmikasha sairain, chiwazha nil aizpa nana. 6 Une aimpihshkanain mai, u Diosta pian akwa. Diosta piantuzkasa waya kiamtune, une u aimpihshtuza Diosta pianchi mikwasha mîlnamtu. 7 U Diosta piantuzkasa waya kimtu akwa, Diosta pianchi mikwasha îakane, une Diosta pianchiruzkana uzamtu. Awa uruza kwail kiakane, une sun kwail naiz kit tailchatpa. Awa nua walkumtukas, une sunkas tailchatpa. 8 Chiwazha kwail uruza tailchamtuchiasmin, une mamaz Diosta piantuza kwail kiamtu. Une Dios piantuz mîj aizpa walkuamtu. 9 Kwail kirîtmikane Dios ussa îninna pashimtuchi. ¿Une sun pianmakkiwas? Une sunmin kamtain. Diosne mamaztuzkasa pitturuzakas dioskanain tî sarîtkin wakpuj wainturuzakas patna ashampa mîltumikarakas patna ampu mîltumikarakas paas ampuwarain ashampakanain pitturuzakas mizurainkas îninmanazi. 10 Diosne walkummikashakas pirît chammikashakas mamazta kwail pit parammikashakas walkummikashakas waya kitmikashakas sua uzninmananazi. Sua napninmanazi. 11 Uruzpain mazantuzne an ñamin sunkana uzara. Mane Diosne u kwail kit aizpa sînam sanat kit uruza Dios iztakin nil namninnara. U au Anpat Jesucristora nîjkularît akwa, mane Diosne uruza maiznat kit nanara, paiña kwal namanapa. Mane Diosne paiña Sînam Izpulta îninzi, ukasa tuan, uruza sunkana namninnanapa.
Au sukin uzamtuasmin, watsal uzarawa
12 Mazantuz ka minñamtu: “Na chiwazha kishitne, kishinash,” Dios sanachi kaiztachi akwa. Nu chiwazha kishimtukas, wanne nua wat kitchi. Aune aumîza nil înintawamakpas, chiwazha kwail kimanpa. 13 Mazantuz ka kizamtu: “Chiwazha kumira kwatpane, pusunta wakimtu.” Diosne au ñakas wan kumirakas pailnintînazi mamaz payura. An sukin uztuasmin, aune kumira kumtumakpas, impachi akwa. Sunkana une patna ashampakasa pitna wachi. Une patna ampukasa pitna wachi. Anpatne aumîza sanazi, paiña kal kianapa. Usne aumîza tînta uzana kiwainnanazi, kwail kiamanpa. 14 Diosne au Anpat ira kamkis kuhsaknin kit kakulninta. Kawarain Diosne aumîza kuhsaknin kit kakulninnanazi, Diosmin tînta akwa. 15 Au Cristora nîjkultu akwa, aune Cristokasa mazain namanapas. Suasne awa paiña ñakana namtumakpas. Cristora nîjkultumikane aricha ashampakasa wanmakmanazi, uskasa mazain nammanpa. Sunkanain kiman. 16 Maza ampukas maza aricha ashampakas sulmin wanmaktane, uspa paasne maza awakanain namtu. Ñamin Diosne paiña pînkîhta ka panintît: “Maza ampu maza ashampara mîltane, maza awakanain namtîshina.” 17 Mînpazha au Anpat Jesucristo kaizta aizpa mîrane, usne Cristokasa maza awakanain namtînazi, Sînam Izpul sun paasta wanmaknintu akwa. 18 Katmizna kaiznamtus: Patna ashampara mîlmuchi, kwail kimanpa. Sun kwailtas îkkaintawa. Wan awane akkwan kwail kiamti. Mamaz tuntu kwailne awawa ñara kwail kimtu chi. Aricha ashampara mîlmumikane paiña ñakin kwail kirîmtu. Patna ampura mîlmumikane paiña ñakin kwail kirîmtu. 19-20 Diosne paiña Sînam Izpulta Diosta pianmikasha pizna îninta, u ñakasa uznapa. Une paiña uzmu namtu. Une paiñawa mai. Cristo kurishta irît akwa, Diosne au akwa chiwazha tazi, au kwail kirîttas puzanapa. Katmizna, usne au Anpatmika i. An sukin uzamtuasmin, aune Dios kaiztu aizpa mîarawai, nil uzana. Katmizna aune au ñakasa nil uzarawa, awa “Diosta kwisha wari” kizanapa.
Pablone Corinto awa mîmara aizpa sînkanamtu
1 Mane u nawa pînkîh parît akwa, nane uruza sînkananash. Mazainpain uzna an wari, ashampa mîltachin. 2 Mazantuz patna ashampa mîlshimtu akwa, pailta ampune paiña ashampain mîjatpa. Mazantuz patna ampu mîlshimtu akwa, pailta ashampane paiña ampuin mîjatpa. 3 Ampu ashampara mîltumikane paiña ashampakasain wat uztawa, ashampa pashit aizpa kin. Ashampa ampura mîltumikane paiña ampukasain wat uz kit ampu pashit aizpa kin. Casara kirît akwa, mazane mamaz pashit aizpa mîrawa. 4 Ampu ashampara mîj akwa, ashampa wan nulas pashimtu akwa, ashampane paiña ampu pashimtu aizpa kitpa. Kawarain ashampa ampura mîj akwa, ampu wan nulas pashimtu akwa, ampune paiña ashampa pashimtu aizpa kitpa. 5 Ampukas ashampakas usparuzain pashiamtu akwa, ashampa mîltamikakas ampu mîltamikakas paimpa pitnachi. Diosta paikwashimtune, sun ampukas sun ashampakas nîjkultawai, akkwan payuchikimain sulmin pitmanpa. Kapal Diosta paikwatpane, mamasa sun paasas sulmin uz kit pittawa, Satanás usparuza kwail kininamanpa. 6 Nane sun pit uruza îninnamtuchish. Nane uruza na kaiznamtu aizpa kianpa kurunamtus. 7 Nane masainpain uzish. Ashampa mîjchi ish. Wan ampune nakanain uzashina mintus. Diosne wan awaruza kiwainnanazi. Mazantuzne kasara kiamtu. Anpane kasara kit chi uzmai. 8 Nane ampu ashampara mîltuchiruzakas ampu irît ashampa uztuzakas kurunamtus, kasara kiamanpa, nakanain mazain uzanapa. 9 Mazainpa uzsachi ish mintumikane kasara kitpa. Ashampara pashimtus mintumikane kasara kitpa. Ashampara saimtumika kasara kimtukine, kwail kishit kit us kwail akwa naizshina. 10 Na an pit uruza kurunamtukas, an Anpat Jesucristone uruza ka îninnara: “ashampa ampu mîjne, ampura kwainachi.” 11 Sunkana manaz, ashampa ampura kwairîtne, ashampane mazainpa uztawa, mamasa kasara kitchin. Mamasa wanmakshitne, ashampane paiña ampu kwairîtmikasha mamasa yaltawa, mamasa wanmaknapa. Kawarain ampune ashampa mîjne, ashampara kwainachi. 12 Mane nane anparuza sun pit kurunamtus. An ñancha au Anpat Jesucristone na kaiztu aizpa kainarachi. Ampune, Diosta pianmikane, Diosta pianchi ashampara mîjne, sun ampune paiña ashampa kwainachi, paiña ashampa uskasa uzshitne. 13 Ashampane, Diosta nîjkultumikane, ampu Diosta pianchi mîjne, sun ashampane paiña ampura kwainachi, paiña ampu uskasa uzshitne. 14 Ashampa Diosta nîjkultu akwa, Diosne paiña ampu Diosta pianchimikasha kiwainshimtu, Dioskasa watsal uznapa. Ampu Diosta pian akwa, Diosne paiña ashampara Diosta pianchimikasha kiwainshimtu, Dioskasa watsal uznapa. Papihshtuz Diosta piankamtune, pashparuzne chiwazha wat aizpa Diostas sappashina. Akkuhshtuz Diosta piankamtune, Diosne uspa pashparuza kiwainashimtu. Dios ussa piantuzpa pashparuza sapnarakine, Diosne sun pashparuza Diosta pianchiruzakana kiwainanazi. Papihshkas akkuhshkas Diosta pian akwa, Diosne pashparuza sapnashina, paiña kwal namnanapa. 15 Ampu Diosta pianchimika paiña ashampara, Diosta pianmikasha kwaishitne, an ashampane paiña ampura kwaishina. Ashampa Diosta pianchimikasha, paiña ampura, Diosta pianmikasha, kwaishitne, an ampune paiña ashampara kwaishina. Diosta pianmikane îshimtumikasha nîjkulninsachi. Diosne aumîza akwanara, wat uznapa, waya kitchin. 16 Une Dios u akwa kishimtu aizpa pianchi. Ampu Diosta pianmikane, paiña ashampara kiwainshinai, Diosta piankamnapa. Ashampa Diosta pianmikane paiña ampura kiwainshinai, Diosta piankamnapa. 17 Diosne aumîza akwanara, Cristora nîjkulanapa. Au Anpat chiwazha mîlam aumîza mîlanamtu. Sunkanain pakaish pakaish uzarawamakpas, us înintu aizpa kin. Nane sun pitmin wan wanmakmukin îninnarau. 18 Diosne mazantuz Judío awara akwanarazi, Cristora nîjkulanapa. Une Judío awa pil namtît aizpa maizkain. Diosne mazantuz Judío awachiruza akwanara, Cristora nîjkulanapa. Une Judío awaruzkana kiman. Aya nakkain. Kainsîh. 19 Dios Judío awaruzakas, pil namtîttuzakas Judío chi awaruzakas iznakane, kawain mai. Wan awa Dios îninta aizpa kiarane, sunne an wari. 20 Dios uruza Cristora nîjkulna akwanakane, sua pakaish pakaish nukkultain, paiña kal kianapa. Une sunkanain kirain. 21 Diosne uruza, mamazpa kal kimtuza, akwanara. Dios nua mamazpa kal kimtumikasha akwatne, nune anpatpa kal impara imparain kal kit kit tailchatpa. Anpatpa kal kimtuasmin, nune paiña kal kitpa, pailnakima. Anpat nua chîhtshimtune, nune puztîshina. 22 Maza mamazpa kal kimtumika tuasmin, Diosne ussa akwara, Cristora nîjkulnapa, Cristokasa chanapa. Suasne usne mamazpa kal kimtumika chi. Kawarain, maza mamazpa kal kimtuchimika tuasmin, Diosne ussa akwara, Cristora nîjkulnapa. Suasne Cristokasa chamtuasmin, usne mamazpa kal kimtumikakana uzchi. 23 Cristo kurishta u akwa irît akwa, Diosne uruza paiña kwal namninnarît, us kaizta aizpa kianpa. Sun akwa, une awawa kiwainmumika namninman. 24 Mamasa Diosta piantuz, mîrain. U ñamin kal kiamtuasmin, Diosne uruza Cristora nîjkulanapa akwanara. Jesucristora nîjkularakima, une sunmin kal kiamîztain. Dios kaiznamtu aizpa mîamtuasmin, une paiña iztakin nil uztain.
Pablone ampu mîjchiruza kurunamtu
25 Mane nane mamaz pit kasara kitchiruza kurunamtus. Au Anpatne sun pit kasara kitchiruza kaizta aizpa înintachi. Jesucristo nawa wat kiwaintît akwa, na kaiztu aizpa watcha pit i. 26 Katmizna kasara kitchi an wari mintus, akkwan kwail taiznapain akwa. 27 Ampu ashampara mîltane, ashampara kwaimans mîltawa. Ampu ashampara mîltuchimikane, ashampara sairakine, an wari. 28 Kasara kitne, kwail kimanazi. Sînam ashampa ampura mîltamikane kwail kimtuchi. Kasara kimturuz au sukin naizarîmtu akwa, nane kasara kiman kurunamtus, naizamanpa. 29 Diosta piantuz, mîrain. Aune akkwan payukima nukkulmanazi. Makis Dios akwa paiña kal tînta kitpamakpas. Kasara kittuzne Diosta nîjkularawa, paiña kal kin, kasara kitchiruzkana. 30 Aune akkwan payu uzna mîjchimakpas. Tayaltumikane akkwan payukima aztachin uztawa. Ishantumikane pailta payu ishantuchin uztawa. Chiwazha paishimtumikane pailta payu us mîj aizpa mintachin uztawa. 31 Au sukin uzamtuasmin, pial kana kimtuasmin, aune wan izamtu aizpa pashitchin uztawamakpas. An sune au iztu aizpa, au mîj aizpa karînazi. 32 Na kaizta aizpa mîrain. Nane uruza kurunarau, kalpain uzanapa, u mîjki aizpa minñamanpa. Ampu ashampara mîjchimikane pailta payu Dios pashimtu aizpa mintu, us manta kit aizpa kin. 33 Paiña kwalpa mintuasmin, ampu ashampara mîjmikane paiña kwalta kwira kimtu. Paiña ashamparakas wat kulninshimtu. 34 Paiña kwalta kwira kishimtuasmin, an ampune au Anpatpa kalkas kishimtu. Pailta ashampakas kawarain mai. Wan ashampa ampu mîjchimikakas sînam ashampakas pailta payu Dios pashimtu aizpa minñamtu, wan us manta kit aizpa kianapa. Ashampa ampu mîjmikane paiña kwalta kwira kishimtu. Suasne usne paiña ampura wat kulninshimtu. 35 Na sun pit uruza paramtasmin, nane uruza kiwainashimtus. Nane uruza kal mîlashichish. Nane u watsal uzanapa pashimtus, au Anpat uruza kurunamtu aizpa pailta payukima kianapa. 36 An pit papihshtuza kaiznamtus. Pashu ma înkwa parasmin, pashu mîjmikane paiña yalkinmin watsal uzshina. Suasne paiña pashura pashimtumikane amtui. Paiña papihshta pashu paikwan amtui, paiña pashura kasara kin namtît akwa, pashura mîlna. Papihshne, sun pashuwamikane, “wat awa i” mintane, mîlanazi, pashura mîlnapa. Kwail kiamtuchi. Kasara kishina. 37 Papihshtuza kwinta kinamtus. Pashu ma înkwa parasmin, usne pashu mîjmikawa yalkimin watsal uzshina. Pashuwamika paiña pashu mîlashitkine, an wari. Kasara kitchin mintane, us wat kimtu. Yalkimin mîjne, wari. 38 Papihsh paiña pashu kasarakin mîlamtumikane wat kimtu. Papihsh paiña pashu kasarakin mîlatchimikane anza wat kimtu. 39 Ashampa paiña ampu mîj uzne, mamazkasa kasara kisachi. Paiña ampu irîtne, ashampa mamaz ampu kasara kishinai. Ashampa kasara kishimtumikane Jesucristo nîjkultumikara kasara kishinai. 40 Mazainpa nukkultane, mamasa kasara kitkine, anza wari mintus. Na uruza kurunnamtasmin, nane Sînam Izpul mîjash mintus.
Cristone an katsa pariya namta
1 Mane sun kumirawa kainanash. Chiwazha piantarawane, awane sun ña tî awakanain sarîtta mîlanat kit unamtu. Une “sun ñara kuashinmasa” mîmamtu. Mînpazha nane akkwan pian ish kiztu. Nane an ña kwashinas pian ish. Sun ña aumîza tañu kisachi pian ish. Sunkana an wat pian ish kiztumikane usmin an katsa namshina. Mamaztuza pashinanapa an wari, usparuzkas Diosta an piankamanapa. 2 Wan wat pian ish kizmumikane we pian i. Usne ma piankamna mazamtu. 3 Diosne sun Diosta pashimtumikasha nara, ussa piankamnapa. 4 Mane mamasa sun ñawa kainammtus. Awane sun ña tî awakanain sarîtta mîlanat kit unamtu. Au sukinne wan tî awakanain sarîtne chinkas kisachi. Kain uzi. Au Diosne mazain i. Mamaz diosne wachi. 5 Awane chiyurakas au sukinkas akkwan tuntu dios uzmai minñamtu. Awa akkwan tuntu dioskas akwan anpatkas uzmai kizamtukas, 6 aune maza Diosmin uz, au Taitta Diosmin uz, pianmakpas. Usne awa wan iztu aizpa sarît. Aune Dios pashimtu aizpa kishimtumakpas. Maza Anpatmin uz. Usne Jesucristo muntîtmika i. Diosne, Jesucristo akwa, kawa chiwal izamtu aizpa sarît. Diosne aumîza uzninnanara. 7 Wan Diosta piantuzne na kaiztu aizpa pianchime. Mazantuzne akkwan payuchikimain tî awakana sarîtkin wakpuj wainñara. Diosta wewazha piantuzne “aune kwail kipuspas” minñamtu, sun kumira kwatne. Sun kumira tî awakanain sarîtkin unarane, uspane kwail kiamtupuspas minñamtu. Sun kumira akwa, uspane ayukta kwail mazamtu. 8 Diosne an kumira kumtumikara sapnazi, Dios iztakin an we namtuchin. Diosne an kumira kumtuchimikara sapnazi, an wat namtuchin. Sun kumira au kwashitkine, aune an we namsachimakpas. 9 U wan kumira kwashimtukas, une wewazha Diosta piantuzpa minñarawa, u akwa kwail kiamanpa. 10 Mînpazha nua tî awakana iztît panakin izshina. Usne sun kumira tî awakana sarîtta, nu kumtu minñazi. Nu Diosta wat piankas, an Diosta wewazha pianmikane unarît kumirara kumîznazi, nu an kumira ussa kwanintît akwa. Sun kumira kwatne, usne kwail kimtus minshina. 11 Nune, Diosta an wat pianmikane, Diosta wewazha pianmikasha, up añara, kwail kinintu, wan karînpa. Nune sun añara kiwaintachi, nu unarît kumira kwarît akwa. Cristokas sun aña akwa irît, ussa sînam sana. 12 Sunkanain up añara kwail kitne, Diosta wewazha pianmikara kwail kimîztune, nune ussa kwail kimtu. Nune Cristorakas kwail kimtu. 13 Ka akwaizna mizurainkas nane sun unarît kumira kumanash, ap aña na akwa kwail kimîztune. Suasne nane sun unarît kumira chi kumanash, ap aña kwail kimanpa.
Pablone Dios înintamika i
1 Diosne nawa chîht akwa, nane mamaz Diosta piantuz kiashimtu aizpa kishinash. Dios nawa paiña înintamika namnintît akwa, nane înintamikawa kal kishinash. Nakas au Anpat Jesucristora iztau. Na ukasa uzasmin, nane tînta kal kirau. Na uruza Dios pit kainanarawane, une au Anpatta nîjkulat kit us kaizta aizpa mîara. Sun akwa une na Dios înintamika ish pian. 2 Anparuz na Cristo nawa înintamika namtît kizamtuchikas, une na Cristo înintamika ish pian. Na uruza Dios pit kainarawane, une Cristora piankamazi, us kamtamtu aizpa kanpana. Sun akwa nane Dios înintamika ish. 3 Nane nawa mîmamturuza, Dios nawa înintachi minturuza, sînkananash. 4 Na u akwa kal kimtu akwa, nane uruztas kumira sap kit kwashinas. 5 Nakas maza Diosta pian ashampara mîlshinas, nakasa chanpa. Anpa Cristo înintaruzkas, au Anpatpa aimpihshtuzkas, Cefaskas sunkanain uspa ashamparuza mîlaarît. 6 ¿Une chima minpuspas? Nakas Bernabékas kal kimtuas, Dios pit kainammtuasmin. ¿Aune kal kinatkin, au kumira pait kwan? Anpane sunkana kal kiamtuchi. 7 Maza suldarune paiña pial tamtuchi, chiwazha paina. Suldaruwa înintamika tanazi. Wankail pippa wamtumikane sun wankail pippa pak kit paiñawa kwanazi. Cabra izmumikane cabrara leche tulnazi, paiñawa kwan. 8 Na uruza sun kwinta kamtanamtukas, nane awa kainanamtukana kainammtuchish. Moiséskas Dios îninta aizpa kawarain uruza kamtanara. 9 Moisésne Dios îninta aizpa Dios pînkîhta ka parît: “Wakara chara pippa aya kîhshnapa chanintuasmin, wakara trupitkin kuhnachi.” Moisés sun pit pînkîhta paramtuasmin, usne awaruza kamtanara, wakara trupitkin kuhmanpa, wakara pitchin pippa kwanapa. Dios sun pit paranintakas, usne wakara kumtu aizpa maintachi, 10 Dios awa akwa minta akwa, usparuza iznanapa. Watcha, Diosne au akwa sun pit para, Diospa kal kimika chiwazha sapnapa. Pilkin kal kimtumikane sun kal pailnakima watsal tîriztu, paiñawa sapna. Pippa paktumikane sun kal pailnakima watsal tîriztu, paiñawa sapna. 11 Ukasa uzasmin, au înintaruzne Dios pit uruza kainaramakpas. Sun pitne pippakanain azi. Aune sun pippakanain u nantakanain waramakpas. Aune u akwa kal kitmakpas. Mane une au we mîj aizpa minñashina, aumîza mîlanana. 12 Mamaztuzne uruza ka îninnara: “Aumîza kiwaintawa.” Sun akwa une mamaz Dios pit kainammturuza mîlanara, uspa we aizpa kiwainnana. Une aumîza an akkwan kiwainshina mintawa. Au we namtukas, aune uruza chiwazha paikwatchimakpas. Au we namtuasmin, aune wan chiwazha tînta tailchapuspas, wan awa Dios watsal pit mîanapa. 13 Une Judío pariya kal kimtu aizpa pian. Judío awa uspa mîlam Judío wanmakmu yaltakima mîltuasmin, Judío pariyaruzne kiwainnazi. Kwiztane uspane sun kumiraras uspawa sappanazi, kwan. Uspane awa akwa wakara piantaamtu, Diosta mîlan. Kwizta uspawa sappanazi, kwan. 14 Kawarain, au Anpat îninta, sunkanain kinpa. Dios watsal pit mîamturuzne pialkas kumirakas Dios watsal pit kainammturuza mîlanarawai, uspa uzanapa. 15 Na chiwazha mîjchiasmin, nane uruza nawa kiwainnapa paikwatchish. Nane sunpa paikwashinas. Nakas uruza pînkîh pamtuchish, nawa chiwazha mîlanapa. Mizurainkas uruza pial paikwamanash, na Dios watsal pit uruza kain kainanashimtu akwa. Suasne nane wan awaruza ap kalpa kainanash, awa ap kal kwail i minñamapa. 16 Dios watsal pit kainarane, nane mamazkin na an wat ish kizsachish. Dios nawa akwat akwa, nane paiña pit paratpaish. Dios watsal pit paramtukine, tayal kit naiznash. 17 Nane Dios watsal pit paramtu, na sun kishimtu akwa. Katmizna au Anpatne manaz nawa chiwazha taanazi. Sun kishimtukas, nane Dios watsal pit paranarawa ish, Dios nawa akwat akwa. 18 Dios watsal pit kainammtuasmin, nane chinkas sapmanash. U mîlamtu aizpa saptuchikas, nane watsal ish, na uruza Dios pit kain kainammtu akwa. Na u pui aizpa saptuchikas, Diosne nawa chiwazha mîlanazi. Na Dios watsal pit uruza paramtukas, nane u pui aizpa saptachish. 19 Nane anpat mîjchish. Katmizna nane wan awaruza kiwainashinash, an akkwan awa Jesucristora nîjkulanapa. 20 Na Judío awakasa uztuasmin, nane uspa uzamtukanain uzmîznash, Judío awa Cristora nîjkulanapa. Sunkanain kinash. Judío awa Moisés kaizta aizpa kiara akwa, nakas Moisés kaizta aizpa kinash. Nane Moisés îninta aizpa chikinpachish. Sunkana us kaizta aizpa kinash, Judío awa Cristora nîjkulanapa. 21 Mamaztuzne Judío awa chiruzne Moisés îninta aizpa kiarakiwa. Na sun awakasa uzasmin, nane uspa uzkanain uzmîznash, Cristora nîjkulanapa. Dios îninta aizpa mîmtuasmin, nane Cristokas înintu aizpa kinash. 22 Mamaztuzne, Cristora we piantuzne, tînta nîjkulamtuchi. Na sun Cristora we piantuzkasa uzasmin, nane usparuza kiwainanash, Cristora an wat piankamanapa. Nane sun wan awakanain namninnash, usparuza kiwainanapa, Cristo mazantuza watsat mîlnanapa. 23 Sunkanain uztus, mazantuz Dios watsal pit piankamanapa. Suasne nakas ussa piantuzkas Dios mîlamtu aizpa sapshinamakpas. 24 Pîpulukin akkwan awane wanmakkamtu, ãïn îana. Akkwan îarîkas, mazain kana kimtui. Mazain chiwazha saptui. Ukas Dios înintukanain uzarawa, kana kianapa, Dios mîlamtu aizpa sappanapa. 25 Mane wan ãïn chashimturuzne an ñamin akkwan payukima ãïn îamtu. Attishta îamtu, an tînta kulanapa, kana kianpa. Sun ãïn chamturuzne kîh iptît kana kiashimtu. Akkwan payu chin sun kîh tuiltîm. Diosta piankamturuzne an tînta kulamtu, Dios usparuza chiwazha pailtuchi aizpa mîlananapa. 26 Ka akwaizna na an sukin chamtuasmin, nilpara îmtu, an azain piannanpa. Nakas wat waya kimtukanain kuznash, mîza kuztachin. Na Dios mîlashimtu aizpa pashimtu akwa, nane Dios kaiztu aizpa minnash, chiwazha kwail kimanpa. 27 Dios pit mamaztuza kamtarawane, nane nawa kurunnarawash, nawa wat parînpa, kwail kimanpa. Nane nawa nîjkultawash, kwail minmanpa. Suasne sun wat pit mînash, Dios pashit aizpa kin. Na sun pit mîmtukine, nane wat kulsachish, na wan karîmtu akwa.
Tî awakana sarîtta wakpuj wainman
1 Diosta piantuz, an pit nîjkularawa, ñamin kirît aizpa mainñamanapa. Au Israel kwal pil pul sukin chamtuasmin, Diosne wanish kwashmin îninta, awa Dios miwara suinkin chanappanapa. Kwanam pi pul parîkane, Diosne usparuza kwakara îninnara. 2 Sun awane Moisésta kanpamtuz namara, sun wanishkin uskasa chaarît akwa, kwanam pikin uskasa kwakkarît akwa. Kawarain ukas kwazikasa munnarît akwa, une Cristora kanpaara. 3 Diospa Izpulne pailta awaruza an chiyuras kumira îninnara, wan kuanapa. 4 Ukkis kwazi puzkane, pailta awane kuara, Dios Izpul usparuza kwinnara akwa. Pil pul sukin chasmin, an ukne uspakasa îrît, an kumirakas an kwazikas kwinnara. Suane Cristone, an ukne, usparuza iznat kit kwinnara. 5 Kwiztane sun awane Dios îninta aizpa kishiarachi. Ka akwaizna pil pul suwara îamtuasmin, wan iamîzta. 6 Mane sun kwinta mîarawane, nane uruza kurunnamtus, uspa kwail kishiarît aizpa piankamamanpa, u kwail kiamanpa. 7 Ka akwaizna tî awakanain sarîtkin sua wakpuj wainman. Ñamin anpane sunkanain wakpuj wainñara. Dios pit pînkîhta ka para: “Awane uzara, kumirakas tîrakukas kwan. Kwiztane kutpat kit paiyi sat kit kuki kiara.” 8 Aune mamazpa ashampakasa pitkain. Ñamin mînpazha awaruz mamazpa ashampakasa pitta akwa, maza payuin veintitrés mil awane iarît. 9 Diosne ap kwail kimtu aizpa ilmanazi minman. Aune us kaizta aizpa mîarawamakpas. Ñamin uztaruz mîarachi akwa, mazantuz kamta kwat iara. 10 Dios aumîza watsal uzna kurunnamtuasmin, aune us kaizta aizpa mîarawamakpas. Ñamin anparuz Diosta aliz kulat kit kwail pararît akwa, Diosne paiña ángelta îninta, usparuza piantananapa. 11 Sunkanain au an ñamin kwaltuzne uzat kit naizara. Diosne sun pit kwinta kit kit paiña pînkîhta panintît, aumîza kurunnanapa. An minpa payu uzamtuasmin, aune sun pit piankamarawamakpas, au an ñamin uzat kwalkana uzamanpa. 12 Kwail kimtuchi ish mintumikane kuiraruin chanka, wan kamanpa. 13 Awa kwail kin minñarawane, uspane kawain kwail kiashimîztu. Wan awa kaspain azi, Diablo wantuza kwail kin nuppainnamtu akwa. Diosne Diosta nîjkulturuza an tînta namninnashina, tînta tailchanapa. Diablo umîza kwail kininshimtuasmin, au nil Diosne uruza kiwainashinazi, tînta tailchanapa, kwail kiamanpa. 14 Ka akwaizna ap pashimtu izmuruz, mîrain. Tîkasa sarît awakanain iztîtkin mizurainkas wakpuj wainman. 15 Une ma na kaiztu aizpa mîashinai. Uruzpain na watcha kaiztu aizpa nîjkularawa. 16 Anpatpa pishta iztuasmin, an vino kuamtuasmin, Diosta piantuzne Diosta aishtaish kizpuspas, Cristo au kwail akwa irît akwa, aumîza paiña aimpikasa sînam sanamtu akwa. An pan nail kit kuamtuasmin, Diosta piantuzne Cristo kurishta irît nîjkulamtu. 17 Akkwan awa sun maza pan kuamtu akwa, aune maza kwalkanain namtîtmakpas. Sun pan kumtu akwa, aune Cristowa kwal namtît kizpuspas. 18 Judío awaruzne uspa mîlam Dios sapmukin mîlaara, sun mîlamtu aizpa sua piantana. Sun mîlam Diosta mîlamtu akwa, piantarît aizpa kumturuzne sua Diosta wakpuj wainñamu. Sua Diosne usparuza sapnamtu. 19 ¿Na kaiztu aizpa mîpuskiwas? Sun tîkasa sarît awakanain iztît kain i. Sun chiwazha ñakas sun tîkasa sarît awakanain iztîtta mîlamtu aizpa kain i. Wan ñane kawarain i. 20 Diosta pianchiruzne saliztuza chiwazha mîlam mîlamturuzne, Diablora wakpuj wainñamtu. Diosta wakpuj wainñamtuchi. Nane uruza kurunnamtus, Diosta pianchiruzakanain, Diablowa kiwainmuruza wakpuj wainñamtukanain kiamanpa. 21 Au Anpatpa pishta iztuasmin, Diosta piantuzne au Anpat Jesúspa vinokas pankas kwashinai, ussa nîjkulana. Diosta piantuzne kumira saliztuza mîlarît aizpa kuasachi. Uruzne sun urain au Anpattakas saliztuzakas wakpuj wainñasachi. 22 Aune Diablora wakpuj waintane, Anpat Jesúsne aukasa aliz kulat kit aumîza naizninnanazi. Usne aukin anza tînta i.
Dios akwa wan kitpa
23 Mazantuz ka kizamtui: “Aune an kishimtu aizpa kishinamakpas.” Au wan kishimtukas, wanne au akwakas mamazpa akwakas wat chi. “Au wan kishimtukas,” wanne Jesústa nîjkulturuza kiwainamtuchi. 24 Mînminkas usmin wat kin sainachi. Mamaztuza wat kin sairawamakpas. 25 Uruzne chiwazha ña painintu aizpa kwashina, chinkas mîmarachin. Sun ña tî awakana sarîtkin mîlatne, une sunpa mîmanachi. 26 Dios pînkîhta ka parît: “Au sukin wa aizpa Diosmin pamika i.” 27 Diosta pianchimika uruza kumira kwinna akukane, îshitne, ît kit wan kwintu aizpa kwan îrain. Tî awakana sarîtkin mîlarîtkane, mîmaman. Sunpa minman. 28 Sunkana mînpazha sun ña tî awakanain sarîtta mîlarît i kizkane, us akwa sun kuman. Mamaz mîlarît aizpa kwail kwan mintuasmin, une sun kuanachi. 29 U wan ña kawarain mai minñarakas, mamaztuzne sun mîlarît aizpa kwail kwan minñamtu. Us akwa kuanachi. Mane mînpazha na kaizta aizpa nawa mîmashinai, us nakasa nîjkultuchi akwa. “Mamaz mîlarît aizpa kwail kwan minkane, usne nawa îninsachi, na sunpa kumanpa. 30 Na kumtu aizpa Diosta aishtaish kiztune, ¿Chikishma mamaz nawa kwail kimtui kiztu?” 31 Ka akwaizna mîrain. Chiwazha kuamtu aizpa chiwazha kiamtu aizpa, Dios akwa kiarawa, awa Dios kwisha wari kizanapa. 32 Wan awa iztakin wat awakanain uztain. An sukin uzamtuasmin, une Judío awaruzakas Judío chi awaruzakas Diosta piantuz wanmakmuruzakas kwail kininnanachi. Mînainkas kwail minman. 33 Kawarain kimtus, wan awaruza wat kin. Nane apminpain wat saimtuchish. Nane mamaztuza kiwainashimtus, Dios usparuza watsat mîlnanapa.
1 Na Cristo uztakanain uztu akwa, une na uztakanain uztain, Cristora kanpana.
Ashamparuzkas wanmakmuruzkas
2 Mane u nawa nîjkulamtu akwa, na kamtanara aizpa kiamîztu akwa, nane uruza “wat kiamtui” kiznamtus. 3 Na kaizta aizpa piankamtain. Diosne an katsa îninmika i. Cristone Dios îninta aizpa mît kit kira. Kawarain wan ampune Cristo înintu aizpa mîat kit kiarawa. Kawarain ashampane paiña ampu înintu aizpa mît kit kitpa. 4 Ampu Diosta paikumtumikane, Dios pit kainammtumikane, awa wanmakmukin paiña chutta ukpiztawa. Dios pit kainammtuasmin, chutta ijmumikane Cristo pashimtu aizpa kimtuchi. Usmin mîtsal mîj. 5 Ashampa Diosta paikumtumikane, Dios pit kainammtumikane, wanmakmukin paiña kîzpu pïnkasa ampaltukine, usne paiña ampura mîtsal kinintu. Paiña kîzpu ampaltarakine, an ashampane paiña kîzpu ash tîttîtkanain uzmai. Sun akwa mîtsal mîj. 6 Ashampa paiña kîzpu ampaltakine, masain wan ash kihtshinai. Wan ash chiwal kihttane, ashampane mîtsal mîjanazi. Ka akwaizna ashampane paiña kîzpu ampaltawa, ash akwa mîtsal mîjmanpa. 7 Ampune wanmakmukin paiña kîzpu ijnachi, Dios ampuruza uskanain sarît akwa. Ampu sunkanain kimtune, usne Dios an tînta namninnazi. Ashamparuzne uspa ampu kuruntu aizpa mîarawa, ussa an tînta namnapa. 8 Dios ampu sarakane, Diosne ashampawa sîhkasa ampu sarachi. Sunkana sara. Ampu kasu pitnin kit sîh uktawane, Diosne sun sîhkasa maza ashampa sara. 9 Ampune ashampa akwa sarachi. Ashampane ampu akwa sara, ussa kiwainapa. 10 Ka akwaizna ashampane paiña kîzpura ampaltawa, paiña ampu kaiztu aizpa mînapa. Sun ashampakas kîzpu ampaltawa ángeltuz akwa. 11 Au Anpatne ampurakas ashamparakas sanara, uspain kiwainnana, Jesús pashimtukanain uzpailnapa. 12 Sunkana watcha kirît. Diosne an ñancha ashampara ampuras sara. Ashampane ampu pashpa nishmu. Minpara Diosne wan wa aizpa sara. 13 Awa wanmakkakane, ashampa Diosta paikumtune, paiña kîzpu ampaltukine, kwailpazha. Une sunpa wat mîmarawa. 14 Wan awaruzne kawarain minñamtu. Ampu ash aks kwammikane mîtsal kimtu. 15 Ashampa ash aks kwammikane watsal kulnazi, Dios ussa ash aks mîlarît akwa, paiña kîzpu ampalnapa. 16 U ashpa an mîmashimtune, an piankamtain: “Aukas, Diosta piantuz wanmakmuruzkas nîjkultumakpas, ashampawa kîzpu ash kwanapa.”
Au Anpatpa kumira kuamtuasmin, uspane ñanta kiara
17 Mane mamaz pit na kurunamtu aizpa mîrain. Nane uruza wat kiamtui kizsachish. Au Anpatpa kumira kwan wanmakkamtuasmin, une uruzpain ñanta kiamtu. Uruzpain wat kiamtuchi. 18 An ñancha pit mîrain. Mazantuzne sun nawa kaizara. U Anpatpa kumira kwan wanmakkamtuasmin, une uruzpain paimpa naiyamtu, u mamaztuzkasa nîjkulamtuchi akwa. Nane sun kakwakimain watcha i pianish. 19 Mazantuzne Diosta nil pianturuzkana uzshiamtuchi akwa, uspane mamaz tuntu uzana pashiara. Uspa mamaz tuntu uzamtu akwa, une Diosta watcha piantuza piankamanazi. 20 Dios iztakin kumira kwan wanmakkakane, une au Anpatpa kumira kumtumakpas kaizasachi, u uruzpain naiyamtu akwa. 21 Kumira nailtachasmin, anparuzne uspa kumira karat aizpa paimpa kuamîztu, mamaztuza kwinnarachin. Mazantuzne tukta kuara. Anpane yak kiamtu. Mazantuzne piwal kuamtu. Anpane kwazi kiyarît. 22 U Diosta piantuz wanmakkakane, sunkana kuman. ¿U yal mîjchimakkiwas mînta kwan? Une chinkas mîjchiruza mîtsal kianintu. ¿Nane uruza chima kiznapai? Nane uruza “wat kiamtu” kiznasachish. Une kwail kiamtu.
Au Anpatpa kumira
23 Nane au Anpat Jesucristo nawa kamtara aizpa saptau. Sunkanain uruza kamtananash. Sunkana kamtara: Sun amtain awane au Anpat Jesústa pizara. Chîhkatchasmin, usne pan paara. 24 An pan saptawane, usne Diosta aishtaish kizta. Suasne usne an pan nail kit kanpamtuza ka kiznara: “An pan kwarain. Anne ap ña i. An pan kuamtuasmin, na u akwa irît aizpa nîjkulamîztain,” kiznara. 25 Kawarain, pan nail kit kuarawane, usne vino tasa paat kit usparuza ka kaiznara: “An vino ap aimpi i. Na u akwa îrîmtu akwa, Diosne uruza sînam sana kin namtu. Sun vino kuamtuasmin, une na u akwa irît nîjkulamîztain,” kiznara. 26 Sun pan kuamtuasmin, sun vino kuamtuasmin, une au Anpatta nîjkulanazi. Une Cristo au akwa irît wan awaruza annanazi, au Anpat mamasa kailtu payukima.
Miza kwashina au Anpat kumira
27 Ka akwaizna, au Anpatpa kumira kuamtuasmin, une au Anpat au akwa irît nil mîarawa. Au Anpat kumirawa nil mintuchimikane kwail kimtu. 28 Au Anpatpa kumira kwatchasmin, wan awaruzne Cristo au akwa irît nîjkularawa. Wan awaruzne us kimtu aizpa wat mîarawa, Dios uspa kwail kiharît akwa. 29 Au Anpat au akwa irît aizpa we mîarane, au Anpatpa kumira kumtumikane wat chi min kit naiztînazi. 30 Katmizna akkwan awane uruzpain imtu pura. Anparuz tînta chi. Anparuz iarît. 31 An kumira kwatchasmin, aune au kiamtu aizpa wat mîmarawa, Dios au kwail akwa ilnamanpa. 32 Au Anpat aumîza ilninarakas, usne Diosta piantuza kamtanamtu, aumîza kamanapa, nil uzanapa. Uskas wan Diosta pianchiruza ilnanazi, wan kaanapa. 33 Sunkanain Diosta piantuz, mîrain. Au Anpatpa kumira kwan wanmakkakane, wan tîrizarawa, parejuin kuana. 34 Mînpazha yak kimtune, atchasmin, paiña yaltain kwatpa, u wanmakmukin kwail kiamanpa. Suasne Diosne usparuza ilnamanazi. Na uruza izna pianakane, nane u we pian aizpa kurunnanash.
Dios Sînam Izpul mîlamtu aizpa
1 Mane Diosta piantuz, mîrain. Nane Dios Sînam Izpulpa kainanash, us mîlamtu aizpa piankamanapa. 2 Piankamtain. Diosta pianchasmin, une sun tî awakana sarîtkin wakpuj wainñat kit suntuza kanpaara. Awa uruza sunpa pîrail kamtara akwa, une sun tî awakana sarîtta kanpat kit pîlsaara, Dios miwara îamanpa. 3 Katmizna, ka piankamtain. Sînam Izpulpa pit kaiztumikane “Jesús kwail i” kiz parasachi. Sînam Izpulpa pit kaiztumikain “Jesús au Anpat i” kiz parashinai. 4 Dios akkwan tuntu kal mîj akwa, Diospa Sînam Izpulmin Diosta piantuza mîlam mîlanamtu, paiña kal kianapa. 5 Awa aizpa pakaish pakaish kal kiamtuasmin, au Anpatmin usparuza kiwainnamtu, paiña kal kianapa. 6 Akkwan tuntu kal wa. Diosmin wan kal kimturuza kiwainamtu, paiña kal kianapa. 7 Diosta piantuzne paiña mîlam sappanazi. Sînam Izpulne usparuza tînta kiwainnamti, paiña kal kianapa. Suasne uspane sun mîlamkasa anpa Diosta piantuza kiwainñashinai. 8 Sînam Izpulne mazantuza an wat piankammu pit mîlanamtu. Sun Sînam Izpulmin mazantuza mîlanamtu, mamaztuza Dios kaizta aizpa piankamninnanapa. 9 Mazantuza sun Sînam Izpulmin Cristora nîjkulanapa mîlanamtu, Cristo pashimtu aizpa kianapa. Mazantuza mîlanamtu, ishturuza kakulninanapa. 10 Mazantuza tînta kiwainamtu, watsal kal kianapa. Mazantuza kiwainamtu, Dios îninta aizpa kainanapa. Mazantuza kiwainamtu, saliztuz kiamtu aizpakas Sînam Izpul kimtu aizpakas piankamanapa. Mamaztuza kiwainamtu, mamaz kamtachi pit paraanapa. Mazantuza kiwainamtu, mamaz tuntu pit paramtumika kaiztu aizpa piankamninnanapa. 11 Sunkanain Sînam Izpulmin awaruza kiwainamti, pakaish pakaish kal kianapa. Us pashit aizpa kin mintawane, Sînam Izpulne wan Diosta piantuza uspa mîlam chîhkanara.
Sînam Izpulne aumîza maza awakanain namnintu
12 Maza awa intiruz mintain. Awa intiruz akkwan pajte wajkas, maza awa i. Aune Cristora piantuzne akkwan makpas. Cristo akwa aune maza awa intiruzkanain namarîtmakpas. 13 Sunkanain Sînam Izpulne Judío awaruzakas Judío chi awaruzakas anpat mîjchiruzakas anpat mîjtuzakas maza awa intiruzkana namninnarît. Dios aumîza sapkane, Diosne aumîza munnat kit paiña Izpulta aumîza îninnat kit aumîza paiña kwal namninnara. 14 Maza awa intiruz akkwan pajte waj. Mazain chi. 15 Awa mittî “na chihtîkana chi akwa, nane awa intiruzkasa chi ish,” kizsachi. Sun kiztakas, sun mittîne awa intiruzkasa nukkultîm. 16 Awa kail “na kasukana chi akwa, nane awa intiruzkasa chi ish” kizsachi. Sun kiztakas, sun kailne awa intiruzkasa nukkultîm. 17 Kasune wan awaspain chi. Kasune awa aspainne, chinkas piasachi. Kailne wan awa intiruz chi. Kimpuh wan awa aspainne, chinkas mîasachi. 18 Mane Diosne au awa intiruz sara. Samtuasmin, usne chiwazha awa intiruz wajnin kit us pashit aizpa kira. 19 Wan awa intiruzkin wa aizpa kawarain chi. Maza pajte maza pajtene kajaram waj. 20 Mane, awa intiruz akkwan tuntu pajte wajkas, awa intiruz i. 21 Kasune “chihtî nawa kiwaintuchish” kizsachi. Kîzpukas “mittî nawa kiwaintuchish,” kizsachi. 22 Mazkwa mazkwa sunkana wajne, wan awa intiruz namtu. An we tînta pajte an kwisha wari. 23 Aune mazkwa mazkwara an we tînta mipuspas. Aune an we tînta pajtera an watsal iznamtumakpas. Ampukas pantalón kuhmu, awa ussa piltîm izanamakwa. Ashampakas puiyirakas kuhmu, awa ussa piltîm izanamakwa. 24 Chiwazha awa iztuasmin, awane chihtîrakas matsîhtakas pïnkasa ampalkain, an watsal iztît akwa. Dios awa intiruz sarane, usne au akwa wat minta, chiwazha an we tînta pajte ampalnapa, awa izamanpa, awa mîtsal kiamanpa. Kawarain Diosne aumîza sanara, wanta kiwainanapa. 25 Dios awaruza sarane, usne chiwal wan wa aizpa sara, wan awa sulmin wan kianapa, waya kiamanpa. Awane pailta awa intiruzkana mamaztuza sunmin kiwainñashina. 26 Mazantuz naizakane, wanne naizanazi. Maza an tînta namtane, wanne watsal kulanazi. 27 Une, Diosta piantuzne, Cristowa kwalkanain mai. Aune akkwan makpas, maza awa intiruz namna. 28 Mane Diosne pakaish pakaish naninnara, Diosta piantuz wanmakmukin paiña kal kianapa. An ñancha Diosne înintaruza nanara. An kwizta Dios pit kainammtuza nanara. An kwizta Dios pit kamtamtuza nanara. Suasne watsal kal tînta kimturuza nanara. Suasne mamaztuza wat paninturuza nanara. Suasne mamaztuza kiwainturuza nanara. Suasne wanmakmuruza îninturuza nanara. Suasne mamaz tuntu pit paramturuza nanara. 29 Diosne wanta nanarachi, paiña înintaruza namanapa. Wanne Dios pit kainammturuz chi mai. Wanne Dios pit kamtamturuz chi mai. Wanne watsal kal kimturuz chi mai. 30 Wanne mamaztuza wat paninturuz chi mai. Wanne kawarain mamaz tuntu pit paramturuz chi mai. Wanne mamaz tuntu pit mamaztuza piankamninturuz chi mai. 31 Une an watsal mîlam Dios mîlashimtu aizpa pashiat kit sairawa, paiña kal kianpa. Mane nane u kiashit aizpa kamtananash. U sun kiamtune, an wari.
Mamaztuza pashiarawai
1 Na mamazpa pit parashimtune, ángelpa pitkas parashimtune, mamaztuza pashinamtukine, nane kain awa ish. Na kaiztu aizpa campana aztukanain i. Wat pa chi. Na kaiztu aizpa pîlattura piantukanain i. We tînta aztu. 2 Na Dios pit kainashimtune, na wan awa pian aizpa mîrane, na nîjkultu akwa înkal îzara ñanpa înintane, sunkana mamaztuza pashinamtukine, nane kain awa ish. 3 Wan na mîj aizpa puizaruza kiwainnanapa nailnarakas, nawa inapa mamaz akwa chîhkatkas, mamaztuza pashinamtukine, nane chinkas kana kimtuchish. 4 Mamazta pashimtumikane ussa kwail kimtumikakasa kalpain uzmîztawa. Uskas wat min kit mamazta wat kitpa. Mamaz akkwan mîj akwa, uskasa aliz kulnachi. Mamazta pashimtumikane mamazkin “na mintu aizpa anza wari” kiztuchi. Uskas mamazkin “na kimtu aizpa anza wari” kiztuchi. 5 Wat kimtu akwa, uskas mîtsal kimtuchi. Uskas usmin wat kin saimtuchi. Uskas mamazkasa azain pilchapuznachi. Uskas mamazpa kwail kirît aizpa mintuchi, ussa wat kultît akwa. 6 Mamaz kwail aizpa kiakane, pashimtumikane watsal kultuchi. Mamaz nil aizpa kiakane, usne watsal kultu. 7 Mamaztuza pashimtumikane awara wat kinazi, usmin kwail kimtukas. Uskas pailta payukima nîjkulmîztu. Uskas pailta payukima Diosta tîriztu, ussa kalpain uzninnapa. Uskas mamaztuza pashinamtu, wan tailchankima. 8 Mamaztuza pashimturuzne, pailta payukima pashinanazi. Diospa Sînam Izpul awaruza chiwazha mîlam mîlanarakas, Dios awaruza Dios pit kainana kiwainarakas, mamaz payura awa kainarît aizpa pailtînazi. Mamaz payura wan mamaz tuntu pit paramtu aizpa pailtînazi. Awa wan piankamtît aizpakas pailtînazi. 9 Aune wat pianchimakpas, Dios aumîza wan piankamnintachi akwa. Au Dios pit kainammtukas, aukas sun we pianmakpas. 10 Mamaz payura sun pit mîanapas. Sun payu taizkane, aune au we pian aizpa piankamanapas. Suasne au we pian aizpa pailtînazi. 11 Na pashpa asmin, nane pashpa pit paramtukanain pararau. Nakas pashpa mintukanain mintau. Nakas pashpa piankana piankamtau. Na îlapa parawane, nane pashpakana nîjkultu aizpa chîhkanarau, pashpakana paramanpa. 12 Ma au an sukin uzasmin, aune wan kai iztuchimakpas. Wan wat piankamtuchimakpas. Sunkana maizakasa wan izsachi. Mamaz payura aune Diosta piankam kit paiña matsîhta iznapas. Mane we pianmakpas. Mamaz payura sun pit wan piankamanapas. Aune Dios aumîza piankamtukanain wan piankamanapas. 13 Mane kutña pit mîat kit kiarawa. Une Diosta nîjkulamîztawa. Ukas chiwazha Dios kin namta aizpa tîrizarawa, sapnakima. Ukas mamaztuza pashinarawa. Sun kutña pit mîamtuasmin, maza pitmin an tînta i. Sun pitnemamaztuza pashinarawa.
Sînam Izpulne awaruza mîlam mîlanamtu
1 Uruzne mamaztuza pashinamîztawa. Diospa kal kishimtuasmin, Dios Izpulpa mîlam sayamtuasmin, an ñancha sun Dios pit kainana an saishiarawa. 2 Mazantuzne mamaz pit paramtu. Mamaztuz paiña paramtu aizpa mîasachikane, mamaz tuntu pit paramtumikane Diosta paramtu. Awaruza chi. Dios Izpulne ussa kiwaintu, mamaz tuntu pit paranpa. Mînminkas us kaizta aizpa pianchi. 3 Piru Diosne Dios pit kainammtuza kiwainanazi, mamaztuz sun pit piankam kit an tînta namninnanapa. Uspane Sînam Izpul akwa usparuza kwainashit kit kishininnanazi, tayalamanpa. 4 Mamaz tuntu pit parammikane usmin an tînta namshimtu. Mamaztuza paranamtune, Dios pit kainammikane Diosta piantuza wanmakmuruza kiwainnanazi, Dios kaizta aizpa an tînta piankamanapa. 5 Mazantuz mamaz kamtachi pit parashimtukas, nane Dios pit kainana anza wari mintus, wan awa piankamanapa. Dios pit kainammmikane mamaz kamtachi pit parammikakin an tînta i, Diosta piantuza kamtanamtu akwa. Mînpazha mamaz kamtachi pit paramtune, mînkas sun pit mamaztuza piankamnintukine, usne kain pit paramtu, Diosta piantuza kamtanamtuchi akwa. 6 Ka akwaizna Diosta piantuz, mîzhain. Na uruza izna îtne, na mamaz tuntu pit u pianchi aizpa paranamtune, na kaiztu aizpa uruza kiwainasachi. Kainsîh. Piru na uruza îtne, na u pit paramtune, Dios nawa piankamnintît aizpa uruza kainananash. Na pian aizpa uruza kainananash. Dios kurunamtu aizpa uruza kainananash. Dios kamtanamtu aizpa uruza kainananash. 7 Na uruza kaiztu aizpa piankamtain. Karaskwil usmumikane paiña kanta nil ustawa, awa sun kanta mîanapa. Guitarra pianmumikane paiña kanta nil piantawa, awa sun kanta mîanapa. Karaskwil watsal ustukine, guitarra watsal piantukine, mînminkas sun kanta mîasachi. 8 Awa waya kiana îamtune, katsa iru karaskwil usmumika nil usna pianchine, mînminkas kapal sasachi, waya kin. 9 Sunkana uruza kishina. Awa u kaizta aizpa mîarakine, uspane u kwinta kimtu aizpa piankamasachi. U kaizta aizpa inkwakasain karînazi. 10 Au wan sukin kwisha akkwan awane mamaz pit paraamtu. Awane paiña pitmin paraat kit mîamtu. 11 Mînpazha mamaz pit nawa paramtune, paiña pit mîmtukine, nane mamaz suras awakanain ish. Uskas nawa mamaz suras awakanain i. Au paas sulmin paramtukas, aune mîsachiwailwas. 12 Katmizna, u Dios Izpulpa mîlam sayamtuasmin, anza watsal mîlamtuza sayarawa, Diosta paintuza wanmakmukin kiwainanapa, Diosta an watsal piankamanapa. 13 Katmizna, mamaz tuntu pit parammikane Diosta paikwatpa, us parat aizpa mamaztuza piankamninnanapa. 14 Na mamaz tuntu pitkasa Diosta paikwatne, nane na kaiztu aizpa pianchish. Nane ap izpul Dioskasa paikumtus. 15 Suasne, ¿Chima kinpai? Ap izpulkasa Diosta paikumtuasmin, nane Diosta paikumtu aizpa mîrawa ish, wan awa wat mîanapa. Ap izpulkasa Diosta kanta kiztuasmin, nane Diosta kanta kiztu aizpa wat mîrawa ish, wan awa mîanapa. 16 Nu ap izpulkasa Diosta kwisha wari kiztune, mînpazha nu kaiztu aizpa mîmtukine, sun pit mîmtumikane nu kaiztu aizpa piankamsachi. Usne nukasa Diosta aishtaish kizsachi, us mîrachi akwa. 17 Diosta aishtaish kiztukas, mamaz awa up wat pit kaiztu aizpa mîamtukine, nune mamaztuza Diosta an piankamna kiwainsachi, nu mamaz tuntu pit paramtune. 18 Nane Diosta aishtaish kiztus, na ukin akkwan piji mamaz tuntu pit paramtu akwa. 19 Nane Diosta piantuza wanmakmukin kamtanashimtus, wan awa mîanapa. Na diez mil pit paramtukas, awa sun pit mîamtukine, palichi, kainsîh. Katmizna nane cinco pitkanain na mîmtu aizpa parashinash, wan awa piankamanapa. Anne an wari. 20 Diosta piantuz, ¡mîzhain! Pashpa we piankanain minman. Pashpa kwail we pian akwa, pashpakainain uztain. Îlaparuz an akwan pian akwa, na kamtara aizpa nîjkulat kit an wat minñat kit nil uztain. 21 Diosne înim pînkîhta ka panintît: “Nane mamaz suras awa îninnanash, ap kwaltuza mamaz pitkasa paraanapa. Mamaz tuntu pit paramtuz usparuza kwinta kinamtukas, uspane na kaiztu aizpa mîamanazi.” 22 Katmizna Diosne mamaz awaruza uspa purakin îninnara, Diosta nîjkularachiruza kamtachi pitpara parananapa. Sun akwa Diosne usparuza akwanamtu, mîanapa. Sunkana Diosne paiña kainammtuza paraninnara, Diosta nîjkulturuza uspa kamtît pitpara parananapa. Sun akwa Diosne usparuza kamtanamtu, an piankamanapa. 23 Diosta piantuz mazakwain wanmaktît purane, mamaz tuntu pit awa pianchi aizpa paraamîztune, mamaz tuntu pit pianchimaka mîna akane, nîjkultuchimikakas mîshimtumikakas “uspane nukku paarît” kiznazi. 24 Sunkana wan Dios pit kuruntu aizpa kamtanamtune, wan us kaiztu aizpa mîamtune, nîjkultuchimikakas mîshimtumikakas mîna akane, usne us kwail kirît aizpa nîjkulnazi, Dios pit mîra akwa. Usne uspa kamtamtu aizpa piankam kit usmin iz kit “kwail kiras” kiznazi. 25 Sunkana usne Dios iztakin kwail kirît aizpakas ayukta kwail mintu aizpakas piankamnazi. Suasne usne Diosta wakpuj wain kit Dios ukasa uztu piankamnazi.
Wan watsal kirain
26 Diosta piantuz, mîrain. Nane mamasa sun pitmin uruza piankaminnanash. Wanmakkamtune, mînpazha chiwazha wat kanta kizanazi. Mamaztuzkas chiwazha kamtananazi. Mamaztuzkas Dios ussa piankamninta aizpa kamtananazi. Mamaztuzne mamaz tuntu pit paranazi. Mamaztuzkas mamaztuza sun pit piankamninnazi. Chiwazha kitne, wan kitpa, awa Diosta an wat piankamanapa. 27 Mînpazha mamaz tuntu pit wan pianchi aizpa parashitne, maza mazain parashina, paas awakima kutña awakima. Mamaz tuntu pit paramtuasmin, mamazne us paramtu aizpa wantuza piankamninnarawa. 28 Wanmakmukin mînminkas sun pit piankamninsachikane, wanmakmukin anza wat sun mamaz tuntu pit parananachi. Puñain puratpa. Usne uskasakas Dioskasakas paratpa. 29 Sunkanain mînpazhara Diospa kamtamtune, usne mamaztuza kamtashina, maza mazain paas awakima, kutña awakima kamtaashina. Anpane, makimin uzmikane, us kaizta aizpa min kit usparuza kwinta kinarawa. 30 Mane Dios mamazta paiña pit piankamnintawane, an ñancha Dios pit kainammmikane mamazta paranintawa, mamaz makimin uzmika Dios pit kainanapa. 31 Sunkana wan Dios pit kainammtuzne maza mazain Dios pit kainanarawa, wan wanmakmuruz piankamat kit an tînta namnapa. 32 Dios pit kainashimtumikane tîriztawa, mamaz Dios pit kainammmika wan pailnakima. Dios pit kainammmikane paiña izpulta înintu, chiwazha pit paranpa. 33 Diosne wanmakmuruza kurunamtu, Dios pit kainammtuza masain wan paraamanpa. Usne kalpain namninnashimtu, tînta paraninnarachin. Sunkanain une Diosta piantuz wanmakmuruz kiamtukana kiamîztawa. 34 Diosta piantuz wanmakmukin wanmakkamtune, ashamparuzne puñain mîarawa. Uspane wanmakmukin wan awaruza Dios pit kainanachi. Uspane uspa ampuruza mîarawa. Uspane wanmakmukin awaruza îninnanaman. Diospa înimkin ka parît. 35 Maza ashampa chiwazha piankamshitne, sun ashampane paiña ampura mîmarawa. Ashampa wanmakmukin paratne, usmin mîtsal kimtu. 36 Na kuruntukana mîrain. Dios watsal pitne uruztas puztachi. Umin sun Dios îninta pit mîarachi, mamaz awaruzkas sun pit sappara akwa. 37 Dios pit kainammtuzkas Sînam Izpul mîlam sapturuzkas na paamtu aizpa au Anpat îninta piankamanazi. 38 Mînpazha na kaizta aizpa wat chi kiztane, uruzne sun awara mîaman. 39 Diosta piantuzne sunkana kiarawa. Dios pit kainashiarawa. Mamaz tuntu pit parammikasha paramun kizman. 40 Dios pit paramtuasmin, une wan watsal kiat kit impara impara wan chiwal nil saarawa.
Cristo irîttas kakultu
1 Mane Diosta piantuz, mîzhain. Diosne uruza watsat mîlnara, u Dios watsal pit sappara akwa. Une na kaizta aizpa nîjkulara. Une sun pitmin mîat kit tînta namara. 2 Diosne sun watsal pit akwa uruza kwailtas ukkat kit watsat mîlninnara. Sun pit chîhkat kit maintane, nu nîjkultu aizpa kain i. 3 An ñancha nane na Diostas sapta aizpa uruza piankamninnarau. Nakas Cristo au kwail akwa irît kiz kit kamtanarît ish. Dios pînkîhta sunkana parît. 4 Cristo irawane, awane ussa uk kulta nukkara. Kutña payu marîtta usne irîttas kakulta, mamasa uzna. Mamasa Dios pînkîhta sunkana parît. 5 Kwiztane Jesúsne Pedrora izpanta. Suasne doce înintuza izpanara. 6 Kwiztane usne quinientos awaruza Diosta piantuza masain wan izpannara. Mînpazha quinientos awaras Diosta piantuz me iarîtkas, anparuzne makima uzamtu. 7 Kwiztane usne Santiagora izpanta. Suasne wan înintaruzakas izpannara. 8 Uspa ussa izarawane, minpara usne nawa izpanta. Nane pashpa weas taiztakanain arau. 9 Nane anpa înintaruzkin an we tînta ish. Nane Diosta piantuza, namkulnat kit usparuza kwail kinarau. Na sun kwail kirît akwa, mînminkas nawa paiña îninmika munman. 10 Cristo nawa paiña înintamika namtît akwa, usne paiña kal nawa chîhkara, wan kinpa. Suasne Diospa kal kirau wan pailnakima. Nane anpa înintaruzkin an tînta kal kirau. Na kal kitkas, Diosmin nawa pashit kit wat kiwainta, paiña kal kinpa. 11 Na kal kimtukas, uspa kal kiamtukas, aune maza pitmin wan awaruza kainammtumakpas. Sun Dios pit akwa, une Diosta nîjkulara.
Awa irîttas kakularînazi
12 Mane aune “Dios Cristora irîttas kakulnin kit mamasa uznintît” watcha kainaramakpas. Mînpazha uruztas “awa irîtne, irîttas kakulamanazi,” kaizamtu. Uspa kaizamtu aizpa watcha chi. 13 Mînpazha “awa irîtne, irîttas kakulmanazi,” kiztune, suasne Diosne Cristora irîttas kakulnintachi. 14 Cristo irîttas kakultakine, au watsal pit kainara aizpa kain i. Cristo irîttas kakultakine, u nîjkulamtu aizpa kain i. 15 Suasne au Cristo irîttas kakultachi kaiztatne, aune Diospa pîrail kaizpuspas, Dios Cristora irîttas kakulnintît kiz kit. Irît awa mamasa kakultukine, Diosne Cristora kakulnintachi. 16 Irît awa irîttas mamasa kakultachine, suasne Cristokas mama irît tuashina. 17 Cristo irîttas kakultachiatne, u nîjkulamtu aizpa kain i. Suasne Dios u kwail kiarît aizpa wat kulnarachi. 18 Cristo irîttas kakultakine, suasne Cristora nîjkulamturuzkas ñamin irîttuzkas mama kaarîtmin mai. 19 Au wan sukin uzamtuasmin, aune Cristora nîjkultamakpas, aumîza kiwainnanapa mamaz payura irîttas kakulninnanapa. Us aumîza an sukimin kiwainamtune, aumîza irîttas kakulninnamtukine, aune wan awakin an tayalanapas. 20 Mane, na kaiztu aizpa watcha i. Diosne Cristora irîttas kakulninta. Usne an ñancha irîttas kakultîtmika i. Diosne sun kin namta, kwizta anpa irîttuza kakulninnana. 21 Maza ampu akwa, Adán kwail kirît akwa, wan awane au sukin iamtu. Sunkas mamaz ampu akwa, Cristo irîttas kakulta akwa, usne mamaztuza irîttas kakulninashina. 22 Adán akwa, aune ianapas. Sunkanain Cristora nîjkulturuzne irîttas kakulanazi, mamasa uzna. 23 Diosne sun kin minta. An ñancha Diosne Cristora irîttas kakulninta. Kwiztane, Cristo mamasa akane, Diosne Cristora nîjkulturuza irîttas kakulninnanazi. 24 Suasne minpa payura taiznazi. Wan chiwal kwail îninturuzakas kwail ángeltuzakas pailnintawane, Cristone Taitta Diosta wan us înintu aizpa chîhkanazi. 25 Cristone katsa mikwakana au sukin îninnanazi, wan aliz awaruza anuppananakima. 26 Cristo mamaz payura paiña kal kapal kitpane, ussa piantuza irîttas kakulninnarawane, awane mamasa mizurainkas iamanazi. 27 Diosne wan chiwal Cristora chîhkara, wan îninnapa. Cristo wan înintukas, usne Taitta Diosta înintuchi, paiña Papihshmin Cristora wan chîhkara akwa, wan îninnapa. 28 Diosne wan îninta aizpa paiña painkulta us îninnapa chîhkara. Wan înintawane, Cristone paiña Papihshta us îninta aizpa chîhkanazi. Katmizna Diosmin wan chiwaltakas wan awaruzakas îninnanazi. 29 Mamaz pit mîrain. Mînpazha mamazpa akwa kwazikasa mamasa munnashiamtu, irîttuz munnarachi akwa. ¿Chikishma ka kiamtu? Irît awa irîttas kakulamtukine, ¿Chikishma irîttuz akwa munnamtu? 30 Irît awa irîttas kakultukine, au kal Dios akwa kain i. Awane Dios kal akwa aumîza kwail kiamtu. Au naiztu aizpa kain i, irît awa irîttas kakultukine. 31 Diosta piantuz, mîzhain. Pailta payu ishinas. An watcha pit piankamtain. U Anpatta Jesucristora an wat piankamamîztu akwa, nane u akwa kwisha warish. 32 Efeso pîpulura tuasmin, nane kwisha aliz awa akwa naiztau. Na sun aliztuzkasa waya kitkas, chinkas kana kitchish. Irît awa irîttas kakultukine, nane chinkas kana kitchish. Uruztas awane ka kizamtu, “¡Pishta sawizsan, kumirakas kwan, chappikas kwan! ¡Tîlawa iwiznapas!” ka kizwizsan. 33 Uruzne ñanta kininman, kwail kin. Mînpazha ka kaizta: “Chakulamtumikane kwail izmuruzkasa chamtune, kwail kishinazi.” 34 Nîjkul kit nil aizpa kirain, kwail kiamanpa. Mînpazha uruztas Diosta mama wat piankamarachi. Sunkana kiztus, uruza mîtsal kininnanapa. Irîttuzne, ¿Mizama kakulanasa? 35 Mînpazha ka mîmanazi: “¿Mizama irîttuzne kakulanasa? Paiña ña intiruz ¿mizama iztît ansa?” 36 Nu mîmamtu aizpa tîmpa i, nu pianchi akwa. Pippa wakane, pippa kasune chiktu. Pippa kasu chikkane, mamaz tî kwal chiktu. 37 Pippa wakane, une tî kwal wamtuchi. Une sun chara pippakas mamaz tuntu pippakas waamtu. 38 Diosne wan pippa wa aizpa kajarammin sara. Usne mazantuza maza tuntu sara. Anparuz mamaz tuntu sara. Us kishimtu aizpa sara. 39 Wan awa intiruz kawarain chi. Awawa ñane kalpain ñakana chi. Chitchukas mamaz tuntu ña waj. Pishkarukas mamaz tuntu ña waj. 40 Sunkanain chiyura uztuzne au sura uztuzkin mamaz tuntu izanazi. Chiyura uztuzne mamaz tuntu watsal izanazi. Sunkanain au sura uztuzne mamaz tuntu watsal izanazi. 41 Pãnne palapchakin mamaz tuntu aizmu. Palapchakas mamaz tuntu maltu. Wan kîmakas mamaz tuntu aizamtu. 42 Awa intiruz irîttas kakultawane, awane mamaz tuntu iztît puzanazi. Awa irîkane, pippakanain pîttîm. Awa irîtmika kakultawane, usne mamasa mizurainkas imanazi. 43 Awa irît ña kwail akwa, pilta kamarîmtu. Awa irîttas kakultawane, usne watsal iztît puznazi. Awa irîtmikane pîttîm. Awa kakultîtmikane tînta namtînazi. 44 Awa au sukin irane, ñane pilta kamamin. Awa irîttas kakultawane, Sînam Izpulne paiña ña uznintu. Mamasa imanazi. Paas tuntu ña mai. Au sukin uztuzne paiña ña pilta kamanazi. Piru irîttas kakultumikane Dios Izpul akwa uznazi. 45 Dios pînkîhta ka parît: “Adánne, an ñanchamikane, au sukin uzta. Diosne ussa sat kit uzninta.” Cristone Adánkana chi. Usne paiña Izpul akwa awaruza uzninnamtu. 46 An ñancha Diosne awa sara, au sukin uznapa. Kwiztane Diosne aumîza maizninnat kit chiyura uzninnanazi. 47 Diosne an ñancha uztamikasha au su piltas sara. An ñancha uztamikane au sukin uzta. An kwizta atmikane, Cristone, chiyuras ara. 48 Wan awa au sukin uzamturuzne an ñancha uzmikawa ñakana mîjara, au su piltas sarît akwa. Chiyura îamturuzne mamaz tuntu iztît puranazi. Cristokana iztît purazi. 49 Au sukin uzamtuasmin, aune an ñancha uztamikakanain uzaramakpas. Kwiztane chiyura aune Cristokana iztît namtît puranapas. 50 Diosta piantuz, na kaiznamtu aizpa mîrain. Au sukin uzturuzne chiyura uzturuzkasa uzasachi. Dios înintukin uzasachi, irachi akwa. Awa an sukin uzamtuasmin, Diosne au sukin uztuza chiyura sapnamanazi. 51 Nane uruza an ñamin kamtanarachi aizpa piankamninnanash. Wanne iamanapas. Au wan awane mamaz tuntu izanazi. 52 Aune masain wan maizanapas, kasu pit kit kasu izkultukana. Sun minpa payura awane katsa iru karaskwil usnazi. Katsa iru karaskwil azkane, irîttuzne mamasa uzna kakulanazi, anneme iamtuchi akwa. Sun payu taizka, uzturuzne mamaz tuntu izarînazi. 53 Awa an sukin pailta payukima tailchasachi akwa, awane iarawa. Iarawane, mamaz tuntu izarînazi, mamasa an iamtuchi akwa. 54 Akkin awane iarînazi. Dios awaruza maiznarawane, awane pailta payukima puranazi, iarachin. Sun kitpane, Diosne pînkîhta panintît aizpa ka kirînazi: “An sukin uztuz iamtukas, awane chiyura mizurainkas mamasa iamanazi. Aune wanta anuppaanapas.” 55 “Irawane, aune an naizamanapas. Irawane, aune mamasa iamanapas.” 56 Antikwane Diosne paiña înim pit îninta, awa uspa kwail kiarît aizpa piankamnapa. Uspa kwail akwa, uspane inna ishkuamtu. Dios usparuza naizninnamtu akwa, ishkuamtu. 57 Aune Diosta aishtaish kiztawamakpas. Usne au Anpat Jesucristo akwa aumîza anuppaninamtu, au iamanpa. 58 Katmizna, Diosta piantuz, mîzhain. Na uruza pashinamtu akwa, nil kiamîztawa. Pailta payu Diosta nîjkulamîztawa. Pailta payu au Anpatpa kal kiamîztawa, wan pailnakima. Une au Anpatpa kal kiara. Katmizna usne u kal kiarît aizpa mainmanazi.
Pial saptu aizpa Diosta piantuza mîlanamtu
1 Mane u nawa pînkîh paarît akwa, nane uruza sînkananash, sun pial wantat kit watsanapa, Judea sura uztuza îninnanapa, Diosta piantuza mîlananapa. Nane Galacia sukin nîjkulturuzakas sun kinpa îninarau. Ukas kawarain kiarawa. 2 Wan Diosta nîjkulturuzne chiwazha pial kana kit aizpa paimpa wantarawa. U Domingo aizpa wanmakkamtune, uruzne sun paimpa watsarît pial karatpa, wanmakmukin mîlanana. Sunkana kitne, uruzne na amtu payura sun pial wantaamanazi. 3 Na u purakin akane, nane u narît awaruza Jerusalén pîpulura îninnanash, na pînkîh akwa parît aizpa usparuza mîlanapa, u paimpa pial watsarît aizpa sua chîhkaanapa. 4 Na ukin îshinakane, uspane nakasa îashina.
Pablone mamaz sura îshimtu
5 Na u purakin îmtuasmin, nane Macedonia suwarain pînnash. Macedonia suwarain pîntawane, Corinto pîpulura piannanash. 6 Nane ukasa akkwan payukima, alu palnakima, nukkulshinas. Suasne uruzne nawa kiwainshinamai, kwizta na îmturakima. 7 Corinto pîpulukin piannakane, nane u purakin pînshitchish. Au Anpat nawa îninkane, nane ukasa akkwan payukima nukkulnash. 8 Nane Efeso pîpulukin nukkulnash, Pentacostés pishta payurakima. 9 Sua akkwan awa aliz purakas, Diosne nawa kwisha kiwainnazi, paiña pit kainanapa, akkwan awa an pit mîanapa. 10 Timoteo pianakane, ussa watsal sap kit ukin napnintain, ukasa ishkumanpa. Usne nakanain au Anpatpa kal kimtu. 11 Mînminkas ussa kwail minman. Na tukin kailtîkane, ussa kiwaintain, wat înpa. Nane ussakas mamaz Diosta piantuz îmturuzakas tîriznamtus, piannankima. 12 Nane ap añara Apolosta kwisha paikwarau, Diosta piantuzkasa înpa, uruza izna. Sun payu îmanamtît. Îshinakane, înazi.
Mînpa pit paramtu
13 Izkultain, ñanta kiamanpa. Nîjkulamîztain, kwail kiamanpa. Tînta nil awakanain uztain, wan kwailtuza anuppana. 14 Wan chiwazha kal kiashimtuasmin, wantuza pashinarawa. 15 Mane uruza, Diosta piantuza, paikwanamtus, Estéfanastakas paiña kwaltakas wat minñanapa. Uspane sun Acaya sukin an ñancha Cristora piankamara. Sun kwalne wan Cristora nîjkulturuza iznat kit tînta kiwainñamîztu. 16 Uruzkas sunkana awaruza mîarawa, uspa kurunamtu aizpa kianapa. Mamaz Diospa kal kimturuzakas usparuza kiwainturuzakas mîarawa. 17 Estéfanaskas, Fortunatokas Acaicokas u pîpuluras nawa izna aat akwa, nane watsal ish. U nawa kiwainta chi akwa, uspane nawa kiwainñara. 18 Uspane nawa kiwainshit kit nawa tînta kulninñara, Diosta an pashinpa. Uruzakas kawarain kiara. Uruzne uspa kaizamtu aizpa piankamat kit usparuza wat minñarawa. 19 Wan Asia suras Diosta piantuzne uruza “kakishapu” kizamtu. Aquilakas Priscilakas uspa yalkin wanmakmuruzkas “kakishapu” kizamtu. Uspa au Anpatta pashiamtu akwa, ka uruza kizamtu. 20 Apas wan Diosta pianturuzne uruza “kakishapu” kiznamtu. Wanmakkamtune, wanta pashinat kit “kakishapu” kiztain. 21 Nane Pablo ish. Nakas uruza “kakishapu” kiz kit sun pînkîhta ap chihtîkasa pamtus, na an pînkîh pamtu aizpa u piankamanapa. 22 Au Anpat Jesucristora pashimtuchine, ussa naizninnaka. Nane au Anpatta kaiztus: “¡Chiyuras kailnaka!” 23 Au Anpat Jesústa paikumtus, uruza kwisha wat kiwainanapa. 24 U Jesucristora wanmakkamtu akwa, nane an pit îninnamtus, uruza pashinamtus kiz kit. Pailti.
Kakishapu
1 Nane Pablo mun ish. Diosne nawa nat kit Jesucristowa înintamika namninta. Nane au aña Timoteokasa Diosta piantuza, Corinto pîpulukin puraruza, an pînkîh pat kit îninnamtus. Cristora nîjkulturuzakas, Acaya suwara uzturuzakas, ap pit îninnamtus. 2 Aune au Taitta Diostakas, au Anpat Jesucristorakas, paikumtuas, Dios uruza wat kiwainanapa, kalpain uzanapa.
Pablone naizta
3 Aune au Taitta Diostakas, au Anpat Jesucristorakas, aishtaish kaizna îrîzhain. Au Taittane aumîza kiwainashimtu. Au tayalakane, Diosne aumîza watsal kulninnashina. 4 Au parishiztuasmin, Diosne aumîza watsal kulninnamtu. Dios aumîza watsal kulninnamtu akwa, aune mamaz parishizturuza, kawarain watsal kulninnashimtumakpas. 5 Cristo akkwan parishizta akwa, aukas akkwan parishiznapas. Au parishizkane, Cristone aumîza watsal kulninnanazi. 6 Au parishiztuasmin, Diosne uruza watsal kulninnat kit uruza watsarît mîlnanazi. Dios aumîza watsal kulninnamtu akwa, usne uruzakas watsal kulninnanazi, wan parishizamtu aizpa tînta tailchaanapa. Aukas sunkanain parishiztamakpas. 7 U Diosta nîjkulara akwa, aune u akwa tîrizpuspas, minpa payura Dios uruza watsarît mîlnanakima. U aukanain parishizta akwa, Diosne uruza aukasa watsal kulninnanazi. 8 Diosta piantuz, mîzhain, au parishizara aizpa piankamanapa. Asia suwara pîntuasmin, aune akkwan parishizaiznash. Pailta payu parishizamtuasmin, aune an tailchasachimanash. Aune inapain manash. 9 Awa aumîza piantashiara mintuanash. Au imasarachi akwa, aune aumin watsasachimanash. Suasne aune Diosta aumîza watsat mîlmumikasha, nîjkulanash, irîttuza mamasa kakulninnamtu akwa. 10 Diosne aumîza an ñamin chîhtnara, au iamanpa. Usne aumîza kwizta chîhtnanazi, au iamanpa. Parishizamtuasmin, aune ussa tîriztumakpas, aumîza watcha chîhtnanapa. 11 U au akwa Diosta paikwatne, une aumîza kiwainnashina. Akkwan awa au akwa Diosta paikuamtu akwa, uspane Diosta aishtaish kizanazi, Dios aumîza wat kiwainnamtu akwa.
Pablone maiz kit Corinto pîpulura îtchi
12 Mamaz pit aumîza watsal kulnintu. An sukin uzasmin, aune uruza kaiznara aizpa wat minñat kit Dios iztakin nil uztamakpas. Aune Diosta pianchiruzkana minñamtuchimakpas. Diosne au minñamtu aizpa piankam kit aumîza kiwainnara, us kishit aizpa u akwa kinpa. 13 Uruza pînkîh panamtuasmin, aune maza pitmin paramtumakpas. Une au parat aizpa izat kit piankamashina. Aune Diosta paikumtumakpas, wan uruza parît aizpa piankamanapa. 14 Mazantuz au kimtu aizpa makima piankamasachikas, une mamaz payura au akwa wat minñanazi. Au Anpat Jesús kailkane, aukas u akwa wat minñanapas. 15 U au akwa wat minñamta akwa, nane an ñancha u uzkin îshirau. Sunkana nane paa piji ukasa kwinta kin îshirau, paa piji uruza kiwainnanapa. 16 An ñancha Macedonia sura îamtuasmin, nane u uzkin putna mintau. Suasne Macedonia suras kailna mintau, ukasa mamasa u uzkin kwinta kin. Tas une nawa kiwainshina, Judea sura piannankima. 17 U sura îshimtukas, nane piannamanamish. Uruza maintachish. Nane mamaz awakanain paas pit paramtuchish. Mamaz awa “sun kinash” kiztakas, usne “kimanash” mintu. Na “sun kinash” kaiztane, nane mamaz tuntu mintuchish. 18 Aune Dios watcha i pianmakpas. Diosne au paramtu aizpa pian. Ukasa kwinta kimtuasmin, aune au paramtu aizpa uruza maiztuchimakpas. 19 Uruza kamtanamtuasmin, aune uruza maza pitmin kamtanaramakpas. Aune uruza Dios Painkulpa kainanaramakpas. Silvanokas, Timoteokas, nakas uruza Jesucristowa kamtanaramakpas. Jesucristone mizurainkas maiztachi. Usne maza pit min kit watcha kaizta. 20 Diosne awaruza akkwan kin namta. An ñamin Cristo Dios kin namtît aizpa kirîtkas, Cristone Dios aumîza kin namtu aizpa kimîznazi. Katmizna Diosta paikukane, aune “Dios kwisha wari” kiztumakpas, Cristo watcha kimtu akwa. 21 Diosne uruzakas aumîzakas Cristora wat piankamnapa kiwainnara. Usne aumîza, wan Cristora nîjkulturuza, nanarît, uskasa chaanapa. 22 Mane usne aumîza watsat mîlnara. An ñancha usne paiña Sînam Izpulta au kaijchura îninta, aukasa uznapa, Dios pashimtu aizpa kianapa. Kwiztane paiña Sînam Izpul akwa, usne aumîza kin namtarît aizpa mîlananazi. 23 Nawa mîzhain. U akwa Diosta paikumtus, na uruza kaiztu aizpa mîanapa. Na uruza pîrail kaiztane, Diosne nawa piantashina. Nane Corinto pîpulura mamasa kailtachish, na uruza aliz kulnamanpa. 24 Aune Cristora piantuza miza uzna îninshitchimakpas, u Cristora me nîjkulamtu akwa. Aune ukasa kal kimtumakpas, nil uzanapa, watsal kulanapa. Me une Cristora piankamat kit tînta nîjkulamtu.
1 Katmizna nane u uzkin mamasa îshitchish. Na u uzkin îratne, nane ap pitkasa uruza mamasa tayalninnashinash. 2 Na uruza tayalnintane, ¿mînmika nawa wat kulninnazi? Na uruza tayalanintane, mînminkas nawa wat kulninsachi, uruzmin nawa wat kulninashimtu akwa. 3 Katmizna na îtchi akwa, nane uruza an ñancha pînkîh panarau, u nawa tayalninamanpa. Nane uruza pilchapuznarachish. Na uruza izna îkane, une tayaltu uzman, nawa tayalninñamanpa. Tayaltu uzamtukine, une nawa wat kulninnazi. Nane uruza wat pianish. Aune sulmin wat kulanapas. 4 Uruza sun an ñancha pînkîh pamtuasmin, nane ap kaijchukin kwail maz kit kwisha tayaltau, tînta aznakima. An pînkîh parakas, nane uruza tayalninnashitchish. Ap pit îninnarau, na uruza kwisha pashinamtus piankamanapa.
Pablone kwail kitmikasha wat kultu
5 Watcha, sun uruzkis kwail kitmikane nawa pitchin tayalninta. Nawa pitchin tayalnintakas, usne uruza kwisha tayalninnara. Ussa mamaz sam pit parashitchish. 6 Akkwanne sun kwail kitmikasha tînta kurunta, naiznapa, kwail kiman piankamnapa. Minpa. Anne ussa sunkana kiman. Usne kamtît. 7 Mane une ussa wat kulnin kit kiwaintawa, tayalmanpa, wat kulnapa. Mamasa ussa saptain, kwail kitmika kwisha tayalmanpa, Anpat Jesústa kwaimanpa. 8 Katmizna nane uruza paikwanamtus, ussa pashianapa, mamasa ussa sappaanapa, ukasa Diosta wakpuj wainñapa. 9 Sun akwa, nane uruza an ñancha pînkîh panat kit kurunnarau, kwail kitmikasha naizninnapa, paiña kwail kirît aizpa chîhkanpa. Watcha, une wan chiwal na îninta aizpa mîara. 10 U sun kwail kitmikasha wat kulninnara akwa, nakas ussa wat kultus. Nane Cristo iztakin watcha ussa u akwa wat kulnintau, u wan kwail mainñat kit wat kulaanapa. 11 Aune an kwail kirîtmikasha wat kulnintawamakpas, Satanás ussa mamasa pizmanpa, ussa an kwail kininmanpa. Satanás sun kitne, usne Diosta piantuza anuppananazi. Usne Dios pit au kaijchuras ukkatshimtu, awa Diospa izmuruz namamanpa.
Pablone Troas pîpulura îrît
12 Nane Troas pîpulura puraruza îrau, Dios watsal pit kainana, Cristowa kamtana. Sua au Anpatne nawa paiña kal kin kiwainta, awaruza Dios pit kainanapa. 13 Troas pîpulura pianatpane, nane au aña Titora Troas pîpulura wanmaltachish. Ussa sairachi akwa, nane us akwa kwaizkultachish. Suasne usparuza “îru” kiznarawane, nane akki Macedonia sura arau.
Pablone Diosta aishtaish kiztu
14 Nane Diosta aishtaish kiztus, us aumîza Dios pit kainana kiwainta akwa, awa mîanapa. Dios pitne incienso paktîtkana i. Sunkanane Dios pit awa uzkin îmtu. Dios pit mîarawane, awane Cristora kanpaashina. Tas Cristora kanpamtuzne wan awaruza Cristowa kamtanamtu, ussa piankamanapa. Sunkana Cristone aumîza kiwainamtu, wan kwailta anuppanakima. 15 Aune, Dios pit kainammturuzne, Dios pashit aizpa kiamtumakpas, awa Cristora piankamanapa. Incienso paktawane, piam, awa piaanapa. Aune, Dios pit kainammtuzne, inciensokana makpas. Nane Dios pit awaruza kainanamtu, wan mîanapa. Mîarawane, mazantuzne nîjkulamtu, Dios usparuza watsat mîlnanapa. Dios pit mîmtuchiruzne ïnta îat kit wan kaarînazi. 16 Dios watsal pit mîmtuchiruzne chiyura îamanazi. Dios watsal pit mîmturuzne chiyura uzanazi, Dios usparuza watsarît mîlnamtu akwa. ¿Mînminkas Dios pit awaruza kamtanashina? Dios aumîza akwanara akwa, aune Dios pit kamtashinamakpas. 17 Akkwan awane sun pit kamtaamtu, kwazpa kulana. Dios pit kainammtuasmin, aune sun pit maiztuchimakpas. Sun pit kamtamtuchimakpas, kwazpa awa kulana. Aune Diosta pianmakpas. Dios aumîza îninnamtu akwa, aune Dios iztakin uruza paiña pit kainanamtumakpas. Cristo aumîza ussa wanmakninnamtu akwa, aune tînta kal kiat kit watcha paramtumakpas.
Pablone Diospa înintamika i
1 Dios pit paramtuasmin, nane awaruza “mamazkin na kimtu aizpa an warish” kiztuchish. Mamaztuzne pînkîh parît aizpa mîlamtu, u usparuza sappanapa. Mînpazha an pînkîh parît aizpa mîlturuzne “wat awa mai” kizamtu. ¿Mamazpa pînkîh parît aizpa uruza Pablo Dios pit kamtammika kiz mîltawasa? Mamazpa pînkîh mîltane, nane sun pînkîhkasa mamazkin an wat awachish. U pînkîh parît aizpa mamaztuza mîlmanash. U pînkîh nakasa înintane, mamaztuzne nawa an wat sappamanazi. 2 Aune u akwa au kaijchukin mintumakpas. Nane uruza Dios pit kamtanarau. Sun pit mîarawane, une maizat kit Cristora nîjkulat kit us kaizta aizpa kiara. U Cristora kanpamtu akwa, wan awakas u miza tuntu uzamtu izamtu. 3 Cristone uruza wat awa namninnara. Na uruza Dios pit kamtanarawane, une Cristora piankamtîttuz namarît. An ñamin Diosne awaruza pînkîhta uktakas pînkîh pamkasa panara, awa Diosta mîanapa. Mane Dios Sînam Izpulne u kaijchura maizninnara, wan awa Cristo u akwa kirît aizpa piankamanapa. 4 Dios nawa akwanara akwa, Cristo nawa paiña kal kinpa chîhkarît akwa, nane Dios iztakin wat kul kit u akwa wat paramtus. 5 Diospa kal saptakas, nane paiña kal kin we pianish. Diosmin nawa paiña kal kin kiwaintu. 6 Usmin nawa kiwain kit paiña kainammmika namta, sun masas pit awaruza kainana, awaruza watsat mîlnanapa. Dios sun masas pit înintuasmin, usne paiña Sînam Izpulta îninta, awa paiña kaijchukin sun pit piankamanapa, awa Dios pashit aizpa mîanapa. An ñamin Diosne Moisésta pînkîhta panapa îninta, awa pînkîhta parît aizpa piankamanapa. Awa us pînkîhta parît aizpa mîarachi akwa, uspane Dios uzkin nuasachi. Dios Sînam Izpul akwa, awane uskasa uzanazi. 7 Moisésne ukta Dios îninta aizpa pînkîh pamkasa para. Sinaí înkalkis ukkasa kihshtawane, Moiséspa matsîh naztam aizta, Dios pit sap kit Dioskasa tuat akwa. Naztam aizta aizpa kwirîmtuasmin, Israel awaruzne ussa izashitchi. Dioskis puzta akwa, paiña matsîh aiztît; impara imparain kwirît. Dios paiña pit Moisésta înintakas, awane mîashitchi. Sun akwa uspane iat kit Dios uzkin nuasachi. 8 Mane Dios Izpulpa masas pitne awaruza Dioskasa pailta payukima uzninnamtu. Moisés îninta aizpa pîntîtkas, Dios Izpulpa masas pitne pailta payukima aukasa nukkultu. 9 Moiséspa matsîh naztam aiztakas, us parît aizpa awaruza uspa kwail kiarît aizpa piankamninnara. Mane Dios masas pit înintu aizpa anza wari, an pit aumîza au kwail kiarît aizpa wat kulninnamtu akwa. 10 Moisés îninta aizpa awa iztakin watsal iztît. Dios Izpulpa masas pitne Moisés îninta aizpakin anza watsal i. 11 Moisés îninta aizpa watsal iztîtkas, sun îninta aizpa pînat kit nukkularachi. Izpulpa masas pitne anza watsal izat kit pailta payukima nîjkulanazi, pailtuchi akwa. 12 Katmizna nane Diosta tîriztus, Dios uruza kin namtît aizpa kinpa. Sun akwa nane sun masas pit uruza tînta kainanamtus, wan awa sun pit piankamanapa. 13 Moiséspa matsîh naztam aizta, Dioskasa tuat akwa. Sun aizmu kwinamtuasmin, usne paiña matsîh palta, Israel awaruz ussa izamanpa. Nane ap kamtamtu aizpa puintuchish, wan awa wat mîanapa. 14 Moisés pînkîhta parît aizpa izarawane, Israel awaruzne an ñancha pînkîh parît aizpa mîarachi. Makima sun pit izamtuasmin, uspane kîzpurakas kaijchurakas nîjkulasachi. Jesucristora nîjkulturuzmin, Moisés parît aizpa mîashina, Cristo usparuza piankamninnamtu akwa. 15 Makima Moisés parît aizpa izarawane, Israel awaruzne an pit uspa kaijchukin nîjkulasachi. Uspa mîamtukas, uspane Cristowa mîasachi. 16 Au Anpatta kailtumikane, an Jesucristora nîjkultumikane, Moisés parît aizpa piankamshina. 17 Au Anpatne Sînam Izpul i. Sun Izpulne Jesucristora piankammikasha kwailtas puznintu, Jesucristokasa nil uznapa. Paiña Izpulne Moisés îninta aizpa aumîza piankamninamtu. 18 Cristora nîjkulamtu akwa, aune paiña pit kwisha wat piankamtumakpas. Au Anpatta piankamamtu akwa, au awa iztukin nil uzamtu akwa, mazantuzne ussa piankamashina. An sura uzamtuasmin, aune ussa mîat kit impara imparain uskanain namtumakpas. Paiña Sînam Izpulne pailta payu aumîza maizninnamtu, au Anpatkana namanapa.
1 Diosne nawa narît, paiña kal kinpa, paiña masas pit kainanapa. Us nawa wat kiwaintu akwa, nane paiña kal chîhkatchin kishimtus. 2 Nane chiwazha puintît kwail aizpa chîhkarau. Kwail kimtumikane mîtsal mîj. An sura uztuasmin, nane mamaztuza ñanta kinamtuchish, usparuza anuppana. Nane Dios watsal pit maiztuchish, awa Dios pit mîanapa. Dios pit paramtuasmin, nane watcha kaiztus, wan awa sun pit nîjkulanapa, wan awa na kaizta aizpa wari piankamanapa. Nane chiwazha kimtu aizpa Dios iztakin kimtus. 3 Na wantuza Dios masas pit kamtanamtukas, mazantuzne mîamanazi. Sun pit mîshimtuchiruzne ïnta wan kaarînazi. 4 Diablo an suwara chamtuasmin, usne Cristora nîjkultuchiruza mîninnamtuchi, Dios watsal pit piankamamanpa. Dios watsal pit piankamtukine, au watsal Cristora nîjkulasachi. Cristo akwa awane Dios mînma i piankamashina. 5 Sun pit uruza paranamtuasmin, nane paramtuchish, awa na akwa wat minñanapa. Nane uruza paranamtus, Jesucristora piankamanapa. Anpat Jesucristo nawa paiña kiwainmika namtît akwa, nane uruza kiwainnanash. 6 Ñamin Dios au su samtuasmin, ka kaizta: “Tîlkwilkin kai malninnash” kizta. Sun Diosmin paiña watsal pit aumîza Cristo akwa îninta, sun watsal pit mîanapa, an katsa Diosta piankamanapa. Mane au kaijchukasa Cristora min kit nîjlultumakpas.
Nîjkulat kit uzamtu
7 Diosne paiña pit nawa chîhkat kit paiña pit kainanapa kiwainta. Dios pitne mamaz pitkin anza wari. Na tînta chi akwa, nane Dios pit kainana we pianish. Katmizna Dios nawa tînta kiwaintu piankamtain. Dios nawa kiwaintu akwa, tînta namnintît akwa, nane Dios pit uruza annamtus. 8 Awa nawa parishiznintukas, uspane nawa anuppaasachi. Masetne na chi kin pianchikas, nane wan tailchamtus, Dios nawa chîhkamtuchi akwa. 9 Awa nawa kwail kiamtukas, Diosne mizurainkas nawa chîhkamanazi. Awa nawa aim kiamtukas, nane imtuchish. 10 Jesús au sura uztuasmin, usne pailta payu naizta, inakima. Na akkwan piji parishiztuasmin, nane Jesúskana ishinas. Na makima uztu akwa, Dios nawa pailta payu kiwaintu akwa, awane Jesús uztu piankamashina. 11 Na an sukin uztuasmin, awane nawa piantashimtu, na Jesústa kanpamtu akwa. Awa nawa piantasachi akwa, Jesús nawa kiwaintu akwa, uspane makima Jesús uztu piankamanazi. 12 Awa nawa ininñashimtukas, nawa naizninñashimtukas, Cristone uruza Dioskasa uzninnanazi. 13 Ñamin mazane Dios pînkîhta pat kit ka kaizta: “Nane Diosta nîjkultau. Katmizna nane awaruza paiña pit paranarau.” Nakas uskana ka kaiztus: Diosta nîjkultu akwa, nakas Dios watsal pit awaruza kainanamtus. 14 Nane Dios au Anpat Jesústa irîttas kakulninta pianish. Katmizna Diosne aumîza irîttas uskanain uskasa uzna kakulninnanazi, au Jesústa pian akwa. Suasne usne nakas ukas us uzkin mîlnanazi. 15 Nane u akwa tînta parishiztau, an akkwan awa sun pit piankamanapa, Dios uruza wat kinanapa. Dios uruza wat kitpane, Diosne akkwan awaruza panashit kit watsat mîlnanazi. Suasne an akkwan awane pailta payukima “Dios kwisha wari” kizanazi. 16 Katmizna paiña kal chîhkatchin kishimtus. Nane pailta payu an îlapa pattaru. Îlapa parîmtukas, nane pailta payukima an tînta namtu, Diosta an nîjkultu akwa. 17 An sukin tînta parishiztuasmin, nane pailta payukima parishizmanash. Sun pailtînazi. Na parishiztukas, Diosne nawa kwisha wat kit kit uskasa pailta payurakima uzninnazi. Tane kwisha wat puranapas. 18 Na an sukin parishiztuasmin, nane chiwazha iztu aizpa saimtuchish. Wan iztu aizpa pailtînazi. An sukin uzamtuasmin, aune iztuchi aizpa minñarawamakpas. Aune chiyura Dios mîj aizpa izsachimakpas. Tane usne aumîza wat kinazi pailta payurakima.
1 Nane an sukin au iarînapas pianish, awa intiruz pailta payukima uzsachi akwa. Sunkana Diosne aumîza mamaz tuntu maiznazi, pailta payukima chiyura uskasa uzanapa. 2 Katmizna an sukin uzamtuasmin, aune tînta pihshtamtumakpas, au naizamtu akwa. Apa uzamtuasmin, aune au masas yalta chiyura napshianapas. 3 Suane Diosne aumîza masas namanazi, au izpul ta uzanapa. 4 An sukin uztuasmin, aune tînta pihshtamtumakpas, au naizamtu akwa. Au ishimtuchikas, aune tîriztumakpas, Dios aumîza masas namanakima. Aumîza maiztawane, Diosne aumîza chiwazha mîlananazi, chiyura pailta payukima uzanapa. Suane mizurainkas iasachimakpas. 5 Diosne wan watsarît mîj, au chiyura uzanapa. Uskas paiña Sînam Izpulta îninta, aumîza maiznanapa. Paiña Izpul aukasa uztu akwa, Diosne aumîza masas maiznanazi. 6 Na Diosta nîjkultu akwa, katmizna nane mizurainkas na tîriztu aizpa chîhkamtuchish. An sukin ap awakanain uztuasmin, nane au Anpat Jesúskasa paiña uzmukin uzsachish. 7 An sukin chamtuasmin, nane Jesústa nîjkultus. Jesústa iztuchikas, ussa pianish. 8 Katmizna, na Cristora nîjkultu akwa, nane na tîriztu aizpa chîhkamtuchish. Nane inapain ish, au Anpatkasa paiña uzmukin tuan. 9 Katmizna na an sukin uztune, nane au Anpat înintu aizpa kishimtus. Na imtune, us uzkin îmtune, nakas us pashimtu aizpa kinash. 10 An sukin chaamtuasmin, aune masetne kwailkas watkas kimtumakpas. Au kiarît aizpa akwa, aune chiyura Cristo uzkin kunanapas. Sua Cristone wantuza uspa kiarît aizpa kainanazi. Uspa kal kiarît akwa, kawarain sappanazi. Sua Cristone wat kirîttuzakas kwail kirîttuzakas uspa kana kiarît aizpa tananazi.
Cristone aliztuza maiznashimtu, paiña izmuruz namanapa
11 Na anpat kimtu aizpa pian akwa, nane Anpat Jesústa ishkwatpa ish, us iztakin nil uzna. Katmizna nane awaruza kurunamtus, maizanapa, Dios watsal pit mîanapa. Dios au minñamtu aizpa wat pian akwa, nane uruza tîriznamtus, na nil uztu piankamanapa, nawa wat minñanapa. 12 Ukasa an pit paramtuasmin, nane mamazkin anza warish kaiztuchish. Nane sun uruza kaiznamtus, u na akwa wat minñanapa. Mînpazha kamtamturuzne Iglesiakin mamazkin an wat awa makpas kizamtu. Sun kizturuzne usparuzpain wat minñamtu. Uspane wan chiwal kiamtu, awa uspa kiamtu aizpa izanapa. Mînminkas uspa kaijchukin mintu aizpa izasachi. Nane uruza wat paranamtus, u uspa iztakin nawa pakpaanapa. 13 Mînpazha kamtamtuz na nukku parît kizamtukas, nane Dios akwa tînta kal kimtus. Mînpazha nawa nîjkultu kiztane, nane u akwa kal kishimtus. 14 Cristo nawa pashimtu akwa, nane us înintu aizpa kishimtus, mamaztuza kiwainanapa. Cristo wan awa akwa irît akwa, aune Cristo au akwa irît pianmakpas. 15 Cristo wan awa akwa irît akwa, au nîjkulturuzne, an sura uzturuzne, an sukin Cristo uztakanain uztawamakpas. Aune au kiashimtu aizpa kitchiwamakpas. Cristo au akwa irît akwa, au akwa irîttas kakulta akwa, aune us akwa uztawamakpas. 16 Katmizna makis na Cristora piankamtakima, nane apas kamtamtuz minñamtukanain mintuchish. Cristo au sukin chasmin, nane Cristo apas awakanain azi mintau. Sun payuin ussa wat pianchiarau. Cristora nîjkultawane, nane Cristora wat piankamtau. 17 Sunkana Cristora wanmaktîtmikane ussa nîjkul kit mamaz tuntu uztu. Dios ussa maiztît akwa, Diosne ussa masas awakanain namnintît. Usne paiña kwail kirît aizpa chîhkamtu, Cristo pashimtu aizpa kin. 18 Diosne awaruza maizninnashina, mamaz tuntu uzanapa. Cristo au kwail akwa irît akwa, Diosne aumîza paiña izmuruz namninnara. Suasne Diosne aumîza sun kal chîhkanara, awaruza sun pit kainanapa, awa Dios izmuruz namanapa. 19 Sun uruza piankamninnashimtus. Cristo irît akwa, Diosne wan awaruza paikwanamtu, uspa kwail kiarît aizpa wat kulnanapa, paiña izmuruz namanapa. Suasne Diosne aumîza sun kal chîhkanara, awaruza sun pit kainanapa, awa Diospa izmuruz namanapa. 20 Cristone nawa paiña pit kainammmika namninta. Na sun pit paramtuasmin, Diosne ussa pianchiruza akwanamtu, sun pit mîanapa. Cristone uruza maiznashimtu, u Dios izmuruz namanapa. Nane Diosta paikumtus, u ap pit mîanapa, u Diospa izmuruz namanapa. 21 An sura chasmin, Cristone chinkas kwail kitchi. Cristo kwail kitchikas, Diosne Cristora au kwail kiarît akwa naizninta. Cristo irît akwa, Diosne au kwail kiarît aizpa wat kulnashina, Dios iztakin nil uzanapa.
1 Na Diospa kal kimtu akwa, nane uruza paikwanamtus, Dios uruza pashinamtu mainñamanpa. Uskas uruza kwisha kiwainara. 2 Sunkana Dios kaiz kit paiña pînkîhta ka panintît: “Nane wat payura at kit u paikuamtu aizpa mîrau. Nane wat payura uruza kiwainnarau, uruza watsarît mîlnanpa.” Mîzha. Mane Diosne awaruza wat kiwainashimtu. Mane Diosne awaruza watsarît mîlnashimtu. 3 An sukin uztuasmin, nane nil uzshimtus, ap kal wat puznapa. Nane mînpazha na kimtu aizpa kwail i kaiznapa pashitchish, mînminkas Dios watsal pit kwayamanpa. 4 Sunkana nane, Diospa kiwainmikane, u iztakin nil uztau, paiña pit kainammtuasmin. ¡Sunkana nîjkultain! Nane awa nawa parishiznintu aizpa tailchamtus. Masetne na pashimtu aizpa we mîjash. Masetne awane nawa kajchira sîppamtu, na puzmanpa. 5 Masetne awane nawa iyamtu. Masetne awane nawa kajchira sîpnintu. Masetne awane nakin wanmakkamtu, nawa kwail kiana. Tînta kal kimtuasmin, tînta kwaiztu. Masetne nane akkwan payukima pittuchish, ap kal akwa. Masetne yak kimtus, kumira mîjchi akwa. 6 Mane nane na miza uztus uruza kaiznamtus, na Diospa kal kimtu piankamanapa. Nane sînam awakana uztus. Diospa watcha pianish. Awa nawa kwail kimtu aizpa tailchamtus, aliz kultachin. Mamaztuza wat kinamtus. Dios Sînam Izpulne nawa kiwaintu. Nane watcha wan awaruza panashimtus. 7 Uruza watcha kamtanamtus. Diosne nawa tînta kiwaintu, paiña kal kinpa. Dios nawa maiztît akwa, usne nawa nil namninta, wat kinpa, aliztuza anuppanapa. 8 Masetne mazantuz nawa wat minñamtukas, mînpazhane nawa wat minñamtchi. Na îrîkane, masetne mazantuzne nawa kwail pit parara. Masetne mînpazhane nawa kwail pit paramtuchi. Na watcha kaiztukas, mazantuzne na pîrail kaiztu kizamtu. 9 Mazantuz kamtamtuz nawa piankas, uspane nawa kainsîh awa i kizamtu. Apane nawa wat awa kizamtu. Mazantuz nawa piantashimtukas, nane uzmîztus. Mazantuz nawa palishiznintukas, uspane nawa piantasachi. 10 Masetne tayaltukas, nane pailta payu watsal kultus. Na puizakana uztukas, nane akkwantuza Dios watsal pit kainanamtus, usparuza Diospa kwal namninnanapa. An sura chinkas mîjchikas, na Diosta pian akwa, nane Diosta pianchiruzkin an akkwan mîj ish. 11 Corinto pîpulura uztuz, Cristora nîjkulturuz, mîzhain. Na uruza kwisha pashinamtu akwa, nane uruza wan chiwal ap kaijchukin mintu aizpa paranamtus, wan piankamanapa. 12 Na uruza kwisha pashinamtukas, uruzne u kaijchukin nawa pashiarachi. Une nawa wat sapparachi. 13 Mane nane, u papihshkana, uruza ap pashparuzakanain paikwanamtus, na uruza pashinamtukanain nawa pashianapa.
Une Cristora nîjkultuchiruzkasa wanmakkasachi
14 An sura uzamtuasmin, une Cristora nîjkultuchiruzkasa paiña dios tîkasa sarîtta wakpuj wainman. Cristora nîjkultumikane Cristora nîjkultuchimikakasa kasara kiman. Sun kiasachi. Cristora nîjkulturuzne Dios pit mîat kit nil kiat kit nil uzamtu. Cristora nîjkultuchiruzne sun pit mîashitchi, uspa kwail kiashimtu akwa. Wat kimturuzkas kwail kimturuzkas pareju nîjkulasachi, Diosta piantuz wat kiashimtu akwa. Anparuzne kwail kianazi. 15 Cristokas Diablokas mizurainkas nîjkulsachi. Cristora nîjkultumikakas Cristora nîjkultuchimikakas usparuzpain nîjkulasachi. 16 Diosta wakpuj wainturuzkas Diosta wakpuj waintuchiruzkas usparuzpain wat nîjkulasachi. Aune Diospa yalkana makpas, sua Dios aukasa uztu akwa. Ñamin Diosne sunkana pînkîhta panin kit kaizta: “Nane uspa kaijchukin uznash, uspakasa chan. Nane uspa Dios ish. Nane usparuza ap kwal namninnanash.” 17 Katmizna Anpatne ma pitchin ka kaizta: “Wan kwail kimturuzkasa wanmakman, uspa kwail kiamanpa. Nane kwail kin chîhkamturuza sapnanash, nakasa uzanapa. 18 Suasne nane u Papihsh namnash. Nane uruza ap pashparuzkasa namninnanash. Sunkana tînta Diosne, wantuza îninmikane, ka kiznara.”
1 Na uruza pashinamtu akwa, mîzhain. Aune Dios aumîza kin namtît aizpa mîjmakpas, wan kwail anuppanapa. Katmizna wan kwail pura aizpa chîhkazhain. Au kwail kiamtu aizpa kihaninchain. Kaijchukin au kwail minñamtu aizpa kihaninchain. Au Diosta ishkwatpamakpas, pailta payurakima us pashimtu aizpa kianapa, sînam awakana uzanapa.
Pablone watsal kultu
2 Mîzhain. U aumîza pashinamtune, aumîza sapchain. Aune mînainkas chinkas kwail kitchimakpas. Aune mînainkas maizninnarachimakpas, usparuza kwail kianapa. Aune mînainkas ñanta kitchimakpas. 3 Sun pit uruza kaiznamtuasmin, nane uruza aliz kulninnamtuchish. Sunkana minman. Nane an ñancha kaizta aizpa mamasa kaiztus: Uruza pashinamtus. Na an sura uztuasmin, nane uruza pashinanash. U iamtukas, nakas uruza pashinanash. 4 Na uruza wat pian akwa, nane uruza ap izmuruza, kwinta kinamtus. U na uruza kaiznamtu aizpa mîarît akwa, nane u akwa wat minñamtus. Une nawa wat kulninñamtus. Na parishiztukas, mane nane pailta payu wat kultus, na u nil uzamtu pian akwa. 5 Akki Macedonia sura pianatpane, nane kalpain uztachish, awa nakasa waya kishiara akwa, awa nawa pilchapuzara akwa. Nane ap kaijchukin ishkwarau, awa na kamtarît aizpa chîhkashiara akwa. 6 Awa nawa anuppashiarakas, sun urain Diosne nawa wat kulninta, Tito au purakin pianat akwa. Diosne parishizturuzakas tayalturuzakas kiwainashina, wat puranpa. 7 Watcha. Tito kailtawane, nane wat kultau. Ukas Tito uruza kuruntît aizpa mîara akwa, usne kwisha wat kulta. U nawa izshiamtu kizta. U tayalamtu kizta, u nawa wat mîarachi akwa. Mane u nawa pakparît kizta. U paiña pit mîarît akwa, nane an wat kultus. 8 Na an pînkîh parît aizpa uruza tayalninnarakas, nane sun pînkîh akwa na mintu aizpa maizshitchish. U akkwan payuchinkima tayaltuasmin, nakas u akwa pitchin tayaltau. Na uruza tayalnintakas, 9 mane kwisha wat kultus. Nane wat kultuchish, u tayaltît akwa. Tayaltawane, umin maizat kit u kwail kiarît aizpa chîhkashira, Diosta kaiyashimtu akwa. Na an pînkîhta uruza îninnarîtkas, une Diosta kiakpîntachi. Sun akwa wat kultus. 10 Diosne awaruza tayalninnamtu, awa maizanapa, uspa kwail kiarît aizpa chîhkaanapa, Dios usparuza watsarît mîlnanapa. Kwail kirît aizpa chîhkamtumikane mizurainkas kwailkin mimanazi, Dios paiña izpul watsat mîj akwa. Diosta piankamshimtuchiruz uspa kwail akwa tayalamtukas, uspane uspa kwail kiamtu aizpa chîhkashiamtuchi. Sun akwa Diosne usparuza watsarît mîlnamanazi. 11 Iztain. Maza u uzkin kwail kit akwa, nane an pînkîh pat kit uruza îninnarau. Suasne Diosne uruza paiña kwail akwa azain tayalninnara. Katmizna une ussa kurunara, paiña kwail chîhkanpa. Watcha, une na iztakin nil kiarît. Watcha, une paiña kwail akwa aliz kularît. Watcha, ishkuamtu akwa, une wan maizshiara. Watcha, une na kailnapa pashiara. Watcha, na amtuchasmin, une wan kapal kishiara. Watcha, une sun kwail kitmikasha naizninñara. Une u kiarît aizpa nawa anara. Katmizna nane u sun kwail kitmikakasa nîjkularachi pianish. 12 Sunkana sun pînkîh pat kit uruza îninnarakas, nane kwail kitmikawa mintachish, ussa ilnapa. Nane kwail sapmumikawa mintachish. Nane Dios iztakin an pînkîh uruza panarau, wan awa na uruza înintît aizpa piankamanapa. Suasne une nawa mîamtu annanazi. 13 U sun pînkîh parît aizpa mîara akwa, une nawa wat kulninñara. Mane nane an wat kultît ish, u Titora an wat kulninñara akwa. Usne paiña kaijchura u akwa wat mintu, u paiña ishkumtu aizpa kanintît akwa. 14 Tito u uzkin îtchasmin, nane Titora u akwa wat pararau. Nane uruzta wat mintus, ap pit îninta aizpa mîara akwa. Nane uruza mîtsal kimtu chish. Ukasa uztuasmin, nane uruza watcha kaiznarau. Mane wat kultus, u na kaizta aizpa mîat kit wan kiarît akwa. 15 Mane Titone uruza an pashinamtu, u paiña pit kurunara aizpa mîarît akwa. Tito ukin pianatchasmin, une ishkuat kit tîrizara. Suasne une us pashit aizpa kiat kit ussa wat sappara. 16 Mane nane u akwa wat mintus. U wan kiarît akwa, nane u akwa wat kulshinas.
Macedonia sura uzturuzne pial sappamtu, puizaruza mîlanana
1 Diosta piantuz, mîzhain. Nane uruza kwinta kinamtus, Macedonia sura uztuz kiamtu aizpa piankamanapa. Diosne usparuza wat kiwainamtu. 2 Kwisha parishizamtukas, uspane wan kwail tailchat kit kwisha wat kulamtu. Kwisha puiza paarîtkas, uspane kwazpa awakanain mamaztuza akkwan pial mîlanashiara. 3 Na kaiztu aizpa watcha i. Uspa mîj aizpa pianish. Uspane chiwazha mîj aizpa mîlanara. Suasne uspain an akkwan kain mîlashiara. 4 Uspane nawa akkwan piji paikuara, uspa mîlarît aizpa sapnapa, Diosta piantuza Judea sukin mîlnanapa, usparuza an pialkasa kiwainnanapa. 5 Nane uspa sunpawa pial mîlarît aizpa tîriztachish. Sun pial mîlatchasmin, Macedonia sura uzturuzne an ñancha au Anpatta chîhkanara, ussa an wat piankamanapa, us îninta aizpa kianapa. Dios pashit aizpa kiashit akwa, an kwiztane uspane aumîza kiwainna namara, Dios pit kainana. 6 Tito nakin kailtachasmin, usne uruza sun pial wantawainara. U ñamin an pial sappamîzta akwa, nane Titora paikwarau, uruza kiwainanapa, wan pial puiza akwa sappanakima. 7 Mane une wan chiwal mîj mai, tiznakima. Une Diosta tînta nîjkulamtu. Ukas kamtampa pian, Dios pit wat mîara akwa. Une mamazkin an watcha pit piankamamtu. Une us kal wat kiamtu. Une Diostakas awaruzakas kiwainashimtu. Ukas nawa wat pashiamtu. Katmizna une pial wantarawa, Cristora piantuza kwisha kiwainanapa. 8 Nane uruza sun pial mîlananapa îninnamtuchish. Nane uruza sunpa kainanamtus, u Macedonia suras awa kiashimtu aizpa piankamanapa. Suasne ukas uspa mîlamtukanain kiashina. Cristora piantuza pashinamtune, ukas sun annat kit usparuza mîlawainshina. 9 Une au Anpat Jesucristo u akwa kirît aizpa pian, us uruza watsarît mîlnarît akwa. Au sura atchasmin, usne Dios uzkin wan chiwal mîjazi. Au sura akane, usne chiyura mîj aizpa chîhkat kit puiza awakanain namta, awaruza pashinamtu akwa. Usne u akwa puiza awakanain namtît, awaruza kiwainana, awa Diosta piankamanapa. 10 Maza año tuasmin, u sun pial wanmakninñara akwa, nane uruza kurunnamtus, u kiashit aizpa pailtînpa. Sun kiarane, u akwa an warashinaka. Une mamaz nîjkulturuzkin an ñancha minñat kit sun pial wantamîzta. 11 Mane une u kiashimtu aizpa pailtawa. An ñamin une puizaruza kiwainnashiara. Sunkana une tînta kal kiarawa, wan pial wantanakima. An akkwan mîjmikane an akkwan tashina. An we mîjmikane an we tashina. 12 Tashitmikane us mîj aizpa tashina. Diosne us tashit aizpa sap kit us akwa wat minazi. Diosne maza mîjchi aizpa sapna tîriztuchi. 13 Puizaruza pialkasa kiwainamtuasmin, une wan mîj aizpa taman, u we mîj aizpa paishimtu akwa. U mîlashimtu aizpa mîlarawa. 14 Ma payu u akkwan tiztît pial mîj akwa, une mîjchiruza mîlatpa, usparuza kiwainanapa. U we mîjkane, mamaz payura uspane uruza kiwainnashina. Suasne mamaz payura uspane uspa mîj aizpa naiyanazi, we mîjturuza chiwazha mîjanapa. Kawarain une wanta kiwainnanazi. 15 Ñamin Diosne paiña pînkîhta miza Israel awaruza kumira kwinnara patnin kit kaizta: “Akkwan kumira sakturuzne tizawa mîjchi. We kumira sakturuzne yak kiarachi,” ka kizta. Sunkana ma payu Diosta piantuz naiyarane, mînminkas wechi mîjmanazi.
Titokas paiña izmuruzkas
16 Na uruza kiwainnamtuasmin, nane Diosta aishtaish kiztus, Titokas uruza kiwainashimtu akwa. Usne nakanain uruza wat kinashimtu. 17 Nane Titora paikwarau, uruza izna înpa. Uruza kiwainna îshimtu akwa, usne nawa mît kit u uzkin înpain azi. 18 Nane Titokasa mamaz Cristora nîjkultumikasha u uzkin înintus. Wan Dios yalta wanmakturuzne an ampuwa wat minñamtu, Dios pit wat kamtamtu akwa. 19 Ma pitchin us akwa kaiztus. Wanne Dios yal wanmakmukin ussa naat kit nakasa chanpa îninñara, an mîlam mîlnapa. Au paasne Jerusalén pîpulura îshimtuas, sun pial mîlna, usparuza kiwainana. Aune takima Jerusalén pîpulurakima îshimtuas, u au Anpatta, Jesucristora wari kizanapa. Aukas îshimtuas, nîjkulturuza kiwainashimtu piankamanapa. 20 Akkwan pial mîlamtu akwa, aune kutñakanain îmtumakpas. Sun pial mîlamtuasmin, aune sulmin îmtumakpas, mînminkas au sun pial walkwarît kizamanpa. 21 Aune Dios iztakin nil uzat kit wat kianapas, wan pial chîhkankima. Kawarain aune awa iztakin nil uzat kit wat kianapas, sun pial chîhkankima. 22 Nane an paaskasa mamaz Cristora nîjkultumikasha uruza înintus. Usne na kurunta aizpa mît kit awa us akwa wat minñamtu. Us wan wat kirît akwa, mane usne u uzkin kiwainna îshimtu, us uruzpa wat minñamtu akwa. 23 Mînpazha Titowa mîmarane, usparuza ka kaiznarain: Titone ap izmumikakas nakasa kal kimmika i. Uskas u akwa kal kimtu. Mînpazha mamaz paas ampuwa mîmarane, kaiznarain: Dios yalkin wanmakmuruzne uspa paastuza îninñara, uspa akwa kainanapa. Uspa kal kiamtu akwa, awane Cristowa wat minñamtu. 24 Uspa pianatpane, une usparuza wat sapparawa. Suasne Dios yalta wanmakturuzne u Cristora pianturuza pashinamtu piankamanazi. U Cristora nîjkulturuza pashinarît akwa, nane u akwa wat minash, na wan awaruza u kiarît aizpa kainanarît akwa.
Pial wantaamtu, Cristora piantuza mîlanana
1 Mane u sun pial Cristora piantuza mîlanana me wantaamtu akwa, nane sun pial akwa uruza mamasa pînkîh pamanash. 2 U sun pial wantaashimtu pian ish. U sun pial maza añokin wantaashimtu akwa, nane Macedonia pîpulura uztuza kainanamtus, u kiamtu aizpa piankamanapa. Sun akwa u akwa wat mintus. Mane uspakas, Macedonia suras awakas, pial wantaashimtu, u usparuza sun kinarît akwa. 3 Katmizna nane an kutña Diosta piantuza kiwainnanapa îninnamtus, sun pial wantaanapa. U sun pial wantarane, nane u akwa wat minash. Na amtuchasmin, une an pial kapal wantaarawa. Me nane u kiwainashimtu awaruza kainarau. 4 Sun pial wanmaktamtukas, une makima wan sapna pailtachi. Nakas mînpazha Macedonia suras awakas u uzkin piananpain. Na pianakane, u wan pial sapparakine, nane uspa iztakin mîtsal anash, na usparuza u kiwainashira kiznara akwa. Sun pial wantarachine, ukas mîtsal anazi. 5 Katmizna na pianatchasmin, nane an kutñaruza u uzkin îninnana mintau, u sun mîlam an ñamin kin namtît aizpa wantana kiwainnanapa. Suasne une akkwan pial wantarît mîjanazi, puizaruza mîlananapa. Suasne awane u sun pial wanmakninnashira piankamanazi. Suasne uspane na uruza sun pial wanmakna îninnarachi piankamanazi. 6 Na uruza kaiztu aizpa nîjkultain. Mînpazha akkwan pial mîlamtukine, usne we wat kulnazi. Mînpazha akkwan pial mîlamtune, usne kwisha wat kulnazi. 7 Pakaish pakaish us mîlan mintu aizpa mîlatpa. Tapail awakana uzman. Mamaz uruza mîlanapa îninnarane, mîlatkiwa. Diosne mîlashimturuza pashinat kit usparuza wat kulninnamtu. 8 Diosne uruza kiwainashina, u we mîj aizpa mîlanana. Suasne une u we mîj aizpa mîjanazi. Usne uruza an akkwan mîlananazi, mamaztuza naiyanapa. Suasne une awa akwa an akkwan tuntu wat kal kiashina. 9 Diosne paiña pînkîhta ka panintît: “Wat awane pailta payurakima puizaruza akkwan mîlanamtu. Diosne paiña nil kimtu aizpa pailta payukima mainmanazi.” 10 Diosne wan tîruza pippa waninnamtu. Awa sun pippa wakane, Diosne pippara chikninnamtu. Suasne awane pakkashina, kuana. Dioskas uruza u we mîj aizpa mîlananazi. Suasne une mamaztuza an akkwan wat kal kiashina, awaruza kiwainanapa. 11 Sunkana Diosne uruza akkwan mîlananazi, u mamaztuza akkwan kiwainnanapa. Aune sun pial u wantaarît aizpa usparuza chîhkanapas. U usparuza akkwan pial mîlanamtu akwa, uspane, Diosta piantuzne, Diosta aishtaish kizanazi. 12 Diosta piantuza kiwainakane, une we mîjturuza mîlanat kit Dios pashit aizpa kiamtu. Suasne uspane pailta payukima Diosta aishtaish kizanazi, u usparuzakas mîlanara akwa. 13 U usparuza kiwainna mîlanamtu akwa, uspane “Dios kwisha wari” kizanazi. Suasne uspane u Cristowa watsal pit kiashimtu nîjkulanazi, u Jerusalén pîpulura uztuzakas wan awaruzakas sun pial mîlanamtu akwa. Sun akwa uspane u Diosta mîamtu piankamanazi. 14 U uspa we mîj aizpa mîlanamtu akwa, uspane u akwa Diosta paikwananazi. Uspane uruza pashinanazi, Dios uruza kwisha wat kiwainamtu akwa. 15 Mane Diosta aishtaish kaizna îzhain, Dios paiña Painkulta aumîza mîlanarît akwa. Watcha, Dios awa akwa kwisha wat kinarît akwa, aune au pitkasa us miza tînta i kizsachimakpas.
Pablone usmin pakpamtu
1 Mane, nane Pablo mun ish. Cristo au sukin chamtuasmin, usne awaruza wat kiwainnat kit pashinara. U iztukin nane Cristo uztakanain uzshimtus. Katmizna nane uruza kurunashimtus, na kaiztu aizpa wat piankamanapa. Na an tînta u uzkin namnintuchi akwa, nane uruza paikumtus, an piankamanapa. Na u uzkin taizkane, mazantuzne na sam pit paramtuchi kizamtu. Na ukasa tuchine, na uruza pînkîh îninnakane, mazantuzne na sam pit paramtu kizamtu. 2 Mane uruza paikwanamtus, u ap izmuchiruza mîamanpa. Uspane na Cristora pianchikana uztu kizamtu. Uspane nawain mintu kizamtu. Na u uzkin pianakane, nane sam pit parashinash, izmuchiruza Dios nawa paiña pit kainanapa îninta piankamanapa. 3 An sukin uztuasmin, nane wan Cristora pianchiruzkanain mintuchish. Sunkana na Dios kal kimtuasmin, Diosne nawa kiwaintu, kwail kirît aizpa anuppanapa. 4 Diospa kal kimtuasmin, nane ap chihtîkasa waya kimtuchish, Dios nawa tînta kiwaintu akwa, nil kamtananapa, uspa kwail kamtarît aizpa maizanapa. 5 Nane Dios akwa uspa kwail minñamtu aizpa anuppashinamtus. Dios pit mîashimtuchiruza anuppashinamtus, uspa Diosta piankamanapa. Awaruza paranamtuasmin, nane uspa minñamtu aizpa maizninnamtus, Cristo kaiztu aizpa mîanapa. 6 An ñancha wantuza kurunnanash, maizanapa. Suasne nane Diosta mîmtuchiruza wan parishizninnanash. 7 Na kamtamtu aizpa izamtukas, mînpazha nawa nil minñamtuchi. “Nain Cristora pian ish” kiztumikane nakin Cristora an wat piankamtachi. Nakas Cristora pianmika ish. 8 Au Anpat Jesucristone nawa îninta, paiña pit kainanapa, uruza an tînta namninnanapa. Nane uruza kwail kinashimtuchish. Na kimtu aizpa uruza kainanamtukas, nane uruza kaiznara aizpa mîtsal kimanash. 9 Uruza pînkîh pamtuasmin, nane uruza ishkwaninnashitchish. 10 Mazantuzne nawa ka kaizamtu: “Paiña pînkîh pamtuasmin, aumîza tînta pilchanamtu. Us au iztakin akane, usne tînta chikanain paramtu. Au uzkin akane, usne aumîza kain pit paranamtu,” ka kizara. 11 ¡Sunkana minturuz mîrain! Ukasa uzchiasmin, nane tînta pit pînkîhta pat kit uruza îninnarau. U uzkin pianakane, nakas ap pitkasa tînta parashinash. Na kaiztu aizpa piankamtain. 12 Watcha. Na uruza pînkîh panat kit ukasa ap pit paranamtukas, nane mamaz kamtammikakin an warish kiztuchish. Mazantuzne u uzkin usparuzpain uspa pitkasain an katsa namashimtu. Mamazkin au kaiztu aizpa an wari kizamtu. Aune mamazkin kawarain makpas. Uspane “au kaizamtu aizpa mamaz awakin an wari” kizamtu. Aune “mamaza awakin an akkwan pianmakpas” kizamtu. Uspane “aune anza wat makpas” kizamtu. Sunkana kaizamturuzne tîmpa awakana mai. 13 Nane mamazkin an wat kal kirau kizmanash. Dios nawa an kal chîhkat akwa, nane ap kal wari uruza kwinta kinanash. Diosne nawa uruza, Corinto pîpulura uzturuza, îninnara, sun watsal pit kainanapa. 14 Na sua kal kin sairachikas, Diosne nawa u uzkin kal kin chîhkara. Mamaztuz u uzkin îarachasmin, nane an ñancha piannarau, uruza Cristowa watsal pit kainana. 15 Nane ap kal kimtu aizpa uruza kwinta kishinamtus. Mamazpa kal uruza kwinta kimanash, Dios uspa kal nawa chîhkatchi akwa. Nane Dios uruza kiwainanapa tîriztus, Cristora an nîjkulanapa, an tînta namanapa. Suasne nane an Diospa kal u purakin kinash. 16 Nane u uzkin an pîntara sun watsal pit kainanashimtus, Dios mamaz awaruza watsat mîlnanapa. Nane mamaz awa Dios pit kainammtukin chi îmanash, Dios uspa kal kin nawa chîhkatchi akwa. Suasne nane mamazpa kal kirau kaizmanash. 17 Aune mamaztuza au kal kiarît aizpa kainaamanawas, awa aumîza wat minñanapa. Aune nil uztawamakpas, Dios au akwa wat minapa. 18 Diosne “nain wat kimtus” kiztumikasha sapmanazi. Diosne ussa mîmtumikasha sap kit us akwa wat minnazi.
Pablokas kwail înintuzkas
1 Na uruza kaiztu aizpa mînaka, na kain pit parashimtu akwa. Uruza akwanamtus, na kain pit kaiztu aizpa tailchaanapa. 2 Dioskas nakas uruza pashiamtuas, Cristora kwayamanpa. Nane uruza Cristowa kamtanarau, ussa nîjkulanapa, ussa piankamanapa. Nane Corinto pîpulura uruza Cristora mîlnashimtus, Cristokasa pailta payukima uzanapa. Nane uruza kurunnamtus, nil uzanapa, Cristo uruza sapnanakima. 3 Une nawa ishkwinamtu, Satanás uruza kutkwaninashimtu akwa. Usne an ñamin kamta iztîtmikakanane, paiña pit akwa Evara kutkwara. Uskas u minñamtu aizpa maizninnashimtu, Cristora pashiamanpa, Cristora an kanpaamanpa. 4 Na an pit uruza kainanamtu aizpa mîrain. Mazantuzne u uzkin aamtu, mamaz tuntu kamtam uruza kamtanamtu. Uspa mamaz tuntu Jesúspa kamtanamtuasmin, une usparuza tailchanat kit na Jesúspa kamtara aizpa kwayarîmtu. Sun kwail kamtamturuzne mamaz izpulpakas kamtanamtu. Une na Dios Izpulpa kamtara aizpa mîashimtuchi. Uspane mamaz watsal pitpa kamtanamtu. Une na Dios watsal pit kamtara aizpa kwayashimtu. Une uspa kamtamtu aizpa tailchat kit mîashimtu. Sun akwa une nawa ishkwintu. 5 Sun înintuz an katsa namamtuasmin, u usparuza kanpaamtukas, nane uspakin an we tînta chi ish. 6 Awa Pablo watsal pitkasa parasachi kizamtukas, nane ap kamtamtu aizpa wat pianish. Nane uruza impara imparain kamtanat kit u uzkin nil uztau, wan awa na Diospa înintamika ish piankamanapa. 7 Dios watsal pit uruza kainanamtuasmin, nane uruza nawa pial tanapa paikwatchish. Mazantuzne na kwail kirît ish minñamtu, kammuruz kamtammikasha taarawa minñamtu akwa. Nane ap chihtîkasa tînta kal kirau, uruza Cristora an wat piankamanapa. 8 Mamaz Diosta piantuzne nawa pial mîlara. Uspa nawa pial mîlarît akwa, nane na we aizpa pairau, uruza kamtanana, uruza kiwainnana. 9 Na ukasa uzasmin, nane pial wenamtu ash, chiwazha paina. Na wenamtakas, nane mînainkas uruzpain paikwanamas. Cristora piantuzne, Macedonia sura uzturuzne, na tukin piannat kit na wenamtît aizpa mîlaara. Ñamin chinkas uruza paikwatchish. Sunkana nane uruza na we aizpa mizurainkas paikumanash. 10 Na Cristora nîjkultu akwa, nane uruza watcha kaiznamtus. Nane u Acaya sura uzturuza chinkas paikumanash, nawa pial mîlaanpa. Mînminkas sunpa nawa puñain paninsachi. 11 Uruza chinkas paikumtuchikas, nane na uruza pashinamtuchish kaiznamtuchish. Diosne na uruza kwisha panashimtus wat pian. 12 Nane na kimtu aizpa kimîz kit u pial chi sapmanash. Nane u mîlamtu aizpa sapmanash, sun mamaz kamtamtuz nakana uzamanpa. Uspa u pial sappamtuasmin, uspane nakana uzamtu kaizasachi, na u pial saptuchi akwa. 13 “Au Diospa kamtamtuz makpas” kizamtukas, uspane uspa kalpa pîrail kaizamtu, awaruza ñanta kininnamtu akwa. Diosne usparuza îninnarachi. Sun ñanta kininturuzne Cristo înintaruzkana namashimtu. 14 Sun kwail kamtamtuz Cristo aumîza îninnarît kizamtukas, uspane uruza ñanta kininnamtu, usparuza kanpaanapa. Sunkana Satanásne Diospa chiyuras ángelkana namshina, awaruza ñanta kininnana. 15 Sun kin samchi. Satanás usmin wat awakana namnintu akwa, sun kwail kamtamtuzkas usparuzain namninnashina, awa iztakin wat awakana izanapa. Kwail awa purakas, uspane nil awakanain namninnamtu. Minpa payura Diosne uspa kwail kal kiarît aizpa wantuza piankamninnanazi. Uspa kwail kiamtu akwa, Diosne usparuza sunkana ilnanazi.
Pablone, Dios înintamikane, parishizta
16 Mamasa na an ñamin kaizta aizpa mîzhain. Na kain pit nawa paramtuasmin, nane tîmpa awakana chi ish. Na tîmpa awakana ish minman. Nawa tîmpa awakana minñarane, nawa tîmpa awakana sapchain, na uruza kaizta aizpa mîanapa. Mamaz kamtamtuz uspa kiarît aizpa uruza kainanara akwa, nakas na kirît aizpa uruza pitchin kainananash. 17 Na uruza na akwa kaiznamtukas, Cristone na kaiztu aizpa înintachi. Na uruza na kirît aizpa kwinta kimtuasmin, nane tîmpa awakana uruza kainanamtus. 18 Akkwan kamtamtuz uspa kal kiamtu aizpa uruza kainanamtu akwa, nakas uspakanain apas awakanain na kirît aizpa uruza kainananash. 19 U akkwan piankamarît minñamtu akwa, une sun tîmpa kamtamtuza mîashit kit tailchaanamtu. 20 Une uspa uruza kiamtu aizpa tînta tailchaamtu. Uspane uruza uspa kiwainmuruz namninnashimtu. U pial mîj aizpa ukkanashimtu. Uruza îninnashimtu, uspa pashimtu aizpa kianapa. Uspane aukin an wat makpas minñamtu. U matsîhkin kwail pit kaizamtu. 21 Nane mîtsal ish, na uruza pilchanarachi akwa. Nane uspa kiarîtkanain uruza kitchish. Nane tînta parîtmikakana parashitchish. Sun kwail kamtamtuzne uspa kiamtu aizpa wat minñat kit wantuza kainanamtu. Nakas uspakanain tîmpa awakana na kirît aizpa uruza kainananash. 22 Uspane “Hebreo awa makpas” kizamtu. Nakas Hebreo awa ish. Uspane “Israel awakana Diosta wakpuj wainñamtu makpas” kizamtu. Nakas Israel awakana Diosta wakpuj waintus. Uspane “Abrahampa kwal makpas” kizamtu. Nakas Abrahampa kwal ish. 23 Uspane “Cristowa kal kimtumakpas” kizamtu. Na tîmpa awakana kaiztukas, nane uspakin Cristowa kal an tînta kimtus. Nane uspakin an akkwan kal mîj ish. Awane uspakin nawa kajchira an akkwan sîpninnara. Awane nawa uspakin an akkwan ilninnara. Nakas uspakin akkwan piji inapain arau. 24 Judío înintuzne cinco pijikima nawa iyarish. Pailta payu nawa iyarasmin, uspane aya tîtkasa treinta y nueve pijikima nawa iyarish. 25 Uspane nawa kutña pijikima tîkasa pianash. Maza piji nawa uk kiarash. Na katsa kanuara kutña pijikima îmtuasmin, kanuane pirain paltaintît. Nane maza payukas maza amtakas ñam pira îsalmin kwaktau, kanua paltaintît akwa. 26 Akkwan suwara charau. Pi kwaktuasmin, pi ishkwarish, pi nawa kwarîmtu akwa. Awa nawa walkwashimtu akwa, ishkwarish. Ap Judío kwaltuzkas nawa kwail kiarish. Judío chiruzkas nawa kwail kiarish. Katsa pîpuluwara pîntuasmin, awane wanmakkat kit nawa kwail kiashiash. Pul suwara chamtuasmin, nane na pashit aizpa mîjchiarau. Katsa pi kwaktuasmin, ishkwarau. Diosta pianchiruzne nawa kwail kiarish. 27 Ap tînta kal akwa, nane kwaiztau. Akkwan amta pittachish. Kwisha yak kirau. Kwisha kwazi kiltau. Akkwan payu yazkain tailcharau. Masetne nane pîna tîh akwa samtau. Masetne parishiztau, kamisha kwam mîjchi akwa. 28 Na parishiztakas, nane uruza sunpa an kainanamanash. Pailta payu nane Dios yalta wanmakmuruzpa mintus. Nane uspa akwa ishkumtus, Cristowa pit chîhkaamanpa. Usparuza kiwainat kit kurunashimtus, Cristora kanpaamîznapa. 29 Masetne mazantuz Cristora piankamturuzne we nîjkulamtu. Nane uspa akwa tayaltus. Mînpazha Cristora piankamturuza kwail kininkane, nane mamazta, kwail kinintumikasha, aliz kultus. 30 Nane uruza na akwa kwinta kimtus, u na tînta chish piankamanapa. Nane wan na naiztarît aizpa kainanarau, u na najtît awa ish piankamanapa. 31 Nane pailta payukima Diosta, an Anpat Jesucristowa Taittara, kwisha wari kiznash. Usne na kainammtu aizpa watcha i pian. Pîrail kaiztuchish. 32 Mamasa maza kwinta kinash, ñamin nawa kirît aizpa piankamanapa. Maza su wa. Aretasne, katsa mikwane, sun sukin îninta. Damasco pîpulune sun sukin uzta. Na Damasco pîpulura uzasmin, Damasco pîpulu ainki mikwane suldaruruza wan pîpulu miwara îninnara, nawa pizat kit kajchira sîppanapa. 33 Sun pîpulukin uzasmin, ap izmuruzne nawa izara. Uspane nawa katsa tîmta win kit pîpulu kalpialkis inkihsat kit mamaza pîpulura îninñash. Sun akwa sun ainki mikwane nawa piztachi.
Pablo kainkizpara aizpa
1 Nane na izta aizpa uruza kainanarawash. Na kirît aizpa uruza kainanamanash, mînainkas kiwaintuchi akwa. Nane ap Anpat Jesús nawa izninta aizpakas, nawa piankamninta aizpakas, uruza kainananash. 2 Nane akkwan añoin Cristora piankam kit ussa nîjkultau. Kwiztane, nane catorce añoin, an kwash chiyura Dios uzkin, nurau. Chiyura ap wan ña nurane, pianchish. Chiyura ap izpulkasa nurane, pianchish. Diosmin na ît pian. 3 Watcha, nane chiyura nurau. Chiyura ap wan ña nurane, pianchish. Chiyura ap izpul nurane, pianchish. Diosmin na ît pian. 4 An kwash chiyura nurawane, nane akkwan masas pit mîrau. Nane Dios nawa kaizta aizpa mînainkas kainanasachish. 5 Na chiyura nurîtmikawa wat minshimtukas, nane sunkana nawa wat minmanash. Na akwa kainammtuasmin, nane uruza na kirît aizpa kainanamanash. Nane uruza na kaiztît aizpa kainananash, na u iztukin an watsal nammanpa. 6 Nane na wat kirît aizpa uruza kainanashinash. Tîmpa awakana paranashimtukas, nane watcha uruza kwinta kinanash. Nane nawa kwinta kimanash, mînminkas nawa anza wat minñamanpa. Une na uztakana pianmai. U na kamtamtara aizpa mîara akwa, une nawa nil minñashinai. 7 Diosne nawa akkwan pijikima kwinta kira, na us kaizta aizpa an wat piankamnapa. Dios nawa akkwan pijikima kwinta kitkas, usne ñamin nawa kamtashimtu, na an wari mamazkin minmanpa. Sun akwa Diosne nawa ishmu îninta. Sunkana Satanásne nawa chihtî kuztakana izninta. Usne nawa izninta, tî kwiz tish ñara tîrîtkana, na mamazkin an wari minmanpa. 8 Sun ishmu akwa, nane kutña pijikima Anpat Jesústa paikwarau, an ishmu wat panapa. 9 Suasne Anpat Jesúsne nawa kutña pijikima ka kaizta: “An ishmu wat panintuchikas, nane nua pashit kit kiwainshimtus. Nu najtît awakana uztuasmin, nane nua an kiwainshinas. Suas awane na nua tînta kiwaintu piankamanazi,” kizta. Katmizna na tînta chi awakas, nane watsal kulnash. Suasne awane Cristo nawa tînta kiwaintu piankamanazi. 10 Na Cristo akwa wan parishiztukas, nane wat kulnash. Masetne nane najtît awakana ish. Masetne awane nawa pilchapuzamtu. Masetne kumira we mîj ish. Masetne awane nawa piantashimtu, na Dios kal kimtu akwa. Masetne awane nawa akkwan kwail kiamtu. Na najtît awakana uztuasmin, Anpat Cristone nawa kiwaintu, nawa tînta awakana namninnapa.
Pablone Corinto pîpulura uztuza kiwainashimtu
11 Na kirît aizpa uruza kwinta kinamtuasmin, nane tîmpa awakanain paramtus. Sun kwail kamtamturuzne u uzkin an wat namninñara. Une uspakin nawa kiwainarachi. Une Pablo wat awa i kainarachi. Une na kirît aizpa wari kizarachi. Nain pakpanarau, u uspa iztakin nawa wat minñarachi akwa. Na tînta awachikas, Cristone nawa kiwainmîztu. An kwail kamtamtuzkin nane an wemika chi ish. 12 U uzkin uztuasmin, nane, Cristowa watcha înintamikane, Diospa kal kirau. Diospa kal kimtuasmin, nane awa nawa kwail kiarît aizpakas awa nawa kwail pit paarît aizpakas tînta tailcharau. Diosne nawa tînta kiwainta, wat iztasparît kal kinpa, awa na Diospa kal kimtu piankamanapa. 13 Nane mamaz pîpulura Diosta piantuzkasakas Corinto pîpulura Diosta piantuzkasakas kal kirau. Nane sun kalmin wan uztukin kirau. Mamaztuz nawa kiwaina pial tarakas, nane uruza pial paikwatchish. Uruza pail paikumtuchikas, nane uruza kwail kinarachish. Na uruza pial paikwatchine, nawa wat kulchain, na uruza sun akwa tayalanninnarane. 14 Mane u uzkin an kutña pijikima pianashimtus. U uzkin akane, nane u pial paikumanash, u nawa kiwainapa. Na u pial sapna saimtuchikas, nane uruza pashinamtus, Cristora an wat nîjkulanapa. Une ap pashparuzkana mai. Pashparuzne kumirakas pïnkas payamtuchi, papihshtuza mîlanana. Papihshtuzne kal kiat kit pial sayamtu, pashparuza kiwainana. Pashparuzne papihshtuza pial kwinamtuchi. Pashparuzne papihshtuza pial mîlamtuchi. U ap pashparuz akwa, nane uruza paikwamanash, chiwazha mîlanana. Nane papihshkana uruza kiwainnanash, Cristora an wat kanpaanapa. 15 Sunkana nane u akwa tînta kal kishimtus, u we mîj aizpa sappanapa. Nane u akwa inapain ish, u chiyura uzanapa. Na uruza an pashinamtukas, une nawa an we pashiamtu. Une nawa an pashiarawa. 16 Une na uruza pial paikwatchish pian. Mane mazantuzne na uruza pîrail kaiznamtu, uruza ñanta kianapa, u pial ukkanapa. 17 Nane ap izmuruza u uzkin îninnarau. ¿Uspane u pial walkuatki? Uspane na akwa chinkas sapparachi. 18 Nane Titorakas mamaz Diosta pianmikashakas u uzkin îninnarau. ¿Titone u pial walkwatki? Uskas chinkas saptachi. Nakas Titokas u uzkin kawarain mintuas, au paas uruza kiwainashit akwa. 19 Aune u iztakin aumîza pakpanamtuchiwas, u aumîza wat minñanapa. Na Cristora nîjkultu akwa, nane Dios iztakin ap pashimturuza paranamtus, u Diosta an piankamanapa. 20 Na u uzkin pianakane, nane u akwa ishkwashinas, u Dioskasa nil chaamtuchi akwa. Ukas nawa izna tayalashina. U uzkin piannan ishkumtus, u mamaz tuntu uzashimtu akwa. Une umîza aliz kulashina. Une patna pashianazi. Mamaztuza pilchapuzashina. Une u akwain kal kiashina. Anparuzne mamazpa kwail paraashina, usparuza kwail kianapa. Mazantuzne uspa akwa minñamtu. Anparuzne mamazkasa waya kiashimtu. U Dios kaizta aizpa kiamtukine, suasne nane ukasa aliz kulnanash. U kwail kiarît aizpa chîhkamtukine, u kwail akwa tayalamtukine, nane Dios iztakin mîtsal mîjanash, na uruza palishiztîmtu akwa. 21 U kwail awakana chaamtune, nane u uzkin în ishkwanash, u kwail kiamtu akwa. Suasne nane u akwa tayalnash, akkwan u an ñamin kwail kiarît aizpa chîhkashiarachi akwa. Maizashitchi akwa, une sînam awakana uzarachi, u akkwan ashampakasa chashiara akwa. An akkwan tuntu kwailkas kishiara.
Pablone minpa pit kurunamtu
1 Mane nane u uzkin kutña pijikima piananpain ish. U kwail kiarît aizpa chîhkaamtukine, sua na pianakane, sunkana kinash. Nane paas awa, kutña awa wanmakninnanash, sun kwail kimtuza uspa kwail kirît aizpa kaiznanapa. 2 Na u uzkin pakima pianatpane, nane kwail kimtuzakas, wantuzakas, kurunanarau, uspa kwail kiamanpa. Mane na u uzkin pianamtuchasmin, nane mamasa usparuza kurunamtus, uspa kwail kwayarînpa. Na mamasa akane, nane wan kwail kimturuza parishizninnanash, impaanakima. 3 Na akane, une Cristo nawa kwinta kira piankamanazi, Cristo nawa tînta kiwaintu akwa. U Cristo kaizta aizpa mîara akwa, Cristone uruza tînta kiwainnara. Usne uruza maiznat kit u uzkin akkwan iztasparît kal kira. 4 Cristora kurishta iru patpiantawane, irît. Imtuasmin, usne wan awa iamtukanain irît. Cristo irîtkas, Diosne us tînta akwa ussa irîttas kakulninta, mamasa uznapa. Sunkana au najtît awakana uzamtukas, Diosne aumîza tînta awakana namninnanazi, Cristo uruza îninnamtu kainanapa. 5 Une umin izarawa. ¿Une makima Cristora nîjkulamtumakkiwas? ¿Cristo kaizta aizpa kiamtumakkiwas? Uruzpain iznakularain. U Jesucristora pian akwa, une Cristo ukasa chamtu pian. Sunkanain Jesucristo kaizta aizpa mîmtuchimikane mizurainkas Cristora nîjkultachi. 6 U Cristora nîjkulamtu akwa, Cristo uruza sapnara. Usne uruza kwainarachi. Na Cristokasa chamtu akwa, Cristokas nawa kwairachi. Nane uruza tîriztus, na Cristo înintamika ish piankamanakima. 7 Nane Diosta paikumtus, u chinkas kwail kiamanpa. Nane sun uruza kainammtuchish, awa na akwa wat minñanapa. Sun uruza kainanamtus, u wan wat kianapa. U wat kiamtune, Diosne uruza sapnanazi, uruza kwainarachi akwa. Mazantuz Dios nawa kwairît minñamtukas, Diosne watcha nawa sap kit paiña înintamika namta. 8 Na Dios pit kainammtuasmin, nane mizurainkas Dios watcha pit kwail i kizmanash. Nane uruza watcha kainananash. 9 Na uruza ilnamtuchi akwa, nane watsal kulnash, u Dios kaizta aizpa mîamtu akwa. Ukas us kaizta aizpa mîashimtu akwa, une Cristo kuruntu aizpa kiamtu. Katmizna nane u akwa Diosta paikumtus, Dios uruza kurunamtu aizpa kianapa. 10 Na u uzkin amtuchasmin, nane uruza pînkîhta panamtus, na kaiztu aizpa watcha i kiz kit mîanapa. U na pînkîhta pamtu aizpa mîamtukine, nane u sukin tînta kurunnana anash. Ap Anpat Cristone nawa îninta, uruza kiwainanapa, uruza an tînta namninnanapa. Nane uruza kwail kinashimtuchish.
Minpa pit
11 Une, Cristora nîjkulamturuzne, ap minpa pit mîrain. ¡Wat kultain! Maiztain, wat uzanapa. Na uruza kamtamtu aizpa kirain. ¡Maza awakanain mintain! Wantuzkasa kalpain uztain. Sunkana u uzamtune, Diosne uruza kiwainanazi, mamaztuza pashinanapa, mamaztuzkasa wat uzanapa. 12 Diosta piantuz wanmakkakane, usparuza “kakishapu” kiztain, Dios usparuza pashinamtu akwa. 13 Apain Cristora nîjkulturuzne uruza “kakishapu” kiznamtu. 14 Nane u akwa paikumtus, au Anpat Jesucristo uruza wat kiwainanapa, Dios uruza pashinamtu piankamanapa, Dios Sînam Izpul ukasa wat chanpa. Pailti.
Kakishapu
1 Nane Pablo mun ish. Jesucristokas Taitta Dioskas nawa nat kit paiña înintamika namninta. Awaruzne nawa înintamika namninarachi. Sun Taitta Diosne Jesucristo irîttas kakulninta. 2 Nane, uruza, Galacia sura uzturuza, Cristora piantuza, an pînkîh panat kit îninnamtus. Nakasa apas Cristora pianturuzkas uruza “kakishapu” kiznamtus. 3 Nane au Taitta Diostakas au Anpat Jesucristorakas paikumtus, uruza wat kiwainanapa, u kalpain uzanapa. 4 Jesucristone usmin inapa chîhkarît, au kwail kiarît akwa. Usne aumîza watsat mîlnanara, an sukin kwail kimtuzkana kwail kiamanpa. Au Taitta Diosne us kishit aizpa kirît. 5 Us au akwa akkwan kirît akwa, “Dios kwisha wari” pailta payukima kaizchain. Na kaizta aizpa watcha i.
Mamaz watsal pit wa chi
6 Nane u kiarît aizpa nîjkulsachish, u nîjkularît aizpa azain mainñarît akwa, mamaz tuntu pit mîanapa. Cristo uruza pashinamtu akwa, Diosne uruza akwanara, paiña watsal pit mîanapa, uruza kiwainanapa. 7 Diosne paiña watsal pit mîj, awaruza kwailtas tainak kit watsat mîlnanapa. Mamaz watsal pit wa chi. Mamaztuzne sun pit maizashit kit uruza azappamtu, u Cristo watsal pit mîamanpa, mamaz tuntu uzanapa. 8 Aune an ñancha u uzkin îat kit Dios watsal pit uruza kainaramakpas. Mînpazha auruztas mamaz tuntu pit uruza kamtanamtune, chiyuras ángel mamaz tuntu pit uruza kamtanamtune, nane Diosta paikwanash, Dios suntuza ilnanapa. Na mamaz tuntu pit uruza kamtanamtune, Dios nawa aishka iltînazi. 9 Sun pit uruza an ñamin kainanarakas, nane mamasa sun pitmin kainananash. Mamaz awa nakanain kamtamtukine, mamaz tuntu pit uruza kainammtune, nane Diosta paikwanash, Dios usparuza ilnanapa. 10 Watcha. Nane awaruza sainamtuchish, nawa wat minñanapa. Diostain saimtus, nawa wat minapa. Awa pashimtu aizpa kimtumikane Cristowa kiwainmumika namsachi. Katmizna nane Cristowa kiwainmumika namtît ish, us pashit aizpa kin.
Pablone Dios înintamika i
11 Diosta piantuz, mîrain, na uruza kaiznamtu aizpa piankamanapa, Dios uruza watsarît mîlnanapa. Awane na sun watsal pit uruza kainammtu aizpa nawa chîhkatchi. 12 Nane mamaz awa kainammtu aizpa mîrachish. Mînminkas sun watsal pit nawa kamtarachi. Jesucristoin sun watsal pit nawa kamtat kit piankamninta, uruza kamtananapa. 13 Na Cristora piankamtachasmin, une na Judío awakanain uztau pianmai. Ñamin nane Judío awa Diosta nîjkultakana charau. Nane pailta payu wan Cristora pianturuza tînta naizninnat kit Cristora piantuza pailninnashiras. 14 Nane au Judío awa kwal Diosta wakpuj wainñarakanain uztau. Nakasa kawintaruzne nakin au Judío awa kwal Diosta wakpuj wainñarakanain an wewazha uzara. Nane au ñamin Judío îlaparuz aumîza kainat aizpa wat mît kit wan aumîza kamtat aizpa kirau. Nane mamaztuzkin an akkwan kirau. 15 Na kawirachasmin, Diosne nawa nara, Diosta piankamnapa. Dios nawa akwara, us nawa pashit akwa. 16 Sun wat payura Diosne nawa paiña Painkulta piankamninta, na Judío awachiruza Dios watsal pit kamtananapa. Suasne Dios nawa maiztawane, sun payura nane mamaz awaruza Cristowakas Diospawa mîmana ît chi ish. 17 Nakas Jerusalén pîpulura îtchi ish, an ñancha Cristowa înintaruza kwinta kin. Uspane nakin an ñancha Cristowa înintaruz namara. Jerusalén pîpulura nurachi akwa, nane Arabia sura pîntîrau. Kwiztane Damasco pîpulura mamasa kailtau. 18 Kutña año pailtawane, nane Jerusalén pîpulura nurau, Pedrora izna. Nane Pedrokasa quince payukima nukkultau. 19 Ta nukkultuasmin, Santiagora, au Anpatpa aimpihshta, iztakas, nane mamaz Cristowa înintaruza iznarachish. 20 Na uruza pamtu aizpa watcha i. Diosne na uruza pîrail kaiztuchish pian. 21 Jerusalén pîpulukis puztawane, kwiztane nane Siria surakas Cilicia surakas pîntau. 22 Na mamaz akkwan sura pîntu akwa, Judea sura uzturuzne, Cristora piantuzne, nawa masainkas izarachimai. 23 Uspane awa na akwa kaizara aizpa mîarît. Sunkana ka kizara: “Aumîza naiznintamikane sun Dios watsal pit awaruza kainanamtu, Jesucristora nîjkulanapa. Ñamin usne sun Cristo piantuza pailninnashira,” kizara. 24 Dios nawa maizta akwa, uspane “Dios kwisha wari” kaizara.
Mamaz Dios înintaruzne Pablora sappamtu
1 Kwiztane, catorce año pailtawane, nane mamasa Jerusalén pîpulura nurau. Na îmtuasmin, nane Bernabérakas Titorakas mîlnarau. 2 Jerusalén pîpulura nurau, Dios nawa înpa piankamninta akwa, Diosta piantuzkasa, Cristora nîjkulturuzpa mikwakasa kwinta kin. Nakas Jerusalén pîpulura Cristowa înintaruzkas paimpa wanmaktamakpas. Suane nane na Judío awachiruza kamtanarît aizpa usparuza kainnanarau. Nane Dios watsal pitmin usparuza kainanamtu aizpa kiznarau. Nane uspakasa sun pit kainana wanmaktau, na kal kimtu aizpa kamanpa. 3 Titone, nakasa amtumikane, Griego awa azi. Sun Cristo înintaruzne ussa paiña ña tîtnapa, circuncisión kinpa, îninarachi. 4 Mamaz kwail kamtamtuzne sun kinpa îninñara. Mazantuz kwail kamturuzne au Cristora piantuzkasa puñain kulat kit wanmakkara, Titora circuncisión kinpa pashiara akwa. Puñain aukin akane, uspane au kiamtu aizpa izshiara, au kwail kiarît kizanapa, Moisés îninta aizpa kiarachi akwa. Jesucristone aumîza chîhtnarît, Moisés înintu aizpa kiamanpa. Sun kwail kamtamtuzne aumîza Moisés kanpamtuza namninnashimtu, us înintu aizpa kianapa. 5 Aune uspa îninta aizpa mizurainkas mîshitchimakpas, pailta payukima Dios watsal pit uruza wat kiwainnanapa, u watcha nîjkulamîznapa. 6 Sun mikwaruzne, sun Dios pit kamtamturuzne, nawa kurunnarachi, na kamtamtu aizpa maiznapa. Uspane nakin an katsa chi mai. Nakas uspakas Dios înintaruz makpas. Aune Dios iztakin kawarain makpas. 7 Uspane nawa mamaz pit kainanapa kurunnarachi. Uspane Dios nawa narît pian mai, Judío chi awaruza Dios watsal pit kamtananapa, Dios usparuza watsat mîlnanapa. Sunkana Pedrokas paiña kal sapta, Judío awaruza Dios watsal pit kamtananapa. 8 Sunkana Diosmin Pedrora nat kit Judío awaruza Dios watsal pit kainana îninta. Sun Diosmin nawa nat kit Judío awachiruza Dios watsal pit kainana îninta. 9 Santiagokas Pedrokas Juankas Jerusalén Iglesiakin katsa mikwaruz mazi. Dios nawa wat kiwaintît akwa, uspane nawakas Bernabérakas sappat kit au chihtî kanat kit sulmin kal kin namara. Au Judío chi awaruza Dios watsal pit kamtanamtuasmin, uspane Judío awaruza kamtanashina. 10 Uspane aumîza akwanara, Judea sura puizaruza kiwainanapa. Uspa sun akwanamtukas, nane me puizaruza kiwainshimtuazi.
Pablone Antioquía pîpulukin Pedrora pilchamtu
11 An ñamin mînpazha mikwaruzne Antioquía pîpulura wanmakkarît. Na Antioquía pîpulura piannatpane, Pedrokas sun pîpulura pianara. Nane paiña matsîh izawara pilcharau, Pedro awa iztakin kwail kit akwa. 12 Santiagowa izmuruz piannarachasmin, Pedrone, Judío awa mikwane, Judío awachiruzkasa kummamin. Santiagone paiña izmuruza Jerusalén pîpuluras îninnara. Sun îninturuz pianatpane, Pedrone Judío chi awaruzkis paimpa nukkulta, uspakasa kumanpa. Usne Judío awaruza Jerusalén pîpulukis aattuza ishkwaninnarît. Sun Judío awaruzne wan Moisés îninnamtu aizpa kiashimtu, Dios usparuza watsat mîlnanapa. Impara imparain Pedrone sun Judío awa chiruza chîhkanara, uskasa kumanpa. 13 Suasne sun Antioquía pîpuluras Judío awaruzne, Cristora nîjkultuzne, Pedrokana kiat kit Judío awachiruza, circuncisión kitchiruza chîhkanamîzta. Bernabékas Pedro kirît aizpa kishira. Uspane salaam kit uspa nîjkulara aizpa wat kiarachi. 14 Sun Cristora piantuz Dios watsal pit mîarîtkas, uspane Dios watcha kaizta aizpa maizat kit nilchi uzara. Uspa nil chi uzara akwa, watsal pit kiamtuchi akwa, nane wan awa iztakin Pedrora ka kaiztau: “Pedro nawa mîzha. Nune Judío awa i. Apa uztuasmin, nune au Judío awa îlaparuz îninta aizpa kimtuchi. Judío awachiruzkana uztu akwa, nune Judío awakana uzsachi. Judío awachiruza chîhkanamtu akwa, nune usparuza Judío awakana uzanapa kamtanamtu. Sunkana kimun,” kizta.
Diosne Judío awaruzakas Judío chi awaruzakas watsat mîlnanazi
15 Judío awa, mîzha. Au paasne Judío awakanain kawirawas. Aune Moisés Judío awaruza îninta aizpa izwailtawas. Aune Judío awachikana kwail kitchiwailwas. 16 Aune Dios awaruza maiznamtu pianwailwas. Diosne awa kwail kiarît aizpa wat kulninnamtu, paiña iztakin wat uzanapa. Moisés Judío awaruza us kaizta aizpa îninnarakas, Diosne Moisés kaizta aizpa mîmturuza uspa kwail kiarît aizpa wat kulmanazi. Diosne Jesucristora nîjkultuzain uspa kwail kiarît aizpa wat kulninnanazi. Au paasne Jesucristora nîjkultawailwas, Dios au kwail kiarît aizpa wat kulnanapa, Dios iztakin wat uzanapa. Judío awa Moisés kaizta aizpa mîamtukas, Diosne uspa kwail kiarît aizpa wat kulmanazi. Diosne mizurainkas Moisés kaizta aizpa mîmturuza sapnamanazi, usparuza Dios iztakin nil namnanapa. 17 Au paas Judío awane Cristora nîjkultawailwas, Dios au kwail kiarît aizpa wat kulnanapa, paiña iztakin wat uzanapa. Awaruzne au paas kwail kimtuwailwas kizamtu, au Moisés kaizta aizpa mîamtuchi akwa. Cristone aumîza kwail kininmanazi. Cristo aumîza kamtarît aizpa mîmturuzne kwail kiamanazi, Moisés kaizta aizpa mîamtuchikas. 18 Nane Moisés kaizta aizpa kin kailmanash, ap kwail wat kulnapa akwa. Moisés kaizta aizpa kin kailturuzne Cristo kamtamtu aizpa mîamtuchi. Nane sunkana kimanash. 19 Ñamin nane Moisés îninta aizpa kirau. Na wan înim mîrakas, Diosne ap kwail kirît aizpa wat kultachi, us iztakin wat uznapa. Moisés kaizta aizpa mîmtuchi akwa, nane Dios nawa kaiztu aizpa mîshimtus, Dios akwa uznapa. Cristo na akwa irît akwa, nane Dios pashimtu aizpa kishimtus. Jesucristo nawa kuruntuasmin, usne nawa kiwaintu, uskasa chanpa, kwail kimanpa. 20 Usne makima nawa înintu, us pashit aizpa kinpa. An sura uztuasmin, nane Dios painkulta nîjkultus, us nawa wat uznintu akwa. Usne nawa pashit kit na akwa irît. 21 Dios nawa kiwaintu akwa, nane ussa kwaimtuchish. Diosne mizurainkas Moisés îninta aizpa mîmturuza nil namninnamanazi. Dios Moisés îninta aizpa kitmikasha nil namtaratne, suasne Cristone kainmin irît.
Diosne nîjkulturuza watsat mîlnanazi
1 Gálatas sura uztuz, mîzhain. Une nilchi minñamtu. ¿Mîn tañumika uruza mamaz kain pit kainanamtu, u Dios watsal pit mîamanpa? Nane u uzkin Jesucristo kurishta patpian kit piantarît kainanarau. ¿Us akwa kirît aizpa mainñamtumakkiwas? 2 Une na kaizta aizpa mamasa mintain. Dios watsal pit mîarawane, une u mîarît aizpa nîjkulat kit Dios Sînam Izpulta sappara. Moisés îninta aizpa kimturuzne Dios Sînam Izpulta sappamanazi. 3 Une nilchi minñamtu. Dios Sînam Izpul uruza maiznara akwa, une nil uzat kit Dios kaizta aizpa kiashina. Mane une Dios kaizta aizpa kwaiyarîttuzkanain uzamtu. Une u miwarain îashimtu, u kiashimtu aizpa kianapa. 4 Cristora nîjkularasmin, une naizat kit akkwan piankamarît. ¿Une u piankamarît aizpa wan maintîmtumakkiwas? U chinkas mainñarakine, waranazi. 5 Mane ma pitchin uruza kainanamtus. Diosne paiña Sînam Izpulta uruza kiwainnapa îninnara, u uztukin akkwan iztasparît kal kianpa. Usne u akwa sunkana kirît, u Dios watsal pit nîjkulamtu akwa. Usne u akwa sunkana kitchi, u Moisés îninta aizpa mîamtu akwa. 6 Sunkana Dios pitta ka parît: “Abraham Dios kaizta aizpa nîjkulta akwa, Diosne ussa sap kit paiña kwail kirît aizpa kanin kit nil namninta.” 7 Katmizna na kaiztu aizpa piankamtain. Diosta nîjkulturuzne Abraham uztakana uzanazi. Diosne ussa nîjkulturuza sapnanazi, Abrahampa kwalkana namninnanapa. 8 Ñamin Diosne sunkana minta: “Nane Judío awachiruza, na kaizta aizpa nîjkulturuza sapnat kit uspa kwail kiarît aizpa kaninnanash, ap iztakin nil uzanapa.” Suasne Diosne ñamin Abrahamta pînkîh ka panin kit Abrahamta kaizta: “Nu nawa nîjkulta akwa, nane wan awaruza nu nîjkultukana kiwainananash,” kizta. 9 Abraham Diosta nîjkulta akwa, Diosne ussa wat kiwainta. Sunkanane Diosne wan Diosta nîjkulturuza wat kiwainnanazi. 10 Mane Moisés îninta aizpa kishimturuzne Dios pashit aizpa kiamanazi. Moisés înintu aizpa mîmturuzne naizarînazi, Dios usparuza sapnamtuchi akwa. Sunkana Dios pitta ka parît: “Diosne us înintu aizpa mîshimtuchiruza ilnanazi, uspa sun wan îninta aizpa kiasachi akwa.” 11 Diosne Moisés îninta aizpa mîmturuza sapnamanazi, uspa kwail kiarît aizpa karîtchi akwa. Sunkana pianmakpas, Dios pitta ka kaiz kit pînkîhta parît akwa: “Diosta nîjkultumikane Dios iztakin nil uznazi, Dios paiña kwail kirît aizpa kannintît akwa.” 12 Chiwazha awa Moisés îninta aizpa kimtukas, Diosne ussa saptuchi, Dios iztakin ussa nil namnapa. Chiwazha awa Diosta nîjkultakane, Diosne ussa sap kit Dios iztakin nil namnintu. Dios pînkîhta ka parît: “Moisés îninta aizpa mîmtumikane wan chiwal îninta aizpa kitpa.” 13 Aune Moisés îninta aizpa kimtuchiruzkana naizamanazi, Cristo au akwa irît akwa. Diosne aumîza kwailtas ukkat kit aumîza ilnamanazi. Dios pînkîhta ka parît: “Awane wan kurishta pat pianturuza ilninnanazi, uspa kwail kiarît akwa.” 14 Cristo Jesús au akwa ka kirît akwa, Diosne aumîza sapnat kit au kwail kiarît aizpa wat paninnarît. Sunkana Dios Abrahamta wat kirît akwa, usne wan Judío awachiruza sunkana kishinanazi. Suasne aune, Cristora nîjkulturuzne, Sînam Izpulta, paiña kin namtamikasha, sapshinamakpas.
Moisés îninta aizpakas Dios kin namtît aizpakas
15 U Cristora piantuz, mîzha. Nane awa mintu aizpa uruza kainananash, u mîanapa. ¡Na kaiznara aizpa kamtain! Maza awa mamazta kin namkane, kin namtamikane ussa pînkîh parît aizpa mîltu, sun piankamnapa. Uspa mun pînkîhta parawane, uspa paas sun pînkîhkin parît aizpa maizsachi. Sun pînkîh sarît aizpa pailsachi. 16 Mane sun piankamtain. Diosne maza pitmin Abrahamtakas paiña painkultuzakas kaiz kit kin namnara. Abrahamkasa paramtuasmin, Diosne akkwan kwaltuza, akkwan awaruza, sun pit kin namnarachi. Pînkîhta ka parîtchi: “Paiña kwaltuza.” Us sun pit paramtuasmin, Diosne amtumikawa paara; Cristowa paara. 17 Mamasa mîzha. An ñancha Diosne an pit Abrahamta kin nam kit “na kin namtît aizpa kinash” kizta. Cuatro cientos treinta años pailtawane, Moisésne Dios îninta aizpa pînkîhta para. Moisés Dios îninta aizpa pînkîhta parakas, Diosne us Abrahamta kin namtît aizpa maizmanazi. Dios kin namtît aizpa nukkulnazi. 18 Mînpazha “Moisés îninta aizpa kitpamakpas” minñamtune, uspane Dios kin namtît aizpa mizurainkas sappamanazi. Dios awaruza kiwainanapa kin namtît akwa, usne usparuza sapnat kit watsat mîlnnazi. Diosne Abrahamta kin namtît aizpa kishira. Usne ussa maiz kit nil awakana namninta. 19 ¿Chikishma sun îninta aizpa pazi? Ángeltuzne sun îninmu sappat kit Moisésta sunmin kwakkara, awaruza parananapa, awa uspa kwail kiamtu aizpa piankamanapa. Diosne awaruza sun înimmu kianapa îninnara, Abrahampa kin namtît pashpa kawiranakima. Sun kin namtît pashpane Cristo azi. Us Abrahampa pashpa akwa Diosne awaruza kiwainnana namta, usparuza wat kinanapa. 20 Dios paiña îninta aizpa parakane, Diosne Abrahamta parara, Judío awakasa kwinta kinanapa. Ñamin Dios Abrahamta paiña pit kin namtakane, Diosmin mazainta, Abrahamta, kizta.
¿Chikishma Dios paiña îninmu îninta?
21 ¿Moiséspa îninmune Dios kin namtîtta tañu kimtuki? Mizurainkas tañu kimtuchi. Mînminkas wan înintu aizpa kisachi, ussa wan payukima uzninnanapa. 22 Dios pînkîhta ka parît: Wan au sura uzturuzne akkwan kwail kiashimtu. Jesucristora nîjkulturuzmin Dios kin namtît aizpa sappashina, Dios usparuza watsat mîlnanapa. 23 Cristo atchasmin, Diosne paiña îninmu au uzkin îninta, aumîza miza uzna ananapa. Aune sun kwail kiamîztamakpas, au Jesucristora tîrizarachi akwa, au kwail kiarît aizpa watkultanana. Kwiztane Diosne aumîza us kin namta aizpa piankamninnara, Jesucristora nîjkulanakima. 24 Sun Dios îninta aizpa, mi piankamninmikanain azi. Sun îninmune awaruza Cristora piankamninnamtu. Awa Cristora nîjkularawane, Diosne usparuza sapnat kit uspa kwail kiarît aizpa kaninnanazi. 25 Mane aune Cristora nîjkultumakpas. Katmizna Diosne sun îninmu aizpa au akwa pailninta. Mane aune sun îninmu aizpa mîamtuchimakpas. 26 U Jesucristora nîjkulara akwa, Diosne uruza paiña kwal namninnara. 27 Diosne paiña Izpul akwa Cristora nîjkulturuza paiña kwal namninnara, Cristo uztakanain uzanapa. 28 Diosne wan Cristora nîjkultaruza sapnamtu. Usne Judío awaruzakas Judío chi awaruzakas, kal kimtuzakas înintuzakas, ampuruzakas ashamparuzakas maizninnamtu, paiña kwal namninnanapa. 29 Sunkanane Cristora nîjkulturuzne Abrahampa kwal namat kit Dios usparuza kin namtît aizpa sappanazi.
1 Nane uruza ma pitchin kamtashinamtus. Wisha awane us mîj aizpa pînkîhta pamtu, paiña painkultuzakas, paiña pashuruzakas us mîj aizpa papihsh ira payu pa kianapa. Papihsh paiña pashpara chiwazha mîlashimtune, papihshne ussa mîlashimtu aizpa pînkîhta pamtus, mamaz payura pa kianapa. Pashpa kawiasmin, usne chinkas pachi, us paiña kwal akwa wan kiwaintuzkana kal kimtu akwa. 2 Pashpa kawimtuasmin, paiña papihshpa kurunmuruzkas su kwira kimturuzkas pashpara izamtu, pashpa îlapa parînkima. Uspane pashpara sun payu papihsh ussa kin namtît aizpa mîlananazi. 3 Sunkana aukas uztamakpas. Cristora nîjkultachasmin, aune au sukin izpultuz kamtarît aizpa mîat kit an su awa uztakanain uztamakpas. 4 Akkwan payu pailtawane, Diosne paiña painkulta au surakima îninta, maza ashampa sun pashpa mîlnapa. Sun pashpa kawimtuasmin, uskas Moisés îninta aizpa mît kit Judío awakanain uzta. 5 Cristone aumîza, Moisés înintu aizpa mîmturuza, chîhtnazi. Cristo aumîza chîhtnarawane, Diosne aumîza sapnat kit paiña kwal namninnara. 6 Mane aune Diospa pashpakanain makpas, Dios paiña painkulpa Sînam Izpulta aukasa chanpa îninta akwa. Sînam Izpul au kaijchukin nap uztu akwa, aune Taitta Diosta paikwashinamakpas. 7 Dios aumîza paiña pashpa namninnarît akwa, aune Moisés înintu aizpa mîmtuchi makpas. Katmizna aune Dios kin namtît aizpa pa kinamakpas.
Pablone nîjkulturuza mintu
8 Diosta piankamarachasmin, une wan tuntu tî awakana sarîtta wakpuj wainñara. Une usparuza ishkuat kit uspa îninta aizpa kiarît. Sun izpultuzne watcha Dios chi. 9 Mane une Diosta piankamamtu. Mamaz tuntu kaiznash: Diosne uruza akwanari, ussa piankamanapa. Katmizna une apas suwara izpultuza kailninman. Mamasa uspa kiwainmuruz namninman. Uspane uruza kiwainasachi, tînta chi akwa. Sun kwail saliztuza, ¿mamasa kaiyiznakiwas? ¿Uspa kaizara aizpa mamasa mîiznakiwas? Sunkana kiman. 10 Une Judío awaruzpa pishta payu izna kaiyamîztu. Mish aizpa usparuzpa pishta izamîztu. Año aizpa an akkwan pishta izamtu. 11 Nane u akwa kwisha tayaltus, u na kamtarît aizpa mîamtuchi akwa. Nane uruza kiwainnamti mintau. Suasne kiwaintachish. 12 Diosta piantuz, mîzhain. Nane uruza akwanamtus, na uztukanain uzanapa. Nane Moisés îninta aizpa chîhkarau. Ñamin u Moisés îninta aizpa mîarachi akwa, makas us kaizta aizpa kanpaman. Na ñamin ukasa chamtuasmin, une nawa wat kiara. 13 An ñamin u uzkin Dios watsal pit kainana îrîkane, nane ishtu uztuarau. Naiztuasmin, nane najtît kit Dios watsal pit uruza kainanarau. 14 Nane u uzkin naiztau. Na ishtukas, une nawa chîhkashitchi. Nawa kwail kaizarachi. Kancha une nawa wat sappara, chiyuras ángelta sapparakana. Une nawa wat sappara, Jesucristora sapparakanain. 15 Ñamin na ukasa uztuasmin, une nawa wat sappat kit wat mazi. ¿Sun mainñarîntumakkiwas? Nane u na akwa kiashit aizpa pianish. Nawa kwisha pashiamtu akwa, une nawa tînta kiwainashira, wan mîlanarakima, u kasu ukkat kit nawa mîlanarakima. 16 Na uruza watcha kaiznarane, ¿Nane u alizmika namtînash? ¿U nawa pashiamanpa maizaramakkiwas? 17 Sun Moisés kaizta aizpa kamtamturuzne u akwa wat kiashimtu, u uspa kamtamtu aizpa mîanapa, u usparuza kwizpa kanpaanapa. Uspa kiamtu aizpa wat chi. Uspane uruza ka kaiznamtu: “Pablora kanpaman,” kizamtu, u usparuza kanpaanapa. Sunkana kiashimtu. 18 Awa uruza wat kiwainashimtune, uspane uruza pailta payukima wat kiashina. Na ukasa uztuchikas, uspane uruza sunkana wat kiarawa. 19 Une ap pashparuzkana mai. Mîzhain. Nane mamasa u akwa naizmîzish. Ashampa pashpa ishtukana, naiztukana nane u akwa naizmîzish, u Cristora wat nîjkulanakima, u Cristora wat piankamanakima. 20 Ma payu nane u uzkin uzshinas, na uruza tînta pilchanamanpa. Mane miza uruza kurunna pianchish, Cristo kaizta aizpa mîanapa.
Paas ashampa: Agarkas Sarakas
21 U Moisés îninta aizpa izarakas, une us parît aizpa kiamtuchi. ¡Sînkazha! ¿Moisés kaizta aizpa piankammuskiwas? Une us kaizta aizpa mîamtuchi. 22 Dios pînkîhta Abrahampa ka parît: Abrahamne paas painkul mîjazi. Paiña ashampawa kiwainmumikane maza painkul mîlzi. An ashampane Agar munazi. Abrahampa ashampakas, maza painkul mîlzi. Paiña ñancha ashampane Sara munara. Usne kiwainmumika chi azi. 23 Abrahamne Sarawa kiwainmumikane pîja waninta. Suasne Agarne wan ashampakanain painkul mîlta. Sarane kiwainmumika chi azi. Pashpa mîltachikas, Diosne Abrahamtakas Sararakas painkul mîlnapa kin namta. Kwiztane Abrahamne Sarara pîja waninta, maza painkul mîlnapa, Dios kin namtît akwa. 24 Nane maza kwinta uruza an paas ashampawa kainanamtus, na kamtamtu aizpa piankamanapa. An kwinta Abrahampa painkultuzpa aumîza kamtanamtus. Diosne Abrahamta chiwazha kin namta. Kwiztane uskas chiwazha Moisésta kin namta. An paas ashampane chiwazha namtumikakanain mai. Maza ashampane, Agarne, Dios kin namtît aizpa Sinaí înkaltakana i. Agar pashpa mîltawane, paiña painkulne akkuhshkanain kiwainmumika namtît. Sunkana Moisés îninta aizpa sapturuzne kiwainmutuzkana namat kit Moisés îninta aizpa kiarawa. 25 Sinaí Înkalne Arabia sura uztu. Agarne sun Sinaí înkalkanakas au sukin Jerusalén pîpulukanakas i. Sun Agarkas an sukin pîpulura uztuzkas kwainmuruzkana uzamtu, Moisés îninta aizpa kiarawa akwa. 26 Mamaztuzne, Sarakanane, chiyura, mamaz Diospa Jerusalén pîpulura, uzanazi. Uspane kiwainmuchiruz mai, Moisés kaizta aizpa mîashimtuchi akwa. Aune, Jesucristora nîjkulturuzne, sun chiyu pîpulura uzashina. An Jerusalén pîpulune au akkuhshkana i. 27 Diosne paina pit pînkîhta ka panintît: “Pashpa kawisachimika, watsal kulnaka. Pîja ishtuchimika, tînta kwiat kit wat kulnaka. Ampu kwairît ashampane ashampa ampu mîjmikakin an akkwan pashpa kawirananazi.” (Na kamtanamtu aizpa piankamtain: Ñamin Diosta piantuzne akkwan wiantachi. Kwiztane uspane akkwan wiantanazi. Ñamin Moisés îninta aizpa mîarîttuzne akkwan wiantarît. Kwiztane uspane akkwan wianmanazi.) 28 Diosta piantuz, mîzhain. Aune Isaackana Abrahampa painkulkana makpas. Diosne Abrahamta maza painkul mîjanpa kin namta. Sunkana Diosne aumîza kin namnara, paiña kwal namanapa. 29 Abrahamne maza painkul mîjara. Sun Ismaelne wan pashpakanain kawirara. Sunkana Diosne Abrahamta painkul mîlnapa kin nam kit Diospa Izpulne ussa kiwainta, Isaac mîlnapa. Uspa paas kawimtuasmin, Ismaelne Isaacta waya puzat kit namkultuara. Makas sun Moisés îninta aizpa kimturuzne Diosta piantuza waya puznamtu. 30 Une Dios pînkîhta parît aizpa pian. Sarane Abrahamta mamaz kiz kit ka parît: “Kiwainmumikasha paiña painkulkasa kwairi, mamaz sura înpa. Suasne kiwainmumikawa painkulne kiwainmuchimikawa painkulpa su pa kimanazi.” Sunkana aune sun Judío awa nil chi kamtaamtu aizpa mîkisachimakpas. 31 Diosta piantuz, Dios kin namtît aizpa pa kimtuz, mîzhain. Aune sun ashampa kiwainmumikawa pashpakanachi makpas. Aune Sarakana, kiwainmuchikana makpas. Au ussa nîjkulamtu akwa, Diosne aumîza chîhtninnamtu, Moisés îninta aizpa mîamanpa.
Cristone aumîza chîhtnara
1 Cristone aumîza chîhtnara, Moisés parît aizpa kiamanpa, sîptît awakanain uzamanpa. Diosne aumîza sapnat kit paiña kwal namninnarît, chîhtît awakanain uzanapa. Katmizna aune Moisés îninta aizpa mîmturuzkanain kimtuchimakpas. Aune mamasa kiwainmuruzkanain namnintuchimakpas. 2 Nane Pablo mun ish. Katmizna mîzhain. Diosne Judío señal uspa ñara samturuza, circuncisión kimtuza, sapmananazi, uspa kwail kiarît aizpa kaarînpa. Cristone sunkana kain minñamturuza kiwainasachi. 3 Mane mamasa uruza kaiznat kit kurunamtus. Judío señal uspa ñara samturuzne, circuncisión kimturuzne, wan chiwal Moisés înintît aizpa kiarawa. 4 Une Cristora piankamshitchi mai. Diosne Moisés înintu aizpa kiashimturuza sapmananazi, uspa kwail kiarît aizpa wat kulnanapa. Une Cristora chîhkaamtu, Cristo uruza chiwazha wat mîlamtu aizpa sapparachi akwa. 5 Aune pailta payu ussa tîriztumakpas, Dios aumîza wan chiwal maiznashimtu akwa. Usne aumîza sapnat kit au kwail kiarît aizpa wat kulnamtu, paiña Sînam Izpul Cristora nîjkulturuza kiwainanamtu akwa. 6 Awa Judíowa señal uspa ñara kiamtukas, Diosne sun akwa usparuza watsat mîlnamanazi. Kawarain awa Judíowa señal uspa ñara kiamtukine, Diosne sun akwa watsat mîlmanazi. Mînpazha sun señal samtune, circuncisión kimtune, palichi. Kainsîh. Jesucristora nîjkulturuzmin Dios kaizta aizpa kiashit kit Diosta piantuza pashinanazi. 7 Uruzne Dios watsal miwara chaara, Dios kaiztu aizpa mîamtu akwa. ¿Chima kiarîzi? ¿Mînmika uruza mamaz pit kamtanara, Dios miwara îamanpa, watcha mîamanpa? 8 Dios uruza akwanarakas, Diosne uruza akwanarachi, mamaz pit mîanapa, mamaz miwara îanapa. 9 “Pitchin kiña wintane, wan sulmu,” kizmumamin. Sunkana kaiztui: Maza kwail pit kamtamtune, akkwanne sun kwail kamtamtu aizpa sappanazi. Kwiztane wan kwail namarînazi. 10 Dios uruzakas nawakas Cristora wanmakninnara akwa, nane u akwa wat mintus, u sun kwail kamtamtu aizpa kanpaamanpa. Une Cristora nîjkulamîznazi. Diosne uruza azhappamturuza wan ñan pit kamtamturuza ilnanazi. 11 Diosta pianturuz, mîzhain. Na uruza Cristora nîjkulturuza Judío awa señal u ñara sarawa kurunnamtuchikas, Judío awaruzne nawa naizninamtu. Diosne Judío awawa señal uspa ñara samturuza sapnamanazi, usparuza wat kulnanapa. Na Cristo kurishta au kwail akwa irît kamtanamtu akwa, Judío awaruzne nakasa aliz kularît. 12 Mazantuzne u uzkin uruza azhappamtu, u Judío awa señal u ñara tîtnakima. Uspa usparuzpain akkwan tîtshiamtune, uspane usparuzpa ñara akkwan pijikima tîttashina. 13 Diosne uruza, Diosta piantuza, paiña kwal namninnat kit uruza akwanara, Dios pashimtu aizpa kianapa. Dios uruza maiznat kit akwanara, Moisés îninta kaizpa mîamanpa. U Moisés kaizta aizpa kiamtuchikas, une chiwazha kwail kiman. Kancha une wantuza pashinarawa. Wantuza kiwainnarawa. 14 Wan Dios îninta aizpa kishimtumikane Dios pînkîhta parît aizpa mîarawa. Ka parît: “Uruzpain pashinamtukanain wantuza pashinarawa.” Une sun maza pitmin kiarawa. 15 Une aliz kalpa waya kishimturuzkanain uzamtu. Nane u waya kishimturuzakas, pilchapuzamturuzakas kurunnamtus, aliz kulaamanpa. Cristora piantuz usparuzpain waya kiamtune, aliz kulat kit wan izmuruz kaamtu. Sunkana Cristora piantuzne wanmakkasachi.
Dios Sînam Izpulne aumîza wat uznapa kurunamtu
16 Nane sun pit kaiznamtus. Dios Izpul uruza kurunnamtu aizpa mîazhaka. Us kuruntu aizpa kimtumikane paiña kwail kishimanazi, watsal uznapa. 17 Kwail kishimtumikane Dios Izpul kuruntu aizpa mîshitchi. Dios Izpul kuruntu aizpa mîmtumikane kwail kishitchi. Masetne kwail kishimtu mintumakpas. Masetne kwail kimanas mintumakpas. Dios Izpul uruza înintane, suasne une u kwail pashiamtu aizpa kiamanazi. 18 Dios Izpul kuruntu aizpa mîmtumikane Moisés îninta aizpa mînachi. Diosne suntuza sapnamtu. 19 Wan awane awa kwail kiamtu aizpa pianmai. Sunkana kwail awane uzamtu. Awane mamazpa ashampakas mamazpa ampukas nakamtu. Awane uspa ñakasa kwail kiamtu. Awane awa iztakin nilchi kaizat kit kwail kiamtu, mîtsalchin. 20 Awane tî awakanain sarîtkin wakpuj wanñamtu. Awane awaruza chimpu kiamtu. Awane usparuzpain aliz kulamtu. Awane usparuzpain waya kiamtu. Awane patna pashiamtu. Awane mamaztuza tînta kwianamtu, aliz akwa. Awa izmuruza wanmakninnamtuchi. Awane usparuza an katsa namat kit mamazpa minñamtuchi. Kwail kamtam mîamtuzne paimpa wanmakkamtu. 21 Awane mamaz mîj aizpa pashiamtu. Awane pirîtmin chashiamtu. Awane wan pishtara izashimtu, akkwan kumira kuanapa. Awane an kwailkin an akkwan kwail kiamtu. Na uruza an ñamin kurunnarakas, nane mamasa uruza ka kaiz kit kurunnarau: sunkana kwail kimturuzne Diosta piankamamanazi. Dios usparuza îninnamtuchi akwa, Dioskasa mizurainkas chiyura uzamanazi. 22 Kainchas Dios Izpulne Diosta piantuza kiwainamtu, mamaztuza pashinanapa, wat uzanapa, kalpain uzanapa, awaruza aliz kulamanpa, wantuza wat kianapa, awa uruza wat nîjkulanapa, 23 mamaztuza wat kinat kit watsal paranapa, uspa kwail kiashimtu aizpa kiamanpa. Sunkana kirain. Mînminkas aumîza “sun kiman” kizamanazi. Diosne Dios Izpul kuruntu aizpa kimturuza mizurainkas ilnamanazi. 24 Jesucristora piantuzne uspa kwail kiashimtu aizpa chîhkaarît, Jesús uspa kwail akwa irît akwa. Mane uspane kwail kiashit aizpa kiashimtuchi, Dios kaiztu aizpa mîamtu akwa. 25 Dios Izpul aumîza uzninnamtu akwa, aune Dios Izpul kuruntu aizpa mîarawamakpas, uskasa chaanapa. 26 Aune aumîza mamazkin an katsa namamasan. Aune mamaztuza aliz kulninnamasan. Aune mamaz mîj aizpa pashiamasan.
Uruzpain kiwaintain
1 Diosta piantuz, mîzhain. Mamaz Diosta pianmika kwail kirîtne, sun kwailpa pianmikane, Diospa Izpul kuruntu aizpa pianmikane, kwail kitmikasha kiwainnapa îtpa, us kwail kimtu aizpa chîhkanpa. Ussa kuruntuasmin, watsal paratpa, mamasa wat uznapa. Uruzpa izizanaka, sunkana kwail kiamanpa. 2 Une naizturuzakas tayalturuzakas kiwainnanaka. Sunkana kitne, une Cristo îninta aizpa mîanazi. 3 Mînpazha mamazkin an tîntamika ish mintumikane ñanta paramtu, watcha kaiztuchi akwa. 4 Pakaish pakaish paiña kal kimtu aizpa mîmarawa. ¿Nane ap kal wat kimtukish? Wat kal kimtumikane paiña kal watsal kirînazi, paiña kal watmin pailtît akwa. Up kal pailtawane, nune ap kal paiña kalkin anza wari minmun. 5 Pailta awaruzne uspa kalmin wat kiarawa. 6 Dios pit kammuruzne uspa kamtammikasha uspa mîj aizpa ussa mîlaarawa. 7 “Nune Diosta pîrail aptu” minman, Dios u minñamtu aizpa pian akwa. Mînminkas Diosta pîrail apsachi. Mînmika chiwazha pippa nanta wamtune, usne paktu payura sun pippakana sapnazi. Sunkana piankamtain: Diosne kwail kimtuza ilnanazi. Ukas wat kimtuza chiwazha wat mîlananazi. 8 An sura uztuasmin, kwail kimtumikane wan karînazi; pailta payukima naiznazi. Dios Izpul kuruntu aizpa mîmtumikane au sukin wat kimtumikakana i. Usne pailta payukima chiyura uznazi. 9 Pailta payukima awaruza wat kiwizsan, kwaizkultachin. Wat kimtumikane Dios nara payura Dios ussa mîlashimtu aizpa sapnazi. 10 Katmizna, an sura uztuasmin, aune pailta payukima pailtaruza wat kiarawamakpas. Watcha, aune Diosta piantuzakas wat kiarawamakpas, uspa Jesucristora nîjkulamtu akwa.
Pablone minpa pit kaiznamtu
11 Na uruza pînkîhta pamtu aizpa iztain. Akkis ap chihtîkasain sun katsa pit pamtus. 12 Mînpazha kamtamturuzne Judío awa señal, u circuncisión, uruza saninnashimtu, awa usparuzpain wat minñanapa, circuncisión kiarît akwa. Sun kamtamtuz awaruza Cristora nîjkularawa kainanamtukas, uspane awaruza îninnamtu, Judío awa señal kianapa, Dios usparuza watsat mîlnanapa. Katmizna uspane sun señal, circuncisión, uruza saninnashimtu, Cristo akwa naizamanpa. 13 Sun Judío awa señal ñara sashimturuzne wan Moisés îninta aizpa mizurainkas kiamanazi. Uspane uruza Judío awa señal sananapa, circuncisión kianapa, îninnashimtu. Suasne uspane mamaztuza u Judío awa señal u ñara sarîtta kainanashina. Sun akwa uspa kal kiarît akwa usparuzpain wat minñazi. 14 Uspakana kimanash. Apa uztuasmin, nane au Anpat Jesucristowa wat mintus, us kurishta irît akwa. Cristo na akwa irît akwa, nane Diosta pianchiruz kiamtu aizpa kishitchish. Sunkana Cristone nawa pailta payu kiwaintu, na Dios pashit aizpa kinpa. An sukis awa akkwan tuntu kwail kiamtukas, nane uspa kwailkana kimtuchish. 15 Diosne Judío awawa señal sarîttuza sapnamanazi. Kawarain Dios Judío awawa señal uspa ñara samtuchiruza sapnamanazi. Sun circuncisión señal sarît aizpa palichi; kainsîh. Diosne Jesucristora piankamturuza sapnat kit masas awakanain namninnanazi. 16 Wan masas awakanain namtîttuzne na uruza kuruntu aizpa mîarawa, nil uzanapa. Suasne Diosne uruza kiwainanazi, kalpain uzanapa. Sunkana wan Diospa kwal uzanazi. 17 Katmizna, makis nawa azhapman. Makis awakasa pilchapuztuchish. Na Cristora kanpara akwa, awane nawa naizninñara. Sun tîttapil nara aizpa kasachi. Nane Dios kiwainmumika ish. 18 Diosta piantuz, mîzhain. Nane Diosta paikumtus, au Anpat Jesucristo uruza wat kiwainnanapa. Pailti.
Kakishapu kiztu
1 Nane Pablo mun ish. Diosne nawa narît, Jesucristowa înintamika namnapa. Nane an pînkîh uruza panamtus, Efeso pîpulukin uzturuza, Diosta wakpuj wainturuza, Jesucristora nîjkulturuza. 2 Nane au Taitta Diostakas au Anpat Jesucristorakas paikumtus, uruza watsal kiwainnanapa, uruza kalpain uzninnanapa.
Diosne Cristo akwa aumîza kiwainamtu
3 Aune “Dios kwisha wari” kaizmîrachain. Au wat Anpat Jesucristorakas paiña Taitta Diostakas wakpuj waintumakpas. Au Cristora wanmakkarît akwa, Diosne chiyuras pailta payura aumîza kwisha akkwan piji wat kiwainnamtu. 4 Dios an su sarachasmin, usne aumîza me nanarît, Cristora wanmakkanapa, us iztakin nil uzanapa. Sunkana usne aumîza ainkihtas sînam sanarît. 5 Dios aumîza pashinamtu akwa, usne ñamin au akwa min kit aumîza nanara, paiña kwalkanain namnanapa. Diosne Jesucristo akwa sun pashimtu aizpa min kit sun kira. 6 Dios aumîza pashinat kit aumîza wat kiwainarît akwa, aune “Dios kwisha wari” kizmîrachain. Dios aumîza wat kishit akwa, usne paiña pashimtu painkulta, Jesucristora, au akwa mîlashira. 7 Cristo irîtne, paiña aimpi puzta. Paiña aimpi akwa Diosne aumîza kwailtas chîht kit au kwail kiarît aizpa sînam sanarît. Aumîza pashinamtu akwa, usne sunkana aumîza kiwainnara. 8 Dios pailta payukima aumîza an wat kiwainashimtu akwa, usne aumîza anza wat mînninat kit aumîza an akkwan piankamninnara. 9 Diosne awa ñamin piankamtachi aizpakas us kishimtu aizpakas aumîza piankamninnara. Diosne Cristo akwa sun wan kininta. 10 Diosne wat urarain us kishit aizpa wan kirînazi. Uskas Cristo akwa wan chiyura pura aizpakas au su pura aizpakas wanmakninnanazi, Cristo wan sarît aizpa îninnanapa. 11 Diosne ñamin aumîza nanat kit aumîza Cristora wanmakninnara, us mîlashimtu aizpa sappat kit pa kianapa. Diosne us kishimtu aizpa min kit kimtu. 12 Dios wan sunkana kirît akwa, aune “Dios kwisha wari,” kizwizsan. Aune an ñamin Cristora tîriztamakpas. 13 U Dios watcha pit mîarawane, Dios uruza watsat mîlnashimtu mîarawane, une Cristora nîjkulara. Suasne u Cristora wanmakninnamtu akwa, Diosne uruza paiña kwal namninara, Dioskasa uzanapa. Cristora nîjkularawane, Diosne uruza paiña Sînam Izpulta, kin namtîtmikasha, îninta, ukasa uznapa. 14 Diospa Sînam Izpul aukasa uztu akwa, aune Dios aumîza mîlan namnarît aizpa sappiznapas. Diosne ussa piantuza kiwainanazi, kwail kiamtu awakanain uzamanpa. Uspane ka kizanazi: “Dios kwisha wari; Dios katsa i.”
Pablone an pînkîh sapmuruz akwa Diosta paikumtu
15 Katmizna, Dios sun wan kirît akwa, nane u akwa Diosta paikumtus. U Anpat Jesústa nîjkulamtuasmin, ukas Diosta piantuza panashimtu. Nane sunpa u akwa mîrau. 16 Nane Diosta pailta payukima u akwa aishtaish kiztus. Diosta paikukane, 17 nane au watsal Taitta Diostakas au Anpat Jesucristorakas akumtus, paiña Izpul uruza kiwainnanapa. Suasne usne uruza an watcha pit wat mîninnanazi. An watcha Diospa mîamtuasmin, une Diosta an piankamanazi. 18 Paikumtus, Dios watcha pit uruza îninta aizpa mîninnanapa. Au sukin uzamtuasmin, aune tîriztumakpas, us mîlan namtarît aizpa sappana. Diosne uruza akwanara, uruza watsat mîlnana. 19 Au Cristora nîjkulamtu akwa, Diosne aumîza tînta kiwainnanazi. 20 Dioskas wan awaruza anza tînta i annara, Cristora irîttas kuhsninta akwa. Diosne ussa chiyura paiña numal chiyura uzninta, wanta îninnanapa. 21 Cristone chiyura wan tîntaruza îninnamtu, us uspakin anza tînta akwa. Ma payu wantuza îninnamtukas, mamaz payurakas wanta îninnanazi. 22 Diosne Cristora wan îninnanapa chîhkat kit ussa paiña mikwara namninta, Diosta piantuza îninnanapa. 23 Cristora piantuzne uskasa wanmakkat kit Cristo pashimtu aizpa kianazi. Cristone paiña wanmakmuruza, we mîjtuza mîlanamtu, chinkas wenamanpa. Usne chiwazha purakin uz kit wanta îninnamtu.
Diosne awaruza masas awakanain namninnamtu
1 Ñamin Diosta piankamarachi akwa, Dios kurunta aizpa kiarachi akwa, u kwail kiarît akwa, une Dios uzkin nappasachi. 2 Ñamin apain uzarasmin, une an sukis awakanain kwail kiarît. Une Diablora mîat kit us kaizta aizpa kiarît. An kwailmikane Diosta mîmtuchiruza îninnamtu. 3 Ñamin aune an kwail awaruzkana uztamakpas. Aune chiwazha kwail mintît aizpa kimtumanash. Aune chiwazha minta aizpa mintumanash. Aune wan awakanain kawimtumanash. Katmizna awa kwail kiarît akwa, Diosne wantuza ilna namnara. 4 Sunkana Dios aumîza kiwainashimtu akwa, aumîza kwisha pashinamtu akwa, usne aumîza wat kin namtu, pailtachin. 5 Diosta mîashitchi akwa, aune Dios uzkin napsachimakpas, au kwail kiarît akwa. Usne aumîza Cristokasa wanmakninnara, chiyura uzanapa. Dios uruza kwisha pashinamtu akwa, Dios uruza watsat mîlnanara. 6 Au Diosta nîjkulara akwa, Diosne aumîza uskasa uzninnara, chiyura Jesucristokasa îninnanapa. 7 Diosne sunkanain kirît, wan awa mamaz payura yawa Dios aumîza pashinamtu piankamanapa. Mînminkas Dios aumîza an wat kirît aizpa wiansachi, Jesucristo aumîza kiwainamtu akwa. 8 U Jesucristora nîjkulara akwa, Diosne uruza wat kiwainnat kit watsat mîlnanara. Mînminkas ussain watsat mîlsachi, Dios kain mîlam namta akwa, awaruza watsat mîlnanapa. 9 Awa uspa akwa kal kiamtukas, uspane usparuzain maizasachi, Dios usparuza watsat mîlnanapa. Diosmin aumîza maiznat kit watsat mîlnashina. Suasne mînminkas uspain wan kiarît minñamanazi. 10 Au Jesucristokasa wanmaktîttakima, Diosne aumîza masas awakanain namninnara, us ñamin wat kal mintît aizpa kianapa.
Aune Cristo akwa wanmakkamtumakpas
11 Cristora piankamtachasmin, u miza uzarît mintain. Judío awaruzne uruza, “Judío chiruza, narîtchiruza” munninnamtu, u Diosta pianchi akwa. Sun Judío awane usparuzain “ña tîtmuruz” munninnara, uspa ampuruzpa ña tîtnamtu akwa, uspa pariya îninnamtu kianapa. Ñamin une Judío awa uzarîtkana uzarachi. 12 Na kainammtu aizpa mintain. Ñamin une mîn Cristo azi piankamarachi. U Judío awa kwal chi akwa, aune uruzpa mamaz awakanain mintumanash. Dios Judío awaruza paiña kwal namninnarakas, Diosne uruza paiña kwal namninnarachi. U Judío awa uzarakin kashain uzarakas, Diosne uruza chinkas kin namtachi. An sukin uzarasmin, une an wat Diosta tîrizarachi, uruza wat kinanapa. Sun payuin une Diosta pianchi. 13 Sunkana mane Cristo au akwa irît akwa, Cristo Jesúsne Diosta pianchiruza wanmakninnat kit maza kwal ukasa namninnara, Dioskasa uzanapa. 14 Cristone aumîza kalpain uzninnamtu. Diosne Judío awaruzakas, uruza, Judío awa chiruzakas, maza kwalkanain wanmakninnara, izmuruz namanapa. Cristo kurishta irît akwa, usne au aliz kularît aizpakas uspa aliz kulalarît aizpakas mainninnarît, auruzpain wat kulninnanapa. 15 Cristone wan Moisés Judío awaruza înintît aizpa pailninta, sun înim awaruza makima îninnamanpa. Sunkanain Cristone, Judío awakasakas au Judío chi awakasakas masas kwalkanain namninnara, uskasa wanmakninnanapa. Sun akwa usne aliztuza kalpain uzninnara. 16 Cristo kurishta irît akwa, usne uruzakas aumîzakas wanmakninnara, maza kwalkanain namanapa, auruzpain waya kiamanpa. Cristo irît akwa, usne usparuza Diosta akwanara, Dioskasa kalpain uzanapa. 17 Cristone au sura at kit aumîza sun watsal pit Diosta pianchiruzakas uruzakas, Dios îninta aizpa sapmuruzakas kamtanara, Judío awaruzkas u Judío chi awaruzkas maza kwalkanain kalpain uzanapa. 18 Cristo aumîza wanmakninara akwa, Judío awakas Judío chi awakas Taitta Dios iztakin nappashina. Au Diosta paikuamtuasmin, paiña Sînam Izpulne aumîza us iztakin napninnashina. 19 Sun akwa manaz, u Judío awa chiruzne mamaz suras awakanachi mai. An sura uztuasmin, ukas Diosta piankamashina. Mane une au Diosta piantuzkasa wanmakkat kit Diospa kwalkanain namarît. 20 Nane maza kwinta uruza kamtananash, na kaizta aizpa an wat piankamanapa. Dios uruza paiña kwal namninnamtuasmin, usne ukasa paiña yalkana samtu. Yalpamikane saktîkas, îrîkas, chaklakas, wan tamtu. Yalpamikane mamaztuza akwanamtu, an yal sawainnapa. Kawarain akkwan awane Diospa kamtanara. Watcha kamtamtuasmin, au înintîttuzkas Dios pit kainammtuzkas uruza kiwainnaramakpas, Jesústa nîjkulanapa. Sun akwa Jesucristone au Anpat namtît. 21 Cristone paiña kwaltuza, wan chiwal sam sînnintu, Diospa yalkanain saninnakima. Suane aune Diosta wakpuj wainñashimtumakpas, au Diosta wanmakninnara akwa. 22 U Cristokasa wanmakkarît akwa, sunkanain Cristone aumîzakas mamaz nîjkulturuzakas wanmakninnamtu. Diosne aumîza Dios uzmukin namninnamtu. Suane Diosne paiña Izpul akwa aukasa uztu.
Pablone Dios watsal pit Judío chi awaruza kainanamtu
1 Dios u Judío chi awaruzakas Judío awaruzakas wanmakninnat kit uruza izmuruz namninnarît akwa, nane Diosta paikumtus. Nane Pablo ish. Na uruza wat kiwainamtu akwa, nane Cristo Jesúspa kajchira sîptîtmika ish, Judío chi awaruza Dios pit kamtanamtu akwa. 2 Une Dios nawa an kal chîhkara piannatpa. Diosne nawa wat pashit kit nawa paiña înintamika namninta, uruza kiwainanapa. 3 Diosne ñamin awa piankamtachi aizpa nawa piankamninta. Ñamin nane sunpa uruza panarau. 4 Ñamin awane Dios kishit aizpa wan piankamasachi. U mamin na parît aizpa izarane, une Dios nawa piankamnintît aizpa piankamashina. Mane Cristone Dios minta aizpa kimtui. 5 Ñamin mînminkas Dios minta aizpa piankamarachi. Mane Diosne paiña Izpul akwa paiña înintuzakas paiña pit kainammtuzakas awa piankamtachi aizpa mîninnara. 6 Mane uruza awa piankamarachi aizpa kamtananash. Diosne paiña watsal pit akwa wan tuntu awaruza watsat mîlnanazi. Diosne Judío chi awaruzakas Judío awaruzakas kawarain sapnanazi. Diosne wantuza wat kiwainnanazi. Diosne usparuza maza kwalkanain namnanazi. Judío awakas Judío chi awaruzkas Dios mîlam namta aizpa kawarain sappanazi. Cristo Jesúsne usparuza Dios kin namtît aizpa kinazi. 7 Dios nawa narît akwa, Diosne nawa paiña kiwainmumika namnin kit nawa tînta kiwainta, an watsal pit kainanapa. 8 Wan Dios piantuzkin nane anza we pianmika ish. Na an we piankas, Diosne nawa wat kit kit sun kal nawa chîhkara, Judío chi awaruza Dios watsal pit kainanapa, Cristo awaruza kwisha wat kinamtu piankamanapa. 9 Dios ap kal nawa chîhkarît akwa, nane wan awaruza Dios ñamin piankamnintachi aizpa nil piankamninnamtus. Suasne Diosne paiña kal kinazi, wan awa sun kal piankamanapa. Wan su sarachasmin, Diosne wan kishit aizpa awaruza piankamninnarachi. 10 Mane Diosne Judío awaruzakas Judío chi awaruzakas maza kwalkanain namninnat kit wanmakninnara, wan chiyura tînta ángeltuz Dios wan pian piankamanapa. Diosne ussa piantuza an pit chîhkanara, sunpa usparuza kamtananapa. 11 Dios an ñamin kishit aizpa mintakima, Diosne au Jesucristo akwa, au Anpat akwa, minta aizpa kira. 12 Au Cristokasa wanmakkamtu akwa, Cristora nîjkulamtu akwa, aune Dios au paikumtu aizpa mîmtu pianmakpas. Aune Diosta îshinamakpas, ishkwatchin. 13 Katmizna Diosta paikumtus, u Dios mi chîhkamanpa. Na u akwa naiztukas, nawa mîtsal kiman. Une na akwa watsal kiashina, na Dios pit kamtanarît akwa.
Cristone usparuza pashinamtu
14 Sun akwa, nane Taitta Dios iztakin wakpuj wain kit u akwa paikumtus. 15 Usne wan chiyura puraruzkas wan an sura puraruzkas uzninnara. 16 Dios chiyura akkwan mîlan mîj akwa, nane Diosta paikumtus, uruza sun mîlananapa, paiña Izpul uruza u kaijchukin tînta namninnanapa. 17 U Cristora nîjkulamtu akwa, nane Diosta paikumtus, Cristo u kaijchukin uznapa. Ussa paikumtus, pailta payukima u wan awaruzakas Diostakas pashinanapa. 18 Sunkana u kiamtune, ukas wan Diosta nîjkulturuzkas yawa Cristo uruza pashinamtu piankamanazi. Watcha usne uruza kwisha pashinamtu. 19 Cristo uruza kwisha pashinamtukas, une yawa Dios uruza pashinamtu aizpa we piankamamtu. Diosne uruza maiznashina, u uskanain namanapa, us pashimtu aizpa kianapa. Sunkana u akwa paikumtus. 20 Katmizna, mane, “Dios kwisha wari” kizmîrachain. Us aumîza tînta kiwainamtu akwa, usne wan au paikumtu aizpa kishina. Usne wan au minñamtu aizpa kishina. 21 Aune Diosta wakpuj wainna wanmakmuruzne “Dios kwisha wari” kaizmîrachain. Aune, Cristo Jesústa nîjkulturuzne, makis pailta payukima “Dios kwisha wari” kizmîrachain. Pailti.
Jesústa nîjkulturuzne wanmakkamtu
1 Nane kajchira warîtmika ish, au Anpat nawa paiña kiwainmumika namtît akwa. Katmizna nane uruza, Dios akwanarîttuza, paikwanamtus, Dios uruza kuruntukanain uzanapa. 2 Uruzpain nil mintain. Aune mamaztuzkin an wat makpas minman. Mamaztuza wat kirain. Tîriztuasmin, mamaztuza impara imparain kurunnarain. U awaruza pashinamtu akwa, usparuza tailcharain. 3 Chiwazha wat kirain, wan Diosta piantuzkasa wanmakkanapa. Sînam Izpulne uruza wanmakninnapa kiwainnanazi, mamaztuzkasa kalpain uzanapa. 4 Aune maza kwalkanain wanmakpuspas, maza Sînam Izpulmin aukasa uztu akwa. Diosne uruza akwanarît, ussa tîrizanapa, uruza kishimtu aizpa sapnanakima. 5 Aune maza Anpatmin mîjmakpas. Aune maza kamtammin mîjmakpas, nîjkulna, aumîza watsat mîlnana. Aune maza munmin mîjmakpas, maza Anpatta kanpamtu akwa. 6 Au maza Taitta Diosne wan awaruza sanara. Usne wan wa aizpa îninnamtu. Diosne aumîza, Cristora nîjkulturuza, kiwainashimtu, us kishimtu aizpa kin. 7 Cristone au maza mazain chiwazha pit mîlanashira, us akwa kal kianapa. Sun akwa, aune “Dios kwisha wari” pianmakpas. 8 Katmizna Dios pitta ka parît: “Cristo chiyura kailtawane, usne uskasa akkwan anupparîttuza mîlnara. Sua usne paiña awaruza chiwazha pit kin mîlanara, Cristo kishimtu aizpa kianapa.” 9 Une sun pit “chiyura kailta” parît aizpa piankamashina. Ka piankamtain: an chiyura kailtamikane an ñancha an su pilkin kihshta. 10 An su pil kwashtas kihshtamikakas wan kwash chiyura nuramikakas Cristo i. Usne wan sarîtkin uznazi, wan Dios pashimtu aizpa pailnakima. 11 Usmin mamaz tuntu pit awaruza mîlanara. Anparuza Diospa înintaruz namninnara. Anparuza Dios kaizta aizpa kainammtuz namninnara. Anparuza Dios watsal pit mamaz awaruza kainammtuz namninnara. Anparuza wanmakmukin kurunmuruzkas kamtamtuzkas namninnara. 12 Sunkana paiñaruz akwa kira, wan Diosta piantuza tînta kawininnanapa, wanmakmuruza kiwainnanapa, Cristo kishimtu aizpa kianapa. 13 Sunkana manaz aune maza kwalkanain wanmakiznapas, au Dios Painkulta nîjkulamtu akwa, ussa wat piankamanapa. Sunkana aune Diosta piantuzkanain kawiiznapas, Cristokanain namana. 14 Mane aune kawirachiruzkanain chi manapas. Inkwane ainki kanuara tînta nuppain kit pi mînta kikwara înintu. Nil chi kamtammika mamaztuza kamtanarane, usne inkwakana mamaztuza maizninnamtu. Pîrail kaiztu akwa, usne mamaztuza ñanta kininat kit mamaz miwara îninnamtu. 15 Sunkana mamaztuza pashinamtuasmin, aune Diospa watcha kaiziznapas. An tînta kawirawamakpas, au Cristo înintu aizpa kiana. 16 Usne aumîza wanmakninnat kit aumîza îninnamtu, maza awakanain namanapa. Aune akkwan makpas. Aune Cristowa kwal makpas, mamaztuza wat kiwainnapa, au chiwazha we aizpa sappanapa. Mamaztuza pashinamtuasmin, aune an wat kawiat kit an tînta namanapas.
Cristo akwa mamaz tuntu uztain
17 Sunkana manaz Anpat nawa îninta akwa, nane uruza kaiznat kit tînta kurunnamtus, Diosta pianchiruzkana uzamanpa. Uspa minñamtu aizpa kain i. 18 Uspa minñamtukas, mizurainkas Dios pit piankamasachi. Dios kaizta aizpa mîashimtuchi akwa, uspane nil uzasachi. Dios pashimtu aizpa kiasachi, tîmpa awa akwa. 19 Mîtsal kiamtuchi akwa, uspane chiwazha kwail kiamîztu. Uspane wan tuntu kwail kiashimtu, pailtachin. 20 Une sunkana Cristowa piankamarachi. 21 Cristowa mîarawane, mamaztuz uruza Cristowa kamtarawane, uruzne ussa nîjkulara, uskasa chan. Suasne une Jesúspa watsal pitkas watchakas piankamara. 22 U ñamin uzarakanain uzman. Ñamin kwail kishiamtuasmin, une chiwazha kwail kiashira, u pîrail apparît akwa. 23 Diosne u izpulta maizninnashina, u wat chaanapa. U minñamtu aizpa maizninnashina, Diosta nil wakpuj wainñanapa. 24 Une masas awakanain maiznintain. Diosmin uruza namninashina, wan awa u nil uzamtu izanapa. U watcha piankamarît akwa, une awakasa nil uzanazi, Dios pashimtu aizpa kin. 25 Katmizna anne me pîrail kaizman. Cristo akwa aune maza kwalmin makpas. Katmizna wan Cristora nîjkulturuza watcha kaiztain. 26 Mînpazhara pilchapuztane, aliz kulman, kwail kimanpa. Nashnakima mamazkasa pilchapuzman. Aza ussa wat kulnintain. 27 Sun kitpa, Diablo uruza kwail kininmanpa. 28 Walkumtuatmikane walkwan chîhkat kit wat kal sait kit tînta kal kimîztawa, pial kana kin, chiwazha we mîjtuza mîlanana. 29 Mînainkas kwail pit paraman. Paramtuasmin, an watsal pit pararain, usparuza Diosta an wat piankamna kiwainanapa. Sun wat pit akwa, une Diosta we piantuza kiwainnashina. 30 Kwail pit paramtune, une Diospa Sînam Izpulta tayalninnanazi. Sunkana paraman. Sînam Izpulne uruza nanat kit uruza kwira kin namta, Cristo amtu payukima. Sun payura usne aumîza us tukin watsat mîlnanazi, pailta payukima uskasa uzanapa. 31 Mamaztuza aliz minman. Mamaztuzkasa pilchapuzman. Mamaztuza tînta kwianman. Mamazkasa waya kiman. Mamaz awawa kwail pit paraman. Mînainkas aliz kulman. 32 Mamaz tuntu uztain. Sunkanain mamaztuza wat kiwainnashit kit usparuza pashinarawa. Diosne Cristo akwa uruza wat kulninnara. Usne uskanain uruzpain wat kulninnarawa.
Une Dios pashpakanain uzarawa
1 Dios uruza pashinamtu akwa, uruzne paiña wat pashpakanain uzat kit us pashimtu aizpa kirain. 2 Mamaztuza pashinarain Cristo aumîza pashinarakanain. Cristone ussain chîhkat kit au akwa naiz kit irît, Dios pashit aizpa kinpa. 3 U Diospa kwalkanain uzamtu akwa, ampu mîjmikane mamaz ampukasa pitnachi. Kawarain, ashampa mîjmikane mamaz ashampakasa pitnachi. Chiwazha kwail aizpa kiman. Chiwazha mamaz mîj aizpa nakaman. Diospa kwal asmin, sun kin wat chi. 4 Mîtsal pitkas kizman. Chiwazha kwail pitkas kizman. Kwail ultimal pitkas kizman. Awaruza paramtuasmin, au wat Diosta kwisha wari kiztain. 5 Mamazpa ashampakasakas mamazpa ampukasakas pitmuruzne Dios înintukin uzamanazi. Kwail aizpa kimtuzne Dios înintukin uzamanazi. Chiwazha mamaz mîj aizpa nakashimtuzne Dios înintukin uzamanazi. An akkwan wa aizpa pashimturuzne sunmin minñamtu. Uspane Diospa kwalchi. An awaruzne Dios înintukinkas Cristo înintukinkas mizurainkas uzamanazi. 6 Pîrail apmuruza nîjkulninman. Usparuza mîman. Diosne sun pîrail apmuruza aliz kulnanazi, us kaizta aizpa mîarachi akwa. 7 Sun awakasa chaman. Sun awakasa wanmakman. 8 Ñamin Diosta piankamarachi akwa, une kwailmin kiara. Au Anpatta wanmakkarakima, une paiña kwal namat kit Diospa watcha piankamara. Katmizna une Anpatta nîjkulamîztawa. 9 Diosta piantuzne wat aizpakas nil aizpakas watcha aizpakas kianazi. 10 Au Anpat pashimtu aizpa piankam kit kirain. 11 Diosta pianchiruz kwail kishiakane, uspakasa kwail kin îman. Anza watsal kurunnarawa, uspa kwail kiamtu aizpa piankamanapa, uspa kwail chîhkaanapa, Cristora kaiyanapa. 12 Nane puintain uspa kwail kiamtu aizpa parashitchish, usne nawa kwisha mîtsal kininamtu akwa. 13 Cristora nîjkulturuz nil uzakane, suasne kwail kimturuzne uspa kwail kiamtu piankamanazi. 14 Sun akwa awane uspa kwail kiamtu piankamanazi. Mazane ka kaizta: “U Cristora pianchiruz mîrain. Diosta kailtain. Cristone uruza watcha piankamninnanazi.” 15 Katmizna, uzamtuasmin, wat chaat kit nil uztain. We piantuzkana uzman. Dios wat piantuzkana uztain. 16 Pailta payukima wat kirain, kwail awa uzat kit kwail kiashimtu akwa. 17 Katmizna tîmpa awakana uzman. Au Anpat pashimtu aizpa piankamat kit kirain, ussa wat kulna. 18 Katmizna chappi tain piwal kuman. Pîna pirîtne, une uruzpain kwail kiarînazi, wan karînkima. Anza watsal Diosta paikwatpa, paiña Sînam Izpul uruza îninnanapa. 19 Diosta wakpuj waintuasmin, salmoskas Diospa kantakas kanta kirain. Salmoskas Diospa kantakas kanta kaizamtuasmin, “Diosta kwisha wari” tînta kiztain. 20 Anpat Jesucristo aumîza ussa wanmaktît akwa, pailta payukima Taitta Diosta aishtaish kiztain, us wan kirît akwa.
Ampune paiña ashampakasa miza uzna piankamtawa
21 Uruzpain mamaz kuruntu aizpa mît kit kirain, u Cristo kaizta aizpa kiashimtu akwa. 22 Cristora mîmtukanain kasara kirît ashampane paiña ampu kaiztu aizpa mîrawa. 23 Ampune paiña ashampara îninshina. Kawarain Cristone paiña wanmakturuza îninnashina. Usne paiña wanmakturuza watsat mîlnanamtu, usparuza paiñawa namninnanapa. Sun wanmakmuruzne paiña kwal namara. 24 Wanmakmuruzne Cristora mîat kit us kaiztu aizpa kiarawa. Kawarain, ampu mîjmikane paiña ampu kaiztu aizpa mît kit wan kitpa. 25 Ashampa mîjmikane paiña ashampara pashitpa, Cristo paiña wanmakmuruza pashinamtukanain. Uskas wanmakmuruz akwa ishira. 26 Jesús uspa akwa irît akwa, usne uspa kwail kiarît aizpa sînam sanat kit usparuza nil namninnara. Dios watsal pit usparuza kainanarît akwa, usne uspa kwail kiarît aizpa sînam sanarît. Katmizna awane usparuza kwazikasa munanarît. 27 Usne wan wanmakmuruza paiñawa namninnara, Dios pashimtukanain wat uzanapa. Usne paiña wanmakmuruza sînam awakana, kwail kimtuchiruzkana, namninnamtu. 28 Ashampa mîjmikane paiña ashampara pashitpa, paiña ñara pashimtukanain. Paiña ashampara pashimtumikane usmin kwira kimtu, paiña ashampa paiña ñakana akwa. 29 Mînminkas mizurainkas paiña ñara naizninshimtuchi. Usne kumira kwat kit ussain kiwainshina, Cristo paiña wanmakmuruza wat kiwainnamtukanain. 30 Akkwan wanmakmuruz purakas, aune paiña ña makpas. 31 Dios pitta ka parît: “Katmizna papihshtakas akkuhshtakas paimpa tîwij îtpane, ampune paiña ashampara wanmaknazi. Sun paasas maza awakanain namnazi.” 32 Makima awane sun Dios pitta parît aizpa piankamarachi. An pitne Cristowakas paiña Cristora wanmakmuruzpakas kamtamtu, mazakanain namarît akwa. 33 Mane mamasa sunkanain ka kiztus: Wan chiwal ashampa mîjmikane paiña ashampara ussa pashimtukanain pashitpa. Wan ampu mîjmikane paiña ampu kaizta aizpa mîrawa.
Papihshtuzkas pashparuzkas
1 Cristora piankamamtu akwa, u pashparuzne papihsh kaiztu aizpa mîat kit kirain. U sun kiarane, nil i. 2 “U papihshpakas u akkuhshpakas wat min kit usparuza wat kirain.” Diosne an wat înim kishimtumikasha chiwazha wat aizpa mîlan namta. 3 Ka kin namta: “Na sun kaizta aizpa kitne, une wat kulat kit akkwan payukima uzanazi.” 4 Papihshtuzakas akkuhshtuzakas kurunamtus, u pashparuza ukasa aliz kulninnamanpa. Usparuza wat kawinanat kit kamtanat kit kurunnarain, uspa Jesucristo pashimtu aizpa kianapa.
Kiwainmuruzkas anpattuzkas
5 U kiwainmuruza kurunamtus, u anpattuza wat minñat kit uspa uruza kizamtu aizpa kapal kianapa. Paiña kal wat kitpa, Cristowa kiwainmumika kal kimtukanain. 6 U anpat uruza iznamtuchikas, us kaiztu aizpa kitpa. Anpatpa kal kimtuasmin, paiña iztakinmin tînta kal kiman, us u akwa wat minnapa. Une, Cristowa kiwainmuruzne, tînta kal kiarawa, u wan Dios pashimtu aizpa kiashimtu akwa. 7 Awa kiwainmumikanain apas anpat iztukin kal kimtuasmin, une wat kulat kit paiña kal kiarawa, au Anpat pashimtu aizpa kianapa. 8 Piankamtain. Au Anpatne wan kiwainmuruzakas wan kiwainmuchiruzakas chiwazha mîlam mîlananazi, uspa wat kal kiarît akwa. 9 U anpattuza kurunamtus, up kwainmuruza kawarain wat kianapa, usparuza naizninna namtachin. Piankamtain. Une, anpattuzkas kiwainmuruzkas, maza chiyuras Anpatmin mîjmai. Usne wan awaruza kawarain iznat kit uspa kwail kiarît aizpakas uspa wat kiarît aizpakas kiznanazi.
Cristora piantuzne Diablowa kwalkasa waya kiamtu
10 Mane me minpa pit kainanash. Au Anpat aumîza uskasa wanmaktît akwa, aumîza tînta kiwaintît akwa, uruzne tînta namtain. 11 Chiwazha Dios uruza mîlan namtu aizpa saptain, u tînta chaanapa. Diablo uruza kurunnakane, us kaiztu aizpa mîman, uruza kwail kininmanpa. 12 Aune an sukis awakasa waya kimtuchimakpas. Aune wan chiyuras kwail izpulkasa waya kimtumakpas. Uspane tînta mai. Uspane amparînkwa înintuzkanakas ajkum înintuzkanakas saliz awaruza înintuzkanakas pura. Uspa kwail kiamtu akwa, awane amtawarakanain chaamtu. 13 Katmizna Dios wan uruza tînta kulninnara akwa, us umîza mîlan namtu aizpa saptain, umîza pakpaanapa. Sun kwail payura Diablokas paiña izpultuzkas umîza kwail kininnashina. Sun kwail payu taizkane, une tailchat kit tînta namtain. Dios uruza kiwainnashimtu akwa, Diablo kaiztu aizpa kiamanpa. 14 Dios pit watcha akwa, une us kaiztu aizpa mîarawa, tînta namanapa. Pailta payukima nil uzat kit wat kiarawa, Dios uruza pakpaanapa. 15 Dios watsal pit Diosta pianchiruza kainanapain, Dios usparuza watsat mîlnanapa, au Dioskasa kalpain uzanapa. 16 Pailta payukima Diosta nîjkulamtuasmin, une Diablora anuppaanat kit ussa mîmanazi. 17 Dios uruza watsat mîlnara akwa, Diablo kaiztu aizpa mîman. Diosne paiña Sînam Izpul akwa, paiña pit aumîza îninnara, aumîza kiwainnanapa, Diablo kaiztu aizpa mîamanpa. 18 Chiwazha kiamtuasmin, Diosta pailta payukima paikwarain, uruza kiwainanapa, Diablo kaiztu aizpa mîamanpa. Paiña Izpul uruza kurunnamtuasmin, izkulat kit Diosta paikwarain, pailtachin. Paikuamtuasmin, wan Diosta piantuz akwa paikwarain. 19 Na akwakas paikwarain, us nawa kiwainapa, na Dios pit mamaztuza kamtananapa. Diosta paikwarain, Dios nawa tînta namninnapa, Dios watsal pit wan awa purakin tînta parananapa. Ñamin awane sun watsal pit piankamarachi. Mane awane sun watsal pit Jesucristowa piankamashina. 20 Diosne nawa Jesucristowa înintamika namnin kit mamaztuza îninnara, paiña watsal pit kamtananapa. Dios watsal pit akwa, nane kajchira was. Mane Diosta paikwarain, na Cristowa paranpa, chinkas ishkwatchin.
Minpa pit kiztu
21 Aune Tíquicora pashimtumakpas, Cristora nîjkultu akwa. Usne wat uz kit au Anpatpa kal kiwainta. Usne nawa uruza kainana înazi. 22 Katmizna nane Tíquicora uruza îninnamtus, apain au kiamtu aizpa piankamanapa, us uruza an tînta namninnanapa. 23 Au Taitta Diostakas au Anpat Jesucristorakas paikumtus, wan Cristora nîjkulturuz usparuzpain kalpain uzanapa, Diosta an wat nîjkulanapa, pailtaruza pashinanapa. 24 U pailta payukima au Anpat Jesucristora pashiamtu akwa, nane Diosta paikumtus, uruza wat kiwainanapa. Pailti.
Kakishapu
1 Pablokas Timoteokas Jesucritora kiwainmumika mai. Aune “kakishapu” u Jesucristora piantuza Filipos pîpulura kaiztuas. Wanmakmukin înintuzakas “kakishapu” kiztuas. Mamaz wanmakmukin kiwaintuzakas “kakishapu” kiztuas. 2 Au Taitta Dioskas au Anpat Jesucristokas uruza wat kiwainnashimtu, ayukta minñat kit watmin uzanapa.
Pablone Diosta paikumtu nîjkulturuz akwa
3 Uruza nîjkulnakane, Diosta aishtaish kiztus. 4 U akwa paikumtune, nane wat kul kit paikumtus. 5 Au paasne sulmin Dios watsal pit kainammtuas, an ñakis makima. 6 Jesucristora nîjkularasmin, Diosne u akwa wat kimîzta. Usne uruza wat kirît aizpa an kimîznazi, Jesucristo kailtu payukima. 7 Uruza watmin min kit panashimtus, u nakasa Dios watsal pit kainana masara akwa. Diosne aumîza wat min kit kiwainta. Kajchira wakas, îninmikara iztakin purakas, nane Dios wat pit parat kit nil kainananash. 8 Diosne na uruza kwisha pashinamtu pian, Jesucristo uruza pashinamtakanain. 9 Diosta paikukane, nane paikumtus mamaztuza an akwan pashiamîznapa, Diosta an piankam kit an nilmin minñanapa, 10 an nil aizpa naanapa. Sunkana kiarane, pailta payu wat uzarane, une kwail kiamanazi. Mînminkas uruza Dios iztakin kwail patkulmanazi, Cristo kailtu payu taizkane. 11 Jesucristone uruza kiwainnanazi, nil chaanapa, wat kianapa, awa Diosta kwisha wari kizanapa.
Nane Cristo uztakana uzshimtus
12 Cristora piantuz, na kaiztu aizpa mîrain. Wan nawa kiarît aizpa akwa, mamaztuzne an awaruza kamtanara, Dios watsal pit mîanapa. 13 Sunkana apain wan katsa suldaruruza îninturuzkas mamaztuzkas na kajchira wara pianmai, na Cristora kanpara akwa. 14 Na kajchira wa izarawane, an akwan Cristora piantuzne au Anpatta pashiat kit Dios pit an tînta kwinta kiara, ishkwatchin. 15 Watcha i. Mînpazhane Cristowa ñanta kamtaamtu, na kimtu aizpa wat chi minñamtu akwa, nawa aliz kulamtu akwa. Diosta pashimtuasmin, mamaztuzne Cristowa anza wat kainanamtu. 16 Pashiamtu akwa, Cristowa kamtaamtu. Na kit aizpa pianmai. Kajchira wakas, nane Dios watsal pit îninturuza nil kainananash. 17 An ñancharuzne uspain minñat kit nawa kwail minñamtu, Cristora wat piantuchi akwa. Na kajchira warît akwa, uspane nawa an naizninñamtu. 18 Paas pit pararakas, nawa kwail minñarakas, watcha minñarakas, uspa kaizamtu aizpa mîmtuchi ish. Uspa chiwazha kizamtuasmin, Cristowa pit kaizamtu. Sun akwa watsal kultus. 19 Watcha, nane anza wat kulmîznash. Nane na akwa watmin puztînazi mintus. U Diosta paikuamtu akwa, Jesucristowa Izpul nawa kiwaintu akwa, nane kajchiras watmin puztînash. 20 Sun payura tîriztuasmin, Dios pit tînta parananash, mîtsal kitchin, ishkwatchin. Kajchiras puz kit uztane, irane, Diosne nawa wat kiwainshina. Ñamin makima nane tînta kal kishimtus, wan awa Cristowa an piankamanapa, wat minñanapa. 21 Apain uzne, Cristo înintu aizpa kishimtus. Irane, chiyura anza wat uznash. 22 Au sukimin uzne, nane Cristo akwa kal kinash, wan awaruz ussa nîjkulat kit piankamanapa. Nane chiwazha pianchish. ¿Uzna anza watsa? ¿Inna anza watsa? 23 Paas tuntu kirane, kwisha sam i. Nane au sukis ishimtus, Cristokasa tuan. Nawane inna anza wari. 24 Sunkana nane u akwa an sukin uznash. Na uzna anza wari. 25 Katmizna nane au sukin uruzkasa nukkulmîznash pianish, uruza kiwainana, u an wat nîjkulanapa, u an wat kulanapa. 26 Na mamasa uruza kailkane, une na akwa an wat minñat kit akwan piji Jesucristora aishtaish kizamîznazi. 27 Sunmin kiamîztain: Cristo watsal pit parît aizpa iz kit nil uzarawa. Na uruza izna îkane, na uruza chi îmakane, na kaizta aizpa kirain. Maza kwalkanain wanmakkat kit maza pitmin kaizarakanain mîat kit uzarawa, nil uzanapa. Une sulmin an watsal pit izat kit nîjkularawa, uruzpain kiwainana. U miza uzamtu piankamshimtus. 28 Aliz awa Dios watsal pit akwa ukasa waya kikane, ishkuarachi. Sun kwail kiat akwa, uspane minpa payura iarînazi, ïnta naizana. Sunkana Diosne uruza watsat mîlnanazi. U Dios înintu aizpa kiamtu akwa, Diosmin wan uruza kiwainanat kit sînam kulninnanazi. 29 Diosne uruza wan kain mîlanara, Cristora nîjkulanapa. Cristora nîjkulamtu akwa, ukas Cristo akwa naizarînazi. 30 Naizamtukas, aune Cristo akwa sulmin tînta kimtumakpas, wan paiña pit mîanapa. Une an ñancha na kit aizpa izara. Mane une na tînta kimtu aizpa mîamîztu, wan Dios pit mîanapa.
Jesús uztakanain uztain
1 Cristone uruza kiwainashimtu, tînta kulanapa. Uruza panashimtu, u wat kianapa. Dios Sînam Izpulne aumîza akwanamtu, uskasa sulmin wanmakkana. Une mamaztuza pashinamtu, kiwainana. 2 Katmizna wan na kaizta aizpa kirain. U mamaz tuntuin nîjkularane, nane watsal uznash. Une uruzpain pashirain. Sulmin minñat kit kal kiarawa. 3 “Aune mamazkin an wat kitmakpas” kizanachi. Kal kimtuasmin, umin minkain. Mamaztuzpa anza wat kiarît aizpa minñarawa. 4 U akwain wat kirît aizpa sayanachi. Mamazpa wat kiarît aizpa sairain. 5 Uruzpain kawarain mintain, Jesucristo mintakanain, usmin anza katsa namtachi akwa. 6 Jesúsne sunkana uzta: Jesúsne Dios azi. Jesúsne Dioskanain îninna sairachi. 7 Diostas us mîj aizpa paimpa chîhkat kit ampukanain kawira, kiwainmumikakanain namna, awaruza kiwainanapa. 8 Awakanain uzasmin, usmin an ainkin namta. Dios ussa îninta aizpa kit kit kurishta mîtsalpazhain ira. 9 Katmizna Diosne ussa anza katsa nam kit uskasa îninna unat kit ussa mamaz munkin anza wat mun munta. 10 Suasmesa Jesústa mîmtuchiruzkas mîmturuzkas chiyura uztuzkas au sukin uztuzkas pil ayukman uztuzkas ussa wakpuj wainñanazi. 11 Suasne wan awane “Jesúsne Anpat i” kizat kit kwinta kianazi. Sun kizamtuasmin, “Taitta Diosta kwisha wari” kizanazi.
Cristora nîjkulturuzne an sura wat uzanazi
12 Katmizna, na Cristora nîjkulturuza pashinamtu akwa, na kaiztu aizpa mîrain. Na uruzkasa uztuasmin, une na kaizta aizpa pailta payu mîara. Maneme na attishta uzasmin, an ñakanain na îninta aizpa an nil mîrain. Dios uruza sînam sanarît akwa, ussa wakpuj wain kit us kurunta aizpa kit kit Diospa kal chîhkat aizpa kirain. 13 Diosne ukasain kal kimîz kit kiwaintu, us pashit aizpakas wan kianapa. 14 Wan kirain, pilchapuzarachin, kutkuarachin, 15 mînminkas u kwail kiarît kizamanpa. Dios uruza paiña kwal namnarît akwa, uzat kit watmin mintain. Kwail kimtuzkin uzamtuasmin, chinkas kwail kiman. Suasne sun awane u mamaz tuntu uzamtu aizpa izanazi. 16 Une an watsal pit kaiznarawa, mamaztuzkas mîat kit mamaz tuntu uzanapa. Sunkana Cristo akane, nane u akwa kwisha wat minnash, u ap pit mîara akwa. 17 U Diosta nîjkulara akwa, us pashit aizpa kiarît akwa, une us akwa naizara. Imtune, nakas u akwa naiztînash, na uruza Diospa kainanat akwa. U akwa naiztakas, nane ukasa watsal kulnash. 18 Sunkanain nakasa watsal kultain.
Timoteokas Epafroditokas
19 Anpat Jesústa nîjkulmîztu akwa, nane Timoteora u uztukin azain îninshimtus. Us kailkane, miza u uzamtu kainakane, nane watsal kulnash. 20 Usne u akwa nakanain mintu. Mînminkas uskana u wat akwa kiwainshimtuchi. 21 Wan awane uspain kal kiamtu aizpa sayamtu. Jesucristowa kal kin minñamtuchi. 22 Uruzne miza Timoteo nil uz kit wat kit aizpa pian. Usne nakasa Dios watsal pit kainana kiwainta. Usne painkul papihshta kiwaintukanain nawa kiwainta. 23 Na kimtu aizpa pailtawane, nane Timoteora uruzpara aza îninshimtus. 24 Ap Anpat nawa kiwaintuasmin, nane masakin uruza înash. 25 Mane nane Epafroditora kailninna mintus. An añakanain nîjkultamikane nawa kiwain kit nakasa awa iztakin kwisha wat kamtanara. Une ussa nawa îninñara, na we aizpa kiwainapa. 26 U us imtu mîara akwa, usne tayal kit wan uruza kwisha izna îshira. 27 Watcha, inapain tuazi. Diosne ussa kiwainta. Irachi akwa, nawakas kiwainta, na kwisha tayalmanpa. 28 Katmizna nane ussa azain îninshimtus, u ussa mamasa izat kit watsal kulanapa, na we tayalnapa. 29 Us akane, au Anpatta nîjkultu akwa, ussa yalta napnintain, watsal kulnapa. Wan awa uskanain wat minñarawa. Epafrodito awakanain wat paraarawa. 30 Nawa tînta kiwaintuasmin, usne imasara, Cristowa kal kimtu akwa. Us u akwa watmin minshimtuasmin, usne u wan kishiamtu aizpa wan tînta kimîzta, nawa kiwainna.
Cristora piankamna
1 Mane, Cristora piantuz, au Anpat Jesucristora nîjkulamtu akwa, watsal kultain. Uruza an pit paakima parakas, nawa kwail kinaptuchi. An pit na kaizta aizpa u akwa nil i. 2 Kwail kimtuzkasa wanmaknarachi. An ña tîtmuruzne Cristora nîjkularachi. Ñanta kamtaamtu, awa uspakanain kianapa. 3 Au Cristora nil nîjkulamtu akwa, aumin watcharuz makpas. Paiña Izpul akwa, Diosta wakpuj waintumakpas. Jesucristowa kwisha wat mintumakpas. Aumin kal kiarît aizpa nîjkultuchimakpas, sînam watsanapa. 4 Watcha. Nane chiwazha na kit aizpa anza nîjkulshinas. Mamaztuz uspa kiarît aizpa nîjkulamtukas, nane uspakin anza akwan nîjkulshimtus. 5 An ñancha nane na kirît aizpakas miza na uzta aizpakas kainanamtus. Ocho payura kawirawane, awa nawa tîttara, Judío awa înim akwa. Benjamínpa kwal ish. Kawimtuasmin, nane Judío awa arau. Ap taittakas ap akkwakas Judío awa mazi. Fariseo Judío awa kurunta aizpa kimtuasmin, nane Moisés îninta aizpa kimîztau. 6 Cristowa wanmakmuruza tînta kanpashinat kit naizninnarau. Moisés îninta aizpa nil kirau, pailnakima. Mînminkas îninta aizpa na kitchi kizasachi. 7 Wan na akwa kimtu aizpa nîjkultau. Mane nane wan kit aizpa chîhkarîmtus, na Cristora nîjkultu akwa. 8 Katmizna wan chiwal kirît aizpa kain i mintus, chinkas na akwa kana kitchin. Na sun wan kirît aizpakin Anpat Jesucristora piankamna anza watsal i. Nane wan chiwal mîj aizpakas wan chiwal kirît aizpakas pakkanain min kit wan chîhkarîmtus, Cristora kanpana. 9 Suasne nane Cristokasa sulmin uzmîznash. Na nil kishimtu aizpakas Moisés înintît aizpakas, nawa nil uzna namninsachi. Diosne Cristora nîjkultuza kiwainamtu, nil uzanapa. 10 Nane Cristora an wat piankamshimtus. Diosne Cristo irîttas tînta kuhsninta akwa, kawarain nane Diosta paikumtus, nawa kiwainnapa. Nakas Cristokana naiztakanain naiztînash. Cristone Dios îninta aizpa kira, innakima. Nakas Cristokana Dios îninta aizpa kishimtus, innakima. 11 Wan irîttas kuhsakkane, nakas sun payu tîriznash, irîttas kuhsna.
Minparakima ãïn ît kit piannamîztu
12 Nane makima miza uzna we pianish. Wan kin pashit aizpa pailtachish. Jesucristo an ñancha nawa akwarît akwa, nane Cristora sait kit us pashit aizpa kishimîznash. 13 Cristora piantuz, mîrain. Nane mama wan kishit aizpa pailtachish. Sunkana minnash. Nane miza an ñancha uzta aizpa mainshimtus, makis pailta payukima na kishimtu aizpa kin. 14 Suasmesa, Dios pashit aizpa kiarawane, nane minpara piannanash, pailta payukima chiyura uzna. Suane Diosne Jesucristo akwa nawa akwanat kit nawa mîlam mîlanazi. 15 Katmizna, wan nil nîjkulamturuzne sunkanain mintawamakpas. Mamaztuz mamaz tuntu minñarane, Diosne usparuza kurunnanazi, nil piamkamanapa. 16 Makima aune akkwan pit izat kit piankamtamakpas. Suas an piankam kit an nil pit akwa wat uztain. 17 Cristora piantuz, nawa izat kit na uztakanain uztain. Mamaz nakanain uzturuza izat kit sunkanain kimîztain. 18 Akkwan pijikima kaiznarîtkas, mane nane mamasa tayal kit az kit sunmin kaiznamtus. Akkwan awane “Cristo au akwa irachi” kizamtu. 19 Sun Cristora aliz awaruzne minpa payurane iarînazi, ïnta naizana. Uspain chiwazha kwan pashiamtu aizpakas kwail kiashimtu aizpakas minñamtu. Diosta minñamtuchi. Kwail kiamtuasmin, mîtsal kiamtuchi. An sukin wa aizpa minñamtu. 20 Sunkana aune chiyuras kwal makpas. Chiyuras sînam sammikasha, Anpat Jesucristora tîrizpuspas. 21 Dios tînta kimtu akwa, usne au wan najtît ña paiña watsal ñakanain namninnazi. Dios tînta kishimtu akwa, wan chiwal îninshina, us kishit aizpa kianapa.
Anpatta watsal kultain
1 Katmizna, na Cristora nîjkulturuza pashinamtu akwa, na kaiztu aizpa mîrain. U nawa watsal kulninñamtu akwa, nane uruza izshinamtus. Anpat Jesucristokasa nil uzmîztain. 2 Nane Evodiarakas Síntiquerakas paikumtus, Anpatpa kwampihshkanain nîjkulnapa, waya kitchin. 3 Watcha, nane ap wat kiwainmikara paikumtus, an paas ashampara kurunapa, uspa paas kwail kizamanpa. Uspa paasne nakasa ñancha kal kiwainpailta. Clementekas mamaz nakasa kal kittuzkas nawa kiwainñara, sun watsal pit kainana. Dios usparuza watmin uzninnarît akwa, au Anpatne usparuzpa mun chiyura pînkîhta parît. 4 Anpatkasa chamtuasmin, watsal kultain pailta payukima. Mamasa kaiztus, watsal kultain. 5 Mamaztuza wat mintain, wan awa u wat kiamîzta aizpa piankamanapa, au Anpatne kasha anpain pamtu akwa. 6 Une wan kishimtu aizpa ishkuman. Naizakane, uruza kwail kimîzkane, sunkana Diosta paikwatpa, uruza kiwainnapa. Ussa wanta aishtaish kizmîztain. 7 Sunkana Diosne uruza watsal usninnanazi. Mînminkas Dios awa akwa kimtu aizpa piankamsachi, watsal uzanapa. Dios uruza watsal uzninna kiwainamtu akwa, usne Jesucristo akwa uruza kurunnanazi, nil minñanapa, Jesucristokasa chaanapa.
Wan wat aizpa mintain
8 Minpa Cristora nîjkulturuz mîrain. Kwinta kiamtune, watcha pit kaizarawa. Wat pitkas kaizarawa. Nil pitkas kaizarawa. Kwinta kiamtune, chinkas kwail pit kaizman. Watsal pitkas kaizarawa. Wan wat aizpa mintain. 9 Wan na kamtara aizpa mîat kit saptain. Na kaizta aizpa mîara. Na miza uztu aizpa izara. Sunkanain kirain. Sunkana kiarane, Diosne uruza watsal uzninnanazi.
Filipos Awaruzne Pablora mîlaamtu
10 Mane nane au Anpatta kwisha watsal kultus, u mamasa nawa mîlan minñamtu akwa. Nawa kiwainashimtukas, une an ñancha chinkas nawa kinamarît. 11 U nawa kiwaintachikas, nane chinkas we kitchish. Na mîj aizpa wat kuj kit kamtît ish. 12 Na we aizpa mîjkas, na akkwan mîjkas, nane uzna kamtît ish. Yak kimtu aizpakas tukta kumtu aizpakas sunkana uzna kamtît ish. 13 Cristo nawa kiwaintu akwa, nane watsal uzshinas. 14 Sunkana uruzne nawa wat kit kit na we aizpa kiwainñaara. 15 Nane u Macedonia sukin uzturuza Dios watsal pit kamtanamîztau. Mamaz sura îkane, u Filipos pîpulukis wanmakmuruzmin na we aizpa mîlam îninñara, na we kimanpa. 16 Na Tesalónica pîpulukin tuasmin, une pakima mîlam îninñara, na we kimanpa. 17 Na u mîlam sairachikas, nane Diosta u akwa paikumîztus, u an akkwan mîlam sappanapa. 18 Nane me u îninta aizpa wan saptît ish, tizawal. An mîlam Epafrodito akwa înintît akwa, nane kapal mîjash. Nawa kain mîlat akwa, Diosne u wat kiarît aizpa iz kit u akwa watsal kulta. 19 Sunkana u na we aizpa mîlat akwa, Diosne u we aizpa mîlananazi. Us mîj aizpa chiyura pailtuchi akwa, usne Jesucristowa kanpamtuza mîlananazi. 20 Aune Diosta pailta payu kwisha wari kizpuspas. Sunkana kirain.
Minpa kakishapu kiztu
21 Na akwa wan Jesucristora nîjkulturuza kakishapu kizanaka. Cristora nîjkulturuzne nakasa puraruzne kakishapu kizmu pit înninamtu. 22 Wan Roma pîpulukin Jesucristora nîjkultaruzne Roma katsa îninmika yalta uztuza kakishapu kizmu pit îninamtu. 23 Au Anpat Jesucristone uruza kiwainnanazi, uruza pashinamtu akwa. Pailti.
Kakishapu
1 Nane Pablo mun ish. Diosne nawa nat kit paiña înintamika namninta, Jesucristowa kainana. Timoteorakas, Jesucristo pianmikarakas, paiña pit kainana îninta. 2 Nane an pînkîh u Diosta nîjkulturuza Colosas pîpulukin pat kit îninnamtus. Cristo akwa une au añakanain, au kwampihshkanain mai. Nane au Taitta Diosta paikumtus, uruza kiwain kit kalpain uzninnanapa.
Pablone Diosta piantuz akwa paikwanamtu
3 Aune Diostakas Anpat Jesucristowa Taittarakas aishtaish kiz kit pailta payura u akwa paikumtumakpas. 4 U Jesucristora nîjkulamtu mîramakpas. Diosta piantuza pashiamtu mîramakpas. 5 U nîjkulat kit pashiamtu akwa, une Dios chiyura mîlashinamtu aizpa tîrizamtu. Dios watsal pit mîarawane, une sun mîlam tîrizamtu. Sun wat pitne watcha i. 6 Mînpazha sun pitmin uruzakas wan sura uzturuzakas kainanara. Dios watsal pit mîarakima, Diosne awaruza kiwainashimtu. Ukas mamaztuzkas sun watcha pit an piankamarîmtu. 7 Epafrasne, au wat añakanain sun pitmin uruza kamtanara. Usne nakanain u akwa kiwainmumika i. Na uruza kiwaintuchi akwa, usne Cristo kishimtu aizpa wat kimtu. 8 Uskas aumîza ka kaiznara: Diospa Izpulne uruza kiwainashimtu, mamaztuza pashinanapa. 9 Katmizna, sun pit mîrakima, aune pailta payukima Diosta uruz akwa paikumtumakpas, us kishit aizpa wat piankamanapa. Diospa Izpul uruza Dios pit piankamninta akwa, une nil kianazi. 10 Sunkana paikumtus, nil uzanapa, au Anpat înintu aizpa wan kianapa. Nane uruza kurunamtus, anza wat kal kiat kit Diosta an wat piankamamîznapa. 11 Dios tînta akwa, usne uruza an tînta namninnanazi, us mintu aizpa kianapa. Suasne naizamtukas, une tailchaat kit wat uzanazi. Wat kishit kit watsal kultain. 12 Taitta Diosta aishtaish kiztain, us mîj aizpa nail kit auruzakas Jesucristo piantuzakas chiyura mîlanamtu akwa. 13 Usne aumîza Diablo uzatkis ukkanat kit aumîza paiña pashimtu painkul înintukin uzninnara. 14 Diospa painkul au akwa irît akwa, usne au kwail kit aizpa kwizninnat kirît aumîza watsat mîlnanara.
Cristone, an ñanchamikane, anza tîntamika i
15 Mînminkas Diosta izsachi. Jesucristo at akwa, awane Diosta piankamashina. Diosta wan sarachasmin, Jesucristone uz kit wan Dios sarît aizpa îninmîzta. 16 Diosne Cristo akwa chiyura wa aizpakas au sukin wa aizpakas wan sara. Izmu aizpakas izmuchi aizpakas wan sara. Us akwa akwan ángeltuzakas înintuzakas kainamtuzakas wanmakninmuruzakas sara. Diosne us akwa wan sara, wan awa Cristora kwisha wari kizanapa. 17 Wan sarachasmin, Cristone me uz kit us wan sarît aizpa nil înintu, wan wa aizpa us iztakin wanmakninnapa. 18 Cristone ussa nîjkulamturuza îninamtu. Cristone ussa nîjkulamturuza uzninnara. Akkwan awa pilta kamarîtkas, Diosne Cristora an ñancha kakulninta, anza katsa mikwakana namtînpa. Suasne usne anza tînta mika namtînazi. 19 Diosne Jesucristora uskanain namninshira, wenamtachin. 20 Diosne Cristo akwa wan au sura uzamtu aizpakas wan chiyura uzamtu aizpakas sulmin wanmakninnashira, paiña kwal namanapa. Cristo kurishta irît akwa, usne paiña aimpi akwa wantuza wanmakninnara, paiña izmuruz namanapa. 21 Ñamin uruzne Diosta kasha aashitchi, kalpain uzanapa. U Diosta aliz minñamtu akwa, une kwail kishiara. 22 Mane Jesucristo u akwa irît akwa, Diosne uruza us kaizta aizpa mîna kiwainnara, Dios iztukin chaanapa. Usne u kwail kwizninnara, Dios iztakin uzaanapa. Suane mînminkas nu kwail kirît kizmanazi. 23 Cristo kaizta aizpa nîjkultakima, une kawarain nîjkulmîztain, tînta kulnakima, Diostas paimpa îtchin. Une Dios watsal pit mîat kit tîrîzamtu, Dios u akwa wat kinanapa. Wan au sukin uzturuzne sun watsal pit mîara. Nane, Pablone, Diospa kiwainmumika ish, paiña watsal pit kainana.
Pablone wanmakmu yalta kiwaina namtît
24 U akwa naiztukas, mane nane watsal kultus. Makis an sukin Cristokanain naiztuasmin, nakas Cristora nîjkulturuz akwa naiztîmtus. 25 Diosne nawa narît, Cristora nîjkulturuza kiwainnanapa. Nawa sun kal chîhkarît, wan Dios watsal pit uruza kainana, wan awa piankamanakima. 26 Mînminkas an pit na kaizta aizpa ñamin piankamarachi. Diosne sun pitne puintîtkanain mîjara. Mane Diosne paiña narîttuza nil mîninnara. 27 Diosne Judío awa chiruza uspa akwa kishit aizpa piankamninnara. Une ñamin awa we pian aizpa pian, Cristo uruzkasa uztu akwa. Aune tîriztumakpas, chiyura uskasa uzna. 28 Cristowa kainammtuasmin, aune wan awaruza kurunat kit wan pian aizpa kamtamtumakpas, wat piankamanapa, Cristo kaizta aizpa mîmturuz Dios iztakin an tînta namanapa. 29 Katmizna nane tînta kal kimtus, Cristo nawa tînta kal kin kiwaintu akwa. Nane paiña kal kimîztus, pailnakima.
1 Mane na kaizta aizpa piankamtain. Nane uruz akwakas Laodicea pîpulukin uztuz akwakas nawa iztachiruz akwakas miza kiwainna tînta min kit Diosta paikumtus. 2 Diosta paikumtus, uruza tînta kiwainanapa, nîjkultu manapa, uruzpain pashianapa. Suasne une wan Dios puintain mîj aizpa piankamanazi, Cristora nil piankamanakima. 3 Cristora piankamarawane, aune wan Dios kaizta aizpa piankamshinamakpas, us pashit aizpa kiana. 4 Sun uruza kaiznamtus, mînminkas uruza pîrail apnamanpa, mamaz miwara îamanpa. 5 Uruzkasa tuchikas, nane ukasa nîjkultus. U Cristo îninta aizpa nil kiamtu akwa, Cristora nîjkulamtu akwa, nane watsal kultus.
Cristokasa uzna anza wat
6 U Anpat Jesucristo kaizta aizpa nîjkultakima, makismin ussa nîjkulamîztain, us kaizta aizpa mîana. 7 Cristora nîjkularît akwa, us kaizta aizpa mîat kit kimîztain, Dios iztakin an tînta namana. An pit kamta akwa, nil uzat kit Diosta pailta payu aishtaish kizmîraiztain. 8 Wat kirain. Iztain, mînpazha ñanta kamtam uruza kurunnamtu, uruza pîrail appamtu akwa. Uspa kamtamtu aizpa kain pit. Uspane kain awawa kamtamkas ángelpa kamtamkas kamtaamtu. Watcha minñamtuchi. Cristowa kamtaamtuchi. 9 Cristo au sura uzna piannatne, usne Dios azi. Dioskanain azi. 10 U Cristora wanmakkarît akwa, une Dioskasa uzashina. Usmin wan chiyura înintuzakin anza tînta îninnamtu. 11 Uruza ussain wanmakninnarît akwa, Cristone uruza nanara, uskasa uzanapa. Usne u kwail kiarît aizpa kwizninnara, uskasa uzana. 12 Kwazikasa munarawane, une Cristo munkasa munat kit kwail kiashiarachi, Cristora kanpaana. Cristo irîtkas, Diosne ussa irît kamkis kakulninta. Dios kimtu aizpa nîjkulturuzakas kakulninnanazi. 13 Diosta pianchiruzne, uruzne, Colosas pîpulura uzturuzne, ñamin kwail kiamîzta. Dios kaizta aizpa mîashitchi, nil kiana. Mane Diosne Cristo akwa uruza uzninnat kit au kwail kiarît aizpa sînam sanarît. 14 Diosne paiña pit parît aizpa apain îninta, aumîza kwail kiarît kizna. Cristo kurishta irît akwa, Diosne au kwail kiarît aizpa kwiznin kit kaninta. 15 Cristo kurishta irîtne, Diosne wan au sukin saliztuza wan kwail ángeltuzakas taizninnara, tînta kulamanpa. Cristo irît akwa, Diosne usparuza anuppanamîztu. Uspane wan awa iztakin mîtsal kularît.
Chiwazha chiyura wa aizpa sairain
16 Sunkana, mînpazha u kwail kiarît kizakane, usparuza mîaman, kwazikas kumirakas kumtune. Katsa pishtakas palapcha puzka pishtakas, sábado pishtakas iztain kizakane, mîaman. 17 U an ñancha wan pishta izarakas, watcha we piankamara. Cristo au sukin atkima, Cristowa watcha piankamamîzta. 18 Mînpazha u kwail kiarît kizarakas, usparuza mîaman, Dios uruza mîlanamtu aizpa sappanapa. Uspane impa akwa kumira we kuat kit ángeltuza wakpuj wainñamtu. Uspane mamaztuzkin anza wat piankamtumakpas kizamtu. Uspane kainkizpara iztumakpas kizamtu. An wat piankamamtumakpas kizamtukas, sun awane nilchi piankamat kit kain awakanain minñamtu. 19 Cristo kaizta aizpa mîashimtuchi akwa, uspane uskasa chashiamtuchi. Cristora nîjkulamturuza kurunat kit îninnamtu. Usne nîjkulamturuza kiwainamtu, an tînta kulanapa. Pailta payukima Diosne nîjkulamturuza tînta kulninnamtu, an nil uzanapa. 20 Ka minñarawa. Cristo au akwa irîtne, aune awa îninta aizpa mîashiman, us kaizta aizpa kin. Sunkana mintain, wan an sukin uzmika îninta aizpa kiamanpa. An sukin uzamtuasmin, Cristora pianchiruz kaizamtu aizpa mîaman, uspakana uzamanpa. 21 Uspane ka îninnamtu: “chiwazha kumirakas kwasachi. Impa. Chiwazha kwashiman. Sun kumira sakain,” ka kizamtu. 22 Kumirakanain wan uspa kamtaamtu aizpakas sun wan uspa îninamtu aizpakas pailtînazi mamaz payura. 23 An kamtamturuzne usparuzpain mamaztuz iztakin an wat pianmikakanain namninshiamtu. Uspane mamaztuza miza wakpuj nil wainna kamtanashimtu. Uspakas auruza wat minñamtuchi kizamtu. Uspakas chiwazha kishit aizpa kiman kamtaamtu. Uspa kamtamtu aizpa awaruza kiwainasachi, nil uzna, ayukta kwail minñamtu akwa.
1 Sunkana Cristo irît akwa, mamasa kakultît akwa, aune mamaz awakanain uzarawamakpas. Sunkana mintain. An sura uzamtuasmin, chiyura wa aizpa, Cristo pashimtu aizpa sait kit kirain. Suane Cristone Diospa numal uzkin îninamtu. 2 Au sukin kwail kishimtu aizpa minman. Chiyura an wat wa aizpa nîjkulmîraiztain. 3 Cristo u akwa irît akwa, uruzne kwail kiashitchi, an wat uzanapa. Maneme une Cristo akwa mamaz tuntu Dios iztukin uzamtu. 4 Cristone aumîza mamasa uzninnanazi. Us kailkane, usne kwisha watsal naztam izanazi. Suasne ukas Cristokas parejuin puranazi izmuruzkanain.
Ñamin uztamikakas, masas uztumikakas
5 Sunkana, wan kwail minñamtu aizpa kiman. Sunkanain uzman: ampu mîjmikane mamaz ampukasa pitnachi; ashampa mîjmikane mamaz ashampakasa pitnachi; chiwazha sînamchi kiman; chiwachi kwail mintu aizpa, chiwazha kwail kiashimtu aizpa minman; kiman. Mamazpa kwazpa mîj aizpa saishimtumikane Diosta wakpuj waintuchi. 6 Uspa sun kiarît akwa, Diosne us kaizta aizpa mîamtuchiruza ilnanazi. 7 Uruzne ñamin sun awakanain uzat kit wan kwail kiat kit Dios kaizta aizpa mîarachi. 8 Mane ukas wan kwail na kaizta aizpa chîhkarain, an kiamanpa. Mamazta aliz kulman; mamaz awawa kwail paraman; mamazta kwail paraman; mamazkasa aliz uzman; mamazkasa kwail pit kwinta kiman. 9 Mamaztuza pîrail kaizanachi. Sunkana uzman. Ñamin kwail kiarît. Maizarît akwa, mane une kwail kiamtuchi. 10 Diosne uruza masas awakanain namninnara, wat minñanapa, Diosta an wat piankamamîznapa, uskanain uzanapa. 11 Cristo au akwa irît akwa, Dios iztakin Judío awakas Judío chi awakas kawarain mai; ña tîtmikakas ña tîttuchimikakas kawarain mai; mamaz suras awakas altîm awakas kawarain mai; kiwainmumikakas anpat mîjchimikakas kawarain mai. Anza wari, Cristora nîjkultane. 12 Diosne uruza pashinat kit nanara, paiña kwal namanapa. Katmizna mamaztuza kiwaintain; mamaztuza wat kinarain; uminpain pîna minanachi; mamaz uruza kwail kikane, wat kiarawa. 13 Mamazkasa tailcharain. Une aliz kulturuza wat kultain. Cristo au Anpat uruza wat kulta akwa, uruzkas kwarain wat kultain. 14 Sun wan kiarakas, uruzpain pashiana anza wari. Sun kiarane, une sulmin wanmakkanazi, nil uzana. 15 Cristo uruza kalpain uzninnara akwa, mamaztuzkasa kalpain uzmîraiztain. Dios uruza maza kwalkanain sulmin uzna akwanarît akwa, une nîjkulturuzkasa kalpain uzat kit Diosta aishtaish kiztain. 16 Cristowa pitne an wat piankammîraiztain. Uruzpain kamtaat kit nil uzna kuruntain. Salmoskas Diospa kantakas kanta kizamtuasmin, watsal kulat kit Diosta aishtaish kiztain. 17 Chiwazha kizamtuasmin, chiwazha kiamtuasmin, au Anpat Jesús akwa wan kimîraiztain. U Cristora nîjkulara akwa, au Taitta Diosta au akwa kirît aizpa aishtaish kiztain.
Cristora piantuz nil uzarawa mamazkasa
18 Ashampane paiña ampu înintu aizpa mîrawa. Sun kirain, nu Anpat Jesústa nîjkulta akwa. 19 Ampune paiña ashampara pashitpa, ussa tînta pit paratchin. 20 Painkultuzkas pashuruzkas papihsh kuruntu aizpakas akkuhsh kuruntu aizpakas mîarawa. Sun kiarane, une au Anpat Cristora wat kulaninnazi. 21 Papihshtuzkas akkuhshtuzkas painkultuzakas pashuruzakas pilchapuzninman, chinkas mainñamanpa, tayalmanpa. 22 Kiwainmuruzne an su pamika wan kaizta aizpa mîat kit kirain. Mînpazha kiwainmuruzne pamikain iztakin wat kal kiamtu, pamika usparuza wat kal kiare kizanapa. U Anpatta ishkuamtu akwa, wan kal kiamtu aizpa wat kirain. 23 Chiwazha kal kiamtu aizpa kwisha wat kirain, au Anpatta kiwainñamtu akwa. Kal kiamtuasmin, une au Anpat akwa u pamika akwa kal kiamtu. Sunkana minñarawa. 24 Une au Anpat Jesús uruza chiwazha mîlamtu aizpa pian. Dios uruza mîlan namta aizpa mîlananazi. Au Anpat Jesucristora kiwainamtu akwa, une chiwazha mîlamtu aizpa sappanazi. 25 Diosne kwail kal kirîttuza naizninnanazi. Usne wan awaruza kawarain iznamtu. Awa kwail kiarît akwa, Diosne usparuza ilnanazi.
1 Pamika mîrain. Uruzne kiwainmuruza Dios iztakin nil kirain, anza akkwan kal kin paikwatchin. U chiyura Anpatkas u kiamtu aizpa iznamtu. 2 Diosta pailta payukima paikwat kit izkulat kit aishtaish kizmîraiztain. 3 Sun urain na akwa paikwarain, Dios nawa kiwainapa, Cristowa pit kainana. Ñamin awane sun pit mîarachi. Na Cristowa kainara akwa, kajchira was. 4 Na akwa Diosta paikwarain, paiña pit nil kamtanapa, awa sun pit piankamanapa. 5 Cristora pianchiruzkasa uzamtuasmin, pailta payura uspa iztakin nil kiat kit uztain, usparuza Dios pit kainanapa. 6 Watsal pitkasa Cristora pianchiruza kainarain, uspa wat mîanapa. Mînpazha Dios watsal pitpa uruza mîmamtuasmin, une mamaztuza miza sînkana piankamarawa.
Minpa kakishapu kiztu
7 Tíquicone, Cristora nîjkultumikane, au pashimtumika i. An nil kiwainmikakas nakas au Anpat Jesústa parejuin kiwaintawas. Usne na apain kimtu aizpa uruza kainananazi. 8 Katmizna nane ussa uruza îninnara, au apain kimtu aizpa piankamanapa, u anza tînta namanapa. 9 Uskasa wat Onésimone înazi. An pashimtu aimpihshkanain u pîpulurasmin Cristora nil kanpamîztu. Uspa paasne wan apain wan kimtu aizpa uruza kainailnazi. 10 Aristarcone, nakasa kajchira wa izmumikane, kakishapu uruza kiznamtu. Marcoskas, Bernabéwa aimpihsh kizna, kakishapu uruza kiznamtu. Nane ñamin ap pit Marcospa îninnara. U uzkin izna akane, yalkin wat nunintain. 11 Jesúskas, Justo muntîtmika, kakishapu uruza kiznamtu. An kutñaruzmin Judío awaruztas nakasa Diospa kal kiamtu. An kutña Cristora piantuzne, nawa kiwainñamtu, Dios watsal pit kainana, awa Dios kaizta aizpa mîanapa. 12 Epafraskas, u pîpuluras, kakishapu kiznamtu. Usne Jesucristowa kiwainmumika i. Uruz akwa pailta payu Diosta kwisha paikumtui, u anza nîjkulat kit nil uzat kit Dios pashimtu aizpa wan kishianapa. 13 Nane Epafras u akwa kal kishimtu aizpa pianish. Usne Laodicea pîpulura uztuzakas Hierápolis pîpulura uztuzakas kwisha min kit Diosta u akwa paikumtu. 14 Na pashimtu médico Lucaskas, Demaskas kakishapu uruza kiznamtu. 15 Wan Laodicea pîpulukin uzturuza Cristora nîjkulamturuza kakishapu kiznarain. Ninfarakas paiña yalkin wanmakmuruzakas kakishapu kiznarain. 16 Sun pînkîh uruza îninta aizpa izarawane, Laodicea wanmakmuruza îninnarain, sun pînkîh izanapa. Mamaz pînkîh Laodicea wanmakmuruza îninta aizpa piannakane, ukas sun pînkîh izanaka. 17 Arquipora ka kiztain: “Au Anpat Jesústa wanmakkarît akwa, Diospa kal uruza chîhkarat aizpa kirain, pailnakima,” ka parît. 18 Nane, Pablone, sun pit ap chihtîkasain pamtus. Na kajchira wasmin, nawa minñat kit Diosta paikwarain. Nane u akwa akumtus, Dios uruza wat kiwainanapa. Pailti.
Kakishapu
1 Nane Pablo mun ish. Nane, Silvanokasa Timoteokasa, an pînkîh pat kit u Tesalónica pîpulura uztuza, u Cristora piantuza, îninnamtus. Une au Taitta Dioskasa au Anpat Jesucristokasa chaamtu. Aune u akwa Diosta paikumtumakpas, Dios uruza wat kiwainanapa, Dioskasa kalpain uzanapa.
Tesalónica pîpulura uztuz nîjkulamtu akwa, uspane Diosta aishtaish kizamtu
2 Uruzpa mintuasmin, pailta payukima aune u akwa Diosta aishtaish kaiztumakpas. Pailta payukima aune u akwa Diosta paikumtumakpas. 3 Taitta Diosta paikumtuasmin, aune u kal kiarît aizpa minñamtumakpas, u Jesucristora nîjkulamtu akwa. U mamaztuza pashinamtu akwa, mamaztuza kiwainashimtu akwa, aukas u kal kiamtu aizpa minñamtumakpas. Au Anpat Jesucristo amtu payura tîrizamtuasmin, une an tînta namamîztu. 4 Diosta piantuzne, mîzhain. Aune Dios uruza pashinamtu pianmakpas. Usne uruza nanara, paiña kwal namnanapa. 5 Aune Dios watsal pit Jesucristowa uruza kamtaramakpas. Kamtanamtuasmin, Diospa Sînam Izpulne uruza tînta kiwainnara, au watcha kaizara aizpa piankamanapa. Ukasa uzamtuasmin, aune kain pit kaiztachimakpas. Aune u iztakin iztasparît kal kiaramakpas. Aune au kiarît aizpa u wat akwa sun kiaramakpas. 6 Uruzne au uztakanain au Anpat Jesús uztakanain kamarît. Sun akwa une aumîzakas au Anpat Jesústakas kanpaara. Awa uruza aliz kularîtkas, une Dios watsal pit au kamtara aizpa mîara. Uspa uruza naizninnarakas, Diospa Sînam Izpulne uruza wat kulninnara, Jesústa nîjkulara akwa. 7 Kwiztane une Macedonia sura nîjkulturuzakas Acaya sura nîjkulturuzakas miza uzna kamtanara. Une tînta namat kit nil uzara. Mane uspane u uztakanain uzashina. 8 Au Anpat watsal pitta Macedonia su uztuzakas Acaya su uztuzakas paranamtuasmin, une u Diosta nîjkulara aizpa wantuza kamtanara. Katmizna aune mamaztuza uruzpa chinkas kainanamanash, wan u akwa mîarît akwa. 9 Uspane u uzkin wan kirît aizpa paramtu. Une aumîza sappat kit au kamtara aizpa mîara paramtu. Ukas sun dioskanain sarîtta chîhkaat kit watcha Diosta, uztumikara, kanpaamîzta, us kaizta aizpa mîanapa. 10 Sunkas paraamtu. Une Jesústa, Dios painkulta, tîrizamtu, chiyuras aka. Diosne ussa irîttas kakulninta. Dios awaruza uspa kwail akwa ilnamtukas, Jesúsne aumîza watsat mîlnanazi, sun naiztu payura naizamanpa.
Pablowa kal Tesalónica Pîpulura
1 Diosta piantuz, mîzhain. Mazantuz au kamtamtu aizpa mîarakas, une au kirît aizpa wan pian. Diosne au kamtamtu akwa uruza maizninnara. 2 Une Filipos pîpulura uztuz aumîza kiarît aizpa pian. Tesalónica pîpulukin au naizarakas, awa aumîza kwail kiarîtkas, Diosne aumîza an tînta namninnara, Dios watsal pit uruza kamtananapa. Suane akkwan aliz awaruzne aumîza pilchapuzara. 3 Uruza kamtanamtuasmin, aune uruza ñanta kamtanapa sairachimakpas. Aune uruza chiwazha kwail kianapa kamtanarachimakpas. Aune uruza kutkwatchimakpas. 4 Sunkana Diosne au akwa wat min kit aumîza Dios watsal pit chîhkanara, awaruza kainanapa. Katmizna sun pit paramtumakpas. Aune paramtuchimakpas, awa au akwa wat minñanapa. Aune Dios pashimtu aizpa kishimtumakpas, Dios au kaijchura pian akwa. 5 Une au parît aizpa piankamara. Aune mizurainkas uruza watsal pit parachimakpas, au pashit aizpa kianapa. Aune Dios pit kamtanarachimakpas, u pial sappana. Diosne au kimtu aizpa pian. 6 Aune chinkas saimtuchimakpas, au wat awain kizanapa. Aune mizurainkas Dios pit kamtanarachimakpas, u au akwa wat minñanapa, mamaz awa au akwa wat minñanapa. 7 Cristo aumîza paiña înintuz namnarakas, aune uruza tînta paramtuchimakpas. Uruzpain wat awakanain uztamakpas. Aliz chimakpas. Akkuhsh paiña pashparuza iznamtukanain, aune uruza kwinta kimtumakpas. 8 Sunkana uruza kwisha pashinara akwa, aune Dios watsal pit uruza kamtanashimtumakpas. Uruza kwisha pashinamtu akwa, aune uruza akkwan kiwainnashimtumakpas. Sunkana uruza pashinamtumakpas. 9 Diosta piantuz, mîzhain. Au kamtît aizpa nîjkultain. Payuwarakas amtawarakas kwisha tînta kal kitmakpas. Uruza Dios watsal pit paramtuasmin, au kalmin kitmakpas, uruza chinkas paikuman. 10 Ukas Dioskas miza uruzpain uztamakpas pian. Aune Dios iztakin nil uztamakpas. Aune, wat awakanain, uruza, Diosta nîjkulturuza, kwail kitchimakpas. Ukasa uztuasmin, aune Dios înintakanain uztamakpas. 11-12 An ñamin ukasa uzamtuasmin, aune uruza kurunat kit maza maza kamtanaramakpas, wat puranpa. Papihsh paiña painkulta kuruntukanain, aune uruza kurunaramakpas. Aune uruza paikwatmakpas, au înintu aizpa mîanapa. Diosta piantuzne Dios înintu aizpa mîat kit kiarawa. Usne uruza akwanamtu, uskasa îninnanapa, u Dios tînta i piankamanapa. 13 Katmizna aune pailta payukima Diosta u akwa aishtaish kiztumakpas, Dios watsal pit mîarît akwa. Uruza Dios watsal pit kamtanamtuasmin, une sun pit sappat kit “uspa kaizamtu aizpa Dios pit i” minñara. An pitne awawa pit chi. Watcha. Sun au kaizamtu aizpa Dios pit i. Paiña pit akwa Diosne uruza, Jesucristora nîjkulturuza, maiznamtu. 14 Diosta piantuz, mîzhain. U sura uztuzne uruza naizninñara. Une Judea sura Jesucristora nîjkulturuz uzarakanain uzara. Kawarain Judío awane Jesucristora nîjkulturuza uspa kwaltuza uspa sura naizninñara. 15 Sun Judío awane Jesústakas Dios pit an ñancha kainammtuzakas piantanara. Uspakas aumîza tînta naizninnara, Dios kaizta aizpa mîashimtuchi akwa. Uspane wan awakasa aliz kulat kit aumîza 16 sun sanachi kizara, Jesústa nîjkularachiruza Dios pit kaizamanpa, Dios usparuza watsat mîlnamanpa. Ñamin kwail kiarîtkas, uspane an akkwan tuntu kwail kiamîztu. Mane an minpa payura Diosne usparuza ilninnanazi, kapal naiznakima.
Pablone Tesalónica pîpulura îshina, usparuza iznana
17 Diosta piantuz, mîzhain. Mamaz awa uruzkis aumîza manta kiara akwa, aune pashpa kwairîtkanain namtamakpas. Katmizna, aune mamasa kailshiaramakpas, uruza iznana. Ukasa uzarachikas, aune wan payura uruza nîjkulamtumakpas. 18 Katmizna aune mamasa u uzkin în namanash. Nain akkwan piji în namnarau. Îshimtuasmin, Satanásne aumîza înintachi. 19 Au Anpat Jesús amtu payura taizkane, aune kwisha wat puranpas, u Diosta tîrizamtu akwa. Aune Jesús amtu payura “u Dios pit wat mîara” kaizanapas. 20 Watcha, aune u akwa wat minñamtumakpas. Aune u akwa kwisha wat makpas.
1 U akwa mîrachi akwa, mamaz payura tîriztashitchi akwa, Silvanokas nakas Atenas pîpulura nukkulpailta. 2 Suasne aune ap añara, Timoteora, u purakin îninpailta. Timoteone aukasa kal kit kit Dios watsal pit Cristowa kamtawaintu. Usne u uzkin îzi, u Cristora an nîjkulwainanapa, an tînta namninnanapa. 3 Suasne une u nîjkulamtu aizpa chîhkanamanazi. U Jesústa nîjkulamtu akwa, mamaztuzne uruza naizninnanazi. Awa uruza naizninnamtukas, usne uruza iznanazi, uruza kiwainnanapa. 4 Ankas an ñamin kaiznaramakpas. U uztukin tuasmin, aune an ñamin au naizamtu aizpa paratmakpas. Watcha, une sun kirît aizpa pian. 5 Katmizna aune mamaz payura u akwa mîna tîriztachimakpas. Au paasne Timoteora îninpailta, miza u Cristora nîjkulamtu piankamnapa. Nane Satanás uruza anupparît ishkwat mintuarau. Sun kitne, au kalne uruzpain kawal. 6 Timoteora uruza înintawane, usne ma u pîpulukis kail kit u wat pit aumîza kainanara. Usne aumîza u Diosta nîjkulamîztu kaizta. Wan awaruza pashinamtu kaizta. Uskas u pailta payura au akwa wat nîjkulamtu kaizta. U aumîza izshinamtu kaizta. Kawarain aune uruza izshimtumakpas. 7 Katmizna, Diosta piantuz, mîzhain. U pit îninta aizpa mîrawane, aune wat puramakpas. Akkwan tuntu naizamtukas, aune an tînta namtamakpas, u mama Cristora nîjkulamtu akwa. 8 U Anpat Cristokasa kanparane, us kaizta aizpa mîarane, aune an wat puranapas. 9 Katmizna u Cristora an wat nîjkulamtu akwa, aune au Diosta akwan piji aishtaish u akwa kiztumakpas. U akwa aune Dios iztukin wat kultumakpas. 10 Payuwarakas amtawarakas Diosta paikumtumakpas, uruza iznanapa, u we nîjkulamtu aizpa kamtananapa. 11 Mane au Taitta Diostakas, au Anpat Jesústakas akumtumakpas, u uzkin azain aumîza îninnanapa. 12 Au Anpat Jesústa paikumtumakpas, Dios uruza wat kiwainanapa, Cristora nîjkulturuzakas mamaztuzakas pashinanapa. Au uruza pashinamtukanain mamaztuzakas an akkwan pashinarain. 13 Sun kitne, une Cristora an nîjkulashina, an tînta namanapa, wan kwail kirît aizpa chîhkanapa. Suasne une Taitta Dios iztakin us pashit aizpa uztakanain uzashina, au Anpat Jesús kailtu payurakima. Us kailkane, usne Diosta piantuza uskasa karananazi.
Pablone ma pitchin Cristora nîjkulturuza kamtanamtu
1 Mane, Diosta piantuz, mîzhain. Aune uruza mamaz pit kuruntumakpas. Aune an ñamin uruza miza uzna kamtanaramakpas, wan awaruza Dios pashit aizpa kianpa. Sunkana uzat kit Dios kaizta aizpa kirain. U au Anpat Jesústa piankamtu akwa, aune uruza paikumtumakpas, ussa an wat piankamanapa. 2 Aune au Anpat Jesús aumîza îninnara aizpa uruza kamtanaramakpas. 3 Diosne uruza paiña pit chihkashimtu, Dios kaizta aizpa kianapa, kwail kiamanpa. Mamazpa ashampakasa chaman. Mamazpa ampukasa chaman. 4 Ampu aizpa paiñain ashampara mîl kit kwira kit kit pashitpa. 5 Ashampa mîjmikane paiña ashampakasa watsal uztawa, ussa kwail kishimanpa. Diosta pianchiruzne usparuzpa ashamparuza sunkana kwail kinamtu. 6 Ashampa mîjmikane, mamaz ampuwa ashampakasa pittane, kwail kinazi. Uruzne Diosta piantuza sunkana kiman. An ñamin nane uruza Dios sunkana kirîttuza ilnanazi kiz kit tînta kurunarau. 7 Diosne aumîza akwanara, kwail kin uzamanpa, mamaz kasara kitchimikakasa chamanpa. Aumîza akwanara, nil uzanapa, Dioskasa chaanapa. 8 Na kamtara aizpa mîmtuchiruzne Dios kamtara aizpa mîamtuchi. Nawa sappamtuchi akwa, uspane Dios kamtara aizpa sappamtuchi. Diosne paiña Sînam Izpulta aumîza îninta, aumîza kiwainnapa, us pashimtu aizpa kinpa. 9 Mane nane uruza miza Diosta piantuza pashinana pamanash. Diosne ñamin uruza uruzpain pashianapa kamtanara. 10 Watcha, une wan Diosta pianturuza, wan Macedonia sura uzturuza panashimtu. U usparuza pashinamtukas, aune uruza paikumtumakpas, wantuza an akkwan pashinanapa. 11 Uruzpain kalpain uzna kamtain. Mamaz awara kwail kinapmun. Wan awane uspain kal kiarawa. Awa aizpa sailkasa kal kiarawa, uspa we aizpa kana kinpa. Mamaztuza chiwazha paikukain. Na kamtanara aizpakanain kal kirain, 12 u chinkas we kimanpa. Sunkana kitne, wan Diosta pianchiruzne uruzpa wat minñanazi.
Anpatne kailnazi
13 Diosta piantuz, mîzhain. Diosta piantuzne iarînazi. Sun akwa kainsîh minman. Aune uruza irîttuzpa, Diosta piantuzpa, piankamnintamakpas, tayalamanpa. Mamaztuzne, Diosta pianchiruzne, tayalat kit chiyura uzna tîrizamtuchi, irîttuz kakulninshina pianchi akwa. Sun akwa uruza kamtananash. 14 Aune Jesús irît nîjkultumakpas. Ankas Jesús irîttas kakultît nîjkultumakpas. Diosne sun irîttuza, Diosta piantuza, kakulninnanazi, Jesús suntuza chiyura nuninnanapa, paiña kailtu payura. 15 Katmizna aune au Anpat aumîza kamtanara aizpa uruza kamtanamtumakpas. Au Anpatpa kailtu payu taizkane, aune mama an sukin uzturuzne, chiyura an ñancha nuamanapas, sun Diosta piantuza, an ñamin irîttuza, aukasa kakulninnamtu akwa. 16 Sun payura au Anpatne chiyuras kailnazi. Awane Dios paramtu aizpa mîanazi. Sun urain awane katsa ángel mikwa tînta kwiantu aizpa mîanazi. Suasne awane Diospa iru kwil tînta ustu mîanazi. Sun urain irîttuzne, Cristora piantuzne, an ñancha kamkis kakulanazi. 17 Kwiztane aune, an sura uzturuzne, iarîttuzkasa parejuin chiyura nuanawas. Suasmesa aune wanish pîlakin au Anpatta wanmalanawas. Suasne aune au Anpatkasa pailta payukima nukkulanapas. 18 Katmizna, an pitkasa uruzpain kiwaintain, tayalamanpa, u Dioskasa pura akwa.
1 Mane, Diosta piantuz, mîzhain. Nane uruza au Anpatpa amtu payuwa pamtuchish, u sunpa wat pian akwa. 2 Mînminkas mizurainkas au Anpat kailtu pianchi. Walkummika amtawara mamazpa yalta napna chamtuasmin, yalpamikane mizurainkas walkum amtu pianchi. Sunkanane mînminkas au Anpat kailtu payura pianchi. 3 Mazantuzne minñat kit ka kaizamtu: “Aune kalpain uztumakpas. Chinkas aumîza azaptuchi,” kizamtu. Uspa sunkana minñakane, Cristone azain at kit wantuza ilnanazi. Ashampa pîja wakane, pashpa taiztachasmin, usne kwisha tînta ishnintu. Sun ashampa aza ishtu kiamtukana Dios kwailtuza ilnakane, mînminkas tizamanazi. 4 Diosta pianchiruz Jesús kailtu pianchikas, une, Diosta piantuzne, paiña kailtu payu tîrizamtu. Walkummika kulat kit yalkin napkane, usne yalpamikasha azain ishkwinintu, walkumtumikasha tîriztuchi akwa. Une au Anpat kailtu payura pian akwa, une paiña kailtu payu tîrizamtu, ishkwatchin. 5 Diosta pian akwa, une wat kiat kit nil chaamtu. Mamaztuz Diosta pianchi akwa, uspane chaat kit kwail kiashimtu. 6 Katmizna aune Diosta pianchiruzkana uzarachiwamakpas, uspa kîzpu mainñamtu akwa. Auruzpain kwira kitpamakpas. Aune wat mintawamakpas. 7 Amtawara awane pittamtu. Diospa minñamtuchi akwa, awane amtawara tîraku kuat kit piamtu, Jesús kailtu payu tîrizamtuchi akwa. 8 Aune, Diosta piantuzne, Dios pashit aizpa kamtumakpas, kîzpu maintuchi akwa. Auruzpain kwira kitpamakpas, wat minñanapa. Dios aumîza kiwainshimtu akwa, Diosta an wat nîjkularawa. Dios aumîza pakpashimtu akwa, aune awaruza pashinarawamakpas. Aune Diosta tîriztawamakpas, Dios aumîza chiyura mîlnanakima. 9-10 Diosne aumîza nanarachi, aumîza ilnana. Au Anpat Jesucristo au akwa irît akwa, Diosne aumîza nanarît, watsat mîlnanapa. Au Anpat kailkane, ma uzturuzkas an ñamin irittuzkas uskasa uzanapas. 11 Katmizna uruzpain watsal pit kaiztain, Diosta an wat piankamanapa. Ma u usparuza kiwaintukanain wantuza kiwainnarain, an tînta namanapa.
Pablone Diosta pianturuza kurunamtu
12 Diosta piantuz, mîzhain. Aune uruza paikumtumakpas, uruzpain Diospa kal kimturuzpa wat minñanapa. Diosne usparuza u mikwa namninnarît, uruza îninnanapa, uruza Dios pit kamtananapa. 13 Usparuzpa kwisha wat mintain. Diospa kal kiamtu akwa, usparuza pashinarain. Uruzpain kalpain uztain. 14 Izmuruz, mîrain. Sunkas kal kishimtuchiruza tînta kurunnarawa, paiñain kal kianapa, paiña pial kana kianapa. Tayalturuza kiwaintain, Dios usparuza an tînta namninnapa. Cristora we nîjkulturuza kiwaintain. Wan awaruza impara imparain kurunarain, aliz kultachin. 15 Uruza kwail kimturuza kwail kiman. Diosta piantuzakas, wan Diosta pianchiruzakas wat kiwaintain. 16 Pailta payukima wat purarain. 17 Chiwazha kimtuasmin, akwan piji Diosta paikwarain. 18 Naizamtuasmin, Diosta aishtaish kiztain. Diosne Jesucristora piantuz sunkana kinpa pashimtu. 19 Diospa Sînam Izpul kuruntu aizpa kirain. 20 Dios pit kamtamturuza mîrain, uspa kaizamtu aizpa mainñamanpa. 21 Dios pit kamtammika kwinta kimtuasmin, une us kaiztu aizpa mîmarain, us Dios kaizta aizpakana kamtanapa. Wat kiztu aizpa nîjkulat kit kirain. 22 Wan tuntu kwail aizpa chîhkarain. 23 Diosne aumîza wat kulninta, uskasa kalpain uzanapa, wan kwail kirît chîhkanapa. Nane Diosta paikumtus, Dios u kaijchura watsanapa, us înintu aizpa kianapa, us kurunamtu aizpa mîanapa. Au Anpat Jesucristo akane, Diosne au kwail kiamtu pashinamanazi. 24 Dios uruza akwanarît akwa, usne uruza watsananazi, Dios iztakin nil uzanapa. Diosne us kin namtarît aizpa kinazi.
Minpa pit
25 Diosta piantuz, au akwa Diosta paikwarain. 26 Wantuza “kakishapu” kiztain. 27 Au Anpatne an pit paranpa nawa îninta, u wan Cristora piantuza sun pit izanapa. 28 Diosta paikumtus, au Anpat Jesucristo uruza wat kiwainanapa. Ka. Pailti.
Kakishapu
1 Nane Pablo mun ish. Nane Silvanokasa Timoteokasa an pînkîh paat kit uruza Tesalónica pîpulura uztuza îninnamtus, u au Anpat Jesucristorakas u au Taitta Diostakas piankaamamtu akwa. 2 Aune u akwa au Taitta Diostakas au Anpat Jesucristorakas paikumtumakpas, Dios uruza wat kiwainanapa, kalpain uzanapa.
Cristo kailka, Diosne kwail kirîttuza ilnanazi
3 Diosta piantuz, mîzhain. Aune pailta payu u akwa Diosta aishtaish kiztumakpas. Ka kaiztawamakpas, u Diosta an nîjkulamtu akwa, u uruzpain an pashiamtu akwa. 4 Katmizna, u Diosta nîjkulturuzkin pianakane, aune wat puramakpas. Aune usparuza u Diosta nîjkulamtu kiznamtumakpas. Mamaztuz uruza naizninnamtukas, u akwan tuntu kwail naizamtukas, une wan chiwal tailchaamtu, u Diosta nîjkulamtu akwa. 5 U Dios pit nîjkulamtu akwa, mamaztuzne uruza naizninnamtu. Sunkana wat Diosne wattuzakas kwailtuzakas nil kinanazi. U naizamtukas, Diosne uruzpa wat min kit uruza paiña înintukin uzninnanazi. 6 Dios nil kimtu akwa, Diosne uruza naizninturuza naizninnanazi. 7 Sun payura Diosne uruzakas aumîzakas parejuin kwaizkulninnanazi. Au Anpat Jesús chiyuras paiña tînta ángeltuzkasa kaiyakane, wan naizninmu pailtînazi. Kailka, usne ïnkanain aiztînazi. 8 Sun payura Diosne Diosta pianchiruzakas, au Anpat Jesús watsal pit mîmtuchiruzakas ilninnanazi. 9 Diosne pailta payukima usparuza ilnanazi, naizanakima, wan kanakima. Uspane au Anpat Jesúspa uzkin kashain mizurainkas pianasachi. Sîpnazi. Uspane miza us watsal iztît piankamamanazi. Yawa tînta i piankamamanazi. 10 Au Anpat akane, Diosta nîjkulturuzne ussa “kwisha wari” kizat kit uspa iztukin wakpuj wainñanazi. Sun payura ukas sunkana kianazi, u au pit parat aizpa nîjkulara akwa. 11 Katmizna aune, Cristora nîjkulamtu akwa pailta payukima Diosta paikumtumakpas, uruza tînta kiwainnanapa. Diosne uruza akwanara, Dios uruza kurunamtu aizpakana uzanapa. U Diosta nîjkulamtu akwa, usne uruza kiwainnashina, u wan wat pashiamtu aizpa kianpa. 12 Sunkana u uzamtune, awaruzne au Anpat Jesúspa wat minñanazi. U Dios kaiztu aizpa mîamtu akwa, uskas u akwa wat minanazi. Wan chiwal sunkana kirînazi, au Dioskas, au Anpat Jesucristokas uruza kwisha wat kiwainashimtu akwa.
Au Anpat Jesucristone anazi
1 Mane, Diosta piantuz, mîzhain, au kaizamtu aizpa piankamanapa. Au Anpat Jesucristone kail kit aumîza wan ussa nîjkulturuza wanmakninnanazi, uskasa puranapa. 2 U mintu aizpa maizman. Mînpazha “au Anpat kailtu payu me putnazi” kiztane, ishkuman. Mînpazha “Diospa Izpul anmin pit nawa kaizna îninta” kiztane, ishkuman. “Pablo an pînkîh pat kit Cristo me kailta” kizturuza mîman. “Pablo an pit kamtat kit me Cristo kailta” kizturuza mîman. 3 “Au Anpat kailtu payu taizzi” kizturuza mîman. Uruza pîrail kaizninman. Au Anpat kailtu payu taiztuchasmin, akkwan awaruzne Dios înintu aizpa mîashimanazi. Uskasa aliz kulat kit wakpuj wainñamanazi. Sun payu taizka, mamaz ampune awa uzkin anazi, akkwan tuntu kwail kianapa. Kwiztane Diosne an kwail kimtumikasha, an ïnta îmtumikasha ilnazi, us naiznakima. 4 Sun Diosta aliz kultumikane Dios înintu aizpa kishimanazi. Usmin an katsa namninshinazi, Dios mîj aizpa azpiannapa. Uskas Dios yalta uznazi, “nane Dios ish” kizna, awa ussa wakpuj wainñanapa. 5 Na uruzkasa mama uzasmin, nane sun pitmin uruza akwan piji paranarau. ¿Nîjmakkiwas? 6 Mane une an kwail kimmikawa pian. Usne mane kwail kisachi, mînpazha ussa kwail kinintuchi akwa. Narît urara awane ussa izat kit piankamanazi. 7 Sun kwail kimmikane ma kulat kit paiña kal kimtu, awa Dios kaizta aizpa mîamanpa. Mamazne an kwail kimmikasha wan kwail kishimtu aizpa kinintuchi, us au sukis înkima. 8 Kwiztane an kwail kimmikane kai iztînazi. Au Anpat Jesús kailkane, usne kwisha watsal iztît anazi. Usne an kwail kimmikasha paiña pitkasa îninnazi, piantanapa, an kwail kimanpa. 9 Jesús kailtuchasmin, an kwail kimmika akane, usne akwan iztasparît kal kinazi, Satanás ussa tînta kiwaintu akwa. Mamazne paiña kwail kal kiamtu aizpa kimanazi. Paiña kwail iztasparît kal akwa, usne awaruza paiña pîrail kirît aizpa kanpaninnazi. 10 Usne akkwan tuntu kwail kinazi, wan awaruza pîrail apninnanapa. An awaruzne iarînazi, Dios watcha pit pashiarachi akwa. Dios watcha pit mîashimtuchi akwa, Diosne usparuza watsat mîlnamanazi. 11 Uspa watcha mîashimtuchi akwa, Diosne usparuza pîrail aptu aizpa mîninnanazi. Suasne uspane an pîrail kaizmumikasha mîanazi. 12 Uspa watcha mîashimtuchi akwa, kwail kiashimtu akwa, Diosne wantuza ïnta impakninnanazi.
Diosne awaruza nananazi, watsarît mîlnanapa
13 Mane, Diosta piantuz, mîzhain. Dios uruza pashinamtu akwa, pailta payu aune Diosta u akwa aishtaish kiztawamakpas. Au su sarachasmin, Diosne an ñamin uruza watsat mîlnana nanarît, uruza pashinara akwa. U Dios watcha pit nîjkularawane, Diospa Sînam Izpulne uruza nil uzninnara, Dios pashit aizpa kianapa. 14 Au Dios watsal pit uruza kainanamtuasmin, Diosne uruza akwanara, us aumîza watsat mîlnanapa, au Anpat Jesucristokasa chiyura uzanapa. 15 Katmizna, Diosta piantuz, an tînta namtain. Sun pit u uzkin na kamtanara aizpakas, sun pînkîh uruza paninnarara aizpakas nîjkulamîztain. 16 Au Anpat Jesucristokas, au Taitta Dioskas aumîza pashinat kit aumîza wat kurunnara, pailta payu kalpain uzanapa. Aune us aumîza wat mîlamtu aizpa tîriztumakpas. 17 Nane au Anpat Jesucristora paikumtus, uruza kalpain uzninnanapa, wan wat kal kianapa, wan watsal pit paraanapa.
Diosta au akwa paikwarain
1 Diosta piantuza, minpa pit kaiznamtus. Au akwa Diosta paikwarain, an akkwan awa au Anpatpa pit mîanapa, Dios aumîza kiwainnanapa, paiña pit wan suwara kainanapa. Suasne uspane sun pitmin sappanat kit u nîjkulamtukanain nîjkulanazi. 2 Wan awa Dios watsal pit nîjkulamtuchi akwa, au akwa paikwarain, au watsarît tuanpa, kwail awaruz aumîza chinkas kiamanpa. 3 Aune au Anpatta nîjkulshinamakpas. Au Anpat aukasa chamtu akwa, usne uruza an tînta namninnat kit uruza iznanazi, Satanás uruza kwail kininnamanpa. 4 Aune au Anpat uruza kiwainanazi pianmakpas, au înintu aizpa pailta payu mîanapa. 5 Nane au Anpatta paikumtus, yawa Dios uruza pashinamtu piankamanapa, Cristo uruza an tînta namninnanapa.
Awane kal kiarawa
6 Diosta piantuz, mîzhain. Mazantuzne, Diosta pianturuzne, wat kal kiamtuchi. Au Anpat Jesucristo aumîza kamtanara akwa, aune uruza îninnamtus, arakantuza paimpa chîhkananapa, uspakasa chaamanpa, uspa au kamtanara aizpa mîamtuchi akwa. 7 U uzkin uzarasmin, aune tînta kal kiramakpas. Arakan chimakpas. Katmizna uspane au kal kimtukanain kal kin piankamarawa. 8 Chiwazha kain sapparachi akwa, aune wan kumira sapta aizpa pialkasa taramakpas. U uzkin uzarasmin, amtawara payuwara tînta kal kiramakpas, mînminkas au akwa pial taanpa. 9 Aune uruza au we mîj aizpa paikwashimtumakpas. Sunkana aune chinkas paikwatchimakpas, u au uztakanain piankamanapa. 10 U uzkin uzarasmin, aune uruza an pit kinpa îninnaramakpas: “Kal kishimtuchimikasha kwinkain.” 11 Aune mînpazha uruzpa arakankanain uzamtu mîramakpas. Kal kiamtuchiasmin, mînpazha mamaztuza azhappamtu. 12 An Anpat Jesucristo aumîza kamtanara akwa, aune sun kal kishimtumikara kurun kit înintumakpas, paiña kal kianapa, paiña kumira kwanpa, wat uznapa. 13 Diosta piantuz, mîzhain. U tayalamtukas, une pailta payukima nil uzat kit wat kiarawa. 14 Mînpazha an pînkîh parît aizpa, au kamtarît aizpa mîmtuchine, ussa wan awaruza antain. Uskasa chakain, us kwail akwa mîtsal mîjanpa, Anpatta mamasa kanpanapa. 15 Une ussa izmumikakanain saptain, Diosta pianmikakana kurunnapa.
Dios uruza wat kinamtu
16 Mane, au Anpat watmika uztu akwa, au Anpat Jesucristone uruza pailta payu kalpain uzna kiwainashimtu, au Anpat ukasa tuanpa. 17 Nane Pablo mun ish. Mamaz an pînkîh pamtukas, nane uruza kakishapu kiz kit an minpa pit ap chihtîkasa pînkîhta pamtus. 18 Au Anpat Jesucristo wan uruza wat kiwainnanaka. Pailti.
Kakishapu
1 Nane Pablo mun ish. Nane Jesucristowa înintamika ish. Au watsat mîlmumika Dioskas au Anpat Jesucristokas nawa nat kit îninta. Au nîjkulturuzne ussa tîriztumakpas, us aumîza chiyura sapnakima. 2 Timoteo, mîri. Nane nua sun pînkîh pamtus. Nune ap watcha painkulkana i, Dios nua kiwaintît akwa, sun pit nîjkulnapa. Nane au Taitta Diostakas Anpat Jesucristorakas paikumtus, nua wat kiwainpa, nua pashinapa, nu kalpain uznapa.
Mamaz awa kwail kamtamtu aizpa kwiraruin
3 Macedonia sura îkane, nane nua Éfeso pîpulukin tîwij îrau. Sua an mari kiztau, wat chi kamtamtuza kurunnanapa, mamaz tuntu kamtam kamtanamanpa. 4 Usparuza kaiznari, ñan kwinta kamtanamanpa. Antikwa awa an ñancha kiara aizpa kamtaamtune, an tuntu kamtamne Diosta piankamna kiwainsachi. Sunne chinkas wat puztuchi. Sun pitkasa kaizmuruzne awaruza wan mîmaninnanazi. Kancha u Diospa wat kamtamtu aizpa nîjkultane, nune Dios kaizta aizpa kinazi. 5 Nune sun kwail kamtamtuza îninnarawa, an kamtanamanpa. Suasne mamazta pashitmikane mamazpa kwail minachi, kaijchu sînam sarît akwa, Dios înintu aizpa kishimtu akwa, Diosta wat nîjkultu akwa. 6 Mînpazha na usparuza kaizta aizpa mîarachi. Suasne ñanta kit kit mamaz miwara îara. Uspane Dios pashit aizpa chîhkat kit mamaz miwara kaiyara, kain pit kaiznapa. 7 Usparuzmin Dios Moisésta îninta aizpa kamtamtuz namashimtukas, uspane uspa kamtamtu aizpa piankamamtuchi. Akkwan pit kaizamtukas, uspane uspain kamtamtu aizpa wat kamtaasachi. 8 Mane aune Dios îninta aizpa wari pianmakpas. Kamtammikane sun pit piankam kit Dios înintît aizpa nil kitpa. 9 Ankas pianmakpas. Awa wat kitne, mînainkas kwail kirît kizamanazi. Diosne us înintu aizpa pînkîhta paninta, Dios kaizta aizpa kiamtuchiruz piankamanapa, Diosta mîashitchiruz kwail kiarît piankamanapa, Diosta wakpuj waintuchiruz kwail kiarît piankamanapa, akkwan tuntu kwail kiarîttuz kwail kiarît piankamanapa, Diosta pashiarachiruz kwail kiarît piankamanapa, Diosta nîjkulamtuchiruz kwail kiarît piankamanapa, papihshtakas akkuhshtakas awarakas piantamtuz kwail kiarît piankamanapa, 10 kasara kitchi ashampakasa pitmuruzkas kwail kiarît piankamanapa, ampuwarain pitmuruzkas kwail kiarît piankamanpa, awara piz kit paininmuruzkas kwail kiarît piankamanapa, pîrail kaizmuruzkas kwail kiarît piankamanapa, katsa namtîtmikasha pîrail apmuruzkas kwail kiarît piankamanapa. Mamaztuzne an akkwan tuntu kwail kianazi, watcha kamtam sapparachi akwa. 11 Sun watcha kamtamne Dios kwisha wari kiztu. Au watsal Diosne nawa îninta, sun pit awaruza kainana, awaruza watsat mîlnanapa.
Pablone Diosta aishtaish kiztu
12 Nane Jesucristora, au Anpatta aishtaish kiztus. Usne nawa tînta kiwainta, paiña pit kainanapa. Usne nawa nil awakana nat kit îninta, paiña kal kinpa. 13 Na an ñamin ussa aliz parîtkas, ussa piantuza naizninnarakas, ussa kwail kiztakas, usne nawa paiña kiwainmikasha namninta. Nîjkultachiasmin, na kit aizpa wat pianchiasmin, Diosne nawa wat min kit kiwainshira. 14 Katmizna au Anpatne nawa kwisha wat kira. Jesucristo nawa saptît akwa, usne nawa wat kiwainta, ussa nîjkulnapa, Diosta pashinpa, uskasa uznapa. 15 Na uruza kaiznamtu aizpa watcha i. Wan awane sun pit mîat kit nîjkularawa. Cristo Jesúsne au sura at, kwail awaruza wat paninnat kit watsat mîlnana. Nane wan awaruzkin an kwail kirît ish. 16 Na kwail kirîtkas, Diosne nawa wat kiwainta. Jesucristone akkwan payukima nawa tîrizta, na ussa piankamnakima. Na akkwan kwail kirîtkas, Dios nawa maizta akwa, usne nawa paiña painkul namninta. Sun akwa an kwizta Cristora nîjkultuzne Dios usparuza maiznashina piankamnat kit pailta payukima chiyura uzninnanazi. 17 Katmizna mane aune Dios kwisha wari kiztumakpas. Usne wantuzkin an watsal i. Usne, au katsa mikwane, wan payurakima wanta îninnanazi. Mizurainkas isachi. Mînminkas ussa izsachi. Mamazne uskana chi. Usne wanta pian. Ka. 18-19 Timoteo, nune ap painkulkana i. Mamasa na kamtarît aizpa mîzha, sun pitmin mamaztuza kamtananapa. Ñamin Dios kainammmikane nuwa wat para, sun kal wat kinpa. Mane na kamtamtu aizpa mîrane, nune sun kal Dios mîlara aizpa wat kishina. Diospa kal kimtuasmin, nune nil min kit Diosta nîjkultawa, chiwazha wat aizpa kinpa, ayukta kwail mazmanpa. Mînpazha sun pit wat mîrachi akwa, sun kammu pashitchi akwa, uspane kaarît me, an nîjkulamtuchi akwa. 20 An ñamin Himeneokas Alejandrokas sunkanain kirailta. Sun paas wat mîshimtuchi akwa, nane sun paasta chîhkarau, Satanásta kanpailnapa, uspa kwail kimtu aizpa piankampailnapa, Diosta an kwail kizpailmanpa.
Wanmakkamtune, uspane Diosta paikwatpa
1 An ñancha nane nua kuruntus, Jesústa piantuza kainana, Diosta wan awa akwa paikwanpa. Uspane paikwatpa, Dios awaruza kiwainanapa. Dios usparuza kiwainakane, Diosta paikumturuzne Diosta aishtaish kizashina. 2 Uspane wan katsa mikwa akwakas wan ainki îninmika akwakas Diosta paikwatpa, awa kalpain uzanapa, waya kitchin. Sun kitne, aune Diosta wakpuj wainñashit kit awa iztakin wat puranapas. 3 U Diosta wan awa akwa paikukane, Diosne sun kimtu aizpa wari kiztu. Au Diosne au watsat mîlmumika i. 4 Usne wan awaruza watsat mîlnashimtu, Dios watcha pit wat piankamanapa. 5 Maza Diosmin uz. Maza ampuin, Jesucristoin, Diostakas awarakas wanmakninnashinai, awa Dios iztakin wat uzanapa. 6 Wan awa kwail kiarît akwa, Jesucristone irît. Au akwa irît akwa, usne au kwail kiarît aizpa wat kulninnara, aumîza watsat mîlnanapa. Diosne sun payu nat kit awaruza an pit piankamninta, wan awaruza watsat mîlnana. 7 Katmizna Diosne nawa narît, Jesucristowa kainanapa. Paiña înintamika namtawane, usne nawa Judío awa chiruza îninta, usparuza watcha pit kamtana, uspa sun pit nîjkulanapa. Na kaiztu aizpa watcha i. Pîrail kaiztuchish. 8 Katmizna nane wan suras ampuruza kainammtus, Diosta paikwanpa. Judío awakana chihtî anak kit Diosta paikumtuasmin, Dios pashimtu aizpa kiarawa, pilchapuztachin, mamazkasa aliz kultachin.
Ashampa Dios wanmakmukin îamtune
9 Ashamparuz Dios wanmakmukin îakane, uspane kwisha muinchi pïnkasa pait kit kwashina. Wat pïn kwashina, awa usparuzpa kwail minñamanpa. Uspa ash wat ulaashina, akkwan pial tarachin. Urukas muin kwilkin kwamkas muin pïnkas kwaman, awa ashamparuzpa kwail minñamanpa. Uspane chiwazha wat kal kiashina, awa watsal ashampa i kiznapa. Uspane wat ashampakana kuharawa, kwail ashampakana chi. 10 Ashamparuzne, Diosta pashimturuzne, watsal kal kiarawa. Sun kal kiarane, ashamparuzne watsal izanazi, Dios pashit aizpa kiamtu akwa. 11 Awa Dios pit kamtamtuasmin, ashamparuzne kamtamtuz kaizamtu aizpa puñain mîarawa, paratchin. 12 Nane ashamparuza kurunnanash, wan awaruza Diospa yalkin kamtanamanpa. Ashamparuzne Dios pit puñain mîarawa. Uspane ampuruza îninñanachi. 13 Ashampa sunkana kiarawa, Dios an ñancha Adánta sara akwa. Kwiztane usne Evara sara. 14 Adánne Satanáspa pîrail aptît aizpa mîrachi. Sun pîrail aptît aizpa mîrawane, paiña ashampain kwail kirît. 15 Diosne ashamparuza watsat mîlnanazi, pashparuza kawiramtuasmin, Jesústa nîjkulamtuasmin. Diostakas wan Diosta piantuzakas pashinarane, Diosne usparuza kiwainnanazi. Uspane nil uzat kit Dios pashit aizpa kiarawa.
Wanmakmuruzpa îninmika
1 An pitne na kaiztu aizpa watcha i. Mînpazha Diosta piantuz wanmakmu yalkin mikwa namshitne, usne wat kal pashimtu. 2 Katmizna an mikwane nil uztawa, mînminkas ussa kwail kirît kizmanpa. Usne maza ashampain mîjatpa. Akkwan tain chappi kukain. Usmin wat min kit nil kitpa. Usne awa iztakin wat uztawa. Maza akane, paiña yal nammîlatpa. Usne kwisha wat Dios pit piankam kit kamtawa. 3 Pirît chakain. Izmuruzkasa waya kikain. Mamaztuza wat kitpa. Usne waya kimtuza kiwainarawa, aliz paramanpa. Usne pialtain minman. 4 Paiña kwalta kurun kit wat îninnarawa. Paiña pashparuza kurun kit kawirarawa, us kaiznara aizpa mîat kit kianapa. 5 Paiña kwalta kurunna wat pianchine, usne Diospa yalkin wanmakmuruza kurunnasachi. 6 Diospa yal mikwara narakane, nune mamin Jesústa piankamtamikasha narakiwa, us “nane mamaz awakin an warish” minmanpa. Suasne uskas Diablokanakas naiznazi, us “mamaz awakin an warish” mintu akwa. Sun akwa Diosne sun kwail kimtuza naizninnanazi. 7 Jesústa pianchiruzkas sun Diospa yal mikwa wat awa i minñat kit kaizarawa, awa us kimtu aizpa nil i piankamanapa. Sun ampu wat chine, awa us akwa wat minñamtuchine, suasne Diablone ussa kwail kininnazi.
Wanmakmukin kiwainmuruz
8 Sunkanain wanmakmukin kiwaintuzne nil uzat kit uspa kaizara aizpa kiarawa. Mizurainkas uspa pit wainamman. Maza pitmin paratpa. Pirît chakain. Kal kimtuasmin, mamazta walkukain. 9 Uspane Dios kamta aizpa mîat kit nîjkularawa. Uspa kaijchu wat panintawa, wat pian aizpa kianapa. 10 Kiwainturuza narachasmin, nune uspa kal iznat kit usparuza mîmarawa, miza uzna piankamanapa. Uspa chinkas kwail kiamtukine, nil uzamtune, nune kiwainmuruza namninnashina. 11 Sunkanain uspa ashamparuzkas wanmakmukin awa iztakin wat uzarawa. Uspane mamazpa kutkukain. Uspakas pirît chakain. Chiwazha kishitne, pailnakima nil kiarawa. 12 Ampu kiwaintumikane maza ashampain mîjatpa. Usne paiña yalkin uzaruzakas paiña pashparuzakas watsal îninnarawa. 13 Kiwainturuz usparuzpa kal wanmakmukin wat kiarane, awane usparuzpa wat minñanazi. Suasne uspane an wat nîjkulat kit Jesucristowa an tînta kamtanashina.
Aune Dios kishimtu aizpa piankamshinamakpas
14 Îrattuin na nua izna îshimtukas, nane an pînkîh pat kit îninshimtus. 15 Upta azain putnasachine, nane an pînkîh înintus, u miza purarakas Diosta piantuzkasa piankamanapa. Au Diosne, chiyura uzmikane, uruza paiña kwal namninnanat kit wanmakninnara. Sun Diosta piantuzne tînta watcha kamtananazi. 16 Awa an pitne an ñamin piankamarachikas, au kamtamne kwisha watsal i. Sunkana aune nîjkulamtumakpas. Diosne Cristo awakana namtît, aumîza piankamninnara. Paiña Sînam Izpulne Cristo kwail kitchi kizta. Ángeltuzkas ussa wat izara. Awane sun pit tînta kainanara, wan awa mîanapa. Akkwan wan suras awane ussa nîjkulara. Diosne ussa chiyura sapta.
Kwail awaruzne kwail kamtanamtu
1 Mane Diospa Sînam Izpulne ka nil kizta: Minpa payurane mînpazha Diosta chîhkat kit Dios kaizta aizpa nîjkulamanazi. Sun kwail awaruzne kwail saliz kaiztu aizpa mîat kit mamaztuza Diablo kamtamtu aizpa kamtananazi. 2 Sun kamtamturuzne pîrail kaizanazi, awa watcha piankamamanpa. Diablo usparuza piznat kit paiñawa namnarît akwa, uspane kwail kiamîznazi. 3 Sun kwail kamtamturuzne awaruza awa kasara kimanpa îninnanazi. Dios wan kumira sarakas, uspakas awara chiwazha kumira kuamanpa îninnanazi. Diosta nîjkulturuzkas watcha piantuzkas aishtaish kizat kit wan kuwizashina. 4 Chiwazha Dios sara aizpa wan kwashina, wat akwa. Chinkas impachi. Chiwazha kwashitne, Diosta aishtaish kizkane, aune sappat kit kwashinamakpas. 5 Dios pit akwa Diosta paikukane, usne au kumtu aizpa wat namnintu.
Jesucristowa wat kiwainmika
6 An pînkîh parît aizpa Jesústa piantuza kamtanarane, nune Jesucristora kiwainazi. Nune an wat kamtam ñamin sap kit nîjkulta, makima sun pit kinpa. 7 Awa chiwazha kain kwinta kwinta kitne, mîkain, an kain kwinta Dios pit chi akwa. Nune Diospa an kamarawa, Diosta an wat nîjkulnapa, Diosta an wat kiwainapa. 8 Salamturuzne usparuzpain pitchin kiwainamtu. Salmukin Diosta nîjkul kit piankamna anza wari, ma payu Dios aumîza iznamtu akwa. Uskas aumîza mamaz payura chiyura uzna kin namnara. 9 An pit na nua kaiztu aizpa watcha i. Wan awane sun pit sappat kit nîjkularawa. 10 Awa aumîza aliz paramtukas, aune Diospa kal aumîza îninta aizpa tînta kitpamakpas. Au Dios uztumikasha piankamtu akwa, aune ussa tîriztumakpas. Usmin wan awaruza watsat mîlnashina. Watcha. Diosne ussa nîjkulturuzain watsat mîlnanazi. 11 Awaruza kamtanakane, nune usparuza îninnamîztawa, an pit na kaizta aizpa kianapa. 12 Nune mama musittu i. Awa nuwa we minñakane, musittuin akwa, nune usparuza mîmun. Nune Jesústa piantuz iztakin wat kit kit nil uztawa. Chiwazha watne paratpa. Wan awaruza pashinarawa. Nune uspa iztakin Diosta nîjkultawa, uspa nîjkulna piankamanapa. Nune wantuza chiwazha nu kimtu aizpa nil i piankamninnarawa. 13 Na piannankima, nune Dios pit pînkîh iztawa, wan awa mîanapa. Jesústa piantuza Dios pînkîh piankamninnarawa, sun kianapa. Kwisha wat kamtanarawa. 14 Ñamin Diospa yal mikwaruzne uspa chihtî up kîzpura paara. Suasne uspane wan awa iztakin Dios nua narît an kal kinpa kizara. An kal Dios nua mîlarît aizpa mainkain. 15 Nune wan pit na kaizta aizpa watsal kitpa, wan awa na kaizta aizpa nu kimtu izanapa. 16 Nuin kwira kit Dios pitkas mamaztuza nil kamtanamîztawa. Nukas an tînta Diosta nîjlultawa. Suasne Diosne nuakas mamaztuzakas watsat mîlnanazi.
Jesústa piantuzkasa miza uzna
1 An îlaparuz kwail kikane, usparuza tînta kaiznanachi. Nune usparuza up papihshkanain watsal kurunnarawa, an kwail kiamanpa. Musitturuzakas aimpihshtakanain kurunnarawa. 2 Înkwaruzakas akkuhshtakanain kurunnarawa. Nimpihshtuzakas kwampihshtakanain kurunnat kit chiwazha watsal kiwainarawa, awa nuwa kwail minñamanpa. 3 Ampu irît ashampa we mîjkane, Jesústa piantuzne ussa kiwainat kit chiwazha we mîj aizpa mîlanarawa. 4 Ampu irît ashampa painkul mîjne, pampa pashpa mîjne, an ñancha uspane kamat kit akkuhshta we mîj aizpa mîlanarawa. Uspane uspa akkuhshtain wat minñat kit kiwainñarawa, ñamin akkuhsh wan pashparain kwira kit kawirara akwa. Pashpa kwalta kwira kiarane, anne Dios iztakin wari. 5 Ampu irît ashampamikakas, mazainpa uzmikakas Diosta nîjkul kit payuwarakas amtawarakas Diosta paikumtu, Dios ussa kiwainapa. Jesústa piantuzne sun ampu mîjchiruza kiwainñarawa. 6 Sunkana ampu irît ashampa usmin min kit chiwazha pashit aizpa paimtune, usne kain uztu. Ussa kiwainachi. An ashampa uztukas, usne Diosta pianchi ashampakana uztu akwa. 7 Nune sun kwaltuzakas ashampa ampu mîjchiruzakas îninnarawa, uspa chinkas kwail kiamanpa. 8 Mînpazha uspa kwaltakas paiña yalta uztuzakas iznarakine, usne Diosta wat nîjkultuchi. Paiña kwal kiwaintuchimikane Jesústa pianchimikakin anza kwail i, paiña kwaltuza pashinamtuchi akwa. 9 Ampu îrît ashampa sesenta año mîjne, maza ampuin mîjatne, paiña mun wian kit wanmakmukin pînkîhta parawa, ussa kiwainanapa. 10 Awane an ashampawa wat kal kiarît aizpa nîjkularawa. Paiña pashpa watsal kawirarane, mamaz suras piannamtuza yal nammîlarane, chiwazha wat kal Jesústa piantuza kinarane, naizturuza kiwainarane, chiwazha wat kal kishirane, sun ashamparuza wiannat kit uspa mun pînkîhta parawa. 11 Ampu irît ashampa an înkwachine, ussa wiannachi, Diospa yalta wanmakmuruz ussa kiwainñamanpa. Mînpazha ashamparuzne mamaz ampura sait kit kasara kishianazi, uspa Diospa yalkin Cristowa kal kiarît aizpa chîhkashiamtu akwa. 12 Suasne wanmakmukin kiwainna kin namtawane, uspane maizanazi, kin namtît aizpa kiashimtuchi akwa. 13 Sun înkwachiruza, sun ampu mîjchiruza, kiwainman, akkwan kal kin mîjchi akwa. Mamaz yalta mamaz yalta kain chaanazi. Sun akwa arakan namanazi. Uspane kutkuanazi. Uspane uspa izmuruzpa kain pit kaizanazi. Uspane ñantawazha paranazi. 14 Katmizna nane ampu irît musittu ashamparuza ka kiznamtus: Uspane kasara kiarawa. Pashpa kawirarawa. Uspa yalta wat kwira kitpa. Wan sun kiarawane, Diosta pianchiruzne usparuzpa kwail kizamanazi. 15 Mînpazha ampu irît ashamparuzne Cristowa mi chîhkat kit mamaz miwara îara, Satanásta kanpaana. 16 Diosta nîjkultu ashampakas paiña kwalkas mamazpa kwaltuza kiwainnarawa, maza ashampawa ampu irîka. Uspane ampu irît ashampara us we mîj aizpa mîlanarawa. Sunkana wanmakmukin Jesústa piantuzne usparuza mîlamanazi. Ampu irît ashampa kwal mîjkine, Jesústa piantuzne us we mîj aizpa ussa mîlanarawa. 17 Awane îlaparuzpa, Diospa yalkin înintuzpa, wat minñarawa. Diosta nîjkulturuzne Dios pit kainammtuzpakas Dios pit kamtamtuzpakas anza wat minñat kit pa pijikima tarawa. 18 Dios pit pînkîhta ka para, awaruza tananapa: “U toro chara pippara u akwa îsalmin kultane, paiña pitkin nukmuchi,” kizta. Suasne usne chiwazha pippa kwashina, u akwa kal kit akwa. Ankas para: “Kal kitpane, kal kimmikane pial sapmu,” kizta. 19 Mînpazha Diospa yalkin îninmikasha kwail kirît kizshikane, paas piantuzkas kutña piantuzkas sunmin kizamtukine, nune sunpa kizmuruza izkinchi. 20 Mane Diospa yalkin îninturuz kwail kikane, nune suntuza wan iztakin kwail kiman kiznarawa. Kwail kimtuza wan iztakin kwail kiman kiznarawane, mamaztuzne kwail kin ishkuanazi. 21 Dioskas Jesucristokas paiña ángel narîttuzkas na nua kaiztu aizpa pian. Katmizna nune na înintu aizpa kitpa. U izmuruz kwail kiamtukas, nune usparuza kwail kiman kiznarawa. Kwail kimtuzpa wat minman. 22 Diosta piantuz wanmakmu yalkin mamazta îninna nakane, nune ussa azain nanachi, us miza uzna piankamnakima. Nu kwail kimtumikasha azain narane, awane nu kwail îninmikasha narît kizanazi. Mamaz kwail kimtu mikakasa chamun. Nuin sunkana tuntu kwail kimun. 23 Kwazin kwanchi. Akkwan payukima pusunmal ishtu akwa, makis nune pitchin vino kwazikasa nat kit kwatpa, wat panapa. 24 Wan awa kwail kiamtukas, mazantuzne uspa kwail awa iztakin kiamtu. An ñancha uspa kwail akwa naizanazi. Mamaztuzne uspa kwail kiamtu aizpa kulanazi. An kwizta uspa kwail akwa naizanazi. 25 Sunkana awa mazantuzpa wat kiamtu aizpa izamtukas, mazantuzne uspa wat kal awa sun izanapa kiamtuchi. Sun wat kal kiamtu aizpa kulasachi.
1 Jesústa piantuzne, kiwainmuruzne, uspa anpatpa wat minñat kit uspa anpatpa kal wat kiarawa. Kiwainmuruz anpatpa wat minñamtune, awane sun kiwainmuruz Diosta wat nîjkulamtu kizanazi, wat kal kiamtu akwa. Uspakas au kamtamtu aizpa wat mîanazi. 2 Masetne anpattuzne Jesústa nîjkulturuz mai. Sun kiwainmumika sun anpat mîjne, kiwainmuruzne uspa anpatpa an wat minñarawa. Jesústa nîjkultu akwa, usne aimpihshkanain i. Katmizna Jesústa nîjkultumikasha anza wat kal kiarawa, ap anpatta kiwaintu akwa, ap anpatta pashimtu akwa.
Watsal kamtam
An pit na kaiztu aizpa wan awaruza kamtanarawa. 3 Mînpazha mamaz tuntu kamtamtune, watsal pit au Anpat Jesucristo kaizta aizpa kamtamtukine, paiña pit kaiztu aizpa mîman. 4 Sun awa “nane mamaz awakin an warish” mintu akwa, usne chinkas pianchi. Usne pailta payukima mamazkasa tînta kaiz kit pitpara mîmamtu. Sun pit akwa, kîzpura mainñarîm. Diosta wat pianchi. Sun kiamtu akwa, awane mamaz mîj aizpa pashiat kit waya kishiamtu. Mamazta kwail kizamtu. Awa uskasa chikin pachish. 5 Usparuzpain aliz paraamîztu. Sun nil chi minñamtu. Watcha pianchi mai. Dios pit kaiztane, uspane kwazpa namtumakpas minñamtu. Sunkanane usparuztas paimpa îrain. 6 Mînpazha Jesústa nîjkultane, mînpazha pitchimin mîjkas, usne watsal uznazi, Diosta pian akwa. 7 Kawirawane, aune au sukin chinkas karaamanash. Irawane, chinkas au sukis mîlsachimakpas. 8 Kumira mîjne, pïn mîjne, aune sunkasain watsal manapas. 9 Kwazpa kulshimturuzne kwail kishiamîztu, an akkwan pial sappashimtu akwa. Nil chi minñamturuzkas wat uzashimtuchiruzkas akkwan piji kwail kiamîznazi. Suasne kwail kin napparawane, mînminkas tas tizamanazi. Suane uspa mîj aizpa wan karînazi. Suasne uspane ïnta pailta payukima naizanazi. 10 Pialmin pashimturuzne akkwan tuntu kwail kishiamîztu, pial sapna. Mînpazha Dios kaizta aizpa an nîjkulashimtuchi, pialmin sayamtu akwa. Akkwan pial sayamtukas, uspane kwisha naizanazi.
Nune wat nîjkultawa
11 Nune Diosta pianmika i. Na kaiztu aizpa mît kit wan kwail chîhkatpa. Nil uztawa. Diospa min kit ussa pashitpa. Dios kaizta aizpa nîjkultawa. Mamaztuza pashinarawa. Naiztukas, nune nil uz kit mamaztuza wat paranarawa. Mamaz awakasa kalpain uztawa. 12 Diosta nîjkultuasmin, nune an tînta kal kit kit wat uztawa, pailta payukima chiyura uznapa. Diosne nua akwara, sun kal kinpa. Sun payura Dios nua akwatpane, akkwan awane nu kaizta aizpa mîara. Nune usparuza “na Diosta nîjkultus” kaiznara. 13 Mane Diosne chiwazha wa aizpa uzninnamtu. Jesucristo Poncio Pilato iztakin kunasmin, usne an watsal pit kamtat kit nil uzta. Dios iztakin nane nua înintus, na kaiztu aizpa kinpa, nu wan awa iztakin nil uznapa. 14 Nune na înintu aizpa kitpa, maiztachin. Suasne awane nu nil uztu piankamat kit nu kwail kirît kizamanazi. Sunkana kitpa, au Anpat Jesucristo amtu payurakima. 15 Sun payu taizkane, Cristone Dios narît payura anazi. Mamaz diosne uskanain wachi. Au Diosne kwisha wat înintamika i. Usne mamaz înintuza îninnamtu. Usne mamaz anpattuza îninnamtu. 16 Usmin ikain. Usne kairain uz. Mînminkas us uztukin nusachi. Awa ussa izsachi akwa, mînminkas mizurainkas ussa izamanazi. Awane ussa wat minñat kit wakpuj wainñarawa. Us tînta akwa, usne wan awaruza payurakima îninnanazi. Ka. 17 Nune an sukin kwazpa kularîttuza kurunnarawa, uspa pialmin minñamanpa. Sun pial akwa, uspane mamazkin an tînta chi mai. Ka kurunnarawa, sun kizamanpa: “Ap pialkasa kwisha wat uznash,” pial pailta payukima tailchasachi akwa. Nune usparuza Diostain an wat nîjkulna kiztain, Diosmin awaruza kwira kinamtu akwa. Diosne aumîza kwisha akkwan mîlanamtu, an watsal uzanapa. 18 Nune kwazpa kularîttuza kurunnarawa, uspa pialkasa akkwan wat kal kianapa. Pial kana kimturuzne akkwan wat kal kiashina. Usparuza kaiznarawa, uspa mîjat aizpa naiyat kit we mîjtuza mîlananapa. 19 Sunkana ma awaruza kiwainarane, uspane mamaz payura an akkwan sappanazi. Uspane Dioskasa pailta payukima wat uzanazi. Uskasa uzna anza wari.
Minpa pit Timoteora kainammtu
20 Timoteo, mîzha. Dios nua kamtarît aizpa chîhkarît akwa, nune sunmin watsatpa, awaruza kamtananapa. Awa kain pit paraaka, mîkikain, uspa Diospa paraamtuchi akwa. Akkwan pianish kizmuruza mîkikain, uspa kaizamtu aizpa nilchi akwa. 21 Mînpazha uspa kamtam sappat kit mamaztuza kamtanamtu, sun wat piantuzkana namanapa. Uspa wat pianmakpas minñamtukas, uspane wat mîamtuchi. Uspane ñan miwara îat kit Dios kaiztu aizpa nîjkularachi. Nane Diosta paikumtus, nua wat kiwainapa. Ka. Pailti.
Kakishapu
1 Nane Pablo mun ish. Diosne nawa narît, Jesucristowa înintamika namna. Usne nawa îninta, awaruza kainananapa. Diosne Jesucristora nîjkulturuza kin namnara, uskasa pailta payukima uzanapa. 2 Nane nua, Timoteora, ap painkulkana pamtus, na nua pashimtu akwa. Nane an pînkîh nua pat kit înintus. Nane au Taitta Diostakas au Anpat Jesucristorakas paikumtus, nua wat kiwainnapa, nua pashinpa, nua watsal uzninnapa.
Aishtaish kiztu
3 Nuwa mintuasmin, nane Diosta aishtaish kiztus, nu watcha Cristora nîjkultu akwa. Ap ñamin Judío irît kwalkanain nane an Diosta wakpuj wain kit us kaizta aizpa min kit wat kimtus. Payuwarakas amtawarakas nu akwa Diosta paikumtus. 4 Nu apkis îtpane, nane nu azta nîjish. Nane nua kwisha izshimtus, na an watsal tuan. 5 Nane nu Cristora wat nîjkulta nîjish. An ñamin up kwankwa Loidakas up akkuhsh Eunicekas Cristora wat nîjkulpailta. Mane nukas Cristora nîjkultu pianish.
Dios kaizta aizpa kin
6 Katmizna nane nua kuruntus, Dios nua mîlarît aizpa mainmanpa, na ap chihtîkasa up kîzpukin paaka. Sun payura Diosne nua paiña kal chîhkara. 7 Diosne paiña Sînam Izpul akwa aumîza kiwainamtu, ishkuamanpa. Usne aumîza kiwainamtu, Diospa kal tînta kianapa. Usne aumîza kiwainamtu, Diostakas awaruzakas pashinanapa. Usne aumîza kiwainamtu, nil minñat kit wat kianapa. 8 Katmizna awaruza au Anpatpakas paiña pînkîhpakas kainanakane, nil kainanaka, mîtsal kitchin. Na Dios pit kainarît akwa, nane kajchira sîptît was. Mane nune nawa mîtsal kimun. Nune nakasain Dios watsal pit akwa naiznawailwas. Nu naiztukas, Diosne nua kiwainazi, uspa pit kainana. 9 Diosne aumîza sînam sanat kit akwanara, wat uzanapa, kwail kiamanpa, Dios pashimtu aizpa kianapa. Diosne au wat kirît akwa aumîza watsat mîlnarachi. Sunkana usne aumîza pashinat kit akwanara, aumîza watsat mîlnana. Dios au su sarachasmin, usne Jesucristora îninna minta, aumîza sînam sananapa. 10 Mane aumîza watsat mîlmumikane, Jesucristone, apain ara. Sun akwa awane Dios wan awaruza pashinara piankamanazi. Cristo irîttas mamasa kakulta akwa, usne aumîza paiña watsal pit mîninnamtu, aumîza watsat mîlnanapa, ïnta îamanpa. 11 Diosne nawa narît, sun pit kainana. Uskas nawa paiña înintamika namninta, wan awaruza sun pit kamtananapa. 12 Katmizna na kajchira sîptît akwa, nane sun naiztus. Na ussa nîjkulta akwa, ussa pian akwa, nane mîtsal kimtuchish. Usne paiña pit nawa chîhkarît aizpa kainanapa kiwainazi, us kailtu payukima, awaruza watsat mîlnanapa. 13 Nu na watsal pit kamtara aizpa mîra akwa, kawarain mamaztuza kamtanarain, Jesucristora nîjkulanapa. Diostakas awaruzakas pashianarawa. 14 Diosne paiña pit nua chîhkarît, awaruza kamtanana. Paiña Sînam Izpul aukasa chamtu akwa, usne umîza kiwainnara, paiña pit awaruza piankamninnanapa. 15 Mane nune wan Asia suras awa nawa kiarît aizpa pian. Akkwanne nawa kwayarît. Figelokas Hermógeneskas nawa kwayarît. 16 Nane au Anpatta paikumtus, Onesíforowa kwalta kiwainapa. Ñamin usne nakin putnat kit nawa akkwan piji kiwainta. Na kajchira wakas, usne nawa mîtsal kitchi. 17 Sunkana us Roma pîpulukin piannatpane, usne nawa kajchira saira, nawa wanmalnakima. 18 Nukas us kit aizpa an wat pian. Usne Éfeso pîpulukin nawa akkwan piji kiwainta. Nane Diosta paikumtus, ussa wat kiwainnapa, Jesús kailtu payura.
Jesucristowa wat suldaru
1 Mane nu ap painkulkana i. Nawa mîzha. Jesucristora nîjkultuasmin, ussa sairawa, nua wat kiwainnapa, paiña kal wat kinpa. 2 Akkwan awane na kaizta aizpa mîara. Nukas na usparuza kaizta aizpa mîra. Kawarain nune an pitmin na kaizta aizpa Cristora nîjkulturuza kamtanarawa, wat piankamtîttuz mamaztuza kiwainat kit kamtananapa. 3 Naiztuasmin, nune Cristo Jesúspa wat suldarukana uztawa. Nune Cristora nîjkul kit wan kwail tailchari. 4 Apas suldarune paiña îninmika kaizta aizpa kinazi. Usne usmin kishimtu aizpa kimtuchi. Îninmika suldarura wanmaknintawane, suldarune îninmika kaizta aizpa kishina. Kawarain Cristowa suldarune paiña îninmika kaizta aizpa kitpa. 5 Kawarain salmumikakas nil saltawa. Salmumika nil saltukine, mîlamtu aizpa sapsachi. Nukas Cristo pashit aizpa kitpa, chiwazha us mîlamtu aizpa chiyura sapnapa. 6 Kawarain nanta kal kimmikane us wamtukin tînta kal kitpa. Usne an ñancha paiña pippa pakmîltawa. Painintawane, pial saptu. Nukas Cristo akwa tînta kal kitpa, chiwazha us mîlamtu aizpa sapnapa. 7 Na nua kaiztu aizpa minti. Au Anpatkas nua kiwainnazi, wan na kaizta aizpa piankamninna. 8 Nune Jesucristowa nîjkulti, us irîttas kakulta akwa. Usne Davidpa kwal azi. Ñamin Davidne Israel mikwa azi. Sun watsal pitmin wan awaruza kainanamtus, Dios awaruza watsat mîlnanapa. 9 Na sun pit kaiztu akwa, naiztus. Nakas kwail kirîtmikakana kajchira sîptît was. Nawa kajchira sîptîtkas, awane Dios pit kamtanashina, awa sun pit mîanapa, awa au pit sîpsachi akwa. 10 Katmizna na wan kwail akwa kajchira naiztukas, Diosne nawa tînta kulnintu. Nane Diosta paikumtus, narîttuza watsat mîlnanapa, Cristo Jesústa nîjkulanapa, pailta payukima uskasa wat uzanapa. 11 An pitne watcha i. Cristone aumîza watsat mîlnara, kwail kiamanpa. Katmizna uskasa uzanapas. 12 Us akwa naizamtukas, usne aumîza tînta kulninnanazi, us uzkin uskasa îninnanapa. Mazantuzne ussa pianchi kizanazi. Cristokas suntuza pianchish kiznanazi. 13 Au kaizta aizpa kiamtuchikas, Cristone us kin namtît kinazi. Usne us kaizta aizpa maizsachi.
Diospa wat kal kimmika
14 Na kaizta aizpa kamtamtuza nîjkulninnari. Dios iztakin usparuza kurunnarawa, mamaz tuntu pitkasa paraamanpa, awa sun pit mîamanpa. Sun kain pit parat aizpa watchi. Kamtamtuz sun kirane, uspane mîmtuza kwail kininnanazi. 15 Diospa kal kimtune, nune sun kal kwisha watsal kitpa, Dios up kal kirît aizpa wari kiznapa. Suasne nune mîtsal kimtuchi. Kawarain nune sun watcha pit awaruza nil kamtanarawa. 16 Awa Diospa minñamtuchine, kain pit paranazi. Sunkana paratne, awane Dios pit mîasachi. Suasne an kwail kiamîznazi. 17 Uspa kain kamtamne katsa kikanain mamaztuza kwisha azain kwakninñamtu. Paas kwail kamtamtuzne nukin chamtail. Mazane Himeneo mun. Mamazne Fileto mun. 18 Uspa paasne Dios watcha pit kwairîilta, mamaz miwara îanapa. Uspane awa irîttas me kakularît kamtamtailta. Dios mamaz payura Diosta piantuza irîttas kakulninnamanazi kamtanamtu. Uspane Diosta nîjkulturuza maizninnamtu, wat uzamanpa. 19 Sun akwa Dios kaizta aizpa nil i. Paiña nil pit maizsachi akwa, sunkana ka parît: “Anpatne paiña kwalta pian.” Ankas sunkana ka parît: “Anpatta paikumtuzne kwail kianachi.” 20 Kwazpa mikawa yalkin akkwan pîlattu izmu. Uru pîlattukas pial pîlattukas izmu. Puizawa yalkin tî pîlattukaas pail pîlattukas izmu. Maza mazain an watsal. Anpane kainsîh. 21 Kawarain Diospa wanmakmukin akkwan tuntu awa pura. Kwail kimtuchiruzne, sînam sarîttuzne, uspa Anpat akwa wat kal kiamtu. Uspa kalne kwisha wari. 22 Nune mamaz musitturuzkana kwail kimun. Wat kin kwiatpa. Diosta nîjkultawa. Awaruza pashinarawa. Mamazkasa waya kimun. Nukas sînam sairîttuzkas Dios iztakin wanmaknintawa, Diosta wakpuj wainñanapa. Sunkanain uzti. 23 Kain pit paramturuzne uspa kaizara aizpa wat pianchi, kamarachi akwa. Uspakasa wanmaknachi, nukasa aliz kulamtu akwa, uskasa uspa pitkasa waya kiamtu akwa. 24 Anpatpa kiwainmumikane mamaztuzkasa waya kiananachi. Kancha wan awaruza pashinarawa. Dios pit wat piankam kit awaruza nil kamtananarawa. 25 Wan kwail kirîttuza impara imparain kurunnarawa, Dios uspa minñamtu aizpa maiznanapa, Diosta kaiyanapa, paiña watcha pit piankamanapa. 26 Me Diablone sun awaruza piznarît, usparuza paiña kwail kishimtu aizpa kininnanapa. Sun piztîttuz Dios pit mîarane, Diosne usparuza kiwainashina, Diablo usparuza îninnamtu aizpa kiamanpa.
Minpa Payu
1 Ankas wat piankamti. Minpa payu taizkane, kwail awane mamaztuza kwisha naizninanazi, wat kiamanpa. 2 Awane uspain pashianazi. Pialmin pashianazi. Awane uspain minñat kit “aumin watmakpas” kizanazi. Uspane mamzapa kwail kizanazi. Uspa akkuhsh kaiztu aizpa, papihsh kaiztu aizpa mîamanazi. Mînpazharain aishtaish kizamanazi. Dios kaiztu aizpa kiamanazi. 3 Uspa kwalta pashiamanazi. Izmuruza aliz paraanazi. Wan awaruza pîrail kaizaanazi. Wan kwail minñamtu aizpa kianazi. Wantuza aliz kulanazi. Wat kimturuza kwail kianazi. 4 Uspa izmuruza kwail kianazi. Uspa kiashit aizpa kianazi, mintachin. “Aumin kwisha watmakpas” minñanazi. Uspain kiashimtu aizpa an minñashimtu akwa, uspane Diosta pashiamanazi. 5 Wan iztakin Dios kammu yalta îamtukas, uspane Dios awaruza kuruntu aizpa kiamtuchi. 6 Sun awakasa wanmakkanachi. Sun kwail kamtamturuzne awaruza pîrail appaat kit ashampawa yalta nappanazi, usparuza kamtananapa. Uspane sun kwail ashamparuza kiashimtu aizpa kurunamtu, kwail kamtamturuz kamtanamtu aizpa kianapa, chiwazha kwail kianapa. Suasne sun ashamparuzne akkwan tuntu kwail kianazi. 7 Sun ashamparuz masas kamtam kamashimtukas, uspane watcha kamasachi. 8 Sun kwail kamtamtuzne Janeskana Jambreskana mai. Ñamin Janeskas Jambreskas Moisés kamtara aizpa mîiltachi. Sun kwail kamtamtuzne kawarain Dios kamtamtu aizpa mîarachi, watcha kiamanpa. Uspane ñanta kiat kit kwail minñamtu. Aukana chi. Uspane Diosta nîjkulamtuchi. 9 Sun kwail kamtamtuzne uspa minñamtu aizpa kiamanazi. Mamaz payura wan awane uspa kwail kiamtu aizpa piankamanazi. Sunkana Janestakas Jambrestakas kira, Moisés kaizta aizpa mîarachi akwa.
Pablone Timoteora minpa pit pamtu
10 Sunkana nune na kamtara aizpa mît kit wat piankamta. Nune na miza uzta nu iztakin pian. Nune na chi kishit aizpa pian. Nune na Jesústa wat nîjkulta pian. Awa nawa naiznintakas, wan tailcharau. Wan awaruza pashinarau. Awa nawa naiznintukas, Diosne nawa tînta namninta. Nune nawa wan kirît aizpa pian. 11 Nune awa nawa aliz kulara pian. Nune na naizta aizpa pian. Nune Antioquía pîpuluras awakas Iconio pîpuluras awakas Listra pîpuluras awakas nawa kiarît aizpa pian. Na wan pîpulukin naiztakas, au Anpatne nawa kiwainta akwa, mîza piantamasaiztîsh. 12 Sunkana wan Jesucristora kanpamturuzne, nil uzshimturuzne naizarînazi, kwail awa akwa. 13 Sunkana kwail kimtuzkas pîrail apmuruzkas anza kwail kiarînazi. Usparuzne mamaztuza pîrail apninnanazi. Mamaztuzne usparuza pîrail apninnanazi. 14 Mane nu kamta aizpakas nu nîjkulta aizpakas nil kitpa. Nune nua kamtammikasha pian. 15 Ainkiasmin nune kawira, Diospa watsal pit piankamna. An pînkîh akwa, Diosne awaruza kamtanat kit Cristo Jesústa nîjkulturuza watsat mîlnanazi. 16 Diosne awaruza kiwainnanara, wan Dios watsal pit paanapa. Us paninta aizpa au akwa kwisha wari. Sun pînkîhne aumîza watcha kamtanamtu. Sunne awara kwail kinchi kurunamtu. Sunne awaruza nil kininnamtu. Sun pînkîhne awaruza nil kamtanamtu, au sukin nil uzanapa. 17 Katmizna Diosne Diosta pianmikasha kwisha watsal kiwainnazi, wan piankamnapa, wan kal wat kinpa.
1 Nane nua kuruntus, na kaizta aizpa mînapa. Nane sunpa Dios iztakinkas Cristo Jesús iztakinkas nua kainammtus. Jesúsne, katsa mikwakana, wanta îninna anazi. Akane, usne au sukin uztuzakas irîttuzakas uspa kwail kiarît aizpa kaiznanat kit usparuza ilnanazi. 2 Nune na kaizta aizpa kitpa, Dios awaruza ilninnamanpa. Awa sun pit mîarachikas, awaruza kurunat kit Dios pit kainanamîztawa. Nune awaruza kwail kinchi kainanarawa. Awaruza kurunnarawa, kwail kiamanpa. Awaruza kiwainnarawa, Dios pashimtu aizpa kianapa. Nune wanta impara imparain kamtanamîztawa pailta payukima. 3 Mamaz payura awane Diospa pit kamtamtu aizpa mîashimanazi. Mamaz ñan kamtam mîashimtuasmin, uspane akkwan kamtamturuza wanmakninnanazi, uspa mîashimtu aizpa kamtaanapa. 4 Uspane Diospa watcha pit mîashimanazi. Uspane wan kain kwinta mîanazi. 5 Sunkana nune nil min kit nîjkulti. Naiztukas, wan tailchatpa. Wantuza Dios watsal pit kainanarawa. Nune Dios sun kal nua mîlat aizpa wat kitpa. 6 Mane, awane nawa piantaashimtu, na Dios kal kit akwa. Mane nane inapain ish. 7 Nane kwisha wat kal kirau, awa Dios pit mîanapa. Nane Dios nawa îninta aizpa kirau. Diostakas paiña watcha pitkas nîjkultau, wennamtachin. 8 Mane nane ap Anpatta, an nil kimtumikasha, tîriztus. Us akane, us nawa mîmarawane, usne us mîj aizpa nawa mîlanazi, na us iztakin nil uztît akwa. Diosne sunta nawain mîlamanazi. Uskas wan paiña kailtu payura tîrizmuruzakas chiwazha mîlam mîlananazi, ussa pashiamtu akwa.
Pablone Timoteora kuruntu
9 Mîri Timoteo. Azain nawa izna anka, nakasa kwinta kin. 10 Demas wan chiwal au sukin wa aizpa pashimtu akwa, usne nawa kwairît kit Tesalónica pîpulura îrît. Crescentekas Galacia sura îrît. Titokas Dalmacia sura îrît. 11 Mane Lucasmin nakasa tu. Marcosta sait kit nukasa karanka, us nawa kal kiwainshina akwa. 12 Nane Tíquicora Éfeso pîpulura înintau. 13 Apa nu amtu payu ap wat palmu karanka. Nane sun Troas pîpulura Carpowa yalkin tîwij îrau. Ap pînkîhkas na tîwij îrît aizpa karanka. An muin pînkîhkas karanka. 14 Alejandrone, iru kal kimmikane, nawa kwisha kwail kizta. Au Anpatne us kwail kirît aizpa ussa kailninnazi, us nawa kwail kirît akwa. 15 Katmizna, ussa izkulti, nua kwail kimanpa. Usne nakasa kwisha aliz kultît, na Dios pit kainarît akwa. 16 An ñancha gobierno yalta îkane, awa nawa mîmaara, na chiwazha kwail kirît aizpa piankamanapa. Gobierno awaruza sînkanakane, mînminkas nawa kiwainnarachi. Wanne nawa kwait îarish. Diosta paikumtus, uspa kiarît aizpa wat kulnanapa. 17 Diosne nawa tînta kulnin kit kiwainta, Dios watsal pit Judío awa chiruza kainananapa, sun pit mîanapa. Awa katsa ishukana nawa piantashiarakas, ap Anpatne nawa izkulta. 18 Uskas nawa wan kwailtas watsammîznazi, chiyura us înimkin uzna. Makis aune pailta payukima Diosta kwisha wari kizanapas. Ka.
Minpa pit
19 Nane Priscarakas Aquilarakas Onesíforowa kwaltakas ap pit îninnamtus. 20 Erastone Corinto pîpulura nukkultît. Tróþmo imtu kirît akwa, nane ussa Mileto pîpulura tîwij îrau. 21 Alu kimtuchasmin, azain piananka. Eubulokas Linokas Claudiakas wan Diosta piantuzkas uspa wat pit nua îninñamtu. 22 Nane Diosta paikumtus, Anpat Jesucristo nukasa tuanpa, Dios uruza kwisha wat kiwainanapa. Pailti.
Kakishapu
1 Nane Pablo mun ish. Nakas Diospa kiwainmumika ish. Nakas Jesucristo înintamika ish. Jesúsne nawa îninta, Dios narîttuza Dios watcha pit piankamninnanapa, an wat Dios pit nîjkulanapa. 2 Ussa mîarane, Diosne usparuza sun kin namta: “Une pailta payukima uzanazi,” kiznara. An su sarachasmin, Diosne, pîrailchimikane, sun min kit kaizta. 3 Mane wat payura Diosne aumîza paiña kainammtuza îninnara, us kaizta aizpa piankamanapa. Au Dioskas, au watsat mîlmumikakas, an pit nawa chîhkat kit îninta, paiña pit kainanapa. 4 Titone, nu wat painkulkana i. Nane an pînkîh nua pamtus. Aune Diosta kawarain nîjkultuas. Nane Diosta paikumtus, au Taitta Dioskas Jesucristokas, au watsat mîlmumika, nua wat kiwainnapa, kalpain ayukta uznapa.
Titowa kal Creta sura
5 Nane nua Creta sura, pi paizka sukin, chîhkarau, chiwazha na kitchi aizpa wan sanapa. Ankas nane nua kuruntau, wanmakmukin mikwaruza wan pîpulura nanana. Uspane Dios pit piantuza kainananazi. 6 Sun mikwaruzne nil uzarawa, awa usparuzpa kwail kizamanpa. Usne paiña ashampakasa uztawa. Paiña pashparuzkas Dios pit piankam kit nîjkularawa. Uspane kwail kiashitkiwa. Uspa papihshtuza mîarawa. 7 Sun iglesia mikwane sun Diospa kainammmikane, nil uztawa. Usne Diospa kal kishitpa. Usne awaruza tînta kaiznanachi. Aliz parananachi. Pirît chanchi. Waya kianachi. Sun pialpa minnachi, walkumanpa. 8 Sunkana kitpa. Awa uspa yalta akane, yal nammîlatpa. Watmin min kit mamaztuza kiwainnarawa. Kwail kianachi. Dios iztakin nil uzarawa. Diosta pashiarawa. Dios kaizta aizpa kiarawa. 9 Usne au kamtara aizpa watsarawa, kwayamanpa. Usne Diospa watcha pit we piantuza kamtanarawa, nil piankamanapa. Uskas Diospa ñantawazha mintuza kamtanarawa, uspa ñanta pararît aizpa piankamanapa. 10 Akkwan awane Diosta mîashitchi. Mînpazha Judío awane awaruza circuncisión kianapa îninnat kit nilchi kamtanamtu. Anpane kain kaizmuruz mai. Awaruza pîrail appamtu. 11 Usparuza sun pîrail kaizman kiznarawa. Nil chi kamtanarane, uspane wan kwaltuza kwail kininnamtu, uruzpa pial kain sapkuamtu akwa. 12 Maza Creta awa mikwa usparuztas ka kizta: “Creta awaruzne pîrail kaizmuruz mai. Aliz awakana mai. Arakan mai. Kumira kwisha kuamtu,” kizta. 13 Us kaizta aizpa watcha i. Katmizna Creta Dios pit piantuza tînta kurunnat kit tînta kaiznarawa, wat uzanapa, Dios pit nîjkulashimturuzkana. 14 Uspane Judío awawa kwinta kiara aizpa mîarakiwa. Uspane awawa pit îninnamtu, Diospa watcha pit kwayanapa. 15 Mînpazha, ayukta sînamtuzne, wat minñat kit wat kiamtu. Mînpazha ayukta sînamchiruzne, Dios pit nîjkulashitkine, uspane kwail minñat kit kwail kiamtu, tayaltuchin. Uspawa izpulkas wan chiwalkas sînam chi. 16 “Aune Diosta pianmakpas” kizamtukas, pîrail kaizamtu. Chiwazha kizakane, watcha kaizamtuchi. Diosta piantuzkana uzamtuchi. Kwail kiarît uzamtu akwa, Diospa pit mîamtuchi akwa, uspane chinkas wat kiasachi.
Wat kamtam
1 Mane nune nîjkul kit Diospa watsal pitta kamtanamîztawa. 2 Îlaparuzne wanmakmukin mikwaruzne an wat chatpa. Chiwazha nil kiarawa. Nil min kit kaizarawa. Dios pit kaiztu aizpakas kamtamtu aizpakas nîjkularawa. Awaruza pashinat kit kiwainarawa. Naizamtuasmin, nil uz kit tailchatpa. 3 Kawarain wanmakmukin înkwaruzne watsal uzarawa, Diosta piantuzkana. Mamazpa kwail kizman. Pirît chaanachi. Mamaztuza miza wat uzana kamtanarawa. 4 Ankas wanmakmukin înkwaruzne ampuwa ashamparuza kamtanat kit kurunnarawa, paiña ampurakas paiña pashparuzakas watsal kit kit pashinanapa. 5 Uspane wat piankam kit nil uzarawa. Paiña yaltain watsal kal kiarawa. Mamaztuza an wat kiarawa. Paiña ampurain mîarawa. Uspawa ampura mîat kit kiwainarane, sunkanane Diosta pianchiruzne Diospa pit kwail kizamanazi. 6 Kawarain musitturuz kwail minñamtune, usparuza kurunnarawa, kwail kiamanpa. 7 Nukas chiwazha kimtune, watsal uztawa, wan musitturuzne nukana kawarain nil uzanapa. Usparuza kamtanamtuasmin, watchain kainanarawa, nuwa wat minñanapa. 8 Na kaizta aizpa nil kamtanarawa, aliz paramikane nuwa kwail kizamanpa. Nuwa kwail kizmuruzne mîtsalanazi, nu kwail kaiztît kaizsachi akwa. 9 Nune kiwainmuruza kurunnarawa, uspa anpatta mîanapa, chiwazha anpat kaizta aizpa kiwainapa. Uspane anpatta kwailpazha sînkaman. 10 Uspane anpatpa walkuanachi. Uspane anpatkasa nil uzarawa. Nil uzamtune, awane ka kizshianazi: “Uspa Dios kamtara aizpakas uspa sînam sammika kamtara aizpakas kwisha wari,” kizanazi. 11 Mane au kwail kiarîtkas, Diosne wan awaruza pashinat kit kiwainashirît. Usne wantuza watsat mîlnashimtu. 12 Dios aumîza pashinamtu akwa, usne aumîza kamtanamtu, apain kwail kiamanpa. Aune kwail kishimtuzkana uzshitchimakpas. Sunkana an payura uzshinamakpas. An sukin uztuasmin, aune kwail kishitchimakpas. Mamaztuza wat kinarawamakpas. Dios kaizta aizpa kitpamakpas. 13 Aune sun kin namtamikasha watsal min kit tîriztawamakpas. Mane Diosne Jesucristora mamasa îninnazi. Sun watsal amtu payura au katsa Diosta izanapas. An Diosne aumîza watsat mîltumika i. 14 Jesucristone au kwail akwa irît, au ïnta iamanpa. Usne au kwail kiarît aizpa sînam sashimtu, paiña kwalkanain nil uzanapa, chiwazha wat aizpa kianapa. 15 Apain na para aizpa Dios pit piantuza kamtanarawa. Nune, wat mikwakana, usparuza piankamninnat kit tînta kurunnarawa. Nu usparuza kamtanamtu akwa, mînminkas nuwa kwail minñamanazi.
Diosta pianmikane nil uztawa
1 Ankas nune Dios piantuza nîjkulninnarawa, katsa mikwara mîanapa, us kaizta aizpa wat kianapa. Uspane chiwazha wat kal kiarawa. 2 Mînainkas kwail kiznaman. Mamaztuza aliz parananachi. Mamaztuza watsal kiwainarawa. Wan awaruza wat minñat kit wat kiarawa. 3 Nune sunpa usparuza nîjkulninnarawa, an ñancha au nil chi uzara akwa. Aune an ñancha Diosta pianchiruzkana uzamakwanashî. Aune mikwara mîkikwanashî. Aune uspa kwail kamtanara aizpa mîakwanashî. Aune chiwazha kwail kishit aizpa kiakwanashî. Aune chiwazha kwail minta aizpa kishiakwanashî. Aune kwail awakana wan payurakima uzshiakwanashî. Aune patna pashiakwanashî. Awane aumîza izshipuschi. Aukas awaruza izshitchimakwanashî. 4 Au kwail kitkas, Diosne, au watsat mîlmumikane, au sura pianara, awa akwa wat kinanapa, awara pashinanapa. 5 Diosmin aumîza watsat mîlnarît. Au watsal kal kimtu akwa, usne aumîza watsat mîlnarachi. Us aumîza pashinamtu akwa, us aumîza kiwainshinamtu akwa, usne aumîza, paiña pit mîraruza, watsat mîlnashira. Dios Izpulne au kwail kirît aizpa kaninnarît, au Dios kwalkana uzanapa, mamaz tuntu uzanapa. 6 Au watsat mîlmumika Jesucristo akwa, Diosne paiña Izpulta aumîza îninta, aumîza kwisha kiwainanapa. 7 Diosne aumîza kiwainat kit au kwail kirît aizpa kaninnara. Katmizna, Diosne ka ussa piantuza kaiznanazi: “Mane nawa pian akwa, nane uruza ïnta ilnamanazi. Une nil chat kit chiyura uzanazi pailta payukima,” kiznazi. 8 Na kaiznara aizpa watcha i. Mane nune Diosta nîjkulturuza chiwazha na kaizta aizpa tînta kamtanarawa, wat kimîraiznapa. Na kamtara aizpa mîat kit wat kiarane, wanne nil uzat kit akkwan awara kiwainanazi. 9 Tîmpa awa kaizamtu aizpa mîkain. Irît awa kwalpa kwinta parananachi. Moisés Judío awaruza kamtanarakas, paiña pitpa parananachi, waya kiamanpa. Tînta paramtune, aune kain pit paramtumakpas. Wat chi. 10 Mînpazha Diosta piantuza nil chi kamtanamtune, ussa ka kizti: “Sunkana kimun,” kizti. Paas piji ussa kuruntawane, nua izshimakane, une, Diosta piantuzne uspakasa wanmaknachi. 11 Mînpazha sunkana uztane, kwailpazha min kit kwail kimtu. Sun kwail kit akwa, usmin kwail ish mintu.
Minpa pit kuruntu
12 Ma pitchin kainammtus. Nua Artemasta înintukine, nane Tíquicora îninnash up kal kimtura. Azain nakin piannatpa, nawa Nicópolis pîpulura wanmalnapa. Suain nukkulshinash alu palnakima. 13 Nune gobierno kiwainmumika Zenastakas, Apolostakas kwisha wat kiwainari. Chiwazha uspa we aizpa, mîlanari, miwara we kimanpa. 14 Kawarain wan Diosta piantuzne kamshiarawa, awa akwa watsal kal kiana. Diosta piantuz wenamkane, uspane chiwazha mîlanarawa, mamaztuza kiwainanapa, kain uzamanpa.
Kakishapu
15 Wan nakasa nîjkulturuzne uspa pit nua an pînkîh akwa îninñamtu. Aune wan Diosta nîjkulturuza, aumîza pashimturuza, au pit îninnamtumakpas, Dioskasa watmin îanapa, nua wat kiwainnanapa. Pailti.
Kakishapu
1 Nane Pablo mun ish. Kajchira was, na Jesucristora pian akwa. Nane au aña Timoteokasa an pînkîh nua, Filemónta, pamtus, nu aukasa Diospa kal kimtu akwa, nu Jesucristowa kamtamtu akwa. 2 Na au kwampihsh Apiarakas “kakishapu” kiztus. Arquiporakas, au kiwainmumikarakas, “kakishapu” kiztus. Up yalta Jesústa piantuz wanmakmuruzakas “kakishapu” kiznamtus. 3 Nane u akwa Diosta paikumtus, au Anpat Jesucristo uruza wat kiwainanapa, u kalpain uzanapa.
Filemóne nîjkul kit wat kirît
4 Nuwa mintuasmin, pialta payukima nane Diosta paikwat kit nu akwa aishtaish kiztus. 5 Nane miza nu uztu mîrau. Nune Diosta piantuza pashinanat kit Jesucristora nîjkultu. 6 Nane Diosta paikumtus, Dios nua kiwainnapa, nu nîjkultu aizpa mamaztuza kainananapa, Jesucristo chiwazha nua mîlamtu aizpa piankamnapa. 7 Ap aña mîzha. Aune kwisha wat namarîtmakpas, nu aumîza pashinamtu akwa, nu Diosta nîjkulturuza kiwainamtu akwa.
Pablone Onésimo akwa Filemónta akumtu
8 Katmizna na paikumtu aizpa mîzha. Cristo nawa înintamika namnintakas, nane nua îninmanash, na pashit aizpa kinpa. 9 Na nua pashimtu akwa, nane nua chiwazha paikwanash. Nune nawa pian. Nane Pablo mun ish. Na îlapa parîtkas, nane Dios înintamika ish. Mane kajchira sîptîtmika ish, Jesucristowa pit paranara akwa. 10 Sun akwa, nane Onésimo akwa nua akumtus, nu ussa wat kulnapa. Kajchira nakasa sîptît wasmin, usne Cristora nîjkul kit ap painkulkana namta. 11 Us nukis îtchasmin, Onésimone up kiwainmumika azi. Nua wat kiwaintachikas, mane usne nuakas nawakas kiwainshina. 12 Nane Onésimora nua înintus, nu ussa sapnapa. Ussa ap pashimtu painkulkana sapti. 13 Nane Onésimo nakasa nukkulnapa pashiras, nawa kiwainnapa. Nane kajchira sîptît ish, na Dios watsal pit kwinta kit akwa. Na kajchira sîptît wasmin, usne nawa kiwainshina, nu asachi akwa. 14 Us nakasa nukkulnapa pashimtukas, nane ussa nukkulnintachish, makima nu ussa nukkulnapa îninnarachi akwa. Nawa wat kishitne, nune Onésimora îninshina. 15 Us nukis akkwan payu chinkimain îrît, Cristora piankamnapa, nukin kail kit nukkulnapa. 16 Kailtuasmin, Onésimone, up kiwainmumikane, nukin kailtu. Usne an wat kiwainmumika namtît, ma Cristora piankamtît akwa. Usne up añakana i. Nane ussa pashimtus. Nukas ussa an pashitpa, uskas nukas au sunmin Anpatta nîjkulamtu akwa. 17 ¿Na up izmumika kish? Watcha, nane up izmumika ish. Aune Cristora nîjkul kit Diospa kal sulmin kal kimtumakpas. Katmizna nu nawa saptukana ussa sapti. 18 Us nua kwail kitne, us nua pui aizpa mîjne, nane nua tanash. 19 Nane ap chihtîkasa an pînkîh nua pat kit us akwa chiwazha nu we aizpa tana namtus. Na nua Cristowa kamtat kit nua akkwan kiwaintau nîjkulti. Nukas nawa pui aizpa mîj. Katmizna nune ussa wat kultawa. 20 Ap aña, mîzha. Nukas nakas au Anpatta nîjkulamtu akwa, na paikumtu aizpa kitpa. Nu na paikumtu aizpa kitne, nane wat kulnash, nu Dios pashit aizpa kimtu akwa. 21 Na nua pamtuasmin, nane nu na paikumtu aizpa kinazi pianish. Watcha, nune an akkwan kinazi, nu Cristo pashit aizpa kishimtu akwa. 22 Ma pitchin nua paikumtus, na nukin îshimtu akwa. Katmizna Diosta akwari, Dios nawa kiwainnapa, nu tukin înpa. Na nu tukin pianakane, up yal nammîlanka.
Pablone minpa pit kaiztu
23 Epafrasne nua “kakishapu” kiztu. Jesucristora pian akwa, usne nakas kajchira sîptît wazi. 24 Marcoskas Aristarcokas Demaskas Lucaskas nawa kiwainat kit nakasa Dios watsal pit kainanara. Uspane nua “kakishapu” kizamtu. 25 Nane au Anpat Jesucristora paikumtus, nua wat kiwainapa. Pailti.
Diosne paiña painkul akwa awaruza paranara
1 Nane maza pit kainanashimtus, Diosta piankamanapa. An ñamin Diosne paiña kainammtuza kurunnara, paiña pit pananapa, an ñamin kwaltuza parananapa. Akkwan pijikas akkwan tuntukas usparuza paranara. 2 An minpa payura Diosne paiña painkulta îninta, aumîza parananapa. Diosne ussa narît, wan chiwal sarît aizpa sapnapa, wan îninnapa. Dioskas paiña painkul akwa wan sukas wan chiyukas sara, wan pa kianapa. 3 Diospa painkulne Dioskanain watsal iztît, au awaruz “Dios kwisha wari” piankamanapa. Diosne paiña painkulkanain iztît. Us wan sarît aizpa iznamtu akwa, usne parat kit au sukinkas au chiyurakas us pashit aizpa kinazi, us tînta akwa. Diospa painkul au kwail kiarît aizpa sînam sarawane, usne chiyura nut kit Dios iztakin îninmîzta.
Cristone ángelkinkas an tînta i
4 Mane Diosne paiña painkulta ángelkinkas an tînta sara. Katmizna Cristowa kalne ángelpa kalkinkas an tînta i. Dioskas ussa paiña painkul munninta, Dios kin namtît aizpa sapnapa. 5 Diosne mizurainkas ángelta ka kaiztachi: “Nune ap painkul i. Nane nua ap painkulta namnintau” Mamasa ángelta ka kaiztachi: “Nane up papihsh anash. Nune ap painkul anazi.” 6 An Dios painkulne wan ángeltuzkinkas anza tînta i. Dios paiña ñancha painkul au sura uztuza annakane, ka kaiznara: “Wan ángeltuzne ussa wanmakkat kit ussa wakpuj wainñarawa.” 7 Dios ángeltuzpa parakane, usne sunkana kaiztu: “Nane wan ángeltuza ap kiwaintuza namninnanash, nawa wakpuj wainñanapa. Uspane inkwakanakas ippakanakas izanazi.” 8 Paiña painkulne ángeltuzkana chi. Diosne paiña painkulpa ka kaiztu: “Nune Dios i. Nune pailta payukima îninnazi. Îninkane, nune wan nil aizpa kinazi. 9 Nune wan wat kinpa pashimtu. Nune kwail kinpa pashimtuchi. Katmizna nane nua îninnapa nat kit nua up izmuruzkin an wat kulnintau.” 10 Ma pitchin Diosne paiña painkulta ka kaizta: “Nune Anpat i. Nune an ñancha an su sara. Nukas up chihtîkasa wan chiyura wa aizpa sara. 11 Wan sarît aizpa pailtînazi. Nune mizurainkas pailmanazi. Wanne pïn pîttukanain pailtînazi, tailchasachi akwa. 12 Pïn pîtta uk kit nan kit masaskana maizmu. Nune, Dios painkulne, maizmanazi. Nune wan payukima uznazi.” 13 Diosne mizurainkas paiña ángeltuza ka kaiznarachi: “Ap înintukin nakasa uztain, ap aliztuza anuppanakima.” 14 Dios ángeltuza sunkana kaiznarachikas, Diosne ángeltuza îninnara, ussa kiwainñapa, ussa wakpuj wainñanapa. Usne usparuza îninnamtu, Diosta piantuza kiwainanapa, suntuz an kwail kiamanpa, chiyura uzanapa. Sunkana Diosne Diosta piantuza watsat mîlnanazi.
Pînkîh pammika ka kaiznara: Kwiraruin Dios u akwa kirît aizpa mainmanpa
1 Dios paiña painkul akwa aumîza paranarît akwa, aune awa aumîza kamtanarît aizpa an akkwan mîmîztawamakpas, Dios watsal pit mainmanpa, paiña watcha pit chîhkamanpa. 2 Ñamin ángeltuzne Moisésta Dios pit kainaara, awa wat aizpakas kwail aizpakas piankamanapa. Diosne sun pit kiarachiruzakas mîashitchiruzakas ilninnara. 3 Sunkanain Diosne aumîza ilnanazi, Dios au akwa kinashimtu aizpa kwayarane. Aune Dios aumîza watsat mîlnashimtu pianmakpas, aumîza ilnamanpa. Au Anpat Jesúsne an ñancha mazantuza Dios usparuza watsat mîlnamtu kainanara. Kwiztane us kaizta aizpa mîmturuzne nîjkulat kit aumîza sun watcha pitmin kainanara. 4 Diosne au awaruza sun watcha pit piankamninnara. Sun pit Dios pit i pianmakpas. Diosne usparuza tînta kiwainnara, awa iztakin akkwan tuntu iztasparît kal kianapa. Dioskas paiña Sînam Izpulta au nîjkulturuza îninnara, aumîza kiwainnanapa, Dios pashimtu aizpa kianapa.
Jesucristone awakanain namtît
5 Mane nane mamazpa su kainanamtus. Dios sun masas su sakane, Diosne mizurainkas ángeltuza masas sura îninnanapa chîhkamanazi. 6 Mînpazha Dios pitta mînmika an masas sura îninnazi parît. Ka parît: “¡Ap Dios mîzha! ¿Chikishma awaruzpa wat mintu? ¿Chikishma awaruza kiwainashimtu? Uspane awain mai. 7 An ñamin une ángeltuza kwisha wat sara. Kwiztane nune mazara an tînta namninta, wan nu sarît aizpa îninnapa. Sunkana Diosne awaruzpa wat minta. 8 Nune mazara an tînta namninta, wan pura aizpa îninnapa.” Dios ussa wan pura aizpa chîhkakane, usne ussa wan chiwal îninnapa chîhkara. Dios awara wan chîhkarîtkas, makima awane wan pura aizpa îninsachi. 9 Mane Jesústa mintain. Diosne ángeltuzkinkas Jesústa akkwan payuchinkimain we tînta namninta. Kwiztane Diosne Jesústa an tînta namnin kit us akwa an wat minta, au akwa naiz kit irît akwa. Dios wan awaruza panashit kit kiwainashimtu akwa, usne Jesústa au kwail akwa inapa îninta. Sun akwa Diosne Jesústa an tînta namnin kit watsal mikwa namninta, wan awa us akwa wat minñanapa. 10 Chiwazha Dios kit aizpa wat azi. Us wan pura aizpa sarît akwa, usne wan îninshina. Diosne akkwan awaruza paiña pashpa namninnashira, us uzmukin uskasa uzanapa. Katmizna Diosne paiña painkulta, Jesústa, awa kwail kiarît akwa inapa îninta, awaruza watsat mîlnanapa. Cristo au akwa kapal naiztawane, Diosne ussa au katsa mikwa namninta, aumîza chiyura mîlnanapa. 11 Jesúsne kwail kirîttuza sînam saninnamtu. Uspa paasne maza papihshmin mîj. Jesús awaruza uspa kwail sînam sarawane, usne paiña kwal namninnashina. Katmizna Jesúsne, Dios painkulne, wan wat kultîttuza ap izmuruz mai kiznashinai, mîtsal kitchin. 12 Jesúsne paiña Taitta Diosta Dios pînkîhta parît aizpa ka kaiztu: “Nane ap kanpamtuza Diospa parananash. Nane awa wanmakmukin ‘Dios watcha i’ kanta kiznash” 13 Mamasa Jesús ka kaizta: “Nane Diosta nîjkulnash.” Mamasa ka kaiztu: “Nane apain tus, Diosta piantuzkasa. Diosne suntuza nawa chîhkanara, usparuza iznanapa.” 14 Jesúsne au awakanain namta. Us irawane, Jesúsne Diablora anuppara, awaruza tînta îninnamanpa, awaruza akkwan kwail kininnamanpa. 15 Sunkana Jesúsne Diablora ishkumturuza chîhtnara. An ñamin an sura uzamtuasmin, uspane pailta payukima irîn ishkuarît, iashitchi akwa. Uspane kiwainmuruzkana Diablo îninta aizpa kiara. 16 Watcha, Jesúsne an sura ángel akwa kiwainna atchi. Us apain akane, usne Abrahampa kwaltuz akwa kiwainna ara, usparuza watsat mîlnana. 17 Katmizna Jesúsne Diosta piantuzkanain nam kit naizta, usparuza kiwainanapa, usparuza wat kinanapa. Au akwa naiztawane, Jesúsne katsa pariya, watchamika namta, Dios iztakin au akwa paikwan. Suane usne Diosta piantuza, paiña kwaltuza, uspa kwail kiarît aizpa wat kulnashina. 18 Diablone Jesústa kwail kinpa kininshira, naiznapa. Jesús wan tailchat akwa, mane usne kwail kishimturuza kiwainnashina, kwail kiamanpa.
Jesúsne Moiséskinkas an katsa i
1 Katmizna, Diosta piantuz mîzhain. Diosne uruza paiña kwal namna akwanara, chiyura uzanapa. Jesúspa nîjkultain. Dios ussa îninta paiña kal kinpa pianmakpas. Aune Jesús au katsa pariya i pianmakpas. 2 Dios Jesústa paiña kal chîhkatpane, Jesúsne kwairachin kapal kira. Moiséskas Diospa kwal uzkin wan kal kapal kirît. 3 Sun Jesúsne Moiséskin an tînta mika i, Jesús wan pura aizpa sarît akwa. Jesúsne, awaruza paiña kwal namnintumikane, paiña kwalkin an tînta i. 4 Mînpazha wan yalkin uztu aizpa sarakas, Diosne wan chiwal wa aizpa sara. 5 Moisés Diospa yalkin kiwainmumikakana kal kimtuasmin, usne Dios kaizta aizpa chinkas maintachin mîra. Dios Moisésta parawane, usne sun pitmin Diospa kwaltuza kainanara, Dios kishimtu aizpa piankamanapa. 6 Cristone Moiséskana chi azi, Cristo Dios painkul ara akwa. Diospa painkulne paiña kwaltuza wat îninnat kit Dios ussa îninta aizpa mîra, maintachin. Diosne aumîza paiña kwal namninnara, uskasa nukkulanapa. Katmizna aune Cristora tîriztawamakpas, us aumîza watsal kulnashimtu akwa. Sun payura aune Dios aumîza mîlashimtu aizpa mîlananazi pianmakpas.
Diosne ussa piantuza kwaizkulninnanazi
7 Katmizna une Sînam Izpul Dios pînkîhta panintît aizpa wat mîarawa. Sunkana parît: “Ma payu Dios uruza kwinta kinakane, une us kuruntu aizpa mîarawa. 8 Sun pit uruza kainammtu aizpa kwainachi. Ñamin Israel awaruz pul suwara chaamtuasmin, uspane cuarenta añokima kwail kiat kit Dios kaizta aizpa mîashitchi. Uspane Dioskasa aliz kularît. 9 Sun pul suwara pînamtuasmin, u ñamin kwalne nawa aliz kulara, na kuruntît aizpa piankamashitchi akwa. Na uspa iztakin akkwan watsal kal kitkas, uspane cuarenta añokima nawa wat mîarachi. 10 Katmizna nane sun payu uzattuza aliz kulnat kit usparuzpa ka kaiznarau: ‘Uspane pailta payukima uspa kaijchukin nawa kwail minñat kit ñan miwara îashimtu. Uspane na usparuza kamtanamtu aizpa mîashitchi.’ 11 Katmizna nane usparuza aliz kul kit kaiznarau: ‘Une nakasa kwaizkulmukin nappamanazi, tînta namanapa. Une kin namtît urara, Canaán sura nakasa uzamanazi.’ ” 12 Diosta nîjkulturuz, uruzpain iztain, mînminkas kwail namamanpa, mînminkas Dios mi kaamanpa. Diosta nîjkulshimtuchimikane Diosta, chiyura uztumikara, kwainazi, ussa an kanpamanpa. 13 Dios aumîza makima mama akwanamtuasmin, pailta payukima uruzpain wat kishirain, tînta namnakima. U Diosta mîashimtukine, ñanta kimmikane uruza kwail kininnashina. Ukas Dios kamtarît aizpa kwainnazi. 14 Dios pit mîarawane, aune Cristowa kwal namtîtmakpas, uskasa uzana. Makis aune Cristora watmin nîjkulmîztawamakpas. Minpa payukima ussa mîamîztane, aune Cristo uzkin uziznapas. 15 Dios pitta ka parît: “Ma payu Dios uruza kwinta kinakane, une us kuruntu aizpa mîarawa. Sun pit uruza kainammtu aizpa kwainachi. Ñamin Israel awaruz pul suwara chaamtuasmin, uspane cuarenta añokima kwail kiat kit Dios kaizta aizpa mîashitchi. Uspane Dioskasa aliz kularît.” 16 Une sun Dios kaizta aizpa mîashitchiruza pian. Moisésne, mikwakana, sun Judío awaruza Egipto suras ukkanara, pul suwara ussa kanpaanapa. 17 Cuarenta añokima pul suwara chaamtuasmin, uspane kwail kishiat kit Dios kaizta aizpa mîashitchi. Uspa kwail kiarît akwa, Diosne usparuza aliz kulnat kit naizninnara, sun awaruz pul sura ianakima. 18 Diosne sun us kaizta aizpa mîrachiruza ka tînta kaiznara: “Nawa mîrachiruzne mamaz Canaán sura, uspa kwaizkulmukin, nappamanazi.” 19 Sunkana aune uspa kwaizkulmu sura napparachi pianmakpas, uspa Diosta nîjkularachi akwa.
1 Katmizna Dios paiña kwaltuza uskasa kwaizkulanapa kin namtît akwa, makima Diosne mama aumîza Diospa kwaizkulmukin nappanapa akwanamtu. Katmizna aune arakan awakana uztakiwamakpas, sun kwaizkulmukin kamanpa. Suane aune Dioskasa kalpain uzanapas. 2 Diosne an ñamin uztuzakas aumîzakas ma uztuzakas kawarain sun watsal pit kainanara. Uspa sun watsal pit mîarakas, an ñamin uztuzne Dios watsal pit nîjkulashitchi. Sun akwa Diosne usparuza watsat mîlnarachi. 3 Aune Dios kwaizkulmukin nappanapas, Dios kin namtît aizpa nîjkultu akwa. Mînpazha us kaizta aizpa nîjkularachi akwa, Diosne usparuza aliz kulnat kit paiña pînkîhta usparuzpa ka panintît: “Uspa nawa aliz kulnintît akwa, nane usparuza ka kaiznara: ‘Uspane nakasa ap kwaizkulmukin nappamanazi.’ ” ka parît. Dios wan pura aizpa sarakima, usne me paiña kwaizkulmu sarît, kwaizkulna. 4 Dios pînkîhta sun séptimo payura Dios kit aizpa ka parît: “Wan wa aizpa kapal sarawane, Diosne séptimo payura kwaizkulta, paiña kwaizkulmukin.” 5 Mamasa Diosne sun pînkîhta ka panintît: “Uspane nakasa ap kwaizkulmukin nappamanazi, nakasa kalpain uzana.” 6 An ñamin uzturuz sun watsal pit mîarakas, uspane Diospa kwaizkulmukin Dioskasa kalpain uzana nappasachi, Dios kaizta aizpa nîjkularachi akwa. Katmizna makima mamaz awaruzne Diospa kwaizkulmukin pianashina, Dioskasa kalpain uzana, Dios kaizta aizpa mîamtune. 7 Dios paiña kwaltuza akkwan piji paiña kwaizkulmukin uskasa kalpain uzana akwanarakas, usne mamasa wan awaruza “ma payu naptain” kaiznamtu. Paiña kwaltuz pul suwara chaamtuasmin, Diosne usparuza akwanara. Kwiztane akkwan año pailtawane, Davidne Dios pînkîhta, salmo pînkîhta, sunkana parît: “Dios uruza kwinta kinakane, une us kuruntu aizpa mîashina. Paiña pit uruza paranamtu aizpa kwaiman,” 8 Josué Canaán sura Israel awaruza mîlnarakas, Diosne usparuza mamaz sura kwaizkulninnapa kin namnara, uskasa kalpain uzana. Josué Israel awaruza Canaán sura kwaizkulninnaratne, Diosne kwizta mamaz payuwa parasachiatka. Katmizna awane mamaz payura sun kwaizkulmukin nappashina, Dioskasa kalpain uzana. 9 Katmizna Dios kaizta aizpa mîraruzne Dios kwaizkulmukin Dioskasa kalpain uzana nappanazi, Dios séptimo payura kwaizkultukana kwaizkulanapa. 10 Dios paiña kal kapal sarawane, usne kwaizkulta, wan kin minta aizpa pailta akwa. Sunkanain awa Dios kwaizkulmukin nappararuzne Dioskasa wanmakkat kit ussa nîjkulamtu, uskasa kalpain uzana. 11 Katmizna aune an tînta namtawamakpas, Dioskasa wanmakkninnanapa, ussa nîjkulanapa, uskasa kwaizkulanapa, uskasa kalpain uzanapa. An ñamin uzturuzne Dios kaizta aizpa mîashitchi. Katmizna uspane Dioskasa wanmakkarachi, ussa nîjkularachi akwa. Uspa uzarakanain uzman. 12 Dios paiña pit pînkîhta panintîtkas, usne sun pînkîh awaruza paranamtu, sun pit piankam kit kianapa. Sun pitne Dioskanain uz. Mizurainkas kasachi. Sun pitne tînta i. Sun pitne pamans tiz mashtikana i. Mashti wan ñakas wan impulkas wan sîhkas tîtshina, awa ayukta wa aizpa izanapa. Paiña pit akwa, us aumîza parakane, au izpulta paramtu. Diosne paiña pit akwa au mintu aizpa piankamnintu, chiwazha wat aizpa naanapa, chiwazha kwail aizpa kwayanapa. 13 Aune Dios iztakin aumîza kulasachimakpas, Dios wan awaruzakas wan sarît aizpakas iznashimtu akwa. Mînminkas us mintu aizpa kulasachi. Diosne au chamtukin pian. Katmizna aune Diosta au kit aizpakas au minñarît aizpakas sînkarawamakpas.
Jesúsne katsa pariya i
14 Jesúsne, Dios painkulne, au an katsa pariya nam kit Dios uztukin napta. Katmizna aune an tînta namtawamakpas, au Jesucristora an nîjkulmîznapa. 15 Au katsa pariyane au naiztu aizpa pian. An su uztuasmin, usne najtît uz kit us wan awa naizarîtkanain naizta. Katmizna usne au akwa min kit kiwainnashimtu. Mazantuz ussa kwail kininarakas, usne mizurainkas kwail kitchi. 16 Katmizna Diosta paikwatpamakpas, ishkwatchin, us aumîza pashinamtu akwa. Usne au kwail kirît aizpa sînam samtu. Ussa paikwatne, usne au wainñamtu aizpa piankam kit aumîza wat minñat kit aumîza kiwainanazi.
1 Mane Diosne maza pariyara Judío awaruztas namtu, ussa katsa pariya namninnapa. Suasne sun katsa pariyane awa akwa Diosta kwinta kimtu, Dios awaruza kiwainanapa. Sun pariyaruzne awaruzpa mîlam Diosta mîlaamtu. Uspakas awaruzpa piantamtu aizpa Diosta mîlaamtu, awa kwail kiarît aizpa wat kulnanapa, sînam sananapa. 2 Apas Judío pariya wan awa kwail kimtukanain kwail kimtu akwa, uspane mamaztuza watmin kiwainashina. Usne wan kwail kimtuzakas kiwainashimtu, uskas kwail kimtu akwa. 3 Judío pariya awakanain kwail kimtu akwa, usne an ñancha chiwazha piantarawa, Diosta mîlan, Dios paiña kwail kirît aizpa sînam sanapa. Sun kitpane, pariyane awa piantarît aizpa Diosta mîlashina, Dios an awa kwail kiarît aizpa sînam sanapa. 4 Sun Judío pariyane usmin nasachi, katsa pariya namna. Diosmin ussa akwat kit katsa pariya Aarón namtakana namnintu. An ñamin Diosne Aarónta nara, katsa pariya namna. 5 Cristokas usmin katsa pariyara namna narachi. Dios ussa narawane, usne ussa katsa pariyara namninta. Suasne Diosne, paiña papihshne, sunkana kaizta: “Nane nua ap painkulta namnintau. Nakas up papihsh namtîrau.” 6 Dioskas mamaz pînkîhta ka panintît: “Nune minpa payukima katsa pariyakana uznazi. Nune pariya Melquisedec kal kirîtkana kinazi.” 7 Cristo an sukin uzasmin, usne Diosta tînta paikwara, ussa kiwainnapa. Diosta paikumtuasmin, usne tînta akwat kit azta, ishitchi akwa. Cristo paiña papihshta wakpuj wainta akwa, Dios kishit aizpa kit akwa, Diosne us paikwat aizpa mît kit ussa irîttas kakulninta. 8 Us Dios painkul atkas, usne Dios îninta aizpa tînta tailchat kit us kaizta aizpa mît kit piankamta. 9 An sukin uzasmin, Cristone Dios kaizta aizpa mît kit Dios îninta aizpa kapal kira. Sun akwa, usne au katsa mikwa namta, ussa mîmturuza chiyura nuninnanapa, pailta payukima usparuza watsat mîlnanapa. 10 Sun akwa, Diosne Cristora katsa pariya namninta, pariya Melquisedec kal kitkanain kinpa.
Cristora nîjkultuchine, kwail i
11 Nane uruza akkwan pit paranashimtus, u Melquisedec katsa pariyawa piankamanapa. Suasne une Cristowa, au katsa pariyawa, piankamanazi. U Dios pit mîashimtuchi akwa, nane uruza wat kamtanasachish. Une piankamasachi. 12 U akkwan añokima Jesucristowa mîarîtkas, une kamtamtuz namarachi. Dios pit we piankamarît akwa, une an katsa kawiarachi. Une sun an ñancha pit kamtarît aizpa kiarawa. Une sun pit uruza kamtanarît aizpa mîarawa, Cristo uruza watsat mîlnamtu akwa. Cristora an nîjkularawa, Dios pit an wat piankamanapa. 13 Dios pit we piantuzne chiwazha kwail aizpakas wat aizpakas naasachi. Une Dios watcha pit kamtasachi, wat pianchi akwa. 14 Cristora an wat piantuzne an tînta namat kit Diospa an piankamamtu. Diospa an piankamturuzne wat aizpa naamtu. Uspane chiwazha kwail aizpa naamtuchi.
1 Sun akwa an ñancha Cristowa kamtarît aizpa piankamarawane, aune an tînta namat kit Cristowa kamtarît aizpa an kammîznachain. Nane uruza an ñancha kamtanarît aizpa mamasa kamtanashitchish. Sun payuin nane uruza u kwail minñarît aizpa chîhkanapa kamtanarau, Dios kwail kimtuza ilnamtu akwa. Sun payukas nane uruza Diosta nîjkulana kamtanarau, Cristo uruza kwailtas watsat mîlnanapa. 2 Nane uruza an kamtanamanash, awaruza kwazikasa munnanapa. Nane Cristora nîjkulturuza kîzpukin chihtîkasa pana uruza an kamtanamanash, Sînam Izpul sappanapa. Nane irîttuz piltas kuhsanazi uruza an kamtanamanash. Nane Dios Cristora pianchiruza pailta payurakima naizninnanazi kamtanamanash. Ñamin nane uruza sunpa kamtanarau. 3 Dios aumîza kiwainashimtu akwa, aune an tînta nampuspas. Chiwazha aumîza an ñamin kamtanarît aizpa piankamarawane, aune katsa pariya Cristowa an kamanawas. 4 Mînpazha awa Cristowa piankamarakas, awa Cristora nîjkultawane, Cristora we mîmturuzne wan kamarît aizpa kaarîshina, Cristowa kamtît aizpa kwairane. Dios kamtamtu aizpa kwairîttuzne mamasa Cristora kaiyasachi, uspa minñamtu aizpa maizasachi akwa. Chiyuras Dios sun awaruza wat kiwainarakas, ussa kwairane, uspane Diosta kaiyasachi. Diospa Sînam Izpul usparuza chiwazha Diosta mîlanamtukas, Diosta kwairane, uspane Diosta kaiyasachi, usparuza maizanapa. 5 Sun Dios pit mîraruzne Dios paiña kwaltuza wat kin namtît aizpa piankamamtu. Cristo kailnakima uspane Dios kwaltuza tînta kiwainamtu piankamara. 6 Sun Diospa pianturuz an mîashimtukine, Cristora an nîjkulashimtukine, uspane Cristora kwait kit wan kaarînazi. Cristora kwaimturuzne “Jesús Dios painkulchi” kizanazi. Uspane Diosta mamasa kaiyasachi, Cristo uspa kwail kiarît aizpa sînam sanapa. Sunkana kizmuruzne Jesústa piantararuzkana mai. Cristowa kwail minñamtu akwa, uspane Cristowa kwail kizanazi, ussa ishanamtu akwa. 7 Aluwa kwinta kinash. Alu kikane, alu pilta taiz kit pulishtîm. Pilta naptu. Alu pilta naptu akwa, pippa warît aizpa chikkamtu. Kwiztane pippa waramikane Dios mîlat aizpa sapnazi. Sunkana Diosne paina pit mîraruza wat kinashimtu. 8 Sun pilta pumin chiktane, sun sune kainsîh, palichi. Kainsîh akwa awane pu tizpiannazi. Tizpiantawane, awane pu pulchaknin kit ïnta impaktanazi. Diosne sunkana us kaizta aizpa mîshimtuchiruza naizninnanazi.
Pînkîh pammikane ka kaizta: “Ap izmuruza mîzain”
9 Ap izmuruz, mîzhain, na uruza pashinamtu akwa. Na uruza sunkana kurunnarakas, nane u Cristora kwayarît kaiznamtuchish. Nane Dios uruza watsat mîlnamtu pianish, paiña wat kal kianapa. 10 Dios wat akwa, us kimtu aizpa nil i. Sun akwa Diosne u izmuruz kal kiamtu aizpa mainmanazi. U usparuza pashiamtu akwa, une mama Diosta piantuza wat kiwainashimtu. 11 U Diosta piantuza kiwainamtuasmin, nane uruza paikwashimtus, sunmin kal kiamîznapa, Cristo kailnakima. Suasne Diosne u tîriztu aizpa uruza mîlananazi. 12 An sukin uzamtuasmin, une arakan awakanain uzman. An ñamin Diosta mîraruz uzarasmin, uspane wenamtachin Diosta nîjkulamîzta, Dios usparuza kin namtît aizpa sappanakima. 13 Dios Abraham akwa chiwazha kin namtane, usne us kaizta aizpa kira. Dioskin anza katsa iztamika wachi akwa, Diosne ussa watcha parat kit 14 mamasa ka kaizta: “Watcha. Nane Dios muntîtmika ish. Katmizna nane nua kwisha wat kinash. Nane nua akkwan pashapara mîlnapa kiwainnash,” ka kizta. 15 Abraham Diosta tîrîzta akwa, Diosta maintachin nîjkulta akwa, Diosne us mîlam namtît aizpa ussa mîlara. 16 Izmuruz mamazta pit parakane, izwainmumikara sayarawa, wat mînapa, watmin chaanpa. Maza awa “Dios ap izwainmumika i” kizkane, mamaz izmumikane “us kaizta aizpa watcha i” kizshina. 17 Dios “nawa mîmturuza ap kwal namninnanash” kizta akwa, usne usparuza paiña uzmukin mîlana namta. Kwiztane mamasa usne an kishit aizpa kin namta, wan awa piankamanapa. Dios maiztuchi akwa, usne paiña kwaltuza kin namtît aizpa kinazi. 18 Dios paiña kwaltuza kin namnarakas, kwiztane usne mamasa kishit aizpa tînta kin namta, wan awa watcha piankamanapa. Dios pa piji us kishit aizpa kin namtît akwa, aune Dios pîrail apmanazi piammakpas. Katmizna aune au izmumikasha, au Diosta, îrîtmakpas, us aumîza kwira kinanapa. Usne aumîza an tînta namninnanazi, Dios aumîza mîlana namtît aizpa sappanapa. 19 An sukin uztuasmin, aune Diosta tîriztumakpas, us aumîza mîlan namtît aizpa sapnakima. Aune Cristo watcha i pianmakpas, us au katsa pariyakana Dios watsal uzkin naptît akwa. Jesucristo akwa aune Diosta paikumtumakpas, us mîlan namtît aizpa tîrizana. 20 Jesús chiyura an ñancha naptît akwa, usne aumîza sua mîlana namtu, us au katsa pariya namtît akwa. Sua au akwa pailta payukima Diosta paikumtu akwa, mane usne pariya Melquisedec kal kirîtkana kimtu.
Jesúsne katsa pariya Melquisedeckana namtît
1 An Melquisedecne Salem pîpulu katsa mikwa munazi. Uskas katsa Diospa pariya munazi. Abraham cinco katsa mikwaruza anupparawane, Melquisedecne ussa wanmal kit us akwa Diosta paikwara, ussa tînta kiwainnapa. 2 Katsa mikwaruza anuppanarît akwa, Abrahamne uspa mîjat aizpa ukkat kit Melquisedecta akkwan mîlara. Chiwazha diez mîjne, maza ukkat kit Melquisedecta mîlara. Melquisedecpa munne “ap katsa mikwa wat kimtu” kiztu. Salem pîpulura înintît akwa, awane “an katsa mikwa awaruza kalpain uzninnamtu” kizara. 3 Mînminkas Melquisedecpa papihshpakas paiña akkuhshpakas pînkîhta parachi. Mînminkas paiña kwal an ñamin uzturuza pianchi. Us kawira payukas us irît payukas mînminkas pianchi. Melquisedecne Dios Painkulkana i. Dios painkulne katsa pariya nam kit Dioskasa pailta payukima nukkultu. 4 Sun Melquisedec katsa mikwa azi piankamtain. Melquisedecne Abrahamkin an katsa mikwa azi. Abrahamne an ñancha Israel kwalpa papihsh azi. Katmizna cinco mikwaruza anupparawane, usne Melquisedecta chiwazha kana kirît aizpa mîlara. Mînmika diez mîjne, usne maza ukkat kit ussa mîlara. 5 Ñamin Moisés uztasmin, Diosne Israel awaruztas Levíwa kwalta namninnara, pariyawa kal kianapa. Moisésne Israel awaruza îninnara, chiwazha kana kirît aizpa pariyaruza mîlananapa. Mînmika diez mîjne, usne maza ukkat kit pariyaruza mîlanarawa. Israel awaruz Abrahampa kwalpakis puzarakas, uspane pariyaruza, uspa kwaltuza, Dios înintît aizpa mîlanarawa. 6 Melquisedec Levíwa kwalchikas, usne Abraham mîlat aizpa sapta. Kwiztane Melquisedecne Diosta paikwara, Abrahamta, Dios kin namtîtmikasha, wat kiwainapa. 7 Melquisedecne Diosta paikwara, Abrahamta wat kiwainnapa. Katmizna aune Melquisedec Abrahamkin an tîntamika i pianmakpas. 8 An sukin uzamtuasmin, apas awaruzne pariya irîmtuza chiwazha mîlanamtu. Apas pariya imtukane, mamazne ussa maiz kit paiña kal kinazi. Izwainmuruzne Melquisedec mizurainkas irachi kizamtu. 9 Ankas ma pitchin kaiznash. Levíne an sukin paiña paimpa sapta. Leví an kwizta kawirarakas, Abrahamne Melquisedecta paiña paimpa mîlara, paiña pashpa Levíwa akwa. Sunkana wan Israel pariyaruzne Melquisedecta uspa paimpa mîlaarît, Abraham akwa. Sun akwa Melquisedec pariyane Levíwa pariyakin an tînta i pianmakpas. 10 Melquisedec Abrahamta wanmaltawane, Abrahamne mama pashpa mîjchi azi. Abraham mama pashpa mîjchikas, usne Melquisedecta paiña Israel kwal akwa, kwizta uzturuz akwa, paiña paimpa mîlara. 11 Levíwa pariyaruzne Judío awaruza kurunamtu, Moisés parît aizpa mîanapa. Uspane an ñancha pariya, Aarón muntîtmika, kal kitkana, kiamîzta. Moisés parît aizpa mîarakas, sun pitne awaruza an wat namninnarachi, Dios usparuza wat kulninnanapa. Akkwan pariya Aarónta kanpaarakas, uspa us kal kitkana kal kiarakas, mamaz tuntu pariya atpa, awaruza wat namninnanapa. Sun masas pariyane pianashina, Melquisedec kal kirîtkana kinpa. 12 Katmizna Diosne mamaz tuntu pariya nara, awa sînam sarîttuza sapnanapa. Diosne pariya Aarónta kanparuza kwaiyat kit wanta maizninnara. Pariya Aarónkana kal kirîttuza pailnintawane, Dioskas Moisés Judío awaruza înintît aizpa maizninnara. Dios Moisés înintît aizpa kwairît akwa, awaruzmin mamaz tuntuwara Dios uzkin piannashina. 13 Jesúsne sun masas pariya azi. Us pariya kwalkis puztachi akwa, paiña kwaltuzne mizurainkas Diospa yalta kal kiarachi. 14 Wanne Cristo Judá kwalkis puzta pianmai. Moisés Israel awaruza pariya Leví kwalpa panarîtkas, usne mizurainkas pariyaruz Judá kwalkis puznazi pînkîhta parachi. 15 Aune Dios kishimtu aizpa an wat piankamshimtumakpas. Dios Moisés înintît aizpa maizta akwa, uskas Levíwa pariyaruza maiznara. An masas pariyane, Cristone, Melquisedec kal kirîtkana ara. 16 Moisés Levíwa kwal pariyaruza namnashina kaiztakas, Diosne Moisés kaizta aizpa maiz kit Cristora pariya namninta, pailta payukima uztu akwa. 17 Sunkana us akwa Dios pînkîhta ka parît: “Nune minpa payurakima pariya tuanazi. Nune pariya Melquisedec kal kirîtkana kinazi.” 18 Katmizna Diosne Moisés Judío awaruza pînkîh pat înintît aizpa kwairît, sun ñamin pit uspa kwail kiarît aizpa sînam sanasachi akwa, awaruza watsat mîlnasachi akwa. 19 Moisés pat înintît aizpa awaruza wat namninnarachi akwa, Diosne masas watsal pit awaruza îninta, awa Jesústa tîrizanapa, usparuza watsat mîlnanapa. Us akwa awane Diosta kasha pianaashina. 20 Levíwa kwaltuzne pariya namara, Moisés sun înintît akwa. Diosne Jesucristora au katsa pariya namninna namta, wan awa sun piankamanapa. 21 Levíwa kwaltas pariyaruz kawiamtu akwa, uspane pariyaruz namamtu, pariyawa kal kianapa. Diosne wan awaruza us kaiztît aizpa piankamninnat kit Jesucristora au katsa pariya namninna namta. Paiña pînkîhtakas Cristowa ka parît: “Nane up Dios ish. Nane nua katsa pariya namnintus, ap kal pailta payukima kinpa. Na pîrail kaiztuchi akwa, nane nua kaiztît aizpa maizmanash. Nune pailta payukima Melquisedec kal kirîtkana kinazi.” 22 Dios Jesucristora sunkana narît akwa, aune Jesúspa pit Moisés îninta pitkin anza wari piankamtumakpas. 23 An ñamin pariya uzmuruzne akkwan mazi. Uspane uspa pariya kal kiamîzsachi, iarît akwa. Iarawane, mamaz pariyaruzne uspa kal kiara. 24 Jesúsne manaz pariyaruzkana chi. Us imtuchi akwa, usne pailta payurakima nukkulnazi. Au katsa pariyane mizurainkas maizmanazi. 25 Katmizna Jesúsne Diosta aashimturuza pailta payukima watsat mîlnanamtu. Mane Jesúsne uspa pariyane, chiyura uz kit Diosta uspa akwa pailtachin paikumtu. 26 Aune maza pariya Jesúskanain pashiamtanash. Usne Dioskana wat i. Usne mizurainkas kwail kin mintachi. Us sînam awa akwa, usne apas kwail kimtuzkana uztachi. Mane usne Diospa chiyura uztu, Dios paiñawa wat mintu akwa. 27 Sun Judíowa katsa pariyaruzne, an ñamin an sukin uzturuzne, payu aizpa piantarît aizpa Diosta mîlanara, pariyaruzpa kwail kiarît akwa. Kwiztane uspane piantarît aizpa Diosta mîlanara, awaruzpa kwail kiarît akwa. Jesús wan awa akwa maza piji irît akwa, usne pailta payukima au kwail kiarît akwa sînam sanashinai. 28 Moisés sun pit Judío awaruza panat kit Leví kwaltuza katsa pariyaruz munnanapa îninnara. Sun pariyaruzne wan awakanain kwail kiara. Moisés an ñamin sun înintît aizpa parakas, kwiztane Diosne parat kit paiña painkulta nat kit Jesústa katsa pariya namninta, au akwa pailta payukima Diosta paikwanpa.
Cristone an katsa pariya namta
1 Na sun pit uruza kainammtu aizpa mîrain. Mamaz pitne an pitkin anza watsal wachi. Jesucristo au katsa pariya namtawane, usne chiyura, Dios uzmukin nura, Dioskasa wantuza îninnanapa. Suane Diosne ussa an tînta namninta. 2 Us au katsa pariya namtît akwa, usne Dios uztukin paiña kal mîj. Awane Diospa uztukin sarachi. 3 Moisés Judío awaruza uspa pariyaruza namninnanapa îninnara, chiwazha piantarît aizpa Diosta mîlananapa. Uspane mîlamkas Diosta mîlaara. Sunkana Jesúsne, au katsa pariyane, Dios pashit aizpa kit kit au kwail akwa irît. 4 Jesús an sukin uzaratne, usne pariya tuamanazi, apain akkwan pariya pura akwa. Apas pariyaruzne Diosta chiwazha mîlaamtu, Moisés usparuza îninnarît akwa. 5 Au sukis pariyaruz Dios yalkin kal kiamtuasmin, Dios uzmukin chiyura anza watsal i. Apas pariyaruz Dios yalkin uspa kal kiamtuasmin, uspa kalne izpulkana iztît, Jesús chiyura, Dios uzmukin, paiña kal kimtu akwa. Moisés an sukin Dios yal sarachasmin, Diosne sun yal miza sana ussa kamtara. Moisés Dioskasa Sinaí înkalta chamtuasmin, ka kaizta: “Na nua an yal antu aizpa izti, an sukin ap yalta sanapa. Izpulkana iztît. An yalne Dios uzmukana iztuchi.” ka kizta. 6 Mane, Jesúsne, au katsa pariyane, an sukin pariyaruzkin anza wat kal chiyura sapta, Diosta au akwa paikwan. Au sukin pariyaruzne Moisés ñamin îninta aizpa kiamtu. Uspa kalne an we tînta i. Sun masas contrato akwa, Jesúsne awaruza Dioskasa wanmaknashina, awa Dios uzkin nappanapa. Jesúsne an wat contrato sat kit aumîza kiwaina namta, us parat aizpa piankamnanapa, au kwail kiarît aizpa kihananapa. 7 Awa Moisés an ñamin înintît aizpa mîasachi akwa, Diosne masas contrato chîhkat kit Moisés an ñamin înintît aizpa maizninta. An ñamin contrato awaruza wat namnasachi akwa, Diosne masas contrato aumîza chîhkanara, awaruza wat namninnanapa. 8 Diosne Israel awaruza kwail kiarît kaiznara, Moisés înintît aizpa mîashitchi akwa. Sun akwa Diosne paiña pînkîhta patnin kit ka kaiznara: “Mîzhain. Mamaz payura nane masas contrato îninnanash, an Israel awaruzkas, wan Judá awaruzkas, ap masas îninta pit nîjkulanapa, nakasa contrato nappanapa. 9 Judío awaruzne an kwizta nakasa masas contrato nappanazi. Judío awa Egipto suras puzarawane, uspa papihshtuzne nakasa nîjkulat kit an ñancha contrato sappara. Suasne nane papihshkanain usparuza Egipto suras mîlnarau. An ñancha contrato sapparakas, uspane ap contrato kwayarît. Ap contrato kwayarît akwa, nane usparuza mîshimat kit kwainarît. 10 Nane mamaz payura masas contrato usparuza chîhkananazi, Israel awaruz masas contrato nappanapa. Diosne sun masas contratokin ka parît: Nane na înintît aizpa usparuza piankamninnanash. Nane uspa kaijchukin ap pit nîjkulninnanash. Nane uspa Dioskanain tuanash, usparuza kiwainana. Uspane ap kwalkanain puranazi. 11 Wan awa Diosta piankamamtu akwa, mînminkas paiña izmuruza Diospa kamtanamanazi. Mînminkas paiña kwaltuza Diospa kamtanamanazi. Awane mamaztuza ‘Diosta piankamtain’ kaizamanazi, wan awa nawa me piankamamtu akwa. Katsa mikwaruzkas katsachiruzkas Diosta piankamanazi. 12 Na awaruza pashinamtu akwa, nane uspa kwail kiarît aizpa wat kulnanash. Nane uspa kwail kiarît aizpa sînam sananash. Uspa Hebreos 8 618 kwail kiamtu aizpa pailta payurakima mainnanash.” 13 Dios masas contrato chîhkarawawne, usne an ñancha contrato kiakpînta, wat chi akwa. Sun contrato wat chi akwa, tailchamai. Pailnapain azi.
Chiyura Dios uzmu yalkas au sukin Dios yalkas
1 Diosne an ñancha contrato Israel awaruza chîhkanat kit au sukin Dios yal sanapa îninnara. Usne usparuza akkwan îninmu chîhkanat kit Diosta pashianapa kamtanara, Diosta wakpuj wainñanapa. 2 An sukin Dios yalne pakwa mîjazi. An ñancha putnakin uru îlampara paizkakin kunarît. Mamin maza misharî ayukta uzta. Pariyaruzne pan sun misharîra Diosta taarît. Awane an ñancha putnakin sînam putnakin muntît. 3 Dios yalkin, paizkakin, pïn kantîtkasa nailtît. Ayukta putnakin anza sînam putnakin muntît. 4 Pïn kantîtkin misharî uzta, incienso impaktana. Sun misharî tîkasa sara. Sun misharî urukasa pianamal appaltît. Pïn kantît naptawane, mamaz katsa kaja unara. Sun katsa kaja urukasa pianmal appaltît. Sun kaja ayukta maza uru ulmune wa. “Maná” muntît panne uru ulmura wintît. Sun kaja ayukta Aarónpa chiktît tîwilkas warît. Sun kaja ayukta paas alpara uktakas wintît. Diosne diez îninmu an paas alpara ukta para. 5 Îsal kajara paas uru ángeltuza unarît. Uspane Dios iztakin kunat kit uspa itsîh îsal kajara appalmura asuztu. Diosne sun kaja appalmukin awa kwail kiarît aizpa sînam kwizninnamtu. Mane nane uruza sunpa an kwinta kisachish. 6 Dios yal kapal sarawane, pariyaruzne an ñancha putnakin nappamîz kit puzamîzta, pariyawa kal kianapa. 7 Katsa pariyain anza sînam putnakin maza pijin año aizpa naptu, Dios iztakin tuanpa. Anza sînam putnakin kwizta naptuasmin, katsa pariyane ainki wakarawa aimpi ayukta mîlta, kaja appalmukin parannapa. Usne sun aimpi ayukta mîlta, Dios paiña kwail kirît aizpa kwizninnapa. Sua tuasmin, katsa pariyane an aimpi mîlta, Dios anpa awa kwail kiarît aizpa kwizninnanapa. 8 Pariyaruz payu aizpa an sukin Dios yal uspa kal kiana nappamtuasmin, Sînam Izpulne awa Dios iztakin chiyura nappasachi aumîza kamtanamtu. An ñancha Dios yal an sukin nukkultuasmin, pariyaruz paiña kal kiarasmin, mînminkas chiyura Dios tukin naptachi, Dioskasa kwinta kin. 9 Awa chiwazha piantarît aizpa an ñancha Dios yalta mîlarakas, sun kalparuzne awaruzpa kwail kiarît aizpa kwizninnasachi. Mane uruza kamtananash, Dios wan chiwal maizshimtu akwa, awa Dioskasa kalpain puranapa, Dios uspa kwail kiarît wat kulnanapa. 10 Dios an ñancha contrato Judío awaruza chîhkanarawane, usne akkwan tuntu înimmu usparuza îninnara. Usne chiwazha kwanpa kamtanara. Usne usparuza kwazikasa kitnapa kamtanara, Dios yalta napparachasmin, us iztakin wakpuj wainñarachasmin. Judío awaruzne wan îninmu mîarawa, Jesús au katsa pariya narakima, Dios wanta masas maiznakima. 11 Cristo au sukin atpane, usne au katsa pariya nam kit chiyura napta, aumîza wat kiwainanapa. Usne Dios iztakin napta, sua paiña wat kal au akwa kinpa. Awa Dios uzmu chiyura sarachi akwa, Diospa uzmune apas Dios yalkin anza watsal i. 12 Cristo Dios anza sînam uzmukin naptawane, usne chivowa aimpikas ternerowa aimpikas chiyura mîltachi. Apas pariyaruzne pailta payukima sunkana kiara. Cristo au akwa irît akwa, usne, au katsa pariyane, Dios sînam uzmukin napta, awa kwail kiarît aizpa kwizninnanapa. Usne Dios anza sînam uzmukin maza piji napta, au kwail kiarît aizpa sînam sananapa, aumîza pailta payukima watsat mîlnanapa. 13 Apas pariyaruzne chivowa Hebreos 9 620 aimpikas torowa aimpikas impa kirîttuza parannara, uspa ña pianamal mamasa sînam sanapa, mamaztuzkasa tuanpa. Ternera impaktawane, uspane ternerawa imjal kwazikasa nat kit impa kirîttuza parannara, uspa ña pianamal mamasa sînam sanapa, mamaztuzkasa tuanpa. 14 Cristowa aimpine ternerowa aimpikinkas anza wari, Cristowa aimpi au ayukta kwail kiarît aizpa sînam sanamtu akwa. Paiña Izpulne, Cristokasa pailta payu uztumikane, Cristora kiwainta, au akwa inapa. Cristo ussain Diosta chîhkarawane, usne au akwa piantarîtmika namtît. Us chinkas kwail kirîtkas, usne au akwa irît, paiña aimpi au kwail minñarît aizpa kwizninnanapa. Us au akwa irît akwa, usne au chiwazha kwail kiarît aizpa sînam sanarît, au Dios chiyura uztumikakasa tuanpa. 15 Katmizna, Cristone masas contrato awaruza chîhkanarît, awaruz Dioskasa wanmakkanapa. Diosne awaruza akwanamtu, Dios mîlan namtît aizpa sappanapa, pailta payukima chiyura uskasa uzanapa. Cristo Judío awaruz akwa, an ñancha contrato saptaruz akwa, irît, uspa kwail kiarît aizpa sînam sananapa, Dios usparuza chiyura pailta payukima uskasa uzninnanapa. 16 Awa irachasmin, mînpazha awane pînkîhta pam kit us mîj aizpa mamazta mîlan namtu, irîka. Awa sun mîlan namtîtmika irît piankamtawane, pa kimmikane ussa mîlan namtît aizpa sapshina. 17 Sun pînkîhta us mîj aizpa pamtumika uztuasmin, mamazne ussa mîlam namtît aizpa sapsachi, namtîtmika mama uztu akwa. Namtîtmika irawane, saptumikane ussa mîlan namtît aizpa pa kishina. 18 Dios paiña kwaltuza an ñancha contrato chîhkarawane, pariyane torora piantat kit torowa aimpi parantawa, awa sun contrato sappanapa. 19 Moisés wan Dios înintît aizpa wan Judío awaruza kainanarawane, usne kwanam pîriku ash tît kit hisopo tîra ipta. Suasne usne ternerowa aimpikas cabrawa aimpikas kwazikasa narît. Usne hisopo tî kwazikas aimpikas ulmukin pain kit Dios contratora, Dios înintît aizpa pînkîhta îsalta tîlpalta. Kwizta us wan Judío awaruza tîtpalnarawane, 20 usne usparuza ka kaiznara: “Diosne ukasa an contrato chîhkanara, us uruza înintît aizpa sappanapa. Sun contratora aimpikasa tîlpalta akwa, Diosne uruza contrato pînkîhta parît aizpa kin namtît,” kiznara. 21 Dios yal sarawane, sunkana Moisésne Dios yaltakas wan ayukta pura aizpakas aimpikasa tîlpalnapa îninta, chiwazha impa aizpa sînam sanapa, awa Dioskasa wanmakkanapa. 22 Moisésne wanpazhara aimpikasa tîlpalnapa îninta, chiwazha impa aizpa sînam sanapa, Dioskasa wanmakkanapa. Aimpi akwa tîlpalnamtukine, Diosne mizurainkas awawa kwail kiarît aizpa kaninnasachi.
Cristone au akwa irît
23 An sukin uzasmin, Dios iztakin pianchasmin, awane chiwazha piantarawa, wan impa aizpa sînam sanapa, Dioskasa wanmakkanapa. Pariyaruzne Dios yalkin pura aizpa aimpikasa sînam sanarît. Chiyura pura aizpa an sura pura aizpakinkas anza wari. Katmizna Diosne chiyura pura aizpa aimpikasakas sînam sanarawa. Cristo au akwa irît akwa, paiña aimpine ternerowa aimpikinkas anza wari, paiña aimpi aumîza sînam sanarît akwa, awa Dios iztakin aanapa. 24 Cristone, au katsa pariyane, apain Dios yalta, awa sarît yalta, naptachi. Cristone chiyura Dios iztukin napta, au akwa paikwanpa, aumîza kiwainanapa, au Dios iztakin puranpa. 25 Apas katsa pariyane año aizpa piantît aizpa sap kit Diospa anza sînam yalta mamazpa aimpikasa mîlta, awa kwail kirît aizpa sînam puranapa. Cristone maza piji it kit Dios iztakin paiña aimpikasa napta, au kwail kiarît aizpa sînam kwizninnanapa. 26 Dios au su sarasmin, Cristone año aizpa irachi, us maza piji pîna naiztît akwa. Mane Cristone maza pijiin au sukin at kit maza piji au akwa irît, au kwail kiarît aizpa kwizninnana. Usne minpa payura au akwa piantarîtmika namta, awaruza sînam sanana, awa Dioskasa wanmakkana. 27 Sunkana wan awaruzne maza pijin iarawa. Awa iarawane, kwiztane Diosne wan uspa kwail minñamtu aizpa chîhkatchiruza ilnanazi. 28 Sunkana Cristone maza piji it kit au akwa piantatmika namta, au kwail kiarît akwa naizna. Sunkana usne wan awa kwail kiarît aizpa sînam sanashina. Cristo mamaz payura mamasa kailtukas, usne sun kailtu payura awa kwail kiarît aizpa sînam sammanazi, uspa kwail kiarît aizpa me sînam sarît akwa. Sun kailtu payura usne ussa tîrizturuza watsat mîlnanazi, chiyura uskasa uzanapa.
1 Moisésne Dios Judío awaruza îninnarît aizpa parît. Uspa Dios înintît aizpa mîashitchi akwa, uspane wat namarachi, Dios pashit aizpa kiana. Chiyura pura aizpa watcha i. Kwiztane Diosne chiyura aumîza wan karamtu aizpa piankamninnanazi, au sukin mîj aizpa pailtîmtu akwa. Awa año aizpa piantarît aizpa Diosta mîlarîtkas, Moisés înintît aizpa kiarakas, uspane mizurainkas sînam sarît uzasachi. Diosne mizurainkas usparuza sapnasachi, uspa kwail kwizninnarachi akwa. 2 Moisés înintît aizpa usparuza wat namnarachikas, uspa kwail sînam saninnarachikas, uspane chiwazha piantarît aizpa Diosta mîlamîzta. Dios sun piantarît aizpa mîlturuza sînam sanaratne, uspane mamasa sun piantarît aizpa Diosta mîltakianazi. Sînam sarîtmika paiña kwail kirît aizpa kwiznintît pian akwa, usne ayukta paiña kwailpa mintuchi. 3 Ñamin awane sunkana minñarachi. Año aizpa kalpa piantamîzta akwa, uspane uspa kwail kiarît aizpa nîjkulara. 4 Aune ternerowa aimpikas cabrawa aimpikas kwail kimturuza mizurainkas sînam sanasachi pianmakpas, Dios usparuza sapnanapa. 5 Chiwazha aimpi awawa kwail kwizninnasachi akwa, Cristo au sukin piannakane, usne Diosta ka kaizta: “Nune chiwazha piantarît aizpa pashitchi. Nune nawa awakana namtît, awa akwa inapa. 6 Awa ternero Diosta mîlarakas, nune ña impaktît aizpakas piantarît aizpakas pashitchi, awawa kwail sînam sananapa. 7 Suasne Cristone Diosta ka kaizta: ‘Izti. Nane an sukin arau, nu pashimtu aizpa kin. Nane Dios pînkîhta nawa parît aizpa kishinash.’ ” 8 Ñamin Moisés sun pit pînkîhta pat kit Judío awaruza îninnara, kalpa piantanapa, uspa kwail akwa Diosta mîlaanapa. Ma payu sunkana Cristone Diosta ka kaizta: “Mane Diosne piantarît aizpa pashitchi, awawa kwail sînam sananapa.” 9 Kwiztane Cristone Diosta ka kaizta: “Izti. Nane an sukin arau, nu pashimtu aizpa kin,” ka kizta. Us au akwa irît akwa, usne Moisés înintît aizpa pailninta, sun awaruza wat namninnamtu akwa. 10 Cristo Dios pashit aizpa kishit akwa, usne Dios înintît aizpa mîra. Jesucristone, au akwa piantatmikane, maza piji irît, au kwail kiarît aizpa sînam sananapa, aumîza Dios iztukin uzninnanapa. 11 Wan Judío pariyaruz an sukin uspa kal kiamtuasmin, uspane pailta payukima Diospa yalta akkwan piji sunmin piantarît aizpa mamazpa akwa mîlanara. Ternerowa aimpine mizurainkas awawa kwail kwizninnasachi. 12 Cristone ussain Diosta chîhkarawane, au akwa piantatmika namta. Usne maza pijiin irît, au kwail kiarît aizpa sînam sananapa. Paiña kal kapal pailtawane, usne chiyura nura, Dios iztakin pailta payukima uzna. 13 Suane usne paiña Taitta Dioskasa tîriztu, paiña aliztuza kapal anuppanakima. 14 Cristone maza piji awa akwa inapa chîhkara, wan Diosta piantuza sînam sanana, usparuza watsat mîlnana. 15 Dios Sînam Izpulne sun watcha pit kaiz kit Dios pînkîhta ka paninta: 16 “Nane masas contrato pam kit Judío awaruza mamaz payura chîhkananash. Anpatne ka kiznara. Nane Dios înintît aizpa usparuzpa kaijchukin piankamninnanash. Nane sun pînkîh parît aizpa ayukta mintukin usparuza piankamninnanash.” 17 Suasne Dios Sînam Izpulne ma pitchin ka kaizta: “Nane uspa kwail kiarît aizpakas mama minmanash. Awa Dios înintît aizpa mîamtuchikas, nane uspa kwail kiarît aizpa kwizninnat kit uspa kwail kiarît aizpa maintînash.” 18 Dios awaruzpa kwail kiarît aizpa kihashinamtu akwa, aune chiwazha piantarît aizpa Diosta mîlashitchimakpas, au kwail kiarît aizpa kwizninnanapa.
Pînkîhta pamtumikane kamtanara, Diosta piantuz ussa paikuanapa
19 Mane, ap izmuruz, mîzhain. Jesucristo au akwa irît akwa, Dios tukin naptît akwa, usne chiyura napta. Suane usne paiña aimpikasa au kwail kiarît aizpa sînam sanashina. Sun akwa aune Dios uzkin napshinamakpas, ishkwatchin, Dioskasa wanmakkana. 20 Jesús sun masas chiyura mi sanintît akwa, katmizna aune Dios iztukin chiyura napshimtumakpas, Dioskasa wanmakkana. Jesús irachasmin, sun chiyura mi sîptît ara. Cristo uztu akwa, usne awaruza maizninnashina, masas miwara nappanapa, chiyura Dioskasa uzanapa. 21 Au katsa pariyane, Jesúsne chiyura uz kit wan Diosta piantuza îninnamtu. 22 Katmizna Dios tura îzhain, ussa wakpuj wainna. Mane ussa wat nîjkultumakpas. Dios aumîza maiznat kit au kaijchura wat namninta akwa, aune Dios watcha i pianmakpas. Cristo au kaijchukin au kwail mintît aizpa sînam sanarît akwa, aune Dios iztukin sînam awakana uztumakpas. 23 Diosta tîrizna îzhain, us kin namtît aizpa kinkima. Wenamtuchin, Cristo watcha i kaizna îzhain. Paiña pit kwairachin, ussa mîzhain. Usne us kin namtît aizpa kinazi, wenamnachin. 24 Mamaztuzpa minchain, usparuza kiwainnanapa, awaruza pashinanapa. Mamaztuza kiwainna îzhain, wat kal kianapa. 25 Diosta piantuz wanmakkakane, uspakasa wanmakna îzhain. Mazantuz ñamin wanmakkarakas, uspane wanmakna paiyarît. Sun wanmakmuchiruzkana uzman. Katmizna maza mazarain kuruntawamakpas, awa Dioskasa watmin chaanapa, Diosta wakpuj wainñanapa. Mane aune awaruza kiwainnarawa, au Anpat kailtu payu piananpain akwa. 26 Maza Dios watcha pit piankamtukas, sun awa kwail kimîztune, Diosne paiña kwail kimtu aizpa sînam sasachi, au piantarîtmikasha kwairît akwa. 27 Sun akwa, Diosne kwail kishimîzturuza ishkwaninnat kit usparuza ïnkin îninnanazi, usparuza ilnana. 28 Ñamin awa Moisés înintît aizpa kitchine, kutña izwainmuruzkima us kwail kirît aizpa izarane, mikwane ussa inapa îninta. Minminkas ussa kiwainsachi. 29 Diosne Dios painkulta kwairîtmikasha an tînta ilnazi, Dios painkulpa wat mintachi akwa. Cristone irît, awa masas contrato uskasa nappanapa, uspa kwail kiarît aizpa paiña aimpikasa sînam sananapa. Diosne Jesús chiwazha awakanain irît minturuza an tînta ilnanazi. Sînam Izpulne awaruza Diosta wanmalninnat kit Diosta piankamwainshimtu. Sînam Izpul kiwainnamtu akwa, Diosne ussa saptuchiruza an tînta ilnanazi. 30 Aune Dios kimtu aizpa pianmakpas. Ka kaizta: “Nane wan kwail kimtuza ilnanash. Nane uspa kwail kiarîtkanain usparuza kailninnanash, sunkanain naizanapa.” Dioskas an kaizta: “Nane ap kwaltuza ilnanazi, nawa mîamtuchine.” 31 Diosne, chiyura uztumikane, kwailtuza tînta ilnanazi. 32 Ñamin une Dios watcha pit mîat kit Diosta piankamara. Dios uruza watsarît mîlnara nîjkultain. Awa uruzkasa waya kiarîtkas, awa uruza tînta naizninnarakas, une uspa kwail tailchaara, u Diosta nîjkularît akwa. 33 Masetne sun kwailtuzne uruza awa iztakin tînta îninnat kit uruza kwail pit kaizara. Uspane uruza akkwan piji naizninnara. U naizturuza kiwainamtasmin, sun kwailtuzne uruzakas kawarain kwail kinara. 34 Une kajchira sîptîttuz akwa tayal kit usparuza kiwainnashit kit uspa we mîjat aizpa usparuza mîlanara. Awa u su mîj aizpa walkwarakas, une tayaltachin tailchaara, uspa u kaijchukin mîj aizpa walkwasachi akwa. Sun kwail tailchamtuasmin, une wat tuat kit Dios uruza mîlamtu aizpa pianmai. Usne aumîza us mîj aizpa mîlananazi, us mîj aizpa anza wat akwa. 35 Katmizna, Diosta nîjkulmîztain, wenamtachin. Watcha, Diosne uruza us wan kin namtît aizpa chiyura mîlananazi. 36 Wan naiztu aizpa tînta tailchamtuasmin, une Dios kaizta aizpa mîarawa, kwairachin. Dios pashit aizpa kiarawa, us uruza kin namtît aizpa chiyura sappanapa. 37 Diosne paiña pînkîhta ka panintît: “Imparain imparain, Cristone, amtumikane, anazi. Usne watcha apain piannanpain. 38 Nane awaruza wat namninnanash, nakasa wanmakkanapa. Nawa wat nîjkulat kit nakasa uzanazi. Nane nîjkultuchiruza ilnanash, nawa mîarachi akwa, Diosta kwayarît akwa.” 39 Aune Diosta kwayamturuzkana chimakpas. Aune chinkas kamanash. Aune ishkwatchin Diosta kanpamtumakpas. Au Diosta nîjkulamtu akwa, Diosne aumîza watsat mîlnanazi.
Diosta nîjkultîttuz
1 Au Diosta nîjkulturuzne Dios kaiztît aizpa watcha i mîmtumakpas, wenamtachin. Dios aumîza kin namtît aizpa apain sapparachikas, aune Dios aumîza kin namtît aizpa pianmakpas. Diosta tîriztawane, aune sappanapas. Aumîza kin namtît aizpa izarachikas, aune an tînta namat kit Dios kaizta aizpa watcha i minñanash. 2 Ñamin uztaruz Dios kaizta aizpa watcha i nîjkularît akwa, Diosne usparuzpa “wat awa mai” kiznara. 3 Au Dios kaizta aizpa watcha i nîjkulamtu akwa, aune Dios au sukas au chiyukas sarît pianmakpas. Dios au su sarachasmin, chinkas wachi. Us tînta akwa, Diosne paiña pit kaiz kit wan wa aizpa sarît. 4 Abelne Dios kaizta aizpa watcha i nîjkulta. Abel us piantarît aizpa Diosta mîlarawane, Diosne Abelpa wat min kit paiña mîlam sapta. Diosne Caín mîlat aizpa saptachi, Diosta nîjkultachi akwa. Abel Diosta nîjkulta akwa, Diosne paiña kwail sînam sat kit Dios iztakin wat sara. Abel irîtkas, aune mama Abelpa kamtumakpas. Aune uskana Dios kaizta aizpa watcha i nîjkultawamakpas. 5 Enocne Dios kaizta aizpa watcha i nîjkulta. Enoc uztasmin, Diosne chiyura ussa mîlta. Îtchasmin, usne irachi. Dios ussa chiyura mîltît akwa, an sukin awane ussa wanmalarachi. Dios pînkîhta Enocpa parît: “Us Dios înintît aizpa mîrît akwa, Diosne Enocpa wat min kit kwizta chiyura mîlta.” 6 Dios kaizta aizpa watcha i nîjkultuchimikane Dios pashit aizpa kisachi. Diosta wakpuj wainshimtumikane Dios watcha uzi nîjkultawa. Diosne ussa saimturuza us kin namtît aizpa mîlananazi. 7 Noéne Dios kaizta aizpa watcha i nîjkulta. Dios Noéra “mamaz payura nane an su pi pînninnash” kuruntawane, Noéne chinkas iztachin Dios kaizta aizpa watcha i nîjkul kit ishkwat kit kwisha katsa kanua samîzta, paiña kwaltuza watsat mîlnana. Noé Dios kaizta aizpa watcha i nîjkultît akwa, Diosne Noéra watsat mîlnat kit Dios kaizta aizpa nîjkultuchiruza ilnara. Noé Dios kaizta aizpa watcha i nîjkultît akwa, Diosne Noéra wat namnin kit ussa watsat mîlta. 8 Abrahamne Dios kaizta aizpa watcha i nîjkulta. Diosne Abrahamta akwat kit mamaz su mîlan namta. Us mînta îmtu pianchikas, Abrahamne Dios înintît aizpa mît kit paiña sukis puzta, Dios sun su mîlan namtît aizpa sapnapa. 9 Abraham Diosta nîjkultasmin, sun suwara Dios mîlan namtît sukin puztuasmin, Abrahamne îranchuruz sat kit mamaz suras awakana uzta. Abraham paiña pashpara, Isaacta, kawirawane, Isaacne sun Dios mîlam namtît sukin uz kit îranchuruz sat kit Abraham uztakana uzta. Isaac paiña pashpara, Jacobta, kawirawane, Jacobne sun suwara Dios mîlan namtît sukin uz kit îranchuruz sat kit Isaac uztakana uzta. Diosne sun kutñaruza sun su mîlan namnara. 10 Abraham an sukin mîlan namtît aizpa sapshimtuasmin, usne Diosta tîrizta, mamaz pîpulura, chiyura, înpa, Dioskasa minpa payukima uznapa. Diosne an pîpulura sarît. 11 Sarane Dios kaiztît aizpa watcha i nîjkulta. Sara kwisha înkwa parît akwa, usne pashpa mîlsachi. Usne Dios kin namtît aizpa watcha i nîjkulta, wenamtachin, pashpa wanapa. Pashpa warawane, Sarane pîja ishta. Suas pashpa taizta. Sara înkwa parîtkas, Abraham îlapa parîtkas, uspane Dios kaizta aizpa watcha i nîjkulpail kit pashpa kawirailta. 12 Abrahamkas kwisha îlapa parîtkas, usne pashpa kawirat kit papihsh namta. Paiña pashpane akkwan pashpa kawirara, aiznakima. Maza ampukis wan Abrahampa pashparuz kawiara. Kîmaruz wiansachi. Pi ksukas wiansachi. Sunkana Abrahampa kwal wiansachi, aiztît akwa. 13 Iarachasmin, suntuzne Dios usparuza mîlan namtît aizpa sapparachi, Dios kaizta aizpa watcha i nîjkularîtkas. An sunkin Dios usparuza mîlan namtît aizpa sapparachikas, uspane Dios kaizta aizpa watcha i nîjkulat kit chiyura wan sappanazi pianmai. An sukin uztuasmin, uspane “pailta payukima an sukin uzanawas” minñarachi. 14 “Apas chi makpas” kizturuzne mamaz sura sayamtu. Uspane wantuza “chiyu sura sayamtu” kainanamtu. 15 Uspane uspa ñamin su uzarakin kaiyashitchi, uspa kailna minñarachi akwa. 16 Uspane anza wat su, chiyura su, pashiara. Katmizna Diosne uspa akwa mamaz su sara, Dios uztukin puranpa. Dios uspa akwa mîtsalchi akwa, Diosne “nane uspa Dios ish” kiztu. 17-18 Ñamin Diosne Abrahamta ka kin namtît: “Up painkul, Isaac kawirawane, usne akkwan pashpa mîlnazi, akkwan kwal aiznakima. Abrahampa kwal munanazi,” ka kizta. Dios Abraham minta aizpa piankamtît akwa, usne Abrahamta îninta, paiña painkulta, Isaacta, piantanapa. Abraham Dios kaizta aizpa watcha i nîjkultane, usne Dios înintît aizpa kishina. Us piantarît aizpa Diosta mîlashimtu akwa, Abrahamne Dios înintît aizpa mît kit maza painkul mîjatmikasha, Isaacta piantashina. Sun akwa Abrahamne Dios kin namtît aizpa watcha i nîjkulta. 19 Abrahamne Diosta nîjkul kit ka minta: “Diosne Isaacta irîttas mamasa kakulninshina.” Isaac irachikas, Abrahamne ussa mamasa sapta, kamkis kakultîtmikakana. 20 Isaacne Dios kaizta aizpa watcha i nîjkulta. Isaacne Diosta paikwara, Jacobkas Esaúkas Dios kin namtît aizpa mamaz payura sappanapa, Dios usparuza wat kiwainanapa. 21 Jacobne Dios kaizta aizpa watcha i nîjkulta. Jacobne inapain azi. Tîwil putnaintuasmin, Dios iztakin sumtîttuasmin, Jacobne Diosta paikwara, paas Joséwa painkultuza wat kiwainnanapa. 22 Joséne Dios kaizta aizpa watcha i nîjkulta. Irachasmin, Joséne Israel awaruz Egipto suras puzanazi kiznat kit îmtu payura paiña sîh uspakasa mîlnapa îninnara, Canaán sura kamanapa. 23 Moiséspa papihshkas akkuhshkas Dios kaiztît aizpa watcha i nîjkulpailta. Moisés ainki tuasmin, papihshkas akkuhshkas kutña mishkima uspa watsal iztît pashpara puintît mîjara. Katsa mikwa wan ampu pashparuza piantanapa înintît akwa, uspane katsa mikwa înintît aizpa ishkwailtachi, mîshichiwail. Katmizna uspane (papihshkas akkuhshkas) Moisésta piantarachi. 24 Moisésne Dios kaizta aizpa watcha i nîjkulta. Moisés îlapa parawane, usne nat kit “Faraónpa, katsa mikwawa pashune ap akkuhsh chi” kizta. “Nane paiña painkul chish,” ka kizta. 25 Moisésne Israel awakasa uzna narît. Katsa mikwa sukin naiztukas, usne katsa mikwa kwaltuz kwail kiarîtkana kishitchi. 26 Us Israel awakasa wanmaktît akwa, Moisésne Cristo naiztîtkana naizta, Egipto sura uztuz ussa kwayarît akwa. Egipto su mikwa pa kiarîtkas, Moisés paiña papihsh kiznakana pa kishitchi. Usne Egipto su uzturuzkana uzshitchi, uspa kwail kiarît akwa. Moisésne Dios mîlamtu aizpa an wari minta. Egiptowa pialne wat chi minta. Moisésne Diosta tîrizta, Dios ussa mamaz payura mîlan namtît aizpa sapnakima. 27 Moisésne Dios kaiztît aizpa watcha i nîjkulta. Usne Egipto sukis puz kit aliz kultît katsa mikwara ishkwatchi. Diosta iztachikas, Diosta kwairachi. Moisésne us kuruntît aizpa kanpara, Dios uskasa kwinta kit akwa. 28 Moisésne Dios kaiztît aizpa watcha i nîjkulta. Usne wan Israel awaruza pîrikuruza piantanapa îninnara, Pascua pishta izanapa. Suasne pîrikuwa aimpi pirulta wintawane, uspane pîjta îsalkinkas pîjta kanmalkinkas nîara, ángel uspa an ñancha painkultuza ininnamanpa. 29 Judío awaruzne Dios kaizta aizpa watcha i nîjkulara. Katmizna uspane mittîwara Kwanam Pira pilpara kwakkara. Egipto awa sun pimin kwakkashimtuasmin, uspane kwaara. 30 Judío awaruzne Dios kaizta aizpa watcha i nîjkulara. Uspane Jericó pîpulura siete payukima pîlsamtaara. Kapal pîlsaarawane, Diosne Jericó pîpuluwa kalpialtuza azpian kit nainninnara, Israel awa Diosta nîjkulara akwa. 31 Jericó kalpial naintachasmin, suane, maza ashampane, Rahab muntîtmikane, Jericó pîpulura uzta. Kwail ashampa akwa, usne ñamin akkwan ampukasa chaarît. Rahab Dios kaizta aizpa watcha i nîjkultît akwa, usne Jericó awakasa irachi. Ñamin paas Judío awaruzne Jericó pîpulura puintain ailta, sun pîpulura iznapa. Ailtawane, Rahabne uspa paasta wat sapnat kit paiña yal nammîlat kit paiña yalkin kulnaninta. Uspa paasta kiwaintît akwa, usne Jericó awa nîjkultachiruzkasa irachi. 32 ¿Uruza mamaz kwinta kinsa? Mamaztuzpa kwinta kisachish. Mama we ish. Nane uruza Gedeónpakas, Baracpakas, Sansónpakas, Jeftéwakas, Davidpakas, Samuelpakas, Dios kainammtuzpakas kwinta kisachish. 33 Uspane Dios kaizta aizpa watcha i nîjkulara. Mazantuzne waya kit kit katsa mikwaruza anuppanara. Mazantuzne awaruza îninnara, nil uzninnanapa. Katmizna uspa Diosta paikuara akwa, usne usparuza kiwainnara, Dios mîlan namtît aizpa sappanapa. Mazantuz ishuruzkasa sîpparîtkas, Diosne usparuza katsa ishukis puzninnara, ishu kumanpa. 34 Awa mazantuza katsa ïnkin kiaintîtkas, uspane impaktarachi. Mazantuzne imasarît, awa usparuza mashtikasa piantashiamtasmin. Najtîttuzne tînta kularît. Mazantuzne tînta waya kiat kit aliztuza anuppanara. Diosne anparuzakas kiwainnara, Diosta nîjlularît akwa. 35 Ashampawa pashparuz iarîtkas, Diosne sun pashparuza kuhsninnara, mamasa uzanapa. Awa mamaztuza naizninnarawane, uspane iara, Diosta kwairashitchi akwa. Uspa apa iarane, uspane chiyura uzanawas pianmai. Diosne anpparuzakas kiwainnanara, uspa Diosta nîjkularît akwa. 36 Awane mamaztuza ishanat kit ilnara. Awane usparuza cadenakasa kaanarît kit kajchira sîpnarît. 37 Mamaztuzne iarît, usparuza uk kinarît akwa. Awane mamaztuza tî kîzmukasa kakwakin tîtnara, ianapa. Mamaztuzne pîriku ayakasa cabra ayakasa kwaarît, kamisha mîjchi akwa. Mazantuzne înkalparain chaara, uspa yal mîjchi akwa. Mamaztuzne puiza namarît. Awane mamaztuza aim kinarît, naizanakima. 38 Sun naiztaruzne an wat awa mazi. Mamaztuza naiznintaruzne kwail awa mazi, naizturuza uspa sukis kwainarît akwa. Uspane înkalparakas, awa purachiwarakas, awa mi karîttuzkanain chaara. Sun naizarîmturuzne an wat sura uzanazi. An sukin uzaraasmin, uspane uk kultakas pil kultakas uzara. 39 Diosne wan naiztaruzpa wat minñara, Dios kaizta aizpa watcha i nîjkularît akwa. Mînminkas an sukin Dios usparuza mîlan namtît aizpa mama sapparachi, 40 Dios au akwa chiwazha an wat kinashimtu akwa. Diosne paiña kal kapal pailshira, ñamin uzarîtkas ma payu uzturuzkas Dios mîlan namtît aizpa parejuin sappanapa, wan Diosta nîjkulturuz Dioskasa uzanapa.
Pînkîh pamtumikane ka parît: Cristora kanparawamakpas
1 Nane akkwan awa Dios kaizta aizpa watcha i nîjkultaruzpa kwinta kinarau. Uspane chiyuras izwainmuruzkana mai. Aukas uspa uzarîtkana uzna piankamtawamakpas, wan naiztu aizpa tailchanapa. Katmizna chiwazha aumîza kiwainamtuchi aizpa mamin chîhkatpamakpas. Chiwazha kwail kishimtu aizpa chîhkatpamakpas. Aune Cristora kanpat kit minpa payukima wan chiwal impara imparain tailchatpamakpas. Aune Dios pashit aizpakas, Dios înintît aizpakas, kitpamakpas, wenamtachin. 2 Aune Jesústain kanparawamakpas, us pashit aizpa kiana. Usne Dios kaizta aizpa watcha i aumîza nîjkulninnara, Dios aumîza chiyura watsat mîlnanapa. Jesús an sukin uztuasmin, usne naiz kit ishtu tailchat kit kurishta irît. Jesús kurishta irîtkas, usne mîtsal kitchi, Dios ussa chiyura watsal kinninta akwa. Katmizna mane usne Dios mamin uz kit Dioskasa wantuza îninnamtu. 3 Jesúsne aukinkas an tînta naizta, awa ussa aliz kulaat kit kwail pit ussa paraara akwa. Katmizna wan naizamtu aizpa tailcharain. Najtît awakana uzman. 4 Uspa Cristora piantarîtkas, makima kwailtuzne uruza piantanarachi. U kwail kiashitchikas, uspane uruza kwail kianapa îninñara, u Cristora nîjkularît akwa. 5 Une Dios uruza, paiña pashparuzakana kurunnarît aizpa mainman, Dios pitta ka parît akwa: “Ap painkul, mîzha. Na uruza ilnamtukas, nane uruza kamtanamtu, na kaiztu aizpa mîanapa. Na chiwazha kiman kaiznarakas, nane uruza kurunnamtu, u kaijchukin tînta namanapa. 6 Nane, u Anpatne, up pashimturuza kurunnamtus, kwail kiamanpa. Wan Diospa pashparuz kwail kiakane, nane uruza tît ilnanash, u kwail chîhkanapa, uruza mamasa sappana.” 7 Une Dios uruza ilnamtu aizpa tailcharain, Dios sunkana uruza paiña pashparuzkanain kurunnamtu akwa. Wan papihshtuzne pashparuza ilnamtu, kwail chîhkaanapa. 8 Diosne wan paiña pashparuza ilnamtu, us kaiztu aizpa mîanapa. Dios uruza kurunnamtukine, uruza ilnamtukine, une Diospa kwal chi mai. Dios uruza ilnamtukine, une sailta pashparuzkana mai. 9 Mane ma pitchin uruza kainanash. An sukin uzamtuasmin, au papihshtuzkas au akkuhshtuzkas aumîza ilnara, au wat nîjkul kit chanapa. Katmizna aune usparuza chikas kikaimakpas. Uspawa wat mintamakpas. Katmizna Dios aumîza ilnakane, aune Diosta an chikas kikaimakpas, us au chiyura papihsh namtît akwa. Usne aumîza uskasa pailta payukima uzninnanazi. 10 Au papihshtuzkas au akkuhshtuzkas aumîza an sukin akkwan payuchin ilninnara, aumîza kamtanashit akwa. Diosne aumîza ilnamtu, aumîza wat namninnanapa. Usne aumîza sînam saninnamtu, au kwail chîhkanapa, Dios kaizta aizpa mîanapa. 11 Dios aumîza ilnakane, aune naiztumakpas, us aumîza ishnintu akwa. Kwiztane kapal Dios kamtarît aizpa piankamarawane, awane nilmin kiat kit Dios iztukin kalpain uziznapas.
Pînkîh pamtumika ka parît: Aune Dios paramtu aizpa mîrawamakpas
12 Katmizna Cristora nîjkulamtuasmin, uruzpain an tînta namnintain. Najturuzne an tînta kultain, Cristora kanpaanapa. 13 Cristora kanpaamtuasmin, une wat aizpa kirain. Cristora we nîjturuza wat kurunnarawa, kailsa miwara chaamanpa. Suasne uspane Cristo mi kaamanazi. Sun akwa Diosne uspa kwail kiarît aizpa kaninnanazi. 14 Aune Diosta piantuzkasa kalpain uzshiarawamakpas. Wan kwail kiashit aizpa chîhkarain. Diosne uspa kwail chîhkamturuza sînam saninanaat kit Taitta Dioskasa uzninnanazi. 15 Uruzpain iztain, wan awa Dios kiwainshimtu aizpa sappanapa, Diosta chîhkamanpa. Diosta kwayamturuzne, Cristora an kanpashimtuchiruzne, Dios kaizta aizpa mîshimturuza kwail kininnashina. Une mamaztuza kwail kiman, Dios mi kwaimanpa. 16 Esaúne kwail awakana uzta. Mamazpa ashampakasakas mamazpa ampukasakas uskana pitman. Uskanain Dios aumîza kurunamtu aizpa kwaiman. Esaú Dios kuruntît aizpa mîshitchi akwa, usne paiña papihsh ussa mîlan namtît aizpa karît. Esaúne Isaacpa an ñancha painkul ara. Maza payura kwisha yak kirît akwa, Esaúne aimpihshta wan sukas, wan ussa mîlan namtît aizpakas paininta. 17 Une Esaú kwizta kirît aizpa pianmai. Papihsh ussa wan mîlan namtît aizpa saptachikas, usne papihshta paikwat kit tînta azta, us painintît aizpa mamasa sapnapa. Esaú Diosta mîashitchi akwa, Diosne ussa kwairît. Esaú us kit aizpa maizsachi akwa, usne ussa mîlan namtît aizpa mizurainkas saptachi. 18 Ap izmuruz, na kaiztu aizpa mîzhain. Diosne aukasa masas contrato chîhkanara, awa Dios tukin piannanapa. An ñancha contrato sunkana chi azi. Ñamin Judío awaruzne Sinaí muntît înkalta îat kit an ñancha contrato sappara. Uspane sun înkalta saarachi, ïn puztît akwa. Înkalpara tîl wanish sîp kit tîlkwil parît. Tînta inkwa parît. 19 Mazantuz iru kwil tînta usamtuasmin, Diosne usparuza, Judío awaruza, tînta paranara. Ishkuarît akwa, uspane Diosta tînta aakwara, usparuza mamaz pit kaiznamanpa. 20 Uspane Dios îninnarît aizpa sappashitchi. Sunkana usparuza ka îninnara: “Chiwazha awakas chiwazha kalpakas an înkalta mittî kultane, une ukkasa kiarawa, inapa. Tiznamkasakas piantarawa,” ka kiznara. 21 Moisés sun kirît aizpa iztawane, usne ka kaizta: “Nakas ishkwat kit ultus,” ka kizta. 22 Judío awa an ñancha contrato sapparakas, Diosne masas contrato ma payu uruza chîhkanamtu, Diosta piantuz Sión înkalta, Dios uzmura, chiyura Jerusalén pîpulura, piannanapa. Suane mînminkas yawa mil ángel chiyura uzamtu wiansachi. Uspane Dios iztukin kwisha wat pura. 23 Diosne usparuza, Cristora an ñancha piantuza, wianta. Iarawane, Diosne uruza chiyura wanmakninnanazi. Suane Diosne, au katsa mikwa Juezne, uz. Suane usne wat namtîttuza wanmakninnamtu. Diosne uspa kwail kiarît aizpa sînam saninnamtu, chiyura mîlnana. 24 Jesúsne masas contrato ukasa saninta, uruza chiyura nuninnanapa. Us au akwa irît akwa, usne au kwail kiarît aizpa paiña aimpikasa sînam saninnara. Sunkana Jesúsne ukasa sun masas contrato sarît. Caín paiña aimpihshta, Abelta, piantarawane, Diosne Caínta ilta. Awa Jesústa piantarakas, Diosne, Jesúspa aimpikasa, awaruza sînam sanashit kit uspa kwail wat kulnashina. 25 Katmizna Dios aumîza kurunnamtuasmin, aune us kainammtu aizpa mîrawamakpas, kwairachin. Ñamin au sukin Dios sun Judío awaruza paranamtuasmin, uspane Dios îninnarît aizpa mîashitchi. Dios usparuza kurunarît aizpa mîarachi akwa, Diosne usparuza ilnara. Mane Diosne chiyuras aumîza akwanamtu, us kurunamtu aizpa mîanapa. Usne us kuruntu aizpa kwaimturuza watcha ilnanazi. 26 Ñamin Dios usparuza tînta paranamtuasmin, usne wan sura ulninta. Makas usne kin nam kit ka kaizta: “Nane mamasa kwinta kinash. An surakas chiyurakas ulninnash,” ka kizta. 27 Dios mamasa wan sarît aizpa ulninnanash kiztane, Diosne aumîza wan sarît aizpa pailnapain kamtananamtu. Dios chiyura mîj aizpa ulmanazi, pailta payukima mamtu akwa. 28 Dios înintukin ultuchi, mizurainkas maiztuchi akwa. Suane Diosne aumîza kin namtît aizpa mîlananazi, uskasa uzanapa. Dios au akwa wat kimtu akwa, Diosta aishtaish kaizchain. Dios iztakin piannakane, Diosta wakpuj waintuasmin, aune Diosta ishkuatpamakpas. Us kuruntu aizpa mîzhain. 29 Dios ussa mîmturuza kiwainashimtukas, Diosne katsa ïnkanain nam kit kwail kimtuza ishkwaninnanazi. Ðn wan impakkamtukanain, Diosne kwailtuza pailninnanazi.
Pînkîh pammikane ka parît: Dios pashit aizpa kitpamakpas
1 Cristora piantuza pashinarain, aimpihshtuzkanain kwampihshtuzkanain. 2 Attishtas Diosta piantuz up yalta aakane, yal nammîlatpa. Mazantuz mazantuza yal nammîlanakane, uspane ángeltuza yal nammîlanara pianchin. 3 Kajchira sîptîttuza minñat kit kiwaintain. Une aim kirîttuza kiwainnarain, u uspakanain an sukin naizashimtu akwa. 4 Kasara kirîttuzne nil uzarawa. Mamazpakasa chakain. Sînam awaruzkana uztain. Kasara kitchasmin, mamazkasa pitkain. Kasara kitpane, mamazpakasa pitkain. Diosne sunkana kimturuza ilnanazi. 5 An sukin uzamtuasmin, pialmin pashiman. U mîj aizpakasa wat uztain. Diosne ka kaizta: “Nane uruza mizurainkas kwainamtuchish. Nane u we mîj aizpa mîlanazi.” 6 Katmizna aune wan awaruza ka kizshinamakpas: “Ap Anpatne ap kiwainmumika i. Nane awa nawa kishimtu aizpa ishkumanash.” 7 Dios pit uruza ñamin kamtamturuza mintain. Iarachasmin, an sukin uzamtuasmin, uspane Dios kaizta aizpa watcha i nîjkulara, wenamtachin. Katmizna uspa uzarakanain uzat kit Diosta nîjkultain. 8 Jesucristo mizurainkas maiztuchi akwa, aune us kaiztu aizpa nîjkulshinamakpas. An ñamin awa puraruz uzarasmin, Jesucristone maiztachi. Makas maiztuchi. Mamaz payura maizmanazi. 9 Awa uruza mamaz tuntu kamtam kamtanamtune, na kamtamtîtkana kamtamtukine, usparuza mîman, usparuza kanpaman. Dios aumîza pashinamtu akwa, usne aumîza wat kiwainashimtu, au kaijchu an tînta kulanapa, Diosta an wat mîanapa. Judío awaruzne uspa kuamtu aizpa nanamtu, impa kuamanpa. Uspa impa aizpa kuamtukine, uspane uspa kaijchu an tînta kulanazi minñara. Sunkana chi. Judío awa impa aizpa kuamtuchikas, Diosne uspa kwail kiarît aizpa sînam sanasachi. 10 Jesucristone au akwa irît, au kwail kiarît aizpa sînam sananapa. Judío katsa pariyaruzne wakarara piantat kit Diospa katsa yalta mîlanarakas, uspane aukanain Diosta wanmakkarachi, Diosta wari kizanapa. 11 Katsa pariyane wakarawa aimpira sap kit Diospa yalta nap kit Dios iztakin sun aimpi paranta, Dios awa kwail kiarît aizpa sînam sananapa. Suasne usne wakara ña kalpialmal inak kit pianamal impaktara. 12 Sunkana Jesúsne pîpulu pianamal au akwa naiz kit mîtsal kit kit irît. Paiña aimpi puztît akwa, usne paiña kwal kwail kiarît aizpa sînam sananara. 13 Awa Jesústa kwayarît akwa, Jesúsne pîpulu pianamal irît. Awa Jesús naiztakanain aumîza naizninnamtukas, Jesús kamtarît aizpa kimîrachain. Aune au ñancha mîrît aizpa chîhkatpamakpas, Jesústain kanpanapa. 14 Aune an sukin pailta payukima uzamanapas. Katmizna aune mamaz chiyu uzmura saimtumakpas, mamaz payura sua uzanapa. 15 Aune Diosta “Dios kwisha wari” pailta payukima kizmîrachain, Jesucristo au kwail kiarît aizpa sînam sanarît akwa. Diosta aishtaish kiztuasmin, aune “usne au Anpat i” kiztumakpas. 16 Aune wantuza wat kinarawamakpas. Aune chiwazha mîjchiruza mîlatpamakpas. Mamaztuza kiwainamturuzne Dios pashit aizpa kiamtu. 17 Uruza Dios pit kamtamtuza mîrain, uspa kurunamtu aizpa kianapa. Dios pit kamtamturuzne uruza wat iznamtu. Uspa kal pailtawane, sun Dios pit kamtamtuza uspa kal akwa Diosta kainarawa. Une sun Dios pit kamtamtuza kiwainnarawa, uspa kal watsal kianapa, tayalamanpa. U uspa kuruntu aizpa mîamtukine, uspane uruza kiwainnasachi. 18 Au akwa Diosta paikwarain. Na an sukin uztuasmin, nane u iztukin wat aizpa kirau. Ukasa chamtuasmin, nane wat pura aizpa kirau mintus. 19 Nane uruza akwanamtus, u Diosta paikwanpa, na u uztukin an azain kailnapa.
Pînkîh pamtumika minpa pit pamtu
20 Mane nane Diosta u akwa paikwanash, Dios uruza chiyura watsat mîlninanapa, kalpain uzanapa. Diosne au Anpat Jesucristora, au katsa pîriku izmumikasha, irîttas kakulninta. Jesúsne paiña aimpikasa masas contrato chîhkara, aumîza chiyura napninnanakima. Aune chiyura pailta payukima uskasa uzanapas, Dios aumîza mîlan namtît aizpa kinpa. 21 Nane Diosta paikumtus, us uruza wan kal wat kiwainnapa, us pashit aizpa wan kianpa. Jesucristone uruza tînta kiwainnanazi, Dios pashit aizpa kianpa. Aune pailta payukima “Cristo kwisha wari” kizmîrachain. Ka azi. 22 Ap izmuruz, wat mîzhain. U Diosta piankamarît akwa, nane na kuruntu aizpa mîanapa paikumtus. Nane uruza akkwan pitchin kamtanat kit pînkîhta panarau, wan piankamanapa. 23 An pînkîh uruza îninnamtuasmin, nane au aimpihsh Timoteo kajchiras puzta kainanamtus. Us nakin azain piannakane, nane uskasa uruza iznana îrînash. 24 Wan Dios pit kamtamtuzakas wan Diosta piantuzakas kakishapu kiztain. Italia sura uztuzne uruza kakishapu kaizamtu. 25 Nane Diosta paikumtus, us uruza wat kiwainnanapa. Pailti.
Kakishapu kiztu
1 Nane Santiago mun ish. Nane Diospakas Anpat Jesucristowakas kiwainmika ish. Ap kwaltuza panamtu akwa, nane wan doce Israel kwaltuza, mamaz sura uzturuza, kakishapu kiznamtus.
Diosne awaruza piankamninnamtu
2 Une, Diosta piantuz mai. Mînpazha uruza kwail kishinakane, naiznakane, wat panintawa. 3 Cristora nîjkulamtu akwa, u naizamtukas, une Dios pashimtu aizpa kin piankamarînazi, us iztakin an tînta namanapa. 4 Naizamtukas, une wat kishiamîztawa, chîhkatchin. Suasne une îlaparuzkanain kawianazi, Dios kaizta aizpa chinkas wenammanpa. 5 Mînpazha chiwazha wat pianchine, mînpazha we piankamtane, Diosta paikwarain. Usne au we pian aizpa piankamninshimtu. Aukasa aliz paramtuchi. 6 Diosta paikumtune, ussa nîjkul kit paikwatpa, nu paikumtu aizpa sappanapa. Saptuchish mintumikane, maiztumikakana i, inkwa pira ñanpa nuppaintukanain i. 7 Saptuchish mintumikane Anpat chiwazha mîlashimtu aizpa sapmanazi. 8 An awa paas tuntu mintu akwa, usne chiwazha kishimtu aizpa nasachi. 9 Puiza aimpihshne watsal kularawa, Dios us akwa min kit kiwainshimtu akwa. 10 Kwazpa kultît aimpihsh nîjkultumikane, watsal kularawa, Dios kwazpa kultîttuza wan awaruzkana namnarît akwa. Wan kwazpa kultîtmikane irînazi, wish pulpat kit taiztîmkanain. 11 Pa puzkane, tînta ïn kikane, wish tî pul parîm. Tî pul parîkane, wish taiztîm. Watsal iztîtne, wishne karîm. Kawarain imtu payu taizkane, kwazpa kultîtmikane wish pul parîtkanain karînazi. Paiña kal mîj aizpa karînazi.
Tailchamtu, kwail kimanpa
12 Mamaz nua kwail kinintukas, chiwazha naiznintukas, au Anpatta chîhkamtuchimikane wat kulnazi. Au Anpatta kanpamtumikane, Diosta nîjkulmîztumikane, Dios mîlan namta aizpa sapnazi, uskasa uzana. Usne ussa pashimturuza uskasa uzninna namnarît. 13 Mînpazha kwail kishikane, Diosne nawa kwail kin kinintu kizman. Diosne chinkas kwail kin mintuchi. Kawarain Diosne mamaztuza kwail kininnamtuchi. 14 Us paiña kwail kishimtu aizpa mintawane, usne chiwazha kwail kishimîztu. 15 Suasne kwail min kit kishimtawane, awane kwail kiamîztu. Kwail kit akwa, it kit Dioskasa uzsachi. 16 Na uruza pashinamtu akwa, Diosta piantuz, ñanta kiman. 17 Taitta Diosne chiwazha wat aizpa aumîza îninnamtu. Usne chiyura naztam aizmukas sara. Wan sarît aizpa maizamtukas, Diosne mizurainkas maizsachi. 18 Paiña watcha pit akwa, usne aumîza paiña kwalkanain namninshinara, mamaz tuntu uzanapa. Usne aumîza an ñancha nanarît, paina kwalkanain namanapa. Kwizta mamaztuzne ussa nîjkulanazi.
Wat mît kit kitpa
19 Na uruza pashinamtu akwa, Diosta piantuz na kaizta aizpa piankamtain. Wan uruzne mamaz Dios pit kuruntu aizpa mîna atpa. Impara impara pit paratpa. Dios pit kainammtuza pilchapuzanachi. 20 Azain pilchapuztumikane Dios pashimtu aizpa nil kisachi. 21 Sunkana manaz, u sînamchi mintu aizpa chîhkarain. Wan awa akkwan kwail kiashimtu aizpa kiman. Sunkana Dios paiña pitta kuruntu aizpa mîat kit kirain. Paiña pit akwa Diosne uruza watsat mîlnashina. 22 Dios kaizta aizpa mîmturuzne paiña pit parît aizpa kiarawa. Us kaizta aizpa kimtuchiruzne, uspain ñanta kiamtu, Dios kaizta aizpa mîamtuchi akwa. 23 Mînpazha kainmin mîat kit an pit parît aizpa kiarachine, usne us mîrît aizpa maintu. Sun awane maizakasa matsîhta iztumikakanain i. 24 Ussain iztawane, usne puijchat kit uskanain iztît aizpa sun urain maintîm. 25 Diosne paiña nil pit îninta, awaruza kiwainana, kwail kiamanpa. Dios kaizta aizpa wat mîarawane, us mîarît aizpa mainñarakine, Dios înintît aizpa kiamîztune, sun ampuruzne wat kulanazi, sun kal kiamtu akwa. 26 Mînpazha Cristora nîjkultus kiztane, paiña pit paran sampiztakine, usne usmin ñanta kimtu. Us nîjkultu aizpa kain i. 27 Taitta Dios iztakin chaamtuasmin, Cristora nîjkulturuzne chinkas kwail kiamîznachi. Usne kwairîttuzakas ampu irît ashampa naizturuzakas iznat kit kiwainnarawa. An sukin uzasmin, nîjkultuchiruzkasa uzasmin, uskas usmin iztawa, kwail kimanpa.
Awaruzpain mamaz tuntu kianachi
1 Uruzne Diosta piantuzne, au chiyuras watsal Anpat Jesucristora nîjkulamturuzne, wan awaruzpain kawarain kiarawa. 2 Dios wanmakmukin nappakane, ¿Une mînta usparuza uzninnamtu? Mazane, kwazpa kultîtmikane, naptu. Usne watsal pïn kwa. Uru chihtî nukmu nuktît. Mazane, puizamikane, naptu. Usne pîtta pïn kwa. 3 U kwazpa kultîtmikasha wat “uzmukin uzti” kiztane, une ussa mamaz tuntu kiamtu, kwazpa akwa. Puizara “an antain kun kit uzti” kiztane, une ussa mamaz tuntu kiamtu, puiza akwa. 4 Sunkana kitne, une uruzpain mamaz tuntu kiat kit mamazpa wat minñamtuchi. 5 Na uruza pashinamtu akwa, Diosta piantuzne na kaiztu aizpa ka mîrain: Diosne au sukin puizaruza nanara, Cristora nîjkulanapa. Puizaruza kwazpa kultîtmikakanain namninnanazi, us înintukin uzanapa. Usne sun ussa pashimturuza kin namta. 6 Sunkana awaruzne puizaruza watchi minñat kit mîtsal kininnamtu. Kwazpa kultîttuzne u puizaruza piznat kit naiznat kit îninmikasha chîhkaamtu, u pui aizpa taanapa. 7 Kwazpa awaruz au wat Cristowa kwail paraamtukas, une Cristora nîjkulat kit Cristora kanpamtuz munarît. 8 U mamaztuza wat kin we pian akwa, Diosne paiña pit înin kit ka parît: “Uruzpain pashimtukanain mamaztuza pashinarawa.” Sun wan kiamîztane, wat kulanazi. 9 Sunkana awaruza mamaz tuntu kiarane, une kwail kiat kit Dios îninta aizpa mîshiamtuchi. 10 U wan Dios îninta aizpa mît kit kiarakas, u maza îninta aizpa we kitne, une wan Dios îninta aizpa we kiamtu. 11 Diosmin ka kizta: “Mamazpa ashampakasa pitmun.” Uskas ka kizta: “Awara piantamun,” kizta. Mamazpa ashampakasa pittachikas, ampura piantarane, sun awane wan Dios îninta aizpa mît kit kimtuchi. 12 Une wan Dios pit kaizarawa. Wan wat kal Dios pashit aizpa kitpa. Diosne paiña înintît pit akwa aumîza mîmananazi. Sun pit akwa usne aumîza chîhtît awakanain uzninashina. Katmizna wantuza nil parat kit wanta kawarain wat kirain. 13 Dios mîmamtu payura taizkane, Diosne mamaztuza kiwainna mintachiruza kiwainmanazi. Mamaztuza wat kiwainturuzne Dios mîmamtu payura watsal kulanazi, Dios usparuza wat kiwainamtu akwa.
Nîjkultukas kal kimtukas
14 Diosta piantuz mîrain. Cristora nîjkulamtu kizmuruzne wat kalkas kishiarawa. Mînpazha Cristora nîjkulamtu kiztane, sunkana wat kal kimtuchine, ¿Watsat mîlnashinasa? 15 Sunkana Cristora pianmikane izmumikasha mintawa. Pïn we kwamikashakas payu aizpa kwan pala we mîjmikashakas iznarawane, 16 une usparuza ¿Chima kizanapas? “Watmin ît kit ikulnaka. Kwashit aizpa kwanka,” kizsachi. Sunkana kiznarakas, usparuza pïn mîlamtukine, pala kwinamtukine, u kaizamtu aizpa usparuza kiwainnamtuchi. 17 Sunkana Cristora nîjkultu kizmumikane wat kalkas kitpa. Wat kal kimtukine, nu nîjkultu aizpa annamtuchi. Us kaiztu aizpa kain pit i. 18 Mînpazha min kit “nu nîjkultu” kizshina. “Nane mamaztuza kiwainnamtus,” kiztus. Na mamaztuza kiwainamtukine, nane nu nîjkultu aizpa pianchish. Na mamaztuza kiwainnamtu akwa, nune na nîjkultu aizpa pian. 19 Nu maza Diosta nîjkultane, nune wat kinazi. Diabloruzkas Diosta piankas, uspane ishkuaat kit ulaamtu. 20 Katmizna une an nîjkultukin kiarawa. Nune wat mintawa. Nîjkultus kizmumikane mamaztuza kiwaintukine, us nîjkultu aizpa kain i. 21 Diosne Abrahamta, au an ña pampamikasha, ka kizta: “Nune wat awa i.” ¿Chikishma sun Abrahamta kizta? Nîjkultuasmin, Abrahamne Dios îninta aizpa mît kit paiña painkulta, Isaacta, Diosta chîhkara, inapa. 22 Une Abraham kit aizpa izashinai. Us nîjkulta akwa, Abrahamne Dios înintît aizpa kirît. Us înintît aizpa kirît akwa, Abrahamne an akkwan nîjkulshina. 23 Sunkana Dios pitta ka parît: “Abraham Diosta nîjkulta akwa, Diosne ‘nune wat awa i.’ ” kizta. “Nune ap izmumika i” kizta. 24 Sunkana manaz iztain. Awane mamaztuza kiwainnarawa. Awakas Diosta nîjkultawa. Suasne Diosne ussa wat namninnazi. 25 Sunkanain Rahabne uzta. Us kwail cham ashampa arakas, usne Diospa kainammtuza paiña yal nammîlanat kit mamaz payura mamaz miwara îninnara. Us kirît aizpa akwa, Diosne ussa wat namninta. 26 Awa izpul îrîkane, awa irîkane, awane mamaztuza kiwainasachi. Sunkanain Cristora nîjkultu kizmumikane, mamaztuza kiwainnamtukine, kain kaiztu, nil chi.
Pitkasa kwail paraman
1 Diosta piantuz, mîrain. Uruzpain kwisha akkwan Dios pit kamtamtuz naman. Diosne nawakas mamaz Dios pit kamtararuzakas an tînta ilnanazi. Diosne Dios pit kamtamtuchiruza an wemin ilnanazi. 2 Aune wan kwail ñanta kipuspas. Kwail pit paramtuchimikane wat awa i. Usne usmin îninshina. 3 Caballo pitkin kuhmumakpas, au înintu aizpa kinpa. Sunkana caballora izpujianin kit îninmakpas. 4 Katsa kanuarakas iztain. Inkwane tînta parane, kanuara nuppaintu. Puijmumikane ainki puijmukasa us îshimtumal înintu. 5 Pitkasakas sunkanain kirîm. Au pitne ainkin i. Awane paiña pitkasa akkwan kwail kwinta kishiamtu. Sunkana ainki ïnne katsa înkal sîn kit tî paktîshina. 6 Pitne ïnkanain i. Aune akkwan kwail pitpara paramtumakpas. Kwail pit parashimtu akwa, aune akkwan tuntu kwail kishimtumakpas. Sun kwail pitne, Diablo ïntas, paiña uzmukis puztu. Diablone au kwail paramtu aizpa paranintu. 7 Awain wan kalparakas, katsa chitchurakas, kamtarakas, katsa pi pîntas kalparakas, pishkarurakas tak kamtaninnara. 8 Wan kalpa tak kamtaninnarakas, mînminkas us kaizta aizpa îninsachi, kwail kizmanpa. Mînminkas pitta tak kamtasachi. Kamta sula kwatpane, awane irîm. Kawarain kwail pit kizkane, awane mamazta kwail kirîm. 9 Aune sun pitkasain au Anpat Diosta “kwisha wari” kizpuspas. Diosta “kwisha wari” kiztuasmin, aune awaruzakas kwail kizpuspas. Dios pailta awaruza uskana uzanapa kawiranara akwa, aune awaruza kwail paratkiwamakpas. 10 Sun pitkismin mamaztuza wat kizpuspas. Mamaztuza kwail kizpuspas. Diosta piantuz, sunkana wat chi. Sunkana kiman. 11 Kwazine pi kasukis puztu. Sînam kwazikas tain kwazikas mazain pi kasukis puzsachi. 12 Diosta piantuz, iztain. Higuera tîne olivos pippa wamtuchi. Wankail tîtkas higo pippa wamtuchi. Kawarain ñam kwazikas sînam kwazikas maza pi kasukis puzsachi. Katmizna u kaiztu aizpa kwiraruin.
Watcha piankammukas
13 Pianmikane, nil mîmtumikane, nil uz kit wat wa aizpa kitpa. Paiñawa mintuchiasmin, pianmikane mamaztuza wat iznarawa. 14 Maza kwazpa kultîmtukas, us mîj aizpa pashiman. Mamaztuza kwail kizman, umin an katsa namna. “Nane mamazkin an wat ish,” kizman. Nil chi mintumikane watcha kaiztuchi. 15 Sunkana kimturuzne au sukis awakanain minñamtu. Diablo kaiztu aizpa minñamtu. Diosne aumîza kiwainnamtu, mamaz mîj aizpa pashimanpa, mamaztuza kwail pit kizamanpa. 16 Mînpazha mamaz mîj aizpa pashimtune, mînpazha mamazpa an tînta namshimtune, mamaztuza kwail pit kizashimtune, usne wan nakat kit waya kishit kit akkwan tuntu kwail kinazi. 17 Dios awaruza us pian aizpa piankamninnakane, awane wat uzanazi, kwail kiamanpa. Mamazkasa waya kiamanazi. Mamaztuza tînta paraamanazi. Mamaz kuruntu aizpa mîanazi. Mamaztuza kiwainnanazi. Wan awaruza kawarain kianazi. Wat kal kianazi. 18 Mamaztuza wat kishimturuzne kalpain uzat kit akkwan wat aizpa sappanazi.
Kwail kiarakiwa
1 ¿Chikishma uruzpain puya tut kit waya kiamtu? Uruzpain pailta payu kwail ayukta minñamtu akwa, kwail kiashimîztu. 2 Chiwazha pashimtu aizpa mîjchi akwa, uruzne mamaztuza piantaamtu. Patnawans pashiamtu. Patnawans saptuchi akwa, puya tut kit waya kiamtu. U pashimtu aizpa saimanamamtu, Diosta paikumtuchi akwa. 3 Diosta chiwazha we aizpa paikwatkas, sappamtuchi, ñanta paikumtu akwa. U paikumtu aizpa sapparane, u akwa pial kwainazi, chiwazha kwail kianapa. 4 Une kwail awa mai. Au sukin kwail kishimturuzne Diospa izmuruz chi. Diosne kwail kishimturuza aliz kulnamîztu. 5 Dios paiña pînkîhta ka parît: “Aumîza pashinamtu akwa, Diosne paiña Izpulta îninta, aukasa uznapa. Aumîza kurunnamtu, ñanta kiamanpa.” 6 Diosne aumîza an akkwan wat kiwainshinamtu, kwail minñamtu aizpa kiamanpa. Paiña pînkîhta ka panintît: “Diosne uspain minturuza aliz kulnamtu. Uspain mintuchiruza wat kiwainamtu.” 7 Manaz Diosta mîat kit us kaizta aizpa kirain. Diablo uruza kaizta aizpa mîman, us ukis îrînpa, an kwail uruza kininnamanpa. 8 Diosta an wat piankamîztain. Uskas uruza kamtananazi. Kwail kimtuzne u kwail kiarît aizpa chîhkarain, Dios uruza wat kulninnanapa. Mînminkas Diostakas Diablorakas sun urain mîsachi. Diosta pashimtumikane kwail kin minman. 9 Uruzpain u kwail akwa naizarînazi. U kwail akwa tayaltain. U kwail akwa aztain. Ishantakas, mane tayaltain. Watsal mintakas, mane tayaltain. 10 Anpat uruza kurunakane, us kaizta aizpa mîarawa, uskasa uzanapa.
Diosta piantuza kwail kirît kizman
11 Diosta piantuz, mîzha. Mamaztuza kwail kaizman. Diosta pianmikara kwail kaiztumikane, ussa pîrail kaiztumikane, Dios îninta aizpa kwail i kiztui. Dios îninta aizpa kwail kiztumikane îninmikakana namtu, Dios îninta aizpa mîmtuchi akwa. 12 Diosne awaruza îninnamtu, us îninta aizpa kinpa. Uskas katsa mikwa i. Usmin mamaztuza kwail kiarît aizpa sînam sanashina. Uskas mamaztuza kawal ïnta îninshina. Une “Dioskanain” namman, mamaztuza kwail kiarît kizna.
Painintuzkas kwazpa kultîttuzkas
13 Mane sun mîrain. Mînpazha ka kizanazi: “Makas tîlawakas aune mamaz pîpulura maza añokima îanapas, paininna, pial kana kin.” Ka minñamtu. 14 Une tîlawa chiwazha kimtu aizpa piankamamanazi. U imtu payu pianchi. An sukin uzamtuasmin, uruzne wanishkanain iztît. Tînta inkwa pakane, wanishne karîm. Ukas kawarain iarînazi. 15 Suas manaz wat minñat kit ka kaizarawa: “Anpat auruza chiwazha kin îninnamtune, aune uzanapas, us îninshimtu aizpa kin.” 16 Umin kiashimtu aizpa minñamtu. “Au wat awa makpas” kizamtu. Sunkana kiztane, kwail i. 17 Wat aizpa kiarawa. Wat kitchine, kwail kimtu.
Kwazpa kultîttuza kurunnamtu
1 Mane kwazpa kultîttuz mîrain. Uruza naiztu payu taiznapain akwa, azat kit kwiantain. 2 Uruzpa pakultît mîj aizpa pîttîtkanain mai. Pusumkas imkas uruzpa watsarît pïn tîtmu. 3 U urukas pialkas îpi kwarît. Pailtîmtu, muinchi akwa. U pialkasa mamaztuza kiwainnarachi akwa, une naizarînazi. U makima akkwan pial watsarîtkas, wanne ïnta kaarînazi. 4 Kal kimtuz u yalmakim kal kirîtkas, une uspa pial watsarît. U pippa pakmuruza wan tanarachi. Katmizna sun pippa pakmuruzne au wat tînta Anpatmikasha paikuara, uspa minñamtu aizpa mîanapa. 5 An sukinne uruzne kwazpa kultîttuzkanain uzat kit chiwazha pashiat aizpa kiashira. Uruzne pîntît wakarakana pîna pînamtu. Diosne anpain, uruza mîmana, uruza ilnana. U imtu payu taiznapain i. 6 Uruzne wattuza kiwainnarachi, ianapa. Uspane u iztakin usparuzain pakpanasachi.
Kalpain uzat kit Diosta paikwarain
7 Katmizna, uruzne Diosta piantuzne kalpain uzat kit tîrizarawa, Anpat Jesucristo amtu payukima. Kal kinmumikawa piankamtain. Pippa wammikane impara impara tîriztawa, an ñancha alu kinkima. An kwizta alu kikane, ma pitchin tîriztu, paktu payukima. 8 Uruzkas kawarain impara impara tîrizat kit tînta kularawa, au Anpat kailtu payu taiznapain akwa. 9 Diosta piantuzne mamaztuza tînta kaizman, mamaz uruza kwail kiarît kizamanpa. Diosne, au katsa mikwane anpain, awa kwail kiarît aizpa kiznana. 10 Diosta piantuz, ñamin Dios pit kainammmikawa mintain. Uspane au Anpatpa paranara. Naizarakas, uspane impara impara tîrizara. Kawarain watsal uzarawa. 11 Iztain. Aune naizturuzpa wat minpuspas, uspa wat kiamîzta akwa. Uruzne Job naizta aizpa mîara. Watsal uzta. Uruzkas Dios Jobta kwizta wat kirît aizpa mîara. Au Anpatne au naizamtu aizpa piankam kit aumîza kwisha wat kiwainashimtui. 12 Sunkana, Diosta piantuz ma pitchin kurunamtus. Paramtuasmin, chiyurakas piltakas mamaz chiwazharakas kin namman. Sun kimtumikane Dios iztakin us kaiztu aizpa kin namtu. “Watcha” kizakane, watchain kizarawa. “Chi” kizakane, chi kizarawa. Maza pitmin kaizarawa, Dios uruza kwail kirît kizmanpa. 13 Mînpazha uruztas naiztukane, Diosta paikwarain. Mînpazha wat kultune, Diosta watsal kanta kaiztawa. 14 Mînpazha uruztas ishtune, us akwa îlaparuza iglesiaras akwarain, Diosta paikuanapa. Au Anpat Jesucristora paikuamtuasmin, uspane ishtumikara watsal piam pihshpikasa nîrawa, Dios ussa kakulninnapa. 15 Jesucristora watcha nîjkul kit Diosta paikukane, ishtumikane kakultînazi. Kwail kirîtne, Anpatne ussa kuhspanin kit us kwail kirît aizpa wat kulnazi. 16 Katmizna, ishtumikane paiña kwail kirît aizpa mamaztuza kainarawa. Uruzpain Diosta paikwarain. Uruzpa Diosta paikukane, suasne Diosne an ishtumikasha kakulninnazi. Wat awa Diosta paikukane, Diosne us akumtu aizpa mît kit kinazi, Dios pashimtu aizpa kimtu akwa. 17 Sunkanane Elíasne, Dios pit kainammmikane, aukanain azi. Aukanainkas, usne alu kimanpa Diosta paikwara. Suasne kutña año kakwakasa pilkin alu kitchi. 18 Mamasa an kwizta Diosta paikwatpane, mamasa alu kimîzta, awa chiwazha pippa pakkanapa. 19 Diosta piantuz mîrain. Mînpazha uruztas watcha pit mainñarane, mamazne ussa mamasa kiwaintawa, Dios watsal pit mamasa mînapa. 20 Sunkana piankamtain. Kwail kirîtmikasha kiwaintawa, kwail kimanpa. Mamasa Dios kaizta aizpa kitne, Diosne wan us kwail kirît aizpa wat kul kit watsat mîlnazi, ïnta îmanpa, naizmanpa. Pailti.
Kakishapu kiztu
1 Nane Pedro mun ish. Jesucristowa înintamika ish, Dios pit kainanapa. Nane u sukis îarîttuza, Dios nanarîttuza, pînkîh panamtus. Mane mînpazha Ponto surakas, mînpazha Galacia surakas, mînpazha Capadocia surakas, mînpazha Asia surakas, mînpazha Bitinia surakas uzamtu. 2 Au Taitta Diosne an ñamin uruza nanara, us pashit aizpa kinanapa. Paiña Sînam Izpulne uruza paiña kwal namninnarît, Jesucristo kaizta aizpa mîanapa. U kwail kiarît akwa, Jesucristone irît, uruza Jesucristowa aimpikasa sînam kihanapa. Diosta paikumtus, uruza an akkwan tînta kiwainnanapa, watsal uzanapa.
Pailta payukima uzna
3 Aune au Diostakas, au Anpat Jesucristowa Taittarakas “aishtaish” kiztawamakpas. Aumîza panashimtu akwa, Diosne aumîza maiznat kit pailta payukima uzninnara. Dios Jesucristora irîttas kakulnintît akwa, aune us aumîza irîttas kakulnintînazi piankamanapas. 4 Diosne us watsarît mîj aizpa uruza chîhkananazi, chiyura pailta payukima uzanapa. Ta chinkas pailsachi. Ta sînammin purai. Ta chinkas maizsachi. 5 Us tînta akwa, Diosne Cristora nîjkulturuza minpa payukima watsarît mîlnanazi. Uruza pakpananazi. Sun payu akane, une Dios uruza wat kishimtu aizpa piankamanazi, us uruza kwail miras watsanarît akwa. 6 Dios uruza wat kininnashimtu akwa, watsal kultain. Akkwan payu chikimain tayalanazi. Naizamtukas, watsal kulamîztain. 7 Cristora nîjkulturuzne naizarînazi, an watsal nîjkulanapa. Sunkanain urune ïn kwaktarawa, sînam naztam panapa. Naizmu tailchamtumikane an tînta parînazi. Uru sunkana chi. Ðn kwaktarakas, kashinai. Jesucristo wan awaruza izpankane, Diosne tailchamturuza “u watsal kiari”, kiznanazi. U akwa wat minñanazi. An “katsa namari” kiznanazi. 8 Jesucristora izarachikas, une ussa pashiamtu. Ussa izarachikas, une ussa nîjkulamtu. Mane ussa nîjkulturuzne kwisha watsal kulamtu. Kwisha watsal kulamtukas, une mamaztuza u pitparain “nane wat kultît ish” kainanamtu. 9 U Cristora nîjkularît akwa, Diosne uruza paimpa watsat mîlnarît. 10 An ñamin Dios pit kainammtuzne Dios pit kwisha izara, miza Dios Cristora nîjkulturuza paimpa watsat mîlnarît piankamanapa. Uspane ñamin ka kaizara: “Diosne uruza kiwainashimtu, uskasa uzana,” kizara. 11 Uspane Dios pit izshiara, wan Dios pînkîhta parît aizpa piankamanapa. Cristowa Izpulne Dios pit kainammtuza kamtanara, Cristo naiztu piankamninnanapa. Usne uruza sun pitkas Dios kwizta kirîmtu aizpakas wat piankamninnara. 12 Diosne paiña kainammtuza us kamtamtu aizpa piankamninnarachi. Usne uruza us kamtamtu aizpa piankamaninnara. Mane Dios watsal pit kainammturuzne, an ñancha Dios pit kainammtuzkana, kawarain kainanara. Diosne paiña Sînam Izpulta chiyuras îninta, Dios watsal pit kainammturuza kiwainanapa, Dios awaruza paimpa watsat mîlanamtu piankamanapa. Ángeltuzkas Dios awara wat kinamtu aizpa piankamashimti. Diosne aumîza akwanamtui, uskanain sînammin uzanapa 13 Suasne Dios au akwa wat kirît akwa, watmin nîjkularawa, uspa kal kianapa. Apain uzamtuasmin, wat izkul kit uzarawa. Jesucristo amtu payu akane, Diosne uruza wat kishinanazi. Uruza kwailtas watsanarît akwa, sun payura iz kit tîriztain. 14 Wat pashpakanain Dios kaizta aizpa kimîraiztain. Cristowa watsal pit pianchasmin, u kwail kiashit aizpa kiara. Sunkana uzman. 15 An sukin uzamtuasmin, mamaz tuntu, sînam awakanain uztain. Diosne aumîza akwanara, us uztakanain sînam uzanapa. 16 Dios pînkîhta ka kiz parît: “Na sînam akwa, sînam awakanain uztain.” 17 Diosta paikukane, une “Diosta ap Taitta i,” kizamtui. Diosne wan kwail kimturuza iznat kit wantuza kawain mîmananazi, ilnana. Ka akwaizna an sukin uzamtuasmin, une Dios iztakin wat uzat kit ussa wakpuj wainñarawa. 18 An ñancha u papihshmin an sukin uzara. Une kwiztain u papihsh uzakwatkanain kamarît. Kainsîh Wat chi. Mane Diosne uruza kwailtas tainak kit paimpa watsat mîlnara, arakan awa uztakanain uzamanpa. Diosne urukas pialkas tarachi, uruza watsat mîlnanapa. Pialkas urukas tailchasachi. 19 Cristo masain irît akwa, aumîza paimpa watsat mîlnara. Cristone sînam pîrikukanain azi. Au kwalne an ñancha wat pîriku piantarît, uspa kwail akwa. Cristo kwail kirîtchi akwa, usne au kwail akwa irît. 20 An su sarachasmin, Diosne Cristora nara, an minpa payura, au sura înin kit uruza kiwainanapa. 21 Une Cristo u akwa kirît aizpa pianmai. Katmizna une Diosta nîjkulamtu. Diosne ussa irîttas kakul kit an katsamikakanain namta. Mane Diosta nîjkulamtuasmin, une Dios uruza chîhkamtu aizpa tîrizamtu. 22 Jesucristo kaizta aizpa mîarawane, watcha mîarawane, une sînam awakanain namarît. Mane une Cristora nîjkulturuza wat pashinamtu. Katmizna wan nîjkulturuza u nîjkulamtukanain sînam kaijchukasa pashinarawa. 23 Dios watsal pit pailmanazi. Dios pitne pippa pîttuchikanain i. Awa sun pit nîjkulara akwa, Diosne awaruza maiznat kit masas awakanain namninnamtu. Diosne Cristora nîjkulamturuza pailta payukima uzninnanazi. 24 Dios pit pînkîhta sunkana parît: “Wan awane pîtkanain mai, pulparîmtu akwa. Wish watsal kwiztawane, kiltawane, wishkas kîhkas taizarîm. Sunkanain awa tînta namtîttuzne paiyarînazi. 25 Wan paiyarîmtukas, au Anpat Dios pitne pailta payukima pailmanazi.” Dios watsal pit kainammtuzne sun pit uruza kainanara.
1 Ka akwaizna wan tuntu kwail kiman. Mamaztuza pîrail kaiznachi. U kwail kiarît aizpa puinkain. Mamaz mîj aizpa pashikain. Mamaztuza kwail pit parakain. 2 Pashpa kuna mîltane, chichu leche kwintawa, tînta kawinapa. Kwail lechekasa narane, kwinsachi. Sunkanane Dios pit iz kit mîrawa, an tînta kawinapa, Diosta an wat piankamanapa. 3 Dios pit pînkîhta ka parît: “Une au Anpat uruza wat kirît aizpa nîjkulamtu.”
Cristone uzmika i
4 Cristora kasha at kit an wat piankamtain. Yal kwinta kinash. Yal samtumikane uk saira, yal sana. “An uk kwail i” min kit kiakpînta. Sunkanane Diosne mazara, Cristora, nara, awaruza paimpa watsat mîlnanapa. 5 Apas awane ussa kwayarît. Diosne awaruza akwanamti. Diospa Izpulne chiyura ukasa paiña kwal namninnashimtu, Dioskasa uzanapa. Uruza, paiña kiwainmuruza namninnashimti, Dios pashit aizpa kianapa, Dios kwisha wari kizanapa. Jesucristone Diospa kiwaintuza kiwainnanazi, Diosta aishtaish kizanapa, mamaztuza wat kinanapa. 6 Ka akwaizna Dios pit pînkîhta ka parît: “An uk yalta tarît iztain. Nane an muin ukkasa ap yal Jerusalén pîpulura sammîztus. Ussa mîramikane ‘mîtsalchin ussa nîjkultus’ kiznazi.” 7 Cristora nîjkulamturuzne us aumîza kiwainamtu piankamarînazi. Dios pit kainammtuzne paiña pînkîhkin nîjkulamtuchiruza ka parît: “An uk pashitchi akwa, yal sammuruzne kiakpîntît. An kwiztane an kiakpîntît ukne an watsal namtît.” 8 Ma pitchin Dios pit kainammtuzne Cristo akwa pînkîhta para: “Awane an ukta patkul kit nainñarît.” Dios pit mîashimtuchiruzne patkul kit nainñarît. Sun pitne sunkana kiztu: Dios usparuza ilnarane, wan kaarînazi. Diosne us mintu aizpa kira. 9 Une sun awakana chi. Une Diosta arîttuz mai. Une kiwainturuz mai, paiña kal kianapa. Au Diostakas au katsa îninmikarakas wakpuj wainñamtu. Une Diosta kanpamtuz mai. Une Diospa kwal mai. Dios uruza akwanarît akwa, une Dios kwisha wat kirît aizpa wanta kainnanarawa. Usne Cristora pianchiruza akwanara, uskasa kai chiyura uzanapa. 10 An ñamin une paiña kwal chi mazi. Mane une Diospa kwal mai. An ñamin Diosne uruza wat kiwainarachi. Diosne uruza pashinat kit kiwainnara. Mane sun pianmai.
Diospa kal kimîztain.
11 Ap izmuruz, mîrain. U chiyura îamtu akwa, nane uruza akwanamtu, na kuruntu aizpa mîanapa. Wan kwail mintu aizpa kiman. Kwail mintumikane usmin kwail parînazi. 12 Diosta pianchiruz iztakin watsal uztain. U kwail kiamtu kizamtukas, mamaz payura uspane u wat kiarît aizpa nîjkulanazi. Mamaz payura Diosne wan awaruza mîmanashina, uspa kwail minñamtu aizpa piankamanapa. Sun payu taizka, u wat kiarît akwa, uspane Diosta “kwisha wari” kizanazi. 13-14 Au Anpat Diosne uruza kurunamtu, au sukin katsa mikwa kaiztu aizpa mîanapa. Diosne katsa mikwarakas ainki mikwarakas ananat kit îninnara, kwail kimtuza ilnanapa, wat kimtuza “wat kirît” kizanapa. 15 Diosne u wantuza wat kianapa pashinamtu, wat pianchiruzkas tîmpa awakas puñain uzanapa, uruza kwail paramanpa. 16 Une kwail kitchin uztain. U kwail kiashimtu aizpa puinsachi akwa, une kwail kin chîhkatpa. Dios uruza watsat mîlnarakas, une Diospa kiwainmuruz namarît, us kaizta aizpa kianapa. 17 Wantuza wat mintain. Cristora nîjkulturuza pashirain. Diosta wat mintawa. Katsa mikwara wat mintain.
Cristone naizta
18 Kiwainmuruz, mîrain. Une u apas anpatta us kaiznamtu aizpa wat mît kit kirain. Wat anpat uruza paranakane, us kaizta aizpa mîrain. Sunkanain aliz anpat uruza tînta paranakane, us kaizta aizpa mîrain. 19 Kwail kiamtuchikas, Dios kiwainmuruzne naizashina. Awa nua kwail paramtukas, Diosne wat tailchamtumikasha kiwainnazi. 20 Kwail kiwainmuruzne uspa kwail akwa naizarînazi. Us ilkane, tînta tailchatpa. Mînminkas kwail kimtuza “wat awa mai” kizamanazi. Kwail kitchikas, wan naizmu tailchamturuzne watsal kulanazi, Dios usparuza kiwainamtu akwa. 21 Diosne uruza akwanara, uspa kal kianapa. Cristone u akwa naiz kit irît. Cristone aumîza miza uzana kamtanara, ussa kanpanapa. 22 “Cristone mizurainkas kwail kitchi. Usne pîrail kaiznarachi.” 23 Awa ussa kwail pit paraarakas, usne usparuza kwail pit sînkanarachi. Naiztuasmin, usne usparuza sunkana naizninnarachi. “Nane uruza ilnanash” kiznarachi. Naiztakas, Cristone Diosta nîjkulta, Dios ussa kwail parattuza nil mîmananapa, kwail kimtuza naizninnanapa. 24 Cristone tî kurishta irukasa patkuztît, au kwail kiarît akwa inapa. Usne irît, au kwail kiarît aizpa mainñarînpa, Dios pashimtu aizpa kianapa, watsal chanapa. Awa ussa ilnarît akwa, usne aumîza paimpa watsat mîlnat kit au kwail kirît aizpa namninnara. 25 Une pîriku ishkwarîtkana ñan miwara îara. Mane Cristone uruza kwail miras kailninnara, pîriku izmumikasha, Cristora, kanpaanapa. Usne uruza iznamtu.
Ampuruzkas ashamparuzkas
1 Ashampa ampu mîjtuz, mîrain. Up ampu kaiztu aizpa mît kit kiri. Ashampa ampu Cristora pianchi mîjmikane watsal uztawa, ampu Cristora nîjkulnapa, akkwan pit kainarachin. 2 An ampune paiña ashampa watsal uztui minnazi. “Nu wat kimtui” minnazi. 3 Ashampa an watsal namshitne, ash uru tîtkasa samkain. Uru tît kwilkin chi kwakain. Muin pïnkas kwakain. Pampa ashampane sunkana uzam, paiña ampu kwisha watsali kiznapa. 4 Sunkana kwazpa ashampakana uzkain. Ashampa kaijchu ayukta kalpain uztamikane an watsal namtîm. Ashampa mamaztuza wat kimtumikane an watsal namtîm. Ashampa kutki uzmikane Dios pashimtu aizpa kirînazi. 5 Ñamin sunkana ashamparuzne, Diosta paintuzne, kutki uzat kit Dios usparuza kin namtît aizpa tîrizara. Uspa ampu kaizta aizpa mîarît akwa, usparuzpain an watsal namninnara. 6 Sunkana Sarane an ñancha uz kit Abraham, paiña ampu, kaizta aizpa mîra. Ussa “ap anpat” kiz kit us kaiztu aizpa mîra. U ampura kiwaintane, ussa ishkumtukine, une Sara uztakanain uzanazi. 7 Ampu ashampa mîjtuzakas paranamtus. U ashampakasain watsal uztain. Ashampa ampu tîntakana chi akwa, ampune paiña ashampara wat min kit kiwaintawa. Diosne ampurakas ashamparakas kawarain chiyura uzninnamta. Sulmin kutchi uzpailtawa, Dios u paikumtu aizpa mîanapa.
Naizamtukas, nîjkulturuzne watsal kiarawa
8 Na kuruntu aizpa mîrain. Une mamaztuzkasa miza uzna nîjkultain. Cristo piantuza pashirain. We mîjtuza kiwaintain. Uruza an tînta awakana namninkain. 9 Uruza kwail kimtuza kwail kailninkain. Uruza kwail pit paramtuza kwail pit paraman. Sunkana kizman. Diosta paikwatpa, usparuza wat kiwainnanapa. Diosne uruza akwananazi, Dios watsal mîlamtu aizpa sappanapa. 10 Ñamin katsa mikwa Davidne pînkîhta pat kit sunkana kaizta: “Watsal uzshitturuzkas akkwan payukima wat kulshimturuzkas awaruza kwail pit paraman; pîrail apman. 11 Kwail kishiman. Awaruza wat kiarawa. Wan awakasa kalpain uzarawa, waya kiamanpa. 12 Au Anpat Diosne wat kiamturuza iznat kit uspa paikumtu aizpa mîmtu. Usne kwail kimturuza aliz kulnamtu.” 13 Watcha, mînminkas uruza, wat kishimturuza, kwail kininnasachi. 14 U wat kiarîmtukas, une naizashina. Naizamtukas, une watsal uzashina. “Uruza kwail kaizmumikasha ishkuman. Uspa uruza kiashimtu aizpa minman.” 15 Cristo u Anpat akwa, Cristowa wat minñat kit ussa wakpuj waintain. Mînpazha uruza “¿chima nîjkulamtu?” mîmakane, une maza pit watsarawa, usparuza sînkananapa. 16 Usparuza sînkarane, sam pit kwinta kisachi. Dios uruza kuruntu aizpa pararain. Watsal uzarawa, kaijchuras kwail minmanpa. Une Cristo kaizta aizpa kiamtu akwa, uruza kwail pit paramturuzne, u kwail kiamtu kaizturuzne mîtsal kiarînazi. 17 Kwail kimturuzkas naizarînazi. Sun kwail kikain. Wat kimturuzkas naizashinai. Naizamtukas, aune Dios pashimtu aizpa kiamîztawamakpas. 18 Cristone masain ira. Mamaztuzpa kwail kirît aizpa naiz irît. Cristone, wat awane, kwail awa akwa irît, uruza Diospara minana. Cristo awakanain irîtkas, Dios Izpulne ussa mamasa kakulninta. 19 Kakultachasmin, Cristone paiña Izpul akwa wan izpul sîptîttukin ît kit Dios watsal pit kainanara. Diosne usparuza sîptît mîjazi, ilnana. 20 Noé katsa kanua samtuasmin, Diosne akkwan payurakima impara impara tîriznara, an awa Noé kaiztu aizpa mîanapa, Dios usparuza naizninnamanpa. Noé kaizta aizpa mîarachi akwa, akkwanchin watsanara. Ocho awain kanuara nappat kit waara. Diosne kanua ayukman usparuza innap kit watsanara. 21 Pi kwakmuruzne pira wintakanain mazi. Diosne pira wintaruza paimpa watsat mîlnara. Cristo irîttas kakulta akwa, Diosne uruza watsanashinai. Pira wintane, awa intiruz sînam kwizsachi. Pira wintamikane Diosta paikumtu, paiña kwail kirît aizpa sînam kwiznapa, paiña kwail minmanpa. 22 Jesucristone chiyura nut kit Diospa numal uztu, awaruza îninnanapa. Tane usne wan ángeltuzakas wan chiyura îninturuzakas manta kinamtu.
Cristora nîjkulturuzne mamaz tuntu uzarawa
1 An sukin uzasmin, Cristone kurishta naizta. Ka akwaizna une uskana naizna ishkuman. Tînta kultain. Naiztaruzne tînta kulat kit an kwail kiashimtuchi. 2 Mane naiztaruzne ñamin kwail kiarîtkana kiamtuchi. Uspane mane Dios usparuza manta kinamtu aizpa kiashimtu. 3 Ñamin pampa payukima une Diosta pianchiruzkana uzara. Ñamin uspane wan tuntu kwail kiashit kit ampukas mamazpa ashampakasa chashiara; ashampakas mamazpa ampukasa chashiara. Pailta payu uspa chappi kuamtasmin, pishta samtasmin, wanne piat kit usparuzpain mîtsal kiat uzara. Awakana sarîtkin wakpuj wainñamtasmin, kwail kiarît. 4 Mane une uspa akkwan kwail tuntu kirîtkana kishiamtuchi. U miza uzamtu aizpa mîasachi. Katmizna uspane uruzpain pilchapuzat kit pîrail kaizamtu. 5 Diosne wan irîttuzakas ma uztuzakas mîmananazi, uspa kwail kiarît aizpakas, uspa pîrail kaizta aizpakas kainana. Suasne Dios usparuza mîmakane, uspane sînkarawa. Dios iztakin uspa kiarît aizpa pakpanarawa. 6 Awa iarachasmin, wantuzne Dios watsal pit mîara. Uspane wan awakanain iarît akwa, Diosne usparuza mîmanara, uspa kwail kiarît aizpa kainana. Iarakas, Diosta nîjkulara akwa, Diosne usparuza uskasa unanara. 7 Ma an sukin kimtu aizpa pailnapain i. Kasha pamti. Ka akwaizna u kiashimtu aizpa nil kiat kit wat minñarawa, Diosta an wat paikwan. 8 Sunkana an kwisha wat kiarawa. Une wantuza pashirain. Mamaza pashimtumikane kwail kirîtmikasha wat kultînazi. 9 Mînpazha awa up yalkin akane, yal nammîlatpa, tapailchin. 10 Dios wantuza, ussa nîjkulturuza tînta kiwainarît akwa, aune mamaztuza tînta kiwaintawamakpas. Dios u akwa wat kal kinarît akwa, une mamaztuzakas wat kal kiarawa. 11 Dios pit kaiztumikane Dios kaiztu aizpa awara paranarawa. Mamaztuza kiwainmumikane usparuza tînta kiwainnarawa, Dios ussa kiwaintu akwa. Chiwazha kal kimtukane, wat kirain, Jesucristora nîjkulamturuza “Diosne kwisha wari” kizanapa. Diosne katsamika i. Pailta payurakima Diosne wanta manta kinarînazi. Sunne watcha i.
Cristora piantuzne naizarînazi
12 Ap izmuruz, mîrain. Mazantuz uruza naizninnamtukane, ishkwanchi. Au naizamtu aizpa kwail i minman. Tînta naizamtukas, une, Cristora nîjkulamturuzne, an tînta namarînazi. 13 Ishkuman. U Cristo naiztîtkana naizamtu akwa, une watsal kultain. Cristo wanta îninna akane, une Cristora izat kit “kwisha watsal namtîre” kizanazi. 14 Awa Cristo akwa uruza kwail pit paramtukas, Cristora nîjkulamturuzne watsal kulashinai, Dios Sînam Izpul ukasa chamtu akwa. 15 Awara piantamtuzkas, walkumtuzkas, mamazta kwail kimtuzkas, patnaruzpa kal kin napturuzkas naizarînazi. Sun awaruz kiamtukana uzman, naizamanpa. 16 U Cristo akwa nîjkulamtu akwa, u naizturuzne Cristora mîtsal kiman. Naizamtu akwa, une Diosta “aishtaish” kizarawa. 17 Diosne awaruza mîmana masamîzta, uspa kwail kiarît aizpa ilnanapa. An ñancha Diosne Diosta pianturuza mîmat kit ilnanazi. Dioskas Dios watsal pit mîmtuchiruza an tînta naizninnanazi. Diosta piantuz we naizarîkas, Diosta pianchiruzne anza tînta naizarînazi. 18 Sunkana kit akwa, Diosne pînkîhta ka panintît: “Wattuza we watsanamtune, kwail kimtuza, Cristora pianchiruza, mizurainkas watsarît mîlnamanazi.” 19 Sunkana masetne, Diosta piantuzne, naizarînazi, Dios înintît aizpa kiarît akwa. Naizamtasmin, une mamaztuza wat kiamîztawa. Uruza sarîtmikasha nîjkulamîztawa. Diosne us kin namtît aizpa kinazi.
Pedrone Cristora nîjkulturuza kurunamtu
1 Mane na uruza kurunamtu aizpa mîzha. Nane ukanain Cristowa kuruntumika ish. Cristo kurishta naiztuasmin, nane ussa iz kit awaruza us naizta aizpa kainanarau. Cristo mamasa akane, Diosne “Cristo watsalmika i” aumîza piankamninnanazi. 2-3 Nane kurunturuza ka paikumtus: U uzkin Diosta wanmakturuza kwira kitpai, iztawai. Wat izmumikakana Diosta piantuza kiwaintuasmin, watsal kiat kit Dios pashit aizpa kiarawai. Diospa kal kinchi, pial kwazpa kultînpa. Usparuza kiwainarawai. Usparuza mikwakana îninnarachi. Wanmaktuza kiwainamtuasmin, une uspa iztakin watsal uzarawa, Dios uruza kamtanarît aizpa sunkanain kamanapa. 4 Cristone au pîriku izmumika i. Wan izmuruza iznamti. Akane, Cristone uruza unananazi, chiytura pailta payukima uzanapa. Sua chinkas pailkain. 5 Sunkanain, u musitturuzne îlapa kurunnamtu aizpa mîat kit kirain. Wantuzne kiwainmukanain mamazta kiwainnarawa. Sunpa Dios pînkîhta ka parît: “Diosne ‘mamazkin nane an katsamika ish’ kiztumikasha aliz kultu. Diosne ‘na katsa mikwa chi ish’ kiztumikasha kiwainnazi.” 6 Katmizna une uruzpain an katsa namninman. Diosne anza tînta mika i. An narît payu akane, usne uruza an katsa namninnanazi. 7 U ishkumtu aizpakas chiwazha wenamtu aizpakas Diosta kaiztain, us uruza iznat kit kiwainashimtu akwa. 8 Izkul kit nîjkultain. Aumîza aliz mikane anpain i. An Diablone, katsa ishu aztukanain, wan înkalpara chamtu. Aumîza sairane, amkulnashinai. Amkultane, awa kwail kinpa kinintui. Kwiraruin chatpa, Diablo uruza kwail kininnamanpa. 9 Diablo ukasa waya kishimtu akwa, uruzpain pakparawa. Cristora nîjkulmîztawai. Sunkas nîjkultain: an sukin uzamtasmin, wan Cristora nîjkulturuzne ukanain naizamtu. 10 Umin akkwan payuchinkima naizarînazi. Naizarawane, Diosne, aumîza wat kiwainmikane, au maztu aizpa watsashinai. Usne aumîza akwananazi, Cristokasa pailta payukima uzanapa. Aumîza tînta kulninnanazi. Aumîza tînta namninnanazi, najamanpa. Uruza tînta tailchaninnanazi, Cristora nîjkulanapa. 11 Diosne pailta payukima wanta manta kishina. Pailti.
Pedrone minpa pit parat
12 Nane ap aña Silvanokasa akkwan pitchin an pînkîh parît aizpa uruza îninnamtus. Us Cristora nil pian akwa, une us kaiztu aizpa nîjkulashinai. Nane uruza kurunashimtus, an tînta kulanapa. Na pînkîh pamtu aizpa watcha i. Diosne uruza pashinat kit wat kinashimti, najamanpa. 13 Babilonia pîpulukin nîjkulturuzne uruza “kakishapu” kizamtu. Diosne ukas uspakas nanarît. Ap painkulkanain Marcosne Cristora pian akwa, uruza “kakishapu” kiztu. 14 Cristora piantuzkasa wanmalkane, “kakishapu” kiznarawa, Dios usparuza pashinamtu akwa. Nane Diosta paikumtus, Cristora piantuz kalpain uzanapa. Pailti.
Kakishapu kiztu
1 Nane Simón mun ish. Nakas Pedro mun ish. Jesucristowa kiwainmumika ish. Jesucristone nawa îninta, us kaiztu aizpa kainanapa. Ukas aukas Cristo kamtara aizpa kawarain nîjkulpuspas. Jesús wat awa i. Au Diosne, au Watsat mîlmumikane, Jesucristone aumîza maiznashinai, watsal kiarînpa. 2 U Diosta pian akwa, au Anpat Jesústa pian akwa, nane paikumtus, Dios uruza kiwainanapa, kalpain uzanapa.
Cristora nîjkultuzne wat kiarawa
3 Jesucristone au akwa tînta kal kit kit aumîza unanara, wantuza wat kianapa. Diosne aumîza akwanara, ussa piankamanapa. Au ussa piankamtît akwa, Diosne aumîza kiwainashimtu, uskanain namanapa, us wat kishimtu aizpa kianapa. 4 Diosne us kin namtît aizpa aumîza chîhkanarît, Diospa kwal namanapa. Usne watsal mîlam mîja. Aumîza sun mîlam kin namtît akwa, Diosne aumîza kiwainnanazi, an sukin awa kwail kishimtu aizpa kiamanpa. 5 Dios ussa piantuza watsanarît akwa, une tînta kal kiarawa, Cristora an piankamanapa. Mane Cristora nîjkulamtuasmin, une an watsal uztain. An watsal uzamtuasmin, Diospa an piankamamîztain. 6 Diospa an piankamamîztuasmin, wan kwail kiashimtu aizpa anupparain. Wan kwail kiashimtu aizpa anuppamtuasmin, chiwal tînta tailcharain. Chiwal tînta tailchamtuasmin, Diospa mintain. 7 Diospa minñamtuasmin, wan Cristora piantuza pashinarain. Wan Cristora piantuza pashinamtuasmin, wan awaruzakas pashinarain. 8 Na wan manta kit aizpa pailta payukima kiarawa, Jesucristora an wat piankamanapa. Sunkana na manta kit aizpa mîmturuzne arakankanain kiamanazi. Na manta kit aizpa mîmturuzne nîjchiruzkanain uzamanazi. 9 Na manta kit aizpa mîmtuchiruzne we piankam kit kasu waj chi awakanain chaamtu. Uspane ñamin uspa kwail kiarît aizpa mainñashimtuchi. Uspane Dios usparuzain sînam sanarît aizpa nîjkulnashimtuchi. 10 Ka akwaizna, Diosta piantuz, wat nîjkul kit mîrain. Diosne uruza akwanat kit nanara, wat awakanain uzanapa. Na kaizta aizpa mîmtumikane mizurainkas kwail kin kailmanazi. 11 Sunkana uzturuzne, sunkana kimturuzne Cristora înintukin nappanazi. Au Anpatne, au watsat mîlmumikane, uruza akwananazi, pailta payurakima uskasa uzanapa. 12 Ka akwaizna, nane uruza na kaizta aizpa nîjkulninnanash. Une watcha kamtanarît aizpa piankam kit kiamtu. 13 An sukin uztuasmin, nane uruza na kurunnarît aizpa nîjkulninnanash. 14 Au Anpat Jesucristone nawa inapain ish piankamninta. 15 Katmizna nane tînta kal kit kit an pit uruza kaiznanamtus, mainñamanpa. Na irawane, une sun pit nîjkulanazi.
Uspa iztakin Cristo an tînta namtît
16 Nane uruza au Anpat Jesucristowa kamtanarau. Usmin wan îninnanazi. Mamaz payura kailnazi. An pitne kain kwinta kiztachish. Aune Jesucristora izaramakpas. Usne an katsa mika azi. 17 Au Taitta Diosne chiyuras ussa “kwisha wari” kizta. Au iztakin an tînta namtît. Dios chiyuras paramtuasmin, usne ka kaizta: “Anne ap pashimtu painkul i. Uskas ap narîtmika i. Usne na pashimtu aizpa kimtu.” kizta. 18 Diospa înkal îzara au Anpatkasa kunasmin, aune Dios chiyuras parat aizpa mîramakpas. 19 Aune Dios kaiztaruz paarît aizpa watcha i pianmakpas. Sun pit iztawamakpas, Cristo aumîza wan piankamninnakima. An pitne impil tîlkwilkin aiztukanain i. An pitne tîlawain katsa kîma aiztukanain i. Kai samtu. 20 An ñancha Dios pit parîtmikawa piankamtain. Diosne Dios kainammturuza kiwainnara, Dios pit piankamanapa, Dios pit paanapa. Minminkas usminpain Dios pit piankamsachi. 21 Dios pit kainammtuz paiña pitkasain paramtuasmin, Diospa Sînam Izpulne usparuza kiwainnara, Dios panashit aizpa paanapa.
Pîrail kamtamtuz
1 Ñamin Israel awaruz uzasmin, pîrail kamtamtuzne uzara. Makas uruzpain mamaz pîrail kamtamtuzne uzamtu. Uspane puintain pîrail pit kamtaanazi, u watcha kamarît aizpa nîjmanpa. Sun pîrail kamtamturuzne “an Jesucristora pianchimakpas,” kizamtu. Au Anpat usparuza watsat mîlnashimtukas, uspane ussa kwayarît. Sun pit kaizamtu akwa, an pîrail kamtamtuzne azain iarînazi, wan kanakima. 2 Akkwan awaruzne uspa kwail kirît aizpa kanpanazi, uspakanain namat kit uzanapa. Nîjkultuchiruzne au watcha nîjkulamtu aizpa “kwail i” kizanazi. 3 Kwazpa kulashimtu akwa, sun pîrail kamtamtuzne uspa kwinta sarît aizpa kwinta kinazi, u pial ukkat kit kuamîznapa. Ñamin Diosne miza usparuza ilnana minta. Mane Diosne usparuza mîmanapain i, uspa kwail kiarît aizpa kainanapa. Uspane mamaz payura kwisha naizarînazi. 4 Diosne ángel kwail kirîttuza uspa kwail kiarît aizpa sînam sanarachi. Usne usparuza tîlkwil kulta îninnat kit karenakasa kuhtîtkana mîj, uspa naizmu payurakima. 5 Dioskas antikwa awaruzakas uspa kwail kiarît aizpa sînam sanarachi. Uspa kwail kiarît akwa, Diosne alu kininta, wan sura pi pînnapa, wan kwail kirîttuza ianapa. Noé wantuza nil uzanapa kamtanarakas, Diosne Noérakas an siete awaruzakas wat uzanapa watsanara. Diosne an ocho awaruza watsat mîlnara. 6 Dioskas Sodoma pîpulu uztuzakas Gomorra pîpulu uztuzakas ïn îninnara, wan azpiannapa, wanta impaknapa, wan imchaj panakima. Sun akwa Diosne an kwizta kwail kishimturuza ka kurunara: “Wan sunkana kwail kimturuzne naizat kit wan karînazi,” kiznara. 7 Kwail kimturuz naizarakas, Diosne Lotta uspa uztukis ukkat kit watsarît. Sun awane wat awa azi. Wan awa kwail kiarît akwa, Lotne kwisha tayal kit uspa kwail kam kit tailchasachi. 8 Usparuzkasa uzasmin, Lotne pailta payu uspa kwail kiarît aizpa iz kit uspa kwail kaizara aizpa mîra. Uspa kwail kiarît akwa, sun wat awane, Lotne, kwisha naizta. 9 Dios wattuza kwailtas watsashimtu akwa, au Diosne Diosta nîjkulturuza watsanashinai, kwail kin minñamanpa. Dioskas wan kwail kishimturuza watsarît mîj, minpa payura il kit naizninnana. 10 Uskas wan chiwazha kwail kishimturuzakas, au katsa mikwa kaizta aizpa mîshimtuchiruzakas naizninnanazi. Sun tîmpa awaruzne, sun pîrail kamtamturuzne, katsa mikwaruza kwail paranamtu, ishkwatchin. 11 Katmizna wan ángeltuzne anza katsa mikwa mai. Uspane, au Anpat iztakin, an ainki mikwaruza uspa kwail kiarît aizpa kaiznamtuchi. 12 Sun awaruzne kalpa mintuchikanain mai. Kalpa kawirarawane, awane kalpa piznazi, piantana. Sunkana sun pîrail kamtamtuzne katsa mikwaruza kwail pit kaiznamtu, wat mintachin. Uspa kaizamtu aizpa wat piankamtachi akwa, uspane kalpa imtukanain iarînazi. 13 Mamaztuza kwail kinarît akwa, uspane kawarain naizat kit wan karînazi. Chinkas sappasachi. Amtawarakas payuwarakas chiwazha kwail minñamtu aizpa kiashimtu. U pishta payu taizkane, uspane ukasa wanmakkat kit nîjkulturuza mîtsal kiamtu. Ukasa kuamtuasmin, uspane chiwazha kwail minñamtu aizpa kiashira. 14 Ashampara izamtuasmin, uspane ussa pizshiara. Kwail kiamîztu, pailtachin. Uspane najtîttuza, Diosta we piantuza, kwail kin kamninnashimtu. Mamazpa pial ukkana kamnara. Diosne usparuza “kwail awa mai” kiznazi. 15 Mamaz miwara îarawane, uspane nil mi sayamtuchi. Balaampa miwara îara, uskanain uzanapa, pîrail kaizanapa. Balaamne Beorpa painkul azi. Kwail kimtuasmin, Balaamne pial sapshira. 16 Balaampa cabollone ussa awa paramtukanain parara. Caballone ussa “kwail kiman” kizta. Katmizna an tîmpa kaiztîtmikane min kit kwail kishit aizpa kitchi. 661 2 San Pedro 2 17 Sun pîrail kamtamtuzne mîmturuza uspa kamtamtu aizpa piankamninnasachi. Inkwane wanishta nuppaintu. Alu kimtukine, an sura kiwainsachi. Kawarain sun pîrail kamtamtuzne awaruza kiwainasachi. Diosne usparuza an tîlkwil uzmukin îninnanazi, sua pailta payukima naizat kit uzanapa. 18 Akkwan pit paramtukas, kain pit paraamtu. Uspa kwail kiamtu akwa, sun pîrail kamtamturuzne mamin kwail kimasamturuza kamtanamtu, mamasa kwail kiamîznapa. 19 Uspane wantuza kin namtu, chîhtît awakanain uzanapa, chiwazha înim mîamanpa. Mamaztuza kurunnamtuasmin, uspane kwail kimmasasachi. Anuppamtumikane anupparîttuza îninnanazi. 20 Anpatta piantuzne, watsat mîltumikara piankamturuzne, Jesucristora nîjkulturuzne kwail kimmasashiara. Kwail kimmasarachasmin, mamasa kwail kimmîztumikane anza kwail kimîztu. Usne an ñanchakin anza kwail kamarînazi. An kwizta an kwail namtînazi. 21 Nil miwara îmtumikane mamaz mi sainachi. Watcha piankamtukas, Dios kaizta aizpa mîmtuchimikane Dios miwara an îmtuchimikane, Dios mi karînazi. Dios kamtanara aizpa chîhkana kwisha kwail i. Sun pit mînachi an wararai. 22 Sun pit awa kaizta aizpa watcha i. Ka kaizamtu: “Kwatshiarawane, kwizane kail kit us kwarara aizpa kum. Kuzu pirawane, kuzune pîram pilwailkin kail kit piwailta kammu,” ka kizara.
Au anpat kailshinai
1 Na pashimtu izmuruz, mîrain. An paas pînkîh pat kit uruza îninnarau. Nane sun paas pînkîhpara uztuza kurunashimtus, an wat kamtanarît aizpa nîjkulanapa, nil minñanapa. 2 Dios pit kainammtuz ñamin kamtara aizpa nîjkultain. Au Anpat Jesucristo kaizta aizpakas, au watsat mîltumika înintît aizpakas nîjkultain. Paiña înintaruzne sunkana uruza kamtanara. 3 An ñancha na kaizta aizpa piankamtain. An su pailtuchasmin, anpattuzne u uzkin aat kit chiwazha kwail kiashit aizpa kianazi. Uspane u nîjkulamtu aizpa ishannanazi. 4 Uruza ka mîmanazi: “Une, ‘Cristo au su kin kailnazi,’ kizamtu. ¿Mane mînta tu? Au irît pampa uzarasmin, an su sararasmin, chinkas maizarachi,” kizanazi. 5 An awane Dios kirît aizpa piankamashitchi. Diosne an su antikwain sara. Paiña pit akwa an sura sat kit kwaziras puzninta. 6 Antikwain kwazine wan su îsalta pînnakta, wan sura uzturuza ininnanapa. 7 Mane aune an surakas an chiyurakas izamtuas. Diosne wan watsarît mîj, impaknapa. Naiztu payu taizkane, usne wan pura aizpa impakninnat kit wan kwail kimturuza pailninnarînazi. 8 Na pashimtu izmuruz, na kaiztu aizpa piankamtain. An pit mainkain. Ap Anpat Diosne ka kiztu: “Diosne iztakin maza payune mil añoskanain pîntu,” kizta. 9 Au Anpat Jesucristone “kailnash” kizta. “Kailnash” kiztakas, mînpazharuzne “azain asachi” minñamtu. Paiña amtu payu atchi mama. Usne uruza pashinat kit uruza kiwainshinamtu, awa iamanpa. Usne impara impara tîriztu, awa maizanapa, uspa kwail kiarît aizpa tayal kit chîhkanapa, Diosta kaiyanapa. 10 Au Anpat Jesucristo kailkane, usne walkum amtukanain anazi. Us kailtu payu taizkane, wan chiyune tînta az kit azain karînazi. Suasne wan su impaknin kit azpiantînazi. An sukin kal kirît aizpa impak kit karînazi. 11 Sunkanain minpa payura wan azpiantîmtu akwa, une ma payu Diosta wakpuj wain kit us kaizta aizpa mît kit nil uzarawa. 12 Une Jesucristo kailtu payu tîriztawa. Tîrizamtuasmin, une Dios kaizta aizpa mît kit mamaztuza Dios pit kainarawa. An kailtu payura chiyune impak kit azpiantînazi. An sukas impak kit impilkanain mantînazi. 13 Wan karîkane, Diosne mamaz masas sukas, masas chiyukas sana namta. Wan masas sarawane, awane Dios kaizamtu aizpa kit kit nil uzanazi. Aune an payu tîrizamtuas. 14 Ka akwaizna pashimtu izmuruz, an payu tîriztain. Tîrizamtuasmin, pailta payurakima Cristo uztakanain uzarawa, kwail kiamanpa. Suasne u kwail kiarît aizpa sînam sarînazi, uskasa kalpain uzanapa. 15 Makima au Anpat kailshitchi, an akkwan awa Cristora nîjkulanapa. Dios awaruza watsat mîlnanamtu piankamtain. Pablokas, au pashimtu añakas, uruza an pitmin Dios ussa piankamnintît aizpa pînkîhta pat kit îninnara. 16 Usne sun kamtarît aizpa wan pînkîhta para. Maza maza pit parît aizpa wat piankamsachi. We nîjkulturuzkas we piankamturuzkas Dios kamtît aizpa maizshiamtu. Dios kamtît aizpa maizshiamtu akwa, uspane minpa payura wan chiwal kaarînazi. 17 Na pashimtu izmuruz, mîrain. Ñamin nane uruza an pîrail kamtamtuzpa kainanarau. Usparuzpa iztain, uspa pîrail kaizamtu aizpa mîamanpa, uspa kwail kiamtu aizpa kiamanpa. Uspa kamtamtu aizpa mîmtukine, une sam namat kit tînta nîjkulanazi. 18 Au Anpatne uruza kiwainashimtu, an tînta kawianapa. Au watsat mîlmumikara, au Jesucristora pashirain. Ussa an wat piankamîztain. Makas pailta payurakima “Cristo kwisha wari” kaizarawamakpas. Pailti.
Sun Pitne awaruza pailta payu uzninnamtu
1 Nane uruza an pînkîhta Jesucristowa, awaruza uzninnamtumikawa, panamtus. Wan sarachasmin, wan mansarachasmin, usne an ñancha uzta. Us kaizta aizpa mîramakpas. Au kasukasa iztamakpas. Watcha ussa iz kit au chihtîkasa piztamakpas. 2 Awaruza uzninnamtumikane ussa piankamninnara. Aune ussa iz kit au izara aizpa piankam kit awaruza uzninnamtumikawa uruza kainapuspas. Wan sarachasmin, usne Paiña Papihshkasa uzara. Usne au sukin ara, au ussa piankamanapa. 3 Au izara aizpakas au mîara aizpakas uruza kainapuspas, uruzkas aukasakas izmuruzkanain wanmakkanapa. Sunkana kitne, aune au Taitta Dioskasa, paiña painkul Jesucristokasa wanmakkiznapas. 4 Aune sun pit uruza papuspas, wan watsal kulanapa.
Diosne kai aiztu
5 Jesucristone aumîza ka kamtanara: Diosne kwisha wari. Impilkanain kai aiztu. Chinkas kwail kitchiwal. Sun pitmin aune uruza kainanapuspas. 6 Diosta wanmaktît ish kizamtune, sun urain nil chi uzamtune, aune pîrail kaiz kit nil chi kiamtuas. 7 Diosne wat kimtu. Aune Dios wat kimtu aizpakanain kit kit chatpamakpas. Sunkana uzarane, aune izmuruzkasa watsal wanmakkiznapas. Suasne Dios painkulne au kwail kiarît aizpa paiña aimpikasa sînam sananazi. 8 Au kwail kitchimakpas kizarane, aune ñan miwara îamtumakpas. Au kaiztu aizpa watcha chi. 9 Au kwail kiarît aizpa Diosta kaizarane, usne au kwail kiarît aizpa wat kul kit wan tuntu kwail kiarît sînam sananazi. Dios wan nil kimtu akwa, usne us kin namtu aizpa kinazi. 10 Aune “kwail kitchimakpas” kizarane, aune Dios pîrail kaiztu kaizamtuas, paiña watcha pit mîrachi akwa.
Cristone au akwa paikummika i
1 Nane uruza, ap pashpakanain, sun pit pînkîhta pananamtus, kwail kiamanpa. Mane mînpazha kwail kiarane, Cristo aumîza kiwainmikane, au akwa Papihsh iztakin paikwanazi, aumîza pakpanapa. Usne kwisha wari. 2 Jesucristone au kwail kiarît akwa irît, au kwail kiarît aizpa wat kulninna. Auruzpain akwa irachi. Wan su awaruz akwa irît, uspa kwail kiarît aizpa wat kulnanapa. 3 Au Dios înintu aizpa kiarane, aune watcha Diosta piankamtu pianmakpas. 4 Mînpazha “nane Diosta pian ish.” kiztane, Dios îninta aizpa kimtuchine, usne pîrail kaiztu. Usne watcha kaiztuchi. 5 Us îninta aizpa kimtumikane, paiña pit mîmtumikane, watcha Diosta nil pashimtu. Sunkana kitne, Diosta wanmaktamakpas pianmakpas. 6 Mînpazha “Dios wanmaktît ish” kizmumikane Jesucristo au sukin uztakanain uzarawa.
Masas înim
7 Nane uruza, ap pashimtu añakanain, sun pînkîhta an ñancha înim akwa pananamtus, sun kianapa. Sun înim masas chi. Cristora nîjkularasmin, sun Dios watsal pit mîarasmin, une sun antikwa înim kiamîzta. 8 Sunkana nane uruza mamasa sun masas înim pamtus, mîanapa. Cristokas ukas sun wat pit piankamat kit kiamîzta. Sun pitne kai impilkanain wan sura aiztu, wan awa sun watcha pit piankamanapa. 9 Mînpazha “wat kimtus” kiz kit paiña aimpihshta aliz kultane, usne makima kwail kimtu uztu. 10 Paiña aimpihshta pashimtumikane wat kimtu uz kit mamaztuza kwail kinintuchi. 11 Sunkana paiña aimpihshta aliz kultumikane kwail kimtu uztu. Tîlkwiltakanain chamtu. Aimpihshta aliz kultane, usne chiwazha wat kin minsachi. 12 Au kwail kiarît aizpa wat kulta akwa, nane uruza, ap pashpakanain, pînkîhta pananamtus, awa “Cristo kwisha wari” kizanapa. 13 Nane îlaparuza an pînkîhta pananamtus, an ñancha uzatmikasha piankamara akwa. Nakas musitturuza an pînkîhta pananamtus, u Diablora anupparît akwa. 14 Nakas pashparuza an pînkîhta parît ish, au Taitta Diosta piankamarît akwa. Îlaparuzakas parît ish, an ñancha uzatmikasha piankamara akwa. Musitturuzakas an pînkîhta parît ish, u tînta akwa, Dios pit mîat kit piankamara akwa, u Diablora anupparît akwa. 15 Au sukin chiwazha kwail wa aizpa kishiman. Chiwazha kwail wa aizpa an sukin kishimtumikane Taitta Diosta pashisachi. Dioskas ussa pashimtuchi. 16 Au sukin wan kwail wa aizpa Taitta Diostas taiztachi. Sun kwail au sukismin wa. Awain chiwazha kwail wa aizpa kiashimtu. Awakas chiwazha izat kit wa aizpa pashiamtu. Awakas kwazpa namashimtu, chiwazha kwazpa kultît mîj aizpa awaruza annanapa. 17 Au sukin wa aizpakas wan awa kiashimtu aizpakas pailtînazi. Dios înintu aizpa kishimtumikane pailta payukima uznazi.
Watchakas pîrailkas
18 Ap pashimtu pashpakanain mîzhain. Minpa payu taiznapain i. Une Cristora aliz amtumikawa mîara. Mane au sukin kwisha akkwan Cristora aliztuzne pura. Katmizna an minpa payu taiznapain i pianmakpas. 19 Uspane aukis puzara, Cristora watcha nîjkularachi akwa. Cristora piankamarane, uspane aukasa tuashina. Cristora piankamtachi akwa, uspane aukis puzara. Uspa Cristora nîjkularachi pianmakpas. 20 Cristone paiña Sînam Izpulta îninnara, uruza kiwainanapa, wan watcha piankamninnapa. 21 Watcha piankamta akwa, nane uruza pînkîhta panarau. Uruzne na pînkîh uruza parît aizpa watcha i pianmai. Pîrail pitne watcha pittas puzsachi. 22 ¿Mînma pîrail kaizmumika i? Pîrail kaizmumikane “Jesúsne Cristo chi” kiztu. “Jesús Cristo chi” kiztumikane Taitta Diostakas paiña Painkultakas piankamtuchi. 23 “Jesús Dios Painkul chi” kiztumikane Taitta Diosta pianchi. “Jesucristone Dios painkul i” kiztumikane Taitta Diostakas paiña painkultakas piankamanazi. 24 Uruzne ñamin sun pit mîat aizpa nîjkulmîztain. U ñamin mîat aizpa nîjkularane, une Dios painkulkasa au Taitta Diostakasakas pailta payu sulmin nukkularînazi. 25 Jesucristone aumîza pailta payukima uzninna namta. 26 Nane uruza pîrailkanain kiztumikawa pînkîhta parît ish, uspa uruza pîrail appamanpa. 27 Jesucristone Sînam Izpulta îninta, ukasa uz kit kiwainanapa. Sînam Izpulmin uruza wan chiwal kamtanamtu akwa, mamaztuzne uruza an kamtanasachi. Us kaiznamtu aizpa watcha i, pîrail chi. Katmizna us kamtat aizpa mîat kit Cristokasa pailta payukima nukkultain. 28 Mane, pashimtu pashpakanain, mîrain. Cristokasa pailta payukima nukkultain, us amtu payura tînta nîjkulanapa, us iztakin mîtsal paamanpa. 29 Uruzne Jesucristo wat kimtu wat pianmai. Sunkas piankamarawa. Wat kimtuzne Dios painkulkanain mai.
Diosta pashparuz
1 Taitta Dios aumîza kwisha pashinamtu akwa, usne aumîza Diospa pashpa namninnarît. Watcha, Diospa pashparuz makpas. Katmizna au sukin uzturuzne, Diosta pianchiruzne, aumîza pianchi, Diosta piankamarachi akwa. 2 Na uruza pashinamtu akwa, u Diosta piantuz mîrain. Aune Diospa pashpakanain makpas. Kwiztane aune miza Dios aumîza maizarînsa pianchimakpas. Jesucristo akane, aune uskanain iztît namarînapas. Suasne aune ussa wat izanapas. 3 Jesucristokanain namna tîrizamturuzne kwail kishiamtuchi. Uspane uspa kwail kiarît aizpa sînam kulna Diosta paikuamtu, Jesucristo sînam uztakanain uzanapa. 4 Wan awaruzne kwail kiamîz kit Dios înintu aizpa mîamtuchi. 5 Uruzne Jesucristo au sukin ara pianmai, au kwail kirît aizpa sînam sananapa. Usne chinkas kwail kitchi. 6 Wan Jesucristora mîmturuzne kwail kiamtuchi. Wan kwail kimturuzne Jesucristora nîjkulamtuchi. Ussa piankamarachi. 7 Ap pashpakanain mîza. Mînainkas uruza pîrailkanain kizmumikara mîman, kwail kiamanpa. Wat kimîztumikane wat awa i. Usne Jesucristo wat kimtukanain kimtu. 8 Kwail kimîzturuzne Diablokasa chamtu. Diablone an ñancha kwail kitmika azi. Kwail kimîzta. Dios Painkulne au sukin kihshta, wan Diablowa kal, wan kimtu aizpa kawal kiana. 9 Diospa pashparuzne kwail kiamîztuchi, Dios usparuza uzninnamtu akwa. Usne kwail kishimîztuchi, Dios ussa paiña kwal namninta akwa. 10 Sunkana aune Diosta piantuzakas Diablokasa chamtuzakas pianmakpas. Wat kimtuchimikakas, paiña aimpihshta pashimtuchimikakas Diospa kwal chi mai.
Mamaztuza pashinarawamakpas
11 Uruzne an pitmin an ñancha ka mîarît. Nîjkulturuza pashinarawamakpas. 12 Caín uztakanain uzman. Caín Diablokasa cha akwa, usne paiña aimpihshta piantara. ¿Chikishma ussa piantara? Usne paiña aimpihshta piantara, Diablowa kal kimtu akwa. Paiña aimpihshne Diospa wat kal kimîzta. 13 Diosta piantuz mîrain. Au sukistuz ukasa pilchapuzkane, nîjkulat kit ishkuman. 14 An ñancha uztuasmin, aune miza uzna piankamarachimakpas. Irît awakanain uztamakpas, Diosta piankamarachin. Mane aune miza uzna pianmakpas, Diosta pianturuza pashinamtu akwa. Mamaztuza pashimtuchimikane irît awakanain uzmîztu. 15 Wan mamaztuza aliz pilchapuztumikane mamazta piantatmikana namtîmtu. Mamazta piantaramikane pailta payukima uzmanazi. Sunkana uruzne pianmai. 16 Cristo au akwa irît. Sunkana usne aumîza anara, miza mamaztuza pashinana. Sunkanain aune Diosta piantuza kiarawamakpas, inakima. 17 Kwazpamikane wan mîj. Kwazpamika, Diosta pianmika we mîjmikara iztane, us we mîj aizpa mîlamtukine, us we kumtu aizpa kwintukine, kwazpamikane “Diosta pashimtus” kaizsachi. 18 Ap pashparuz, mîrain. Aune pitparain mamaztuza pashinasachimakpas. Mamazpa akwa wat kal kimtune, aune mamaztuza watcha pashinamakpas.
Dios iztakin nil kitpamakpas
19 Au mamaztuza pashinamtune, aune Dios watcha pit pianmakpas. Suasne aune Dios iztakin nilmin uzpuspas, ishkwatchin. 20 Au kwail kiarît aizpa minñarane, Diosne, aukinkas anza katsamikane, aumîza kiwainanazi, au minñamtu aizpa kwail kiamanpa. Usne au pian aizpakas anza wan pian. 21 Na pashimturuz, mîrain. Kwail kirît aizpa ayukta nukkultukine, aune Diosta paikwashimakpas, ishkwatchin. 22 Aune Diosta wan paikumtu aizpa sappiznapas, an us înintu aizpa mîamtu akwa, au us pashimtu aizpa kiamtu akwa. 23 Diosne sunkana aumîza îninnara, paiña painkulta, Jesucristora nîjkulanapa. Uskas aumîza îninnara, mamaz nîjkulturuza pashinanapa. 24 Dios înintu aizpa mîmturuzne Dioskasa chaamtu. Uskas aukasa cha. Sunkana Diosne aukasa chamtu pianmakpas, paiña Sînam Izpul aukasa uznapa îninta akwa.
Diospa Sînam Izpulkas Cristora aliztuzkas
1 Ap pashimturuz, mîrain. Wan “Dios nawa paiña pit kainana îninta” kizmuruza nîjkulanachi. Suntuza uspa kaizamtu aizpa mîmarain. “¿Dios usparuza sun pit îninma?” kiz kit mîmarawa. Akkwan nilchi kainammtuzne au sura pîrail kaizamtu. 2 Sunkana kurunamtus, Sînam Izpul akwa kainammmikara piankamanapa. “Jesucristo awakanain kawira i” kizmumikane Dios Sînam Izpul akwa kainammtu. 3 “Jesucristo awakanain kawirachi” kizmumikane Dios Sînam Izpul akwa kainammtuchi. Sun kizmumikane Cristora aliz awa i. Une sun kizmumika anpain i mîara. Au sukin me arît i. 4 Pashparuz, mîrain. Uruzne Diospa kwal mai. Katmizna uruzne sun pîrailtuza anuppanarît. Ukasa chamtumikane, sun Sînam Izpulne, Diablokin, an sukin chamtumikakin, anza tînta i. 5 Pîrail kaizmuruzne an sukin awaruzkasa chaamtu. Katmizna uspane an sukin wa aizpa kwinta kiamtu. An sukin uztuzne uspa kaizamtu aizpa mîamtu. 6 Sunkana aune Diospa kwal makpas. Diosta piantuzne au kaizamtu aizpa mîamtu. Diosta pianchiruzne au kaizamtu aizpa mîamtuchi. Na kaizta akwa, aune Izpulpa watcha kainammmikara piankampuspas. Kawarain aukas watcha kainammtuchimikara piankampuspas.
Dios panashimtu
7 Na uruza pashinamtu akwa, Diosta piantuz, mîrain. Aune kawarain nîjkulturuza pashimîztawamakpas. Mamaztuza pashimtumikane Dios înintu aizpa kimtu. Wan mamaztuza pashimtumikane Diospa kwal mai. Uspane Diosta wat pian. 8 Mamaztuza pashimtuchimikane Diosta pianchi. Diosne wanta pashinamtu. 9 Diosne us aumîza pashinamtu piankamninnara, paiña painkul mazain mîj au sukin îninta akwa, au kwail akwa inapa, us akwa pailta payukima uzanapa. 10 Aune Dios pashimtukanain pashimtuchimakpas. Usne aumîza panashit kit paiña painkulta îninta, au kwail akwa inapa, au kwail kiarît aizpa sînam sananapa. 11 Na pashimturuz, mîrain. Dios aumîza sunkana pashinarît akwa, aukas mamaz nîjkulturuza kawarain pashinarawamakpas. 12 Mînminkas Diosta izarachi. Mamaztuza kawarain pashinamtune, aune Dioskasa chaamtumakpas. Suasne aune Diosta pashiamtumakpas. 13 Diosne paiña Sînam Izpulta îninta, aukasa uznapa. Mane aune paiña Izpul akwa Dioskasa chamtumakpas. 14 Aune Diospa Painkulta iz kit ka kainaramakpas: “Papihshne paiña painkulta au sukin îninta, wan awa kwail kirîttuza sînam sananapa.” 15 “Jesúsne Dios painkul i nîjkultus” kiztumikane Dioskasa chamtu. Diosne ussa chîhkamanazi. 16 Aune Dios aumîza pashinamtu watcha nîjkul kit pianmakpas. Diosne wan awaruza pashinamtu. Mamaztuza pashimtumikane Dioskasa cha. Diosne ussa chîhkamanazi. 17 Sunkana aune Diosta an nil pashimîztawamakpas. Suasne Diosne wan awaruza mîmanazi, uspa kwail akwa. Sun payu taizkane, aune tînta nîjkulanapas, ishkwatchin. An sukin uzamtukas, aune paiña Papihshta, au Diosta piankampuspas. Usne aumîza Cristokanain namarît. 18 Diosta watcha pashimtumikane Dios iztakin ishkwasachi. Diosta pashimtumikane us ishkumtu aizpa paimpa îninnamtu. Ishkumtumikane usmin naizmîztu. Katmizna mînpazha ishkumtune, usne miza Diosta watcha pashimtu piankamsachi. 19 Aune Diosta pashipuspas, us an ñancha aumîza pashinara akwa. 20 Mînpazha “Diosta pashimtus” kiztune, sun urain paiña aimpihshta pilchapuztane, usne pîrail kaiztu. Mînpazha paiña aimpihshta, paiña iztamikara pashimtuchine, Diosta iztachimikara pashitchi. 21 Diosne sun înim aumîza ka îninnara: Diosta pashimtumikane paiña aimpihshtakas paiña kwampihshtakas pashitpa.
Diosta nîjkultawamakpas, au sukin nil uzanapa
1 Wan “Jesús Cristo i” kiz kit nîjkulturuzne Diospa kwalkana mai. Papihshta pashimtumikane papihshpa pashparuzakas panashimtu. 2 Diosta pashikane, aune us îninta aizpa kipuspas. Suasne Diospa pashparuzakas pashinamtu pianmakpas. 3 Diosta pashimtumikane us îninta aizpa mît kit kimtu. Us îninta aizpa kwisha kal chi. 4 Wan Diospa kwalkanaintuzne an sukin kwail kin mîamtuchi. Diosta nîjkultamikane au sukin nil uznazi, kwail kimanpa. 5 “Jesús Dios painkul i” kiz kit nîjkultamikane an sukin kwail kin mîamtuchi.
Diosne “ap painkul wat i” kiztu
6 Jesucristone apain ara. Aune “Jesúsne Dios Painkul i” pianmakpas, Jesús kwazikasa muntît akwa, kurishta aimpi puz kit irît akwa. Kwazikasain muntachi. Kwazikasa muntawane, kwiztane awane ussa piantarît. Sînam Izpulne wan piankam kit “Jesúsne Dios Painkul i” kiz kit wan watcha kainammtu. 7 Kutñaruzne “Jesúsne Dios painkul i” kainammtu. 8 Sînam Izpulne “Jesúsne Dios Painkul i” kiz kit sun awaruza piankamnintu. Jesús kwazikasa muntît akwa, Diosne awaruza “Jesúsne Dios painkul i” kiz kit kainanara. Jesús kurishta aimpi puz kit ira akwa, Diosne wanta “Jesúsne Dios Painkul i” kiz kit kainara. Sun kutñaruzne kawarain kainammtu. 9 Mînpazha ampu parakane, aune us kaizta aizpa mîmtumakpas. Dios kainammtu aizpa anza tînta akwa, aune us kainammtu aizpa mît kit nîjkularawamakpas. Diosmin “Jesúsne Dios Painkul i” wanta kainanara. 10 Dios Painkulta nîjkultamikane “Jesúsne Dios painkul i” kiz kit watcha usmin piankamtu. Dios kaizta aizpa nîjkultachimikane “Dios pîrail kaiztu” kiztu. Usmin Dios paiña painkulpa kainammtu aizpa nîjkultuchi. 11 Mane Diosne aumîza paiña pitmin piankamninnamtu. Usne aumîza paiña Painkulta nîjkulturuza pailta payukima uzninna namta. 12 Dios Painkulta nîjkultamikane me Dios akwa mamaz tuntu uztu. Dios Painkulta nîjkultuchimikane mizurainkas Dioskasa uzmanazi.
Minpa pit kaiz kit kurunamtu
13 Nane an pînkîh uruza, Dios Painkulta nîjkulturuza panarau, Dios akwa pailta payukima uzanazi piankamanapa. 14 Au Diosta wat nîjkulamtu akwa, aune ussa chiwazha paikwashinamakpas, ishkwatchin. Us pashimtu aizpa paikumtune, usne aumîza mîmtu. 15 Sunkana aune Dios au paikuamtu aizpa mîmtu pianmakpas. Sun akwa au paikuamtu aizpa sappanapas pianmakpas. 16 Mînpazha paiña aimpihshta kwail kimtu iztane, paiña kwail akwa imtukine, usne Diosta aimpihsh akwa paikwatpa. Diosne ussa uzninanazi, paiña kwail sînam sarît akwa. Mamaz tuntu kwail kitne, sînam sasachi. Mînpazha sun mamaz tuntu kwail kitne, une sun mamaz tuntu kwail kitmika akwa Diosta paikwasachi. 17 Wan kwail kimtu aizpa kwail i. Diosta paikwatpa, awa kwail kirît aizpa sînam sanapa. 18 Aune Diosta piankamtaruz kwail kiarît aizpa kiamîztuchi pianmakpas. Dios Painkulne usparuza nil uzana kiwainamtu, Diablo usparuza kwail kiamanpa. 19 Aune Diospa kwal makpas pianmakpas. Aune Diablo mamaz awaruza au sukin uztuza îninnamtu pianmakpas. 20 Aune sunkas pianmakpas. Dios Painkulne apain at kit aumîza piankamninta, watcha Diosta piankamanapa. Mane aune watcha Dios kaizta aizpa mîpuspas. Paiña painkulkasa, Jesucristokasa chapuspas. Aumîza pailta payu uznintumikane watcha Dios i. 21 Ap pashparuz, mîrain. Chiwazha Dioskanain sarît aizpara, wan awa tîkasa sarît aizpara, wakpuj wainman. Pailti.
Kakishapu kiztu
1 Nane îlapa înintamika ish. An pînkîh wanmakmuruza, Dios narîttuza panamtus. Paiña painkultuzakas pashuruzakas panamtus. Wan uruza watcha pashinamtus. Na uruza pashinamtukas, wan Dios watcha pit piankamturuzkas uruza pashinamtu. 2 Aune kawarain panashit kit Dios watcha pitmin piamkampuspas. Sun Dios watcha pit aukasa tuanazi, pailta payukima. 3 Au Taitta Dioskas au Jesucristo, Taittawa Painkulkas, uruza wat kiwainanazi. U akwa wat minñanazi, naizamanpa. Uruza kalpain uzninnanazi. Suasmesa une sun watsal pit mîat kit nîjkultaruza pashinanazi. 4 Nane kwisha wat ish, mînpazha paiña pashparuz wanmalarît akwa. Uspane watcha mîat kit wat uzamîzta. Uspane Taitta Dios îninta aizpa kiamîzta. 5 Mane, ap izmuruz, mîrain. Nane uruza paikwanamtus, wan kawarain mamaztuza pashinanapa. Sun înim na pamtu aizpa masas chi. U sun înim an ñancha mîjmazi. 6 Pashimturuzne Taitta Dios îninta aizpa mîat kit nil uzarawa. Sun an ñancha înim mîazi, Taitta Dios îninta aizpa kianapa.
Ñanta kinninmuruz
7 Sunkana kwisha akkwan ñanta kininmuruzne au sukin chaat kit Jesucristo awakanain kawirît kizamtuchi. Sunkana kimmikane ñanta kininmika i. Usne Cristora aliz. 8 Uruzpain iztain, u kal kiamtu aizpa kamanpa, Dios uruza mîlamtu aizpa wan sappanapa. 9 Mînpazha Cristo kamtara aizpa kwairane, Cristo kamtara aizpa mîrakine, usne Dioskasa chatchi. Pailta payu Cristo kamtara aizpa mîmtumikane Taitta Dioskasakas paiña painkulkasakas chamtu. 10 Mînpazha uruza izna akane, Cristo kamtara aizpa kamtamtukine, une suntuza “ap yalta napti” kizman. “Kakishapu” kizman. 11 Mînminkas “Wat i” kizmumikane uskasa sun kwail kal kimîzpailnazi.
Minpa pit
12 Akkwan pit uruza kainashimtukas, mane nane pînkîhta pamtuchish. Nane uruza izna îshimtus, u iztakin kwinta kin, u kwisha watsal puranpa. 13 Ukasa wanmaktuzkas narîttuzkas uruza “kakishapu” kiznamtu. Pailti.
Gayo muntîtmikane wat awa i
1 Nane îlapa înintamika ish. Dios watcha pit akwa, nane an pînkîh Gayora pamtus. Na pashimtu izmumikasha pamtus. 2 Ap pashimtumika, mîza. Dios nua wat kiwaintu akwa, nane Diosta paikumtus, an watsal uznapa, tînta kulnapa. 3 Mînpazha añakanaintuz apa aakane, kwisha wat kultau. Uspane watcha akwa nune nil uztui kizara. Dios watcha nua kuruntu aizpa nil kimtui kizara. 4 Ap painkultuz Dios watcha pit mîat kit nil uzakane, nane anza wat kultus. 5 Na pashimtumika, mîri. Mamaz suras Diosta piantuz up yalta pianakane, nune uspa akwa kimtu aizpa wari. 6 Uspane Diosta piantuza uspa wanmakmukin paranara. Nu usparuza kwisha panashimtui kizara. Kaiyarîkane, usparuza kiwainnari, miwara wat îanapa. Diospa kal kiamtu akwa, nune uspa akwa Dios pashimtu aizpa kitpa. 7 Uspane uspa suras puzat kit Jesucristowa kal kin îara. Diosta pianchiruzpa chinkas sapparachi. 8 Ka kwaizna aune Dios kiwainturuza kiwaintawamakpas, Dios watcha pit kainanapa.
Diótrefeskas Demetriokas
9 Nane wanmakturuza mamaz pînkîh parakas, Diótrefesne, u iztakin usmin an katsa namshimtumikane, na înintu aizpa mîmtuchi. 10 Katmizna na pa îkane, nane ussa akwanash. Us kimtu aizpakas nawa pîrail pit paramtu aizpakas nîjkulninnash. Usne sunkasa wat kultuchi. Diosta piantuz aakane, uskas paiña yal nammîlanamtuchi. Uskas mamaztuza yal nammîlaman kiznamtu. Mamaztuza wanmakmukis an ñanpa îninnamtu. 11 Na pashimtumika, mîri. Mamaz kwail kimtu aizpakana kiman. Mamaz wat kimtu aizpakana kirain. Wat kimtumikane Dioskasa cha. Kwail kimtumikane Diosta piankamtachi. 12 Wan wanmakmuruzne Demetriowa wat kainaamtu. Uztuasmin, watcha paramtu. Nakas us akwa wat kainammtus. Une na kaiztu aizpa watcha i piam.
Minpa pit
13 Akkwan pit uruza kainashimtukas, mane nane pînkîhta pashitchish. 14 Uruza masakin izna tîriztus, u iztakin kwinta kin. 15 Dioskasa kalpain uzti. Akkis up izmuruzne “kakishapu” kiz înintu. Au izmuruza nu uzkin “kakishapu” kiz îninnari. Pailti.
Kakishapu kiztu
1 Nane Judas mun ish. Jesucristowa kal kimtumika ish. Santiagowa aimpihsh ish. Au Taitta Dios pashimturuza an pînkîh panamtus. Jesucristone usparuza akwanat kit iznamtu. 2 Nane u akwa Diosta paikumtus, kwisha akkwan wat kiwainanapa, Dioskasa kalpain uzanapa, uruza an pashinanapa.
Pîrail kamtamtuz
3 Na pashimturuz, mîrain. Dios au kwail kiarît aizpa sînam sanarît akwa, nane uruza pînkîh pana mintuarau, Dios au akwa kirît aizpa an wat piankamanapa. Sunkana mane nane uruza pînkîhta pat îninnarawaish. Uruza paikwatpas, u Dios pit nîjkultu aizpa watsaanapa, mamaz nakaamanpa. Diosne paiña pitta nîjkultumikasha chîhkanara. 4 Mînpazha awaruzne u uzkin puintain napparît, uruza pîrail kizanapa. Ñamin Dios pit ka parît: “Sun awane, nîjkultuchiruzne, naizat kit wan kaarînazi.” Dios usparuza wat kiwainashimtukas, sun Diosta pianchiruzne pailta payukima wan chiwal kwail kishiara. An Diosta, katsa îninmikara, chinkas mîashitchi. Au Anpat Jesucristora pianchimakpas kizamtu. 5 Mane u sun pit wat piankas, nane mamasa sun kwinta nîjkulninnashimtus. Anpat Israel awaruza Egipto sukis ukkanarawane, Anpatne nîjkultachiruza kawal kinarît. 6 Akkwan ángeltuz uspa kal chiyura kiarît aizpa chîhkaarît akwa, Diosne tas kwayarît. Mane Diosne usparuza tîlkwilta kuhtît mîj, uspa naiztu payukima. 7 Une Dios ángeltuza kinarît aizpa pian. Kawarain, usne Sodoma pîpulura uztuzakas Gomorra pîpulura uztuzakas pîpulu makin uztuzakas kinarît. Sun awaruzne u pîpulukin uztuzkana chiwazha ashampa pizat kit uspakasa pittamtu. Mamaz usparuztas ampuruzpain ashampakanain pittamtu. Diosne sun pîpulukin uztuza impaktanara, sunkana kwail kimtuz pailta payukima naizarînazi piankamanapa. 8 Sun awaruzkanain nilchi kamtamturuzne kwailpa kainkizpamtu uzamtu. Paiña ñakasain kwail kininnamtu. Dios aumîza îninnarachi kizamtuasmin, uspane katsa îninmikasha kwail paraamtu. 9 Katsa ángel îninmumikane, Miguelne, Diablokasa usparuzpain Moisés irît ñawa tînta parara. Miguelne Diablora “kwisha kwail kit” kizshitchi. Sunmin ka kizta: “Diosne nua tînta kurun kit ilnazi.” 10 Uspane uspa chiwazha pianchi aizpa kwail paraamtu. Kalpane us mintuchi aizpa wan kimtu. Sun awaruzne kalpakanain uspa kishiamtu aizpa kiamtu, minñarachin. Suasne uspane wan kaarînazi. 11 Sun awaruzne kwisha naizarînazi. Caínpa kwail kit aizpakanain kiamîztu. Pial kana kimtu akwa, uspane Balaamkana kwail kiara. Sun nilchi kamtamtuzne Corékanain wan chiwal kaarînazi, Dios îninta aizpa kiamtuchi akwa. 12 Sun awa u pishta izna aakane, uspane u uzkin nîjkultachin kuamtu, mîtsal kitchin. Usparuzpain naiyat kit kuamtu. Mamaztuza naiyamtuchi. Chiwazha uspa kiamtu aizpa kain i. Inkwa mîltuasmin, uspane wanish alukasachikanain mai. Uspane pippa wanachi tîkanain mai. Tî pulparîkane, kwarîm. Tî mujtîtkas puhstîm. Uspane sun tîkanain mai. 13 Inkwa pira tînta nuppaintawane, uspa mîtsal kwail kiarît aizpa putchã pi suhkanain mai. Uspane kîma kwirîtkanain mai. Diosne usparuza tîlkwilta pailta payukima kuhnarît mîjananazi. 14 Adánpa pampa pashpa kawiara. Seis kwal kawiarawane, Enocne kawira. Usne Dios ussa înintu aizpa ka kainara: “Anpatta iztau. Usne kwisha akkwan ángelkasa aanazi. 15 Wan awaruza ‘kwail kiari’ kiznanazi, wan kwail awaruz kwail kiarît aizpa piankamanapa. Uspa kwail kal kiashimtu aizpa minñamtuasmin, sun Diosta pianchiruzne Diosta aliz pararît.” 16 Uspane kutkuat kit watsal uzamtuchi. Chiwazha kwail kin pashiamtu aizpa kiamtu. Pit parakane, uspane “wan pianmakpas” minñamtu. An katsamikara an watsal pit paraamtu, uspa pashimtu aizpa kianapa.
Kurunta aizpa
17 Na pashimturuz, mîrain. Au Anpat Jesucristowa înintaruz kaizta aizpa nîjkularain. 18 Ka kizara: “Minpa payura kwailtuzne Dios îninta aizpa kiashimanazi. Wan tuntu kwail minñashimtu aizpa kianazi.” 19 Sun awaruzne wantuza paimpa îninnamtu. Apas awakanain minñamtu akwa, uspane Dios Izpulta pianchimanazi. 20 Na pashimturuz, mîrain. Dios kaizta aizpa nîjkulara akwa, une uruza an tînta kulninnarain. Diosta paikukane, Sînam Izpulne uruza kiwainanazi, nil paikuanapa. 21 Dios aumîza pashinamtu akwa, aune us kaiztu aizpa nîjkulmîztawamakpas. An Anpat Jesucristone aumîza wat kiwainanazi. Us kailtu payu taizka, aune uskasa pailta payukima uzanawas. 22 We nîjkulturuza kiwainat kit kurunarain, ñanta kwail kiamanpa. 23 Mamaztuza ïntas ukkanarain, ïnta pakkamanpa. Mamaztuza wat kiwainarain. Uruzmin kwira kirain, uspa kwail kiamtu aizpa piankamamanpa. Uspa kwail kiarît aizpa pil pïnkanain iztît mai. Uspa pil pïn akwa sasachi, pil pusmanpa, uspa kwail nua kwakmanpa.
Minpa Pit
24-25 Au Diosne, maza Dios i. Au kwailtas watsammikane aumîza kiwainshinai, kwail kiamanpa. Aumîza kwail sînam sarît akwa, Diosne paiña kai iztukin aumîza mîlnashinanazi, us iztukin watsal kulanapa. Au Anpat Jesucristo akwa, aune Diosta “kwisha wari” kiztawamakpas. Usne, katsa îninmikakanain wantuza pailta payurakima îninnanazi. Pailti.
Diosne awaruza Jesúspa piankamninnamtu
1 Diosne an pit Jesúspa paranintît, paiña kiwaintuz mamin kirîmtu aizpa piankamanapa. Nane Juan mun ish. Diosne paiña ángel nawa îninta, Diosta nîjkulturuz an pit piankamanapa. 2 Nane watcha na izta aizpa pînkîhta parau. Dios pitkas Jesucristo kaizta aizpakas pînkîhta parau. 3 Diospa pit pînkîh iztumikane, Dios kaizta aizpa mîshimtumikane, an pit parît aizpa kishimtumikane, watsal kulnazi. Sun watsal payu taiznapain i.
Juanne siete iglesiaruza panamtu
4 Nane Juan mun ish. Nane, uruza, siete iglesiaruza Asia sukin uzturuza panamtus. Diosne uruza kiwainashimtu, kalpain uzanapa. Usne ñamin uzta. Makas uztu. Kwiztakas uznazi. Diospa Sînam Izpulne siete impilkanain aiz kit uruza kiwainashimtu, wat uzanapa. 5 Jesucristokas uruza wat kainashimtu. Usne an ñancha irîttas kuhsaktamika azi. Mamasa imanazi. Usne wan au sukin înintuzkin an tînta i. Cristone aumîza pashinat kit au kwail akwa irît. Cristo au akwa irît akwa, paiña aimpi akwa, usne au kwail kiarît aizpa sînam sanat kit aumîza chîhtnara, kwail kiamanpa. 6 Usne aumîza wanmakninnara, uskasa îninnanapa. Usne aumîza pariya namninnara, paiña Taitta Diosta kiwain kit paikuanapa. Awane Diosta “us kwisha wari” kizarawa. Usne an surakas wan awaruzakas pailta payurakima îninnashina. Sunkana kirînazi. 7 Cristone wanishkasa anazi. Wan ussa nîjkultuchiruzne ussa izanazi. Ussa piantarîttuzkas wan suras awaruzkas uspa kwail kiarît akwa, us akwa ishkuat kit tînta azanazi. Sunkana kirînazi. 8 Anpat Diosne, wan kishitmikane, nawa ka kaizta: “Nane ñamin uztau. Minpa payukima uznash. Nane ñamin uztau. Makas uztus. Kwiztakas kailnash,” kizta.
Juanne kainkizparakanain Cristora izta
9 Nane Juan mun ish. Nane uwa aimpihshkanain ish. Au Jesústa nîjkulamtu akwa, aune naiztumakpas, Dios wanta anuppanakima. Jesús aumîza kiwainamtu akwa, wan naizmu tailchashimtumakpas. Dios pit parît aizpa kainarawane, Jesús kaizta aizpa kainarawane, awane nawa Patmos sura îaninta, sîpninnapa. Sun sune pi paizkakin uzta. 10 Diospa Izpulne Domingo payura nawa piz kit kainkizparakanain izninta. Nane ap punsîhman tînta paramtumikasha mîrau. Usne tînta parat, iru kwil ustukanain. 11 Usne nawa ka kaizta: “Nu kainkizpamtu aizpa pînkîhta parawa. Pînkîhta parawane, sun pînkîhta nîjkulturuza Asia sukin uzturuza îninnari. Sun pînkîhta Efeso pîpulurakas, Esmirna pîpulurakas, Pérgamo pîpulurakas, Tiatira pîpulurakas, Sardis pîpulurakas, Filadelþa pîpulurakas, Laodicea pîpulurakas îninnari.” 12 Nane ap punsîhman izpujiarau, paramtamikasha izna. Puij izkane, nane siete uru impil put panatkana iztau. 13 Siete impil uru panat paizkakin nane Cristora, maza awakanain iztau. Paiña pïnne aks mittîrakima kwarît. Usne paiña pechokin uru tît iptît. 14 Paiña ashne putchã pimpuhkanainkas putchã wanishkanainkas iztît. Paiña kasune ïn aiztukanain iztît. 15 Paiña mittîne iru aiztîtkana iztît. Paramtuasmin, usne paiña pitpara tînta kwianta, katsa pi aztukanain. 16 Usne paiña numal chihtîkasa siete kîma pizta. Pa matsîh tiz mashtine paiña pittas puzta. Paiña matsîhne pãn tînta maltukanain kwisha watsal aizta. 17 Ussa iztawane, nane irîtkanain paiña mittîkin wakpuj waintau. Sunkana usne paiña numal chihtîkasa nawa pat kit kaizish: “Ishkumun. Wan sarachasmin, nane an ñancha uztau. Minpa payurakima uznash. 18 Makas uzmika ish. Pailmanash. Na irîtkanain tuatkas, mane pailta payukima ka uzish. Awa irîka, nane awaruza iarînpa îninnamtus. Nane Dios nîjkultuchiruza, irît izpultuza, ïnta îninnat kit sua watsarît mîjash, sun uzmura uzanapa. 19 Nu iztît aizpakas, sun ma kimtu aizpakas, sun kwizta kirîmtu aizpakas, pari. 20 Nane an puintît kamtarît aizpa nua piankamninnash. Nune ap numal chihtîra siete kîmakas, siete uru impilkas, izta. Siete kîmane ángelkana mai. An siete kainammtuzne, Diosta nîjkulturuza, siete pîpulura uzturuza, kainanamti. Siete impil panamne siete iglesiakana mai.”
Juanne pînkîh pat kit siete iglesiara sun pit îninnara.
Paiña pit Efeso pîpulura uzturuza îninnamtu
21 Cristone “na nua kaiztu aizpa Efeso pîpuluwa kainammmikasha pari,” kizta. Ka parît: Nane ap numal chihtîra siete kîma piztus. Nane siete uru impil panam paizkakin chamtus. Sun pitmin Diosta nîjkulturuza kainanari. Usne ka kaizta: 2 Wan u kiamtu aizpakas u miza uzamtu aizpakas pianish. Une Dios akwa tînta kal kiamti, pailtachin. Ukas an kwail kimturuza pashinamtuchi. Mînpazha “aune Diospa înintuz makpas” kizamtu. Uspane sunkana chi mai. Usparuza mîmaarawane, une uspa pîrail kaiztu aizpa piankamanazi. 3 Na akwa tînta naizarakas, une tînta kal kiamîzta, pailtachin, kwaizkultachin. 4 Sunkana nane uruza kurunamtus, u pitchin we akwa. Une Diostakas ussa piantuzakas we pashinamtu. Nawa an ñanchakanain pashiamtuchi. 5 Ka akwaizna, une an ñancha kiara aizpa nîjkularain. Mane sun kal kimtuchimai. Umin maiztain, an ñancha kal mamasa kianapa. Uruzpain maizamtukine, Diosta mamasa mîamtukine, nane mamasa anpain ish, uruza pailninnana, up impil nakana. 6 Na sun kiznamtukas, une wat minñamtu. Une Nicolaítas awaruzakas, awa mamaztuza kwail kininturuzakas, aliz paranamtu. Nakas kawarain usparuza aliz paranamtus. 7 Mîshitmikane Diospa Sînam Izpul kaizta aizpa mîrain. Usne wan wanmakmuruza iglesia yalkin ka paranamtu: “An sukin kwail kirît aizpa anuppamturuzne Dios iztakin watsal uzanazi.”
Paiña pit Esmirna pîpulura uzturuza îninnamtu
8 Cristone ka kaizta: “Na nua kaiztu aizpa Esmirna pîpuluwa kainammmikasha pari,” kizta. Ka parît: Wan sarachasmin, nane an ñancha uztau. Minpa payurakima uznash. Nane irau. Mamasa uztau. Sun pitmin Diosta nîjkulturuza kainanari. Usne ka kaizta: 9 Nane u naizamtu aizpa pianish. U puizaruzkana uzamtukas, wan pianish. Uspa uruza sun kiamtukas, une kwazpa awa mai, Diosta pain akwa. Judío awaruzne uruzpa kwail paramtu, uspa Diosta pianchi akwa. Uspane Satanásta kanpaamtu. 10 Mamaz payura naizamtu aizpa ishkuman. Satanásne mînpazharuza kajchira sîpninnanazi, uruza kwail kianapa. Akkwanchin payukimain naizanazi. Watsal uztain, inakima. Suasne nane uruza chiyura pailta payukima uzninnanash. 11 Mîshitmikane Diospa Sînam Izpul kaiztu aizpa mîrain. Usne wan nîjkulturuza iglesia yalkin ka paranamtu: “An sukin kwail kirît aizpa anuppamtumikane ïnta naizmanazi.”
Paiña pit Pérgamo pîpulura uzturuza îninnamtu
12 Cristone ka kaizta: “Na nua kaiztu aizpa Pérgamo pîpuluwa kainammmikasha pari,” kizta. Ka parît: Sun pitmin Diosta nîjkulturuza kainanari. Pa matsîh tiz mashti mîjmikane ka kaizta: 13 U kiamtu aizpa pianish. Une Satanás înintukin, awa kwail kiamtukin, uzamtu. Une nawa wat nîjkulat kit na kaiztît aizpa kiamtu. Awane, u pîpulukin, Satanás uzkin, ap nil kaizmumikasha, Antipasta piantaara. Ussa piantaarakas, une nawa nîjkulamîztu. 14 Nawa nîjkulamtukas, nane u kwail kiarît aizpa kainanash. Mînpazha ukasa uzmumikane Balaam kamtara aizpa nîjkulat kit ñanta kiamtu. Balaamne Balacta kurunta, Judío awaruz kwail kianapa. Suasne Balacne Judío awaruza îninnara, awakana sarît uzkin kumira unara aizpa kuanapa. Suasne Balacne usparuza mamaz ampuwa ashampakasa pitnapa îninnara. 15 Nicolaítas awakas u uztukin nilchi kamtanamtu, mamaztuza kwail kininnanapa. 16 Ka akwaizna, u kwail kiamîztu aizpa maintain. U kwail maintukine, nane u tukin anash, ap mashtikasa waya kin, uruza ilnana. 17 Mîshimtumikane Diospa Sînam Izpul kaiztu aizpa mîri. Usne wan wanmakmuruza iglesia yalkin ka panamtu: “Nane an sukin kwail kirît aizpa anuppammikasha Dios puintît mîj aizpa mîlanash, watsal uznapa. Nane masas mun putchã ukta panarît ussa mîlanash. Uk saptamikain sun munmin piankamnazi.”
Paiña pit Tiatira pîpulura uzturuza îninnamtu
18 Cristo ka kaizta: “Na nua kaiztu aizpa Tiatira pîpuluwa kainammmikasha pari,” kizta. Ka parît: Nîjkulturuzakas, uspa îninmumikarakas panari. Sunkana Dios Painkulne, kasu ïn aiztukanain wajmikane, iru mittî naztam aiztukanain wajmikane ka kaizta: 19 Nane u kal kiamtu aizpa pianish. Nune nawa pashiamtu aizpa pianish. Nawa nîjkultaruza pashiamtu aizpa pianish. Nawa nîjkulamtu akwa, une mamaztuza kain kiwainamtu. U naizamtukas, Diospa kal kiamîztui, maza payu marachin. An ñamin ap kal kiarakas, mane an akkwan wat kal kiamti. 20 U kwail kiamtu aizpa kainanamtu. Uruzne ashampa Jezabel kwail kamtamtu aizpa kain mîamtuchi. Us Dios kaizta aizpa pian ish kiztuasmin, pîrail kaiztu. Ap kiwainmuruza nilchi mîninnamtu. Nawa nîjkulturuza nilchi kamtanamtu, awakana sarît uzkin kumira unara aizpa kuanapa, ampu mîj ashampakasa pittanapa. 21 An ñamin ussa kuruntau, paiña kwail kimtu aizpa chîhkanpa, Dios kaiztu aizpa mînapa. Usne wan tuntu kwail kimtu aizpa chîhkashitchi. 22 Ka akwaizna wan tuntu kwail kimtu aizpa chîhkashitkine, nane ussa kamarain ishninnash, ishtu tuanpa. Wan tuntu kwail kiamturuzkas sun ashampakasa kwisha naizarînazi, sun kwail chîhkashitchi akwa. 23 Nane sun ashampawa kamtamtu aizpa mîamturuza ininnanash. Suasne wan nawa nîjkulturuzne na uruza kaiztu aizpa piankamanazi. Nane wan awa minñamtu aizpa pianish. Na wan awa minñamtu aizpa pian akwa, na wan awa kiashimtu aizpa pian akwa, nane wattuzakas watsal kininnanash, wat kiarît akwa. Kwailtuza kwail kininnanash, kwail kiarît akwa. 24 Anpattuzkas ukasa Tiatira pîpulu uztuzkas, sun Jezabelpa kwail kamtam mîarachi. U wan Satanás kamtamtu aizpa mîamtuchi akwa, nane mamaz pit uruza kurunamtuchish. 25 Mane sun pit kurunamtus. Sun pit mîarît aizpa nîjkul kit watsarain, na amtu payukima. 26 Kwailta anuppamtumikane, ap kal kimtumikane nakasa wan awaruza îninnanazi. 27 Ap Taittane nawa sun kal chîhkash, awaruza îninnanapa. Sunkanain uruza sun kal chîhkananash, awaruza îninnanapa. Uspane wan awaruza tînta îninnanazi, nu kaiztu aizpa kianapa. Mîamtukine, uspane usparuza anuppananazi, iru tîkasa pailta kîzpiantukanain. 28 Maza kîma kînmîzka, naztam aizmu. Nane anuppamtumikasha sun kîma aiztukanain namninnash, awa us akwa wat minñanapa. 29 Mîshimtumikane Diospa Sînam Izpul kaiztu aizpa mîri. Usne wan wanmakmuruza, nîjkulturuza paraanamtu.
Paiña pit Sardis pîpulura uzturuza îninnamtu
1 Cristone ka kaizta: “Na nua kaiztu aizpa Sardis pîpuluwa kainammmikasha pari,” kizta. Ka parît: Nîjkulturuzakas uspa îninmikarakas panari. Sînam Izpul mîjmikane, paiña kiwainmumikasha siete iglesiara înintumikane, siete kîma mîjmikane ka kiztu: Wan kimtu aizpa pianish. Une u uzamtukin “Diospa kaiztu aizpa wat kipuspas” kizamtui. Diosta pianchi akwa, une irît awakanain uzamtu. 2 Izkultain. Wan awaruza kiwaintain, nukkulturuz Diostas puzamanpa. Ap Diosne iz kit u kiamtu aizpa pian. U Dios iztukin we kal kiamtu aizpa pianish. 3 An ñamin u nîjkularît aizpakas u mîarît aizpakas nîjkultain. Sun pit mîarît aizpa nîjkultuasmin, une sun pit kiarawa. U kwail kiamtu aizpa chîhkat kit Diosta kaiyarawa. Na kaiztu aizpa mîamtukine, nane u uzkin maza walkumkanain kainarachin anash, uruza ilnana. Une na amtu payu pianchimai. 4 Mînpazha Sardis pîpulura uztuzne kwail kiamtuchi. Sun kwail kimtuchiruzne sînam pïn kwakanain mai. Uspa kwail kiarachi akwa, uspane putchã pïn sappat kit kwaanazi, nakasa uzaanapa. 5 Kwailtas anuppamturuzne putchã pïn sapkwaanazi. Dios uspa mun chiyura pînkîhta panarît akwa, nane uspa mun chiyura pînkîhta kwiztamanash. Nane Ap Taitta uzkin paiña ángeltuzkasa an awaruza pianish kiznash. 6 Mîshimtumikane Diospa Sînam Izpul kaiztu aizpa mîrain. Usne wan wanmakmuruza nîjkulturuza paraanamtu.
Paiña pit Filadelþa pîpulu uzturuza îninnamtu
7 Cristo ka kaizta: “Na nua kaiztu aizpa Filadelþa pîpuluwa kainammmikasha pari,” kizta. Ka parît: Nîjkulturuzakas uspa îninmikashakas panari. Dios sînam mikane, watchain kaiztumikane, Davidwa llave mîjmikane, sun pit kainanamtu. Cristo tînta akwa, us pîjta sîptane, mamazne chîhtsachi, awa chiyura nappanapa. Us pîjta chîhttane, mamazne sîpsachi, awa chiyura nappamanpa. 8 Nane u wan kiamtu aizpa pianish. Ap kal kiamtuasmin, nawa we nîjkulamtukas, une ap pit mainñarachi. Une nawa mîara. Ka akwaizna nane u matsîhkin chîhtît pîjta mîjash, Dios pit awaruza kainanapa. 9 Anpane Satanásta kanpaanazi. “Aune Judío awa makpas” kizamtukas, uspane pîrail kaizamtu, nawa kanpaamtuchi akwa. U nawa piankamamtu akwa, nane usparuza u uzkin wakpuj wainñana îninnanash, na uruza pashinamtu piankamanapa. 10 Tînta naizamtuasmin, une ap pit uruza îninta aizpa nîjkulat kit watsat mai. Ka akwaizna sun payu taizka, nane uruza watsashinash, na kaiztu aizpa mainmanpa. Sun naizamtu payura taizkane, wan awa an su uzturuzne naizarînazi. Suasne nane nîjkulamtuchiruza uspa kwail kiarît akwa ilnanash. 11 Masakin anash. Sun pit mîarît aizpa min kit watsarain, Dios kin namta aizpa kamanpa. 12 Nane kwailta anuppamturuza tînta awakanain namninnanash, ap Diospa yal saktîkanain. Uspane Dios yalkis mizurainkas puzamanazi. Nane ap Diospa mun usparuza pananash. Diospa pîpulu muntîtkas usparuza pananash. Sun chiyuras masas pîpulune Jerusalén munta. Nakas ap masas mun usparuza pananash. 13 Mîshitmikane Diospa Sînam Izpul kaiztu aizpa mîri. Usne wan wanmakmuruza, nîjkulturuza paranamtu.
Paiña pit Laodicea pîpulura uzturuza îninnamtu
14 Cristo ka kaizta: “Na nua kaiztu aizpa Laodicea pîpuluwa kainammmikasha pari,” kizta. Ka parît: Nîjkulturuzakas uspa îninmikarakas panari. Sun pit kaizmumikane watchain kaiztu. Sun watcha paramtumikane Diostas azi. An su samtuasmin, Diosne us akwa wan sarît. 15 U wan kimtu aizpa pianish. Masetne une Diablo miwara chashiamtu. Masetne une Cristo miwara chashiamtu. Nane uruza kurunnamtus, maza mi naanapa. 16 Diablo mikas Cristo mikas naashitchi akwa, nane uruza kwainarînash. 17 Une “kwazpa makpas” kizamtu. “Au kiamtu aizpa wari” kizamtu. “We chi mîjmakpas” kizamtu. Sunkana nane uruzakas kaiznamtus. Une wat kulamtuchi mai. Tapail mai. Puiza mai. Kasu kai chikanain mai. Piltîm awakanain mai. Wat nîjkulamtuchi mai. 18 Ka akwaizna nawa sairawa, u we mîj aizpa sappanapa. Sunkana kitpa. Nane uruza kurunnamtus, ap uru ïn ainnarît mîj aizpa painapa, watcha kwazpa awakanain namanapa. Putchã pïn na mîj aizpa paizha, kwaanapa, piltîm uzamanpa, mîtsal kiamanpa. Kasu pih na mîj aizpa paizha, kasura nînapa, kasu kai panapa. 19 Nane wan nawa pashimturuza kurunamtus, kwail kiamanpa. U na kuruntu aizpa mîmtukine, usparuza ilnanash. Ka akwaizna tînta kulnintain. U kwail kimtu aizpa masain wan maintain, Dios miwara îanapa. 20 Mîrain. Nane pîjtakin akwanat kit awaruza sainamtus, awakas aanapa. Mînpazha ap pit mîrane, sun pîjta chîhtkane, nane us uzkin napnash, uskasa uzan. Uskas nakasain izmuruzkanain kwasan. 21 Nane kwailta anuppamturuza na înintukin nakasa uzninnanash. Nakas wan kwailta anuppanarau. Ka akwaizna ap Taittane us înintukin nawa uzninta, uskasa îninna. 22 Mîshimtumikane Diospa Sînam Izpul kaiztu aizpa mîri. Usne wan wanmakmuruza iglesia yalkin panamtus.
Chiyura wantuzne “Diospa kwisha wari” kizpusi
1 An kwiztane chiyura iztuasmin, nane pîjta chîhtît iztau. An ñancha nakasa paramtumikane mamasa nakasa iru kwil ustukana tînta paranarît. Usne nawa ka kizta: “Apa nuri. Nane nua kwizta chiwazha kiarîmtu aizpa annash,” kizta. 2 Sun urain Dios Sînam Izpulne nawa piz kit na kainkizpamtu aizpa izninta. Sun urain nane chiyura katsa mikwa uzmu iztau. Mazane, Diosne, sun katsa mikwa înintukin uzta. 3 Sun uzmikane jaspe maiza ukkanain iztît. Kwanam cornalina maiza ukkanain iztît. Sun pikamta mikwa uzmu îsalta panainta. Pijtammin wirît, esmeralda ukkanain naztam iztît. 4 Mikwa uzmukin mamaz veinticuatro uzmu salpînwal uzarît. Veinticuatro îlaparuzne putchã pïn kwaksham kwaat kit sun uzmura uzarît. Uspane uru chutta kîzpura ijmu sarît. 5 Diospa uzmukis ïnkanain iztît puztît. Dios parakane, ippa parît. Paiña matsîh uzmukin siete impil putpanarîtkanain aiztu. Diospa Sînam Izpulne siete impilkanain iztît. 6 Paiña matsîh uzmukin maza katsa sînam pikanain iztît. Ampara uztuzne paiña uzmukin salpînwal kunarît. Nane uspa kîzpukin punsîhmalkas kînijmalkas akkwan kasu waj iztau. 7 An ñancha uzmikane katsa ishukana iztît. Mamaz uzmikane wakara ampukanain iztît. Mamaz uzmikane paiña matsîh awakanain waj iztît. Minpara uzmikane katsa wam pîltukana iztît. 8 Wan ampara uztuzne seis ilsîh waj. Wan seis ilsîh wajtuzne akkwan kasu wajsuh pain. Payukas amtakas chîhkatchin ka kizara: “Diosne katsa îninmika i. Wan awaruzne ussa wakpuj waiñarawa, sînammika akwa. Wan sarachasmin, usne uzta. Makas uzi. Mamaz payukas kailnazi.” 9 Sun uztuzne ussa “kwisha wari” kizat kit “aishtaish” kizara. Pailta payu uzmikasha wakpuj wainñara. 10 Ampara uztuz “Dios kwisha wari” kizarawane, veinticuatro îlaparuzne îninmika uzkin wakpuj wainñat kit pailta payu uztumikasha “kwisha wari” kizara. Uspa uru chutta wizpizat kit paiña uzmukin sua taat kit ka kizara: 11 “Nune kwisha wari. Nune au Anpat Dios i. Wan chiwal sarîtmika akwa, nune tînta i. Wan chiwal sashimtu akwa, nune wan sara. Ka akwaizna wan awane nua ‘kwisha wari’ kizarawa.”
Pînkîh parît aizpakas pîrikukas
1 Suasne Diosta us uzmukin uztu iztau. Usne paiña numal chihtî pamans parît iptît pînkîh mut kit uzara. Sun iptît pînkîh sietekima pustît. 2 Maza tînta ángeltakas iztau. Usne tînta ka mîmara: “¿Mînma wat awa an iptît pînkîh nakpiz kit izshinasa?” kizta. 3 Mînminkas chiyuraskas, mînminkas pilmal uztuzkas, mînminkas pil ayuktaskas iptît pînkîh nakpizmanamtît. Mînminkas pînkîhta parît aizpa izmanamtît. 4 Mînminkas pînkîhta nakpizna saimanamtît. Mînminkas sun pînkîhta iztuchi akwa, nane tayal kit tînta aztu arau. 5 Mazane îlaparuztas nawa sunkana kaizta: “Anneme azmun. Izti. Cristone, ishu muntîtmikane, at kit paiña aliztuza anuppanara. Judáwa kwalkas îninmika Davidwa kwal i. Sun iptît pînkîhne sietekima pusta. Usmin nakpiz kit izshinai,” kizta. 6 Nane sun pîriku tîrîtkana Dios îninmu uzkin iztau. Usne ampara uztuz uzkinkas, îlaparuz uzkinkas kunta. Usne siete pulkas siete kasukas waj. Paiña kasu Dios sînam Izpulkanain iztît i. Paiña kasune wan sura iznamtu. 7 An Pîrikune Dios uzkin ît kit paiña numal chihtîkis sun iptît pînkîh sapta. 8 Iptît pînkîh saptawane, ampara uztuzkas veinticuatro îlaparuzkas Pîriku kunkin wakpuj wainñara. Uspa wantuzne guitarrakanain mumazi. Uru wazkas, tî puzpi inciensokana impaktamtu mumazi. Nîjkulturuz Diosta paikukane, uspa paikumtu aizpa tî puzpi inciensokana iztît. 9 Uspane masas kanta kaiz kiara: “Nune sun iptît pînkîh sap kit sun pînkîh sietekima pustît nakpiz kit izshinai. Nu au akwa piantarît akwa, up aimpi puzta akwa, Diosne wan awaruza mamaz pit paramtuza, kwailtas painara, awa kwail kiarît aizpa sînam sananapa, Dioskasa uzanapa. 10 Nune usparuza akwanara, pariya namanapa, Diospa kal kianapa. Nune usparuza uspa kal chîhkanazi, an sukin îninanapa.” 11 An kwiztane nane akkwan ángeltuza mînat kit iznarau. Sun ángeltuzkas, sun ampara uztuzkas, sun îlaparuzkas katsa mikwa îninmukin salpînwal kunarît. Akkwan ángel pura akwa, nane mizurainkas wiansachish. 12 Uspane ka tînta paranara: “An Pîrîkune au kwail akwa irît akwa, aune sunkana kaizarawamakpas: ‘Usne wantuza îninnashinai. Wan chiwal pian i. Wan chiwal mîj. Tînta mika i. Awa us kaizta aizpa mîarawa. Usne wari’ kizarawa.” 13 Nane wan chiyura uztuzakas, an pilkin uztuzakas, pil ayukta uztuzakas, wan pira uztuzakas mîrau. Sunkana kanta kaizara: “Katsa îninmukin uztumikashakas Pîrikurakas ‘uspa paas kwisha wari’ kiztawamakpas. Uspa kaizamta aizpa mîarawamakpas. Uspa paas tînta wai i. Pailta payukima ‘kwisha wari’ kizarawamakpas.” 14 Ampara uztuzkas ka kizara: “Uspa kaizara aizpa watcha i,” kizara. Sun veinticuatro îlaparuzkas Dios uzkin wakpuj wainñara.
Siete pustît pînkîh
1 Suasne, nane Pîrikura, maza sieteras pustît pînkîhta nakpiztamikasha, iztau. Suasne nane maza ampararuztas uztumikasha iztau. Usne ippa aztukanain nawa ka kaizta: “Apain at,” kizta. 2 Na iztuasmin, nane putchã caballo iztau. Caballora uzmikane chihtîra tiznam mura. Uru chutta saptawane, sun mikwane waya kin îrît, wantuza anuppanana. 3 Pîriku paas sieteras pustît pînkîhta nakpiztawane, nane paas ampararas uzturuz kaizta aizpa mîrau. “Apain at,” kizta. 4 Na iztuasmin, suasne mamaz kwanam caballo amtu iztau. Katsa mashti saptawane, caballora uzmikane au sukin îrît, awa usparuzkasain waya kit kit usparuzpain piantaanapa, kalpain uzamanpa. 5 Pîriku kutña sieteras pustît pînkîhta nakpiztawane, nane kutña ampararas uzturuz kaizta aizpa mîrau. “Apain at,” kizta. Na iztuasmin, maza tîlkaya caballo amtu iztau. Caballora uzmikane yawa ustakas anizna chihtîra mîlta. 6 Nane ampara uztuz paizkakin maza kaiztumikasha mîrau. Akkwan kumira wachi akwa, sunkana kizta: “Maza payu kal kit pialkasa tarawai, maza kilo chara pippa sapna. Maza payu kal kit pialkasa tarawai, kutña kilo cebada pippa sapna. Olivos pippa tîrakas wankail pippa tîttakas kwail kimun.” 7 Pîriku ampara sieteras pustît pînkîhta nakpiztawane, nane amparamika ampararas uzturuz kaizta aizpa mîrau. “Apain at,” kizta. 8 Na iztuasmin, maza naram caballo amtu iztau. Caballora anuzmikane “irît” muntît. Paiña kwizpa mazane irîttas azi. Uspane su kakwa wemin awa uztukin îninnashinai, usparuza piantanapa. Mazantuzne waya kiat kit iara. Mazantuzne yak kiat kit iara. Mamaztuzne ishtu kiat kit iara. Anpane kalpa kwarît akwa iara. 9 Pîriku cinco sieteras pustît pînkîhta nakpiztawane, nane irît izpultuza iznarau. Dios pit akwa, awane usparuza piantanara. Uspa pit mamaztuza kaiznara akwa, awane usparuza piantanara. Uspane Diospa incienso misharî pulaman purara. 10 Usparuzne tînta kaizara: “Nune au Anpat Dios i. Watcha mika akwa, wat nil kimtui. ¿Miza urama an sukin uztuza mîmanash, uspa kwail piankamanapa? Aumîza piantamtu akwa, ¿Miza uruma usparuza naizninnanazi?” kizara. 11 Suasne putchã pïn kwaksham wan usparuza mîlanara. “Akkwan payuchikima kwaizkultain,” kiznara. Mamaz aimpihshtuzne, mamaz Cristora kal kiwaintuzne iarînazi. Kwail awane uruza piantamtukanain usparuza piantananazi. Sun payura kwaizkul kit tîriztain, wan pailnakima. Suasne Diosne kwailtuza naizninnanazi. 12 Pîriku seis sieteras pustît pînkîhta nakpiztawane, nane wan iz kit tînta ulpiantu maztau. Pãnne tîlchakta parît, tîlkaya pïnkanain. Wan intiruz palapchane kwanam aimpikanain parît. 13 Wan kîmane chiyuras pilta taizara. Tînta inkwa parane, tî ulpiantane, pippa wane, wan pippa pilchukas taizarîm. Sunkana kîmane taizara. 14 Chiyune maiz kit karît, maza kîh nulsapiztîtkanain. Wan înkalkas wan su pi paizkakinkas uspa uzmukis maizarît. 15 An sukis katsa îninmuruzne katsa uk kultakas înkal pilchirarakas îara. Wan awaruza înintuzkas, kwazpa awaruzkas, suldarura înintuzkas, tînta awaruzkas, kiwaintuzkas, anpat mîjchiruzkas ishkuat kit sun kulta kulana îarît. 16 Uspane înkaltakas katsa uktakas ka kaiznara: “Aumîza taizarain. Aumîza kulanintain, Dios paiña uzmukis aumîza izmanpa, Pîriku aumîza naizninnamanpa. 17 An tînta naizninamtu payu me taizta. Sun payu mînminkas tailchasachi.”
Diosne paiña kiwainmuruza watsananazi
1 An kwiztane nane ampara ángeltuza pianamal sukin uzara iztau. Uspane ampara tînta inkwa mîjazi. Uspane wan inkwa surakas pirakas, tîrakas nuppainintuchi; panintachi mama. 2 Suasne nane mamaz ángel pãn puzmuras amtu iztau. Paiña chihtîkin Diospa pînkîh pam mura, Dios akwa panapa. An Diosne watcha uz. An ángelne ampara ángeltuza tînta kwianara. Usne usparuza îninnara, surakas pirakas wan kwail kianapa. 3 Ka kaiznara: “Au Diospa kal kiwaintuza uspa kînijkin Diospa mun panamtuchi akwa, piltakas pirakas tîrakas kwail kiman,” kiznara. 4 Awa kînijkin Diospa mun panarîttuza wianta. Wan Israel painkulpa kwaltuza wiantawane, 144.000 wianta. 5 Pailta uspa kwal Diospa mun panat kit ka wan wiannara: Judáwa kwalkas 12.000 wianta. Rubénpa kwalkas 12.000 wianta. Gadpa kwalkas 12.000 wianta. 6 Aserpa kwalkas 12.000 wianta. Naftalíwa kwalkas 12.000 wianta. Manaséspa kwalkas 12.000 wianta. 7 Simeónpa kwalkas 12.000 wianta. Levíwa kwalkas 12.000 wianta. Isacarpa kwalkas 12.000 wianta. 8 Zabulónpa kwalkas 12.000 wianta. Josépa kwalkas 12.000 wianta. Benjamínpa kwalkas 12.000 wianta.
Akkwan awa putchã pïn kwaarît
9 Suasne nane akkwan awa iznarau. Wan suraskas, wan kwaltaskas, wan pîpuluraskas aara. Wan pit param piantuzkas aara. Uspane Dios îninmu uzkinkas Pîriku kunkinkas sua punak kit kunara. Wanta wiansachi, pîna akkwan akwa. Putchã pïn kwaksham kwaat kit kanarî kîh chihtîra muara. 10 Uspa wanne ka tînta kwianara: “Au Diosne us îninnamkin uzi. Uskas Corderokas aumîza watsat mîlnara.” 11 Wan ángeltuzkas veinte y cuatro îlaparuzkas ampara uzmuruzkas Dios îninmu uzkin salpînwal kunarît. Uspane paiña îninmu uzkin wakpuj wainñat kit uspa kînij pilta paltuarît. Wakpuj wainñamtasmin, Diosta ka kaizara: 12 “Sunkana kirînazi. Usne kwisha wari. Usmin wan pian i. Diosta aishtaish kiztain. Us kaizta aizpa mîarawai. Usne wan chiwal kishinai. Usne tîntamika i. Au Diosta pailta payukima ka kiztain. Sunkana kirînazi.” 13 Mazane îlaparuztas nawa ka mîmara: “Sun putchã pïn kwaksham kwaarîttuzne ¿Mînma mai? ¿Mîntasma aazi?” kizta. 14 Nane ka sînkarau: “Ap Anpat, nune pian.” Usne nawa ka kaizta: “Uspane tînta naiztu payura tailchaat kit anuppaarît, mamaz payura maizamanpa. Uspa pïn pattara, uspa kwaksham pïn an putchã namanapa. Pîriku uspa akwa irît akwa, Diosne uspa kwail kiarît aizpa sînam sashina, pïn an putchã kultukana.” 15 “Ka akwaizna, uspane Dios îninmu uzkin purai. Payuwarakas amtawarakas paiña yalkin ussa kiwainat kit wakpuj wainñamtu. Usne paiña îninmu uzkin uzi. Usne usparuza iznat kit watsanamtu. 16 Uspane yak kiamanazi. Kwazi kwashiamanazi. Pãnne usparuza pakmanazi. Pãnne usparuza ïn malnamanazi. 17 An Pîrikune Dios îninmu uzkin uzi. Usne pîriku izmumikakana wantuza iznanazi. Usparuza wat miwara îninnat kit usparuza wat iznanazi, pailta payukima chiyura uzanapa. Diosne uspa kappi puztît aizpa sînam kihat kit usparuza an tayalninnamanazi.”
Siete pînkîhta pustît nakpiz kit chîhtu
1 Pîriku siete pînkîhta pustît nakpiztawane, chiyura paizka urakima kalpain parît. 2 Suasne siete ángeltuza iznarau. Dios iztakin kunamtuasmin, Diosne usparuza pakaish pakaishta iru usmu kwil mîlanarît. 3 Suasne mamaz ángelne sua pianat kit uru wazta inciensokasa mut kit incienso impakmu misharîkin kunta. Sun uru misharî Dios îninmu uzkin uzta. Akkwan incienso wazta win kit ussa mîlara, sun misharîra impaktanapa. Diosta piantuzne Diosta paikuat kit inciensokas misharîra unara. 4 Ángelne sun incienso impaktarît ishkas, Diosta piantuz paikuamtu aizpakas Dios uzta nuninta. 5 Suasne usne uru waz inciensokasa chihtîra mut kit misharîras imchaj ïn ukkat kit uru wazta winta. Imchaj ïn inciensokasa uru wazta wintawane, au sura kiakpînta. Suasne ippa ïn taiztat kit ippa tînta azta. Pil ulmalmukas tînta ulmalta.
Iru usmu kwil
6 Siete ángeltuzne, iru usmu kwil mîjtuzne, iru kwil watsat kit kunara, iru kwil usna. 7 An ñancha ángelne paiña iru kwil usta. Iru kwil ustawane, ainki tîh hielokas, ïn aimpikas kajaram an sura taizara. Akkwan su, kakwa chi sukanain impaktarît. Sua kakwa chin tîkas, kakwa chin pîtkas impaktarît. 8 Mamaz ángelkas paiña iru kwil usta. Ustawane, katsa înkalkana ïn aiztukanain ñam pira taizta. Kakwa chin ñam pine aimpikanain namtît. 9 Kakwa chin pishkaru ñam pira uzta aizpa iarît. Kakwa chi kanua pira chamtu aizpa pi kwaarît. 10 Mamaz ángelkas paiña iru kwil usta. Ustawane, chiyuras katsa kîmane impil aiztukanain kakwa chi ainki pirakas, kakwa chi pi kasurakas taizta. 11 An kîmane “tain” munazi. Kakwa chin pine tain namtît. Kwazi tain namtît akwa, awa pi kuarît akwa, akkwan awane iarît. 12 Mamaz ángelne paiña iru kwil usta. Ustawane, kakwa chin pãnkas kakwa chin palapchakas kakwa chin kîmakas kwiarît. Kwiarît akwa, kakwa chin aizarachi. Kakwa chin payuwarakas, kakwa chin amtawarakas chinkas aiztachi. 13 Suasne nane katsa wam chiyura pîltu iztau. Usne tînta ka kaizta: “An sukin uztuzne naizarînazi. Uspane an tînta naizarînazi. Mamaz kutña ángeltuz uspa iru kwil usakane, an sukin uztuzne an tînta naizarînazi.”
1 Mamaz ángelne paiña iru kwil usta. Ustawane, nane mamaz kwail ángelta chiyuras pilta taizta iztau. Ángelne kîmakana iztît. Ainkih kulta kunta, kulkin uztuza îninnanapa. 2 Ainkih kulta chîhttawane, akkwan ishne katsa ïn usaptakanain puzara. Sun ish kwashpa chiyura nurawane, wan sumal ît kit pãn tîlkwil panintît. 3 Sun ishtas akkwan katsa chîhttuzne puzat kit wan suwara pîlara. Sun chîhttuzne awaruza kwaanashinai, kwisha ishanapa. Pil tuil tuil kwatkanain ishanazi. 4 Diosne usparuza pît piltakas, wan katsa pît pijtamtakas, wan tîrakas kwail kimanpa îninnara. Uspane Diospa mun paiña kînijta panarachiruza kwail kinashinai. Usparuza kwanashinai. 5 Uspane awaruza piantamanamtît. Awaruza kwaanashina, cinco mishtakima ishanapa. Pil tuil tuil awara kwatkanain ishanazi. 6 Sun payura ishamtu akwa, awa ina kwianazi. Ina wanmalmanazi. Awa iashimtukas, imanamarînazi. 7 An katsa chîhttuzne caballo waya kishimtukana izarît. Uspane uru chuttakanain ijarît. Uspa matsîh awakanain izarît. 8 Uspa ashne ashampa akskanain iztît. Uspa sularuzne ishu sulakana izarît. 9 Uspa ña iru iptîtkanain iztît. Uspa ilsîh tînta inkwakanain azmu. Akkwan carro caballo waya kin îamtukanain azmu. 10 Uspa mîrî katsa chîhpukanakas, tuil tuil mîrîkanakas izarît. Uspane uspa mîrîkasa awaruza cinco mishtakima kwail kinashinai. 11 Chîhttuza îninmumikane, ainkih kulkis ángelne, “azpiantumika” muntît. Hebreo pitta Abadón muntît. Griego pitta Apolión muntît. 12 An ñancha kwisha tayaltu payu pîntît. Mama paas kwisha tayaltu payu taiznapain. 13 Mamaz ángelne paiña iru kwil usta. Ustawane, nane uru unam misharîra Dios iztakin iztau. Ampara pul misharîmara kunarît. Sun misharîkis mînpazha paraka mîrau. 14 Sun paramtumikane sun ángel iru kwil mîjmikasha ka kizta: “Ampara ángeltuzne katsa Éufrates pira kuhtît pura. Usparuza chîhtnarain.” 15 Suasne an ampara ángeltuzne chîhtnarît, uspa suldaruruza îninnanapa, kakwa wemin awaruza piantananapa. Uspane, sun urain, sun mishtain, sun añorain kapal kinpain sarît, sun kal kianapa. 16 Kwisha akkwan awa suldaru caballora anuzturuza mîrau. Dos cientos millones purazi. 17 Sunkana iztau. Caballoruzakas caballo anuztuzakas iznarau. Caballora anuzturuzne uspa pecho irukasa iptît uzara. Ðnkanain iztît. Pijtam jacintokanain iztît. Azufre paktukanain iztît. Caballo kîzpune katsa ishu kîzpukanain iztît. Uspa pitkis ïnkas ishkas azufrekas puzta. 18 Kakwa wemin awaruzne iarît, ïnkasakas, ishkasakas, asufrekasakas. Sun kutña naizmu caballo pitkis puzara. 19 Caballoruzne akkwan kwail kinashinai, uspa pitkasakas, uspa mîrîkasakas. Uspa mîrîruzne kamta kîzpukanain izarît. Uspa kamta kîzpukasa kwail kiamtu. 20 Mamaz awaruzne, mamaz an kutña naizmukasa irachi awaruzne, uspa kwail kiashimtu aizpa chîhkaarachi. Diablo izpultuzakas mamaz dios tîkana sarîtuzakas wakpuj waina kwainñarachi. Uspa diosne awakanain iztît sarît. Urukasa, pialkasa, ukkasa, tîkasa sarît. Uspa diostuzne izasachi, mîasachi, chaasachi. 21 Uspa kwail kiashimtu aizpa chîhkaashitchi. Piantaashimîztu. Kappacho kiashimîztu. Mamazpa ashampara kwail kiashimîztu. Walkwan kamamîztu.
Maza ángelne iptît pînkîh mîj
1 Mane mamaz tînta ángel chiyuras wanishkasain kihshtu iztau. Paiña kîzpukin kwilchi aizta. Paiña matsîh pãnkanain naztam iztît. Paiña mittîkas pimpulkas ïnkanain iztît. 2 Usne paiña chihtîkin ainki iptît pînkîh naksarît mîjara. Paiña numal mittî pira kunta. Paiña kwiyamal mittî pilta kunta. 3 Tînta kwianta, katsa ishu aztukanain. Kwiankane, siete ippa aztu mîrau. 4 Siete ippa azarawane, nane uspa paraamtu aizpa pînkîhta pashirau. Nane maza chiyuras kaizka mîrau. Ka kizta: “Sun siete ippa kaizara aizpa puintain watsari. Pînkîhta pamun.” 5 Nane sun ángel numal mittî pirakas kwiyamal mittî piltakas kuntamikasha iztau. Sun ángelne paiña numal chihtî chiyura annakta. 6 Usne Diosta akwara, us kaizmîztu aizpa piankamanapa. An Diosne pailta payukima uztu. Chiyukas, sukas, pikas sara. Wan chiwal wa aizpa sara. Usne ka kaizta: “Sun urain taiznapain. 7 Sun ura taizkane, minpa ángel iru kwil usmîztuasmin, Diosne us puintît mîjat aizpa wan kirînazi, us kishit aizpa paiña kainammtuza, paiña kiwaintuza an ñancha kainarîtkanain.” 8 Diosne, sun chiyuras nawa pararîtmikane, mamasa nakasa kwinta kit kit kaizta: “Ángel numal mittî pirakas, kwiyamal mittî piltakas kuntumikasha îtti. Usne iptît pînkîh paiña chihtîra nakpiztît mîj. Sun iptît pînkîh pizti,” kizta. 9 Nane ángelta ît kit iptît pînkîh mîlanpa paikwarau. Usne nawa ka sînkash: “Piz kit kwatkweri. Pitkin pînkîh kumtuasmin, chap kulnazi, mishkikanain. Pusunmal taizkane, tain kultînazi.” 10 Nane iptît pînkîh ángel chihtîras sap kit piz kit kwarau. Ap pitne chap kultish, mishkikanain. Iptît pînkîh kwatpane, ap pusunmal tain kultish. 11 Suasne nawa kaizish: “Mamasa nune Dios wan awaruza kinamtu aizpa kainanarawa. Sun pit mamaz pit paramtuzakas, katsa înintuzakas, mamaz sura uztuzakas kainanarawa.”
Paas kainammtuz
1 Nawa anizmu tî mîlatmikane nawa kaizta: “Kuhs kit at, Diospa yaltakas, unam misharîrakas anizna. Wan sua wakpuj wainñamturuza wianti. 2 Diospa yal pianamal anizmun, sua Diosta pianchiruzne chaamtu akwa. Uspane cuarenta y paas mishkima an Diospa pîpulura, Jerusalén pîpulura, azpiananazi. 3 Sun payura nane ap paas kainammtuza îninnash, kutña año kakwakasa na akwa paranpa. Awa uspa kwail akwa tayalamtuchi akwa, uspa paasne tîl pïn kwailnazi,” kizta. 4 An paas kainammtuzne olivos tîkanain izpailta. Uspa paasne Dios iztakin impil unamkanain izpailta. Uspa paas Dios iztukin uzpailta. An Diosne wan sura îninmika i. 5 Mînpazha usparuza kwail kishitne, uspane uspa pittas ïn puzninnazi, uspa aliz kultuza impaktanapa, ianapa. Usparuza piantashitne, sunkana iarînazi. 6 An sukin Dios kaizta aizpa paramtuasmin, uspa paas kainammtuzne chiyu sîpninshina, alu kimanpa. Kwazikas aimpi namninshina, wan surakas, an sukin uztuzakas akkwan pijikima naizninshianapa. 7 Kainammtuz Dios pit kainana pailtîkane, sun aliz kalpakanane kwisha ainkih kultas nut kit an paastuza waya kit kit anuppat kit piantanazi. 8 Paas irawane, sun katsa pîpulu mikin sua tuailnazi. Sun pîpulura awane au Anpatta, Cristora, piantaara. An pîpulune Sodoma pîpulukanakas Egipto sukanakas munarît, sua awa kwisha akkwan kwail kiarît akwa. 9 Mamaz pîpuluras awakas, mamaz kwaltuzkas, mamaz suras awakas, mamaz pit paramtuzkas, an paas irîttuza kutña payu kakwakasa izanazi. Pilta kamninmanazi. 10 Uspa irît akwa, an sukin uztuzne watsal kulanazi. Watsal kulamtu akwa, uspane chiwazha usparuzpain mîlaanazi, sun paas Dios pit kainammtuz usparuza naizninnara akwa. 11 Kutña payu kakwakasa pailkane, Diosne an paas irîttuza kuhsninnat kit mamasa kakulninnara. Sun paasta izararuzne kwisha ishkuarît. 12 Suasne an paasne maza chiyuras paraka mîilta. Usne usparuza ka kaizta: “Apa nurain.” Suasne uspane chiyura wanishkasain nuilta. Numtazasmin, aliztuzne usparuza izara. 13 Sun urain tînta su ulmu ara. Su ulmu at akwa, pitchin pîpuluruzne nainñat kit azpiantît. Siete mil awa iara. Irachiruzne ishkuat kit maizat kit chiyuras Diosta “kwisha tînta i” kizara. 14 An kwizta naiztu payu pîntît. Mama maza kwisha naiztu payu taiznapain.
Minpa iru kwil
15 Minpa ángelne paiña iru kwil usta. Ustawane, chiyura akkwan tînta paraka mîara. Ka kaizara: “Au Anpat Dioskas Cristokas au sukin ailta, wan îninna. Usne pailta payurakima îninnanazi.” 16 Veinticuatro îlaparuzne uspa îninmukin, Dios iztakin uzara. Sun pit mîarawane, uspane uspa matsîh pilta palsumal wakpuj wainñat kit ussa 17 ka kaizara: “Au Anpatta Au Dios wan kimtumikasha aishtaish kiztumakpas. Nune ma uz. Ñaminkas uzta. Wan payukimakas uznazi. Nune me tînta îninna masamîzta. 18 Wan sura uztuzne, up pit mîrachiruzne, aliz kularît. Nune awaruza maizninna masamîznazi. Irîttuz kuhstawane, nune irîttuza ‘kwail kiarît’ kizna mansamîznazi. Nune up kiwaintuza, up pit kainammtuza chiwazha mîlam mîlananazi. Nune Diosta piantuza mîlananazi. Nune Diosta wakpuj wainturuza mîlananazi. Katsaruzakas, ainkiruzakas mîlananazi. Nune an sukin kwail kiarîttuza wan kawal kinarînazi.” 19 Suasne chiyura pîjta azpiztawane, nane Diospa katsa yal ayukta paiña winmura iztau. Ñamin Moisésne sun winmukin chiwazha tara. Dios paiña kwalta kin namtît aizpa sua watsarît. Suasne ippa azkane, ïnkanain taizara. Su ulmu ara. Akkwan ainki tîh hielokana, pia kasupatsa, chiyuras taizara.
Ashampakas katsa piaintîkanakas
1 Chiyuras chiwazha iztasparît aizpa kai puzta: maza ashampane pïn pãn aiztukanain kwaarît. Us kunkin palapchakanain iztît. Paiña kîzpu chuttara doce kîmakanain iztît wajazi. 2 An ashampane pîjakasa azi. Pashpa warît. Pîja ishtîka, tînta kwianta, pashpa nishna. Kwianta, pîja ishtu akwa. 3 Suasne chiyuras mamaz chiwazha iztasparît aizpa kai puzta: Katsa kwanam piaintîkanain iztît. Usne siete kîzpukas, diez pulkas, wajazi. Wan kîzpura chutta ijarît. 4 Paiña mîrîkasa kakwa wemin chiyura kîmara ilnat kit kîmara pilpara kiakpînta. Sun katsa piaintîne ashampa iztakin kunta, ashampawa pashpara kwashimtu akwa. Pashpa nishnapain. 5 Suasne ashampane maza ampu pashpa mîlta. An pashpane wan sukin uztuza tînta îninnanazi. Ashampa maza pashpa mîltawane, Diosne sun ashampawa painkul chiyura, us iztukin, us înintukin mîlta. 6 Sun ashampane pul sura îkaintît. Suasne Diosne us akwa uzmu kapal sarît, mil dos cientos sesenta payukima sua kuanapa. 7 Kwiztane chiyura waya kiara. Katsa ángel Miguelkas paiña ángeltuzkasakas, katsa piaintîkanainkasa waya kiara. Sun katsa piaintîkanakas paiña ángelkasakas mamaztuzkasa waya kiara. 8 Uspane anuppamanamarît. Uspane chiyura uzamanamarît. 9 Sunkana Diosne sun katsa piaintî, sun katsa kamta, chiyuras îninta. Usakas paiña ángeltuzakas pilmal îninnara. An antikwa kamtamne, Diablokas, Satanáskas muntît. Usne wan awaruza pîrail kaiznanara, ñan miwara îanapa. 10 Suasne nane chiyura tînta parammikasha mîrau. Usne ka kiztuazi: “Mane au Diosne awaruza kwailtas tainak kit watsananazi. Usne wanta tînta îninnanazi. Cristokas wanta îninnanazi. Diosne au aimpihshtuzpa kwail paramturuza chiyuras îninnara. Sun kwail paramturuzne Dios iztakin payuwarakas amtawarakas nîjkulturuzpa kwail kizara. 11 Au aimpihshtuzne Diablorain anuppaarît, an Pîriku uspa akwa irît akwa. Paiña aimpikasa usparuza sînam sananara. Uspane mamaztuza an Pîrikura nîjkulpuspas kizara, ishkwatchin. Uspane Cristo akwa ina ishkuarachi. 12 Wan chiyura uztuzne watsal kultain. An sukin uztuzkas, wan ñam piwara chamturuzkas, tînta naizarînazi, Diablo kihshta akwa, us wan sura uztuza naizninnanapa. Akkwan payukima uztuchi akwa, usne ukasa kwisha aliz kulnazi. Suasne Diosne ussa ilnazi.” 13 Sun aliz piaintîkana pilta înintawane, usne sun ashampa painkul mîjatmikasha kanpat kit kwail kimîzna minta. 14 Suasne Diosne an ashampara paas katsa wam ilsîh mîlazi, attish pul su watsarîtkin tînta pîlnapa, aliz piaintî us uzkin pianamanpa. Tane Diosne ussa chiwazha wenamtu aizpa kwinnazi, kutña año kakwakima. 15 Aliz piaintîne paiña pitkis katsa pi kwazikanain îrak kit kwararît, ashampara pi kwarînpa. 16 Sunkana pilne ashampara kiwainta. Sun pilne aliz piaintî pi kwarakta aizpa tuk kit wan kaninta. 17 Ka akwaizna sunkana akwa sun aliz piaintîne an ashampara kwisha aliz kultît, ussa kwail kirachi akwa. Suasne usne ashampawa kwaltuza, Dios pit mîmturuza, Jesús kaizta aizpa mîmturuza ît kit waya kinarît. 18 Suasne aliz piaintîne katsa pimamin, pi sura kunta.
Paas kalpa piras
1 Na pira iztuasmin, katsa kalpane piras numîzta. Siete kîzpukas diez pulkas wajazi. Sun wan pulkin watsal ipmu tît ijta. Wan kîzpuruza Diosta kwail pit pararît. 2 An katsa kalpa pultam ishukana iztît iztau. Paiña mittîne usu mittîkanain iztît. Paiña pitne katsa ishu pitkanain iztît. Katsa aliz piaintîne katsa kalpara paiña uzmu mîlta, wantuza tînta îninnanapa. 3 Katsa kalpawa kîzpukin aim kirît azi. Inapain azi. Aim kirît aizpa namtawane, wan suras awane iztaspaat kit katsa kalpara kanpaara, us pashimtu aizpa kiana. 4 Sun awane aliz piaintîra wakpuj wainñarît. Katsa kalpara îninna chîhkakane, awane katsa kalpara wakpuj wainñat kit ka kaizara: “Mamazne an kalpakana wachi. Mînminkas ussa annuppasachi.” 5 Aliz piaintîne ussa kiwainta, kwail pit paranpa, Diosta aliz pit paranpa. Ussa îninta cuarenta y paas mishkima, sun pit paranpa. 6 Sunkana kirît. Diosta aliz pit pararît. Ussa kwail pararît. Wan chiyura uztuzakas kwail paranarît. 7 Ussa îninta, Diosta piantuza waya kinpa, usparuza anuppananapa. Ussa îninta, wan sura uztuzakas, mamaz pit paramturuzakas, wan awaruzakas îninnanapa. 8 Wan an sura uzturuzne, uspa mun Pîrikuwa pînkîhta chiyura parîtchiruzne, an katsa kalpara wakpuj wainñamîznazi. An Pîrikune, piantatmikane, an pînkîh mîja. Au su sarachasmin, Diosne nîjkulturuzpa mun chiyura pînkîhta panarît, pailta payukima uzanapa. 9 Mîmtumikane an pit mîrawa: 10 “Mînpazha mamaztuza kajchikin mîltane, uspakas kajchira sîpparînazi. Cuchillo kwizkasa pat kit piantaramikane kawarain inazi.” Sunkana naizamtuasmin, une, Diosta pianturuzne wan naizmu tînta tailchat kit Diosta pailta payukima nîjkularawa. 11 An kwizpane nane mamaz katsa kalpa piltas nura iztau. Usne paas pîriku pulkana wajazi. Parakane, usne aliz piaintîkana azta. 12 An kwizpa katsa kalpane an ñancha katsa kalpakana îninnat kit us pashit aizpa kimîzta. An kwiztamikane an sura uzturuza îninnara, an ñancha mikasha wakpuj wainñanapa. An ñancha kalpamikane aim kirît aizpa namtîtmika azi. 13 Kwizpa kalpakas anza katsa iztasparît kal kira. Usne wan awa iztakin chiyuras an pilkin ïn taizninnara. 14 Paiña katsa kal kimtu akwa, kwizpa kalpamikane an sukin uztuza pîrail kaiznara, uskasa îanapa. Usne wan katsa kal an ñancha kalpa iztakin kirît. An sukin uztuza îninnara, mamaz kalpa an ñancha kalpakanain saanapa. An ñancha kalpa cuchillo kwizkasa aim kirîtkas, usne uzmîzta. 15 An ñancha kalpane an kwizta kalpara îninta, maza kalpa tîkasa sanapa. Awaruza an kalpa sarîtta wakpuj wainñapa îninnara. Wakpuj wainñarakine, usne usparuza piantanara. 16 Sun katsa kalpane wan awaruza uspa numal chihtîkin chiwazha panapa îninnara. Chihtîkin parakine, kînijkinkas chiwazha panapa îninnara. Ainkiruzakas, katsaruzakas, kwazparuzakas, puizaruzakas, anpat mîjchiruzakas, anpat mîjtuzakas, chiwazha panapa îninnara. 17 Chihtîkin chiwazha parît aizpa mîjchiruzne, katsa kalpawa mun parît aizpa mîjchiruzne, paiña número parît aizpa mîjchiruzne, chinkas paisachi, chinkas paininsachi. 18 An pit mintawa, wat piankamanapa. Piankamtamikane an katsa kalpawa número wintawa. Awane sun númerokasa muntît. Sun númerone seis cientos sesenta y seis mai.
144.000 awa kanta kaizamtu
1 Suasne mamasa iztau. Sión îzara iztuasmin, nane Pîrikurakas, 144.000 awaruzakas iznarau. Uspane Pîrikuwa munkas paiña Papihshpa munkas kînijkin wan panarît mîjazi. 2 Suasne nane maza chiyuras paramtu mîrau. Usne katsa pi aztakanain azta. Ippa tînta aztakanain azta. Akkwan awa guitarra piantukanain tînta azta. Wan azta aizpa mîrau. 3 Uspane Dios uzmukin masas kanta kaiz kiara. Ampara uztuz uzkinkas, îlaparuz uzkinkas, kanta kaiz kiara. Mazantuzmin masas kanta kamazi. Ciento cuarenta y cuatro mil awane, kanta kaiz kiara, Dios usparuza au sukin watsat mîlnara akwa. 4 Sun awaruzne sînam awa mai. Uspane mamaz patna ashampakasa pittarachi. Uspakas an Pîriku îmtura kanpaanazi. Diosne usparuza an ñancha painara, an sukin puraruzkasa chaizamanpa, Dioskasakas sun Pîrikukasakas uzanapa. 5 Uspakas pîrail kaizarachi. Sînam awa mai.
Kutña ángeltuz paraamtu
6 Suasne mamaz ángel chiyu paizkakin pîltîmtu iztau. Sun ángelne an sukin uztuza Dios watsal pit kainanashinai. Chiwaltuzakas, wan kwaltuzakas, wan pit paramtuzakas, kainanashinai. 7 Uspa ka tînta kaiznara: “Dios mît kit wakpuj waintain. Ussa ‘nune kwisha wari’ kiztain. Diosne chiyuras anpain, awaruza mîmanana, uspa kwail piankamanapa. Chiyu sarîtmikashakas, an su sarîtmikashakas, wan pi sarîtmikashakas, wan pi kasu sarîtmikashakas wakpuj waintain,” ka kizta. 8 Suasne mamaz ángelne ussa kwizpa at kit ka kaizta: “Katsa Babilonia pîpulune wan azpiantît. Babilonia pîpulukin uztaruzne akkwan tuntu kwail kiat kit wan awaruza kwail kin kawarain kamninnara,” ka kizta. 9-10 Kwiztane mamaz ángelkas paas ángeltuza kanpaat kit tînta kaizta: “Diosne aliz kalpara wakpuj waintaruzakas, kalpa aliz kalpakana sarîtta wakpuj waintaruzakas, aliz kalpawa marca kînijkin parîttuzakas, aliz kalpawa marca chihtîkin parîttuzakas, tînta naizninnanazi. Diosne usparuza kwisha aliz kulnazi. Usparuza ïnta, asufre ïnkasa, îninnanazi, kwisha naizanapa. Diospa ángelkas Pîrikukas chiyuras usparuza iznanazi. 11 Uspa naizmukis ishne akkwan payukima puznazi. Pailmuchi. Aliz kalpara wakpuj wainturuzkas, kalpa aliz kalpakana sarîtta wakpuj wainturuzkas, aliz kalpawa munkasa parîtuzkas, payuwarakas amtawarakas naizanazi,” ka kizta. 12 Diosta piantuzne, Dios pit mîmturuzne, Jesús kaizta aizpa nîjkultuzne, wan naizmu tînta tailchaanazi. 13 Suasne nane maza chiyuras paramtu mîrau. Nawa ka kaizta: “Sunkana pari: ‘Diosta piantuz iarîkane, uspane watsal kularînazi pailta payukima.’ Diospa Izpulkas ka kaiznamtu: ‘Watcha. Uspa tînta kal kiarît akwa, pîna kwaizkulanazi. Uspa kal kiarît akwa, Diosne chiyura usparuza chiwazha mîlananazi,’ ” ka kizta.
An sukin pakmu payu
14 Suasne mamasa iztau. Chiyura iztuasmin, nane putchã wanish iztau. Diospa painkulkanain wanish îsalta uzta. Paiña kîzpukin uru tît iptît. Usne kwiz azuelo plano chihtîkin piztît. 15 Suasne mamaz ángelne Dios yaltas puz kit wanish îsalta uzmikasha tînta ka kwianta: “Up kwiz azuelo plano tizpian kit pakti. Wan pippane kilpuin parît. An sukin wan pippa pakpain parît.” 16 Wanish îsalta uzmikane paiña kwiz azuelo plano an sukin kiakpînta, wan pippa kilpuin parît aizpa tizpian kit pakna. 17 Mamaz ángelne kwiz azuelo plano mut kit chiyu yaltas puzta. 18 Mamaz ángelne chihtîra ïn îninnapa mura. Diospa incienso paktam misharîkis puztawane, usne kwiz azuelo plano mumikasha tînta parat kit kaizta: “Up kwiz azuelo planokasa tizpian kit pakti. An sukin wankail pippa kwas paktawa, wan wankail pippane wan ïn arît akwa.” 19 Sun ángelne paiña azuelo planora an sukin kiakpîntît, wankail pippa kwas kalpiz kit paknapa. Wan kwas pak kit wan wantat kit nuzpizta, chap pi puznapa. Sun ángeltuz wankail pippara pakkat kit nuzpiztukana, Diosne kwail awaruza naizninnanazi, ianakima. 20 Pîpulu mamal wankail pippara nuzpizta. Wankail pippa nuzpiztakin, aimpi pine pînnakta, caballo kîzpukinkima, caballo tît kan kit îninkinkima. An aimpi pine kutña cien kilómetroskima puzta.
Moiséspa kanta
1 Chiyura iztuasmin, nane chiyura mamaz katsa iztasparît kal iztau. Ñamin sunkana iztachish. Siete ángeltuza iznarau. Maza mazain minpa siete kwail kianapa îninnarît. Wan kwail kirît aizpa pailkane, Diosne an sukin an kwail îninmanazi. 2 Suasne nane sînam katsa pikanain iztît iztau. Sun pine ayukta kai iztau. Pi ayukta ïnkanain iztau. Aliz kalpara anupparîttuzne sun sînam pimakin uzara. Aliz kalpakana sarîtta wakpuj wainñarachi. Aliz kalpawa munkas, paiña númerokas, uspa kînijkin panintachi. Diosne usparuza guitarra mîlanara, Diospa kanta kizanapa. 3 Uspane Moisés Diosta kiwainmumika kantakana, Pîrikura kantakas kaiz kiat kit kizara: “Nune wan kal kit aizpa kwisha watsal kirît. Au Anpatne, au Diosne wan kal kishinai. Nu wan kimtu aizpa kwisha wari. Nune an sukin uzturuza îninnamti. 4 Wan chiwal nua wakpuj wainñanazi. Wan chiwal nua ‘kwisha wari’ kizanazi. Nuin sînammika i. Wan suras awane nu uzkin aat kit wakpuj wainñanzi. Awaruzne nu watsal nil kirît aizpa piankamanazi.” 5 Sun iztawane, kwiztane, nane chiyura wanmakmukin iztau. Sua Dios uzkin ayukta Dios pit pînkîh parakin iztau. 6 Sun siete ángeltuzne chiyu wanmakmukis puzara, siete kwail ilnam kianapa. Uspane putchã kwaksham kwarît. Uru tîtkas pechokin ipparît. 7 Suasne maza kalpane ampara kalparas siete ángeltuza siete aiz uru waz mîlanara. Diosne, pailta payu uzmikane, ilmu uru wazta winta, au sukin uztuza ilnanapa. 8 Katsa Diosne chiyura wanmakmukin akkwan ishkasa napta. Sun urain mînminkas chiyura wanmakmukin napsachimazi. Siete ángeltuz siete kwail ilnam pailtawane, awane chiyura wanmakmukin nappaashinai.
Uru waztas ilnam puzanazi
1 Suasne nane maza chiyuras paramtumikasha mîrau. Usne siete ángeltuza ka kaiznara: “Diosta îat kit siete ilnam wazta wintain, pilta parannapa,” ka kiznara. 2 An ñancha ángelne paiña ilnam waz pilta paranta. Ilnam waz parantawane, aliz kalpawa marcakasa parîttuzkas, aliz kalpawa kalpakana sarîtta wakpuj wainturuzkas ña pîtnakima kwisha ishtu paarît. 3 An kwiztamikane paiña ilnam waz ñam pira paranta. Ñam pine kwanam aimpikana namta, awa piantarît aimpikana. Wan ñam pira chamturuzne iarît. 4 An kwiztamikane paiña ilnam waz wan ainki pirakas, pil kulta pi puzmukinkas, paranta. An pine aimpikana namta. 5 Suasne nane ainki pi tañu kirîtmikasha mîrau. Sun ángelne ka kizta: “Nu kimtu aizpa nil i. Nune ap sînam Dios i. Nukas ma uztu. Nukas an ñancha uzta. Nu ilnara aizpa watcha i. 6 Sun ma payu naizmuruzne Diospa kwaltuzakas, Dios pit kainammturuzakas piantanarîzi. Uspa kwail kiarît akwa, uspane naizashina, aimpi pi kwankima.” 7 Mazane Diospa incienso paktam misharîkis ka kaizta: “Diosne wan chiwal kishinai. Anpat ilnara aizpa watcha i. Usne wan nil kirît. Ñanta kitchi.” 8 Suasne an kwiztamikane paiña ilnam waz pãnta paranta, wan awaruza ïnkasa impaktanapa. 9 Ðn impaktamturuzne kwisha naizara. Naizarakas, uspane Diospa kwail kizarît, Dios wan ilnam îninta akwa. Uspa kwail kiashit aizpa chîhkaashitchi, Diosta kaiyanapa, “Dios kwisha wari” kizamanpa. 10 An kwiztamikane paiña ilnam waz aliz kalpawa uzmura paranta. Tîlkwil parît, aliz kalpa înintukin. Suane wan awaruzne uspa yankwijara sula kuara, uspa ishtu akwa. 11 Chiyura Diosta kwail pit kizara, uspa ishamtu akwa, uspa ña pîttain ishamtu akwa. Uspa kwail kal kiarît aizpa chîhkaashitchi. 12 An kwiztamikane paiña ilnam waz katsa Éufrates pira paranta. Parantawane, Éufrates pine chîhktît, pãn puzmumals mikwaruz kwakkanapa. 13 Suasne nane katsa aliz piaintîrakas, aliz kalparakas, pîrail kaiztumikashakas iznarau. Uspa pitkis kutña kwail salizne, pumkanain iztît, puzara. 14 Sun Diablowa saliztuzne katsa iztasparît kal kiara, awa usparuza kanpaanapa. Uspakas wan suwara îat kit wan katsa mikwaruzakas uspa suldaruruzakas akwanara, sun payu Dioskasa, wan chiwal kal kimturuzkasa, tînta waya kianapa. 15-16 Katsa mikwaruzne Armagedón înkal sura wanmakkara. Hebreowa pitta Armagedón munta. Cristo kaiztu aizpa mîrain. “Nane anpain ish. Maza walkumkanain kainarachin anash. Sun payu tîrizturuzne, uspa putchã pïn watsamtuzne, watsal kulanazi, piltîm chamanpa, paiña iztakin mîtsal kiamanpa.” Putchã pïnwa paramtukas, usne uspa kwail kiarît aizpa sînam samtu kaiznara. 17 Suasne minpa ángelne paiña ilmu waz inkwara paranta. Parantawane, mazane chiyuras, Dios uzmuras, tînta ka kaizta: “Na kaizta aizpa, wan ilnara aizpa, wan pailtîre,” kizta. 18 Suasne ïn chiyuras taiztawane, ippa tînta azta. Tînta su ulmu azi. Awa an sukin uzasmin, an su ulmukana wachi azi. 19 Katsa Babilonia pîpulukin kutña pajte îstît uz kirît. Wan sukin pîpuluruzne urumpukasa wan taizarît. Dios an katsa Babilonia pîpulura uztuza aliz kulnat kit ilnanapa îninta, kwisha naizanapa. 20 Wan ainki su pi paizkakin wan kaarît. Wan înkal îzakas saimanamtît, wan kaarît akwa. 21 Akkwan katsa hielo, ampara arroba uskanain, chiyuras taizara. Awaruza aim kiara. Hielo awaruza kwisha aim kiara akwa, sun awane Diosta aliz pit paraarît.
Diosne kwail ashampara ilnazi
1 Maza ángel siete ángeltuztas, ilnam waz mîjmikane, nawa parat kit kaizish: “Nakasa at. Nane nua annash, an kwail ashampara yawakima ilkwarakas. Usne wan pi îsalta uztu. 2 An sukin uzturuza mikwaruzne an ashampakasa uzat kit akkwan kwail kiarît. An ashampawa kwail kirît aizpa awaruza kwaktît akwa, an sukin uzturuzne kwail awa namat kit pirît awakana uzanazi,” kizta. 3 Kwiztane Dios Izpul nawa kainkizpanintuasmin, maza ángelne nawa pul sura mîlzish. Tane nane ashampa kwanam aliz kalpara anuzta iztau. Akkwan kwail pit sun aliz kalpara parît, Diosta kwail pit paran. Siete kîzpukas, diez pulkas waj. 4 An ashampane tîlchakta pïnkanakas kwanam pïnkas kwara. Akkwan uru in kwara. Akkwan watsal iztît ukne kwilkin kwara. Putchã inkas kwara. Uru wazkas paiña chihtîkin mura. Waz ayukta paiña kwail kit aizpakas, mamaztuza wan kwail kwaktît aizpakas mura. 5 Paiña kînijkin maza pianchi mun ka parît: BABILONIA KATSA I. SUN PÎPULUNE AWAKANA I, KWAIL AWARUZA KAWIRARA AKWA, AWARUZA AKKWAN TUNTU KWAIL KWAKTÎT AKWA. 6 Suasne nane an pirît ashampara iztau, an ashampane Diosta piantuza piantanarît akwa. Usne Jesús pit kainammtuza piantanarît. Na ussa izta akwa, nane ishkwatkwerau. 7 Suasne ángelne nawa kaizish: “¿Chikisma ishkumtus? Nane nu izta aizpa kainanash, wan piankamanapa. Sun ashampane aliz kalpara anuzta. Kalpane siete kîzpukas, diez pulkas waj. 8 Sun aliz kalpane nu izta an ñamin uzta. Ma uztuchikas, mamaz payura paiña ainkih kultas nurînazi, mamasa uzna. Paiña kal pailtawane, usne ïnta îrînazi, chiwal pailnakima. An aliz kalpara izarawane, an sukin uzturuzne, uspa mun chiyu pînkîhta patchiruzne, ishkuarînazi. An su sarachasmin, Diosne pînkîh sat kit ussa piantuzpa mun pînkîhta para. Sun aliz kalpane an ñamin uzta. Ma uztuchikas, an imparane uztînazi. 9 Sun pit mîraruzne nîjkulat kit na kaiztu aizpa piankamanazi. Sun ashampane aliz kalpara siete kîzpu waj anuzta. Siete kîzpune siete înkal îzakanakas, siete katsa mikwaruzkanakas, izarît. 10 Cinco katsa mikwaruzne wan kaarît me. Mazane cincoras ma înintui. Minparane mama atchi. Minpara akane, akkwan payuchikimain nukkulnazi. 11 Sun aliz kalpane, an ñamin uztamikane, mane uzchi. Sun kalpane katsa mikwa namta. Uskasa ocho înintuz wianta. Uskas pailtînazi. 12 Sun diez pul nu izta aizpa diez mikwaruzkana izarît. Mama îninnamtuchikas, uspane an aliz kalpakasa akkwan payu chikimain îninnanazi. 13 Sun diez mikwaruzne usparuzpain nîjkulamtu, aliz kalpara kiwainnanapa, wanta îninanapa. 14 Uspakas aliz kalpakasakas Pîrikukasa waya kianazi. Sun Pîrikune paiña akwanarîttuzkasa, paiña narîttuzkasa, ussa nîjkulturuzkasa, usparuza anuppanarînazi. Usne mamaz mikwakin anza tînta i. Usne mamaz katsa anpatmikakin anza tînta tailcham.” 15 Suasne ángelne nawa kaizish: “Nune kwail ashampara paiña uztukin pimakin izta. Sun pine awakanain iztît. Pailta suras awakas, pailta kwaltas awakas, pailta pîpuluras awakas, pailta pit paramtuz awakas, purai. 16 Nune aliz kalpara diez pultakas izta. Uspane kwail cham ashampara aliz kularînazi. Wan us mîj aizpa nakarînazi, piltîm uznapa. Uspane paiña ña kuat kit ïnta impakkarînazi. Sunkana uspane ussa kanintînazi. 17 Diosne diez pul înintuza kawarain nîjkulninnara, Dios pashit aizpa kianapa. Suasne uspane usparuzpain nîjkulara, aliz kalpara kiwainñanapa, wanta îninanapa, Dios kaizta aizpa pailnakima. 18 Nune an ashampara izta. Usne katsa pîpulukana iztît, an sukin wan chiwal mikwaruza îninamtu akwa.”
Babilonia pîpulu wan pailtît
1 Suasne kwiztane nane mamaz ángel chiyuras kihshtu iztau. Usne katsa îninmikakana azi. Usne pãn maltakanain aizta, wan su kai puranapa. 2 Tînta kwiat kit ka kaizta: “Katsa Babilonia pîpulu paltaintît. Mane saliztuzne sua uzarît. Wan kwail izpulkas sua nukkularît. Wan tuntu pîkumkas chikuyukas ta uzarît. 3 Wan suras awane pirîtkana namarît, wan tuntu kwail kiarît akwa. An sukin katsa mikwaruzne akkwan awakasa an kwail kiare. An sukin painintuzne, kwazpa awa kularît, uspa kwazpa ashampakana uzashit akwa.” 4 Suasne nane chiyuras paramtumikasha iztau. Nawa kaizish: “Ap kwalta ka kuruntain. Sun katsa pîpulukis puzarawa, an pîpulukin uztuz kwail kiamtukanain kiamanpa, an pîpulukin uztuz naizamtukanain, naizamanpa. 5 Uspa akkwan tuntu kwail kiarît akwa, Diosne chiyuras uspa kwail kiarît aizpa izta. Diosne uspa kwail kiarît aizpa mainmanazi.” 6 Suasne usne ángeltuza kaiznara: “Mane usparuza ilnari. Yawa ilmu mamaz awaruza ilnarakanain kawarain an pîpulura ilnari. Uspa kwail kiarît akwa, usparuza pa pijikima sun kwail kinari. Sun pîpulu mamaztuza naizninara akwa, an pîpulura uztuza anza naizninnari. 7 Uspane uspa chiwazha kiashimtu aizpa kiat kit kwail kwazpa awakanain uzshiara. Kawarain usparuza naizninnari. Sun pîpulu uztuzne ka minñara: ‘Aune an sukin îninmumikakana makpas. Aune wan pashimtu aizpa mîjmakpas. Aune mizurainkas tayalsachimakpas.’ 8 Katmizna maza payurain wan ilmu usparuza taiznarînazi. Sun payura iarînazi, tayalarînazi, yak kiarînazi. An tînta Anpat Diosne usparuza mîmananazi, uspa kwail kiarît aizpa piankamanapa. Suasne usne usparuza impakninnanazi, wan pailnakima.” 9 An sukin katsa manta kimtuzne, sun ashampakanain kirîttuzne, kwail kwazpa awakanain uzararuzne, azarînazi. Sun pîpulura impaktawane, awane ish panaktu izanazi. Sun akwa uspane tayalarînazi. 10 Sun awaruzne attishtas sun pîpulura izat kit ishkuarînazi, pîpulukin ilnamîztu akwa. Uspane ka kaizanazi: “An katsa Babilonia pîpulune kwisha naiztînazi. Akkwan payu chinkima nukkulmanazi.” 11 An sukin paininturuzne, an pîpulu akwa, azat kit kwiananazi, mînminkas uspa painim mîj aizpa paimtuchi akwa. 12 Mînminkas uspa uru mîj aizpakas, pial mîj aizpakas, muin uk mîj aizpakas, ainki putchã uk mîj aizpakas, paimtuchime. Putchã pïn mîj aizpakas, tîlchaktakana pïn mîj aizpakas, an watsal pïn mîj aizpakas, kwanam pïn mîj aizpakas, paimtuchime. Watsal tî piamkas, katsa sînam kihtît sulakas, wat tîkas, paimtuchime. Naztam irukas, mamaz irukas, marmol ukkas, paimtuchime. 13 Mînminkas canela tî ayakas, watsal piam kîhwilkas, incienso impaktakas, mirra pikas, olivos pikas, vinokas, olivos pihshpikas, chara pippa kîrîtkas, chara pippakas, paimtuchime. Mînminkas wakarakas, pîrikukas, caballokas, caballo carrokas, kiwaintuzkas paimtuchime. 14 Sun painintuzne an pîpulura ka kaizarînazi: “Nu wan mîjat aizpakas, nu wan mîlshimtu aizpakas, wan karît. Mizurainkas chiwazha karît aizpa saimanazi.” 15 An pîpulukin uspa mîj aizpa painintîttuzne kwisha kwazpa kularît. Uspane pîpulura attishtain kun kiarînazi. Sun pîpulura uztuz naizamtuasmin, uspane azat kit tînta kwian kit kaizanazi: 16 “An katsa pîpulune kwisha naiztînazi. Usne watsal pïn kwarît ashampakana iztît. Tîlchakta pïnkanakas, kwanam pïnkas kwarît. Urukas ainki putchã ukkas, muin watsal iztît ukkas kwilkin kwarît. 17 Akkwan kwazparuz masain wan pailti; wan kakihsharît.” Katsa kanua puijmuruzkas, kanuawara chamtuzkas, kanuara kal kimtuzkas, piwara kal kimtuzkas, pîpulura attishtain kun kiarînazi. 18 Pîpulu impakta ish iztawane, ka kwiannara: “An pîpulukinkas anza katsa pîpulu wachi.” 19 Kwisha tayalamtu akwa, uspane pul pil uspa kîzpura paran kit azat kit kaizara: “An katsa pîpulune kwisha naizarînazi. Katsa kanua pira mîjattuzne, uspa kwazpa akwa, an kwazpa namarît. Uspa kwazpa masain wan kakihsharît. 20 An pîpulu kakihshtîtkas, chiyura uztuzne watsal kultain. Diosta piantuzkas, Dios manta kittuzkas, Dios pit kainammtuzkas, watsal kularain. Diosne an pîpulukin uztuza ilnara, an pîpulukin uztuz Diosta piantuza naizninnarît akwa.” 21 Maza katsa ángelne katsa chara kîmu uk mut kit katsa pira kiain kit kaizta: “An katsa Babilonia pîpulune karînazi. An uk katsa pira kiaintakanain karînazi. Mînminkas sun pîpulura chinkas izamanazi. 22 Mînminkas an pîpulu miwara guitarra pianamanazi. Karaskwil usmuruzkas, iru kwil usmuruzkas, an pîpulu miwara mamasa usamanazi. An pîpulukin kal kimtuzakas sayamanazi. Kal wa chi akwa, an pîpulukin chara kîmu ukne mamasa azmanazi. 23 Mizurainkas an pîpulukin impil putta aizamanazi. Mizurainkas mînminkas an pîpulukin kasara kimanazi. Painintuz katsa manta kimmikakana namarîtkas, an pîpulune wan karînazi. Uspane wan suras awaruza pîrail apnarît, nilchi pit paarît akwa. 24 Diosne an pîpulu uztuza ilninnanazi, Dios pit paramtuzakas, Diosta piantuzakas, wan suras uzararuzakas piantanarît akwa.”
1 Kwiztane nane akkwan awa chiyura tînta paramtu mînarau. Ka kaizara: “Au Diosne kwisha wari. Usne aumîza kwail sînam sammika i. Us an tînta akwa, usne wanta îninnashinai. 2 Usne wan awaruza wat mîmanamtu, uspa kwail piankamanapa. Mamaztuza ilnamtukas, us kimtu aizpa watcha i. Usne an Babilonia pîpulura uztuza naizninnara. Uspane kwail ashampakana uzat kit wan awaruza kwail uznapa kamtanara. Mane Diosne usparuza naizninnarît, Diosta kiwaintaruza piantanarît akwa.” 3 Sun akkwan awane mamasa kaizara: “Au Diosne kwisha wari. An pîpulu impakta ishne pailta payukima nunazi.” 4 Suasne veinticuatro îlaparuzkas, ampara uztuzkas, Dios uzkin palsumat kit wakpuj wainñat kit kaizara: “Watcha Diosne kwisha wari,” kizara. 5 Mazane Dios uztukin ka kaizta: “Wan Dios kiwaintuzkas, ussa ishkumtuzkas, katsaruzkas, ainkiruzkas, ‘Dios kwisha wari’ kaizarain.” Pîrikuwa kasara kim pishta 6 Suasne nane akkwan awa paramtukanainkas, akkwan pi taizta aztukanainkas, akkwan ippa aztukanainkas, mîrau. Ka kaizara: “Diosne kwisha wari. Au Anpat Diosne îninnat kit us tînta akwa us kishimtu aizpa kinazi. 7 Us akwa, watsal kulmîzpai. ‘Diosne kwisha wari’ kiztuasmin, watsal kulmîzpai, Pîrikuwa kasarakim pishta taizta akwa. Pîrikuwa ashampane usmin sînam parît uskasa în. 8 Sun ashampane sînam putchã pïn naztam iztît sap kit kwara. Diosta piantuzne, wat kin uzturuzne, putchã pïnkanain kwaanazi.” 9 Ángelne nawa kaizish: “Sunkana pari, ‘Pîrikuwa kasara kim pishtara akwattuzne watsal kulanazi.’ ” Ma pitchin kaizta: “Na kaiztu aizpa Dios watcha pit i.” 10 Suasne nane ángelpa mittîkin taiz kit wakpuj wainshirau. Usne nawa kaizish: “Sunkana kimun. Nakas Diospa kiwainmika ish. Nukas, nu aimpihshtuzkas, Diospa kiwainmuruz mai. U Dios pit kainanamturuzne paiña kiwaintuz mai. Diostain wakpuj waintawamakpas,” ka kizta.
Putchã caballora anuzmumika
11 Suasne mamaza iztau. Chiyura ayukta iztuasmin, nane putchã caballora iztau. Caballora anuzmumikane Dios kaizta aizpa mîra. Watchain kaiz kit mamaztuza nil îninnara. Usparuzkasa waya kinarakas, usne wat kirît. 12 Paiña kasune ïnkanain naztam aizta. Akkwan tît watsal iptît kîzpukin kwarît. Paiña mun kînijkin parît aizpa usmin pianazi. 13 Usne aimpi pustît pïn kwara. Paiña munne “Dios pit” munazi. 14 Chiyuras waya kimturuzne ussa kanpaat kit putchã caballoruza anuzara. Uspane kwisha watsal putchã pïn kwaara. 15 Maza kwiz mashtine paiña pittas puzta, an sura uztuza piantananapa. Usne irukasa an sura uzturuza tînta îninnanazi. An tînta Diosne, wan kishimtumikane, awaruza mittî kulnanazi, ilnanazi, Dios usparuza aliz kulnarît akwa. Kawarain usparuza naizninnanazi. 16 Paiña kwakshamtakas, paiña pantalóntakas ka parît: SUN KATSA MIKWANE WAN ÎNINTUZA ÎNINNAMTU. USMIN WANTUZA MANTA KINAMTU. 17 Suasne maza ángel pãn îsalta kuntît iztau. Usne wan katsa wam chiyu kwashtara pîlturuza tînta kwian kit ka kaiznara: “Arain. Diospa katsa pishtara wanmaktain, us kwintu aizpa kuanapa. 18 Usne katsa mikwaruzpa ñakas, ainki mikwaruzpa ñakas, tînta awaruzpa ñakas, caballowa ñakas, caballora anuztuzpa ñakas, anpat mîjchiruzpa ñakas, anpat mîjtuzpa ñakas, pashpawa ñakas, îlapawa ñakas kwinnanazi, kuanapa,” kiznara. 19 Suasne nane sun aliz kalparakas, an sukin katsa mikwaruruzakas, uspa suldaruruzakas, iznarau. Uspane wanmakkara, cabollora anuztamikakasa waya kianapa, paiña suldaruruzkasa waya kianapa. 20 Waya kiarawane, mînpazhane aliz kalparakas, pîrail kaizmumikashakas, pizat kit kantît. An pîrail kaizmumikane aliz kalpa iztakin masas iztasparît kal kirît. Paiña kal kirît akwa, usne aliz kalpawa izmu marca parîttuza pîrail kaiznarît, aliz kalpakana sarîtta wakpuj wainñapa. Uztuasmin, sun aliz kalpakas sun pîrail kaizmumikakas pizat ïn asufre aiztukin kiakpîntît azi. 21 Caballora anuztumikane paiña pittas mashtikasa anparuza piantanara. Katsa pîkum chiyu kwashta pîlturuzne uspa ña tuknakima kuara.
Los mil años
1 Suasne chiyura iztuasmin, nane maza ángel chiyuras kihshtu iztau. Sunne paiña chihtîkin ainkih kulpa llavekas katsa cadenakas mîlta. 2 Sun ángelne aliz piaintîra, antikwa kamtara, tî pain kit piz kit maza mil añokimain cadena kuhtît. Antikwa kamtane “Satanáskas Diablokas” muntît. 3 Usne antikwa kamtara ainkih kulta kiakpîn kit pîjta sîp kit pîjtakin palta, wan sura uztuza mil añokima kwail kimanpa. Mil años sîpta pailtîkane, antikwa kamtane akkwan payuchin chîhtît anazi. 4 Mama chiyura iztuasmin, nane akkwan înintuzpa uzmu iztau. Piantarîttuzne, kîzpu tît irîttuzne, wan uzmukin uzara. Uspane iara, Dios pit kainara akwa, Jesúspa pînkîhta panarît akwa, aliz kalpara wakpuj wainñarachi akwa, aliz kalpakana sarîtta wakpuj wainñarachi akwa, aliz kalpawa marca kînijkinkas chihtîkinkas parachi akwa. Mamasa kakulakane, sun awaruzne Cristokasa maza mil añokima îninñanazi. 5 Suntuzne an ñamim mamasa kakultaruz mai. Mil años pailtawane, anpa irîttuzne mamasa kakul uzanazi. 6 An ñamin mamasa kakul uztaruzne Dioskasa uzat kit watsal kularînazi. Uspane mamasa iamanazi. Diospakas, Cristowakas pariya namanazi. Cristokasa mil añorakima îninnanazi.
Satanásne pailtînazi
7 Mil año pailtîkane, Satanásne kajchiras chîhtît anazi, 8 wan suras uztuza pîrail kaiznanapa. Sun awaruzne “Gogkas Magogkas” mun mai. Puztawane, usne an suras uztuza wanmaknanazi, uspakasa waya kinpa. Pi ksu wiansachikanain sun awaruza wiansachi. 9 Wan suras awaruzne Dios pashimtu pîpulura nuat kit Diosta piantuza pîlzawal kwianazi. Awa pîpulura izparawane, Diosne chiyuras ïn îninnanazi, sun awaruza impaktananapa. 10 Diosne Diablora, awaruza pîrail kaiztumikasha, ïn impaktukin kiakpînnazi. Sua asufre aizmu. Sun impaktukin aliz kalpakas, kwail kaiztumikakas, uzpailnazi. Suane uspane payuwara amtawara chiwal pailta payukima naizpailnazi.
Wantuzne Diospa putchã uzmukin
11 Suasne nane katsa putchã uzmu iztau. Dios paiña putchã uzmukin uzasmin, an sukas an chiyukas wan kakihshtît, mizurainkas izamanpa. 12 Îlapa irîttuzkas pashpa irîttuzkas mamasa kuhstawane, nane usparuza Diospa înintukin iznarau. Suane parît pînkîh azpiztît. Mamaz pînkîhkas azpiztît. Diosta piantuzpa mun sun pînkîhta parît azi. Uskasa uzanazi. Sun pînkîh iztawane, irîttuzpa kal kiarît aizpa pînkîhta iztawane, Diosne irîttas kuhsninnat kit irîttuza mîmanat kit usparuza uspa kwail kiarît aizpa kainanara. 13 Katsa pi kwarît irîttuzkas, wan chiwal an sukin irîttuzkas, purazi. Diosne usparuzpa kal kiarît aizpa mîmanat kit usparuza uspa kwail kiarît aizpa kainanara. 14 Minpara sun irîttuzne ïn impaktukin îanazi, kwisha naizarînpa. Ðn impaktamtukin kihshturuzne sunkanain attishta îanazi, Diosta izamanpa. 15 Paiña mun chiyu pînkîhta parîtchiruzne, Dioskasa uztachiruzne, ïn impaktukin kiakpîntît azi.
Masas chiyukas masas pilkas
1 Kwiztane, suasne nane masas chiyukas masas pilkas iztau. An ñancha sara chiyukas, an ñancha sara pilkas, an ñancha sara pikas pînkularît. 2 Dios pîpulura, masas Jerusalén pîpulura, chiyuras, Dios uztas kihshtîmtu iztau. Ashampa paiña ampukas kasara kimtune, usne watsal pïn kwamtu. An chiyuras pîpulune sun ashampakanain kwisha watsal iztît. 3 Nane Dios uzmukin tînta kwiantumikasha mîrau. Ka kaizta: “Diosne awa purakin tuanazi. Awakasa uznazi. ‘An awane ap kwal i’ kiznazi. Diosne uspa Dios namnazi. 4 Suane Diosne wan tayalmu pailnintînazi. Suane mînminkas an iasachi. Mînminkas an tayalasachi. Mînminkas an azasachi. Suane an ishtu wachi. Mane wan an ñancha naizninmu pailtît,” ka kizta. 5 Uzmukin uztumikane ka kaizta: “Wan antikwa pîntît akwa, nane wan chiwal masas sashinash,” kizta. Mamasa nawa kwinta kikane, nawa ka kaizish: “Na kaiztu aizpa pînkîhta pari. Na kaiztu aizpa watcha i. Katmizna sun watcha pit nîjkultain,” kizta. 6 Mamasa ka kaizish: “Na kaizta aizpa wan pailtîre. Wan sarachasmin, uztau. Wan pailtîkane, nane mama uznash. Nakasa wan masamtu. Nakas wan pailnintus. Nane kwazi kiltumikasha chiyuras kwazi kwinnash, pailta payukima uznapa. Kain kwinnash. 7 Anuppamtumikane na kin namtît aizpa piankam kit sapnazi. Nane paiña Dios namnash. Usne ap painkulkanain namnazi. 8 Na akwa ishkumturuzne, na kaizta aizpa nîjkultuchiruzne, wan tuntu kwail kirîttuzne, mamazta piantarîttuzne, ampu mamaz ashampakasa pittîttuzne, ashampa mamazpa ampukasa pittîttuzne, mamaztuza tañu ki kamturuzne, awakana sararuza wakpuj waintaruzne, wan chiwal pîrail apmuruzne, asufre ïn aiztukin, ïn impaktukin wan chiwal îanazi. Suane Diostas îanazi. Uspane nakasa tuamanazi.”
Masas Jerusalén pîpulu
9 Suasne maza ángelta, siete ángeltuztas iztau. Sun siete ángeltuzne minpa siete wazta ilnam wintît aizpa pilta kiakpînta. Nawa parat kit ka kaizish: “Nakasa at. Nane nua ashampa kasara kin namtîtmikasha, Pîrikuwa ashampara annash,” kizta. 10 Na kainkizpamtuasmin, Diospa Izpulne nawa mira, katsa înkal kwash îzarakima. Suane nawa sînam Jerusalén pîpulu Diostas, chiyuras kihshtîmtu anzish. 11 An pîpulune kwisha watsal aizta, Dios uztas arît akwa. Jaspe muin ukkanain naztam aizta. Kai iztît. 12 An pîpulune katsa kalpialkas, kwash kalpialkas salpînwal kintît. Doce ángeltuzne doce napmukin kunara. Doce Israel kwalpa mun, doce pîjtakin parît. 13 Pãn puzmura kalpial kutña pîjta wa. Kalpial sur nilmalkas kutña pîjta wa. Kalpial norte nilmalkas kutña pîjta wa. Pãn payapmura kalpial kutña pîjta wa. 14 An pîpulu kalpialne doce katsa ukkasa sarît. Doce Pîrikuwa înintuzpa munne doce ukta parît. 15 Nakasa paramtumikane, uru tî anizmu mîlta, pîpulurakas, pîjtaruzakas pîpulu kalpialtuzakas anizna. 16 An pîpulune ampara kawarain kalpial kintît wa. Yawa aizkas, yawa akskas sun kalpial kawarain anizta. Ángelne paiña tî aizmukasa pîpulura anizta. Paas mil kilómetros, paas ciento kilómitroskasa anizta. Yawa aizkas, yawa akskas, yawa kwashkas kawarain anizta. 17 Uskas kalpialtakas anizta. Sesenta y cinco metros kwash aniztît. An ángelne ampuwa anizmukasa anizta. 18 Salpînkintît kalpialne jaspe ukkasa sara. Pîpulune sînam uru aiztukanain iztît. Maizakanain aizta. 19 Kalpial samtasmin, akkwan tuntu muin ukkasa sara. An ñancha kwanam ukne jaspe munta. Mamaz kwizta kai pijtam ukne saþro munta. Mamaz kwizta pijtam tîlkaya ukne ágata munta. Mamaz kwizta pijtam ukne esmeralda munta. 20 Mamaz kwizta putchãwazha ukne ónice munta. Mamaz kwizta kwanam ukne cornalina muntît. Mamaz kwizta naram ukne crisólito munta. Mamaz kwizta pijtam ukne berilo munta. Mamaz kwizta naram ukne topacio munta. Mamaz kwizta pijtamwazha ukne crisoprasa munta. Mamaz kwizta kai pijtam ukne jacinto munta. Minpa tîlkayawazha ukne amatista munta. 21 Doce pîjtane putchã ukkanain izarît. Maza maza pîjtane putchã ukkasa sara. Pîpulu mine urukasa sara. Pîpulu mine maizakana aizta. 22 Sun chiyukin iglesia wachi, au Anpatne sua uztu akwa. Au Diosne, chiwazha kishimtumikane, Pîrikukasa wan pîpulukin uztu. Awane wan chiyukin Diosta wakpuj wainñamtu. 23 Sun pîpulukinne pãnkas, palapchakas aiznapa pashimtuchi, Dioskas Pîrikukas kai pãnkanain aiztu akwa. 24 Wan sura uzturuzne an pîpuluwara chaanazi, sua kai aiztu akwa. Wan katsa înintuzne chiwazha pial mîj aizpa muat kit sua chîhkat kit “Dios kwisha wari” kizanazi. 25 An pîpulukinne payuwara pîjta sîpmanazi. Sua amta wa chi. 26 Wan sura uztuzne chiwazha pial mîj aizpakas, chiwazha watsal iztît mîj aizpa muat kit sua chîhkanazi. 27 Chiwazha kwailne an pîpulura nappamanazi. Chiwazha kwail kiamtuzkas, pîrail paramtuzkas, mizurainkas sua nappamanazi. Uspa mun chiyu pînkîhta parît mîjtuzmin chiyura nappat kit uzashina.
1 Sun ángelne nawa maza sînam pi anzish. Sun pine Dios uzmukiskas, Pîriku uzmukiskas puztu. Sun naztam pine awaruza uzninnamtu. 2 Pîpulu paizkakin kwisha katsa mi tu. Mi paizkakin katsa pi wa. Pimamin akkwan tîne kunkularît, awaruza uzninnanapa. Mish aizpa sun tîruzne pippa waamtu. Maza añorain doce pijikima waamtu. Tî kîhkasa pih samtu, wan sura uzturuza wat paanapa. 3 Sua chinkas kwail wanmalsachi. Dioskas Pîrikukas sua uzpailnazi. Paiña kiwaintuzne ussa kiwainanazi. 4 Uspane paiña matsîh izanazi. Usne paiña mun uspa kînijkin parananazi. 5 Suane amta wachi. Impilkas pãnkas wenamtuchi, Anpat Dios sua wanta kai aizninnamtu akwa. Suntuzne wan payukima îninanazi.
Jesucristo anpain i
6 Ángelne nawa ka kaizzish: “Na kaiztu aizpa watcha i, u nîjkulanapa. Anpat Diosne paiña ángelta îninta, Dios pit kainammtuza parananapa, paiña kiwaintuz chiwazha kirîmtu aizpa piankamanapa.” 7 Cristone ka kaizta: “Nane anpain ish. An ñancha pit kaiztu aizpa mîmturuzne, an pit pînkîhta parît aizpa mîmturuzne, watsal kularînazi.” 8 Nane Juan mun ish. An pînkîhta parît aizpa wan iz kit mîrau. Wan iztawane, wan mîrawane, nane ángel mittîkin palsum kit ussa wakpuj waintau. 9 Suasne nawa ka kaizzish: “Sunkana kimun. Nakas nukanain Dios kiwainmumika ish. Up añaruzkas, Dios pit an ñancha kainnamturuzkas, an pînkîhta parît aizpa mîmturuzkas, Dios kiwainmuruz mai. Diostain wakpuj wain kit paikwatpamakpas,” ka kizzish. 10 Mamasa kaizzish: “An pit pînkîhta parît aizpa, an pit ñancha kaiztît aizpa puintît mîjmun. Wan an pînkîhta parît aizpa masanapain. 11 Kwail kimtuzne mama kwail kiarînazi. Sînam chiruzne, kwail mintuzne, mama kwail kishiarînazi. Wat kishimturuzne mama wat kishiarînazi. Diosta mîshimturuzne mama Diosta nîjkularînazi,” kizzish. 12 Mamasa Cristone ka kaizzish: “Mamasa azain anash. Na amtu payura kwail kimturuzakas wat kimturuzakas uspa kiarît akwa chiwazha mîlananash. 13 Ñamin uztau. Minpa payukima uznash. Nane an ñanchamika ish. Nakas minpamika ish. Nane wan masamtus. Nakas wan pailnintus. 14 Uspa kwail kiarît aizpa sînam kultîttuzne watsal kulanazi. Uspane putchã pïn pattîtkana sînam namanazi. Uspane sun pîpulura nappat kit uzanazi, an pîpulu tî pippa warîtta kuanapa. 15 Kwisha kwail kimtuzkas, tañu kimturuzkas, mamazpa ampukasa pitturuzkas, mamazpa ashampakasa pitturuzkas, mamazta piantamturuzkas, awakana sarîtta wakpuj wainmuruzkas, wan pîrail kaizmuruzkas, an pîpulu pianamarain nukkularînazi. 16 Nane Jesús mun ish. Ap ángelta wan nîjkulturuza îninnara, na kaiztît aizpa piankamanapa. Katsa mikwa Davidne ap pampa i. Katsa kîmane palapcha kwiztain cham. Nane katsa kîma aiztukanain ish,” kizta. 17 Dios Sînam Izpulkas, Pîrikuwa ashampakas “Arain” kiznara. An pit mîmturuzakas “Arain” kiznara. Kwazi kilturuzne atpa, an kwazi kuanapa, Dioskasa uzanapa. Kain kwintu. 18 Nane Dios an pit pînkîhta parît aizpa mîmturuza kurunanash. Watsal nîjkul kit iztain. Mînpazha chiwazha an Dios pînkîhta wiantane, Diosne suntuza an pînkîhta kwail parît aizpa taizninnanazi. 19 Diosne Cristora nîjkulturuzpa mun chiyu pînkîhta parît. Mînpazha chiwazha an Dios pînkîhta parît aizpa ukkarane, Diosne paiña mun pînkîhtas kwiznazi, Diospa pîpulura uzmanpa. 20 Sun pit kaiztumikane wanta kainanamtu: “Mamin anash.” Sunkana kinazi. “Anpat Jesús, nu anka.” 21 Nane Diosta paikumtus, Jesucristo uruza kiwainanapa. Pailti.