The New Testament of our Lord and Saviour Jesus Christ
1 A yurúsãre Jesucrísto quicujáidie ore íode jne. Mu obiréjnane u David, Abraham iji ore. Enga Jesus quicujáidie u ore to. 2 Ore íode u unojo: jnani bajai Abraham ujnacari tu Isaac nanique. Enga Isaac ujnacari u Jacob. Jeque Jacob ujnacarode u Juda ore to nanique. 3 Jeque Juda ujnacarode ore u Fáres, Zára ore. Enga udore ore daté i u Tamar. Fáres ujnacari cusapo rĩ enga i tu Esrom. Jeque Esrom ujnacari cusapo rĩ enga i tu Aram. 4 Aram ujnacari cusapo rĩ enga i tu Aminadab. Aminadab ujnacari cusapo rĩ, enga i tu Naason. Jeque Naason ujnacari cusapo rĩ enga i tu Salmon. 5 Salmon ujnacari cusapo rĩ enga i tu Booz. Enga Booz daté u chequé bajé Rahab. Jeque Booz ujnacari cusapo rĩ enga i tu Obed. Enga Obed daté u chequé bajé Rut. Jeque Obed ujnacari cusapo rĩ enga i tu Isaí. 6 Isaí ujnacari cusapo rĩ enga i tu David uje eduguéjna cuchape nanique. Jeque David ujnacari cusapo rĩ enga i tu Salomon. Enga uté daté u Urías acoté nanique iji taningai. 7 Salomon ujnacari cusapo rĩ enga i tu Roboam. Jeque Roboam ujnacari cusapo rĩ enga i tu Abías. Abías ujnacari cusapo rĩ enga i tu Ása. 8 Ása ujnacari cusapo rĩ enga i tu Josafat. Josafat ujnacari cusapo rĩ enga i tu Joram. Jeque Joram ujnacari cusapo rĩ enga i tu Uzías. 9 Uzías ujnacari cusapo rĩ enga i tu Jotam. Jotam ujnacari cusapo rĩ, enga i tu Acaz. Jeque Acaz ujnacari cusapo rĩ enga i tu Ezequías. 10 Ezequías ujnacari cusapo rĩ enga i tu Manases. Manases ujnacari cusapo rĩ enga i tu Amon. Jeque Amon ujnacari cusapo rĩ enga i tu Josías. 11 Quigade enga Josías ujnacarode cusapo rĩ enga uñai i tu Jeconías. Enga deréjnane jé u nanique uje Israel gosode ore umajosórone ore chisa ore enga ore jno ore údi aja daniri uje i tu Babilónia. 12 Quigade enga Jeconías ujnacari cusapo rĩ enga i tu Salatiel. Jeque Salatiel ujnacari cusapo rĩ enga i tu Zorobabel. 13 Zorobabel ujnacari cusapo rĩ enga i tu Abiud. Abiud ujnacari cusapo rĩ enga i tu Eliaquim. Jeque Eliaquim ujnacari cusapo rĩ enga i tu Azor. 14 Azor ujnacari cusapo rĩ enga i tu Sadoc. Sadoc ujnacari cusapo rĩ enga i tu Aquim. Jeque Aquim ujnacari cusapo rĩ enga i tu Eliud. 15 Eliud ujnacari cusapo rĩ enga i tu Eleazar. Eleazar ujnacari cusapo rĩ enga i tu Matan. Jeque Matan ujnacari cusapo rĩ enga i u Jacob uñai. 16 Jacob uñai ujnacari cusapo rĩ enga i tu José. Enga José acoté tu Maria. Enga Jesus daté jé u uaté. Enga uaté abi Jesus upúsu Dupade uruode atatasórone jnani bajácho ore atatai Crísto, uje chi chiqueta darasade ore jne. 17 E yingo ore íode ome uaque. Mu a jé yingopo ore guejnanie ayoré ome uaque jne rĩ. Abraham ape disi ejo eyúgode ore dayode gagájni iji pirídai aja eduguéjnai David. Jeque David ape disi ejo eyúgode ore dayode gagájni iji pirídai aja Jeconías uje basíji Babilónia nanique. Jeque Jeconías ape disi ejo eyúgode ore dayode gagájniapo iji pirídai te rĩ aja Jesucrísto. 18 Jesucrísto batigai isocade u unojo. Maria, uje Jesus daté jé u jne, chi José ore áyipiei ome ñane ujetiga ore chóji ñane gari jne. Mu uje cáma ore chisa ñane, chi Maria ica déji ajei. Mu chi José ca ica go, mu Dupade Ujopie Espíritu Sánto chi ipesute Maria abi iji ajei. 19 José gajma Maria mu cáma chisa. Enga jnani paraquedaté José. Uje e chiraja uje Maria abi e déji ajei mu que chingo ayorérique go. Pota jetiga cha mu que chingo erámi. Gaidi u gu ujetiga ca ore chedo iji erámi. 20 Mu José qué cho dáyugu re eti Dupade iroi gaté unirísõri chiqueta raja iji imoi. Enga chojningame: —José a, David ape disi ejo a, ca o báyugu ua. Enga ca etaque bajma Maria. Enga ca aya. Uje Dupade Ujopie Espíritu Sánto ipesute uaté abi iji ajei. 21 Uaté abi base jne enga ẽ́care Jesus aja jne. Uté a chiqueta darásade ore jne gu iji ore isijnaringuéone.— (Jesus i qui tu piquetangore ome Israel gosode ore uruode.) 22 Cuchade unojo jnese pésu re gu ujetiga Dupade uruode tocade uje urusãracho nanique ome Dupade uruode urusarasórone uñai uje chojninga: 23 A gapu paréraque icáraque déji ajénique bisideque jne. Enga a atique cuse jne. Enga a ore chĩ́care Emanuel aja jne. Uje Emanuel uruode qui tu: Dupade déji yocari. 24 Enga chi José niji iji darigode quigade. Enga doi Dupade iroi ojningane cucha. E que chetagapo dajma Maria gotique rĩ, enga ore nóna ñane aja quedéjnane. 25 Ore déji ñane gari mu cáma ore móji ñane gari, jé aja Maria ape bajai quigade. Maria abi base enga José chĩ́care gojni Jesus aja.
1 Heródes chi qué u ore eduguéjna cuchábi iji ore uniri Judéa nanique uje Jesus basíji guidai Belen. Quigade enga guédodie irajasóningo chi ore chise idai cuchábi Jerusalen. Enga udore chi ore tṍraji punire quedéjnai iji guedé garani. 2 Udore ore catecã́ri Jerusalen gosode enga ore chojninga: —¿Jé disabi idánique a uje chi basosíji duruñeque? Uje Israel gosode chi ore eduguéjna cuchape suté jne. E imóngo garãpie guédo iji guedé garani diríca. Enga yoquigaidi tu ujetiga yẽcója ome uringai cuchape.— 3 Enga Heródes chopise dáyugu re uje chudute uje chi disatique basosíji duruñeque uje chi eduguéjna cuchape suté jne. Que gusu Heródes, mu urásade ore cho dáyugu raque to iji Jerusalen údode. 4 Enga eduguéjna cuchábi Heródes chi chamáta judíode angaránone ore asutedie. Chamatapo Moises urusarane atatasórone rĩ. Enga chojningame ore: —¿Jé uacajnati Crísto basiji rique jne a ome uacajirigode, Dupade uruode atatasórone ore urusãracho?— 5 Udore ore chajnai Heródes enga ore chojningame: —Uté chi batigai tu ore idai Belen jne iji Judéa gosode ore uniri. Uje Dupade uruode atatasórone uñai, jé urusãracho nanique gu uje chojninga: 6 Belen a, guidai atíami joroque ua iji Judéa gosode ore uniri, Mu a jé eduguéjna cuchátique tṍra siji ua jne. Enga a chirote yurásade Israel gose ore jne.— 7 Ore chejna daruode udore guesi, enga jé u uje eduguéjna cuchábi Heródes tibidi guédo irajasórone ore. Mu Heródes pógu daruode uje catecã́ri ore enga chojninga: —Atatayo díningo iji garãpie guédo yui ujetiga amóño diríca.— Enga jé u uje ore chingo. 8 Quigade enga Heródes chiroque guédo irajasórone ore aja Belen ujetiga ore chucuesi disabi tiji. Enga uté chojningame ore: —Ujetiga esósi disabi jne enga ajníñopo aja ne rĩ enga jé u jne ujetiga yibágosi to jne rĩ ujetiga yẽrásia suté to ome uringai cuchape.— 9 Uje e ore chejna eduguéjnai Heródes uruode guesi enga jé u uje ore jnopome dajei te rĩ. Mu ore imo bajé guédo jé u uaté uje tṍraji guedé garani, jé jogate ore iquei, jé aja Belen. Uje ore chise Belen, guédo uaté chapísiji disabi jogadi gai. 10 Uje ore chimo guédo uje cha, enga guédo irajasórone ore nína raque uje ore chiraja gu uje e ore chise daqui. 11 E ore chacája guiguíjnai ajei enga ore chimo disabi, daté Maria ore iji. Udore ore chichaga dagatáidie aja suté iquei. Mu jĩraque ore chuchẽre daborapíode gáyode ujetiga ore chisi ome deranone cucha ome suté. Enga ore gueranone u óro, cucha ai unérone uje i tu inciénso, mírra ore. 12 Diga Dupade chiqueta raja ore iji ore imoi enga chojninga: —Ajníño jne enga oyo carúja uacaniri. Enga ayóyo Heródes gai jne. Mu angaráño uacajnátique dajeque jne ome uacajnaque baja casica.— 13 Uje guédo irajasórone e ore jno, enga Dupade iroi gaté unirísõri chiqueta raja José iji imoi. Enga chojningame uté: —Heródes jmongárasija disabi. Pota chujési. Jecute arĩji jne enga bósi disabi, daté ore údi jne aja ore uniri Egípto. Enga ayáyoji ta to jne, jé aja ujetiga yujuégapo arohai ome uaque rĩ.— 14 Enga José niji jmame iji damochápi. Enga chi ca chajire cuchárique. Chi jnosi disabi, daté ore údi jé iji dejai uté. Enga chi ore chicáji punire idájai uje i tu Egípto. 15 Enga ore cháji te, jé aja Heródes itoringai. Cuchade unojo pésu re gu ujetiga Dupade uruode atatasórone uñai urusarane tocade uje chojninga: “A chise dínique jne ujetiga yingome yabi ujetiga jnoji Egípto gosode ore uniri.” 16 Chi Heródes cha dangoroné ome guédo irajasórone ore, enga cho júruru uje ore tagúja. Jecute chiroque dasoldádode aja Belen ujetiga ore chujé disi parátagabode ore iji, jé aja acorásedie jogonórone disío iji Belen ejode to. Chi ore yugode urásu disiode jnese uje cáma sequeréraque gare iji ore yui. Uje chi chasingara guédo irajasórone ore ojñane aja guédo yui uje ore chimo diríca. Jecute chiraja uje ore ucuegábi disabi suté jé irába guédo. 17 Jecute Dupade uruode atatasṍri jnani bajai Jeremías urusarane quene tocade uje chojninga: 18 Ducududique pisorã cuchábode uje tṍraji ore idai Rama. Chequé bajé Raquel u uje chisa dabade ome dabode gajnei poca ninga. Que paquĩraquérique chajni uaté ome jnusietigai ome abode. Uje ore chejna ore jnese. 19 Diga Heródes toi. Enga Dupade iroi gaté unirísõri chiqueta raja José iji imoi uje qué déji Egípto. Enga chojninga: 20 —Disabi jmongárajasorone e ore toi. Jecute ayague enga bosiapo disabi, daté ore údi rĩ aja Israel gosode uacaniri.— 21 Jecute José chague jmame. Enga jnosi disabi, daté ore údi aja Israel gosode ore uniri. 22 Mu uje uté qué déji dajei, chudute to uje chi Judéa gosode ore eduguéjna ichai tu Heródes ujnacari Arqueláo. Jecute José cájnaru rágome ore uniri Judéa yui. Jecute que chiraja dasocárique. Mu Dupade chiquetápo raja José iji imoi rĩ. Enga chingome ujetiga chicáji ore uniri dosate uñai uje i tu Galiléa. 23 Uje ore chise Galiléa enga ore quítiquiguiji ore idai uje i tu Nazaret. Enga jé isocai upúsu Dupade uruode atatasórone ore urusarane uringane tocachucho ome Jesus uje chojninga: “A Nazaret gose Crísto jne.”
1 Dirode unojo jé u uje Juan chacate darásade ore iji erãpe eyutiguei iji ore uniri Judéa. Juan uté jé upo rĩ uje tṍra ore aja yodi. 2 Enga Juan acajnaquéode qui tu uje chojninga: —Ecãcho uacajéode. Ayáyopo uacate bajade rĩ, uje e idógosi ujetiga Dupade chijna daringai dacasuté cuchape aja jnumi uné.— 3 Juan jé upúsu Dupade uruode atatasṍri Isaías ojningai uje chojninga: A ore chudute gosi pijnatígo jne ujetiga tṍraji erãpe eyutiguei. Enga a uté chojningame ore jne: “Boyo yico, yipéco dajei iji yoc angarádejnai iquei uje a di jne. Apesopúsu aja quedéjnane jne.” 4 Juan uté u uje ore ora iguidedie iji caméllode, burica quedéjnane acarane. Enga uté igarubi cuchiso aópo rĩ. Posode upo carichade, cutérone ore rĩ. 5 Chi Juan uté ibaguiésorone u cojñone uje ore tṍraji Jerusalen, Judéa, jé aja tie Jordan ejominórone to, ujetiga ore tangári acajnaquéode. 6 Juan acajnaquéode chijnime ore. Jecute ore chingo dasijnaringuéone ome ñane. Quigade enga Juan chaca ore edodie iji tie uje i tu Jordan. 7 Enga chi jiei fariséode, saducéode ore uje chi ore yore Juan gai ujetiga chaca ore edodie iji tie to. Mu Juan chi chiraja fariséode, saducéode ore áyipiedie uje chi ore pógu dasijnaringuéone iji dáyipiedie. Enga Juan chojningame ore: —Aringácachoqui uaque. Uacajnui u uacajnai Satanas píode uga. ¿Jé uñeque ingome uaque a ujetiga piquetaque uaque jne ome uacajnei pujuyaqué uje e idógosi?— 8 Juan chojningapome ore rĩ: —Ajusópise uacatígo guio enga uacasoca arétigo pijoque jne, uje e uaquécãcho uacadode. 9 Enga jé ca ojnichome ñane: “Jé areque yoque ẽrie uje jnani bajai Abraham ape disi ejo yoque.” Mu que cuchárique tṍraji udore. Uje yojningame uaque: ujetiga Dupade ajéo enga a dorási cucaranéringui udire enga pesurásu udire enga ore gajnunie urásu Abraham ape disi ejórigo to.— 10 Juan chacãra Dupade isocade aja jnani utacai adode enga chojninga: —Dimane ijnose ajineré iji utacai jmáinie ujetiga chaquesu pore gajnarénguenie iji pore ueradedie ujade. Ga ducarané ujetiga papose. Uje gajnarenguei adie gu.— 11 Juan qué jno dacajnaquéode údi enga chojninga: —Yaca uaquedodie iji tie uje imoi tu uje e uacayáyo uacate bajade. Mu Dupade utocaidi uñeque a chise uaque jne uje suépise yibai ome cutejma ujopie enga a chĩropise uacasijnaringuéone jne. Enga a chĩreta uacajéode ome Dajopie Espíritu Sánto jne.— 12 Mu Juan qué chacãrapo Dupade isocade aja utacai adode rĩ enga chojninga: —E oidi pite déji jmáinie ujetiga chujé dacade iji jnumi. Enga cãra ajñunie jogadi ga cãrapo itabidode jogadi rĩ. Chuse adie guio. Mu chãru itabidode gai. Mu pioi uté uje Dupade ipesute ome ayoré sijnángone ore que eruénique cuse ome ore jne.— 13 Diga Jesus tṍraji Galiléa enga chise tie uje i tu Jordan uje Juan charidi tu. Enga catecã́ri Juan ujetiga chaca edodie iji tie. 14 Mu Juan chetaque iji taningai. Enga chajnai Jesus uruode enga chojninga: —Jesus a, bamo uje bajnuépise yibai. ¿Jé gotique gu a uje bapota jeta yaca bedodie iji tie? Uhua urásu ujetiga acárase yedodie iji tie unaque.— 15 Mu Jesus chojningame: —Areque ujetiga yipéco Dupade áyipiedie jnese. Jecute jé tiógara ujetiga aca yedodie iji tie.— Enga Juan chojningame: —Jé areque.— Do gojni enga chaca edodie iji tie. 16 Uje Jesus doi guesi tiji tie, enga chi gaté chuchẽre dabai. Enga chi chimo Dupade Ujopie Espíritu Sánto uje chi doi jnumi. Enga chi cho cucujnadatéode aja jnumi. Enga basaja Jesus gai. 17 Jé u uje ore chudute darade uje tṍraji gaté yui. Enga chojninga: —Yimeserai yape u uné.—
1 Chi Jesus jnoji tie uje i tu Jordan. Enga Dupade Ujopie Espíritu Sánto chi chorei Jesus iji erãpe eyutiguei, ujetiga Satanas chequetingare iji. 2 Mu chi Jesus cho dayágome re ome díningo uje chi guejnáringui ayoré gare. Iji unojo quigade enga chi quene chejnáreque dayaguhei. 3 Jecute chi Satanas sose Jesus yui ujetiga chequetingare uté enga chojningame: —Ujetiga jé ũré enga Dupade abipise ua enga apésu cucaranenie udire enga noña jne enga arurécho jne.— 4 Mu Jesus chi ca doi Satanas áyipiedie mu chajnai uruode enga chojningame: —Dupade uruode déji enga chojninga: “Que gusu cucha pibotique jeta ayorérique ecame. Mu yiquecágo to gu Dupade uruode uje yoco cucha pibotíji.”— 5 Chejna unojo guesi enga Satanas chorepoi Jesus iji Dupade ijnorai idai Jerusalen rĩ. Enga chorepóji Dupade iguíjna cuchábi ójo te rĩ. 6 Enga Satanas chojningame: —Be gojni enga ṍra ua aja jnumi ujetiga jé ũré enga Dupade abipise ua.— Satanas e potapísa ujetiga sué joroque Jesus gai. Jecute chijna joróga Dupade uruode ome enga chojningame: —Dupade uruode déji to ẽrie uje cho jninga: Dupade a chingome darótigo jne ujetiga ore chirote ua. Ujetiga abasiji gaté mu a Dupade irótigo chisa ua iji gaté yui jne, ujetiga ca cuchárique chósi ti iji ua.— 7 Jesus chajnai Satanas uruode enga chojningame: —Jé ũré ua, mu bécãre quigode gu. Uje Dupade uruode déji to enga chojninga: “Que toc ujetiga pujñiete Dupade ome ojningane cucha quigode.”— 8 Quigade enga Satanas jno údi aja cucarãte chaguesi ójo. Jé u uje Satanas chingo punire ueradode aja jnese, iji erámi údode. Chingopo uringane cuchábejna ome rĩ. 9 Satanas chojningame Jesus: —Ope bangaráni iji yu bajaque enga achagába bagatáidie aja yiquei enga jé bajnechope punirone unojo jnese jne.— 10 Mu Jesus chojningame Satanas: —Satanas a, acai síñeque iji yejode. Uje Dupade urusarane déji uje chojninga: “A gusu Dupade jne ujetiga angári. Enga gusu uté jne ujetiga be iroquéode.”— 11 Enga Satanas noñome Jesus iji te jmete. Enga gaté unirisórone uñane ore chise Jesus ujetiga ore chátaja. 12 Jesus chudute uje chi ore suru Juan gai iji soldádode iguíjnai. Enga jé u uje Jesus chajnésarapo Galiléa rĩ. 13 Chajmita darásade ore iji Nazaret. Mu diga chácariji ore idai Capernaum uje déji gajño Galiléa pijnanai. Capernaum uté idógosiji pachaminone Zabulon, Neftali ore to. 14 Jnani bajai Dupade uruode atatasṍri Isaías urusarane e tocade uje chojninga: 15 Urúsarome pachaminone Zabulon, Neftali ore jogosórone uje pacha minórone udore déji dajequedatei gáyode uje chicáji Galiléa pijna nai iji Jordan dosadi iji guedé garani. Mu que judío ore go. 16 Pachaminone udore jogosórone ore déji ijnangununie ajñonie icaite, Mu e ore chimo direcaringuei to. Pitoringai suru ore gai nanique. Mu ore ejode cho jnaque gajneri ome ore imoi direcaringué tuté. 17 Jesus e chacate Capernaum gosode enga chojninga: —Ayáyo uacasoca gajnaréngone ome Dupade. Uje e idógosi ujetiga Dupade chijna daringai dacasuté cuchape aja erámi uné.— 18 Jesus diguiji gajño Galiléa pijnanai enga chimo jnacare gáreode uje ore jõra ñane. Chojmarai i tu Simon uje i uñai tupo Pédro rĩ. Jõrai i tu Andres. Oyite gaisõre ore enga qué ore tṍra doradie chímeno aja gajño uje Jesus chise ore. 19 Enga Jesus chojningame ore: —Boyo iji te ga ajínaño yu. Enga a yecãrape uacasatígo jne. Ga a ca acueyoi oyítigo rĩ, mu a uacacuegode u ayorérigo jne ujetiga amácho ore aja panguretigai ome Dupade to.— 20 Uje ore chudute Jesus uruode udore enga que ore áyipieraque dépoji dachímenonie, dasagode cucha rĩ. Jé u uje ore carubája Jesus quigade. 21 Jesus jnoja daquei, mu chimópo jnacare gáreode uñane rĩ. Enga jé ore jõrapo ñane rĩ. Jacóbo, Juan ore u. Enga ore déji dai Zebedéo gari iji uraque dachidi cuco ajei. Qué ore chuga uraque dachímeno daquesupídode. Jé u uje Jesus catecã́ri ore ujetiga ore nóna to. 22 Jĩraque udore ore noñome cucoi, uraque dai ore, enga ore nóna Jesus to. 23 Enga Jesus diguiji Galiléa údode. Enga chacate judíode ore iji ore aquiningaméone udore, udore, udore. Enga omío atatagode ome ore. Uje chingo ore uje idógosi ujetiga Dupade cho darásaji danguresórone ore to. Chiquetápo ore ejnareque ponáyone jnese to rĩ. 24 Síria jogosórone e ore chudute Jesus ujnoméone to. Jecute ore chijna darása ejnaretade aja Jesus to. Jé aja ũrusode uje Satanas utocaidode déji ore ajéode, sereretaguebéode, noñángone ore rĩ. Enga Jesus chiqueta ore jnese. 25 Quigade enga cojñonguemui ore chajna Jesus uje ore tṍraji Galiléa, Decápolis, Jerusalen, Judéa ore. Ore tõrapóji tie Jordan dosadode iji guedé garani rĩ.
1 Uje Jesus chimo gaguedaté enga cheru cototé ujetiga chacate ore iji dádi. Chi chácariji ta. Enga chi acadigode ore cháji ejode to. 2 Jesus chi chacate ore enga chojninga: 3 —A ore nína raque jnese jne uje ore chiraja Dupade uringai ore agutíyamate. Chamáñaje Dupade a urásade u udore ore jnese jne gu. 4 Jnusietade a ore nína raque to jne. Chamáñaje Dupade a chaquĩ́ra ore jne iji ore jnusietigade. 5 Ayipie pajnotágode a ore nína raque to jne uje a ore gajneque Dupade ingomei punire jne. 6 A ore nína raque jnese jne, udore ore uje que cucha uñeque déji ore ajéode ome Dupade uruode uje ore pésu. Uje Dupade a chátaja dapotigádode cucha aja ore jne ujetiga ore pésu. 7 Osõcacade a ore nína raque jne. Chamáñaje Dupade a chosõre ore to jne gu. 8 Udore ore uje ore áyipiedie quigode chojmára ome Dupade a ore nína raque jne. Chamáñaje a ore u jne ujetiga ore chimópise Dupade. 9 A ore nína raque jne ujetiga ore chaquĩ́ra dojode ayoré ome ore ájningane ome ñane. Uje Dupade a cho dabi iji ore jne gu. 10 A ore nína raque jne uje ore cho daba Dupade iroquéode. Dupade a cho darása iji ore jne gu. 11 Anínaño uaque ujetiga uacojode ayoréo ore urúrigo gajnárecho aja uaque, ujetiga ore chopo damajoi uaque to rĩ, ujetiga ore chaguhétapo cucha ponáyone uacabai rĩ. Chamáñaje uacoyo uacaba yu gu. 12 Mu anínaño uagome cucha gajnaréngone unojo ujeta chise uaque. Uje Dupade a tẽrája uaque jne ome uacaringane pumajo iji jnumi uné, ujetiga eso iji gaté. Mu que quene uacate go uté uje uacoyo uacaba Dupade uruode. Uje jecucha Dupade uruode atatasórone jnani bajade chi ore cho daba Dupade uruode to nanique. 13 Uacajnui u echoi iji erámi unirisórone ore ujade. Ujetiga echoi íjnoque unéningai iji ga e uringai cucha bisideque jogadi u. A jogadi u jne ujetiga ducarãte echoi aja jnumi ga jogadi upo rĩ uje ore chuchiéjna aja jnumone. 14 Uacajnui u direcaringuei iji erámone. Uacajnui upo guidai cuchábi uje déji cucarani ójo uje que toc ujetiga chacose re. 15 Ujetiga papose ibioguéjnarique enga ca pagoyaque iji cuchárique útique. Mu arei tu ujetiga picháji goningárique enga iguíjnasorone ore tajicára jnese. 16 Uacapesute arégode a chorase direcaringuéone to. Jecute ajóyorase uágaja. Enga a uacojode ayoréo ore chimo uacapesute arégode jne enga a ore chicota uacai Dupade iji gaté to jne ome. 17 Uacuñéngo uacajoso eti yigaidi tu ujetiga yṍra jnani bajai Moises urusarane, ujetiga yṍrapo Dupade uruode atatasórone ore acajnaquéode to rĩ. Mu que yigaidi tu go ujetiga yṍra ore. Mu yigaidi tu ujetiga yatatapísa udore ore quigode ome uaque. 18 Jé ũrepise yu ome unojo: uje jé jogate jnumi, gaté ore enga isocai jé u to ome Moises, ore urusarane Dupade urúo. A ore jogadípise jnese to, jé aja ujetiga ore chise daringane tocachucho jnese. 19 Uñeque ujetiga ca doi Moises urusarane Dupade iroquéo uñeque enga chacate dojode ayoréo ujetiga ore doi isocai to, a ayoré gajnareque jne iji Dupade idai. Mu uté gosi uje pésu Moises urusarane Dupade iroquéo jnese enga chacate dojode ayoréo ujetiga ore chirate, a ayoré ataque uté gosi jne iji Dupade idai. 20 Yingome uaque uje a ca eso uacaringáringo Dupade urása jne ujetiga ca ajnuéño fariséode, Moises urusarane atatasórone ore gai, ujetiga apéso Dupade ipotigádode cucha.— 21 Jesus chojningapome cojñonguemui rĩ: —Uacadúcho jnani bajai Moises urusãra casodicáite to uje chojninga: “Jé ca ajé bojórique ayoré.” Chojningapo rĩ: “Ujetiga uñeque chujé dojórique ayoré, a docoite uté gosi to jne aja pasutedie iquei, ujetiga ore doi dasocáringome gosi.” 22 Mu ojningapome uaque rĩ: ujetiga uñeque ajningaranguípise ome dojórique ayoré, a jé tiógara to jne ujetiga docoidája pangaránone to. Ujetiga gosi chijnime daru gajnarétigo aja dojórique ayoré enga uté jé tiógara to ujetiga docoidája dacasuté cuchábi, ujode dacasutei ore iquei. Jé chopo rĩ ujetiga uñeque chuca dojórique ayoré, a susi deo ome gajño pioi jne. Socase chicáji.— 23 Jesus qué chacate ore enga chojninga: —Yocobi jne ujetiga e agúsiji Dupade iguíjnai ajei. Enga e bacharása berani aja gaserani gai ome Dupade. Mu jé u uje báyipie déji uje bãjorai chugua ua. 24 Jé u uje amorase berani iji bajmáinie. Enga acháji gaserani gatẽrasui. Jé u uje o búja bajõrai enga ajni uté guetétigai ome ua. Jé u uje bepoi berani cucha rĩ ome Dupade enga asi ome. 25 Ujetiga uñeque chetaque batígo enga pota chayója dacasutedie ome ua enga jĩraque ajira uté gosi yui enga acatecã́ri enga ẽrája. Jé u uje a cha banerai jne. A jé ca basocai uté jne enga a baniresṍri chijna ua aja pangaránone ore ero jne. Enga jé u jne ujetiga pangaránone ore ero chorei ua iji soldádode eduguéjnarique jne. Enga a soldádode eduguéjnai suru babai jne. 26 Enga a agúsiji ore iguíjnai ajei jne, jé aja ujetiga o bãjorai oré jnese. Enga ca ajníraja jne.— 27 Jesus chojninga: —Uacadúcho Moises urusãra casodicáite to uje chojninga: “Ca angáraja gapu unejángueraque, jeonga pabai unejátique.” 28 Mu yingo uaque ujetiga gosi chichaga dáyipieragaja chequé unejángueraque ujetiga pota iji dáyipie, enga e pisijnaringué ome. Isocai jé urásu ujetiga e morásiji gari. 29 Ujetiga bedo iji bãrachua chorei benominone aja cucha gajnaréngone ujetiga apésu, enga ajnime janipe enga ṍra. Ome u gu ujetiga bedóraque chojmára marínga, ca ducarãte ua aja gajño pioi jnese. 30 Isocai jé u ujetiga bajmanai iji bãrachua upúsu bajurérigui ipesungóri. Enga be enga aquesu enga ṍraja toniñeque. Arei jé u gu ujetiga parãte uñeque atique marínga, jé ca ducarãte uñéngaja gajño pioi jnese. 31 Uacadúcho Moises urusãra casodicaite to uje chojninga nanique: “Ujetiga uacuñeque pota piyátigome dacotéraque, doi enga chutṍri pangarádejnarique ujetiga chisi ome darusãratígo ome ujetiga chisi ome dacoté. Enga uringai ũrei jogadi u ujetiga cha uaté.” 32 Mu yojningame uaque: ujetiga jnanírique cha dacotéraque bisideque, enga ca uaté cho dabai iji jnani unejátique marínga, uaté nóna jnani unejátique enga e pésu pisijnaringuei. Enga chequé piyague abai ejo gatei jnani pesapo pisijnaringuei to rĩ. Mu ore isijnaringuéone bai upúsu uaté iyásõri dabai bajaque. Cachi iyague dacoté nanique gu uje bárique que cuse. 33 Isega adúcho uacayode jnani bajade ore uruode quigode uje ore chojninga: “Ujetiga ẽ́cacho bangarádejnai Dupade ome baruode ujetiga pangurete ua ome enga ca toque ujetiga ca baruode tocade.” 34 Mu ojningame uaque: ca ẽ́cachopise cuchade ujetiga pangurete ua ome. Ca ẽ́cacho gatajnoquei ujetiga pangurete uaque. Chamáñaje yoqueduguéjnai Dupade jogadi u gatajnoquei gu. 35 Jé cho jnumi ujetiga ca ẽ́cacho to ujetiga pangurete uac. Chamáñaje Dupade gajneque gu. Jé cho guidaidatei Jerusalen, uje Dupade, yoqueduguéjna cuchábi, cho dedaipísi iji uté gu. 36 Ujetiga be ga ẽcarirase batoi marínga, a ca toque go ujetiga écãre baterodie enochárique gotique. Chamáñaje Dupade ipesute baterodie enochade gu. 37 Ueradi u ujetiga ojnicho: “yipésu jne,” jeoga “ca yipésu jne.” Enga e gusu. Uje uaquecarane udore cucha uñane garani u Satanas gu. 38 Uacadúcho to uje Moises uru casodicaite chojninga nanique: “A uñeque chusaque dojórique ayoré edóraque jne, enga jé basa busiga usigasṍri edo to jne. Adi jé upo rĩ ujetiga pibéroque uñeque pãtarátique. Enga jé basa piberoque iberosṍri pãtarátique to jne.” 39 Mu ojningame uaque: jé ca arungu babai ome ayoré sijnátique. Quigueque uñeque a chujé baré te, enga õre baré uña tiji yui enga chujépo to rĩ. 40 Ujetiga uñeque chijna ua aja dacasutedie iquei ujetiga qué chachoque batique enga uté chutapoi baguidé te rĩ enga asi ome. Atapoja baguidé dajñorai gaté rĩ ujetiga asíapome rĩ. 41 Ujetiga ore angarátique chijna damenuringuei aja ua enga chiroque ua aja dagúcharigo ujetiga ajnongamája dajei gatocoro chojmáraraque, asa saque. Enga ajnóngaja ojningai iquérique. 42 Jé basa bojórique ayoré chutai bagúcharique enga asi ome bu. Jeque uñeque pota ujetiga qué chijna bagúcharique, enga ca acusu ua ome. Asíapome bu rĩ. 43 Jnani bajade ore urúo nanique uje chi ore chojninga: “Ajnóra bajnorangórone, mu ca ese betésorone unétigo.” 44 Mu yósi tome uaque: ca ajusécho uacamajosórone, uacojo ayoréo, mu ajnórañopise udore ore gaté. Ujetiga uñéngo cho damajo uaque enga acatecãchoi Dupade ome udore gosode. 45 A apéso yuruode unojo jne enga uacaringárigo Dupade ape pijoque. Uacamóño uje uacai Dupade iji gaté ipesute direcaringuei ome sijnángone, parágode ore. Chirogapo guéode aja jnumi te rĩ ome ayoré parágode, sijnángone ore jnese. 46 ¿Ja Dupade tẽrarásaja uaque ujetiga edúyo uacajnorasórone uacojo ayoréo ujetiga ajnóraño ore? Uacamóño uje jnani sijnanguipísode que ore changureta Dupade mu jé ore chijnóra dajnorasórone to. 47 Ujetiga uacapajnotaringai gusu ome uacajorane, querénga cucha gotique. Uacamóño uje ayoréode jé ore isoca to uje cáma ore chiraja Dupade adode. 48 Acacho uágaja uacai Dupade uje déji guéode uje que iyoguérique cuse.
1 Jé ca be ujetiga picotaque ua ome bate goningárique. Uje uacai Dupade uje déji gaté a chiraja basocai uté enga a ca tẽrája ua to jne. 2 - 3 Bamo ẽrie uje ayoré dicotáreode ore isoca te iji ore aquiningaméone, jé iji ore ajesúode jnese. Ore gaidi tu gu ujetiga ore ujode ayoré chicota ore. Mu a ore chedu dajnéone picotaquéo uje a ca Dupade tẽrája ore to jne. Mu ujetiga asi bojórique ayoré jmatátique enga ca ango penomitique, bãjorapísirique uñeque. 4 Apógu bate goningane marínga, bai Dupade a chiraja jne. Enga jé u uje a irasique ua jne. Enga a tẽrája ua jne. 5 Ca oyo jnani taquechoquíode ujetiga acatecãchoi Dupade. Uje cachi ore imitiguéo uje ore chague iji ore iquéode uje ore catecã́ri Dupade iji ore aquiningaméone, jé aja guesode rĩ. Ore gaidi tu ujetiga ore ujode ayoré chicota ore gu. Mu a Dupade jé chedu ore gajnéone picotaquéo ome ore enga a ca tẽra cucháringome ore jne. 6 Mu ujetiga acatecã́ri bai Dupade enga acája baguíjnai enga ajuru baquigade enga acatecã́ri Dupade iji. Dupade déji bari iji uté gu. Dupade chimo cucha pipoguédode enga a chimo ua iji baguíjnai ajei jne uje gusu ua iji mu. Enga a jé u jne ujetiga chisi ome bataitique cucha ome ua. 7 Eti acatecã́ri Dupade enga ca agota barúrigo iji jnumi. Uje agupurayode ore ome Dupade ore isoca uté gu. Ore jos eti Dupade tangaripísi ore gu ore uru dipeséode. 8 Ca beyoi udore ore isocade to. Uacamóño uje cáma ãraracho, mu uacai Dupade e chiraja cuchade uje qué chona uaque. 9 Jecute oyósi te ujetiga acatecãchoi Dupade: Yocai Dupade a, uje bagúsiji gaté, Yisígo babai. 10 Yocajéode u ujetiga jĩraque ãri baringai eduguéjna údi iji erámi uné. Yirajágo uje gaté unirisórone ore dopísi báyipiedie quigode. Enga apesabu yoguiji jnumi ujetiga yicoi báyipiedie quigode to jne. 11 Apesabu to enga ca cucha pibotique chona yoguiji diri uné jnese. 12 Acadígui yoquisijnaringuéone. Adi tu uje yicadíjoi yocujode ayoré ore isijnaringuéone to ome yoque. 13 Ca ajuéga yogome páyipie gajnaré ngueraque ujetiga yore yoquimá nique. Enga ãraque yogome Satanas uje que áyipieraque ujñapégome yo que gu. Irajágo baringai cuchabejna, bari ngai ujopierãque. Uje yoquedu guéjnai a u ua iji deréjna pitade unojo jne. Amen.— 14 Chejna unojo guesi enga cho dacajnaquéode quigode ome ore enga chojninga: —Ujetiga acadíchoi uñane ate gajnaréngone ome uaque jne enga uacai Dupade uje déji guéode uéchai a chicadígui uacate gajnaréngone to jne. 15 Mu ujetiga ca acadíchoi uñane ate gajnaréngone ome uaque enga uacai Dupade a ca chicadígui uacate gajnaréngone to jne. 16 Irajágo uje ijoyatade ore edodie chísaja jnumi, uje ore gaidi tu gu ujetiga ore uringai uyataque pijóguiji ore. Enga jé u uje ore urásade chisi ore gáyode ome ore uringane Dupade anguresóño. Mu ca aracho ore to. Uje Dupade a ca tẽrája ore ome ore uringane uyatácho jne. Ore gajnéone a u ore ujode ayoréo icotaquéode jne. Enga jé gusu. 17 Jé basa ua ujetiga o bayatiga enga aru bedodie, ariguétapo babai te rĩ. 18 Enga ca bojórique ayoré chiraja ua ome baringárique uyataque. Jé edu bai Dupade uje chiraja badode. Cachodi a u jne ujetiga bai Dupade nína re ome ua enga a tẽrapója ua to jne rĩ.— 19 Jesus jé chajnéra dacajnaquéode údi enga chojninga: —Ca acueyoi ujetiga ajéyo uacagúcharigo aja ñane gáyode iji erámone unojo. Uacamóño uje pugúchade jĩraque dijite enga jĩraque íjnongapo rĩ. A ca dijidírase mu socase ore toria. 20 Mu omi tu ujetiga apemeráñoji uacate goningáringo ejode ujetiga Dupade tẽra cucha dipesérigo ome uaque jne iji gaté. Enga yirajágo uje que toque jne ujetiga Dupade guerãtique cucha dijite iji gaté. Oriechoquírique a ca dépoji jne rĩ. 21 Ujetiga uacanguretigai déji Dupade guerãtique yui enga a uacáyipiedie jogadípise Dupade jne. A uacagúcha dipesérigo déji jnumi uné enga uacáyipiedie a ca jnoji jne. 22 Uaquedodie gajnúone u pibiotique ome uaque. Ujetiga uñeque edodie uchui, enga pañapísiji dajiritígo. 23 Jé basa a gajnarenguei bedodie jne, enga a cho jne ujetiga agusirásiji ijnangunúraque. Mu ujetiga bedo uchudie gajnarenguepo rĩ enga a apañapísiji ijnangunua uringa guecorise jne. 24 Uacarajayópise uje que togome jnanírique ujetiga doi darósõre gárerigo ore ajéningo jnese. Ayipie quigode a u jne uje chijnóra uñai, jé chetaque uñai. Isocai jé u uje a pesupúsu uñai áyipiedie jne, mu a cho uñeque áyipierigui gáningo jne. Enga jé gajnui tu uje a ca togome gosi jne ujetiga cháta Dupade, plátadie ore aja ñane ujetiga chijnóra ore jnese.— 25 Jesus qué jno dacajnaquéode údi enga chojninga: —Yingome uaque ujetiga ca oyo uacáyugu uaque ome uacabosode, uacajódode cucha, uacaguidedie cucha rĩ. ¿Ja ca cucha uñane qué déji ujetiga ejnáño uacáyipiedie aja? 26 A uacai Dupade guerãcho uacabotígo ore ome uaque jne. Uacamóño chungúperenie to uje que guejnatígo cuse. Que ore chacápo cuchárique rĩ. Que ore iguíjnaringo cusapo rĩ. Mu uacai Dupade uje déji guéode uéchai átapi udire enga guerãte posode ome. ¿Ja Dupade chijnóra chungúperenie udire marínga, ca chijnorapisirase uaque? 27 ¿Ujetiga uaque gosi chejnápise dáyipierigui aja daqueraningai enga jé uté gosi quẽrarásiji a? Ungare. Enga payugabatigade jé ate jnese uje a yejnangorase yocáyipiedie aja marínga, que cuchárique tṍraji. 28 ¿Gotique gu a uje uacoyo uacáyugu uagome uacaborárigui? Uacamóño cucha asíguedie uje que ore chisa dejórique. Que ore pesapo daguidérigui rĩ. Mu jé ueradei. 29 Enga udire sué eduguéjna cuchábi Salomon gai ome dahueratigai. Ueradei eduguéjna cuchábi Salomon iguidedie to nanique múñi. 30 Dupade chosõre cucha asíguedie ome uringanie ueradei, uje jĩraque beta múñi. Jetapurerase uacaguidérigui ujetiga chisi ome uaque. ¿Gotique gu a uje garósi uacanguretigai ome Dupade? 31 Yuruode qui tu ujetiga ayáyo uaquedojnaringuéone ome uacacuegode cucha pibóso, uacajótigo cucha ore. Jé chopo uacaguidedie rĩ. 32 Cojñone uje que ore chiraja Dupade to enga ore edojnaringuei gáite cuchade ome re. Mu uacajnengóri déji uje uacai Dupade u iji gaté enga uté chiraja ujetiga ajmátayo uagome cuchárique. Enga a chisi ome uacameserane cucha ome uaque jne. 33 Ueradi tu ujetiga ejnañope uágaja Dupade iroquéode bajaque enga jogadi u ujetiga uacasuté Dupade tẽrája uagome cuchade udore jnese jne. 34 Jé ca uacáyipiedie déji dire uñai ome pujuré pipesudérigui. Mu jé edúyo yoquijogosṍri dire jogotodie pujuré uníji ujetiga amácho aja quigode. Chamáñaje pujuré uñanie sué yoquibai iji yoquiquei ujetiga yocáyipiedie déji to.—
1 Jesus acajnaquéode chósi te: —Ca apéso ñane iyoguérigo. Socase Dupade doi uacayoguérigo to. 2 Uje Dupade a jé cho uacayoguéji uacapesutígo uacojo ayoré iyoguéo to jne. Enga a jé chirate uacatígo to jne ome uacojórigo ayoréo ujetiga chisi ome uaque to. 3 ¿Gotique gu a uje bese bojode ayoré iyoguebode uje bayoguéode sué uté iyoguéode gáyode mu? Que araja uje uté iyoguebode gajnámone su pite atíãtique. Jé basa ga bayoguéode gajnua tu pocoróraque. 4 Que togome ayorérique ujetiga cho dojórique ayoré quique ujetiga uté ate gajnarétigo sué dojoi ayoré atígo gai. 5 Beyoi enga ayáyobu uacate gajnaréngone bajaque enga jogadi quene u ujetiga oyo uacojórique ayoré quique.— 6 Jesus cho ore quique enga chojninga: —Ca apemeráñoji Dupade uruode ejórique ome ayoré tayipietique ujetiga acachome. Chamáñaje a ca chisírase Dupade uruode unétique. Socaseti socárome uagome uacacajnaquéode. Gajnui jé urásu ujeta ayorérique chisi ome cucha tiriachuguéjnarique ome yacõré quedéjnarique, tamocórique uñeque uje que chiraja uringai tiriachuguéjna enga chuchiéjnai jnumi.— 7 - 8 Jesus qué chacate ore enga chojningame ore: —Ujetiga atayoi uacajegaitígo cucha iji Dupade enga a chisi ome uaque jne. Isocai jé u gu ujetiga gosi chucué cuchárique enga diga chise. Isocai jé upo rĩ ome uacuñeque ujetiga uacuñeque pota chacája guiguíjnarique enga doi enga chujé piagoi bajaque. Enga jogadi u ujetiga puchérengai ome uté gosi. Jeonga uaque gosi chutai cucháriguiji Dupade enga jĩraque uaqueso. 9 ¿Enga jé jnanírique gosírase ujetiga atique chutárasi arurétique marínga, chisírasome cucaranéraque ome? 10 ¿Jeonga atique utaitique oyite marínga, chisi ome ugáringome? 11 Sijnaque uaque marínga, que uacacájnacho cucha ueratígo ome uacatígo. Enga ca iyieguirase uacai Dupade uje déji guéode uéchai ome icaniratiguérique jne ome dabode uhuaque ujetiga atayoi. 12 Bapotigádi u ujetiga bojórique ayoré susípise dáyipierigui quitígo guio ome ua. Enga jé be uté gosi isocai enga be enga ajusípise báyipiedie quitígo guio ome uté gosi to. Chamáñaje Moises, jé aja Dupade uruode atatasórone jnani bajácho jnese, jé ore ajegaidi u nanique gu ome uaque.— 13 - 14 Jesus chacate ore enga chojninga: —A yo quique pucuecaringuei iji deréjnane qui ome uaque jne. Gabi cho guiguíjna piago ajámi. Chopo dajeque ajã́tique rĩ. Enga garósi ore uje ore chise pigabi uté. Chamáñaje obiréjnapise piago uñai te gu, dajeque uñai ore. Enga querújna. Jecute ore cho buru, buru, buru aja quigode. Mu chorei ore iji gajño pioi. Mu yojningame uaque: Acáputayoji dajeque ajámi, piago ajámi ore enga ajnáño. 15 Ajuso uaqueo ome urupataquechoquíode. Uje chiese ore acajnaquéode garani tu Dupade. Mu que u go. Ore uruode omío, jé basa ga ore áyipiedie gajnarenguei. Enga ore gajnúone u cuchiso sijnángone uje chujé áyasadie. 16 A arajayórase ore jne gu ore ipesudode cucha jne. Uacamóño uje que toque ujetiga piránguei úvadie iji cataguebúrique ajénique. Jé adi u ome hígodie rĩ. Que piránguei go iji ojnatéraque ajénique. 17 Uacarajáyo uje pore ijórenie adie omei. Adi tupo ome pore betágueraque rĩ uje a ca ujñapeque árigui jne. 18 Que toc ujetiga pore ijórẽraque gajnarenguei árigui. Que togapo rĩ ujetiga pore betágueraque áraque ujñapeque. 19 Que ducañéra pore betágueraque ujetiga ca áraque cuse. A paquesu jne enga padíja pioi te jne. 20 Jecute a apáñañoji jnani aringácachoquíode ore jne ome ore ipesute gajnarétique to. 21 Ca ajoso eti ore chise daringáringo Dupade urása jne gu uje ore chimoringa yu enga ore chojninga: “Yangaráni a, yangaráni a.” Mu a gusu ore jne uje ore doi yai Dupade uruode, ujetiga Dupade cho darása iji ore.— 22 Jesus chojningapome ore rĩ: —Ujetiga chise diri ujeta yajire ore adode aja quigode ga a uásejna cojñone ujetiga ore chijócha yajei údi enga ore chojninga: “Yocangarádejna, yocangarádejna yico bajnomei údi diríca. Yijnángo bajopie diríca ome Satanas utocaidode ga yórango ore aja guesode iji ore píode cojñoque. Enga uásejna yoquipesute datéode uñane to rĩ uje yĩ́caco bei.” 23 A yichajnárasi ore enga yojningarásome ore jne: “Que yimo uaque to go. Boyóji yejode ome uacapesudode cucha gajnarécho.” 24 Yangarásõripisode u udore uje ore gajnui tu jnacanique uje chucué dáyipie ome dapesutique daguíjna. Uté doi enga chijócha jnumi bajaque ujetiga chise cucaranenie iji jnumi údi. Jé u uje doi enga pésu daguíjnai aja gaté. 25 Mu a yote bayátique, ẽpe cuchátique ore dirásiji jnacari. Mu que toc ujetiga chinguíra uté iguíjnai aja jnumi. Uje cucaranenie déji údi gu. Enga iguíjnai etóguiji jnumi. 26 Jé chopo rĩ ome uté gosi uje chudute yuruode mu que doi yojningane cucha to. Uté gajnui tu jnacare uñai to uje que chiraja cuchárique. Chamáñaje chicha dapesutique daguíjna aja ujnáraque gai gu. Chedu ujna enga que chicha cucaranéringaja daguíjnai údi to. 27 Mu a yote bayátique, ẽpe cuchátique ore dirásiji uté gosi ipesudi guiguíjna. Enga chinguíraja jnumi enga urui jnumi. Chichai te bisideque gu.— 28 Jesus chejna dacajnaquéode guesi enga acajnaquéode chajuque ore agutedie. 29 Chamáñaje Jesus uringai pangarádejna pijoguipis ome acajnaquéode udore. Enga que chopise Moises urusarane atatasórone go uje querénga ore acajnaquéode chijnime ore to.
1 Jesus chi chejna dacajnaquéode guesi iji cucarani guidoboi enga chi doi jnumi. Mu cojñoque dipeséode chi ore cho júa Jesus quigade. 2 Mu jnani ejnaretátique chi déji uje ejnarei i tu lépra . Enga jnani uté chimo Jesus enga chi chichaga dagatáidie aja jnumi iji Jesus iquei. Enga chojninga: —Yangaráni a, ujetiga bajéo enga aquetape yu. Yiraja uje bajopie déji ome cuchade udore ujetiga aqueta yu.— 3 Jecute chi Jesus chicha dajmanai aja jnani ejnaretai gai enga chi chojningame: —Yipota ẽrie ujetiga yiqueta ua.— Uje chi urúo udore enga jé u uje jnani ejnarei chi jĩraque jnoji. 4 Jé u uje Jesus chojningame jnani: —Ca angoma baringai piquetágaja erámi jne. Mu bope bádi aja judíode yocangaránone uñénguiji Dupade iguíjna cuchábi ajei. Enga bebi Moises áyipie quigode ome baringai piquetaque enga erámaja Dupade jne ome cuchisórique. Enga a imoi tu jne ujetiga ore cho ayoré ijõre iji ua.— 5 Jesus chise ore idai uje i tu Capernaum enga Róma gosi uje dacasuté chise Jesus enga chijócha ajei údi. 6 Enga chojninga: —Yangarádejna, yirógabi désiji damochápiabi iji yiguíjnai. Enga ejnaretaguipísape. Urugúode toi enga que tiógara dejnarei. Enga e ujñapie ajãpe.— 7 Jesus chojningame: —Yicai enga yiqueta barógabi jne.— 8 Mu ore asuté chojningame Jesus: —Que yicási ujetiga acája yiguíjnai. Mu angacare yiroi enga ecape jne. 9 Adi u uje eduguéjna yu to. Mu yoqueduguéjnapisi qué déji uje yiji áyipiedie. Isocai tu ome yajnéone soldácho uje yiroque ore. Enga ore doi yuruode. A yojningarásome uñeque: “Bo” enga uté gosi jno. Jeonga yojningame uñeque: “Boji te,” enga gosi tibágui yu. Jé adi u to ome yiroi uje tangári yu to enga pésu yojningane cucha.— 10 Uje Jesus chudute soldádode ore eduguéjnai uté uruode enga irasiguípise re. Enga chojningame cojñone uje ore déji gari: —Quene yimópise cojñoque agupurai uté to uje jé cãraque re ome danguretigadatei. Que yurásade Israel gose uñeque isoca uté to ujetiga uñeque changuretápise yu.— 11 Jesus chojningame dacadigode: —A uásejna cojñotígo iji erámi údode ujetiga ore chacásõra jnani bajade Abraham, Isaac, Jacob ore iji daringane Dupade urása. Jé aja judíode uñéngo. 12 Dupade áyipiedie u nanique ujetiga judíode jnese ore chise daringáringo urása to. Mu que ore pota. Jecute a ducarãte ore aja guesi tiji ijnangununie jne. Enga a jogadi tu jne ujetiga ore po joróguiji enga ore jnari joróguiji jne.— 13 Jesus chojningame ore asuté uté: —Bo enga ajníja baguíjnai. Uje a yiji bojningane cucha ome banguretigai te jne.— Enga jĩraque íjnoque iroi ejnarei iji deréjnai uté. 14 Jesus chacája Simon Pédro iguíjnai enga chise ejo iji mochápi uje ducosi tagu gu. 15 Jé u uje Jesus chi chisa jmanai. Enga chi jĩraque ducosi jnoji. Enga uringai ijõre jogadi chi u. Chi niji iji damochápi enga jé u uje chi pésu ore posode. Enga ore tagu. 16 Enga uje e dejaque enga ore chijna darása ejnaretade, jé aja Satanas utocaidode píode ayoréo aja Jesus ujetiga chiqueta ore. Enga chi uásejna ore. Chi Jesus arecujátaque chojmára ome Satanas iroque sijnángone, mu jé chijócãre ore. Chi chiquetápo dequejnareque uñane isagode ore jnese to rĩ. 17 Cuchade unojo pésu re gu ujetiga Dupade uruode atatasṍri Isaías urusarane tocade uje churúsãre nanique. Uje chojninga: “Yocagutíyamani uté e chijna yoquejnaréngone iji yoque. Enga e chiqueta yoque to uje garósi yoquetotiguéode.” 18 Jesus chi chimo gague dipesei iji dejode enga chi chojningame dacadigode: —Boyo, yico enga yicagóji yote quedéjnai uéchai uñai.— 19 Mu uje cáma ore jno to ome dajesui, enga Moises urusarane atatasórone uñai sose Jesus yui. Diga catecã́ri Jesus enga chojningame: —Yacadisṍri a, yipotigádi tu ujetiga yijína ua to aja baquitique erãpe.— 20 Jesus chi chajnai uté enga chi chojninga: —¿Ja jé ũré ua ya? Uje arapujnánguenie chiraja daguíjnane jogadode. Enga chungúperenie iguíjnane, úbiredie cusapo rĩ iji erámi. Jé basa Dupade utocaidi uyu que yiguíjnarique cusipise to go.— 21 Jnanione uñai uje jécucha tangári Jesus acajnaquéode to, chi chojningame Jesus: —Yocangaráni a, a yimope yapade aja jnutíguiji cachotique jne. Jé u jne ujetiga yijína ua to jne.— 22 Jesus chajnai uté enga chojninga: —Jé ajína yu. Enga jé ca báyipieraque déji bayé. Jiépisi ore gu uje que ore tangári yuruode to. Enga a bayé ajñerasórone u ore jne.— 23 Quigade enga Jesus nóna dacadigode aja uraque dabi cuco. 24 Qué ore déji yote quedéjnai ajei uje qué ore chiramísara mu Jesus mo. Jé u uje úyujna cuchabéraque chorei ore iji yote quedéjnai gatocoro. Enga yodi chĩreta cucoi ajei. 25 Jé u uje ore chiringare Jesus enga ore chojningame: —Yocangaráni a, ¡Be yoque! ¡E yico ome yote quedéjnai údi gu!— 26 Jesus chajnai ore enga chojninga: —¿Jé gotique gu a uacasadodéringai? A garósi uacanguretigai.— Jé u uje Jesus chaguena ore ajei enga botãre úyujna, yote quedéjnai ore. Enga jĩraque úyujna cho jnaque. Jé u uje yote quedéjnai cho paráguiji jnumi. 27 Enga chi acadigode tijapísa atedatei. Enga jé u uje chi ore catecã́ri ñane enga ore chojninga: —¿Chimo joroque re uje uté chaquĩ́ra yote quedéjnai, úyujna ore enga ore doi uruode?— 28 Uje Jesus chise ore uniri Gadára iji yote quedéjnai uéchai enga jnani gáreode ore chachai Jesus. Udore ore charidode u ducódedie. Enga chi Satanas utocaidode pi ore enga chi ore chachẽre cojñone ome dájningane. Jecute ca jnanírique chi cási ore arúbuchaque quitique. 29 Jé u uje chi ore chinguíra dabijnanone aja Jesus enga chi ore chojningame: —Jesus a, Dupade ujnacari ua ya, ¿gotique gu a uje bapota bajocase yoque? Mu cáma deréjnai u go ujetiga asocárome yoque.— 30 Mu yãcoré quedéjnanie chi idógosi iji ore uje qué taque. 31 Enga Satanas utocaidode ore chijócha Jesus ajei údi enga chi ore chojningame: —Ujetiga ajócãrirasi yoque enga ajmare yógaja yãcoré quedéjnanie usidé jne.— 32 Jé u uje Jesus chojningame ore: —Acáyoja.— Jecute Jesus jocarane udore doi guesi iji jnanione enga ore chacája yãcoré quedéjnanie. Enga Satanas utocaidode udore pésu ũrusoi iji yãcoré quedéjnanie. Enga yãcoré quedéjnanie idájai jnumi, mu jé ore basiji cucarani gaté, enga ore tṍra rángaja yote quedéjnai. Enga que toc ujetiga piqueta uñáraque. 33 Yãcoré quedéjnanie irodisórone uje ore chimo udore ga chajuque ore agutedie. Enga ore chayome. Uje ore chise dedai enga jĩraque ore chatata cucha dacadode udore jnese. Uje Jesus chiqueta jnanione udore uje Satanas utocaidode déji ore. 34 Jé u uje Gadára jogosórone ore yore Jesus gai. Enga ore chijócha ajei údi ujetiga jnoji ore gari.
1 Jesus jnoji Gadára jogosórone uniri. Chacája cucórique enga chajna yote quedéjnai aja dedai Capernaum. 2 Uje chi di enga cojñotígo chi ore di dojórique cojñoque údi iji Jesus. Enga chi ore chijnónguiji pitígo gai. Uje chi noñaque jnani nanique enga que dique. Jesus chi chimo uje ore changureta ome ujopie. Enga chi chojningame ejnaretai: —Yabi a, a tijode cho jnangome ua jne uje a yĩro bate gajnaréngone jnese jne.— 3 Moises urusarane atatasórone chi ore chojninga iji dajéode: “Jnacari uté pota ujetiga cháji Dupade charidi to. Mu que toque ujetiga jnanírique yico enga yirongo pisijnaringuérique.” 4 Jesus chi chiraja ore áyipiedie quigode. Jecute chojningame ore: —Gajnarenguei uacáyipiedie ome yu.— 5 Enga chi chojningapome ore rĩ: —Que cucha piraque gotique ujetiga yĩro uté isijnaringuéone. Jeonga yiqueta ejnarétigo, enga yojningame: “Ãriji enga ayague. Asa bamochápi enga bo.”— 6 Jesus chi jno darai údi enga chojningame ore: —A qué yetingarape yu jne ome uaque. Ujetiga arajáyo to uje Dupade utocaidi uyu yajnei tu ujetiga yĩro pisijnaringuéone iji erámi uné.— Jesus chejna daruode udore guesi enga jé u uje chojningame jnani noñai: —Ãriji bamochápi enga bo údi aja baguíjnai.— 7 Jecute jĩraque jnani noñai uté niji enga chisa damochápi picho enga chijnája daguíjnai. 8 Enga chi chajuque cojñone ore agutedie uje que ore chimo cuchárique uné gajnúrique nanique. Enga ore chicotápise Dupade ome Jesus atedatei. Enga ore chojninga: —Yicotágo Dupade uje chisi ome dajopie ome yocujoi ayoré uje yipáñangoji.— 9 Jesus jnoji guiguíjnai uté enga chimo ore eduguéjna cuchábi iroi uje utaidé ore iplátadie ome eduguéjnane. Enga iroi uté chácariji ejoi uje cojñone uñane ore chisi ome daplátadie ome. Jé u uje Jesus chimo enga chojningame: —¿Ajína yu to jne a?— Jnani uté i tu Matéo. Enga uté cha dasagode enga nóna Jesus to. 10 Matéo uté jno Jesus údi aja daguíjnai enga pésu uraque dabose unérone. Matéo ujórigo jnacare, ore eduguéjnai iroque gatérigo, jé aja pisijnaringuéone ipesungóningo chi ore chise ñane iji te. Enga Jesus, acadigode ore cháta rágaja ore iji ore posode gai. 11 Chi fariséode chimo Jesus iji ore gari enga chi ore dojnóngaja. Chi ore chojningame Jesus acadigode: —Uacacadisṍri Jesus e chimate dayoguei uje gajnareque yoqueduguéjnane iroque gatéode adode uje ore utaidei yoquiplátadie mu jé taguíji ore gari to, jé aja cojñoque sijnángone uñane to.— 12 Chi Jesus chudute ore uruode enga chi chojninga: —Cojñoque ejnaretade ore gajnei tu ujetiga piquetaque ore. Jé basa ga cojñoque ijórone que áyipieraque déji daringárique piquetaque. 13 Beyoi enga ajichopise Dupade uru quigode to uje chojninga: “Yipotigádi tu ujetiga osṍcho ñane. Que gusu gu ujetiga ẽcho cuchisode ome yu.”— Chi Jesus chojningápome ore rĩ: —Que yibaguiédode u uaque gotique uje uacacotáyo uagome Dupade. Yibaguiédode u ayoré ate gajnaréngone ujetiga ore chécãre dáyipiedie quitígo enga ore chabu date gajnaréngone to.— 14 Jé u uje Juan acadigode chi ore sose Jesus yui enga chi ore chojningame: —Yoco yocuyaque gatuaque to uje yicatecãcoi Dupade. Jé cho fariséode rĩ. Mu ¿gotique gu a uje bacadigode que ore cho dayaque gatuaque to?— 15 Chi Jesus chajnai udore ore uruode enga chojninga: —Uje ayorérigo déji dajñamitedatérique enga que ore cho dayágome raque uje ore nína ráguiji ajñamitedaté ipesungónique gari gu. Isocai jé u ome yacadigode uyoque. Qué yugúsi ore gari, jecute que jnusiétac ore. Mu a chise dínique jne ujetiga ore chijna yu iji ore gari. Enga cachodi u jne ujetiga jnusiétac ore enga ore cho dayágome raque jne.— 16 Jesus chojninga: —Que pisocai u go ujetiga gosi chuga borapeque ichai aja daguidé árime. Chamáña gu uje gosi a churúrasu enga jogadi u uje borapeque ichai caco aja ñane. Ga gosi iguidé dajuque ga edo casé chajnerame enga e querújna.— 17 Chi isocai upo rĩ ome cucha otatique uje chacãra dacajnaquéode aja. Enga chi chojninga: —Yipéco víno enga yirajágo uje a dajate jne. Jecute que yucuegoi cucha ao ijaroi ome. Socase dajuque gai gu enga yachígo jnese. Jecute yucuegoi cucha ao ichai ome yoquipesudi víno icha, ujetiga ca yachígo yoque.— 18 Chi Jesus qué déji dacajnaquéode gai mu judíode eduguéjna cuchátique chi chachai to enga chi i tu Jáiro. Jnani uté chichaga dagatáidie aja Jesus iquei enga chijócha ajei údi. Enga chojningame: —Jesus a, qué yutṍri ua ujetiga ajinama yu aja yiguíjnai. Yuro e toi gu. Iraja uje a acha bajmáinie aja gai jne enga a ecápo jne rĩ.— 19 Jesus chi chague enga chi nóna dacadigode ore aja Jáiro iguíjnai yui. 20 Mu chi chequé ejnaretéraque déji ore gari to. Uje sequeredie chi gare iji yirídai uje chi pésu uaté iyosoringuéone. Chi ejnarei u uje iyode que cha tamutaque. Mu chi chequé uaté chaguitóna Jesus enga tṍraji quigade ome. Jé u uje chi chisa Jesus iguidé eruémami. 21 Chequé ajéode chi u gu ujetiga chisarase Jesus iguidé eruémami marínga, uringai piqueta jogadi jé urásu. 22 Enga Jesus chi tajira daquigade enga chi chojningame chequé uaté: —Yabia, jé tiógara uje yiqueta ua. Banguretigai u gu ome yu.— Enga chi deréjnai uté jé u uje chequé ejnarei jnoji. 23 Uje Jesus chise Jáiro iguíjnai enga chimo cuchade ubuchungórone uje dimane ore ujetiga ore nóna ajñerasórone aja eduguéjnai ape togué cachodi yui. Enga chi cojñonguemui ore chisa dabade iji uro ejode. 24 Jé u uje chi Jesus chaquĩ́ra ore enga chi chojningame: —Beyoi guesi. Uacamóño uje que gapua togué go. Qué mo.— Mu chi cojñonguemui ore cana Jesus gai. Enga chi ore chotigase uruode. 25 Mu Jesus chirogapo ore aja guesi rĩ. Ga jé u uje chi ore chejna rángaja guesi. Enga Jesus chi chacája ajei to. Jé u uje chi chisa gapua jmanai. Enga chi jĩraque chague. 26 Jé u uje Jesus ujnomei chubu erámi jnese. 27 Chi Jesus doi guesi iji Jáiro iguíjnai enga chi jĩraque jnani edoparique gáreode ore tibite Jesus gai. Enga chi ore chojninga: —Yoqueduguéjnai David ape disi ejo e. Yoquijnati tu ua ye. Be enga osõrape yóguiji ne gajneri ye.— 28 Jé u uje chi Jesus chacája guiguíjnai enga edoparigode udore chi ore nóna aja ajei. Mu chi Jesus chojningame ore: —¿Ja jé anguretáyo yu a ome uacaringai piquetácho?— Mu chi ore chajnai Jesus enga chi ore chojninga: —Yocangaráni a, cachi yanguretágo ua.— 29 Enga chi Jesus chisa ore edodie enga chi chojningame ore: —A amóñopo uacajiritígo jne rĩ uje a yiqueta uaque jne gu uje yipañapísiji uacanguretigai ome yu.— 30 Enga chi jĩraque jnani gáreode ore chimo dajirigode. Mu chi Jesus chaquĩ́rapise ore enga chi chojningame ore: —Jé ca atatayo jne uje iqueta uaque.— 31 Mu chi ca ore jnomája uje chi ore chatata Jesus ipesudode ome ore. Enga chi jĩraque chubu erámi. 32 Uje ore jnoji guiguíjnai uté enga chi ore chijna cojñotique aja Jesus iquei uje que urúrique cuse. Uje Satanas utocaidi juruque pijnani gu. 33 Chi Jesus chijócãre Satanas utocaidi iji jnani uté. Enga jé u uje jnani chi nararapo rĩ. Cojñone chi ore tijapísa Jesus ome ipesudode udore. Enga chi ore chojninga: —Que Israel gosode uyoque yimóngo cucha dacatique uné gajnúrique nanique, jé aja dirode unojo.— 34 Mu fariséode chi ore chojninga: —Cajicho jnani uté to uje chijócãre Satanas utocaidode píode iji cojñone. Mu a jé oidé tu ore eduguéjnai Satanas ujopie ome to.— 35 Jé u uje chi Jesus jno daringai urugu údi iji ore idáyode jnese. Jé aja ore idáyode acorásedie rĩ. Enga chacate judíode iji ore aquiningaméone jnese iji ore idáyode udore. Enga chiqueta ore iji dequejnareque ponáyone, enga chacate ore iji dajesúode. Enga unere atatagode uje chacate ore uje Dupade a cho darása iji ore iji erámi uné. 36 Chi Jesus chimo cojñonguemui enga chi chosõre ore uje chi ore cho caru iji dejode. Chi ore chapu re. Enga chi ore gajnunie u áyasadie ome Jesus uje íjnoque ore irodisórone . 37 Enga Jesus chi chojningame dacadigode: —Uacapesudode unojo cucha ome Dupade, gajnúone u cucha pĩrátique ujetiga sué uacabai. Garósi uágome gu. 38 Enga jé jogadi u ujetiga qué abichoi Dupade ujetiga chṍrape uaque ome uacasai uné.—
1 Jé u uje chi Jesus tibidi dacadigode ore uje gare ore iji yirídai. Enga chi tẽra dajopie ome ore ujetiga ore chijócãre Satanas utocaidode iji ore píode. Jé aja ujetiga ore chiqueta dequejnareque ponáyone, pute dosógode ore to rĩ. 2 Jesus acadigode udore ore íode u unojo uje gare ore iji yirídai. Simon u uñai uje i uñai tu Pédro; jé basa ga Andres u uñai uje Simon desaque. Jeque uñane ore íode u Jacóbo, Juan uje ore dai tu Zebedéo. 3 Jeque acadique uñane ore íode u Felipe, Bartolomé, Tomas. Matéo upo uñai rĩ uje utáite ore ome ore iplátadie ome dasutedie nanique. Jacóbo u uñai uje dai tu Alféo. Lebéo u uñai uje i uñai tu Tadéo. 4 Simon upo uñai rĩ uje pota chijnime ore eduguéjnai ducurása quedéjna nanique iji ore uniri. Jeque Júdas u uñai uje i uñai tu Iscariote. Uté u uje guerãte Jesus ome guetesórone nanique. 5 Chi Jesus chiroque dacadigode ore aja quedéjnane nanique uje gare ore iji yirídai. Enga chi cho ore quique enga chojninga: —Ca abáchoi purása quedéjnaringo to jne, jé aja Samária jogonórone ore. 6 Mu acáputayoji Israel gosode ore jne. Chamáñaje ore gajnunie u áyasa dodie. 7 Acacho ore ome Dupade adode enga angoñome ore uje e idógosi ujetiga Dupade chijna daringai dacasuté cuchape aja jnumi uné. 8 Aquetáyo ejnaretade ore to jnese jne, jé aja lépra isatígo to rĩ. Aringachopo totígo ore jne rĩ. Ajnichópo Satanas utocaidode ore iji ore pírigo jne rĩ. Enga jé ca atayoi ore ome uacaquetatígo orérigui jne. Uacamóño uje bisideque yujopie ome uaque uje yerame uaque. 9 Boyo jne enga jé ca ajnócho uacaplátarigui jne. 10 Ca ajnóchopo uacagúchade pírigo jne rĩ iji dajei. Jé gusu uacamamitodie jne iji uacabai. Adi jé u uacachiédode. Jé ca ajnáñopo uacoguéraque jne rĩ. Uacamóño uje gosi uje doi Dupade iroquéode enga gajnei u ujetiga posõraque uté gosi. 11 Ujetiga eso idaidatérigo, acoráserigui ore enga jĩraque acueyoi uacanguretique jnani jne ujetiga ayáyoji uté gosi iguíjnarique, jé aja ujetiga boyopo rĩ. 12 Uje acáyoja ore iguíjnarique enga ojnichome uté jne: “A Dupade chatapísaja uaque jne ujetiga tijode cho jnangome uaque.” 13 Ujetiga ca ore suseque uaque enga a jé u baruode ome ore jne. Jé basa ujetiga ca ore chajire uaquéode enga a ca Dupade chátaja ore jne. 14 Mu ujetiga uaqueyatique guidai jogonónique ca dejena uágaja daguíjnarique enga jĩraque boyóji jne. Boyóji idai uté jne enga ajninguéso jnumi isapídode iji uacarídade. (Chamáñaje judíode jé yoquisocabeque gu. Enga imoi tu uje yetájopise cucha dacadode iji.) 15 Ũré yuruode ome uaque uje Dupade a chajire cuchade aja quigode jnese jne enga a pujuya guidai uté jne enga a suépise Sodóma, Gomórra gosode ore gajnei pujuyaqué gai jne.— 16 Chi Jesus chojningápome ore rĩ: —Boyo mu ajusópise uaqueo iji erámi jne uje a uásejna cojñotígo jne ujetiga ore pota sué uacabai ome uacaringáringo chucho. Uje a uacajnunie u áyasadie jne iji cuchiso chagúrigo ajénique. Uacarajáyo uje ugade edodie chojmára ome dejode. Jecute omi tu to ujetiga oyo ugade edodie to ome uaquejode. Oyópo cucujudaijnane to rĩ, uje pajnotácho enga que tagu dejórique go. 17 Uacamóño uje a ore tẽra uaque jne ome pasutedie enga a ore chaquesu uacádode jne iji judíode ore aquiningaméone. Jecute ajusópise uaqueo gaté. 18 Enga a ore chijnápo uágaja deduguéjna cuchábode ore iquéode to jne rĩ uje ore chetaque uacaringáringo yanguresóño. Piotiguei a u jne ujetiga angoño yuruode ome eduguéjnane udore ore to, jé aja purása quedéjnane to rĩ. 19 Mu ujetiga ore jno uacádi aja dasutedie jne enga jé ca apemeráñoji uacaru quitique ejórigo jne iji ore angaránone iquéode. Uacamóño uje a Dupade u ujetiga chisi ome uacarúrigo ome uaque ome eduguéjnane ore. 20 Ujetiga e agúsoi uacaringane dara gánique jne enga Dupade a tẽra Dajopie Espíritu Sánto ome uaque jne ujetiga arajáyo uacaru quitígo ome ore. 21 Diga jnanione a ore tẽrápo dãjorápisirigo jne rĩ ujetiga chuque ore ome ore uringane Dupade anguresõre. Jé basa enga uñéngo a tẽra datígo to jne. Mu adi jé u uje jnacaníngo a ore chajni dayode gai to jne. Enga a ore chujé ore jne. 22 A chisápo dínique to jne rĩ ujetiga cojñone ore chetáguipise uaque to iji erámi údode. Mu a uacabade jé u yadode jne uje uacatatayo. Ujetiga adotáyopise uáguiji uacanguretigai enga a eso uacaringane piquetácho jne iji deréjna pitade. 23 Ujetiga ducañerájma uagome ore jne iji ore idánique uñeque marínga, jé atatayo yuruode aja uacajesúrigo guidai uña jne. Uacamóño uje a cáma eso Israel gosode ore idáyode jnese ome yuruode, mu a jé u jne ujetiga óraño uagome Dupade utocaidi uyu jne ujetiga yise uaque. 24 Uyu u mu, jé que ore chise yunétique, cayieque yacadigode uaque jne ome ore atígo. Uacarajáyo uje que pisoca ujetiga dacatique omome ayoré gajnarétique, jé basa ca posõraque dacasutéraque. 25 jetiga piroque uaque enga a uacaringai ducañerájma jé cho uaqueduguéjnai uringai ducañerájma jne. Jé basa ujetiga pacadique uaque enga a jé ca apichome uacacadisṍri gajnei pujuyaqué to jne. Uacamóño uje ore cho Satanas iji yu. Mu a ore doi dateringai ome uaque jne.— 26 Chi Jesus chojningapome dacadigode ore rĩ: —Ca atodóyo uacojórique ayoré. Uje a ca ayorérique déji jne ujetiga pógu datique enga ca pirajaque iji quigade. Isocai jé upo rĩ uje dara pipoguiétique que cuse ujetiga noñáji síñeque enga ca pududique. 27 Gajnui u ujetiga yugúcoi ñane gari iji dejai ome yatatagode cucha udore. Mu a chise deréjnai jne ujetiga agúsoi direcaringuei. Enga jogadi u jne ujetiga atatayo yatatagode udore ome ore jnese. Uacajnéone unojo yacajnaquéode mu gusu ome uaque iji deréjnai uné. Mu quigade enga atatayo ome ore enga chubu erámi.— 28 Jesus chi chojningapome ore rĩ: —Ca atodóyo ayoréode uje ore yugode u yocuringane unojo ayorepíso. Chamáñaje que toque ujetiga udore ore chijocasipise yocáyipiedie gotique. Mu uacatódi upusurásu Dupade. Uje que gusu ujetiga ajéraso enga uñeque toi, mu ajepóraso enga chiroguirase uñéngaja gajño pioi.— 29 Chi Jesus chojningápome dacadigode ore rĩ: —Garósi chungúperenie oredie. Mu Dupade que suseque ore gotique. Enga que toque ujetiga chugué uñáraque ujetiga ca ajéo. 30 - 31 Jecute ca atodóyo go. Uje uacajnuéño chungúperenie gai ome Dupade. Enga que suseque uaque to. Jé chuságaja baterodie uje Dupade isecarané jnese. Mu que gusu baterodie uje chiraja, chirajápo badode to jnese rĩ. 32 A yise yai Dupade idai dirome enga a yingongara ore aja yai Dupade jne. Uje que ore chise yunerotiguérique iji erámi uné, enga ore chingongara yu aja darásade. 33 Jeque udore ore uje ore chotigase yu iji erámi uné, jé basa a jé yotigase ore to dirome iji Yai iquei iji gaté. 34 A ajoso eti anguretáyorase yu enga tijode chorase jnángome uáguiji uacojode ayoréo ujade. Mu cachi uacajéo. Ujeta anguretáyo yu jne enga jogadi u jne ujetiga oyo jmíti, jmíti ome udore ore jne. 35 Isocai a u jne gu ujetiga jnacanique chetaque dánique uringárique yanguresõre. Jeonga gapúraque chetaque datéraque uringáraque yangureto. Jeonga picaríraque chetaque dejóraque ome uringáraque yangureto. 36 Qui a u jne ujetiga ore jogasu dajogasui marínga, jé ore chetaque ore jne ome ore anguretigade iji yu.— 37 Chi Jesus chojningápome ore rĩ: —Ujetiga uñeque ijnoraquei tadipise ome dánique, datéraque ore, enga sué uñeque ijnoraquei gai ome yu, a ca uté gosi tiógara jne ujetiga yanguresõre. Jeonga uñeque ijnoraquérique cho dabai ome dataque, datique ore, jeque carénga chijnóra yu, a ca tiógara uringárique yanguresõre jne. 38 Jé adi tu ujetiga ca uñeque chóji gaté ujetiga cho daba yu enga a ca togome uté gosi jne ujetiga chise daringárique yanguresõre. 39 Jecute gosi ujetiga pota chapídome daringárique pujuya ome yu, ujetiga ca cho daba yu, enga a chachia re jne. Jeque gosi ujetiga timiningara dacuecaringuei ome yu, a chise dacuecaringué gatérique jne rĩ.— 40 Chi Jesus chojningapome dacadigode rĩ: —Gosi ujetiga chimesere uaque enga imeserai jé u yu to. Adi upo rĩ uje yimeserangórone ore imeserai jé u yutocaisṍri Dupade to. 41 A uacuñeque chijna Dupade uruode atatasónique aja daguíjnarique enga gajnui tu ujetiga chijnorapise Dupade to. Enga Dupade guerãtique ome uté gosi a jé u Dupade uruode atatasṍri gajnetique to jne. Isocai jé u to ome ayorérique jeta chijna dojórique ayoré parágaja daguíjnarique. A jé ore gajnetique cucha chojmára jnese jne ujetiga Dupade tẽrája ore. 42 Ujetiga uacuñeque chimo yanguresónique ujetiga uyátique chujé enga uaque gosi chajningare ome yote aréredatei enga jé ũré yu uje Dupade chi tẽrája uaque gosi te jne ome uacadi tuté. Qui tu gu uje uaque gosi chijnóra yu enga jé chijnóra yanguresórone to.—
1 Jesus chi chejna dacajnaquéode udore guesi ome dacadigode ore uje gare ore iji yirídai. Enga chi jnome guidáyode iji erámi uté enga chi chacate ore aja daquigode guidáyo jnese. 2 Chi Juan chudute Jesus ujnomei to iji daringai pujurúgai. Jé u uje Juan chi chiroque dacadigode aja yui. 3 Juan ajéode u ujetiga acadigode ore catecã́ri Jesus ujetiga Israel gosode ijnati Crísto jé upúsu, jeonga cáma u enga ore chirodape uñeque yui. 4 Uje chi ore chise Jesus enga chi ore chingo Juan uruode aja. Enga chi Jesus chajnai ore enga chi chojningame ore: —Boyo enga abáchopoi Juan rĩ. Enga angoño uacamone yipesute cucha ome to. Jé upo uacadudigode yacajnaquéo to rĩ. 5 Angoñome to jne uje yiqueta edoparigode enga ore chimópo dajirigode rĩ. Yiquetápo poritade rĩ enga ore digapo rĩ. Yiquetápo lépra isagode rĩ enga ore uditique que cusapo rĩ. Jé upo angoninguite parigode rĩ uje yiqueta ore enga e ore angoninguinone guesa. Enga jé chopo ayoré togode rĩ, uje yiringarápo ore rĩ enga ore eca. Jé chopo ayoré gajnaréngone ore rĩ uje e ore nína yacajnaquéode. 6 Angoñome Juan to ujetiga ca cho caru ome danguretigai. Uje uté gosi a ninapísa re jne ujetiga ca anguretigai doi jnumi ome yu.— 7 Uje Juan utocaidode ore jnoji ore gari enga chi jĩraque Jesus cho quique Juan adode ome cojñonguemui enga catecã́ri ore enga chojninga: —¿Ja uacacuei u gosi iji erãpe tarei nanique a? ¿Ja ayoré gajnareque a nanique uje gajnui u jnacaraque bisidétique uje emi chubúchu aja quedéjnane? 8 Ujetiga ca ũré udore enga ¿ja ca uacacuetique ayoré dacasuté a ujetiga ca suseque re? Que uacacuei tu gotique. Uje uacarajáyo gu uje ayoré atade que ore charidi u erãpe tarétique go. Mu ore charidode u eduguéjna cuchábode ore iguíjnane. 9 ¿Ja ca ũré yu a uje uacacuei tu Dupade uruode atatasónique nanique uje uaqueso erãpe tarei? Jé ũrepise yu ẽrie. Mu uacacuei tuté uringai uñai cuse uje suépise daringai Dupade uruode atatasõre. 10 Juan jé upúsu Dupade ojningai datocaite ome dajnacari diringai yui uje jnani bajade ore urusarane quigode jé upúsu uje chojninga: A yiroque yutocáite gatérigaja baquei jne ujetiga dimane ore atígo ome baríringai yui jne. 11 Jé ũré yu uje que yimo jnanírique iji jnani bajade jec aja dirie jogonórone rĩ ujetiga sué Juan gai, uté uje tṍra ore aja yodi nanique. Mu ujetiga Dupade e chimate darásapisode aja re jne enga a ayoré gajnareque udore uñeque mu a jé uté gosi suépise Juan gai jne. 12 Cojñonguemúone ore jnusi rágome ñane nanique uje Juan chacate ore iji taningai ujetiga ore chacája Dupade gari ujeta cho darása iji ore to. Enga jé ate jec aja deréjnane unojo uje cojñoque dicaséode ore chejna rángaja ujeta ore chise daringáringo Dupade uráso. 13 Uacamóño uje Moises, ujode Dupade uruode atatasórone uñane, jé ore atatai chojmára nanique. Enga ore chijáro iji jnumi uje deréjnarique chi déji yoquiquénique uje chi Dupade chijna daringai eduguéjna cuchap aja ore jne iji jnumi. Ore atatai udojo quigade u uje Juan di enga chatata Dupade uruode to. 14 Ujetiga apótayo anguretáyo yu enga a yingo Juan uringai gosi aja uaque. Uje jé u ore atatai Dupade uruode atatasõre Elías uje chi di jne. 15 Aminingacho yuruode unojo eti uacangoninguitígo guesa.— 16 - 17 Mu chi Jesus chojningame ore: —A qué yucuebi Juan uyoque yoquetésorone ore gajnúrique jne. Uje ore gajnúone u disiode, uje jécucha ore chetaque ñane ajéode iji dajñaminone. 18 Yiraja uje uacadojnóchoja Juan uté uje garãte uágaja yodi nanique. Uje chi ca tagu cucha ueratique nanique. Enga que chojiapo yote pioi nanique rĩ. Chi jé oyo ũrusóji uté nanique. 19 Enga jé uacasocai tu ome yu to uje uacabóyoja yu uje Dupade utocaite yu mu. Uje chiese acharánecojna yu ome uaque. Chiese yátapo yu aja jnani sijnángone ore to rĩ iji ore agapíode, jé aja eduguéjna cuchábode ore irótigo rĩ uje uaquetácho ore. Enga chiese yojiapo ore jodode yote piócho rĩ. Mu a pijoque ayipieranguipis iji yoque jne gu yoquipesudode cucha.— 20 Jé u uje chi Jesus chigota tijode ome guidáyode jogonórone uje chi ore chimo ipesute daté uásejnane, mu que ore tangári go uje chaquĩ́ra ore ome ore adode. Enga chi chojningame ore: 21 —Jé bioque ji ujetiga Tíro, Sidon gosode ore chimo yipesute datéode unojo to nanique, enga a ca toguírasome ore ujetiga ore cho uaque. Enga a ore chécãrirase datígo to. Uje a ore chorase dáyugu cutejmane dapesute gajnarécho unojo. Mu Corazin gosode uaque, jeonga Betsáida gosode uaque, uacapáñañoji yipesute datéode unojo, mu que écãcho uacatique go. Jecute iyieja joroque Dupade ujuyaquei yui jne ome uaque. 22 Mu a chise dínique jne ujetiga uacajnetique Dupade ujuyaquei chise uaque enga a sué Tíro, Sidon gosode ore gajnei Dupade ujuyaqué gai jne. 23 A Capernaum gosode uaque, uacajoso eti uacaqui tu gaté jne. Mu que uacaqui u go. Uacaqui tu jnaropie . Jé bioque ji ujetiga Sodóma gosode chimo yipesute datéode uje yipésu iji uacajade, enga a jĩraque ore chécãrirase dadode nanique enga a qué ore idai jogadírase iji dirode unojo to. 24 Mu a chise dínique jne ujetiga uacajnetique Dupade ujuyaqué chise uaque. Enga a sué Sodóma gosode ore gajnei gai jne.— 25 Enga Jesus e catecã́ri Dupade enga chojninga: —Yapa, yisípise babai uje bajnué gaté unirisórone ore gai jnese gu. Enga jé cho jnutiminórone ore, uje bajnué ore gáyode to. Yisípise babai to uje bapógu badode ome cojñoque dicotárechoquíode, cojñoque irajatade ore. Mu que apógu ua ome udore ore gotique uje qué garósi ore irajatigade. 26 Yapa, ueradei báyipiedie udire.— 27 Cha catecã́ri dayé Dupade enga chi chojninga: —Yai tẽra cuchade ome yu jnese. Enga gusu Yai uje chiraja dajnacari uyu. Que ayorérique chirajápise yu to go. Que pirajagápo Yai to rĩ. Gusu yu uje yirajápise. Gusúpo yu rĩ uje a yingo Yai aja yipotigátigo ore jne.— 28 Diga Jesus chi chojninga: —Ujetiga uacasagode chujé uaque, enga uacáyugabátigade chajópo uágaja ñane jne rĩ, enga anguinécho yi. Abáchoi yu enga jé u jne ujetiga oyo uacajñare iji yari. 29 A tijode cho jnángome uaque jne ujetiga beyoi yiroquéode. Uje paraguipise yu ome uaque enga a yinejé uacádode jne. Que yigaidi u go ujetiga gusu uágome uacasagode cucha ome yu. Uje a yáta uacasatígo cucha aja uaque jne. Enga a yocajnui u cabáyuode jne uje pigaricho aja ñane. 30 Enga a ca yirajágo yoquetabi isangurui jogosõri pite imenuringuéone jne ome ñane. A ca yirajagópo yocujnutique cucha imenuringuérique jne rĩ.—
1 Mu chi chise dire puyátique uje chi Jesus nóna dacadigode aja dajetique. Enga chi ore chicáji ore guejnatígo dosatígo. Enga chi chaguhei chejna Jesus acadigode. Enga ore chisa ore acade ade. Enga chi ore chujñuque gáyode. Enga chi ore tagu aja dajesui. 2 Mu chi fariséode uñéngo chimo Jesus acadigode uje ore chisa ore acade ade enga chi ore chojningame Jesus: —¿Ga ca araja to a uje dire puyac uné? Mu bacadigode jé ore chisa cuchade iji.— 3 Chi Jesus chajnai ore enga chi chojningame ore: —¿Ga ca ajnusínaño Dupade uruode atatagode ome eduguéjna cuchábi casicáite David ipesudode ome dajorane ore nanique uje chi chaguhérique chejna ore nanique a? 4 Uje chi eduguéjnai David chacája Dupade iguíjnai nanique enga chi chise arureque puyade iji nanique. Enga chi tagu enga chajuguína dajorane to nanique rĩ. Uje chi gusúrasu Dupade irógode uje chi ore gajnécho arureque puyade udore nanique. 5 ¿Jé ca adúcho to a? uje Moises urusarane chojninga: “Dupade irógode gajnei tu ujetiga ore chisa cuchade, jé iji dire puyade iji Dupade iguíjna cuchábi. Mu jé que pisijnaringuéo go ome ore.” 6 Mu yingome uaque uje uyoque uñai déji ne uje sué Dupade iguíjnai uringai cuchape gai. 7 Isenga ca arajáyo Dupade uruode quigode uje chi chojninga: “Yipotigádi tu ujetiga osṍcho uñane. Que gasu ujetiga ẽcho cuchisode ome yu.” A arajayórase Dupade uruode udore quigode enga a ca anichorase ayoréode uje que ore pésu cucha gajnarétique. 8 Dupade utocaidi uyu . Jecute jé tiógara ujetiga yiji yáyipiedie, jé iji dire puyátique.— 9 Jé u uje Jesus jno enga chi chacája ore gari iji ore aquiningárique. 10 Chi jnanírique déji to uje chi jmanai cacogue. Mu chi uñéngo timíninga Jesus aja quedéjnane. Chi ore gaidi tu gu ujetiga ore chisíji jnani poritai gai ujetiga chiqueta iji dire puyai . Jé u uje chi ore catecã́ri Jesus enga chi ore chojninga: —¿Ja jé piquetaguirase ayorérique iji dire puyátique ome bajéode a?— 11 Chi chajnai ore enga chi chojningame ore: —¿Ja ca uacuñeque chijnimirase dachidéraque áyasa ya ujetiga basaja ejóraque iji dire puyátique? 12 Uacarajáyo uje orerãi tupúsu ayorei ome áyasaraque. Jecute arei tu ujetiga piquetaque ayorérique iji dire puyátique to.— 13 Enga chi jé u uje Jesus chojningame jnani: —Apotingare bajmanai.— Jé u uje chi jnani uté chipotingare dajmanai enga chi uajádapo iñoñaringuei rĩ enga jé chopise jmanai ijõrei. 14 Enga chi ájningaranguipise fariséode ore. Enga ore jno enga jé u uje chi ore chucué dáyipie ome Jesus ujetiga ore chujé. 15 Jesus chiraja ore áyipiedie ome re. Jecute chi jnoji judíode aquiningamei guiguíjna enga cojñoque dipeséode chi ore nóna. Enga Jesus chi chiqueta ejnaretade ore jnese aja dajesui. 16 Enga chi Jesus chojningame daquetade ore: —Apócho yu jne enga jé ca angoño yu ome uñeque jne.— 17 Cuchade udore tocade gu uje jé Dupade uruode quicho nanique ome uruode atatasṍri Isaías uje chojninga: 18 Yajegaidi u yiroi uté. Yijnorai upo rĩ enga yirasique yu ome. A yijmare Yujopie Espíritu Sánto aja uté jne. Enga chacate erámone jogosórone ore ome yadode jne. 19 A ca uté chucué dabotátique dojo ayoré jne. A ca etochopo uruode to jne rĩ. Enga a ca chucuepoi daringárique ibijoque jne rĩ iji pujade. 20 Ujetiga tagáca asíguedie chósi taque mu a ca chibéro go. Ujetiga pibiotique ocarádabia garósosi enga chejnásija úyujnanie mu a ca chajnísi pibiotique uté go. Enga a jno daringai pajnotai tuté údi jec aja ujetiga chimate daringai peduguéjna pujnuéngai sõre aja re, ujetiga pesupúsu cuchade aja quigode ome dará sade. 21 Enga jé u uje jnanione iji punirone jnese a ore changureta uté jne. 22 Quigade enga ore chijna edopari aja Jesus uje chi ca urúrique cusapo rĩ. Chamáñaje Satanas utocaitique guejnai edodie, uruode ore gu. Mu Jesus chiqueta uté enga chimópo dajirigode rĩ. Narárapo to rĩ. 23 Jé u uje cojñonguemui chi ore tija uté enga chi ore chojninga: —¿Jé uté gosi te? ¿Ja yoquijnati u a, uje eduguéjna casicáite David ape disi ejo?— 24 Mu chi fariséode ore chudute uruode udore enga chi ore chojninga: —Que u gotique, uje uté chijócãre Satanas utocaidode iji cojñone mu a jé oidé tu Beelzebu ujopie. Uje Satanas uté, i uñai u uté. Jecute Satanas utocaidode ore tangári deduguéjnai enga ore doi guesode.— 25 Mu chi Jesus chiraja ore áyipiedie quigode enga chi chojningame ore: —Ujetiga pachamitique jogonórone chetaque ñane enga a diga ore chujé ñane jne. Uacamóño ujetiga idaisórone, jeonga yoquijogasúode ore chetaque ñane enga jogadi tu ujetiga ore cho jmíti, jmíti ome ñane. 26 Jecute jé isocai u to ome Satanas. Uje a ca togome uté jne ujetiga chijnime datocaitique iji isatique cojñoque. A socarirásome re gu. Enga a diga ca bisitique pijogapo iji uté rĩ.— 27 Chi Jesus qué jno daruode údi ome ore enga chi chojningame ore: —Yósi te ome uaque gu uje yiraja uaque uje chiese yijna Satanas ujopie ome Satanas utocaidode, uje yijócãre ore. Uacarajáyo uje uacojode fariséo uñéngo ore chequetingare chiqueta cojñone to uje Satanas chacája ore. Ujetiga ojnichome ore: “¿Uacoidé uaté uacajopie tṍraji rique ome uaque?” Mu a ore chojningárasa: “Dupade Ujopie tu ẽrie yocoidé.” Jé yo ore. Jecute a oyópise parágome yu que ome uacaru quigode udore. 28 Mu yoidé tu Dupade Ujopie Espíritu Sánto ome Satanas utocaidode uje yṍra ore aja guesode iji cojñone. Imoi tu ome yadode unojo uje Dupade e chijna daringai eduguéjna cuchape aja ne enga e pijóguiji uacajade. 29 A ca togome gosi ujetiga chacája jnani etótique iguíjnai ujetiga chajnose ugúchade ujetiga ca pigarique jnani etoi tuté bajaque. Mu ujetiga e pigarique enga quene jogadi u ujetiga pajnoñaque. 30 Uté gosi uje que chingo raja erámi uje changureta yu, enga gajnui u ujetiga chetaque yu. Jé cho udore rĩ uje que ore cháta raja yu ome yipesudode Dupade iroquéo, enga gajnui u ujetiga ore chijócãre dojode ayoréo aja quedéjnane ujetiga ca ore chise yu.— 31 Jesus chojningápo rĩ: —Jecute yojningame uaque, Dupade a chĩro ore isijnaringuéone jnese, jé aja ore uru noñángone. Mu ujetiga gosi chedo Dupade Ujopie Espíritu Sánto ome daru gajnarétigo, enga Dupade a ca chĩro uté gosi isijnaringuéringo jne. 32 Mu ujetiga uñeque doi daru gajnarétigo ome Dupade utocaidi uyu to mu, a qué Dupade chĩrope uté gosi uru gajnarétigo jne. Jé basa ujetiga gosi chedo Dupade Ujopie Espíritu Sánto ome daru gajnarétigo enga a ca Dupade chĩro uté isijnaringuéringo jne. Enga a uté isijnaringuei jé jogate jne iji deréjna pitade.— 33 Jesus chacate ore enga chacãra dacajnaquéode aja pojníngui adie enga chojninga: —Pojnaque a ijõre enga ueradei adie. Jé adi upo ome pore betáguedie rĩ, uje a adie gajnarenguei. Poridie pijoque gu adie. 34 Uga gajnúone uaque a, ¿enga esórase uacaru oníngo a ome uacaringane sijnácho? Ungare. Chamáñaje uacasijnaringuéone irágu uacáyipiedie gu. Jecute uacaruode noñácho jnese uje tṍraji uacabijnanone. 35 Isocai jé u ome ayoré áyipie omone uje ore uruode omío to. Mu ayoré sijnai uru noñángone garani tu áyipie uje isijnaringuéone garanája guesi tiji pijnani.— 36 Jesus chojningápo rĩ iji dacajnaquéode: —Jé ũrepise yu uje aquĩ́ra uaque, uje a chise dínique jne ujetiga pajirique uacaru noñángone aja quigode jnese jne. 37 Uje Dupade a chajire uacapesudode aja quigode jne enga ujetiga uacarúrigo omío jne enga a ca chise uacayoguérique jne. Jé basa a uacarúrigo gajnarécho jne enga a uacaringane iyogueraque jogadi u ome jne.— 38 Jé u uje chi fariséode, Moises urusarane atatasórone uñéngo ore catecã́ri Jesus enga chi ore chojningame: —Yocacadisṍri a, a qué yajicobirase bapesute datérique to ujetiga ajna Dupade Ujopie ome.— 39 Mu chi Jesus chojningame ore: —Cojñone uaque iji deréjnane unojo, gajnarenguipíso uacadode, que angachopoi Dupade rĩ. Uacapotigádi upúsu ujetiga amóñopise yipesutígo cucha datéo. Mu a ca yujuéga jne jeta yingongara yipesute datérigo ome uaque. Gusu ujetiga amóño yisocai jne uje jé u jnani bajai Jonas isocai to nanique. 40 ¿Ajnusináño jnani bajai Jonas a? uje guejnane dire gadioque, dejade gadiógapo rĩ iji oyite cuchábi ajei. Uje a jé isocai u jne ome Dupade utocaidi uyu uje a yejnatígo dire gadioque jne, dejátigo a gadiógapo jne rĩ iji yitoringai iji jnumi údi.— 41 Jesus chojningápome ore rĩ: —A jnani bajade uñéngo, Nínive gosode, ore chaguhéta uaque gosode gai to jne iji diri ujetiga Dupade chajire uacadode aja quigode. Uje ore tangári jnani bajai Jonas acajnaquéode nanique enga jĩraque ore cha date gajnaréngone. Mu uyu,yujnué Jonas gai ome yuringai Dupade utocáite, mu que angáchoi yu gotique. 42 Chequé bajé eduguéjna tṍraji umusoi garani ome eduguéjna cuchábi Salomon nanique ujetiga tangári irajatigadatéode to. A uaté u to jne ujetiga chaguhéta uacabai. Uje yirajatigade déji Salomon irajatigade iquéode, mu que apotáyo angáchoi yu gotique.— 43 Jesus chacadápo ore rĩ enga chojninga: —Ujetiga Satanas utocaitique dorási guesi iji dasatique bisideque enga jno enga chucué dabírique cucha uña iji erãpe eyutiguei. Mu que chise. Jecute a chojningárasome re: 44 “A yajni yibi bajai gai jne.” Diga chise jnani uqué uje dimane ome yui uje que gajnesónique uñeque déji ajei go. 45 Jecute uté dorási dajoráringo ore ome uté enga gare ore iji ti iji yijmanuñai enga ore chacáporasaja to rĩ. Mu udore ore suépise bajai uté gai ome daringane sijnaque. Enga Satanas utocaidode udore ore dorási dateringane ome. A jé isocai u to udore ome jnani sijnángone iji deréjnane unojo.— 46 Jesus cáma chejna dacajnaquéode guesi mu chi daté, jorane ore di mu ore cháji guesi. Enga chi ore pota ore catecã́ri Jesus. 47 Jecute cojñone uñeque chi chingome Jesus enga chi chojningame: —Baté, bajorane ore déji guesi enga chi qué ore pota ore catecã́ri ua to.— 48 Mu Jesus chi chojningame gojñane atatasṍri: —¿Jé yaté goto a? ¿Yijorane jé gosode rĩ a?— 49 Jé u uje Jesus chi chusẽre dacadigode ore ome cojñonguemui enga chi chojninga: —Yaté, yijorane ore u udore ore.— 50 Enga Jesus chojningápome ore rĩ: —Udore gosode ujetiga ore dopísi yai Dupade uru quigode enga udore ore u ujetiga yo yiguiosíji ore.—
1 Jé deréjnai uté u nanique uje Jesus chi doi guesi iji dayaripi guiguíjna enga chi jno enga chi cháji gajño edo gai. 2 Jiépise cojñone ore uje ore tibágui Jesus ome acajnaquéode. Uje chimo cojñoque dipeséode enga jé u uje chacája cucoi enga cháji ajei ome dacajnaquéode. Enga cojñone ore cháji gajño pijnanai uje ore tangári. 3 Jesus chacate ore enga chacãra dacajnaquéode aja cucha dipeséode enga chojninga: —Ayorérique jnome daringárique utáca ujetiga chaca dajonatique. 4 Enga chi cucha ajñunie uñanie basaja dajei edúdi. Enga chugúperenie chimo enga tagu. 5 Jeque uñanie basaja cucaranemui mu garósi jnumi tiji enga cucha ajñunie udire jĩraque sué. 6 Mu guedé jĩraque tocade enga charũ cucha pacadie gai. Garósi éode enga jĩraque toi. 7 Mu cucha ajñunie uñanie chi suéji ojnatedie ajei. Enga chi ca togome ujetiga ijórẽi uje chi ojnatedie nóna aja gatéode enga que chise daqueraningárique go. 8 Jé basa ga cucha ajñunie udire uje basaja jnupe arei chi u uje chaquesu re enga uásejna adie. Mu ore adie cha ñane yui. Uje chi uñanie guejnanie 100 u. Jé basa uñanie adie guejnanie 460 u. Jé basa uñanie adie guejnanie 430 u.— 9 Uje Jesus chejna dacajnaquéode unojo guesi enga chojninga: —Uñéngo ujetiga angoninguite guesaque ore enga a udore gosode u jne ujetiga ore chiraja yuruode unojo quigode.— 10 Jecute acadigode chi ore sose Jesus yui enga chi ore chojningame: —¿Gotique gu a uje bacãra bacajnaquéode aja cuchade ome cojñone ore?— 11 Mu chi Jesus chajnai ore enga chojninga: —Uacajnei tu ujetiga Dupade chingongara dajmapiédie ome uaque ujetiga chijna daringai eduguéjna aja jnumi tuné iji gaté. Jé basa cucha pipoguiédode u udore ome ore enga que toc ujetiga ore chiraja. 12 Mu udore uje ore chañuru darajatigade guio enga Dupade chõre ore irajatigade. Enga diga uásejna ore irajatigade jne. Mu ore uje que ore chañuru darajatigade guio enga Dupade chijna ore irajatiga garósirigo iji ore gari jne. 13 Jecute yo cucha gajnúo iji yacajnaquéode ome ore. Chamáñaje yacate ore mu ore gajnui urásu ujetiga edoparic ore enga que ore chimo yu iji daquei. Uje ore chudute yacajnaquéode mu chórase jeta ca yacate ore. Chamáñaje que ore chiraja yuruode quigode gu. 14 Dupade uruode atatasṍri Isaías urusarane ojningai u ore uje chojninga: A adúcho yuruode jne marínga, ca arajáyo quigode jne. A amóñopo yu jne rĩ mu a ca arajáyo yuringai cuchape jne. 15 Chamáñaje angoninguite pariguí pise Israel gosode udore ore gu. Enga que ore tangári yu. Cho jetiga ca ore edóraque cus. Chamáñaje ore gaidi u ujetiga ca ore chimo. Enga ore gaidi upo rĩ ujetiga ca ore chudute cuchárique. Que ore pota gu ujetiga ore chiraja. Que ore pota rĩ ujetiga ore chajni yibai enga yiqueta ore. 16 Mu pininaquei gajnesórone u uaque uje uacamóño ome uaquedodie. Enga uacadúchopo rĩ ome uacangoninguinone. 17 Chi uásejna Dupade uruode atatasõre bajade, jé aja ore urása parágode. Chi ore potapísa joróga nanique ujetiga ore chimo uacamone cucha yipesute datéode to. Jé chopo uacadudigode yacajnaquéo rĩ ujetiga ore tangári jorógui to. Mu que toc.— 18 Jesus chojningápome ore rĩ: —A yope utácai adíso yacajnaquéo quigome uaque jne. Jecute angáchoi yu. 19 Cucha ajñunie udire uje basaja dajei edúdode enga gajnui tu ayorérique ujetiga chudute uje Dupade chijna daringai eduguéjna aja jnumi tuné mu que chiraja quitígo. Enga chugúperenie gajnui u Satanas uje charatáyime Dupade uruode ome uté enga chijna iji gari. 20 Jeque ajñunie udire uje basaja cucarané pitabui gajnui tu ayorérique ujeta chudute Dupade uruode enga que chise unerotiguérique enga changureta bu. 21 Mu ore cho cucha pacadie uje garósi éode. Jecute uje pequetingaquéode chise ore jeoga ore cho daba danguretigai iji Dupade uruode enga jogadi u uje jĩraque ore anguretigai chicai jnumi yui ome Dupade. Enga que ore jno daringai Dupade anguresõre údi gotique. 22 Jeque ajñunie udire uje suéji ojnatedie ajei gajnui tu ayorérique uje chudute Dupade uruode. Mu áyipieraque que jnoji cucha ponáyone iji erámi údode. Pota ujetiga chise daringárique ataque. Jecute que cuchárique tṍraji uté gosi anguretigai go. 23 Mu cucha ajñunie udire uje pacáji jnupe ueratigai, gajnúone u ayorérigo ujetiga ore tangári Dupade uruode enga ore chirajápise quigode. Enga ujnomeraque ore ome Dupade adode uje ore doi. Ore isocai jé u ajñunie udire uje chaquesu re enga que chajire re dedórodie. Mu ore adie cha ñane yui. Uje uñanie adie guejnanie 100 u. Jé basa uñanie adie guejnanie 460 u, jé basa uñanie guejnanie 430 u.— 24 Jesus chacãrápo dacajnaquéode aja cucha uñai rĩ enga chojninga: —Yoqueduguéjnai Dupade iji gaté urasapísode iji jnumi tuné ore gajnui tu arroz quedéjnai ajñunie uje utácarique chutáriji dejnai. 25 Mu jnani uté chi guetesṍri doi uje qué ore mo jnese enga chi chaca ugape gajnarenguei ajñunie iji arroz quedéjnai ujade to. Uje chimánaja jnumi enga chi jno. 26 Jé u uje arroz quedéjnai quérã. Ugape gajnarenguei quérãpo rĩ. Enga chi ore cho uñane aja gaté. Quigade enga ájnanie cuse jnese. Jé u uje pijoque arroz quedéjnai, ugape gajnarenguei ore iji ñane ujade. 27 Jé u uje chi guejnasṍri irógode ore chingo. Enga chi ore chojningame: “Bacapiédie ueradépi ica ya, ¿chimo joroque gotique uje ugape gajnarenguei sué iji arroz quedéjnai ujade?” 28 Mu guejnasṍri chi chojninga: “A yetesónique ayoré acáji ujade.” Quigade enga irógode chi ore chojningame: “¿Ja apota ya ujetiga yijnico ugape gajnarenguei iji ujade a?” 29 Mu guejnasṍri chi chajnai ore enga chi chojninga: “Jé dóji. Chamáñaje a ajnicho ugape gajnarenguei iji arroz quedéjnai ujade jne enga nonarása ñane aja guesode. 30 Jé dóji enga nóna ñane aja daringai pojnaque, jé aja diri ujetiga pirãque. Enga jogadi u jne ujetiga yiroque yirógode ore aja enga ore chamáta ugape gajnarenguei bajaque jne iji arroz quedéjnai ujade. Enga jé u jne ujetiga papose gai. Enga pujusápo arroz quedéjnai guio to jne rĩ iji jogatique.”— 31 - 32 Jesus chacate ore enga chojninga: —Yoqueduguéjnai Dupade iji gaté uringai pangurete iji jnumi tuné gajnui tu cucha ajñu atíamia uje quene pacape. Jé u uje suési enga poredaté iji quigade. Enga jé u uje pijoque. Uje poredaté iji ejoi enga chugúperone basaja enga pésu daguíjnane iji jmanecade.— 33 Chi Jesus chojningápome ore rĩ: —Dupade urasapísode a ore chõre raque jne enga ore gajnui u arurégode bisitique to uje chequéraque chójneja harína pipesutique gai, uje chi gadioque tázadie. Mu jé cachodi tu uje harína pipesudi uté quérã enga cho dabai.— 34 Jesus que chacate ore bisideque mu jecucha cho cucha gajnu iji dacajnaquéode jnese. 35 Chacãra dacajnaquéode aja cuchade gu uje Dupade uruode atatasórone uñai jé urusãracho nanique uje chojninga: A yo cucha gajnu iji yacajnaquéode jne. A yopo quique cuchade to jne rĩ uje cáma pududicho to iji erámone taningane. 36 Jesus chi chiroque cojñonguemui aja doi nanique. Jé u uje chi chacája guiguíjnarique enga acadigode chi ore tibágui. Enga chi ore chojningame: —Ope bacajnaquéode quique ome yoque ome arroz quedéjnai, ugape gajnarenguei ore quitique.— 37 Enga Jesus chi chojningame ore: —Jnani uje chaca cucha ajñu ueradedie gajnui jé u Dupade utocaidi uyu . 38 Jeque coracabia gajnui tu erámone unojo. Cucha ajñu ueradedie gajnúone u Dupade urasapísode ore. Jé basa ugape gajnarenguei gajnúone u Satanas ajnangórone ayoréo jnese. 39 Jeque ugape gajnarenguei acasṍri gajnui tu Satanas. Sequeré piranguei gajnui tu erámone unojo eruei. Jeque sequeré irasórone ore gajnúone u Dupade irógode gaté unirisóño. 40 Uacamóño uje a pigarique ugape gajnarenguei aja ñane jne enga a paranája pioi to jne enga a papose gai jne. Enga Satanas ajnasórone ayoréo ore isocai jé upo to jne rĩ iji erámone eruei. 41 Dupade utocaidi uyu a yiroque yirógode gaté unirisórone aja erámone ujetiga ore chamáta ayoréode ore jnese uje ore dejena dojode ayoréo aja pisijnaringuéone. Jé aja ore uje ore chajmára pisijnaringuéone. 42 Enga a parãte udore ore jnese jne aja pioquedatérique. Enga jogadi a u jne ujeta ore po joroque. Jogadi upo jne rĩ ujetiga ore jnari joróguiji. 43 Jé ore uje ore pésu Yai uruode a ore gajnunie tu guedé ojodie jne ujetiga ca poque ore iji ore dai Dupade dosadi. Ujetiga uacuñéngo angoninguitígo cuse enga adúcho yuruode unojo.— 44 Jesus chi chacate ore enga chojninga: —Yocuringane Dupade urása gajnui u cucha orerã́tique ujetiga pijochame iji jnumi údi. Ujetiga ayorérique chise mu jĩraque chagose gaté iji jogadi. Enga chayóji dagúchade yui enga tẽra dagúchade jnese. Uje pota doi oré tome jnumi uté gu. Enga doi oré tome enga chejna dagúchade oredie aja jnese. Jé u uje ininaquei jogadi tu. Chiraja gu uje e gajneque cucha orerãi uté. 45 Yocuringane Dupade urása gajnui upo ayoré ugucharãi rĩ uje chucué cucarané pórorodie iji erámi uje nanganatápise. 46 Mu ujetiga chisírase dacuegué cucarané orerẽ́ enga jĩraque tẽra dagúchade jnese. Chiraja uringa orerẽ́ gu. Chejna dagúchade oredie aja jnese uje doi. 47 Yocuringane Dupade urása gajnua u jocha pichaguéraque ome chímenoraque ujetiga chímeno chijnime oyite ponáyone jnese. 48 A oyídode irágu chímenoraque ajénique enga jé u uje gaisórone ore churugúsaja yote quedéjnai pijnanai. Enga jé jogadi u uje ore doi dajegaidode iji oyídode ujade. Ore suse dameserane guio iji dorade picho. Jeque ore tṍrapo detégode aja yote quedéjnai rĩ. 49 Yote quedéjnai ichajusórone ore gajnúone u Dupade irógode, gaté unirisórone, uje ore chamáta ayoré parágode, ayoré sijnágone ore jnese jne iji erámone eruei. Jé u uje a ore cãra ore jogatígo ome ñane jne. 50 Enga jé u uje a ducarãte Dupade guetesórone ore aja pioque ditaguérique jne. Enga a ore cachodi u jne ujetiga ore chisa dabade enga ore jnari joróguiji.— 51 Unojo quigade enga Jesus chojningame dacadigode ore: —¿Ja arajáyo yacajnaquéode unojo quitígo a?— Jé u uje ore chajnai enga ore chojningame: —Yocacadisṍri a, yirajágo ẽrie.— 52 Jé u uje chi chojningame ore: —Ujetiga uacuñeque chiraja Moises urusarane enga chirajápo yacajnaqué ichade ome yocuringane Dupade urása jne rĩ, enga gajnui tu guiguíjnai iguijnasṍri jne uje suse dagúcha orerãque diyajmane, ichade ore guio iji dari. Jé u uje tagúrome dagúchade jnese. Chamáñaje orerã́cho jnese gu.— 53 Jesus chimate dacajnaquéode ome cucha gajnúone guesi. Enga jnopóji ore idai uté rĩ. Jno gojni enga jnome danirípisi enga chise dedai Nazaret. 54 Enga chacate judíode ore iji te iji ore aquiningaméone. Enga chi Jesus irajatigade chajuque cojñone agutedie uje chacate ore. Enga chi ore chojningame ñane: —¿Jé uté irajatigadatei tṍra iji rique a? ¿Jé cho piringome ipesute cucha pitijádode udore rĩ a? 55 Uacamóño dayé uringai poridie irábesõre to. ¿Ja ujnacari irajatigadatei tõrarásiji uté bisideque e? Uje yoquimópo daté Maria to rĩ. Imóngopo uté desade: Jacóbo, José, Simon, Júdas ore to rĩ. Uje ayoré gajnareque ore. 56 Jé chópo uté neronie ore rĩ uje yocurása ore to. ¿Chimo joroque gotique irajatigai?— 57 Jesus chiraja uje que ore chise unétique. Jecute chojninga: —Uacamóño uje, cucha Dupade uruode atatasónique urásarique, jogasúrique chise unétique; ore urása joroque. Mu a Dupade uruode atatasõre agupuránique dirásiji ore to enga ore imeserai u uté.— 58 Ore chotigase Jesus, jecute querénga pésu cucha pitijátiguiji dedai to.
1 Eduguéjna cuchábi Heródes chi chudute Jesus ipesute datéode ujnoméone nanique iji dajnepídi punire Galiléa. 2 Enga chi Heródes chojningame darijogosórone nanique: —Chimo joroque re ujetiga yi casicáite Juan uté uje tṍra ore aja yodi nanique, enga ecápo rĩ. Uje pésu cucha pitijádode ome daringai ujopierãque.— 3 - 4 Chi Juan chaquĩ́ra ore eduguéjnai Heródes nanique gu uje chi uté chijna desai Felipe acotéragaja re uje uaté chi i tu Herodías. Mu Heródes chi ca tangári Juan aquĩraquéode. Enga chi chisa Juan gu dacoté uje chi chaquírame. Jé u uje chi chigaru enga chi suru gai iji soldádode iguíjnai. 5 Chi eduguéjna cuchábi Heródes pota joróga ujetiga chujé Juan. Mu todo cojñonguemui nanique uje chi ore cho Dupade uruode oisṍri iji Juan nanique. 6 Mu chise Heródes batiga sequeré nanique enga chi uté pésu dajñamite datériguiji nanique. Enga Herodías uro chi doi ore ajñamini to. Enga chi gapua doi edai iji ore ajei nanique. Jé u uje chi Heródes irasépise dabejñua. 7 Jé u uje chi Heródes chojningame gapua: —Yurúo yurúrique enga que yajéninga. Atai cucháriguiji yu enga a jé yisi ome ua jne.— 8 Jecute gapua chi caputaji daté enga daté chingome ujetiga chutai Juan gatoi iji Heródes. Jecute uje gapua chise Heródes enga chojninga: —Así ome Juan gatoi ome yu enga ajnáji agapírique jne aja ne.— 9 Mu eduguéjna cuchábi Heródes chi ca chiraja dasocárique ome Juan. Mu chi ore chudute uruode ucode jnese to que. Uje chi uru darúrique enga chi ca ajéninga. Jecute que toc ujetiga uruode noñáji. 10 Enga chi chiroque soldádode aja Juan ujetiga ore chaquesu etabi iji ore jurúgai pidi. 11 Quigade enga chi ore di Juan gatoi údi enga chi ore chijnáji agapi. Jé u uje chi ore chisi ome gapua. Jé basa gapua chi chisi ome daté. 12 Unojo quigade enga Juan acadigode ore di to. Enga ore gaidi tu dacadisṍri ujetiga ore chijochame. Uje ore chimánaja jnumi enga ore jno enga ore cho gojñame Jesus iji quigade. 13 Uje Jesus chudute Juan ujnomei to uje chi ore chujé chi pota ujetiga gusúji dayaritique. Jecute chi chacája cucórique aja daquitique erãpe yui. Mu uje chi cojñone ore chiraja qui enga chi ore jnoji dedáyode enga chi ore jnome quigade. Enga chi ore diguiji jnumone aja yui. 14 Mu uje Jesus doi guesi tiji cucoi enga chimo cojñonguemui enga jĩraque chosõre ore. Jogadi jé upo rĩ uje doi ore enga chiqueta ejnaretade iji ore ujade. 15 Mu uje e tota erámi enga Jesus acadigode ore tibágui enga ore chojningame: —Guedé uqué e chaca ẽrie. Enga que cojñotique iguíjnarique cuguésõre yoquiyaridi tuné. Jé go que aroque cojñone aja ore quitígo ujetiga ore doi oré tome dabotígo ome raque iji ore iguíjnane acorásedie iji daté.— 16 Mu Jesus chi chojningame ore: —¿Gotique gu a ujeta ore chucué dabosode iji quedéjnarique a? Beyoi enga asíyo ore potígo ome ore.— 17 Mu ore chojningame: —¿Jé yocórase írique? uje yoquigode arureque chejna yijmanai, oyite gáreode dépoji yocari rĩ. ¡Jeta chórase cojñoque dipeséode iji yocari jnese!— 18 Enga Jesus chi chojningame ore: —Ajnáño gotígo aja ne.— 19 Jé u uje chi chojningame cojñoque dipesei: —Acayoji jnacarai gai iji te.— Enga chi chisa arurégode uje chejna yijmanai, aja oyite gáreode. Enga chi chajire gaté uje chi catecã́ri Dupade uje chacãre gai ome ore posode. Jé u uje chi chajuque arurégode, oyídode ore aja jnumi. Enga chi chisi ome dacadigode ujetiga ore chisi ome cojñoque dipeséode. 20 Chi ore do gojni enga chi ore tagu jnese. Enga chi ore chĩreta dacadie iji jnese. Jé u uje chi ore chejna chagúi guesi enga chi ore chamáta ore pose pépitade, ore iquebéode to. Enga chi ore iretáringui dora depei gare iji yirídai iji. 21 Cucha pibosode udore chi gunórone jnanío ore guejnáringui 5. 000. Que pisecarané chequérigui, disírigo ore to. 22 Cuchade unojo quigade enga chi Jesus chiroque dacadigode ore aja cucoi ajei ujetiga ore jno bajaque. Enga chi ore chirodírasiji uéchai. Uje cojñone chi ore íjnongaja dajesúode enga Jesus quene chajna dacadigode ore to. 23 Uje chi cojñone ore chimate rágaja doi iji gari enga chi Jesus cheru cucarani ujetiga gusu iji ujetiga catecã́ri Dupade. Mu chi jé dejágome iji catecãraitigade gai. 24 Mu acherangóri chachẽre acadigode ore iji cucoi uje ore chise yote quedéjnai ajei. Enga chãrai ore pi cuco iji gatéode. 25 Chi chise dirájnanie uje Jesus qué diguiji yodi gai enga chachai dacadigode ore iji ore pi cuco. 26 Uje acadigode ore chimo uje diguiji yodi gai enga chajuque ore agutedie. Enga ore todópisa. Chi ore josípise eti dicoré gatéraque tocade ome ore. Enga ore tibidi dejode. 27 Mu Jesus chi chojningame ore: —Uyu u ẽrie. Ca uacagutérigui cho jora.— 28 Jé u uje Pédro chojningame Jesus: —Ujetiga jé ũré enga yocangaráni Jesus u ua, enga aroque yu aja bei enga yiriguiji yodi gai to aja ua.— 29 Mu Jesus chi chojningame: —Be enga abágui yu.— Quigade enga Pédro chi doi jnumi tiji cucoi enga chi diguiji yodi gai aja Jesus yui. 30 Mu Pédro áyipie chi déji úyujna. Jecute chi todo. Jé u uje Pédro chi jnome yodi údi. Mu chi chasẽra Jesus ome dabijnane enga chi chojninga: —¡Yangarádejna, be yu go!— 31 Enga jĩraque Jesus chachẽre jmanai to aja gaté enga chojningame: —Pédro a, ¿banguretigai chicai rique que a? Uje bangureta yu que iji taningai, mu baya bangureta yu.— 32 Uje Jesus, Pédro ore cheru cucoi enga úyujna cho jnaque. 33 Chi acadigode uñane iji cucoi ajei ore chichaga dagatáidie aja jnumi iji Jesus iquei enga ore chojningame: —Que potigayaguípise ua. Jé ũré enga Dupade ujnacaripise ua.— 34 Ore chiramísara yote quedéjnai uechamito enga chi jĩraque ore chise ducuniri iji uéchai uje i tu Genesaret . 35 Uje Genesaret gosode chiraja uje Jesus u enga ore chingo erámi. Jecute Jesus ujnomei jĩraque chubu erámi. Jé u uje chi ore chijna ejnaretade aja Jesus jnese. 36 Enga cojñonguemui chi ore chutai Jesus ujetiga juéga daguidé eruémami ome ore ujetiga gusu ore chisarase marínga, jé chiquetárase ore. Enga uje diga ore chisa enga jĩraque ore ninguira jnese ome dejnaréngone.
1 Enga fariséode uñane, jé aja Moises urusarane atatasórone uñane rĩ ore tṍraji idaidatei Jerusalen enga ore ibaguiédi tu Jesus. Enga chi ore chojningame: 2 —¿Gotique gu a uje bacadigode que ore doi yocayode jnani bajade ore jmapiedie to? Uje yimóngo bacadigode gu uje que ore churu dajmáinie gatuaque go ome dabosode.— 3 Jesus chajnai fariséode enga chojninga: —Jé cho uaque ẽrie uje que beyoi Dupade iroquéode quigode to. Uacagaidode jé u jnani bajade jmapiedie ome cuchade. 4 Uje Dupade uruode chojninga: “Ajusópise uacayode, uacatedie ore guio, enga angáchoi ore.” Chojningápo rĩ: “Ujetiga uñeque uruode gajnarenguipise aja dánique, datéraque ore enga a chuque uté gosi jne.” 5 - 6 Jé basa uacai jnani bajade ore churúsãre dajmapiedie nanique to iji darujna aone, mu que cuésõri Dupade uruode udore gotique. Enga qui tu icáite ujetiga jnacanique chichaga daplátadie aja Dupade ujetiga e toi, cachodi tu ome jnacari uné ujetiga ca chajirapo dayode ore yúode rĩ ome dagúchade. Mu gajnareque uacajéode unojo. Jecute obiréjnapise uje que ajichopo Dupade áyipiedie yui rĩ ome uacagaidedie jnani bajade áyipiei. 7 Jnani taquechoquíode u uaque. Uacamóño uje Dupade uruode atatasṍri Isaías ojningai jé u uaque uje chojninga: 8 Cojñone unojo ore chijnóra yu ome dabijnani, Jeque ore áyipiedie idájapise iji yu. 9 Jecute cucha bisidécho ore icota quéode ome yu. Uacamóño gu uje ore acajnaquéode ome dojode ayoréo garanone jé u ore, Jeque garani que u yu go. 10 Jé u uje Jesus tibidi cojñonguemui enga chojningame ore: —Angachopísi yuruode enga a arajáyo quigode jne. 11 Uje babosode cucha a ca pésu bañoñaringuérique jne. Mongacho baru gajnaréngone a u jne ujetiga pésu bañoñaringuei.— 12 Jé u uje Jesus acadigode chi ore sose yui enga chi ore chojningame: —¿Ja araja to a uje fariséode chi ore chejnáreque baruode ucode que?— 13 - 14 Mu Jesus chi chojningame ore: —Jé ore dóji. Uacamóño uje fariséode, Moises urusarane atatasórone ore gajnúone u edoparigode. Uje cho jetiga edoparic ore enga ore chijñaque ñane aja dagaitique cucha yúrique. Diga ore basaja ejopiéraque enga ore nóna ñane aja ajei. Yanguresórone ore gajnunie a u Yapade acárigui pori. Mu pore uñanie uje que acai to enga a pijnimé udire jne iji erodie.— 15 Enga Pédro chojningame Jesus: —Angoma yoque baruode quitique.— 16 Jesus narare enga chojninga: —¿Ja uac u to a ujetiga ca arajáyo quigode to? 17 Isocai u uje yajo cuchade enga chicáji yocajéode. Quigade enga chacája yocuchade enga yórangoja guesode bisideque. 18 Jé basa yoquibijnanone garasórone yocurúo u uje tṍraji yocáyipiedie. Enga ujetiga gajnarécho yocurúrigo enga udore ore ipesute yoquiñoñaringuéone ome Dupade. 19 Yirajago uje jnanione ore ate gajnaréngone jnese garanone u ore áyipie gajnarénguenie: uje ore pota chugode ome dojode ayoréo, uje ore potapo chequé unejánguenie rĩ, uje ore potapo pagupíode ome raque rĩ, uje ore potapo oriéode rĩ ome cucha quedéjnane, jé upo purupataringane ore rĩ, dacate pijnimingone ore. Cucha gajnaréngone udore garani u páyipie jnese. 20 Cuchade ucode jé ipesute yoquiñoñaringuéone ome Dupade. Mu ujetiga ca yicoi jnani bajade ore adode marínga, ujetiga ca yurugo yoquijmáinie aja jnumi, jé yocate tiji. Uje que pésu yoquisójnaringuérique ome Dupade.— 21 Jesus chi jnoji uté enga chi chicáji Tíro, Sidon gosode ore uniri. 22 Mu uje chi ore jno enga chi Canaan jogotóraque tibidája ore quigade. Enga chojninga: —Yangaráni e. David ape disi ejo e. Be enga osõrape yu e. Uje Satanas utocaitique déji yabia ajei e. Uñapie ajámi iji jmáinie e.— 23 Mu chi Jesus ca chajnai chequé uaté pijnane go. Jé u uje chi acadigode chise. Enga ore chijócha ajei údi. Enga chi ore chojningame: —Aroque chequé uaté aja doi. Bamo uje que cha dabijnacaráidie aja yoquiquigade.— 24 Jé u uje Jesus chi chojninga: —Yai Dupade iroque yu ujetiga yedu Israel gosode ome yadode uje ore cho Yai gachidé áyasa bijnánguenie.— 25 Mu chequé chi sose yui enga chichaga dagatáidie aja jnumi iji iquei. Enga chi chojninga: —Yocangaráni a, átabaja yu go.— 26 Jesus chi chajnai chequé uruode enga chi chojningame: —Gajnareque ujetiga yijna yibotígo iji yatígo ore gari marínga, yisi ome tamocórigo.— 27 Mu chequé chi jé chajo raja darai enga chi jé chojningame: —Yangaráni a, jé ũré ua. Mu bamo uje tamocode pose cucha pe pitade to uje basaja jnumi iji dachisṍri agapi gai.— 28 Jé u uje chi Jesus chojningame: —Chequé a, que iyieque banguretigai. Yipésu bapotigádode ome ua jne.— Enga jé iji deréjnai uté uaté abia ejnarei chi jnoji. Jesus chiqueta ejnaretaque dipeséode 29 Jesus chi jnoji uté enga chicáji yote quedéjnai pijnanai uje i tu Galiléa. Uné quigade enga chi cheru cototéraque enga chi cháji ójo. 30 Chi jé u uje cojñoque dipeséode chi ore chise Jesus iji cototé ójo enga chi ore di ejnaretaque ponáyone ore údi iji. Chi edoparitígo díji to, jé aja noñátigo, corocoróringo, jé aja uru eyútigo to. Chi ore chijna ore aja Jesus iquei. Enga chi chiqueta ore jnese. 31 Jé u uje cojñoque dipesei chi ore tṍra rángome Jesus adode uje uru eyúgode ore narare. Jé chopo corocorone ore rĩ uje omápo ore rĩ. Noñángone ore digapo rĩ. Edoparigode chimópo dajirigode rĩ. Jecute cojñonguemui ore chicotápise Israel gosode ore angureni Dupade. 4.000 ore 32 Chi Jesus tibidi dacadigode enga chi chojningame ore: —Yosõripise cojñone udore ore uje ore guejnane dire gadióguiji yari enga e que ore potique cuse. Que yipota ujetiga yiroque ore aja ore iguíjnane. Cachi ore íjnoque gu iji dajei ome dayaguhérigo.— 33 Mu acadigode chi ore chojningame dacadisṍri: —Que cuchárique déji yoquiyaridi uné gotique ome cojñoque dipeséode ujetiga ore tagu. Que uñeque déji pejórique ujetiga pigáite cucháriguiji.— 34 Jé u uje chi Jesus chajnai ore enga chi chojninga: —¿Arurétigo jé chó riguiji uacari a?— Acadigode chi ore chojningame: —Arurégode gariti. Jé basa oyídabode garósosi.— 35 Enga chi chojningame cojñoque dipeséode: —Ayáyoji jnumi iji te.— 36 Enga chisa arureque garitíode, oyite garósiode ore. Quigade enga chi catecã́ri dai Dupade enga chi chacãre gai. Diga chajuque udore iji jnumi enga jé u uje chi chajuguína dacadigode ujetiga ore chisi ome cojñoque dipeséode. 37 Jecute chi cojñonguemui ore tagu jnese. Enga chi subudé ore iji jnese. Mu chi ore cha chagúi enga jé u uje chi ore chamáta daquebéode iji dabosode udore. Enga chi ore irẽtadie canásta gare iji ti iji ore iquebéode. 38 Gunórone jnanío chi 4.000 ore. Que pisecarané chequérigui, disírigo ore rĩ. 39 Udore quigade enga chi Jesus chiroque cojñoque dipeséode aja doi. Enga chi jĩraque chacája cucoi. Enga chi chicáji Magdála gosode ore.
1 Chi fariséode, jé aja saducéode chi ore tibágui Jesus ome daringaquérique. Enga chi ore chutai ujetiga pésu cucha pitijátique enga tõrarásiji gaté ome ore. 2 Jesus chajnai ore uruode enga chi chojninga: —Guedé jnoringane enga uacojnicho: “A uerate dínique dirome. Icha gaté gu.” 3 Direjnime enga uacojnichópo rĩ: “Guéode suru gaté. A beque gajneri.” Aringácachoqui uaque, uacacotáyo uagome uacarajatigade unojo, mu que cucha uacarajatigade. Pisecarãte Dupade ipesudode cucha pãrapié ome uaque iji dirode jnese. Mu que amíningacho gotique. 4 Gajnarenguipíso uacadode. Que anguretáyopo Dupade gotique rĩ. Chamáñaje uacatáyoi yu ome yipesutique cucha daté. Mu a ca yujuéga ome uaque jne. Gusu ujetiga amóño yisocai to jne uje jé u jnani bajai Jonas isocai to nanique.— Chi Jesus noñome ore iji te jmete enga chi jno. 5 Uje Jesus acadigode chi ore chicáji yote quedéjnai uécha uñai enga chi ore chicadígui arurétigo ujetiga ore chijnoque. 6 Jesus chi chojningame dacadigode ore: —Angáchoi yuruode. Enga ajuso uaqueo ome arurégode bisidi uje fariséode, saducéode ore angúrome.— 7 Jesus acadigode chi ore chojningame ñane: —Chimo joroque re ujetiga chĩ́care arurégode bisidi gu uje que yijnójo arurétigo.— 8 Jesus pañáji uje que ore chiraja uje acajnaquéo. Jecute chi chojningame ore: —¿Gotique a uacaruode uje chiese jé ca ajnócho arurétigo? Isenga qué garósi uacanguretigai ome yu ome uacameserane cucha. 9 A cáma arajayópise yadode jõ. A jnopoji uacajéode rĩ uje yajuguína arurégode uje udore chejna yijmanai aja jnanione ica uje 5.000 ore. Enga uacarajáyo yocamatade ica iji yoquibose péode. 10 A jnopoji uacajéode rĩ uje yajuguína arureque garitíode aja jnanione ore ica uje 44.000 ore. Enga uacarajáyo yocamatade ica iji yoquibose péode. 11 A uacáyipiedie chejna raja uacabotique yúrique. Jecute que arajáyo uje yacajnaquéo que uje yĩ́care fariséode, saducéode ore angúrome cucha arureque bisicho ujetiga ajuso uaqueo ome.— 12 Jé u uje quene ore chiraja acajnaquéode quigode uje Jesus que ojningane upúsu arurégode bisidípisode. Mu ojningane u fariséode, saducéode ore acajnaquéode jútigo uje cho arurégode bisidi uje chacája harína údode enga quérã. 13 Uje Jesus, acadigode ore chirõre ore idai Cesaréa iji ore uniri Felípo enga chi Jesus chojningame dacadigode: —¿Cojñone jé ore cho ringome Dupade utocaidi uyu a?— 14 Acadigode chi ore chojningame: —Uñane jose Juan u ua, uté uje chaca cojñone iji yodi nanique. Jeque uñane ore cho jnani bajai Elías iji ua. Jé basa ga uñane chi ore chojninga: “Jnani bajai Jeremías a u. Jeonga Dupade uruode atatasõre uñeque u.”— 15 Jesus catecãrápoi ore rĩ enga chi chojningame ore: —¿Jé uacajéningo cho ringome yu a? ¿Uyu gosi ome uaque a?— 16 Mu Simon Pédro chi chajnai enga chi chojningame: —Crísto u ua, Dupade utocaidípisi. Dupade ujnacari tupo ua rĩ.— 17 Jesus chi chojningame Pédro: —Simon, Jonas ujnacari a, anína ua uje que ayoré uñeque ingome ua ome yu gotique. Yai Dupade iji gatajnoquei jé u uje ingome yu gosi ome ua. 18 Simon a, bei uñai u Pédro. Uje bei qui tu cucarané. Mu barecujáidie, uje baraja yuringai Dupade ape, gajnua u cucarané cuchabéraque rĩ uje guiguíjnane ipesungórone ore pésu guiguíjnane iji gáyode. Enga ore jnese ujetiga ore chirate barecujáidie udire to enga a ore u jne ujetiga yo yijogasúji ore. Enga Satanas, uje gajmaque ayoréode ore ome pitoringai, a pota chinoningase yijogasui ore jne, mu a ca toque jne ujetiga chinoningase ore.— 19 Jesus chojningapome Pédro rĩ: —Baraja yu. Jecute a yisi ome lláveraque ome ua ujetiga achẽre cuchade aja guesode ome bojode ayoré uñéngo ujetiga ore chise daringáringo Dupade urása to. O ore quique enga a Dupade narare babai iji gaté ome bãrétigo cucha, jé aja bajuegátigo cucha to.— 20 Jesus chi chojningame dacadigode uje cho ore quique: —Jé ca angoñoma yu aja erámi jne uje Dupade utocaidi Crísto jé u yu.— 21 Deréjnai uté enga Jesus cho dacadigode quique gatuaque ome dagachodi yui. Chi Dupade ajéo ujetiga chicáji Jerusalen jne. Enga chojninga: —A yumajosórone u judíode ore eduguéjnane, ore asutépisedie ore, jé aja Moises urusarane atatasórone. Udore a ore socaripísome yu jne. A ore chimate yu aja jnumi jne rĩ. Mu yejnatígo dire gadioque jne iji yigachotique. Enga jé u jne ujetiga yiquecápo rĩ iji yitoringai.— 22 Enga Pédro chi chorei Jesus iji quedéjnarique. Enga chi ore cãra dáyipiedie ome ñane. Mu chi Pédro chaquĩ́ra ome uruode. Enga chi chojningame: —Yocangaráni a, a ca Dupade áyipiedie u udire. A ca baruode ucode tocade jne ẽrie.— 23 Mu Jesus chi chajnai Pédro enga chojningame: —Boji ti yejode, Satanas angúrome ua. Bajéode u ujetiga ca yicaputaji Yai áyipiedie ome yu. Mu que báyipiedie cunguésõri yai Dupade áyipiedie go. Báyipiedie udire garani tu baringai ayoré.— 24 Jé u uje chojningame dacadigode jnese: —Ujetiga uacuñeque pota daringai yanguresõre enga uté gosi a cha daringai ayuguhebátaque jne ome re. Enga jé tiógara jne ujetiga uté gosi cho daba yu. 25 Jecute gosi ujetiga pota chapídome daringárique pujuya jne ome yu, ujetiga ca cho daba yu enga a chachia re jne. Jeque gosi ujetiga timiningara dacuecaringué ome yu, a chise dacuecaringué gatérique jne.— 26 Chi Jesus chojningápome dacadigode jnese rĩ: —Que cuchárique tõrapísiji ayorérique ujetiga chise dajegaidode cucha jnese iji erámi uné, ujetiga uté gosi chachia re ome daringárique pujuya iji quigade. ¿Jeonga jé gueranéringui pláta chórase rique ujetiga gosi cho doré enga gosi chise pucuecaringuei to? Ungare. Que toc ujetiga chise doréraque. 27 A Dupade utocaidi uyu yajniapo jne rĩ enga a yijna yai Dupade uringai cuchape jne aja erámone unojo. Enga jé u jne ujetiga Dupade irógode gaté unirisóño a ore nonapo yu jne rĩ aja erámone unojo. Enga ujetiga e yĩri enga a yo oré erámi unirisórone ore jnese jne. Mu a jé yiji ore ipesutígo cucha jne ujetiga yo ore oré. 28 Jé ũré yu uje a uacuñéngo ca tobi jne, ujeta cáma amóño Dupade utocaidi uyu yuringai eduguéjna cuchape.—
1 Uje chi dirode chojmára iji ti iji acajnaquéode unojo quigade enga chi Jesus nóna dacadigode uñéngo aja cucarãte umanique ójoraque. Enga chi jorane u Pédro, Jacóbo ore. Jé aja Juan uje Jacóbo jõra to. 2 Chi Jesus qué déji cucarani ójo gai iji ore ajei enga chi edodie chécãre dasocade. Enga díreca. Cho guedé ojode ichode. Jé aja iguidedie rĩ. Uje chi póroropisi iguidedie enga chi chijninguese dayaridi. 3 Chi ore chuninga mu jnani gárerigo ore chiqueta raja Jesus. Enga chi Jesus ore catecã́ri ñane. Chi Moises u uñeque. Jé Elías u uñai. Uje chi jnani bajácho ore nanique. 4 Pédro chi pañáji ore. Jé u uje chojningame Jesus: —Yocangaráni a, ueradípise ujetiga yácagoji ne enga yipéco guiguíjna gadiótigo ome uaque. Bajneque uñeque jne. Jé Moises gajneque uñeque jne. Jé Elías gajneque uñeque to jne.— 5 Mu chi cáma Pédro chejna daruode unojo guesi uje chi gue abuja nanganatágueraque díji ore. Enga chi chaco udore ore gai. Chi ore déji gue abuja uaté ajei. Enga chi ore chudute darárigo iji gue abuja ajei uje chi chojninga: —Yape yijnorai u uté enga yirasique yu ome. Angachopísi.— 6 Uje ore chudute cuchade unojo enga chajuque ore agutedie enga ore todópisa. Jé u uje chi ore cṍraja jnumi. 7 Jé u uje Jesus sose ore yui enga chijocase ore. Enga chojninga: —Ayágueyo. Jé ca atodóyo.— 8 Chi ore chajirapo dejode rĩ mu que ore chimo ayorériguiji. Mu gusu ore imoi u Jesus iji. 9 Uje ore doi jnumi iji cucarãte orone ójo enga Jesus chojningame ore: —Jé ca ajúyo cucha dacadode unojo jne, jé aja ujetiga Dupade utocaidi uyu yiquecápo rĩ iji yitoringai.— 10 Mu acadigode ore chojningame: —¿Jé gotique gu a uje Moises urusarane atatasórone ore chacate yoque uje chi bajaque Elías jne ujeta di, jeque chi judíode yoquijnati Crísto díji quigábode jne?— 11 Jesus chajnai ore uruode enga chojningame ore: —Jé ũré uje Elías a di bajaque jne. Enga a pésu cuchade bajaque jne ujetiga dimane ome ore angaráni diringai yui. 12 Mu yingome uaque uje Elías e di nanique. Mu que ore chiraja uté nanique. Jecute ore doi datuatigade ome. Enga isocai a jé u jne ome Dupade utocaidi uyu. Uje a ore cho damajóji yu to jne.— 13 Jé u uje quene Jesus acadigode ore chiraja uje ore acadisṍri ojningai upúsu Juan uje chaca ore edodie iji yodi nanique. 14 Jesus ore doi jnumi iji cucarani enga ore chise cojñonguemui. Jé u uje jnanírique chi sose Jesus yui enga chichaga dagatáidie aja jnumi iji iquei. Enga chi chojningame: 15 —Yangarádejna, osõrape yabi. Uje ejnaretaque enga ejnaréquedateode chujé. Enga chipese re aja quedéjnane. Ejnarei jecucha tṍraja piogode. Tõrapója yodode to rĩ. 16 E ijnája bacadigode ore que, mu que ore chijnime ejnarei ãrírique.— 17 Jecute Jesus chi chojningame ore: —Que uacanguretigárique cuse go. Enga jecucha écãcho cuchade quigode. ¿Chimo joróquerase re díningo ujetiga qué yugúsiji uacari iji ne enga yidota yu ome uacaringane angoneparicho? Boyo ga beyoi disi tuté ga ajnáño aja ne.— 18 Uje chi ore diósi disabi suté údi iji Jesus enga chi Jesus chijócãre Satanas utocaidi iji disabi. Jé u uje chi jnosíji. Enga chi jĩraque ijõrape disabi te rĩ. 19 Unojo quigade enga Jesus acadigode ore catecã́ri dacadisṍri iji quedéjnai. Enga chi ore chojningame: —¿Chimo joroque re uje que yijnico Satanas utocaidi iji disabi suté que?— 20 Jesus chi chojningame dacadigode: —Chimo joroque re uje uacanguretigai qué chonasia disabi ejnarei. Uje a atíamirase uacanguretigai marínga, enga chósi cucha ajñu atíãtaque, a jé cuchárique tõrarásiji. Enga a ojnichórasa ome cucarãte cototéraque: “Ecãre bajogatique iji ne.” Enga a chécãrirase dajogatique. Que cucha pirátique cuse ome uñeque ujetiga anguretigai ũrepise ome Dupade.— 21 Enga cho dacadigode quique enga chojningame ore: —Satanas utocaidode unojo que ore doi guesi iji pisoca uñeque go. Ore doi guesi gu ujetiga ayorérique cho dayágome re ujetiga catecã́ri Dupade.— 22 Uje Jesus, acadigode ore nóna ñane iji Galiléa údode enga Jesus chi chojningame ore: —A pẽrate Dupade utocaidi uyu ome yetesórone dirome. 23 Enga a udore ore chimate yu aja jnumi jne. Mu a gadioque díningo dirome iji yitoringárique quigade enga jé u ujetiga yĩrijíapo rĩ iji yuringai toque.— Mu ojñane unojo cháji ore údode. 24 Uje Jesus, acadigode ore chise Capernaum nanique, enga jnanione tibágui Pédro uje ore chutai ore iplátadie ome Dupade iguíjna cuchábi. Enga chi jnanione ore chojningame Pédro: —¿Uacacadisṍri ja chorase doré to a ome Dupade iguíjna cuchábi?— 25 Pédro chi chajnai ore enga chojninga: —Cachi cho doré to.— Quigade enga Pédro chi chise Jesus iji charidi guiguíjna ajei. Mu Jesus chi catecã́ri bajaque enga chi chojningame: —Simon Pédro a, angomome yu ujetiga eduguéjna cuchábode iji erámone unojo ore chutai darásade iplátadie, enga ¿ja ore chutapoi dabode to rĩ a?— 26 Mu Pédro chi chajnai enga chi chojningame: —Ore utaidode u ayoré unejángone.— Enga Jesus chi chojningame: —Jecute a ca cucha putáite eduguéjnane atígo to.— 27 Enga chojningápo rĩ: —Isenga a ca yorase yoré to uje yocangaráni Dupade ape yu gu. Mu jé dóji siñeque. Que yipota gu, ujeta dequeteque yocatique. Jé yoco yocoré to. Be tie enga ṍra bojnai aja enga a jĩraque ajnime oyítique jne ujetiga tagu bojnai. Enga achẽre pijnani gai jne. Enga jé u jne ujeta ajnime plátaraque iji pijnani. Enga a jé chopise yoque jne ujetiga yoco yocoré.—
1 Quigade enga Jesus acadigode chi ore chojningame: —¿Jé ibijótique jne iji yoque ujetiga Dupade e chijna daringai eduguéjna aja erámone unojo?— 2 Mu Jesus que chajnai ore míraque. Diga dosi disabi enga chichasíji uraque dajei. 3 Enga chi quene chojningame dacadigode: —Jé ũré yu ujetiga uacuñeque ca chécãre dáyipie quitique enga ca chósi disabi suné, a ca uacuñeque chise daringárique Dupade urása to jne. 4 Uacamóño uje a eso uacaringáringo Dupade urása jne enga ibijoi a upúsu uñeque jne ujetiga chósi disabi suné ome uringai pajnotaque. Uje que áyipie déji daringárique cucha daté. 5 Jecute ore uje que ore suseque disabi suné gajnúone, cho jeta ore ijnorai jé u yu to.— 6 Jesus qué cho dacadigode ore quique. Enga chojningame ore: —Dupade ujuyaquei a ca chajire re jne ome uté gosi ujetiga gosi chacate yanguresórone uñeque ome pisijnaringuéone atique, jetapuré ujetiga disape. Ujetiga pigariguírase cucarané cuchabéraque aja uté gosi etabi, enga paranírasaja yote quedéjnai ajedatéode marínga, Dupade ujuyaquei a suépise cucha dacadode udore gai ome uté gosi jne. 7 Yo yáyugu uje pisijnaringuei jé jogate erámone unojo uje unéningai cuse ome erámone unirisórone. Mu a jé ate unojo jne iji deréjnane. Mu iyieja Dupade ujuyaquei yui ome gosi ujetiga chacate dojoi ayoré ome pisijnaringuéone unéningai. 8 Jecute ujetiga bajmanai, jeonga barídai ore chorei ua ji pisijnaringuéone, be udore enga aquesu enga ṍraja toniñeque. Bamo uje ueradi u ujetiga corocorõ ua aja bacuecaringué ichai marínga, ca porei ua iji gajño pioi jnese, uje pioi uté que eruénique cus. 9 Ujetiga bedo u ujetiga chorei ua iji cucha gajnaréngone, be enga ajnime enga ṍraja toniñeque. Arei tu ujetiga bedóraque chojmára aja bacuecaringué ichai marínga, jé ca ducarãte ua aja gajño pioi jnese. 10 Ca etáchosi disabi suné ujátique disape ore. Yingo uaque gu uje ore irodingórone gaté unirisóño déji Yai gari to iji guéode. 11 Uje Dupade utocaidi uyu yirĩ gu ujetiga yiqueta ayoré togadégode. 12 Ujetiga uacuñeque gachidedie dérasi 100, mu a chojmáraraque bijnárase enga, que toc ujetiga uaque gosi noñome bijnangue iji erámi. Uaque gosi a noñomirásome amirenie iji pie enga jno enga chucuérasi bijnangue uaté. 13 A uaque gosi irasei dachidedie jnese. Mu quene ininaquei cho dabai uje chise dachidé bijnangue. 14 Isocai jé u uacai Dupade uje déji gatajnoquei iji guéode uéchai. Uje que pota to ujetiga disabode sudore uñátique bijnási ome. 15 Ujetiga bojórique Dupade anguresõre pésu cucha gajnarétique ome ua, enga be uté gosi enga o quique iji quedéjnarique. Enga ujetiga doi baruode enga jogadi tu uje uacajõrápo ñane. 16 Jé basa ujetiga uté gosi ca tangári ua enga abidi bojórique Dupade anguresõre, jeonga gárerigo, enga átayo uágaja ñane ome uté gosi. Uacaringane ũréo pijogúsorone a u ore jne. 17 Mu ujetiga uté gosi jé ate ujetiga ca timíninga udore ore enga ajnáño uté aja Dupade anguresórone ore iquei iji ore aquiningamei. Mu ujetiga jé ate ujeta ca tangári Dupade anguresórone uaque, enga beyoi enga oyo Dupade uruode guetesõre iji. Enga a ca átayopo uágaja uté gosi rĩ. Enga uté gosi gajnui u jnanírique jne uje chutai yógome yoquiplátadie ome dasutedie ore, uje que diquiyaque udore ore unétique. 18 Jé ũré yu uje uacajnéone u ujetiga oyo ñane quique ome cuchade iji jnumi uné. Enga a Dupade narare uacabáyode to jne ome uacãrétigo cucha, uacajuegátigo cucha ore. 19 Yojningápome uaque rĩ: a yanguresõre gárerigo uacáyipieraque chojmararase iji jnumi uné ome uacataitique cucha iji Yai uje déji gaté, enga a jé chisírasome uaque. 20 Adi jé upo rĩ uje a yanguresõre garósirigo ore cháta rágaja ñane ome yuruode. Garósi ore marínga, jé yugúsiji ore gari to.— 21 Mu Pédro chi sose Jesus yui enga chojningame: —Yangarádejna, ujetiga yujórique Dupade anguresõre gajnareque atígo ome yu enga ¿ja garijiti a ujetiga yicadígui uñeque atígo ome yu to?— 22 Mu Jesus chajnai uruode enga chojningame: —Ungare, que quigode u udore go. Que gusu ujetiga gare iji ti mu ueradi u ujetiga yicadíjoi yocujode Dupade anguresõre ate gajnarétigo ome yoque durasedie, deréjnane ore jnese iji dirode jnese to. 23 Ujetiga Dupade chijna daringai eduguéjna aja erámone unojo, a chicadígui darásade ore isijnaringuéone jnese jne. Adi tu yojñane unojo gajneri ome eduguéjna cuchábi uje chajire darógode íode nanique. 24 Chi qué déji ore íode gai. Mu ore di irógode uñai údi uje chi írigo dipeséo iji gari. 25 Mu chi ca ugúcharique cuse ujetiga chimate déode. Jecute chi eduguéjnai chiroque ore aja daroi ujetiga ore tẽra, jé aja acoté, abode ore jnese, jé aja ugúchade rĩ. Enga eduguéjnai chi chijnárasa daroi ore oredie jnese ome íode. 26 Mu iroi doi enga jĩraque chichaga dagatáidie aja jnumi iji eduguéjnai iquei. Enga chijócha ajei údi enga chojninga: “Yeduguéjna, ca agu bejode ome yu. A yo boré jnese jne.” 27 Jé u uje eduguéjnai chosõre daroi enga chicadígui íode iji dari enga chirame daroi. 28 Mu iroi jnoja daquei enga tuagóa jnani uje íode déji gari to. Mu chi garósi. Mu que chajire cucharigome. Jĩraque chisa etabi enga chibéro. Enga chojningame: “O yoré, jé iji ne ome béode iji yari.” 29 Jé u uje jnani uté jĩraque chichaga dagatáidie aja jnumi iji uté iquei enga chijócha ajei údi. Enga chojninga: “Ca agu bejode ome yu go. Bamo uje a yo boré jnese jne ome yíode iji bari.” 30 Mu que pota. Enga doi jnani uté enga chijnája soldádode iguíjnai, jé aja ujetiga cho oré déode. 31 Mu uté jorane chimo adode enga jnusiétaque ore ome dãjorai. Udore ore jno enga ore chingo cucha dacadode udore aja deduguéjnai. 32 Jé u uje uté eduguéjnai tibidi daroi enga chojninga: “Gajnareque badode ome bojoi uté yiroque que. Chamáñaje bajócha yajei údi que enga yicadígui be dipeséode que. Mu que be yisocai to. 33 Yosõre ua que. Enga badi a jé urásu ujetiga osõre bojoi yiroque.” 34 Jé u uje eduguéjnai ájningaraque cuchape enga doi enga chiroque darógode aja daroi uté ujetiga ore chisa. Enga pujuya uté iji soldádode iguíjnai, jé aja ujetiga cho oré déode jnese.— 35 Uje Jesus chejna daruode udore guesi enga chi chojningame ore: —Yai Dupade a isocai jé u unojo jne ome uaque ujetiga ca acadichopísi uñane adode.—
1 Unojo quigade uje Jesus chejna dacajnaquéode guesi enga jnoji ore uniri Galiléa. Enga chise ore uniri Judéa to iji tie Jordan uéchai uje déji guedé garani. 2 Chi cojñoque dipesérigo ore nóna uté to. Jé u uje chiqueta ejnaretade ore aja dajesui. 3 Fariséode uñéngo chi ore chise Jesus ome daringaquérigo ujetiga pijoque Jesus igajnaretigárique ujetiga chajnai ore. Enga chi ore chojningame: —¿Ja jé areque a ujetiga uñeque cha dacotéraque enga chapúsaja bárique?— 4 Mu Jesus chi chajnai ore enga chojninga: —¿Ja ajicho Dupade uruode to a ome ipesudode iji erámone taningane? Uje jogadi jé u to uje Dupade chi pésu jnani bajai, chequé bajé ore ujetiga ore nóna ñane. 5 Jecute Dupade uruode chojningápo rĩ: “A jnacari jnoji dayé, daté ore dosadi enga a nóna dacoté jne. Jé u uje a ca ore cãrapome ñane jne rĩ, mu a jé chojmára ore jne iji jnumi.” 6 Mu ujetiga Dupade ca ajéo ujetiga ore cãra ome ñane, gajnareque ujetiga uñeque qué juéga piyai ome ore ome ñane. Chamáñaje Dupade jé oite ore aja ñane gu, ujetiga chojmára ore iji jnumi.— 7 Jé u uje ore chojningame Jesus iji dabotaquéode: —¿Gotique gu a? uje Moises chojninga nanique: “Ujetiga uacuñeque pota piyátigome dacotéraque enga doi enga chutṍri pangarádejnarique ujetiga chisi ome darusãratígo ome jne enga chisi ome dacoté. Enga uringai ũré jogadi u uje cha dacoté.”— 8 Jesus chajnai ore enga chojninga: —Moises churúsãre darusarane unojo nanique gu uje chiraja uacojode jnanío nanique uje que ore tangarapoi Dupade rĩ enga ore chajo rágaja dacoté piyáguedie nanique. Jecute juéga nanique ujetiga uñeque cha dacotéraque. Mu que Dupade áyipie gotique ujetiga jnanírique cha dacotéraque iji taningane. 9 Mu yojningame uaque: jnanírique tṍra dacotéraque bisideque jne enga ca bai u jnani quedéjna pimochápasarique, enga a pisijnaringué jne ome uté gosi ujetiga chisa chequé unejángueraque gaté. Enga uñeque ujetiga nóna chequé piyágueraque, jé pisijnaringué to ome uté gosi.— 10 Jé u uje acadigode ore chudute uruode, enga ore chojningame: —Ujetiga cuchade isocai tu baruode udore, enga omi jé u ome yoque ujetiga ca pĩjora chequéraque.— 11 Mu Jesus chojningame ore: —Que togome ayoréode jnese go ujetiga ca pĩjora chequéraque. Gusu udore ore uje Dupade jé áyipie ome ore. 12 Yirajágo uje jnanione déji uje isójna ore, jé iji ore uringane disi caratácho. Jecute que togome ore ujetiga ore nóna chequéraque. Uñane dépoji rĩ uje jnanione ore jnari ore ome ore uringáringo darócho. Jecute ore chijnime ore adode. Jé u uje que ore áyipieraque déji chequé pĩjóraraque. Mu cho jetiga yojningane u udore uje yojninga: jnanione déji uje que ore pota chequé pĩjóraraque. Ore u uje ore chejna dáyipie aja ore eduguéjnai Dupade iroquéode. Jé u ujetiga uacuñeque chiraja re eti uñeque cho udore uñeque enga be enga jé o uñeque.— 13 Cojñone ore chijna dabode aja Jesus ujetiga chicha dajmáinie aja ore enga catecã́ri Dupade ome ore. Mu chi Jesus acadigode ore chanire ore enga chi ore chijócãrirase ore iji dejode. 14 Mu Jesus chi chojningame dacadigode: —Jé dóji enga disabode ore chisósi yu to. Enga ca ãracho yejode ome ore. Uje Dupade a chopise darása iji disiparátagabode sudore ore gajnúringo jne.— 15 Jé u uje chi chicha dajmáinie aja disiode udore ore gáyode. Quigade enga chi jnoji ore idáyode iji te. 16 Chi jnacanique tibágui Jesus nanique. Enga chi catecã́ri enga chojningame: —Jesus a, areguipise ua. Enga baraja cuchade. Ango cucha arétigome yu ujetiga yipésu enga yiqueca iji deréjnane jnese.— 17 Mu Jesus chajnai uté uruode enga chi chojningame: —¿Jé gotique gu a uje bacota yu ome yuringárique ayoré areque? Uje gusu Dupade uje ujñapetaque. Mu ujetiga apota eca ua iji deréjnane jnese, jé be Moises iroquéode quigode.— 18 Jnacari chi chojningame Jesus: —¿Déji rique a gotígo?— Jé u uje Jesus chi chajnai uruode enga chojningame: —U unojo: ca ajé bojórique ayoré. Jé ca apotapo bojórique ayoré acotéraque rĩ. Jé ca õri. Jé ca o baru pataringa ome bojórique ayoré rĩ. 19 Mu angári bayé, baté ore acajnaquéringo ome ua. Ajusípise bojode ayoré guio. Enga gajnui jé u uje bajuse beo.— 20 Chi jnacari chojningame Jesus: —Cachi que yiyo Moises urusarane cucha puyaque uñeque gánique ẽrie, jé aja yuringai tuné jnacare. ¿Jé yipesute cucha uñeque ujetiga eca yu iji deréjnane jnese to?— 21 Mu Jesus chojningame: —Qué cucha amiri déji ome ua ujetiga ese baringárique ujñapetaque. Be jne enga ẽra bagúchade jnese enga asi ome oredie ome ayoré jmatágode. Enga jogadi jé u jne ujetiga ese baringárique piquetaque iji Dupade idai to iji gaté. Enga a Dupade tẽrája ua jne ome bacaniratiguérique iji gaté. Ujetiga ejna badode unojo guesi enga be enga ajína yu to.— 22 Mu jnacari chopise dáyugu re. Chijnóra dagúcha dipeséode gu. Jecute que togome ujetiga doi Jesus uru quigode. 23 Mu Jesus chi chojningame dacadigode: —Angachopísi yu. Piraguipise ujetiga ayoré atátique chise daringárique Dupade urása to. 24 Qué yigota yuruode iji jnumi ome uaque. Uacarajáyo uje que togome cuchiso cuchátique ujetiga chacája ojnatique edóraque. Enga jé adi tu ome cojñoque atátique to ujetiga uñeque chise daringárique Dupade urása. Jé ore cho ñane ome daringane cucha ibiracho gu.— 25 Uje Jesus acadigode ore chudute Jesus acajnaquéode unojo, enga chi ore cho dáyugu re enga ore chojninga: —¿Chimo joroque daquetade gosoderase?— 26 Jecute chi Jesus chajire ore enga chojningame ore: —Jé ũré uaque uje cucha ibirade cuse uje que togome jnanírique ujetiga pésu, mu que cucha ibiratique cuse ome Dupade.— 27 Chi Pédro chojningame Jesus: —Yocangaráni a, uyoque u uje yijíñongome cuchade jnese ica uje yijínango ua. ¿Jé yocajnetique jne a ome Dupade?— 28 Jesus chajnai enga chojningápome ore rĩ: —Ajichopise yuruode unojo uje Dupade a chinoningase cuchade jnese jne. Enga Dupade utocaidi uyu a yácariji yiyaripi nanganataguipísirique gai te jne ujetiga yajire cuchade aja quigode jnese. Yacadigode uaque, a ayáyoji piyaripi uñéngo gáningo jne uje a gare iji yirídai jne iji yirosadode. Enga uacajnei a u jne ujetiga ajicho Israel gosode adode aja quigode jnese uje ore uáguedie gare iji yirídai.— 29 Chi Jesus chojningápome ore rĩ: —Ujetiga uacuñeque noñome daguíjnarique iji te ujetiga uñeque jno yujnomei údi, jeonga dãjorárique, jeonga dánique, datéraque, jeonga dacotéraque, jeonga datígo, jeonga dejnatique. Mu a Dupade chatire uaque gosi gai jne, enga gueranone sué uacañomone cucha gai gaté jne. Mu que gusu cuchade udore gotique, mu a nóna pucuecaringuei jne iji deréjnane ome uté gosi.— 30 Mu chi Jesus chojningame ore: —A uacuñéngo déji jne ujetiga ibijoque uacuñéngo iji erámone unojo, mu a uacuñéngo ca pijoque to jne iji Dupade idai. Jé basa uñéngo ore déji jne ujetiga ca ibijoque ore to iji erámone unojo. Mu a ibijoque ore jne jeta ore chise Dupade idai.
1 Ujetiga Dupade e di daringai eduguéjna údi iji jnumone enga a isocai tu jnanírique uje chobere aja dajesúrique uje chi chucué darótigo ujetiga ore na acadie úvai . 2 Chise gojni darógode enga chingo dáyipiedie ome ore ujetiga gueranenie pláta denário chojmára iji dire chojmarai. Enga chi ore chimesere áyipiedie. Jé u uje chiroque ore aja daroquei. 3 Jnani uté chicapóji ore idai ajã́ro rĩ uje guedé qué paráta. Jé u uje chimópo cojñone rĩ uje chi ca ore doi piroquérique. 4 Enga chojningame ore: “Boyo enga beyoi yiroquei to. Aráñomu yacadie úvai to jne. Enga jé yiji uacameseráringui plátai jne ome uaque.” Chi jé u uje ore doi iroquei to. 5 Guejnasṍri chucuepoi darógode gaté rĩ iji guedé gatocoro. Enga chucuepoi ore rĩ uje guedé cho jñuque. 6 Uje guedé e jnopise, mu chicapóji guidai ajã́ro rĩ enga chise ayoréode uñane uje chi ca ore doi piroquérique to. Enga chojningame ore: “¿Gotique gu a uje que beyoi piroquérique iji diri uné to?” 7 Ore chojningame uté: “Que uñeque catecã́ri yoque gu. Jecute que yicoi uñeque iroquérique.” Chi chajnai ore uruode enga chojningame ore: “Beyoi enga aráño yacadie úvai to jne. Enga jé yiji uacameseráringui plátai jne ome uaque ujetiga aráño to.” 8 Uje e cho sere enga guejnasṍri chi chojningame daroguipísi: “Abidi yirógode enga o ore oré ome diri uné. Mu o bajágu ejode jne. Jeque o ejoi iji bajade ore jne.” 9 Iroque ejópisode uje ore doi trabájo iji guedé jnoringai, ore gajnenie jé u ore ipláta denário chojmarai. 10 Quigade enga cho uñane oré to. Mu bajaguipísode ore jos eti ore gajnéringui déji ejode iquéode. Mu que u ore áyipiedie go uje ore gajnenie jé chojmára jnese. 11 Uje ore chimo ore gueranenie uje jé chojmára, enga ore cho chi chi chi chi aja darósõri. 12 Jé u uje chi ore chojningame: “Guedé gatocoro chojmáraque uje ejode ucode ore doi baroquei to que. Mu yocajnenie jé cho ore gajnenie to. Uyoque u múñi uje yejnángo yoque iji guesi enga guedé ojodie chejna yoque iji diri jnese.” 13 Mu guejnasṍri chojningame ore uñai: “Yĩjora, que yatique gajnareque go. Yeranenie jé u yojninganie ome uaque que. ¿Ja ca ajnusina ya uje yicatecãcoi uñane que ujetiga amesecho yeranenie iji diri tuqué? 14 Asa bajnenie udire enga bo. Yipota ujetiga ejóriso ore gajnenie jé u bajade gajnenie to. 15 ¿Ja ca araja to a uje yiplátai enga jé tiógara uje yiji yajéode ome? ¿Jeonga aratáñime yuringai caniraque ome yu?”— 16 Jesus chi cha daruode guesi enga chi chojningame ore: —Jecute yingome uaque uje yanguresõre ejode uñane a ore sué yanguresõre bajade gáyode jne ome Dupade guerãtígo ome ore. Jé basa yanguresõre bajade, bajac ore mu, a querénga ore gajnetique ujnájna jne. Uje Dupade ibidigode jiei ore. Mu imeserane garósi iji ore.— 17 Uje Jesus chi ore déji dajere iji Jerusalen yui enga chijna dacadigode aja quedéjnarique uje gare ore iji yirídai. Enga chi chojningame ore: 18 —Uacarajáyo uje yoquiqui tu Jerusalen. Mu ujetiga yico gajneri a pisi ome Dupade utocaidi uyu ome judíode angaránone asutépisedie, Moises urusarane atatasórone ore to gajneri. Enga a udore ore tẽra yu ome chutique dirome. 19 Enga a ore tẽra yu ome ducurása quedéjnane ore dirome ujetiga ore chujñieta yu. Enga a ore chujépo yúdode jne rĩ. Quigade enga a ore chajo yu aja curesérique jne. Enga a jé yitoji jne. Mu a gadioque díningo dirome iji yitoringárique quigade enga jé u ujetiga yĩrijíapo rĩ iji yuringai toque.— 20 Jé u uje Zebedéo ujnacarode Jacóbo, Juan, ore daté ore tibágui Jesus. Enga ore daté chichaga dagatáidie aja iquei enga chingo dajnacarode ome. 21 Enga Jesus chojningame: —¿Bagaitíguiji yu a?— Enga chequé chojningame: —Yibágui ua gu yujnacarode. Yajéode urásu ujetiga e ajna baringai eduguéjna aja erámi uné jne enga acharása ore aja barosadode ujetiga dacasuté ore to. Uñeque a charásiji bãrachua qui, jeque uñeque charásaji barasei qui ome uringárique dacasuté.— 22 Mu Jesus chi chojningame ujnacarode ore: —Que arajáyo uaquecarane cucha udore uringane cucha ibiraguéjna. ¿Ja jé acasorási yuringai ducañerájma to a? Uje a yajnéone cucha gajnui tu cucha pijote iringoguéjnarique jne.— Mu jĩraque ore chajnai enga ore chojningame: —Cachi yicáco ẽrie.— 23 Enga Jesus chojningame ore: —Jé ũré uje uacacásoi uacaringáringo ducañerájma to, jé aja ujetiga ójiyo yijotique cucha iringoguéjna to. Mu que yajneque go ujetiga yi yajéningo ome yirosadi charisóningo. Yai Dupade a u jne ujetiga doi dajegaitígo ome yirosadode.— 24 Uje Jesus acadique uñane, uje ore chejna yijmanáyone, ore chudute Jacóbo, Juan ore ajéode ome ore uringai dacasuté enga ájningaraque ore. 25 Jé u uje Jesus chi tibidi ore enga chojningame ore: —Uacarajáyo uje dacasutedie ore chopise daroguipísiji darásade. Enga ore chijna damenuringuei aja ore. 26 Jé basa uaque enga a ca uacadi u to jne. Quigueque uje a uacuñeque pota daringárique uacangarate jne enga a uñeque chucué dasocárigo jne ujetiga chátaja dojode Dupade anguresóño. 27 Mu ujetiga uacuñeque pota daringárique uacangarate jne, uté doi enga ca suseque dajorane ore. 28 Uje Dupade utocaidi uyu jé yisocai u to uje que yĩri gu ujetiga yijna yimenuringuei aja uaque ujetiga apéso cuchade ome yu, mu yigaidi u ujetiga yátaja uaque. Yigaidi upo rĩ ujetiga yẽra yu enga yimate uacasijnaringuéone oré. Cho jetiga pisijnaringuéone igarique uaque, mu yigaidi u ujetiga yirame uaque. Enga a jiei yiraméone iji uaque jne.— 29 Uje chi ore jnoji ore idai Jerico enga cojñoque dipesérigo chi ore nóna Jesus to. 30 Edoparique gárerigo chi ore cháji dajei dosatique. Enga chi ore chudute uje Jesus déji dajei ga e chirõre ore. Enga jé u uje ore tibite Jesus gai to. Enga ore chojninga: —Jesus, David ape disi ejo a. ¡Osõrape yoque e!— 31 Mu ore ejominórone cojñoque, chi ore chetaque darai ome ore. Enga ore chojninga: —Oyo parácho.— Mu chi edoparigode ore tibite gaté. Enga chi ore chojninga: —Jesus, David ape gaté a. Be enga osõrape yóguiji ne to e.— 32 Enga chi Jesus chudute ore pijnacaráidie udire enga chi jĩraque chague iji gaté. Enga chi tibidi edoparigode enga chi chojningame udore ore: —¿Uacajegaitique a ujetiga yipésu ome uaque?— 33 Chi edoparigode chojninga: —Yocangaráni a, qué yutõcoi ua ome yoque ujetiga aqueta yoquedodie.— 34 Jé u uje Jesus chosõre udore ore enga chisa ore edodie gáyode. Enga jĩraque edoparigode ore edodie omépo rĩ. Enga chi ore quíte quiguijí Jesus quigade to.
1 Uje chi e idógosi ore iji Jerusalen enga ore chisósi idayatique uje chi iábi su Betfagé. Enga chi idógosiji cucarãtique uje chi i tu Olívos. Jé u uje Jesus chi catecã́ri dacadique gárerigo. 2 Enga chi chojningame ore: —Boyo enga abáchosi Betfagé uje déji yoquitiógare. Enga a eso burica quedéjnarique iji jne uje a ore chigaru enga nonasia dabatíguiji jne. Ejñúño enga ajnáño udore aja ne jne. 3 Ujetiga uñeque chojningame uaque jne: “¿Gotique gu a uje uaqueñúño burica quedéjna uaté?” Mu a ojnichome jne: “Yocangarádejnai pota chujé raja gai gu. Mu chi jĩraque yatiregópo jne rĩ.”— 4 Cucha dacadode unojo chósi te gu ujetiga Dupade uruode atatasṍri urusarane tocade uje chojninga: 5 Ojnichome Sion gosode ore jnese: “Jé cajicho to uaqueduguéjna cuchábi to uje paráguejna uté. Uje que chucué burica ueratique ujetiga cháji gai, Mu cháji burica quedéjna abi gai uje jnuque ore ugúchade.” 6 Jecute Jesus acadigode ore jno enga ore chicáji ojningai, uje ore doi Jesus uruode ucode. 7 Chi ore chijna burica quedéjna uje nonasia dababi aja Jesus. Enga chi acadigode ore pésu daguidedie enga ore chujé aja gai. Jé u uje Jesus chujé raja burica quedéjna abi gai. 8 Chi jiei cojñotígo uje chi ore chitẽre daguidedie aja dajere iji Jesus iquei. Jeque uñane ore chaquesu poridie agatadode enga ore chitẽre aja dajere to. Ore isocade u gu ome deduguéjna dameserane. 9 Enga chi gagué iji iquei, quigaminórone chi ore ninapísa raque jnese. Enga chi ore tibidája dajesui. Enga ore chósi tiji dabijnacaráidie: —¡Asiyopise eduguéjna cuchábi uné gai uje eduguéjna casicáite David ape! ¡Picotaguípise opejã yoqueduguéjna cuchábi Jesus uje Dupade utocáite uté ome yoque! ¡Jé tiógarapisa ujetiga pitijate Dupade iji gaté ome utocaidi uringai pujnuéngaisṍre! ¡Isígopo Dupade gai te rĩ!— 10 Uje Jesus chacája Jerusalen enga idaisórone ore ichorájna. Ore chojningame ñane: —¿Jé uté gosi a?— 11 Enga cojñonguemui chi ore chojninga: —Dupade uruode atatasṍri Jesus u ẽrie. Uje garani u ore idai Nazaret, iji ore uniri Galiléa.— 12 Jé u uje Jesus chacája Dupade iguíjna cuchábi iji Jerusalen. Mu que chise unétique uje ore tẽra cuchade iji. Jecute chi chijócãre cojñone ore iji uje ore tẽra cuchade iji ajei. Upo ore rĩ uje ore doi cuchade oredie. Enga chucurase jnanione agapíode uje ore doi oredie ome pláta quedéjnanie. Chi chucurasapo cucujúode guerasórone ore charipíode rĩ. 13 Enga chi chojningame ore: —Uacarajáyo uje Dupade uruode chojninga: “Ujetiga uaque gosi chacája yiguíjnai enga, yiguíjnai gajnei tu ujetiga acatecãchoi yu iji.” Mu uaque enga uacacáyoja gu ujetiga ẽcho cuchade iji enga uacaráñopo ñane rĩ ome uaqueranone oredie.— 14 Quigade enga edoparigode, noñángone ore chise Jesus iji Dupade iguíjna cuchábi enga Jesus chiqueta ore iji deréjnai uté. 15 Mu ájningaranguípise judíode ore asutedie ore, jé aja Moises urusarane atatasórone uje ore chimo Jesus ipesudode cucha pitijácho. Ore chudúdapo disiode pijnacaráidie rĩ iji Dupade iguíjna cuchábi uje ore chojninga: —¡Icotagopise eduguéjna cuchábi Jesus uje David ape disi ejo!— 16 Enga ore chojningame Jesus: —¿Ja adute ore icotaquéode ome ua to a? Uje Dupade a gajnenguíraso.— Jesus chajnai ore uruode enga chojninga: —Ejẽ. Yudute ẽrie. Mu ¿ja ca ajnusináño Dupade uruode quigode ome unojo to a? uje chósi te: Disiode, jé aja disi parátagabode ore gajnémi su ujetiga ore chicotási yu. Enga que iyieque ore icotaquéode unojo.— 17 Unojo quigade enga jnoji ore gari enga chicáji ore idai Betánia. Enga moji to iji dejai uté. 18 Chi dire uñai enga Jesus jnoji Betánia enga chicáji Jerusalen. Mu chaguhei chi chejna aja dajei. 19 Enga chi chimo pojnaque uje i tu higuéra iji dajere dosadi. Jé u uje chi tibágui enga chi ajéode u ujetiga tagu áraque. Mu chi ca áraque cuse. Chi gusu acarane iji. Enga Jesus chi catecã́ri higuéra uaté enga chi chojningame: —A jé ca báraque cusapo jne rĩ.— Enga jé iji deréjnai uté chi poria chiririta. 20 Jé u uje Jesus acadigode chi chimo udore enga chi ore tija ipesudode cucha. Jé u uje chi ore catecã́ri Jesus enga ore chojningame: —¿Chimo joroque re uje jĩraque higuéra uaté chiririta que?— 21 Jesus chi chojningame ore: —Jé ũré yu uje yojningame uaque, ujetiga anguretáyo yu enga ca abóyoja yu, a ca gusúrasu uacapesutique uté gajnúrique. Mu a ojnichorásome cucarãte chaguesírique: “Ecãre bajogatíguiji ne. Enga jé ayabíji yote quedéjnai ajei.” A dorási uacarúrigo. 22 Dupade a chisi ome uacataitígo cucha ome uaque jnese jne ujetiga anguretayopise.— 23 Enga Jesus chacája Dupade iguíjna cuchábi. Enga chacate ore iji. Mu chi judíode ore asutedie, jé aja ore angaránone uñéngo chi ore sose Jesus yui. Enga chi ore chojningame: —¿Uñeque iroque ua aja cuchade udore a uje bapésu? ¿Jé gosi guẽrate baringai dacasuté ome ua ya?— 24 Jesus chajnai ore uruode enga chojningame ore: —A qué yingo cucharingome uaque to jne. Enga a achajnáñoi yu jne. Enga a jé u jne ujetiga yingo yirósõri aja uaque uje chiroque yu aja yipesudode udore. 25 ¿Gosi iroque Juan nanique a ujetiga tṍra ore aja yodi? ¿Jetiga Dupade urúo nanique, jeonga jnaníringo ore urúo a?— Jecute ore botãre ñane uje que ore chiraja daru quitígome. Enga chi ore chojningame ñane: —¿Jé yocórasi ringome a? Ujetiga yojnicórasa: “Dupade iroque Juan nanique,” mu a chojningárasome yoque gajneri: “¿Gotique gu a uje que ejnáño uágaja nanique enga anguretáyo uté to?” 26 Jé basa a yojnicórasa gajneri: “Jnanione ore iroque Juan aja nanique.” Mu yoquitódode u cojñonguemui. Uje ore changuretápise Juan casicáite gu ome uringai Dupade iroque uje chatata Dupade uruode nanique.— 27 Ore chajnai Jesus uruode enga ore chojningame: —Que yirajágo gosi ujetiga iroque Juan nanique uje chaca ore edodie iji yodi.— Jecute chi Jesus chojningame ore: —Isocai jé u. A ca yingo gosi iroque yu aja yuringai dacasuté jne ome uaque.— 28 Jesus chojningápo rĩ: —Angáchoi yuruode unojo uje jnanírique chi atígo gare nanique. Enga chi chojningame uñeque: “Yujnacari a, be yacadie úvai enga ãra.” 29 Ujnacari chi chajnai uruode enga chojninga: “A ca yiji jne.” Mu chi chécãre dajéode enga chi jé doi dayé iroquei. 30 Jnani uté chi tibágui dajnacare uñai enga uruode jé chome to. Mu ujnacare ejoi chi chojninga: “Yapa, jé a. E yiji baroquei.” Mu que doi go. 31 ¿Jé gáreode udore uñeque gáite dai iroquei a?— Mu ore chojninga: —Bajai gáite ẽrie.— Enga Jesus chojningame ore: —Jé ũré yu uje uaquetégode uje ore chutai uacaplátadie ome deduguéjnane, jé aja dibechoquidie, a ore chise daringáringo Dupade urása jne. Jé basa que pimo uaque ujetiga eso to jne. 32 Uje Juan díji uaque nanique enga chingo Dupade uruode ome uaque ujetiga beyoi. Mu que angáchoi go. Jé basa jnanione udore uje ore utaidé plátadie ome dasutedie, jé aja chequé dibedie ore u nanique uje ore changureta Juan acajnaquéode. Uacamóño joroque ore anguretigade. Mu jé que écãcho uaque to. Enga jé que anguretáyo to go.— 33 Jesus qué jno dacajnaquéode údi enga chojninga: —A qué yipesabu yacajnaquéode gajnúrique uñeque jne rĩ. Jnani déji nanique enga pésu dejnai enga chaca úvadie iji. Mu chicha dajuyaquéode aja dacadie gai. Enga pésu dacadie úvai jogadi ujetiga chijose iji. Pesapo guiguíjna umari iji dosadi te rĩ ujetiga uñeque cháji enga chajire guejnai údode. Quigade uje chimate dadode iji dejnai enga chisi ome dejnai ome jnani uñane. Pota ore na iji sequeré, enga ore tẽra, enga gajnei oredie petique. Enga jé u uje guejnasṍri chi jnome dajesui erãpe uña. 34 Unojo quigade ore na acadie úvai. Enga chi guejnasṍri chiroque darógode aja ore ujetiga ore chisi ome darósõri gajnepídi ome. 35 Mu gajnareque guejnai irodisórone ore adode ome guejnasṍri irógode. Chi ore chujé uñai údode ome pidode. Jeque ore chujépise uñai. Jeque chi ore ajnangoque uñai ome cucaranenie. 36 Jé u uje chi guejnasṍri chirógapo datocáite uñéngo gaté aja ore yui. Mu chi jé ore ate uje ore socárome ore. 37 Mu chi quene guejnasṍri chucué dajéo. Enga chi chojninga iji dajei: “Yijíape enga yirógape yujnacari aja ore jne. Socaseti ore chimo uringai yujnacare enga ore ajéngome. Enga ca ore cho ate.” 38 Mu chi jnanione udore ore chimo ujnacari uje chi chicáji ore yui enga chi ore pésu dáyipiedie ome uté. Enga chi ore chojningame ñane: “A uté dayé toi jne, enga ujnacari uté gajneque jnumi uné jne. Yicoi enga yujégo jne, enga yocajnenguípise jnumi uné jnese jne.” 39 Jecute chi ore chisa uraque dabaguiésõri jnacare. Enga chi ore chijna aja guesi iji uraque dejnai enga chi ore chujé.— 40 Chi Jesus catecãrápoi ore rĩ enga chi chojningame ore: —¿Guejnasṍri jé cho ringome jnanione udore ore jne ujetiga diga chise ore?— 41 Mu chi ore chojningame: —Isocai u uje a chujé ore jnese jne. Enga a ca chosõre ore jne. Chamáñaje que ore áyipieraque cuse gu. Enga jé u uje a chisi ome dejnai ome jnani uñéngo jne ujetiga ore nápisaja, ujetiga ore cho oré guejnai petígo ome iji ojningáringo dire.— 42 Chi Jesus chojningame ore: —¿Ga jé ca arajáyo a? jnani bajade ore urusarane quigode iji Dupade uruode uje chojninga: Guiguíjna cuchábi ipesungórone ore guetegue cucarané noña enga dequedójnariejna. Dupade chicháji goningai gu. Jé cachi cucha pitijatedatéode u unojo ome yoque. 43 - 44 Uté gosi ujetiga cṍraja cucarané cuchabé uaté gai, a jogadi u jne ujetiga cucarané chimate údode. Jé basa ujetiga cucarané base uñeque gánique enga a chajmaripise uñéngaja jnumi jne. Jecute yojñane unojo uruode qui u uje: a Dupade chijna daringai purása iji judíode uacari jne enga a tẽra daringai purása ome uñéngo jne ujetiga uñéngo ca agutu gajnetígo ome.— 45 Mu chi judíode ore asutépisedie, jé aja fariséode quene ore chiraja uje chi Jesus acajnaquéode udore, cucha gajnúo, jé gajnesórone u ore. 46 Jecute ore potapísa ujetiga ore chisa Jesus ome uruode unojo. Mu chi ca ore chiraja dasocáringome gu uje chi ore todópisa cojñonguemui ore. Uje cojñonguemui chi ore changureta Jesus ome atatagode Dupade urúo.
1 Jesus chacadápo ore ome cucha gajnuone rĩ. Enga chojninga: 2 —Dupade chamáta darásade ore aja dari jne enga isocai a jé u eduguéjna cuchátique isocai to jne uje pésu dajnacanique ininaquei uje gajma ore nóna ñane. 3 Chi eduguéjnai uté chiroque darótigo aja dapotigátigo cojñoque ujetiga ore díji uraque daninaquei to. Mu udore chi ca ore pota to ujetiga ore chise ininaquei to. 4 Mu chi chirogapo darótigo uñéngo aja dabidigode yui rĩ. Enga chi chojningame ore: “Angoño ore jne uje dimane cucha pibosode ome ore yui. Enga uje e yirogapo yirógode ore aja cabáyu urojnanie yui rĩ, jé aja yachite urojna uñane ujetiga ore chujé. Enga yajo iji yoquininaquei. Angoño ore enga ore chaguinéru gadoi jne.” 5 Mu chi ibidigode jnanío chi jé ate uje chi ca ore pota yui. Uñai chi chicáji dajnepítique jnupe. Jé uñai qué tẽra deranone cucha. 6 Mu ibidique uñane chi ore chisa eduguéjna cuchátique irótigo. Enga chi ore chujé ore údode, jé aja ore uringáringo toque. 7 Enga chi eduguéjna cuchábi ájningaranguípise. Jé u uje chi chiroque dasoldádode aja ore, ujetiga ore chujé irógode yusórone. Enga ore chãrúpo ore idai gai te rĩ. 8 Enga eduguéjna cuchábi chi jĩraque chojningame darógode: “Dimane cuchade jnese que iji yoquininaquei. Mu que tiógara go ujetiga yibididique bajade qué ore di to. 9 Boyo enga ajnáñoji quedéjnane. Enga angoño yoquininaquei aja uaqueyatígo ayoréo aja quedéjnane.” 10 Jecute irógode ore do gojni enga ore chisite rágaja quedéjnane. Enga ore chamáta deyade jnese: jnani sijnácho, jé aja parágode ore. Jé u uje ore chĩreta guiguíjnai ajei. 11 Enga ore chigui eduguéjna cuchábi gueranenie borai aja daninaquei yui. Jé u uje eduguéjna cuchábi chacája cojñoque dipeséode ore gari. Enga chajire ore jnese. Mu chimo jnani unejai iji ore ujai uje que chigui gueranéisi bora uñáraque to. 12 Enga chi chojningame uté: “Yĩjora ¿gotique gu a uje bacája yoquininaquei uné to, uje que agui yeranéisi bora uñáraque to mu?” Icatecaraini jnani chi ca narare. 13 Enga eduguéjna cuchábi chi tibidi darógode uje ore chijna cucha pibosode aja ore ininaquei gaisórone. Enga chojningame ore: “Beyoi uté enga agacho guídogorodie, jmanecade ore aja ñane jne. Enga órañoja ijnangununie iji guesi jne. Jogadi tu jne ujetiga po joróguiji. Jnari joróguiji jne rĩ.” 14 Yojningai u uje Dupade ibidigode uásejna, mu ajegaidode garósi.— 15 Jé u uje Jesus chimate dacajnaquéode unojo guesi. Enga fariséode ore jnoji ejoi. Mu ore chamátapo uñane rĩ iji quigade ujetiga ore pésu dáyipiedie ome Jesus yui, jé aja ujetiga ore chise bárique cucha. 16 Jecute ore chiroque dojode fariséo, jé aja Heródes angarásorone uñane ore aja Jesus yui enga ore chojningame: —Yocacadisṍri a, yirajagópise ua uje jé ũrepise ua ome baruode quigode uje bo quique Dupade adode ome yoque. Yirajagópo rĩ uje que agutúapo ua ome ayorérique rĩ. Que cuchapome ua rĩ ujetiga ore irasique ua, jeonga ore chetaque ua ome baru uréone. 17 Jecute angomome yoque ujetiga uerate ome judíode uyoque ujetiga yoco oré Róma gosode ore eduguéjna cuchábi, jeonga jé ca yoco oré.— 18 Jesus jĩraque chiraja ore áyipie gajnarenguenie quigode enga chojningame ore: —Urupataquechoquío uaque. ¿Gotique gu a uje uacáyipiedie gajnarenguei ome yu? ¿Uje uacacuei tu yibárique cucha? 19 Angoño pláta guebetique ome yu ujetiga po oré pasutéraque ome.— Jé u uje ore doi pláta guebetique uje chi i tu denário enga ore chingome. 20 Uje Jesus chi chimo ore oidé pláta guebei enga chi chojningame ore: —¿Uñeque edoi unáji a? ¿Jé uñeque iapo u ne rĩ a?— 21 Ore chajnai enga ore chojningame: —Róma gosode ore asuté oré ẽrie. Jecute i jé déji údi.— Mu chi Jesus chojningame ore: —Jé arec ujetiga asíñome Róma gosi uté gajnepídi ome. Jé basa ga asíñome Dupade gajnepídi ome to rĩ.— 22 Uje chi ore chudute uruode udore enga chi ore tija. Jé u uje ore noñome iji te enga ore jno. 23 Diri uté jé u uje jnanione uñane ore tibágui Jesus uje ore uague i tu saducéo . Ore gaidi tu Jesus uringai pibotaque. Uje chiese ca totique ecápo gotique rĩ ome ore. 24 Enga chi ore chojningame Jesus: —Yocacadisṍri a, jnani bajai Moises urusarane quigode u unojo nanique: ujetiga jnanírique toi enga cáma atique tṍraji dacoté enga jõrárique nonapo gaté to rĩ. Ujetiga ore atígo base enga gajnui jé u ujetiga abai bajai jé abío. 25 Jnacanique déji yocujade to nanique uje desátigo gare ore iji ti. Uté chisa dacoté, mu toi uje cáma atique déji dacoté gari. Jecute uté quigaminóri nonapo dãjora toi acoté to rĩ. Mu topoi gaté rĩ. 26 Jé basa gadioi nonapo gaté rĩ. Mu topoi to rĩ. Enga isocai jé upome garitíode jnese rĩ uje ore nóna chequé uaté jnese, mu que uñeque atique cuse iji gari. 27 Enga chequé topoi to rĩ iji ore quigade. 28 ¿Jé chequé uaté abaipísiriquerase iji garitíode ore ujetiga ore ecaporase rĩ iji daringáringo toque quigade?— 29 Mu Jesus chi chajnai ore enga chojningame ore: —Que arajáyo Dupade uruode quigode to go. Que arajayópo uje Dupade ujopie cuse ome cuchade jnese. 30 Uacamóño uje a togode ore ecápo jne rĩ, enga a ca ore nonapo chequéraque jne rĩ iji gaté. Ore gajnúone u Dupade irógode, gaté unirisórone ore jne. Chamáñaje que gapu pisaguéraque déji ore ajénique gu. 31 ¿Jé ca arajáyo to a Dupade uru quigode uje chingopísome yoque uje togode a ore ecápo jne rĩ? Uje Dupade chojninga: 32 “Cachi jnani bajade Abraham, Isaac, Jacob ore idupade u uyu iji deréjnane.” ¿Ga Dupade chojningárasa “ore idupade u uyu” ujetiga e íjnoque jnani bajade udore ore jogadode? Ungare. Uje que Dupade cho dajnéone iji ayoré togode mu cho dajnéone iji ayoré uecade.— 33 Uje cojñone ore chudute acajnaquéode unojo enga ore tija uté uruode jnese. 34 Fariséode iji ore ujade chi ore chimo uje saducéode que chijnime Jesus ãríringome acajnaquéode. Enga que ore chiraja daru quitígome rĩ. Quigade enga ore chamáta rágaja ñane to ujetiga ore chucué dajéo ome dasocárique ujetiga ore chise Jesus bárique. 35 Uje ore chimate dáyipiedie enga Moises urusarane atatasórone uñai chi chague iji ore ajei. Enga catecã́ri Jesus. Mu chi qué equetingaraque to. Enga chojningame: 36 —Yocacadisṍri a ¿ja jé Dupade iroqué ujñapetátiguiji Moises urusarane a ujetiga sué uñane gai?— 37 Jesus chi chojningame uté: —Ujñapetai u uné uje chojninga: “Ajnorapise bangaráni Dupade ome baringai ayoré jnese. Enga ejnápise báyipie, betotiguei ore aja.” 38 Iroquei bajai u uné uje sué iroqué uñane gáyode jnese. 39 Iroqué ejoi jé cho bajai uje chojninga: “Ajusípise bojórique ayoré guio. Gajnui tu uje bajuse beo to.” 40 Moises urusarane Dupade iroquéo garanone u iroqué gáreode unojo jnese. Dupade uruode atatasórone, jnani bajade, ore acajnaquéode garanone jé upo unojo to rĩ.— 41 Chi Jesus e catecã́ri fariséode iji ore jogadi. 42 Enga Jesus chi chojningame ore: —¿Uacáyipierigui cho rique ome Dupade utocaidi Crísto a? ¿Ape te a ome uaque a?— Mu ore chojningame Jesus: —Jnani bajai David a ape disi ejo jne ẽrie.— 43 Jé u uje Jesus chojningápome ore rĩ: —Dupade Ujopie Espíritu Sánto angúromei u David casica nanique uje cho dadupade iji Crísto iji darusarane. Uje urusarane u unojo: 44 Dupade chojningame yangaráni: “Ayáji yejoi iji yãrachua aja diri ujetiga yujnué bamajosórone ore gai jne.” 45 ¿Jé quitique dérasi rique a uje David cho dadupade iji Crísto, ja ape disi ejo urásu to a?— 46 Mu que pichajnaringápo uru quigode rĩ. Que ore chiraja gu. Enga que ore chucuepoi daringaquéringo ome rĩ, jé iji diri uté, jé aja dire piqueminórone.
1 Enga chi Jesus chojningame cojñonguemui, dacadigode ore: 2 —Moises urusarane atatasórone, fariséode ore ajéode ore chirajárase Moises urusarane quigode jnese. 3 Beyoi enga angáchoi ore enga jé ca ayóyopo ore uru quitique gánique rĩ. Mu ca aracho ore adode. Uacamóño ẽrie uje ore chacate uágome cuchárique, mu ore pésu cucha uñai. 4 Uje ore acajnaquéode pero ore acadigode gai uje que togome udore ore jeta ore chimate. Mu que ore chãra ránguiji dacajnaquéode to ujetiga ore doi. 5 Ore ipotigádi tu ujetiga picotaque ore ome ore adode. Enga ore aparagate rĩ uje ore chajo Dupade urusarane pei aja denóchade, jé aja dajmanecabode. Ore chiguiapo daguidedie rĩ uje pajnerapícho eruéode ome borapeque querúode. Ore gaidi tu gu ujetiga ore sué dojode cojñoque uñane gai ome dadode. 6 Ore chise judíode yocaquiningaméone enga ore ajegaidode upúsu piyaripi ibijógode ome raque. Jé ore jmapié u to iji ore ininaquéode, uje ore ucuegode u dayarite ibijógode ome raque ujetiga ore pañáji ore. 7 Udore ore ajéode upo rĩ ujetiga cojñone cho pacadisõre piraráidejna iji ore. Enga uje ore tuagóa ayorérique enga ore pota ujetiga uñeque achieta aja ore. 8 Mu jé ca aracho ore ujetiga uacojórique ayoré chĩ́care pacadisõre piraráidejnarique aja uaque. Uacamóño uje uacoyo ñane gu. Enga uacacadisõre piraráidejnai chojmára, enga Crísto u. 9 Jé ca oyopo uacai iji ayoré bágueguejnarique rĩ iji jnumi uné. Uje uacai chojmára enga déji guéode uje Dupade u. 10 Jé ca ojnichome ayorérique rĩ: “O dacasuté iji yu.” Uacamóño uje uacasuté ugurui u Crísto. 11 Uaque gosi ujetiga cháta cuchade aja dojode ayoréo, a ibijoi u uté jne iji uaque. 12 Ujetiga gosi cho cucha daté iji re enga Dupade a sose uté gosi iji jnumi jne. Jé basa gosi ujetiga ca chucué daringárique ayoredaté enga Dupade a pésu uté gosi uringárique ibijoque jne.— 13 Jesus chojningame fariséode ore: —Iyieja Dupade ujuyaquei yui ome Moises urusarane atatasórone uaque, jé aja fariséode uaque uje ducusuechoqui uaque jnese. Uje chórase ujetiga ajucho Dupade yui ome uacarásade ujetiga ca ore chise daringárique purása to jne. Jé cho uaque uje que apotáyo Dupade uringárique purása yúrique enga que acasopo rĩ ujetiga uacojórique ayoré chise Dupade uringárique purása to. Uñane pota joróga. 14 Iyieja Dupade ujuyaquei yui ome Moises urusarane atatasórone uaque, jé aja fariséode uaque to rĩ ome uacaringane ducusuechoquío. Uje jecucha uacajnosopo chequé abai toguedie rĩ ome ore iguíjnane, uje que chequé uecadie udire ujñapeque mu ujetiga uñeque narare uñáraque gai. Uacacotáyo uaque ome Dupade uje uacacatecãchoi, enga uacajoso eti apócho uacate gajnaréngone iji uacáyipiedie. Mu que toc ujetiga pãraque Dupade ome uacajoyaquérigo. Uje a ca Dupade chajire re jne ujetiga cho dajuñame uaque ome uacadode udore. 15 Iyieja Dupade ujuyaquei yui ome Moises urusarane atatasórone uaque, jé aja fariséode uaque rĩ ome uacaringane ducusuechoquío. Uje uacaboyo uacacajnaqué tágode údi aja quedéjnane. Uacagaidi u ujetiga ore timíninga uaque enga ore chirate uacadode. Mu ujetiga diga ore nóna uaque enga a ore atígo doi dateringane jne ome uacadode. Jecute a atirócho acayoi gajño pioi te jne mu a aguchopísi ore jne. 16 - 17 - 18 - 19 Iyieja Dupade ujuyaquei yui ome uaque uje chiese uacarásade ijñac uágaja Dupade, mu a ca eso ore ome Dupade jne. Uacajnúone u edoparigode gu uje ore chinguíra rágaja quedéjnane. Jecucha uaqueránganone u Dupade iguíjnai jogosórone cucha. Uacagaidi u ujetiga uacojode ayoréo ore timíninga uaque. Ujetiga uaquẽcaratique cucha iyiejna enga a amácho aja guesi to jne uacaruode udore. Jé basa ga a ẽ́care cucha iyiétique jne enga a jé arec ujetiga be baruode, jeonga ca be. Mu que arajáyo cucha iyiejnane, cucha iyiégode ore. Uje chiese cucha iyiejna óro iji Dupade iguíjna cuchábi ajei, mu que u go. Dupade iguíjnai upúsu uje uringai iyiejna suépise óro gai iji ajei. Isocai jé u uje chiese uaquerani cuchiso upúsu iyiejnai ome uaque. Mu que arajáyo cuchárique go ome uacaringane edoparicho. Uje cucha iyiejnai upúsu gaserani enga gaserani u uje pésu uaquerani cuchiso uringai iyiejna. 20 - 21 - 22 Jé ũré uje gusu Dupade uje iyiejnapise. Gaserani, gaiminóri cuchiso ore iyiejnaringuei garani u Dupade. Jé cho Dupade iguíjna cuchábi rĩ. Chamáñaje Dupade charite, jecute iyiejna to. Adi jé u guéode to uje iyiejna gu uje Dupade charicho. Jecute a ẽ́carirase cuchade unojo uñeque enga gajnui jé upúsu ujetiga ẽ́carirase Dupade. 23 Iyieja Dupade ujuyaquei yui ome Moises urusarane atatasórone, fariséode uaque, uje ducusuechoqui uaque. Uje chiese ca acadíchoi Dupade gotique ome gajnepídi iji uacagúchade, jé aja uacanírenie cucha ajñu quiyiguitagabidie ujetiga asíñosi Dupade iji to. Unojo déji Dupade uruode enga ca amoque ujetiga apéso. Mu cucha uñane déji uje sué unojo gai. Mu que apéso to go. Uje Dupade uruode chojninga: “Ajusipise badode guio ome Dupade.” Chojningápo rĩ: “Osõre bojode ayoréo.” Chojningápo rĩ: “Angureta Dupade.” Cuchade unojo u ujetiga ca uacáyipierigui jnorásiji ujetiga apéso ome Dupade. 24 Ore ijñaque uaque mu uacajnúone u edoparigode. Ujetiga amóñorase cucha atíãtique iji uacajotai mu a jĩraque achayorása borapetígaja yui. Enga jé u ujetiga ójiyo. Mu que amóño pasique querúrique iji mu jé uacójiyo. 25 Moises urusarane atatasórone, fariséode uaque, ducusuechoqui uaque. Uacajnui tu ayorérique uje churu dagapi iji guesi, mu gajnarenguipísi iji ajei. Uacagaidi tu ujetiga ayoréode ore chiraja uacate guesiminórone. Jé basa uacapócho uacasijnaringuéone, uacoriquéode ore iji uacajéode. 26 Fariséode uaque, que arajáyo cuchárique. Uacajnúone u edoparigode. Beyoi enga aruyo uacagapíode ajéode bajaque. Enga quigade enga a ichapo guidobode to jne rĩ. 27 Iyieja Dupade ujuyaquei yui ome Moises urusarane atatasórone, fariséode uaque, uje ducusuechoqui uaque. Uje uacajnua u ducode uje ore chirósi guiguíjnami iji gai enga uerate, enga póroropise. Mu que uerate údi to go. Uje ayoré toque taratai jogadi u. 28 Enga jé uacasocai u uje uacoyo ayoré áyipieranguiji uaque iji uacarásade ujade. Mu taquechoqui uaque uje uacasijnaringuéone irágu uacajéode. 29 Iyieja Dupade ujuyaquei yui ome uaque to ome uacajoyaquéode ome jnani bajade ucacasodicáite, Dupade uruode atatasórone ore. Uje taquechoqui uágome uacajoyaquéode udore. Uje chiese ajnusinañopísa ore uringane omío. 30 Enga uacojnicho: “A qué yiquecagorase iji yocai casodicáite, enga a ca yujégorase ore yugode Dupade uru atatasóño to nanique.” 31 Obiréjna ome uacaruode udore uje uacayode jé ore yuque Dupade uruode atatasórone nanique. 32 Ujetiga jé ũré eti ca ajéyorase Dupade uruode atatasórone to nanique enga jé ca uacáyipieraque dépoji rĩ iji dirode unojo ujetiga ajéyo uñeque. 33 Aringacachoqui uaque. Jé oyópise uacayode jnani bajácho ore. Uacajnúone u ugade. Jé chopo uacayode jnani bajácho rĩ. Ca ajoso eti apícho jne ome gajño pioi. 34 Jecute a yiroque yuruode atatasóningo uñéngo aja uaque jne, jé aja irajatátigo, pacadisóningo ore rĩ. Mu a ca ajéchome ore jne. A oyópise uacamajo yirógode ore jne iji uacaquiningaméone. A ajnañopo ore aja quedéjnane jne rĩ ome uacajocaningáringo. Quigade enga a ajéyo uñéngo jne. A ajóyopo uñéngo aja curesérigo to jne rĩ. 35 Mu Dupade a chaguhéta uacayode jnani bajaque ore jocaningane udore uacabai to jne. Uje jé uacasáchoja deréjnane unojo uje uacoyo uacamajoi Dupade irógode ore iji uacajade. A Dupade qué chingoma Abel ome uaque jne uje uacai jnani bajai Caín chujé nanique. Uje que ayáyo Dupade uruode atatasórone unétique gotique uje uacajéyo ore iji uacajade. Uje a agusorásiji to nanique enga uaqueguírase jnani bajai Zacarías to nanique. Uje chi Berequías ujnacare Zacarías. Uté cachopísaja Dupade iguíjnai ajépisi nanique uje chi cho daba dapesutígo Dupade urúo aja quigode. 36 Jé ũré yu uje yojningame disi ejode uaque, a oyo uacaba yocai jnani bajade jocaningane jnese to jne, jé aja uacajocaninga ejode unojo to rĩ.— 37 Mu Jesus cho dáyugu re ome Jerusalen gosode. Enga chojninga: —¿Gotique chimo joroque re uje Jerusalen gosode uacoyo uacamajóji Dupade uruode atatasórone iji uacajade? Enga jé chopome Dupade irógode iji uaque rĩ uje uacamitingarácho ore údode ome cucaranenie. Uje jecucha yáyipie quigode u ujetiga yamáta uágaja ñane enga uacajnúone u yabode. Enga yajnua tu cochagájnaraque uje chamáta dabidie aja dajnóngone údode. Mu que apótayo yu gotique. 38 A jé amóño to jne ujetiga ca Dupade dépoji uacari jne rĩ. Enga uacajnui tu guiguíjna noñimérique jne. Uje que cojñotique déji. 39 A ca amóñopo yu to jne rĩ, jé aja diri ujetiga ojnichome yu jne: “Dupade imeseranguipísi tu datocaidi uté aja yoque.”—
1 Uje Jesus e doi guesi tiji Dupade iguíjna cuchábi, mu acadigode uñane ore tibágui enga chi ore tija Dupade iguíjna cuchábi uje chi ueradípiso jogosórone cucha jnese gu. 2 Mu chi Jesus chojningame ore: —Ueracho uacatijabáidode cucha iji Dupade iguíjnai. Mu a chise dínique jne ujetiga ore chajningarasipise jne enga urui jnumi. Enga a ca pimópo cucaranéringui iji jogadi jne rĩ ujetiga chugápoja ñane gánique rĩ.— 3 Jé u uje Jesus, acadigode ore chise cucarani uje i tu Olívos enga qué ore chácariji. Enga Jesus acadigode ore catecã́ri iji quedéjnarique enga ore chojningame: —Yocacadisṍri a, ¿jé cho rique a ujetiga cuchade udore tocade a? ¿Jé pãrapiérigui jne iji bãríringai, erámone eruei ore yui?— 4 Mu Jesus chojningame ore: —Yingoma quigode ome uaque jne. Añuchopúsu uaqueo enga ca pãraque uaque jne. 5 Uje a jiépisi cojñotígo jne ujetiga ore chósi tome uaque: “Cachi uacangarádejnai Crísto u yu a.” Udore a ore chãra cojñoque uásejnane jne. 6 Ujetiga adúcho pujnoméringo ome pocaningane iji erámone údode jne, mu ca chajuque uacagutedie gotique. Enga a arajáyo jne uje bajácho cuchade udore jnese ujetiga tocade. Mu erámone eruei cáma upúsu gotique. 7 Mu a arajayópo erámi eruei yúode jne rĩ ujetiga cojñotígo ore socárome ñane iji erámi údode ome dajocaningádatérigo ome ñane. A chaguhéode socarapome uaque to jne rĩ. Jé aja dequejnarequedatérigo ujetiga tṍraji dajñarenie ome uaque. Jé cho jnupe tãrarachutígo ujetiga chise quedéjnane. 8 Mu taningami qué su ome cucha datéode uje a pésu erámi unirisórone ore juredie jne. 9 Mu a jé irába jne ujetiga qué ore chisa uacuñéngo. Enga a ore cho dajuñame uacuñéngo jne rĩ. Enga a ore chujé uacuñéngo to jne rĩ. Enga a ore chetaguipise uáguiji erámi údode jne. Uacabade a jé u yadode jne. 10 Enga a Dupade anguresõre uásejnane ore cha danguretigai iji Dupade jne. Enga a ore chetaguipise dojode Dupade anguresóño jne. Enga a ore tẽra ore jne ujetiga ore chujé ore. 11 Jé u uje urupataquechoquírigo a ore di jne enga a ore cho Dupade uruode atatasõre iji re jne. Enga a uásejna ore jne ujetiga ore jos eti jé ũré ore. 12 Jé u uje pisijnaringuéone a chichagu raja erámone jne enga cojñone ca ore chisápo uñane unétique jne rĩ ome cucha dacate gajnaréngone unojo. Jé u uje a ca docosorangápo ore ome ñane jne rĩ. 13 Mu ujetiga uñeque jé chidota re aja daringai ducañerájma eruei enga a piquetaque jne. 14 Enga a ore jno Dupade ujnomei údi aja erámone jnese jne uje ore potapísa gu ujetiga erámone unirisórone ore chiraja uje Dupade pota cho darásai iji ore. Enga eruei a u jne. 15 Ajnusináño Dupade uruode atatasṍri Daniel urusarane quigode uje chĩ́care cucha puyáquedatei uje chi ca toque ujetiga picha gotígo aja Dupade iguíjna cuchábi ajei. Mu chi chojninga: “A chise dínique jne ujetiga ore chijna cucha puyaque noñai uté aja Dupade iguíjna cuchábi. Enga Dupade iguíjna cuchábi uringai eyuque jogadi tu jne.” Daniel urusarane udore ajirisórone uaque a arajáyo jne ujetiga urusarane chise daringai tocachuque. 16 Ujetiga unojo tocade jne enga areque ujetiga Judéa gosode jĩraque ayóyo jne aja cucaranone. 17 Enga ujetiga uñeque déji daguíjnai guesi enga jé ca áyipieraque chachẽrapo daguíjnai rĩ ujetiga chiqueta dagúcharique iji. 18 Enga ujetiga uñeque déji erã́tique enga ca chajniapója daguíjnarique rĩ iji daquigáningo ujetiga áyipieraque déji daguidé piquetatígo. 19 Yosõripise chequé icamasuguérigui, jé aja ore uje ore chacucãre dababode. Uje a ca toque jne ujetiga ore chayo iji diri uté to. 20 Ujetiga agúsoji deréjnane unojo to enga ajóchayo Dupade ajei údi ujetiga uacagajñua ca basiji dire puyátique jne jeonga tejnuringa areredatéraque útigo. 21 Uje parecujate dosóguedie, payugabátigade a ca chajire re jne iji dirode udore. Uje que pimope gajnúrique nanique, jé aja unojo, jé aja yoquiquei jne. 22 Ujetiga Dupade ca chaguinérurásu jetiga pésu cuchade unojo eruénique enga a jé ca ayorérique chapidirase go. Mu Dupade a chaquĩ́ra cucha dacadode jne gu danguresórone jne ujetiga ore chapite. Chamáñaje chijnorapise dajegaidode ore gu. 23 Mu ujetiga uñeque potarása jeta chãra uaque enga chojningame uaque: “Crísto déji ne.” Jeonga uñéngo chojninga: “Crísto déji ta.” Mu jé ca angáchoi udore gosode to go. 24 Uje a aringáca dírigo jiei jne uje chiese ore acajnaquéode garani tu Dupade. Enga a uñane ore cho Dupade utocaidi Crísto iji raque to jne. A ore pésu cucha pitijátigo ome daringaquéode ome uaque jne. Enga a idógosi jne ujetiga Dupade anguresoripísode ore timíningarása ore to, uje Dupade ajegáite ore múñi. 25 Yingo cuchade unojo bajaque ome uaque ujetiga dimane uágome yúode. 26 Jecute ujetiga ore chojningame uaque: “Crísto déji erãpe eyutiguei.” Mu jé ca angáchoi udore ore. Jeonga ore chojningame uaque rĩ: “Beyoi enga ajicho to. Crísto déji guiguíjnai uné ajei uñai.” Mu adi jé u, jé ca angáchoi udore ore uruode go. 27 Uje Dupade utocaidi uyu yiríringarique gajnui a u ajnorátique jne. Uje tṍraji gaté enga chicáji quedéjnane. 28 Uje gajnui tu jetiga cuchiso totique dóji erã́tique enga chugúpẽre chagúode jĩraque chiraja jogadi. 29 Parecujate dosóguedie udire quigade enga guedé a toi jne. Guedoside a ca chajniapo jnumi te jne rĩ. Guédodie a basapo jne rĩ iji gaté. Enga gaté a chijocase re jnese jne. 30 Ujetiga ore chimo Dupade utocaidi uyu yãrapiedie udire iji gaté enga pagoyedie jogadi tu ome erámi unirisórone ore iji erámi jnese jne. Enga a ore chimo Dupade utocaidi uyu iji gue abujáraque. A ore pañáji yuringai ujopierãque, yuringai pujnuéngaisṍre ore jne. 31 Enga a yiroque yirógode gaté unirisórone uñeque ujetiga chubúchu dabuchui jne enga a chejnápusu. Enga a yiroque yirógode uñéngo aja erámone quigode jnese jne ujetiga ore chamáta yajegaidode ayoréo jnese aja yari.— 32 Jesus qué jno dacajnaquéode údi enga chacãra dacajnaquéode aja poridie. Enga chojningame ore: —Adójningacho poridie agatadode adi to. Uje poridie acarane e sué enga imoi tu gu uje e idógosi sequeré. 33 Jé isocai upo rĩ ome cuchade unojo uje a tocade jne enga a arajáyo jne uje yiríringai e idógosi. 34 Jé ũré yojñane uje cuchade udore jnese a tocade jne uje cáma ore toi iji deréjnane unojo. 35 Guéode, jnumi a ore íjnoque jnese jne. Mu a gusu yuruode jne ujeta ca íjnoque to. 36 Mu que pirajaque yiríringarique dire, guedé gatócororaque ore. Gaté unirisórone, Dupade irógode u marínga, que ore chiraja. Jé chopome Dupade ujnacari uyu rĩ uje que yiraja to. Gusu yai Dupade uje chiraja yiríringai dire. 37 Dirode iji Dupade utocaidi uyu yiríringai yui a chopise dirode yui jne uje gue dequejnangóri chejna Noé urásade nanique. 38 Ore áyipiedie gaidode upúsu daquetangóningo cucha ome raque nanique. Uñane ore áyipiedie gaidode u dabosode. Jé uñane áyipiedie gaidode u dajódode yote piócho. Jé basa uñane ore áyipiedie gaidode u dajmatodie gapui, dajmasórone jnacare ore ujetiga jé ore chisa ñane. Mu chise diri uje Noé e ore Mchacája dabi cuco cuchape ajei. 39 Enga Aore chuninga mu gue dequejnangóri yore ore gai enga chejna ore jnese. Adi a jé u jne ujetiga Dupade utocaidi uyu yĩriápo rĩ iji uaque. 40 Qué yingopo yiríringai isocade ome uaque rĩ. Uje a jnaníringo ore déji uñane gari jne iji erã́tique uje qué ore cháta dasagode aja ñane. Mu a pijna uñeque jne. Jeque pijíñome uñai. 41 Enga a jé cho chequé gárerigui jne ujetiga qué ore chijáro dajarotique cucha. Enga a jõra chuningame jne eti pijna jõra. Jé pijíñome uña. 42 Beyoi enga ajuso uaqueo enga dimane uágome yiríringai yui. Uacamóño uje que arajáyo uacangarádejnai uyu yiríringarique yui. 43 Adi tu ome guiguíjna gajnengónique. Ujetiga uté chirajárase ayoré oriechoquírique díringaringuiji dejai, enga uté gosi a ca morase to iji dejai údode. Gaidi tu gu ujetiga chuninga oriechoqui enga ca uté tõria ugúcharique. 44 Yacajnaquéode unojo quigode u ujetiga arajáyo enga dimane uágome yiríringarique yui. Uje a aninañome jne eti Dupade utocaidi uyu yiríringai tu.— 45 Jesus catecã́ri dacadigode enga chojningame ore: —¿Piroque gaté ayipierã́tique atígo cho rique? Uacarajáyo uje isocai u uje susipise darósõri iguíjnai guio, jé aja irógode ore jnese. Que chimoque uje dimane ore posode. 46 Enga a uté irasique re jne ujetiga irósõri di enga chisíji daroquéode gai uje pesupúsu aja quedéjnane. 47 Enga a jé u jne ujetiga uté irósõri chojningame: “Yipota ujetiga jecucha be yiroquéode uje que amoque cuchárique gu. Enga a yẽrapísaja ua jne ome.” 48 Mu ujetiga uté gosi iroque gatérique sijnaque enga a ca áyipie déji uraque darósõri diringárique yui, enga a chojninga iji dajei: “Yirósõri a ca di míraque jne jõ.” 49 Jé u uje chanire dojode irócho aja quedéjnane. Enga nóna yote pioi yugode jnanío aja quedéjnane. Chacásõrapo ore rĩ aja quedéjnane. 50 Mu uté a chunina jne mu irósõri tṍraji tome. 51 Jé u uje a iroi ujñapie ajámi iji dajuyaquei jmáinie jne. Enga Dupade a isocai u tome jnani urupataquechoquíode. A ore chisa joroque dabade iji ujuyaquéode jmáinie. A ore jnarapo joróguiji jne.
1 Arei u ujetiga yanguresórone dimane ore ome yiríringai yui ome yuringai dacasuté. Yojñane a chichaga raja cuchade unojo jne. Uje chi gapúrigui cuse nanique. Enga chi ore chejna yijmanáyone. Enga chi ore chijna dabiotígo jnese. Chi ore gaidi tu ujetiga ore chachai gapúraque gajmasónique iji garãtique uje chi gajmáraque quene ore chisa ñane. 2 Mu gapudíe udire uñanie ajmité ore. Jeque uñanie que chajmita cuchárique. 3 Jecute ore chejna yijmanai uje que ore chajmita cuchárique. Enga que ore chajmita acéite quedéjnai ome dabiogode gaté. 4 Jé basa ajmitedie ore ajminone acéite quedéjna cuse ome dabiogode. 5 Quigade enga moi doi ore uje gajmasṍri que di. Jé u uje ore mo. 6 Mu ore chudute ore pijnacaráidie iji dejnínga gatocoro uje chojninga: “¡Gajmasóri e di e! Beyoi enga achayoi to e.” 7 Gapudíe udire niji jmame enga ore changuinéru dabiogode yúode. 8 Gapudíe uquidé uje que ore chajmita cuchárique, ore chutai jorógui acéite quedéjnai iji dajoranie. Enga ore chojningame ore: “Asíñope yóguiji uacanírone to. Uacamóño uje yoquibiogode toi.” 9 Mu gapu ajmitedie ore chojningame udire ore: “Ungare. Cachi acéite quedéjnai chona yoque gu ujetiga yisíngo uáguiji. Boyo enga beyóji oredie iguíjnarique enga aníchoja uacabiogode.” 10 Mu uje qué ore doi acéite quedéjnai enga gapua gajmasṍri di iji ore quigade. Jecute gapu ajmitedie ore cho búja quigade. Enga ore chacája ininaquei jogadi guiguíjnai ajei to. Enga ore suru daquigade. 11 Enga gapudíe uquidé quene ore di uje que ore chajmita cuchárique que. Enga ore tibidi gapua gajmasṍri enga ore chojninga: “Achẽre uacabai enga yacágoja uacari to e.” 12 Mu uté chajnai ore enga chojninga: “Que yiraja uaque gotodie. Jecute que yuchẽre yoquibai ome uaque.”— 13 Jecute Jesus chi chojningame ore: —Ajuso uaqueo enga dimane uágome yiríringai yui. Uacamóño uje que arajáyo Dupade utocaidi uyu yiríringarique deréjna. 14 Arei tu ujetiga Dupade urasapísode ore jno Dupade gueranone ore irajatiga údi gaté. Ujetiga diaporase rĩ enga ca chise ore unerotiguérique. Enga yojñane a chichaga raja cuchade unojo jne ome uaque. Jnani cuse nanique uje e idógosi coringai ome punire uñai. Enga tibidi darógode ujetiga chajuguína daplátadie iji ore ujetiga ore chõre iji dari. 15 Mu gueranenie cha ñane yui ome ore. Uñai uje chañurupúsu daplátadie guio gueranenie 5.000 ome. Jeque uñai gajnenie 2.000. Jeque ejoi gajné chi 1.000 u. Enga quigade uje chajuguína daplátadie iji darógode enga chi jnome dajesúrique erãpe. 16 Jé u uje iroque bajai uté uje gajnenie 5.000 diríca, chi tẽra cuchade ome dajnenie enga chi chijnime 5.000 gatéraque iji iquei. 17 Isocai jé u ejoi uje chi gajnenie 2.000 u. Uje tẽrápo cuchade ome dajnenie rĩ enga chijnimápo 2.000 gatérigui iji iquei rĩ. 18 Mu ejópisi uje gajnéraque chi 1.000 u, chi jno dajné pláta údi enga chi chijochame. 19 Chi diyajmaque enga udore ore irósõri chi díji ore. Enga chi catecã́ri ore ome ore atígo ome guerané casidica daplátai ome ore. 20 Enga chi bajai chise enga chi chojninga: “Yangaráni a, berané casidica 5.000 dépoi niji rĩ. Yijnimenie, 5.000 ejodie, dépoji niji rĩ.” 21 Jé u uje irósõri chicotápise daroi uté enga chojningame: “Ueradípise badode ome yu. Enga yiroque yimeserai tu ua. Uje garósi yeranenie ome ua ica, mu suépise uqué casidica gai. Jecute a yãrai ua iji gaté jne. Acája yari enga a yipéco yoquininaquérigo jne ome ua.” 22 Jé u ejoi chisápo to rĩ enga chojninga: “Yirósõri a, berané casica 2.000 de niji jã. Yijnimenie 2.000 iji iquei depoi ne rĩ.” 23 Jé u uje irósõri chicotápise daroi uté to. Enga chojningame: “Ueradípise badode ome yu to. Enga yiroque yimeseraque ua to. Uje garósi yeranenie ome ua ica, mu suépise uqué casidica gai. Jecute yãrai ua iji gaté to jne. Acája yocari to iji yoquininaquédatéi.” 24 Jé u uje chi ejópisi chise to enga chi chojningame: “Yocangaráni a, yiraja uje jnani josipierãquedaté ua. Uje bajegaidi tu ujetiga cuchade chise ua iji bayaritique bisideque, ujetiga ca bajuya ua ome. Bajnui tu ujetiga ãra pacaque quedéjnaringo enga bajnei orérigui. 25 Jecute yitodópisa bei que, ujetiga baplátabia bijna. Jecute yijochame que. Mu e yatire babai. Jé u berané casidica uje 1.000 uniji.” 26 Chi irósõri chojningame daroi uté: “Sijnaque ua enga ducutaque ua. A jé bajéo udore uje chiese yajegaidi tu ujeta yajnei plátadie bisideque. Jeonga cucha pacatígo jeta yajné orérigui bisideque. 27 Baraja cuchade udore quigode múñi, ¿gotique gu a uje que acha yipláta casidica aja plátadie iguíjnarique ica uje i tu bánco ? Bamo múñi uje plátadie quérã iji uté. Enga a atirerási yibai ujetiga quérã enga baringai yirasique jogadi a urásu ujeta yĩri iji yiguíjnai.” 28 Jé u uje catecã́ri darógode uñane iji dejode enga chojningame ore: “Ajnáño yiplátadie iji uté gari enga asíñome uté uje irodedie plátai quérãji gari. Enga chise 10.000. 29 Chamáñaje ujetiga gosi gajnéone cucha déji, jé tiógara ujetiga pisi ome uté gosi gaté. Jé basa ga gosi ujetiga gajnetígo cucha que déji enga jé tiógara ujetiga gosi gajnetígo cucha garósi poidíji gari. 30 Beyoi yiroque noñai uté enga óraño aja ijnagununie iji guesi. Enga jogadi u jne ujetiga po joróguiji enga jnari joróguiji jne rĩ. 31 Ujetiga Dupade utocaidi uyu yĩriápo rĩ enga a eduguéjna cuchape yu jne. Enga a yirógode gaté unirisórone ore chicha yu aja dajei te jne. A yiyápoji yiyaripi jne rĩ ome yuringai pojnánguejna. 32 Cojñone iji ducunirone jnese a ore chamáta rágaja yiquei te jne. Jé u uje a yingara ore jogadode ome ñane jne. Enga yajnui tu áyasadie irodisónique jne uje cãra áyasadie, erámoro quedéjnanie ore jogadode ome ñane. 33 Jé u uje a yicha áyasadie gajnunie aja yãrachua jne. Jé basa erámoro quedéjnanie gajnunie a dóji yarasei te jne. 34 Mu eduguéjnai uyu a yojningame yãrachua jogonórone jne: “Dupade angacarane uaque, boyo ome uacaringane purása yui ome Dupade. Uje jé ipesute ome uaque naninguéjna iji erámi taningápisode. 35 Jé tiógara uacaringane yurása. Chamáñaje uacosṍcho yu nanique gu iji yiyaguhéode. Uacasõchopo yu nanique rĩ iji yuyádode. Uacajnáño yu aja uacaguíjnane nanique to rĩ ujetiga yupúsi uaque iji yiriguitigade. 36 Yijmátapome boráidie nanique rĩ mu uacasíñome yu. Yejnaréngapo yu nanique rĩ mu uacajmitáyo yu nanique. Yugúsapoji soldádode iguíjnai nanique rĩ uje ore suru yibai enga uacabáchoi yu iji ujetiga osṍcho yu iji.” 37 Enga yanguresoripísode uje yicha ore aja yãrachua ome ore uringane paracho a ore chojningame yu jne: “Yocangaráni a ¿jé déji rique a ujetiga yimóngo bayaguhérique to enga yisíngo ua? ¿Jé dépoji rique rĩ a ujetiga yimóngo ua iji bayatique nanique enga yajningáco ua? 38 ¿Jé dépoji rique rĩ e ujetiga yimóngo ua iji baríringarique, enga yijnángo ua aja yoquiguíjnarique nanique? ¿Jé dépoji rique rĩ e uje chi ajmáta ome baguidérigui enga chi yisíngo ua? 39 ¿Upo rĩ uje chi ejnaretaque ua enga yibájoi ua? ¿Jeonga bagúsi baringárique pujurúgai enga chi yibajopoi ua te rĩ?” 40 Mu ore eduguéjnai uyu a yichajnai ore enga yojninga jne: “Uacate goningane udore ome yijorane, ore gajnui urásu ujetiga jé yajnécho to. Ca uñeque ibijoque marínga, jé u.” 41 Jé u uje eduguéjnai uyu a yojningame yarasei jogosórone jne: “Dupade ujuyaquedatei gajnesórone uaque, acayoi quedéjnane ome yu. Uacaquítequiguijí gajño pioi uje Dupade jé ipesudome Satanas, irógode ore nanique. Enga a qué uacagúsoji jne iji deréjna pitade. 42 Jé tiógara udore ome uaque. Chamáñaje que osṍcho yu iji yiyaguhéode, yuyádode ore nanique gu. 43 Que acueyopoi yimochácho nanique rĩ iji yiríringane, yiriguitigade ore. Que ajichópo yírique nanique rĩ ome boráraque uje íjnoque yiguidedie nanique. Que ajmitáyopo yu nanique rĩ iji yejnaréngone, yajnenie pujurei ore uje ore suru yibai nanique.” 44 Mu a ore chajnai enga ore chojningame yu jne: “Yocangaráni a, ¿jé déji rique e ujetiga yimóngo bayaguhérique, bayatique ore nanique marínga, ca yosṍco ua? ¿Jeonga yimóngo ua nanique iji bariguitigárique, baríringarique ore marínga, ca yosṍco ua? ¿Jé dépoji rique rĩ e ujetiga yimóngo ua iji baringárique ejnaretaque, jeonga pujurúgai marínga, ca yajmitágo ua?” 45 Mu eduguéjnai uyu a yósi tome ore jne: “Uacamóño yĩjora dipeséode ore nanique uje jmataque ore, mu que ajicho ore yúrique nanique ome uacosõraquérique. Enga gajnui urásu ujetiga uyu jé u eti ca ajicho yírique. A yanguresõre gajnareque marínga, ujeta ca ajire yúrique enga jé bo baba.” 46 Jé u uje a pujuya ore jne iji deréjna pitade. Jé basa ore uje que ore bárique cuse enga a ore chise dacuecaringuéringo jne iji deréjna pitade.—
1 Uje Jesus chejna dacajnaquéode ucode guesi enga chojningame dacadigode ore: 2 —Uacarajáyo uje dirode amirone gare iji Páscua yui uje judíode yujnusinángo Dupade isocai uje chijnime yocai jnani bajade ore iji Egípto nanique. Dirode unojo a jé upo dirome rĩ ujetiga ore tẽra Dupade utocaidi uyu ome yisóningo ore enga a ore chujé yu iji curesérique gaté dirome.— 3 Enga jé upo rĩ uje Jesus qué déji daruode udore gai ome dacadigode, mu judíode angaránone ore chamáta ñane iji ore eduguéjna cuchábi Caifas igóichocoijná. Enga Moises urusarane atatasórone ore déji to, jé aja ore asutépisedie. Jé aja judíode ore angaráte uñane. 4 Ore ucueguedie dáyipie quicho ome Jesus ujetiga ore chisa ome daringaquérique. Enga jé u ujetiga ore chujérase. 5 Mu ore chojninga: —Jé ca yujégoji Páscua jne. Gajnareque gu ujetiga cojñonguemui ore cho dasõra iji dirode udore.— 6 Quigade enga Jesus déji Betánia. Enga chi cháji Simon iguíjnai uje chi lépra isaque ica. 7 Jesus chi qué chácariji ore agapírique dosatique. Jé u uje chequéraque sose Jesus yui enga chi chijna cuchirise alabástro aja. Uje chi póroropise mu chi dabujnaque. Enga chi cucha ai unere orerã́tique déji ajei. Jé u uje chi chise Jesus, enga chi chojne aja Jesus acarãi gai. 8 Uje Jesus acadigode chi ore chimo udore enga ájningaraque ore. Chi ore chojningame ñane: —¿Chimo joroque re uje chojne cucha ai unere orerãi bisideque?— 9 Enga ore chojningápome ñane rĩ: —Uje a yocórasi orérigui ujetiga pẽrate cucha ai uneri uté enga a jiérasi orérigui. Enga yajuguinarása jmatágode ore.— 10 Jesus chi chudute udore ore uruode ome ñane enga chi chojningame ore: —¿Uacajéode udore gotígo a ome chequé uaté? Uje ueracho chequé uaté adode ome yu. 11 Uje jmatágode jé charite uacari iji deréjnane ome uacosõraquérigo. Jé basa e idógosi ujetiga ca yugusapoi uacari to rĩ. 12 Chequé uaté ojnei cucha ai unere aja yibai imoi u uje a ore chijochame yu dirome iji yode. Jecute e dimane yu ome yui. 13 Jé ũré yu uje a ca picadiguiéte chequé uaté adode jne ome yu. A ore jno yujnomei údi aja erámi jnese jne ome yuringai piquetangore. Enga a jé nóna uaté ujnomei to jne ome adi uné ome yu.— 14 Unojo quigade enga Jesus acadigode uñai uje i tu Júdas, uje i uñai u Iscariote, chi jno enga chicáji judíode ore asutépisedie. 15 Enga chi chojningame ore: —¿Uaqueranéringui plátai chorási ringome yu a ujetiga yẽra Jesus ome uaque?— Enga chi jĩraque ore chisi ome pláta guebéode ome Júdas uje chi 30 u. 16 Enga jé u iji deréjnai uté uje Júdas chi chucué piotiguérique ujetiga tẽra Jesus ome ore. 17 Enga chi dire bajai u uje chi judíode ore tagu arurégode uje chi ca nóna bisitique. Jé u uje Jesus acadigode ore sose Jesus yui enga ore chojningame: —¿Bajegaipítique déji rique jne a ujetiga yipéco yoquibosode iji to ome Páscua yui?— 18 Mu chi Jesus chajnai ore enga chi chojninga: —Acayóji idaidatei enga acáyoja jnanírique iguíjnarique jne enga ojnichome jne: “E idógosi yocacadisṍri itoringai. Jecute pota jeta ajuéga baguíjnai ajei uñeque ome yoque ujetiga yipéco Páscua gajnetígo cucha pibóso iji to.” 19 Jé u uje Jesus acadigode dopísi dacadisṍri uruode. Enga ore pésu dabosode iji deyai guiguíjna ajei ome Páscua yui. 20 Chi guedé chise dabatigai enga dimane Jesus, acadigode ore uje gare ore iji yirídai iji ore agapi dosadode ujetiga ore taque. 21 Uje chi qué ore déji daringai chagu gai enga Jesus chi chojningame ore: —Jé ũré uje uacuñeque a tẽra yu ome yumajosórone ore gajneri.— 22 Jé u uje Jesus chi chũe pujnusiétigai aja dacadigode ore. Enga chi acadigode tṍra dajñarenie ome uje chi ore chojningame: —Yangaráni a, ¿ja yẽrate ua jne a?— 23 Mu Jesus chajnai ore uruode enga chojninga: —A uacuñai u jne uje yacácorango uñane que iji yocagájai uné. 24 Dupade utocaidi uyu a yitoi jne uje Dupade uruode jé quicho gu. Mu iyieja Dupade ujuyaquei yui ome uté uje a tẽra yu ome yumajosórone jne. Uje a ca Dupade chajire dajuyaquérigo ome jne. Arei urásu ome nanique ujetiga ca basiji erámone unojo to.— 25 Jé u uje Júdas, uje a tẽra Jesus jne, chojningame: —Yacadisṍri a, ¿ja uyu jne a ujetiga yẽra ua ya?— Mu Jesus chajnai uruode enga chojningame: —A bẽrate yu jne ẽrie.— 26 Uje qué ore déji daringai chagu gai enga Jesus chisa arurei. Jé u uje chacãre Dupade gai bajaque. Enga cha dacatecãraitigade enga jé u uje chi chajuque arurei aja jnumi enga chisi ome dacadigode. Enga chojningame ore: —Arurei de ne jã. Acho. Uacamóño uje uné gajnui tu yibai.— 27 Ore chejna daboti arureque guesi enga jĩraque Jesus chisapo ore jopidi rĩ. Enga jé doi dasocai uqué uje chacãre Dupade gai bajaque. Quigade enga chisi ome dacadigode enga chojningame ore: —Yoquijódi de ne jã. Beyoi enga ójiyo to jnese. 28 Uje yiyoi gajnui u, uje a yitoi jne enga Dupade áyipie ichadie tocachuringai jogadi u jne. Enga a yiyoi chinoningase erámi unirisórone ore isijnaringuéone jnese jne. 29 A ca yojiapo cucha adie otadi uné to jne rĩ iji jnumi uné, jé aja diri ujetiga yugúcopoji ñane gari rĩ iji Yai idai. Enga jogadi u jne ujetiga yójigo yoquijote ichárique jne uje jé cãra re ome yoquijódi uné.— 30 Quigade enga ore chirate Dupade iradé enga jé u uje ore jnome cucarani uje i tu Olívos . 31 Enga Jesus chojningame ore: —Uacanguretigai a doi jnumi ome yu jnese gajneri iji dejai uné. Uje Dupade uruode jé quique gu uje chojninga: “A yujé áyasadie irodisṍri jne enga gachidedie áyasai a chisite rágaja quedéjnane jne.” 32 Mu quigade ujetiga e yiquecapo rĩ iji yuringai toque enga a bajaque yu aja uacaquei jne iji Galiléa.— 33 Jé u uje Pédro chojningame: —A ore anguretigade cho caru jnese ome ua, mu a ca uyu u to jne.— 34 Jé u uje Jesus chojningame Pédro: —Pédro a, jé ũrepise yu uje yojningame ua: dejai uné a jé u gajneri ujetiga cochagájnai cáma po enga a otigase yuringai bamósõre to enga a gadioque gajneri.— 35 Mu Pédro chojningame Jesus: —Que yãra ua go. A yipatíõrarasa ua marínga, que yotigase baringai yimósõre to.— Enga ujode acadique ore uruode jé u udore to ome Jesus. 36 Jesus chi nóna dacadigode aja cucarani údi uje i tu Getsemani. Enga jé u uje chi chojningame dacadigode: —Beyoi enga ayáyo iji ne jne. Uje a qué yijiabája síñeque jne, enga yicatecárami Yai Dupade iji jne.— 37 Jeque chi chijna Pédro, Zebedéo ujnacarode aja dajesui. Chi jé u uje áyipie doi cucha dacadode yui gajneri, enga jé u uje chi chijororase údode. 38 Enga chojningame darijogonórone dacadicho: —Yajnéone cucha dacacho chijororasipise yu. Ayáyobiji ne. Enga ca amóño jne. Atayo niriji aja yu to jne.— 39 Jesus chi qué jno aja ore iquei enga jé u uje cṍraja jnumi. Enga chijócha Dupade ajei údi enga chojninga: —Yapa, yajnéone cucha dacate gajnui u gu ujetiga ore chajningarirase cucha aguté ingoguéjnaragaja yu. A bajérasome yu enga noñamírasiji gajneri. Mu jé be bajéningo, jeque ca yiji yajéningo jne.— 40 Uje Jesus chejna dacatecãraitigade guesi enga chajni dacadique gadiógode ucode ore gai. Enga chise ore mu qué ore mo. Enga jé u uje chojningame Pédro: —¿Gotique gu a uje a ca uaquedóraque chope jnángaja síñeque que iji yiquigade? Uje yojningame uaque que: átayo niriji aja yu jne. 41 Arijínaño uaquejode. Beyoi enga acatecãchoi Dupade ome uaque. Ujetiga pequetingaraque uaque jne marínga, ca pijnimique uacãrírique. Jé ũré uje uacáyipiedie chóji gatei ome yu, mu uacaringai ayoré uné u gu uje cho jnoro.— 42 Enga Jesus chi jno enga qué catecãrápoi Dupade gaté rĩ enga chi chojninga: —Yapa, ujetiga ca toque ujetiga qué yapite mu jé be bajéningo ome yu.— 43 Chi chisápo dacadigode ore rĩ, mu chi jé ore ate uje chi ca ore edóraque cho jnaque. 44 Chi ca chiringare ore mu quítequigapóji daquigade rĩ enga chi catecãrápoi dai Dupade gaté rĩ. Enga icatecãraitigade jé u bajade. 45 Chejna dacatecãraitigade guesi, enga jé u uje tibágui dacadigode enga chojningame ore: —Jé amóño. Enga jé oyo uacajñare. E que qué pisocárique cuse gu uje deréjnai uné jé u ome Dupade utocaidi uyu ujetiga ore chisi ome yu ome sijnángone ore. 46 Arijínaño to, enga yico. Yẽrasóri e jnome gadoi.— 47 Jesus chi qué déji daruode gai, uje acadigode uñai Júdas e di dajosé údi. Enga chi judíode angaránone chi ore iroque ore aja Júdas quigade ujetiga ore chisa Jesus, enga jiei ore. Enga ore chijna daguebedie, pidode, corachade uñane to aja Jesus yui. 48 Jesus guerasṍri Júdas chi chimate dáyipiedie ome dacadisṍri yui ome ore. Enga chi uruode u unojo ome dajorane jõcaratácho: —A uacasai u gajneri ujetiga yagu uréraque.— 49 Enga jé u uje Júdas chijna re aja Jesus enga chojninga: —Yacadisṍri a, qué yibágui ua.— Enga chi tagu uré. 50 Enga chi Jesus chojningame: —Yĩjora, ¿gotique uje bese yu?— Jé u uje Júdas josé yore ore gai. Enga ore jno Jesus údi aja dangaránone. 51 Jé u uje chi Jesus acadigode uñeque chisa daquesérique enga chi chaquesu judíode ore eduguéjnai irógode uñeque angoronéraque ¡jnaque! 52 Mu Jesus chi chojningame: —Ajmárapo boidi quesé aja pi te rĩ. Bamo uje ayorérique a chujérase dojórique ayoré ome daquesérique, enga jé basa a chuguírasome to. 53 ¿Ja ca araja to a? uje a yicatecãrirási yai Dupade ome iroque dipesérigo enga a ore chirotárase yu gajneri. 54 Mu ujetiga yujegorase ore to enga, ¿ja Dupade uruode tocaderase ome yuringai chuque?— 55 Chi Jesus chojningame cojñonguemui: —Yo oriechoquíode iji uacajmáinie uje uacajnáño corachaque dipeséode ome yu. Uacamóño yu iji deréjnane mu, uje yacate uáguiji Dupade iguíjna cuchábi, ¿jé que asayo yu iji diríca? 56 Dupade uruode atatasórone urusarane tocadepise ome uacadode udore.— Jesus chejna daruode guesi, enga jé u uje acadigode que ore chajirapo dacadisṍri yui rĩ. Jé u uje ore chayome jõcaratade. 57 Chi ore chisa Jesus. Enga chi ore jno údi aja judíode ore eduguéjna cuchábi Caifas igóichocoijná, uje chi judíode ore angaránone uñengo charite bajaque. 58 Pédro chi chajo ore quigade aja to mu chi ujai cuse iji ore uje chi ore chise Caifas igóichocoijná. Enga Pédro cháji soldádode gari iji guesi to. Ipotigádi u gu ujetiga chimo ore isocáringome Jesus to. 59 Judíode ore asutedie chucué daguhéyajarique cucha Jesus gai ujetiga ca ũré marínga, jé cho daba ujetiga ore chujé. 60 Dipesei joroque aguhéyajasórone, ore ojñane deroco. Diga jnani taquechoqui gáreode chise ore to, enga udore ore u uje ore chise bai cucha. 61 Enga ore chojninga: —Ayorei uné chojningame yoque diríca: “A yucurasirase Dupade iguíjna cuchábi uné jne enga jĩraque yimanaporase rĩ iji dire gadiótigo.”— 62 Enga judíode eduguéjna cuchábi chague jmame. Enga chojningame Jesus: —¿Ja ca adute ore uruode ome ua ya, uje que ãrarare babai?— 63 Mu Jesus jé que cho chimíñimi go. Jé u uje judíode eduguéjna cuchábi chojningame: —Ujetiga ũré ua enga bangureni jé u Dupa uecai, enga baru ũréringo pijoque. Ãrarare. ¿Dupade utocaidi Crísto jé u ua ya?— 64 Jé u uje Jesus chajnai enga chojninga: —Ẽje. Jé baraja. A qué yingopo cucharigome uaque jne rĩ. Enga u uje a amóñopo Dupade utocaidi uyu jne rĩ uje a yácariji yai Dupade ãrachua uje ujopieranguipísi u uté. Enga a yacája gue abujáragaja jnumi tuné jne.— 65 Jé u uje judíode eduguéjna cuchábi chejna dájningai aja guesi enga chajningarase daguidé aja quedéjnane iji dabai. Enga chinguíra dabijnani aja dojode eduguéjna enga chojninga: —E ipáñangoji uté bai jnese. Uje dojnónangaja Dupade enga cho Dupade iji re. Que togome yoque ujetiga qué yangácoi ayoré uñeque ojñáringo ome uté. Uje jé uyoque upúsu uje yudúcopise uté uruode ome re. 66 ¿Jé oyó ringome uté uruode a?— Ore chojningame: —Jé tiógara ẽrie ujetiga cho daba daruode enga chuque.— 67 Jé u uje ore socárome Jesus. Uñane ore chutĩ́raja edodie. Jeque uñane ore chujépo edodie rĩ. Jé uñane ore chaquesu údode. 68 Enga ore chojningame iji dajñiequéode: —Arajape besṍri uté gosi, ujetiga jé ũré enga Dupade utocáite ua.— 69 Uje qué ore socárome Jesus iji ajei enga ore irogué gapu chi chise Pédro iji guesi iji charidi enga chojningame: —Isenga ua u uje bagúsiji Galiléa gosi Jesus gari to diríca jõ.— 70 Mu chi Pédro chotigasipise uaté uruode iji cojñonguemui ajei. Enga chi chojningame: —Que yimo bẽcarai gotique to.— 71 Mu chi Pédro e dorási guesi eti chi tuagóa gapu uñáraque uje chi chimo to. Enga chi chojningame cojñone ore iji dejode: —Yiraja jnacari uté. Enga déji Nazaret gosi Jesus gari to diríca.— 72 Chi jé Pédro ate uje chi chotigase uaté uruode enga chi chojningápome rĩ: —¡Jé ũré yu ẽrie! Que yimópie Jesus gotique to a.— 73 Qué gajné mu uñane chojningápome Pédro rĩ: —Isenga jé ũré enga Jesus acadique ua to jõ. Jecute baruode jé u Galiléa gosode uruode to.— 74 Mu chi Pédro chojningame ore: —Dupade chiraja uje jé ũré yu uje que yimo uacojningai gotique to.— Mu chi Pédro cáma chejna darai guesi eti cochagájnai po. 75 Enga chi jĩraque Pédro jnusina Jesus uru casodé uje chi chojninga diríca: “Dejai uné jé u uje a cáma cochagájnai po gajneri enga a otigase yuringai bamósõre to enga gadioque gajneri.” Jé u uje Pédro chi diponguerame re, enga chi jno bu iji ore ajei enga poja guesi.
1 Uje guedé cáma tocade enga judíode angaránone, ore asutépisedie ore chimate dáyipiedie ome Jesus ujetiga ore chujé. 2 Jé u uje chi ore chigaru Jesus jmanecade aja ñane enga chi ore jno údi aja Póncio Piláto uje Róma gosode ore eduguéjna cuchábi icháji jogadi. 3 Uje chi Jesus guerasṍri Júdas chudute to uje chi ore chujé Jesus jne, enga chi jnusi jorógui uje tẽra diríca. Jé u uje chi chayóji judíode angaránone yui enga chi chatirépo Jesus oredie ore gai te rĩ, uje chi 30 pláta guebétigo. 4 Jé u uje chojningame ore: —Yirajápise yuringai sijnaque. Chamáñaje yerani casé jnani ome uaque que tiógara daringárique chuque go. Uje que bárique cuse.— Mu ore chojningame: —Que cucha ome yoque go. Jé bapesudei bajuredie.— 5 Jé u uje Júdas chi tṍra ore iplátadie aja Dupade iguíjna cuchábi ajei. Enga chi chayója guesi. Enga chi chigaru detabi enga chujé re. 6 Judíode angaránone ore asutépisedie chisapo atiredie plátai enga ore chojningame ñane: —¿Ja yátagorása pláta unaji aja Dupade gajnenie yoquiplátai to a? Uje ayoré chui oré.— 7 Quigade enga ore chimate dajéode ujeta ore doi jnutique oréragome Júdas atiredie plátai. Enga ore chojninga: —Beyoi enga yicoi dácha orangóri gajnei jnupe. Enga ducurása quedéjnane ore óderigui jogate jne.— 8 Enga, ore chĩ́care Diyobi Garai aja. Enga jé yĩ́caco Diyobi Garai aja, jé aja deréjnai unojo. 9 - 10 Jé u uje Dupade uruode atatasṍri Jeremías urusarane tocade uje chojninga: “Israel gosode ore chojninga: ‘A yicoi oredie ome jnacari uté ome pláta guebéode jne uje déji 30.’ Diga guerasórone ore chisa ore iplátadie unaji enga ore doi oré tome dácha orangónique gajnei jnupe. Uje Dupade jé uruode u ome yu.” 11 Ore chijna Jesus aja eduguéjnai Piláto ujetiga chidójnanga bárique cucha. Jé u uje chojningame Jesus: —¿Ja jé ũré enga judíode eduguéjnai gotique u ua ya?— Mu Jesus chajnai uruode enga chojninga: —Baraja uje uyu u.— 12 Mu judíode angaránone, ore asutépisedie ore chaguhéta cuchade Jesus gai. Mu que Jesus chajnai ore gotique. 13 Enga Piláto chojningame Jesus: —¿Ja ca adute ore uruode ome ua ya? Uje que ãrarare babai to.— 14 Mu Jesus chi jé ate uje chi ca narare. Jecute Piláto chi ca chiraja dasocárigome, enga tija uje Jesus que cho chimíñimi iji ore jmáinie. 15 Chi eduguéjnane ore isocabeque nanique uje chi chise Páscua enga chi ore chirame dajurúgayode uñeque. Mu chi jé ore doi darásade ore ojningárique ujetiga ore chirame. 16 Enga chi ore jurúgarique déji soldádode iguíjnai nanique uje chi urásade ore erangate. Uje chi cho daba dajocaningárique nanique, enga chi i tu Barrabas. 17 Enga uje chi cojñonguemui qué ore déji ñane gari enga Piláto chi chojningame ore: —¿Uacajegaitique iji Barrabas, Jesus ore jetiga yirame uñeque? Yojningai u uté uje chi Dupade utocaidi Crísto u.— 18 Piláto urúo unojo gu uje chiraja uje Jesus isasórone ore charatáyime uje cojñone ore tangári enga ore cho jara aja quigade. 19 Qué Piláto déji dayaripi gai uje qué chirote cojñonguemui ore ajéningo, enga acoté chiroque daruode aja uje chojningame: —Ca báyipieraque gajnaréngaja uté to. Uje que bárique cuse. Yĩ́cara que gu enga yurigode gajnaréchome que.— 20 Mu judíode angaránone ore nejena cojñonguemui údode ujetiga ore chutai Barrabas ujeta Piláto iramei tu. Jé basa ujetiga yui tu Jesus. 21 Piláto catecãrápoi cojñonguemui gaté rĩ. Enga chojningame ore: —¿Jé uacajegaitique iji jnani gáreode udore ore ujetiga yirame uñeque?— Enga ore chojninga: —¡Arame Barrabas!— 22 Piláto chi chojningame ore: —¿Jé yo ringome Jesus, Dupade utocaidi Crísto jne a?— Mu chi ore chojningame jnese: —Ajo aja curesei gai.— 23 Jé u uje Piláto qué catecãrápoi ore gaté rĩ. Enga chojningame ore: —¿Jé uté bárique a?— Mu chi ore pijnate gatéo uje chi ore chojninga: —¡Ajo aja curesei gai!— 24 Mu Piláto chiraja uje que chijnime cojñone ãrírique ome Jesus, enga chi todópo rĩ ujetiga diga ca chiraja dasocárigome cojñonguemui atique. Jecute chi churu dajmáinie iji cojñonguemui ore iquei jnese. Enga chi chojningame ore: —¿Amóño a? uje yuru yijmáinie iji uacaquei. Qui tu gu uje que yajéo uté uringai chuque uje que yiraja bárique cucha gu. A oyo uacaba uté jne.— 25 Chi ore chajnai enga chi ore chojningame jnese: —Que cucha go ujetiga yoco yoquiba uté uringai chuque. Jé upo rĩ ujetiga yocape disi ejórigo jé qué ore cho daba to rase.— 26 Diga Piláto doi ore áyipiedie enga chirame Barrabas. Jeque chiroque darógode aja Jesus ujetiga ore chaquesu údode bajaque. Enga quigade enga ore jno údi ujetiga ore chajo aja curesei gai. 27 Jé u uje eduguéjna cuchábi irógode soldácho ore jno Jesus údi aja Piláto igóichocoijná enga ore chamáta ñane iji Jesus ejode jnese. 28 Quigade enga ore chejñu Jesus iguidedie iji gai. Jeque ore na iguidé caraté aja. 29 Ore chirópo ojnane rĩ enga ore cho gatoje iji enga chi ore chajója Jesus ójo. Jeque chi ore na ogué pojnaque aja jmanai ãrachua. Jé u uje chi ore cháji dagatáidie iji iquei enga chi ore chujñieta enga ore chojningame: —E bopíse eduguéjna cuchábode ¡jõ!— Enga ore chojningápo rĩ: —¡Que gajnúrique cuse judíode eduguéjna cuchábi uné!— 30 Ore doi datuatigade gaté ome. Enga ore chutĩ́raja edodie. Ore chisapo ogué rĩ iji jmáinie enga ore chujé gatoi ome iji quedéjnane. 31 Quigade enga uje ore chimate uringai pujñiete aja jnumi enga ore chejñuapo iguidé caraté iji gai te rĩ. Enga ore napo iguidépisedie aja rĩ. Enga jé u uje ore jno údi ujetiga ore chajo aja curesei gai. 32 Chi ore jno Jesus údi aja cachodi yui ujetiga ore chajo aja curesei gai. Mu chi ore chise jnanírique uje chi i tu Simon uje idai chi u Cirene. Mu soldádode doi uté enga ore chisi ome Jesus gajnei curesei ome ujetiga chijnoque. 33 Enga jé u uje ore chise cachodi uje i tu Gólgota. (Gólgota i qui tu dacatode ajnoquei.) 34 Enga chi ore doi víno enga ore chimesa cucha agutéragaja. Jé u uje chi ore chajningararása Jesus. Jé u uje chi chetingare mu chi ca chóji. 35 Uje chi ore chimate Jesus aja curesei enga chi soldádode ore canáji Jesus iguidedie ejode ujetiga ore ajñamini yugónique gajnei Jesus iguidedie. Enga jé Dupade uruode atatasórone uñai uruode tocachuringai u uje chojninga: “Ore doi dajñaminone iji yiguidedie ejode. Quigade enga ore chajuguína ñane.” 36 Chi ore chejna unojo guesi enga jé u uje chi ore cháji Jesus ejode enga chi ore timíninga aja quedéjnane. 37 Enga chi ore chicha darusarane aja Jesus gatoi gai uje chi chatata bárique cucha. Enga chi ore urusarane u unojo: “Judíode ore eduguéjna cuchábi Jesus uné.” 38 Jesus cho dabaya jnani oriechoqui gáreode ore to iji dagachodi. Uñai dóji ãrachua. Jeque uñai dóji arasei. 39 Enga cojñone ore chujñieta Jesus aja quedéjnane. Uje ore chise enominone enga ore chachógui gaté. Enga ore chungurase datóidie ome aja quedéjnane. 40 Ore chojningápome rĩ: —Bojningápie diríca ya: “A yinguírarása Dupade iguíjna cuchábi uté aja jnumi, mu a yiringaraporase rĩ iji dire gadiótigo.” Be gojni enga aqueta gojni ua ujetiga jé ũré enga Dupade abipise ua enga be jnumi iji curesei gai.— 41 Chi jé ore cho judíode angaránone jnese, jé aja fariséode ore. Uje chi ore chujñieta Jesus to. 42 Enga chi ore chojningame ñane: —Chiquetápie dojode ayoréo diríca, que chiqueta gojni re. Jeta jé ũré ujetiga Israel gosode yoquijnati eduguéjna u enga doi enga doi jnumi iji curesei gai. Enga jé urásu ujetiga yiyágo yotigáco uté. 43 Chi jé urúpio diríca uje chi angureni u Dupade diríca. Chi Dupade abipísapo diríca rĩ ome. Dupade que doi gojni enga chiqueta gojni.— 44 Chi jé cho bayade oriechoquío uje ore chujñieta aja quedéjnane to. 45 Enga chi ijnangunúraque base ore gai jnese iji ore uniri uté, uje chi guedé déji gatocoro iji deréjnai uté. Jé u uje ore cháji ijnangunua ajei, jé aja uje guedé cho jñuque. 46 Enga deréjnai uté chi jé u uje chi Jesus chisa dabade. Enga chi chojninga: —Eli, Eli, ¿láma sabactáni?— Udore chi qui tu uje chojninga: “Yai Dupade a, Yai Dupade a, ¿gotique gu a uje bamingara yu?” 47 Mu ejominórone uñéngo chudute pijnacaráidie enga ore chojninga: —Tibidi Dupade uruode atatasṍri Elías.— 48 Jé u uje ore uñai chayóji pamatadé gajnua yui, enga chacáji ore jotaque sujnai. Enga chadiapója daburuco eruei te rĩ, enga chũarásaja Jesus ome daburuco ujetiga chise. 49 Mu chi jorane uñane ore chojningame: —Jé dóji enga yajico jne ujetiga Dupade uruode atatasṍri Elías casicáite chiqueta.— 50 Jé u uje Jesus chi chisapise dabade gaté rĩ. Enga chi pijnacaráidie chicáji gatajnoquei. Enga chi toi ¡pac! 51 Uje Jesus toi enga qué jnomája uje borapeque cuchábi dajuque uje dóji Dupade iguíjna cuchábi ajei puyai ore ujai. Dajuguiji gatocoro iji gaté enga jé chuságaja jnumi. Enga chi nonapója rĩ uje jnumi chi chijocase re iji gaté. Enga jé aja cucarãte chaguesíode uje dosadode chi cho ¡po! ¡po! 52 Chi ducóderigui chuchẽrapo dabáyode rĩ. Enga Dupade anguresõre toque aórigo uñéngo chi ore ecápo rĩ iji ore itoringane. Enga chi uásejna ore. 53 Mu chi cáma ore chingongáraja penomitique, jé aja quigade uje Jesus chi ecápoji datoringai quigade rĩ. Jé u uje chi quene ore jnoji ducódedie enga ore chacája Dupade ijnorai guidai Jerusalen to. Enga ore imósorone cojñoque uásejna. 54 Uje Jesus irodingórone soldácho, jé aja ore eduguéjnai, ore chimo jnupe tãrarachui, cucha dacate uñane ore, enga que ore isadodéringai chajire re. Jecute ore chojninga: —A jé ũrepise enga Dupade ape jnani uté gotique.— 55 Mu chi chequérigui cháji quedéjnarique ome Jesus uje chi ore chajire iji gaté. Enga uásejna ore. Chi jé ore u uje chi ore jõra diríca iji Galiléa enga chi ore chátaja Jesus diríca iji dajei. 56 Chi Maria Magdaléna déji ore gari to, jé aja Jacóbo, José ore daté uje i tu Maria to. Zebedéo ujnacarode ore daté dépoji ore gari to rĩ. 57 Uje guedé e chaca enga cojñoque atátique di uje i tu José. Enga Arimatéa gose. Uté u uje cho Jesus acadíguiji re to diríca iji Jesus uringai ueca. 58 Uté chi jno enga chi chijócha Piláto ajei údi ujetiga juéga Jesus enga chañuru guio ujetiga chijochapome rĩ. Enga chi Piláto chiroque darógode ujetiga ore chisi ome Jesus ome José. 59 Enga José chi chiamurase Jesus. Enga chi chipocásu gai iji borapeque ichárique. Enga jé u uje jno údi aja ducódedie. 60 Enga chi chijmare Jesus aja ejopiéraque iji cucarané cuchábéraque. Uje chi jé jochame re ica ome datoringai yui ujetiga ore nárasaja. Chi chimate gojni Jesus aja ajei enga chi suru piagoi ome cucarané iménujnaraque. Enga jé u uje chajni to. 61 Mu chi Maria Magdaléna, Maria uña jé ore cháji ode tiógarei. 62 Dire uñai enga judíode angaránone, jé aja fariséode uñéngo ore tibágui Piláto. Chi dire puyai jé u ome ore, mu chi e ore chimate cucha dacadode aja jnumi jnese bajaque. 63 Enga ore chojningame Piláto: —Eduguéjna, yujnusinángo Jesus urupatáringa casodé uje chojninga diríca: “A yiquecápo jne rĩ iji dire gadiótigo.” 64 Jecute be enga aroque barótigo aja uté ode, jé aja dire gadiótigo, enga ore chirote jne. Socase uté acadi casodé ore tõria jne iji dejátique. Jé socase ore chojningápo rĩ ome cojñone: “Uqué casé e ecápo rĩ iji itoringai quigade.” Jé socase ore urupatáringaringo sué uté urupatáringa casodé gai gaté.— 65 Piláto chojningame ore: —Ore déji dojo uacajegaidode soldádode. A ore nóna uágaja ode jne ujetiga ore chãraque yui ome cojñone. Ujetiga uacajéo enga beyopoi uacasoca uñeque jne rĩ ome ode ujetiga ca toque ajei ome uñeque.— 66 Jé u uje judíode angaránone chi ore tibágui Jesus ode. Chi ore chimere ducaritíguiji Jesus ode piagoi jogato cucarané. Enga chi ore idojnangamáni tu ducari iji ujetiga pijoque ujetiga uñeque chijocase enga ducari chécãre dajogatique. Chi ore noñopome ore irógode soldácho iji to rĩ uje chi ore chirote.
1 Chise dínique iji dire puyai quigade enga quene direjnipe. Enga Maria Magdaléna, ujo Maria ore chobéri Jesus ode yui. 2 Uje chi qué ore jnome yui mu jnumi chi chijocase re iji Jesus ode jogadi uje chi Dupade irótique tṍraji gaté gu. Enga chi Dupade iroi uté u uje chijnare raja Jesus ode piagoi. Enga chi tṍra cucarané iji piagoi. Enga chi doi enga chi cháji gai. 3 Chi nánganata Dupade iroi uté enga chopise ajnorápiedie. Iguidedie chi póroropisi. 4 Jé u uje chi chajuque soldádode agutedie uje ore chimo enga chi ore cṍraja jnumone, enga ore cho togode iji jnumone. 5 Enga chi Dupade iroi chojningame chequedíe: —Jé ca atodóyo go. Yiraja uje uacacuei u Jesus uje ore chajója curesei diríca. 6 Uacacuei uté e que déji ne go. E ecápo rĩ. Uje jé urúo diríca. Jé cajicho gojni jogadi casé to. 7 Boyo bu, enga angoño cucha dacadode unojo ome acadigode ore uje uté toi diríca mu e ecápo rĩ. Enga chi bajágaja ore iquei jne aja Galiléa, enga chi ore chimo iji ta jnese jne. E gusu yuruode ome uaque.— 8 Enga jé u uje chequedíe ore jnoji ode mu chi ca ore digape. Chi jĩraque ore chayo. Chi ore todo gu uje ore chimo Dupade iroi, mu chi deroco ore isadodéringai uje ore áyipie dépoji dacadisṍri casé uringai uecápo rĩ. Jecute chi ore irasé ráguiji ujade. Chi ore chijna dagajñunie aja acadigode ujetiga ore chatata Jesus ujnomei ome ore uje ecápo rĩ. 9 Jé u uje chi ore chuningame mu Jesus chiqueta raja ore enga chi catecã́ri ore. Chi ore doi enga ore sose yui enga chi ore chiporigase guídade aja jnumone ome ore ininaquéode uje chi ore achietája. 10 Chi Jesus chojningame ore: —Ca atodóyo go. Mu abáchoi yijorane ore enga angoñome ore uje yipota ore chicáji Galiléa enga a yimóngo ñane iji jne.— 11 Uje chequedíe qué ore jnome acadigode yui enga Jesus ode irodisórone soldate uñane jnome idaidatei yui to ujetiga ore chingo cucha dacadode aja judíode angaránone asutépisedie ore. 12 Ore asutépisedie tibidi pangarate uñane enga ore pésu dáyipiedie ome Jesus ujnomei. Enga ore chojninga: —Yicoi enga yoco oré soldádode ore jne enga ore doi yocurúrigo jne.— 13 Enga ore chojningame soldádode: —Ojnicho jne: “Que yunínango Jesus acadi casodé ore que uje ore tõria dacadisṍri casé iji dejnínga gatocoro uje qué yimóngo.” 14 Ca agutúyo uágome eduguéjna cuchábi Piláto yui. A chudute to jne, enga yajningo jne ome yocuru quitígo. Jé u uje a ca cuchárique chosi tiji uaque jne.— 15 Jé u uje soldádode chi ore chisa ore gueranenie plátai ¡saque! Enga chi ore dopísi ore uruode ome ore. Jecute judíode jé qué ore urúo, jé aja dirode unojo, uje chiese porite Jesus iji ode nanique. 16 Enga jé u uje Jesus acadigode, uje chojmára ore iji yirídai, ore chicai Jesus ojningai cucarãte iji Galiléa. 17 Uje chi ore chimo Jesus enga jé u uje ore chichaga dagatáidie aja jnumi iji iquei. Mu uñane chi qué ore chotigase uje chiese cáma Jesus u go. 18 Jesus chi sose ore yui enga chi chojningame ore: —Yai Dupade e tẽra yuringai dacasuté ome yu iji guéode, erámone ore jnese. 19 Boyo enga acayóji ayoréode iji punirone jnese. Enga apéso yunéningarique ome ore jnese, enga ore changureta yu to jne. Jé u jne ujetiga óraño ore aja yodi jne ujetiga ore changureta yai Dupade, abi uyu, Ujopie Espíritu Sánto ore. 20 Acacho ore ome cuchade jnese jne uje e yacadique uágome enga ore doi to jne. Enga a arajáyo jne uje a yugúsiji uacari jne iji dirode jnese, jé aja erámone eruei.— Amen.
1 A yatata Dupade ujnacari Jesucrísto ujnomei ome uaque jne iji yurusarane adore. 2 Dupade uruode atatasṍri jnani bajai Isaías urusarane ojningai jé u Juan uje chi jnanírique di jne ujetiga chingome darásade ome ore iquetangónique diringai yui. Ga Isaías urusarane chósi te: Dupade chojningame dajnacari nanique: “A yiroque yutocáite gatérique aja baquei jne Ujetiga ore chucué dasocárigo ome baríringai yui. 3 A ore chudute gosi pijnatígo jne ujetiga tṍraji erãpe taretigai. Enga a uté chojningame ore jne: “Boyo yico, yipéco dajei iji yoca ngarádejnai iquei uje a di jne. Apesopúsu aja quedéjnane jne.” 4 Jecute chi Juan uté di iji erãpe tarei, enga cho quique cojñone ore ome ujetiga ore chécãre dáyipierigui quitígo. Ga jé jogadi tu ujetiga tṍra ore aja yodi ujetiga Dupade chĩro ore isijnaringuéone. 5 Jecute chi Judéa unirisórone, jé aja Jerusalen idaisórone ore diguina Juan to ujetiga ore tangári acajnaquéode to. Enga chi ore chatata date gajnaréngone ome ñane. Ga jé u uje Juan tṍra ore aja yodi iji ore itié uje i tu Jordan. 6 Enga Juan chi chapúsaja daguidedie nanique. Ga chi iguidedie u burica quedéjna aoi uje chi i tu caméllo . Jé aja igarubi uje chi cucha ao to. Posode chi u carichade enga ipeyade chi upo cutérone rĩ. 7 Uje Juan chacate cojñone enga chi chósi tome ore: —A Dupade utocáite ejórique di jne rĩ iji yiquigade. Uje uté u jne ujetiga suépise yibai ome doidéraque dajopie. Jecute a ca cucha yu iji uté iquei gotique jne, uje jé tiógara ujetiga ca yijocase uté atique. 8 Que potigayaque yu uje yṍra uágaja yodi. Mu uté a di gojni jne enga a chĩreta uágome dajopiéjna Espíritu Sánto jne.— 9 Uje chi qué Juan chacate ore ga Jesus chise ore to iji dirode udore. Enga tṍraji ore idai uje i tu Nazaret uje déji ore uniri Galiléa. Enga Jesus chise Juan ore ga Juan tṍraja Jesus aja yodi iji tie to uje i tu Jordan. 10 Jecute chi ore doi guesi iji yodi mu Jesus chimo guéode uje ore chungare re. Ga chi chimo Dupade Ujopie Espíritu Sánto uje chi gajnui tu cucujnadatérique enga basaja gai. 11 Enga chi ore chudute darade uje tṍraji gaté enga chi chojninga: —Yape yedójnari tu ua uje yínínapúsu yu ome ua.— 12 Uje chi chejna udojo guesi ga Dupade Ujopie Espíritu Sánto chorei Jesus iji erãpe tarei. 13 Enga jé u uje Jesus chi déji erãpe tarei iji díningo uje chi guejnanie ayoré gare. Enga chi cuchiso sijnángone pie to Jesus charidi uté. Enga chi jogadi u to uje Satanas chetingare Jesus. Mu Dupade irógode gaté minórone ore déji Jesus gari to ujetiga ore chirodipise iji charidi tuté. 14 Diga Juan cho daba dacajnaquéode ga ore suru gai. Enga udojo quigade ga jé u uje Jesus chicáji Galiléa ujetiga chatata Dupade ujnomedatei ome udore ore ujetiga ore chise daringáringo Dupade urása to. 15 Enga Jesus acajnaquéode quigode u udojo ome ore uje chojninga: —Dupade uringai uaqueduguéjna uja yoquibai ujetiga cho darása iji uaque to. Jecute écãcho uacasocárigo to ome uté yui. Enga anguretayopise uté ujnomedatei yui to ga jogadi u jne ujetiga eso uacaringáringo piquetácho ome uté.— 16 Chi chise dire uñeque uje chi Jesus chajna yote quedéjnai Galiléa edúdi. Enga chimo jnani iji te uje i tu Simon. Enga uté desai déji gari to uje chi i tu Andres. Enga chi jochagaisoremeque jnanione udore. Mu uje chi Jesus chise udore ore ga qué ore tṍra dora dachímeno aja yodi. 17 Mu chi jé u uje Jesus dejena jnani gáreode udore ore aja daquigade enga chi chojningame ore: —Boyo iji te ga ajínaño yu. Enga a yecãrape uacasatígo jne. Ga a ca acueyoi oyítigo rĩ, mu a uacacuegode u ayorérigo jne ujetiga amácho ore aja panguretigade ome Dupade to.— 18 Jecute chi ca ore chajirape cuchárique mu chi jĩrique ore noñome dachímeno iji te ga jé u uje ore nóna Jesus to. 19 Mu Jesus chi jnome daquei mu jé isocai tu ome jnacarode uñéngo uje chi chise ore iji ore gachitique cuco ajei. Uje chi qué ore chuga dachímeno. Ga uñai chi i tu Jacóbo. Jé basa uñai i tu Juan. Enga Zebedéo ujnacarode chi u udore. 20 Jecute chi Jesus dejena ore aja daquigade to. Enga chi ore noñome dayé Zebedéo, jé aja uté irótigo ore to iji ore gachidi cuco ajei. Adi jé u uje chi jĩrique ore nóna Jesus to. 21 Quigade enga Jesus ore chise ore idai uje i tu Capernaum. Ga chi Jesus chicáji judíode ore aquiningamérique ujetiga chacate ore iji uté. Enga chi dire puyaque u uté. 22 Mu chi chajuque cojñonguemui ore agutedie ome dacajnaquei. Uje chi Jesus acajnaquéode suépise Moises urusarane atatasórone ore acajnaquéode gáyode jnese. Uje chi Jesus oidedie u ayoré dacasutedie ore arecujáidie gu. 23 Mu chi jnanírique déji ore aquiningamei uté iji ore idai uje chi Satanas utocaitique déji uté ajei. Enga chi chinguíra dabijnani aja dejode. 24 Mu chi Satanas utocaidi óite jnani tuté pijnani ga chósi tome Jesus: —Ajíñome yóguiji te. ¿Gotique gu a uje báta ua aja yoque? Bãri gu ujetiga ejna yoque. Yimo ua to ga bei tu Jesus, ga bedai i tu Nazaret. Dupade utocaidi ta u ua uje chi ca bayoguérique cusipise gu.— 25 Mu chi Jesus jĩrique tagu dejode ome Satanas utocaidi iji jnani tuté. Ga chi chojningame: —O paraque. Be ga ajnime ua iji jnani tuté.— 26 Jecute Satanas utocaidi pésu dabi jnani enga íjnoque. Enga údode tãrara jnese. Enga Satanas utocaidi uté tibite gaté enga jé u uje chi doi guesi iji dabi tuté. 27 Enga chi chajuguipise cojñone ore agutedie jnese. Jecute chi ore chojningame ñane: —¿Gotique chimo joroque re uje que cuchárique piragome pacadisṍri uté uje icha acajnaquéode ome yoque múñi? Uje ipáñangoji uté imenuringuei uje chuságaja Satanas utocaidode ujetiga chiroque ore aja guesode enga ore tangaripísi ga ore doi guesode iji dasangórone cojñocho.— 28 Mu chi jĩrique Jesus ujnomei chubu ore uniri Galiléa uté údode. 29 Unojo quigade ga Jesus jnoji ore aquiningamei uté guiguíjna. Enga chicáji Simon, Andres ore iguíjnai. Mu chi qué Jacóbo, Juan ore nóna Jesus to. 30 Uje ore chise Simon ore iguíjnai ga ore chingome Jesus uje Simon ejo ejnaretepise. Uje chi ca tiógara ducosi uje tagu. 31 Mu chi Jesus sose chequé uaté yui enga chisa jmanai enga chiringáraja gaté. Enga jé u uje chi jĩrique chequé uaté ijõre. Enga gai dotáningai jnoji. Enga chi niji iji damochápi enga chãrei ore posode. 32 Mu chi e chise dejai rĩ, mu cojñone chi qué ore di darása ejnaretade údi aja Jesus ujetiga chiquetape ore to. Jé aja Satanas utocaidode ore isangórone ore to rĩ. 33 Enga chi guidai idaisórone jnese ore pésu dáguedaté iji Jesus upusiédi guiguíjna uté piagoi. 34 Enga chi Jesus chiqueta ejnaretade ore jnese iji uágue uaté ujade. Uje chi ore ejnaréngone cha ñane yúode. Ga chi chatapója Satanas utocaidode isangórone rĩ uje chiqueta ore. Mu chaquĩ́ra darade ome Satanas utocaidode uje chiroque ore aja guesi iji ore isangórone cojñocho. Chamáñaje ore chiraja uringai Dupade ujnacare gu. 35 Uje chise dire uñeque enga Jesus chobere ome daqui ujetiga catecã́ri Dupade iji guidai guesi iji sañeque ujetiga gusu iji. 36 Mu chi Simon, joráringo chi ore chucué Jesus. 37 Ga jé u uje ore chise enga ore chojningame Jesus: —Guidai idaisórone ore chijnángui ua. Jecute ore chucué ua jnese.— 38 Mu chi Jesus chajnai ore uruode ga chósi tome ore: —Mu udore ore e ore chudute yacajnaquéode. Ga boyo yico ga ajinañoma yu ga yicope Dupade ujnomei údi ome cojñone uñéngo iji yoquejode to iji ore idai idógosiode. Uje yiji jnumi nanique ga yigaidi u gu ujetiga yacate cojñone jnese ome Dupade adode.— 39 Mu chi Jesus oidé u dajmapié uje chacate cojñone iji ore aquiningaméone guiguíjna iji ore idáyode jnese iji ore uniri Galiléa údode. Ga chi chijnimápo Satanas utocaidode iji ore isangórone cojñoque ore rĩ iji dajesúode udore. 40 Mu chi cojñotique chise Jesus uje chi lépra isaque cojñoi uté. Enga chi chichaga dagatáidie aja Jesus iquei enga chi chojningame: —Yocangaráni a, bajopie cuse ome yejnarequedatei udé. Jecute ujetiga bajéo enga apesabu yu ome yejnarequedatei udé.— 41 Jecute chi Jesus chosõripise jnani tuté. Enga chi chisa jmanai enga chi chojningame: —Yipota arĩe. Be ga ajníja baringai ayoré pórecajna.— 42 Uje jé urúo udojo ga jnani tuté ejnarei jĩrique jnoji. Ga jé u uje uringai ijõre jogadi u. 43 Mu chi Jesus chiroque cojñoi uté aja doi mu chi qué cho quique bajaque. 44 Enga chojningame: —Ca bope yujnomei údi ome erámi uje yiqueta ua. Mu bo ga angongaráma uája Dupade irótique jne iji Dupade iguíjna cuchábi. Ga bebi Moises uru quigode ome cuchiso perãpáidode ome Dupade. Ujetiga imoi tu ome ore jnese jne uje e ayoré pórecajna ua ome bejnaréso rĩ. 45 Mu chi jnani uté jno ga chi ca pogabu Jesus gotique uje iquetangóri u. Jecute chi Jesus ujnomei chubu ore idáyode údode jnese. Jecute chi ca togome Jesus ujetiga chacápoja ore idáyode. Mu chi acajnaquéode jogadode u dayaritígo erámio uje chi ca cojñotique déji. Ga jogadi u uje cojñone ore diguina Jesus iji charidode udore ujetiga ore tangári acajnaquéode to.
1 Uje dirode qué garósi iji udojo quigade ga chi Jesus chajniapója ore idai uje i tu Capernaum. Ga chi jĩrique idaisórone ore chudute Jesus ujnomei uje pusi idaisórone udore uñeque iguíjnarique. 2 Mu chi jĩrique cojñonguemui ore yore aja Jesus charipi guiguíjna uje chi ca ore edóraque cuse iji guiguíjnai uté. Enga chi Jesus chatata Dupade uruode ome ore iji guiguíjnai uté. 3 Jecute chi cojñotígo ore di dojórique cojñoque údi iji uje chi poritaque uté enga chi ca toque ujetiga uté dique. Jnungórone chi gagájni ore ome uje chi ore chijnáji dajai. 4 Mu chi ca togome ore ujetiga ore chise Jesus iji charidi uje chi cojñonguemui irágu ejode gu. Jecute chi ore cheru guiguíjnai ome. Ga chi ore pésu edóraque iji guiguíjnai ójo. Enga chi ore chigaru jnani ejnaretai tuté mochápi eruéode ome ducarigode. Enga chi jé u uje ore chiramurase Jesus gai iji charidi uté. 5 Uje chi Jesus chimo jnanione udore ore anguretigade ome re enga chi jé u uje chojningame udore ore jõrai ejnaretaque: —A yĩro basijnaringuéone jnese jne.— 6 Mu Moises urusarane atatasórone uñéngo ore déji uté to uje qué ore chácariji dayaripíode gai. Enga chi ore áyipiedie chamáña ome Jesus uru quigode udore. 7 Enga ore chojninga iji dáyipiedie: “¿Gotique chimo joroque re uje jnani tuté pota ujetiga sué Dupade gai, enga chiese chĩro pisijnaringuéone? Uje gusu Dupade múñi uje gajneque ujetiga chĩro pisijnaringuéone.” 8 Mu chi Jesus jĩrique chiraja udore ore áyipiedie quigode. Ga chi chojningame ore: —Gajnarenguepísi uacáyipiedie ome yu uje chiese yipota ujetiga yujnué Dupade gai.— 9 Mu chi Jesus chojningápome ore rĩ: —Que cucha piraque gotique ome yu ujetiga yĩro uté isijnaringuéringo, jeoga yiqueta iji ejnarétigo, enga yojningame: “Ãriji iji bamochápi, ga asa bamochápi, ga bo ga jĩrique arique.”— 10 Mu chi qué Jesus jno daruode údi ome ore enga chojninga: —A qué yetingarape yu jne ome uaque. Yigaidi tu gu ujetiga apáñañomiji yu uje Dupade utocaidi uyu yajnei tu ujetiga yĩro pisijnaringuérigo iji jnumi tudé.— Uje chejna daruode udore guesi ga jogadi u uje catecã́ri cojñoque poritai. 11 Enga chósi tome: —Yojningai tu ua ujetiga ãriji, ga asa bamochápi, ga bo ga acáji baguíjnarique.— 12 Mu chi jĩrique cojñoque poritai niji iji cojñonguemui ore ajei. Uje chi chisa damochápi ga chijnóngaja daqui. Enga cojñone chi ore chimo jnese. Jecute chi ore tijapísa Jesus ipesudode ome daquetai cojñoque jnani uté enga ore chicota Dupade ome udore. Enga chi ore chojningame ñane: —Cáma yimóngo cuchárique to ujetiga cho udore.— 13 Udojo quigade ga Jesus chajniapo aja yote quedéjnai edúdi rĩ. Enga uje cojñone ore chamáta rágaja gari enga jĩrique chacate ore to. 14 Mu chi uje qué Jesus jnoji dayaridi tuté aja daquei, mu chi chimo Alféo ujnacari Levi. Uje chi ore eduguéjna cuchábi iroque ujetiga utaidé ore iplátadie . Enga chi qué déji dataquéode udore gai uje Jesus chise. Enga chi Jesus dejena uté aja daquigade to. Jecute chi chojningame uté: —Levi a, bo iji te ga ajinama yu to jne.— Mu chi ca Levi cusu rome Jesus gotique. Ga chi jĩrique nóna Jesus to. 15 Jecute chi Levi uté jno Jesus údi aja daguíjnai ga chi pésu uraque dabose unéningo ome raque. Ga chi Levi ujórigo jnacare déji to uje chi ore utaidé ore iplátadie to, jé aja cojñone uñéngo rĩ uje chi ate gajnarenguipíso ore to. Enga chi ore chacásõra Jesus, acadigode ore to iji ore agapidi gai. Enga chi uásejna iji jnanione udore uje ore diguina Jesus acajnaquéode gatuaque to. 16 Mu chi Moises uruode atatasórone uñéngo, jé aja fariséode uñéngo rĩ, chi ore dojnóngaja Jesus uje chi chacásõra udore ore to. Enga chi ore chojningame Jesus acadigode: —Gajnareque uje uacacadisṍri chacásõra cojñoque ate gajnaréngone udore, uje gajnarenguipíso ore isocade ome dojode cojñoque ore uyoque múñi.— 17 Mu chi Jesus chudute udore ore uruode ga chi chajnai ore enga chi chósi tome ore: —A ca toque ujetiga ayoré ijónique áyipieraque déji daringárique pipesute ome daijnáringo ore. Uyu ga que yucuegode u ayoré ate omone gotique. Mu yajegaidode u ayoré ate gajnaréngone ujetiga yisape ore ga yiquetape ore to.— 18 Chi chise dínique uje chi Juan acadigode, jé aja fariséode uñéngo qué ore cho dayágome raque uje chi jé ore jmapié u gu. Jecute chi udore uñéngo catecã́ri Jesus. Enga chi ore chósi tome: —¿Gotique chimo joroque re uje que bacadigode chijna yoquijmapié to ujetiga ore cho dayágome raque ujetiga ore catecã́ri Dupade? Bamo gu uje Juan acadigode jé aja fariséode uyoque jecucha ga yoco yocuyaque.— 19 Mu chi Jesus chajnai ore uruode ga chósi tome ore: —Ujetiga ayorérigo déji pajñamitedatérique gai ga a ca togome ore ujetiga ore cho dayágome re uje qué ore déji pajñamitedatei ipesungóri gari gu. 20 Mu jé basa ga a chise dínique jne ujetiga pajñamitedatei ipesungóri jno enga quene cachodi u ujetiga gosi cho dayágome re.— 21 Jesus qué jno dacajnaquéode údi enga chacãra dacajnaquéode aja borapetígo. Enga chojninga: —Ujetiga borapeque ijarórique edo cuse mu que toc ujetiga pugaque borapeque ichárique aja. Chamáña gu uje ichai etotiguei sué ijaroi gai. Jecute ichai chayo borapeque ijaroi údi ga jĩrique daquesu, enga edo casé e querújna.— 22 Enga chi Jesus chacãrápo dacajnaquéode aja cucha otadode rĩ enga chojninga: —Uacarajáyo uje que uaque gosi doi enga chojne cucha otate ichárique aja cucha ao ijarórique. Uje cucha otate ichai uté pésu ga aoi dusi ome gu, uje dajadája guesi enga jogadi u uje uaque gosi chachia dapesudi cucha otate. Jecute omi tu ujetiga uaque gosi chanire cucha otate ichai taja cucha ao ichárique ga ore etotiguéode chopise ñane. Enga isocai tu ujetiga ca uaque gosi chachia dapesudi cucha otate uté, jé aja cucha aórique.— 23 Mu chi chise dire puyátique uje chi Jesus nóna dacadigode ore aja dajei. Enga chi ore chise guejnatique uje chi cucha pacátigo déji. Mu chi acadigode ore chimochere adie uñáringui ujetiga ore tagábu to. 24 Mu chi fariséode uñéngo ore chimo Jesus acadigode uje ore chimochere ore acadie adie. Jecute chi ore chojningame Jesus: —¿Ga jé ca amo bacadigode ore uje ore chimochere cucha pacade adie udire iji dire puyai udé a?— 25 Mu chi Jesus chajnai udore ore arecujáidie ga chi chósi tome ore: —¿Ja ca ajicho jnani bajai David isocade to a iji Dupade uruode a? Uje chi chaguhénique chise jorane ore nanique iji dasoranéraque mu chi ca toque ore potique garãtique ome ore nanique. 26 Chi David chacája Dupade iguíjnarique ga chise arureque puyade iji. Uje chi gusu ome sacerdóteode uje chi ore poso arurégode udore. Mu chi David tagu to. Enga chisíapome dajorane ore to rĩ uje chi chaguhei ujuyápise ore gu. Uje chi ore asuté Abiatar irodique Dupade iguíjnai uté nanique.— 27 Jesus qué cho quique dacajnaquéode ga chopósi tome ore rĩ: —Que Dupade pésu dire puyai gu ujetiga sué ayoréode yoquibáyode mu pésu dire puyai gu ujetiga pagutiyamate uté ujetiga ore cho dajñare iji. 28 Jecute Dupade utocaidi uyu yajnenguipise ujetiga yiji yáyipiedie quitígo iji dire puyade udore.—
1 Mu chi dire uñeque ga Jesus chi chisápo judíode aquiningamérique rĩ. Mu chi jnanírique déji to uje chi jmanai cacoque. 2 Mu chi Jesus guetesórone uñéngo ore chajire Jesus aja tijode, uje chi ore chajmita ujetiga chiqueta cojñoi tuté iji dire puyai . Ga jé u ujetiga ore cho báji. 3 Jecute chi Jesus catecã́ri jnani uté uje jmanai caco enga chojningame: —Bo iji te ga ayágueji yocajei udé.— 4 Jecute chi Jesus catecã́ri cojñone iji darosadode enga chojninga: —Angoñome yu cucha pujuregátique ujetiga pipesudi iji dire puyade udore. ¿Ga pujuregate a ujetiga pipesute cucha oníngo iji, jeoga cucha gajnarétigo? ¿Arei tu ujetiga piquetaque ayorériguiji a, jeoga chuque uñénguiji?— Mu que togome ore gotique ujetiga ore chajnai uruode quigode. 5 Mu chi Jesus chibéro dedodie iji ore uje que posõraquérique déji ore uñeque ome jnani tuté. Ga chi chopise dáyugu re, mu ajei dotãripis ome ore rĩ. Uje chi ca ore potapísa acajnaquéode gu ujetiga ore tangári to. Mu jé u uje chi catecã́ri jnani tuté uje chi jmanai cacoque enga chojningame: —Apotingare bajmanai.— Mu chi jĩrique jnani tuté doi Jesus uruode enga chi jĩrique chipotingare dajmanai, enga chi jĩrique ueradipise jmanai to rĩ. 6 Mu chi jĩrique fariséode ore jno enga ore cháta rágaja Heródes irógode ore ujetiga ore chucué dáyipierigui ome Jesus uringárique chuque. 7 Mu chi Jesus jno enga nóna dacadigode aja yote quedéjnai edúdi. Mu chi cojñonguemui ore cho jara quigade to iji ore uniri Galiléa údode. 8 Uje chi ore chudute Jesus ujnomei ome ipesute datéode, jecute chi jiépise cojñone uje chi ore diguina Jesus to ujetiga ore chajirape ipesute datéode to. Cojñone udore chi ore gãrapíode u ore unirone Judéa, Iduméa ore. Jé aja idaidatei Jerusalen idaisórone uñéngo to rĩ. Jé aja ore itié Jordan uechamito jogonórone rĩ uje ore déji guedé garani iji ore itié uaté. Jé basa ga uñane tṍraji ore idáyode Tíro, Sidon, jé aja ejóminóningo ore idáyo ujetiga ore chimope Jesus to. 9 Uje Jesus chimo cojñonguemui uje ore bese ga todo ujetiga ore chajo aja. Jecute chi Jesus chiroque dacadigode aja cucórique ujetiga dimane ome ujetiga chacárasaja ome dacajnaquéode. 10 Uje chi ore chimo iquetaguébujnane cojñoque ejnaretácho, jecute chi ore tṍra rángaja Jesus gáyode ujetiga ore chijocase to enga ore uringai piquetaque jogadi u to ome Jesus. 11 Mu Achi Satanas utocaitígo piésoningo uñéngo déji ore gari to. Uje chi ore isocai tu uje ore tibágui Jesus ga chi ore chichaga dagatáidie iji Jesus iquei. Ga jé u uje chi ore tibidi dejode ga ore pijnacaráichi uje chi ore chojninga: —Yirajágo baringai Dupade ujnacaripísi.— 12 Mu chi Jesus chaquĩ́ra ore ome darai ujetiga ca ore chatata uringárique ayoré ome erámi. 13 Quigade enga chi Jesus cheru cucarãtique ójoraque enga tibidi dajegaidode iji dacadigode. Enga jĩrique ore chamáta ñane aja. 14 Jecute Jesus chi edopírigo gare ore iji yirídai ome daroquéode. Ujetiga ore nóna aja tijode enga ore jno Dupade uruode údi to aja erámi. 15 Enga chi jé u uje tẽrája dedopíode ome dajopie ujetiga ore chiquetape deyatígo ayoré ejnaretácho to. Enga ore chijnimape Satanas utocaidode iji isatígo ore to rĩ. 16 Enga chi Jesus edopíode uje gare ore iji yirídai ore íode u udojo: uñai u Simon, uje chi Jesus pésu i gaté ga chĩ́care Pédro aja. 17 Jé basa Zebedéo ujnacarode u uñane. Uje uñai i tu Jacóbo, jé basa uñai i tu Juan. Mu Jesus pésu ore i gatéode to. Enga chĩ́care “Guei Darade” aja ore uje Boanérges u ome judíode uruode. 18 Jé basa uñane ore íode u: Andres, Felipe, Bartolomé, Matéo, Tomas. Alféo ujnacari Jacóbo u uñai. Jé basa uñane u Tadéo, Simon ore. Enga chi Simon uté cháta raja darásade uñéngo nanique uje chi ore pota ore chijócãre ore eduguéjna Róma gosode. Jecute ore chĩ́care Cananísta aja uté. 19 Enga Júdas Iscariote u uñai to uje chi u uje guẽrate Jesus ome umajosórone jne. 20 Quigade enga Jesus acadigode ore chajni aja dapusiédi guiguíjna enga jé u uje cojñonguemui ore chamatapo rágaja Jesus ore iji guiguíjnai uté. Enga chi irágupúsu ajei enga chi ca edóraque cuse iji guiguíjnai uté. Jecute chi ca togome Jesus ore ujetiga ore tagu dabotígo to. 21 Enga chi Jesus iguiosode ore chopise dáyugu uje ore chudute uje chiese ũruso Jesus. Chamáñaje cojñonguemui chi ore ijópise gu iji charipi guiguíjna. Jecute chi iguiosode ore tibágui jorógui Jesus iji uté ujetiga ore jno údi. 22 Enga chi Moises urusarane atatasóningo uñéngo uje ore tṍraji Jerusalen gajnarenguipise ore uruode ome Jesus to. Enga chi ore chojninga: —Cachi Satanas utocaidode ore eduguéjnai Satanas Beelzebu déji uté ajei ãrie. Enga Satanas u uje chisi ome dajopie ome ujetiga tṍra utocaidode aja guesi iji dabiésorone cojñocho.— 23 Jecute chi Jesus chojningame ore: —¿Ja pisocárase ome uacajéode a ujetiga Satanas chiroque datocaitique aja gosi ajei, mu quigade ga chijócãraporásaja guetique rĩ iji uté gosi a? A ca pisocai urásu ãrie. 24 Ujetiga pachamitique jogosóningo ore chetaque ñane iji daniri ga que toc ujetiga ore chimate raja páyipie oméringui. Mu diga ore chajni ñane gai ga ore chejna ñane enga que ore bisitique pijoque go ome ñane. 25 Enga jé isocai tupome jnani jogasúratique rĩ. Ujetiga ore chetaque ñane ga cachodi tu to ujetiga ca ore bisitique pijoque. 26 Gajnui jé upo ome Satanas rĩ. Ujetiga doi enga chijócãre datocaitique iji piésonique enga cachodi tu ujetiga ca bisitique pijogapo rĩ. Enga diga chise uraque deruénique iji te uje socárome re gu. 27 Uacarajáyo uje que toque ujetiga pajnoñaque jnani etótique ome ugúcharigo. Mu a qui tu ujetiga pigarique uté gosi bajaque ga jé u ujeta gosi chacája iguíjnai enga cho dajnécho iji jnani etoi uté ugúchade udore. 28 Enga que potigayaque yu gotique ome yuru quigode udojo: uje que piragome Dupade gotique ujetiga chĩro ore ate gajnarétigo jnese, jé aja ore uru noñátigo jnese rĩ. 29 Mu ujetiga gosi dojnóngaja Dupade Ujopie Espíritu Sánto ga a ca toque jne ujetiga pĩroque uté gosi idojnongabátigade ome Dupade Ujopie Espíritu Sánto. Mu a uté gosi badatéode upúsu jne dadojnongabátigade ome Dupade Ujopie Espíritu Sánto iji deréjnane jnese.— 30 Uje chi Jesus uru quicho udojo ome ore gu uje chiese oidé u Satanas ujopie ome cojñone ore uje tṍra Satanas utocaidode iji ore. 31 Mu chi qué Jesus déji dacajnaquéode gai enga chi Jesus daté di to, jé aja desade ore rĩ. Mu chi ca togome ore ujetiga ore chacája gari iji guiguíjnai ajei. Uje chi cojñonguemui ore irágu ejode gu. Jecute chi ore chiroque jnanírigaja ujetiga tibidi Jesus tome ore. 32 Mu cojñone uje chi ore chácariji Jesus ejode chi ore chojningame: —Baté, besade ore déji guesi. Ga ore potapísa ujetiga ore chimo ua to.— 33 Jecute Jesus chajnai ore ga chojninga: —¿Jé gotodie iji uaque ujetiga yo ité iji uaque a? ¿Jé gosode rĩ a iji uaque ujetiga yo yeságuiji uaque a?— 34 Enga chi Jesus chajire cojñone ore iji dejode enga chojninga: —Yo ité iji chequedíe udire iji yejode enga yopo yeságuiji jnanione udore ore rĩ iji yejode. 35 Chamáñaje yopise yeságuiji udore ore jnese ujetiga ore pesupúsu Dupade ajegaidode. Enga jé chopome chequedíe udire ore rĩ uje ore dopísi Dupade áyipiedie quigode uje yo yijnámiji ore, ga yopo ité iji udire uñanie rĩ.—
1 Chise dire uñeque enga chi Jesus qué chacadápo cojñonguemui ore gaté rĩ iji yote quedéjnai edúdi. Uje chi uásejnapise cojñone ore uje ore chamáta ñane aja yote quedéjnai edúdi. Jecute Jesus chacája cucoi enga chácariji dayaridi uté ome dacajnaquéode ome cojñonguemui iji yote quedéjnai edúdi. 2 Enga jé u uje chi Jesus chacate ore ome cuchade enga chacãra dacajnaquéode aja cucha ponáyone. Jecute chi chacãra dacajnaquei uñai taja jnani utácarique enga chósi tome ore: 3 —Angachopisabi yacajnaquéode quigode jne. Uje chi jnanírique jnome daringai utáca ujetiga chaca dajonatígo cucha ajñui. 4 Mu jnani tuté chaca dajonai iji dejnai mu chi acadie cucha ajñui uñanie basaja dajei. Mu chi chugúperenie doi ga tagu. Ga que toc ujetiga udire sué. 5 Jé basa cucha ajñunie uñanie basaja cucarané pitabui. Uje chi carurénga jnutique déji. Jecute chi jĩrique udire sué uje chi erode choqui guesode gu. 6 Mu uje chi guedojodie doi udire ga jĩrique beta uje chi carurénga erode chicáji jnumi gu. 7 Jé basa ga chi cucha ajñunie uñanie suéji ojnatebui ajei. Uje chi ojnatedie nóna aja gatéode. Jecute chi ca udire chaquesu re go uje chi ojnatedie suépise gáyode gu. 8 Jé basa ga chi cucha ajñunie uñáringui basaja jnumi ueratigai. Jecute jĩrique sué enga ijõrei gatuaque uje quérã. Ijõrei jnani acadie jnese mu chaquesu re ga ore adie cha ñane yui. Uje chi uñanie adie guejnanie 30 u. Jé basa uñanie adie guejnanie chi 60 u. Jé basa uñanie guejnanie chi 100 u.— 9 Jesus chi qué chósi tome ore: —Ujetiga angoninguite guesátigo déji uaque ga angachobi yacajnaquéode udojo quigode ujetiga apotáyo arajáyo quitígo to.— 10 Mu chi uje cojñone chejna Jesus acajnaquéode udojo guesi ga ore jno ga ore noñome Jesus iji te. Uje chi gusu acadigode ore iji gari ga chi jogadi u uje ore chingome Jesus ome acajnaquéode ucode quitígo. 11 Jecute chi Jesus doi ga cho dacajnaqueso quique ome ore. Enga chojninga: —Uacajnei tu ujetiga Dupade chingongara dajmapiedie ome darásarigo uaque jne ujetiga diga oyo uaqueduguéjnapísi iji uté. Mu Dupade jmapiedie udire cho cucha pipoguiédode ome guesiminórone udore ore uje que ore changureta to go. 12 Yigaidi u gu ujetiga ore chudute yacajnaquéode mu a ca ore chiraja quitique go. Enga yigaidi upo rĩ ujetiga ore chimo yipesute datéode mu a ca ore chijnime ãrírique ujetiga ore chiraja quitígo. Que yipota gu ujetiga yanguresorojmane ore chapu rágome Dupade yui ujetiga ore chajni uté gai ome ore isijnaringuéone uringáringo pĩrocho to.— 13 Mu chi Jesus qué catecã́ri dacadigode ore gaté ga chósi tome ore: —Que ajnícho yacajnaquéode udore quigode ãrírique go uje yacãra yacajnaquéode aja jnani utácai. ¿Ga toguirase ome uac ujetiga ajnícho yacajnaqué ejórigo ãrírique?— 14 Enga jé u uje Jesus cho dacajnaquéode quic ome ore. Enga chojninga: —Jnani utácai uje chaca cucha ajñunie jé gajnui tu uté gosi ujetiga chacate ore ome Dupade uruode. 15 Ayoréode uñane ore gajnunie u cucha ajñunie uje basaja dajei. Chamáñaje quene ore chudute Dupade uruode mu Satanas jĩrique doi ore áyipiedie ga chijna Dupade uruode iji ore gari. 16 Jé basa ga ayoréode uñéngo ore cho cucha ajñunie uje basaja cucarané pitabui. Uje udore gosode ore chudute Dupade uruode ga jĩrique ore irasicho enga a ca ore chise unerotiguérique go. 17 Mu ayoréode udore isocai tu ujetiga ca ore enique chicai jnumi gotique. Jecute que ore etotiguérique cuse go. Uje petingaquéode chise gojni udore ga ore chopise daba danguretigade ome Dupade uruode ga jé jogadi tu uje ore anguretigai qui tu jnumi yui ome Dupade. 18 - 19 Jé basa ayoréode uñane ore gajnunie u cucha ajñunie uje basaja ojnatebui. Uje ore chudute Dupade uruode, mu que ore áyipiedie jnoji erámi tudé. Enga cucha ueradode udore iji erámi udé ipesute ore edojnaringuéone. Jecute ore chimate cuchade aja re mu cucha uñai qué dépoji rĩ. Jecute uté gosi cho cucha pacáraque uje toi dádi bisideque uje que chaquesu re go enga que áraque cuse. Chamáñaje cucha ueradode udore iji erámi udé suru Dupade uruode gai iji uté gosi ajei gu. 20 Mu ayoréode uñane ore chudute Dupade uruode ga Dupade uruode catája ore áyipiedie. Jecute ore gajnunie u cucha ajñunie uje pacáji jnumi ueratigai. Jecute jĩrique quérã enga chaquesu re ga adie cuse. Jecute ayoréode udore cho cucha ajñunie uje chaquesu re enga adie cuse. Mu adie cha ñane yui. Jecute uñane adie cho 30. Jé basa uñane cho 60. Jé basa uñane cho 100.— 21 Mu Jesus chacãrápo dacajnaquéode aja ore apótique rĩ. Enga chojninga: —A ca ayorérique isoca go ujetiga chãru dapótique ga chicháji cuchárique útique. Jeoga chicháji damochápirique útique ujetiga pógu. Mu uté gosi ichapidi tu gaté yui. Gaidi u gu ujetiga chijñate ejominórone ore gáyode jnese. 22 A ca toque jne ujetiga cucha pipoguiétique ca chise daringárique pute. Ujetiga pipoguiete cuchárique marínga, diga tocade jne ujetiga chise daringárique pute. 23 Uacuñeque ujetiga angoninguitígo guesa ga ca acusúyo uaque. Mu beyoi ga angáchoi yacajnaquéode udojo.— 24 Jesus chojningápome ore rĩ: —Mu ejnáñopise uacáyipiedie aja uacadudigode Dupade urúo quigode. Ujetiga apésu uru quitique ga a jé jogadi tu ujetiga chacadápo ua ome daru uñéngo gaté rĩ. Mu diga chimo jne uje que ese uruode unerotiguérique, ga jé u uje chojne barajatigai babai ome daruode quigode jnese. 25 Jecute ujetiga pirajatigai déji uaque gosi enga uaque gosi doi ga tagúrome uté enga Dupade a tẽrája uté gosi ome pirajatigai gaté jne. Mu ujetiga gosi ca tagúrome ga Dupade chajnose uté gosi ome irajatígabode sudore gaté jne.— 26 Jesus qué cho quique Dupade isocáringome dajnetígo ayoréode uyoque ujetiga chamáta yógaja dari jne enga chojninga: —Dupade isocai ujetiga chamáta darásade aja re jé peropísiji cucha ajñunie isocade uje jnanírique chaca. 27 Uje jnani tuté chimate dacapiedie aja jnumi iji cucha ajñunie enga jno ga que chajirapo yui gotique rĩ. Moji dejade, enga niji iji durasedie jnese ome dasatígo uñéngo. Mu chejna deréjnane mu quigade ga chunina mu acapiedie udire sué enga chaquesu re enga adie cuse. Mu cachi agupuraguipise uté ome cucha ajñunie udire isocade ome udore. 28 Uje jnumi uté jé ipesute iqueraningai gu. Ujnié u bajé aja guesi. Quigade ga jé u uje pésu dero. Mu udore quigade jé u uje pésu dade. Enga ade quigade ga jé u uje pésu dajñunie. 29 Ujetiga adie udire chise daringárique timachugué ga jé jogadi u ujetiga jnani uté gosi chijna erásonique ome ujetiga chaquesu. Uje chise deréjnai gu ujetiga e na dacadie udire gu.— 30 Jesus qué jno darai údi enga chojninga: —¿Jé Dupade uringárique yocurása yocorási ringome ujetiga yicoi uté gajnúringuiji cuchade a? 31 Gajnua tu cucha ajñu atíãtaque uje i tu mostáza ujetiga pacáji jnumi. Uje cucha ajñua suaté atiãpísape ome ujodie cucha ajñui jnese iji erámi udé. 32 Mu diga paca cucha ajñámia suaté ga jé u uje quérã ga chise daringáraque poredaté. Enga jogadi jé u uje suépise dojodie pore ore gáyode ome daringa poredaté. Jecute chugúperone cho daburúpie iji uaté jmaneca cuchábode rĩ.— 33 Uje Jesus chacate ore ome Dupade uruode ga isocai jé u gajnúone udojo uje jecucha chijna cucha gajnúone ome dacajnaquéode udore. Mu que Jesus chó dacajnaquéode gai gotique ome ore. Mu oidode u ore irajatigade eruéode ome ore. 34 Jecute chi ca Jesus chacate ore bisideque ujetiga ca chijna cuchárique gajnúrique ome ore. Mu quigade ga chi jecucha cho cucha gajnúone udore quigome dacadigode. 35 Mu chi jé deréjnai uté u uje chi guedé e chaca ga chi Jesus chojningame dacadigode: —Boyo yico ga yaquesúgo yote quedéjnai. Ga yicoi uechamito.— 36 Jecute chi Jesus acadigode ore noñome cojñonguemui ore iji te. Ga ore nóna Jesus iji dabi cuco ajei enga ore jno. Mu chi ujórigo cuco chi ore nóna oraja dajei to. 37 Mu uje Jesus, jorane ore déji yote quedéjnai ajei mu úyujna cuchabe chorei ore iji yote quedéjnai gatócoro. Mu chiringare yodi aja gatéode ga chi carajnoque chĩreta ore pi cuco ome yodi. Chirõripise ujetiga jno ore údi aja yote quedéjnai údi. 38 Mu chi Jesus moji cucoi ajidé tiji quigade. Enga chi chugutána dagutadéraque. Jecute chi jĩrique Jesus acadigode chiringare Jesus enga chi ore chojningame: —¡Yocangaráni a! ¿A ca cucha ome ua ya uje a yote quedéjnai jno yocúdi jne aja dádi a?— 39 Mu chi jĩrique Jesus niji ga chi chaquĩ́ra úyujna, yote quedéjnai ore. Enga chi chojningame udore: —Oyo parácho iji jnumi.— Mu chi uje Jesus urúo udojo ga chi jĩrique ore cho paráguiji jnumi jnese. 40 Mu jĩrique Jesus chósi tome dacadigode ore: —¿Gotique chimo joroque re uje a garósosi uacanguretaretigátique ome yu a? Uje úyujna cuchabe tuaté chajuque uacagutedie que.— 41 Mu chi Jesus chajuque dacadigode ore agutedie ome dapesute datéode udore. Jecute chi ore tijapísa enga chi ore chojningame ñane: —¿Chimo joroque jnani uté oidé pujopie garãtígome uje jé chuságaja yote quedéjnai, úyujna uje chaquĩ́ra ore enga ore tangári?—
1 Diga Jesus ore chise daqui iji yote quedéjnai uechamito ga ore garãpi u ore uniri uje i tu Gadára. 2 Chi Jesus doi jnumi iji cucoi mu jĩrique cojñotique chachai iji garani. Uje chi jnani tuté Satanas utocaidode ipesute juredie. Jecute chi charidode u ducódedie. 3 Chi Satanas pi uté jnani chi jecucha charidode u ducódedie. Uje chi ca togome ayorérique ujetiga ayorérique sué uté gai. Uje chi ore chigaru ome ojnaquerodie mu chi jĩrique uté chaquesu ojnaquerodie udire iji dádode. 4 Uje chi ore isocabeque múñi uje chi ore chigaru uté guídade aja ñane, jé aja jmanáyone rĩ. Mu chi doi derátodie ojnaqueroi ga chi jĩrique chayo údi ga daquesu iji údode ga chi pépitabio iji jmáinie. Jecute chi cojñoi tuté cháji ore údode. 5 Jecute jnani uté chi ca cho dariguitígarique uja iji dirode jnese, jé upo iji dejade rĩ. Uje chi tibidi dejode gatuaque. Ga chi isoránenie quigode u cucaranone uje chi ducódedie jogadode u gu. Jecute chi ca chañurupúsu deo ome cucaranenie uje chi chaquesu údode gatuaque. 6 Uje chi qué idája jnani, Jesus óriji ñane mu chi jĩrique uté chayóji Jesus yui. Enga chi chichaga dagatáidie aja jnumi iji Jesus iquei. 7 Mu chi chinguíra dabijnani aja Jesus ga chi chósi tome: —Yirajapise barãpi uje Dupade upúsu. Ga Dupade pujnuéngaisṍri ujnacari tu ua. Jecute ¿gotique gu a uje bapota báta ua aja yoque to? Ujetiga Dupade osongaquei déji ua ga ca ope bajuñame yu gaté rĩ.— 8 Jnani tuté chi urúo udore gu uje Jesus e chiroque Satanas utocaidode aja guesi iji jnani tuté uje chi chojningame: —Satanas utocaidi ua, be guesi ga ajíñome jnani tuté iji te.— 9 Mu chi Jesus chojninga: —¿Jé bérique a?— Mu chi chajnai enga chojninga: —Yi tu Dipeséode. Chamáñaje Satanas utocaidode dipesépise yoque gu iji jnani tudé údode.— 10 Enga chi Satanas utocaidode ore chijócha Jesus ajei údi ujetiga ca tṍra ore aja guesode iji ore achamini tuté. 11 Mu chi yãcoré quedéjnanie idógosi iji ore charidi iji cucarani uté. Uje chi qué yãcoré quedéjnanie udire taguíji. 12 Mu chi Jesus ijnimíso Satanas utocacho chi ore chutai Jesus enga chi ore chojningame: —Be ga ajuéga yãcoré quedéjnanie udire ome yoque ga yacágoja udire ore ajéode.— 13 Enga chi Jesus juégame Satanas utocaidode ujetiga ore chacája yãcoré quedéjnanie. Enga jé u uje ore pésu ũrusodie iji yãcoré quedéjnanie. Enga jĩrique ore quejnapísiji cucarani edógai enga ore tṍra rángaja yote quedéjnai. Uje chi que toc ujeta qué piqueta udire uñáraque uje idájapise jnumi gu. Enga chi 2.000 u yãcoré quedéjnanie guejnanie. 14 Jecute chi Jesus ipesute datéode udore chajuque yãcoré quedéjnanie irodisórone agutedie. Enga chi ore jno ga ore chayója dedaidatei ujetiga ore cho gojñame ore jnese iji, jé aja acorásabidie rĩ. Jecute chi cojñonguemui ore tibágui Jesus ore to. Uje chi ore igaminone gajnengóri u Jesus. 15 Uje chi ore chise Jesus ore enga chi jĩrique ore chimo Jesus iquetai cojñoque uje chi chácariji ore ejórique. Uje chi Satanas utocaidode ipesute edojnaringuéone diríca. Mu chi e chigui daguidérigui to enga chi e chajníja daringai ayoré pórecajna. Enga chi chajuque cojñonguemui ore agutedie jnese. 16 Mu chi yãcoré quedéjnanie irodisórone ore chingome cojñonguemui ome Jesus isocade ome daquetai uqué cojñoque, jé upo isocade rĩ ome yãcoré quedéjnanie uje chijnime Satanas utocaidode iji cojñoi ga nája yãcoré quedéjnanie. 17 Jecute chi cojñonguemui ore todópisa Jesus tome uringai ujopierãque to. Ga jogadi u uje ore chijócha ajei údi ujetiga jnoji ore uniri. 18 Uje Jesus e ore chimate raja dabi cucoi ajei ga chi Jesus iquetai uqué cojñoque catecã́ri Jesus ga nejepúsu Jesus údode ujetiga nóna aja tijode. 19 Mu Jesus chi chaquĩ́ra daquetai tuqué cojñoque enga chojninga: —Acarape to. Ga bo ga ajni aja baguíjnarique. Ga angongaráma ua aja bajogasúrique ore uje yocangaráni Dupade u uje chosõripise ua enga chiqueta ua que.— 20 Mu chi jĩrique jnani tuté jno enga chingo cojñone ore iji ore uniri Decápolis údode jnese uje Jesus chiqueta que iji Satanas ujuyaquéode jmáinie. Jecute chi uté ojñane udore chajuque cojñone ore agutedie jnese. 21 Mu chi Jesus chejna udojo guesi ga jé u uje chacapója dabi cucoi rĩ enga chajnésarapo yote quedéjnai uechamito uña te rĩ. Mu chi dimane cojñonguemui iji Jesus iquei uje chi ore chirote yui iji yote quedéjnai edúdi. Jecute chi Jesus cháji yote quedéjnai edúdi. 22 Mu chi jnanírique di to uje chi judíode ore eduguéjna cuchape uté iji ore aquiningaméone. Uje chi jnani uté i tu Jáiro nanique. Mu chimo Jesus ga chi jĩrique chichaga dagatáidie aja jnumi iji Jesus iquei. 23 Mu chi jnani tuté chijócha Jesus ajei údi ga chi chósi tome: —Jesus a, ajinama yu aja yiguíjnai jne. Uje qué yutṍri ua ujetiga aquetásiape yababia suaqué gajneri. Ujetiga achaba bajmáinie aja suaté gai ga ejnarei a jnoji gajneri.— 24 Enga chi Jesus jĩrique nóna jnani uté to. Mu jé chopo cojñonguemúrique rĩ, uje chi ore nóna ore to. Jecute chi ore chapédugu Jesus dosadode iji dajei. 25 Mu chi chequéraque déji gáguedaté uaté ore gari to. Uje chi ejnareté uje chi ejnaréngone chi u uje iyode tocade gatuaque. Mu chi diyajmánguipise uaté ejnaréngone uje chi chisa uje chi sequeredie gare iji yirídai iji yui. 26 Mu chi chequé uaté ipeya re ome dejnaréngone udore. Jecute chi tẽra dagúchade ujetiga chicabi jorógui daijnane ga ore pesabu. Mu chi ca toc ujetiga daijnárique chibote uaté ejnaréngone. Uje chi ejnarei cho dabáyode. 27 Uje chi chequé tuaté chudute Jesus ujnoméone ome iquetade cojñocho. Ga jecute chi chaguitóna Jesus to iji daquei uje chi chajo raja cojñonguemui ore ujade aja yui. Enga chi chisa Jesus iguidé iji quigade. 28 Uje chequé uaté pésu dajéode enga chojninga iji dajei: “A yisarase Jesus gotique iguidéraque gajneri ga a jé chiquetárase yu gajneri jõ.” 29 Uje chi chequé tuaté chisa Jesus iguidé ga jĩrique iyoi cha tamuta que. Uje chi chequé chuniname mu íjnoque uaté ejnarei uqué. Ga chi jogadi u uje tijode cho jnangome chequé tuaté. 30 Mu chi jĩrique Jesus chiraja uje chiqueta dajocayasónique ome dajopie. Jecute chi chumuchase re enga chajire cojñonguemui iji daquigade enga chojninga: —¿Uaque gosi chijocase yiguidé que a?— 31 Mu chi Jesus acadigode ore chajnai enga ore chojningame: —Bamo ãrie uje cojñonguemui ga ca toc ujetiga ca pijocayaque ua uje ore chijocase ua aja tijode jnese. ¿Mu jé barúo udore ome baringárique pijocayaque a?— 32 Mu chi jé ca Jesus cha dajocayasṍri uté gosi unerai gotique. Jecute chi chajire dejode gatuaque uje chucué uté gosi. 33 Mu chi chequé tuaté chopise dáyugu re uje todópisa Jesus yui. Enga tãrarapise. Mu chi diga sose Jesus yui enga chichaga dagatáidie aja Jesus iquei. Ga jé u uje chingo dejnarei isocade ome enga chi ca pógu datígome go. 34 Ga chi Jesus chojningame chequé tuaté: —Yababia, jé tiógara uje yiqueta ua que ome banguretigai ome yu. Bo jne mu ca o báyugu ua jne aja baquitique jne.— 35 Mu chi uje cáma Jesus chejna daruode udore guesi mu chi ore eduguéjnai Jáiro irótigo chi ore di. Enga chi ore chojningame Jáiro: —Babia tuaqué e tosi que. Aya atṍri Jesus jne ga yico ga yajníngo to.— 36 Mu chi qué Jesus chajo raja Jáiro iguíjnai yui. Enga chi chojningame Jáiro: —Jáiro a, ca o báyugu ua jne. Mu gusu ujetiga angureta yu.— 37 Mu chi ca Jesus juéga daquigade ome cojñonguemui ore jnese. Chi gusu Jesus angurenone Pédro, Jacóbo, Juan ore uje dejena ore aja daquigade. Enga chi Juan uté u Jacóbo jõrai. 38 Mu chi Jesus ore chise Jáiro iguíjnai mu cojñone chi ore uyuacamicho iji uaté ejode uje chi ore chisa dabade iji ejode. 39 Mu uje chi Jesus chacája Jáiro iguíjnai enga chi chojningame cojñone ore: —¿Gotique gu a uje uacapéso uacachorájnai iji de, uacayuacamini rĩ? Uje disabia suaté que cho ujetiga togape mu qué mongape.— 40 Uje chi cojñone ore chudute Jesus uruode udore ga chi ore cana gai uje chi ore poja uté uruode. Enga chi jogadi u uje chi Jesus chiroque cojñone ore aja guesi. Chi gusu disabia dayé, daté ore uje juéga daquigade ome ore. Jé aja dacadique gadiógode ore to rĩ. Enga udore ore u uje ore nóna aja disabia jogadi uté. 41 Jecute Jesus chi chisa disi togué uaté jmanai ga chi chojningame: —Talíta, cúmi— uje uruode udore qui tu: Disabia, angári yu ga ãriji to jne. 42 Mu chi jĩrique disabia suaté ucuecaringuei chajnísi gai ga chi jĩrique chague ga jĩrique digapo rĩ. Mu chi chajuque cojñone ore agutedie uje Jesus chiqueta disabia suaté. Chi sequeredie gare iji yirídai iji Jesus iquetábia suaté yui. 43 Mu chi jĩrique Jesus chiroque disabia daté ore aja ujetiga ore pésu suaté potique. Mu chi Jesus chopise quique cojñone ore ujetiga jé ca ore tujúa ipesute datei ome togué tuaté uringa piqueta.
1 Mu chi Jesus chejna dapesudode udojo guesi ga chajníja daniri. Enga chi acadigode ore nóna to. 2 Mu chi Jesus chise judíode ore aquiningamei guiguíjna iji dire puyátique enga chi chacate ore iji. Mu chi cojñone ore tijapísa uté acajnaquéode quigode. Jecute ore chojningame ñane: —¿Uté irajatígadatei tṍraji rique ome a? ¿Jé chorási ringome dapesute datéode udore to rĩ a? 3 Cachi Maria, José ore ujnacari u uté ãrie uje poridie irábesõre to. Enga Jacóbo, José, Júdas, Simon ore uyai u uté. Ga uté neronie déji udé to yoquidai, ga yocurása udire ore to.— Jecute chi ore popísaja Jesus uté enga que ore chise acajnaquéode unétique go. 4 Mu chi Jesus chojningame ore: —Yirajágo uje ore edójnari u Dupade uruode atatasónique mu ujetiga tṍraji punire uñeque. Mu jé basa ore urása uté gosi enga que toc ujetiga ore chise acajnaquéode unétique go. Jé isocai tu ome uté jogasúrique to rĩ, uje que ore tangári uté to gotique.— 5 Jecute chi ca Jesus pésu dapesute datérique iji dedai uté. Uje chi Jesus aniri tu gu uje ore popísaja. Mu chi jé chiqueta cojñone uñéngo uje chujé dajmáinie aja ore gáyode. 6 Jecute chi Jesus chopise dáyugu darásade uje chi ca ore changuretapise uringai Dupade utocáite gu. Jecute chi Jesus chijnime re iji udore ore gari, ga chicáji ore idai uté dosadode ujetiga chacate cojñone ore iji. 7 Enga Jesus chi chamáta dacadigode aja dari uje chi gare ore iji yirídai ujetiga chajuguína óraja tijode. Chi gare ore aja ñane aja ore quigode ujetiga ore jno Dupade uruode údi. Enga chisi ome dajopie tome ore to ujetiga ore chiqueta Satanas utocaidode piésoningo ore to. 8 Enga Jesus chi qué cho quique dacadigode ome ore quigode erámio ga chósi tome ore: —Boyo jne ome uacajesúode erámio mu gusu ujetiga ajnáño uacagutadéraque iji uacajmáinie. Ca ajnóchopise uacagúcharique jne rĩ. Jeoga arurécho, jeoga uacapláta. 9 Eduyo uacarídade udore ujetiga déji uaque. Jé chopo uacaguidéraque rĩ ujetiga chojmára mu jé eduyo uaté enga ca ajnáño gárerigui.— 10 Jesus chojningápome ore rĩ: —Ujetiga eso uacapusiétique enga ayáyoji uté jé aja uacacoringárique. 11 Ujetiga uaqueyai tuté ore idai idaisórone ca ore chise uacanétique enga jĩrique boyo iji ore idai uté. Mu ajninguéso jnumi isapídode iji uacarídade aja ore gai. Uje judíode jé yoquijmapié u gu uje yetajopise gosi isocárique. Urẽpise yu ome yuruode udojo: ujetiga cojñone udore ca ore chimesere yirógode uaque ga a ca Dupade ujuyaquei chajire re ome ore dirome. Ga a suépise Dupade ujuyaquei casica gai jne ome Sodóma, Gomórra gosode ore gáyode jne.— 12 Jecute chi Jesus chejna daruode udojo guesi ga jé u uje acadigode ore jno. Enga ore chacate cojñone ujetiga ore chécãre datígo ome Dupade yui. 13 Enga chi ore tṍra Satanas utocaidode aja guesode iji piésorone cojñocho ore to. Enga ore chojnepo acéite rĩ aja cojñoque ejnaretade ore gáyode rĩ. Ga jé u uje ore chiqueta ore iji ore ejnaréngone to. 14 Udojo quigade ga chi ore eduguéjna cuchábi Heródes chudute Jesus ujnomei to ome uringai pitijabate ome cojñonguemúone ore. Jecute chi Heródes chojningame yui: —Chimo joroque re ujetiga yi casica Juan ecápo rĩ iji daringai toque. Uje cachi Jesus uté gotique oidé pujopie peropísiji yi casica ujopie.— 15 Mu chi jogadi jé u to uje chi cojñone botãre ñane ome Jesus. Enga chi uñane chojninga: —Cachi a Dupade uruode atatasṍri jnani bajai casicáite Elías u ãrie uté.— Jé basa uñane chi ore chojninga: —A ujo casodicáite Dupade uruode atatasórone uñeque u uté.— 16 Mu chi Heródes chudute ore uruode udore enga jé u uje chojninga: —A yi casicáite Juan u uté, uje yiroque ore aja ica ga ore chaquesu etabi ica. A jé upúsu uté ga a e ecápo rĩ.— 17 Juan uté chi bade u daquĩraquéode ome Heródes uje chi Heródes pota desai Felipe acoté uje i tu Herodías enga doi enga chijna iji gari. Jecute chi Heródes chachopise Juan aquĩraquéode enga doi ga chisa Juan ga chigaru, ga surápo gai rĩ. 18 Uje chi jecucha Juan chojningame Heródes: —Gajnarenguipise basocai uje bajnose besai Felipe ga bajna acoté iji gari ga bo bacoté iji uaté.— 19 Jecute chi Herodías ajei dotãripísome Juan. Ga ipotigádi upúsu ujetiga chujé joroque Juan. Mu chi ca chiraja dasocáringome uringárique chuque. 20 Uje Heródes chãraque Juan ome gu. Uje chi Juan uté pésu daquiyiringuei ome doidode Dupade urúo, jé upo ome daringai ayoré ate uome uje que piyaque iyoguérique gu. Jecute chi Heródes todópisa enga que juéga ujetiga acoté chujé. Heródes jé irasiguipise Juan acajnaquéode udore, mu chajugapo aguté rĩ enga chopise dáyugu re uje tangári. 21 Mu chi chise piotiguei ome Herodías uaté uje chi ore pésu dajñamítedatérique uje chi Heródes batigai dire u nanique. Jecute pésu uraque dabose uneréjnane. Ga chi chimate ga jé u uje tibidi cojñone ore asutedie iji ore uniri Galiléa údode, jé aja cojñoque atade ore rĩ. 22 Jecute chi Herodías uro chacája ore gari to iji ore agapidi. Enga chi ca chuseque re. Ga chi gapua uaté doi ore ajñamini uje chi chichagu dógorodie iji gatéode iji. Uje chi ore chirase gapua isocade ga jé u uje Heródes chojningame: —Atai bajegaitique cucha iji yu enga a yisi ome ua jne.— 23 Jecute Heródes qué chajo raja dacatecarainé gapu ga chi chósi tome: —Que cho cuchárique go ome yu ujetiga jiei bataitique cucha orérigui marínga, a jé yisi ome ua gajneri. Jeoga bajegáite yuniri ga yajuguína petígome ua jne.— 24 Jecute gapua chi ca chiraja dajegaitique cucha. Ga jé u uje qué chingome daté gaté. Ga chi chojningame daté: —Ité a. Que yiraja yajegaitique iji Heródes jõ.— Mu chi daté jĩrique chajnai uruode ga chi chojningame: —Bo ga atai Juan gatoi uje uté gãrate ore aja yodode nanique.— 25 Mu chi jĩrique gapua chayója ore eduguéjna cuchábi yui rĩ ga chi chojningame: —Yajegaidi u ujetiga aquesu Juan etabi ga ajna gatoi iji pírique ome yu jne. Jé u iji de.— 26 Enga uaté uruode chajuque Heródes aguté. Ga jé u uje chopise dáyugu. Mu chi ujode eduguéjna chi ore chudute uje chajo raja daruode ome gapua que. Jecute chi ca togome ujetiga qué chopo darúrique gai rĩ ome uaté. 27 Jecute chi Heródes jĩrique chiroque darótigaja Juan ujetiga chaquesu etabi. 28 Jecute Heródes iroi tibágui Juan iji uringai pujurúgai. Enga chi chaquesu etabi. Ga chi chijna gatoi iji pírique aja gapua enga chisi ome. Jé basa gapua chisíapome daté rĩ. 29 Mu uje Juan acadigode chudute uté ujnomei to ome uringai chuque ga chi jĩrique ore doi ga ore jno údi ujetiga ore chijochame. 5.000 u 30 Chi chise deréjnai uje Jesus acadigode ore diapo iji rĩ. Chamáñaje ore chejna Jesus utoquéode gu. Ga jé u uje ore chingome dapesudode cucha ome uté. MJé aja ore acajnaquéode quigode rĩ. 31 Jecute chi Jesus chojningame dacadigode: —Boyo iji te ga oyope uacacajnaquéode uja to. Ga ajínañoma yu aja sañeque ujetiga gusúabu yóguiji enga yocope yocujñare to jne.— Uje chi Jesus urúo udojo gu uje cojñone chi ca ore cho dajame uje chi ore tibágui ore gatuaque. Jecute chi ca togome ore ujetiga ore tagu dabotique. 32 Jecute Jesus acadigode chi ore nóna Jesus ga chi ore chacája cucórique jnese enga ore chicai sañeque ujetiga gusúabu ore iji. 33 Mu cojñonguemui chi ore chimo Jesus ore iji ore pi cucoi ajei. Jecute chi ore edojnaringuéo ome Jesus quigade uje ore diguiji yote quedéjnai edúdi. Ga chi bajaque cojñonguemui ore aja Jesus qui uté erãpe. Enga chi udore garanone u ore idáyode jnese. 34 Jecute chi Jesus ore chise dabatigai mu chimo cojñonguemui iji dejode enga chi chosõripise ore. Uje chi ore gajnunie u áyasarigui ome Jesus uje íjnoque ore irodisónique. Ga jé jogadi u uje Jesus chosõre ore ga chacate ore ome Dupade uruode quique dipeséode. 35 Mu chi e guedé jno jecute Jesus acadigode ore sose Jesus yui enga ore chojningame: —E guedé jnopise mu que cojñotique iguíjnarique cuguésõri yoquiyaridi tudé gotique. 36 Jecute a ca toque cucha pibotique uringárique pigáite jne iji de. Be ga aroque cojñone ore aja ore quitígo ujetiga ore chucué dabotígo ome raque iji ore iguíjnane acorásedie iji daté.— 37 Jecute Jesus chajnai ore enga chósi tome ore: —Beyoi ga asíyome ore potígo ome ore.— Mu Jesus acadigode ore chojninga: —Cho jetiga 200 denário déji yoque ãrie ujetiga yicorási cojñonguemui udore ore potígome ore.— 38 Mu chi Jesus chajnápoi ore rĩ enga chojninga: —Ajicho uaquetígo arurécho amíningo.— Jecute chi ore jno ga jĩrique ore chucué. Uje ore chise ga ore chojningame Jesus: —Yocangaráni a, arurégode amirone chejna yijmanai. Jé basa oyídode garósi.— 39 Mu uje Jesus chudute ore uruode udore ga chiroque dacadigode ujetiga ore chingome cojñone gaté enga ore chácariji jnumi iji jnacarai gai iji dáguedaté uásejnanie. 40 Jecute acadigode jĩrique ore doi Jesus uruode quigode uje ore chingome cojñone ore ujetiga ore chamáta raque iji dayaridode ujetiga ore pésu dáguerigui. Jecute chi ore pésu dayoyade ome dáguedie. Enga chi uñane uáguedie chi ore guejnanie 50. Jé basa ga uñane chi 100 ore guejnanie iji dáguedie. 41 Jecute chi Jesus chisa arurégode uje chejna yijmanai. Mu chi jé u uje chajire gaté bajaque enga chacãre Dupade gai ome. Ga chi chajuque arurégode udore aja jnumi. Enga jé u uje chisi ome dacadigode ore enga chojningame ore: —De do jã. Beyoi ga ajuguínaño cojñonguemui ore jnese jne.— Enga isocai jé upo udore ome oyite gáreode rĩ. 42 Jecute chi ore tagu arurégode jé aja oyídode rĩ enga chi cojñonguemui ore chĩreta dacadie jnese. 43 Enga chi ore chejna chagúi guesi enga ore chamáta daquebéode. Ga chi ore chĩreta doradie ijnacojoi iji daquebéode enga chi gare iji yirídai ore ĩretadie. 44 Enga chi arurégode, oyídode udore ore gunórone chi 5.000,1u jnanione. 45 Uje Jesus ore chejna udojo guesi ga Jesus chiroque dacadigode aja ore idai uje i tu Betsáida, uje déji yote quedéjnai uechamito. Jecute ore pi tu cucoi aja. Mu chi Jesus qué naseque ujetiga catecarámi cojñonguemui ore bajaque ujetiga chejna ore aja doi. 46 Enga jé u uje chimate ore aja doi jnese ga quigade ga cheru cucarani ga gusúji ujetiga catecarámi Dupade iji uté ójo. 47 Mu chi e dejágome Jesus acadigode iji yote quedéjnai gatocoro. Mu chi Jesus qué déji jnumi. 48 Jesus chi chimo dacadigode ore iji yote quedéjnai ajei, uje chi ca togome ore ujetiga ore ijocayai cuco caputáji daquitique uje chi emi chorei ore iji quedéjnane gu. Mu chi direjnipe ga Jesus tibágui dacadigode uje chi diguiji yodi gai aja ore yui. Mu chopise ujetiga carubíji ore dosadi. 49 Mu Jesus acadigode ore chimo Jesus uje diguiji yodi gai. Mu chi ca ore chiraja gotique. Jecute chi ore cho dicoré iji uté. Enga jé u uje ore chisa dabade iji uté jmáinie uje chajuque ore agutedie. 50 Uje chi Jesus acadigode ore chimo Jesus jnese. Jecute chi chajuguipise ore agutedie jnese rĩ. Jecute chi jĩrique Jesus catecã́ri ore iji quedéjnai enga chi chojninga: —Ca uacagutéraque cho jora ome yu jne. Jesus jé upúsu yu gu.— 51 Jecute chi jĩrique Jesus cheru ore pi cuco to. Ga chi jé jogadi tu uje úyujna cho parágome ore. Mu que Jesus acadigode chiraja daru quitique ome uté gu ome ipesudode udore ome ore. 52 Ore pañáji Jesus ipesute datéode ome ore poti casodé arurécho diríca, mu a qué Jesus acadigode udore ore áyipiedie cho quiyiguiyi gu. Jecute Jesus chajuque ore agutedie uje diguiji yodi gai enga pésu emi ujetiga cho parágome ore. 53 Uje ore chijocásapo dabi cuco rĩ ga ore chaquesu yote quedéjnai enga chi ore chise ore uniri uje i tu Genesaret. Ga chi ore chigaru dabi cuco iji yote quedéjnai edo gai iji te. 54 Mu chi Jesus ore doi jnumi iji dabi cuco mu chi jĩrique cojñone chiraja uje Jesus u. 55 Jecute chi cojñone udore ore jno enga ore chayo iji darásade yúode ujetiga ore chijna darása ejnaretade aja Jesus. Jecute ore tṍraji dajñarenie ome Jesus uje ore chijnoque darása ejnaretade iji ore mochápiode aja jogadi uté. 56 Chi ca cojñone chimoque Jesus quitique ome doidode daguiose ejnaretácho iji ore píode ore idáyo. Uje chi ore chijna darása ejnaretade aja Jesus quigade uje chi Jesus chise ore idáyode, jé aja acorásedie ore iji ore idáyode dosadode rĩ. Enga chi ore nejepúsu Jesus údode ujetiga juégabá daguidé eruénique ga ejnaretade ore chisa. Enga ejnaretade udore jnese uje ore chisa Jesus iguidé eruéode ga jogadi u uje chiqueta ore jnese.
1 Udojo quigade ga chi fariséode uñéngo díji Jesus, jé aja Moises urusarane atatasóningo uñéngo to. Uje chi ore garani tu ore idaidatei Jerusalen. 2 Mu chi udore ore poja Jesus acadigode uje chi ore chimo uje ore tagu dabosode mu que ore doi judíode ore jmapié gotique ujetiga ore churu dajmáinie bajaque. Jecute ore chopise ore iyoguei iji. 3 Uje chi fariséode qué ore oidé u ore dayode jnani bajaque ore jmapié. Uje chi ca ore chimoque ujetiga ore churu dajmáinie ga jiépisi enga quene jogadi u ujetiga quene ore taque. 4 Uje ore doi cuchade iji oredie iguíjnane jogadode enga chi ore chajni aja daguíjnane ga que ore chijna re iji gotique mu jĩrique ore oidé u ore dayode jmapié. Enga ore churu dajmáinie, dagaidode cucha gatuaque enga quene jogadi u uje ore tagu dabosode. Mu que gusu ore jmáinie gotique mu jé ore chuságaja dagapíode cucha ore jnese, damochápiode ore to rĩ uje ore churu gáyode. 5 Jecute fariséode, jé aja Moises uruode atatasórone ore catecã́ri Jesus enga chi ore chojninga: —¿Gotique gu a uje que bacadigode ore chijna yocayode jnani bajaque ore jmapiedie to a, ujetiga ore taque ga ore churupise dajmáinie gatuaque to a?— 6 Mu chi Jesus chajnai ore arecujáidie ga chi chósi tome ore: —Jé ũrepise jnani bajai Isaías, Dupade uruode atatasṍri, ome darusarane quigode nanique. Enga ojningane u uaque uje ãrapataquechoqui uaque. Uje Isaías churúsãre Dupade uruode nanique uje Dupade chojninga: Cojñone udore que iyieque ore icotaquéode ome yu. Mu cachi garãte ore pijnanone. Uje idájapise ore áyipiedie iji yu. 7 Enga que cuchárique tõrapísiji ore icotaquéode ome yu. Chamáñaje ore chedu dojode ayoré ore acajnaquéode gu. Jecute que ore jmapiedie udire garani uyu gotique. 8 Jecute Jesus chiboráta ore uruode enga chojningame udore ore: —Que piraque uaque uje uacayáyo Dupade ojningane cucha. Mu qué uacaboyo yocayode jnani bajaque ore jmapiedie údi uje uacarúyo cucha pagapíode gáyode jnese. Enga qué uacaboyo ore jmapiedie uñanie ore jnese údi to rĩ. Mu uacoyo uaquedobója Dupade uruode.— 9 Enga chi Jesus chojningápome ore rĩ: —Yiraja uaque uje qué uacaboyo jnani bajade ore josipiedie údi. Mu uacoyo uaquedobója Dupade uruode. 10 Uje chi jnani bajai Moises cho quique Dupade urúrigo ome ore to nanique uje chi chojninga: “Añuchopúsu uacayode, uacatedie ore guio.” Mu chojningápo rĩ: “Mu gosi ujetiga cho darúja dánique jeoga datéraque ga beyoi uté gosi ga ajéyo ga eruenínique.” 11 Mu uhuaque, uacojnichome uacayode jeoga uacatedie ore: “E que yátapo cuchárigaja uaque rĩ gu uje e yẽrapácho yugúchade jnese ome Dupade.” 12 Enga chiese e que uacajnécho uacagúchade gotique uje e uaquẽrapácho ome Dupade. Enga isocai tu uté ujetiga e que ajicho uacayode yúrique ome uacagúchade udore. 13 Que gusu uté mu uacapéso cucha ponáyone uñane to rĩ uje jé chopise udore. Jecute uacoyo cucha bisidégome Dupade uru quigode. Mu uacabeyoi jnani bajade ore acajnaquéode. Uje que pacajnaquéode udore garani u Dupade gotique, mu jiei garanone ome uaque. Uje garanone jé u ayoréode uaque iji de jnumi.— 14 Jesus e tibidápoi cojñonguemui ore to rĩ ga chacadápo ore rĩ. Enga chojninga: —Ujetiga uacuñéngo angoninguitígo guesa enga a uaque u ujetiga arajáyo yacajnaquéode quigode gajneri. 15 Cucha pibotique ujetiga ayorérique tagu ga a ca pésu uté gosi iyoguérique gotique. Jé basa páyipie gajnarénguenie uje tṍraji uté gosi ajei ga udire u uje pésu uté gosi iyoñaringuei. 16 Ujetiga arajáyo yacajnaquéode udojo quigode ga beyoi ga ajnáño to.— 17 Mu Jesus chi chejna daruode udore guesi ome cojñonguemui enga ore chicáji daquigode. Mu jé basa ga Jesus acadigode ore nóna Jesus aja guiguíjnai ajei. Ga chi ore chojningame Jesus: —Yocacadisṍri a, ope bacajnaquéso quígome yoque.— 18 Jecute Jesus chajnai ore enga chojninga: —Yo yáyugu uje uacoyo cojñone uje que arajáyo yacajnaquéode quitique to go. Mu qui tu uje cucha pibotique ujetiga yajo que toc ujetiga pésu yoquiyoñaringuérique. 19 Que cho ujetiga cucha pibotique chacája yocuñeque áyipieraque go. Gusu uje chacája yoquica, mu jĩrique jno ga yuchígoja. Jecute que toc ujetiga cucha pibotique pésu yoquiyoñaringuérique gotique.— Jesus uru quicho udojo gu uje chi cucha pibosode ueracho jnese. 20 Jesus chojningápo rĩ: —Mu jé basa ga cuchade uje tṍraji ayorérigo áyipiedie ga udore u uje pésu ore iyoñaringuéone. 21 Yirajágo uje jnanione ore ate gajnaréngone garanone u ore áyipie gajnarénguenie. Yojningane u isagocade, ipotiguerenie ore. Jé aja udore ore uje que ore áyipie jnoji dojórique ayoré ome uringárique chuque. 22 Jé aja ayoré oriechoquíode rĩ. Jé aja udore ore uje ore ipotiguéode déji ome cucha quedéjnane. Jé aja páyipie gajnarénguenie ipesungórone ore. Jé aja aringácachoquíode ore rĩ. Jé aja udore ore uje que ore chañurupúsu deo gotique. Jé aja udore ore uje ore charatáyime cuchade ome dojode ayoréo. Jé aja dacate ijnimisórone ore, jé aja udore ore uje dicotarechoquípise ore. Jé aja udore uje que ore áyipieraque cus. 23 Udore ore jnese ore ate gajnaréngone suéji ore áyipiedie enga uje tocade ga jé u uje pésu ore iyoñaringuéone.— 24 Mu chi Jesus chejna dacajnaquéode guesi iji uté ga jé u uje chicáji ore idáyode Tíro, Sidon yúode. Enga Jesus pusi cojñotique iguíjnarique iji uté. Mu chi Jesus ajéode u ujetiga ca cojñotique ore chiraja uté jogatique. Mu que toc ujetiga pógu re uje ujnomei chubu erámi údode jnese gu. 25 Mu chi jĩrique chequéraque chudute Jesus ujnomei to. Jecute chi tibágui Jesus gu ome dataque uje chi Satanas utocaidode uñeque déji uaté ajei. Ga chichaga dagatáidie aja jnumi tiji iquei. 26 Mu chi jé ca Jesus urása judéa chequé uaté to go. Mu chi unejangue enga chi uniri i tu Síria, enga uaté idai i tu Fenícia. Mu jé u uje chutai Jesus ujetiga chiquetape ababia iji Satanas utocaidode jmáinie. 27 Mu chi Jesus chojningame chequé: —Baraja uje yocabode gajneque cucha pibosode udore ujetiga ore taque bajaque. Enga que pisoca go ujetiga póite cucha pibotíguiji disírique gari ga pisi ome tamocórique.— 28 Mu chi qué chequé uaté chajo raja daruode ga chojningame: —Jesus a, jé ũrepise ua ome baruode. ¿Mu jé ũré yu a? uje bojningane udore tamoco ore gajnenie u disi chagúrique abejnanie iji agapiéraque útique. Jecute qué yijócha bajei údi ujetiga bebi yutoquei ga aquetásiape yababia suaqué.— 29 Jecute Jesus chajnai enga chojningame: —Que potigáya ua ome banguretaretigai ome yu. Jecute e yijnime Satanas utocaidi iji babia uaté údode que. Bo ga ajni to jne aja babia.— 30 Jecute chi chequé chajníja daguíjnai. Mu chi jĩrique chimo dabia uje chi cho paráguiji damochápi. Enga chi Satanas utocaidi e jnoji. Jecute chisápo daringa disi ijõre rĩ. 31 Udojo quigade ga Jesus jnoji ore idai Tíro yúode. Enga chicáji ore idai uje i tu Sidon. Uje chejna Sidon guesi ga jé u uje chicáji Decápolis uje ore idáyode udore chi chejna yijmanáyone uje chi ore déji yote quedéjnai edúdi uje i tu Galiléa. 32 Jecute chi cojñone iji uté chi ore di darásai údi iji Jesus. Uje chi angoneparique enga chi uru taratagapo rĩ. Jecute chi ore chojningame Jesus: —Qué yijóchago bajei údi ujetiga achaba bajmáinie aja uté gai ga aquetape jne.— 33 Jecute chi Jesus doi cojñoque angonepari ga chi chijna aja guesi iji cojñonguemui ajei. Jecute chi na dajmáinie aja angoninguinone. Enga jé doi ga chutĩ́raja dajmanai ga jé u uje chajni cojñoi uté arei. 34 Jecute chi jĩrique Jesus chajire gaté ga chi jé jogadi u uje chijnime dajñari. Ga chi chojninga: —¡Efáta!— Uje urui qui tu gu ujetiga angoninguinone chuchẽre dabáyode. 35 Jecute chi jĩrique uté chudute darade. Enga chijocásapo darei te rĩ uje chi narare ga ueradipíso uruode jnese. 36 Mu chi Jesus cho ore quique ujetiga ca ore chingongarámaja erámi. Mu chi ca ore doi uruode gotique. Uje chi ore tujúa gaté iquetai tuté cojñoque. 37 Jecute chi cojñone ore jnese tijapísa Jesus ipesute datéode udore. Uje chi ore chojningame ñane: —Picotaguipise Jesus uje que cucha ibiratique cus ome uté. Uje chuchẽre angoninguite parigode ore angoninguinone gáyode. Enga ore chudúdapo darade to rĩ. Pesapo uru taratágode ore uruode ga uerachópo to rĩ.— 4.000 guejnanie
1 Chi cojñonguemúrique ore chamáta ñane aja Jesus ejode iji dirode udore. Mu chi íjnonguipise ore posode. Ga Jesus cho dáyugu ore. Jecute tibidi dacadigode ore. 2 Enga chojningame ore: —Yosõripise cojñonguemui uje e ore guejnane dire gadioque iji yocari. Enga a e íjnonguipise ore potígo. 3 Enga que togome yu ujetiga yiroque ore aja ore iguíjnane. Chamáñaje yiraja uje que ore tagu dabotique gu enga uñéngo a ore chorase sere ome dayaguhéode iji dajei. Uje uñane ore iguíjnane idajapise iji yoque.— 4 Mu Jesus acadigode chajnai ga ore chósi tome: —¿Jé yocorase rique ome cojñonguemui ore ujetiga yisíngome ore potígo ome? Uje que cojñotique cuguésõri yoquiyaridi udé ujetiga yicorási arurétigo iji uñeque.— 5 Mu chi Jesus chajnai dacadigode enga chojninga: —¿A ca arurétique déji uacuñeque a?— Mu chi ore chojninga: —Uñane déji enga gare iji ti yijmanuñai.— 6 Jecute chi Jesus chingome cojñonguemui ore ujetiga ore chácariji jnumi. Ga jé u uje chisa arureque gare iji tíode. Ga catecã́ri Dupade ujetiga chacãre gai. Ga jé jogadi u uje chajugája jnumi. Ga chisi ome dacadigode ujetiga ore chajuguína aja cojñonguemui ore jnese. Enga jĩrique acadigode ore doi Jesus uruode. 7 Mu chi jé isocai tu ome oyítigo uje chi déji mu garósi. Ga chi doi ga catecã́ri Dupade bajaque. Ga jé u uje chisi ome dacadigode ujetiga ore chajuguína cojñonguemui ore to. 8 Jecute cojñonguemui ore tagu ga chi ore chĩreta dacadie jnese. Mu chi uje ore cha ga Jesus acadigode chi ore chamáta ore iquebéode iji. Ga chi ore ĩretadie gare iji ti yijmanuñai iji ore oradie ijnacojoi. 9 Arurégode udore gunórone chi ore guejnanie chi ore déji 4.000. Udojo quigade enga Jesus chiroque ore aja doi ujetiga ore chajniapo aja daguíjnane rĩ. 10 Uje Jesus chi chejna cojñonguemui ore aja doi ga jé u uje nóna dacadigode ore aja cucoi ajei. Uje chi ore qui tu ore uniri uje i tu Dalmanúta. 11 Enga chi fariséode uñéngo chi ore yore Jesus gai uje chi qué ore botãre. Uje chi ore ajegaidi tu ujetiga Jesus chetingarape re ome ore, enga pesabu dapesute datérique ome ore ujetiga toramíji gaté ome ore. Chi ore ipotigádi u ujetiga ore chimópise ome dedodie ga jé urásu ujetiga chiese ore changuretarase uté to. 12 Mu chi jé jogadi u uje Jesus chijnime dajñari ga chi chejnápise daguesi ome udore ore. Enga chi chojninga: —Gajnarenguipise uje que panguretigárique déji cojñoque disi ejode udore ajénique. Mu ore ucuegode u yipesute datérigo ome ore ujetiga ore chimópise. Jé ũrepise yu ome yuruode udojo: uje a ca pujuregate pipesute datérique ome udore gotique ujetiga ore chimope.— 13 Mu chi jé u uje Jesus noñome fariséode ore iji te jmete. Ga Jesus ore chacája cucoi ujetiga ore chicáji yote quedéjnai uechamito uña. 14 Mu chi Jesus jorane ore chicadígui ujetiga ore chijnoque dabotígo aja daqui uté. Mu chi ore jnutique arurétique chojmára iji cucoi ajei. 15 Enga Jesus chi catecã́ri dacadigode ujetiga cho ore quique. Enga chojninga: —Angachopísi yu jne enga ca ajocáso arurégode bisidi jne uje fariséode, Heródes ore agúromei u uté.— 16 Jecute chi Jesus acadigode catecã́ri ñane enga ore chojninga: —A Jesus aniri u gu uje yicadíjoi arurégode que.— 17 Mu chi Jesus e chiraja uje acadigode que ore chibote uru quigode uje chacãra fariséode, Heródes ore jmapié gajnarénguenie aja arurégode bisidode. Jecute chi chojningame ore: —¿Jé gotique gu a uje que uacáyipieraque jnoji arurégode uje chi acadíchoi que? ¿Gotique gu a uje uaquejnáño deréjnane iji yari múñi cáma abócho yacajnaquéode udore quitique? A ca ajnusináño to uje jecucha yacãra yacajnaquéode aja cuchade múñi. Ise ga etoguipise uacáyipiedie jõ. 18 ¿A ca amóño ome uaquedodie a? ¿Jé ca aduchopo ome uacangoninguinone rĩ a? ¿A ca uacáyipieraque déji yipesute datei casodé a? 19 Uacamóño diríca uje yajuguína arurégode ome cojñonguemui ore diríca. Uje arurégode chejna yijmanai diríca. Jé basa ga jnanione 5.000 u ore diríca. ¿Mu jé cho rique uacãretárigui iji ore orárigui ijnacojoi diríca iji ore iquebéode udore diríca ya?— Mu acadigode ore chojningame: —Cachi gare iji yirídai diríca ãrie.— 20 Enga Jesus qué jno daruode údi ome ore gaté ga chojninga: —Uacamóñopo to diríca rĩ ãrie uje yajuguína arurégode ome cojñonguemúone uñane diríca rĩ. Uje arurégode gare iji ti diríca iji yijmanuñai. Jé basa ga jnanione 4.000 u ore diríca. ¿Jé cho rique uacãretárigui iji ore orárigui ijnac ojo ica iji ore iquebéode a?— Enga ore chojningame: —Cachi gare iji ti yijmanuñai diríca ãrie.— 21 Enga chi jé u uje Jesus chojningame ore: —A cáma ajnicho yacajnaquéode ãrírique jõ.— 22 Mu chi Jesus chejna udojo guesi iji cucoi ajei ga chi chise daqui uje chi ore idai Betsáida u. Mu chi jĩrique cojñone ore chijna cojñoque edoparitígaja Jesus. Enga chi ore chijócha Jesus ajei údi ujetiga chiquetape uté. 23 Jecute chi Jesus chisa edopari uté jmanai enga chi jno údi aja ore idai eruei. Mu chi jé jogadi u uje chutĩ́raja dajmáinie ga chajo aja cojñoque edopari edodie, enga jé u uje chujé dajmáinie aja cojñoque edopari uté gai. Mu chi Jesus catecã́ri jnani tuté enga chojninga: —¿Ga jé amo cuchárigo a?— 24 Mu chi edopari chajire dejode ga chojningame Jesus: —Yimo jnanione uje ore dique. Mu ore gajnunie u poridie ome yu.— 25 Jecute Jesus dopoi dasocai tuqué ome rĩ. Uje chujé dajmáinie aja edodie gáyode que. Jecute chi jĩrique edodie cho jnaque ga chi jĩrique niji ga chimópise cuchade to rĩ. 26 Jecute chi Jesus chiroque daquetai jnani edopari aja iguíjnai. Mu chi cho quique bajaque enga chojninga: —Jé ca acája idai ujetiga angongara yu aja erámi. Mu bo ga o carúja baguíjnarique jne.— 27 Uje Jesus chejna udojo guesi ga nóna dacadigode aja ore idai Cesaréa acorásedie uje déji ore uniri Felípo. Enga chi jé catecã́ri ore iji dajei. Uje chi chojninga: —¿Cojñonguemúiso jé ore cho ringome yu que a? ¿Jé uyu gosi ome ore que a?— 28 Jecute Jesus acadigode ore chajnai ga ore chojninga: —Que ore chiraja ua gosi go. Jecute uñane chaguhéta Juan ucácasica babai uje uté gãrate ore aja yodode nanique. Jé basa ga uñane ga ore chaguhéta Elías aja babai uje chiese u ua. Mu uñane ga ore chojninga: “A jnani baja cásodicaite Dupade uruode atatasṍri cásodicaite a uña uté.”— 29 Mu chi Jesus catecã́ri ore ome re rĩ enga chojninga: —¿Jé oyo ringome yu to a? ¿Ujetiga uyu gosi to a ome uaque?— Mu chi Pédro jĩrique chajnai ga chojningame: —Cachi que piraque ua ãrie, uje Dupade utocaidi Crísto u ua.— 30 Mu Jesus chaquĩ́ra ore enga chojninga: —Jé ũrepise ua, Pédro a, mu ca angongachoba yu aja erámi jne.— 31 Jecute Jesus cho dacadigode quique ome dagachodi yui. Enga chojningame ore: —A Dupade utocaidi uyu a yejnarenguipísi joroque ore josipiérigui jne ome yu. Ga yetesṍredatéode upúsu judíode ore angaránone jne, jé aja Moises uruode atatasórone ore to rĩ, jé aja sacerdóteode ore angaránone ore rĩ. Udojo a ore imanique yu aja jnumi dirome. Mu a chise dire gadiótigo iji yigachodi quigade ga jé u ujetiga yiquecápo rĩ iji yuringárique toque.— 32 Enga chi Jesus uruode choqui guesode ome acadigode. Jecute chi Pédro jno Jesus údi aja ore eruénique. Enga chaquĩ́ra ome darai. 33 Mu chi Jesus chiguísãre dacadigode ore gai iji daquigade. Enga chi chojningame Pédro: —Pédro a, ca amere yu iji uje Satanas angúrome ua gu. Uje baruode udore garani u Satanas. Uje boidedie u jnanione ore áyipie gajnarénguenie mu que ajnime Dupade áyipiedie ãrírique go.— 34 Uje chejna daruode udore guesi enga chi Jesus tibidi cojñone ore ga jé chatapója dacadigode ore rĩ enga chi cho ore quique jnese. Enga chojninga: —Ujetiga uacuñeque pota nóna yu to enga uacuñeque jĩrique cha cucha ponáyone unerane ome re. Mu dimane uaque gosi ome gadoi ujetiga cho daba yadode. 35 Mu uaque gosi ujeta chagutu rome yadode ome daringárique pumajo jne, ga a uté gosi chachia re jne. Mu uté gosi ujetiga tẽra rome datatagode yacho, ga a piquetai tu uté gosi jne. 36 A ca cuchárique tõrapísiji ayorérique ujetiga chimo dajegaidode cucha iji erámi údode jnese, mu quigade enga uté gosi chachia re jne ome Dupade idai. 37 Ujetiga uté gosi chachia re ga e que toque ujetiga qué dopoi oréraque ome dacuecaringuérique rĩ. Ujetiga jiérasi ingómenie ome Dupade múñi, e que chise doréraque gotique. 38 Mu ujetiga gosi chajéngome Dupade utocaidi uyu, jeoga chajéngome yacajnaquéode iji daquitígo erámio iji cojñoque ate gajnaréngone ore ujade enga a jé yijna uté gosi jmapié ome jne. Enga a yajéngome uté gosi to jne iji yiríringarique, ujetiga obiréjna Yapade ingoningájnai iji yu ujetiga Yapade irógode gaté minórone ore cháta rágaja yu to jne aja de jnumi.—
1 Jesus chi chojningápo rĩ: —Jé ũrepise yu ome yuruode udojo quigode ome uacuñéngo uje uacagúsoi yari iji de. Uje a ca uacuñéngo chimo pitoringáringo ome raque to jne mu udore gosode a jé ore chuságaja deréjnai jne ujetiga ore pañáji Dupa pujnuéngaisṍri uringai eduguéjna cuchape. Enga cucha datepise cucha dacadode udore ome ore jne.— 2 Mu chi díningo chojmára iji ti iji udore quigade ga Jesus jno ga chicáji cucarãtique ójoraque uje chi idájai iji jnumi. Mu chi gusu Pédro, Jacóbo, Juan ore uje Jesus dejena ore aja daquigade. Mu uje chi ore chimate rágaja cucarani uté ójo mu chi Jesus tocade ome dajorane udore ore. 3 Mu chi Jesus iguidedie naganatapise uje chi póroropisi gu. Ujetiga ayorérique doi enga chejna joroque daguesi ome daruguérigui daguidei a ca toc ujetiga sué uté iguidedie gai ome uringáringui póroropisi. 4 Mu chi ore chunina mu chi jnani bajade Elías, Moises chi ore chiqueta raja ore to. Enga ore pañapísiji uje Jesus ore catecã́ri ñane. 5 Jecute chi Pédro catecã́ri Jesus ga chi chojningame: —Yocacadisṍri a, jé areguipise uje dimane uyóguiji yoquiyaridi tudé. Enga a yipéco uacaguíjna gadiótigo jne. Jé bajneque uñai. Jé basa a Elías gajneque uñai. Jé basa Moises a gajneque uñeque jne.— 6 Uje chi ca Pédro chirajapise daru quitique ome Jesus gu jecute chi uru bisidécho udore uje chi cucha dacadode udore chajuguipise Jesus acadigode ore agutedie jnese gu. 7 Jecute ore chunina mu gue abujáraque chaco ore gai. Mu chi jĩrique ore chudute darárigo uje chi tṍraji gue abuja uaté. Uje chi darade udore chi chósi tome ore: —Yedójnari yape uté. Beyoi uté jne enga angachopísi to jne.— 8 Mu chi ore chejna udore guesi ga ore chajire darosadode mu chi ca ayoré uñeque dépisi. Mu ore imoi u Jesus enga gusúpusu iji dayaridi uté. 9 Mu chi jé u uje ore doi jnumi iji deruti uté cucarãte. Mu chi Jesus cho quique ore aja dajei ujetiga cáma udore uñeque tujuaba ore imone udore cucha. Mu chi chojningame ore: —Mu ujetiga Dupade utocaidi uyu diga yĩrijiapo jne rĩ iji yitoringárique ga a jogadi tu jne ujetiga angongacho uacamone cucha udore aja erámone jne.— 10 Jecute chi ore pogupúsu cucha dacadode udore enga que ore tujúa go. Mu chi ca ore chijnime Jesus uru quigode uñéngo ãrírique go uje chi chĩ́care darijíningarique iji daringárique toque. Jecute chi ore catecã́ri jorógui ñane ome uruode udore quitígo. 11 Jecute chi udore ore chingome Jesus: —¿Gotique gu uje Moises urusarane atatasórone ore ojningai tupúsu jnani bajai Elías uje chi di bajaque ome yoquijnati Dupade utocaidi?— 12 Enga chi Jesus chajnai ore enga chi chojninga: —Jé ũrepise ore uje Elías u bajátique jne ome Dupade utocaidi Crísto . Mu uté a ipesute cucha dacadode aja uringáringo ueracho jne ome Dupade utocaidi Crísto yui. Mu ore urusarane Dupade urúo uñane déji to ome Dupade utocaidi Crísto to. Uje ore urusarane udore quigode u ujetiga chi dequetéquedate Dupade utocaidi Crísto jne, uje a chejnáreque joroque jne dajnetígo pujuyaquéo. 13 Mu qué yingopísome uaque uje uacojningai tuté Elías e di ica. Mu ducañerájma uté iji ore jmáinie ica. Jecute ore urusarane Dupade urúo quigode jé upúsu ome ore isocade udore uje tocade ome Elías suté.— 14 Cucha dacadode udojo quigade ga jé u uje Jesus, jorane ore chajni dacadigode uñane ore gai. Mu chi ore chimo cojñonguemúrique iji udore ore ejode. Enga chi Moises urusarane atatasóningo ore déji ore ujade to uje chi qué udore ore botãre Jesus acadigode ore to. 15 Mu cojñonguemui chunina mu ore chimo Jesus iji te enga chi jé u uje ore chayóji uté yui ujetiga ore chachai iji garani. 16 Mu chi Jesus chise ore ga chojningame ore: —¿Jé uacabotaquéode gajnengónique cucha gotique que a?— 17 Mu chi cojñonguemui udore uñeque chi chajnai Jesus uruode ga chi chojningame: —Yocacadisṍri a, qué yibágui ua ome yabi to que. Uje Satanas utocaidode uñeque pésu ga chejna uté uruode. 18 Uje Satanas utocaidi uté jecucha chinguíra yabi uté aja jnumone iji yoquiquigode erámio jnese. Uje qué déji jnumone ga ebié tṍraji uté pijnani jecute chigasapo damatarane to rĩ. Jecute yabi uté que ujñapéguiji jmáinie. E yutṍri bacadigode ujetiga ore chijócãre Satanas utocaidi iji yabi uté que mu que ore chibote go.— 19 Mu chi Jesus chajnai uté ga chojningame ore: —Yidojnongapísaja uaque uje a ca uacanguretigárique cuse. ¿Chimo joroquerase re díningo ujetiga qué yugúsiji uacari iji de ome uacaringane ayoré angoneparicho? Boyo ga beyoi disi tuté ga ajnáño aja ne.— 20 Jecute chi jĩrique ore doi Jesus uruode ga ore chijna disi uté aja. Mu Satanas utocaidi chimo Jesus enga jé u uje chinguíra disi tuté aja jnumi. Jecute chi tṍra raja quedéjnane iji jnumi enga chi jĩrique ebié tõrapóji pijnani rĩ. 21 Mu chi Jesus catecã́ri disi uté dai enga chi chojningame: —¿Jé cho rique disi uté ejnaréngone guejnatígo deréjna uje ejnarei chisa ica ya?— Mu chi disi dayé chojninga: —Jĩrique chisasi nanique iji uringámi parátagape. 22 Mu que gusu uje Satanas utocaidi uté chinguíra yabi aja jnumone. Mu jecucha tṍraja piogode to, jé aja yodode rĩ. Uje ipotigádi u gu ujetiga chujépise. Jecute yijócha bajei údi ujetiga bajopie déji ome cuchade udore ga osõrape yoque ga átape yabi uté aja uyoque ga aquetape.— 23 Mu chi Jesus chojningame jnani tuté: —Que cucha ibiratique cuse ome uaque gosi ujetiga uacuñeque changureta yu. ¿Ga panguretigárique déji ua ome uyu a?— 24 Jecute chi disi dayé chinguíra dabijnani aja Jesus enga chi chojningame: —Yangureta ua, mu átabaja yu ga ajnerame yanguretigai gaté jne.— 25 Uje chi Jesus chimo cojñone ore uje chi ore yore aja ore ejode enga jé u uje Jesus dosója Satanas utocaidi uté enga chi chojningame: —Satanas utocaidi uhua ya, uje bapesute disabi suté uringai darájma. Bapesapo enga angoneparigápo uté rĩ. Mu yo yurúja ua ujetiga be guesi iji disi uté. Enga ca ajniapója uté gai jne rĩ ujetiga apésu disi tuté juredie.— 26 Jecute chi Satanas utocaidi uté chisa dabade iji disi ajei. Jecute chi chinguirapo disi aja jnumi rĩ enga jé u uje noñome iji te. Enga chi disi ca ujñapéguiji jmáinie. Mu chi cojñonguemui chi ore josipis eti disi e toguipise. 27 Mu chi Jesus doi disi ga chisa jmanai enga chiringáraja gaté. Mu chi disi uté jĩrique etóguiji gaté. 28 Udojo quigade ga chi Jesus acadigode ore chacája guiguíjnarique. Mu uje chi gusu ore ga jé u uje acadigode ore catecã́ri Jesus ga chi ore chojningame: —¿Chimo joroque gotique que uje que yijnico Satanas utocaidi tuqué ãrírique que ujetiga yijnicóji isangóri disi uté que?— 29 Mu chi Jesus chajnai dacadigode ga chi chósi tome ore: —Jé tiógarapísa uje que ajnicho Satanas utocaidi tuqué ãrírique que. Gusu uje yijnico gu uje jõrai tu yoquicatecãraitigade ome Dupade uje yoco yocuyágome uté.— 30 Jecute chi ore jnoji dayaridi uté ga ore chicáji ore uniri uje i tu Galiléa. Mu que Jesus potapísa go ujetiga pirajaque iji ore uniri uté. 31 Uje chi Jesus áyipie quigode u gu ujetiga gusúabu acadigode ujetiga qué chacadape ore iji dirode udore. Uje chi acajnaquéode quigode u uje Dupade utocaidi Crísto gajnei tu ujetiga pẽrate ome umajosórone jnani udore ore jne. Ga gajnei tupo rĩ ujetiga ore chimánaja jnutique jne ome uringárique chuque. Mu jé gajnei tupo rĩ ujetiga chise dire gadiótigo iji udojo quigade enga uringárique niriji jé u iji dóderaque ga jé u ujetiga ecápo rĩ. 32 Mu chi ca udore uñeque déji ujetiga chijnime Jesus acajnaquéode udore ãrírique. Chi ca ore chajo rágaja Jesus go ujetiga cho quique dacajnaquéode. Uje chi ore chagutúpusu rome Jesus yui gu. 33 Jecute chi ore jno ga ore chise ore idai uje i tu Capernaum. Mu chi uje ore déji dapusiétique guiguíjna ga jé u uje Jesus catecã́ri dacadigode ga chi chojningame ore: —¿Jé uacabotaquéode gajnengónique que a iji dajei tuqué?— 34 Mu chi ca ore chiraja daru quitígome Jesus go. Uje chi ore chiraja gu uje ore ibotaquéode gajnengórone jé u ore que ome ibijoguipítiguiji ore que. 35 Jecute chi Jesus chácariji dayaritique ga jé u uje tibidi dacadigode uje gare ore iji yirídai enga chi chojningame ore: —Ujetiga uacuñeque pota rome daringárique ibijoque, ga pisoca omi tu ujetiga uté gosi doi ga chopise ejo iji re ome cuchade. Mu jé jõrai tu ujetiga osongaquérigo déji ome dojórigo ayoréo ore jnese.— 36 Mu chi Jesus chejna daruode udojo guesi ga jé u uje chi doi disatique ga chicháji disi tuté aja ore gatocoro. Enga chi chigaru disi tuté pajei aja re ga catecã́ri ore. Enga chojninga: 37 —Ujetiga uacuñeque ca chuseque disírique uté gajnúrique, ga cho ujetiga uté gosi chijna yunerai ome disi suté, enga jé imoi tupo rĩ ujetiga uté gosi ca chuseque yu to. Uté gosi ujetiga ca chise yunerotiguérique mu que gusu yu go uje irasique yu, mu irasi tupo yirósõri Yai uté to rĩ.— 38 Mu chi Juan catecã́ri Jesus ga chi chósi tome: —Yocacadisṍri a, yimóngo jnanione uñai diríca uje chijna bei tome Satanas utocaidode uje tṍra ore aja guesode iji ore isangórone diríca. Mu que cho jetiga yoquĩjora uté ga yetajopise ome. Jecute yarájome uté diríca.— 39 Mu chi Jesus chajnai ore ga chósi tome ore: —Ca ãrácho cuchade udore ome cojñotique uté gajnúrique. Ujetiga uté gosi chijna yijmapié ome dapesute cucha datérique enga a ca toc ujetiga dopoi rĩ enga urúrique chamáña ome yu. 40 Mu que piraque udore gotique uje que ore chetaque yoquisocárique gu. Jecute ore ajegaidi tu ujetiga ore cháta rágaja yoque to. 41 Jé ũré yu ome yuruode udore: ujetiga gosi chijna yijmapié ome dosongaquérigo ome Crísto uyu yanguresónique, jeoga gosi guẽratique yote marínga, mu a jé Dupade tẽrája uté gosi jne ome icaniratiguei tuté ome uaque.— 42 Jesus qué chacate ore enga chojninga: —Ujetiga uacuñeque chijna yanguresoramone uñatígaja pisijnaringuéringo mu cucha arei a jé urásu ujetiga pisaque uté gosi, ga pigarique cucarané cuchabéraque aja uté gosi etabi, ga nóna cucarané cuchabe uaté aja yote quedéjnai údi. Uje pujuyaquei uté jé chajire re ome uté gosi. Jé basa Dupade ujuyaquei chi ca chajirirase re ome uté gosi jne. 43 Ujetiga bajmanai óite ua aja pisijnaringuéone ga bo ga aquesu jnaque. Uje cucha areguipísi tu ujetiga corocorõ ua aja bacuecaringué ichai, mu jé ca ese gajño pioi ome bajmanai gáreode. Uje que togome ayorérique ujetiga pajnique pioi uté iji deréjnane jnese. 44 Iji pogadi uté ga chi ore gunórone jupucha ca toji to go iji deréjnane. Enga chi jé isocai tu to ome pioi uje chi ca ocarataque toi gotique. 45 Ga a isocai jé u to ome barídarique rĩ ujetiga chorei ua iji pisijnaringuéone ga jĩrique aquesu jnac. Uje cucha areguipísi a jé u ujetiga corocorõ ua aja bacuecaringué ichai uté, mu jé ca ese gajño pioi ome barídade udore jnese. Chamáñaje a ca toc ujetiga pajnique pioi tiji uté. 46 Pogadi uté ga chi ore gunórone jupucha ca toji to go iji deréjnane. Enga chi jé isocai tu to ome pioi uje chi ca ocarataque toi gotique. 47 Jé isocai tu to ome bedo ujetiga óite ua aja pisijnaringuéone, be uaté ga jĩrique ajnime. Uje cucha omi tu ujetiga ese bacuecaringué ichai ome bedo chojmaráraque, mu jé ca ducarãte ua aja gajño pioi ome bedo gáredie udire. 48 Pogadi uté ga chi ore gunórone jupucha ca toji to go iji deréjnane jnese. Enga chi jé isocai tu to ome pioi uje chi ca ocarataque toi gotique. 49 Enga dimane pioi iji uté ome pisijnaringuéone ipesungórone ore jnese. Adi tu uje echoi dimane ome cucha arione uje gosi chibore ome dabotique. 50 Uacamóño to uje echoi ueradipise ome yoque jnese. Mu ujetiga chise danéningai eruénique ga jé u uje que cuchárique tõrapóji uté rĩ uje derocopise. Jecute ajusópise uaqueo ujetiga ca pejnaque uacanéningai uté. Mu ejnáñopise uágaja pajesereringane ome ñane.—
1 Jesus chi chijnime re iji ore idai tuté uje i tu Capernaum, ga jé u uje chi qui tu ore uniri Judéa. Mu uje chi chise Judéa uté ga jé u uje chicáji tie Jordan uechamito iji guedé garani. Mu chi jĩrique cojñonguemui ore yore gai. Ga chi jĩrique doi dasocabei uje chi chacate udore ore. 2 Jecute chi fariséode uñéngo ore sose Jesus yui ga ore catecã́ri ujetiga pujuregate ome ayorérique ujetiga cha dacotéraque. Mu chi ore ucuei upúsu ujetiga cho paraque enga jé u ujetiga ore chise bárique cucha. 3 Mu chi Jesus chajnai ore ga chósi tome ore: —¿Ga jé ca arajáyo Moises acajnaquéode quigode ome udore a?— 4 Mu chi jé basa ore chajnai gaté. Enga chi ore chojningame: —Moises uté urusarane quigode u: ujetiga ayorérique pota piyátigome dacotéraque, ga uté gosi doi ga chutai dangaránone ore urusãratígo. Ga jé u uje chi uté gosi chisi ome ore urusarane udore ome dacoté ga jé u uje pijógome uringa piyagué.— 5 Mu jé basa ga Jesus chajnai ore ga chi chósi tome ore: —Moises uté juéga cucha dacadode udore ome uaque nanique uje chiraja gu uje que toc ujetiga pajnique uágome uacáyipiedie udire. 6 Mu uje Dupade pésu cuchade jnese iji taningápisi ga áyipie quigode u nanique ujetiga jnanírique, chequéraque ca ore cho jmíti jmíti ome ñane. Uje Dupade uruode chósi te: “Dupade pésu jnani nanique ga pesapo chequé rĩ.” 7 Dupade uruode uñane dépoji rĩ uje chósi te: “Jecute a ayorérique chirame dánique, datéraque ore jne ga uté gosi jno enga jõra a upúsu dacoté aja tijórigo jne. 8 Mu udore a gajnui tu ujetiga e que garapo jnani, chequé ore to gotique, mu e ore noña ga chopise ujetiga e chojmára ore ome ñane.” 9 Jecute a gajnareque ujetiga jnanione ore chejñu cuchárique uje e Dupade óite ore aja ñane que.— 10 Uje chi e ore dépoji dapusiédi guiguíjna enga Jesus acadigode ore catecãrápoi rĩ ome cuchade udore quitígo. 11 Jecute chi Jesus chajnai ore enga chojningame ore: —Udore quigode u ãrie: ujetiga ayorérique cha dacotéraque ga chisapo dacoté uñáraque rĩ, jé u uje uté gosi chimate dasijnaringuéone ome dacoté dayagué bajé tuaqué. 12 Mu jé isocai upome chequéraque rĩ. Ujetiga uaté goto cha damanique enga dopoi ga chisapo ujórique jnani rĩ, jecute uaté chimate dasijnaringuéone to ome dayai tuté dabai bajai.— 13 Mu chi udore quigade enga chi cojñone chi ore chijna disírigo aja Jesus to ujetiga chisasíape ore to. Mu chi Jesus acadigode ore tagu dejode ome udore ore dayode ore. 14 Mu uje Jesus chudute dacadigode ore uruode ga ájningaripísome udore ore. Ga chi chojningame ore: —Ca ãrácho yejode ome disabode sudore ore. Ca amecho ore iji ome gadoi. Uje Dupade uringárique pibi gajnúone u disabode sudore uje ore gajnenguipise daringane Dupade urásapiso to gu. 15 Jé ũrepise yuruode udore ome uaque: ujetiga ca uacuñeque chosi disatique ome darasitigai ome Dupade yui ujetiga chopise deduguéjnai iji enga a ca toque jne ujetiga chise daringai Dupade urása.— 16 Uje Jesus chejna daruode udore guesi enga jé u uje chisasi disabode ore iji gaté enga changacarósi sudore ore uje chi chujé dajmáinie aja ore gáyode. 17 Mu uje Jesus e chóji gaté ome daringárique do, mu chi jnanírique chimo uté ga chayo iji uté iquei. Uje chi chise ga chi jé u uje chichaga dagatáidie iji Jesus iquei. Enga chi chojningame: —Pacadisṍri a. Ate omío u ua. ¿Jé yorási ringome ujetiga yise yucuecaringué eyúgojmarique to a?— 18 Mu chi Jesus chajnai uté ga chi chojninga: —¿Gotique gu a uje babidi yu ga bẽ́care ate omi taja yu a? Uje que ate onique déji ayorérique, uje gusu Dupade uje ate uomi tu. 19 A e arajapise Moises urusarane quigode uje isocai tu de: “Be ga ca angáraja chequé quedéjnaraque. Ca bajénique déji chutique ome bojórique ayoré. Ca apota poriquérique ome bojórique ayoré ugúcharique. Ca o barapatáringa ome bojórique ayoré. Ca ãrápo bojórique ayoré rĩ. Be ga angaripísi bayé, baté ore.”— 20 Mu chi jnacari uté chajnai Jesus ga chósi tome: —Yocacadisṍri a, yimate cuchade udore jnese iji yuringai disi jé aja deréjnai tudé.— 21 Jesus chi chajire cojñoi uté mu jé u uje chosõripise ome uru quigode udore. Ga jé u uje chojningame: —Cucha amiri chojmárapise ome ua ujetiga be ga apésu uté. Be ga be bagúchade udore enga ẽra jnese jne. Ga asi ome orérigui ome cojñoque jmatágode ore jne. Ga a jé u ujetiga Dupade tẽrája ua ome bacaniratiguei tuté iji gaté, ujetiga ese baringárique ataque jne iji gaté. Mu ujetiga e amate bacaniratiguérigo ome jmatágode ore enga bo ga ca acusu ua ome yiquigade jne.— 22 Mu chi jnacari tuté chudute dajnéone udore Jesus urúo ga jé u uje chi jno mu chopise dáyugu re ga chi jnusiétaguipise aja daqui. Chamáñaje chi chiraja daringai cojñoque ugucharanguipise gu. 23 Jecute chi Jesus chajire dacadigode iji darosadode ga chi chojningame udore ore: —Piraguipísome cojñoque ugucharane ore ujetiga ore chise daringane Dupade urása to.— 24 Mu chi Jesus uruode udore chajuque acadigode agutedie jnese. Mu chi Jesus qué chajo raja daruode ga chi chósi tome ore: —Yacadigode uaque a, cucha ibiraguipise tu ome ayoré ugucharane ore ujetiga ore chise daringáringo Dupade urása to jne. Chamáñaje udore ore anguretigai chejna raja cutejmane dagúcha udore gu. 25 Uacarajáyo uje que toc ome cuchiso cuchátique ujetiga chacája ojnatique edóraque. Ga jé adi tu ome cojñoque atátique to ujetiga chacája Dupade idai. Jé ore cho ñane ome daringane cucha ibiracho gu.— 26 Mu chi Jesus acadigode chudute uruode ga jé u uje ore chopise dáyugu raque ga chi ore catecã́ri ñane enga chi ore chojningame ñane: —¿Chimo joroque daquitique ujetiga piquetaque uyoc uñeque?— 27 Mu chi Jesus chajire dacadigode ga chósi tome ore: —Que toc ujetiga jnanírique doi ga chiqueta re. Mu que cuchárique piragome Dupade gotique. Jecute uté u ujetiga chiqueta uacuñeque jne.— 28 Jecute chi Pédro chojningame: —Yocangaráni a, e yijíñongome yocugúchade jnese diríca ujetiga yijínango ua aja tijode.— 29 - 30 Jecute Jesus chajnai ore ga chósi tome ore: —Jé ũrepise yu uje a uacuñéngo noñome dajnetígo cucha ujetiga jno yujnomei údi mu a Dupade tẽrája uté gosi gaté jne ome iñomone udore dagúcha. Jeoga iguíjnarique u. Jeoga joráringo ore u. Jeoga joráringui ore u. Jeoga uté dayé u, jeoga daté, jeoga abío, jeoga gajnepite jnupe. Mu uaque gosi ca cha dangoroné ome dañomone udore cucha. Uje Dupade a chatire uaque gosi gai iji erámi tudé jne enga guẽrapáitigo suépise uaque gosi iñomone udore cucha gáyode. Mu uje qué uacagúsoi yiroquéode gai ga a uacajnécho uacaringáringo pumajo to jne. Mu diga eso erãpe ichai uté to dirome enga jé u jne ujetiga amácho uágaja pucuecaringué eyúgojmai.— 31 Mu Jesus qué jno doquigode cucha údi ga chósi tome ore: —A cojñoque uásejnaringo déji ujetiga ore cho ibijóguiji raque iji jnumi udé. Jé basa ga a ca ore pijoque to jne iji Dupade idai. Mu jé basa ga uásejnapise ore to uje ayoré gajnareque ore iji jnumi udé mu a ore chise daringáringo ibijócho jne iji Dupade idai.— 32 Mu chise diri uñeque ga chi ore jno ga ore chicai ore idaidatei uje i tu Jerusalen. Mu chi Jesus acadigode ore chijñaque dacadisṍri. Mu chi Jesus acadigode ore chopise dáyugu raque aja dajei, jecute chi ore agutupúsu raque ome cucha dacadode iji ore iquei. Mu chi Jesus tibidi dacadigode uje gare ore iji yirídai enga chingopo cucha dacadode ome ore rĩ uje a cuchade udore tocade ome ore dirome iji ore qui tuté. 33 Enga Jesus chojningame ore: —Uacarajáyo uje e yico ome Jerusalen yui. Mu ujetiga diga yiríngo jne enga a pẽrate Dupade utocaidi uyu ome sacerdóteode ore asutedie jne, jé aja Moises urusarane atatasórone ore rĩ. Mu a udore ore guẽrate yu ome chutique dirome. Enga a ore teráma yu ome deduguéjna purása quedéjnaringo to jne rĩ. 34 Mu purása quedéjnane udore a ca ore chimo dedore dipógueragome yu dirome. Uje a ore chujñieta yu, enga a ore chujé yúdode, enga a ore chutĩ́raja yedodie. Mu udojo quigade dirome ga yigachodi tu jne ujetiga ore chimate yu aja jnumi. Mu a chise dire gadiótigo iji yigachodi quigade ga a jé u jne ujetiga yĩrijiapo jne rĩ iji yuringárique toque.— 35 Mu chi quigade ga Zebedéo ujnacarode Jacóbo, Juan ore chi ore sose Jesus yui ga chi ore chojningame: —Yocacadisṍri a, qué yijóchago bajei údi ujetiga bebi yocutoquérique jne.— 36 Mu chi Jesus chajnai ore ga chi chojninga: —¿Jé gotique uacajegaitique ujetiga yipésu ome uaque a?— 37 Mu chi ore chajnai Jesus ga chi ore chósi tome: —Be ga ajuéga barosadode ome uyoque jne ujetiga ese baringai eduguéjna cuchape. Yocuñeque a gajné u bãrachua jne. Jé basa yocuñai gajné u barasé.— 38 Mu Jesus chajnai ore ga chojninga: —Mu a ca uacáyipieraque déji uacataquéode udore cucha gotique. ¿Ga jé acasõrási yajnéone udore pocaninga dirome ome yuringárique ducañerájma? Uje yajnéone udore, cojñone ujuyaquéo, gajnui tu cucha otate unerótique dirome ome yu.— 39 Jecute chi ore chajnai Jesus ga ore chojningame: —Jé ũrepise yoque uje yicacopísi udore yui.— Jecute Jesus chojningame ore: —A jé ũrepise uágome uacacasitigade udore. Ujetiga a jé eso to jne uacaringáringo ducañerájma uje a gajnui tu cucha otate unerótique jne ome uaque. 40 Mu que yajnei tu gotique ujetiga yujuéga yãrachua, jeoga yarasé ome uacuñeque. Chamáñaje Dupade e chimate dáyipiedie ome udore gajnesórone gu. Enga udore a ore gajneque yirosadode jne, ujetiga ore chácariji.— 41 Mu chi Jesus acadique uñane uje ore chejna yijmanáyone ore chudute udore ga chi jé u uje ore ajéode chamañapise ome dajorane Jacóbo, Juan ore. 42 Mu chi Jesus tibidi ore ga cho ore quique ga chósi tome ore: —Uacarajáyo uje eduguéjane ore cho ñane iji erámone údode ome dajosipiedie. Uje ore sué darásade uacabáyode iji uacanirone. 43 Mu ca ajnáño udore ore jmapiedie udire ome ñane to go. Mu jé basa ga uacuñeque pota daringárique ibijoque ga ca uaque gosi chajirape dei ome cuchárique mu uaque gosi doi ga chátaja cuchade aja dojórique ayoréo gatuac. 44 Mu ujetiga uaque gosi pota daringárique dajorane angarãte mu ca uté gosi áyipie déji daringárique ibijoque mu uté gosi doi enga chope dajorane iróguiji re gatuaque. 45 Uacamóño uje jé chuságaja Dupade utocaidipísi uyu. Uje que yise erámi udé gu ujetiga yo yijosipié ome uaque mu yigaidi tu ujetiga yo uacaróguiji yu iji yoquiquitígo erámio. Mu yigaidi tupo rĩ ujetiga yẽra yu ome erámi unirisórone uaque ga a jiépisi yimanitígo uaque jne aja uacaringáringo piquetaque.— 46 Udojo quigade ga Jesus ore chise ore idai Jerico. Mu uje chi Jesus jnopóji ore idai uté enga acadigode, cojñonguemui ore nóna. Mu chi ore chise cojñoque edoparitique iji ore idai eruei uje chi i u Bartiméo. Uje chi Timéo ujnacari u. Mu chi charidébeque dajere edúdi uje chi utaidébeque cojñone iji uté gatuaque. 47 Mu chi jnani edopari uté chudute Nazaret gosi Jesus ujnomei uje chicáji yui ga jé u uje jnani edopari jĩrique tibite Jesus gai. Enga chi chojningame: —Jesus a. Yoqueduguéjna jnani bajai David ujniegaté a u ua ya. Jecute be ga ajnama bosongaquérique ome yu jne a.— 48 Mu chi ca ore chise cojñoque edopari unétique ome pijnane udore. Jecute chi ore ipojnaquéode tṍraji dajñarenie ome uté ujetiga cho paraque. Mu chi jnani tuté tibite gaté. Uje chi ca tangári ore gotique enga chi chojninga: —David ujniegaté ua ya. Osõrape yu jne.— 49 Mu chi Jesus chudute uté uruode ga chi jé u uje base ga chi chojninga: —Beyoi ga abichoi uté.— Jecute chi ore tibidi jnani edopari uté ga chi ore chojningame: —Ayague ga o bedojnaringué ome uté yui. Jé areque gu uje e tibidi ua.— 50 Jecute chi jnani edopari chi jĩrique tṍra daguidé damamito aja jnumi enga chi jĩrique chague jmame ga chi sose Jesus yui. 51 Jecute chi Jesus catecã́ri enga chojninga: —¿Jé bajegaitique ujetiga yipésu ome ua?— Mu chi jnani edopari chojninga: —Ore acadisṍri a, cachi yajegaidi u ujetiga achẽre yedodie gáyode ga yimópo yajiritígo to rĩ.— 52 Mu chi Jesus chojningame: —Bo jne, chamáñaje bangureta yu gu, jecute yiqueta ua.— Jesus urúo udojo ga jé u uje cojñoque edopari chi jĩrique chimo dajirigode to rĩ. Enga chi nóna Jesus aja dajei to.
1 Uje Jesus, acadigode ore chirõre Jerusalen enga chi ore chise idayatígo uje ore íode u Betfagé aja Betánia ore. Mu chi idayabode sudore idogosipísiji cucarani uje i tu Olívos. Ga chi jé u uje Jesus catecã́ri dacadique gáreode. 2 Ga chi chojningame ore: —Boyo jne enga acayóji ore idayabi suté jne. Mu ujetiga eso burica quedéjnarique to jne ujetiga gachisónique chigaru enga ejñúño jne enga ajnáño aja yu jne. Uje a cáma piyaripi burica quedéjnai uté to ome ayorérique. 3 Mu ujetiga uñeque catecã́ri uágome burica quedéjnarique gajneri ujetiga chojninga: “¿Gotique gu a uje uacajnáño?” Mu achajnáñoi uté gajneri ga ojnichome jne: “Yoquirósõri potapísa gu, mu a jĩrique chatirépo uacabai jne rĩ.”— 4 Jecute chi ore doi Jesus uruode ga ore jno ga ore chise burica quedéjnai uje chi gachisṍri chigaru que iji daguíjnai piagoi. Mu chi jogadi u dajere edúdi. Jecute chi jĩrique ore doi enga ore chejñu. 5 Mu chi uñéngo déji uté to ga chi jĩrique ore chajire udore ga chi jĩrique ore chojningame ore: —¿Uacapesutique a? ¿Gotique gu a uje uaquejñúño burica quedéjnai uté a?— 6 Mu chi udore ore chingo Jesus áyipiedie ome ore ga chi jĩrique ore juéga doi ome ore ujetiga ore chijna. 7 Ga chi jé u uje ore jno údi aja Jesus, burica quedéjnai uté. Mu chi ore di údi iji Jesus ga ore pésu charipi iji daguidedie enga jé u uje Jesus chujé raja uté gai. 8 Mu chi jiépisi cojñone uje chi ore nínapísa Jesus yui. Ga ore chejñu daguidedie ga ore chĩtéraja daguidedie aja Jesus iquéode ujetiga burica quedéjnai diguiji gáyode. Jé basa uñane chi ore chaquesu ijnacojodie enga ore chicha Jesus iquéode iji dajei to. 9 Mu udore ore uje ore déji Jesus iquei iji dajei, jé aja quigaminórone ore rĩ chi ore tibidája dajei ga chi ore pijnane chósi te: —Peduguéjna cuchape uté e. Dupade edopi tu uté enga utocaidipísi upo rĩ ome uyóguiji udé jnumi. 10 Pitijabate opejãre uté enga uringárique yoqueduguéjna e puja yui ujetiga chimate raja. Enga a jé dopísi yocai jnani bajai David jmapiedie jne ome yoque. Beyoi ga yejnángo yógaja ujetiga yicotágo Dupade ome udore yui.— 11 Jé u uje Jesus chimate raja Jerusalen uje chacája. Ga quítequiguijí Dupade iguíjna cuchábi to rĩ. Mu chi Jesus chajmita cuchade aja quigode jnese iji uté. Mu chi quigade enga jno ga nóna dacadigode aja daqui aja ore idai Betánia. Chamáñaje chi e guedé jnopise gu. 12 Mu chi chise dire gatérique uje chi Jesus ore jnoji ore idai uje i u Betánia. Mu chi Jesus ore déji dajei mu chi chaguhénique chejna iji dajei. 13 Jecute chi Jesus chajire daquei mu chimo ore aca pore iji ta uje poria uaté i u higuéra . Jecute chi jĩrique jno ga tibágui poria uaté ujetiga tagúrasu áraque. Mu chi chise mu chi íjnoque adie. Chi acarãque uécho iji poria uaté. Uje chi cáma deréjnane u gu ujetiga poria uaté chaquesu re. 14 Mu chi jé jogadi tu uje Jesus cho darúja poria uaté ga chi chojningame: —A ca esápo baringárique arẽ́ to jne rĩ ujetiga ayorérique chise ua ga tagúrasu báraque.— Mu chi Jesus acadigode ore chudute uruode quigode udore jnese. 15 Mu chi Jesus ore chajnesarapo Jerusalen rĩ ga chi jé u uje Jesus chacája Dupade iguíjna cuchábi. Mu chi jé u uje chimo cojñone iji Dupade iguíjna cuchábi uté. Mu qué ore tẽra cuchade iji. Jé basa uñane chi ore doi oredie ome cuchade uñane ome daplátadie. Mu chi jé jogadi u uje Jesus socárome ore ga chi chijócãre ore aja guesode. Ga chi chéngame pláta quedéjnanie gaisóningo ore agapiedie to. Ga chi chátapoja cucujnadatéode ore guẽrasóningo ore charipíode to rĩ uje chéngame ore to. 16 Enga Jesus chojningame cojñonguemui ore: —Ca acayopója Dupade iguíjna cuchábi udé rĩ ome uacajnutígo udore uacagúcha.— 17 Enga chi Jesus chacate ore ga chósi tome udore ore: —Ore urusarane Dupade uruode déji uje quigode chósi te: “A yiguíjna cuchábi udé chise daringárique ibijoque jne ome ducunirone jnese ujetiga ore gajneque ujetiga ore catecã́ri Dupade iji ajei.” Mu oriechoquíode uaque, uacoyo uacacoyapídi iji Dupade iguíjna cuchábi udé, uje uacaráño uacojode ayoréo iji udé ome cuchade oredie udire.— 18 Mu chi sacerdóteode, ore eduguéjnane, jé aja Moises urusarane atatasórone ore rĩ chi uje ore chudute Jesus uruode udore ga ore chucué dasoca ujetiga ore chimate Jesus aja jnumi ome uringárique chuque. Chamáñaje ore todo gu ujetiga cojñonguemui ore chejna rángaja acajnaquéode. Uje chi cojñonguemui ore irasique uté acajnaquéode ga ore tijapísa to quigode. 19 Mu chi dejai chise ore iji te ga jé u uje Jesus chijnime re iji ore idai uté. 20 Chi chise dire gatérique mu Jesus, acadigode ore chisápo urugaidé casé pore rĩ iji duraséraque. Mu chi poria uaté higuéra topísi ga jé chuságaja erode rĩ. 21 Jecute chi Pédro jĩrique jnusinapísa Jesus uru casodé enga chi chojningame: —Yocacadisṍri a, barugaidé casé higuéra e topísi.— 22 Mu chi Jesus chajnai uté uruode ga chojninga: —Beyoi ga anguretáyopise Dupade to.— 23 Enga chi chojningápome ore rĩ: —Jé ũrepise yu ome yuruode udojo quigode: ujetiga uacuñeque chojningárasa ome cucarãte cuchátique: “Be ga écãre bajogatíguiji bajogadi uté ga bo ga ṍra ua aja yote quedéjnarique,” mu qui tu ujetiga ca uaque gosi áyipieraque cho quiyiguiyi ome uté mu chejnápise raja danguretigade enga a jé jogadi u ujetiga uté gosi uruode tocade. 24 Jecute yuruode quigode jé u udore ome uaque jnese: cuchade jnese ujetiga atayoi Dupade enga ca ayáyo uacangoroné ome. Mu ejnañopise uágaja uacanguretigárigo ome uté yui, ga a jé u jne ujetiga pisi ome cuchárique uté ome uaque gosi. 25 Mu ujetiga qué uacagúsoi uacacatecãraitigade udore gai mu uacuñeque jnusina detétigarigome dojórique ayoré ga jĩrique uaque gosi doi enga chiramurase detétigade udore iji dajei. Ga a jé Dupade chijna uaque gosi jmapié jne enga chĩro uaque gosi isijnaringuéone to. 26 Mu jé basa ujetiga uaque gosi ca chiramurase detétigarigo iji dajei ome dojórique ayoré ga a jé Dupade isocai u uté jne ome uaque gosi. Ga a ca chĩro uaque gosi isijnaringuéone to jne.— 27 Mu chi Jesus ore chajnesarapo ore idai Jerusalen rĩ. Mu chi Jesus qué chisõre iji Dupade iguíjna cuchábi ajei enga chi sacerdóteode eduguéjnane, jé aja Moises urusarane atatasórone ore, jé aja judíode angaránone uñéngo rĩ, chi ore sose Jesus yui ga chi ore catecã́ri. 28 Enga chi ore chojningame: —¿Jé uñeque juegabate cuchade udore ome ua ya ujetiga apésu cuchade aja quigode iji udé a? ¿Jé gosi guẽrate baringai eduguéjna ome ua ya, uje bapésu cuchade udore a?— 29 Mu Jesus qué chajnai ore ga chojninga: —Jé cho yu uje a qué yipesabu uacajnetígo yurúo to jne ujetiga jé arajáyo quitígo gajneri. Ujetiga diga achajnáñoi yu gajneri ga a jé jogadi u jne ujetiga yingo yipesudode udore guẽrasṍri jne ome uaque. 30 ¿Jé gosi iroquei ome Juan nanique ujetiga tṍra cojñone aja yodode a? ¿Ga Dupade u nanique a, jeoga ujórique jnani u uje irógaja? Beyoi ga jĩrique achajnáñoi yu.— 31 Mu chi ore botãre ñane enga ore chucué jorógui daru quicho ome uruode udore yui. Enga ore chojningame ñane: —Ujetiga yojnijome uté: “Dupade iroque Juan uté nanique.” Ga a jé basa enga chojninga gajneri: “Jé ¿gotique gu a uje a ca anguretáyo uté to nanique?” 32 Mu que togome yoque to ujetiga yojnijo: “Jnanírique a iroque uté aja.”— Chamáñaje chi ore agutu rágome cojñonguemui. Uje chi cojñonguemui ore changuretapise Juan uté acajnaquéode udore gu uje chi garani upúsu Dupade. 33 Jecute chi ore chojningame Jesus: —Que yirajágo gosi ujetiga iroque Juan uté.— Mu chi jé basa Jesus chojningame ore: —Jé cho yu, a jé yijna uacajmapié to ga a ca yingome uaque jne yipesudode udore guẽrasṍri.—
1 Jecute chi Jesus chacate ore gaté mu chacãra dacajnaquéode ome cuchade. Enga chi chósi tome ore: —Jnani déji nanique uje chaca dacadie úvai iji dajuyaquéode ajei. Mu chi jé u uje pésu guiguíjnarique ome dacadie udire ujetiga chijose úva udire adie iji ajei. Jecute chi pesapo cototé gajnúraque rĩ ujetiga chicha irodisóningo aja enga ore chajire udire ejode. Mu chi quigade ga jnani uté chajuguína dajnepídi uté aja darógode uñéngo ujetiga ore chajire dajnepítigo guejnai tuté yúode. Mu ujetiga diga ore na acárigui árigui ga ore chajuguína oredie ome ñane, jé aja ore irósõri to uje gajnei úvadie udire. Ga jé u uje chi uté jnome daquitique ome pachamite quedéjnarique. 2 Mu uje chi e chise deréjnane ujetiga ore na ore acadie udire adie, ga jé u uje cojñoi tuté chiroque darótique aja dejnai irodisórone ore ujetiga chutai dajnepídi iji oredie udire. 3 Mu chi cojñoi guejnai irodisórone ore chisa uté iroi aja ore. Ga chi ore chujépise údode. Ga jé u uje ore chirógaja doi rĩ. Enga chi ca ore chisi ome cucharigome uté gotique. Jecute chi chedo dajmáinie aja daqui. 4 Mu ore guejnai uté gajnengóri chirogapo daroque gatérigaja ore iji te rĩ. Mu chi ore doi uté ga ore chimitare údode ome cucaranenie. Jecute chi ore chimate uté gatoi údode. Enga chi ca ore chimo dedore dipógueraguiji uté. 5 Mu jnumi gajnengóri uté chirogapo uñéngaja ore gaté rĩ. Mu chi ore chimate uté aja jnumi uje ore chujé. Mu jecute chi doi ga chiroque daroque jiéode aja ore. Mu chi ore chujé uñane údode, mu jé basa ga ore chimate uñane aja jnumone. 6 Mu chi uté chejnápise darógode ore aja ore yui. Ga chi gusu jnani uté abi iji gari uje chijnorapise. Mu chucué dáyipie ga chojninga iji dajei: “Yiabi yabi ga yirógaja ore gajneri. Socase udore ore ajéngome yabi uté gajneri.” 7 Mu uje chi jnanione udore ore chimo uté ujnacari ga ore chingo dáyipiedie ome ñane ga chi ore chojninga: “Uté a jé basa ga gajnepite dayé gajnei tudé jnupe jne.” Jecute ore chojningápome ñane rĩ: “Boyo ga yicoi ga yujégo. Ga noña ga a jé yocajneque jnumi udé jne.” 8 Jecute chi ore doi jnacari tuté ga ore chujé ga ore chimánaja jnumi. Ga chi ore doi ga ore churugúsiji guesi iji dayé gajnepídi tuté jnupe.— 9 Mu uje chi Jesus chejna daruode guesi ga jé u uje catecã́ri ore enga chojningame ore: —A yingomome uaque jne jnumi uté gajnengóri uté isocáringome daroque áyipie eyúgode udore. Uje a jĩrique doi udore ore ga jé basa ga chejnápiserase ore. Mu a jé basa chucué uñéngo ujetiga chicha ore aja ore charidode ujetiga ore susipise jnumi tuté guio.— 10 Chi Jesus chojningame ore: —Ga jé ca arajáyo a, jnani bajade ore urusarane quigode iji Dupade uruode uje chojninga: Guiguijna cuchábi ipesungórone ore guetegue cucarané noña enga dequedójnariejna. 11 Dupade chicháji dagoningai gu. Jé cachi cucha pitijate datéode u udojo ome yoque. 12 Jecute chi judíode angaránone chi ore chucuepísi dasocáringome Jesus ome uringárique pisaque. Chi ore chirajapise gu uje Jesus chacãra dacajnaquéode aja cuchade ga chopise ore adode. Mu chi ca togome ore uje ore todo cojñonguemui gu uje chi ore cháta rágaja Jesus jnese. Mu chi ca ore adésu dayaridode iji ore ejode enga chi jĩrique ore jnome daquitígo. 13 Udojo quigade ga chi fariséode, jé aja Heródes uáguedie ore chayója ñane ujetiga ore cháta rágaja ñane ome Jesus. Enga diga udore uñéngo tibágui Jesus ujetiga ore tangári uruode quitígo enga jé u ujetiga ore chise bárique ome uru gajnarétigo quitígo. 14 Mu chi diga ore chise Jesus ga ore catecã́ri ome daringaquéode ga ore chósi tome: —Pacadisṍri a, yirajagópise uje jé ũrepise ua ome bacajnaquéode udore Dupade acho. Enga que angaripísi bajnéone cojñone ore uru gajnarécho ome ua gotique. Jeoga ayoré gajnareque yocuñeque, jeoga ayoré ataque yocuñeque, mu que ajuque yocajei gotique. Jecute yicatecãcoi ua ujetiga qué ope yoquiquique. ¿Ga jé cucha uome a ujetiga judíode yoco yocoré ome Róma gosode ore eduguéjnai a? ¿Yoco yocoré jeoga ca yoco yocoré a?— 15 Mu chi jĩrique Jesus chiraja udore ore áyipie gajnarénguenie udire quigode ome re. Jecute chi chojningame ore: —Yiraja uaque uje uacagaidi u ujetiga ca yijnime uacaruode udore ãrírique. Mu boyo ga beyosi uacaplátataque enga yajirape. Ga jé yimo enga jé u ujetiga yijnime yáyipiedie ome uaque.— 16 Jecute chi jĩrique ore dosi daplátataque enga ore chisísi ome Jesus. Mu Jesus chi chajire ore oidé pláta uaté ga jé u uje chojningame udore ore: —¿Jé uñeque edoi udáji iji plátabia sudaque a? ¿Jé gosi i uje ore churúsãre iji údi a?— Mu chi ore chojningame: —Róma gosode ore yoqueduguéjnai edodie u, jé aja i.— 17 Jecute chi Jesus chojningame ore: —Que piraque quigode gotique. Asíñome Róma gosode eduguéjnai gajnenie ome. Jé basa asíñome Dupade gajnenie ome Dupade.— Mu chi ore tijapísa Jesus uru quigode udore ome ore. 18 Mu chi cuchade udojo quigade ga saducéode ore tibágui Jesus to. Uje jecucha ore urúbecho uje chi ore chojninga: “Ca toque ome ayorérique ujetiga nijiápo iji daringárique toque rĩ iji dóderaque.” Mu chi ore gaidi tu ujetiga ca Jesus chijnime ore uruode ãrírique. Jecute ore catecã́ri to. 19 Enga ore chósi tome: —Pacadisṍri a, cachi Moises jnani baja casicáite noñome darusarane iji yocari nanique ãrie. Ga quigode chósi te: ujetiga jnanírique toi mu noñome dacotéraque iji guesi, mu ujetiga cáma atique cuse, ga jé basa ga jnani uté jõrárique chojiapo iji gari rĩ. Uje chi áyipie quigode u gu ujetiga basaja dãjorai toi tuté charidi. Enga socase atígo tṍraji chequé uaté. 20 Jesus a, yóbisi tome ua jne. Ujetiga jnanírique déji ujetiga joráringo ore gare iji ti yijmanuñai. Mu bajai a chojirásiji chequé uaté gari mu cáma atique tṍraji. Mu toi jnani. 21 Mu jé isocai tu ome ejoi. Uje a chojirásiji chequé tuaté gari to mu jĩrique toi to. Mu que noñome datíguiji gari. Mu udore ore isocade u ome udore ore jõrárique uñeque rĩ. 22 Jecute diga jnacarode udore ore chejna rángaja chequé tuaté uje ore choji gari. Mu chi ca uñeque noñome datique iji uaté gari uje ore toi jnese. Mu udojo quigade ga chequé uaté torási to. 23 Jecute angome quitígome yoque. Yocuruode qui tu udé: ujetiga udore ore jnese ecárase rĩ iji daringáringo tocho, jé aja chequé to rĩ, ¿jé abai gosirase a iji jnanione udore ore uje gare ore iji ti yijmanuñai?— 24 Mu chi jĩrique Jesus chajnai ore ga chi chósi tome ore: —Que abochopise cuchade udore quitique gotique. Chamáñaje cho ujetiga agúchoi ore urusarane Dupade uruode acajnaquéo gáyode gu. Chopo rĩ ujetiga agúchopoi Dupade uringai ujopierãque gai rĩ ome yocuringáringo nirijío rĩ iji yocóderigui. 25 Diga ayorérigo yirijíngopo jne rĩ iji yocódedie ga a ca pisocai tu jne ujetiga ayorérique chucué dacotéraque, jeoga chequé tu ga chucué damanique. Mu a yocajnúone u Dupade utocaidode uje ore déji gatajnoquei. Chamáñaje que ore chucué dacotérigui to go. 26 Mu qué yo uacaquique to ome togode ore uringáringo nirijío yui. Ise ga e ajicho Moises urusarane quigode to jõ. Uje chatata uje Dupade uruode tṍraji porabia ome. Uje chi porabia suaté pioi ocaráidie tṍraji. Ga chi Moises ududigode Dupade urúo quigode u udojo: “Cachi bayode jnani bajade Abraham, Isaac, Jacob ore idupade u uyu iji deréjnane.” 27 ¿Ga Dupade chojningárasa “ore idupade u uyu” ujetiga e íjnoque jnani bajade udore ore jogadode? Ungare. Uje que Dupade cho dajnéone iji ayoré togode mu cho dajnéone iji uecade. Jecute uacoyópise paraque uje chiese ayoré togode ca ore nijiápo jne rĩ.— 28 Jecute chi Moises urusarane atatasórone uñeque di to enga chudute Jesus uruode ome saducéode ore uje chi qué ore botãre Jesus que. Mu uté chimo uje ueradipíso Jesus ijnimingone daru quicho ome ore. Ga jé jogadi tu uje catecã́ri gaté to. Ga chi chojningame: —¿Jé déji rique a Moises urusãraque ibijoguipítique ome ua ya?— 29 Mu Jesus chi chajnai ga chi chósi te: —Moises urusãraque ibijoguipísi u udé: “Adoningachopísa Israel gosode uaque a, uje yocangarádejnai Dupápisi u uté enga que yocangarãte uñeque cuse go. 30 Jecute be enga ajnorapise bangaráni Dupa enga ejna báyipie aja uté. Mu be ga ajo ua aja uté gaté.” Uje Moises urusãraque ibijoquedatei u udé. 31 Jé basa ga ejoi depoi rĩ ga jé chirõripise bajai ome uringai ibijoque. Ga quigode u udojo: “Mu be ga ajna udore jne enga jecucha ajire bojode ayoréo yúode jne, ga jé isocai tu uje bajire bei.” Mu ijnonguipise Moises urusãraque uñéngo ujetiga sué udore gai.— 32 Jecute Moises urusarane atatasṍri chi chojningápome rĩ: —Pacadisṍri a, barajapise barecujáidie quigode udore. Uje jé ũrepise ua uje gusu Dupa ugurui u uté ga que ujórique Dupa déji gotique. 33 Cucha omi tu ujetiga ayorérique ca chimoque dẽrapáitigo ome Dupade ujetiga chãru iji ore oratique gaserãte gánique. Mu cucha ueradipítique qué déji uje sué gai, ga u ujetiga ayorérique chijnorapise Dupade. Enga doi ga chejnápise daguesi ome. Ga jé jõrai tupo ujetiga chajiripise dojórigo ayoré yúode to ga jé isocai tu uje chajire dei.— 34 Mu uje Jesus chi chimo jnani tuté uje susipise darecujáidie guio jecute chi chojningame: —Baringai Dupade urásapise que idája iji ua gotique.— Mu jé u iji udojo quigade ga que qué uñeque casapoi ujetiga catecãrápoi Jesus gaté rĩ. 35 Mu chi diga Jesus chacadápo ore iji Dupade iguíjna cuchábi te rĩ. Ga chi acajnaquéode chi chósi tome ore: —Uacarajáyo uje Moises urusarane atatasórone jecucha ore urúbecho ome daruode: uje chi jnani bajai David ape disi ejo judíode ore ijnati Crísto jne. 36 Jecute a yingome uaque jnani bajai David uruode quigode uje garani tu Dupade Ujopie Espíritu Sánto. Uje chósi te: Yocangarádejnai Dupade catecã́ri yangarádejnai Ga uru quigode u udojo: “Be ga abágui yu ga ácariji yirosadi iji yãrachua, Jé aja dínique ujetiga yujnué bamajosórone ore gáyode jnese.” 37 Jé chimo joroque quitique uje chi judíode ore ijnati Crísto a u jnani bajai David ape disi ejo jne múñi, David tuté chi chĩ́care dangarate cuchátigaja nanique. ¿Ujetiga jec ũré David cho dadupade iji nanique enga jé ape disi ejo u to a?— Enga chi cojñonguemui ore irasiguipise Jesus acajnaquéode, jecute chi ore tangaripísi. 38 Jesus chi qué jno dacajnaquéode údi ga chósi tome ore: —Ajusópise uaqueo ome Moises urusarane atatasórone ore to jne. Chamáñaje ore ucueguipísi tu gu daringáringo ayoré ibijócho. Uje ore isocabei tu uje ore chigui daguidé umarenie. Jecute ore chicáji ore idáyode ujade ga ore jnatupúsu daringáringo pidosobate ome dojórigo ayoré. 39 Ujetiga ore chise pagapitique gánique jeoga ore chise judíode ore aquiningamétique mu ore ucueguipise piyaripi ueradode ome raque. 40 Uje chi jecucha udore ore pésu chequé ecadie juredie ome ore iguíjnane. Uje chi ore chijna iji ore gari gatuaque. Mu chi ca ore pota gu ujetiga pirajaque ore uringárique sijnaque ga jecucha ore catecã́ri Dupade enga chi ca ore chajire raque ome dacatecãraitígadatéode udore. Jecute a ca Dupade chajire ore gajnetique dajuyaqué ome ore jne.— 41 Chi chise deréjnarique uje chi Jesus chacája Dupade iguíjna cuchábi ga chi cháji ajei uñai uje chi jecucha ore na Dupade gajnenie ore iplátai aja pírigo iji. Mu chi chinoningapísa cojñone ore isocade ome deranéringui daplátai iji uté. Chi chajire ore mu chimo uje cojñoque atade chi ca ore cájnaru deranenie iji daplátadie uje ore naja píode udore. 42 Mu chi diga chequé jmatágueraque di to uje chi chequé eca. Chi chijnime dapláta gárabidie ga chi nasija píode udore uñeque to. Mu chi chequé eca uaté chi iplátabidie sudire ca oréraque cuse to go. 43 Jecute chi Jesus tibidi dacadigode ga chi chósi tome ore: —Jé ũrepise yu ome yuru quigode udojo: uje chequé eca jmatagué uaté gueranenie sué bajáiso ore gueranenie gáyode jnese. 44 Chamáñaje bajade udore ore gueranenie u dapláta soguedie. Mu jé basa chequé eca tuaté ipláta cucha gotábidie jé sudire uje agutíyamanamínie jé su gu.—
1 Mu uje chi Jesus, acadigode ore doi guesi iji Dupade iguíjna cuchábi mu chi acadigode uñeque chojninga: —Yocacadisṍri a, cajire guiguíjnane udojo iji Dupade iguíjnai udé. Uje cucarané cuchábedie iji ga que chajire re go uje chijninguese dejode.— 2 Mu chi Jesus chajnai dacadi tuté ga chósi tome: —Baminingánone udore guiguíjna cuchábio, mu a ore chise daringáringo pĩrocho jne. Enga a ca cucaranéraque pijogapo iji charitíguiji dojóraque cucarané gánique jne rĩ. Uje a ijnonguipise udore jogadode jnese jne.— 3 Jesus chejna cuchade udojo guesi ga jé u uje nóna dacadigode aja cucarani uje i tu Olívos. Uje cucarani uté pijóguiji Dupade iguíjna cuchábi uté. Enga chi Jesus chácariji dayaritique iji cucarani uté mu chi jé jogadi u uje Pédro, Jacóbo, Juan, Andres ore catecã́ri dacadisṍri, mu chi ore ipoguiécho daru quigode udore. 4 Enga chi ore chojningame: —Be ga angome yoque dínique ujetiga tocade cuchade udore. ¿Chimo joroque jne aníri, cuchade udore gãrapiesónique ujetiga cuchade udore tocade jne?— 5 Mu chi Jesus chajnai ore ga chósi tome ore: —Beyoi ga ajusópise uaqueo ujetiga ca uacojórique ayoré chãra uaque ome cuchade udore yui. 6 Uje a jiépisi cojñone jne ujetiga ore cho yu iji raque. Enga a ore chojninga: “Uacajnati Crísto uyu.” Mu a ore chejna cojñonguemúone jne aja re ome daringaquérigo. 7 Mu a adúchopo jne rĩ pujnoméringo ome pocaningane rĩ iji erámone ujetiga pujnoméone udore tṍraji dajñarenie jne ome uaque. Mu ca uacagutéraque cho jora ome udore gotique. Chamáñaje a isocai jé u uté gu. Mu ca ajosópise jne eti e erámone eruei gãrapiedie jé u udire ome. 8 Uje isocai a jé u jne ujetiga puníningo ore chachai ñane jne ome dajocaningáringo. Jé basa ore asutedie ore pésu dáyipiedie ome pocaningane yúode. Mu a jé isocai tupo jne rĩ ujetiga adúcho jnupe tãrarachugode ujnoméringo iji puníningo uásejnane. Mu a jé jorane upo jne rĩ ujetiga cojñone chisa dabáningo ujetiga chaguhéningo socárome ore. Mu cuchade udojo cáma cucha gosode u gotique ujetiga socárome ayoréode ore iji erámi ujetiga pésu ore juredie. 9 Mu uaque ga ajusópise uaqueo ome uacajnéone pocaninga yúode to. Uje diga ore jno uacádi aja ore asutedie jne. Enga a jogadi u jne ujetiga uacagachodi u ujetiga ore chujé uacádode iji judíode ore aquiningaméone. Mu que gusu udore mu dépoi rĩ ujetiga ore chijna uágaja ore eduguéjnapísode. Mu udore quigode u gu uje uacabade u yadode. Mu a piotiguei tu jne ujetiga angoño yadode jne ome eduguéjnane udore ore. 10 Mu cuchade udore a ca chise deruénique jne ujetiga jé ca patata yuruode ome cojñone ore ome ore uringáringo piquetácho iji punirone jnese. 11 Mu diga a ore jno uacádi aja deduguéjna cuchábode jne. Mu ca oyópise uacáyugu uaque jne ome uacapesutígo uacaru jne ome udore. Uje Dupade a guẽrapácho uacarúrigo ome uaque jne ujetiga jĩrique ajnicho uacarúrigo ome ore jne. Mu que cho ujetiga uacaruode udore, mu Dupade Ujopie Espíritu Sánto guẽrapácho uacaru quitígo ome ore. 12 Mu diga cucha uñéngo a tocadepo jne rĩ. Ujetiga jnanírique doi enga tẽra dajoráringo ome pocaningárique ujetiga ore chujé uté. Jé isocai tupo ome uñeque dánique rĩ ujetiga juéga dajnacari ome chutique. Mu jé basa ga a gosi ujnacarode ore chajni dayé, daté ore gai jne enga ore tẽra ore ujetiga chuque ore. 13 A dequetequedaté uágome cojñone ore iji erámone jnese jne. Mu uacaba cuchábode u yadode gu. Mu ujetiga uaque gosi chejnápise raja yadode udojo, jé aja daringárique ducañerájma eruei, mu a jé u jne ujetiga uaque gosi chimate raja daringai piquetaque jne ome Dupade. 14 Dupade uruode atatasṍri Daniel urusãratígo déji uje chi chĩ́care cucha puyaguipísi ujetiga picháji pogate quedéjnarique jne uje que gajnei tu mu ujetiga jogadi u uté. Mu ujetiga chise dayaridi uté ga a jé jogadi u jne ujetiga e íjnoque udore charidode jnese.——Cuchade udore ajirisórone uaque a, ajusópise udore guio, ujetiga ajichopise udore quigode jnese aja quigode.——Mu ujetiga cuchade udore tocade jne ga Judéa jogonóningo iji uaque, jĩrique boyo ga ayóyome ga beyoi cucaranone enga echo. 15 Mu ujetiga qué diga uacuñeque cho dajñare iji daguíjnarique ójoraque, mu uaque gosi ca chacája daguíjnarique ujetiga chijnime dagúcharique iji, mu uaque gosi jĩrique jno to. 16 Mu uacuñeque ujetiga qué déji dasoranéraque iji erã́tique ca chajni dagúcharigo gánique ujetiga chiqueta. Mu jĩrique uaque gosi jno to. 17 Yosõripise joroque chequé icamasuguérigui iji dirode udore. Jé aja udire ore to uje qué ore chumuñási dabadode. 18 Beyoi ga ajóchayo Dupade ajei údi ome uaque ujetiga ca uacagajñunie udire ca chise uáguiji tejnuringáringo jne. 19 Uje a ca uacajnéone pujuyaquéo udore chajire re ome uaque jne. Uje cáma pimo pujuyaquedatérique to ujetiga cho uacajnéone udore. Jé iji erámone taningápisi uje Dupade pésu nanique, jé aja deréjnane udojo. Mu a jé isocai tupo rĩ uje a ca pimo uté gajnúrique to jne rĩ jé aja yoquiquei. 20 Ujetiga uacangarádejnai Dupade ca chaquĩ́ra pujuyaquéode udore enga a ca toguirase jne ujetiga ayorérique qué chapite. Mu a chaquĩ́ra jne gu dosongaquéode ome danguresórone uje ajegáite ore gu. 21 Mu ujetiga uñéngo narare jne ome uaque enga chojninga: “Cajire to, yoquijnati Crísto de ti,” jeoga chojninga, “Yoquijnati Crísto déji ta,” mu jé ca ajire udore ore gosode uruode yui. 22 Mu a jé isocai tu ome jnani aringácachoquíode uje a ore chise uaque to jne. Mu a jnanione udore chopise Crísto iji re jne. Jé basa uñéngo a ore chopise Dupade uruode atatasõripísode iji re jne rĩ. Mu a ore pésu dapesute pitijabátigo ome doitígo daringaquéo. Mu ore ipotigádi u joróga jne ujetiga ore chãra Dupade anguresõripísode uje Dupade ajegaidode u ore. 23 Mu ujetiga cuchade udore tocade jne, mu ca jnopise uacajénique jne uje e yimanipise quigode ica uje yingome uaque ica. 24 Mu pujuyaquéode udore quigade ga a jé jogadi tu jne ujetiga diga deréjnaringo chise uaque uje guedé edo a toi jne ga topiéjna. Jé basa guedoside ca chijñánapo uacabai jne rĩ. 25 Mu jé basa ga a jogadi tu jne ujetiga guédodie base uacabáyode iji gaté. Mu jé basa ujórigo cucha iji gaté a ca chajire detotiguérigo ujetiga tãrara iji uacabai. 26 Mu udojo quigade a jogadi tu jne ujetiga pimo Dupade utocaidi uyu ujetiga yiji jnumi iji gue abujárigui. Enga a yoidé tu yujopie aja jnumi te jne enga a ca yajire yingoningájnarique jne ome ore. 27 Mu diga a jogadi tu jne rĩ ujetiga yiroque yirógode gaté minórone aja jnumi eruéode jnese, jé aja gaté eruéode jnese rĩ, ujetiga yamáta yajegaidode udore ore jnese. 28 Adojningachopísa jne poria higuéra uaté gajnúringui cucha uje a qué yingome uaque jne: a arajayópise higuéra uaté isocade. Uje jmanecade sosi riji guesode ga jé u uje acarane garanone u. Mu udore imoi tu uje e idógosi sequeré iji uaté. 29 Mu jé isocai tu ome yatatagode udore cucha ome uaque que. Ujetiga ore chisipise daringáringo tocachucho enga ca jnoji uacajéode uje cuchade udore eruéode idógosi iji uaque enga ujapísaja uacabáyode. 30 Enga jé ũré yojñane uje cuchade udore jnese a tocade jne uje cáma ore toi iji deréjnane udojo. 31 Jnumi, jé aja gaté rĩ, a ore chise daringáringo eyúcho jne. Mu a gusúpusu yuruode jne ujetiga ca chise deruénique to ujetiga ca cha daringáringo tocachucho jnese. 32 Mu que pijoguipise deréjnarique, guedé batigárique ore rĩ, ujetiga cuchade udore tocadepísiji. Jé chopome Dupade iroque gaté minórone rĩ. Jé chopome Dupade ujnacari uyu rĩ. Mu gusúpusu Dupade uje chiraja dínique ujetiga cuchade udore tocade iji. 33 Jecute arijínañopise uaquejode, ga ajusópise uaqueo ga ca oyo uja ujetiga acatecãchoi Dupade ome uaque. Uje que pimo dínique gu ujetiga yise uáguiji yiríringarique. 34 Cuchade udore isocai tu jnanírique uje chiraja dacoringárique yui ujetiga idájapise quitique ga qué cho quique darógode ore ome ore isatígo iji uté quigade. Enga pésu jnanírique to ujetiga cháji iguíjnai piagoi ujetiga timíninga cuchade jnese aja quigode iji. 35 Jecute oyo uté ga amíningacho cuchade jnese aja quigode to. Uje que pimópise uacarósõri uyu yiríringarique gu. Jeoga quene dejaque, jeoga dejnínga gatocoro, jeoga dirájnai uje cochagájnane poji, jeoga direjnipe. 36 Jé socaseti uacanínaño mu yiyague uacabai iji uacamótigo ujetiga e ayáyo amíningacho cuchade aja quedéjnane. 37 Que gusu yuruode udojo gajnengórone u uaque mu yojningane upo ududisórone uaque jnese to rĩ ujetiga arijínañopísa uaquejode gatuaque to.—
1 Mu chi dirode amíningo gare iji ore jnusinamanemétique dire uje chi i tu Páscua . Uje chi jecucha ore adébeque gu uje chi ore tagu arurégode iji uté uje chi ca bisitique déji. Mu chi iji dirode udore sacerdóteode ore eduguéjnane, jé aja Moises urusarane atatasórone ore chucuepísi dasocáringome Jesus ujetiga ore chisa ome daringaquérigo. Enga jé u ujetiga ore chujé ga ore chimánaja jnumi. 2 Mu chi ore chojningame ñane: —Ca yimáco yocáyipiedie aja guesi iji yocujnusinamánone udore dire jne. Chamáñaje a cachi yajujo cojñonguemui ore agutedie enga ore chajni yoquibai.— 3 Uje chi Jesus qué déji ore idai Betánia ga chi pusi jnani iguíjnai uje i tu Simon uje chi ore chĩ́care lépra isa casica aja uté to. Mu chi qué Jesus déji dayaripírique iji ore agapidéraque ejoi. Enga chi jé jogadi tu uje chi chequéraque chi sose yui ga chijna cucha pi ueradéjnarique uje chi ore ipesute iji cucarané uje chi i tu alabástro . Ga chi acéite irágupúsu oidi tuté pi. Jecute chi acéite uneri ai uté i tu nárdo . Enga acéite chedupise re iji dabi uté ajei. Jecute chi ca chajire doréraque gotique. Mu chi jé u uje chi chequé uaté déji Jesus ejoi ga jé u uje chibéro pie uaté ga chi chojne Jesus gatoi gai. 4 Mu chi Jesus ejominórone uñéngo uje chi ore déji uté to enga ajningaranguipíso ore ome chequé uaté. Mu chi ore chojninga: —Gajnarenguipise uje chachia re uje chojne acéite uté aja Jesus gatoi. 5 Cucha arei a jé upusurásu que ujetiga uaté tẽrárasa acéite uté que, enga dorási orérigui ga chisírasome ayoré jmatágode ore. Chamáñaje a jiérasi guejnáringui ga dérasi 300 denárionie .— Jecute chi ore chopise detegue ome chequé uaté ome isocai. 6 Mu chi Jesus chaquĩ́ra ore ome darai ga chósi tome ore: —Jé dóji chequé uaté, enga ca apéso juredie ome isocade udore. Chamáñaje isocade u cucha ueradipíso ome dapesudode udore ome yu. 7 Chamáñaje ayoré jmatágode a jé jogate uacajade jne iji deréjnane ga diga uacajéningo enga osṍcho udore ore jne gatuaque. Mu jé basa uyu ga a ca toque jne ujetiga amóño yu to gatuaque ome uacosongaquérigo. 8 Mu jé tiógara chequé tuaté guẽrapáidi cucha udore ome yu, uje e chejna daguesi ome deranone udore. Enga e dimane acéite iji yibai ome yigachodi yui. Uje imoi tu yigachotique dirome ujetiga ore chijochame yu iji. 9 Jé ũrepise yu ome yuruode udojo quigode: ujetiga diga ore jno yujnomei údi ome erámi údode jnese ujetiga ore chimate erámi unirisórone aja ore uringáringo piquetácho, mu a jé jogadi tupo jne rĩ ujetiga ore chatata chequé uaté uringáraque ibijogue ome dacaniratiguéode udojo ome yu. Ga a ore jnusinamane uaté gatuaque to jne.— 10 Udojo quigade ga Jesus acadigode uñai uje i tu Júdas Iscariote chi jno enga tibágui sacerdóteode ore asutedie. Chi tibágui ore gu ujetiga catecarámi ore ga pesabu dajnetique putoquei ome udore ore ujetiga teráma uraque dacadisṍri ome udore ore. 11 Mu chi sacerdóteode ore chudute uté uruode ga ore nínapúsu raque ga chi ore chojninga: “A yisígo bajnéringui pláta ome ua jne ujetiga ẽra uacacadisṍri ome yoque.” Jé jogadi tu uje Júdas uté chucuepísi dasocáringome ujetiga tẽra Jesus ome udore ore. 12 Mu chi chise ore jnusinamánone dire bajai uje chi ore adébei u uje ore tagu arurégode iji, uje chi ca bisitique déji. Enga chi ore chujépo áyasadie iji diri uté to rĩ uje i tu Páscua . Mu chi Jesus acadigode ore catecã́ri Jesus ga chi ore chósi tome: —¿Déji rique bajegaitique jogatique ujetiga yico ga yipéco cuchade aja quigode iji ome cucha pibosode yui ujetiga yajo ome yocujnusinamánemei Páscua uté a?— 13 Jecute chi Jesus chiroque dacadique gáreode aja ore idai ga chi chósi tome ore: —Boyo ga acayoi ore idaidatei. Mu a eso jnanírique iji ta jne uje chijnoque yotíguiji ore oráraque cojna. Ga ajínaño uté aja quitique jne. 14 Mu ujetiga diga uté chise daqui ga ajnácho uágaja guiguíjnai uté gajnengónique. Enga ojnichome: “Yocacadisṍri potapísa ujetiga ango guiguíjna ajei jogatígome yoque ujetiga chacásorama dacadigode ore uyóguiji, iji dejai tudé ome Páscua yui.” 15 Mu diga ore chingo guiguíjnai ajé uñeque jne ome uaque uje a ajei querújna ga idájai jnumi. Mu a dimane cuchade iji jnese ome uacaquei. Mu ujetiga amácho uágaja uté ga a jé u ujetiga apéso yoquibosode ome dejai tudé yui.— 16 Jecute Jesus acadigode udore ore jno ga ore chicáji ore idaidatei tuté. Mu chi Jesus uruode ucode tocadepise ome ore ga chi jé u uje chi ore pésu dabosode iji uté ome Páscua yui. 17 Mu chi chise uje dejaque. Enga jé u uje Jesus di dacadique amirone údi iji ore to. 18 Mu chi qué ore déji dagapidi ejode gai jnese uje chi qué ore taque ga jé u uje Jesus chojningame ore: —Jé ũrepise yu ome yuruode udojo, uje a uacuñeque déji gajneri ujetiga uacuñeque tẽra yu ome yumajosórone.— 19 Mu chi Jesus uruode udore chajuguipise ore agutedie. Jecute chi ore chopise dáyugu raque. Jecute ore tṍraji dajñarenie ome Jesus ga ore chojningame jnese: —¿Ga uyu jne a? ¿Ga uyu jne a?— 20 Mu Jesus chi chajnai ore ga chósi tome ore: —Jé uacuñai u iji udé uje gare uáguiji yirídai. Uje uté qué chacásõra yu múñi iji yagapi udé. 21 Cuchade jnese uje purusãracho ome Dupade utocaidi uyu iji Dupade uruode quigode a ore tocade ome yu jnese jne. Mu a yosõripise joroque yẽrasṍri uté gosi ome gajnetígo Dupade ujuyaquéo jne. A cucha ueradi urásu nanique ujetiga ca uté basiji datéraque ujetiga ca chimórase dajnetígo pujuyaquéo to jne.— 22 Mu uje chi jé ore déji daringáringo chagúo gai ga jé jogadi u uje chi Jesus chisa arurégode iji gaté iji dajmáinie. Mu chi qué chacãre Dupade gai bajaque. Ga jé u uje chajuguína dacadigode ore iji ga chi chósi tome ore: —De do jã. Acho udojo mu imoi tu yaoi dirome.— 23 Chi quigade ga jé isocai tu ome ore jopidéraque uje chi chisaji gaté to. Ga chi chacãre Dupade gai bajaque. Ga chi chisi ome dacadigode ga ore chóji iji ore jopidé uaté jnese. 24 Mu chi chojningame ore: —Cucha otadi udé imoi tu yiyoi jne. Uje a yojne ome yiyoi jne ujetiga ayorébujnaringo ore cho dagutíyamani iji yiyoi jne. Enga ujetiga yitoi enga yojne ome yiyoi ga jogadi tu jne ujetiga Dupade áyipie ichadie quene chuságaja daringáringui ujñapetei. 25 Jé ũrepise yu ome yuruode udojo: uje a qué yiyábu yójiapo úvadie otadi tudé to jne rĩ ga a jé yuságaja úva otate gatérique jne iji Dupade idai.— 26 Uje chi ore chejna daradéraque guesi iji Dupade iradedie ga jé u uje ore jno ga ore chicáji cucarani uje i tu Olívos. 27 Uje ore déji cucarani uté enga chi Jesus chojingame dacadigode ore: —Idógosipise ujetiga oyópise uacáyugu uágome yu iji dejai tudé jne enga cho ujetiga uacanguretigade udore ome yu bijna ome uaque jnese. Uje ore urusarane Dupade urúo déji gu uje quigode chósi te: “A yujérase áyasadie irodisṍri jne enga a jé u gajneri ujetiga uté gachidedie ore chisite rágaja erámi údode jnese.” 28 Mu ujetiga yĩrijíapo jne rĩ iji yuringárique toque enga yicai Galiléa jne, ga a bajaque yu aja uacaquei, ga a yirodipise uaquei jne.— 29 Mu chi Pédro chajnai uruode ga chósi tome: —A ore cho dáyugu raque jnese gajneri ome ua, enga ore anguretigai chicai jnumi gajneri, mu a ca yanguretigai chicai jnumi to jne go.— 30 Mu chi Jesus chojningame Pédro: —Jé ũrepise yuruode udojo ome ua. Uje dejai a jé u udé jne ujetiga cáma cochagájnarique po ga gare, mu a jé jogadi u jne ujetiga otigase baringai yacadique ga gadioque to jne iji cojñonguemúone ujade.— 31 Mu chi Pédro qué chajo raja daruode udore ga chi chojningame Jesus: —Jé ũrepise yu ãrie ome yuruode udojo, a yipatíorãrasa ua mu que toque go ujetiga yotigase ua.— Jecute chi Pédro jorane ore chirate ga ore uru qui jé chojmára jnese. 32 Mu chi ore jno enga ore chise pajmitique uje chi i tu Getsemani. Mu chi Jesus chojningame dacadigode ore: —Ayáyoi de. Qué yiji ome uacaquei ga yicatecarámi Dupade iji siñeque jne.— 33 Mu chi dejenamánone chi u Pédro, Jacóbo, Juan ore aja daquigade. Mu chi jĩrique ayuguhebátaque Jesus aja daqui uté yui. Enga chi jĩrique pisadodéringai dépoji ajei rĩ. 34 Jé u uje chojningame dajorane udore ore: —Yayuguhebátigade udojo napise yu aja jnumi. Mu gajnui tupúsu ujetiga e chimate yu aja jnumi. Mu beyoi ga ácayoji de mu arijínaño uaquejode gajneri.— 35 Jecute chi qué Jesus noñome dacadigode iji uté ga chicáji ore iquei. Mu jogadi u uje chajna jnumi aja daqui enga chi jé jogadi u uje chi chijócha Dupade ajei údi ome re. Ga chi chojninga: —Ujetiga bajéraso enga jé ca yajnenguiráso pujuyaquedatéode udore gajneri iji yiquei.— 36 Mu chi jé jno dacatecãraitigade údi ga chi chojninga: —Yapa yajnengóri a, que cucha ibiratique cus ome ua gotique. Be ga aqueta yu iji yajnei pujuyaqueque gajneri uje gajnui tu cucha otate unerótique ome yu. Mu que yajéode u go ujetiga yi yáyipiedie guitígo. Mu jé be báyipiedie quitígo ome yu.— 37 Mu chi jogadi jé u uje chajniapo dacadigode ore gai rĩ. Enga chise ore mu qué ore mo. Jecute chi chojningame Pédro: —Simon a, ¿a qué amo a? ¿A ca toguipise ome ua ujetiga qué arijína bejode garósirique que a? 38 Beyoi ga ayáyoji de mu arijínaño uaquejode ga acatecãchoi Dupade. Jé socaseti ca Satanas chijnime uacãrírique jne ome doitígo petingaquéo. Jé ũrepise yu uje yirajápise uje uacáyipiedie dimanepísi ome cucha omone yui, mu jé basa uacaringai ayoré uté u uje que ujñapeque go ome udore yui.— 39 Jecute chi jĩrique Jesus jnopo rĩ ga catecãrápoi Dupade rĩ mu uru quigode jé chopise uru bajáiso. 40 Mu chi jĩrique chajniapo dacadigode ore gai rĩ. Mu chi chise ore mu qué ore mopo rĩ. Uje chi ca ore tiógara damongone gu ga chi ore edodie chipocásu dabáyode uje chi moi ujuyápise ore gu. Mu udore ca ore chirajápise daru quitígo ome Jesus. 41 Mu chi Jesus qué jnopo rĩ ujetiga qué catecã́ri Dupade gaté rĩ. Enga e gadioque uje catecã́ri Dupade. Mu e diápo iji dacadigode enga chi chojningame ore: —Jé areque, amóño, ga oyo uacajñare. E yimáco cuchade aja jnumi gu, enga e deréjnai tu ujetiga Dupade utocaidi uyu yẽrasṍri chisi ome yu ome pisijnaringuéone ipesungórone ore gajneri ujetiga ore doi dasocáringome yu. 42 Jĩrique arijíño ga yico. Chamáñaje yajmasṍri e di.— 43 Mu chi uje qué Jesus déji daruode udore gai mu chi jogadi u uje Júdas di dajosei údi iji ore. Júdas uté u uje Jesus acadigode ore jõra to uje gare ore iji yirídai. Enga chi Júdas uté josei ore ujuya dõrachade, queséode, jé aja pidode ore rĩ. Enga sacerdóteode ore eduguéjnane, jé aja Moises urusarane atatasórone, judíode ore angaránone uñéngo chi ore utocáite Júdas ore jnese aja Jesus yui. 44 Jecute chi Jesus gajmasṍri Júdas e chingo dáyipiedie aja dajosei ore jnese ujetiga jĩrique ore chiraja Jesus iji ore ujade. Ga chi chojningame ore: —Amíningacho uyu aja tijode gajneri. Ujetiga yagu cojñotique uréraque ga yoquigaidi u uté. Ga jĩrique asayo uté gajneri ga agachopúsu gajneri, ga boyo uté údi jne.— 45 Mu chi jĩrique ore di enga jé u uje Júdas sose Jesus yui ga chi chojningame: —Yocacadisṍri a, yocacadisṍri a.— Ga jé jogadi u uje tagu uré. 46 Jecute chi jĩrique ore chisa Jesus uté ga ore jno údi. 47 Mu chi Jesus acadigode uñeque chijna daquesérique to ga chi jĩrique chijnime daquesei ga jĩrique chaquesu sacerdóteode ore irótique uñai angoroné to. 48 Jecute chi Jesus chojningame cojñonguemui ore: —Yopise oriechoquíode iji uacajmáinie uje uacajnáño queséode, jé aja pidode rĩ aja yu, uje uacasayo yu ujetiga ajucho yibai. 49 Jé gotique gu a uje jecucha ga yacate uáguiji Dupade iguíjna cuchábi diríca múñi, cucha marínga asayo yu ica ujetiga ajucho yibai ica. Mu uacapesudode udore ome yu gajneri imoi tu gu ujetiga ore urusarane Dupade urúo tocade.— 50 Enga chi jé jogadi u uje Jesus acadigode chimo uringai pisaque ga ore noñome iji te ga ore chayo jnese. 51 Mu chi jnacare gatóderaque nóna Jesus aja dajei to uje chi chigui datarãpétigaja dajei. Mu chi Jesus oisórone chi uñéngo ore chimo ga ore chisarase. 52 Mu chi jnacari chijnáriji Jesus isangórone gari enga ore chijna iguidi uté, enga chi jnacari chayo ga choquíbi aja daqui. 53 Jecute chi ore jno Jesus údi aja sacerdóteode ore eduguéjna cuchábi charidi. Enga sacerdóteode eduguéjnane uñane, jé aja Moises urusarane atatasórone, jé aja judíode ore angaránone uñéngo to rĩ ore chamáta ñane aja uté to. 54 Mu chi Pédro jé qué nóna ore to mu chi idájapise iji ore. Enga chi chacája ore eduguéjna cuchábi charidi uté to, mu chi chácariji guesi iji ore iguíjnai atetai. Enga chi cháji soldádode ore gari to iji ore oritique pioque gai. 55 Enga chi sacerdóteode eduguéjnane chi ore catecã́ri páyipiedie ipesungoremétigo ore ujetiga ore chise Jesus bárique cucha ome uringárique chuque. Mu chi ca ore chise bárique. 56 Enga chi jiépisi ore uje ore chatata dajnimingone darúo ome Jesus mu chi taguipise ore. Uje chi ore ojñane cha ñane yui gu iji uté adode. MJecute caurénga pangarate ore go. 57 Mu chi jé basa uñane chi ore chague to uje chi ore chaguhéta cucha bisidétigo Jesus gai to. 58 Ga chi ore chojninga: —Udúco uté uruode diríca uje chojninga diríca: “Yi jne enga yĩro Dupade iguíjna cuchábi uté jne, jnanione uacora casica. Mu a yi jne enga yipésu aja gaté iji dire gadiótigo gajneri, mu gusu yu ome gajneri ujetiga yipésu. Enga a ca ayorérique cháta raja yu gotique jne ome uté ujetiga yipésu aja gaté.”— 59 Mu gojñangarane udore chi ore ojñane udore cha ñane yui to. 60 Jecute sacerdóteode ore eduguéjna cuchábi chague iji ore ajei ga chi chojningame Jesus: —¿Ga ca ãrarare babai to a ome udore ore uru quigode udore a? ¿Gotique gu a uje que ope quique ore aguhéyajade udore dacacho babai?— 61 Mu chi Jesus cho paráguiji udore ore uruode údi, uje chi ca chajnapísi udore uñeque urú quitique go. Jecute chi sacerdóteode ore eduguéjna cuchábi catecãrápoi rĩ ga chi chojningame to: —¿Yoquijnoranguipísi Dupa jé ujnacari tu ua ya? ¿Uté utocaidi Crísto jé upúsu ua ya?— 62 Mu chi jé jogadi u uje Jesus chajnai uté uruode enga chojninga: —Ejẽ, bojningai uté jé uyu. Enga diga amóño Dupade utocaidi uyu jne ujetiga yiyáji Dupade pujnuéngaisṍri uté ãrachua. Mu a apáñañopóji yu jne rĩ ujetiga yṍraji gaté rĩ enga yijína gue abujárigui aja jnumi.— 63 Jecute chi ore eduguéjnai uté doi daguidé ga chajningarase aja tijode uje chi imoi tu gu uje ajningaranguipise ome Jesus uruode. Enga jé u uje catecã́ri dojode dacasuté ore enga chojninga: —Beyoi jne ga yiyágo uté imósoningo ore unerane jne ujetiga ore cho quique uté adode. 64 Chamáñaje udúco uté uru gajnarenguipísode gu uje chopise Dupade abipísiji re. A Dupade chejnarenguipise joroque uté uru quigode ome re que. ¿Jé yoco ringome uté a?— Mu chi ore uru qui chojmára jnese enga ore chósi tome: “Cucha ueradi tu ujetiga chuque uté.” 65 Jecute chi jé jogadi u uje ore socárome. Ga chi ore uñane chutĩ́raja. Jé basa uñane ore chigaru borapei aja edodie ujetiga ca chimo dajiritique. Enga chi jé u uje ore chujé ga ore chojninga: —Be ga arajape besṍri uté gosi.— Mu chi jé u to ome soldádode ore uje chi ore chujé uté edodie to. 66 Mu chi udore ore déji daguíjnai ajei gatéminóri. Mu chi jé basa Pédro chi qué déji ore iguíjnai atetai iji jnumi. Mu jogadi jé u uje chi sacerdóteode iróguedie uñáraque chi di. 67 Mu chi uaté chimo Pédro uje chi qué toria pioi iji ore atetai ga chi chósi tome: —Yiraja ua ga bãjora Nazaret gosi Jesus to ica.— 68 Mu chi Pédro chi chotigasipise ga chi chojningame: —Que yimo bojningai uté gosi to go. Que yirajápo bojningane udore quitique rĩ.— Mu chi jé u uje Pédro chicáji guesi ga chi jĩrique chudute cochagájnarique agoyéraque. 69 Mu gapua uaté chajirapo Pédro rĩ enga jé u uje chojningápome dejominóningo jnanío rĩ: —Yirajápise uté ga jé jnani uté acadigode jé uña to diríca.— 70 Mu chi Pédro chajo raja uje chotigase uaté uruode ome re. Mu cuchade ucode quigade mu chi uñéngo iji uté ore charipi, chi jé u ore uruode udore ome Pédro to, uje chi ore chojninga: —A jé ũrepise ga uté acadigode jõra ua to diríca. Uje que piraguipise baru quigode gotique, uje boidode jé upúsu Galiléa gosode ore jmapié ome daru quigode.— 71 Mu Pédro chi chisipise dabai ome daruode uje chiese jé ũrepise ome daruode udore. Mu jé u uje chi chojninga: —Cachi que yimo uacojningai uté gotique jnani to ãrie.— 72 Mu chi chise uruode udore ga jé u uje cochagájnarique chi popo rĩ. Mu chi jogadi u uje Pédro quene jnusina Jesus uru casodé ome re uje chojningame diríca: “A cáma cochagájnarique po ga gare dirome, mu a otigase yu ga gadióguiji yui dirome.” Chi jnusina udore ga chopise dáyugu re ga jé u uje popise.
1 Mu uje chi e direjnipe enga chi sacerdóteode eduguéjnane, judíode angaránone, Moises urusarane atatasórone ore cháta raja jnanione uje chi páyipiedie ipesungore ore. Ga chi jé u uje ore chigaru Jesus gai ga ore jno údi aja Róma gosi, eduguéjnai Piláto. 2 Mu chi jĩrique Piláto uté catecã́ri Jesus ga chi chósi tome: —¿Ga jé ũré enga judíode eduguéjna cuchábi tu ua ya?— Mu chi Jesus chajnai ga chi chósi tome: —Jé upúsu baruode quigode udore.— 3 Jecute sacerdóteode ore eduguéjnane ore chaguhéta cuchade Jesus gai jnese. 4 Mu chi Piláto uté qué catecãrápoi Jesus gaté rĩ ga chi chojningame: —¿Gotique gu a uje que ãrarare babai to? ¿Jé ca adute bajnéone ore uru gajnarécho to a, uje jiépisi cuchade uje ore chaguhéta babai?— 5 Mu chi ca Jesus narare dabai gotique mu chi cho parac. Jecute chi Piláto uté ca chirajápise dasocáringome. 6 Mu chi jecucha Piláto isocabeque uje chi chise ore jnusinamanemei uté uje chi i tu Páscua, uje chi chirame ore jurúgayode uñeque iji diri tuté gatuaque. Mu chi jecucha uté doi judíode ajegaitíguiji pujurúgayode ore ujetiga chirame. 7 Mu chi ore jurúgarigo uñeque déji to uje i tu Barrabas. Uje uté joráringo déji uté to rĩ uje ore chujé cojñotígo iji dajocaningai. 8 Jecute chi cojñone ore yore Piláto gai ga ore chijócha Piláto ajei údi ujetiga doi dasocabei ome dajurúgayode udore ujetiga chirame uñeque. 9 Mu chi Piláto chajnai ore ga chi chojninga: —¿Ga uacajegaidi u ujetiga yirame judíode uaqueduguéjna cuchábi a?— 10 Mu chi Piláto áyipie déji sacerdóteode ore eduguéjnane gu uje udore ore charatáyime Jesus ome uringai pangarate ome cojñonguemui ore. Jecute udore ore tẽra Jesus ome que, uje chi ca bárique cusipise múñi. 11 Mu chi sacerdóteode ore eduguéjnane ore chajo cojñonguemúone aja ujetiga ore utaidi tu Barrabas ujetiga Piláto chirame. 12 Mu jé u uje Piláto chojningame ore: —¿Jé uacajegaitique ujetiga yipésu ome Jesus? Uje uacojnichome uté mu judíode yoqueduguéjna cuchábi u udé.— 13 Mu chi jé u uje ore chinguíra dabijnanone aja Piláto enga chi ore chojninga: —Ajo aja curesei.— 14 Mu chi Piláto uté chojningame ore: —¿Mu jé uté ipesutique cucha gajnareque que a?— Mu chi qué ore chajo raja dabijnane udore ga jé u uje ore chojninga: —Ajo aja curesei.— 15 Mu chi jé jogadi tu uje chi Piláto ca pota daringárique petégome cojñonguemui ore, ga jé u uje doi ore uruode ome Barrabas, enga diga chirame. Mu chi quigade enga chiroque darógode aja Jesus ujetiga ore chaquesu údode. Ga quigade ga chirogapo ore aja rĩ ujetiga ore chajo aja curesérique. 16 Ga chi jĩrique soldádode ore jno Jesus údi aja ore eduguéjnai charidi guiguíjna atetai. Ga chi jogadi tu uje ore tibidi dajoráringo soldádode ore enga jé u uje ore yóreja Jesus ejode. 17 Mu chi jé jogadi tu uje ore na piguidéragaja Jesus uje chi gatipis. Jé basa ga chi ore chiro gatóje iji ojnatígo enga ore nája gatoi. 18 Mu chi jé jogadi u uje ore chagota tijode ome Jesus. Ga chi ore chinguíra dabijnanone aja. Ga chi ore chojninga: —Be ga aqueca uje chiese judíode eduguéjna cuchape ua ãrie.— 19 Mu chi ore doi dateringane ga chi ore chijna pidi ome enga ore chujé gatoi údode. Jé basa uñane ga ore chutĩ́raja. Jé basa uñane ga chi ore chichaga dagatáidie aja jnumi iji Jesus iquei uje ore chujñieta gaté. 20 Mu uje ore cha ore chujñieta ga ore chijna iguidé uaté bora caraté iji gari, enga jé jogadi upo rĩ uje ore napo uté iguidépisedie uquidé aja rĩ. Ga jé ore jno údi ujetiga ore chajo aja curesei. 21 Mu chi jnanírique chise ore uje chi tṍraji dasoranéraque mu jé u uje ore chiroque uté ujetiga jé chijnóngape Jesus gajnei curesé. Uje chi Alejándro, Rúfo ore dai u uté, enga ípisi chi u Simon. Mu chi uté idai tu Cirene. 22 Jecute chi ore jno Jesus údi aja ore gajmitique uje chi i tu Gólgota uje ore uruode udore qui tu patode ajnoquéode jogadi. 23 Enga chi ore chise daqui uté enga chi ore chisi ome úva otadi ome Jesus uje chi ore chimera pojnaque udui ome, uje chi udui i tu mírra . Mu chi Jesus ca chóji go. 24 Mu chi jé jogadi tu uje ore chajo aja curesei. Mu chi jĩrique soldádode ore canárapo Jesus iguidedie rĩ ujetiga ore chajire iguidedie udire yusóningo enga jé u ujetiga yusórone ore gajnei udire. 25 Mu chi guedé qué dúrase uje ore chajo Jesus aja curesei iji. 26 Chi ore churúsãre Jesus bai iji pidi iji gai. Enga chi ore urusarane chósi tome: “Judíode ore eduguéjna cuchábi u udé.” 27 Mu chi Jesus cho dabaya jnani gárerigo to rĩ. Mu chi oriechoqui cuchape udore ore. Uñai chi dóji Jesus ãrachua. Jé basa uñai doji arasé. 28 Mu chi jé peropísiji ore urusarane Dupade urúo uje chósi te: “Ore chopise cojñoque sijnánguiji uté to uje ore cháta uté aja cojñoque sijnángone gu.” 29 Mu cojñone ore uje ore chise Jesus tiógarei ga ore chujñieta gaté. Ga ore chijocase datóidie iji ga jé u uje ore chojningame: —Jé bajosigode ĩ́rique uje chiese ajnangarasirase Dupade iguíjna cuchábi diríca mu chiese a jé amanapo aja gaté rĩ iji dire gadiótigo. 30 Gotique gu a uje que aqueta ua ga be jnumi iji curesei uté.— 31 Chi jé chopome sacerdóteode eduguéjnane, jé aja Moises urusarane atatasórone ore rĩ uje chi ore chagota tijode ome uté to. Enga chi ore chojningame ñane: —Chiese chiquetápie yocujórigo cojñocho diríca, ¿que doi ga chiquetape re a? 32 Ujetiga yimóngo gajneri ujetiga doi jnumi iji dajnei curesé enga a quene jogadi tu jne ujetiga yanguretágo uté to ujetiga yoco yoquijnati Crísto iji to, enga yocópo Israel gosode yoqueduguéjna cuchábi iji rĩ.— Mu chi jé chuságaja Jesus bayade ore to uje ore tṍra daru gajnaréngone aja Jesus to. 33 Uje chi guedé e déji gatocoro ga jé u uje chi jnumi chi topiéjna. Ga chi jé chuságaja uje guedé chopise jñuque. 34 Mu chi guedé batigai chi jé u uté uje Jesus chinguíra dabijnani aja dejode. Ga chi uruode quigode u udojo: —Elói, Elói, ¿láma sabactáni?— uje uruode udore quigode u: Dupa yajnengóri a, Dupa yajnengóri a, ¿gotiguipise uje ajíñome yu iji de que a? 35 Mu uñéngo iji uté chi ore chudute uruode to ga ore chojningame ñane: —Cangáchoi to a. Qué tibidi jnani baja casicáite Elías.— 36 Mu jé jogadi tu uje udore uñeque chayóji uté yui, ga chi chijna cuchárique ujetiga chacáji úva otatique uje chi sujnapise. Ga chi chicháji pojnaque eruénique ujetiga chisi ome Jesus ujetiga chóji otadi uté. Ga jé u uje chi chojninga: —Jé dóji ga yajico jne ujetiga jnani bajai Elías díji uté ga chiramurase uté.— 37 Jecute chi Jesus etoguipise pijnane ga jogadi e u uje toi. 38 Uje chi Jesus toi ga borapeque cuchábi iji Dupade iguíjna cuchábi ajei chi dajuguiji gatocoro. Uje chi dajuguiji gaté, ga jé chuságaja jnumi te rĩ ome dajugupétigai. 39 Mu chi soldádode ore asutéraque uje Róma gose chi idógosi Jesus ga chi pañáji Jesus adode uje chi etoguipíso pijnane ga jé u uje toi. Ga chi chojninga: —A jé ũrepise yu ga jnacari uté Dupade ujnacaripísi u que.— 40 Chi jé chopome chequérigui rĩ uje ore toji Jesus gai mu idajapise udire ore iji. Uñáraque chi i tu Maria Magdaléna. Jé basa uñáraque chi i tu Maria rĩ uje chi José, Jacóbo ore daté u. Enga chi qué jnacare gatode Jacóbo uté. Jé basa chequedíe udire uñáraque chi i tu Salomé. 41 Chequedíe chi udire chi jé ore jõra Jesus aja tijode to diríca. Ga chi ore cháta Jesus isagode aja to iji ore uniri Galiléa. Mu jé chopise uñáringui rĩ uje chi jiépisi ore to iji ore gari uje chi jé ore jõra uté to aja Jerusalen yui diríca. 42 Chi judíode ore socárome dapesudode cucha. Chamáñaje chi e dejai chirõre gu, uje chi dire puyaque dirome ujetiga ore cho dajñare iji uté. 43 Mu chi Josérique di uje Arimatéa gose uté. Mu chi jnanione páyipie ipesungóredatéode uña uté to. Ga uté chi edójnari Dupade ome uringárique purása to. Jecute chi uté a ca chagutu rome ore eduguéjnai Piláto ga jĩrique chacája gari iji charidi. Mu jĩrique chutai Jesus aoi ujetiga chijochame. 44 Mu chi Jesus ujnomedatei chajuque Piláto aguté uje José chingome uje chi e toi. Ga jé u uje chi qué tibidi soldádode ore asutéraque ujetiga jé chingopome gaté rĩ ujetiga jé ũrepise ujetiga Jesus e topísi. 45 Uje chi soldádode ore eduguéjnai chojninga: —Jé ũré.— Ga chi jé u uje Piláto juéga Jesus aoi ome José uté. 46 Jecute chi José uté doi oré ome borapetique uje chi ueradipise. Ga jé u uje doi Jesus aoi ga chipocásu gai iji uté. Mu chi jĩrique jno uté údi, ga chi chicháji cucarãtique edóraque, uje chi ore jocha. Mu chi doi ga chaco cucarané cuchabe Jesus ode gai. 47 Mu chi Maria Magdaléna jé aja José udore ore daté Maria chi ore chimo Jesus ode jogadi to.
1 Mu chi chise dire puyai uté quigade ga chi Maria Magdaléna, Jacóbo ore daté Maria, jé aja Salomé udaji chi ore doi cucha otate unéningo ujetiga ore tibágui Jesus ode ga qué ore chaguñerama Jesus aoi gai to. 2 Mu chi qué durasepise uje chi quene guedé tocade iji domíngoi uje chi chequedíe ore chise Jesus ode. 3 Enga ore catecã́ri ñane aja Jesus ode yui enga chi ore chojningame ñane: —Chimo joroque gosirase ujetiga tṍra cucarané cuchabe ome yoque tiji Jesus ode piagoi.— 4 Mu chi jĩrique ore chajire mu que ore chimo cucarané cuchabe casé uje ore suru Jesus ode gai ome diríca. Uje chi e íjnoque uaté jogadi. 5 Jecute chi jĩrique ore chacája ducode jogadi mu chi ore taji ome mu ore chimo jnacari tiji. Ga chi cháji ode ãrachua. Mu chi uté iguidedie chisipise jnumone. Jecute chi póroropisi rĩ. Ga chi jogadi tu uje chajuque udire ore agutedie jnese. 6 Mu chi jnacari tuté chojningame ore: —Ca uacagutéraque cho jora ome yu. Uacacuei tuté Jesus, Nazaret gose uje ore chujé diríca, ga ore chajo aja curesei diríca, e nijiápo que rĩ. Enga que dépoji de gotique rĩ. Qué beyoi ga ajicho jogadi casé to gojni uje ore chicháji diríca.— 7 Mu jé u uje chojningame chequedíe ore: —Boyo jne, enga angoñome Jesus acadigode, Pédro ore enga oyósi tome ore jne: “Uacacadisṍri casé a bajágaja uacaquei jne iji Galiléa. Mu a eso ta to gajneri enga a amóño to iji ta. Chamáñaje uruode quigode jé upúsu diríca gu.”— 8 Mu chi jé u uje chequedíe udire ore jno ga ore chayopis ome ducódedie jogadi uté. Uje chi ore tãrarapise gu ome dasadodéringane. Mu chi ca ore catecã́ri deyátique cojñoque gotique ome damone ucode cucha. Uje chi ore todópisa gu. 9 Chi chise direjnime iji dire bajai tuté uje i tu domíngoi uje chi Jesus ecápo rĩ iji datoringai. Ga chi udojo quigade ga iquetápise raja bajé chi u chequéraque uje chi i tu Maria Magdaléna. Uje chi Jesus jé iqueta uaté nanique iji Satanas utocaitígo uje chi gare ore iji ti yijmanuñai nanique. 10 Jecute chi chequé tuaté jĩrique jno ujetiga chingome Jesus acadigode uje Jesus e ecápo rĩ. Jecute chi chequé uaté chise dabaguiédode mu chi ore chopise dáyugu raque enga chi qué ore popise iji dejode. 11 Mu chi ore chudute chequé uaté ojñane uje Jesus e ecápo rĩ uje chi pañapísiji Jesus uje chimo, mu chi ore chotigasipise. 12 Mu udojo quigade ga jé u uje chiqueta raja dacadique gáreode ore iji ore isoranéraque uje chi qué ore déji dajetique. Mu chi Jesus checãripise dadode ome udore ore, ga chi ca chopo Jesus gotique rĩ. Jecute chi ca ore chiraja uté míraque. 13 Mu uje ore chirajápise uje ore acadisṍri u ga jé u uje ore chayóji dajorane ore yui ujetiga ore chingome ore to. Mu chi jé isocai tu chequé ojñane ome ore, uje chi ore chotigasipise udore ore to. 14 Jecute udojo quigade ga chi Jesus chise dacadigode uje ore chojmára iji yirídai ga chi qué ore chácariji dagapidi gai. Mu chi Jesus catecã́ri dacadigode ore ga jĩrique uruode dosója udore ore. Uje chi guiyade detepícho iji ore u uje chi ca panguretigai déji ore ome uru cásodicaite ome ore. Upo rĩ uje chi ore chotigasipise dajorane ojñane ome uté uje chi ore pañapísiji uté múñi uje ecápo rĩ. 15 Mu chi jé jogadi u uje chi chojningame ore: —Boyo jne ga angoño yujnomei tome óriji erámone údode jnese jne, ujetiga ore chise daringáringo piquetácho jnese to jne. 16 Mu diga uté gosi ujetiga changureta yu, ga dimane jne ujetiga óraño uté gosi aja yodi, ga uté gosi uringai piquetaque jogadi tu. Mu uñéngo ujetiga ore chetaque uacojñáringo ome yu, ga ore gajnei tu pujuyaquedatei jne. 17 Mu yanguresórone udore a ore oidé tu yujopie jne aja tijode ujetiga pangurenipise ore ome datatagode yurúo udojo. Ujetiga ore chijna yi tome Satanas utocaidode, enga a jé cachodi tu jne ujetiga ore doi guesi tiji dasangórone udore ore. Mu udore a ca puru quedéjnaringo piragapo ome udore ore jne rĩ, ujetiga jĩrique ore chiraja. 18 Jé isocai tu ome ujetiga uñeque chisarase ugárique iji gaté mu a ca cuchárique chósi ti uté gosi jne. Ujetiga gosi chojirase cucha otate puyátique mu a ca pésu cuchárique ome uté uñeque jne. Mu que gusu udore gotique. Jé jõrai tu ujetiga udore ore doi ga ore chicha dajmáinie aja ejnaretade gáyode, enga jogadi u jne ujetiga jĩrique Dupade chiqueta ore.— 19 Uje chi Jesus chejna daruode udore guesi ome ore ga jé u uje Dupade jno údi aja gaté. Mu chi uté quítequiguijí Dupade ãrachua ga chi cháji iji dirode udojo. 20 Mu chi acadigode ore doi Jesus uruode quigode ga ore jnome erámone ujetiga ore chacate cojñone ore iji, ujetiga ore chise daringáringo piquetácho iji erámone údode jnese. Mu chi ore agutiyamáni jé upúsu Jesus uje ore cho dangarádejnai iji uté nanique. Enga tẽrápisa dajopie ome udore ore gu ujetiga ore pesu dapesute datérigo iji cojñonguemui ore ujade, ujetiga diga ore chisipise daringárique pangurecho ome datatagode Dupade urúo. Amen.
1 Teófilo a, e jiei ore uje ore churúsãre Jesus adode quigode uje pésu iji yocurásade ujade nanique. Enga ore ipotigádi u ujetiga ore chatatapísa quitígo. 2 Ore urusarane u yocacadisórone acajnaquéode. Uje yocacadisórone udore ore chimópise Jesus adode iji taningai nanique. Enga ore u to uje ore jno uté ujnomei údi. 3 Jecute uerate ome yu ujetiga yo quigome ua to, Teófilo a, uje e ore chingo yu Jesus adode iji taningai jé aja eruei. Enga e yiraja quigode to. 4 Yipotigádi u gu ujetiga araja to uje cuchade udore ũrepíso uje pacadique ua ome ica. 5 Chi Heródes u ore eduguéjna cuchábi iji ore uniri uje i tu Judéa nanique. Ga chi sacerdote déji to uje chi i tu Zacarías. Zacarías acote chi i tu Elisabet. Chi ore garãpi u jnani bajai Aaron jnese. Sacerdóteode chi ore pésu dáguedie enga ore chécãre rágome dasagode iji Dupade iguíjna cuchábi. Enga jnani bajai Abías gajneque Zacarías uague uaté to iji taningápisi. 6 Enga chi ueracho Elisabet, Zacarías ore adode enga chi Dupade irasiguipise ore. Ore tangaripísi Dupade iroquéode aja acajnaquéode ore gu. Enga que piyaque ore bárique cucha uje ore dopísi Dupade adode. 7 Mu chi Zacarías, Elisabet ca ore atique cuse go uje chi aberé acoté. Enga chi e choquíjnape Zacarías ga e gatape Elisabet to. 8 Chi chise dínique uje sacerdóteode udore ore doi dáguedie ga chi ore chijníe ñane aja dáguedie iji Dupade iguíjnai jeta ore pésu cuchade aja quigode iji ajei. Jecute chi Zacarías déji Dupade iguíjnai ajei. 9 Chi sacerdóteode ore adébeque uje chi ore doi cucaranenie ome ñane. Enga ore doi ome ñane enga Zacarías chi yuque. Jecute Zacarías u uje chacája Dupade iguíjnai ajei uñai puyai ujetiga chãru cucha ai unénique iji. 10 Uje Zacarías qué chãru cucha ai unérone iji ajei puyai ga urásade qué ore catecã́ri Dupade iji guesi ome raque. 11 Zacarías chi chuniname eti Dupade utocaidode gaté minórone uñai chiqueta raja. Enga cháji Zacarías ãrachua iji gaserani dosadi uje ore chãru cucha ai unérone iji. 12 Uje chi Zacarías chimo Dupade utocaidi uté uje chiqueta raja enga que chiraja dasocárique, enga todópisa. 13 Mu Dupade utocaidi chojningame Zacarías: —Ca atodo yu. Yibágui ua gu jetiga araja uje Dupade a chisi ome bataquei ome ua jne. Ga a bacoté Elisabet, uacatique cuse jne. Enga ẽ́cacho Juan aja jne. 14 A aninapúsu ua jne iji babi batigai. Mu que angara anína ua gotique mu jé chuságaja barásade ore to ore ininaquei ome babi batigai. 15 Enga a Dupade cho ujnomeránguiji babi jne. A ca babi chóji yote pioi to jne. Enga Dupade Ujopie a chise ajei eruéode jne uje qué déji daté ajei, mu jé aja batigai. 16 Enga a babi uté gajneque jne ujetiga chacate darásade ore ga a jiépisi Israel gosode ore ujetiga ore chajni Dupade gai. Enga ore chopo dangaráni iji Dupade to jne rĩ ome uté acajnaquérigo. 17 Enga babi Juan a óite pujnomei jne ome yocangaráni Dupade ujnacari diringai. Enga a cho jnani bajai uje i tu Elías uje chi a ujopierãque babi to jne. Ga a chijna pajesereringai ome abechugode ore jne uje a ore cha dájningane ome dabode jne. Enga a ore abode cha dájningane ome dayode ore rĩ. Enga jé upo ome Dupade guetesórone ore rĩ. Uje a ore tangarápoi Dupade rĩ enga a ore chisa ome dáyipiedie ome babi uté acajnaquéringo jne.— 18 Uje Dupade utocaidi cha narare enga chi Zacarías catecã́ri enga chi chojninga: —¿Ama jé ũré ua ya ome baruode udore a? Yaníri tu gu uje gatape yacoté uyoque.— 19 Mu chi Dupade utocaidi uté chojninga: —Dupade iroguipise yu aja ua ãrie. Enga yi tu Gabriel. Yarani tu gaté aja udé jnumi uje Dupade chiroque yu aja ua ujetiga yisi ome babi ujnomei ome ua. 20 Mu botigase yu ga a ca ãrararápo jne rĩ jé aja bacoté ica batigárique. Mu jé yurúo ome ua uje a batique base jne ujetiga chise dínique.— 21 Mu chi Zacarías urásade uje ore déji guesi chi ore cho dáyugu uje diyajmanguipise Zacarías iji Dupade iguíjnai ajei uñai uje puyaguipise. 22 Mu uje chi Zacarías doi guesi iji Dupade iguíjnai ajei puyai mu chi ca narárape. Jé urásade ore chiraja uje a chimo denomitígo iji Dupade iguíjnai ajei puyai. Enga chi Zacarías chusẽre cuchade uje chi ca toque daráringome. 23 Uje Zacarías chejna dajnéone dire ome Dupade iroquéode ga chi chajni aja daguíjnai. 24 Udojo quigade enga Zacarías acoté Elisabet chi jeque. Guedosíode chi chejna yijmanai uje que chicapoi siñeque rĩ iji daguíjnai. Enga chi chucué dáyipie ome re. 25 Chojningame re: “Dupade ipesute yabi gu ujetiga ca yajéngopome yuringa aberé rĩ ome yurásade ore.” 26 Uje chi guedosíode chojmára iji ti iji yui uje Elisabet ica déji ajei enga chi Dupade chirógapo datocaidi Gabriel aja ore idai uñeque rĩ uje i tu Nazaret, uje déji ore uniri Galiléa. 27 Chi ibaguiéde tu gapua uje i tu Maria. Chi gapu uegue mu gajmasṍri e cuse. Enga gajmasṍri i tu José. Enga eduguéjnai David ape disi ejo gajmasṍri tuté. 28 Dupade utocaidi chi chacája Maria gari iji jogadi. Enga chojningame: —Qué yibágui ua, Maria. Dupade ajegaidé ua iji bojodie chequei ujade. Enga Dupade déji bari iji de.— 29 Uje Maria chimo Dupade utocaidi enga uruode chajuque aguté. Enga chi chojninga iji dajei: “¿Chimo joroque gotique uje urúo udore ome yu?” 30 Mu Dupade utocaidi chi chojningame Maria: —Ca atodo yu. Ueradépise Dupade áyipiedie ome ua.— 31 Enga chi chojningápome rĩ: —A jeque ua jne, enga diga babi base jne enga a ojningame jne, Jesus. 32 Ga a eduguéjna cuchape babi jne. Uje ajnai tu dayé Dupade gu ome uringai eduguéjna cuchape. Ga a ajnai tupo eduguéjna cuchábi David to uje barãpi tu gu. 33 Enga Israel gosode a ore cho deduguéjna cuchábi iji uté jne. Enga uringai eduguéjna a ca íjnoque jne.— 34 Enga Maria catecã́ri Dupade utocaidi enga chojningame: —¿Jé yatique tṍrarasiji rique jne a? Uje cáma yimanique cuse.— 35 Enga Dupade utocaidi chojningame Maria: —Dupade pujnuéngasṍri Ujopie Espíritu Sánto a chise ua jne. Enga a chaparu babai jne. Gajnui u ujetiga agúsiji gue abujáraque ajei. Babi uté a garani upúsu Dupade jne. Jecute a ueque jne ome pisijnaringuéone. A ore chĩ́care Dupade abi aja jne. 36 Baguioto Elisabet a atique cuse to jne. Uaté uje ore chojningame aberé. Gata mu a jé atique cuse jne. Enga e guedosíode chojmára iji ti iji yui uje ica déji ajei. 37 Dupade que ajéningapusu darúrique. Enga que pujuréraque cúsome Dupade.— 38 Jecute Maria chojninga: —Yocangaráni Dupade irogue yu ãrie. Jecute yajéode u ujetiga uté doi dáyipiedie quigode ome yu, enga baruode udore tocade ome yu.— Maria chejna daruode udore guesi ome enga Dupade utocaidi jé u uje jno. 39 Udojo quigade ga Maria chi jĩrique jnome ore idai yui iji cucaranone edo iji ore uniri Judéa. 40 Di iji ore idai ga chi chicáji Zacarías iguíjnai. Tibidi Elisabet enga chi chojninga: —Yĩri iji uaque a.— 41 Uje chi Elisabet chudute Maria pijnane enga chi abi chijocase re iji ajei. Enga jĩrique Dupade Ujopie Espíritu Sánto irágu Elisabet ajei. 42 Elisabet chejnapúsu daruode enga chojninga: —Dupade a imesera ua iji yocujodie chequei ujade jnese. Enga a imeserangápo babi to jne rĩ iji bajei. 43 ¿Jé gotique gu a uje babágui yu uje que yugúsiji cuchárique múñi? Mu a yocangarádejnai daté u ua jne. 44 Uje yudute baruode que, enga yabi chijocase re iji yajei. Nínapúsu re iji yajei gu. 45 A anínapúsu ua uje que otigase Dupade ojningane cucha ome ua uje a tocade jnese jne.— 46 Jecute Maria chi chojninga: Yacaranguipise ome Dupade uje yẽrápisa yuringa ayoré ome. 47 Enga jé yirasepíse yu to ome yuringa piqueta ome Dupade. Yiquetangóri u uté gu. 48 Enga Dupade áyipiedie ueradepísi ome yu uje que yugúsiji cuchári que múñi. Enga jé u uje erámi unirisórone, ore ape disi ejórigo a ore chiraja yu jnese jne uje Dupade imesera yu. 49 Uje Dupade u ujopierãi uje ipesute cucha datéode ome yu. Uje pisijnaringuéringo que déji uté ajei go. 50 Jecucha Dupade chosõre dangara sórone jnese. 51 Dupade ipesucho cuchade ome dajopiéjna. Enga sué cojñoque dicotarechoquíode gai ome dape sute datéode udore. 52 Dupade chĩro dacasutedie ore uringane dacasuté. Enga jé basa udore ore uje que ore déji cuchárique ga Dupade sosi ore iji gaté. 53 Dupade átapipisode u jmatágode ore. Jeque ga chiroque cojñoque atade aja doi mu ore chedo dajmáinie. 54 Enga chopise dáyugu daroi Israel ape disi ejoi ore uyoque enga yocajneque osongaquei. 55 Uje jé urúpiso nanique ome jnani bajai Abraham enga jé chuságaja ape disi ejode uyoque to uje chi ca cha chátaja yoque jne iji yocuniri gotique jne.— 56 Maria chi guejnane guedosi gadioc iji Elisabet ore gari. Mu udojo quigade ga chajni to aja dedai. 57 Udojo quigade ga chi Elisabet ica base. Enga diyocape ababi. 58 Elisabet ica base ga iguiosode, urásade ore tibágui to uje ore nína re ome abi. Ore chiraja uaté gu uje Dupade imesera ome abi. 59 Chi e abi chise dirode uje gadióguiji ti iji yui enga jé u uje ore tibagapoi rĩ ujetiga ore chicasi disabi suté. Enga ore chojningame Elisabet: —A yĩ́caco dayé i aja jne uje Zacarías u.— 60 Mu daté chetaque ore áyipiedie. Enga chi chojninga: —A yĩ́caco Juan aja jne.— 61 Mu jé ore chojninga: —¿Gotique gu a? Que uacaguiotique i Juan to gotique.— 62 Mu ore cho quique daserane cucha ome disabi dayé ujetiga pésu írique. 63 Mu dayé chutai darujna aórique iji ore ujetiga churúsãre dajegaitique ore írique iji. Enga churúsãre Juan iji. Mu ore tijapísa uté ipesudi i jnese. 64 Uje ore chejna udojo guesi enga Zacarías narárapo to rĩ. Enga jé u uje tijapúsu Dupade. 65 Ore tijapúsu uje Zacarías narárapo rĩ. Ga ore chingo cucha dacadode udore ome ñane iji dedai údode. Jé ore chuságaja dedai eruéode. Jé u iji guidáyode iji cucarani edodie rĩ iji puniri Judéa. 66 Uje ore chudute udojo jnese enga ore cho dáyugu re. Ore catecã́ri uñane aja daquigode. Enga ore chojninga: —¿Jé chósi píringome re jne a, suté disabi?— Chamáñaje jé ũré enga Dupade imeserape. 67 Dupade Ujopie Espíritu Sánto irágu disabi dayé Zacarías ajei. Jecute uruode u Dupade gueranone urúo ome. Ga qué tujúa ga chósi tome: 68 Picotaque opejã Israel gosode yocangarádejnai Dupade. Uje di iji yoque ujetiga chiqueta yoque. Uje gajneque yoque iji yocuniri. 69 Chisi ome Yoquiquetangóri tome yoque uje ujopierãque. Enga Yoquiquetangóri uté garãpi tu jnani bajai David. 70 Uje Dupade jé urúo nanique ome daruode atatasórone iji taningá pisode. Uje ore urusãraque Dupa de uruode udojo to ga chise yoque to. Uje chi chiroque piquetangó nique aja yoque jne. 71 Uje chi uté chãraque uyógome yocumajosóningo ore jne, yoque tesóningo ore rĩ. 72 Enga chi jecucha ga jnusina dáyipiedie ome yocai cásodicaite jnani bajácho ore. Enga chi jé ca chicadígui dáyipie omenie ome ore jne. 73 Dupade urúo udojo to ome yoca cásodicaite jnani bajai Abraham nanique. 74 Uje chi chiqueta yógome yocuma josóningo ujetiga yicoi uruode enga a ca yitodógo iji gánique jne. 75 Enga chi a yisígo uyógome Dupade jne enga yocuringai paraque jogadi tu. Enga jé yusájoja yocucuecaringuei eruénique jne. 76 Zacarías e tujua dababi ga chósi tome: Yababi a, a Dupade pujnué ngaisṍri uruode atatasõre ua jne ome yocurásade. Chamáñaje a bajaque ua aja Yocangarádejnai iquéode jne gu. Uje a bo uté ujnomei údi ome yocurásade jne ujetiga ore chécãre dadode ome uté yui. 77 Enga a angome yocurásade jne uje ore uringai piquetaque garani tu ujeta pĩroque orisijnaringuéone jne. 78 Uje yocosõrasṍri u Dupade. Enga chijnorapise yoque. Enga uté gajnui tu guedé uje chijñate yoquibai ujetiga quene díreca yoquejode ujetiga chiqueta yoc. 79 Enga a di direcaringuei údi ome ore jne uje qué ore déji ijnangununie ajéode; udore ore jnese uje ore qui upúsu pitoringai yui. A chiqueta ore, uyoque jnese jne ga jé u uje yico yocáyipie ueradedie enga quene pajesereringai chise yoque. 80 Enga ore ababi Juan chi quérãsi enga querãpo irajatigai iji Dupade adode rĩ. Enga chi jogadi tu erãpe tarei nanique. Ga jé chuságaja uje chingongara raja Israel gosode ore.
1 Udojo quigade ga eduguéjnai Augústo chiroque dáyipiedie aja erámi údode ujetiga ore chisẽcaru cojñone iji erámi údode. 2 Ore isẽcaratigai bajai chi u uje Síria gosode ore eduguéjnai u Cirénio. 3 Cojñone ore jnese ore chajni aja dabatigade punire ujetiga ore churúsãre déode iji. Ujetiga ore chisẽcaru ore iji. 4 Jecute José jnoji ore gari iji ore idai Nazaret uje déji ore uniri Galiléa. Enga chicáji ore idai uje i tu Belen uje déji puniri Judéa. Chamáñaje jnani bajai David ore batigade u gu uje José garãpíode u ore. 5 Chi José, Maria ore nóna ñane aja Belen ujetiga ore churúsãre déode iji uté. Uje José jé gajmato Maria. Mu Maria ica chi déji ajei. 6 Uje qué Maria ore déji Belen mu Maria ica basiji. 7 Ijnoque ore upusiétique guiguíjna ome José, Maria ore iji Belen. Jecute Maria ape bajai basiji aquirájnanie iguíjnai ajei. Uje e base enga daté chigaru gai iji borapébode enga chicháji aquirájnanie agapidi. 8 Chi áyasadie irodisóningo déji Belen ejórique uje ore chirote dachidédie iji dejade. 9 Chi ore chuniname eti Dupade utocaidode gaté minórone uñai chiqueta raja ore enga chijninguese ore gai. Chamáñaje Dupade ijningueñai nóna iroi aja ore gu. Enga chajuque áyasadie irodisórone agutédie enga ore todópisa. 10 Mu Dupade iroi chojningame áyasadie irodisórone ore: —Ca atodóyo. Yise uaque gu ujetiga yingo gojña omone ome uaque. Enga a pininaquei gajnengore uáguiji erámi údode jnese jne ome yojñane udore. 11 Yojña omone u uje disabi basosi que iji dejai tuqué iji Belén, jnani bajai David idai. Enga ta uté u jne ujetiga uacaquetangóri tu. Enga yoquijnati Crísto upúsu, Yocangarádejnai. 12 Enga a qué yo quigome uaque jne disabi suté jogadi. Disabi su uje ore chigarúsu gai iji borapébode. Enga déji aquirájnanie iguíjnai.— 13 Uje chejna daruode udojo guesi enga jorane Dupade iroque gaté minórone ore diapóji to rĩ enga jiépisi ore. Ga chi ore nínapúsu raque enga ore chicota Dupade. 14 Enga ore chósi te: Picotaguipise opejã Dupade iji idai iji gaté. Jé basa ga a cho sẽre jnumi jogosórone ajéode jne uje a ore nínapúsu raque jne uje ore chimo Dupade osongaquedatei ome ore gu. 15 Uje Dupade irógode gaté minórone ore jnopome gaté rĩ enga áyasadie irodisórone ore catecã́ri ñane. Ga ore chojningame ñane: —Boyo yico ga yibájobí ore iji ore idai Belen to. Yajicope yocangarádejnai Dupade ojningai yoquiquetangóri to.— 16 Ore jno ga ore chaguitópisiji yui. Enga ore chise José, Maria ore iji aquirájnanie iguíjnai enga Maria ababi désiji aquirájnanie agapidi. 17 Uje ore chise ore ga ore chingo Dupade iroi ojñane ome ore ome ore ababi. 18 Uje Maria, José ore chudute ore ojñane enga ore tijapúsu gojñane udore. 19 Mu Maria que chicadígui cuchade udore iji dáyipie. Mu jecucha jnusina ore ojñane udore. 20 Mu áyasadie irodisórone ore chajni aja darodedie dachidei. Enga ore tija Dupade aja dajei. Uje ore chimo Dupade ojningane cucha uje ore chudúdome Dupade utocaidi gaté minóri uruode. Uje tocadepise ore ojningane cucha ome ore. 21 Uje chi disabi chisósi dirode uje gadióguiji ti iji yui enga ore doi judíode ore isocabei ome Jesus ujetiga ore chicási . Ga quene ore pésu írique. Mu ore chĩ́carosi Jesus aja uje chi Dupade irótique ipesute gu i uje abi cáma chiquetási raja daté ajei. 22 Uje chi dirode chejna ayoré gáredie ga chi José, Maria ore jno dádi aja Jerusalen ujetiga ore tẽrája Dupade ome Maria uringa puyé. Uje Moises urusarane quigode jé u gu ujetiga ore tẽrája Dupade ome daringáraque puyé enga jé u uje ore uringa icha jogadi u iji quigade ome Dupade. Jé upo rĩ ujetiga ore chisi ome dape bajábi ome dangarádejnai Dupade. 23 Ore pésu udojo gu uje Dupade jé urúo iji daruode uje chojninga: “Ujetiga uacape bajátique diyoqui enga asíñome Dupade.” 24 Ore gaidedie upo Dupade áyipiedie rĩ uje chi chojninga: “Ẽcho cucujnadaté gáningo ome yu, jeoga guidobo gáningo ujetiga ajéyosi ome yu.” 25 Chi jnanírique déji Jerusalen nanique uje chi i tu Simeon. Enga chi paraguipise uté uje chi jecucha catecã́ri Dupade. Enga chi ca cha dangoroné ome Israel gosode ore iquetangónique yui. Enga Dupade Espíritu Sánto ujopie chi irágupúsu uté ajei. 26 Dupade Ujopie Espíritu Sánto chojningame Simeon: —A ca atobi jne. Mu a jé aságaja jne ujetiga amo baquetangóri to ujetiga yirógaja ua jne.— 27 Mu chi chise dínique uje chi Dupade Ujopie Espíritu Sánto catecã́ri Simeon ujetiga chicáji Dupade iguíjna cuchábi. Enga chi jĩrique Simeon jnome. Ga chicáji enga chi chise José, Maria ore iji uje qué ore doi Dupade áyipiedie ome raque. 28 Uje quene Simeon chimo disabi Jesus iji taningai enga chisasi iji gaté enga tija Dupade. Enga chojninga: 29 Yangaráni a, Dupade a, jé arec ujetiga e yitoi uje bojningane cucha e tocadepise ome yu. 30 Uje e yimópise ome yedodie yoqui quetangóri uje disabi sudé su. 31 Uje bachapite uté ome uyoc ujetiga yoquiquetangore jnese iji erá mone. 32 Chamáñaje uté u gu ujetiga chi jñate purása quedéjnane ore, yoquibáyode. Enga a picotaque barásade Israel gosode uyoque jne uje piquetangóri Jesus garãpíode u yoc. 33 Uje José, Maria ore chudute Simeon ojñane ome disabi ga ore tijapísa. 34 Udojo quigade enga Simeon chi chojningame José, Maria ore: —Yipesupu ga Dupade chatapísaja uaque jõ a.— Enga chojningame Maria: —A jiépise Israel gosode jne ujetiga ore changureta disabi suté. Mu a jiépise Israel gosode to ujetiga ore chetágosi. Mu a Dupade sose uté ipotigásoningo iji gaté jne. Mu jé basa ga Dupade a sose guetesóningo ore iji jnumi jne ujetiga ujuya ore. Mu disabi suté a chosi Dupade gãrapié iji re jne mu a jiépise cojñotígo uje a ore chotigásosi jne. 35 Enga a udore ore áyipierigui imóringo tocade jne. Mu ome ua, Maria, a bajneque payuguhebátigadatei jne ujetiga chise bajei.— 36 Enga chi chequéraque dépoji Dupade iguíjna cuchábi ajei te rĩ. Uje chi Dupade uruode ojñato. Uaté chi iábi su Ána nanique. Chi dayé i tu Fanuel. Enga ore garãpi tu jnani bajai uje i tu Áser. Mu chi Ána e chise daringa gata. Chi Ána suaté chi jĩrique chisa damanique nanique iji daringa gapu. Mu chi déji dabai gari aja sequeredie uje gare iji ti iji yijmanai uñai. Mu chi abai toi nanique. 37 Enga uaté chequé eca iji Dupade iguíjna cuchábi ajei. Enga guejnanie sequerei 84 iji yui uje chi gatapísap. Enga chi ca doi guetíguiji Dupade iguíjnai ajei gotique. Uje jecucha doi Dupade uruode ga chi cho dayac ome re ujetiga jnusi rome dacatecãraitigade ome Dupade. 38 Enga chi Ána chise Simeon, Maria ore iji ñane gari uje qué ore chicotási disabi suté. Enga chi Ána cháta raja ore to. Enga chacãre Dupade gai ome disabi Jesus to. Enga jno ga chingo erámi uje chi e di Jesus uje chi Jerusalen gosode ore ijnati tu ujetiga chiqueta ore iji ore umajosórone jmáinie. 39 Uje José, Maria ore chejna Dupade áyipiedie quigode guesi, jé u uje ore chajni aja dedáipisi uje i tu Nazaret uje déji puniri Galiléa. 40 Mu chi Jesus quérãsi gaté. Ga chi irajatigai querãpo rĩ. Enga chi Dupade chatapísaja disabi enga caniranguipísome rĩ. 41 Chi Jesus dayé, daté ore chicai Jerusalen iji sequeredie jnese ome judíode ore jnusinamáni dire uje i tu Páscua . 42 Enga uje Jesus e chise sequeredie uje gare iji yirídai ga e nóna ore aja Jerusalen to uje ore doi dasocabei uté. 43 Mu uje chi José, Maria ore chejna dasocabei adode guesi enga jé u uje ore chajni aja dedai. Chi ore jos eti Jesus déji gague dipesei ore gari to uje ore nóna ore aja dajei. Mu Jesus a qué chácariji Jerusalen que. 44 Chi ore jos eti Jesus nóna ore jorane cojñoque aja dajei. Jecute que ore chucué míraque. Mu chi ore chejna dire chojmarárique iji dajei enga jé u uje ore jnusina Jesus. Enga jé u uje ore chucuesi iji dajorane cojñoque ujade. 45 Mu que ore chise Jesus go iji darásade ore ujade. Jecute ore chajni Jerusalen gai ujetiga ore chucué iji. 46 Chi gadioque ore guejnatígo dire uje ore chucué. Mu chi diga ore chisiji Dupade iguíjna cuchábi ajei. Mu chi qué déji Moises uruode atatasórone uñéngo ore gatócororaque. Uje chi tangaripísi ore ojñane ga catecã́ri ore to ome cuchade. 47 Mu jnanione udore chi chajuque ore agutedie uje chi jnacare gatódabia suté ayipieranguipise. Uje chi chiraja ore uruode quigode ga chimate ore uru quitígo ome ore. 48 Uje José, Maria ore chise dabi iji Moises uruode atatasórone ore ajei ga chajuque ore agutedie uje cháji ore gatócoro. Ga daté chi chojningame: —Yababi a, bayé uyoque yucuegoi ua iji erámi údode diríca. Yocopise yocáyugu ua gu. Uje que yirajágo bajogatique. ¿Gotique gu a uje que ajína yoque to diríca ya?— 49 Mu chi chajnai daté uruode ga chojninga: —¿Gotique gu a uje a acueyoi yu iji daté diríca? ¿Ga ca arajáyo a uje yijogadi tu yajnéone yapade iroquéode gai iji iguíjnai tudé?— 50 Mu que ore chiraja Jesus áyipie quigode go. 51 Mu udojo quigade ga nóna ore aja dajei uje ore chajni aja Nazaret. Enga jécucha ga tangaripísi ore. Mu daté chi ca chicadígui cuchade udore iji dáyipie. 52 Mu chi qué Jesus quérã. Enga irajatigai quérã to iji áyipie. Enga chi Dupade irasiguipis. Enga jé chopo cojñone ore to rĩ iji urásade.
1 Iji dirode udore chi Tibério e chise sequeredie uje chejna yirídai ome daringai eduguéjna cuchape. Enga chi ipesute darásade ore uringane dacasuté uje urásade ore ero tu gu. Enga chorei Póncio Piláto iji Judéa gosode ore ujetiga ore cho deduguéjna iji. Enga chorei Heródes iji Galiléa gosode ore. Enga chorei Heródes jõrai Felipe iji Ituréa gosode, Traconite gosode ore rĩ. Enga chorei Lisánias iji Abilínia gosode ore. 2 Enga chi jnaníringo déji to uje chi ore íode u Anas, Caifas ore. Enga chi judíode angarádejnane u ore iji Dupade iguíjna cuchábi. Enga chi qué Zacarías ujnacari Juan déji erãpe taretigai nanique iji dirode udojo. Mu chi diga Dupade catecã́ri iji te ujetiga jno uruode údi ome erámi údode. 3 Enga jé u uje chi Juan jno dacajnaquéode údi ome cojñone idáyode uje déji tie Jordan edúdode. Enga acajnaquéode chi quigode u uje chojningame ore: “Écãcho uacatígo enga ayáyo uacate bajade ga yṍra uágaja yodi jne. Enga jogadi u jne ujetiga Dupade chĩro uacasijnaringuéone.” 4 Dupade uruode atatasṍri jnani bajai Isaías urusarane ojningai jé u Juan uté. Ga Isaías urusarane chósi te: A yudúco uté gosi pijnatígo jne ujetiga tṍraji erãpe taretigai. Enga a chojningame yoque jne: “Boyo yico, yipéco dajei iji Yoca ngarádejnai iquei uje a di jne. Apesopúsu aja quedéjnane jne. 5 Ujetiga ejopiérigui déji mu acosá yoja ome jnumi. Ujetiga orocórigui déji mu apéso ga tiroque. Jé ca apéso ga dajetique ditáji mu ujetiga caputáji daqui. Dajetique ujetiga gajnareque ga apésopúsu ga uerate. 6 Enga diga erámi unirisórone ore jnese ore pañáji Dupade isocade ome ore uringane piquetaque.” 7 Chi cojñone yore Juan gai ujetiga chaca ore edodie iji yodi. Mu Juan chojningame ore: —Aringácachoquí uaque enga uacajnúone u uacajnai Satanas píode uga. ¿Jé uñeque ingome uaque ujetiga piquetaque uaque jne ome uacajnei pujuyaquequedaté ujetiga ayoyorása ome? Uje pujuyaquequedatei e idógosi.— 8 Juan chojningápome ore rĩ: —Ajusópise uacatígo guio ujetiga pimo uacasoca arétigo uje uaquécãcho uacadode. Enga jé ca ojnichome ñane: “Jé areguipise yoque ãrie uje jnani bajai Abraham ape disi ejo yoque.” Mu que quigode u gotique. Ujetiga Dupade ajéo ga a pesurásu cucaranéringui to ga ore gajnunie urásu Abraham ape disi ejode to. 9 Dupade jé cho jnani utácarique uje dimane ome dajnosé ujetiga chaquesu pore gajnarénguenie iji pore ijorenie ujade. Chiraja gu uje gajnarenguei enga que áraque cuse. Jecute chaquesu udire ore jnese enga tṍra ore aja pioi.— 10 Mu jé u uje cojñone catecã́ri Juan. Enga ore chojninga: —¿Jé yoquipesutique cucha dérasi rique a ujetiga ca yico to Dupade ujuyaquei tuté?— 11 Mu Juan chi chajnai ore uruode ga chósi tome ore: —Uacuñeque ujetiga iguidérigui gare ajuguína uñáraque ome uñeque ujeta gosi ca iguidéraque cuse. Ga jé cho ome cucha pibosode rĩ. Ujetiga uacabotígo cuse ga asíyo udore ore iji uje ore jmáta.— 12 Cojñotígo chi ore chise Juan to nanique uje chi ore utáite dojode cojñoque ome deduguéjna cuchábi gajnenie plátai . Ore ajegaidi u ujetiga Juan tṍra ore aja yodi to. Ore catecã́ri Juan enga ore chojninga: —Yocacadisṍri a, ¿jé yoquisocárique dérasi rique to a?— 13 Mu chi Juan chojningame ore: —Ayáyo asayo uacangaráni ipesudedie plátai iquéode.— 14 Enga chi soldádode uñéngo ore chise Juan to ga ore catecã́ri to ga ore chojningame: —¿Jé yoquipesutique to jne a?— Mu chi Juan chajnai ore uruode ga chi chojninga: —Ayáyo ajnóso cojñone. Ca ajmongachopója ore rĩ ujetiga ca arajáyo ore bárique cucha. Enga ca etácho uacangaránone gueranenie plátai ome uaque ome uacatrabajandoringane.— 15 Mu chi cojñonguemui ore jnatupúsu daquetasónique yui uje chi jnani bajade ore erángate uje chi Crísto u jne. Jecute ore jos eti e u Juan ome uringai pitijabate ome acajnaquéode. 16 Jecute chi Juan chojningame ore jnese: —Que potigayaque uje uyu u uje yṍra uágaja yodi. Mu que yugúsiji cuchárique. Uje uñai qué déji yiquigade uje suépise yibai ome dajopiéjna. Uje ujopie gajnunie u pioi ocaráidie. Uje que cuchárique déji iquénique. Ga a uté di iji uaque jne ga jé u jne ujetiga chĩreta uacajéode ome dajopie uje Dupade Espíritu Sánto u.— 17 Mu Juan qué chacate ore enga chacãrapo dacajnaquéode aja ayoré utácarigo ore isocárigo rĩ uje chojninga: —Dupade isocade a jé cuguésõri ayoré utácade ore isocade uje jé dimane ore ome doidode picho ujetiga ore chujé dacatígo cucha iji jnumi. Enga ore cãra ajñunie jogadi enga ore susipise udire guio. Jé basa ore chãru guídode gai. Mu Dupade iquetai que toc ujetiga pajnique pioi uté go iji deréjnane.— 18 Ga jé isocade u udore uje Juan chacate cojñone ore ome yoquiquetangóri Crísto ujnomei yui. 19 Enga Juan pojna ore eduguéjnai Heródes iji uté ore uniri. Uje chi Heródes uté chijna desai Felipe acoté iji gari gu uje chequé uaté chi i u Herodías. Ga chi jé bade u date gajnaréngone uñéngo to rĩ. 20 Mu chi ca Heródes tangári gotique. Enga chi doi dateringane uje pésu cucha gajnaréngone ome Juan. Ga chi chisa ga suru uté gai. 21 Mu iji taningai uje Juan qué déji gai uje tṍra cojñonguemúone aja yodi enga chi Jesus tibágui to ujetiga tṍra aja yodi. Enga uje Jesus qué catecã́ri Dupade enga jĩrique gaté chuchẽre dabai. 22 Enga jĩrique Dupade Ujopie Espíritu Sánto doi jnumi ga cho cucujnadatéode aja jnumi. Enga chi basaja Jesus gai. Enga chi jĩrique ore chudute darade uje tṍraji gaté yui ome Jesus. Uje chi chojninga: —Yape yedójnari tu ua uje yinína yu ome ua.— 23 Jesus chi e chise sequeredie uje 30 iji yui ga jé u uje chingongara raja erámi. Mu cojñone chi ore jos eti José jé abipise Jesus. Uje chi José dayé i tu Eli. 24 Jé basa ga Eli dayé u Matat. Ga Matat dayé i tu Levi. Ga Levi dayé i tu Mélqui. Ga élqui dayé i tu Jána. Ga Jána dayé i tu José gatei. 25 Ga José gatei dayé i tu Matatías. Ga Matatías dayé i tu Amos. Ga Amos dayé i tu Nahum. Ga Nahum dayé i tu Ésli. Ga Ésli dayé i tu Nágai. 26 Ga Nágai dayé i tu Maat. Ga Maat dayé i tu Matatías gatei. Enga Matatías gatei dayé i tu Sémei. Ga Sémei dayé i tu José uñai. Ga José uñai dayé i tu Juda. 27 Ga Juda dayé i tu Joána. Ga Joána dayé i tu Résa. Ga Résa dayé i tu Zorobabel. Ga Zorobabel dayé i tu Salatiel. Ga Salatiel dayé i tu Néri. 28 Ga Néri dayé i tu Mélqui gatei. Ga Mélqui gatei dayé i tu Ádi. Ga Ádi dayé i tu Cosam. Ga Cosam dayé i tu Elmodam. Ga Elmodam dayé i tu Er. 29 Ga Er dayé i tu Josué. Ga Josué dayé i tu Eliezer. Ga Eliezer dayé i tu Jorim. Ga Jorim dayé i tu Matat. 30 Ga Matat dayé i tu Levi gatei. Ga Levi gatei dayé i tu Simeon. Ga Simeon dayé i tu Juda gatei. Ga Juda gatei dayé i tu José uñai. Ga José uñai dayé i tu Jonan. Ga Jonan dayé i tu Eliaquim. 31 Ga Eliaquim dayé i tu Meléa. Ga Meléa dayé i tu Mainan. Ga Mainan dayé i tu Matáta. Ga Matáta dayé i tu Natan. 32 Ga Natan dayé i tu David. Ga David dayé i tu Isaí. Ga Isaí dayé i tu Obed. Ga Obed dayé i tu Booz. Ga Booz dayé i tu Salmon. Ga Salmon dayé i tu Naason. 33 Ga Naason dayé i tu Aminadab. Ga Aminadab dayé i tu Aram. Ga Aram dayé i tu Esrom. Ga Esrom dayé i tu Fáres. Ga Fáres dayé i tu Juda uñai. 34 Ga Juda uñai dayé i tu Jacob. Ga Jacob dayé i tu Isaac. Ga Isaac dayé i tu Abraham. Ga Abraham dayé i tu Taré. Ga Taré dayé i tu Nacor. 35 Ga Nacor dayé i tu Serug. Ga Serug dayé i tu Rágau. Ga Rágau dayé i tu Peleg. Ga Peleg dayé i tu Heber. Ga Heber dayé i tu Sála. 36 Ga Sála dayé i tu Cainan. Ga Cainan dayé i tu Arfaxad. Ga Arfaxad dayé i tu Sem. Ga Sem dayé i tu Noé. Ga Noé dayé i tu Lamec. 37 Ga Lamec dayé i tu Matusalen. Ga Matusalen dayé i tu Enoc. Ga Enoc dayé i tu Jared. Ga Jared dayé i tu Mahalaleel. Ga Mahalaleel dayé i tu Cainan gatei. 38 Ga Cainan gatei dayé i tu Enos. Ga Enos dayé i tu Set. Ga Set dayé i tu Adan. Ga Adan garãpi tu Dupade.
1 Ga chi Jesus jnoji tie uje i tu Jordan. Mu chi Dupade Ujopie Espíritu Sánto irágupúsu ajei. Ga Dupade Ujopie Espíritu Sánto choreji erãpe tarei. 2 Chi déji erãpe tarei tuté iji díningo uje chi guejnáringui ayoré gare. Mu chi Satanas chetingare Jesus iji charidi uté. Mu chi Jesus cho dayágome re ome dejnane udore dire. Mu dirode udojo quigade ga chi quene chejnáreque dayaguhei. 3 Mu chi Satanas chojningame: —Ujetiga jé ũré ua ujetiga Dupade abipise ua enga aroque cucaranenie udire aja, ga noña ga arurécho.— 4 Mu jé u uje Jesus chajnai Satanas uruode ga chojninga: —Dupade urusarane déji ga quigode chósi te: “Que gusu cucha pibotique go jeta ayorérique eca ome. Mu yiquecágo gu Dupade uruode uje yoco cucha pibotíji.”— 5 Mu chi chejna daruode udojo guesi ga Satanas jno údi aja cucarãte umari ójo. Mu chi Satanas jĩrique chingo punire ueradode ome uje déji erámi údode jnese. 6 Mu chi Satanas chojningame Jesus: —A yipésu cuchade udore jnese aja quitígo ga yisi ome ua jne. A bajneque cucha orerane jnese iji punirone udore. Enga a punirone udore unirisórone a ore cho deduguéjnai iji ua jne. Uje yajnécho gu ga jé tiógara ujeta yẽrája ua ome to. 7 Mu ope bangaráni iji yu bajac ujetiga achagába bagatáidie aja yiquei ga jé bajnécho punirone udore jnese jne.— 8 Mu chi Jesus chajnai uruode enga chi chojningame: —Satanas, acai sañeque iji yejode. Uje Dupade urusarane déji ga chósi te to: “Gusu Dupade ujetiga angári. Ga gusu uté ujetiga be iroquéode rĩ.”— 9 Mu chi chejna udojo guesi ga chorepóji Jesus tiji ore idaidatei uje i tu Jerusalen. Enga chorepóji Jesus tiji Dupade iguíjna cuchábi ójo rĩ. Ga jé u uje Satanas chi chojningame: —Qué be gojni ga abasiji de gaté ujetiga jec ũré enga Dupade ape ua.— 10 Enga chijna joróga Dupade uruode ome enga chósi tome: —Dupade urusarane déji to ãrie uje chojninga: Dupade a chisi ome dajopie ome darótique jne ujetiga chirote ua. 11 Ujetiga abasiji gaté mu a Dupade irótique chisa ua iji gaté jne, ujetiga ca cuchárique chósi ti iji ua. 12 Mu Jesus chajnai Satanas uruode ga chósi tome: —Jec ũré ua mu bécãre quigode gu. Uje Dupade urusarane déji to ga isocai tu de: “Que toc ujetiga pujñiete Dupade ome ojningane cucha quigode.”— 13 Uje Satanas que chiraja dasocáringome ujetiga chajnéra detingaquéode údi ome Jesus enga jnoji gari. Mu ajéode u ujetiga qué jno detingaquéode údi iji dire uñeque. 14 Jesus chi chajniapo aja daniri te rĩ uje i tu Galiléa. Ga chi Dupade Ujopie Espíritu Sánto irágu ajei. Ga chi cojñone ore tujúa uté iji punirone údode jnese. 15 Chi Jesus chacate ore iji judíode aquiningaméone iji ore idáyode jnese ga chi ore nínapúsu uté acajnaquéode. 16 Chi diga Jesus chajnésara dedaipísi uje i tu Nazaret uje dayode ore chimánaja gaté iji guidai uté. Jesus chacate ore iji ore aquiningamei iji dire puyátique . Uje chi adébeque uje chicáji ore aquiningaméone iji dire puyade. Mu chi jĩrique Jesus chague iji ore ajei uje chi imoi tu gu ujetiga naráraja Dupade urusarane. 17 Chi ore chisi ome darujna aoi ome uje chi Dupade uruode atatasṍri Isaías urusãracho nanique. Jesus chi chungare darujna aoi ga chucué dajegaidode Dupade urúo quigode iji. Ga jec u uje chi naráraja. Ga chósi tome: 18 Yocangarádejnai Dupade Ujopie déji yari. Uje chi imeseraque yu gu ujeta yiji uté ujnomei údi ome ayoré jmatágode, ayoré gajnaréngone ore to rĩ. Chiroque yu aja udé gu ujetiga yiqueta ayoré jnusietade, ayu guhebátade ore. Ujetiga yijnime udore ore iji ore isijnaringuéone ajei. Ujetiga yiqueta edoparigode ore enga ore chimópo cuchárigo rĩ. Jé upo ome ayoré pumajone rĩ ujetiga yijnime ore iji ore umajo sóningo ore gari to. 19 Uje jé adi tupo rĩ ujetiga yingome ore uje e deréjnai u udé ujetiga ore nína raque ome dangarádejnai diringai. 20 Mu uje Jesus chi cha dajirigode darujna ao, ga chi suru gai ga chi chisi ome ore aquiningamei irótique ga jé u uje chácarapoji rĩ. Mu chi cojñone ore iji ore aquiningai chi ore topísiji gai. 21 Jecute chi chajnerame dacajnaquéode ome ore ga chi chósi te: —Yajirigode Dupade urúo ome uaque e tocade ome uaque, jé u iji de gajneri.— 22 Ore irasique Jesus acajnaquéode jnese. Mu chi ore chopise dáyugu jnese ome Jesus uruode udore quigode. Enga chi chajuque ore agutedie ome darecujate ueradedie. Enga chi ore chojningame ñane: —¿Ga ca José abi uté a?— 23 Jesus chojningame ore: —Ise ga abóyoja yu jõ. Ga a ojnichome yu jne: “Daijna, be ga aqueta ua, jé aja barásade uyoque.” Uje yuniri u udé ga a ojnichome yu to jne rĩ: “Udúco uje baqueta ore iji ore idai Capernaum diríca, jé go ca aqueta barásade ore iji banirípisi udé to.”— 24 Jecute Jesus qué jno daruode údi ga chi chojninga: —Jé ũrepise yu ome yuruode. Uje uacamóño uje a Dupade uruode ojñasónique dirásiji dedánique ga a ca uté urásade ore ajéngome gotique. 25 Jé ũrepise yu uje chequé ecadie uásejna nanique iji ore uniri Israel. Enga chi Dupade uruode atatasṍri Elías déji ore uniri uté to nanique uje que begapo rĩ iji sequeré gadióguedie mu chi peque uñai. Jecute chi chaguhéode socárome ore iji ore uniri uté údode jnese. 26 Mu que Dupade chiroque Elías aja chequé ecadie udire uñáraque iji Israel, mu chi chirógaja chequé eca, purása quedéjnaraque, iji ore idai Serépta uje idógosiji ore idaidatei Sidon. Enga jé u uje chaguhéode que socarapome uaté rĩ uje Elías déji gari gu. 27 A ajnusináño to jõ, ore ojñane ome jnani bajai Dupade uruode atatasṍri uñai uje chi i tu Eliséo. Chi jiépisi dequejnareque datérique isatígo iji Israel gosode ore ujade nanique uje dequejnarei tuté chi i tu lépra . Mu chi ca Eliséo chiqueta darásade ore iji gotique. Mu chi chiqueta jnani purása quedéjnai uje i u Naaman. Naaman uté chi uniri i tu Síria.— 28 Mu uje chi ore chudute Jesus acajnaquéode udojo ga jé u uje ore chetaque Jesus. Ga chi ájningaranguipise ore jnese iji daquiningai. 29 Enga chi jé u uje ore chajni Jesus gai. Ga ore chisa ga chi ore chijnája dedaidatei eruénique. Ga chi ore chorei iji cucarãtique ójoraque uje chi déji ore idaidatei eruei. Uje chi ore gaidi tu ujetiga ore tṍra Jesus taja jnup edo. 30 Mu chi ore chise uté mu ore chunina mu Jesus jnoji ore ajei. 31 Jecute Jesus jnopo rĩ ga chi chicai ore idai uje i u Capernaum uje déji ore uniri Galiléa. Mu jé adi tu dadi uje chacate cojñone ore iji ore idai uté iji dire puyai . 32 Mu chi acajnaquéode chajuque ore agutedie uje chi ca chijna puru gajnarétique mu oidedie u ayoré dacasutedie ore arecujáidie. 33 Mu chi jnanírique déji ore aquiningai tuté uje chi cho ũrusode uje chi Satanas utocaidi déji ajei gu. Ga chi jecucha ga tibidi dejode. 34 Enga chi jnani tuté catecã́ri Jesus mu chi oidi tu Satanas utocaidi uje déji ajei. Ga chósi tome: —Jesus a, Nazaret gosi a, ajíñome yóquiji te. ¿Gotique gu uje bacája yoque? ¿Ãri gu a ujetiga ejna yoque? Yiraja ua ãrie. Barãpi tu Dupade. Enga ueque ua ome pisijnaringuéone.— 35 Mu chi Jesus pojna Satanas utocaidi iji jnani uté ajei ga chojninga: —O paraque. Be guesi iji uté jnani ajei.— Mu chi Satanas utocaidi chinguíra jnani aja jnumi. Enga chi cojñone ore pañáji jnese. Mu chi doi guesi iji jnani ga que pésu cucharingome gotique. 36 Chi chajuque cojñone ore agutedie jnese. Ga chi ore chojningame ñane: —¿Jé gotique gu a uje uté uruode tocade a? Ga jé chuságaja Satanas utocaidode uje chiroc ore aja guesode iji ore isasórone cojñocho. Ga gajnui tu ayoré dacasuté ome daruode.— 37 Enga chi ore tujúa Jesus jnese iji dedai údode ga jé ore chuságaja guidai unejángone to iji dedai ejode. 38 Mu uje chi Jesus jnoji ore aquiningai guiguíjna ga chi chacája Simon iguíjnai. Mu Simon uté chi ejóraque ejnaretepise. Uje chi dotãripise gai. Ga chi ore chojningame: —Qué yijóchago bajei údi ujetiga aquetape chequé uaté.— 39 Mu chi Jesus tajíra yui enga jé u uje chijócãre uaté ejnarei. Ga jĩrique uaté údode cho jnánguiji. Enga jé uringa ueca jogadi tu. Enga jé u uje niji iji damochápi ga chi pésu ore posode. 40 Uje e guedé chaca ga chi ore jnese chijna darásade aja Jesus ujetiga pesabu ore iji ore ejnaréngone. Uje chi ore ejnaréngone cha ñane yúji gu. Mu chi Jesus chujé dajmáinie aja ore gáyode jnese ga jé u uje chiqueta ore jnese. 41 Mu chi chijócãre Satanas utocaidode iji ejnaretade uñéngo to. Ga chi Satanas utocaidode ore tibídaja daquigode ga chi chósi te: —Cachi Dupade abipísi u ua ãrie.— Mu chi Jesus pojna ore enga chi chaquĩ́ra ore ome ore pijnane. Uje chi Jesus qué ipoguiete re iji darásade ujade. Chamáñaje chi Satanas utocaidode chiraja uje judíode ore ijnati Crísto u. 42 Mu chi quene dire iji deréjnai uñai ga chi Jesus chijnime re iji ore idai ujetiga cãra dayaritique. Mu chi cojñone chi ore chijnángui ga chi ore chucué ga jé u uje ore chisápo rĩ. Ore gaidi tu ujetiga ore chaquĩ́ra iji dari iji dedai. 43 Mu chi chajnai ore uruode ga chósi tome ore: —Yigaidedie u Dupade áyipiedie ome yu ãrie. Ujetiga yijna uté ujnomei aja quedéjnane ujetiga yimate uñéngo aja Dupade uáguedie to ujetiga chope darásade iji ore to.— 44 Enga chi jé isocai tu dadi uje chacate ore iji ore aquiningaméone jnese iji Galiléa údode.
1 Mu chi chise deréjnai uje Jesus chi déji yote quedéjnai pijnanai uje chi yote quedéjnai tuté i tu Genesaret. Enga chi cojñonguemúrique ore chise Jesus iji to. Ga chi chacate ore iji mu chi ore chapédugu yote quedéjnai pijnanai. Mu chi ore ajegaidi tu ujetiga ore chudute Dupade ujnomei to. 2 Mu Jesus chi chimo cuco gárerigo uje chi déji yote quedéjnai iberoi. Mu chi cucode gachisórone que ore déji ajei gotique uje oyite gaisórone ore, enga qué ore churu oyídode gajnenie dorárigui dachímeno. 3 Mu chi diga Jesus chacája cucode udore uñeque uje chi cucoi gachisṍri i tu Simon. Ga chi chojningame Simon: —Bope yocúdi aja yoquiquei.— Uje chi cojñone ore chapédugu erámi gu. Ga jé u uje Jesus chácare iji cucoi ajei enga chacate cojñone iji yote quedéjnai edúdi. 4 Uje chi e chejna dacajnaquéode guesi ome cojñone ore enga chi chojningame Simon: —Bope bachidi cuco údi aja yodi ajedatei ujetiga yisago oyítigo ome uacora chímeno.— 5 Mu chi Simon chajnai Jesus uruode ga chi chojningame: —Yocacadisṍri a, cachi yirógode yejnángo dejai iji yodi que, mu que yujégo oyítique. Mu a yiji báyipiedie jne. Ga yichaba yora yichímeno aja yodi jne rĩ.— 6 Mu uje chi Simon ore tṍra dora taja yodi ga chi ore isagode jiépisi iji oyídode. Ga ore ora uaté chi pota ujetiga dajúgome oyídode. 7 Uje chi oyídode irágupúsu ore ora ajei ga chi Simon ore chutai dajorane iji cuco uñai ajei ujetiga ore cháta rágaja ore to. Jecute chi ore di, ga ore chĩreta cuco gárode udore ome oyídode. Mu chi penupise oyídode ga idógosi ujetiga oyídode jno cucode údi aja yodi údi. 8 Mu chi quene Simon Pédro ore chiraja Jesus uringai ujopierãque ome ipesute datéode udore ome ore. Ga chi jé u uje Simon Pédro chichaga dagatáidie iji iquei enga chi chojningame: —Yangarádejna, bome yoque uje jnani ate gajnareque uyu gu.— 9 Uje chi Jesus chajuque Simon Pédro, jorane ore, ore agutedie ome dapesute datéode udore gu ome dejnane oyícho. 10 Ga chi jé cho ome Zebedéo ujnacarode Juan, Jacóbo ore to. Uje chi Simon Pédro ore jõra ore to iji cucode udore to. Mu chi Jesus chojningame Simon: —Ca o báyugu ua ome cuchade udore. A aya baringai oyite gaisõre jne ga a acate cojñotígo ore to jne ga a amate cojñotígo ore aja yu jne.— 11 Jecute chi ore jno cucode udore údi aja guesi. Mu chi ore noñome iji te ga ore nóna Jesus jnese. 12 Uje chi Jesus chise ore idáyode uñeque enga jnani ejnaretátique tibágui Jesus uje ejnarei i tu lépra . Uje chimo Jesus ga chichaga dagatáidie aja jnumi iji iquei, mu chajire jnumi. Chijócha ajei údi enga chojninga: —Pangarádejna, ujetiga bajéo enga aqueta yu. Uje bajopie déji ome cuchade udore gu.— 13 Mu chi Jesus chisa cojñoi jmanai enga chi chojningame: —Yipota ãrie ujeta yiqueta ua.— Uje urúo udojo ga jé u uje cojñoi ejnarei chijnime re iji. 14 Mu chi Jesus chojningame cojñoi: —Ca angoba baringai piquetac aja erámi. Mu bope bádi aja judíode yocangaránone uñeque iji Dupade iguíjna cuchábi ajei. Ga bebi Moises áyipie quigode ome baringai piquetac ga erámaja Dupade ome cuchisórique ujetiga imoi tu ujetiga ore cho ayoré ijõre iji ua.— 15 Mu chi Jesus uringai ujnomeraque chubu erámi ome cojñone ore. Jecute chi ore timíninga Jesus aja tijode ujetiga ore tangári acajnaquéode. Ga jé u to ujetiga chiqueta ore ujáningo ome ore ejnarétigo. 16 Mu chi Jesus noñome cojñone ore iji te ujetiga chise dayaritique ujeta gusu iji uje chi isocabeque gu ujetiga catecarámi dayé Dupade iji. 17 Chi chise deréjnarique uje chi Jesus chácariji cojñonguemui ore ajei iji cojñotique iguíjnarique. Mu chi oidé tu Dupade Ujopie Espíritu Sánto uje chiqueta cojñone, uje chacadápo ore rĩ. Enga chi Moises urusarane ojñasórone, fariséode ore uñéngo ore déji to uje chi ore tṍraji ore unirone Galiléa, Judéa ore, jé iji idaidatei Jerusalen rĩ. 18 Mu chi cojñotígo ore di dojórique cojñoque údi uje chi ore chijnónguiji pidode. Uje chi poritaque nanique uje chi ca dique go. Chi ore ipotigádi tu ujetiga ore na aja guiguíjnai ajei enga ore chicháji Jesus iquei ujetiga chiquetape. 19 Mu chi ca togome ore ujetiga ore nája guiguíjnai ajei uje cojñone ore chapédugu guiguíjnai ajei gu. Jecute chi ore cheru guiguíjnai ome. Ga chi ore pésu guiguíjnai ójo edóraque iji gaté ga chi ore na cojñoque ejnaretai aja damané edo. Ga chi ore chiamurase ome ducarigode iji cojñonguemui ajei aja Jesus iquei. 20 Mu chi Jesus chimo ore uje ore changureta ome ujopie ga chi chojningame ejnaretai: —Yĩrope bate gajnaréngone jnese jne.— 21 Mu chi Moises urusarane atatasórone, fariséode ore, ore chojningame raque iji dáyipiedie: “¿Gotique gu a uje jnacari tuté pota ujeta cháji Dupade charidi? Uje que toque múñi ujetiga cojñotique chĩro pisijnaringuéringo. Uje gusu Dupade uje chinoningase pisijnaringuéringo.” 22 Mu chi Jesus chiraja udore ore áyipiedie quigode. Jecute chi chojningame ore: —Chamáña uacáyipiedie quigode ome yu.— 23 Mu chi Jesus chojningápome ore rĩ: —Que cucha piraque gotique ome yu ujetiga yĩro uté isijnaringuéringo. Jeoga yiqueta iji ejnarétigo. Ujetiga yojningame: “Ãriji iji bamochápi ga bo ga arique.”— 24 Mu chi Jesus jno darai údi ga chojninga: —Dupade utocaidi uyu qué yetingarape yu jne ome uaque. Ujetiga arajayope to uje yajnei tu ujetiga yĩro pisijnaringuéringo iji de jnumi.— Mu chi Jesus chejna daru iyiejnane udojo guesi ga jé u uje chojningame jnani poritai uté: —Ãriji iji bamochápi ga ajna bamochápi uté aja baqui aja baguíjnarique.— 25 Jecute chi jĩrique jnani uté niji iji cojñonguemui ore ajei. Ga chi chisa damochápiode pícho ga chi chijna aja dagúijnai. Chi nínapúsu re aja daqui ga chi tijapísa Dupade uje chiqueta. 26 Mu chi chajuque cojñone ore agutedie jnese uje chi ca ore chimo cuchárique to gu ujetiga ate uté ome ore. Ga chi ore tijapísa Dupade to ome adode udore. Enga ore chojninga: —Quene yoquimo pipesudode cucha datéo udore iji udé deréjnai.— 27 Mu chi Jesus jnoji ore iguíjnai uté ga chi chimo ore eduguéjna cuchábi irótique uje i tu Levi uje chi utaidé ore iplátadie ome ore eduguéjnai . Ga chi chácariji uté uje cojñone uñane ore chisi ome plátadie ome. Mu chi Jesus chi chimo ga chojningame: —Boji te, ajinama yu to.— 28 Jecute Levi uté chi cha dasagode jnese ga nóna Jesus to. 29 Enga chi Levi jno Jesus údi aja daguíjnai ga chi pésu uraque dabose unéningo ome rac. Ga chi Levi ujórigo jnacare, ore eduguéjnai iroque gatérigo, cojñone uñéngo ore chise ñane iji te, ga ore cháta rágaja ñane iji ore agapidi gai. 30 Moises urusarane ojñasórone, fariséode ore chimo Jesus iji ore gari ga jé u uje ore dojnóngaja. Chi ore chojningame Jesus acadigode: —Uacacadisṍri, uhuaque uacamácho uacayoguéode uje uacacho iji cojñoque sijnángone ore gari. Uje gajnareque yocasutedie iroque gatéode ore adode múñi.— 31 Mu chi Jesus chajnai udore ore uruode. Ga chi chojningame ore: —Cojñoque ejnaretade ore gajnei tu ujetiga piquetaque ore. Mu jé basa ga cojñoque ijónique que áyipieraque déji daringárique pipesute.— 32 Jesus chojningápome ore rĩ: —Que yibaguiédode u uaque gotique uje uacacotáyo uágome yu. Mu yibaguiédode u ayoré ate gajnaréngone ujetiga ore checãrape dáyipierigui quitígo ga ore chabu date gajnaréngone.— 33 Moises urusarane atatasórone, fariséode ore qué ore dojnóngapója Jesus rĩ. Ga ore chojninga: —¿Gotique gu a uje Juan acadigode cho dayágome raque ujetiga ore catecã́ri Dupade? Jé chopo fariséode ore uyoque rĩ. Mu bacadigode uaque que uacasoca to go ujetiga oyo uacayágome uaque.— 34 Mu chi Jesus chajnai udore ore uruode ga chojningame ore: —¿Ga ayorérigo ore chorase dayaque ome raque a ujetiga ore ajñamitedatei ipesungónique qué déji ore gari? 35 Mu pisocai tu ujetiga ore ajñamitedatei ipesungónique jnoji ore gari, ga jé cachodi tu ujetiga ore cho dayágome re.— 36 Chi Jesus chacãra dacajnaquéode aja piguidé árimeraque aja piguidé icháraque. Enga chi chojninga: —Que ayorérique doi enga chaquesu daguidé icháraque petique ujetiga chugája daguidé árimeraque. Chamáñaje a cucha bisidegue iguidé icha iji quigade gu. Mu que gusu udore, mu iguidé árime a uringai árime pijoguipise ome borapei ichai uje pugagája gai.— 37 Mu chi jé isocai tupo rĩ ome cucha otatique uje chi chacãra dacajnaquéode aja. Enga chojninga: —A ca ayorérique chojne cucha otatígaja cucha ao ijarórique. Uje uacamóño uje cucha otadi ebié dajate ga jĩrique chejna cucha aoi tuté. Mu ore chaníraja cucha ao ichárique ujetiga ca ore chachia cucha otadi, jé aja cucha aoi. 38 Jecute pisoca ueradi u ujetiga ójneño cucha otate ichai taja cucha ao ichárique. Ga e ore cho uñane ome detotiguéode ga jé u ujetiga añucho guio. 39 Mu ujetiga gosi chóji cucha otate diyajmane enga que potapo ujetiga chóji ichai. Enga a chojninga: “Cucha otate diyajmane suépise ichai gai ome uringai unere.”—
1 Mu chi chise dire puyátique rĩ uje chi Jesus nóna dacadigode aja cojñotígo ore guejnatígo. Mu chi urugúo ore mu acadigode ore chisa ore acatique áraque. Enga chi ore chujñuque gai ga ore tagu. 2 Mu chi fariséode uñéngo ore chimo Jesus acadigode ore uje ore chise ore acade adie udire ga ore chojningame ore: —¿Ga ca arajáyo to a uje dire puyac udé deréjnai ome cucha pisagode udore?— 3 Mu chi Jesus chajnai udore ore arecujáidie ga chi chojninga: —¿Ga ca ajnusináño jnani bajai eduguéjna cuchábi casicáite David ipesudode ome dajoráringo ore nanique uje chi chaguhénique chejna ore nanique a? 4 Uje chi eduguéjnai David chacája Dupade iguíjnarique nanique ga chi chise arureque puyade iji. Ga chi tagu ga chajuguína dajorane to. Gusu Dupade irógode uje chi ore gajnécho arureque puyade udore mu ore eduguéjna cuchábi David doi ga tagu to.— 5 Qué Jesus jno darai údi ome fariséode ore ga chojningame ore: —Dupade utocaidi uyu, yoraque dire puyai. Ga jé tiógara ujeta yipésu yajegaitígo cucha iji.— 6 Chise dire uñeque iji dire puyátique ga chi Jesus chacája ore gari iji ore aquiningárique ujetiga chacate ore iji. Mu chi jnanírique déji to uje chi jmanai ãrachua chi cacoque. 7 Mu chi Moises urusarane atatasórone, fariséode ore chidóningapísa Jesus adode aja tijode ujetiga ore chajmita jeta chiqueta cojñoi tuté iji dire puyai. Ga jé u ujetiga ore cho ba iji ujeta chiqueta uté iji dire puyai. 8 Mu chi Jesus chiraja udore ore áyipie quigode ga chi chojningame cojñoi uje jmanai cacoque: —Be ga ayague iji uté ore ajei.— Ga cojñoi uté jĩrique doi Jesus uruode ga chague iji ore ajei. 9 Mu chi cáma Jesus jnátu cojñoque jmana cacoi gotique ujetiga chiqueta jmanai. Chi qué catecã́ri cojñone udore bajaque. Enga chi chojningame ore: —¿Jé déji rique Moises casica áyipiedie quitígo a? ¿Ujetiga piquetaque ayorérique iji dire puyátique jeoga pijnari jetiga toi? Mu a yo yiba ujetiga ca yipésu cucha arétiguiji dire puyátique. Mu cucha arei tu ujetiga yiqueta cojñotique uñénguiji.— 10 Mu chi Jesus tangári ore yui ujetiga uñeque chajnai uruode. Mu chi ca pichajnácho go. Ga jé jogadi tu uje chojningame cojñoi uté: —Apotingare bajmanai.— Ga chi jnani tuté chipotingare dajmanai ga chi ueradápo rĩ uje íjnoque. 11 Mu chi Moises urusarane atatasórone ore chetaguipise Jesus uje chi ca ore chibote go. Ga ájningaranguipise ore. Ga chi jé u uje ore chucué dáyipie ome Jesus ujetiga ore chise dasocáringome. 12 Chi Jesus jnoji ore gari ga chi chicáji cucarãtique ójoraque. Enga catecã́ri dayé Dupade iji. Ga chi chejna dejai tuté ome dacatecãraitigade ome dayé Dupade iji dayaridi uté. 13 Mu chi quene direjnipe ga tibidi dacadigode ore, ujetiga doi dajegaitígo iji ore ujade. Enga chi ajegaidode chi gare ore iji yirídai ome daroquéode. Enga chĩ́care darógode aja ore. 14 Jesus ajegaidode ore íode u udojo. Simon u uñai uje chi Jesus ipesute i gatei ga chi Pédro u. Ga chi Simon desaque uñai uje i tu Andres. Ga uñane ore íode u Jacóbo, Juan, Felipe, Bartolomé ore. 15 Ajegaidode uñane ore íode u udojo: Matéo udé, jé Tomas udé, jé Jacóbo udé uje chi Alféo ujnacare. Chi uñeque i tu Simon to uje chi uté cháta raja jnani uñéngo nanique ujetiga ore tṍra deduguéjnane purása quedéjna uñéngo iji daniri. 16 Mu chi ajegáite Júdas gárerigo to. Ga Júdas uñai tu Jacóbo uyai. Ga uñai u uje i gatei tu Iscariote. Ga uté u uje chi guẽrate Jesus ome umajosórone ore. 17 Mu chi quene Jesus doi jnumi iji cucarani tuté ga jé u uje Jesus acadigode ore chamáta ñane aja jnup edo. Ga chi cojñonguemúrique chi ore chise ore iji uje ore tṍraji punirone jnese. Chi uñéngo ore tṍraji ore uniri uje i tu Judéa. Jé uñéngo ore tṍraji ore idaidatei uje chi i u Jerusalen. Jé uñane ore tṍraji dedáyode iji yote quedéjnai edúdode uje uñai i tu Tíro. Jé uñai i tu Sidon. Chi ore tibágui Jesus gu ujetiga ore tangári acajnaquéode to. Jé uñane tibágui ome dejnaréngone ujetiga chiqueta ore ome to. 18 Mu chi jé ca gusu Jesus iquetade dequejnareque ayoréo gotique mu chi jé chuságaja Satanas utocaidode to uje chijnimíji cojñone udore uñéngo to. 19 Jecute chi cojñone uñéngo ore ajegaidi u ujetiga ore chijocase Jesus uje ore chiraja gu uje uté ujopie a chuságaja ore jne ga a chiqueta ore ome dajopie ujetiga ore chijocase. 20 Chi Jesus chajire dacadigode ore ga chi chacate ore ga chi chojningame ore: —Ujetiga ayoré jmatácho uaque mu anínaño uágome uacaringane Dupade urása. Uje uacajneque Dupade osongaquei gu. 21 Jé chopome uaque rĩ uje chaguhéode chipatigase uáguiji udé. Anínañopúsu uaque to uje a ca cuchárique chonapo uaque jne rĩ iji quigade. Jé chopome uaque rĩ uje ugo uaque ome uacayuguhebátigade iji de. Anínañopúsu uaque to uje a uacarasiguipise uaque jne iji quigade. 22 Anínaño uaque to ome uacajnetígo cojñone ore ipojnaquéo ujetiga ore chujñieta uáguiji dajade uje ore chetaque uaque gu, ujetiga cojñone ca ore ajéngome uaque ga ore tṍra uaque. Chamáñaje uacoyo uacaba yu gu uje uacarása yu to. 23 Mu anínaño uágome cucha gajnaréngone udojo ujeta chise uaque. Uje chi Dupade tẽrája uaque jne ome uacaringane pumajo iji de jnumi ujetiga eso iji gaté. Uacamóño uje uacamajosórone dirie jogosórone, ore dayode jnani bajade ore isocai jé u uté ome Dupade uruode atatasórone ore to nanique uje ore cho damajo ore to. 24 Mu yosõripise joroque atade uaque uje uacanínaño uaque iji erámi udé. Chamáñaje uacaninaquéode a chaquesu re jnaque jne gu. 25 Yosõripise joroque uaque to uje que cuchárique chona uaque iji jnumi udé. A uaque u jne ujetiga chaguhéode yuque uaque iji quigade. Yosõripise joroque uaque to rĩ uje gusu uacaboqueringane ome uaque iji de jnumi. Uje a chise diri jne ujetiga abóyo uaquejode ome uacajnusiétigade. 26 Yosõripise joróga uaque to uje cojñone jnese ore chicota uaque. Chamáñaje cojñone udore uje ore chicota uaque ore gajnúone u jnani bajade uje ore icotaquéode gajnesórone u jnani tágode to nanique uje udore ore cho Dupade uruode atatasórone iji raque.— 27 Mu chi Jesus qué chajnerame dacajnaquéode ome dacadigode ore ga chi chojninga: —Yuruode gajnengórone u uac uje uacangachopísi yu. Ga yósi tome uaque: ca ajusécho uacamajosónique, uacojo ayoré, mu ajnorañopise uté gosi to. 28 Ujetiga uñeque chamacare uaque bisideque múñi ca amacácho uté gosi to. Mu acueyoi uacáyipie oméringui ome uté gosi. Enga acatecãchoi Dupade ome uté gosi to ujetiga pojna uaque. 29 Ujetiga uñeque a chujé baré te, enga orei baré uña tiji yui enga chujépo to rĩ. Ujetiga uñeque chijna baguidé dañoráraque iji bari mu jé dóji gari ga jé chijna. Enga atapója baguidé uñáraque gaté rĩ enga asíapome rĩ. 30 Mu ẽrája uté gosi ujetiga chutai ua. Mu jé ca opise merángu bẽratique bagúcha ome bojórique ayoré. 31 Bapotigádi u ujetiga bojórique ayoré susipise dáyipierigui quitígo guio ome ua. Ga jé be uté gosi isocai ga be ga ajusipise báyipiedie quitígo guio ome uté gosi to. 32 Mu que ajnuéño cojñoque sijnángone gai gotique ome uacajnoraquérigo ujetiga eduyo uacajnorasórone. Uje cojñoque sijnángone jé ore jmapié u to gu uje ore chedu dajnorasórone to. 33 Ujetiga edu bacaniratiguérigo ome bojórigo ayoré uje caniraque ore ome ua to, ga que apijógui cojñoque sijnátigo ujade, uje jé ore jmapié u to gu. 34 Mu ujetiga edu bajnose carutígo ome bojórigo ayoré ujeta ore cho oré jne, ga a ca apijóguiji cojñoque sijnátigo ore ujade jne uje jé uacasocai chojmára gu. 35 Mu beyoi ga ajnórañopise uaquetesórone ore to ga osõchopise ore. Enga apuso óraja ome uacajnose carutígo ga ca uacáyipieraque déji jeta ore chatĩre uacamánique. Ga a quene jogadi u jne ujetiga Dupade tẽrája uaque. Ga jé u jne ujetiga picotaque uaque jne ome uacaringane Dupade abío. Uje a pimo uaque jne gu uje uacoyo uacai Dupade. Uje Dupade chi chijnóra ayoré sijnángone to. Uje chi sijnaque ore mu jé canirángome ore uje que ore chacãre gai to múñi. 36 Jecute boyo uacai Dupade jmapié údi uje chapuse ayoréode aja uje chosõripise ore jnese.— 37 Jesus qué jno dacajnaquéode údi ga chósi te: —Mu ca apéso uñane iyoguérique. Uje Dupade a chise uacayoguérigo to jne jõ. Enga ca acueyoi uñane ba uje a Dupade chise uacabárigo cucha jne. Mu ayáyo uacájningane ome ñane ome uacapesute gajnarétigo enga a Dupade chĩro uacasijnaringuéringo to jne. 38 Jé ajuguínaño uacacaniratiguérigo ome ñane. Uje Dupade a sué uacabai ome dacaniratiguérigo ome uaque jne gu. Uje chi Dupade jé chijna uacajmapié ome ñane ome uacosongaquei. Mu ujetiga garósi uaque gosi guẽratígo ome dojórigo ayoré ga a Dupade jé gaidé u uaque gosi jmapié ome dẽratígo cucha ome uaque gosi. Mu ujetiga jiei bẽratígo ga Dupade a jé adi ome ua ujetiga jiei bajnetígo to.— 39 Mu chi Jesus qué chacate ore ga chi chacãra dacajnaquéode aja jnani edoparitígo ujetiga gare ore. Enga chi chojninga: —A ca togome yocuñeque ujetiga edoparique yocuñeque ga doi ga chijñaque dojórique ayoré edoparic. Uje a ore chisírase ejopiéraque mu que ore chimo ejopié tuaté go. Ga jé ore cachodi tu ujetiga ore basaja jnese. 40 Jé pisocai tu ome ayorérique acadisónique. Uje que toc ujetiga acadi sué gai ome irajatigai. Mu a chejnárase dacadisṍri uté acajnaquéode guesi ga a jogadi tu ujetiga cho dacadisṍri uté ome darajatigárique.— 41 Jesus qué chacate ore ga chojningame ore: —¿Jé gotique gu a uje bese bojode ayoré iyoguebode uje bayoguéode déji to uje sué uté iyoguéode gáyode múñi? Mu que achase go. Uje uté iyoguebode gajnámi su pite atíãtique iji uté gosi edo. Jé basa ga bayoguéode gajnua tu pocóro querúraque iji bedo. 42 ¿Gotique gu a? uje ojningame bãjorai: “Be ga yijnime bedo jogonórami pasique.” Mu que ajire bedo jogonóri uje suépise uté edo jogonóri gai. Taquechoqui ua uje chiese areguipise ua ome bajorane. Cucha arei u ujetiga ajnime pocóro querua iji bedo bajaque. Enga quene jogadi u ujetiga ajnimape bãjorai edo jogonórami.— 43 Jesus qué chacate ore ga chacãra dacajnaquéode aja pojníngui áringui enga chi chojninga: —A ca toc ujetiga pore ijṍreraque gajnarenguei áringui. Ga jé adi tupo ome pore betágueraque rĩ uje a ca ueradé áraque go. 44 Yirajago porídie íode gu uringanie ai. Uje a ca toc ujetiga piránguei hígo áringuiji ojnatéraque ajénique. Ga jé adi u ome úvadie uje que toc ujetiga piránguei iji cataguebúrique ajénique.— 45 Jesus chi cho dacajnaquéode udojo quique ga chósi te: —Ga jé isocai tu ome ayoré áyipie onique uje que urúrique gajnareque gotique. Mu ayoré sijnai ga áyipie gaidode upúsu date gajnaréngone ga que urúrique chijnaque. Jecute yirajágo uté gosi áyipiedie ome uruode quigode, ujetiga ueracho jeoga gajnarécho.— 46 Jesus qué chajnerame dacajnaquéode ga chósi te: —¿Gotique gu a uje uacuñéngo ore tibidi yu ga ore chósi tome yu: “Yocangaráni a,” mu que ore tangári yu gotique? 47 A yingo yajnúone ome uaque jne uje jec ũrepise uje ore tangaripísi yu ga ore ipesudode u yajegaidode cucha. 48 Yangarisõripísode u udore ore uje ore gajnui tu cojñotique uje chucué dáyipie ome dapesutique daguíjna. Ga uté doi ga chijócha jnumi bajaque ujetiga chise cucaranenie iji jnumi údi. Ga jé u uje doi ga pésu daguíjnai aja gaté. Mu a yote bayátique dirásiji cojñoi tuté mu que toc jeta chinguíra cojñoi tuté iguíjnai taja jnumi. Uje cucaranenie déji údi gu ga iguíjnai etóguiji jnumi. 49 Jé chopo rĩ ome uté gosi ujetiga chojningame yu: “Yangarádejna,” mu taquechoqui uté gosi uje que doi yuruode ome yojningane cucha. Ga uté gajnui tu ayorérique ujetiga chicha dapesutique daguíjna taja ujnáraque gai. Mu chedu ujna uje que chicha daguíjnai aja cucaranéringui. Ga a yote bayátique doi uté gosi ipesudi tuté iguíjna jne ga chĩro ga chejnája erámi. Uje chichai te bisideque gu. Que chicháji cucaranéringui gai to gu.—
1 Mu Jesus chi chejna dacajnaquéode udojo guesi ome cojñone ore ga jé u uje jno ga chicáji ore idai uje chi i u Capernaum. 2 Chi Róma gotique déji ore idaidatei tuté uje chi soldádode ore eduguéjna. Mu chi eduguéjnai tuté irótique déji uje ejnaretaque uje chi idógosi ujetiga toi. Uje chi chijnorapise daroi tuté. 3 Mu uje soldádode ore eduguéjnai uté chudute Jesus ujnomei to uje chi chiqueta ayoré ejnaretade, ga chi chucué judíode ore angarátigo uñéngo ujetiga qué ore dobi Jesus ujetiga diape ga chiquetape uté iroi. 4 - 5 Uje judíode angaránone chi ore chise Jesus ga chi ore chijócha ajei údi ga ore chojningame: —Be ga ajinama yoque ga aquetape soldádode ore eduguéjna tuté iroi jne. Uje que soldádode ore eduguéjnai tuté chuseque judíode yoque to iji yocuniri udé. Uje purása quedéjna uté múñi. Ga uté imanique guiguíjnai tome yocaquiningaméone. Ga jé tiógara ujetiga atabája uté to.— 6 Mu chi jĩrique Jesus nóna soldádode ore eduguéjnai irógode. Mu uje chi e ore chirõre uté iguíjnai ga soldádode eduguéjnai jorane uñéngo chi ore chachai. Ga chi ore chojningame: —Jesus a, yoquĩjorai soldádode eduguéjna chojningame yoque que: “Aquirañope Jesus iji guesi jne uje uté suépise yibai gu.” 7 Jecute chi ca chingongara raja ua ujetiga chucué ua, mu jecute chutṍri judíode ore angaránone aja ua ujetiga ore chijócha bajei údi ujetiga aquetape uté iroi. Jecute uté chi chojninga: “Jé arec ujetiga Jesus changacarape ga yiroi uté ecape jne. 8 Uje jé yadi tu uje eduguéjna yu mu yoqueduguéjnapísi qué déji uje yiji uté áyipiedie. Ga isocai tu to ome yajnéone soldádode uje yiroque ore. Ga ore tangári yu. Uje a yojningárasome uñeque: ‘Bo,’ ga uté gosi jno. Jeoga yojningame uñeque: ‘Bojite,’ ga tibágui yu. Ga jé adi u to ome yirógode ore jnese uje a ore tangári yu ga ore pésu yojningane cucha jnese. Jecute angacarape yiroi uté ga ecape jne.”— 9 Mu uje chi Jesus chudute soldádode ore eduguéjnai tuté uruode ga irasiguipise re ome uté uruode ga chi chojningame cojñone ore uje ore déji gari: —Quene yimópise cojñoque agupurai tuté to uje jé cãraque re ome danguretaretigadatei ome yu. Uje que yurásade Israel gotique isoca uté to go ujetiga changuretapise yu.— 10 Mu uje chi soldádode ore eduguéjnai tuté iroque gatéode ore chajni aja uté iguíjnai mu chi ore chise soldádode eduguéjnai iroi tuqué mu e eca. 11 Mu udojo quigade ga Jesus chi chicáji ore idánique uje chi i tu Naín. Ga chi acadigode ore nóna to, jé aja cojñonguemúrique ore. 12 Mu chi Jesus ore chirõre ore idaidatei uté mu chi ore chimo cojñotígo uje chi ore chijnoque cojñoque totique. Ujetiga ore chijochame. Uje chi datéraque chequé eca uje chi gusúpusu chequé tuaté abi. Mu chi cojñonguemui ore nóna daté to. 13 Mu Jesus chi chimo uaté ga chi chosõripise ga chi chojningame: —Ca abo.— 14 Jesus chose ore jnui cojñoque toque yui ga chujé dajmanai aja cojñoque toi pi, cajon . Enga jogadi u uje jnungórone ore cha. Jé u uje Jesus chojningame jnacare toi: —Yingome ua ujetiga ãriji.— 15 Mu chi ore chuninga mu cojñoque toi tuté chague ga chi catecã́ri ore iji dejode. Ga jé u uje Jesus chingongara daté. 16 Chi chajuque cojñonguemui ore agutedie jnese. Jecute chi ore chicotapise Dupade. Ga chi uñane ore chósi tome dacotaquéode ome Dupade: —Dupade irótique ujopierã́tique a chiqueta raja yoque que.— Ore chojningápo rĩ: —Dupade gaidi upúsu ujetiga chátaja judíode uyoque.— 17 Jecute chi Jesus ujnomei chubu ore idai tuté údode. Ga jé chuságaja ore uniri Judéa údode to rĩ. Jé aja ejominórone cojñone unirone rĩ. 18 Mu chi Juan chudute Jesus ujnomei to iji daringai pujurúgai. Uje chi acadigode uñéngo chi ore chingo ujnomei ome. Ga jé u uje chi Juan chingome dacaditígo gárerigo ujetiga ore tibágabi Jesus. 19 Uje chi Juan ajegaidi tupúsu ujetiga irógode ore catecãripísabi Jesus ujetiga jec ũrepise ga Crísto upúsu uje chi Israel gosode ijnati tu uje chi Dupade ichagája ore nanique ujetiga chiqueta ore iji ore uniri. Ujetiga ca u go ga ore chirodape uñeque yui. 20 Uje chi Juan irógode ore chise Jesus ga chi ore chojningame: —Juan uté utocáite yoque aja ua uje gãrate cojñone aja yodi ica. Uté potapísa ujetiga chiraja ua iji baringárique cucha. Ujetiga Dupade ojningai Crísto jé upúsu ua. Ujetiga ca u ua. Ga yirocope uñeque yui.— 21 Mu chi Juan acadigode unojo qué ore chise Jesus iji iquetatígo cojñoque ore gai. Uje chi ore ejnaréngone cha ñane yúji. Jé aja Satanas utocaidode piesóningo to rĩ. Enga chi jiépise iquetatígo cojñoque iji edoparigode to rĩ uje ore chimópo dajirigode to rĩ. 22 Jecute Jesus chi chajnai ore ga chi chósi tome ore: —Boyo ga ajniñopója Juan gari rĩ. Ga angoñome uacamone cucha ome, uacadudigode cucha rĩ. Angoñome to uje yiqueta edoparigode ore ga e ore chimo cuchade. Yiquetápo poritade ga ore digápo rĩ. Yiquetápo lépra isagode ore rĩ ga ijnonguipise ore udigode. Jé chopo angoneparigode ore rĩ. Yiqueta ore ga ore chudúdapo darade. Ga jé chopo ayoré togode rĩ. Yĩrigarápo ore rĩ aja gaté. Jé chopo ome ayoré gajnaréngone ore rĩ uje yujnomei chise ore uje yiqueta ore ome ore isijnaringuéone. 23 Jecute angoñome Juan ujetiga ca cho caru ome danguretigai. Uje uté gosi a nínapúsu re jne ujetiga ca sosi danguretigai tiji jnumi ome yu.— 24 Uje Juan utocaidode ore jnoji ore gari enga chi jĩrique Jesus cho quique Juan adode ome cojñonguemui enga catecã́ri ore enga chojninga: —¿Ja uacacuei u gosi iji erãpe tarei nanique a? ¿Ja ayoré gajnareque a nanique uje gajnui u jnacaraque bisidétique uje emi chubúchu aja quedéjnane? 25 Ujetiga ca ũré udore enga ¿ja ca uacacuetique ayoré dacasuté a ujetiga ca suseque re? Que uacacuei tu gotique. Uje uacarajáyo gu uje ayoré atade que ore charidi u erãpe tarétique go. Mu ore charidode u eduguéjna cuchábode ore iguíjnane. Ore chejna rángaja dáyipiedie gaidode cucha. 26 ¿Ja ca ũré yu a uje uacacuei tu Dupade uruode atatasónique nanique uje uaqueso erãpe tarei? Jé ũrepise yu ãrie. Mu uacacuei tuté uringai uñai cuse uje suépise daringai Dupade uruode atatasõre. 27 Juan jé upúsu Dupade ojningai datocáite ome dajnacari diringai yui uje jnani bajade ore urusarane quigode jé upúsu uje chojninga: A yiroque yutocáite gatérigaja baquei jne ujetiga dimane ore atígo ome baríringai yui jne. 28 Que yimo Dupade uruode atatasónique iji jnani bajade, jec aja dirie jogonórone rĩ ujetiga sué Juan gai, uté uje tṍra ore aja yodi nanique. Mu ujetiga Dupade e chimate darásapisode aja re jne enga a ayoré gajnareque udore uñeque mu a jé uté gosi suépise Juan gai jne.— 29 Uje cojñonguemui, jé aja ore eduguéjnane irógode uje utaidé ore iplátadie ore chudute udojo enga ore chajo raja uje ore chicota Dupade ome uringai areguipise. Udore ore u uje Juan chaca ore edodie iji yodi nanique. 30 Jé basa ga Moises urusarane atatasórone, fariséode ore uje chi ca Juan gãrate ore aja yodi, chi ore chotigasipise Jesus acajnaquéode. Enga ore chetágapo Dupade áyipie oméringui ome ore to. 31 Mu chi Jesus chojningame ore: —A qué yucuebi Juan uyoque yoquetesórone ore gajnúrique jne. 32 Uje ore gajnúone u disiode uje jecucha ore chetaque ñane ajéode ome dajñaminone. 33 Yiraja uje uacadojnóchoja Juan gu uje gãrate cojñone ore aja yodi nanique. Uje chi ca tagu cucha ueratique. Ga que chojiapo yote pioi to rĩ. Jecute chi jé oyo jnani ũrusóji uté. 34 Ga jé uacasocai tu ome yu to uje uacabóyoja Dupade utocaidi uyu uje chiese acharánecojna yu ome uaque. Chiese yáta yu aja jnani sijnángone ore to iji ore agapidode, jé aja eduguéjna cuchábode ore irótigo rĩ uje uaquetácho. Ga chiese yojiapo ore jotade yote piócho rĩ ome uaque. 35 Mu a pijoque ayipieranguipísi iji yoque jne gu yoquipesudode cucha.— 36 Mu chi fariséode uñeque uje chi i tu Simon chi dejena Jesus aja daquigade ujetiga tagábiji gari. Ga chi Jesus jĩrique nóna uté. Mu Jesus chi chácariji ore agapidé ejoi iji iguíjnai ajei. 37 Mu chi chequé ate gajnaréngueraque chudute Jesus ujnomei to uje déji fariséode uñai uté iguíjnai. Uje chi jé ore idaidatei jogoto to. Jecute chi tibágui to ujetiga Jesus chĩro isijnaringuéone. Ga chi chequé tuaté chijna detique acéite iji pié ueradéraque uje chi uneréjna ánique ujetiga tẽrája Jesus ome. 38 Mu chi chequé tuaté chácariji Jesus guídade ejoi. Ga chi chosõripise re ome dapesudode cucha gajnarécho. Ga chi poji dejode. Ga chi educadode basaja Jesus guídade gai. Mu chi chequé tuaté changuñéra daterodie aja Jesus guídade gai ujetiga cajnore. Udojo quigade ga chojne acéite ai unéningaja uté guídade gai. Ga tagu guídade uredie. 39 Mu chi fariséo uté uje inejeramáite Jesus que, chi chojningame re iji dajei: “Ise ga ca Dupade uruode atatasórone jõra uté jõ. Uje que chimo chequé uaté ipesute gajnaréngone. Ujetiga chiraja enga a ca juegarása ujetiga pijocayaque ome uaté. Ga a chijócãrirase uaté iji dejode.” 40 Mu chi Jesus chiraja uté áyipie quigode iji dajei. Jecute chi chojningame fariséo uté uje i tu Simon: —Simon a, qué yope cuchade udojo quigome ua jne.— Jecute chi fariséo uté chi chojningame: —Be ga angome yu, yacadisṍri a.— 41 Mu chi Jesus cho quique ga chi chojninga: —Jnani gárerigo chi qué ore chijna dajnose carutígo iji dojórique jnani. Uje chi uñeque oidérigui jiei. Jé jõra oidedie garósi. 42 Mu chi ca togome udore ore ujetiga ore chimate doidérigui udire. Mu chi jnani tuté chi doi ga cha ore ijnose carubode unerai jmete.— Mu chi Jesus chojningame Simon: —¿Gosi iji jnani gáreode udore ujetiga chijnorapise déode jogosṍri?— 43 Mu chi Simon chajnai Jesus uruode ga uté chi chojninga; —A uté u uje íode sué dãjorai íode gai.— Enga chi Jesus chojninga: —Que potigayaque ua go uje quigode jé u udore.— 44 Chi Jesus e chusẽre chequé ga chi chojningame Simon: —Jé bamo chequé tuaté isocai to ome yu. Uje yise baguíjnai que, mu que osõre yu go ujetiga asi ome yotique ome yu ujetiga yuru yirídade iji. Mu chequé tuaté sué babai. Uje po que ga churu yirídade iji ome deducadode. Ga changuñéra daterodie aja ujetiga cojnore. 45 Mu que agu yuredie gotique uje yacája baguíjnai. Mu chequé tuaté cáma cho uja go uje tagu yirídade uredie. 46 Moitapuré acéite ome yatoi uje que ójneja go. Mu chequé tuaté chojne dei acéite ai unere aja yirídade que. 47 Uje yirajapise uje chequé tuaté chingo dajnoraquedatei tome yu gu uje chiraja uje e yĩro isijnaringué cuchábode. Mu ayorérique ujetiga garósi ijnoraquei tome yu ga imoi jé u ujetiga garósi isijnaringuéone uringáringo pĩrocho to.— 48 Jecute chi Jesus chojningame chequé tuaté: —E yejnápise basijnaringuéone uringane pĩrocho jnese.— 49 Mu Simon jorane uñéngo uje chi ore chácariji ore gari iji uté, uje chi ore dojnóngaja Jesus adode udore, ga chi ore chojningame ñane: —Chimo joroque re ujetiga jec ũré ga jnani tuté chĩrorase pisijnaringuéringo.— 50 Mu que Jesus timíninga ore go mu chojningame chequé tuaté: —E yiqueta ua iji basijnaringuéone ome banguretigai. Bo ga ca opo báyugu ua jne rĩ aja baquitígo.—
1 Uje chi Jesus chejna udojo guesi ga chi chicáji ore idaidatérigo. Jé aja ore idai ajamatígo rĩ ujetiga chacate cojñone ore iji ome Dupade ujnomei yui ujetiga ore cho dangaranipísi iji Dupade. Ga chi Jesus utocaidode uje chi gare ore iji yirídai chi ore nóna aja tijode to. 2 Mu chi chequérigui ore nóna ore to uje chi Jesus chiqueta ore iji ore ejnareque datérigo. Ga chijócãre Satanas utocaidode iji ore uñanie to. Mu chi uñáraque déji ore gari to uje i u Maria Magdaléna uje chi Jesus chijnime Satanas utocaitígo iji uaté enga chi gare iji ti yijmanai uñai. 3 Ga chi uñáraque i tu Juána uje chi Chúza gotique acoté. Uje chi eduguéjna cuchábi Heródes iroque gaté uté. Jé uña chi i u Susána. Mu chi jiépisi udire ore ujórigui chequei to uje chi ore chátaja Jesus, ore to ome dacaniratiguérigo. 4 Mu chi jiépisi cojñone ore uje ore tibágui Jesus to uje ore tṍraji pidai uñéngo. Uje chi Jesus chimo cojñonguemui ore ga jé u uje chacate ore ga chacãra dacajnaquéode aja cucha ajñúringui uje chi jnani utácai chaca ga chi chojninga: 5 —Mu chi ayorérique jnome daringai utáca ujetiga chaca dajonatígo cucha ajñui. Mu chi cucha ajñunie uñáringui basaja dajei edúdi. Mu a ayorérigo ore tṍrai tome ga ore chuchiéjna jnumone. Jeoga chugúperenie chimo ga tagu. Jecute que sué go. 6 Mu a uñanie basaja cucarané pitabui ga chi cucha ajñunie udire sué mu jĩrique beta. Uje a ca jnup otadi déji udire jogadi gu. 7 Mu cucha ajñunie uñanie udire chi suéji jnacarapui. Ga chi ca togome ujetiga ijõrei uje chi jnacarade nóna aja gatéode ga que chise dajóningarique go. 8 Jé basa ga cucha ajñunie udire uje chi jnani chacáji jnumi ueratigai chi u uje chi ca chajire dedórojnaraque.— Uje Jesus chejna dacajnaquéode udojo guesi ga doi ga chi chinguíra dabijnani aja ore ga chi chojningame ore: —Uacuñéngo angonenguitígo guesa ga a udore gosode u jne ujetiga ore chiraja yuruode udojo quigode.— 9 Udojo quigade ga chi acadigode chi ore chajnai ga ore chojningame: —Jé ope bacajnaquéode udore quigode ome yoque to ga yirajagope quitígo to.— 10 Mu chi Jesus chojningame ore: —Que yipógu yacajnaquéode quigode go ome uaque uje uacanguretigai déji ome Dupade uringai pangarate gu. Mu que yiji yacajnaquéode údi ome udore ore to. Uje que ore changureta yu to go. Uje ore chimo yipesudode cucha mu gajnui jec u ujetiga ca ore chimo. Ga adi jec u ome yacajnaquéode. Uje ore chudute mu que ore pésu gotique.— 11 Jecute chi Jesus cho dacajnaquéode quigome dacadigode ore ga chósi tome ore: —Cucha ajñunie udire gajnui tu Dupade uruode uje pingome ayorérique. 12 Ga cucha ajñunie udire uje basaja dajei edúdode ga gajnui tu ayorérique uje chudute Dupade uruode mu Satanas utocaidode na raja ajei ga jé u uje charatáiyime Dupade uruode ome uté gosi. Ga chijna Dupade uruode iji gari uje que pota ujetiga uté gosi changureta Dupade ga piquetaque uté gosi. 13 Jeque ga ome cucha ajñunie udire uje basaja cucarané pitabui, gajnui tu ayorérique uje chudute Dupade uruode ga ca chise unerotiguérique. Changureta mu a cachi anguretíga uje petingaquéode chise uté gosi ga jĩrique anguretigai doi jnumi uje garósi anguretigai gu. Ga jĩrique cha. 14 Cucha ajñunie uje suéji erãpojóningai gajnúone u udore ore uje ore chucué Dupade uruode, mu ore chejna rángaja dáyipiedie quigode. Jecute erámone jogonórone cucha cho ujetiga suru ore áyipiedie yui gai. Yojningane u ore ayuguhebátigade, jé aja ore áyipiedie gaidode cucha. Jé aja ore ipotiguéode ome daringane ayoré ataque. Jecute ore gajnua upo pore paca uje sué bisideque enga íjnoque adie. 15 Mu cucha ajñunie udire uje pacáji jnumi ueratigai, gajnui tu ayoré parai uje dimane ome Dupade adode. Uje chudute Dupade uruode enga jĩrique doi. Enga chajo raja dagaidode Dupade iroquéo. Jecute jiei ate omone enga gajnua tu sequeré ueradé uje ore na dacadie enga jiépisi adie.— 16 Chi Jesus qué chacate ore ga chacãra dacajnaquéode aja ore apótique enga chojninga: —¿Ga ayorérique isocarase ujetiga chãru dapótique ga chaco cuchárique gai a? ¿Jeoga chicháji damochápirique útique a? Mu isocai tu ujeta ichapidi tu cuchárique gai iji gaté yui. Ga gaidi tu ujetiga chijñate ore gai jnese. 17 Enga isocai jé u ome yacajnaquéode ome uaque. Uje yedu uac uje yingome uac. Mu que yipota go jeta yacajnaquéode cho cucha pipoguiédode ome uaque mu yáyipie quigode u ujetiga ajnerañome ga ore chise daringáringo pududicho. Ga ududisóningo ore chirajapise quigode to uje jé ũrepíso. 18 Jecute angachopísi yacajnaquéode quigode uje udore ore uje ore tangaripísi ga a yajnerame ore irajatigai jne. Mu udore ore uje ore chicota raque ome darajatígabi ga ore irajatígabi a bijname ore jne.— 19 Mu chi Jesusdaté, ujnacarode uñéngo chi ore chisiji uté to iji charidi. Mu chi ca togome ore ujetiga ore chimo Jesus to uje chi cojñonguemui ore suru ejode gu. 20 Jecute cojñone uñeque chingome Jesus ga chojningame: —Baté, bajorane ore déji guesi ga chi ore potapísa ujetiga ore chimo ua to.— 21 Mu chi Jesus chojningame ore: —Udore gosode ujetiga ore chudute Dupade uruode ga ore doi Dupade uru quitígo ga udore ore u jne ujetiga yope yiguiosipísi iji ore jne.— 22 Mu chi chise dínique uje chi Jesus acadigode ore chacája cucórique ga chi Jesus chojningame ore: —Boyo, yico ga yicagobíji yote quedéjnai uechamito.— Ga chi jĩrique ore chicáji uechamito. 23 Mu qué ore déji yote quedéjnai ajei uje qué ore chaquesu mu chi qué Jesus mo. Mu chi úyujna cuchabéraque choji ore iji yote quedéjnai ajei. Ga chi yodi chĩreta cucoi uté ajei ga carajnoque jno cucoi údi aja yote quedéjnai údi. 24 Jecute chi ore chaguinéru ore chiringare Jesus ga chi ore chojningame: —Yocangaráni a, yocangaráni a. Yodi jno yoquibi cuco údi aja údi.— Jecute Jesus niji ga jĩrique chaquĩ́ra úyujna uaté. Ga chi chaquĩ́ra yodi iji yote bayai uté rĩ. Ga chi cuchade udore cho jnaque ome ore uje chi chaquĩ́ra. Ga jé u uje chopise parac iji jnumi. 25 Mu chi Jesus chojningame dacadigode ore: —¿Jé oyo ringome uacanguretigai te a?— Mu chi ca ore chajnai go uje chajuque ore agutedie. Uje chi ore tijapúsu ome ipesudode cucha ga chi ore catecã́ri ñane ga chi ore chojningame ñane: —¿Gotique chimo joroque re ome jnani tuté uje chaquĩ́ra yodi ga yodi tangári? Chaquĩrapo úyujna ga úyujna tangarapoi rĩ.— 26 Jecute chi ore chise guesi iji yote quedéjnai uéchai. Uje chi puniri uté i tu Gadára. Uje chi déji Galiléa tiógarei iji yote quedéjnai uechamito. 27 Uje chi Jesus doi jnumi iji cucoi mu chi jnanírique chise Jesus uje chi Gadára gose. Mu chi noña ga ayoré do jnani uté ome Satanas utocaidode iji ajei uje chi diyajmanguipíso iji. Ga chi ca pota go ujetiga chigui daguidéraque. Ga chi choquíbi. Chi ca moji cojñotique iguíjnarique go. Mu chi charidode u ducódedie. 28 Jnani uté chi chimo Jesus ga tibágui Jesus ga chi chichaga dagatáidie iji iquei. Ga chi chinguíra dabijnani taja Jesus. Enga chojninga: —¿Gotique bapota bátaja ua aja yu? Yiraja baringai uje Dupade pujnuéngaisṍri ujnacari tu ua. Mu yipotigádi u ujetiga ca o bajocaningame yu.— 29 Chi urúo udojo gu ome Jesus uje Jesus chi qué chijócãre Satanas utocaidode iji ajei. Uje chi Satanas utocaidode ore ijocayaque jnani tuté. Jecute chi cojñone ore chisa uté mu chi ore chigaru jorógu ome ojnaquerodie. Ore chigaru jmáinie, guídade ore aja ñane. Mu chi Satanas utocaidode irágu uté ajei ga jé chaquesu origaripídode iji dádode. Enga chi Satanas utocaidode ore pésu ga jnani tuté chayome cojñone ore, ga chi chicáji erãp uégode uje chi ca cojñotique déji go. 30 Chi Jesus chingome írique ga chi chojningame: —Jnani, ¿jé bérique a?— Mu chi jnani chojninga: —Yi tu Cojñoque Dipeséode.— Uruode udojo u gu uje Satanas utocaidode dipeséo údode gu. 31 Mu Jesus chi chijocãrirase Satanas utocaidode iji cojñoi tuté. Mu chi utocaidode ore chijócha ajei údi ujetiga Jesus ca chorei ore iji ejopie uje que eruénique cus. 32 Mu chi yãcoré quedéjnaringui idógosi ore iji cucarãtique gaté uje chi qué ore tagu dabosode iji uté. Ga chi Satanas utocaidíso, Jesus jocarane, chi ore chojningame Jesus: —Be ga ajmare yógaja yãcoré quedéjnanie ajéode.— Ga chi Jesus juéga ujetiga jocarane udore chacája yãcoré quedéjnanie ajéode. 33 Jecute chi Jesus jocarane udore doi guesi iji jnani ga chi ore chacája yãcoré quedéjnanie ajéode. Ga chi Satanas utocaidode udore pésu ũrusodie iji yãcoré quedéjnanie ga chi yãcoré quedéjnanie idája ore iji jnumi mu chi jé ore basiji cucarani gaté ga chi ore tṍra raja yote quedéjnarique uje chi ca toc ujeta piqueta uñáraque. 34 Mu chi chajuque yãcoré quedéjnanie ore irodisórone agutedie. Ga chi jĩrique ore chayóji ore idaidatei yui ujetiga ore chingongara erámi iji ore idaidatei údode. Ga ore chingopome cojñone ore rĩ iji ore idai eruéode rĩ. 35 Ga chi jĩrique cojñonguemui ore jnome ujetiga ore chajire cucha dacate pipesudode udore. Uje chi ore chise Jesus iji charidi tuté ga chi iquetai tuqué cojñoque chácariji Jesus ejoi. Uje chi Satanas utocaidíso e jnoji gari ga chi uté chacája daguidedie to. Ga e chirajapise cuchade rĩ. Jecute chi chisápo daringai ayoré rĩ. Ga cojñone ore chimo ga chajuguipise ore agutedie ome uringai piquetaque. 36 Mu chi cojñone udore uje ore imo to Jesus ome isocai ome iquetai cojñoque ga chi ore cho quique isocade ome cojñonguemui ore. 37 Jecute Gadára gosode ore jnese iji uté ore uniri ore chijócha Jesus ajei údi ujetiga jnoji ore gari. Chamáñaje chi ore todópisa gu. Jecute chi Jesus jĩrique chacája cucoi ga jnoji ore uniri uté. 38 Mu chi Jesus iquetai tuqué cojñoque chi potapísa ujeta nóna Jesus aja tijode. Mu Jesus chi chaquĩ́ra ga chi chojningame: 39 —Bo ga ajníja baguíjnarique ga angomome erámi uje Dupade iquetaque ua que.— Jecute jnani tuté chi jno ga chajníja daguíjnai ga chingo guidai údode jnese uje Jesus iquetaque que. 40 Ga chi Jesus jno ga chajnésara yote quedéjnai uechamito rĩ. Ga chi cojñone ore nínapúsu Jesus yui. Chi ore irasique raque jnese uje chi diyajmaque ore iji uje ore chirote yui gu. 41 Ga chi judíode eduguéjna cuchátique chachai Jesus to uje i tu Jáiro. Uté chi gajneque ore iji ore aquiningamérique. Mu chi jnani tuté chicha dagatáidie iji Jesus iquei ga chi qué chijócha ajei údi. Ga chojningame: —Jesus a, qué yutṍri ua ujetiga ajinama yu aja yiguíjnai tuqué.— 42 Jnani uté chi gaidi tu ujetiga Jesus chiquetásiape ape ugurátaque. Disabia suaté chi sequeredie gare iji yirídai iji yui. Uje chi idógosipise ujetiga tosi. Jesus chi nóna mu cojñonguemúrique chi ore nóna to. Uje chi ore irágu ore iquéode. Ga chi ore chujé raja Jesus to aja daqui. 43 Mu chi chequé chojmáraraque déji ore gari uje chi ejnareté. Uje chi sequeredie gare iji ti iji yirídai uje pésu uaté iyosoringuéone. Chi ejnarei tu uje chi iyode que cha tamutaque. Chi chequé tuaté chi tẽra dagúchade jnese ujetiga cho oré daijnane ore ujetiga ore pésu. Mu chi ca daijnárique déji ujetiga chibote chequé uaté ejnaréngone ujetiga chiqueta. 44 Mu chi chequé tuaté chaguitóji Jesus yui ga tṍraji quigade ome ga chi chisa Jesus iguidé eruémami. Jecute Jesus ujopie chi chise chequé tuaté ga chaquĩ́ra iyode uringane tamutaque. 45 Mu chi Jesus catecã́ri cojñonguemui ore. Ga chi chojninga: —¿Goto a iji uaque ujetiga goto chijocase yu que a?— Jecute chi cojñonguemui ore chósi tome: —Yocacadisṍri a, que pijocayaque ua ãrie.— Mu Pédro jorane chi ore chojningame Jesus: —Bamo cojñonguemui uje ore chinguíra ua aja ñane ga ore chijocase ua aja tijode. ¿Gotique gu a uje bacué bajocayasónique a?— 46 Mu chi jé Jesus chajo raja uje chojninga: —Uacuñáraque chijocase yu que ãrie. Jecute jé yunina yujopie uje doi guesi iji yu uje yiqueta uacuñáraque que.— 47 Mu chi chequé tuaté chiraja uje Jesus chiraja adode ome re. Jecute jĩrique sose Jesus yui. Mu chi tãrara ome dasadodéringai ga chi jĩrique chichaga dagatáidie iji Jesus iquei. Ga chi chojningame Jesus: —Uyu u que.— Ga uaté chi chingo dejnarei isocade ome iji cojñonguemui ore ajei. Ga chi chojninga: —Yijocase Jesus iguidé eruémami ga jĩrique chiqueta yu.— 48 Ga chi Jesus chojningame chequé tuaté: —Yababia, jé tiógara uje yiqueta ua que ome banguretigai ome yu. Bo jne ga ca o báyugu ua jne aja baqui.— 49 Uje chi cáma Jesus ore chejna daruode udojo guesi mu chi ore eduguéjna cuchábi Jáiro irótique chi e di iji ore uje chi tṍraji Jáiro iguíjnai. Chi catecã́ri Jáiro ga chojningame: —Bababia e tosi que. Aya yocacadisṍri Jesus unerai ome uringai putocáite ga yajníngo to aja baguíjnai.— 50 Mu chi Jesus chudute Jáiro iroi uruode udore ga chi chojningame Jáiro: —Jáiro a, jé ca o báyugu ua. Gusu ujetiga angureta yu. Ga bababia uringa piqueta jogadi a u jne.— 51 Uje chi ore chise Jáiro iguíjnai ga chi ore chacája disabia gari iji ajei. Mu chi Jesus ca juéga daquigade ome cojñotígo uñéngo. Mu chi gusu Pédro, Jacóbo, Juan aja disabia dayé, daté ore ujetiga ore chacája gari iji guiguíjnai ajei tuté. 52 Chi cojñonguemui ore chisa dabade iji disabia ejode uje chi ore po. Ga chi ore yuare iji ejode ome suaté. Mu chi Jesus chi chaquĩ́ra ore ga chojningame ore: —Ca abóyo. Disabia que tosi go. Qué mósi.— 53 Mu chi ore dojnongapísaja Jesus. Ga chi ore cana gai. Uje ore chiraja disabia suaté uringa togape. 54 Mu chi Jesus chi chisa disia suaté jmanai ga chi chojningame ga chi chejnápusu daruode ome: —Disia, ãriji to.— 55 Jecute disabia suaté ecásiapo rĩ. Ga chi disabia jĩrique niji. Ga chi chague. Ga chi jĩrique Jesus chiroque daté, dayé ore aja potique ujetiga ore pésu ome disabia suaté. 56 Mu chi disabia suaté dayé, daté ore tijapúsu Jesus uje chiqueta ore ababia. Mu chi Jesus chi chaquĩ́ra daté, dayé ore ujetiga ca ore chingo erámi.
1 Jecute chi chise dínique uje chi Jesus chi chamáta dacadigode ore uje chi gare ore iji yirídai ujetiga tẽrámaja ore ome dajopie ujetiga ore jno ga ore chiquetape ejnaretade ore to. Ujetiga ore chijocãrape Satanas utocaidode iji piésorone ore to. 2 Enga chiroque ore aja ujetiga ore jno Dupade ujnomei údi aja erámi údode. Ujetiga ore chiqueta cojñoque ejnaretade ore to iji ore ejnaréngone. 3 Ga chi Jesus chósi te ome ore: —Boyome uacaquitígo ga ca ajnáño uacagutadéraque, aja uaquepéraque rĩ. Jé aja cucha pibotique rĩ. Jé aja uacaplátaraque rĩ. Mu gusu uacaguidéraque iji uacamánique ujetiga aguíyo. 4 Mu ujetiga eso uacaquitique guidai ga cojñotique dejena uaque aja daguíjnarique ga ca écãcho uacayaripírique guiguíjna. Ga jé asáchoja jeta boyo iji uté ore idai. 5 Mu ujetiga uaqueyai tuté guidai, ca uñeque dejena uágaja daguíjnarique ga jĩrique boyóji ore idai tuté. Boyóji ore idai tuté mu abócho jnumi isapídode iji uacarídade uje imoi tu gu uje uaquetachopise cucha dacatígo iji ore idaidatei tuté.— 6 Quigade enga ore jno ga ore chicáji pidai ajámone jnese ujetiga ore chingo Dupade uringai piquetangore aja ore. Ore chiquetápo ejnaretade rĩ. 7 Ore eduguéjnai Heródes chi chudute to Jesus ipesute datéode ujnoméone jnese. Enga que Heródes chiraja dáyipieraque quitique ome Jesus. Chamáñaje uñane ore chaguhéta Juan Jesus gai uje ore jos eti Juan niji iji pitoringai. 8 Jé basa uñane jos eti Dupade uruode atatasṍri Elías u Jesus enga chiqueta raja ore. Uñane ore jos eti Dupade uruode atatasórone jnani bajade uñeque u Jesus enga e chiqueta raja ore. 9 Mu Heródes chojninga: —Uyu u nanique uje yiroque ore aja ujetiga ore chaquesu Juan etabi. ¿Jé gosi u ore erángani uté uje chi i tu Jesus?— Jé u uje Heródes chi chucué dasocáringome ujetiga chimo Jesus to. 10 Mu chi uje Jesus irógode ore chejna Jesus utoquéode guesi ga ore chajni Jesus gai ujetiga ore chatatame uraque dapesudode cucha ome. Ga chise udore quigade ga Jesus jno dacadigode ore údi aja daquique uñeque ujetiga gusu ore iji. Mu chi ore qui tuté idógosiji ore idánique uje chi i tu Betsáida. 11 Mu cojñonguemui chi ore chudute uté ujnomei to ga jé u uje ore chajna to. Mu chi jé ca Jesus chetaque ore gotique uje chi jé chimesere ore ga chacate ore ome ore uringai pimeserasõre ome Dupade ujetiga Dupade cho darása iji ore to. Uje chejna dacajnaquéode udojo guesi ga jé u uje chiqueta ejnaretátigo to. 12 Mu chi guedé jnome ore iji uté. Jecute chi irógode uje gare ore iji ti iji yirídai ore sose Jesus yui. Enga ore chojningame: —Yocangaráni a, ajócãre cojñonguemui udore ore ga ore chope dajñare to. Jeoga ore chucuebi dabotígo to iji ore idáyode iji yoquejode iji dati. Uje que cuchárique dépisi yoquiyaridi udé gotique ujetiga ore tagu.— 13 Mu Jesus chi chojningame ore: —Ajuguínaño uacabotígo ome ore.— Mu chi ore chojningame: —Gusu arurégode uje chejna yijmanai ga garósi oyídode rĩ uje déji yoque. ¿Jeoga báyipie quigode u ujetiga yicoi cojñoque dipeséode udore potígo ujetiga yajuguínango ore?— 14 Chi cojñonguemui udore ore cho ujetiga jnanione ore chise 5.000. Mu chi Jesus chojningame dacadigode ore: —Angoñome cojñone ore ga ore pésu dáguerigui ujetiga ore déji 50 iji dague chojmara.— 15 Jecute chi ore doi Jesus áyipiedie quigode ga ore chácare jnese iji dayaridode. 16 Jecute chi Jesus chisa arurégode, oyídode ore. Ga chi chajire gaté ga catecã́ri Dupade ga chacãre gai ome udore. Ga chi jé u uje chajúgaja jnumone. Ga jé u uje chisi ome dacadigode udore ga chi chojninga: —Beyoi, ga ajuguínaño cojñone ore jnese.— 17 Jecute chi cojñonguemui ore tagu jnese. Ga chi subudé ore iji jnese. Mu chi ore cha chagúi ga jé u uje ore chamáta daquebéode iji dabosode udore. Ga chi ore ĩretadie canásta chi gare iji yirídai ome ore iquebétigo. 18 Jecute chi chisápo dire gatérique rĩ uje chi Jesus cãra daquitígo ome dacadigode ore ujetiga catecarámi dayé Dupade. Mu uje chi cha dacatecãraitigade udore ga chi chisápo dacadigode ore rĩ ga chi chojningame ore: —¿Cojñone jé ore cho ringome uyu que a?— 19 Mu chi acadigode ore chojningame: —Ore chaguhéta Juan babai, uté uje gãrate cojñone aja yodi nanique. Jeque uñane ga chi ore cho jnani baja cásodicáite Elías iji ua. Jé basa ga uñane ga chi ore chojninga: “A Dupade uruode atatasṍri cásodicáite uña uté ga a e ecápo rĩ.”— 20 Mu chi Jesus catecãrápoi ore rĩ ga chi chósi tome ore: —¿Jé uacajéningo cho ringome yu a? ¿Ujetiga uyu gosi a?— Mu chi Pédro jĩrique chajnai ga chi chojninga: —Cachi que piraque ua ãrie. Uje Crísto u ua, Dupade abi.— 21 Mu Jesus chaquĩrapise ore ujetiga ca ore chingongara uringai Dupade utocáite aja erámi. 22 Enga chojningame ore: —Dupade utocaidi uyu yajnei tu ujetiga yejnarenguipise cuchade ome yu. Yajnei tupo rĩ ujetiga judíode ore angaránone chetaguipise yu. Jé aja sacerdóteode ore eduguéjnane ore rĩ. Jé aja Moises urusarane atatasórone ore rĩ. A ore chujé yu jne, mu a yĩriji jne iji yitoringai quigade iji dire gadiótigo.— 23 Quigade enga catecã́ri ore jnese ga chojninga: —Gosi ujeta pota chajna yu doi ga chicadígui dacuecaringuei ome re enga ca cha yunerai iji dirode jnese. Ujetiga cho daba yiroquéode marínga que cha yunétique gotique. 24 Mu gosi uje que áyipieraque jnoji dacuecaringuei, a bijna jne ome gosi. Jé basa gosi uje cho daba dagaidode yiroquéo, uté gosi u uje piquetaque jne.— 25 Mu chi chojningápo rĩ: —Que cuchárique tõrapísiji ayorérique ujetiga chise dajegaidode cucha jnese iji de erámi, ujetiga uté gosi chachia re jne ome daringárique pujuya.— 26 Mu chi Jesus chósi tome ore rĩ: —Mu ujetiga yujórique ayoré ajéngome yadode, yacajnaquéode quigode ore, ga a jé Dupade utocaidi uyu yiji uté gosi isocai ome jne. A yajéngome to jne ujetiga yisápo jnumi rĩ ome yuringárique eduguéjna cuchap. Uje a yoidé tu Yapade ujopie jne gu. Jé aja yapade irótigo jeta ore nóna yu aja jnumi. 27 Jé ũrepise yu uje yojninga: uñane uje ore déji yocari iji de a ca ore chimo pitoringai jec aja ujetiga ore chimo Dupade uringai eduguéjna cuchape.— 28 Uje chi dirode gadióguiji ti iji acajnaquéode udojo quigade ga chi Jesus nóna darógode uñéngo aja cucarãtique ójoraque ujetiga ore catecã́ri Dupade iji. Ga chi jorane jõra Pédro, ga jõrápo Jacóbo rĩ, jé aja Juan. 29 Mu uje chi Jesus jé déji dacatecãraitigade gai ome Dupade ga chi edodie chécãre dasocade. Jé aja iguidedie rĩ. Uje chi póroropise iguidedie ga chi chijninguese re iji dayaridi. 30 Mu chi ore chunina mu jnani gárerigo chiqueta raja uté uje chi ore catecã́ri ñane. Ga chi Moises u uñeque, ga Elías u uñai. Uje chi jnani bajácho ore nanique. 31 Uje chi ore déji daringárique pijningueñataque ajénique. Mu chi ore ojñane quigode u Jesus gajnei pocaninga jne. Uje chi Jerusalen gosode ore eduguéjnane ore imaningája jnutique jne iji cachotique iji Jerusalen. 32 Mu chi moi chejnápise Pédro, jorane ore ga idógosirase ujetiga ore mo. Mu chi moi tuqué jnoji Pédro ore edodie uje ore chimo direcaringué cuchábi tiji dãjorai Jesus ejode. Ga chi ore pañapísiji jnani gáreode udore uje ore déji Jesus gari. 33 Chi jnani gáreode udore ore noñome Jesus iji te. Mu chi Pédro chojninga: —Yocacadisṍri a, jé ueradipis ujetiga yácagoji de ga yipéco guiguíjna gadiótigo iji ome uaque ga bajneque uñeque jne. Jé Moises gajneque uñeque jne rĩ. Jé Elías gajneque uñai.— Mu chi Pédro chi cho paraque ome darecujáidie udire. 34 Mu chi cáma Pédro chejna daruode udojo guesi uje chi gue abujáraque chi di iji ore. Ga chi chaco udore ore gai. Chi ore déji gue abuja tuaté ajei ga chajuque ore agutedie ga ore todópisa. 35 Mu chi ore chudute darárigo iji gue abuja ajei uje chi chojninga: —Yape yijnorai u uté. Angachopísi uté.— 36 Mu chi Dupade chejna daruode guesi ome udore ore ga chi ore chunina mu gusuapo ore rĩ iji dayaridi uté. Mu chi ore cho paraque ujetiga ca ore tujúa ome cojñotique uraque damone cucha. 37 Mu chi chise dire gatérique uje chi Jesus ore doi jnumi iji cucarani uté. Ga chi jiépisi cojñotígo uje ore chachai Jesus iji garani. 38 Mu chi jnanírique déji cojñonguemui udore ore ujade uje chi chinguíra dabijnani taja Jesus. Ga chi chósi te iji dabijnane uje chi chejnápusu: —Yocacadisṍri a, qué yutṍri ua ujetiga ajirape yabi tuqué to. Yopise yáyugu uje yape ugurape gu suté. 39 Uje Satanas utocaitígo isaque disi uté. Ga pésu ga jecucha tibidi dejode. Ga pésu ga jecucha íjnoque. Ga jecucha ebié tṍraji pijnani. Uje Satanas utocaidode pésu yabi uté edojnaringuéone ga jecucha pésu juredie. 40 E yijnája bacadigode ore que, mu que ore chibote uté ejnarei ujetiga ore chijnimape.— 41 Ga chi Jesus chojningame ore: —Que uacanguretigárique cuse go. Enga jecucha écãcho cuchade quigode. ¿Chimo joroque rase re díningo ujetiga qué yugúsiji uacari iji de enga yidota yu ome uacaringane angoneparicho? Bo ga besi babi tuté ga ajnáño aja de.— 42 Mu chi uje disabi suté chirõre Jesus ga chi Satanas utocaidode chi chisa. Ga chinguíraja jnumi uje chi cho sẽre ome. Mu chi Jesus chijócãre Satanas utocaidi uté ome. Ga jĩrique disi tuté eca. Ga jé u uje chatĩrósi dayé gai. 43 Ga chi cojñonguemui tijapísa Dupade osongaquedatei ome disi suté. Mu qué ore déji ñane gari uje qué ore catecã́ri ñane ome datijabádode, Jesus ipesudi tuqué. Mu chi Jesus catecã́ri dacadigode ore ga chi chósi tome ore: 44 —Angachopísi yuruode udojo. Ga ca acadíchoi yuruode quigode. Uje uacuñeque a tẽra Dupade utocaidi uyu ome dojórigo jnanío jne.— 45 Mu Jesus acadigode chi ca togome ore ujetiga ore chiraja uruode udore quitique. Chamáñaje que pujuregácho jetiga ore chiraja. Mu chi ca ore casi ujetiga ore chingome Jesus ujetiga cho daruode quigome ore. Uje chi ore todópisa gu. 46 Mu chi Jesus acadigode chi qué ore botãre ñane ga chi ore chojningame ñane: —¿Chimo joroque re ibijóguipítique iji yoque?— 47 Mu chi jĩrique Jesus chiraja udore ore áyipiedie quigode uje ore ucuei tu daringárique pujnuéngaisõre. Jecute chi dosi disatique ga chi chisasi ga chichásiji dejoi. 48 Jesus e catecã́ri ore enga chojninga: —Gosi ujetiga chimesere disi udé uje changureta yu, gajnui u ujetiga chimesere yu. Jé chopo to rĩ, gosi ujetiga chimesere uyu ga gajnui upo rĩ ujetiga chimesere yirósõri Dupade. Chamáñaje uaque gosi uje paraguipise, uté u uje suépise dajorane ore gáyode jnese. Ga obiréjnai tu uté iji uacajade.— 49 Juan chojningame Jesus: —Yocacadisṍri a, yimóngo yocujoi jnani que uje chijócãre Satanas utocaidode iji isagode ore uje chi chijna bajopie tome udore que. Mu yetajopísome jnani uté que ujetiga cha dajmapié uaté. Uje que yoquĩjora uté gosi to gu.— 50 Mu Jesus chi chojninga: —Jé ca etácho ome ga uté gosi jé chijna. Uje que déji yocari to mu que chetaque yoque to go. Mu ucuei tu jeta chátaja yoque to.— 51 Mu Jesus chiraja uje e idógosi dajñapié eruei ome dagachodi ujetiga chicáji gaté. Chiraja dagachodi batigai to rĩ uje ore idaidaté cuchábi Jerusalen u. Ga chi Jesus ca dosóñime. Ga jĩrique jnome Jerusalen yui. 52 Jecute chi chiroque darótigo aja daquei ujetiga bajac ore aja ore idai uje chi i tu Samária ujetiga ore chucué ore upusiétique cojñoque. 53 Mu chi Samária gosode ca ore chise udore ore unétique uje chi ore cho quique daqui gu uje ore qui tu Jerusalen. Samária gosode ore gueteguipise Jerusalen gosode ore gu. Jecute que ore juéga dedai tome ore. 54 Mu uje Jesus acadigode, Jacóbo, Juan, ore chudute uraque dajnéone ore gãrétiga ome dedai ga chi ore chojningame Jesus: —Yocangaráni a, ¿ja ajuéga ya ujetiga yijnangoma bajopie ome udore ore idai? Ga yirójope piotígaja ore ujetiga tṍraji gaté ome ore. Ga yejnangope udore ore iji ore idai tuté. Ga yicobi jnani bajai Dupade uruode atatasṍri cásodicáite Elías isocai tome ore.— 55 Jecute Jesus chajire ore ga chaquĩ́ra ore enga chojninga: —¿Ja ca arajáyo to a uje uacáyipiedie quigode udore que tṍraji Dupade go? 56 Dupade utocaidi uyu que yĩri iji jnumone nanique gu ujetiga yo yujuñame uñeque. Mu yĩri gu ujetiga yiqueta erámi unirisórone ore.— Jecute chi ore chicai pidai uñeque ujetiga ore chise dapusiétique iji. 57 Chi ore jnome daqui tuté erãpe mu chi jnanírique chise Jesus to ga chi chojningame: —Yocangaráni a, yipotigádi u ujetiga yijinama ua to ga ca yimoque bajesúrique erãpe.— 58 Mu chi Jesus chajnai uté gosi ga chi chósi tome: —¿Ga jé ũrepise ua ya? Uje baraja to yisocade. Uje dibedie chiraja daguíjnane jogadode. Ga chugúperenie iguíjnane, úbiredie cusapo rĩ. Mu Dupade utocaidi uyu mu que yiguíjnarique cusipise go.— 59 Mu chi Jesus cha catecã́ri jnani bajai ga jé u uje catecã́ri ejoi. Ga chi chósi tome: —Be ga ajína yu to.— Mu jnani uté gosi chi chojningame Jesus: —Yocangaráni a, jé dóbiji ga ajuégabá jeta yimo yapade aja jnutique iji cachotique. Ga jé u ujetiga yijína ua to jne.— 60 Mu chi Jesus chajnai uté gosi uruode ga chósi tome: —Ca o báyugu bayé. Jiépisi cojñone ore uje que ore tangári yu to. Ga a bayé atajasórone u udore ore jne iji dagachotique. Mu ujetiga araja Dupade ujnomei ga jé bo údi. Ga amate cojñotígo aja Dupade uringárique purása to jne.— 61 Jeque ga chi uñeque chi chojningame Jesus to: —Yocangaráni a, yipotapísa jeta yijína ua to. Mu ayape jne. Ga yingongaráma yu aja yijogasui ore jne iji yiguíjnai tuqué. Ga yingoba yáyipiedie ome yijogasui ore bajac iji yoquiguíjnai tuqué.— 62 Mu Jesus chojningame uté: —Bajnui tu utácarique uje chirase dejnai ome erásõri arado. Mu chajire daquigade ga jogadi u uje chicai quedéjnane enga que ujñapeque irañapídode. Jecute adi jé u ome ua ga gajnareque ua ome Dupade iroquéode ujetiga amáta cojñone aja daringáringo Dupade urása.—
1 Mu chi udojo quigade ga chi yocangaráni Jesus chisa cojñotígo to ujetiga ore dobi iroquéode to. Uje chi ore chejna ayoré gadiógode ga ore chisa uña jmanáyone rĩ. Ga chojningame ore: —Boyo ga bajaque uágaja yiquei. Ga gare uágaja ñane jne. Ga angoñoma uágaja ore idáyode jnese uje ore déji yoquiquigode udore iji yoquiquei.— 2 Jecute Jesus chacãra dacajnaquéode aja cucha pĩrátique enga chi chojninga: —Yoquipesudode udojo cucha ome Dupade, gajnúone u cucha pĩrátique uje sué yoquibai uje garósi uyógome. Ga jé jogadi tu ujetiga qué yutocobi Dupade ujetiga chṍrape uyoque ome yoquisai tuté cucha.— 3 Chi Jesus chojningápome ore rĩ: —Boyo mu ajusópise uaqueo iji erámi uje a uásejna cojñotígo jne ujetiga ore pota ore sué uacabai ome uacaringáringo chucho. Uje a uacajnúringui u áyasarigui jne ujetiga agúsoji cuchiso sijnátigo ajénique. 4 Boyo mu jé ca acueyoi uacajnutique cucha jne. Jé aja uacoidéraque uacapláta. Jé aja uacarídai gatérigo. Mu oyo caru aja uacaquitique erápe uté. Ca ajnaséchoji uacaqui tuté yui. 5 Mu ujetiga eso uacajegaidi tuté uacaquique ga añuchopúsu uacarúrigo quitique guio ome uacapusiétique guiguíjna iguijnasónique. Enga ojnichome jne: “Yajéode u ujetiga pajesereringai ca /8jnoque iji uaque iji uacajogadi udé.” 6 Ujetiga jec ũré enga ayoré parai uté enga a uacaruode udore quigode a tocade ome ore jne. Jé basa ujetiga ca ayoré paraque uté enga a ca uacaruode tocade ome ore jne. 7 Jé ca uacáyipiedie déji ujetiga asochóji ore idai údode ujetiga écãcho uacapusiétigo. Jé ayáyoji uacapusiétique bajai uté gari enga acho uté gueranone pibóso ome uaque jne. Chamáñaje ujetiga uaque gosode doi Dupade iroquéode ga jé tiógara ujetiga ore chosõre uaque. 8 Ujetiga ese ore idaidatérique ujetiga ore chimesere ua ome bacajnaquéringo, ga acadipise ore ome Dupade adode. Mu ca etaque udore gosode guẽratígo cucha ome ua. Agu ga ca ese unerotiguérique. 9 Ajnusi uágome ejnaretátigo ujetiga aquetáyope ore iji ore idai tuté. Acácho ore ome Dupade adode enga angoñome ore uje e idógosi ujetiga Dupade cho darásade iji dameserasórone. 10 Mu ujetiga uaqueyai tuté ore chetaguipise uacacajnaquéode ga beyoi ga ajnáño dajei aja ore idai guetique, ga ojnichome ore: 11 “Cajicho yoque to e. Uje jé yátagoja jnumi isapídode iji yoquirídade uje yijninguéco aja uaque. Ga udojo imoi tu uje yetajopise uacadode ome yoque. Yocósi ti ome uaque gu ujetiga arajáyo to uje Dupade ujnomei e idógosipísiji uaque ujetiga aduchorase to. Mu uaquetácho uyógome uaquedai.”— 12 Mu chi Jesus chojningame dacadigode udore ore: —A chise dínique jne jeta Dupade cho dajuñame cojñone ore iji ore idaidatérigo udore. Ga a ujuyaquedatérique sué Sodóma gosode ore gajné casicáite pujuyaquei gai jne ome uraque dedai tuté.— 13 Jesus chojningápo rĩ: —Yuruode gajnengórone u idaidatéode jogosórone ore uje ore chetaque yu gu. Enga yósi tome ore: jé bioque ji ujetiga Tíro, Sidon gosode chimo yipesute datéode udojo to. Ga a ca toguirásome ore ujetiga ore cho uaque. Ga a ore checãrirase datígo to. Uje a ore chorase dáyugu cutejmane dapesute gajnarécho. Mu Corazin gosode uhuaque, jeoga Betsáida gosode uhuaque, uacapáñaicho yipesute datéode que, mu que écãcho uacatique go. Uje que eso yocacajnaquéode unétique go. Jecute yosõripísi joroque uaque uje iyieja Dupade ujuyaquei yui to ome uaque. 14 Mu a chise dínique jne ujetiga uacajnetique Dupade ujuyaquei chise uaque ga a sué Tíro, Sidon gosode ore gajnei Dupade ujuyaqueque gai jne. 15 Mu yuruode gajnengórone u Capernaum gosode uaque to rĩ. Uacoyo ayoredatei iji uaque. Mu que ayoredaté uaque go. Uje uaquetácho yuruode ga a uacaqui tu jnaropié jne.— 16 E catecãrápoi dacadigode ore rĩ ga chi chósi te ome ore: —Ujetiga uñeque ca tangári uaque ga jé gajnui tu ujetiga ca tangári yu to gotique. Mu ujetiga uñéngo tangári uaque ga cho ujetiga ore tangaripísi yu. Mu uté gosi ujetiga chetaque yu ga gajnui jé u ujetiga chetaque Dupade uje iroque yu aja uaque gu.— 17 Mu chi Jesus utocáite ejóiso uje 70 ore, ore jno Jesus uruode údi mu ore chisápo Jesus rĩ. Enga ore irasiguipise raque. Ga chi ore chojningame: —Yocangaráni a, yoquirasiguipise yoc, uje Satanas utocaidode isagode, yiquetágo ore uje yĩ́caco bei enga yijnángo bajopie tome ore.— 18 Enga Jesus chajnai ore uruode enga chojninga: —Yiraja. Chamáñaje yimo Satanas to nanique uje basiji gatajnoquei. Gajnui u ajnorátique nanique. 19 Enga e yerané yujopie taja uaque ga jé uacaringane pujnuéngaisõre jogadi tu ome Satanas, utocaidode ore rĩ. Ga a achiyorási ugáriguiji jnutique, jeoga suarechequéraque mu a ca toque ujeta cuchárique uté chósi ti iji uaque. 20 Mu ca aninañoma uaque uje Satanas utocaidode todópisa uaque uje uacajnáño yujopie tome ore, mu anínaño uaque gu uje Dupade e churúsãre uaquéode iji gaté ga e dimáneo.— 21 Jecute chi Dupade Ujopie Espíritu Sánto irágupúsu Jesus ajei enga chi irasiguipise re. Chicotapise dayé Dupade ga chi chojninga: —Yacaranguipis ome ua, Yapa, uje bajnué gaté minórone ore gai jnese, jé aja jnutiminórone ore to. Yacaranguipis ome ua to uje bapógu badode udore ome cojñoque dicotarechoquíode, cojñoque irajatade ore rĩ. Mu que apógu ome udore ore gotique uje qué garósi ore irajatigade. Jec arec uje báyipie ueradedie udire e tocade ome ore.— 22 Cha catecã́ri dayé Dupade ga chojningame re: —Yapade tẽrája yu ome cuchade udore jnese. Uje abape yu gu. Enga a ca togome uñeque ujetiga chiraja yapade uté gosi. Mu gusu yu uje yiraja uté uje abipise yu gu. Ga jé isocai tu ome gosode udore uje a ca ore chiraja uyu gosi. Gusu yapade uje chiraja yu uje ape yu gu. Mu gusu yu rĩ ujetiga yingo yapade ome udore gosode ga jé u ujetiga ore chiraja to.— 23 E chajire dacadigode ore ga chi catecã́ri ore. Mu chi gusu uruode gajnengórone u ore enga chojninga: —Anínañopúsu uaque ome uacamone cucha uje uacamóñopise ome uaquedodie. 24 Uje chi Dupade uruode atatasõre bajade, eduguéjnane ore rĩ, chi ore pota joróga nanique ujetiga ore chimo yu to. Mu que togome ore go jeta ore chimo yu to. Ore potapísa joróga ujetiga ore chimo yipesute datéode uje uacamóño. Jé chopo ome yacajnaquéode udojo ujetiga ore tangári jorógui uje e uacadúcho que. Mu que togome ore jeta ore chudute, ujetiga ore chimo cuchade udore to.— 25 Udojo quigade ga chacate cojñonguemúrique ga chi Moises urusarane atatasórone uñeque chi chague iji ore ajei ga catecã́ri Jesus ujetiga qué chetingare Jesus. Ga chósi tome uté: —Yocacadisṍri a, ¿jé yisocárique dérasi rique a, ujetiga yise yuringárique piquetaque to a?— 26 Mu chi Jesus chajnai uté gosi uruode ga chósi tome: —¿Cho rique Moises urusarane quigode a, ome yocuringáringo piquetácho a? ¿Ja ca araja quigode to a?— 27 Moises urusarane atatasṍri uté chajnai ga chi chojningame: —Moises urusarane quigode u uje chósi te: “Ajnorapise bangaráni Dupade ome baringai ayoré jnese. Ga ejnapise báyipie taja uté. Ga ejnapise betotiguei taja rĩ. Ga ajusipise bojórique ayoré guio to. Ga jé gajnui tu uje bajuse beo to.”— 28 Jecute chi Jesus chajnai uté uruode ga chi chojningame: —Je ũrepise ua ome barecujáidie udire. Mu be quigode ga a ese baringárique piquetáguiji deréjnane jnese jne.— 29 Mu chi qué Moises urusarane atatasṍri uté chajo raja Jesus ujetiga qué botã́rapo rĩ. Ga chi chojningame Jesus: —¿Jé gosirase a jeta yujuse guio a?— 30 Mu chi Jesus chojningame uté: —A yatatabu cojñone adode jne ome ua ujetiga arajape quitígo. Uje cojñoi déji nanique ga gusu iji dajei uje tṍraji Jerusalen ga qui turásu Jerico. Ga chi uje oriechoquírigo ore chise cojñoi uté ga chi ore toria ugúchade jnese. Ore chatapója iguidé gamitodie rĩ. Ga chi ore chujé cojñoi tuté údode ga jé u uje ore jno. Chi chirõre ujeta cojñoi toi ome ore yupídode. 31 Mu chi diga judíode ore angarátique chise uté mu chi chimo mu que chosõre gotique ga chi cho caru iji dosadi. 32 Mu chi jé isocai tu ome levíteode uñai rĩ. Uje chi chise uté jogadi to ga chimo to. Mu que chosõre gotique. Mu quítequiguí dosadi to. 33 Mu chi Samária gotique chi chise to ga chi uté chimo ga jĩrique chosõripise. 34 Mu chi uté chisa jnani tuté ga chi chanire bisitígo aja cojñone ore yupídode. Ga chigarápo gáyode rĩ ome borapéode. Jecute chi qué chujépo aja dachidi burica gai to rĩ. Ga jé u uje jno údi aja ore upusiétique guiguíjna ujetiga chirodíji uté. 35 Mu chi chise dire gatérique uje chi Samária gosi chi e jnome daquitique jne. Ga chi chijnime doidérigui daplátai ome guiguíjnai gajnengóri ga chi chisi ome ga chojningame: “Bajné de daque jã. Arodipísape jnani tuté jne. Que cho cucháric ujetiga bẽratígo cucha déji yeranenie udire iquei. Mu a yo boré jne jéta e yĩriápo rĩ.”— 36 Jesus chi cha cho dojña ga chi catecãrápoi Moises urusarane atatasṍri uté rĩ. Ga chi chojningame: —¿Déji rique ome ua ya iji jnani gadiógode udore uje ore chise jnani tuté iji cachodi iji dajeque pajei, ujetiga gosi iji ore suse pajnangoi tuqué guio a?— 37 Mu chi Moises urusarane atatasṍri chi chojningame: —U ãrie uje chosõre jnani uté.— Mu chi Jesus chi chojningame uté: —Be ga jé be uté jmapié to.— 38 Mu jé Jesus jno daringai urugu údi. Mu chi díji ore idai ajámi uje chi tõrapísiji chequéraque uje chi i tu Márta. Ga chi Jesus pusi uaté. Ga chi Márta uaté irasepise re. 39 Uje chi Jesus chacája ore iguíjnai ajei mu chi Márta neróraque déji to uje chi i tu Maria. Ga chi uaté doi Jesus ejópisi ga chi cháji ujetiga tangári acajnaquéode quigode. 40 Mu chi Márta uaté isagode cucha suépise gai. Ga chi tibágui Jesus ga catecã́ri Jesus ore enga chojninga: —Yangaráni a, ¿jé ca cho cucháringome ua ya, ujetiga yẽro tuaté cháji bari iji de bisideque? Ga noñome cucha pisagode udore iji yari uje que chátaja yu gotique. Angomome ga chátaja yu.— 41 Mu chi Jesus chajnai uaté uruode ga chi chósi tome: —Márta, Márta aya bedojnaringuéone ome bapesudode cucha udore jne. 42 Uje cucha chojmarai déji ujetiga pajiriguipise. Ga Maria u uje ajegáite cuchai tuté. Que togome yu jeta yingome uaté ga cha.—
1 Chi chise dínique uje chi qué Jesus déji dacatecãraitigárique gai. Mu chi chejna dacatecãraitigárigo guesi ga chi acadigode uñeque chojningame: —Yocangaráni a, qué be ga acadape yógome picatecãraitigade ome Dupade. Ga basocai turásu Juan casicáite uje chacate dacadigode ore ome picatecãraitigade nanique.— 2 Ga chi Jesus chojninga: —A yacate uaque jne. Ga acatecãchoi Dupade ga oyósi te: Yocai Dupade, uje bagúsiji guéode uéchai, Yocajéode u ujetiga picotaque ua ome baringai Dupa. Yocajéode upo rĩ ujetiga jĩrique ãri ga ope barásade iji yóguiji de jnumi. Yirajágo uje gaté unirisórone ore dopísi báyipiedie quigode, Ga apésabu yóguiji udé jnumi to ujetiga yicoi báyipiedie quitígo to jne. 3 Apésu to ga ca cucha pibotique chona uyoque iji diri tudé údode jnese. 4 Ãrope yoquisijnaringuéone gajneri ga yiyagobu yocájningane ome ñane to jne rĩ. Ca ajuéga yógome pisijnaringuéone ujetiga pota chetingare yoc. Mu ãraque uyógome pisijnari nguéone jnese. 5 Jesus e chacate ore ome picatecãraitigade ome Dupade gaté ga chósi tome ore: —A uacuñeque dérasi ujetiga jõrapísirique di iji uacuñeque iguíjnarique iji dejnínga gatócororaque ujetiga chiringare uaque gosi. Ga chojningame uaque gosi: “Yĩjora, be ga asiamome arureque gadiótigo ome yu ga yijnáma jne. 6 Uje quene yĩjorai diji yiguíjnai uje pusi yu. Mu que yibotique cus jeta yisíji.” 7 Mu a uaque gosi chajnárasi enga chojningame uté gosi iji guesi: “Jé dóji ga jé ca acatecã́ri uyoque iji yiguíjnai ajei. Yujuco guiguíjna piagoi gai que gu. Yugúsapo yabode ore gari rĩ iji yoquimochápi gai. Ga que togome yu ujetiga yĩriji ga yisi ome ua.”— 8 Mu chi Jesus chojningame ore: —Ise ga ca uacuñeque chirate uté jmapiedie. Ujetiga ca uaque gosi jõrapise mu a jé chisírasome ajegaidode cucha ome, ujetiga ca pésu uaque gosi ejoporinguéone iji dejai gatócororaque.— 9 - 10 Jesus chi cho cuchade udore quigode ome ore ga chi chósi tome ore: —Gajnui tu ujetiga acatecãchoi Dupade. Atayoi uacajegaitígo cucha ome Dupade enga a chisi ome uaque jne. Isocai jé u gu ujetiga gosi chucué cuchárique, diga a chise. Isocai jé upo rĩ ome uacuñeque ujetiga uacuñeque pota chacája guiguíjnarique ga doi ga chujé piagoi bajaque. Ga jé jogadi u ujeta puchẽra gai ome uté gosi. Ga jé uaque gosi doi dajmapiedie udire ome Dupade to ujetiga uaque gosi chutai cucháriguiji Dupade ga Dupade a jĩrique tẽrája uacuñeque jne.— 11 Jesus chi qué jno dacajnaquéode údi enga chojninga: —¿Ga jnanírique dérasi a, ujetiga atique chutarási arurétique iji ga chisírase cucaranéraque ome datique a? ¿Jeoga atique utaitique urásu oyítique ujetiga tagu, mu gosi chisi ome ugárique ome datique? 12 ¿Jeoga atique utaitique urásu cucha curẽtique mu uté gosi chisi ome suarechequéraque ome? 13 Jecute uacarajáyo jnese to uje jnaníringo que ore isoca gotique ome datique ujetiga ore chisi ome cucha gajnarétique ome datique. Mu ore gueranone u cucha omone ome dabode. Cuchiyi urásu uacai Dupade iji gaté ome dẽrapáitigo cucha ome dabode ore uhuaque. Uaque gosi a chutai Dupade Ujopie Espíritu Sánto ga a Dupade tẽrája ome uté gosi jeta chutai.— 14 Chi chise dire uñeque uje qué Jesus pésu cojñotique uje chi ca toque darai tome uje Satanas utocaitique chi juruque pijnani. Ga chi Jesus chijócãre Satanas utocaidi iji jnani uté. Ga jé u uje chi narárapo to rĩ. Ga chi cojñone ore tijapísa Jesus ome ipesudode udore. 15 Mu chi cojñone uñéngo iji ore ujade chi ore chojninga: —Cajicho jnani tuté to uje chijócãre Satanas utocaidode iji cojñone. Mu a jé oidé tu Beelzebu ujopie tome gu jõ. Uje Satanas u uje yĩ́caco Beelzebu aja to. Enga a Satanas utocaidode ore tangári deduguéjnai ujopie gu uje uté chijna.— 16 Jé basa uñane ore pota ore chetingare Jesus ujetiga pésu dapesute datérique ujetiga tṍraji gatajnoquei tome ore. 17 Mu chi Jesus chiraja ore áyipiedie quigode ga chi chojningame ore: —Cuchade udore gajnúone u ayoré dacasutérigui ujetiga ore chetaque ñane atígo ga ore socárome ñane. Ujetiga ore chujé ñane ga que togome ore urásarigo ujetiga ore cho parágome ñane iji jnumi. Ga jé gajnui tu ome ayorérique ore jogasúode. Ujetiga ore chetaque ñane atígo ga ore pojna ñane údode. Diga ore chejna ñane. 18 Jecute isocai tu to ome Satanas uje i uñai u Beelzebu to. Ujetiga Satanas socarirásome re, enga a ujopie etotiguei doi jnumi, doi jnumi. Diga e chise detotiguei eruei. Yuruode u udore ome uaque gu uje chiese yijna Satanas ujopie uje yijnime utocaidode iji piésorone cojñocho. 19 Uacarajáyo uje uacarásade uñéngo ore chetingare chiqueta cojñone to uje Satanas chacája ore. Ujetiga ojnichome ore: “¿Uacoidé tuaté uacajopie tṍraji rique ome uaque?” Mu a ore chojninga: “Dupade ujopie tu ãrie.” Jé chopise yu. Jecute a oyopise parágome yu que ome uacaru quigode ome yu. 20 Que yijna pujopie uñáraque go mu yoidé tu Dupade ujopie uje yijócãre Satanas utocaidode iji piésorone. Jecute obiréjna uje Dupade utocaidi e di enga e déji uacajade ujetiga ayoréode cho deduguéjnai iji.— 21 Jesus qué chacate ore ga chojninga: —Uje Satanas chacája dasatique cojñoque ga adode udore gajnui tu ayoré etótique uje suse dagúchade guio iji daguíjnai ajei. Ga que toc ujeta pijocayácho ugúchade uje õracharaque uté gosi gu. 22 Mu ayoré uñeque díji uté iguíjnai uje suépise ayoré etoi tuté gai. Ga a ajéo ga chajnose uté ome õrácharigo uje suépise uté gai gu. Ga a jé gajnechoráso ayoré etoi tuté ugúchade ome uringáiso pajnoñácho. Gajnenguirase iguíjnai rĩ.— 23 Uje chi chejna dacajnaquéode udojo guesi ga chojningápome ore rĩ: —Mu jĩrique amácho uacáyipierigui ome yu. Uje a obiréjna iji uaque jne: ujetiga uaque gosi ca cháta raja yu to ga imoi a u jne uje uté gosi chetaque yu gu. Mu ujetiga uaque gosi cháta raja yu bisidec ga a uaque gosi pésu yujuredie jne uje que doi yiroquérigo to go.— 24 Jesus chacadápo ore rĩ enga chojninga: —Ujetiga Satanas utocaitique dorási guesi iji dasatique bisideque enga jno enga chucué dabírique cucha uña iji erãpe eyutiguei, mu que chise, jecute a chojningarásome re: “A yajni yibi bajai gai jne.” 25 Diga chise jnani uqué uje dimane ome yui. 26 Jecute uté dorási dajoráringo ore ome uté enga gare ore iji ti iji yijmanuñai enga ore chacáporásaja to rĩ. Mu udore ore suépise bajai uté gai ome daringane sijnaque. Enga Satanas utocaidode udore ore dorási dateringane ome.— 27 Uje chi qué Jesus déji daruode udore gai mu chi chequéraque chi chinguíra dabijnani aja ejode enga chi chojninga: —Picotapise opejã baté gotóraque. Chamáñaje barãpié u nanique gu. Enga uaté u uje chimate ua aja gaté.— 28 Mu Jesus chajnai uaté uruode ga chósi tome: —Ungare. Que quigode u udore gotique. Picotaquéode gajnetodie udire ore u uje ore chudute Dupade uruode ga ore doi quigode.— 29 Mu chi cojñone ore chamáta ñane aja Jesus ejode jnese ga chi orone ore iji ejode. Mu chi jé u uje Jesus chacate ore ga chósi tome ore: —Mu cojñone uaque iji deréjnane udojo, gajnarenguipíso uacadode. Ga chi uacapotigádi upúsu ujetiga amoñopise yipesutígo cucha datéo. Mu a ca yujuéga jne jeta yingongara yipesute datérigo ome uaque. Gusu ujetiga uacamóño yisocai jne uje jé u jnani bajai Jonas isocai to nanique. 30 Uacamóño uje Dupade gãrapié u jnani bajai Jonas ome Níneve gosode ore nanique. Jé basa Dupade gãrapié u datocaidi uyu ome diríe jogonórone uáguiji de. 31 Ujetiga diga e chise diri ujetiga Dupade chajire ore adode aja quigode enga a pajirique diríe jogonórone uaque uacadode aja quigode to. Enga umusoi jogosórone jnani bajácho ore eduguéjna chequé bajé a chague jne ujetiga chingo detétigade ome uaque. Uje uaté tṍraji puniri uje idájapise nanique ujetiga tangári jnani bajai eduguéjnai Salomon irajatigade. Mu uaté etétigai u uje uñai déji uacajade uje irajatigade suépise Salomon irajatigade gai, mu que angáchoi uté go.— 32 Jesus chojningápome ore rĩ: —A jnani bajade uñéngo, Nínive gosode, ore chaguhéta uaque gosode gai to jne iji uté diri ujetiga Dupade chajire uacadode aja eruéode iji. Ga jogadi u jne ujeta ore chojninga: “Jonas di baruode údi aja yoque nanique ga jĩrique yiyágo yocate gajnaréngone nanique. Mu batocaidi ome disi ejode ore, suépisi Jonas gai mu urásade que ore tangaripísi gotique.”— 33 Udojo quigode ga chi Jesus qué chacate ore enga chojninga: —A ca ayorérique déji jeta chãru dapótique ga pógu ga chicháji cuchárique útique. Mu ichapidi tu cuchárique gai iji gaté yui. Gaidi tu ujetiga ayorérigo ore chise ga chijñate ore ejode gai jnese iji guiguíjna tajei. 34 Uaquedodie gajnúone u papótigo to ome uaque. Ujetiga uaque gosi ueradepísi edodie ga pañapísiji dajiritígo ome re. Ga gajnui u jeta déji direcaringuérique ajénique. Mu ujeta uaque gosi edodie gajnarenguei enga que toc ujeta chimo direcaringuérique iji dejode. Ga cho jetiga déji ijnangunúraque ajénique. 35 Jecute ajuso uacajnei direcaringué guio iji uaque. Ujetiga ca chécãre re enga topiejnapo uaquejode rĩ. 36 Ujetiga díreca badode jnese, enga etaque ijnangununie jogosórone cucha, enga jogadi u ujetiga báyipiedie caputáji cuchade. Gajnui u ujetiga papósi chijñate babai.— 37 Uje chi Jesus chejna daruode udojo guesi ga chi fariséode uñeque chi catecã́ri. Ga dejena aja daquigade ujetiga tagábiji iguíjnai to. Chi ore chise iguíjnai mu Jesus cháji ore agapi ejoi ujetiga e taque. 38 Mu chi fariséo toji Jesus gai uje chi ca doi judíode ore jmapiéraque uje chi ore isocabeque nanique ujetiga ore taque gajneri ga chi qué ore churu dajmáinie bajaque. 39 Jecute Jesus chojningame uté: —Yiraja fariséode uaque. Uje uacajnui u ayorérique uje churu dagapírique cucha iji guesi mu ajei gajnareque. Jecute uacaruyo uacajmáinie gatuaque mu uacáyipiedie irágu ome uacate gajnaréngone, jé aja uacoriquéode. 40 Ayipie yugode u uaque. ¿Ga jé ca arajáyo to a uje Dupade ipesute uacaringane ayoré jnese? Mu que gusu go ujetiga ajuso uacaringáringo ayoré guio mu ajuso uacajéningo guio ome Dupade to. 41 Jecute ajuso uacáyipiedie guio uje asíyo uaqueranone ome ore ujetiga uacosõraquéode u ome ore. Enga quene uacaringane icha jogadi u ome Dupade. 42 Fariséode uaque a, yopise yáyugu joroque uaque ome uacajmapié uaté. Uje chiese ca acadíchoi Dupade gotique ome gajnepídi iji uacagúchade, iji uacaplátadie ore. Mu que ajuso uacáyipiedie guio ome gotique. Enga que ajnóraño Dupade to gotique rĩ. Jecute a Dupade ujuyaquei gajnengórone u uaque jne. Jé arec ujetiga jnanírique tẽra dajnepídi ome Dupade mu que doi ga chicadígui dajnoraquei ome dojórique ayoré, jé upo ome Dupade rĩ. 43 Yosõripise joroque uaque to uje uacapotigádi u ujetiga eso uacaringáringo ayoré datéo ujetiga ca ayorérique suseque uaque. Jecute uacacayóji ore aquiningaméone ga uacajéode u ujetiga ibijoque uáguiji ore iquei. Enga uje uacamóño ayorérique iji dajetique enga uacapótayo ujetiga jĩrique uté gosi achieta aja uaque. 44 Yosõripise joroque Moises urusarane atatasórone uaque to rĩ. Uje uacapócho uacasijnaringuéone iji uacajéode. Enga taquechoqui uaque. Jecute a uacajnúone u ayoré totique uje ore chijochame ga tãrata iji jnumi ajei. Uje cojñotique a chicai gai mu que ai chise uje idája iji guesi.— 45 Mu chi Moises urusarane atatasórone uñeque chajnai uruode ga chojninga: —Yocacadisṍri a, gajnarenguipíso baruode udore ome yoque que. Bapojna yoque.— 46 Mu Jesus chi qué chajo raja dapojnaquéode ome ore ga chósi tome ore: —Yosõripise joroque Moises urusarane atatasórone uaque to ome uacaringane josipierã́cho. Uje uacacajnaquéode pero uacacadigode gai uje que togome ore jeta ore chimate. Mu jé cho ome uaque uje que apéso cuchade udore aja quigode to go. 47 Yosõripise joroque uaque to ome uacajoyaquéode ome jnani baja cásodicáite Dupade uruode atatasórone ore. Uje taquechoqui uágome uacajoyaquéode udore. Uje chiese uacajnusinañopísa ore ome ore uringane ayoré picotac. Mu que ajnusináño to go uje uacayode jnani bajácho ore yuque ore nanique. 48 Jé tiógara uje que ajnusináño uacayode gotígo ore ipesudode cucha gajnarécho ome udore ore jocaningane. Uje yirajágo uje ore yuque Dupade uruode atatasórone jnani bajácho nanique. Mu disi ejode uaque uacajochame udore ore isijnaringuéone. Imoi tu ujetiga disi ejode uaque, uacagusorásiji ore ujade nanique ga a átayorasa uágaja ore ome uacayode udore ore jocaningane. 49 Jé ũrepise Dupade ome daringai irajataque. Uje chi chatata cuchade udore uje qué piraque yui. Ga chojninga nanique: “A yiroque yirótigo, aja yuruode atatasóningo aja jnumi jne. Mu a ca ore urásarigo ore ajéngome ore jne. Enga a ore chopise damajo yirógode ore jne iji dajáningo. Ga a jé ore chuságaja daringáringo chúgome ore jne.” 50 Diríe jogosórone uaque a, Dupade a chaguhéta uacayode jnani bajaque ore jocaningane udore, uacabai jne. Ga a chósi tome uaque: “Angoñome yu yirógode udore ore bárique uje chi ajéyo ore nanique iji erámi taningápisi. Ga jé uacasáchoja deréjnane udojo uje uacoyo uacamajo yirógode uñane ore iji uacajade.” 51 A Dupade chojningápome uaque rĩ: “A qué yingoba Abel ome uaque uje chi uacai jnani bajai Caín chujé nanique. Uje que ayáyo yuruode atatasórone ore unerane gotique uje uacajéyo ore iji uacajade. Ga jé uacasáchoja deréjnane udore iji jnani bajai Zacarías uje uacajéyo to. Uje chi Zacarías uté cachopísaja iguíjnai ajepísi nanique uje chi cho daba dapesutígo yurúo aja quigode. Mu cachója dapesudode udore gai.” Jecute a Dupade chojningame uaque jne: “Disi ejode uaque a, uacabade u uacajocaningane ome yuruode atatasórone ore iji uacajade. Angoñomome quitígo ome yu.”— 52 Jesus qué chajo raja ore ga chósi tome ore: —Cho ujetiga pujurúgai pirajatigade gáyode iji guiguíjnarique ajénique. Enga uaque u uje uacasayo llave ome guiguíjnai uté piagoi. Mu que achẽcho guiguíjnai piagoi gai ujetiga eso pirajatigade ome uaque. Enga ujetiga uacarásade ore pota pirajatigade ome raque mu uacãrácho ome ore.— 53 Uje chi Jesus chejna daruode udojo guesi ome ore ga chi jé u uje Moises urusarane atatasórone, fariséode ore ajningaranguipise ore ome uté. Mu chi qué ore chajo raja uje ore chingome cuchade ome gaté. 54 Enga chi ore tangaripísi Jesus yui uje ore ucuei tu ujetiga ore chise bárique cucha.
1 Mu udojo quigade ga cojñoque dipeséode ore yore aja Jesus ejode ujetiga ore tangári acajnaquéode to. Chi cojñonguemui udore ca ore edóraque cuse. Jecute ore chinguíra raja ñane iji daquigode. Mu Jesus chi catecã́ri dacadigode ore bajaque ga chi chósi tome ore: —Ajusópise uaqueo ome uacasocade ga ca beyoi fariséode ore jmapiedie to jne. Chamáñaje taquechoqui ore ome daringane Dupade irócho gu. 2 Jecute a ca ayorérique déji jne ujetiga pógu datique ga ca pirajaque iji quigade. Ga qué quigode upo rĩ ome puru pipoguiétigo uje diga chise daringai pirajaque to rĩ. 3 A apochorásu uacarúrigo ome ñane múñi a diga chise dínique jne ujetiga pududicho ome uyoque jnese. Ga jé chopo rĩ ome uacapoguiétigo uacarúo. A diga pududicho ga chubu erámi. 4 Mu yijorane uaque, yojningame uaque: ca atodóyo ore uje ore pota chui ome uacabai ayoré. Uje que toc ujeta ore chijocase uacáyipiedie. 5 Mu a qué yo quigome uaque jne uté gosi ujetiga uacatódi turásu. Uje Dupade u. Uje uté ipesudé yocujñapiedie eruéode. Ga uté u to uje ipesute yoquiquigode iji yoquitoringai quigáningo jne. Jé dejena yógaja gajño pioi jne ga jé yoquiqui tu. Jecute uacatódi ta urásu Dupade mu ca atodóyo ayorérique.— 6 Jesus e jno dacajnaquéode údi ga chojninga: —Garósi chugúperenie orátigui ujetiga ayorérique dorási oréraque ome. Mu que Dupade chicadígui ore gotique. Uje garósi ore oredie mu jé gajnui tu ujeta susipise ore guio iji erámi údode. 7 Jecute ca atodóyo cuchárique. Uje uacajnuéño chugúperenie gai ome Dupade. Ga susipise uaqueo to. Jé chuságaja baterodie uje Dupade chirajapise jnese. 8 Mu yojningame uaque jnese ujetiga Dupade utocaidi uyu yise yapade idai dirome ga a ca yise udore gosode unerotiguériguiji jne ujetiga yingongara ore aja Dupade, irótigo ore iji gaté. Uje yiraja gu uje que ore chise yunerotiguérique iji de jnumi ga ore chingongara yu aja darásade ore to. 9 Mu udore ore uje ore chotigase yu iji de jnumi jé basa ga a jé yotigásape ore to dirome ome yapade, irógode ore to iji gaté. 10 Mu ujetiga uñeque doi daru gajnaréngone ome Dupade utocaidi uyu mu a qué Dupade chĩrope uté gosi uru gajnaréngone to jne. Mu ujetiga gosi chise Dupade Ujopie Espíritu Sánto ome daru gajnaréngone ga uté gosi u jne ujetiga Dupade ca chĩro uté gosi isijnaringuéringo. 11 Mu diga soldádode a chijnarása uacuñéngo aja deduguéjna cuchátigo. Mu jé ca oyo uacáyugu cuchade udore ome uacaru quitígo ujetiga ãraracho uacabánique. 12 Ujetiga qué agúsoji uacaruode udore gánique mu Dupade a guerané dajopie Espíritu Sánto tome uac ujetiga arajáyo uacaru quitígo ome udore ore.— 13 Mu chi cojñone uñeque déji uje chi chojningame Jesus: —Yocacadisṍri a, angomome yĩjorai ujetiga chisi ome yajnepídi ome yu iji yocai ugúchade uje noñome yoque.— 14 Mu Jesus chi chojningame: —Que yiji baruode gu uje que cho jetiga yajneque ujetiga atõchoi yu ome uacapotigátigo cucha, ujetiga yajire uaquéode ome cuchade udore. 15 Mu ajusópise uaqueo ujetiga ca apótayo uacaringárique ugucharã́cho. Uje uacarajáyo uje que ayorérique chimate raja pininaquérique ome dagúcha dipesérigo.— 16 Jecute chi Jesus chicha gajnúrique cucha aja dacajnaquéode ga chi chojninga: —A jnani ugucharã́tique dérasi erámi ujetiga pésu dejnatígo ga jiépise acade cucha. 17 Jecute jnani tuté chi chucué dajéo. Ga chojningame re: “¿Jé yo píringome yacade cucha udojo jne a? Que yiraja jogatígo iji yiguíjnane.” 18 Mu jé chojningame re iji dajei: “E yiraja yisocai. Yi ga yĩro yacade gajnei yiguíjna jne. Ga yipésu ichárique jne. Enga querúpise jne. Ga jé u ujetiga yécãre yacade udore aja ajei jne. Jec aja yugúchade jnese ujetiga yijmáraja ajei to jne. 19 Ujetiga diga yimate yáyipiedie udáji aja guesi ga a yojningame yu jne ome yáyipie, ‘E yimate yugúcha dipeséode aja yiguíjna cuchábi ajei ga e dimáneo iji ajei. Jecute e que toc jeta cuchárique chona yu iji sequeredie iji yoquiquei uje chicai yoqui.’ Jec udé u ujetiga qué yo yujñare ome yisagode cucha jnese. Ga a ca yajire yu jne ome yibose uneréjnaringo, jeoga yijotaque dipesérigo. Ga a yuringárique yirasique jogadi u jne.” 20 Mu a Dupade catecãrirási uté gosi ga chojningárasa: “A ca araja cuchárique jõ. A jé atoi iji de dejai ga bañera casodé bagúcha ¿jé gosi gajnenguiráso udore a?”— 21 Jesus cho dacajnaquéode udojo quique ga chojninga: —A jnanione uacasocai tu uté to jne ujetiga acueyoi uacagúcha dipesérigo ome uacaringáringo atácho. Mu que acueyoi Dupade atique go ome uaque.— 22 Mu chi Jesus catecãrápoi dacadigode ore rĩ ga chi chósi tome ore: —Jé ca ejnañopise uacáyipiedie aja cucha pibotique jeoga uacaguidérigui ujetiga acueyoi cuchade udojo. 23 Mu cucha ueradode qué déji ujetiga uacacuegode urásu ome uaque. Enga udore u uje sué cucha pibosode, piguidedie ore gáyode. 24 Mu a Dupade guẽracho uacabotígo ome uaque jne. Jé uacamóño chugúpẽre utatadie to uje que guejnatique cus. Que chaca cuchárique rĩ. Que acatígo iguíjnarique cusapo rĩ. Mu uacamóño to uje Dupade átapi udire ga guẽrate posode ome ore. Mu Dupade ijnoraquei tome uaque sué chugúperenie udire gai. 25 ¿Ujetiga uaque gosi chejnápise dáyipierigui aja daqueraningai ga jé uté gosi querãrásiji a? Ungare. 26 Jecute ayáyo uacayuguhebátigade ome uaque uje que cuchárique tõrapísiji ome uaque. 27 Jé uacamóñopo cucha pojnánguenie rĩ uje quérã. Uje que chisa dejórique. Que pesapo daguidérigui rĩ. Mu ore sué eduguéjna cuchábi Salomon gai ome daueratigai uje jé ueradé eduguéjna cuchábi Salomon iguidedie to nanique múñi. 28 Ujetiga jec ũré enga Dupade chosõre cucha pojnánguenie ome uringanie ueradei, uje udire jĩrique ore beta, moitapurerase ome uacaguidérigui ujetiga chisi ome uaque. ¿Gotique gu a uje garósi uacanguretigai ome Dupade a? 29 Mu yuruode qui tu ujetiga ayáyo uaquedojnaringuéone ome uacacuegode udore cucha. Jeoga cucha pibóso. Jeoga uacaguidei. 30 Uje cojñone uje que ore chiraja Dupade to go ore jmapié uacasocai tuté. Mu uacajnengóri déji uje uacai Dupade u. Uté chiraja ujetiga ajmátayo ome cuchárique. Ga uté a chisi ome uacajegaitígo cucha jne ome uaque. 31 Mu cucha ueradi tu ujetiga ejnañope uágaja Dupade iroquéode ga jé jogadi u ujetiga uacasuté Dupade tẽrája uágome cuchade udore jnese. 32 Mu yirodigode uaque, ca atodóyo. Uje garosipise uaque mu Dupade que chise uacanerotiguérique go. Mu nínapúsu re ome uaque ujetiga cho darása iji uaque. Enga ajéode u ujetiga oyo uacasuté iji uté rĩ. 33 Jecute ẽcho uacagúchade uje déji uaque ga asi ome uacojode ayoré jmataque. Ga jé jogadi tu jne ujetiga Dupade tẽrája uáguiji gaté ome uacosongaquei uté. Jecute acueyoi uacáyipie quitígo ome uacajnetígo cucha iji gaté. Yirajágo to uje chi ca toque jeta ayoré oriechoquírique chise gaté ga toria uacuñeque ugúcharique. Chi ca pimópo cucha ijaróriguiji jne rĩ. 34 Ujetiga banguretigai déji ome Dupade guẽratígo yui ga a báyipie jogadípise Dupade. Mu ujetiga uacagúcha bujnai déji jnumi udé ga a uacáyipie que jnoji uacagúcharigo gai gotique mu jé jogadi tu.— 35 Mu chi Jesus qué chacate ore ga chi chósi tome ore: —Yajéode u ujetiga oyo pirótigo ore uje chi ore chirote darósõri yui ujeta díji dejátique. Uje chi dimane ore apótigo ome uté yui. 36 Uje chi ore irósõri a tṍraji sañeque jne uje chi quene gajmatóraque ore chisa ñane. Ga dimane ore ome darósõri diringai yui. Ga ujetiga chise dariringárique ga jĩrique ore chuchẽre iguíjnai piagoi gai ome. 37 Mu uje ore irósõri chi di ga a irasique ore jne uje qué irógode ore nijína yui. Ga chi jogadi u ujetiga ore nínapúsu raque jnese. Ga chi ca suseque darógode udore jne ga a chojningame ore jne: “Beyoi yocagapidi. Ga ayáyoji ejode ga a yisi ome yibotígo ome uaque jne rĩ.” 38 Uje jé isocai tu ujetiga chise darógode ore iji dejnínga gatócororaque jeoga dirájnai ujetiga chise ore mu qué ore nijína yui. Ga pininaquei jogadi tu ome irógode ore jnese. 39 Jec adi tu ome guiguíjna gajnengónique to rĩ ujetiga uté chirajarase ayoré oriechoquírique diringárique iji dejai. Ga a uté gosi ca morase to iji dejai údode ujetiga gaidi tu ujetiga chunina oriechoqui enga ca uté toria ugúcharique. 40 Yacajnaquéode udojo quigode u ujetiga dimane uágome yiríringarique yui to. Ga a aninañome jne eti Dupade utocaidi uyu yiríringai jogadi tu.— 41 Jecute Pédro catecã́ri Jesus enga chojninga: —Yocangaráni a, ¿ja gusu yógome bacajnaquéode udore que a, jeoga yocajnécho jnese? Uje bacãra bacajnaquéode aja cuchade udore.— 42 Mu yocangarádejnai Jesus catecãrápoi Pédro rĩ enga chojninga: —Yacajnaquéode gajnesórone u udore ore uje ore gajnui u jnani uje irósõri noñome darógode uñéngo iji jmáinie ujetiga chirote ore enga chisi ome ore posode ome ore iji deréjnane jnese. Uté irósõri chiraja gu uringai ayipierãque, jé aja uringai ũré rĩ. 43 Mu ujetiga ore irósõri diga di mu chise daroque gatei uté mu dopísi uruode aja quigode ga jec u uje iroque gatei nínapúsu re. Uje que ore irósõri uté chise daroque gatei unerotiguérique go.— 44 Jecute chi Jesus chojningápome ore rĩ: —Jé ũrepise yu ujetiga jnani tuté irósõri chimo daroque gatei dirome uje pesupúsu iroquérigo ga que cho áyipieraque gai, ga jé u uje changuretapise ga chajnerame daroquéode ome uté gaté. Irasique uté gosi gu ga jé u uje ore nínapúsu raque jnese. 45 Mu ujetiga uté gosi iroque gatérique que áyipieraque déji uraque darósõri diringárique yui ga chojninga iji dajei: “Yirósõri a ca di míraque jne ãrie.” Jecute que chañuru dojode piroque ore guio gotique iji uraque darósõri quigade. Enga doi oredie ome cucha pibosode, jé aja yote pioi to enga yote pioi chujé iji dirode jnese. 46 Mu jecute a ore irósõri dirase ga chise daroque gatei uté iji ipesute gajnaréngone udore gai iji dínique ujetiga ca iroi chunina diringárique. Jecute uté gosi irósõri a chucué jne enga chisa uté gosi ga jé u ujetiga cho dajuñame. Uje jé ipesute dagajnarétigai ome uraque darósõri uje que tangaripísi áyipiedie. 47 Ujetiga ore irótique chiraja darósõri áyipiedie mu que tangári, ga que pésu áyipiedie aja quigode go, ga uté irósõri a ca chajire dajuyaquérigo ome jne ujetiga chujé útigo. 48 Mu ujetiga agupurairase ore irótique ome darósõri áyipiedie, ga cho darósõri áyipieraque gai, mu a irósõri chujé údode to mu garósi gajnéone pujuyaquéo. Cuchade udore quigode u ujetiga Dupade chingopísa dáyipiedie aja uté gosi enga uté gosi u jne ujetiga Dupade chajiripise adode aja quigode jne. 49 Yugúsi uacari iji udore erámone mu yajnéone pocaninga que chajire re gotique mu qué déji yiquei. Ga gajnui tu piotique ujetiga tagu erã́tique. Ga chejna erámone aja quedéjnane. Ga unerirase yui ome yu ujetiga pioi tuqué toi ga yimórase uje yapósi ueradíji jnumi. 50 Yirajapise yadode uje cucha gajnarenguipísode qué déji yiquei ome yuringárique pujuya jne. Ga iyieja joroque yui. 51 A ajoso ati pajesereringai jogadi u ome erámi unirisórone ore gu uje yise ore. Mu que qui u gotique. Jogadi u ujetiga ore chajuque ñane ajéode ome ñane. 52 A amóño udore jne iji deréjnai tudé jec aja yoquiquei uje a jogasurane ore chetaque ñane ajéode. A chejna yijmanai ore mu a yimeserasórone gadioc ore. Jé basa gare ore ujetiga ore chetaque yu. 53 Ga isocai a u jne ujetiga yanguretasõre ore dai ga uté gosi ujnacari chetaguipise dayé uringai yanguretasõre. Jeoga yanguretasṍri u ujnacari jne. Jé basa dayé chetaque yu ga ibotaquéode jogadi tu ome ore. Mu a jé isocai tupo ome chequéraque rĩ. Ujetiga chequéraque changureta yu ga uro chetaque yu. Jeoga yanguretato u uróraque mu uaté daté chetaque yu. Ga ore ibotaquéode jogadi tu ome ñane uje ore chetaque ñane. Mu jé isocai tu ome chequé uaté goto pejóraque ore rĩ. A ejóraque changureta yu, mu dacaria chetaque yu. Jeoga uaté icaria changureta yu. Mu ejóraque u uje chetaque yu. Ga jé u ore cachodi uje ore cho jmíti, jmíti ome ñane jnese.— 54 Jesus chajnerame dacajnaquéode ome ore ga chósi tome ore: —Ujetiga uacamóño gue abujárigui iji guedé cacadi ga uacojnicho: “A beque jne.” Mu jec ũré uaque ga tocade udore uacaruode. 55 Jé basa ga a amóño úyujna gajnaréngueraque ga uacojnicho ome ñane: “A pioque erámi jnese.” Ga jé ũrepise uágome. 56 Cojñone uaque, uacacotáyo uágome uacarajatigade udojo, mu que arajáyo cuchárique gotique. Uje chiese arajáyo cuchade iji gaté jnese. Chiese arajáyo jnumi jogosórone adode to rĩ. Mu que anuninaño Dupade ipesute datéode go iji uacajade iji dirode udojo jnese. 57 ¿Jé gotique uje que arajáyo cucha omone quigode ome uac ujetiga apéso? 58 Ujetiga bajnose carutígo déji bojórique ayoré gari enga uté pota chisa ua ome bajnose carutígo mu jĩrique acué báyipie ome bajnose carubode ome jnani tuté gosi ujetiga ca chijna ua aja uacangarátique. Jĩrique o oré ga jogadi tu ujetiga jĩrique oyo paracho ome ñane. Mu ujetiga ca atĩre babotedie udire iplátai ome uté gosi ga uacangaráni a chisi ome ua ome daroque gatéode ujetiga ore suru babai iji daguíjnai. 59 Jecute yósi tome ua: a agúsi ore iguíjnai ajei ujetiga ore suru babai ga a jé ca amópo guetique rĩ. Jé aja ujetiga o bajnose carubode amirenie oré.—
1 Jesus qué déji dacajnaquéode gai mu jnanione uñane ore chisíji. Ore chingo Jesus uje chi quene Piláto chujé Galiléa gosode uñéngo que, uje chi qué ore déji degode cuchiso gai uje ore gueranome Dupade. Mu chi Piláto yugode ucode jnanío ore iyojnanie cháta raja degode cuchiso iyode aja jnumi. 2 Mu Jesus chajnai ore enga chojninga: —¿Uacajéningo cho rique ome jnanione udore ore, Galiléa gosode? ¿Cucha dacadode udore chise ore gu a uje sijnanguipise ore ome dojode jnanione iji uacaniri? 3 Mu yojningame uaque uje que quigode u udore go. Mu ujetiga ca écãcho uacasocárique ome Dupade enga a eso uaqueruénique to jne. 4 E uacadúcho jnese uje jnanione uñane uje gadioc ore iji yirídai uñai ore toi to uje ore ora cototé gajnua pero ore gai diríca iji Siloé. A ajoso eti ore uringane máraque sué Jerusalen gosode uñane ore gai. Jecute cucha dacadode udore chise ore. 5 Mu yojningame uaque uje que quigode u udore go. Mu ujetiga ca écãcho uacasocárigo enga a eso uaqueruéningo to jnese jne.— 6 Jesus chacãra dacajnaquéode aja pore pacaraque enga chojninga: —Jnani déji nanique uje chaca daca pore ga chi tibágui daca pore ujetiga árigui cus. Mu chi chise mu chi ca áraque cusipise go. 7 Mu jnani tuté chi chojningame daroi uje irodique acade cucha: “Gadioque sequeredie uje yibágui poria tuaté mu que togome poria tuaté ujetiga yise ga árigui cuse. Arei jé u ujetiga paquesu poria uaté. Cachi charite iji dojodie pori ajei bisidec. Que cuchárique tõrapísiji go.” 8 Mu jnani uje chi chirote acadie pori ga chi chojningame: “Jé dóbiji jé aja sequeré tudaque. Ga yijochape ero ejode jne. Ga yijochame aquirájnanie uchade iji ejode to jne rĩ. 9 Jé soca isocai u a, ujetiga árigui cuse. Mu a ca pésu dáraque ga jé u jne cachodi ujetiga paquesu.”— 10 Mu chi chise dire puyátique uje Jesus chi déji ore gari iji ore aquiningárique. Ga chi chacate ore iji. 11 Mu chequéraque déji ore gari to uje chi ejnareté. Ga chi ejnarei guejnanie sequeré gadióguiji yirídai uñai. Mu chi Satanas utocaidode chajnongose ira aja ñane. Uje chi ca togome uaté ujetiga chipotingare re. 12 Mu chi Jesus chimo chequé tuaté. Ga chi tibidi ga chi chojningame: —Chequé a, angarabi yu a. Uje e bejnaréngone cha ua.— 13 Ga Jesus chi chicha dajmáinie aja chequé gai. Ga chi jĩrique chequé chipotingare re. Ga chequé uaté jĩrique tija Dupade ome ipesudode ome re. 14 Mu chi judíode ore angarátique ajningaranguipis ome Jesus uje chiqueta chequé tuaté iji dire puyai. Ga chi chojningame cojñonguemui ore: —Uacarajáyo uje dirode chojmára iji ti ujetiga pipesucho cuchárigo iji. Ujetiga acueyoi uacaquetangóningo iji ome uaquejnarétigo. Mu que pujuregate ujetiga pipesute cucháriguiji dire puyátique.— 15 Jecute Jesus chajnai uruode ga chósi tome: —Taquechoquíode uaque, ¿ga uacuñeque dérasi a? ujetiga ca chosõre dachidéraque aquirájna, jeoga búrro iji dire puyátique ujetiga chijnája yodi jeta chajningare. 16 Mu chequé tuaté taguripísi gai ujeta piqueta iji dire puyai. Uje Satanas utocaidode chigaru údode. Ga jé tiógara ujeta piqueta iji dire puyai. Uje uacarajáyo uje yocai jnani bajai Abraham ape disi ejo uaté to. Ga chequé tuaté ejnaréngone e iyajmácho uje guejnanie sequeré uje gadióguiji yirídai uñai uje chisa. Ga cucha ueradi tu ujeta piqueta iji dire puyátique.— 17 Uje chi Jesus urúo udojo daruode ga chinguíra dipoi taja damajosórone ore. Mu chi cojñoc uñéngo iji ore ujade ore nína raque ome Jesus ipesute datéode iji ore ujade. 18 Jesus chi chacate ore enga chojningame ore: —Qué yucué yisocáringome ujetiga yacate uaque ga arajayope to Dupade isocade ujetiga chamáta danguresórone aja re ujeta ore cho deduguéjnai iji. 19 Mu e yiraja ore gajnui cucha. Uje Dupade isocai gajnua tu cucha ajñu atíãtaque ujetiga quene pacape. Mu sué ga poredaté iji ejoi. Ga jé u uje pijoque. Ga poredaté iji ejoi ga chugúperone basaja ga pésu daguíjnane iji jmanecade.— 20 Mu chi Jesus chojningápome ore rĩ: —A qué yacãra yacajnaquéode aja cucha uñeque rĩ ujetiga arajayópise Dupade isocade quigode ome danguretasórone ujetiga chamáta ore aja re. 21 Uje jé gajnui tu arurégode bisitique to ujeta chequéraque chimera harína aja ñane ome dapesutique ga jé u cachodi uje quérã.— 22 Mu chi qué Jesus jno daringai urugu údi uje chicáji Jerusalen. Ga chise cojñone idáyode iji yui ga chacate ore iji. Mu que gusu iji idáyode mu chi Jesus chacate ore iji deyade guiguíjna to iji Jerusalen yúode. 23 Mu chi cojñotique chojningame Jesus iji duruñeque: —Yocangaráni a, a garósi baquetatígo jõ. ¿Jeoga jiei ore?— 24 Mu chi Jesus chajnai uruode ga chi chojningame: —Que toc ome ayorérique ujetiga chacája Dupade idai ujetiga ca chacája piagoi aja. Uje a jiépisi ore jne ujetiga ore pota joróga ore chacája ajei. Mu a ca togome ore uje que ore chise piagoi uté gu. Jecute acueyopísi uacasoca ome ujetiga eso piagoi uté ujetiga acáyoja ajei to. 25 Jé isocai u to ome guiguíjnai iguíjnasónique. Ujetiga doi ga suru piagoi ga qué cojñonguemui déji guesi. Ga cojñonguemui ore chujérase piagoi ga ore chojningárasa: “Yocangaráni a, achẽre babai ga yacágoja to. Cachi baraja uyoque to a.” Mu guiguíjnai gajnengóri a chojningárasome ore: “Que yiraja uaque to go. Que yirajápo uacajogatique rĩ. Jecute que yuchẽre yibai ome uaque.” 26 Mu a cojñonguemui ore chojningárasa: “Cachi yajo iji bari diríca. Enga bacadápo yoque rĩ iji yoquidai ujade.” 27 Mu a guiguíjnai gajnengóri uté chajnarási ore ga chojningame ore: “E yingome uaque que, uje que yiraja uaque to go. Ga boyóji yejode ome uacapesudode cucha gajnarécho.” 28 Ga a jogadi tu jne ujetiga ore po joroque ga ore chigase joroque dajúode ujetiga ore pañáji jnani bajade Abraham, Isaac, Jacob, jé aja Dupade uruode atatasórone uñane ore uje ore déji Dupade gari iji dirode udojo. Jé basa ga Dupade gueteque ore ome dedai. 29 Uje qué Dupade chamáta danguresórone iji erámi údode. Ga ore tṍra iji dajñarenie ome jne jeta ore chise iji idai.— 30 Mu chi Jesus chojningame ore: —A uacuñéngo déji jne ujetiga ibijoque uaque múñi, mu a ca ibijoque uágome Dupade idai jne. Jé basa ga uñéngo ore déji jne uje que ibijoque ore to, mu a ibijoque ore jne jeta ore chise Dupade idai.— 31 Uje Jesus cha chacate ore mu fariséode ore uñéngo ore catecã́ri Jesus. Enga ore chojningame: —Boji de uje ore eduguéjna cuchábi Heródes potapísa ujetiga chujé ua gu.— 32 Mu Jesus chajnai ga chojningame ore: —Boyo ga angoñome uté, jnani ducusurechoqui, uje qué yigaidedie u Dupade áyipiedie ome yu uje qué yiqueta cojñone aja yiqui ome ore piésorone Satanas utocaidode iji ore údode. Ome ore ejnaréngone uñéngo rĩ. Uje jé yajnei tu gu. 33 Mu qué yiqui tu Jerusalen yui ujetiga ore chicha yigachotígaja jne uje qué dirode amirone gadióguiji yui ujetiga yise ta. Mu que pisoca gotique ujetiga chuque Dupade uruode atatasónique iji guetique ome Jerusalen.— 34 Mu chi Jesus cho dáyugu re ome Jerusalen gosode ore. Ga chojninga: —Gotique chimo joroque re uje Jerusalen gosode uacoyo uacamajo Dupade uruode atatasórone iji uacajade. Ga jé chopome Dupade irógode aja uaque rĩ uje uacamitingácho ore údode ome cucaranenie. Uje jecucha ga yáyipie quigode u ujetiga yamáta uágaja ñane ga uacajnúone u yabode. Ga yajnua tu cochagájnaraque uje chamáta dababode aja dajnóngone údode. Mu que apótayo yu gotique. 35 Mu a jé amóño uaque to jne ujetiga ca Dupade dépoji uacajéode jne rĩ. Ga a uacajnui tu guiguíjna doñimérique jne. Uje que cojñotique déji. Ga jé aja dínique ujeta amóñopo yu rĩ ome yuringárique picotac ujetiga oyo uacangarádejnai iji yu ga a ojnichome yu jne: “Yocangarádejnai u uté uje Dupade utocaidi tu ome yoque.”—
1 Mu chise dínique iji dire puyátique uje chi Jesus nóna fariséode uñéngo ore eduguéjnai aja iguíjnarique ujetiga tagábiji to. Mu fariséode uñéngo chi ore chuquéjnai iji ujetiga ore chimo atígo to. 2 Mu chi jnanírique déji ore gari to uje ejnaretaque ga chi guejna údode. 3 Mu chi ca Jesus chiqueta jnani míraque mu chi catecã́ri Moises urusarane atatasórone, fariséode ore bajaque. Ga chi chojningame: —¿Ga jé areque ujetiga piquetaque jnanírique iji dire puyátique a?— 4 Mu chi ca toc ome ore ujeta ore chajnai. Ga chi jogadi u uje Jesus chiqueta ejnaretai iji. Ga chirógaja doi ga chojninga: —Bo, e yiqueta ua.— 5 Udojo quigade ga jé u uje catecã́ri fariséode ore ga chi chojningame ore: —¿Ga uacuñeque gachidéraque aquirájna basirásaja ejopiéraque, jeoga búrro, ga uacuñeque ga ca chijnimírase e? Mu a uacasocai ta urásu ujetiga jĩrique ajnicho iji dire puyátique ujetiga dire puyaque múñi.— 6 Mu chi ca ore chiraja daru quitique ome Jesus uruode. 7 Mu chi Jesus timíninga dojode pinejeneracho ome ore isocade. Mu chi ore ajiriguipise ore charipi ueradode ome raque. Jecute chi cho ore quique ga chi chósi tome ore: 8 —Ujetiga uñeque dejena uacuñéngo aja daquigáningo ome dapesutique ore ajñamite, jeoga dasaguéraque dacoté. Mu ca beyoi uacajmapié uje uacajichopise uágome ore eduguéjnane charipíode. Uje jé socase uñéngo di ga ore charipíode gajnengórone quene u. 9 Ga a uacanejesṍri dirase jne ga a chojningárasa ome uaque gosi: “Asi ome bayaripi ome uté.” Mu a jé jogadi tu ujetiga boyo ji ore charipi tuté ga uacabeyoi ore charipi idájai ga uacajécho jorógome uaque. 10 Mu quique uñai déji. Ujeta uacanejesṍri chise uacuñeque iji uaque gosi charipi idájai ga a chojningame uaque gosi: “Yĩjora, ecãrape bayaripírique ga ajosape yejoi to.” Ga jé jogadi tu ujetiga ore chimo baringai ibijógome uté gosi uje dejena ua aja dejoi. 11 Jé u ujetiga uté gosi cho cucha datei iji re ga Dupade a sosi gosi iji jnumi jne. Mu uté gosi uje que ibijoque to mu a Dupade sosi uté gosi iji gaté jne uje que cho cucha datei iji re gu.— 12 Jesus chi catecã́ri danejesṍri fariséo uté ga chi chojningame: —Ca osõre bajogasúrique ore ome cucha pibotique, jeoga baguiotique, jeoga bojórique ugucharãc. Uje uté gosi a jĩrique chatĩre bosongaquei babai gu. Ga bajéode qui tu gu ujetiga uté gosi jĩrique chatĩre babai, jeoga jĩrique cho boré. 13 Mu qui uñai déji. Ujetiga osõre uñéngo ga bosongaquei gajnengórone urásu jmatágode, perógode ore. Jeoga tatógode. Jeoga edoparigode ore u. 14 Ga baringárique pirasique pijoque ome ua jne. Uje que togome ore ujetiga ore cho boré. Mu a Dupade u jne ujeta cho bosongaquei uté oré jne iji diri ujetiga chiquetápo ayoré parágode ore rĩ ujetiga ore nijiápo rĩ iji daringai toque quigade.— 15 Mu chi uñeque chudute Jesus acajnaquéode udore to uje chi acásõra ore iji ore agapidi to que. Ga chi chojningame Jesus: —A cachi udore ore irasique re jne ujetiga ore tagu dabosode iji Dupade gari iji idai.— 16 Mu chi Jesus chojninga: —Gajnui jé u ujetiga jnanírique dejena uaque gosode aja daguíjnarique to ujetiga uaque gosi taguíji gari to. Ga jiépisi inejeneratígo uaque. 17 Mu a chisirase guedé batigai uje e ore taque ga chiroque daroi aja dabiditígo ore ujetiga ore di ga ore taque to. 18 Mu a iroi tibágui ore mu ore chãra ránguiji cuchade jnese. Ga bajai chojninga: “Quene yiji jnumi oré que. Yipotapísa ujeta qué yajirape to. Yopise yáyugu uje que yicáji ua ome babijnane.” 19 Mu chi ejoi chojninga: “Quene yṍraji te que uje yiji aquirájnanie uje chejna yijmanáyone. Ga yipotapísa ujeta qué yetingare ore ujetiga yigaru ore aja ñane. Yopise yáyugu múñi babijnane.” 20 Ejogatei chi chojninga: “Quene yacoté yisago ñane que. Jecute que yicagóji babijnane.” 21 Jecute chi iroi díji darósõri ga chingo ore adode ome jnese. Jecute chi irósõri ajningaranguipis ome ore. Jecute chi chojningame daroi: “Bope jne rĩ ga acáji idaidatei údode jnese ga ajnáma cojñoque jmatágode, cojñoque pumajone, cojñoque perógode ore aja de. Jeoga edoparigode ore aja de.” 22 Mu chi udojo quigade ga uté iroi catecã́ri darósõri: “Yangaráni a, yipésu baroquéode jnese. Mu qué edo cuse ujetiga piyarite.” 23 Mu chi irósõri chojninga: “Jé bopo rĩ ga acabíji dajéode rĩ iji ore idai údode ga ajochape cojñotígo uñéngo ore ajéode údi ujetiga ore chacabája yocari to ujeta ore chĩreta yiguíjnai. Uje yigaidi tupúsu gu ujetiga ore chĩretapise yiguíjnai. 24 Mu yojningame uaque: a yibididique bajáiso a ca uñeque chacája yocari iji de to jne jeta uñeque taguíji yocari to. Que ore pota gu iji taningai.”— 25 Udojo quigade ga chi cojñonguemui ore chajna Jesus to. Mu chi Jesus chiguísãre ore gai ga chi catecã́ri ore. 26 Ga chojningame ore: —Mu a ca togome uté gosi ujetiga chajna yu to ujetiga ca cha dayé, daté, dacoté, dabode, dãjorárigo, jeoga dãjorárigui udojo ore unerane jnese. Ga jé aja re rĩ ujetiga cha danétique to. Ga quene jogadi tu ujetiga chise daringárique yimeseraque ome re. 27 Mu jec adi tu to ujetiga ca cho daba yu ga ca togome uté gosi ujetiga chise daringárique pacadisõre ome yadode. 28 Ga jé gajnui tu ome uacuñeque ujeta potarása dapesutique guiguíjna. Mu gosi chucué dáyipie ome bajaque ujeta jé chimate jne. Socaseti iplátaraque chona ga gosi ca chimate. 29 Mu ujetiga ca chucué dasocáringome dapesudode cucha ujeta chimate jne, ga cha dapesudode udore uje iplátadie chona. Ga jé cachodi tu uje ujode jnanío ore cana gai. Uje que chimate dapesudode go. 30 Ga a ore chojningame jne: “A jnani tuté ipesute daguíjnai quigode diríca mu que togome jeta chimate go.” 31 Mu jé gajnui tu ayoré dacasutéraque to ujetiga pota pocaningárique ome dojórique dacasuté. Mu qué uté chucué dáyipie bajaque. Doi ga chisẽcaru darógode. Chisẽcarápo dojórique eduguéjna irógode to rĩ. 32 Mu ujetiga chiraja uje que toque jeta ore sué ore gai uje jiépisi ore, ga uté doi ga cha dáyipiedie ome dajocaningai. Ga jĩrique chiroque darótigo aja ore ujetiga ore chaquĩ́ra ore ome pocaningai. Uje qué idája ore múñi. 33 Jecute uacasocai tu ujetiga acueyoi uacáyipiedie ome yadode bajaque to. Ujetiga ca ayáyo uacagúchade unerane jnese ga a ca toc ujetiga eso uacaringárique yajnangore to. 34 Echoi uerate múñi, ujetiga charásu daringai echo ga e que cuchárique tṍraji uté to. 35 Que toc ujetiga ayorérique chijna ome datique. Noña ga cucha bisideque. Mu pisocai u ujetiga pãrate. Mu uacajnúone cuse déji to. Mu ujetiga apéso uacáyipierigui ome ga a arajáyo quigode udore, ujetiga angáchoi.—
1 Chi ore eduguéjnai irótigo uje chi ore utaidé ore iplátadie chi ore sose Jesus yui ujetiga ore tangarami acajnaquéode to. Jé upo pisijnaringuéone ipesungórone uñéngo rĩ. 2 Jecute chi fariséode uñéngo aja Moises iroquéode atatasóningo ore chujñieta Jesus ga chi ore chojningame ñane: —Cajicho to uje uté que tagu dejórigo ome cucha gajnaréngone ipesungórone ore ga chacásõra ore rĩ iji ore agapidode to.— 3 Chi Jesus chajnai ga chacãra dacajnaquéode aja áyasadie gachisónique. Enga chojninga: 4 —Ujetiga gachisṍrirase uacuñeque, mu uaque gosi gachidedie dérasi 100. Mu a chojmáraraque bijnárase ga, que toc ujetiga uaque gosi noñome bijnangue iji erámi. Uaque gosi a noñomirase amirenie iji ore pie ujetiga chucué bijnangue uaté. Jé aja ujetiga chise. 5 Ujetiga uté gosi chisírase dachidé bijnangue ga chisa ga chijnónguiji dorotadé. Ga jé u uje chajni údi aja daguíjnai. Ga nínapúsu re aja daguíjnai yui ome dachidé uje chise gu. 6 Ujetiga uté gosi dirase dachidé bijnangue údi ga chamáta dajorane, daguiosode ore aja daguíjnai ga jé u uje chingo dadode ome ore uje chise dachidé bijnangue, ujetiga ore nína re to. Uje chi chojninga: “Yise yachidé áyasa bijnangue casé que. Jecute yirasiguipise yu.” 7 A yope yatatagode cucha udore quigome uaque jne. Uje pininaquei déji Dupade urásade to iji gaté ome ayoré parágode ore jnese. Mu ore ininaquedatei sué uté gai ome jnani sijnátique ujetiga chajniápo Dupade gai enga checãrápo dadode rĩ.— 8 Jesus chacãrápo dacajnaquéode aja chequéraque rĩ ujetiga bijna iplátaraque ga cho dáyugu re ga chojninga: —Ujetiga chequéraque iplátarigui chejna yijmanáringo mu bijna uñáraque iji dejátique enga chequé uaté doi ga chãru dapótique enga chajo daguíjnai ajei ga susipise guio ga jé aja ujetiga chise. 9 Mu ujetiga chise ga jĩrique chamáta dajoranie, daguiotodie ore ujetiga ore irasé raque to enga chojninga: “Yise yipláta bijnangue tuaqué que. Jecute yirasepise yu.” 10 Uje jé isocai tupo ome Dupade, irógode ore rĩ ujetiga ore irasiguipise raque ome gosi ujetiga cha dasijnaringuéringo ga chajniápo Dupade gai rĩ. Ujetiga chojmára uté gosi marínga, a qué ore nínapúsu raque jne ome uté gosi ujeta uté gosi cha date gajnarétigo.— 11 Jesus qué jno dacajnaquéode údi ga chósi tome: —Chi jnanírique déji nanique uje chi atígo gare ore. 12 Mu chi ape ungarómi chojningame dayé: “Yapa, ajuguína yajnepídi ome yu iji bagúchade.” Mu chi dayé doi dagúchade ga chajuguína dabode ore. 13 Mu chi dirode garósiji yui mu ape ungarómi uté chamáta dagúchade jnese ujetiga chicáji ore idai uñeque iji sañeque. Mu uje chi chise ta ga chi ca suse daplátadie guio go. Ga chi jĩrique chejna jnese ome dapotiquedatéode. Uje chi gajnarenguipise atígo ome re ga que suse deo gotique. 14 Mu chi chise diri uje chejna dapláta casidé jnese. Chi diga garósi cucha pibosode iji ore idai uté uje chi jiépisi cuchade oredie gu. Ga jé u uje jnacari uté iyaguhéode e chise. 15 Ga chi chise dínique uje quene chucué datrabajandoringane. Ga chi jnanírique chijna ujetiga chirote gachidérigui yãcoré quedéjnai iji ore idai uté. 16 Mu uje chi jnacari tuté chimo yãcoré quedéjnanie potígo cucha a, ga chi pota joróga jetiga tagu to.Mu chi jé ca pujuregate cuchárique ome ujetiga uté tagu. 17 Mu jé u uje áyipie chisõre ga chi chojningame re: “Cachi yapade irógode jiépiso ore ica iji yidai. Ga ore tagu dabosode. Ga ore tṍra daredie ica. Jé basa uyu iji de ga e yise yigachodi ome yiyaguhéode.” 18 Jé u uje chojningame re: “Yiji ga yajni yapade ore gai jne. Ga a yojningame dirome: Yapa, gajnarenguipise yadode ome Dupade. Ga gajnarenguipis ome ua to rĩ. 19 Que yajéode u go ujetiga opo babi iji yu rĩ. Mu yajéode u ujetiga yajnui tu barótique iji de baguíjnai.” 20 Mu chi jé u uje jno ga chajni dayé ore gai. Uje chi qué idája iji dayé iguíjnai mu chi dayé chimo. Ga chayóji yui uje chi chosõripise. Mu chi chise ga chisa pajei aja re ga chi tagu dajnacari uredie. 21 Mu chi jnacari chi chojningame dayé: “Yapa, yate gajnaréngone chise Dupade. Ga chisápo ua iji de rĩ. Mu que yajéode u ujetiga qué opo babi iji yu rĩ.” 22 Mu chi ca dayé timíninga dabi uruode go mu chi chojningame darótique: “Be yoquiguidé ueradéraque ga ajmáraja. Átaja jmanepiéraque jne. Jé aja guídaningo rĩ.” 23 Chi chojningame daroi: “Be yachidé urojna ga ajé jne. Ga yipecobu yoquibose unéningo jne ome yocajñamitique. 24 Chamáñaje yijocopis eti yocabi tudé e toi. Mu yórango yógome uje diapo rĩ. Uje bijnaque ome yoque mu e chisápo yoque rĩ.” Chi ore dejena daguiosode aja daguíjnai ujetiga ore pesabu dajñamitique uje ore abi bijna diríca mu diapo rĩ iji ore. 25 Mu jnani uté ujnacari urẽjai chi qué déji dasatígo iji dejnai. Jecute que chudute pujnomei to. Mu chi chajni mu chi chudute ore ubuchugode, ore ichorájnai rĩ iji ore ajñamini. 26 Jecute chi tibidi disírique ujetiga chingomome uté gotique. Ga chi chojninga: “¿Jé ore ipesutique iji te que a?” 27 Mu chi disi chojningame jnacari: “Ise ga ca adute to uje bãjorai di que. Ga bayé chujé dachidé urojna ome que. Chi bayé nína re gu uje que cuchárique chósi ti iji besai.” 28 Mu chi jnacare doi jõrai ajningaranguipise ome ore. Ga chi ca potapísa ujetiga chacája ore gari to iji ore ajñamini. Mu dayé doi guesi ujetiga tibágui ujetiga chingome to ujetiga cháta raja ore to iji ore ajñamini. 29 Mu chi chojninga: “Ungare, yapa, a ca yáta yu aja uaque to jne. Uje baraja uje jiépisi sequeredie uje yiji baroquéode uje que yiyo barúrique gánique múñi que bate uté ome yu to go. Ujetiga asi ome cucha ajamatique ome yu ujetiga yamatape yijorane to ga yipesabu ore ininaquérique to. 30 Yetétigade upúsu uje bape doi uté chejnápise daplátadie ome gapu quedéjnanie mu a jé ajé bachidé urojna ome que. Uje gajnarécho adode múñi.” 31 Mu chi dayé chajnai dajnacari uruode ga chi chósi tome: “Yabi a, cachi baraja cuchade jnese uje jecucha bayáji de yari. Gajnui jé u ujetiga bajnécho yocugúchade jnese. 32 Mu cucha arei u ujetiga yipecobu yocajñamini tudé. Cucha arei upo rĩ ujetiga pininaquei irágu yoque. Uje gajnui tu diríca ujetiga e besai togome yoque. Mu chajni yoquibai ga e noña ga ecápo rĩ uje chisápo yoque rĩ uje díji yoque. Gajnui tu ujetiga bijnaque ome yoque mu yicópo rĩ. Ga jé tiógara ujetiga yipéco yocajñamítedatéi tome uté.”—
1 Udojo quigade ga Jesus qué jno dacajnaquéode údi ome dacadigode ga chósi tome ore: —Chi jnanírique déji nanique uje ataguipise. Mu chi chicha daroque gatérique aja darógode uñane ore gari ujetiga chajire ore yúode. Mu chi irógode ore chaguhéta cuchade ore iroque gatei gai uje chi chejna uraque darósõri iplátadie aja re gu. 2 Jecute chi jnani atai uté chi tibidi daroque gatei ga chi chojningame: “Angomome ore uruode quitígo ome ua ujetiga jé ũré ore uruode gotígo. Jetiga tac ore. Uje ore chaguhéta cuchade babai. Atata batrabajadoringane quitígome yu uje a yijócãre ua jne gu. Uje baraja múñi uje yiroguipise ua.” 3 Mu chi ca togome jnani tuté iroque gatei ujetiga chingo cuchárique ome. Mu chi jno ga jé u uje chucué dáyipie ga chi chojningame re: “A yirósõri cha yu jne jõ. Ga a ca togome yu jne ujetiga yipésu cuchárique. Uje que yetotiguérique cuse gu ujetiga yirase jnumi. Mu pajegátiga cuchape rĩ ome yu ujetiga yiji ga yutai cojñone to.” 4 Mu chi chojningame re: “E yiraja yáyipiedie quigode to ome cojñotígo ore ujetiga yise ore iji ore iguíjnaringo jõ. Uje a íjnoque yipesutique cucha, mu a ca ore chuseque yu jne iji daguíjnaringo ujeta ore chosõre yu.” 5 Ga jé u uje chi jno ga tibidi jnanione udore uje ore ijnose carubode déji ore irósõri gari to. Ga chijnire ore aja ujetiga pésu ore ijnose carubode aja quigode. Ga chi chojningame bajai: “¿Cho rique bajnose carubode iji yoquirósõri gari a?” 6 Mu chi bajai chojninga: “ 100 u yijnose carubode iji acéite píode iji guebecarójnane.” Mu chi iroque gatei chojningame uté uje ijnose carubode 100 u que: “Ãro 50 iji bajnose carubode jne. Apésu darujna ao ichárique ga a 50 u jne béode amíningo.” 7 Enga chi catecã́ri ejoi to rĩ. Ga chi chojningame: “¿Cho rique bajnose carutígo to a?” Mu chi chojningame: “100 píode iji trígo .” Jec u uje chi chojninga: “Yipéco darujna ao ichárique ome ua to ga ãro 20 ome ua jne. Ga 80 u béode amirone jne.” 8 Mu chi jnani atai uje chudute to daroi ipesudode udore cucha. Ga chi chojninga: “Dimane yiroque gatei áyipiedie jõ.” Chamáñaje udore ore uje que ore changureta Dupade jé tiógara ore adode uje ore chãra yoc. Jé basa Dupade anguretasónique ga ca togome jeta chãra dojórique ayoré. Chamáñaje jogadi u direcaringuei gu. 9 A qué yingo uacapesute arétigo quitígo aja uaque jne. Ujetiga eso cucha orerãque datérigo iji pisijnaringuéone jogadi udé erãpe, enga beyoi enga ejnáñoja uacojode ayoréo enga diga a ore irasique uaque jne iji dajade. Mu ujetiga e íjnoque cucha orerane udore mu a eso uacapusiétique eyúgojmane iji Dupade idai jne. 10 Uté gosi uje susipise deo ome ore iñomenie pláta garósirigui iji gari, ujetiga ore iñoméringui jié iji gari doi ga susipise deo ome to. Jé basa ujetiga ca suse deo ome pláta garósirigui, ga adi jé u to ome pláta dipesedie uje ore noñome gari. 11 Ujetiga ca pangurete uaque ujetiga ajuso plátadie guio iji pisijnaringuéone jogadi tudé erãpe, jé basa a ca pangurete uaque to ome Dupade iroquéode uje iroquéode udore oredie suépise cuchade jnese gáyode. 12 Ujetiga gosi chirote cucha unejátique mu que chuse guio mu chijna péode ome re. A ca togome uté gosi ujetiga pangurete ome ujórigo ayoréo, enga a ca ore noñome cuchárique iji gosi gari. 13 Uacarajayopise uje chi ca togome jnanírique ujetiga doi darósõre gárerigo ore ajéningo jnese. Uje áyipie quigode u uje chijnóra uñai. Jé chetaque uñai. Ga isocai jé u uje a pesupúsu uñai áyipiedie mu a chó uñeque áyipierigui gáyode. Ga jé gajnui tu uje chi ca togome gosi ujetiga áyipie chijnóra Dupade mu áyipie chijnorapo plátadie rĩ iji deréjnarique.— 14 Mu chi fariséode uñéngo déji to uje ore edójnari plátadie ga chi ore chudute Jesus uruode quigode udojo to. Ga chi ca ore ajéngome Jesus go ome acajnaquéode. Uje chi ore cana gai ome acajnaquéode. 15 Mu chi Jesus chojningame ore: —Yirajágo jnese uje cojñone ore chicota uaque ome uacaringáringo jnani paracho mu que ore chiraja uacáyipiedie. Mu gusu Dupade uje chiraja uacáyipiedie jnese. Mu Dupade guetétiga ujetiga oyo ayorédatei iji uaque. 16 Gusu Moises urusarane Dupade iroquéo, jec aja Dupade uruode atatasórone ore acajnaquéode nanique ujetiga ore doi quigode. Ga jé chuságaja Juan uté diringai uje pangarate urusarane udore. Mu iji udore quigade enga pacajnaqué ichai chise ore enga unere pacajnaquéode udore quigode. Enga quigode u uje a Dupade cho darásade iji ore jne, enga a ore cho dacasuté iji Dupade to. Jecute ore chejna rángaja jnese ujetiga ore chise daringáringo Dupade urása. 17 Gaté, jnumi ore jogadipise. Mu ujetiga diga ore íjnoque bisideque, mu a qué jogate Moises urusarane. Enga a qué udore chise daringáringo tocachucho jnese. 18 Jecute ujetiga jnanírique déji ujetiga cha dacotéraque mu chisapo ujóraque chequé rĩ ga gajnarenguipise adode. Chimera chequé quedéjnaraque ome re gu. Mu jé isocai tu ome jnanírique ujetiga ujórique jnani iyague dacoté, ga uté gosi chisa mu jé isocai tu bajai uqué jmapié.— 19 Jesus qué chajnerame dacajnaquéode ga chacate ore ome jnaropié adode enga chósi tome: —Yatatabu jnanírique adode ome uaque jne. Uje chi ataque nanique. Ga chi ca chuseque re ome daguidé ueradedie iji dirode jnese. Ga chi pésu dajñaminone iji dirode jnese uje chi dicotarechoqui. 20 Mu chi jnani jmatátique déji to uje chi i tu Lázaro nanique. Mu chi ca Lázaro uté chise dajóningarique nanique uje pugórodie chi yuque. Ga chi moji jnani atai uté piagoi. 21 Mu chi jnani jmatai uté pota joróga jnani atai posode abejnanie uje base ujetiga tagu ga ica guejna joroque uje chi basiji agapié. Mu chi tamocode sose Lázaro yui ujeta chipese ugórodie iji gai. 22 Mu chi chise dínique uje chi jnani jmatai uté chi toi. Ga chi Dupade irógode ore chijna áyipie aja yocai jnani bajai Abraham gari iji jogadi. Ga chi jé basa ga jnani atai uté toi to mu chi ore chijochame. Mu chi áyipie qui tu jnaropié. 23 Mu chi cojñoque atai chi chise dayaridi uje togode charidi u iji jnaropié uje chejnárenguiji joroque dejnaréngone isagode. Mu chi chajire gaté mu chimo Lázaro ga jõrai u Abraham iji dayaridi uje chi qué idája ore iji ñane. Mu jé ore chudute ñane pijnane. 24 Jecute chi tibidi ga chojninga: “Yapa, Abraham, yajéode u ujeta qué osõrape yu. Ga arógape Lázaro aja yu ujetiga chaca dajmané iji yotique ga chutape yibijnani. Uje yisa yibade iji udé gu yebiedie ome pioquedatei ocaráidie udaji gu.” 25 Mu chi Abraham chojningame: “Yababi a, ajnusinapísa to uje baringa casica ayoré ga que cuchárique chonapísa ua ica. Jé basa Lázaro udé ga que chise dajóningarique ica. Mu quene Lázaro udé chise daringai posõraque iji de. Jé basa ua ga bo ducujuyai que. 26 Baraja udojo quigode to jnese uje edógai cuchábi chãraque bei ome uyoque. Ga isocai jé u ome udojo jogosónique. Ga a potarása ujeta chicáji uáite mu que toque. Ga jé isocai u to ome uáite jogosónique ujeta pota joróga tibágui yóguiji de.” 27 Mu chi ayoré atai uqué chécãre daruode quigode ga chi chojningame Abraham ore: “Abraham, qué yutṍri ua ujetiga arógape Lázaro aja yapade iguíjnai. 28 Yajéode u ujetiga Lázaro catecarámi yijorane uje ore chejna yijmanai iji yapade iguíjnai. Ujeta chaquĩ́ra ore ome ore ate gajnaréngone ujetiga ca ore chise udé to jne, pagoyedie jogapi tudé punire.” 29 Mu chi Abraham chojningame jnani tuté: “A ca yiroque Lázaro aja jne gu uje bajorane gotígo a ore chiraja Moises garéngone cucha. Ore chirajápo Dupade uruode atatasórone acajnaquéode rĩ. Ga qui tu ujeta ore tangári.” 30 Ga jé u uje jnani atai tuté chijócha Abraham ajei údi ga chojningame: “Yapa, Abraham, jé ũrepise ua, mu isocai jé urásu ujetiga ayoré totique chisírase ore ga a jé ore tangarirási uté gosi ujetiga ore cha dapesute gajnarétigo.” 31 Mu chi Abraham chojningame uté: “Ungare. Que isocai tu gotique. Ujetiga ca ore chise Moises urusarane, Dupade uruode atatasórone ore unétique ga a jé ore gajnui tu ujetiga ca ore tangári deyasónique ayoré to ujetiga chiquetárase raja ore múñi iji daringárique toque.”—
1 Jesus qué cho dacadigode ore quique ome pipesute gajnarétigo atígo yui. Ga chósi tome ore: —A jecucha ga cucha gajnarétigo déji erámi jne ujetiga pésu uacajuredie ome uacapotiguérigo jne. Mu yirajágo uje Dupade ujuyaquei gajnengórone a udore u jne uje ore acadique dojode ayoré ome pate gajnaréngone.— 2 Mu chi chojninga: —Cucha ueradi tu ujetiga pigarique uté gosi ome cucarané cuchabéraque aja etabi. Ga paranája yote quedéjnai. Uje Dupade ujuyaquei a ca chajire re ome uté gosi jne uje uté gosi chacadósi disi parátagabode ome pisijnaringuéone adode gu. 3 Jecute ajusópise uaqueo. Ujetiga bojórique Dupade anguresõre pésu cucha gajnarétique ome ua, mu bo ga o uté gosi quique. Mu ujetiga uté gosi ajéo ga chécãre datígo ome ua ga, jĩrique aya bájningai ome. 4 Ujetiga bãjorai ate gajnarétigo gare iji ti ome ua iji diri chojmarárique mu uté gosi chojningame ua, “Jé yiya yate gajnaréngone.” Enga be ga acadígui ate gajnaréngone gatuaque.— 5 Mu chi qué Jesus irógode catecãrápoi yocangaráni gaté rĩ ga chi ore chojningame: —Ajnerámome yocanguretigai tiji ua.— 6 Mu yocangaráni Jesus chojningame ore: —Ujetiga atíãpe uacanguretigátique múñi, ujetiga gajnua tu cucha ajñu atíãtaque mu a jé cuchárique tṍraji. Ga a uacarúrigo tocaderase ga a ojnichorása ome pore cuchabéraque: “Be ga écãre bajogatíguiji de, ga jé ayábiji yote quedéjnai ajei.” Ga a uaté a dorási uacuñeque urúrigo quitígo.— 7 Jesus chi qué jno dacajnequéode údi ome ore ga chi chósi te: —A uacuñeque dérasi ujetiga uacuñeque irótique cuse. A gosi iroi chajnirase re iji dasatígo mu que togome uté gosi ujetiga jĩrique taque. 8 Mu a uaque gosi chojningárasome darótique: “Be ga apesabu yoquibotígo ga bo údi ome yoque. Ga a yejnangorase yoquibosode guesi ga quene baque to.” 9 Isocai jé u ome baroi uté uje que toc ujetiga acãre gai gatuaque ome imanitígo cucha ome ua. Uje jmapié jé u gu ujetiga uté gosi jé gajnei u gu ujeta pésu baroquéode. 10 Jé isocai tu ome uaque. Ujetiga ca asíyo uacabai ome uacamanitígo cucha ome Dupade. Mu cucha omi tu ujetiga ojnicho: “Cachi yipesute cuchade ome Dupade. Dupade iroque yu gu ga jé tiógara ujetiga yipésu iroquéode. Mu que togome yu ujetiga yicota yu ome yipesutígo.”— 11 Mu chi udojo quigade ga Jesus chi qué jnome daqui uje chi chicáji Jerusalen. Mu chi chicapísiji ore unirone Samária, Galiléa ore ujai to ome daqui yui. 12 Mu chi chirõre ore idáyatique mu chi cojñoque ejnaretátigo ore chisíji dajeque pajei uje chi ore chejna yijmanáyone uje chi cojñone udore chi ore ejnarequedatei chi i tu lépra nanique. Mu chi ore basiji quedéjnai ome Jesus. 13 Chi ore chinguíra dabijnanone aja Jesus ga chi ore chojninga: —Yocacadisṍri Jesus a, ¿jé gotique gu a uje que osõrape yoque a?— 14 Mu chi Jesus chajire ore mu chosõripise ore ga chi chojningame ore: —Boyo, ga angongachóba uágaja uacangarádejnane judíode ore uje ore déji Dupade iguíjna cuchábi.— Ga chi ore jno mu chi qué ore déji yui mu ore chunina mu íjnoque ucode ore ejnaréngone. 15 Mu chi ore chimo uje Jesus chiqueta ore jnese ga uñeque chi chajniapo aja Jesus gai rĩ. Ga tijapísa aja daquigode uje chi chejnapúsu dabijnane. 16 Mu chi chisápo Jesus rĩ. Ga chichaga dagatáidie iji Jesus iquei enga chacãripise gai uje chiqueta que. Mu chi jnani tuté que judíode jõra to go mu chi Samária gosode jõra. 17 Jecute Jesus chi chojningame: —¿Ga jé ca yiquetade cojñoque ejnáño yijmanáyone que a? ¿Bajoráringo jé ore déji rique a, udore uje a gagájni ore iji ti? 18 A purása quedéjna ua múñi, mu a gusúpusu ua uje bajni yibai ujeta atija Dupade ipesute datéode ome ua que.— 19 Jecute Jesus chi chojningame jnani tuté: —Ãriji ga ayague. Ga bope uje yimóngo banguretígadatéi ome yu ga jé tiógara ome baringai piquetaque.— 20 Mu chi diga fariséode uñéngo ore catecã́ri Jesus to ga chi ore chojninga: —¿Jé cho rique jne Dupade diringárique ujetiga yoco yoqueduguéjna iji, iji de jnumi a?— Mu Jesus chajnai ore ga chósi tome ore: —Cho jeta cucha Dupade diringai ga pimója quitígo, 21 ujetiga uacuñeque chimo ga chojninga: “De de jã,” jeoga chojninga: “De ta ya.” Uje que pisocai tu gotique. Mu Dupade jé déji uacajade mu que arajáyo gotique.— 22 Mu Jesus catecã́ri dacadigode ore ga chósi tome ore: —A chise dínique jne ujetiga apótayo joróga amóñopórase Dupade utocaidi uyu jne rĩ ome dire chojmarárique mu a ca toque jne ujetiga amóñopo yu rĩ. 23 Uje a uñéngo potarása jne jeta chãra uaque ga a ore chojningame uaque gosi jne: “Dupade utocaidi déji de ãrie.” Jeoga uñéngo chojninga: “Udúco to uje déji ta.” Mu ca angáchoi udore gosode ore ujetiga abáchoi ore to. 24 Uje yiriringárique gajnui tu ajnóratique. Uje tṍraji gaté ga chicai quedéjnane jnese. Ga ore chimo jnese. 25 Mu ujetiga cáma yiji ome uaque ga a qué yo ducujuyade bajaque jne. Uje a cojñonguemúone diríe jogonórone a ore chetaguipise yu jne. 26 A yiji ome uaque jne. Mu a chise dínique jne ujetiga yĩriápo rĩ. Ga a yiríringai yui gajnui ta u jnani bajai Noé ore urásade. 27 Uje chi Noé urásade ore isocai u nanique uje chi ore áyipiedie gaidode upúsu daquetangóningo cucha ome raque nanique. Uñane chi ore áyipiedie gaidode u dabosode. Jeque uñane áyipiedie gaidode u dajódode cucha. Jé basa uñane ore áyipie qui tu darodie ujeta ore chijna ore aja ore amaníngo. Mu chi chise diri uje Noé e ore chacája dabi cuco cuchape. Ga uje ore chimate rágaja ajei ga jé u uje guei dequejnangóri diringai tu ome ore ujeta chejna ore ga ore toi jnese. 28 Adi chi jé upo rĩ ome jnani bajai Lot urásade. Uje chi ore áyipiedie gaidode u cucha pibosode. Jé aja dajódode cucha rĩ. Jé aja dẽratígo cucha, jeoga ore gaitígo cucha oré rĩ. Chi ore áyipiedie gaidode u dejnane. Jeoga daguíjnane ujeta ore pésu. 29 Mu chi chise diri uje Lot jnoji ore idai Sodóma. Mu jé u ore cachodi uje Dupade cho dajuñame ore. Uje chi Dupade chiamurase piotique ore gai uje chi tṍraji gaté ome ore. Ga chi ca toc ujetiga uñeque ecáji. 30 Ga a jé gajnui tu jne ujetiga Dupade utocaidi uyu yĩriápo iji uaque jne rĩ. Uje ore chunina mu yṍraji gaté jne. 31 Ujetiga chise diri ome yiríringarique ga ca uacuñeque chopise dáyugu dagúcharigo iji daguíjnarique ajénique jeoga iji guesi. Mu a jé ca áyipie chachẽre ujetiga chiqueta. Ujetiga uté gosi déji erã́tique, mu ca áyipie déji ugúcharigo iji dedánique. 32 Ga ca jnoji uacajéode uje Lot acoté chi chiguísãre daquigade gai ga jogadi u uje Dupade ujuyaquei chise. 33 Mu uté gosi ujetiga cájnaru re ome cuchade ga ca toc ujetiga Dupade chiqueta uté gosi jne. Mu jé basa uté gosi uje que cájnaru re ome cuchárique ga a Dupade iquetai tu uté gosi jne. 34 Ga yingomome yiríringarique isocade ome uaque jne ujeta jé gajnui tu ome ayoré gárerigo uje ore dérasi damochápi chojmarárique iji dejátique, mu a póite uñeque jne. Mu a piñome uñeque jne. 35 Ga jé cho uje chequé gárerigui uje qué ore chijáro dajarotique cucha ujetiga ore déji ñane gari jne. Ga a jõra chuniname jne ti, poidé uña. Jé piñome uña iji. 36 Jé isocai tu ome jnaníringo uje a ore déji erã́tique ga qué ore cháta dasagode aja ñane. Mu póite uñeque jne. Jé piñome uñai iji.— 37 Mu chi acadigode ore chojningame: —Yocangaráni a, ¿jé udore déji rique jne a ujetiga tocade a?— Mu chi Jesus chojningame ore: —Mu ca oyo uacáyugu cuchade udore. Enga gajnui tu ujetiga cuchiso totique déji erã́tique ga chugúpẽre chagúode jĩrique chiraja jogadi.—
1 Jesus qué jno dacajnaquéode údi ga chósi tome ore: —Acatecãchoi Dupade gatuaque enga ajóyo uágaja uacacatecãraitigade. 2 - 3 Ga a yacãrape yacajnaquédode aja chequé ecáraque uje chi chayója ore eduguéjnarique gatuaque iji dirode jnese ujetiga chaquĩ́ra umajosórone ome ore ate gajnaréngone ome. Mu chi ore eduguéjnai tuté que ajéngopísome Dupade gotique. Que ajengopome dojórique ayoré rĩ iji darásade ore. 4 - 5 Iji taningai ga que tangaripísi chequé eca. Mu chi chachopise chequé tuaté uje chi ijója. Enga chojninga: “Que yangári cuchárique. Mu a yangarami chequé eca tuaté jne uje qué chutṍri yu. Enga chabu chisape yu iji de jne. Yiji ga yirotape jne.”— 6 Mu yocangaráni Jesus cho quique daruode ome ore, ga chi chojninga: —Udé isocai u ome ore eduguéjna sijnátique. 7 Mu Dupade suépise eduguéjna sijnai uté adode gai. Uje chirota dajnéone, dangarasórone ore ujetiga ore catecã́ri gatuaque iji dirode, dejade ore. Ga que cho daja ome ore ujetiga cháta cuchárigaja ore. 8 Yojningame uaque: uje Dupade a jĩrique chirota ore to jne. Mu yáyipie déji Dupade utocaidi uyu yiríringai ujetiga yĩriápo iji ore iji jnumi rĩ ujetiga ca yise uñéngo iji jnumi ujetiga changureta yu.— 9 Jecute chi Jesus qué chacate ore mu chi chacãra dacajnaquéode aja cucha uñeque. Uje chi chimo ore gu uje ore chicotapise raque ome daringane ayoré canirácho. Mu chi ore dojnongapísaja dojode ayoréo. 10 Jé u uje chósi tome ore: —Chi jnani gárerigo ore chicáji Dupade iguíjna cuchábi ujetiga ore catecã́ri Dupade iji. Chi fariséo u uñai. Jé basa uñai ore eduguéjna cuchábi iroque uje utaidé ore iplátadie iji ore idai údode. 11 Mu chi fariséo u uje chisi dabai ome dacatecãraitigade uje chi catecã́ri Dupade uje chi chósi te: “Dupade, yacaranguipis ome ua uje que yo yujórigo ayoréo. Uje oriechoquipise ore. Ga jecucha ore chécãre dacotedie rĩ uje que ore cho daja ome date gajnaréngone. Ga ore gajnui u jnani tudé uje déji yari iji de uje yoqueduguéjna cuchábi utocáite uje utaidé ore iplátadie. 12 Uje a araja yu uje yo yuyáguiji domíngoi ujai ga gare ome ua. Barajápo rĩ uje jecucha ga yerame ua ome yiplátadie péode.” 13 Jé basa ujoi jnani uje chi ore eduguéjnai iroque ujeta chutai ore ipláta, chi chopise dáyugu re. Idájapisiji ore ga chi ajengopísome erámi gu. Chi tajia re iji dayaridi. Mu chi chujé darobé uje chi imoi tu gu uje jnusiétaque uje cho dáyugu re. Ga jé u uje chi chojninga: “Dupade, osõrape yu jne. Bamo yu uje ayoré sijnanguipísi uyu gu.” 14 Jecute yo yuruode quigome uaque. Uje jnani tuté ore eduguéjnai iroi uté uje utaidé ore iplátadie, a chajni aja daguíjnai ga Dupade imeserai tu. Mu que Dupade chise fariséo gosi catecãraitigade unétique. Mu a Dupade sosi uté gosi iji jnumi ujetiga gosi chicotapise re. Jé basa sosi uté gosi iji gaté ujetiga ca gosi cho ayorédatei iji re.— 15 Uje chi qué Jesus chacate ore mu chi cojñone ore chise Jesus to ujetiga ore chijnásia dababode aja ujetiga qué Jesus chisasiape ore ababode to. Mu chi Jesus acadigode ore chetaguipise ore ga chi ore chijócãre ore aja quedéjnane rĩ. 16 Mu chi Jesus tibidi ore enga chi chojninga: —Jé dóji ga disabode ore chisósi yu. Ga ca ãrácho yejode ome ore go. Uje a Dupade chopise darásade iji uaque jnese jne ujetiga oyósi disi parátagabode sudore ore.— 17 Mu Jesus chojninga: —Jé ũrepise yu ome yuruode uje disírique que chotigase cuchárique gu. Jecute a uacajnane urásu ore ujetiga apótayo acáyoja Dupade idai to. Uje a chãraque dedai yui ome dotigayasórone ore jnese jne.— 18 Mu chi judíode ore eduguéjna cuchábi uñeque catecã́ri Jesus to. Chojninga: —Yocacadisõre paraguipísi a, ¿jé yisocáriquerase ujetiga yacája Dupade idai ga yo yuniri iji, iji deréjnane a?— 19 Mu Jesus chajnai uté uruode ga chi chósi tome: —¿Jé gotique gu a uje bacota yu ome yuringárique ayoré paraque? Uje gusu Dupade gu uje paraque.— 20 Mu chi Jesus chajnai uru bajade ga chi chojningame: —Ise ga e araja Moises urusarane cucha puyácho quigode jõ. Uje quigode u udojo: “Ca bo ga apota bojórique ayoré acotéraque. Ca bo ga ajé bojórique ayoré. Ca bo ga ori. Ca o barupatáringa ome bojórique ayoré. Mu angaripísi bayé, baté ore acajnaquéringo ome ua.”— 21 Mu chi jnacari chojningame Jesus: —Cachi que yiyo Moises urusarane cucha puyaque uñeque gánique ãrie iji yuringai disi jé aja yuringai tudé jnacare.— 22 Uje chi Jesus chudute jnacari tuté uruode ome re ga chi chósi tome: —Qué cucha amiri déji ome ua ujetiga ese baringárique Dupade urása. Be ga ẽra bagúchade jnese ga asi ome ayoré jmatágode iji bagúchade oredie. Ga a Dupade tẽrája ua ome bacaniratiguérique jne iji gaté. Ujetiga ejna udojo guesi badode ga be ga ajna yu to.— 23 Mu chi jnacari tuté chudute Jesus uruode udojo ga jec u uje chopise dáyugu re. Uje chi chiraja gu uje ataguipise. 24 Mu Jesus chimo jnacari uté uringai jnusiétaque ga jé u uje chojningame: —A ca toguirásome ayoré atátique ujetiga chise Dupade idai to jne ujetiga cho darása iji Dupade to. 25 Uacarajáyo uje que toc ome cuchiso cuchátique ujetiga chacája ojnatique edóraque. Ga jé adi tu ome cojñoque atátique to ujetiga chacája Dupade idai. Jé ore cho ñane ome daringane cucha ibiracho gu.— 26 Mu udore ore uje ore chudute acajnaquéode quigode que, ga ore cho dáyugu re enga ore chojninga: —¿Chimo joroque re daquetade gosoderase?— 27 Jecute chi Jesus catecã́ri ore ga chi chósi tome ore: —Jec ũré uaque uje cucha ibirade cuse ujetiga ca togome jnanírique ujetiga pésu, mu que cucha ibiratique cus ome Dupade.— 28 Mu chi Pédro chojningame Jesus: —Yocangaráni a, uyoque u uje yijíñongome cuchade jnese diríca ujetiga yijínangopísa ua.— 29 Jecute chi Jesus chajnai uruode ga chósi tome: —Yirajapise ãrie. Uje a uacuñeque noñome daguíjnarique iji te, jeoga gosi dai, jeoga gosi daté, jeoga gosi jõra, jeoga gosi acoté, jeoga gosi abío, ujetiga gosi doi Dupade iroquérigo ujetiga jno ujnomei údi ome uringai eduguéjna, 30 mu a Dupade uté u jne ujetiga tẽrája uté gosi jne. Jé u iji deréjnane udojo jnese. Mu que gusu udore mu Dupade a tẽrája uté gosi to jne ome ucuecaringué eyúgojmarique iji gaté.— 31 Chi udojo quigade ga chi Jesus chamáta dacadigode ore uje chi gare ore iji yirídai. Ga chi chojningame ore: —Yico ga ajinañoma yu to aja Jerusalen. Ujeta yico Jerusalen dirome ga a Dupade uruode atatasórone, jnani bajácho, ore urusarane quigode a tocade jnese dirome. Yuruode qui tu ore urusarane ome Dupade utocaidi uyu ujetiga ore chimate yu aja jnumi dirome. 32 Uje a ore tẽra yu ome Róma gosode ore dirome. Ga jé jogadi tu ujetiga ca ore ajéngome yu rĩ dirome. Ga a ore chujñieta yu enga a ore dojnongapója yu dirome rĩ. Ga a ore chutĩ́raja yibai jne. 33 Mu a ore chujé yúdode dirome rĩ. Mu quigade ga a ore chimate yu aja jnumi ujetiga ore chujé yu. Mu a gadioque díningo jne iji yitoringárique yui ga jé u ujetiga yĩrijíapo iji togode gari rĩ.— 34 Mu chi ca irógode ore chijnime uru quigode ãrírique uje chi ca togome ore ujetiga ore chiraja quitígo. 35 Mu ore jnopo rĩ ome Jerusalen yui. Mu uje ore chirõre ore idai uje i tu Jerico ga chi ore chise cojñoque edoparitique iji uté uje chácariji dajei uré. Ga chi edopari uté utaicho dojode cojñoque ore. 36 Mu jnani edopari tuté chudute cojñonguemui ore ichorai ga chi chojninga: —¿Jé gotique ore ichorájnai tuté a?— 37 Mu chi ore chojningame: —Cachi ore ichorájnai gajnengóri tu Jesus uje Nazaret gosi. E chirõre yoquidai.— 38 Mu chi jĩrique jnani edopari tibite Jesus gai ga chojningame: —Jesus a, David ape disi ejo ua ya, be ga osõrape yu iji de.— 39 Mu chi Jesus jorane uje ore déji iquei ore chetágome darai. Ga chi ore chaquĩ́ra ujetiga cho parac. Mu chi tibite gaté. Ga chi chojninga: —Jesus, David ape gaté a, be ga osõrape yu iji de a.— 40 Mu chi uje Jesus chudute uté pijnane ga chi Jesus jĩrique chácare. Ga chi chiroque ore aja ga chojninga: —Beyoi ga ajnáño aja de.— Mu jnani tuté chirõre ga Jesus chi chojninga: 41 —¿Bajegaitique a ujetiga yipésu ome ua?— Mu chi edopari chojninga: —Yangaráni a, qué yutṍri ua ujetiga amánape yedodie e.— 42 Mu chi Jesus chojninga: —A amópo bajiritígo jne rĩ uje yiqueta ua gu uje yirajapise gu uje banguretapise yu gu.— 43 Mu chi jĩrique jnani tuté chimo dajirigode. Jecute chi nóna Jesus to ga tijapísa Dupade. Ga chi jé cho cojñonguemui to uje ore chimo Jesus ipesudode ome edopari ga ore tijapísa Dupade to.
1 Mu chi Jesus chi chicáji Jerico ga chajuque ore idai iji gatocoro. 2 Mu chi tṍraji jnanírique uje chi ataque. Uje chi ore angarádejnai iroque uté, mu chi ore asutépisedie jõra uje chi utaidé ore iplátadie to. Enga chi i tu Zaquéo. 3 Mu jnacari tuté potapísa ujeta chimo Jesus to. Mu chi ca togome uje chi catadape Zaquéo gu. Uje chi cojñonguemui irágu ejode. 4 Jecute chi Zaquéo edósare re ga chi jno ga chayóji ore iquei. Ga chi cheru pojnaque iji ore iquei ujeta chimo Jesus to uje chi Jesus ajnai u jne gu dajei tuté. 5 Jecute chi Jesus chise Zaquéo tiógarei mu chi jĩrique chajire gaté mu chimósi iji. Enga chi Jesus chojningame Zaquéo: —Zaquéo a, be jnumi to ga aquito iji jnumi yui. Uje yipotigádi u gu ujeta qué yiyáji baguíjnai to iji de deréjnai.— 6 Jecute chi Zaquéo edojnaringuéo ome jnumi uje chi doi. Ga chi nínapúsu Jesus ga dejena aja daquigade aja daguíjnai. 7 Uje cojñonguemui chimo uje Jesus dejena Zaquéo aja daquigade enga jĩrique ore poja. Enga ore chojninga: —Jé go uje Jesus pota nóna ayoré sijnanguipísi ujetiga chácariji iguíjnai.— 8 Mu chi jĩrique Zaquéo chague ga chojningame Jesus: —Yocangaráni a, angarabi yu to. Yirajapise uje sijnanguipise yu diríca. Mu a yeramája cojñoque jmatágode ore jne ome yajnepítique petique uje a yajuguína yugúchade ome ore jne. Ga ore gajnécho petígo. Mu jé isocai tu ome uñéngo, ujetiga yoria ore atique jeoga yaringaquéo. Mu ujetiga yaringaquérigo chojmára diríca mu a gagájni jne ujetiga yatĩre ore gáyode.— 9 Jecute Jesus chi catecã́ri cojñonguemui ore iji dejode ga chi chósi tome ore: —E yipáñagopísiji uje jnani tuté uringai piquetaque chise iji de deréjnai. Ga a chisápo uté jogasui ore to jne rĩ. Uje ore garãpi tu jnani bajai Abraham gu. 10 Jecute Dupade utocaidi tu yu ujetiga yucuebi udore ore uje ore cho bijnángone ome yu ome ore ipesudode dasijnaringuéo. Jecute yáyipie qui tu ujetiga yiqueta ore jnese.— 11 Cojñonguemui uje ore tangári Jesus acajnaquéode ore jos eti deréjnai e di ujetiga ore chise daringane Dupade urása. Ore chiraja gu uje idógosi ujetiga Jesus chise Jerusalen. Mu que u ore áyipiedie quigode go. Jecute Jesus chacãra dacajnaquéode aja jnani uje chicáji puniri idájai. 12 Ga chi chósi tome ore: —Jnanírique déji nanique uje ataque jogasui ore jnese. Diga eduguéjna cuchábi tibidi uté uje déji idaidatei uñeque. Enga chojninga: “Acáji de ujetiga yipésu ua ujetiga ese baringai eduguéjna to jne. Quigade enga a ajniapo aja bedai jne rĩ.” 13 Mu uje idógosi coringai ga chi tibidi darótigo uje chi ore chejna yijmanáyone. Ga chi chisi ome daplátarigui ome ore ujetiga ore pesabu dẽrapáitigo cucha ome ga iplátadie querãpe. Ga chi cho ore quique ga chi chojningame ore: “Ajnáño yiplátadie udaji. Mu yipotigádi u ujetiga yiplátadie quérã iji uacari. Jé aja yiríringárique ujeta yisápo uaque rĩ.” 14 Mu chi urásade uñéngo chetaguipise uté ome uringai eduguéjna iji daniri. Jecute chi jno mu ore chamáta ñane ome dáguedatéraque ga chi ore chajna ujetiga ore chijócãre iji daniri ga ore chojninga: “Que yipótago uté ujetiga yoco yoqueduguéjna iji, iji yocuniri udé.” 15 Mu chi ca ore áyipieraque tocade go ujetiga ore chijócãre. Jecute chi ore eduguéjna cuchábi doi ga pésu uté uringai eduguéjna. Mu udojo quigade ga chajnésaru daniri. Uje chi di ga tibidi daro cásodica ore uje chi ore chejna yijmanáyone ica uje chi chisi ome daplátadie ome ore ica. Uje chi ajegaidi tu gu ujetiga chiraja ore amátajarigui iji derané casidica daplátai iji ore gari, ujetiga quérã iji uñeque gari. 16 Jecute chi bajai chingongara raja ga chi chósi tome: “Yocangarádejnai a, bapláta casidica querãpísiji yari uje chojmára ica mu e chejna yijmanáyone iji quigade.” 17 Jecute chi eduguéjnai tuté chicotapise daroi uté ga chi chojningame: “Ueradipise bajmapié ome yu. Ga yiroque yimeserai tu ua. Uje garósi yeranenie ome ua ica mu suépise uca casidica gai. Jecute a yijosi ua iji gaté jne ga gajnui tu ujetiga pidai datérigo uje chejna yijmanáyone a ore cho dasuté iji ua jne.” 18 Jecute chi jõrai chingongara raja to ga chi chojningame: “Yangaráni a, bapláta casidica querãpise to iji yari. Ga chejna yijmanai guejnanie iji iquei.” 19 Jecute chi chajnai uté uruode to ga chi chósi tome: “Ueradipíso badode to. Jecute a ore idáningo ujeta chejna yijmanai, a ore chope dasuté iji ua to jne.” 20 Jecute chi ejogatei chingongara raja to ga chi chósi tome: “Yocangaráni a, bapláta casidica de daji uje yañurupúsu guio ga yipocásu gai iji borapei. 21 Yitodópisa bei gu uje jnani josipierãquedaté ua. Uje bajegaidi tu ujetiga cuchade chise ua iji te bisideque. Ujetiga ca bajuya ua ome bajac. Ga jé gajnui tu ujetiga ãra pacaque quedéjnaringo ujetiga bajnei orérigui.” 22 Jecute chi eduguéjnai tuté chi chojningame daroi: “Yiroque yeteguipísi tu ua ome baruode udore. A jé yi baru quigode udore, ga a yaguhéta baruode babai jne. Uje chiese jnani josipierãquedaté yu ome ua. Uje chi yajegaidi tu ujeta yajnei plátadie bisidec. Jeoga cucha pacatígo jeta yajné orérigui bisidec. 23 Mu a araja cuchade udore quigode múñi, ¿gotique gu a uje a ca acha yipláta casidica aja plátadie iguíjnarique ica uje i tu bánco ? Uje bamo múñi uje plátadie quérã iji uté. Ga atĩrerase yibai ujetiga quérã ga baringai yirasique jogadi ta urásu ujeta yise yiguíjnai ome.” 24 Jecute chi catecã́ri darógode uñane iji dejode ga chi chósi tome ore: “Ajnañoma yiplátadie iji uté gari ga asíñome uté uje irodedie quérãji gari ga chise chejna yijmanáyone que.” 25 Mu chi irógode ore chojningame: “Yocangaráni a, cachi baplátadie chejna yijmanáyone iji uté gari que. E jiépisiji gari.” 26 Mu chi ore eduguéjnai chajnai ore ga chi chósi tome ore: “Ujetiga e dérasi gosi mu ueradipise ujetiga ajóyo aja uje imoi u gu uje susipise cuchade guio, ga quérã iji gari. Jé basa ga uté gosi uje que suse cuchárique guio, qui tu ujeta ajnóso uté gosi ome gajnetígo cucha garósio ga asi ome uté gosi uje suse dagúchade guio.” 27 Jecute ore eduguéjnai áyipiedie chisõre ga áyipiedie déji damajosórone uje ore chetágome uringai eduguéjna. Ga chojningame darógode: “Beyoi udore ore ga ajnañoma ore aja de. Ga ajeyope ore iji yedominone jne.”— 28 Jesus chi chejna daruode udojo guesi ga jé u uje jnopome Jerusalen rĩ. 29 Mu udojo quigade ga chi chirõre ore idáyode uje chi ore íode u Betfagé, Betánia ore uje chi ore idógosiji cucarãtique uje chi i u Olívas. Ga chiroque dacadique gárerigo aja dajei. 30 Ga chósi tome ore: —Boyo ga acayóbiji ore idáyabi uje idógosiji yoque. Mu a eso ore gachitique búrro ujetiga ore chigaru uje cáma piyaripi uté to. Ga ejñúño gajneri ga ajnáño aja yu iji de. 31 Ujetiga uñeque catecã́ri uaque enga chojninga: “¿Gotique gu a uje uaqueñúño búrro uaté?” Mu a ojnichome jne: “Yocangarádejnai potapísa gu.”— 32 Jecute Jesus acadigode udore ore jno ga ore chicáji ojningai pidai. Enga Jesus uruode ucode ome ore tocade jnese iji guidai uté. 33 Jecute chi gachisórone ore chimo udore ore uje ore chejñu ga ore chojningame ore: —¿Gotique gu a uje uaquejñúño búrro uaté a?— 34 Mu chi ore chajnai gachisórone ga chi ore chojningame ore: —Yocangaráni potapísa gu.— 35 Jecute ore chijnája Jesus. Ga chi ore pésu daguidedie ga ore chujé aja gai. Ga jé u uje chi ore chicha Jesus aja gai ujetiga cháji búrro uaté gai. 36 Jecute chi ajnasórone jorane ore chejñu daguidedie ujáningo ga ore chijnera jnumi iji Jesus iquéode. Ujetiga búrro ore diguiji gai iji dajei. 37 Mu uje chi ore doi jnumi iji cucarani uté uje chi i tu Olívas chi Jesus joráringo ore changureta jnese to uje ore nóna ga chi ore nínapúsu raque. Ga ore chinguíra dabijnanone aja dejode. Uje chi ore chicota Dupade ome ujopie uje tocade ome Jesus ipesute datéode uje ore chimópise to. 38 Jecute chi ore chósi tome: —Picotaguipise opejã yoqueduguéjna cuchábi Jesus uje Dupade utocáite uté ome yoque. Jé tiógarapísa ujetiga pitijate Dupade iji gaté ome uringai pujnuéngaisõre.— 39 Jecute fariséode uñéngo iji ore ujade chi ore chojningame Jesus: —Pacadisṍri a, aquĩrape bajorane udore to ome ore icotaquedatéode udore ome ua.— 40 Mu chi Jesus chajnai ore uruode ga chi chósi tome ore: —Ujetiga yaquĩrarase ore mu a jé basa ga cucaranenie chajnerarásome ore icotaquéode ome yu.— 41 Mu chi uje ore chirõre ore idai uje chi i tu Jerusalen, ga chi Jesus poji uté ejode. 42 Chi chósi tome ore: —A arajayórase yu ga a amesechórase yu. Enga pajesereringai chacárasaja Jerusalen gosode uaque to iji de deréjnai. Mu uaquetácho yu que, ga a ca togome uac ujetiga Dupade chingongara pajesereringai tome uaque to. 43 Mu jé u uje uaquetácho yu que, ga a cucha dacate gajnaréngone chajopise raja uaque jne iji uaquedai Jerusalen. Uje a uacamajosórone ore gajnúone u pujuyaquérigo jne ujeta ore chaparu uacabai iji uaquedaidatei tuté. Ga uacagachodi tu jne ujetiga ore chachẽre uáguiji uaquedai ujetiga ore cho dajocaningame uac. 44 Ga a uacagachodi u jne ujeta ore chejna uágaja jnutique. Ujeta ore chejna uacarásade ore jnese ga a ore chajnangarase uacaguíjnane aja tijode to jne, uacajuyaquéode jnupe rĩ. A Dupade ujuyaquéode upúsu cucha gajnaréngone udore uje chajo raja uaque jne gu. Uje que ajuécho Dupade ome uaquedai ujetiga chacája to.— 45 Jecute chi Jesus chacája Dupade iguíjna cuchábi iji Jerusalen mu chi chijócãre cojñone ore iji uje ore tẽra cuchade iji ajei, jé aja udore ore uje ore doi oredie ome cuchade. 46 Ga chi Jesus chósi tome ore: —Ore urusarane Dupade uruode déji uje quigode chósi te: “Ujetiga gosi chacája yiguíjnai ga yiguíjnai gajnei tu ujetiga acatecãchoi yu iji.” Mu oriechoquíode uaque, uacoyo uacacoyapídi iji Dupade iguíjna cuchábi udé, uje uacaráño uacojode ayoréo iji udé ome cuchade oredie udire.— 47 Jecute chi Jesus chi ca cho daja ome dacajnaquéode iji deréjnane údode iji Dupade iguíjna cuchábi ajei. Mu chi judíode ore asutedie, ore angarádejnane ore, jé aja Moises urusarane atatasórone ore eduguéjnane, ore chucuepísi Jesus bárique ujetiga ore chise bárique ga ore chujé. 48 Mu chi ca togome ore ujetiga ore chise Jesus bárique uje cojñone ore jnese ore tangaripísi acajnaquéode iji deréjnane údode jnese uje chi ore tijapísa.
1 Mu chi chise dínique uje chi qué Jesus chacate cojñonguemui iji Dupade iguíjna cuchábi ajei uje qué chatata uraque dajnomei piquetangóri adode isocade ujeta ore chiqueta rágome. Mu chi judíode ore asutérigui ore angarátigo, aja Moises urusarane atatasóningo chi ore sose Jesus yui. 2 Ga chi ore chojningame: —¿Jé uñeque iroque ua aja udore ome bapesudode udore cucha ya? ¿Jé gosi guẽrapáite baringai dacasuté ome ua iji de a?— 3 Mu chi jé basa ga Jesus chojningame ore: —A qué yingoma cuchárigaja uaque to jne. Yajire jne ujetiga uacuñeque chajnai yu. 4 ¿Jé gosi iroque Juan casicáite ujetiga tṍra ore aja yodi nanique a? ¿Jetiga Dupade u, jeoga jnaníringo ore u a?— 5 Jecute chi ore botãre ñane uje chi ca ore chiraja daru quitígome. Ga chi ore chojningame ñane: —¿Jé yocórasi ringome a? Ujetiga yojnicorása: “Dupade iroque Juan aja nanique,” mu a chojningárasome yoque gajneri: “¿Gotique gu a uje a ca ejnáño uágaja nanique ujetiga anguretáyo to a?” 6 Mu a yojnicorása gajneri: “Cachi jnanione ore iroque Juan aja,” ga a cojñonguemui chaguhetarase yoquibai gajneri. Ga a ore chimitingarirase yocúdode gajneri ome cucaranenie. Uje a ore changuretapise gu Juan casica ome uringai Dupade iroque ujetiga chatata Dupade uruode ome ore.— 7 Jecute ore chajnai Jesus uruode ga ore chojninga: —Que yirajágo gosi ujetiga chiroque Juan ome ujetiga chaca ore edodie iji yodi.— 8 Jecute chi Jesus chojningame ore: —A jé yi uacajmapié jne uje a ca yichajnai uágome yuringai piroque uje yipésu cuchade udore jnese aja quigode.— 9 Enga jĩrique Jesus catecã́ri cojñonguemui enga chacãra dacajnaquéode aja jnani uje irógode chujé abi. Enga chojninga: —Jnani déji nanique uje chaca úvadie iji dejnai. Mu quigade enga pota chicai puniri uñai. Jecute catecã́ri jnanione uñane ujetiga ore chirote guejnai. Mu ujetiga e chise diri ujetiga ore na acadie enga ore tẽra uéchai ome raque. Jé basa ore chañuru uéchai uñai oredie guio ome guejnasṍri. Diga uté e jnome daquitique erãpe enga iyajmánguiji. 10 Mu chi chise deréjnai uje e ore na acadie adie úvai. Ga chi jnani chiroque daroi taja ujetiga chutai irógode ore ome dajnepídi. Mu chi irógode udore ore uje ore chirote guejnai, chi ore chujé uté údode ga chi ore chijócãre. 11 Jecute chi gajnengóri chirogapo darógode uñai aja rĩ. Mu chi jé ore adi u dasocai bajai ome. Chi ore pojna údode, ga ore chujé údode to. Ga jé u uje ore chirógaja doi ga que ore chisi cucháringome. 12 Mu chi ore irósõri chirogapo uñai aja ore rĩ. Mu chi irógode ore chaquesu údode ga ore tṍraja guesi to. 13 Mu chi quene ore irósõri chucué dajéo. Ga chi chojningame re: “¿Jé yo rique jne a?” Mu chi chojninga: “E yiraja yisocai ome ore. Yadi a u jne, a yiroque yape yedójnari aja ore jne. Jé socase ore chimo uringai yape ga ore ajéngome jne.” 14 Mu chi irógode udore ore chimo abi uje chicáji ore yui ga chi ore pésu dáyipierigui ome uté. Ga chi ore chojningame ñane: “A uté dayé toi jne enga a jé basa abi gajneque uté gajnei jnupe jne. Yicoi ga yujégo jne ga jé basa ga yocajnenguipise gajnei jnupe jne.” 15 Jecute chi ore chijnimíji gajnei jnupe ga chi ore chujé.— Uje chi Jesus chimate dacajnaquéode udojo aja guesi ga chi catecãrápoi cojnonguemui ore rĩ enga chi chósi tome ore: —¿Jé uacáyipierigui cho rique ome uté jnumi gajnengóri isocáriquerase a? 16 Isocai urásu ujetiga jĩrique jnome darógode ore to ujetiga cho dajnutaque ome ore enga chejna ore jnese. Mu udojo quigade a chucué uñéngo ujetiga chicha ore aja ore charidode. Ujetiga ore suse guejnai guio.— Mu chi uje cojñonguemui ore chudute uruode quigode udore ga chi ore chojninga: —Yipecopu ga ca udore tocade jṍra ome yoque.— 17 Mu chi Jesus chajire ore ga chi chósi tome ore: —¿Ga arajáyo jnani bajade ore urusarane quitígo a iji Dupade uruode a? Uje chósi te: Cucarané cucháberaque uje guiguí jna cuchábi ipesungórone ore guetegue, mu noña ga cucarané pedójnare uje obirejnapise ome cucarané uñanie. 18 Uté gosi ujetiga basaja cucarané cuchabe uaté gai, a jé ore u jne ujetiga cucarané chuságome ore. Mu ujetiga cucarané basiji gosi gai ga a chimate gosi aja jnutique jne.— 19 Mu chi ajningaranguipise sacerdóteode ore angaránone, jé aja Moises urusarane atatasórone ore rĩ. Chi ore potapísa ujetiga ore chisa Jesus. Ore chiraja gu uje chi Jesus ipesudode udore, cucha gajnúone jé gajnengórone u ore. Mu chi ca ore chiraja dasocáringome gu uje chi ore todópisa cojñonguemui ore. 20 Jecute chi ore chucué dáyipie ujetiga ore chiroque jnaníringo aja ujetiga ore chuquéjnai. Ga chi ore cho ore quique ga ore chojninga: —Araño uáguiji jne ga oyo jnani paracho iji uaque jne. Mu adojningachopísa uru quitígo jnese jne, ujetiga yico bárique cucha. Ga yico údi ome yoqueduguéjnapísode, Róma jogosóningo iji yoquidai.— 21 Jecute ore irógode jno ga ore pésu daruode ga ore neje údode ga ore chósi tome: —Yocacadisṍri a, yirajagopise ua uje jé ũrepise ua ome baruode quigode uje bo quique Dupade adode ome yoque. Yirajagopo rĩ uje que agutúapo ua ome ayorérique rĩ. Que cuchapome ua rĩ ujetiga ore irasique ua, jeoga ore chetaque ua ome baru uréone. 22 Jecute angomome yoque ¿ujetiga uerate ome judíode uyoque ujetiga yoco oré Róma gosode ore eduguéjna cuchábi, jeoga ca po oré a?— 23 Mu chi jĩrique Jesus chiraja ore áyipie gajnarénguenie quigode ga chi chojningame ore: —¿Gotique gu a uje uacáyipiedie gajnarenguei ome yu a? ¿Uje uacacuei tu yibárique a? 24 Angoñomome pláta guebetique jogosónique cojñoque orérac ome yu. ¿Jeoga gosi i tu ujetiga déji?— Mu chi ore chajnai ga chi ore chósi tome: —Cachi Róma gosode ore asuté oré u ãrie, jecute i déji údi.— 25 Jecute chi Jesus chojningame ore: —Jé arec ujetiga asi ome Róma gosi tuté gajnepídi ome. Jé basa ga asi ome Dupade gajnepídi ome to.— 26 Mu chi ca togome udore ore ujetiga ore chise dajosipieragome. Jeoga jeta ore chise bárique cucha ome uruode quigode iji cojñonguemui iquei. Mu chi jé basa ga chajuque ore agutedie ome daruode uje chajnai ore gatuac. Jecute chi jogadi u uje ore cha daruode quigode. 27 Cuchade udojo quigade ga chi judíode uñéngo uje chi ore uague tuaté chi i tu saducéo, chi ore tibágui Jesus to. Chiese ca togode ore niji iji daringárique toque quigade ome ore. 28 Ga chi ore chetingare Jesus to ga chi ore chojningame: —Yocacadisṍri a, Moises urusarane quigode chósi te ome yoque: ujetiga jnanírique toi mu ujetiga noñome dacoté tiji guesi uje cáma ore atique cus, mu uté gosi jõrárique jé basa ga chojiabíji dãjorai acoté tuaté gari. Mu ujetiga ore atígo base ga gajnui jé u ujetiga abai bajai ore abío to. 29 Jnacari déji nanique uje desade chojmára iji ti iji yijmanuñai. Jnacari uté nóna dacoté mu toi ga que noñome datíguiji gari. 30 Jé basa ga ejoi chisa chequé eca tuaqué to mu toi to, mu que noñome datíguiji gari go. 31 Mu jé isocai tu to ome ejogatei. Chisa chequé tuaqué to, mu toi mu que noñome datíguiji gari to go. Mu jé isocai tu to ome udore jnese, jnani garitíode udore iji yijmanuñai. Uje ore toi jnese mu que ore noñome datíguiji chequé uaté gari go. 32 Ga quene uaté toi to chequé tuaqué. 33 Mu ¿jé dérasi rique iji jnani garitíode udore ore ujetiga ore nijiápo daringane toque rĩ, ga pijoque chequé tuaqué amanínguiji ore a?— 34 Mu Jesus chi chajnai ore ga chi chósi tome ore: —Gusu yocuniri tudé erãpe uje jnanione, chequedíe ore chucué dabayode iji, dacotedie ore. 35 Mu punire uñai iji gatajnoquei gajnesórone u ore jne uje ore tangári Dupade. Uje diga ore niji iji datoringai quigade enga a ca ore áyipieraque dépoi chequé pĩjoráraque jne rĩ, jeoga chequé ga ca áyipieraque déji jnani pamanique. 36 Enga yojningane udore a ca ore topoi jne rĩ iji deréjnane. Ga ore gajnúone u Dupade utocaidode gaté minóño. Mu ujetiga ore niji iji pitoringai enga Dupade chinoningase ore enga e Dupade ape ore. 37 Moises urusarane déji to uje cho quique pirijiningai iji pitoringai isocade ome yoque. Moises urusarane udore chatata uje Dupade chiqueta raja iji porabia nanique uje pioi ocaráidie tṍraji. Enga Moises chojninga iji darusarane: “Jnani bajade Abraham, Isaac, Jacob ore idupade chiqueta raja yu.” 38 Que toc ujetiga ayoré totique cho dadupade iji Dupade. Mu ayoré uecade ore gajneque ujetiga ore cho dadupade iji. Ujetiga toque Dupade anguresóningo marínga, Dupade qué cho uecade iji ore.— 39 Mu chi fariséode uñéngo uje chi ore gajnei tu ujetiga ore chacate ore ome Moises urusarane quigode, chi ore chajnai uruode ga ore chojningame Jesus: —Jé ũrepise ua ome baruode quigode.— 40 Mu saducéode uje ore catecã́ri iji taningai chi ca ore chirajápo daru quitígo ome rĩ ujetiga ore chajnai uté uruode quigode. Jecute chi cojna ore cho paraque jmete. 41 Udojo quigade ga Jesus chojningame ore: —¿Jé gotique gu a? uje uacojnicho: “Jnani bajai David ape disi ejo judíode yoquijnati Crísto jne.” 42 Mu jnani bajai David cho dadupade iji to uje qué déji urusarane iji Sálmos uje chósi tome: Dupade chojningame yangaráni: “Ayáji yejoi iji yãrachua. 43 Jé aja diri ujetiga yujnué bamajosó rone ore gai jne.” 44 ¿Jé quitique dérasi rique a uje David cho dadupade iji Crísto, ja ape disi ejo urásu to a?— 45 Cojñonguemui chi ore yore Jesus gai ujetiga ore tangári uruode to mu chi Jesus uruode gajnengórone u dacadigode. 46 Enga chósi tome ore: —Ajusópise uaqueo ome Moises urusarane atatasórone ore uje ore ucuei tu gu ujetiga ca ore suseque raque ome daguidé umáreringui ome daringáringo ibijócho. Uje ore áyipie qui tu ujetiga yoco yocangarádejna iji ore. Ore chise judíode ore aquiningaméone ga ore ajegaidode upúsu piyaripi ibijógode ome raque. Jé ore ijmapié tu to ome raque iji ore agapidode uje ore ucuegode u dayaripi ibijótigo ome raque ujetiga jĩrique ibijoc ore iji. 47 Jecucha ore chajnósapo chequé ecadie rĩ ome ore iguíjnane. Mu ujetiga ca pirajaque ore enga ore catecã́ri Dupade enga umare ore icatecãraitigade. Ore u jne ujetiga ca Dupade chajire dajuyaquérigo ome ore jne.—
1 Chi Jesus qué déji Dupade iguíjna cuchábi ajei mu chi chimo cojñoque atade ore uje chi ore chijmare daplátadie aja pírique uje ore amátajai u ome Dupade. 2 Chi chajire mu chimo chequé ecáraque to uje chi jmataguepise. Ga chi chijmarósi dapláta guebeque garatígo aja pi tuté to. Chi ore ipláta guebei tuté chi i tu cobre nanique uje chi carénga oréraque cuse nanique. 3 Jecute chi Jesus narare ga chi chojningame ore: —Jé ũrepise yu ome yuruode udojo uje chequé eca jmatagué tuaté chejnási daplátabidie aja Dupade uje chisi ome. Ga gueranenie sué ore gai jnese. 4 Chamáñaje udore uñane ore chisi ome dapláta soguedie ome Dupade. Mu chequé eca uaté uje jmatagué, chisi ome dapláta uguruábidie ome Dupade.— 5 Mu chi qué uñéngo tijapísa Dupade iguíjna cuchábi uje chi ueradipíso jogosórone cucha jnese. Uje chi cojñone guẽrapáicho. Ga chi jé chopome cucaranenie rĩ uje chi ore chujé aja ñane gáyode iji dosadode. Chi ueradepísi to rĩ. 6 Mu chi Jesus chudute ore uruode udore ga chi chojninga: —A chise dínique jne ujetiga ore chajnangarasipise aja tijode Dupade iguíjna cuchábi udé. Ga a ca pimópo cucaranéringui jogatique jne rĩ ujetiga chuguéja ñane gánique.— 7 Uje ore chudute Jesus uruode udore ga chi jĩrique ore catecã́ri ome. Ga chi ore chojningame: —Yocacadisṍri a, ¿jé cho rique jne a, ujetiga cuchade udore tocade a? ¿Jé chopo rique cuchade gãrapiérigui jne rĩ a ujetiga di iji yoque a?— 8 Mu Jesus chi chojningame ore: —A yingoba quigode aja uaque jne. Mu añuchopúsu uaqueo ujetiga ca pãraque uaque. Uje a jiépisi cojñotígo ore jne ujetiga ore chósi tome uaque: “Cachi uacangarádejnai Crísto uyu ãrie. Beyoi ga angáchoi yu.” Jeoga ore nararirásome uaque jne ga ore chojningárasome uaque: “Erámi eruei e u udé.” Mu jé ca angáchoi udore gotígo ore jne. 9 A angáchoi pujnoméringo ome pocaningane iji erámi údode jne. A aduchopo rĩ ujeta ore tagu yoqueduguéjnane aja ome dajocaningane ujeta ore chejna ñane iji erámone údode. Mu jé ca chajuque uacagutedie gotique. Uje a arajáyo jne uje bajácho cuchade udore jnese ujetiga tocade. Mu erámone eruei cáma upúsu gotique jne.— 10 Qué Jesus jno dacajnaquéode udore údi ga chósi tome ore: —Mu a arajáyo erámi eruei yúode jne ujetiga cojñonguemúone ore socárome ñane iji erámi údode ome dajocaningádatérigo ome ñane. 11 Ga a jnupe tãrarachutígo chise uaque to. Jé aja chaguhéode ujetiga socárome uaque. Jé aja dequejnaréquedatérigo rĩ ujetiga tṍraji dajñarenie ome uaque. Jé basa ga cuchárigo a tṍraji gaté to jne ujetiga cucha pimojma ujetiga chajuque ayoréode uacagutedie iji jnumi tudé jnese jne. 12 Mu ujetiga cáma cuchade udore tocade jne enga a qué ore chisa uaque bajaque jne ujetiga ore socárome uaque ga ore cho damajo uaque. Ga a jé u ujetiga ore jno uacádi aja judíode ore aquiningaméone ujetiga ore chaquĩ́ra uágome yadode. Jeoga ore surábu uacabai. Jeoga ore chijna uágaja ore eduguéjna cuchátigo ujetiga uacabade u yadode ujeta atatayo. 13 Mu ca acusúyo uágome cuchade udore jne jã. Uje a qué piotiguei tu jne ujetiga acacho ore to ome yadode. 14 Mu jé ca oyo uacáyugu uaque ome uacarúrigo ome ore ujetiga ãraracho uacabánique. 15 Uje a yerané uacáyipie etotiguérigo to ome uaque jne, jé aja pirajatigárique rĩ ujetiga arajáyo uacaru quitígo ome ore. Uje a ca uacamajosórone chiraja daru quitígo ome uaque jne gu ujetiga ore chajnai uaque. 16 Mu a chise dínique to jne ujetiga ore terame uágome ore jne ujetiga ore chujé uaque. Enga a uaquẽrasórone u uacayode jne, jeoga uacajoráringo, jeoga uacaguiotígo, jeoga uacojórigo ayoré rĩ. Jecute a ore chujé uacuñéngo to jne. 17 Mu a chise dínique to jne ujetiga cojñone iji erámi údode ore chetaguipise uaque. Mu a uacabade u yadode uje uacatatayo. 18 Mu ca oyo uacáyugu uaque jne, uje a Dupade chiqueta uaque jnese jne. Uje a ca toc ujetiga uacuñeque bijna ome. 19 Mu ujetiga adotayopísa uáguiji uacanguretigai enga a eso uacaringáringo ueca jne iji deréjnane jnese. 20 Mu ujetiga amóño ore idai tudé Jerusalen ujetiga umajosórone ore chĩro ore gai, ga a arajáyo jne uje qui tu gu ujetiga ore chejna ore gajneri. 21 Ujetiga udojo tocade jne ga cucha ueradi u ujetiga Judéa gosode jĩrique chayome ore ga ore chicáji cucaranone ójodie. Jé basa ga Jerusalen gosode, ujetiga ore chayorásome ore to ga ore chayója dedaidatei eruéode iji guesode. Ujetiga uñéngo déji erámi ga jé arec ujetiga ca ore chajnésara uraque dedaidatei. 22 Uje dirode udore u gu uje Dupade ujuyaquedatei chise ore uje jnani bajade, Dupade uruode urusãrasórone, ore urusarane quigode a tocade jnese jne gu. 23 Yosõripise joroque chequérigui ore yui jõ iji dirode udore ujetiga qué ore icárigui déji ore ajéode. Jeoga qué ore chacucarirase dabatígo. Uje a ore chejnarenguipisirase raque jnese iji puniri uté údode jnese. Uje a gajnarenguipise Dupade ujuyaquei uté ome ore uje a ore chisa joroque dabade iji jmanéringui jne. 24 Uacuñéngo a déji jne ujetiga chuque uáguiji pocaningáringo. Mu a uacuñéngo dépoji jne rĩ ujetiga pisaque uáguiji ore ijocaningane, ga ore chijna uágaja punirone uñéngo jnese. A purása quedéjnane ore sué Jerusalen gosode gáyode jne ga a ducañerájma ore idai tuté iji ore jmáinie jne jé aja ujeta Dupade chaquĩ́ra ore ome ore ájningaringo ome ore. 25 Mu cuchade udojo quigade enga jé basa ga erámi unirisórone a ore chimópo ore ingongóningáringo ome guedé, guedoside, guédodie ore rĩ. Ga a jogadi tu jne ujetiga chajuque erámi unirisórone ore agutedie jnese. Uje a yote quedéjnane chijocase re iji jnumone jne ujetiga pésu dajocaraque cuchátigo. 26 Jecute a erámi jogosórone a ore cho sẽre iji jmáinie jne ome ore isadodéringáringo. Uje ore áyipiedie déji cuchade udore gu ujetiga tocade iji erámi údode jnese. Ujetiga doi datéringaringo ome guedé, guedoside, guédodie ujetiga ore chijocase re iji gaté jne rĩ. 27 Mu a ore chejna cuchade udojo guesi jne ga jé u uje yiqueta yu aja ore ujetiga ore chimo Dupade utocaidi uyu . Mu ujetiga yṍraji gaté ome ore ga yibiéraque u gue abujáraque aja jnumi ujetiga ore pañáji yuringai ujopierãque, yuringai pujnuéngaisõre rĩ. 28 Ujetiga adúcho uje yojningane udore uñane e tocade, beyoi enga ajnusoi uágome. Enga ajicho gaté ome uacaquetasṍri uyu yiríringai yui.— 29 Jesus qué jno dacajnaquéode údi mu chacãra dacajnaquéode aja poridie. Enga chósi tome ore: —A arajáyo poridie isocade ãrie. 30 Uje poridie acarane e sué ga imoi tu gu uje é idógosi sequeré. 31 Mu jé isocai tupo rĩ ome cuchade udojo jnese uje tocade ga a arajáyo to gu ome ore uje a idógosipise Dupade diringai ujetiga oyópo uacarása iji rĩ iji jnumi tudé. 32 Jé ũré yojñane uje cuchade udore jnese a tocade jne uje cáma ore toi iji deréjnane unojo. 33 Gaté, jnumi a ore íjnoque jnese jne. Mu jé basa ga a ca yuruode íjnoque to jne. A ore chise daringane tocachucho jnese. 34 Jecute añuchopúsu uacadode guio. Socase ca anínaño yu jeta yise uáguiji uacate gajnarétigo gánique: ujetiga qué beyoi piboquereringai adode ome uaque to, jeoga qué ójiyo yote pioi ga yote pioi yuque uaque. Jeoga yise uáguiji uacayuguhebátigarique ome erámi jogosóningo cucha udore. 35 Yiríringarique gajnua u trámpa uje chisa cuchisode enga suru ore gai uje que ore chunina. Adi a jé u ome ore jnese iji erámi údode jnese. A ca ore chunina yiríringai jne ujetiga yise ore. 36 Jecute ajuso uaqueo ga dimane uágome yiríringarique yui. Enga ca oyo uacaja ujetiga acatecãchoi Dupade iji deréjnane jnese ujetiga apíchome cuchade udore jnese jne ujetiga chise uaque. Acatecãchópoi Dupade rĩ ujetiga ca agutúyo uágome Dupade utocaidi uyu jne ujetiga agúsoi yiquei.— 37 Jecute chi Jesus cháji Dupade iguíjna cuchábi iji dirode jnese ujetiga chacate cojñonguemui ore iji. Mu chi chise dejade ga chicáji cucarani ójo ujetiga cháji uje cucarani uté i tu Olívos. 38 Jecute chi cojñonguemui ore choberipísi Dupade iguíjna cuchábi yúode iji durasabidie. Uje chi uneripise Jesus acajnaquéode yui ome ore gu ujetiga ore tangaripísi.
1 E idógosi ore jnusinamáni dire uje i tu Páscua uje judíode ore tagu arurégode uje íjnoque arurégode bisidi iji. 2 Mu iji dirode udore ga chi judíode ore asutérigui, aja Moises urusarane atatasóningo, ore chucué jorógui dasoca ujetiga ore chujé Jesus. Mu chi ca togome ore go uje ore todo gaguedatei iji Jesus gari. 3 Mu chi diga Satanas chacája Júdas ajei to ujetiga juéga Jesus ome ore. Júdas uté u uje i uñai u Iscariote. Jesus irógode jõra uté to uje gare ore iji yirídai. 4 Chi Júdas uté jno ga chi chicáji judíode asutépisedie iji Dupade iguíjna cuchábi ujetiga pésu dáyipierigui ome ore. Uje chi áyipiedie u gu ujetiga juéga Jesus ome udore ore. 5 Jecute chi ore nínapúsu raque ome Júdas áyipiedie udire. Jecute chi ore chojningame: —A yẽcója ua jne ome plátarigui jne ujetiga ajuéga uté ome yoque.— 6 Mu chi Júdas uté chi chimesere ore áyipiedie. Jecute chucuépisi dasoca ome Jesus ujetiga tẽrame ore ujetiga ca cojñotique chudute áyipieraque. 7 Mu chi diga chise diri uje judíode ore ipesudi u dajñamitedatei. Ga chi ore chiborátaja uje ore tagu arurégode to uje íjnoque bisidode iji. Uje chi ore chatapója áyasarigui rĩ ome dajñamitedatei uté ujetiga ore tagu to iji. 8 Jecute chi Jesus chiroque Pédro, Juan ore aja sañeque ga chi chósi tome ore: —Boyo ga apéso yoquibotígo jne ome yocajñamitedatei gajnetígo cucha.— 9 Mu chi ore chajnai Jesus uruode ga chi ore chojningame: —¿Déji rique a bajegaipítique ujetiga yipéco udore iji a?— 10 Mu chi Jesus chajnai ore ga chi chósi tome ore: —A acáyoja ore idai gajneri. Enga a eso jnanírique jne ujeta chijna dajopidéraque cojna, yodi gajnéraque. Mu ajnáño uté gosi jé aja iguíjnarique jne. 11 Mu acatecãchoi uté gosi irósõri gajneri ga oyósi tome: “Yocangaráni chiroque yógaja ua que ujetiga ajuegaba baguíjnai ajénique ome yoque ujetiga yipecobu yoquibotígo iji ome yocajñamitedatei gajnetígo.” 12 Jecute a chingome uaque gajneri guijnatajei cuchátique ujetiga e dimane iji uacaquei. Guijnatajei uté u uje idájai jnumi. Ga ayáyoji uté jne ga jé u ujeta apéso yoquibosode iji uté.— 13 Jecute ore jno ga ore chicáji mu chi ore chise daqui tuté. Mu jé u Jesus urúiso ga chi ore pésu dabosode iji deyai iguíjnai ajei uje chi dimane iji ore iquei. 14 Chi chise guedé batigai ujetiga ore taque ga chi e dimane Jesus, irógode ore iji dagapié dosadode jnese. 15 Jecute Jesus chojningame ore: —Jecucha yáyipie déji ujetiga yacásõrango ñane iji de ujetiga yajo yocujnusinamáni dire Páscua gajnéone uje cáma yitoi. 16 Uje a gusu udé deréjnai uje yacásõra uaque ome yocujnusinamáni dire iji de jnumi. Jé aja ujetiga yugúcoji ñane gari rĩ iji yoqueduguéjnai Dupade gari iji idai. Ga jé jogadi tu jne ujetiga yipecopo yocajñamitígo rĩ.— 17 Uje chi Jesus chejna daruode udojo guesi ga jé u uje chi chisa ore jopidéraque. Mu chi qué chacãre dayé Dupade gai bajaque. Quigade ga chi jé u uje chisi ome ore ga chi chojninga: —Jíca, asayo udaque. Mu ajuguínaño ñane jnese jne. 18 Jecute yurúo udojo ome uaque uje a ca yojiapo cucha adie otadi to jne rĩ iji jnumi udé, jé aja dínique ujetiga eso uacaringáringo Dupade imeseracho ome idai. Ga yójigo ome ñane jne rĩ.— 19 Mu chi chejna udojo guesi ga jé u uje chisa arurétique rĩ. Mu chi qué catecã́ri dayé Dupade bajac. Ga cha ga jé u uje chi chajúgaja jnumi ga chi chisi ome darógode udore ore ga chi chósi tome ore: —De deja. Acho. Uje arurégode udojo gajnui tu yaoi ujetiga yẽra yu ome uaque jne. Acho arurégode udojo mu ca uacáyipiedie jnoji yu iji uacajéningo.— 20 Ga chi jé isocai tu dasocai uqué ome ore jopidé tuaté. Uje ore chejna dabosode guesi ga chi chósi tome ore: —De daque jã yoquijopidé. Ga gajnua tu Dupade áyipie ichadie ome uaque jne. Uje yojninganie Dupade áyipiedie udaji qui tu gu ujetiga chiqueta uágome yiyoi jne, ujetiga yitoi ome uaque jne. 21 Mu uñai déji de yocujade uje qué chacásõra yoque. Mu a uté u jne ujetiga tẽra yu jne ome yumajosórone. 22 Dupade utocaidi uyu yajnei tu ujetiga guẽrate yu ome yumajosórone ore jne. Dupade áyipiedie jé u ome yu gu. Mu a ca Dupade chajire dajuyaquérigo ome uté gosi jne ujetiga guẽrate yu ome ore.— 23 Mu chi jé u jogadi uje ore chingome ñane ga chi ore chojninga: —¿Chimo joroque re jne iji yoque ujetiga uyoque gosi tẽra yocacadisṍri ome umajosóningo ore jne a?— 24 Mu chi qué Jesus acadigode ore botãre ñane ga chi ore chojninga: —¿Chimo joroque re ujetiga e ibijoque yocuñeque to a?— 25 Mu Jesus chudute ore uruode enga chojninga: —Uacamóño uje josipierãque ore eduguéjnane iji punirone jnese. Ga cho ujetiga ore iroque darásade ore. Mu ore urásade ore cho ayoré areguipísi iji ore. 26 Mu uaque, ca beyoi eduguéjnane udore isocade to. Mu uaque gosi ujetiga obiréjnapisiji uaque enga uté gosi doi ga cho ejopísiji re. Jé basa uacangaráni doi enga uté gosi cho piróguiji re iji uacajade. 27 ¿Jé yocorási ringome ujeta yicoi udore ga yoco ibijóguiji udore uñéngo a? ¿Jeoga uté u uje dimane iji dagapié ejoi ujetiga e taque? ¿Ujetiga u uté uje jno ore posode údi ome ore ujetiga yoco ibijoi tiji? A ojnichorása: “Uté a urásu ãrie uje dimane iji dagapié ejoi uje chácariji. Uñai uté ga ore iroque.” Mu que quigode u udore gotique. Uje uacapáñañoi yu to uje yajnui tu uacaroi tiji uacajmáinie. 28 Jé areguipise uaque jnese uje uacajnórañopise yu ga jecucha uacagúsoi yari ome yajnéone petingaquéo. Ga que ajíñoñome yu iji duruñeque gotique. 29 Jecute a yẽrája uaque ome jne jeta eso yapade uniri to ome uacaringáringo ibijócho jnese. Adi tu uje yapade guẽrate yuringai ibijoque ome yu nanique. 30 Ga a acásoraño yu jne iji yagapidi jne ujetiga e yibasaja yuringai eduguéjna cuchape. Ga jé u ujetiga abasója uacaringáringo ayoré dacasuté jne. Ga jé u ujetiga Israel gosode uáguerigui uje gare ore iji yirídai, a ore cho dacasuté cuchabe iji uaque jne.— 31 Uje Jesus chejna daruode udojo guesi ome ore ga catecã́ri Pédro mu chĩ́care i gatei aja ga chi chojningame: —Simon a, Simon a. Cajirape to gójni uje Satanas e catecã́ri Dupade ujetiga juégabá ua ome ujetiga chetingarape ua. Uje a chetingaripise ua dirome. 32 Mu jecucha yijócha Dupade ajei údi ome ua ãrie ujetiga ca ayapúsu banguretigai ome uté. Mu ujetiga amate ua aja bajnei tuté petingaquei uéchai ga ajnusi ua ome bajorane ujetiga acate ore ujetiga ore puja danguretigade.— 33 Mu chi jĩrique Simon chajnai Jesus arecujáidie ga chósi tome: —Yocangaráni a, cachi dimane yu ãrie, ujetiga yijinama ua aja baquitique erãpe. Ujetiga ore suru babai ga a ore suru yibai to. Jeoga ore yuque ua ga a jé yo yibaya ua jne ujetiga yipatíõra ua to.— 34 Mu chi Jesus chojningame Pédro: —Pédro, que esipise bajei gotique. Uje a jé deréjnai tudé u jne ujetiga otigásape bojórique ayoré ome yu, ga cho ujetiga cáma amóño yu to go. Ga a botigayaquéode udore a gadiógaja guesi jne ujetiga otigase bojórique ayoré ome yu. Cuchade udore a tocade jnese iji dejai tudé jne ujeta cáma cochagájnai po marínga.— 35 Jesus cho quique darógode ga chósi tome ore: —¿Ga ajnusináño to a uje yiroque uágaja erámi nanique? Ga yojningame uaque nanique: “Ca ajnócho uaquepéraque, ga jé aja uacaplátaraque. Jé aja uacarídarigo ujetiga boyo yujnomei údi.” Uje uacaboyo nanique iji uacajesui tuté erãpe ¿ga cuchárique chona uaque a?— Mu chi ore chojningame: —Ungare, que cuchárique chona yoque gotique.— 36 Mu chi Jesus chojningápome ore rĩ: —A qué yecãrape yuru quitígo ome uaque jne. Ujetiga uacuñeque guipéraque ga gosi chijócãra dagúcharigo aja ga uaque gosi chijnoque. Jé basa ujetiga uacuñeque qué jmáta ome quesérique ga uaque gosi tẽrame daguidéraque ga uacuñeque doi oréraque ome. 37 Uje yuruode qui tu gu uje é idógosipis ujetiga jnani bajade urusarane quigode tocade ome yu ujetiga yise yuringárique ducujuya ome ore. Uje ore urusarane isocai u uté: “A erámi unirisórone cho jnani sijnanguipísiji Dupade utocaidi Crísto jne.” Ga cuchade udore quigode jnese a tocade jne ome yu.— 38 Jecute chi irógode ore chojningame: —Yocangaráni a, quesé gáreode déji de yocari.— Mu chi Jesus chajnai ore ga chojninga: —Gome, ga gusu udore gáreode.— 39 Jecute Jesus jnopo rĩ ga doi dasocabei uje jecucha chicai cucarãtique uje chi i tu Olívos. Mu chi acadigode ore chajna uté aja qui. 40 Mu uje ore chise Jesus iji cucarani ójo ga chi chojningame ore: —Acatecãchoi Dupade ujetiga ca petingaquérique chibote uaque jne.— 41 Mu chi jĩrique Jesus jno ome daquitique iji siñeque uje chi ujánique cus ome ore. Mu chi chise siñeque ga jé u uje chichaga dagatáidie aja jnumi ujetiga catecã́ri dayé Dupade. 42 Ga chi chósi te: —Yapa, ujetiga bajéo ga aquetape yu jne iji yajnei tuté pujuyaquei uje a chise yu jne. Mu que yipota yipésu yajéningo gotique. Mu yajéode u ujetiga yiji báyipie quitígo ome yu.— 43 Mu chi jĩrique Dupade iroguipítique chiqueta raja Jesus uje chi garani tu gaté ujetiga teráma petotiguei tome. 44 Mu chi Jesus chopise dáyugu cuchade udore uje a tocade ome jne. Jecute chi jnusi rome dacatecãraitigade. Ga chi chejnápise daguesi ome dacatecãraitigade ga chi gajnetui yore gai ome dacatecãraitigade. Mu chi gajnetui tuté chi ayedie gajnunie chi u diquiyojnáraque ujetiga basaja jnumi. 45 Uje chi chejna dacatecãraitigade guesi chi chague ga jé u uje tibágui dacadigode ore. Mu chi chise ore mu qué ore mo. Mu chi ore ayuguhebátigade na ore aja jnumi gu, aja ore jnusiétigade. 46 Jecute chi chojningame ore: —¿Jé gotique gu a uje uacamóño a? Arijínaño uaquejode ga acatecãchoi Dupade ujetiga etoguipise uáguiji uacanguretigai ujetiga ca petingaquérique chibote uaque jne.— 47 Mu chi cáma Jesus chejna daruode udore guesi, mu chi ore chudute cojñonguemúrique adode uje chi e ore díji ore. Ga chi ore ijñai tu Júdas uje chi Jesus acadigode jõra to nanique uje chi gare ore iji yirídai. Uje chi ore chise ore ga Júdas chi sose Jesus yui ujetiga tagábu Jesus uredie. 48 Jecute chi Jesus chojningame: —Júdas, cachi yiraja bajéode quigode ãrie. Uje bapota bagu yuredie gu ujetiga ore chiraja uyu gosi ome ua. Bajegaidi u ujetiga ẽra Dupade utocaidi uyu ome ore.— 49 Mu Jesus irógode uje qué ore déji gari chi ore chimo Jesus catecãraisórone ga ore chojningame: —Yocangaráni a, ¿ga yisago queséode ome udore ore a?— 50 Mu chi Jesus irógode uñeque chi chisa quesérique ga charosa judíode ore eduguéjnai uñeque irógode uñeque angoronérac iji ãrachua. 51 Mu chi Jesus chaquĩ́ra darógode ore ga chi chojningame ore: —Ayáyo uacájningai ome ore. Ga goñome uacájningai.— Mu chi jé u uje Jesus doi uté ore iroi ga chisa angoroné ga ore iroi tuté ueradépo angoroné rĩ uje chi Jesus pésu. 52 Mu chi jĩrique Jesus catecã́ri judíode ore eduguéjnane, jé aja ore angaránone uje ore déji Dupade iguíjnai iji dirode jnese. Enga chósi tome ore: —A abáchoi yoque gu ujetiga ajnáño queséode ore ome yoque que. Jeoga pidode ore. ¿Ga oriechoqui yoque ome uacadode udore gotígo a? 53 ¿Jé gotique gu a uje uacamóño yu iji deréjnane múñi uje jecucha yiyaridi tu Dupade iguíjna cuchábi diríca, uje cucha marínga ajocáso yu ica? Mu qui tu gu uje Satanas áyipiedie e déji uacajéode jnese gu. Ga gajnui tu ujetiga e agúsoi ijnangununie ajéode. Jecute uacapótayo uacasayo yu iji de.— 54 Jecute chi ore chisa Jesus ga ore chijna aja judíode ore eduguéjna cuchátique iguíjnarique. Mu Pédro chajna quigade uje idajapise múñi. 55 Jecute chi ore chise uté iguíjnai ga chi cojñoc uñéngo ore pésu daquetátique pioque iji guesáringarique iji ore ajã́roraque. Mu chi cojñone uñéngo ore chaparu gai, ore iquetai tuté, ga chi Pédro déji udore ore ujade to. 56 Mu chi jĩrique ore irógueraque uje chi déji ore gari to chi chimo Pédro ga toji gai. Enga chi gapua tuaté chojninga: —Cachi yiraja uté ga uté jõra Jesus to diríca ãrie.— 57 Mu chi Pédro chotigasipise ga chi chósi tome: —Cachi que ũré ua gotique ãrie. Cáma yimo uté gosi to go.— 58 Mu chi jé isocai tu ome jnani uñeque. Uje chi dicasé uqué múñi uté gosi chise ore to ga chojningame Pédro to: —Yiraja ua ga bãjora Jesus ore to diríca.— Mu chi Pédro chojninga: —Jnani a, cachi bo paraque ãrie. Uje a ca uyu u gotique.— 59 Deréjnai uté jé u uje chi uñeque chirajápo rĩ, ga chi chósi tome: —Jé ũrepise uje uté jõra ore to diríca. Uje Galiléa gosi Jesus urása uté to.— 60 Mu chi qué Pédro chajo raja uje chotigase ore ga chi chojninga: —Jnani a, que yirajapise bojningai tuté gotique.— Mu chi Pédro cáma chejna daruode guesi iji uté ga chi jé u uje cochagájnai tuqué agoyé jogadi tu. 61 Jecute chi ore angaráni Jesus chiguísãre Pédro gai ga chi chajire. Ga chi jĩrique Pédro jnusina Jesus uru qui casodé uje chojninga: —A cáma cochagájnarique po iji dejai tudé jne ga a otigase yu ga gadiógaja guesi jne.— 62 Jecute chi Pédro ajengopísome dadode ga chi jnoji ore gari ga chi chopise dáyugu re ga po ga chisa dabade aja daqui. 63 Udore chi quigade ga Jesus isasórone uje chi ore irodique chi ca ore ajéngome gotique. Ga chi ore chujñieta ga ore pojnapo údode rĩ. Ga chi ore chujépo údode rĩ. 64 Jec u uje chi ore suru Jesus edodie ome borapetique ujetiga ca chimo cuchárigaja re. Ga chi uñeque chujé uredie ga jé u uje ore chojningame: —Arajape uté gosi ujetiga uté gosi yuque ua que a.— 65 Mu chi jiépisi ore isoca uñéngo rĩ ome ujetiga ore chujñieta gaté mu ore idojnongamátiga. 66 Mu quene direjnipe uje chi judíode ore eduguéjnane, ore asutépisedie ore chamáta ñane. Jé aja Moises urusarane atatasórone eduguéjnane ore rĩ. Ga chi ore jno Jesus údi aja ore uáguedaté jogadi uje chi ore gaidi tu gu ujetiga ore catecã́ri Jesus údode ome bárigo cucha uje ore chisa. 67 Mu chi Jesus déji ore gatocoro ga chi ore chojningame: —¿Ga jé Dupade utocaidi Crísto tu ua ya?— Mu chi Jesus chajnai ore ga chi chósi tome ore: —Ujetiga yojninga: “Ejẽ, upúsu yu,” mu a ca anguretáyorase yu gotique. 68 Ujetiga yicatecã́ri uaque ome cuchárique, mu a ca achajnáñorase yuruode. A ca arañoporas ome yu jne rĩ. 69 Idógosi ujetiga Dupade utocaidi uyu yácariji Dupa pujnuéngaisṍri ãrachua enga a jé yijogadi u.— 70 Uje chi ore chudute Jesus uruode udojo ga jĩrique ore catecã́ri ga chi ore chojningame: —¿Ga jé Dupade abipísi tu ua ya?— Jecute chi Jesus chajnai ore ga chósi te: —Ejẽ, cachi qui tu uacaruode udore.— 71 Jecute chi udore ore, ore chojningame ñane jnese: —E yipáñangoji uté bai jnese uje bai u uje cho Dupade iji re. A jé ca togome yoque ujetiga yangácoi ayoré uñeque ome ojñaringo go ome uté. Uje jé uyoque upúsu gu uje yuducopise uté ojñane ome bai ome re.—
1 Jecute chi judíode ore asutedie, ore chague jmame jnese ga ore chijna Jesus aja ore asutépise, Róma gosi, uje i u Piláto. 2 Uje chi ore chimate rágaja Piláto iquei ga chi ore chijnime darade ome Jesus uje chi ore chaguhéta cuchade gai jnese. Ga ore chósi tome: —Eduguéjnai Piláto a, yico jnani udé iji ijnimingone dara gai ome yocurásade judío diríca. Chiese que yocajnei tu gotique ujetiga yoco yocoré ome Róma gosode uaqueduguéjna cuchábi. Mu que gusu udojo mu chingopo raja uyoque enga chiese yoquijnati Crísto u ujetiga yoco yoqueduguéjna cuchábi iji.— 3 Jecute chi Piláto jĩrique doi ga catecã́ri ga chi chojningame Jesus: —¿Ga jec ũré ga judíode ore eduguéjnai gotique u ua ya?— Mu chi Jesus chajnai ga chi chósi tome: —Cachi jé u ãrie baruode udore quigode uje bẽ́caraja yu que.— 4 Mu chi Piláto chojningame judíode ore eduguéjna cuchábode ore: —Que yisípise jnani tuté bárique gotique jõ.— 5 Mu chi judíode asutedie ore chajopise rágaja dájningai ome. Ga chi ore chojningame Piláto: —Cachi uté badatéode upúsu ãrie uje chijnime darade ome yocurásade ore iji Judéa údode jnese ujetiga ca ore tangaripísi deduguéjnane, Róma gosode ore. Mu chajnerame dacajnaqué gajnaréngone gaté uje chacate ore iji Galiléa iji taningapísi ga jé chuságaja udé deréjnai ome Jerusalen gosode ore uyoque to.— 6 Mu chi Piláto chudute udore ore ojningane cucha ga chi chojningame ore: —¿Ga jec ũré uaque ga Galiléa gosipise uté a?— 7 Uje chi jec ũrepise ore ome uje chi Galiléa gose ga Piláto chojninga: —Jé arec ujeta aróchobája ore eduguéjna cuchábi uje uté i tu Heródes ga chimope to.— Uje chi qui tu gu uje Galiléa gosode ore eduguéjnai tuté ujeta doi dasocárique ome. Ga chi ca piraque ore áyipiedie ome ñane gotique uje chi dimane Heródes iji Jerusalen gosode ore gari iji dirode udore. Jecute chi jĩrique ore jnosi Jesus údi aja ore eduguéjnai Heródes. 8 Mu chi Heródes uté gotique chi chimo Jesus to ga nínapúsu yui. Uje chi diyajmaque gu uje chi chudute uté ujnoméone to ga chi jecucha potapísa jeta chimo uté to. Ga potapísa ujetiga Jesus pesabu dapesute cucha pibojma iji uté edomitígo to. 9 Heródes chi catecã́ri joroque Jesus ome cuchade, mu chi ca Jesus chajnai gotique. 10 Mu chi qué judíode ore asutedie déji uté to, jé aja Moises urusarane atatasórone ore. Enga ore chaguhéta cuchade Jesus gai enga More chajo raja daruode quigode. 11 Enga Heródes, jé aja soldádode chi ca ore ajéngome Jesus go uje ore chujñieta. Uje chi ore doi ga ore na Jesus aja iguidé ueradedie uje chi cho eduguéjnane iguidedie. Ga jĩrique Heródes chirogapo aja Piláto rĩ. 12 Mu chi jĩrique Piláto, Heródes ore chise daringane pimeseraque ome ñane iji dirode udore. Uje chi ore umajosõre ñane nanique iji taningárique. 13 Mu chi udojo quigade ga jé u uje chi Piláto chamáta judíode ore asutedie jnese. Jé aja cojñonguemui ore rĩ. 14 Mu chi jĩrique catecã́ri ore ga chi chósi tome ore: —Judíode uacaríño jnani uté údi que aja yu. Uje uacojnichome yu que: “Jnani tudé que chajire re ome dajnimingone dara ome yocurásade.” Yicatecãripísi jnani tuté que ome cuchade udore jnese. Mu que cucha marínga yise uté bárique cucha que, uje ucué jorógui uacaborátajade cucha ome que múñi. 15 Que yujoi eduguéjna Heródes chise bárique to go. Jecute jĩrique chatĩre yoquibai. Jecute que yirajagópise yoquisocáringome uté ome uringárique chuque. Uje que yico bárique gu.— 16 Jecute chi chojninga: —Gusu jne ujetiga yo yujuñame uté mu a jĩrique yĩrapome jne rĩ.— 17 Uje chi Piláto isocabei u uje chi chise ore jnusinamáni dire ga chi chijócãre dajurúgayode chojmárarique. Uje chi jecucha adébeque gu. 18 Mu chi ca cojñonguemui chise Piláto áyipiedie unétique. Ga ore chojningame: —Ungare, a ca u bojningai uté gotique mu jec arec ujeta Barrabas u baramérique jne.— 19 Barrabas uté gotique bade u uje chi ojña cuchade ome ujode judío ujetiga ore tagu ore eduguéjnane áyipiedie aja iji ore idai údode. Jé bade upo rĩ uje chi chujé dojórique cojñoque. Jecute ore suru gai nanique. 20 Mu chi qué Piláto catecã́ri cojñonguemui gaté ujetiga jocãrai jé u jorógu Jesus. 21 Mu chi cojñonguemui ore chinguíra dabijnanone aja uje chi ore chejnápusu ga chi ore chojningame: —Jé ajéyo Jesus uté, ga ajóyo aja curesérique gai.— 22 Mu chi Piláto qué catecãrápoi ore gaté rĩ ga chi chósi tome ore: —¿Jé uté ipesutique cucha gajnareque que a? Uje yajiripise uté adode aja quigode mu que yise uté bárique gotique ome uringárique chuque. A yope yujuñame ga a jĩrique yijócãrapo jne rĩ.— 23 Mu chi cojñonguemui chajnerame dájningane ome. Ga chi judíode eduguéjnane, cojñonguemui ore, ore chinguíra dabijnanone aja jnese uje chi ore ajegaidi tu ome uringárique chuque gu. Mu chi Piláto chachopise ore ipojnaquéode gu uje ore chajnéra dájningane údi ome. 24 Ga jé cachodi tu uje tẽra Jesus ome ore ujetiga ore doi dasocáringome. 25 Mu chi Piláto uté doi ore áyipiedie enga chirame Barrabas, dajurúgai uté uje chi suru gai ome bárigo ica. Uje chi bade u páyipie gajnaréngueringui ome deduguéjnane ore, uje chi cojñoque yungore to ica rĩ. Jé basa ga juéga Jesus ome ore ga chojninga: —Beyoi uacasocáringome uté jne.— 26 Uje chi ore jno Jesus údi aja cachodi yui ujeta ore chajo aja curesei gai ga chi ore chise jnanírique uje chi idai tu Cirene. Chi i tu Simon uje chi quene tṍraji erámi. Mu soldádode ore doi uté ga ore chisi ome Jesus gajnei curesé ome uté ujetiga chijnongamája Jesus quigade. Uje chi ore cheru cucarani aja Jesus cachodi yui. Enga que togome Simon uté gotique ujetiga chetaque soldádode áyipie ome re. 27 Mu chi cojñonguemúrique ore nóna to, jé aja chequebúrique ore to rĩ. Ga chi chequedíe ore chisa dabade aja daquigode uje ore poji Jesus ejode ome dajnusiétigade ome uté. 28 Mu chi Jesus chaquĩ́ra ore ome ugoi ga chi chojningame ore: —Jerusalen gotodie uaque a, jé ca abóyo yejode. Mu uacagoyedie jé gajnetodie urásu uaque. Jé gajnesórone urásu uacabode rĩ. 29 Uje a chise deréjnai jne ujetiga Jerusalen gosode uacajnei pujuyaquérique chise uaque. Enga a ore chojninga: “Omi turásu ujetiga abéra yoque enga íjnoque yocabode.” 30 Uje a Dupade ca chajire re ome dajuyaquedatei tome uaque dirome. Jecute a cojñone ore edosaré re joroque raque dirome iji jmáinie ga a ore chojningame raque dirome: “Jé gotique gu a uje que cucarãte cuchábode udore pero yoquibáyode jnese. Uje que yipótago yimóngo joroque Dupade ujuyaquei tuté gotique to a. Jeoga yocajéode u jorógu ujetiga orocórigui chaco joroque yoquibáyode.” 31 Dupade cho pore ijõre iji yu ome yuringai ayoré paraque marínga mu jé juregate yu ujetiga ajéyo yu uje uacamácho yu aja jnumi. Jé basa ga Dupade cho pore togué iji uaque ome uacaringane ayoré sijnácho. Mu jecute a dopísi datéringáringo ome uaque jne ome uacaringáringo pumajo.— 32 Ca gusu Jesus go uje ore jno údi ome cachodi uté mu chi ore cháta cojñoque gárerigo to uje chi oriechoqui cuchape ore ujeta ore cho dabaya Jesus to. 33 Mu chi ore chise ore gajmitique uje chi i tu Patode Ajnoquei. Ga chi ore chicha Jesus ore cachodi aja. Ga jé ore chátaja jnani oriechoqui gareiso ore uje ore chajo ore aja cureséode to. Ga chi ore chicha uñai aja Jesus ãrachua. Jé basa ore chicha uñai aja arasei. 34 Mu chi qué ore déji Jesus gari uje ore chajo aja curesei ga chi Jesus catecã́ri dayé Dupade ome ore ga chi chósi tome: —Yapa, ca o bajocaningame ore jne. Que ore chiraja uyu gosi gu.— Uje chi e ore chimate Jesus ore aja cureséode ga chi soldádode ore canáji Jesus iguidedie ejode ujetiga ore ajñamini yugónique gajnei Jesus iguidedie. 35 Mu chi cojñonguemui ore toji Jesus gai jnese. Enga ore asutérigui chujñietapise gaté ga chi ore chósi tome: —Cajicho to uté. Chiqueta cojñoc unejátigo diríca múñi que doi ga chiquetape re gajneri. A yimóngorase ujetiga jé ũrepise ome uje chiese Crísto u, Dupade ajegaidipísi uté gotique.— 36 Chi jé cho soldádode to uje que ore ajéngome gotique rĩ. Ga chi ore chujñieta to. Ga chi ore sose yui ga chi ore chisi ome cucha otatique ome uje chi sujnapise ujetiga chóji. 37 Enga chi ore chanire ga ore chósi tome: —Ga jé ũrepise ga judíode ore eduguéjna cuchábi gotique ua ya, ga be ga aquetape ua iji uté.— 38 Mu chi ore chicha dajuyárigo darusãraque aja Jesus gatoi gai iji gajnei curesé. Uje chi ore urusarane udore chi purusãraque quedéjnane. Ga chi Grécia gosode ore urusãraque uñane. Jé Róma gosode ore urusãraque uñane. Jé judíode ore urusãraque uñane. Uje chi quigode u udojo: “Judíode ore eduguéjna cuchábi u udé.” 39 Mu chi oriechoquíode uñeque qué tṍra daruode aja Jesus to uje e déji gaté to múñi uje ore chajója curesei. Ga chi qué pojna Jesus to ga chi chósi tome: —¿Jé gotique gu a uje chiese Crísto u ua múñi jé qué be ga aqueta ua, ga aquetápo yoque to jne rĩ?— 40 Mu chi oriechoqui uñai chajnai dãjorai uruode ome Jesus uje chi chirota Jesus gu. Ga chi chósi tome: —¿Gotique gu a uje a ca atodo Dupade to a? ¿Ga jé ca amo to a uje yocopise ñane ome yocuringane pujuya iji cureséode udojo gatéode a? 41 Yirajágo uje que ore chujé yoque bisideque go. Mu ore chiraja yoquibade cucha. Jecute yocajnenguiráso ore ujuyaquéode udore. Mu jé basa ga jnani tuté iji yocujai, que bárique cusipise mu jé ore chujé bisideque to.— 42 Jecute chi jnani oriechoqui tuté uje chirota Jesus qué catecã́ri Jesus ga chósi tome: —Jesus a, ujetiga ese baringárique dacasuté dirome iji bedai ga ca báyipieraque jnoji yu to dirome.— 43 Jecute chi Jesus chajnai uté uruode ga chi chósi tome: —Jé ũrepise yu ome yuruode uje yósi te ome ua, a jĩrique yimóngo ñane gajneri iji yapade idai iji gaté, jnupe ueradi, uje baqui jé u to gu.— 44 Mu e chise guedé gatocoro iji deréjnai tuté. Mu ore chunina mu deréjnai chi tocade ome ore ga chi topiepise jnumi ga jé chuságaja guedé uje cho jñuque uje chi topiéjna jnumi. 45 Jecute chi ca guedé pusapoi daringárique guedé rĩ. Ga chi topiepise edo. Mu chi jé basa ga borapeque cuchábi casé iji Dupade iguíjna cuchábi ajei puyai yui chi dajuguiji gatocoro. 46 Mu cuchade udojo chejna daguesi ga jé u uje Jesus tibite. Ga chi chósi te: —Yapa, yẽra yáyipie tome ua ujetiga yijíñome yu iji bajmáinie jne e.— Mu chi chejna daruode udojo guesi ga jé u uje toi. 47 Uje chi soldádode ore eduguéjnarique Róma gotique uje pañáji Jesus adode udojo ga jec u uje tija Dupade ga chi chósi tome: —A jec ũrepise yu jõ. Uje jnani tuté cho dabána udore bisideque ome daringai chuque. Uje obiréjna quigode múñi uje jnani paraque.— 48 Mu chi cojñonguemui ore chimo cuchade udore ome raque uje chiquetápise raja ore ga chi jé jogadi tu uje chajuguipise ore agutedie. Ga que ore chiraja dasocáringome re. Ga chi ore jnoji uté ga chi ore tãrara aja daquigode ome dasadodéringane uje chi ore chopise dáyugu raque. 49 Mu chi Jesus joráringo jnanío, jé aja chequérigui rĩ uje chi ore chajna Jesus iji Galiléa, chi qué ore cháji Jesus cachodi ujetiga ore chirote iji. Mu chi ore ujánique cuse iji cachodi tuqué. 50 Mu chi jnani parátique déji nanique uje uté chi i tu José uje idai i tu Arimatéa iji ore uniri Judéa. Uje chi judíode eduguéjna cuchábode jõra uté. 51 Mu chi eduguéjnai uté changuretapise Dupade yui ome daringárique piquetangore ujetiga chirota judíode ore ome ore umajosórone. Jecute chi chetaguipise dojode eduguéjna ore isocade ome Jesus ucacasé uje ore chimanipise aja jnumi. 52 Jecute chi uté jno ga chijócha Piláto ajei údi ujetiga Piláto juégabá Jesus ga chañuru Jesus guio ujetiga chijochamome. 53 Mu Piláto juéga ome ga jé u uje José uté jno ga chicai Jesus ore cachodi. Ga chiamurase Jesus ga chipocásu gai iji ore itarãtique borapeque ueradéjna. Ga jé u uje jno údi aja ducóderigui. Mu chi chise ore ejopiéraque iji cucarané cuchabéraque uje chi edo dimane ore imané. Mu chi cáma pijmarique cojñoque totígaja gotique. Jecute chi jĩrique na Jesus taja. 54 Mu chi dire puyai tu dirome. Jecute chi cojñone ajiriguipise dasagode ujetiga ca ore chisa dejórique iji dire puyai tuté dirome. 55 Mu chi cáma chise dire puyai tuté ga Galiléa gotodie ore chajmita Jesus ode jogatique to. 56 Mu chi ore chajni aja daguíjnane ga chi ore socárome datígo uje ore pésu dadode ome Jesus yui ujetiga ore chaguñéra gai dirome ome doitígo cucha otate ai unéño, acéiteode ore. Mu chi ca togome ore ujetiga ore chajmitápo ode rĩ iji diri uté. Uje jé ore gaidode u Moises iroquéode urusarane quigode gu ujetiga ca ore chó iroquérique gánique uje chi ca pujuregate cucha pisatíguiji dire puyai tuté.
1 Chi chise dínique iji dire puyai quigade ga jé u uje chequedíe ore choberipísi ore ódedie yui. Uje ore chijna dapesudi casodé cucha ai unéño. Jé aja acéiteode ore. Ga chi ore ujórigui chequei nóna ore to. 2 Mu chi ore chise Jesus ode casé mu cucarané casé que dépoi dasoca casé rĩ. Uje chi ore suru gai ome diríca múñi. 3 Ga chi jĩrique ore chacája cucarané edo ajei mu chi ca ore chimo Jesus ajnoquetígo iji. 4 Mu chi jé u uje chajuque ore agutedie. Uje que ore chimo uté atíguiji go, ga chi ca ore chiraja dasocáringome raque. Mu chi diga ore chajire dejoi mu ore chimo jnacare gáreode iji uje chi ore iguidedie chi chijninguese te. 5 Mu chi chequedíe udire chi ore chajire jnumone uje chi ore todópisa ore gu. Mu jnacare gáreode udore chi ore narare ga chi ore chósi tome ore: —¿Gotique uje uacacueyoi ayoré uecárique iji ducódedie udaji gari a? 6 Uje uacacuei tuté Jesus e que déji de gotique. E ecápo que rĩ. ¿Ga jé ca ajnusináño uru cásodica uje chósi tome uaque uje qué déji uacari iji uacaniri Galiléa ica ya? 7 Uje chósi tome uaque ica: “A ore tẽra Dupade utocaidi uyu ome jnani sijnángone jne ujeta ore chimate yu aja jnutique ga ore cho dajuñame yu ga ore chajo yu aja curesérique jne. Mu a chise dire gadiótigo jne ujetiga gadióguiji yi ga jé u ujeta yĩrijíapo jne rĩ iji yuringárique toque.”— 8 Jecute chi jĩrique ore jnusinapísa Jesus uru cásodica gotígo ome ore. 9 Ga chi jĩrique ore jno ga ore chajnésara dedai. Mu chi jĩrique ore chatata pujnoméone udore jnese ome Jesus irógode ore uje chi chojmára ore iji yirídai. Jé upo ome udore ore jnese uje chi ore déji ore gari. Ga chi ore cho dojñame ore jnese. 10 Chequedíe uje chi ore óite pujnomei tome Jesus irógode ore jnese ga chi ore íode u udojo: Maria Magdaléna chi uñáraque. Juána chi u uñáraque. Maria uje Jacóbodaté chi uñáraque to. Jé aja ore jõrárigui chequei to rĩ. 11 Mu chi Jesus irógode chi ore cho ũrusoi iji chequedíe udire ore. Ga chi ore chotigasipise ore ome ore ojñane quigode. 12 Mu chi Jesus irógode uñai Pédro chi qué chajmita Jesus ode jogadi to. Ga chi jno ga chayopísiji yui jeta jé ũrepísi chequedíe ome ore ojñaiso. Mu chi chise mu chi chajire ajei mu chi Jesus iguidi casodé borapeque uerácho chi doi ti ejoi. Mu chi ca Jesus déji go. Jecute chi jĩrique chajni ga chi tijapísa cuchade udore uje tocade ome ore ga chopise dáyugu aja daqui. 13 Mu chi jé diri uté u uje chi Jesus acadique gárerigo chi ore chicai ore idánique uje chi i tu Emaús. Uje chi kilómetrodie déji chojmarai iji yirídai iji Emaús, Jerusalen ore ujai. 14 Mu chi ore tijapísa cucha dacadode udore uje ore cho dojña ome ñane aja dajei iji Emaús yui. 15 Mu chi qué ore déji dojñane udore gai uje chi ore botãre ñane ome Jesus adode mu Jesus chi diga sose udore ore yui ga jec u uje nóna ore to aja dajei. 16 Chi ore chimo uté múñi uje sose ore yui mu chi ca toguipis ome ore ujetiga ore chiraja uté gosi iji uringárique ayoré. 17 Mu chi jé jogadi u uje Jesus catecã́ri ore ga chi chósi tome ore: —¿Gotique que a uacojñane udore gajnengónique? ¿Gotique to a uje uacoyópise uacáyugu a?— 18 Mu chi uñeque chajnai uté uruode uje chi i tu Cleófas ga chi chósi tome: —Cojñonguemui ore jnese iji Jerusalen údode ore chudute pujnomei ichai tuté jnese. ¿Mu a ca adute cuchade udore to a?— 19 Mu chi jé Jesus chajnai ore ga chojninga: —¿Jé gotígo a cucha tocachugode a uje uacabotã́cho uñane ome a?— Mu chi ore chajnai ga chi ore chósi tome: —Yoquibotaquéode gajnengóri tu Jesus ucácasicá uje idai tu Nazaret ica. Dupade uruode atatasõre ica enga cucha pitijácho uruode jé aja ipesudode rĩ ome cojñone uyoque jnese. Enga ujopie garani u Dupade. 20 Yoquicatecãraitigade udojo gajnengórone upo rĩ uje que yirajágo gotique gu uje judíode yocasutedie, jé aja ore angarádejnane ore juéga uté ica ujetiga chuque ga pajója curesei. 21 Yocopise yocáyugu gu uje yocajéode u ica múñi ujetiga e Dupade ojningai utocaidi u uté to ica ujetiga chiqueta uyoc iji yocuniri, Israel gosode ore uyoc, ome yocumajosóningo. Mu quene dirode gadióguiji uté yui uje ore chujé diríca. 22 Jé isocai tu ome direjnime tuqué to. Uje yocopise yocáyugu uje yoquijoranie chequei ore di uté ujnomei údi que. Mu ore ojñane chajuque yocagutedie que. Uje ore tibágui uje qué dúrasape múñi, mu chi íjnongome ajnoquetígo iji ode jogadi. 23 Mu chi uje qué ore déji Jesus ode jogadi mu uje que ore chimo cucháriguiji ga jé u uje ore chajni. Mu chiese gaté unirisóningo chiqueta raja ore iji uje chiese Jesus ucacasé ecápo rĩ. 24 Jecute chi jĩrique yoquijorane uñéngo ore tibágui to ãrie Jesus ode casé jogadi mu chi jé adi tu chequedíe uquidé ore ojñane uje chi ca ore chimo Jesus iji ode gotique.— 25 Jecute chi Jesus chajnai ore ga chósi tome ore: —¿A ca pijnimique uacãrírique jõ ome uacajné cásodica pacajnaquéo? Uje a arajáyo Dupade uruode atatasórone, jnani bajaque urusarane quigode ica mu a ca anguretáyopise go. 26 ¿Jé ca ũré yu a ome quigode udojo uje déji Dupade uruode ga utocaidi tuté Crísto a qué pujuyape bajaque jne? Mu udojo quigade ga jec u uje chise daringárique dacasuté pujnuéngaisõre ome yoque jnese.— 27 Jecute chi jĩrique Jesus doi uraque daruode quigode ga chi cho quique quigode ome ore. Enga chósi tome ore: —A yingomome Dupade uruode quigode ome uaque jne. Mu a yajirigode u uru quigode uje chatata datocaidi Crísto ujnoméone ome uaque.— Jecute doi Moises urusarane quigode ome ore bajaque. Mu chatapója Dupade uruode atatasórone jnani bajácho ore urusãratígo quitígo rĩ. 28 Mu chi quigode jé u udore uje chi Jesus chacate ore aja dajei. Mu chi ore chise daqui ore idai uje chi ore chácariji jne. Mu Jesus chãra re iji ujetiga qué jnome gatei. 29 Ga chi jé jogadi u uje ore nejé Jesus údode ga chi ore chojningame: —Acarabi yocari to iji de. Uje guedé e jnopise ãrie. Ga e idógosi dejai uje a dejágome ua jne gu.— Jecute chi Jesus chacája ore gari iji ore upusiédi to. 30 Mu uje chi e ore chamáta ñane aja dagapié ejode ujetiga e ore taque mu chi Jesus chisa arurétigo mu chi qué catecã́ri dayé Dupade bajaque. Mu jé u uje chi chajúgaja jnumi ga jé u uje chi chisi ome dajorane ore to. 31 Mu chi quene ore chiraja Jesus ome uringai Jesus. Uje chi quene ore áyipiedie chuchẽre dabáyode. Mu uje chi ore chiraja uringai Jesus, ga jé jogadi u uje bijnapome ore rĩ. 32 Jecute chi ore chojningame ñane: —¿Ga jé déji ua to que a, uje uté nóna yógaja dajei ga yajmarangopúsu acajnaquéode quigode que aja dajei údode uje cho quique Dupade uruode quigode ome yoque?— 33 Mu uje e ore chiraja uje Jesus jé ũré uje ecápo rĩ ga que ore chajirape cuchárique. Chi jĩrique ore jno ga ore chajnésarapo Jerusalen rĩ. Uje ore di ga ore chise Jesus irógode ore uje chojmára ore iji yirídai uje qué ore déji dajorane uñéngo ore gari to. 34 Mu chi uje ore chise dajorane ore uje ore déji Jerusalen mu jĩrique ore chojningame dãjora díode: —Jé ũrepise yocangarádejnai Jesus ga ecápo rĩ. Ga Simon Pédro chimópise to que.— 35 Jé basa ga chi ore cho dojñame ore to. Ga ore chósi tome ore: —Jé cho yoque rĩ uje yocangarádejna casica chiquetápo raja yoque to ga nóna yógaja dajei to que. Ga chacásõra yóguiji yocagapidi iji yoquiyaridi guiguíjna que. Ga chajuque arurei iji jnumi ome yoque que. Ga qué chajuguína arurei tome yoque to. Mu udore u uje jĩrique yirajágo uringai Jesus.— 36 Mu uje chi qué ore déji dojñane udojo gai ome ñane mu chi jé jogadi u uje Jesus chiquetápo raja ore rĩ ga chi chósi tome ore: —Yajéode u ujetiga pajesereringai déji uaque.— 37 Mu chi chajuque ore agutedie jnese ga chi ore todópisa. Chi ore josipise eti poré gatéraque u ujetiga chiqueta raja ore. 38 Mu chi Jesus catecã́ri ore ga chósi tome ore: —¿Gotique gu a uje uacatodóyo yu a? ¿Gotique gu a uje uacaboyója yu? Ga uacajoso poré gatéragaja yu. 39 Cajicho to gojni yijmáinie, jé aja yirídade rĩ, ojnaquero casidé ore piédie udire. Jé uyu u ãrie. Ajocáso yu gojni a. Uje jé uyu u. Uacarajayópise to uje poré gatéraque que toc ujetiga pãrírique déji. Jé chopo ome ajnoquetígo rĩ. Mu uacapáñaño yu uje cuchade udojo déji yu jnese. Ga que toc ujetiga poré gaté yu go.— 40 Mu chi urúo udojo ga jé u uje chingo ojnaquerodie piedie ome ore iji dajmáinie. Jé aja darídade rĩ. 41 Mu chi ca ore chirajápise dasocáringome re uje ore tija rac uje ore ninapo raque rĩ. Uje chi ca ore áyipie déji jorógui ujeta Jesus upúsu. Mu chi Jesus narare ga chojninga: —¿Cuchárique qué déji de ujetiga yagábu to a?— 42 Mu chi ore doi oyite petique ga ore chisi ome mu chi uñu oyídi uté. Ga chi ore chátaja cuténique petique. 43 Jecute chi chisa udore ga jĩrique tagu iji ore iquei. 44 Mu chi jĩrique cho quique cuchade udore jnese ujeta ore chiraja quigode. Ga chi chósi tome ore: —Yajnéone pujuyaquéo u udore uje yingo uaque ica uje qué yugúsi uaque ica ujeta tocadepe jnese. Uje a amóño to iji Moises urusarane quigode. Jé aja Dupade uruode atatasórone urusarane quigode. Jé aja David urusarane quigode rĩ uje David urusarane udore i tu Sálmos. Uje udore ore urusarane jnese quigode u yajnéone cucha dacacho udore.— 45 Ga chi quene jogadi tu uje ore chirajápise purusarane udojo quigode uje chopise quigome ore gu. 46 Ga chósi tome ore: —Uje ore urusarane iji darujna aone chi quigode upúsu udojo. Uje chi Dupade utocaidi Crísto chi gajnei tu ujetiga pujuya bajaque. Mu chise díningo uje gadióguiji yui ga jec u ujetiga gajnei tupo rĩ ujetiga niji iji dagachotique, daringárique toque ga ecápo rĩ. 47 Mu chi gajnei upo rĩ ujetiga anguresóningo ore jno ujnomei údi aja quedéjnane, ujetiga ore chingome ore iji punirone jnese. Mu chi ore gáite bajai tu ore idai Jerusalen ujetiga ore chingoba ore iji bajac. Mu chi ore oidi tuté pujnomei turásu ujetiga ore chósi tome: “Beyoi ga écãcho uacatígo ome uacasijnaringuéone. Ga jé jogadi tu jne ujetiga Dupade utocaidi Crísto chĩro uacasijnaringuéringo.” 48 Enga a yipijogusórone u uaque jne. 49 A yiroque yai Dupade Ujopie aja uaque jne uje chichaga uaque nanique. Mu jé ayáyo iji de ore idaidatei Jerusalen, jé aja deréjnai ujetiga Dupade Ujopie uaté chise uaque to uje garani tu gatajnoquei.— 50 Jecute chi Jesus chijnime ore iji ore idaidatei ga chijna ore aja ore idánique uje chi i tu Betánia. Ga jé u uje Jesus chãrai dajmanáyone iji gaté iji ore gai ujetiga chacacãre ore. 51 Mu uje chi chejna dacãratigade udojo guesi ga chi noñome ore, ga chi jno ga chicai gaté. 52 Ga ore chicotapísa Jesus ga jec u uje ore chajniapója Jerusalen rĩ ga ore nínapúsu rágaja dajei. 53 Chi jecucha ore ijója Dupade iguíjna cuchábi ujetiga ore jno daninaquei uté údi ome Dupade uje ore chicota. Amen.
1 Uje cáma pipesute erámi iji taningai mu Dupade áyipiedie pijogúsõri jé jogate. Enga uté déji Dupade gari nanique enga Dupade jé u uté to. 2 Dupade garijogosṍri uté jé jogate Dupade gari iji taningápisi. 3 Enga Dupade angúromei u uté uje ipesute cuchade jnese. Uté imanique cuchade iji erámi jnese enga que cucha amínique cuse ujetiga ca ipesute. 4 Enga pucuecaringuei gajnesṍri u uté. Enga quene díreca jnanione ore áyipiedie uje uté guẽrate pucuecaringuei ome ore. 5 Uté chijñate ijnangununie gáyode. Enga que togome ijnangunua uaté ujetiga chajni uté idirecaringuei. 6 Dupade utocaidi cuse nanique enga i tu Juan. 7 Dupade ajegaidi u ujetiga Juan uté chatata direcaringuei guẽrasṍri gosi ome ore ujetiga ore changureta. 8 Que direcaringuei guẽrasṍri u Juan gotique. Mu Dupade utocáite ujetiga chatata direcaringuei guẽrasṍri gosi. 9 Enga Juan atatagode u uje direcaringuei guẽrasõripísi uté a jĩraque di jne iji erámone. Enga direcaringuei uté u uje chijñate erámi unirisórone ore gáyode jnese. 10 Dupade angúromei u dáyipiedie pijogúsõri uté nanique uje pésu erámi iji taningai. Mu uje uté chise erámi enga que erámi unirisórone chiraja uje erámi ipesungóri u uté. 11 Uté gajneque erámi, unirisórone ore mu que ore chimesere nanique uje chise ore. 12 Mu uñane ore chimesere enga ore changureta. Jecute chinoningase ore enga ore chise daringane Dupade abío. 13 Mu ore uringai Dupade abío que cho ore uringane ayorei abío. Uje ore dayode ayoréo chisa ore datedie nanique jecute ore basiji datedie. Jé basa ore uringane Dupade abío garani u Dupade áyipiedie ome ore. 14 Enga Dupade áyipiedie pijogúsõri pésu re enga cho erámi unirisṍri iji re to nanique. Enga déji yocujade nanique iji erámi udé. Enga chijnorapise yoque. Enga ũrepíso arecujáidie. Yimóngo ingoningájnai. Enga cucha daté ingoningájnai uje Dupade ape ugurui u uté gu. 15 Dupade utocaidi Juan chojninga: —Yojningai jé u jnacari uté uje yacate uaque diríca. Uje yojninga: “A Dupade utocaitique uñeque diapo jne rĩ iji yiquigade. Uté u uje sué yibai. Uje cáma yibase nanique mu uté jé jogate.”— 16 Enga uyoque jnese yocajneque uté icaniratiguedatei. Enga uté chosõre yoque gatuac, tuaque. 17 Yirajágo uje Moises di Dupade iroquéode údi iji darásade ore nanique. Yirajagopo rĩ uje Jesucrísto iringuío dai Dupade ijnoraquei údi ome yoque. Enga e yirajágo cucha uréone gu Jesucrísto. 18 Que uñeque chimo Dupade gotique. Gusu Dupade ape ugurui u uje chingo dayé aja yoque. Chamáñaje Jesus, dayé Dupade ore cháta raja ñane ome dáyipiedie gu enga que ore chiamurase ñane iji dajéode go. 19 Chi judíode ore eduguéjnane iji Jerusalen ore chiroque sacerdóteode, levíteode uñane aja Juan ujetiga ore chiraja uringárique ayoré. 20 Diga ore catecã́ri Juan ujetiga ore jnati Crísto u. Mu Juan chingopísa ore enga chojninga: —Crísto que u uyu gotique.— 21 Enga chi ore catecãrápoi Juan gaté rĩ enga chi ore chojninga: —Ujetiga Crísto ca u ua, ango ua aja yoque. ¿Ja Dupade uruode atatasṍri Elías u ua ya?— Mu Juan chojninga: —Que u yu gotique.— Jecute ore chojninga: —Ore erángani Dupade uruode atatasõre ¿ja u ua ya uje chi di jne iji yoque?— Mu Juan chojninga: —Que uyu u gotique.— 22 Chi jé ore ate uje ore catecã́ri Juan enga ore chojninga: —Ango ua gosi ome yoque enga yirajágo ua. Ga yingongo ua aja yoquirósorone ore. Ore potapísa joróga jeta ore chiraja ua gosi.— 23 Jecute Juan chajnai ore enga chi chojninga: —Dupade uruode atatasṍri Isaías ojningai u yu uje chojninga: “A pududicho gosi pijnane jne uje tṍraji erãpe taretigai. Enga a uté chojninga: ‘Achẽcho dajei gai iji Yocangarádejnai iquei.’”— 24 Fariséode ore iroque udore uñane to uje ore catecã́ri Juan. 25 Enga ore catecã́ri Juan gaté enga ore chojninga: —¿Gotique gu a uje baca ore edodie iji yodi? Uje chi ca Crísto u ua enga chi ca Elías upo ua gotique rĩ. Uje chi ca Dupade uruode atatasṍri upo ua rĩ uje yijnátugo diringai.— 26 Juan chajnai ore uruode enga chojninga: —Jé ũré uje yaca ore edodie iji yodi. Mu a Dupade utocaitique uñeque di jne iji yiquigade uje e déji uacajade mu cáma arajáyo. 27 Bajaque yu mu que yipijoque. Mu uñai di iji yiquigade enga ibijoguipísi u uté. Que yugúsiji cuchárique go mu cucha datei u uté uje chise uaque iji yiquigade.— 28 Jnanione udore catecã́ri Juan nanique iji ore idai uje i tu Betábara uje déji tie Jordan edógai iji guedé garani. Enga Juan qué chaca cojñone edodie iji tie uaqué nanique uje ore chise. 29 Jecute dire uñai enga Juan chimo Jesus uje chose ore yui enga chojningame darijogosórone: —Cajicho to jnacari uté. Uté u jne ujetiga toi ome erámone jogosórone yoquisijnaringuéone. Enga gajnua u áyasa perané ome Dupade. Enga Dupade jé guerani u ome yoque.— 30 Mu Juan jé jno dacatecãraitigade údi ome ore enga chojninga: —Yojningai jé u uté uje a di jne iji yiquigade mu sué yibai ome uringai Dupade utocáite. Mu uté jé jogate nanique uje cáma yibase. 31 Que yiraja Dupade utocaidi uté gosi iji taningai mu yĩri gu ujetiga yaca yurásade Israel gose ore edodie iji yodi ujetiga dimane ore ome uté diringai yui. Yigaidi u gu ujetiga di enga jĩraque ore chiraja.— 32 - 33 Juan qué jno daruode údi enga chojninga: —Que yiraja uté to iji taningápisi. Mu yirósõri Dupade u uje chiroque yu aja ujetiga yaca ore edodie iji yodi enga chojningame yu: “Jogadi tu jne ujetiga araja yutocaidi gosi: ujetiga amo Yujopie Espíritu Sánto ujetiga doi jnumi iji gaté enga cháji jnacari uté ójo gai enga a araja jne uje yutocaidi jé u ujetiga chĩreta ore áyipiedie ome Yujopie Espíritu Sánto.” Enga e yimo Espíritu Sánto uje doi jnumi iji gaté enga cho cucujnadatei enga basaja jnacari uté ójo. 34 Uje e yimo enga uté pijogúsõre yu to. Enga yingome uaque uje Dupade abipísi u uté.— 35 Dire uñai enga Juan e dépoji uté rĩ. MEnga acadique gáreode ore déji gari. 36 Uje Jesus chicáji ore ejoi enga jĩraque Juan chimo ga chojninga: —Cajicho to Dupade utocaidi uté uje Dupade a terame yoque jne. Enga gajnua tu áyasa perané.— 37 Uje Juan acadique gáreode udore chudute udore enga ore jno enga ore chajna Jesus. 38 Jecute Jesus chajire daquigade enga chimo ore enga chojninga: —¿Uacagaitique?— Enga ore chojninga: —Pacadisṍri a, ¿bajogatique déji rique?— 39 Enga Jesus chojninga: —Boyo ji ti. Ajínaño yu.— Enga ore jno enga ore nóna Jesus aja jogadi. Guedé e jnome ore uje ore chise Jesus jogadi mu ore catecã́ri Jesus aja guedé jnoringai. 40 Andres u jnanione udore uñai uje ore chajna Jesus gu Juan ojñane. Enga Andres uté u Simon Pédro jõrai. 41 Enga Andres que chajirape cuchárique mu jĩraque chucué dãjorai Simon enga chojninga: —Yico judíode yoquijnati Mesías .— Enga ore ẽcarai Mesías u Crísto ome Grecia gosode. 42 Jĩraque Andres jno Simon údi aja Jesus jogadi. Enga uje Jesus chimo Simon enga chojningame: —Simon, Jonas abi u ua. Mu quigade enga a ore chĩ́care Céfas jeoga Pédro aja ua jne.— Simon i ichade udore qui tu cucarané ome judíode ore uruode. 43 Dire uñai enga Jesus pota chicai ore uniri uje i tu Galiléa mu tuangóa jnacari uje i u Felipe. Enga chojninga: —Felipe a, ajína yu to.— 44 Felipe uté idai u Betsáida. Enga Pédro, Andres ore idai jé u to. 45 Felipe jno enga chucué Natanael enga chojninga: —Yimóngo Dupade utocaidi que uje Moises, Dupade uruode atatasórone uñane ore urusarane ojningai tu. Enga uté i u Jesus uje dayé u José, Nazaret gosi.— 46 Mu Natanael chotigase Felipe uruode jecute chojninga: —¿Ja Dupade utocáite cuchátique tõrarásiji Nazaret a?— Mu Felipe chojninga: —Yico ga yibájoi enga ajirape to ujetiga araja ujetiga yoquijnati u.— 47 Uje Jesus chimo Natanael uje chose yui enga chojninga: —Israel gosipise jnacari uté uje e chose yoqui. Enga que paringaquérique déji.— 48 Jecute Natanael catecã́ri enga chojninga: —Quene bamo yu múñi jé baraja yu.— Jesus chojninga: —Uje cáma Felipe tibidi ua, mu yimo ua iji poria údi uje i tu higuéra .— 49 Jecute Natanael chojninga: —Yocacadisṍri a, e yiraja uje Dupade ape ua. Israel gosode yoquijnati yoqueduguéjna cuchábi upo ua rĩ.— 50 Jesus chojningame uté: —Bangureta yu uje yingome ua uje yimo ua iji te iji poria údi. Mu a amópo yipesute datérigo uñéngo jne rĩ uje sué udore gai.— 51 Jesus qué jno daruode údi enga chojninga: —Jé ũrepise yu ome yuruode udore: a amóño gatajnoquei jne uje chuchẽre dabai. A amóñopo Dupade iroque gaté minórone ujetiga ore chicáji jnumi aja Dupade utocaidi uyu . Enga a amóñopo jne rĩ ujetiga ore chicapóji gaté rĩ.—
1 Uje dirode gadioque iji udojo quigade enga ore pésu dajñamini iji ore idai uje i tu Cana uje déji ore uniri Galiléa. Jnacari, gapua ore chisa ñane iji gu. Enga chi Jesus daté déji ore gari to. 2 Chi ore tibidi Jesus, jé aja acadigode ore to ujetiga ore cháta rágaja ore to iji ore ajñamini. 3 Uje e íjnoque ore jodi víno enga chi Jesusdaté chojningame Jesus: —E íjnoque víno iji ore.— 4 Mu Jesus chajnai enga chojninga: —Chequé a, ¿jé gotique gu a uje bango cuchade udore ome yu? Cáma chise diri ujetiga yingo yu aja ore.— 5 Mu Jesusdaté e catecã́ri ore irógode uje ore chisi ore iji víno enga chojninga: —Beyoi uté ojningane cucha jnese.— 6 Chi cojna quedéjnanie déji ti uje chojmára iji ti uje judíode oidébedie u uje ore churu dabáyode. Chi cojna quedéjna chojmára a déji 100 lítrodie, jé uñanie déji 80 lítrodie. 7 Jesus chi chojningame ore irógode: —Beyoi enga ãretáyo cojnanie uniji ome yodi.— Ga ore doi yodi ga ore chĩreta cojnanie ome yodi enga iragupúsu jnese. 8 Jesus e chojninga: —Beyoi enga ajnicho garósi enga boyo údi aja ore ajñamini gajnesṍri ujetiga chetingare.— Jecute ore doi Jesus uruode. 9 Chi ore ajñamini gajnesṍri doi ga chetingare yodi. Mu yodi noña ga víno u. Enga que uté chiraja garãtique go. Gusu ore irógode u uje ore chiraja garani. Ore u gu uje ore ijnimique yodi. Jecute ore ajñamini gajnesṍri uté doi enga tibidi jnacari uté uje quene chisa dacoté. 10 Enga chojningame: —Jé bajosigode ĩ́rique uje quene basi ome víno uneréjnai ome yoque. Uje que pisocai uté go iji pajñaminone iji deréjnane. Uje jecucha ore chisi ome víno uneréjnai ome yoque bajaque. Enga uje ore ibidigode uyoque subudé yóguiji enga ore chisi ome víno gajnarei ome yoque.— 11 Jesus pésu dapesute daté bajai uté iji ore idai Cana iji ore uniri Galiléa, uje chécãre yodi enga noña enga víno. Enga isocai u uje chingo daringai cuchape aja ore. Jecute acadigode ore changuretapise to. 12 Udojo quigade ga Jesus chicáji ore idai uje i tu Capernaum. Enga daté nóna to. Jé aja desade, acadigode ore. Mu dirode garósi ome ore iji ore idai Capernaum. 13 Uje idógosi judíode jnusinamánone dire uje i tu Páscua enga Jesus chicáji ore idai Jerusalen yui. 14 Uje Jesus déji Jerusalen enga chicáji Dupade iguíjna cuchábi enga chise jnanione iji uje ore tẽra cabayúode, áyasadie, cucujnadatéode ore. Chisápo uñane iji ore charidi te rĩ uje ore doi oredie ome pláta quedéjnanie. 15 Uje Jesus chimo ore adode udore iji Dupade iguíjna cuchábi ajei enga pésu paójnane aja ñane enga chijna. Doi enga chijócãre ore aja guesi, jé aja ore gachidode cabayu. Jé aja áyasadie. Enga tṍra pláta quedéjnanie guẽrasórone ore iplátadie aja jnumone enga chucurase mésadie to aja quedéjnane. 16 Enga Jesus chojningame udore ore uje ore tẽra cucujnadatéode: —Ajnicho udore. Boyo údi aja guesode. Ca oyo cucha peranone iguíjnai iji Yapade iguíjnai.— 17 Enga Jesus acadigode udore ore jnusina Dupade uruode uje chojninga: “A yájningai tocade ome ore jne uje yetaque ore ipesudode iji baguíjnai.” 18 Uje judíode ore catecã́ri Jesus enga ore chojninga: —Angoma yoque bapesute datérique ujetiga jé ũré ua enga Dupade utocáite ua aja jnumi uje bajócãre cucha peranone guẽrasórone ore iji Dupade iguíjnai udé ajei.— 19 Enga Jesus chajnai ore ga chojninga: —Yipesute datei u udé: acuráso Dupade iguíjnai udé mu a yimanapo rĩ iji dire gadiótigo.— 20 Jecute judíode ore catecã́ri Jesus enga ore chojninga: —Dupade iguíjna cuchábi udé guejnanie sequeré 46 nanique uje ore chimate nanique aja gaté. ¿Ja toguirásome ua ya ujetiga apésu enga amate iji dire gadiógode?— 21 Mu que ore chiraja Jesus uruode quigode. Jesus ojningai jé u re. Uje chacãra dabai aja Dupade iguíjna cuchábi. 22 Jecute Jesus nijiápo iji pitoringai rĩ enga acadigode ore jnusina Jesus arecujáidie quigode ome re. Ore jnusinapo Dupade uruode atatasórone urusarane uje ore ojningai u Jesus. Jecute ore changuretapise Jesus uruode quigode jnese. 23 Uje Jesus déji Jerusalen iji judíode jnusinamánone dire uje i tu Páscua enga uásejna ore uje ore changureta. Ore chimo ipesute datéode nanique gu ome uringai Dupade utocáite. 24 Mu Jesus que cháta raja ore. Chotigase ore gu. Chamáñaje chirajápise jnanione áyipiedie quigode jnese gu. 25 Uje Jesus e iraja aro ore áyipiedie uje cáma ore chingome, uje chiraja cuchade iji ayoré chojmarai áyipie.
1 Fariséode uñai déji uje i tu Nicodémo. Enga judíode angarate obiréjnane uñai u Nicodémo. 2 Dejaque uñai enga Nicodémo tibágui Jesus ujetiga catecã́ri. Enga chojninga: —Pacadisṍri a, yirajágo uje Dupade iroque ua aja de ujetiga acate yoque. Chamáñaje bapésu bapesute datéode ome yoque gu. Ujetiga ca Dupade iroque ua enga a ca toguirásome ua ujetiga apésu cuchade udore.— 3 Jesus catecã́ri Nicodémo enga chojninga: —Jé ũrepise yu ome yuruode udore: ujetiga Dupade ca chinoningase gosi enga a ca togome gosi ujetiga chimo daringárique Dupade urása. Enga gosi chise daringárique Dupade urása enga gajnui u ujetiga quene basosi.— 4 Nicodémo catecãrápoi Jesus gaté rĩ uje que chiraja uruode quigode gu. Enga chojninga: —Que toc ujetiga e jnani gosi enga doi enga chacápoja daté ajei rĩ ujetiga basapo rĩ. ¿Jé chorase rique ujetiga basapo gaté rĩ?— 5 Jesus catecã́ri Nicodémo ga chojninga: —Jé ũrepise yu ome yuruode udore: ujetiga gosi chedu dabatigai ayorei a ca uté gosi chimo daringárique Dupade urása jne. Mu ujetiga Dupade Ujopie chinoningase gosi enga uringai Dupade urása jogadi u. 6 Jecute gosi basiji daté enga jé chopise daté ome uringai jnutiminore. Jé basa ga uje Dupade Ujopie inoningayaque gosi enga uté gosi jé chopise danoningayasṍri. 7 Jecute aya baguté jora ome yuruode uje yojninga: “Ujetiga apota baringárique Dupade urása enga ajuéga ua ome babatigai ejoi.” 8 Uje emi chubúchu erámi aja dajesúode, mu que pirajaque garãtique enga que pirajaque quitique rĩ. Que pimo mu ore chudute jocarane. Enga Dupade Ujopie Espíritu Sánto isocai u uté ome ore uje chinoningase ore. Que ore chimo mu ore chiraja adode iji dajéode.— 9 Uje Jesus chejna dacajnaquéode guesi ome Nicodémo enga Nicodémo catecãrápoi rĩ enga chojninga: —Cáma yiraja cuchade udore quitígo.— 10 Mu Jesus chojningame Nicodémo: —Israel gosode ore acadisõre obiréjnai u ua mu ¿ja ca araja ya yojningane cucha udore quigode ome ua ya? 11 Jé ũré yu uje yirajágo cuchade udore quigode, enga yocojñane u yoquimone cucha. Mu uaque, que anguretáyo yocojñane cucha. 12 Ujetiga ca anguretáyo yu uje yacãra yacajnaquéode aja erámi jogonórone cucha, móitapuré ujetiga yacate uágome gatajnoquei jogonórone cucha. 13 Que uñeque déji ujetiga chicáji gaté ujetiga chatata gaté jogonórone cucha ome uaque. Gusu Dupade utocaidi uyu uje yiyaridi u gatajnoquei. Enga uyu u uje yicáji jnumi nanique uje yṍraji gaté ujetiga yatata gaté jogonórone cucha ome uaque. 14 Uacarajáyo uje Moises pésu ugai gajnui nanique iji erãpe taretigai. Enga Moises chiringare dapesudi aja gaté nanique. Gaidi u gu ujetiga urásade chajire enga ore eca. Adi a jé u ome Dupade utocaidi uyu. A piringaraque yu jne iji gaté. 15 Ujetiga udore ore changureta yu enga a ore eca iji deréjnane jnese jne. Enga jé ca ore bijnápo jne rĩ. 16 Enga Dupade chijnorapise erámi jogosórone ore. Jecute tẽra dajnacare ugurui ome ore. Ujetiga gosi changureta enga gajneque pucuecaringué eyúgojmai iji deréjnane jnese. Enga a ca chimo Dupade ujuyaquedatei jne ome re. 17 Dupade que ajéode u ujetiga chiroque dajnacari aja erámi ujetiga cho dajuñame ore. Mu chirógaja erámi gu ujetiga chiqueta ore. 18 Uté gosi ujetiga changureta Dupade ape ugurui enga a jé ca chimo daringárique pujuya jne. Mu gosi ujetiga ca changureta enga e chimate ujetiga e chise daringai pujuya. Chamáñaje que changureta Dupade ape ugurui gu. 19 Udore ore uje que ore changureta Dupade abi enga e dimane ore gajnéone pujuyaquéo ome ore jne. Chamáñaje direcaringuei e chise erámone gu, mu ore irasigode u ijnangununie enga que ore chise direcaringuéone unétique. Chamáñaje jé ore déji date gajnaréngone gáyode gu. 20 Jé ate uje cucha gajnaréngone ipesungórone ore chetaque direcaringuéone. Enga idája ore iji direcaringuei. Ore ajéode u gu ujetiga ca pijoque ore ipesudode cucha gajnarécho. 21 Mu udore ore uje ore gaidode u Dupade uru uréone quigode jĩraque ore chose direcaringuei yui. Ore ajéode u gu ujetiga ore ujode ayoréo chiraja uje Dupade déji ore gari iji ore ipesudode udore.— 22 Udojo quigade ga Jesus nóna dacadigode ore enga ore chicáji ore uniri Judéa. Enga dirode ocoi ome ore iji ore uniri uté. Enga ore chaca ore edodie iji yodi iji ore uniri uté. 23 Adi jé u ome Juan uje chaca ore edodie iji yodi to iji deréjnane udore. Enga Juan déji jogadi uje i tu Enon uje idógosiji ore idai uje i tu Salim. Enga gajño cuchábi chi idógosiji. Enga uásejna yodi iji gajño uaté. Jecute ore chise Juan iji te ujetiga chaca ore edodie iji to. 24 Cucha dacadode udore tocade uje cáma pujurúgai Juan. 25 Iji udore quigade enga Juan acadigode uñane botãre judíode uñane. Enga ore ibotaquéode gajnengórone u Juan, Jesus ore ujetiga gosi iji ore ujetiga ayorérique chise daringárique ayoré icha ome udore uñeque isocade. 26 Juan acadigode ore tibágui Juan enga ore chojninga: —Pacadisṍri a, jé ca adute to a uje jnacari uje chise ua iji tie Jordan uechamito e chaca ore edodie iji yodi to. Yocojningai u uté uje bacate yógome ica. Enga ore jnese e ore tangári uté.— 27 Enga Juan chajnai ore uruode enga chojninga: —Jé dóji. Uje que toque ujetiga uñeque chimo daringárique Dupade utocáite ujetiga ca Dupade guẽrate uringai utocáite ome.— 28 Juan chojningame ore: —Uacaduchopise yuruode diríca uje yojningame uaque: “Dupade utocaidi Crísto que u yu gotique. Mu yajnei u ujetiga yimate cucha dacadode iji uté diringai iquei.” 29 Jecucha pijoque jnacari uringai gapua gajmasõre. U gu uje ore déji ñane ejode. Uje gajmasṍri ujoi jnacare chudute dãjorai arecujáidie enga pininaquei irágu. Adi jé u iji deréjnai udé to uje yirasitigai irágu yu uje yudute yujoi Dupade utocáite ujnomei to. 30 Uje yajéode u ujetiga jnacari uté obiréjnapise iji dirode jnese. Yajéode upo rĩ ujetiga yuringai obiréjna e bijna ome yu.— 31 Juan jno dacajnaquéode údi enga chojninga: —Ore uje ore garani u jnumi enga ore júdode u erámone jogonórone cucha. Mu ujetiga gosi garani u gaté enga uté gosi u uje sué yoquibáyode iji de jnumi. 32 Enga uté júdode u damone cucha iji gaté. Jé aja dadudigode cucha iji gaté rĩ. Mu que uñeque changureta atatagode cucha quigode. 33 Mu ujetiga uñeque changureta uruode quigode enga chajo raja uje ũrepise Dupade. 34 Jecute Dupade utocaidi uté chatata Dupade uruode. Enga Dupade chĩretapise uté áyipie ome dajopie Espíritu Sánto. 35 Jecute Dupade chijnorapise dabi uté enga chisi ome cuchade jnese ome ujetiga chijocase cuchade. 36 Ujetiga gosi changureta Dupade Abi uté gosi gajneque pucuecaringué eyúgojmai. Mu gosi ujetiga ca pota changureta Dupade Abi a ca uté gosi chimo dacuecaringué ichai uté jne. Mu uté gosi a chimo Dupade ujuyaquedatei ome re jne.—
1 Chi fariséode ore chudute uje Jesus angarasórone jiépis ome ore guetei Juan angarasórone. Enga ore chudute to uje jiépise ore uje Jesus chaca ore edodie iji yodi. Jecute ore chetaque Jesus. 2 Mu que Jesus u go uje chaca ore edodie iji yodi, mu acadigode ore u. 3 Uje Jesus chiraja uje fariséode ore chetaque adode enga jnoji ore uniri Judéa enga chajnésaru aja daniri Galiléa. 4 Uje Jesus jnome dajesui ga chiramísara ore uniri uje i u Samária. 5 Enga chise ore idai iji ore uniri Samária uje i tu Sicar. Enga idógosiji jnani bajai Jacob gajnepídi jnupe uje chi gueranome dabi José nanique. 6 Ejopié déji uté uje Jacob u nanique uje chijócha. E idógosi guedé gatocoro uje Jesus chise ejopié uaté. Jesus eyúguiji dajei nanique jecute chácariji ejopié uaté ejoi. 7 - 8 Mu Jesus acadigode ore jno, ga ore chicai ore idaipísi ujetiga ore doi oré tome cucha pibosode ome Jesus ore. Uje gusu Jesus iji charidi mu Samária goto chise. Gaidi u yodi iji ejopié. Enga Jesus chojningame: —Asíape yu iji yodi.— 9 Judíode que ore chimesere Samária gosode adode. Jecute que ore cháta rágaja ñane. Jecute chajuque Samária goto aguté uje Jesus chutai yodi iji. Jecute uaté chojninga: —¿Jé go uje judío ua mu jé batai yodi iji yu? Uje Samária goto yu mu.— 10 Mu Jesus chajnai Samária goto uaté enga chojninga: —Ise ga ca araja to uje Dupade pota ujetiga chisi ome cucha datei ome ua. Enga a ca araja uyu gosi uje yutai yodi iji ua. Ujetiga arajárase yu enga a atárasi yodi iji yu enga a yisírasome yote uecai ome ua.— 11 Chequé chajnai Jesus uruode enga chojninga: —Yodi erásonique que déji ua ẽrie ujetiga ajnime yodi iji ejopié uaté uje idája guesi. ¿Jé déji rique jne a bojningai yote uecai ujetiga asi ome yu enga yóji? 12 Uje yocai jnani bajai Jacob noñome yocari ejopié uaté nanique. Uje jopidé jé u ejopié uaté nanique enga abode ore jopidé jé u to nanique, jé aja gachidode cuchiso. ¿Ja bajéode u ujetiga ajnué yocai jnani bajai Jacob gai a?— 13 Jesus chojninga: —Gosode uje ore chóji yodi iji ejopié udaque enga a ore cajnorapo jne rĩ. 14 Mu gosi chóji yerani yote uecai enga que toque ujetiga uté gosi qué cajnore. Chamáñaje yerani yote ome uté gosi gajnui u sibíjnai iji gosi ajei ujetiga ca íjnongapo rĩ, jé iji deréjnane jnese. Enga gosi eca iji deréjnane jnese to.— 15 Jecute chequé chojningame Jesus: —Be ga asi ome yu yote uecai uté enga yóji ujetiga ca yicajnorapo rĩ. Ujetiga ca yijiapoi yodi iji de jogadi gatuaque.— 16 Jesus chojningame chequé: —Bo ga abágui babai enga acayobíji de.— 17 - 18 Mu chequé chojninga: —Ijnoque yabai.— Jesus chojninga: —Jé ũrepise baruode udore uje que bamanique cus. Mu babayode déji nanique uje ore chejna yijmanai. Adi jé u uje e bagusapoi uñai gari rĩ mu que babaipise go.— 19 Jecute chequé chudute udojo, Jesus uruode, enga chojninga: —¡E yiraja uje Dupade uruode atatasórone uñai u ua! 20 Mu Samária gosode uyoque, judíode uaque yocáyipiedie cãra re ome cuchade. Samária gosode yocayode jnani bajade ore tẽrája Dupade nanique iji cucarani uta. E qué yicoi ore jmapiedie udire. Jé basa ga judíode uaque chi ueratigai u ujetiga ore tẽrája Dupade iji ore idai Jerusalen.— 21 Jesus chojningame chequé: —Yajéode u ujetiga anguretapise yuruode. Uje que qui u ujetiga acayoi cucarani uta jeoga acayóji Jerusalen ome uacajmapiedie ome Dupade. Uje a chise deréjnai jne ujetiga ore chicota yocai Dupade iji dayaritígo jnese. 22 Mu Samária gosode uaque uacabeyoi uacajmapiedie ome Dupade mu que arajáyo uruode quigode jnese. Jé basa ga judíode uyoque yirajágo Dupade uruode jnese. Jecute yirajágo uje yoquiquetangóri garani u judíode uyoque. 23 A chise dínique, mu deréjnai e u ujetiga ũrepise Dupade adode gaisórone enga ore icotaquéode ome Dupade garanone u ore ajépisode. Chamáñaje Dupade ajegaidi u ujetiga yoquisocai u udé uje yicoi adode. 24 Uacamóño uje pujopie Dupade ga que pimo. Jecute udore ore jnese uje ore pota adode ga ore doi ga ore chejna dáyipie pimojmanie aja dacotaquéode ome Dupade iji dajéode. Enga ũrepise ore ome dadode udore.— 25 Chequé chojningame Jesus: —Yiraja uje a Dupade utocaidi Crísto di jne. Ujetiga e di enga a chuchẽre cuchade iji guesode ome yoque.— 26 Enga Jesus chojninga: —Bojningai Crísto jé u bacatecãraisṍri uyu.— 27 Uje Jesus qué catecã́ri chequé mu acadigode ore chise. Enga ore cho dáyugu re uje Jesus catecã́ri chequé, mu que uñeque cási ujetiga catecã́ri Jesus ome ore ajegaitique ome ñane, jeoga ome ore uruode quitígo. 28 Uje Jesus acadigode ore chise enga chequé noñome darané enga chicapoi ore idai rĩ ujetiga tibidi darásade. 29 Uje di iji ore enga chojninga: —Boyo ji ti. Cajicho jnani uje déji te enga chingome yu yipesudode jnese. ¡Ise ga yoquijnati Crísto u jõ!— 30 Jecute ore jnoji dedai enga ore tibágui Jesus iji charidi. 31 Uje cáma ore chise Jesus iji charidi mu acadigode ore chijócha ajei údi enga ore chojninga: —Yocacadisṍri a, agu bu cucha pibosode to.— 32 Mu Jesus chajnai dacadigode ore uruode enga chojninga: —Cucha pibosode déji uje yibosode u mu que arajáyo go.— 33 Jesus acadigode ore catecã́ri ñane enga ore chojninga: —¿Ja uñeque chisi ome potígome que a?— 34 Jesus chi chojninga: —Yibosode u yirósõri Yapade iroquéode. Yajéode u ujetiga yimate uté áyipiedie aja jnumi.— 35 Jesus chojningame dacadigode: —Uacarajáyo uje ayoré utácai chaca cucha ajñunie enga chojninga: “A qué yirote guedosi gagájnione jne ujetiga timate enga yĩra.” Mu yojningame uaque: Cajicho cojñoque díode udore ore to uje quene paca Dupade uruode iji ore áyipiedie mu e ore timate ujetiga pĩraque ore ome Dupade.— 36 Jesus qué jno daruode údi enga chojninga: —Gosi uje na cucha pacade timachugode ga ore cho oré gosi. Adi jé u to ome udore ore uje ore ijnimique cojñone aja pucuecaringué eyúgojmai. Dupade cho ore oré to. Jecute ujetiga gosi chaca Dupade uruode iji dojórique ayoré áyipie jeoga gosi imanique dojórique ayoré aja pucuecaringué eyúgojmai, mu a ore ininaquéode cho ñane ome dasagode Dupade iroquéo. 37 Jé ũré ore uruode uje ore chojninga: “Uñane gajnei tu ujetiga ore chaca cucha ajñunie. Jé basa ga uñane gajnei upo rĩ ujetiga ore na cucha pacade.” 38 Yiroque uaque ujetiga aráño uñane acade cucha. Uje que ejnáño uacaguesi ome. Uacagutiyamánone u uacojode ayoré uje ore chejna daguesi ome Dupade iroquéode iji uacaquei.— 39 Uásejna Samária gosode iji ore idai uté uje ore changureta Jesus ome chequé ojñane uje chojninga: —Jnacari uté chingome yu yadode jnese.— 40 Uje Samária gosode ore di enga ore chijócha Jesus ajei údi ujetiga chacarabíji ore gari iji ore idai Sicar. Jecute Jesus cháji ore gari ome dire gáreode. 41 Enga uje Jesus déji ore idaipísi enga uásejnapise uñane uje ore chudute acajnaquéode enga ore changureta to. 42 Enga ore chojningame chequé: —Que gusu batatagode uté acho ome yoque ujetiga yanguretágo uté. Mu e yudúco uté acajnaquéode quigode to. Jecute yanguretágo uringai yoquijnati Crísto. Enga yirajágo uje jé ũrepise uje erámi unirisórone yoquiquetangóri u.— 43 Uje Jesus e chimate dire gáreode iji ore gari enga jnoji Samária enga jé qué jno daringai urugu údi aja ore uniri Galiléa. 44 Jesus u uje chojninga nanique: “A Dupade uruode atatasónique dirásiji dedánique enga querénga urásade ore tangári.” 45 Mu uje Jesus díji Galiléa enga ore nínapísa yui. Uje ore déji Jerusalen to nanique iji judíode ore jnusinamáni dire uje i tu Páscua . Enga ore chimo Jesus ipesute datéode jnese iji ta. 46 Udojo quigade enga Jesus chajni aja ore idai Cana uje déji ore uniri Galiléa. Uté u nanique uje Jesus chinoningase yodi enga noña enga víno . Enga ore eduguéjna cuchábi iroque gatei déji Cana uje abi ejnaretaguipise iji ore idai Capernaum. 47 Eduguéjna cuchábi iroque gatei chudute uje chi Jesus jnoji Judéa enga e déji Galiléa. Ga jno ga tibágui. Enga chijócha ajei údi ujetiga chicáji iguíjnai enga chiqueta abi uje idógosi ujetiga toi. 48 Uje Jesus chudute uruode enga chojninga: —Yiraja uje a ca anguretáyo yu ujetiga ca amóño yipesute datérigo, yipesute pitijátigo ore.— 49 Mu ore eduguéjnai iroque gatei chojninga: —Yocangaráni a, aguito uje cáma yabi toi.— 50 Jesus chojningame jnani: —Bo ga ajni aja baguíjnai. Babi ejnarei e ninguira. A eca jne.— Enga jnani changureta Jesus uruode ga jno. Enga chajni aja daguíjnai. 51 Uje chajni aja daguíjnai enga irógode ore chachai iji garani enga ore chojninga: —Babi ejnaréngone e ninguira iji údode. A eca jne.— 52 Eduguéjna cuchábi iroque gatei catecã́ri ore ga chojninga: —¿Guedé batigárique déji rique qué a ujetiga ninguira ejnarei iji údode?— Enga ore chojninga: —Guedé e cho jñuque diríca uje gai dotáningai e íjnonguiji.— 53 Jecute disi uté dayé e jnusina uje guedé batiga casei uté jé u diríca uje Jesus chojningame: “Babi a e eca jne.” Jecute uté changureta Jesus, jé aja jogasui jnese. 54 Jesus ipesute daté ejoi u udé uje jnoji Judéa enga chicáji Galiléa.
1 Udojo quigade ga judíode ore jnusinamáni dire u. Jecute Jesus jno to ga chicáji Jerusalen. 2 Ore esãrepié déji ore idai uté uje déji ore ujuyaquéode piagoi uñai ejoi. Enga ore chĩ́care áyasadie gajnei aja piagoi uté. Enga ore esãrepié imeñenie chejna yijmanai uje chaparu gai. Enga judíode ore ẽcarai u Betésda aja ore esãrepié uaté. 3 Ore esãrepié dosadode, jiei ejnaretade iji ejode uje ore terẽtáji jnumone iji ejode. Edoparigode déji, jé aja perógode, noñángone ore. Enga ore chajire yodi aja quedéjnane ujetiga chijocase re. 4 Uje chi Dupade irótique gaté unirisõre uñeque chise ore esãrepié iji ujade enga chijocase yodi aja quedéjnane. Gosi ujetiga chacája yodi bajaque enga ejnarei íjnoque ga chise daringai ayoré ijõre iji quigade. 5 Jnani déji uté to uje chi guejnanie sequeré 38 uje chi ejnaretaque nanique. 6 Uje chi Jesus chimo jnani uté uje terẽtáji jnumi iji ore esãrepié ejoi enga chopise dáyugu. Chiraja gu uje jiei sequeredie iji uringai ejnaretaque yui. Enga catecã́ri enga chojningame: —¿Apota baringárique ayoré ijõre a?— 7 Ejnaretai chi chojninga: —Yipota yuringárique piquetac. Mu íjnoque yátajasonique gu ujetiga gosi na yu aja yodi ujetiga e chijocase re. Jecucha yáyipie déji ujetiga yṍra yu aja yodi mu jecucha bajaque uñane aja.— 8 Jesus chojningame jnani: —Ayague. Asa bataranone enga bo ga arique.— 9 Iji deréjnai uté uje catecã́ri jnani enga jĩraque ejnarei íjnoque. Jnani chisa dataranone enga jĩraque dique. Mu chi dire puyaque nanique uje Jesus chiqueta jnani. 10 Mu chi judíode ore catecã́ri Jesus iquetai jnani. Enga chi ore chojningame: —Deréjnane udé u uje que pisaque pejóriguiji. Bamo uje que pujuregate ome ua ujetiga ajna bataranone.— 11 Jnani uté uje piquetaque chojningame judíode ore: —Yipésu yiquetangóri uté uruode quigode uje chojningame yu: “Asa bataranone ga arique.”— 12 Mu ore chojningame uté: —¿Jé gosi te a? ujetiga urúo udore ome ua uje chi chojninga: “Asa bataranone enga arique.”— 13 Mu jnani que chiraja daquetangóri írique. Enga que chiraja ajesúrique rĩ. Uje uásejna cojñone ore gu enga Jesus e chacája ore ujade enga que chimópo quitique rĩ. 14 Uje Jesus chicáji Dupade iguíjna cuchábi enga chise daqueta casé jnani iji ajei. Enga chi chojningame: —E bamo baringai piquetaque enga be ga ca apesapo cucha gajnarétique jne rĩ ujetiga ca cucha uñeque chijocasapo ua rĩ ujetiga ca sué bejnareque bajai gai.— 15 Jecute jnani uté chi jno uje chi Jesus chiqueta. Enga chingome judíode ore uje Jesus u iquetangóri. 16 Jecute chi judíode ore jmongarája Jesus enga ore pota chutígome. Chamáña gu uje chiqueta cojñoque ejnaretade iji dire puyade gu. 17 Mu chi Jesus chajnai ore uruode enga chojninga: —Yapade adi jé u uje pésu cucha arégode iji dirode jnese. Yadi jé u uje yipésu cucha arégode to iji dirode jnese.— 18 Uje chi judíode ore chudute Jesus uruode udore enga chi ore jmongarája gaté. Ore guetei u gu uje que timíninga Moises urusarane uje pésu cuchade iji dire puyade. Mu que gusu udore go. Ore chetaque to uje chi jé cho Dupade iji re uje chojninga: “Dupade u Yai.”— 19 Enga chi Jesus chojningame ore: —Jé ũré yu uje yojninga: que togome Dupade Ujnacari uyu ujetiga yiji yajénique quitique. Mu yedu Yai ajéode. Enga cuchade jnese uje Yapade pésu, adi jé upo ome Ujnacari uyu rĩ ujetiga yipésu cuchade to. 20 Chamáñaje Yai chijnorapise dabi uyu gu. Jecute chingome yu dapesudode jnese. Enga Yai a chingome yu dapesute cucha pitijatedatéode uñéngo jne. Diga ujetiga amóño udore enga jogadi a u jne ujetiga chajuguipise uacagutedie. 21 Uacarajáyo uje yai Dupade chiringare togode enga ore ecápo rĩ. Adi jé u ome Ujnacari uyu. Ujetiga yipota enga yiringare togode ore to enga ore ecápo to rĩ. 22 Yai Dupade que chajire ayorérique atique aja quedéjnarique ujetiga pésu quitique mu edugádi u dajnacari uyu ujetiga yajire ayoréode jnese ore atígo aja quedéjnane. 23 Yai Dupade áyipiedie u ome erámi unirisórone jnese ujetiga ore cho dangaráni iji dajnacari uyu. Adi jé u to uje ore cho dangaráni iji yai Dupade. Ujetiga gosi ca cho dangaráni iji Dupade Ujnacari uyu, enga que cho dangaráni iji yirósõri Dupade to. 24 Jé ũrepise yu ome yuruode udojo: uje gosi tangári yuruode enga doi quigode enga changuretapo yirósõri rĩ enga pucuecaringué eyúgojmai gajnesṍri u uté gosi. Enga a ca pujuya gosi jne. Mu cho ujetiga pitoringai juseque gosi enga e chicáji pucuecaringué eyúgojmai iji gaté. 25 Jé ũrepise yu ome yuruode udojo: uje Dupade ojningai dire e di ujetiga pitoringai gajnesórone chudute Abi uyu yuruode. Ujetiga ore tangaripísi yuruode quigode enga a ore eca jne. 26 Uacamóño uje yai Dupade ujopiedaté cuse ujetiga chisi ome pucuecaringuei ome uñane. Uté chisi dajopiedaté uaté ome dajnacari uyu to ujetiga yisi ome pucuecaringuei ome uñéngo to. 27 Dupade utocáite yu jecute yajnei tu ujetiga yajire erámi unirisórone ore adode aja quigode ujetiga yipésu ore quitígo. 28 Ujetiga yuruode udojo chajuque uacagutedie mu cucha uñai qué déji uje a chise deréjnai jne ujetiga togode ore chudute yibijnane jnese. 29 Jogadi jé u ujetiga ore doi guesode iji dódedie. Udore ore uje ore ipesudode u cucha arégode nanique ga ore niji jne enga a ore qui u gaté enga a ore eca iji deréjnane jnese. Jé basa udore ore uje ore ipesudode u cucha gajnaréngone nanique, enga a ore niji to jne mu a pujuya ore jne iji darijíningarique quigade. 30 Que togome yu ujetiga jé yiji yajéningo quitique. Mu jé yigaidedie u yai Dupade áyipiedie ome yu uje yajire ore adode aja quigode enga uje yipésu ore quigode. Enga yáyipiedie jogadipise yirósõri Dupade ojningane cucha jecute que togome yu ujetiga yécãre uruode quigode uje yajire erámi unirisórone adode aja quigode. 31 Yiraja uje ujetiga yĩrarare yibai enga querénga pangurete yu. 32 Mu yiraja uje uñai déji enga uté u uje narare yibai. Enga jogadi quene u ujetiga ore cho ũrepíso iji yojningane cucha. 33 Uacarócho uacarógode aja Juan ica ujetiga acatecãchoi ome Crísto gosi. Enga Juan chingome uaque Crísto gosi enga jé ũrepise Juan ome uruode. 34 Ujetiga ayorérique doi enga narare yibai, mu que yangurenone u ayoréode go. Mu yingo cuchade udore ome uaque gu ujetiga anguretáyo yu enga eso uacaringane piquetaque. 35 Uje Juan gajnui u papósi ica uje e tagu enga chijñate dejode gáyode. Mu catadé deréjnai uje díreca uaquejode ome uté acajnaquéode. Mu uje déji uacajade ica enga uacanínaño uaque ome acajnaquéode. 36 Mu yipijogúsorone uñane ore déji uje ore narare yibai. Enga ore sué yipijogúsõri Juan gai. Yipijogúsorone udore u yipesudode cucha. Chamáñaje yipesudode u Yai iroquéode uje noñome yari nanique. Jecute que potigayaquérique déji yuringai Dupade utocáite. 37 Mu cuchiyi tupúsu yirósõri yai Dupade uje narare yibai. Mu que ayorérique déji uacajade ujetiga chimópise Dupade ome dedodie enga chududipise urúpisode. 38 Enga que togome uaque ujetiga Dupade uruode chacája uaque. Uacotigáso gu yuringai yai Dupade utocáite. Jecute uacotigáso to yatatagode Dupade urúo. 39 Jecute jecucha uacajichopise ore urusarane Dupade urúo. Uacacuei u pucuecaringué eyúgojmai ome uaque. Mu uacajirigode Dupade urúo chingopísa uaque uje uyu u uje yisi ome pucuecaringuei ome ore. 40 Mu que apótayo ujetiga abáchoi yu jetiga yisi ome pucuecaringuei ome uaque. 41 Mu que cucha ome yu ujetiga jnanione uhuaque ca eso yunétique. 42 Yiraja uaque gu uje que pijnoraquei déji uaque ome Dupade. 43 Yai Dupade utocaidi uyu nanique ujetiga yacate erámone unirisórone uágome uruode. Mu que amesecho yu gotique. Jé basa ujetiga uñeque dirásiji uaque bisideque uje que Dupade utocáite, mu a amesechorase acajnaquéode. 44 Yiraja uje que togome uaque ujetiga anguretáyo yu. Uje que cucha ome uaque Dupade ugurui icotaquéode ome uaque. Chamáñaje uacacuegode u uacojode ayoréo icotaquéode ome uaque gu. 45 Ca ajoso eti yaguhéta uacabáyode iji yai Dupade iquei. Mu uacangureni Moises a u jne ujetiga chatata uacate gajnaréngone ome Dupade. 46 Ujetiga jé ũré uaque ome uacanguretaretigade ome Moises urusarane ojningane cucha enga a anguretayorase yu to. Moises uté urusarane ojningai jé u yu gu. 47 Jecute ujetiga jé ca anguretáyo Moises urusarane quigode, móitapuré yu uje que anguretáyo yacajnaquéode quigode.—
1 Udojo quigade enga Jesus jno enga chicáji yote quedéjnai uéchai uje íode gare: Galiléa u i uñai, jé basa ga Tibérias i uñai u. 2 Uásejna cojñone ore uje ore chajna Jesus. Chamáña gu uje ore chimo ipesute daté cucha pitijádode gu uje chiqueta ejnaretade. 3 Uje chi Jesus ore chise yote quedéjnai uté uechamito enga Jesus, acadigode ore choru cucarani ga chi ore chácariji te. 4 Chi e idógosi judíode jnusinamáni dire uje i tu Páscua . 5 Uje chi Jesus chajire daquigade enga chimo cojñoque dipeséode uje chi qué ore chajna ore aja ore charidi enga chi chojningame Felipe: —¿Jé yicagóji rique jne a ujetiga yicoi oré tome cucha pibotique ujetiga cojñoque dipeséode udore ore tagu?— 6 Mu cachi Jesus urúo ome Felipe. Gaidi u gu ujetiga qué tangári uru quitígo. Chamáñaje Jesus e chiraja gu dasocai ome cucha pibosode ome cojñoque dipeséode. 7 Mu Felipe chajnai Jesus uruode enga chojninga: —Garósi yoquiplátadie ẽrie. Mu ujetiga yoquiplátadie denário chorase 200 a yijírasi arurétigo ome ore. Mu a qué chona ore ujetiga subudé ore iji.— 8 Jecute chi Simon Pédro jõrai Andres uje Jesus acadigode uñai jé u to doi ga catecã́ri Jesus. 9 Enga chojninga: —Disi déji de uje arurégode déji gari enga chejna yijmanai. Uje ore ipesucho iji arroz quedéjnai uje i tu cebáda. Oyite gáreode dépoji gari rĩ. Mu qué garósi udore ome cojñoque dipeséode udore.— 10 Enga chi Jesus chojningame ore: —Angoñome ore enga ore chácariji jnumi jnese.— Chi ore chácariji jnacarabui. Enga 5.000 u jnanione iji ore. 11 Udojo quigade enga Jesus chi chisa arurégode udore enga jé u uje chi chacãre dai Dupade gai. Enga chisi ome arurégode ome dacadigode ore. Jé u uje acadigode udore chajuguína arurégode ome cojñone ore uje ore chácariji dayaridi. Adi jé u to ome oyite gáreode. Ore chisi ore jnese iji. Enga subudé ore iji jnese. 12 Uje chi subudé ore iji jnese enga Jesus chojningame dacadigode: —Amátayo péode ujetiga ca ducarãcho.— 13 Chi ore chamáta arureque quedéjnane pépitade ga ore chĩreta canástadie uje gare iji yirídai. Uje arurégode udore chejna yijmanai iji taningai. 14 Uje cojñone ore chimo Jesus ipesute datei uté enga chi ore chojninga: —Jé ũré uje Dupade uruode atatasṍri u uté ujetiga di iji jnumone udore.— 15 Jesus chiraja ore áyipiedie uje ore ajegaidi u ujetiga ore chisa ujetiga ore cho deduguéjna cuchábi iji. Jecute jnopo rĩ enga chicáji cucarani uje chi idájai jnumi ujetiga chácariji uje gusu iji. 16 Uje chi e dejaque enga Jesus acadigode ore doi jnumi iji cucarani enga ore chicáji yote quedéjnai yui. 17 E dejaque enga chi topiéjna erámi mu cáma Jesus chajni to aja ore. Jecute ore chacája cucoi enga ore jnome yote quedéjnai uéchai uñai ujetiga ore chicáji ore idai Capernaum. 18 Mu uje ore déji yote quedéjnai ajei enga úyujna chi chorei ore iji yote quedéjnai ajei. Enga yodi bayaringai chorei ore iji quedéjnane. 19 Chi e idája ore iji yote quedéjnai edógai. Chi kilómetrodie chise 6. Mu ore chimo Jesus iji te uje diguiji yodi gai aja ore yui. Enga chi ore todópisa. 20 Mu chi Jesus catecã́ri ore ga chi chojninga: —Uyu u. Jé ca atodóyo.— 21 Uje ore chudute Jesus uruode udore enga e dimane ore ujetiga Jesus chacája ore pi cuco. Enga uje Jesus chacája cucoi enga jĩraque ore chise daqui punire. 22 Dire uñai u uje cojñonguemui casé uje ore déji yote quedéjnai uechamito uñai ore áyipiedie déji Jesus jogatique. Ore chiraja uje Jesus acadigode ore pi u cuco ugurui diríca uje ore jno. Ore chirajápo rĩ uje chi ca Jesus nóna ore to diríca. 23 Uje ore áyipiedie déji cuchade udore jé u uje chi cuco uñéngo di uje ore tṍraji ore idai Tibérias. Cucode udore chi ore tṍraji te enga ore chirõre jogadi casé uje Jesus chajuguína arurégode ome ore diríca, uje chacãre Dupade gai iji diríca. 24 Uje chi cojñonguemui udore ore chimo uje Jesus que déji ore qui uté enga que acadigode dépoji rĩ jé u uje ore chacája cucode ga chi ore chicáji Capernaum yui. Uje chi ore ucuei u Jesus. 25 Uje chi ore chise yodi uté uéchai mu chi ore chise Jesus iji. Enga chi ore catecã́ri. Chi ore chojningame: —Yocacadisṍri a, ¿jé basocárique ujetiga ese de?— 26 Jecute chi Jesus chajnai ore uruode enga chi chojninga: —Jé ũrepise yu ome yuruode: uacacueyoi yu gu ome yipesute daté casé uje uacacho yeranone arurécho diríca enga uacãretáyo uacacadie iji diríca. Mu que arajáyo quigode gotique yipesute datéode ome uaque. 27 Ayáyo uaquedojnaringuéone ome uacacuegode cucha pibose uje jĩraque íjnoque. Mu uacacuegode urásu cucha pibosode uje que eruénique cuse. Cucha pibosode udore u gu uje chisi ome pucuecaringué eyúgojmai ome uaque. Enga pibosode udore guẽrasṍri jé u Dupade utocaidi uyu ujetiga yisi ome uaque jne. Chamáñaje yai Dupade ajegáite yu ome udore gu.— 28 Uje chi ore catecã́ri Jesus enga chi ore chojninga: —¿Jé yoquisocárique ome yoque e ujetiga yipéco Dupade ajegaidode cucha?— 29 Jesus chi chajnai ore uruode enga chi chojninga: —Dupade ajegaidi u ujetiga anguretáyo utocaidi uyu.— 30 Mu ore catecã́ri Jesus gaté enga ore chojningame: —Angoba yoque bajopiedaté ujetiga yimóngo enga jé u ujetiga yanguretágo ua. ¿Jé bapesutique jne ome yoque?— 31 Mu chi jé ate ome ore uje ore jno daruode údi ome Jesus. Enga ore chojninga: —Yocayode jnani bajade ore tagu arurégode nanique uje i tu mana iji erãpe eyutiguei. Dupade uruode urusãrasórone ore urusarane quigode u uje chi: “Dupade u nanique uje guẽracho arureque gaté minórone ome ore nanique uje garani u gatajnoquei.”— 32 Jesus chi chajnai ore uruode enga chi chojninga: —Jé ũrepise yu uje que Moises u go ujetiga guẽrate arurégode udore uje tṍraji gaté ome ore nanique. Mu yai Dupade guẽracho ome ore nanique. Enga Yai e ajéode u ujetiga chisi ome arureque uñai ome uaque uje tṍraji gaté to, mu suépise arureque mana gáyode. 33 Enga Dupade guerani arureque uñai u datocaidi uje garani jé u gaté to. Mu uté u uje chisi ome pucuecaringué eyúgojmai ome erámi unirisórone.— 34 Chi ore chojningame Jesus: —Be ga jecucha asi ome yoque arurégode udore ujetiga yajo.— 35 Jesus chajnai ore uruode enga chojninga: —Arurei uté uje chisi ome pucuecaringué eyúgojmai ome ore jé u uyu. Ujetiga gosi tibágui yu ome arurei uté enga a ca chaguhénique chejnápo uté gosi rĩ. Ujetiga gosi changureta yu ga a ca gosi cajnorapóji jne rĩ.— 36 Jesus jno daruode údi enga chi chojninga: —E yingome uaque uje que anguretáyo yu uje uacamóño yu múñi. 37 Yai Dupade a chiroque uacuñéngo aja yu jne enga a udore ore jnese chise yu jne. Enga a ca yetaque yibaguiésoningo iji uaque. 38 Que yise jnumone nanique gu ujetiga yipésu yáyipierigui quitígo. Mu yiji jnumi iji gatajnoquei nanique gu ujetiga yipésu yirósõri áyipiedie quigode. 39 Enga yirósõri yai Dupade ajéode u ome yu ujetiga yañurupúsu yibaguiésorone ore guio ujetiga ca uñeque bijna ome yoc. Yojningane u udore ore uje Dupade iroc ore aja yu. Ajegaidi u ujetiga yiringare udore ore jnese iji dirode erueminóri ujetiga ore chise daringane eca iji deréjnane jnese. 40 Yirósõri Dupade ajéode u to ujetiga dajnacari uyu yajirisórone ore changureta yu jnese ujetiga pucuecaringué eyúgojmai déji ore jnese. Enga yiringare udore ore jne iji dirode erueminóri.— 41 Uje judíode ore chudute Jesus uruode uje chojninga: “Arurei uyu ga yarani u gatajnoquei,” enga jé u uje ore dojnóngaja. 42 Enga chi ore chojninga: —¿Ja ca José abi Jesus uté a? Yimóngo dayé José, ga yimóngopo daté rĩ. Chiese garani u gatajnoquei.— 43 Jesus chi chojningame ore: —Ayáyo uacadojnongamátigade ome yu. 44 Que togome uacuñeque ujetiga chise yu ujetiga ca yirósõri yai Dupade óite uágaja yu. Enga yai Dupade oidode udore u jne ujetiga yiringare ore iji dirode erueminóri. 45 Dupade uruode atatasórone ore urusarane chósi te: “Dupade u ujetiga chacate ore jnese jne.” Udore quigode u ujetiga ore tangári yai Dupade acajnaquéode enga ore doi quigode, udore ore u jne ujetiga ore chose yi. 46 Yirajágo uje que amóño yai Dupade. Mu imósõre ugurui u uyu uje yarani u Dupade iji gaté. 47 Jé ũrepise yu ujetiga gosi changureta yu enga pucuecaringué eyúgojmai gajnesõre gosi. 48 Arurei u uyu uje gosi tagu enga eca iji deréjnane jnese. 49 Uacarajáyo uje uacayode jnani bajade ore tagu arurégode mana nanique iji erãpe taretigai. Mu ore toi jnese nanique. 50 Mu yacajnaquéode júdi u arureque uecai ujetiga tṍraji gaté ujetiga gosi tagu enga que chimo pitoringai ome re. 51 Enga arureque uecai uté uje tṍraji gaté jé upúsu yu. Ujetiga gosi tagu arureque uecai uté enga eca iji deréjnane jnese. Yerani uté arureque gajnui jé u yibai. Uje a yẽra yu jne ome erámi unirisórone ore jnese. Yigaidi u gu ujetiga ore chise daringane eca iji deréjnane jnese.— 52 Jecute chi judíode ore botãre ñane ome Jesus acajnaquéode quigode. Ga chi ore chojninga: —¿Jé uté isocáringome uyoque ujetiga chisi ome dabai ome yoque ujetiga yajo?— 53 Uje chi Jesus chajnai ore uruode enga chojninga: —Jé ũrepise yu ome yuruode: ujetiga ca acho Dupade utocaidi uyu yibai, enga ójiyopo yiyoi rĩ enga a ca aquecáyo iji deréjnane jnese. 54 Jecute gosi ujetiga tagu yibai, enga chójiapo yiyoi rĩ pucuecaringué eyúgojmai déji uté gosi. Enga a yiringarápo uté gosi jne rĩ iji dirode erueminóri. 55 Chamáñaje cucha pibotíguipíse yibai, enga cucha pijotáguipíse yiyoi rĩ. 56 Jecute gosi uje tagu yibai enga chójiapo yiyoi rĩ enga jé u uje uté gosi, uyu yitojmárango iji jnumi. 57 Pucuecaringuei garani u yirósõri Yai enga yiqueca gu uté. Adi jé u uté gosi ujetiga cho cucha pibotíji yu, uté gosi eca gu uyu. 58 Yuruode udojo gajnengóri u arurei uje tṍraji gaté enga cháji jnumi udé nanique. Mu que yojningai u uacayode jnani bajade ore posode mana. Uje ore tagu nanique mu ore topoi nanique rĩ. Mu yuruode gajnengóri u arurei uje gosi tagu enga eca iji deréjnane jnese.— 59 Jesus déji judíode ore aquiningamei guiguíjna nanique iji ore idai Capernaum uje chacate ore ome cuchade udore. 60 Enga uje Jesus acajnaquéode angarasórone uñane ore chudute udojo enga ore chojninga: —Uajácho Jesus acajnaquéode udore ujetiga ayorérique chiraja udore quigode. ¿Jé yocórase rique ujetiga yicoi quigode?— 61 Jesus e chiraja uje ore cho dabuja ome ñane uje ore chetaque acajnaquéode quigode. Jecute chojningame ore: —¿Etácho yacajnaquéode quigode a? 62 Ujetiga quedéjna yacajnaquéode udojo quigode ome uaque, moitapurerási ujetiga amóño Dupade utocaidi uyu ujetiga yicapóji yijogadi casica rĩ iji gaté. 63 Dupade ujopie u uje guẽrate pucuecaringuei ome ore. Jé basa que cuchárique tṍraji yocuringane ayoréo. Yacajnaquéode ome uaque ũréo enga ore garani u Dupade ujopie. Jecute udore guẽrate pucuecaringuei ome ore. 64 Mu uacuñane qué déji uje cáma anguretáyo yu.— Uje Jesus chiraja danguresórejmane gosode jne iji taningápisi. Enga chirajápo gosi rĩ ujetiga tẽra jne ome damajosórone. 65 Uje chi Jesus chojninga: —Yingome uaque que: ujetiga yai Dupade ca óite uaque gosi aja yu, enga a ca toque jne ome gosi ujetiga chise yu.— 66 Enga jogadi chi jé u uje chi uásejna cojñone uje ore cha ore nóna Jesus aja quedéjnane. 67 Quigade enga Jesus catecã́ri dacadigode uje gare ore iji yirídai. Enga chi chojninga: —¿Jé oyo rique jne a ujetiga apótayo doi to a?— 68 Mu Simon Pédro chi catecã́ri enga chojninga: —Yocangaráni a, que togome yoque ujetiga yico to. Uje que pacadisṍri uñeque déji ujetiga uruode cho baruode. Ua u gu uje baruode chisi ome pucuecaringué eyúgojmai ome yoque. 69 Bacadigode uyoque e yanguretágo baruode enga yirajágo uje yoquijnati Crísto u ua. Enga Dupa uecai abi upo ua rĩ.— 70 Jesus chi chajnai ore uruode enga chi chojninga: —¿Ja jé ca ũré a uje yajegáite yacadigode uaque uje gare uáguiji yirídai? Mu uñai déji uacajade uje Satanas déji ajei.— 71 Jesus uruode udojo gajnengóri u Júdas Iscariote uje dai i u Simon to nanique. E chiraja uje Júdas u jne ujetiga terame damajosórone. Acadigode uje gare ore iji yirídai, jé jõrai u to múñi.
1 Cuchade udojo quigade enga Jesus diguiji ore uniri Galiléa údode uje chacate ore iji quedéjnane. Que pota joróga ujetiga chajniapo aja ore uniri Judéa rĩ. Chiraja uje chi judíode ore chujérase iji Judéa gu. 2 E idógosi judíode ore jnusinamáni dire uje ore pésu daguíjna noñimenie iji. 3 Jecute Jesus desade chi ore chojninga: —Jé ca ayáji de. Bo ga acáji Judéa. Enga banguresórone iji ta ore chimo bapesudode to. 4 Ujetiga gosi ucuei tu ujetiga pirajaque gosi ome dojode ayoréo, a ca uté gosi pógu dapesudode. Jecute bo enga ango bapesute datéode aja erámi jnese.— 5 Jesus desade ore urásu ujetiga ore changureta, mu que ore changureta go. Jecute ore uruode cho piboqueringane ome Jesus. 6 Mu Jesus chi chojninga: —Cáma deréjnai u ujetiga yingome yu aja erámi. Mu deréjnane cho ñane ome uaque. 7 Mu que togome uaque ujetiga erámone jogosórone ore chetaque uaque. Mu ore chetaque yu. Uyu u gu uje yingopísa ore ate gajnaréngone aja ore. 8 Boyo, acayóji yocujnusinamáni dire iji Jerusalen. Chamáñaje a jé ca yijína uaque to jne. Cáma yajnei tu ujetiga yicáji.— 9 Chimate daruode udojo enga jé u uje cháji Galiléa. 10 Uje chi Jesus desade ore jno que enga jé u uje chi Jesus chajna ore to aja ore jnusinamáni dire. Mu Jesus pógu dacoringai. Gaidi u gu ujetiga cojñotígo ca chiraja. 11 Judíode chi ore chucué Jesus iji ore jnusinamáni dire enga ore chojninga: —¿Jé dépisi rique jnani uté?— 12 Enga cojñonguemui ore tujua Jesus i aja quedéjnane. Uñane ore chojninga: “Paraguipise jnani uté.” Mu uñane ore chojninga: “Que paraque go. Aringácachoquí.” 13 Mu jecucha ga ore pógu dacatecãraitigade udore. Ore todópisa dangaránone gu. 14 Judíode ore jnusinamánone díño cáma chise eruei uje chi Jesus chise Dupade iguíjna cuchábi. Chacája enga jé u uje chacate ore iji. 15 Chi Jesus acajnaquéode chajuque judíode ore agutedie enga ore chojninga: —Jé go uje chiraja cuchade jnese. Que ayorérique chacate ome irajatigade múñi.— 16 Mu Jesus chi chojningame ore: —Yacajnaquéode udojo que garani u yu mu garani u yirósõri uje chiroque yu aja jnumi nanique. 17 Ujetiga gosi angoninguinone guesája ome Dupade enga a chiraja yacajnaquéode udojo garãtique. Jeoga garani u Dupade, jeoga garani jé u yu. 18 Uacarajáyo uje gosi chedu re ome dojñáringo quitígo enga uté gosi ucuei u daringárique picotaque. Jé basa ga gosi ucuei u darósõri uringárique picotaque enga chedu darósõri ome dojñane. Enga que aringácachoquí uté mu ũrepíso ojñane. 19 ¿Ja ca ũré yu a? uje Moises u uje di Dupade iroquéode údi iji uaque nanique. Mu que uacuñeque déji ujetiga doi udore quigode. Uje Dupade iroquéode chojninga: “Ca ajé bojórique ayoré.” Mu uhuaque, uacapótayo chui ome yu.— 20 Mu cojñone chi ore chojningame: —A Satanas utocaitique déji bajei enga a ãraque ua ¡jõ! ¿Jé gosi te a ujetiga pota chui ome ua ya?— 21 Jesus chojningame ore: —Ise ga yipesute daté casica chajuque uacagutedie ica uje yiqueta jnani noñai ica iji dire puyai . Enga uaquetei u uté iji yu. 22 Uacarajáyo uje Moises chiroque uágaja ujetiga acáyo uacape diyoquíode iji dire gare iji ti iji ore batigai quigade. Jecute uacabeyoi Moises iroquéode udore quigode enga uacacáyo uacabode uje chi dire puyágome uaque múñi. (Mu que gusu Moises uje chiroque uágaja udore. Mu uacayode jnani bajade, uje bajac ore ome Moises, ore jmapié u to nanique.) 23 Que apótayo ayóyo Moises ojningane cucha gáyode jecute uacacáyo uacape parátagabode uje dire puyai ome uaque múñi. Enga que etácho ñane ome uacasocade udore. ¿Ome gotique gu a uje ájningaraque uágome yu? Uje yiqueta jnani uté údode jnese iji dire puyai ica. 24 Que toc ujetiga jĩraque gosi chiraja dojórique ayoré áyipie quigode. Jecute ajichopise cuchade aja quigode bajaque ujetiga arajayópise cucha dacadode udore quigode.— 25 Udojo quigade enga Jerusalen gosode uñane ore catecã́ri ñane ome Jesus uringárique chuque. Enga ore chojninga: —¿Ja ca Jesus uté u ore ucuei ujetiga ore chujé? 26 Mu déji ti. Enga chacate cojñone ore iji yoquedominone. Mu que pógu re go. Enga que uñeque cási ujetiga chãraque darai ome. Ise ga yocangarádejnane ore changureta uringai yoquijnati Crísto ¡jõ! 27 Mu a ca u ¡jõ! Uje yirajágo uté idai. Mu ujetiga yoquijnati Crísto di ga a ca uñeque chiraja garãtique.— 28 Uje chi Jesus chudute ore uruode iji Dupade iguíjna cuchábi ajei uje jé déji dacaditigade gai enga catecã́ri ore ome daru uajádode enga chojninga: —Uacáyipiedie qui u uje chi arajáyo yu enga chi arajayopo yarani te rĩ. Mu que yise de jnumi ome yáyipie quitique. Mu yise de gu yirósõri uje ũrepise uruode quigode. Mu uhuaque, que arajáyo yirósõri uté go. 29 Uyu u uje yiraja. Yarani u uté gu uje uté iroque yu aja jnumi tudé nanique.— 30 Jé u uje chi judíode ore angaránone ore potapísa ujetiga ore chisa enga ore jno údi. Mu que togome uñeque ujetiga chisa. Uje cáma deréjnai u gu ujetiga ore chisa. 31 Mu uásejna ore iji cojñonguemui ujade uje ore changureta Jesus uringai Crísto. Enga ore chojninga: —A ca toque jne ujetiga uñeque cuse ujetiga sué uté gai ome uté ipesute cucha datéode.— 32 Uje chi fariséode ore chudute cojñone ore uruode uje Jesus u ore ijnati Crísto, enga ore tibágui sacerdóteode ore angaránone ujetiga ore chiroque Dupade iguíjna cuchábi irótigo uñéngo aja Jesus yui ujetiga ore chisa enga ore suru gai. 33 Uje Jesus qué catecãrápoi cojñonguemui rĩ enga chojninga: —A yacarabi uacari jne iji dire garósirigo. Enga quigade jne enga yajnésaru yirósõri jogadi. 34 A acueyoi yu jne mu a ca esopo yu jne rĩ. Chamáña gu uje a ca togome uaque jne ujetiga eso yijogadi.— 35 Jé u uje chi judíode ore catecã́ri ñane enga chi ore chojninga: —¿Jé chicapi rique jne uté uje chi ca yimóngopo jne rĩ? A chicáji ore uniri Grécia jne. Uacamóño uje chi uásejna judíode ore iji ta. A pota chacate Grécia gosode ¡jõ! 36 Chimo joroque daruode quitique ome yoque uje chojninga: “A yiji jne ome uaque. A acueyoi yu jne mu a ca amóñopo yu jne rĩ. Uje que togome uaque ujetiga acayóji yijogadi.”— 37 Judíode jnusinamánone dire erueminóri u uje chi ore pesupúsu cuchade aja quigode iji. Diri uté u uje chi Jesus chague enga chi catecã́ri ore ome daru uajádode enga chi chojninga: —Gosi ujetiga cajnóriji, doi ga tibágui yu enga chóji yerani yote ueca. 38 Uje Dupade uruode chósi te: gosi ujetiga changureta yu enga gajnui u sibíjnai uje yodi chayóji enga pésu re enga tie. Uje yodi uté yote ueca.— 39 Jesus uruode qui u ujetiga gosi changureta ga jogadi u ujetiga Dupade Ujopie Espíritu Sánto chacája gosi. Mu cáma chacája Jesus anguresórone gu uje Jesus qué déji jnumone enga cáma chicáji gaté gu ome daringai eduguéjna cuchape. 40 Uñane iji cojñonguemui udore ujade ore chudute Jesus uruode udore enga ore chojninga: —Que potigayaquérique déji jnani uté uringai yoquijnati Dupade uruode atatasõre.— 41 Uñane chi ore chojninga: —Yoquijnati Crísto jé u.— Mu uñane chi ore chojninga: —A ca yoquijnati Crísto u go. ¿Ja yoquijnati Crísto tõrarásiji Galiléa jne a? 42 Uacarajáyo uje Dupade uruode qui jé u uje chi yocai jnani bajai eduguéjna David ape disi ejoi jé u yoquijnati Crísto jne. Enga idai jé u jnani bajai David idai to, uje Belen u.— 43 Jecute chi cojñonguemui udore ore chajuque uñane ajéode ome Jesus. 44 Uñane iji ore ore ajéode u ujetiga ore chisa enga ore suru Jesus gai. Mu que uñeque pésu. 45 Diga Dupade iguíjna cuchábi irodisórone ore chajnésaru darósorone. Enga ore irósorone fariséode, jec aja sacerdóteode ore catecã́ri darógode enga ore chojninga: —¿Jé gotique gu a uje que ajnáño Jesus aja de?— 46 Mu Dupade iguíjna cuchábi irodisórone ore chojninga: —Que togome yoque. Arecujáidie chajuque yocagutedie. Uje que uñeque déji ujetiga arecujatígui cho uté arecujáidie quigode.— 47 Jecute chi fariséode ore chojninga: —¿Ome gotique gu a uje uté sué uacabai ome daringaquérigo to? 48 Uacamóño uje que yocangarátique, jé aja fariséode uyoque uñeque changureta uté acajnaquéode. 49 Uacamóño uje cojñonguemui udore que ore chiraja Moises urusarane quigode. Jecute uté doi enga sué ore gai ome daringaquéode. Mu a Dupade cho dajuñame ore jne.— 50 Nicodémo chi déji fariséode ore gari to. Uté u uje tibágui Jesus iji dejai nanique. Enga uté catecã́ri dojode fariséo ore. 51 Enga chi chojninga: —Uacarajáyo uje Moises iroquéode uñai u ujetiga ca yoco yocujuñame gosi ujetiga ca yimóngo bárique cucha. Arei u ujetiga yangácoi ojñane quigode bajaque ujetiga yirajágo ipesutique cucha bajaque.— 52 Jé u uje ujode fariséo ore chojninga: —¿Ja Galiléa gose ua ya uje bãrarare uté gai? Ajire Dupade uruode. Jogadi u ujetiga araja uje que Dupade uruode atatasõre uñeque tṍraji Galiléa.— 53 Udojo quigade ga fariséode ore chajni aja daguíjnane jnese.
1 Mu chi Jesus chicáji cucarãtique uje chi i tu Olívos. 2 Dire uñai enga chi Jesus jnoji direjnime enga chicapóji Dupade iguíjna cuchábi rĩ. Enga cojñonguemui chi ore chose yui enga Jesus chácariji dayaridi iji Dupade iguíjna cuchábi ajei enga jé u uje chacate ore. 3 Uje chi qué Jesus déji dacajnaquéode gai mu chi Moises urusarane atatasórone, fariséode uñane chi ore chijna chequé aja Jesus uje chi ore chisíji jnani gari uje chi qué ore chisa ñane. Enga chi ore chicháji cojñonguemui ajénique. 4 Enga chi ore chojningame Jesus: —Pacadisṍri a, yico chequé udaque que iji ate gajnaréngone gai uje déji jnani quedéjnarique gari. 5 Bamo uje Moises urusarane quigode jé u ujetiga yujégo uje yatingáraco chequé ate gajnarénguenie ujetiga yico ore iji ore ate gajnaréngone gáyode. ¿Jé o ringome chequé udaque a?— 6 Ore ajéode u ujetiga ore chise Jesus bárique cucha iji uruode ujetiga ore doi enga ore chaguhéta gai iji dangaránone iquei. Jecute chi Jesus doi jnumi iji dayaridi enga churúsãre jnumi ome dajmané. 7 Mu chi jé ore ate dadi uje ore catecã́ri Jesus uje ore chojninga: “¿Jé o ringome chequé udaque?” Mu chi Jesus chipotingarápo re rĩ enga chojningame ore: —Ujetiga íjnoque uacuñeque isijnaringuéone enga bajaque uté gosi jne ujetiga chisa cucaranéraque ga chatingare chequé ome doidéraque cucarané.— 8 Dopoi jnumi iji dayaridi rĩ ga jé ate uje churúsãre jnumi. 9 Mu Jesus uruode udojo chi chajuque ore agutedie enga jĩraque ore jnusina date gajnaréngone jnese. Enga chi e ore chijnire ñane aja guesi. Bajade chi u jnanipísode. Uje chi ore déji guesi jnese enga Jesus chuniname eti gusu chequé iji charidi. Uje chi uaté cháji uté gu. 10 Jé u uje chi Jesus chipotingare re aja gaté. Enga chi ca chimo cojñotique. Gusu chequé iji charidi. Jecute catecã́ri, enga chojninga: —Chequé a, ¿jnanione ucode jé ore déji rique uje ore chaguhéta cuchade babai? ¿A ca uñeque chatingare ua que a?— 11 Enga chequé chi chojninga: —Que uñeque chatingare yu que.— Jecute chi Jesus chojninga: —Adi jé u yadi uje a ca yo yujuñame ua to jne. Mu bo ga ca apesapo cucha gajnarétique jne rĩ.— 12 Jesus chacadápo cojñonguemui ore rĩ enga chojninga: —Direcaringuei u uyu iji erámone udojo. Ujetiga gosi tangaripísi yacajnaquéode quigode enga uté gosi u uje déji direcaringuei. Enga pucuecaringué eyúgojmai gajnesṍri u uté gosi. Enga a ca digapóji ijnangununie jne rĩ.— 13 Uje chi fariséode ore chudute udojo enga ore chetaque Jesus acajnaquéode. Enga ore chojninga: —A ca pangurete ua. Chamáñaje bãrarare babai gu.— 14 Mu Jesus chi chojninga: —Jé ũré yu ẽrie. Yĩrarare yibai mu que cucha bisidécho yuruode go. Chamáñaje yiraja yarani. Enga yiraja yiqui te rĩ. Enga que cucha bisidécho yarani, yiqui ore. Mu que arajáyo yarani enga que arajayopo yiqui rĩ.— 15 Jesus qué catecã́ri fariséode ore enga chojninga: —Uacarajáyo uje erámi unirisórone uhuaque uacajmapiedie cuse ome uacojode ayoréo uje uacajicho ore adode aja quigode. Jé basa uyu, que yajire ayorérique atique aja quedéjnai. 16 Mu ujetiga yajirirase ayorérique atique aja quedéjnai mu a jĩraque yirajárase adode. Chamáña gu uje yirósõri yai Dupade iroque yu gu jecute déji yari enga cháta raja yu ome yajirigode ore acho. 17 Uacarajáyo uje uacajirigode, Moises iroquéo quique uñai chósi te: ujetiga cucha dacatique pijogúsoningo gare ore enga ore ojningáringo cucha jé chopise ñane enga jogadi u uje uacoyo ũrepíso iji ore ojñane. 18 Adi jé u ome yu uje yipijogúsorone gare ore to. Uñai u uyu. Jé uñai upo Yai rĩ uje iroque yu aja erámone udojo.— 19 Jecute chi ore catecã́ri ome dai enga chi ore chojninga: —¿Jé déji rique bai gosi?— Jesus chi chojningame ore: —Que arajáyo uyu gosi. Que amóñopo Yai to rĩ. Ujetiga arajayórase yu enga a arajayopórase Yai te rĩ.— 20 Jesus uruode u cuchade udojo uje chi chacate ore iji Dupade iguíjna cuchábi ajei. Chi ore jogadi u uté uje ore gueranone pi déji to. Enga que togome uñeque ujetiga chisa Jesus enga suru gai. Chamáña gu uje cáma deréjnai u gu ujetiga ore chisa. 21 Jesus chojningápome ore: —A yiji jne ome uaque. A acueyoi jorógui yu jne mu a atoyoi jne uje uacasijnaringuéone jé jogate uaque. Enga a ca togome uaque jne ujetiga eso ta yiqui.— 22 Mu chi judíode ore catecã́ri ñane ome Jesus uruode udore enga ore chojninga: —¿Ja chujé re jne a? Uje chojninga: “A ca togome uaque jne ujetiga eso ta yiqui.”— 23 Jecute Jesus chi catecã́ri ore enga chi chojninga: —Uacayaridi u udé jnumi. Jé basa yiyaridi u ta gatajnoquei. Erámone udojo jogosórone u uaque mu que erámone jogosõre yu to gotique. 24 Jecute yingome uaque que uje a atoyoi uacasijnaringuéone údi jne. Jetiga ca anguretáyo yu ome yuringárique uje yingo yu aja uaque, enga diga yuruode a tocade jne ome uaque. Enga a atoyoi uacasijnaringuéone údi jne.— 25 Ga chi ore catecã́ri Jesus enga ore chojninga: —¿Jé ua gosi a?— Jesus chi chojningame ore: —E yingome uaque iji taningápisi. 26 A yajéraso enga yajirirase uacadode aja quigode jé iji de. Enga a jiérase yatatagode uacapesute gajnarécho. Mu yirósõri uruode ũréo jnese. Jecute a yedu udore ome yatatagode ome erámi unirisórone. Chamáñaje yudute puru uréone udore nanique iji uté pijnani.— 27 Mu que ore chiraja uje Jesus ojningai darósõre u dai Dupade. 28 Jesus jno darade údi enga chojninga: —Jecute yurúo udojo ome uaque: ujetiga apotingacho Dupade utocaidi uyu yajnei curesei dirome, jogadi jé u uté ujetiga arajáyo yuringai ũré uje yingo yu aja uaque. Enga a arajáyo to jne uje yacajnaquéode que garani u uyu mu yedu yirósõri Yai uruode uje yacate uaque. 29 Uacamóño uje yirósõri uté u uje déji yari. Enga Yai que noñome yu iji te go. Chamáña gu uje yipesudode jecucha u ajegaidode cucha, jecute irasiguipise yu.— 30 Uje chi Jesus uruode udojo ome ore enga uásejna uñane uje ore changureta. 31 Jecute chi Jesus cho judíode ore quique uje ore changureta enga chojninga: —Ujetiga adotáyo uáguiji yacajnaquéode enga obiréjna uje yanguresõripísode u uaque. 32 Enga a arajáyo cucha uréone udore enga gajnui u ujetiga chijnime uaque iji uacasasórone jmáinie.— 33 Chi ore chojningame Jesus: —¿Jé gotique gu a? uje bo ayoré pisaguíji yoque uje bojninga: “A gosi doi enga chirame uaque jne.” Jnani bajai Abraham ape disi ejo yoque ẽrie. Que toc ujetiga ayorérique cho dasaguíji yoque nanique jé aja deréjnane udojo.— 34 Jesus cho quique daruode enga chojninga: —Jé ũré yu ome yuruode. Ujetiga gosi pésu pisijnaringuéone enga pisijnaringuéone isaque gosi. 35 Que toc ujetiga ayoré pisai cháji dasangóri iguíjnai iji deréjnane jnese. Mu uté isangóri abipísi u uje gajnei tu ujetiga cháji dayé iguíjnai iji deréjnane jnese. 36 Ujetiga Dupade Abi uyu yirame uaque jne enga a ca pisijnaringuéone suepo uacabáyode jne rĩ iji deréjnane. 37 Yiraja uje jnani bajai Abraham ape disi ejo uaque. Mu que anguretáyo yojningane cucha ome uaque enga uacapótayo uacajéyo yu. 38 Yatatagode u Yapade ingómeone cucha ome yu. Enga uacagaidode u uacai ojningane cucha to.— 39 Enga chi ore chojninga: —Yocai tu Abraham.— Mu chi Jesus chojningame ore: —Ujetiga jec ũré uaque ujetiga Abraham ape uaque enga a uacapesudode urásu Abraham ipesudode to. 40 Uje yatatagode u Dupade acajnaqué uréone ome yu mu uacajegaidi u ujetiga ajéyo yu. Mu Abraham que áyipieraque déji ujetiga chujé Dupade utocaitique nanique. Que adi u uacadi uje uacapótayo chui ome yu. 41 Uacapesudode u uacai ipesudode to.— Jecute ore chajnai Jesus uruode enga ore chojninga: —A ajos eti pape bisideque yoque enga que yirajágo yocai gosi. Mu que quigode u go. Mu yocai ugurui cuse uje Dupade u.— 42 Jesus chi chajnai ore uruode ga chi chojninga: —Ujetiga jec ũré enga Dupade ape uaque enga a ajnorañorase yu. Uacamóño uje yarani u Dupade enga e yugúsi de. Que togome yu ujetiga yiji yajénique quitique mu yugúsi de gu uje Dupade iroque yu gu aja de. 43 ¿Gotique gu a uje que toque ujetiga arajáyo yojningane cucha quigode? Ise ga quigode u uje que apótayo angáchoi yacajnaquéode quigode. 44 Uacai u Satanas. Enga uté gajneque uaque. Jecute uacapótayo apéso uté ajegaidode cucha. Ayoré yungore Satanas uté iji taningápisi. Enga que togome ujetiga urúrique ũré. Chamáñaje cucha uréone guetesõre uté gu. Urupataquechoqui u enga uruode u purupataringane. Enga urupataquechoquíode ore dai u uté. Chamáñaje purupataringane garani u uté gu. 45 Jecute uje yingome cucha uréone ome uaque mu que toc ujetiga anguretáyo yu. 46 ¿Jé gosi te iji uaque ujetiga chingome yoque ujetiga pisijnaringuérique déji yu? Ujetiga ca déji yu enga obiréjna yuruode uje ũrepíso. ¿Jé ome gotique gu a uje que anguretáyo yu? 47 Ujetiga Dupade gajneque gosi ga gosi doi enga tangári Dupade uruode. Uje que Dupade gajneque uaque enga que apótayo angáchoi Dupade uruode.— 48 Jecute chi judíode ore chojningame Jesus: —¿Ja ca ũré yoque a? uje yojnicome ua: “Yoquetégode Samária gosode uñai u ua. Enga Satanas utocaitique déji bajei.”— 49 Jé u uje chi Jesus chajnai ore uruode enga chojninga: —Que Satanas utocaitique déji yajénique go. Mu yucuegode u Yai uringárique picotaque. Mu que eso yipesudode unétique enga gajnui u uje oyo cucha bisidéguiji yu. 50 Que yajéode u ujetiga acotáyo yu. Mu uñai déji enga uté ajéode u ujetiga acotáyo yu. Enga uté u uje chajire uacadode aja quigode.— 51 Jesus jno daruode údi enga chojninga: —Gosi ujetiga doi yacajnaquéode quigode enga a ca gosi chimo pitoringai ome re iji deréjnane jnese.— 52 Jecute chi judíode ore catecãrápoi Jesus rĩ enga ore chojninga: —Que potigayaquérique déji yoque uje a Satanas utocaitique déji bajéode ome baruode udore. Uje yocai jnani bajai Abraham, Dupade uruode atatasórone uñane ore toi jnese. Mu jé go uje bojninga: “Gosi ujetiga doi yacajnaquéode quigode a ca gosi toi jne iji deréjnane jnese.” 53 ¿Ja bajéode u ujetiga ajnué yocai Abraham gai to a? Bamo uje Abraham toi nanique, jé aja ujode Dupade uruode atatasõre uñane jnese. ¿Jé ua gosi te a ome bajéode?— 54 Jesus chajnai ore uruode enga chojninga: —Ujetiga yisírase yibai enga a ca cuchárique tõrarásiji. Mu Yai déji enga uté u uje chisi yibai, enga que toc ujetiga oyo cucha bisidéguiji uté icotaquéode. Chiese uacangureni u Dupade, mu jé u Yai uté to. 55 Chiese uacangureni u Dupade mu que arajáyo go. Uyu u uje yiraja. Ujetiga yojningárasa: “Que yiraja Dupade,” enga a yorase uaque ome uacaringane urupataquechoquío. Mu jé ũré yu uje yimo Dupade enga que yiyo ojningárique cucha gai ome yu. 56 Uacai jnani bajai Abraham nínapúsu re nanique uje chiraja uje a yĩri jne. Diga chimo yiríringai enga pininaquei irágu ajei.— 57 Jecute judíode ore catecã́ri Jesus enga ore chojninga: —Quedejnapise baruode uje cáma bejnáringui sequeré 50 iji bei múñi chiese amo yocai jnani bajai Abraham. Bamo uje sequeredie e jiépisi iji Abraham quigade.— 58 Jesus chi chajnai ore uruode enga chi chojninga: —Jé ũrepise yu ẽrie. Uje Abraham cáma base nanique mu jé yijogate aro nanique. Enga jé yijogate.— 59 Jecute chi ore chisa cucaranenie ujetiga ore chatingare Jesus údode, enga ore chujé. Mu Jesus chacose re iji ore ujade, enga doi guesi iji Dupade iguíjna cuchábi enga jé u uje jno.
1 Uje chi Jesus jno daringai urugu údi enga chi chise jnanírique to uje chi edoparique aja guesi iji daté. 2 Uje chi Jesus acadigode chi ore chimo jnani uté to enga chi ore catecã́ri Jesus ome. Enga ore chojninga: —Yocacadisṍri a, ¿gotique gu a uje jnani uté edoparique aja guesi iji daté nanique? A dayé, daté ore isijnaringuéone u jõ, jeoga uté isijnaringuéone jé u.— 3 Chi Jesus chajnai ore uruode enga chojninga: —Que uté isijnaringuéone u go. Que dayé, daté ore isijnaringuéone upo gotique rĩ. Mu Dupade ajéode u ujetiga pijoque ujopie ome uringai piquetaque. 4 Uje qué dire enga yajéode u ujetiga yejnape yiguesi jne ome yirósõri iroquéode. Chamáñaje qué dire gu. Mu uje e dejaque enga que togome ayorérique ujetiga chisa dejode iji dejai. 5 Uje qué yugúsiji erámone udojo enga yajnui u direcaringuei iji erámone udojo.— 6 Uje chi Jesus chejna daruode udore guesi enga jé u uje chutĩ́raja jnumi ga pésu pacataringué garósi ome datĩrai. Jé u uje chi chaguñéra edopari edodie. 7 Jé u uje chi Jesus chojningame edopari: —Bo ga aru bedodie iji ore esãrepié uje i tu Siloé.— Ore uruode Siloé qui u uje ore chiroque ore aja cuchade. Jé u uje chi edopari jno enga chi churu dedodie enga jogadi u uje chimo dajirigode. Enga chajnésaru dayaridi. 8 Enga jnani uté chi chise dejominórone cojñoque uñane ore mu ore chirajaque enga ore chojninga: —¿Ja ca uté u uje utaidé yoquiplátadie ica?— 9 Chi uñane ore chojninga: —Jé uté u.— Uñane chojninga: —Que u gotique, cachi jé cho.— Mu jnani uté chi chingo re ome ore enga chojninga: —Uyu jé u ẽrie.— 10 Chi ore catecã́ri enga ore chojninga: —¿Jé go uje bamo bajirigode?— 11 Enga chi chajnai ore uruode enga chi chojninga: —Jnani uté uje i u Jesus chutĩ́raja jnumi enga pésu pacataringuei enga jé u uje chaguñéra yedodie. Enga chojningame yu: “Bo, ga acáji ore esãrepié uje i tu Siloé enga aru bedodie iji.” Ga yiji uruode. Yuru yedodie iji. Jé u uje yimo yajirigode.— 12 Jé ore ate uje ore catecã́ri enga chi ore chojninga: —¿Jé déji rique jnani uté?— Mu uté chojninga: —Que yiraja jogatique.— 13 Chi ore jno uté údi enga ore chijna aja fariséode . 14 Uje chi dire puyai u uté uje Jesus pésu pacataringuéone aja ñane enga chaguñéra edopari edodie. Enga jé u uje chiqueta edopari. 15 Enga fariséode ore catecãrápoi jnani uté rĩ ome isocárique uje e chimo dajirigode. Enga jnani chajnai ore enga chojninga: —Yiquetangóri pésu pacataringuei enga chaguñéra yedodie. Uje yuru yedodie enga jogadi u uje yimo yajirigode.— 16 Mu fariséode chi ore chajuque uñane ajéode uje uñane ore chojninga: —Que toc ujetiga jnani uté iquetasṍri tṍraji Dupade. Sijnaque uté uje pésu dapesudode iji dire puyai.— Jé basa uñane chi ore chojninga: —¿Ja toguirase ome ayoré sijnátique ujetiga cho uté ome ipesute datéode?— 17 Jecute chi ore catecã́ri jnani edopari gaté enga ore chojninga: —Boji te e. Yangácoi báyipierigui quitígo ome baquetangóri jnani uté.— Jnani edopari chi chojninga: —Ome yajéode, ise ga Dupade uruode atatasórone jõra jõ.— 18 Mu judíode chi ore chotigase uringai casé edoparique. Chamáñaje e chimo dajirigode gu. Jecute chi ore tibidi dayé, daté ore ujetiga ore catecã́ri ore. 19 Enga chi ore chojninga: —¿Jec ũré uacape udé uje chiese edoparique aja guesi nanique iji daté? Ujetiga jec ũré udore enga ¿ome gotique gu a uje e chimo dajirigode?— 20 Enga dayé ore chojningame ore: —Yirajágo uje yocabi casicai jé u uje basiji daté ica ga edoparígaja guesi. 21 Mu que yirajágo gotique uje e chimo dajirigode. Que yirajagopo iquetangónique gosi te rĩ uje chuchẽre edodie gáyode. Mu beyoi ga acatecãchoi uté. Uté e chise daringai jnani. Jé tiógara ujetiga chatata datígo ome uaque.— 22 Jnani uté dayé urúo udore gu uje ore todo judíode ore angaránone. Ore chudute gu uje judíode angaránone e ore chimate dáyipiedie gu ujetiga ore chãraque daquiningamei guiguíjna ome udore ore uje ore changureta Jesus uringai pijnati Crísto . 23 Jecute jnani uté dayé uruode u udore gu ome ore uje chojninga: —Uacamóño uje e jnani uté, jecute angoñome iquetangóri gosi.— 24 Chi judíode angaránone ore tibidápoi edopari gaté rĩ ujetiga ore catecã́ri enga chi ore chojninga: —Be ga angopísa baringai piquetaque quigode ome yoque iji Dupade iquei. Uje e yirajagópise jnani uté uje sijnanguipise.— 25 Jnani edopari chi chojninga: —Que yiraja go ujetiga sijnaque yiquetasṍri. Mu yirajai u uje edoparique yu ica mu e yimo yajirigode.— 26 Mu jé ate uje ore catecã́ri. Ga ore chojninga: —¿Jé isocáringome ua diríca ya, uje chuchẽre bedodie gáyode?— 27 Chi jnani edopari chojninga: —E yingome uaque ẽrie. Mu que angáchoi yuruode. ¿Ome gotique gu a ujetiga yingopome uaque gaté rĩ? ¿Uacajegaidi u panguretigai ome uté to a?— 28 Jecute chi judíode ore pojna edopari údode enga ore chojninga: —Bajegaidi u ujetiga be uté uruode quigode. Jé basa uyoque ga yicoi jnani bajai Moises iroquéode. 29 Que potigayaquérique déji yoc uje Dupade catecã́ri yocai jnani bajai Moises nanique. Mu que yirajagópise baquetangóri jnani uté garãtique.— 30 Jnani edopari chi chojninga: —Quedéjnapise uacaruode udore. Uje que arajáyo uté garani uje uté ujopie cuse ga chuchẽre yedodie gai. 31 Mu yirajágo jnese uje Dupade que doi sijnángone ore uruode quigode. Mu tangaripísi dajnorasórone ore uruode uje ore u gu uje ore doi áyipiedie quigode. 32 Que yudúco uté gajnúrique to ujetiga uñeque doi enga chuchẽre edoparitique edórigui gáyode ujetiga edoparígaja guesi iji datéraque. 33 Ujetiga jnani uté ca garani u Dupade enga a ca pesurásu cucha pitijátique.— 34 Mu chi ore chojningame edopari uruode: —Basijnaringuéone u uje pésu ua ica enga edoparique ua aja guesi iji baté. ¿A ca ajéngome yoque to a? Uje bapota jeta acate yoque to ome cuchade.— Jé u uje chi judíode ore angaránone ore tṍra edopari aja guesi iji daquiningamei guiguíjna. 35 Jesus chi e chiraja uje judíode ore tṍra edopari aja guesi iji daquiningamei guiguíjna. Jecute uje chi Jesus e chise edopari enga chojninga: —¿Jé ũré yu jõ? uje bangureta Dupade Abi.— 36 Mu jnani edopari chi catecã́ri Jesus enga chojninga: —Yocangaráni a, ango yu uté gosi ujetiga yangureta uté to.— 37 Jecute chi Jesus chingo raja enga chi chojninga: —E bamo Dupade Abi que ẽrie. Uyu u uje bacatecã́ri yu iji de.— 38 Jec u uje chi jnani edopari uté doi ga chichaga dagatáidie aja jnumi iji Jesus iquei enga chojninga: —E yangureta ua, Yangaráni a.— 39 Udojo quigade ga Jesus chojninga: —Yise erámone udojo nanique gu ujetiga yipésu cuchade aja quigode. Jecute yuchẽre edoparigode ore edodie gáyode ujetiga ore chimo dajirigode. Jé basa yujuru dicotarechoquíode ore áyipiedie gáyode. Enga a ore gajnúone u edoparigode.— 40 Jecute chi fariséode uñéngo chi ore chudute Jesus uruode enga chi ore chojningame: —¿Ja edoparique yoque to a ome ua ya?— 41 Uje chi Jesus chajnai ore uruode enga chi chojninga: —Ujetiga jec ũré enga agupurai uaque ome Dupade uruode quigode, enga jogadi jé urásu ujetiga uacajnui urásu edoparigode. Enga a ca tiógararása ujetiga pujuya uaque ome uacate gajnaréngone. Mu uacojnicho: “Yirajágo Dupade uruode quigode.” Jecute jé tiógara ome uacaringane pujuya.—
1 Jesus chacãra dacajnaquéode aja áyasadie pie enga chojninga: —Jé ũrepise yu uje oriechoquíode ore pijoque gu uje que ore chacája piagópisi iji áyasadie pie. Mu ore pógu re enga ore chacája uéchai uñai uje íjnoque piagode iji. 2 Jé basa ga áyasadie gachisõripise gosi enga chacája piagoi aja darodedie áyasai. 3 Ujetiga áyasadie pie irodisṍri chimo áyasadie gachisṍri enga jé u uje chuchẽre piagoi gai ome ujetiga chacája ajei. Enga áyasadie chiraja dachisṍri pijnane. Enga uté chĩ́care áyasadie ore íode uje chijnime ore iji pie ajei. 4 Enga jé u uje chijnime ore iji pie ajei. Enga uje e ore déji guesi jnese enga basaja ore iquei. Enga jé u uje áyasadie ore chajna. Chamáña gu uje ore chiraja uté uruode gu. 5 Enga que togome áyasadie udire ujetiga ore chajna damójmarique. Mu ore chayome. Que ore chiraja uruode gu.— 6 Uje chi Jesus chacãra dacajnaquéode aja cuchade udore mu chi ca ore chiraja quigode go. 7 Jé u uje chi Jesus chingome ore gaté. Enga chojninga: —Jé ũrepise yu ome udojo uje yojninga: yajnui u áyasadie pie piagoi ujetiga áyasadie chacája dabié. 8 Judíode uje ore cho pacadisórone iji raque iji yiquei ore gajnúone u oriechoquíode. Ore ajéode u ujetiga áyasadie chajna ore mu que togome ore. Uje áyasadie que ore chiraja ore gu. 9 Yajnui u guiguíjna piagoi aja Dupade yui. Ujetiga gosi chacája yu enga chise daringárique piquetaque jne. Enga gajnúraque a u yachidéraque áyasa uje gajneque dabié ujetiga chacája jeoga doi guesi ujetiga chucué dabose jnacarátique. 10 Yirajágo uje oriechoquírique áyipieraque que jnoji doriquéode. Enga que cucha ome uté ujetiga chujé dojórique ayoré jeoga tṍra orugúcharigo aja quedéjnaringo. Mu uyu, yise jnumone nanique gu ujetiga yisi ome pucuecaringué eyúgojmai ome ore enga a ca yicaniratiguéode eruénique cuse ome ore. 11 Yajnui u áyasadie irodisõre paraguípisi. Uje áyasadie irodisõre parai uté tẽra re ome darodedie áyasai. 12 Mu yirajágo uje que paraque áyasadie irodisórone ore jnese go. Uje uñane ore chirote áyasadie gu ujetiga ore irósõrone ore cho ore oré ome daplátadie. Enga que pijnoraquérique déji ore ome darodedie áyasai. Jecute uje ore chimo cuchiso sijnángone iji darodedie áyasai uéchai enga ore chayome enga ore noñome darodedie áyasai iji te. Chamáñaje que ore gajnei darodedie áyasai gu. Jé u uje cuchiso sijnai uté jno uñanie údi. Enga amirenie chisite raja erámone. 13 Mu jnani uté chayo enga noñome darodedie áyasai iji te, uje que cucha gotique ome uté ujetiga cuchárique chósi ti iji darodedie áyasai. Chamáñaje uté áyipiedie que déji cucha uñeque. Ajegaitedaté u darósõri iplátadie ome re gu ujetiga cho oré isagode cucha. 14 - 15 Mu uyu u uje yajnui u áyasadie irodisõre parai. Yapade chiraja yu gu, enga yirajápo Yai to rĩ. Adi jé upo rĩ uje yirajápise yirodedie áyasai enga ore chirajápo darodisṍri uyu to rĩ. Enga dimane yu ujetiga yẽra yu ome yirodedie áyasai. 16 Mu yajnenie áyasai uñanie déji uje cáma ore chise dabié udé. Mu a yijna ore aja yu to jne. A ore tangaripísi yu to jne. Chamáñaje a yamáta ore aja yachidé bajedie enga ore quitique chojmára jne. Enga a ore irodisónique chojmárapo rĩ. 17 Yai chijnorapise yu gu uje dimane yu ujetiga yẽra yu ome ore. Mu a ecápo yu rĩ. 18 Que togome uñeque ujetiga chijna yucuecaringuei iji yari. Mu yajéode ome yu u ujetiga yẽra yu. Enga yajnei u ujetiga yijnime yucuecaringuei iji yu, enga yajnei upo rĩ ujetiga yatĩrépo yibai. Yai jé urúo nanique gu ome yu.— 19 Uje chi judíode ore chudute Jesus arecujáidie udire enga ore botãre ñane ome Jesus uruode quigode. 20 Chi uásejna ore uje chi ore chojninga: —¿Jé ome gotique gu a uje uacangáchoi uté? ¿Ja ca arajáyo uje Satanas utocaitique a déji uté enga cho ũrusode?— 21 Mu uñéngo chojninga: —Que togome uñeque ujetiga Satanas utocaitique déji ajei ga urúo udore. ¿Ja togome Satanas utocaitique a ujetiga chuchẽre edoparitique edórigui gáyode?— 22 Jesus déji Jerusalen iji esoi uje judíode ore jnusinamáni dire u uje ore jnusina dayode jnani bajade adode uje ore pésu Dupade iguíjna cuchábi aja gaté nanique enga ore tẽra dapesudi aja Dupade nanique. 23 Enga Jesus chi e diguiji Dupade iguíjna cuchábi imeñéraque nanique uje jnani bajai Salomon gajneque nanique. 24 Judíode chi ore chaparu Jesus gai enga chi ore chojninga: —¿Jé gotique gu a uje que ango ua gosi aja yoque ujetiga yoquijnati Crísto jé u ua? Be enga angopísa yoque.— 25 Jesus chi chajnai ore uruode enga chojninga: —E yingome uaque dúrase ẽrie. Mu que anguretáyo yu. ¿Jé gotique gu a? uje que anguretáyo cuchade udore uje yipésu gu Yai utoquéode. Obiréjna yuringai Crísto gu yipesudode udore. 26 Quene yacate uágome uje yajnenie áyasai udire u uje ore chiraja yu. Mu uhuaque, jé que anguretáyo yu. Jé pijoque uaque uje que yajnenie áyasai uaque go. 27 Uje obiréjna yajnenie áyasai ore to. Uje ore chiraja yibijnane. Yirajápo ore to rĩ. Enga udire ore u uje ore chajna yu. 28 Uyu u uje yẽrate pucuecaringué eyúgojmai ome yirodedie áyasai udire. Enga jogadi u uté ujetiga ca togadegue uñáraque. Que togome uñeque rĩ ujetiga chijna uñáraque iji yijmáinie. 29 Yai Dupade uté u uje guerané ore ome yu. Enga Yai u uje sué ore gáyode jnese. Jecute que toguipis ome uñeque rĩ ujetiga chijna uñáranguiji jmáinie. 30 Yai Dupade, uyoque jé yitojmárangopise.— 31 Jesus uruode udore pésu ga judíode ájningaraque ore ome. Enga chi ore chajni cucaranenie gai ujetiga ore chisa Menga ore chatingare Jesus ome. 32 Jesus chi chojninga: —E yipesudode cucha arécho uásejna iji uacaquéode uje yoidé u Yai ujopiedaté ome. ¿Jé déji rique iji yipesudode udore uñeque uje uacasayo cucaranenie ujetiga atingáracho yu?— 33 Judíode chi ore chojninga: —A ca yatingáraco ua gotique ome bapesudode udore cucha areque uñeque. Mu yatingáraco babai gu ome baru gajnaréngone udore quigode uje bo Dupade iji ua. Chamáñaje baruode dosója Dupade ome yoque gu. Uje cachi yocujo jnutiminore ua múñi.— 34 Mu Jesus chajnai ore uruode enga chojninga: —Ja ca ajnusináño uacajirigode Dupade uruode quigode uje chósi te: “Yichajapite uacaringane eduguéjna enga e yujo Dupade uaque to.” 35 Yirajágo uje que toc ujetiga yichágo ore urusarane Dupade urúo aja ti yui. Jecute anguretáyo Dupade uruode udore quigode uje cho dojo dupade iji daruode atatasórone nanique uje ichajapite ore uringane eduguéjna ome ore. 36 Jé isocai u ome yu. Uje Dupade ajegáite yu nanique ga chiroque yu aja erámi nanique. Mu jé go uje uacojnicho ome yu: “Gajnareque baruode ome Dupade uje bojningame yoque, Dupade Abi uyu.” 37 Ujetiga ca yipesudode curẽ́sori Yai ipesudode enga jé ca anguretáyo yu. 38 A otigáso yu mu ujetiga yipesudode curẽ́sori Yai ipesudode enga que potigayaquérique déji yipesudode udore garani, uje Dupade u. Jecute ome yipesudode udore a jĩraque arajayórase to uje Yai déji yari enga yugusapóji uté gari to rĩ.— 39 Uje que ore chise Jesus uruode udore unétique enga ore potapo ujetiga ore chisa rĩ enga ore suru gai. Mu Jesus chi jnoji ore jmáinie. 40 Udojo quigade enga Jesus chi chajniapo aja tie rĩ uje i u Jordan ga chicáji guedé garani iji tie uéchai. Ga chi cháji te uje chi Juan chaca ore edodie iji nanique. 41 Chi uásejna cojñone uje chi ore chise Jesus iji charidi ga chi ore chojningame ñane: —Que Juan casica pésu dapesute cucha pitijate ica mu chacate yoque ica ome Jesus uté adode enga jé ũrepíso acajnaquéode quigode.— 42 Jecute chi uásejna cojñone udore ore uje ore changureta Jesus iji charidi uté.
1 Chi jnani ejnaretátique déji ore idai Betánia uje chi i tu Lázaro. Ga jõra gáredie ore idai chi jé u to uje ore íode u Maria, Márta ore. 2 Ejnaretai Lázaro jõra Maria uaté chi u uje chojne cucha ai uneréjna aja Jesus guídade gai nanique enga doi ga chaguñéra datui aja gai. 3 Diga Lázaro jõra gáredie udire ore chiroque darógode aja Jesus ujetiga ore chojningame: —Yocangaráni a, bãjorai Lázaro ejnaretaque.— 4 Uje chi Jesus chudute ore uruode enga chi chojninga: —Dequejnarei uté a ca chujépise Lázaro jne. Mu ejnaretaque Lázaro gu ujetiga Dupade chingo daringai eduguéjna cuchap aja ore. U to ujetiga chingopo dabi uyu yuringai cuchap aja ore rĩ.— 5 Jesus chijnorapise Márta, Maria, Lázaro ore marínga que jĩraque tibágui ore. 6 Uje chi ore chojningame Jesus: “Lázaro ejnaretaque,” mu chi qué chejnapo dire gáreode iji dayaridi rĩ. 7 Mu uje chi Jesus chejna dire gáreode enga chi chojningame dacadigode: —Boyo ga yico. Yicagópoi Judéa rĩ.— 8 Mu chi Jesus acadigode ore chetaque áyipiedie quigode ga chi ore chojninga: —Yocacadisṍri a, qué upo diri casodé uje judíode iji Judéa ore chucué dasocáringome ua ujetiga ore chatingare ua ome cucaranenie. ¿Ome gotique gu a uje bapota bajniapo aja Judéa rĩ?— 9 Mu Jesus chi chojningame dacadigode: —Jec ũré yu ẽrie uje guedé gatocorodie gare iji pirídai ujetiga gosi diguiji deréjnai údode. Ujetiga gosi diguiji dínique enga que toc ujetiga cṍra. Chamáñaje díreca jnumi gu. 10 Jé basa ujetiga gosi diguiji dejai enga cṍra. Amiri tu direcaringuei ome gu.— 11 Udojo quigade ga Jesus chi chojninga: —Yoquĩjorai Lázaro qué mo. A yiji jne enga yiringare jne.— 12 Uje chi Jesus acadigode ore chudute uje Lázaro e mo enga chi ore chojninga: —Yocangaráni a, ujetiga jec ũré baruode udore enga ise ga Lázaro e ninguira údode jõ.— 13 Mu Jesus urui qui u uje chi Lázaro e toi. Jé basa acadigode ore jos eti quigode Mu ujetiga Lázaro qué déji damotique. 14 Jogadi jé u uje Jesus chingopísa ore enga chi chojninga: —Lázaro e toi.— 15 Mu chi Jesus chojninga: —Jé areguipise ome uyu uje que yugúsi to uje Lázaro toi. Uje ueradi tu ome uaque ujetiga amóño yipesute datérique gajneri enga jogadi u ujetiga anguretáyo yu.— Enga chojningápo rĩ: —Bo yico enga yibájoi.— 16 Mu chi Tomas catecã́ri dojode Jesus acadique ore enga chojninga: —Boyo yico, yijínango, enga yoco yoquibaya jne iji ta ujetiga ore chujé.— Tomas uté u uje chi garaja ore nanique. 17 Uje chi Jesus chirõre ore idai ga chi ore chojningame Jesus: —E dirode gagájni iji yui uje ore chijochame Lázaro diríca.— 18 Ore idai uté Betánia chi idógosiji Jerusalen. Chi kilómetrodie gare enga chi nóna petique iji ore idáyode udore ujai. 19 Enga chi uásejna judíode ore uje ore tṍraji Jerusalen ga ore chicáji Betánia ujetiga ore chajire Márta, Maria ore ome dajai itoringai. 20 Mu uje chi Márta e chiraja uje chi Jesus e di enga chi chachai iji garani. Mu jõra Maria chácariji ore iguíjnai. 21 Mu Márta chi chojningame Jesus: —Yangaráni a, ujetiga agúsirási de diríca enga yocaja casé a ca torási diríca.— 22 Mu Márta chi chojninga: —Yiraja uje a Dupade chisi ome ua bataidode cucha jnese.— 23 Jesus chojningame Márta: —Uacajai a jé ecápo jne rĩ.— 24 Márta chi chojninga: —Yiraja uje a nijiápo jne rĩ iji datoringai quigade iji dirode udore erueminóri uje piringaraque togode.— 25 Jecute chi Jesus chojninga: —Uyu u uje yiringare ore. Uyu upo rĩ uje yisi ome pucuecaringuei ome ore. Ujetiga gosi changureta yu, gosi a toi mu a ecápo jne rĩ.— 26 Jesus qué jno daruode údi enga chojninga: —Enga isocai jé upo ome yanguresõre uecade ore jnese. Uje ore changureta yu, a ca ore chimo pitoringai ome re gotique.— Enga chojningápome Márta rĩ: —¿Angureta yuruode udojo a?— 27 Márta chojninga: —Ejẽ, yangureta baruode, Yangaráni a. Enga yanguretapo baringai yoquijnati Crísto rĩ. Jec aja baringai Dupade ape uje chi di jne iji yoque iji erámi tudé.— 28 Udojo quigade ga Márta chise dãjora Maria enga catecã́ri mu pógu daruode enga chojninga: —Yocacadisṍri de ti. Pota ujetiga chimo ua.— 29 Enga Maria chudute udojo, dãjora Márta uruode, enga jé u uje jĩraque Maria jno enga tibágui Jesus. 30 Jesus cáma chise ore idaipísi. Jé qué déji dayaridi uje Márta chi chisíji. 31 Uje Maria osõrasórone judíode ore chimo Maria uje jĩraque jno ga ore nóna. Ore ajéode u gu ujetiga Maria poji dajai ode ejode. 32 Chi Maria chise Jesus charidi enga chi chichaga dagatáidie aja jnumi iji Jesus ejoi enga chi chojninga: —Yangaráni a, ujetiga agúsi de, yaja casé a ca torási diríca.— 33 Uje chi Jesus chimo Maria uje chi po, jé aja judíode ore rĩ uje chi ore nóna, ga chi chosõripise ore. Enga ore agoyedie chijnorosipise. 34 Enga Jesus catecã́ri ore ga chojninga: —¿Ajochañome iji rique diríca ya?— Enga ore chojninga: —Yocangaráni a, bo iji ti enga ajire to.— 35 Enga Jesus po to. 36 Ga judíode ore chojninga: —Cajicho to. A chijnorapise Lázaro jõ.— 37 Mu chi uñane ore chojninga: —Uté u ica uje chuchẽre edopari edodie gai. ¿Gotique gu a uje que di diríca enga chiqueta Lázaro diríca ujetiga ca toi?— 38 Posõraquei chisápo Jesus ajei rĩ. Jé u uje chi chose Lázaro ode yui. Chi Lázaro ode cucarãtedo mu ore suru gai ome cucarané. 39 Enga Jesus chojninga: —Ajnicho cucarané iji Lázaro ode gai.— Mu Lázaro toi jõra Márta chojninga: —Yocangaráni a, a e ánique chójmare. Jé dóji. E dirode gagájni iji yui uje toi diríca.— 40 Mu Jesus chojningame Márta: —¿Ja ca ajnusina yuru casodé a? Uje yojningame ua: “Ujetiga angureta yu jne enga a amo Dupade ujopie ingoningájnai.”— 41 Chi ore chijnime cucarané iji Lázaro ode piagoi. Jé u uje Jesus chajire gaté enga catecã́ri dai Dupade. Enga chojninga: —Yapa, yacãre babai iji de. Chamáñaje bangári yuruode gu. 42 E yiraja uje jecucha bangári yu. Mu yicatecã́ri ua iji cojñonguemui udé ore iquei ujetiga ore chiraja yuringai batocáite enga ore changuretápo yu rĩ.— 43 Uje chi chejna udojo guesi jé u uje chejnapúsu daruode enga tibidi Lázaro enga chojninga: —¡Lázaro, be guesi iji bode!— 44 Enga jé u uje chi jnani toi uté doi guesi iji dode. Enga chi guídade, jmáinie ore chimeriji borapei údode. Adi jé u ome edodie, gatoi ore rĩ. Jesus chi chojninga: —Ejñuño borapéode iji údode. Jé dóji ga dique.— 45 Udojo quigade enga chi uásejna judíode uñéngo uje chi ore changureta Jesus. Yojningane u udore ore uje ore chajna Maria aja dajai Lázaro ode enga ore chimo Jesus uje chiqueta ore dajai iji itoringai. 46 Chi udore uñéngo chi ore tibágui fariséode ore ujetiga ore chingo Jesus ipesudode aja ore. 47 Jecute fariséode, sacerdóteode eduguéjnane ore cháta rágaja ore angaranipísode. Enga chi ore chojninga: —¿Jé yoco ringome jne a ome jnani uté ome ipesudode cucha pitijádode? Uje chi e uásejna ipesudode udore cucha. 48 Ujetiga ca yãrájo uté ipesudode udore ome enga a ore changureta uringai Dupade utocáite jnese jne. Enga a yoqueduguéjna cuchábode, Róma gosode, a ore jos eti yoco yoqueduguéjna iji uté. Enga jogadi u ujetiga ájningaraque ore ome yoque. Enga a ore chajnangarase Dupade iguíjna cuchábi enga a ore chãraque yocuringane eduguéjna ome yoque to.— 49 Mu chi ore eduguéjnane uñeque déji uje chi i u Caifas. Enga chi sacerdóteode ore eduguéjnapisi u uté iji sequeré uaté. Enga chi uté chojningame ore: —Que arajáyo cuchárique. 50 ¿Ujetiga cucha arei u ujetiga gusu toque jnani chojmarai tuté, jeoga ueradi u ome uaque ujetiga yocuniri íjnoque?— 51 Mu que eduguéjnai Caifas uté uruode garani u re gotique. Mu garani u Dupade. Chamáña gu uje chi sacerdóteode ore eduguéjnai u uté iji sequeré uaté. Jecute Dupade chingo payuquetotiguei aja ujetiga chatata uje Jesus a toi jne ome darásade judíode. 52 Mu chi ca gusu judíode ujetiga Jesus toi ome ore, mu jé upo ome erámone unirisórone ore jnese ujetiga ore chise daringáringo Dupade abío. Enga a jogadi u ujetiga chamáta ore iji erámi údode jnese. 53 Jecute diri uté chi u uje judíode ore angaránone ore chimate dáyipiedie ujetiga ore chujé Jesus. 54 Jecute Jesus chi ca chingopo raja judíode ore rĩ. Mu jnoji ore uniri Judéa. Enga chicáji ore idánique uje chi i tu Efrain uje chi idógosiji erãp eyutiguei. Enga chi Jesus acadigode ore cháji Jesus gari iji te. 55 Uje chi dirode e garósi ome judíode ore jnusinamáni dire uje chi i tu Páscua enga judíode chi ore íjnongaja Jerusalen uje ore tṍraji guidáyode uñane. Ore gaidi u ujetiga ore doi dajmapiedie ome daringáringo icha. Ujetiga dimane ore ome dajnusinamáni dire yui. 56 Enga judíode ore chucué Jesus aja dajesúode. Diga ore chise Dupade iguíjna cuchábi enga ore catecã́ri ñane enga chi ore chojninga: —¿Chimo joroque re eti ca Jesus chicáji yocujnusinamáni dire to jne?— 57 Enga chi fariséode, sacerdóteode eduguéjnane ore chingome cojñonguemui ujetiga gosi chiraja Jesus jogatique enga chingo jogadi aja ore. Jé u ujetiga ore doi ga ore chisa Jesus enga ore suru gai.
1 Uje chi dirode chojmára iji ti iji judíode jnusinamáni dire Páscua yui enga Jesus jno enga chicáji daquetai Lázaro idai uje i u Betánia. Lázaro uté u uje chi Jesus chiringare iji itoringai quigade. 2 Chi Márta, jorane ore nína Jesus yui. Jecute chi ore pésu ore pose unérone ome Jesus. Márta chi u uje chisi ore iji ore posode. Mu Lázaro, jorane ore u uje ore nóna Jesus iji ore agapidi gai. 3 Udojo quigade enga chi Maria di cucha ai unénique údi uje chi oidi uté cucha ai unere chajni iji pie pajénique. Uje chi pie uaté chome lítro chojmarai. Cucha ai uneri uté chi i u nárdo enga chi oredie jiépisi. Enga nárdo ueque. Que ore chimesa cuchade uñeque. Enga Maria chojne cucha ai uneri uté aja Jesus guídade enga jé u uje chaguñéra datui aja guídade. Cucha ai uneri uté chi chusaque ore iguíjnai ajei jnese. 4 Chi Simon gaté ujnacari déji ore gari to uje i u Júdas Iscariote. Uje chi Jesus acadigode jõra uté to. Chi uté u jne ujetiga tẽra Jesus ome damajosórone. Enga uté catecã́ri dejominórone. 5 Chi chojninga: —¿Jé gotique gu a uje que tẽra cucha ai uneri uté? Enga yisígo jmatágode ore iji orérigui. Chamáñaje oredie jiépisi gu, enga a oredie chisírase 300 denárionie .— 6 ¡Cho jetiga caniraque Júdas ome jmatágode! Ayipie qui u gu ujetiga toriarase uñáringui ome re. Chamáñaje uté oidé Jesus, acadigode ore iplátadie pie. Enga jecucha isocabeque uje chijnime uñanie ome re. 7 Jecute Jesus chojningame Júdas: —Qué dóji, jé ca barúrique gajnaréngaja chequé uaté. Chequé uaté chañuru cucha ai uneri uté guio gu ome yu. Uje e chojne cucha ai uneri aja yirídade gai ga imoi tu uje e dimane yu ome yuringárique pijóchõre. 8 Uje jé ate ome uaque iji deréjnane uje jmatágode ore charite uacajade ujetiga osṍcho ore. Jé basa uyu ga idógosi ujetiga ca yugusapo uacajade to jne rĩ ujetiga osṍcho yu.— 9 Chi uásejna judíode ore uje chi ore chudute to uje Jesus chi déji Betánia enga chi judíode ore chicáji. Mu que gusu ujetiga ore tibágui Jesus, mu ore ajegaidi upo rĩ ujetiga ore chimo Lázaro. Uje Jesus chi chiringare iji itoringai nanique. 10 Mu chi sacerdóteode ore eduguéjnane chi ore chimate dáyipiedie ujetiga ore chujé Lázaro to. 11 Ore guetétigai u uje chi uásejna judíode uje ore changureta Jesus gu dapesute datei uje chiringare Lázaro, enga ore cha ore tangári deduguéjnane sacerdóteode ore. 12 Chi cojñonguemui di iji Jerusalen ome ore jnusinamáni dire uje chi i tu Páscua . Diri uñai enga chi ore chudute uje chi Jesus di iji ore idai Jerusalen gajneri. 13 Uje cojñonguemui nína Jesus yui enga jé u uje ore chaquesu ijnacojodie ujetiga ore chachai enga ore charẽ́ji yúode. Enga ore tibidi iji dejode enga ore chojninga: —¡Picotaguipise opejã Dupade! Yocangaráni Dupade utocáite uté aja yoque e. Israel gosode yoqueduguéjna cuchábi uté to e. Jé tiógarapísa ujetiga Dupade chatapísaja uté e.— 14 Jesus chi chise burica quedéjnarique enga chi cháji gai. Enga Dupade uruode quigode chi jé u uje chojninga: 15 Guidaidatei Sion jogosórone uaque a, ca atodóyo. Cajicho to uje uaqueduguéjna cuchábi cháji burica quedéjnari que gai aja uaque. 16 Iji cuchade udojo taningai chi Jesus acadigode ca ore chiraja quigode. Mu quigade u uje chi Jesus ecáji daringai toque enga ore áyipiedie quene déji Dupade uruode udore uringane tocachucho. 17 Cojñonguemui udore ore uje chi ore déji Jesus gari uje tibidi Lázaro iji ode, udore ore u uje ore jno cucha dacadode udore ujnomei údi. 18 Jecute chi cojñone ore chachai Jesus iji garani. Chamáña gu uje ore chudute ipesute cucha datei ujnomei. 19 Jecute fariséode ore chojningame ñane: —¡Cajicho to! ¿Yoco ringome jne a? Chamáña gu uje ore íjnongaja quigade.— 20 Chi Grécia gosode uñéngo chicáji Jerusalen to ome judíode ore jnusinamáni dire. Chamáñaje ore chijnóra Dupade gu. 21 Enga udore ore chose Betsáida gosi Felipe yui uje uté idai déji ore uniri Galiléa. Enga ore chijócha Felipe ajei údi enga ore chojninga: —Yocajegaidi u ujetiga yimóngo Jesus to.— 22 Enga Felipe chi jno enga chingome Andres. Enga ore nóna ñane ujetiga ore chingome Jesus. 23 Enga chi Jesus chojninga: —Deréjnai e u ujetiga Dupade utocaidi uyu yise yuringai pujnuéngaisṍre. 24 Mu jé ũré yu uje a yitoi bajaque. Enga yajnua a u arroz quedéjnai ajñua. Uacamóño ujetiga ca pijóchõre cucha ajñua enga aode basiji gai enga a ca sué jne. Mu cucha ajñua chojmarai iji deréjnane. Jé basa ga ujetiga pijóchõre cucha ajñunie enga jogadi u uje ore aode tarata jnumone, mu jogadi upo rĩ uje ajñugaté iji ajei sué. Quérã enga jiei adie. 25 Ujetiga gosi chijnóra dacuecaringuei ome re enga a bijna gosi ucuecaringuei ome re jne. Jé basa gosi ujetiga cha dajnerai ome re iji erámi udé uté u jne ujetiga chise pucuecaringué eyúgojmai ome re jne. 26 Ujetiga gosi pota doi yiroquéode enga doi enga chirate yadode. Enga ujetiga gosi doi yiroquéode a chise yijogadi to. Enga a Yai Dupade chisi uté gosi gai jne ome dagaidode yiroquéo.— 27 Jesus chiraja dagachodi yui jecute chojningame re: —Yo yáyugu yu. Enga que togome yu ujetiga yojninga: “Yapa ãraque yu ome cucha dacadode uje a tocade jne ome yu.” Yiraja gu uje yise jnumone nanique gu ujetiga cucha dacadode udore tocade ome yu.— 28 Enga chi Jesus catecã́ri dayé enga chojninga: —Yapa, be bajéningo ome yu ujetiga diga picotaque opejã ua ome ore.— Enga jé u uje ore chudute darade uje tṍraji gatajnoquei. Uje chojninga: —E yise yuringai picotaque que, enga diga picotagapo yu jne rĩ.— 29 Cojñone ore uje chi ore déji uté uje chi ore chudute darade enga chi ore jos eti guéode urúo. Mu uñane ore chojninga: —A Dupade utocaitique uñeque catecã́ri Jesus que.— 30 Enga Jesus chojningame ore: —Darade udore uje uacadúcho que, que yajnécho go mu uacajnécho. 31 Enga deréjnai e u ujetiga pajirique erámi unirisórone ore adode aja quigode jnese. Enga deréjnai jé upo rĩ ujetiga erámi unirisórone ore irósõri Satanas pijocãraque. 32 Adi jé u ome yu ujetiga ore chiringare yu aja gaté enga jogadi u ujetiga ore íjnongaja yu jnese.— 33 Jesus uruode quigode u uje a toji curesei gai jne. 34 Mu cojñonguemui ore catecã́ri Jesus enga ore chojninga: —Yocajirigode Moises urusãracho quigode u uje yoquijnati Crísto que eruénique cuse. Quedéjna baruode ome yoque uje bojninga: “Dupade utocaidi piringaraque aja gaté iji curesei.”— Chi ore chojningápo rĩ: —¿Jé gosi te Dupade utocaidi uté?— 35 Mu Jesus chojninga: —Dupade utocaidi gajnui u direcaringuei. Mu deréjnane e garósi ujetiga déji uacari. Jecute aquejnáño aja uté yui to uje qué dire. Socaseti dejai chise uáguiji yui enga a ca eso jne. Enga a ca togome uaque jetiga arajáyo uacajesúode. 36 Beyoi enga anguretáyo direcaringuei gajnui uté uje qué déji uacajade, ujetiga eso uacaringane direcaringuei gajnesõre.— Jesus chejna daruode udore guesi ga jé u uje jno ga chacose re ome ore. 37 Jesus ipesute datéode cucha pitijádode jiei iji ore ujade ujetiga ore changureta marínga que ore chise unétique. 38 Mu cucha dacadode udore tocade gu Dupade uruode atatasṍri jnani bajai Isaías urusarane uje chósi te: Yocangarádejna, que uñeque déji ujetiga changureta yocatatagode barúo. Ore chimo bapesute datéode, mu jé ate uje que ore changureta ua. 39 Enga obiréjna ome jnani bajai Isaías urusarane uje que togome ore ujetiga ore changureta. 40 Uje urusarane chósi te: Dupade ipesute ore ujetiga ore gajnúone u edoparigode. Enga ipesute ore áyipiedie uringane uajadei rĩ ujetiga ca ore tangári cuchárique. Gaidi u gu ujetiga ca ore chimo cuchárique enga ca ore chiraja cuchárique quitígo. Uje Dupade chojninga: “Jé socaseti ore chajni yibai ujetiga yiqueta ore.” 41 Chi jnani bajai Isaías urúo udore gu uje chimo Jesus ingoningájnai nanique enga uruode udore júdi u Jesus. 42 Mu que anguresórejmá judíode ore jnese go. Mu chi uásejna uñéngo uje chi ore changureta Jesus. Enga jé chuságaja obiréjnane iji ore. Mu udore ore que ore chingo danguretigai ome Jesus aja erámi. Ore todo fariséode ore gu ujetiga ore chijócãre ore iji daquiningamei guiguíjna. 43 Chamáñaje cucha datei u ore ujode ayoré icotaquéode ome ore gu. Jé basa que cucha ome ore Dupade irasitigade ome ore. 44 Jesus chi chejnapúsu daruode enga chojninga: —Gosi ujetiga changureta yu ga que gusu angureni uyu mu changuretapo yirósõri yai Dupade rĩ. 45 Ujetiga gosi chimo yu ga jogadi u to uje chimópo yirósõri to rĩ. 46 Uyu u uje yajnui u direcaringuei. Enga yĩri iji erámone udojo icáite gu ujetiga gosi changureta yu ga jé ca cháji ijnangununie. 47 Mu ujetiga gosi ca tangári yuruode enga que pesapo quigode rĩ a pujuya mu a ca uyu u uje yo yujuñame. Uje que yise erámone gu ujetiga yo yujuñame ore, mu yigaidi u gu ujetiga ore chise daringáringo piquetaque. 48 Gosi ujetiga ca chise yunétique enga que tangári yuruode ga e dimane uté gosi gajnei pujuyaqué. Chamáñaje a yijna yuru cásodica ome ore jne gu iji deréjnane erueminóri dire. 49 Uje yuruode udore que garani u yu gotique mu garani u yai Dupade. Chamáñaje yuruode, yacajnaquéode ore quigode upúsu yirósõri Yai áyipiedie quigode. 50 Enga yiraja ujetiga gosi tangári yacajnaquéode, Dupade urúo, enga jogadi u ujetiga gosi chise pucuecaringué eyúgojmai ome re. Jecute yedu Yai uruode udojo quigode ome uaque uje yacate uaque.—
1 Chi e dire chojmarai iji judíode ore jnusinamáni dire yui uje i tu Páscua . Jé u uje chi Jesus chiraja uje deréjnai e idógosi ujetiga jnoji erámone udojo ujetiga jé chicapóji dai rĩ. Jecucha Jesus chijnorapise danguresórone uje déji ore gari iji erámi, mu e idógosi ujetiga chingo dajnoraquedatei ome ore. 2 Jesus, acadigode ore taguíji ñane gari. Mu Satanas e chijocase Júdas Iscariote áyipie ujetiga tẽra Jesus ome umajosórone. Júdas uté u Simon gaté ujnacari. 3 Jesus chirajápise darani uje Dupade u. Chirajápo rĩ uje a chajniapo aja Dupade gari rĩ. Enga chiraja uje dai Dupade chisi ome cuchade jnese ome ujetiga chijocase. 4 Uje chi qué ore déji dabosode gai enga Jesus chague. Jé u uje chi chejñu daguidé gaimitodie enga chigaru dapajei ome borapetique. 5 Chi Jesus chojne yodi aja piéraque. Enga jé u uje chi churu dacadigode guídade. Enga quigade ga chejñu borapei iji dapajei enga jé u uje chaguñéra dacadigode guídade gáyode. 6 Uje chi jé chururase Simon Pédro guídade mu Pédro chetaque ga chojninga: —Yangarádejna, que pisocai u go ujetiga pacadisónique churu dacaditique guídade.— 7 Mu uje chi Jesus chajnai Simon Pédro uruode enga chojninga: —Cáma araja yipesudi udé quigode. Mu a quene araja iji quigade.— 8 Mu Pédro chajnai Jesus uruode enga chojninga: —A ca yujuéga ujetiga aru yirídade to jne go.— Mu Jesus chi chojninga: —Ujetiga ca yuru barídade enga a jé ca toque jne ujetiga yitojmárango jne iji jnumi.— 9 Enga chi Simon Pédro chojningame Jesus: —Ujetiga jé ũré baruode udore enga ca gusu yirídade mu aruapo yatoi, yijmáinie ore jnese rĩ.— 10 Enga Jesus chojningame: —Uje quene gosi chise daringárique puruque enga icha gai jnese. Gusu uté guídade uje iguirode déji gáyode, jecute guídade u ujetiga purucho. Ichapise yacadigode uhuaque, mu que icha uaque jnese go.— 11 Jesus e chiraja dẽrasṍri gosi jecute chojninga: “Que icha uaque jnese go.” 12 Uje chi e chejna guesi uje churu ore guídade enga chiguiapo daguidedie uquidé rĩ, enga nonapo ore iji ore agapidi mésa gai rĩ. Jé u uje chojningame ore: —¿Ja arajáyo a yipesudode udojo quigode a? 13 Uacojnichome yu: “Yocacadisṍri a.” Uacojnichopome yu rĩ: “Yocangarádejna.” Enga jé tiógara ujetiga oyo uacacadisṍri iji yu. Enga oyópo uacangarádejnai iji yu rĩ. Chamáñaje uyu u gu. 14 - 15 Ujetiga uacangaráni, uacacadisṍri u yu mu jé yuru uacarídade. Mu beyoi enga ajnáño yijmapié enga aruyo ñane guídade to. 16 Jé ũrepise yu ome yuruode uje que togome pirótique ujetiga sué darósonique gai. Enga que togapo rĩ ome putocaitique rĩ ujetiga sué datocaisṍri gai. 17 Ujetiga arajáyo yacajnaquéode udojo quigode, enga beyoi quigode, jogadi u jne ujetiga anínaño uaque. 18 Mu que yojningane u uaque jnese go. Yiraja yajegaidode iji uaque, mu yirajápo rĩ uje uacuñai a tẽra yu jne ome yumajosórone. Yiraja gu uje que toc ujetiga Dupade uruode quigode ca tocade. Uje ore urusarane Dupade urúo déji uje chojninga: “Yacasõrasórone uñeque a tẽra yu jne.” 19 Yingome uaque cucha dacadode udore bajaque ujetiga ajnusináño quigode ujetiga e tocade. Enga jogadi u jne ujetiga arajáyo uje que yãra uaque ome yuringai yojninga, enga anguretáyo yu jne. 20 Jé ũrepise yu ome yuruode udojo: ujetiga gosi chimesere yirótique enga imoi tu uje imeseraque yu to. Enga isocai u to ujetiga gosi chimesere yu enga chimeserapo yirósõri to rĩ.— 21 Uje Jesus chejna daruode udore guesi enga chi chise áyipie uje acadigode uñai a tẽra jne. Enga jé u uje chingopísa daruode aja dacadigode ore. Enga chojninga: —Jé ũré yu uje a uacuñeque tẽra yu jne ome yumajosórone ore.— 22 Enga chi acadigode ore chajire ñane mu que ore chiraja Jesus ojningai iji ore. 23 Jesus acadigode uñai déji Jesus ejoi iji ore agapidi mésa gai uje chi Jesus ijnorai u uté. 24 Enga chi Simon Pédro toji dãjorai uté gai enga cho dabujame ujetiga catecã́ri Jesus ome ojningai gosi. 25 Jecute Jesus ejominóri uté chose yui enga chojninga: —Yangaráni a, ¿gosi u bojningai?— 26 Ga chi Jesus chajnai uruode enga chojninga: —A yaca arureque petíguiji yoquibosode otadi, enga yojningai uté u uje yisi ome.— Uje chejna daruode udore guesi enga Jesus chaca arureque pei iji ore posode otadi enga chisi ome Simon gaté ujnacari Júdas Iscariote. 27 Uje Júdas chisa Jesus guerani arureque pei enga jĩraque Satanas chijocase Júdas áyipie ujetiga tẽra Jesus. Jecute Jesus chojninga: —Aguito, bo gajneri enga jĩraque apésu bajéningo.— 28 Mu que Jesus acadigode uñeque chiraja Jesus uruode udore quigode, uje ore déji mésa gai. 29 Júdas uté u uje chañuru Jesus, acadigode ore iplátadie pie bólsa guio. Jecute ore jos eti Jesus uruode qui u ujetiga Júdas doi dajegaitígo cucha ome ore jnusinamáni dire yui. Jeoga chisi jmatágode ore iji dajnunguenie plátai. 30 Uje Júdas e chisa Jesus guerani arureque pei enga chi jnoji ore gari. Enga chi e dejaque. 31 Uje Júdas e jno enga Jesus catecã́ri darijogosórone ore enga chojninga: —Deréjnai udé e u ujetiga pijoque Dupade utocaidi uyu yingoningájnai. Enga Dupade ingonigájnai pijogapo iji yu to rĩ. 32 Ujetiga Dupade utocaidi uyu yingome Dupade ingoningájnai aja ore enga jogadi a jé u to ujetiga Dupade chingo yingoningájnai aja ore to. Enga a jĩraque yuruode udore tocade jne.— 33 Enga Jesus chojningápome ore rĩ: —Yababode uaque a, a ca diyajmaque yu iji uacari jne. A acueyoi yu jne mu a ca eso yu. Adi jé u yuru cásodica ome judíode ore uje yojninga ica ome ore enga jé yingome uaque to uje: a ca togome uaque jne ujetiga eso yijogadi. 34 Mu yijíñome yiroqué ichai udé iji uacari: ujetiga beyoi ga ajnóraño ñane. Adi jé u ome yu uje yijnóra uaque, enga beyoi yijmapié uaté to enga ajnóraño ñane. 35 Ujetiga ajnóraño ñane enga jogadi a u jne ujetiga erámi unirisórone ore chiraja jnese uacaringane yacadicho.— 36 Chi Simon Pédro catecã́ri Jesus enga chojninga: —Yangarádejna, ¿acáji rique jne a?— Enga Jesus chajnai uruode enga chojninga: —A ca togome ua ujetiga ajína yu aja yijogadi, mu quigade enga a ese yijogadi jne.— 37 Mu Pédro catecãrápoi Jesus rĩ enga chojninga: —Yangarádejna, ¿ome gotique gu a ujetiga ca togome yu ujetiga yijína ua jne? Chamáñaje dimane yu ujetiga yẽra yu ome ua.— 38 Jesus chajnai uruode enga chojninga: —¿Jé ũrepise ua ya ome baruode udore ujetiga ẽra ua ome yu? Jé ũrepise yu ome yuruode udojo: ujetiga cáma adute cochagájnai agoyedie dirome, mu a otigase yu jne enga ga gadioque.—
1 Enga Jesus chojningame dacadigode ore: —Jé ca oyo uacáyugu uaque. Anguretáyo Dupade ome uaque enga anguretayopo yu rĩ. 2 Chamáñaje pijogadode uásejna iji Yapade idai. Ujetiga ca ũré udore enga a ca yingorása uaque. Jecute a yiji jne enga yipésu uacajogadode ome uacaríringai yui. 3 Mu ujetiga yiji, enga e dimane uacajogadode ome uaque, enga a yĩriápo jne rĩ. Enga jogadi u ujetiga yiji uacádi. Yigaidi u gu ujetiga agúsoji ta to yiyaridi. 4 Uacarajáyo yiqui enga uacarajayopo dajei te rĩ aja yiqui yui.— 5 Tomas chi chojninga: —Yocangarádejna, que yirajágo baquitique. ¿Jé yoco rique jne a ujetiga yajnángo dajei aja baqui yui?— 6 Jesus chajnai uruode enga chojninga: —Dajei jé u uyu. Enga cucha uréone, pucuecaringuei ore garani jé upo yu rĩ. Gusu panguretigai ome yu ujetiga gosi chise Yai. 7 Ujetiga arajayópise yu enga a arajayopo Yai to rĩ. Uje e uacamóño gatuaque jecute a e arajayópise Yai iji de gajneri.— 8 Enga Felipe catecã́ri Jesus enga chojninga: —Yocangarádejna, be enga ango bayé aja yoc enga pininaquei irágu yoque jne.— 9 Jesus chajnai Felipe uruode enga chojninga: —Felipe a, e iyajmanguipise yu iji uacari mu cáma arajáyo yu. Ujetiga gosi chimo yu enga chimópo Yai to rĩ. ¿Ome gotique gu a uje bango yu ujetiga yingo Yai aja ua? 10 ¿Ca angureta yu a uje yugúsiji Yai gari enga Yai déji yari rĩ? Yatatagode ome uaque que garani u yu go mu garani u Yai uje déji yari. Enga angúromei tu yu uje pésu dapesudode cucha. 11 Beyoi enga anguretáyo yu uje Yapade déji yari enga yugúsiji Yapade gari to. Mu ujetiga ca togome uaque ujetiga anguretáyo yu bisideque, mu anguretáyo yu gu yipesudode cucha. 12 Jé ũrepise yu ome yuruode udojo: ujetiga gosi changureta yu ga a pésu dapesudode udore cucha to ujetiga chopise yipesudode quigode. Mu a uté ipesutígo uñéngo sué yipesute bajade gáyode. Chamáñaje a yicáji Yai jogadi jne. 13 Cuchade jnese ujetiga atayóji Dupade gu uacanguretigai iji yi enga a yipésu ome uaque jne. Uje yigaidi u gu ujetiga Dupade Abi uyu yingo Yai ingoningájnai aja uaque. 14 Enga que cucha uñeque cus ujetiga ca yipésu ome uaque gu uacanguretigai iji yu. 15 Ujetiga ajnóraño yu enga beyoi yiroquéode. 16 Enga a yijócha Yai ajei údi ujetiga chiroque uacátajasõri uñeque aja uaque ujetiga cháji uacari iji deréjnane jnese enga chisi ome picasitigai ome uaque. 17 Enga uacátajasõri uté u Dupade Ujopie Espíritu Sánto, uje cucha uréone garani tu. Que togome erámone jogosórone ore jnese ujetiga Dupade ujopie chise ore. Chamáñaje que ore chimo to enga que ore chiraja go. Mu uaque u uje uacarajáyo. Uacarijogonore uté gu. Enga a chise deréjnai jne ujetiga uté chacája uaque jne iji deréjnane jnese. 18 A ca yijíñome uáguiji te jmete mu a yajniapo uacabai te jne rĩ ujetiga yugusapóji uacari rĩ. 19 Idógosi ujetiga cojñone ca ore chimópo yu rĩ. Mu uaque u ujetiga amóñopo yu rĩ. Chamáñaje a yitoi mu a yiquecápo rĩ jecute a uacasocai u uté to jne. A aquecáyo jne iji deréjnane jnese. 20 Ujetiga e yiqueca iji yitoringai enga a jogadi u jne ujetiga arajáyo uje Yai uyu yitojmárango. Enga a arajayopo rĩ uje uhuaque, uyu yitojmárango jnese to. 21 Ujetiga gosi chiraja yiroquéode quigode enga doi enga pésu, uté u uje chijnóra yu. Enga Yai chijnóra uté gosi gu ijnoraquei ome yu. Que gusu Yai uje chijnóra uté gosi mu uyu u to uje yijnóra, enga a yingo yu aja uté gosi jne.— 22 Júdas uñai catecã́ri Jesus. Mu que Jesus guẽrasṍri Júdas Iscariote u go. Enga uté chojninga: —Yangaráni a, ¿gotique gu a uje a ango ua aja banguresórone uyoque jne, jé basa que ango ua aja erámone jogosórone?— 23 Jesus chajnai uruode enga chojninga: —A gusu yingo yu aja yangarasõripísode. Uje uté gosi ujetiga chijnóra yu doi ga pésu yuruode quigode. Jecute Yai a chijnóra uté gosi jne. Enga a Yai uyoque yátago yógaja uté gosi. 24 Mu gosi uje que chijnóra yu enga que doi yuruode quigode. Mu uacadudigode yacajnaquéo udojo que garani uyu go. Mu garani u yirósõri yai Dupade. 25 Uje qué yugúsiji uacari enga yingo cuchade udojo jnese aja uaque. 26 Mu quigade enga Yai a chiroque dajopie Espíritu Sánto aja uaque jne ujetiga basaja yijogadi. Enga uté a chátaja uaque jne enga a chajni uacajnusiétigade jne. U to jne ujetiga chacate uágome cuchade jnese enga uté upo rĩ uje jnusinapo yacajnaquéode quigode jnese ome uaque rĩ. 27 A yiji jne ome uaque mu a yijíñome yijogosṍri pajesereringai iji uaque. Mu yerani pajesereringai que curẽ́sori erámone jogosórone ore irasitigai pajesereringa ome uaque, uje cachi ore urúo. Jecute ca oyo uacáyugu ome cuchade. Ca atodóyopo cuchárique rĩ. 28 E uacadúcho yuruode uje yingo yicoringai aja uaque. Jé aja ujetiga yisápo uaque rĩ ujetiga yugusapoi uacari rĩ. Ujetiga jec ũré ajnóraño yu enga a pirasitigai jogadi u ome uaque uje yicáji Yai jogadi. Chamáñaje Yai sué yibai gu. 29 Yingo cuchade udojo aja uaque uje cáma tocade. Yigaidi u gu ujetiga tocade, enga anguretáyo. 30 Mu a jé ca yiji yuruode udojo údi ome uaque. Chamáñaje erámone jogosórone ore eduguéjnai Satanas diringai e puja yui. Mu que togome uté ujetiga etotiguérique sué yibai. 31 Mu yajnéone cucha a tocade jne ome yu. Yigaidi u gu ujetiga erámone jogosórone ore chiraja yijnoraquei ome Yai. Enga u to ujetiga ore chiraja uje yipésu yirósõri Yai ojningane cucha ome yu. E gusu yacajnaquéode udojo ome uaque. Boyo yico iji de.—
1 Jesus chacadápo ore rĩ enga chacãra dacajnaquéode aja erejna quedéjnai uje i u úva . Enga chojninga: —Yajnua tu erejna quedéjnai úva pacaráque uje obiréjnapise. Enga Yai gajnui u utácai uje suse dacadie úva guio. 2 Doi ga chibéro úva jmaneca bisidégode uje íjnoque adie. Mu chaquesu jmaneca ijorone eruéode enga chijnime acarãque betágode iji gai. Gaidi u gu ujetiga árigui jiépisi. 3 Mu uacajnui u úva jmanecade uje e paquesuque eruéode enga pijnimique acarãque betágode. Chamáñaje uacamesecho yacajnaquéode quigode gu uje yacate uágome diríca. 4 Mu ajóyo uágaja yu. Adi u uje yajo yu aja uaque. Que togome erejna quedéjnai jmanecai ujetiga áraque cuse ujetiga gusu iji charidi. Mu adie cuse gu uje cháta raja ero. Adi jé u ome uac. Uje a ca uacáraque cuse to ujetiga ca átayo uágaja yu. 5 Uacarajáyo uje yajnua tu ore acai ero. Jé basa uacajnúone u jmanecade. Ujetiga jé yoquijogate yóguiji ñane enga jogadi u ujetiga uacárigui uásejnai. Uacarajáyo gu uje que cuchárique toque ome uaque ujetiga ca átayo uágaja yu. 6 Mu ujetiga gosi ca chajo raja yu enga ducarãte uté gosi enga gajnui tu erejna quedéjnai jmanecaque paquesugode uje e toi enga pamatácho aja ñane enga quigade enga papose. 7 Ujetiga jé ajóyo uágaja yu enga que acadíchoi yacajnaquéode quigode enga jogadi u jne ujetiga atayoi uacajegaitígo cucha iji Yai enga a chisi ome uaque. 8 Yai Dupade uringai picotaque u uje uacabeyoi uacate goningane. Enga uacaringane yiroque uréone pijoque to ome uacadode udore. 9 Yijnoraquei ome uaque chopise Yai ijnoraquedatei ome yu. MJecute ejnáño uágaja yijnoraquei. 10 Ujetiga beyoi yiroquéode quigode enga a uacajogate iji yijnoraquéode. Adi jé u ome yu uje yiji Yai iroquéode enga jé yijogate iji Yai ijnoraquei ome yu. 11 Yurúo udojo ome uaque ujetiga pirasitigai déji yógome ñane. Yigaidi u gu ujetiga pininaquei irágu uacajéode. 12 Yiroquei u udé ome uaque: ujetiga ajnóraño ñane enga uacajnoraquéode ome ñane chopise yijnoraquei ome uaque to. 13 Pijnoraquedatei uje sué pijnoraquéode gáyode jnese u ujetiga gosi tẽra re ome dajoráringo ore. 14 Yijorane u uaque ujetiga apéso yojningane cucha. 15 A ca yĩcarapo yirógode aja uaque jne rĩ. Chamáñaje pirógode que ore chiraja darósorone áyipiedie ome cuchade. Mu a yĩ́care yijorane aja uaque jne. Chamáñaje e yingo yajnéone Yai ojningane cucha jnese aja uaque gu. 16 Que uacajegáite yu nanique mu uyu u uje yajegáite uaque. Enga yiroque uágaja erámi ujetiga amácho cojñoque uásejnane aja yu. Enga uacamaningone udore a jogate jne iji deréjnane jnese. Enga uacadie u uacamaningone udore cucha. Enga Yai a chisi ome uacataidode cucha jnese ome uaque gu uacanguretigai iji yu. 17 Yajo yu aja yiroquei, ujetiga ajnóraño ñane. 18 Ujetiga erámone jogosórone ore chetaque uaque enga ajnusináño uje ore chetaque yu bajaque nanique. 19 Ujetiga erámone jogosórone urása uaque enga a ore chijnorarase uaque, adi u uje ore chijnóra darasapísode. Mu yajegaidode u uaque nanique iji ore ujade, jecute ore chetaque uaque. Chamáñaje que erámone jogosórone urasapo uaque rĩ. 20 Ajnusináño yacajnaqué cásodica uje yojninga: “Que togome uñeque irótique ujetiga sué darósõri gai.” Ujetiga jé ũré enga ore umajo yu enga a ore cho damajo uaque to. Jé basa ga ujetiga ore doi yacajnaquéode quigode enga a ore doi uacacajnaquéode quigode to. 21 A ore cho damajo uaque gu yadode. Chamáñaje que ore chiraja yirósõri gosi gu. 22 Ujetiga agupurarase ore enga a ca máraguirase ore. Mu yise ore gu ujetiga yo cuchade quigode ome ore. Jecute a ore cho daba dasijnaringuéone enga a ca pĩroque ore isijnaringuéone. 23 Udore ore uje ore chetaque yu, ga cho ujetiga ore guetei u Yapade. 24 Yipésu yipesute datéode iji ore ujade uje que toguirase ome uñeque ujetiga cho yu ome yipesute datéode udore. Mu jé ate ome ore uje ore chetaque yu. Jecute ore guetei upo Yai te rĩ. Ujetiga ca ore pañáji yadode enga a ca máraque ore mu uje ore chimo yadode enga ore uringai máraque jogadi u. 25 Ore ajirigode Moises urusarane quigode tocade ome ore adode udore. Enga Moises urusarane chósi te: “Ore chetaque yu bisideque.” 26 A yiroque yai Dupade Espíritu Sánto aja uaque jne uje cucha uréone garani u. Enga a uacátajasõri u uté jne enga a chisi ome picasitigai ome uaque jne. A yipijogúsõri u uté jne. 27 Mu que gusu uté mu a yipijogúsorone u uaque to. Chamáñaje uacagúsoi yari nanique iji taningápisi gu.
1 A yingo uacajnéone cucha dacate udojo aja uaque gu ujetiga chise uaque enga ca uacanguretigai doi jnumi. 2 Uje a ore eduguéjnane chijócãre uáguiji ore aquiningaméone. Enga cucha dacate gajnaréngone uñane a tṍraji dajñarenie ome uaque. Enga diga a ore pota chutígome uaque uje ore jos eti Dupade ajéo ome ore ujetiga ore chujé uaque. 3 A ore socárome yanguresórone uhuaque gu uje que ore chiraja yu gosi. Enga que ore chise daringáringo Yapade irajasóño. 4 Yuruode u udojo ome uaque gu ujetiga cuchade udore chise daringáringo tocachucho enga jĩraque uacáyipiedie déji yuruode udore quigode ome uaque. Que yingo cucha dacadode udore aja uaque iji taningai. Chamáñaje qué yugúsi uacari gu. 5 Mu e yingome uaque uje a yicáji yirósõri Yai jne. ¿Mu gotique gu a uje que uacuñeque catecã́ri yu ome yiquitique? 6 Mu jnusiétaque uaque ome yatatagode cucha dacate udore. 7 Jé ũrepise yu ome yuruode quigode uje cucha ueradéjnai u ome uaque ujetiga e yiji. Ujetiga ca yiji iji uacari enga a yojningai uacátajasõri a ca chise uaque jne. Jé basa yiji ome uaque enga jogadi u jne ujetiga yirógaja uaque. 8 Ujetiga uté e di iji erámi enga a chingo quigode ome erámone unirisórone ujetiga ore chiraja daringane ate gajnarécho. Enga a chingopo quigode ome ore jne rĩ ujetiga ore chise daringáringo ayoré parácho. Mu a chingopome ore rĩ uje ũrepise Dupade ome dajiritigade ome erámone jogosórone ore adode. 9 A ore chiraja ome uté acajnaquéode uje ate gajnaréngone u udore ore jnese uje que ore changureta yu. 10 Enga a ore chiraja to ome uté acajnaquéode uje a ore chise daringane ayoré parácho gu yicoringai ome Yai jogadi. Enga a ca amóñopo yu iji de jnumi te rĩ. 11 Enga a ore chiraja Dupade isocade uje chajire ore adode aja quedéjnane. Chamáñaje e Dupade chajire erámi jogosórone ore eduguéjnai Satanas adode aja quigode gu enga e chimate uté qui. 12 Cucha amirone qué uásejna ujetiga yingome uaque, mu a ca toque iji deréjnai udé ujetiga arajáyo quigode. 13 Dupade Ujopie Espíritu Sánto u uje cucha uréone garani u. Ujetiga uté di iji uaque enga a uté chacate uágome cucha uréone quigode jnese. Enga a ca acajnaquéode garani tu re mu garani u dadudigode Dupade urúo. Enga uté a chingo cucha dacadode aja uaque uje cáma tocade. 14 A picotaque yu jne ome Dupade Ujopie Espíritu Sánto uté adode. Chamáñaje uté acajnaquéode júdode u yajnéone cucha enga a chingome uaque jne. 15 Cuchade jnese uje déji Yai gari jé yajnécho to. Jecute yingome uaque uje Dupade Ujopie Espíritu Sánto acajnaquéode júdode u yajnéone cucha enga chingome uaque. 16 Idógosi ujetiga ca amóñopo yu rĩ. Mu garósi dirode iji udojo quigade ujetiga amóñopo yu rĩ. Chamáña gu uje yiji ga yicáji Yai jogadi.— 17 Uje ore chudute Jesus uruode udore enga acadigode uñane ore catecã́ri ñane enga ore chojninga: —¿Chimo joroque daruode quitique a ome yoque? Uje chojninga: “Idógosi ujetiga ca amóñopo yu rĩ. Mu a garósi dirode to iji udojo quigade ujetiga amóñopo yu rĩ. Uje yiji ga yicáji Yai jogadi.” 18 ¿Chimo joroque daruode quitique? uje chojninga: “Garósi dirode.” Que yirajágo uruode udore quigode.— 19 Jesus chiraja ore áyipiedie quigode uje ore pota catecã́ri. Jecute chojningame ore: —Yuruode quigode u udojo ome uaque que uje yojninga: “Idógosi ujetiga ca amóñopo yu rĩ. Mu dirode garósi to iji udojo quigade ujetiga amóñopo yu rĩ.” ¿Uacacatecãraitigade ome ñane quigode u udojo ome ñane a? 20 Jé ũrepise yu ome yuruode uje a jnusiétaque uaque enga a abóyopo yiquigade rĩ. Jé basa ga erámone jogosórone ore a ore irasique re jne. A jnusiétaque uaque múñi uacajnusiétigade a chécãre re jne enga pininaquei a irágu uacajéode. 21 Uacarajáyo uje chequedíe ore abode achaminone chise ore enga payuguhebátigade jogadi tu ome ore. Jé basa ga uje ore abode base ga que ore jnusinápo ũrosoringuéone rĩ. Chamáñaje ore irasé raque gu uje e ore abode base. 22 Adi jé upo ome uaque rĩ. MUje uacayuguhebátigade sué uacabáyode iji deréjnai udé. Mu ujetiga yisápo uaque rĩ enga pininaquedatei jogadi u ome uaque. A ca togapo jne rĩ ome uñeque ujetiga chijnime pininaquéode iji uacajéode. 23 A ca acatecãchoi yu ome cuchade iji dirode udore mu a acatecãchoi Yai ome cuchade jne. Enga jé ũrepise yu uje Yai a chisi ome uacataidode cucha jnese ome uaque jne ujetiga ẽ́cacho uacanguretigai iji yu. 24 Uje uacacatecãchoi Dupade jé aja deréjnai udé mu que ẽ́cacho uacanguretigai iji yu uje uacatayoi uacapotigádode cucha. Mu jé beyoi enga ẽ́cacho uacanguretigai iji yu enga jogadi u jne ujetiga Dupade chisi ome uacataidode cucha aja uaque. Gaidi u gu ujetiga pininaquéode irágu uacajéode. 25 Uacamóño uje jecucha yacãra yacajnaquéode aja cuchade, mu a chisápo dínique jne rĩ ujetiga ca yacãrápo yacajnaquéode aja cuchade rĩ. Mu a yo Yai adode quique ome uaque jne enga yijna yurúpisode ome uaque uje que yacãra yacajnaquéode aja cuchade. 26 Ujetiga atayoi cuchade iji Yai iji dirode udojo enga a ẽ́cacho uacanguretigade iji yu. Mu que quigode u go ujetiga yijócha Yai ajei údi ome uaque. 27 Chamáñaje yai Dupade chijnorapise uaque gu uacajnoraquei ome yu. Chijnóra uaque to uje uacanguretáyo uje yarani u Dupade. 28 Uacamóño uje yṍraji Yai gari nanique iji gaté ujetiga yicai erámi udé. Jecute e yiji ome erámi tudé ujetiga yicapóji Yai jogadi iji gaté rĩ.— 29 Uje acadigode chudute Jesus uruode enga ore chojningame: —Baruode ucode e tocade ome yoque. Enga e babé barúpisode enga que acãra bacajnaquéode aja cuchade. 30 E yirajágo uje baraja cuchade jnese. Uje cáma picatecãráite ua ome cuchade mu e batata quigode. Jecute yanguretágo ua uje barani tu Dupade.— 31 Jesus chi chajnai ore uruode enga chojninga: —¿Jé ũrepise uaque a ome uacanguretigai iji yu? 32 A chise deréjnai jne, mu deréjnai uté e u ujetiga asicho uágaja uacajesúode erámio. Enga a ajíñoñome yu iji te jne. Mu que gusu yu iji te gotique, mu Yai u uje déji yari iji te. 33 Yuruode u udojo ome uaque gu ujetiga eso pajesereringane ujetiga ajóyo uágaja yu. A ejnárecho cuchade jne iji erámi tudé, mu adotáyo uac. Chamáñaje yujnué cuchade gáyode iji erámi gu.—
1 Uje Jesus chejna daruode udore guesi enga chajire gaté enga catecã́ri dai Dupade. Enga chojninga: —Yapa, bojningai dire e chise yu. Jecute yicatecã́ri ua ujetiga bangoningájnai pijóguiji bajnacari uyu. Yigaidi u gu ujetiga picotaque opejã ua to ome bajnacari uyu yadode. 2 E bajíñome baroquéode jnese iji bajnacari uyu yari ujetiga yiroque erámi unirisórone jnese. Enga u to ujetiga yisi ome pucuecaringué eyúgojmai ome yanguresórone jnese uje bẽrate ore ome yu. 3 Pucuecaringué eyúgojmai quigode u udojo: ujetiga gosi chirajapise Dupa uguru ũrei ua, enga chirajapísapo Jesucrísto uyu rĩ uje baroque yu aja jnumi nanique. 4 E yimate baroquéode ome yu jnese, jecute bangoningájnai e pijógome erámi unirisórone ore. 5 Jecute, Yapa, yajéode u ujetiga yugusapóji bari enga ujetiga atĩre yuringai cuchape yibai. Yigaidi tu gu ujetiga yocópo ñane rĩ ome yocuringane cuchape. Ujetiga yocópise uje cáma erã́tique cuse nanique iji taningane. 6 E yingo baringai gosi ome bajegaidode ore uje bẽrate ore ome yu iji erámone udojo. E bajneque ore mu basi ome ore ome yu. Enga udore ore dopísi baruode quigode. 7 Enga e ore chiraja uje beranone yacajnaquéo garani tu ua. 8 E yacate ore ome beranone yacajnaquéo enga ore chimesere. Que potigayaquérique déji ore uje yarani tu ua. Enga ore changureta uje baroque yu aja jnumi nanique. 9 E yijócha bajei údi ome udore ore. Mu que yijócha bajei údi ome erámone jogosórone uñane. Mu yicatecã́ri ua ome udore uje bẽrate ore ome yu. Chamáñaje bajneque ore gu. 10 Bamo uje yanguresórone jnese jé bajnécho ore to. Adi jé u to banguresórone jnese, uje jé yajnécho ore to. Enga bamo to uje yingoningai pijóguiji yocanguresórone udore ore to. 11 A ca yiyapóji erámi tudé jne rĩ. Mu yanguresórone udore ore, a ore cháji. A e yiji jne ujetiga yugúsiji bari. Yapa, uje urec ua ome pisijnaringuéone, yijócha bajéode údi ome beranone yanguresõre ore, ujetiga arodipise ore ome bajopiedaté ujetiga ca ore ajéode cãra re ome ñane mu ore ajéode chojmára, adi tu ome uyoque uje yocajéode jé chojmára. 12 Uje qué yugúsi beranone yanguresõre ore gari iji jnumi udé enga yirote ore ome bajopiedaté ujetiga ca cuchárique chósi ti iji ore. Que udore uñeque bijna ome yu. Mu chojmarai u uje bijna ome yu. Chamáñaje uté quique obiréjnai u ujetiga bijnaque. Chamáñaje ore urusarane barúo quigode jé u gu. 13 Idógosi ujetiga e yicáji bari. Mu uje qué yugúsi erámi udé enga yicatecã́ri yanguresórone ome cuchade udore. Yigaidi u gu ujetiga yijogonóri pininaqué irágu ore ajéode to. 14 E yingo baruode aja yanguresórone jecute erámone jogosórone ore chetaque ore. Chamáñaje que erámone jogosórone urasapo ore to rĩ. Enga e ore cho yu uje que erámone unirisõre yu to. 15 Que yingome ua ujetiga ajnime ore iji erámi, mu arote ore ome Satanas. 16 Adi jé u ome yu uje que erámone jogosõre yu, adi jé u to ome yanguresórone ore uje que erámone jogosõre ore to. 17 Acate ore ome cucha uréone quigode ujetiga ore chedu ua iji dajéode. Chamáñaje bacajnaquéode ũréo quigode gu. 18 Adi u ome yu uje baroque yu aja erámone unirisórone, adi jé upo ome ore rĩ uje yiroque ore aja erámone unirisórone ore to. 19 Yisi ome yu ome ua to ujetiga yanguresórone ore adi jé u yadi ga ore chisi ome raque ome ua to uje ore chiraja bacajnaqué uréone quigode. 20 Que gusu deréjnai udé jogonórone yanguresõre uje yicatecã́ri ua ome ore. Mu yijócha bajei údi ome yanguresõre disi ejode ore to uje a ore chudute ore atatagode barúo. 21 Yutai ua ome yanguresórone ore jnese ujetiga ore áyipiedie quitígo chojmarapise. Ujetiga ore chatapísa raja uyoque enga chojmára yóguiji jnumi. Yapa, yigaidi u gu ujetiga ore chopise yoque, uje yocáyipiedie chopise ñane. Ujetiga erámone jogosórone ore chimo uje yanguresórone ore áyipiedie quigode chojmára enga a ca potigayaquérique déji ore ome yuringai batocáite. 22 E yajuguína berani yingoningájna aja yanguresórone ore. Yigaidi u gu ujetiga ore chopise uyoque enga chojmarapise ore iji jnumi to. 23 Yugúsi yanguresórone chojmara chojmarane ore, adi u uje bagúsi yari. Yigaidi u gu ujetiga yáta ore aja ñane enga chojmára ore iji jnumi. Ujetiga erámone jogosórone ore chimo uje chojmára ore iji jnumi, enga jogadi u jne ujetiga ore chiraja uje batocaidi u ore angureni uyu. A ore chiraja to uje bajnorapise ore enga bajnoraquei ome ore chopise bajnoraquei ome yu. 24 Yapa, bẽrate yanguresórone ome yu, jecute yajéode u ujetiga ore chise yu iji yijogadi jne. Ujetiga ore chimo yingoningájnai to uje beranome yu. Chamáña gu uje bajnorapise yu nanique uje cáma pipesute erámi jé aja deréjnane udojo. 25 Yapa, yicota ua ome baringai ũrepise. Erámone jogosórone ore que ore chiraja ua go. Mu uyu yirajápise ua. Enga yanguresórone udore ore chiraja uje batocaidi u yu. 26 E yatata ua gosi ome ore, enga qué yiji údi uje yingo ua aja ore. Yigaidi u gu ujetiga barijogonóri pijnoraqué déji ore to adi u uje déji yu. Yigaidi upo rĩ ujetiga yugusipísiji ore gari to.—
1 Uje Jesus chejna daruode udore guesi enga jno enga nóna dacadigode aja daquitique uje déji pararingai Cedron uéchai. Enga Jesus, acadigode ore chicáji porebui uje chi acárigui pori jiépisiji. 2 Jesus acadigode uñai uje i tu Júdas chi chiraja ore qui uté jogadi. Chamáñaje jecucha Jesus chamáta dacadigode ore aja jogadi uté gu. Júdas uté u uje tẽra Jesus jne. 3 Uje Jesus, acadigode, qué ore déji jogadi uté enga Júdas e chise ore. Mu chi soldádode ore uágueraque nóna. Jé aja sacerdóteode, fariséode ore irógode uñéngo uje ore irodi u Dupade iguíjna cuchábi. Enga chi ore chijna dõrachade jnese jé aja dapósode, dacuguedie ore. 4 Mu Jesus e chiraja cucha dacadode udore uje a tocade jne, jecute chachai ore iji ore garani enga chojninga: —¿Uacacuei gosi te a iji yoque?— 5 Chi ore chojninga: —Yocucuei u Nazaret gosi uje i tu Jesus.— Jecute Jesus chajnai ore enga chojninga: —Yugúsi de.— Júdas uté uje chi guẽrate dacadisṍri jne chi déji ore gari to. 6 Uje chi Jesus chojninga: “Yugúsi de,” enga chi ore tṍra raque jnese enga ore cṍra aja jnumi. 7 Jecute chi Jesus catecãrápoi ore gaté rĩ enga chojninga: —¿Jé uacacuei gosi te a?— Enga ore chojninga: —Jesus, Nazaret gosi u.— 8 Jesus chi chojninga: —E yingome uaque que uje uyu u. Ujetiga uacacuei u uyu enga ajuécho doi ome yijorane ore.— 9 Cucha dacadode udore tocade gu uje Jesus uru casodé quigode u. Uje chojninga: “Que Yai gueranone yacadique uñeque bijna ome yu.” 10 Diga Simon Pédro chijnime daquesei uje déji gari enga chaquesu sacerdóteode ore iroi Málco angoroné, ãrachua jogoto. 11 Mu Jesus chaquĩ́ra Pédro enga chojninga: —Acha baquesei aja jogadi. Ujetiga Yai ajéo enga pequetingaquedatei udé chise yu, ga ¿a yayorásome a?— 12 Diga soldádode, ore eduguéjnai, jé aja judíode angaránone ore irógode chi ore chisa Jesus enga ore chigaru jmanecade. 13 Enga jĩraque ore jno Jesus údi aja ore eduguéjnai Anas. Chi Caifas ejoi u Anas uté. Enga chi sacerdóteode ore cho deduguéjnai iji Caifas iji sequeré uaté. 14 Caifas uté u uje catecã́ri dojode judío ica enga chojninga: “A jé ca ueradi u ome uaque ujetiga yẽco uté enga gusu toque. Enga jé ca yoqueduguéjnane Róma gosode ájningarac ore ome yoc.” 15 Uje ore jno Jesus údi enga Simon Pédro jé aja Jesus acadigode uñeque chi ore chajna Jesus. Simon Pédro jõrai uté chi chiraja sacerdóteode ore eduguéjnai. Jecute ore juéga ajei ome uté to enga chi nóna Jesus aja ore asuté iguíjnai ajã́ro. 16 Mu Pédro que nóna ore aja ajei go mu cháji guesi. Enga chaguena guiguíjnai piagoi iji guesi. Jecute Pédro jõrai uje chiraja sacerdóteode ore eduguéjnai doi enga catecã́ri ore irogue uje chirote piagoi ujetiga juéga ajei ome Pédro to. Diga uaté juéga ajei ome Pédro to. 17 Jecute chi ore irogue uaté catecã́ri Pédro enga chojninga: —¿A ca jnani uté acadigode jõra ua to a?— Mu Pédro chotigase enga chojninga: —Que uté acadique yu go.— 18 Uje chi tejnupise enga Dupade iguíjna cuchábi irodisórone uje ore déji ta jé aja ore irógode uñane ore doi enga ore pésu pioi enga ore chaguena ejode ujetiga ore chajningare dádode iji. Enga Pédro chi déji ore gari enga chajningare dádode to. 19 Sacerdóteode ore eduguéjnai catecã́ri Jesus ome acadigode ore íode. Catecãrápoi Jesus ome acajnaquéode quigode rĩ. 20 Jecute Jesus chajnai uruode enga chojninga: —Cho ujetiga pipoguiete yacajnaquéode quigode. Bamo uje jecucha yacate ore iji guesaringane. Yacadápo ore rĩ iji ore aquiningaméone guiguíjna jé aja Dupade iguíjna cuchábi. Enga bamo judíode ore jnese chamáta rágaja Dupade iguíjna cuchábi. 21 ¿Gotique gu a uje bacatecã́ri yu ome yacajnaquéode quigode? Be ga acatecã́ri ore uje ore chudute yacajnaquéode diríca iji yajesúode erámio, enga ore chingo quigode ome ua. Udore ore chiraja yacajnaquéode quigode gu.— 22 Uje Jesus urúo udojo enga Dupade iguíjna cuchábi irodisórone uñai doi enga chinguíra dajmanai aja Jesus edodie enga chojninga: —¿Ja ca ajéngome sacerdóteode ore eduguéjnai uje barúo udore ome uté que a?— 23 Jesus chajnai uruode enga chojninga: —Ujetiga yurúrigo gajnarécho que ome ua ya, ga be ga angome yu yuru gajnarétigo quitígo. Mu ujetiga yuruode ueracho, mu ¿gotique gu a uje bajé yu?— 24 Quigade enga ore eduguéjnai Anas chiroque darógode ujetiga ore jno Jesus údi aja sacerdóteode ore eduguéjna cuchábi Caifas, uje Jesus qué déji daringai pigarique. 25 Uje ore doi dasocade ome Jesus mu Pédro qué déji daringai chaguesi iji pioi ejoi uje chajningare dádode iji. Enga Pédro ejominórone ore catecã́ri enga ore chojninga: —¿Ja ca jnani uté acadigode jõra ua to a?— Pédro chãrapo ore rĩ enga chojninga: —Que uté acadigode jõra yu to go.— 26 Diga sacerdóteode eduguéjnai irógode uñai catecã́ri Pédro to. Pédro aquesui u uté iguiosi uje Pédro chaquesu angoroné iji porebui údi que. Enga uté chojningame Pédro: —¿Ja ca yimo ua to que a iji porebui údi uje bagúsi Jesus ejoi a?— 27 Pédro chi chãrapo ore rĩ uje chiese ca Jesus acadigode jõra. Uje chi Pédro chejna daruode udore guesi enga chi jé u uje cochagájnai po. 28 Uje Caifas chejna dajiritigade ome Jesus ga ore jnopo údi rĩ aja eduguéjnai uñai iguíjna cuchábi uje Róma gosode ore eduguéjna cuchábi ichajapite uté aja charidi. Enga chi idógosi diri. Que togome Jesus oisórone judío ujetiga ore nóna Jesus aja eduguéjna cuchábi iguíjnai ajei. Chamáñaje purása quedéjna eduguéjnai uté gu enga ore todo daringáringo puyaque yui. Jecute que ore chacája ajei to. Ore chiraja gu uje a ca togome ore ujetiga ore tagu ore jnusinamáni dire uje i tu Páscua gajnéone cucha ujetiga puyac ore. 29 Jecute Piláto doi guesi iji daguíjnai ujetiga catecã́ri ore enga chojninga: —¿Uaquetétigai iji jnani uté a?— 30 Mu ore chojninga: —Ujetiga ca sijnanguirase uté enga a ca yijnangorásaja ua.— 31 Piláto chojningame ore: —Que yipota ujetiga yajire adode aja quigode. Boyo údi aja judíode uaqueduguéjnapísode. Chamáñaje udore ore u uje ore chiraja uacajnéone Moises urusarane quigode ujetiga ore chajire uacarásade adode aja quigode.— Mu judíode chi ore chojninga: —Bamo uje judíode uyoque que togome uyoque ujetiga yisígo pitoringai ome ayorérique. Jecute yijnángo uté aja Róma gosi ua.— 32 Jesus uruode e tocade uje chingome ore diríca uje chi toji curesérique gai jne. 33 Ore eduguéjna cuchábi Piláto chacapója daguíjna cuchábi rĩ. Enga tibidi Jesus aja re enga catecã́ri. Enga chojninga: —¿Judíode ore eduguéjna cuchábi tu ua ya?— 34 Mu Jesus chajnai uruode enga chojninga: —¿Jé ũré uje uhua upúsu uje bapota baraja udore a? ¿Jeoga yurásade judíode uñeque uru quitígo ome ua ya?— 35 Ore eduguéjna cuchábi Piláto catecã́ri Jesus enga chojninga: —¿Ja judío yu a, ujetiga yangári judírique áyipierigui? Mu barásade, jé aja sacerdóteode eduguéjnane ore u uje ore chijna ua aja yu. ¿Jé bapesutique a uje ore chetaque ua ya?— 36 Jecute chi Jesus chajnai uruode enga chojninga: —Yajnepídi erãpe ome yuringai eduguéjna cuchape que u erámi tudé. Ujetiga urásu enga yacadigode jĩraque ore chirotárase yu diríca uje judíode ore chisa yu. Yajnepídi erãpe que u de gotique.— 37 Jecute Piláto catecãrápoi rĩ ga chojninga: —¿Jé ũré ua ya ome baringai eduguéjna cuchape?— Enga Jesus chojninga: —Ejẽ. Jé ũré baruode uje eduguéjna yu. Mu yibase nanique gu ujetiga yingo cucha uréone ome erámi unirisórone ore. Enga cucha uréone ijnorasórone ore jnese tangári yacajnaquéode quigode.— 38 Piláto chojninga: —¿Gotique a cucha uréone quigode?— Uje chi Piláto chejna daruode udore guesi enga dopoi guesi te rĩ ujetiga catecã́ri judíode ore, enga chojningame ore: —Que yiraja jnani uté bárique cucha. 39 Uacarajáyo uje uacasocabei u ujetiga yirame yoquisatique pujurúgai ome uaque iji uacajnusinamáni dire uje i tu Páscua . ¿A apótayo a, ujetiga yirame judíode uaqueduguéjna cuchábi udé a?— 40 Mu chi ore ichorã enga ore tibite jnese. Enga ore chojninga: —¡Que yipótago ujetiga arame uté! ¡Be ga arame Barrabas!— Barrabas uté u uje oriechoqui.
1 Jecute ore eduguéjnai Piláto chiroque darógode aja Jesus ujetiga ore chaquesu údode. 2 Piláto irógode soldádo ore pésu Jesus ayo gajnui iji pore ojnacúcodie jmanecade enga ore chicháji Jesus gatoi. Enga chi ore dopoi iguidé gatíjna rĩ uje eduguéjnane ore iguidei enga ore na aja Jesus. 3 Enga ore chujñieta enga ore chose yui enga ore chojninga: —¡Picotaque opejã judíode ore eduguéjna cuchábi!— Enga ore chinguíra dajmanáyone aja edodie. 4 Piláto dopoi guesi te rĩ enga catecã́ri judíode ore enga chojninga: —A yijnime uaquetei Jesus jne enga a yicháji uacaquei ujetiga ajicho. Mu yipota ujetiga arajáyo uje que yirajápise bárique.— 5 Diga Jesus doi guesi iji ore iguíjnai uje ayo gajnui qué déji gatoi uje ore ipesudi iji pore ojnacúcodie jmanecade. Enga qué chigui eduguéjnane ore iguidé gatíjna. Enga jé u uje Piláto chojningame ore: —Yojningai jnani déji de.— 6 Uje sacerdóteode eduguéjnane, Dupade iguíjna cuchábi irodisórone ore chimo Jesus enga ore tibite enga ore chigotája daruode enga ore chojninga: —¡Ajo uté aja curesei gai! ¡Ajo uté aja curesei gai!— Mu Piláto chojninga: —Boyo údi enga ajóyo aja curesei. Chamáña gu uje que yirajápise uté iyoguérique gu.— 7 Mu judíode ore chojninga: —Uté bai u uje cho Dupade Abi iji re. Jecute jé tiógara ujetiga toi. Yocai jnani bajai Moises urusarane quigode uñai jé u gu.— 8 Piláto aguté cho jora iji taningai mu uje chudute uje chi Jesus cho Dupade iji re enga todo gaté. 9 Jecute Piláto chacapója daguíjna cuchábi te rĩ enga catecãrápoi Jesus rĩ enga chojninga: —¿Banínique jé déji rique a?— Mu Jesus que chajnai uruode. 10 Uje Jesus que chajnai Piláto uruode enga Piláto chojninga: —¿Ja ca ajéngome yu a? Uje que achajnai yuruode. ¿Jé ca araja to a? uje yajnei u ujetiga yiroque ua aja ujetiga ore chajo ua aja curesérique. Enga yajnei upo rĩ ujetiga yirame ua.— 11 Mu Jesus chajnai uruode enga chojninga: —Ise ga ca araja to uje Dupade sué bajnéone udore gáyode. Ujetiga ca ajéo enga a ca toguirase ome ua bojningane udore ujetiga apésu. Mu Dupade guẽrate ujetiga apésu cucha dacadode udore aja quigode. Jecute uté uje óite yu aja ua uté isijnaringuéone sué basijnaringuéone gai.— 12 Uje Piláto chudute Jesus uruode udore enga jĩraque chucué dáyipie ujetiga chirame Jesus. Mu judíode ore tibite gaté enga ore chojninga: —Bamo uje beduguéjna cuchábi umajosṍri u Jesus uté. Chamáñaje pota daringai eduguéjna cuchape to ome re. Jecute ujetiga arame Jesus enga obiréjna uje que bagaidedie u eduguéjna cuchábi áyipiedie.— 13 Uje Piláto chudute judíode ore uruode enga chimate dáyipiedie ome Jesus. Jecute chiroque darógode aja Jesus ujetiga ore di údi iji. Enga Piláto chácariji ore charipi cuchábi iji guiguíjnai ajei uñai uje i tu Gabáta ome judíode ore arecujáidie. Enga guiguíjnai ajei uñai uté u uje chi ore ipesute ajei ome cucaranenie. Enga guiguíjnai ajei uté u uje Piláto chingo dáyipiedie ome ore. 14 Chi judíode ore pésu cuchade aja quigode ome dajnusinamáni dire dirome uje i u Páscua . Enga chi guedé chirõre gatocoro. Enga jé u uje Piláto catecã́ri judíode ore enga chojninga: —Uaqueduguéjna cuchábi déji de.— 15 Mu ore tibite enga ore chojninga: —¡Yocajegaidi u ujetiga toi! ¡Yocajegaidi u ujetiga toi! ¡Ajo aja curesei gai!— Piláto chi chojninga: —¿Ja uacajéode u ujetiga yajo uaqueduguéjnai aja curesei a?— Mu sacerdóteode oreduguéjnane chajnai Piláto uruode enga ore chojninga: —Que yoqueduguéjnai uñeque cus. Gusu uje yoco yoqueduguéjnai iji beduguéjna cuchábi uje déji Róma.— 16 Udojo quigade enga Piláto chisi ome Jesus ome ore ujetiga ore chajo aja curesei gai. Enga jé u uje ore jno údi. 17 Enga Jesus chicai dagachodi yui enga chijnoque dacuresei aja jogadi uje i tu Patode Ajnoquei. Mu Gólgota u ome judíode ore uruode. 18 Enga ore chajo Jesus aja curesei iji uté. Mu que gusu Jesus, jorane u dabayade uje gare ore. Ore chicha uñai aja ãrachua, jé ore chicha uñai aja arasei. Enga Jesus déji ore ujai. 19 Piláto chiroque ore ujetiga ore pésu darusarane enga ore chajo aja Jesus gajnei curesé. Enga ore urusarane quigode u udore: “Jesus Nazaret gosi, judíode ore eduguéjna cuchábi u udé.” 20 Diga uásejna judíode uje ore chimo ore urusarane iji Jesus gajnei curesé. Chamáñaje Jesus cachodi idógosiji ore idai gu. Que gusu judíode ore uruode uje déji ore urusarane. Mu Grécia gosode, Róma gosode, ore uruode déji to. 21 Jecute sacerdóteode ore eduguéjnane ore catecã́ri Piláto enga ore chojninga: —Gajnareque barusarane quigode uje bo judíode yoqueduguéjnai iji uté. Ecãre barusarane quigode enga ósi te: “Jnani uté cho judíode eduguéjnai iji re.”— 22 Mu Piláto chojninga: —Yurusarane quigode jé u udore enga jé jogate. A ca yécãre jne.— 23 Soldádode chi gagájni ore uje ore chimate Jesus aja curesei. Uje Jesus e déji curesei gai enga soldádode udore chamáta iguidedie enga jé u uje ore chajuguína ñane. Mu chi Jesus iguidé qué déji uje ore ora enga íjnoque pugapídode iji. 24 Enga soldádode ore catecã́ri ñane ome Jesus iguidé gajnesónique. Enga ore chojninga: —Jé ca yajújo iji jnumi mu yicoi enga yicobi yocajñamitique ome ñane enga a yusónique chijna.— Enga ore urusarane Dupade urúo tocade ome ore ipesudode udore. Uje Dupade uruode chósi te: “A ore chajuguína yiguidedie iji ñane jne. Enga a ore dopoi dajñamitígo jne rĩ ome ñane ome yiguidé.” Enga jé upúsu soldádode ipesudode udore. 25 Chequedíe uñáringui ore déji Jesus gajnei curesé ejoi. Jesus daté jé u uña, enga Jesus daté jõra jé upo uña te rĩ. Cleófas acoté uje i tu Maria déji to. Enga Maria Magdaléna dépoji to rĩ. 26 Enga Jesus acadigode uñai dépoji ore gari rĩ uje chi Jesus chijnorapise uté. Enga chi Jesus chimo uje uté déji daté ejoi. Jecute catecã́ri daté enga chojninga: —Chequé a, o babi iji uté.— 27 Quigade enga Jesus catecã́ri dacadi enga chojninga: —O baté iji uaté jne.— Enga jec u uje Jesus acadi uté cho daté iji uaté enga uaté pusi uté iguíjnai. 28 Cuchade udojo quigade enga Jesus chiraja uje Dupade uruode atatasórone jnani bajácho ore urusarane quigode e tocade jnese. Cucha amiri tu uje chojninga: —Yicajnóriji.— Uje chejna daruode udore guesi enga Dupade uruode atatasórone ore urusarane uringane tocachuguipíso jogadi u. 29 Ore jotai piéraque chi déji jogadi uté uje ore jotaque sujnai chi irágu dabi. Chi ore pésu damatadé gajnua iji daburuco eruei enga jé u uje ore chacáji dajotaque sujnai. Enga ore chisa daburuco enga ore churãrája Jesus pijnani. 30 Uje Jesus chi chóji ore jotaque sujnai enga jé u uje chojninga: —Yajnéone cucha dacate e tocade jnese ome yu.— Uje chejna daruode udore guesi enga jé u uje gatoi chi cho caru aja jnumi enga jé u uje chi toi. 31 Chi dire puyai u dirome. Enga judíode ore cho cucha daté iji dire puyai uté gu uje ore jnusinamáni dire jé u to uje i u Páscua . Jecute que ore pota ujetiga ore yugode ajnoquéode cháji cureséode iji dire puyai uté. Jecute ore chingome deduguéjnai Piláto ujetiga chiroque soldádode aja ore yugode ujetiga ore chimochere ore ajnoquéode iji ore etarúdode. Ore gaidi u gu ujetiga jĩraque ore toi enga ore chijnime ore iji cureséode. 32 Jecute soldádode ore doi enga ore chimochere Jesus bayade ore etarúdode. 33 Mu uje ore chose Jesus yui enga ore chimo uje Jesus e toi. Enga que ore chimochere etarútique to. 34 Mu soldádode uñai chi doi ga chichagu Jesus orotabidi. Uje chichagu enga jĩraque iyoi tṍraji enga yodi tõrapóji rĩ. 35 Cucha dacadode udore ojñasṍri u uyu enga jé ũrepise yojñane. Chamáñaje cucha dacadode udore pijogúsõri u yu to. Jecute yingome Jesus adode udore ome uaque gu ujetiga anguretayopise uté. 36 Jesus gajnéone cucha dacacho udore tocade gu ujetiga ore urusarane Dupade urúo chise daringáringo tocachucho to. Uje quigode u uje chósi te: “A ca pimocheraque uté ajnoquéode uñeque jne.” 37 Mu ore urusarane quique uñai dépoji rĩ uje chósi te: “Enga a ore chajire dajnongoi uté jne.” 38 Quigade enga José Arimatéa gosi catecã́ri ore eduguéjnai Piláto ujetiga Piláto juéga Jesus ajnoquéode ome. Gaidi u gu ujetiga chijochame. Jesus anguretasõre José to mu pógu danguretigai ome Jesus. Chamáña gu uje todo judíode ore gu. Enga Piláto chimesere José áyipiedie. Jecute José jno Jesus ajnoquéode údi ujetiga chijochame. 39 Enga chi Nicodémo uje catecã́ri Jesus nanique iji dejai chi di cucha ai unerone údi uje kílodie déji 30. Enga chi ore chimériji ñane cucha ai unerone uje ore íode u mírra aja áloes. 40 Jecute chi José, Nicodémo ore cháta rágaja ñane uje ore jno Jesus ajnoquéode údi. Enga ore chimochere Jesus ajnoquéode iji borapéode uje arupachío ome cucha ai unerone udore uje ore chimériji ñane. Chamáñaje judíode ore isocabei u gu uje ore chijochame togode. 41 Enga chi porebúrique idógosiji Jesus cachodi uje ore chajo aja curesei iji. Enga ore jochai jnupedo déji oroco iji porebui uté. Ore chijócha jnupedo uaté nanique gu ujetiga dimane ome totique. Mu cáma ayoré totique déji. 42 Jecute ore na Jesus ajnoquéode aja jnupedo idógosia uaté. Chamáñaje ore edojnaringuéo gu uje idógosi dire puyai ome judíode ore.
1 Uje e chise domíngoi enga Maria Magdaléna tibágui Jesus ode iji direjnime, uje qué topiéjna erámi. Uje chise Jesus ode enga chimo uje íjnoque cucarané cuchabe iji Jesus ode piagoi. 2 Jecute Maria Magdaléna jno ga chayopísaja Pédro jogadi, uje Jesus acadigode uñai déji to uje Jesus chijnorapise diríca. Enga uaté chojninga: —A ore jno yocangarádejnai Jesus ajnoquéode údi enga ore chicháji sañeque. Enga que yirajágo jogatique.— 3 Uje ore chudute Maria ojñane enga jĩraque Pédro ore jno enga ore chicáji Jesus ode. 4 Enga Pédro, jõrai ore chayopise mu ibisoque jõrai, jecute bajágaja Jesus ode. 5 Enga uté chajo raja jnumi enga tajire ome Jesus ode. Chimo borapéode iji jnumi uje ore chigaru Jesus gai ome diríca. Mu que uté chacája ajei. 6 Mu Simon Pédro di to iji uté quigade. Mu Pédro u uje chacája Jesus ode ajei. Enga uté u to uje chimo Jesus iguidi casodé borapeque. 7 Mu Pédro chidójninga uje Jesus gatoi jogonore casodé borapeque que déji borapéode uñane jogadi. Mu pipocayacho aja ñane enga déji jogate uñai. 8 Quigade enga Pédro jõrai uje bajágaja Jesus ode doi enga chacája ajei to. Enga uje uté chimo uje Jesus íjnonguiji ode enga jogadi u uje changureta Jesus uringai niriji iji pitoringai. 9 Mu cáma Jesus acadigode udore ore chiraja Dupade uruode atatasórone urusarane quigode uje chatata uje Jesus a nijiápo rĩ iji datoringai quigade. 10 Uje ore chimo uje Jesus íjnonguiji ode enga ore chajnésaru daguíjnai. 11 Mu Maria que jno to go. Mu cháji guesi iji ode enga poji ejode. Mu uje qué po enga chajo raja jnumi enga chajire Jesus ode ajei. 12 Uje chajire ajei enga chimo Dupade utocáite gáreode uje ore déji dayaridode iji Jesus mochádi casé. Enga ore iguidedie póroroi. Chi udore uñai chácariji Jesus aoi gaterasui jé uñai cháji guídade jogadi. 13 Enga Dupade utocaidode ore catecã́ri Maria enga ore chojninga: —Chequé a, ¿gotique gu a uje babo?— Enga Maria chajnai ore uruode enga chojninga: —Yibo gu uje a ore jno Yangarádejnai ajnoquéode údi aja sañeque, enga que yiraja jogatique.— 14 Mu uje e chejna daruode udore guesi enga jĩraque chajire dedoboi enga chimo Jesus iji. Mu que chiraja uje Jesus u imoi. 15 Enga jĩraque Jesus catecã́ri ga chojninga: —Chequé a, ¿gotique gu a uje babo? ¿Jé bacuetique e?— Mu Maria jos eti uje ore acadie pore irodisṍri u Jesus. Enga catecã́ri enga chojninga: —Ujetiga ua u uje babo Yangarádejnai údi enga angome yu jogatique ga yiji enga yijochame jne.— 16 Mu uje Jesus catecãrápoi rĩ enga chojninga: —Maria.— Enga jĩraque Maria chajire daquigade enga catecã́ri Jesus ome judíode uruode enga chojninga: —Rabóni.— Uje uruode udojo quigode u “ore acadisṍri” ome judíode arecujáidie. 17 Enga Maria jĩraque chisa Jesus mu Jesus chojninga: —Arame yu. Chamáña gu uje cáma yicáji Yai jogadi iji gaté. Mu bo enga acáji yijorane ore enga angome ore jne uje a yicáji yai Dupade jogadi jne. Mu que gusu Yai, mu uacai jé u to yoquidupade.— 18 Jecute Maria Magdaléna jno ujetiga chingome Jesus acadigode ore uje chimópise ore angarádejnai Jesus ome dedodie, enga ujetiga chatata Jesus uruode udore quigode ome ore. 19 Iji domíngoi uté iji dejai enga Jesus acadigode ore chamáta ñane aja guíjna tajei. Enga ore surúpusu dabai. Chamáñaje ore todo judíode gu. Mu uje qué ore déji ñane gari iji guíjna tajei enga Jesus chiqueta raja ore. Enga Jesus chingo darasitigade aja ore enga chojninga: —Yajéode u ujetiga pajesereringai déji uaque.— 20 Uje chejna daruode udore guesi enga jé u uje chingo dajmanáyone aja ore. Enga chingopo ore ichajupídi ome ore rĩ, uje déji orotabidi. Enga ore irasique re uje ore chimo uje ore angaráni Jesus jé upúsu. 21 Enga chingopo daruode aja ore rĩ enga chojninga: —Yajéode u ujetiga pajesereringai déji uaque. A yiroque uágaja erámi jne. Adi u uje Yai chiroque yu aja erámi nanique.— 22 Jé u uje Jesus doi enga chubúchu dajñari aja dacadigode enga chojninga: —Yujopie Espíritu Sánto e chacája uaque ome yujñarone udojo. 23 E uacajnei tu ujetiga ojnichome uñéngo: “E pĩroque uacasijnaringuéone.” Enga uacajnei tupo rĩ ujetiga ojnichome uñeque: “Basijnaringuéone jé jogate ua.”— 24 Mu Jesus acadigode uje gare ore iji yirídai, uñai i tu Tomas uje chi garaja ore nanique. Mu chi uté ca déji ore gari to uje Jesus chiqueta raja ore. 25 Mu uje Jesus acadigode uñane ore chise Tomas enga ore chojninga: —Yimongopise Yocangarádejnai ome yoquedodie que.— Mu Tomas chojninga: —Ujetiga ca yimo ojnaquerodie piedie iji jmanáyone ga yiji enga yijmare yijmané aja ojnaquerodie piedie enga yijmarapo yijmanai aja ore ichajupídi iji orotabidi enga que toc ujetiga yangureta.— 26 Chi dirode gadióguiji ti iji udojo quigade enga Jesus acadigode chamatapo raja ñane rĩ iji guíjna tajénique. Mu Tomas e déji ore gari to. Enga chi guiguíjnai uté piagode jóidedie uajádiji jnese. Mu chi Jesus chacája guíjna tajei uje que chuchẽre piagórique gai mu. Enga chiqueta raja ore enga chácariji ore ajei. Enga chojninga: —Yajéode u ujetiga pajesereringai déji uaque.— 27 Enga chi jĩraque chojningame Tomas: —Ajirape yijmanáyone enga ajmare bajmané aja ojnaquero pie iji yijmanai. Enga ajmarapo bajmanai aja ore ichajupídi iji yorotabidi. Jé ca bo botigayaquéode údi ome yu mu angureta yu.— 28 Jé u uje Tomas chojningame Jesus: —Yangaráni tu ua. Enga yidupade upo ua rĩ.— 29 Jesus chojningame Tomas: —Tomas, bamo yu que, jecute bangureta yu. Mu a pininaquei jogadi upúsu ome udore ore jnese jne uje que ore chimo yu mu ore changureta yu.— 30 Yipota jetiga arajáyo uje Jesus ipesute datéode uñane jiépiso uje pésu iji dacadigode iquéode. Mu gusu udore uje yurúsãre ore quigode iji darujna aoi udé. 31 Mu Jesus ipesute datéode udore uje déji darujna aoi udé, purusãracho gu ujetiga anguretáyo Jesus uringai Dupade utocáite Crísto . Enga ujetiga anguretayopo uringai Dupade Ape rĩ. Yigaidi tu gu ujetiga pucuecaringué eyúgojmai déji uaque to ome uacanguretigai iji Jesucrísto.
1 Quigade uje chiqueta raja Tomas ore enga chiquetápo raja dacadigode rĩ iji yote quedéjna cuchábi pijnanai uje i tu Tibérias. Enga isocai u udé uje chiqueta raja ore. 2 Jesus acadigode uñane déji yote quedéjnai uté pijnanai enga Simon Pédro u uñai. Tomas déji to uje garaja ore nanique. Nataniel Cana gosi déji to uje idai déji ore uniri Galiléa. Zebedéo ujnacarode déji to, jé aja Jesus acadique gáreode uñane. 3 Diga Simon Pédro chojningame dajorane: —A yiji oyídode jne.— Pédro jorane ore chojninga: —A yijínango ua jne.— Jecute ore jno enga ore chacája cucoi. Enga ore chucué oyídode iji dejai údode mu que ore chisa oyítique. 4 Uje chi e idógosi diri enga Jesus chi chise yote quedéjnai uté pijnanai to. Acadigode ore chimo Jesus iji ta mu que ore chiraja gosi. 5 Mu Jesus tibite ore gai enga chojninga: —¡Jõ e! ¿Jé ca ajnicho oyítique e?— Enga ore chajnai uruode enga ore chojninga: —Ungare e.— 6 Jecute Jesus chojningame ore: —Beyoi enga óraño uacachímeno aja uacãrachua. Enga jogadi u jne ujetiga ajnicho oyídode.— Jecute ore doi Jesus uruode quigode enga jĩraque oyídode irágu ore chímeno. Chi pénupise ga que togome ore ujetiga ore churuguse chímeno aja guesi. 7 Jecute Jesus acadigode jõrai uje chi Jesus chijnorapise chiraja Jesus gosi. Enga catecã́ri Pédro enga chojninga: —Yocangarádejnai a u jõ.— Uje Simon Pédro chudute dãjorai uruode uje ore angaráni Jesus u enga jĩraque chigui daguidé gaiminóri uje chi chejñu que, enga chi jĩraque tṍra re aja yodi enga doi jnacoi iji yodi aja Jesus yui. 8 Mu Jesus acadigode uñane ore cháji cucoi ajei uje cucoi que idája yote quedéjnai pijnanai go. Uje chi métrodie déji 100. Enga ore doi enga ore chijocase cucoi aja yote quedéjnai pijnanai yui uje ore churuguse ore chímeno uje irágu ome oyídode iji cucoi dosadi. 9 Uje ore doi jnumi iji cucoi enga ore chimo uje ore posode e dimane ome ore. Uje chi oyídi déji pioi gueguerade gai enga arurégode déji pioi ejoi. 10 Enga Jesus catecã́ri ore enga chojninga: —Ajnáño oyídode ucode uñéngo aja de uje quene ajnicho que.— 11 Jecute Simon Pédro chayója cucoi enga chi churuguse chímeno iji jnumi aja yote quedéjnai pijnanai. Oyídode chi iragupúsu chímeno ga chi querújna. Chi ore chisẽcaru oyídode enga 153 u. Chi jiépise oyídode iji ore chímeno ajei mu que dajuque go. 12 Jecute chi Jesus tibidi ore enga chojninga: —Boyo iji ti. Acho uacabosode to.— Mu que udore uñeque cási ujetiga catecã́ri ome uringárique ayoré. Chamáñaje ore chiraja gu ome ipesute datei uje a ore angarádejnai u. 13 Mu Jesus jĩraque chose ore yui. Chisa arurei enga chisi ome ore. Enga jé isocai u to ome oyídode uje chajuguína ore to. 14 E gadioque ome Jesus uje chiqueta raja dacadigode ore uje niji iji pitoringai. 15 Ore posode quigade enga Jesus catecã́ri Simon Pédro enga chojninga: —Simon a, Jonas abi a, ¿bajnorai upúsu yu a, jeoga bajnoraquei ome cuchade udore sué bajnoraquei gai ome yu a?— Mu Pédro chojninga: —Yangaráni a, baraja uje yirasiguipise ua.— Jecute Jesus chojninga: —Ujetiga jec ũré ua ome baruode udore enga ajusipise yanguresõre ichade ore guio. Uje ore gajnunie u áyasabidie gu.— 16 Mu Jesus catecãrápoi Pédro rĩ enga chojninga: —Simon a, Jonas abi a, ¿jé ũré uje ajnóra yu?— Enga Pédro chajnai uruode enga chojninga: —Yangaráni a, baraja uje yirasique ua.— Jec u uje Jesus chojningame: —Ujetiga jec ũré ua enga ajusipise yanguresórone ore guio jnese uje ore gajnunie u áyasadie.— 17 E gadioc uje Jesus chingo Pédro ujetiga jec ũré ome ijnoraquei enga chojninga: —Simon a, Jonas abi a, ¿jé ũrepise ua ome barasitigade ome yu a?— Mu jnusiétaque Pédro uje Jesus catecã́ri ga gadioque eti jé ũrepise ome irasitigade. Enga jé u uje Pédro chojninga: —Yangaráni a, baraja cuchade jnese. A baraja to uje jec ũré yu uje yirasique ua.— Jesus chojningame: —Be enga ajusipise yanguresórone ore guio uje ore gajnunie u áyasadie.— 18 Enga Jesus jno daruode údi enga chojningame Pédro: —Jé ũré yu uje jnacare ua nanique enga bagui bajegaidedie iji baguidedie. Enga bacapóji bajegaitígo bajesúrigo erãpe rĩ. Mu ujetiga ese baringai choquíjna enga a ãrai bajmanecade iji gatéode ujetiga bamajosórone ore chimate dasocade ome ua. Enga a ore jno bádi aja dajegaitique erãpe uje que bajegáite mu.— 19 Jesus uruode u udojo ome Pédro gu ujetiga Pédro chiraja datoringai yui quitígo. Enga chingopome rĩ uje a Dupade uringai cuchape pijoque jne ujetiga diga cho daba danguretigai iji Dupade. Quigade enga Jesus chojningame Pédro: —Ajo ua aja yadode.— 20 Uje Pédro chiguísãre daquigade enga chimo uje Jesus acadigode uñai chajna ore to. Jesus acadi uté u uje Jesus chijnorapise. U to uje chácariji Jesus ejoi iji ore agapidi enga catecã́ri Jesus ome guẽrasṍri gosi. Uje chojninga ica: “Yocangaráni a, ¿bẽrasṍri gosi te jne a?” 21 Uje Pédro chimo uté enga catecã́ri Jesus enga chojninga: —Yangaráni a, be ga atata cucha dacadode quitígo to uje a tocade jne ome uté.— 22 Mu Jesus chojninga: —Ujetiga yajéraso enga qué ecárase aja yiríringai mu qué dóji. Be enga ajo ua aja yadode.— 23 Diga Jesus anguretasórone uñane chudute udojo enga que ore chiraja quitique. Jecute ore ojña bisidégode chubu erámi uje chiese ca Jesus acadi uté toi jne. Mu Jesus uruode quigode que u ujetiga ca toi. Mu uruode qui u ujetiga ajéraso enga eca aja diringai. Jecute Jesus chojningame Pédro: “Que bajnei to yáyipiedie ome uté.” 24 Enga ore erángani, Jesus acadi uté, u uyu. Uyu u to uje yurúsãre cucha dacadode udore iji darujna aoi udé. Enga yajo yu aja yurusarane uje jé ũrepíso. Enga que potigayaquérique déji uyoc uñeque ome cucha dacadode udojo uringane ũréo. 25 Amirone qué uásejna ome Jesus ipesudode cucha uje que purusãracho iji darujna aoi udé. Mu ujetiga uñeque dorási enga churúsãre Jesus ipesudode jnese enga a chipedugurásu erámi ujetiga purusãracho jnese. Amen.
1 Teófilo a, a yurúsãrapo cuchade ome ua jne rĩ. Bamo uje yurusarome ua nanique enga yurusarane u Jesus ipesudode jnese, acajnaquéode jnese rĩ. Yingome Jesus ipesute taninguíone aja ua. 2 Enga yingopo ipesute ejode jnese aja ua to rĩ uje pésu nanique uje cáma jnome gaté. Mu uje cáma jnome gaté nanique enga doi dajegaidode iji dacadigode ujade ujetiga chingo dáyipiedie aja ore enga ore doi iroquéode. Enga Jesus garijogosṍri u Dupade Ujopie Espíritu Sánto nanique uje pésu cuchade udore. 3 Enga Jesus chiqueta raja dajegaidode udore iji datoringai quigade nanique. Dirode guejnane ayoré gare nanique uje jé ate udore enga chiqueta raja ore gatuaque. Chetingare re iji ore ujade uje jé upúsu re. Gaidi u gu ujetiga ca potigayaquérique déji udore uñeque uje ecápo rĩ iji daringai toque quigade. Enga jecucha catecã́ri ore ome ore uringáringo purása ome Dupade ujetiga Dupade u ore asuté. 4 Uje Jesus qué déji darógode udore ore gari ga chaquĩ́ra ore ujetiga cáma ore jnomíji Jerusalen. Chojninga: —Arochope jeta yojningai di iji uaque jne, uje yai Dupade chi chirógaja uaque jne. 5 Juan casicáite chaca uáguiji yodi ica, mu e idógosi jeta Dupade Ujopie Espíritu Sánto chacája uaque.— 6 Uje Jesus irógode, Jesus ore déji ñane gari ga ore catecã́ri Jesus enga ore chojninga: —Yocangaráni a, ¿ajocãrape purása quedéjnane ore eduguéjnane iji yocujade jne iji deréjnane udojo a? ujetiga Israel gosode uyoque yipecopo yoqueduguéjnapísode jne rĩ.— 7 Mu Jesus chajnai ore ga chojninga: —Que uacajnei tu gotique ujetiga arajáyo deréjnarique ujetiga yai Dupade pésu cucha dacadode aja quigode. Enga gusu Yai uje gajnei tu ujetiga pésu cuchade aja quigode ujetiga ore tocade. 8 Mu ujetiga Dupade Ujopie Espíritu Sánto chacája uaque enga a uacajopiéraque cuse to jne. Enga yipijogúsorone u uaque jne iji Jerusalen, iji Judéa jnese rĩ, iji Samária jnese rĩ, iji jnumi eruéode jnese to rĩ.— 9 Uje Jesus chejna daruode udore guesi enga jnome gaté yui uje qué ore chajire. Enga gue abujadie suru gai, jecute que toc ujetiga ore chimópo rĩ. 10 Uje qué ore chajire gaté uje Jesus jno, ga jnani gáreode chiqueta raja ore. Enga póroropisi ore iguidedie. 11 Enga ore catecã́ri Jesus irógode enga ore chojninga: —Galiléa gosode uaque a, ¿gotique gu a uje que ayáyo amíningacho Jesus aja jnoringai? Jec ũré uje e jnoji uacari que enga qui tu gaté, mu adi a jé u to jne ujetiga diapo jne rĩ.— 12 Quigade ga Jesus irógode ore, ore chajni iji cucarani uje i tu Olívos ga ore chajni aja Jerusalen. Cucarani Olívos, ore idaidatei Jerusalen, ore idógosiji ñane. 13 Uje e ore chise guidaidatei ga ore cheru guiguíjnai ajei gateminóri. Pédro, Juan, Jacóbo, Andres, Felipe, Tomas, Bartolomé, Matéo, Jacóbo uje Alféo ape, Simon uje pota chijnime ore eduguéjna ducurása quedéjnai nanique iji ore uniri, Júdas uje Jacóbo jõra, udore ore upusiédi u guiguíjnai tuté. 14 Chequedíe uñanie chamáta rágaja ore to iji uté gatuaque uje ore gaidi u picatecãraitigade ome Dupade. Enga Jesus daté Maria, jec aja Jesus desade ore cháta rágaja ore to. 15 Enga ore pesapo dague te rĩ iji dirode udore uñeque enga Pédro chague iji dojode Jesus anguretasóño ajei ujetiga chacate ore. Chi 120 ore uje ore déji ñane gari iji jogadi uté. 16 Enga Pédro chi chojningame ore: —Yujode Jesus anguretasóño uaque a, Dupade Ujopie Espíritu Sánto angúromei u jnani bajai David nanique ujetiga churúsãre cucha piqueminórone. Jecute que toc ujetiga ca David urusarane udore tocade. Enga David urusãra cásodicaite ojningai u Jesus guẽrasṍri Júdas. 17 Uacamóño to uje Júdas uté jõra yógaja Jesus iroquéode to ica. 18 Mu uje tẽra Jesus ome ore ica enga ore chisi ome plátadie ome ica. Enga Júdas uté jno ga doi oré tome jnupe pei ome dasijnaringuéone oredie enga jé u uje chujé re enga chichaga datoi aja jnumi enga dusi ome. Enga uchade tocade. 19 Jerusalen gosode ore chudute Júdas casica ujnomei jecute ore chĩ́caraja Acéldama aja ore gaidi jnupe pei. Acéldama ore uruode qui tu Erãpe Diquiyoi. 20 Enga David ojningai jé upúsu Júdas iji darusarane uje i tu Sálmos. Uje chojninga: Jec arec ujeta uté iguíjnai íjnoque bisidec. Enga ca uñeque pusapóji rĩ iji deréjnane. Enga David chojningápo rĩ: Jec arec ujetiga uñeque basaja uté jogadi Enga doi Dupade iroquéode. 21 - 22 Pédro e cha catecã́ri ore ome David urusarane udore enga cho ore quique. Enga chojninga: —Jnanione uñane déji yocujade uje ore chimo Jesus to uje Juan tṍraja yodi ica. Enga jecucha ore nóna Jesus uyoque to aja erámone nanique jec aja diri uje jnome gaté. Jec areque jeta yisago jnanione udore uñeque aja yoque ujetiga chacate ore ome Jesus to uje ecápo rĩ.— 23 Enga ore ajegaidode gare iji jnanione udore. Uñai íode gadioc: José, Barsabas, Jústo u. Uñai i tu Matías. 24 Enga ore catecã́ri Dupade enga ore chojninga: —Yocangarádejnai Dupade, barajápise oráyipiedie jnese. Jecute ango yoque bajegaitíguiji jnani gáreode udore ore. 25 Yoquigaidi tu gu ujetiga bajegaidi tuté basaja Júdas casica jogadi ome bajnacari iroquéode to. Uje bamo uje Júdas uringai bajnacari iroque e bijna ome gu isijnaringuéone. Enga jé tiógara Júdas uté uringai pujuya, enga e chise.— 26 Uje ore cha dacatecãraitigade enga ore doi cucaranenie ome ñane. Ore gaidi u gu ujetiga ore chiraja gosi iji jnanione udore. Enga Matías yuque, jecute Jesus irógode uje chojmára ore iji yirídai ore cháta uté aja raque to.
1 Uje e chise judíode ore jnusinamáni dire uje i tu Pentecostes enga Jesus anguretasórone chamáta ñane iji pijogate chojmarai. 2 Ore chuningame eti cucha ajamomíni tṍraji gaté. Cho úyujna cuchabe. Cucha ajamomíni irágu ore charidi guiguíjna tajei. 3 Enga ore chimo cuchárique uje cho piogode ocaráidie. Enga pioque ocarai gajnunie basaja ore gáyode jnese. 4 Enga Dupade Ujopie Espíritu Sánto irágu ore ajéode jnese enga jĩrique ore chiraja enga ore doi dara quedéjnane. Ore chiraja gu Dupade Ujopie Espíritu Sánto. 5 Judíode uñane déji Jerusalen iji dirode udore uje ore gaidode u Dupade adode, mu ore doi dayode jnani bajade jmapiedie ome dagaidode udore. Enga ore tṍraji erámi údode jnese. 6 Uje guidai idaisórone udore ore chudute cucha ajamomíni enga jĩrique ore chamáta ñane aja. Mu ore uruode cãra re ome ñane. Jecute que ore chiraja gotique uje ore chudute darúpisode iji Jesus anguretasórone ore pijnanone uje ore narare. 7 Ore tijapísa Jesus anguretasórone ore enga que ore chiraja gotique. Jecute ore chojningame ñane: —¿Jé gotique a? ¿Ja ca Galiléa gosode Mu udore ore a? uje ore dopísi yocuruode. 8 ¿Jé gotinguiringuipise? uje udúco yocurúpisode iji ore pijnanone uje dara quedéjna ome ore múñi. 9 Chamáñaje yocuñane yórangoji Pártia. Yocuñane yórangoji Média. Yocuñane yórangoji Elam. Yocuñane yórangoji Mesopotámia. Yocuñane yórangoji Judéa. Yocuñane yórangoji Capadócia. Yocuñane yórangoji Pónto, Ásia ore. 10 Yocuñane yórangoji Frígia. Yocuñane yórangopoji Panfília rĩ. Yocuñane yórangopoji Egípto rĩ. Yocuñane yórangoji guidáyode uje déji ore uniri África uje déji Cirene uéchade. Róma gosode uyoc uñane mu yoco yocuniri iji puniri udé. Judíopise yocuñane. Mu uñane que judío yoque go, mu yoco judíode iji yoque gu uje yicoi ore isocade to. 11 Yocuñane yórangoji Créta. Yocuñane yórangoji Arábia. Yocuruode cãra re ome ñane, mu jé ore doi yocuruode jnese uje ore chacate yógome Dupade ipesute datéode.— 12 Ore tija enga que ore chiraja gotique. Enga ore catecã́ri ñane ome enga ore chojninga: —¿Jé gotinguiringuipise uje ore doi yocuruode uje que ore urúo múñi?— 13 Mu uñane cana ore gai enga ore chojninga: —Yote pioi a yuque ore.— 14 Mu Pédro jĩrique chague. Enga jorane Jesus irócho uje chojmára ore iji yirídai ore chague to. Enga Pédro chejnapúsu daruode enga chojninga: —Judéa jogosórone uaque a, jé aja Jerusalen gosode uaque rĩ, angachopísi yuruode uje yigaidi u gu ujetiga arajayópise cuchade udore quigode. 15 Uacoyo yote pioi yúguiji yoque mu que yote pioi yuque yoque go, uje qué dúrasape. 16 Que u gotique, mu Dupade uruode atatasṍri Joel urusarane ojninga cásodicaite u. Enga e tocade uje chojninga: 17 Dupade chojninga: A yuruode tocade jne ome disi ejórigo iji dire erueminórone. A yojne Yujopie Espíritu Sánto aja cojñone ore jnese jne iji disi ejórigo. Ore ujnacaníngo, ore urórigui a ore chatata yadode jne. Jnacarode a ore chimo denomitígo jne rĩ. Choquíjnane a ore chĩ́cara daritígo jne. 18 A yojne Yujopie aja yirógode, yiróguedie ore gáyode jne enga a ore chatata yuruode. 19 A yingo cucha pimojmane aja ore jne enga ore tocade iji gaté jne. Enga a yingo cucha pingongoni ngane aja ore jne rĩ enga ore tocade iji jnumi jne. Enga diquiyode, pioque chagúode, pioque úyujna cuchábedie u jne cucha pingongoningane udore. 20 Guedé a cha daringai guedé enga topiéjna. Guedoside a cha daringai guedoside enga a cho diquiyode jne. Ore angarádejnai gãrapiedie u udaji uje cáma di. A pijóninga ore angarádejnai uté diringai jne. Enga suépise cuchade jnese gai. 21 Mu ore jnese uje ore chijócha Pangarádejnai uté ajei údi ome raque enga a chiqueta ore jne. 22 Pédro qué chacate ore enga chojninga: —Angáchoi yu, Israel gosode uaque, uje yuruode gajnengórone u uaque. Dupade pota nanique ujetiga ca potigayaquérique déji ome Nazaret gosi Jesus uringai Dupade utocáite. Jecute angúromei tu enga cucha pitijácho uté ipesute datéode iji uacajade nanique. Enga uacarajayópise yuruode udore uringane ũréo. 23 Mu uje pẽrate Jesus ome uaque diríca enga jĩrique uacarócho jnani sijnángone aja ujetiga ore chujé iji curesei gai. Mu Dupade áyipie diyajmenie u udire nanique, enga ajéode jé upúsu cucha dacadode udore uje tocade diríca ome datocaidi Jesus. 24 Mu Dupade chiquetápo Jesus rĩ enga que juéga jeta pitoringai sué gai. Chamáñaje que toc ujetiga pitoringai sué gai. 25 Enga eduguéjna cuchábi David casicáite urusarane ojningai jé upúsu Jesus to nanique uje chojninga: Jecucha imo yangaráni iji yiquéode. Déji yãrachua enga que yitodo cuchárique. 26 Pininaquéode chĩreta yajéode. Jecute yĩrarare enga jĩrique pijoque uje yinína yu. Uje qué yugúsi yuringai ayoré enga a ca yiya yangoroné ome Dupade ujetiga cháta cuchade aja yu. 27 Chamáñaje a ca ajuéga jne jeta yáyipie cháji jnaropié. Jé cho uje a ca ajuéga to jeta baroque bajnorai uyu yarione tarata jne. 28 Mu bango dajei qui aja yu uje chicáji pucuecaringuei iji deré jnane. Enga a yininaquei irágu yajei jne ujeta yugúsi bari. 29 Pédro qué chacate ore enga chojninga: —Yurásade uaque a, uacarajayópise uje yocurásai jnani bajai David toi nanique. Enga ore chijochame. Uacarajáyo to uje ode jé déji de yoquidai. 30 Mu Dupade uruode atatasórone uñai David nanique. Jecute chiraja uje Dupade chajo raja ujetiga datocaidi Crísto a u David ape disi ejórique jne. Enga chichaga uringai eduguéjna cuchábi aja David ape disi ejoi uté ujetiga basaja eduguéjnai David charidi. 31 Cho ujetiga David pañapísiji uje Dupade utocaidi Crísto niji iji daringai toque quigade. Jecute obiréjna uje que ojningai u re go, mu ojningai u Crísto uje chojninga: a ca Dupade juéga ujetiga áyipie cháji jnaropié. A ca juegapo to rĩ ujetiga aoi tarata iji ode ajei jne. 32 Enga jé upúsu urusarane quigode uje Dupade e chiqueta datocaidi iji datoringai. Enga utocaidi uté jé upúsu Jesus. Enga imósorone u uyoque jnese enga yajógo yógaja uje jé ũrepise udore. 33 Jecute Dupade chiringare Jesus enga susi iji gaté enga e déji Dupade ãrachua iji gaté. Enga jogadi u to uje Dupade chisi ome dajopie Espíritu Sánto ome Jesus ujetiga chajnerame danguresórone. Chamáñaje Dupade jé chajo raja nanique gu ujetiga chisi ome. Enga cucha dacadode jnese uje uacamóño jé aja uacadudigode cucha iji de diri garani u uté. 34 - 35 Que David u gotique uje chise Dupade idai, jecute ojningai u uñeque uje chojninga: Yocangaráni Dupade chojningame Yangaráni: “Ayáji yejode iji yãrachua aja diri ujetiga yipésu ua ga ajnué bamajosórone ore gai jne.” 36 Pédro qué chacate ore enga chojninga: —Jecute yipota ujetiga Israel gosode uaque jnese uacarajáyo uje Dupade ipesute uaquei Jesus uringai datocáite Crísto. Yojningai u Jesus uté uje uacajóyoja curesei ica. Enga e Dupade pésu uté to ujetiga ore cho dangarádejnai iji jnese.— 37 Uje ore chudute Pédro uruode udore ga ore chopise dáyugu re. Enga ore chojningame Pédro, ujode Jesus irócho ore: —Yoquijorane, ¿jé yoco rique jne a?— 38 Pédro chajnai ore ga chojninga: —Ecãcho uacadode ome Dupade. Angoño uágaja ore ujetiga ore chaca uáguiji yodi uje uacanguretáyo Jesus to. Enga a Dupade chĩro uacate gajnaréngone jne enga a Dupade chisi uáguiji dajopie Espíritu Sánto to jne rĩ. 39 Jé yocangarádejnai Dupade urúo nanique gu ujetiga chiroque dajopie Espíritu Sánto aja dabidigode jnese. Enga ojningane u uaque. Jé upo uacape disi ejórigo rĩ. Enga jé upo erámi unirisórone ore jnese rĩ uje idája ore iji erámone.— 40 Pédro acajnaquéode u udore ome ore mu ojningane cucha uñane ocoi. Mu uje Pédro e chejna dacajnaquéode udore guesi enga cho ore quique enga chojninga: —A pujuya diri jogonórone jne uje sijnanguipise ore gu. Jecute ca átayo uágaja ore to ujetiga ca ore gajnei pujuyaqué chise uaque to.— 41 Enga cojñone ore jnese uje ore chimesere Pédro acajnaquéode enga jĩrique ore tṍra ore aja yodi. Enga Pédro acajnaquéode imeserasórone 3.000 u ore iji diri tuté. Jecute Jesus anguretasórone chõre raque ga jie ore. 42 Enga udore ore chejna rángaja Jesus irógode acajnaquéode, enga pirasitigai déji ore ome ñane uje ore chamáta ñane gatuaque ome picatecãraitigade ome Dupade, jé u to uje ore chamáta ñane ome dabosode. 43 Dupade angúroméone u Jesus irógode, jecute jie ore ipesute datéode, ore ipesudode cucha pitijácho ore rĩ. Jecute cojñone tijapísa jnese. 44 Diga Jesus anguretasórone ore chatapise rágaja ñane enga ore pero dagúchade gáyode jnese. 45 Ore doi oredie ome dagúchade jnese enga ore chisi dojode Jesus anguretasóño iji daplátadie uje cuchade qué chona ore. 46 Ore chamáta ñane aja Dupade iguíjna cuchábi iji dirode jnese. Ore chamatapo ñane iji daguíjnane gatuaque to rĩ ome dabosode. Enga jé ũrepise ore ome darasitigade ome ñane uje ore pésu udore. 47 Jesus anguretasórone ore chicota Dupade aja daquigode enga guidai idaisórone que ore chise ore unerotiguérique go. Enga yocangarádejnai Dupade chõre danguretasórone iji deréjnane gatuaque uje chiqueta ore ome ore isijnaringuéone.
1 Dire uñai ga Pédro, Juan ore nóna ñane aja Dupade iguíjna cuchábi uje guedé cho jñuque. Judíode ore isocabei u gu uje ore catecã́ri Dupade iji uté uje guedé cho jñuque. 2 Jnani noñai jecucha ga déji Dupade iguíjna cuchábi piagoi iji dirode jnese uje noñaque aja guesi iji daté. Enga jnani uté jorane jecucha ga ore chijnóngaja Dupade iguíjna cuchábi piagoi uje i tu Piago Ueradi ujetiga chutai cojñone uje ore chacája Dupade iguíjna cuchábi. 3 Uje jnani noñai chimo Juan, Pédro ore ga chutai ore to uje ore chacája Dupade iguíjna cuchábi. 4 Pédro, Juan ore toji jnani noñai gai ga chi Pédro chojningame: —Cajire yoque.— 5 Enga jnani noñai chajire ore ga jos eti ore chisi ome cucharigome. 6 Mu Pédro chojningame jnani noñai: —Que yiplátaraque cuse. Ijnoque óro iji yu rĩ. Mu yisi ome yijogonóri cucha ome ua jne. A yiqueta ua jne ome Jesus, Nazaret gosi ujopie. Ayague enga arique.— 7 Pédro e doi enga chisa jnani noñai jmanai ãrachua enga chiringare aja gaté. Enga jĩrique etoque guídade, guidogorodie ore. 8 Jnani noñai chãra re iji gaté enga chague. Enga jĩrique dique enga nóna Pédro ore aja Dupade iguíjna cuchábi ajei. Chãra re iji gaté uje irasiguipise re gu enga chicota Dupade uje diguiji Dupade iguíjnai ajei. 9 Enga guidai idaisórone ore chimo jnese uje dique enga ore chicota Dupade to. 10 Enga ore chirajápise uje jé ũré uje uté u uje jecucha chácariji Dupade iguíjnai piagoi ejoi uje i tu Piago Ueradi ujetiga chutai ore. Jecute ore tijapísa uje e dique. 11 Jnani noñai que chirame Pédro, Juan ore gotique uje ore déji Dupade iguíjna cuchábi imeñé uña uje chi Salomon gajneque nanique. Enga Dupade iguíjna cuchábi piésorone, ejominórone ore, ore tibágui ore jnese uje ore tija jnani noñai uje e dique. 12 Uje Pédro chimo ore uje ore tijapísa ore enga chojningame ore: —Israel gosode uaque a, ¿gotique uje uacatijáyo yoque enga uacatoyóji yoquibai? Ise ga ajoso ati jnani uté dique gu yocujopie, jeoga uacajéode u uje yoquijnoraquéode ome Dupade u uje chiqueta. 13 Mu que quigode u gotique. Yocai cásodicaite jnani bajade Abraham, Isaac, Jacob ore angureni Dupade pésu dajnacari Jesus ujetiga sué ore gáyode jnese. Yocojningai Jesus uté u uje uaqueranome eduguéjnane ica. Enga uje Piláto pota jeta chirame ica mu uaquetácho. 14 Ueque Jesus ome pisijnaringuéone ga uerate adode jnese, mu que apótayo ica jeta Piláto chirame. Mu uacameserai u jnani sijnanguipísi ica ujetiga Piláto chirame. 15 Diga uacajéyo pucuecaringuei guẽrasṍri mu Dupade chiquetápo iji itoringai rĩ. Ga imósorone u yoque uje ecápo rĩ, enga jé ingongome uaque. 16 Uacarajayópise jnani uté uringai noñaque diríca mu uje ĩ́care Jesus i que enga jĩrique etoque. Yocanguretaretigai ome Jesus u uje chiqueta jnani uté. Enga uacamóño jnese uje e etoque jnani noñai. 17 Yurásade uaque a, jé yiraja uje que arajáyo cuchárique ica uje uacajéyo Jesus. Jé cho uaqueduguéjnane to rĩ. 18 Mu Dupade ojningane e tocade ome uacapesudode udore. Uje jé Dupade urúo nanique ome daruode atatasórone uje ore churúsãre enga ore chojninga: Dupade utocaidi Crísto gajnei tu ujetiga chejnáreque re. 19 Jecute écãcho uacadode ome Dupade enga ajníño gai ujetiga chĩro uacasijnaringuéone to. Quene jogadi u jne ujetiga Dupade pésu cuchade aja quigode ujetiga tijode cho jnangome uaque. 20 Enga Dupade a chiroque uacajnati Crísto aja uaque jne. Uje chimate dáyipiedie ome nanique ujetiga chirógaja uaque. 21 Mu Jesucrísto qué déji gaté uje Dupade qué pésu cuchade aja quigode gu. Uje jé urúo nanique ome daruode atatasórone iji jnani bajade uje ore chedu Dupade iji re. Uje chi chatĩre cuchade jnese uringáringo ujñapetágaja ore jne. 22 Moises acajnaquéode u ome yocayode jnani bajade enga chojninga: “Yocangaráni Dupade a chiroque daruode atatasónique aja uaque jne.Adi jé u uje chiroque yu aja uaque. Enga garani jé upúsu uaque. Ujetiga di gojni enga angachopísi ome ojningane cucha jnese. 23 Ore jnese uje que ore tangári Dupade uruode atatasṍri uté ga pujuyápise ore jne, enga ducarãte ore iji Israel gosode gari.” 24 Dupade uruode atatasṍri Samuel jé aja ujode Dupade uruode atatasõre ejode jnese ore chatata jnese cucha dacadode udojo icáite uje chi tocade jne. 25 Dupade jé urúo ome yocayode jnani bajade nanique uje chojningame Abraham: “Bape disi ejórique a erámi unirisórone jnese agutíyamáite jne.” Dupade ojningane cucha udore gajnengórone u uaque to uje Dupade uruode atatasórone chingome yoque iji darusarane. 26 Uje Dupade chiqueta dabi ga chiroque aja uaque bajaque ujetiga uacagutíyamáite enga ujetiga ayáyo uacasijnaringuéone jnese.—
1 Uje jé Pédro, Juan ore chacate ore ga sacerdóteode, Dupade iguíjna cuchábi irodisórone ore eduguéjnai, saducéode uñane ore díji ore. 2 Ajningarac ore ome Pédro, Juan ore. Ore chetaque gu uje ore chacate cojñone enga ore acajnaquéode quigode u uje que potigayaquérique déji uje togode ore ecápo rĩ. Chamáñaje Jesus ecápo rĩ iji daringai toque quigade gu. 3 Enga ore chisa Pédro, Juan ore enga ore jno ore údi aja ore jurugaisórone iguíjnai. Uje guedé e jno enga ore suru ore gai aja dire uñai. 4 Mu jiei ore uje ore tangári Pédro acajnaquéode uje Pédro chacate ore iji Dupade iguíjna cuchábi ajei. Enga jiei ore uje ore changureta Jesus. Gusu jnanione ore isecaranone ga idógosiji 5.000 uje ore changureta. 5 Dire uñai enga judíode ore eduguéjnane, ore angaránone, ore acadisórone uje ore chacate ore ome Moises urusarane ore chamáta ñane iji Jerusalen. 6 Enga ore cháta rágaja sacerdóteode ore eduguéjnai uje i tu Anas. Caifas, Juan, Alejándro ore déji ore gari to. Enga sacerdóteode ore eduguéjna cuchábode ore iguiosode jnese déji to. 7 Ore chiroque darógode aja Pédro, Juan ore ujetiga ore doi ore. Uje e ore di ore údi enga ore chicha ore aja dajei. Enga ore catecã́ri ore enga ore chojninga: —¿Jé gosi iroque uágaja jnani noñai uje uacaquetáyo diríca? ¿Oyo ringome uje uacaquetáyo a?— 8 Espíritu Sánto irágu Pédro ajei enga jĩrique chajnai ore ga chojninga: —Eduguéjnane a, Israel gosode angaránone uaque a, angáchoi yuruode. 9 Uacacatecãchoi yoque que ome cucha dacate ueradi uje jnani noñárique chise daringárique piquetaque. Enga chi apótayo arajáyo to uté iquetangónique cucha. 10 Jecute a yingopísa quigode jnese ome uaque jne. Yigaidi u gu ujetiga Israel gosode arajáyo jnese uje jnani udé uje déji uacaquei etoque gu Jesus Nazaret gosi ujopie. Uté u uje uacajéyo uje uacajóyo aja curesei. Mu Dupade chiquetápo rĩ enga jé ecápo rĩ. 11 Déji Dupade uruode uje chi guiguíjna cuchábi ipesungórone ore guetegue cucarané noña enga dequedójnariejna iji quigade enga ore chicháji guiguíjnai jogate obiréjnapisi. Enga Jesus gajnua tu cucarané uaté. 12 Enga que piquetangore uñeque cuse. Gusu uté. Uje Dupade ojningai chojmára iji erámi unirisórone jnese ujetiga chiqueta ore. Enga Jesus uté u.— 13 Uje eduguéjnane ore chimo uje Pédro, Juan ore chacate ore ga que ore chagutu ragome ga ore tijapísa ore. Uje cojñoque gajnareque ore, enga querénga ore doi escuéladie to. Mu ore chirajápise cuchade. Ga quene eduguéjnane jnusina uje Jesus jorane u ore nanique. 14 Enga ore iquetai jnani noñai déji ore gari iji ore aquiningai uté. Jecute eduguéjnane que ore chiraja daru quitígome Pédro, Juan ore. 15 Enga eduguéjnane chiroque Juan, Pédro ore aja guesi. Uje gusu ore enga ore botãre ñane. 16 Enga ore chojninga: —¿Jé yoco ringome udore ore jne a? Chamáñaje ore ipesute datei ujnomei e chubu Jerusalen údode jnese. Enga ore chiraja jnese ujnomei uté uringai ũré, jecute que togome yoque ujetiga yotigáco iji ore iquei. 17 Mu yicoi enga yijmongacója ore jne enga ca ore ujnomei jnome erámi. Enga a yãrájome ore jne iji de diri, jec aja dire piqueminórone ujetiga ca ore chacadápo cojñone jne rĩ ome Jesus adode.— 18 Eduguéjnane e ore tibidi Juan, Pédro ore ga ore chojningame ore: —Jé ca acachopo cojñone ore ome Jesus adode jne rĩ.— 19 Mu Pédro, Juan ore chajnai ore ga ore chojninga: —Beyoi uacajéningo ¿ujetiga omi tu ome Dupade ujetiga yangácoi uaque enga yiyágo yangácoi Dupade? 20 Que toguipis ome yoque ujetiga yiyágo yacáco ore ome yocududigode, yoquimone cucha.— 21 Eduguéjnane e jmongarapísaja Pédro, Juan ore mu quigade enga ore chiroque ore aja doi. Que ore chiraja dasocáringome ore ujetiga ore cho dajuñame ore uje socaseti cojñonguemui chetaque. Chamáñaje cojñonguemui chicota Dupade gu ome ore ipesute cucha datei. 22 Ore iquetai jnani noñaque chi sequeredie 40 iji yui uje base, mu e etoque gu ore ipesute datei uté. 23 Uje ore chiroque ore aja doi ga Pédro, Juan ore tibágui dajorane. Ore chingo sacerdóteode eduguéjnane, judíode angaránone ore uruode aja ore. 24 Uje Juan, Pédro ore jorane ore chudute ore ojñane ga ore catecã́ri Dupade enga ore chojninga: —Yoque Dupade, cuchade ipesungóri tu ua iji gaté, iji jnumi to, jé iji yote quedéjnane rĩ. Jé bapesute cuchade jnese. 25 Batṍri bajopie Espíritu Sánto ome baroi David nanique ujetiga churúsãre baruode enga chojninga: ¿Gotinguiringuipise uje purása quedéjnane ore chiboráta? ¿Gotinguiringuipise to uje Israel gosode ore cho joroque dáyipie bisidéguedie ome yu? 26 Eduguéjnane ore chingo dáyipiedie aja erámi, Dacasutedie iji guidáyode ore chamáta ñane to, Uje ore chetaque yocangaráni Dupade enga ore chetagapo Dupade utocaidi Crísto rĩ. 27 Yoque Dupade, ore adi u icáite uje Heródes, Piláto, purása quedéjnane, Israel gosode ore chamáta ráguiji udé guidai ujetiga ore chimate dáyipie gajnarénguenie ujetiga ore chujé bajnacari Jesus. Ueque uté ome pisijnaringuéone múñi. Enga bajegaidi tu ome batoquéode. 28 Mu uje ore chujé bajnacari ga báyipiedie ojningane cucha e tocade. 29 Yocangaráni a, bamo uje ore jmongarája yoque. Mu atapísaja barógode uyoque enga ca yitodógo ore enga ca yagutúgo yógome ujeta yatatago baruode. 30 Aqueta cojñoque ejnaretade ome bajopie. Enga apésu bapesute datérigo, cucha pitijátigo ujetiga yĩ́caco bajnacari Jesus i jne uje ueguipis uté ome pisijnaringuéone.— 31 Uje e ore cha catecã́ri Dupade enga jĩrique ore charidi guiguíjna tajei tãrara. Enga Espíritu Sánto irágu ore ajéode jnese. Enga que ore chagutu re ome uje ore chacate ore ome Dupade uruode. 32 Jesus anguretasórone jiépis ore mu ore áyipiedie, ore ajéode jé chojmára. Que uñeque iji ore chojningame dagúcharique: yugúchapise. Mu ore pero dagúchade gáyode. 33 Dupade ujopie dépisi Jesus irógode uje ore chatata yocangaráni Jesus ujnomei uje e ecápo rĩ. Ga Dupade chatapísaja danguretasórone. 34 - 35 Que cuchárique chona Jesus anguretasónique gu uje ore chisi ñane iji deranone dagúcha oredie. Ore tẽra dajnepídode jnupe, daguíjnane ore enga ore chisi udore oredie ome Jesus irógode. Enga Jesus irógode chajuguína ore uje cuchade qué chona ore. 36 Jecute Jesus anguretasórone uñai uje i tu José doi ore jmapié uaté to. José uté garãpi tu jnani bajai Levi. Uniri u yote quedéjnai ajã́ro uje i u Chipre. Mu Jesus irógode ore pésu José uté i uñai ga ore chĩ́care Bernabé aja to. MChamáñaje i qui tu Posõrasṍri gu. 37 Enga jnani uté doi oré tome dajnepídi jnupe enga chisi oredie ome Jesus irógode to.
1 Mu jnani uñai uje i tu Ananías, acoté Safíra ore tẽra dajnepídi jnupe to. 2 Mu Ananías uté pógu dajnepídi jnupe oredie pei ga chisi ome pei ome Jesus irógode. Chiese oredie u jnese. Ga acoté chi chirajápise dabai aringaquéode to. 3 Mu Pédro chojningame Ananías: —Ananías a, que oredie u jnese go. Jé bapógu pei. ¿Gotique gu a uje bajuéga ujetiga Satanas chacája bajei? Chamáñaje uté ipesudei báyipie gajnarénguenie udire gu uje bo barapatáringa que ome Dupade Ujopie Espíritu Sánto. 4 ¿Ja ca bajneque bajnepídi jnupe uté diríca? Uje babé oré tome ga ¿jé ca bajnei oredie to a? ¿Ome gotique gu a uje uacapéso udore? A ajoso eti uacãrai u jnanione uyoque. Mu barupatáringane udore gajnesṍri upúsu Dupade.— 5 Uje Ananías chudute Pédro uruode udore ga cṍra enga toi. Enga pisadodéringai jogadi u uté ome udore ore jnese uje ore chudute Ananías ujnomei. 6 Enga jnacarode uñane ore di ga ore chigaru Ananías gai iji boráidie enga ore jno údi ujetiga ore chijochame. 7 Guedé gatocorodie chi 3 u uje Ananías acoté chacája ore iguíjnai uté to. Mu chi cáma uaté chudute dabai tuqué ujnomei to. 8 Pédro e catecã́ri uaté ga chojningame: —¿Jec ũré uacajnepídi jnupe oredie jé u udire a?— Enga uaté chajnai ga chojninga: —Jé oredie upúsu udire.— 9 Ga Pédro chojningame Safíra: —¿Jé gotique gu a uje uacapéso uacajéode ujeta etingácho yocangarádejnai Ujopie Espíritu Sánto? Jõ, ¿adute ore guichai to a uje ore chijochame babai que? Enga a ore chijochame ua to jne.— 10 Jĩrique Safíra cṍraja jnumi to iji Pédro iquei enga toi. Chi jnacarode udore ore chacápoja guiguíjnai tuté ajei rĩ enga ore chise Safíra iji jnumi uje e toi. Ga ore jno údi ga ore chijochame to iji abai dosadi. 11 Jecute Jesus anguretasórone ore todópisa. Mu que gusu ore, mu jé cho cojñone ore jnese uje ore chudute Ananías, Safíra ore ujnomei, enga ore todópisa to. 12 Jesus irógode ore ipesute datéode, cucha pitijádode jiépisi iji cojñone ujade nanique. Enga Jesus irógode udore ore chamáta ñane gatuaque aja Dupade iguíjna cuchábi imeñé uje ore chĩ́caraja Salomon Gajnei. 13 Mu Jesus anguretasórone uñane que ore cási ujetiga ore cháta raja ore iji uté. Jé basa cojñone uñane ore tangaripísi ore. 14 Enga jiépise jnanione, chequedíe uje ore changureta yocangarádejnai Jesus ome ore acajnaquéode. 15 Enga cojñone ore chijna ejnaretade aja dajéode aja Pédro ore iquéode. Uñane moji damochápiode gáyode, ga uñane chitarano dataranone. Ore gaidi u ujetiga Pédro oré chise ore ga chiqueta ore. 16 Jerusalen ejominórone guidáyo ore idaisórone di ejnaretade údi to iji Pédro ujetiga chiqueta ore. Enga ore di Satanas utocaidode piésorone údi to rĩ. Enga Pédro chiqueta ore jnese. 17 Mu sacerdóteode ore eduguéjna cuchábi, saducéode ore uje ore nóna, ore charatáyime cojñone ome Pédro ore. 18 Jecute ore chigaru Jesus irógode enga ore jno ore údi aja guidai jurugaisórone iguíjnai. 19 Mu dejaque ga Dupade utocaidode gaté minórone uñai, chuchẽre guiguíjnai piagoi gai enga jno ore údi aja guesi. 20 Enga Dupade utocaidi chojningame ore: —Boyo, enga ayáyoji Dupade iguíjna cuchábi ujetiga angoño cojñone iji dati ome pucuecaringué ichai isocade jnese.— 21 Enga jĩrique Jesus irógode ore doi Dupade utocaidi uté uruode. Uje e dire iji dire uñai enga jĩrique ore chacája Dupade iguíjna cuchábi. Enga ore chacate ore. Mu sacerdóteode eduguéjna cuchábi, jorane, ore tibidi judíode ore angaránone iji daquiningai. Enga udore ore chiroque darógode ore aja Pédro ore ujetiga ore di ore údi. 22 Mu uje ore jurugaisórone que ore chise dajurúgayode enga ore chajni ga ore chingome sacerdóteode eduguéjna cuchábi. 23 Enga ore chojninga: —Yico yocujurúgayode jogadi guiguíjna que enga irodisórone jé ore chirote piagoi. Piagoi jóidedie etoguipísiji to rĩ. Mu uje uchẽco gai ga íjnoque ajei ome yocujurúgayode.— 24 Uje ore chudute ore ojñane enga Dupade iguíjna cuchábi irodisórone ore eduguéjnane, sacerdóteode ore eduguéjnane ore chopise dáyugu jnese. Enga ore chojningame ñane: —¿Jé ore cho píringome re que a?— 25 Uje qué ore déji daruode gai enga jnani uñai di ga chojningame ore: —Uacajurúgayode jnanío ore déji Dupade iguíjna cuchábi enga jé ore déji dacajnaquéode gai uje ore chacate cojñone ore.— 26 Dupade iguíjna cuchábi irodisórone ore eduguéjnai nóna ore jurugaisórone aja Dupade iguíjna cuchábi. Enga ore jno Jesus irógode údi aja daquiningai. Mu que ore cho ore ate go uje ore todo cojñonguemui ujetiga ore chujé ore ome cucaranenie. 27 Ore di ore údi ga ore chicha ore aja eduguéjnane iquei iji ore aquiningai. Sacerdóteode ore eduguéjnai chojningame Jesus irógode: 28 —Yãrájo ome uaque diríca ujetiga acácho ore ome Jesus adode. Mu que angáchoi yoque gotique. Enga Jerusalen idaisórone ore íjnongaja uacacajnaquéode. Enga chi aguhétayo yoquibai uje chiese yoquique Jesus.— 29 Pédro ore chajnai ore ga ore chojninga: —Yocangaráni u Dupade, ga que yangácoi uaque go. 30 Yocayode, jnani bajade ore angaráni Dupa chiqueta uaquei Jesus uje uacajóyo aja curesei ica. 31 Mu Dupade e chosi iji gaté enga e chicháji dãrachua iji gaté. Pésu uringai yoqueduguéjna to. Que gusu udore mu pesapo uringai yoquiquetangore rĩ. Gaidi u gu ujetiga Israel gosode chécãre dadode ome Dupade ujetiga pĩroque ore isijnaringuéone. 32 Cuchade udore atatasórone u yoque. Mu que gusu yoque mu Dupade Ujopie Espíritu Sánto chajo raja yoque ujetiga yangácoi Jesus adode. Ga Dupade chisi ome dajopie Espíritu Sánto ome dangarasórone ore jnese.— 33 Uje eduguéjnane chudute ore uruode enga ore ajéode dotãre ome ore. Jecute ore pésu dáyipiedie ome ñane ujetiga ore chisi ome pitoringai ome ore. 34 Mu eduguéjnai uñai déji ore gari uje i tu Gamaliel. Fariséo u uté to ga chacate ore ome Moises urusarane. Enga guidai idaisórone ore irasique uté enga ore tangaripísi. Uté chague iji ore ajei ga chiroque darógode ore aja ujetiga ore chijnáma Jesus irógode aja guesi. 35 Ga jé u uje catecã́ri dojode eduguéjna ga chojninga: —Yujode Israel gose uaque a, ajuso uacasocárique guio ome jnanione udore uje cáma yirajágo ujetiga jé ũré ore jeoga taque ore. 36 Ise ga ajnusináño uje jnani chingo raja ore nanique uje i tu Téudas. Chiese pangarádejna cuchape uté nanique enga jĩrique chamáta dacadigode aja re nanique. Chi 400 ore nanique. Mu uje ore chujé uté enga jĩrique acadigode chisite raja quedéjnane. Enga que cuchárique tṍraji uté acajnaquéode gotique. 37 Udojo quigade enga Galiléa gosode uñai chingo raja cojñone ore to uje i tu Júdas. Ore cho dangarádejnai iji uté to enga angarasórone jiei to. Mu ore chujé uté to enga angarasórone ore chisite raja quedéjnane to. 38 Jecute ayáyo Jesus irógode udore unerane to enga ca ajocáso ore. Ujetiga ore acajnaquéode garani u ore enga a íjnoque bisideque jne. 39 Mu ujetiga garani u Dupade a ca dequejnácho jne. Jecute ajuso uacasocárique guio ome ore. Jé socaseti uaquetei u Dupade.— 40 Eduguéjnane udore ore chimesere Gamaliel uruode. Enga ore tibidápoi Jesus irógode rĩ, enga ore chaquesu ore údode. Enga ore chãraque ujetiga ore chacate cojñone ome Jesus adode. 41 Jecute ore jnoji eduguéjnane ejode, mu ore irasiguipise re uje Dupade juéga ome ore ujetiga ore cho daba Jesus. 42 Enga que ore cha ore chacate ore ome Jesus adode gotique. Mu ore chacate cojñone iji Dupade iguíjna cuchábi iji dirode jnese, jec iji origuíjnane to rĩ.
1 Udojo quigade ga Jesus anguretasórone chõre raque enga ore chajuguína cucha pibosode ome ñane iji dirode jnese. Mu diga Jesus anguretasórone uñane uje oruruode u Grécia gosode ore uruode ore dojnóngaja ore gueranone ome uraque darásadie, chequé ecai. Chiese Jesus irógode gueranone jiei ome chequé ecadie uje ore uruode u judíode uruode, mu garósi ome chequé ecadie uje oruruode u Grécia gosode ore uruode. 2 Jecute Jesus irógode uje gare ore iji yirídai ore chamáta dojode Jesus anguretasórone, enga ore catecã́ri ore ga ore chojninga: —Gajnareque ujetiga yiyágo yacáco ore ome Dupade uruode ujetiga yajuguínango cucha pibosode ome ore gatuaque. 3 Yocujode Jesus anguretasóño a, angáchoi yoque. Enga acueyoi jnaníringo iji uacajade ujetiga gare ore iji ti; ujetiga uacarasícho ore adode; ujetiga ayipierãque ore, ujetiga Dupade Ujopie Espíritu Sánto irágu ore ajéode. Enga ore chajuguína cucha pibosode iji yoque. 4 Enga a jé Jesus irógode uyoque yicoi Dupade uruode jne ujetiga yacáco ore ome, enga a yicatecãcoi Dupade gatuaque rĩ.— 5 Jesus anguretasórone ore chimesere jnese Jesus irógode áyipiedie enga jĩrique ore chucué datocaidode jnanío ome cuchade udore. Enga ore ajegaidode uñai u Estéban. Enga Estéban changuretapise Jesus enga Dupade Ujopie Espíritu Sánto irágu ajei. Enga ore ajegaidode jõra Felipe, jõrapo Prócoro rĩ. Jõrapo Nicanor rĩ. Jõrapo Timon rĩ. Jõrapo Parménas rĩ. Jõrapo Nicolas rĩ uje Antioquia gose. Mu uté changureta judíode angureni dupa to, enga cho judío iji re to. 6 Ore chijna udore ore aja Jesus irógode. Enga Jesus irógode ore chicha dajmáinie aja ore gáyode. Enga ore catecã́ri Dupade ome ore. 7 Enga Dupade uruode chubu erámi ga jiei ore uje ore changureta. Enga Jesus anguretasórone chõre re iji Jerusalen. Ga jiépise sacerdóteode rĩ uje ore changureta Jesus. 8 Enga Dupade chatapísaja Estéban, enga chisi ome dajopie ome. Jecute pésu dapesute datéode, cucha pitijádode iji cojñone ujade. 9 Mu judíode uñane botãre Estéban uje ore tṍraji Cirene, Alejandria, Cilícia, Ásia ore. Enga judíode udore cháta rágaja judíode uñane uje ore aquiningamei guiguíjna i u Piroque Piraméone. 10 Ore botãre Estéban mu uje Estéban chajnai ore enga que ore chiraja darúringome go. Chamáñaje ayipieranguipise Estéban gu Dupade Ujopie Espíritu Sánto uje déji ajei. 11 Jecute ore chisi ome plátadie ome jnanione uñane ujetiga ore chijnime darárigo ome Estéban. Ga ore chojningame ore: —Ojnicho: Estéban uté dojnóngaja Moises diríca, jec aja Dupade to.— 12 Uje cojñone chudute ore uruode udore enga ajningaranguipise ore ome Estéban. Que gusu ore mu ájningaraque ore angaránone to, jec aja ore acadisórone ome Moises urusarane. Enga udore ore cugújnai Estéban jnese enga ore chisa enga ore jno údi aja ore eduguéjna cuchábode aquiningamei. 13 Enga ore chucué darade ijnimisórone to ujetiga ore chojninga: —Jecucha ga Estéban dojnóngaja Dupade iguíjna cuchábi uje Dupade gajneque múñi. Dojnongapója Moises urusarane rĩ. 14 Udúco to uté uruode uje chiese Nazaret gosi Jesus ucacasica a chajningarase Dupade iguíjna cuchábi jne. Mu que gusu udore go, mu chiese Jesus ajegaidi tu to ujetiga yécãco yoquisocade ome Dupade enga yiyágo Moises urusarane quigode uje Moises chacate yógome nanique.— 15 Mu jé u uje eduguéjnane, jnanione jnese uje ore déji oraquiningamei ore chajire Estéban mu ore chimo uje edodie chécãre dadode enga chopise Dupade utocaidode, gaté minórone, edodie.
1 Jé u uje sacerdóteode ore eduguéjna cuchábi catecã́ri Estéban enga chojninga: —¿Jé ũrepise ore ojñane udore ome ua ya?— 2 Estéban chajnai enga chojninga: —Yujode Israel gose uaque a, angachobi yu to. Jé aja yangarádejnane uaque rĩ. Uje cáma yocai jnani bajai Abraham chicáji ore idai Haran nanique mu yocangarádejnai Dupa pujnuéngaisṍri chiqueta raja iji ore uniri Mesopotámia. 3 Enga Dupade chojningame Abraham nanique: “Boji baniri, enga boji baguiosode ore gari rĩ. Enga acáji pachamite uñai uje a yingome ua jne.” 4 Jec u uje jnoji ore uniri Caldéa ga chicáji ore idai Haran. Diga Abraham dayé toi iji uté nanique. Udojo quigade enga Dupade chijna Abraham aja puniri udé uje qué uacagúsoji. 5 Mu que Abraham gajnepítique cuse iji puniri udé go. Que Dupade chisi ome erámi petique ome Abraham gotique nanique rĩ. Cachi charite. Mu Dupade chichaga Abraham gajnei punire aja ape disi ejórigo. Mu cáma atígo cuse nanique uje Dupade chingo udojo aja. 6 Mu Dupade chojningame Abraham nanique: “Bape disi ejórigo a ore cháji punire quedéjnarique jne. Mu punire quedéjnai uté unirisórone a ore chisa bape disi ejórigo jne ome daroquéode. Enga a ore cho dajuñame ore jne. Enga a sequeredie 400 jne ujetiga ore chejnáreque dasasórone josipiedie ome ore.” 7 Mu Dupade chojningápome Abraham rĩ: “Mu quigade enga a yo yujuñame bape disi ejórigo ujuyasórone jne. Quigade enga a bape disi ejórigo ore jnoji uté enga a ore chajniapo aja pachamini udé jne rĩ, enga a ore doi yuruode iji udé jne.” 8 Dupade chingo dáyipiedie aja Abraham to ga chiroque Abraham ujetiga chica dabode ujetiga pijoque uje Dupade uruode gajnesórone u ore. Jecute Abraham chica dabi Isaac uje dirode gadióguiji ti iji yui uje base. Adi jé upo rĩ uje Isaac chica dabi Jacob to. Adi jé upo rĩ Jacob. Chica dabode to uje gare ore iji yirídai. Enga Israel gosode uyoque uje yocuáguedie gare iji yirídai yocarãpi jé u Jacob ujnacarode udore. 9 Mu yocayode jnani bajade udore charatáyime desai José ome ore dai. Jecute ore tẽra desai. Ga gaisórone ore jno údi aja Egípto. Mu Dupade nóna José. 10 Enga Dupade chijnime José iji cucha dacate gajnaréngone jmáinie jnese uje chise José. Enga chisi ome payuquetotiguei ome. Jecute Egípto gosode ore eduguéjna cuchábi Faraon irasique. Enga pésu José enga eduguéjna cuchape to iji ore uniri Egípto. Jecute José chiroque Egípto gosode, enga chiroque Faraon iguíjnai jogosórone to rĩ. 11 Mu diga sequeré noñangue enga chise Egípto gosode. Enga chise Canaan gosode to. Enga ore chopise dáyugu re jnese. Enga que yocai cásodicaite jnani bajade chise dabotique rĩ. 12 Mu Jacob chudute uje chi cucha pibosode déji Egípto. Jecute chiroque dajnacarode aja Egípto ujetiga ore doi oré tome cucha pibosode. Enga Jacob ujnacarode udore u yocarãpíode. Enga ore jnoringai bajai u uté ome Egípto. 13 Mu ore diringai ejoi u uje José chingo raja dayade. Enga quene Faraon chiraja José garãpíode gosode. 14 Jecute José tibidi dayé Jacob ore ujetiga ore cháji gari iji Egípto to. Enga José iguiosode 75 ore uje ore chicáji Egípto to nanique. 15 Adi tu uje Jacob chicáji Egípto nanique. Enga Jacob toi iji Egípto, jec aja yocayode jnani bajade ore to. 16 Udojo quigade u uje disi ejode ore chijna Jacob, yocayode jnani bajade, ore ajnoquéode aja Siquem. Enga ore chijochame ore ajnoquéode iji cucarãte edo uje Abraham doi oré tome nanique iji Hamor abode uje ore idai u Siquem nanique. 17 Uje e idógosi Dupade arecujáidie tocachuringai uje chingome Abraham nanique enga chajo raja daruode, enga Israel gosode e jiépise ore iji ore uniri Egípto. 18 Mu Egípto gosode ore eduguéjna ichárique cus iji dirode udore uje uté que chiraja yocai jnani bajai José gotique nanique. 19 Enga eduguéjnai uté chãra yocayode jnani bajade. Enga cho dajuñame ore to. Diga chiroque ore aja ujetiga ore tõrasia dababode uje quene ore base. Gaidi u gu ujetiga orababode toi jnese. 20 Diga Moises basosi to, enga Dupade irasigape. Guedosíode gadioque uje Moises daté, dayé ore pógusu iji daguíjnai. 21 Mu quigade ga ore tõrasia Moises to mu Faraon uro chisósi Moises enga chósi dababi iji. Enga Faraon uro uaté ipesudape Moises. 22 Jecute pacadique Moises ome Egípto gosode ore irajatigade jnese. Jecute pangarate Moises to ome arecujáidie enga que chagutu re ome cuchárique. 23 Uje sequeredie guejnanie ayoré gare iji Moises yui enga áyipie déji darásade Israel gosode ore. Jecute pésu dáyipiedie ujetiga chajirape ore to. 24 Enga chise ore mu chimo Egípto gosode uñai uje cho dajuñame urásade uñai, Israel gosi. Moises chirota darásai uté enga jnutágome Egípto gosi enga chujépise ga toi. 25 Dupade utocáite Moises ujetiga chijnime darásade iji Egípto gosode ore ujade. Enga Moises jos eti urásade Israel gose ore chiraja uringai Dupade utocáite. Mu que ore chiraja go. 26 Dire uñai ga Moises chise darása gáreode uje ore chujé ñane. Moises chaquĩ́ra ore enga chojninga: “¿Jé gotique uje uacajéyo ñane? ¿Jé ca uacarása ñane a?” 27 Mu jnani ajningarai uje chujé darásai chucuase Moises to. Enga chojningame: “¿Jé gosi iroque ua aja yoque ujetiga ajire yocadode aja quigode a, ujetiga yoco yocangarádejnai iji ua ya? 28 ¿Ja apota ya ujetiga ajé yu to uje bajé Egípto gosode uñai diríca?” 29 Uje Moises chudute uruode udore enga chayo enga chicáji ore uniri Madian. Purása quedéjna Moises iji puniri uté. Mu chisa dacoté iji te enga ape gáreode basiji uté to. 30 Sequeredie e 40 iji yui uje Moises déji Madian enga Moises déji garai uje idógosiji cucarani uje i tu Sinaí. Enga Dupade utocaidode, gaté minórone uñai, chiqueta raja Moises. Enga Dupade utocaidi uté déji pioi ocaráidie ajei iji porabia. 31 Enga Moises tijapísa ga chose porabia yui ujetiga chajiripise. Mu uje qué déji yui enga chudute yocangarádejnai Dupade uruode. 32 Ga chojninga: “Bayode jnani bajade Abraham, Isaac, Jacob ore angureni Dupade u uyu.” Enga Moises todópisa ga tãrara enga que cási go ujetiga chajirapo porabia yui rĩ. 33 Enga Dupade chojningame Moises: “Ejñu barídade. Bamo uje yugúsi bachiéjnai jnupe ga que cucha bisideque go.” 34 Dupade chojningápome rĩ: “Yimo uje yurásade Israel gosode ore chejnarenguipise raque iji Egípto gosode ore ujade. Enga udute ore ujnacade rĩ. E yiji jnumi gu ujetiga yiroque ua aja ore ujetiga ajnime ore iji Egípto gosode ore gari. Jecute be yuruode enga acáji Egípto.” 35 Ore gueteque Moises nanique uje ore chojningame: “¿Jé gosi iroque ua aja yoque ujetiga ajire yocadode aja quigode ujetiga yoco yocangarádejnai iji ua ya?” Ore gueteque mu Dupade jé chiroque aja ore ujetiga ore cho deduguéjnai iji ujetiga chijnime ore iji Egípto gosode gari. Dupade jé urúo udore ome Moises uje Dupade utocaidi chiqueta raja iji porabia. 36 Enga Moises u uje chijnime yocayode jnani bajade iji Egípto. U to uje pésu cucha pitijádode iji Egípto, jé iji yote quedéjnai uje i tu Yote Quedéjna Gati rĩ, jé iji erãpe tarei to rĩ. Enga sequeredie 40 uje ore déji erãpe tarei nanique. 37 Moises jé upo rĩ uje chojningame Israel gosode nanique: “A Dupade chiroque daruode atatasónique uñeque aja uaque jne. Adi jé u uje chiroque yu aja uaque. Enga garani a jé upúsu uaque jne. Angáchoi uté ome ojningane cucha jnese.” 38 Moises jé u to uje nóna Israel gosode iji erãpe tarei nanique. Enga Dupade utocaidi gaté unirisṍri icatecaraini u to Moises nanique iji cucarani Sinaí ujetiga chajnerame uruode ome yocayode jnani bajade ore nanique. U to Moises uje Dupade chingo daruode ome nanique uje pucuecaringué eyúgojmai garani u uruode udore. Enga Moises u to uje churúsãre Dupade uruode udore to nanique ujetiga disi ejode uyoque yajico udore to. 39 Mu yocayode jnani bajade que ore pota ore tangári Moises go. Mu ore pota jeta ore chajni aja Egípto. 40 Enga ore chojningame Aaron nanique: “Apésu ayoré gajnúringo ome yoque ujetiga yijnójo ore. Enga yoco dupa iji ore. Uje que yirajágo Moises quitique uje ijnimique yóguiji Egípto ica.” 41 Jec u uje ore pésu aquirájna abi gajnui enga ore chibore degode dachicho cuchisode ome. Ga ore nína re ome dapesudi aquirájna ape. 42 Ga Dupade jnoji Israel gosode ore gari. Enga Dupade juéga ome ore ujetiga ore cho dupa iji guédodie, guedé, guedoside ore. Uacarajáyo Dupade uruode atatasórone uñai urusarane ome cuchade udojo uje urusarane chósi te: Uacagúsoji erãpe tarei nanique enga sequeredie 40 mu que ajéyo uacachite cuchisórique ujetiga echome yu. 43 Jé basa uacoyo dupa iji Moloc enga uacangaráni Moloc iguíjnape cucha aoi u uje uacajnócho aja uacaquigode. Enga uacajnócho to guédo oré uje i tu Renfan enga uacoyo dupa iji to. Enga uacapesudode cucha gajnúo ne u uje uacangáchoi. Jecute a yijócãre uáguiji uacaniri jne ga uacamajosórone a ore jno uacádi jne enga ore chorei uáguiji ore uniri Babilónia uéchade jne. 44 Uje qué yocayode jnani bajácho ore déji erãpe tarei nanique enga Dupade iguíjnai cucha ao déji ore gari. Enga Dupade urusarane dáyipiei jogadi jé u nanique. Dupade chingo iguíjnai cucha ao uté gajnúrique aja Moises nanique iji taningai enga chopise uje e ipesute. 45 Enga Dupade guẽrate daguíjnai cucha ao ome yocayode jnani bajade ujetiga ore chajnerame aja dape disi ejórigo to. Jecute Josué ore chijna to uje ore doi pocaningane ome purása quedéjnane. Enga Dupade chijócãre purása quedéjnane ore iji ore unirone ujetiga Israel gosode ore cho daniri iji ore uniri. Enga jecucha ga Dupade iguíjnai cucha ao déji yocayode jnani bajade ore gari, jé aja dirode uje ore eduguéjnai u David. 46 Eduguéjnai David chise daringai Dupade imeseraque nanique. Jecute ajéode u ujetiga pésu iguíjnapisi ome jnani bajai Jacob idupade ujetiga cháji. 47 Mu Salomon u uje ipesute Dupade iguíjna cuchábi. 48 Mu yirajágo uje Dupade pujnuéngaisṍri que cháji guiguíjna pipesutique gotique. Uje Dupade uruode atatasórone uñai jé urúo nanique uje urusarane chósi te: 49 Yocangarádejnai chojninga: “Yiya ripi u gaté. Yuchiéjnai u jnumi. ¿Jé orásiringome ujetiga apésu yiguíjnarique a? ¿Yiyaritique dérasi rique a? 50 ¿Ga ca yipesute cuchade udore jnese nanique a?” 51 Estéban qué jno dacajnaquéode údi enga chojninga: —Mu jecucha ga angoneparique uaque. Cho jetiga ca arajáyo Dupade enga uaquetácho Ujopie Espíritu Sánto rĩ. Jé uacadi u uacayode jnani bajade adode. 52 Que Dupade uruode atatasónique cuse ujetiga ca pumajo ome uacayode jnani bajade nanique. Ore chujé Crísto parai ujnomei atatasórone nanique uje ore chatata uté diringai. Enga di gojni mu uaquẽcho enga ore chujé. 53 Uaque u uje uacajneque Moises urusarane uje Dupade utocaidode gaté minórone uñai chingome Moises. Mu que angáchoi go.— 54 Uje ore chudute Estéban uruode udore enga ore chigase dajúode ome Estéban uje ájningaraque ore. 55 Mu Dupade Ujopie Espíritu Sánto irágu Estéban ajei. Ga Estéban chajire gaté enga chimo Dupade ingoningai enga chimópo Jesus rĩ iji Dupade ãrachua uje chague iji. 56 Enga Estéban chojninga: —Cajicho to uje imo gaté uje chuchẽre dabai. Imópo Dupade utocaidi Jesus rĩ, enga déji Dupade ejoi tiji ãrachua.— 57 Mu ore pijnacaráchi enga ore suru dangoninguinone gáyode. Enga ore cugújnai Estéban. 58 Enga ore jno údi aja dedaidatei eruei. Enga ore chujé ome cucaranenie. Enga yungore bajade u udore uje ore chaguhéta cuchade Estéban gai. Mu yungórone ore chisi ome daguidé gaimitodie ome jnacari uje i tu Sáulo ujetiga chirote ome ore. 59 Uje qué ore chujé ome cucaranenie mu Estéban catecã́ri Dupade enga chojninga: —Yangarádejnai Jesus, ajna yáyipie taja bari.— 60 Enga jé u uje chichaga dagatáidie aja jnumi enga chejnapúsu daruode enga chojninga: —Yangarádejna, ca o bajuñame ore jne ome ore ate gajnaréngone.— Chejna daruode udore guesi ga jé u uje toi.
1 Enga jnacari uté uje i u Sáulo ajéode jé u to ujetiga chuque Estéban. Mu que gusu Estéban uje ore pota chutígome mu jé ore jno dájningane údi ome Jesus anguretasórone jnese iji oridaidatei Jerusalen. Jecute Jesus anguretasórone ore chisite rágaja erámi jnese uje ore chayome damajosórone. Enga ore chicáji punirone uñane uje ore íode u Judéa, Samária ore. Gusu Jesus irógode uje ore chácariji Jerusalen. 2 Mu jnani parágode uñane ore doi Estéban enga ore chijochame. Enga ore popísiji ejode. 3 Mu Sáulo e socárome Jesus anguretasórone to. Enga chacája origuíjnane ujetiga jno ore údi aja ore jurugaisórone ujetiga ore suru ore gai. Enga chátaja jnanione aja chequedíe ore. 4 Mu dode iji Jesus anguretasórone uje ore jnoji Jerusalen que ore cha chacate cojñone ome Dupade uruode iji daquigode erámio. 5 Jesus anguretasórone uñai uje i tu Felipe chicáji ore idáyode uñai iji puniri uje i tu Samária. Enga chacate guidai idaisórone iji uté ome judíode ijnati Crísto adode. 6 Ga guidai idaisórone udore ore chamáta ñane ujetiga ore tangári Felipe acajnaquéode enga ore tangaripísi. Enga ore pañáji to Felipe ipesute datéode. 7 Uje Felipe chijnime Satanas utocaidode iji piésorone, enga pijnacaráchi aja guesode. Chiquetápo jnani noñángone rĩ enga chiquetápo totógode rĩ. 8 Jecute guidai idaisórone udore nínapúsu re ome Felipe ipesudode iji ore idai. 9 Mu jnani déji to uje i tu Simon enga jecucha chãra Samária gosode uje chiese daijna. Enga cho dacasuté iji re rĩ. 10 Jecute guidai idaisórone tangaripísi uté jnese enga ore chejna rángaja acajnaquéode; cojñoque atade, jé aja cojñoque gajnaréngone ore jnese. Enga ore chicota enga ore chojninga: —Cucha datei u jnani uté, jecute Dupade ujopie pijóguiji.— 11 Enga ore tangári gu uje iyajmánguiji ore gari ome daringaquéode ome daringai daijna. 12 Mu Felipe chacate ore ome panguretigai ome Jesucrísto ujetiga ore chise daringane Dupade urása. Uje ore changureta Felipe acajnaquéode udore enga jé u uje ore chaca jnanione, chequedíe ore edodie iji yodi. 13 Mu diga daijnai Simon changureta Jesus to, enga ore chaca edodie iji yodi. Enga e nóna Felipe aja quigode to. Enga tijapísa uje chimo Felipe ipesute datéode cucha pitijácho. 14 Uje Jesus irógode chudute to iji Jerusalen uje Samária gosode chi ore chimesere Dupade uruode to enga ore chiroque Pédro, Juan aja ore. 15 Uje e ore di iji Samária ga ore catecã́ri Dupade ome Jesus anguretasórone udore ujetiga Dupade Ujopie Espíritu Sánto chacája ore to. 16 Uje cáma Espíritu Sánto chacája uñénguiji ore. Gusu uje ore chaca ore iji yodi uje ore changureta Jesus. 17 Mu Pédro, Juan ore chicha dajmáinie aja ore gáyode enga quene Dupade Ujopie Espíritu Sánto chacája ore. 18 Simon chimo uje Espíritu Sánto chacája Jesus anguretasórone uje Juan, Pédro ore chicha dajmáinie aja ore gáyode. Jecute chingo daplátadie ome ore. 19 Enga chojninga: —Asíyo yu iji to uacajopie uaté. Yigaidi u gu ujetiga yicha yijmáinie aja uñeque gánique ga Dupade Ujopie Espíritu Sánto chacája to.— 20 Mu Pédro chajnai ga chojninga: —Atoina baplátadie aja gajño pioi uje bajos eti pigaidé oré Dupade Ujopie. Mu que pigáite Dupade guẽratique oréraque. 21 A ca togome ua ujetiga áta ua aja yoque to ujetiga acatecã́ri Dupade ujetiga Ujopie chacája uñéngo. Jé tiógara gu ome ua uje gajnarenguepisi báyipiedie gu ome Dupade. 22 Aya báyipie gajnarénguenie enga ajócha Dupade ajei údi ome ua. Jé soca Dupade chĩro báyipie gajnarénguenie udire. 23 Obiréjna gu ome yu uje cachi basijnaringuéone qué chijocase ua. Bajnári cuchade ome ua mu cachi bagaidi u gu baringai cucha daté. Cho ujetiga irágu bajei ome cucha otate uneroi.— 24 Uje Simon chudute Pédro uruode udore enga chojninga: —Acatecãchoi Dupade ome yu ujetiga ca uacojningane cucha chise yu.— 25 Jesus irógode ore chingopísa Dupade isocade ome ore iji jogadi uté enga ore chatatapo Dupade uruode ome ore rĩ. Quigade enga ore jno Jesus ujnomei údi aja guidáyode uñane iji Samária ejode ujetiga ore nína raque ome Jesus ujnomei to. Udojo quigade enga ore chajni aja Jerusalen. 26 Udojo quigade enga Dupade utocaitique, gaté minónique chiqueta raja Felipe. Enga chojningame: —Bo ga ajna dajei aja Gáza uje chicáji umusoi garani. Dajei uté u uje garani u Jerusalen ga chiramísara erãpe tarei.— 27 Enga Felipe jno ga chise Etiopia gosi iji dajei. Eunúco uté enga eduguéjna Candace iroque. Enga eduguéjna tuaté iplátadie irodisõre. Enga uté sué irógode uñane gáyode. Chicai Jerusalen gu ujetiga catecã́ri Dupade iji. 28 Mu e chajni to aja daniri Etiopia. Chácariji dachidi guebéquedatei ajei enga chajire Dupade uruode atatasṍri Isaías urusarane aja daquigode. 29 Jecute Espíritu Sánto chojningame Felipe: —Ajose guebéquedatei uté yui ga ajína aja dajei.— 30 Enga Felipe idógosi iji ga chudute uje Etiopia gosi naráraja darujna aone gai, Isaías urusarane. Enga Felipe chojningame: —¿Ja araja bajirigode quigode a?— 31 Jnani chojninga: —Ja yirajárase uje que pacadique yu ome.— Enga chojningápome Felipe rĩ: —Oru enga ácariji yejoi.— 32 Ajiripídi u iji Dupade uruode uje chojninga: Jnani uté gajnui tu áyasa uje ore jno údi ujetiga ore chujé. Gajnui upo áyasa ape pujúgaiyabia rĩ uje que pijnatique cuse uje ore chuju ojode iji gai. Adi jé u jnani tuté. Gajnareque ore adode ome mu que cho chimíyimi. 33 Que chosi re iji gaté go jecute que uñeque narare gai. Que toc ujetiga pisecarãte ape disi ejórigo. Chamáñaje ore chujé enga Dupade jno údi aja gaté iji jnumi udé. 34 Enga eduguéjna iroi chojningame Felipe: —Ango yu udojo quitígo. ¿Ujetiga Dupade uruode atatasṍri ojningai tu re, jeoga ojningai tu uñeque?— 35 Jé u uje Felipe cho quique ajiripídi iji Isaías urusarane. Mu quigade enga chopo Dupade uruode uñane quigode rĩ. Enga chingome eduguéjna iroi uje Dupade uruode udore jnese ore ojningai u Jesus. Enga unere Jesus ujnomei uje Felipe chatatame Etiopia gosi uté. 36 Jecute uje ore chise yodi iji dajei tuté dosadi ga jnani chojningame Felipe: —Cajire to, yodi de ti. ¿Jé go que acape yu iji yodi a?— 37 Felipe chojninga: —Ujetiga angureta Jesus ome baringai ayoré jnese ga a yacape ua iji jne.— Enga jnani chajnai ga chojninga: —Yangureta uje Dupade ujnacare Jesucrísto.— 38 Jé u uje chojningame daroi: —Aquĩ́ra guebéquedatei.— Enga ore doi jnumi iji guebéquedatei enga ore chicáji yodi. Enga Felipe chaca jnani iji yodi. 39 Uje ore doi guesi tiji yodi ga jĩrique Dupade Ujopie Espíritu Sánto jno Felipe údi. Enga eduguéjna iroque gatei que chimópo rĩ. Mu jno ga irasique re aja dajei. 40 Felipe chuningame eti e déji ore idai Azóto. Jecute chatata Jesus ujnomei ome ore iji uté. Enga jno ga chacate cojñone ore to iji idáyode uñane aja Cesaréa yui.
1 Mu Sáulo que cha jmongarája Jesus anguretasórone ore ujetiga chujé ore. Jecute tibágui sacerdóteode ore eduguéjna cuchábi. 2 Enga chutai eduguéjna cuchábi urusãratígo ujetiga chijna aja ore idai Damásco. Gaidi u gu ujetiga chisi ome uté urusãratígo ome judíode eduguéjnane iji ore aquiningamei guiguíjna. Enga ore juéga Jesus anguretasórone ome ujetiga jno ore údi aja Jerusalen ujetiga suru ore gai iji. Que gusu jnanione uje chucué ore mu chátaja chequedíe aja dacuegode udore to. 3 E déji dajei enga e chirõre Damásco, mu chuningame eti direcaringué cuchábi tṍraji gaté enga chijñate gai. 4 Enga Sáulo cṍraja jnumi enga chudute darade uje chojningame: —Sáulo a, Sáulo a. ¿Jé gotique gu a uje bo bamajoi yu?— 5 Enga Sáulo chojningame: —¿Jé ua gosi te a?— Ga darade chojninga: —Jesus u yu. Bamajoi tu yu. Mu jé bamajo ua to. Bajnui tu aquirájnai uje chuchiéjna derasṍri asõre uje gachisṍri ipesudé ome.— 6 Sáulo tãrara ome dasadodéringai enga chojningame Jesus: —Yangaráni a, ¿bapotigátique a ujetiga yipésu ome ua ya?— Enga yocangarádejnai Jesus chojningame: —Ayague. Bo ga acáji ore idai enga a ore chingo bapesutígaja ua jne.— 7 Darade chajuguipise Sáulo jorane jnanío ore agutedie uje que ore chimo ayorérique iji darade garani. 8 Sáulo jĩrique chague. Chuchẽre dedodie gáyode, mu que chimo dajiritique. Jecute chisa dajorane jmanáyone, ga ore jno údi aja guidaidatei Damásco yui. 9 Dirode gadioque iji uté ore idai uje que chimo dajiritique. Enga que tagu dabotique. Enga que chójiapo yotique rĩ. 10 Jesus anguretasórone uñai déji Damásco uje i tu Ananías. Chimo Jesus iji denominone enga Jesus catecã́ri. Chojninga: —Ananías a.— Enga Ananías chajnai ga chojninga: —Yangaráni a, yugúsiji ne.— 11 Enga yocangarádejnai Jesus chojningame: —Bo ga ajna dajere uje i tu Caputáji Dajesui aja Júdas iguíjnai. Acatecã́ri ore ome Társo gosi uje i tu Sáulo. Yojningai uté qué catecã́ri Dupade ome re. 12 Chimo denominone to enga chimo ua rĩ enga chiraja bei. Chimo uje bacája iguíjnai iji denominone enga bachai bajmáinie aja gai ujetiga chimópo dajiritígo rĩ.— 13 Mu Ananías chojningame Jesus: —Ore chingo yu jnese uje chi sijnaque uté enga chi gajnarenguipise adode ome banguretasórone iji Jerusalen. 14 Ga chi sacerdóteode ore eduguéjna cuchábi irógaja ne gu ujetiga jno banguretasórone ore údi ujetiga suru ore gáyode jnese uje ore changureta ua.— 15 Mu yocangarádejnai Jesus chojningame: —Bo ga abágui uje yajegáite uté ujetiga jno yujnomei údi aja purása quedéjnane; jé aja ore eduguéjna cuchábode rĩ. Jé aja bojode Israel góso ore to rĩ. 16 A yatatame Sáulo jne uje a chopise daba yu jne.— 17 Jecute Ananías jno ga chicáji Sáulo charipi guiguíjna. Chacája ajei enga chicha dajmáinie aja Sáulo gai enga chojningame: —Sáulo a, yujo Jesus anguretasṍri a, yocangarádejnai Jesus u uje chiqueta raja ua iji dajei diríca uje bacai yoqui. Enga uté u uje chiroque yu aja ua to ujetiga yicha yijmáinie aja babai enga amópo bajiritígo rĩ. Enga a Espíritu Sánto chacája ua to jne rĩ.— 18 Jĩrique cho ujetiga cucha aórigo basiji edodie, enga chimópo dajirigode rĩ. Jecute niji iji damochápi enga jno ga ore chaca edodie iji yodi uje changureta Jesus to. 19 Udojo quigade tagúpo cucha pibosode rĩ. Enga etotiguei cusapo rĩ. Ocoi guejnane díño iji Dupade anguretasórone gari iji Damásco. 20 Jĩrique Sáulo chacate ore ome Dupade uruode iji judíode aquiningaméone guiguíjna enga chojningame ore: —Dupade ujnacari jé upúsu Jesus.— 21 Chajuque ore agutedie jnese uje ore chudute Sáulo acajnaquéode udore enga ore chojningame ñane: —¿Ja ca uté u a uje umajo Jesus anguretasórone iji Jerusalen diríca? ¿Ja ca uté upo rĩ uje gaidode u Jesus anguretasórone iji yoquidai uné ujetiga jno ore údi aja sacerdóteode eduguéjnane jeta ore suru ore gai?— 22 Mu Sáulo qué chejna raja dacajnaquéode enga chingopísa Dupade uruode ome ore enga obiréjnapise acajnaquéode quigode uje Jesus jé upúsu Dupade utocaidi Crísto . Jecute judíode iji oridai Damásco que ore chirajápise daru quitígome ujetiga ore botãre. 23 Dirode e jiei iji udore quigade uje judíode pésu dáyipiedie ome ñane ujetiga ore chujé Sáulo. 24 Mu Sáulo chudute to uje chi ore jmongarája. Ore chirote guidai piagode iji dirode jnese ujetiga ore chujé Sáulo; jec iji dejade to rĩ. 25 Mu dejaque uñai enga Jesus anguretasórone jno Sáulo údi aja ore idai ujuyaquéode. Enga ore choru ujuyaquéode enga ore na Sáulo aja ore ora ijnaque quedéjna ojo gajnua. Enga ore jno údi aja jnumi ome enuéjnane. Enga adi jé u uté uje Sáulo pógu re enga chayome dajmongarájasórone ore. 26 Uje Sáulo chise Jerusalen pota jeta cháta raja Jesus anguretasórone to, mu ore todo jnese. Ore chotigase Sáulo gu ome uringai Jesus anguretasõre. 27 Mu Bernabé chijna Sáulo aja Jesus irógode gari enga chatata adode ome ore. Enga chojninga: —Jesus chiqueta raja Sáulo iji dajei iji Damásco yui, enga catecã́ri. Enga udojo quigade ga Sáulo chatata Jesus adode ome ore to iji Damásco enga que chagutu re ome go uje chacate ore.— 28 Jecute ore cha chotigase Sáulo enga Sáulo nóna ore aja ore ajesúode erámio iji Jerusalen. 29 Que Sáulo chagutu re ome uje chingo Jesus adode aja cojñone ore. Catecã́ri judíode to uje ore uruode u griégo, enga botãre ore. Mu udore ore pota jeta ore chujé. 30 Uje ujode Jesus anguretasórone ore chudute uje ore jmongarája Sáulo enga ore chirógaja ore idai uñai uje i tu Cesaréa, enga ore chorepóji Társo rĩ. 31 Udojo quigade enga tijode cho jnangome Jesus anguretasórone iji Judéa, Galiléa, Samária ore uje cojñone cha cho damajo ore. Enga etoguipise ore iji danguretaretigade iji Jesus. Enga ore tangaripísi Dupade. Enga Espíritu Sánto chatapísaja ore. Jecute Dupade anguretasórone chõre re iji dirode udore. 32 Pédro jecucha chidójnanga Jesus anguretasórone iji oridáyode. Chidójnanga Jesus anguretasórone to iji ore idai uje i tu Lída. 33 Enga Pédro chise jnani iji uté ore idai uje i tu Enéas. Sequeredie gadióguiji ti uje piñoñane chisa enga que cháguepo rĩ. 34 Mu Pédro chojningame Enéas: —Enéas a, ayague enga apocásu bataranone uje Jesucrísto a chiqueta ua jne.— Enga Enéas jĩrique chague. 35 Uje Lída gosode, Saron gosode ore chimo uje Enéas eca, ga ore cha dangurete cucha bajade ga ore changuretapise yocangarádejnai Jesus. 36 Chequé déji ore idai Jope iji dirode udore uje i tu Tabíta. Enga Jesus anguretato. Uaté i qui tu Dórcas ome Grécia gosode oruruode. Canirepise enga jecucha ga chátaja cuchade aja darásade uje ate omé. 37 Diga Dórcas uaté chejnáreque re iji dirode udore enga toi ome dejnarei. Jecute ore churu gai ga ore chijna aja guiguíjna ajei gatéminóri. 38 Ore chiroque Jesus anguretasõre gáreode aja Lída ujetiga ore chingo Pédro. Chamáñaje ore chiraja gu uje Pédro déji Lída. Enga oridai Lída idógosiji Jope. Uje ore di ga ore chojningame Pédro: —Pédro a, aguito ga ajína yoque ga yajnésacoja Jope.— 39 Uje ore díji Jope ga Pédro nóna ore aja Dórcas jogadi, guiguíjna ajei gatéminóri. Enga chequé uecadie qué ore po iji ejode. Enga ore chingo Dórcas ugaguedie ore iguidei aja Pédro uje ugaguei uje qué eca. 40 Mu jĩrique Pédro chiroque ore aja guesi jnese. Enga chichaga dagatáidie aja jnumi enga catecã́ri Dupade. Quigade ga chajire chequé togué ga chojningame: —Tabíta, ãriji.— Enga Tabíta niji ga chuchẽre dedodie gai. Uje chimo Pédro enga jĩrique chácare. 41 Pédro chisi ome dajmanai ome enga chiringare. Enga tibidi dojode Jesus anguretasõre, jé aja chequé uecadie ore ujetiga ore chajire to uje Tabíta e eca. 42 Enga Jope gosode chudute jnese Tabíta ujnomei uje Pédro chiqueta, enga jiei ore uje ore changureta Jesus to. 43 Enga ocoi dirode iji ore idai uje Pédro cháji, enga cháji cucha aode acangóri iguíjnai uje i tu Simon.
1 Jnani déji ore idai Cesaréa uje i tu Cornélio. Enga soldádode, Itália gose, ore eduguéjnai u. 2 Jnani uté, jé aja jogasui ore jnese, ore cho dangureni iji Dupade enga ore tangaripísi. Uásejna Cornélio uté icaniratiguéode ome jmatágode iji judíode ujade, enga jecucha ga catecã́ri Dupade. 3 Dire uñai uje guedé cho jñuque ga Cornélio chimo denominone. Dupade utocaitique gaté minónique chacája gari enga chiqueta raja. Enga Dupade utocaidi uté tibidi enga chojninga: —Cornélio a.— 4 Mu Cornélio todópisa ga toji Dupade utocaidi gai, enga chojninga: —¿Gotique a?— Enga Dupade utocaidi chajnai ga chojninga: —Dupade chimesere bacatecãraitigade. Enga irasique ua ome bate goningane uje basi jmatágode iji baplátadie. 5 Aroque barótigo aja ore idai Jope ujetiga ore tibidi Simon uje i uñai u Pédro. 6 Uté déji Simon uñai iguíjnai uje cucha aode acangore. Iguíjnai déji yote quedéjnai edógai. Enga Simon Pédro uté a u jne ujetiga chingo bapesutígaja ua jne.— 7 Uje Dupade utocaidi jnoji gari ga jĩrique Cornélio tibidi daroque gáreode. Tibidápoi soldádode uñai rĩ uje iroque to. Soldádo uté cho dangureni iji Dupade to. 8 Cornélio chingo denominone aja ore bajaque. Quigade uje chiroque ore aja Jope. 9 Dire uñai uje qué ore chirõre Jope, mu Pédro choru guiguíjnai ujetiga catecã́ri Dupade iji ójo. Guedé déji gatocoro. 10 Enga chaguhei chejna Pédro enga unere chagúi yui ome. Mu uje qué ore pésu posode ga Pédro chimo denominone. 11 Enga Pédro chimo gaté uje chuchẽre dabai enga chimo pepeque gajnu cuchábi uje tṍraji gaté uje pigarícho eruéode gagájnione. Enga pepeque gajnu cuchábi uté basaja iquei. 12 Enga cuchiso ponáyone déji bora ajei jnese; jec aja ugade, chugúperone ore rĩ. 13 Enga Pédro chudute darade uje tṍraji gaté uje chojninga: —Pédro a, ayague. Ajé cuchisode udore uñeque enga agu.— 14 Mu Pédro chetaque. Chojningame yocangarádejnai: —Ungare a. Cáma yagu to go cuchiso puyade, isójnane ore uje puyágome judíode uyoque.— 15 Mu chudúdapo darade rĩ enga chojninga: —Pédro a, Dupade juéga ujetiga agu. Enga ca opo cucha puyáguiji ore rĩ.— 16 Pédro chudute darade ga gadioque enga darade jé chojmára gatuaque. Mu quigade ga pepeque gajnu cuchábi jnome gaté enga que diapo rĩ. 17 Mu uje Pédro qué cho dáyugu denominone uje que chiraja quigode enga Cornélio irógode e ore chise Simon uñai iguíjnai piagoi. Uje chi ore catecã́ri ore aja dajesúode ome Simon iguíjnai jogatique. 18 Enga ore chejnapúsu daruode ga ore chojninga: —¿Ja ca Simon Pédrorique upusiédode u uáguiji ne a?— 19 Mu Pédro qué áyipie déji denominone. Enga Espíritu Sánto chojningame: —Pédro a, jnani gadiógode qué ore chucué ua. 20 Be jnumi ga abágui ore. Enga ca etaque jeta ajína ore enga ca agutu ua ome ore. Chamáñaje uyu u gu uje yiroque ua aja ore.— 21 Jecute Pédro doi jnumi tiji guiguíjnai ójo ga tibágui Cornélio irógode enga chojningame ore: —Pédro u yu, uacacuei. ¿Uacagaitique a?— 22 Ore chojningame Pédro: —Yoqueduguéjnai Cornélio chiroque yoque aja ua enga e yico ua. Uerate yoquirósõri Cornélio adode. Dopísi Dupade adode ga judíode jnese ore irasique enga ore tangári. Chimo denominone diríca enga chimo Dupade utocaidode uñai enga uté chi chojninga diríca: “Abidi Pédro ujetiga angáchoi acajnaquéode to.” Jecute chiroque yógaja ua diríca.— 23 Uje ore chejna daruode udore guesi enga ore chacája Pédro upusiédi guiguíjna to enga ore moji uté iji dejai tuté. Mu uje e dire enga Pédro nóna ore, enga Jesus anguretasórone uñane uje ore idai u Jope enga ore nóna ore to. 24 Dire uñai ga ore díji Cesaréa. Cornélio jorane, jé aja iguiosode e dimane ore iji iguíjnai ujetiga ore tangári Pédro ojñaringo to. 25 Uje Pédro ore di ga Cornélio doi guesi tiji daguíjnai ujetiga chachai ore. Uje chise ore enga jĩrique chichaga dagatáidie aja jnumi iji Pédro iquei enga chicotapise. 26 Mu Pédro chojningame: —Ãriji. Ca achaga bagatáidie aja jnumi iji yiquei. Bojo jnani yu enga jé yo ua.— 27 Enga Cornélio niji ga ore catecã́ri ñane aja guiguíjnai ajei yui. Enga Pédro chimo cojñonguemui iji guiguíjnai ajei. 28 Enga Pédro catecã́ri ore ga chojninga: —Uacarajáyo uje puyágome judíode uyoque ujetiga yátago yógaja purása quedéjnaringo iji ore uágueraque. Puyaque rĩ ujetiga yacágoja purása quedéjnarique iguíjnarique. Mu imo yenominone diríca enga Dupade chingo yu ujetiga ca yopo cucha puyáguiji yujórique jnani uñeque rĩ. 29 Jecute jĩrique yijína uacarógode diríca enga que yãra yu iji cuchárique. ¿Mu gotique gu a uje uacabichoi yu?— 30 Enga Cornélio chajnai Pédro enga chojninga: —Dirode e gagájni uje yimo yenominone to iji yiguíjnai. Enga guedé jogadi jé u udé diríca. Yo uyatáguiji yu diríca enga yicatecã́ri Dupade iji guedé jnoringai uje jecucha yate. Enga Dupade utocaidi uñai chiqueta raja yu enga iguidé naganata. 31 Enga uté chojningame yu: “Cornélio a, Dupade chudute bacatecãraitigade enga chimo to bate goningane uje basi jmatágode iji baplátadie. 32 Aroque barótigo aja ore idai Jope ujetiga ore tibidi Simon uje i uñai u Pédro. Uté déji Simon uñai iguíjnai uje cucha aode acangore. Iguíjnai déji yote quedéjnai edógai. Ujetiga Simon uté di jne enga a chacate uágome yuruode jne.” 33 Jecute jĩrique iroque yirógode aja ua diríca ujetiga ore di bádi. Enga omipise uje e bãríji yoque. Bamo uje dimane yóguiji de iji Dupade iquei ujetiga yangácoi batatagode jnese uje yocangarádejnai Dupade chiroque ua aja ujetiga atata adode ome yoque.— 34 Pédro e chacate ore enga chojninga: —Quene yiraja uje Dupade que cãra dasocárique ome erámi unirisórone uyoque iji erámi jnese. 35 Mu chimesere erámi unirisórone ore jnese iji erámi údode uje ore tangári enga ore chejna rángaja date goningane. 36 Jesucrísto u uje di Dupade uruode údi ome jnani bajai Israel ape disi ejode uyoque ujetiga pajesereringai chise yoque ome adode. Mu que gusu Israel gosode yocangarádejnai u Jesucrísto mu uté gajneque erámi jnese, jecute jé tiógara ujetiga ore cho dangarádejnai iji to iji erámi údode. 37 Uacarajáyo uje bajaque Juan nanique uje chacate cojñone enga chaca ore edodie iji yodi. Mu quigade u uje Jesus chatata Dupade uruode ome ore. Ore chudute atatagode Dupade urúo bajaque iji Galiléa iji taningai mu quigade enga chubu erámi enga chise ore to iji Judéa údode. 38 Enga uacarajáyo to uje Dupade chisi Nazaret gosi Jesus iji dajopie Espíritu Sánto, enga adode omío iji dajesúode erámio. Enga chiqueta Satanas utocaidode piésorone uje Satanas cho dajuñame ore. Chamáñaje Dupade déji gari gu. 39 Enga Jesus imósorone u yoque. Uje yimóngo ipesudode cucha jnese uje pésu iji Judéa údode, jec iji ore idaidatei Jerusalen rĩ. Mu udojo quigade ga ore chujé ga ore chajo aja curesei. 40 Toi mu Dupade chiquetápo rĩ uje dirode gadióguiji yui iji itoringai. Mu quigade enga Dupade chingo dabi Jesus aja yoque to uje ecápo rĩ. 41 Dupade ajéode u iji taningai ujetiga Jesus pijogúsorone u darógode uyoque, uje yátago yógaja iji posode, jodode cucha otate gáyode iji itoringai quigade diríca. Jecute chiqueta raja yoque, mu que chiqueta raja cojñone jnese go. 42 Enga chiroque yógaja erámi unirisórone iji erámi údode jnese ujetiga yacáco ore, enga yingongo ore uje Dupade ajegaidi u Jesus uté ujetiga pésu togode, uecade ore adode aja quigode jnese. 43 Dupade uruode atatasórone jnese iji jnani bajade, ore urusarane júdi u Jesus jnese uje ore chojninga: “Ore jnese uje ore changureta uté enga ore gajnei tu jne ujetiga pĩroque ore isijnaringuéone.”— 44 Uje qué Pédro chacate ore ga Dupade Ujopie Espíritu Sánto basaja ore gai jnese uje ore tangári acajnaquéode. 45 Mu Dupade anguretasórone uje judío ore enga ore jõra Pédro aja Cesaréa diríca, ore tija jnese. Uje Dupade Ujopie Espíritu Sánto basaja purása quedéjnane gáyode to uje que judío ore to múñi. 46 Ore chimo gu uje ore doi puru quedéjnane uje ore chicota Dupade. 47 Enga Pédro chojninga: —¿Ja parenguirase ome ore a ujetiga parãte ore aja yodi? Uacamóño gu uje ore cho yoque uje Dupade Ujopie Espíritu Sánto chacája ore ajéode to.— 48 Jecute Pédro chiroque ore aja ujetiga ore chaca ore iji yodi. Chamáñaje ore changureta Jesus gu. Udojo quigade ga Cornélio ore chaquĩ́ra Pédro ujetiga ore chejnape díningo iji ore gari.
1 Jesus irógode, jec aja Jesus anguretasórone to uje ore déji Judéa, ore chudute purása quedéjnane ore ujnomei to uje chi ore chimesere Dupade uruode to. 2 Mu uje Pédro diapo iji Jerusalen rĩ enga judíode uñane ore botãre. Pédro adode guetesórone u ore uje qué ore chajo raja ujetiga Jesus anguretasórone dopísi Moises acajnaquéode quigode to. 3 Jecute ore chojningame Pédro: —¿Jé gotique gu a uje babágui purása quedéjnane enga báta ua aja ore iji ore posode gáyode?— 4 Mu Pédro chingopísa cucha dacadode quigode aja ore jec iji taningápisi. Enga chojningame ore: 5 —Uje ugúsi ore idai Jope ica ga icatecã́ri Dupade. Uje qué icatecã́ri ga imo yenominone. Imo pepeque cuchábi uje tṍraji gaté. Uje pigarícho erué gagájnione. Enga diga basaja yiquei. 6 Uje yajire ajei enga imo cuchiso ponáyone, jec aja chugúperone, ugade ore to. 7 Enga darade tṍraji gaté enga chojningame yu: “Pédro a, ayague. Ajé cuchade udore uñeque enga agu.” 8 Mu yojninga: “Ungare a. Cáma yagu to go cuchiso puyade, isójnane ore, uje puyágome judíode uyoque.” 9 Mu yudúdapo darade rĩ ga chojningame yu: “Dupade juéga ujetiga agu, enga ca opo cucha puyáguiji to rĩ.” 10 Enga gadioque uje yudute darade mu darade jé chojmára. Mu quigade ga pepeque cuchábi jnome gaté enga que diapo rĩ. 11 Uje yenominone jĩrique íjnoque ga jnani gadiógode di iji yu iji yiyaridi guiguíjna. Cesaréa gosi Cornélio iroque ore aja yu ujetiga ore chucué yu. 12 Enga Dupade Ujopie Espíritu Sánto chojningame yu: “Ca etaque jeta ajína ore, enga ca agutu ua ome ore. U yu uje yiroque ore aja ua gu.” Jecute yijína ore. Enga yujode Jesus anguretasõre jnani chojmára iji tíode ore nóna yoque to. Yojningane u yijorane udore uje ore déji yocari iji de. Uje yico Cesaréa enga yacágoja yoquibidisṍri iguíjnai ajei. 13 Jnani uté chingo denominone aja yoque uje chi chimo Dupade utocaidode gaté minórone uñeque iji daguíjnai. Enga chi uté chague iji iquei enga chojningame: “Aroque barótigo aja Jope ujetiga ore tibidi Simon uje i uñai u Pédro to. 14 Ujetiga uté chise uaque enga a chingo Dupade uruode aja uaque jne ujetiga bajogasui uhuaque eso uacaringane piquetaque to.” 15 Uje qué yacate ore mu Dupade Ujopie Espíritu Sánto basaja ore gai. Adi jé u uje basaja yoquibai ica iji taningai. 16 Enga jĩrique yáyipie déji yocangarádejnai Jesus acajnaqué cásodica uje chojninga: “Juan chaca ore edodie iji yodi, mu e idógosi jeta Dupade Ujopie Espíritu Sánto chacája uaque to.” 17 Dupade u diríca uje chisi ome dajopie Espíritu Sánto ome purása quedéjnane ore. Adi jé u uje chisi ome dajopie Espíritu Sánto ome yoque to uje yanguretágo Jesucrísto. ¿Jé yorási rique a jeta yetaque Dupade áyipiedie udaji?— 18 Mu uje Jesus anguretasórone iji Jerusalen ore chudute Pédro ojñane udore enga ore cha detétigade ome Pédro. Enga ore chicota Dupade enga ore chojninga: —Obiréjnapise uje Dupade juéga re ome purása quedéjnane to ujetiga ore chécãre dadode enga ore gajneque Dupade guerani pucuecaringué iji deréjnane jnese to.— 19 Uje ore chujé Estéban ica ga ore chopo damajo Jesus anguretasórone uñane to rĩ. Jecute uñane chayome damajosórone enga ore chicáji ore idai Fenícia. Jec uñane chicáji Chipre. Jec uñane chicáji Antioquia. Enga ore chacate ore iji pidáyode udore jnese ome Jesus adode. Mu ore acajnaquéode gajnengórone u judíode enga que ore chacate purása quedéjnane to. 20 Mu Jesus anguretasórone uñane, Chipre gosode, Cirene gosode ore chise Antioquia. Enga ore chacate purása quedéjnane iji Antioquia ome yocangarádejnai Jesus adode to, enga unere ore acajnaquéode quigode. 21 Dupade Ujopie Espíritu Sánto dépisi ore gari. Jecute jiei purása quedéjnane uje ore cha dangurete cucha bajade enga ore changureta yocangarádejnai Jesus to. 22 Jesus anguretasórone iji Jerusalen ore chudute uje chi jiei purása quedéjnane iji Antioquia uje ore changureta Jesus to. Jecute ore chiroque Bernabé aja Antioquia ujetiga jé tibágui ore. 23 Uje Bernabé díji Antioquia enga irasiguipise re uje chimo uje Dupade chatapísaja purása quedéjnane to. Enga Bernabé cho ore quique enga chojninga: —Ejnáño uágaja yocangarádejnai Jesus adode enga adotáyo uáguiji.— 24 Jnani paraque Bernabé gu enga changuretapise Dupade. Enga Dupade Ujopie Espíritu Sánto irágu ajei. Jecute jiei ore uje ore changureta yocangarádejnai Jesus ome Bernabé acajnaquéode. 25 Udojo quigade enga Bernabé chucué Sáulo iji oridai Társo. Uje chise Sáulo ga jno údi aja Antioquia to. 26 Ore guejna sequeré chojmára iji Jesus anguretasórone gari iji Antioquia, enga jiei ore acadigode iji Antioquia gosode ujade. Bajade u Antioquia gosode uje ore chĩ́caraja Cristiánone aja Jesus anguretasórone iji ore ujade. 27 Uje Bernabé, Sáulo qué ore déji Antioquia ga Dupade uruode atatasórone uñane ore díji Antioquia uje ore garani u Jerusalen. Jnanione udore u uje Dupade chingo cucha piqueminórone ome ore ujetiga ore chajnerame dojode Jesus anguretasóño to. 28 Udore uñai i tu Agábo enga uté chague iji dojode Jesus anguretasóño ajei. Enga chingo ore uje chi chaguhérigo di jne iji erámi údode jnese. Chiraja udojo gu uje Dupade Ujopie Espíritu Sánto chingome. Enga jé ũrepise uje atatagode udore tocade uje ore eduguéjnai u Cláudio. 29 Enga Jesus anguretasórone iji Antioquia ore pésu dáyipiedie ome ñane ujetiga ore chátaja dojode Jesus anguretasóño iji Judéa. Ujetiga oriplátadie déji ome ore enga que ore chise deranone unerotiguérique to go ujetiga ore chisi ome ore. 30 Enga jé u uje ore chamáta deranone aja ñane ga ore chisi ome Sáulo, Bernabé ore ujetiga ore jno údi aja Jesus anguretasórone angaránone iji Judéa, ujetiga ore chajuguína dojode Jesus anguretasóño.
1 Ore eduguéjnai Heródes cho damajo Jesus anguretasórone uñane iji dirode udore. 2 Enga chiroque darógode ore aja Juan uyai Jacóbo ujetiga ore chujé uté ome quesérique. 3 Heródes chimo uje judíode ore irasique ome jocaningai. Jecute chisa Pédro to iji judíode jnusinamanemei dire uje i tu Páscua . Dirode udore u uje judíode ore tagu arureque unérongone iji. 4 Enga ore jno Pédro údi enga Heródes chiroque ore aja ujetiga ore suru Pédro gai. Soldádode ore pésu dáguedie enga gagájni ore iji ore uague chojmara. Enga ore uáguedie gagájni to. Diga ore chécãre rágome uje ore chirodipise Pédro. Heródes chi ajéode u ujetiga chijnime Pédro jne iji ore jnusinamanemei Páscua quigade enga chingo Pédro aja judíode jne. 5 Jecute soldádode udore ore chirodipise Pédro iji jurugaisórone iguíjnai. Mu Jesus anguretasórone ore chejna rángaja to uje ore catecã́ri Dupade ome Pédro. 6 Dejai amiri tu uje chi Heródes chijnimirase Pédro ga chujérase dirome iji cojñone ajei. Enga Pédro moji darodisórone soldádo gáreode ujai uje ore chigaru Pédro ome ojnaquero gáredie. Enga soldádode uñane ore chirote guiguíjnai piagoi. 7 Pédro chuningame eti Dupade utocaitique chiqueta raja enga díreca guiguíjnai ajei uje Dupade utocaidi díji ore gu. Enga Dupade utocaidi uté chisa Pédro orotabidode ga chiringare enga chojninga: —Pédro, aguito enga ãriji.— Enga jĩrique ojnaquerodie basiji Pédro jmanegatáidie. 8 Dupade utocaidi chojningápome rĩ: —Adi bagarubi taja ua enga achíe barídade.— Pédro chadi dagarubi aja re, ga chuchíe darídade. Jé u uje Dupade utocaidi chojninga: —Agui baguidé, babai gaimito, enga ajína yu ga yico.— 9 Jecute Pédro nóna Dupade utocaidi, mu que chiraja ujetiga jé ũrepise uje ore doi guesi. Jose denomitígo aja gu. 10 Ore chise piagoi bajai mu que piagoi irodisórone chúnina ore go. Ore chise piagoi uñai mu jé ate. Que piagoi irodisórone chúnina ore go. Uje ore chise piagode, dajere yuminórone, uje jóidedie guebécho ga chuchẽre dabai bisideque. Jé u uje ore chise guesi ga ore nóna ñane aja dajei. Mu udojo quigade enga Dupade utocaidi noñome Pédro ga gusu Pédro iji dajei. 11 Jé u uje Pédro chiraja uje que enomicho gotique enga chojninga: —Jé ũrepise uje Dupade chiroque datocaidi aja yu que, ujetiga chijnime yu iji yuringai pujurúgai ujetiga ca Heródes, judíode ore áyipie gajnarénguenie tocade ome yu.— 12 Pédro qué áyipie déji udore enga jĩrique chicai Maria iguíjnai uje Juan Márcos daté u. Enga jiépise Jesus anguretasórone uje qué ore catecã́ri Dupade ome Pédro iji Maria uaté iguíjnai. 13 Uje Pédro chise ore iguíjnai ga chujé piagoi jóide. Gapabia tibágui uje i tu Rode enga chojninga: —¿Jé ua gosi a?— 14 Pédro chajnai ga chojninga: —Uyu u.— Enga jĩrique gapabia chiraja uje Pédro uruode u. Que chuchẽre gai ome gotique mu chayóji Jesus anguretasórone yui, uje irasape re gu enga chojningame ore: —Pédro déji guiguíjnai piagoi.— 15 Mu Jesus anguretasórone ore chotigásosi ga ore chojningame gapabia. —¿Ja ũrusape ua ya? Pédro a ca u go.— Mu Rode chajo raja enga chojninga: —Jec ũré yu ãrie.— Mu ore chojninga: —A ca Pédro u go. Dupade utocaitique a u jõ uje chirote Pédro.— 16 Mu uje qué ore botãre gapabia enga Pédro jé ate uje chujé guiguíjnai piagoi. Mu uje ore chuchẽre gai enga chajuque ore agutedie uje Pédro jé u. 17 Mu Pédro chajo ore aja jnumi ome dajmanai ujetiga ore cho parac. Enga chingo cucha dacadode quigode ome ore uje Dupade chijnime iji uringai pujurúgai. Enga chojninga: —Angoño udojo aja Jacóbo; jec aja yocujode Jesus anguretasóño uñane ore jnese to.— Chejna udojo guesi enga jno ga chicáji sañeque. 18 Uje dire enga soldádode chopise dáyugu ga ore botãre ñane uje íjnoque ore jurúgai iji jogadi. Enga que ore chiraja quitique. 19 Enga Heródes chiroque ore aja ujetiga ore chucué, mu que ore chise go. Jecute Heródes catecã́ri soldádode uje bijna ore irodi casé. Enga que ore chiraja daru quitígo ome. Jecute Heródes chiroque darógode uñane aja ore ujetiga ore chujé ore uje bijna ore irodi casé. Udojo quigade ga Heródes jnoji Judéa ga doi guidaidatei Cesaréa enga cháji uté. 20 Heródes chetaguipise Tíro, Sidon gosode iji dirode udore enga chãraque oredie ome ore ujetiga ore doi cucha pibosode iji uniri. Jecute Tíro, Sidon gosode chimate dáyipiedie ujetiga ore chiroque datocaidode aja Heródes ujetiga ore chaquĩ́ra ome ájningai. Mu ore catecãripísi Heródes iroi Blásto bajaque ujetiga catecã́ri darósõri ome ore ujetiga cha dájningai ome ore enga juegapo cucha pibosode ome ore rĩ ujetiga ore doi oré tome iji uniri. Chamáñaje ore posode garani upúsu puniri uté gu. 21 Heródes chingo diri taja ore ujetiga catecã́ri ore iji. Chise gojni dojningai dire ga Heródes chacája daringai eduguéjna iguidedie enga chácariji dayaripi cuchábi gai iji daguíjnai ajei uñai. Enga ajei uñai uté u uje chajire cucha dacadode aja quigode iji. Enga jé u uje cho dojñame Tíro, Sidon gosode ore enga que chuseque re ome dojñane udore. 22 Uje cojñonguemui chudute Heródes ojñane udore enga jé u uje ore chicotapise. Ore chejnapúsu daruode enga ore chojninga: —¿Ja yocujo ayoré uté a? Ungare. Obiréjna ome arecujáidie udire que uje a dupa que.— 23 Mu jĩrique yocangarádejnai Dupade utocaidi gaté minore chutṍri dequejnarei ome Heródes enga chequésãre. Chamáñaje que chãraque ome cojñone ujetiga ore chicota enga ore cho Dupade iji. Jecute toi gojni enga jupuchade tagu. 24 Mu Dupade uruode chubu erámi. Chamáñaje ore chacate cojñone ome iji erámi údode jnese gu. 25 Uje Bernabé, Sáulo ore chimate Antioquia gosode ore gueranone aja Jerusalen gosode enga ore chajniapo rĩ iji Jerusalen. Enga Juan Márcos nóna ore to.
1 Jesus anguretasórone iji ore idai Antioquia ore acadisórone cuse uje ore chacate ore ome Dupade uruode. Enga Dupade uruode atatasórone dépoji ore gari rĩ. Jnanione udore ore íode u udojo: Bernabé u uñai. Simon u uñai uje i gaté u Utatai. Cirene gosi Lúcio u uñai. Manaen u uñai. (Galiléa gosode ore eduguéjnai Heródes, Manaen ore ipesungóri chojmára nanique iji daringane disi.) Sáulo u uñai to. 2 Dire uñai uje udore ore catecã́ri Dupade iji ñane gari enga ore chopo uyatáguiji re rĩ ome dacatecãraitigade ome Dupade. Enga jé u uje Espíritu Sánto catecã́ri ore enga chojninga: —Angaráño Sáulo, Bernabé ore jogatígome uaque ujetiga ore doi yiroquei uñeque uje e yimánome ore.— 3 Uje e ore chudute Dupade Ujopie Espíritu Sánto áyipiedie udire enga jé u uje ore jno daringane uyataque údi enga ore catecã́ri Dupade gaté ome Bernabé, Sáulo ore. Enga jé u uje ore chicha dajmáinie aja ore gáyode uje e ore pijógome Dupade iroquéode. Uje e ore chejna udojo guesi ga ore chiroque Bernabé, Sáulo ore aja doi ujetiga ore doi dajnéone Dupade iroquéo. 4 Enga Bernabé, Sáulo ore jno ga Dupade Ujopie Espíritu Sánto chingo ore quigode aja ore. Enga ore chicai ore idai uje i tu Seleúcia. Enga ore chaca cucoi tiji uté enga ore chicáji yote quedéjnai ajã́ro uje i tu Chipre. 5 Uje ore chise daqui uté ga ore chacája guidai uje i tu Salamína uje déji yote quedéjnai edógai. Enga ore chacate ore ome Dupade uruode iji judíode aquiningaméone guiguíjna iji Salamína. Jesus anguretasórone uñai nóna ore to uje i tu Juan ujetiga cháta cuchade aja ore. 6 Ore chise ore idáyode jnese iji yote quedéjnai ajã́ro enga ore chise ore idai uñai uje i tu Páfos. Enga ore chise judíode uñai iji uté uje i tu Barjesus. Enga chi daijna uté. Mu taquechoqui uje chiese Dupade acho atatagode. 7 Daijnai uté jecucha nóna ore eduguéjnai Sérgio Páulo, enga irajataque eduguéjnai uté. Enga ore eduguéjnai tibidi Sáulo, Bernabé ore uje chi pota jeta tangári Dupade uruode iji ore pijnani to. 8 Mu daijnai Barjesus i uñai cuse enga Elímas u. Enga uté chetaque ore acajnaquéode ome eduguéjnai enga cho eduguéjnai quique ujetiga ca changureta Jesus to. 9 Mu Dupade Ujopie Espíritu Sánto irágu Sáulo ajei uje uté i uñai u Páblo. Enga Páblo toji daijnai gai. 10 Enga chojninga: —Satanas abi a. Pisijnaringuéone gajnengóri a. Paringaquéode gajnengóri a. Pate goningane guetesṍri a. ¿Gotique ĩ́rique uje que aya uje bo táguiji Yocangarádejnai uru uréone? 11 Mu yocangarádejnai Dupade a cho dajuñame ua jne. A surábu bedodie enga a ca amópo guedé to jne rĩ jec aja dire uñeque jne iji baquei.— Enga jĩrique opoi jnumi ome daijnai uté enga chucué dojórique ayoré ujeta chijñaque. Uje que chimópise daquénique gu. 12 Uje eduguéjnai chimo udojo ga changureta Jesus. Chamáñaje tija Páblo ore acajnaquéode ome Yocangarádejnai adode gu. 13 Udojo quigade ga Páblo, Bernabé ore chacája cucórique iji ore idai Páfos, enga ore chicáji ore idai Perge uje déji ore uniri Panfília. Mu ore jõrai Juan noñome ore iji uté ga chajni aja Jerusalen. 14 Mu Páblo, Bernabé ore jnoji Perge ga ore chicáji ore idai Antioquia to, uje déji ore uniri Pisídia. Ore chicáji judíode aquiningamei guiguíjna iji uté iji dire puyátique . Enga ore chacája enga ore chácariji ore charipíode gáyode. 15 Judíode ore naráraja darujna aone gai bajaque enga ore ajirigode u Moises urusarane, jé aja Dupade uruode atatasórone uñane urusarane. Uje e ore cha enga ore angaránone chojningame Páblo ore: —Yocurása di ichade uaque, uacuñeque chacadape yoque to jne rĩ ujetiga uacuñeque pota.— 16 Enga Páblo chague ga chãrai dajmanai tiji ore ujetiga ore cho parac. Enga jé u uje chojninga: —Yujode Israel gosode uaque a, ujetiga angáchoi Dupade enga angáchoi yu to. 17 Israel gosode yocangaráni Dupade imeseraque yocayode jnani bajade nanique. Uje purása quedéjna ore iji ore uniri Egípto nanique mu Dupade pésu ore enga ore quérã enga jiépise ore. Enga udojo quigade enga chijnime ore iji Egípto gosode ore ujade ome dajopiedaté. 18 Enga sequeredie 40 nanique uje Dupade chidota re ome Israel gosode ore ate gajnaréngone iji erãpe tarei uje ore jnoji Egípto. 19 Udojo quigade u uje Dupade guejnanie gague gare iji ti iji Canaan gosode ujetiga chisi ome ore unirone ome yocayode jnani bajade. 20 Enga Dupade angúroméone u páyipie ipesungórone jnanío nanique ujetiga Israel gosode cho dangaránone iji ore. Enga sequeredie 450 u nanique uje Israel gosode ore cho dangaránone iji ore. Mu Israel gosode angaránone páyipie ipesungóño ore eruei u uje ore cho dangaráni iji Dupade uruode atatasṍri Samuel nanique. 21 Mu yocayode jnani bajade ore chutai Samuel ujetiga pésu ore eduguéjna cuchátique ome ore. Enga Dupade tangári ore enga cho ore eduguéjna cuchábi iji Cis ujnacari Sáulo. Enga Sáulo ore garãpi u jnani bajade uñai Benjamin. Sáulo uté guejnanie sequeré 40 ome daringai eduguéjna. 22 Mu diga Dupade chijna Sáulo uringai eduguéjna iji gari enga cho ore eduguéjna cuchábi iji David. Enga Dupade chojninga: “Jnacare paraque David Isaí ujnacari enga yirasique gu uje tangári yu enga a uté u jne ujetiga doi yáyipiedie quitígo jnese.” 23 Dupade jé urúo ome ore nanique uje chi chisi ome Israel gosode iquetangónique ome ore jne. Jecute Dupade ojningai piquetangore di iji yoque enga Jesus u. Enga garãpi u yocayode jnani bajade ore eduguéjna cuchábi David. 24 Mu uje cáma Jesus di nanique enga Juan u uje chacate Israel gosode. Enga acajnaquéode quigode u ujetiga ore chécãre dadode ome Dupade ujetiga chaca ore edodie iji yodi. 25 Uje Juan e chimanirase dajnéone Dupade iroquéo enga chojningame cojñonguemui nanique: “Uacajoso eti uacaquetangóri u yu. Mu que uyu u go. Mu a di jne iji yiquigade. Enga a uté suépise yibai jne ome daringai Dupade utocáite.” 26 Yujode Israel gose, Abraham garãpiésorone, uaque uje uacoyo uacangarádejnai iji Dupade, yacajnaquéode gajnesórone upúsu uaque ujetiga anguretáyo Jesus enga eso uacaringane piquetaque to. 27 Jerusalen gosode, jé aja ore eduguéjnane rĩ, que ore chiraja Jesus nanique uje ore iquetangóri u. Cachi ore igotaque re uje ore chajire darujna aone uje que ore tangári go. Uje ore naráraja gai ome darásade iji ore aquiningamei guiguíjna iji dire puyade gatuaque. Ore ajirigode Dupade uruode atatasórone urusãracho chingopísa ore iquetangóri adode ome ore, mu que ore chirajápise quitígo go. Mu uje ore chisi ome pitoringai ome Jesus enga jé u uje Dupade uruode atatasórone ore urusarane tocade. 28 Que ore chiraja bárique mu jé ore chutai Piláto ujetiga chisi ome pitoringai ome Jesus. 29 Uje e chejna guesi Dupade uruode atatasórone urusarane ojningane cucha ome Jesus enga ore chiramurase Jesus iji curesei enga ore chijochame. 30 Mu Dupade chiquetápo rĩ iji itoringai enga ecápo rĩ. 31 Enga dirode jiei iji udojo quigade enga Jesus chiqueta raja dacadigode uñane gatuaque. Uje acadigode udore nóna to nanique uje jnoji Galiléa enga chicai Jerusalen. Enga udore jé u to iji deréjnane udojo uje e ore chatata adode ome cojñone ore. 32 Jecute e yingome uaque uje uacaquetangóri e di enga pujnomé ueradi a urásu ome uaque. Uje jé upúsu Dupade uruode ome yocayode jnani bajade ore nanique uje chi ore iquetangónique di jne. 33 Dupade uruode udore ome yocayode jnani bajade e tocade ome disi ejode uyoque. Chamáñaje Dupade chiqueta Jesus iji itoringai gu ujetiga ca potigayaquérique déji ome uringai yoquiquetangore. Eduguéjnai David urusarane Sálmo 2 quigode jé upúsu cuchade udojo to uje chojninga: “Yape ua enga bai tu yu gajneri, uje bacuecaringuei garani tu yu gu.” 34 Dupade jé urúo nanique ujetiga chiqueta Jesus iji itoringai, ujetiga ca arione tarata. Dupade jé urúo iji daruode to uje chojninga: “A yisi ome yojningane cucha ueracho ome uaque jne uje e yingome David nanique.” 35 Jecute dépoji Sálmo uñai rĩ enga chósi te: “A ca ajuéga jne jeta batocaidi bajnorai arione tarata aja jnumi jne.” 36 Que David ojningai u re go iji darusarane udore. Uje qué eca nanique enga David doi Dupade áyipiedie quigode ome darásade. Mu quigade enga toi to enga chicai dayode jnani bajácho iji jnaropié. Enga aoi tarata aja jnumi. 37 Mu Dupade ojningai que aoi tarata to go mu Dupade chiquetápo uté rĩ iji itoringai quigade. 38 Yujode Israel gosode uaque, yipotapísa ujetiga arajáyo to uje Jesus u uje chĩro yoquisijnaringuéone, enga yatatagode ome uaque quigode u udojo. 39 Jesus u uje chĩro ore isijnaringuéone jnese ujetiga ore changureta. Jé basa panguretigai ome Moises urusarane que chĩro uñeque isijnaringuérique gotique. 40 Ajusópise uaqueo ujetiga ca otigáso yuruode. Jé socaseti Dupade uruode atatasórone ojningane cucha chise uaque to jne a, uje ore chojninga: 41 Uaque uje uacadojnóchoja yuruode, angachopísi yu. Uje a óraño uágome uacatoringá rique jne. A yipésu yipesute cucha datérique iji uacajade jne. Ujetiga uñeque chatatarása udore ome uaque bajaque mu a jé otigasorase ore atatagode udore uringane ũréo. 42 Páblo acajnaquéode eruei u udé, enga jé u uje Páblo jorane ore doi guesi iji judíode aquiningamei guiguíjna. Enga purása quedéjnane iji judíode udore ujade ore catecã́ri Páblo ujetiga ore chacadápo ore rĩ ome cuchade udore iji dire puyai ejórique. 43 Uje cojñone cha dague iji daquiningamei guiguíjna ga jiei judíode ore uje ore nóna Páblo, Bernabé ore to. Purása quedéjnane uñane nóna ore to uje ore cho judíode iji raque to. Enga Páblo, Bernabé ore cho ore quique ujetiga ore chimesere Dupade ijnoraquei ome ore enga ore chidota re iji danguretigade iji Dupade. 44 Dire puyai e upo rĩ enga guidai idaisórone jnese ore chamáta ñane ujetiga ore tangári Dupade uruode iji Páblo ore pijnanone to. 45 Mu judíode ore chimo cojñonguemui ga ore charatáiyime cojñonguemui ome Páblo ore. Enga jé u uje ore chotigase ore enga ore botã́rapo ore rĩ. Enga gajnarenguipise ore uruode ome Páblo ore. 46 Mu Páblo, Bernabé que ore todo ore go mu ore chajnai ore enga ore chojninga: —Dupade uruode gajnengórone urásu uaque bajaque uje judíode u uaque gu. Mu uaquetácho adode. Cho ujetiga ojnicho: “Dupade guerani pucuecaringué eyúgojma que gajnesórone u yoque go.” Jecute a yico jne. Yicagóji purása quedéjnane ore uje que judío ore to, enga yacáco ore ome Dupade uruode. 47 Chamáñaje Yocangarádejnai chiroque yógaja ore uje chojninga: Iroque uágaja purása quedéjnane Ujetiga ajñacho ore gáyode. Yigaidi u gu ujetiga ore chise daringane piquetaque to Iji erámi údode jnese. 48 Uje purása quedéjnane chudute udojo enga ore nína re enga ore chojninga: —Uerate Dupade uruode uje udúco que iji ore pijnani.— Enga Dupade ajegaidode iji ore ujade ore changureta Jesus jnese ujetiga ore gajneque pucuecaringué eyúgojmai to. 49 Enga yocangarádejnai Jesus ujnomei chubu ore uniri údode jnese. 50 Mu judíode ore catecã́ri chequé atedie uje jecucha ore dopísi judíode isocade. Enga ore catecãrápoi jnani atade to rĩ iji ore idai. Enga ore chijnime pocaningai ome Páblo ore to. Jecute ore chijócãre ore iji daniri. 51 Mu Páblo, Bernabé ore chijninguese jnumi iji darídade aja ore gai ga imoi tu uje ore chetaque guidai idaisórone udore isijnaringuéone. Enga ore jno enga ore chicáji guidai uñai uje i tu Icónio. 52 Mu Jesus anguretasórone ore irasiguipise re ga Espíritu Sánto irágu ore ajéode.
1 Páblo, Bernabé ore nóna ñane aja judíode aquiningamei guiguíjna iji ore idai Icónio. Enga ore chacate ore iji uté ome Dupade uruode enga uneréjna ore acajnaquéode. Jecute jiei purása quedéjnane, jé aja judíode ore uje ore changureta Jesus to. 2 Mu judíode uñane uje que ore changureta to go ore chingo detétigade ome purása quedéjnane. Jecute purása quedéjnane ore chirate ore aja ore guetétigade ome Jesus anguretasórone. 3 Mu que Páblo, Bernabé ore jno míraque mu iyajmaque ore iji uté enga ore chejna rángaja datatagode Dupade urúo. Picasitigai déji ore gu uje ore changuretapise Yocangarádejnai ome cuchade. Enga Yocangarádejnai chátaja ore ujetiga ore pésu dapesute datéode, cucha pitijácho iji cojñone ujade. Gaidi u gu ujetiga pangurete ore uje ore chacate cojñone ome Dupade ijnoraquedatei ome erámi unirisórone. 4 Mu guidai idaisórone chajuque ñane ajei. Uñane chirota Jesus irógode, jec uñane chirota judíode. 5 Mu udojo quigade enga judíode, purása quedéjnane ore cháta raja deduguéjnane. Enga jé u uje ore pésu dáyipiedie ujetiga ore pojna Páblo, Bernabé ore enga ore pota ujetiga ore chimitingare ore ome cucaranenie. 6 Mu uje Páblo, Bernabé ore chudute udojo ga ore chayome ore. Enga ore chicáji ore uniri uje i tu Licaónia. Enga ore chise ore idáyode iji uté uje ore íode u Lístra, Derbe ore enga ore chisápo udore ejominórone guidáyo to rĩ. 7 Enga ore chacate ore aja dajesúode ome Jesus adode enga uneréjna ore atatagode quigode. 8 Jnani noñai déji ore idai Lístra enga noñaque aja guesi iji daté. Enga que dique to go. 9 Jnani uté chudute Páblo acajnaquéode to enga Páblo chajire enga chimo uje changureta ujetiga chiqueta. 10 Jecute Páblo chinguíra dabijnani aja ga chojninga: —Ayague.— Enga jnani chague ga choja daquei enga jĩrique dique. 11 Cojñone ore chimo uje Páblo chiqueta jnani uté enga jé u uje ore chinguíra dabijnanone aja ñane. Ore doi Licaónia gosode uruode enga ore chojninga: —Yocangurete cuchábode uñane ore cho ayoré iji raque enga ore base yoquibai.— 12 Ore cho dangureni Júpiter iji Bernabé, jeque ore cho dangureni Mercúrio iji Páblo. Darachoqui ore angureni Mercúrio gu, jecute ore choji Páblo. 13 Ore angureni Júpiter iguíjnai déji ore idai gabi enga jnani déji iguíjnai uté uje pésu cuchade aja quigode ome ore. Enga jnani uté jĩrique tibágui Páblo, Bernabé ore enga chijna aquirájnane aja ore uje chadi ujnápeode aja. Enga ujnápeode u cucha pojnánguenie. Uté pota jeta chujé aquirájnane udore ome Páblo ore uje cho dupa iji ore gu. 14 Mu Páblo, Bernabé ore chimo uje cojñonguemui cho dupa iji ore enga jé u uje ore chajningarase daguidedie. Ore chetaguipise gu uje ore cho dupa iji ore. Enga ore chacája cojñonguemui ujade. Ore chejnapúsu daruode enga ore chojninga: 15 —¿Jé gotique ĩ́rique uje uacoyo dupa iji yoque? Uacojo ayoré yoque ãrie. Mu ibájoi uaque gu ujetiga yingongo uaque ujetiga ayáyo uacangurenone cucha bisidécho. Enga angáchoi Dupa uecai to uje ipesute gaté, jnumi, yote quedéjnane ore; jec aja jnumi, gaté ore jogonórone cucha jnese. 16 Diyajmanguipise uje Dupade noñome purása quedéjnane uhuaque iji te ujetiga beyoi uacáyipiedie quitígo ome cuchade. 17 Jecucha chingo raja uaque múñi. Enga cháta cuchade aja uaque to. Chamáñaje Dupade u gu uje chiroque guéode aja uaque. Upo rĩ uje chiroque sequeré omenie aja uaque. Enga jecucha ga chisi ome uacabosode ome uaque ujetiga anínaño uaque.— 18 Páblo acajnaquéode u udojo ome ore mu que ore charásu uje ore cho dupa iji ore enga jé ore chujérase aquirájnane ome ore. 19 Jé u uje judíode uñane ore di uje ore tṍraji Antioquia, Icónio ore uje ore chetaque Páblo. Enga udore ore chijnime darade ome cojñone. Diga ájningaraque cojñonguemui ome Páblo to enga ore chimitingare ome cucaranenie. Ore jos eti Páblo e toi enga ore churugúsi iji jnumi aja ore idai eruei. 20 Mu Jesus anguretasórone ore chamáta ñane iji Páblo gai. Mu Páblo niji ga chague enga chacápo aja ore idai to rĩ. Mu dire uñai ga Páblo, Bernabé ore jno enga ore chicáji ore idai uñai uje i tu Derbe. 21 Uje ore chacate Derbe gosode ome Dupade uruode ga jiei ore uje ore changureta Jesus ome ore acajnaquéode. Enga unéño ore atatagode quigode. Mu uje ore chejna dacajnaquéode guesi enga ore chajniapo aja guidáyode uje ore íode u Lístra, Icónio, Antioquia ore. 22 Enga ore cho Jesus anguretasórone ore quique iji ore idáyode udore jnese enga ore chojninga: —Adotáyo uáguiji uacanguretaretigai. Uje a yejnárejo yoque ome cucha dacate gajnaréngone iji de jnumi bajaque marínga, quigade ga yicagóji Dupade idai enga yocuringai purása jé u ome Dupade enga yocasuté u Dupade iji idai jne.— 23 Enga ore pésu Jesus anguretasórone angaránone iji ore idáyode udore ujetiga ore chirote dojode Jesus anguretasóño. Enga ore catecã́ri Dupade ome ore uje ore cho uyatáguiji re ujetiga yocangarádejnai Jesus chatapísaja danguresórone udore ome ore isagode udore. 24 Uje Páblo, Bernabé ore jno ga ore chicáji ore uniri uje i tu Pisídia. Mu ore jnopo rĩ iji uté ga ore chicáji punire uñai uje i tu Panfília. 25 Ore chacate ore ome Dupade uruode iji ore idai Perge mu udojo quigade enga ore chicai ore idai uñai uje i tu Atália. 26 Ore chacája cucoi iji Atália ga ore chicapóji ore idai casé Antioquia rĩ. Chamáñaje Antioquia gosode ore u iji taningai uje ore catecã́ri Dupade ome Páblo ore ujetiga chatapísaja ore iji ore ajesúode uje ore jno uruode údi aja erámi. Enga ore noñome Páblo ore iji Dupade jmáinie uje ore chiraja gu uje caniranguipise Dupade gu ome darógode. Mu uje Páblo ore chimate dajnéone Dupade iroquéo enga ore chajniapo aja Antioquia rĩ. 27 Uje ore díji Antioquia enga jĩrique ore chamáta dojode Jesus anguretasóño aja ñane. Enga jé u uje ore chatata dojñane ome Dupade adode ome ore iji dajesúode erámio. Enga ore chojninga: —Yocangarádejnai chosõre purása quedéjnane to enga chiroque yógaja ore ujetiga ore changureta to ome yocatatagode Dupade urúo.— 28 Enga diyajmaque Páblo, Bernabé ore iji Jesus anguretasórone ore gari iji Antioquia.
1 Judéa unirisórone uñane déji Antioquia uje Páblo, Bernabé qué ore déji. Enga ore chacate Jesus anguretasórone ujetiga ca ore chedu danguretigade ome Jesus mu chiese cucha amiri tu ujetiga ore doi Moises acajnaquéode quigode to enga ore chica raque . Chiese quene jogadi u ome ore ujetiga ore chise daringane piquetaque ome Dupade. 2 Mu Páblo, Bernabé ore botãripise Judéa unirisórone ome ore acajnaquéode udore. Jecute Jesus anguretasórone ore chiroque Páblo, Bernabé, jé aja Jesus anguretasórone uñane aja Jerusalen ujetiga ore catecã́ri Jesus irógode ome Judéa unirisórone ore acajnaquéode udore. Que gusu Jesus irógode ujetiga ore catecã́ri ore, mu ujetiga ore catecã́ri Jesus anguretasórone angaránone ore to iji Jerusalen. 3 Jesus anguretasórone iji Antioquia ore nóna Páblo, Bernabé ore aja guidai eruei enga jé u uje Páblo ore jno. Ore chicáji ore unirone Fenícia, Samária ore uje ore chicáji Jerusalen yui. Enga ore chingo purása quedéjnane ujnoméone ome Jesus anguretasórone jnese iji dajesúode. Enga ore atatagode quigode u uje purása quedéjnane ore cha dangurete cucha bisideque bajade uje ore changureta Jesus. Enga Jesus anguretasórone jnese ore irasique re ome ore ojñane udore. 4 Uje Páblo, Bernabé ore díji Jerusalen enga Jesus anguretasórone, jé aja ore angaránone, jé aja Jesus irógode rĩ ore nína Páblo, Bernabé ore yui. Enga jé u uje Páblo ore chatata dojñane ome Dupade adode ome ore iji dajesúode erámio. 5 Mu fariséode uñane uje ore changureta Jesus to, ore chojninga: —Jec arec ujetiga angoñome purása quedéjnane uje ore changureta Jesus enga ore chica re to. Angoñome ore to ujetiga ore doi Moises acajnaquéode quigode to rĩ.— 6 Jecute Jesus irógode, jé aja Jesus anguretasórone angaránone ore chamáta ñane ujetiga ore pésu dáyipierigui ome ñane ome cuchade udore. 7 Iyajmaque ore ome dabotaquéode enga Pédro chague enga chojninga: —Yujode Jesus anguretasórone uaque, uacarajáyo jnese uje diyajmaque ica uje Dupade ajegáite yu iji uacajade ujetiga yacate purása quedéjnane ome Jesus adode to. Gaidi u gu ujetiga purása quedéjnane changureta Jesus to. 8 Dupade u uje chiraja erámi unirisórone áyipiedie jnese. Enga uté u uje chisi ome dajopie Espíritu Sánto ome purása quedéjnane to, adi jé u uje chisi ome judíode uyoque. Obiréjna gu ome udore uje Dupade pota purása quedéjnane to. 9 Que Dupade cãra dasocárique ome uyoque gotique. Jé chojmára isocai ome yoque jnese. Uje ore changureta Jesus enga Dupade chĩro ore isijnaringuéone, adi jé u uje chĩro yoquisijnaringuéone to ome yocanguretaretigade. 10 ¿Jé gotique ĩringuipise a uje uacotigáso uje Dupade chacája purása quedéjnane to? ¿Jé gotique ĩringuipise uje uacarochorase ore aja Moises iroqué jiéode uje yocayode jnani bajade, uyoque que yipéco go? 11 Mu que quigode u go. Mu yirajágo uje yocangarádejnai Jesus chiqueta yoque bisideque ome dacaniratiguedatei. Enga adi jé u to ome ore ujetiga Jesus chiqueta ore.— 12 Udojo quigade ga ore cha uje ore botãre ñane. Enga ore tangári Páblo, Bernabé ore ojñane uje ore chojninga: —Dupade chatapísaja yoque diríca ujetiga yipéco yoquipesute datéode, jé aja cucha pitijádode uñane uje ugúcoji purása quedéjnane ujade.— 13 Uje e ore cha dojñane udore enga Jacóbo narare enga chojninga: —Yujode Jesus anguretasórone uaque, angáchoi yu. 14 Simon Pédro chingome yoque ica Dupade isocai uje quene chingo dajnoraquei ome purása quedéjnane to enga chamáta danguretasórone iji ore ujade ujetiga cho darása iji ore to. 15 Uacamóño uje Dupade uruode atatasórone ore urusarane ojningane jé u udore to uje ore urusarane chósi te: 16 Udojo quigade enga a yĩriápo jne rĩ Enga a yipesapo David iguíjna árimei rĩ. Ujetiga yipesapo iguíjna árimei amirone rĩ enga a ichapo jne rĩ. 17 Jogadi jé u jne ujetiga cojñoque uñane ore chucué dangarádejnai uyu jnese. Jé u pachamite quedéjnane unirisó rone jnese to rĩ. Jé u udore ore jnese uje yipota ujetiga yo yurása iji ore. 18 Yocangarádejnai Dupade jé urúo udojo nanique iji taningane. 19 Jecute yingome uaque ujetiga ca yirójo purása quedéjnane iji yocujade aja cucha ibirade. Chamáñaje e ore cha dangurete cucha bisideque bajade ujetiga ore doi Dupade adode to. 20 Gusu ujetiga yurúsãcome ore ujetiga ca ore tagu ayoré gajnúone gajnéone cucha ãrío. Ujetiga ca uñeque tungarája gapu quedéjnaraque, jeoga chequé enga ca moji jnani quedéjnarique gari. Ujetiga ca ore tagu cuchiso pimocherane. Ujetiga ca ore tagu cucha iyojnanie rĩ. 21 Uacamóño gu uje diyajmanguipise uje judíode yocaquiningaméone guiguíjna déji purása quedéjnane idáyode jnese to. Enga Moises urusarane atatasórone dépoji udore rĩ uje ore cho quique Moises urusarane iji dire puyade jnese iji purása quedéjnane ujade.— 22 Jecute Jesus irógode, jé aja Jesus anguretasórone, jé aja ore angaránone ore chimate dáyipiedie. Enga ore chucué jnani gárerigo iji uraque dajade ujetiga ore nóna Páblo, Bernabé ore aja Antioquia. Ore irógode jõrai u Júdas uje i u Barsabas to. Jeque uñai i tu Sílas. Enga obiréjnapise jnanione udore iji dojode Jesus anguretasórone ujade. 23 Enga ore chisi ome darusarane ome udore ore ujetiga ore chijnoque enga ore urusarane quigode u udojo: “Jesus irógode uyoque, jé aja Jesus anguretasórone iji de, jé aja ore angaránone yoquirasique uaquei jnese. Yurúsãco yocurusarane ome purása quedéjnane uaque uje uacagúsoji Antioquia. Yocurusarane gajnengórone u uaque to rĩ uje uacanirone u Síria, Cilícia ore. 24 Udúco uje yocurásade uñane ore chicáji uaque mu que yoquiroque ore aja uaque go. Enga chi ore chacate uaque ujetiga acáyo uaque enga beyoi Moises iroquéode quigode. Enga udúco to uje e que arajáyo uacangarátiguiji ore. Ujetiga angáchoi Páblo, jeoga angáchoi ore. 25 Jecute omome yoque jnese iji de ujetiga yirójo yocuñéngo aja uaque ujetiga ore tibágui uaque. Enga udore ore a ore nóna yoquirasiguipísode Páblo, Bernabé ore aja uaque jne. 26 Uacamóño uje Páblo, Bernabé ore cho daba yocangarádejnai Jesucrísto adode to iji dajesúode erámio. 27 Enga e yirójo Júdas, Sílas aja uaque. Enga a ore chingo yocurusarane quigode aja uaque jne. 28 Chamáñaje omome Espíritu Sánto uyoque ujetiga ca yirójo uágaja cucha ibirade. Mu yirójo uágaja cucha obiréjnane uje que piraque ujetiga apéso. 29 Enga yoquiroquéode ome uaque u udojo: Ca acho ayoré gajnúone gajnéone cucha ãrío. Ca acho cucha iyojnanie rĩ. Ca acho cuchiso pimocherane rĩ. Ca uacuñeque tungarája gapu quedéjnaraque, gusu dacotéraque. Enga ca uacuñáraque tungarája jnani quedéjnarique, gusu abai ome. Ujetiga ajuso uaqueo ome yoquiroquéode udore enga a uerate uaque jne. Jé gusu yocurusarane.” 30 Jé u uje Páblo, Bernabé nóna dajorane udore enga ore jno enga ore chicáji Antioquia. Uje ore díji Antioquia ga ore chamáta Jesus anguretasórone enga ore chisi ome ore gajnéone, Jerusalen gosode urusãracho, ome ore. 31 Uje Jesus anguretasórone ore chajire ore urusarane ga ore irasiguipise re, enga ore cha dayuguhebátigade. 32 Dupade uruode atatasórone u Sílas, Júdas ore to. Jecute ore chacate Jesus anguretasórone gatuaque uje qué ore déji Antioquia. Enga pininaquei jogadi tu ome ore uje ore chudute udore ore acajnaquéode enga jogadi u to uje ore chejna rángaja Dupade adode gaté. 33 Mu uje e iyajmaque Júdas, Sílas ore iji ore gari iji te enga ore pota arorárique aja darásade. Enga jé u uje Jesus anguretasórone chojninga: —Jec arec ujetiga boyo mu yocajéode u ujetiga etoguipise uáguiji dajei.— 34 Mu Sílas chécãre dajéode enga chácariji ore gari. 35 Páblo, Bernabé chácariji Antioquia to enga ore cháta rágaja Dupade uruode atatasórone uñane to enga ore chingo Dupade uruode quigode aja ore enga ore chacate ore ome yocangarádejnai Jesus adode. 36 Udojo quigade enga Páblo chojningame Bernabé: —Bo yico, enga yicagópoji Jesus anguretasórone iji yoquiqui cásodica guidáyo rĩ. Yojningane u udore ore jnese uje yacáco ore ome yocangarádejnai Jesus adode nanique.— 37 Bernabé pota jeta Juan nóna ore to uje i tu Márcos to. 38 Mu Páblo que pota go jeta Juan Márcos nóna ore to. Uje Juan Márcos noñome ore ica iji Panfília uje ore doi Dupade iroquéode iji uta. Enga que chatapo Dupade iroquéode aja ore rĩ. 39 Ore botãripise ñane, Páblo, Bernabé ore. Jecute ore cho jmíti, jmíti ome ñane. Enga Bernabé nóna Juan Márcos enga ore chacája cucoi enga ore chicáji Chipre. 40 Mu Páblo chaquĩ́ra Sílas iji dari ujetiga nóna aja quitígo. Enga Jesus anguretasórone catecã́ri Dupade ome Páblo ujetiga yocangarádejnai Dupade chatapísaja iji quitígo. 41 Ore jno ga ore chicáji punirone uje ore íode u Síria, Cilícia ore. Enga ore cho Jesus anguretasórone quique iji udore ujetiga ore chejna rángaja Jesus adode to.
1 Páblo, Sílas ore díji guidáyode uje ore íode u Derbe, Lístra ore enga ore chise Jesus anguretasṍri iji uté uje i tu Timotéo. Timotéodaté judia enga changureta Jesus to. Mu Grécia gose dayé. 2 Jesus anguretasórone uje ore idáyode u Lístra, Icónio ore irasique Timotéo adode jnese. 3 Páblo pota jeta Timotéo nóna, jecute doi enga chica bajaque. Chica gu uje que pota jeta Timotéo urásade judío iji guidáyode udore ore dojnóngaja. Chamáñaje ore chiraja jnese gu uje Grécia gose dayé, enga ore chiraja to uje Grécia gosode que ore chica dabode to go. 4 Udojo quigade enga Timotéo nóna Páblo enga ore chingo Jerusalen gosode ore urusarane aja ore iji ore idáyode jnese uje Jesus irógode, jé aja Jesus anguretasórone ore angaránone ore urusãracho ome purása quedéjnane. 5 Enga jec u uje Jesus anguretasórone chidota re iji danguretaretigai. Enga Jesus anguretasórone chõre re iji dirode jnese. 6 Dupade Ujopie Espíritu Sánto chãraque ore uniri Ásia yui ome ore ujetiga ore chacate ore ome Dupade adode iji. Jecute ore chicáji punirone uñane uje ore íode u Frígia, Galácia ore. 7 Uje ore chise ore uniri eruei uje i tu Mísia enga ore chicárasiji puniri uje i tu Bitínia. Mu Jesus Espíritu Sánto chãraque yui tome ore. 8 Jecute ore chó /8sia gai. Enga ore chicáji ore idai uje i tu Tróas, uje déji yote quedéjnai edógai. 9 Uje qué Páblo ore déji Tróas enga Páblo chimo denominone iji dejai. Uje Macedónia gosi chiqueta raja enga chaguena gai. Enga chojningame Páblo: “Acáji Macedónia ga acadape yoque to.” 10 Uje Páblo chimo denominone ga irajágo uje Dupade pota jeta yicagóji Macedónia. Enga yijócaco ujetiga yicagóji Macedónia ujetiga yacáco ore ome Jesus adode iji uté ujetiga Jesus chiqueta ore to. 11 Yico ga yacágoja cucoi iji ore idai Tróas. Enga yoquiquítequígaja yote quedéjnai ajã́ro uje i tu Samotrácia. Enga dire uñai enga yico guidai uje i tu Neápolis. 12 Yicoji Neápolis enga yicagóji guidaidatei uñai uje i tu Filípos. Róma gosode ore ipesute ore idaidatei uté enga obiréjna ome guidáyode uñane iji ore uniri Macedónia uéchai uñai uté. Enga yoquimochádode jiei iji uté. 13 Diga yisṍcoji guidaidatei ejode iji dire puyátique enga yicagóji tie uje jecucha cojñone charite ujetiga ore catecã́ri Dupade iji. Enga yico chequedíe iji uté uje qué ore chamáta ráguiji. Enga yácagoji ore gari enga yacáco ore ome Jesus adode. 14 Chequedíe udire uña i tu Lídia. Enga uaté idai u Tiatíra. Borapeque ueradode guẽrato. Enga Lídia uaté changuretapise Dupade. Jecute uje qué tangári Páblo acajnaquéode enga Dupade catecã́ri iji ajei ujetiga tangaripísi. 15 Diga changureta Jesus to, jé aja iguíjnai jogosórone ore. Jecute ore tṍra ore aja yodi jnese. Udojo quigade enga Lídia chojningame yoque: —Ujetiga jec ũré yu uje yangureta yocangarádejnai Jesus ome uaque enga ajínaño yu aja yiguíjnai enga ácayoji.— Chaquĩrapise yóguiji daguíjnai jecute yácagoji. 16 Dire uñai enga yicagópoji rĩ uje ore catecã́ri Dupade iji. Enga yico gapua iji yui uje Satanas utocaidi déji ajei. Enga irósorone ore iplátadie garané u uje cojñone chutṍri. Uje uaté chiraja cucha piqueminórone gu uje Satanas utocaidi déji ajei. Jecute cojñone ore pota ore chiraja to enga ore chutṍri gapua ujetiga chatatame ore. 17 Gapabia suaté chajna Páblo uyoque enga tibídaja yoquiquigade. Enga chojninga: —Jnanione udore ore angureni u Dupa pujnuéngaisṍri. Enga ore chingome uaque Dupade isocai ujeta chiqueta uaque jne.— 18 E iyajmaque uje gapabia tibídaja yoquiquigade iji dirode jnese. Mu Páblo chacho gapua pijnane. Enga chajire iji daquigade enga chojningame Satanas utocaidi: —Yiroque ua aja guesi ome Jesucrísto ujopie. Be guesi tiji gapua.— Enga Satanas utocaidi jĩrique doi guesi tiji gapua. 19 Mu uje gapua irósorone ore chimo uje que ore chirajápo daplátaraque garãtique rĩ enga ájningaraque ore ome Páblo, Sílas ore. Jecute ore chisa Páblo, Sílas ore enga ore jno ore údi aja eduguéjnane uje ore iguíjnane déji ajã́ro uje déji ore idaidatei ajei. 20 Ore chijna ore aja eduguéjnane iquei enga ore chojningame eduguéjnane: —Guidai idaisórone uyoque, que yocópo paráguiji yoquidai rĩ ome judíode udore ore uje ore pésu yocujuredie ome dadode. 21 Chamáñaje ore chacate yógome pacajnaqué quedéjnane. Enga que togome Róma gosode uyoque ujetiga yicoi ore acajnaquéode quigode. Chamáñaje que pacajnaquéode udore curẽ́sori yoqueduguéjnane iroquéode ome yoque gu.— 22 Uje ore chejna daruode udore guesi enga cojñonguemui chamáta raque enga ore socárome Páblo, Sílas ore. Enga eduguéjnane chiroque darógode aja Páblo, Sílas ore to ujetiga ore chejñu ore iguidedie enga ore chaquesu ore údode ome pidode. 23 Uje ore cha dajocaningai ome ore enga ore suru ore gai. Enga eduguéjnane chiroque ore jurugaisṍri aja ore ujetiga chirote ore enga chirodipise ore ujetiga ca toque guetique ome ore. 24 Uje jurugaisṍri chudute deduguéjnane uruode udore ga doi Páblo, Sílas ore enga napise ore aja guiguíjnai ajei erueminoripísi ujetiga ca toque guetique ome ore. Enga chijníe ore guidogorodie jogadode iji poridie enga ore chajo ojnaquerodie aja. 25 Uje dejnínga gatocoro ga Páblo, Sílas ore chijñecare enga ore chirate Dupade iradedie. Enga ore catecãrápoi Dupade rĩ. Enga ore jurúgayode uñane qué ore tangári ore. 26 Mu ore chuningame eti jnumi tãrara enga guiguíjnai cutádode tãrarápo rĩ. Enga jĩrique guiguíjnai piagode chuchẽre dabáyode enga ojnaquerodie, poridie ore basapóji ore jurúgayode jnese rĩ. 27 Ore jurugaisṍri cho cuyúgome jnupe tãrarachui enga chimo uje guiguíjnai piagode guesája. Enga chijnime daquesei enga chujérase re. Chi jos eti jurúgayode ore jno jnese gu. 28 Mu Páblo tibidi enga chojninga: —Ca ajé ua. Jé ugúcoji de jnese.— 29 Jecute ore jurugaisṍri chucué dabiotique enga chayóji Páblo ore yui. Enga chichaga dagatáidie aja jnumi iji Páblo, Sílas ore iquei enga tãrara ome dasadodéringai. 30 Enga jĩrique chijna ore aja guesi enga catecã́ri ore enga chojninga: —¿Jé yo ringome ujetiga Dupade chiqueta yu to?— 31 Ore chajnai enga ore chojninga: —Angureta yocangaráni Jesucrísto to, enga a chiqueta ua, jé aja bajogasui ore to jne.— 32 Jé u uje Páblo, Sílas ore nóna ore jurugaisṍri aja iguíjnai ga ore chacate ore iji ome yocangarádejnai Jesus adode. 33 Uje qué dejaque mu ore jurugaisṍri churu Páblo, Sílas ore iyode iji ore yupídode. Udojo quigade enga ore tṍra ore jurugaisṍri, iguíjnai jogosórone ore jnese aja yodi. 34 Udojo quigade ga ore jurugaisṍri chijna Páblo, Sílas ore aja daguíjnai ujetiga chisi ore iji dabotígo. Enga ore jurugaisṍri irasiguipise re uje e changureta Dupade to. Enga jé ate jogasui ore to uje ore irasique raque to ome daringane Dupade anguretasóño. 35 Uje dire ga eduguéjnane páyipiedie ipesungóño ore chiroque guidai irodisórone aja jurugaisṍri iguíjnai ujetiga ore chingome ujetiga chuchẽre dajurúgayode, Páblo, Sílas ore gai. 36 Enga ore jurugaisṍri chojningame Páblo: —Eduguéjnane e ore chingome yu ujetiga yirame uaque. Jecute boyo enga ca atodóyopo jne rĩ.— 37 Mu Páblo chojningame guidai irodisórone: —Róma gose yoque mu ore chaquesu yocúdode bisideque iji cojñonguemui ajei diríca. Enga que ore chajire yocadode bajaque uje ore suru yoquibai. ¿Ja apochorásu yoque a ujetiga ajnicho yoque a? Ungare. Eduguéjnane doi yoque jne enga ore chijnime yoque jne.— 38 Guidai irodisórone jno enga ore chingo Páblo, Sílas ore uruode aja deduguéjnane uje chi Róma gose ore to. Enga eduguéjnane todópisa deduguéjnapísode yui uje ore suru Róma gosode gáyode bisideque. 39 Jecute eduguéjnane chicáji jurugaisṍri iguíjnai enga ore chijnime Páblo, Sílas ore enga ore chojninga: —Diponguera yoque uje chi Róma gose uaque to uje yaquesúgo uacádode bisideque.— Enga ore chijócha ore ajéode údi ujetiga ore jnoji ore idai. 40 Uje Páblo, Sílas ore doi guesi tiji daringane pujurúgai enga ore chicapóji Lídia iguíjnai bajaque enga ore catecãripísi dojode Jesus anguretasóño ujetiga ore chejna rángaja Dupade adode. Enga jé u uje ore jno.
1 Páblo, Sílas ore jno ga ore chó ore idáyode gai uje ore íode u Anfípolis, Apolónia ore. Enga ore chisápo ore idai rĩ uje i tu Tesalónica. Enga judíode aquiningamei guiguíjna déji uté. 2 Páblo doi dadébei uje ijója judíode aquiningaméone iji dire puyade . Enga chacate judíode iji ore aquiningamei uté iji dire puyaque gadiógode. 3 Enga acajnaquéode quigode u Dupade uruode quigode uje chi judíode ijnati Crísto a di jne. Enga chejnáreque re iji erámi udojo. Mu udojo quigade enga chi toi, mu chi ecápo rĩ iji datoringai quigade. Enga Páblo chojninga: —Dupade ojningai Crísto uté jé u Jesus uje yingome adode ome uaque.— 4 Enga judíode uñane ore changureta enga ore cháta rágaja Páblo, Sílas ore. Jiei Grécia gosode rĩ uje ore changureta Dupade enga ore changuretapo Jesus rĩ. Jiepo chequé atedie rĩ uje ore changureta Jesus to ome Páblo acajnaquéode udore. 5 Mu judíode uñane ore charatáyime darásade ome Páblo, Sílas ore. Jecute ore chamáta jnani ducutade aja re uje jecucha ore chácariji guidai bisideque. Enga udore ore chijnime pocaningai ome Páblo, Sílas ore. Jecute ájningaraque guidai idaisórone jnese ome Páblo, Sílas ore to. Jé u uje ore cugújnai Jason iguíjnai uje ore chucué Páblo, Sílas ore iji. Ore gaidi u gu ujetiga ore chijna Páblo, Sílas ore aja guesi enga ore chisi ome ore ome cojñonguemui. 6 Mu uje que ore chise Páblo, Sílas ore iji Jason iguíjnai enga ore chisa Jason, jorane Jesus anguretasóño ore, enga ore jno ore údi aja guidai uté eduguéjnapísode. Enga ore chinguíra dabijnanone aja ore enga ore chojninga: —A uacadúcho jõ Páblo, Sílas ore ujnoméone to uje ore pésu ore juredie iji erámi údode. Enga e ore di iji yoquidai udé to ome dacajnaqué quedéjnane. 7 Enga Jason udé óite ore aja daguíjnai. Enga cháta raja ore ome ore etétigade ome Róma gosode yoqueduguéjna cuchábi iroquéode. Uje chiese eduguéjna cuchábi uñai cuse ome ore uje chi i u Jesus.— 8 Uje cojñone, eduguéjnane ore chudute udore enga ore chinguíra dabijnanone aja ñane to. 9 Mu uje Jason ore cho doré enga jé u uje ore chirame ore. 10 Jĩrique Jesus anguretasórone ore chiroque Páblo, Sílas ore aja doi iji dejai ujetiga ore chicáji Beréa. Uje ore di iji Beréa enga jĩrique ore chicáji judíode ore aquiningamei guiguíjna. 11 Judíode iji Beréa que ore cho dojode judíode iji Tesalónica go. Paraque ore ga ore tangári Páblo, Sílas ore acajnaquéode. Ore chajire Dupade uruode iji deréjnane ujetiga jé ũrepise Páblo ome acajnaquéode. 12 Jecute jiei ore uje ore changureta Jesus. Grécia gosode iji ore ujade ore changureta Jesus to rĩ. Chequé atedie, jnani atade, déji Jesus anguretasórone udore ujade to. 13 Mu judíode ore iji Tesalónica ore chudute Páblo ore ujnomei uje chi e ore déji Beréa. Ore chudute to uje chi qué ore chacate ore ome Dupade adode iji Beréa. Jecute ore chajna ore aja rĩ. Mu uje Tesalónica gosode ore díji Beréa enga ore chijnime pocaningane ome Páblo ore iji uté to. 14 Mu jĩrique Jesus anguretasórone iji Beréa ore chiroque Páblo aja guidai iji yote quedéjnai edógai, mu Sílas, Timotéo qué ore chácariji Beréa. 15 Páblo jõrasórone ore jno údi aja ore idai uje i tu Aténas, mu jĩrique ore chajni to aja Beréa ujetiga ore chingome Sílas, Timotéo ore uje Páblo ajéode u ujetiga jĩrique ore tibágui to iji oridai Aténas. 16 Uje Páblo chirote Sílas, Timotéo ore yui iji Aténas mu chopise dáyugu re gu uje jiei ayoré gajnúone iji ore idai uté uje cojñone ore cho dadupa iji ore. 17 Jecute Páblo chacate judíode iji ore aquiningamei guiguíjna, jé aja purása quedéjnane ore rĩ uje ore changureta Dupade. Chacadápo cojñone rĩ iji ore idai ajã́ro iji dirode jnese. 18 Jnanione uñane iji ore idai uté ore gaidode u pacajnaqué quedéjnane ujetiga ore chiraja quigode to. Ore chĩ́care epicúreode aja udore uñane, jé basa ga ore chĩ́care estóicode aja uñane. Enga udore uñane ore catecã́ri Páblo ome acajnaquéode quigode. Enga ore chojningame ñane: —Darachoqui uté ¿jé cho ringome yoque jne a?— Jeque uñane ore chojninga: —Ise ga gaidi u ujetiga yangácoi acajnaquéode enga yoco yocangureni iji dupa quedéjnaringo to.— Ore uruode u udojo gu uje Páblo chacate ore ome dacajnaqué unerone uje piquetangore Jesus uje toi mu ecápo rĩ iji datoringai quigade. 19 Jecute ore jno Páblo údi aja ore aquiningamei jogadi uje i u Areópago. Enga ore chojningame Páblo: —Yoquigaidi u ujetiga yangacobi bacajnaqué ichade to jne. 20 Uje quedéjna bacajnaquéode ome yoque enga yipótago jeta yirajágo udore quitígo to.— 21 Chamáñaje Aténas gosode, purása quedéjnane iji ore ujade que ore áyipieraque déji cucha uñeque. Mu ore ajegaidode u gojña ichárigo gatuaque ujetiga ore tangári enga ore chatatame ñane. 22 Enga Páblo chague iji ore ajei iji ore aquiningamei jogadi Areópago. Enga chojninga: —Yimo uje Aténas gosode uaque uacabeyopísi uacangaránone ayoré gajnúo adode uje uacoyo dupa iji ore. 23 Uje yisõre iji uaquedai ujade enga imo gaseranone uje uacapéso ome uacangaránone ayoré gajnúo, uje uacacatecãchoi ore iji. Ise gaseranone udore uñai uje uacarúsãcho uacarusarane iji uje chojninga: “Dupa pimójmai u udé.” Dupa pimójmai u uté ome uaque mu jé uacacatecãchoi. Mu yangaráni Dupa jé u uté to enga iraja adode. Enga a yatata adode ome uaque jne. 24 Dupade uté u uje ipesute erámi, jé aja erámi jogonórone cucha ore jnese. Enga uté gajneque gaté, jnumi ore jnese rĩ. Enga que cháji jnanione ipesutique guiguíjna go. 25 Que cuchárique chona to go jetiga ayorérique chisi ome. Mu uté u uje guẽrate cuchade ome yoque. Guẽrate yocucuecaringuei ome yoque. Enga guẽrate yocujñari ome yoque rĩ. Cuchade jnese uje déji yoque iji erámi tudé jé garani u uté to. 26 Yocarãpi u Dupade uté ipesudi jnani bajaque jnese. Enga uté chisite yógaja erámi ujetiga cojñotígo déji punirone jnese. Dupade uté ipesute punirone jogadode to, enga ichajapite yógaja dajegaidode puníño ome yoque. Enga chingo yoquibatigade díño aja yoque jnese rĩ ujetiga yibácoji. 27 Dupade chicha yógaja erámi udé gu ujetiga yétingaco enga yucuegoi. ¿Soca yico a? Jec ũré uje que Dupade idája iji yoque go. 28 Yiquecágo gu Dupade. Yijocáco yoque gu Dupade. Yugúcoji erámi gu Dupade. Uacarásade uñai iradedie achachagúgode jé cho uje chojninga: “Dupade jogasu yoque jnese.” 29 Ujetiga jec ũré ujeta Dupade jogasu yoque enga ca yoco dupa iji ayoré gajnúrique uje ore ipesucho iji órodie, plátadie, cucaranenie ore. Uje jnanione cachi ore ipesucho ome dajéode. 30 Que Dupade chajire purása quedéjnane isijnaringuéone yúrique nanique uje que ore chiraja cuchárique gu. Mu e chiroque erámi unirisórone jnese ujetiga ore chécãre dadode. 31 Dupade e chimate diri ujetiga pajirique erámi unirisórone yocadode aja quigode iji jne. Enga e chimate dajegaidi jnani to ujetiga chajire yocadode aja quigode. Ũrepise uté jne enga a ca cho parágome dajirigode udore ujetiga pésu yoquiquigode. Enga que potigayaquérique déji uje Dupade ajegaidi uté u Jesus. Chamáñaje toi mu Dupade chiquetápo uté rĩ iji itoringai ujetiga uringai Dupade utocáite obiréjna ome yoque.— 32 Mu uje ore chudute uje chiese togode ecápo jne rĩ enga ore chujñieta Páblo enga uñane ore chojninga: —E gome. Yangácopoi bacajnaquéode iji dirode uñeque dirome rĩ.— 33 Jecute Páblo noñome ore iji te. 34 Mu cojñone uñane cháta rágaja Páblo uje ore changureta acajnaquéode. Jnanione udore uñai u Dionísio. Ore eduguéjnane uñai u uté uje jecucha cháta raja dojode eduguéjna iji ore aquiningamei jogadi Areópago to. Chequé changureta to uje uaté i u Dámaris. Enga jnanione uñane ore changureta to uje ore tangári Páblo acajnaquéode udore.
1 Udojo quigade ga Páblo jnoji Aténas enga chicáji ore idai uñai uje i tu Corínto. 2 Páblo chise judíode uñai iji uté uje i tu Aquíla. Uté unirípisi u Pónto nanique enga acoté i tu Priscíla. Ore déji Itália mu ore jnoji uté enga quene ore díji Corínto. Ore jnoji Itália gu uje eduguéjna cuchábi Cláudio chijócãre judíode jnese iji ore idaidatei Róma gu. Diga Páblo chicáji Aquíla, Priscíla ore iguíjnai. 3 Páblo isagode jé u ore isagode to. Jecute chácariji ore gari enga cháta ore isagode aja ore to uje ore pésu guiguíjnane cucha ao. 4 Mu jecucha ga Páblo chicáji judíode aquiningamei guiguíjna iji dire puyade . Enga catecã́ri judíode, purása quedéjnane iji uté ome Jesus adode. Ajéode u gu ujetiga chingopísa Dupade uruode quigode ome ore ujetiga ore changureta Jesus to. 5 Mu Sílas, Timotéo ore jnoji Macedónia enga ore di to iji Corínto. Enga jé u uje Páblo cha cháta Aquíla, Priscíla ore isagode aja ore enga chedu datatagode Jesus acho ome judíode. Enga chopise Dupade uruode quigode quique ome ore uje Jesus jé upúsu judíode ore ijnati Crísto uje ore chirote yui. 6 Mu judíode ore chetaque Páblo. Enga ore uruode gajnarécho ome. Jecute Páblo chijninguese daguidedie aja jnumi. Imoi tu gu uje a jnoji ore gari jne. Enga chojninga: —Ujetiga diga eso uacaringárique toque mu a ca u gu uje que yingome uacaquetangóri aja uaque. Mu a uacangoniguite paritigade u gu ome yatatagode. A yiji jne jé iji de gajneri enga a yiji Dupade uruode údi aja purása quedéjnane jne.— 7 Chejna daruode udore guesi enga jnoji judíode ore aquiningamei guiguíjna ga chicáji jnani iguíjnai uje i tu Jústo. Jnani uté angarate Dupade to enga iguíjnai déji judíode aquiningamei guiguíjna ejoi. 8 Mu judíode aquiningamei guiguíjna piésorone angaráni Críspo changureta yocangarádejnai Jesus to, jé aja iguíjnai jogosórone ore jnese rĩ. Jiepo Corínto gosode to rĩ uje ore chudute Dupade uruode iji Páblo pijnani enga ore changureta Jesus to. Enga ore tṍra ore aja yodi jnese. 9 Dejaque uñai enga yocangarádejnai Jesus catecã́ri Páblo iji enominone enga chojninga: —Jé ca atodo. Jé acate ore enga ca aya. 10 Chamáñaje yugúsiji bari enga a ca pijocayaque ua jne ome cojñotique. Yimo uje qué jiei ore uje a ore changureta yu jne iji de guidai.— 11 Sequeré chojmara enga guedosíode chojmarápo iji ti rĩ uje Páblo cháji Corínto. Enga jecucha ga chacate ore iji uté ome Dupade uruode. 12 Mu udojo quigade uje Acáya gosode ore eduguéjnai u Galion enga judíode ore chamáta ñane ujetiga ore chisa Páblo. Enga ore jno údi aja ore eduguéjna cuchábi ujetiga ore chatata detétigade ome Páblo ome uté. 13 Enga ore chojningame eduguéjnai: —Jnani udé chacate cojñone aja dajesúode ujetiga ore tangári Dupade, mu ujetiga ore cha yoqueduguéjnane iroquéode.— 14 Páblo e nararírase dabai mu Galion narare bajaque enga chojningame judíode ore: —Ujetiga gajnarenguipise uté adode enga a jĩrique yangarirási uaque. 15 Mu uaquetégode ome uté cucha bisidécho ome yu. Chamáñaje judíode uhuaque jecucha ga uacabotã́cho ñane ome puruode quitígo, jeoga jnani bajade ore írigo, jeoga Moises urusarane quitígo. Cucha bisidécho cuchade udore jnese ome yu. Jecute apéso uáguiji te uje a ca yangári uaque to.— 16 Enga Galion chijnime ore iji daguíjnai uté uje chajire ore adode aja quigode iji. 17 Enga Grécia gosode jnese iji ore ujade ore chisa judíode aquiningamei guiguíjna piésorone eduguéjnai uje i tu Sóstenes. Enga ore chaquesu údode iji eduguéjnai iquei. Mu cucha bisidégome eduguéjnai Galion. 18 Páblo qué iyajmánguiji Corínto mu udojo quigade enga chingo raja dojode Jesus anguretasóño uje pota doi. Jno ga nóna Priscíla, Aquíla ore. Enga ore chicáji guidai uje i tu Cencréa uje déji yote quedéjnai edógai. Uje qué ore déji Cencréa uté enga Páblo chuju datui. Imoi tu gu uje e chimate dáyipiedie quigode ome Dupade. Enga jé u uje ore chacája cucórique enga ore jnome Síria. 19 Uje ore díji Éfeso ga Páblo jnoji Aquíla, Priscíla ore gari enga chicáji judíode ore aquiningamei guiguíjna. Enga catecã́ri judíode uje ore taquíriji uté. 20 Ore chaquĩ́ra Páblo ujetiga chácarabíji ore gari, mu Páblo chetaque. 21 Enga chojningame ore: —Que yácarabíji uacari gu uje yipota jeta yugúsi Jerusalen uje e idógosi jeta judíode chamáta ñane iji uté ome yocujnusinamáni dire. Mu yajniapo uacabai jne rĩ ujetiga Dupade pota.— Enga jé u uje chacája cucoi ga jnoji Éfeso. 22 Uje Páblo díji Cesaréa ga chicáji Jerusalen ujetiga chinóninga Jesus anguretasórone iji uté. Enga jĩrique jnopo iji rĩ enga chicáji Antioquia. 23 Uje diyajmaque Páblo iji Antioquia ga jnopo iji rĩ. Enga chicáji guidáyode uñane iji ore unirone Galácia, Frígia ore. Enga cho Jesus anguretasórone quique iji udore, udore ujetiga ore chejna rángaja Jesus adode. 24 Judíode uñai díji Éfeso iji dirode udore uje i tu Apólos. Uté idaipísi u oridai Alejandria. Enga uneréjna uté acajnaquéode enga chirajápise Dupade uruode quigode. 25 E pacadique Apólos ome Jesus adode uñane enga irasique re uje chacate ore ome darajatigade udore. Enga obiréjnapise acajnaquéode quigode ome ore. Mu gusu irajade u Juan acajnaquéode uje tṍra ore aja yodi. 26 Uje Apólos chacate ore iji judíode aquiningamei guiguíjna enga que chagutu rome uje chacate ore. Mu uje Priscíla, Aquíla ore chudute acajnaquéode enga ore doi ga ore jno údi aja quedéjnarique ujetiga ore catecã́ri uje gusu ore iji gari. Enga ore chacadome Dupade adode uñane uje cáma Apólos chiraja to. 27 Uje Apólos chingo raja dojode Jesus anguretasóño iji Éfeso uje pota jeta chicáji Acáya, enga ore chimesere áyipiedie. Enga jé u uje ore churúsãre darusarane ome Jesus anguretasórone iji Acája ujetiga ca ore chuseque Apólos ujetiga díji ore idai. Uje Apólos e di enga chatapísaja Jesus anguretasórone uje ore chise daringane Jesus anguretasóño gu Dupade icaniratiguéode. 28 Enga Apólos chajnai judíode ibotaquéode ome re iji cojñonguemui iquei. Enga angúromei u Dupade uruode uje chajnai ore. Jecute chi ca judíode udore chiraja daru quitígo ome. Enga obiréjnapise ome Apólos acajnaquéode udore uje Jesus jé upúsu judíode ore ijnati Crísto uje judíode ore chirote yui.
1 Uje Apólos qué déji Corínto enga Páblo chicáji guidáyode aja Éfeso yui uje ore déji cucaranone edodie. Uje díji Éfeso ga chise Jesus anguretasórone uñane iji. 2 Páblo catecã́ri ore enga chojninga: —¿Ga Dupade Ujopie Espíritu Sánto base uacabai to a uje uacanguretáyo?— Mu ore chojninga: —Ungare. Que yudúco Espíritu Sánto gotique ujnomérique to.— 3 Jecute Páblo jno dacatecãraitigade údi ome ore enga chojninga: —Uje ore tṍra uágaja yodi ica enga ¿uacanguretígo cucha cho rique a?— Enga ore chojninga: —Yanguretágo Juan casicáite acajnaquéode ica uje ore tṍra yógaja yodi.— 4 Jecute Páblo chojninga: —Juan tṍra ore aja yodi nanique uje ore chécãre dadode ome Dupade. Mu chacadápo ore rĩ ome Dupade utocaidi uñeque uje chi di jne iji Juan quigade ujetiga ore changureta uté jne. Enga ojningai u Jesus, judíode ore ijnati Crísto .— 5 Uje ore chudute Páblo acajnaquéode udore enga ore changureta Jesus to. Enga jé u uje ore tṍra ore aja yodi gu ore anguretigai iji yocangarádejnai Jesus. 6 Enga Páblo chicha dajmáinie aja ore ójodie enga jĩrique Dupade Ujopie Espíritu Sánto base ore gai. Enga ore chiraja dara quedéjnane enga ore chacate darásade ome dajnéode Dupade urúo to. 7 Gare jnanione iji yirídai uje ore changureta Jesus iji deréjnai uté. 8 Páblo guejnane guedosío gadioque iji uté enga chacate ore iji judíode aquiningamei guiguíjna gatuaque. Enga que chagutu rome dacajnaquéode gotique. Chingopísa quigode ome ore ujetiga ore chise daringáringo Dupade urása to. 9 Mu angoneparique uñane enga que ore changureta Jesus to go ome Páblo acajnaquéode. Enga ore chujñieta Jesus adode iji dojode judío ujade. Jecute Páblo jnoji ore ajei enga chiroque Jesus anguretasórone aja daquigade enga ore chicáji escúela uje ore acadisṍri i tu Tiránno. Enga Páblo chacate ore ome Dupade uruode iji uté iji dirode jnese. 10 Sequeredie gare uje Páblo jé ate uje chacate ore. Jecute Ásia unirisórone jnese, judíode jé aja purása quedéjnane rĩ, ore chudute yocangarádejnai Jesus ujnomei. 11 Enga Dupade pésu dapesute datéode iji ore ujade nanique uje angúromei u Páblo. 12 Enga cojñone ore chijna borapetígo, piguidérigui ore aja Páblo ujetiga chisa enga jé u uje ejnaretade chisa enga ore eca ome. Jé basa Satanas utocaidode piésorone ore chisa udore to enga jĩrique Satanas utocaidode doi guesi iji ore. 13 Diga judíode uñane uje disoranguemeque ore, ore ijnimique Satanas utocaidode iji piésorone to. Enga ore pota ore chiradírase Páblo aja adode to. Jecute ore chĩ́care Jesus i to uje ore chijnime Satanas utocaidode iji piésoningo. Diga ore chojningame Satanas utocaidode uñai: —Yirójo ua aja guesi ome pangarádejnai Jesus ujopie uje Páblo chacate yógome.— 14 Jnacare gare iji tíode udore uje ore ipesute udore ore dai i u Escéva. Enga sacerdóteode eduguéjnane uñai u. 15 Mu uje jnacarode udore catecã́ri Satanas utocaidi tiji piésõri ajei mu Satanas utocaidi uté chojninga: —Iraja Jesus. Irajápo Páblo rĩ. ¿Mu jé uaque gosode?— 16 Enga jé u uje Satanas utocaidi piésõri cugújnai ore enga chijna detotiguei aja ore. Enga sué ore gai. Ajningaranguipise ome ore enga chujé ore údode. Jecute jnacarode udore ore chayópisome enga jĩrique ore doi guesi iji guiguíjnai. Mu choquíbi ore aja dagajñunie enga ajnangoque ore rĩ. 17 Éfeso gosode jnese ore chudute udojo ujnomei to, judíode jé aja purása quedéjnane ore to rĩ. Enga ore todópisa enga ore tujúa yocangarádejnai Jesus i aja quedéjnane uje chi cucha daté Jesus uté ujopie. 18 Jiei Jesus anguretasórone to iji ore ujade uje ore pógu date gajnareque bajade, mu e ore chatatame ore. 19 Jé basa Jesus anguretasórone uñane ore chijna Satanas ujopie ome dapesudode uje cáma ore changureta Jesus. Mu ore yugode darujna ao qué déji ore uje chatata pujopie gajnarénguenie udire isocade. Jecute ore doi degode darujna ao udore enga ore chipotame iji cojñonguemui ajei. Chi jiei darujna aone udore oredie marínga jé ore chipotame. Uje chi udore oredie chise 50.000 iji pláta guebéode. 20 Cuchade udore ujnoméone chubu erámi enga que ore chopo cucha bisidéguiji Dupade uruode. Enga uásejna ore uje ore changureta yocangarádejnai Jesus ome ore atatagode Dupade urúo. 21 Udojo quigade enga Páblo pésu dajéode ujetiga qué tibágui Jesus anguretasórone iji ore unirone Macedónia, Acáya ore. Enga chojninga: —A yicáji Jerusalen to jne enga ujetiga yejna Jerusalen guesi enga Dupade ajéode u ujetiga yicapóji Róma rĩ.— 22 Mu Páblo que jno míraque. Mu chutṍri dãjora gáreode aja Macedónia bajaque. Enga utocaidode udore u Timotéo, Erásto ore. Mu Páblo qué chácariji Ásia gosode ore gari. 23 Cojñone uñane ore chetaguipise Jesus adode iji Éfeso iji dirode udojo. 24 Chamáñaje jnani déji Éfeso uje i u Demétrio enga uté ijnimique pájningai ome Páblo ore. Jnani uté, jorane jnanío ore pésu dangarané Diána iguíjna cuchábi oredie. Enga pláta ore ipesudode udore jecute jiei oredie uje ore terame cojñone. 25 Enga Demétrio uté doi enga chamáta darógode, jé aja dojode ayoré gajnúone ipesugóño enga chojningame ore: —Uacamóño uje yoquiplátadie garani u yoquipesudode ayoré gajnúo. Enga yiquecágo gu udore oredie enga que cuchárique chona yoque gu uje jecucha cojñone doi oredie ome yoquipesudode. 26 Ise ga e uacamóño jnani to uje i tu Páblo, jeoga e uacadúcho uté ujnomei. Uje uté chacate cojñone aja dajesúode uje cucha bisidécho ayoré gajnúone uje pipesute ome jnanione. Enga chiese ca cuchárique tṍraji panguretigai ome udore uje yicatecãcoi ore. Uásejnapise ore uje ore changureta uté acajnaquéode. Que gusu iji yoquidai Éfeso udé mu jé u to iji yocuniri Ásia údode. 27 Yo yáyugu ujetiga diga cojñone ore cha ore doi oredie ome yoquipesudode gu uté acajnaquéode. Mu que gusu udore go mu yopo yáyugu rĩ ujetiga yocangarané cuchabe Diána iguíjnai ujnomei ca cusapo rĩ. Uacamóño uje yicotágo yocangarané uaté iji yocuniri Ásia. Jé cho cojñone uñane iji erámi údode to rĩ. Picotague opejã uaté to ome ore jnese. Enga gajnarenguipise ujetiga cojñone ore tangári Páblo uté enga ore cha changureta Diána uringa cucha daté.— 28 Uje ore chudute udojo enga ajningaranguipise ore. Jecute ore chinguíra dabijnanone aja dejode enga ore chojninga: —Pujnuengaito Éfeso gosode yocangarané dupa Diána.— 29 Enga guidai idaisórone ore chirate ore aja ore ájningai. Jecute ore chisa Macedónia gosode Gáyo, Aristárco ore. Páblo jorane u jnani gáreode udore iji dajesúode erámio. Mu e ore chisa ore enga ore jno ore údi aja guiguíjnai uje jecucha guidai idaisórone ore taquíriji. 30 Páblo pota jeta chacája ore gari to ujetiga catecã́ri cojñone. Mu ujode Jesus anguretasóño ore charángome. 31 Jé cho Ásia gosode orasutedie uñanie uje ore jõrapise Páblo. Ore chiroque daruode aja Páblo to ujetiga ca chacája cojñonguemui ore uague. 32 Mu cojñonguemui chinguíra dabijnanone aja dejode iji ore uague uaté enga ore pijnane chacája ñane. Enga jiei cojñone uñane uje que ore chiraja uague uaté gajnesónique gotique. 33 Mu judíode uñane uje ore déji ore uague uaté to ore chutṍri Alejándro ujetiga catecã́ri cojñonguemui. Enga ore chucuase aja cojñonguemui uague ajei yui. Jé u uje Alejándro chãrai dajmanai tiji ore ujetiga ore cho paraque. Ajéode u gu ujetiga cho quique cuchade. 34 Mu uje cojñonguemui chimo uje judío Alejándro enga ore tibite gaté. Enga diyajmanguipise ore ome dabijnacaráidie enga ore chojninga: —Pujnuengaito Éfeso gosode yocangarané dupa Diána.— 35 Udojo quigade ga guidai idaisórone adode urusãrasṍri chaquĩ́ra ore ome ore pijnacaráidie ujetiga ore cho parac enga chojninga: —Éfeso gosode uaque a, ore chiraja iji erámi údode jnese uje Éfeso gosode yocajnei tu ujetiga yujuco yocangarané dupa Diána iguíjnai guio. Chamáñaje uaté oré ayoré gajnu base yoquibai nanique iji gaté. Jecute yujucopise uaté guio to. 36 Uacamóño uje que potigayaque uyógome udore. Jecute ayáyo uacájningai enga ca apéso cuchárique ujetiga cáma ajichopise cucha dacadode aja quigode. 37 Uacamóño uje jnanione udore uje uacabeyoi ore údi aja de que ore toria cucháriguiji yocangarané dupa Diána iguíjnai gotique, enga que ore urúrigo gajnaréngapo aja rĩ. 38 Ujetiga Demétrio, ujode ayoré gajnúone ipesungóño ore chetaque uñeque atígo, yocasutedie cuse gu cucha dacadode udore. Omi tu ujetiga ore chijna uté gosi aja dacasutedie gari enga ore chingo detétigade aja ore. Diga ore etei uté narare dabai to. 39 Que yimo ujetiga apótayo acatecãchoi ñane gaté ome cuchárique mu omi tu ujetiga beyoi yocasutedie áyipiedie ome udore ujetiga diga amátayopo ñane rĩ. 40 Yocajnúone u cojñoque sijnángone uje ore tagu deduguéjnane aja. Chamáñaje yoquichorájna que enga yoquibijnane chacája ñane iji udé. Enga a ca yirajagórase yocuru quitígome yocadode udore ujetiga uñeque catecãrirási yógome.— 41 Uje guidai idaisórone adode urusãrasṍri uté chejna daruode udore guesi enga jé u uje ore cha dague enga ore chajni aja daguíjnane.
1 Uje cojñonguemui e cha dajei dotáningane udore enga Páblo tibidi dojode Jesus anguretasóño enga cho ore quique. Uje chejna udore guesi enga chingo dacoringai aja ore enga jé u uje jno enga chicáji Macedónia. 2 Enga chinóninga Jesus anguretasórone iji ore idáyode jnese iji dajesúode enga cho ore quique ujetiga ore chidota re iji danguretaretigade. Udojo quigade ga chise ore uniri Grécia. 3 Guedosíode gadiógome Páblo iji Grécia. Uje e jnorásome cucoi ujetiga chicáji Síria mu chudute to uje chi judíode ore jmongarája. Jecute chécãre dajéode enga diguiji jnumi aja Macedónia yui. 4 Jnanione uñane nóna enga Beréa gosi u uñai enga i tu Sópater. Jeque uñane ore íode u Aristárco, Segúndo ore enga ore idai u Tesalónica. Uñai i tu Gáyo, enga idai u Derbe. Enga Timotéo déji ore gari to, jé aja Tíquico, Trófimo ore uje ore uniri u Ásia. 5 Yoquijorane udore, bajaque ore ome yoque enga ore chirote yóguiji ore idai uje i tu Tróas. 6 Páblo uyoque yejnángo dirode guesi uje judíode ore tagu arureque uneróngone iji. Mu quigade enga yico to iji Filípos. Enga yacágoja cucoi enga yoquejnane dire chejna yijmanai iji cucoi ajei uje ico ore iji Tróas. Enga yoquimochádode gare iji ti iji Tróas. 7 Uje domíngo enga Jesus anguretasórone yamátago ñane ujetiga yujnusinángo yocangarádejnai Jesus itoringai. Enga Páblo chacate yoc enga chuságaja dejai gatocoro. Iyajmángome dacajnaquéode gu uje chi jno dirome. 8 Yocuágue déji guiguíjnai ajei gateminóri enga jiei ore apósode iji. 9 Jnacarabi désiji yocuágue uaté to uje i tu Eutíco enga chácarosi piago catadé. Uje Páblo acajnaquéode umáño enga moi chujési jnacarabi. Enga mósi. Mu basosíji guiguíjnai ajei gateminore gadioi uté. Jĩrique ore doi jnumi enga ore chiringarósi mu íjnoque ujñari enga tosipísi. 10 Mu Páblo doi jnumi to ga chungare riji jnacarabi gai enga chisa aja re. Enga chojningame dojode Jesus anguretasóño: —Ca oyo uacáyugu, e ecásiapo rĩ.— 11 Mu Páblo chorápo guiguíjna ajei gateminóri rĩ enga jé u uje yajo Jesus gai gajnui arureque uje yujnusinángo itoringai. Páblo chacate ore gaté enga chuságaja diri. Enga jéc u uje jno. 12 Uje ore jno jnacarabi údi ga ore irasiguipise re uje ecásiapo rĩ. 13 Yico bajaque ga yacágoja cucoi. Enga icagóji Ason. Enga yiroco Páblo yui iji uté. Chamáñaje Páblo pota diguiji jnumi aja yoquiquigade gu. 14 Uje Páblo yico ñane iji Ason enga jé u uje nóna uyóguiji yoquibi cuco to. Enga yicagóji ore idai Mitilene. 15 Yicoji uté ga dire uñai ga yimóngo yote quedéjnai ajã́ro uje i tu Quío. Yoquejnai dire chojmarai iji dajei uje yicoji uté enga yico ore idai iji yote quedéjnai edógai uje i tu Sámos. Yicoji Sámos uté ga imóngoji guidai uje i tu Trogílio. Enga dire uñai ga yico guidai uje i tu Miléto. 16 Yiyógo Éfeso gai gu uje Páblo que pota jeta iyajmánguiji Ásia. Ajéode u gu ujetiga jĩrique chise Jerusalen ome judíode ore jnusinamáni dire uje i tu Pentecostes . 17 Mu uje ugúcoji Miléto enga Páblo tibidi Jesus anguretasórone angaránone iji Éfeso ujetiga ore tibágabíji uté. 18 Uje ore di ga Páblo catecã́ri ore enga chojninga: —Uacapáñañoji yadode iji uacaniri Ásia jnese. Jec iji taningápisi uje quene yĩríji uaque. 19 Uacarajáyo to uje paraque yu ica uje yiji yangarádejnai Jesus iroquéode iji uacajade. Uacarajáyo to yayuguhebátigadatéode ica ome judíode ore isoca gajnaréngone ome yu. 20 Mu que yiya yacate uaque go. Yigaidi u gu ujetiga yatapísa cuchade aja uaque. Jecute yacate uaque iji uacáguedie enga yacadápo uáguiji uacaguíjnane rĩ. 21 Jecucha yingome judíode, purása quedéjnane ore jnese ujetiga ore chécãre dadode ome Dupade enga ore changureta yocangarádejnai Jesucrísto to. 22 A e yiji jne enga a yicáji Jerusalen. Chamáñaje Dupade Ujopie Espíritu Sánto iroque yu aja gu. Mu que yiraja cojñone áyipierigui ome yu iji uté. 23 Mu gusu yirajade u Dupade Ujopie Espíritu Sánto uruode atatasórone ojningane ome yu. Uje udore ore chingome yu iji ore idáyode jnese uje a ore suru yibai jne enga yuringai ducañerájma déji yiquei. 24 Mu que yo yáyugu yu ome yajnéone cucha dacate gajnarécho udore gotique. Ujetiga ore chujé yu mu que cucha to ome yu. Uje yigaidi u gu ujetiga yejna yu aja yangarádejnai Jesus iroquéode enga yimate udore aja guesi jnese. Uje chiroque yu aja erámi nanique gu ujetiga yatatame ore jnese uje Dupade chijnorapise ore enga pota chiqueta ore to. 25 Yirajápise ujetiga yiji jne mu yacadigode uaque a ca amóñopo yu to jne rĩ. Yojningane u uaque jnese uje yingome quigode ome uaque ica ujetiga eso uacaringane Dupade urása to ujetiga uacasuté u Dupade jne. 26 Jecute yingome uaque gajneri uje que toc ujetiga uacuñeque chaguhéta daringárique bijnaque yibai jne ome Dupade. 27 Chamáñaje e yingo Dupade ojningane cucha jnese aja uaque gu enga que yipógu ojningárique cucha. 28 Jecute yingome uaque ujetiga ajuso uaqueo, enga ajuso uacojode Jesus anguretasóño guio to rĩ. Uacamóño uje Dupade Ujopie Espíritu Sánto utocaidode u uaque gu ujetiga arócho yocangarádejnai Jesus anguretasórone uje gáite oré ore. Enga oré tu uringai chuque uje chojne dayoi ome ore nanique. 29 Yiraja ujetiga yiji iji uacari enga a jĩrique cojñoque aringácachoquírigo chacája uaque jne. Enga a ore gajnúone u cuchiso sijnángone uje ore gaidi u ujetiga ore chujé áyasadie. Enga a ca udore ore susipise Jesus anguretasórone uaqueo gotique jne. 30 Que gusu udore mu a yicatecãraisórone uáguiji de, a uacuñéngo u to ujetiga acácho ore ome pacajnaqué tágode to. Uje a uacagaidi u to jne ujetiga ore cha cháta raja Jesus anguretasórone enga ore nóna uágaja quedéjnane. 31 Jecute ajusópise uaqueo enga ajnusináño yacajnaquéode quigode jnese uje yacate uágome enga sequeredie gadioque nanique. Jecucha yejnáreque yajnéone cucha dacate gajnarécho marínga que yiya yacate uaque jnese iji dirode, dejade ore jnese. 32 Yujode Jesus anguretasóño uaque a, a e yingo uágaja Dupade jne ujetiga chingopísa daruode quigode ome uaque uje chatata dajnoraquedatéode ome yoque. Yigaidi u gu ujetiga uacarajatigade ome udore pésu uaque enga etoguipise uágome Dupade adode. Yigaidi upo rĩ ujetiga uacarajatigade udore pésu uaque to enga eso Dupade gueranone cucha omío to uje chisi ome danoningañane ore jnese. 33 Jé uacamóño uje que yipota plátaraque jeta uñeque chisi yu iji nanique iji uacari. Que yipota piguidé quedéjnaraque rĩ. 34 Mu uacarajayópise uje yijmáinie isagode imanique yibosode, yiguidedie ore nanique. Enga jé chuságaja yijorane ore to uje yijmáinie isagode imanique cuchade ome ore to uje cuchade qué chona ore. 35 Jecucha yacate uaque to ujetiga asayo uaquejórigo ujetiga átayoja uacãjoráringo to ujetiga qué cuchárigo chona ore. Yujnusinápo yocangarádejnai Jesus uruode ome uaque to rĩ uje chojninga: “Peranone gajnesórone ore irasique raque mu cuchiyi tupúsu guẽrasórone ore irasitigade ome raque.”— 36 Uje chejna daruode udore guesi enga jé u uje Páblo chichaga dagatáidie aja jnumi iji dojode Jesus anguretasórone ajei enga catecã́ri Dupade ome ore. 37 Enga jorane udore ore po jnese enga ore chisa Páblo pajei aja re, enga ore tagu uredie. 38 Enga ore jnusipísi Páblo. Chamáñaje Páblo chojningame ore: —A ca amóñopo yu to jne rĩ iji erámi udé.— Enga ore nóna Páblo aja cucoi jnese.
1 Uje e yico iji yocujode Jesus anguretasóño ore gari ga yico ga yoquiquítequígaja ore idai uje i tu Cos. Dire uñai ga yico ga yico ore idai uñai uje i tu Ródas. Yico iji Ródas ga yicagóji ore idai uje i tu Pátara. 2 Yico cucoi iji Pátara uje qui tu ore idai Fenícia enga yacágoja uté ga yico. 3 Enga yimóngo yote quedéjnai ajã́ro uje i tu Chipre uje déji yocarasei. Yico ga jé usájoja puniri uje i tu Síria. Usájoja gu uje chi cucoi noñome dagúcharigo iji ore idai uje déji yote quedéjnai edógai uje i tu Tíro. Enga yibájoi ore to iji ore idai uté. 4 Yico Jesus anguretasórone uñane iji uté enga yácagoji ore gari ga yoquejnane dire gare iji ti iji ore gari. Dupade Ujopie Espíritu Sánto chingome ore uje cucha dacate gajnaréngone a chise Páblo jne iji Jerusalen. Jecute ore chingome Páblo ujetiga ca chicáji Jerusalen. 5 Mu uje ejnángo yoquimochádode udore iji ore gari ga yico. Enga Jesus anguretasórone jnese, jé aja ore acotedie, jé aja ore abode to rĩ, ore nóna yógaja guidai eruei. Uje yico yote quedéjnai atetai ga yichájo yoquigatáidie aja jnumi ga yicatecãcoi Dupade iji ñane gari. 6 Udojo quigade ga isago ñane pajéode aja ñane enga yacágoja cucoi. Enga jé u uje ore chajni aja daguíjnane. 7 Yacágoja cucoi iji Tíro aja guidai uje i tu Tolemáida, enga yiyágo yoquibi cuco iji uté. Yico yocujode Jesus anguretasóño iji Tolemáida enga yoquimochádi chojmára iji ore gari. 8 Dire uñai ga Páblo jé aja jorane uyoque yico enga yicagóji ore idai uje i tu Cesaréa. Enga yicagóji Felipe iguíjnai uje Jesus adode jnungore. Felipe uté jõra jnanione to uje gare ore iji ti uje ore chajuguína cucha pibosode ome Jesus anguretasórone iji Jerusalen nanique. Enga yiyágoji uté gari. 9 Felipe urodie gagájni, enga cáma ore doi jnacanique to go. Enga udire ore chiraja uje ore chatata dajnéone Dupade urúo to. 10 Uje e diyajmaque yoque iji uté enga Dupade uruode atatasṍri uñai di iji yoque uje i u Agábo enga garani u Judéa. 11 Chi qué chidójnonga yoque to. Diga uté chisa Páblo igarubi ga chigaru dadigarodie aja dajmanegatáidie ore ome Páblo igarubi. Enga chojninga: —Dupade Ujopie Espíritu Sánto chingome yu que uje judíode a ore isocai u udojo ome igarubi udé gajnesónique iji Jerusalen dirome, enga a ore chigaru jne enga a ore terame purása quedéjnane jne.— 12 Uje udúco udojo ga Cesaréa gosode ore uyoque yaquírango Páblo ujetiga ca chicáji Jerusalen. 13 Mu Páblo chojningame yoque: —¿Gotique uje uacabóyo? Cachi uacagoyedie chusuruhase yu to. E dimane yu ãrie ujetiga ore chigaru yu iji Jerusalen. E dimane yu to ujetiga ore chujé yu rĩ. Chamáñaje yibai u yocangarádejnai Jesus gu.— 14 Mu uje Páblo que tangári yoque enga que yaquírangopo rĩ. Mu yojníjo: —Jé be bangaráni Jesus áyipierigui ome ua.— 15 Udojo quigade enga yipéco yocugúchade ga yico ga yicagóji Jerusalen. 16 Jesus anguretasórone uñane iji Cesaréa ore nóna yoque to enga ore jno yocúdi aja jnani iguíjnai uje tṍraji Chipre nanique ujetiga yiyágoji uté gari. Jnani uté i tu Mnason enga e diyajmángome Jesus uje changureta to. 17 Uje yico Jerusalen ga yocujode Jesus anguretasóño ore nína yoque. 18 Dire uñai ga Páblo nóna yoque to uje yibájoi Jacóbo to iji iguíjnai. Enga yico Jesus anguretasórone angaránone anciánoi iji uté jnese. 19 Páblo chingo darasitigai ome ore uje déji ore gari, enga jé u uje jĩrique chatata Dupade ipesudode jnese uje angúromei u iji purása quedéjnane ujade. 20 Uje ore chudute Páblo ojñane udore enga ore chacãre Dupade gai enga ore chojningame Páblo: —Ueracho bojñane mu bamo to uje jiépisi judíode uje ore changureta Jesus to. Enga udore ore chajo rágaja jnese ujetiga judíode uyoque jé yicoi Moises iroquéode quigode to. 21 Enga ore guetei u uje chi ore chudute uje chi acate judíode iji purása quedéjnane ujade ujetiga ore cha ore doi Moises iroquéode ojningane cucha. Enga chiese aquĩ́rapo ore rĩ ujetiga ca ore chica dabode . Chiese cucha omi tu ome ua ujetiga judíode uyoque yiyágo yocayode jnani bajácho ore isocade to. 22 Ujetiga yocujode Jesus anguretasõre judíode ore chudute uje e bãri iji yoque enga a jĩrique ore chamáta rágaja yoque. ¿Jé yoco ringome udore jne ujetiga diga ore catecã́ri yógome cuchade udore? 23 - 24 Cucha omi tu ujetiga yocujode Jesus anguretasõre judíode udore ore chimo ua iji judíode yoquisocade uñeque gánique. Jogadi u jne ujetiga obiréjna ome ore uje babé Moises urusarane ojningane cucha to, enga cachi ore urúo uje ore chaguhéta babai uje betaque judíode yoquisocade. Jecute be yocáyipiedie quigode enga ajína yoquijorane iji de uje gagájni ore ujetiga ore chicáji Dupade iguíjna cuchábi jne. Chamáñaje udore ore chajo daruode aja ome Dupade diríca enga e ore gaidode u ujetiga ore chimate daruode udore ome Dupade. Be enga amate oredie ome ore, uhuaque jnese ujetiga eso uacaringane icha ome Dupade. Enga ujetiga ejnáño udore guesi enga a ore chuju dacarane. Jogadi a u jne ujetiga ca potigayaquérique dépoji uñeque rĩ ome baringai Moises urusarane angarasõre. 25 Mu yocáyipiedie jé jogate ome purása quedéjnane ore. Chamáñaje yurúsãco yocáyipiedie udire ome ore diríca ujetiga ca ore doi judíode yoquisocade to. Mu gusu uje yãrájo ome ore ujetiga ore tagu ayoré gajnúone gajnéone cucha ãrío. Ujetiga ca ore tagu cucha iyojnanie rĩ. Ujetiga ca ore tagu cuchiso pimocherane. Jé u to ujetiga ca uñeque tungarája gapu quedéjnaraque, gusu dacotéraque. Enga ca uñáraque tungarája jnani quedéjnarique, gusu abai ome.— 26 Jé u uje Páblo doi ore uruode enga dejena jnani gagájnione udore aja daquigade. Dire uñai enga ore doi judíode isocai ome raque ujetiga ore uringai icha u ome Dupade. Quigade enga Páblo chacája Dupade iguíjna cuchábi ujetiga chingo diri aja ore ujetiga cho doré iji enga jé u ujetiga ore chimate pisocade udore jnese. 27 Mu uje e ore chejnárase dire gare iji ti ujetiga ore tẽrája Dupade mu judíode uñane uje ore tṍraji Ásia ore chimo Páblo iji Dupade iguíjna cuchábi ajei enga ore pijnacaráchi. Ore gaidi u ujetiga ore urásade chirate ore aja ore ájningai. Enga jé u uje ore chisa Páblo. 28 Ore chejnapúsu daruode enga ore chojninga: —Israel gosode uaque e, átayo uágaja yoque to e. Jnani tudé u uje chacate cojñone ore iji dajesúode erámio ome dacajnaqué gajnaréngone. Chamáñaje dojnóngaja yocurásade ore iji yocuniri. Dojnongapója Moises iroquéode to rĩ. Dojnongapója Dupade iguíjna cuchábi udé rĩ. Que gusu udore mu e cho cucha bisidéguiji udé rĩ. Chamáñaje puyágome purása quedéjnane ujetiga ore chacája Dupade iguíjnai to mu Páblo udé chijna Grécia gosode uñéngo aja de uje purása quedéjna ore múñi.— 29 Ore urúo udojo gu uje ore chimo Éfeso gosi Trófimo iji Páblo gari iji guidaidatei Jerusalen. Enga ore jose eti Páblo nóna uté aja Dupade iguíjna cuchábi ajei. 30 Cojñone iji ore idaidatei údode ore chirate ore aja ore ájningai. Enga ore chayóji Páblo ore yui. Ore chisa Páblo enga jĩrique ore jno údi aja guesi iji Dupade iguíjna cuchábi. Enga jĩrique ore suru Dupade iguíjna cuchábi piagode gáyode. 31 E ore chujérase Páblo mu soldádode ore eduguéjna cuchábi chudute ujnomei to uje chi ájningaraque Jerusalen gosode ore jnese. 32 Jecute soldádode ore eduguéjnai uté chamáta soldádode, jé aja ore eduguéjnane uñane rĩ enga ore chayóji cojñonguemui yui. Uje cojñonguemui chimo ore ga quene u uje ore cha chujé Páblo údode. 33 Enga soldádode eduguéjna cuchábi sose Páblo yui, chisa enga chiroque soldádode uñane aja ujetiga ore chigaru ome ojnaquero gáredie. Udojo quigade ga catecã́ri ore enga chojninga: —¿Jé jnani uté gosi a? ¿Ja pésu cucha gajnarétique a?— 34 Mu cojñonguemui chinguíra dabijnanone aja dejode uje ore chatata Páblo bade. Mu ore ojñane que cho ñane gotique. Jecute soldádode eduguéjna cuchábi que chiraja ore ojningárique cucha ome ore ichorájnai. Enga jé u uje chiroque darógode aja ujetiga ore chorei Páblo iji soldádode iguíjnai. 35 Uje e ore chise ore uchiéjnacapíode iji soldádode iguíjnane yui enga soldádode ore chijnoque Páblo. Ore chijnoque gu uje ajningaranguipise cojñonguemui. 36 Chamáñaje ore chajna ore gu enga ore chinguíra dabijnanone aja enga ore chojninga: —Ajéyo.— 37 Uje e ore nárase Páblo aja soldádode iguíjnane ajei enga Páblo chojningame eduguéjnane uñai: —Yajéode qué yicatecã́ri ua.— Enga chajuque soldádode eduguéjnai aguté uje chi Páblo doi Grécia gosode ore uruode to. Jecute chojningame Páblo: —¿Ga araja Grécia gosode uruode to a? 38 ¿Ja ca Egípto gosi tu ua ya?, uje chi chijna cojñone nanique aja erãpe tarei uje chi 4.000 ore. Uje chi jocaratáguebeque ore jnese enga chi ore pota pocaningane ome eduguéjnane.— 39 Mu Páblo chojninga: —Ungare. Judío u yu. Yibatigai u Társo nanique ga yuniri u Cilícia. Yidai Társo obiréjnapise iji Cilícia. Mu be ga ajuégabá darai tome yu ga yicatecãrabi cojñone.— 40 Uje eduguéjnai juéga darai tome Páblo enga Páblo chague iji ore uchiéjnacapíode gai. Chãrai dajmanai iji detesórone ujetiga ore cho parac. Uje e ore cho paraque enga narare ga hebréo uruode.
1 Páblo chojninga: —Yujode judío a, jé aja yayode uhuaque rĩ, angáchoi yuruode uje yĩrarare yibai.— 2 Uje ore chudute uje Páblo doi ore uruode hebréo enga jé u uje ore cho paraque gaté. Jecute jno dacatecãraitigade údi ome ore enga chojninga: 3 —Judío yu, enga yibatigai u ore idai Társo uje déji Cilícia. Mu uje jnacare yu iji Jerusalen udé nanique enga yacadisṍri u Gamaliel. Enga uté acajnaquéode quigode jé upúsu Moises iroquéode ojningane cucha uje yocayode jnani bajade ore doi udore quigode to nanique. Enga jé yadode u uacadode iji de gajneri. Uje jecucha ga yajéode u ujetiga yiji Dupade iroquéode ome yuringai ayoré jnese. 4 Yumajo Jesus anguretasórone to nanique. Enga yajéode u ujetiga chuque ore to. Yiji jnanione, chequedíe ore údi aja ore jurugaisórone iguíjnane to nanique ujetiga ore suru ore gáyode gu ore anguretaretigai ome Jesus. 5 Sacerdóteode eduguéjnai, jé aja judíode yocangaránone ore pañáji yadode jnese. Chamáñaje ore u gu uje ore chisi ome darusarane ome yu ica ujetiga yijna ome yocujode judío iji Damásco. Yigaidi u gu ujetiga yucuerási Jesus anguretasórone iji Damásco ujetiga yiji ore údi aja Jerusalen ujetiga pujuya ore iji udé. 6 Mu uje yugúsiji dajei enga e yirõrirase Damásco uje guedé doi gatocoro enga yuningame eti direcaringué cuchábi tṍraji gaté enga chijñate yibai. 7 Icṍraja jnumi. Enga udute darade uje chojningame yu: “Sáulo a, Sáulo a. ¿Jé gotique a uje bo bamajo yu?” 8 Yojninga: “¿Jé ua gosi te a?” Ga darade chojninga: “Nazaret gosi Jesus u yu. Enga bamajoi jé upúsu uyu.” 9 Yijorane jnanío ore chimo direcaringué cuchábi to enga chajuque ore agutedie. Mu que ore chudute yajnéone dara go. 10 Yichajnai darade udore enga yojninga: “Yangaráni a, ¿bapotigátique a ujetiga yipésu jne?” Enga yocangarádejnai Jesus chojningame yu: “Ayague. Bo ga acáji baqui ore idai Damásco enga a ore chingo bapesutique cucha aja ua jne iji uté.” 11 Mu direcaringué cuchábi suru yajirigode. Jecute yijorane ore chisa yijmanai aja yoquiqui ore idaidatei Damásco yui. 12 Jnani déji Damásco to uje i tu Ananías enga dopísi Moises iroquéode ojningane cucha to. Enga judíode iji Damásco ore irasique uté jnese. 13 Ananías uté tibágui yu. Uje di iji yu ga chojninga: “Sáulo a, yujo Jesus anguretasṍri a, a amópo bajiritígo to jne rĩ.” Enga jĩrique yimo yajirigode rĩ. 14 Enga Ananías chojningápome yu rĩ: “Yocayode jnani bajade angureni Dupa imeseraque ua nanique, enga ajéode u ujetiga araja áyipiedie quitígo. Enga ajéode upo rĩ ujetiga amópise utocáite paraguipísi Jesus enga adute uté uruode to iji pijnani. 15 Gaidi u gu ujetiga atata uté adode jne ome cojñone ore iji erámone údode jnese, enga ango bamone cucha, jé aja badudigode cucha to rĩ ome ore. 16 Jecute be enga ayague ga yico enga yṍra ua aja yodi jne. Enga angureta yocangarádejnai Jesus to enga jogadi u jne ujetiga churu basijnaringuéone aja jnumi.” 17 Uje yajníja Jerusalen nanique ga yicáji Dupade iguíjna cuchábi ujetiga yicatecã́ri Dupade iji. Uje qué yicatecã́ri enga yimo yenominone. 18 Yimo yocangarádejnai Jesus iji yenominone enga chojningame yu: “Aguito ga boji Jerusalen. Chamáñaje a ca ore tangári bacajnaquéode ome yu iji de jne.” 19 Mu yojningame Yocangarádejnai: “Mu ore chiraja yu jnese. Uje ore pañáji yadode uje yicáji judíode aquiningaméone guiguíjna jnese nanique ujetiga yi banguretasórone údi aja ore jurugaisórone. Ore pañáji to uje yaquesu ore údode rĩ. 20 Uje ore chujé baroi Estéban uje chatata badode to nanique enga yugúsi to. Yiyáguena ejoi enga yajire to, enga ueradome yu uje ore chujé. Yirote yungórone iguidedie to nanique uje ore chujé.” 21 Mu yocangarádejnai Jesus chojningame yu: “Bo ga bo. Uje a yorei ua iji tiiii jne. Yigaidi u gu ujetiga acate purása quedéjnane ome yadode.”— 22 Ore angaránone acajnaquéo eruei tu de. Enga que ore tangarapoi Páblo acajnaquéode rĩ. Mu ore chinguirapo dabijnanone aja dejode rĩ enga ore chojninga: —Ajéyo jnani tuté. Gajnareque adode gu.— 23 Uje ore tibite gaté ga ore chãrai daguidedie iji gatéode enga ore chicosapója gaté rĩ. 24 Jé u uje eduguéjnai chiroque darógode aja Páblo ujetiga ore nája soldádode iguíjnane ajei enga chojninga: —Aquesúyo údode ujetiga chatata dabárique cucha ome yoque uje cojñone chinguíra dabijnanone aja.— 25 Uje e ore chigaru Páblo ujetiga ore chaquesu údode, mu Páblo catecã́ri ore eduguéjnai uñai uje déji ejoi enga chojninga: —¿Ja uacajnéone u ujetiga aquesúyo Róma gotique údode uje cáma arajáyo bárique?— 26 Uje chudute udojo ga eduguéjnai uté jno ga chingome ore eduguéjna cuchábi. Enga chojninga: —Ajuse beo ome jnani uté gajneri. Chi Róma gose.— 27 Jecute eduguéjna cuchábi sose Páblo yui enga catecã́ri enga chojninga: —¿Jec ũré enga Róma gose ua ya?— Enga Páblo chojninga: —Ejẽ.— 28 Jecute eduguéjnai uté chojningame: —Jiei yoredie nanique uje yiji yoré ujetiga Róma gose yu to.— Mu Páblo chojninga: —Róma gosipise yu ãrie, uje Róma gose yayode gu.— 29 Páblo igarisórone ore chudute udojo ga jĩrique ore sose quedéjnane ome. Enga ore eduguéjnai uté jé upo rĩ uje todo deduguéjnapísode yui, uje gajnareque adode gu uje chigaru Páblo uje chi Róma gose. 30 Dire uñai enga eduguéjna cuchábi chiroque darógode aja sacerdóteode, jé aja judíode eduguéjnane uñane ore rĩ ujetiga ore chamáta ñane enga chi catecãripísi ore ome Páblo bárique cucha. Chejñu ojnaquerodie iji Páblo jmanegatáidie enga jno údi aja judíode eduguéjnane aquiningamei enga chijnája ore iquei.
1 Páblo chajire eduguéjnane iji ore aquiningai enga chojninga: —Yujode judío uaque a, que yagutéraque cho jora ome yipesutígo cucha gajnarécho ome Dupade gotique nanique, ga jé chuságaja deréjnai udé gajneri.— 2 Enga jĩrique sacerdóteode eduguéjna cuchábi Ananías chetaque Páblo uruode udore enga chojningame Páblo ejominórone: —Anguíraño uacajmanáyone aja uté pijnani.— 3 Mu Páblo chajnai uruode enga chojninga: —Chiese jnani paraque ua mu taque ua. A Dupade chujé ua to jne ome baringai taquechoqui. ¿Ja ca agúsi te gu a ujetiga ajire yocadode aja quigode uje bajna Moises iroquéode ojningane cucha ome bajirigode udore? Jé quigode u ãrie. Jecute, ¿gotique gu a uje bapota jeta ore chujé yu uje Moises iroquéode chãraque pisocade udore múñi?— 4 Páblo ejominórone ore chojninga: —¿Ja jé barúo udore ome Dupade iroi, yoqueduguéjna cuchábi a?— 5 Páblo chojninga: —Yujode judío uhuaque. Que yiraja que uje sacerdóteode eduguéjna cuchábi tu uté. Jec ũré uje Dupade uruode chojninga: “Jé ca barúrique chamáña aja dacasutéraque iji bedáirique.”— 6 Enga Páblo chajire ore enga chimo uje saducéode déji ore ujade, anírone fariséode dépoji ore ujade rĩ. Jecute chejnapúsu daruode enga chojninga: —Yujode judío uaque. Fariséo yu to jé aja yayode ore jnese. Yangureta to uje chi togode ecápo jne rĩ. Ise ga yanguretigai ome udore u uje ore chetaque yadode enga ore chijna yu aja de ujetiga pajirique yadode.— 7 Uje urúo udojo enga jogadi u uje fariséode, saducéode ore botãre ñane, enga ore cãra dáyipiedie quigode ome ñane. 8 Uje saducéode ore chojninga: “A ca togode ecápo jne rĩ.” Ore chotigase rĩ uje chi ca gaté unirisóningo cuse. Enga chi ca poré gatérigui cusapo ome ore rĩ. Jé basa fariséode que ore chotigase cuchade udojo gotique. 9 Ore tibite jnese enga ore acadisórone uñane chague uje udore ore chacate ore ome Moises iroquéode ojningane cucha. Fariséo ore to gu enga ore narare Páblo gai enga ore chojninga: —Jnani tuté que pésu cucha gajnarétique. Ujetiga jec ũré enga poré gatéraque jeoga gaté unirisónique catecã́ri diríca enga obiréjna uje garani u Dupade. Jecute gajnarenguirase ujetiga yetájo Dupade ipesutígo.— 10 Ore botãripise ñane enga soldádode eduguéjnai todo ujetiga ore chaquesu Páblo aja jnumi. Jecute chiroque darógode aja Páblo ujetiga ore napo aja soldádode iguíjnane ajei rĩ. 11 Uje e dejaque iji dire uñai enga Yocangarádejnai chiqueta raja Páblo enga chojninga: —Páblo a, jé ca atodo. E bacate Jerusalen gosode ome yadode, enga a jé badi upo jne rĩ iji Róma uje bajnei tu gu ujetiga atata yadode ome Róma gosode to jne rĩ.— 12 Dire uñai ga judíode uñane ore pésu dáyipiedie ome Páblo ujetiga ore chujé. Ore cho darúja re enga ore chojninga: —Yoco yocujuñame yoque jne ujetiga ca yujégo Páblo. Enga a ca yajo cuchárique jne enga a ca yójigopo cuchárique jne rĩ ujetiga ca yujégo Páblo.— 13 Jiei jnanione udore uje ore jmongarája Páblo. Chi ore sué 40 gai. 14 Diga ore tibágui sacerdóteode ore eduguéjnane, judíode angaránone ore enga ore chojninga: —A yoco yocujuñame yoque jne ujetiga ca yujégo Páblo. Enga a ca yajópo cucha pibotique jne rĩ enga a ca yójigopo cuchárique rĩ ujetiga ca yujégo Páblo. 15 Jecute átayoja yoque to, enga angoño soldádode ore eduguéjnai ujetiga chijnapo Páblo aja uacaquiningamei dirome rĩ. Enga chiese angachopísi bárique dirome. Mu a yujégo iji garãtique dirome ujetiga cáma chise uaque.— 16 Mu Páblo nero abi chudute uje ore jmongarája Páblo enga jno ga chicáji soldádode iguíjnai ujetiga chingome Páblo. 17 Uje Páblo chudute ojñane enga catecã́ri eduguéjnai uñai enga chojninga: —Bo ga ajinasia disi sudé aja eduguéjna cuchábi uje chi chingo gojñaringo aja jne.— 18 Soldádode eduguéjnai uté jnosi disi údi aja eduguéjnai ga chojninga: —Yocujurúgai Páblo tibidi yu que ujetiga yijinasia disi sudé aja ua. Enga chi angári ojñaringo jne.— 19 Eduguéjnai chisa disi jmanecai ga jno údi aja quedéjnai. Catecã́ri ga chojninga: —¿Jé gotígo a bojñaringo ome yu?— 20 Enga disi chojninga: —Judíode e ore chimate dáyipiedie ome Páblo yui. Enga chi ore chutai Páblo iji ua dirome ujetiga ajna Páblo aja ore aquiningamei ujetiga ore eduguéjna cuchábi, ore tangári Páblo ojñaringo dirome. Enga chiese ore tangaripísi dirome. 21 Ca angári ore jne. Bamo gu uje 40 jnanione udore uñane uje chi ore pógu re jne iji judíode eduguéjnane aquiningamei yui ujetiga ore chujé Páblo dirome. Enga chi ore cho dajuñame raque jne ujetiga ca ore chujé. Enga chi ca ore tagápo cucha pibotique rĩ, enga ca ore chójiapo cuchárique rĩ ujetiga ca ore chujé. E ore chimate dáyipiedie mu cucha amiri tu ujetiga ajuéga Páblo ome ore dirome ujetiga ore chajirapo adode aja quigode rĩ.— 22 Soldádode eduguéjna cuchábi chiroque disi aja doi mu chojningame: —Bo ga ca ango erámi jne uje udute bojñane udore.— 23 Udojo quigade enga eduguéjna cuchábi tibidi dojode eduguéjna gáño ujetiga chingo dáyipierigui aja ore enga chojninga: —Ajócãcho enga boyo iji dejai udé ujetiga e dejnínga. Enga acayóji Cesaréa. Enga ajínaño soldádorigo jne. 200 diguiji jnumi jne. Jeque buricai charisóningo 70 ore jne. Jeque ujórigo 200 diguiji jnumi jne ujetiga ore chijna dasóreringui.— 24 Chingo dáyipiedie ome ore to ujetiga Páblo cháji buricárique gai. Enga chingo ore ujetiga ore susipise Páblo guio iji dajei enga di daringárique ueca údi iji eduguéjnai Félix. 25 Chisi ome darusarane ome ore to ujetiga ore chijnóngaja eduguéjnai Félix. 26 Enga urusarane quigode u udojo: “Eduguéjnai Cláudio Lísias u yu uje yurúsãre yurusarane ome ua, eduguéjna Félix. Eduguéjna cuchape ua enga yirasiguipise bei. 27 Judíode ore chisa jnani tudé diríca enga chi ore chujérase jne. Mu uje udute ujnomei to uje chi Róma gose enga yiji enga yijína yirógode soldádo aja ore enga yarángome ore. 28 Mu yipota jeta yiraja uté bárique enga yiji údi aja judíode eduguéjnane aquiningai. 29 Mu jĩrique yiraja uje cucha bisidécho bade. Uje bade jé u ore dayode jnani bajade iroquéode ojningane cucha. Mu que tiógarapísa gotique ujetiga yujégo. Que tiógara to ujetiga pujuru gai. 30 Mu udute to uje judíode chimate dáyipiedie quigode ome Páblo uté ujetiga udore ore chujé. Jecute yirógaja ua enga e yingome guetesórone to ujetiga ore chatata detétigade ome Páblo ome ua ujetiga ajire cuchade udore aja quigode. E gusu yurusarane.” 31 Soldádode ore doi deduguéjnai uté áyipiedie ga ore jno Páblo údi iji dejai. Enga ore chise guidai iji dejai uje i tu Antípatris. 32 Dire uñai enga soldádode uje ore diguiji jnumone ore chajni aja soldádode iguíjnai. Mu buricai jnungórone jé ore nóna Páblo aja Cesaréa. 33 Uje ore di iji Cesaréa enga ore chisi ome eduguéjnai Cláudio urusarane ome eduguéjnai Félix, enga ore chisiapome Páblo ome to rĩ. 34 Uje chejna urusarane guesi uje chajire enga Félix catecã́ri Páblo ome Páblo unínique. Enga Páblo chojninga: —Yuniri tu Cilícia.— Uje chudute uje chi Cilícia gose enga chojninga: 35 —A yangári bojñaringo ujetiga betesórone ore di jne.— Enga chiroque soldádode uñéngo ujetiga ore na Páblo aja Heródes iguíjna cuchábi ajei, enga ore chirote iji uté.
1 Dirode chejna yijmanai iji udojo quigade enga sacerdóteode ore eduguéjna cuchábi Ananías di to. Enga nóna judíode ore angaránone uñane, jé aja ore utocaidi Tértulo ujetiga uté catecã́ri eduguéjnai Félix ome ore enga chingo ore guetétigade ome Páblo aja. 2 Uje ore chijna Páblo aja ore enga jé u uje ore utocaidi Tértulo catecã́ri eduguéjnai Félix enga chojninga: —Jé yacaranguipis ome ua, eduguéjna, uje tijode cho jnangome yoque iji yocuniri gu ua. Bayuquetotiguei u gu uje bajusipise yoquio. 3 Jecucha ga yimóngo bapesudode cucha iji yocuniri údode jnese enga yocacaranguipis ome ua. Eduguéjnapise ua, enga jé tiógara yoquicotaquéode ome ua. 4 Chamáña ujetiga diyajmaque yóguiji bari. Mu angarabi yoque chojmárarique. 5 Mu yingongome ua uje jnani udé pesupúsu judíode yocujuredie iji erámi údode jnese. Chamáñaje chacate ore ujetiga ca ore tangarapoi cuchárique rĩ, enga jogadi u uje judiode ore chajuque ñane ajéode ome cuchade. Enga yingongopome ua rĩ uje Nazaret gosi casicáite Jesus anguretasórone angarate jnani udé to. 6 Que gusu udore mu jnani udé chiraja Dupade iguíjna cuchábi uringai puyaque ome purása quedéjnane mu jé chijna udore uñai aja diríca ujetiga chacája. Jé u uje yisago diríca. Enga yocajéode u ujetiga yicoi yocai jnani bajai Moises urusarane quigode enga yoco yocujuñame uté. 7 Mu soldádode eduguéjna cuchábi Lísias chacája yoque enga chijnáji yocari uje jorane soldádode jiei. 8 Enga eduguéjnai Lísias chingome yoque ujetiga yatatago yoquetétigade ome uté ome ua iji de. Jec ango gójnia Páblo uté ujetiga jec ũré yógome udojo.— 9 Jé u uje judíode uñane uje ore déji uté to ore chajo raja jnese uje jé ũrepíso ore utocaidi ojningane cucha jnese. 10 Enga eduguéjnai e chusẽre Páblo to ujetiga narare dabai. Enga Páblo chojninga: —Yiraja uje iyajmaque ua ome baringai eduguéjna iji yocuniri. Jecute que yagutu yu ome yuruode gotique uje yĩrarare yibai iji baquei. 11 Ujetiga acatecãrirási yujode judío ore iji Jerusalen enga a ore chingo ua uje quene dirode gare iji yirídai uje yĩríji Jerusalen diríca. Uje cachi yigaidi upúsu ujetiga yiji judíode yoquisocade ome Dupade iji iguíjna cuchábi. 12 Enga que uñeque chimo yu ujetiga yibotãre cojñotique. Que yijnime pájningaringome yoqueduguéjnarique gotique rĩ uje ugúsi Dupade iguíjna cuchábi ajei. Jé upo uje ugúsi judíode aquiningamei guiguíjna. Jé upo iji yoquidai rĩ. Cachi yo paraguipise iji jogadode udore jnese. 13 Jecute obiréjna uje cachi ore urúo uje ore chaguhéta yibai iji baquei. Enga que toc ujetiga ore chise datatagode udore uringane ũréo gotique. 14 Mu jé yingome ua uje yayode jnani bajácho ore angureni Dupa jé yidupade u to enga yiji uté adode to. Mu yiji pisoca ichade ome yigaidode udore. Chiese ca Dupade acho Jesus anguretasórone yoquijmapié ichadie udire. Mu Dupade acho ãrie. Chamáñaje que yiya yangureta Dupade uruode atatasórone ore urusarane to jnese, jé aja Moises urusarane jnese to rĩ. 15 Yadi jé u jnanione udore ore adi to uje ore changureta Dupade ome togode ucuécaringuérique yui. Que gusu ayoré parágode, mu yanguretágo to uje sijnángone jé u ore to ujetiga ore ecápo to jne rĩ. 16 Jecute yajéode jecucha u ujetiga ca yagutéraque cho jora ome Dupade, jnanione ore rĩ ome yipesutique cucha gajnarétique. 17 Uje diyajmaque yu iji yajesúode erámio enga quene yajniapo aja yuniri diríca rĩ. Yĩri gu ujetiga yisi ome yujnunguenie plátai ome yocurása jmatágode iji yidaidatei. Jé upo rĩ ujetiga yẽrája Dupade. 18 Uje qué ugúsiji udore gai mu judíode uñane chise yu iji Dupade iguíjna cuchábi ajei uje ore tṍraji Ásia, uje quene yiya yuringai puruque ome Dupade. Enga cojñotígo que jiei ore iji yocari gotique, enga que pichorã́rique cusapo rĩ. 19 Ásia gosode udore a ore urásu ujetiga ore tibágui uyóguiji de ujetiga ore chaguhéta cuchárique yibai ujetiga ore chetaque yatique. 20 Jeoga jnanione udore uñeque iji de chatatame ua ujetiga judíode eduguéjnane chise yibárique diríca uje ugúsiji ore aquiningamei. 21 Jeoga yibai u uje yinguíra yibijnani aja eduguéjnane ore diríca uje yojninga: “Uacajicho yadode iji de gu uje uaquetácho uje yangureta uje chi togode ecápo jne rĩ.”— 22 Uje Félix chudute Páblo ojñane udore enga cha tangári ore. Chamáñaje que agupuraque go ome Jesus anguretasórone isocade. Jecute chojninga: —Quene yajirapo Páblo adode aja quigode rĩ ujetiga diga eduguéjnai Lísias di. Enga chingo yu gaté cucha dacadode udore quitígo.— 23 Jé u uje eduguéjnai Félix chingome eduguéjnai uñai ujetiga suruápo Páblo gai rĩ. Mu chojninga: —Ujetiga uté jorane pota ore tibágui enga ca ãrácho Páblo yui tome ore. Jec areque ujetiga ore cháta cuchade aja.— 24 Dirode jiei iji udojo quigade enga eduguéjnai Félix diapo rĩ enga nóna dacoté. Acoté i tu Drusíla, enga judía uaté. Enga Félix chiroque ore aja Páblo ujetiga ore di údi enga chacadape ore ome danguretaretigade ome Jesucrísto adode to. 25 Jecute Páblo chacate ore ome pisocade ujetiga yico yocuringárique ayoré paraque ome Dupade. Chacadápo ore rĩ ujetiga ore susipise dadode guio ome Dupade. Enga chingome ore to uje chi Dupade a chajire erámi unirisórone uyoque yocadode aja quigode jne. Enga Páblo acajnaquéode udore chajuque Félix aguté. Jecute chojninga: —Bo. Yangarapoi bacajnaquérigo jne rĩ ujetiga ca yisa yejórique.— 26 Félix ajéode upo rĩ ujetiga Páblo chisi daplátadie iji enga chijnímiji uringai pujurúgai. Jecute chãra re iji Páblo acajnaquéode enga jecucha ga tibidi. 27 Sequeredie gare mu jé ate udore. Mu udojo quigade enga Félix cha daringai eduguéjna iji uté, enga Pórcio Fésto doi jogadi. Mu Félix noñome Páblo iji te uje ore suru gai. Chamáñaje que pota gu ujetiga judíode chetaque atique.
1 Fésto di iji Cesaréa enga doi eduguéjnai Félix charidi. Mu dirode gadióguiji udore quigade enga jnopo rĩ enga chicáji Jerusalen. 2 Uje Fésto di iji Jerusalen enga sacerdóteode ore eduguéjnane, judíode ore urása obiréjnane ore chayója Fésto ome Páblo. 3 Enga ore chutai Fésto ujetiga chorepoi Páblo iji Jerusalen rĩ. Mu ore ajéode u ujetiga ore chujé Páblo iji Jerusalen yui. 4 Mu Fésto chojninga: —Cachi ore suru Páblo gai ãrie iji Cesaréa. Enga yajéode u ujetiga jĩrique yajniapo jne rĩ aja uté. 5 Omi tu ujetiga dacasutedie uñanie iji uacajade ore nóna yu aja Cesaréa enga jogadi u jne ujetiga udore ore chatata uaquetétigarigo ome Páblo ujetiga gajnarécho adode ome uaque.— 6 Que yimo ujetiga Fésto mochádode jeoga 10 u iji Jerusalen. Mu iji dirode udojo quigade enga chajniapo aja Cesaréa rĩ. Dire uñai u enga chácariji daringai eduguéjna charipi gai iji ore aquiningamei. Enga jé u uje chiroque ore ujetiga ore doi Páblo. 7 Uje Páblo chacája gari enga judíode ore sose yui uje ore tṍraji Jerusalen. Enga ore chaguhéta cucha datéode Páblo gai. Mu que toc ujetiga ore chise udore ore atatagode uringáringo ũréo go. 8 Páblo narare dabai enga chojninga: —Que yipésu cucha gajnarétique gotique. Que yetaque Moises urusarane ojningárique cucha go uje purusãracho ome judíode uyoque. Que yopo cucha bisidéguiji Dupade iguíjna cuchábi rĩ. Que yiyopo Róma gosode eduguéjna cuchábi gãrétique cucha gai rĩ.— 9 Mu Fésto que pota jeta judíode chetaque atique, jecute chojningame Páblo: —¿Ja apota ya jeta yicagobíji Jerusalen ujetiga pajirique badode iji uté a?— 10 Mu Páblo chojninga: —Róma gosode yoqueduguéjna cuchábi ipesute bajogadi udé ujetiga ajire cuchade aja quigode iji. Jecute jé tiógara ujetiga pajirique yadode aja quigode iji udé. Barajápise to uje que yipésu cucha gajnarétique ome judíode gotique. 11 Ujetiga jec ũré yibárique u cucha datei enga que yãraque yu ujetiga ore chujé yu. Mu ujetiga cachi ore chaguhéta cuchade yibai enga que ese udore ore atatagode uringane ũréo enga que tiógara go ujetiga pẽrate yu ome judíode ore. Yipotigádi u ujetiga Róma gosode eduguéjna cuchábi chajire yadode aja quigode.— 12 Uje Fésto chejna guesi uje catecã́ri dojode eduguéjna iji uraque daquiringai enga Fésto chojningame Páblo: —Bajéode u ujetiga Róma gosode ore eduguéjna cuchábi chajire badode aja quigode. Jec areque. A acáji Róma jne.— 13 Jiei dirode iji udojo yui enga eduguéjnai Agrípa, Berenice ore chicáji Cesaréa ujetiga ore chidójnonga Fésto. 14 Uje e ore mochádode jiei iji Cesaréa ga Fésto chingo Páblo adode aja eduguéjnai Agrípa enga chojninga: —Ore jurúgai déji de uje Félix noñome iji de diríca. 15 Uje yugúsi Jerusalen enga sacerdóteode eduguéjnane, jé aja judíode angaránone ore chayója yu ome uté ujetiga yisi ome pitoringai ome. 16 Mu yojningame ore uje dacasutedie uyoque uje Róma gose yoc que yoquisoca to go ujetiga yujégo yocujórique ayoré ujetiga ca uté narare dabai iji detesórone iquei. 17 Jecute uje ore di diríca enga que yãra yu iji cuchárique. Dire uñai ga jĩrique yiyáji yuringai eduguéjna charipi gai iji yocaquiningamei. Ga yiroque yirógode aja ujetiga ore doi jnani tuté. 18 Cachi yajéo uje Páblo jeodeti bárique cucha daté. Mu udute guetesórone ore ojñane enga cucha bisidécho ore aguhétajade ome Páblo. 19 Gusu ore guetei iji uté u uje chiese ca doi dayode jnani bajade adode. Ore chotigásapo rĩ ome jnani uje i tu Jesus uje chi toi mu chiese ecápo rĩ ome Páblo. 20 Que yiraja yisocáringome cuchade udore. Jecute yojningame Páblo: “¿Ja apota ya jeta yico ga yicagóji Jerusalen ujetiga pajirique badode aja quigode iji uté?” 21 Mu Páblo pota jeta Róma gosode yoqueduguéjna cuchábi Augústo chajire adode aja quigode. Jecute qué yaquĩ́ra iji uringai pujurúgai iji de, jé aja diri ujetiga yorei iji Róma.— 22 Enga Agrípa chojninga: —Fésto a, yajéode u ujetiga qué yangári jnani uté ojñaringo to.— Enga Fésto chojningame: —Jec arec. A angári ojñaringo dirome.— 23 Dire uñai ga Agrípa, Berenice ore di enga ore chacája daguidé ueradéjnanie. Soldádode eduguéjnane ore di to, jé aja cojñoque atade uje ore tṍraji ore idaidatei. Enga ore chacája guíjnatajé cuchábi jnese. Enga que ore chuseque rágaja ajei. Enga jé u uje Fésto chiroque darógode aja Páblo ujetiga ore di údi. 24 Uje Páblo di enga eduguéjnai Fésto catecã́ri darijogonórone enga chojninga: —Yijna jnani uté aja de gu ujetiga eduguéjnai Agrípa, yocarijogonórone uáguiji de ajicho to. Jiei jnanione iji judíode ore uje ore chingo detétigade aja yu ome uté adode. Que gusu iji Jerusalen, mu jé u to iji Cesaréa udé. Enga que ore cha catecã́ri yu ome uté ujetiga yisi ome pitoringai ome. 25 Mu uté bade que cucha datéo gotique. Jecute que tiógara ujetiga chuque ome yajéode. Mu uté pota jetiga eduguéjna cuchábi Augústo chajire adode aja quigode. Jecute yajéode u ujetiga yoreji eduguéjnai Augústo. 26 Mu que yiraja yuru quitígo iji yurusãratígo ome yeduguéjnai Augústo. Jecute ijnája uacari iji de. Cuchiyi tupúsu ua eduguéjna Agrípa. Enga yajéode u ujetiga acatecã́ri enga angári ojñaringo enga jé u ujetiga ango yu bárique ujetiga yiraja yuru quitígo ome yurusãratígo. 27 Uje quedéjna ome yu ujetiga piroque pujurúgarique aja yoqueduguéjna cuchábi ujetiga ca pirajaque bárique.—
1 Enga eduguéjnai Agrípa chojningame Páblo: —Atata bojñaringo ome yoque.— Enga Páblo chãrai dajmanai iji ore enga doi enga narare dabai. Enga chojninga: 2 —U ãrie, eduguéjnai Agrípa. Yacaranguipise ome ua uje bapota ujetiga angári yojñaringo ome yetesórone judíode ore aguhétajade cucha yibai. 3 Omi tu ome yu uje e baraja judíode uyoque yoquisocade. Enga barajápo rĩ uje judíode uyoque jecucha ga yibotã́co ñane. Jecute yingome ua ujetiga angarabi yu enga ca acho angári yu. 4 Judíode ore chiraja jnese yadode iji yuringámi disape iji yuniri, enga ore chirajápo yadode iji Jerusalen rĩ. 5 Ore chiraja to rĩ uje fariséo yu uje qué jnacare yu nanique enga a ore chingorása ua uje jé ũré yu ome udore ujetiga ore pota. Bamo uje fariséode ore upúsu uje ore chejna rángaja judíode adode enga ore dopísi quigode. 6 Ore chijna yu aja udé gu ujetiga pajirique yadode aja quigode. Uje ore gueteguipísi u iji yu uje yangureta Dupade uruode uje chi togode ecápo rĩ. Uje Dupade jé urúo udojo nanique ome yocayode jnani bajade. 7 Israel gosode uyoque uje yocuáguedie gare iji yirídai yiróco jnese ujetiga Dupade uruode udore tocade enga togode ecápo rĩ. Jecute que ore cha tangári Dupade enga ore doi iroquéode iji dirode, dejade ore jnese. Eduguéjna Agrípa, jé yadi upúsu ore adi to uje yangureta pucuecaringué ichárique yui to. Mu jé ore chetaque cuchade udojo ome yu. Enga ore chaguhéta cuchade udojo yibai. 8 ¿Ja jec ũré yu a, uje uacanguretáyo to uje Dupade chi chiqueta togode jne? 9 Jéodeti omone yu to nanique ujetiga yipésu cucha gajnarétigo ome Jesus, Nazaret gosi, anguretasórone to. 10 Jecute yo yumajo ore nanique iji Jerusalen. Enga yijna sacerdóteode eduguéjnane urusarane ome ore enga yujuru Jesus anguretasórone gáyode. Que gusu udore mu uje ore chujé ore enga que yetaque go. 11 Jecucha yo yujuñame ore to. Uje yajéode u gu ujetiga ore cha changureta Jesus. Yo yujuñame ore iji judíode aquiningaméone guiguíjna jnese. Enga yajnápo ore aja purása quedéjnane idáyode to rĩ uje yagúpusu yejode. 12 Sacerdóteode eduguéjnane ore chutṍri yu aja Damásco to ica, enga yijnoque ore urusarane aja uté. Uje yigaidi u gu ujetiga yisa Jesus anguretasórone iji uté. 13 Eduguéjnai Agrípa, uje e ugúsi dajei iji Damásco yui, enga guedé doi gatocoro, enga direcaringué cuchábi chiqueta raja yoque, yijorane ore uyoque. Enga sué guedé gai. 14 Enga icórangoja jnumi jnese. Enga udute darade enga doi judíode yocuruode hebréo. Enga chojninga: “Sáulo a, Sáulo a. ¿Jé gotique gu a uje bo bamajo yu? Mu bamajópisi u ua. Uje bajnui u aquirájnai uje chuchiéjna derasṍri asõre uje gachisṍri ipesudé ome.” 15 Yichajnai darade udojo enga yojninga: “¿Jé ua gosi te a?” Enga yocangarádejnai Jesus chojningame yu: “Jesus u uyu, bamajoi. 16 Mu ãriji enga ayague. Chamáñaje iqueta yu aja ua gu ujetiga be yiroquéode jne. Mu que gusu deréjnai udé uje yiqueta yu aja ua, mu a yiquetápo yu aja ua rĩ iji dirode uñéngo. Enga bajnei tu ujetiga atatame erámi bamone cucha jnese uje yingome ua. 17 Ujetiga diga be yiroquéode enga judíode, purása quedéjnane a ore pota chutígome ua jne. Mu a yãraque ua ome ore. Mu a yiroque ua aja purása quedéjnane jne. 18 Yiroque ua aja ore gu ujetiga acate ore ome yadode to. Chamáñaje ore gajnúone u ayoré edoparigode. Enga cho ujetiga ore déji ijnangununie ajéode. Diga ore changureta bacajnaquéode ome yu enga cho ujetiga achẽre ore edodie gáyode enga quene díreca ore ejode. Que yipota gu ujetiga Satanas jno ore údi uje sué ore gai, mu yipota ujetiga ore changureta yu enga ore doi Dupade adode to. Yipota to ujetiga yĩro ore isijnaringuéone ujetiga Dupade cháta ore aja danoningañane to jne ome dẽratígo cucha omío.” 19 Eduguéjnai Agrípa, bamo uje que angoneparique yu ome gaté unirisṍri Jesus uje chiqueta raja yu. 20 Mu jĩrique yacate Damásco gosode bajaque ujetiga ore chécãre dadode enga ore chajni Dupade gai, enga ore doi date omone ujetiga pijógome ore jnese uje e ore chécãre dadode. Udojo quigade enga yiji yacajnaquéode udore údi aja Jerusalen, jé aja Judéa údode jnese, jé aja purása quedéjnane ore rĩ. 21 Yibade u udojo ome judíode ore uje ore chisa yu iji Dupade iguíjna cuchábi enga ore chujérase yu. 22 Mu que yiya go uje yacate cojñone ore ome Dupade adode. Chamáñaje yátajasõri u Dupade gu. Jecute yacate cojñoque atade enga yacadápo cojñoque jmatágode ore rĩ. Enga yacajnaquéode que cãra re gotique ome Dupade uruode atatasórone, Moises ore urusarane quigode uje ore chatata jnese uje cucha dacadode udore a tocade jne. 23 Chamáñaje udore ore chatata jnese uje judíode yoquijnati Crísto gajnei tu ujetiga chejnáreque re enga toi ome yoquisijnaringuéone. Enga chi uté u to jne ujetiga chijñate yurásade judío ore gáyode, jé aja purása quedéjnane ore gáyode rĩ. Gaidi u gu ujetiga ore chise daringane piquetaque jnese.— 24 Uje Páblo urúo udojo uje narare dabai enga Fésto chinguíra dabijnani aja enga chojninga: —Ũruso ua, Páblo a. Jiei bajirigode iji darujna aone, enga udore u uje ore ipesute bãrusoringuei.— 25 Mu Páblo chajnai ga chojninga: —Que ũruso yu go, eduguéjna cuchábi Fésto a. Jec ũré yu ome yojningane udore jnese. 26 Eduguéjnai Agrípa uté u uje chirajápise cuchade udojo quigode. Jecute que yagutu yu ome yojñane iji gari. Ise ga jec ũré yu uje eduguéjnai Agrípa chiraja udore uje que pipoguiécho Jesus adode gotique nanique. 27 Eduguéjnai Agrípa, ¿ja e angureta Dupade uruode atatasórone ore ojningane cucha to a? A e angureta ãrie.— 28 Eduguéjnai Agrípa chojninga: —A bajéode u ujetiga jĩrique yangureta Jesus ome bacajnaquéode uje garósi bacajnaquéode múñi.— 29 Páblo chojninga: —Garósi yacajnaquéode mu a jiérasi marínga, yajéode u ome Dupade ujetiga arate yu aja yanguretaretigade ome Jesus. Cho ujetiga gusu ua, mu yojningane jé u udore ore jnese to uje ore tangári yu iji de. Mu aracho yu aja yadode marínga ca pigarique uaque.— 30 Uje Páblo chejna daruode udore guesi ga jé u uje eduguéjnai Agrípa chague, jé aja Berenice, eduguéjnai Fésto ore. Enga ore garijogonórone ore chague jnese to. 31 Enga ore chicai quedéjnane ome Páblo ujetiga ore catecã́ri ñane ome cucha dacadode udore. Enga ore chojningame ñane: —Jnani tuté que bade cucha datéo gotique ujetiga yisíngome pitoringai ome. Que tiógara to ujetiga pujurúgai rĩ.— 32 Eduguéjnai Agrípa chojningame Fésto: —A yirangorásome iji de gajneri, mu chamáñaje pota jeta Róma gosode yoqueduguéjna cuchábi chajire adode aja quigode.—
1 Uje e ore chimate dáyipiedie ujetiga ore chorei Páblo uyóguiji Itália, enga ore chisi ome Páblo, ujode pujurúgayo ore ome soldádode eduguéjnarique uje i tu Júlio. Soldádode uague uje i tu Augústo Irógode ore eduguéjnai u uté. 2 Yico ga yacágoja cuco cuchábi uje garani u ore idai Adramítio. Enga cucoi uté chi quigode u guidáyode iji yote quedéjnai edógayode iji Ásia. Aristárco nóna yoque to uje uté idai u Tesalónica uje déji ore uniri Macedónia. 3 Dire uñai ga yico ore idai uje i tu Sidon uje déji yote quedéjnai edógai. Ore idai uté u uje Júlio chosõripise Páblo iji enga juéga disorãi ome ujetiga tibágabi dajorane enga udore ore cháta cuchade aja. 4 Yicoji Sidon mu úyujna cuchábi chãraque yoquiquei, jecute yicagóji yote quedéjnai ajã́ro Chipre uéchai uñai uje úyujna cuchábi garósi iji uté gu. 5 Yico ga yiyógo punirone Cilícia, Panfília ore gai. Enga yico ore idai Míra uje déji ore uniri Lícia. 6 Soldádode eduguéjnai Júlio chise cucoi iji uté ore idai uje garani u ore idai uje i tu Alejandria. Enga uté qui u Itália. Enga eduguéjnai Júlio chiroque yógaja cuco cuchábi uté ujetiga yacágoja ujetiga jé yico. 7 Jiei yoquimochádode iji dajei. Quirĩque yico gu. Enga ore chidota rágaja uje ore chijocase cucoi aja ore idai Gnído yui. Yico Gnído tiógarei mu qué úyujna chãraque yoquiquei. Enga inguírangoja ore idai Salmon gai uje déji yote quedéjnai ajã́ro uje i tu Créta. 8 Yico ga ore chidota rágaja uje ore chijocase cucoi uje yajnángo yote quedéjnai qui iji. Enga yico yote quedéjnai ocoro uje i tu Ocoro Ueradé. Yote quedéjnai ocoro uaté idógosiji ore idai uje i tu Laséa. 9 Diyajmaque yóguiji yote quedéjnai ocoro. Enga esoi chise yóguiji. Enga gajnareque jeta ore chacája cucode iji esoi iji yote quedéjnai uté. Jecute Páblo cho ore quique. 10 Enga chojninga: —Yijorane uaque a, gajnareque jeta yicopo rĩ. Uje a yoquibi cuco pero jne gu. Enga a yijnájoi yocugúchade jnese jne. Jé soca yijnájopoi uyoque jnese to jne rĩ.— 11 Mu que eduguéjnai Júlio tangári Páblo aquĩraquéode udore go. Chamáñaje cucoi gajnesṍri, jé aja ijocayasórone ore irósõri ore chajo raja jnese gu uje a ca cuchárique chósi ti iji ore ujetiga ore jnopo aja daqui rĩ. Jecute eduguéjnai Júlio angaránone u ore. 12 Chi gajnareque yote quedéjnai ocoro uaté iji esode. Jecute ore ajéode u ujetiga ore jnoji uté, soca ore chise ore idai iji yote quedéjnai edógai uje i tu Fenice. Enga jé u ujetiga ore chácariji uté jé aja esoi eruei. Chamáñaje yote quedéjnai ajã́ro uaté chãraque umusoi, casaque ore iquéode gu. 13 Emami diósi ga tṍraji umusoi garani. Jecute ore jose eti jé areque jeta ore jno. Ore jno enga ore charose rágaja yote quedéjnai ajã́ro uje i tu Créta. 14 Mu ore chuningame eti úyujna cuchabe chachẽre ore enga chaquesu cucoi údode uje tṍraji casaque garani. 15 Casaque chorei yoquibi cuco iji quedéjnane. Jecute que ore chijocásapo rĩ enga chorei yóguiji dajesui. Chamáñaje que ore chajno cucoi gu ujetiga ore chorei yoquiqui. 16 Yicagóji yote quedéjnai ajã́ro atíamia uéchai uje i tu Cláuda, enga querénga úyujna chubúchu jnumi iji uéchai uñai. Idotágo yógaja enga imácosi yocujnungámi cuco abape aja cucoi ajei uje cucoi churugúsosi iji daquigade. 17 Uje e ore chimánosi cucábi aja cuco cuchábi ajei ga ore chigaru cuco cuchábi ome enuéjnane. Ore todo yui gu ujetiga cucoi chicáji ujnanie jogadi uje i tu Sirte. Jecute ore chiamurase borapéode iji cucoi gai, enga cucoi chicai úyujna quigode. 18 Mu dire uñai ga acherangóri jé ate. Jecute ore tṍra cucoi ugúchade aja yote quedéjnai. 19 Dirode e gadiógome úyujna cuchabe iji yote quedéjnai ajei, enga yórango cucoi erásorone cucha aja yote quedéjnai to. 20 Chamáñaje dirode e jiei uje guedé que tocadepo rĩ. Enga que yimóngo guédoraque iji dejade rĩ. Enga acherangóri jé ate, uje tṍra yoquibi cuco aja quedéjnane. Enga que yijoco ati qué yiquecagopo jne rĩ. 21 Uje e iyajmaque uje que yajo yoquibotique enga Páblo chague enga chojningame yoque: —Yijorane uaque a, a angáchoi yu diríca enga ca yicorási iji yote quedéjnai ajã́ro Créta casé diríca. Enga a ca yijnajorási cucoi ugúcha casodé. Enga a ca yijnajoporási cucoi te rĩ. 22 Mu ca oyo uacáyugu uaque. Uje a cucoi pero jne marínga, a ca uacuñeque toi jne. 23 Uje Dupade iroi gaté unirisṍri uñai chiqueta raja yu que iji dejai udé. Yajnesṍri Dupade chiroque uté aja yu. Chamáñaje yiji Dupade uté iroquéode gu. 24 Enga Dupade iroi uté chojningame yu que: “Páblo a. Ca atodo. Bajnei tu ujetiga ango ua aja Róma gosode eduguéjna cuchábi dirome jne. Enga Dupade pota chiqueta ua iji yote quedéjnai udé. Jecute a chiquetápo bajoráringo ore jnese to jne enga a ca uñeque toi jne. Yojningane u udore ore jnese uje ore déji cucoi udé ajei.” 25 Jecute jé ejnáño uágaja, yijorane uaque a. Chamáñaje yangureta Dupade ome udore, enga a Dupade iroi uruode tocade jnese jne ome yoque. 26 A pero yoquibi cuco udé uje acherangóri a tṍra yoquibi cuco aja yote quedéjna ajã́roraque jne.— 27 Dirode e gagájni iji yirídai ome acherangore cuchábi iji yote quedéjnai ajei. Enga ugúcoji yote quedéjnai jogadi uje i tu Ádria. E dejaque enga acherangore cuchábi chorei yoquibi cuco iji quedéjnane. Mu uje e dejníngai gatocoro enga cucoi ijocayasórone ore chiraja uje e yirõco yote quedéjnai ajã́roraque. 28 Ore chuga jnumi yui enga 36 métrodie iji jnumi yui. Enga ore jnopo rĩ enga ore chugapo jnumi yui iji ta rĩ enga e 27 métrodie iji jnumi yui. 29 Ore todo ujetiga cucoi chinguíra raja cucaranéringui, jecute ore tṍra cucoi isangúrone, guebeque iménuo gagájnione aja jnumi iji quigade ujetiga ca jno. Enga ore jnátu diri yui uje ore todópisa jnese. 30 Mu cucoi ijocayasórone ore tõrasia cucoi ababi aja yote quedéjnai. Ore ajéode u gu ujetiga ore chayome cucoi ujetiga diga pero. Mu ore chãra ránguiji cucoi isangúrone iji iquei uje chiese qué ore chiamurásaja jnumi. Ore gaidi u gu ujetiga uñane ca chiraja ore. 31 Mu Páblo chiraja enga catecã́ri soldádode eduguéjnai, jé aja soldádode ore rĩ enga chojninga: —Udore a ore jno iji cucoi jne enga a ca uacuñeque eca jne.— 32 Jecute soldádode ore chaquesu enuéjnane iji cucoi ababi enga yote quedéjnai jnosi údi. 33 Dirájnai enga Páblo chingome ore ujetiga ore tagu cuchárique. Enga chojninga: —Dirode e gagájni iji yirídai uje que amóñopo rĩ enga que achopo uacabotique to rĩ. 34 Angáchoi yu enga acho uacabotígo enga etoque uágaja jnumi ome yote quedéjnai yui jne. Enga a ca yijnájoi yocuñeque jne. A yiringopo yocuringane etoque údi jnese jne rĩ.— 35 Páblo chejna daruode guesi enga chisa arurétique. Mu qué catecã́ri Dupade bajaque iji dajorane ore iquei. Enga jé u uje chajuque enga tagu. 36 Enga jĩrique ore cha dasadodéringai enga ore chirate Páblo aja chagúi enga ore tagu dabosode jnese. 37 Jiei yoque ga 276 yoque iji yoquibi cuco ajei. 38 Uje ore chejna chagúi guesi enga ore tṍra cucoi yuguedie trígo aja yote quedéjnai. Ore ajéode u ujetiga cucoi cho pujnúrique. 39 Uje direjnipe ga cucoi ijocayasórone ore chiraja uje e idógosi ore iji yote quedéjnai ajã́ro uaté, mu que ore chimo to nanique, enga que ore chirajápo írique rĩ. Mu ore chimo uje yote quedéjnai ocoro déji uje jnumi chajnecara raja enga ore pésu dáyipiedie ujetiga ore chijocase cucoi aja ocoro uaté, ¿jé soca ore chise jne? 40 Jecute ore chaquesu enuéjnane iji cucoi isangúrone, enga guebeque iménuone udore noñáji yote quedéjnai údi. Ore chejñu cucoi erasórone to enga ore chijocase cucoi ome udore. Enga ore chasingare cucoi jogosórone borapécho iji cucoi iquei ujetiga emi chubúchu enga jno cucoi údi. Enga cucoi jnome jnumi yui. 41 Mu cucoi chise uje yote quedéjnai jochade gare iji enga cucoi únoi catája jnumi. Enga yote quedéjnai imesera cuchábedie chibéro cucoi iji quigade enga chajuque aja quedéjnane. 42 Soldádode ajéode u ujetiga ore chujé darodigode pujurúgayo. Ore todo gu ujetiga ore doi jnacoi aja yote quedéjnai ajã́ro enga ore noñáji uté. 43 Mu soldádode eduguéjnai que pota chugome Páblo, jecute que juéga chui ome ore jurúgayode. Mu chojninga: —Boyo, enga uñéngo doi jnacoi bajagája yote quedéjnai ajã́ro ujetiga chiraja. 44 Enga uacuñéngo chujé rágaja cucoi perode gai aja guesi yui.— Enga jé u uje ore di iji jnumi jnese enga que uñeque toi.
1 Uje e yico guesi jnese ome yocuringane ueca enga cojñone ore chingo yoque uje yote quedéjnai ajã́ro chi i tu Málta. 2 Yote quedéjnai ajã́ro unirisórone ore irasique yoque enga ore chosõripise yoque. Ore chiqueta pioguéjnai ome yoque ujetiga yoríago. Chamáñaje beque enga tejnupise. 3 Enga Páblo doi pite togode to enga chadíja pioi. Mu ugai doi guesi tiji pidode uje todo pioi jurũachuringai enga catája Páblo jmanai. 4 Uje yote quedéjnai ajã́ro unirisórone chimo uje ugai catája Páblo jmanai enga ore chojningame ñane: —A ayoré yungore jnani uté jõ. Eca iji yote quedéjnai mu a quene isijnaringuéone chajni gai enga ugai a chequésãre jne.— 5 Mu Páblo chimesere ugai aja pioi iji dajmanai. Enga que cuchárique chósi ti iji Páblo. 6 Ore jnátu jnese ujetiga ugai potipídi guejna iji Páblo, jeoga toi ome. Mu uje iyajmaque uje ugai tagu Páblo enga que cuchárique chósi ti iji, jogadi u uje ore chécãre dajéode enga ore chojninga: —A dupa jõ.— 7 Yocoridi pioque idógosi iji Málta gosode ore eduguéjnai gajnepídi erãpe. Enga ore eduguéjnai uté i tu Públio. Uté chijna yógaja daguíjnai enga yoquimochádode gadioque iji gari iji iguíjnai. Enga que chuseque yoque. 8 Mu ejnaretaque yocupusiédi Públio dayé. Ducosi tagu enga chátaja pajei chagúi ome. Enga Páblo tibágui enga chisíji mochápi gai. Enga Páblo catecã́ri Dupade ome enga chicha dajmáinie aja gai enga uringai ueca jé u. 9 Uje cojñone ore chimo uje Páblo chiqueta enga yote quedéjnai ajã́ro unirisórone ore chijna darása ejnaretade aja Páblo to jnese. Enga Páblo chiqueta ejnaretade ore jnese. 10 Enga ore tẽrája yoque uje caniraque ore ome yoque. Uje e yicopome yote quedéjnai enga que cucha amínique cuse ujetiga ca ore chisi ome yoque ome dajei yui. 11 Uje yoquejnane guedosío gadioque iji yote quedéjnai ajã́ro enga e yicopome cucoi. Yoquibi cuco cuchábi chi garani u ore idaidatei Alejandria ica mu chejna esoi tiji yote quedéjnai ajã́ro Málta. Ayoré gajnúone gare iji cucoi uté iquei uje ore íode u Cástor, Pólux ore. 12 Yico ga yico ore idai iji yote quedéjnai edógai uje i tu Siracúsa. Enga yoquimochádode gadióguiji uté. 13 Yicoji uté enga yaroco yógaja yote quedéjnai edógai. Enga jé usájoja ore idai uje i tu Régio. Dire uñai enga emami di ga tṍraji umusoi garani. Yico enga dire uñai enga yico ore idai uje i tu Puteóli. 14 Yico yocujode Jesus anguretasóño iji uté, enga ore irasique yoque. Jecute ore chaquĩ́ra yoque enga yoquimochátigo gare iji ti iji ore gari. Quigade enga yicome ore idaidatei Róma yui. 15 Yocujode Jesus anguretasóño iji Róma ore chudute yocujnomei. Jecute ore chachai yoque. Enga yico ñane iji jogadi uje i tu Fóro de Ápio; jec iji ore idai Las Tres Tabérnas rĩ. Uje Páblo chimo ore enga chacãre Dupade gai ome ore enga tijode cho jnangome. 16 Uje ico Róma enga soldádode eduguéjnai chisi ome darodigode pujurúgayo ome pujurúgayode irodisórone eduguéjnai. Mu ore cãra Páblo qui ome ujode pujurúgayo. Enga ore juéga ujetiga Páblo chucué daguíjnarique. Mu jé soldádo chojmarai cháji gari ujetiga chirote. 17 Dirode gadióguiji diringai yui enga Páblo tibidi judío atade uje ore idai jé u Róma to. Uje e ore chamáta rágaja enga Páblo chojninga: —Yujode judío uaque a, que yurúrique gajnaréngaja judíode múñi. Que yetágapo yocayode jnani bajade adode rĩ. Mu jé ore chigaru yu iji Jerusalen enga ore chisi yu ome Róma gosode. 18 Uje Róma gosode ore catecã́ri yu enga que ore chise detepítiguiji yu enga ore chĩrarásome yu uje que ore chiraja yibárique ujetiga chuque yu. 19 Mu yujode judío ore chetaque. Jecute yingome ore ujetiga Róma gosode ore eduguéjna cuchábi chajire yadode aja quigode. Mu que yetaque yurásade judío uñeque atique gotique, enga que yajéode u gotique ujetiga yaguhéta ore gai gotique to iji udé. 20 Mu yibidi uaque gu ujetiga yĩrarare yibai iji uacaquei. Uacamóño uje ore jurúgai yu enga ore chigaru yu ome ojnaquerodie udaji. Mu que yipésu cucha gajnarétique gotique. Gusu uje yangureta Israel gosode yoquijnati Crísto to enga yibai u uté ome yetesórone judío ica uje ore chisa yu.— 21 Enga udore ore chojningame Páblo: —Que yudúco bajnomérique to ome yocajnetígo purusãracho uje yoquijorane iji Judéa ore churúsãre ome yoque. Yocujode judío díode que ore ojñaringo gajnaréngome ua rĩ. 22 Mu a yangacobi bojñaringo ome banguretaretigade udore. Uje udúco to uje cojñone ore iji erámi jnese ore chetaque pacajnaqué ichade udore.— 23 Jecute ore chimate diri ujetiga Páblo chacate ore iji. Jecute chise gojni diri uté enga cojñone ore chamáta ñane aja Páblo charipi guiguíjna enga jiei ore. Enga Páblo chacate ore iji dúrase ga chuságaja guedé jnoringai. Enga chingo isocai ome ore ujetiga ore chise daringáringo purása ome Dupade to ujeta Dupade u ore asuté to. Enga angúroméone u Moises urusarane, jé aja Dupade uruode atatasórone ore urusarane to rĩ uje chatata judíode ore ijnati Crísto adode. Gaidi u gu ujetiga chimate ore aja panguretigai ome Jesus, uje judíode ore ijnati Crísto u. 24 Uñane ore chimesere Páblo acajnaquéode mu uñane que ore changureta go. 25 Jé u uje ore botãripise ñane. Uje e uásejna ore ibotaquéode enga jogadi u uje que ore chisápo ñane unétique rĩ, enga ore cho jmíti jmíti ome ñane. Mu uje cáma ore jnopise enga Páblo chojningame ore: —Jé ũrepise Dupade Ujopie Espíritu Sánto uruode ome yocayode jnani bajácho uje angúromei u Dupade uruode atatasṍri Isaías nanique. Uje chojninga: 26 Bo, ga ango yuruode aja barásade judío ore. Ojninga: A adúcho yuruode jne marínga, a ca arajáyo quigode jne. A amóñopo yu jne rĩ mu a ca arajáyo yuringai cuchape jne. 27 Chamáñaje angoninguite parigui pise Israel gosode udore ore gu. Enga que ore tangári yu. Cho jetiga ca ore edóraque cuse. Chamáñaje ore gaidi u ujetiga ca ore chimo. Enga ore gaidi upo rĩ ujetiga ca ore chudute cuchárique. Que ore pota gu ujetiga ore chiraja. Que ore pota rĩ ujetiga ore chajni yibai enga yiqueta ore. 28 Anóningacho gajneri uje Dupade a chingo daringai piquetangore ome purása quedéjnane iji erámone jnese uje que judío ore gotique. Enga a ore tangári jne.— 29 Uje Páblo urúo udojo enga judíode ore jno. Enga ore botãripise ñane ome Páblo acajnaquéode udore. 30 Páblo guejnanie sequeré gare iji dapari guiguíjna iji Róma uje cho oré ome. Enga nína dabaguiesórone jnese uje ore tibágui iji apari guiguíjna uté. 31 Enga Páblo jno dacajnaquéode údi ome cojñone gatuaque, gatuaque enga que pijocayagome acajnaquéode udore gotique. Jecute chingo isocai ome ore ujetiga ore chise daringáringo purása ome Dupade ujetiga Dupade u ore asuté to. Enga chacadápo ore rĩ ome yocangarádejnai Jesucrísto adode.
1 Páblo uyu uje yurúsãre yurusarane ome uaque. Jesucrísto iroi uyu enga Dupade ajegáite yu nanique ujeta cho daróguiji yu ome daruode. Gaidi tu gu ujetiga yiji ga yatata áyipie omenie ome ore ga ore uringane piquetaque jogadi jé u. 2 Dupade uruode atatasórone ore chatata Dupade áyipie omenie udaji to nanique iji darusarane Dupade uru taninguíone. 3 Enga ore urusarane udore júdi u yocangarádejnai Jesucrísto, Dupade Abi. Jesucrísto uté garani u jnani bajai eduguéjnai David ome daringai jnutiminore. 4 Mu que potigayaquérique déji uje Dupade Abipise. Chamáñaje uec ome pisijnaringuéone uje Dupade Ujopie Espíritu Sánto jogadipise nanique, enga obiréjna uje ujopierãque. Chamáñaje ecápo rĩ iji datoringai gu. 5 Enga Jesucrísto uté u uje di Dupade icaniratiguei údi iji yoque, enga yocuringane Dupade ajegáite ome daruode garani u to. Gaidi u gu ujetiga yimáco erámi unirisórone uñéngo aja panguretigai ome Dupade enga angoninguite guesac ore to ome adode. 6 Enga Dupade ajegáite uaque to iji uaquedai Róma ujetiga átayo uágaja Jesucrísto to. 7 Jecute yurusarane gajnengórone u Róma idaisórone uaque. Chamáñaje Dupade chijnorapise uaque gu. Enga ajegáite uaque gu ujetiga ueque uágome pisijnaringuéone to. Yocajéode u ujetiga yocai Dupade, yocangarádejnai Jesucrísto ore chatapísaja uaque ga uacajneque ore ajesereringai to. 8 Yingome uaque bajaque uje yacãre Dupade gai ome Róma gosode uaque jnese uje yicatecã́ri enga yĩ́care Jesucrísto i. Chamáñaje uacajnomei que eruénique erãpe cuse gu. Uje chi ũrepise uacanguretigai gu iji Dupade. 9 Yanguretapise Dupade ome yáyipie jnese ga jecucha ga yatata Ujnacari ujnomei ome ore to. Enga yangureni Dupade chiraja uje que taque yu go uje yingome uaque uje jecucha yicatecã́ri Dupade ome uaque. 10 Jecucha ga yicatecã́ri Dupade to ujetiga ajéo ga yicabíji uaque to. Chamáñaje e diyajmaque uje yipotapísa uaquéode to nanique. 11 Yipota jeta yise uaque ga yatataba Dupade uruode ome uaque uje cáma pacadique uágome to. Yigaidi tu gu ujetiga uajate uáguiji uacanguretigade iji Dupade gaté. 12 Yigaidi tupo rĩ ujetiga yoco ñane quique ome panguretigai gaté ome Dupade. Chamáñaje panguretigai ome Dupade déji yoque jnese gu. 13 Yijorane uaque a, yipota ujetiga arajáyo uje yajéode u ujetiga yise uaque gatuaque mu que togome yu gotique, jé aja dirode udojo. Yigaidi tu gu ujeta cucha onique tṍraji uaque to ome Dupade. Adi tu uje e yimate purása quedéjnane uñane aja panguretigai ome Dupade enga e cucha omone tṍraji ore ome Dupade to. 14 Dupade e chimate yu aja daroquéode. Jecute yajnei tu ujetiga yiji uruode údi ga yapuse cojñone, ayoré quedéjnane ore aja ñane iji jnumi ome yacajnaquéode. Que gusu ujeta yacate irajatade mu jé jorane u udore ore uje agupurai ore ome pirajatiguéode. 15 Jecute dimane yu ujetiga yapuse uágaja to iji uaquedai Róma, ujeta yatata Dupade uruode ome uacarásade to ujetiga ore uringane piquetaque jogadi jé u jne. 16 Que toc ujetiga yajéngome yatata Dupade áyipie omenie ome ore. Chamáñaje piquetatoi áyipie omenie udire gu ujetiga gosi changureta ga uringai piquetaque jogadi e u. Bajaque judíode nanique uje ore gajnei tu ujetiga pacadique ore ome Dupade áyipie omenie. Mu e purása quedéjnane ore gajnepo to rĩ áyipie omenie udire ujetiga pacadique ore ome to. 17 Enga Dupade uruode udore u uje chingo yoque uje Dupade imeserane u ore uje ore changureta. Chamáñaje chedu ore anguretigai ome re gu enga que chucué ore ate uñeque. Chamáñaje Dupade jé uru to nanique gu uje chojninga: “Udore ore uje ore chise daringane paraque gu danguretigai iji Dupade ga a ore gajneque pucuecaringuei jne.” 18 Irajágo uje Dupade ujuyaquedatei chi cucha daté ga pidosobate. Ga ujuyaquedatei tuté garani u gaté ome cojñoque sijnángone ore, ome Dupade guetesórone ore rĩ. Uje udore ore chijnóra dasijnaringuéone. Jecute ore chetaque Dupade uru uréone ome raque. 19 Ore chiraja joroque Dupade uringai Dupade uje Dupade jé upúsu uje chingo raja ore nanique. 20 Que pimo Dupade mu yirajágo gu ipesudode cucha iji erámone. Que potigayaquérique déji Dupade uringai Dupa jé iji taningápisode uje pésu erámi iji taningane. Enga obiréjnapise to uje ujopie que eruénique cuse go. Jecute que toc ujetiga udore ore chãra re iji cuchárique go, uje ore chiraja Dupade uringai Dupa múñi que ore doi atique go. 21 Udore ore chiraja Dupade uringai Dupa mu que ore chuse deo ome Dupade go. Que ore chacãre Dupade gánique rĩ ome gueranone cucha ome raque. Mu ore chejna dáyipiedie aja cucha bisidégode. Jecute áyipie yuque ore enga ore áyipiedie qué déji ijnangununie ajei. 22 Chiese ayipierãque ore ome ore ajéode, mu que ore áyipieraque cuse. 23 Udore ore angurenone u damone cucha jnutininóño. Ore changureta ayoré gajnúone, cuchisode, chugúperone, ugade ore. Enga ore pésu ore oré gatedie ga ore changureta dapesudode cucha oré gatedie. Mu cachi ore angurete cuchade udore a toi jnese jne. Jé basa Dupade u uje que toque jeta toi. Mu que ore chajire Dupa pujnuéngaisṍri uté yúrique go. 24 Jecute Dupade noñome ore iji te jmete ujetiga ore doi dajegaidode cucha gajnarécho gaté. Jé u udore uje que ore áyipieraque jnoji punganingárique. Jecute udore ore isocade ome ñane a chinguíra pajegatigadatei aja ore jne. 25 Chamáñaje udore ore cho cucha ũré iji cucha tágode ga que ore changureta Dupade uru uréone gotique. Ore angurenone u Dupade ipesudode cucha. Ga que ore changureta cuchade udore ipesungóri Dupápisi go. Mu Dupade a gajnei urásu picotaquei ome ore iji dirode jnese. Amen. 26 Uje que ore chajire Dupade yúrique ga que Dupade chajirapo ore yúrique to rĩ. Mu noñome ore iji udore jmete ujetiga jé ore jno dapesudode cucha gajnarécho údi. Jé upo chequedíe rĩ. Uje quedéjna ore isocade ga ore tungarája dojodie chequei ga que ore pusi pisoca goningánique ome raque go. 27 Jé upo jnanione rĩ uje ore chécãre dadode aja quedéjnane. Uje gajnarenguepísi ore áyipiedie. Ga ore pota tungarája dojórigo jnanío. Pajegátigade garanone u cuchade udore ga pésu ore áyipiedie noñaringuéone. Noña ga ore ejnaréquedatéo dapotiguéode ome cuchade uje ore chécãre dasocade aja quedéjnane. 28 Uje que ore áyipiedie dépoji Dupade rĩ, ga Dupade noñome ore iji dore jmete, ujetiga jé ore jno dáyipie gajnarénguenie údi. Enga que Dupade chaquĩ́rapo ore ome detégode cucha uña to rĩ. 29 Jecute ore ipesudode cucha gajnaréngone irágu ore ajéode. Sijnanguipise ore. Ga ore moji chequé quedéjnanie gari, jeoga ore moji jnani quedéjnane gari. Dimane ore áyipie gajnarénguenie ome dapesudedie dáyipie gajnarenguei. Ore pota cuchade jnese iji udore, udore. Jecucha ore charatáyime cuchade ome dojode ayoréo. Jecucha ga ore pota chui ome dojode ayoréo rĩ. Ore pesapo dojode ayoréo ajedotáningane ome dabotaquéode rĩ. Aringácachoquí ore rĩ. Jutarequechoqui ore rĩ. 30 Jecucha ore tagu dojode ayoréo iji quedéjnane. Ga jé ore isocade u udore ome Dupade rĩ. Chamáñaje ore chetaguipise Dupade gu. Jĩrique ore tṍra dájningai aja guesi ome dojode ayoréo, jé aja Dupade rĩ. Jé ore icotaquedaté re ome dajosipiedie. Ore qui jé u gaté ome dapesudedie dáyipie gajnarenguei. Que ore tangári dayode, datedie ore go. 31 Que ore pota tangári cuchárique. Ga taque ore ome daruode. Ore gueteque picaniratiguéode ome dojórique ayoré. Que ore chiramurase dojode ayoréo isijnaringuérique go iji dajénique. Que posongaquérique déji ore ajénique go ome dojórique ayoré rĩ. 32 Udore ore chirajápise Dupade etégode cucha. Ore chirajápo to rĩ uje pisijnaringuéone ipesungórone ore gajneque pitoringai. Mu jé ore chajnéra dasijnaringuéone údi, enga ore irasique rac uje ore ujórigo ayoré chirate ore aja ore ate gajnaréngone udore.
1 Ujetiga bajéode u ujetiga Dupade cho dajuñame bojórique ayoré ome uté ate gajnarétique, jé socaseti baruode udore chajni babai ga jé Dupade ujuyai u uhua jne a. Chamáñaje jé bo uté ome ipesudode cucha gajnarécho gu. Jecute ujetiga ayoré dacasuté yoque, jeoga ayoré gajnareque yoque marínga, que qui tu go ujetiga yucuegoi ñane iyoguéode. 2 Yirajágo gu uje gusu Dupade jeta chajire ore ome ore ate gajnaréngone ga pésu ore quigode. Chamáñaje Dupade u gu uje ũrepísome denominone. 3 Ujetiga achagapísa cucha gajnaréngone aja bojórique ayoré, mu jé bo uté ome ipesudode cucha gajnarétique ¿ga a jé apidirase jne a ome Dupade ujuyaquérique? Ungare a ca apite jne. 4 ¡A ca cucha ome ua jõ Dupade icaniratiguedatéode ome ua! Chamáñaje que cho dajuñame ua míraque gu uje ajéode u gu ujetiga écãre badode enga ajni gai. 5 Mu que apota adute Dupade uruode gotique, enga que abéro ua ome bapesudode cucha gajnarécho. Uje jé babo basijnaringuéone údi ga Dupade chorei dajuyaquéode ome ua to. Enga ujuyaquéode udore a tocade ome ua jne iji Dupade ojningai dire ujetiga chingo raja erámi ujetiga chajire ore adode aja quigode. Enga cuchade udore a pijoque quigode jnese jne ujetiga Dupade chajíraja quigode. 6 Uje Dupade a cho yoquipesudode oré jnese jne iji dirode uñeque. 7 A Dupade chisi ome pucuecaringué eyúgojmai ome udore ore uje ore chucué cucha eyúgojmane, Dupade ingoningájnai ore ome re. Yojningane u udore ore uje ore chejna rángaja date goningane gatuaque. 8 Jé basa Dupade ájningai gajnengórone u ore uje ore ajiriguipise déode ome cuchade. Enga a cho dajuñame ore jne uje ore ucuegode u cucha gajnaréngone gatuaque enga que ore chajire Dupade ojningane cucha ũréo yúrique go. 9 Enga pisijnaringuéone ipesungórone jnese a ore chacho joroque dajnéone Dupade ujuyaquéo jne ome raque. Cuchiyíode a upúsu judíode ore jne, jé aja purása quedéjnane ore to rĩ. 10 Jé basa a Dupade chisi ome pininaquei, pajesereringai ore ome udore jne uje ore adode ujñapetácho. Enga a ore gajneque Dupade icotaquei jne. Cuchiyíode a upúsu judíode ore, jé aja ducurása quedéjnane ore to rĩ. 11 Chamáñaje judíode, purása quedéjnane jé yitojmárango gu ome Dupade. Ga jé isocade chojmára ome yoque jnese. 12 Uje gosi que chiraja jnani bajai Moises urusarane quigode marínga, uté gosi jé gajneque Dupade ujuyaquei to jne. Uje pisijnaringuéone déji uté gosi gu. Jé u gosi rĩ uje chiraja Moises urusarane quigode mu chó ojningane cucha gáyode, ga jé gajnui u bajai to. Uje gajneque Dupade ujuyaquei to. Enga a Dupade chijna Moises urusarane udore to jne ujetiga chajire uté gosi adode aja quigode. 13 Uje Dupade que chimesere udore ore go uje cachi ore irajaque Dupade uruode quigode, mu imeserane u ore uje ore dopísi quigode. 14 Que Moises urusarane déji purása quedéjnane ore mu jé ore pésu udore quigode to. Chamáñaje jé ore irajaque cucha gajnaréngone, cucha omone ore iji daringai tuté ayoré agupurai gu. Ga jé ore áyipiepísedie u uje cho ore quique ome cucha gajnaréngone, cucha omone ore. 15 Obiréjna ome ore ipesudode uje pirajatigade ome cucha omone, cucha gajnaréngone ore, jé jogate aro ore áyipiedie uje que pacadique ore ome múñi. Jecute ore chiraja daringane ayoré paracho uje ore pésu date omone, enga jĩrique ore chiraja daringane ayoré sijnácho rĩ, uje ore pésu cucha gajnaréngone. Chamáñaje jĩrique ore agutedie cho jora ome dapesudode udore gu. 16 Enga a ore jnusina dadode jnese jne, jé u dapoguédode dacho ujetiga Dupade utocaidi Jesucrísto di enga chuchẽre ayoréode ore igaranguenie dáyipiei iji guesode jnese. Chamáñaje Dupade angúromei a u Jesucrísto uté jne ome dajirigode ujetiga pajirique erámi unirisórone adode aja quigode. Chamáñaje yacajnaquéode jé qui tu gu uje yacate ore ome Jesucrísto uringai piquetangore. 17 Cachi bojninga múñi: “Judíode uña yu. Moises urusarane irajasṍri upo yu rĩ.” Jecute dicotare ua uje chiese bajnenguipise Dupade. 18 Baraja Dupade ajegaidode cucha. Enga barajápo cucha ujñapetade ome Moises urusarane to rĩ, uje cucha omi tu ome ayorérique ujetiga ucuegode u cuchade udore. 19 Chiese barajáguipise dajei aja Dupade yui. Enga bajéode u ujetiga edoparigode, ijnangununie jogosórone ore cho dajñangóri iji ua aja Dupade yui. 20 Chiese arajayópise ujetiga acácho disiode, cojñoque agupurayode ore ome Dupade adode. Chamáñaje Moises urusarane déji uaque gu uje pirajatigade, cucha uréone jogadi u Moises urusarane udore. 21 Bagaidi tu ujetiga acate bojórigo ayoréo. Mu jé go que be bacajnaquéode quigode to. Uje baquĩ́ra ore ome ore oriquéode, mu jé boria cuchade. 22 Baquĩ́ra ore ome punganingane ome gapu quedéjnanie mu jé ua u uje bajo uája punganingane ome gapu quedéjnanie. Betaque ore ome ayoré gajnúone, mu jé ua u uje bacája udore iguíjnane ujetiga oria ayoré gajnúone gajnéone cucha orerã́cho iji iguíjnai. 23 Bacota ua uje chiese baraja Moises urusarane quigode mu uje que be adode enga jogadi u uje pujñiete Dupade ome bojode ayoréo ore. 24 Jecute Dupade uruode chojninga: “Uje judíode uacadode gajnarécho, ga purása quedéjnane ore dojnóngaja uacangureni Dupade to.” 25 Ujetiga picaque uaque gosi údode nanique ga uté doi ga chejnapise Moises urusarane cucha puyade guesi enga ũrepise uté gosi ome uringai picaque. Mu ujeta chetaque Moises urusarane cucha puyade uñéngo ga que cuchárique tṍraji uté gosi uringai picaque go. 26 Jé basa ga ujetiga ca picaque purása quedéjnarique mu gosi dopísi Moises urusarane quigode enga uté gosi suépise ore icai gai. Enga cho jeta picaque to. 27 Purása quedéjnane uje que picaque ore mu jé ore dopísi Moises urusarane quigode enga ore suépise uacabai. Enga uacaringane máraque pijoguipise gu udore. Uje Moises urusarane gajnengórone u judíode uaque nanique, mu que beyopísi quigode go uje picaque uaque múñi. 28 A judío gosi, mu que judíopise go ujetiga áyipie ca déji Dupade uruode uringai pangarate. Ujetiga picaque gosi mu áyipie que déji Dupade uruode uringai pangarate enga que cuchárique tṍraji uringai picaque, enga cho ujetiga ca picaque gosi. 29 Jé basa ga gosi áyipie jogadipise Dupade enga judíopise uté gosi. Enga uringai judío que tṍraji uringai picaque go. Que tõrapóji gosi uje Moises urusarane dépisiji gari. Mu uringai judío pijoque gu áyipie uje jogadipise Dupade. Ujetiga ca ujórigo ayoréo chicota uté gosi ome adode udore, mu Dupade u uje chisi uté gai.
1 ¿Ja cucha bisideque a ujetiga judío yoque enga picaque yocúdode? Ungare, que cucha bisideque gotique. 2 Dupade gueranone cucha omío jiépise ome judíode uyoque. Cucha datei u ãrie uje Dupade changureta judíode uyoque nanique enga chisi ome daruode ome yoque. 3 ¿Jé Dupade isocáriguirase a ujetiga judíode uñéngo ore cha danguretigai tiji Dupade? ¿Ja Dupade charásu dajnoraquei ome yoque jnese a? 4 Ungare, que toc ujetiga Dupade cha dajnoraquei ome yoque. Ujetiga taquechoquirase jnanione jnese mu Dupade que chécãre daru ũrérique quitique. Chamáñaje Dupade uruode chósi te gu: A ore cho ũrepísiji ua jne ome barúrigo. Ujetiga petingaraque ua mu a ca pajnoque ua jne. 5 Jnanione uñane ore chojninga: “¿Ja ca gajnareque ujetiga Dupade cho dajuñame yoque gu yoquisijnaringuéone a? Chamáñaje yoquigajnarétigade u uje chingo Dupade ueratigai aja erámi. Ujetiga uerate yocadode to enga a ca pijoguipísiráse Dupade ueratigai.” 6 Mu que quigode u gotique. Ujetiga Dupade chorase cucha omi iji pisijnaringuérique enga uringai ũré a bijnárasome. Enga a ca toguirásome dirome ujetiga chajire erámi unirisórone adode aja quigode. 7 Jnanione uñane ore chojninga: “Ujetiga ca urupataquechoqui jnanione uyoque enga a ca Dupade uringai ũrepise pijoque ome erámi. Jecute gajnareque ujetiga Dupade cho pisijnaringuéone ipesungóri iji yoque.” 8 Jnanione uñane ore chetaque yoque ga ore pésu yocuruode ga chiese yojníjo: “Beyoi ga yejnángo yógaja yoquisijnaringuéone. Uje yoquisijnaringuéone u uje pijoque gaté Dupade uringai areguipis.” Mu yocacajnaquéode que quigode u udore gotique. Jnanione udore ore uje ore pésu yocuruode ore tiógarapísa ujetiga Dupade cho dajuñame ore. 9 ¿Judíode uyoque ga yujnuéngo purása quedéjnane gáyode a? Ungare. Jé yoco ñane jnese. Chamáñaje obiréjna ome yacajnaquéode udojo uje pisijnaringuéone sué erámi unirisórone yoquibáyode jnese. 10 Enga Dupade uruode déji uje chojninga: Que ayoré pajnotátique cuse go iji erámone udojo jnese. 11 Ijnoque ayorérique rĩ ujetiga pota tangári Dupade adode. Que ayorérique déji to ujetiga pota chucué Dupade ome re. 12 Erámi unirisórone ore chicáji udore yúode jnese ome Dupade adode, Enga gajnareque ore adode jnese. Que uñeque déji ujetiga pésu cucha arétique. 13 Jecute ore uruode gajnarécho ome ñane. Ore chãra ñane, Enga ore tagu ñane ome daru gajnaréngone. 14 Ore chedu daru gajnarenguipísode ome ñane. Enga ore cho darúja ñane. 15 Ayoré yungore ore enga dimanepise ore ome pocaningane. 16 Jecute ore tṍra dajñarenie ome dapesudode cucha gajnarécho. Ga cuchade udore u uje chinoningase pajesereringai ga chinguíra páyu guhebátigade aja ore. 17 Ga que ore chiraja pajesereringá ringo ome re gotique. 18 Erã́tique ore chajire Dupade yúri que. 19 Yirajágo uje ore urusarane Dupade uru taninguíone gajnesórone cuse. Enga Dupade chisi ome udore ome yoque gu ujetiga erámi unirisórone uyoque jnese yirajágo yocuringane máraque jnese enga a ca yĩraraco yoquibánique jne iji Dupade iquei ujetiga diga chajire yocadode aja quigode. 20 Que ayorérique cuse jetiga dopísi ore urusarane Dupade urúo quigode jnese aja daringárique Dupade imeseraque. Mu Dupade uru taninguíone udore u uje yirajágo yoquisijnaringuéone ome. 21 Mu Dupade e chingongara yoquisocade ome yoque ujetiga yico yocuringáringo pimeserácho ome re. Mu que u yocangoninguite guesaringane ome Moises urusarane cucha puyácho. Mu Dupade uruode atatasórone, jé aja Moises to rĩ ore chatata cuchade udore quigode to nanique iji darusarane. 22 Enga ore atatagode u uje panguretigai ome Dupade utocaidi Jesucrísto u uje pésu gosi uringai Dupade imeseraque. Dupade jé urúo udore enga isocai chojmára ome erámi unirisórone jnese. 23 Chamáñaje sijnaque yoque jnese gu. Enga que toque go Dupade ingoningájnai uringárique diquiyágome yoc. 24 Mu Dupade chosõre yoque enga chiqueta yoque gu Crísto Jesus adode ome yoque. Enga chimesere yoque bisideque gu Jesus adode ome yoque enga que chucué yocate uñeque. 25 Uje Crísto toi ome yoquisijnaringuéone enga Dupade ajegáite uté to ujetiga chĩro yoquisijnaringuéone ome dayoi. Jecute uje gosi changureta Crísto enga jogadi u uje chĩro gosi isijnaringuéone. Enga Dupade uringai paraque pijoque gu udore. Uje Dupade chidota re nanique enga que chajire yoquisijnaringuéone yúrique to go jé aja diri ujetiga utocaidi Crísto toi ome yoquisijnaringuéone. 26 Enga Dupade uringai paraque pijoque to iji deréjnane udojo ome Jesus adode udore. Chamáñaje qué jno dasocade údi uje chimesere Jesus anguresórone ore jnese. 27 Jecute e que toque go ujetiga ayorérique doi enga chisi dabánique ome daringárique Dupade imeseraque. Uje ore pésu Moises acajnaquéode quigode nanique enga jogadi u uje ore chisi dabáyode ome dapesudode udore. Mu que quigode u gotique ome Jesus anguresórone uyoque. Que yisígo yoquibánique gotique. 28 E obiréjnapise uje Jesus anguresórone u uje Dupade cho dameserane iji ore. Enga e que chajire ore ipesudode gotique ujetiga Moises acajnaquéode ipesungórone u ore, jeoga ca u ore. 29 ¿Ja gusúrasu judíode ome Dupade a? ¿Ja ca togome purása quedéjnane jeta ore changureta Dupade to a? Ore gajneque to ãrie ujetiga ore cho dadupade iji Dupade to. 30 Chamáñaje que Dupa uñeque déji siñeque go. Enga Dupa ugurui uté u uje chapuse danguresórone uyógaja jnese. A ca picaque yoque marínga, jé imeseraque yoque. Que gusu Dupade imeseraque ore uje ore chica dádode. 31 Ujetiga yanguretágo Jesucrísto ¿ga e cucha bisidécho Moises urusarane ome yoque a? Ungare. Quene yirajágo Moises urusarane uringane orerã́cho gu yocanguretigai ome Jesucrísto.
1 ¿Jé cho ringome yocai jnani bajai Abraham? ¿Ja chise daringai Dupade imeseraque gu danguretigai ya? ¿Jeoga ate datérigo u? 2 Ujetiga Dupade chimesere Abraham gu ate datérigo enga Abraham uringai dicotare jogadi jé urásu iji dojode ayoré ujade nanique. Mu que toc ujetiga chicota re iji Dupade iquei. 3 Chamáñaje Dupade uruode chojninga: “Abraham changureta Dupade ga jogadi jé u uté uje Dupade chimesere enga cho ayoré ujñapetáguiji.” 4 A yacaráma yuruode aja ayoré pirósõri jne uje cho oré daroi ome ipesudode iroquéo. Cho oré daroi isagode, jecute que bisidéguei go gueranenie iplátai udire uje chisi ome daroi. 5 Mu Dupade isocade ome yoque que u uté isocai gotique. Jecute ayorérique ca pésu dapesute cucha uñeque marínga, Dupade chedu uté gosi anguretigai ome re. Enga jogadi u uje Dupade chimesere uté gosi enga cho ayoré ujñapetáguiji. Dupade pota pisijnaringuéone ipesungórone gu ujetiga chiqueta ore. 6 Adi jé u to jnani bajai David urusarane quigode uje chatata uje pininaquei jogadi u ome gosi uje chiraja daringai Dupade imeseraque. Uje Dupade que chucué ipesutígo cucha datéo gotique mu chedu anguretigai. 7 David uté urusarane quigode u udojo uje chojninga: Uté gosi nína re uje Dupade chĩro isijnaringuéone, Ga togadeque gosi isijnaringuéone ome. 8 Uté gosi nínapúsu re to uje chimo uje e íjnoque íode iji yocangará dejnai Dupade ome isijnari nguéone. 9 ¿A gusúrasu judíode jeta ore gajneque pininaquei ome dasijnaringuéone uringane pirõcho? ¿Ga ca Dupade chapusarásaja purása quedéjnane ore aja to a, uje que picaque ore? Cachi chapuse ore aja ãrie. Chamáñaje Dupade uruode uje e yingome uaque, quigode u udore uje chojninga: “Abraham changureta Dupade. Jecute Dupade chimesere Abraham enga cho ayoré ujñapetáguiji nanique.” 10 ¿Ja e picaque Abraham nanique a uje Dupade chimesere gu anguretigai? Ungare, cáma picaque go nanique. 11 Mu quigade ga Dupade quene chingo Abraham uringárique picaque aja. Gaidi tu gu ujetiga Abraham uringai Dupade imeseraque gu anguretigai pijógome icáchurique. Jecute a ca picaque purása quedéjnane marínga, ore changureta Abraham angureni Dupade ga ore uringane Dupade imeseraque jé jogadi u to enga Dupade cho ayoré ujñapetáguiji ore to rĩ. Ga jé ore cho dai iji Abraham to. 12 Mu judíode ore dai upo Abraham rĩ. Chamáñaje picaque ore údode to gu. Mu que gusu udore. Mu cuchiyi tupúsu uje ore chiradaja anguretigai ome Dupade uje cáma picaque nanique marínga, jé changureta Dupade. 13 Dupade chichaga Abraham nanique ujetiga Abraham, ape disi ejórigo ore gajneque erámi jnese. Mu Dupade que jnaripísi erámi uringai dacajnéngome Abraham gu uje angoninguite guesaque ome uruode, mu jnari gu anguretigai. Enga anguretigai u to uje Dupade chimesere Abraham enga cho ayoré ujñapetáguiji. 14 Ujetiga gusu angoninguite gueságode ome Moises urusarane ujetiga ore gajneque Dupade gueranone cucha, enga e que cucha gotique panguretigai ome Dupade. A ca cuchárique tõrapórasiji Dupade uruode rĩ uje chichaga erámi uringai dacajnéngome anguretasórone. 15 Ujetiga gosi chiraja Dupade uruode acajnaquéode, mu que gosi doi go, enga uté gosi ijnimique Dupade ájningai ome re. Jé basa uje gosi que chiraja Dupade uruode acajnaquéode gotique, enga que uté gosi chiraja daringai máraque to go. 16 Dupade pota ujetiga uruode tocadepise ome Abraham, ape disi ejode ore. Jecute guẽrate bisidec ome ore enga que chucué orate datérique mu ucuei u ore anguretigade ome re. Enga que gusu Moises urusarane ipesungórone uje ore gajneque Dupade uruode, mu ore gajneque to jnese uje ore chirate Abraham aja anguretigai ome Dupade. Jecute Dupade anguresórone yoco yocai iji Abraham jnese. 17 Dupade uruode chatata uje Abraham chague iji Dupade iquei nanique uje Dupade catecã́ri enga chojninga: “Cojñoque ponáyone iji erámi údode a ore cho dai iji ua jne.” Enga Abraham angureni Dupade u uje pésu ga togode ecápo rĩ, enga u to uje ipesute cuchade jnese; uje íjnoque cuchade nanique, mu jĩrique déji ome Dupade uruode. 18 Abraham chiraja uje que toque atígo ome gotique. Mu uje Dupade chingo ape disi ejode aja Abraham uje chi jiépise jne enga Abraham que chotigase go. Mu doi ga changureta Dupade uruode enga changuretápo ape disi ejode yúode rĩ. Jecute diga erámi unirisórone iji erámi údode ore cho dai iji Abraham to. 19 E choquíjnapise Abraham nanique uje Dupade chingo ape disi ejode aja ga que idája itoringai gotique. Guejnanie sequerei e chirõre 100. Enga jé chosi acotábia to rĩ uje e gatapísape. Enga aberepe rĩ. Mu Abraham que doi ga chiramurase Dupade uruode iji dajéningome re. 20 Que potigayaquérique chimo Abraham ome Dupade ojningane ape disi ejo. Jé uté chejna raja danguretigai gaté ome Dupade. Enga chicota Dupade gaté. 21 Chirajápise gu uje ujopierãque Dupade enga que ojningane cucha toja go, mu jecucha tocade. 22 Jecute Dupade chimesere Abraham enga cho ayoré ujñapetáguiji. Chamáñaje chimo anguretigai gu ome re. 23 - 24 Uje purusãraque Abraham adode nanique enga ore urusarane chósi te: “Dupade chimesere Abraham ome anguretigai enga chopo ayoré ujñapetáguiji rĩ.” Mu ore urusarane udore que gusu ome Abraham go, mu jé yocuringane Dupade imeserácho jogadi u to uje yanguretágo enga Dupade chopo ayoré ujñapetáguiji yoque to rĩ. Yojningane u uyoque uje yanguretágo uje Dupade chiringare yocangarádejnai Jesus iji itoringai. 25 Uje pẽrate Jesus ome yoque nanique ujetiga toi ome yoquisijnaringuéone. Mu Dupade chiringare iji itoringai quigade ujetiga Jesus doi enga imanique yógaja yocúringane ayoré pimeserángome Dupade.
1 Jecute uje e yico yocuringane Dupade imeseraque gu yocanguretigai enga jogadi u to uje yocajéode cho sẽre ome Dupade. Enga cuchade udore jnese garani u yocangarádejnai Jesucrísto adode ome yoque. 2 Uje yanguretágo Jesucrísto enga chimate yógaja Dupade ujetiga yocajneque icaniratiguéode. Enga que pumuchayaque yóguiji Dupade gari ome icaniratiguéode. Yanguretágo yui to ujetiga yico Dupade enga yimóngo ingoningájnai, jecute yoquirasiguipise yoque ome udore. 3 Que gusu udore mu, yinínango yógome yocajnéone petingaquéo iji erámi udé to. Yirajágo gu uje petingaquéode udore u gu uje chacate yoque ujetiga yidotágo yógome cuchade. 4 Uje yidotágo yógome petingaquéode enga yocuringane Dupade anguresõre etoque pijoque. Enga jé u uje yocanguretigai ome Dupade quérã. 5 Que cucha bisideque panguretigai ome Dupade gotique to go. Uje Dupade chĩreta danguresórone uyoque yocáyipiedie ome dajopie Espíritu Sánto. Que gusu udore mu Ujopie u uje pésu ga yirajágo Dupade ijnoraquédatéode ome yoque. 6 Que ayorérique cuse ujetiga chiqueta re iji te bisideque. Mu uje Crísto chise Dupade ojningai dagachodi dire enga jé u uje toi ome pisijnaringuéone ipesungórone uyoque. 7 Yirajágo uje ayorérique que ate go ujetiga tẽra re ome dojórique ayoré. Mu socaseti paraguipise gosi enga jõrárique doi enga tẽra re ome. 8 Jecute Dupade ijnoraquédatéi pijoguipise ome yoque. Uje sijnanguipise erámi unirisórone uyoque, mu jé Dupade utocaidi Crísto tẽra re ome yoque enga toi ome yoque. 9 Enga uté iyoi u uje churu yoquisijnaringuéone aja jnumi ujetiga yico yocuringane ujñapetaque ome Dupade. Mu que gusu udore go. A chãraque yoque to jne iji diri ujetiga Dupade ájningai tocade ome erámi unirisórone. 10 Dupade etesõre uyoque nanique marínga, jé Dupade chucué yocajesereringai gajnesónique cucha ujetiga yiyágo yocajedotáningáne ome ñane. Jecute chiroque dabi Jesucrísto aja yoque nanique ujetiga toi ome yoquisijnaringuéone. Tamuré uje Jesus ecápo rĩ ga jé jno daringai piquetangóri údi ome yoque uje e yico pajesereringai ome Dupade. 11 Uje Dupade chimo yoque uje yanguretágo yocangarádejnai Jesucrísto enga jé u uje cha dájningai ome yoque to. Enga pininaquei jogadi jé u uté ome Dupade uyógome ñane. Chamáñaje Jesucrísto e chimate Dupade uyógaja ñane gu. 12 Yirajágo uje pisijnaringuéone déji erámone gu jnani chojmarai. Enga Adan u uté nanique. Pisijnaringuéone jé jõrai u pitoringai nanique uje chise erámi. Jecute ayoréode iji erámi jnese yitogoi gu yoquisijnaringuéone. Uje sijnaque yoque jnese gu. 13 Uje cáma purusãraque Moises urusarane Dupade urúo nanique ga pisijnaringuéone jé jogate aro erámi nanique. Mu cáma pajirique pisijnaringuéone udore yúrique nanique uje cáma pijoque Dupade áyipiedie quitígo ome pisijnaringuéone. 14 Mu jnanione iji Adan, Moises ore ujai ore toi gatuaque to nanique. Agupurai ore ome Dupade áyipiedie Moises urusãracho, mu jé ore isijnaringuéone jno ore údi aja pitoringai. Mu que ore isijnaringuéone cho Adan isijnaringuéone gotique. Chamáñaje Adan chiraja Dupade áyipiedie iji taningai nanique mu que doi go. Cucha daté Adan, Crísto ore adode jnese. 15 Cucha daté uje Adan isijnaringuéone iriringui u pitoringai ome erámi unirisórone uyoque jnese uje jnani chojmára Adan múñi. Jé basa Dupade guẽrate bisidei suépise udore gai. Chamáñaje chiqueta yógome yoquisijnaringuéone gu jnani chojmarárique adode to. Enga jnani chojmarai tuté u Jesucrísto uje yoco yocagutiyamáini iji, iji erámi údode jnese. 16 Pisijnaringuéone díji yoque gu jnani chojmarai Adan nanique. Uté ipesudi pisijnaringué chojmára to nanique mu jé máraque yoque jnese enga jé yitogoi jnese gu pisijnaringué chojmarai uté. Jecute cucha daté jnani uté ipesudi. Jé basa Dupade adode suépise udore gai. Uje jiépise jnanione uyoque yoquisijnaringuéone marínga, jé chiqueta uyoque jnese, enga cho ayoré ujñapetáguiji yoque. Enga que yoquigáite oré udore, mu Dupade guẽrate bisideque adode udore ome yoque. 17 Ujetiga cucha daté jnani chojmarárique isocai uje di pitoringai údi aja yoque gu isijnaringuei, jé cucha datepise jnani chojmarárique uñai isocai uje di pucuecaringué eyúgojmai údi aja yoque. Yojningai u uyoque uje e yico yocuringane Dupade imeserácho. Uje chimesere yoque gu Jesucrísto adode ome yoque. Uje que yoquigáite oré yocuringane Dupade imeseraque mu Dupade guẽrate bisideque ome yoque. 18 Adan ate gajnarei u nanique uje di Dupade ujuyaquei údi aja erámi unirisórone uyoque jnese. Mu Jesucrísto ate omi u uje chijnime erámi unirisórone iji Dupade ujuyaquedatei jmáinie. Enga e ore gajneque pucuecaringuei ome raque. 19 Cuchade udore quigode u udojo: chojmára Adan, mu uté angoninguite paritigade u uje jiépise pisijnaringuéone ipesungórone iji erámi udé. Mu jé adi u to ome Jesucrísto. Cachi chojmára uté to, mu uté angoninguite guesáringane u uje jiépise yoque to uje yico yocuringane Dupade imeserácho. 20 Dupade chisi ome dáyipiedie ome Moises nanique ujetiga churúsãre ome erámi unirisórone uyoque ujetiga yirajágo yoquisijnaringuéone uringai gajnarenguipíso. Yoquisijnaringuéone jiépiso marínga, jé Dupade chĩro. Jecute Dupade osongaquéode ome yoque suépise yoquisijnaringuéone gai. 21 Pisijnaringuéone ipesute pitoringai. Jé basa ga Dupade osongaquei imanique yógaja pucuecaringué eyúgojmai ome uyoque jnese uje Dupade chimesere yoque gu yocanguretigai ome yocangarádejnai Jesucrísto.
1 ¿Jé yoco ringome udore jne a? ¿Ja yicoi enga yipéco cucha gajnaréngone gaté a ujetiga Dupade chĩrope gaté enga uringai osõrataque pijoguipise a? 2 Ungare. Que quigode u udore gotique. Chamáñaje yoquisijnaringuéone e toi ome yoque gu uje yanguretágo Jesucrísto. ¿Ja cucha omi tu a ujetiga yajnerangome yoquisijnaringuéone? 3 ¿Ga ca ajnusináño a? uje pacaque yoque iji yodi gu yocanguretigai ome Jesucrísto, enga imoi tu uje yoco yoquibaya Jesucrísto iji cachodi to. 4 Uje ore chaca yoquedodie iji yodi nanique ga cachi e ore jochõre yoque. Ga cho ujetiga yijínango Jesus aja jnumi to. Ga yoco togode. Uje yicoi guesi iji yodi ga cachi e yiquecágo iji yocuringáringo toque quigade. Cachi e yugúcoji yocucuecaringué ichárique, jecute omi tu ujetiga icha yocadode to. Enga yocopise Jesus uje dayé Dupade chiqueta iji itoringai quigade ome dajopiéjna. 5 Jecute ujetiga yoco yoquibaya Crísto iji itoringai, jé basa yocopise uté to ome ucuecaringué ichárique uje ecápo rĩ iji itoringai quigade. 6 Yirajágo uje Jesucrísto toji curesei gu ujetiga chinoningase yocuringai ayoré. Jecute yanguretágo uté enga yocuringai ayoré eruei jogadi upúsu. Enga pisijnaringuéone e que isagapo yoque rĩ. Cho ujetiga yoquirósõre pisijnaringuéone nanique mu e que yocopo yoquirósõri iji rĩ. 7 Ujeta gosi toi ga quene pisijnaringuéone chirame uté gosi. 8 Ujetiga e yoco yoquibaya Crísto iji cachodi enga e que potigayaquérique déji yoque go ome yocucuecaringué ichárique uje yátago yógaja uté. 9 Uje yirajágo uje piringaraque Crísto iji datoringai quigade, jecute que togápo ome rĩ ujetiga topoi rĩ. Chamáñaje pitoringai e que bisitique pijógome Crísto go. 10 Jesus itoringai ome yoquisijnaringuéone jé chojmarapise, enga a ca topoi to jne rĩ ome pisijnaringuérique. Jé basa ecápo rĩ enga chedu Dupade adode iji deréjnane jnese. 11 Jecute oyo toguíji uacaringane ayoré jnutiminóño ujetiga ca pisijnaringuéone suépo uacabáyode rĩ. Mu oyo uecade iji uaque ome Dupade adode uje e uacátayo uágaja yocangarádejnai Jesucrísto gu. 12 Adotáyo uágome pisijnaringuéone ujetiga ca sué uacabáyode enga jnopo uacádi aja pipotiguéode ome cucha gajnaréngone rĩ, uje unere cuchade udore ome ayoréode uyoque. 13 Ajuso uacaringane ayoré guio ujetiga ca Satanas chijocase uaque enga apéso cucha gajnaréngone. Mu asíyo uágome Dupade ujetiga chijocase uaque enga uacapesudode omío jnese. Oyo ore uje ore toi mu ecápo ore rĩ ujetiga ore chedu Dupade adode iji deréjnane jnese. 14 Enga que qué pisijnaringuéone doi enga suépo uacabáyode rĩ. Chamáñaje uacaringane Dupade imeseraque que garani u uacangoninguite guesáringane ome Moises urusarane, mu garani u Dupade osongaquedatéode ome uaque. 15 Ujetiga jec ũré enga yocuringane Dupade imeseraque tṍraji Dupade osongaquedatei ome yoque enga que tṍraji yocangoninguite guesáringane ome Moises urusarane, ¿ja quigode u a ome uaque ujetiga yajnerangome yoquisijnaringuéone údi? Ungare, que quigode u go. 16 Ujetiga ayorérique doi enga chisi rome pirósonique enga que toc ujetiga ca doi darósõri uté áyipiedie. Jecute ujetiga oyo uacarósõri iji pisijnaringuéone enga uacaqui obiréjnai u pitoringai. Mu ujetiga oyo uacarósõri iji Dupade enga a beyoi uté áyipiedie enga a uerate uacatígo jnese jne. 17 Pisijnaringuéone isaque uaque nanique, mu yacaranguipis ome Dupade uje e uacamesecho pacajnaqué uréone enga e beyoi udore quigode ome uacaringane ayoré jnese. 18 Uje Dupade e chijnime uáguiji uacarósõri pisijnaringué gari enga e piquetaque uaque ome Dupade ujetiga beyoi uacasoca omone. 19 (Yacãra yacajnaquéode aja cucha jnutiminórone gu uje cachi cáma arajayópise Dupade adode quigode bisideque go.) Uacoyo uacarósorone iji pate gajnaréngone, pisijnaringuéone ore nanique uje uacagaidi u gu pisocade udore. Mu e beyoi enga oyo uacarósõri iji cucha ujñapetatígo. Uje uacagaidi tu gu ujetiga ueque uágome pisijnaringuéone uje uaquejnáño uágaja Dupade. 20 Uje uacagúsoji pisijnaringuéone jmáinie nanique ga que acunguésoñoi uacate ujñapetatígo ome Dupade gotique nanique. 21 Mu cachi ca cuchárique tṍraji uacasoca bajade udore múñi. Gusu uje pajegátiga gose udore. Gusu uje chimate uágaja pitoringai. 22 Mu Dupade e chijnime uáguiji uacarósõri pisijnaringué jmáinie, enga e Dupade agutiyamáite uágome daroquéode to. Enga cucha ueradode tṍraji udore ome uaque: a eso uacaringane ayoré ujñapetácho iji erámi udé enga a uacajneque pucuecaringué eyúgojmai jne iji erámi udé eruei quigade. 23 Pisijnaringuéone a cho darógode oré jne, ga oré u pitoringai ome ore. Jé basa Dupade guẽrate bisidei u pucuecaringué eyúgojmai ome yocangarádejnai Jesucrísto anguresórone.
1 Yijorane uaque a, uacarajáyo jnese uje peduguéjnane urusarane dáyipiei gajnesórone u darásade. Ujetiga qué gosi eca enga gajnei tu ujetiga tangári deduguéjnane áyipiedie udire. 2 Isocai jé u ome chequé amanachuguéraque. Uje qué abai eca enga que pujuregate ome uaté ujetiga chisa dabai uñeque. Jé basa abai a torási enga quene jogadi u uje pujuregate ome chequé tuaté ujetiga chisa dabai uñeque. 3 Mu ujetiga abai jé eca enga uaté doi enga chisa dabai uñeque enga uringa maré jogadi u. Mu ujetiga abai e toi enga que uaté eduguéjnane chãraque go ujetiga chisa dabai uñeque. E pujuregate ome uaté ujetiga chisa dabai uñeque, enga que maré gotique, uje que chó deduguéjnane áyipieraque gai gotique gu. 4 Adi jé u to ome uaque, yijorane uaque a. Uje uacangureni Crísto toi enga jogadi u uje Moises urusarane cucha puyácho bijna ome uaque ujetiga oyo uacangaráni iji Moises urusarane udore. Chamáñaje cho ujetiga uacabaya Crísto iji itoringai gu. Enga e Crísto u uje ecápo rĩ iji datoringai quigade ga jé gajneque uaque ujetiga beyoi Dupade adode to. 5 Uje cáma Dupade chinoningase yoque nanique enga pipotiguéode ome cucha gajnaréngone chijocase yoque gatuaque. Uje yirajágo cucha puyade gu Moises urusarane, mu jé yipótago yipéco cuchade udore gaté. Jecute yico udore údi nanique enga pitoringai caputáji yógome yoquipesudode cucha gajnarécho udore. 6 Uje yiyógo Moises urusarane cucha puyade gáyode nanique enga yocuringai máraque jogadi u nanique. Mu uje yoco yoquibaya Crísto iji itoringai enga jogadi u uje Moises urusarane uringai yocangarate bijna ome yoque. Enga e yoco piroque piraméone ujetiga yucuegoi yoquirósõri uñeque. Enga yoquirósõri ichai uté u Dupade uje chisi ome dajopie Espíritu Sánto ome yoque ome dadode. Jecute Moises urusãra cásodicaite e chirame dasapídode iji yoque. 7 ¿Jé yoco ringome pacajnaquéode udore a? ¿Ja quigode u a uje cucha gajnareque Moises urusarane? Ungare, que quigode u gotique. Uje Moises urusarane cucha puyácho u uje cho quique pisijnaringuéone igajnarétigai ome yu nanique. Jecute yiraja pipotiguéode ome cucha quedéjnane gu uje Moises urusarane chojninga: “Ca apótayo cucha unejátigo.” 8 Mu pisijnaringuéone jé jogate aro yu nanique. Jecute chijocase yu nanique. Uje yiraja uje puyaque pipotiguéode ome cucha unejángone, enga jogadi u uje yipota udore gaté. Chamáñaje pisijnaringuéone iji yocajéode cho cucha totique gu. Mu chiringare re uje pãreque cuchárique ome yoque. 9 Agupurai yu ome Moises urusarane nanique. Jecute yirasique yu gatuaque. Mu uje e yiraja Moises urusarane cucha puyade quigode enga jé u uje pisijnaringuéone iji yajei chiqueta raja yu enga yiyó Moises urusarane cucha puyácho gai. Enga jé jno yúdi aja pitoringai. 10 Enga e yiraja yuringai máraque enga yirajápo uje a yajneque pitoringai jne rĩ. Moises urusarane Dupade áyipiei gaidi urásu yucuecaringuérique ujetiga yimánaja quitígo. Mu datéringa ome yu uje yetaque, ga udore jé upúsu uje imanique yu aja pitoringai. 11 Pisijnaringuéone iji yajei chãra yu enga pésu Moises urusarane garéngone cucha unéningai ome yu ujetiga yipésu. Jecute angúroméone u Moises urusarane udore uje jno yúdi aja pitoringai. 12 Ujñapetácho Dupade áyipiedie quigode jnese uje purusãracho ome Moises nanique. Chamáñaje cucha gajnaréngone íjnonguiji, enga jé ũrepíso jnese. 13 ¿Ja Moises urusarane Dupade áyipie ueradedie udire u uje jno yúdi aja pitoringai a? Ungare. Yisijnaringuéone u uje jno yúdi aja pitoringai. Enga pisijnaringuéone uringai sijnaque pijoque gu udore uje jno yúdi aja pitoringai. Datéringa uje pisijnaringuéone angúromei u Dupade áyipie ueradedie uje chequésãre yu. Mu Dupade áyipiedie udire u to uje pésu ga pijoguipis ome yoque uje cuchiso pisijnaringuéone ome yoque. 14 Yirajágo uje Moises urusarane garani u Dupade. Mu yiraja yu to uje e yẽra yu ome pisijnaringuéone nanique ujetiga yiji adode. 15 Que yiraja gotique uje yajnéra yisijnaringuéone údi uje yetaque múñi. Jé basa yipotapísa joróga jeta yipésu cucha omone mu que yipésu go. 16 Obiréjna ome yadode udore uje yiraja uje cucha omi tu Moises urusarane cucha puyácho. Chamáñaje uje yiyó udore gáyode enga jĩrique yo yáyugu yu, uje yetaque yate gajnaréngone gu. 17 Jecute que yipésu yate gajnaréngone gu yipotigádode, mu pisijnaringuéone iji yajei u uje pésu. 18 Yiraja uje que yatique ujñapeque go iji yuringai udé jnutiminore. Uje yipotarása jeta yipésu cucha ujñapetade mu que togome yu jeta yipésu. 19 Que toc jeta yimate yu aja yipotigádode cucha omío. Yajéode u ujetiga ca yipésu cucha gajnaréngone marínga, qué yipésu. 20 Jecute uje yajnéra yisijnaringuéone údi uje yetaque múñi, enga obiréjna uje que uyu u go uje yipésu udore, mu pisijnaringuéone iji yajei u uje ipesute yate gajnaréngone udore. 21 Jecute yipotarása jeta yipésu cucha omone mu yingóri u pisijnaringuéone iji yajei. Ga que toc ujeta yipésu. 22 Yirasé jorógui Dupade áyipiedie iji yajei. 23 Mu yiraja uje yingónique cucha a jé déji yajei. Cho ujetiga pacadisṍri u pisijnaringuéone iji yajei enga chiroque yu aja dacajnaquéode enga chãraque ome yu ujetiga yangári cucha uñeque. 24 Erã́tique yiraja yisocáringome yu jõ. Que yimo yiquetangónique cucha ome yu to. Chamáñaje pisijnaringuéone que chóyime yajei gu. A diga chimate yu aja pitoringai jne. 25 Jecute yiraja uje yajéode u yipésu Dupade ojningane cucha uje déji Moises urusarane, mu cho ujetiga pisijnaringuéone isaque yu enga que toguipis ome yu ujetiga yipésu Dupade ojningane cucha. Mu que piquetangónique uñeque cuse ome udore. Gusu Dupade. Chamáñaje chinoningase yocangarádejnai Jesucrísto anguresórone uyoque jnese gu. Jecute yacãripise Dupade gai ome ate ueradode udore ome yoque.
1 Ujetiga ayorérique e changureta Jesucrísto enga tiógara ti que chimo Dupade ujuyaquérique ome re. Chamáñaje e chicadígui gu dasoca bajade uje cáma changureta Jesucrísto, enga e cho dangaráni iji Dupade Ujopie Espíritu Sánto, enga pota doi uté ojningane cucha. 2 Cho ujetiga yugúcoji pisijnaringuéone, pitoringai ore ajei enga que toque guetique ome yoque. Mu Dupade Ujopie Espíritu Sánto ijnimique yóguiji udore ajei. Chamáñaje chisi ome pucuecaringué eyúgojmai ome yoque gu uje yanguretágo Jesucrísto. 3 Enga Dupade isocade udore suépise Moises urusarane gáyode. Chamáñaje eyuque ayoréode uyóguiji erámi tudé, jecute que togome yoque ujetiga yipéco Moises urusarane quigode jnese, jecute que udore ijnimique yóguiji pisijnaringuéone go. Mu Dupade chiroque dajnacari Jesucrísto aja erámi tudé, enga ujnacari tuté cho ayoré iji re to. Gaidi tu gu ujetiga Ujnacari toi ome yoque enga cho yoquisijnaringuéone oré. Enga Dupade Ujnacari tuté cho pisijnaringuéone ipesungórone uyoque nanique, mu que pésu pisijnaringuéone gotique. Mu tẽra re ome yoque. Jogadi u uté uje Dupade cho dajuñame dabi ome erámi unirisórone uyoque yoquisijnaringuéone. 4 Dupade pésu udore gu ujetiga chinoningase erámi unirisórone uyoque ujetiga ujñapetaque yoque, enga e yedugo Dupade Ujopie Espíritu Sánto ipotigádode cucha. Enga e que yicoi yocate bajade uje yipéco nanique uje cáma yirajágo Dupade atique. Enga Moises urusarane Dupade áyipiei e que ibiracho ome yoque rĩ jetiga yicoi. 5 Uté gosi uje áyipie que chiramurase erámi tudé adode, uté gosi u uje isocade jé u erámi tudé jogosórone isocade. Jé basa gosi uje áyipie que chiramurase Dupade, uté gosi u uje isocade u Dupade Ujopie Espíritu Sánto isocade. 6 Mu udore ore uje que ore áyipiedie chiramurase erámi tudé, ore quique obiréjnai u pitoringai. Jé basa udore ore uje que ore áyipiedie chiramurase Dupade enga ore gajnéone u pucuecaringué eyúgojmai, pajesereringai ore. 7 Que gusu udore mu udore ore uje que ore áyipiedie chiramurase erámi tudé ga Dupade guetesórone u ore. Enga que togome ore ujetiga ore pésõra Dupade áyipiedie quitique. Chamáñaje que ore pota gu. 8 Jecute udore ore uje ore chajo rágaja dasoca bajade enga que toc ujetiga Dupade chirase re ome ore ate goningárique. 9 Ujetiga jec ũré enga Dupade Ujopie Espíritu Sánto jogate uaque enga e que uacajóyo uágaja uacasoca bajade go, mu e uacabeyopísi Dupade Ujopie Espíritu Sánto ipotigádode cucha. Ujetiga Crísto Ujopie Espíritu Sánto ca déji gosi enga obiréjna uje uté gosi unejángome Crísto. 10 Ujetiga Crísto jogate uaque enga cucha ueca uacáyipiedie. Chamáñaje Dupade e cho ayoré ujñapetáguiji uaque gu. Jé basa pisijnaringuéone isai uacao u jne uje toi. 11 Cachi baoi toi mu a jé Dupade chijnimapo jne rĩ iji dirode uñeque. Enga angúromei u dajopie Espíritu Sánto ome udore. Adi tu Crísto uje toi mu Dupade jé chiringarápo nanique rĩ iji itoringai quigade ome dajopie tuaté uje jé déji uaque to. 12 Yijorane uaque, e yocajnei tu ujetiga yicoi Dupade Ujopie Espíritu Sánto adode, mu que yocajnei tu gotique ujetiga yejnángo yocáyipiedie aja yoquipotiguéode gajnengórone cucha uje cachi yoquigaidode u udore nanique uje cáma yirajágo Dupade atique nanique. 13 Mu a jé boyo uacasoca bajade údi uje cáma arajáyo Dupade, enga uacaqui obiréjna u pitoringai. Jé basa ujetiga oyo uacátajasõri iji Dupade Ujopie Espíritu Sánto enga a uacate gajnaréngone toi ome uaque jne, enga jogadi u uté ujetiga aquecáyo. 14 Ujetiga Dupade Ujopie Espíritu Sánto cho gosi quique enga nóna gosi aja quedéjnane, obiréjna uje Dupade ape uté gosi. 15 Dupade guerané dajopie Espíritu Sánto ome uaque que josipierẽ go ujetiga pesapo uacasadodéringane rĩ. Mu u uje pésu uaque enga uacoyopise ujetiga jé Dupade abipise uaque. Jecute Dupade Ujopie déji yoque enga jé jnari ujetiga yoco yocai iji Dupade. Jecute yojníjo: “Dupade a, yocai tupúsu ua.” 16 Yirajágo yocuringane Dupade abío iji yocáyipiedie. Enga Dupade Ujopie Espíritu Sánto catecã́ri yoque to iji yocáyipiedie uje jé ũré yocuringane Dupade abío. 17 Ujetiga jec ũré enga Dupade ape yoque enga jé basa a yocajneque Dupade gueranone cucha jne uje chichaga dabode uyoque. Enga yocajnéone cucha a jé chopise Crísto gajnéone cucha to jne. Yirajágo uje Crísto chejnáreque re nanique uje doi Dupade adode, jecute ujetiga yoco yoquiba Dupade adode to iji erámi tudé enga a jé yijnángo Crísto ingoningájnai to jne iji gaté. 18 Isenga ca cuchárique u yocuringane ducañerájma iji deréjnane udojo jõ. Chamáñaje a yimóngo Dupade ingoningájnai jne iji yocuringane ducañerájma uéchai gu. 19 Dupade ipesudode jnese ore jnatupúsu diri ujetiga Dupade di enga chingo dabode aja ore. 20 Chamáñaje Dupade cho darúja jnumi nanique gu uje jnani bajai ore pésu pisijnaringuéone. Mu que jnumi isijnaringuéone u gotique nanique. Cachi Dupade cháta jnumi aja jnani bajai nanique uje cho darúja ore. Mu Dupade ipesudode udore que ore cha dangoronenie ome daquetagónique cucha yui. 21 Jecucha Dupade ipesudode cucha iji erámi tudé toi gatuaque, mu diga Dupade a chijnime dapesudode udore iji pitoringai jmáinie jne ujetiga diga ore chijna Dupade abode uyoque yoquingoningájnai to jne. 22 Yirajágo uje cucha gajnaréngone jĩrique chichagu raja erámi nanique iji taningai, jé aja deréjnane udojo. Jecute erámi udé ujñapié ajãpe iji cucha gajnaréngone udore jmáinie. Ga gajnua u chequéraque uje ica e tagu iji ga ujñapié ajãpe iji achaminone jmáinie. 23 Mu que gusu erámi uje ujñapié ajãpe iji cuchade jmáinie, mu jé adi u Dupade anguresórone uyoque to. Dupade chisi ome dajopie ome yoque gu ujetiga ca yiyágo yocangoronenie ome dẽrate ejode yúode. Mu jé ate uje yocujñapié ajãpe to iji cucha gajnaréngone jmáinie iji erámi udé to. Enga yijnátugo yui ujetiga Dupade chimanipise yógaja re ome yocuringane Dupade abipíso. Chamáñaje a chinoningase yocao bajade iji diri uté jne gu. 24 Dupade chiqueta yoque gu uje panguretigai ome uruode uringai tocachuque déji yoque. Uacamóño uje gosi e chimo cuchárique enga que doi ga changureta yui go. Chamáñaje e déji gosi gu. 25 Mu uje cáma yimóngo cuchárique, mu yanguretágo yui jogadi u uté uje que yocáyipiedie cho sebégome cuchade udore yúode. Isocai u udore uje yiroco Dupade uruode uringai tocachuque yui ome yoque. 26 Jé adi upo rĩ Dupade Ujopie Espíritu Sánto. Yoquetotiguéode garósi ome Dupade adode, mu jĩrique Dupade Ujopie chátaja yoque. Uje que yirajágo yocuru quitique ujetiga yicatecãcoi Dupade, mu Dupade Ujopie Espíritu Sánto doi enga catecã́ri Dupade ome yoque. Ga cachi Dupade Ujopie Espíritu Sánto icatecãraitigade udore gajnúone u pujñacade. Enga que toc ujetiga jnanírique doi ga chirate Dupade Ujopie uruode udore to, ujetiga tṍraji gosi pijnani. 27 Dupade chiraja yocáyipiedie jnese, enga chirajápo dajopie Espíritu Sánto icatecãraitigade quigode to rĩ. Enga Dupade Ujopie Espíritu Sánto chiraja Dupade áyipiedie to, jecute chedu Dupade áyipiedie udire uje catecã́ri Dupade ome yoque. 28 Yirajágo uje cuchade jnese uje chise Dupade ijnorasórone, enga Dupade doi enga chinoningase cuchade udore enga noña ga cucha omío ome dajnorasórone ore jnese. Yojningane u udore ore uje Dupade e pésu dáyipiedie ome ore nanique uje ajegáite ore. 29 Chamáñaje Dupade chiraja danguresórone uyoque nanique uje cáma pipesute erámi, enga ajéode u ome yoque ujetiga yocopise ujnacari Crísto. Pota gu ujetiga Ujnacari jorane jiépiso, enga yoco yoquĩjora urẽjai iji Crísto jnese jne. 30 Dupade ibidigode u uyoque uje ajegáite yoque nanique uje cáma pipesute erámi iji taningai. Enga Dupade chinoningase dabidigode uyoque, enga cho ayoré ujñapetáguiji yoque. Pésu udore gu ujetiga dameserane uyoque yijnángo ingoningájnai to. 31 ¿Jé yoco ringome Dupade ipesute datéode udore ome yoque jne a? Quigode u uje yoquĩjorai u Dupade, jecute que toc ujetiga uñeque doi enga suérase yoquibánique. 32 Uacamóño Dupade isocai nanique uje que chãraque Dajnacari ome yoque, uje ujnacaripise múñi. Mu tẽra nanique ujetiga toi ome yoque. Uje que chãraque Dajnacari ome yoque, obiréjna uje a ca chãrangápo cucha uñeque ome yoque jne rĩ, mu a chisi ome yoque deranone cucha jnese jne. 33 ¿Ja ayorérique déji ujetiga chaguhéta cuchárique Dupade ajegaitique gánique a? Ungare que déji go, chamáñaje Dupade e cho ayoré ujñapetáguiji dajegaidode jnese gu, enga ore uringai máraque e bijna ome ore. 34 ¿Ja ayorérique déji ujetiga tẽra yógome Dupade ujuyaquei a? Ungare. Chamáñaje Crísto e toi gu ome yoquisijnaringuéone nanique. Que gusu udore mu ecápo rĩ enga e déji Dupade ãrachua iji gaté enga catecã́ri Dupade ome yoque. 35 ¿Ja ayorérique déji ujetiga chinoningase Crísto ijnoraquédatéi ome yoque a? Ungare. Ujetiga pejnaréngone chise yoque, jeoga cucha dacate gajnaréngone chise yoque, jeoga pujuya yoque, jeoga chaguhei chejna yoque, jeoga yijmátago ome piguidedie, jeoga pitoringai idógosi iji yoque, jeoga sué yoquibai enga yitogoi, mu Crísto ijnoraquei ome yoque qué jogate yoc. 36 Ore urusarane Dupade urúo déji uje chojninga: Yoco yoquiba badode, Dupade, iji dirode jnese. Ore socárome yoque, jecute yoca jnunie u áyasadie uje qui u dagachodi yui. 37 Jé cho yoque, mu que toc ujetiga cucha dacadode udore uñeque sué yoquibáyode. Chamáñaje yoquijnorasṍri u Crísto, jecute pujnuéngaisṍripísode u yoque. 38 Enga yirajápise uje que toc ujetiga pejñuque Dupade ijnoraquei ome yoque. A yitogoi marínga, jé chijnóra yoque. Yiquecágo mu jé chijnóra yoque. Ujetiga Dupade utocaitique, jeoga peduguéjnarique, jeoga Satanas utocaitique pota chinoningase Dupade ijnoraquei ome yoque, mu a ca togome udore uñequerase. Jé cho cucha dacadode jnese rĩ ujetiga tocade ome yoque iji deréjnane udojo, jeoga tocade ome yoque dirome iji yoquiquei. Que toguipise to ujetiga chijnime yóguiji Dupade ijnoraquei gotique. 39 Que cucha gateminónique, jeoga jnutiminónique cuse ujetiga chejñu Dupade ijnoraquédatéi ome yoque. Jé cho Dupade ipesudode cucha jnese, que udore uñeque doi enga chejñu Dupade ijnoraquédatéi ome yoque. Yirajágo udore gu uje Dupade chingopísa dajnoraquédatéi ome yoque nanique uje tẽra yocangarádejnai Jesucrísto ome yoque.
1 Yuruode ome uaque jé ũrepíso. Chamáñaje Crísto anguresõre yu ga que yo yurupatáringa gotique. Dupade Ujopie Espíritu Sánto iji yajei chiraja yuringai ũré, ga que yagutéraque cho jora gotique ome yurupatáringarique. 2 Yopise yáyugu yu ome yurásade, ga yayuguhebátigai chinguíra yu aja jnumi gatuaque. 3 Yajéode u jorógu ujetiga pujuya yu, ga yo jmíti, jmíti ome Crísto, ga gusu ujuyagáite yu ga piquetaque yurásade ore. 4 Chamáñaje Dupade ajegáite yurásade Israel goso ore nanique, ga cho dabi iji ore. Dupade ingoningájnai déji ore to nanique. Dupade chingo dáyipiedie ome ore gatuaque, enga ore gajneque Dupade uruode Moises urusarane. Dupade chingopome ore rĩ pijmapié omé ujetiga gosi doi Dupade adode. Dupade chingopome ore rĩ uje a chiroque ore iquetangóri aja ore jne. 5 Ore garãpíode u Israel abode, enga Crísto jé garãpíode u ore to. Mu gusu aoi uje tṍraji ore. Uje jé Dupa pujnuéngaisṍre Crísto uté to. Enga uté gajnéone picotaquéo que eruénique cuse iji deréjnane jnese. Amen. 6 ¿Ja cucha bisideque Dupade uruode ome Israel gosode a? uje cáma pimo uringane tocachucho. Ungare. Mu cachi Israel ape disi ejode uñane que judíopise ore gu, jecute Dupade que cháta ore aja darasapísode ome daruode uringárique tocachucho. 7 Jé chopo Abraham ape disi ejode to rĩ. Que Dupade cho dabi iji ore jnese gotique. Uje Dupade chojningame Abraham nanique: “Gusu Isaac ape disi ejode ujetiga o babi iji ore jne.” 8 Yirajágo ome udore uje Dupade que cho dabi iji gosi gu dabatigai punire, jeoga gosi garãpíode jnani bajácho, mu cho dabi iji ore uje ore changureta Dupade uruode, ga Abraham abipíso u udore ore. 9 Enga Dupade uruode chósi te ome Abraham nanique: “A yĩri iji uaque jne iji yojningai dire, enga a bacoté Sára atique cuse jne.” 10 Que gusu udore mu Rebéca ape gáreode ore dayé chojmára ga yocai jnani bajai Isaac u nanique. 11 - 12 - 13 Mu uje cáma disabode udore base mu jé Dupade ajegáite uñai iji ore ujetiga áyipiedie tocade. Que Dupade chiringare ore atígome go uje pésu dáyipiedie udire. Chamáñaje cáma ore pésu pisijnaringuérique gu. Enga cáma ore pésu cucha arétique rĩ. Mu Dupade chojningame Rebéca uje cáma atígo base: “A bape ejoi cho daróguiji bajai jne.”Enga Dupade uruode uñane cuse uje chósi te: “Yijnorai u Jacob, jé basa yetei u Esaú.” Yirajágo ome udore uje Dupade gajnei tu ujetiga jé doi dajegaitíguiji yoque, enga que doi ga chiringare gosi atígome go. 14 ¿Jé yoco ringome Dupade adode udore a? ¿Ja yojníjo ome Dupade adode udore: “Gajnarécho”? Ungare. 15 Dupade jé urúo to ome Moises nanique uje chojninga: “Ujetiga yipota yosõre gosi enga a yosõre jne. Ujetiga yipota yátaja gosi enga a yátaja jne.” 16 Jecute que pigáite oré Dupade osongaquéode ome jnanírique ipesutique jeoga ipotigátique, mu Dupade osongaquéode gajnengórone u dedopíode. 17 Dupade uruode chatata uje Dupade catecã́ri Egípto gosode ore eduguéjnai Faraón nanique ga chósi tome: “Cachi yipesute baringai eduguéjna cuchape. Yigaidi u gu ujetiga yujnué babai enga yuringai ujopierãque pijógome udore iji erámi údode jnese.” 18 Yimóngo ome Dupade isocade udore uje Dupade chosõre dedopíode iji yoque, jé basa ujetiga ajéo enga chisi ome páyipie uajádedie ome uyoc uñane ujetiga ca yangácoi. 19 Isenga uacuñeque pota catecã́ri yu ome udore. Enga a ojningárasa: “Ujetiga jec ũré baruode udore enga Dupade ipesudé gosi áyipie uajade, ¿jé gotique gu a uje Dupade doi enga cho ayoré máraguiji uté gosi? Uje que toque ãrie ujetiga ca Dupade ipotigádode cucha tocade ome yoque.” 20 Mu ujetiga baruode urásu udore ome yu, enga a yiboratarása enga a yingorása ua: ¿Ga cuchape ua ya uje babotãre Dupade? ¿Ja córaque doi enga botãrirase dapesusónique a? Ga chojningárasome a: “¿Jé go uje bósi te ome yu?” 21 Ungare. Que quigode u udore go. Uje dachorasórone ore gajnei tu ãrie ujetiga ore ipesudode u dajegaitígo ome dajnei dachabeque. Jeoga orai u cucha ujñapetai, jeoga oratique u cucha bisidétique. 22 Dupade potarása ujetiga uringai ujopierãque pijoque ome erámi ujetiga ájningai e tocade ome ore uje ore angoninguite paritigade e jno ore údi aja Dupade ujuyaquedatei. Mu ujetiga Dupade ajéo qué chidota re ome ore, enga que toc ujetiga yibotã́co Dupade ome adode udore. 23 Chamáñaje áyipie dépisiji danguresórone uyoque gu. Chiraja gu uje uringai pujnuéngaisṍre a pijoque gu dadode ome yoque. Yojningai u Dupade ijnorane uyoque. Chamáñaje chosõre yoque enga ajegáite yoque nanique iji taningai ujetiga yijnángo ingoningájnai to iji gaté jne. 24 Jecute Dupade tibidi yoque ome udore. Tibidi judíode uyoc uñane iji yocujode judío ujade. Mu que gusu yoque go. Mu tibidápoi purása quedéjnane uñane to rĩ iji ore ujode purása quedéjnane ujade. 25 Jé cho jnani bajai Oséas urusarane Dupade urúo uje chojninga: A yo yurása iji purása quedéjnane jne, uje que yurása ore to nanique múñi. Enga a yijnóra ore jne, uje que ore ijnorangónique cuse nanique. 26 Yicatecã́ri ore iji ore uniri nanique enga yojninga: “Que yurása uaque go.” Mu diga yo yabíji ore jne iji ore uniri tuté enga a ore chojningame ore jne: “Dupa uecai ape ore jõ.” 27 Mu Dupade uruode déji ome Israel gosode to, enga Dupade uruode atatasṍri Isaías urusãracho nanique. Enga chósi te: “Israel ape disi ejode jiépise jne marínga, a Dupade iquetade iji ore garósi jne. 28 Uje Yocangarádejnai ũrepise ome daruode enga a uruode udore tocade jne ome erámi jnese. Enga a jĩrique chimate dapesudode cucha dacacho udore aja quigode jnese jne.” 29 Dupade uruode atatasṍri Isaías uté urusarane júdi u uté to nanique uje chojninga: Ujetiga gaté jogonórone ore Edu guéjna Cuchábi ca noñome yoca pe disi ejórigo uñéngo iji guesi ome daringane ueca enga a e íjnonguirase Israel gosode uyoque iji erámi. Ga a yocajnúone urásu Sodóma gosode, Gomórra gosode ore. Uje Dupade chejnápise ore nanique enga íjnonguipise uecade iji ore. 30 Cuchade udore qui tu uje purása quedéjnane uje que ore áyipieraque déji daringane Dupade imeserácho nanique, mu udore jé upúsu uje Dupade doi enga cho ayoré ujñapetáguiji ore gu ore anguretigai. 31 Jé basa Israel gosode ore jos eti ore chise daringane Dupade imeserácho gu dagaidode Moises urusãracho. Mu que ore chibote go. 32 ¿Jé gotique gu a uje que ore chibote? Ore chedu dapesudode cucha gu uje ore doi judíode jmapié. Enga que ore chedu panguretigai ome Dupade. Jecute ore gajnui u jnanírique uje cṍra iji cucaranéraque ga chona dajegaidi yui. 33 Udore déji ore urusarane Dupade urúo to enga chósi te: A yiroque yutocaitique aja Sión gosode ore jne, mu a uté gajnua tu cucaranéraque jne iji gosi iquei ujetiga chucuase uté gosi ga cṍraji. Mu ujetiga gosi changureta yuto caidi tuté que cucha bisideque anguretigai gotique. Mu jogadi u uté ujetiga chise daringai pimeseraque ome yu.
1 Yijorane uaque a, yajegaidipísi tu ujetiga yurásade judío ore chise daringáringo piquetaque to. Jecute yicatecã́ri Dupade, ga yijócha ajei údi ome ore gatuaque. 2 Mu a yisi yurásade judío gai jne. Chamáñaje ore potapísa ore doi Dupade adode gu. Mu cachi cáma ũré enga ore chirajápise Dupade uruode quigode. Jecute ore cho parágome Dupade áyipiedie quigode. 3 Que ore chiraja to Dupade isocade ujetiga pésu gosi enga gosi chise daringai Dupade imeseraque. Mu ore ipesudei dajmapiedie jeta ore chise Dupade, enga ore chedu udire. Jecute que ore chibote go. Chamáñaje ore chicha Dupade uruode aja ti yui gu, uje Dupade uruode udore u múñi uje cho quique gabi ome yoque ujetiga yico Dupade. 4 Uje Crísto di ga eruei u ujetiga jnanione chucué daringane Dupade imeserácho ome dagaidode Moises urusãracho. Jé basa e panguretigai ome Crísto u ujetiga gosi chise daringárique pimeseraque ome Dupade. 5 Moises cho quique darusarane ujetiga pirajaque quigode ujetiga gosi chise daringárique Dupade imeseraque. Ga urusarane chósi te: “Pucuecaringuei gajnengórone u udore ore uje ore chimate yacajnaquéode Dupade urúo aja quigode aja jnumi jnese.” 6 Mu ujetiga Dupade imeserátique doi enga chorase dojórique ayoré quique to enga a chojningárasa: “Ca ojningame ua: ‘¿Jé yo ringome jne a? ujetiga yoru gaté ujetiga yijócha Crísto ajei údi ujetiga doi jnumi enga chiqueta yu.’ 7 Ca ojningápome ua rĩ: ‘¿Jé yo ringome jne ujetiga yicáji jnaropié enga yijnime Crísto iji jnaropié jogosórone ujade ujetiga doi ga chiqueta yu?’” 8 Mu Dupade imeserai tuté uje chise daringai ujñapetaque gu danguretigai a chojningárasome dojórique ayoré: “Crísto que idája iji ua gotique. Chamáñaje e uacadúcho ujnomei enga e uacarajáyo adode quigode, enga e uacacatecãchoi ñane ome adode to.” Uacamóño uje panguretigai ome Crísto jé u yocacajnaquéode quigode to. 9 Jecute ujetiga atata banguretigai ome Jesus uringai pangarádejna, enga banguretapo uje Dupade iquetaque uté iji daringai toque rĩ, ga jogadi jé u uté ujetiga ese baringárique piquetaque ome Dupade. 10 Ujetiga panguretigai ome Jesus jogadipise yocáyipiedie enga Dupade cho ayoré ujñapetáguiji yoque. Ujetiga yatatago yocanguretigai uté ome yocujode ayoréo enga Dupade doi enga chiqueta yoque. 11 Chamáñaje ore urusarane Dupade urúo jé cho uje chojninga: “Uje ore changureta yutocaidi uté enga que ore anguretigai cucha bisideque go, uje udore ore u gu uje ore chise daringáringo piquetácho.” 12 Judíode, purása quedéjnane jé ore cho ñane jnese iji jnumi. Chamáñaje Yocangarádejnai chojmára gu iji erámi údode jnese. Enga Yocangarádejnai tuté caniranguipise ome dacatecãraisórone jnese. 13 Uje Dupade uruode chojninga: “Udore ore jnese uje ore chutṍri Yocangarádejnai, enga jogadi u ujetiga Yocangarádejnai doi enga chiqueta ore jnese.” 14 Mu ujetiga cáma ore changureta Dupade enga ¿jé ore chutõrirase a? Ungare. Chamáñaje ujetiga cáma pacadique ore ome Dupade adode enga que toc ujetiga ore changureta. Adi jé u to ujetiga ca uñeque jno Dupade uruode údi aja ore enga a ca toc ujetiga ore chudute Dupade ujnomei to jne. 15 Mu ujetiga ca putocáite gosi, enga a ca toc ujetiga gosi doi enga chatata Dupade uruode ome ore. Uacamóño uje Dupade uruode déji uje chojninga: “Uneripise ore yui uje ore di Dupade áyipie omenie údi aja yoque ujetiga pajesereringai chise yoque to.” 16 A uñeque jno Dupade uru piquetangórone údi marínga, jé ate uje uñéngo a ca ore chise unétique jne. Jnani bajai Isaías urusarane quigode jé u udojo to nanique uje chojninga: “Yocangarádejna, ¿jé gosode u a uje ore changureta yocatatagode barúo a?” 17 Uje gosi chudute pujnomérique, enga quene jogadi u uje gosi changureta. Jecute isocai u uté uje gosi tangári Dupade uruode ome Jesucrísto adode. 18 Mu yósi tome yu: Jé socaseti ca ore chudute to go. Mu cachi ore chudute ãrie, uje Dupade uruode chojninga: Ore chudute Dupade uruode atata sórone uruode iji erámi údode jnese. Ga que eruojmárique erãpe cuse gotique. 19 Mu yicatecãrápoi yu ga yojninga: ¿Ja ca Israel gosode chiraja udore quigode to a? A ore chiraja jõ. Chamáñaje bajaque Moises nanique uje chojninga: A yo yurásade iji purása quedé jnane uje unejaque ore múñi, enga jogadi u jne ujetiga Israel gosode aratáyiñome yu ome purása quedéjnane ore. Enga a ajningaranguipise uaque jne ujetiga amóño uje yo yurása iji purása quedéjnane uje que ore chiraja cuchárique nanique múñi. 20 Jnani bajai Isaías urusarane jé cho udore to, enga obiréjnapise uruode quigode uje chojninga: Que ore chucué yu, mu jé ore chise yu. Que ore áyipieraque déji yu gotique, mu yiji enga yingo yu aja ore. 21 Isaías ojningai u Israel gosode to uje chojninga: “Jecucha ga yibidi Israel gosode ujetiga ore tibágui yu. Mu ore chetaque yibijnane. Chamáñaje ayoré angoninguite pariguipise ore enga jecucha ore tagu yuruode aja.”
1 Yicatecãrápoi yu rĩ ga yojninga: ¿Ja Dupade gãrate darásade Israel gosode a? Mu yiraja uje que gãrate ore gotique. Chamáñaje Israel gose yu to gu. Chamáñaje Abraham, Benjamin ore ape disi ejo yu to. 2 A Dupade urása aro Israel gosode uyoque nanique ga que doi enga chiramurasirase yóguiji dajénique. ¿Ja ca adúcho Dupade uruode atatasṍri Elías adode uje purusãracho nanique? Uje Elías uté catecã́ri Dupade nanique enga chaguhéta cuchade darásade gai. Enga chojninga: 3 “Yocangarádejna, yurásade jecucha chujé baruode atatasórone iji dajade. Ore chujé bajnéone gaserãcho iji jnumone uje yujégo cuchisode aja gáyode uje yẽco udore ome ua. Gusu yu uje yiji badode, mu e ore jmongarája yu to rĩ.” 4 Mu Dupade chajnai Elías ga chojninga: “Qué 7.000 jnanione iji Israel gosode uje ore changureta yu. Chamáñaje yirodipise ore ome ayoré gajnui Baal gu. Enga que ore chichaga dagatáidie iji Baal uté iquénique go.” 5 Isocai jé u udore ome Israel gosode iji deréjnane udojo to. Qué uñane déji to uje Dupade chingo dosongaquéode aja ore, enga jé ajegáite ore ome re to gu. 6 Yirajágo ome udore uje yocuringane Dupade imeserácho tṍraji Dupade osongaquéode ome yoque. Jecute obiréjna uje que toc ujetiga gosi chise daringárique Dupade imeseraque gu dapesutique cucha. Mu ujetiga Dupade dorási enga chimesere gosi gu uté gosi ipesutígo, enga e que Dupade icaniratiguei u uté gotique. 7 ¿Jé yoco ringome Israel gosode jne? Quigode u uje ore chucué jorógui daringáringo Dupade imeserácho, mu que ore chise go. Mu Dupade ajegaidode iji ore, ore chise. Jé basa amirone iji ore Dupade chisi ome ore áyipie uajádedie ome ore, ujetiga ca ore tangári cuchárique. 8 Chamáñaje Dupade urúo u udojo to iji daruode enga chojninga: “Cachi Dupade ipesute ore ujetiga ca ore chajire yúrique. Jecute ore edodie cachi jogate dore bisideque, mu que ore chimo cuchárique go. Jé chopo rĩ, cachi ore angoninguinone jogate dore bisideque, ga que ore chudute cuchárique go. Jecute que ore chajire Dupade yui gotique, jé aja dirode udojo.” 9 Jnani bajai David ojningai u ore to uje chojninga: Ore chamáta ñane ome dabose unérone enga que ore áyipieraque déji cucha uñeque. Mu ore chuninameti pujuyaquéri que chigaru ore. Enga ore cachodi u uté ome Dupade uje cho dajuñame ore. 10 A ore cho edoparigode jne, chamá ñaje a ca ore chimópo dajiritígo rĩ. Enga a ore cho jne ujetiga pugú chade iménuone chijna ore aja jnumi iji deréjnane jnese. 11 Yicatecãrápoi yu rĩ enga yojninga: ¿Ja Dupade noñome judíode iji te jmete a, enga ca juegapo dei ome ore rĩ a? Que quigode u udore gotique. Judíode isijnaringuéone u uje Dupade doi enga chingo daringai piquetangore aja purása quedéjnane. Gaidi tu gu ujetiga judíode pañáji ipesute datéode ome purása quedéjnane enga ore chajni gai to. Enga ore chirate purása quedéjnane aja ore anguretigai ome Dupade to. 12 Erámi unirisórone ore cho dagutiyamáini iji judíode. Chamáñaje uje angoninguite parique judíode ome Dupade enga jogadi u uje Dupade chajire erámi unirisórone uñane ore yúode. Uje judíode que ore chise Dupade áyipiedie unétique, enga ore gajnúone u ayoré jmatatígo. Jé basa purása quedéjnane ore gajnúone u ayoré atatígo. Chamáñaje Dupade áyipie omenie gajnesórone u ore gu. Mu ujetiga judíode ore chajni Dupade gai jne, enga a pininaquedatei jogadi u jne ome ore jnese. 13 Yipota ujetiga e yicatecã́ri purása quedéjnane uaque. Dupade iroque yu aja uaque nanique, enga que yo cucha bisidéguiji yajnei Dupade iroqué uté ome yu. 14 Yacajnaquéode gajnesórone u uaque mu yigaidi upo ujetiga yurasapísode pañáji Dupade isocade ome uaque rĩ, enga ore doi enga ore chirate uágaja panguretigai ome Dupade to ome ore uringáringo Dupade iquetácho. 15 Cucha datei u uje Dupade tṍra judíode nanique enga chajire purása quedéjnane yúode ujetiga purása quedéjnane ore chise pajesereringai ome raque. Mu a cucha datepísi u ujetiga Dupade chimeserapo judíode ore rĩ. Udore gajnúone a u jne ujetiga doi enga chiqueta ayoré totígo enga ore ecápo rĩ. 16 Judíode ore gajnúone cucha déji. Ujetiga pẽrate harína ome Dupade, enga Dupade a cho dajnénguiji ore ipesudi arurécho jnese jne. Jé chopo poria rĩ uje énique pẽrate ome Dupade enga Dupade a cho dajné iji cucha goto jnese. 17 Judíode uñane ore gajnúone u pore ueradé paca jmanecade uje paquesuque enga ducãrate. Uje poria uaté i tu olívo. Jé basa purása quedéjnane uacajnúone u poria uña jmanecade uje poria tuaté i tu olívo to, mu sué iji erámi bisideque. Cho ujetiga Dupade doi pore gajnarengue uaté jmanecade enga chichaga uágaja daquesugode pore ueradé jmanecade jogadode. Jogadi u uté uje uacoyo uacajnei iji pore ueradé uaté éode to, enga eca uaque gu éode udore to. 18 Mu ca ajos eti jmanecaque pimeserai tu ua ome jmanecaque bajai uje paquesuque. Bamo uje que cuchárique tṍraji ua gotique. Mu poria uaté éode ipesute bangoningai. 19 A abotã́cho yu ome yuruode udore enga ojnichorásome yu: “Jec ũré, mu ca acadígui uje Dupade chaquesu pore ueradé jmanecapísode nanique ga doi yoque enga chichaga yóguiji daquesugode udore jogadode.” 20 Mu a yichajnarási uaque ga a yojningárasa: Dupade chaquesu ore gu uje íjnoque panguretigai iji ore ome Dupade. Mu Dupade que chicha uágaja ore jogadode gu uacangoningájnarique go. Mu chicha uágaja gu uacanguretigai. Jecute ca oyo dicotare iji uaque enga ajuso uacáyipiedie guio. 21 Ujetiga Dupade doi pore ueradé jmanecapísode nanique enga tṍra ore, ¿ja ca tõrapo uaque to rĩ a ujetiga uacasocade cunguésõri ore isocade? 22 Yipota ujetiga arajáyo uje caniranguipise Dupade, mu etoque to. Jecute etógaja judíode ore nanique uje angoneparique ore, mu chosõre purása quedéjnane uaque. Mu ajóyo uágaja Dupade icaniratiguei enga ca oyo cucha bisidéguiji. Chamáñaje ujetiga oyo cucha bisidéguiji enga jé socaseti etógaja uaque to jne. 23 Mu jé socase judíode ore chajni aja panguretigai ome Dupade ga Dupade chichapo ore aja dajogadi cásodicaite rĩ a. Uacamóño ãrie uje que cucha uajátique cuse go ome Dupade jeta chatĩrépo ore aja dajogadi cásodicaite rĩ. 24 Dupade doi uáguiji pore unejangue nanique marínga, jé chimate uágaja jmanecai jogadi iji pore ueradé. Jétapure judíode ujetiga chichapo ore aja dajogadi cásodicaite rĩ iji pore ueradé olívo uaté. Chamáñaje jé jogate aro ica ga que uajadipísome Dupade go. 25 Yijorane uaque a, Dupade áyipiedie ome judíode cho cucha pipoguiédedie uje cáma pirajácho ome erámi. Mu a yingome uaque jne. Yigaidi tu gu ujetiga ca uacuñeque doi enga cho irajatáguiji re ome Dupade isocade ome judíode. Chamáñaje judíode uñane que ore chise Dupade unétique gu. Mu ujetiga Dupade ajegaidode iji purása quedéjnane e ore chimate rágaja Dupade, enga jogadi u jne ujetiga judíode udore ore áyipie uajádedie eruei u, enga ore chajni Dupade gai. 26 Ujetiga udore tocade enga jogadi u jne ujetiga Israel gosode ore chise daringáringo Dupade iquetácho jnese jne. Chamáñaje ore urusarane Dupade urúo jé cho udore uje chojninga: A ore iquetangóri tṍraji Sión jne, enga a chĩro Jacob ape disi ejode isijnaringuéone jne. 27 Enga yuru cásodicaite ome ore tocade jne ujetiga e yĩro ore isijnaringuéone iji jnumi. 28 Dupade e cho damajosórone iji judíode iji deréjnane udojo, mu gaidi u gu ujetiga piotiguérique débi uaque to ujetiga eso uacaringáringo piquetácho. Mu Dupade qué chijnóra judíode, chamáñaje ajegaitedaté ore dayode nanique gu. 29 Chamáñaje cho jeta Dupade ẽrate cuchárique ome yoque mu doi ga jé chijnapo iji yocari rĩ. Que Dupade isocade u go. Jecute uje tibidi gosi ga que doi enga chetagapo gosi rĩ. 30 Angoneparique purása quedéjnane uágome Dupade nanique, mu uje judíode ore chetaque Dupade áyipiedie ome re enga Dupade caputáji purása quedéjnane uaque ujetiga uacajneque osongaquei to. 31 Adi jé u ome judíode iji deréjnane udojo, angoneparic ore to ome Dupade. Mu Dupade isocade ome ore a jé u isocade ome uaque to jne. A chajniapo ore gai to jne rĩ ujetiga ore gajneque to osongaquedatei. 32 Jecute Dupade noñome judíode, purása quedéjnane ore jnese iji dangoninguite paritigade jmáinie. Gaidi u gu ujetiga chosõre ore enga osongaquéode udore gajnengórone u ore jnese. 33 Dupade osongaquéode ome yoque que eruénique erãpe cuse go. Ayipierãque cuchape, enga irajataque cuchape rĩ. Jecute que pirajaque isocade gotique enga que toc ujetiga ayorérique doi enga chojninga: “Yiraja Dupade áyipiedie quigode jnese, a yatata quigode ome uaque jne.” 34 Cho Dupade uruode uje chojninga: “¿Ja ayorérique déji a ujetiga chiraja Yocangarádejnai áyipiedie a? ¿Ja pacadique Dupade nanique ome ayorérique a? 35 ¿Ga ayorérique déji a jetiga tẽra cucháringome Dupade bajaque nanique, ga jé basa Dupade cho uté gosi icaniratiguei oré a? Ungare, que déji go.” 36 Chamáñaje cucha ponáyone garani u Dupade nanique gu. Enga cucha ponáyone udore imanisṍri u Dupade jnese. Enga Dupade pésu cuchade jnese ome re ujetiga gajneque cuchade jnese. Beyoi ga yicotágo Dupade iji deréjnane jnese ome ingoningájnai. Amen.
1 Yijorane uaque a, yijócha uacajéode údi ujetiga ajnusinañopísa Dupade osongaquéode ome uaque. Enga beyoi to enga asíyo uágome Dupade to ujetiga gajneque uacaringane ayoré jnese uje jé uacaquecáyo. Eduyo Dupade iji uacajéode enga jogadi u jne ujetiga Dupade irasique uacadode. Que cucha daté pisocade udore gotique, mu cachi Dupade ucuegode u pisocade udore ome danguresórone uyoque. 2 Ayáyo erámi jogosórone isocade to, enga écãcho uacáyipiedie quitígo. Uje quene jogadi u uté ujetiga gosi adode omío ome Dupade. Ujetiga apéso udore enga a arajáyo jne Dupade áyipiedie ome uaque ujetiga eso uacaringane Dupade irasique. Chamáñaje cucha ujñapetedie u Dupade áyipiedie jnese ome yoque gu. 3 Uje Dupade osongaquei gajnengore yu to, jecute yicatecã́ri uaque jnese. Enga yuruode u ome uaque ujetiga ca oyo ayoredatei iji uaque. Mu ajuso uacáyipiedie guio. Uje gusu uacanguretigai iji Dupade u uje cucha ujñapetaque. Mu que garani u uaque go. Dupade guerani u yocanguretigai ome yoque. 4 Yirajágo uje ayorérique aoi chojmára, mu adode jiei iji gai. Enga adode udore cãra dasocade ome ñane. 5 Adi u uté ome Crísto anguresórone uyoque. Jiei yoque, mu cho ujetiga yocaoi chojmára uje yamátago yógaja Crísto jnese gu. Mu yocadode cãra re ome ñane to. 6 Dupade u uje chisi ome pirajatigade ome yoque jnese ujetiga yipéco adode. Enga doi dáyipiedie ome yoque jnese ome daroquéode. Yocajnei e u ujetiga yijnángo yocajnéone udore enga yicopísi Dupade adode ome. Dupade guerani u ome yocuñane ujetiga yatatago uruode. Ujetiga gosi gajneque udore enga jé arec ujetiga gosi changureta Dupade enga chatata uruode. 7 Ujetiga Dupade guerani u ome gosi ujetiga cháta cuchade aja Dupade anguresórone enga omi tu ujetiga uté gosi doi enga ca chuseque dojórigo Dupade anguresõre. Jeoga Dupade guerani u pirajatigai ome pacaditigade, enga uté gosi doi enga chacate dojórigo ayoréo. 8 Ujetiga gosi chiraja ujetiga cho quique dojórigo ayoréo, enga uté gosi doi enga cho ore quique ujetiga ore jnusi rome Dupade adode gaté. Jeoga Dupade chisi ome gosi uringai canirángome ga uté gosi doi ga chosõre dojórigo ayoré to, enga que chucué orégatéraque ome re. Ujetiga Dupade chisi ome gosi uringai pangarate ome gosi, enga uté gosi doi enga chusipise dáyipiedie guio ome darásade. Jeoga Dupade ajéode u ome gosi ujetiga chátaja udore ore uje que ore agutiyamáitique cucha cus enga uté gosi nína re ome dasocai uté uje chátaja udore ore. 9 Ajnóraño ñane ga jé ũrepíso uágome uacajnoraquéode ome ñane. Enga ca eso cucha gajnaréngone unétique. Enga jé ca abéroyo uágome uacate goningane ome Dupade rĩ. 10 Enga beyoi ujetiga uacajnoraquéode ome ñane chopise ujetiga uacãjorapise ñane iji jnumi. Enga angachopísi ñane enga jecucha ga ajicho uacojode ayoréo yui ome cucha ujñapetatígo. 11 Adotáyo uágome Dupade adode, enga ca pucutaquérique déji uaque. Beyoi Dupade iroquéode ome uaque enga ejnáñopise uágaja gaté. 12 Anínañopúsu uaque enga ca oyo caru ome uacangurenone cucha yúode. Ujetiga cucha gajnarétique chise uaque marínga, adotáyo uáguiji jmáinie. Enga ca aramuráso jeta acatecãchoi Dupade. 13 Ujetiga cuchárique qué chona uacojórique Dupade anguresõre enga beyoi enga átayoja ga osṍcho uté gosi. Jé ca ajusécho ayoré dírique to ujetiga chise uaque. 14 Acatecãchoi Dupade ome uacojode ayoréo ujetiga gajnareque ore adode ome uaque, ujetiga Dupade chátaja ore to. Ca atṍri Dupade ujetiga cho dajuñame ore mu acatecã́ri Dupade ome ore ujetiga chátaja ore to. 15 Ujetiga bojórique ayoré chirase re, áta ua aja ga arase ua to. Jé basa bojórique ayoré po ga áta ua aja enga abo to. 16 Beyoi ga jé Dupade anguresórone uacáyipiedie chojmára iji jnumi jnese. Ca dicotarechoqui uaque, mu parac uágome ñane. Ca asíyopise uacabai ujetiga irajataque cuchape uaque. 17 Ujeta uacojórigo ayoré atígo gajnaréngaja uaque marínga, ca beyoi ga aracho udore ore isocade to. Mu jecucha angongara bajnoraquei ome udore ore jnese. 18 Acueyopísi pajesereringane ome ñane. Ujetiga uacojórique ayoré chetaque uacasocade udore, mu jé ejnáño uágaja. 19 Yijorane uhuaque a, ca jnutaque uaque jne. Mu jé dóji ga Dupade a cho dajuñame pisijnaringuéone ipesungórone udore ore jne. Uje Yocangarádejnai chojninga: “Yajnei tu ujetiga yo yujuñame ore. Ujetiga gosi adode gajnarécho ome dojórique ayoré, mu a uyu u jne ujetiga yo uté oré ome ate gajnaréngone udore.” 20 Dupade uruode dépoji rĩ uje chojninga: “Ujetiga bamajosõre gosi marínga, chaguhei chejna ga asi ome potígo ome. Ujetiga cajnóriji marínga, asi ome yodi ome ga chóji. Chamáñaje bacaniratiguéode udore a chinguíra pajegátigai aja uté jne.” 21 Ca be ga bojode ayoré isijnaringuérique chijnime bãrírique. Mu ca ajuseque uté jne enga jogadi u jne ujetiga ajnué uté etétigade gai ome ua.
1 Dupade ajéode u ujetiga yicoi ga yangácoi yocasutedie iji yocunirone jnese. Chamáñaje dacasutedie jnese ore garani u Dupade gu ome yoque enga Dupade jé ichapite ore uringane dacasuté aja ore to. 2 Ujetiga gosi chetaque dacasutéraque áyipieraque ga que gosi etegue u dacasuté mu etétigade gajnengóri u Dupade. Chamáñaje Dupade jé ipesute uringai dacasuté gu. Jé máraque udore gosode ome detétigade ome dacasutedie. Jecute ore gajneque dacasutedie ujuyaquéode jne. 3 Que cho jeta Dupade pésu dacasutedie uringane dacasuté gu jeta ore pésu ayoré pajnotágode isadodéringane, mu pésu ore gu ayoré sijnángone ujetiga ore todo ga ore isijnaringuéone doi jnumone. Ujetiga apota ca atodo dacasutedie ga ca apésu cucha gajnarétique. Ajusipise beo ome ore enga a ore susipise beo to jne. 4 Chamáñaje Dupade pésu dacasutedie gu uje gaidi tu gu ujeta ore chusipise uaqueo. Jé basa a apésu cucha gajnarétique ga batodotigai jé u. Chamáñaje que cucha bisideque dacasutedie gu. Ore gajnei tu gu jeta ore cho dajuñame sijnángone. Chamáñaje Dupade jé ajéo gu ujeta pujuya ate gajnaréngone ore iji yocujade. 5 Jecute uacajnei tu ujetiga angáchoi uacasutedie iji uacanirone ujetiga ca pujuya uaque. Mu jé u to ujetiga ca uacagutéraque cho jora ome uacapesutique cucha gajnarétique. 6 Jecute yoco yocoré to ga yisígo yocasutedie jnese iji yocunirone. Chamáñaje ore chejna rángaja darásade uyoque gu uje ore chuse yoquio. Chamáñaje Dupade jé guẽrate ore isagode udore gu ome ore. 7 Uacajnei tu to ujetiga asíyo udore ore jnese ujetiga uaquéode déji ore gari. Ujetiga ore chamátaja daplátarigui aja ga jĩrique amátaja to. Ujetiga eduguéjnane chutai uaque ome uaquéode enga jĩrique oyo ore oré. Eduguéjnane ore gajnei tu to ujetiga pangarate ore, jecute beyoi ga angáchoi ore to. Ujetiga uerate udore uñeque atígo ome uaque ga beyoi enga asiyopise uté gai to. 8 Ca uaquérigo déji uacojórigo ayoré gari. Mu cho ujetiga uaquéode qué déji uacojode ayoréo gari, mu que plátadie u go, mu pijnoraquei u. Jecute boyo ga oyo uaquéode udore oré ga oré tu uacajnoraquéode ome ñane. Chamáñaje ujetiga ajnóra bojórigo ayoréo enga e bamate Dupade áyipiedie aja jnumi. 9 Yirajágo Moises urusarane Dupade aréngone cucha uje ore chósi te: “Ca apota chequé quedéjnaraque. Ca ajé bojórique ayoré. Ca oria cucha quedéjnarique. Ca o barupatáringa ome bojórique ayoré. Ca apota cucha unejátique.” Moises urusarane piroquéo uñane qué déji to, mu cho ujetiga ero u iroquei udé to uje chojninga: “Ajusipise bojode ayoré ore guio, ga gajnui jé u uje bañerupúsu beo.” 10 Ujetiga jec ũré uté gosi ome dajnoraquei enga que pésu cucha gajnarétique ome dojórique ayoré. Jecute ujetiga gosi chijnorapise dojórique ayoré enga jogadi u uje chijnimipise Moises urusarane quigode iji jnese. 11 Apéso cuchade udore jnese uje e yugúcoji erámi tudé eruei yúode. Jecute ca oyo mongone iji usodi, enga arijínaño uaquejode. Chamáñaje yanguretágo Dupade uruode nanique ga cho ujetiga idógosi yocuringane Dupade iquetaque ujetiga chimate yógaja re. Tamuré deréjnane udojo uje e diyajmaque yógome yocanguretigade iji Dupade. 12 Cho ujetiga dejai e jno ome yoque, enga diri e idógosipise iji yoque. Jecute yicoi enga ca yoco udore ore uje qué ore déji ijnangununie. Mu yicoi enga yipéco yocate ujñapetade. Uje yocajnúone u soldádode uje dimane ore ome dõrachade ome diri yui. 13 Enga yicoi enga yujucopise yocadode guio. Chamáñaje direcaringuei jogosórone u yoque gu. Jecute ca yójigo yote pioi, enga yiyágo piboquereringane rĩ. Jé ca yungacója gapu quedéjnaringui rĩ, enga ca pipotiguéode ome cucha gajnaréngone sué yoquibánique. Yicoi enga yiyágo pibotaquéode ome ñane uje yajujo ñane ajéode iji jnumi gu. Enga jé ca yaratayingome cuchade ome ñane to rĩ. 14 Jé basa ga oyo uacõrácha iji uacanguretigai ome Jesucrísto. Enga beyoi ga ca acueyoi erámi adode to. Chamáñaje uacagaidode u cuchade udore gu uje cáma arajáyo Dupade to nanique.
1 Ca ãrácho ujetiga jnanírique chacája uaque uje cáma etoque iji danguretigai. Enga jé ca abotã́cho uté to ome angurenone cucha. 2 Uacamóño gu uje Dupade anguresórone uñane ore chapuse dabosode aja. Jé basa Dupade anguresórone uñane uje cáma etoque ore iji danguretigai, ore chedu cucha pacade ome dabosode. 3 Jecute omi tu ujetiga udore ore uje ore tagu cuchade jnese enga ca ore chujñieta dojode ayoréo ome ore potique uje que ore cási cucha pibose uñeque. Jé chopo ore rĩ uje ore posode u cucha pacade adie ga ca ore chujñietapo udore to rĩ uje ore chapuse cucha pibosode aja. Chamáñaje Dupade imeseraque ore jnese gu. 4 Que bajnei tu gotique ujetiga acué uñeque irótique iyoguérique. Chamáñaje uté irósõri gajneque ujetiga pésu dáyipierigui ome daroi atígo, jeoga ueracho, jeoga gajnarécho. Mu ujetiga gosi irósõri u Yocangarádejnai enga a ueracho atígo jne. Chamáñaje uté irósõri Dupa chiraja dasocáringome daroi gu ujetiga chijñángaja páyipie omenie quigode. 5 Qué yopósi te rĩ ome uaque: uje yocujode Dupade anguresõre uñane déji uje ore chajuque dirode ome ñane iji jnumone ome Dupade. Jé basa uñane ore chojninga: “Dirode jé cho ñane iji jnumi ome Dupade ãrie.” Mu jé ca abotã́cho ñane ome udore, mu acueyopísi uacáyipiedie ome dirode udore quitígo. 6 Ujetiga gosi pésu dire puyátigo iji dirode uñéngo, pésu gu uje chijnóra Dupade. Jé cho udore ore to uje que ore pésu dire puyátigo, mu ore gaidi u to ujetiga ore chirase re ome Dupade to. Jé u uté to uje chapuse dabosode aja. Chapuse dabosode aja gu uje gaidi tu ujetiga chacãre Dupade gai ome enga Dupade irasique adode udore. Adi jé upo uté to rĩ uje que tagu cucha pibosode uñane to. Chacãre Dupade gai ome dabosode to enga gaidi upo rĩ ujetiga Dupade irasique ome adode udore. 7 Yirajágo uje Dupade anguresórone uyoque yocajnengóri cuse. Jecute que toc ujetiga yicoi yocáyipiedie quitique ome yocucuecaringuéone, jé u to ome yoquitoringane rĩ. 8 Mu yiquecágo gu Yocangarádejnai. Yitogoi rĩ gu Yocangarádejnai. A yitogoi marínga, jé Yocangarádejnai gajneque yoc. Jé gajneque yoque to rĩ uje qué yiquecágo. 9 Crísto toi mu ecápo rĩ. Gaidi tu gu daringai pangarádejna cuchape, ujetiga uecade, togode ore cho dangarádejnai iji jnese. 10 ¿Gotique gu a uje bajnime bojoi Dupade anguresõre iyoguéode? ¿Gotique gu a uje badojnóngaja bojoi Dupade anguresõre to? Bamo gu uje a yingongo yógaja Crísto jnese jne ujetiga chajire yocadode aja quigode jnese. 11 Chamáñaje Dupade uruode qui jé u uté uje chojninga: Jé ũrepise yu uje ayoréode a ore chichaga dagatáidie aja jnumi iji yiquei jnese jne. Enga a ore chisi yibai jnese jne ome yuringai Dupa cuchape. 12 Enga yirajágo uje ayoré chojmara, chojmarane iji yoque a jé atatate datígo jne ome Dupade jne. 13 Jecute, yiyágo yucuegoi ñane iyoguéode. Gusu ujetiga yicoi ga yujucópise yocadode guio ome yocujórique Dupade anguresõre ujetiga ca chimo yocate gajnarétique enga chirate yógaja to. 14 Yiraja uje cucha uóme cuchade jnese ome yocangarádejnai Jesus anguresórone uyoque. Mu ujetiga gosi áyipieraque déji cuchárique ujetiga puyaque ga jé puyaque ome uté gosi. 15 Ujetiga araja uje bojórique ayoré cho cucha puyáguiji cucha pibotique mu jé bagu iji iquei, ga imoi tu uje que ajuse bojoi ayoré uté guio gotique. Chamáñaje Crísto toi ome uté to nanique, jecute be ga ca apésu ujetiga bijnápise uté ome Crísto to ome babotique cucha uje uté tódode cucha u. 16 Jecute ajusipise badode guio ujetiga bojórique ayoré ca chise bayoguérique ome bapesutique cucha. Uje baraja uringai cucha uóme múñi. 17 Yirajágo uje Dupade que cho darásade iji gosode gu ore potígo, jeoga ore jotígo. Mu cho darásade iji udore gu uje Dupade Ujopie Espíritu Sánto e chisi ome ore uringane ujñapetácho ome ore, jé aja pajesereringai, pininaquei ore. 18 Enga gosi uje dopísi udore quigode ome re uje chejna raja Crísto iroquéode enga uté gosi u uje Dupade chimesere adode. Mu que gusu Dupade mu ujode ayoré chimesere adode to. 19 Jecute yicoi enga yocucueguipise pajesereringai garanone cucha. Uje udore u gu uje a ipesute Dupade anguresórone uyoque yocuringane querãque jnese iji Dupade adode. 20 Ca apéso Dupade adode unerotiguérique ome uacabotique cucha. Jé ũré uje cucha pibosode ueracho jnese. Mu gajnarei tu ujetiga agu cuchárique enga bapésu ujetiga bojórique ayoré cho caru enga gajnareque atique iji quigade. 21 Ujetiga agu cucha aríringo, jeoga óji víno enga badode udore pésu ga bojórique ayoré cho caru ome udore enga arei u ujetiga ca ajocase cuchade udore. Bagaidi u gu ujetiga bojórique ayoré ca pésu cucha gajnarétique ga ca anguretigai iji Dupade chicai jnutique. 22 Jecute edu báyipiedie udire ome Dupade enga jé ca abotãre bojórique ayoré ome cuchade udore quitígo. Chamáñaje a gosi gajneque pininaquei tome re ujetiga chirajapise uje cucha uóme ipesudode ome re, enga que agutéraque cho jora ome dapesutique. 23 Mu ujetiga gosi ca chucué dáyipie ome cucha pibotique mu gosi tagu, ga jé máraque uté gosi ome. Chamáñaje áyipie cáma dépisi daboti uté uringai cucha uóme gu. Que gusu ome cucha pibosode gotique mu jé u cuchade jnese to. Ujetiga ca arajapise cuchárique uringai uóme ome ua, enga jé pisijnaringuei u ome ua to ujetiga apésu.
1 Uje e etoque yóguiji yocanguretigai iji Dupade ga yocajnei tu ujetiga yátagoja udore ore uje qué ore anguretigai garósi iji Dupade. Enga jé ca yejnangopise yocáyipiedie aja yoque ome cuchade. 2 Ayoré chojmara, chojmarane iji yoque gajnei tu jetiga ajiriguipísode u dojode ayoré yui. Gaidi u ore iquéraningárique gu ome Dupade adode. 3 Chamáñaje Jesucrísto que ajiriguipísi tu dei to nanique. Enga jé cho ore urusarane Dupade urúo uje chojninga: “Yibade u ore ujñiequéode ome uaque nanique.” 4 Yirajágo uje purusãracho Dupade uruode gu ujetiga pacadique yógome quigode. Jecute uje pacadique gosi ome Dupade uruode enga chidota re ome dajnéone petingaquéo. Ga tijode cho jnangome gosi enga jé u uje changureta Dupade ojningane cucha yui ome re. 5 Dupade u uje guẽrate ome yoque ujetiga yidotágo yógaja ome cuchade. Jé upo rĩ uje nejé yocúdode ga yocajéode cho sẽre. Yajéode u ujetiga Dupade uté chátaja uaque to enga uacajéode chojmára iji jnumi enga pijnoraquei dépisi uágome ñane. Chamáñaje Crísto Jesus jé isocade u udore to nanique gu uje déji jnumi nanique. 6 Yigaidi u gu ujetiga yamátago yógaja ñane ga yoquicotaquedatérique chojmarai iji jnumi ome yocangarádejnai Jesucrísto dayé Dupade ore. 7 Jecute yicoi enga ca yetájo ñane. Adi jé u Crísto uje chijnóra yoque jnese nanique ome re. Chamáñaje gaidi tu gu jeta yirajágo Dayé ingoningájnai to. 8 Jesucrísto di iji jnumone udojo nanique gu ujetiga judíode ore agutiyamáite. Gaidi u to ujetiga ore chiraja uje jé ũrepise Dupade uruode ome ore dayode jnani bajácho nanique. 9 Di to gu purása quedéjnane ujetiga ore chicota Dupade to ome osongaquéode ome raque. Ore urusarane Dupade urúo déji uje júdi u cuchade udore to nanique enga chojninga: A yisi babai jne iji ducurása quedéjnane ore ujade. Enga a yirate baradedie to jne rĩ iji ore ujade. 10 Dupade uruode uñane chojningápo rĩ: Purása quedéjnane uaque a, átayo uágaja Dupade urásade uñane ome uacaninaquéode to. 11 Dupade uruode uñane dépoji rĩ uje chojninga: Acotáyopise Yocangarádejnai iji uacanirone jnese. Enga ajúyopisa jnese Dupade uringai cuchape. 12 Jnani bajai Isaías urusarane dépoji rĩ uje chojninga: Adi u uje tapósi apadi sué, ga isocai jé u jne ujetiga jnani bajai Isaí ape disi ejórique di. Enga a uté u jne ujetiga erámi jnese cho deduguéjnai iji. Enga erámi unirisórone jnese a ore chichai danguretigai aja uté jnese jne. 13 Dupade u uje pésu ujetiga ca yoco caru ome ojningane cucha yúode. Ga yajéode u ujetiga Dupade uté chĩreta uacajéode ome pininaquei, pajesereringai ore uje uacanguretáyo uté. Ga yajéode upo rĩ ujetiga uacarijogonóri Espíritu Sánto pésu uacanguretigade ga ca iyieque ome Dupade. 14 Yijorane uaque a, jé ũrepise yu uje caniranguipise uágome ñane. Jecute uacosṍcho ñane. Uacarajáyo cuchade jnese to, jecute uacarajáyo to uje uacoyo ñane quique. 15 Cho ujetiga yagutu yu ome yurusarane udojo uñane quigode, mu jé yurúsarome uaque. Yigaidi tu gu ujetiga ajnusinañopísa cuchade udojo to. Chamáñaje Dupade jé osõraque yu nanique gu ujetiga yiji iroquéode to. 16 Enga chiroque yu aja purása quedéjnane ujetiga yatata yoquiquetasṍri Jesucrísto adode ome ore. Ga yajnei tu ujetiga yẽra Dupade guerani pucuecaringué ome ore to. Ga yẽrapo purása quedéjnane ome Dupade to rĩ ome ore uringáringo Espíritu Sánto inoningayaque. 17 Chamáñaje yangureta Crísto Jesus ga yirasique yu ome yimaningone Dupade iroquéo. 18 Mu que yagutu yu ome yuruode udore. Chamáñaje que cho ujetiga yimanique cuchade udore ome yu gu, mu Crísto u gu uje oidi tu yu ome cuchade udore. Jecute jé isocai u udé uje purása quedéjnane changureta Dupade to enga e ore doi adode to. Que gusu yacaditigade go mu yadode u to uje chimate ore aja Dupade uringai pangurete. 19 Ore pañáji gu yipesudode cucha pibojmadatéo, jé aja Dupade Ujopie Espíritu Sánto etotiguedatei. Jecute ore changureta yatatagode uje Crísto u yoquiquetangóri. Yisocai jé u udé iji Jerusalen, iji punirone uñane jnese, jec aja ore uniri Ilírico. 20 Yiquigode u punire agupurayode uje cáma ore chudute Jesucrísto ujnomei to go. Que yajéode u gu ujetiga jé yicáji pidánique ujetiga e Dupade irótique e guiyaque aro ome dacajnaquérigo ome Jesus adode. 21 Ore urusarane Dupade urúo jé cho to uje chojninga: Uje agupurai ore ome ujnomei nanique mu a ore chimo uté jne. Enga a ore chiraja to jne uje cáma ore chududipise ujnomérique to nanique múñi. 22 Yajéode u jorógu ujeta yicabi uaque to mu yisagode udore sué yibai, jecute que yise uaque go. 23 Mu e idógosi jeta yimate yisagode iji ducunirone udojo. Ga a yicabíji uaque jne. Chamáñaje sequeredie e jiei iji yui uje jé yipota uaque. 24 Yangureta yu ujetiga yibasabíji uáguiji te uje yicáji ore uniri Espáña dirome. Uacamóño gu uje unere uaquei tome yu ujetiga yise uaque. Mu ujetiga e yiji iji uacari ga yangureta uaque ujetiga átayobaja yu ome yiqui uté Espáña jne. 25 Mu a jé yicabíji Jerusalen jne. Chamáñaje yijorane Dupade anguresóño iji de ore chutṍri yu gu jetiga jé yijnóngape ore gueranone cucha ome Dupade anguresórone ore iji Jerusalen. 26 Chamáñaje Macedónia, Acáya gosode ore pésu dáyipiedie diríca ujetiga ore chamáta deranone cucha ome dojode Dupade anguresóño iji Jerusalen uje ore jmatapis ome cuchade. 27 Enga ueradei udore ore áyipiedie udire diríca. Uje cho ujetiga udore ore írigo déji judíode gari iji Jerusalen. Chamáñaje judíode udore ore u bajaque nanique gu uje ore jno Jesus ujnomei údi aja purása quedéjnane. Jecute jé tiógarapísa ujetiga purása quedéjnane udore ore chosõre judíode udore ome dẽratígo cucha. 28 Jecute yipésu yajéode ujetiga yimate cucha dacadode udojo aja Jerusalen, enga a yicáji Espáña jne mu a jé qué yibasiji uáguiji te bajaque jne. 29 Yiraja yu ome udore: ujetiga yise uaque enga a Crísto pesupúsu uacaninaquedatérique jne gu yatatagode acho. 30 Yijorane uaque a, yutai uaque gu uje Yocangarádejnai u Jesucrísto jnese. Enga pijnoraquei déji yoque jnese to gu yocarijogonóri Espíritu Sánto. Yutaquéode u ujetiga acatecãchoi Dupade ome yu uje yiji Dupade iroquéode. Enga ejñáño uágaja uacacatecãraitigade udore. 31 Acatecãchopísi Dupade ome yu ujetiga chãraque yu ome daruode etesórone ore iji ore uniri Judéa. Chamáñaje jecucha ore pota chúgome yu gu. Acatecãchopísi ome yu to jeta jé yisipise ore iji Jerusalen ome ore gajnéone cucha to enga ore chirasipise ore gueranone ome raque. 32 Acatecãchopísi Dupade ome yu to ujetiga yisipísape uaque to jne ujeta Dupade ajéo. Ga jogadi jé u jne jeta yinínango ñane. Ga yope yujñare to iji uacari. 33 Pajesereringai guẽrasṍri u Dupade. Enga yajéode u ujetiga Dupade uté dépisiji uacari to. Amen.
1 Idógosi jeta yoquĩjora Febe díji uaque to. Enga ca ajusécho uaté jne. Chamáñaje uaté gaidode upúsu Dupade iroquéode iji dojode Dupade anguresóño iji dedai Cencréa. 2 Chamáñaje Jesucrísto anguresórone uyoque yocajnei tu ujetiga ca yujuséjo yocujode Dupade anguresóño. Yocajnei upo rĩ ujetiga cuchárique jé chona yocuñeque ga yátagoja gosi. Jé tiógarapísa jeta átayoja uaté. Chamáñaje uaté chatapísa cuchade aja yu ica gu. Mu que gusu yu go mu chátaja dojode Dupade anguresõre uñane to rĩ enga uásejna ore. 3 Asayope Priscíla, Aquíla ore jmanáyone ome yu jne. Chamáñaje yijorane u ore ica iji yigaidode Jesucrísto iroquéo. 4 Ore chopisirase daba yu ica ga ore chujérase ore to ica. Jecute yacaranguipísome ore. Mu que gusu yu mu jé upo yacadigode purása quedéjnane ore to rĩ iji ore idáyode jnese. 5 Asayopo yijorane ore jmanáyone jne rĩ ome yu uje ore chamáta ñane ome Dupade uruode iji Priscíla, Aquíla ore iguíjnai. Asayope yĩjorai Epenéto jmanai to jne rĩ ome yu. Uje bajaque uté ome danguretigai ome Jesucrísto nanique uje yacate ore ica iji Acáya. 6 Asayope Maria jmanai jne rĩ ome yu. Uje uaté ujuya re ome dagaidode Dupade iroquéo iji uaquedai. 7 Asayope yurásade Andrónico, Júnias ore jmanáyone ome yu to jne rĩ. Chamáñaje ore cho dabaya yu ica iji yuringai pujurúgai. Chamáñaje yocangaránone Jesus iroque bajade ore irajaguipísode u ore uje udore bajaque ore ica uje ore changureta Crísto ome yu. 8 Asayope yĩjora yedójnari Ámplias jmanai ome yu to jne rĩ. 9 Asayope yocujoi Crísto iroi Urbáno jmanai ome yu to jne rĩ. Jé upo Estáquis rĩ. Chamáñaje yijnorapise uté to. 10 Asayope Apéles jmanai ome yu to jne rĩ. Uásejna uté gajnéone petingaquéo marínga, que doi ga anguretigai chicai jnutique yúrique ome Jesucrísto. Asayope Aristóbulo jogasui ore jmanáyone ome yu to jne rĩ. 11 Asayope yurásai Herodión jmanai ome yu to jne rĩ. Jé upo Narcíso jogasui ore rĩ. Yocangarádejnai Jesucrísto anguresõre ore to gu. 12 Asayope Triféna, Trifósa ore jmanáyone ome yu to jne rĩ. Udore ore gaidode upúsu yocangarádejnai Jesucrísto iroquéode gu. Jé upo yoquĩjora Pérsida uje gaidode upúsu yocangarádejnai Jesucrísto iroquéode to rĩ. 13 Asayope Rúfo jmanai ome yu to jne rĩ. Uté ibijógome daringai Jesucrísto anguresõre gu. Jé upo daté rĩ. Chamáñaje daté jé chopise yatedie to gu. 14 Asayope Asíncrito, Flegonte, Hérmas, Patróbas, Hérmes, jé aja ore jorane Jesus anguresóño ore jmanáyone jnese to jne rĩ. 15 Asayope Filólogo, Júlia, Neréo, uaté nero, Olímpas ore jmanáyone ome yu to jne rĩ. Jé aja ore jorane Dupade anguresóño jnese. 16 Asayope ñane jmanáyone jnese to jne rĩ iji uáguiji te. Enga Dupade anguresórone iji ore idáyode jnese ore chutṍri yu to ujetiga yurúsãre ore irasitigade ome uaque iji te. 17 Yijorane uaque a, beyoi enga ajichopise udore ore uje ore ijnimique pibotaquéode ome uáguiji te. Yojningane u udore ore uje ore pésu ga uacuñane cho caru iji danguretigai iji Dupade. Jé aja udore ore rĩ uje ore chetaque pacajnaquéode uje e pacadique uágome ica. Beyoi ga ca acunguésoñoi udore ore jne. 18 Cho jeta unéño ore acajnaquéode. Jecute ore chijnime uacuñane ome daringaquéode uje cáma ore chirajapise pacajnaquéode quigode ome Dupade uruode. Chamáñaje que ore irósõri u Jesucrísto gotique gu. Mu ore ajiriguipísi tu daringárique posõraque yui ome dojode ayoré. 19 E yirajágo uacaringane ayoré angoninguite guesaque jnese gu. Jecute yinína yu ome uaque. Mu yajéode u ome uaque ujeta dimane uágome pate goningane mu jĩrique etácho cucha gajnaréngone jnese. 20 Enga yirajágo uje pajesereringai gajnesṍri Dupade a u jne ujetiga jĩrique pésu uaque enga ajnuéño Satanas gai. Ga a cho jne ujetiga Satanas dépisiji jnumi iji uacádi. Yajéode u ujetiga yocangarádejnai Jesucrísto chatapísaja uaque. 21 Yĩjorai Timotéo qué chutṍri yu jeta yingoma áyipiedie ome uaque uje chijnóra uaquéode to. Jé cho yijorane uñane Lúcio, Jason, Sosípater uje yurása ueque udore ore jnese. 22 Tércio uyu uje yurúsãre Páblo áyipiedie quigode ome uaque ga jé uneripise uaquéode ome yu to. Chamáñaje yujo Dupade anguresõre uaque to gu. 23 Jé u yupusiédi Gáyo to rĩ uje chijnóra uaquéode to. Uté juéga jeta yipéco Dupade uruode iji iguíjnai. Jé upo ore iplátadie irodisṍri rĩ iji guidai tudé uje uté i tu Erásto. Uté chijnóra uaquéode to. Jé chopo yoquĩjorai Cuárto to rĩ. 24 Ore ajéode u to jeta yocangarádejnai Jesucrísto chatapísaja uáguiji te to. Amen. 25 Beyoi ga yisigopise Dupade gai. Chamáñaje Dupade u gu uje pésu enga etoque uáguiji uacanguretigai. Ga yacajnaquéode quigode jé u udore to uje yatata yoquiquetasṍri Jesucrísto adode. Enga Dupade áyipie omenie u udire nanique uje cáma erã́tique cuse. Mu Dupade áyipiedie udire cho cucha pipoguiédedie nanique mu quene tocade iji deréjnane udojo. 26 Mu yirajágo Dupade áyipiedie udire to gu Dupade uruode atatasõre bajade urusarane uje ore noñome disi ejode uyoque yocari. Enga Dupa eyúgojmai tuté e iroquédatéi u ujetiga pacadique erámi unirisórone jnese ome dáyipie omenie udire. Gaidi u gu ujetiga ore changureta ga ore doi adode to. 27 Gusu Dupa Dupade. Ga que ujnuéngaisónique cuse ome daringai irajataque. Enga uté u uje chiroque Jesucrísto aja yoque, jecute yicoi enga yisigopise uté gai iji deréjnane jnese ome ingoningájnai. Amen.
1 Páblo u yu uje yurúsãrome uaque. Dupade jé áyipiei nanique ujetiga yiji Jesucrísto iroquéode. Enga ajéode upo rĩ ujetiga Jesucrísto cho daroguipísode uñai iji yu. Enga yujoi Dupade anguresõre Sóstenes déji yari iji ne uje urúsãre unojo. 2 Yurusarane gajnengórone u Dupade anguresórone uáguiji Corínto. Yojningane u uaque uje Dupade cho dajnénguiji uaque gu uje uacátayo uágaja Crísto Jesus. Chamáñaje Dupade tibidi uaque gu ujetiga eso uacaringane ueque ome pisijnaringuéone. Mu que gusu Corínto gosode uaque, mu yurusarane gajnengórone upo ore jnese rĩ iji erámi údode jnese uje ore chutṍri Jesucrísto ome raque ujetiga chiqueta ore to. Uje que gusu yoque uje yoco yocangarádejnai iji Jesucrísto, mu ore cho dangarádejnai iji to. 3 Enga yipotigádi tu ome uaque ujetiga yocai Dupade, yocangarádejnai Jesucrísto ore chisi ome pajesereringai ome uaque to. Enga yipotigádi tupo rĩ ujetiga uacajneque ore icaniratiguéode to rĩ. 4 Enga jecucha yacãre Dupade gai ome uaque. Chamáñaje Dupade chatapísaja uaque gu uje uacanguretáyo Jesucrísto. 5 Uje uacátayo uágaja Jesucrísto enga jé u uje Dupade tẽrája uágome cucha pimójma omone jnese. Jecute gueranone udore, cucha pimójma omío, pijóguiji uacarajatigade. Pijógapóji uacaruode rĩ. 6 Jé ũrepise yocojñane ome Crísto ipesutígo cucha. Chamáñaje tocade gu ome uaque ga uacamóñopise to. 7 Jecute uacajnécho Dupade gueranone cucha jnese enga que Dupade guẽratique cucha chona uaque gotique iji ne jnumi, uje qué uacarocho yocangarádejnai Jesucrísto diringárique yui. 8 Enga Jesucrísto uté chatapísaja uaque jne ujetiga apúyoja uacanguretigai, jé aja erámone unojo eruei. Gaidi tu gu ujetiga ca diquiyaque uacayoguérique jne iji diri tuté ujetiga Yocangarádejnai diapo rĩ. 9 Ũrepise Dupade enga uruode que toja ome yoque. Enga uté jé u uje ajegáite uaque ujetiga abi Jesucrísto uaque jé uac upúsu ñane iji jnumi. 10 Mu yijorane uaque a, ijócha uacajéode údi ujetiga jé ca abotã́cho ñane. Mu oyo parácho ome ñane enga uacáyipiedie jé chojmára iji jnumi tome ñane. Uje Jesucrísto jé ajéode u udore gu ome uaque. 11 Yósi te gu ome uaque uje Cloé jogasui ore chingome yu uje chi jecucha abotã́cho ñane enga angaráño uacáyipiedie ome ñane. 12 Chi uacangaráño uacangaránone ome ñane. Chi uacuñane ore chojninga: “Yangaráni tu Páblo.” Jeque uñane ore chojninga: “Yangaráni tu Apólos.” Jeque uñane ore chojninga: “Yangaráni tu Pédro.” Jeque uñane ore chojninga: “Yangaráni tu Jesucrísto.” 13 Que toc ujetiga yajujo Crísto iji jnumi enga yajuguínango yocujode ayoréo. ¿Ga Páblo uyu yitoji curesérique gai ome uaque a, uje uacoyo uacangarádejnai iji yu a? ¿Ja ore chaca uaquedodie iji yodi gu uacanguretigai iji yu a? Ungare, uacarajáyo uje que ũré darade udore gotique ome yu. 14 Yacaranguipis ome Dupade uje cáma yaca uacuñeque edodie iji yodi to ica. Mu gusu Críspo, Gáyo ore uje aca ore edodie iji yodi ica. 15 Chamáñaje yitodo gu ujetiga uacuñeque chojninga: “Yangureni u Páblo. Chamáñaje Páblo acaque yedodie iji yodi nanique gu.” 16 (E jé ũré, uje aca Estéfanas jogasui ore edodie iji yodi to ica, mu e que yujnusina go ujetiga yacápo uñéngo edodie iji yotique rĩ.) 17 Crísto que iroque yu gu ujetiga yaca ore edodie iji yodi. Mu chiroque yu ujetiga yatata Dupade áyipie omenie ome ore. Mu que yiji enga yo irajatáguejna iji yu ome yatatagode udore ujetiga ore tija yuruode. Jé socaseti ore ajiriguipísi tu yu gu enga querénga ore tangári Crísto ujnomei uje toji curesei gai ome ore. 18 Uje atatago Crísto ujnomei uje toji curesei gai enga cucha bisidégome Dupade guetesórone ore uje ore qui tu Dupade ujuyaquei. Jé basa ga patatagode ome Dupade uruode u cucha piquetangórone ome yoque uje yoquiqui u yocuringane piquetaque yui. 19 Jé cho Dupade uruode to uje chojninga: Ujetiga irajatáguejna gosi iji erámi tuné, mu a yinoningase jne uté irajatígadatei. Jé basa ga ayipierane a yicha ore áyipiedie aja ti yui jne. 20 ¿Ja cuchárique tṍraji a ujetiga irajataque gosi, jeoga pacadisõre gosi, jeoga gosi chiraja dasocáringome pibotaquéode ome dojode ayoréo ome cucha jnutiminórone? Ungare. Que cuchárique tṍraji go. Chamáñaje Dupade e chinoningase erámi unirisórone irajatígadatéode enga e cucha bisidécho. 21 Enga Dupade u uje chiraja dasocade ome cuchade. Jecute que juéga ujetiga erámone jogosórone ore chise Dupade ome daringárique irajataque cuchape. Mu iquetade a u ore jne uje ore changureta ore atatagode Dupade urúo. Uje cucha bisideque Dupade uruode ome erámi unirisórone ore múñi. 22 Judíode ore pota ujetiga yequetingáco yógome yoquipesutígo cucha datéo. Jé basa ga Grécia gosode ore pota ujetiga yacáco ore ome yocuringáringo irajatáguejna. 23 Mu gusu uje atatago Crísto ujnomei ome ore uje ore chujé uté iji curesei nanique. Mu judíode que ore chise Crísto itoringai unétique uje ore chujé iji curesei. Jé cho purása quedéjnane to uje ore cho cucha bisidéguiji Crísto itoringai. 24 Mu que cucha bisideque Crísto gotique ome Dupade ibididigode uyoque. Ujetiga judío yoque, jeoga purása quedéjna yoque mu yirajágo jnese uje Dupade ujopie, jé aja ayuquetotiguei pi upúsu Crísto. 25 Erámi unirisórone ore jos eti ca Dupade chiraja cuchárique. Mu ujetiga jé ca Dupade chiraja cuchárique, mu irajatigade suépise ore irajatigade gáyode. Jé cho to uje ore jos eti Dupade ca bisitique pijóguiji, mu ujetiga jé ca bisitique pijóguiji, mu Dupade u uje etotiguei suépise ore etotiguei gai. 26 Yijorane uaque a, Dupade ibididigode u yoque. Mu garósi irajatade, atade, eduguéjnane ore iji yocujade. 27 Dupade ajéode u nanique ujetiga cho dajegáite iji ore uje garósi ore irajatigade. Gaidi u gu ujetiga chinguíra pajegátigai aja udore ore uje ore cho irajatáguejna iji raque. Jé cho to uje Dupade ajegáite ayoré gajnaréngone to rĩ iji dojode erámi unirisóño ore ujade. Gaidi upo rĩ ujetiga chinguíra pajegátigai aja ore to uje ore cho ayoredatéo iji raque iji erámi tudé. 28 Jecute Dupade doi enga tibidi ayoréode aja re uje ore ujode ayoréo dojnóngaja ore, enga ore chopo cucha bisidéguiji ore rĩ. Pota gu ujetiga yirajágo uje que cuchárique tõrapísiji go ujetiga gosi doi enga cho ayoredatei iji re. 29 Jecute que toque ujetiga gosi chisi dabánique ome cuchárique iji Dupade iquei. 30 Mu Dupade u uje cháta yógaja Crísto enga e Crísto uyoque itojmárango iji jnumi. Jecute yocayuquetotiguei garani u Crísto to. Enga yico yocuringane Dupade imeserácho to ome uté adode ome yoque. Enga Crísto u to uje chinoningase yoque ujetiga yico yocuringane ayoré ujñapetácho. Enga jé u to uje chiqueta yógome yoquisijnaringuéone. 31 Jé cho ore urusarane Dupade urúo to uje chojninga: “Jé ca gosi chicota re. Mu arei tu ujetiga picotaquéode gajnengóri tu yocangarádejnai Jesucrísto.”
1 Yijorane uaque a, uje ise uaque ica enga yacate uágome Dupade áyipie omenie. Enga que yo irajatáguejnai iji yu ome yacajnaquéode udore iji uacajade ujetiga atijáyo yuruode. 2 Mu edu Jesucrísto adode ome yatatagode ome uaque ica. Cuchiyi tupúsu uté itoringai uje yacate uágome ica uje ore chujé iji curesei gai ome yoque. 3 Uje yingo yu aja uaque ica yagutupúsu yu ome uacaquei. Enga yajei tãrarapo rĩ uje acate uaque. 4 Que yijna jnani irajatáguejnane isocade uje yacate uaque ica enga yatata Crísto adode. Mu yijnimique uaque ome panguretigai ica uje Dupade Ujopie Espíritu Sánto etotiguei déji yacajnaquéode gu. 5 Que yigaidi u ujetiga yijnime uágome panguretigai ome pacajnaquédatei guesiminónique, mu yigaidi tu ujetiga uacanguretigai gajnesṍri u Dupápisi. Chamáñaje u gu uje etotiguei déji ome yocuringárique piquetaque. 6 Mu yacajnaqué ibirade gajnesórone u uaque uje e etoque uáguiji Dupade adode. Enga yacajnaquéode unojo que garani tu erámone jogosórone cucha go. Que tṍraji ore eduguéjnane iji erámone unojo rĩ. Chamáñaje eduguéjnane udore ore uringane eduguéjna a bijna ome ore jne gu. 7 Mu yacajnaquéode ome uaque garani u Dupade ayuquetotiguedatéode. Chamáñaje Dupade áyipiedie u nanique uje cáma pipesute erã́tique ujetiga chiqueta yoque enga yiquecágo iji deréjnane jnese. Mu Dupade áyipiedie udire que pudúdei nanique go, mu e yatatame uaque. 8 Erámone jogosórone eduguéjnane que uñeque chiraja Dupade áyipiedie unaji nanique go. Ujetiga ore chirajárase enga a jé ca ore chajórasa Yocangarádejnai gaté unirisṍri aja curesei gai nanique. 9 Mu jé cho ore urusarane Dupade urúo uje chojninga: Ueradipíso Dupade ipesudode ome dajnorasórone. Enga que udore ujnomérique cuse to ica. Enga que pimópo cuchade udore rĩ iji erã́tique. Enga que pipesute pajéningome cuchade udore rĩ. 10 Mu Dupade oidé tu dajopie Espíritu Sánto ujetiga chingo dáyipie omenie udire ome yoque. Chamáñaje Dupade Ujopie Espíritu Sánto chiraja cuchade jnese, jecute chijnime Dupade áyipie ibiredie jnese to rĩ, enga chingome yoque. 11 ¿Ja togome uñeque ujetiga chiraja cuchade uje déji dojórique ayoré ajénique? Ungare. Gusu jnani áyipie uje chiraja dajéode. Enga adi jé upo ome Dupade rĩ. Que diquirajaque Dupade ajéode. Mu gusu Dupade Ujopie Espíritu Sánto uje chiraja ajéode to. 12 Dupade anguresórone uyoque que yocajné páyipieraque ujetiga tṍraji erámi tuné ome yoque. Mu yocajné tu Dupade Ujopie uje tṍraji gaté ome yoque. Enga uaté u uje chacate yógome Dupade gueranone cucha omío uje chisi ome yoque gu dacaniratiguei. 13 Yocacajnaquéode ome Acuchade udore que garanone u yocayuquetotigué jnutinimórone go. Mu garani tu Dupade Espíritu Sánto ome yoque enga jé yacáco uágome to. Jecute yoco quique uágome Dupade gueranone cucha pimójma. Chamáñaje Dupade ujopie pimójma gajnesórone u uaque tu. 14 Ujetiga Dupade Ujopie Espíritu Sánto que déji gosi, enga uté gosi que chimesere Dupade Ujopie Espíritu Sánto atique ome re. Enga cho cucha bisidéguiji. Chamáñaje que togome uté gosi gu ujetiga chiraja cuchade udore quitígo. Uje Dupade Ujopie Espíritu Sánto déji gosi ajei enga quene jogadi u ujetiga uté chijnime darajatigade ome cucha pimójmane quigode. 15 Mu uje Dupade Ujopie Espíritu Sánto déji gosi enga uté gosi chiraja cucha dacadode quigode jnese iji dojode ayoréo. Jé basa ga gosi uje agupurai ome Dupade Ujopie que toque go ujetiga chiraja cucha dacadode quitígo iji Dupade Ujopie gajnesónique ayoré. 16 Chamáñaje ore urusarane Dupade uruode chojninga: “¿Ja uñeque déji a ujetiga chiraja yocangarádejnai Dupade ajéode? Ungare. ¿Ja togome uñeque to a ujetiga chacate Dupade ome cuchárique? Ungare.” Jé basa Dupade anguresórone uyoque enga Crísto áyipiedie jé upúsu yocáyipiedie to.
1 Mu yijorane uaque a, que togome yu go ujetiga yacate uágome yacajnaqué ibiratígo. Obiréjna uje uaquetácho ujetiga Dupade Ujopie Espíritu Sánto chijñaque uaque to. Uje cachi uacáyipiedie qué jogadipise cucha jnutiminórone gu. Enga uacoyósi disi parátagabode ome Crísto adode. 2 Jecute yedu yacajnaqué ibijógode ome uaque. Ga yajnua tu chequé uje chacucãre dabi enga que chisi ome pose uajátique ome uje qué caratape gu. Enga jé cho uaque to ica, qué caratape uaque to ome Dupade adode, jecute que togome uaque ujetiga arajáyo pacajnaqué ibirade ica. Mu jé uacate uje cáma arajáyo pacajnaqué ibirade iji deréjnane unojo to. 3 Uacoyópise erámone jogosórone uje Dupade anguresorejma ore. Uje uacaratáyiñome cuchade, uacabotã́chopo ñane rĩ, enga uacajuchopo ñane ajei to rĩ. Enga uacasocade jé chopise erámone jogosórone udore ore isocade. 4 Uje chi uacuñéngo chojninga: “Yangaráni tu Páblo.” Jeque uñane chi ore chojninga: “Yangaráni tu Apólos.” Uacasocade unojo jé chopise erámone jogosórone ore isocade uje cáma ore chiraja Dupade gotique. 5 ¿Já cucha daté Páblo uyu a? ¿Ja cucha datepo Apólos rĩ a? Ungare. Mu cachi Dupade iroque yoque gu ujetiga yatatago uruode ome uaque ujetiga anguretáyo Yocangarádejnai to ome yocacajnaquéode. Enga Yocangarádejnai u uje chingome yocajnepídode daroquéo ome yoque jnese enga yoquipesudode u udore. 6 A yacãra cuchade udore aja utácai te jne uje chaca dacade cucha. Uyu u uje aca cucha pacade. Enga Apólos u uje chuta. Mu gusu Dupade uje ipesute cucha pacade udore iquéraningane. 7 Que cucha daté acasṍri gotique. Enga que cucha datepo utangóri tuté to rĩ. Mu cucha datei tu Dupade uje ipesute cucha pacade udore iquéraningane. 8 Cucha pacade acasṍri, utangóri jé ore chopise ñane jnese uje ore jõra ñane aja dapesudode. Enga a Dupade cho udore ore ipesudode oré jnese jne. 9 Yocajnúone u utácarique irógode uje ore pésu darósõri tuté guejnai. Jé basa uacajnúone u yoquipesudi guejnaque. Mu a yacãrápo uágaja pipesudi guiguíjna jne rĩ uje ipesungóri u Dupade. 10 Enga yajnui tu guiguíjnai ipesungore irajatai rĩ. Jecute Dupade chiroque yu ujetiga yipésu guiguíjna porai tuté ero taja. Enga quigade enga uñane a ore chajnerame yipesudode údi jne aja gaté. Mu arei tu ujetiga ore chusipise dapesudode guio jé aja ujetiga ore chimate. 11 Jesucrísto gajnui u guiguíjna porai tuté ero, uje e yicháji jogadi. Enga uñeque que doi enga chicha ero uñáraque aja údi gaté. Gusu Jesucrísto uje guiguíjna porai ero tu gu. 12 Yirajágo uje udore ore uje ore chimate guiguíjnai tuté aja gaté ore oidode cucha cháji ñane yúode. Uñane a chicha óro, pláta, cucarané orerenie aja guiguíjna porai tuté ero uje ore pésu aja gaté. Jé basa uñane ore chicha jnacarade, porójodie, tábladie ore aja. 13 Enga a pipáñaji yoquipesudode cucha jnese aja quigode jne ujetiga Jesucrísto chajire yoquipesudode aja quigode. Chamáña gu uje a chijna pioi tome yoquipesudode cucha jne iji diri tuté. Enga chequetingare yoquipesudode jnese ome pioi. 14 Ujetiga ca pioi tagu uyoque gosode ipesudode cucha enga imoi tu uje cucha omío enga a Jesucrísto cho yocoré jne. 15 Mu ujetiga pioi chejna yocuñeque ipesudode cucha enga uté gosi chachia re ome dapesudode udore. Mu uté gosi a jé chapite jne. Mu gajnui a u jne ujetiga piotique juseque mu jé piquetaque. 16 ¿Ja jé ca arajáyo a? uje Dupade cho daguíjnai iji uaque enga uté Ujopie Espíritu Sánto u uje déji uacajei. 17 Jecute ujetiga gosi gaidi u Dupade iguíjnai tuté uringai pajnangarañaque aja jnumi enga Dupade a cho dajuñame uté gosi jne. Chamáñaje puyaque Dupade iguíjnai gu. Enga ojningai tuté daguíjna jé upúsu uaque. 18 Jé ca uacuñeque chisi dabánique ome darajatígadatérigo ome erámi tuné adode. Chamáñaje cucha bisidécho pirajatígadatéode udore gu. Mu omi tu ujetiga uté gosi cho cucha bisidéguiji darajatíga jnutiminórone, enga jogadi a u jne ujetiga chise daringai ũré ome darajatigade. 19 Chamáñaje Dupade irajatigade suépise erámone unirisórone ore irajatigade gai gu. Jecute Dupade cho cucha bisidéguiji ore irajatigade. Ore urusarane Dupade urúo déji to uje chojninga: “Irajatade iji erámi tuné ore cho irajataquedatei iji raque ome cuchade jnese, mu Dupade doi ore uruode udore ga chajni ore gai, enga ore uringane taque pijoque ome erámi.” 20 Ore urusarane Dupade urúo déji to uje chojninga: “Yocangarádejnai Dupade chiraja uje que cuchárique tṍraji irajatade ore áyipiedie iji jnumi tuné.” 21 Jecute ca dicotare uágome uacacadisõre uñeque. Chamáñaje jé uacajneque cuchade jnese gu. 22 Uacajneque Páblo uyu, jé aja Apólos, Pédro ore to rĩ. Uacajnengapo erámi rĩ. Uacajnengapo pucuecaringuei, pitoringai ore to rĩ. Uacajnengapo cucha dacadode jnese iji dirode unojo rĩ. Enga jé chopo rĩ uacajnengapo cucha piqueminórone rĩ uje a tocade jne iji yoquiquei. 23 Enga Jesucrísto gajneque uaque. Enga Dupade gajneque uacajnengóri Jesucrísto to rĩ.
1 Jecute oyo Jesucrísto iróguiji yoque enga jé ca oyópo cucha datei iji yoque rĩ. Uje yocajnéone u ujetiga yacáco uágome Dupade ipoguiédedie dáyipiei. 2 Yirajágo uje piroque gaté gosi enga gajnei tu ujetiga chuse datígo guio ome darósonique. Gaidi tu gu ujetiga irósõri changureta ome daroquérigo. 3 Ujetiga ajichórase yadode aja quigode, jeoga jnani uñeque chajire yadode aja quigode, mu que cucha ome yu gotique. Jé cho to uje que yajirapo yadode aja quigode to gotique rĩ. 4 Que yagutéraque cho jora ome yipesutique cucha go. Mu que toc ujetiga yojninga: “Que yiyoguérique cuse.” Mu Yangarádejnai u uje chajire yipesudode aja quigode enga chiraja ujetiga ueracho jeoga gajnarécho. 5 Jecute ayáyobu uacajiritigade ome ñane ipesudode enga arochope yocangarádejnai Jesus diringai yui. Uje a uté u jne ujetiga chajire cucha pipesudode aja quigode jnese. A yipójo yocadode, jeoga yocáyipiedie iji deréjnane unojo, mu Yocangarádejnai a chicháji dirie uné jne ayoré chojmara, chojmarane ore ipesutígo dacho, jé aja ore áyipierigui jnese to rĩ. Enga jé u jne ujetiga Dupade chingo yoque ujetiga yoquipesudode arécho, jeoga gajnarécho. Enga a chisi uté gosi gai jne ome dapesute arétigo. 6 Yijorane uaque a, yipota ujetiga agutíñañome yacajnaquéode unojo. Uje yacãra Apólos, uyógaja utácarique irótigo. Yigaidi u ujetiga ayáyo oyo cucha datei iji yoque. Mu amíningachopísa ore urusarane Dupade urúo quigode ome cucha dacatígo, enga jé ca eduyo uacáyipie ayoredie. Uje gajnareque uje uacacadisórone uñane ore gajneque uacacotaquéode, jé basa uñane gajneque uacadojnongamátigade. 7 ¿Jé gosi ipesute baringai ayoredaté ujetiga ajnué bojode ayoré gáyode? ¿Ja baríjogosónique cucha cuse a ujetiga ca garani u Dupade? Ujetiga jec ũré enga Dupade chisi ome bajnéone cucha jnese ome ua enga ¿jé gotique gu a uje dicotare ua ome bajnéone cucha udore? Uje que cuchade udore uñeque garani u ua múñi. 8 Cho jetiga e eduguéjna cuchape uaque enga uacapotigádode cucha jnese e déji uaque. Mu uacoyo eduguéjna iji uaque enga uacachayo yógaja uacarosadi. Yipesupu enga jé ũré uaque enga eduguéjnapise uaque jõ. Enga a yoco yoqueduguéjna cuchape iji uaque to enga yagutíñangome uaque. 9 Isenga Dupade jé ajéo ome darógode uyoque ujetiga jnani gajnareque yoque ome erámi unirisórone jnese. Enga oco jnani pujuyade ome pitoringai yui, ome yajéode. Chopo ujetiga ayoré ponáyone uáguiji erámone, Dupade irógode iji gaté rĩ uacórañoji dajñarenie ome yoque ujetiga amíningacho yógaja quedéjnane. 10 Yoquibai tu Crísto uje ore cho áyipie eyúguiji yoque. Mu cachi ayipierane u uaque ome Crísto adode, ome uaque. Uyoque enga que yoquibisitique pijoque. Jé basa ga jnanidaté uaque. Enga ayoré ponáyone iji erámi ore chetaque yoque, jeque ore tangári uaque. 11 Uacarajáyo uje jecucha cuchade chona yoque iji deréjnane. Enga yejnárejo chaguhei, enga yejnárejo yoquebiedie rĩ. Ga yijmátagopo ome piguidedie rĩ. Enga ducañerájma yoque ome cojñone rĩ. Enga gusu yoque uje que yoquiguíjnarique cuse. 12 Enga ajningopo yóguiji cucha pisagode rĩ ujetiga yoquibosode déji ome yoque. Cojñone ore chasa yoque to, mu que yichajnángopoi ore rĩ ome yocuru dosótigo. Mu ichajnángoi ore ome yocuru pajnotágode. Enga ore jmongarája yoque rĩ, mu jé yidotágo yógome ore ijmongaquéode. 13 Ore uruode gajnarécho aja yoque, mu que yigotágo tijode to go ome ore enga yaquírango ore ome yocuru pajnotágode. Mu ore cho jnani ducaraníji yoque jé aja dirode unojo. 14 Que yigaidi tu ujetiga yijnime pajegátigárique iji uaque ome yurusarane unojo, mu yigaidi tu ujetiga yo uacaquique. Chamáñaje yo yape yijnoranguíji uaque gu. 15 Ujetiga uacacadisórone ome Crísto adode 10 mil ore marínga, que uacai ore go ome Dupade adode. Mu uyu u uje yijnimique uágome Crísto Jesus uringai pangurete ica uje acate uágome Dupade áyipie omenie. Jecute uyu urásu ujetiga oyo uacají yu. 16 Jecute ijócha uacajéode údi ujetiga aracho yisocade ome Dupade adode. 17 A yiroque yijnorai Timotéo aja uaque jne. Yo yabi iji uté to uje yijnimique anguretigai ome Yocangarádejnai to nanique. Enga uome uté adode ome yu. Enga uté a ingome yate goningane ome uaque jne ujetiga ajnusináño yu uje Crísto anguresõre ũrei tupúsu yu. Enga yacate Dupade anguresórone ore ome pisoca goningane udore to iji ore idáyode jnese. 18 Uacuñéngo cho jnanidatéji raque enga ore chojninga: “Páblo a ca tibágui yoque to jne uje a iyieja yoqui tome.” 19 Mu yajéode u ujetiga jĩraque yibágui uaque ujetiga Dupade ajéo. Enga a yimo jne jnanidatéode udore ore ipesutígo cucha jne. Jeoga cachi ore urúo. 20 Uje yocuringai purása ome Dupade que pijoque gu yocuru bisidégode, mu pijoque gu yocarijogoto Dupade Ujopie isoca goningane ome yoque. 21 ¿Ga apótayo ujetiga yise uaque enga yidosója uaque jne ome uacate gajnarétigo? ¿Jeoga apótayo yuru pajnotátigo ome uaque ujetiga yise uaque jne?
1 Uacuñai ujnomei e chise yu uje chi ujnacari tuté chijna dayé acoté ejo taja re. Gajnarenguipise ipesudi uté. Erámi unirisórone uje agupurai ore ome Dupade adode marínga, que ore isocade u udore gotique. 2 Uacoyo dicotare iji uaque múñi, ¿jé gotique gu a uje que jnacari tuté adode chiarese uacáyipiedie uje jnacari tuté pésu dasijnaringueque cuchábi iji uacari? ¿Gotique gu a uje que aquírañopo uté rĩ enga etácho uté ome uacáguedie? 3 Que yugúsi joróguiji uacari, mu yáyipie déji uacari enga e ipésu yajéode ome jnacari tuté uje pésu dasijnaringuéone iji uacajade. 4 Yipota ujetiga yocangarádejnai Jesucrísto anguresórone uaque amátayo ñane. Enga a cho jne jetiga yugusipísiji uacari to. Mu uacaríjogonóri a upúsu yocangarádejnai Jesucrísto jne enga a uté ujopie chatapísaja uaque jne. 5 Ujetiga e agúsoi ñane gari enga asíñome jnacari tuté ome Satanas jne ujetiga cho dajuñame. Mu gusu ao jnutiminóri ujetiga Satanas cho dajuñame. Jé basa áyipie a piqueta jne iji diri tuté ujetiga yocangarádejnai Jesucrísto diapo rĩ. 6 Gajnareque uje Corínto gosode uaque uacacotayopise uaque. Chamáñaje que adóningacho pisijnaringuérique iji uacajade gotique gu. Isenga adúcho to jõ uje chi: “Arurégode bisidi garósi marínga, chacája pipocaya enga chisite raja údode jnese enga doi gaté.” 7 Jecute óraño bisite diyajmane udore. Yojningane u uacate bajade jnese. Chamáñaje pisocade udore u uje pésu uacaringane máracho. Enga oyo arureque ichade uje ueguipísome bisidode. Uje uacamóño gu uje judíode ore pésu pipocaya icha nanique uje que bisitique déji ome ore jnusinamáni dire uje i tu Páscua . Chamáñaje icha uaque gu ome pisijnaringuéone uje uacanguretáyo Crísto. Uje Crísto uté toi ome yoquisijnaringuéone gu enga gajnua jé u ore yugué áyasa uje judíode ore tagu iji dajnusinamáni dire uté. 8 Cho ujetiga ugúcoji pujnusinamáni dire gai to rĩ uje e yicoi Dupade adode. Jecute yicoi enga yiyágo yocate gajnaréngone, yoquisijnaringuéone ore uje udore gajnúone u arurégode uje ore chaníraja bisite diyajmane iji. Mu yicoi enga yedugo Dupade uru uréone, pate omone ore uje udore gajnúone u arureque ichade uje íjnoque bisidi iji. 9 Ojningame uaque ica iji yurusãraque bajade ujetiga jé ca ajnecacho uágaja pisijnaringuéone ipesungórone udore ore. Cuchiyi tupúsu udore ore uje que ore áyipieraque jnoji punganingane. 10 Que yuruode qui tu ujetiga angaráño erámi unirisórone jogatique ome uaque. Yirajágo gu uje erámi unirisórone uje que ore changureta Dupade jé ate uje que ore áyipiedie jnoji punganingane, jeoga ore jnári cuchade ome raque, jeoga ore toria cuchade, jeoga ore cho dangurenone iji ayoré gajnúone. Obiréjna uje que togome yoque ujetiga yoco jmíti, jmíti ome ore jnese. Gusu ujetiga boyópisiji erámi tuné, enga quene jogadi u ujetiga ca amecho uáguiji pisijnaringuéone ipesusórone udore jnese. 11 Mu ujetiga gosi cho Dupade anguresṍri iji re mu jno dasijnaringuéone údi enga uté gosi u ujetiga ca átayo uágaja uté gosi. Yojningane u ore uje ore pota nungare ome chequé quedéjnanie, jeoga ore jnari cuchade ome raque, jeoga ore catecã́ri dacatecãrainone ayoré gajnúo, jeoga gojñangaraquechoqui ore, jeoga yote pioi yuguébeque ore, jeoga oriechoqui ore. Enga jé ca átayo uágaja udore uñéngo. Ujetiga udore uñeque tibidi ua ome cucha pibosode mu ca abágui. 12 - 13 Chamáñaje que yajnei tu ujetiga yajire Dupade otigayasórone ipesutígo cucha gajnareque aja quitígo. A Dupade chajire udore ore ipesudode aja quigode jne. Mu yiraja uje uacajnei tu ujetiga apéso uacajéode ome pisijnaringuéone ipesungórone iji Dupade anguresórone ore iji uacajade. Jecute ãrachope uacajade ome jnacari tuté, chamáñaje gajnarenguipise uté adode gu iji uacajade.
1 ¿Jé gotique uje chi uacuñane chayója dacasutedie uje que Dupade anguresõre ore go uje uaquetácho uacajorane ipesudode ome uaque? ¿Jé go que ayóyoja uacojode Dupade anguresõre a ome uacãjorárique ipesutique ujetiga gajnareque ome uaque? 2 ¿Ja ca arajáyo a? uje Dupade anguresórone uyoque a yocajnei tu jne ujetiga yajico erámi unirisórone atígo aja quigode ujetiga diga Crísto diapo rĩ ome daringai eduguéjna cuchape. Ujetiga jec ũré udore enga uacajiritigade u cucha querúode jne, ¿ja ca tiógara to ome uaque a ujetiga ajichopo cucha dacate ajámatigo jne rĩ a iji uacajade? 3 Mu que gusu erámi unirisórone mu a yajicopo gaté unirisórone adode aja quigode to jne rĩ. Ujetiga yocajnei u udore, tamuré cucha dacate jnutiminórone ujetiga yajico aja quigode to ome yocujode Dupade anguresóño. 4 Ujetiga cucha jnutiminore uaquetétigarique ome uacojórique Dupade anguresõre, mu ca ayóyoja eduguéjnane uje unejac ore ome Dupade anguresórone uaque. 5 Ajengopísome uacapesudode uje uacayóyoja dacasutedie ome ñane. ¿Ja ca uacuñeque déji a ujetiga chiraja páyipierigui quitígo ujetiga chajire dojórique Dupade anguresõre ipesutígo aja quigode? Isenga déji. 6 ¿Ja omi tu ome uaque a ujetiga Dupade anguresónique chijna dojórique Dupade anguresõre aja dacasuté guesiminónique ujetiga chajire ore adode aja quigode? 7 Mu gajnareque to uje Dupade anguresórone uaquetácho ñane enga jĩraque uacayóyoja dacasutedie ome ñane. Imoi tu uje Satanas suépise uacabáyode. Cucha omi turásu ujetiga adotáyo uágaja ome uacajorane ipesute gajnarétigo ome uaque. Ujetiga ore chãra uaque marínga, cucha omi tu ujetiga jé dóji enga ca oyo chimíyimi ome ore. 8 Mu uaque uje uacayóyoja dacasutedie udire, uaque jé u to uje uacapéso pisijnaringuéone. Chamáñaje paringaquéode déji uaque to gu. Enga uacaringaquéode udore chuságaja Dupade anguresórone to, uje uacajorane u ore múñi ome Dupade adode. 9 - 10 A uacarajáyo jõ uje pisijnaringuéone ipesungórone a ca ore chise daringáringo Dupade urása to jne. Jecute ca ajuécho ujetiga uñeque chãra uaque ome udore. Udire ore uje ore chachia re iji jnacarode ore, jeoga udore uje ore chachia re iji gapudíe ore, a ca ore chimo daringáringo Dupade urása to jne. Jé aja amanachuguedie, acoterachugode ore rĩ uje ore pota punganingane ome chequé quedéjnanie, jeoga jnani quedéjnane. Jé aja jnanione udore ore to uje ore pota tungarája dojórigo jnanío. Jé aja udore ore to uje ore catecã́ri ayoré gajnúone. Jé aja oriechoquíode to. Jé u to udore ore uje ore jnári cuchade ome re. Jé u to yote pioi yuguébeode ore. Jé u to jutarequechoquíode. Jé u to aringácachoquíode uje cachi ore gaidi tu poriquéode ome dojode ayoréo ugúchade. A ca udore ore uñeque chacája Dupade idai to jne. 11 Uacuñane isocade adode u udore to nanique. Mu uje e uacanguretáyo yocangarádejnai Jesus enga uté chĩro uacasijnaringuéone enga cãra uacajogadode ome erámone unirisórone ore jogadode ujetiga eduyo uágome Dupade. Enga Dupade chisi ome daEspíritu Sánto ome uaque enga cho ayoré paráguiji uaque to gu yocangarádejnai Jesus adode ome uaque. 12 Ore chojninga: “Pujuregate cuchade jnese ome Dupade anguresórone uyoque ãrie.” Ẽje, pujuregate cuchade ome yoque, mu que cuchade jnese pésu yoquiquéraningárique aja gaté ome Dupade adode. Yiraja uje Dupade juéga cuchade jnese ome yu, mu a ca yujuéga yu jne ujetiga yipotigádode ome cuchade udore jno yúdi aja pisijnaringuérique. 13 Jé ũré uje pipesute cucha pibosode gu yoquicadie. Jé basa pipesute yoquicadie gu ujetiga yajo yoquibosode. Mu a chise dínique jne ujetiga Dupade chécãre pisocade udore enga e cucha bisidécho pibosode, picadie ore jnese. Mu que Dupade ipesute ayorérique aoi gu ujetiga chachia re iji gapudíe, jeoga jnacarode. Ungare. Yocangarádejnai gajneque yocaoi ujetiga cho daguíjnai iji yoque. 14 Enga a chise diri jne ujetiga Dupade chiringare yoque to jne iji pitoringai ome dajopie. Adi tu uje chiringare yocangarádejnai Jesus iji pitoringai to nanique. 15 ¿Ja ca arajáyo a uje Crísto cho dabai iji danguresórone uyoque jnese a? ¿Ja cucha omi turásu ujetiga yiji Crísto gai atique uñeque enga yisi ome gapu dibechoquíraque ujetiga tungarája? A gajnarenguipisirase pisocade udore ãrie. 16 A ca arajáyo jõ ujetiga jnacari tungarája gapu dibechoquíraque enga jogadi tu uté uje chojmára ore iji jnumi. Ore urusarane Dupade urúo déji uje chojninga: “Ujetiga jnacari, gapua ore moji ñane gari enga jogadi u uté uje e que garapo ore rĩ, mu e chojmarapise ore iji jnumi.” 17 Adi tu to ome yocáyipiedie. Ujetiga gosi cháta raja Yocangarádejnai enga jé u uje uté gosi, Yocangarádejnai ore áyipiedie chojmarapis iji jnumi to rĩ. 18 Jecute ayóyo ome gapu quedéjnanie enga ca angachója ore. Uacamóño gu uje gajnareque pisijnaringuéone jnese, mu cucha guesiminórone u pisijnaringuéone udore jnese. Jé basa punganingane ome gapu quedéjnanie u uje pésu gosi aoi iñoñaringuei. Jecute uté gosi aoi jé gajneque ipesudode cucha gajnareque. 19 ¿Jé ca arajáyo a uje Dupade guerani Espíritu Sánto jogadipise uacajéode enga cho daguíjnai iji uacaode? E que uacajneque uacaode gotique, mu Dupade gajnécho. 20 Chamáñaje Dupade gáite oré uaque enga uásejnapise uacoredie. Jecute ajusópise uacaoi, uacáyipiedie ore guio. Uje uacagaidi tu gu ujetiga picotaque Dupade ome uacasoca omone udore.
1 A quene yichajnai uacarusarane jne ome yu uje uacarúsãcho ome yu diríca. Uré yu uje ojninga: cucha arei u ujetiga jnacanique ca chucué dacotéraque. 2 Mu yiraja uje uásejna jnacarode, gapudíe uje ore chachia ráguiji ñane. Enga que yipota ujetiga abasója cuchade udore to. Jecute arei tu ujetiga jnacare chojmara, chojmarane ore chisa dacotépiserigui. Enga jé chopo gapudíe to rĩ. Areque ujetiga ore chisa damaníngo to iji jnacarode ore. 3 Enga uje e ore déji ñane gari enga jnacari gajnei tu ujetiga moji dacoté gari. Jeque acoté gajnei tupo rĩ ujetiga moji dabai gari. 4 Chamáñaje chequé amanachuguéraque e que gajneque daoi mu abai e gajneque. Jé cho acoterachutique to, e que gajneque daoi mu acoté e gajnenguipise. 5 Jecute amanachuguedie uaque a, ca ãrácho uágome uacabayode ore ujetiga ore pota moji uacari. Jé chopo acoterachugode uaque rĩ. Ujetiga uacacotedie pota moji uacari enga ca ãrácho uágome ore. Jé basa ujetiga uñeque pota cãra dajogatique ujetiga catecã́ri Dupade enga cucha omi tu ujetiga abai, acoté ore catecã́ri ñane bajaque enga ujetiga ore ajéningo chojmára iji jnumi, quene jogadi tu ujetiga ore cãra dajogadode ome ñane ome picatecãraitigade ome Dupade. Mu jĩraque ore chisápo ñane rĩ. Adi tu gu ujetiga Satanas ca pésu gapu quedéjnaraque, jeoga jnacare quedéjnarique unéningarique ome udore uñeque enga basaja pisijnaringuérique. 6 Que yiroque uágaja ujetiga asayo uacacotérigui, jeoga uacamaníngo. Mu ujetiga gosi pota enga jé areque ujetiga chisa dacotépiseraque, jeoga gotóa pota enga chisa dabaipísirique. 7 Yajéode u jorógu ujetiga ayoréode ore cho yu uje que yisa yacotéraque. Mu que yoco ñane go, mu Dupade ipesute uyoque jnese. Jecute Dupade ajéode u ome yocuñane ujetiga jnani ueque yoc. Jé basa ga ajéode u ome yocuñane ujetiga acoterachuque yoc. 8 Ojningame jnacare uégode, gapu uéguedie, chequé ecadie uaque: arei tu ujetiga ca asayo uacacotérigui, uacamaníngo ore to enga jé oyo yu. 9 Mu ujetiga gosi áyipieraque ca jnoji gapudíe enga arei tu ujetiga uté chisa dacotéraque to. Uje que pisijnaringuei u go ujetiga uñeque chisa dacotéraque. Mu gajnareque ujetiga gosi ca chajire re ome dapotigaquéode ome gapu quedéjnaraque. 10 Yajéode u ujetiga amanachuguedie uaque ca ayáyo uacabayode. Piroquei tuté que garani u uyu go, mu garani u yocangarádejnai Jesucrísto. 11 Mu jé socaseti chequéraque e noñome damanique, uaté goto ca chisapo dabai uñeque jne rĩ iji dañomi tuté dabai quigade. Mu ujetiga uaté e potapo dabai uñeque rĩ, enga arei tu ujetiga chajniapo dabai dañomi casica gai rĩ. Enga jé chopo jnanione uaque rĩ. Ca ayáyo uacacotedie to. 12 Yuruode gajnengórone e u jnanione uaque uje uacacotedie que changureta Dupade to. Icha yacajnaquéode unojo uje cáma Yocangarádejnai chujnúngu jmare to nanique ome ore. Enga u unojo: ujetiga Dupade anguresónique acotéraque que changureta Dupade to, mu ujetiga uaté goto pota chácariji dabai gari enga ca uté gosi cha dacoté uaté jne uje que changureta Dupade múñi. 13 Enga ujetiga Dupade anguretóraque amanique que changureta Dupade to, mu pota chácariji dacoté gari enga uaté goto ca pota piyátique ome dabai to jne rĩ. 14 Ujetiga cáma goto abai changureta Dupade mu cho ujetiga Dupade cãra uté jogadi ome erámi unirisórone jogadode to gu acoté uje Dupade angureto u. Jé cho to gosi acoté. A cáma changureta Dupade mu cho ujetiga Dupade cãra uaté jogadi ome erámi unirisórone jogadode to gu abai uje Dupade anguresórone uñai u. Uacamóño uje Dupade anguresorejmane abode cachi erámi unirisõre ueque ore. Mu ujetiga disírique dayé, jeoga daté changureta Dupade enga jogadi u uté uje Dupade cãra ore jogadi ome erámi unirisórone ore jogadode to. 15 Mu ujetiga Dupade otigayasónique pota piyátique ome dacotéraque uje Dupade angureto enga jé arec ujetiga cha. Ga e omepo chequé uaté rĩ ome dabai doi uté. Jé cho to ome Dupade otigayatóraque ujetiga pota piyátique ome damanique uje Dupade anguresõre enga jé arec ujetiga cha. Ga e omapo jnani tuté rĩ ome dacoté do tuaté. Chamáñaje Dupade ajéode u ome yoque ujetiga yoco parágome ñane. 16 Mu ujetiga Dupade angureto ua enga ca boji babai ejode uje que changureta Dupade múñi. Socaseti diga babai changureta Dupade to jne. Jé cho ua rĩ ujetiga Dupade anguresõre ua enga ca boji bacoté ejode to uje que changureta Dupade múñi. Socaseti bacoté uaté changureta Dupade to jne iji dire uñeque. 17 Arei tu ome Dupade anguresórone jnese ujetiga ore pésu Dupade áyipiedie ome raque. Enga arei tupo ome ore rĩ ujetiga ca uñeque chécãre dasocárique. Chamáñaje ujetiga angureta Dupade iji baringai jnani ga jé ácariji te to ome baringai Dupade anguresõre. Jecucha yacajnaquéode u unojo to ome Dupade anguresórone jnese to rĩ iji ore idáyode jnese. 18 Ujetiga Dupade tibidi gosi aja re uje ore icaque gai ica, enga arei u ujetiga jé chácariji tome dangureni Dupade. Mu ujetiga Dupade tibidi gosi aja re uje cáma ore icaque gai ica, enga areque ujetiga chácariji tome to ome dangureni Dupade. 19 Chamáñaje que cucha ome Dupade gu ujetiga picaque uacádode, jeoga ca picaque uacádode. Mu Dupade ucuegode u ujetiga angoninguite guesaque uágome ipotigádode. 20 Jecute ca achóguinaño uaque gaté rĩ iji uté uje Dupade tibidi uaque. Ga jé ácayoji uté ome baringai Dupade anguresõre. 21 Ujetiga ore isaque ua uje Dupade tibidi ua aja re, mu jé ca o báyugu ua ome baringai pisaque. Mu ujeta ore pota chirame ua enga jé areque ujetiga bo to. 22 Ujetiga Yocangarádejnai tibidi ore isatique aja re, enga Yocangarádejnai tuté que cho dasaguíji uté gosi. Mu uté gosi jé jno ga doi Yocangarádejnai iroquéode to. Jé basa ujetiga Yocangarádejnai tibidi ayoré atátique aja re, enga e Yocangarádejnai isaque uté gosi, enga uté gosi doi Yocangarádejnai iroquéode to. 23 Dupade gáite oré uaque enga uásejnapise uacoredie ome Dupade nanique. Jecute gajneque uaque. Jecute ca ajuéchopo uágome pisatique rĩ ome jnanírique. 24 Yujode Dupade anguresóño uaque a, yijáro yuruode iji jnumi ome uaque ujetiga ca achóguinaño uaque gaté rĩ iji uté uje Dupade tibidi uaque. Ga jé ácayoji uté ome uacaringane Dupade anguresõre. 25 A e yingo yajéode ome uaque ome jnacare uégode, gapu uéguedie ore jne. Que Yocangarádejnai cho quique cuchade unojo quitígo ome yu. Mu yiraja uje Dupade chingo dosongaquéode ome yu ica ujetiga yiji iroquéode. Jecute yajnei tu ujetiga anguretáyo yacajnaquéode to. 26 Irajágo uje jé ate uje cucha dacate gajnaréngone tocade ome Dupade anguresórone uyoque iji deréjnane unojo. Jecute areguipísi tu jõ ome yajéode ujetiga jnacarode ore chedu daringáringo jnacare uécho. 27 Mu ujetiga bacoté cuse enga jé ca apota piyágueraque ome bacoté. Mu ujetiga jnacare ueque ua enga ca o bedojnaringué ome bacotéraque. 28 Que pisijnaringué go ujetiga gosi chisa dacotéraque, enga que pisijnaringuépo rĩ ujetiga gapúraque chisa damanique. Mu uje jnacarode, gapudíe ore chijna ñane enga jogadi u uje ore narañime cuchade iji erámi tuné. Uje yaquĩ́ra uágome pisagode ome ñane enga yigaidi u ujetiga ca payuguhebátigade chise uaque. 29 Yijorane uaque a, yipota ujetiga yingome uaque uje dirode garosipis ome yoque ujetiga yicoi Dupade adode. Jecute acoterachugode uaque, ajusópise uacacotedie guio, mu ca ejnáño uacáyipiedie aja ore, enga cho ujetiga ca uacacotéraque cuse. 30 Ujetiga bajogasúrique toi mu adotáyo uágome pujnusiétigade enga cho ujetiga ca pujnusiétigade sué uacabáyode. Ujetiga agúsiji ore ajñamítedatérique, mu ca ejna ua aja pininaquéode. Ujetiga be oré tome cuchárique, mu ca o bajnénguiji bagaidé oré tuaté. 31 Ujetiga ataque uaque iji erámi tuné mu ca oyo atáquedaté iji uaque, enga ca uacáyipiedie chejnapise raja uacagúchade. Chamáñaje yoquijogadi erãpe tuné, jé aja jogosórone cucha jnese a jĩraque íjnoque jnese jne gu. 32 Que yipota ujetiga payuguhebátigade sué uacabáyode, jecute yaquĩ́ra uágome cuchade. Uacamóño uje jnacare uei uje Dupade anguresõre que áyipieraque chejna raja cucha jnutiminórone gotique. Mu ucuegode upúsu Yocangarádejnai iroquéode. Chamáñaje gaidi u gu ujetiga Yocangarádejnai chirase re ome adode. 33 Jé basa acoterachuque gosi enga uté áyipie chejnapise raja cucha jnutiminórone ujetiga ca cuchárique chona acoté, abode ore. Gaidi tu gu ujetiga acoté chirase re ome adode. 34 Chequé amanachuguedie ore ipesudode jé cãra re ome gapu uéguedie ore ipesudode cucha to. Uje que Dupade anguretóraque amanique cuse enga uaté goto chedu Yocangarádejnai iroquéode ome re. Que áyipieraque déji cucha uñeque, mu pota ujetiga Dupade gajneque áyipie, aoi ore jnese. Mu amanachuguedie ore áyipiedie déji dasacuatigade cucha ujetiga ore abayode irasé ore. 35 Yajéode u ujetiga agutíñañome yacajnaquéode unojo ome uaque. Que yipota ujetiga oyo yãrecho iji yacajnaquéode gotique. Mu yigaidi u ujetiga arajáyo cucha arégode ujetiga apéso to. Yigaidi tupo rĩ ujetiga beyoi Yocangarádejnai iroquéode to enga ejnáñopise uágaja udore. 36 Ujetiga gosi chaquĩ́ra daróraque ome jnacaníngo, mu quigade enga chimo uje uro chó daringa gapu uriéngue gai uje cáma chisa damanique, jé arec ujetiga uaté dayé chécãre dajéningo. Cuchiyi tupúsu ujetiga uro potapísa chisa damanique to. Jé areque ujetiga doi enga juéga ome uaté ujetiga chisa damanique. Uje que pisijnaringuérique déji go ujetiga gapúraque chisa damanique. 37 Mu jecute ujetiga gosi chaquĩ́ra daróraque ome uringáraque amanachugué enga uerate uté gosi áyipiedie quigode. Chamáñaje que pésu udore gu paquĩraquérique, mu pésu gu dáyipiepisedie. 38 Mu uerate gosi adode to ujetiga juéga ujetiga uro chisa damanique. Mu uté gosi uje chaquĩ́ra daro tome uringáraque amanachugué, uté gosi áyipiedie sué bajai tuté áyipiedie gai. 39 Ujetiga chequéraque abai qué eca enga que pujuregate ujetiga uaté doi enga chucué dabai uñeque iji dabaipísi ejode. Mu jé mongacho ujetiga abai e toi enga jé areque ujetiga chisapo dabai uñeque rĩ, mu gusu ujetiga Dupade anguresõre jnani tuté. 40 Mu pininaquei jogadi urásu ome chequé uaté ujetiga ca chisapo dabai uñeque rĩ. Cachi yajéode u udore, mu ísenga Dupade ajéode u to jõ. Chamáñaje Dupade Ujopie Espíritu Sánto déji yajei gu.
1 A qué yujnúngumu jmare jne ayoré gajnúone gajnéone cucha piboso ujetiga jé areque ujetiga yajo, jeoga ca yajo. Iraja uje jé ate ome ayoréode uyoque uje yoco irajatade iji yoque ome cuchade quigode jnese. Mu yiraja to uje yocuringane dicotarechoqui jogadi tu uje yicotágo yógome yoquirajatigade. Jé basa ujetiga gosi chijnorapise dojode ayoréo enga jogadi tu uté uje uté gosi quérã iji Dupade adode. 2 Ujetiga uñeque cho irajatáguiji re, uté gosi u uje cáma chiraja cuchárique. Chamáñaje que toc ujetiga gosi chiraja cuchárique ujetiga Dupade ca cho cuchade udore quique ome gosi. 3 Mu ujetiga uñeque chijnóra Dupade enga Dupade chiraja uje dangarásõri u uté enga cho cuchade quique ome uté gosi. 4 A qué yo quique ome uaque jne ayoré gajnúone gajnéone cucha piboso ujetiga Dupade anguresórone uyoque yajo, jeoga ca yajo. Irajágo uje que cucha dacatique tṍraji ayoré gajnúone udore ore. Enga que Dupade u ore gotique. Uje que Dupa uñeque cuse, gusu Dupápisi uje déji gaté. 5 Irajágo uje uásejna pangurenone cucha iji gaté, jnumi ore uje erámone unirisórone ore cho dadupa iji ore. 6 Mu ome Dupade anguresórone uyoque, yocangureni Dupa chojmarapise enga yocai Dupade u. Uté pésu cuchade jnese enga yiquecágo gu uté ujetiga yicoi adode. Enga Yocangarádejnai chojmarapo rĩ enga Jesucrísto u uté. Uje Dupade angúromei u uté nanique uje pésu erámi iji taningane nanique. Enga Dupade angúromei upo uté to rĩ ujetiga chisi ome pucuecaringué eyúgojmai ome yoque. 7 Mu yocujode Dupade anguresõre uñane que ore chiraja pacajnaquéode unojo quigode to go. Uje ore isocabeque nanique uje ore catecã́ri ayoré gajnúone to. Enga que udore ore áyipiedie jnoji dacatecaraini casodicáite ayoré gajnúo uringane ujopierã́cho. Jecute uje ore tagu ayoré gajnúone gajnéone cucha piboso udore ore agutedie cho jora ome. Cáma ore taya iji danguretigai ome Dupade gu. 8 Yocuringane Dupade imeserácho que garani upúsu cucha pibotique ujetiga gosi tagu, jeoga ca tagu. Uje jé cho ñane ome Dupade gu ujetiga yapúcoja yoquibosode, jeoga ca yapúcoja. 9 Mu ajusópise uacadode guio. Pujuregate cucha pibosode jnese ome uaque marínga, jé ca acho iji uacojórique Dupade anguresõre iquei uje cáma etoque uté ome danguretigai ome Dupade. Jé socaseti chirate uágaja enga tagu to enga jĩraque aguté chorase jora ome jne. Enga basaja pisijnaringuéone jne rĩ. 10 Ujetiga uacuñeque jno enga acárasaja ayoré gajnúrique iguíjnai ujetiga agu cucha pibosode iji, socaseti Dupade anguresónique uñeque di uje cáma etoque iji danguretigai. Enga chimo Dupade uruode irajasṍri ua iji ajei enga chacája to enga nóna ua. Enga diga tagu cucha pibosode udore to. Mu quigade enga aguté chopisirase jora ome dapesudode udore uje tagu ayoré gajnúrique gajnéone cucha piboso, uje que dupápisi uté múñi. 11 Pirajatigai déji ua ome cuchade udore múñi, que ajusipise bãjorai uté guio, uje cáma etoque uté iji danguretigai. Jecute uté chopise caru ome danguretigai enga bijna ome Crísto uje toi ome uté to múñi. 12 Uje bapesute bãjorai uté aguté jora uje cáma etoque iji danguretigai enga cho ujetiga basijnaringuéone udore gajnengóri upúsu Crísto. 13 Jecute ujetiga yibotique u uje ipesute yĩjorárique iñoñaringuérique, enga arei u ujetiga ca yajoporásu ayoré gajnúone gajnéone cucha piboso rĩ iji deréjnane jnese. Yigaidi tu gu ujetiga yĩjorai ca pésu pisijnaringuéringo to.
1 Que potigayaquérique déji ome yuringárique Jesucrísto iroque. Uje e imópise yocangarádejnai Jesucrísto ome yedodie nanique gu. U to uje yimanique uágaja panguretigai ome Jesucrísto. Jecute yajnéone cucha a jé chorase Jesus irógode uñane ore gajnéone cucha to. 2 Isenga uñéngo ore chotigase yuringai Jesucrísto iroque jõ. Mu uaque u uje uacarajayópise uje jé ũré yu ome udore uje Jesucrísto iroque yu. Chamáñaje uacanguretáyo yocangarádejnai Jesucrísto gu uje atata uágome adode ica. 3 Yiraja uje uñane ore chucué yiyoguérigo. Mu yipota jeta yĩrarare yibai, enga a yósi te ome udore ore jne: 4 Yajnei tu ãrie ujetiga yisa yajnetígo cucha pẽracho saque to uje Jesus irógode uña yu to. 5 Yajnei tupo rĩ ujetiga yacotéraque dérasiji yari ujetiga Dupade angureto goto enga uaté a nonarása yu to aja yiquitígo. Adi tu yujode Dupade irógode uñane uje ore acotedie nóna ore aja ore atatagode Dupade urúo iji erámone. Yojningane u Jesus jorane, Pédro ore. 6 Isenga uacáyipiedie u ujetiga gusu Bernabé uyoque ujetiga yisago yoquejórigo ome yoquibotígo. Jé basa ga uacáyipiedie a u jõ ome yocujode Jesus iroque uñane ujetiga ore chedu datatagode Dupade urúo. 7 ¿Ja soldátique déji a ujetiga chorase dabotique oré? Ungare, ore eduguéjnane gáite oré ore posode. ¿Ja utácarique déji a ujetiga ca tagu dacatígo cucha árigo a? Ungare. ¿Ja áyasadie irodisónique déji a ujetiga ca chóji dajóyadie áyasai ijnanie irisode? Ungare. 8 Uje yacãra yacajnaquéode aja cuchade udore cho ujetiga cachi cucha jnutiminóño. Mu déji Dupade uruode to. 9 Uje Moises urusarane Dupade urúo chósi te: “Ca agaru bachitique cabáyu pijnatique uje qué chinasu bacai árigo iji guídode. Mu ajuéga ujetiga tagu uñéngo aja dajesúode.” ¿Ga Dupade uruode u udore gu uje chosõre cabáyuode a? Ungare. 10 Dupade chacãra dacajnaquéode aja cabáyuode, mu áyipie dépisiji darógode uyoque ujetiga pisi yógome to uje yicoi adode. Uacarajáyo uje jnani tuté uje chirase guejnatique ome derásõri arádo, jé aja uté to uje chinasu pacade árigui, udore ore áyipiedie jnese déji diri tuté ujetiga ore tagu árigui to jne. 11 Yocajnui u utácarique uje chaca cucha ajñunie iji dejnatique. Chamáñaje cho ujetiga yocacaque Dupade uruode iji uacajéode to. Jecute jé tiógarapísa to ujetiga yirango yocacade árigui udire to, enga árigui urásu uaqueranone cucha ome yoque to. 12 Iraja uje uacasíyo uacacadisórone uñane iji uaqueranone. Taguripisirási yoquibai ujetiga asíyo yoque to uje yoquijnimique uaque ome panguretigai iji Jesucrísto gu. Yocajnei tu ujetiga asiyorase yoque, mu que yutagoi uaque go. Mu yidotágo yógome cuchade udore jnese. Chamáñaje que yipótago gu ujetiga uñeque chetaque yocatique enga diga ca tangári yocatatagode iji Crísto adode jne. 13 Isenga uacarajáyo jõ uje udore ore jnese uje ore pésu cuchade aja quigode iji Dupade iguíjna cuchábi ore gajnei tu ujetiga ore tagu cucha pibosode iji Dupade iguíjnai tuté. Jé cho udore ore to uje ore chisa ore gueranone cuchiso enga ore chujé udore ome Dupade. Jecucha ga ore tagu dajnepídode iji cuchisode udore to. 14 Enga jé adi u uté to ome udore ore jnese uje ore jno Crísto ujnomei údi, ore gajnei upo ujetiga pisi ore to rĩ. Chamáñaje Yocangarádejnai iroquei tu uté ome yoque gu. 15 Jecute yajnei tu to ujetiga pisi yu. Mu que yutai uñeque gotique ujetiga chisi dẽratígo cucha ome yu. Enga que yurúsãre ome uaque gu ujetiga asíyo yu iji uaquẽratígo cucha. Jé tiógara ujetiga yirasique yu. Chamáñaje yijmáinie imaningone u yibosode uje yiji Crísto ujnomei údi. Enga que yipotapísa gotique ujetiga uñeque doi enga chojninga: “Cachi Páblo gaidi u yoqueranone cucha ãrie uje chatata Dupade uruode ome yoque.” Ujetiga jé ũrerase ore uruode udore enga a yipotarása pitoringai. 16 A gajnarenguipisirase ujetiga yiji enga yisi yibai gu yatatagode Crísto ujnomei ome ore. Uje cachi Dupade chiroque yu aja yatatagode udore gu. Mu ujetiga yiji enga yetaguirase Dupade iroquéode udore, enga yiya yacate ore, enga jé yigachodi u ujetiga cucha gajnarétique chósi ti iji yu. 17 Ujetiga yipésu cuchárique gu yajéningo, enga jé tiógara ujetiga pisi yu. Mu ujetiga ayorérique que yocajéo mu jé yipéco cucha dacatique enga uóme to. Chamáñaje Dupade iroquéo udore gu ome yoque. 18 ¿Ja Dupade cho yoré ome udore to a? Ẽje. Guerani u yirasitigai tome yu uje acate ore ome Jesucrísto uringai piquetangore uje que yutai cucháriguiji uñeque. Itiógarapísarása mu ujetiga pisi yu, mu que yutai cucháriguiji uñeque gotique. 19 Que pisaque yu go. Mu cho ujetiga erámi unirisórone ore isaque yu jnese. Uje yujuya yu iji ore ujade gu ujetiga jiei yijnimitígo aja panguretigai ome Jesucrísto. 20 Uje yugúsiji judíode ore ujade enga jé o ore ome ore adode enga que yo cucha bisidéguiji ore angurenone Moises iroquéo to go. Iraja mu uje cuchade udore ore toi ome Dupade anguresórone uyoque. Yigaidi tu gu ujetiga ca ore chise yunerotiguérique enga yimate ore aja Crísto uringai pangurete to. 21 Jé basa ga uje yugúsiji purása quedéjnane ore ujade uje agupurai ore ome Moises urusarane enga jé o udore ore to. Enga que yiji judíode ore jmapiédie. Yigaidi u gu ujetiga yimate udore uñéngo aja Crísto to. Mu jecucha yigaidode u Dupade, Crísto ore iroquéode uje ugúsiji purása quedéjnane ujade múñi. 22 Jé cho uje yugúsiji Dupade anguresórone ore ujade uje cáma ore taya iji danguretigade, enga jé yo udore ore to. Yigaidi tu gu ujetiga ca ore chise yacajnaquéode unerotiguérique enga ore quérã iji danguretigade. Jecute ucué yajéo ujetiga jé yo yacaditígo ore jnese iji yajesúode erámio. Yigaidi tu gu ujetiga yijnime udore uñéngo aja panguretigai ome Jesucrísto to. 23 Yisocabéode u unojo gu uje ipotapísa ujetiga Dupade uruode chise erámone jogosórone jnese enga udore uñéngo chise daringáringo Dupade iquetácho to. Que gusu udore, mu yipotapísa to ujetiga pininaquei chise yu to uje yimate uñane aja panguretigai ome Crísto to. 24 Uacarajáyo uje qué ore doi dagajñunie ome ñane enga bajai tu ore isi tiji ore. Yajéode u ome uaque ujetiga ibisoguipise uágome Dupade adode to. Yojningai u ujetiga ejnañopise uágaja adode. Enga a Dupade tẽrája uaque to jne. 25 Irajágo to uje e idógosi deréjnai ujetiga ore doi dagajñunie ome ñane enga ore susipise deo ome cuchade. Ore gaidi tu gu ujetiga etoque ore ome dagajñua. Enga ibisoi iji ore uté gajneque ore oradie uje ore ipesudé iji poracarane. Mu uté gosi gajnei ducayo iji poracarane jĩraque beta enga íjnoque. Mu uyoque enga ejnángo yoquiguesi ome Dupade adode, enga a yocajneque Dupade guẽratique cucha to jne. Mu yocajnei tuté a ca íjnoque jne iji deréjnane jnese. 26 Irajágo uje ore chequetingare re gatuaque ome dagajñunie yui. Mu que yetingaraque yu to go ome pigajñúraque yúrique. Chamáñaje e yugúsiji gai gu. 27 Jecute yo yujuñame yu aja yiqui yui. Enga que yimíninga yute ũrosoringuéone gotique. Enga ujusipise yadode guio. Socaseti gajnareque yatique, enga ca Dupade chisi ome yajnetique cucha ome yu iji yigajñua eruei. Nosoringuéo uje jecucha yacate ayoréode múñi ome Dupade uruode.
1 Yujode Dupade anguresõre uaque a, ipota ujetiga arajáyo uje Dupade isocade jé chojmára ome yocayode jnani bajade ore jnese nanique. Uje chicha gue abuja taja gaté nanique enga ore chajna jnese iji erãpe eyutiguei. Uje Dupade chajuque yodi iji yote quedéjnai uje i tu Yote Quedéjna Caratai enga noña enga dajere cajnore iji yote quedéjnai tuté gatocoro. Enga jé u uje ore chiramísara jnese. 2 Uje yocayode jnani bajade ore chajna Moises nanique uje gue abuja chicáji ore iquéode enga imoi tu uje ore cho dangaráni iji Moises jnese. Jé u to uje ore chiramísara yote quedéjnai to nanique. 3 Uje Dupade chiroque cucha pibosode uje tṍraji gaté ome ore enga ore tagu jnese. 4 Ore chóji yodi to jnese uje tṍraji cucarané cuchabe ome ore. Mu cucarané tuaté gajnui tu Crísto. Enga Crísto upúsu to uje nóna ore aja ore ajesúode erámio nanique enga cho ujetiga yote uneri tṍraji uté to ome ore enga ore agutiñamáite uté jnese nanique. 5 Udore ore chimo Dupade ate ueradode udore ome raque, mu uásejnapise ore uje ore chajo raja date gajnaréngone. Jecute Dupade que chise udore ore unétique enga noñome ore iji ti ujetiga ore toi iji erãpe eyutiguei tuté. 6 Cucha dacadode udore chacate yoque ujetiga jé ca yiraco udore ore aja ore isoca gajnaréngone udore to. Enga jé ca yipótago cucha gajnaréngone to. 7 Irajágo uje yocayode jnani bajade uñane ore catecã́ri ayoré gajnúone to nanique. Mu jé ca aracho udore ore aja ayoré gajnúone uringane picatecãrácho to. Ore urusarane Dupade urúo déji to uje chojninga: “Jnani bajade udore ore pésu dajñamítedatéi nanique uje ore tagu dabose unérone iji. Quigade enga ore doi edai tiji dapesudi cabáyu ucatoque ejode.” 8 Irajágo to uje yocayode jnani bajade uñane que ore moji jnutígome chequé unejánguenie ore nanique. Jecute Dupade cho dajuñame ore. Enga togode iji ore chise 23 mil nanique iji dire chojmarai. Jecute ajusópise uaqueo ome chequé quedéjnanie, jeoga jnani quedéjnane ore. Enga ca amóñoji ore gari. 9 Irajágo uje yocayode jnani bajade ore pésu Dupade ejoporinguéone to nanique enga Dupade cho dajuñame udore ore enga chiroque ugade aja ore nanique. Enga uásejna ugade equesarane iji udore ore nanique. Jecute beyoi enga yujucópise yocadode guio ome Dupade enga jé ca yipéco ejoporinguéringo to. 10 Irajágo to uje yocayode jnani bajade uñane ore cho chere, chere ome Dupade to nanique uje ore chetaque adode. Jecute Dupade chiroque daroi gaté unirisõre dequejnangóri aja ore ujetiga chujé ore. Enga uásejna togode. Jecute ajuso uaqueo to enga ca oyo chere, chere ome Dupade to. 11 Irajágo uje Dupade chiroque daruode urusarasórone nanique ujetiga ore churúsãre yocayode jnani bajade udore ore adode aja quigode. Gaidi tu gu ujetiga disi ejode uyoque uje ugúcoji erámi eruei yúode yajico enga ca yiraco ore aja ore ate gajnaréngone to. 12 Isenga uacuñéngo uacajoso ati etoguipise uaque iji Dupade adode. Mu ojningame uaque: ajusópise uaqueo ujetiga ca abasója pisijnaringuéone ajñonie to. 13 Uacajnéone petingaquéo que gusu ome uaque go, mu petingaqué ponáyone déji ome erámi unirisórone uyoque jnese. Mu ũrepise Dupade ome daruode uje a ca chõre uacajnéone petingaquéo rĩ ome uaque ujetiga ca atiócho. Ujetiga petingaquérique e chise uaque mu a jĩraque Dupade chisi ome petotiguei ome uaque ujetiga adotáyo uaque ome udore. Enga a chingo uacasocárique ome uaque jne ujetiga jĩraque eso petingaquei tuté uéchai. 14 Yósi te ome yujode Dupade anguresóño uaque uje ijnóra uaque gu: jé ca acásoi uágome ayoré gajnúone uringáringo picatecãrácho to. 15 Iraja uje ayipierãque uaque enga e arajáyo cucha uréone, cucha tágode ore iji ñane. Jecute ajicho yacajnaquéode aja quigode to ujetiga jé ũré yu. 16 Uje ójigo Jesus iyoi gajnui cucha otate enga yacãco Dupade gai ome Jesus ate goningane ome yoque. Enga Dupade anguresórone uyoque yocáyipiedie chojmára iji jnumi jnese uje yujnusinángo Jesucrísto itoringai uje iyoi yore ome yoque nanique. Jé basa uje yajujo arurei enga yajo, enga yocáyipiedie déji Jesucrísto aoi to jnese uje chejnáreque re ome yoque to nanique. 17 Porójna Dupade anguresórone yoque, mu arurei chojmára uje yajo uje yujnusinángo Jesus itoringai. Enga gajnui tu ujetiga Crísto anguresórone uyoque jé yitojmárango iji jnumi jnese to. 18 Yingo judíode isocade aja uaque to: udore ore jnese uje ore tagu peranone cucha ome Dupade, enga obiréjna uje ore áyipiedie chojmára iji jnumi to ujetiga pẽrate cuchade ome Dupade iji Dupade gajnei gaserãte gai. 19 Ca ajoso ati yo ujopieránguiji ayoré gajnúrique. Yiraja gu uje cucha bisidécho, enga ujetiga pẽrate cuchisórique ome ayoré gajnúrique mu cachi cuchisoi tuté arágajñua tuaté cucha bisidegue enga jé chopise cucha arágajñunie jnese. 20 Mu yiraja to uje cho ujetiga Dupade anguresorejmane ore tẽra cuchisode ome ayoré gajnúone, mu ore gueranone udore gajnesõripísode u Satanas utocaidode. Enga que Dupade gajnenguipíso ore gueranone udore to go. Jecute yaquĩ́ra uágome cucha pibosode udore uje pẽrate ome ayoré gajnúone uje que yipotapísa ujetiga ajocáso Satanas utocaitígo gajnetígo cucha to. 21 Gajnareque ujetiga ójiyo Yocangarádejnai iyoi gajnui cucha otate, mu uacaboyópo rĩ enga uacátayopo uágaja Satanas utocaidode gaisórone rĩ uje ore chóji dacatecãrainone ayoré gajnúo gajnéone cucha. Que pujuregate gu ome yoque ujetiga yajo iji Yocangarádejnai agapidi, mu yajópo iji Satanas utocaidode agapidi to. 22 ¿Ja arei tu ome uaque a ujetiga yipéco Yocangarádejnai ejoporinguéringo enga chajire yoc ome ayoré gajnúone a? Que arei tu gotique ãrie. ¿Ja yoquetotiguéode sué Yocangarádejnai etotiguei gai ome uaque a? Uacarajáyo uje que ũré udore gotique. 23 Jé ũré ore uje ore chojninga: “Pujuregate cuchade jnese ome yoque ujetiga yipéco.” Mu jé ũré to uje que cucha dacatique tṍraji pipesutígo jnese go. Enga que cuchade jnese pésu ujetiga gosi quérã iji Dupade adode. 24 Que yocajnei tu ujetiga yajico yoquíode gatuaque, mu arei tu ujetiga yajicópise yocujode ayoréo ore yúode. 25 Apúsoja cucha arágajñunie aja ujetiga beyoi oredie ome iji ore gueranone cucha batigade. Mu jé ca acatecãchoi ore ome ujetiga ore catecarainone ayoré gajnúo gajnei. Socaseti arajáyo uje ore catecarainone ayoré gajnúo gajnei enga uacagutedie cho jora ome jne. 26 Mu yirajágo uje Yocangarádejnai gajneque erámi, jé aja cucha ponáyone jnese uje déji erámi tuné. 27 Jé cho to ujetiga Dupade anguresorejmárique dejena uacuñeque aja daguíjnarique ujetiga agu posode to enga apota ajína enga jé arec ujetiga ajína. Mu arei tu ujetiga ca achase uté posode, enga ca acatecãrápoi rĩ ome posode gãratique ujetiga ca baguté cho jora ome. 28 Mu ujetiga gosi chojningame ua: “Ayoré gajnúone gajnei yoquibotedie unaji.” Enga jé ca agu to. Báyipie déji bacatecãraisṍri uté gu ujetiga chimo uje ũrepise ua ome banguretigai iji Dupade. Jé upo rĩ ujetiga uté agutéraque ca cho jora ome udore to rĩ. 29 Que yojningai tu baguté joraraque mu yojnigai tu bacatecãraisṍri uté aguté joraraque, ujetiga ca aguté cho jora ome ujetiga unejátique tagu dacatecãrainone ayoré gajnúo gajnéone cucha. Mu ísenga uacuñeque pota catecã́ri yu ome yuruode udore enga chojningárasa: “Chiese pujuregate cuchade jnese ome yu, mu ¿gotique gu a uje a ca yagu cuchárique ujetiga yĩjorárique aguté cho jora ome? 30 Ujetiga yacãre Dupade gai bajaque ome yibotique, ¿ja ca gajnareque a ujetiga uñeque doi enga cho yiyoguei iji uje yagu yibosode udore?” 31 Ujetiga agu cuchárique, jeoga óji bajótique, jeoga apésu cucha uñeque, mu acha báyipie aja Dupade uje qué bagúsiji bapesudi tuté gai. Uje bagaidi tu gu ujetiga ca pujñiete Dupade ome uñeque gu basocárique, mu bacuei turásu ujetiga picotaque Dupade gatuaque ome bapesudode jnese. 32 Jecute ajusipise badode guio ujetiga ca judírique, jéoga purása quedéjnarique, jeoga bojórique Dupade anguresónique ca chise batígo iyoguérigo, enga ore doi enga ore cho caru ome Dupade adode. 33 Uyu ga yigaidi tu ujetiga yujode ayoréo ore nína raque jnese ome yatígo jnese. Enga yo yidobóya yipotigádode cucha, mu yáyipie jecucha déji yujode ayoréo ujetiga ore chise daringáringo piquetácho to ome Dupade.
1 Crísto jmapiedie u yigaidedie. Jecute aracho yu to aja yijmapiedie. 2 Yijorane uaque a, yirasiguipise yujode Dupade anguresõre uaque uje que acadíchoi yu. Enga jecucha boyo yacajnaquéode údi ome uaque uje yacate uágome ica. 3 Ipota ujetiga arajáyo cuchade unojo uje chequedíe ore gajnei tu ujetiga ore tangári dabayode uruode. Jeque jnanione ore gajnei tu ujetiga ore tangári Crísto uruode. Jeque Crísto gajnei tu ujetiga tangári dayé Dupade uruode to. 4 Ujetiga jnanione ore chacate ore ome Dupade uruode, jeoga ore catecã́ri Dupade uje ore chacája datójedie aja ome dacatecãraitigade udore, enga pajegátigai jogadi tu ome ore angarádejnai Crísto. 5 Jé basa arei tu ome chequedíe ore ujetiga ore chacate ore ome Dupade uruode, jeoga ore catecã́ri Dupade enga ore doi enga ore chaco borapetique datoi gai. Ujetiga goto ca chaco borapetique datoi gai ome dacatecãraitigade udore, enga pajegátigai jogadi tu ome uaté abai. Uje cho chequedíe ore gu uje que ore timíninga cuchárique enga ore chaquesu dacarane. 6 Ujetiga chequéraque ca pota chaco borapetique datoi gai enga jé areque ujetiga uaté goto doi enga chaquesu dacarãi tuté to, jeoga chuju datui. Mu ujetiga ajéchome udore yui, enga beyoi yuruode enga acóyo uacatóidie gai. 7 Irajágo uje jnanione que ore chaco datóidie gai uje ore catecã́ri Dupade uje cachi ore peróji Dupade gu. Uje Dupade gajnu dapesudi jnani nanique iji taningai. Jecute Dupade ingoningájnai pijóguiji jnanione to. Jé basa chequedíe ore peróji jnanione. Chamáñaje chequé bajé garani u jnani gu iji taningápisode, enga jé basa jnanione ore ingoningájnai pijóguiji chequedíe to. 8 Irajágo uje Dupade que chijnime chequé bajé atique ujetiga pésu jnani bajai tiji. Gusu uje chijnime jnani bajai ajnoquei enga pésu chequé bajé tiji. 9 Que Dupade pésu jnani gu ujetiga chequé chagutíñame, mu pésu chequé bajé nanique gu ujetiga jnani bajai uté chagutíñame dacoté. 10 Uacamóño uje Dupade irógode gaté unirisóño ore timíninga Dupade anguresórone uyoque aja quedéjnane. Jecute arei tu ujetiga chequedíe ore chaco cuchárigo datóidie gai. Imoi tu gu uje udire ore pésu dabayode ajegaidode cucha. 11 Mu yirajágo unojo to: ujetiga jnani ore, jeoga chequé ore mu ore chagutíñame ñane jnese ujetiga Dupade anguresõre ore. 12 Ũré uje chequé bajé pipesudéji jnani bajai ajnoquei iji taningane nanique. Mu ũrepo rĩ uje jnanione jnese ore basiji chequedíe to iji chequé bajé uaté quigade. Mu chequedíe, jnanione, jé aja cuchade jnese ore garani tupúsu Dupade jnese. 13 ¿Jé uacajéningo cho rique a? ¿Ja jé areque a ujetiga chequedíe ore catecã́ri Dupade bisideque iji dojode Dupade anguresõre ujade enga que ore chaco borapetique datóidie gai a? 14 Irajágo jnese uje que jnanione gajneque datu umarone gotique. Jecute ujetiga umare jnanírique gatúrique enga uté gosi pésu dipoi tiji re ome cutejmai datu umare. 15 Jé basa ga chequedíe ore gajnei tu ujetiga umare ore gatúode ujetiga ore dujnúji gai. Chamáñaje Dupade chisi ome acarãque umarone ome chequedíe gu ujetiga ore acarane udore chaco ore gatóidie gai. 16 Que yimo ujetiga uacuñéngo ca eso yacajnaquéode udore unétique. Mu yacajnaquéode u unojo ome yujode Dupade anguresórone iji ore idáyode jnese. Enga ísenga pacajnaquéode uñéngo ome cuchade udore ca dépoji siñeque to jõ. 17 Yigaidi urásu ujetiga yicota uaque ome uacasocade uñéngo to rĩ iji yurusarane unojo. Mu que toque go. Chamáñaje que cucha onique tṍraji gotique uje uacamátayo ñane ome Dupade uruode. Gajnareque gu uacasocade uje uacagúsoi ñane gari. 18 Yanire bajé tu uje chi amátayo ñane aja Dupade uruode enga chi jĩraque abotã́cho ñane, enga jogadi tu uté uje uacajucho uacajéode ome ñane. Isenga jé ũré ore ojñane jõ uje ore chatata uacadode udore ome yu. 19 Que potigayaquérique déji yu ome udore. Chamáñaje que toc ujetiga Dupade anguresõre uréone ca ore chamáta rágaja ñane to ome uaque. Uje ore gaidi tu gu ujetiga ore uringane ũréo pijoque. 20 Uje uacáyipiedie que chojmára iji jnumi enga obiréjna uje Yocangarádejnai que chise uacanétique uje uacójiyo iyoi gajnui cucha otate iji uacáguedie udire. 21 Uje e uacachórase mu que arocho ñane gotique. Mu uacapótayo ujetiga bajaque uac ome cucha pibosode udore. Enga uacangaráño uacabosode ome uacojode Dupade anguresõre uñane. Jecute chaguhei qué chejna uñane. Jé basa yote pioi yuque uñane. 22 Uacaguíjnane cuse ãrie ujetiga amátaño ñane iji ome uacabose unérone. Gajnareque uje uacacho udore uje uacamátayo ñane ome Dupade uruode. ¿Ja cucha bisideque uacáguedie udire a uje que ajuso uacadode guio iji? ¿Ja cucha bisideque uacojode Dupade anguresõre jmatágode to a uje uacangaráño uacabosode ome ore a? Uacamóño uje que ore chiraja dasocáringome raque iji uacajade. ¿Ja jé tiógara ome uaque a, ujetiga yisi uacabáyode ome uacasoca gajnaréngone udore? A ca yisípise uacabáyode ome uacasocade udore jne ãrie. 23 Ududipise yajnéone unojo, Yocangarádejnai acajnaquéo, iji uté pijnani nanique enga e acate uágome to. Chi dejai tuté jé u uje pẽrate yocangarádejnai Jesus ome umajosórone gajneri uje chi chacate dacadigode ome daoi gajnui arureque. 24 Uje e ore déji ñane gari jnese nanique iji dagapidi enga chi Jesus chisa arurei tiji dajmáinie. Enga chacãre dai Dupade gai ome. Quigade enga e chajuguína arurei tuté iji dacadigode ore enga chojninga: “Asayo arurei tuné enga acho. Uje yibai gajnui tu arurei tuné uje ẽra yibai tuné ome uaque. Yajéode u ujetiga jecucha acho arurégode iji ñane gari enga ajnusináño yu iji yiquigade jne.” 25 Jesus adi jec upo rĩ ome cucha adie otadi. Uje ore cha chagu enga chisa dajopidé nanique enga chojningame dacadigode: “Jináca. Ójiyo cucha adie otadi tuné uje gajnui tu yiyoi. Uje a yitoringai u jne ujetiga pésu Dupade áyipie ichadie uringanie ujñapeté ome erámi unirisórone uaque. Jecute jecucha ójiyo yiyoi gajnui cucha otate enga ajnusináño yadode ome uaque to jne.” 26 Jecute uje yójigo Jesus iyoi gajnui cucha otate, enga yajo gai gajnui arureque, enga ingongome erámi uje que yoco cucha bisidéguiji Yocangarádejnai itoringai gotique. Jecute boyo unojo údi jé aja ujetiga Yocangarádejnai diapo rĩ. 27 Jecute uacáyipiedie jogadi tupusurásu Dupade uje uacójiyo Yocangarádejnai iyoi gajnui cucha otate. Enga jé ca déji cucha uñeque. Uje pisijnaringué ujetiga uacáyipiedie déji cucha uñeque. Enga gajnui tu ujetiga oyo cucha bisidéguiji Yocangarádejnai aoi, iyoi ore gajnúone cucha. 28 Jecute ueradi tu ujetiga Dupade anguresórone ore jnese ore doi enga ore chajiripise dadode aja quigode bajaque. Quigade ga quene ore tagu Jesus aoi gajnui arureque. Enga quene ore chóji Jesus iyoi gajnui cucha otate to rĩ. 29 Ujetiga agu Jesus aoi gajnui arureque, enga ójiapo iyoi gajnui cucha otate rĩ, mu báyipieraque que déji Jesus itoringai ome ua enga jé máraque ua ome Dupade ujuyaquérique yui. 30 Enga jec ũré uje Dupade ujuyaquéode e tocade ome uacuñane. Uje ejnaretácho uacuñane. Jé basa ga uñane que ore etotiguérique cuse. Datéringa uje uñane e ore topísi to rĩ. 31 Mu ujetiga yajicórase yocadode aja quigode bajaque jnese, enga a ca Dupade chorase dajuñame yoque. 32 Mu ujetiga ca yajico yocadode aja quigode enga jogadi tu ujetiga Yocangarádejnai chajire yocadode aja quigode. Que gusu uje chajire yocadode aja quigode, mu chopo dajuñame yoque to rĩ. Gaidi tu gu ujetiga yiyágo yocate gajnaréngone enga yangácopoi rĩ. Enga jé ca erámi unirisórone gajnéone Dupade ujuyaquéo chise yoque to jne iji erámi tuné eruei. 33 Yujode Jesus anguresóño uaque a, uje uacamátayo uágaja ñane ujetiga acho uacabosode, enga jé ca oyo uaquedojnaringuéo ome chagúi. Mu agúsoji jnese enga jogadi tu ujetiga quene acho uacabosode. 34 Ujetiga chaguhei chejna gosi, jé areque ujetiga tagu dabosode iji daguíjnai bajaque. Chamáñaje Dupade ujuyaquei déji gu ome ore uje ore jnári cuchade ome raque iji uacáguedie uje uacacho iji ñane gari. Yacajnaquéode uñane qué déji ome uaque, mu a yacate uágome udore jne ujetiga yĩri iji uaque.
1 Dupade Ujopie Espíritu Sánto chajuguína Dupade irajatigade iji Dupade anguresõre chojmara, chojmarane ore jnese. Jecute yijorane uaque a, ipota ujetiga arajáyo cuchade unojo to. 2 Uacarajáyo uje cáma Dupade anguresõre uaque ica enga uacangurenone u uacacatecãrainone ayoré gajnúo ica. Que udore ore narare go, mu jé uacanguretáyo ore. Enga cho ujetiga ayoré gajnúone udore iroque uaque uje ore jno uacádi aja cucha quedéjnane. 3 Yipotigádi tu ome uaque ujetiga arajáyo unojo to: ujetiga gosi urúrigo gajnarécho aja yocangaráni Jesus enga chojninga: “Jé tiógara ujetiga purugáite Jesus” enga obiréjna uje uté gosi uruode que garani tu Dupade Ujopie Espíritu Sánto go, mu garani tu Satanas. Jé basa ga que toque go ujetiga gosi chicota Jesus enga chojninga: “Pangarádejna cuchábi u Jesus” ujetiga Dupade Ujopie Espíritu Sánto ca déji gosi. 4 Que yoco ñane ome yoquirajatigade go. Jé yoquirajatigade cãra re ome ñane. Mu yoquirajatigade unojo guẽrasṍri chojmára. Enga Dupade Ujopie Espíritu Sánto u uje chisi ome yoquirajatigade udore ome yoque. 5 Yoquipesudode chayu ñane yúode iji Dupade adode. Mu yoquirósõri jé chojmára. Enga Yocangarádejnai u uté. 6 Pisocade jé cãra re ome ñane to rĩ. Mu chojmára Dupade enga Dupade uté u uje acadique danguresórone uyoque ome pisocade udore jnese ujetiga yipéco. 7 Dupade chisi ome pirajatigade ome danguresõre chojmara, chojmarane. Gaidi u gu ujetiga ca potigayaquérique déji udore ore uje Dupade Ujopie Espíritu Sánto dépisiji ore ajei. Gaidi upo rĩ ujetiga anguresórone ore chagutíñame ñane jnese ome darajatigade. 8 Dupade chutṍri dajopie tome yocuñane ujetiga yirajágo payuquetotiguédatéode ujetiga yacáco ñane ome. Enga Dupade chutõrápoi dajopie tome yocuñane rĩ ujetiga irajatáquedatéi yoque enga yacáco ñane ome yoquirajatígadatéode udore to. 9 Jé basa ga chisi ome panguretigai tome yocuñane ujetiga yanguretágo Dupade gaté. Jeque chisiapome dajopie ome yocuñane rĩ ujetiga yiquetágo ejnaretade ore. Mu cuchade udore guẽrasṍri chojmára to enga Dupade Ujopie Espíritu Sánto jé u. 10 Yocuñane gajnei tu ujetiga yipéco yoquipesute cucha pitijabáicho. Jeque yocuñane gajneque ujetiga yacáco yocujode ayoréo ome Dupade uruode. Jeque yocuñane gajnéngapo rĩ ujetiga chiraja Satanas ujopie iji Dupade Ujopie Espíritu Sánto ujade. Jeque yocuñane gajneque ujetiga yirajágo dara quedéjnane. Mu yocuñane gajnéngapo rĩ ujetiga yatatago dara quedéjnane quigode ome ñane. 11 Mu Dupade Ujopie Espíritu Sánto upúsu uje pésu dáyipiedie ome yoque jnese, enga chajuguína pirajatigade udore iji yoque jnese. 12 Crísto chacãra danguresórone uyoque aja dabai. Irajágo uje ayorérique chojmára marínga, uté adode uásejna. Jé cho Crísto anguresórone uyoque. Uásejna yoque mu jé yitojmárango iji yocanguretigai ome Crísto, enga yocajnui u ayoré chojmarai iji jnumi. 13 Enga Dupade Ujopie Espíritu Sánto chojmára uje chacája Dupade anguresórone uyoque yocajéode jnese ujetiga Jesucrísto uyoque itojmárango iji jnumi. Jeoga judío yoque, jeoga purása quedéjna yoque, jeoga ayoré ataque yoque, jeoga ayoré gajnareque yoque, mu jé yitojmárango iji jnumi jnese uje pacaque yoquedodie iji yodi gu yocanguretigai ome Jesucrísto. Enga Dupade Ujopie uaté chĩreta uyoque jnese. 14 Ayorei chojmára mu que chojmára atígo go, mu jiei adode. 15 Ujetiga pirídarique chojningárasa: “Que pijmanai yu go, jecute a ca yácariji yijogadi iji ayoré tuné jne.” Uruode a urásu udore mu que toc ujetiga cho jmíti, jmíti ome dajogadi tuté ayoré. 16 Jé basa ujetiga pangoronéraque chojningárasa: “Que pedo yu go, jecute a ca yácariji yijogadi iji ayoré tuné jne.” Uruode a urásu udore mu que toc ujetiga cho jmíti, jmíti ome dajogadi tuté ayoré. 17 ¿Ja jé chududirase darárigo a ujetiga pedórase ayoré gosi jnese? Ungare. Mu jé chopo rĩ ujetiga pangoronérase ayoré gosi uté jnese, ¿ja jé chojárirase cuchárique a? Ungare. Que chojare cuchárique to go. Jecute arei tu ujetiga yoquibai adode chayu ñane yúode iji jnumi. 18 Mu yirajágo uje Dupade ichajapite yocadode aja jogadode nanique ga gaidode jé u dajéode ome. 19 ¿Ja ca gajnarenguipisirase a ujetiga yoquibai atique chojmára enga gusu? A atique chojmararase ga e que cuchárique tṍraji. 20 Mu Dupade ipesucho pibai adode uje uásejna péode. Mu péode udore ore cháta rágaja ñane enga e ayoré chojmára iji jnumi. 21 Jecute gajnareque ujetiga pedóraque chorase cucha bisidéguiji pijmanárique. Enga jé chopo patode to rĩ. Gajnareque ujetiga chojningame pirídade: “Cucha bisidécho uaque ome yu.” 22 Cho jetiga cucha bisidécho pibai ate ajámone. Mu sudore uñane uringane pagutiñamácho suépise ate querúode gáyode iji pibai tuté údode. 23 Que cuchárique tṍraji yocadode uñane iji yocúdode ome yocajéode. Mu udore ore upúsu uje yujucópise udore guio. Jé cho yocadode uñane rĩ. Que ore ueratigárique cuse go ujetiga pimo ome uñeque, mu udore ore u to uje yujucópise ore guio enga yacógo boráidie ore gáyode. 24 Jeque que yacógo yoquibai peque uñane gáyode to. Mu obiréjna ore ome erámi uje yoco ueracho iji ore gu. Dupade jé isocai uté to ome Crísto anguresórone uyoque to uje Crísto cho dabai iji yoque to. Ujetiga ayoré gajnareque yoque uñane mu Dupade susipise yoquio to ujetiga ingoningájnai pijóguiji yoque to. 25 Yirajágo uje dacadode iji pibai jnese que ore isocai u gotique ujetiga ore cãra dadode ome ñane. Mu dacate chojmara, chojmarane iji pibai ore chagutíñame ñane jnese iji pibai. 26 Ujetiga gosi údode atique uñeque doso enga uté údode jnese chejnáreque re to. Enga jé cho ujetiga picotaque pibai tuté atique uñeque enga uté gosi adode jnese chirase re jnese to. 27 Jecute Jesucrísto anguresórone uyoque itojmárango to. Enga oco pibai adode uje uásejna marínga, ore cháta rágaja ñane iji pibai chojmarai. 28 Jecute Dupade ichapite danguresórone ore aja ore isagode jogadode. Mu cuchiyíode u Jesus iroguipísode. Jé aja udore ore uje ore chatata dajnéone Dupade urúo ome raque. Jé aja Dupade anguresórone ore acadisórone to rĩ. Jé aja cucha pitijabáidode ipesungórone. Jé aja ejnaretade iquetangórone ore. Jé aja udore ore to uje ore chátaja dojode ayoréo to. Jé aja Dupade anguresórone ore angaránone to. Jé aja dara quedéjnane irajasórone to rĩ. 29 Uacarajáyo uje que Jesus iroguipísi u uyoque jnese ome daroquéode. Uacarajayopo rĩ uje que Dupade uruode atatasõre uyoque jnese go. Enga que pacadisṍrapo yoque jnese rĩ. Enga que yipécopo cucha pitijabáidode jnese to rĩ. 30 Que yocujopiéraque cuse jnese go ujetiga yiquetágo ejnaretade ore. Enga que yirajagopo dara quedéjnane jnese rĩ. Que yirajagopo jnese to rĩ ujetiga yatatago dara guichayade ojningane cucha ome yoquijorane ore. Mu pirajatigade déji yoque jnese, mu ore chayu ñane yui ome ñane. 31 Beyoi enga acueyoi Dupade gueranone pirajatiga ueradipísode ome uaque. Mu a qué yope quique cucha uñai ome uaque jne ujetiga sué pirajatigade udore gáyode jnese. Enga yojningai tuté u pijnoraquei.
1 A irajataguipisirase yu enga a yirajárase dara guichayade jnese. Datéringa ujetiga yirajapórase gaté unirisórone ore uruode rĩ. Mu cucha dacatique a ca tṍrarásiji yirajatigade udore ujetiga jé ca pijnoraquei déji yu. Enga a yiji enga yagúrasome yirajade dara guichaya udore, mu cachi yichora bisidécho. Chamáñaje pijnoraquei íjnonguiji yu gu. 2 A yacadirase ore ome yajnéone Dupade urúpiso, enga a yirajapórase cucha pipoguiédode jnese rĩ ome cutejmai yirajatígadatéi. Enga ome yanguretígadatéi a yiji enga yicatecãrirási Dupade ujetiga chécãre cucaranone jogadode, enga Dupade a dorási yuruode. Mu ujetiga pijnoraquei ca déji yu, enga cucha bisideque yadode udore jnese. 3 A yajuguínaporása yugúcharigo jnese rĩ ome ayoré jmatágode ore. Jeoga yopo yiba yatatagode Dupade urúo rĩ, enga ore chiboro ome yu rĩ, mu ujetiga pijnoraquei íjnonguiji yu enga cucha bisideque yadode udore to. 4 Pijnoraquei adode chósi te: ujetiga gosi chijnóra dojórique ayoré enga a ca uté gosi narañime dãjorai atique jne. Enga a caniraque uté gosi ome dajorane jne. A ca charatáyime cuchárique ome dãjorárique jne rĩ. A ca josipierángapo ome dãjorárique ayoré jne rĩ, enga ca cho ayoredatei iji re rĩ. 5 A ca táyipiegapo jne rĩ ome dãjoráringo ore. Enga a ca dicotárepo jne rĩ. Enga a ca jĩraque ajningaraque uté gosi jne rĩ ome dojode ayoréo. Ujetiga ujórique ayoré atique gajnaréngaja mu a ca jnusina gatuaque jne gotique. 6 Uté gosi a ca irasique re jne ome dãjorárique ipesutígo cucha gajnarécho. Mu irasitigai jogadi upúsu ujetiga chimo dãjorárique ga ũrepise ome atígo. 7 Ujetiga pijnoraquei déji uté gosi enga chidota re ome cuchade jnese, enga anguretigai que doi jnumi ome Dupade. Enga que cho dedojnaringuéo ome cuchade jnese rĩ. 8 Irajágo to uje a yico Dupade idai jne enga a ca yajópome pirajatigade udore jne rĩ. Uje a ca pacadigápo ore ome Dupade uruode iji guéode uéchai jne rĩ. Enga a ca yocajegaidápo puru guichayade rĩ ujetiga yirajágo udore to rĩ iji Dupade idai. Gusu pijnoraquei jne uje a ca eruénique cusipise go iji deréjnane jnese. 9 Que uñeque déji erámone unojo gotique ujetiga chiraja cucha ponáyone aja quigode jnese. Gusu uje irajágo cuchade péode iji udore, udore. Jé chopo Dupade uruode atatasórone ore rĩ. Que uñeque iji ore chijóchapise Dupade uruode gai jnese, mu ore chiraja ducadode iji udore, udore. 10 Mu ujetiga yico Dupade idai enga a yirajágo cucha ponáyone jnese jne. Enga a e ca yocáyipieraque dépoji yoquirajatiga garósiode iji erámone unojo jne rĩ. 11 Uje disape yu nanique enga yuruode u yujode disabío uruode. Yáyipiedie jé upo yujode disío ore áyipiedie rĩ. Mu uje e jnani yu, enga iya disiode ore isocade. 12 Que toc ujetiga yirajágo cuchárigo aja quitígo jnese iji erámi tuné. Mu udore gajnui u ajicaranone uje querénga pijoque gosi tiji. Uje que pijoque cuchade jnese iji erámone unojo to. Mu iji guéode enga a yirajágo cucha ponáyone jnese to jne, uje a cuchade choqui iji guesode ome yoque jne iji uté. Mu querénga yiraja cucha uñane iji erámone unojo. Mu ujetiga e yise guéode to jne enga jogadi tu ujetiga ca yeruojmárique cucha cuse. Dupade chirajápise yadode jnese, enga a jé yo uté to jne ujetiga yise gaté. 13 Panguretigai ome Dupade, jé aja panguretigai ome Dupade ojningane cucha yúode, jé aja pijnoraquei ome Dupade, yocujode ayoréo ore, cuchade udore jnese que eruénique cuse iji deréjnane. Mu pijnoraquei tupúsu uje suépise cuchade udore gáyode.
1 Jecute acueyopísi uacasocáringome ñane ujetiga ajnóraño ñane gaté. Mu acueyopoi rĩ Dupade Ujopie Espíritu Sánto gueranone pirajatíga ome uaque. Cuchiyi tupúsu pirajatigai ujetiga acácho ñane ome Dupade uruode. 2 Uacuñane uje uacarajáyo dara guichayade uacacatecãráite ugurúi u Dupade ome dara guichayade udore. Mu uacojode Dupade anguresóño que erã́tique ore chiraja uacarúrique. Dara guichayade udore jé garani tu Dupade Ujopie Espíritu Sánto to, mu cho ujetiga pipoguiedei parecujáidie udire. 3 Jé basa ga yagutíñangome yocacadisórone acaditigade ome Dupade uruode. Enga udore ore acaditigade ijnimique yógome panguretigai ome Dupade ujetiga yiquérango to iji adode. Ujetiga yoco yocáyugu yoque enga udúco udore ore acaditigade enga jĩraque yiyágo yocujnusiétigade. Jé chopo rĩ ujetiga yocanguretigai chicáji jnumi mu uje yangácoi ore acaditigade enga yocanguretigai jĩraque chicapoi gaté yui rĩ. 4 Irajágo uje dara guichayade irajasórone ore catecã́ri Dupade ome darajade dara guichaya enga jĩraque ore quérã to iji Dupade adode. Mu gusu ore. Jé basa ga Dupade uruode atatasórone uje ore chacate ore ome Dupade uruode, que gusu acadisórone ore uje ore quérã iji Dupade adode, mu ududisórone ore quérã to. 5 Yajéode u ujetiga arajayórase dara guichayade jnese to. Mu yajegaidi tupúsu ome uaque ujetiga arajáyo Dupade uruode quigode enga atatáyome ñane. Uje gosi chacate ore ome Dupade uruode enga sué dara guichayade irajasórone gáyode. Jé basa ga ujetiga dara guichayade irajasónique doi enga chatata daru quigode ome yoque enga quene jogadi u ujetiga yagutíñangome to. 6 Jecute a yisírase uaque enga a yacadírase uágome yirajade dara guichaya, mu a ca cuchárique tṍrarásiji yacajnaquéode udore ome uaque. Chamáñaje que arajáyo quitique gu. Mu ujetiga yatatatígo urásu Dupade ingómeone cucha ome yu, jeoga yirajatique cucha, jeoga yo quique Dupade uruode uñéngo enga yacaditigade unojo urásu ujetiga chatapísarásaja uaque jõ. Chamáñaje uacaruode u gu, enga jĩraque uacarajáyo quigode. 7 Yirajágo uje que cucha pijocayade ucuecaringuérique cuse, mu a jé yacãra yacajnaquéode aja udore jne. Ujetiga gosi chijna purusarane ome uje chijocase dajocayatique, jeoga dabuchutique, mu uté jorane jĩraque ore chiraja iradedie achachagúgode, júdode to rĩ. Mu ujetiga gosi chapúsaja uje chijocase enga que diquirajaque iradéraque, achachagútique ome. 8 Isocai jé u to soldádode uje ore déji pocaningárique gai. Ujetiga ubuchui ubuchungóri chapúsaja uje chubúchu dabuchui enga a ca soldádode ore timíningarása go. Mu ujetiga ubuchungóri pesupúsu aja quigode enga jĩraque soldádode chiraja uje ũré ome dabuchui uté enga jĩraque dimane ore ome damajosóningo yui. 9 Cuchade unojo cachi peróji uaque to. Uje uacachome dara guichayade uje uacacácho uacojode Dupade anguresóño enga jé ore tangári jorógui uacacajnaquéode. Que erã́tique ore chiraja darasitígarique iji uacacajnaquéode udore. Cho jeta uacacadi tu guesáringarique bisideque. 10 Irajágo uje dara guichayade déji erámone jnese, enga jecucha ga dara guichayade irajasórone cuse to. 11 Mu ujetiga uñeque catecã́ri yu ome darúrigo uje que yiraja, enga e yirajágo uje purása quedéjna yógome ñane. 12 Yiraja uje uneripise yui ome uaque ujetiga Dupade Ujopie Espíritu Sánto gueranone pirajatíga chise uaque to. Jecute beyoi enga acueyoi pirajatigade udore uje pésu uacojode Dupade anguresóño iquéraningane ome Dupade uruode to. 13 Mu ujetiga Dupade jé guẽrate dara guichayade ome uacuñeque, arei tu ujetiga uté gosi catecã́ri Dupade ujetiga Dupade chingopísa darade udore quigode ome. Quigade ga uté doi enga chingome dara guichayade quigode ome dojode Dupade anguresóño to. 14 Adi tu ujetiga yicatecãrirási Dupade ome yajnei dara guichaya uje Dupade Ujopie chisi ome yu, mu cho ujetiga yáyipie u uje catecã́ri Dupade, mu que yiraja yáyipie catecãraitigade udore quitígo iji yuringai tuné ayoré. 15 ¿Jé yo ringome yu jne a? A ca yedu dara guichayade uje yicatecã́ri Dupade, mu a yicatecã́ri to jne ome yurúpisode. A ca yeduapo dara guichayade jne rĩ ome yiradedie, mu a yirate Dupade iradedie to jne ome yurúpisode. 16 Jecute ujetiga acãre Dupade gai uje bacatecã́ri, mu bangúromei u barajade dara guichaya, a ca togome bojórique ayoré jne ujetiga chiraja baruode udore uje agupurai ome gu. Enga a ca togome jne rĩ ujetiga cháta raja bacotaquéode udore to ome Dupade. Uje que chiraja bacatecãraitigade quigode gu. 17 Ujetiga bacatecãraitigárigo uneréjna ome Dupade mu, ujetiga angúrome barajade dara guichaya enga que cucha dacatique tṍraji udore ome bojórigo Dupade anguresóño. 18 Yacãre Dupade gai uje yujnué uacabai ome yirajade dara guichaya. 19 Mu ujetiga yujode Dupade anguresóño yamátago yógaja ñane ome Dupade uruode enga que yajéo ujetiga yagúrome yirajade dara guichaya. A catadé joroguirase yacajnaquérigo ome yurúpisode marínga, cucha pagutíñamacho yacajnaquéode udore ome yujode Dupade anguresóño. Jé basa ga a yacadirase ore ome yacajnaqué umaníngo iji yirajade dara guichaya, mu a ca pagutiñamaniráso yacajnaquéode udore ome ore, uje que diquirajácho quigode gu. 20 Yijorane a, yajéode u ome uaque ujetiga oyósi disi parátagabode ore uje que ore chiraja pisijnaringuéone unétique. Mu oyópo jnanione ore rĩ ome ore ayuquetotiguedatéode. 21 Ore urusarane Dupade urúo déji uje chojninga: “Yocangarádejnai chojninga: a yangúromeone u dara guichayade, jé aja purása quedéjnane pijnanone jne ujetiga yicatecã́ri yurásade ore. Mu a ca ore timíninga yuruode gotique jne.” 22 Dupade guẽrate pirajatigade ome dara guichayade gu ujetiga uruode otigayasórone chudute dajnéone pimongaquéo ome raque. Jé basa Dupade guẽrate pirajatigai ome daruode atatasórone ujetiga ore ujode Dupade anguresóño chiraja Dupade isocade to jne ome raque. 23 Ujetiga Dupade anguresórone uaque uacamátayo ñane ome Dupade uruode enga ajuso uacaruode guio. Chamáñaje ujetiga Dupade anguresõrejmárique, jeoga Dupade anguresónique uje cáma chirajápise Dupade uruode chacája uaque mu chudute uacachorade uje uacacatecãchoi ñane ome dara guichayade jnese, jé socaseti chajuque uté aguté enga cho ũrusode iji uaque jne. 24 Jé basa ga Dupade anguresõrejmai tuté chacárasaja uacágueraque to uje uacagaidode u uacarúpisode ome uacacaditigade, enga uté a tangári uacacajnaquéode quigode. Enga diga chiraja daringai sijnaque to. Enga pésu dáyipiedie ome re. 25 Uje e chiraja daringai sijnanguipise enga cha pogu dasijnaringuéone iji dajei. Mu a dorási enga chichaga dagatáidie aja jnumi iji Dupade iquei enga a catecãrirási Dupade ome re. Enga a chojningárasa: “Obiréjnapis ome yu uje Dupade déji uacari iji ne.” 26 Jecute yijorane uaque a, agutíñañome ñane iji uacáguedie. Uacuñane a ore chijñecare jne, jeque uñane a ore chacate uaque jne, jeque uñane a ore chatata Dupade ingómeone cucha ome raque ome uaque jne. Jeque uñane a ore catecã́ri uaque ome dajnéone dara guichaya jne. Jeque uñane a ore chatata dara guichayade udore quigode jne ome uaque. Cucha omi tu ujetiga uacapesudode udore agutíñañome jnese jne, enga pésu uacaquéraningane jnese ome Dupade adode. 27 Ujetiga dara guichayade irajasórone déji uacajade enga ore pota catecã́ri uágome darajade udore enga jé areque ujetiga gare ore, jeoga gadioque ore ome, enga gusu. Mu arei tupo rĩ ujetiga uñeque doi enga chatata udore ore uruode quigode ome uaque ujetiga arajáyo quigode jnese. 28 Mu ujetiga jé ca uñeque déji ujetiga chatata ore uruode quigode ome uaque, enga areque ujetiga ca ore tagúrome dara guichayade udore iji uacague uaté. Jé basa ujetiga gusu ore, enga ueradi tu ujetiga ore tagúrome dara guichayade udore ujetiga ore catecã́ri Dupade. 29 Adi jé u to ujetiga uacacadisórone ome Dupade uruode gare, jeoga gadioque ore to. Pigaidi tu gu ujetiga ore ujode Dupade anguresóño tangaripísi ore acaditigade iji Dupade uruode, enga ore pésu dajéode ome ore acajnaquéode quigode. 30 Ujetiga gosi déji dacajnaquéode gai mu Dupade chingo daruode quitique aja udore uñeque enga arei tu ujetiga bajai tuté chope paraque uje jõrai qué chingo dajnéone Dupade urúo ome ore. 31 Jecute arei tu ome uaque ujetiga chojmara, chojmarane iji uaque atatayo uacajnéone Dupade urúo to ome ñane iji uacáguedie. Mu arocho ñane ujetiga uté cha dara enga quene jogadi u ujetiga gosi chatata darajatígo to iji Dupade adode iji uacáguedie. Chamáñaje jogadi u uté gu ujetiga arajáyo Dupade uruode udore to enga ajnusoi uágome Dupade adode gaté to. 32 Ujetiga gosi chingo dajnéone Dupade urúo aja uaque, mu omi tu ome uté gosi ujetiga susipise dadode guio. 33 Chamáñaje Dupade que ajéode u go ujetiga yapúcoja te bisideque mu ipotigádi u ujetiga cuchade pijoque quitígo iji yocuáguedie. A jé yingo Dupade anguresórone uñane isoca omone ome uaque jne. Yigaidi tu gu ujetiga beyoi ore isocade udore to. 34 Chequedíe ore gajnei tu ujetiga ore cho paráguiji uacáguedie uje uacagúsoi ñane gari ome Dupade uruode. Que pujuregate gu ome ore ujetiga ore narare. Uacamóño to uje ore urusarane Dupade urúo déji uje cho quique cuchade udore to. Enga quigode u ujetiga ca chequéraque doi ga ca basaja jnanírique iquénique. 35 Jé socaseti cáma chequé uaté chiraja pacajnaquérique quitique, mu arei tu ujetiga doi enga catecã́ri dabai ome udore quitígo ujetiga e ore déji daguíjnane. Uje gajnareque ujetiga chequéraque tṍraji dajñarenie ome darade uje pacadique yógome Dupade uruode iji yocuáguedie. 36 Ajnusináño uje Dupade uruode que garani u Corínto gosode uaque gotique nanique. Enga que gusuapo Corínto gosode uaque to rĩ uje uacamesecho Dupade uruode to nanique. Jecute angáchoi uacojode Dupade anguresõre yocuñane to. 37 Ujetiga uñeque iji uaque chiraja daringai Dupade uruode atatasõre, jeoga chiraja uje Dupade Ujopie Espíritu Sánto guẽrate pirajatigade ome, a uté gosi urásu ujetiga chiraja to uje yacajnaquéode unojo garani upúsu Yocangarádejnai uje e yurúsarome uaque. 38 Mu ujetiga uté gosi chotigase yacajnaquéode unojo enga taque ome daringai Dupade uruode atatasõre. Jecute ca angáchoi uté gosi to. 39 Jecute arei tu ome yijorane uaque ujetiga ójiyo iji gaté ome Dupade uruode uringane patatacho ome ñane. Mu ca etácho ome ore ujetiga uñéngo pota catecã́ri uágome dara guichayade to. 40 Gusu ujetiga arocho ñane enga ca oyo uaquedojnaringuéo ome uacacaditigárigo. Enga jogadi u uté ujetiga ca uacáguedie iyoguérique cuse enga pajmaranei.
1 Yujode Dupade anguresóño uaque a, yajéode u ujetiga ajnusináño pacajnaqué piquetangórone uje yacate uágome ica. Uje uacamesecho yacajnaquéode udore to ica, enga uacadotáyo uáguiji. 2 Uacarajáyo uje uacaringane piquetácho garani u yacajnaquéode udore ome uaque. Jé basa ujetiga uacanguretáyo cucha uñéngo enga a ca cuchárique tṍraji uacanguretigade udore gotique jne. 3 Yingo yajnéone pacajnaqué ueradéjnapis ome uaque ica. Enga chopise ore urusarane Dupade urúo quigode to. Enga Mu uje Crísto toi ome yoquisijnaringuéone. 4 Quigade enga ore chijochame Crísto mu guejnane dire gadióguiji dode enga ecápo rĩ. Enga ore urusarane Dupade urúo chatata udore quigode to. 5 Unojo quigade u uje chiqueta raja daroi Pédro, enga chiqueta raja darógode uñane to rĩ. 6 Chiquetápo raja danguresõre dipeséode ore to rĩ uje ore guejnanie u 500. Udore uñane qué ore eca, mu uñane e ore toi. 7 Quigade enga chingopo raja Jacóbo rĩ, mu unojo quigade enga chingopo raja daroguipísode uñane jnese rĩ. 8 Mu ejo yu uje chingo raja yu to nanique. Jecute yajnui tu disi pati iji daté ajei uje que base míraque. Uje ejopise yu ome Jesus irógode uñane ore ome yuringai Jesus iroque to. 9 Mu que yipijoque iji yujode Jesus irócho ore ujade. Enga que yudujnui gai to ujetiga ore cho Jesus iroguipis iji yu to. Chamáñaje o yumajo uté anguresórone nanique gu. 10 Mu ibasaja yuringai Jesus iroque ome Dupade ate goningane ome yu nanique. Enga que yachia Dupade ate goningane udore ome yu. Uje ise yuringai isagócadaté ome Dupade iroquéode. Enga ujnué yujode Jesus irócho gáyode ome yisacuatigade. Mu cachi Dupade angúromei u yu ome daroquéode, jecute que tiógara ujetiga yisi yibánique. 11 Jé cho ñane ujetiga yacaditigade u, jeoga yujode Jesus irócho ore acaditigade u. Uje yocacajnaquéode quigode jé chopise ñane iji jnumi jnese. Enga udore u uje uacanguretáyo to nanique. 12 Uacarajáyo uje yocacajnaquéode udore júdi u uje Crísto toi mu ecápo rĩ iji daringai toque quigade. Jecute gotique gu a uje uacuñane chojninga: “Toque totique enga que qué piringarangápo aja gaténique rĩ.” 13 Ujetiga jec ũré uacaruode uje uacojnicho: “Togode que niji iji pitoringai go,” enga a ca Crísto niji to nanique iji pitoringai. 14 Mu ujetiga Crísto jé qué déji dode enga a cachi yocacajnaquéo ome uaque jõ. Enga a ca cucha dacatique tṍraji yocacajnaquéode udore ome uaque jõ. Enga uacanguretigai ome Crísto a cucha bisideque to jõ. 15 Ujetiga jé ũré uaque enga a taque yoque jõ ome yocatatagode udore uje yojníjo: “Dupade chiringare Crísto iji pitoringai.” Ujetiga jec ũré enga togode que ore niji iji daringane toque quigade enga jé basa que ũrépo to rĩ uje Dupade chiringare Crísto iji pitoringai. 16 Ujetiga jec ũré ujetiga togode ca ore nijiápo rĩ enga a adi jé u Crísto to, a ca nijiápo to rĩ iji dode jõ. 17 Jecute uacanguretigai ome Crísto a cucha bisideque ujetiga jé ũré enga ca uacangureni tuté niji iji pitoringai nanique rĩ. Enga a ca pĩrocho uacasijnaringuéringo gotique to jõ. 18 Enga jé cho yocujode Dupade anguresóño togode, a cucha bisideque to jõ ore anguretigai ome Crísto iji daringane ueca nanique. Enga a e bijnaque udore ore ome Dupade to jnese. 19 Ujetiga Crísto ojningane cucha gusu ome yocucuecaringuei tuté enga cucha bisideque yocanguretigai. Enga jé tiógarapísa ujetiga erámi unirisórone chosõre yoque. 20 Mu ũrei tu uje Crísto nijiápo rĩ iji datoringai quigade nanique. Enga uté cho bajaguhei ome pirijíningai. Mu quigade ga uté anguresõre uásejnane a ore niji to jne rĩ iji pitoringai. 21 Irajágo uje pitoringai chise yoque jnese gu jnani chojmarai isijnaringuéone nanique. Enga irajagopo rĩ uje pirijíningai chisápo yoque gu jnani chojmarai agotedatei to rĩ. 22 Jecute yitogoi jnese gu uje yocarãpi u Adan. Jé basa yiquecagopo jnese to rĩ uje yocajnengóri u Crísto. 23 Mu a ca yijnátugo yocuringane nirijío jne. Uje Jesucrísto gajnei tu ujetiga niji bajaque. Quigade ga ujetiga uté diapo jne rĩ enga jogadi a jé u jne ujetiga chiringare danguresórone uyoque jnese to. 24 Enga jogadi u jne ujetiga cucha ponáyone chaquesu re jnac. Enga Crísto a chinoningase eduguéjnane jnese uringane eduguéjna. Enga a chinoningasapo pujopiedie uringanie pujopierãi jne rĩ, jé aja Satanas utocaidode uje ore jogadi u gaté yui ore uringane Satanas utocacho. Enga jé u ujetiga Crísto chisi ome erámi ome yocai Dupade ujetiga e ore eduguéjna cuchábi tu iji jnumi. 25 Uje Crísto e gajneque erámone ujetiga chijocase, enga a jé chuságaja jne ujetiga dayé Dupade sué uté umajosórone gáyode jnese. 26 Mu Dupade umajosõre erueminoripísi a u pitoringai jne ujetiga suépo gai rĩ. 27 Dupade uruode chacate yoque uje Dupade pésu Crísto uringai pujnuéngaisõre ome cucha ponáyone jnese. Mu uruode que qui tu go jetiga Crísto sué dayé Dupade gai to. Chamáñaje Dupade uté u gu uje ipesute dajnacari uringai pujnuéngaisõre. 28 Ujetiga Dupade e chimate cuchade jnese aja Crísto jmáinie enga jogadi u jne ujetiga Dupade ujnacari Crísto doi to jne enga chisi ome re ome dayé Dupade to. Chamáñaje dayé Dupade guẽrate cucha ponáyone jnese nanique gu ome. Enga jec u jne ujetiga pujnuéngaisṍredatéi tu Dupade ome cucha ponáyone jnese. 29 Uacuñane chojninga: “Que ayoré totique niji iji daringai toque.” Mu ¿jé gotique gu a uje uacacáyo ñane edodie iji yodi ome uacãjora totígo? Uje chiese uacapéso udore gu ujetiga piquetaque uacãjora totígo udore to. Ujetiga togode jé ũré enga ca ore niji iji datoringai ¿jé gotique gu a uje uacacáyo ñane edodie iji yodi ome ore? 30 Ujetiga taque yógome yocacajnaquéode ¿enga jé gotique gu a uje yoco yoquiba yocatatagode udore iji deréjnane jnese? 31 Ugúsiji pijmongaquéode jmáinie iji dirode jnese. Que yimo dínique ujetiga e chuque yu. Mu que cucha yuringai pumajo go. Uje yininaquei ome uaque suépise cuchade unojo gai jnese gu uje e uacanguretáyo Crísto to ome yatatagode Dupade urúo. 32 Yumajosórone iji Éfeso ore gajnúone u carataque surungúone. Uje ore chetaguipise yacajnaquéode. Enga cho ujetiga yipésõra udore ore. Jé po ga cucha bisideque cuchade udore jnese ujetiga taque yógome pirijíningárique rĩ. Enga uréone a u udore ore uje ore chojninga: “Yicoi enga yinínango yóguiji erámi tuné. Yajo yoquibose unérone, enga yójigo yoquijote unérone rĩ. Chamáñaje a yitogoi dirome jne enga yoqueruei e u.” 33 Jé ca amingara ua ome cucha gajnaréngone ipesungórone. Ajnusináño pacajnaqué diyajma casodicáite uje chojninga: “Ujetiga gajnareque bãjorárique atígo, enga bajína uté enga jogadi tu uje barate uté aja ate gajnaréngone enga a e ca esápo cucha arégode unétique jne rĩ.” 34 Jecute ajníño Dupade gai enga beyópoi uacate arégode rĩ. Enga ajusopo uacajéode guio rĩ. Enga ca apéso pisijnaringuéone. Uje uacuñane que ore chiraja Dupade gotique. Yósi tome uaque gu ujetiga ajéchome uaque. 35 Mu ísenga uacuñane pota ujetiga qué yo quique cuchade udore ome uaque. Enga uacojnicho: “¿Jé pisocáringome pirijíningai tuté gotique jne a? ¿Ja yoquibai jé upúsu yoquibai ayorei tuté jne a, jeoga unejaque?” 36 ¿Ja ca arajáyo a? uje cuchade unojo dóji guesáringane ãrie. Cho cucha ajñu pacadie. Uje paca cucha ajñua tuaté enga cho ujetiga togué iji jnumi uje pijóchõre. Mu pigaidi tu gu ujetiga ujniéraque cuse enga sué. 37 Yirajágo uje que gosi doi enga chaca cucha ujniéraque. Mu gosi acai tu cucha ajñua; jeoga trígo u, jeoga cucha ajñu uña. 38 Ujetiga e paca cucha ajñúraque ga Dupade u uje pésu rĩ enga quérã. Enga Dupade que chécãre atique aja guesi. Jecute ujetiga pacaque guejnárique ga sué ga jé guejna. Enga jé isocai tu uné ome cucha ajñunie jnese. 39 Irajagopo rĩ uje ayoréode uyoque, jé aja cuchisode, chugúperone, oyídode, jé aja cucha uñane to rĩ, ingarángo yocaode ome ñane. Enga que yoco ñane gotique iji jnumi. 40 Irajágo to uje gaté unirisórone ore adode, jé aja ore enócha goningájnai cãra re ome erámi unirisórone ore adode, ore enócha goningane rĩ. 41 Jé cho guedé idirecaringuei to rĩ, uje unejaque ome guedoside idirecaringuei. Enga unejangapo guédodie idirecaringuéone rĩ. Irajagopo rĩ uje guédodie ore idirecaringuéone cãra re ome ñane idirecaringuéone to. 42 Isocai jé u ome ayoré togode ore to rĩ. Ujeta ore chise daringane nirijío enga a unejanguipise ore ao ichade ome ore ao bajade uje e pijóchõre ore ao bajai tuté nanique. Chamáñaje ore ao bajai tarata aja jnumi uté gu. Jé basa ore ao ichai a ca topoi to jne rĩ iji deréjnane jnese. 43 Pequeteque ayoréode ore aoi uje ore toi. Jecute yijochagome ore aoi tuté. Jé basa ujetiga ore nijiápo rĩ enga a ca ore chajire re jne ome dangoningárique. Uje gosi toi enga bijnápise uté etotiguei ome re. Jé basa ujetiga uté e nijiápo jne rĩ enga a ca chajire re jne ome daringárique etoguipise. 44 Irajágo uje pijóchõre yocao ayorei. Mu ujeta e yirijíngoji pitoringai enga jogadi tu jne ujetiga yocao gateminónique cusapo rĩ. Que potigayaquérique déji uje pao ayoréode cuse. Enga que potigayaquérique dépoji rĩ uje pao gateminórone cuse to. 45 Ore urusarane Dupade urúo chósi tome yoque: “Uje Dupade tẽrája pucuecaringuei ome jnani bajai Adan nanique enga jé basa Adan chajnerame dajnei tuté pucuecaringué tome yoque ga yiquecágome to.” Jé basa Adan uñai u Crísto to uje tẽra pucuecaringuei ome yoque to, mu pucuecaringué eyúgojma tuté garani tome yoque. Chamáñaje gaté unirisõre uté gu. 46 Mu yirajágo uje yocucuecaringué eyúgojmai tuté quene chise yóguiji yocucuecaringué ayorei quigade. 47 Irajágo uje jnani bajai pipesudíji jnumi enga uniri tu jnumi. Jé basa ga yirajágo uje gateminore jnani ejoi tuté. Enga Yocangarádejnai u uté. 48 Irajagopo uje yocao jnutiminóri chopise jnani bajai uté aoi uje pipesudíji jnumi nanique. Irajagopo to rĩ uje yocao gateminóri a jé chopise Yocangarádejnai ao gateminóri to jne. 49 Yocajnai tu yocarãpi Adan ome ao jnutiminóri iji erámi tuné. Jé basa yocajnai a upo Yocangarádejnai rĩ ome ao gateminóri jne. 50 Yijorane uaque a, yipota ujetiga yo cuchade udore quique ome uaque: uje yocuringai tuné ayoré ajnoquéode cuse, arione cusapo rĩ. Jecute que toc ujetiga unojo chise Dupade idai to jne ujetiga Dupade cho darása iji. Chamáñaje yocuringai tuné ayoré que eyúgojma to gu. Jecute que toc ujetiga cháta raja cucha eyúgojmárique. 51 A qué yingoma cucha datei tome uaque jne uje a cáma arajáyo to jõ, uje a ca Jesus anguresórone uyoque yitogoi jnese go. Mu a Crísto chécãre yoque to jne ujetiga di. 52 A yunínango jne eti cuchade udore tocade ome yoque. Enga a pududique pubuchutique jocarãi ejopísi jne. Enga jec u jne ujetiga togode ore niji enga e que toc ujetiga ore topoi rĩ. Mu uecade uyoque iji deréjnai tuté a jĩraque pecãraque yoque to jne. 53 Yirajágo uje yocao ayorei toi enga que eyúgojma go. Jecute arei tu ujetiga yacágoja yocao gateminónique uje cucha eyúgojmai tu uté. 54 Mu ujetiga e pecãraque yocao ayorei tuné, uje que bisitique pijoque ga toguébeque, enga a yibacója yocao uñai uje que qué toque ujetiga topoi rĩ. Enga jogadi a u uté jne ujetiga Dupade uruode tocade uje chósi te: “Dupade e chinoningasipise pitoringai, enga ujnuéngaipise. 55 Pitoringai a, ¿jé bajopiedaté casicáite déji rique jne a uje bequésãre yógome nanique a? ¿Baringai pujnuéngaisõre jé déji rique to jne a?” 56 Irajágo ujetiga gosi chó Dupade iroqué bajade gai enga jogadi tu uje gajneque pitoringai. Jecute irajágo uje yoquisijnaringuéone u uje ipesute pitoringai uringai pujnuéngaisõre, enga doi enga chequésãre yoque. 57 Mu yicoi enga yacãco Dupade gai ome derani tuté ome yoque uje chimate yógaja yocuringai pujnuéngaisõre to uje yanguretágo gu yocangarádejnai Jesucrísto. 58 Yijnoranguipísode uaque a, yósi tome uaque: apúyoja uacanguretigai iji Jesucrísto jne. Enga ca oyo uacasagode cucha uja ome uté. Mu jé boyo údi enga oyo uacajuñame uágome iroquéode. Uje uacarajáyo gu uje a ca cucha bisidécho uacasagode udore ome Yocangarádejnai jne.
1 Yurusãraque ejode unojo gajnengórone u uaqueranone ome yocujode Jesus anguresóño iji Jerusalen. Enga ujetiga amátayo uaqueranone aja, enga beyoi yacajnaqué cásodica uje ingome Galácia gosode ore ica. 2 Ca amócho domíngone ujánique ujetiga amátayo uaqueranone cucha omío ome Dupade jnese. Enga uaquẽratígo cucha jé chirate uacasagode orérigui to. Enga ajuso uacamátadie plátai guio enga dimane jne iji yiríringárique. Que yipota gu ujetiga oyo uaquedojnaringuéo ome uacamátadie udire ujetiga yugúsiji uacari dirome. 3 Ujetiga yise uaque jne enga a yiroque uacajegaitígo jnanío jne aja Jerusalen ujetiga ore chijnoque uacamátadie plátai aja ore. Enga a ore chijnongapo yurusãratígo ome ore rĩ ujetiga Jerusalen gosode chiraja ore uringáringo yocutocáite. 4 Jé socaseti yijína ore to jne a aja Jerusalen, ujetiga Dupade ajéo ome yu. 5 Ujetiga e yiji jne enga a yicabíji puniri Macedónia jne. Mu quigade ga a yise uáguiji uaquedai Corínto to jne. 6 Ujeta e yise uaque jne enga que yiraja yejnatígo díño iji uacari. Mu socase, eti Dupade ajéo, enga yejnape esoi iji uacari iji uaquedai jne a. Mu ujetiga e yijiaporásiji uacari enga yajéode u ujetiga atayobárasaja yu to ome yiquitique guidai yui, jeta yiji Dupade uruode údi aja diquidai uñéngo to. 7 Que yajéode u go ujetiga jĩraque yo yedójnari doi tiji uacari. Jecute ujetiga Yocangarádejnai ajéo ga a diyajmángape yu jne iji uacari. 8 Yajéode u ujetiga judíode yocujnusinamáni dire Pentecostes qué chise yu iji Éfeso uné jne. Quigade jne enga yicáji uaque to. 9 Uje uásejna Éfeso gosode uñane uje ore tangaripísi yacajnaquéode ome yocangarádejnai Jesucrísto adode. Jecute que yipota jeta jĩraque yiji iji Éfeso gosode ore gari. Mu uñane déji to uje que ore chise yacajnaquéode unétique enga gajnarenguei ore áyipiedie ome yu. 10 - 11 Ujetiga Timotéo chise uaque jne enga ca eso unerotiguérique jne. Mu ajusópise guio jne, ujetiga ca cuchárique chona to. Uacamóño uje uté cho yu uje doi Yocangarádejnai iroquéode to. Ujetiga e dimane ome daqui yui enga beyoi enga osṍcho uté jne ujetiga ca cuchárique chona iji dajei. Uje uté qui a u Éfeso jne uje ibaguiédi tu yu. Enga yijorane uyoque yijnátugo uté yui. 12 Ijócha yoquĩjorai Apólos ajei údi diríca ujetiga chamáta dajorane uñane enga ore nóna uté aja uaque. Mu que chicáji diríca. Mu socaseti chise uaque iji dire uñeque jne ujetiga pirotiguérique déji. 13 Ca oyo caru ujetiga arijínaño uaquejode enga apúyoja uacanguretigai. Ca oyósi disi parátagabode ome Dupade uruode, mu oyo jnanione uje etoc ore iji Dupade adode. 14 Omi tu ujetiga uacapesudode cucha jõrai jec u pijnoraquei to. 15 Uacarajáyo uje bajaque Estéfanas jogasui ore uje ore changureta Jesucrísto iji ore uniri Acáya nanique. Enga iji deréjnane unojo udore ore áyipiedie dépisiji dojode Dupade anguresóño ujetiga ore cháta cuchade aja udore ore jnese to. 16 Yajéode u ome uaque ujetiga ca ajusécho udore ore urúrigo to. Mu que gusu Estéfanas jogasui ore gotique, ujetiga angáchoi ore, mu adóningacho uacátajasorone ore jnese enga angáchoi udore ore to. 17 Yirasiguipise yu diríca uje uacarásade Estéfanas, Fortunáto, Acáico ore chise yu iji ne. Iraja uje uacajé joróguio to ujetiga abáchoi yu to ujetiga apéso yininaquérique to. Mu a ca togome uaque jõ. 18 Ore pésu yiquéraningai ome yanguretigai diríca uje ore déji yari. Jé cho uje ore déji uacari enga ore pésu uacaquéraningane to ome uacanguretigai. Ujetiga uacojode Dupade anguresóño ore isocade u udore ore adode enga ca ajusécho ore. 19 Dupade anguresórone iji ore uniri Ásia ore pota ujetiga yatata uje chi yiguíjna uaquéode ome ore to. Jé cho Aquíla, Priscíla, ore ujode Dupade anguresóño uje ore chamáta ñane aja ore iguíjnai. Chi yiguíjna uaquéode ome ore to. Uje ore chiraja gu uje Yocangarádejnai anguresóño uaque gu. 20 Uacajnéone u yarijogosórone ore irasitigade jnese. Enga yocajéode u ujetiga uacajnoraquéode pijógome ñane enga cho jetiga acho uñane uredie. 21 Jé yurusaranguipíso yurusarane erueminórone unojo ome uaque. Yigaidi u gu ujetiga arajáyo yijnoraquedatei to ome uaque. 22 Ujetiga uñeque ca chijnóra yocangarádejnai Jesucrísto to enga jé tiógara ujetiga pamacáraque uté gosi. Yangarádejna, bajneque yuruode unojo: “Jĩraque ãri iji yoque.” 23 Yajéode u ujetiga yocangarádejnai Jesucrísto chatapísaja uaque jnese jne. 24 Yijnoraquéode gajnengórone jé u uaque jnese uje uacanguretáyo Jesucrísto. Amen.
1 Páblo uyu uje yiroque yurusarane aja Dupade anguresórone uáguiji uacaniri Acáya údode jnese. Mu yoquijorane Dupade anguresõre uaque iji Corínto, uacajnenguipíso yurusarane udojo. Uacarajáyo uje Jesucrísto iroguipísode jõra yu. Uje Dupade jé áyipie gu ome yu ujeta utocáite yu. Enga yĩjorai jé u Timotéo iji de uje yurúsãre ome uaque. 2 Yajéode u ujetiga uacajneque yocai Dupade, yocangarádejnai Jesucrísto ore acacáninga omone to. Yajéode upo rĩ ujetiga ajnáño yocangaráni Jesucrísto, dayé ore guerani pajesereringa to. 3 Beyoi ga yisigopise yocangarádejnai Jesucrísto dayé gai uje Dupápisi u. Uje Yocai jé u to enga osõrataguipise ome dabode uyoque. Enga yoquidupade u uté to rĩ enga nejé yocúdode enga cho yoquiquique rĩ ome cuchade. 4 Dupade u uje chosõre yóguiji yocajnéone payuguhebátiga jnese. Gaidi tu gu ujetiga yicoi enga yijnángo uté osõraquei tuté ome yocujode Dupade anguresóño to iji ore gajnetígo payuguhebátigadatéi. 5 Adi jé u uje yoco yoquiba yocangarádejnai Jesucrísto adode to enga yejnárejopise yocuringane ducañerájma, mu a jé adi u Jesucrísto to jne ujetiga chatapísaja yóguiji yocuringáringo ducañerájma jmáinie to, ujetiga tijode cho jnangome yoque to. 6 Jecute ducañerájma yoque mu yoquigaidi tu ujetiga Dupade chosõre uaque enga eso uacaringane piquetaque to. Ujetiga yocajnenie pujurei chise uaque to jne ga ajnusináño jne uje Dupade u uje chatapísaja yóguiji yocajnenie pujurei enga chijnime yóguiji udire jmáinie. Jecute adotáyo uáguiji uacajnenie pujurei jmáinie to uje Dupade a chátaja uaque to jne iji udire jmáinie. 7 Yocanguretigai jiépise ome uaque. Yirajágo gu uje jé yocajné pijosipiedie jnese ga a yocajneque Dupade osõraquédatéi jnese to jne. 8 Yijorane uaque, yipótago ujetiga yingongo yocuringane ducañerájma ome uaque uje yugúcoji ore uniri Ásia ica. Uje yocajnéone petingaquéo etócho ica aja yoque enga cho ujetiga ca yico uécharique ica. Que yichagágopo yógaja uecárique rĩ. 9 Enga cho jetiga e yoquiqui tu pitoringai yui ica. Mu Dupade etingaquéo udore ome yoque ica. Gaidi tu gu ujetiga ca yichago yocanguretigai aja yoque, mu yichago yocanguretigai aja Dupade, uje u gu uje chiqueta togode. 10 Mu Dupade gãreque yoque ica iji yocajnei pocaninga uje ore chujérase yoque. Enga a adi jé u uté jne iji yocajnéringui pijosipiei jnese jne iji yoquiquei. Enga e yanguretágo Dupade ujetiga jé jno dasocade udore údi jne ome yoque, ujetiga chiqueta yoque gatuaque. 11 Mu átayoja yoque to ujetiga acatecãchoi Dupade ome yoque. Ujetiga jiei uaque ujetiga acatecãchoi Dupade ome yoque, enga a Dupade chatapísaja yoque jne. Enga a jogadi u jne ujetiga jiei ore ujetiga ore chacãre Dupade gai ome icaniratiguedatei ome yoque. 12 A yingo cuchárigaja uaque jne uje pésu yoquininaquei: u uje que yocagutéraque cho jora ome yoquipesutique cucha gajnarétique. Uje yujucópise yocadode guio iji erámi udé enga que paringaquérique déji yocajéode. Jetapuré uje yugúcoji uacajade. Que yocuringane ate uome garani u yoque go, mu garani u Dupade ome yoque. Chamáñaje ate uome gu uté ome yoque enga ecãraque yocadode enga imanique yógaja yocuringai ayoré uome. 13 Uacamóño uje que cucha uñeque chimesa yocurusãraque bajade ome uaque. Mu choqui guesode ujetiga ajicho ga jĩraque arajáyo quitígo ome uaque. Enga yajéode jé upúsu ujetiga arajayópise quigode jnese. 14 Yiraja uje e uacarajáyo yocurusarane udore quigode ujade. Mu yigaidi urásu ujetiga arajayópise quigode jnese, enga aráso uágome yu. Enga ujetiga Yocangarádejnai di jne enga yoquirasitígadatéode déji yógome ñane jne iji uté iquei. 15 Yangureta yurusarane udore diríca ujetiga unere yi ome uaque. Jecute yigaidi u ujetiga yisape uaque bajaque aja yajesui. Enga yipesabu uacaninaquérigo to, adi u yiríringa baja casica uje yipésu uacaninaquei ica. 16 Uje yicáji Macedónia diríca enga yajéode u ujetiga yise uaque bajaque. Ga yajniapórase jne rĩ enga yisáporase uaque jne rĩ. Jecute yanguretarase uágome yi ujetiga atayorásaja cuchárigo aja yu ome yiqui punire Judéa yui. 17 Jé ca ajoso ati cachi yurúo yuruode udore diríca uje que yiji yáyipiedie quigode. Enga ca ajoso ati yo jnanione udore ore rĩ uje que ore changureta Dupade. Uje jĩraque ore chĩro dáyipiedie quigode iji gu. 18 Mu Dupade u uje chiraja uje ũré yoque diríca. Enga chiraja to uje que cachi yocurúo yocuruode udore ome uaque ujetiga yico uaque. 19 Uacamóño uje yijorane Silváno, Timotéo uyoque yatatago Dupade abi Crísto Jesus adode ome uaque nanique. Enga yocajnai jé u Jesucrísto uté, uje que uté áyipieraque noña gotique to. Enga que urúrique toja gotique rĩ. 20 Uacarajáyo uje Dupade chichaga dáyipiedie aja ayoréode nanique, mu áyipiedie jnese imaningóri u abi Jesucrísto. Jecute yisígo Dupade gai ga yojnijo: “Amen, ũrepise uje báyipiedie imaningóri tu Jesucrísto uté.” 21 Dupade uté u uje imanique yógaja yocanguretigai ome Jesucrísto enga etoque yóguiji. Enga uté u to uje chicha dajmáinie aja yoquibai ujetiga yicoi iroquéode. 22 Enga uté e urusãraque yoque. Enga e ajópie dajopie Espíritu Sánto aja yoque ujetiga ca potigayaquérique déji yoque ome ojningárique cucha. 23 Que yise uaque iji Corínto gu uje cachi yinguíra pujnusiétigarigo aja uaque. Enga Dupade chiraja uje jé ũrepise yu ome udore. Mu ujetiga taque yu ga jé arec ujetiga Dupade chujé yu. 24 Que yipótago ujetiga yipéco uacanguretigai unerotiguérique ome uaque. Chamáñaje yirajágo uje uacanguretigai etoque gu iji Dupade. Jé basa yoquigaidi tu ujetiga yátagoja uaque enga uacaninaquéode quérã to iji Dupade adode.
1 Jecute que yisápo uaque diríca rĩ. Chamáñaje cachi yipesapo uacajnusiétigarique rĩ iji yiríringárique. 2 Jecute a yipésu uacajnusiétigarique ga adi jé u yu, a jnusiétaguirase yu to. ¿Jé yorasíringome yu a? ujetiga jnusiétaque yu. Uje que yaquĩrasónique uñeque cuse, uje yangurenone urásu uaque ujetiga oyo yiquique iji yujnusiétigarigo ajénique. Mu a ca toguirásome uaque. Chamáñaje e yinguíra pujnusiétigai bajagája uaque gu. 3 Jecute yutṍri yurusarane ome uaque diríca ga que yisípise uaque. Chamáñaje cachi apéso yayuguhebátigadatérique gu ujetiga yugúsiji uacari. Mu uaque a urásu jõ ujetiga apéso yininaquérique. Yiraja uje a yirase yu ga a uacaráso uaque to. Enga yipotigádi tu pininaquérique to ome yoque jnese. 4 Uacarajáyo uje yurúsãre yurusarane ome uaque diríca ga ayuguhebátaque yu aja, enga itajíja yu aja, enga carajnoque yibója. Mu que yiji jeta yinguíra payuguhebátigadatérique aja uaque. Yigaidi tu ujetiga arajáyo to uje yijnoraquei uásejnapise ome uaque. 5 Yingopo uaque rĩ ujetiga yoquĩjorárique pésu cucha gajnarétique ga uté u uje ipesute yayuguhebátigadatei. Mu que gusu yu go. Pésu uacayuguhebátigadatéode to. Mu que uaque jnese u go uje chinguíra payuguhebátigade aja uaque. 6 Mu yo uacaquique ujetiga etácho uté ome uacáguedie diríca enga goñome uaquetétigade ome uté iji uacáguedie. 7 Enga beyoi uté ga anejecho údode ga oyo uté quique ga cha dayuguhebátigade. Jé socaseti ayuguhebátigadatei chijnapísaja jnumi jne. 8 Jecute yingome uaque ujetiga beyoi uté ga anejecho údode ga angoño uacajnoraquédatéi aja. 9 E yurúsãre cuchade udojo quigode ome uaque ica ga yo quique cuchade udojo quigode ome uaque ica. Mu yetingaraque uaque ica ujetiga angáchoi yu, jeoga ca angáchoi yu. 10 Jecute ujetiga arajayopo uaquetei casé jne rĩ enga uacadi jé u yu, a yirajápo to jne rĩ. Que yajneque uté ipesudi cucha gajnareque, mu ujetiga yajnenguirase to ga a jé yirajápo cucha gajnaréngone ipesungóri uté to jne rĩ. Yucuei tu gu uacomitígarique ome ñane. Yucuei tupo yomitígarique to iji Crísto iquei gu. 11 Uome ujetiga yipéco cuchade udore aja quigode. Ga a jé ca Satanas chimere re iji yocujade jne. Que yoco agupuranique ome Satanas josipiedie go. 12 Yicáji Tróas diríca ujetiga yacate ore iji ome yocangarádejnai Crísto adode enga yacajnaquéode que chajire danéningárique ome ore. Chamáñaje Yocangarádejnai ipesute yacajnaquéode uneréjnane gu ome raque. 13 Mu yáyipie jĩraque déji yĩjorai Títo enga jnusiétaque yu ome uté. Jecute jĩraque yiji iji Tróas gosode ore gari ga yicáji ore uniri Macedónia. Chamáñaje yipota gu ujetiga yimope yĩjorai Títo to iji Macedónia. 14 Yacaranguipise ome Dupade uje Jesucrísto u uje jecucha ujnuéngai cuchade enga yocajnai jé u uté. Enga Crísto Jesus chisite daruode aja erámi jnese, enga uruode atataisórone u uyoque. Ga uruode gajnui tu cucha ai unénique. 15 Yipijójome Dupade gu uje Crísto ai uneri chisa yoque to. A yipijójopome Dupade iquetade udore ore rĩ. Jé basa yipijójopome udore ore rĩ uje bijnaque ore ome Dupade. 16 Mu udore ore uje bijnaque ore ga cho ujetiga Jesucrísto ai chujé ore. Jé basa udore ore uje Jesucrísto iquetaque ore ga cho ujetiga uneripise ai tome ore enga ore chojare enga ore uringai piquetaque u iji deréjnane jnese. ¿Ja picasidirase ome uyoque jnese ujetiga yatatago Dupade uru iyiejnane udore quigode? 17 Uacamóño uje uásejna Dupade uruode atatasórone uje ore cho cucha bisidéguiji Dupade uruode enga ore tagu dacajnaquéode oredie. Mu que gusu udore go, jorane jé u uje ore chécãre Dupade uruode quigode. Mu que yoquisocai u udore ore isocade to go. Mu uyoque ga que paringaquérique déji yógome Dupade. Chamáñaje Dupade utocáite yoque gu enga Crísto iroguipise yoque rĩ.
1 ¿Ga ajoso ati yicotágo yoque ome yocuruode udore a? ¿Jecute que eso yocunétique? ¿Ujetiga yijnángorása yocujode ayoré uñéngo urusãratígo iji yocadode, enga amesechorase yoque a ome purusarane udore? ¿Jeoga uacáyipiedie u to ujetiga yutagoi uacarusãratígo to iji yocadode enga yijnójo udore aja yocajesúode ujetiga pimeseraque yoque ome diquidai uñane? Chamáñaje uacacadisórone uñane ore isocai u uté to iji uacari. 2 Ungare. Que qui tu go. Chamáñaje yocadode ipijogúsorone u uaque ga uacagusopísiji yocajéode. Enga uacajnúone jé upúsu purusãraque ugurúode ome yoque uje ore chajire jnese enga e pijoque yocadode. 3 Que potigayaquérique déji uje Crísto pésu cuchade quigode iji uaque. Enga cho ujetiga Crísto urusãraque uaque ome erámi ujetiga adode pijoguipis iji uaque. Jé basa ga Crísto angúroméone u yoque ome darusarane udore iji uaque. Jé basa Dupa uecai Ujopie Espíritu Sánto gajnua u tíntaraque uje Crísto angúrome tu ome darusarane. Crísto que churúsãre darusarane udore iji cucaranéraque gai go, mu urusãrapídi tu ayorei uyoque yocáyipie. 4 Ũrepise yógome yocuruode udojo enga que potigayaquérique déji yógome. Chamáñaje Jesucrísto ipesute yocanguretigai tome dayé Dupade uruode gu. 5 Yirajágo uje que toque cuchade ome ayoréode uyoque bisideque. Mu pirajatigai ome yoquisaque ponáyone jnese garani u Dupade ome yoque. 6 Dupade chisi ome dáyipie ichadie ome yoque. Gaidi u gu ujetiga dicase yógome adode. Mu áyipie ichadie udire que chopo dáyipie bajedie rĩ uje purúsãrai nanique ome pijmáinie, ujetiga gosi chajire nanique enga doi quigode. Que yibóco áyipie bajedie quigode nanique mu ejodie u uje yibóco quigode ome yoque. Chamáñaje Dupade ujopie tu gu uje chécãre yocáyipiedie. Yirajágo uje Moises urusarane cucha puyácho chijna yógaja pitoringai gu uje que yibóco. Jé basa Dupade ujopie u uje chijna yógaja pucuecaringué eyúgojmai. 7 Yirajágo uje Dupade churúsãre dáyipie bajedie ome Moises nanique enga churúsãre iji cucarané gai. Mu jõrai taja jnumi direcaringueque cuchape nanique. Enga naganata Moises edodie ome direcaringuei tuté. Jecute Moises urásade Israel gosode que ore chimo edóraque ome uringai naganatac. U mu quigade ga Moises uringai naganataque jé doi jnumi ga diga íjnonguiji. Cucha daté Dupade isocade udore nanique ome dáyipie bajedie. U mu, u to uje chijna yógaja pitoringai. 8 Dupade ingoningájnai jõra áyipie bajedie udire nanique aja yoque mu chaquesu re jnaque. U mu, omipísi tu ingoningájnai tome áyipie ejodie udire ome yoque uje Ujopie Espíritu Sánto iriringui aja yoque. 9 Ueradei Dupade áyipie bajedie nanique mu que yibóco quigode ga e máraque yoque ome quigode. Jecute e yocajneque Dupade ujuyaquei nanique. Jé basa áyipie ejodie suépise áyipie bajedie gai ome daringanie ueradéjnai. Chamáñaje Dupade e chingome yoque gu uje e que yoquibárique cuse gu. 10 A ueradei Dupade áyipie bajedie ome Moises urásade ore nanique, mu e cucha bisideguei iji áyipie ejodie jmáinie. Chamáñaje ejodie suépise gai gu. 11 Yirajágo uje Dupade áyipiedie udire a ueradejnapísi nanique, mu chaquesu re jnaque. Jé basa áyipie ejodie que toc ujetiga chaquesuapo re jnaque rĩ ome yoque. Jecute uringai ueradéjnai suépise bajedie gai. 12 Jecute dicase yoque ome yocatatagode Dupade urúo. Chamáñaje yirajagópise uje Dupade áyipie ejodie udire a ca íjnongapo jne rĩ gu. 13 Mu que yocajnui tu Moises go. Uje chaco borapei dedodie yui gai nanique ujetiga urásade ca chimo uje jé doi jnumi naganataringuei iji ga diga íjnonguipísiji. 14 Mu Moises urásade que ore chiraja uje e direcaringuei tuté e chaquesu re jnaque. Jecute judíode iji deréjnane udojo ore chajire Moises urusarane Dupade áyipie bajedie mu que ore chiraja quigode. Enga cho ujetiga borapei tuté jé qué déji ome ore uje suru ore áyipiedie yui gai. U mu gusu Crísto ujetiga chajnangarase borapei tuté iji yocáyipiedie yúode ga guesája yocáyipiedie yúode to ome uruode. 15 Jé aja deréjnane udojo ujetiga ore chajire Moises urusarane quigode, ga gajnui tu ujetiga ore suru dáyipiedie gai ome borapetique. Jecute que ore chiraja quitique. 16 Mu gosi ujetiga chajni Yocangarádejnai gai ga cho ujetiga borapei tuté e dajúguiji gosi áyipie yui gai. Ga quene u uje chiraja Dupade uruode quigode. 17 Enga yocojningai Yocangarádejna u Dupade Ujopie tuaté. Enga ujetiga yocangarádejnai Dupade Ujopie tuaté déji pijogatique enga jé u uje guesája cuchade yui jnese ome ore. 18 Jecute uje e yanguretágo Jesucrísto ga e que chopo rĩ ujetiga qué yacógo borapei tuté yoquedodie yui gai. Mu yocajnui tu ajicarani uje obiréjna Yocangarádejnai ingoningájnai tiji yoque. Jecute Yocangarádejnai uté jé chosi dangoningájnai tiji yoquíode iji dirode jnese. Jecute uté ingoningájnai chise yoque ga jé yoco uté ome ingoningájnai. Enga que yoquipesute udore go, mu Yocangarádejnai uje Dupade Ujopie jé upúsu uté ipesucho udore ome yoque.
1 Jecute que yoco jóro ome Dupade iroquéode iji deréjnane jnese. Chamáñaje Dupade chosõre yoque ga chisi ome picasitigai ome yoque ome daroquéode. 2 Jecute e yetajopise pate gajnaréngone uje pipoguiécho. Cachi chinguíra diponguerai taja ipesungórone gu. Mu uyoque ga que yécãco Dupade uruode quitique go, enga que yarangopo yocujórique ayoré rĩ. Enga ũrepise yógome yocojñane jnese. Enga yujuco yocadode guio ome yocujode ayoréo. Yoquigaidi tu gu ujetiga yocujode ayoré ore chimesere yoque to. Yoquigaidi tupo rĩ ujetiga Dupade chirase re to ome yocadode. 3 Mu ujetiga yocacajnaquéode ome Crísto adode ca pirajachome angarásonique ga imoi tu uje uté gosi qui tu Dupade ujuyaquei. 4 Udore ore uje que ore changureta yocacajnaquéode ga pijoque uje ore cho dadupáji Satanas iji erámone udojo. Enga Satanas uté u uje suru ore áyipiedie gai, jecute que ore chiraja yocacajnaquéode quigode ome raque. Chamáñaje Satanas ipotigádi tu ujetiga ca ore chimo direcaringué cuchátique ome raque to. Enga ca ore chiraja yocacajnaquéode uringai ueradéjnapíso uje yacáco ore ome Crísto ingoningájnai. Chamáñaje yocojñane gajnengóri Crísto u uje dayé Dupade chopise re iji nanique ome yoque iji erámi tudé. 5 Uje yacáco uaque gajneri, yocujúdi u yocangarádejnai Jesucrísto adode. Jé basa ga que yujúgo yocatígo go. Chamáñaje que cucha daté yoque go, mu yocajnui tu ujetiga uacaroque yoque enga agutíñañome yoque to. Enga yipéco udore gu yoquijnoraquei tome Jesus. 6 Dupade u nanique uje ipesute direcaringuei ujetiga chijñate ijnangununie gai. Enga jé u to uje chijñate yocáyipiedie gai to. Pésu udore gu ome yoque ujetiga pijoque ingoningájnai ome yoque to. Enga Dupade idirecaringuei tuté u uje dépisiji Jesucrísto to. 7 Yirajágo uje cucha orerã́quedatéi déji yocao ayorei ajei. Yirajágo mu uje que cuchárique tṍraji yocao ayorei tuté. Mu gajnua u pĩraca docoráraque iji jnutique. Jecute obiréjna uje yocarijogoto pujopiedaté que garani u yoque go, mu garani u Dupade. 8 Jecute pujuredie tṍraji yoquibai tome yoque jnese, mu jé yico uéchade. Payuguhebátigade dépoji yoque to rĩ, mu que chijnápisa yógaja jnumi go. 9 Ducañerájma yoque mu Dupade jé jogate yocari. Que noñome yóguiji te go. A ore chinguíra yógaja jnumone marínga, que toc ujetiga pajnoque yoque. 10 Jecucha dimane yógome pitoringai yui iji yocajesúode erámio. Chamáñaje yocajnai tu yocangarádejnai Jesus gu, uje toi ome yoque to. Yoquigaidi tu gu ujetiga yipijójo ome erámi uje Jesus uecai tuté dépisiji yocajéode to. 11 Uje qué yiquecágo iji jnumi tudé ga jecucha pijmongarápi yoque iji deréjnane jnese ome yocatatagode Jesus acho. Yirajágo uje yocao ayorei tudé eruei cuse, mu yipotagopísa ujetiga Jesus uecai pijoguipísiji yocao ayorei tuté gu uje yoco yoquiba adode. 12 Jecute yugúcoji pijmongaquéode ajei mu yoquigaidi tu ujetiga yimáco uágaja pucuecaringué eyúgojmai to. 13 Dupade uruode chojninga: “Yangureta cuchai ga yatata adode.” Ga isocai jé u ome yoque uje yocanguretigai déji to ome yocangureni cucha. Uje yanguretágo ga yatatago adode. 14 Yirajágo uje Dupade chiringare yocangarádejnai Jesus nanique iji itoringai. Ga a adi jé u yoque to uje a chiringare yoque to jne. Ga a cháta yógaja uaque jne enga a chijna yoque jnese jne aja dedai ujetiga yácagoji gari. 15 Yibade u uaque gu uje yejnáreque yajnéone petingaquéo, payuguhebátigade ore jnese. Mu jé tiógara uje yucuei tu uacomitígarique. Yipota gu ujetiga jiei yimanitígo aja guesi ome Dupade. Ga a jiepo uñéngo jne rĩ ujetiga ore chacãre Dupade gai ome icaniratiguedatei ome yoque. Enga a ibijóquedate Dupade ome yoque jne. 16 Jecute que yoco jóro ome Dupade adode. Chamáñaje ayoré uyoque yoquiqui tu jnumi yui jnese gu. Jé basa yocáyipie u uje chiro re iji deréjnane, ga chicai gaté ga que toi go iji deréjnane jnese. 17 Yirajágo uje pirarãitigade chise yoque iji jnumi tudé mu jĩraque jnopo rĩ, jnopo rĩ iji yoque. Mu ujetiga yimáco yógaja udore uéchai ga yocajneque cucha eyúgojmane iji Dupade idai ueradéjnai tuté. Enga yocucuecaringuei tuté a suépise yocucuecaringueque baja casé iji jnumi tudé. 18 Jecute ca yicoi ga ca yejnángo yocáyipiedie taja yoquimone cucha iji jnumi tudé, mu yicoi ga yejnángo yocáyipiedie aja cucha pibójmane yui iji gaté. Chamáñaje yoquimone cucha iji jnumi tudé jĩraque íjnoque gu. Jé basa ga cuchade udore uje cáma yimóngo to udore u uje a ca íjnongapo jne rĩ iji deréjnane jnese.
1 Yirajágo uje yocao ayorei tudé gajnui tu guiguíjna pipesutique ome pijmanéringui. Uje jĩraque íjnoque. Enga yirajágo rĩ ujetiga toque yoque, mu e dimane yocao icha ejórique ome yoque iji gaté. Yocao ichai tuté gajnui u guiguíjna pipesutique rĩ, mu e que cho ayorérique ipesutique go, mu Dupade jmáinie ipesute. 2 Jé ũrepise yu uje qué yugúcoji yocao ayorei udé ga yirañíngome cucha ponáyone ome yoque. Enga unere yui ujetiga e yugúcoji yocajnei tuté guiguíjna uje Dupade a chisi ome yoque jne iji gaté. 3 A ca yoco dicoré bisidégueraque jne mu Dupade a chisi ome yocao ichárique ome yoque jne iji gaté. 4 Uje qué yugúcoji yocao ayorei tudé ga yirañíngome yocajnenie pujurei ome yoque. Que yipótago ujetiga yitogoi ga yécãco joroque yocao ayorei tudé. Mu uneratai tu yocao ichai tome yoque. Ga yocao ayoré toguébei bijna ome yoque. 5 Jecute Dupade qué chingo cuchade quigode ome yoque ujetiga dimane yógome yocao ichai tudé yui to. Enga noñome dajopie Espíritu Sánto iji yocari ujetiga ca potigayaquérique déji yógome yocao ichai tuté yúrique. 6 Jecute dicase yógome Dupade adode iji deréjnane jnese. Mu uje qué yugúcoji yocao ayorei tudé ga cho ujetiga yugúcoi quedéjnaringo ome yoquiguíjnapisi. Yojningai u uje cáma yugucopísiji Yocangarádejnai gari iji gaté. 7 Uje que yimóngo uté, mu jé yichago yocanguretigai taja. 8 Jecute dicase yógome yoquitoringai yui ujetiga yijíñongome yocao ayorei tudé to. Enga yoquipotigádi upúsu ujetiga e yugúcoji Yocangarádejnai gari to iji gaté. 9 Jeoga qué yugúcoji jnumi tudé, jeoga e yugúcoji gaté, mu yocucuei tu ujetiga uerate yocadode ome Yocangarádejnai iji deréjnane jnese. 10 Chamáñaje a chise dínique jne ujetiga Crísto chajire yocadode aja quigode jnese. Enga a ayoré chojmara, chojmarane a jé gajneque dapesutígo quitígo jne, uje pésu iji daringai ayoré nanique. Ujetiga uerate atígo nanique enga jé gajnécho. Ujetiga gajnarécho atígo ga jé gajnécho to rĩ. 11 Yirajágo pisadodéringai ome Yocangarádejnai yui, jecute yicoi enga yinejeco jnanione uñane údode to ujetiga ore tangári Dupade to. Ga Dupade chiraja uje yoquisocai u uté. Enga yiroco diri ujetiga arajáyo yoque to. 12 Ca ajoso ati e yicotagopo yoque rĩ, mu yingongo yocadode ome uaque ujetiga pirasitigai déji uágome yoque to. Yoquigaidi tupo rĩ ujetiga arajáyo yocadode quigode ga ãraracho yoquibai to jne ome dicotáreode udore. Uje cachi udore ore chicota gosi ujetiga aoi uerate, jé basa que ore chicota gosi ujetiga áyipie uome. 13 Uje ore chojningame yoque: “Ũruso.” Mu yoquibai u yocangarádejnai Dupade. Mu ujetiga oyo omi iji yoque, enga a omitigai tu uté ome uaque. 14 Que toc ujetiga ca yicoi Crísto áyipiedie quigode. Chamáñaje ijnoraquei uásejnapise ome yoque gu. Yirajagópise uje uté toi ome yoque jnese. Enga cho ujetiga e yipatírango uté jnese iji itoringai. 15 Crísto toi ome yoque jnese gu ujetiga ayoré uecade uyoque ca yedugo yocáyipie ayoredie ome yoque. Mu gaidi tu ujetiga yedugo uté áyipiedie ome yoque. Chamáñaje uté u gu uje toi ome yoque nanique enga nijiápo iji datoringai ome yoque to rĩ. 16 Jecute que yimíningangopo ayorérique rĩ ujetiga cucha daté, jeoga ayoré gajnareque iji erámi tudé. Mu iji taningai enga edugo yocáyipie ayoredie ome Crísto to nanique, mu e yiyágo yocáyipie ayoredie udire ome. 17 Jecute ayorei uje e chisa Crísto ome dáyipie ga cho ujetiga ayoré icha uté. Enga cuchade e chécãre re ome, uje ate bajade jnese e bijna ome. Enga e doi date ichade. 18 Enga Dupade ipesucho cuchade udore jnese. Enga u to uje angúromei u Crísto nanique ujetiga yico yocuringáringo uomome ñane, Dupade uyoque. Enga e chiroque yoque to ujetiga yucuegoi uñane ujetiga ore chise daringáringo omío to ome Dupade. Chamáñaje cho ujetiga yocumajo ñane nanique, Dupade uyoque iji jnumi. 19 Jecute Crísto toi nanique ujetiga chimate erámi unirisórone yocuringáringo omío ome dayé Dupade, ujetiga Dupade, uyoque yocajéode chopo sẽre ome ñane rĩ. Enga que qué Dupade áyipieraque dépoi yoquisijnaringuéone rĩ. Ga Dupade e chutṍri yoque to ujetiga yatatago pajesereringai adode ome yocujode ayoréo, ga ore chiraja quitígo to. 20 Yibájoi uaque gu uje Crísto e cho yóguiji re. Jecute gajnui tu ujetiga yoquijinequéode ome uaque garani upúsu Dupade. Jecute yinejeco uacádode. Mu cho ujetiga Crísto upúsu uje nejé uacádode. Enga yocósi te ome uaque: ajuécho uágome Dupade ga pajesereringai dépoji uágome Dupade to rĩ. 21 Yirajágo uje Crísto que pésu cucha gajnarétique nanique. Mu Dupade cho ayoré sijnánguiji uté nanique. Gaidi u gu ujetiga cho daba yoquisijnaringuéone. Jecute uje yanguretágo Crísto ga yocuringáringo omío a u jne iji quigade. Chamáñaje Dupade potapísa yocuringáringo omipíso ome re gu.
1 Jecute yijorane uyoque iji Dupade iroquéode, yijóchago uacajéode údi ujetiga ca oyo cucha bisidéguiji uacajnéone Dupade icaniratiguedatéo ome uaque. 2 Ore urusarane Dupade urúo chósi te: E yico deréjnai ujetiga yangári ua. Chamáñaje e yimate cuchade aja quigode gu ujetiga piquetaque ua iji. Enga e yico Dupade ojningai uté dire ujetiga chiqueta yóguiji. 3 Que yipéco Dupade uruode unerotiguérique ome uacuñeque ome yoquipesutique cucha gajnarétique. Chamáñaje que yipótago gu ujetiga uñeque dojnóngaja yógome yocatatagode Dupade urúo. 4 Jecute yoquipotigádi tu ujetiga yipijojopis ome uaque uje Dupade iroguipísode jõra yoque. Jecute petingaquéode chise yoque ga yidotágo yógaja. U to ujetiga cuchade chona yoque mu yidotágo yógaja. Uje cucha gajnaréngone udojo pero yoquibai mu jé yidotágo yógaja ome cuchade udore, ga yipijójo uje Dupade iroguipísode jõra yoque. 5 Uacamóño uje yijorane uyoque yoquibade u Dupade uruode. Ga ore chaquesu yocúdode enga ore suruápo yoquibáyode rĩ. Enga ore chamáta ñane ome yoque ome daru gajnaréngone. Enga eyuguipise yógaja yoquisagode Dupade iroquéo. Ducado uña enga moi yuguipise yoque. Enga yejnárejopise chaguhei ome yoque rĩ iji ujade. 6 Que gusu ujetiga yipijójo ome cucha dacadode udore. Yipijójo to gu uje yujuco yoquio ome erámi unirisórone ore isoca gajnaréngone. Enga pirajatigai déji yógome Dupade uru uréone. Enga yidotágo yóguiji jnumi ome cuchade jnese. Enga caniraque yógome yocujode ayoréo. Chamáñaje yocátajasõri tu Dupade Ujopie Espíritu Sánto uje déji yoque gu. Enga ũrepise yógome yoquijnoraquéode ome yocujode ayoréo. 7 Enga yipijójopo to rĩ uje Dupade iroguipísode jõra yoque uje uté uru uréone jnungórone u yoque. Enga yocarijogoto u Dupade Ujopie etogué. Ujetiga uñeque pota cho dajocaninga ome yoque mu yocõrachaque ugurui u yocuringai ayoré añerataque ome Dupade. A yugúcoji erãpe noñátique marínga, jeoga yugúcoji erãpe onique mu jé yocõráchai chojmára enga yocõráchai tudé u yocuringai añeratac. 8 Yocajneque picotaquéode iji ujade. Jé basa ore chinguíra pajegátigai aja yoque iji ujade. Ore uruode omío ome yoque iji ujade, jé basa ore uruode noñácho ome yóguiji ujade. Ore cho urupatáquechoquí iji yoque iji ujade, jé basa ore cho ũreji yoque iji ujade. 9 Ore cho jetiga ore chirajaque yoque iji ujade, jé basa que ore chuseque yóguiji ujade. Yajníngo iji pitoringai ejode iji ujade, mu jé yidotágo yógome yoquiquei. Ore cho dajuñame yoque mu cáma ore chimate yógaja jnumi. 10 Ayuguhebátaquedaté yoque iji ujade mu yoquininaquei ome Dupade que íjnonguiji yoque go. Yijmátago, mu uásejna ayoréode uje ore agutiñamáite yoque. Chamáñaje orerã́cho yocatatagode Dupade urúo ome ore gu. Ujetiga yijmátagopísa ome cuchade jnese marínga, cho ujetiga yocajneque cuchade jnese to rĩ. 11 Yijorane Corínto gosode uaque a, uacamóño uje que yipójo yocurúrique ome uaque. Enga yuchẽcopísi yocáyipiedie quigode aja guesode ome uaque. 12 Que qué yoquijmaritique cucha déji yocajénique go. Mu uaque u uje a qué uacajmaritígo déji uacajéode ome yoque. 13 Yinejé uacádode ga yajnui tu jnanírique ome uaque uje nejé dabi údode. Yinejequéode u ujetiga angáchoi yu ga achẽco uacáyipiedie gáyode to ome yu. Angoño uacáyipiedie quitígo ome yu, adi uyu uje yingo yáyipiedie quigode ome uaque to. 14 Jé ca átayo uágaja udore ore uje que ore changureta Dupade to. Uacarajáyo uje que pisocai u gotique ujetiga patapi buricárique aja cabayúraque ujetiga pirañaque jnumi ome udore. Enga udore gajnui jé u ome Dupade anguresónique to ujetiga cháta raja Dupade anguresorejmárique ome datígo to. Yirajágo uje pate omone que atique cuguésõri pate gajnaréngone ome ñane. Yirajagopo to rĩ uje diri, dejai que ore cuguésõri ñane ome datique rĩ. 15 Adi jé u Satanas ome Crísto uje que ore adode cuguésõri uñane atique ome ñane. Jecute que omi tu ujetiga Dupade anguresónique doi ga cháta raja jnanírique ujetiga ca changureta Dupade. 16 Yirajágo uje cucha puyaguipísi u ujetiga pichapite ayoré gajnúrique aja Dupade iguíjna cuchábi. Uacamóño uje Dupa uecai tuté cho daguíjnai iji uaque to. Jecute Dupade u uté to uje chojninga: A yugúsiji ore ujade jne enga a yijína ore aja quedéjnane jne. A ore cho dadupa iji yu jne. Enga a yo yurása iji udore ore jne. 17 Yocangarádejnai uté qué chojningápo rĩ: Ajoso ti ome udore ore uje que ore changureta yu, Enga angaráño uacajogatígo ome ñane. Enga ca ajocáso cucha gajnaré ngone to. Enga jogadi tu jne ujetiga yimesere uaque. 18 Enga a oyo uacaji yu jne. Enga jé basa yo yujnacari iji jnanione uaque, enga a yopo yuro iji chequedíe uaque jne rĩ. Yocangarádejnai uruode u udore uje cuchade jnese ujnuéngaisõri tu.
1 Jecute yijorane uaque a, yocajneque Dupade uru ueradéjnane udore jnese to. Jecute yicoi ga ca yipéco yocáyipie iñoñaringuérique ome Dupade. Enga yañecopúsu yocao ayorei guio ome cucha gajnaréngone. Yicoi enga yẽcopísa yocáyipiedie, aja yocuringai ayoré aja Dupade. Chamáñaje Yocangarádejnai u gu. 2 Jecute ayáyo uacáyipie gajnarénguenie ome yoque enga ajnóraño yoque to. Uacamóño uje que yipéco cucha gajnarétique ome uaque. Que yinejecopo uacádode ome cucha gajnarétigo rĩ. Enga que yarangopo uágome cuchárique to rĩ. 3 Que yichaga cucha gajnarétique aja uaque go, ome yuruode udore. Chamáñaje yijnoraquei uásejnapise ome uaque gu. A ca yáyipieraque jnoji uaque jne. Enga yajéode u ujetiga yibaya uáguiji uacacuecaringuérique, jé aja uacatoringárique to rĩ. 4 Yanguretapise uaque, jecute uacapéso yininaquei tome uaque. Uje yugúcoji yocajnéone petingaquédatéo jmáinie mu yujnusi yu ome Dupade iroquéode enga pininaquédatéi irágu yu. 5 Uje yiríngoji Macedónia diríca ga yocajnéone cucha gajnaréngone que doi jnutique ome yoque. Enga cho ujetiga yugúcoji pijmongaquéode ajei. Enga pisadodéringai dépisiji yocajéode. 6 Mu uje yoco caru ga Dupade jecucha jnári yógome dadode. Jecute chorei Títo iji yoque diríca. Gaidi u gu ujetiga tijode cho jnaque ome yoque ome Títo diringai. 7 Mu que gusu Títo diringai u uje tijode cho jnangome yoque, mu ojñane u to iji uaque uje tijode cho jnaque gaté ome yoque. Ojñane u uje chi unere yoqui ome uaque ujetiga yico uaque. Chingopome yoque rĩ uje chi uacajnusiétigai jiépise ome yoc. Enga chi ayuguhebátaque uaque rĩ ome yoque. Uje yudute uacosõraquei ome yu ga yirasique yu gaté. 8 Yiraja uje yipésu uacayuguhebátigai diríca ome yurusãraque baja casodé. Ga adi jé uyu diríca, yo yáyugu yurusarane quigode to diríca ome uaque. Mu e íjnoque yayuguhebátigade ome yurusãraque baja casodé. Yiraja gu uje tijode jĩraque cho jnangome uaque uje uacamácho cucha gajnaréngone udore aja quigode. 9 Enga e yirase yu. Mu que yirasitigade garani u uacajnusiétigade go, mu garani u uje uaquécãcho uacáyipiedie ga e omei quigode. Enga uacajnusiétigai ome yurusãra casodé u uje ecãraque uacáyipiedie udire quigode. Yuruode dosója uaque diríca mu uacangáchoi yu. Jecute Dupade irasique re ome uaque. Jecute yirasiguipise yu uje que ejnárecho yurusãra casodé quigode ome uaque. 10 Ujetiga paquĩraquérigo dosója yoque marínga, yicoi ga yangácoi. Enga jogadi u ujetiga Dupade irasique yoque. Enga uje Dupade chimo uje yécãco yocáyipie gajnarénguenie quigode enga yocuringai piquetaque jogadi u ome Dupade. Cucha omi tu uté ga que toc ujetiga chinguíra payuguhebátigai aja yoque. Mu pujnusiétigade uje garani tu erámi tudé ga uté u uje chijna yógaja jnumi. 11 Mu uacajnusiétigade ome yaquĩraquéode que chijna uágaja jnumi go. Chamáñaje uacangáchoi yu gu enga Dupade irasique re ome uaque. ¡Cajicho to gojni uje cucha omone tṍraji uacajnusiétigade udore! Chamáñaje yo cuchade udore quique diríca ome uaque iji yurusãraque baja casodé enga jé u uje e que oyópo cucha bisidéguiji jnani uté ipesudode cucha gajnarécho rĩ. Enga e que aráso uté adode ome uacajade. Chamáñaje uacatodóyo ate gajnaréngone gu. Enga jé u uje unere yi ome uaque ujetiga yáta yu aja uaque. Enga dimane uágome uté ujetiga oyo quique. Enga e obiréjna ome yu uje uacayoguéode e bijna ome uaque uje e uacaquíraño uté gu ome ate gajnaréngone. 12 Uje yurúsãre yurusarane ome uaque diríca ga yáyipie déji jnacari uté uje pésu cucha gajnaréngone. Yáyipie dépoji uté dayé to rĩ uje gajnareque ujnacari adode ome. U mu yáyipie gaidipísode u uaque diríca uje yurúsarome uaque. Yigaidi u gu ujetiga Dupade chingo uaque to uje uacagutiñamáite yu to ome cuchade udore. 13 Uje yirajágo uacadode udore enga yujnuco yógome udore. Mu yujnucopo yoque gaté rĩ ome Títo irasitigade ome uaque. Chamáñaje chi atayopísaja uté gu ome cuchade enga tijode cho jnangome gatuaque iji uacajade. 14 Uje cáma Títo chise uaque ga yingo yirasitigade aja Títo ome uaque. Uje e chimo uacadode to ga chiraja uje jé ũrepise yu ome yojñane iji uaque. Chamáñaje yocojñane ũrepíso to ome uaque gatuaque. Jecute jé ũré yocojñane udore to ome Títo iji uaque, uje yicotágo uac ome uacadode. 15 Jecute Títo chijnóra uaque gaté uje jnusina uje angoninguite guesaque uágome ica. Enga que ajusécho to rĩ uje déji uacajade ica. 16 Jecute yirasiguipise yu to enga que potigayaquérique déji yu go ome uaque jnese.
1 Yijorane uaque a, e yipótago ujetiga yingongo ome uaque uje Dupade icaniratiguéode e chise Dupade anguresórone ore ajéode to iji Macedónia údode. 2 Yirajágo uje cucha dacate gajnaréngone tṍraji dajñarenie ome ore to, mu que ore cho jóro ome pininaquei ome Dupade adode. Jmataque ore, mu cho jetiga ugucharãque ore ome deranone cucha omío ome Dupade. 3 Yipañáite ore adode udore uje que ore chise deranone unerotiguérique, mu unéninga gatéo ome ore uje ore chisi Dupade iji deranone. Enga que ore chimo dagutúrigui iji deranone cucha ome Dupade. 4 Enga ore chijócha yocajéode údi ujetiga yijnójo ore gueranone cucha omío to ome yocujode Dupade anguresõre ore iji ore uniri Judéa. Chamáñaje ore chudute gu uje ore ujode Dupade anguresóño iji udore, udore ore isocai jé u uté to. 5 Yanguretágo ore ome ore guẽratígo cucha diríca. Mu ore sué yocanguretigade udore gai. Chamáñaje ore doi enga ore tẽra rángome Yocangarádejnai bajaque gu, enga jé u uje ore doi Dupade áyipie ome raque, enga ore chingo rángaja yoque to. 6 Yirajágo uje Títo e chingo Judéa gosode aja uaque to ica ujetiga amátayo uaquẽratígo cucha omío ome ore to. Jecute yirójopo Títo aja uaque rĩ ujetiga chimánaja jnumi dáyipiedie udire ome uaque. Chamáñaje cucha omi tu gu uje caniraque uágome uacojode Dupade anguresóño iji Judéa. 7 Yirajágo uje jecucha uacajnueñopise uacojode Dupade anguresóño gai ome uacanguretigai iji Dupade. Yirajagopo to rĩ uje Dupade uruode acadisórone jiépisiji Corínto gosode uaque ome diquidáyode uñane. Enga irajatáquedaté uágome Dupade uruode. Enga ijõripise uágaja Dupade adode. Enga que Dupade anguresórone uñéngo cho uacajnoraquédatéi ome yoque go. Enga jé boyo uaqueranone cucha uóme údi aja Judéa gosode enga ajnuéño uacojode Dupade anguresóño gai ome uaqueranone udore to. 8 Ca ajoso ati yiroquei u uté ome uaque. Mu yingome Macedónia gosode ore icaniratiguéode ome uaque gu ujetiga ejnañopise uágaja uacacaniratiguéode to. Enga uacajnoraquei uringai ibijoque u jne ome erámi uje jé ũrepise uaque to. 9 Chamáñaje e uacarajáyo yocangarádejnai Jesucrísto icaniratiguédatéode ome uaque gu. Uje que cuchárique chona nanique uje déji dayé gari. U mu chicai jnumi ga jmataguipísiji jnumi tudé. Chamáñaje chijnorapise uaque gu, enga gaidi tu ujetiga agutiñañopísome adode iji jnumi tudé to. 10 Chamáñaje yucuei tu uacomitígarique gu uje yingo yáyipiedie ome uaque ome uaquẽrapáidode cucha udore. Uerate uacasocade ome uaqueranone cucha ica iji sequeré bajé casica. Uaque u bajade ica ome uaquẽrapáidode cucha ome Judéa gosode ore. Ga que eso unerotiguérique ica. 11 Jecute ca aberóyo uágome uaquẽrapáidode udore ome uacojode Dupade anguresóño. Uje que eso unerotiguérique nanique iji taninga cásodica, enga jé ejnañopise uágaja ujetiga jĩraque dimane. Jé beyoi uaquẽratígo ome: ujetiga garósi ga jé garósi. Ujetiga jiei ga jé jiei. 12 Chamáñaje Dupade chimeseripise uyoque uje que yico yoquẽrapáidode unerotiguérique. Ujetiga Dupade chimo uje caniraque yoque ome enga e que chachoque yoquẽrapáitique cucha go. Chamáñaje Dupade que jnári gu cucháringome re ujetiga ca déji gosi. 13 Que yacajnaquéode qui tu go ujetiga uacuñeque jogasui uacajmátayopis ome cuchárique gu ome uaqueranone. Mu ujetiga cuchade déji uaque enga asíyo Judéa gosode ore iji to. 14 Uacarajáyo uje que cuchárique chona uáguiji deréjnane udojo. Jecute jé tiógarapísa ujetiga asi udore ore to iji uacagúchade uje ore jmatapis ome cuchade. Jé socaseti ajmátayo to dirome. Ga jé basa ore chosõre uaque iji uacajmátaringuérique to. Ga jé u uje uacacaniratiguéode cho ñane iji jnumi ome ñane. 15 Yirajágo uje Dupade uruode chatata ore adode ome arureque quedéjnane mana nanique uje chojninga: “Gosi ujetiga amatade jiei enga doi ga chajuguína dajorane uje ore amatade garósi. Jecute que uté gosi iréraque cuse uje ujuya damatade mu. Jé basa uté jorane uje garósi ore amatade ga ore u uje ore icadie guejnapísi ome uté icaniratiguéode.” 16 Yacaranguipise ome Dupade uje Títo jé cho yu uje que áyipieraque jnoji uaque to. Chamáñaje Dupade ipesute Títo ijnoraquédatéi ome uaque gu. 17 Uje yiroque Títo aja uaque ujetiga chamáta uaqueranone cucha omío diríca ga que chise unerotiguérique. Chamáñaje áyipie dépisiji uaque to gu. Jecute a jĩraque chise uaque jne rĩ. 18 Enga yirójo yoquĩjorai uñai aja uaque rĩ ujetiga nóna Títo. Yocujode Dupade anguresõre iji de, jé iji diquidáyode uñane ore chiraja jnese uje adode omío ome datatagode yoquiquetangóri Crísto acho. 19 Que gusu yu ome uje yajegáite, mu Dupade anguresórone ore iji quedéjnane ore ajegáite to ujetiga nóna yoque jne aja Judéa gosode ore ujetiga yijnójo uaqueranone cucha omío aja ore. Que yocucuei tu yocuringárique picotaque go ome Judéa gosode, mu yocucuei tupúsu ujetiga ore chacãre Yocangarádejnai gai ome yocosõraquéode. Yoquigaidi tupo rĩ ujetiga ore chiraja uje que agutúyo uágome uacosõraquédatéode. 20 Que yipótago ujetiga uñeque chaguhéta poriquérique yoquibai. Jecute yipótago ujetiga uñéngo nóna yoque dirome ujetiga yijnójo uaqueranone ome Judéa gosode. 21 Yoquigaidi tu gu ujetiga Yocangarádejnai, jé aja yocujode ayoréo ca ore chimo detépitígo iji yocatígo. 22 Qué yirojopo yocujoi Dupade anguresõre uñai aja Títo ore quigade to rĩ. Enga yoquĩjorai tuté que chise cuchárique unerotiguérique. Jetapuré uje chudute uacate goningane ga unéninga gaté uaquéode ome uté. 23 Ujetiga gosi chirajaque Títo enga ojnichome jne: “Páblo jõrai tu uté ẽrie iji dasagode Dupade iroquéo. Jecute chise yoque ga cháta cuchade aja yoque to.” Jeoga ore chirajaque Títo jorane yocujode Dupade anguresóño rĩ enga ojnichome ore jne: “Yocujode Dupade anguresõre ore iroque ore aja yoque ujetiga ore chátaja yoque to. Enga ore ipesute dojode Dupade anguresõre ore ajei chiretaringuéone to ome Crísto.” 24 Jecute ujetiga Títo, jorane ore chise uaque enga jé ca ajusécho ore jne. Enga a ore urásade ore chudute jne uje que ajusécho ore iji ore iríringai iji uaque, ga jogadi u jne ujetiga ore chachietápisiji uaque to. Chamáñaje a ore chimo jne uacajnoraquédatéi ome jnani díode udore ore gu. Enga a ore chojninga: “Jé ũrepise Páblo icotaquéode ome Corínto gosode.”
1 A ca yigotája yo uacaquique jne iji yurusarane ome uacamatade cucha ome uacojode Dupade anguresóño iji Judéa. 2 Chamáñaje yiraja uje dimanepise uágome udore gu. Enga jecucha yuruode u udore ome yocujode Dupade anguresõre ore iji Macedónia uje Acáya gosode dimane uaque to ica iji sequeré bajé casica ome uaqueranone cucha omío ome Judéa gosode ore. Enga uje yocujode Dupade anguresóño iji Macedónia ore chudute uacajnoméone enga ore jnusi rángome uaqueranone udore ujetiga ore chirate uágaja uacate goningane udore. 3 Jecute yiroque Títo ore aja uaque ujetiga ore cháta cuchade quitígo aja uaque ga dimane uaqueranone cucha. Yigaidi tu ujetiga ca yocujode Dupade anguresõre chotigase yojña casodé ome uaque, uje yojninga diríca: “E dimane ore gueranone cucha.” 4 Jé socaseti yocujode Dupade anguresõre uñéngo iji Macedónia ore nóna yu aja uaque dirome ujetiga e yamátago uaqueranone cucha omío ome uacojode Dupade anguresõre iji Judéa. Enga yiríngo iji uaque enga cáma dimane uaquẽratígo ome Judéa gosode ore. Enga a anguirañorása pajegátigai aja yoque uje que yoquicotaquéode chajire re diríca ome uaque. Mu a ca gusúrasu pajegátigai ome yoque, a pajegátigai dérasi uaque to ome cuchade udore uje cáma dimane uaqueranone cucha omío gu. 5 Jecute omi tu diríca ome yu ujetiga yiroque Títo, jorane ore aja uaque bajaque. Ujetiga ore chingo uaque ome uaquerani casodé cucha omío ome Judéa gosode enga ore cháta rágaja uaque ujetiga amachopise uaqueranone aja ñane enga dimanéo ome yiríringai yui. Yigaidi tu gu ujetiga uacacaniratiguéode uringane ũréo pijógome ore jnese enga jé ca uñeque jos eti cachi yutáite uaque enga jecute amátayo uaqueranone udore aja ñane ome Judéa gosode. 6 Yipota ujetiga ajnusináño udore to: ujetiga gosi acatígo garósosi ga na ga jé garósi. Jé basa gosi acatígo jiei ga na ga ujuyápiso. 7 Jecute acueyoi uacáyipiedie ome uaqueranone cucha bajaque enga ujetiga amácho uacáyipiedie enga ca eso unerotiguérique uaqueranone. Chamáñaje Dupade ijnorai tu gosi uje irasique re aja deranone cucha. Jé basa gajnarei tu ujetiga uneroque gosi gueranone ome Dupade mu jé tẽríji. Enga cho ujetiga piroque gosi aja. 8 Chamáñaje Dupade a e chécãripise deranone cucha omío aja uaque jne. Gaidi tu gu ujetiga ca cuchárique chona uáguiji deréjnane jnese. Enga a sué uacabai jne. Enga jé basa uacasíyo uacojode ayoréo iji to. Enga a apéso pate goninga ponáyone jnese jne ome ore. 9 Yirajágo uje ore urusarane Dupade urúo chósi te: Uje gosi que chacho dacaniratiguei ome jmatágode Enga que toc ujetiga Dupade chicadígui uté icaniratiguéode iji deréjnane jnese. 10 Yirajágo uje Dupade gueranei cucha ajñunie ujetiga pacai, enga gueranápo cucha pibosode rĩ. Enga a uté u jne ujetiga chisi ome cuchade udore ome uaque gatuaque. Gaidi u gu ujetiga ajnerañome uacojode ayoréo gatuaque to. Enga quigade ga uacate goningane jiépise iji erámi. 11 Jecute a arajáyo Dupade icaniratiguédatéode to jne ome uaque ujetiga sué uacabáyode. Ga cuchade a déji uaque jnese jne ujetiga asíyo uñane iji gaté. Enga ujetiga yimáco uaqueranone cucha omío aja Judéa gosode, enga jogadi a u jne ujetiga ore chacãripise Dupade gai. 12 Yirajágo uje Judéa gosode ore chejnáreque daringai jmataque ome cuchade. Mu ujetiga yiríngo uaqueranone údi iji ore dirome enga jogadi u jne ujetiga cucha chonángone udore e déji ore to. Mu que gusu udore go, mu cucha uñai u uje a ore chacãripise Dupade gai to jne. 13 Enga a ore chicotapise Dupade jne uje ore chimo uje jé ũrepise uágome uacanguretigai iji yocangarádejnai Crísto. Enga a uacacaniratiguéode gajnesórone udore iji Judéa, jé iji ducuniri uñane a ore chicotapise Dupade to jne ome uaqueranone udore. 14 Enga a ore catecãrápoi Dupade ome uaque to jne rĩ. Chamáñaje a ore chimo gu uje Dupade angúroméone u uaque ome picaniratiguédatéi ome raque, enga a ore chijnorapise uaque to jne rĩ. 15 Dupade guerani ome yoque suépise dequeranone gáyode jnese ga que qué yirajágo yocuru quitíguiji rĩ. Jecute yicoi enga yacãcopise Dupade gai ome derani cucha daté uté ome yoque.
1 Páblo jé uyu uje yijna Crísto isocade aja uaque. Uje que yujuseque uaque enga osõrataguipise yu ome uaque. Jecute yijócha uacajéode údi ujetiga angachopísi yu. Uje yudute ore ojñane ome yu uje chiese yugúsiji uacari ga paraguipise yu iji uacari. U mu chiese yiji iji uacari ga idája yu iji uaque, ga chiese yécãre yisocade ga e josipierãque yu. 2 Jecute uacuñéngo chuse dáyipierigui guio ome yu. Enga ore cha chaguhéta cuchade yibai. Uje chiese yedu yáyipie ayoredie enga chiese cucha bisidéguei Dupade áyipiedie ome yu. Ujetiga ca ore cha dáyipiedie udire enga a yĩri jne enga a yingo yu aja ore jne enga a yĩrarare yibai jne. Enga a yo josipieranguipísiji yu jne ome udore ore. 3 Jé ũré uje ayorepise yoque to, mu que yijnángo ayoréode jmapiedie ome yocajnéone pocaninga to iji Dupade iroquéode gai. 4 Chamáñaje yocõrachade que u ore õrachade go. Mu Dupade guẽrate yocõrachade ome yoque ome yocajnéone pocaninga. Jecute yocõrachade que cuchárique chisa dejórique ome. Enga inoningáco Satanas josipiédie jnese ome yocõrachade udore. 5 Ujetiga pacajnaqué tátique déji, jeoga páyipie gajnarénguenie déji enga chãraque Dupade yui ome gosi mu yinoningáco udore ore to. Enga yujnuéngo páyipie ayoredie gáyode jnese ujetiga gusu pangaranei Crísto áyipiedie. 6 Enga e dimane yógome udore ore jnese uje angoninguite parique ore ome Dupade adode, ujetiga yoco ore quique. Mu cucha amiri tu ujetiga angáchoi yoque enga átayo uágaja yoque to ome yocaquĩraquéode ome udore ore, ga yinoningáco ore angoninguite paritigade jnese. 7 Cachi uacajirique pibai ayorei isocade gatuaque, mu que ajichopise gosi áyipieraque isocárigo. Ujetiga arajayópise uágome Crísto uje gajnenguipise uaque enga jé cho yoque to. Yanguretagopise yoque to ome yocuringáringo Crísto gajneque. 8 Que yajéngome yuruode go uje yingo yuringai Dupade utocáite aja uaque. Chamáñaje Yocangarádejnai guẽrate yocuringai pangarate ome yoque gu ujetiga angáchoi yoque. Gaidi u gu ujetiga yatatago uruode ome uaque ujetiga aquérañoji uruode. Que chiroque yógaja uaque gu ujetiga yoco yoquijosipié ome uaque enga ca atirócho yoquijosipiérigui. 9 Que yipotigádi tu to ujetiga yurusarane chajuque uacagutéraque. 10 Yiraja uje ore dojnóngaja yu enga ore chojninga: “Irajatáquedaté Páblo uté enga urusarane quigode etócho ome uaque. Mu a dirase ga a ajichósirase mu cucha bisidégape enga que bisitique pijoque ome darúrique.” 11 Mu uté gosi uje urúo udore ome yoque, ga yipótago ujetiga chiraja to uje yocurusarane quigode uje tṍraji quedéjnane ome uaque, a jé upúsu yocadode quigode jne ujetiga yugúcoji uacari. 12 Que yoco áyipie catadéode udore ore uje ore chicotapise raque ome dadode uje chiese ore atígo omío. Enga ore chatingára rágaja dojode ayoréo. Chamáñaje que cucha onique tṍraji ore isocade udore gu. Yirajágo gu uje Dupade isocade u ujñapetade, jé basa ayoréode uyoque que yoquisocade ujñapécho go. Jecute que yatingáraco yógaja yocujode ayoréo iji de jnumi. 13 Uyoque ujetiga yicórase enga yisigorase yoquibáyode ome cuchárique mu a jé yocajnenguipisirase cucha dacadi uté. Chamáñaje Dupade u gu uje chingo yoquisagode jogadode aja yoque. Enga Dupade u uje chiroque yógaja Corínto gosode uaque to nanique. 14 Jecute que qui tu ore uruode gotique uje chiese ca yocajneque Corínto gosode uaque to. Mu yocajneque uaque to uje Dupade ichapite yógaja uaque nanique. Bajade u yoque nanique gu uje yatatago Crísto ujnomei ueradéjnane ome uaque. 15 Que yijnójo yógaja pisaque quedéjnarique go ujetiga ca yocajneque. Mu yiroco uaquei ujetiga uacanguretigade quérã gaté iji Dupade enga yicopo uaque jne rĩ, ga yátagopo cuchade aja uaque to jne rĩ. Mu u jne ujetiga Dupade jé ichapite yógaja uaque. 16 Mu que gusu ujetiga yicórase uaque mu yiñóñangorásiji uaquéchai ujetiga yatatago Crísto adode ome diquidai uñane ujetiga Crísto chiqueta udore ore to. Mu que yocajéode u go ujetiga yimeco yógaja Dupade utocaitígo ujáningo uje Dupade e chicha ore iji diquidáyode udore gu. 17 Ujetiga unere picotaquérique yui ome uaque gosi ga jé ca chicota re, mu uté gosi doi enga chicota Yocangarádejnai. 18 Chamáñaje cáma pijoque uté gosi ome Dupade gu uje chicotapise re. Mu ibijoi u uté gosi ome Dupade uje Yocangarádejnai chisipise gosi gai ome ate goningane.
1 A jé yatata yadode ome uaque jne. Yiraja mu uje chi ca cuchárique tṍraji yoquicotaquéode ome yoque. MMu adotáyo uacajéode ome yu jne. 2 Chamáñaje yijnorapise uaque gu, enga yetaque ujetiga angáchoi pacadisõre unejátigo. Enga jecute yocãra uaque. Mu garani u Dupade uje yocãra uaque. Chamáñaje e yingome uágaja Crísto nanique gu ujetiga gajneque uaque to. Enga ujetiga eso jne enga uacajnua tu gapua uje chachai dajmasṍri. Jecute a gajnarenguipisirase ujetiga eso mu e uacagúsoji uñai gari. 3 Uacarajáyo uje Satanas chacája ugai nanique enga chãra yocaté bajé Éva nanique ome daringaquéode. Jecute yitodópisa udojo ome uaque ujetiga jnanione udore ore chãra uaque to ome dacajnaqué tátigo. Yiraja uje jé ũrepise uágome uacajnoraquei ica ome Crísto. Enga que uacáyipieraque déji cucha uñeque ica. Mu itodópisa ujetiga e écãcho uacáyipiedie quitígo enga angáchoi pacaditíga tágode udore, enga oyópise jmíti, jmíti ome Crísto. 4 Yiraja uje uacacadisõre tágode udore ore chacate uaque enga que arañíñome ore acajnaquéode quitique ome uaque. Ore chatata Jesus quedéjnarique atígo ome uaque, mu unejácho ome yocangarádejnai Jesus adode uje yacáco uágome ica. Ujetiga amesecho udore ore acajnaquéode enga a pujopiéraque chisírase uaque, mu pujopie quedéjna enga que Dupade Ujopie Espíritu Sánto u go uje díji uaque ica. Chiese ore acajnaquéode u páyipie omenie quigode to, mu udire que cuguésõri uacadudi casodicáite go uje piquetatoi páyipiedie udire nanique ome uaque. 5 A oyo cucha datepísiji pacadisórone udore ore jõ. Enga a ajoso ati Dupade iroguipísode u udore ore to. Mu ome yajéode ga a ca udore ore sué yibai, uje uacoyo pangarádejnai iji ore múñi. 6 A ca yiraja puru unénique ome yacajnaquérique mu unérone upúsu yirajatigade quigode. Enga e uacapañáñoji yoquirajatigade quigode to gatuaque ica uje ugúcoji uacari. 7 Uacamóño uje yise uáguiji taningane ica enga yacate uágome Yoquiquetangóri adode ica enga que yutai uaque ome cuchárique ica. Enga yijmátapise aja yisagode iji uacajade ica. Mu que cucha gotique ome yu uje yigaidi tu gu ujetiga yijosi uáguiji gaté ome yadode udore. A ajoso ati yate gajnarécho udore jõ. 8 Mu yagutíñamáinone u yujode Dupade anguresõre iji diquidai uñane ica. Enga yibosode u ore gueranone cucha udore iji yisagode gáyode iji uacajade ica. 9 Uje cuchade chona yu iji uacajade, mu que yingo yu aja uacuñeque go. Yigaidi tu gu ujetiga ca arañíñome yu ome yutaitique cucha iji uaque. Mu udojo quigade ga yoquijorane Dupade anguresórone ore díji Macedónia ga udore ore u uje yagutíñame ore uje ore doi oré tome cuchade uje chona yu ica. Enga yadode u udore iji uacajade gatuaque ujetiga ca uñeque narañime yatique. Enga a jé yadi u yadi udé gatuaque jne uje que yipota ujetiga ẽcho cucháringome yu to. 10 Yirajápise uje Crísto ate uréone irajasõripísi tu yu. Enga yirajápise to rĩ uje que togome uñeque ujetiga chĩro yirasitigai ome yisocade udore uje yacate uágome Crísto adode, mu que yutai uaque gotique. 11 ¿Ga ajoso yipojnaquéo ome yuruode udore a? ¿Jeoga ajoso ati yetaque uágome yuruode udore? Ungare. Dupade u uje chirajápise uje yijnorapise uaque. 12 Mu a jé yiji yisocade udore údi ome uaque jne uje yacate uaque, mu que yutai uaque. Yigaidi tu gu ujetiga udore ore ca ore chiraja daru quitíguiji yu ujetiga ore chojninga: “Yoquirasique yoque to uje Páblo uyoque jé yoco ñane uje yajo uaqueranone cucha uje yacáco uaque.” 13 Yirajágo uje pacadisõre tágode udore ore chopise Crísto iroguipísiji raque, mu taque ore. Ore gaidi tu paringaquéode ome uaque. Enga que Crísto iroguipísode jõra udore ore gotique. 14 Mu que gusu paringaquéode iji udore ore go ujetiga ore cho re iji cuchárique. Chamáñaje Satanas chiraja to gu ujetiga cho re iji cuchárique. Jecute cho Dupade iroguipísode uñai tiji re enga chopise udore ore uje ore jogadi u direcaringuei ajei. 15 Jecute Satanas ajnasórone udore ore gaidi u dangaráni tuté jmapié. Enga ore cho ate omíji raque iji uacajade. Mu a jé ore gajneque dapesudode udore jne ujetiga ore chise deruei. 16 A oyo ũruso iji yu, mu a qué yatatapo yadode ome uaque jne rĩ. Yiraja uje chi gajnareque ujetiga gosi chicota re, mu ujetiga ajoso ati yicotaquéo yuruode ome yu, mu a jé yatata yadode jne ome uaque. Chamáñaje yirasitigai déji yu gu ome yadode uñane. 17 Yocangarádejnai iroque yu jecute uté uruode u yatatagode. Mu a jé qué yijnimape yuru garósirigo to jne ome uaque uje yatata yadode ome uaque. A oyo dicotare iji yu, mu a yingome uaque jne cuchade uje pésu yuringai dicotare udé. 18 Yirajágo uje uásejna ore uje dicotare ore ome dapesudode cucha iji erámi tudé. Jecute a yingo yate bajade ome uaque to jne uje dicotare yu to nanique ome yadode udore. 19 Uje chiese irajatáquedaté uaque, mu adotáyo uágome ũrusórique ojñáringo ome uaque. 20 Uje udore ore cho dajosipié ome uaque, mu jé uacadotáyo uágaja ome ore josipiédie udire. Udore cachi ore pose uaqueranone bisideque uje que ore isatique oréraque cuse. Enga ore cho dajnénguiji uaque. U mu que ore áyipieraque déji uacangoningárique ome uaque. Ujetiga ore chinguirarása dajmana ocorodie aja uaquedodie, mu a jé boyórase uacajnoraquei tuté údi ome ore. 21 Ise enga pajegátigai déji uágome yoque uje que yicoi udore ore jmapié noñánguenie ome uaque. Jecute dicase udore ore ome dacotaquéode ome raque. Mu jé basa enga a yo dicase iji yu to jne ome yicotaquéode ome yu. Enga a yo áyipie eyúgode udore ore jne. 22 Ore cho judío iji raque, mu judíopise yu to. Chiese Israel gosipise ore, mu Israel gosipise yu to. Chiese ore garãpi u yocai jnani bajai Abraham, u mu jé yarãpípise to. 23 Ore cho Crísto iróguiji raque, mu uyu upúsu iroguipísi tome ore, enga yujnué udore ore gáyode. Mu gajnareque uje yisi yibai ome cuchade udore. Mu ũrepísi tu yu uje yisagode ome Crísto suépise udore ore isagode gáyode. Chamáñaje yo yiba adode gu. Yajnéone paquesupite sué udore ore gai. Adi jé u uje yuringai pujurúgai sué ore gai rĩ. Enga yajniapóji pitoringai ejode to gatuaque rĩ. 24 Yajnéone e chejna yijmanai uje judíode ore chisa yu, ga ore chaquesu yúdode. Enga ore inguirane u 39 aja yu. 25 Gadioc uje ore chisa yu ga ore chinguíra pidode aja yúdode. Jé basa chojmára uje ore chimitingare yúdode ome cucaranenie uje ore gaidi u gu yuringai chuque. Gadioque uje yibíode cucode pero yúdi iji yote quedéjnai ajéode uje yiji Dupade uruode údi aja diquidáyode uñane. Iji udore uñai enga yoquibi cuco peróji yote quedéjnai ajei enga yejnai dire chojmara, dejaque chojmara rĩ iji yote quedéjnai ajei. 26 Uásejna yiriguitigade uje yiji Dupade uruode údi aja quedéjnane. Enga yiraja uje cucha ũrosode déji yiquéode. Socaseti yibasaja yote quedéjnarique, jeoga oriechoquírigo toria yugúcharigo, jeoga yurásade ore cho damajo yu, jeoga purása quedéjnane ore cho damajo yu rĩ. Jeoga cucha dacate gajnarétigo tṍraji yu iji guidaidatéode uñéngo, jeoga tṍraji yu iji yiquitique erãpe, jeoga tṍraji yu iji yote quedéjnai ajénique. Jeoga uñéngo cho yocujode Dupade anguresõre iji re ga ore pésu yujurérigui. 27 Yisagode suépise yibai iji ujade, enga chijna yu aja jnumi. Uásejna dejade uje que yimópo to rĩ enga yejnarenguipise moi isagode ome yu. Yejnarengápo chaguhei ome yu rĩ. Yejnarengápo yuyádode rĩ. Yopo yuyaque rĩ enga jiei dejade ome yu. Yejnarengápo tejnuringane ome yu rĩ. Yijmátapo rĩ ome piguidedie. 28 Que gusu udore mu cucha uñane qué déji uje cáma yatata to. Mu cuchiyi tupúsu yayuguhebátigadatéode ome yujode Dupade anguresõre uaque iji erámi. Enga yayuguhebátigade udore chise yu iji deréjnane jnese. 29 Ujetiga yujórique Dupade anguresõre uje garósi anguretigai pésu cucha gajnarétique enga chejnáreque re ome dapesudode udore enga yadi jé u. Yejnáreque yu to ome uté gosi ipesutígo. Ujetiga gosi chijna dãjorárique aja cucha gajnaréngone enga chinguĩra pajegátigadatei taja yu. Chinguírapo pajedotáninga taja yu rĩ. 30 Que yicota yu go ome yimanitígo cucha, mu yicota yu gu ome yajnéone cucha gajnareque ponáyone uje sué yibai. 31 Mu yocangarádejnai Jesucrísto dayé Dupade u uje jé tiógarapísa daringai picotaque iji deréjnane jnese. Enga uté u uje chirajápise yu uje jé ũrepise yu ome yojñane udore ome uaque. 32 Qué yatatapo cucha uñeque ome uaque rĩ. Uje yugúsiji Damásco ica, enga eduguéjna cuchábi Arétas iroguipísi chiroque soldádode aja guidai ujuyaquéode piagode. Pota gu ujetiga ore chisa yu ga ore suru yibai. 33 U mu yujode Dupade anguresõre ore chosõre yu ga ore jno yúdi aja ore ujuyaquéode piago catadei iji ójo. Enga ore na yu aja dora ijnac ojo ajei, enga ore chigaru ducarigode aja dora eruéode enga jé u uje ore jno yúdi aja jnumi. Jecute yapídome eduguéjnai irógode udore ore.
1 Que cuchárique tṍraji ujetiga ayorérique chisi dabánique. Jecute ca oyo dicotarechoquíji yu ome yojñane udojo jne. Uje que toc ujetiga ca yatata Yocangarádejnai gueranone yenomicho ome yu uje chingopísa cuchade quigode aja yu. 2 Yimo jnanione uñai to uje changureta yocangarádejnai Crísto. E sequeredie gagájni iji yirídai iji quigade uje Dupade jno jnani udé údi aja gatajnoquei uéchai. Que yimo ujetiga jno uté ao ayorei údi, jeoga ca jno aoi údi. Mu Dupade u uje chiraja. 3 Que yimo ujetiga jnani uté jé chise Dupade idai tome daoi, jeoga ca ao ayorei nóna to. Mu Dupade u uje chiraja. 4 Gusu yirajai tu uje Dupade jno údi aja dedai ijõri. Enga uje déji uta enga Dupade chingo daru dapoguiédode aja uje que suréga ome ayoré uñeque ujetiga doi ga chatata. 5 Jé tiógarapisarása yicotaquérigo ome jnani tuté. Mu que dicotare yu ome yu go, enga que yisi yibánique ome cuchárique. Mu gusu yajnéone cucha uje sué yibai ujetiga yicota yu ome udore. 6 A yisírase yibai mu a jé tiógarapisarása. Chamáñaje jé ũrepise yatatagode yacho gu. Enga a ca yorase dicotarechoquíode uñane uje ore chicota re bisidec iji dore. Mu que yicota yu go. Yipota ujetiga pimo yipesudode bajaque enga pududicho yacajnaquéode bajaque rĩ. Enga jogadi u jne ujetiga gosi pésu dáyipierigui ome yu. Que yipota ujetiga uñeque chajnerame dacotaquédatérigo ome yu ujetiga jé yigarabío gu. 7 Yenomicho udore ga cucha pitijácho. Enga cho ujetiga cucha datepise yu ome Dupade uje chingo cucha pitijádode udore ome yu. U mu Dupade que pota jetiga dicotaripise yu ome udore. Jecute Dupade juéga yu ome Satanas ujetiga Satanas cho dajosipié ome yu. Enga uté josipiédie dosopísaja yu enga gajnui u ojnatique ujetiga chichagu yútique. 8 Gadioque uje yicatecã́ri Yocangarádejnai ome yu ujetiga chijocãrape Satanas josipié dosóguedie iji yu. 9 Mu Yocangarádejnai chojningame yu: “Bajnei tu yijnoraquei tome ua. Enga jé gusu. Enga que cuchárique chonapo ua gotique rĩ. Yujopie etotiguei pijoguipise aja guesode iji udore ore uje ore chejnáreque re gatuaque.” Jecute yirasique yu uje yejnáreque yu. Yipotigádi u gu ujetiga pijoguipise yocangarádejnai Crísto ujopie taja guesi tiji yu. 10 Jecute yachietáji yu uje cuchade udore chinguíra yu aja jnumone. Uje ore uruode gajnarenguipíso ome yu, jé u to uje cuchade chona yu, jé u to uje ore cho damajo yu, jé upo cucha gajnaréngone jnese rĩ uje tṍraji yu uje yatata yocangarádejnai Crísto adode. Uje cucha gajnaréngone udore chinguíra yu aja jnumi enga yetotiguei garosipise, mu jogadi upo rĩ uje Dupade chorei detotiguei aja yu enga yuringai etoguipise jogadi e u ome Dupade adode. 11 Yo ũrusode uje yicota yu ome yate omone udore. Uaque urásu ujetiga uacarúrigo omío ome yisagode cucha ome Dupade. Mu uje que uacarúrique omaja yipesudode udore, enga gusu yu ujetiga yatata quigode. Yiraja uje que yugúsiji cuchárique ome uaque, mu uyu u uje yujnuépise uacajnane udore uje ore cho Dupade iroguipísode iji re. 12 Uje yugúsiji uacari ica ga que yujuseque uaque ica enga yinejepúsu uacádode ica. Yuringai Dupade iroguipise obiréjna gu yipesudode cucha pitijabácho iji uacajade. Jé basa a ca Dupade iroque yu ga a ca toguirase ome yu ujetiga yipésu yipesute cucha datéode udore iji uacajade. 13 Que yécãre yijmapiéraque ãrie ome Dupade anguresórone uaque jnese go iji uaquedáyode jnese. Gusu uje yujode Dupade anguresõre uñane iji diquidáyode ore chosõre yu ome deranone cucha. Mu ujetiga uaquetépidi tu uté iji yu enga beyoi enga ayáyo jne. 14 Qué yipésu yu ome uaquei ujetiga yisápo uaque rĩ. Gadiogué a e udaque jne ujetiga yise uaque. Mu a ca yutai uágome cuchárique jne ujetiga yugúsiji uacajade. Chamáñaje que yucuegode u uaquẽratígo cucha ome yu go. Mu yucuegode upúsu uaque. Chamáñaje uacoyo yabode gu. Uacarajáyo uje jnanírique que agutiyamáite dababi go. Jé basa ababi agutiyamáini u dayé. 15 Yucuei tu uacangoningádatérique ome Dupade adode, ga que cho cuchárique ome yu ujetiga yejna yiplátarigui jnese iji uaque, jeoga eyuguipise yu iji Dupade iroquéode iji uacabáyode. Mu yo yáyugu yu uje cachi yijnoraquei quérã gaté ome uaque, mu ome yajéode, ga uacajnoraquei jé doi jnumi, jé doi jnumi ome yu jõ. 16 - 17 Uacuñane chirajápise uje que yagu uaquẽratique cucha go uje yugúsiji uacari. Mu uacuñane chojninga: “Taque Páblo. Tagu uaqueranone cucha to ẽrie. Jecute chiroque darógode udore uñane aja uaque ujetiga chamáta uaqueranone.” Enga chiese yaringaquéode u udore ome uaque. ¿Enga ajoso ati yigaidi tu yaringaquérique ome uaque diríca ya? Muje yiroque yirógode aja uaque diríca. 18 Jé ũré uje yingome Títo diríca ujetiga chajmita uaque. Enga yiroque yoquĩjorai Dupade anguresõre uñai aja quigade diríca. ¿Ga Títo charingacãre iji uacajade diríca ya? Ungare. ¿Ja ca ũré yu a? uje Títo uyoque jé yoco ñane ome yocáyipie omenie ome uaque, enga yujucópise yoquio jnese, uje yugúcoji uacajade. 19 A ajoso ati cachi yoquĩraraque yoquibai iji uacaquei, mu que qui u go. Mu yocuruode gajnesṍri upúsu Dupade uje chiraja uje Crísto iroguipíso yoque. Mu yijorane uaque a, yoquigaidi tupúsu ujetiga aquéraño iji uacanguretigai iji Dupade ome yocuruode udore. 20 Yitodo ujetiga yico ñane, mu yocajéningo noñácho ome ñane atígo. Yitodopo rĩ ujetiga pibotaqué gajnarétigo déji uaque ome ñane, jé upo rĩ ujetiga aratáyiñome cuchade ome ñane, jé upo rĩ pájningaringo rĩ ome ñane, jé upo rĩ ujetiga uacuñéngo jnaripise cuchade ome raque, jé upo dara pijnimingone rĩ ome ñane, jé upo piyoguéode ome ñane rĩ, jé upo uacajosipiedie ome ñane jne rĩ, jé upo rĩ ujetiga ca angachopísi ñane. 21 Yitodópisa ujetiga yise uaque ga pajegátigai déji yu ome Dupade ome uaque jne. Yitodopo rĩ ujetiga anguíraño pujnusiétigadatéi aja yu enga yibo jne. Yiraja gu uje diyajmaque uacuñane uje uacapéso cucha gajnaréngone nanique. Enga cáma ayáyo uacasoca gajnareque bajade ome punganingane. Enga uacasoca bajade udore jé aja uacasocade uñane qué catapísaja uaque.
1 A e gadiogué udaque dirome ujetiga yise uaque. Enga ujetiga yĩri enga a jé yiji Dupade uruode acajnaquéode aja quigode ome uaque jne. Uje Dupade uruode chósi te: “Quene pajire páyipierigui aja quitígo uje pududicho cucha dacadode quigode jnese ome pijogúsoningo jnanío, jeoga gare ore, jeoga gadioc ore.” 2 A e yaquĩ́rapo uaque jne rĩ. Enga yaquĩraquéode gajnengórone u udore ore uje ore pésu cucha gajnaréngone ica. Mu que gusu ore go. Jé yaquĩraquéode gajnengórone u uaque jnese. Enga yaquĩraquéode que cãra re ome yaquĩraqué cásodica uje yugúsiji uacari ica. Enga yaquĩraquéode quigode u udojo: ujetiga jé uacate uje que angáchoi yu, ga a yĩriápo jne rĩ enga jogadi u jne ujetiga ca yagutu yurúrique ome uaque. 3 Yiraja uje uaquetingaraque yu ome yuringai Crísto utocaidipise. Mu a yise uaque dirome enga a ca potigayaquérique dépoji uágome yu dirome rĩ. Uje a Crísto chijnápisa yibijnani tome uaque dirome. Enga que cucha bisidégape Crísto go. Enga uté u uje chiraja dasocade ome uaque. Enga a chingo daringai pujnuéngaisõre aja uaque dirome. 4 Jé ũré enga ore cho cucha bisidéguiji Crísto nanique, enga ore chajo aja curesei gai. Mu Dupade chiringare ome dajopiedaté etogué enga ecáji deréjnane udojo. Uje ore cho cucha bisidéguiji yoque, mu jé yoco uté uje ore cho cucha bisidéguiji to nanique. Enga Dupade ujopie tuaté u to uje dépisiji Crísto anguresórone yocari iji deréjnane udojo to. Enga Dupade ujopie tuaté a jé jõrai u yu dirome aja uacajade. 5 Beyoi enga ajichopise uacadode aja quigode ujetiga etócho uáguiji uacanguretigai iji Dupade, jeoga ca etócho uacanguretigai iji. Jé etingachopise uaque. Ujetiga ca arajáyo uje Crísto dépisiji uacajéode enga imoi tu uje uacoyo udore ore uje ore cho Dupade anguresṍri iji re, mu Dupade que anguresõre ore go. 6 Mu yipotapísa ujetiga arajáyo to uje que taque yoque go ome yocanguretigai iji Dupade. 7 Yicatecãcoi Dupade ome uaque ujetiga ca apéso cucha gajnarétigo. Que yoquigaidi u go ujetiga ayorérique chojningame yoque: “Omío Páblo acadigode ore adode.” Mu a uneriras ome yoque ujetiga beyoi pate goningáringo ome uaque. Mu que cuchárique déji ujetiga ca picotaque yoque ome yoquisatígo iji uacajade. 8 Ujetiga ũré cuchárique enga que toc ujetiga pumuchayac. Jé basa enga pocojña omone garãpié u cucha ũré tuté ujetiga pangurete ome uñane to. 9 Yoquirasiguipise yoque uje eyuque yoque iji yoquisagode gáyode, Dupade iroquéo, chamáñaje yocajegaidi u gu ujetiga yimóngo uacaringane Dupade anguresõre etoque. Jecute a jecucha yicatecãcoi Dupade ome uaque jne ujetiga eso uacaringane ujñapetácho to ome Dupade. 10 A yibágui uaque to jne mu qué yiroque yurusarane udojo aja uaque bajaque. Yigaidi u gu ujetiga angáchoi yaquĩraquéode bajaque ome uaque enga ayáyo uacate gajnaréngone udore. Enga yĩri jne, enga a ca yurúrique dosója uaque jne. Chamáñaje Yocangarádejnai ipesute yuringai pangarate gu ome uaque. Ipotigádi u ujetiga yijosi uáguiji gaté ujetiga aquéraño iji adode. Jé basa que ajéode u go ome yu ujetiga yijosi uáguiji jnumi. 11 Yijorane uaque a, yajéode u ujetiga tijode cho jnangome uaque iji uacajesúode. Yajéode upo rĩ ujetiga uacacuegode u uacaringáringo ujñapetácho ome Dupade. Yajéode upo rĩ ujetiga uacajneque posõraquéode to. Yipotapísa to ujetiga jé ca etácho ñane, mu jé uac upúsu uñane enga pajesereringai déji uágome ñane. Enga pajesereringai, pijnoraquei guẽrasṍri Dupade a dépisi uacajade jne. 12 Angoñopísa uacarasitigadatei taja ñane, enga acho uñane uredie uje Dupade anguresõripísode u uaque gu. 13 Uacojode Dupade anguresõre ore iji de ore pota ujetiga yurúsarome uaque uje qué ore chiroque darasitigadatei taja uaque to. 14 ¡Yipesupu ga yocangarádejnai Jesucrísto chacacãre cucha omone ome uaque jnese jõ! Enga arajayórase ome uaque Dupade ijnoraquédatéi ome uaque, enga Dupade Ujopie Espíritu Sánto nonapísa uágaja quedéjnane jne jṍra. Amen.
1 Jesucrísto irógode uñai u Páblo uyu uje yiroque purusarane udojo aja uaque. Que ayorérique ajegáite yu ujetiga yiji Jesucrísto iroquéode, mu Jesucrísto jé upúsu uje ajegáite yu ome udojo. Mu que gusu Jesucrísto, mu yocai Dupade uje chiringare Jesucrísto iji uringai toque quigade uté jé upúsu to uje pota yu ome dabi iroquéode. 2 Yurusarane gajnengórone u Dupade anguresórone uaque jnese iji uacaniri Galácia údode. Enga yujode Dupade anguresóño iji de ore pota jeta yingo ore irasitigade aja uaque to uje unere uaquéode ome yoque jnese. 3 Yajéode u ujetiga yocangarádejnai Jesucrísto, dayé Dupade ore chatapísaja uaque, enga ore chisi ome pajesereringai ome uaque to. 4 Jesucrísto doi yocai Dupade áyipiedie ome re nanique, enga tẽra re ujetiga chuque ome yocate gajnaréngone. Gaidi u gu ujetiga chiqueta yógome erámi tudé josipié gajnarénguenie. 5 Jecute beyoi gajneri ga yisigopise Dupade gai iji deréjnane jnese ome ipesute datéode udore ome yoque. Amen. 6 Yopise yáyugu yu uje chi jĩrique écãcho uacáyipiedie. Uje chi e que angáchopoi uacabidisṍri Dupade rĩ uje chosõre yoque gu Crísto adode ome yoque. Enga chi e uacangáchoi pacajnaqué quedéjnarique uje chiese piquetaque uágome jne. 7 Mu que pacajnaquei uñeque déji siñeque go ujetiga yiquetágo yógome. Mu uñéngo a déji uacajade jõ uje ore chãra uaque enga ore chécãre pacajnaqué uréone quitígo, uje pacajnaqué uréone udore chacate yoque uje gusu Crísto ujetiga chiqueta yoque. 8 Mu ujetiga gosi, jeoga uyu u, jeoga Dupade iroque gaté unirisõre, doi enga chacate uágome dacajnaqué quedéjnarique uje unejángome yocacajnaqué cásodica ome Crísto uringai yoquiquetasõre, enga jé arec ujetiga pujuyápise uté gosi jne iji deréjnane jnese. 9 Qué yingo uaque gaté rĩ. Ujetiga gosi doi enga chacate uágome dacajnaqué quedéjnarique uje unejángome yocacajnaqué cásodica uje e uacamesecho ica, enga jé arec ujetiga pujuyápise uté gosi jne iji deréjnane jnese. 10 Uje yósi tome uaque, enga que yucuei tu go ujetiga asíyo yibánique, jeoga oyo ũrepise iji yu. Mu yucuei upúsu ujetiga Dupade irasique yadode. Ujetiga yucuegode urásu ujetiga yujode ayoréo ore chisi yibánique enga chorase ujetiga yo yirósõri iji jnanione udore. Enga e que toguirase ujetiga Crísto chopo daroi iji yu rĩ. 11 Yipota ujetiga arajáyo to uje yacajnaquéode ome Crísto adode que garani u jnanione gotique. 12 Enga que yujórique ayoré acadique yu ome pacajnaquéode udore to go. Mu Jesucrísto jé upúsu uje chacate yu ome cuchade udojo quigode. 13 A jé adúcho yujnoméone to uje qué yugúsiji yurásade judío ore áyipiedie quigode. A e arajáyo to uje yopise yumajo Jesus anguresórone nanique, enga yajéode u nanique ujetiga yejnápise udore ore jnese. 14 Uyu u irajataguipísi nanique ome yujode jnacáño ore ome judíode yoquijmapiedie. Enga que yiyópise yocayode jnani bajácho acajnaquéode quitique gánique gotique to. 15 Mu Dupade a jé ajegáite yu nanique iji yaté ajei ujetiga yiji iroquéode. Chijnorapise yu gu. Enga pésu dáyipiedie ome yu. 16 Jecute chise deréjnai uje Dupade chingo dajnacari aja yu to. Gaidi u gu ujetiga yiji Ujnacari uté ujnomei údi ome ducurása quedéjnane uje piquetangóri tu. Uje Dupade chiroque yu aja udore enga que yetatique cuse go, enga que yucué yujórique ayoré áyipieraque gotique. 17 Enga que yicabíji Jesus irógode uñane to go uje ore déji Jerusalen uje bajac ore ome yu ome Dupade iroquéode. Mu jĩrique yijnare yu aja ore uniri uje i tu Arábia. Udojo quigade enga yajniapo aja ore idai Damásco rĩ. 18 Uje yejnanie sequeré gadioc iji ore idai Damásco ga quene u uje yicáji Jerusalen, enga quene yimo Pédro to iji uté. Enga yácariji uté gari iji dirode uje chejna yirídai. 19 Mu que yimo Pédro ujode Jesus irócho gotique. Gusu Yocangarádejnai desaguipísi u uje yimo to uje uté i u Jacóbo. 20 Jé ũrepise yurusarane udojo quigode jnese. Enga Dupade chirajapise uje que yo yurupatáringa gotique. 21 Uje e yiji iji Pédro ore gari iji Jerusalen enga yicáji ore unirone uje íode u Síria, Cilícia ore. 22 Jecute Crísto anguresórone ore iji ore uniri Judéa que ore chimópise yu to nanique iji taningai. 23 Gusu uje ore chudute ore ojñane ome yadode. Uje ore chojninga: “Yocumajosṍri cásodica e jno Crísto ujnomei údi to. Potapísa ujetiga chĩro dojode ayoréo anguretigai ome Crísto nanique, mu e chacate ore iji dajesúode erámio ujetiga ore changureta Jesucrísto to.” 24 Enga uje ore chudute yujnomei tuté enga jogadi u uté uje Judéa gosode ore chacãre Dupade gai ome yu.
1 Uje yejnanie sequeré gagájni iji yirídai uje yiriguiji ducurása quedéjnane ore iji erámi enga Bernabé uyoque yibajopoi ore iji Jerusalen rĩ. Enga Títo nóna yoque to. 2 Yicáji Jerusalen gu uje Dupade chingome yu uje jé ajéo ujetiga yicáji. Uje gusu yu iji jnanione gari uje Jesus anguresórone ore cho dangaránone iji ore, enga jé u uje yo ore quique ome yacajnaquéode quigode ome ducurása quedéjnane uje yatata Jesus adode ome ore. Yigaidi u gu ujetiga ore chimo uje ueracho yacajnaquéode quigode enga ca potigayaquérique déji ore ome yacajnaqué casodé quigode ome ducurása quedéjnane. Jé u to ujetiga ore changureta yu ome yisagode Dupade iroquéo uje a yipésu jne iji dire gatéode dirome. Que yipota gu ujetiga ore cho cucha bisidéguiji yipesudode cucha ome Dupade. 3 Ore chiraja uje ducurása quedéjna yĩjorai Títo, mu que ore chiroque Títo aja go ujetiga picaque údode . 4 Jé ũré uje jnanione uñane ore pota ujetiga picaque Títo údode. Mu cachi ore cho Jesus anguresõre iji raque mu taque ore. Enga cachi ore chimere re iji Jesus anguresórone yocujade gu uje ore pota ore timíninga yógaja quedéjnane. Uje ore chudute gu uje chi e guesája cuchade yui jnese ome yoque uje yanguretágo Jesucrísto. Enga ore pota ujetiga yajningopo aja Moises urusarane cucha puyade quigode rĩ uje udore ujnuéngai yoque nanique. 5 Mu que pangarate udore ome yoque go. Ga jé yidotágo yóguiji yocacajnaqué uréone ome yoquiquetangóri Jesus adode. Chamáñaje yocáyipiedie déji uaque gu ujetiga gusu pacajnaqué uréone udore ome uaque ujetiga beyoi quigode. 6 Mu Dupade anguresórone angaránone udore iji Jerusalen que ore cho quique dacajnaqué ichárique ome yu go. Yojningane u udore ore uje yocujode Jesus anguresóño ore cho dangarádejnai iji ore. Mu que cucha ome yu ujetiga pangarádejna ore. Yiraja gu uje Dupade que chajire yocate guesiminórone, mu ajirigode u yocajéode. 7 Mu jnanione udore que ore chetaque yacajnaquéode quitique go, mu jĩrique ore chiraja uje Dupade iroguipísi tu yu aja ducurása quedéjnane ujetiga yacate ore ome yoquiquetangóri Jesus adode to. Ga adi jé u uje chiroque Pédro aja judíode to ujetiga chacate ore ome Jesus adode. Mu Pédro uyoque yocacajnaquéode quigode jé chojmára ome ore jnese. 8 Enga Pédro uyu yoquirósõri jé chojmára enga Dupade u, mu cãra yoquiquigode ome ñane. Chiroque Pédro aja yocurásade judío, jé basa chiroque yu aja ducurása quedéjnane. Mu cho Jesus iroguipísode iji uyoque jnese. 9 Jecute jnanione udore uje Jesus anguresórone ore cho dangaranipísode iji ore, ore chiraja uje Dupade jé iroguipise yu to. Yojningane u Jacóbo, Pédro, Juan ore. Enga udore ore chisi ome dajmanáyone ome yoque ga imoi jé u uje jé itojmárangopis iji jnumi. Enga ore ajéode u to ujetiga yĩjorai Bernabé uyoque yico ga yacáco ducurása quedéjnane, jé basa jé ore chacate yocurásade judío. 10 Mu udore ore cho yoquiquique to ome jmatágode ore ujetiga yosṍco ore. Mu jé yosõraque jmatágode ore gatuaque, enga yejna yu aja yosõraquéode ome ore. 11 Uje Pédro chise yóguiji ore idai Antioquia enga yiji enga yaquĩ́ra Pédro iji yocujode Jesus anguresóño ajei. Chamáñaje obiréjnapis ome yu gu uje gajnareque isocade. 12 Yetétigai tu uje Pédro taguíji ducurása quedéjnane gari iji taningai, mu uje Jacóbo irógode ore di iji yoque enga Pédro jĩrique cha uje taguíji ore gari. Pédro todo gu ujetiga ca udore ore chise adode unétique uje tagu iji ducurása quedéjnane gari. Chiraja gu uje judíode udore uñane ore chajo raja ujetiga picaque ducurása quedéjnane údode bajaque uje ore changureta Jesus, enga quene jogadi tu uté ujetiga Jesus anguresórone judío ore cháta rágaja ore. 13 Que gusu Pédro go, mu Dupade anguresórone uñane, jé aja Bernabé rĩ ore chirate Pédro aja ate gajnaréngone uje ore cha taguíji ducurása quedéjnane gari to. 14 Uje yimo uje Pédro ore isocade quedéjna, enga que cuguésõri pisoca omone uje pacadique yógome iji Dupade uru uréone, enga jé u uje yiborátaja ome ore. Enga yojningame Pédro iji yocujode Dupade anguresórone ajei: “Judío ua, Pédro a, mu bacha judíode yoquisocade aja ti yui diríca enga babé ducurása quedéjnane ore isocade. ¿Jecute jé gotique gu a uje bécãre ua enga e aroque ducurása quedéjnane aja ujetiga ore doi judíode yoquisocade to?” 15 Judíopise yoque enga que yoco ducurása quedéjnane ome ore ipesute gajnaréngone to go. 16 U mu yirajágo to uje que togome uñeque ujetiga chise daringárique Dupade imeseraque gu uje pésu Moises urusarane cucha puyácho. Mu gusu panguretigai ome Jesucrísto u uje pésu yoque enga Dupade cho dameseránguiji yoque. Jecute uyoque ga yanguretágo Jesucrísto to nanique uje yoquigaidi tu gu yocuringane Dupade imeserácho. Yirajágo gu uje Dupade chedu yocanguretigai enga que chucué gotique ujetiga yipéco Moises urusarane cucha puyácho aja quitígo. Uje a ca ayorérique déji jne ujetiga chise daringárique Dupade imeseraque gu uje pésu Moises urusarane aja quitígo jnese. 17 Ujetiga yicoi enga yanguretágo Crísto uje yoquigaidi tu yocuringane Dupade imeserácho, mu quigade enga yipéco pisijnaringuérique, ¿ga jé yoquisijnaringuéone udore garani u Crísto a? Ungare. Gajnarenguipisirase ome Dupade ujetiga gosi chojningárasa: “Yisijnaringuéone garani u Crísto.” 18 Mu ujetiga yiji enga yajningarase cuchárique, mu quigade enga yipesapo aja gaté rĩ, enga uté urásu ujetiga pésu yuringai máraque. 19 Mu uyu ga cho ujetiga yitoi nanique ome Moises urusarane cucha puyácho. Enga Moises urusarane jé upúsu uje pésu yu ga yopise togode ome ore nanique. Mu cuchade udore pésu re iji yu gu ujetiga e yedu Dupade iji yajei iji erámi tudé. 20 Uje Crísto cho daba yate gajnaréngone nanique ga cho ujetiga jé yibaya to iji itoringai uje ore chujé iji curesei gai. Ga e cho jetiga ca uyu upo uyu gotique rĩ, mu Jesus jé itojmárango iji jnumi enga yucuecaringué ichai tudé garani tu yanguretigai iji Dupade abi Jesucrísto uje chijnóra yu ga tẽra re ome yu ujetiga ore chujé iji curesei gai. 21 Enga que yetaque Dupade áyipie omenie udire ome yu ujetiga chiqueta yu ome dajnacari Jesus. Mu ujetiga Dupade chiquetárase yógome Moises urusarane cucha puyácho ga a ca cuchárique tõrarásiji Jesus itoringai tome yoque jeta chiqueta yoque.
1 ¡Galácia gosode uaque a, ísenga ca uacáyipieraque cus! Cho jetiga daijnárique chamacãre uáguiji uaquedai ome páyipie gajnaréngueringui ujetiga ayáyo angáchoi pacajnaqué uréone quigode. Uje uacadúcho Jesucrísto ujnomei nanique uje toji curesei gai ome yoque, enga pacajnaqué obiréjnapisode u udore ome uaque ica. 2 Jecute angoñome yu: ¿ujetiga Dupade chisi ome dajopie Espíritu Sánto tome uaque to ica uje qué uacagaidode u Moises urusarane quigode, jeoga chisi ome dajopie Espíritu Sánto ome uaque ica uje uacanguretáyo Jesus to ica uje uacadúcho ujnomei tiji yoquibijnanone to? 3 ¿Gotique gu a uje que acueyoi uacáyipie quique omone? Taningai ica ga uacamesechopise Dupade Ujopie Espíritu Sánto adode ome uaque. Mu iji de gajneri uacajéode u ujetiga ejnáño uaquetotigué ayoré aja Dupade adode. Mu que pisoca udore ome Dupade adode go. 4 ¿A ca cucha ome uaque uje uaquejnárecho uaque ome Jesus adode ica iji taningane? Ipesupu ga ca oyo cucha bisidécho iji uacasocade udore. 5 Uacarajáyo uje Dupade tẽra uágome dajopie Espíritu Sánto. Enga Dupade pesapo dapesute cucha pitijádode iji uacajade. ¿Ga pésu udore gu a, uje uacanguretáyo Jesucrísto ujnomei uje uacadúcho iji yoquibijnanone, jeoga pésu udore gu uje uacapéso Moises urusarane cucha puyácho? 6 Yocai jnani bajai Abraham angurenipíso Dupade uruode ome re nanique. Ga jé gusu Abraham anguretigai tiji Dupade uruode ome re, mu Dupade chimesere Abraham enga cho ayoré ujñapetáguiji. 7 Jecute yo quique yocai bajai Abraham ape disi ejopísode ome uaque jne: u ore uje ore changureta Dupade. 8 Dupade uté uje chisi ome daruode ome yoque, chiraja iji taningai nanique uje ducurása quedéjnane a ore chise daringane Dupade imeserácho to jne gu danguretigai. Jecute cho dáyipie omenie udire quique ome Abraham to nanique enga chojninga: “Abraham a, a yosongaquéode chise erámi unirisórone ore jnese jne gu ua.” 9 Uje Abraham changureta Dupade nanique enga jogadi u uté uje gajneque Dupade osongaquéode. Isocai jé u uté to ome Dupade anguresórone uyoque jnese. Uje yanguretágo Dupade enga yocajneque Dupade osongaquéode to. 10 Ore uje ore changureta Moises urusarane cucha puyade quigode jé ore yuque raque ome Dupade. Uje Dupade uruode chojninga: “Uñeque ujetiga doi Moises urusarane cucha puyade, mu cho uñeque gai ga jé yuque re ome Dupade.” 11 Obiréjnapise quigode: uje que togome uñeque go ujetiga chise daringárique Dupade imeseraque gu dagaidode Moises iroquéo. Chamáñaje ore urusarane Dupade urúo déji uje chojninga: “Udore ore uje ore chise daringane Dupade imeserácho gu danguretigai, ga a ore gajneque pucuecaringuei jne.” 12 Moises urusarane que chutai gosi anguretigai iji re go, mu utaidipísi tu gosi ipesudode. Chamáñaje ore urusarane Dupade urúo dépoji rĩ uje chojninga: “Ujetiga gosi dopísi yurusarane quigode jnese ga yiquetai tu uté gosi jne.” 13 Yirajágo uje jé yoquique yógome Dupade uje yiyógo Moises urusarane gáyode gu. Mu Crísto iquetaque yógome yocajnéone Dupade ujuyaquédatéo. Chamáñaje gajneque Dupade ujuyaquei tome yoque gu nanique, ga cho daba yocate gajnaréngone. Uje ore urusarane Dupade urúo déji uje chojninga: “Dupade ujuyaquéode gajnesórone u udore ore jnese ujetiga chuque ore iji curesérique gai.” Jecute yirajágo uje Crísto gajneque Dupade ujuyaquéode to nanique uje chuque iji curesei gai gu. 14 Crísto pésu cuchade udore gu ujetiga Dupade uruode ome Abraham tocade uje chojninga: “A purása quedéjnane gajneque yosongaquéode jne.” Jecute Jesucrísto anguresórone uyoque jnese yocajneque Dupade Ujopie Espíritu Sánto to uje Dupade jé urúo nanique ujetiga chirógaja yoque jne. 15 Yujode Dupade anguresóño uaque a, qué yope yacajnaquéode udojo gajnui iji jnanírique ujetiga chimate dáyipierigui ome dapotigátique cucha. Ga doi ga churúsãre quigode. Uje chimate, ga e chicha dei aja. Uje e chicha dei taja ga e que toc ujetiga qué pecãrai áyipiedie quigode. Enga que togapo rĩ ujetiga uñeque doi enga chinoningase uté áyipiedie quigode. 16 Gajnui jé u uje Dupade chimate dáyipiedie ome Abraham, ape disi ejórique nanique. Que Dupade uruode ojningane u Abraham ape disi ejo dipeséode ore jnese go. Mu ojningai u ape disi ejo chojmarai, ga ojningai u Crísto. 17 Yuruode quigode u udojo: uje Dupade chimate dáyipiedie ome Abraham nanique, ga que toc ujetiga qué chécãre dáyipieraque. Jé basa ga sequeredie 430 iji udojo quigade u uje Dupade chimate dáyipiedie ome Moises ome cucha puyade. Mu que toc ujetiga Moises urusarane udore doi enga chĩro Dupade áyipie bajedie ome Abraham ga ca cuchárique tṍraji. 18 Ujetiga gusu Moises urusarane ipesungórone ujetiga ore gajneque Dupade osongaquéode, enga e cucha bisideque Dupade uruode ome Abraham. Mu Abraham changureta Dupade uruode nanique, jecute gajneque Dupade osongaquéode. Enga Dupade chedu Abraham anguretigai enga que chucué ate uñeque go. 19 ¿Ga jé ca cuchárique tṍraji Moises urusarane cucha puyácho a? Tṍraji ãrie, udore u gu uje cho quique pisijnaringuéone quitígo ome yoque, enga yirajágo uje máraque yoque gu udojo. Mu eruei tu uje Abraham ape disi ejoi di uje uté gajnei Dupade áyipie omenie. Yirajágo uje Dupade chutṍri darógode ome Moises nanique ujetiga ore chatata cucha puyade quigode ome Moises. Ga jé basa Moises chajnerame darásade. Jé basa Moises urásade ore chutṍri Moises to ujetiga catecã́ri Dupade ome ore. 20 Cucha uñai u Dupade isocade ome Moises urásade nanique uje chutṍri Moises aja ore ujetiga chajnerame daruode ome ore. Enga que cuguésõri isocade ome Abraham gotique. Uje que angúromei u datocaitique ujetiga chingo dáyipiedie ome Abraham, mu Abraham icatecãraisṍri jé chojmára nanique enga Dupade jé upúsu. 21 Que yuruode qui tu gotique ujetiga Moises urusarane chinoningase Dupade uruode ome Abraham. Ujetiga Moises urusãratique dérasiji siñeque ujetiga chisírase pucuecaringué eyúgojmai ome yoque enga a jĩrique yicorási udore quitígo, enga yocuringane ayoré ujñapetácho a jé urásu ujetiga Dupade cho darása iji yoque. 22 Mu Dupade uruode cho quique uje pisijnaringuéone isaque erámi jogosórone uyoque jnese, enga que toque guetique ome yoque. Mu uje yirajágo udore enga jogadi u uté uje yajico Jesucrísto yui. Enga jé u uje Dupade uru diyajmane ome Abraham tocade ome yoque gu yocanguretigai ome Jesucrísto. 23 Mu uje cáma pacadique yógome panguretigai quigode, enga gusu Moises urusarane ome yoque. Enga cho ujetiga Moises urusarane udore suru yoquibai jé aja ujetiga Dupade chingo dáyipie omenie ome yoque ujetiga chiqueta yoque gu yocanguretigai. 24 Cho ujetiga yoquirodisṍri tu Moises urusarane nanique ga yocajnui tu disabi iji udore jmáinie ujetiga yicoi yoquirodisṍri uté iroquéode. Mu uje Crísto di enga Moises urusarane e toi ome yoque ujetiga e yico yocuringane Dupade imeserácho gu yocanguretigai ome Jesucrísto. 25 Uje e chise deréjnai uje yanguretágo Jesucrísto enga e que yoquirodisṍri upo Moises urusarane cucha puyácho rĩ. 26 Uacanguretigai tuté ome Jesucrísto u uje Dupade cho dabi iji uaque jnese. 27 Uje e uacanguretáyo Jesucrísto ga ore tṍra uágaja yodi, enga e apijócho uje uacátayo uágaja Jesus ga e uacatojmáraño. 28 Ga e que cucha go ujetiga judío yoc, jeoga purása quedéjna yoc; jeoga ayoré ataque yoc, jeoga pisaque yoc; jeoga chequé marínga, jeoga jnani marínga. Jé yocopise ñane ujetiga yanguretágo Jesucrísto. 29 Ujetiga Crísto gajneque yoque ga jnani bajai Abraham e ape disi ejo yoque to. Ga a yocajneque Dupade osongaquéode to jne uje chichaga aja yocai Abraham nanique.
1 A yacãra yacajnaquéode aja disabi uje dayé chichaga dẽrapáidode cucha aja. Mu uje qué disape ga cáma pijógosi iji dayé irógode ababode ujade. Que pijógosi mu e gajnécho dayé gajnéone cucha jnese. 2 Uje qué disape ga disabi suté irodisórone cuse uje ore chusosipise guio. Jé basa ore chuse gajnéone cucha guio to jé aja dayé ojningai dire ujetiga e disabi cho dajnénguiji cuchade udore jnese. 3 Yocajnui jé u disabi suté to nanique uje cáma yirajágo cuchárique. Enga yoquigaidedie jé u judíode jmapiedie gatuaque, uje udore ore cho ujetiga yoquirodisṍri u ore. 4 Mu uje chise Dupade ojningai dire ga Dupade chiroque dajnacari Jesus aja yoque. Mu cho ayorepísiji ga basiji chequé judía, ga jé judío u to nanique. Jecute dopísi Moises urusarane cucha puyácho to. 5 Mu Dupade abi uté gaidi u ujetiga chijnime yóguiji Moises urusarane cucha puyácho jmáinie. Enga gaidi upo rĩ ujetiga jno yocúdi aja dayé Dupade ujetiga cho dabi iji yoque to. 6 Dupade que pota ujetiga potigayaquérique déji uaque ome uacaringane abío. Jecute chiroque dabi Ujopie Espíritu Sánto taja uacáyipiedie ujetiga oyo uacaji Dupade to. Chamáñaje Dupade abi Ujopie Espíritu Sánto u uje gajnei tu ujetiga chojningame Dupade: “Yai tu ua, Dupade a.” 7 Cho ujetiga ayoré pisaque ua nanique, mu e Dupade ape ua. Jecute a bajneque Dupade guẽrapáidode cucha to jne uje chichaga aja dajnacari Crísto anguresórone. 8 Uje cáma arajáyo Dupade to nanique ga uacoyo dupa iji ayoré gajnúone mu uacangurenone udore que bisitique pijógome uaque. Mu cho ujetiga ore isaque uaque nanique. 9 Mu e uacarajáyo Dupade. Mu que gusu udore mu Dupade e chirajápo uaque rĩ. Jecute ¿gotique gu a uje uacoyo cãru ome Dupade ga uacajnésacho aja uacangurenone cucha bisidécho uje que cuchárique tṍraji ome uaque? ¿Gotique gu a uje uacajuéchopo uágome udore ore rĩ ujetiga ore chopo darógode iji uaque rĩ? 10 Uje jé uacabeyoi udore jmapiedie enga uacajnusináño ore gajnéone dire puyácho gatuaque to uje que Dupade acho mu. 11 E yopise yáyugu yu. Chamáñaje que yipota gu ujetiga cucha bisideque yisagode Dupade iroquéo uje yipésu iji uacajade nanique. 12 Yujode Dupade anguresóño uaque a, acãcho uágaja yu, uje uacamóño uje yo purása quedéjnane uaque to. Que gajnareque uacasocárique ome yu ica gotique, ga jé beyoi uacasocade udore údi ome yu. 13 Uacarajáyo uje yejnaréngone chise yu iji uaquedai nanique, jecute que yiji iji uacari míraque go. Enga jé u uté ica uje yacate uágome yoquiquetangóri Jesucrísto adode nanique iji taningai. 14 Que arajáyo uacasocáringome yu diríca uje ejnaretaguipise yu iji uacajade, mu que etácho yu gotique. Mu datéringa uágome yu uje a yajnúrique u Dupade irótique gaté unirisónique ome uaque, jeoga Dupade abi Jesucrísto jé upúsu. Uje que ajusécho yu ica. 15 Que arajáyo uacasocáringome uacarasitígadatéode ome yu ica. Mu ísenga uacarasitigade udore e bijnápo ome uaque rĩ. ¿Gotique gu a? Uje uacamóño yejnaréngone iji yedodie ica, enga chi apótayo ajnicho uaquedo omenie ome yedo gajnarénguenie ga omepo rĩ. 16 Ísenga ayáyo uacarasitigai tome yu gu uje yacate uágome Dupade uru uréone quigode, ¿ga ajoso ati yipojnate uaque a? Jecute a oyo uacamajosṍri iji yu. 17 Yiraja uje jnanione uñane ore áyipiedie dépisiji uaque mu gajnareque ore áyipiedie quigode. Ore ajegaidi u gu ujetiga ore chécãre uacáyipiedie quigode ome yoque, enga uacáyipiedie dépisiji ore. 18 Cucha ueradi u ujetiga yocáyipiedie déji yocujode ayoréo ome cucha omone. Enga jé arec ujetiga boyo uacasoca omone udore údi gatuaque. Enga ca ayáyo uje boyo uacasoca omone udore údi uje idája yu iji uaque. 19 Yababode uaque a, a yajnua tu chequéraque uje chejnáreque dape basui ũrosoringuéone. Uje a ca íjnoque yayuguhebátigade ome uaque jne, jé aja ujetiga yimo uje oyópise uacangureni Crísto. 20 Yipota joróga ujetiga yugúsiji uacari iji uáguiji te ujetiga yicatecãcopísi ñane ome cuchade udojo. Mu idája yu iji uaque jecute que yiraja yuru quitígo ome uaque. 21 Uaque uje uacapótayo uacajnésacho Moises urusarane cucha puyácho, ¿ga ca arajáyo quitígo a? 22 Uje Moises urusarane chósi te: yocai jnani bajai Abraham abode gare nanique. Abi uñai tṍraji darogue Agar. Jé uñai tṍraji acotépise Sára. 23 Que cucha daté gotique uje Abraham acoté darogue jeque ga abi basiji. Mu cucha datepise uje acotépise abi cuse. Chamáñaje Dupade urugaidé ome dabi gu uje gatapise uaté nanique. 24 A yacãra yacajnaquéode aja chequé gáredie udire ore jne. Uje Dupade áyipiedie jé gare to nanique. Dupade áyipie quique uñai u uje chisi ome Moises nanique iji cucarani uje i tu Sinaí. Enga Dupade áyipie quique uñai uté gajnua tu Abraham irogue Agar. Chamáñaje uje ore déji Moises urusarane cucha puyade gai nanique enga cho ujetiga cuchade udore iroque ore to. 25 Que gusu cucarani Sinaí uje déji ore uniri Arábia uje gajnua u Abraham irogue Agar, mu Jerusalen iji deréjnane udojo gajnua jé u to. Chamáñaje cáma Jerusalen gosode ore áyipieraque toi ome cucha puyade enga cho ujetiga cucha puyade jé iroque ore. 26 Mu yirajágo uje Jerusalen gateminóri cuse to. Enga Jerusalen uté idaisórone que ore cho ayoré pisagode gotique uje guesája cuchade yúode ome ore gu. Enga Jesus anguresórone uyoque yocajnúone u ujetiga idaidatei uté ape yoque. 27 Uje ore urusarane Dupade urúo déji uje chojninga: Aninapísa ua, chequé a. Aberé ua enga íjnoque babode, mu a batígo cuse jne. Yiraja uje cáma ejnáreque batique achaminone, mu aninapísa ua rĩ. Chequé ducarané ua, mu a jé batígo suépise chequé dacajné abode gai jne. 28 Yujode Dupade anguresóño uaque a, yirajágo uje Dupade urugáite Abraham ujetiga atique cuse jne ga abi tuté u Isaac. Enga yocajnui u Isaac. Chamáñaje Dupade jé urúo to ome Abraham nanique ujetiga abode uásejna enga uyoque u. 29 Yirajágo uje Abraham abi iji dacoté darogue cho damajo abi uje Dupade Ujopie Espíritu Sánto urugáite nanique. Judíode iji deréjnai udé ore gajnui tu ape sijnai tuté uje ore cho damajo Abraham abipísode yoque uje yanguretágo Dupade abi Jesucrísto. 30 Dupade uruode chósi tome Abraham nanique: “Õra bacoté barogue, abi ore uje a chamáña jne ujetiga ajuguína bẽrapáidode aja bacoté barogue abi to jne. Jé basa bẽrapáidode udore gajnesóri turásu bacotépise abi.” 31 Yujode Dupade anguresóño uaque a, uje e yanguretágo Jesucrísto ga e que yoco Abraham irogue abi go. Jé basa yoco acotépise abi uje a gajneque dayé guẽrapáidode cucha jne.
1 Jesucrísto e chinoningase yógome cucha puyade ujetiga ca yitodógopo rĩ. Ga adotáyo uáguiji uacanguretigai iji Jesucrísto to. Ca ajuéchopo uágome cucha puyade jne rĩ uje cucha puyade udore ipesute uacasadodéringane ome uaque ica. 2 Yujode Dupade anguresóño uaque a, angachobi yu. Páblo uyu uje qué yo uacaquique enga yósi tome uaque: ujetiga beyoi ore uruode uje ore chiroque uágaja ujetiga acáyo uacádode ome uacaringane piquetaque, enga a ca toque jne ujetiga Jesucrísto chiqueta uaque to. 3 Qué yingopo uaque gaté rĩ, ujetiga gosi doi udore ore uruode ga chica dádode, mu que gusu go ujetiga chica dádode. Jé jorane u Moises urusarane cucha puyácho jnese ujetiga ore doi. 4 Uje uacabeyoi Moises urusarane cucha puyade quigode, uje chiese udore u uje chiqueta uaque ujetiga eso uacaringane Dupade imeserácho, e uacacayoi ti yui ome Jesucrísto adode. Enga e uacajnicho uáguiji Dupade ijnoraquei. 5 Mu uje Dupade imanique yógome dajopie Espíritu Sánto taja re, ga yanguretágo abi Jesucrísto, ga jé u uje yanguretágo yógome Dupade ujetiga chimesere yoque. 6 Ujetiga Jesucrísto e yitojmárango ga e que cuchárique tṍraji ujetiga ore chica yocúdode, jeoga ca ore chica yoque gotique. Mu gusu cucha omi tome uyoque u ujetiga yanguretágo Dupade abi Jesucrísto, enga ujetiga yijnórango Dupade, yocujode ayoréo ore jnese. 7 Uacadode omío ica mu e écãcho uaque. ¿Jé gosi a ujetiga chacate uágome dacajnaqué quedéjnaringo ica ya, uje e uacayáyorase pacajnaqué uréone? 8 Obiréjna uje uacacadisṍri uté gosi que garani u uacabidisṍri Dupade gotique. 9 Uacarajáyo arurégode uje bisidi ajãpe mu chicáji údode jnese ga doi gaté. Pacajnaqué tátigo jé gajnui tu uté to iji uacajade. 10 Mu yangureta Yocangarádejnai ome uaque ujetiga ca écãchopo uacáyipiedie quitígo jne rĩ ome yocacajnaqué uréone. Que yiraja ujetiga ayoré dacasuté jeoga ayoré gajnareque, mu a Dupade cho dajuñame jnani tuté jne uje pésu uacajurérigui ome dacajnaquérigo. 11 Yijorane uaque a, ujetiga jé ũré enga qué yiroque ore aja ujetiga picaque ore údode, enga a jĩrique yurásade judío ore charásu uje ore cho damajo yu. Enga a ore chaporásu rĩ uje ore chetaque yatatagode Jesucrísto acho uje toji curesei gai. 12 Yajéode u ujetiga jnanione udojo uje ore chiroque uágaja cucha puyade quigode ujetiga acáyo uacádode, jé ore aquesuguipise raque. Uje ore pésu uacajuredie gu. 13 Yijorane uaque a, Dupade ibididique uaque nanique. Enga gaidi u ujetiga chimate uágaja cucha puyade uéchai. Mu que chimate uágaja cucha puyade udore uéchai gu ujetiga e beyoi uacapotigué ayoréode. Jé basa Dupade pota ujetiga ajnóraño ñane enga beyoi ñane iroquéode gatuaque. 14 Moises urusarane Dupade iroquéo jiei mu cho ujetiga ore ero u piroqué chojmarai uje chojninga: “Ajusipise bojórique ayoré guio, adi tu uje bajusipise beo.” 15 Ujetiga jec ũré ore ojñane uje chi pibotaquéode, pajedotáningane déji uágome ñane enga ajusópise uaqueo ujetiga ca oyo jmíti, jmíti ome ñane, enga e íjnoque pijnoraquéode iji uacajéode ome ñane. 16 Yuruode qui tu udé: ujetiga beyoi Dupade Ujopie Espíritu Sánto áyipiedie gatuaque enga a ca uacapotigué ayoréode unéningárique cusapo jne rĩ ome uaque. 17 Uje yoquipotigué ayoréode, Dupade Ujopie Espíritu Sánto ore chetaque ñane iji yocajéode. Enga yoquipotigué ayoréode jécucha ga chetaque Dupade Ujopie Espíritu Sánto adode iji yocajéode. Jé basa Dupade Ujopie Espíritu Sánto chetaque yoquipotigué ayoréode to iji yocajei. Jecute que togome uaque ujetiga apéso uacapotigádode cucha. 18 Mu ujetiga yocajnai u Dupade Ujopie Espíritu Sánto, enga e que Moises urusarane cucha puyácho suepo yoquibai rĩ. 19 Obiréjna erámi unirisórone ipesudode cucha gajnarécho uje ore jno dapotigué ayoréode údi: jnanione que ore chedu dacotépisedie mu ore chucué gapu quedéjnanie gatuaque. Jé cho chequedíe rĩ uje que ore chedu dabaipísode mu ore pota jnani unejángone. Que gusu udore mu ore pésu dapesute cucha gajnarenguipísode uñane to rĩ. 20 Jorane jé u udojo: ore cho dupa iji ayoré gajnúone, ore cho daijna iji rac ga ore chijna pujopie quedéjnanie. Ore chetaque dojode ayoréo, ga ore botãre ñane. Ore charatáyime cuchade ome ñane. Ájningaraque ore iji udore bisidec. Ore jnári cuchade ome re. Ore chajuque uñane ajei aja jnumi ga ore gaidi tu ujetiga ore chirota ñane ome detétigade. 21 Ore charatáyime cuchade ome ñane, ayoré yusõre ore, yote pioi josõre ore rĩ. Enga acharádecojna uñane to rĩ. Mu que gusu go udojo dacate gajnaréngone mu gajnúone qué déji. E yingome uaque ica, mu yingopome uaque rĩ, uje Dupade a ca cho darása iji udore ore to jne uje ore pésu cucha gajnaréngone udore. 22 Mu uje Dupade Ujopie Espíritu Sánto chinoningase gosi ga e pijnoraquei déji, pirasitigai dépoji rĩ, pajesereringai déji, ga chidota re ome cuchade, irasique dojode ayoréo, osõrataque rĩ. Que potigayaquérique déji urúrique rĩ. 23 Pajnotaque enga chidota re ome páyipie gajnarénguenie. Enga que purusãratique déji siñeque ujetiga chãraque gosi ome pisoca omone udore. 24 Udore ore uje e ore changureta Crísto ga cho jetiga ore pãtíora Jesus iji itoringai iji curesei gai. Jecute cho ujetiga ore isoca bajade toi ome ore. Yojningane u ore ipotigué ayoréode, jé aja ore áyipie quique gajnaréngone. 25 Ga cho ujetiga yiquecagopo rĩ iji yoquitoringai quigade uje Dupade Ujopie Espíritu Sánto iringaraque yoque gu. Jecute ca yetájo Dupade Ujopie Espíritu Sánto tuaté jne ujetiga chorei yóguiji quedéjnane ga yicoi áyipiedie quigode ome yoque gatuaque. 26 Yicoi ga ca josipierãque yógome ñane uje pijosipiedie udire ipesute pájningane gu. Ca yaratáyingopome cuchade ome ñane rĩ.
1 Yujode Dupade anguresóño a, ujetiga amóño uacojórique Dupade anguresõre uje cṍra iji danguretigai enga pésu date gajnaréngone, ga beyoi enga oyo uté gosi quique. Yojningane u uaque uje uajate uáguiji uacanguretigai. Mu ajusópise uacaruode quigode guio ome uté gosi. Enga ajusopo uaqueo to rĩ ujetiga ca acórañoji uacanguretigai to ujetiga ca petingaraque uaque to ome Satanas. 2 Uje ayuguhebátaque gosi enga gajnui u ujetiga chijnoque cucha iménurique. Uje uacátayoja ore uje ayuguhebátaque ore enga cho ujetiga ajnócho ore ugúcha iménuone udore ome ore. Jecute uje uacosṍcho uacojode ayoréo enga imoi u uje uacabeyopísi Crísto iroquéode. 3 Ujetiga gosi cho ayoredatei iji re, mu e yirajágo uje taque uté gosi. Enga uté gosi ãrai jé u re. 4 Jé arec ujetiga Dupade anguresõre chojmara, chojmarane doi enga chajiripise dadode yúode ujetiga areguipise dapesudode. Ujetiga chimo uje uerate ipesudode enga jogadi u uté uje irasique re. Mu jé ca áyipie déji ujetiga adode cho uñeque atígo, mu áyipie déji ujetiga adode ueracho ome Dupade. 5 Chamáñaje Dupade anguresõre chojmara, chojmarane gajnei tu gu ujetiga susipise dadode, dáyipiedie ore guio. 6 Ujetiga pacadique gosi ome Crísto adode enga omi tu ujetiga uté gosi tẽrája dacadisṍri ome dẽratígo cucha omío. 7 Ayáyo aráño uaque uje que toc ujetiga ayorérique doi ga sué Dupade gai ome daringaquérique. Yirajágo ujetiga gosi doi enga chaca cucha ajñúraque, quigade ujetiga napo dacai tuté rĩ, mu jé chopise acaque bajai. 8 Jecute uté gosi uje pésu dapotigué ayoréode enga a uté gosi ipotigué ayoréode u jne ujetiga chorei uté gosi iji pitoringai. Mu ujetiga uté gosi doi Dupade Ujopie Espíritu Sánto áyipie omenie ga Dupade Ujopie Espíritu Sánto u jne ujetiga chorei uté gosi iji pucuecaringué eyúgojmai. 9 Mu yicoi ga ca yachógo yocate goningane ome Dupade ujetiga yipéco adode. Ujetiga ca yachógo yipéco udore ga a chise dínique jne ujetiga yimóngo yocate goningane udore adie ome yoque. 10 Jecute yicoi ga yejnángo yógaja yocate goningane ome yocujode ayoréo jnese gatuaque. Cuchiyíode upúsu yocujode Dupade anguresóño ore ujetiga yatagopísaja ore ome cuchade. 11 Uacamóño uje Páblo jé uyu upúsu uje e yurúsãre cuchade erueminórone udojo. Enga dacódejna yurusarane udojo ome uaque. 12 Qué yopo uacaquique rĩ ome jnanione udore ore uje ore jnári uágome ujetiga picaque uacádode . Cachi ore gaidípisi tu ujetiga ore urásade judío irasique ore. Enga que ore pota ujetiga ore cho daba Crísto adode uje toji curesei gai ome yoque. 13 Ore chiroque uágaja ujetiga picaque uaque, mu que udore ore pésu Moises urusarane quigode jnese go. Mu cachi ore chiroque uágaja udore gu ujetiga ore ujode judío chisi ore gáyode gu uje picaque uacádode gu ore. 14 Mu uyu ga que yajéode u go ujetiga pisi yibánique. Jé basa yajéode upúsu ujetiga yisígo yocangarádejnai Jesucrísto gai ome itoringai iji curesei gai. Yiraja gu uje uté itoringai u gu uje chinoningase yu nanique uje yangureta. Jecute e cho ujetiga yitoi ome erámi jogosórone cucha, enga chopo ujetiga erámi jogosórone cucha toi ome yu to rĩ. 15 Uje e yanguretágo Jesucrísto ga e que cuchárique tṍraji ujetiga picaque yocúdode, jeoga ca picaque yocúdode. Mu cucha obiréjnai tu ujetiga pinoningayaque yoque ome Jesucrísto. 16 Yipota ujetiga uacajneque Dupade osongaquéode, pajesereringai ore. Yojningane u uaque uje uacabeyoi yacajnaquéode udojo quigode, jé aja Dupade urasapísode ore jnese. 17 Jecute que yipotapo rĩ ujetiga uñeque pesapo yujuréraque rĩ ome yuringárique Crísto iroguipísi. Chamáñaje yipijoque gu yicáchuode iji yibai uje uyu u Jesucrísto iroguipísi. 18 Yujode Jesus anguresóño uaque a, yajéode u ome uaque ujetiga yocangarádejnai Jesucrísto chatapísaja uaque jnese. Amen.
1 Páblo uyu uje yijipísi Jesucrísto iroquéode. Ga iroi uyu uje Dupade jé áyipiedie upúsu ome yu gu. Jecute yurúsãre udojo ome Éfeso gosode uáguiji te, uje Dupade gajnéone u uaque uje uacanguretáyo Jesucrísto gu. 2 Yajéode u ujetiga yocai Dupade, yocangarádejnai Jesucrísto ore chatapísaja uaque, enga uacajéode cho sẽre ome cuchade. 3 Beyoi ga yicotágo yocangarádejnai Jesucrísto dayé Dupade. Uje jé Jesucrísto yitojmárango ga jogadi tu uje Dupade nínapúsu yoque ga tẽrája yoque ome cucha ujñapetade ore jnese iji gaté. 4 Uje cáma Dupade pésu erámi nanique, mu jé ajegáite aro yoque ujetiga yanguretágo Crísto. Gaidi u gu ujetiga chijnime yóguiji pisijnaringuéone ajei ujetiga yico yocuringane ayoré ujñapetaguipíso iji iquei uje e que yoquiyoguérique cuse. 5 Chamáñaje jé Dupade ajéo nanique iji taningai ome uyoque ujetiga yanguretágo Jesucrísto ga yocuringai Dupade ape jogadi jé u. Uje jé áyipiedie upúsu nanique ome yoque uje chijnóra yoque gu. 6 Jecute yicoi ga yicotagopise Dupade ome osongaquédatéi ome yoque gatuaque. Uje chatapísaja yoque gu uje edójnari Ujnacare, uyoque e itojmárango. 7 Dupade chijnorapise yoque, jecute chiroque dajnacari ujetiga toi ome yoquisijnaringuéone. Gaidi tu gu ujetiga chĩrópise yoquisijnaringuéone ome uté iyoi. 8 Enga Dupade tẽrája yógome payuquetotiguei, pirajatígadatéi ore. Gaidi tu gu ujeta yirajágo osongaquédatéi ome yoque. 9 Dupade pésu dáyipiedie ome dajnacari nanique ujetiga Ujnacari u jne ujetiga chimanipise dáyipiedie udire. Mu que pirajai áyipiedie udire nanique. Mu e chingome dáyipiedie udire ome danguresórone uyoque iji deréjnane udojo. 10 A chise Dupade ojningai dire jne enga a Dupade áyipiedie udire quigode tocade jnese jne. Enga jé u jne ujetiga cháta cuchade jnese aja ñane iji jnumi, gaté ore enga a ore eduguéjnapísi tu Crísto jnese jne. 11 Ujetiga Crísto jé yitojmárango ga e yocajnécho Dupade gueranone cucha omío to. Chamáñaje Dupade ajegáite yoque nanique iji erámi taningane iquéode gu ujetiga yocajneque cuchade udore to. Ga yirajágo uje Dupade áyipiedie que toja go, mu jecucha ipesudode u dapotigádode cucha. 12 Dupade pésu udojo gu ujetiga Crísto anguresõre bajade uyoque yajógo yógaja adode, ga yocujode ayoréo chicota Dupade to ome uringai cucha daté uje ore chimo yocadode. 13 Uje uacadúcho Dupade uru uréone nanique uje pota chiqueta uaque, enga jé u uje jĩrique uacanguretáyo Crísto. Enga jogadi jé u uté uje Crísto uhuaque uacatojmáraño to iji jnumi. Ga jogadi jé u to uje Dupade chisi ome dajopie Espíritu Sánto ome uaque to. Chamáñaje chichaga dajopie Espíritu Sánto aja yoque nanique gu. Jnanione ore churúsãre dagúchade ga obiréjna ore ugúchade ome ore. Ga jé adi tu ome Dupade. Uje Dupade chiraja yoque to uje gajneque yoc uje Ujopie Espíritu Sánto déji yoque. 14 Dupade chisi ome dajopie Espíritu Sánto ome yoque gu ujetiga ca potigayaque yoque ome gueranone cucha omío uje e chichaga aja yoque. Mu quene cuchade udore chise yoque jne ujetiga Dupade e chimanipise darasapísode uyoque aja re. Yicoi enga yicotagopise Dupade jne ome daringai cucha daté. 15 - 16 Que yo yicatecãraitigade uja go ome uaque uje yacãre Dupade gai ome uaque. Uje udute gu uje tate uacanguretigai ome yocangarádejnai Jesus. Enga chi ajnórañopise uacojode Dupade anguresóño ore jnese to. 17 Pujnuéngaisṍre yocangarádejnai Jesucrísto dayé Dupade. Jecute yutai uté ujetiga arajayópise uruode quigode ome uacarijogonóri Dupade Ujopie Espíritu Sánto. Yigaidi tu gu ujetiga anguretáyopise Dupade gaté. 18 Yicatecã́ri Dupade ome uaque ujetiga chijñate uacáyipiedie gáyode. Ujetiga arajáyo uruode quigode ome uaque enga ca ayáyo uacangoroné ome ojningane cucha udore yúode. Uje cucha ueradéjna, cucha oreránguejna Dupade gueranone udore jne ome darasapísode uyoque. 19 - 20 Yicatecãrápoi Dupade ome uaque rĩ ujetiga arajáyo to uje Dupade ujopie u cucha daté enga que eruénique cusapo rĩ. Enga Dupade ujopie uaté u uje chijocase danguresórone uyoque yocáyipiedie to. Enga jé upúsu to uje chijna detotiguei aja Crísto nanique uje chiringare uté iji datoringai, enga jno údi aja gatajnoquei ujetiga chácariji dayé ãrachua iji te. 21 Jecute Crísto e chijocase cuchade jnese iji jnumi, gaté ore jnese, enga suépise peduguéjnane, dacasutedie, pujopiedie jnese to rĩ iji deréjnane udojo, jé aja erámi udé uéchai jne iji yoquiquei dirome. 22 Jecute pujnuéngaisṍre Crísto enga cho ujetiga Dupade chicha cuchade jnese aja údi. Enga Dupade chisi ome Crísto uté ome danguresórone uyoque to ujetiga yoco yoqueduguéjnai iji. 23 Enga gajnui jé u ujetiga Crísto e cho daoi iji danguresórone uyoque, jé basa yoco yocatoi iji uté. Enga Crísto chĩreta uyoque, jecute yitojmárangopis iji jnumi, Crísto uyoque. Enga Crísto uté u to uje chĩreta erámi údode jnese ome dajopie.
1 Uje uacagúsoji uacasijnaringuéone gai nanique ga cho jetiga e toque uaque nanique. Mu uacanguretáyo Crísto ga Dupade chisi ome pucuecaringuei ome uaque. 2 Yirajágo uje pujopie gajnarengue cuse uje diguiji gaté yui. Enga pujopie gajnarengue tuaté u uje chiroque ore aja ujetiga ca ore pésu Dupade uruode quitique. Enga uacaróto jé u uaté to nanique uje qué uacabeyoi erámi jogosórone cucha adode. 3 Que gusu uaque go mu uyoque jnese yoquisocai jé u uté to nanique. Jé yoquigaidode u yoquipotigádode cucha nanique uje ugúcoji yoquisoca gajnaréngone gai nanique. Ga jé yicoi yocáyipie gajnarénguenie aja guesi to nanique uje cachi yangácoi yoquipotigué ayoréode gatuaque gu. Jecute jé tiógara ujetiga Dupade chopise dajuñame yoque jnese. Uje jé yocopise ñane gu ome yocuringane sijnácho. 4 Mu Dupade chosõripise yoque, ga chijnorapise yoque rĩ. 5 Yoco togode ome Dupade gu yocate gajnaréngone nanique múñi, jé chiqueta yoque to enga chisi ome pucuecaringuei ome yoque, adi tu uje chiqueta dajnacari Crísto to nanique iji itoringai, enga chisi ome pucuecaringuei ome uté. Pésu udore ome yoque gu dosongaquédatéi ome yoque. 6 Enga e cho ujetiga Dupade cháta yógaja Crísto iji irijíningai. Enga chopo ujetiga chátapo yógaja rĩ iji charidi iji gaté. 7 Pésu udojo gu ujetiga chingongarája erámi iji deréjnane jnese uje chijnorapise dosongaquéode gajnesórone uyoque uje yanguretágo Jesucrísto. 8 Jecute Dupade chiqueta uaque gu dajnoraquei uje uacanguretáyo uté. Que uacapesutique cucha chiqueta uaque go. Mu Dupade guẽrate bisideque uacaringane piquetaque ome uac. 9 Que toc ujetiga uacuñeque doi enga chicota re ome daringárique piquetaque. Chamáñaje que togome ayorérique gu ujetiga chiqueta re bisideque ome dapesutique cucha. 10 Yoquipesusṍri u Dupade, enga uté u to uje chimate yógaja Jesucrísto. Gaidi u gu ujetiga yocate goningane cuse to. Uje pésu dáyipiedie udire ome yoque gu iji taningai nanique. 11 Ajnusináño uje purása quedéjna uaque nanique. Uje que judío uaque go. Jecute que beyoi judíode isocade to go uje ore chica dabáyode . Jecute judíode udore uje picaque ore, ore dojnóngaja uaque enga ore chojninga: “Que ore chica dabáyode go.” 12 Que Crísto anguresõre uaque gotique nanique, enga purása quedéjna uágome judíode to nanique. Jecute que arajáyo Dupade áyipiedie ojningane cucha, que arajayopo uje Dupade chichaga cuchade aja danguresórone rĩ. Jecute que uacagutiyamátique cucha cuse nanique uje que arajáyo Dupade nanique gu. 13 Mu e uacanguretáyo Jesucrísto to. Ga e que toc ujetiga jé idája uáguiji Dupade rĩ. Chamáñaje Jesucrísto toi ome uacasijnaringuéone nanique gu ujetiga chorei uáguiji dei. 14 Jesucrísto pésu ga yocajéode cho sẽre ome ñane. Jecute purása quedéjnane, judíode ore tojmára iji jnumi uje ore changureta Jesucrísto. Purása quedéjnane, judíode yocájningane gajnúone u pujuyaquéode uje chãraque yocujai. Mu cho jetiga Jesus chajningarase yocujuyaquéode iji yocujai ga jé yitojmárango iji jnumi. 15 Uje Jesucrísto toi ome yoquisijnaringuéone ga Moises urusarane cucha puyácho eruei tu. Enga doi purása quedéjnane, judíode ore ga pésu ore ujetiga chojmára ore iji jnumi ujetiga cho darása iji ore jnese. Ga Jesucrísto jé isocai u uté uje pésu purása quedéjnane, judíode ore ujetiga ore ajéode cho sẽre ome ñane. 16 Uje Jesucrísto toi ome yoquisijnaringuéone nanique iji curesei gai ga jogadi jé u uje purása quedéjnane, judíode ore, ore cha dájningane ome ñane uje pajesereringai e déji ore ome Dupade gu. Ga e Dupade chimate ore aja ñane uje ore changureta Jesucrísto to. Ga gajnui e u ujetiga chojmára ore iji jnumi. 17 Crísto di enga chingo pajesereringai adode aja yoque jnese. Que gusu ome urásade judíode go uje idógosi ore iji Dupade, mu purása quedéjnane uacajnécho acajnaquéode to rĩ uje idája uágome Dupade múñi. 18 Ujetiga judío yoque, jeoga ca judío yoque mu yoquisocai jé chojmára ujetiga yico yocai Dupade jne. Ga isocai jé u ujetiga yanguretágo Jesucrísto ga uté Ujopie Espíritu Sánto déji yoque. 19 Cho nanique ujetiga purása quedéjna uágome Dupade idai. Mu e uacajneque Dupade idai to, uje Dupade e gajneque uaque gu uje e uacanguretáyo Dupade ujnacari Jesucrísto. Jecute Dupade e cho dabi iji uaque ga e jogasu uaque to rĩ. 20 Uacoyo guiguíjnarique uje guiguíjnai ipesungóri pésu iji cucaranenie gai. Enga Jesucrísto irógode, Dupade uruode atatasórone ore gajnunie u cucaranenie udire. Mu guiguíjnai uté erópisi tu Jesucrísto. 21 Jecute uje pipesute guiguíjnai uté aja gaté enga uajádaja gaté uje uerate ero gu. Jecute ujetiga pimanique guiguíjnai tuté aja gaté enga yocangarádejnai Dupade a cho daguíjnai iji jne. 22 Adi jé u ome uaque. Uje uacanguretáyo Crísto enga e uacátayo uágaja Crísto anguresórone uñane jnese. Enga e uacoyo guiguíjnarique. Enga Dupade cho daguíjnai iji uaque, enga uté Ujopie Espíritu Sánto chacája uaque.
1 Uacarajáyo yu uje Páblo uyu ga yugúsiji guiguíjna tajei uje ore suru yibai. Mu yibai jé u yatatagode Jesucrísto acho ome purása quedéjnane uaque. Jecute yicatecã́ri Dupade ome uaque. 2 Ise ga e arajáyo uje Dupade chosõre yu nanique ujetiga yiji iroquéode. Enga utocaidi tu yu aja purása quedéjnane uaque ujetiga agutíñañome uruode to. 3 Uje Dupade chingo dapoguiédode darúo aja yu ga e yiraja to. Uje e yatata quique garósiode uñane ome uaque que iji yurusãraque bajade. 4 Ujetiga ãrarachója yurusãráiso gai ga a adójningacho jne uje e Dupade chingo dapoguiédode darúo aja yu. Enga ipoguiédode daru quigode júdi upúsu Crísto. 5 Que Dupade suéga dapoguiédode daru aja erã́tique nanique, mu quene suéga ome daroguipísode, daruode atatasórone ore uje ore chejna rángaja Dupade. Chamáñaje Dupade Ujopie Espíritu Sánto u uje chingome ore. 6 A e yingo uaque jne Dupade ipoguiédode daru quicho. Qui tu uje chapuse purása quedéjnane ore aja jnese ujetiga ore chudute Crísto ujnomei ga piquetaque ore ome adode to. Enga Dupade ojningane cucha ome gueranone a e que gusu ome judíode go. Mu purása quedéjnane ore gajnécho to rĩ. Chamáñaje Dupade jé urúo ujetiga yanguretágo Jesucrísto jnese ga jé yocajneque ojningane cucha jnese to. Enga jé judíode, purása quedéjnane yitojmárango iji jnumi jnese to uje yanguretágo Jesucrísto. 7 Que yajnei u nanique ujetiga yiji Dupade iroquéode. Mu udojo quigade enga Dupade chosõripise yu. Enga chisi ome dajopie ome yu to enga chiroque yu aja ujetiga yatata ujnacari Jesucrísto ujnomei ome ore. 8 Cachi cucha bisidégape yu iji yujode Dupade anguresóño ujade. Mu jé Dupade ajegáite yu nanique ome daroquéode ujeta yatata adode ome purása quedéjnane jeta ore nína rángome yojña omone ome Jesucrísto adode to. Chamáñaje tate Crísto icaniratiguéode ome yoque enga que toc ujetiga yico udore eruénique. 9 Cuchade jnese ipesungore Dupade, enga uté u uje chãraque dáyipie omenie udire uringai pirajaque nanique ome erámi unirisórone jnese. Mu e chiroque yu aja ujetiga yingopísa udire quigode ome ore jnese iji deréjnane udojo. 10 Dupade chijna judíode, purása quedéjnane ore aja ñane ga ore tojmára iji jnumi uje ore changureta Jesucrísto. Enga cho darása iji udore ore jnese. Pésu cuchade udojo gu ujetiga darijogonórone iji gatajnoquei, jé aja pujopie uñanie iji gatajnoquei yui ore chimo ipesute datéode udore ga ore chiraja irajatigade quique ponáyone jnese ome. 11 Dupade pésu udore gu dáyipie diyajmenie. Enga yirajágo uje Dupade áyipiedie quigode que eruénique cus. Enga angúromei u yocangarádejnai Jesucrísto ujetiga chimate dáyipiedie udire jnese. 12 Enga jé u uje guesája Dupade yui ome yoque jeta yanguretágo Jesucrísto, enga e que yagutúgo yógome jeta yicatecãcoi Dupade. 13 Jecute yijócha uacajéode údi ujetiga ca uacanguretigai chicai jnutique ome Dupade gu yuringai pujurúgai. Mu anínaño uágome yijnoraquei ome uaque uje yo yiba yatatagode Dupade urúo ome uaque. 14 Jecute yichaga yigatáidie aja jnumi iji yocangarádejnai Jesucrísto dayé iquei. 15 Yiraja gu uje yanguretágo Jesucrísto ga e Dupade cho dajogasu iji yoque. Uje e ore déji jnumi udé, mu jé Dupade cho dajogasu iji ore to. Mu ujetiga ore déji gaté, Dupade cho dajogasu iji ore iji gaté to. 16 Dupade garijogonórone cucha ueradéjnapiso enga que eruénique erãpe cuse. Jecute yutai yocai Dupade ome uaque ujetiga tẽra uágome darijogonórone udore to ujetiga uté Ujopie Espíritu Sánto pésu uaque, enga etoguipise uáguiji adode jnese. 17 Yicatecãrápoi Dupade ome uaque rĩ ujetiga Crísto jé jogate uacajéode uje uacanguretáyo, ujeta pijnoraquei tadipis iji uaque rĩ. Ujetiga adotáyo uágaja jnumi, ga oyo poria uje erode chicáji jnumi ga que toc jeta cuchárique chucurase. 18 Yicatecãrápoi Dupade to rĩ ujetiga urásade uaque jnese arajáyo Crísto ijnoraquédatéi ome uaque. Chamáñaje ujetiga gosi dorási enga chatingáraja Crísto ijnoraquei enga a chimo uje umáningai que eruénique cuse. Jé cho arubajei rĩ uje que eruénique cusapo rĩ. Umáningai iji gaté que eruénique cusapo rĩ. Jé cho iji jnumi údi, idájai iji guesi ga que eruénique cusapo rĩ. 19 Jecute yicatecã́ri Dupade ome uaque ujetiga arajáyo Jesucrísto ijnoraquédatéi uté ome uaque uje querúpise. Mu que toc ujetiga diquiyaque ijnoraquei eruénique. Mu yajéode u ujetiga Dupade ijnoraquédatéi uté iragupúsu uacajéode to ga chise uaqueruéode to rĩ. 20 Beyoi ga yicotágopise Dupade iji dirode udojo uje ujopierãque cuchape. Uje dorási yocurúrigo mu dopórasi dateringane rĩ. Ga a dopoi yocáyipiedie quigode rĩ, mu jé u uje doi dateringane ome yoque. Ga Dupade ujopiedaté uaté déji yoque to ga pésu yocáyipiedie aja quigode. 21 Yajéode u ujetiga jecucha ga Jesucrísto anguresórone uyoque, yicoi ga yicotágopise Dupade iji yocuáguedie ga ca yiyágo yoquicotaquéode ome uté iji deréjnane jnese. Amen.
1 Uacarajáyo uje ore suru yibai mu yibade u yojñane ome Yocangarádejnai uje yatata adode. Uje jé uté ajegáite uaque ga yijócha uacajéode údi ujetiga ajusópise uaqueo ome Dupade. 2 Ca oyo cucha daté iji uaque mu apajnotáyo aja ñane. Ga ca adosóyo aja ñane rĩ mu angachopísi ñane ga ajnóraño ñane. 3 Acueyoi uacasocárique ujeta ca ayáyo uje jé uacatojmáraño iji jnumi. Ga a Dupade Ujopie Espíritu Sánto chátaja uaque jne uje uacarajáyo uje Dupade Ujopie Espíritu Sánto u uje pésu ga yocajéode cho sẽre ome ñane. 4 Uje Jesucrísto anguresórone jé ore adode tojmára iji jnumi. Ga jé gusu Dupade Ujopie Espíritu Sánto ome ore ga chojmára to. Enga yoquirodi cucha jé chojmára to, uje Dupade tibidi yoque gu yoquirodi tuté yui. 5 Yocangarádejnai jé chojmára, yocangureni jé chojmára rĩ, ga pisocai jé chojmára to jeta pacaque yóguiji yodi. 6 Yocai Dupade chojmára to rĩ. Ga uté u uje sué yoquibáyode jnese. Ga uté u uje pésu yocáyipiedie aja quigode ujeta yicoi áyipiedie quigode. Ga uté dépisi yocari jnese. 7 Mu Jesucrísto tẽrája danguresórone chojmara, chojmarane ome pirajatigade. Mu yoquirajatigade udore que cho ñane, mu yocajnéone pirajatíga jé garani u Crísto áyipiedie ome yoque jnese. 8 Jecute Dupade uruode chojninga: Uje Crísto chicapóji gaté enga ore jurúgayode nóna. Mu chuse danguresórone guio iji erámi ga chisi ome ore irajatí gadatéode ome ore. 9 ¿Ga arajáyo udore quitique a? uje chojninga: “Crísto chicáji gaté.” Urui qui tu uje chi tṍraji jnaropié ome gaté. 10 Uté uje chicáji jnaropié ica ga jé u to uje jnome gaté ga déji gatajnoquei. Mu chĩreta erámi udé, gaté ore ome dajopiedaté. 11 Jé uté u rĩ uje chajuguína pirajatigade aja danguresórone chojmara, chojmarane. Ga uñane gajnei tu daringane Jesus iroguipíso. Uñane ore gajnei tu ujetiga ore chatata dajnepídode Dupade urúo. Uñane ore jno Jesus uringai piquetangore ujnomei údi aja erámone. Uñane gajnei tu uje ore chusipise dojode Dupade anguresõre guio. Uñane gajnei tu daringane pacadisõre. 12 Jesucrísto isocade u udojo ome danguresórone jeta dimane ore ome dagaitígo Dupade iroquéo. Pota gu ujetiga danguresórone chõre re iji erámone. 13 Gaidi u to ujetiga yirajágo Dupade ujnacari Jesucrísto jnese, enga tojmára yóguiji jnumi ome yocanguretigade. Pisocai u uté gu ujetiga yico yocuringane jnanío ome Dupade adode ujetiga yocopise yocangarádejnai Jesucrísto. 14 Enga a jé ca yocópo disi parátagabode rĩ ome Dupade adode. Uje disiode jecucha ga ore chécãre, chécãre dáyipiedie aja quedéjnane ome cuchade. Enga jĩrique ore tangári pacajnaqué taque ichade. Uje jnani taquechoquíode déji erámi gu uje ore pota jeta ore chijna yógaja dacajnaqué tágode. 15 Mu cucha arei tu ujetiga yocatatagode u puru uréone ome ñane uje yijnórango yocujode ayoréo gu. Ga pisocai u uté ujetiga yiquérangopise iji yocanguretigai ome Jesucrísto. Chamáñaje Jesucrísto uté cho daoi iji yoque, ga yocatoi u uté. Ga jé yitojmárango, Jesucrísto uyoque. 16 Enga Crísto pésu danguresórone uyoque ga yitojmárangopis iji jnumi jnese ga yocajnui u paoi chojmarai. Enga pésu yocadode ga ujñapetácho ome yoquisagode yoquejo. Jecute ujetiga Jesucrísto anguresórone chojmara, chojmarane pesupúsu dajnéone Jesucrísto iroquéo enga jogadi u uté uje yiquérango jnese iji Dupade adode. Enga a yusájoja yocuringárique ayoré ibijoque ome yoquijnoraquédatéi ome ñane. 17 Yuruode qui jé u ome uaque, ga yo uacaquique jne, uje Yocangarádejnai jé ajéode u to ome uaque. Ujetiga ayáyo beyoi ore adode uje que ore adode cunguésõri Dupade atique go. Uje jé ore ipesudé dáyipie bisidéguedie. 18 Cachi udore ore áyipiedie udire cho jetiga ore tṍraji ijnangununie utataringuéone ajéode. Uje íjnoque Dupade ucuecaringuei iji ore. Jecute táyipieque ore. Uje angoninguite pariguipise ore ome Dupade adode gu. 19 Que ore chajéngome cuchárique gotique. Mu ore chejna rángaja cucha gajnaréngone. Jecute ore irasiguipise cucha uñane uje pésu ore ajéode uringane gajnarécho. 20 Mu e uacarajáyo uje Crísto acajnaquéode que quigode u udore go ujetiga beyoi ore isocade to. 21 A jé ũré yu uje uacadúcho uté ujnomei ga e uacarajáyo pacajnaqué uréone to ome Jesucrísto. 22 Jecute ayáyo uacasoca baja casodicáite, uacáyipie sijnangue cásidica rĩ. Uje udire garani u uacaringane ayoré jnutiminóño bisidécho. Uje uacáyipie jnutimito bisidéguedie ãraque uaque gu. Jecute uacáyipiedie chejna rángaja cucha sijnángone nanique. 23 Mu arei tu ome uaque ujetiga ajuécho uágome Dupade ga chécãre uacáyipiedie, uacajéode ujetiga uacaringai icha jogadi jé u. 24 Jecute ayáyo uacaringane ayoré jnutiminóño. Ga acueyoi uacaringáringo ayoré gateminóño. Uje Dupade ipesute yoquisoca ejode udojo, uje jé áyipiedie u udaji ome yoque nanique. Ga a ore pañáji uacapesudode cucha omío jne, jé aja uacaringane ũréo rĩ. 25 Jecute ca taque uac ome uacarúrigo ome ñane. Mu uacarúrigo jé ũrepíso ome uacojode Jesus anguresóño. Chamáñaje cho ujetiga yocaoi jé chojmarapise uje yanguretágo Jesucrísto. 26 Ujetiga pajedotáningarique suéji uaque gosi, mu arei tu ujetiga uté gosi jĩrique cha dajedotáningai ujetiga ca jno údi aja cucha gajnaréngone. Enga arei tupo rĩ ujetiga jĩrique gosi cha dajedotáningane, enga jé ca chajnerame iji deréjnai údode. 27 Ca ajuécho uágome Satanas, ga ca Satanas chiraja dabipítiguiji uaque. 28 Ujeta oriechoqui uaque ica, mu ayáyo uacoriquéode. Enga asayo uaquejode to. Que gusu ujetiga cuchade déji uaque mu u to ujetiga asíyo jmatágode iji uacarijogonórone cucha to. 29 Ca uacarúrique gajnareque aja uacojórique ayoré. Mu ueradi u ujetiga uacarúrigo omío ome ñane. Ga ajneráñome uacajorane, ga ore quérã iji Dupade adode. Ga a Dupade chátaja ore ome bojñane. 30 Ca apéso Dupade Ujopie Espíritu Sánto ujnusiétigarique iji uacajéode ome uacapesutique cucha gajnarétique. Chamáñaje Dupade chicha dajopie Espíritu Sánto aja uaque gu ujetiga apijócho ome uacaringane Dupade gajnécho jé aja deréjnai ujetiga chimanipise uágaja re ome uacaringane urasapíso. 31 Ayáyo uaquetétigade ome ñane, uacajedotáningane ome ñane to. Ayáyo to uje uacanguíraño uacabijnanone aja ñane iji uacapojnaquéode. Ca ajnícho ñane iyoguéode rĩ. Ga ayayopúsu pisijnaringuéone gajnéone cucha jnese. 32 Jé basa ga ueradi tu ujetiga uacajéode cho sẽre ome ñane ga osṍcho ñane. Ga ca uacajéode dotárome gosode ujeta ore pésu date sijnátique ome uaque. Uje uacagaidi jé u Dupade isocai uje chĩro uacasijnaringuéone to nanique uje uacanguretáyo Jesucrísto.
1 Dupade ape edójnareone u uaque. Jecute jé tiógara ujeta arachója Uacai uté isocade. 2 Ga pijnoraquei déji uaque to. Adi jé u Jesucrísto uje chijnorapise yoque ga tẽra re ome yoque nanique. Ga gajnua u áyasa pẽrapáide uje ore tẽra áyasa ga Dupade chĩro ore isijnaringuéone nanique. Uje chi unere ore iborigode dẽracho ai ome Dupade nanique ga irasique ore. Ga adi jé u ome dabi Jesucrísto uje Dupade irasique adode to uje toi ome yoquisijnaringuéone. 3 Uacajnengóri e u Dupade, jecute ca uacáyipieraque dépoji pisoca gajnarétique rĩ ome chequé quedéjnaraque, jnani quedéjnarique ore rĩ. Ca ajuéchopo uaque rĩ ome uacabai ayoré ipotigué gajnaréngone. Enga jé upo rĩ ujetiga ca ajnáchoi cuchárigo ome uaque. 4 Ajuso uacaru quigode guio ujetiga ca chinguíra dipoi aja uacuñeque. Enga ca uacaru quigode cho pujñiequé gajnaréngone. Enga ca aracho táyipiegode aja ore uruode uje cachi ore uru bisidécho. Mu beyoi ga acãcho Dupade gai ome cuchade gatuaque. 5 Ujetiga gosi chachia re iji gapu quedéjnanie, jeoga goto chachia re iji jnani quedéjnane ore, enga a ca udore ore chimo gajnetique cucha to iji Dupade, Crísto ore idai. Jé cho udore ore to uje que ore áyipieraque jnoji dabai ayoré ipotiguéode cucha gajnarécho. Jé cho udore to rĩ uje ore jnári cuchade ome re. (Chamáñaje udore ore gajnúone u ayoré gajnúone icatecãraisórone gu. Uje ore chijnorapise cucha uñane gu ome Dupade.) 6 Ca ajuécho uágome jnani arapatáquechoquíode uje ore pota chãra uágome dacajnaqué bisidégode. Uje jé ũrepise yu uje Dupade ujuyaquedatei gajnengórone a u udore ore jne uje ore pésu cucha gajnaréngone enga ore chetaque Dupade áyipiedie ome re. 7 Jecute ca ajuécho uágome udore ore to. 8 Uje sijnaque uaque nanique ga cho jetiga agúsoji ijnangununie utataringuéone ajéode. Mu uje uacanguretáyo Yocangarádejnai ga uté chimate uágaja direcaringuei. Jecute ajusópise uaqueo ga apijócho iji uacaringai direcaringuei jogosõre. 9 Chamáñaje uje gosi chise direcaringuei enga uté gosi ate ujñapetade jogadi jé u ome uté. Jecute caniraque enga chedu puru uréone to ome ore jnese. 10 Acueyoi Yocangarádejnai ajegaidode cucha, ga beyoi udore ujetiga Yocangarádejnai irasique uaque. 11 Enga ca beyoi cucha uñane uje cachi cucha bisidécho. Chamáñaje cucha gajnaréngone udore ipesungórone cho jeta ore déji ijnangununie ajéningo. Mu omi tu ujetiga pijnimique udore ore iji oporinguéone ga ore chise direcaringuei to. 12 Cachi a aduchorase ore ipesute gajnaréngone udore ga a chinguirarása pajegátigai aja uac. Jecute que yĩ́care cuchade udore go uje ore ipoguiécho dapesudode cucha gajnarécho. 13 Mu uje pimanique cuchárique aja direcaringuérique ga quene pirajaque adipísode. Obiréjna cuchade jnese gu uje déji direcaringuei ajei. 14 Jecute Dupade iradedie uñáraque achachagúcho udojo. Ga chojninga: Ãriji iji bamoi. Ãriji iji togode gari rĩ. Ga Crísto a chijna ua aja dire caringuei. 15 Jecute ajusópise uacadode guio. Ga ca beyoi táyipiegode adode to, mu beyoi ayipierane isocade. 16 Aguinécho to uje qué piotiguei déji ome Dupade adode. Uacarajáyo ãrie uje pisijnaringuéone chichagu raja erámone jnese gu iji deréjnane udojo. 17 Ca oyo táyipiegode uje que ore tangári Dupade. Mu acueyoi Yocangarádejnai ipotigádode cucha ome uaque. 18 Ca ójiyo yote pioi uje uacamóño uje pésu pũrusoringuéone ome uaque gu. Ga chorei uáguiji pisijnaringuéone. Mu ueradi tu ujetiga ãretáyo uacajéode ome Dupade Ujopie Espíritu Sánto. 19 Beyoi to enga ejnáño uágaja uacacotaquéode ome Yocangarádejnai enga beyoi enga acatecãchoi ñane ome Dupade adode uje uacarachója Dupade iradedie, jeoga uacapéso uacaradedie iji Dupade uruode. 20 Jecucha ga acãcho yocai Dupade gai ome cuchade jnese. Uje yocangureni u yocangarádejnai Jesucrísto gu. 21 Angáchoi ñane uje Dupade jé ajéode u ome uaque. 22 Amanachuguedie uaque a, angáchoi uacabayode. Adi u ãrie uje uacangáchoi Yocangarádejnai. 23 Ga chequé amanachuguedie uaque a, cho jeta uacatoi u uacabayode. Adi u yoque uje yanguretágo Jesucrísto ga yoco yocatoi iji Jesucrísto. Mu que gusu patoi go Jesucrísto, mu jé u to uje chiqueta danguresórone uyoque enga cho daoi iji yoc. 24 Adi u yoque uje yoco yocatoi iji Jesucrísto ga yicoi áyipiedie ome yoque. Jecute chequé amanachuguedie a, angachopísi uacabayode ome cuchade jnese to, ga beyoi ore áyipiedie jnese to. 25 Mu acoterachugode uaque a, ajnóraño uacacotedie. Adi u Crísto uje chijnóra danguresórone. Jecute tẽra re ome danguresórone uyoque nanique. 26 Tẽra re gu uje gaidi tu gu ujetiga chimate danguresórone aja re. Ga gajneque ore. Gaidi tupo rĩ gu ujetiga ore chudute uruode ga cho jetiga puruque ore ome yotique. 27 Gaidi tu gu ujeta chimate yógaja re ome yocuringáringo ujñapetácho, ujetiga ca yoquiyoguérique cuse, enga ujetiga ca pisijnaringuérique dépisi yoque to. Potapísa gu ujetiga dimane yógome ga gusu ome yoque. 28 Adi jé u, ujetiga acoterachugode uaque ajusópise uacacotedie guio. Adi u ãrie uje uacajusópise uaqueo. Chamáñaje ujetiga gosi chijnóra dacoté ga jé gajneque dajnoraquei to. 29 Que ayorérique cuse gotique jetiga chetaque dapetique. Mu yujucópise yocadode guio jnese. Jecute yajo yoquibosode gu ujetiga etoque yocadode iji ñane. Crísto jé adi u ome danguresórone uje jé aoi u danguresórone uyoque gu. 30 Chamáñaje Jesucrísto jé cho re iji yoque, ga yocadode jé chojmára. Yocajnoquéode jé cho ñane. Ga yoquipeque ñane. 31 Ore urusarane Dupade urúo déji uje chojninga: “Jecute uje e jnacare gosi ga gosi e cãra re ome dayé, daté ore ga chimate raja dacoté gari ga jé acoté ore tojmára iji jnumi.” 32 Dupade uruode udore quique uñai cuse to uje piraque quigode mu ueradéjnapo quigode rĩ. Ga quigode u uje gajnúone u Crísto isocade ome danguresórone uyoque. 33 Mu Dupade uruode udore qui jé u to ujetiga ajusópise uacacotedie guio jnese. Ga ajnóraño ore, adi tu uje uacajusópise uaqueo. Ga amanachuguedie gajnei tu ujetiga ore tangaripísi dabayode.
1 Cucha omi tu ome disiode uaque ujetiga angachopísi uacayode, uacatedie ore. Uje e Jesucrísto anguresõre uaque to gu. 2 Dupade iroquéode jiei, mu chojmarai u uje chi tẽrája ore ome ujeta ore pésu quigode. Ga adi tudé: “Ajusópise uacayode guio ga angachopísi ore. 3 Ga yerani tu pininaquei ome uaque jne. Mu que gusu pininaquei go mu a uacacuecaringuei umare jne iji erámi tudé.” 4 Abechugode uaque a, abechuguedie uaque rĩ, ca acho uaquejode ome uacabode ga ca apéso ore ajedotáningane ome uaque. Gusu ujetiga oyo ore quique. Ga acácho ore ome ore uringárique Dupade anguresõre. 5 Ujetiga piroque ua iji erámi udé ga angaripísi barósõre jnutiminóri ga ajusipise áyipiedie guio. Bagaidi tu ujeta ca barósonique chise bayoguérique ga ca deroque ua ome. Enga gajnui jé urásu ujetiga barósõri u Crísto. 6 Ujetiga uacarósõri ca déji uaquejoi marínga, jé asayo iroquéode. Ca oyo piroque uñane uje ore cho isagocade uje ore irósõri déji ore ejoi mu ore gaidi tu ujetiga ore irósõri chicota ore. Mu ore irósõri jno ga ore chapo rĩ. Mu Jesucrísto iroque uaque to jecute beyopísi Dupade ojningane cucha jnese ome uacaringane ayoré jnese. 7 Beyoi iroquéode ga uneripise ome uaque. Ga ca acho uaquejode aja. Uje uacarajáyo uje que gusu uacarósõre jnutiminóri uje chajire uágaja quedéjnane mu uacarósõri u Yocangarádejnai to. Ga acueyoi uacasocáringome ujeta uté nína re ome uacasocárique. 8 E uacarajáyo uje jé piroque uaque marínga, jeoga ataque uaque marínga, mu Yocangarádejnai jé jmapié chojmára ome yoque jnese. A di ga chisi yoque jnese jne ome yocate goningane. 9 Ujetiga pirósõre uaque marínga, jé ajusópise uacarótigo guio. Enga ca uacarúrigo gajnarécho aja ore. Ca aramuráso uacarósõre gateminóri iji uacajéode. Uacajnei tu jeta angáchoi uté to. Uje que chécãre dasocárique ome pirótigo, pirósoningo ore. Mu Yocangarádejnai jé jmapié chojmára iji jnumi ome yoque jnese. 10 Yijorane uaque a, adotáyo uáguiji uacanguretigai ome yocangarádejnai Jesucrísto. Ga uacoidé u uté ujopiedaté ome uacapesudode cucha. 11 Ajnáño to Dupade gueranone cõrácha ga ãrácho uaquejode ome Satanas. Ga adotáyo uágome aringaquéode. 12 Cachi yugúcoji pocaningárique gai, mu que yipéco pocaningárique ome ayorérique go, mu yoquijocaningane gajnengórone u Satanas ujopie gajnarénguenie iji gaté yui. Chamáñaje udire ore ijocayaque erámone jogosórone cucha iji ijnangununie ajéode iji erámi tudé. 13 Jecute ajnáño Dupade gueranone cõrácha udore ome Satanas ga a arajáyo Satanas aringaquéode jne iji dínique jeta chise uac. Enga adotáyo uágaja ome uté. 14 Jecute adotáyo uáguiji uacaru uréone. Ga uacajnui tu ujetiga jocarataguebei chigaru dapajei ga gaidi tu ujetiga etoc. Ajusópise uacadode guio ga beyoi uacate goningane ga uacajnui tu jocarataguebei uje chicha guebei taja darobe yui. Gaidi u gu ujetiga gajnéone cõrácha ca chacája. 15 Jecucha dimane uágome uacatatagode ome uacojode ayoréo ujetiga pajesereringai déji ore to ome Dupade. Ga uacajnúone u soldate jocaratade uje dimane ore uchiédode iji ore ome dagaidi pocaningai yui. 16 Cuchiyi tupúsu ujeta ca aramurásorase uacanguretigai aja quedéjnane. Uje uacanguretigai uté gajnui tu guebetique jeta achayóji uacajmanai ga ãrácho uaquéode ome uacajnenie Satanas ojo ditaguei. 17 Ajnusináño uacaringane piquetaque ga ca atodóyo uaquejórique rĩ. Ga uacajnui u jocarataguebei uje chimate daquetangóri guebégaja datoi. Ga ajnáño Dupade Ujopie Espíritu Sánto gueranone Dupade urúo gatuaque to. Uje Dupade uruode gajnua tu guebéraque gu ome uaque. 18 Beyoi cuchade udojo jnese mu acatecãchoi Dupade gatuaque to. Ga ajóchayo Dupade ajei údi ome cuchade jeta atayoi cuchade iji. Ga gusu Dupade Ujopie Espíritu Sánto ipotigádode cucha ujetiga atayóji Dupade. Enga ajicachome uaquejode gatuaque enga ca uacanguretigai chicai jnumi ome Dupade. Enga acatecãchopome uacojode Dupade urása ore jnese rĩ. 19 Acatecãchopome yu to rĩ ga Dupade chisi ome daruode ome yu ga yatata uruode. Ga ca yagutu yu ome yacaditigade. Mu picasitigai déji yu ome uruode. Yigaidi tu gu ujetiga cojñone uñane ore chudute Dupade uru piquetangórone to uje que ore chudute to nanique. 20 Uje Dupade cho daroguipísiji yu nanique ome daruode ujetiga yatata ome ore. Mu ore suru yibai gu uje yibade u yacajnaquéode uje yacate ore ome uruode. Mu acatecãchoi Dupade ome yu ga yejna yu aja yacajnaquéode gatuaque. Chamáñaje Dupade ajéode jé u udore ome yu gu. 21 Uacarajáyo yocujoi Dupade anguresóre Tíquico to. Ga uté u uje chatapísaja yu ome Yocangarádejnai iroquéode. Ga uté a jno yujnomei údi ome uaque jne ga a chatata yadode jnese ome uaque jne. 22 Jecute yiroque uté aja uáguiji te ujetiga chingo yocadode aja uaque enga ajnusoi uágome ojñane. 23 Yajéode jé u ujetiga yocangarádejnai Jesucrísto, dayé Dupade ore chisi ome pajesereringai, pijnoraquei, panguretigai ome yujode Dupade anguresóño uaque jnese. 24 Yajéode upo rĩ ujetiga Dupade chatapísaja yocangarádejnai Jesucrísto ijnorasórone uaque jnese uje jogadipise uacajnoraquéode ome uté. E gusu yurusarane. Amen.
1 Jesucrísto irógode u Páblo, Timotéo uyoque, enga yurúsãco yocurusarane unojo ome yocujode Dupade anguresóño jnese iji uaquedai Filípos uje uacátayo uágaja Jesucrísto to. Enga uacangaránone, uacatocaidode ome Dupade adode ore gajnécho yocurusarane to rĩ. 2 Yocajéode u ome uaque ujetiga yocai Dupade, yocangarádejnai Jesucrísto ore chátaja uaque enga uacajéode cho sẽre jne. 3 Jecucha yáyipie déji uaque enga yicatecã́ri Dupade ome uaque. Enga jecucha yacãre Dupade gai ome uaque rĩ. 4 Uje yicatecã́ri Dupade ome uaque enga yirasique yu ome yicatecãraitigade ome uaque jnese. 5 Chamáñaje jecucha uacátayopis aja yu gu ome yatatagode Jesus acho jé iji taningápisi, jé aja deréjnane unojo to rĩ. 6 Uerate Dupade ipesudode iji uacajéode iji taningápisi. Enga a jé jno dapesudode cucha omío udore údi ome uaque jne jé aja diri uté ujetiga Jesucrísto diapo jne rĩ. Enga que potigayaquérique déji yu to ome Dupade adode udore ome uaque. 7 Jé tiógara yáyipie omenie udire ome uaque jnese. Chamáñaje cho ujetiga agusopísiji yajei uje yijnorapise uaque gu. Uje yugúsiji soldádode iguíjnai uje ore suru yibai iji, jeoga yugúsiji eduguéjnane iquei uje ĩrarare yatatagode Jesus acho gai, mu cho ujetiga agúsoji yari iji te enga yajnei Dupade icaniratigué jé gajnengórone u uaque to. 8 Dupade chiraja uje yijnorapise uaque jnese. Enga yijnoraquei gajnui u Jesucrísto ijnoraquei tome uaque. 9 Yicatecã́ri Dupade ome uaque ujetiga uacajnoraquéode querãpise ome ñane jé aja uacarajatigade, uacayuquetotiguéode to rĩ ujetiga udore querãpise to iji uaque jnese. 10 Yipota gu ujetiga jĩraque arajáyo cucha areguipísode iji cuchade uñane ujade, enga ejnáño uacáyipiedie aja cucha areguipísode udore. Yigaidi tu gu ujetiga uacaringáringo ũréo pijoque, enga ca ayorérique chiraja daru quitíguiji uaque, jé aja Crísto diringárique. 11 Yigaidi tupo rĩ ujetiga uacajnua tu poria uje adie jiépisi. Yojninganie ai u uacate goningane uje udore garani u uacarijogosṍri Jesucrísto. Chamáñaje yocate goningane u uje pésu ga Dupade ingoningájnai pijógome erámi enga diga picotaque Dupade gu ome udore. 12 Yijorane uaque a, yingome uaque uje que gajnarécho yajnéone pujuyaquéo gotique, mu ueracho. Uje piotiguei jé u gu ome yu jetiga yingo Dupade uringai piquetangore aja ore. 13 Enga soldádode uje ore déji eduguéjnai iguíjnai, ore chiraja jnese uje yibade u Crísto adode. Jé u cojñone uñane rĩ, ore chirajápo to rĩ uje yibade u Crísto adode. 14 Jiéode upúsu yujode Dupade anguresóño uje ore chimo yu aja yuringai pujurúgai enga udore ore u uje ore jnusi rángome datatagode Dupade urúo gaté, enga que ore chagutu rángome to. Ore chimo uje Yocangarádejnai chátaja yu, enga ore changuretapise to ujetiga chatapója ore to rĩ. 15 Ũré yu uje gajnarenguei jnanione uñane áyipiedie uje ore chacate darásade ome Crísto adode. Uje cachi ore ajéode noña ome yu enga ore ucueguipísi tu ujetiga ore ujode Dupade anguresóño ore ajéode noñapise to ome yu. Jé basa uerate jnanione uñane áyipiedie, enga ueracho to ore isocade uje ore chacate darásade ome Crísto adode. 16 Taque jnanione udore uñane uje ore cho Crísto adode atatasórone iji raque. Udore ore gaidi tupúsu daringáringo ayoredatéo, enga ore pota chinguíra payuguhebátigade aja yu gaté iji yuringai tuné pujurúgai. 17 Jé basa ga uñane basaja yiyaridi tome Crísto iroquéode uje ore chijnóra yu gu. Ore chiraja gu uje yibade u uje yĩrarare Crísto uringai piquetangóri gai. 18 Ujetiga uerate Crísto adode atatasórone ore áyipiedie, jeoga gajnarenguei ore áyipiedie, mu yirasique yu uje yudute uje pacadique ayoréode ome Crísto adode. Enga a qué yirasique yu gaté jne. 19 Yiraja gu uje Dupade a chiqueta yu jne ome cuchade udore jnese ome uacacatecãraitigade ome yu. Uje Jesucrísto Ujopie Espíritu Sánto a chátaja yu to jne rĩ gu. 20 Yajéode u ujetiga ca yajéngome yatique uñeque jne, mu yangureta Dupade ome yu ujetiga picasitigai irágu yu ome yatatagode Dupade urúo iji deréjnane. Yigaidi tupúsu ujetiga picotaguipise Crísto ome yadode iji deréjnane. Cuchiyi tupúsu iji deréjnane unojo. Jecute jé arec ome yu ujetiga yitoina yanguretigai ome Jesus, jeoga qué yiqueca. 21 Uje qué yiqueca enga uneri tu Crísto ojningane cucha ome yu, enga yigaidode u udore. Jé basa uneripísi tu yitoringai ujetiga yimate yu aja Crísto gari iji gaté. 22 Mu ísenga jé yiqueca ga yatatarása Jesus adode gaté. Jecute que yiraja yajegaitique iji cucha gáreode udore: ujetiga e yitoi, jeoga jé yiqueca. 23 Que toc ujetiga yiraja arétiguiji cucha gáreode unojo. Yipotarása jetiga e yitoi enga yicáji Jesus gari to. Isenga ueratigai u uné ome yu jetiga yitoi. 24 Mu ueratigai a u ome uaque jetiga yiquecape ome uaque. 25 E yiraja uje arei tu jetiga yiqueca enga yatabája uaque gaté jne ujetiga aquéraño iji uacanguretigai ome Dupade. Yigaidi tu gu jetiga uacarasique uaque gaté ome uacanguretigai. 26 Yiraja to uje a jé yisápo uaque jne rĩ, enga a anínañopúsu Jesucrísto jne ujetiga chorei yu iji uaque. 27 Uje Crísto adode gaisórone u uaque, enga acueyoi uacasocáringome uaque ujetiga uacadode omío jnese. Ujetiga yise uaque, jeoga idája yu iji uaque, mu yipota ujetiga uacajnomérique chise yu uje chi uacajéode chojmarapísiji jnumi jnese uje uacajóyo uágaja uacanguretigai ome Dupade uru piquetangórone. 28 Enga ca amóño pisadodéringárique ome uacamajosórone ore. Chamáñaje ujetiga ore chimo uacacasitigai enga a jĩraque ore chiraja jne uje Dupade iquetade a u uaque jne, jé basa ore quique obiréjnai a u Dupade ujuyaquei jne. 29 Uacajnei tu ujetiga anguretáyo Crísto, mu que gusu ujetiga anguretáyo uté. Mu uacajnei tupo to rĩ ujetiga oyo uacaba adode to. Enga cucha omejnai tupúsu ome yoque ujetiga yoco yoquiba Crísto adode. 30 Jé yoco ñane ome yocajnéone pocaninga uje Dupade guetesórone cho dajocaningame yoc. Mu uacarajáyo uje que yiya yatata Dupade adode nanique ome cuchade udore. Enga yujnomei a e chise uaque uje jé yajo yu aja yatatagode Dupade urúo ome ore, jé aja deréjnane unojo.
1 Etoque uágome Dupade adode uje Crísto chijnóra uaque gu enga cho uacaquique ome uacajnusiétigade. Enga uacarijogosṍri u Crísto Ujopie Espíritu Sánto to rĩ. Jecute caniraque uaque to enga posõraquéode déji uaque to ome uacojode ayoréo. 2 Jecute apéso yininaquéode to rĩ, enga ajnórañopise ñane. Uacajéode chojmarapísiji jnumi ome cuchade jnese, enga átayo uágaja ñane ome Dupade adode gatuaque. 3 Ujetiga apéso cuchárique jne, mu ca uacáyipieraque déji orérangome uaque, jeoga uacaringárique picotaque. Mu beyoi enga apéso uacapesutique cucha enga ca uacáyipieraque dépisiji uaque. Uje ueradi u ujetiga yajicopise yocujode ayoré yui ome cuchade, enga yisígopise uté gosi gai, enga cho ujetiga sué yoquibai ome cuchade. 4 Acueyoi cucha arégode ome uaque, mu jé ca eduyo uaque. Mu acueyoi cucha arégode ome uacojode ayoréo to. 5 Cucha omi tu ujetiga ajuso uacáyipiedie guio, adi u Crísto uje suse dáyipiedie guio to nanique. 6 Crísto, Dupade ore adode jé upúsu ñane nanique. Mu Crísto áyipieraque que déji gotique ujetiga chopise dai Dupade ome gajnéone cucha. 7 Mu chicha dajnéone cucha aja ti yui, enga pésu re enga erámi unirisõre to, enga jé basa ga cho piróguiji re iji jnumi tuné to. 8 Uje e cho erámi unirisórone uñai tiji re, enga jnacare pajnotaque nanique. Enga tangaripísi dayé Dupade aja dagachodi, uje noñanguipise múñi uje ore chajo ayorérique aja curesérique gai. 9 Jecute Dupade chosipísi dajnacari iji gaté ujetiga sué ore gáyode jnese, enga ĩcarai taja dabi i u uje ueradéjna enga sué ore íode gáyode jnese iji jnumi. 10 Enga ujetiga ayoré togode, erámi unirisórone, gaté unirisórone ore chudute Jesus i ueradéjnai enga ore doi ga ore chichaga dagatáidie aja jnumi iji iquei jnese jne. 11 Enga a ore chojninga jnese jne: “Yocangarádejna Jesucrísto.” Enga Jesus gajnéone picotaquéo udore a gajnengóri u dayé Dupade to jne. 12 Yijorane uaque a, uje yugúsiji uacari nanique enga jecucha uacangáchoi yu. Mu ujetiga idája yu iji uaque marínga, jé angáchoi yu gaté. Ca ácayoji uacayaritique bisideque, mu beyoi enga ejnáño uágaja uacacuecaringué ichai tuté uje Dupade gueranome uaque. Ga pajnotaguipise uaque, enga jecucha ga angachopísi Dupade to. 13 Dupade pésu dáyipiedie ome cuchárique, enga jé u uje chisi ome páyipie omenie ome yoque. Enga Dupade upo rĩ uje chátaja yoque ujetiga yimáco yocáyipiedie unaji aja guesi. 14 Apéso cuchade unojo jnese enga ca oyo chere chere ome ñane, enga ca abotã́cho ñane rĩ. 15 Yigaidi u gu ujetiga ca uacojórique ayoré chiraja daru quitíguiji uaque, enga ca ore chisápo uacayoguérique rĩ iji dajade. Uacagúsoji pisijnaringuéone ipesungórone ujade iji erámi tuné uje gajnarenguipíso ore isocade. Mu Dupade ape uaque, jecute oyo uacai Dupade uje uégome pisijnaringuéone iji erámi unirisórone udore ore ujade. Chamáñaje uacajnunie u guédodie ome uringanie daganataguei uje chijninguese utataringuéone ajei. 16 Uaque u gu uje uacangoño Dupade uruode ome ayoré sijnángone udore ore uje Dupade a guẽrate pucuecaringué eyúgojmai ome ore ujetiga ore changureta. Enga ujetiga Crísto di jne enga a yirasique yu jne ome uacapesudode udore. Enga a yiraja jne uje que cucha bisideque yacajnaquéode ome uaque go. Enga a yirajápo jne rĩ uje que cucha bisideque yisagode go ome Dupade. 17 Jé socaseti ore chujé yu jne, mu pininaquei jogadi u jne ome yu. Yiraja gu uje e uaquẽcho uacanguretigai ome Dupade to, enga a yẽrápisa yu to ujetiga yoquẽrapáidode nóna ñane aja gaté ome Dupade. Enga e yingo yirasitigade ome cuchade udore ome uaque ujetiga aráso uaque to. 18 Jecute anínaño uaque to, adi uyu uje yinína yu to. 19 Ujetiga yocangarádejnai Jesus ajéo enga a jĩraque yiroque Timotéo aja uaque jne ujetiga chinóninga uaque. Enga a yinína yu jne ujetiga di uacajnomérique údi iji yu. 20 Que yarijogonórone uñeque déji ne ujetiga cho Timotéo, uyoque. Uje Timotéo chopise yu enga gaidode u uacangoningárique to. 21 Uje yocurásade uñane ore ucuegode u cuchade ome re jnese, enga que cucha Jesucrísto iroquéode ome ore go. 22 Mu uacarajáyo Timotéo ate goningane to uje cháta raja yu ome yocatatagode Dupade urúo. Enga Timotéo gajnámi su disabi to ome yu uje cháta cuchade aja dayé. 23 Jecute a yiroque Timotéo aja uaque jne jeta pijoque yujurúgaisórone áyipierigui ome yu. 24 Mu yangureni u Yocangarádejnai ujetiga jĩraque chijnime yu iji yuringai pujurúgai enga a uyu u jne jeta yise uaque. 25 Yajéode upo rĩ jeta yirógape Epafrodíto aja uaque uje uacaroi jé u Epafrodíto aja yu ica jetiga cháta cuchade aja yu iji yuringai pujurúgai. Jecucha Epafrodíto uyoque yátago yoquipesudode cucha aja ñane ome Dupade uje yipécorango Dupade guetesórone ore adode. 26 Mu e Epafrodíto potapísa jetiga chajirapo uaque rĩ. Uje chi adúcho uringai ejnaretaque to enga chi osõchopise yui. Enga e pota jeta chisápo uaque rĩ ujetiga ayáyo uacayuguhebátigade ome. 27 Jé ũré yu uje ejnaretaque diríca enga jé toguírase. Mu Dupade chosõre diríca enga chiqueta. Que gusu uje chosõre Epafrodíto, mu jé chosõrapo yu to rĩ jetiga ca pujnusiétigade sué yibai iji yuringai pujurúgai uné. 28 Jecute yipota jetiga yirogabája uaque jetiga uacarasique uté jeta amóño, enga a yiya yo yáyugu uaque to jne. 29 Ujetiga Epafrodíto díji uaque enga ca ajusécho jne uje uacojo Dupade anguresõre gu. Mu ca gusu Epafrodíto ujetiga ca ajusécho, beyoi enga ca ajusécho jnanione uñane to uje ore cho Epafrodíto uté. 30 Uje Epafrodíto toguírase diríca enga uté bai u Crísto iroquéode. Uje idája yu iji uaque enga que toque jeta átayo cuchárigo aja yu, mu uacaroi Epafrodíto chisi ome re ome yu iji yajnei pocaninga ujetiga chátaja yu iji yuringai tuné pujurúgai.
1 Yijorane uaque a, anínaño uágome Yocangarádejnai. Que cucha go ome yu ujetiga yigotája jeta yo quique uaque ome yurusãraque ejode unojo. Yigaidi u gu ujetiga cucha gajnarétique ca chósi ti iji uaque. 2 Ajusópise uaqueo ome ore uje ore gajnúone u tamoco sijnángone, enga gajnarenguipise ore adode. Uje ore chiroque uágaja ujetiga acayo uacádode . Uje chiese quene jogadi u uté ujetiga Dupade cho darása iji uaque uje uacacayo uacádode. 3 Chiese Dupade urasapísode u udore ore uje ore chica dádode. Mu Dupade urása obiréjnane upúsu yoque uje yanguretágo Dupade ome yocuringane ayoré jnese, uyoque uje yoquirasique yoque uje Jesucrísto e gajneque yoc. Enga que qué yocáyipieraque dépoji cucha guesi minónique rĩ ujetiga chiqueta yoque. 4 Ujetiga jé ũré jnanione udore uje ore iquetangórone u dapesudode cucha, enga jétapure uyu ujetiga yipesudode cucha udore chiquetápise yu to. 5 Uje dirode gadióguiji ti iji yibatigai yui enga ore chica yúdode to nanique. Chamáñaje Israel gose yu gu, enga yarãpi u Israel ujnacarode uñai Benjamin. Enga hebréo yai, yaté ore jnese. Jecute hebréode uñai yu to. Uacamóño uje fariséo yu to nanique enga yigaidode u ore acajnaquéode ome Moises urusarane, uje judíode uyoque yicoi purusarane udore quigode. 6 Enga fariseopise yu nanique enga yetaque pacajnaqué unejángone jnese. Jecute yo yumajo Jesus anguresórone nanique. Que yiyó Moises acajnaquérique gánique gotique to, jecute que yurásarique chiraja daru quitíguiji yu nanique. 7 Yipésu cuchade unojo nanique uje jeoti enga cucha omío nanique ome yu. Mu e yingo uaque uje cucha bisideque cuchade udore jnese ome yu. Uje e yiraja uje yiquetangóri u Crísto enga cucha bisideque cucha uñane jnese ome yu. 8 Cho ujetiga cuchade udore e que oréraque cusipise go ome yu. Mu cucha orerãi upúsu uje yiraja yangarádejnai Jesucrísto. Jecute e yṍra cuchade udore. Chamáñaje yate bajade udore jnese chopise pasique ducaranone ome yu gu. Uje e yangureta Crísto uje cucha gose uté ome yu gu. 9 Enga e yarijogonóri u Crísto enga uté gajnenguipise yu. Enga Dupade e cho ayoré ujñapetaque iji yu. Mu yuringai ujñapetaque que tṍraji yipesudode cucha uje yiji Moises urusarane, mu tṍraji yanguretigai ome Jesucrísto. 10 Enga yajéode e u ujetiga yirajapise Crísto gaté. Enga yipota ujetiga Dupade ujopiedaté uje chiringare Crísto iji datoringai nanique jogadipise yu to. Yipota to ujetiga yo yiba Crísto adode, adi u uje Crísto cho daba Dupade adode to nanique. Enga dimane yu to ujetiga yitoi ome adode. 11 Yigaidi u gu ujetiga piringarangápo yu jne rĩ iji yitoringai quigade. 12 Yiraja uje qué yiságui ujetiga yise yipotigádode udore jnese, enga cáma yise yuringai ujñapetaguipise. Mu yejna yu aja Crísto adode uje yigaidi u gu ujetiga yimate Crísto áyipiedie jnese ome yu. Chamáñaje Crísto chiqueta yu gu udire nanique iji taningai. 13 Yijorane uaque a, yiraja uje cáma yimate Crísto áyipiedie udire aja jnumi ome yu jnese. Mu e yimate yáyipiedie ome yu: a yijíñome yate bajade, enga a yejna cucha dacadode jnese aja yiquigade. Mu qué yiqui tu gaté ujetiga yise Crísto ipotigádode cucha ome yu jnese, uje cuchade udore qué déji yiquei gu. 14 Enga gajnui u ujetiga yugúsiji pigajñúraque enga yiquítequígaja yiqui tuté. Chamáñaje ujetiga yise yiqui tuté jne enga Dupade a tẽrája yu jne iji gaté. Uje Dupade tibidi Jesucrísto anguresórone uyoque nanique gu ujetiga yico idai enga tẽrája yóguiji uté. 15 Omi tu ujetiga Dupade anguresõre etógode uyoque jnese yocáyipiedie chojmarai iji jnumi ome cuchade udore. Mu ujetiga uacuñéngo jé cãra dáyipiedie quitígome yáyipiedie udire quigode enga Dupade a chingo quiguipísode ome uaque to jne. 16 Mu beyoi enga yejnángo yógaja yoquirajade cucha iji Dupade adode enga jé yico údi. 17 Yijorane uaque a, ejnáño uágaja yadode unojo to. Enga anóningacho uacojórigo Jesus anguresõre ujetiga ore ajnerámeone u yadode enga átayo uágaja udore ore to. 18 E yingo uaque ica enga e yingopome uaque rĩ uje yopise yáyugu uje jiei uacuñane uje cachi ore cho Dupade anguresõre iji re mu gajnareque ore adode. Crísto guetesórone u ore enga ore cho cucha bisidéguiji Crísto itoringai uje toji curesei gai ome yoque. 19 Mu a Dupade cho dajuñame udore ore jne. Uje cachi ca udore ore chajire Dupade yúrique go, mu cho ujetiga ore idupade u dapotiguéode cucha. Enga que ore chajéngome date gajnaréngone gotique, mu ore irasique re ome date gajnaréngone. Udore ore áyipiedie gaidode u cucha jnutiminórone gatuaque ome re. 20 Jé basa Dupade urasapísode u yoque, enga yoquidai u gaté. Enga yanguretágo yoquiquetangóri yui jeta di enga tṍraji gaté ome yoque. Yojningai u yocangarádejnai Jesucrísto. 21 Ujetiga di, enga a chinoningase yoquejnaréngone isai yocao jne. Enga a yocópise uté jne ome ao ijoréjnai. Enga oidé tu dajopie jne ujetiga chinoningase yoque. Enga utocaidé a jé upo dajopie tuaté jne rĩ ujetiga chimate cuchade aja re jnese, enga a ujnuéngai cuchade udore jnese jne.
1 Yijorane uaque a, yijnorapise uaque enga yipotapisarása jetiga jé yisápo uaque rĩ. Uje yirasique yu gu ome uaque uje yajnéone u uaque ome Dupade. Jecute yipota ujetiga adotáyo uáguiji uacanguretigai iji Yocangarádejnai to. 2 Evódia a, Síntique a, uje Yocangarádejnai angureto uaque jnese enga ayáyo uaquetétigade ome ñane enga oyópise uaquẽro iji ñane to. 3 Yijnorapise ua to, uje yijorámeque ua aja yoquisagode Dupade iroquéo. Jecute yipota jetiga átaja yoquijoranie udire, enga o ore quique. Baraja gu uje yoquijoranie udire jecucha ga ore cháta rágaja yu ica ome yatatagode Jesus uringai piquetangore, jé aja Clemente ore to ica. Enga yirajágo uje ore íode déji pucuecaringuei gajnéone darujna ao jnese iji Dupade gari iji gaté. 4 Yajéode u ujetiga uacarasique uágome uacanguretigai ome Yocangarádejnai iji deréjnane jnese. Yijáro yuruode iji jnumi ome uaque uje yojninga: anínaño uaque gatuaque iji dirode jnese. 5 Yajéode u to ujetiga uacacaniratiguéode pijógome uacojode ayoréo ore jnese, uje e idógosi Yocangarádejnai diringai gu. 6 Ca oyo uacáyugu uáguiji udore bisideque, mu acatecãchoi Dupade ome uacajnusiétigade jnese. Jé u uacapotigádode cucha rĩ ujetiga acatecãchoi Dupade ome udore to. Atáyoi Dupade ome cuchade, enga acãcho Dupade gai to ome guẽratígo cucha ome uaque. 7 Ujetiga beyoi yuruode udore quitígo enga Dupade a chisi ome darijogonóri pajesereringa ome uaque jne. Enga Dupade guerani pajesereringa uté u uje chinoningase pujnusiétigadatéode, enga que togome erámi unirisórone ujetiga ore chiraja garãtique. Enga Dupade guerani tuté pajesereringa a u jne ujetiga chãraque uacáyipiedie, jé aja uacajéode ome cucha gajnaréngone jnese. Chamáñaje Jesucrísto anguresórone u uaque gu. 8 Yijorane uaque a, a yo uacaquique jne iji yurusarane eruei tuné ujetiga ejnáño uacáyipiedie aja cucha omone, jé aja cucha uréone, pipesute ueradode, cucha ujñapetágode ore. Enga ca uacáyipiedie jnopo iji pujnomé omone to rĩ. Enga ueguipise uacáyipiedie ome cucha gajnaréngone udore iji erámi tuné. Ujetiga gosi isocade omío enga uté gajnei tu picotaquei, enga ejnáño uacáyipiedie taja uacacotaquérigo ome uté gosi to. 9 Uacadúcho yacajnaquéode, enga uacamóño yisocade to rĩ. Jecute beyoi yacajnaquéode udore quigode enga aracho yu aja yisocade to. Ujetiga beyoi yuruode udore enga pajesereringai guẽrasṍri Dupade a chijína uágaja quedéjnane to jne. 10 Yirasiguipise yu ome Yocangarádejnai uje uaqueranone cucha e díji yu enga yiraja uje jé gajnui u uje uacáyipiedie dépoji yu rĩ. Que yuruode qui u go ujetiga acadíchoi yu, mu ísenga quene piotiguei dépoji uaque rĩ ujetiga ẽchója yu. 11 Ca ajoso ati yuruode udore qui tu ujetiga yutáite uaque uje yijmáta ome cuchárique. Chamáñaje yiraja cuchade gu uje basaja yu, jecute yinína yu ome cuchade uje déji yu. Ujetiga garósi marínga, jeoga jiei, mu yinína yu ome udore. 12 Uje yiraja pijmataringuéone quigode ome yu, ga yirajápo cucha dipeséode quigode ome yu rĩ. Mu yidota yu ome cucha dacadode udore jnese. Jecute jé cho ñane ome yu ujetiga yica guejna, ujetiga chaguhei chejna yu rĩ. Jé chopo ñane ome yu rĩ ujetiga cuchárigo sué yibai, jeoga yijmátapis ome cuchárigo. 13 Enga que cuchárique pirágome yu, uje Jesucrísto jecucha chisi ome petotiguei ome yu gu ome yajnéone cucha dacacho jnese. 14 Mu ueradipise uacasocade ome yu uje uacosṍcho yu iji yuringai pujurúgai uné. 15 Uacarajáyo uje gusu Jesus anguresórone uaque iji uaquedai Filípos uje uacasíyo yu iji uaqueranone cucha uje yiji iji uacaniri Macedónia ica iji taningai ujetiga yacate ore iji ducunire uñane ome Jesus uringai piquetangore. Uje chi uacarasique yacajnaquéode Dupade urúo ome uaque gu, jecute uacasíyo yu ome uaqueranone cucha to nanique. 16 Uje yugúsiji ore idai Tesalónica to ica ga uaqueranone cucha chise yu gatuaque to. Uacagaidi u gu ujetiga ca yijmáta ome yajegaitique cucha. 17 Que yáyipie déji gotique ujetiga pisi yu iji, mu yáyipie déji uaque ujetiga ejnáño uágaja uacacaniratiguéode. Yiraja uje Dupade a cho uacoré jne ome uaqueranone udore gu. 18 Uaqueranone cucha jnese e chise yu uje Epafrodíto di údi iji yu. Enga jiei uaqueranone ome yu enga chamáñapo rĩ. Enga jé arec. Uaqueranone cucha gajnui tu gu cucha ai otate unerone uje jnani bajade ore tẽrája Dupade ome nanique. Jecute Dupade a irasiguipise re ome uaqueranone udore ome yu. 19 Enga yangureni Dupade a chosõre uaque to jne ome cuchade ujetiga qué chona uaque. Chamáñaje cuchade déji Dupade jnese gu iji gaté ujetiga chosõre yógome uje yanguretágo Jesucrísto. 20 Beyoi enga yicotagopise yocai Dupade gatuaque iji dirode jnese. Amen. 21 Angoba yirasitigai aja Dupade urásade iji uaité jne. Yojningane u Jesucrísto anguresórone jnese. Yarijogonórone ore iji ne ore irasique uaquei to rĩ. 22 Dupade anguresórone ore jnese iji ne, jé aja Róma gosode ore eduguéjna cuchábi irógode ore rĩ, ore pota to jetiga adúcho to uje ore irasiguipise uaquei to rĩ. 23 Yipota jetiga yocangarádejnai Jesucrísto chátaja uaque jnese jne. Amen.
1 - 2 Páblo uyu enga yarijogosṍri tu Timotéo. Enga urúsãre yuruode ome yocujode Dupade urásade uaque iji uaquedaidatei Colósas uje uacanguretáyopise Crísto to. Jesucrísto iroguipísode uñai tu yu uje Dupade jé ajéo ome yu gu ujetiga yiji Jesucrísto iroquéode to. Yajéode u ujetiga yocai Dupade chatapísaja uaque enga chisi ome pajesereringai ome uaque. 3 Jecucha ga acãco yocangarádejnai Jesucrísto dai Dupade gai ome uaque uje icatecãcoi ome uaque. 4 Uje uacajnomei e chise yoque uje chi anguretáyopise Jesucrísto, enga chi ajnórañopise uacojode Dupade anguresóño ore jnese. 5 Uacáyipiedie déji gateminórone cucha gu uje chi e dimane ome uaque iji Dupade idai iji gaté. Enga jĩraque uacanguretáyo cuchade udore yúode to nanique uje uacadúcho Dupade uru uréone, enga ore cho quique Dupade áyipie omenie ome uaque ujetiga piquetaque uaque ome Dupade. 6 Uje uacadúcho pacaditigade nanique ome Dupade ijnoraquei ome uaque, enga jĩraque uacanguretáyo. Uje uacarajáyo gu uje jé ũrepise pacaditigade udore. Enga uacadudigode Dupade urúo udore e chubu erámone jnese, enga e uásejnapise erámi jogosórone ore uje ore changureta Dupade uruode unojo to. 7 Uacacadisṍri ome Dupade uruode u yoquĩjorai Epáfras nanique. Uje yoquibaya uté to ome Crísto iroquéode, enga uté chejnápise re aja dagaidode Crísto iroquéo uje déji uacajade nanique. 8 Enga Epáfras uté u uje di uacajnomei údi diríca iji yoque, enga chatatame yoque uje chi Dupade Ujopie Espíritu Sánto déji uaque jecute uacajnórañopise uacojode Dupade anguresóño ore. 9 Uje udúco uacajnomei diríca enga jĩraque icatecãcoi Dupade ome uaque, enga que yiyágo icatecãcoi ome uaque. Enga yoquicatecãraitigade quigode u unojo: ujetiga Dupade chĩreta uágome páyuquetotiguei, pirajatigade ore ome dadode, ujetiga arajáyo áyipiedie ome uaque enga jĩraque apéso quigode. 10 Ujetiga cuchade udore chise uaque enga a u jne ujetiga ajuso uaqueo enga a apijócho jne ome uacaringane Yocangarádejnai anguresõre. Enga a apéso ajegaidode cucha gatuaque jne. Enga a uacajnimique cucha omone jnese jne aja guesi ome uacadode udore. Enga arajayópise Dupade adode gaté to jne rĩ. 11 Icatecãcoi Dupade to ome uaque ujetiga na dajopie iyiejna taja uaque ujetiga apúyoja adode, enga adotáyo uágome cucha ponáyone jnese, enga ca ayáyo anínaño uágome Dupade adode. 12 Enga acãcho yocai Dupade gai to uje pésu yoque enga e dimane yógome idai yui to. Uje díreca tijode iji Dupade idai tuté, enga Dupade a tẽrája darásade ore jne iji dedai uté. Enga a yocajnetígo cucha déji to jne ome yoque. 13 Cho ujetiga Satanas suru yoquibai iji ijnangununie ajei nanique, mu Dupade e chijnime yóguiji ijnangununie enga e chicha yógaja direcaringuei ujetiga yoco yoqueduguéjnai iji ujnacari Jesucrísto, uje Dupade ijnoranguipísi tu dajnacari tuté gu. 14 Enga yoquiquetangóri upúsu Jesucrísto uté uje toi ome yoquisijnaringuéone. Jecute Dupade e chĩrópise yoquisijnaringuéone jnese. 15 Pibójma Dupade, mu sene pimo uje Ujnacari di iji jnumi. Enga bajaguipise Ujnacari tuté ome cuchade jnese, enga u uje gajneque cuchade jnese. 16 Enga Dupade Ujnacari upo rĩ uje Dupade chutṍri nanique ujetiga pésu cuchade jnese iji guéode, erámone ore jnese. Uté ipesute yoquimone cucha jnese, enga pesapo cucha ponáyone rĩ uje que yimóngo ome yoquedodie to. Pésu eduguéjnane jnese ore uringane eduguéjna, enga pesapo pujopiedie jnese rĩ. Dupade utocaidi tu Dajnacari ujetiga pésu cuchade jnese, enga Dupade ajéode u ujetiga Ujnacari gajnengápo damaningone cucha jnese rĩ. 17 Crísto jé jogate nanique uje cuchade qué íjnoque. Enga uté e u uje suse dapesudode cucha udore quigode guio iji deréjnane. 18 Que gusu udore, mu Crísto cho daopísi iji danguresórone enga ore gatoi jé u uté to. Enga guẽrate pitijinaquédatéi tome danguresórone ore, uje ore ucuecaringuei garani u gu. Uje bajaguipise Crísto ome cuchade jnese enga jé bajaguipise to uje ecápo rĩ iji pitoringai. Dupade gaidi u gu ujetiga eduguéjna cuchape Crísto ome cuchade jnese. 19 Dupade ajéode u nanique ujetiga dadipísode dépisi Crísto to ujetiga Ujnacari tuté jé chopise dayé Dupade ome cuchade jnese. 20 Enga Dupade pésu dáyipiedie nanique ome erámi jogosórone, gaté jogosórone ore jnese ujetiga chátapo ore aja re rĩ, ujetiga pajesereringai dépoji ore rĩ ome ñane. Enga chimate ore aja re gu Crísto itoringai, uje toi ome ore isijnaringuéone. 21 Purása quedéjna uágome Dupade ica, enga uacoyo uacamajo Dupade ica. Uje gajnarenguipise uacadode ome Dupade ica gu. Mu unojo quigade u uje Dupade chopo darása iji uaque rĩ enga jogadi u uté uje pajesereringai dépoji Dupade, uágome ñane rĩ. 22 Uje Crísto toji curesei gai ome uaque enga imoi tu uacaringane uome ome Dupade. Dupade pésu cuchade udore gu ujetiga diga chimanipise uágaja dari uje e ueque uágome pisijnaringuéone, enga e que uacayoguérique cusipise go, enga uacaringane máraque e bijnápis ome uaque to. 23 Jecute e uacajnei tu ujetiga apúyoja uacanguretigai. Enga oyo poria uje erode purúja jnumi. Uje uacadúcho Dupade áyipie piquetatodie iji taningai nanique, enga jé u uje uacanguretáyopise Dupade ojningane cucha yúode ome uaque. Jecute beyoi enga ca abéroyo uágome uacarodigode cucha udore yúode. Enga uacadudigode Dupade áyipie piquetatodie udire u uje e chubu erámi údode jnese. Uje udire atatasórone jõrai tu Páblo uyu to. 24 Pininaquei jogadi tu ome yu uje yo yiba yatatagode Dupade urúo ome uaque. Yiraja gu uje Crísto chejnáreque re to nanique ome danguresórone ore uje cho daoi iji ore. Enga yipotigadipísi tu ujetiga yimanipise yajnepídi taja jnumi uje yajnerámeone u Crísto adode uje chejnáreque re ome danguresórone ore nanique. Jecute yirasique yu uje yejnáreque yu iji uacabáyode. 25 Jecute Dupade ajéode u ome yu ujetiga anguresórone uaque uacoyo uacaróguiji yu. Chamáñaje Dupade ucuei tu uacomitígarique gu. Jecute yajnepídi tu ome uaque ujetiga yacate uágome Dupade uruode gaté ujetiga arajáyo quigode jnese. 26 Enga yatatagode ome uaque u Dupade áyipie ipoguiédedie uje que yocayode jnani bajácho chiraja to nanique. Mu Dupade ajéode e u ujetiga danguresórone disi ejode uyoque yirajágo to áyipie ipoguiédedie udire quigode. 27 Enga Dupade pota ujetiga danguresórone ore chudute áyipiedie udire jnese. Chamáñaje cucha datei gu, enga ueradipísi ome erámi unirisórone jnese. Enga áyipie omenie udire quigode u unojo: uje Crísto déji gosi, enga uté gosi a gajneque Dupade ingoningájnai jne iji gaté. 28 Jecute acáco ore jnese ome Crísto adode. Aquírango ore jnese to ome pisijnaringuéone. Acacopo ore jnese rĩ ujetiga ore chirajapise Dupade uruode quigode jnese. Yoquigaidi tu gu ujetiga Crísto anguresórone chojmara, chojmarane quérã enga ore chise daringáringo jnanío jnese jne iji Crísto adode. 29 Jecute ejna yiguesi ome Crísto iroquéode, enga Crísto uté u uje chisi ome petotiguei ome yu ome daroquéode udore jnese.
1 Ipota ujetiga arajáyo uje ejna yiguesi gu Colósas gosode uaque. Enga yejnapo yiguesi to rĩ ome Laodicéa gosode ore. Ejnapo yiguesi to rĩ ome ayoré uñane jnese uje cáma ore chimo yu to. 2 Yajéode u gu ujetiga ditijinaque ore ome Dupade adode, enga pijnoraquei dépisiji ore ome ñane. Yajéode u to ujetiga ore chiraja Dupade uruode quigode ujetiga ca ore chagutu rágome uté adode. Yipotapísa to ujetiga ore chiraja uje Dupade áyipie ipoguiédedie quigode upúsu Crísto adode ome yoque. 3 Chamáñaje payuquetotiguéode jnese, jé aja pirajatigade jnese rĩ ore garani upúsu Crísto enga que tṍraji siñeque go. 4 Jecute yuruode udore qui tu ome uaque ujetiga ca beyoi enga pãraque uaque ome puru unere bisidétigo jne. 5 Uje idája yu iji uaque múñi, yáyipie jecucha déji uáguiji te. Enga yirasique yu uje udute uacajnoméone. Uje chi ajusópise uacadode guio ome Dupade, enga chi apúyoja uacanguretigai iji Crísto. 6 Yiraja uje uacasayo yocangarádejnai Jesucrísto ome uacáyipiedie nanique. Jecute beyoi enga adotáyo uáguiji Crísto uté ejode to jne. 7 Enga beyoi yocacajnaquéode enga apúyoja uacanguretigai iji Jesucrísto. Oyo poria uje erode chajuque jnumi enga purúja jnumi. Enga jecucha acãcho Dupade gai ome cuchade jnese. 8 Ajuso uaqueo ome pacadisõre tágode ore uje ore chacate uágome dáyipie bisidéguedie, dabotaquéode ore. Uje udore ore acajnaquéode que garani tu Crísto to go, mu garani tu ore jmapié dipesedie, jé upo áyipie ayoré dipesedie rĩ. 9 Uacarajáyo uje Dupade adipísode déji Crísto to uje chojmarapise ore iji jnumi gu. 10 Jecute e Dupade iragupúsu uacajei uje uacátayo uágaja Crísto gu. Enga uacangureni Crísto u uje ujnuéngai dacasutedie, pujopiedie ore gáyode jnese iji erámone, jé iji gaté yui to rĩ. 11 Uje uacátayo uágaja Crísto nanique enga cho ujetiga e picaque uacádode ujetiga apijóchome Dupade to. Mu que cho judíode ore jmapiedie gotique uje ore chica pute guesiminóri, mu yoquiquetasṍri Crísto aquesupídi jogadi tu yocajei. Chamáñaje ayoréode uyoque yoquisijnaringuéone garani u gu. Jecute uté icapídode iji yocajei imoi tu uje chiqueta yóguiji yoquisijnaringuéone ujetiga yipijójome Dupade to. 12 Uje ore chaca uaquedodie iji yodi nanique, enga imoi tu uje uacanguretáyo Dupa pujnuéngaisṍri uje chiringare Crísto iji itoringai nanique. Enga gajnui tu ujetiga uacapatíraño Jesus iji ode. Enga gajnui tupo rĩ ujetiga jé ajínañopo aja gaté rĩ uje ecápo rĩ iji dode. 13 Uacoyo ayoré togode uje uacagúsoji uacasijnaringuéone gai nanique. Uje que picaque uacádode nanique enga que cucha Dupade ome uaque to nanique. Mu uje uacanguretáyo Crísto enga jogadi u uje Dupade chisi ome pucuecaringuei ome uaque, adi u uje chatĩre pucuecaringuei Crísto gai to nanique. Enga Dupade chĩrópise uacasijnaringuéone jnese. 14 Chamáñaje cho jetiga yoquijnose carubode déji Dupade gari nanique uje iyógo uté áyipiedie gáyode gu. Enga yocajnei pujuyaqueque déji yoquiquei. Mu Dupade chĩro yoquijnose carubode udore iji dari gu uje ujnacari Crísto cho yoquisijnaringuéone oré ome daringai chuque uje toji curesei gai ome yoque. 15 Uje Crísto toji curesei gai nanique enga sué Satanas, irógode ore gáyode jnese. Uje chiese pangarádejna ore iji erámone unojo. Enga gajnui tu ujetiga Crísto isaque ore enga jno ore údi ujetiga chingo ore aja darásade. Gaidi u gu ujetiga urásade ore chimo udore ore uje que qué ore bisitique pijoque ome cucha dacatique yui. 16 Jecute ca angáchoi jnanione uñane acajnaquéode uje ore chacate uágome cucha pibose puyade, uje ore chiroque uágaja dajnusinamánone dire, uje ore chãraque cucha pisagode ome uaque iji sábadode. 17 Uje yimóngo ayorérique oréraque enga yirajágo uje idógosi oresṍri iji. Enga a jé isocai u to ome judíode ore jmapiedie jnese. Cachi pocoré bisideque cuchade udore. Mu tocade enga oresṍri tupúsu Crísto iji cuchade udore quigade. 18 A ajusécho Dupade gueranone cucha ome uaque jne ujetiga angáchoi pacadisõre tágode. Jecute ajusópise uaqueo ome jnanione udore ore. Uje ore cho jnani paraguipísode iji raque iji uacajade, enga ore chiroque uágaja dacatecãrainone gaté unirisóño. Ore chisi dabáyode bisideque uje chiese irajatáguejna ore, uje udore que ore cho dojñaji damórique cucha go, enga ore acajnaquéode udore garani upúsu dáyipie ayoredie. 19 Enga udore ore que ore casapoi Crísto yúrique rĩ. Jé basa Crísto anguresõripísode ore cho datoi iji Crísto, enga Crísto chopise daoi iji danguresórone ore to. Enga Crísto u uje ipesute daoi ijóningai. Enga chicha daoi tuté adode aja jogadode. Enga pésu enga aoi adode nóna ñane aja gaté uje quérã. Chamáñaje Dupade áyipiedie quigode jé u gu. 20 Uacapatíraño Crísto nanique iji itoringai, jecute páyipie ayoredie e que cucha ome uaque. Jecute ¿gotique gu a uje jé qué uacabeyoi erámi jogosórone acajnaqué bisidégode? Cho ujetiga jé qué uacagúsoji uacáyipie ayoredie gáyode jõ. 21 Uje udore ore chojningame uaque: “Ca asayo cuchade unojo.” Jeoga ore chojninga: “Ca acho cuchade unojo.” Jeoga ore chojningápo rĩ: “Jé ca etingácho cuchade unojo.” 22 Uje pacajnaquéode unojo que garani tu Dupade go mu garani tu jnanione iji erámone. Uje udore ore garéngone cucha puyácho ome uaque que bisitique pijoque. Enga a jĩraque cuchade udore íjnoque jnese jne. 23 A uacuñane jos eti ayipierãque jnanione udore ore jõ, enga uerate ore acajnaquéode quigode ome uacajéode. Chamáñaje ore chãraque cuchade ome raque gatuaque, enga ore chejna rángaja dacatecãraitigade ome dangurenone cucha. Mu que ore ipesudode udore chatapísaja ore gotique. Chamáñaje ore áyipie ayoredie jé qué jogate ore, enga ore ipotiguéode ome erámone jogonórone cucha qué déji ore to.
1 Uje uacanguretáyo Crísto, enga jogadi tu uté uje piringaraque uágaja gaté to iji uacaringane toque quigade, adi u Crísto uje piringaraque to aja gaté to nanique. Jecute acueyoi gaté jogonórone cucha. Uje uacangureni Crísto e déji gaté gu, enga chácariji dai Dupade ãrachua ome daringai eduguéjna cuchábejna. 2 Omi tu ujetiga uacáyipiedie déji gaté jogonórone cucha, enga jé ca ejnáño uacáyipiedie aja jnumi jogonórone cucha. 3 Uje e chopise ujetiga uacapatíraño Crísto iji itoringai nanique, jecute que pijoque uacacuecaringuérique ome erámi unirisórone ore. Chamáñaje uacacuecaringuei e déji Crísto gari gu iji Dupade gari. 4 Yirajágo uje yocucuecaringué ichai uné guẽrasṍri tu Crísto, enga ujetiga uté di jne enga a jĩraque agúsoji gari to jne iji guéode. Enga a uacajneque uté ingoningájnai jne. 5 Jecute ayáyo uacáyipie ayoredie quigode ome uaque, enga cho ujetiga cuchade udore topísi ome uaque. Yojningane u: ujetiga ca apótayo nungare ome chequé quedéjnaraque, jeoga jnani quedéjnarique ore rĩ. Mu arei tu ujetiga chequé, abai ore chedu ñane. Enga ayáyo uacasoca gajnaréngone, uacapotigué gajnaréngone ore rĩ. Enga ca beyoi uacáyipie gajnarénguenie quigode ome uaque. Enga ca ajnachoi cucha ponáyone ome uaque. Uje uacamóño uje gosi chejna raja dapotiguéode ome cuchade, enga uté gosi chicadígui Dupade. Enga cho jetiga uté gosi idupade u dagaidode cucha. 6 Uacamóño uje pisoca gajnaréngone udore isangurui u Dupade ujuyaquédatéi ome angoneparigode ore jnese uje que ore tangári Dupade. 7 Enga que amóñoji jnutígome cuchade unojo to ica uje uacapéso, uje cáma anguretáyo Crísto ica. 8 Jecute ayáyo apéso cuchade udore jnese: ca oyo uacájninga, enga ca jĩraque óraño uágome cucha gajnaréngone. Ca beyoi uacate gajnaréngone ome ñane rĩ. Ca eso ñane iyoguéode, enga ca adojnóchopo aja ñane rĩ. Enga ca acho puru gajnaréngone ome ñane, pujñiequé gajnaréngone ore rĩ. 9 Enga ayáyo uacarapatáringane ome ñane, uje e uaquécãcho uacasocade ome cucha bajade unojo gu uje uacanguretáyo Jesucrísto to. 10 Enga e uacabeyoi uacate ichade. Chamáñaje Dupade e chinoningase uaque ome uacate bajade gu, enga qué pésu uaque ujetiga oyópise uacanoningayasṍri uté to. Gaidi u gu ujetiga arajayópise Dupade uté gaté. 11 E que cucha go ujetiga judío yoc, jeoga purása quedéjna yoque, jeoga picaque yocúdode, jeoga ca picaque yocúdode. Jeoga ayoré ataque yoque, jeoga ayoré pisaque yoque, mu cucha obiréjnai tu ujetiga Crísto déji gosi. Chamáñaje Crísto dépisiji danguresórone ore gari jnese gu, enga cucha gose Crísto ome ore jnese rĩ. 12 Dupade chijnorapise uaque jnese, enga ajegáite uágome re. Jecute beyoi adode to. Osṍcho uacojode ayoréo, enga caniraque uágome ore. Parágapo uágome ore rĩ enga adotáyo uágome ore adode jnese. Enga ajusópise ñane guio. 13 Yirajágo uje Crísto chĩro yoquisijnaringuéone jnese nanique, enga que jnusinápo rĩ. Jecute beyoi uté adode to enga adotáyo uágome uacojode ayoré ate gajnaréngone ome uaque. Enga jĩraque acadíchoi uaquetétigade ome ore to. 14 Mu cuchiyi tupúsu ujetiga ajnórañopise ñane. Ujetiga pijnoraquei déji gosi enga pisoca omone tocade iji uté gosi jnese. Enga ayoré ujñapetai tupúsu uté gosi. 15 Oyo uacajñanguíji Dupade guerani pajesereringa ome cuchade jnese. Enga jogadi a upúsu uté jne ujetiga chopise sẽre uacajéode. Chamáñaje Dupade ajegaidi u uté gu ome danguresórone uyoque jnese. Chamáñaje Dupade átapi yógaja ñane gu enga cho ujetiga yocaoi jé chojmarapis iji jnumi. Enga beyoi to enga acãcho Dupade gai iji deréjnane jnese ome cuchade jnese. 16 Beyoi enga ãretáyopise uacajéode ome Crísto adode, ujetiga pacadique uágome gatuaque. Enga asíñome uacayuquetotigué omone ome ñane ujetiga oyo ñane quique, enga anejenáño ñane aja piquei gatuaque. Ujetiga ajñecacho enga uacarasitigai gajnengóri upúsu Dupade. Ajñecachója Dupade iradedie, jé iji sálmonie rĩ. Enga ajñecachója to uje edoi tu Dupade. 17 Jecute uacáyipiedie jogadipise yocangarádejnai Jesus gatuaque iji uacapesudode cucha gáyode jnese. Enga cho ujetiga Jesus gajneque uacapesudode cucha. Enga jé isocai u to ome uacojñane jnese. Chopo rĩ ujetiga Jesus gajnécho uacaruode udore to. Enga acãcho yocai Dupade gai ome cuchade uje uacanguretáyo Jesus gu. 18 Amanachuguedie uaque a, angáchoi uacabayode enga apéso ore ipotigádode cucha. Uje e uacanguretáyo Yocangarádejnai jecute uacajnepídi tu ujetiga beyoi uté áyipiedie uniji ome uaque. 19 Acoterachugode uaque a, ajnóraño uacacotedie enga jé ca acho uaquejóringome ore. 20 Pabode uaque a, angoninguite guesaque uágome uacayode gatuaque, uje Dupade ucuei tu uné ome uaque gu. 21 Abechugode uaque a, jé ca apéso uacabode ejoporinguéringo. Socaseti apéso uacabode ejoporinguéringo enga ore cho caru, enga jé ca ore chiraja dasocáringome re jne. 22 Diquirógode uaque a, beyoi uacarósõre jnutiminórone uruode jnese. Que gusu uje uacarósõri déji uaquejode ujetiga angáchoi ore ujetiga ore irasique uaque, mu jé u to uje ore déji sañeque. Uacagaidi u gu ujetiga Dupade chimo uje ũré uaque enga irasique uaque. 23 Jé ca eso uacapesudode uñeque unerotiguérique, mu cho ujetiga ca uacarósõre ayorépisi gajnécho uacapesudode jnese. Mu cho ujetiga Yocangarádejnai gajnécho. 24 Ajnusináño to uje Yocangarádejnai chi cho uacoré jne uje uacabeyoi iroquéode. Enga uté gueranone e dimáneo ome uaque iji gaté. Uje uacarósõripísi tu Crísto uté gu. 25 Mu ujetiga uñeque atígo gajnarécho enga a Dupade cho oré ome cucha gajnarétigo to jne. Enga Dupade a isocárique jé chojmára jne ome yoque jnese.
1 Ujetiga pirósõre uaque engaũrepise uágome uacarógode, enga ca acho uaquejóringome uacarógode ore, mu ajusópise ore guio. Ajnusináño uje uacarósõre gatei déji guéode enga Dupade u. 2 Jecucha acatecãchoi Dupade, enga arijínaño uaquejode. Enga jecucha acãcho Dupade gai to ome cuchade. 3 Acatecãchoi Dupade to ome yoque ujetiga Yocangarádejnai chisi ome piotiguei ome yoque ujetiga yatatago uruode ome ore jnese. Yojningai u Crísto adode ujetiga yatatago ore ome, uje quene pirajaque cuchade udore iji deréjnane unojo. Uacamóño uje yo yiba yatatagode udore uje ore suru yibai iji ne. 4 Acatecãchoi Dupade ome yu to ujetiga yatatagode Crísto acho choquíji guesode ome ore jnese, uje jé yajnei tu udore gu. 5 Ujetiga agúsoji ayoréode ore gari uje que ore changureta Dupade enga ajusópise uacadode guio. Enga ujetiga piotiguei déji ujetiga acate ore ome Crísto adode enga jĩraque acatecãchoi ore. 6 Mu ajuso uacaruode guio enga ore chajmara uacaruode. Enga ujetiga uñeque catecã́ri uágome cuchárique, mu e dimane uágome ujetiga oyo uté quique. 7 Yoquĩjorai Tíquico jecucha chátaja yu ome Yocangarádejnai iroquéode. Enga uté a chise uaque dirome, enga a chatata yadode jnese ome uaque jne. 8 Yajéode u gu ujetiga Tíquico chicabíji uaque ujetiga chatata yujnomei tome uaque, enga pésu uacaninaquérique. 9 Uacarásade uñai, Onésimo, dopísi Dupade adode to, enga a uté nóna Tíquico aja uaque to jne. Enga a udore ore chatatapísa cucha dacadode jnese jne ome uaque. 10 Yibayai tu Aristárco iji soldádode iguíjnai uné. Enga chi yiguíjna uaquei tome uté to. Enga jé chopo Bernabé iguiosi Márcos rĩ uje chi yiguíjna uaquei ome uté to. E yingome uaque ica, mu qué yingopome uaque rĩ: ujetiga ajusópise Márcos guio jne ujetiga díji uaque to. 11 Chi yiguíjna uaquei to ome Jesus uje i uñai u Jústo to. Gusu udore ore iji dojode Dupade anguresõre judío ujade uje ore chátaja yu ome yisagode Dupade urúo. Enga udore ore pésu yininaquei uje ore chatapísa cuchade aja yu gu. 12 Uacarásade uñai Epáfras dopísi Crísto iroquéode to, enga chi yiguíjna uaquei ome uté to. Uté jecucha catecã́ri Dupade ome uaque ujetiga apúyoja uacanguretigade enga ejnáño uágaja Dupade áyipiedie gaté ome uaque. 13 Yimópise uje Epáfras áyipiedie déji uaque gatuaque. Que gusu uaque go, mu Laodicéa gosode, Hierápolis gosode que ore jnoji uté ajéode to go. 14 Chi yiguíjna uaquéode to ome daijnai Lúcas, uje yijnórangopise uté. Enga chi yiguíjna uaquéode ome Démas to rĩ. 15 Angoño Dupade anguresórone iji Laodicéa uje yiguíjna ore yúode ome yoque to. Angoñopome Nínfas, ujode Dupade anguresóño uje ore chamáta ñane ome Dupade uruode aja uté iguíjnai uje yiguíjna ore yúode jnese ome yoque to rĩ. 16 Ujetiga e amácho ujetiga ajicho yurusarane unojo enga aróchoja Dupade anguresórone ore iji Laodicéa jne ujetiga ore chajire to. Yipota ujetiga ore chiroque dajnéone yurusãracho aja uaque to, ujetiga ajicho unojo to. 17 Angoñome yuruode ome Arquípo uje a yósi tome jne: “Ca amoque Yocangarádejnai urúrique ome ua uje chiroque ua aja daroquéode udore ica. Enga be enga amanipise aja quigode.” 18 A yurusaranguipise ejode unojo jne ome yijmáinie. Enga yijócha uacajéode údi ujetiga jé ca acadíchoi yu to iji yuringai pujurúgai enga jecucha acatecãchoi Dupade ome yu to jne. Enga yajéode u ome uaque ujetiga Dupade chatapísaja uaque. Amen.
1 Páblo uyu, enga yijorane u Silváno, Timotéo ore. Urúsãre yurusarane unojo ome Dupade anguresórone uáguiji uaquedaidatei Tesalónica. Yurusarane unojo gajnengórone u uaque uje yocangarádejnai Jesucrísto, dai Dupade ore gajneque uaque. Yocajéode u ome uaque ujetiga yocai Dupade, yocangarádejnai Jesucrísto ore chatapísaja uaque enga ore chisi ome pajesereringai ome uaque. 2 Yacãco Dupade gai ome Tesalónica gosode uaque gatuaque. Enga jecucha icatecãcoi Dupade ome uaque to rĩ. 3 Uje icatecãcoi yocai Dupade ome uaque enga ujnusinángo uacadode. Ujnusinángo uje uacapéso Dupade uruode gu uje tate uacanguretigade ome Dupade. Enga uacabeyoi iroquéode gu uje uacajnórañopise. Enga que ayáyo uacangoroné ome yocangarádejnai Jesucrísto ojningane cucha yúode ome uaque. 4 Yocujode Jesus anguresõre uaque a, Dupade chijnorapise uaque to, enga irajágo uje jé ajegáite uaque to nanique. 5 Que cachi yocatataque Dupade uruode gotique ica ome yocojña ayorérigo, mu yocarijogonóri u Dupade Ujopie Espíritu Sánto ica ome yocacajnaquéode udore. Enga que potigayaquérique déji yógome yocacajnaquéode udore uringane ũrepíso. Uacarajáyo to uje yujucópise yocadode guio uje ugúcoi uacari ica. Uje yocucuei u uacomitígarigo ica ujetiga aquéraño to iji Dupade adode. 6 Jecute jé uacajéo icáite ujetiga aracho Yocangarádejnai, uyoque aja yoquisocade. Cuchade chácariji uacádode nanique múñi, jé uacamesecho yocatatagode Dupade urúo ica. Enga Dupade Ujopie Espíritu Sánto chisi ome pininaquédatéi ome uaque gu uacasocade udore ica. 7 Jecute Jesus anguresórone jnese iji ore unirone Macedónia, Acáya ore, e ore chirate uágaja uacadode unojo to. 8 Uacadúcho Yocangarádejnai adode iji uaquedai Tesalónica ica, mu unojo quigade u uje uté ujnomei chubu erámi. Uje que gusu Macedónia gosode, Acáya gosode uje ore chudute uté ujnomei, mu e chise guidai uñane jnese. Uje cáma yatatago uacajnomei ome ore, mu e ore chudute uacajnomei bajaque to uje chi uásejna uacanguretigade ome Dupade to. 9 Jé basa ga jé ore ojña to ome yoque uje chi Tesalónica gosode uaque uacarasique yoque to nanique uje ico uaque. Uje chi ayáyo uacangurenone ayoré gajnúo, enga e uacanguretáyo Dupápisi to. Enga e uacabeyoi Dupa uecai tuté adode to. 10 Ore chatata rĩ uje chi ajnátuyo Dupade ujnacari Jesus diringai yui iji gaté uje uacajnati uté jé u uje Dupade chiquetápo icáite rĩ iji togode gari. Uje uté a jé u yoquiquetangóri jne ome Dupade ujuyaquédatéi uje chi di jne.
1 Yocujode Jesus anguresõre uaque a, uacarajayópise uje que cachi yoquibaguiete uáguiji uaquedai ica go. 2 Uacarajáyo to uje ico Filípos gosode ore ica, enga ore pojna yoque enga ore isocade gajnarenguipis ome yoque iji dedai ica. Mu jé ibájoi uaque iji uaquedai Tesalónica ica. Dupade átapi yoque gu. Mu que yicájnaco yoque ome ore guetétigade ome yoque, mu jé yajógo yógaja yocacajnaquéode Yocangarádejnai acho ica uje piquetangóri u uté gu. 3 Uje yacáco uaque ica enga ũrepise yoque enga que paringaquérique déji yoque ujetiga yarango uágome pacajnaqué tátique. Enga que yocáyipiedie dépoji yoquipotigué gajnarétigo gotique rĩ, mu yocáyipiedie jogadi upúsu Dupade. 4 Jé basa Dupade chiraja yocadode uje omío. Jecute ajegáite yoc ujetiga yico ujnomei údi ujetiga yatatago yocangarádejnai Jesucrísto uringai piquetangore ome ore. Jecute que yocajéode u go ujetiga ayoréode ore irasique yoque. Mu yoquigaidi u ujetiga Dupade irasique yoque, uje uté u gu uje a chajire yocadode aja quigode jne, enga chiraja yocajéode iji yocáyipiedie jne. 5 Uacarajáyo uje que yisígo uacabánique gotique ome yocuru uerate bisidétique. Enga que yarango yóguiji quedéjnarique rĩ ujetiga yipótago uaquẽratique cucha. Dupade u uje chiraja yocuringane ũréo ome cuchade unojo. 6 Ujetiga yocajéraso ica, enga a yingongorása yoquimenuringuéone ome uaque ujetiga picotaque yoque ome uaque. Chamáñaje yocangarádejnai Jesucrísto irógode uñane u yoque gu. Mu que yocáyipiedie déji ujetiga picotaque yoque ome ayorérique, jeoga uaque u, jeoga uñéngo u. 7 Mu que yijnángo yocájningarique aja uaque mu yocajnua tu chequé ome uaque uje chacucãre dabi enga chijnóra. Yocadi jé u uté ome uaque uje ijnórangopise uaque to gu. 8 Tadipise yoquijnoraquéode ome uaque. Jecute jé yitiójopísarása ujetiga yoco yoquiba uaque ome yocatatagode Dupade urúo ome uaque. Chamáñaje ijnórangopise uaque gu. 9 Yocujode Jesus anguresõre uaque a, ajnusináño uje ugúcoji uacajade ica enga yocujuya yoc ica uje ucuegoi yoquiquetangóño ica iji uaquedai. Oco yocujuñame yoque ica gu ujetiga ca yipéco uacajuréraque ica ome cuchárique uje qué yatatago Dupade uruode ome uaque ica gu. 10 Yocadi cásodica pijogúsorone u Dupade, jé u uaque rĩ. Uje que yipéco Dupade anguresórone uaquejnarétique cucha ica, mu yedugopise Dupade ica iji yocajéode, enga ũrepise yoque ujetiga ca diquiyaque yoquiyoguérique ome ayorérique uaque. 11 Uacarajáyo to uje yaquírango uágome uacajnusiétigade ica, enga yinejecopo uacádode rĩ. Enga yocajnui u jnani uje susipise dabode guio. 12 Enga ingongome uaque ica ujetiga ca apúsoja uacajéningo, uje Dupade anguresóño uaque gu. Uje Dupade tibidi uaque gu ujetiga cháta uágaja darásade ujetiga uacasuté jé u Dupade to ujetiga amóñopise ingoningájnai ome uaque to. 13 Jecute yacãco Dupade gai ome uaque gatuaque uje uacadúcho Dupade uruode ica iji yoquibijnanone, enga que oyo gojña ayoréo iji ica. Mu uacamesecho ica uje Dupade urúo yocatatagode udore. Enga jé ũrepise uje Dupade uruode jé upúsu yocacajnaquéode udore ome uaque. Chamáñaje chécãre uacadode gu uje uacanguretáyo ica. 14 Yocujode Jesus anguresõre uaque a, uacarásade ore cho damajo uaque. Mu Dupade anguresórone jé ore adi tu to ica iji Judéa. Uje ore urásade judío ore cho damajo ore to ica uje ore changureta Jesucrísto to gu. 15 Judíode udore jé ore yuque yocangarádejnai Jesus to icáite. Jé ore yugápo Dupade uruode atatasórone jnani bajácho icáite to rĩ uje judíopise ore to múñi. Enga jé ore jocarangápo yoque to rĩ iji dajade. Que ore chucué dangoningárique ome Dupade go, enga cho ujetiga ore cho damajo erámi unirisórone ore jnese. 16 Jecute uje ipótago ujetiga yacáco purása quedéjnane ome Jesus adode ujetiga chiqueta ore to, mu judíode ore chãraque darai ome yoque. Jecute ore isijnaringuéone chõre re gaté. Mu Dupade ujuyaquédatéi a chise ore jne, jé iji ne gajneri. 17 Yocujode Jesus anguresõre uaque a, uje yicoji uacari ica enga yirajágo uje a ca diyajmaque yoque jne, mu jĩraque yipótago yimóngopo uaque rĩ. Ũré uje ugúcoji quedéjnane ome uaque ica, mu yocáyipiedie que jnoji uaque go. 18 Jecute yocajéode u ujetiga yibajopoi uaque rĩ. Cuchiyi tupúsu Páblo uyu, yijírase gatuaque, mu jecucha ga Satanas chicha raja yiquei enga chãraque uaquéode ome yu. 19 Uaque u yocangurenone ome Dupade adode. Enga uacapesute yocajéchiretaringuéi to. Enga tijode a chopise jnangome yoque jne gu uaque ujetiga diga yocangarádejnai Jesucrísto di. 20 Jé yocajéchiretaringuéi, yoquininaquéode ore gajnengórone u uaque gatuaque.
1 - 2 Uje e que yirajágo yoquisocárique ica uje que yimóngopo uaque rĩ, enga yocajéode u ujetiga Timotéo chicáji uaque ica ujetiga chajmita uaque, jé qué gusu yoque iji yoquiyaridi Aténas. Dupade irógode uñai u yoquĩjorai Timotéo, enga cháta raja yoque ome yocatatagode Dupade urúo ome Crísto uringai piquetangore to. Jecute yoquiroi tu uté aja uaque ujetiga cho uacaquique enga chacate uaque gaté ome Dupade uruode. Yigaidi u gu uacaringane Dupade anguresõre etócho. 3 Yigaidi upo rĩ ujetiga ca uacuñeque cho caru ome uacaringane pumajo ome uacarásade. Uacarajáyo uje Dupade anguresórone uyoque yocajnei tu ujetiga yejnárejo joroque cuchade unojo jnese iji Dupade adode gáyode. 4 Jé upo rĩ uje qué ugúcoji uacari ica enga jĩraque yoquirajaque cucha dacadode unojo ica ome yocuringane pumajo. Enga ingongo uaque ica uje a cucha dacadode udore tocade ome yoque jne. Enga e uacamóño uje jé ũré yu ome cuchade udore. 5 Jecute uje que yirajápo yisocáringome uaque ica rĩ, enga iroque Timotéo aja uaque ujetiga chatata uacasocade ome yu ome uacanguretigade iji Dupade. Itodo ica gu ujetiga Satanas chucuase uacuñeque aja pisijnaringuéone, enga socaseti cachi yocatataguírase yocatatagode Dupade urúo ica ome uaque. 6 Mu Timotéo e chisápo yoque rĩ uje tṍraji uaque. Enga ojñane ueradipíso ome uacanguretigade, uacajnoraquéode ore. Chatata uje chi jecucha anínaño yoróga yoqui ujetiga amóñopo yoque rĩ. Enga adi jé u uje ipótago joróga yimóngo uaque to rĩ. 7 Jecute, yocujode Jesus anguresõre uaque a, uje ugúcoji pujuredie, yocuringane pumajo ajei, mu inínangopísa yoque gu uje irajágo uje uajate uáguiji uacanguretigade. 8 Jecute tijode chopise jnaque ome yoque. Uje e irajágo gu uje uajate uáguiji uacanguretigade iji Yocangarádejnai. 9 Jecute yacãco Dupade gai ome uaque. Mu que qué yirajagopo yoquisocárique ome yoquirasitigai ome Dupade rĩ ome uaque. 10 Icatecãcoi Dupade iji dirode, dejade ore jnese ujetiga ajéo enga yibajopoi uaque rĩ ujetiga yimongopísape ñane. U to ujetiga yacáco uágome cucha amirone iji Dupade uruode ujetiga uacanguretigade quérã gaté rĩ. 11 Yocajéode u ujetiga yocai Dupade, yocangarádejnai Jesucrísto ore chatapísaja yoque enga yibajopoi uaque rĩ. 12 Yocajéode upo ome uaque rĩ ujetiga Yocangarádejnai chisi ome piquéraningai ome uaque iji dadode. Ujetiga ajnórañopise ñane gaté, enga ajnórañopo uacojode ayoréo ore jnese rĩ iji erámi tuné. Adi jé u uje ijnórangopise uaque to. 13 Yocajéode u to ujetiga uacanguretigade uajácho to iji uacáyipiedie, ujetiga eduyo Dupade to iji uacajéode. Enga ca uacayoguérique cusipise go iji yocai Dupade iquei ujetiga yocangarádejnai Jesucrísto diapo darásade ore údi rĩ iji jnumi.
1 Yocujode Dupade anguresõre uaque a, e yoco quique uágome pisoca goningane ica, uje Dupade irasicho. Ome yajéode ga e beyoi pisoca goningane udore isocade. Mu uje yocangarádejnai Jesus iroque yoque aja uaque enga yijóchago uacajéode údi gaté ujetiga jé boyo pisoca goningane udore údi gaté. 2 Uacamóño uje yocangarádejnai Jesus jé utocáite yoque ica ujetiga yacáco uaque. Enga uacarajáyo yocacajnaqué cásodica quigode. 3 Uacarajáyo uje Dupade ipotigádi tu ujetiga asiyopísome uágome Dupade. Enga ca amócho uruode quigode iji uaque. Enga ca pipotiguérique déji uacuñeque ome gapu quedéjnaraque, mu gusu ome dacotéraque. 4 Ujetiga ayoré chojmara, chojmarai acotépiseraque cuse. Enga chedupise dacoté enga susipise guio. 5 Enga ca áyipieraque noña ome dacoté uaté, enga ca chirate erámi unirisórone ore to uje que ore changureta Dupade. 6 Ujetiga ca uacuñeque tõria dojórique Dupade anguresõre acotéraque. Uje e yingongome uaque bajaque diríca uje Yocangarádejnai a chopise dajuñame uñeque jne ujetiga pésu cucha dacadode udore uñeque. 7 Chamáñaje Dupade que tibidi yoque gu pisoca gajnarétique, mu tibidi yoque gu ujetiga yedugo ipotigádode cucha omío ome yoque. 8 Jecute gosi ujeta chetaque yocacajnaquéode unojo que guetégode u yoque gotique, mu guetei tu Dupade. Dupade jé u mu uje chisi ome dajopie Espíritu Sánto ome yoque, ujetiga ueguipise yoque ome pisijnaringuéone. 9 Que yurúsãre cuchárique gaté ome uaque ujetiga ajnóraño uacojode Dupade anguresóño. Chamáñaje Dupade jé acadique uaque ujetiga ajnóraño ñane gu. 10 Enga jé ũrepise uje jecucha uacajnóraño uacojode Dupade anguresõre ore iji Macedónia jnese. Mu jé oco uacaquique ujetiga ajnóraño ñane gaté to. 11 Jé ca uacáyipieraque déji pedotígarique. Mu oyo parácho ome ñane. Enga ca uacáyipie jnoji uacasatígo cucha. Uje yoco quique uaque ica ome cuchade udore quigode. 12 Adi u ujetiga ca ajmátayo ome cuchárique. Adi upo rĩ ujetiga agupurayode ome Dupade uruode ore chimesere uacadode enga ore tangári uaque. 13 Yocujode Jesus anguresõre uaque a, yipótago ujetiga arajáyo yocujode Jesus anguresõre toque ore ajesúrique to. Uacarajáyo uje agupurayode ome Dupade ore urásade toi enga que ore chajire re ome pujnusiétigárique. Chamáñaje que ore anguretique cucha cuse gu. Enga que yipótago ujetiga oyo udore ore. 14 Yirajágo uje Jesus ecáji daringai toque nanique. Jecute yirajágo to uje chi Dupade isocai jé u uté jne ome Jesus anguresõre togode. Uje chi chiqueta ore jne iji ore uringane tocho rĩ. 15 Jecute yingongome uaque Jesus acajnaquéode. Uje chi ejo ayoré uecade ome Jesus anguresõre togode jne ujetiga ore chachai iji Jesus diringai tuté. 16 Uje Yocangarádejnai tupúsu jne ujetiga doi jnumi tiji gaté. Enga a pududique pijna iyiejnane jne. Enga a pududique Dupade iroguipísi gaté unirisõre pijnacaráidie to. Enga a pududique ubuchutique agoyéraque to jne rĩ. Enga jé u jne ujetiga Jesus anguresõre togode ore niji bajaque iji dódedie. 17 Unojo quigade enga Jesus anguresõre uecade uyoque a póite yoque to jne aja gaté, enga Jesus anguresõre togode, uecade uyoque a yacágo aja gue abujadie jne ujetiga yachagoi Yocangarádejnai jne iji gaté yui. Enga jogadi jé u uje que qué yijnicópo yóguiji Jesus gari rĩ iji deréjnane jnese. 18 Jecute beyoi enga anejenáño ñane gaté ome yocacajnaquéode udore ome uaque.
1 Yujode Jesus anguresórone uaque a, que cucha go ujetiga ca arajáyo cucha dacadode udore imone cucha, jé aja dínique ujetiga cuchade udore tocade. Jecute que yurusarome uaque cuchade udore quitígo. 2 Jé uacarajáyo to uje que pijoque Yocangarádejnai diringárique yui go. Mu a ore chunina jeti di jne. Gajnui a u oriechoquírique jne uje que puninamate iji dejátique. 3 Ujetiga ayoréode jnese iji erámone ore chojninga: “Tijode cho jnangome yoque jnese. Uje íjnoque pocaningane ome yoque. Enga e que paguté joráraque cusapo rĩ.” Enga deréjnai tuté a u jne ujetiga Dupade ujuyaquédatéi yore ore gai enga a ca ayorérique chapídome jne. Ore gajnua ta u chequé icamasugué te jne. Uje que tiógara dabi achaminone enga que chapídome. 4 Mu yujode Jesus anguresórone uaque a, a ca Yocangarádejnai diringai adi u oriechoqui ipesudéraque paguté jora jne ome uaque. Chamáñaje e que agúsopoi ijnangununie ajei gu. 5 Uje Jesus anguresórone uaque uacajnui tu jetiga agúsoi direcaringuérique, dínique ore ajénique. Que yoco ore go uje ore déji ijnangununie, dejade ore ajéode, uje que ore changureta Dupade. 6 Jecute ca yoco ore uje que ore changureta Dupade, uje ore cho mongone enga que ore áyipieraque déji Dupade. Mu uyoque ga yoquedodie uchui ome yoquejode gatuaque enga dimane yoque gatuaque rĩ. 7 Irajágo uje mongone ore gajnei tu dejai jeta ore moji. Yote pioi josórone ore gajnei tupo dejai te rĩ ujeta chujé ore iji. 8 Mu uyoque uje yugúcoji direcaringuei yocajnei tu ujetiga dimanepise yoque gatuaque ome yoquejode. Yirajágo uje jocaratade ore chicha guebéode aja darobe yúode uje ore chãraque rac. Enga jé yoquisocai u to uje yanguretágo Dupade, enga yijnórangopo rĩ. Yirajágo uje jocaratade ore chicha datoje guebei aja datoi yui to rĩ, uje ore chãraque datoi gu. Enga adi jec u to uje yanguretágo yógome piquetaque to ome Dupade. 9 Uje uacamóño uje que Dupade ajegáite yoque gu ujetiga cho dajuñame yoque. Mu ajegáite yoque gu ujetiga chiqueta yoque ome yocangarádejnai Jesucrísto ipesudode ome yoque. 10 Toque yoque jne marínga, jeoga ueca yoque jne, a jé yátago yógaja Jesucrísto jnese jne iji idai. Uje Jesucrísto toi gu cuchade unojo nanique. 11 Jé beyoi uacasocai tuté údi uje uacoyo ñane quique enga uacapénuñoji jnumi ome ñane iji uacanguretigai ome Jesus. 12 Yocujode Jesus anguresõre uaque a, yijóchago uacajéode údi ujetiga angachopísi Dupade irógode aja uaque. Ore u gu uje ore chacate uágome Dupade uruode. Enga ore chopo uacaquique rĩ ome Yocangarádejnai adode. 13 Uacajnei tu ujetiga ca ajusécho ore. Enga ajnórañopise ore rĩ ome ore ipesudode Dupade urúo ome uaque. Tijode cho jnangome Dupade anguresórone uágome ñane gatuaque to rĩ. 14 Ingongopo ome yocujode Jesus anguresõre uaque rĩ ujetiga oyo ducutáguebéode ore quique enga uacaruode dosója ore, ujetiga ore caniraque ome cucha pisatígo to. Enga apéso Dupade uruode unéningárique ome ore uje ore pota ore cho caru iji danguretigade. Enga átayo aja ore uje cáma ore nunapísiji Dupade adode. Enga adotáyo uágome unojo ore adode jnese. 15 Ujetiga bojórique ayoré pésu cucha gajnarétique ome ua marínga, jé ca apésu cucha gajnarétique ome gosi to. Jé basa beyoi uacate arégode ome ñane, beyopome uacojode ayoréo ore jnese rĩ iji erámone. 16 Jecucha anínaño uaque gatuaque. 17 Acatecãchoi Dupade gatuaque rĩ. 18 Acãcho Dupade gai ome cucha dacadode jnese uje tocade iji uaque. Uje Dupade ajegaidode cucha u unojo ome uaque uje uacanguretáyo Jesucrísto. 19 Ca etácho Dupade Ujopie Espíritu Sánto adode iji uaque. 20 Ca etácho Dupade uruode atatasónique acajnaquérique ujetiga jec ũré enga irajatigade garani u Dupade. 21 Mu quétingacho ore acajnaquéode jnese ome uaque, enga amesecho arétigo iji ore acajnaquéode. 22 Ca acunguésoñoi pisijnaringuéone uñeque iji erámone unojo. 23 Yajéode u ujetiga pajesereringai guẽrasṍri Dupa pésu uaque enga ueguipise uágome. Enga yajéode upo rĩ ujetiga chãraque uacáyipiedie, uacajéode, uacao ayoré rĩ ome pisijnaringuéone. Yigaidi u gu ujetiga ca uacayoguérique cusipis ujetiga Yocangarádejnai di. 24 Enga uacajegaisṍri Dupade ũrepis ome daruode ome uaque. Enga a doi daruode jnese jne ome uaque. 25 Yocujode Dupade anguresõre uaque, acatecãchoi Dupade ome yoque to. 26 Angoño yocujode Dupade anguresõre ore jnese ome yu uje que yocáyipiedie jnoji ore go. Enga asayopo ore jmanáyone ome yu to jne rĩ. 27 Yocangaráni Jesucrísto iroque yu ujetiga ingo cuchade unojo ome uaque ujetiga ajicho yurusarane unojo enga ãrarachója gai ome yocujode Dupade anguresórone ore jnese iji uáguiji te. 28 Yajéode u ujetiga yocangaráni Jesucrísto chatapísaja uaque. E gusu yurusarane. Amen.
1 Páblo uyu, enga yijorane u Silváno, Timotéo ore. Urúsãre yurusarane unojo ome Dupade anguresórone uáguiji uaquedai Tesalónica. Yurusarane unojo gajnengórone u uaque uje uacanguretáyo yocai Dupade, Jesucrísto ore. 2 Yocajéode u ome uaque ujetiga yocai Dupade, yocangarádejnai Jesucrísto ore chatapísaja uaque enga ore chisi ome pajesereringai ome uaque to. 3 Yocujode Dupade anguresõre uaque a, yoquisocápisi tu ujetiga yacãco Dupade gai gatuaque ome uaque. Uje gajnareque ujetiga ca yacãco Dupade gai ome uaque. Uje uacanguretigai iji Jesus chõre re. Enga uacajnoraquéode tádapo gaté rĩ ome ñane. 4 Unere uje yatatago uacadode ome yocujode Dupade anguresóño ore iji yocajesúode erámio. Chamáñaje uacanguretigai iji Dupade pijógome ore jnese gu uje uacadotáyo uágome uacajnenie pujurédatéi, jé u iji uacaringane ducañerájma jmáinie rĩ. 5 Yirajágo uje ũrepise Dupade uje pésu cucha dacadode aja quigode jnese. Uje Dupade chiraja uacaringane pumajo ome dadode. Jecute chi atióchopísa uacaringáringo urása jne iji gaté. 6 Mu chi jé tiógarapísa to ujetiga cho dajuñame uacamajosórone udore to uje e uaquejnarécho ore ipesudode ome uaque iji deréjnane unojo. 7 Mu jé tiógarapísa to ujetiga Dupade chijnime uáguiji cucha gajnaréngone udore ajei uje uaquejnarechopise uágome, enga tijode cho jnaque rĩ ome uaque. Que gusu uaque mu uyoque u to. Mu cuchade udore jogadi u jne ujetiga Yocangarádejnai tṍraji ome yoque. Chamáñaje a uté jõrai u pioque ocarádejnánie aja jnumi te rĩ. Enga iroque ujopierane a nóna to aja jnumi te jne. 8 Yocangarádejnai Jesucrísto a di jne gu ujetiga cho dajuñame Dupade guetesórone ore jnese, angoninguite parigode ore rĩ uje ore chotigase yocatatagode yocangarádejnai Jesucrísto acho. 9 Unojo a ore gajnei pujuyaqueque ca eruénique cusapo jne rĩ iji deréjnane jnese. Enga Dupade a tṍra udore ore jne enga a ca chimópo ore jne rĩ ome denomitique. Enga a ca ore chimo Yocangarádejnai uringárique cucha datei, ingoningájnai ore ome raque to jne. 10 Enga a Yocangarádejnai anguresórone ore jnese, a ore chatai jnese jne iji diringai tuté, enga a ore tijapója jnese jne rĩ. Enga a uac u to jne uje uacanguretáyo yocacajnaquéode ome uté gu ica. 11 Yocajéode jé u unojo ome uaque. Jecute jecucha icatecãcoi Dupade ome uaque ujetiga Dupade chátaja uaque enga atióchopísaja uacaringane Dupade ajegaicho. Icatecãcópoi Dupade rĩ ujetiga chisi ome dajopie etogue tome uaque ujetiga uacajegaidode cucha omío tocade jnese. Jé upo uacasagode cucha jnese rĩ uje uacapéso gu uacanguretigai ome Dupade, ujetiga udore tocade to enga omío quigode jnese. 12 Yajéode u gu ujetiga picotaque yocangarádejnai Jesucrísto jne ome uacadode, uacanguretigade ore. Jé basa picotaque uaque to jne ome yocai Dupade, yocangarádejnai Jesucrísto ore to. Uje paraque gu Dupade ore ome yoque.
1 Yocangarádejna Jesucrísto a di jne enga chamáta yoque jne aja re. 2 Jecute yijócha uacajéode údi ujetiga ca écãcho uacajénique quitique ome cuchade udore yúode. Enga jé ca chajuque uacagutéraque jne ujetiga uñeque pota chãra uágome dacajnaquérique uje chiese acajnaquéode tṍraji Dupade. Jé upo pacajnaqué quedéjnarique uñeque ujetiga ca chajuque uacagutéraque. Ajusópo uaqueo rĩ ome purusãratígo jne rĩ uje chiese tṍraji yoque uje chiese yojníjo, “Yocangarádejnai e di ica ẽrie.” 3 Jecute ajusópise uaqueo ujetiga ca paranguipise uaque. Uje cáma Yocangarádejnai di enga, a bajai u jne ujetiga jnanione iji erámi údode jnese ore tagu Dupade uruode quigode aja. Iji dirode udore enga a jnani tocade jne uje pisijnaringuéone edópise uté. U mu, Dupade imanique dimanei jnani uté qui. MEnga quique obiréjnai u gajño pioi. 4 Enga a uté u jne ujetiga umajo Dupápisi, jé aja ayoréode ore angurenone cucha jnese rĩ iji erámi. Enga diga jno enga chacája Dupade iguíjna cuchábi ajei te jne enga a chopise Dupade iji re jne. Enga a chãra cojñone ore jnese jne iji erámi. 5 ¿Ja jé ca ajnusináño uje yugúsiji uacari ica iji uaquedai enga yacate uágome cuchade unojo quigode ica ya? 6 Enga uacarajáyo uje pisijnaringuéone edo tuté jnani e igarisṍri cuse iji deréjnane unojo. Enga uté igarisṍri u uje qué chigaru. Gaidi tu gu ujetiga cáma tocade jé aja ujetiga chise Dupade ojningai tuté dire. 7 E pijoque jnani uté ipoguiédode dajéo ome dasijnaringuéone iji erámi tuné. Mu cáma uté pijoque to. Amiri tu ujetiga Dupade chijnime uté igarisṍri iji erámi tuné enga jé u ujetiga yore erámi gai jnese. 8 Enga ujetiga pisijnaringuéone edo tuté jnani chingo raja erámi, enga jé u jne ujetiga Yocangarádejnai Jesus chiboráta. Enga a chujépise uté jne ome dajñare iyiejnai. Enga chajnangarása aja quedéjnane jne ome daringai iyiejna iji daríringai. 9 A pisijnaringuéone edo tuté jnani garani u Satanas jne. Enga a jé jõra tu dajopiéjnane, dajñangone dacho ujetiga diga di. Enga a pitijabácho ate datéode ome cojñone ore jne. U mu, ãraque ore ome datuatigade udore. 10 Enga pisijnaringuéone edo tuté jnani a chãrapise ore jne ome daringaquédatéode. U mu, a arane u udore jne uje ore quique dimanéo Dupade ujuyaquédatéi yui. Chamáñaje udore que ore chise Dupade uru uréone unétique ica gu ujetiga piquetaque ore ome to. 11 Uje ore chetaque Dupade uru uréone enga Dupade noñome ore iji paringaquéode jmáinie. Gaidi u gu ujetiga ore changureta purupatáringane gatuaque. 12 Jecute a Dupade ujuyápise daru uréone otigayasórone ore jnese jne. Uje ore irasiguipísode u dasijnaringuéone ica gu. 13 Yocujode Yocangarádejnai ijnorane uaque a, que toc ujetiga yiyágo yacãco Dupade gai ome uaque. Chamáñaje ajegáite uaque nanique gu iji taningápisi ujetiga chiqueta uaque. Enga uaquẽrato u Ujopie Espíritu Sánto uje pésu uacaringai ujñapetac ome Dupade, enga jé jõrai u uru uréone to uje uacanguretáyo to nanique. 14 Uje uacamesecho yocacajnaquéode Dupade urúo ica ome uacaringane piquetaque, enga Dupade ajegáite uaque ujetiga uacaninamáni tu yocangarádejnai Jesucrísto ingoningájnai to iji gaté. 15 Jecute yocujode Dupade anguresõre uaque a, uajate uáguiji uacanguretigade gatuaque. Enga ca acadíchoi yocacajnaqué cásodica ome uaque uje ugúcoji uacari ica. Enga ca acadichopoi rĩ yocacajnaqué cásodica ome uaque rĩ iji yocurusarane ome uaque. 16 - 17 Yajéode u ujetiga yocangarádejnai Jesucrísto, yocai Dupade chichagu picasitigai taja uacáyipiedie ajéode, ujetiga uome uacaru quitígo jnese, enga omío uacapesudode cucha jnese to rĩ. Chamáñaje yocai Dupade u gu uje chosõre yoque enga chingo dajnoraquédatéi aja yoque. Enga a ca dequejnaque Dupade osõraquei ome yoque jne. Enga Dupade chisi ome pirasitigai ome yoque to rĩ ome yocajnéone cucha uome yui iji gaté.
1 Yocujode Dupade anguresõre uaque a, e idógosi yurusarane unojo eruei, mu acatecãchoi Dupade ome yoque to ujetiga Yocangarádejnai ujnomei jĩraque chise erámi jnese. Enga ujetiga ore chimesere yocacajnaquéode to. Isocai tu uje uacamesecho to ica. 2 Acatecãchopoi Dupade rĩ ujetiga chãraque yógome jnani áyipie eyúgode, sijnángone ore. Uje uacamóño uje que pangurete Jesus ome ayoréode jnese go. 3 Yocangarádejnai que ajéninga darúrique, jecute a chisi ome petotiguei ome uaque jne. Enga a chirodápo uaque jne rĩ ome cucha gajnaréngone jnese. 4 Yanguretágo Yocangarádejnai ome uaque ujetiga ajnerañome yocacajnaqué cásodica ome uaque gaté. 5 Yocajéode upo rĩ ome uaque ujetiga Yocangarádejnai chátaja uaque enga arajayópise Dupade ijnoraquei quigode. Yocajéode jé u to ujetiga adotáyo uágome cuchade, isocai tu Crísto uje chidota re ome cuchade icáite. 6 Yocujode Dupade anguresõre uaque a, Jesucrísto ajéode u ujetiga yingongome uaque ujetiga acayoi quedéjnaringo ome Dupade anguresórone uñeque ujetiga ca pota chisa cucha pisatique, enga ujetiga ca doi yocacajnaqué cásodica quigode to ome uaque. 7 Uje uacarajáyo yocadode uje ugúcoji uacari ica, ujetiga aracho yoque. Uje que yiyágoji uacari bisideque ica, mu isago cucha pisagode to ica iji uacari. 8 Que yajópo ayorérique potique bisideque ica rĩ jetiga ca yoco oré. Mu yocujuya yóguiji dirode, dejade ore ica uje isago cuchade ica. Yoquigaidi u gu ujetiga ca yipéco uacuñeque juréraque ica ome cuchárique. 9 Yocajnei jé u ica mu ujetiga yutagoi uaque enga átayoja yoque ica. Mu jé isago cucha pisagode ica ujetiga amíningacho yóguiji yocadode enga aracho yoque to aja. 10 Yocajéode u ica enga ingongome uaque ica ujetiga gosi ca chisa cucha pisatique enga ca uté gosi taque to. 11 Uje ore chingome yoque uje chi uacuñéngo ca chisa cucha pisatígo. Enga chi ore áyipie jogadipise uje que pésu cuchárique. 12 Yoquiroquei tu ome udore ore ujetiga ore cha dedoitigade. Enga ore chucué daquetangóño, enga ore chisa cucha pisatígo to. Uje yocangarádejnai Jesucrísto jé ajéo ome ore gu. 13 Yocujode Dupade anguresõre uaque a, beyoi uacate arégode gatuaque enga ca achóyo. 14 Ujetiga uñeque ca doi yocacajnaquéode iji yocurusarane unojo enga adójningachopísa gosode jne. Enga acayoi quedéjnane ome udore gosode jne. Enga diga ore chajéngome dadode udore jne ome raque. 15 Mu ca oyo uacamajo iji uté gosi. Mu aquírañome adode uje yocujo Dupade anguresõre gu. 16 Yocajéode u ujetiga Yocangarádejnai uté uje chisi ome pajesereringane ome ayoréode, enga chisi ome uaque to iji dirode jnese. Ujetiga tijode chopo jnangome uaque rĩ iji cucha dacadode ore jnese. Yocajéode upo rĩ ujetiga yocangarádejnai Jesucrísto déji uacari jnese jne. 17 Páblo uyu upúsu uje yurúsãre yirasitigade unojo ome uaque. Enga jé yisocai u uné ome yurusarane jnese. Yigaidi u gu ujetiga jĩraque pirajaque uje yurusaranguipíso. 18 Yajéode u ujetiga yocangarádejnai Jesucrísto chatapísaja uaque. E gusu yurusarane. Amen.
1 Páblo uyu enga yurúsãre yurusarane ome ua, Timotéo a. Bamo uje Jesucrísto iroguipísode uñai u yu. Chamáñaje yoquiquetangóri Dupade, yocanguretigai gajnesṍri Jesucrísto ore ajéode u unojo gu ome yu. 2 Bamo uje yopise yabi iji ua nanique uje yimanique ua aja panguretigai ome Jesucrísto. Enga yajéode e u ujetiga yocai Dupade, yocangarádejnai Jesucrísto ore chátaja ua, enga ore chosõre ua enga ore chisi ome pajesereringai ome ua. 3 Yijócha bajei údi ica ujetiga ayáji ore idai Éfeso uje qué yicáji ore uniri Macedónia. Yaquĩ́ra ua iji gu ujetiga etaque jnanione udore ore ome ore acajnaquéode uje que ũréo go. Enga jé bo baquirãquéode udore údi ome ore jne iji bayaridi Éfeso uté. 4 Enga aquĩ́ra ore ome ore acajnaqué bisidégode ome yocai casodicáite ojña bisidégode, jé ome ore ibotaquéode ome jnani bajade ore íode rĩ. Uje que toc ujetiga ore chise dabotaquéode udore eruénique gu. Enga que cuchárique tṍraji udore ome yoque. Uje pibotaquéode udore que chatapísaja yoque ujetiga yirajágo Dupade áyipiedie quigode ome yoque. Mu panguretigai u uje chátaja yoque. 5 Yiroque ua aja udore gu ujetiga pijnoraquei dépoji uyoque ome ñane rĩ. Ujetiga yoquijnoraquéode udore garani u yocáyipie ichadie ome ñane. U to ujetiga yujuco yocadode guio enga yocáyipiedie ca pésu yoquejoporinguérique rĩ. Ujetiga yocanguretigai déji yoque enga que taque yoque. Jogadi u uté gu ujetiga yoquijnoraquei quítequiguijí yocuéchai ome ñane. 6 Mu jnanione uñane e ore cho caru iji danguretigai ome Jesucrísto, enga e ore chejna rángaja pibotaqué bisidégode gatuaque. 7 Ore pota raque ome daringane pacadisõre, ujetiga ore cho quique dojode ayoréo ome Dupade adode. Enga que ore chagutu rágome dacajnaquéode. Mu que ore chirajapise cucha uréone quigode. 8 Yirajágo Moises urusarane uringane cucha pagutiyamácho. Mu cucha amiri tu ujetiga yirajágo ujetiga yajome udore quigode jnese. 9 Uje que Moises churúsãre Dupade guetégode cucha ome ayoré parágode go. Mu purusãracho ome sijnángone ore. Jé ome Dupade guetesórone ore rĩ uje ore tagu Dupade uruode aja. Jé ome angoninguite parigode, ome pisijnaringuéone ipesungórone ore rĩ uje ore chetaque Dupade adode, uruode ore. Jé u to ome ore uje ore chetaque dayode enga ore pota chutígome ore. Jé u to ome ayoré yungórone ore rĩ. 10 Jé u ome udore ore to uje ore tungarája gapu quedéjnanie, jé u ome chequedíe to rĩ uje ore moji jnani quedéjnane gari. Jé u to ome jnanione ore uje ore tungarája dojode jnanío. Jé upo ome ayoré isangórone ore rĩ uje ore pógu dasagode dojode ayoréo, jé aja ujetiga urásade cho oré isangórone udore. Jé upo ome urupatáquechoquíode, dara ijnimisórone ore jnese to rĩ. Jé upo rĩ ome Dupade uru uréone guetesórone ore jnese. 11 Mu pacajnaqué uréone unojo jé u uje pininaquei guẽrasṍri Dupade chisi ome yu to nanique ujetiga yiji údi aja erámi. Enga pacajnaqué uréone udore u uje chingo Dupade pujnuéngaisṍri áyipie omenie quique ueradéjnane ome yoque. 12 Yacaranguipise ome yocangarádejnai Jesucrísto uje chisi ome petotiguei ome yu ome unojo. Yacaranguipise to uje cho daroque ujñapetáguiji yu to enga chiroque yu aja daroquéode nanique. 13 Gajnarenguipise yadode ome Jesus nanique marínga, jé ajegáite yu ome daroquéode. Gajnareque yuruode ome nanique enga gajnareque yadode ome anguresórone to nanique uje yumajo ore. Mu Dupade chosõre yu. Que yiraja cuchárique nanique gu uje cáma yangureta Jesus nanique. 14 Paraguipise Dupade ome yu nanique, enga cucha datepo ome yu rĩ. Enga oidi tu panguretigai, pijnoraquei ore ome yu uje chicha yu aja Jesucrísto ejoi. 15 Ũrepíso unojo enga beyoi ga anguretáyo to: uje Jesucrísto chise jnumi nanique ujetiga chiqueta sijnángone ore ome ore ate gajnaréngone. Enga pisijnaringuéone ipesungore obiréjnai tu yu ome ore jnese nanique. 16 Mu jé ũré yu uje Dupade chosõripise yu nanique. Gaidi u gu ujetiga Jesucrísto chejna daringai piquetangore aja yu enga chiqueta yu to, uje yujnué ore gáyode jnese nanique ome yuringai sijnanguipise. Enga a uyu urásu ujetiga pisijnaringuéone ipesungórone uñane ore chirate yu aja Dupade uringai pangurete ujetiga pucuecaringué eyúgojmai déji ore to. 17 Jecute yajéode u ujetiga yicoi ga yicotágo Dupa ugurui iji deréjnane jnese ome uringai eduguéjna eyúgojma, ome uringai togójma, ome uringai pimójma, ome uringai ayipierã́quedatéi rĩ. Amen. 18 Yabi a, Timotéo a, yijíñome yiroquéode udore iji bari gu ujetiga apesupúsu aja quigode uje babé Dupade iroquéode, uje bajnui tu jocarataguebei gu uje chirajapise pocaningane adode. Yiroquéode udore quigode u ujetiga anguretapise Dupade enga upo rĩ ujetiga ca bagutéraque cho jora ome bapesutique cucha gajnareque. Enga ajnusinapísa Dupade uruode atatasórone ore uruode quigode uje ore chingo ua aja Dupade nanique. 19 Jnanione uñane ore áyipiedie chaquĩ́ra ore ome dapesute gajnaréngone iji taningai, mu que ore tangári dáyipiedie quigode ica. Jecute ore ipesute gajnaréngone chĩropise ore anguretigade. 20 Adi jé u to ome Himenéo, Alejándro ore. Jecute iya ore to ujetiga Satanas doi dasocáringome ore jne. Enga a ore chiraja jne uje que pidoningamate Dupade go.
1 Yacajnaqué bajade u ujetiga acatecãchoi Dupade ome uacojode ayoréo, enga acãcho gai ome ore jnese. Enga ajóchayo Dupade ajei údi ome ore uje uacatayoi Dupade ome ore imeserane cucha to. 2 Acatecãchoi Dupade to ome peduguéjnane, dacasutedie ore jnese rĩ ujetiga yocajéode cho sẽre ome ñane enga tijórigo cho pujnúringome yógome ñane rĩ. Enga yicoi enga yisíngome yógome Dupade, enga yujucopise yocadode guio ujetiga yocujode ayoréo tangári yoque to. 3 Ueracho pisocade unojo enga yoquiquetangóri Dupade irasicho. 4 Uje Dupade uté pota gu ujetiga erámi unirisórone ore jnese chise daringane piquetaque. Enga pota to ujetiga ore chiraja uru uréone quigode jnese to rĩ. 5 Que Dupa uñeque cuse. Gusu Dupápisi. Enga que putocaitique uñeque cuse to rĩ ujetiga jno yocúdi aja Dupade ujetiga Dupade, uyoque yocajéode cho sẽre ome ñane. Gusu yocujoi erámi unirisõre Jesucrísto u ujetiga yutõcoi ome yoque. 6 Jesucrísto tẽra re ome erámi unirisórone uyoque jnese nanique gu ujetiga cho yoquisijnaringuéone oré. Gaidi u gu ujetiga chiqueta yoque. Enga cuchade udore tocade jnese iji Dupade ojningai dire nanique ujetiga yirajágo Dupade áyipie omenie quigode. 7 Enga Dupade chiroque yu aja purása quedéjnane to ujetiga yacate ore ome Dupade uru uréone udore ujetiga ore changureta Jesucrísto to. Crísto uté anguresõre yu to, enga jé ũrepise yu ome udore enga que yo yurupatáringa. 8 Jecute yajéode u ujetiga Dupade anguresórone jnanío iji erámi jnese ore catecã́ri Dupade. Enga ore chejna daguesi ome dacatecãraitigade ujetiga ca cucha gajnarétique déji ore ajéode, enga ujetiga icha ore ajéode ome pibotaquéode, pajedotaningane ore jnese. 9 Yajéode u to ome chequedíe, gapudíe ore rĩ ujetiga ca ore áyipiedie chejna rángaja daringanie chequé ueradei, jeoga daguidé ueradéraque, dajnápeque ueratígo, jeoga ca ore chariguetapísa dabánique. Mu omi tu ujeta ore cho chequé iji raque. 10 Mu omi tu ujetiga ore atígo omío jnese. Enga ore cho dojodie chequei uje ore chisi rágome Dupade nanique. 11 Omi tupo rĩ ujetiga chequedíe tangári dacadisórone, enga ore cho paráguiji ore acajnaquéode údode. Ore gajnei tu gu ujetiga parague ore enga ca ore sosi rágaja gaté. 12 Enga que yujuéga ujetiga chequedíe chacate ore iji yocuáguedie, enga que yujuéga rĩ ujetiga ore sué jnanione gai. Mu omi tu ujetiga ore chopise paraque. 13 Uje bamo uje Dupade pésu jnani Adan bajaque. Quigade enga pésu chequé Éva. 14 Bamo to uje que Satanas ãrai tu Adan go. Mu Satanas ãra tu chequé Éva. Enga unojo quigade u uje pisijnaringuéone chisa chequé Éva. 15 Mu Dupade jé ujuya chequedíe nanique ujetiga ore chejnáreque dabode achamitígo jne. Mu Dupade a chiqueta ore to jne, ujetiga ore changuretapise Dupade enga ore chedu Dupade iji dajéode. Jé u to ujetiga ore susipise dadode guio enga ore chijnóra dojode ayoréo to.
1 Jé ũré yu ome unojo: ujetiga gosi potapísa daringárique Dupade anguresórone angarate, enga uerate uté gosi áyipiedie ome re. 2 Mu ueradi tu ome Dupade anguresórone angarátique ujetiga ca dara quedéjnarique tagu ome ipesutique cucha gajnareque. Enga acotéraque jé chojmára. Uerate to ujetiga susipise dadode guio enga ayipierãque, enga gaidi tu ujetiga urásarigo ore tangári. Enga doi ga chijna ayoré dírigo aja daguíjnai gatuaque. Enga chóji gaté ome darásarigo ujetiga chacate ore ome Dupade uruode. 3 Mu jé ca áyipieraque déji yote pioi uringárique pijote. Ca áyipieraque dépoji pajedotáningárique, pocaningárique ore rĩ, mu paraque enga ucuei tu pajesereringai gatuaque. Enga caurénga áyipieraque déji pláta docoidéraque. 4 Omi tu ome uté gosi rĩ ujetiga susipise dacoté, dabode ore guio enga chacate ore ujetiga ore tangári, enga ore susipise dadode guio to. 5 Mu ujetiga Dupade anguresórone angarátique ca chiraja dasocárique ome dacoté, dabode ore enga a jé upome darodigode Dupade anguresóño ore rĩ. A ca chiraja dasocáringome udore ore to. 6 Jé ca oyo uacangaráni iji gosi ujetiga quene changureta Dupade. Socaseti chajni aja daringárique ayoré dicotare, enga a cho Satanas jne uje dicotare enga Dupade cho dajuñame nanique. 7 Cucha omi tu to ujetiga uerate uacangarátique ujnomérique iji Dupade anguresõrejmane ujade. Ujetiga gajnareque ujnomérique diga ore dojnóngaja uté gosi enga quigade enga cho caru iji danguretigai, enga Satanas sué gai enga jno údi aja pisijnaringuéone. 8 Adi jé u to ome diáconone . Omi tu to ujetiga uerate ore adode enga ũrepise ore gatuaque. Jé ca ore áyipieraque déji yote pioi uringárique pijote, enga jé ca ore áyipieraque dépoji pláta docoidé bisidégueraque rĩ. 9 Enga ore suse dadode guio enga ore áyipiedie ca pésu ore ejoporinguéone. Mu omi tu ujetiga ore áyipiedie dépisiji Dupade uruode uringane ũréo uje Dupade chingo udore quigode ome yoque nanique. 10 Mu etingácho jnanione udore bajaque ujetiga jé ũrepise ore ome daruode, enga jé u ujetiga atõchoi ore ome cuchade iji uacáguedie. 11 Adi jé u to ome chequedíe, uacatocaidode acotérigui, ujetiga ore susipise dadode guio to, enga jé ca ore cho dajutareque. Mu ũrepise ore, enga ore chidota re ome cuchade ujetiga ore ujode ayoré irasé ore to. 12 Adi jé u to ome uacatocaidode diácono ujetiga ore acotéraque chojmára. Enga ore susipise dacoté, dabode ore guio ujetiga uerate ore adode to enga ore tangári ore. 13 Ujetiga uacatocaitique pesupúsu cuchade aja quigode enga jogadi tu uje ujode Dupade anguresóño ore tangaripísi. Enga a ca chagutu re ome uje chatata danguretigai ome Jesucrísto. 14 Yajéode u ujetiga jĩrique yibágui ua, mu jé yurúsãre yurusarane ome ua. 15 Ujetiga ca yise uaque míraque marínga, a ajire yurusarane unojo enga a araja jne pisoca omone quigode ome Dupade jogasúode uyoque ujetiga yipéco aja quigode. Yojningai u Dupa uecai anguresórone uyoque. Uyoque u gu uje yanguretágo Dupade uru uréone enga yãraráco gai iji erámi tuné. 16 Jé ũrepise yu uje cucha datei u Dupade adode ome erámi unirisórone uyoque uje yanguretágo. Mu que pirajaque udore quigode ome ore jnese go. Mu quiguipísi tu unojo: Dupade pésu re enga ayoré to nanique enga chingo raja erámi unirisórone. Ujopie Espíritu Sánto chajo raja uje ũrepise uté. Dupade irógode, gaté unirisóño, ore chimópise adode to nanique. Ujnomei chubu erámi enga erámi unirisórone iji erámi údode ore changureta. Mu diga póite uté aja gatajnoquei enga e pijogapo cutejmai ingo ningájnai rĩ.
1 Dupade Ujopie Espíritu Sánto acajnaquéode choqui guesode ome yoque, uje chojninga: a chise dínique jne ujetiga jnanione uñane a ore cha changureta Dupade uru uréone, uje Dupade uru uréone udore u uje cho yoquiquique ome panguretigai ome Jesucrísto. Enga a udore ore tangaripísi pacajnaqué tátigo jne uje pacajnaquéode udore garani tupúsu Satanas irógode ore. 2 Enga a ore tangári jnani urupatáquechoquíode jne uje jnanione udore que ore agutéraque chopo jora rĩ ome ore ipesudode cucha gajnarécho. Enga uje que ore tangarapoi dáyipiedie aquĩraquéode, enga gajnui u ujetiga guebeque dotãripísirique chejna ore áyipiedie ujetiga ca chaquĩ́rapo ore ome cuchárique rĩ. 3 Enga jnanione udore a ore chãraque diyequé pacotedie ome dacaditígo jne. Enga a ore charangapo cucha pibotígo ome ore jne rĩ. Mu Dupade pésu ore garéngone cucha piboso udore nanique gu ujetiga yajo. Jecute uyoque uje yanguretágo Dupade uru uréone, enga yanguretagopo Jesucrísto rĩ, yicoi enga yacãco Dupade gai bajaque ome yoquibosode, enga quigade enga yajo cuchade jnese. 4 Yirajágo uje Dupade ipesudode cucha ueracho jnese. Enga ca yicoi enga ca yoco cucha puyáguiji Dupade gueranone cucha pibose. Mu yicoi enga yacãco Dupade gai ome gueranone cucha jnese. 5 Chamáñaje ujetiga pujuregate cuchárique iji Dupade uruode, enga gosi doi enga chacãre Dupade gai ome cuchade udore bajaque enga jogadi u uté uje Dupade que chise unerotiguérique to. 6 Ujetiga acate bojórigo Dupade anguresóño ome cuchade udore enga a Jesucrísto irasique ua ome bacajnaquérigo jne. Enga cucha omi u to ome Jesucrísto irógode ujetiga ore cho cucha pibotígo iji Dupade uruode, enga ore chejna rángaja panguretigai ome Jesucrísto. Enga jé badode u udore gatuaque to, Timotéo a. 7 Mu jé ca acunguésõri ore ojña bisidégode uje cachi udore ore garani u erámi uné. Mu jecucha etingare ua ome Dupade adode gatuaque. Bagaidi u gu ujetiga bajnoraquei ome Dupade quérã. 8 Ujetiga gosi chetingare re gatuaque enga chejna raja ujetiga etoque, enga a chise daringárique etoque jne iji erámi tuné. Jé basa ujetiga gosi chetingare re gatuaque ome Dupade adode enga a chise daringárique Dupade anguresõre etoque to jne, que gusu iji erámi tuné mu a jé chise Dupade idai to jne ome daringárique ujñapetaguipise. 9 Enga jé ũrepise yu ome yacajnaquéode unojo. Beyoi enga anguretáyo to jnese. 10 Jecute yejnángo yógaja yoquisagode Dupade urúo. Ujetiga ore dojnóngaja yoque marínga, jé yejnángo yógaja. Chamáñaje yichágo yocanguretigai iji Dupa uecai gu enga yanguretagopise ojningane cucha yúode jnese. Erámi unirisórone jnese ore iquetangóri urásu Dupade, mu iquetade upúsu danguresórone uyoque. 11 Yajéode u ujetiga o bojode Dupade anguresõre ore quique ome cuchade unojo enga angome ore ujetiga ore dopísi udore quigode. 12 Ajusipise badode guio jnese ujetiga ca ore dojnóngaja ua gu baringai jnacare. Mu ujetiga bojode Dupade anguresóño ore chimo bate goningane enga diga ore tangári ua gaté, enga ore chacãra raja ua jne ome batígo, barúrigo, jé ome bajnoraquei rĩ. Uje ore chimo uje bedu Crísto iji báyipiedie enga a ore chirate ua aja udore to. Uje ore chimo banguretigai ome Dupade enga a ore changureta Dupade gaté to rĩ. Jé cho ujetiga ore chimo uje bajusipise báyipiedie guio ome chequedíe, gapudíe ore, enga a ore susipise dáyipiedie guio to jne. 13 Uje cáma yĩri iji uaque enga ãraráraja Dupade uruode gai gatuaque iji uacáguedie. Enga acate ore ome ore urusarane Dupade urúo quigode, enga o ore quique ujetiga ore jnusi rángome Dupade adode. 14 Uje Jesus anguresórone ore angaránone ore chicha dajmáinie aja babai nanique enga imoi tu uje Dupade ajegáite ua ome daroquéode. Enga jogadi u uté to uje Dupade chisi ome pirajatigai ome ua ome daroquéode. Jecute ca o cucha bisidéguiji barajatigade udore, mu bangúroméone u udore gatuaque jne uje babé Dupade iroquéode. 15 Jé be Dupade ojningane unojo cucha, enga a ore chimo ua jne uje que o sebeque ome Dupade adode. 16 Enga ajuse badode, bacajnaquéode guio jnese. Enga adota ua iji bacajnaquéode. Chamáñaje ujetiga ejna unojo guesi enga a ese baringai piquetaque jne enga a aquetápo bangarasórone to jne rĩ.
1 Jé ca barúrique dosója jnanírique, mu anejé jnanione údode. Enga cho jetiga bai u jnani tuté gosi. Adi jé u to ome bojode jnacáño. Ca barúrique dosója ore to, mu cho jetiga besaque ore. 2 Ajusipise chequedíe guio to, enga cho jetiga baté ore. Enga ajusipise báyipiedie quigode guio ome gapudíe ore to enga cho jetiga bẽro ore jnese. 3 Ajusipise chequé ecadie guio to uje que ore chimo dagutiyamátique. 4 Mu ujetiga chequé ecáraque ujnacaníngo cuse, jeoga ájnatigo cuse enga ujnacaníngo, jeoga ájnatigo ore gajnei tu ujetiga ore susipise udire guio. Chamáñaje ore jogasu udire ore gu. Enga ore datedie, jé aja ore dacódedie ore imanique ore aja gaté nanique, jecute jé tiógara ujetiga ore ujnacaníngo, ore ájnamone ore chijnóra ore enga ore chosõre ore to ome cuchade. Uerate pisocade udore gu ãrie, enga Dupade irasicho. 5 Mu ujetiga ca chequé ecárigui iguiotígo cus ujetiga ore cháta cuchárigo aja ore, enga udire ore urásu ujetiga Dupade anguresórone uyoque yosṍco ore ome cuchade. Udire ore u gu uje ore angureni tupúsu Dupade ome cuchade yúode, enga ore catecã́ri Dupade gatuaque iji dirode, dejade ore jnese. 6 Mu chequé ecárigui ujetiga ore gaidode u erámi jogosórone cucha, enga gajnareque ore adode. Uje ecápise ore iji erámi tuné uje ore jno dagaidode udore údi, mu Dupade e cho ayoré toguedie iji ore uje que ore chajire Dupade yúrique go. 7 Enga opise ore quique jnese ome cuchade udore ujetiga uerate ore adode, enga ca diquiyaque ore iyoguérique. 8 Chamáñaje ujetiga gosi ca chajire daguiotique yúrique, cuchiyi tupúsu dajogasui yúrique, enga cho jetiga ca changuretapise Dupade gotique. Enga gajnarenguipise uté adode enga sué Dupade guetesórone ore ate gajnaréngone gáyode. 9 Ujetiga purusãraque chequé ecadie íode enga jé ca átayo chequé ecáraque ujetiga cáma gatapise uaté goto. Enga uacátapiedie urásu chequé ecárigui ujetiga ore amaníngo chojmára nanique. 10 Yojninganie u udire ore uje ujnomeré ore ome ore ate goningane: udire ore uje que ore chuseque dabode, udire ore rĩ uje ore chijna ayoré díode aja daguíjnane, jé u udire ore rĩ uje que ore chuseque dojode Dupade anguresóño, jeoga ore chátaja darása ejnaretade, jeoga ore pésu dapesutígo cucha ueracho uñéngo to rĩ. 11 Mu ca arusãracho chequé eca gapudíe íode to. Chamáñaje gapu ore gu, enga a jĩrique ore potapo ore chisa damaníngo rĩ. Enga e que cucha Crísto iroquéode ome ore gotique. 12 Enga gajnareque ujetiga chequé ecáraque doi enga chingo raja Dupade ujetiga doi iroquéode, mu quigade enga cha. 13 Ujetiga ore diguiji guidai údode bisideque, enga diga a ore cutapome dasagode cucha rĩ. Mu que gusu uje ore cuta, mu a jutaréguechoquí ore to rĩ, enga a ca ore susipise daruode guio gotique jne. 14 Jecute yajéode u ujetiga chequé eca gapudíe ore chisapo damaníngo rĩ, ujetiga ore pésu datígo, enga ore chirote ore iji daguíjnane. Enga ca ore pésu cucha gajnarétique. Enga a ca Dupade uruode guetesórone dojnóngaja uyoque gu yocujodie Dupade anguresõre chequé eca ore. 15 Uacamóño uje chequé eca gapudíe uñanie e ore cha Dupade adode, enga Satanas e jno ore údi. 16 Ujetiga Dupade anguresónique iguiotóraque cuse uje chequé eca, enga uté gosi gajnei tu ujetiga suse daguioto uaté guio. Gaidi u gu ujetiga dojode Dupade anguresóño ore chedu chequé ecadie uñanie uje que ore chimo dagutiyamátique, enga ore átapiedie u udire gotodie. 17 Ujetiga Jesus anguresórone angarátique susipise dojode Jesus anguresóño guio iji uacáguedie, enga jé tiógara ujetiga angachopísi uté gosi enga caniranguipise uágome. Cuchiyi tupúsu uacangaránone udore uje ore chedu datatagode Dupade urúo, jeoga dacaditigade ome uaque. 18 Chamáñaje ore urusarane Dupade urúo déji uje chojninga: “Ca ãrácho chagúi ome aquirájnarique ujetiga chuchíe arroz aja jnumi, uje jé déji databidi tome acasṍri jetiga chijnime arroz adie.” Enga Dupade uruode chojningápo rĩ: “Gosi uje doi Dupade iroquéode gajnei tu ujetiga pisi uté gosi.” 19 Jé ca angáchoi dara pijnimitígo ome Dupade anguresórone angarátique ujetiga ca imósoningo ayoré gare, jeoga gadioque. 20 Mu ujetiga jé ũré jetiga Dupade anguresórone angarátique pésu cucha gajnarétique, enga beyoi uté enga oyo quique jnese iji uacágueraque. Enga uacaruode dosója. Uacagaidi u gu ujetiga uñane todo pipojnaquérique yui enga jé ca ore chirate uté aja adode. 21 Yurúo unojo ome ua iji Dupade, yocangarádejnai Jesucrísto, Dupade irógode gaté unirisóño ore iquei jnese: ujetiga jé ejna ua aja yacajnaquéode unojo. Enga jé ca angara basocárique ome barásarique jeoga bãjorárique. Mu o ore quique jnese. 22 Ca jĩrique aroque gosi aja Dupade iroquéode. Chamáñaje ujetiga baroi tuté gosi pésu dasijnaringuérique enga jé basijnaringuei urásu to. Chamáñaje que ajiripise adode aja quigode bajaque diríca uje baroque ome Dupade iroquéode gu. Jecute ajusipise badode guio to ujetiga ca piyaque pisijnaringuérique iji ua. 23 Timotéo a, ujetiga ũroso bejnarei tiji bajei enga be enga óji víno ajámatique enga jé ca edu yodipísi ujetiga óji. 24 Obiréjnapise jnanione uñane ipesudode cucha gajnarécho iji deréjnane unojo, uje cáma ore chise deréjnai tuté ujetiga pajirique yocadode aja quigode iji. Jé basa ga a quene pirajaque jnanione uñane isijnaringuéone jne iji diri tuté dirome. 25 Adi jé u udore to ome pate goningane. Jĩrique pirajaque uñane ate omone. Mu ujetiga ca pirajaque pate goningane uñane míraque, mu a chise dínique to jne ujetiga pirajaque jnese. Uje que toque gu ujetiga pipoguiécho pate goningáringo iji deréjnane jnese.
1 Pirógode ore gajnei u ujetiga ore tangaripísi darósorone. Ore gaidi tu gu ujetiga jnanione chimo ore ate omone udore enga ca ore dojnóngaja Dupade, enga ca ore dojnongapója yocacajnaquéode rĩ. 2 Jé socaseti pirógode uñane irósonique changureta Jesus to. Jé ca udore ore doi enga ore cha tangári darósõri uté. Mu ore tangaripísi gaté. Chamáñaje ore ujo Jesus anguresõre uté gu. Enga cucha ueradi upúsu ujetiga yijnórango yocujode Jesus anguresórone enga yocujode Jesus anguresórone ore chagutíñame yoque. Be enga acate ore ome cuchade udore enga opise ore quique gatuaque. 3 Obiréjnapise uje dicotarechoqui jnanione udore ore jnese uje ore chacate darásade ome dacajnaqué tágode, uje pacajnaquéode udore que cunguésõre yocangarádejnai Jesucrísto acajnaqué uréone gotique, enga unejángome yoquigaidode Dupade acho. 4 Enga pacadisórone udore que ore chirajapise cuchárique go. Mu ore áyipie gajnarénguenie jno ore údi aja pibotaqué bisidégode ome puruode quitígo. Jecute ore ududisórone pota sué ñane gáyode to ome dabotaquéode enga ore charatáyime cuchade ome ñane, ore dojnongapo aja ñane rĩ, enga ore chotigase ñane to rĩ. Enga diga ore chajuque ñane ajéode gatuaque. 5 Jecute que ore ibotaquéode eruénique cuse ome dojode ayoréo. Chamáñaje ore áyipiedie gajnarenguei gu. Jecute que ore chirajápo cucha uréone iji cucha tágode ujáningo. Chiese ore gaidode u Dupade adode, mu ore gaidi tupúsu daringárique ayoré ataque. Jecute ajusipise beo ome jnanione ore jnese uje ore adode u udore. Enga angara baquigode ome ore. 6 Que potigayaquérique déji uje ayoré ataguipísode u Dupade adode gaisórone. Mu que quigode u ujeta ugucharãque ore, mu qui tu uje ore nína rángome darijogonórone cucha: ujetiga jiei, jeoga garósi gajnéone cucha, mu jé irasique re ome. 7 Jé ũré uje yacágoja erámi tuné nanique iji taningai enga que yijnángo yocugúcharigaja guetique. Adi jé upo rĩ, ujetiga yicopoji erámi tuné rĩ, enga a ca yijnójo cuchárique. 8 Jecute ujetiga yoquibotígo cuse, jeoga yoquiguidéraque cuse iji erámi tuné, enga yicoi enga yinínango yógome udore. 9 Mu udore ore uje ore pota daringane ayoré ugucharã́cho, enga que ore chajire gaté ome Satanas aringaquéode. Enga ore ipotiguéode ome cucha bisidégode, cucha gajnaréngone ore iji erámi tuné jno ore údi aja pisijnaringuéone. Enga e que toque guetique ome ore, mu ore quique obiréjnai tu Dupade ujuyaquédatéi. 10 Yirajágo uje pisijnaringué ponáyone jnese ore ero tu pláta pijnoranie. Jecute pláta docoidedie e jno yocuñane údi enga ore chicai quedéjnane ome Dupade adode enga ore anguretigai chicapísiji jnumi. Jecute cucha dacate gajnaréngone yore ore gai, enga e que ore chirajapise dasocáringome raque. 11 Mu Dupade iroi tu ua, jecute etaque pisoca gajnaréngone udore jnese. Enga bagaidi u baringárique ujñapetaque ome Dupade. Jecute be Dupade adode gatuaque; anguretapo Dupade gatuaque rĩ. Enga ajnorapise Dupade to. Enga adota ua ome bajnéone cucha dacácho jnese, enga paraguipise ua ome bojode ayoréo ore jnese rĩ. 12 Cho ujetiga agúsiji pigajñúraque gai enga pucuecaringué eyúgojmai déji baquei iji bagajñua eruei. Jecute ejna ua aja banguretigai ome Dupade, chamáñaje pucuecaringué eyúgojmai déji baquei gu. Enga Dupade ajegáite ua nanique gu udore uje bango banguretigai aja ore nanique iji taningai. Enga jiei ore nanique uje ore chudute baruode udore. 13 Yurúo unojo ome ua iji Dupade iquei uje guẽrate pucuecaringuei tome cuchade jnese. Jé iji Jesucrísto iquei rĩ uje chatata daringai eduguéjna cuchape ome eduguéjnai Póncio Piláto to nanique enga que chagutu re ome. 14 Enga yuruode u ujetiga apesupúsu yojningane cucha jnese, enga jé ca écãre udore uñeque quitique. Enga a ca diquiyaque bayoguérique jne jé aja deréjnai uté ujetiga yocangarádejnai Jesucrísto diapo jne rĩ. 15 Ujetiga chise Dupade ojningai dire uté, enga a chiroque Jesucrísto aja yoque. Chamáñaje Dupa ugurui u Dupade gu, enga pininaquei guẽrasṍri tu Dupa ujopierãi tuté rĩ. Eduguéjna cuchape to enga sué eduguéjnane gáyode jnese iji erámi tuné. Pangarádejna to enga sué pangarádejnane jnese gáyode to rĩ iji erámi údode. 16 Gusu Yoquidupade uté u uje que chimo pitoringai ome re. Enga déji direcaringué cuchábi ajei, jecute que toque ujetiga gosi doi enga chirõre jogadi uté. Enga que ayorérique dépoji rĩ ujetiga chimo Dupade ome dedodie nanique, enga a jé ate udore jne iji deréjnane jnese uje a ca toque jne ome ayorérique ujetiga chimópise Dupade ome dedodie. Uté gajnei tu ujetiga picotaque ome uyoque jnese, enga ujopiedatei a ca eruénique cuse jne iji deréjnane jnese. Amen. 17 O ugucharane ore quique ujetiga ca ore cho dicotare iji re. Enga jé ca ore áyipieraque chejna raja dagúchade udore. Bamo uje cuchade unojo iji erámi tuné jĩrique íjnoque gu. Mu ueradi tu ujetiga ore changureta Dupa uecai. Dupa uecai uté u gu uje chisi ome cucha íbojnane ome yoque iji erámi tuné ujetiga yagutíñangome. 18 Enga angome ore ujetiga ore pésu cucha arégode gatuaque. Enga ca ore chajire re ome dacaniratiguéode uje ore chajuguína dagúchade ome dojode ayoréo. 19 Ujetiga ore pésu udore enga a cho ujetiga e ore chamáta dagúchade iji gaté to. Enga yirajágo uje que cuchárique chósi ti iji cuchárique iji gaté. Enga a dimáneo ore gajnetígo cucha ome ore jne ujetiga diga ore chise pucuecaringuepísi iji gaté. 20 Timotéo a, ajusipise beo ome baringai Dupade iroque. Chamáñaje Dupade changuretapise ua ome udore nanique gu. Enga jé ca áta ua aja pibotaquérique uje cachi cucha bisidécho ore ibotaquéode gu. Chiese irajataque ore ome dojode ayoréo, mu cachi ore irajatigade udore garani upúsu erámi tuné ãrie. 21 Mu uñane uje ore gaidode u pirajatíga jnutiminórone udore, e ore cho caru iji danguretigai ome Jesucrísto. Yajéode u ome ua ujetiga Dupade chatapísaja ua gatuaque. Amen.
1 Páblo uyu enga yurúsãre yurusarane ome ua, Timotéo a. Jesucrísto iroguipísode uñai u yu uje Dupade ajegáite yu ome udore gu. Dupade iroque yu ujetiga yatata Jesucrísto adode ome yujode ayoréo ore ujetiga ore changureta uté enga ore gajneque pucuecaringué eyúgojmai to uje Dupade chichaga aja yoque nanique. 2 Timotéo a, cho ujetiga yabipise ua. Jecute yajéode u ujetiga yocai Dupade, yocangarádejnai Jesucrísto ore chatapísaja ua, enga ore chosõre ua, enga ore chisi ome pajesereringai ome ua to rĩ. 3 Que yagutéraque cho jora ome Dupade go uje yiji iroquéode. Enga yisocai jé u yocai casodicáite jnani bajaque ore adode uje ore doi Dupade iroquéode to nanique. Jecute yacaranguipis ome Dupade ome unojo enga jecucha ga yujnusina ua to iji dirode, dejade ore jnese uje yicatecã́ri Dupade. 4 Que jnoji yajénique uje Dupade chiarese ua nanique uje yoco jmíti, jmíti ome ñane. Jecute yajéode u ujetiga yicapóji ua rĩ. Adi tu ujetiga yajnerame yininaquei iji bari. 5 Que jnoji yajénique to uje jé ũrepise ua ome banguretigai ome Dupade. Bacode Lóida, baté Eunice ore changureta Dupade bajaque nanique, enga yiraja uje jé bo ore ome ore anguretíga uréone to. 6 Jé yo baquique ome barajatigade ome bagaidode Dupade acho, ujetiga jé bo udore údi gatuaque. Chamáñaje Dupade tẽrája ua ome barajatigade udore gu nanique uje yicháji yijmáinie aja babai enga yicatecã́ri Dupade ome ua. 7 Enga baraja uje Dupade que chisi ome pisadodéringárique ome danguresórone uyoque go, mu guerani tu picasitigai tome yoque. Enga guerani tupo pijnoraquei tome yoque rĩ, jé aja petotiguei ujetiga yidotágo yógome yoquipotigué ayoréode. 8 Enga ca agutu ua ome ujetiga atata Yocangarádejnai adode ome ore. Enga ca ajéngopome yu to rĩ uje ore suru yibai. Bamo uje yibai u Yocangarádejnai uté gu. Mu apésu bajnepítigo to ome Dupade áyipie omenie uringáringo patatacho, ujetiga uñéngo ore chise daringáringo piquetaque to. Ujetiga ejnáreque ua jne ome batatagode udore marínga, a Dupade chisi ome picasitigai ome ua jne. 9 Dupade chiqueta yoque enga tibidi yoque aja re ujetiga urasapísode u yoque. Enga que yoquipesute ueradode u gotique uje Dupade chiqueta yoque gu udore. Ungare, chiqueta yoque gu uje áyipiedie u udire nanique uje cáma erã́tique cus. Chamáñaje chijnóra yoque enga pota cháta yógaja dajnacari Jesucrísto to. 10 Mu quene Dupade chingo dajnoraquei aja erámi uje yoquiquetangóri Jesucrísto díji erámi. Enga Jesucrísto uté u uje sué pitoringai uringai pitoringai gai. Enga u to uje chijñate yoquibai ujetiga yirajágo Dupade áyipie omenie quigode enga yico pucuecaringué eyúgojmai ome yoque to. 11 Dupade ajegáite yu ujetiga iroguipísode uñai uyu to. Enga chiroque yu aja purása quedéjnane uje que judío ore to go ujetiga yacate ore ome Dupade áyipie omenie quigode to. 12 Mu yo yiba yatatagode udore, mu que yibéro yu ome go. Enga que yajéngome uje pujurúgai yu. Chamáñaje iraja yangureni gosi te gu. Enga que potigayaquérique déji yu gotique ome yangureni tuté. Yiraja gu uje ujopie déji uté ujetiga susipise cuchade guio jnese uje noñome yari ujetiga yujuse ore guio, jé aja diri tuté ujetiga diapo jne rĩ. 13 Jé ejna ua aja yacajnaqué uréone uje yacate ua ome udore nanique. Ejnapo ua aja banguretigai to rĩ, bajnoraquei ore. Chamáñaje Dupade tẽra yógome cuchade udore gu uje yanguretágo Jesucrísto. 14 Bamo uje Dupade changureta ua ome daroquéode nanique. Jecute ejna ua aja bajnéone piroquéo udore. Enga yocarijogonóri Dupade Ujopie Espíritu Sánto a chátaja ua ome udore jne. 15 Baraja uje Ásia gosode ore cha yu jnese, enga Figélo, Hermógenes ore cha yu to rĩ. 16 Mu yajéode u ujetiga Yocangarádejnai chosõre Onesíforo, jogasui ore. Chamáñaje Onesíforo pésu yininaquei gatuaque gu enga que chajéngome yuringai pujurúgai. 17 Uje díji Róma enga jĩrique chucué yu, enga que cha chucué yu jé aja uje chise yu nanique. 18 Enga yajéode u ujetiga Yocangarádejnai juéga dosongaquéode ome uté to iji diri tuté jne ujetiga diapo jne rĩ. Baraja gu uje jecucha chátaja yoque to icáite rĩ uje ugúcoji Éfeso to.
1 Yabi a, ajnusi ua ome Dupade gueranone cucha omone uje yocajnécho udore uje yanguretágo Jesucrísto. 2 Uje yacate cojñonguemúone ica, enga badute yacajnaquéode quigode to. Jecute be enga atata yuruode udore jnese ome bojode ayoréo uñane uje jé ũré ore to ome danguretigai ome Jesucrísto. Bagaidi tu gu ujetiga udore ore jno enga ore chajnerame pacajnaquéode udore ome dojode ayoré uñane to rĩ. 3 Enga adota ua ome baringárique ducañerájma ujetiga bépisi Jesucrísto iroquéode to. Enga bajnui tu jnacare jocaratátique uje que chagutu rome pocaningárique yui. 4 Uje jocaratade ore déji dajocaningárique gai enga que ore áyipieraque dépoji daguíjnarique, dajogasúrique ore rĩ, mu ore áyipiedie jogadipise dasuté áyipiedie. 5 Adi jé u to ome uté gosi ujetiga ore déji dajñamitique gai. Ujetiga ca doi dajirisórone áyipiedie quigode enga a ca pisi uté gosi to jne. 6 Isocai jé u ome ayorérigo uje ore pésu dejnane. Ore isi bajai urásu uté gosi uje que chacho pésu dejnane uje diga e timate ore acade cucha. 7 Jé ca báyipieraque jnoji yojningane unojo cucha. Enga Yocangarádejnai a chingo unojo quitígo aja ua jnese jne. 8 Ca báyipieraque jnopóji Jesucrísto rĩ uje jnani bajai eduguéjnai David ape disi ejo. Uje toi mu Dupade chiquetápo rĩ iji itoringai. Uté ujnomei tu uje yacate yocujode ayoré ore ome, ujetiga piquetaque ore ome uté to. 9 Yidota yu ome ore ujuyaquéode udore jnese ome yu uje yatata Crísto adode. Enga pujurúgai yu to gu yatatagode udore. Mu que gusu uje ore suru yibai mu ore chigaru yu to ome ojnaquerodie enga ore cho pisijnaringuéone ipesungóri iji yu rĩ. Mu que pujurúgai Dupade uruode go. 10 Jecute que yimíninga yuringai ducañerájma go. Yigaidi tu gu ujetiga Dupade ajegaidode ore changureta Jesucrísto to jnese enga piquetaque ore ome Dupade to. Enga a ore gajneque Dupade ingoningájnai to. Uje Dupade ate goningane udore que eruénique erãpe cuse go ome dajegaidode ore jnese. 11 Jé ũrepise yu ome unojo: Ujetiga yipatíorango Jesucrísto uté enga jé basa ga yiquecagopo ome uté rĩ. 12 Ujetiga yejnárejo yógome uté adode, enga a uté ujode eduguéjna uyoque to jne ujetiga chijna daringai eduguéjna cuchape aja erámi tuné jne. Mu ujetiga yojnijome yocujórique ayoré: “Que yirajágo uté go.” Enga a uté doi yoquisocai tuté to jne enga a chojninga jne: “Que yiraja udore ore to.” 13 Ujetiga ca yidotágo yóguiji uté adode, mu uté que chécãre datique. Chamáñaje que toque gu ujetiga doi enga chinoningase dáyipieraque. Jecucha ũrepise ome uruode gu. 14 Opo barásade ore quique rĩ iji Yocangarádejnai iquei, ujetiga ca ore chicadígui unojo: ujetiga ore cha dabotaqué bisidégode ome ñane. Uje cachi ore botãre ñane ome puruode quigode, enga que cuchárique tṍraji ore ibotaquéode udore gotique. Cachi ore ujode Dupade anguresóño tangári ore enga e querénga ore tangarapoi Dupade urúpisode rĩ. 15 Enga acuepísi basocáringome ua ujetiga Dupade irasiguipise badode jnese gatuaque. Enga bajnui tu ayoré pirótique uje que chajéngome datique go iji darósonique iquei. Uje cucha ueradi tupúsu ome ua ujetiga edu Dupade uru uréone ome bacajnaquéode jnese, enga jé ca écãre udore quitique. 16 Enga etaque dara bisidégode jnese uje cachi udore garani u erámi tuné. Enga jnanione ore jnese uje ore gaidode u dara bisideque jnutiminórone udore ore chicai ti yui ome Dupade adode, enga chajnéra dádi ome date gajnaréngone udore. 17 Enga ore acajnaqué bisidégode udore jé ate uje chajnerame re, chajnerame re. Enga gajnui tu dequejnarétique uje tagu ayorérique enga que íjnoque to go. Adi tu ome Himenéo, Filéto ore. 18 Bamo uje ore cha tangári Dupade uru uréone, enga ore chacate darásade uje chiese togode e ore niji iji datoringane nanique. Enga yocujode Dupade anguresóño uñane ore changureta ore acajnaqué tágode udore, enga ore anguretigai ome Dupade uruode chicai udore yúode. 19 Mu que pumuchayaque Dupade ojningane cucha. Uje chojninga: “Yocangarádejnai chiraja danguresõre ũrepísode.” Chojningápo rĩ: “Gosode uje ore cho Crísto anguresõre iji re enga ore gajnei tu ujetiga ore chetaque pisijnaringuéone jnese ome raque.” 20 Que gusu pagapi ueradode uje déji cojñoque atai iguíjnarique uje ore ipesucho ore iji óro, pláta ore. Mu pagapi gajnaréngone déji to uje ore ipesute ore iji poridie, dachabéode ore. Mu quene ore chijnime pagapi ueradode ome dajñamini dire. Jé basa ga ore chijnime pagapi gajnaréngone iji dirode jnese uje íjnoque ore ajñaminone iji. 21 Ujetiga yipótago yoco pagapi ueradode enga yicoi enga yiyáyo pisijnaringuéone jnese ome yoque. Enga yocangarádejnai Jesucrísto angúroméone u yoque jne ome daroqué obiréjnane. Enga Crísto agutiyamánone u yoque to jne ujetiga dimane yógome yocate goningane jnese. 22 Be enga ayome jnacarode ore gajnéone piboqueringa. Mu ejna ua aja baringai Dupade anguresõre ujñapetaque. Yojningai u ujetiga angureta Dupade, enga ajnóra bojode ayoréo, enga bajei cho sẽre ome ore jnese. Enga áta ua aja Dupade anguresórone udore ore uje ore chedu Dupade iji dáyipiedie to, enga ore chutṍri Dupade ome raque. 23 Enga jé ca angári dara bisidégode. Uje cachi jecucha pibotaquéode garanone u darade udore gu. 24 Que Yocangarádejnai ajéode u ujetiga irógode ore cháta raja udore ore to uje ore botãre ñane. Jé basa ajegaidi u ujetiga paraque ore ome dojode ayoréo ore jnese, enga ca ore narañime ore adode uje ore chacate ore ome Dupade uruode. 25 Cucha ueradi u to ome Yocangarádejnai irógode ore ujetiga ore cho quique angoninguite parigode mu ore susapo daruode quigode guio ome ore. Enga ore changureta Dupade ome ore ujetiga chécãre ore áyipiedie quigode enga ore chiraja to uje Dupade uruode u uréone. 26 Enga socaseti ore changureta Dupade to, enga ore chayome Satanas. Uje bamo gu uje Satanas igarique ore nanique gu, enga que togapo ome ore rĩ ujetiga ca ore doi Satanas áyipiedie.
1 Yajéode u ujetiga araja to uje chi gajnareque Jesus diringai yúode jne. 2 Enga erámi unirisórone chi dicotarechoqui ore jne. Enga a ore chijnorapise plátadie jne. A jé ore osorane u raque jne. Enga a ore uruode gajnarécho ome Dupade. Enga disírigo a ca ore tangarapoi dáningo jne rĩ. Enga a ca ore chacãrápo dojórique ayoré gánique jne rĩ ome cuchárique. Enga a ca ore áyipieraque dépoji Dupade atique rĩ. 3 Enga a ca posõraquérique dépoji ore ajénique jne rĩ ome dojórique ayoré. Jutareque ore, enga ore ipotigué gajnaréngone sué ore gai gatuaque jne enga a jno ore údi aja pisijnaringuéone gatuaque to jne rĩ. A sijnanguipise ore ome dojode ayoréo, enga a ca ore susipise dojode ayoréo guio to go. Enga pate arégode guetesórone ore to rĩ. 4 A dequetangóño ore enga a ca ore susipise cuchárique guio to jne. Mu a ore chicota raque jne ome daringáringo ayoré datéo. A ore ucueguipísode u erámi jogosórone cucha gatuaque uje chiese pininaquei garani tu cuchade udore ome ore. Mu a ca ore chucuepísi Dupade gotique to ujetiga ore chiraja atígo. 5 A cho jne ujetiga udore ore gaidode u Dupade adode to, mu a ore chotigase Dupade uruode iji dáyipiedie, jecute que ore chécãre datique. Jé ca áta ua aja jnanione udore ore to ujetiga ore adode u udore ore adode. 6 Enga a jnanione udore uñane chisõre iji guidai údode, enga ore chacája chequé áyipie eyúguedie iguíjnane ome daringaquéode. Uje chequedíe udire ipotigué gajnaréngone jno ore údi aja pisijnaringuéone gatuaque. 7 Chiese chequedíe udire potapísa ore chiraja cuchade, jecute ore chejna rángaja pacajnaqué quedéjnane gatuaque, mu que ore áyipieraque dépisiji cucha urénique gotique ujetiga ore chiraja udore quigode. 8 Yirajágo uje jnani bajade Jánes, Jámbres ore chijna pujopie quedéjnanie nanique enga ore u uje ore chetaque Moises acajnaquéode to nanique. Enga jé adi tu to jnanione udore iji deréjnane unojo, uje ore chetaque Dupade uru uréone uringane patatacho to ome darásade. Áyipie yuque udore ore enga que panguretigai dépisiji ore ome Dupade gotique. 9 Mu a ca cuchárique tṍraji jnanione udore acajnaquéode jne. Chamáñaje a jĩrique pirajaque ore ome erámi uje áyipie yuque udore ore. Jé adi tu nanique ome Jánes, Jámbres ore uje ore dojnóngaja Moises nanique. 10 Mu Timotéo a, ua u uje bepísi yacajnaquéode quigode, enga barate yu aja yadode, yigaidode udore ore jnese uje yiji Dupade iroquéode. Bamo yadode gu uje ũré yu ome yanguretigade, yijnoraquéode ore ome Dupade. Bamo to uje que yacho yiji Dupade iroquéode enga que yagu yejórique ome yujode ayoréo to. Mu yidota yu ome yajnéone cucha dacate gajnaréngone jnese. 11 Baraja uje ore cho damajo yu enga yo yiba yatatagode Dupade urúo gatuaque. A e barajapise to uje que ore suse yio go iji ore idáyode Antioquía, Icónio, Lístra ore, mu gajnarenguipise ore adode ome yu iji guidáyode udore jnese. Mu Yocangarádejnai chijnime yu iji ore ujuyaquéode udore jnese. 12 Mu jé ũrepise yu ome unojo: ujetiga Jesucrísto anguresónique pota dopísi Jesus adode, enga jé basa a erámi unirisórone cho damajo uté gosi jne. 13 Mu ãrapatáquechoquíode, sijnángone ore a ca ore chibéro rome date gajnarenguipísode. Mu a ore isijnaringuéone chajnéra dádi ome ore jne. Chamáñaje Satanas ãraque ore, enga jé basa ore chãra dojode ayoréo to. 14 Mu jé adota ua iji Dupade uru uréone uje pacadique ua ome nanique. Chamáñaje que potigayaquérique déji ua ome udore uringai ũréo nanique gu. Barajápo bacadisórone uringane ũréo to rĩ. 15 Jé ũré yu uje baraja ore urusarane Dupade uru uréone iji baringai disi nanique. Uje Dupade uru uréone udore u uje pésu gosi uringai ayipierãque, enga udore u to uje imanique gosi aja uringai piquetaque to uje changureta Jesucrísto. 16 Dupade u uje chisi ome daruode ome purusãrasórone udore ujetiga ore churúsãre quigode. Jecute yocangúroméone urásu Dupade uruode udore ome yocacajnaquéode jnese. Ujetiga gajnareque gosi adode, jeoga cho paraque ome datique mu yocangúromei urásu Dupade uruode ujetiga yoco uté gosi quique. Jé u to ujetiga yoco pisoca omone quitígo ome yocujórique ayoré ujetiga uté gosi pota doi Dupade adode. 17 Yoquigaidi u gu ujetiga yocujode Dupade anguresóño ore chirajapise Dupade uruode quigode, enga ore chirajápo dasocáringome date goningane jnese rĩ.
1 Yijócha bajei údi iji Dupade, yocangarádejnai Jesucrísto ore iquei, ujetiga ejna ua aja Dupade iroquéode. Uje a Jesucrísto di jne enga eduguéjna cuchape jne. Enga uté a u jne ujetiga chajire ayoré uecade, ayoré togode ore adode aja quigode jnese. 2 Jecute be enga acate ore jnese ome Jesus adode. Ujetiga pangarate ua, jeoga ca pangarate ua ome ore, mu jé ejna ua aja bacajnaquéode udore gatuaque. Ango ore isijnaringuéone aja ore, enga aquĩ́ra ore, enga opo ore quique rĩ. Enga ca bajénique dotã́raja ore ujetiga acate ore. 3 A chise dínique jne ujetiga ca ore tangarapoi Dupade uru uréone rĩ ujetiga pacadique ore ome. Mu a ore chucué pacadisõre tátigo ome raque ujetiga jiei ore. Enga a ore chacate ore ome ore ajegaidode cucha gatuaque. 4 A ore cho dedobóiya Dupade uru uréone jne, mu a ore tangaripísi dacadisórone ojña bisidétigo jne uje cachi ore ipesucho dacajnaquéode udore. 5 Mu ua, enga ajusipise báyipiedie guio ujetiga etoque ua iji bajnéone cucha dacacho jnese. Ujetiga cucha gajnarétigo yore babai iji bagaidode Dupade iroquéo, mu adota ua ome cuchade udore jnese. Enga ajnusi ua ome bagaidode Dupade iroquéo ujetiga amánaja jnumi jne uje bacate ore ome piquetangóri Jesucrísto adode. 6 A yajnui tu cuchiso pẽrapáitique jne ome Dupade. E idógosi gu ujetiga cojñone ore chujé yu. 7 Cho ujetiga yugúsiji pocaningárique gai uje yiji Jesus ujnomé ueradéjnai údi aja erámi. Mu e yejna yajnei pocaningai tuté guesi. Cho to ujetiga yugúsiji pigajñúraque gai rĩ uje yipésu Dupade iroquéode. Mu e yejnapo pigajñua tuaté guesi te rĩ. Enga yanguretigai ome Dupade jé jogadipise yu, jé aja deréjnai tuné. 8 Jecute dimane yajnetique yayo danganataque jne iji Dupade idai ome yuringai ayoré ate ujñapetaque. Enga Yocangarádejnai tuté uje ũrepis ome dajirigode yocacho, uté u jne ujetiga chisi ome yajnetique yayo ome yu jne iji daríringárique dire. Mu que gusu yu ujetiga tẽrája yu jne. A tẽrapója dajnorasórone ore jnese rĩ uje ore chirote diringai yui. 9 Timotéo a, serã abágui yu. 10 Démas cha yu gu. Chamáñaje ipotigádode u erámi jogonórone cucha gu. Enga jno enga chicáji Tesalónica. Enga Cresente chicáji Galácia. Jé basa ga Títo chicáji Dalmácia rĩ. 11 Gusu Lúcas uje déji yari iji ne. Jecute acué Márcos, enga nóna ua aja ne jne. Enga Márcos u jne ujetiga cháta yisagode aja yu jne. 12 Iroque Tíquico aja ore idai Éfeso diríca. 13 Ujetiga acáji yu enga ajnoque yiguidé jne uje yijíñome Cárpo iguíjnai ica uje yiji iji Tróas. Ajnóngapo yigode darujna aone to, enga cuchiyi tupúsu yurusarane ujetiga ajnóngapo ore aja yu jne rĩ. 14 Guebéode ipesungóri Alejándro uté adode gajnarenguipíso ome yu diríca. Mu a Yocangarádejnai doi dasocáringome uté jne ome ipesudode udore. 15 Enga ajuse beo ome uté to. Chamáñaje chetaguipise yocacajnaquéode ome Jesucrísto gu. 16 Uje yĩrarare yibai iji taningai nanique iji eduguéjnane iquei, enga que Dupade anguresónique uñeque cháta raja yu nanique. Mu ore cha yu jnese. Mu yipesupu enga ca Dupade cho dajuñame ore jõ ome udore. 17 Mu Yocangarádejnai que cha yu to nanique. Enga chisi ome detotiguei tome yu ujetiga yacate purása quedéjnane ore ome adode jnese. Enga chãraque yu ome yuringárique chuque to. 18 Enga a jecucha doi enga chãraque yu iji yajnetígo cucha gajnarécho jnese jne. Enga a suse yio jne jé aja ujetiga yise uniri tiji gaté. Beyoi enga jecucha yicotágo Dupade iji deréjnane jnese ome ingoningájnai. Amen. 19 Angoma yu aja Prísca, jé aja abai Aquíla. Jé aja Onesíforo jogasui ore jnese to rĩ. 20 Erásto cháji Corínto diríca. Enga ijíñome Trófimo iji Miléto uje ejnaretaque diríca. 21 Acuepísi basocáringome ujetiga acai yóguiji ne iji esoi yui te jne. Eubúlo, Pudente, Líno, Cláudia, yocujode Dupade anguresóño jnese ore irasique bei to. 22 Yipesupu enga yocangarádejnai Jesucrísto nóna ua aja quedéjnane gatuaque jõ. Enga Dupade chatapísaja uaque jnese to jõ. Amen.
1 Dupade iroi u Páblo uyu uje yurúsarome ua. Enga Jesucrísto iroguipísode uñai upo yu rĩ. Enga Jesucrísto uté chiroque yu ujetiga yimate Dupade ajegaidode aja panguretigai ome Dupade jnese. Jé u to ujetiga yo ore quique ome yoquigaidode Dupade uru uréone ujetiga ore chirajapise quigode to. 2 Jé u to ujetiga ore chirote pucuecaringué eyúgojmai yui ome raque to. Chamáñaje Dupade uje que taque to go ome darúrique jé urúo unojo nanique uje cáma chimate erámi. Enga chi chisi ome pucuecaringué eyúgojmai tuté ome danguresórone ore jnese. 3 Uje chise Dupade ojningai dire enga chingo dáyipie omenie udire ome erámi. Enga yoquiquetangóri Dupade chiroque yu aja to ujetiga yatata uruode udore ome ore jnese. 4 Cho ujetiga yujnacaripise ua, Títo a, uje yanguretágo Dupade jnese. Enga yurusarane unojo gajnengóri tu ua. Yajéode u ome ua ujetiga yocai Dupade, yoquiquetangóri Jesucrísto ore chatapísaja ua. U to ujetiga ore chosõre ua enga ore chisi ome pajesereringai ome ua to. 5 Yaquĩ́ra ua iji yote quedéjnai ajã́ro uje i tu Créta diríca gu ujetiga acate ore gaté, enga apésu cucha amirone aja quigode iji ore ujade uje cáma yipéco diríca. Yajéode u to ujetiga acué jnaníringo rĩ ujetiga Jesus anguresórone ore cho dangaránone iji ore iji idaidatéode udore jnese. Enga yijíñome yiroquéode iji bari to diríca ome bacuegode jnanío udore. Enga yiroquéode quigode u unojo diríca: 6 Ujetiga uerate Jesus anguresórone angaránone adode enga ca diquiyaque ore iyoguérique ome dojode ayoréo ore jnese. Enga ore acotéraque chojmára. Enga ore abode changureta Jesus jnese to, enga ca dara quedéjnarique tagu ore ome ore angoninguite paritigárigo, jé ome orate gajnarétigo to rĩ. 7 Chamáñaje Jesus anguresórone angaránone ore gaidode urásu Dupade iroquéode iji dojode Jesus anguresóño ujade. Jecute omi tu ujetiga ore atígo omío gatuaque. Ujetiga ca ore cho dajosipiedie ome dojode ayoréo. Ujetiga ca jĩrique ore cho jururu. Ujetiga ca ore chóji yote pioi. Ujetiga ca sijnaque ore. Ujetiga ca ore jnari pláta docoidé bisidégueraque ome re. 8 Mu paraque ore, enga ore ajéode u ujetiga ore chijna ayoré díode aja daguíjnane gatuaque. Enga ore irasique picaniratiguéode. Ayipierãque ore enga ore chedu Dupade iji dajéode, enga ore chidota re ome cucha gajnaréngone. Enga ore susipise deo. 9 Omi tupo rĩ ujetiga ore chidota re iji Dupade uru uréone to uje pacadique ore ome ica. Ore gaidi u gu ujetiga ore cho dojode Jesus anguresóño ore quique ome dacajnaqué uréone udore to, enga ore ujode Jesus anguresóño ore jnusi rángome Dupade adode to. Ore gaidi tupo rĩ ujetiga ore chacate Dupade uruode otigayasórone ore to rĩ, ujetiga ore cha chotigase Dupade uru uréone. 10 Bamo uje jiei angoninguite parigode iji uacajade gu. Cuchiyíode u judíode ore. Uje ore chijnime dara bisidégode gatuaque, enga ore chãra uacuñane. 11 Jé tiógara ujetiga pujuruque jnanione udore pijnanone. Chamáñaje pijogasúode uñane ore tangári ore acajnaquéode enga ore anguretigade chicai quedéjnane. Bamo gu uje quedéjna ore acajnaquéode quigode enga a ca pujuregadirase ore acajnaquéode ujetiga pacadiguirase ore ome. Chamáña gu uje ore cho uréone iji raque mu ore ajegaidi upúsu ujetiga ore chisi ore iji daplátadie. 12 Créta gosode ore urásade uñai uje chiraja cucha piqueminórone chi chojninga nanique: “Jecucha ga ducutáquechoquí Créta gosode. Que gusu udore mu chagujnare ore enga ore gajnúone u cuchiso sijnángone uje que toque go ujetiga ayorérique chaquĩ́ra ore ome ore adode. Enga taquechoqui ore to rĩ.” 13 Enga jé ũrepise Créta gosode ore urásai tuté ome dojñane. Jecute opise Jesus anguresórone ore quique iji Créta enga baruode dosója ore. Bagaidi u gu ujetiga ore cha tangári pacajnaqué quedéjnaringo, enga gusu Dupade uru uréone ujetiga ore changureta. 14 Enga angome ore ujetiga ca ore tangári judíode ore acajnaqué bisidégode uje cachi ore ipesute dacajnaquéode udore. Enga jé ca ore doi ore iroquéode quigode ome yoque. Uje udore ore u gu uje ore cho dedobóiya Dupade uru uréone. 15 Uje pujuregate cuchade jnese ome Dupade anguresórone. Chamáñaje Dupade uruque ore enga ore áyipiedie ueradei. Mu Dupade anguresṍrejmáne ore isijnaringuéone jé jogate ore ajéode, enga ore áyipiedie quigode gajnarécho. Enga ore áyipiedie pésu ore ejoporinguéone. Jecute ajé noñaque ore enga ore chetaque cuchade jnese. 16 Chiese ore chiraja Dupade, mu gajnareque ore adode, enga obiréjna uje que ore changuretapise Dupade to. Gajnarenguipise ore adode enga angoninguite paric ore, enga que ore chibote dacate goningane adode gotique.
1 Mu, Títo a, be enga edu pacajnaqué uréone uje Dupade acho uje bacate bojode ayoréo. 2 Ango jnanione ujetiga ca boqueraque ore, enga ore ujode ayoréo ore tangári ore. Enga ore susipise deo to ome pisijnaringuéone. Enga etoque ore iji danguretigai. Enga ore chijnorapise dojode ayoréo. Enga ore chidota re ome cuchade jnese rĩ. 3 Adi jé u to ome chequedíe. Ujetiga ore ujodie chequei tangári ore, enga ore chedu Dupade iji dajéode to. Enga ca jutaréguechoquí ore. Enga jé ca ore chójiapo yote pioi rĩ. Enga uerate ore adode ujetiga ore ujodie chequei chirate ore aja orate goningane udore. 4 Adi jé u to ujetiga chequedíe chacate gapudíe ore ujetiga ore chijnóra damaníngo, datígo ore jnese rĩ. 5 Ujetiga ore susipise deo, enga ca ore pésu cucha gajnarétigo. Ujetiga chaguesi ore to enga ore susipise uraque daguíjnane guio. Enga caniré ore. Enga ore tangaripísi dabayode. Bamo gu ujetiga ore suse dadode guio, enga a ca toque jne ujetiga Dupade guetesónique doi enga cho cucha bisidéguiji Dupade uruode gu ore adode. 6 Adi jé u to ujetiga o jnacarode ore quique. Ujetiga ore susápo deo rĩ. 7 Títo a, ajusipise beo to, enga a ore chirate ua aja bate omone jne. Ujetiga acate ore, mu edu Dupade uru uréone enga baringai ũrepise pijogapo ome ore jnese rĩ. 8 Ajusipise baruode guio to ome bacajnaquéode jnese. Bagaidi tu gu ujetiga ca ore chiraja daru quitique jne ome ua ome bacajnaquéode quitígo. Enga a anguíra pajegátigai aja gosi ujetiga pota chotigase yocacajnaquéode. Uje que cucha gajnarétique déji bacajnaquéode udore gu. 9 O pirógode quique to. Enga ore tangaripísi darósorone. Enga ore ucuei tu ujetiga orirósorone irasique ore adode jnese. Enga jé ca ore chajnai darósorone ome daru dosótigo, mu ore cho paraque. 10 Enga jé ca ore pota poriquérique ome darósonique ugúcharique. Ore gaidi u gu ujetiga ore irósonique ca todópisa ore ome dagúcha poritígo. Ore gaidi tupo rĩ ujetiga ore uringáringo ate uome pijoque ome ore jnese. Enga ore ujode ayoréo chiraja uje ate uome ore gu uje pacadique ore ome yoquiquetangore Dupade adode. 11 Uje Dupade chingo daringai piquetangore aja erámi unirisórone uyoque jnese. Enga adi jé u uje yirajágo uje chijnóra yoque. 12 Dupade chijnóra yoque jecute chaquĩ́ra yoque ome yocate gajnaréngone, yoquipotigué gajnaréngone ore rĩ ome erámi jogonórone cucha. Enga chiroque yógaja ujetiga yujuco yocadode guio iji erámi tuné, enga yipecopúsu cucha arégode, enga tadipise yoquijnoraquéode ome Dupade. 13 Enga Dupade pota to ujetiga yanguretágopise ojningane cucha yúode. Cuchiyi tupúsu Dupápisi Piquetangóri Jesucrísto diringai ujetiga ca yiyágo yocangoroné ome yui. Chamáñaje di gojni jne enga pininaqué diringai tuté ome yoque. 14 Baraja gu uje Jesucrísto uté u uje tẽra re ome yoque. Gaidi u gu ujetiga chiqueta uyóguiji yoquisijnaringuéone jnese ome daringai chuque. Enga churupise yoque ujetiga chinoningase yoque uje pota yógome re gu. Enga pota to ujetiga yójigoji gatéode ome yoquipesutígo cucha omío gatuaque. 15 Títo a, bajnei tu ujetiga ango cuchade unojo aja ore, enga o ore quique to ujetiga ore jnusi rángome Dupade adode to. Aquĩ́rapo ore to rĩ ome ore ate gajnarétigo. Enga ca agutu ua ome udore. Chamáñaje Dupade iroque ua gu. Ujetiga ajusipise badode guio enga a ca toque jne ujetiga diquiyaque bayoguérique. Enga jogadi a u jne ujetiga pangarate ua ome ore jnese.
1 Angopome ore rĩ ujetiga ore tangaripísi deduguéjnane iji danirone. Ujetiga ore chóji gatéode ome ore ojningáringo cucha jnese. Ujetiga ore chójiapoi gaté rĩ ome dapesutígo cucha omío gatuaque to. 2 Ujetiga ca ore dojnóngaja dojórique ayoré, mu ore ucué tupúsu pajesereringane ome ore jnese. Omi tupo rĩ ujetiga caniraque ore ome ñane, enga paraque ore rĩ ome dojode ayoréo jnese. 3 Uacarajáyo uje que yirajágo cuchárique to nanique. Enga angoninguite parique yógome Dupade enga jecucha ga yicagóji quedéjnane ome. Enga cho ujetiga yoquipotigué ayoréode sué yoquibáyode, enga yocáyipiedie chejna rángaja erámone jogonórone cucha gatuaque. Uje chiese pininaquei garanone u cucha ponáyone udore iji erámi tuné ome yoque. Sijnanguipise yoque rĩ enga jecucha ga yaratáyingome cuchade ome yocujode ayoréo. Jecute yocujode ayoréo ore chetaque yoque gatuaque, mu yetájopo ore gatuaque rĩ. 4 Unojo quigade u uje yoquiquetangóri Dupade chingo dajnoraquei, dacaniratiguei ore aja yoque. 5 Enga doi enga chiqueta yoque to. Mu que chiqueta yoque gu yoquipesutique cucha arétique go, mu chiqueta yoque gu dosongaquéode ome yoque. Dupade chĩro yoquisijnaringuéone iji jnumi, enga yocuringai icha jogadi u. Jogadi u uté to uje Ujopie Espíritu Sánto chinoningase yoque enga Dupade ape icha yoque. Enga doi enga chisi ome pucuecaringué ichárique to ome yoque. 6 Enga chisi ome dajopie Espíritu Sánto ome yoque uje yanguretágo yoquiquetangóri Jesucrísto. Enga Ujopie tuaté chise yoqueruéode jnese. 7 Gaidi u gu ujetiga chosõre yoque enga yico yocuringane imeserácho to. Enga u to ujetiga yico pucuecaringué eyúgojmai ome yoque to uje qué yiroco pucuecaringuei tuté yui. 8 Títo a, jé ũrepise yacajnaquéode udore ome ua. Jecute yipota jeta ajo ua aja udore to uje bacate barásade ore. Ujetiga Dupade anguresórone ore jnese ore chejna rángaja dapesudode cucha omío gatuaque. Ueracho pisocade udore gu. Chamáñaje ujetiga gosi chejna rája dapesudode cucha omío enga yagutíñangome ore ate goningane udore jnese. 9 Mu ayome ore ibotaqué bisidégode. Yojningai u uje ore botãre ñane ome jnani bajade íode, jeoga ore botãre ñane ome Moises urusarane quique ponáyone uje jecucha ga ore chucué udore quiguipísode. Uje que cuchárique tõrapísiji pibotaquéode udore gotique. Mu cachi pajedotáringane, pipojnaquéode garani u pibotaqué bisidégode udore ome yoque. 10 Ujetiga gosi iji Dupade anguresórone ujade pota chajuque uáguiji ñane ome dabotaquéode, enga be enga oyo uté quique enga gare. Mu ujetiga ca tangári uaque enga beyoi enga etácho uté ome uacáguedie. 11 Baraja gu uje jnani uté gosi que suse dáyipiedie guio gotique. Sijnaque enga chirajapise daringai máraque, mu qué jno dasijnaringuéone údi. 12 Ujetiga yiroque Artémas, Tíquico ore uñéngaja ua, enga serã abágui yu jne iji ore idai uje i u Nicópolis. Chamáñaje a yejna esoi iji uté jne gu. 13 Atapísaja eduguéjnane iroquéode ajneramisṍri Zénas, jé aja Apólos rĩ aja ore quigode erámio. Asi ore imeserane cucha ome ore, enga jé ca cuchárique chona ore iji dajei. 14 Enga yocujode Dupade anguresóño iji uté ore doi dacate goningane to, enga ore chátaja dojode ayoréo gatuaque ujetiga cuchárique qué chona ore. Dupade que pota gu ujetiga danguresónique cháji erámi tuné bisideque, mu pota ujetiga yocujode ayoréo ore chagutíñame yoque. 15 Yijorane ore jnese uje ore déji yari iji ne ore irasique bei. Yoquirasique yoquijorane yui iji bari to. Chamáñaje yijnórangopise ore gu. Yipesupu ga Dupade chátaja uaque jnese jne jõ. E gusu yuruode. Amen.
1 Páblo uyu uje yurúsãre yurusarane unojo ome ua, Filemon a. Enga yoquĩjorai Timotéo cháta raja yu ome yocurusarane unojo to. Bamo uje ore suru yibai gu Jesucrísto adode. Mu ua u to uje bátaja Dupade iroquéode aja yoque to. Jecute yijnórango ua. 2 Enga Jesus anguresórone uñane ore gajneque yocurusarane unojo to uje ore chamáta ñane aja baguíjnai to ome Dupade uruode. Jé aja yoquĩjora Ápia, yoquĩjorai Arquípo ore to rĩ. Uje Arquípo uté cho yoque enga chejna raja dagaidode Dupade iroquéo to. 3 Yipesupu ga yocai Dupade, yocangarádejnai Jesucrísto ore chatapísaja uaque enga ore chisi ome pajesereringai ome uaque to jõ. 4 Jecucha ga yujnusina ua uje icatecã́ri Dupade, enga yacãre uté gai ome badode. 5 Uje bajnomei e chise yu uje chi anguretapise yocangarádejnai Jesus. Enga chi ajnorapise bojode Dupade anguresóño to. 6 Yiraja uje bojode ayoréo uñane ore chirate ua aja banguretigai ome Dupade to. Enga yicatecã́ri Dupade ome udore ore jnese ujetiga diga ore chirajapise to Jesucrísto gueranone cucha omío jnese ome danguresórone uyoque. 7 Uje yimo bajnoraquédatéode ome ore jnese enga yirasiguipise yu. Enga yujnusi yu ome cuchade. Mu que gusu yu go, mu Dupade urasapísode ore jnese ore irasique raque to ome badode udore enga ore jnusi rángome Dupade adode to. 8 Bamo uje Crísto iroguipísode uñai uyu. Jecute yajnei turásu ujetiga jĩraque berási yiroquérigo. 9 Mu yajéode que u yuru bajade ucode go uje ijnorapise ua gu. Enga yajéode upúsu ujetiga yijócha bajei údi. Baraja uje e choquíjna yu enga ore suru yibai tiji soldádode iguíjnai iji ne, mu yibai tu Jesucrísto. 10 Jecute yijócha bajei údi ome baro casica Onésimo. Uje uté e changureta Dupade to enga cho ujetiga yabipísi u uté iji yijogadi uné soldádode iguíjna. 11 Yiraja uje angoninguite parique Onésimo ica enga que agutíñame go. Mu Dupade e chécãre uté adode enga ca gusu ua ujetiga agutiñarásome, mu yagutíñame to iji uné. 12 A yirogapo Onésimo aja ua jne rĩ. Ujetiga di iji uaque enga ca ajuseque jne. Chamáñaje yijnorapise Onésimo gu. 13 Yajéode u jorógu ujetiga jé charásiji yari iji ne, enga chatarása cuchade aja yu iji soldádode iguíjnai uje qué yo yiba yatatagode Dupade áyipie omei. Enga chorase ujetiga jé ua u baroi tuté ujetiga cháta cuchade aja yu iji ne. 14 Mu que yajéode u ujetiga yijnárasa yimenuringuei aja ua ujetiga be yipotigádode cucha. Mu yipotapísa ujetiga bajéode jé u yajéode to. Jecute a ca yaquĩ́ra Onésimo iji yari jne ujetiga jé ca bajépiso to. 15 Isenga Dupade ajéode u diríca ujetiga baroi Onésimo chayome ua. Gaidi tu gu ujetiga chatĩre babai ome uringai Dupade anguresõre, enga cháji bari iji deréjnane jnese. 16 Jé ũré uje piroque Onésimo, mu que gusu piroque, mu yocujo Jesus anguresõre to. Bamo uje yijnorapise Onésimo, mu be ga ajnorapise gaté to. Chamáñaje que gusu uje baroque Onésimo, mu e bojo Yocangarádejnai anguresõre to. 17 Ujetiga jé ũré uje bo bãjorápisi iji yu, enga be yuruode jne enga ca ajuseque Onésimo. Enga cho yu ujetiga yisírase ua enga que ajuseque yu. 18 Ujetiga baroi Onésimo atique gajnaréngaja ua diríca, jeoga írigo déji bari enga ango yu enga a yo oré jne. 19 Páblo uyu uje yurúsãre yurusarane eruéode udore ome yijmáinie. Enga yurusarane quigode u uje a yo boré ome Onésimo írigo jnese ujetiga déji bari. Mu yujnusina ua ome udore: cho ujetiga béode déji yari to. Chamáñaje bangureta Dupade nanique gu yatatagode Dupade urúo ome ua. 20 Jecute Filemon a, bebi yuruode unojo uje bojo Yocangarádejnai anguresõre yu gu. Enga yujo Crísto anguresõre ua to, jecute ãro yujnusiétigade ome Onésimo, enga atĩre pininaquei yibai. 21 Enga urúsarome ua gu uje que potigayaquérique déji yu ome baringai angoninguite guesaguipise. Yirajapise uje a ca gusu yuruode jne ujetiga apésu aja quigode, mu datéringa jne ome bapesute arégode ome Onésimo dirome. 22 Bamo uje yangureta yui ujetiga Dupade doi uacacatecãraitigade ome yu, enga chorei yu aja uaque ujetiga yimóngopo ñane rĩ. Jecute apesabu yijogatique iji baguíjnai ujetiga dimane ome yu ujetiga diga yĩri iji uaque. 23 Epáfras déji yari iji soldádode iguíjnai uné, enga uté bai tu Jesucrísto to. Enga chi yiguíjna bei ome uté to. 24 Chi yiguíjna bei ome yijorane árcos, Aristárco, Démas, Lúcas ore rĩ, uje udore ore cháta raja yu to ome yigaidode Dupade iroquéo. 25 Yipesupu ga yocangarádejnai Jesucrísto chatapísaja uaque jne jõ. Amen.
1 Dupade catecã́ri yocai jnani bajade gatuaque icáite enga isocade ocoi uje catecã́ri ore. Enga angúroméone u uruode atatasórone uje catecã́ri ore nanique. 2 Mu iji ejode unojo enga catecã́ri yoque, enga angúromei u dajnacari ome yoque. Angúromei jé u dajnacari uté to uje Dupade pésu erámone unojo, gaté ore iji taningai nanique. Enga chisi ome cuchade unojo jnese icáite ome dajnacari. 3 Enga Dupade idírecaringuei pijogapo rĩ iji Ujnacari uté. Chamáñaje Dupade adípisode jé dépisiji Ujnacari enga chojmarapise ore iji jnumi. Enga Dupade Ujnacari u uje chijocase cuchade jnese iji erámone, gaté ore ome darúdatéode. Uté jé upo rĩ uje chise erámone icáite ujetiga churu yoquisijnaringuéone iji jnumi. Quigade enga jnopome gaté rĩ. Enga chácariji dai Dupade ãrachua ome daringai cuchape. 4 Enga uté sué Dai irógode gai jnese iji gaté. Uje ore gajnei tu ujetiga yĩ́caco Dupade utocaidi aja ore, mu Dupade Ujnacari gajnei tu ujetiga yĩ́caco Dupade Abi aja uté. 5 Uje Dupade narare icáite enga chojninga nanique: Yape ua. Enga bai tu yu gajneri. Mu que urúo unojo ome darógode uñeque nanique. Mu uruode gajnengóri u Ujnacari. Enga Dupade uru uñane dépoji rĩ uje chojninga: A uté cho dají yu. Jé basa a yo yabi iji uté jne. 6 Mu uje Dupade chiroque dape taningui aja erámone nanique enga chojningame darógode gaté jogosóño icáite: Yipota eti yirógode uaque jnese iji gaté asíyo Yujnacari gai. 7 Jé basa Dupade uruode déji uje chojninga: Dupade cho darógode gaté jogosó rone ore gajnu iji úyujna cuchá bedie, acherangórone ore. Enga ore gajnunie jé upo pioque ocarádejnánie rĩ. 8 Mu Ujnacaripísi gajnéone urúo sué unojo gai uje chojninga: Dupade a, baringai eduguéjna cuchape que íjnoque to go iji deréjnane jnese. Eduguéjna cuchape ua enga que báyipieraque gajnarengue ome barásade gotique. 9 Barasique cucha omone gu. Jé basa betaque pate gajnaréngone jnese. Jecute badupade uyu yajegaidipísi u ua ujetiga baninaquéode sué pise bajorane gaté jogosóño ore ininaquéode gáyode jnese. 10 Dupade chojningápome dabi te rĩ: Pangarádejna, jé bapesute erámone unojo ero jnese iji taningane. Bamaningápo guéode rĩ ome ba jmáinie. 11 Bapesudode udore a ore chise deruéningo jnese jne. Mu a ca beruénique cuse jne iji deréjnane. Bapesudode udore gajnúone u piguidedie jne uje icha iji tani ngai, mu jĩraque ijaro. 12 Jecute a cho jne ujetiga aya bapesute bajade udore jnese, enga apocásu ore aja ñane, Enga a écãre ore jne ome cucha ichade. Mu ua enga a ca écãre batique jne, mu a jé bate te jne iji deréjnane jnese. Uje eyúgojma ua gu. 13 Dupade chojningápome dabi te rĩ: Be yãrachua enga ácarabíji, jé aja ujetiga yinoningase bama josórone ore jnese. Enga que uruode udore gajnengónique u irótique uñeque gotique iji gaté, mu gajnengóri u Ujnacari. 14 Pimojma Dupade irógode gaté unirisóño jnese, enga que ayoré ore gotique. Mu Dupade utocaidode u ore ujetiga ore chátaja iquetade ayoréo. Yojningane u udore ore jnese uje ore gajmaque panguretigai ome Jesucrísto to.
1 Jecute yocajnei tu ujetiga yicoi enga yangacopísi yocududigode Dupade urúo, enga ca yicagoi quedéjnarique ome Dupade. 2 Yirajagópise uje Dupade irógode gaté unirisóño jé ore ĩrijío Dupade uruode nanique iji jnani bajai Moises. Enga Dupade uruode udore queyiécho nanique. Jecute ayorérique ujetiga chó uruode udore gai nanique enga pujuyápise uté gosi nanique. Enga tiógarapísa daringai pujuya nanique. 3 Jé cho to ome Dupade áyipie ejodie ome yocuringane piquetaque. Uje cucha datepise áyipie ejodie udire gu. Enga a ca yapíco to jne ome Dupade ujuyaquei ujetiga yoco cucha bisidéguiji áyipie ejodie. Bajai tu Yocangarádejnai nanique uje chatata udire quigode ome ore. Enga uté ududisórone ore u uje ore cho quique ome yoque ujetiga ca potigayaquérique déji yógome uruode udore uringane ũréo. 4 Enga Dupade jé u to uje chetingare daruode uringane ũréo ome dajopie iji danguresórone. Jecute anguresórone udore ore urásade pañáji ore ate pitijádode. Enga uásejna ore ipesute datéode udore nanique. Enga Dupade pésu dáyipiedie ome danguresórone uyoque to enga chisi ome dajopie Espíritu Sánto gueranone pirajatíga ome yoque jnese, uje yoquirajatigade udore cãra rome ñane. 5 Dupade que doi enga pésu darógode gaté unirisóño uringane eduguéjna ome ore ujetiga ore chijocase cuchade iji yocojningai erãpe ichai. 6 Jé basa enga ore urusarane Dupade urúo déji uje chojninga: Jecute ¿gotique gu a, Dupade a, uje bosõre yoque uje jĩraque yitogoi múñi? ¿Gotique to rĩ a uje bejna báyipiedie aja yocujoi erámi unirisõre uté uje barógaja yoque? 7 Bajuéga nanique ujetiga barógode gaté jogonóño ore sué uté gai, mu chi garósi deréjnane jne ujetiga ore sué gai. Quigade enga batĩre uté uringai cuchape gai ujetiga picotaque ome ore jnese. Enga basi ome bapesudode cucha jnese ome uté ujetiga sué cuchade jnese gai. 8 Enga erámi unirisṍri uté gajnei tu ujetiga chijocase cuchade jnese. Enga que cucha amínique cuse ujetiga ca Dupade chisi ome uté ujetiga gajneque. Jé ũré yu ome udore, mu jé ũré yu to rĩ uje cáma angoninguite guesaque cuchade jnese ome uté. 9 Mu yirajágo uje Jesus uté u uje Dupade chicháji gaté jogosórone daroque ore údi nanique, mu garósi dirode uje déji ore údi. Dupade chijnóra erámone jogosórone jnese gu, jecute chiroque Jesus uté aja erámi nanique ujetiga cho daba ore isijnaringuéone jnese. Mu e Dupade chatĩrepója uringai cuchape gai te rĩ ujetiga yisígo gai ome itoringai ome yoque. 10 Dupade uté uje ipesute cuchade jnese ome re, juéga ujetiga Jesucrísto chejnáreque re nanique. Gaidi u gu ujetiga ujñapetaguipise Ujnacari tuté enga erámi unirisórone ore cho daquetangóri iji uté. Pota gu ujetiga cho dabi iji yoque enga pota to ujetiga abode ore Mgajneque ingoningájnai to jnese. 11 Enga Aore inoningayasṍri Jesucrísto, inoningañane ore e ore cho dají Dupade jnese. Jecute Dupade Abi uté que ajéngome go uje cho dãjora iji ore. 12 Purusãraque uté uruode nanique iji Dupade uruode enga chojninga: A yingo badode ome yijorane ore jne. Enga a yicota ua jne iji udore ore ujade iji yocuáguedie. 13 Chojningápo rĩ: Yangureni u Dupade. Enga chojningápo gaté rĩ: Yugúsi ne a. Enga Dupade guera none yabío ore déji yari to. 14 Adi u uje disírique a quene base enga erámi e unirisõre to. Jesus isocai jé u to nanique. Uje uté basiji chequé ayoré nanique jecute noña ga erámi unirisõre to. Gaidi tu gu ujetiga cho daba dojode erámi unirisóño ore isijnaringuéone. Enga u to ujetiga chejnápise Satanas, uje Satanas u gu uje ujopie cuse ujetiga chisi ome pitoringai ome ore. 15 Enga isocai tu uté to uje chijnime yóguiji pitoringai jmáinie. Chamáñaje yitodógo pitoringai yui gatuaque jnese uje qué yiquecágo iji erámi tuné. 16 Jesucrísto que di gu ujetiga Dupade irógode ore chagutíñame iji gaté. Mu di gu ujetiga Abraham ape disi ejode ore chagutíñame. 17 Jecute Dupade pésu Jesus nanique ujetiga chopise dojode ayoré uyoque. Gaidi u gu ujetiga pangarate cuchape uje osõraquei tate ome darásade ore uyoque, uje tẽrája Dupade ome yoquisijnaringuéone. 18 Enga uté jé u uje chejnáreque daringai petingaraque to nanique, jecute chosõripise yoque to uje petingaquéode chise yoque. Enga chiraja to ujetiga chijnime yóguiji petingaquéode jmáinie.
1 Yujode Dupade anguresõre uaque a, uje uaqueduyo Dupade iji uacajéode to. Dupade ibididique uaque to ome dadode. Jecute uacáyipieraque jé ca jnoji Jesucrísto. Chamáñaje Dupade iroguipísi tu gu ujetiga yutõcoi enga catecã́ri Dupade ome danguresórone uyoque. Enga gajnui u sacerdóteode eduguéjna cuchábi iji jnani bajade uje catecã́ri Dupade ome darásade nanique. 2 Dupade u uje ajegáite Jesus ujetiga doi iroquéode. Jecute Jesus doi gojni enga chimanipise Dupade ojningane aja guesi jnese. Isocai jé upo Moises rĩ uje que cho caru ome dapesudode Dupade iroquéo to nanique iji Dupade urásade ujade. 3 Uje yimóngo guiguíjnarique ueratigai enga yitijágo guiguíjnai tuté. Mu yoquicotaquéode gajnengoripísi tu guiguíjnai tuté ipesungóri. Jé cho ome Jesus, Moises ore to. Yitijágo ore ipesudode jnese, mu jé tiógara ujetiga yoquicotaquéode gajnengóri tu Jesus. 4 Yirajágo uje guiguíjnane ipesungórone cuse jnese. Mu Dupade u uje ipesute cuchade jnese. Enga que imótique cucha cuse ujetiga ca ipesute. 5 Moises dopísi Dupade iroquéode iji Dupade urásade ujade. Enga gajnui u guiguíjnarique gajnesónique irótique uje dimane ome darósõri iroquéode ujetiga chajnerame uté uru piqueminórone ome darásade. 6 Mu Crísto gajnui u guiguíjnai gajnesṍri ujnacari uje pesupúsu cuchade aja quigode iji dayé Dupade iguíjnai. Jé basa ga yocajnui tu Dupade iguíjnai tuté rĩ. Yojningane u yoque uje que yoco cutúguiji yocanguretigai ome Dupade ojningane cucha yúode, jé aja ujetiga yimóngo cuchade udore ome yoquedodie. 7 - 8 Dupade Ujopie Espíritu Sánto arecujáchi uje purusãracho iji Dupade uruode nanique uje chósi te: Iji ne gajneri ujetiga adúcho Dupade uruode, enga ca ajároyo uágaja ome uruode. Ca oyo Moises urásade uñane uje ore pésu Dupade ujuredie nanique uje ore cháji údode icáite iji erãpe tarei. 9 Sequeredie 40 nanique uje uacai cásodicaite ore chimo yipesute datéode gatuaque, mu ore quigode jé u nanique uje ore pésu yujuredie gatuaque to. 10 Jecute yajei dotárome ore nanique, enga yojninga nanique: “Ore áyipiedie chicáji quedéjnane ome yu enga que ore pota ore chiraja yadode gotique.” 11 Jecute ájningaraque yu nanique ome ore enga o yurúja ore nanique ujetiga ca ore chacája yari ujetiga ore cho dajñare iji yari. 12 Yijorane uaque, ajuso uaqueo to ujetiga ca uacáyipieraque chicáji quedéjnarique ome Dupápisi, Dupa uecai tuté. Enga diga chiborátaja ujetiga uaque gosi ca changureta. 13 Jé basa ga ajnusoi uágome ñane iji Dupade adode gatuaque uje qué piotigué deréjnai tu uné. Uacagaidi u gu ujetiga pisijnaringuérique ca chãra uacuñeque, enga diga uacuñeque tagu Dupade uruode aja. 14 Ujetiga yajógo yógaja yocanguretíga taninguíone ome Jesucrísto jé aja erámone eruei, enga a yocajnécho Crísto gajnéone cucha jnese to jne. 15 Uje ore urusarane Dupade urúo chósi te: Iji ne gajneri ujetiga adúcho Dupade uruode, enga ca ajároyo uágaja ome uruode. Ca oyo Moises urásade uñane uje ore áyipiedie uajadei nanique enga ore chijáro raja ome Dupade uruode. 16 ¿Jé gosode a uje ore chudute Dupade uruode nanique, mu ore tagu Dupade uruode aja? Udore ore u jnese uje Moises ijnimique ore nanique iji Egípto gosode ore gari. 17 ¿Jeque Dupade ájningai gajnengórone jé gosode a, iji sequeredie uje guejnanie ayoré gare nanique? Udore ore u uje ore pésu pisijnaringuéone ome Dupade nanique. Enga quigade enga ore toji erãpe tarei ajei nanique. 18 ¿Dupade jé uru gáite gosode rĩ a, uje chi jé ca ore cháji gai to iji guerani punire ujetiga ore cho paráguiji to? Uru gaidode u ore uje que ore tangári. 19 Yimóngo uje que ore chise Dupade guerani punire to nanique, uje ore chotigase Dupade uruode nanique gu.
1 Mu qué piotigué uné ome yoque ujetiga yiyágoji Dupade gari enga yoco yocujñare iji gari to. Jecute yujuco yoquio ujetiga yico jnese jne enga ca yocuñeque déji guesi iji Dupade adode. 2 Uje pacadique yógome Dupade áyipie piquetatodie iji deréjnane unojo to. Adi jé u uje pacadique jnani bajade ome udire to nanique. Mu que cuchárique tṍraji Dupade uruode udore ome ore nanique, uje ore chotigase gu nanique. 3 Mu uyoque uje yanguretágo Dupade uruode enga yocajneque ujetiga yugúcoji uté gari iji ti, enga yoco yocujñare. Uné jé u Dupade ojningai casicáite uje chojninga nanique: Yo yurúja ore gu yájningai ujetiga ca ore chacája yerani punire to enga ca ore cho dajñare iji. Mu Dupade jé u uje e chimate dasagode cucha jnese iji taningai uje pésu erámi nanique. 4 Ore urusarane Dupade urúo déji jogate uñane uje chojninga: Dupade chimate dapesudode jnese nanique, enga cho dajñare iji dire gare iji tia. 5 Chojningápo rĩ iji daru uñane: A jé ca udore ore chise yari to jne, ujetiga ore cho dajñare iji. 6 Yirajágo uje uñane cáma ore chise Dupade gari to ujetiga ore cho dajñare iji. Yirajagopo rĩ uje bajaque jnani bajade uje ore chudute Dupade áyipie piquetatodie nanique, mu que ore nóna Dupade to icáite ujetiga ore cho dajñare iji gari. Angoninguite parique ore nanique gu ome uruode. 7 Jecute Dupade pésu diri uñai enga u uné ujetiga yacágoja gari to. Enga chingo daruode udore ome David to nanique iji Moises urásade ore quigade. Enga yocajneque David urusarane Dupade urúo to uje chojninga: Iji ne gajneri ujetiga adúcho Dupade uruode enga ca ajároyo uágaja ome uruode. 8 Israel gosode ape ejode ore chise Dupade ojningai punire uje ore eduguéjnai u Josué nanique. Mu que ore cho dajñare iji. Ujetiga ore chorase dajñare iji uté, enga a ca Dupade chĩcarirase diri uñai ome ore ujetiga ore chacája gari enga ore cho dajñare iji. 9 Jecute yirajágo uje diri qué déji ome Dupade urásade uyoque ujetiga yoco yocujñare iji. Enga a jé cho uje Dupade cho dajñare nanique uje chimate dasagode cucha iji erámi taningai. 10 Jecute gosi ujetiga nóna Dupade enga cho dajñare iji gari enga gosi chopise dajñare, enga que áyipieraque dépoji dapesutique cucha. Isocai jé u Dupade to uje chimate dasagode enga chopise dajñare nanique. 11 Jé ca yicoi enga ca yoco Israel gosode ore uje que ore chise Dupade uruode unétique nanique uje chingo punire ichai ome ore. Mu yicoi enga yujnucoi yógome Dupade ojningai uté yui ujetiga yico enga yoco yocujñare iji. 12 Uje iyiejna Dupade uruode enga chijocase ayoréode áyipiedie. Asico to enga sué queséode gáyode uje ore asode gare. Jecute gosi ujetiga chudute Dupade uruode enga Dupade uruode chijnare aja uté gosi áyipie ajepísi. Enga jé u uje cuchade doi guesáringane iji ore. Enga jé u uje pijoque ore áyipiedie quigode ome. 13 Que togome yoque ujetiga yipójo cuchárique ome Dupade. Chamáñaje Dupade ipesute cuchade gu, enga chimo cuchade udore jnese iji ore jogadode. Enga chirajápo cucha dacadode quigode jnese rĩ. Enga Dupade uté u jne ujetiga yingongo yoquipesudode cucha aja jnese. 14 Dupade Abi Jesus e chacája Dupade gari iji gaté ujetiga catecã́ri ome yoque. Enga gajnui u sacerdóteode ore eduguéjna cuchábi iji jnani bajade ore. Jecute yicoi enga yujnucoi yógome yocanguretigai ome uté enga ca yibérogo yóguiji yocajesui Dupade acho. 15 Enga Yocangarádejnai uté que dojnóngaja yoque uje querénga yoquetotiguérique cuse iji yocujuredie jmáinie. Chamáñaje ayoré uté to nanique gu uje déji erámone unojo nanique. Enga chiraja cuchade jnese uje chetingare ayoréode uyoque, mu que pésu pisijnaringuérique to go nanique. 16 Jecute jé ca yagutúgo yoque jne ujetiga yicatecãcoi yoquijnorangóri Dupade. A yibájoi Dupade jne enga a jĩraque chosõre yoque jne enga chátaja yoque iji yocajnéone petingaquéode jnese.
1 Yirajágo uje jnani bajade ore doi Dupade ajegaidi tiji uraque dajade icáite ujetiga uté gosi icatecãráite Dupade ome ore. Sacerdote uté to, mu sué dojode sacerdóteode gáyode ome uringai eduguéjna cuchape. Enga uté u to uje chingo darásade gueranone cucha ome Dupade nanique, enga chujépo ore gachidode cuchiso nanique rĩ ome ore isijnaringuéone. 2 Enga sacerdóteode eduguéjna cuchábi uté gosi nejena darásade údode nanique. Chiraja gu uje urásade ore ujo ayoré pisijnaringuéone amatate to nanique. Jecute uje chimo darásade uje agupuraque ore, jeoga ore chicáji quedéjnarique ome Dupade adode, mu que tagu dejórique ome ore. 3 Que gusu urásade ore gachidode cuchiso nanique uje chujé ome ore isijnaringuéone, mu chujépo cuchisode to nanique rĩ ome dasijnaringuéone. Uje chiraja nanique gu uje que etotiguérique cuse ome pisijnaringuéone. 4 Ujetiga jnanírique potarása daringárique eduguéjna cuchape nanique ome dojode sacerdóteode ore mu que togome uté gosi go. Chamáñaje Dupade u uje ajegáite jnanione ome udore. Adi u jnani bajai Aaron nanique. Dupade ajegáite taningui u nanique ujetiga ujode sacerdóteo ore cho deduguéjna cuchábi iji uté. 5 Isocai jé upo ome Crísto rĩ. Uje que chingo erámi ujetiga ore eduguéjna cuchape ujetiga catecã́ri Dupade ome ore. Mu Dupade ajegáite Crísto ome udore. Jecute urúo ome nanique uje chojninga: Yape ua. Enga bai tu yu gajneri. 6 Dupade chojningápome dabi nanique rĩ iji darusãraque uñane: Baringai pangarate a jé jogate ua jne iji deréjnane uje bacatecã́ri yu ome barásade, enga bajnui tu sacerdóteode eduguéjna cuchábi iji jnani bajade ore nanique. Mu bajnai a jé u jnani bajai te jne uje i tu Melquisedec uje ore eduguéjna cuchape uté to nani que. 7 Uje Crísto qué déji erámone unojo nanique enga jecucha catecã́ri Dupade enga chutai cuchade iji. Uje catecã́ri Dupade iji uñane enga chejnapúsu daruode enga edocadode cusapo icáite rĩ iji uñane. Chiraja uje a Dupade ajeráso enga ca torási gu. Jecute Dupade pañapísiji uje angoninguite guesaque Crísto nanique, enga jecute tangári icatecãraitigade nanique. 8 Dupade Abipise Crísto múñi, jé chejnáreque re to iji erámi tuné nanique. Mu jecucha ga tangári Dupade iji udore jmáinie, enga jé u uje uringai angoninguite guesaque pijoque. 9 Enga uringai ujñapetaguipise jé pijoque to. Jecute pucuecaringué eyúgojmai garani u uté ome udore ore jnese uje ore doi uruode. 10 Jecute Dupade pésu nanique enga Yocangarádejna Crísto ujetiga catecã́ri dai Dupade ome yoque, adi tu sacerdóteode eduguéjna cuchábi iji jnani bajade ore nanique. Mu Crísto ajnai tu jnani bajai Melquisedec uje catecã́ri Dupade ome ore to nanique. 11 Cucha amirone qué uásejna ujetiga yacáco uágome cuchade udore, mu piraguipise ujetiga arajáyo quigode. Uje que apótayo arajáyo quigode gu. 12 E uacajnei urásu ujetiga acácho uacojode ayoréo to ome Dupade uruode. Mu uacajnei jé qué u ujetiga yacacopo uaque gaté rĩ ome cucha obiréjnane iji Dupade uruode. Cho ujetiga ajníñoja uacaringane disi parátaque. Enga uacajnéone u uacatedie ijnanie jeta acúyo. Uje que ajnóño cucha pibotipísode gu ujeta acho. 13 Jecute ujetiga qué eduyo Dupade uru obiréjnane mu que arajáyo uru ibirade enga gajnui tu ujetiga qué disi parátagape uaque iji Dupade adode. Enga que arajáyo cucha gajnaréngone, cucha arégode ore iji ñane. 14 Jé basa ga udore ore uje ore chiraja Dupade uru ibiragode enga ore gajnúone u jnanione uje ore tagu cucha uajádode, enga ore chiraja cucha gajnaréngone, cucha arégode ore iji ñane. Uje ore chetingare re iji Dupade adode gatuaque gu.
1 Jecute yujnucoi yógome yoquiquei enga yico yocuringane jnani. Enga yichago yocududigode Dupade uru bajácho aja yoquirosadode. Enga jé ca yijárogo Dupade uru bajade iji jnumi. Yojningane uru bajácho u: yoquisijnaringuéone uje jno yocúdi aja pitoringai, jé upo panguretigai ome Dupade rĩ. 2 Jé upo pacajnaquéode rĩ ome yodi uje ore tṍra ore aja. Jé upo rĩ pacajnaquéode rĩ ujetiga ore catecã́ri Dupade enga ore chicha dajmanáyone aja Dupade anguresónique ójoraque. Jé upo pacajnaquéode ome togode ore uringáringo piringarangápo rĩ. Jé upo pacajnaquéode ome Dupade ujuyaqué cuchábi yui rĩ. 3 Mu a yujnucoi yógome yoquiquei ujetiga Dupade chátaja yoque. 4 Yirajágo uje jnanione déji uje pacadique ore ome Dupade uruode. Enga ore chiraja Dupade gueranone cucha ome ayoréode, uje Dupade Ujopie Espíritu Sánto chijocase ore áyipiedie to. 5 Ore chirajapise to Dupade uruode uringane uerate. Enga ore chimo uje Dupade ujopiedaté uje a pijoguipise jne iji erãpe ichai, e gajnesórone u yoque to iji deréjnane unojo. 6 Mu ujetiga diga jnanione udore ore doi enga ore cho cucha tágode iji Dupade uruode, adode ore enga que qué toque jne jeta ore checãrapo dajéode rĩ enga ore chajniapo Dupade gai to rĩ. Chamáñaje ore cho Dupade Abi yungórone ore gu uje udore ore chotigase Crísto uringai Dupade utocáite nanique. Enga ore chopo cucha bisidéguiji Dupade Abi uté rĩ iji dojode ayoréo ore ujade. 7 Ore gajnúone u jnumi uje guéode chuta gatuaque. Ujetiga diga sequeré omé tṍraji jnumi uté ome isangórone ore, chiborátaja Dupade irasitigade ome jnumi tuté. 8 Mu ujetiga gusu ojnacúcodie ujetiga suéji jnumi tuté enga que ujñapeque jnumi. Jé u uje Dupade uru gáite jnumi tuté, ujetiga diga dacapose gai. 9 Mu que uacajneque yigotade tijo unojo, yijorane uaque. Uje yiraja uje uaque u uje uacanguretáyopise Dupade. Enga a uacajneque Dupade gueranone cucha omío to jnese, uje Dupade iquetade u uaque gu. 10 Uje Dupade que chapúsaja dáyipierangome uaque gotique ome dapesute arégode ome uaque. Enga a ca chicadigapo uacapesudode cucha ome jne rĩ. Uje uacangoño uacajnoraquéode ome uacojode Dupade anguresóño, enga jecucha uacátayo cuchade aja ore ica. Enga jé qué uacagúsoji gai uje uacátayoja ore. 11 Yocajéode u ujetiga ca abéroyo uáguiji uacadode unojo. Enga jé ajneráño údi aja uaqueruei. Ujetiga beyoi udore enga a Dupade ojningane cucha tocade jne ome uaque jnese uje qué uacarocho cuchade udore yúode. 12 Que yipótago ujetiga tagoideque uaque iji Dupade adode. Mu acã́cho uágaja Dupade anguresõre chaguesíode ome ore anguretigade, uje que ore chacho doi Dupade adode. Udore ore u gu uje ore gajneque Dupade ojningane cucha jnese uje chichaga danguresõripísode jnese. 13 Ajnusináño uje Dupade catecã́ri jnani bajai Abraham nanique. Enga chingo abi ujnomei tome uje chi chisi ome jne. Enga Dupade chojningame: “Jé yarecujate yingomenie ome ua.” Enga yirajágo uje que parecujate uñáraque cuse ujetiga sué Dupade arecujáidie gai. 14 Jecute Dupade chojningame Abraham icáite: “Jé ũrepise yu, a yisi ome yosõraquédatéi ome ua jne. Enga a yisi ome bape disi ejo dipesérigo jne ome ua.” 15 Enga Abraham que chotigase Dupade, mu timiningapísa Dupade uruode. Enga que chacho uje chirote yui. Jecute diga Dupade ingoméone cucha jnese díji Abraham. 16 Ujetiga ayorérique pota piminingate ome dojode ayoréo enga chajo raja uje ayoredatérique uñeque chiraja uringai ũré. Enga ojningai ayoredatei tuté jecucha sué uté gosi gai ome uringai cucha daté. Jecute jogadi u uté uje pangurete ome dojode ayoréo enga que ore botãre uruode. 17 Dupade isocai jé u uté to. Jecute chojninga nanique: “Jé yarecujate yingomenie ome uaque.” Gaidi u gu ujetiga ojningane cucha gajnesóningo ca ore chotigase ingoméone cucha udore yúode. Gaidi upo rĩ ujetiga ore chiraja uje uruode tocade jnese jne enga a ca pecãraque uruode udore quitique uñeque. 18 Dupade gueranone cucha gare ome yoque ujetiga ca yotigáco. Enga u unojo: ingoméone cucha u uñai ome yoque. Jé arecujáite urenie u uñanie. Enga yirajágo uje Dupade que cho darapatáringa to go. Jecute uyoque uje yayógo aja Dupade ujetiga chirote yoc, enga yanguretágo ojningane cucha yúode, e yocayuguhebátigade bijna ome yoque enga yajógo yógaja uté uru uréone. 19 Cucode isangúrone cuse uje jogadi u jnumi iji yodi údi ujetiga cucoi ca chinguíra raja quedéjnarique. Isocai u to yocanguretigai ome Dupade. Yoquisangúri u yocanguretigai to, mu jogadi upúsu Dupade iguíjna gateminóri ajei uñai uje borapeque cuchátique déji iquei. Jecute e que toque ujetiga cuchárique chinguíra yógaja quedéjnarique ome Dupade adode, mu jogadipise yóguiji Dupade gari iji deréjnane. 20 Mu bajaque Jesus uje chacája ajei uñai uté ujetiga pésu enga guesája yui ome yoque to. Jecute yocangarádejnai u uté ujetiga catecã́ri Dupade ome yoque. Enga ajnai u jnani bajai Melquisedec uje catecã́ri Dupade to nanique ome darásade.
1 Melquisedec uté jé u uje Salem gosode ore eduguéjna cuchape icáite. Enga Dupápisi jé ipesute uringai pangarate nanique ujetiga catecã́ri Dupade ome darásade. Abraham di nanique iji ore jocaningai uje ore sué eduguéjna cuchábode gáyode nanique, enga Melquisedec chachai iji garani nanique. Enga chimo, enga chacacãre ejode nanique. 2 Abraham tẽrája Melquisedec ome dasagode cucha péode uje di údi iji ore jocaningai nanique. Enga chisẽcaru nanique. Uje cuchade e chise 9 enga Melquisedec e gajneque jõrai. Enga adi jé u ome dasagode cucha jnese uje chisi ome Melquisedec. Melquisedec uté i quigode u “eduguéjna ayipierãque” nanique. Enga uté uniri Salem i quigode u “tijójnanguéone.” Jecute Melquisedec i uñai u “tijójnanguéone jogosórone eduguéjna.” 3 Mu que pijoque Melquisedec datéraque, dánique, dáquirigo ore nanique. Que pirajágapo batigárique dire nanique rĩ. Que pirajágapo isocárique rĩ ujetiga toi. Jecute Jesus, Dupade Abi, gajnui u Melquisedec enga uringai pangarate jé jogate iji deréjnane ujetiga catecã́ri Dupade ome ore. 4 Jecute adoningachopísa Melquisedec uringai cuchape to nanique. Enga a ca cuchabirase nanique enga yocai jnani bajai Abraham a ca chisírasome dasagode uñéngo ome nanique iji dajocaningane uje chajnose eduguéjna cuchábode uñane nanique. 5 Uacarajáyo Moises urusarane quigode uje chi Levi ape disi ejode u nanique ujetiga ore chisa darásade ore gueranone dagúcha pécho ome Dupade nanique. Sacerdote ore, mu que ore sué darásade gáyode to nanique. Uje ore utaisórone jé ore chojmára nanique ore utaidode ore. Uje Abraham ape disi ejo ore jnese. 6 Mu Melquisedec que Levi ape disi ejo gotique. Bajaque gu ome Levi ore. Mu Melquisedec jé chutai dajnepídi iji Dupade uruode gajnesṍri Abraham ugúchade to nanique. Enga Melquisedec uringai cuchape pijoque gu uje acacarãque Abraham tuté nanique. 7 Que potigayaquérique déji uñeque ome unojo: gosi ujetiga doi enga chacacãre dojórique ayoré enga uté gosi sué dacacarãi tuté gai. 8 Yirajágo uje ore jnese uje ore chisa yoqueranone yocugúcha péode ome Dupade iji dirode unojo, yocujo ayoré pitoringai amatate ore. Mu Melquisedec jé cãrapúsu re ome udore ore, uje Dupade uruode que chatata itoringárique isocárique. Chorase ujetiga ca toi nanique. 9 Jecute ísenga Levi, ape disi ejode, jé aja udore ore uje ore chutai Dupade gajnéone iji yoque iji deréjnane unojo gajneri, ore chisi dagúchade petígo iji Melquisedec to nanique. Enga isocai jé urásu ujetiga ore dérasi Abraham gari nanique uje Melquisedec chachai nanique enga Abraham tẽrája. 10 Chamáñaje cáma ore base nanique enga jé jogate ore iji darãpi Abraham ajei nanique uje Melquisedec chachai iji dajei. 11 Yirajágo uje Israel gosode uyoque yirajágo Moises urusãraque puyade gu yocacadisórone uje yĩ́caco levíteode aja ore. Enga yocacadisórone udore ore garani u Levi ape disi ejoi Aaron jnese. Mu que ore acajnaquéode chimate yógaja yocuringáringo arécho. Jecute Dupade chisi ome pacadisõre uñai ome yoque uje jé cãra rome Aaron ore. Mu chopise jnani bajai Melquisedec. 12 Ujetiga pecaranguírase pangaránone ujetiga uñeque basaja udore ore jogadi ujetiga chacate yógome Dupade ipotigádode cucha, enga cucha amiri tu ujetiga pecãraque Dupade iroquéode ome pacajnaqué ichárique to rĩ. 13 Enga ore urusarane Dupade urúo chatata uje Yocangarádejnai u pangarate ichai tuté ujetiga cho yoquiquique ome Dupade ipotigádode cucha. Mu que uté garãpi u jnani bajai Levi go, mu garãpi u Jacob ujnacare uñai Juda. Enga que Juda ape disi ejode uñeque cuse nanique ujetiga pangarate enga catecã́ri Dupade ome darásade. 14 Ore chiraja jnese uje Yocangarádejnai garãpi u jnani bajai Juda nanique. Enga jnani bajai Moises que acajnaquei u go nanique ujetiga jnani bajade ore cho dangaránone iji Juda ape disi ejode ujetiga ore catecã́ri Dupade ome ore. 15 Jecute yipáñangopísiji uje Dupade e chécãre cuchade jnese. Jecute yocangarate ichai cuse iji deréjnane unojo, enga u Jesucrísto. Enga uté cunguésõripísi Melquisedec, jnani bajai. 16 Enga que Crísto chise daringai pangarate gu ayorérique acajnaquérique ujetiga garani u jnani bajai Levi. Mu chise daringai pangarate gu dajopiedaté uje ecáji deréjna pitade. 17 Jecute Dupade ojningai jé upúsu Crísto uje chojninga: Baringai pangarate a ca eruénique cuse jne ujeta acatecã́ri yu ome barásade. Uje jé bopise Melquisedec gu. 18 Jecute yimóngo uje Dupade e chicháji ti yui daroqué bajade ome Moises. Uje piroquéode udore que etotiguérique cuse gu ujetiga chécãre ayorérique atígo. 19 Enga Moises urusarane cucha puyácho que pésu ayorérique uringárique ujñapetaque nanique. Mu pacajnaqué ichade uje basaja udore jogadi u uje suépise bajade udore gai. Enga e yijóco Dupade yui ome yocanguretigai ome pacajnaqué ichade udore. 20 Dupade arecujate iyiejnai nanique ome dabi uje cho pangaráni iji ujetiga catecã́ri Dupade ome darásade iji deréjnane. 21 Jé basa ga uje jnani bajade basaja daringane pangarate nanique ujetiga ore catecã́ri Dupade ome darásade, mu Dupade que arecujate iyiejnanie cuse ome ore. Mu pangarate ejoi tuté uje catecã́ri Dupade ome yoque, uté gajnei u Dupade arecujate iyiejnanie nanique uje purusãracho quigode iji Dupade uruode, enga chojninga: Yocangarádejnai Dupade jé arecu jáichi ome dabi enga que toc jeta pecãraque quigode uje chojninga: “Baringai pangarate a ca eruénique cuse jne ujeta acatecã́ri yu ome barásade. Uje jé bopise Melquisedec.” 22 Jecute Jesus u uje chajo raja uje ũrepise Dupade ome daru ejode. Enga chajopo raja to rĩ uje uru ejode u uje suépise uru bajade gai ome uringane omipíso. 23 Dipesé pangarate bajade uje ore catecã́ri Dupade ome darásade nanique. Uje toguebeque ore nanique, enga ore basaja ñane jogadode gatuaque. 24 Mu Jesus que toi gotique. Jecute a ca pecãraque yocangarátique tuté jne ujetiga catecã́ri Dupade ome yoque. 25 Ujetiga ayorérique pota tibágui Dupade enga doi enga changureta Jesus ome Dupade yui, enga Jesus ujopie cuse ome udore ore jnese ujetiga chiqueta ore. Chamáñaje eca Jesus iji deréjnane jnese gu enga jecucha ga chijócha Dupade ajei údi ome yoque. 26 Jecute Jesus jé upúsu yocucuei pangarate cuchape ujetiga catecã́ri Dupade ome yoque. Uje ueque gu ome cucha gajnaréngone, pisijnaringuéone ore jnese. Enga Dupade e cãra jogadi ome pisijnaringuéone ipesusórone ore jnese. Enga uté jogadi jé upúsu Dupade gari iji guéode uéchai. 27 Que Jesus isocai u Dupade icatecãraisõre bajade ore isocade go. Uje ore chujé cuchisode iji dirode jnese, enga ore chisi ome Dupade. Ore gaidi u ujetiga Dupade chimo ore gueranone enga chĩro ore isijnaringuéone. Ore chujépo cuchiso uñane gaté rĩ ujetiga Dupade chimópo rĩ enga chĩro ore urásade isijnaringuéone to. Mu Jesus guerani cucha chojmára enga jé gusu. Enga a jé ca tẽrápo rĩ cucha uñeque ome Dupade ome pisijnaringuéone. Uje uté guerani ome Dupade jé u re nanique uje toi ome yoquisijnaringuéone. 28 Yirajágo uje Moises urusarane cho quique gosode ujetiga ore catecã́ri Dupade ome darásade nanique. Mu Dupade catecãraisõre bajade udore jé ore cho ñane jnese icáite uje que ore ujñapeque. Mu Dupade arecujate iyiejnanie di iji Moises urusarane quigade ujetiga pangarate cuchape dajnacari enga catecã́ri Dupade ome darásade. Uje ujñapetaguipise Ujnacari gu, enga uringai ujñapetaque que eruénique cuse iji deréjnane jnese.
1 Yacajnaquéode quique obiréjnai u uje Jesus u yocangarate cuchábi tuté enga chácariji Dupade ãrachua iji guéode uéchai. 2 Enga e pésu cuchade aja quigode iji Dupade iguíjnapísi uje déji gaté. Enga que ayorérique ipesute guiguíjnai tuté go, mu Yocangarádejnai ipesute. 3 Yirajágo uje pangarate cuchábode jnese uje ore catecã́ri Dupade ome darásade ore gajnei u to icáite ujetiga ore tẽrája Dupade ome darásade gueranone cucha, jé ome cuchiso pẽrapáidode to rĩ. Jecute que toc ujetiga pangarate cuchábi Jesucrísto ca tẽrája Dupade to ome cuchárique. 4 Mu ujetiga Jesucrísto jé jogadírase erámone unojo enga a ca ore chorase pangarate cuchábi iji ujetiga catecã́ri Dupade ome ore. Chamáñaje ore angaránone cuse gu ome udore ujetiga ore doi Moises urusarane quigode ome deranone cucha ome Dupade. 5 Mu pangaránone udore iji dirode unojo ore angúroméone jé u Moises acajnaqué diyajmane ome dasagode cucha. Mu ore isocade cachi cucha gajnúo. Mu pisoca ũrepísode u uje pipesute iji gaté. Yirajágo unojo gu uje Dupade jé urúo ome Moises nanique uje chojninga: “Ajusipise bapesudi yiguíjna jnutiminore guio ujetiga jé chopise yiguíjna gateminóri uje yingo quigode ome ua iji cucarani gaté.” 6 Mu pangarate cuchábi Jesucrísto uje catecã́ri Dupade ome yoque isocade sué pangaránone uñane isocade gáyode uje ore angúroméone u Moises urusarane. Jé basa Dupade áyipie ichadie ipesusṍri u Jesucrísto enga Dupade ingoméone cucha ome Jesucrísto anguresórone uyoque suépise ingoméone cucha gáyode ome Moises urásade to nanique. 7 Jecute ujetiga Moises urusarane Dupade áyipie bajé pesurásu ayorérique uringárique ujñapetaque, enga a ca pipesudaporase áyipie ejórigui rĩ. 8 Mu Dupade chiraja nanique uje que ore ujñapeque, urása bajade. Jecute purusãracho Dupade uruode ome ore iji Dupade uruode enga chojninga: A chise dínique jne ujetiga yipésu yáyipie ichárigui jne ome Israel, Juda ore ape disi ejórigo. 9 A jé ca isocai tu yáyipie bajedie jne ome ore dai cásodicaite ore. Uje yipésu yáyipiedie udire ome ore nanique uje yijnime ore iji Egípto nanique. Mu que ore doi yáyipiedie quique bajade nanique, jecute que yanga rapoi ore yúrique rĩ. 10 Jecute a yipésu yáyipie ichárigui jne ome Israel gosode ape disi ejórigo ore. Enga a chósi te jne: A yicha yáyipiedie aja ore áyipiedie jne. Enga a ca jnoji ore ajéode jne. Enga gajnui u jne ujeta purusãrai yáyipie ichadie iji ore áyipiedie. Jogadi jé u jne ujetiga ore idupade u yu. Jé basa ga yurása ore jne. 11 A ca uñeque doi enga chacate dojórique ayoré ome yadode jne iji dirode udore. A ca uñeque chopo dojórique ayoré quique rĩ ome yu to jne rĩ enga chojninga: “Omi tu ujetiga arajáyo Dupade adode to.” Chamáñaje a ore chiraja yu jnese jne: ayoredatéode, jé aja ayoré gajnaréngone ore jnese. 12 Enga a yĩro ore isijnaringuéone jnese jne. Enga a ca yujnusinápo ore ate gajnaréngone rĩ iji deréjnane jnese. 13 Uje Dupade chĩ́care dáyipie ichadie enga obiréjnapise uje áyipie bajedie e que ujñapeque ome Dupade. Enga yirajágo uje que cuchárique ujñapeque enga jĩraque íjnoque.
1 Yirajágo uje Dupade áyipie bajedie quigode cuse nanique ujetiga jnanione ore pésu udore aja quigode jnese. Enga Dupade iguíjnai cuse to ome udore uje pipesute ome erámi unirisórone. 2 Uje ore pésu Dupade iguíjnai tuté nanique enga quigode u unojo: ore pésu ajé bajai enga ore chĩ́care Ajé Puyai aja. Enga ore agapidi déji ome arureque puyade, enga ore apósode dépoji rĩ. 3 Enga borapeque cuchábi chijna Ajé Puyai iquei, mu borapeque cuchape gatei dépoji ajei uñai yui te rĩ uje i tu Ajé Puyaguipísi . 4 Gaserani déji Ajé Puyaguipísi uté rĩ uje óro ueque. Enga uté u uje ore chãru cucha ai unerone iji. Cuchade pi dépoji rĩ enga óro déji gañámi jnese. Cuchade pi uté i cuse to enga ore chĩ́care Dupade áyipiedie jogadi aja. Co déji cuchade pi uté ajei to rĩ enga óro uegue co uaté to. Enga Dupade iringuíone arureque déji ajei uje i tu mana . Enga jnani bajai Aaron ogué dépoji cuchade pi tuté ajei to rĩ. Uje ogué uaté u uje agatadi sué nanique. Enga Dupade áyipiedie jogotodie cucaranei dépoji cuchade pi ajei to rĩ. 5 Dupade iroque gaté minórone gajnúone déji cuchade pi uté gai uje ore íode u querubíneone . Ore cháji gai gu uje qui tu uje Dupade déji uté to. Enga querubíneone udore ore ujnóngone suru jogadi gai uje chi pĩroque pisijnaringuéone iji. Quique uñane qué déji mu que togome yoque ujetiga qué yajnerángo údi. 6 Mu Dupade iguíjnai ajéode udore jé adode u, enga pangaránone uje ore catecã́ri Dupade ome ore, ore pésu cuchade aja ñane iji Ajé Puyaque bajai uté iji dirode jnese. 7 Mu que ore chacája ajé uñai uje i tu Ajé Puyaguipísi iji dirode jnese gotique. Písõri chojmára enga pangarádejna cuchábi u uje chacája mu chojmára iji sequeredie enga e gusu. Enga que chimoque uje chacája enga chijna cuchisode iyode iji dajmáinie ujetiga catecã́ri Dupade ome dasijnaringuéone, jé ome darásade ore isijnaringuéone to rĩ. 8 Dupade Ujopie Espíritu Sánto cho cuchade udore quique ome yoque enga chósi te: uje pangaránone qué ore pésu cuchade aja quigode iji ajé bajai, enga jé basa que pibípise Ajé Puyaguipise uñai uté ome ayorérique. 9 Enga jé adi tu to iji deréjnane unojo to rĩ: uje ore tẽrája Dupade ome cuchade iji deréjnane unojo to, enga ore tẽrapója Dupade ome degode cuchiso to rĩ, mu cáma ore chise daringane ujñapeque go ome dadode udore. 10 Jé upo ore isocade rĩ ome cucha pibosode, cucha podode ore. Jé upo rĩ uje ore churu raque gatuaque ome cucha puyade. Mu querénga cucha udore bisitique pijoque go. Enga pisocade udore jnese eruei tu uje Dupade e chécãre pisoca bajade udore ome pisoca icha ejode. 11 Enga Crísto e di icáite. Jecute uté e u pangarate cuchábi ujetiga catecã́ri Dupade ome yoque. Enga uté diapo cucha pagutiyamánone údi iji yoque to rĩ. Uté jé upo rĩ uje e pésu cucha dacadode aja quigode iji Dupade iguíjnai ajei. Mu uté charidi Dupade iguíjna suépise pangarate bajade ore charidode gai. Uje uté charidi guiguíjna déji guéode uéchai gu. Enga que ayorérique ipesute charidi tuté go uje que déji erámi uné gu. 12 Enga Crísto uté chacája guiguíjnai Ajé Puyaguipísi iji gaté. Mu que gaidi u ujetiga tẽrája Dupade ome cuchisórique iyórique. Mu edugádi jé u dayópisi. Enga uje e tẽrája Dupade ome dayoi tuté enga que tẽrapója Dupade rĩ iji Ajé Puyaguipísi uté rĩ iji deréjnane. Gome gu ujetiga chojmára, enga adi jé u uté uje chise pucuecaringué eyúgojmai ome danguresórone uyoque jnese. 13 Jé ũré yu ome unojo: ujetiga gosi inoñaringuei cuse nanique enga pisoca bajade udore ore u uje chinoningase uté gosi inoñaringuéone nanique. Yojningai u uje pangaránone ore chuta ore nanique ome cabayúode iyode, jeoga erámoro quedéjnane iyode. Jé u to uje ore chãru degode aquirájna abío iji gaserani gai nanique enga ore chaguñéra dabáyode ome udore uhúode. Enga adi jé u uté nanique uje ore inoñaringuéone bijna ome ore, mu jé gusu iji ore gañámi. 14 Ujetiga cuchisode iyoi chinoningase ore adode nanique iji ore gañámi, jétapure Crísto iyoi ome yoque. Chamáñaje Dupade Ujopie Espíritu Sánto eyúgojma jogonóri u Crísto nanique uje tẽra re ome Dupade ome yoquisijnaringuéone. Enga que iyoguérique cusipise go nanique uje tẽra re ome yoque. Jecute ujñapeque uté iyoi ujetiga chĩropise yoquisijnaringuéone jnese, uje pisijnaringuéone udore jnorase yocúdi aja pitoringai nanique. Jecute e íjnoque paguté joradie iji yoque ome yoquisijnaringuérique, enga e que yagutúgo yógome Dupade uecai iroquéode ujetiga yicoi. 15 Jecute yimóngo uje Jesucrísto u uje pésu Dupade áyipie ichadie uringanie ujñapetei. Toi gu nanique ujetiga cho yoquisijnaringuéone oré ome dayoi. Yojningane u yoque uje yiyógo Dupade áyipie bajedie gáyode gatuaque nanique. Mu Crísto uté e ipesute ujetiga Dupade ibidigode uyoque yocajneque Dupade ojningane cucha jnese, uje cuchade udore que eruénique erãpe cuse iji deréjnane. 16 - 17 A yacãra yacajnaquéode jne aja jnanírique uje chingo dagúcha omone ome dabode ujetiga ore gajneque jne. Enga doi enga churúsãre dáyipiedie udire. Mu uje qué uté eca enga áyipiedie cáma tocade gotique ome ore. Mu quigade uje e toi enga quene udore ore pijógome jnani tuté ingoméone cucha ome ore. 18 Enga adi jé u ome Dupade áyipie bajedie to. Quene chise daringanie ujñapetei uje chuque cuchisórigo nanique. 19 Ajnusináño Moises ate bajade ome darásade. Uje uté chingo Dupade áyipie bajedie ome darásade jnese bajaque. Quigade enga doi cabáyudie abode, erámoro quedéjnane ore enga chujé ore. Chisa ore iyode enga chaníraja yodi. Quigade enga doi áyasa ojo caratade enga pésu pamatadé iji. Chacáji yodi uje diquiyode chimera enga doi gojni enga chuta darujna aone gai uje Dupade iroquéode déji. Chutapo damatadé caraté aja darásade ójodie jnese rĩ. 20 Enga jé u uje Moises chojningame ore: “Diquiyojna unaque imoi tu uje e ujñapetei Dupade áyipiedie. Yojninganie u Dupade áyipiedie udire uje Dupade e chiroque uágaja ujetiga beyoi udire quigode jnese.” 21 Moises chutapo cuchisode iyojna aja Ajé Puyai, Ajé Puyai ajeminórone cucha jnese to nanique rĩ. 22 Dupade áyipiedie quigode u ujetiga puta piyojna aja cuchade ujetiga chinoningase cuchade uringane noñácho. Enga querénga cuchárique déji ujetiga ca Dupade pota ujetiga puta ome piyojna nanique. Jecute yirajágo ome udore uje a ca pojneque piyórique, enga que puruque pisijnaringuéringo to iji deréjnane unojo to. 23 Jecute yirajágo uje quene ujñapeque cuchade iji Dupade iguíjnai jnumi jogonore uje ore chuta udore ome dẽrapáidode cuchiso iyojna nanique. Mu cachi cucha gajnúo cuchade udore jnese iji jnumi jogonore Dupade iguíjna. Mu cucha ũrepísode u cuchade udore uje ore déji Dupade iguíjnai gaté jogonore. Jecute queyieguipisirase diquiyojna te jne ujetiga chinoningase cuchade udore iji gaté. 24 Dupade iguíjna jnutiminóri uné imoi u Dupade iguíjnapísi iji gaté. Mu Jesucrísto que pi u Dupade iguíjna jnutiminóri gotique, mu pi u gateminóri. Enga jé déji uté enga narare yoquibai iji Dupade iquei iji gaté. 25 Yirajágo uje pangarádejna cuchábi judío uje catecã́ri Dupade ome darásade iji sequeredie jnese que chijna dayopísirique gotique uje chacája Ajé Puyaguipísi. Mu oidi cuchisode iyo. Mu Crísto tẽra re enga chojmára ome Dupade, enga jé gusu iji deréjnane jnese. 26 Ujetiga Crísto gajnei urásu ujetiga tẽra re gatuaque jé iji taningane uje Dupade pésu erámi, jé aja deréjnane unojo, enga a e uásejnapisirase. Mu que quigode u udore go. Mu Crísto quene chingo raja erámi iji erámi tuné eruei yúode. Enga jé u uje tẽra re ome yoque ujetiga cho yoquisijnaringuéone oré. Enga chojmára uje tẽra re nanique, enga e gusu. 27 Adi jé u uje yitogoi enga chojmára to. Enga quigade u uje pajirique yocadode aja quigode enga pipesute yoquiquigode rĩ. 28 Isocai jé u Crísto. Uje toi enga chojmára enga chisi ome re ujetiga pĩroque yoquisijnaringuéone. Quigade enga a diapo jne rĩ. Enga diringane gare uje chise erámi. Bajai u nanique ujetiga chĩro pisijnaringuéone. Mu diringai ejoi u ujetiga chiqueta uyoque jnese jne uje yiroco yui.
1 Uje yimóngo ayorérique oréraque enga yirajágo uje idógosi oresṍri iji. Enga jé isocai u to ome Moises urusarane Dupade áyipie bajedie. Cachi pocoré u purusarane udore. Jé basa oresṍri u Dupade áyipie ejodie uje di iji udore quigade. Enga yirajágo uje áyipie ejodie iringuíone u cucha omone. Yirajágo to uje yocuringane ujñapetaque ome Dupade que garani u cuchiso pẽrapáitique uje yicoi Moises iroquéode quigode. Jecute yocangaránone ore chajnera dẽrapáidode cuchiso udore údi iji sequeredie jnese, socaseti yico yocuringane ujñapetágome Dupade. 2 Mu ujetiga ore chisírase daringáringo ujñapetácho ome dagaidode pacajnaqué bajade udore, enga a ore charásu ore chujé cuchisode gatuaque. Chamáñaje ujetiga ujñapetaguirase ore enga a e íjnonguirase ore aguté joradie ome ore ipesutígo cucha gajnarétigo. 3 Mu ore aguté joradie que íjnoque go ome ore ipesudode cucha nanique, jecute que chimoque nanique uje ore chujé cuchisode iji sequeredie jnese. Enga jĩraque ore jnusina dasijnaringuéone iji dẽrapáidode cuchiso gáyode. 4 Uje cabáyuode iyode, erámoro quedéjnane iyode que udore chijnime ore isijnaringuéone ãrírique nanique gu. 5 Jecute uje Crísto díji erámone nanique enga catecã́ri Dupade, enga chojninga: Que apota cuchisode iyórique go. Bedugádi uyu gu. Jecute basi ome yibai ayoré ome yu ujetiga yitoi ome pisijnaringuéone jnese. 6 Yiraja uje que ese ore gueranone cuchiso unétique gotique uje ore chujé gatuaque enga ore chãru iji gaseranone gáyode ome ore isijnaringuéone. 7 Jecute yojningame ua nanique: “Dupade a, yugúsi ne ujetiga yiji bojningane cucha jne. Adi jé upúsu ore urusarane quigode uje purusãracho iji baruode.” 8 Cucha bajai uje yimóngo iji Crísto uruode udore u uje Dupade que pota ore gueranone cucha, jeoga cuchiso pẽrapáitique u, jeoga ore iboritígo cuchiso u. Moises urusarane jé quigode u udore nanique marínga, Dupade que chise ore gueranone udore unétique gotique. 9 Quigade enga Crísto chojninga: “Dupade a, yibágui gu ujetiga yipésu báyipiedie aja quigode.” Unojo quigode u uje Dupade e tṍra pisoca bajade uje chuque cuchisode ome jnanione isijnaringuéone, enga e chicha Crísto aja udore jogadode ujetiga tẽra re enga toi ome pisijnaringuéone jnese. 10 Enga Dupade e chinoningase yoque gu Crísto ipesudode udore ome yoque. Uje uté pésu Dupade áyipiedie jnese gu enga tẽra re ome yoquisijnaringuéone. Enga Dupade que qué chucuepoi pẽrate uñeque rĩ ome pisijnaringuéone iji deréjnane jnese. 11 Mu pangaránone judío uje ore catecã́ri Dupade ome darásade que ore chimoque uje ore tẽrája Dupade ome cuchisode iji dirode jnese. Mu que ore gueranone cucha udore chinoningase pisijnaringuérique go nanique. Mu jé ore jno dasocade udore údi iji deréjnane unojo to. 12 Mu Jesucrísto que cho ore go. Uje uté tẽra re ome yoquisijnaringuéone enga chojmára nanique. Enga que tẽrapo raja gotique rĩ iji deréjnane. Enga e déji Dupade gari iji guéode uéchai iji ne gajneri enga cháji Dupade ãrachua. 13 Enga jé charite Dupade dosadi iji guéode uéchai, jé aja ujetiga Dupade sué umajosórone ore gáyode jnese iji erámone unojo. 14 Chojmára uje tẽra re ome yoque, mu itoringai chojmarai uté u uje chinoningase yoque enga yico yocuringane ujñapetaque to. Enga yocuringane ujñapetácho a ca bijna ome yoque jne iji deréjnane jnese. 15 Dupade Ujopie Espíritu Sánto chingopísa udore ome yoque uje jé ũrepíso. Enga chósi te: 16 Yocangarádejnai Dupade chojni nga: Yáyipie ichárigui a cuse jne ome ore ape disi ejórigo. A yicha yáyipiedie aja ore áyipiedie jne enga a ca jnoji ore ajéode jne. Gajnui u jne ujetiga purusãrai yáyipiedie iji ore áyipiedie ajéode. 17 Quigade enga chojningápo rĩ: Jé u jne uje a ca yujnusinápo ore isijnaringuéone, ore ate gajnaré ngone jne rĩ iji deréjnane. 18 Jecute uje e pĩroque pisijnaringuéone jnese, enga e que páyipieraque dépoji cuchiso pẽratique rĩ ome pisijnaringuéone iji deréjnane jnese. 19 Jecuté, yijorane uaque a, uje uacanguretáyo Jesucrísto, e que yicájnacopo yógome Dupade yui rĩ ujetiga yacágoja gari iji Ajé Puyaguipísi tuté. Uje Jesucrísto e toi gu ome yoquisijnaringuéone. Enga e chojne ome dayoi ujetiga puruque yógome. 20 Enga cho ujetiga Jesucrísto jé u borapeque cuchábi iji Dupade iguíjnai Ajé Puyaguipísi yui. Enga cho jeta borapeque cuchábi uté e doi enga chuchẽre dabai ome yoque ujetiga yico pucuecaringué ichai iji jogadi tuté ajei. 21 Jesus uté u yocangarate cuchábi ujetiga catecã́ri Dupade ome yoque. Enga uté gajneque cuchade jnese iji Dupade iguíjnai. 22 Jecute e yocajnei tu ujetiga yijóco Dupade yui, enga yirajagopo yógome Dupade yui rĩ. Chamáñaje ũrepise yógome yocanguretigai gu. Yirajágo gu uje uté chinoningase yoquisijnaringuéone iji yocáyipiedie, enga e que máraque yoque gotique. Isocai upo rĩ uje puruque yoquibai inoñaringuéone to ome yote yocárerique. 23 Yicoi enga yujnucoi yógome Dupade adode enga yanguretágo Dupade ome ojningane cucha yúode gatuaque. Uje Dupade a ca chó dangoméone cucha uñeque gai jne ujetiga chisi ome yoque. 24 Yocajnei tupo rĩ ujetiga yucuegoi yoquisocade ome yocujode Dupade anguresóño ore to, ujetiga pijnoraquéode déji ore ome ñane enga ore pésu cucha arégode to. 25 Ca yoco yocujode Dupade anguresõre uñane uje que ore dopoi Dupade uruode to rĩ. Mu yicoi enga ca Dupade uruode unerotiguérique cuse ome yoque. Yinejecoi ñane ome Dupade uruode gatuaque to. Cuchiyípise dirode unojo. Yirajágo gu uje Yocangarádejnai diringai e idógosipise. 26 Ujetiga yirajágo Dupade uru uréone, mu yico enga yajnerángo yocate gajnaréngone udore údi enga a ca yibóco pẽrapáitique uñeque jne ujetiga yẽcója Dupade ome yoquisijnaringuéone uringane pĩrocho. 27 Amiri e u pisadodéringadatéi ome uyoque ome yocajnei Dupade ujuyaqueque cuchape yui. Uje pióquedaté Dupade ujuyaquei tuté ujetiga chejna Dupade guetesórone ore jnese. 28 Ujetiga uñeque ca doi Moises iroquéode uñeque enga uté imósoningo ayoré gadiótigo, jeoga gárerigo ore doi enga ore chatata adode. Enga jogadi jé u uje que ore chagutu uté gosi uje ore chujé. 29 Jecute a doi dateringane jne ome Dupade ujuyaquédatéi ome ore uje ore chiraja Dupade áyipie ichadie quigode marínga, que ore doi go. Gajnui u gu ujetiga uté gosi chuchiéjna Dupade Abi Jesucrísto iji jnumi, enga chujñieta iyoi gaté rĩ. Gajnui jé upo rĩ ujetiga chujñietapo Dupade Ujopie Espíritu Sánto rĩ uje chijnóra yoque. Uje ore ujñieni Jesucrísto iyoi uté ipesute Dupade áyipie ichadie uringai ujñapeté ome yoque nanique. Upo rĩ uje chinoningase ore isijnaringuéone jnese uje ore changureta uté. ¿Ja ca tiógararása ya ujetiga pujuyápise ore ome Dupade a? 30 Yirajágo uje Yocangarádejnai chojninga iji daruode: “Yajneque jeta yo yujuñame ore. A jnutaque yu jne.” Enga Dupade uruode chojningápo rĩ: “Yocangarádejnai a jé u jne ujetiga chajire darásade adode aja quigode jnese jne.” 31 Cucha iyiejnapise Dupa uecai ujuyaquei te jne ujetiga yocuñeque gajneque to. 32 Mu uaque enga ajnusináño uacajnéone cucha dacacho uje tocade ome uaque nanique. Uacoyo uacaba uacanguretigade nanique uje quene Dupade chijñate uacabáyode ome daru uréone. Mu que arayíñome ore josipiedie nanique go uje uacanguretáyo Dupade iji taningai nanique. 33 Ore chujñieta uacuñane nanique enga ore chujé uáguiji uacarásade ore enominone nanique. Uacuñane que gajneque ore ujñiequéode to, mu que boyo iji ore yugode uacojo Dupade anguresõre ore gari nanique rĩ. 34 Mu uje ore suru uacojode Dupade anguresóño ore gáyode nanique enga uacabáchoi ore gatuaque nanique. Ore chijnapo uacagúchade iji uacari nanique rĩ, mu que cucha ome uaque nanique. Uacarajáyo gu uje uacajnéone cucha iji guéode uéchai sué uacagúchade udore gáyode iji jnumone unojo. Uacarajáyo to uje uacajnéone cucha iji guéode a ca íjnongapo jne rĩ iji uacari iji deréjnane. 35 Anguretáyopise Dupade enga ca oyo uacanguretigade uja. Uje uacanguretigai iji Dupade a di uacagutiyamátique cucha ueradéjna údi iji uaque ujetiga Dupade tẽrája uaque. 36 Ujetiga uacajéode u ujetiga apéso Dupade áyipiedie ome uaque enga cucha amiri tu ujetiga adotáyo uágome cucha dacadode jnese. Enga jé u jne ujetiga Dupade ingoméone cucha jnese chise uaque. 37 Uje ore urusarane Dupade urúo déji uje chojninga: E idógosi. E idogosipise ujetiga yoquirodi diapo rĩ. Enga e que sase. 38 Yimeserane u ore uje ore chise daringane ujñapetácho ome da nguretigade. Enga yajéode u ome ore ujetiga jé ore chajnéra danguretigade údi ome yu uje qué ore eca. Mu a ca yise ore unétique jne jetiga ore chajniapója date bajade rĩ. 39 Mu yiraja uje uyoque enga a ca yajningopója yocate bajade jne rĩ. Enga a ca yocajneque Dupade ujuyaquédatéi te jne ujetiga chejna yoque. Mu yocanguretigai jogadipise Dupade enga a piquetaque yoque jne.
1 Obiréjna uje panguretigai déji gosi ujetiga ca potigayaquérique déji uté gosi ome irodigode cucha yúode. U to uje que chotigase cucha pibójmane uringane ũrepíso. 2 Enga yocayode jnani bajácho ore chise daringane Dupade imeseraque to nanique gu danguretigai. 3 Uje yanguretágo Dupade enga jé u uje yirajágo uje angúroméone u daruode nanique ome dapesudode cucha jnese iji erámi, gaté ore. Enga yirajágo to uje yoquimone cucha jnese que pipesute iji cucha pimone uñane, mu ore garani u Dupade uru pibójmane jnese nanique. 4 Yirajágo uje jnacare bajai Abel chujé cuchiso nanique enga terame Dupade. Enga Abel guerani sué dãjorai Caín gueranone gai to nanique. Jecute Dupade chimesere Abel gueranone nanique enga cho ayoré paraguipísiji. Abel uté toi nanique mu cho ujetiga qué eca enga catecã́ri yoque ome panguretigai quigode. 5 Jnani bajai Enoc changuretapise Dupade to nanique. Jecute que chimo pitoringai to nanique ome re. Mu Dupade jno údi aja gaté iji uringai ueca nanique. Urásade ore chucué jorógui nanique, mu que ore chise. Enga Dupade uruode chatata uje Dupade irasique re ome Enoc adode nanique uje cáma jnome gaté. 6 Que toc ujetiga Dupade irasique uñeque atique ujetiga jé ca panguretigai déji uñeque. Jecute ujetiga gosi pota ujetiga chise Dupade enga uté gosi doi enga ca chotigase Dupade uringai Dupa jne. Enga changuretapise Dupade to ome uringai posõrangore uje jecucha chisi ome cucha arégode ome dacuesórone ore jnese. 7 Noé changureta Dupade to nanique uje Dupade chatata cucha dacadode yúode uje cáma pimo cuchade udore quigode to ome ayorérique nanique. Doi Dupade uruode enga pésu cucórique. Enga cucoi uté u uje chiqueta Noé jogasui ore uje gue dequejnangóri di iji ore nanique. Uje Noé changureta Dupade nanique enga jogadi u uté uje erámi unirisórone uñane jnese ore uringáringo angoninguite parique pijógome Dupade enga Dupade cho dajuñame ore. Jé basa Dupade cho ayoré ujñapetáguiji Noé gu anguretigai. 8 Jnani bajai Abraham jé adápo rĩ uje changuretapise Dupade to nanique. Jecute uje Dupade catecã́ri ujetiga jnoji daniri, enga jĩraque doi Dupade uruode nanique. Jnoji daniri mu que chimo daquitique erãpe nanique. Mu chiraja uje Dupade a choreji erãtique ujetiga cho daniri iji. 9 Abraham anguretigai u to nanique uje chise Dupade ojningai punire uté uje chi gueranome jne. Mu purása quedéjna Abraham iji puniri uté jogosórone ore ujade nanique. Jecute Abraham chapúsaja daguíjnane nanique enga iguíjnane bora nañorei iji ore ujade nanique. Enga Isaac, Jacob ore gajnéone Dupade urúo jé chopise Abraham gajnéone nanique to. Jecute jé ore adi u Abraham adode to nanique uje purása quedéjna ore iji puniri tuté to nanique. 10 Mu Abraham changureta idaidatei uñeque yui uje chi jogadipise guidai tuté ero. Chamáñaje Dupade u uje pésu dáyipiedie ome guidai tuté quigode, enga u to uje chimate cuchade aja gaté iji. 11 Gatapise Sára to nanique jecute aberé. Mu Sára anguretigai u to nanique uje chiqueta enga jeque uaté iji daringa gata nanique. Abi cuse to nanique uje changureta Dupade ojningane cucha yúode gu. 12 Abraham choquíjnape to nanique, enga déji deruei yui uje quene abi cuse. Quigade enga ape disi ejode jiépisi, enga que pisecãrate ore, uje ore gajnúone u guédodie gu iji gaté, ujnanie ore rĩ iji yote quedéjnai pijnanane. 13 Jnani bajade unojo ore toi bajaque nanique uje cáma Dupade ingoméone cucha tocade nanique ome ore. Mu cho ujetiga ore chimo cuchade udore iji quedéjnarique nanique. Chamáñaje ore changuretapise Dupade gu. Enga que ore ininaquei chajire re nanique ome Dupade ingoméone udore cucha ome ore. Jecute ore chojninga nanique: “Cachi urugu yóguiji erámone unojo. Yoquidáipisi déji guéode uéchai gu.” 14 Obiréjna ome ore uruode unojo uje ore ucuei tu punire uñai nanique ujetiga ore cho danirípisi iji uté. 15 Que ore uru quigode u ujetiga qué ore gajneque darani dedai bajaque. Uje ore uruode quigode urásu, enga a ore chajniaporásaja daniri uté rĩ. 16 Mu ore ucuei u punire ueradipísi uje Dupade idai u uté iji gatajnoquei. Jecute que Dupade ajéngome gotique uje ore cho dadupade iji. Enga Dupade e chimate guidaidatei tuté ome ore. 17 Yimóngo Abraham anguretigai to ome adode ome abi. Chamáñaje Dupade chetingare anguretigai nanique enga jĩraque Abraham doi dabi Isaac ujetiga tẽrája Dupade enga gajnui u cuchiso pẽrapáitique. Chiraja mu uje ape disi ejórigo a ore garãpi urásu Isaac ome Dupade uruode, mu que doi enga chãraque dape ugurui tuté to gotique nanique. 18 Uje Dupade uruode chósi te ome Abraham nanique: “Bape disi ejórigo ore garãpi u Isaac jne.” 19 Dimane Abraham ujetiga chujé dabi. Chiraja gu uje Dupade ujopie cuse ujetiga chiringare togode ore. Jecute Abraham que chujépise dabi nanique, mu gajnui u ujetiga e chujé, enga Dupade chiringare iji itoringai enga chatĩre Abraham gai nanique. 20 Isaac chacacãre dabode Jacob, Esaú ore nanique ome cucha pagutíyamánone uje changureta Dupade ujetiga uruode tocade ome ore. 21 Jnani bajai Jacob changureta Dupade to. Jecute uje choquíjna enga chiraja deruei yui, doi dajnacari José abode enga chacacãre ore jnese ome cucha pagutíyamánone. Quigade enga catecã́ri Dupade enga chugutána dogué. 22 José changureta Dupade ujetiga chijnime Israel gosode iji Egípto gosode ore gari. Jecute uje e chiraja deruei yui enga chojningame ore: “Yocurásade Israel gose a ore jnoji Egípto uné jne. Jecute boyo jne enga ajnócho yajnoquéode jne aja uacajesúrique.” 23 Moises dayode ore changureta Dupade to. Jecute que ore todo dejórique nanique uje ore chacósosi dababi Moises nanique uje ueradape. Enga guedosíode gadioque iji ore agoyapídi nanique. Ore chiraja eduguéjna cuchábi ijmongaquéode mu ome ore ape diyoquíode ujetiga ore chujé ore. 24 Jé basa Moises changureta Dupade to. Jecute e jnacare enga que cho daté iji dapesuto Egípto gosi eduguéjna uro. 25 Moises chiraja uje urásade ore chejnáreque re ome eduguéjna cuchábi josipiedie nanique, mu jé ajegáite ujetiga cháta raja ore. Chiraja uje Dupade urása ore gu. Jé basa que ajegáite pipotigué ayoréode ome cucha gajnaréngone iji Egípto gosode ore gari. Uje chiese pininaquei garani u cuchade udore ome ore. Chiraja gu uje cuchade udore unéningai eruei tu ujetiga gosi toi. 26 Moises a jé gajnenguirase cuchade jnese iji eduguéjnai iguíjnai nanique mu noñome cuchade udore jnese. Chimo uje cucha orerãi u ujetiga gosi cho daba Crísto iroquéode gu. Jecute Moises doi Crísto iroquéode to. Enga áyipie jogadipise Dupade gueranone cucha yui ujetiga diga Dupade cho oré ome adode. 27 Jecute Moises chajo raja danguretigai ome Dupade enga jnoji Egípto. Enga que todo eduguéjna cuchábi ijmongaquéode ome raque. Mu jnoja daquei. Enga cho ujetiga chimópise Dupa pibojma iji daquei. 28 Moises changuretapise Dupade enga doi uruode to nanique ome páscua . Enga chiroque darásade Israel gose ujetiga ore changuñéra áyasadie iyode aja daguíjnane piagode gáyode jnese nanique. Gaidi u gu ujetiga Dupade iroi pitoringai oisõre chimo iyoi uté jne, enga chó ore gáyode enga ca chujé ore ape bajade to. 29 Moises urásade Israel gose ore changureta Dupade to. Jecute ore chiramísara tie nanique uje i tu Tie Caraté. Enga Dupade chajuque tie. Jecute Israel gosode ore chuchiéjna jnupe cajnori jé aja tie uéchai. Jé basa ga Egípto gosode chayóna Israel gosode enga ore chicáji ore qui to iji tie. Mu Dupade chátapo yodi taja ñane to rĩ enga Egípto gosode ore toji tie jnese. 30 Israel gosode ore changureta Dupade to nanique enga ore doi uruode quigode nanique. Uje chojningame ore: “Apacho idaidaté Jerico gai jne iji dire garitírigo.” Uje ore doi Dupade uruode quigode unojo enga jé u uje ujuyaquéode iji Jerico gai cṍra. 31 Jerico idaito déji nanique uje agupierẽ́. Mu uaté u uje chañurúpusu Israel gosode ore irógode guidáyo ore guio nanique. Jecute uaté chapite uje urásade ore toi jnese nanique. Uje udore ore toi gu dangoninguite paritigade nanique. 32 Uñane qué déji uje ore changuretapise Dupade to nanique. Mu yipota yiji yurusarane údi ome cucha uñéngo. Jecute que yurúsãre jnani bajai Gedeon adode ome uaque. Jé cho Barac adode, Sanson adode, Jefté adode rĩ. Jé upo David, Samuel ore adode rĩ. Jé upo Dupade uruode atatasórone uñane adode to rĩ. 33 Udore ore jnese ore changureta Dupade. Jecute udore uñane ore sué damajosórone gáyode enga ore gajneque ore unirone. Udore uñane eduguéjna ayipierãque ore nanique ome darásade. Enga jecucha Dupade doi daruode ome ore enga chatapísaja ore. Enga suru caratedie pijnanone ome ore ujetiga ca ore tagu ore. 34 Enga chajni pióquedatéode ome ore. Chátaja uñane enga que chuque ore ome ore ijmongarásorone iqueséode. Uñane que ujñapeque, mu Dupade pésu ore ujñapetáringane. Quigade enga ore tiógarapísa pocaningane enga ore suépo damajosõre dipeséode gáyode rĩ. 35 Chequedíe uñanie cuse nanique uje ore changuretapise Dupade to. Jecute Dupade chiquetápo ore iguiose togode nanique rĩ ome ore. Mu Dupade anguresórone uñane ore cho daba danguretigai nanique. Uje ore chojningame ore nanique: “Ayáyo uacanguretigade iji Dupade enga ca yujégo uaque jne.” Mu que ore dosóñime ore nanique. Jecute ore chujé ore. Mu a ore chise pucuecaringué icha areguipísirique jne iji Dupade gari ujetiga Dupade chatĩrépo ore ucuecaringuéone ore gáyode rĩ. 36 Dupade anguresõre uñane ore chopo daba danguretigade to nanique rĩ uje ore chujñieta ore enga ore chaquesu ore údode ome paójnane. Ore suruápo uñane gáyode rĩ enga ore chigaru ore ome enué ojnane. 37 Ore chujépo uñane rĩ enga ore chimitãre ore ome cucaranenie. Ore chajuque uñane iji ore gatócorodie ome arámuchequedíe nanique. Uñane urásade chetingare ore anguretigade ome dajosipiedie iji dirode jnese. Jeque ore chujépise uñane ome queséode. Uásejna Dupade anguresórone ore uje ore chinguíra datóidie aja quedéjnane uje jmataque ore. Enga ore pésu daguidedie iji cuchisode aode. Enga ducañerájma ore ome ore urásade. 38 Jecute udore ore uje ore cho daba danguretigade ome Dupade ore tiógarapísa ujetiga ore déji guéode enga ca ore déji erãpe iyiejnai tuné. Udore uñane ore chayome damajosórone nanique enga ore chacája erugode ajéode nanique ujetiga ca chuque ore. Uñane chacája cucarãte ujade iji dagajñunie. Uñane chicáji erãpe eyutiguéode enga ore cho daguíjnai iji jnupe peróringane. 39 Pequetingaraque udore ore anguretigade ome Dupade jnese. Mu ore anguretigade que doi jnumone. Jecute Dupade imeseraque ore. Mu cáma ore chimópise Dupade ingoméone cucha ome ore to. 40 Chamáñaje Dupade pésu dáyipie ujñapetedie gu ujetiga cháta disi ejode uyoque aja anguresõre bajade ore to. Enga quene ore chimo daringane ujñapetaguipíso ujetiga yugúcoji ñane gari jnese.
1 Gajnui urásu ujetiga Dupade anguresõre bajade ore chaparu yoquibai, uje jiei ore nanique enga pijoguipise ore ome danguretigai ome Dupade jnese. Enga cho ujetiga e ore chajire yoque to ome yocanguretigade iji Dupade. Jecute yicoi gajneri enga yiyágo cuchade gajneri uje chijocase yoque. Jé aja yoquisijnaringuéone uje chimere re iji yoque. Enga yoco bayade gajneri aja yoquiquei. Enga yajnerángo yocanguretigai údi ome Dupade. Enga ca yirayíngome yoquigajñua aja yoquiquei. 2 Enga ca yoquedóraque chiramurase Jesus aja quedéjnane. Yirajágo gu uje yocanguretigai garani u, enga uté u to uje pésu enga yocanguretigai quérã to. Jesus uté chejnáreque re iji curesei gai nanique. Yirajágo uje gosi toi iji curesérique gai enga pajegátigai u ome uté gosi. Mu que pajegátigárique chimo Jesus nanique uje toji curesei gai. Uje áyipie jogadipise pininaquei, jé aja pirasitigade ore nanique rĩ iji datoringárique quigade. Jecute e chácariji Dupade ãrachua iji gatajnoquei. 3 Uacáyipieraque ca jnoji Jesus uringai pumajódatéi nanique ome jnani sijnángone ore. Aracho uté enga ca oyo caru iji uacanguretigade ome Dupade. Enga ca arañíñopóme uacaringane ducañerájma rĩ. 4 Yiraja uje uacapéso pocaningai ome pisijnaringuéone uje pota sué uacabáyode, mu cáma eso pitoringai ome uaque iji uacajnéone pocaninga udore jmáinie. 5 Ca acadíchoi uacajnéone Dupade urúo uje cho uacaquique nanique uje uacajnúone u ujetiga abipise uaque. Uje purusãracho uruode udore enga chósi te: Yabode uaque, ca etácho uacanga rádejnai Dupade adode ome uaque uje chacate uaque. Enga ca oyo caru uje Dupade cho uacaquique. 6 Ujetiga jnanírique chimo datique ate gajnarétique enga jé u uje chaquesu dabi tuté údode. Enga Yocangarádejnai adi jé u to ome udore ore jnese uje cho dabi iji ore. Ujetiga chijnóra gosi, enga jé u to uje cho uté gosi quique. 7 Jecute ca arañíñome ujetiga Dupade chacate uaque, uje Dupade cho dabi iji uaque gu. ¿Ja disírique cusirase ujetiga danique jé ca chaquesu údode? 8 Mu ujetiga Dupade jé ca dorási dasocai ome uaque uje chacate dabode ore, enga a ca abipisirase uaque. Mu pape unejánguirase uaque. 9 Uacarajáyo to uje disío yoque nanique enga yocai ayoréode ore chacate yoque nanique. Enga angácoi ore nanique. Cayieguirase yocangoninguite guesáringárique ome yocai Dupade ujetiga yocuringane ujñapetácho pijóguiji yoque. 10 Yocai ayoréode ore chacate yógome cuchade nanique uje cachi ore áyipiedie quicho nanique. Enga garósi deréjnane nanique uje ore chacate yoque. Jé basa ga Dupade ucuei u yocuerátigarique ome yoque uje chacate yoque. Gaidi u gu ujetiga yoco uté enga yico yocuringane ueque ome pisijnaringuéone to. 11 Yirajágo uje Dupade angúroméone u petingaquéode ujetiga chacate yógome. Mu que uñeque irasique dajnetique petingaqué. Chamáñaje ũrosopis ome uté gosi gu. Mu ujetiga gosi e chimate raja petingaquéode uéchai enga jogadi u uje chise daringai ujñapetaque enga pajesereringai dépoji rĩ. 12 Ujetiga eyuque uágome Dupade adode enga adotáyo uágaja. 13 Enga acueyoi dajei tuté jne uje caputáji dajesui. Jogadi u uaté gu ujetiga uaquedogorodie ninguira enga ca oyo tatoque, tatoque aja uacajesúode. 14 Acueyoi pajesereringane ome uacojode ayoréo ore jnese. Enga eduyo Dupade iji uacáyipiedie. Ujetiga gosi ca chedu Dupade iji dáyipie enga jé ca chimópise Yocangarádejnai jne. 15 Dupade pota jetiga chátaja yoque. Jecute ajuso uaqueo ujetiga ca etácho Dupade uringai paraque ome uaque. Ajusópise uaqueo to ujetiga uaque gosi ca cho pore paca uje adie ingonguei. Chamáñaje que cuchárique tṍraji adie udire, mu gusu uje pésu uñane ore igajnarétigade to. aje que cuchárique tṍraji adie udire, mu gusu uje 16 Jé ca uacuñeque pota moji chequé quedéjnaraque gari. Enga ca oyo cucha bisidéguiji Dupade uru iyiejnane to. Chamáñaje Esaú isocai u uté to nanique uje cho cucha bisidéguiji dai ingoméone cucha nanique. Uje chi gajnécho jne gu uje dai ape bajai nanique. Enga doi enga chutai dangarómi ome cucha pibosode enga chojninga: “A bajnécho yocai gajnéone cucha jnese jne ujetiga asi ome yu baraquegode udore.” 17 Unojo quigade enga Esaú pota chijnárasa dai acãraquéode nanique, mu dai chetaque. Enga uté po nanique. Enga popise nanique. Mu e que pisocárique cuse nanique ujetiga qué gajneque dai acãraquéode. Uje pimanique cuchárique enga e que toque ujetiga qué pecãraque. 18 Israel gosode ore sose cucarãte iyiejnai yui nanique uje puyaque ujetiga gosi chijocase. Ore chimo pioi iji nanique. Mu que gusu pioi go, mu ijnangunua dépoji to nanique rĩ, jé aja acherangórone iji ejode. Mu uaque gajneri, que acunguésoñoi cucarãte puyai tuté to. 19 Cáma aduchopo ore ududigode cucha to rĩ. Uje ore chudute pubuchugode jocarane nanique. Ore chudúdapo Dupade uruode nanique rĩ uje catecã́ri ore. Mu pisadodéringai chise ore nanique uje ore chudute Dupade uruode. Enga ore chingome Dupade ujetiga ca catecãrápoi ore rĩ. 20 Uje Dupade catecã́ri ore nanique enga chojningame ore nanique: “Uñeque cheru cucarani tuné enga ajéyo gosi to jne. Anguíraño cucaranéringui aja jne. Jeoga achachome asṍreraque jne. Cuchiso jé u marínga, jé ajéyo to jne.” Mu ore ujñapié ajámiji Dupade uruode unojo jmáinie nanique. 21 Iquiyiringuétaguipíse ore imone cucha udore nanique to. Jecute que narayime Moises uje chojninga nanique: “Yitãrara ome yisadodéringai.” 22 Jé basa ga uaque enga uacajóso cucarãte Sion yui, jé aja Dupade uecai idaidatei yui rĩ. Uje Dupade idaidatei tuté i u Jerusalen gateminóri. Enga uacoyo uacarásade iji Dupade iroque dipeséode iji gaté. 23 Enga a amátayo uágaja ñane iji uté jne ujetiga acotáyo Dupade jne. Enga a átayo uágaja Dupade abode uñane to ujetiga diga ore chamáta ñane uje udore ore íode purusãracho iji gatajnoquei to. Enga e uacajóso Dupade yui uje Dupade uté u uje chajire yocadode aja quigode jnese. Enga uacajóso jnani parágode ore oré gatedie yui to, uje Dupade ipesute ore uringane ujñapetácho nanique. 24 Enga uacajóso Jesus yui to uje uté ipesute Dupade áyipie ejodie uringanie ujñapetei nanique uje chojne ome dayoi. Enga Jesus iyoi suépise jnani bajai Abel iyoi gai. Chamáñaje cho ujetiga Jesus iyoi catecã́ri yoque enga cho yoquiquique ome pisijnaringuéone uringane purucho. 25 Jecute ajuso uaqueo ujetiga Dupade catecã́ri uaque. Enga ca ajusécho uruode ujetiga angáchoi. Uacamóño gu uje yocai jnani bajade que ore chapite nanique uje ore chetaque Dupade uruode quigode uje ore ujoi erámi unirisõre chacate ore ome. Cayieguirase uyoque ujetiga yetájo Dupade uruode ome yoque uje gaté unirisṍri Crísto di údi iji yoque. 26 Yirajágo uje jnumi tuné tãrara nanique ome Dupade uruode uje catecã́ri jnani bajade nanique. Mu Dupade e chojningápo rĩ: “A yipésu enga jnumi tãrarapo jne rĩ, mu eruei e u ujetiga yijocase cuchade jne. Mu a ca gusu jnumi jne, mu guéode u jne ujetiga tãrara to.” 27 Uje Dupade chojninga: “Eruei e u jne ujetiga yijocásapo cuchade rĩ,” enga udore qui tu uje Dupade a tṍra dapesudode cucha aja quedéjnane jne, enga gusu eyúgojmane u jne ujetiga jé ore jogate dajogadode. 28 Enga que toc ujetiga pijocayaque yocuringane Dupade urása. Jecute yicoi enga yacãco Dupade gai ome cuchade udore jnese. Enga yijnórango Dupade gaté. Chamáñaje Dupade irasique re uje yicoi adode enga yangacopísi uruode quigode. 29 Uje Yoquidupade gajnui tu pioque ditaguei uje tagu cuchade enga chejna cuchade udore jnese.
1 Ca ayáyo ajnóraño ñane enga oyo ujetiga jé uacãjorápise ñane. 2 Jé ca etácho ayoré dírique iji uacaguíjnai, enga jé ca ajusécho ore. Uje jnacare bajade que ore suseque ayoré díode nanique uje ore jos eti ayoré ore to nanique, mu Dupade irógode gaté unirisóño u ore nanique. 3 Osṍcho uacojode ayoréo ore ujetiga ore suru ore gáyode. Enga uacacaniratiguéode udore gajnui urásu ujetiga apatíoraño ore. Osõchopo ore ujuyade rĩ uje ore chaquesu ore údode. Uacarajáyo pujuyaquéode uringane ũroso gu uje ore aode jé u uacaode to. 4 Uome ujetiga asayo uacacotérigui jnese enga gusu uacacotérigui ore ome uaque. Jé chopo chequedíe to rĩ ujetiga gusu ore abayode ome ore. Uje Dupade a cho dajuñame udore ore jnese jne uje ore chachia ráguiji gapu quedéjnanie ore jeoga jnacare quedéjnarique. Enga Dupade ujuyaquéode gajnengórone a upo acoterachugode ore to jne rĩ, ujetiga ore chachia ráguiji uñane acotedie. Jeoga amanachuguedie ore chachia ráguiji uñane abayode to. 5 Ajuso uaqueo ujetiga ca ajnóraño plátadie. Mu anínaño uágome uacarijogonórone cucha. Uje Dupade jé urúo uje chojninga: “A yugúsi bari jne iji deréjnane jnese. Enga a ca yijíñapóme ua iji te jmete jne rĩ.” 6 Uje e yirajágo Dupade uruode unojo enga yirajágo yógome Dupade. Jecute yojnico: Yocangarádejnai u uje chátaja yu. Jecute que yitodo ayorérique atígo ome yu. 7 Ajnusináño uacangaránone ore adode ome uaque. Uje udore ore u uje ore chatata Dupade uruode quigode ome uaque nanique. Ajnusináño ore adode, ore anguretigade to, enga acã́cho uágaja uacangaránone udore to. 8 Jesucrísto que chécãre datique gotique iji deréjnane enga isoca bajade jé cho isoca ejode iji deréjnane unojo, enga a jé chopo dirome to rĩ. 9 Jecute ca beyoi enga ca angáchoi pacajnaquérique ujetiga quedéjna quitígo. Uje uñane pésu cucha pibosode quigode uje chi uerate cucha pibosode uñane ujetiga yajo. Jeque chi gajnaréngome uñane. Mu que cuchárique tṍraji ore gaidode udore pacajnaquéo. Jé basa ga yocucuei urásu payuquetotiguei uje garani u Dupade ijnoraquei. 10 Yirajágo uje Dupade icatecãraisórone jnani bajácho ore tagu darásade gueranone cucha nanique ome Dupade. Mu Jesus anguresórone ore uyoque yoco yoquerani iji Jesus ome Dupade. Jecute que toque jeta Dupade icatecãraisónique tagu yoquerani. 11 Yirajágo uje isocade u unojo ome judíode ore nanique: uje gusu sacerdóteode angarádejnai u ujetiga chijna cuchisode iyojna aja Dupade iguíjnai Ajé Puyaguipísi ujetiga catecã́ri Dupade ome darásade ujetiga Dupade chĩro ore isijnaringuéone. Jé basa ga ore chãru degode cuchiso iji ore idai guesi nanique. 12 Jecute uje Jesus toi nanique enga toji ore idaidatei guesi nanique. Gaidi u gu ujetiga chinoningase danguresórone isijnaringuéone ome dayoi ujetiga ore chise daringane icha iji quigade. 13 Jecute yicoi enga yátago yógaja Jesus iji cachodi iji guidaidatei guesi. Yirajágo mu uje pajegátiga ujetiga ducarãte gosi aja guesi iji ore idaidatérique. Mu yico enga yátago yógaja Jesus ome gajnéone pujuyaqué. 14 Yirajágo gu uje Dupade anguresórone uyoque que yocajneque guidaidatérique iji erámone unojo ujetiga yiyágoji deréjnane. Mu yocucuei tu guidaidatei ichárique yui uje a yocajneque jne iji dirode uñeque. 15 Jecute omi tu ujetiga yicotágo Dupade gatuaque enga Jesucrísto jno yoquicotaquéode udore údi aja gaté. Chamáñaje Ayocajnei tu gu ujetiga yẽcója Dupade ome yoquicotaquéode unojo. Jecute yico gojni enga yisígo Dupade gai ome yoquibijnanone. 16 Enga ca yicadíjoi yoquicaniratiguéode to ome ñane. Ujetiga yosṍco ñane ome yocarijogonórone cucha. Uje Dupade cho yoqueraníji cuchade unojo ome re, enga irasique yoque. 17 Angachopísi uacangaránone ome Dupade adode enga beyopísi ore uruode quigode. Udore u gu uje ore susipise uaqueo. Chamáñaje ore chiraja gu uje Dupade a catecã́ri ore ome ore ipesudode cucha iji uacajade. Ujetiga angáchoi ore enga a ore irasique raque iji dasagode gai, enga a ca ore isagode chibéro ore údode jne. Mu ujetiga ore isagode chibéro ore údode gu uacangoninguite paritigade, enga a ca toque jne ujetiga agutíñañome ore. 18 Acatecãchoi Dupade ome yoque. Uje yirajagópise uje que puguté joráraque déji yoque. Uje yoquigaidi tu gu ujeta ca gajnareque yocatique uñeque. 19 Cuchiyi tupúsu ujetiga acatecãchopoi ome yu rĩ ujetiga Dupade ajéo enga jĩraque yisápo uaque jne rĩ. 20 Pajesereringai guẽrasṍri Dupade iringaraque yocangarádejnai Jesucrísto nanique iji itoringai. Enga Jesucrísto uté gajnui u áyasadie irodisõre paraguipísi uje susipise darodedie guio. Enga Jesucrísto uté iyoi u uje pésu Dupade áyipie ejodie ujñapetáringai nanique. 21 Jecute yajéode jé u to ome uaque ujetiga Dupade uté pésu uacaringane areguipíso ujetiga apéso cucha arégode gatuaque. Enga jogadi a u jne ujetiga apéso Dupade ajegaidode cucha jnese. Enga Dupade jé dopoi dajéningo ome yoque jnese rĩ uje yanguretágo Jesucrísto. Yicotágo Crísto uté jne iji deréjnane jnese. Amen. 22 Yiraja uje que umáño yurusarane unojo ome uaque, enga cucha amirone qué déji uje que yurúsarome uaque. Jecute yijócha uacajéode údi ujetiga ca arañíñome udore uje uacajicho yurusarane unojo quigode ome uaque. Yigaidi u gu ujetiga yisi ome pirasitigade ome uaque ome yurusarane unojo. 23 Yipota jeta arajáyo uje yoquĩjorai Timotéo e déji guesi iji daringai pujurúgai. Jecute jĩraque chise yoque enga a uté nóna yu jne aja uaque ujetiga diga yibájoi uaque. 24 Asayo uacangaránone jmanáyone jnese ome yu. Jé upo Dupade anguresórone jnese rĩ iji uáguiji te rĩ. Yarijogonórone ore jnese iji puniri Itália uné ore ajéode u ujetiga jé areguipise uáguiji te. 25 Yajéode u ujetiga Dupade chacacãre uaque jnese ome cucha pagutíyamánone. Amen.
1 Santiágo uyu uje urúsarome uaque. Dupade iroque yu enga yocangarádejnai Jesucrísto irógapo yu to rĩ. Urúsarome judíode uaque uje uacasicho uágaja erámone. Yojningane u uaque uje uacarãpíode u jnani bajai Israel ujnacarode ore uje gare ore iji yirídai nanique. 2 Yujode Jesus anguresõre uaque a, anínaño uágome uacajnetígo cucha dacate gajnarécho jnese. 3 Uacarajáyo gu uje petingaquéode udore ore pésu enga pijoque yocanguretigade uringane ũréo. Jé u to uje pésu yoque enga e yirajágo ujetiga yidotágo yógome yocajnéone cucha dacacho jnese uje chise yoque. 4 Jecute adotáyo uágome cuchade jnese gatuaque. Uacagaidi tu gu uacaringane ujñapetácho, uje e que diquiyaque piyoguérique iji uaque uje uacabeyoi Dupade adode. 5 Mu ujetiga uaque gosi ca chiraja dasocáringome re, enga uté gosi doi enga catecã́ri Dupade ome re. Enga jogadi a u uté jne ujetiga Dupade chisi ome payuquetotiguei ome uté gosi. Chamáñaje caniranguipise Dupade ome yoque, enga que dojnóngaja yoque ome payuquetotiguei yui, enga a chisi ome yoque jne. 6 Gusu ujetiga anguretáyopise Dupade to ujetiga atáyoi cuchade iji. Enga ca potigayaquérique dépisiji uágome uacataquéode udore yúode. Mu gosi ujetiga chutai cucháriguiji Dupade, mu quigade enga chotigase Dupade ome guẽratígo yúode, enga uté gosi gajnui tu yote quedéjnai ebié uje emi chubúchu aja quedéjnane. 7 Jecute ujetiga uaque gosi chotigase Dupade, enga uaque gosi ca changureta jne ujetiga Yocangarádejnai chisi uaque gosi. 8 Chamáñaje uaque gosi que púsi dáyipie quitique gu, uje chécãre dáyipiedie aja quedéjnane gatuaque. 9 Ujetiga ayoré gajnareque yocujórique Dupade anguresõre mu cucha omi tu ujetiga uté gosi nínapísa re to. Chamáñaje Dupade chosi uté iji gaté gu uje changureta Jesucrísto. 10 Jé basa ga ujetiga ugucharãque yocujórique Dupade anguresõre, mu uté gosi chirase re to. Chamáñaje Dupade chosi uté gosi iji jnumi gu, enga e chopise Dupade anguresórone iji jnumi to. Uje cucha bisidécho ugucharane ugúchade gu, enga gajnunie u pore asíguedie uje base enga jĩraque íjnoque. 11 Uje guedé tocade enga ojodie dotãripise, enga poridie asíguedie toi enga base enga e íjnoque asíguedie ueratigai iji. Isocai jé u to ome ugucharane ore. Uje ore áyipiedie chejnápise raja dagaidode cucha ome re, jeoga aja deranone cucha ome re, mu ore chuniname mu ore toina enga cucha bisideque cuchade udore jnese ome ore. 12 Pininaquei jogadi tu ujetiga gosi chidota re iji daringai petingaraque. Chamáñaje e petingaraque gu ome Dupade, enga jogadi u jne ujetiga Dupade chisi uté gosi. Enga Dupade guerani a u pucuecaringué eyúgojmai jne ome uté gosi. Chamáñaje Dupade e chichaga pucuecaringuei tuté ome dajnorasórone ore jnese nanique gu. 13 Ujeta unerirase pisijnaringuéone yui ome gosi, ca jos eti Dupade ipesute pisijnaringuéone unéningárique ome uté gosi. Chamáñaje que cucha bisidétique chiringare Dupade ajénique gu ujetiga pésu pisijnaringuérique. Adi jé upo rĩ uje que Dupade ipesute cuchade unéningárique ome uaque ujetiga apéso pisijnaringuérique. 14 Mu ujetiga unerirase pisijnaringuéone yui ome gosi enga obiréjna uje uté gosi tangári dapotigué ayoréode gu. Chamáñaje gosi tangári dapotigué ayoréode, enga jé u uje basaja pisijnaringuéone. 15 Uje páyipie gajnarénguenie chiringare re iji gosi ajei, enga chise guesi enga uté gosi e pésu cucha gajnarei. Enga jé u uje pitoringai tocade ome uté gosi. 16 Yujode Dupade anguresõre uaque a, jé ca araño uaque ome cuchade udore quigode. 17 Chamáñaje cucha arégode, cucha ujñapetade ore jnese ore garani u gaté ome yoque. Enga cuchade udore jnese guẽrasṍri u Dupade uje ipesute direcaringuéone jnese iji gaté yui. Enga Dupade idírecaringuei jogate ome yoque. Uje que checãripise dasocárique iji deréjnane jnese ome yoque. Upo rĩ uje que juegapo ijnangununie ome yoque to rĩ. 18 Uje yanguretágo ore atatagode Dupade uru uréone nanique, enga jé u uje Dupade chisi ome pucuecaringué eyúgojma ichai ome yoque. Gaidi u gu ujetiga yipijójo iji ipesute cucha uñane ujade. Chamáñaje Dupade jé ajéo ome yoque nanique gu. 19 Jecute, yijorane uaque a, Dupade pota ujetiga danguresõre chojmara, chojmarane doi enga jĩraque tangári dojode ayoréo. Mu omi tupo rĩ ujetiga susipise daruode guio uje catecã́ri ore, enga ca jĩraque ájningaraque ome ore. 20 Mu gosi ujetiga jĩraque ájningaraque ome daruode, enga imoi tu uje que doi Dupade áyipie omenie quigode ome re. 21 Enga beyoi enga ayáyo uacate gajnaréngone udore jnese uje qué ore chijocasipise re iji uaque. Enga ca ajusécho Dupade uru ũréone uje Dupade chicháji uacáyipiedie. Chamáñaje piquetangóño Dupade uruode gu uje chicháji uaque, enga u uje chiqueta uaque. 22 Mu beyoi Dupade uruode quigode, enga ca angáchoi bisideque. Chamáñaje gosi ujetiga tangári bisideque enga ãrai jé u re. Chamáñaje jos eti Dupade irasique ome dadode udore gu. 23 Gosi ujetiga tangári Dupade uruode bisideque mu que doi udore quigode enga gajnui u jnani uje chajire dedodie iji ajicarani. 24 Jnani tuté chimópise re, enga chiraja dadode iji ajicarani. Mu cha chajire re, enga jno, enga jĩraque chicadiguipísi damone cucha iji re. 25 Ujñapetácho Dupade iroquéode jnese. Jecute udore u uje chijnime yóguiji pisijnaringuéone jmáinie. Jecute gosi ujetiga ca chicadígui dadudigode Dupade iroquéo, enga chajiripise quigode gatuaque, enga pésu quigode, enga uté a u jne ujetiga gajneque Dupade acacáninga omone ome re. 26 Gosi ujetiga changureta danguretique mu que chiraja ujetiga suse dabijnani guio ome cucha gajnaréngone, enga obiréjna uje ãrai jé u re enga cucha bisideque uté angureni ome uté gosi. 27 Pacajnaqué ueque omone, uje que diquiyaque iyoguérique ome yocai Dupade, pijoque gu gaisórone ore isocade: ujetiga ore chatapísaja disi jádode ore, jé aja abai toguedie ore to uje ore chejnáreque re ome cucha gajnaréngone. Enga u to uje gaisórone ore chãraque re ome cucha gajnaréngone to rĩ iji erámone unojo. Jecute ujetiga gosi adode u unojo enga obiréjna uje que cucha bisideque uté angureni gotique.
1 Yijorane uaque a, iraja uje uacanguretáyo yocangarádejnai Jesucrísto uje sué cuchade gáyode jnese. Jecute aracho uté aja adode. Enga jé ca angaráño uacasocáringome uacojode Dupade anguresóño ore, enga jé ore chojmarapise iji jnumi jnese ome uaque. 2 - 3 Enga socaseti ayoré dacasutéraque chacája Dupade iguíjnai to uje jmanepié óro déji jmané, enga iguidedie ueradéjnapisi. Enga uacojnichome: “Acariji charipi ueradi gai.” Mu socaseti ayoré gajnarétique chacápoja Dupade iguíjnai to rĩ. Enga uacojnichome ayoré gajnarei tuté: “Ayague naté, jeoga ácariji jnumi.” 4 Ujetiga uacasocade u udore ujetiga ajucho ñane iji jnumi, enga uacasocade udore imoi tu uje e uacáyipiedie noña ome ñane iji jnumi. 5 Yujode Dupade anguresóño uaque a, angáchoi yuruode unojo: Dupade ajegáite jmatágode ore to iji erámi tuné. Enga gaidi u gu ujetiga chinoningase ore, enga ataque ore to ome danguretigai. Chamáñaje a ore gajneque Dupade ingoningájnai to jne gu ujetiga diga ore chise daringane Dupade urása iji gaté. Chamáñaje Dupade jé urúo udore gu ome dajnorasórone ore jnese. 6 Jé basa ga uacoyo cucha bisidéguiji ayoré gajnaréngone ore. ¿Ja ca ugucharane u a, uje ore pésu uacajuredie enga ore jno uacádi aja dacasutedie uje ore chaguhéta cuchade uacabáyode? ¿Jecute gotique gu a, uje uacadojnóchoja jmatágode, jé basa uacasíyo ugucharane gáyode? 7 Uje yanguretágo Crísto enga ore chĩ́care Crísto anguresórone aja yoque. ¿Mu ja ca ugucharane udore ore u a, uje ore doi enga ore dojnóngaja Crísto uté i ueradéjnai? 8 Uacarajáyo uje ore urusarane Dupade urúo déji uje chojninga: “Ajnóra bojórique ayoré, adi tu uje bajnóra baringai tuté ayoré ome ua.” Ujetiga ejna udore guesi enga uerate badode. Chamáñaje piroquei tuté u uje sué piroquéode uñane gáyode jnese iji Dupade uruode. 9 Jecute ujetiga etácho uacarásade ujáningo, enga e uacasijnaringuéo, enga uacaringane máraque jogadi u ome Dupade uje uacayóyo ojningane cucha gáyode. 10 Ujetiga gosi doi, enga doi Dupade ojningane cucha jnese, mu chó ojningai chojmarai gai, enga uté gosi jé iyogué to. Enga gajnui u ujetiga chó ojningane cucha gáyode jnese. 11 Dupade upúsu uje chojninga: “Jé ca asa chequé quedéjnaraque.” Enga upúsu to rĩ uje chojninga: “Jé ca apota chutígome bojórique ayoré.” Ujeta ca asa gapu quedéjnaraque marínga, bajé bojórique ayoré enga pijoque baringai angoninguite parique ome Dupade ojningane cucha. 12 Dupade ojningane cucha u uje chisi ome piotiguei ome danguresórone ujetiga ore jnoji pisijnaringuéone jmáinie. Enga Dupade a chingo daroquéode udore quigode aja yoque jne ujetiga diga di enga chajire yocadode aja quigode. Jecute uacajnei tu ujetiga ajusópise uacaruode guio, jé aja uacadode guio jnese to. Chamáñaje a pajirique uacadode aja quigode to jne gu. 13 Mu ujetiga ca yosṍco yocujórique ayoré iji dirode unojo, enga Dupade a ca chosõre yoque to jne ujetiga chajire yoquipesudode cucha aja quigode. Mu ujeta yosṍco yocujode ayoré iji dirode unojo, enga Dupade a chosõre yoque to jne ujeta chajire yoquipesudode cucha aja quigode. Enga a cho jne ujetiga yujnuéngo yocajnei tuté Dupade ujuyaqueque gai. 14 Yijorane uaque a, ujeta gosi chojninga: “Yangureta Jesus.” Mu que pésu cucha arétique, ¿ja panguretigai tuté chiquetárase gosi te jne a? 15 Ujetiga yocujórique Dupade anguresónique jmáta ome daguidéraque enga querénga potique cusapo rĩ, enga beyoi enga osṍcho uté gosi. 16 Mu ujetiga uacuñeque doi enga chojningame uté: “Bo ga tijode chopise jnangome ua jne, enga ca ajmáta ome piguidéraque, cucha pibotígo ore,” mu que uaque gosi chosõre uté ome cuchárique, enga e que cuchárique tõrapísiji uaque gosi uruode udore. 17 Isocai jé upo rĩ ome panguretigai. Ujetiga panguretigai ca nóna gosi ipesute omone enga que pitijinaquérique tṍraji panguretigai tuté. Mu gajnui tu cucha totique uje doi te bisideque. 18 Jecute a gosi chojningárasa: “Banguretigai cuse ome ua. Jé basa uyu enga yate omone cuse.” Be enga angopísa banguretigai taja yu bisideque uje que apésu cucha onique. Enga a yiji enga a yingo yanguretigai taja ua jne, uje a jĩraque pijoque gu jne ome yate omone. Jé basa ga panguretigai bisidétique que pijoque go. 19 Banguretigai déji ujetiga angureta uje Dupápisi déji, enga que dupa uñeque déji siñeque. Mu que cucha datépise udore go. Chamáñaje Satanas irógode changureta udore to, enga pisadodéringai déji ore to ome Dupade yui. 20 ¿Ga jé ca báyipieraque cuse a? Uje que apota araja cuchade udore quigode: uje que pate omone nóna panguretigai, enga e que cuchárique tõrapísiji panguretigai tuté. 21 Dupade chimesere yocai jnani bajai Abraham nanique enga cho ayoré ujñapetáguiji. Chamáñaje que chãraque dajnacari Isaac nanique gu uje Dupade chirógaja ujetiga chujé iji gaserani gai. 22 Bamo uje quene Abraham anguretigai pijoque nanique uje doi Dupade uruode quigode ome re. Enga quene anguretigai uome uje ate omone tocade iji. 23 Enga ore urusarane Dupade urúo tocade uje chojninga: “Abraham changuretapise Dupade, jecute Dupade chimesere enga cho ayoré paráguiji.” Jecute yĩ́caco Dupade jõrai aja Abraham uje dopísi Dupade uruode quigode gu. 24 E uacamóño uje que gusu uje Dupade irasique ore ome ore anguretigai mu irasigápo ore rĩ ome ore ate goningane to. 25 Adi jé u ome dibechoquia Rahab to nanique. Dupade cho ayoré parague iji ome ipesudode cucha omío to. Chamáñaje suse jnani bajai Josué irógode guio gu, enga cho ore quique ujetiga ore chajna dajeque uñai uje ore chayome Rahab urásade. 26 Yirajágo uje ayoré toi que áyipieraque cuse, jecute que qué chijocásapo re rĩ. Jecute adi jec u panguretigai iji Dupade to. Ujetiga ca pimo pate goningárique, enga cho to ujetiga toque panguretigai tuté to.
1 Yijorane uaque a, ca oyo pacadisõre iji uaque jnese. Chamáñaje que cucha iyieque pacadisórone ore gu. Chamáñaje pacadisórone a ore upúsu jne gu ujetiga Dupade chajiripise ore adode aja quigode. 2 Yirajágo uje oco paraque jnese gatuaque. Mu ujetiga gosi chiraja ujetiga susipise daruode guio enga ujñapetai tu uté gosi, enga chiraja to ujetiga susipise deo ome cuchade jnese. 3 Uacarajáyo to uje aníco buricade posode aja pijnani, enga yoquigaidi tu ujetiga buricade tangaripísi yoque, enga ijnángo ore aja yocajegaipídode erámio. 4 Cajicho gojni cuco cuchábode isocade to: uje querújna ore, enga úyujna cuchábedie chumúchungará, mu cucoi ijocayasṍri jé chóreji dajegaipídi erãpe. Uje erásorami atíãpe múñi. 5 Adi jec u to ome yocarei. Uje ajámape yocarei to, mu chejna raja ipesudode cucha datéo. Adi jé upo pioque dijnírataque rĩ. Uje dijnírape, mu a chejnárase erã́tique gai ujetiga tagu gai. 6 Enga yocarei gajnui tupúsu pioque dequejnangóri. Enga cucha gajnaréngone jnese garãpipísi u yoquibai ayoré jogonóri tuté yocareque. Jecute ipesute yocuringai tuné ayoré inoñaringuei. Jecute cho ujetiga piotique tõrapísiji gajño pioi ome yocarei enga basaja iji taningai nanique. Jecute pioi tuté que toi gotique jé aja yoqueruei. 7 Enga ayoréode chiraja dasocade ujeta ore pésu cuchiso ponáyone uringáringo paracho. 8 Mu que ayorérique déji ujetiga chiraja dasocáringome darei. Chamáñaje cucha sijnanguipise uté gu. Jecute chetaque ujetiga pipesute uringárique parac. Enga cho ujetiga bisidi tṍraji yocarei enga chequésãre yocujórigo ayoréo. 9 U mu, yocarei uté jé u uje yicotágo yocai Dupade ome. Mu yocangúromei jec upo yocarei tuté to rĩ uje yoco yocuru gajnarécho ome yocujode ayoréo, uje Dupade ipesute ore nanique múñi ujetiga jé ore cho dapesungóri tuté. 10 Jecute yimóngo uje picotaquéode ome Dupade, jé aja puru noñángone ome yocujode ayoréo ore garani jé chojmára. Jecute yijorane uaque a, que pisoca uté go ome Dupade anguresórone uyoque. 11 ¿Ja yote uneri, yote derocoi ore garãtique chojmára ya? Ungare. Que garãtique chojmára go. 12 Adi jec u, que toque ujetiga erejnárique áraque tṍraji pojnaque. Enga adi jé upo rĩ, que togápo rĩ ujeta pojnaque áraque tṍraji erejnárique rĩ. Yijorane uaque a, jé adi tu to, que toc ujeta yote unénique, yote derocótique ore tṍraji simíjna chojmarárique. Jecute yicoi enga ca yimecóa dara gajnaréngone iji yoquibijnani, enga gusu yocuru pajnotágode ome. 13 Ujetiga irajatátique, jeoga ayipierã́tique déji uaque enga uté gosi doi enga chijna enga doi pisoca arégode ome re iji uacajade ujetiga pijógome uaque. Enga ca doi enga dicotare, mu doi enga pajnotaguipise. Uje ayipierane ore isocai u uté gu. 14 Mu uaque gosi ujetiga qué charatayipísome cuchade ome dojode ayoréo, jeoga jnaripísi cuchade ome re, uté gosi ca chichaga raja ayoré irajatátique. Chamáñaje a taque uté gosi ujetiga cho irajatáguiji re, enga chicha cucha uréone aja ti yui. 15 Yirajágo uje pirajatigade uñane que garani u Dupade go. Mu uñane garanone u erámi tuné, jeoga páyipie ayoredie, jeoga garani u Satanas. 16 Ujetiga jec ũré ajnáchoi cucháringome uaque, enga aratáyiñome cuchade ome uacojode ayoréo, enga a jogadi tu uté jne ujetiga ducañerájma cuchade jnese iji uacajmáinie, enga uacapéso cucha gajnaréngone ome ñane jnese. 17 Mu ujetiga uacarajatigai garani upúsu Dupade enga a apijochopise jne ome uacaringane ayoré omipíso. Enga uacacuei a u pajesereringai ome ñane jne. Enga a caniranguipise uágome ñane to. Enga a anejenáño ñane údode to jne rĩ. Enga a osõrataque uaque jne ome ñane. Enga uacáyipiedie a jogadipise cucha omone quitígo jne ujetiga apéso. Enga a eduyo uacaru uréone gatuaque ome ñane. Chamáñaje ũrepise uaque gu. 18 Uté gosi ujetiga chucué pajesereringai ome re, enga doi enga chedupísiji dajei. Enga diga pajesereringai iji uté gosi ajei tṍra cucha omone aja guesi iji uté gosi ajei gatuaque jne. Enga uringai ate omi pijógome ore jnese.
1 ¿Jé uacajé dotáningane garãtique a? ¿Jé uacabotaquéode tṍraji rique to a ome ñane? Udore garani tu yocáyipie noñánguenie ãrie. Uje yocáyipie noñánguenie udire chijnoque aja guesi tiji yocajei, enga pota ujetiga doi guesi. 2 Uacapótayo cucha unejángone, mu uacarañíñome uje que abócho uacapotigádi cucha. Enga jec u uje uacajéyo ñane. Jé adi upo rĩ uje uacajnáchoi cuchade ome uaque enga que abócho cuchade udore ome uaque, enga uacayóyo iji ñane ome uaquejopode. Mu que abócho uacajegaidode cucha gu uje que atayóji Dupade. 3 Mu ujetiga atayoi cuchade udore iji Dupade, mu que chisi ome uaque gu uje chiraja uacáyipie gajnarénguenie enga todo ujetiga uacañamáicho. 4 Ayoré gajnaréngone uaque Agu uje que apúsoi uacangureni Dupa ejórique, enga uacagaidode u erámone jogonórone cucha. ¿Ja ca arajáyo to a uje ore chijnóra erámi tuné adode enga imoi tu uje ore gueteque Dupade? Jecute gosi uje pota doi erámi jogonórone isocade, enga cho dedoboi aja Dupade enga e noña enga Dupade guetesõre to. 5 Que cucha bisideque ore urusarane Dupade urúo go uje chósi te: “Yocarijogoto Dupade Ujopie Espíritu Sánto uje Dupade chicháji yoque, uaté ijnoraquei uásejnapis ome yoque, enga chajiripise yoquejode. Chamáñaje chijnorapise yoque gu.” 6 Mu Dupade chatapísaja yógome date goningane. Uje ore urusarane Dupade urúo déji uje chojninga: “Dupade chetaguipise ayoré dicotárechoquíode. Mu átapiode u ayoré parágode ore ome date goningane.” 7 Jecute beyopísi Dupade áyipiedie quigode ome uaque, enga ca amíningacho Satanas urúrigo ome uaque. Enga a ajócãcho uté jne ome uacasocade udore, enga a jnoji uaquejode jne. 8 Enga beyoi enga ajoso Dupade yui, enga Dupade a sose uaquei to jne. Pisijnaringuéone ipesungórone uaque a, uje pisijnaringuéone pésu uacanoñaringuéone enga asíñome uágome Dupade enga churupise uacanoñaringuéone iji uacabáyode enga ichapise uaque jne. Ujetiga ajnóra Dupade, mu ajnórapo erámi adode rĩ, enga be enga ajócãre bajnoraquei tuté ome erámi adode enga edu bajnoraquei ome Dupade. 9 Ajéchome uacate gajnaréngone udore. Abóyo to enga asayo uacabade. Ayáyo dago enga abóyopise. Ayáyopo uacaninaquéode rĩ, enga eduyo uacajnusiétigade. 10 Enga beyoi enga oyopise uacáyugu uáguiji Yocangarádejnai iquei. Enga Yocangarádejnai a chĩro uacayuguhebátigade jne enga chiringare uágaja gaté jne. 11 Yujode Dupade anguresõre uaque a, ca adojnóchoja ñane. Chamáñaje gosi ujetiga dojnóngaja dojórique Dupade anguresõre, jeoga chucué iyoguéo enga imoi tu uje cho cucha bisidéguiji Dupade iroquéode. Uje udore urásu ujetiga cho quique gosi ome cuchade quigode. Jecute ujetiga gosi chucué Dupade uruode iyoguéode, enga imoi tu uje uté gosi e cho dacasuté guesiminore iji re ujetiga chajire cuchade aja quigode. Enga uté gosi e que gaidode u Dupade áyipie quigode go ujetiga pésu. 12 Mu uñai déji uje ipesute piroquéode udore ujetiga ayoréode uyoque yicoi quigode. Enga gusúpusu uté ujetiga chajire yocadode aja quigode to. Enga uté jé upo to rĩ uje gajnei tu ujetiga chiqueta yoque, jeoga cho dajuñame yoque. Mu jé bajosigonírique a, uje badojnóngaja bojode Dupade anguresõre ore, enga chiese bajirique ore adode aja quigode. 13 Uacuñane changuretapise re enga uacojnicho: “A yico dirome, enga yicagóji idaidatei tuté jne. Jeoga jé yicagóji jne iji ne diri. Yocajéo enga yejnángo sequeréraque jne iji ta, guidaidatei. Enga a yisagope yoquisatígo iji ta jne, enga a yajníngo jne ujetiga e yocujuya yoquisagode orérigui.” Mu angachopísabi yu jne. Uje que pimo ãrie ujetiga uacaruode udore tocade jne ome uaque. 14 Chamáñaje que pimo dire uñai atígo. Uacamóño ãrie uje yocucuecaringuei cucha bisideque enga gajnui tu jesi. Uje tocade, mu quigade enga jĩraque íjnongapo rĩ. 15 Mu ueradi tu ujetiga yojníjo: “Ujetiga Yocangarádejnai pota ujetiga qué yiquecágo aja dire uñeque, enga a yicagóji yocojningáringo erámio ujetiga jé ajéo ome yoque.” 16 Mu uaque enga que ayáyo asíyo uacabáyode iji uacojode ayoré iquéo. Mu gajnareque udore ujetiga Dupade anguresónique chisi damánique. 17 Ujetiga pate omone chiringare re iji uté gosi ajei, mu uté gosi que doi enga chiradome re, enga e pisijnaringuéo ome uté gosi.
1 Ugucharane uaque a, angáchoi yu to. Uacajnéone cucha dacate gajnarécho a chise uaque jne. Jecute beyoi enga aboyopise iji uaquejode. 2 Uje jnumi e tagu uacagúcha omone, enga bora gutodíe e tagu uacaguidé ueradéjnanie to. 3 Jé cho uacaplátadie rĩ uje pipesuchóji óro, pláta ore. Jnumi e tagápo to rĩ. Mu a oyo uacabaya uacamátadie uacaplátai to jne aja Dupade ujuyaquei gajño pioque. Chamáñaje dirode erueminórone e idógosi, mu jé qué uacajóyo uágaja uacamátadie plátai. 4 Uacarócho uacarógode aja uacaroquéode bisideque uje que oyo ore oré. Enga e ore chayója Dupade ome uaque uje que oyo ore oré. Enga ore agoyedie e chise Yocangarádejnai iji gaté uje gaté unirisõre dipeséode ore eduguéjna cuchábi tu Yocangarádejnai tuté. 5 Chamáñaje que cuchárique chona uaque iji jnumi tuné. Jecute jecucha uaquejnáño uágaja uacagaidode cucha ponáyo iji jnumi uné, uje chiese pininaquei garanone u udore ome uaque. Mu uacajnui tu aquirájna urojnanie. Uje e urojnapise enga gachisṍri e chujé. 6 Enga jé tiógarapísa ujetiga chuque uaque to. Chamáñaje jecucha uacate gu uje uacajicho ayoréode ore adode aja tijode uje que ore bárique cuse múñi ome uaque. Mu uacasíñome pitoringai tome ore. Enga que ore chisa dejórique ome uaque gotique. 7 Jecute, yujode Dupade anguresõre uaque a, adotáyo uágome cuchade jnese jé aja Yocangarádejnai diringárique. Enga acã́cho uágaja utácai uje jnusi rome dacade árigui yui uje changuretapise gu. Mu jé qué chirote guéode yui ujetiga guéode enga pésu enga quérã. 8 Jecute jé ca amíningacho cucha gajnaréngone, enga jé ca oyo caru rĩ. Uacamóño uje Yocangarádejnai diringai e idógosi gu. 9 Yujode Dupade anguresõre uaque a, jé ca oyo chere chere ome uacojode Dupade anguresóño. Uacamóño uje Dupade e idógosi diringai ujetiga chajire yoquipesudode cucha aja quigode. 10 Yujode Dupade anguresõre uaque a, acã́cho uágaja Dupade uruode atatasórone iji jnani baja cásodicaite ome ore adode. Uje que ore chacho doi Yocangarádejnai iroquéode icáite. Pumajopise ore múñi ome darásade. 11 Yirajágo uje pininaquei jogadi tu ome udore ore uje ore chise dajnéone petingaquéo uéchai. Ore chidota re nanique gu iji dajnéone petingaquéo jmáinie. A jé adúcho Job ujnomei to uje chi chidotapise re iji dajnéone petingaquéo jmáinie to nanique. Mu a jé adúcho to rĩ jõ uje Yocangarádejnai chatapísaja uté iji dajnéone petingaquéo quigade. Chamáñaje caniranguipise Yocangarádejnai gu, enga chosõripise ayoréode uyoque jnese. 12 Yujode Dupade anguresõre uaque a, e jiei yacajnaquéode ome uaque, mu obiréjnai tu uné: ujetiga jé ca ẽ́cacho gaté jogonórone cucha uñeque i bisideque. Enga jé cho jnumi jogonórone cucha to. Ca ẽ́cacho ore íode bisideque to. Enga jé ca ẽ́cacho cuchade uñane i bisideque to rĩ. Mu ojnicho: “Ejẽ” ujetiga ũrepise cuchárique, jeoga ojnicho: “Ungare” ujetiga ca quigode u go. Uacagaidi u gu ujetiga ca Dupade cho dajuñame uaque to ome uaquecarane cucha ío bisideque. 13 Ujetiga uaque gosi chejnáreque re, enga doi enga catecã́ri Dupade ome re. Enga ujetiga uaque gosi ijõre, enga doi enga chicota Dupade ome daradérigui. 14 Ujeta uaque gosi ejnaretaque, enga doi enga tibidi Dupade anguresórone angaránone ujetiga ore catecã́ri Dupade iji gai. Enga a ore chanire acéite aja ójo te jne enga a ore chijócha Dupade ajei údi ujetiga chiqueta ejnaretai tuté. 15 Enga ujetiga panguretigai nonapísa ore icatecãraitigade ome uté gosi, enga a piquetaque ejnaretai tuté jne. Enga Yocangarádejnai a chatĩre ijóningarique gai jne. Ujetiga ejnaretai tuté pésu cucha gajnarétique, mu Yocangarádejnai a chĩro to jne. 16 Enga angoño uacapesudode cucha gajnarécho aja ñane, enga acatecãchoi Dupade ome ñane ujetiga chiqueta uáguiji uaquejnaréngone. Chamáñaje jnani parátique ujetiga chejna daguesi ome dacatecãraitigade ome Dupade, enga cucha dacadode tocadepísome. 17 Uacarajáyo jnani bajai Elías uje chi jé yocujo ayorépise nanique, mu chi catecã́ri Dupade ujetiga ca begapóji jnumi te rĩ. Enga Dupade chudute icatecãraitigade. Enga que begapo rĩ enga sequeredie gadioque mu guedosíode chojmára iji ti rĩ uje que begapo iji jnumi te rĩ. 18 Mu unojo quigade enga Elías catecãrápoi Dupade rĩ ujetiga begapo rĩ iji jnumi. Enga begapo rĩ. Enga cuchade adie cusapo rĩ iji jnumi. 19 Yujode Dupade anguresõre uaque a, ujetiga uaque gosi cho caru ome Dupade adode enga beyoi enga oyo quique ujeta chajniapo Dupade gai rĩ. 20 Uaque gosi ujetiga chatĩrépo Dupade anguresónique Dupade gai te rĩ, enga uaque gosi u uje chiqueta uté gosi iji gajnei pitoringai yui. Enga a diquĩroque pisijnaringué uásejnane to jne gu uje uacoyo ate gajnaréngone ore quique.
1 Pédro uyu enga Jesucrísto iroguipísode uñai yu, jecute yigaidode u uté iroquéode. Yurúsãre yurusarane udojo ome uaque uje uacasícho uágaja erámi ica iji uacaniri. Enga e uacagúsoi pachamite quedéjnane uje ore íode u Pónto, Galácia, Capadócia, Ásia, Bitínia ore. 2 Yocai Dupade ajegáite uaque nanique iji taningane. Uje áyipiedie u nanique ujetiga gajneque uaque gu. Jecute Dupade Ujopie Espíritu Sánto chacája uaque to enga e uacajnengóri tu Dupade ujetiga angáchoi to. Enga Jesucrísto e churu uacasijnaringuéone ome dayoi. Jecute yajéode u ujetiga Dupade icaniratiguéode, guerani pajesereringa irágu uacajéode to. 3 Beyoi ga yicotágo yocangarádejnai Jesucrísto dayé Dupade ome osõraquédatéi ome yoque. Uje Dupade pésu ga chiringare Jesucrísto iji itoringai nanique enga pésu ga yocuringane ayoré icha isocade jé u to. Jecute yirajágo uje tate Dupade osõraquédatéi ome yoque, enga yocanguretigai u yoquitijinaquéode uje yiroco Dupade ojningane cucha yúode. 4 Enga a uacajneque Dupade gueranone cucha uje chirote uaquei ome iji gatajnoquei. Enga a ca cuchárique chósi ti iji uacajnéone cucha udore. Que toc jeta cucha iguínique chisa mu icha gatuaque. Que cho cucha pojnánguenie to go uje jĩraque beta. Mu e dimane iji uacaquei. 5 Chamáña gu uje uacanguretigai déji ome Dupade. Jecute chirote uaque ome dajopie etotiguei ujeta eso uacaringane piquetaque to iji deréjnane udojo eruénique. 6 Jecute uacanínaño uágome cuchade udore. Mu deréjnane a déji ome uaque, ujetiga pequetingaqué uásejnane chise uaque. Mu adotáyo uágome udore uje a garósi díningo jne. 7 Uacanguretigai gajnui u óro . Yirajágo uje ore chãrei óro enga ore chijnime pasigode iji ujade. Quigade ga ore chijnime óro iji uje ore chiraja uje óro ueque gu ga que cuchárique chimesa go. Yocanguretigai isocai u óro. Uje pequetingaquéode chise yoque to, enga pijoque yocanguretigai uringai ũréo iji udore jmáinie to. Mu yocanguretigai oredie jiei, ga oredie sué óro oredie gai. Chamáñaje que eyúgojma óro go. Ujetiga uaque gosi anguretigai pijoque enga Jesucrísto a irasique uaque jne ujetiga diapo rĩ. Enga a chicota uaque jne enga a uacajneque uté ingoningájnai to jne. 8 Yirajágo uje uacajnóraño Jesucrísto uje que amóño ome uaquedodie. Que amóño marínga, jé uacanguretáyo. Jecute uacarasiguipise uaque. Enga que uacarúrigo cus ome uacaninaquei uté uje uacarasiguipise uaque gu. 9 Uacarajáyo gu uje a eso uacaringane piquetaque jne ome uacanguretigai. 10 Yirajágo uje Dupade uruode atatasórone, jnani bajade, jecucha ore chajire Dupade uruode enga que ore áyipieraque jnoji Dupade áyipie omenie ome erámi unirisórone ujetiga chiqueta ore. Enga ore chatata Dupade osongaquédatéi quigode uje chi tocade jne ome disi ejode uyoque. 11 Yirajágo uje Crísto Ujopie Espíritu Sánto chingome cucha piqueminórone ome Dupade uruode atatasórone, jnani bajade, nanique. Uje chi Crísto a chejnáreque re jne ome yoquisijnaringuéone. Mu quigade enga chise daringai eduguéjna cuchape. Enga jnani bajade chi ore ajegaidi u nanique ujetiga ore chiraja gosi Crísto. Ore pota jeta ore chiraja diri to ujetiga darijogoto Crísto Ujopie ojningane cucha chise ore. 12 Mu Dupade chingome daruode atatasórone ore uje que ore gajneque datatagode ujetiga tocade ome ore, mu chi disi ejode uyoque yocajnécho ore atatagode. Enga Dupade e chiroque Dajopie Espíritu Sánto aja erámi udé. Enga Dupade Ujopie Espíritu Sánto uaté u uje déji uacacadisórone ajéode to uje ore chatata Jesucrísto adode ome uaque nanique ujetiga eso uacaringane piquetaque to. Enga Dupade utocaidode gaté unirisóño, ore tija Dupade adode udore ome yoque, enga que ore áyipieraque jnoji gotique. 13 Jecute ayipierãque uaque, enga uacáyipiedie jogadipísiji ujetiga añucho uacadode guio. Enga anguretáyopise Dupade uje chichaga dẽrapáidode cucha aja uaque, uje jé ũrepise enga a chisi ome udore ome uaque jne jeta Jesucrísto diapo jne rĩ. Chamáñaje chosõripise uaque gu. 14 Oyo disi uje angoninguite guesaque enga tangaripísi dayé. Enga ca beyoi uacate baja cásodica uje gajnarécho ica uje cáma anguretáyo Dupade to. 15 Jé basa ga ejnañopise uágaja Dupade adode. Uacamóño gu uje uacabidisṍri Dupade ueque ome pisijnaringuéone. Enga ueradi tu ujetiga íjnoque pisijnaringuéone iji uaque to. 16 Uje ore urusarane Dupade urúo déji uje chojninga: “Beyoi ga oyo yu uje ueque yu ome pisijnaringuéone.” 17 Ujetiga yojnicome Dupade: “Yapa Dupade a,” ga yicoi enga yipéco uté ojningane cucha ome yoque. Uje Dupade a u jne ujetiga chajire ayoré chojmarai adode aja quigode, enga a ca chapuse yógaja. Jecute yicoi enga yangácoi Dupade jé aja deréjnane udojo uje yugúcoi erámi udé. 18 Uacarajáyo uje que cuchárique tṍraji uacayode jnani bajácho ore adode nanique. Enga jé uacadode u ore adode to nanique. Mu Dupade ijnimique uáguiji uacasoca bisidégode udore enga chiqueta uaque. Enga uacarajayópise to uje que pigaidé yocuringane piquetaque ome pláta, óro ore uje cuchade udore jĩraque íjnoque. 19 Mu Jesucrísto gáite oré uacaringane piquetaque uje chojne ome dayoi ome yoque. Enga Dupade cho cucha orerã́quedatéi iji Jesucrísto iyoi. Enga Jesucrísto gajnua tu áyasa uje ueradéjna enga que iyoguérique cuse, uje jnani bajade ore tẽrája Dupade nanique ome ore isijnaringuéone. 20 Dupade áyipiedie jé jogate nanique ome Jesucrísto ujetiga toi ome yoque uje cáma pipesute erámi. Mu quene Dupade áyipiedie udire tocade iji deréjnane udojo ome Jesucrísto. Enga e yocagutíyamani u. 21 Dupade u uje chiringare Crísto iji itoringai nanique enga chatĩre uringai eduguéjna cuchape gai. Jecute uje uacanguretáyo Crísto enga jogadi u uté to uje uacachayo uacanguretigai aja Dupade gai to ome ojningane cucha yúode. 22 E icha uacáyipiedie. Chamáñaje uacanguretáyo Dupade uru uréone gu Dupade Ujopie Espíritu Sánto uje chijocase uacáyipiedie. Jecute pijnoraqué ũrei déji uaque ome uacojode Dupade anguresóño. Enga uacajnei e u ujetiga ajnórañopise ñane enga ejnáñopise uágaja uacajnoraquéode udore ome ñane. 23 Dupade chinoningase uaque enga uacacuecaringué ichai e cuse uje que eruénique cus. Uje garani u Dupade uruode gu uje que íjnoque go. Enga uacacuecaringué ichai tuté que cuguésõri uacacuecaringué casica uje garani u uacatedie, uacayode ore. Uje ore toi ica, ga ore topísi. 24 Ore urusarane Dupade urúo déji to ga chósi te: Ayoréode uyoque jnese yocajnúone u jnacarade. Jé basa yocajnéone picotaquéo gajnunie u jnacaraque asíguedie. Mu jnacarade itabidode jĩraque toi. Jé cho jnacaraque asíguedie jĩraque beta. 25 Mu Dupade uruode déji iji deréjnane jnese, Enga que eruénique erãpe cuse. Enga e pacadique uágome Dupade uruode udore to nanique ujetiga eso uacaringane piquetaque to.
1 Jecute ayáyo to cucha gajnaréngone jnese: paringaquéode, purupatáringane ore. Enga ca aratáyime cuchade ome uacojode ayoréo. Enga ayáyo to uje ajnicho uñane adode. 2 Oyósi disi parátagabi uje quene basosi enga chucuepísi leche . Beyoi enga acueyoi Dupade uru uréone to ujetiga uneréjna to ome uaque, ujetiga aquéraño to iji uacacuecaringueque ichai. 3 Chamáñaje e uacaraja Yocangarádejnai uje ũrepise enga caniranguipis. 4 Átayo uágaja yocangarádejnai Jesucrísto. Uje Yocangarádejnai gajnua tu cucarané uje ueca. Mu jnanione ore chetaque enga ore tṍra. Jé basa Dupade chisa dajegaidé cucarané uaté. Chiraja gu uringa orerẽ́. 5 Enga uacajnunie u cucaranenie to uje uecai cucaranenie udire. Jecute ca etácho ujetiga Dupade angúroméone u uaque ome dapesudi daguíjna uecai to. Uacamóño uje Dupade irógode cuse to nanique ome daguíjna bajai uje ore tẽrája Dupade ome cuchisode. Mu Dupade irógode e u danguresórone uyoque uje yedugo adode. Enga pota jeta yẽcója cuchade ome to, mu ucuegode u yoquipesudode cucha ujñapetácho uje yanguretágo Jesucrísto. Udore u uje Dupade chimesere iji yoque. 6 Ore urusarane Dupade urúo jé cho udore uje chojninga. A yiji yajegaidé cucarané orerẽ́ jne, Enga a yicháji ore idai Sion ujetiga ore pésu yiguíjnai aja gaté iji uaté gai. Ujetiga gosi changureta yajegaidi tuté enga a ca cucha bisideque anguretigai. Uje a uté uruode tocade jne ome gosi. acanguretáyo Jesucrísto uje gajnua u cucarané ueca, uje uacarajáyo gu uringai orerãi. Mu udore ore uje que ore changureta Jesucrísto, ore gajnui u jnanione uje ore tṍra cucarané orerẽ́ nanique. Uje Dupade uruode ojningai u ore uje chojninga: Cucarané cuchabéraque uje guiguí jna cuchábi ipesungórone ore guetegue A noña enga cucarané pedójnare jne. 8 Dupade ojningai jé upo ore rĩ uje chojninga: Cucarané uaté pésu enga gosi cṍra. Udore ore uje que ore tangári yocatatagode ome Jesucrísto, gajnui tu ujetiga ore cṍra enga ca ore nijiápo rĩ. Uje Dupade jé áyipiedie u udire ome detesórone gu. 9 Jé basa ga Dupade ajegáite uáguiji punire quedéjnane. Enga uacoyo pangaránone uje ore catecã́ri Dupade ome darásade nanique, enga ore dopoi deduguéjna cuchábi iroquéode rĩ. Uacoyópo puniri unirisórone ore rĩ uje ueque ore ome pisijnaringuéone uje Dupade gajneque ore iji ore uniri gu. Jecute Dupade pijnangáite uaque nanique, enga chijnime uaque iji ijnangununie ajéode ujetiga acáyoja idírecaringué cuchábi. Gaidi u gu ujetiga uaque u ujetiga atatayo ipesute cucha pitijádode ome ore. 10 Dupade cáma urása uaque nanique, mu chise diri uje cho darása iji uaque. Que cuchárique déji nanique ujetiga chosõre uaque, mu chise diri uje Dupade chosõre uaque. 11 Yijorane uaque a, uacoyo purása quedéjnane uje que ore uniri u erámi udé, mu ore uniri u gatajnoquei. Jecute yijócha uacajéode údi ujetiga ca angáchoi uacapotigué ayoréode. Uje udore gajnúone u jocaratade gu uje doi uaque enga pota sué uacabáyode. 12 Beyoi ga añuchopúsu uacadode guio iji uacojode ayoréo ore ujade. Uacamóño uje cáma ore changureta Dupade to. Ujetiga ore chaguhéta cucha gajnarétique uacabáyode, enga ore uruode gajnarécho ome uaque, mu jé boyo uacate arégode údi. Enga a ore chimo uacate arégode enga jogadi tu ujetiga ore chicota Dupade to ujetiga diga Dupade di enga chajire ore adode aja quigode. 13 - 14 Yocangarádejnai ajéode u ujetiga yangacopísi yoqueduguéjna cuchábi iji yocuniri, jé aja uté iroque gatéode ore rĩ. Uje uté ichajapite ore aja ore jogadode gu ujetiga ore cho dajuñame ate gajnaréngone ore, enga ujetiga ore chañuru ore guio to uje ore ipesudode arécho enga ore chisi ore gáyode. 15 Dupade ajéode u ome danguresórone uhuaque ujetiga apéso cucha ujñapetágode gatuaque. Uje uacagaidi u gu ujetiga ca áyipie yúgode chiraja daru quitíguiji uaque. Yojningane u udore uje que ore chiraja cuchárique, mu jecucha ga ore dojnóngaja Dupade adode. 16 Pujuregate cuchade jnese ome uaque ujetiga apéso, uje Dupade chirame uágome erámi tudé gu. Mu que chirame uaque gu ujetiga apéso cucha gajnaréngone. Jecute beyoi ga oyo Dupade iságuiji uaque to enga eduyo uté ojningane cucha gatuaque. 17 Mu angáchoi uacojode ayoréo ore jnese. Ajnóraño to uacojode Dupade anguresóño. Angachopísi Dupade enga angáchoi eduguéjna cuchábi to iji uacaniri. 18 Ujetiga piroque uaque enga beyoi enga angachopísi uacarósorone. Que gusu ujetiga angáchoi uacarósorone uje uerate ore adode ome uaque, mu angáchoi uacarósõre ducusuechoquíode ore to rĩ. 19 Ujetiga gosi que tiógara daringai pujuya marínga, chidota re iji jmáinie enga cucha ueradi tu uté gosi ipesudode. Chiraja uje Dupade ajegaidi u gu jecute chidota re iji cuchade udore jmáinie. 20 Mu ujetiga uacuñeque pésu cucha gajnarétique enga ore cho dajuñame, ujetiga uté chidota re ome dajnei pujuyaqueque, mu que cuchárique tṍraji gotique. Uje jé tiógarapísa dajnei pujuyaqueque gu. Jé basa ga gosi ipesudode u cucha arégode, mu ore cho dajuñame enga uté chidota rome dajnei pujuyaqueque enga Dupade a chicota uté gosi jne. 21 Uje Dupade áyipiedie u udire ome uaque ujetiga acã́cho uágaja Crísto. Uacamóño uje Crísto chejnáreque re nanique ome uaque, ga jé uacajnei tu ujetiga oyo uacaba Crísto to. 22 Crísto que pésu pisijnaringuérique nanique go. Enga que paringaquérique dépoji ome uñeque rĩ. 23 Uje ore uruode gajnarécho ome Crísto nanique que urúrique gajnareque aja ore to go. Uje ore socárome nanique, mu que jmongarája ore to. Mu chingo ore ome Dupade ujetiga jé doi dasocáringome ore. Uje chiraja gu uje ayipierãque Dupade uje chajire cucha dacadode aja quigode. 24 Uacarajáyo uje Crísto óite yoquisijnaringuéone iji dabai ayoré nanique aja curesei enga toi ome yoque. Enga uje yanguretágo Crísto cho ujetiga e yitogoi to, enga yijíñongome yocate bajade, yoquisijnaringuéone ore. Enga yiquecagopo rĩ ga e yicoi yocucuecaringué ichai isoca ujñapetágode. Ore chichagu Crísto nanique enga jé u uje uaqueso uacaringane ayoré ijóño iji quigade. 25 Uacajnunie u áyasadie uje ore chimere riji erámi. Mu uje uacanguretáyo Crísto enga uacacáputayopísiji uacarodisṍri Crísto. Enga Crísto e u uje chirote uaque enga suse uacáyipiedie guio. Adi u áyasadie irodisṍri isocai ome dachidedie áyasai uje que chuseque ore.
1 Jecute abechuguedie uaque, apéso uacabayode ajegaidode cucha ome uaque to. Ujetiga babai cáma changureta Dupade to mu socaseti chise diri ujetiga changureta to ome bate arégode ome. Ujetiga babai chetaque baruode ome Dupade, jé dóji ga eduyo uacate arégode. 2 Ujetiga babai chimo uje bajuse badode guio enga bangaripísi, jogadi a u jne ujetiga changureta Dupade to. 3 Omi tu ujetiga chequedíe ca ore chucué daringáringui chequé ueradéjnai. Ujeta ca ore chariguetapise dabáyode. Ujetiga ca ore chejna dáyipiedie aja daguidé ueradéjnanie, dajnápeode ore. 4 Mu ore doi ga ore chañuru dáyipiedie quigode guio ome raque. Baraja uje babai guesiminóri ueratigai a bijna jne ome ua. Mu báyipie uringanie ueradei a ca bijna jne. Yojningai u baringa parague iji bayaridode. Dupade que timíninga yoque gu ome yocuringanie ueradei, mu cucha orerãi tu ome Dupade ujetiga uerate goto áyipiedie quigode. 5 Uacamóño uje chequé bajedie uje ore chijnóra Dupade nanique, ore chañuru dáyipiedie guio. Ore changuretapise Dupade, enga ore tangaripísi dabayode nanique. 6 Adi jé u ome chequé bajé Sára. Uje tangaripísi dabai Abraham nanique enga chĩ́care dangarádejnai aja dabai. Chequé disi ejodie uaque a, diga a oyo uaté to jne ujetiga apéso cucha arégode to ome uacabayode, enga anguretáyopise Dupade ujetiga ca pisadodéringárique sué uacabáyode. 7 Acoterachugode uaque, angáchoi to uacacotedie ujetiga arajáyo ore áyipiedie to. Ujetiga bacoté adode ueracho ga jé tiógara ujetiga asi gai. Baraja uje bacoté etotiguei que cho jnani etotiguei, jecute ajusipise bacoté guio. Que gusu udore go, mu ajuse guio to uje bojo Dupade angureto gu. Uje Dupade chosõre to enga e chisi ome pucuecaringué ichai ome uaté to. Apéso yacajnaquéode udore quigode ujetiga ca cuchárique suru Dupade yui ome uacacatecãraitigade ome. 8 Yacajnaqué erueminórone ome cuchade udore u ujetiga ajnóraño ñane iji dirode jnese, enga osṍcho ñane iji udore, udore. Cho jetiga uacãjorapise ñane. Omi tu ujetiga uacajnoraquéode ome ñane tocade ome ñane enga paraque uaque ome ñane iji udore to. 9 Ujetiga uñeque adode gajnarécho aja ua mu ca arate uté ate gajnarei ome. Ujetiga uruode gajnarécho aja ua mu ca barúrique gajnareque aja to. Mu acué basoca omone ome uté gosi. Uje Dupade tibidi uágaja re gu ujetiga chacacãre uaque ome cucha omone. 10 Ujetiga bajegaidode u pininaquéode ome ua enga: Ajuse babijnani guio ujetiga puru gajnaréngone, purupatáringane ca tṍraji. 11 Enga aya bate gajnaréngone. Enga apésu cucha ueradode. Acué basoca omone ome bojode ayoréo ujetiga pajesereringane déji uágome ñane. Enga ejna ua aja basocade udore. 12 Uje Dupade chañuru ayoré pará gode ore guio enga tangári ore icatecãraitigade. Mu chetaque pate gajnaréngone ipesungórone ore enga que tangá ri ore to. 13 Ujetiga eduyo uacasoca arégode ome ñane, ¿ja togome uñeque ujetiga pésu cucha gajnarétique ome uaque a? 14 Mu ujetiga oyo uacaba uacapesudode cucha ueracho, pininaquéode a jé jogate uaque. Jé ca atodóyo uacojórique ayoré, enga ca óraño uágome cuchárique. 15 Mu eduyo Crísto iji uacáyipiedie enga oyo uacangarádejnai iji. Ujetiga uñeque catecã́ri uaque ome uacanguretigai iji Jesucrísto enga jĩraque achajnai enga atata uacanguretigai quigode ome. Mu angári uté gosi to, enga pajnotaque uacaruode ome. 16 Enga ajusópise uacadode guio ujetiga ca uacáyipiedie cho jora ome uacapesutique cucha gajnarétique. Ujetiga uñeque urúrigo gajnarécho aja ua uje bagaidode u bangaráni Crísto adode, mu jé bo bate arégode udore údi. Diga a chajéngome daru gajnaréngone udore ome ua jne. 17 Que cuchárique tṍraji go ujetiga yoco yoquiba yocate gajnaréngone. Jé basa ga ujetiga Dupade ajéo enga yoco yoquiba yocate arégode, enga cucha arei u uté. 18 Uacamóño uje Crísto toi ome yoquisijnaringuéone ga chojmarapise enga e gusu. Mu que tiógara daringai pujuya nanique uje paraque gu, mu cho daba sijnángone uyoque enga toi ome yoquisijnaringuéone. Gaidi tu gu ujetiga chinoningase yoque enga chijna yógaja Dupade jogadi. Yirajágo to uje Jesus aoi u uje toi nanique, mu Ujopie u uje chiringare aja gaté. 19 Enga Ujopie Espíritu Sánto nóna uje chicáji jnani bajade ore uje ore toi nanique enga pujurugáite ore iji jnaropié. Enga chacate ore iji. 20 Ore u uje que ore tangári Dupade nanique, Noé urásade ore, uje Noé qué pésu cucoi nanique. Mu Dupade chidota re aja ome ore jé aja deréjnai uje Noé chimate cucoi. Mu gusu iquetade gadioque ore iji ti yijmanuñai uje yodi chijna ore pi cuco aja gaté. 21 Yodi tuté gajnui tu yodi uje ore chaca yoquedodie iji ujetiga yico yocuringane piquetácho ome Jesus uje niji iji datoringai nanique gu udore. Que ore chaca yoquedodie iji yodi gotique ujetiga ore churu yoquibáyode ome yodi. Mu ore chaca yoquedodie iji yodi gu uje imoi tu uje e yanguretágo Dupade enga yocáyipiedie e que pésu yoquejoporinguéone ome yoquipesudode cucha gajnarécho. 22 Enga yirajágo uje yoquiquetangóri Jesucrísto uté jnome gaté nanique enga e cháji Dupade ãrachua. Enga e sué gaté unirisórone ore gáyode jnese, jé aja dacasutedie, pujopiedie ore jnese rĩ.
1 Uacarajáyo uje Crísto chejnáreque re nanique ome uaque. Enga e uacajnei tu ujetiga dimane uaque to ujetiga ejnárecho uaque to ome uté adode. Uté gosi uje chejnáreque re ome Crísto adode pijoque uje e cha date bajaque gajnaréngone. 2 Enga e chejna raja dacuecaringué ichai adode. Enga áyipiedie u ujetiga pésu Dupade áyipiedie jé aja datoringai. Enga e que áyipieraque dépoji dapotigué ayorérique rĩ. 3 E gome uacapesudode cucha gajnarécho. Uacarajáyo gu uje Dupade uruode otigayasórone ore ucuegode u cuchade udore. Uje cáma arajáyo Dupade nanique enga uacajegaidode u cuchade udore ica. Que uacáyipiedie jnoji uacapotigué gajnaréngone. Enga yote pioi chujé uaque gatuaque. Enga uacapéso uacasorã bisidégode ome uacajódode. Enga uacacatecãchoi uacacatecãrainone ayoré gajnúo gatuaque rĩ uje Dupade chetaque cuchade udore. 4 Uacajorane udore ore chirajaque uacadode uje que ajínañopo ore aja quedéjnane rĩ uje ore chamáta ñane ome dajegaidode cucha. Enga ore uruode gajnarécho aja uaque uje que átayopo uágaja ore rĩ ome ore ipesudode cucha gajnarécho. 5 Mu a chise dínique jne ujetiga uacajorane udore a ore chatata dadode ome Dupade jnese. Uje Dupade e dimane ujetiga chajire ayoré togode, ayoré uecade ore adode aja quigode jnese. 6 Uje Dupade ujuyaquei pitoringa chise Noé urásade ore jnese nanique, adi tu uje chise erámi unirisórone uyoque jnese to. Mu pacadique togode udore ome Dupade áyipie omenie to nanique ujetiga diga ore chise daringanie piquetaque to enga ecápo ore áyipiedie rĩ enga ore cho Dupade to uje eca iji deréjnane jnese. 7 Uacarajáyo uje e idógosi deréjnane eruei. Jecute beyoi enga añuchopúsu uacáyipiedie guio enga ejnáño uágaja uacacatecãraitigade ome Dupade iji dirode udojo. 8 Dupade ipotigádode jiei ome uaque mu cuchiyi tupúsu ujetiga uacajnoraquei querújna ome ñane. Uacamóño gu uje gosi chijnóra dãjorai enga áyipieraque que déji dãjorai tuté iyoguérique. 9 Ca achóyo díode ujetiga ore chise uaque iji uacaguíjnane. Mu ca ajusécho ore. 10 Omi tu ujetiga Dupade anguresórone chojmara, chojmarane tagu ome Dupade guerani pirajatíga ome dejominónique ayoré. Enga yocajnui u cojñotique uje chirajapise dasocáringome darijogonórone cucha enga ujode ayoréo ore chagutíñame ipesudode. Enga uásejna Dupade gueranone pirajatíga ome yoque enga ore cãra rome ñane. 11 Ujetiga ayorérique chacate ore enga omi tu ujetiga chedu Dupade uruode iji dajei. Jeoga chisa dasaque uñéngo ome Dupade enga chejna raja ome Dupade guerani etotigué. Acueyoi uacasocáringome uacapesudode cucha udore jnese ujetiga pijoque uacanguretigai iji Jesucrísto. Enga diga ore chacãre Dupade gai ome bapesudode udore. Yocajéode u gu ujetiga picotaque Dupade iji deréjnane jnese ome ujopiedaté. Amen. 12 Yijorane uaque a, ujetiga pequetingaqué uajátique chise uaque, jeoga pequetingaqué quedéjnarique u, mu ca óraño uágome. 13 Jé basa ga anínaño uaque. Uacarajáyo gu uje piotiguei e u ujetiga oyo uacaba Crísto. Adi jé u Crísto uje chejnáreque re nanique ome uaque to. Enga pirasitigai a irágu uacajéode jne ujetiga amóño Crísto uringai cuchape jne ujetiga e di. 14 Ujetiga ore uruode gajnarécho aja uaque gu Crísto adode, mu anínaño uágome ore uruode. Uacarajáyo gu uje Dupade Ujopie cuchabe déji uacabáyode. Ore uruode gajnarécho aja Dupade, mu uhuaque u uje uacasíyo Dupade gai. 15 Ajuso uacadode guio ujetiga ca pujuya uaque gosi ome uacuñeque ate gajnarétique. Yojningane u ujetiga gosi ca chujé dojórique ayoré, jeoga toria cucha unejátique, jeoga chijnime dojórique ayoré atígo, jeoga chó deduguéjnane áyipiedie gánique. 16 Mu ujetiga uacuñeque cho daba Crísto adode, enga jé ca pajegátigai chise gosi. Mu gosi doi enga chicota Dupade uje bade u anguretigai ome Crísto. 17 E chise diri ujetiga Dupade chajire dajogasui uyoque yoquipesudode aja quigode. Ujetiga jec ũré enga bajaque Dupade jogasui uyoque ome ajirigode, ¿ja ca gajnarénguipísiráse ome ejode udore ujetiga chajire ore adode aja quigode? Chamáñaje que ore tangaripísi uruode gu. 18 Cucha uajadipise nanique ujetiga Dupade chiqueta ayoré ate omone ore, jecute isocai jé u uje a ca pisocárique cuse jne ome jnani sijnángone ore ujetiga Dupade chiqueta ore. Uje ore chetaque Dupade uruode gu. 19 Ujetiga Dupade ajéo ome baringai pequetingaraque, enga bejnáreque ua iji jmáinie, mu jé bo bapesute arégode údi. Mu ajíñome ua iji Dupade jmáinie. Chamáñaje bapesungóri u Dupade enga a uté susipise beo jne. Uje jé urúo, enga que Dupade uruode toja go.
1 E yuruode gajnengórone u Dupade anguresórone angaránone iji uaquedáyode. Enga a yo ore quique jne. Uje Dupade anguresórone ore angarate yu to enga yimópise Crísto to ome yedodie uje chejnáreque re nanique. Enga ujetiga Jesucrísto diapo jne rĩ ome daringai cuchape enga a jé Dupade anguresórone angaránone uyoque yocajneque uté ingoningájnai to. 2 Jecute yo uacaquique ujetiga oyo áyasadie irodisṍri uje chañurupúsu dachidedie áyasai guio. Uje uacajnei tu ujetiga añuchopúsu uacojode Dupade anguresóño guio to. Uje Dupade ichajapite uágaja ujetiga arocho ore. Enga Dupade que pota ujetiga deroco iroquéode ome uaque, mu pota jeta ejnáño uacacaniratiguéode ome uacasagode cucha. Enga que Dupade pota jetiga beyoi iroquéode gu ore gueranéringui plátai ome uaque. 3 Mu que quigode u go ujetiga oyo uacajosipiedie ome uacarodigode udore, mu ajuso uacadode guio ujetiga ore chirate uacate omone. Uje uacajnúone u áyasadie irodisṍri uje susipise darodedie áyasai guio. 4 Mu yoquirodisõre gatérique cuse to uje sué yoquibai. Ujetiga uté diapo iji yoque rĩ enga a tẽrája uaque jne. Enga gueranone cucha ome uaque a ca beta jne, mu ijõre iji deréjnane jnese. 5 Jé adi u ome jnacarode uaque to, beyoi enga angáchoi uacangaránone to. Uje omi tu ujetiga paraque yógome ñane enga yangacopísi ñane uje: Dupade chetaque dicotárechoquíode enga que chátaja ore go. Mu Dupade chejna dacanirati guéode ome ayoré parágode ore enga chatapísaja ore. 6 Enga oyo paracho iji Dupade iquei enga ca oyo ayoredatei iji uaque. Uacagúsoi Dupa pujnuéngaisṍri jmáinie údi gu. Mu ujetiga adotáyo uágaja enga a chise diri jne ujetiga Dupade chiringare uágaja gaté. 7 Asíñome uacayuguhebátigade ome Dupade jnese. Chamáñaje Dupade áyipie que jnoji uaque go ome dosongaquéode. 8 Ajusópise uacáyipiedie guio, enga beyoi enga arijínaño uaquejode. Uacamóño uje uacamajosṍri Satanas diguiji erámi gu. Enga ucuegode u Dupade anguresórone uyoque iji erámi ujetiga sué yoquibai. Enga gajnui u cuchiso sijnátique uje diguiji erámi údode ujetiga tagu cuchisórique enga chejna. 9 Adotáyo uágaja ome Satanas aringaquéode, enga adotáyo uacanguretigade iji Dupade. Uacamóño gu uje uacajorane Dupade anguresóño iji erámi údode ore cho uaque enga ore chejnáreque raque to ome dajnéone pequetingaquéo. 10 Mu uacarajáyo uje a garósi díningo jne ome uacajnetígo pequetingaquéo. Mu ujetiga eso uacajnéone pequetingaquéo udore uéchai enga jé u jne ujetiga Dupade pésu uaque enga etoque uáguiji adode, enga a eso uacaringane ujñapetaque to. Enga a jogadi tu to ujeta arajáyo uaque ome Dupade. Dupade uté jé u to uje chisi ome dacaniratiguédatéode ome yoque to. Uje jé ibididique yoque nanique uje pota yógome Jesucrísto ujetiga yocajneque uté ingoningájna eyúgojmai to. 11 Yirajágo uje uté ujopie que eruojmárique erãpe cus. Enga jé cho ingoningájnai. Jecute yicoi enga yicotágopise. Amen. 12 Yocujoi Dupade anguresõre ũrei u Silváno ome yajéode, enga a uté u jne ujetiga jno yurusãraque catadéode udojo údi aja uaque. Uje yurúsarome uaque gu ujetiga yo uacaquique. Yigaidi tupo rĩ ujetiga arajáyo uje jé ũrepise Dupade ijnoraquédatéi ome uaque gu icaniratiguéode ome uaque. Yajéode u ujetiga ca acadíchoi udojo quigode, enga adotáyo uáguiji yacajnaquéode udojo jnese. 13 Dupade anguresórone iji Babilónia ore ajéode u ujetiga yurúsãre ore irasitigade to. Uacamóño uje Dupade ajegáite uaque enga ajegáite ore to rĩ. Jé cho yĩjorai Márcos to uje yurúsãre uté irasitigade ome uaque to rĩ. Uacamóño uje yo yabi iji Márcos uté to. 14 Jecucha asayo ñane jmanáyone uje imoi tu uje uacajnóraño ñane. Yajéode u ujetiga pajesereringane jogadipise uacajéode jnese, uje uacajnesṍri u Jesucrísto. Amen.
1 Simon Pédro uyu uje yiji Jesucrísto iroquéode. Enga Jesucrísto iroguipísode uñai uyu to uje chiroque yu aja erámi to. Yurusarane gajnengórone u uaque uje oyo yoque, enga e uaqueso uacanguretíga orerãi ome Dupade to. Chamáñaje Dupa ayipieranguipísi u yoquiquetasṍri Jesucrísto uje guẽrate yocanguretigai ome yoque. 2 Yajéode u ujetiga uacarajatigade quérã iji Dupade, yocangarádejnai Jesucrísto ore. Adi tu ujetiga uacajesereringane querãpise to iji uacajéode enga Dupade chatapísaja uaque. 3 Dupade chingo yoquibijnángaisṍri aja yoque uje cucha datei u enga cucha pitijácho ipesudode to. Uje e yirajagópise uté adode enga Dupade ujopie chatapísaja yoque ujetiga yico yocucuecaringué ichai. Enga que pisoca uñeque chona yoque ujetiga yipecopúsu Dupade adode. 4 Jecute Dupade chichaga cucha orerane, cucha datéode ore aja yoque to. Enga Dupade ichagápiode udore pésu yoque enga e yoco Dupade. Jecute que qué pipotiguéode ome cucha gajnaréngone iji erámi udé suépo yoquibáyode rĩ. 5 Jecute be enga áta bate omone aja banguretigai. Enga áta baringai ayipierãque aja bate omone ore. 6 Ujetiga ayipierãque ua mu be enga ajusipise badode guio to. Ujeta e bajuse badode guio, mu be to enga ca ajnátu to cuchárique rĩ. Ujetiga e adota ua ome bajnéone cucha dacacho mu be enga ajnorapise Dupade to. 7 Que gusu ujetiga ajnorapise Dupade, mu u to rĩ ujetiga caniraque ua ome bojode Dupade anguresóño ore to. A caniraque ua, mu be to enga ajnorapise ore to rĩ. 8 Ujetiga cuchade udojo déji uaque enga ejnáño uaque aja cuchade udore gatuaque, enga a ca cucha bisideque uacanguretigai iji yocangarádejnai Jesucrísto. Enga a pijoque uacacuecaringuei uringai orerãque jne. 9 Mu ujetiga cuchade udore ca déji gosi enga gajnui u ayorei uje chicadígui uje pucheréngai edodie iji uringai edoparique. Enga chicadígui daringai piquetaque. Que áyipie dépoji rĩ uje pĩroque isijnaringué baja casodé. 10 Jecute yijorane uaque, arajáyo uágome uacaringane Dupade ibididique, uacaringane Dupade ajegaicho ore. Ujetiga apijóchome cuchade udojo enga adi tu jne ujetiga ca acayoi quedéjnane ome Dupade. 11 Enga ujetiga eso yocangarádejnai, yoquiquetasṍri Jesucrísto idai jne enga a guesája yui ome uaque. Enga a ore nína uaque jne iji gaté. 12 Yirajágo uje e uacarajáyo Dupade uruode enga uajate uáguiji uacarajatigade ome Dupade uru uréone. Mu yadi jé u yadi uje yujnusina cuchade udore ome uaque, ujetiga ca acadíchoi. 13 Cucha omi tu ome yajéode uje qué yiqueca enga a yujnusina cuchade udore ome uaque, enga a yo uacaquique jne. 14 Chamáñaje yocangarádejnai Jesucrísto e chingo yu uje e idógosi yitoringai. 15 Jecute yejna yu aja yacajnaquéode ome uaque. Yigaidi tu gu ujetiga ajnusináño cuchade udore iji yitoringai quigade. 16 E yacáco uágome yocangarádejnai Jesucrísto ujopie cuchabe. Yacacopo uágome rĩ uje a diapo jne rĩ. Enga que cachi yoquipesute yocojñane udore ome uaque. Uje yimongopise Jesucrísto uringai cuchape ome yoquedodie nanique. 17 Yimóngo nanique uje dayé Dupade chicota ome ingoningájnai. Enga yudúco uje dai Dupade catecã́ri enga uruode ueradéjna nanique enga chojninga: “Yabi u uté. Yijnorai yape u. Jecute yirasiguipise yu ome.” 18 Uyoc u nanique uje yudúco darade nanique uje tṍraji gaté ome yoque uje yugúcoji yocangarádejnai Jesucrísto gari iji cucarãte puyai ójo nanique. 19 Uje jé ũré yocatatagode Jesucrísto acho ome uaque to, uje jé chopise Dupade uruode atatasórone jnani bajácho ore urusarane quigode uje jé jogate aro nanique. Enga omi tu ujetiga angachopísi ore urusarane. Uje ore urusarane gajnui u papósi uje déji ijnangunúraque, mu chijñate dejode gáyode. Ujetiga gosi chajiripise Dupade uru uréone udore enga diga chiraja quigode enga gajnui tu ujetiga guédo diríngoro e tocade ome gosi enga chijñate áyipie enga díreca to. 20 - 21 Yipota ujetiga arajáyo bajaque uje Dupade uruode atatasórone jnani bajácho que ore irajatigade tṍraji ore gotique. Jé cho ore uruode rĩ uje que tṍraji ore uringane jnutiminore. Jé basa ga jnanione udore ore chisi ome daringai ayoré jnese nanique gu ome Dupade. Jecute Dupade Ujopie cho jetiga ijocayaque ore aja quedéjnane enga ore atatagode garani upúsu Dupade nanique. Jecute cucha ueradi u ujetiga arajáyo udore quigode: uje que togome gosi ujetiga chiraja Dupade uruode bisideque. Gusu ujetiga Dupade Ujopie chacate gosi ome.
1 Que gusu udore Dupade uruode atatasõre uréone nanique mu jnanione déji Israel gosode nanique to uje ore cho Dupade uruode atatasõre iji raque mu urupatáquechoquí ore. Adi jé u iji deréjnane udojo uje pacadisõre tágode déji uacajade to. Ore chacate dojode ayoréo ome dáyipie gajnarénguenie mu ore pógu daringane taquechoqui ome dojode ayoréo. Enga ore chotigase daquetangóri, yocangarádejnai Jesucrísto. Mu a ca ore chapite jne ome dasocade udore uje a jĩraque Dupade ujuyaquei chise ore jne. 2 A uásejna ore jne ujetiga ore nóna ore enga ore chirate ore ate gajnaréngone. Mu uje Dupade uruode guetesórone ore chimo ore adode enga jĩraque ore chujñieta Dupade uru uréone uje chatata Jesus adode. 3 Jnanione udore ore gaidi tu gu ujetiga asíyo ore iji uacaplátadie uje ore chacate uágome dacajnaqué tágode. Mu a ca bisitique cuse ome udore ore uje Dupade a cho dajuñame ore jne. Uje dimane Dupade áyipiedie ome ore nanique ujetiga chujé ore jne. 4 Yirajágo uje Dupade que chĩro daroque gaté minórone ore isijnaringuéone nanique. Mu tṍra ore aja gajño pioi. Enga noñome ore iji ijnangununie, enga chigaru ore ome ojnaquerodie enga suru ore gai iji te, jé aja ujetiga chajire ore adode aja quigode. 5 Adi jé u nanique uje Dupade que chĩro Noé urásade ore isijnaringuéone to nanique, mu chiroque gue dequejnangóri aja ore nanique uje sijnaque jnanione udore gu. Enga gusu Noé uje Dupade chiqueta nanique, jé aja jogasui ore uje gare ore iji yijmanuñai. Mu Noé jecucha chacate darásade nanique múñi ujetiga ore chécãre datígo enga ore doi Dupade adode to. 6 Adi jé u ome ore idáyode Sodóma, Gomórra ore to. Uje gajnareque ore adode, enga Dupade chiroque dajuyaqué pioque aja ore nanique. Jecute cho puchucurúode ore idáyode udore iji quigade. Jecute disi ejo sijnángone a ore chiraja to jne uje a Dupade isocai jé u uté jne ome ore to. 7 Yirajágo uje jnani bajai Lot déji Sodóma to nanique, mu Dupade chijnime nanique uje cáma ujuyaquei chise ore idai Sodóma. Chiraja gu uje jnani paraque Lot nanique, enga chopise dáyugu darásade ore ate gajnarenguipísode. 8 Yirajágo Lot uje paraque nanique. Jecute uje chudute joroque darásade ore uru gajnaréngone, enga chimo joroque ore ipesute gajnaréngone enga ũroso jorógome iji dirode jnese. Mu uté áyipiedie ueradei. 9 Yimóngo uje Yocangarádejnai chiraja dasocáringome dajnorasórone ore ujetiga chiqueta ore iji cucha gajnaréngone jmáinie. Jé basa chiraja dasocáringome ate gajnaréngone ore to. Enga ore gajnéone pujuyaquéo dimane ome ore yui ujetiga tocade ome ore iji diri tuté jne ujetiga chajire ore adode aja quigode iji. 10 A Dupade cho dajuñame pisijnaringuéone ipesungórone ore jnese jne. Mu cuchiyi tupúsu udore ore uje que ore áyipieraque jnoji punganingane, jé aja udore ore uje ore tagu Yocangarádejnai iroquéode aja. Udore ore uje que ore chajéngome cuchárique, mu ore chedu dasoca gajnaréngone. Uje que pisadodéringárique déji ore ome gaté jogonórone cucha mu ore uruode gajnarécho aja ore. 11 Yirajágo uje Dupade iroque gaté minórone ore sué jnanione udore ore gáyode ome daringane cuchábio, mu pajé dotáringárique que déji ore ajénique go. Jecute uje ore chatata dojode gaté minórone ore adode ome Dupade nanique, mu que ore dojnóngaja ore gotique. 12 Yirajágo uje cuchisode que ore áyipieraque cuse enga ore ucuecaringuei gajnengórone u raque. Uje ore base iji datedie, mu ore quique obiréjnai u ujetiga pisaque ore enga chuque ore. Enga jnani sijnángone udore ore chopise cuchisode to. Uje ore uruode gajnarécho aja cuchade, mu que ore chiraja cuchade udore quitígo go. Enga a jé ore cho cuchisode udore jne, uje ore quique obiréjnai u ujetiga chuque ore to. 13 Enga jé tiógara ujetiga ore chejnáreque re jne. Chamáñaje ore bade u dajuyaquéode ome dojode ayoréo gu. Chiese pininaquéode irágu ore ajéode iji deréjnane udojo uje ore chejna rángaja erámi jogosórone cucha. Enga uje ore cháta raja uacagapídode enga jé ate uje ore irasique raque iji uacajade, mu ore áyipie gajnarénguenie jé jogate ore uje ore chãra uaque. Enga gajnarenguipise uje uacajuécho uacáguedie ome udore, enga pajegátigai jogadi urásu ome uaque. 14 Que togome ore ujetiga ore chidota re ome chequé quedéjnanie. Que ore cho dajñare ome dapesudode cucha gajnarécho. Ore ucuegode u ore uje garósi ore anguretigai ujetiga ore chirate ore aja pisijnaringuéone to. Ore chirajapise dasocade to ujetiga ore chise dajegaidode cucha ome raque. Mu Dupade e cho darúja ore ome ore ate gajnaréngone udore. 15 Ore chiraja joroque Dupade adode, mu ore chicai quedéjnane ome. Jecute ore cho ayoré edojíseode. Ore gajnui u jnani bajai Balaam to uje jnani bajai Beor ujnacare nanique. Uje jnani bajai tuté ijnoranie u dajegaidedie pláta bisidéguedie nanique. Enga ajéode u ujetiga chijna ore iplátadie ome ipesudode cucha gajnarécho. 16 Burica quedéjnane que ore narare go, mu jnani bajai Balaam tuté gachidi burica quedéjna narare nanique enga chaquĩ́ra dachisṍri ome ate gajnaréngone. Enga uruode chopise ayoréode uruode uje narare. Jecute Balaam todo ujetiga jé jno daqui erãpe údi ome dãrusoringuéone. 17 Jnanione udore uje ore chacája uacajade ome daringaquéode ore gajnunie u gajñonie uje íjnoque yodi iji, enga cucha bisidéguei. Ore gajnunie upo gue abujadie rĩ uje que yotique tṍraji, mu ore déji gaté bisideque enga emi chubúchu ore aja quedéjnane. Mu Dupade e pésu jnanione udore qui enga ijnangunu cuchábedie u. Enga a ore charidi u uté jne iji deréjnane jnese. 18 Enga udore ore uringane dicotárechoquío, jé aja ore uringane áyipie yúcho pijógome ore uruode quigode. Enga ore angúroméone u pipotigué ayoréode ome cuchade, jé aja cucha gajnaréngone uñane rĩ ujetiga ore pésu pisijnaringuéone unéningai ome Dupade anguresórone. Yojningane u ore uje Dupade e ijnimique ore iji ate gajnaréngone ore ajéode nanique. 19 Chiese ore gaidode u ujetiga ore chirame dacadigode iji cucha paréngone jmáinie, uje chiese igarique ore. Mu cachi ore urúo. Uje igarigode u ore. Chamáñaje ore ipotiguéode igarique ore gu, enga e que toc ujetiga ca ore jno dasijnaringuéone údi. Chamáñaje cucha gajnarétique sué uñeque gai, enga e que toc ujetiga ca pésu. 20 Ujetiga gosi chiraja yocangarádejnai, yoquiquetangóri Jesucrísto adode enga cho ujetiga cucha gajnaréngone e juseque gosi. Enga que doi enga chisápo erámi jogonórone cucha unétique rĩ. Mu ujetiga uté gosi chajni aja dayágode cucha gajnarécho, cho ujetiga cucha gajnaréngone udore isagapo uté gosi rĩ. Enga a doi dateringane ome date gajnareque bajade. 21 Cucha arei urásu ome uté gosi ujetiga ca chirajárase Dupade ajegaidode cucha ueracho ome yoque. Uje Dupade ujuyaquei a ca chajire re ome udore ore jne uje ore chiraja Dupade uru iyiejnane ujetiga ore doi quigode, mu ore chicai quedéjnane ome. 22 Jé ũré ore uruode uje ore chojninga: “Tamocoi u uje pogai, mu quigade ga tagúpo dapogaidode rĩ. Adi jé u ome yãcoré quedéjnarique rĩ uje ore churu gai, mu tõrapo raja pacataringuéone rĩ enga chumuchase re iji pacataringuei.” Ujetiga gosi chiraja Dupade uruode, mu chajnésaru daquigade enga ore gajnúone u tamocode, yãcoré quedéjnane ore.
1 Yijorane uaque a, e gare yurusarane ome uaque, ga ejoi u udé. Mu yo uacaquique iji yurusarane udore jnese. Uje yigaidi u gu ujetiga uacáyipiedie dépisiji Dupade adode gatuaque. 2 Ajnusináño Dupade uruode atatasórone, jnani bajácho ore urusarane qui cásodicaite uje jnanione udore ore chedu Dupade iji dajéode nanique. Enga ajnusináñopo rĩ Yocangarádejnai, Yoquiquetasṍri iroquei to rĩ uje iroguipísode chacate uágome to icáite. 3 Adóningachopísa cuchade udore to: a chise dirode udojo eruei yui jne enga jnanione uñéngo a ore chujñieta Dupade uruode. Enga a ca ore chucué cucha arégode jne, mu ore ucuegode u dapotiguéode ome cucha gajnaréngone gatuaque. 4 Enga jnanione udore a ore chujñieta Jesucrísto diringai yui enga a ore chojningame uaque: “¿Jé cho rique Crísto diringai? Uje jé urúo nanique múñi ujetiga diapo iji jnumi tudé rĩ. Que cuchárique chécãre re iji erámi tudé gotique ãrie. Mu jé cho yocai cásodicaite ore ucuecaringuei cásodicaite. Jé cho to erámi taningápisi uje quene pipesute cuchade nanique.” 5 Mu udore ore que ore áyipieraque déji to uje Dupade pésu gatajnoquei nanique, erámi ore iji taningápisi. Uje yodi chaco erámi gai iji taningai nanique, mu Dupade jé urúo nanique enga jnumi chicáji gaté. 6 Mu udojo quigade enga Dupade chiroque gue dequejnangóri enga yodi chacopo erámi gai nanique rĩ. 7 Enga Dupade e pésu dáyipiedie ome yoquiyaridi jnupe udé, jé aja yocajiri tuté gatajnoqué. Ujetiga doi daruode quigode enga pioi a tagu erámi, jé aja gatajnoquei jne. Enga a cucha dacadode udore tocade jne ujetiga e chise diri ujetiga Dupade chajire erámi unirisórone ore adode aja quigode. Enga jogadi a u uté to ujetiga pujuyápise sijnángone ore jnese jne. 8 Yijorane uaque a, ca acadíchoi to uje Yocangarádejnai que jnátu cuchárique. Dire chojmarai gajnui u sequeredie uje 1.000 ome uté. Jé basa ga sequeredie ujetiga 1.000, mu gajnui u dire chojmarai ome uté. 9 Chiese que jĩraque Yocangarádejnai doi daruode quigode ome otigayasórone udore. Mu que quigode u gotique. Mu Yocangarádejnai qué chirote yoqui jetiga yanguretágo to jnese. Que ajéode u gu ujetiga yocuñeque bijna ome. Mu ajéode u ujetiga yécãco yocadode jnese. 10 Ujetiga ore cha dangoroné ome, mu a chise diri ujetiga Yocangarádejnai e di. Enga gajnui u oriechoqui uje que puninamate iji dejátique. Mu ujetiga e chise Yocangarádejnai diringai dire enga a ore chudute cucha jocarã́quedatéi jne ujeta chajuque ore agutedie, enga jĩraque gatajnoquei, jogonórone cucha ore íjnoque. Jé aja erámi, jogosórone cucha ore. Pioi a chejna ore jnese. 11 Yicoi enga yañuco yoquio, enga yoquijnoraquei ome Dupade tate to. Yirajágo gu uje Dupade ujuyaquei a jĩraque chejna cuchade jnese jne. 12 Uje Aqué uacarocho Dupade diringai dire yui enga acueyoi uacasocáringome ujetiga amácho Dupade iroquéode aja quigode jnese. Jogadi u uté gu ujetiga diapo jne rĩ. Yirajágo uje pioi a chejna gatajnoquei jne iji diri tuté. Enga pioi a chãrei cuchade jnese jne iji jnumi, gaté ore enga noña enga yote ome pioi dotáningai. 13 Mu Dupade anguresórone uyoque yiroco erãpe ichai yui, gatajnoqueque ichai yui rĩ. Uje Dupade jé urúo nanique gu ujetiga chisi ome yoque. Enga a ca cucha gajnarétique chacája erãpe ichai tuté. Gusu cucha omone iji. 14 Jecute, yijorane uaque a, uje qué uacarocho cucha dacadode udore yúode enga acueyoi uacasocáringome ujetiga gusu pajesereringane iji uacajéode. Uacagaidi u gu ujetiga diga Dupade chise uaque enga ueque uágome pisijnaringuéone jnese enga ca uacayoguérique cusipise go. 15 Yipota ujetiga arajáyo udore quigode: uje Yocangarádejnai cáma di gu uje qué chirote yoqui ujetiga chiqueta yoque to. Yoquĩjorai Páblo urusarane quigode jé u udore to. Enga yirajágo uje Dupade chisi ome payuquetotiguei ome Páblo uté to. 16 Enga Páblo churúsãre cucha dacadode udore quigode iji darusarane jnese ome uaque, mu uajácho ujetiga yirajágo purusarane udore uñane quigode. Jecute jnani ducusuéchoquíode uñane uje que ore chiraja cuchade, ore doi enga ore chécãre Páblo urusarane udore quigode. Enga jé ore adi u to ome ore urusarane Dupade urúo uñane, ore chécãre udore quigode to. Mu a ore cho daba damuchayade ome Dupade uruode enga a pujuya ore to. 17 Jecute yijorane uaque a, uje e uacarajáyo uje ore chumuchase Dupade uruode quigode, beyoi enga ajusópise uaqueo ujetiga ca pisijnaringuéone ajnangórone ore chãra uaque to ome dacajnaqué tágode. Uacagaidi u gu ujetiga ca acóraño enga ca bijna uacaringane Dupade anguresõre etoque ome uaque. 18 Yajéode u ome uaque ujetiga arajáyo gaté yocangarádejnai, yoquiquetangóri Jesucrísto ijnoraquédatéi ome uaque, enga aquéraño iji uté adode. ¡Beyoi enga yicotágo Yocangarádejnai jé iji diri tudé, jé iji deréjnane jnese to! Amen.
1 Yurusarane unojo júdi u Jesucrísto uje chacate ore ome pucuecaringué eyúgojmai quigode nanique. Jesucrísto uté jé jogate nanique uje quene pipesute erã́tique. Enga yijorane ore uyoque yipáñangopísiji uté to nanique. Enga yangácoi ojñane to. Yisagopo uté to rĩ ome yoquijmáinie, enga yajico ipesudode cucha to nanique. 2 Uje pucuecaringuei guẽrasṍri Jesucrísto chingo raja yoque nanique, enga jé u uje yatatago adode ome uaque. Enga yocatatagode júdi u pucuecaringué eyúgojmai quigode, uje pucuecaringuei tuté guẽrasṍri déji dai Dupade gari iji taningai, mu quigade enga chingo raja yoque to. 3 Yingongo yocududigode, yoquimone Crísto acho ome uaque ujetiga átayo uágaja yoque to ome uté adode. Uje jé ũrepise yoque uje e yátago yógaja yocai Dupade, ujnacari Jesucrísto ore enga jé yitojmárango jnese. 4 Enga urúsãco yocurusarane unojo ome uaque gu ujetiga arajáyo quigode to enga yoquininaquéode tadipíso jnese. 5 Jesucrísto jé guẽrate yoquingomei cucha uné ome uaque. Enga u uje direcaringuei u Dupade enga que ijnangunúraque cunguésõre uté. 6 Ujetiga yocuñeque chojningárasa: “E yáta yu aja Dupade to,” mu que cha dasijnaringuéone, enga gajnui jé u ujetiga jé jogate ijnangununie ajéode. Jecute yirajágo uje taque uté gosi ome uruode, ipesudode ore jnese. 7 Mu ujetiga yicoi Dupade adode enga gajnui u ujetiga yugúcoji Dupade gari iji direcaringuei. Enga jogadi u uté uje yocujode Dupade anguresóño uyoque yoquirasique ñane. Enga jogadi u to uje Dupade ujnacari Jesucrísto iyoi churu yoque iji yoquisijnaringuéone jnese. 8 Mu ujetiga yojnico: “Que yisijnaringuérique cuse,” enga yocarane jé u yoque, enga taque yoque. 9 Mu ujetiga yingongo yoquisijnaringuéone ome Dupade, enga Dupade a pésu cucha arégode ome yoque jne. Uje a chicadígui yoquisijnaringuéone jne, enga a yocuringai icha jogadi tu iji quigade jne ome yoquisijnaringuéone jnese. 10 Mu ujetiga yojnico: “Que yate gajnarétique cuse,” enga yirajájo yoquisijnaringuéone enga cho ujetiga taque Dupade. Enga obiréjna uje udore gosode que ore chimeseripise Dupade uruode go ome daruode udore. Chamáñaje Dupade chingome yoque gu uje pisijnaringuéone déji uyoque jnese.
1 Yabode uaque a, yurúsãre unojo ome uaque gu ujetiga ca apéso pisijnaringuéringo. Mu ujetiga uñeque pésu pisijnaringuérique, yocangaráni cuse ome unojo ujetiga catecã́ri yocai Dupade ome yoque. Enga yocangaráni uté u Jesucrísto. Enga uté áyipiedie que gajnareque quitique go. 2 Enga Dupade angúromei u Jesucrísto uté adode ujetiga chĩro yoquisijnaringuéone. Mu que gusu yoquisijnaringuéone uje chĩro, mu jé u erámi unirisórone ore isijnaringuéone jnese to rĩ. 3 Ujetiga yipéco Dupade ojningane cucha, enga a ca potigayaque yoque jne uje yirajágo Dupade. 4 Mu ujetiga uñeque cho darajáguiji Dupade marínga, que pésu uruode quigode enga taque uté, enga que ũré gotique. 5 Jé basa enga gosi uje pésu Dupade ojningane cucha enga imoi u uje Dupade ijnorangóri upúsu uté gosi. Enga a yirajágo gu unojo jne uje Dupade anguresõre yoque ujetiga yicoi ojningane cucha. 6 Ujetiga jé ũré gosi uringárique Dupade anguresõre, enga uté gosi gajnei u ujetiga ipesudode cunguesõripísi Jesucrísto ipesudi cásodicaite jne. 7 Yijorane uaque a, que yurusarane gajnengónique piroqué icha gotique. Mu jé u piroqué baja casicai uje uacadúcho to nanique, jé iji taningápisi uje ore chacate uágome Dupade uruode. 8 Mu cho ujetiga piroqué icha uté uje yurúsarome uaque iji yurusarane unojo. Enga piroqué ichai tuté gaisṍri u Crísto nanique, jé basa gaisórone u uaque to iji deréjnane unojo. Chamáñaje ijnangununie e idája iji yoque enga diga a bijna jne ome yoque. Jé basa e direcaringué ũrepísi u uje e chijñate yoquibáyode. 9 Gosi ujetiga chojningárasa: “Yugúsiji direcaringuei,” mu chetaque dãjorai, enga que déji direcaringuei gotique. Mu jé qué jogate ijnangununie. 10 Jeque gosi uje chijnóra dãjorai, uté gosi u uje déji direcaringuei enga que cuchárique cuse ujetiga chorei uté gosi iji pisijnaringuérique. 11 Mu gosi ujeta chetaque dãjorai, uté gosi déji ijnangununie enga pésu ijnangununie jogosórone ore adode to. Enga que chiraja daquitique uje cho edoparigode iji ijnangununie ajei. 12 Yababode uaque a, yurusarane gajnengórone u uaque uje Dupade e chicadígui uacasijnaringuéone gu uacanguretigai iji Jesucrísto. 13 Jnanione uaque a, yurusarane gajnengórone u uaque to uje uacamoñopise Jesucrísto to nanique, uté uje jé jogate nanique iji erámi taningane. Jnacarode uaque a, yurusarane gajnengórone jé u uaque to uje uacajnuéño Satanas gai ome uacanguretigade. Yababode uaque a, yurusarane gajnengórone u uaque jnese to uje uaqueso yocai Dupade to enga uacarajáyo uté to. 14 Jnanione uaque a, yurúsãre unojo ome uaque gu uje uacarajáyo uté uje jé jogate nanique uje cáma erã́tique cuse nanique. Yurusarane gajnengórone u jnacarode uaque to uje e uajate uáguiji Dupade adode uje uacamesecho Dupade uruode iji uacáyipiedie gu. Enga uacajnuéño Satanas gai ome uacanguretigade. 15 Enga yósi te ome uaque: ayáyo ajnóraño erámone jogosórone cucha. Uje gosi chijnóra cuchade unojo enga obiréjnapise uje que chijnóra yocai Dupade gotique. 16 Yojningane erámone jogosórone cucha u: pipotigué ayoréode. Jé u to pitaráyimeone cucha. Jé u to rĩ uje ayorérique chucué daringárique ayoredaté. Que cuchade unojo uñeque tṍraji Dupade gotique, mu ore garanone u erámone unojo jnese. 17 Mu erámone unojo a jĩraque íjnoque jne, jé aja cucha gajnaréngone jnese uje déji. Mu gosi uje pésu Dupade uruode, a eca iji deréjnane jnese jne. 18 Yababode uaque a, e yugúcoji deréjnai erueminórone. A e uacadúcho to jõ uje Crísto umajosõre cuchábi a di jne iji erámi eruei yúabi. Enga e uásejna Crísto uté guetesõre pimone iji deréjnane unojo. Jecute yirajágo uje e yugúcoji erámone eruei ejábi. 19 Jesus guetesórone udore ore cháta raja Dupade anguresórone yoque to nanique, mu quigade enga ore jnoji yocari. Jecute yirajagópise uje que ũrepise ore ome daringane Dupade anguresõre. Chamáñaje a jé ũrerase ore nanique enga a jé qué ore dérasiji yocari iji deréjnane unojo to. Jecute uje ore jnoji yocari enga e que potigayaquérique dépoji yoque rĩ uje unejanguipise ore ome Dupade anguresórone uyoque. 20 Mu Dupade anguresõripise uaque. Jecute Crísto chisi ome dajopie Espíritu Sánto ome uaque, enga pirajatigai déji uaque jnese. 21 Yiraja uje uacarajáyo cucha uréone quigode. Jecute que yurusarane quigode u go ujetiga ca arajáyo. Enga uacarajáyo to uje que paringaquérique tṍraji cucha uréone ore jnese. 22 ¿Yoco taquechoqui iji gosi a? A yoco taquechoqui iji gosi jne ujetiga chotigase Jesus ome uringai Dupade utocáite Crísto. Obiréjna uté gosi uje Crísto guetesṍri u. Chamáñaje chotigase yocai Dupade enga chotigásapo Dupade ujnacari Jesucrísto to rĩ. 23 Gosi uje chotigase Jesus uringai Dupade ape enga que cuchárique déji uté ome yocai Dupade to. Mu gosi uje que otigayaquérique déji Jesus ome uringai Dupade ape enga yocai Dupade déji uté gosi gari to. 24 Jecute ca uacadudigode pacajnaqué bajácho jnoji uacajéode. Ujetiga uacajnéone pacajnaqué bajade udore jogadipise uacajéode enga a jé u jne ujetiga apúyoja Dupade, Ujnacari ore jnese jne. 25 Enga a yocajneque Jesucrísto ingomei pucuecaringuedaté jne. 26 Jnanione uñane ore pota chãra uaque gu. Jecute yurúsãre yurusarane unojo ome uaque. 27 Mu Jesucrísto guerané dajopie Espíritu Sánto déji uaque ujetiga chacate uaque ome cuchade jnese. Jecute jé ca uacáyipieraque déji pacadisõre uñeque. Uje Crísto Ujopie Espíritu Sánto acajnaquéode jé ũrepíso, enga que paringaquérique déji. Jecute jé beyoi Crísto Ujopie Espíritu Sánto acajnaquéode ome uaque enga apúyoja Crísto. 28 Yababode uaque a, e yo uacaquique ujetiga jé apúyoja Crísto. Adi tu ujetiga ca yagutúgo yógome uté iquei jne ujetiga diga chiqueta raja yoque. Enga a ca yocuñeque chiraja dajegátigárique jne ome uté. 29 Uacarajáyo Jesucrísto uringai areque. Jecute uacarajayopo Dupade atígo ore to rĩ ome ore uringáringo cucha arégode ipesungóño.
1 ¡Yocai Dupade chijnorapise yoque jõ! Jecute juéga ujetiga yoquíode u Dupade abode. Mu que cachi yoquío. E Dupade abipise yoque. Jecute erámone jogosórone que ore chiraja yocuringane Dupade abío. Chamáñaje que ore chiraja yocai Dupade gu. 2 Yijorane uaque a, e Dupade ape yoque iji deréjnane unojo, mu cáma yimóngo yocatígo jne ujetiga e yugúcoi gari iji gaté. Mu yirajágo uje Jesucrísto a diapo jne rĩ, enga a jé u jne ujetiga yocópise uté jnese jne. Uje a yimóngo uté jne enga yipáñangopísiji jne. 3 Udore ore jnese uje ore chirote Jesus diringai yui, enga ore suse deo iji dirode jnese. Chamáñaje ore ajegaidi u ujetiga ore chopise Jesucrísto ome uringai ueque ome pisijnaringuéone. 4 Mu ore jnese uje ore pésu pisijnaringuéone ore tagu Dupade iroquéode aja. Uje pisijnaringuéone u ujetiga uñeque chó Dupade iroquérique gánique. 5 E uacarajáyo uje Jesucrísto chise erámone nanique gu ujetiga chĩro yoquisijnaringuéone. Uje que pisijnaringuei unéraque déji uté. 6 Jecute ore jnese uje ore cháta rágaja Jesucrísto enga que ore áyipieraque déji pisijnaringuérique. Mu ore jnese uje ore áyipiedie que jnoji pisijnaringuéone, enga obiréjna uje que ore chimo Jesucrísto gotique, enga que ore chirajapise atique go. 7 Yababode uaque a, ajuso uaqueo enga ca pãraque uaque. Uje gosi a pésu cucha arégode enga imoi tu uje areque gosi. Uje ajnai tu Jesucrísto uringai areque. 8 Mu uje gosi pésu pisijnaringuéone enga uté gosi ajnai tu Satanas. Uje pisijnaringuéone ipesungore Satanas jé iji erámone taningane. Mu Dupade Abi di gu unojo ujetiga chinoningase Satanas ipesute gajnaréngone iji erámone unojo. 9 Dupade atique que toque ujetiga áyipieraque jogate pisijnaringuérique. Dupade ape gu uje gajneque Dupade guerani pucuecaringué. Jecute e que toc ujetiga qué chajnerame pisijnaringuéone adode. Chamáñaje Dupade ape gu. 10 Jecute Dupade abode que piraque iji ayoréode. Satanas ajnangórone que ore piragápo rĩ. Uje gosi a ca chijnóra dojórique ayoré, enga que pesapo date goningárique rĩ, enga choquipísiji guesi uje Dupade que ape uté go. 11 Uacadúdi Dupade iroqué jé iji taningane nanique u uné: ujetiga yijnórango ñane jnese. 12 Jé ca yiraco jnacare bajai Caín. Uje Satanas irasingore uté enga que áyipieraque jnoji adode. Jecute doi enga chujé dãjorai Abel nanique. ¿Jõrai báringome uje chujé a? Bade u dapesute arégode. Uje Caín ipesudode gajnarécho gu. 13 Jecute yijorane uaque a, jé ca chajuque uacagutedie ujetiga erámone jogosórone ore chetaque uaque uje jé ore ate uje ore chetaque yoque gu. 14 Uyoque enga e yugúcoji pucuecaringué gatei iji pitoringai uéchai, ujetiga jé ũré enga yijnórangopise yoquijorane ore. Mu a ca yijnórango yoquĩjorárique enga gajnui tu ujetiga que yugúcoji pitoringai uéchai go. 15 Jecute gosi ujetiga chetaque dãjorárique, enga gajnui tu ujetiga jé yuque dãjorai. Enga ujetiga gosi chujé dojórique ayoré enga obiréjnapise uje que pucuecaringué eyúgojmai déji uté gosi ajei. 16 Irajágo pijnoraquei gu Jesucrísto isocai uje uté tẽra re ome yoque enga toi ome yoque. Jecute areguirase to ujetiga Jesucrísto anguresórone uyoque yoco yoquiba yoquijorane to. 17 Ujetiga cucha piquetangórone déji uñeque marínga, ca chosõre dãjorárique ujetiga jmáta ome cuchárique ¿jé chorási rique ujetiga uté gosi cho Dupade ijnorangore iji re? 18 Yababode uaque a, yoquijnoraquei jé ca u cuchade uje cachi garãte yoquibijnanone. Mu jé ũrepise yoquijnoraquei enga pijóguiji yocadode ome ñane. 19 Enga yoquisocai urásu uné jne ujetiga yirajágo yocuringane ũrepíso, enga yirajagópise yoque iji Dupade iquei jne. 20 Mu a yocáyipiedie chotigase yoque enga taguripísi Dupade uje sué yocáyipiedie gáyode jnese. Uje uté chiraja cuchade jnese. 21 Jecute yijnorane uaque a, a ca yocáyipiedie chiraja yoquiyoguérique, enga jé u uje yirajagópise yógome Dupade. 22 Enga a Dupade chisi ome yoquimeserane cucha jnese ome yoque jne ujetiga yutagoi. Yicoi uruode gu, enga yipéco uté irasigode cucha gatuaque. 23 Uje Dupade iroquei tu ome yoque ujetiga yanguretágo Abi Jesucrísto enga yicoi uté ojningane cucha. Enga uté ojningai tu ujetiga yijnórango ñane. 24 Uyoque uje yicoi Dupade iroquéode, uyoque u uje yátagopise yógaja uté, enga uté déji yoque to. Enga yirajágo uje uté déji yoque gu guerané dajopie Espíritu Sánto ome yoque.
1 Yijorane uaque a, jé ca angáchoi ore jnese ujeta ore cho Dupade uruode atatasórone iji raque. Mu adóningachopísa ore adode bajaque ujetiga Dupade Ujopie u uje déji ore gari, jeoga pujopie gajnarengue u. Uje uásejna arapatáquechoquíode uje ore déji erámone iji deréjnane unojo. Uje chiese ore garani tu Dupade ujetiga ore chatata uruode ome yoque. 2 Mu a arajáyo Dupade Ujopie Espíritu Sánto gajnesórone ore jne: uje ore u gu uje que ore chotigasipise uje Jesucrísto chopise ayoré iji re icáite, enga chise erámone unojo. 3 Jé basa gosi ujetiga chotigase Jesus uringai Dupade irógaja erámone nanique, enga Dupade Ujopie Espíritu Sánto que déji uté gosi. Mu pujopie gajnarengue déji uté gosi enga chetaque Jesucrísto. E uacadúcho to uje pujopie gajnarengue uaté a di iji erámone jne. Mu e déji unojo gajneri. 4 Yababode uaque a, uacajnesṍri u Dupade, enga e uacajnuéño taquechoquíode udore ore gáyode ome uacaringane Dupade abío. Uje Dupade guerané dajopie ome uaque suépise pujopie gajnaréngone oisórone ore gáyode jnese iji erámone unojo. 5 Uje erámone unojo jogosõre udore ore, enga gusu ore icarane u cucha dacadode iji erámone unojo. Jecute ore ujode erámone unirisóño ore tangári ore. 6 Mu Dupade urásade u yoque. Enga uté gosi uje chiraja Dupade enga tangári yoque. Mu ujetiga ca Dupade urása gosi enga que tangári yoque to. Jecute quigode u unojo ujetiga yirajágo uje Dupade Ujopie ũrepise déji gosi jeoga pujopie tague u uje déji gosi. 7 Yijorane uaque a, yocajnei u ujetiga yijnórango ñane uje pijnoraquei ome ñane garani u Dupade. Jecute ujetiga pijnoraquei déji gosi enga obiréjna uje Dupade ape uté gosi enga chirajapise Dupade. 8 Que Dupade irajasõre ayorérique ujetiga ca pijnoraquei déji uté ome dojode ayoréo. Uje pijnoraquei jé u Dupade gu. 9 Dupade chingo dajnoraquédatéi ome yoque gu Ujnacare ugurui uje chirógaja erámone unojo nanique. Gaidi u gu ujetiga erámi unirisórone uyoque yico pucuecaringué gatei gu uté adode ome yoque. 10 Que pijnoraquei pijoque gu yoquijnoraquei ome Dupade. Mu pijoque gu Dupade ijnoraquei ome yoque. Uje chingo yoque dajnoraquédatéi uje chiroque dabi aja erámone nanique ujetiga cho yoquisijnaringuéone oré ome datoringai. 11 Yijorane uaque a, ujetiga Dupade ijnoraquei cucha daté ome yoque, jé tiógararása to ujetiga anguresórone uyoque yijnórango ñane to. 12 Que ayorérique pañáji Dupade ome dedodie go, mu Dupade pijóguiji yoque ujetiga yijnórango ñane. Enga Dupade ijnoraquédatéi chimate re aja guesi iji yoque ujetiga yijnórango ñane. 13 Dupade chisi ome dajopie Espíritu Sánto ome yoque gu ujetiga ore chiraja jnese uje déji yocari, enga yugúcoji uté gari to. 14 Enga jé uyoque u uje yimongopise Dupade Abi to nanique. Enga e yingongome ore jnese uje yocai Dupade iroque uté aja erámone unojo gu ujetiga chiqueta yoque ome adode. 15 Gosi uje que chotigase Jesus uringai Dupade Ape, uté gosi dépisi Dupade gari, enga Dupade déji uté gosi gari to. 16 Uyoque enga e yirajágo uje Dupade chijnóra yoque, jecute yanguretágopise Dupade. Pijnoraquei u Dupade, jecute gosi uje jno pijnoraquei uté adode údi obiréjna uje uté déji Dupade gari enga Dupade dépoji uté gari to rĩ. 17 Uje yocacãrájai uyógaja Jesucrísto iji erámone unojo enga yocucuei tu ujetiga yoquijnoraquei ujñapetaguipise. Yoquigaidi u gu ujetiga ca yagutúgo yógome Dupade iquei jne ujetiga diga chajire yocadode aja quigode. 18 Uje pijnoraquei déji yógome gosi enga e que yitodógo uté gosi. Uje pijnoraqué ũrei déji gosi enga cho ujetiga tṍra pisadodéringai aja guesi iji gosi. Mu uje pisadodéringai qué déji gosi enga a cho dajuñame uté gosi jne. Jecute yirajágo uje pisadodéringárique qué déji gosi enga cáma uté gosi chijnorapise Dupade. 19 Uyoque enga yijnórango Dupade gu uje Dupade ijnoraque bajaque yoque nanique. 20 Mu ujetiga gosi chojninga: “Yijnóra Dupade” marínga, chetaque dãjorai, enga taquechoqui uté. Mu ujetiga que yijnórango yoquĩjorai uje déji yoquedominone ¿enga jé yijnórangorase Dupade a, uje que pimo? 21 Mu Crísto jé guẽrate daroquei uné ome yoque nanique uje chojninga: gosi ujetiga chijnóra Dupade, gajnei u to ujetiga chijnóra dãjorárique.
1 Ore jnese uje que ore chotigase Jesus uringai Crísto Dupade utocáite, enga Dupade abode u udore ore. Jecucha ate to uje gosi chijnóra jnanírique, enga chijnorapo jnani tuté abode to rĩ. 2 Jecute ujetiga yijnórango Dupade enga yipéco ojningane cucha enga a yijnórangopo uté abode to rĩ. 3 Jecute gosi a chijnóra Dupade enga gajnui u ujetiga pésu iroquéode. Enga Dupade iroquéode que piraque ome gosi. 4 Que piraque gu uje Dupade pésu dabode uyoque gu enga pujnuéngaisṍre yoque ome erámone jogonórone cucha. Enga yirajágo uje yocanguretigai iji Dupade u uje pésu enga yujnuéngo erámone adode gáyode. 5 Gusu erámone jnuéngaisṍre uté gosi ujetiga changureta Jesus uringai Dupade ape. 6 Yirajágo uje Jesucrísto chise erámone unojo nanique enga pijoque uringai Dupade ape nanique ome cucha gáreode. Uñai u yodi uje ore tṍraja yodi nanique. Mu que gusu yodi go, mu iyoi upo rĩ uje toji curesei enga chojne ome dayoi nanique. Enga Dupade Ujopie Espíritu Sánto chatata unojo uringane ũréo to. Enga yirajágo uje ũrepise Dupade Ujopie ome ojningane cucha jnese. 7 Unojo pijogúsorone cucha gadioque iji gatajnoquei to. Yocai Dupade jé u uñai. Jé uruode u uñane. Ujopie Espíritu Sánto upo to rĩ. Enga unojo ore uruode jé chojmára. 8 Pijogúsorone gadiógapo rĩ iji erámone unojo to. Dupade Ujopie Espíritu Sánto u uña. Yodi u uñai uje ore chaca Jesus iji nanique. Jeque iyojna u uña uje Jesucrísto chojne ome iji curesei. Enga jé ore cunguésõri ñane to rĩ. 9 A yimeseco jnanione ore ojningane cucha, enga jétapure Dupade ojningane uje sué jnanione ojningane gai. Jecute ca yotigáco Dupade uté ojningane cucha ome Ujnacari. 10 Gosi uje changureta Dupade Abi, uté gosi u uje chimesere Dupade ojningane cucha ome Ujnacari. Enga que jnoji áyipie. Mu gosi uje que changureta Dupade Abi uringai Dupade ape, uté gosi cho táguiji Dupade. Uje chotigase Dupade ojningane cucha gu ome Abi. 11 Enga Dupade ojningane cucha u uje Dupade chisi ome pucuecaringuei iji deréjnane ome yoque. Enga pucuecaringuei uté jõrai u Ujnacari uringai pangurete. 12 Jecute gosi uje Dupade Abi déji gari, enga pucuecaringuei iji deréjnane dépoji gari to rĩ. Mu ujetiga ca Dupade Abi déji gosi, enga que gajneque pucuecaringuei to uje déji Dupade Abi. 13 Yurusarane unojo gajnengórone u uaque uje uacanguretáyo Dupade Abi, ujetiga arajáyo to uje Dupade guerani pucuecaringué gajnengórone u uaque iji deréjnane jnese. 14 Yanguretágo yógome Dupade yui. Yirajágo gu uje a tangári yoque jne ome yocutaidode cucha, ujetiga jé áyipiedie u ome yoque to. 15 Ujetiga yirajágo uje tangári yoquicatecãraitigade, enga yirajagópise to uje a chisi ome yocutaidode cucha ome yoque to jne rĩ. 16 Ujetiga yimóngo yoquĩjorárique iji isijnaringuérique gánique, yicoi enga yicatecãcoi Dupade ome uté gosi. Enga Dupade a chisi ome pucuecaringuei ome uté jne. Mu yirajágo uje pisijnaringuéone déji uje chiboráta pitoringai. Arei u ujetiga ca picatecãráite Dupade ome udore ore uje ore pésu pisijnaringuéone unojo. 17 Pate gajnaréngone jnese garani u pisijnaringuéone. Mu yirajágo uje que pate gajnaréngone chiboráta pitoringai jnese go. 18 Yirajágo to uje gosi cho dají Dupade enga suse deo ome pisijnaringuéone jnese. Chamáñaje Dupade Abi chirote uté gosi ujetiga Satanas ca chijocase. 19 Yirajágo uje Dupade gajnenguipise danguresórone uyoque. Jé basa erámone jogosórone ore uéchai déji Satanas gari, enga uté chorei ore iji quedéjnane. 20 Yirajagopo rĩ uje Dupade Abi e di nanique ujetiga chuchẽre yocáyipiedie edodie gáyode ujetiga yirajágo Dupápisi to. Jecute e yátago yógaja Dupápisi Abi uje i tu Jesucrísto enga icoi uté adode. Uje Dupa ũrepísi tu uté. Enga uté guerani u pucuecaringuei ome yoque ujetiga yiquecágoji deréjnane jnese. 21 Jecute yababode uaque a, jé ca acunguésoñoi dupa unejángone udore ore yúode. Amen.
1 Purusarane unojo urusãrasṍri u Juan uyu uje e choquíjna yu. Enga yurusarane unojo gajneto u ua uje Dupade ajegaidé ua. Jé aja babode to rĩ. Yijnorapise uaque, mu que gusu yu uje yijnóra uaque, mu Dupade uru ũréone irajasórone ore chijnóra uaque to jnese. 2 Ijnorapise uaque gu uje yujo Dupade uru ũréone anguresórone u uaque. Enga yocanguretigai uné ome Dupade uru uréone a jé jogate yocáyipiedie jne iji deréjnane jnese. 3 Yiraja uje yocai Dupade, yocangarádejnai Jesucrísto uje Dupade Ape to a ore chatapísaja uaque jne. A ore chosõrapo uaque jne rĩ enga a ore chisi ome pajesereringane ome uaque jne. Enga a arajáyo cucha uréone jne uje Dupade chijnorapise uaque gu. 4 Inínapísa yu diríca uje yise babode uñane uje ore doi Dupade uru uréone quigode. Chamáñaje Dupade jé iroquéo ome yoque gu ujetiga yicoi uruode quigode. 5 Jecute yijócha bajei údi gajneri, yĩjora, ujetiga yijnórango ñane. Que pacajnaqué icha uné gotique. Mu yocajnei piroqué jé u uné iji taninga cásodicaite. 6 Pijnoraquei ome Dupade, pangoninguite guesáringane ome uruode jé ore cho ñane. Enga e uacadúcho Dupade iroqué taninguíone to ica uje u ujetiga yijnórango ñane iji deréjnane. 7 Uje uásejna aringacade iji erámone unojo uje ore chotigase uje Jesucrísto cho ayoré iji re nanique uje díji erámone icáite. Mu gosi ujetiga chotigase Jesucrísto enga obiréjna uje aringácachoquí uté gosi. Enga Crísto etesõre uté gosi. 8 Jecute ajusópise uaqueo ome aringacade udore ujetiga ca uacapesudode cucha orérigui bijna ome uaque jne. Mu jé ajóyo uágaja uacajnéone Dupade iroquéo enga a amóño orérigui jnese jne. 9 Uñeque ujetiga chajnerame cucha uñéngo iji Jesucrísto acajnaquéode iquei, que Dupade déji uté gosi gari. Mu gosi uje que chorei pacajnaquei uñeque iji Jesucrísto acajnaqué cásodica iquei, yocai Dupade déji uté gosi gari. Enga Dupade Ujnacari dépoji gari rĩ. 10 Ujetiga uñeque tibágui uaque enga chatata pacajnaqué unejátigo ome uaque ujetiga unejácho ome Dupade Abi acajnaquéode, enga ca eso uté gosi unétique, enga ca ajuécho uacaguíjnai ome. Enga jé ca acatecãchoi uté gosi to. 11 Chamáñaje ujetiga acatecãchoi ore ome uacaru omone enga cho ujetiga átayo uágaja ore to uje ore pésu cucha gajnaréngone iji uacajade. 12 Yacajnaquéode amirone qué uásejna ome uaque. Mu que yipota ujetiga yicháji yurusãratígo. Yipotigádi upúsu ujetiga yibaguipísabí uaque, enga yacate uaque ujetiga e yimóngo ñane. Yigaidi u gu ujetiga yinínangopísa ñane jne. 13 Bãjora uje Dupade ajegaidé uaté to nanique uaté abode ore pota jeta yingo ua uje ore irasique bei to. Amen.
1 Purusarane unojo urusãrasõre Juan uyu uje e choquíjna yu. Enga yurusarane unojo gajnengóri u ua, Gáyo a. Yĩjorapise ua enga ũrepise yu uje yijnóra ua. 2 Yĩjorai ya, yicatecã́ri Dupade ome ua ujetiga areque ua iji badode jnese. Jé aja bajóningai rĩ. Yiraja uje báyipie areguepise enga bapúja Dupade adode. 3 Yinínapísa yu ica uje bojode Dupade anguresõre uñane ore tṍraji uáguiji te ica, enga ore chatata ica uje chi ca acuta ome Dupade uruode ica uje bapésu, uje babepísi Dupade uru uréone quigode. 4 Pininaquédatéi u ome yu uje yabode ujnoméone chise yu uje chi ore doi Dupade uru uréone quigode jnese. 5 Yujo Dupade anguresõre ua, bapesudode ueradipíso uje que ajuseque bojode Dupade anguresõre ore uje ore chise uaque. Cuchiyípisode u ore uje quene ore chise uaque to uje ore tṍraji guidai uñane. 6 Udore uñane ore chatata badode iji Dupade anguresórone aquiningane iji uné uje chi ca ajuseque ore enga bajnorapise ore diríca. Yijócha bajei údi ujetiga ore chisápo ua jne rĩ enga jé áta cuchade aja ore, ujetiga ca cuchárique chona ore iji ore ajesúode erámio. MBagaidi u gu ujetiga Dupade irasique ua ome bacaniratiguéode ome udore. 7 Chamáñaje ore gaidode u Jesucrísto iroquéode iji ore ajesúode erámio. Enga que ore chisa ayorérique guẽratique cucha ome raque, ujetiga jé ca uñeque changureta Dupade. 8 Jecute Dupade anguresórone uyoque yocajneque posõraquei ome udore ore ujetiga ca ore cho Dupade uru uréone uja uje ore jno údi. 9 Yurúsãre yurusarane unojo uñane ome bojode Dupade anguresóño uáguiji ta to diríca. Mu Diótrefes chetaque yáyipiedie quigode diríca. Pota daringárique pangarate gu ome darásade. Yajnei urásu ujetiga tangári yu, mu tagu yuruode aja. 10 Jecute a yibágui uaque jne enga a yiqueta uté edodie jne ome adode. Uje pésu darupatáringane enga chedo yoque. Mu que gusu udore, mu que chise yocujode Dupade anguresóño ore unétique uje ore di iji uaque. Enga que juéga daguíjnai tome ore. Chetágapo rĩ ujetiga ayorérique uñeque chimesere ore enga uñeque chijna ore aja daguíjnai. Charangapo Dupade uruode ome ore rĩ ujetiga ore tangári to iji dojode Dupade anguresórone gari. Enga chijócãre ore. 11 Gáyo a, ca arate dacate gajnaréngone udore. Baradigode urásu cucha arégode jne. Gosi uje pésu cucha arégode enga Dupade gajneque uté gosi. Mu gosi uje pésu cucha gajnaréngone enga que cunguésõri Dupade uje que chiraja Dupade. 12 Demétrio que jnoji ore pijnanone uje ore chicota ome ipesute arégode. Enga cucha uréone chisi gai to. Enga uyoque upo to rĩ uje yajógo yógaja uje jnani areque Demétrio. Enga uacarajáyo uje yocatatagode ũrepíso. 13 Yuru uñane qué dérasi ome ua, mu a ca yicháji yurusarane jne ome ua. 14 Mu yipota eti jĩraque yicabíji ua jne. Jé u jne ujetiga yingopísa yuruode udore aja ua ujetiga e yugúcoji ñane gari. 15 Yajéode u ujetiga Dupade ajesereringai déji ua to, Gáyo a. Bojode Dupade anguresóño ore iji ne ore chingome ua uje chi unere bei ome ore. Yipótago to ujetiga angome yoquijorane ore iji uáite uje yipótago yimóngo ore to.
1 Júdas uyu uje urúsarome uaque. Uje Jesucrísto iroi u yu enga Jacóbo jõrai upo yu rĩ. Yurusarane gajnengórone u uaque jnese uje yocai Dupade jé ajegáite uaque uje pota jeta gajneque uaque nanique. Enga uacarodisṍri u uacangureni Jesucrísto. 2 Yajéode u ujetiga arajáyo Dupade osongaquéode, icaniratiguéode, guerani pajesereringa ore enga irágu uacajéode ome udore. 3 Yijorane uaque a, uacarajáyo uje yijnóra uaque. Enga yajéode urásu diríca ujetiga yurúsarome uaque enga yo quique Dupade isocade ome yocuringane piquetaque. Mu uje yimo uje pacadisõre tágode chacája uacajade enga yécãre yajéode. Jecute a yurúsarome uaque ujetiga apúyoja uacanguretigade iji Dupade uruode. Dupade u gu uje chisi ome daruode ome darasapísode uyoque enga que Dupade chécãre daruode quitique go. Enga changureta yógome daruode ujetiga yĩraraco gai. 4 Jnanione uñane ore cháta raja yoque uje chiese ate ujñapetaque ore, mu sijnaque ore. Enga ore chacate yoque ujetiga yipéco yoquipotigué gajnaréngone jnese. Uje chiese paraque Dupade ome yoque enga chidota re ome cuchade jnese. Enga ore chotigase Dupade, uje yocasuté ugurui u mu. Enga ore chotigasapo yocangarádejnai Jesucrísto to rĩ. Mu purusãraque ore quique obiréjnai iji Dupade uruode nanique iji taningai. Enga ore quique obiréjnai u Dupade ujuyaquédatéi. 5 Isenga e arajáyo, mu a yingopome uaque jne rĩ, uje chi yocangarádejnai Dupade chijnime Israel gosode ore jnese iji Egípto gosode ore gari nanique. Mu unojo quigade enga jé guejnangápo dotigayasórone ore jnese rĩ iji udore ore ujade uje que ore changureta uruode. 6 A e arajáyo to jõ Dupade utocaidode gaté unirisóño uñane adode. Uje chi ore chetaque daringane Dupade irócho ga ore cha Dupade iroquéode. Jecute Dupade suru udore ore gai iji ijnangununie ajei. Enga chigaru ore ome ojnaquerórigui uje chi ca eruénique cuse, jé aja dire iyiejnai tuté ujetiga Dupade chajire ore adode aja quigode jnese. 7 Yirajágo to uje chi Sodóma gosode, Gomórra gosode, jé aja guidai ajámone gosode iji ore dosadode chi ore gajnúone u Dupade irógode udore ore to nanique. Uje ore cha pisoca omone nanique uje jnanione moji dacotépisedie gari, enga ore doi pisoca gajnaréngone ome dojode jnanío uje ore cho dacoté iji ore. Mu a ore chejnárengui joroque dajnéone pujuyaquéo iji gajño pioi jne, uje pioi uté que chise deruénique. Jé arec ujetiga yicoi jnese enga yaquírango yoc ome pisoca gajnaréngone udore ujetiga ca pujuya yoque to jne iji gajño pioi. 8 Adi jé u to ome jnanione udore ore iji deréjnane unojo to. Que ore áyipieraque jnoji cucha gajnaréngone. Uje que ore chedu dacotéraque ome re enga jé ore ipesute dabai noñaringuéone. Ore chetágapo Dupade iroquéode rĩ. Enga ore chujñieta Dupade idai jogosórone cucha jnese to rĩ. 9 Uje Moises toi nanique ga Dupade utocaidipísi gaté unirisõre Miguel, Satanas ore botãre ñane. Ga ore ibotaquéode gajnengórone u Moises ajnoquéode. Uje ore jnári Moises ajnoquéode gu ujetiga udore uñeque jno udore údi. Mu Miguel uté chuse daruode guio ome Satanas enga que pojna go. Mu arecujáidie chojmára ome Satanas nanique enga chojninga: “A Yocangarádejnai chaquĩ́ra ua jne.” 10 Mu jnanione iji deréjnane unojo ore dojnóngaja cuchade, mu que ore chiraja dadojnóngamánone udore cucha quigode. Ore gajnúone u cuchisode uje ore gaidode u dajéode quigode ome cuchade gatuaque. Jecute jnanione udore ore ipesute dagajnarétigade ome dapotiguéode cucha. 11 Iyiejã Dupade ujuyaquei yui ome jnanione udore ore. Chamáñaje ore adode jé cho jnani bajai Caín adode gu. Ore isocai jé upo jnani bajai Balaam adode to nanique, uje ore ajegaidedie u pláta docoidé bisidéguedie, jecute ore chicai udore yúode ome Dupade adode. Mu a ore qui u pitoringai to. Adi jé u ome jnani bajai Coré nanique uje tagu Dupade uruode aja enga toi uje Dupade uru gáite. 12 Enga gajnareque ore adode to iji uacajade, mu que ore chajéngome raque go ome dapesute gajnaréngone udore. Uje uacamátayo uágaja ñane ome uacagapidode, mu jnanione udore ore chacája uacajade iji udore to. Ga ore cana dabáyode, enga ore chĩreta dacadie, mu que ore áyipieraque déji uacuñeque go. Ore gajnunie upo gue abujadie rĩ uje que yotique tṍraji, mu emi chubúchu aja quedéjnane. Udore ore gajnunie upo poridie rĩ uje que ore áraque cuse iji sequeréraque. Ore gajnua upo poria te rĩ uje gosi chijnime iji jogadi enga erode ore tṍraja quedéjnane, enga jogadi u uje toi. 13 Ore cho yote quedéjnai ijocayataque ibisógode aja dajesúode uje ebié chicáji gaté. Enga ore ate gajnarenguipísode gajnunie u ebiedie udire. Enga ore chopo guédodie rĩ uje que ore chicapóji daquiguebéode to rĩ. Mu Dupade e pésu ore quigode, ga ore quique obiréjnai u ijnangunu cuchábedie, enga a ore charidi u uté jne iji deréjnane jnese. 14 Jnani bajai Adan ujnacare bajade ore quigaminore gatéode 6 iji Adan, Enoc ore ujade nanique. Enga Enoc uté chatata Dupade uruode quigode ome ore nanique ga uruode ojningane u jnani urupatáquechoquíode udore ore jnese. Enga Enoc chimo denominone to nanique ga chatata quigode enga chojninga: “Imo Yocangarádejnai enga tṍraji guéode, enga nóna darása gateminórone ore enga uásejnapise ore. 15 Enga gaidode u dajiritigade ome ore jnese ujetiga chiroque ore aja ore uringáringo pujuya. Yojningane u pisijnaringuéone ipesusórone udore ore jnese uje ore chejna rángaja date gajnaréngone gatuaque, jé aja daru gajnarenguipísode to rĩ ome Yocangarádejnai uté.” 16 Jnanione udore ore chachóguina cuchade ome raque. Ore dojnongapója dojode ayoréo rĩ. Que ore chucué dojode ayoréo ueratigárique, mu ore ucuegode u daueratigade ome raque. Enga ore chisipise dabáyode ome dojode ayoréo. Aringácachoquí ore to uje ore uruode ueracho ome dojode ayoréo, mu ore ajegaitígo u ore guẽrapáitigo cucha. 17 Mu, yijorane uaque a, ajnusináño yocangarádejnai Jesucrísto iroguipísode uruode ome yoque. 18 Uje ore chojningame yoque nanique: “A jnaníringo di jne iji erámone eruei yui ujetiga ore chujñieta Dupade uruode, adode ore jnese. Enga a ore gaidode u dapotigué ayoréode gatuaque uje ore chejna rángaja date gajnarenguipísode.” 19 Enga udore ore gaidode u ujetiga ore chajuque uacajéode ome ñane. Chamáñaje ore gaidode u dapotigué ayoréode quigode gu, enga íjnoque Dupade Ujopie Espíritu Sánto adode iji ore ajéode. 20 Mu yijorane uaque a, apéso ga apúyoja uacanguretigai uje Dupade gueranome uaque gu. Ujeta acatecãchoi Dupade ga abichoi Dupade Ujopie Espíritu Sánto enga a chátaja uaque jne ome uacacatecãraitigade. 21 Jé ca acayoi quedéjnane ome Dupade ijnoraquédatéi. Mu arochópise Yocangarádejnai diringai yui. Chamáñaje diri uté u gu ujetiga chingo dosõraquéode ome yoque, enga chisi ome pucuecaringué eyúgojmai ome yoque jne. 22 Ujetiga bojórique ayoré chotigase Dupade uruode enga bo enga abágui enga o quique ome Dupade uruode. MSocaseti uté cha dotigayaquéode udore. 23 Acueyoi uacasocáringome uacojode ayoréo to uje ore qui tu gajño pioi ujetiga aquetáyo udore ore to ome daqui gajño pioque. Enga cho jetiga ajnicho udore ore iji gajño pioi ajei. Osṍcho ore, mu ajuso uaqueo ome ore ate gajnaréngone. Etachopise ore ate gajnaréngone jnese ujetiga ca apéso to. 24 - 25 Yoquiquetangóri etotiguei déji ujetiga chirote uaque enga ca acóraño aja pisijnaringuérique, jé aja ujetiga chicha uágaja dari iyiejnai iquei. Enga a ca diquiyaque uacayoguérique jne iji iquei, mu a pininaquédatéi irágu uacajéode. Dupade ugurui u Yoquiquetangóri uté, enga ayipierãque ugurui upo uté rĩ. Jecute yicoi enga yicotágo Dupade uje chiqueta yoque gu Jesucrísto adode ome yoque. Uje Dupade ingoningájnai u cucha datei. Enga cucha datepo imenuringuei, ujopie ore jnese rĩ. Ga jé tiógara ome uté ujetiga picotaque iji taningai, jé iji deréjnane unojo to, jé iji deréjnane jnese to rĩ iji yoquiquei dirome. Amen.
1 Dupade chingo cucha piqueminórone unojo aja Jesucrísto enga déji darujna aone unojo jnese. Gaidi tu gu ujetiga Jesucrísto chingo cucha dacadode unojo quigode aja danguresórone darócho ujetiga ore chinóninga to uje cuchade unojo a jĩraque tocade jne. Jecute Jesucrísto doi enga chiroque datocaidode uñai aja daroi Juan ujetiga cho quique cuchade udore gaté. 2 Enga Juan uyu u uje yatata gojña uréone udore jnese uje yimópiso to ome yedodie. Chamáñaje gojña uréone udore garani tupúsu Jesucrísto ome yu gu, enga gojña uréone udore garani tupúsu Dupade ome Jesucrísto to. 3 Pininaquei a jogadi tu jne ome gosi ujetiga naráraja darujna aone unojo gai. Chamáñaje gojñane unojo garani tupúsu Dupade gu. Mu que gusu ajirisórone ujetiga pininaquei chise ore, mu pininaquei a chise udore ore to jne ujetiga ore tangári quigode iji ajirisórone ore pijnanone enga ore doi udore quigode. Chamáñaje e idógosi diri ujetiga cucha dacadode udore jnese tocade gu. 4 Juan uyu uje yurúsãre yurusarane unojo ome yujode Dupade anguresõre uaque iji uaquedai garitíode iji uacaniri Ásia. Eyúgojma Dupade. Chamáñaje Dupade jé jogate nanique iji erámi taningane, jé aja deréjnane unojo, enga a jé upo jne rĩ ujetiga diapo iji yoque rĩ iji jnumi iji dire piqueminórone. Yajéode u ujetiga uacajneque pajesereringai, pininaquei ore uje udore garani upúsu Dupade uté. Uje garani upo Dupade Ujopie Espíritu Sánto gajnu garitíode udore to ome uaque, uje ore charidi tu Yoqueduguéjna cuchábi iquei tiji gaté. 5 Enga pajesereringai, pininaquei ore garani upo Jesucrísto to rĩ ome uaque, uje ũrepise uté ome dojñane iji Dupade adode. Enga uté u bajai nanique uje ecápo rĩ iji datoringai. Jecute uté u uje etotiguei suépise eduguéjna jnutiminórone etotiguéode gáyode jnese iji erámi tuné. Mu Crísto uté jé u to uje chijnorapise yoque enga chinoningasipise yoquisijnaringuéone ome dayoi. 6 Enga pésu yoque enga eduguéjna cuchape yoque to ujetiga yicoi dai Dupade iroquéode to. Enga yocajnúone u jnani bajade angaránone uje ore chedu Dupade iroquéode nanique iji Dupade iguíjna cuchábi. Jecute beyoi enga yisigopise Jesucrísto uté gai iji deréjnane jnese jne ome uringai ujopierãque, ome ingoningádatéi to rĩ. Amen. 7 Jnec, anóningacho to uje Crísto a di jne, enga gue abujáraque oidája jnumi jne. Enga a ore chimo Crísto uté jne aja jnumi, jé aja udore ore to uje ore ichajuque nanique iji curesei gai. Enga a erámi unirisórone ore jnese iji dedáyode a ore popise jnese jne ujetiga ore chimo. Jé ũrepise yu ome cuchade unojo, enga a tocade jne enga a jé upúsu yuruode unojo quigode jne. 8 Pujnuéngaisṍri u Yocangarádejnai ome cuchade jnese. Jé jogate gu nanique iji erámi taningane, jé aja deréjnane unojo, enga a jé upo jne rĩ ujetiga diapo iji yoque rĩ iji jnumi iji dire piqueminórone. Enga uté chingo dadode ome yoque enga chojninga: “Yajnua tu purusãra bajé uje i tu A. Enga yajnua tupo rĩ purusãra eruemito uje i tu Z. Uje bajaque yu ome cuchade jnese gu. Enga a jé yijogadápo jne rĩ iji erámi eruei iquéode.” 9 Yijorane uaque a, uacojo Dupade anguresõre yu, enga yoquibaya ñane ome pijmongaquéode iji deréjnane unojo, enga Dupade urása uyoque jnese rĩ. Mu Jesucrísto átapi u yoque jnese to rĩ ujetiga yidotágo yóguiji yocanguretigai iji pequetingaquéode jmáinie. Ore chisa yu diríca enga ore jno yúdi aja yote quedéjnai abué uje i tu Pátmos. Enga que ore juéga guetique ome yu. Yibai tu yatatagode Dupade urúo uje Jesucrísto chacate yógome ica. 10 Yocangarádejnai gajnei tuté dire pujnusinamate u uje Dupade Ujopie Espíritu Sánto chingo yenominone aja yu. Enga yudute pibijna dosógode iji yiquigade. Enga cho pubuchugode jocarane. 11 Enga yicatecãraisṍri chojningame yu: —Yajnua tu purusãra bajé uje i u A. Enga yajnua jé upo purusãra eruemito rĩ uje i tu Z. Chamáñaje bajaque yu gu iji erámi taningane nanique. Enga a erámone íjnongapo jne rĩ, mu jé yijogate jne. Jecute arúsãre bamone cucha enga aroque barusarane aja Dupade anguresórone ore iji ore idai garitíode uje déji puniri Ásia. Guidaidatéode udore ore íode u: Éfeso, Esmírna, Pérgamo, Tiatíra, Sárdis, Filadélfia, Laodicéa ore.— 12 Enga jĩraque yajire yiquigade ujetiga yimo cuchai uté uje catecã́ri yu. Mu imo papósode píode iji uje pipesucho iji óro enga nanganatácho. Enga yimone udore gare iji ti. 13 Enga imo jnacanique iji papósode píode gatocoro uje chopise ayorépisode. Enga chigui daguidé uje chise jnumi, enga igarubi óro nanganataque uje chadíja re, enga chise arobé eruéode. 14 Enga uté acarãi póroropise enga gajnúone u ebedie, áyasadie ojode ome uringane póroropiso. Enga edodie cho pioc ocaráidie. 15 Guebecho uté guídade enga gajnui tu brónce nanganatai uje ore chijnimi pioi enga ore charose gai ujeta nanganatápise. Enga uté uruode etócho enga cho yote úode uje cho uoooooo. 16 Guédo garitidie déji uté jmanai ãrachua. Enga quesé asicoi tõrapóji uté pijnani rĩ uje uó jnese. Enga uté edodie cho guedé ojo dotarenie uje tagu jnumi. 17 Mu uje imo uté enga jĩraque icṍraja jnumi iji iquei. Enga o togode iji jnumi. Mu uté doi yu, enga chicha dajmanai ãrachua aja yibai. Enga catecã́ri yu enga chojningame yu: —Jé ca atodo yu go. Bamo uje bajaque yu iji taningane nanique uje cuchade qué íjnoque. E mu a erámone íjnongapo jne rĩ, mu a jé yijogate jne. 18 Bamo uje toque yu nanique. Mu quigade enga yiquecápo rĩ, enga a e ca yitopoi jne rĩ iji deréjnane jnese. Enga yujopie etotiguei déji ome pitoringai, jnaropié ore jnese. Chamáñaje llávedie déji yu gu ome cuchade udore. 19 Enga yipotigádi tu ujetiga arúsãre bamone cucha jnese. Arúsãrape cucha dacadode uje déji iji dirode unojo, enga arusãrapo cucha piqueminórone quigode to jne rĩ. 20 A yingo papósode pi garitíode quigode ome ua jne uje óro nanganatácho. Ore gajnúone u Dupade anguresórone iji guidai garitíode uje barusarane gajnengórone u ore. A yingopo guédo garitidie quigode jne ome ua to rĩ uje bamo ore que iji yijmanai ãrachua. Ore gajnúone u Dupade anguresórone angaránone ore iji guidai garitíode udore.—
1 Enga Jesus chojningame yu: —Arúsãrape yuruode ome Dupade anguresórone angaráni uje déji ore idaidatei Éfeso. Enga ósi te ome barusarane: “Uyu u uje yiríguiji papose pi nanganatágode ore ujade, uje gare ore iji ti. Enga guédo garijitidie déji yijmanai ãrachua. 2 Iraja uacapesudode ome yu jnese uje que abéroyo uágome yiroquéode. Irajápo to rĩ uje que achóyo beyoi Dupade uruode. Irajápo to rĩ uje que eso cucha gajnaréngone ipesungórone ore unétique. Uje jnani urupatáquechoquíode chacája uacajade ome daringaquéode diríca enga ore cho Dupade iroguipísode iji raque. Mu jĩraque uaquetingácho ore enga uacarajáyo uje taque udore ore. 3 Yiraja uje uacadotáyo uágome cuchade. Enga uacoyo uacaba yadode. Enga uaquejnáño uacaguesi ome yu uje uacabeyoi yiroquéode. Enga que oyo caru ome uacasocade udore ome yu. 4 Mu yetétigai déji uaque: enga u uje uacajnórañopise yu iji taningai nanique, mu e uacajnoraquei doi jnumi ome yu. 5 Anóningachopísa uje idajapise uáguiji uacate goninga cásodicaite jogadode. Beyoi enga écãcho uaque, enga beyopoi uacate goningane udore rĩ uje uacapéso nanique iji taningane. Jé socaseti ca angáchoi yuruode udore enga yiborátaja jnéa ujetiga yi enga yijnime uáguiji papose pi garitíode ujade jnéa. Jé basa ujetiga angáchoi yu enga a jé uacayarite papose píode udore jne. 6 Mu yimeserapídi déji ome uaque to: enga u uje uaquetachopise Nicolas ajnangórone acajnaqué tágode. Jé yo uaque uje yeteguipíso to. 7 Ujetiga angoninguite guesaque uaque, enga ca ajusécho Dupade Ujopie Espíritu Sánto uruode ome Dupade anguresórone uaque uje chojninga: Ujetiga Satanas ca chijnime uacãrírique enga a yujuéga poria tome uaque jne uje déji yidai iji gatajnoquei. Enga a acho adie udire jne enga pucuecaringuei a déji uaque jne iji deréjnane jnese.”— 8 Enga Jesus chojningápome yu rĩ: —Arúsãrape yuruode ome Dupade anguresórone angaráni to uje déji ore idai Esmírna enga ósi te: “Uacacatecãraisṍri tupúsu uyu uje bajaque yu ome cuchade jnese, enga ejo yu rĩ ome cuchade jnese. Uje yitoi nanique, mu yiquecápo rĩ. 9 Iraja uacapesudode cucha jnese. Yiraja uje uacoyo uacaba yadode. Enga irajápo uacajmátaringuéone rĩ ome yu. Mu que cho jetiga jmataguipise uaque. Uje uacagúchade déji gaté enga uásejna. Yiraja to uje judíode uñane, uje chiese ore doi Dupade adode, ore uruode gajnarécho aja uaque gatuaque. Mu obiréjna udore ore uje ore ajnai tupúsu Satanas. 10 A ejnárecho uaque jne, mu ca atodóyo yui jne. Chamáñaje Satanas a chetingare uacanguretigade jnese jne gu. Enga a ore suru uacuñane gáyode jne iji soldádode iguíjnane. Mu a ejnárechopise uacajnéone udore petingaquéo jne jé aja díningo ujetiga chejna yijmanáyone. A ore chujé uacuñane jne mu ujetiga gosi jno danguretigai údi jne ome yu jé aja datoringárique, enga jogadi a u jne ujetiga yẽrája uté gosi. Enga a yerani u pucuecaringué eyúgojmai jne ome uté gosi. 11 Ujetiga angoninguite guesaque uaque enga ca ajusécho Dupade Ujopie Espíritu Sánto uruode ome Dupade anguresórone uaque uje chojninga: Ujetiga Satanas ca chijnime uacãrírique enga a ca arajáyo pitoringai ejoi ũrosoringuéringo to jne.”— 12 Enga Jesus chojningápome yu rĩ: —Arúsãrape yuruode to ome Dupade anguresórone angaráni uje déji Pérgamo enga ósi te: “Uacacatecãraisṍri uyu u uje yiquesei asicopise enga uó jnese. 13 Yiraja uacapesudode jnese. Yirajápo rĩ uje uacagúsoji idaidatei tuté uje idaidatei tuté idaisórone ore cho dangarádejnai iji Satanas. Mu jé uacabeyoi yadode iji udore ore ujade. Uje que oyo caru ome uacanguretigai tiji yu uje uacapáñañoji nanique uje Satanas urásade udore ore chujé Antípas iji dedaidatei tuté. Uje Antípas uté changuretapise yu to nanique, enga chatatapísa yadode quigode ome ore. 14 Mu yetégode cucha qué déji uaque: enga u uje uacuñane iji uaquedai Pérgamo que apótayo piyátique ome jnani bajai Balaam adode. Uje uté chacate dojoi jnani bajai Balac nanique ujetiga pésu pisijnaringuéone unéningárique ome Israel gosode. Enga Balac uté doi enga chingo gapudíe aja ore ujetiga ore tungarája ore. Enga chingopo ayoré gajnúone gajnéone cucha ãrío aja ore to ujetiga ore tagu. Chamáñaje cucha puyácho gu udore ome Israel gosode nanique ujetiga ore tagu. 15 Etaque to uje uacuñane déji uje que ore chibéro rágome Nicolas acajnaqué tágode. Chamáñaje yetaguipise pacajnaquéode udore gu. 16 Jecute beyoi enga écãcho uacadode. Mu ujetiga etácho yuruode udore enga a jĩraque yĩri jne iji uaque, enga a yo yijocaningame angoninguite parigode udore ore jnese. Enga yõrachai a u yiquesei jne uje tṍraji yibijnani. 17 Ujetiga angoninguite guesaque uaque, enga ca ajusécho Dupade Ujopie Espíritu Sánto uruode ome Dupade anguresórone uaque uje chojninga: Ujetiga Satanas ca chijnime bãrírique enga a yisi ome mana ome ua jne ujetiga agu uje qué pipoguiete. Enga a yisiapome cucarané pórorabia ome ua jne rĩ. Enga a yurúsãre bei ichárique iji cucarané tuaté jne. Mu a ca ayoré uñeque chiraja bei tiji, mu gusu gajnesṍri ua ujetiga araja bei tiji.”— 18 Enga Jesus chojningápome yu to rĩ: —Arúsãrape yuruode to ome Dupade anguresórone ore angaráni uje déji Tiatíra enga ósi te: “Uacacatecãraisṍri u yu enga Dupade Abi upúsu yu. Yedodie gajnunie u pioque ocaráidie, jé basa yirídade gajnúone u guebeque nanganatágode uje guebéode udore i u bronce. 19 Iraja uacapesudode cucha jnese. Irajápo uacajnoraquei, uacanguretigai to rĩ ome yu. Yiraja to uje que achóyo apéso yajegaidode cucha. Yiraja uje jiei uacapesudode iji taninga cásodicaite ome yu, mu uacapesudode ome yu iji deréjnane unojo suépise bajade gáyode. 20 Mu yetei cucha qué déji uaque: enga yetei cucha u uje uacangáchoi chequé iji uacajade uje isocade u chequé bajé Jezabel isocade to nanique. Uje chequé tuaté cho Dupade uruode atatatóji re mu chãra yirógode uaque ome dacajnaqué tágode. Enga uaté acajnaquéode quigode u ujetiga ca abéroyo uágome punganingane ome gapu quedéjnane. Enga u to ujetiga acho ayoré gajnúone gajnenie cucha arágajñui to rĩ. 21 Yisi jorógome deréjnane ome chequé uaté. Socaseti chécãre datígo. Mu que pota go. Enga que cha tungarája jnani quedéjnane go. 22 Mu ujetiga ca ore cha chirate uaté aja adode jne enga a yo yujuñame uaté jne. Enga yujuyaquei u jne ujetiga dequejnaréquedatérique chise uaté jne. Enga a chejnarenguipise re jne iji damochápi. Adi jec u udore ore jnese rĩ uje ore tungarája chequé uaté. A ore chejnarenguipise yujuyaquérique to jne ome raque. 23 Enga a yujé uaté abode to jne rĩ. Enga yanguresórone ore chiraja jnese jne uje que yerurojmárique cucha cuse ujetiga ca yiraja. Yirajápo ore áyipie pipoguiédedie jnese to rĩ. Enga a chise deréjnai jne ujetiga yajiripise ayoréode ore adode aja quigode jnese. Enga jé u jne ujetiga ore gajneque dapesudi cucha oréraque. 24 Mu que Tiatíra gosode uacuñane doi uaté acajnaqué tágode to ome re. Uje chiese uaté angarasóningo chirajárase Satanas isoca datérigo to ujetiga ore chirate, uje chiese cucha pibójma jne. Jecute yo uacaquique ome cuchade udore: 25 Gusu ujetiga ajóyo uágaja uacarijogonórone udore yurúo ome uaque jé aja ujetiga yĩriápo jne rĩ iji uaque. 26 - 27 - 28 Ujetiga Satanas ca chijnime uacãrírique jne, mu uacajóyo uágaja uacasagode yiroquéo jne, jé aja uacatoringárique, enga a yisi ome guédo niríngoro ome uaque jne. Enga erámi unirisórone a ore cho deduguéjnane iji uaque jne. Jecute eduguéjna uaque jne enga uaquetotiguei a gajnui u pogué guebetique jne, jé basa ga a cojñone ore jnese uje ore déji jnumi yui ome uaque ore gajnúone a u pĩraca docorã jne iji dachabei, uje que ore bisitique pijoque ome uaque. Chamáñaje yai Dupade ipesute yuringai eduguéjna, enga jé tiógara ujetiga yipésu yanguresórone uringáringo eduguéjna to jne. 29 Ujetiga angoninguite guesaque Dupade anguresórone uaque enga ca ajusécho Dupade Ujopie Espíritu Sánto uruode.”—
1 Enga Jesus chojningápome yu rĩ: —Arúsãrape yuruode ome Dupade anguresórone angaráni uje déji Sárdis enga ósi te: “Uacacatecãraisṍri uyu u uje yarijogoto u Dupade Ujopie Espíritu Sánto gajnu garitidie. Enga guédo garitidie dépoji yari to rĩ. Enga yirajapise uacadode jnese. Yiraja uje uacajnomei chise erámi jnese uje chiese ayoré ijõripise uaque. Mu ome Dupade enga chi toque uaque. 2 Jecute arijíño iji uacamoi. Aringachopo uacanguretigade ome Dupade rĩ. Uje garósosi Dupade ate ujñapetábode uje qué uacabeyósi. Socaseti bijnápise jne ome uaque. Chamáñaje yimo gu uje que omío uacapesudode udore ome yai Dupade. 3 Beyoi enga ca acadíchoi ore acajnaqué cásodicaite to ome uaque, enga beyoi udore quigode. Enga beyoi enga écãcho uacadode. Ujetiga ca arijíño iji uacamoi tuté jne, enga a yṍra iji te jne ome uaque, enga yajnui a u oriechoqui jne uje que pirajaque diringárique. 4 Mu iraja uje uacuñane qué déji Sárdis uje que átayo uágaja pisijnaringuéone ipesungórone udore ore to. Enga a uaque u jne ujetiga ajínaño yu aja quedéjnane, enga a aguíyo bora pórorodie to jne. Jé uacatiróchopísa gu, uje que átayo uágaja pisijnaringuéone ipesungórone ore to. 5 Ujeta ca Satanas chijnime uacãrírique enga a aguíyo Dupade gueranéringui bora pórorodie jne. Enga a ca yĩro uaquéode iji darujna aoi te jne uje pucuecaringuei quisórone ore íode déji jnese. Enga a yingo uágaja Yapade jne. Enga a yingopo uágaja Yapade irógode gaté unirisórone ore jnese jne rĩ. 6 Ujetiga angoninguite guesaque Dupade anguresórone uaque, enga ca ajusécho Dupade Ujopie Espíritu Sánto uruode ome uaque.”— 7 Enga Jesus chojningápome yu rĩ: —Arúsãrape yuruode ome Dupade anguresórone angaráni uje déji Filadélfia enga ósi te: “Ueguipise uacacatecãraisṍri uyu ome pisijnaringuéone enga ũrepise yu rĩ. Enga jnani bajai eduguéjna David gajné llave déji yu. Jecute a yuchẽre cuchárique gai enga que toc ujetiga uñeque suruápo gai rĩ. Jé basa a yujuru cuchárique gai enga que toc ujetiga uñeque chuchẽre gai. 8 Iraja uacapesudode cucha jnese. Iraja uje que jiei uaque go, mu uacangáchoi yuruode enga que otigáso yu to go. Jecute uacajnei tu ujetiga qué beyoi yiroquéode. Cho jetiga yuchẽre piagórique gai tome uaque ujetiga boyo yuruode údi. Enga que toque ujetiga uñeque suru piagoi tuté gai ome uaque. 9 Jnanione uñane iji uaquedai chiese judío ore enga ore gaidode u Dupade uruode. Mu taque udore ore. Uje ore jorane u Satanas adode gaisórone gu. Mu diga udore ore chiraja jne uje yijnoranguipísode u uaque. Enga a yipésu jne ujetiga udore ore chichaga dagatáidie aja jnumi tiji uacaquei. 10 Uaque u uje uacabeyopísi yuruode quigode uje yojnínga: adotáyo uáguiji petingaquéode jmáinie jne. Jecute a yãraque uaque jne ujetiga diga pequetingaquéode chise erámi jnese. Chamáñaje a yetingáco erámi unirisórone ore jnese jne gu iji erámi údode. 11 A serã yĩri jne. Jecute jé adotáyo uáguiji uacayaridi tuté iji yadode. Socaseti ca adotáyo uáguiji yadode enga amíningacho Dupade gueranone cucha ome uaque jne. 12 Ujetiga ca Satanas chijnime uacãrírique enga a agúsoji Yapade gari to jne iji deréjnane jnese. Enga uacajnunie a u Dupade iguíjnai cutádode jne uje jogadipise to iji deréjnane jnese. Enga a yurúsãre yai Dupade i tiji uaque to jne rĩ. Enga a yurusãrapo Dupade idaidatei i tiji uaque to jne rĩ, uje uté i tu Jerusalen ichai. Enga Dupade a chiroque dedaidatei tuté aja jnumi jne, enga a oyo uaquedai iji uté to jne. Enga a yurusãrapo yi ichárique to jne rĩ iji uaque uje a yurasapísode u uaque jne gu. 13 Ujetiga angoninguite guesaque Dupade anguresórone uaque, enga ca ajusécho Dupade Ujopie Espíritu Sánto uruode ome uaque.”— 14 Enga Jesus chojningápome yu rĩ: —Arúsãrape yuruode ome Dupade anguresórone ore angaráni uje déji Laodicéa enga ósi te: “Ũrepise uacacatecãraisṍri uyu. Enga uyu u uje yatatapísa Dupade uru uréone nanique ome ore. Enga Dupade angúromei upo yu rĩ nanique ome dapesudode cucha jnese iji erámi taningane. 15 - 16 Iraja uacapesudode cucha jnese. Mu que yise uacapesudode cucha unétique. A yacãra uágaja yodi te jne. Uneréjna yote tejnui tome yoque ujetiga yójigo. Jé chopise yote jũruachui to rĩ. Mu yote pajnotai derocopis ome yoque. Ujetiga yójigorase mu deroco enga jĩraque yójnengo yoquibogórodie aja jnumi. Enga a jé yisocai tuté ome uaque jne uje uacajnúone u yote pajnotágode ome yu gu. Yajéode urásu ujetiga agupuraipise uté gosi, jeoga gosi dopísi yadode, mu deroco ome yu uje yanguresórone que ore chóji gaté ome yatique. 17 Uacoyo ayoré ataque iji uaque. Enga chiese ca cuchárique chona uaque ome uaque. Uacajosopo eti jé areguipise uaque rĩ ome Dupade adode. Mu que arajayópise cuchárique. Uje Dupade chujnapise uaque enga cho ayoré choquíbi iji uaque, enga chopo edopariguíji uaque. Que ataguipise uaque go mu jmataguipise uaque ome Dupade adode. 18 Angáchoi yu. A yo uacaquique jne: ujetiga jec ũré enga ataque uaque enga abáchoi yu enga beyoi yugúcha orerane iji yu. Yojningane u óro omepísedie uje e piborei enga que iguínique cusipise go. Enga a quene ataguipise uaque jne ujetiga óro uaté e déji uaque. Jé yojninganie upo piguidé póroropísedie rĩ ujetiga beyoi oredie ome. Chamáñaje choquíbi uaque gu. Enga acóyo uacabai enga jogadi u uté jne ujetiga íjnoque uacajegátigai ome uaque. Yojningai upo bisidi rĩ ujeta beji yu enga aníchoja uaquedoparedie, enga amóñopo uacajiritígo rĩ. 19 Uje yijnóra gosi enga jé u uje yaquĩ́ra uté gosi ome ate gajnaréngone. Mu ujetiga ca uté gosi tangári yu enga yo uté gosi ate. Jecute aguitóyo enga écãcho uacáyipiedie quigode. 20 Yipotapísa ujetiga yugúcoji ñane gari ome yoquininaquéode. Enga cho ujetiga yibidi uaque iji uacaguíjnai piagoi. Mu gosi ujetiga chudute yuruode ga chuchẽre daguíjnai piagoi gai ome yu, enga a jíraque yacája ajei jne. Enga jé u jne ujetiga yacácõra ñane iji uté iguíjnai ajei. 21 Ujetiga Satanas ca chijnime uacãrírique jne, enga a yo yujo eduguéjna iji uaque jne iji gaté. Adi uyu uje Satanas que chijnime yãrírique to nanique, enga yiyaridi e u Yai gari iji gaté ome yuringai eduguéjna cuchape. 22 Ujetiga angoninguite guesaque Dupade anguresórone uaque, enga ca ajusécho Dupade Ujopie Espíritu Sánto uruode ome uaque.”—
1 Iji unojo quigade enga yajire gaté. Enga imo piagoi uñai uje guesája iji gaté. Enga dara bajade catecãrápoi yu rĩ uje cho pubuchugode jocarane. Enga chojningame yu: —Boji ti á, enga oru yu. Enga a yingo cucha piqueminórone ome ua jne uje udore a tocade jne iji cucha bajade udore quigade.— 2 Enga jé u uté uje Dupade Ujopie Espíritu Sánto chingopo yenominone aja yu rĩ. Enga yimo piyaripi cuchábi iji gaté, enga eduguéjna cuchátique chácariji gai. 3 Enga imo piyaripi uté charipísõri ingoningádatéi enga nanganata ejode. Enga cho ujetiga cucarané nanganataguedie chijninguese ome uringai nanganatagué, uje udire íode u jaspe, cornalína ore. Enga aquesua chaparu piyaripi cuchábi uté gai uje uaté uruchachai cho cucarané uruchachai uje i tu esmerálda. 4 Enga imo pangaránone jnanío uje ore chácariji dayaripíode iji piyaripi cuchábi uté ejode to, enga ore iguidedie póroropisi. Enga ore ayode óro nanganatácho. Enga 24 jnanione udore ore. 5 Enga ajnorane tṍraji charipi cuchábi uté, enga jocarane tõrapóji rĩ enga cho guéode uruode. Enga papose garitíode tagúji charipi cuchábi uté iquei, enga udore imoi tu uje Dupade Ujopie Espíritu Sánto gajnunie gariti to. 6 Enga yote quedéjnai gajnui déji charipi cuchábi uté iquei enga cho ajicarani uje díreca uéchai. Enga gaté unirisõre gagájnione déji to uje ore chague iji charipi cuchábi uté ejode enga ore edodie déji ore gai jnese. 7 Enga gaté unirisórone udore uñai cho caraté cuchábedie. Jé basa uñai cho ubuñurane. Enga uñai edodie cho ayoréode edodie. Enga uñai cho aroéode uje choque iji gaté. 8 Enga ujnoque chojmaráji tíode déji ore jnese. Enga udore ore edodie dépoji ore ujnóngone uéchade jnese rĩ. Enga que ore chimoque dínique, dejátique uje ore chicota Dupade. Enga ore chojninga: Ueque ua ome pisijnaringuéone. Ueguipise ua ome pisijnaringuéone. Yijárogo yocuruode iji jnumi uje ueguipise ua ome pisijnaringuéone. Yocangarádejna, Dupa ujopierãi tu ua enga bajopie sué cuchade gáyode jnese. Bajogate nanique. Jé bajogadápo rĩ iji deréjnane unojo. Enga a jé bajogadápo to jne rĩ ujetiga ãriapo iji erámi rĩ. 9 - 10 Uje jnanione udore uje 24 ore, ore chudute gaté unirisórone udore ore icotaquéode uje ore chacãre Dupade gai ome uringai eyúgojma, enga ore chichaga dagatáidie aja Dupade uté iquei to uje chácariji dayaripi cuchábi. Enga ore chisi gai to uje que eruénique cuse. Enga ore doi enga ore chicha dayode aja Dupade iquei enga ore chojninga: 11 Yocangarádejna Dupa, jé tiógara písa ujetiga picotaque ua. Chamáñaje bangoningájnai cucha daté gu. Jé cho baringai pangarate, jé aja bajopie, uje cucha daté ore to. Chamáñaje bamanique cuchade jnese gu iji erámi, gaté ore. Báyipie omenie u nanique gu uje cuchade udore tocade.
1 Enga imo charipi cuchábi charipísõri uje chisa darujna aoi iji dajmanai ãrachua enga pipocayaque. Enga purusarane déji uéchade jnese. Enga jurúgai ome cucha cataque garitíode. 2 Enga imo Dupade iroque cuchábi gaté unirisõre enga uté chejnapúsu daruode enga chojninga: —¿Ja uñeque déji yocujade ujetiga jé tiógarapísa ujetiga chijnime cucha catágode iji darujna aoi tuné údode enga chuchẽre gai a?— 3 Mu que uñeque déji gaté, jnumi, jnaropié ore ujetiga jé tiógara ujetiga chuchẽre gai. Enga que uñeque dépoji rĩ ujetiga tiógarapísa ujetiga chajire darujna aoi tuté. 4 Enga uje e yiraja uje que ducuchẽrángai enga jĩraque ibóji yejode. Uje que uñeque déji ujetiga gajnei tu ujetiga chuchẽre darujna aoi gai. Que uñeque déji rĩ ujetiga naráraja gai ome yoque. Enga que uñeque tiógara to rĩ ujetiga chajire. 5 Jecute pangaránone uñai catecã́ri yu enga chojningame yu: —Aya ugo. Uje uñai déji uje pujnuéngaisṍre uté. Enga ujopie déji ujetiga chijnime cucha cataque garitíode iji darujna aoi uté. Enga a uté u jne ujetiga chuchẽre gai ome yoque. Yojningai u eduguéjnai jnani bajai David ape disi ejoi uje uté garãpi tu Jacob ujnacarode uñai uje i tu Juda. Uje Jacob chojningame dajnacari Juda tuté nanique: “A eduguéjna cuchape bape disi ejórique jne, enga gajnui a u caraté quedéjna cuchabéraque jne.”— 6 Enga yimo Ayasa iji piyaripi cuchábi gai iji pangaránone, gaté unirisõre gagájnione ore ajei. Cháguesi mu obiréjna ore ajnangopídode iji uté gai. Enga yiraja uje cuchiso pẽrapáite uté ome Dupade. Enga uté uedie gariti, enga edodie garapo iji ti rĩ. Enga uté edodie upúsu Dupade Ujopie Espíritu Sánto gajnu garitíode uje Dupade iroque ore nanique aja erámi údode jnese. 7 Enga Ayasa tuaté sose charipi cuchábi charipísõri yui iji yenominone enga chisa darujna aoi tuté uje déji charipísõri jmanai ãrachua. 8 Uje e chisa darujna aoi, enga jĩraque gaté unirisõre gagájnione, pangaránone uje 24 ore, ore doi enga ore chichaga dagatáidie aja jnumi tiji Ayasa iquei. Enga ore ijocayade árpai déji pangaránone udore ore jmáinie jnese. Enga ore chisasíapo agapiábode rĩ uje óro nanganatágabio iji dajmanai uñane. Enga cucha ai uneri déji agapiábode udore ajéode. Enga cucha ai uneri gajnúone u Dupade anguresórone ore icatecãraitigade ome Dupade. 9 Udore ore chirate daradé icha uje chojninga: Que uñeque gajneque ujetiga chisa darujna aoi uné go. Mu gajnengóri tupúsu ua. Que uñeque gajnengapo rĩ ujetiga chijnime cucha catágode iji. Mu gusu ua uje bajnime. Uje ua u gu uje bẽra ua ome erámi unirisórone nanique enga bo ore isijnaringuéone oré ome bayoi uje ore chujé ua nanique iji curesei gai. Bagaidi tu gu ujetiga Dupade cho darásaji ore iji erámi údode jnese to. 10 Bapesute baquetade udore ujetiga eduguéjna ore. Bagaidi tu gu ujetiga ore u ujetiga ore pésu cuchade aja quigode to iji erámi jnese. Bapesute ore to ujetiga sacerdote ore, enga ore chedu yoquidupade iroquéode ome dojode ayoréo. 11 Yajirapo gaté rĩ enga yudute Dupade iroque dipesei pijnane uje ore chicotapise Ayasa. Enga yimo charipi cuchábi, pangaránone, gaté unirisõre gagájnione ore iji udore ore ajei. 12 Enga ore chejnapúsu daruode enga ore chojninga: Picotaque opejã Dupade Abi uje cho áyasa pẽrapáideraque ome erámi unirisórone. Jé tiógarapísa yoquicotaquéode ome re. Chamáñaje ujopierã́quedaté gu, ataguipise rĩ, enga ayuquetotiguei que eruénique erãpe cuse. Jé chopo uté etotiguedatei to. Pangarate cuchape uté rĩ enga ingoningájnai cucha daté. 13 Enga udúdapo Dupade ipesudode cucha ponáyo icotaquéode to. Enga tṍraji gaté, jnumi, jnaropié, yote quedéjnane ore jnese. Enga udore ore chojninga: Yoquicotaquéode gajnengóri u charipi cuchábi charipísõri Dupa, jé aja Ayasa to. Uje pangarate cuchape ore gu. Enga ore ingoningájnai, ore ujopie cucha datépise. Jecute ore gajneque yoquicotaquédatéode jne iji deréjna pitade jnese. 14 Enga gaté unirisõre gagájnione udore ore chajnai ore enga ore chojninga: —U ãrie. Amen.— Diga pangaránone uje 24 ore, ore chichaga dagatáidie aja jnumi tiji Dupade iquei uje que Dupade uté eruénique cuse. Enga udore ore chisipise Dupade gai to.
1 Enga yajire yoquiquetasṍri Jesus uje gajnua tu áyasa pẽrapáideraque uje chijnime cucha cataque bajai. Enga udute gaté unirisõre gagájnione uñai uruode uje ibisócho enga cho guéode uruode enga chojninga: —Jé ajire cucha dacadode udore to a.— 2 Jecute yajire, enga imo burica póroroi iji ti enga charipísõri chijna docoji iji dajmáinie ome pocaningai yui. Enga ore chisi ome uté ayoi tome. Enga uté jno enga obiréjna uje jnusi rome dajocaningai. Gaidi u gu ujetiga uringai pujnuéngaisṍre pijoque. 3 Unojo quigade enga yoquiquetasṍri Jesus tuté chijnimápo cucha catágode uñai, enga udute gaté unirisõre gagájnione uñai uruode uje chojninga: —Boji ti ga ajire to.— 4 Enga buricai uñai tocadepo rĩ uje gati aoi. Enga Dupade chisi ome dajopie ome charipísõri ujetiga chinoningase pajesereringai iji erámi údode jnese. Enga ujopie pésu enga jnanione ore chujé ñane iji erámi údode jnese rĩ. Enga Dupade chisi ome quesé cuchábi ome buricai charipísõri uté. 5 Uje yoquiquetasṍri Jesus chijnimápo cucha catágode uñai enga e gadioque ijnimingone. Enga jé u uje udute gaté unirisõre gadioi uje chojninga: —Boji te a. Enga jé ajire to.— Jecute yajire. Enga imo burica utatai tiji enga charipísõri chijna cucha imenuringuéone erásõri iji dajmanai uje ore chajire cuchade imenuringuéone iji. 6 Enga udúdapo darade rĩ iji gaté unirisõre gagájnione ore ujai uje catecã́ri buricai charipísõri enga chojninga: —Apésu cuchade oredie ome erámi unirisórone enga jiei. Enga a gosi doi kílo chojmarai iji trígo mu a chopise diri oredie jne. Jeoga doi kílo gadiógode iji cebáda mu chejna diri oredie aja rĩ. Jé basa ga ca o bajuñame ore acadie úvai, aceitúna ore ujetiga ca víno, acéite ore íjnoque to.— 7 Uje yoquiquetasṍri Jesus chijnimápo cucha catágode uñai te rĩ enga e gagájni ijnimingone, enga udute gaté unirisõre gagájnia uruode uje chojninga: —Boji te, enga ajire to.— 8 Yajire mu yimo buricai enga aoi sare. Enga uté i tu Pitoringai. Imo uñai iji uté quigade rĩ, uje chajna bajai uté, enga uté i tu Jnaropié. Enga Dupade chisi ome dajopie ome ore ujetiga ore chequésãre erámi unirisórone peque gatei. Udore ore utocaidode u pocaningane, jé aja chaguhéode, dequejnaréquedatéode, jé aja cuchiso sijnángone ore. 9 Uje yoquiquetasṍri Jesus chijnime cucha catágode uñai uje e chejna yijmanai, enga jé u uje yimo Dupade anguresórone ore áyipiedie, uje chuque ore nanique uje ore cho daba datatagode Dupade urúo. Enga páyipiedie udire déji gaserani údi uje cuchiso pẽrapáidode gajneque ome Dupade. 10 Enga udute iji yenominone uje ayoré togode udore ore tibite enga ore chojninga: —Yocangarádejna, ueguipise ua ome pisijnaringuéone enga que ajéninga barúrique. ¿Jé deréjnaringo cho rique jne a ujetiga e ajire yoquisórone jnutiminóño ore adode aja quigode to a, ujetiga e arota yoque to?— 11 Enga ore chisi ome ore iguidé pórorodie ome ore enga ore chaquĩ́ra ore. Enga ore chojningame ore: —Adotáyope uágaja enga arochope uacabayade ore yui. Uje qué uñane ore déji ujetiga ore chopo daba dapesudode Jesucrísto iroquéode to jne rĩ. Mu ujetiga ore chujé ore ome danguretigai enga jogadi jé u jne ujetiga Dupade chirota uaque.— 12 Yimo uje yoquiquetasṍri chijnime cucha cataque chojmaráiji ti. Enga jé u uje jnupe tãrarachui tṍraji. Enga guedé edo toi enga opoipise. Enga gajnui tu piguidé utatapíseraque uje piguidé enga imoi tu uje ayorérique uchachárique toi. Enga guedoside chécãre re enga gatípise enga gajnua tu diquiyojnáraque. 13 Enga imo guédodie iji guéode enga ore basaja jnumi. Enga cho pijninguéñanie aja jnumi. 14 Enga guéode íjnoque bisideque. Enga gajnui u darujna aórique uje pipocayaque aja ñane. Enga yote quedéjnane abuedie, cucaranone ore chécãre dajogadode jnese iji erámi údode jnese. 15 Enga erámone jogosórone eduguéjnane ore chacose re iji cucarã́tedódie, jé iji cucarãte ujade rĩ. Que gusu ore, mu ayoré gajnaréngone ore chacose re to. Jec upo soldádode eduguéjnane, atade, dacasutedie ore chacose raque jnese to. Ayoré pisagode, jé aja ayoré dacajnéone ore chacose raque to rĩ. 16 Enga ore tibite enga ore chojninga: —Cucaranone uaque a, beyoi enga aperóyo yoquibáyode. Enga apócho yoque ome Eduguéjna Cuchábi uté uje déji dayaripi cuchábi gai iji gaté. Jé ome yocajnei Ayasa ujuyaqueque iyiejnai tuté to rĩ.— 17 Chamáñaje deréjnai e di gu ujetiga Dupade ujuyaqueque cuchábi e di. Enga a ca ayorérique déji jne ujetiga chapite.
1 Quigade enga imo Dupade iroque gagájnione uñane iji yenominone. Enga ore déji emone garanone. Chojmarai déji umusoi garani, uñai déji casaque garani. Jeque jõrai dépoji guedé garani te rĩ. Jeque jõrai dépoji guedé cacadi te rĩ. Enga udore ore chãraque emone quigode ome, ujetiga ca chubúchu erámone, yote quedéjnane, poridie ore jnese. 2 Enga e pẽrate pujopie tome ore ujetiga ore cho dajuñame erámone, yote quedéjnane ore jnese. Mu imópo Dupade irógode uñai te rĩ uje tṍraji guedé garani, enga chijna Dupápisi i erásõri ujetiga chajója Dupade anguresṍripísode ore enóchade ome. Dupade iroi tuté catecã́ri iroque gagájnione udore ore enga chojningame ore iji dabijnacaráidie: 3 —Ca oyope uacajuñame erámi, yote quedéjnane, poridie ore, jé aja ujetiga yajógoja yoquidupade i erásõri taja irógode ore enóchade.— 4 Enga udute uje chi uásejna ore uje Dupade iroi churúsãre ore enóchade. Enga udore ore jnese ore garãpíode u jnani bajai Israel ujnacarode uje gare ore iji yirídai nanique. Enga chi 144 mil ore. 5 Jnani bajai Juda ape disi ejode 12 mil uje pajója Dupade i aja ore. Jnani bajai Ruben ape disi ejode 12 mil to uje ore chajója Dupade i aja ore enóchade to. Jnani bajai Gad ape disi ejode 12 mil to uje ore chajo Dupade i aja ore enóchade to. 6 Jnani bajai Aser ape disi ejode 12 mil to uje ore chajo Dupade i aja ore. Jnani bajai Neftali ape disi ejode 12 mil to uje ore chajo Dupade i aja ore to. Jnani bajai Manases ape disi ejode 12 mil to uje ore chajo Dupade i aja ore to. 7 Jnani bajai Simeon ape disi ejode 12 mil to uje ore chajo Dupade i aja ore to. Jnani bajai Levi ape disi ejode 12 mil to uje ore chajo Dupade i aja ore to. Jnani bajai Isacar ape disi ejode 12 mil to uje ore chajo Dupade i aja ore to. 8 Jnani bajai Zabulon ape disi ejode 12 mil to uje ore chajo Dupade i aja ore. Jnani bajai José ape disi ejode 12 mil to uje ore chajo Dupade i aja ore to. Jnani bajai Benjamin ape disi ejode 12 mil to uje ore chajo Dupade i aja ore to. 9 Unojo quigade enga yimo ayoré dipeséode. Enga ducunirone unirisórone ore déji jnese. Ayoré quedéjnane, cojñoque quedéjnane ore déji jnese rĩ uje ore uruode cãra ome ñane. Enga udore ore ore cháguiji charipi cuchábi charipísõri, Ayasa gajnui Jesus iquei jnese. Enga que diquirajaque udore ore ujetiga pisecãrate ore uje jiépisi ore gu. Enga udore ore iguidedie póroropisi, enga ore chijnapo ijnanie ojodie rĩ iji dajmáinie. 10 Enga ore pijnacaráchi enga ore chojninga: Yoquiquetangóri u Dupade uje chácariji dayaripi cuchábi gai. Chamáñaje Abi toi ome yoque gu enga gajnui u áyasa pẽrapáideraque ome yoque. 11 Enga Dupade iroque dipeséode chaparu gai iji charipi cuchábi. Enga pangaránone uje 24 ore, jé aja Dupade utocáite gagájnione ore déji Dupade iquei jnese. Enga udore ore jnese ore chichaga dagatáidie aja jnumi iji Dupade iquei ujetiga ore chicota. 12 Enga ore chojninga: ¡Amen ! Yicoi enga yicotágo Dupade enga yacãco gai. Chamáñaje ingoningájnai, ayuquetotiguei, etotiguéode cucha datéo. Pangarádejna cuchape enga ujopierã́quedaté. Jecute jé tiógarapísa gajnéone yoquicotaquéo iji deréjnane jnese. ¡Amen! 13 Diga pangaránone udore uñai catecã́ri yu enga chojninga: —¿Araja bora pórorodie iguisórone gosode a? ¿Ja arajápo ore garani te rĩ a?— 14 Enga ichajnai jnani tuté enga yojningame: —Cachi baraja ãrie. Angome yu.— Enga uté chojningame yu: —Udore ore u uje ore chejna cucha dosógode aja daquigade. Enga ore churu dáyipiedie, daguidedie ore iji Yoquiquetasṍri iyoi enga e ichapise ore. 15 Jecute ore déji charipi cuchábi tuté iquei enga que ore chimoque dínique, dejátique uje ore pésu Dupade ipotigádode cucha iji iguíjnai. Enga Dupade déji ore gari enga a chirodipise ore jne enga a chirotápise ore jne rĩ. 16 Jecute a e ca chaguhérique chejnapo ore jne rĩ. Enga a e ca ore cajnórapo iji jne rĩ. Enga a e ca ore chejnáreque guedé ojo dotarenie jne rĩ iji deréjnane jnese. 17 Chamáñaje Jesus uté u uje déji Dupade charipi cuchábi gatocoro ujetiga chirodipise ore. Yojningai u uté uje tẽra re ome ore nanique, enga gajnua u áyasa pẽrapáideraque. Enga a cho áyasa iji darodigode udore jne. Enga a chorei ore iji yote uecai garani jne ujetiga ore chóji gatuaque. Enga a Dupade doi enga churupise ore edocadode jnese jne, enga a ca ore popo jne rĩ iji deréjnane jnese.—
1 Uje Yoquiquetasṍri chijnime cucha cataque erueminóripísi iji darujna aoi uté, enga jé u uje ore chopise chíguiji jnumi jnese iji gaté. Enga udore ore cho chígaja guedé batigai pei. 2 Enga jĩraque imo Dupade iroque garitíode ore uje ore déji Dupade iquei, enga ore chisi ome pubuchuque garitíode ome ore. 3 Quigade enga imo Dupade irógode uñai uje chijna papose pi iji dajmanai. Enga uté jno enga chágueji gaserani iquei uje pipesute iji óro ueguipise. Uje cuchiso pẽrapáidode gajneque gaserani tuté. Enga ore chisi ome acéite ai uneripísode ome uté ujetiga chãru iji dapose pi tuté iji gaserani gai. Enga jiei acéiteode uje ore chisi ome uté. Enga uje acéite uté tagu enga Dupade urásade jnese ore icatecãraitigade nóna acéite ai aja gaté. 4 Enga uneréjna úyujnanie uje tṍraji pi uté iji iroi jmanai. Enga ai uneri chise Dupade. Que gusu ai uneri uje chise Dupade, mu anguresórone ore icatecãraitigade chise to enga uneréjna to ome Dupade. 5 Enga Dupade iroi tuté chijnime pioi gueguerade iji gaserani tuté, enga chaníraja papose pi tuté. Enga doi enga tṍraji erámi gai enga ajnorane tṍraji, enga cucha jocarãque cuchábi tṍraji rĩ, jé aja guéode uruode, jé aja jnupe tãrachui rĩ. 6 Enga Dupade iroque garitíode, uje e dimane ore ubuchugode iji ore jmáinie, ore doi enga ore chicha dabuchugode aja dabijnanone ujetiga ore chubúchu. 7 Dupade iroque bajai chubúchu dabuchui enga ebe cuchábedie tṍraji gaté, jé aja pioi uje chimesa diquiyoi, enga ore chãru poridie peque gatei iji erámi údode, jé cho erãpijóningane ore rĩ, chejna udore peque gatei to. 8 Enga Dupade iroque uñai chubuchapo dabuchui rĩ, enga jĩraque pioguéjnai tṍraji enga basaja yote quedéjnane. Enga pioguéjnai uté gajnui u cototé cuchabéraque. Enga jé u uje yote quedéjnane peque gatéode diquiyojnai iji jnumi. 9 Enga yote quedéjnane ujosórone peque gatéode ore toi jnese. Adi jec u cucode uje pioguéjnai chejna udore peque gatéode to rĩ. 10 Enga Dupade iroque gadioi chubuchapo dabuchui te rĩ enga guédo cuchabe basiji gatajnoquei tuté enga ocaráchi aja jnumi, enga cho ibioguéjnane. Enga chequésãre tiedie peque gatéode iji erámi údode jnese jé aja sibíjnane peque gatéode to rĩ. 11 Enga guédo tuaté i tu Iringongué uje chusaque yodode. Enga uásejna cojñone uje ore chóji enga ore toi jnese. Chamáñaje yodode peque gatéode iringocho gu iji erámi údode jnese. 12 Enga Dupade iroque gagájni e chubuchapo dabuchui rĩ. Enga jé u uje cho dajuñame guedé, guedoside, guédodie ore. Jecute guedé peque gatei topísi, jé cho guedoside peque gatei rĩ uje topísi to. Jé chopo guédodie peque gatei rĩ uje topísi. Jecute udore peque gatéode que ore idírecaringuérique cusapo rĩ ome dejórique. Jecute topiejnapise jnumi gatuaque iji dirode, dejade ore jnese. 13 Jĩraque yajire gaté mu yimo Dupade irógode uñai uje choque iji gaté. Enga udute uté pijnacaráidie uje chojninga: —¡Ja jõõõõ! Yosõripise joroque jnumi unirisórone ore yui ome Dupade iroque amirone isocade uje gadioc ore. Chamáñaje a udore ore chubúchu dabuchugode jne enga dopísi datéringane jne ome ore.—
1 Enga Dupade iroque chejnayijmanai chubuchapo dabuchui te rĩ. Enga imo Dupade iroque uñai uje basaja jnumi. Enga cho guédo basugué uje basaja jnumi. Enga Dupade chisi ome llave ome guédo uaté ome ejopie cuchabe uje que eruénique cuse. 2 Enga uje chuchẽre ejo cuchabe gai uje que eruénique cuse, enga úyujnanie chicáji gaté. Enga cho ejo piqueta cuchabe úyujnanie. Ejo cuchabe tuaté úyujnanie irágu gaté yui enga chajni guedé edo enga topiéjna. 3 Enga churuyúgu quedéjnanie tṍraji uaté úyujnanie. Enga ore chóna erã́tique údode. Mu pecãra ore adode, enga ore cho suaré chequedíe uje chigase ore. 4 Mu Dupade chãraque ujetiga ore cho dajuñame erãpijóningane, poridie, cucha pacade ore. Mu gusu ujetiga ore chigase cojñone uje que pajópi Dupade i aja ore enóchade to. 5 Mu Dupade chãraque ujetiga ore chujépise dagayade ore iji erámone. Mu gusu guedosíode uje chejna yijmanai ome churuyúgu quedéjnanie ujetiga ore chigase erámone unirisórone ore. Enga udire ore cayapídode achabode cho suaré chequedíe cayapídode achabode. 6 A churuyúgu quedéjnanie cayade ore chucué jorógui datoringárique jne iji dirode udore. Mu a ca ore chise jne. Cho jetiga pitoringai jnome ore gu. 7 Enga churuyúgu quedéjnanie ore cho buricade uje e dimane ore ome pocaningai yui. Enga cuchárique déji ore gatóidie gai uje cho ayode uje pipesudíji óro nanganatai. Mu edodie chopise ayoréode edodie. 8 Enga ore acarane cho chequedíe acarane uje umáño. Enga ore patarane chopo caraté quedéjnane patarane rĩ. 9 Enga cho jetiga churuyúgu quedéjnanie ore chigui daguidé guebéode ome dagaidi pocaningai yui ujetiga ca ore umajosórone õrachade chacája ore. Enga ore ujnóngone jocarane chichagu gatajnoquei tuté ome dajocarane. Enga cho guebéquedatéode, buricade ore guichade jocarãpídode uje uásejna ore uje ore chayo aja pocaningai yui. 10 Enga ore carigode cho suaré chequedíe carigode uje ore ojodie déji. Enga ore chigase erámone jogosórone ore ome dojodie udire. Enga udire ore guejnane guedosío chejna yijmanai uje ore chigase erámone jogosórone aja dajesúode. 11 Enga churuyúgu quedéjnanie ore eduguéjnai cuse uje cho Dupade irógode. Enga ejo cuchabe tuaté uje que eruénique cuse gajnengóri u uté. Enga Dupade irógode gajnui tuté i tu Abadon iji hebréode ore uruode. Jé basa i tu Apolion ome Grécia gosode ore. Uje Abadon, Apolion ore urui jé qui chojmarane uté. Enga qui tu: jnani dequejnangóri. 12 Erámone unirisórone e ore tṍra paguté sutabáidode cucha gajnaréngone uñai taja daquigade. Mu amirone qué déji enga gare. 13 Enga Dupade iroque chojmaraiti chubúchu dabuchui enga jĩraque udute darade uje tṍraji gaserani uje óro nanganataque uje déji Dupade iquei. Darade udore tṍraji ue gagájnione uje déji ajidedie jnese. 14 Enga darade catecã́ri Dupade iroi uje e chubúchu dabuchui te que enga chojninga: —Ejñu Satanas iroque gagájnione udore uje e pigarique ore iji tie cuchabe pijnanai uje i tu Eufrátes.— 15 Jé u uje Dupade iroi uté jno enga chejñu Satanas iroque gagájnione udore ore ujetiga ore chujé cojñone ore peque gatéode iji erámi údode. Chamáñaje pigarique udore ore nanique gu ujetiga dimane ore ome Dupade ojningai tuté dire. Chamáñaje Dupade ipesute cuchade udore jogadode gu ujetiga ore tocadepísiji, jeoga guedé batiga, jeoga dire, jeoga guedosi, jeoga sequeré. 16 Enga udute Satanas iroque gagájnione udore ore isoldádode ore guejnanie ayorei. Enga 200 millones u ore jnese. Enga ore cháji buricade gáyode jnese. 17 Enga imo buricade udore iji yenominone enga udore ore charipísorone ore iguidedie guebecho enga uruchachade déji ore aróbedíe jnese. Enga charumájna ujade, jeque azul u ujade, jeque sare ujade. Enga buricade udore ore gatóidie cho caraté quedéjnane gatóidie enga pioi ocaráidie, úyujnanie tṍraji ore pijnanone jnese, uje ai u azufre ai to. 18 Enga ore chujé erámone jogosórone peque gatei ome pioi, úyujnanie, azufre ore uje tṍraji ore pijnanone enga uásejna ore yugode iji ore. 19 Mu buricade udore que gusu ore ujopiedie iji ore pijnanone go, ujetiga ore chujé erámone jogosórone. Mu dépoji ore carigode rĩ. Uje ore carigode cho ugade. Enga ore cho dajuñame erámi unirisórone ore ome dacarigode to. 20 Mu cojñone ore uje que ore toji pujuyaquéode udore jmáinie to jé ore chajo rágaja dasijnaringuéone. Enga que ore cha dangaranenie pujopie gajnarenguei. Enga que ore chapo dangaránone ayoré gajnúo rĩ uje pipesucho ore iji guebéode uje ore íode u óro, pláta, bronce ore, jé iji cucarané nanganatáguedie, pidode ore. Uje ore angaránone udore que ore chimo cuchárique, que ore chudúdapo cuchárique rĩ, enga que ore digapo rĩ. 21 Que ore chapo jocarataque rĩ ome ñane. Que ore chapo pujopie gajnarénguenie, dajuyaquéode rĩ ome ñane. Que ore chapo punganingane ome chequé unejánguenie, jnani quedéjnane ore rĩ. Que ore chapo orie rĩ ome uñane ugúchade.
1 Unojo quigade enga imópo Dupade iroque ujopierãi te rĩ uje doi jnumi tiji guéode enga gue abuja dóji ejode. Aquesua dopóji gatoi gai te rĩ. Edodie cho guedé ojodie uje nanganata. Enga otadéjna enga cho ujetiga pioi tṍraji otadode. 2 Imo iji yenominone uje darujna aábi désiji uté jmanai uje pungaraque. Enga uté chuchiéjna yote quedéjnai ome darída ãrachua. Jeque chuchiéjna jnumone ome darída arasei. 3 Enga uté chejnapúsu daruode enga cho caraté quedéjnane ajéode uje cho dajé. Enga jĩraque guéode uruode ore chajnai enga cho jetiga guei uru garitíode jé chojmára ore iji jnumi. 4 E dimane yu ujetiga yurúsãre guéode uruode udore. Mu udute darade uje tṍraji guéode uje chojningame yu: —Apógu guéode uru garitíode ore uruode. Enga jé ca arúsãre.— 5 Diga ajire Dupade iroque ujopierãi tuté uje chuchiéjna yote quedéjnai, jnumi ore. Enga chãrai dajmanai ãrachua tiji gaté. 6 Enga chojninga: —Dupade pujnuéngaisṍri u yipijogúsõri uje jé ũrepise yu ome yojñane ome uaque. Enga yipijogúsõri uté u uje ipesute gaté, erámone, yote quedéjnane ore. Ipesudápo gaté, erámi, yote quedéjnane ore jogosórone cucha ponáyone ore jnese rĩ. Jecute ojningame uaque: E íjnongapo piroditigade rĩ ome Dupade ojningane cucha uje a jĩraque tocade jne. 7 Jecute ujetiga Dupade iroque gariti chubúchu dabuchui te jne, enga a jĩraque Dupade ipoguiédedie dáyipiei tocade ome erámone jogosórone ore jne. Uje e áyipie aroi udire uje chingome daruode atatasórone jnani bajade ore nanique.— 8 Enga darade uje tṍraji gaté e catecãrápoi yu rĩ enga chojningame yu: —Boji ti e. Asasi darujna aábi uje pungarangape, uje désiji Dupade iroi jmáinie uje chuchiéjna yote quedéjnai, jnumi ore.— 9 Ijose Dupade iroi yui enga utási darujna aábi tiji. Enga chojningame yu: —Asasi enga agu. A cho cutérone jne iji babijnani. Mu a anire gai te jne enga a chigogája bajei te jne.— 10 Enga isasi darujna aábi iji Dupade iroi jmáinie enga yagúsu. Uneréjna aja yibijnani. Cho cutérone. Mu uje inire gai enga yajei ũroso ome iringotigai. 11 Enga ore chojningame yu: —Bajnei tu ujetiga atatapo Dupade áyipiedie rĩ iji pidai uásejnane, jé iji punire uásejnane rĩ, jé iji ore jogosórone uje ore uruode cãra ome ñane jnese, jé iji udore ore eduguéjna uásejnane to rĩ.—
1 Enga ore chisi ome pidi tome yu, uje ore erásõri u ujetiga ore chatingara cuchade ome. Enga ore chojninga: —Ayague enga atingara cuchade aja Dupade iguíjnai eruéode. Enga asẽcaru Dupade icatecãraisórone iji jne uje ore chicota Dupade.— 2 Enga ore jno daruode údi ome yu enga ore chojninga: —Mu jé ca atingara cuchade aja ajã́ro guesi to jne iji Dupade iguíjnai. Chamáñaje ore chisi ome ajã́ro guesi tuté ome purása quedéjnane ore gu. Enga purása quedéjnane udore a ore chejna guedosírigo iji Dupade edójnari guidai tuté jne. Enga a 42 guedosírigo jne. Mu a ca ore susipise cuchárique guio iji Dupade edójnari guidai tuté jne. 3 Enga a yiroque yipijogúsõre gárerigo aja ore jne ujetiga ore chatata yuru uréone ome ore. Enga a dirode 1.260 jne ujetiga ore pésu yiroquéode iji ore ujade. Enga a ore chigui bora utatadie jne uje imoi tu uje pujnusiétigai sué ore gai.— 4 Enga Dupade ipijogúsõre gáreode udore ore gajnunie déji Yocangarádejnai iquei iji gaté, uje Yocangarádejnai uté u uje gajneque jnumi. Enga udore ore gajnúone uñai u ore acaque gáreode uje ore i tu olívodie enga ore gajnúone uñane upo papose pi gáreode rĩ. 5 Ujetiga uñeque pota chigócarique ome udore uñeque, enga a jĩraque pioi tṍraji uté pijnani tome ore enga chejnárase uté gosi. 6 Enga a pujopie déji Dupade ipijogúsorone udore ore jne ujetiga ore chaquĩ́ra guéode jé iji dirode udore uje qué ore doi Dupade iroquéode iji jnumi. Enga a udore ore ujopie etotiguei cuse to ome yodi ujetiga ore chinoningase enga noña enga diquiyojna. Enga a udore ore ujopie etotiguei cusapo jne rĩ ome erámi ujetiga ore cho daru noñángone ome jnumi. Enga a jé ore doi dajéningome dajopie cuchabe uaté jne ujetiga tocade ome ore gatuaque. 7 Mu ujetiga ore chimate Dupade iroquéode udore iji jnumi enga jé u uje jnani guichayárique tṍraji ejopié tuaté uje que eruénique cuse. Enga jnani guichayai uté a pésõra Dupade ipijogúsorone udore ore jne, enga a sué udore ore gai jne, enga a chujépise ore. 8 Enga a ore chinguire ore ajnoquéode iji dajeque dajnanguemei jne iji ore idaidatei tuté uje ore chujé Yocangarádejnai iji curesei gai iji nanique. Enga idaidatei tuté jé gajnui u guidai uje i tu Sodóma nanique. Enga gajnui upo puniri Egípto rĩ. Chamáñaje sijnanguipise idaisórone udore ore gu. 9 Dirode a gadioque enga peque uñai jne uje cojñone ore diguina idaidatei tuté ujetiga ore chajire udore ore ajnoquéode iji jnumone. Enga a ore tṍraji ducunirone jnese iji erámone, enga ore déji jnese uje ore cãra daruode ome ñane. Enga a ca ore pota jne ujetiga ore chijochame ore ajnoquéode. 10 Enga a pududique udore ore ujnomei jne iji erámi jnese uje chi e ore toi. Enga a pininaquei jogadi tu ome ore enga a ore tẽrája ñane jne ome darasitigade. Chamáñaje Dupade ipijogúsõre gáreode udore, uje ore chatata Dupade uruode ome ore, ore pesupúsu ore juredie ica gu. 11 Enga Dupade chiringarápo ore rĩ uje e dirode gadioque enga nóna pei. Enga udore chaguepo rĩ enga ore chajuguipise jnanione ore agutedie uje ore pañáji ore. 12 Enga Dupade ipijogúsõre gáreode udore ore chudute dajnéone dara uajácho uje tṍraji guéode uje chojningame ore: —Ocho gaté a.— Enga jĩraque udore ore chacája gue abuja aja gaté. Enga udore ore umajosórone ore pañáji Dupade ipijogúsorone icoringai aja gaté jnese. 13 Jé u uje jnupe tãrarachuque cuchábi chijninguese idaidatei tuté. Enga jé u uje chijninguesipise guiguíjnane jnese iji idai peque gatébi enga chejna guiguíjnane udore jnese iji. Enga togode iji uté 7 mil. Mu guidai idaisórone, uje ore chapídiji, ore chicota Dupade iji gaté ome dasadodéringadatéi. 14 E erámone unirisórone ore tṍra paguté sutabáidode cucha gajnaréngone uñai taja daquigade. Mu Dupade ujuyaqueque amiri qué déji enga a jĩraque di jne. 15 Enga Dupade iroque gariti e chubúchu dabuchui enga gaté unirisórone ore chudute pibijnacaráidie uje chojninga: Deréjnai e di uje yocangarádejnai Dupade, utocaidi Crísto ore gajneque punirone iji erámone jnese. Jecute erámone unirisórone udore ore jnese a ore cho dangarániji Dupade ore iji deréjnane jnese jne. 16 Enga pangaránone udore uje 24 ore, uje ore chácariji dayaripíode iji Dupade iquei, uje ore chudute ore icotaquéode, enga jĩraque ore chague to enga ore chichaga dagatáidie aja jnumi iji Dupade iquei enga ore chisi Dupade gai to. 17 Enga ore chojninga: Yocangarádejna, yocacaranguipis ome ua uje Dupa pujnuéngaisṍri tu ua. Yirajágo uje jé bajogate iji deréjnai tuné, jé bajogadápo to nanique rĩ iji taningápisi, enga a jé bajogadápo to jne rĩ ujetiga ãriapo iji jnumi rĩ. Yacãco babai uje bajna bajopiedaté etogue ome erámi unirisórone, enga e ore déji bádi jnese enga e bajnuéngai ore gai. 18 Ajningaraque erámi unirisórone ore jnese ome ua, mu diri e u ujetiga bájningai tocade. Deréjnai e u uné to rĩ ujetiga ajire togode ore adode aja quigode ujetiga apésu ore quigode. Mu a ẽrája barógode ore jne uje ore chatata baru uréone, jé aja udore ore rĩ uje ore chedupise ua iji dajéode, jé aja udore ore to uje ore cho cucha datei iji bei. Ujetiga ujnomeraque ore, jeoga ca ore pijoque, mu a jé ẽrája banguresórone udore ore jnese jne. Enga diri e u uné to ujetiga opise bajuñame erámi umajosṍripísode to. 19 Enga jé u uje Dupade iguíjna cuchábi chuchẽre dabai iji gaté. Enga ipáñangoji cuchade pi iji ajei uje Dupade áyipiedie pi tu. Enga imóngo ajnorane iji, enga udúco cucha jocarã́quedatéi iji, jé aja guéode uruode. Enga jnumi tãrara to enga ebe dipesedie tṍraji gaté to.
1 Enga cucha pibójmai tṍraji guéode enga chequé. Enga uaté cho daguidéji guedé ojodie. Uaté chuchiéjna guedoside. Enga guédodie déji uaté ayoi enga gariji yirídai. 2 Enga chequé uaté ica déji ajei. Enga uaté chisa dabade ome dabi achaminone. Uje e idógosi ujetiga base. 3 Enga cucha pibojma uña tõrapóji guéode rĩ. Enga arócojna guichaya. Charumájna uté. Enga gatóidie gariti. Uté ayode déji gatóidie jnese. Enga uedie chejna yijmanáyone. 4 Enga cho ujetiga arócojna guichayai tuté chajuguína guédodie iji jnumi enga péode gadioque, enga cari churuguse guédodie peque chojmarai enga tṍra ore aja jnumi gai. Unojo quigade enga arócojna guichayai chaji chequé icarẽ́ iquei. Gaidi tu gu ujetiga jĩraque tagu chequé abi ujetiga e base. 5 Enga chequé abi base enga diyoqui. Enga jĩraque ore choréji abi tiji Dupade iji guéode ujetiga déji Dupade gari iji dayaripi cuchábi. Mu erámone jogosórone a ore eduguéjna uté jne. Enga ujetiga uté e basaja daringárique eduguéjna, enga a ca ajéninga darúrique jne, enga ducunirone jnese iji erámone a ore tangaripísi uté jne enga a ore dopísi uruode quigode. 6 Uje e ore jno uaté abi údi aja gaté, enga uaté chayo enga chicáji erãpe tarei. Uaté gaidi tu Dupade imani jogate uje e dimane iji iquei. Enga Dupade chirodipise uaté iji te jé aja dirode ome uaté uje 1.260 u. 7 Unojo quigade enga Dupade iroque gaté uje i tu Miguel, irógode ore, ore cho dajocaningame arócojna guichayai, irógode ore iji guéode. Enga ore chujé ñane. 8 Arócojna guichayai, irógode ore jnusi jorógui rágome dajocaningai. Mu Dupade iroi Miguel, jorane ore sué ore gai. Enga ore chãraque guéode ome ore. 9 Enga arócojna guichayai tuté jiei íode. I bajai tu Ugai. I uñai tupo Dicoré te rĩ. I uñai tupo Satanas te rĩ. Enga uté u uje chãra erámone jogosórone ore jnese. Diga uté patíorã darógode ore uje ore tṍra ore aja erámone. 10 Enga udute dara ibisógode iji gaté uje chojninga: —Yoquidupade e chiqueta yógome yocumajósṍri Satanas. Enga yoquidupade e pijoguipis ome daringai eduguéjna cuchape, enga Dupade utocaidi Crísto e pijoguipise ome erámi uje gajneque cuchade jnese iji. Chamáñaje e ducarãte Satanas uté iji gaté gu. Yocojningai uté u uje jecucha chijnime yocujode Dupade anguresóño iyoguéode iji dirode, dejade ore jnese iji Dupade iquei. 11 Enga jé cho yocujode Dupade anguresóño ore uje ore sué Satanas gai gu daringai puruque iji yocangarádejnai Jesucrísto iyoi uje uté gajnua u áyasa pẽrapáide chugué nanique. Adi jec upo rĩ uje ore sué Satanas gai to rĩ gu Dupade uru uréone to uje ore changureta enga que ore chagutu quitique ome darásade. Enga que ore chagutúapo dacuecaringuei rĩ ujetiga ore cho daba datatagode Dupade urúo udore.— 12 Uje gojñangarai tuté e chejna dojña bajade guesi enga tibidi gaté, erámi unirisórone ore enga chojningame ore: —Idaité uaque iji guéode é, anínaño uaque é. Uje e ore tṍra Satanas tiji uaquedai te é. Mu jnumiminórone uaque é, iyiejã joroque Satanas yui ome uaque é. Jé aja yote quedéjnane jogosórone uaque to é. Uje dicoré Satanas e basaja uáguiji erámone ome dájningadatéode é. Chiraja gu uje eruei e idógosi é.— 13 Unojo quigade enga imo uje ore tṍra arócojna guichayai uté aja erámi. Enga jĩraque uté chajna chequé icamasugué. 14 Mu imo iji yenominone uje ore chisi ome arorei cuchábi ujnóngone ome chequé icamasugué tuaté ujetiga chója Dupade imani jogate iji erãpe tarei. Ore gaidi tu gu ujetiga idajapise uaté iji dajnasṍri uté. Enga jé ore chªa uaté ome posode iji sequeré gadióguedie enga peque uñai. 15 Enga imo iji yenominone uje ugai tuté chojne dabogoro aja chequé quigade enga ibogoro pésu cutejmai yote dequejnangóri. Ajegaidi tu jorógu ujetiga chequé icamasugué tuaté toi iji uté to. 16 Mu jnumi chátaja chequé tuaté. Enga jnumi chuchẽre dabijnani gai enga chijnire arócojna guichayai ibogoro ipesudi yote dequejnangóri gai. 17 Jecute arócojna guichayai chugúja chequé tuaté. Enga jno enga pésu pocaningai ome uaté ape disi ejode ore. Enga ore u uje angoninguite guesaque ore ome Dupade iroquéode. Ore upo rĩ uje ore pesupúsu Jesucrísto uru uréone quigode uje chatata udore quigode ome ore nanique.
1 Yimone cucha unojo quigade enga iyáji yote quedéjnai pijnanai iji yenominone. Enga imo uje jnani guichayai tṍraji yote quedéjnai. Enga uté gatóidie gariti. Uedie dépoji rĩ enga chejna yijmanáyone. Uté ayode déji uedie jnese. Enga purusarane déji gatóidie uje uruode gajnarécho aja Dupade. 2 Yimoi jnani guichaya uté gajnui u carataque quedéjnai. Enga uté guídade cho yajogue quedéjnanie guídade. Jé basa enga pijnani cho caraté quedéjnanie pijnanone. Enga arócojna quedéjnai ipesute jnani guichayai tuté uringai pangarate ujetiga gajneque cuchade iji erámi jnese. Enga chisi ome dajopie tome jnani guichayai tuté ujetiga chijna. 3 Enga imo paquesupídi tiji jnani guichayai gatóidie uña enga cho docódode. Cho jetiga ca chapídome gajneri. Mu docódi tuté jĩraque íjnoque. Enga erámone jogosórone ore tijapísa jnese. Jecute ore pésu uté ipotigádode cucha jnese. 4 Enga ore chisi arócojna guichayai gai uje uté guẽrate jnani guichayai ujopie tome. Jecute udore ore chisiapo jnani guichayai gai to rĩ. Enga ore chojninga: —Que uñeque déji uje cho jnani guichayai tuté. Enga que qué ducujnuéngaipo uté gai to rĩ ome cutejma ujopiedaté.— 5 Jecute arócojna guichayai chiroque jnani guichayai tuté ujetiga chicota re, enga ujetiga uté uruode gajnarécho aja Dupade to. Enga Dupade jé guẽrate deréjnane ome uté ome uru gajnaréngone udore ome re. Enga jé ore cho deduguéjna iji uté, jé aja guedosírigo ujetiga 42 ore. 6 Jecute jnani guichayai tuté que cha daru gajnaréngone ome Dupade. Mu chujñieta iguíjnai, urásade ore jnese to iji gaté. 7 Enga arócojna guichayai tuté e chiroque ujetiga jnani guichayai cho dajocaningame Dupade anguresórone ore to enga sué ore gai. Enga uté ujopie chise erámi údode jnese. Enga ore cho deduguéjna iji uté iji danirone jnese. Enga Dupade jé juregate deréjnane ome uté jnani guichayai ome udore ore. 8 Enga erámi unirisórone jnese ore chopise dupade iji jnani guichayai tuté. Yojningane u udore ore jnese uje que purusãraque ore íode nanique iji erámi taningai iquéode ujetiga ore gajneque pucuecaringuérique to. Enga darujna aoi tuté gajnesṍri tu Jesucrísto uje gajnua u áyasa pẽrapáide chuguéraque ome yoque nanique. 9 Ujetiga angoninguite guesaque uacuñeque, angaripísi yuruode unojo. 10 Gosode ujetiga suru uacabáyode iji soldádode iguíjnai, mu quigade enga a pujuru udore gosode gai to jne. Adi jé u to ujetiga gosode chujé uaque ome daquesérigo, mu quigade enga a chuque udore ore to jne ome quesérigo. Jecute Dupade anguresórone uaque a, ca oyo caru ome ore jocaningane ome uaque. Mu adotáyo uágaja. Enga ca ayáyo uacanguretigai. 11 Quigade enga imo jnani guichaya uñai iji yenominone uje uté tṍraji jnumi údi. Uté uedie gare enga cho áyasadie uedie. Mu narare enga uruode cho arócojna guichayai uruode. 12 Jnani guichaya bajai guẽrate jnani guichaya ejoi ujopie tome ujetiga eduguéjna cuchape to. Jecute uté pota jetiga erámone jogosórone ore chisi jnani guichaya bajai gai jnese, uje e piquetaque docódi tiji gatoi nanique gu. 13 - 14 Enga Dupade juegabate deréjnane ome jnani guichaya ejoi uté ujetiga pesapo cucha pitijabáidode rĩ iji jnani guichaya bajai iquei. Enga chiroque pioi aja jnumi iji gaté. Enga erámone jogosórone ore pañáji uté ipesudode cucha jnese. Uje erámone jogosórone ore chimo uté ipesute datéode uje oidé tu jnani guichaya bajai ujopie tome, enga ore chicota jnani guichaya bajai jnese. Mu uté aringaquéo dapesute datéode ome ore. Jecute doi datéringane rĩ ome ore uje chojningame ore: —Uacapañáñoji uté ujopie. Jecute apéso uté gajnúrique enga oyo uacadupa iji jne. Uje uté u uje quesei imanipídi dóji gatoi nanique, mu que toi ome.— 15 Enga udore ore doi enga ore pésu jnani guichaya bajai gajnui. Enga jnani guichaya ejoi pésu enga jnani guichaya bajai gajnui narare to. Enga gajnui tuté uruode chequésãre ore uje que ore chisi uté gai to go. 16 Uté chiroque erámone unirisórone to ujetiga purusãracho ore enóchade, jeoga ore jmanai ãrachua. Chapuse ore aja jnese iji erámi údode: jnanione, chequedíe, disiode, ugucharane, jmatágode. Jé u ore jnese. 17 Enga jnani guichaya bajai ípisi u uje ore churúsãre iji ore enóchade, jeoga uté gajnei número u ore urusarane. Ujetiga uñeque chetaque daringárique purusãraque, enga que toc ujetiga dequẽrate cuchárique ome uté gosi. Que togapo rĩ ujetiga tẽra dagúcharique ome ore. 18 Que toc ujetiga pirajaque udore quitique ujetiga ca pirajatígadatérique déji gosi. Mu ujetiga déji gosi, enga uté gosi doi enga chejnapise darajatigai aja udore quigode enga jé u jne ujetiga uté gosi chiraja jnani guichayai tuté gosi. Enga quigode u unojo: ayorépise jnani guichayai uté to, enga gajnei número u 666. Enga ípisi tṍraji número udore. 144 mil ore,
1 Cuchade unojo quigade enga yajire enga imo yoquiquetasṍri Jesucrísto iji yenominone uje uté gajnua tu áyasa chugué. Enga uté cháji cototé gai uje i tu Sion. Enga iquetade, uje 144 mil ore, ore déji uté gari. Enga Jesucrísto, dai Dupade ore íode déji ore enóchade jnese. 2 Enga udute cucha jocarãpídi uje tṍraji guéode enga cho guéode uruode uje que cha daruode. Chopo tiedie jocarane rĩ uje ore cho uooo. Chopo ore ijocayade árpai jocarane rĩ, uje uásejnapise ijocayasórone. 3 Enga Jesucrísto iquetade erámi unirisóño udore ore chirate daradé icha iji Dupade charipi cuchábi iquei. Enga gaté unirisõre gagájnione, jé aja pangaránone uje 24 ore, ore chudúdapo ore iradé tuaté to jnese. Mu gusu Jesus iquetade, uje 144 mil ore, uje ore gajné ore iradé tuaté ujetiga ore chirate. 4 Enga Jesus iquetade, uje 144 mil ore, ore u uje que ore doi punganingárique ome chequé quedéjnaringui. Enga ueque ore ome pisijnaringuéone. Enga ore nóna Jesus aja quedéjnane uje uté u gu uje gajnua u áyasa pẽrapáide chuguéraque ome ore. Enga piquetaque ore nanique iji dojode erámi unirisõre ujade ujetiga pẽrate bajade u ore ome Dupade, Jesucrísto ore. 5 Enga que purupatáringarique chimo udore ore pijnanone. Enga ueguipise udore ore ome pisijnaringuéone jnese iji Dupade iquei. 6 Cucha dacadode unojo quigade enga imópo Dupade iroque uñai te rĩ uje chóna tijode iji erámone. Enga chacate ore ome Dupade uru eyúgojmane ujetiga ore changureta enga pucuecaringuei déji ore iji deréjnane jnese. Enga chapuse ore aja iji erámone jnese ome dacajnaquéode. 7 Enga uté chojningame ore iji daru uajádode: —Jé angachopísi Dupade é. Beyoi enga acotáyo uté to é. Deréjnai e u gu ujetiga uté chajire uacadode aja quigode. Beyoi enga acotáyopise uté uje ipesute erámi taningane, jé aja yote quedéjnane, sibíjnane ore jnese é.— 8 Diga Dupade iroque uñai tṍraji bajai quigade enga chojninga: —Idaidaté cuchábi Babilónia e pujnuéngai é. Idaidaté cuchábi Babilónia e pujnuéngai é. Enga a ca chacadápo erámone jogosórone ore jne rĩ é, ome dasoca gajnaréngone é. Uje que ore áyipiedie jnoji cucha gajnarenguipísode gatuaque é.— 9 Diga jĩraque Dupade iroque uñai tṍraji uté quigade enga chojninga iji daru uajádode: —Ajuso uaqueo ome jnani guichaya bajai enga ca asíyo uté gai to é. Ujetiga uacuñeque chisi uté gai, jeoga chichaga dagatáidie aja jnumi iji gajnui iquei, enga a Dupade ujuyaquei chise uaque gosi te jne rĩ. Ujetiga uté urusarane déji uaque gosi enóchai, jeoga uaque gosi jmanai, enga uté gosi a gajneque Dupade ujuyaquei te jne é. 10 Enga a ajningaranguipise Dupade ome ore jne. Enga Dupade ujuyaquei paguté sutabáide gajnesórone u udore ore jnese uje ore chisi jnani guichayai uté gai te é. Enga a gãrate obiréjnane u udore ore aja gajño pioi uje tagu iji deréjnane jnese é. Enga que uñeque chapídome é. Enga Dupade, irógode ore iji gaté a ore pañáji udore ore iñosoringué datéode iji pioi ocaráidie ajei te jne é. Que gusu ore mu a Jesus pañáji ore to jne uje Jesus uté gajnua tu áyasa pẽrapáideraque.— 11 Enga qué jno dabijnane údi enga chojninga: —Enga udore ore iñosoringuéone a ca eruénique cuse jne é. A ca ore iñosoringuéone cho jnaque iji dirode, dejade ore jnese jne é. Chamáñaje ore chisi jnani guichayai, gajnui ore gai te gu é. Enga ore juéga jeta uté i dóji ore enóchade gu é.— 12 Enga jé jno daruode údi enga chojninga: —Jecute Dupade anguresõripísode ore gajnei tu ujetiga ore chidota rome dajnéone pequetingaquéo gatuaque á. Yojningane u ore uje ore doi Dupade ojningane cucha, enga jogadipise ore anguretigai iji Jesucrísto á.— 13 Enga udute puruode uje tṍraji guéode ome yu uje chojninga: —Arúsãre cuchade unojo quigode enga ósi tome: A jé yoco ditijínanguiji Yocangarádejnai anguresórone ore jnese uje ore toina, jé aja uné iquéode.— Mu Dupade Ujopie Espíritu Sánto doi enga chojninga: “Jé u ãrie. Chamáñaje ore cho dajñare ome dasagode cucha, enga ore ate goningane nóna ore to aja gaté.” 14 Quigade enga yajire enga yimo gue abuja pórorojna. Enga imo jnanírique enga chopise ayorérique uje chácariji gai. Enga ayoi déji gatoi uje óro nanganataque. Enga aramu asicoi déji jmanai enga dimane ome cucha pacade yui ujetiga na. 15 Enga Dupade iroi uñai dopoi guesi tiji Dupade iguíjnai te rĩ, enga uté catecã́ri gue abuja charipísõri enga chejnapúsu daruode enga chojningame: —Deréjnai e u ãrie. Bo enga aquesu cucha pacade iji erámone údode jnese ome boidi aramu asico. Uje e cuchade timániji gu á.— 16 Jecute gue abuja charipísõri doi enga chaquesu cucha pacade iji erámone údode ome aramu asicoi enga chijna. 17 Enga Dupade iroque uñai dopoi guesi te rĩ iji Dupade iguíjna cuchábi uje déji guéode enga chijnapo aramu asico uñai to rĩ. 18 Enga Dupade iroque uñai tõrapo gaserani údi to rĩ iji Dupade iguíjnai uje ujopierãque uté ome pioi. Enga uté tibidi aramu asicoi isangóri enga chojninga: —Aquesu úvadie ubugode iji erámone údode jnese é. Enga amáta ore aja pijoyapídi te jne. Chamáñaje e timachuguépisi gu.— 19 Enga Dupade iroi doi enga chaquesu úvadie ubugode iji erámone. Enga chamáta úvadie ore aja ore ijoyapite cuchábi ujetiga pijóya ore iji. Mu úvadie udire gajnúone u Dupade guetesórone ore iji erámone uje ore gajnei tu Dupade ujuyaqueque cuchábi. 20 Enga ore chijose damátadie úvai iji dajoyapídebéi iji idaidatei guesi. Mu que úva otadi u go uje tṍraji, mu ayoré iyo uje tṍraji. Enga pésu tie uje umaritigai chajni 300 kilómetrodie, jé basa enga uringai ajedatei chajníji buricade posode.
1 Unojo quigade enga imo cucha pibojma uñai iji gaté uje chajuque yaguté. Enga imo Dupade iroque garitíode iji gaté uje dimane ore ome Dupade ujuyaqué ejode uje gariti ore. Enga iraja uje a Dupade ájningai chimate raja guesi ome dajuyaqué ejode udore jne. 2 Enga imo cuchárique uje gajnui u yote quedéjnarique uje pioi nóna ajicaranone iji. Enga imo ayoréode uje ore chague iji yote quedéjnai uté pijnanai, enga ore ijocayade árpai déji ore jnese uje Dupade gueranome ore. Yojningane u udore ore uje ore sué jnani guichayai, gajnui ore gai. Chamáñaje que udore ore juéga rome jnani guichayai tuté gajnei número to gu ujetiga purusãraque ore ome. 3 Enga ore chirate Dupade iroi Moises iradé. Enga ore chiradápo Jesus iradé rĩ uje gajnui u áyasa pẽrapáideraque. Enga ore chojninga: Yocangarádejna, Dupa pujnuéngaisṍripísi tu ua. Enga cucha pitijabácho bapesute datéode. Pangarádejna cuchape ua ome erámi unirisórone ore, enga basocade ome ore que iyoguérique cus. Mu uome ua enga ũrepise ua ome baruode jnese. 4 Yocangarádejna, que uñeque déji ujetiga ca todo ua. Que uñeque dépoji rĩ ujetiga ca chisi babai. Gusu ua gu uje ueguipise ua ome pisijnaringuéone. Erámone jogosórone a ore chichaga dagatáidie aja baquei jnese jne, enga a ore chicota ua. Uje ore chiraja gu uje jé tiógarapísa bapesudode udore jnese. 5 Unojo quigade enga yimo Dupade iguíjnai ajei gaté puyaguipísi uje chuchẽre dabai iji gaté, uje Dupade áyipiedie jogadi tu. 6 Enga Dupade iroque garitíode ore tṍraji Dupade iguíjnai ajé puyaguipísi tuté. Enga a udore u jne ujetiga ore chijna ujuyaqueque garitíode aja erámone to jne. Enga ore iguidedie líno enga póroropisi. Que iguínique cuse iji ore. Enga ore chadía dagarubode aja re uje chise ore aróbedíe eruéode. Enga óro nanganatácho. 7 Enga gaté unirisõre gagájnione uñai doi, enga chisi ome agapiábode ome Dupade iroque garitíode udore, enga óro nanganatagábio, uje Dupa eyúgojmai ujuyaqueque gajnarénguipísode irágu ajéode. 8 Enga Dupade ingoningájnai, ujopie ore irágu ajé puyaguipísi tuté enga gajnunie u pioi úyujna. Enga que toque ujetiga pibi uté jé aja diri uté ujetiga Dupade ujuyaqueque garitíode tocade jnese, uje Dupade iroque garitíode ore jno údi aja erámi.
1 Enga udute pibijnacaráidie uje tṍraji Dupade iguíjnai ajé puyaguipísi . Enga chojningame Dupade iroque garitíode ore: —Boyo enga ójneño Dupade ujuyaqueque gajnarénguipísode udore aja erámone uje dosíji agapiábode uje gariti.— 2 Enga Dupade iroque bajai jno, enga chojne doidábi agapiábi aja jnumi, enga jĩraque udique gajnaréngone tṍraji ore jnese uje jnani guichayai urusarane déji ore, uje ore chichaga dagatáidie aja jnumi iji uté gajnui iquei. 3 Enga Dupade iroque uñai jnopo rĩ enga chojne doidábi agapiábi aja yote quedéjnai. Enga jĩraque noña enga diquiyojna cuchabe. Enga diquiyojna uaté gajnui tu ujetiga tṍraji ayoré totique. Enga cucha ponáyone ore toi jnese to uje ore déji yote quedéjnai tuté. 4 Enga Dupade iroque uñai jnopo to rĩ, enga chojne doidábi agapiábi aja tiedie, sibíjnane ore enga ore checãrapo re rĩ enga diquiyo ore to. 5 Enga udute Dupade iroi uñai uje gajneque pujuyaquéode ome yodi enga chojninga: —Dupade a, jé bajogate iji deréjnane unojo, enga jé bajogate to iji erámone taningane iquéode. Yocangarádejnai tu ua, enga jé tiógarapísa uje bo bajuñame cucha gajnaréngone ipesungórone udore ore. Uje ueque ua gu ome cucha gajnaréngone. 6 Chamáñaje udore ore yuque baruode atatasórone nanique gu, jé aja udore uñane to rĩ uje ore chedupise ua iji dajéode. Jecute jé ore tiógarapísa diquiyojnanie uje basi ome ore ujetiga ore chóji.— 7 Enga udute darai to uje tṍraji gaserani iji Dupade iguíjnai ajei uje chojninga: —Jé ũré ãrie, Yocangarádejna. Dupade pujnuéngaisṍripísi tu ua, enga jé ũrepise ua ome bajiritigade ore jnese.— 8 Enga Dupade iroque uñai jno enga chojne doidábi agapiábi aja guedé edo. Enga e ujopie déji guedé ujetiga ojo dotarenie tagu erámone jogosórone ore ome daringanie ditaguei. 9 Dupade ujuyaqueque cuchábi tuté chujñungu ore gáyode: chieque, chieque jnese. Mu que ore cha dasijnaringuéone. Enga que ore chisi Dupade gai gotique. Mu ore uruode gajnaréchopís aja Dupade. Uje Dupade u mu uje gajnei turásu ujetiga chaquĩ́ra dajuyaqueque datéode udore. 10 Enga Dupade iroque uñai jno, enga chójnesiapo doidábi agapiábi aja jnani guichaya bajai charidi te rĩ. Enga jĩraque topié uté uniri jnese iji jnumi. Enga ijnangunújna cuchabe chise urásade ore jnese. Enga udore ore ajúgorodie cho ta ta, ta ta ome uraque daũrosoringuéone. 11 Mu que ore chajni Dupade gai gotique. Mu ore chajo raja dasijnaringuéone. Enga udore ore uruode gajnarécho gaté aja Dupade iji guéode iji gaté uje ipesute ore udigode, aja ore ũrosoringuéone jnese múñi. 12 Enga Dupade iroque uñai jnopo rĩ, enga chójnesi doidábi agapiábi aja tie uje i tu Eufrátes. Enga yodi iji tie jĩraque íjnoque. Enga eduguéjnane, uje ore tṍraji guedé garani, ore cho dajẽre iji tie uaté ome raque. 13 Quigade enga imo nicoré uje tṍraji arócojna guichayai pijnani. Enga yimópo nicorenie uñai rĩ uje tṍraji jnani guichayai pijnani to rĩ. Enga nicorenie uña tṍraji jnani guichayai iroque aringacai pijnani to rĩ. Enga pujopie gajnarénguenie u nicoré gadióguedie udire ore jnese. 14 Enga pujopie gajnarénguenie udire garanone u Satanas irógode, enga ore ujopie etotiguei cuse ujetiga ore pésu cucha pitijádode. Enga udire jno, enga ore chicáji erámi údode jnese ujetiga ore chamáta cojñone eduguéjnane ore aja ñane ome pocaningai yui, uje a tocade jne iji Dupa pujnuéngaisṍri ojningai uté dire. 15 “Angáchoi yu. Uje a yṍraji te janipe jne ujetiga ca ayorérique áyipieraque déji yu. Adi u oriechoquírique uje que pirajaque diringárique. Mu pininaquei jogadi tu jne ome udore ore uje niriji ore, uje ore iguidedie dimane iji ore. Chamáñaje a ca ore chimo pajegátigarique ome raque jne gu ome daringáringo choquíbio.” 16 Enga pujopie gajnarénguenie udire a ore chamáta dabididigode udore eduguéjna aja erámi uté jne uje i tu Armagedon ome hebréode. 17 Enga Dupade iroque gariti doi enga chójnesi doidábi pagabiábi aja gaté yui. Jec u uje dara ibisógode tṍraji charipi cuchábi iji Dupade iguíjnai ajé gaté puyaguipísi . Enga chojninga: —E yimate cuchade jnese.— 18 Enga unojo quigade enga ajnorane tṍraji, jé aja cucha ajámomítedatéi. Enga guéode uruode tõrapóji to rĩ. Enga jnumi tãrarapise ome jnupe tãrarachuque datei, uje uté sué jnupe tãrarachugode jnese jec iji erámi taningane nanique. 19 Enga idaidaté cuchábi Jerusalen dajuque enga péode gadioque ome jnupe tãrarachuque cuchábi tuté. Enga e pucuayagápo idaidatéode iji erámone údode jnese rĩ. Enga Dupade e jnusina idaidaté cuchábi Babilónia ipesute gajnarenguipísode to enga e chopise dajuñame uaté. Uje Dupade ajningaranguipise ome idaidatei Babilónia tuaté ome ipesute cucha gajnarenguipísode. 20 Enga jnupe tãrarachuque cuchábi tuté chucuase cototedie jnese iji erámi. Enga que pimópo ore rĩ. Enga que pimópo yote quedéjnane abuedie ore jnese to rĩ. 21 Ebe cuchábedie basapóji guéode rĩ, enga basaja erámone jogosórone ore gai jnese. Ebedie udire chojmarai chise 40 kílodie. Jecute jnanione iji erámone jnese ore uruode gajnarécho gaté aja Dupade uje ujuyaquei que chajire re gu ome ore.
1 Unojo quigade enga Dupade irógode uñai uje ore chójnesi doidábode agapiábio aja jnumi, udore uñai chise yu enga chojningame yu: —Juan, boji ti enga ajína yu á. A yingo chequé dibechoquia tome ua jne uje ore chudute uaté ujnomei iji erámone jnese. Uje uaté charidode u yote quedéjnane. Mu a yingo uaté gajnei pujuyaquéquedaté ome ua jne. 2 Enga erámone jogosórone ore eduguéjnane jnese ore cháta raja chequé tuaté ome unganingane. Enga jé chopo erámone unirisórone ore rĩ. Ore chirate chequé tuaté aja isoca gajnaréngone to, enga ore gajnúone u yote pioi yugode uje que ore chiraja cuchárique eruénique ome re.— 3 Enga Dupade iroi jno yúdi aja erãpe eyutiguei iji yenominone uje Dupade Ujopie Espíritu Sánto chingome yu. Enga imo chequé tuaté uje cháji cuchiso guichaya charumájnai gai. Enga purusarane déji uté gai uje uruode gajnarécho aja Dupade. Enga uté gatóidie gariti, jeque uedie chejna yijmanáyone. 4 Chequé tuaté iguidé charumájna enga cho eduguéjnanie ore iguidedie uje ugucharẽ́ ore. Enga uaté tujúna dajnápeode uje óro nanganatac. Tujúnapo cucarané ueradedie rĩ, jé aja pérladie ore rĩ. Uaté chisasi dajopidábia uje óro nanganatagape. Enga cho jetiga isoca gajnarenguipísode jnese irágusupúsu suaté. 5 Enga chequé uaté purusãrai pi déji enóchai uje pipoguiécho quigode enga chósi te: “Yi tu guidaidaté ujnomerãi i, uje i tu Babilónia. Enga pisoca gajnarenguipísode ipesusórone ore jnese iji erámi tuné ore iradé tu yu aja cuchade udore jnese. Jé cho dibechoquidie jnese rĩ ore iradé tupo yu rĩ.” 6 Enga jĩraque yiraja uje uaté cho yote pioi yuguedie. Mu que yote pioi yugué uaté go, mu uaté ũrusoringuei tṍraji Dupade urásade iyojnanie ome. Chamáñaje uaté yugode jiei gu iji Dupade urásade ore, jé iji Jesus adode atatasórone ore. Enga uje iraja uaté adode udore, enga chajuguipise yaguté. 7 Enga Dupade iroi chojningame yu: —¿Gotique gu uje cuchade udore chajuque baguté? A yo quique cucha pibójmane quigode iji chequé uaté jne, jé iji uaté charipi cuchiso guichayai to uje uté gatóidie gariti enga uedie chejna yijmanáyone. 8 Cuchiso guichayai tuté uje bamo iji benominone déji erámi nanique, mu qué íjnoque iji deréjnane unojo. Mu a dopoi guesi jne rĩ iji dayaridi ejo cuchabe uje que eruénique cuse. Mu quique obiréjnai u datoringai tuté jne uje e que qué nijiápo rĩ iji. Mu ujetiga erámone unirisórone ore chimo cuchiso guichayai tuté uje dépoji erámi rĩ, enga a ore tija jnese jne uje diapóji erámi rĩ. Mu itijabáisórone u udore uje que ore íode déji Dupade yugode darujna ao uje churúsãre pucuecaringuei gajnesórone ore íode iji uje cáma pipesute erã́tique nanique.— 9 Enga Dupade iroi chojningápome yu rĩ: —Piraguípise yuruode unojo. Jecute anóningachopísa. Uté gatode garitidie qui tu cototé garitidie uje chequé tuaté chácariji udire ore gai.— 10 Enga Dupade iroi chojningápome yu rĩ: —Uté gatode garitidie qui tupo eduguéjna garitíode rĩ. Chejna yijmanai iji udore ore e ore cha daringane eduguéjna. Mu uñai iji ore jé qué eduguéjna uté iji deréjnane unojo. Mu uñai cáma di, uje chi ore eduguéjna to jne. Mu a díningo garósi jne ome ejoi uté ujetiga eduguéjna. 11 Mu eduguéjna ejópisi a u cuchiso guichayai tuté jne uje déji erámi nanique, mu e que dépoji rĩ. Enga uté a basaja daringárique eduguéjna jne iji eduguéjna bajaque garitíode ore quigade. Enga e gadioque ore iji ti, eduguéjnane udore. U mu garitíode udore ore, a jé uña jne ejopísi tuté. Enga e gare ome uté uje basaja daringai eduguéjna. Mu ujetiga e chejna udore guesi, enga quique obiréjnai a u datoringai jne, ujetiga toi enga ca diapo jne rĩ. 12 Bajiredie uedie udire iji cuchiso guichayai tuté uje chejna yijmanáyone, ore gajnúone u eduguéjnaringo jne uje cáma udore basaja daringáringo eduguéjna. Mu Dupade a guẽratique guedé batiga chojmára jne ome udore ore ujetiga ore basaja daringárique eduguéjna. Enga a jé ore nóna cuchiso guichayai tuté jne aja gaté. 13 Enga eduguéjnane udore ore, uje ore chejna yijmanáyone, a ore cho deduguéjna cuchape iji cuchiso guichayai tuté jne. 14 Enga a ore pésu pocaningai ome Jesus, uje gajnua tu áyasa pẽrapáide chuguéraque. Mu Jesus a sué udore ore gai jne. Chamáñaje pangarádejnai gu enga sué pangaránone gáyode jnese. Eduguéjna cuchape to enga sué eduguéjnane uñane gáyode jnese to rĩ. Enga uté jorane ore dopísi deduguéjnai tuté uru quigode. Chamáñaje Dupade ajegáite udore ore gu nanique.— 15 Enga Dupade iroi chatatapo yote quedéjnane quigode ome yu to rĩ. Enga chojninga: —Bamo chequé dibechoquia iji benominone que, uje cháji yote quedéjnane. Udore qui tu uje uaté adode chise punirone jnese iji erámi údode.— 16 Enga yicatecãraisṍri tuté Dupade iroque chojningápome yu to rĩ: —Eduguéjna erueminórone udore uje ore gajnunie u uedie uje chejna yijmanáyone a ore chetaguipise chequé dibechoquia tuaté jne. Enga jé cho cuchiso guichayai uje a chetaguipise uaté to. Enga a ore cugujnáji uaté jne. Enga a ore chejñu uaté iguidedie jne. Enga a ore tagu uaté arágajñunie jne. Iji unojo quigade enga a ore chãrúpo detepídode gai rĩ ujetiga ca diquimópo uaté atique rĩ iji erámone. 17 Enga Dupade ipesudé ore áyipiedie udire ujetiga ore cháta rágaja cuchiso guichayai. Dupade ijocayaque udore ore gu ujetiga uru diyajmane tocade jne ome ore ipesudode. 18 Chequé tuaté uje bamo iji benominone qui tu idaidaté cuchátique uje chijocase erámone jogosórone ore eduguéjnane jnese.—
1 Quigade enga imópo Dupade iroque uñai rĩ uje ujopieranguipise uje tṍraji gaté. Enga uté chijñate erámone gai jnese ome dangoningájnadatéi. 2 Enga uté pijnacaráchi aja jnumi uje chojninga: —Idaidaté cuchábi Babilónia e pujuya é. E pujnuéngai yé. A ca ayorérique chopo dedáiji jne rĩ é. Uje noña enga gajnarenguipise é. Enga jogosórone u Satanas iroque gajnaréngone, aja pujopie gajnarénguenie jnese, aja chugúpẽre gajnarénguenie ore rĩ é. 3 Uje uaté isoca gajnarénguipísode chuságaja erámi unirisórone ore jnese, enga ore iradé tu. Enga eduguéjnane iji erámi jnese ore tungarája uaté jnese uje ore chirate. Enga uaté chimate oredie gaisórone aja guesode ome ore uringane atácho iji erámi údode ome uaté cutejmane ipotiguédatéo.— 4 Enga udúdapo dara uajádode uñane rĩ uje tṍraji gaté uje chojninga: —Yanguresórone uaque a, boyóji udore ore gari iji Babilónia tuaté é. Enga jé ca átayo uágaja udore ore isijnaringuéone to é. Idógosi gu udore ore gajnei pujuyaqueque é. 5 Uje ore isijnaringuéone chujé raja ñane gai, enga chichagu gatajnoquei te é. Jecute dimane Dupade ujetiga cho dajuñame ore ome ore ate gajnarenguipísode é. 6 Mu uaté ujuyaquédatéode ome yanguresórone jé qué iyiécho. Jeque yujuyaquéode enga a ca iyiécho ome uaté jne.— 7 Enga Dupade chojningápo rĩ: —Boyo enga asíñome pujuyaqueque cuchátique ome uaté jne ujetiga chopise daba dapotiguédatéode, jé aja dacotaquédatéode ome re. Chamáñaje uaté chojningame re: “Yajnua tu eduguéjna cucháberaque. Enga que toque go ujetiga chequé eca yu jne. Enga a ca yimo payuguhebátigarique ome yu jne rĩ.” 8 Jecute uaté gajnéone pujuyaquéquedatéo a chise uaté jne iji dire chojmarai uje pujuyaquéode unojo u: pitoringai, payuguhebátigade, chaguhedatéode ore. Que gusu udore mu a papose uaté gai to jne. Chamáñaje pangarádejna cuchape Dupade, enga a ca ajéninga darúrique jne ome uaté.— 9 Enga eduguéjnane iji erámone uje ore chirate uaté aja ate gajnarenguipísode a ore chimo pioi ocaráidie, úyujnanie ore uje tṍraji idaidatei tuté. Enga a ore popísiji uaté ejode jne. 10 Enga udore ore a ca ore cunguésõri uaté gajnei pujuyaqueque. Mu a ore chisa dabade jne, enga a ore chojninga jne: —¡Ja jõõõ! Osõcopise joroque guidaidaté cuchábi Babilónia uaté. Uje ujnomerẽ́ uaté ica. Mu chunina mu dajnei pujuyaqueque e yore gai.— 11 Cucha guẽrasórone ore iji erámone a ore popóji uaté ejode to jne rĩ. Uje ore chiraja gu uje e que diquigaidé oré ore ugúchade gu. Uje jecucha udore ore tẽra cucha orerane ome uaté gu. 12 Enga ore gueranone u óro nanganatágode, pláta, guebeque uñane to rĩ uje ore íode u bronce, hiérro ore, cucarané ueradedie, jé aja pérladie rĩ. Ore chijnapo borapeque cangarátubiode uje ore ipesucho iji líno, séda ore uje uruchachade chichagu iji ñane rĩ. Ore chijnapo pore ueradedie rĩ uje udore ai uneripíso. Ore chijnapo cuchiso uedie, uje ore pésu datuatigade iji rĩ. Ore chijnapo tábla oreranguipísode rĩ. 13 Udore ore gueranone u cucha pibosode gajnéone udore to uje ai unéño uje udore uñai i tu canéla. Jé upo cucha ai unérone rĩ uje ore chãru, jé aja cucha ai unérone to rĩ uje ore changuñéra dabai uje udore uñai i u mírra. Ore chijnapo yote pioi, acéite, harína ore rĩ. Ore chijnapo cuchisode aja rĩ: cabáyuode, áyasadie, buricade ore. Ore chijnapo guebéquedatéode aja rĩ. Ore chijnapo dasagode ayoréo rĩ ujetiga ore tẽrapo ore rĩ. 14 Enga a ore chojningame uaté jne: —Bedójnareone cucha a e ca ore chajniapo babai jne rĩ. Jé chopo bagúcha orerane ore jnese rĩ. Udore ore bijna, enga jé ore bijnápis ome ua.— 15 Enga cucha guẽrasórone udore ore, ugucharanguipise ore ome deranone cucha ome idaidatei tuté. Mu ore todo ujeta gajnei pujuyaqueque chise ore to. Jecute idája ore iji. Mu ore poji ejode to rĩ. 16 Enga a ore chojninga jne: —¡Ja jõõõ! Osõcopise joroque idaidaté cuchábi Babilónia. Uje guidaidaté ueradéjna diríca, enga gajnui tu chequé ueradéjna uje ueradéjnai iguidedie to uje líno orerẽi enga uruchachade chichagu iji ñane iji. Uje uaté tujúna dajnápeode óro nanganatácho, jé aja pérladie, cucarané ueradedie ore jnese to. 17 Mu uaté chunina mu ugúcha dipesé ueradéjnane ijnonguipise.— Que gusu cuchade guẽrasórone uje ore cho dáyugu uaté, mu pangaránone iji uraque dabíode cuco ore chopise dáyugu uaté to, jé aja piésorone ore jnese to. Mu udore que ore cunguésõri uaté to, mu idája ore iji. 18 Uje ore chimo pioi úyujnanie iji idaidaté cuchábi gai, enga ore chojningame raque: —¿Ja jé qué diquiyaguirase idaidatérique uñeque a, ujetiga cho uaté ome uringai até ome dagúchade?— 19 A ore popóji uaté ejode rĩ, enga a ore chojninga: —¡Ja jõõõ! Osõcopise joroque idaidaté cuchábi tuté. Uje cucode gachisórone areque yoque gu uaté. Mu uaté chunina mu gajnei pujuyaquéquedatéi chejna.— 20 Mu gaté unirisórone uaque a, anínaño uaque ome cucha dacadode udore. Jé aja Jesus iroguipísode uaque, anínaño uaque to. Jé aja Dupade uruode atatasórone uaque to, anínaño uaque to. Jé u uaque to uje uacoyo uacajnéngu Dupade, anínañopúsu uaque to. Chamáñaje Dupade cho dajuñame idaidatei uté gu ipesute gajnaréngone ome danguresórone uaque. 21 Enga imo Dupade irógode uñai uje ujopierãque. Enga uté doi enga chisa cucarané cuchabe uje cho ore ugutádode eratodie cucaranei. Enga doi enga tṍra cucarané tuaté aja yote quedéjnai. Enga chojninga: —Idaidaté cuchábi Babilónia a gajnua tu cucarané tunaque jne, uje yṍra uaté aja yote quedéjnane. Chamáñaje a ca pimópo guidaidaté cuchábi jogonórone cucha jnese jne rĩ iji deréjnane jnese.— 22 Enga Dupade iroi e icatecãraini tu guidaidatei Babilónia uaté enga chojninga: —A e ca pududigápo ore ijocayade árpai jocarane iji uacajáronie jne rĩ, jé aja pubuchugode jocarane rĩ. Enga a e ijnonguipise pisagode iji ua jne rĩ. Enga a ca pududigápo ayorérigo jne rĩ ujetiga ore chijáro cuchárigo iji ua. 23 Ibijoguipísode u cucha ẽrasórone nanique uje ore cho dedai iji ua. Jé cho barásade udore ore uje chiese daijna cuchape ore to nanique, uje ore jno daringaquéode udore údi aja erámone údode jnese. Mu cuchade udore e chise deruei. Enga e que pimo bajicaradéjnaringo. E que pududigápo bajñamítedatéode rĩ uje uacapéso ome jnacanique ujetiga chisa dacotéraque.— 24 Dupade cho dajuñame guidaidatei tuté gu isijnaringuéone. Cuchiyi tupúsu uje chujé Dupade anguresórone ore iji erámi údode, enga chujépo uruode atatasórone ore rĩ.
1 Quigade enga udute gaté jogosõre dipeséode ore pijnacaráidie uje ore chojninga: ¡Alelúya ! Icotágo yocasuté Dupade uje chiqueta yoque ome daringai ujopierãque. Icotágopo ome ingoningájnadatéi te rĩ. 2 Chamáñaje ũrepise Dupade ome ajiritigade gu, enga que cho paraque ome dapesutique cucha. Enga jé tiógara uje cho dajuñame chequé dibechoquia uaté. Chamáñaje uaté bai u dapesute gajnarenguipísode uje chacate erámi unirisórone ome punga ninga quedéjnane. Enga Dupade jnutaque to ome darógode udore uje uaté chujé ore nanique. 3 Enga udore ore chojningápo rĩ: —¡Alelúya! Chamáñaje pioi uté úyujnanie a ca íjnoque jne uje chãru uaté gai.— 4 Enga pangaránone uje 24 ore, jé aja gaté unirisõre gagájnione udore, ore doi enga ore chichaga dagatáidie aja jnumi iji Dupade iquei iji gaté. Enga udore ore chisi Dupade gai uje chácariji dayaripi cuchábi gai enga udore ore chojninga: —¡Amen ! ¡Alelúya!— 5 Enga jé u uje udute darade uje tṍraji charipi cuchábi ejoi enga chojninga: Beyoi enga acotáyo yoquidupade jnese. Yojningane u uaque uje uacabeyoi iroquéode, jé u uaque rĩ uje uacoyo uacangaráni iji. Ujetiga ujnomerãque uaque, jeoga caurénga uacajnomérique cuse, mu beyoi enga acotáyo Dupade jnese. 6 Udúdapo gáguedatédie ore ichorã cuchábi te rĩ uje chichagu gatajnoquei tuté. Enga cho yote úode ajamomínone uje cho uooo. Chopo gue tórangone rĩ uje ajnorane chijna re aja jnumone. Enga ore chojninga: ¡Alelúya ! Uje Yocangarádejnai, Dupade pujnuéngaisõre, e u yoqueduguéjnapísi. 7 Jecute beyoi enga yinínango yoque gaté. Enga beyoi enga yisígopíse Dupade uté gai. Deréjnai e u gu ujetiga yoquiquetasṍri Jesucrísto, anguresórone ore nínapúsu ñane. Yojningai u uté uje gajnua tu áyasa pẽrapáideraque ome yoque. Enga ore ininaquei gajnui tu jnacari uje sene gajmato ore chijna ñane. Uje uté gajmato e chigui daguidé ueradéjna, enga dimane ome dajmasṍri yui. 8 Enga ore chisi ome iguidé líno póroropisedie ome uaté enga ichapise uaté iguidé, enga que iguínique déji, enga nanganata ejode. Bora líno póroropise quigode u uje e que diquiyaque Dupade anguresónique iyoguérique. 9 Enga Dupade iroi chojningame yu rĩ: —Arúsãrape unojo: “Uje Dupade urúo udore enga ũrepíso uje a chamáta dajnacari Jesucrísto, anguresórone ore aja ñane jne ome dabose uneréjnane. Enga pirasitigai jogadi tu ome ore jne ujeta Dupade tibidi ore ome to.”— 10 Enga yicha yigatáidie aja jnumi iji Dupade iroi tuté iquei ujetiga yicota to. Mu chaquĩ́ra yu enga chojningame yu: —Ca achaga bagatáidie aja jnumi iji yiquei. Chamáñaje Dupade iroque yu to. Enga yopise uaque, bajorane uaque uje uacabeyopísi Jesus acajnaqué uréone quigode. Uacacotaquéode gajnengóri urásu Dupade enga gusupúsu.— Yocatatagode Dupade urúo que garani u atatasórone uyoque go, mu garani u Jesus acajnaqué ũrepísode. 11 Cucha dacadode unojo quigade enga imo guéode uje chuchẽre dabai. Enga burica póroroi tṍraji. Enga charipísõri i u Uru Ũrei, uje eduguéjna uté. Enga chirodipise darásade. Enga que pésu pocaningárique bisideque rĩ. 12 Buricai charipísõri tuté edodie cho piogode ocaráidie enga cho jmíti, jmíti, jmíti. Enga uté chacája dacayo dipeséode. Enga purusarane déji uté uje chatata i. Mu que diquirajaque i quigode ome ore. Gusu uté uje chiraja. 13 Enga diquiyojna cho cheme aja uté iguidé gáyode. MEnga uté ípisi tu Dupade Uruode. 14 Enga imo jocarataque dipeséode uje ore chajna deduguéjnai uté. Enga líno ore iguidedie enga póroropisi. Enga que iguínique dépoji ore iguidedie udire rĩ. Enga udore ore cháji burica pórorode gáyode jnese. 15 Enga quesé asicoi tṍraji buricai charipísõri bajai tuté pijnani. Enga angúromei a u quesei uté jne ujetiga chicha erámi unirisórone ore aja jnumi yui iji ore unirone jnese. Enga a ore eduguéjna cuchape uté jne, enga a chijna pogué guebetique jne ome daringai pujnuéngaisṍre. Enga ujetiga uté dayé Dupa pujnuéngaisṍri ájningárique tocade jne, enga jé u ujetiga uté chopise dajuñame erámi unirisórone ore jnese jne. 16 Enga purusarane déji uté iguidé. Enga dépoji etarútepiédie iji etarúdi gai te rĩ. Enga purusarane udore chojninga: “Eduguéjna querui u uté ome eduguéjnane jnese. Pangarádejna uté to, enga que pangarátique cho uté.” 17 Diga imo Dupade irógode uñai iji yenominone. Enga uté chague iji guedé edo. Enga uté chejnapúsu daruode enga tibidi chugúperone enga chojninga: —Chugúpẽre chagúode a, boyóji te jnese é. Amátayo uágaja Dupade imaningone uacaboso é. 18 Uje idógosi ujetiga Yocangarádejnai jnué erámi unirisórone gai te jne á. Enga a yugode uásejna iji ore jne á. Beyoi enga acho ore arágajñunie jne á. Acho jocaratade, eduguéjnane, ore irógode jne rĩ á. Achópo buricade to jne rĩ á. Achópo ore charipísorone ore to jne rĩ á. Boyo enga apúso ore iji jnumi te jne á, ujetiga acho ore á. Acho ayoré atade, jé aja ayoré gajnaréngone ore jnese á.— 19 Iji darade unojo quigade enga imo jnani guichaya bajai, erámone jogosórone ore eduguéjnane uje e ore chamáta dasoldádode aja ñane ujetiga ore pésu pocaningai ome buricai charipísõri, isoldádode ore to. 20 Mu buricai charipísõri tuté sué ore gai, enga doi enga chisa jnani guichaya bajai. Dopoi ejoi to rĩ enga chisapo rĩ. Enga tṍra ore jnese aja gajño pioi uje azufre ai nóna pioi aja gaté. Uje ejoi tuté ãraque erámi unirisórone ore jnese ome daringaquédatéode nanique. Uje pésu dapesute datéode diríca ome dangaráni jnani guichaya bajai ujopie. Enga chiroque darane udore ore aja ujetiga purusãraque ore enóchade ome jnani guichaya bajai i. Enga chirogapo ore aja rĩ ujetiga ore chichaga dagatáidie aja jnumi iji uté gajnui iquei. 21 Enga buricai charipísõri tuté doi jnani guichayai anguresórone enga chujé ore ome daquesei uje tṍraji pijnani. Enga chugúpẽre chagúode doi enga tagápo ore arágajñunie rĩ. Enga ore icadie guejna iji ore.
1 Unojo quigade enga imo Dupade irógode, gaté jogosórone uñai, uje doi jnumi iji gaté. Enga chijna ejo cuchabe joidé erásõri enga chátaja enuei uje ojnaque cuchape. 2 Enga Dupade iroi gaté unirisõre chisa arócojna guichayai enga chigaru, enga suru gai tiji ejo cuchabe ajei. Enga guejnanie sequeredie mil u iji ejo ajei. Arócojna guichayai tuté u ugai nanique. Enga íode jé u Dicoré, Satanas to. 3 Enga Dupade iroi tuté tṍraja Satanas aja ejo cuchabe ajei uje que eruénique cuse. Enga surupúsu piagoi gai ome erato ujetiga ca uté dopoi guesi te jne rĩ. Gaidi tu gu ujetiga ca uté chãrápo erámi unirisórone rĩ jé aja sequeré mil eruei. Mu quigade enga a ore chĩrápo jne rĩ, enga a dépoji erámi jne rĩ iji dire garósirigo. 4 Quigade enga imo piyaripi cuchábode enga Jesus anguresórone ore chácariji gáyode. Uje Jesus e ujo eduguéjna ore ujetiga ore chajire erámi jogosórone ore adode aja quigode to. Enga imópo Dupade uruode ipesusõripísode to uje ore chatata Jesus ujnoméone nanique, enga ore cho daba datatagode unojo. Jnani guichayai guetesórone u unojo ore, jecute que ore chichaga dagatáidie aja jnumi iji uté gajnui iquei. Que ore juéga to ujetiga uté i dóji ore enóchade jeoga ore jmanai. Jecute jnani guichayai irógode ore chaquesu udore ore etabidode nanique. Mu imo uje ore ecápo rĩ. Enga Crísto ujo eduguéjna ore to iji sequeredie mil udire. 5 Mu udore ore gajneque pirijíninga bajai tuné ujetiga ore niji iji. Mu togode uñane a cáma ore niji to jne jé aja sequeredie mil eruei. 6 Pininaquei jogadi a u jne ome Dupade imeserane ore ujetiga ore gajneque pirijíninga bajai tuté to. Enga a ca ore chimo pisadodéringárique ome raque to jne iji pitoringai ejopísi. Mu udore ore a ore basaja daringáringo sacerdóteo jne ujetiga ore pésu Dupade adode aja quigode. Enga Crísto ujo eduguéjna ore to jne jé aja sequeredie mil. 7 Ujetiga sequeredie e chise mil eruei enga a ore chĩrápo dicoré Satanas jne rĩ. 8 Enga Satanas a chãra erámone unirisórone ore jnese iji erámone údode. A chãrapo eduguéjnai uje i tu Gog, jé aja uté urásade rĩ iji ore uniri Magog. Enga a ore chamáta ráguiji punirone uñane jnese ujetiga ore pésu pocaningai ome Jesucrísto. Enga a uásejna soldádode jne uje ore pésu pocaningai. Enga ore gajnunie u ujnanie ore iji yote quedéjnai pijnanane. 9 Enga yimo iji yenominone uje ore chubu uniri tuté údode jnese. Enga diga ore chaparu Dupade urásade gai uje ore déji darengúi. Enga ore chaparu Dupade ijnoranguipísi guidai gai to. Mu Dupade chiroque pioguéjnarique aja ore gai uje tṍraji gaté ome ore. Enga chejnápise udore ore jnese. 10 Enga pacãrate Satanas aja gajño pioi to uje azufre ai nóna pioi aja gaté. Chamáñaje aringácachoquípise uté gu. Enga jorane u jnani guichayai, iroque táquechoquí ore iji uje e pacãrate bajaque ore iji ica. Enga a ore chejnarenguipise dajnéone pujuyaquécho jne iji dejade, dirode ore jnese iji deréjnane jnese. 11 Enga imo piyaripi cuchábi uje póroropise. Enga imópo charipísõri to rĩ. Enga imo to uje jnumi, gaté ore íjnonguiji uté iquei bisideque. Chamáñaje que ore charitique cuse gu. 12 Enga imo ayoré togode ore jnese uje ore chague iji Dupade iquei. Ayoré atade déji, enga ayoré gajnaréngone ore déji jnese rĩ. Enga imo uje puchẽraque darujna aone gáyode. Enga imo darujna aoi uñai uje pucuecaringuei gajnesórone ore íode déji. Enga ore adode pijogúsorone u darujna aone udore. Chamáñaje purusãracho ore adode iji darujna aone udore nanique gu. Diga a pingo ore adode aja ore jne, enga quigade enga patataque ore quigode ome ore. 13 Enga piringaraque ayoré togode ore jnese; udore ore uje ore déji yote quedéjnane ajedatéode, jé aja jnaropié jogosórone ore jnese rĩ. Enga pajirique udore ore ipesudode aja quigode jnese, enga jé ore gajneque dapesudode udore quitígo. 14 Unojo quigade enga Dupade tṍra pitoringai, jnaropié ore aja gajño pioi jnese. Enga pitoringai erueminóripísi tu gajño pioi tuté. 15 Enga Dupade tṍra ore aja gajño pioi to uje que ore íode déji Dupade yugode darujna ao to, uje pucuecaringuei gajnengórone ore íode déji.
1 Dupade ujuyaquei tuté quigade enga imo uje icha jnumi, guéode ore. Enga íjnoque yote quedéjnane iji. Uje jnupe bajai, gue bajade e ore íjnoque gu. 2 Juan uyu u uje ipañapísiji Dupade edójnari guidai Jerusalen icha uje doi jnumi iji gaté iji Dupade gari. Enga ueradéjnapise. Gajnua tu gapúraque ome yu uje que suseque re ome dajmasṍri yui. 3 Enga udute pibijnacaráidie uje tṍraji guéode enga chojninga: —¡Ajire to! Dupade déji erámi unirisórone ore gari. Enga a jé charite ore gari jne, enga cho darása iji ore. Enga Dupade a jé upúsu jne ujetiga chácariji ore gari ujetiga ore cho dadupa ugurui iji uté jne iji deréjnane jnese. 4 Dupade a chinoningase darásade ore edocadode jne. Enga a chinoningasapo pitoringai iji ore jne rĩ, jé aja pagoyedie, jé aja puyacade, jé aja pute ũrosoringuéone. Cuchade udore ore déji erámi nanique, mu e ore chise deruéode jnese.— 5 Enga charipi cuchábi charipísõri catecã́ri yu to enga chojningame yu: —Jne ajire to. E imate cuchade uringane icha jnese.— Enga chojningápome yu rĩ: —Arúsãrape yuruode unojo. Iqué ũréo yuruode unojo ujetiga ore changuretapise jnese.— 6 Unojo quigade enga chojningame yu: —E yimate cuchade jnese. Yajnua tu purusãra bajé uje i tu A, jé basa yajnua tupo purusãra ejopise uje i tu Z. Chamáñaje bajaque yu ome cuchade jnese, mu uje cuchade udore chise deruéode mu jé yijogate. Jecute uté gosi uje cajnóriji, enga a yisi ome yote uecai tome uté jne uje tṍraji sibíjnai iji gaté enga bisideque yerani yote tome uté gosi. 7 Ujetiga Satanas ca chijnime uñeque ãrírique enga a yẽrája uté gosi te jne ome yimaningone cucha. Enga a uté idupade u yu jne. Enga a yopo yabíji uté gosi to jne rĩ. 8 Mu pisijnaringuéone ipesusórone a pãrate udore ore jnese aja gajño pioi jne uje azufre ai nóna pioi ocaráidie aja gaté iji uté. Enga pitoringai erueminóripísi u uté jne. Gajño pioi quisórone ore u: sadodechoquíode. Upo Dupade uruode otigayasórone ore rĩ. Upo pijnacororane ore rĩ. Upo ayoré yungórone ore rĩ. Upo jnanione, chequedíe ore jnese rĩ uje ore chachia ráguiji punganingane. Upo udore ore jnese rĩ uje ore chequetingare re ome pujopie gajnarénguenie. Upo ayoré gajnúone catecãraisórone ore rĩ. Upo urupatáquechoquíode ore jnese to rĩ.— 9 Unojo quigade enga Dupade iroque garitíode uñai tibágui yu uje ore oidábode su agapiábode uje Dupade ujuyaqueque erueminóri dóji ajei. Enga uté chojningame yu: —Boji te a. A yingo Jesus uté gajmámia aja ua jne, uje Jesus uté u uje gajnua u áyasa pẽrapáide chuguéraque. Uje a acotépise uaté jne.— 10 Uje qué yenominone u uje Espíritu Sánto chingome yu, enga Dupade iroi uté jno yúdi aja cototé umaré gaté enga uté chingome Dupade edójnari idaidaté cuchábi Jerusalen ome yu. Mu imo uje idaidatei tuté doi jnumi tiji gaté iji Dupade gari. 11 Obiréjna Dupade ingoningájnadatéi iji idaidatei tuté. Enga nanganata. Gajnunie u cucaranenie uje ore íode u jaspe, cristal ore uje nanganatapísi. 12 Idaidaté cuchábi tuté ujuyaquéode déji enga chaparu gai. Enga umáño. Enga querújnapo rĩ. Enga piagode déji enga gariji yirídai. Enga Dupade irógode gaté unirisóño ore chirote piagode udore jnese. Enga jnani bajai Israel ujnacarode uje gare ore iji yirídai ore íode déji piagode udore. 13 Piagode déji dosadode jnese, enga gadiógode déji umusoi garani. Jeque gadiógode déji casaque garani. Jeque gadiógode déji guedé garani. Jeque gadiógode dépoji guedé cacadi te rĩ. 14 Cucarané cuchábedie déji ujuyaquéode udore údi enga gare ore iji yirídai. Enga purusãraque Jesus iroguipísode ore íode iji udire. Uje ore irósõri Jesus gajnua tu áyasa pẽrapáide chuguéraque. 15 Enga yicatecãraisṍri Dupade iroque chijna pidi uje óro nanganataque. Chijna gu ujetiga chasingara idaidatei, ujuyaquéode, ujuyaquéode piagode ore ome. 16 Dupade iroi chasingara pidi aja idaidatei dosadode. Enga dosadode jé ore cho ñane jnese. Enga kilómetrodie 2.200 u iji dosate chojmara, chojmarane. Enga idaidatei tuté umaritigai cuse to rĩ iji gaté enga jé cho dosadode. 17 Quigade enga Dupade iroi chasingarápo ujuyaquei umáningai rĩ enga métrodie 64 iji. Enga oidi chopise ayoréode uyoque yocoidode picho uje yasingáco cuchade ome. 18 Idaidatei tuté adode nanganatácho jnese, uje óro uécho enga díreca uéchade. Enga cho ajicaranone uje ichájna. Enga ore pésu ujuyaquéode iji cucaranenie uje i tu jaspe. Enga nanganata ujuyaquéode udore to. 19 - 20 Uje ore pésu pujuyaquéode udore aja gaté enga ore cãra erásorone ome ñane enga gare iji yirídai erásorone udore. Enga erásõre bajai cucarané ueradé uje i tu jaspe. Erásõre ejode udore cucarané ueradei to uje udore íode u: zafíro, ágata, esmerálda, ónice, cornalína, crisólito, berílo, topácio, crisoprása, jacínto. Enga erásõre ejopísi i tu amatísta. 21 Piagode uje gariji yirídai udore jé pérla udire ore jnese. Dajerepise iji idaidatei óro ueque enga nanganatapise. Enga cho ajicaranone uje díreca uéchai. 22 Yajire, mu que yimo Dupade iguíjnarique iji idaidatei tuté ujetiga ore catecã́ri Dupade iji. Chamáñaje Yocangarádejnai, Dupa pujnuéngaisṍre, Jesus, uje gajnua u áyasa pẽrapáide chuguéraque, ore charidi upúsu idaidatei údode jnese gu ujetiga picatecãráite ore iji udore údode jnese. 23 E que cucha guedé, guedoside ore ome idaidatei idaisórone udore ore. Dupade chijñate ore gai gu ome dangoningájnadatéi. Enga guidaidatei tuté idírecaringuei tu Jesus uje gajnua tu áyasa pẽrapáideraque. 24 Cojñone iji ducunirone jnese a ore chajicãra idaidatei uté idírecaringuei jne. Enga eduguéjnane iji erámone jnese a ore chisi idaidatei uté gai, enga a ore tẽrája cucha uoméjnapísode ome uté jne. 25 Enga a ca ore suruápo guidai piagode gáyode udore jne rĩ iji deréjnai údode. Enga a e ca pimópo dejátique jne rĩ iji guidaidatei tuté. 26 Enga erãpe ichai jogosórone a ore ajiriguipise Jerusalen ichai tuté ome deranone cucha ueracho jne uje ore chijnorapise uaté gu. 27 Mu a ca pijnacororárique chacája guidai tuté jne. Jé aja pisijnaringuérique ipesusónique, jé aja aringácachoquírique. Mu acapiésorone a u udore ore uje udore ore íode déji áyasa Jesucrísto yugode darujna ao uje pucuecaringuei quisórone ore íode déji jnese.
1 Enga Dupade iroi chingome tie tome yu uje uaté que iguínique cuse. Enga tie tuaté yocaripise uje pucuecaringuei déji uaté. Enga cho ajicaranone. Enga tie tuaté tṍraji Dupade, Jesucrísto ore charipi cuchábi. Uje Jesucrísto uté gajnua tu áyasa pẽrapáideraque. 2 Tie tuaté dépisiji dajerepise gatocoro iji idaidatei tuté. Enga poridie suéji tie dosadode uje pucuecaringuei déji udire adie. Enga poridie udire adie timate enga gariji yirídai iji sequeré chojmara. Enga adie udire que chimoque guedosíode uje timate. Enga bisite poria tuaté acarane ujetiga erãpe ichai jogosórone ore chóji enga que qué cuchárique chopósi tiji ore rĩ. 3 Enga Dupade acacáninga gajnaréngone ome erãpe bajai eruei upúsu guidaidaté ichai uté jne. Enga Dupade, áyasa gajnui Jesucrísto ore charipi cuchábi déji guidaidaté ichai tuté, enga udore ore irógode a ore chichaga dagatáidie aja jnumi iji ore iquéode gatuaque. 4 Idaidatei tuté jogosórone a ore chimópise Dupade jne ome dedodie. Enga a uté churúsãre dei tiji udore ore enóchade jne. 5 A íjnoque dejai iji jne. Jecute que cucha guedé idírecaringuérique rĩ. E que cuchapo ibiotique idírecaringuéringo rĩ. Chamáñaje yocangarádejnai Dupade a u jne gu ujeta chijñate ore gai iji uté. Enga a Dupade tẽra darijogosórone ore ome ore uringáringo eduguéjna jne. Enga ore uringane eduguéjna a e ca eruénique cuse jne iji deréjnane jnese. 6 Diga Dupade iroi chojningame yu: —Yojningane cucha ome ua ũrepíso jnese enga pangurécho. Yocangarádejnai Dupade u uje chisi ome daruode ome jnani bajade nanique ujetiga ore chatata quigode. Enga jé uté upúsu uje chiroque darógode gaté unirisõre uñai aja darógode uaque ujetiga cho quique cucha piqueminórone ome uaque uje udore jĩraque tocade jne.— 7 Udute Jesus uruode to uje chojninga: —A serã yĩri jne. Enga pininaquei jogadi a u jne ome udore ore jnese uje ore dopísi yuruode quigode iji darujna aone unojo.— 8 Juan u yu uje e yejna yimone, yududigode udore guesi enga ichaga yigatáidie aja jnumi iji yicatecãraisṍri Dupade iroque iquei. Yigaidi tu gu ujetiga yisi gai. 9 Mu uté chojningame yu: —Ca achaga bagatáidie aja jnumi iji yiquei. Bojo Dupade iroque yu to, enga jé yo Dupade anguresórone uaque jnese. Yojningane u ore uje ore chatata Dupade uruode ome ore, jé aja udore ore jnese uje ore dopísi pacajnaquéode quigode uje purusãracho iji darujna aone unojo. Be enga achaga bagatáidie aja Dupade iquei.— 10 Chojningápome yu rĩ: —Jé ca apógu Dupade uru quigode uje purusãracho iji darujna aone unojo. Chamáñaje e idógosi gu ujetiga cuchade udore tocade. 11 Jé dóji enga ayoré sijnángone jé ore jno dasijnaringuéone údi. Jé cho udore ore to uje que ore chusipise deo ome cucha gajnaréngone. Jé ore dóji dadode udore. Mu ate omi doi enga jé jno date omone údi. Enga ujetiga gosi chisipise re ome Dupade, jé jno uté údi to.— 12 Udute Jesus uruode uje chojninga: —A serã yibágui uaque jne. Enga dimane yeranone cucha iji yijmáinie. Enga a yẽrája ayoré chojmara, chojmarane ore jnese jne. Enga a yẽratígo jé chirate ore ipesudode cucha jne. 13 Bajaque yu ome erámi nanique. Enga a erámi íjnongapo jne rĩ mu a jé yijogate jne. Enga yajnua tu purusãra bajé uje i tu A. Enga yajnua tupo purusãra eruemito te rĩ uje i tu Z.— 14 Pininaquei jogadi tu ome udore ore jnese ujetiga puruguei ore iguidedie enga póroroi. Uje a udore ore gajnei tu jne ujetiga ore chacája Jerusalen icha piagode. Enga a ore gajnei tupo jne rĩ ujetiga ore tagu poria adie uje pucuecaringuei déji. 15 Mu Dupade a chãraque dedaidatei tuté ome cucha gajnaréngone ipesungórone ore jnese jne. Yojningane u udore ore uje ore chécãre pisoca omone quigode enga ore chachia ráguiji cucha gajnaréngone udore. Upo Dupade uruode otigayasórone ore rĩ. Upo pujopie gajnarénguenie etingarasórone rĩ. Upo udore ore jnese rĩ uje ore pota punganingane ome jnani quedéjnane, jeoga chequé quedéjnanie. Upo ayoré yungórone rĩ. Upo ayoré gajnúone catecãraisórone ore rĩ. Upo udore ore jnese rĩ uje que ore chibéro re ome daringaquéode.— 16 Enga udúdapo Jesus uruode rĩ enga chojninga: —Jesus uyu enga yiroque yutocaidi gaté unirisõre aja uaque ujetiga ajnerañome uté ojningane cucha ome yanguresórone ore jnese iji dedáyode. Bajaque yu ome eduguéjna cuchábi David nanique, mu uté ape disi ejo yu to. Enga yajnua tu guédo niríngoro ome yingoningájnadatéi.— 17 Dupade Ujopie Espíritu Sánto, áyasa gajnui Jesucrísto gajma ore dejena uágaja daquigade. Enga ore chojninga: —Boyóji te é.— Jecute udore ore jnese uje ore chudute ore pijnane enga ore doi to enga ore tibidi to enga ore chojninga: —Boyóji te á.— Uacuñeque ujetiga cajnóriji, enga gosi tibágui ore pijnane udore enga chóji yote uecai iji ore gari. Chamáñaje Dupade guẽrate bisideque gu yote uecai tuté. 18 Udore ore jnese uje ore chudute cuchade quigode uje purusãracho iji darujna aone unojo beyoi enga ajusópise uaqueo. Chamáñaje ujetiga pajnerame pacajnaqué icha quedéjnarique aja Dupade uruode unojo enga Dupade a chajnerame uté gosi gajnetígo pujuyaquéo ome uté gosi to jne, uje pujuyaquéode udore purusãracho iji darujna aone unojo to. 19 Jé basa enga ujetiga uñeque doi enga chĩro purusarane unojo uñéngo iji darujna aoi unojo enga a Dupade chĩro uté gosi i iji degode darujna ao to jne uje pucuecaringuei quisórone ore íode déji jnese. Enga a charangapo dedaidatei dedójnari to jne rĩ ome uté gosi, uje idaidatei tuté isoca ueradéjnane purusãracho iji darujna aone unojo. 20 Uté uje chingo cuchade unojo ome yu chojninga: —A jĩraque yĩrípise jne.— Enga ichajnai uté uruode enga ojninga: —Yocangarádejna Jesus a, jé yajéode u to. Jĩraque ãriápo jne rĩ iji yoque.— 21 Yajéode u ujetiga yocangarádejnai Jesucrísto chatapísaja uaque jnese. Amen.