Jesus wâgâ mawânkâ Kunwym Deus kiuntuly
1 Idânârâ âtugudyly iraynâ, âdy peba awyly ume, tâlâ myakâwândy kyam Deus Xutuen-hoim. Tunwym Deus agâlâ myakâwândy mâkâ. 2 Idânârâ nhugudyly iraynâ, Deus Xutuen-hoim Deus agâlâ myakâwândy. 3 Deus Xutuen-hoinlâ, idânârâ tâlânro modo adâkelygue kulâ xugunehonri. Mâkâ aguepa watay, âdy peba, ânguy peba warâ tâise. 4 Deus Xutuen-hoim mawânkâ xirâ anaym tâlâ kyenehonri. Mâkâ wâgâlâ ise Deus eydâ atoam kytâly, kieinwândylygue. Iajinu wâne kytâho kientoem ânwa tâsagonze, myara lâpylâ Deus wâgâ kiuntuhoem anhenehonly. 5 Iajinu emyenro mâkâ, inakanhe aguitobyry xutuen-hoim. Iamu, iajinu tohoreba nietaymba, arâ lâpylâ inakanhe tadawyly Deus wâgâ kiuntuly nianlâpyra awyly. 6 Jesus Deus wâgâ aguely adaguly iraynâ, Deus eagonro uguondo unâ egatuim igonomâmy, João Batistalâ. 7 Iajinu oze kytâduo, âdyam kytâly awyly tutuze kurâ, arâ lâpylâ Jesus âdara Deusram kaindyly awyly nhutuen-honly. Jesus wâgâ agueze myani João âewyly. Idânârâ adâkely indatomoem, Jesus nheinwântomoem warâ myani João aguely. 8 Deus Xutuen-hoim kuru mâkeba myani João. Jesus mawânkâ kyam Deus Xutuen-hoim kuru; mâkâ wâgâ ani João aguely. 9 Jesus xirâ onro anaxi âewyly myakâwâm, Deus kyam xutuen-honze. Mâkâ wâgâ mawânrâ âdara mâkâ xurâem kydawyly xutuly. 10 Mâkâ kyam Deus Xutuen-hoim onro anaxi âemâ; tarâ kuduaylâ akâwâm. Mâkâ lelâlâ idânârâ onro anano modo tytanrugue kulâ xugunipyry, Deus xurâ keba modo olâ Messiaslâ mâkâ awyly nutubamo, Deus Ingonotyby. 11 Typemugudo judeu domodo duaxilâ wâne myani âewyly. Ipemugudo judeu domodo ewy olâ myani, eynynonroem tâidysebamo. 12 Tâlâ olâ myani einwânni lâpylâ, awylygue akaemo Deus xurâem nhenehonly. 13 Tâjimery tyze odaypalâ iazely, nhunwynlâ xuguni warâ. Arâpa olâ Deus tymeryem kyedyly. Eynynonroem kydawylygue tymeryem kyedyly. 14 Deus kyam Xutuen-hoim Jesus Cristo karalâ akâwâm kurâem awyly. Kuduaylâ akâwâm xirâ onro anaym awyly. Kagâ koendonro lelâlâ mâkâ. Mâkâlâ mawânkâ âkealâ kuru âdaunlo Deus awyly xutuen-hoim. Deus imery tokaleom tawylygue, koendâ, ton-honre warâ mâkâ. Tâense kurâ koendonro kehoem awyly, ton-honre awyly warâ. 15 Mâkâ Deus kyam Xutuen-honri wâgâ myakâwâm João Batista aguely: — Saguhoem iwâgâ auguehobyrylâ merâ. Auguehobyry enanâguewâdaungâ, “Inepa ise mâkâ yakadâ kuru xuturim âewyly. Urâ lelâlâ wâne ani waunroem iazeim, tâlâ olâ myakâwândy merâ yazely iraylâ” uguehobyry — kely. 16 Koendonro lelâlâ mâkâ, koendâ lelâ inanry, idânârâ kagâ awyly. Aunlolâ inanry kurâem koendonro anhesezedyly. 17 Saguhoem kuru Moisésram myakâwândy Deus kâzewenry nhegatuen-honly, kydamudo judeu domodo ezewenry. Jesus Cristo wâgâ olâ iwerâ Deus koendonroem tawyly, ton-honre tawyly warâ nhenehonly. Jesus Cristo wâgâ mawânrâ âdaunlo Deus awyly kiuntuly. 18 Ânguy Deus netaymba. Mâkâ imery tokaleom olâ tâense, Deus agâ âzekibalâ tawylygue. Tunwym agâlâ mâkâ. Mâkâlâ ani koendâ kuru âdaunlo Deus awyly xutuen-honri.
João Batista aguehobyry
19 Judeu domodo iwymârydo Jerusalém donro, kurâdo eynynâ Deus agâ aguewâni modoram, emary modoram warâ aguelymo myakâwâm: — Joãoram idâwâtaungâ. Sapâiguewâdaunda: “Âmâ-ro? Ânguyka âmâ? Âwâgâlâ amyguely? Messiaslâ âmâ, Deus ingonokyly tynwânwânseinlâ?” kewâtaunda — kelymo. 20 Aituo idâlymo; João nhapâiguelymo. Tapâiguehobyry koendâ kehoem in-hoguly: — Messias mâkeba urâ, mâkâ Deus ingonokyly kurâdo inwânwânkyly mâkeba — kely. 21 Aituo nhapâigueondylymo: — Messias keba matay, Elias kurâem itondyby âmâ? — kelymo. Aituo João in-hoguly: — Elias mâkeba urâ — kely. — Moisés ara Deus itaumbyry egatuim tynwânwânseinlâ âmâ? — kelymo. — Mâkâ keba aze — kely. 22 Aituo agueondylymo Joãoram: — Arâ atay, ânguy pylâka âmâ? Tugononibyryam mâin-hoguhobyry tiandyse xina. Âdara tâkezeka âmâ âwâgâlâ? — kelymo. 23 Aituo João in-hoguly, saguhoem lelâlâ Isaías inweniby aralâ: — Âdy peba atodâ Messias wâgâ agueinlâ urâ. “Ohondaungâ Kywymâry Deus Ingonotyby saintodâ, taseray tuonse wâne pymâ ton-honreim saintoem myara. Inakanhe amidylymo imowâdaungâ” keim urâ — kely João. 24-25 Aituo, sapâigueze igonotyby modo duano, fariseu domodo, Joãoram aguelymo: — Messias keba, Elias kurâem itondyby keba, unâ egatuim Deus ingonokyly tynwânwânseim keba warâ âmâ-ro watayma kurâ domodo batiza iese ton-honruneba âmâ-ro — kelymo. 26 Aituo João aguely eyanmo: — Urâ parugue batiza âenimo. Âduaymolâ olâ awâkâ, eon-honru mâuntudânrymo. 27 Urâ pygueduo lelâlâ wâne Deus xurâem tâwanu nhaguly, awâkâ olâ yakadâ kuru tynrenseim. Mâkâ mawânkâ Deus wâgâ agueim kuru. Mâkâ ara iedylymo watay, âdy mâkeba urâ. Ihuru kâingokehoem ihuru etary etyrinhe witoenlâ nudupa lâgâlâ — kely. 28 Betaniadâ myakâwâm awârâ aidyly, âtunâguedylymo, paru Jordão kuynâ, João, Deus eynynonroem tâidysedo modo batiza nhetondâ.
João Jesus wâgâ aguehobyry
29 Kopaelâgâem João, Jesus nhedyly. Tyam idâly tientuo tonlo modoram aguely: — Etaungâ Deus Ingonotyby. Awâkâ wâgâ ise Deus inakanhe aguitobyry nhygakely. Saguhoem, kordeiru tyâze, tyaduânse warâ mykâinane kurâdo eynynâ Deus agâ aguewâni modo. Awârâ tientuo mykâinane Deus, inakanhe aguitobyry nhygakely. Arâ lâpylâ ise awâkâ âeni kâtaybyay iguely. Awâkâ iguehobyry wâgâ ise, inakanhe aguitobyry Deus nhygakely. 30 Auguehobyry enanâguewâdaungâ: “Inepa ise mâkâ yakadâ kuru xuturim âewyly. Urâ lelâlâ wâne ani waunroem iazeim, tâlâ olâ myakâwândy awâkâ yazely yraynâlâ” uguehobyry — kely. 31-34 Aituo João nhegatuly ânguy Deus Ingonotyby awyly. — Âdaunlo uguondo wâgâ inakanhe aguitobyry xygakely awyly kâuntuwâbyra wakynre, kordeiru ara inakanhe aguitobyry epywaze tyâzeim. “Kurâdo parugue batiza iekâ” nyguelâ Deus. “Yspiritury uguondo onwa âewyly ese âmâ. Mâkâ ise Yspiritury xuduim, ânguy ynynonro awyly tienehon-hoem, iwerâ wâne enra kurâdo batiza mânhedyly, ânguy ynynonro awyly âzehohoem myara” nygue Deus, ânguy Ingonotyby awyly kâuntuhoem. Deus aguehobyry ara, Deus Ispiritury kaynâpa xytâguyly kâendyly papaem Jesus onwa. Aituo lelâlâ ânguy Messias, Deus Ingonotyby awyly kâuntuly. Messias âewyly iray on-honi modo parugue batiza iedyly mawânrâ iewanu, ânguy mâkâ awyly israelita domodo nhutuhoem. Awylygue “Deus imery awâkâ Jesus” uguely — kely João.
Jesus tynynonroem André, Simão Pedro warâ iduakehobyry
35 Kopaelâgâem târâlâ João azagâ tynynonro modo agâ. 36 Jesus sakadyly tientuo, João aguely: — “Kordeiru Deus Ingonotyby” keholâ awâkâ, mâkâ iwâgâ auguehobyrylâ — kely. 37 Agueduo, akaemo azagâ Jesus nhapygue idâlymo âgânâ. 38 Aituo Jesus MYK idyly tykayam. Tyampygue idâlymo awyly tientuo, aguely: — Âdaituoka yampyguedylymo? — kely. — Konomedâni, âdykâka mâxidâdyly? — kelymo. 39 Jesus in-hoguly: — Âetaungâ. Inoro eydâ watoam — kely. Kogoneyam, quatro horas awârâem, Jesus agâ idâlymo. Nhedylymo âdykâ Jesus âxidâdybyem awyly. Eagâlâ iguandylymo. 40 João Batista eynynonrolâ akaemo azagâ uguondo modo. Jesus aguely tindapygueduo olâ eagâ idâlymo lelâ, iwâgâ tâsenomedâdomoem. Akaemo azagâ uguondo modo ewy André, Simão Pedro iukono, myani mâkâ. 41 Jesus agâ adâkebygueduo myani André tywaigoru nhuinly, aguely: — Paigo, Deus Ingonotyby Messias xina netai — kely. (“Cristo” keze “Messias” kely gregüem.) 42 Aituo tywaigoru nhadyly Jesusram. Jesus Simão enipyryem, aguely: — Simão izedy, João imery. Iwerâ olâ ise izedy iwelo Cefas — kely. (Pedro kezelâ gregüem Cefas kely, “tuhu imâsedo” kezelâ.)
Jesus tynynonroem Filipe, Natanael warâ induakehobyry
43 Kopaelâgâem Jesus Galiléia yan-yam tâtâdyze idyly. Tâtâly iraynâ, Filipe agâ oxiodyly; eyam aguely: — Yagâ âekâ, ynynonroem mitoem — kely. 44 Betsaida donro myani mâkâ Filipe, André, Pedro warâ ety anano. 45 Filipe, Natanael agâ agueze idâly. — Saguhoenlâ Moisés pape kâzewenry awo wâgâ inweniby Deus Ingonokyly wâgâ aguehobyry xina netai. Deus itaumbyry egatuimbyry modo tywenizemo lâpylâ mâkâ âeni wâgâ. Jesuslâ, Deus Ingonotyby, José imery, xidadâ Nazaré donro — kely. 46 Awârâ tindatuo, Natanael aguely: — Âdy koendonro lâpeba târâ Nazarédâ! Nazaré donro ewy Messias awyly kâinwântaymba urâ — kely. — Âekâ. Egârâ — kely Filipe. 47 Natanael saindyly tientuo, Jesus aguely tagonro modoram: — Israelita lelâlâ awâkâ saini. Ânguy enokuni mâkeba awâkâ — kely. 48 Jesus aguely tindatuo, Natanael, Jesus nhapâiguely: — Âdaraka utuly? Waunroem kydoxiodylylâma xirâ! — kely. Aituo Jesus in-hoguly: — Kâenkylyemba lelâlâ wâne enra iwague mawyly, Filipe. Âgâsedyly iraylâ olâ enra se figueira iay ekadybyem mawyly kâendyly — kely. 49 Natanael inwauntudyly, aguely: — Konomedâni, Deus imery âmâ! Israelita domodo iwymâry kehobyry! — kely. 50 Jesus aguely: — “Figueira iay enra nhedyly” uguehobyry wâgâ kulâ yeinwândyly! Ago kuru yeinwânse olâ âmâ, awârâ modo takazeno agânhedyly mâentuo — kely. 51 Aituo idânârâam aguely: — Kau âzenahunguely-ro waunlo ara ise mâendylymo. Anju domodo yagâ xytâguyly, âkuly warâ ese âmaemo, urâ Uguondo Kaynâpa Âetyby agâ. Xirâ mâuntudyzemo kuru wato — kely.
Jesus Canádâ todohogüinday, adyesenry anhetobyry
1 Azagâ iguandyly ipygueduo, Canádâ todohogüinlybe akâwâm, Galiléia eynynâ. Târâlâ akâwâm Jesus ise, todohogüin-hodâlâ. 2 Jesus agâ xina idâwâm lâpylâ, igâsedybyem tawylygue. 3 Aituo vinhu adainly, âty nadaimpalâ. Awârâ tiuntuduo Jesus ise eyam aguely: — Mery, igâsedyby modo sakuihoem vinhu lâpeba — kely. 4 Jesus aguely: — Âdaituoka yam amyguely? Iewanu kanguhu oday inkâba awârâ — kely. 5 Arâ aguepygueduolâ Jesus ise âty sodo emary modoram aguely: — Ymery aguehobyry arane aitaungâ — kely. 6 Tâlâ ani âtâdâ seis poty tuhugue xygatyby modo, paru ekanâdo. Oitenta, cem litros warâ mârâ modo nhawâdyly. Tâzewenry ara, tâzemaunguehomoem, tywykeba tâitomoem warâ judeu domodo parugue nhumytâguylymo myani mârâ. 7 Jesus aguely vinhu epâni modoram: — Xirâ poty modo parugue xumytâdaungâ — kely. Aituo parugue poty nhumytâdylymo. 8 Ilâpyryem aguely: — Xirâ poty odano ewy paru âentywâdaungâ. Sataungâ âty iwymâryam — kely. Aguehobyry ara aidylymo. Paru nhetylymo, nhadylymo. 9 Jesus olâ mârâ paru vinhuem ienehonrimbyryem. Aituo âty iwymâry mârâ xuduypy nhekudyly. Ipa, mârâ paru, vinhuem itybyem lelâ. Âdykâ mârâ vinhu nhetylymo awyly nutuba mâkâ. Emary modo olâ mârâ paru poty odano modo vinhuem ietybyem awyly tutuze. Akaemolâ mawânkâ mârâ tânyzeim poty odayba etyim. Aituo âty iwymâry uguondo ohogüinrim ingâsedyly, aguely: 10 — Kâzewenryem vinhu tâkubâgueim mawânrâ waunroem tâpâzeim igâsedyby modoram. Ize tato ara nhenybygueduomo pylâ eagonro vinhu ewy epâdyly-ro warâ. Âmâ olâ vinhu tâkubâgueim mekanâdai; âty adainze idâly ume kulâ pylâ mâempâdyly-ro! — kely. 11 Târâ Canádâ, Galiléia eynynâ, saguhoem kuru adyesenry anhedylylâ ani Jesus Deus eon-honru tienehon-hoem. Xina Jesus eynynonro modo Jesus anhetyby tientuo, einwânmâ. 12 Awârâpygueduo xidadâ Cafarnaumram Jesus idâly. Ise, iukonodo warâ eagâ idâwânmo, xina lâpylâ warâ. Iweâpa xina nipyra ani târâ.
Jesus ânguydo imeom vende ieni modo Deus ety odayba nhegaseândobyry
13 Âty Páscoa etyguedo saindyly iray Jesus idâly xidadâ Jerusalémram, mârâ âty aitoam, kydamudo Egitodâpa âsemaguehomobyry enanâgueho. Eagâ xina idâwâm. 14 Deus ety idaseraji egawântybyem kurâ domodo nhedyly. Uguondo modo tapirâ, ovelha, papa, awâkâ modo vende nhedylymo. Tanâseim ani mâkâ modo, xyâhoem, iaduântoem warâ, Deusram egamehoem. Mesa wâgâ ekadyby modo kurâdo idinheruru troca nhedyly, nhedyly lâpylâ. Târâ adyeseim keba anhekylymo. 15 Aituo kordague xikoty anhedyly. Vende ieni modo Deus etydâba inwenkewâdyly, ovelha, tapirâdo warâ agâlâ. Dinheru troca ieni modo iwenzary nhamunedyly. Aituo idinherurumo adapâeguyly onro wâgâ. 16 — Tarâpa merâ modo etywâdaungâ — kely papa vende ieni modoram. — Pabai xyrento xirâ âtâ, âdydo imeom vende ieto, sanâto warâ mâkeba — kely. 17 Xina Jesus eynynonro modo nhenanâguely saguhoem Deus itaumbyry awo Salmos wâgâ iweniby: “Deus, toenzepa âtâ âyrento ize wawyly. Woday peto yaduândyly-ro waunlo ara kehoem ity kâinwynedyly. Awârâ ise yiguehoem aienehonrim” warâ iwenibyem awyly. 18 Jesus anhetyby tientuo myani, pymâdo aguely: — Âdylâ Deus eon-honrugue amânhedyly tiendyse xina, Deuslâ, Deus keba tarâ amitoem aguenri mawyly tiuntuhoem — kelymo. 19 — Xirâ âtâ mankalagueduomo, azagâ emedyly idyly ara, saunâtonze urâ — kely Jesus. 20 — Nuduwâpyra! Quarenta e seis anu samâ xirâ âtâ itâdoem. “Azagâ emedyly ara saunâtonze urâ” myguely. Myguewâdyly kulâ! — kelymo. 21 Deus ety wâgâ wâne Jesus aguely, tywâgâlâ olâ aguely lâpylâ. 22 Igueypyem, kurâem itonduo, Deus ety azagâ emedyly ara tiaunâdyly wâgâ aguehobyry xina enanâguewâm. Tienanâgueduo, âkealâ Jesus aguehobyry awyly xina nhutuly, Deus itaumbyry awo wâgâ iweniby âkealâ awyly lâpylâ warâ.
Idânârâ kyangahu oday kunâry tutuze lelâ Jesus
23 Páscoa etygueday Jesus Jerusalémdâ awyly ume, toenzepa kurâdo Jesus nheinwândyly, Deus Ingonotyby Messiaslâ awyly, adyesenry modo kehoem anhedyly tientuomo. 24 Jesus olâ kurâdo neinwâmpyra, koendâ kehoem akaemo âdaunloem awyly tutuze tawylygue; tutuze agui akaemo ewy tyizepa awyly. 25 Idânârâ kurâdo tutuze lelâ Jesus ânguy eyam negatubalâ. Idânârâ tyangahu oday xunâgomo tutuze, ânguy eyam aguepalâ.
Nicodemos Jesus agâ agueze idâhobyry
1 Tâlâ myakâwâm uguondo Nicodemosgue tâzekeim. Fariseu myakâwâm mâkâ, judeu domodo iwymâry. 2 Kopae idâly Jesus agâ agueze. — Tutuze xina, konomedâni mawyly, Deus ingonotyby. Agâpa Deus watay, adyesenry kehoem amânhetaymba tâise âmâ — kely. 3 Jesus aguely: — Azeompyra kulâ, Deusgue tywymâguneba âmâ. Arâ lelâ mawânrâ Deus xurâem tâjidyly. Xirâ mâuntudyze kuru wato — kely. 4 — Âwâ! Ânguy xutuybyem itybyem niazeontaymba! Nuduwâpyra kyze idâhu odaxi kydodopâdoem, kyazeontoem — kely Nicodemos. 5 Jesus aguely: — Deus Ispirituryam iweloem kydâiehoba, parugue kyazeontaymba kurâ warâ watay, Deusgue tywymâguneba. Xirâ mâuntudyze kuru wato. 6 Kyze idâhu odayba kâgaseduo, kurâenlâ kyazely. Awârâ keba olâ Deus einwânni modo Deus xurâem ienehoim, Deus Ispiriturylâ iweloem kyenehoim. 7 Awylygue tâseguâdâzeba ikâ, “Azeontaungâ” uguelygue. 8 Sapezenru igâky tydase, ponwary, se iwatary warâ nhekânily tâense warâ âmaemo, sapezenru kuru olâ mâempyra âmaemo. Arâ lâpylâ Deus Ispiritury, Deus einwântaynrim modo wâgâ aidyly mâempyra mawylymo; aitobyry modo lelâ mâenkylymo — kely. 9 Nicodemos aguely: — Kâuntuba lelâ aze. Âdara kuruka amyguehobyry aidyly, Deus Ispiriturygue xina iazeondyly? — kely. 10 Jesus in-hoguly: — Kâzewenry enomedâni âmâ, awârâ olâ mâuntuba âmâ! 11 Idakâ. Tiuntuybylâ xina Deus eynynonro âyanmo agueho, tientybylâ xina âyanmo nhegatuly warâ. Arâlâ olâ xina agueho mâinwâmpyra mawylymo. 12 Xirâ onro anano wâgâ augueduo mâinwâmpyra âmaemo, Deus wâgâ augueduo lakuru ise mâinwâmpyra kuru mawylymo. 13 Ânguy xirâ anano kulâ Deus ezaxi nâkuwâbyra, iwâgâ egatuze nodopâbyra warâ. Urâ, Uguondo Kaynâpa Âetyby lelâ târâpa xytâguyby. Urâ lelâ Deus wâgâ aguenriem xurutyby — kely Jesus. 14 Aituo aguely: — Enanâguegâ, saguhoem kydamudo Deus einwântânry modo âji âdy peba ato einkâ adakobâday, âgâuram sâtobyry. Deus, Moisés âgâu bronzegueto anhetoem, se wâgâ nhaunâtoem warâ aguewâm, mâkâ âgâuram MYK ityby modo kua itoem. Mâkâ âgâu bronzegueto saunâtobyry ara, arâ lâpylâ ise urâ, Uguondo Kaynâpa Âetyby keho, se wâgâ kadaunâhonly, 15 idânârâ yeinwântaynrim modo, aunloenlâ Deus agâ itomoem. 16 Idânârâ Deus kywynedyly. Awylygue urâ tymery tokaleom ugonodyly. Idânârâ yeinwântaynrim modo eyam âzemakeoze. Deus agâpa tyetunebamo ise, aunlolâ ise eagâ awylymo. 17 Deus ugonodyly, xirâ anano modo igueduo tienagazedoem inkâba, idânârâ yeinwântaynrim modo tienmakehoem. 18 — Urâ Deus imery yeinwântaynrim modo âji tâdâsenagazedoam nâtâwâbyramo ise. Yeinwântânry modo olâ idâze mârâ âji tâdâsenagazedoam, urâ Deus imery tokaleom yeinwâmpyra atomobyry wâgâ, aunloenlâ Deus agâpa ietomoem. 19 Iajinu MAH nheto ara xirâ anaym Deus wâgâ koendonro segatu, urâ Deus imery; Deus xurâ keba modo olâ Deus izepa ato adiendylylâ ize atomo, awylygue yizepa awylymo. Iamu duay adakobâni aramo kulâ, iajinu oday adakobâni ara inkâba. Awârâ mawânrâ yeinwântânry modo aunloenlâ âsenagazedomoem egamehonrimo. 20 Inakai aieni modo yizemo inkâba; ydâpa tâwiensemo lelâ. Yam idâlymo-ro watay, inakai anhekylymo tâdutuoze tâise. Inakanhe adâidyly timodyzebamo tawylygue, adienkyly nhoendylymo, ânguy nutuba itoem. 21 Deus ize ato aieni modo olâ wopaji tainsemo. Iajinu aguienkyly nhesagon-ho ara, idânârâam koendâ anhekylymo âzeholy, Deuslâ anhetomoem eon-honrumo xuduim awyly nhutulymo warâ — kely.
Jesus wâgâ João Batista aguehobyry
22 Awârâpygueduo, Judéia einkâ Jesus adakobâdyly. Eagâlâ xina idâly. Iweâpadobe târâ xina awyly, inakanhe adâitobyry wâgâ âjityeni modo, adâidyly timodyzedo modo warâ parugue batiza âiehoday. 23 João lâpylâ Enomdâ parugue batiza nhetaynlymo, Salim iwaguepa, târâ toenzepa paru awylygue. Toenzepa myani kurâdo idâly eyam batiza âiehoze. 24 (Tâtadâzeba João ilâem.) 25 Judeu agâ João eynynonro modo ewy âjihoguly. Deus enanaym âdara tywykeba tâjidyly wâgâ aguelymo. 26 João eynynonro modo eyam agueze idâly. — Tânanâgueze âmâ mâkâ uguondo paru Jordão kuynâ agonropyry, iwâgâ amyguehobyry. Toenzepa kurâdo eyam idâly batiza âiehoze, âyam âeni modo takaze — kelymo. 27 João aguely: — Tuomare urâ, kurâdo eyam idâlygue. Deuslâ awârâ aienehonrim. 28 Auguely midadâmolâ: “Messias mâkeba urâ” ugue. Iraynâlâ olâ kâjigonoholy, sainto koendâ konhontoem. 29 Todohogüinday, uguondo ohogüinrim xurâ mawânkâ pekodo. Eataen-ho tuomazeze lâpylâ olâ, ohogüinrim ohomaenduo. Arâ lâpylâ kohomaendyly, toenzepa kurâ domodo Jesus nheinwândyly kâuntuduo. Mâkâ mawânkâ Messias, urâ keba. 30 Agui Jesus aguely idase idâlymo ize wato, auguely idase âewylymo mâkeba — kely João.
Deus eydâpa âetyby awâkâ Jesus
31 Deus eydâ atodâlâ Messias âewyly. Idânârâ duay tynrenseim awâkâ Messias. Xirâ onro anano kulâ kurâ, xirâ ananolâ kiuntuly. Kydâ iwaguepa aityby kulâ kiuntuly. Tarâ kientyby, kindatyby warâ kulâ aguykeho. Messias olâ idânârâ duay tynrenseim kuru. 32 Deus eydâ atodâ tientyby wâgâ, tindatyby wâgâ warâ aguely. Arâlâ olâ, agui aguely einwântânrybe awyly. 33 Warâ einwânni modo aguely: “Âkeá lelâlâ ‘Jesus, Deus imery awyly’ Deuslâ mawânkâ agueim” kelymo. 34 Deus aguedyse ato, mâkâ Deus ingonotyby agueho, Deus Ispiritury eagâpa nitaymba. 35 Kunwym Deus toenzepa lelâlâ tymery inwynedyly. Awylygue emaxilâ idânârâ nhuduly. Deuslâ idânârâ aitaynrim modo iwymâryem itoem agueim. 36 Awylygue ise, Deus imery einwântaynrim modo Deus agâpa tyeseba awylymo. Tyigueduo, Deusram idâzemo, aunloenlâ eagâ tâitomoem. Deus imery einwântânry modo olâ ise, Deus agâ nipyramo. Tyigueduo, âji tâdâsenagazedoam idâzemo, aunloenlâ Deusdâ iwague itomoem.
Jesus pekodo Samaria eynynonro agâ aguehobyry
1 Jesus nhenomedâdo idani modo aguiom kuru, João aguely idani modo takaze, Jesus agui kurâdo batiza nhenehonly, João batiza nhetyby takaze, kely tydase myani fariseu domodo. 2 (Jesus keba olâ tâinwânni modo batiza ieni, xina eynynonro modo.) 3 Unâ tywâgâ, João wâgâ warâ tiuntuduo, Jesus Judéia eynynâba idyly, Galileiaranlâ odopâdyly. Eagâlâ xina idâly. 4 Samaria einkâ takadyze Jesus. Awylygue tâinkâ xina sakadyly. 5 Samaria donro xidadâ Sicar kehoam iwaguepa xina saindyly. Mârâ xidadâ iwaguepa, onro saguhoem lelâlâ kydamu Jacó tymery Joséram nhuduypybe târâ. 6 Mârâ onrodâ paru etyho Jacó nhesaguehoymbybe. Kuotatay awârâem paru etyhoram xina saindyly. Toenzepa adakobâdybyem tawylygue, Jesus ekozeybyem. Aituo paru etyhodâ ekadyly tokobyzeguehoem. 7 Târâ awyly ume, pekodo Samaria donro paru etyze idâly; Jesus eyam aguely: — Parugue yakuigâ wao — kely. 8 (Târâpa ani xina Jesus eynynonro modo, pyni sanâse xidadâam idâypyem.) 9 Pekodo aguely: — Judeu âmâ, samaritana urâ warâ. Ypemugudo, âpemugudo agâ âjizetonro mâkeba; koendâ oxioni keba warâ. Xina adakuihobyry oday, madakuidyzedo mâkeba âmaemo. Awylygue ywalu etary odano ewy mâenyhoem mâenkaduo, kâseguâdâdyly — kely pekodo. Mâkâ pekodo arâ aguely, judeu domodo, samaritano domodo warâ âjizetonro keba awylymogue. Samaria donro modo adakuihobyry oday nadakuiwâbyra judeu domodo. 10 Aituo Jesus aguely: — Deus âmâem nhuduly mâuntuly ânguy paru ekani awyly warâ mâuntuly watay, yam paru tâkaze tâise âmâ mâenyhoem. Yam mâenkaduo, âyam tuduze tâise urâ. Mâenyly-ro watay, iweloem tâiehoze tâise âmâ; âigueduo, aunloenlâ Deus agâ mitoem eyam tâtâze tâise âmâ — kely Jesus. 11 — Tâsanigue xirâ paru etary, etyho peba âmâ-ro warâ. Nuduwâpyra paru iweloem yetoni yam mâunduhoem, mârâ aunloenlâ Deus agâ witoem ayenehoim. 12 Saguhoenlâ myakâwândy kydamu Jacó xirâ paru etyho nhesaguehonly. Mâkâ, imeom, eguy modo warâ taunlolâ myakâwândy paru nhenylymo, tâiguewâsemo olâ. “Mâenyly-ro watay, iweloem tâiehoze tâise âmâ” mygueduo, “Jacó takaze ton-honreim urâ” myguelylâ awârâ — kely pekodo. 13 Aituo Jesus aguely: — Tâwâlâ lelâlâ wâne tatuanzeim modo xirâ paru ewy nhenylymo, inepa lâpylâ olâ ise satuandondylymo. 14 Paru kâunduypy enywânibyry modo olâ ise natuandombyra. Inatagâdo oze aunlolâ paru egasely myara xirâ paru iwâgâ augueho. Deus agâpa nipyra tyenehonzemo mawânrâ kâunduypy. Iguelymo-ro watay, Deusram idâzemo, aunloenlâ eagâ tâitomoem — kely. 15 Aituo pekodo aguely: — Awârâ paru ewy yam âundugâ wao. Arâ ise yatuambyra wawyly. Xirâ paru ese kâetombyra wawyly — kely. 16 — Oso igâseda. Xarâlâ eagâ odopâgâ-ro warâ — kely Jesus. 17 — Tusonuneba urâ — kely pekodo. Jesus aguely: — Âkealâ, “Tusonuneba urâ” myguely. 18 Cinco lelâ tusoneimbyry mawyly, tutuze urâ. Iwerâ ohogüimbyem inkâba âmâ uguondo eagâ mato agâ. Âkealâ amyguely — kely Jesus. 19 Âdaunloem tawyly Jesus agueduo, pekodo âseguâdâdyly. Eyam aguely: — Iweâma tutuze urâ, Deus wâgâ agueim mawyly. 20 Xina idamudo Deus nhehoguedyly mykâinane xirâ iwy wâgâ. Âmaemo, judeu domodo olâ “Jerusalémdâ lelâ ehoguedo” tâkeze. Âdaunlo unâka iozeno kuru? — kely. 21 Aituo Jesus in-hoguly: — Sainse mârâ Deus einwânni modo kuru âdykâingâlâ nhehoguedo, tarâ xirâ iwy Samaria donro wâgâ kulelâba, Deus ety Jerusalém donrodâ kulelâba warâ ise Deus ehoguedyly. 22 Âmaemo, Samaria donro modo, Deus ehogueze tâkewâze wâne âmaemo, mâuntuba olâ âmaemo mâkâ kuru. Xina judeu domodo olâ tutuze, tâinwânse warâ. Judeu ewylâ mawânkâ Deus Ingonotyby imakerinmoem. 23 Sainse mârâ Deus eynynonro modo, Deus ize ato ara kehoem nhehoguedo. Anri awârâ aidyly adaguly-ro warâ. Âdara ioze ehoguedyly awyly xutuen-honze eagâmolâ ise Deus Ispiritury. Deus wâgâ enomedâzemo mâkâ. Awâkâ ioze lelâ ehogueni modo mawânkâ Deus ize ato tohogueniem. 24 Tâentuneim mâkeba Deus. Tyispirituryenlâ mâkâ ekaduo nhuduly. Deus Ispiriturygue lelâ Deus nhehoguedyly, ize ato ara kehoem, âkealâ adâkehobyry nhenehon-ho ara — kely. 25 Pekodo aguely: — Tutuzelâ urâ, âdaralâ Messias, Deus Ingonotyby, saindyly awyly. Âewyly-ro watay, idânârâ kehoem ise Deus wâgâ kiuntudyze ato aguely — kely. 26 — Urâ agâ tunâgueim, Messiaslâ urâ — kely Jesus. 27 Mârâ ume kehoem xina odopâdyly, pyni sanânibyryem. Jesus pekodo agâ xunâgu tientuo, tâseguâdâze ani xina. Xina ezewenry keba mawânrâ pekodo tiuntudânry agâ tâdunâgu. — Âdyka merâ agâ ize mato? — xina kepa olâ ani pekodoam. — Âdaituoka awâkâ pekodo agâ âunâgu? — xina kepa gâlâ Jesusram warâ. 28 Aituo pekodo idâly, tywalu etary târâlâ nhânly. Xidadâam odopâdyly. Tonlo modoram aguely: 29 — Paru ese watay, uguondo âdykâ kâentyby keba xiotai. Idânârâ agânhetaymby modo wâgâ agueanry olâ. Etaungârâ. Messiaslâ keanra mâkâ — kely. 30 Aituo agui kurâdo xidadâ odaypa egaselymo. Idâlymo Jesus eydâ atoam. 31 Pekodo idâpygueduo, xidadâ odano modo saindyly ume, xina aguely Jesusram: — Anra xina nhanâtyby pyni. Kydâwinduane, Konomedâni — xina kely. 32 Jesus olâ aguely xinaram: — Mâenetybymo kâinwâpyra ise urâ. Tâlâ urâ mâenetybymo takaze kehoem, pyni koendonro. Âdy augueho awyly mâuntuba lelâ olâ âmaemo — kely. 33 Aituo xina aguely: — Ânguylâ keanra ipyniry nenetai — xina kely. 34 — Ânguy ypyniry nenetaymba. Mâkâ ugononibyry agânhetoem aguehobyry aiedylylâ ypyniry. Idânârâ ize ato agânhetuo, âdy izetonze inkâba urâ, tuomare lelâ, âwinduatybyen-ro waunlo ara lelâ. 35 Wamyguelymo inanry: “Quatro nunâ pygueduo kientâdyby kienkaunâdyly lelâ ise” myguelymo. Etaungâ akaemo âeni modo. Trigu ekaunâdo odaxi ityby emyenro akaemo. Iwerâ koendâlâ Deus itaumbyry eyanmo egatuhoem; iweâpa tâiseba itaungâ. 36 — Etânibyry, ekaunânibyry warâ tâzepywaozemo. Koendâ lelâ âzekaunâdyly watay, tohomaenzemo. Arâ lâpylâ, waunroem ywâgâ egatuwânibyry modo, ilâpyryem ywâgâ imâem kuru enomedânibyry modo warâ ohomaendyly ise, aguelymo idani modo yeinwândylygue. 37 Âkealâ wakehonly: “Mâkâ etâni, eagonro pylâ ekaunâni-ro” kehonly. 38 Ogonodylymo, ywâgâ mâengatuhomoem. Eagonro ewanugue kulâ âgâmylymo, eagonro nhetâdyby kulâ mâenkaunâguylymo waunlo ara. Saguhoenlâ mawânkâ Messias saindyly wâgâ eagonro modo aguewâm. Unâ mâengatulymo idani modo yeinwânsemo, amyguelymo tindadylygue kulâba olâ, saguhoem ywâgâ aguely tindatybymo tienanâgueduomo — kely Jesus. 39 Samaria eynynonro, âtâ anary Sicar donro modo ewy agui myani Jesus Messiaslâ awyly einwânni modo, “Uguondo âdykâ kâentânry xiotai. Idânârâ agânhetaymby modo wâgâ agueanry olâ” pekodo keduo. 40 Imâem myani Jesus wâgâ tiuntudyze awylymo. Awylygue Jesusram taintuomo, tagâlâ itoem nhekadylymo. Aituo azagâ iguandyly Sicardâ nhakadyly. 41 Mâkâ lelâlâ aguely tindatuomo, kurâ domodo nheinwândylymo Messiaslâ mâkâ awyly. 42 Pekodoam aguelymo: — Mâkâ tâinwânse xina iwerâ, mâengatuyby wâgâ kulelâba olâ, xina lelâlâ nhenomedâdo tindatobyry wâgâ. Tutuze xina, idânârâ tâinwânni modo emakeze âetyby awyly — kelymo.
Jesus pymâ emaryem tâwaneim imery kua nhetobyry
43 Târâ azagâ iguandyly sakanibyryem, Jesus agâ Samaria eynynâba xina egasely. Galiléia yan-yam eagâlâ xina idâly. 44 “Deus itaumbyry egatuim tâinwântuneba ety anano modoram kuru” kely ani Jesus. 45 Galileiaram xina saintuo olâ ani tonlo modo koendâ kehoem xina nhedaenkulymo. Jerusalémram tâtâzemo myani, Páscoa etygueze. Tâensemo myani târâ Jesus anhetaymby modo. Awylygue koendâ nhedaenkulymo. 46 Aituo mârâ âjidâpa Jesus âxiguely, xidadâ Canánra odopâdondyly, Galiléia eynynonroam, paru vinhuem tienehon-hombyryam. Tâlâ ani Cafarnaumdâ tâjikeim pymâ emary. Toenzepa myani imery ewânu. 47 “Judeiadâpa Jesus naindâ; Galileiadâ iwerâ” kely tindatuo myani pymâ emary Canánra idâly Jesus agâ agueze: — Toenzepa ymery ewânu târâ Cafarnaumdâ. Yagâ wao inoro, kua mânhetoem — kely. 48 Jesus aguely eyam: — Adyesenry agânhedyly mâentuomo lelâ yeinwândylymo — kely. 49 Tâwâneim nhunwym aguely: — Iguezeseaji enra iegaseday. Iokobagâ inoro, iguely iraynâlâ! — kely. 50 — Tadahulizeba ikâ. Ityam odopâgâ lelâ. Ipa, âmery kua nitai, niguewâpyra ise — kely Jesus. Tâwâneim nhunwym Jesus tymery kua ienipyryem awyly nheinwândyly, eydâ iwague awyly umelâ. Aituo odopâdyly tâtyam. 51 Ânwa oze tâmary modo agâ oxiodyly. Aituo aguehonly: — Âmery niguewâpyra! — kelymo. 52 Aituo adapâigueolymo: — Âdara hora awyly umeka keankâ ymery koendâ idyly? — kely. Aituo in-hogulymo: — Kopaelâgâ, kogoneyam tokalâ hora awyly umelâ keankâ iaturu inmoly — kelymo. 53 Aituo iamudo nhunwym mârâ kogonekâlâ Jesus “Âmery kua nitai. Niguewâpyra ise” kehobyry nhenanâguely. Aituo Jesus einwânniem idyly, idânârâ ety odano modo lâpylâ warâ. 54 Judéia yan-yam tâtâly iraynâ adyesenry aiemâlâ Jesus Canádâ paru vinhuem tyenehonze. Galiléia yan-yam odopâdondybyem, azagâ adyesenry anhedyly idyly ani Canádâ, pymâ emary imery kua nhedyly.
Jesus uguondo adakobâdânry kua nhetobyry
1 Pymâ emary imery kua ienipyryem Jesus idâly Jerusalémram, âtyam. 2 Jerusalémdâ, Ovelha Modo Iwyantary keho iwaguepa tâlâ mawânrâ paru etary. Hebraiku-em, “Betezata” mârâ paru etary ezedy. Cinco lelâ varanda modo, târâ mawânkâ tâwânuneim modo emynru eguetunu warâ. 3 Mârâ âjiam Jesus idâday, toenzepa tâwânuneim modo onwâgâ awyly: epy modo, nadakobâbyra ityby modo, tywykelâ iazeypy modo warâ. Paru sahugânily inwânwândylymo. 4 Anju Deus ingonotyby mawânkâ mykâinane tytâguyze mârâ paru sahugânize. Anju anhepygueduo mawânkâ tâwânuneim modo ihuguely; paikaji waunroem ihugueybylâ olâ kua ini. 5 Tâlâ ani iduaymo uguondo iweâpa tâwâneim; trinta e oito anu myani mâkâ ewânu; nadakobâbyra awyly. 6 Eguetudybyem awyly ume Jesus nhedyly. Iweâpa arâ ewânu awyly nhutuly. Aituo eyam aguely: — Kua midyse âmâ? — kely. 7 Uguondo in-hoguly: — Ânguy paikaji yeni peba adahugânioduo. Iegawândyse wâne urâ, eagonro tâwâneim olâ inanry uwakadâ lelâ — kely. 8 Jesus aguely eyam: — Aukâ. XYDYK ikâ. Iguetudobyry sanâkâ. Idâ ityam tadakobâze — kely. 9 Ilâ umelâ kehoem, uguondo kua idyly Jesus eon-honrugue. Tâguetudobyry nhanâdyly, adakobâdyly. Sábado oday ani awârâ aidyly, kokobyzegueho âdaunloenlâ kydâsewaniho keba ume. 10 Judeu domodo iwymâry ewy mâkâ uguondo tâguetudobyry nhanâdyly nhedylymo. Awylygue eyam aguelymo: — Kokobyzegueho iwerâ. Kâzewenry ara inkâba awârâ amidyly, âdy aieto mâkeba iwerâ awârâ iguetudobyry kadadâ — kelymo. 11 Aituo aguely: — Uguondo kua yenipyry agueanry: “Iguetudobyry sanâkâ. Idâ ityam tadakobâze” keanry — kely. 12 — Ânguyka enra arâ amitoem agueim? — kelymo eyam. 13 Kua tyenipyry ezedy nutuba olâ mâkâ uguondo, tonlo modo duaylâ Jesus idâypyem awylygue. 14 Ilâpygueduo Jesus kua tientyby nhedyly Deus etydâ. Aguely eyam: — Auguely wao idakâ. Kua itybyem âmâ. Deus izepa ato kulâne akâiedâ, arâ matobyry takaze kehoem amipyra mitoem — kely. 15 Jesus aguepygueduolâ mâkâ uguondo târâpa âxiguely. Kua tyenipyry wâgâ agueze idâly judeu domodo iwymâryam. 16 Jesus nhewiâsedylymo nhenuagaendylymo warâmo myani, tâzekobyzegueho oday kua nhedyly awylygue. Awylygue eynynâ inakanhe aguelymo: 17 Jesus aguely eyanmo: — Kopaelâgâembaba Pabai âsewanily; ara lâpylâ iewanu kâempagunâbyra wawyly — kely. 18 “Pabai ugueho” Jesus keduo, Deuslâ agueho awyly tutuzemo ani. Awylygue toenzepa iewiâpadylymo, âdara tyânly awyly wâgâ âseinwândylymo, tâzekobyzegueho oday kua nhetobyry wâgâ kulelâba, Deus “Pabai ugueho” kehobyry wâgâ lâpylâ. Arâ adâkeduo, Deus agâ âzekiba tawyly mawânkâ Jesus agueho.
Deus imery idânârâ anhedyly, Deuslâ anhetoem agueim awylygue
19 Jesus aguely: — Deus imery lelâlâ wâne urâ, won-honrugueba olâ âdydo imeom agânhedyly. Pabailâ agânhetoem agueim. Pabai anhedyly kâenkyly lelâ agânhekyly. Mâkâ anhekyly, adyese urâ, imery wawylygue. Xirâ mâuntudyzemo kuru wato. 20 Imery wawylygue, toenzepa Pabai ywynedyly. Awylygue idânârâ adienkyly modo nhenehonly. Agânhetyby modo tâense âmaemo. Pabai yam nhenehonly aiese olâ urâ, mârâ iwâkuru kuru. Mârâ agânhetuo, âsewânize lelâlâ âmaemo. 21 Iguewâtyby modo, kurâem tyetonze Pabai. Turâ xurâ modo aunloenlâ tagâ tyenehonze mâkâ. Pabai anheto aralâ agânhedyly. Aituo ise aunloenlâ Deus agâ kânhenehonly, mâkâ eagâ kânhenehondyze wato lelâ. 22 Xypyry etay Pabai mâkeba ise ânguy tâmakezeim, tâmakezenry warâ awyly agueim. Aunloenlâ eagâ ini modo kâinduakehoem, âji tâdâsenagazedoam idâwâni modo kâinduakehoem warâ agueypyenlâ mâkâ. 23 Arâ Pabai agânhetoem aguely, idânârâ yrendylymo mawânkâ ize ato, mâkâ mâynrentomo ara lâpylâ. Yrempyra âmaemo-ro watay, Pabai ugononibyry mâynrentaymba lâpylâ âmaemo — kely. 24 Jesus aguely: — Auguely indadyly, ugononibyry nheinwândyly waunlo âdaunloenlâ Deus agâpa tyetuneba ise. Iguely-ro watay, aunloenlâ ise Deus agâ awylymo. Âdalâ âji tâdâsenagazedoam nâtâwâbyramo ise. Xirâ mâuntudyzemo kuru wato. 25 Idataungâ auguely. Anri adaguly, Deus eynynâbaom modo augueho indato. Deus xurâempa awylymogue, igueypy aramo kulâ. Auguely indadylymo, yeinwândylymo warâ watay olâ, igueypyem, kurâem itondyby aramo ise. 26 Âdaunloenlâ Deus agâpa tyetunebamo ise, iguely iraynâ, igueduo alelâ, ton-honre mawânkâ Pabai awârâ adientoem. Ynynonro modo Deus agâpa kânhenehomba witoem aguewâm lâpylâ. 27 “Uguondo Kaynâpa Âetyby mawylygue, auguely âyam, âynynonro modo xurâem koendonro lelâ mâunduhoem; âynynonro keba modo pylâ ise mâenagazenehonly-ro” kewâm. 28 — Xirâ âyanmo augueho wâgâ tâseguâdâzeba itaungâ. Anri saindyly, idânârâ iguewâtyby modo ytaumbyry indato. 29 Kurâem itonzemo. Âji tâpyâdomobyrydâpa âzepyâguezemo, egasezemo-ro warâ. Deus ize ato aienibyry modo aunloenlâ ise Deus agâ awylymo, âdaunloenlâ eagâpa tyeseba itomoem. Deus izepa ato aienibyry modo olâ âzewentâozemo. Âjigonohonzemo âji tâdâsenagazedoam, aunloenlâ târâ itomoem — kely Jesus.
Deus Ingonotyby tawyly wâgâ Jesus aguehobyry
30 Jesus aguely: — Unâry wâgâ kulâ inkâba idânârâ agânhekyly modo agânhedyly. Deus aguehobyrylâ agânhekyly. Yeinwântaynrim modoram koendonro lelâ ise kâunduly; yeinwântânry modo pylâ kâenagazenehonly-ro warâ. Pabai aguehobyry lelâ mawânrâ agânhekyly. Ize wato kulâ mâkeba agânhekyly, mâkâ ugononibyry ize atolâ. 31 — Ywâgâlâ auguely-ro watay, “Deus ingonotyby urâ” ugueduo, auguehobyry âdyem nitaymba, âkealâ keim kepa watay. 32 Tâlâ ynynâ agueim, Deus, Pabai ugueho. Ânguy wawyly tutuze mâkâ. Ywâgâ agueho âkealâ awyly tutuze urâ-ro warâ. 33 Ânguy wawyly mâuntuhomoem, João Batista tapâiguen-honze ani âmaemo. Âkealâ ani mâkâ ywâgâ aguely. 34 Ywâgâ aguenriem ânguygue kâtuiwâbyra urâ, ânguyem wawyly mâuntuhomoem. Arâlâ olâ ynynâ João aguehobyry âyanmo kâenanâguehonly. Aguehobyry mâinwândylymo, yeinwândylymo-ro warâ watay, âzemakeoze lelâ âmaemo. 35 — Lamparina koendâ kehoem tyatygueim wâne, kytâho nhesagonly, myara ani João aguehobyry mâuntulymo âdara Deus ezaxi tâdâtâly wâgâ. Mâkâ aguehobyry mâindatuomo omazemo. 36 Âdiempa mutumo ywâgâ. Iwerâma adyesenry kehoem agânhedyly tâense âmaemo, âkealâ kuru Deus Ingonotyby wawyly mâuntuhomoem. Pabai Deus adyesenry modo kehoem agânhetoem anygue. Mâentuomo, xutuze âmaemo, Ingonotybylâ wawyly. 37 Pabai ywâgâ adâkeze lâpylâ, mâkâlâ ugononi awylygue. Agueho mâindadyseba olâ âmaemo, nhutuen-honly mâuntudyzebamo warâ. Âdykâ mâkâ itanru mâindapyra, emydy mâempyra warâ olâ âmaemo. 38 Ywâgâ Pabai aguehobyry mâinwândylymo-ro watay, yeinwântâ tâise âmaemo. Yeinwâmpyra, ywâgâ Pabai agueho mâinwâmpyra warâ olâ âmaemo. 39 Âdara mâsemaguelymo awyly mâuntudyze mawylymogue, Deus itaumbyry awo wâgâ iweniby mâintainlymo. Mâsenomedâdylymo, âdara aunloenlâ Deus agâ tâjidyly kyigueduo awyly mâuntuhomoem wâne. Iweniby modolâ ywâgâ âkealâ agueim, ywâgâ lelâ mawânrâ Deus eydâ atoam tâdâtâly. 40 Aralâ olâ, yeinwândyseba mawylymo, aunloenlâ Deus agâ mitomoem. 41 — Koendâ wawyly wâgâ, won-honru wâgâ warâ kurâdo aguepa awylygue kâseguâdâdaymba urâ. 42 Koendâ âutudâmo urâ, angahumo oday âunârymo alelâ. Deus izetonro ara midylymo kulâ awyly, tutuze urâ. 43 Pabai ugueho ingonotybyenlâ xirâ kâewyly, yizepa, yeinwândyseba warâ olâ âmaemo. Pabai ingonotybyemba âeni watay olâ âmaemo tâinwânse. 44 Ataen-homo âwâgâmo koendâ aguely ize matomo. Deus tokaleom âwâgâmo koendâ aguehoem, koendâ lelâ amidylymo mipyra olâ âmaemo. Awylygue mawânrâ nudupa awyly yeinwântomoem. 45 Kâzewenry Moisés inwenihoem Deus aguehobyry mâinwânkylymo. Awylygue, “Aunloenlâ Deus agâ tâitoem idâze xina” myguelymo. Xypyry etay, idânârâ kurâ domodo Pabai enado âepanâgueduo, urâ keba ise agueim, Moiséslâ ise agueim: “Deus neinwâmpyra atomobyry wâgâ asaemo ise tâwentâzeim” kerim. 46 Ywâgâlâ myakâwândy Moisés inwenily urâ Deus Ingonotyby wâgâ. Moisés inweniby tâinwânse lelâlâ âmaemo-ro watay, yeinwântâ lâpylâ tâise âmaemo. 47 Inweniby mâinwâmpyra mawylymogue, augueho mâinwâmpyra mawylymo — kely Jesus.
Jesus cinco mil uguondo modo cinco pão, azagâ kanra âjihuyby warâgue
nhuantobyry 1 Arâ agueypyem, Jesus Galiléia iwalu nhekuâdyly pepi oday; Tiberíades kelygue tâzekeim lâpylâ mârâ paru. Eagâlâ ani xina. 2 Târâ Jesus awyly tiuntuduomo, agui kurâ domodo myarâ idâly, toenzepa tâwânuneim modo kua nhedyly tientomobyry wâgâ. Adyesenry anhedyly tientondyze tawylymogue, nhapygue idâlymo. 3 Jesus âkuly iwy onwa xina agâ. Târâ xina ekadyly. 4 Páscoa etyguedo iwaguepa idyly ani. 5 Jesus wayam wayam warâ MYK idyly. Tyampygue toenzepa kurâ domodo iwy onwa âkuly nhedyly. Aituo Filiperam aguely: — Âdykâ kaise pyni kianâdyly merâ kurâ domodo ipyniryem? — kely. 6 Kurâdo tuantoem âdy adienkyly awyly tutuzelâ olâ myani Jesus-ro warâ. Âdara Filipe in-hoguly awyly tiuntuhoem kulâ arâ aguely. 7 Aituo Filipe in-hoguly: — Duzentas moedas pratagueto tainze tâise kurâ, pyni sanâtoem, mâkâem, mâkâem warâ pão epajiwâdoem, tydinheruguepa kurâ — kely. (Tokalâ iguandyly âwanopyry epywado mawânrâ tokalâ moeda pratagueto.) 8 Aituo Simão Pedro iukono André idâly Jesus agâ agueze. 9 — Tâlâ tarâ iamudo cinco pão cevadagueto, azagâ kanra âjihuyby warâpeom. Nudupa olâ ise toenzepa kurâ domodo xuatoem — kely. 10 Aituo aguely Jesus xinaram: — Âji iwâkurudâ ekadomoem aguewâtaungâ — kely. Poji wâgâ ekadomoem âji iwâkurube ani târâ. Aituo idânârâ ekadaynlymo. Toenzepa târâ kurâdo awyly, uguondo modo kulelâ cinco mil lelâ. 11 Aituo Jesus cinco pão sanânibyryem, Deus agâ aguely: — Koendonro lelâlâ âmâ, Pabai; awylygue xinaem xirâ pão mâunduly — kely. Arâ agueypyem, pão nhepajiwâdyly; xina nhepâdoem nhuduly. Xina nhepâdaynly umelâ kehoem Jesus pão epajiwâdyby agui nhenehonly. Ilâpygueduo, Jesus azagâ kanra âjihuyby nhanâdyly, Deus agâ aguely: — Koendonro lelâlâ âmâ, Pabai; awylygue xinaem merâ kanra mâunduly — kely. Arâ agueypyem, kanra nhepajiwâdyly, xina nhepâdoem nhuduly. Xina nhepâdaynly umelâ kehoem, kanra agui nhenehonly. 12 Ize tato ara kehoem idânârâ kurâdo âwinduadyly. Kanra âjihuyby nhâdylymo; pão nhedawynlymo; koendâ kehoem iolataynlymo warâ. Koendâ kehoem âwinduapygueduomo, xinaram aguely: — Âsegubydâdyby modo saunkuwâdaungâ, nâxiumebyra itoem — kely. 13 Ilâpyryem pão, kanra âjihuyby warâ âsegubydâdyby xina nhetadâdyly. Doze cestu tumyke lelâ xina nhekanâdyly. 14 Awârâ adyesenry Jesus anhedyly enipyry modo aguelymo: — Âkealâ mynra, Deus itaumbyry egatuim kinwânwânkylylâ mynra merâ. Roma donro takaze kehoem merâ kywymâryem kyjiene! — kelymo. 15 Tywymâryem tyese kelymo tiuntuduo, mâkâ kulelâ târâpa âxiguely, eagonro âjiam idâly. Pymâ onro anano keba tawyly, tutuze mawânkâ.
Jesus paru wâgâ adakobâdobyry
16 Iguandyly ume, târâ Jesus cinco pão, azagâ kanra warâgue kurâ domodo nhuantobyrydâpa xina xytâguyly. Galiléia iwaluam xina idâly. 17 Jesus xina agâ nâepyra. Pepi odaxi xina âxiedyly, paru tienkuâdoem, xidadâ Cafarnaumram tâtâhoem. Xina idâzesedyly umelâ, iamadyly. 18 Tahuleim kulâ adapezeinly ton-honre kehoem xina yan-yam; toenzepa kehoem paru adahugânily. 19 Sagunudâpa âxigueybyem, cinco, seis kilômetros awârâem xina awyly ume, paru wâgâ Jesus adakobâdyly xina nhedyly. Xina iwepiry iwaguepa saindyly. Jesus paru wâgâ adakobâdyly tientuo, toenzepa xina âseanedyly. 20 Warâ olâ Jesus aguely xinaram: — Tâseanezeba itaungâ! Jesuslâ urâ! — kely. 21 Aituo Jesus pepi odaji âxiedyly. Toenzepa xina iomazely, mâkâ tagâ awylygue. Inepa xina saindyly eyam tâtâhoam.
Kurâdo Jesus nhuin-hobyry
22 Emetybyem, Jesus tuizemo myakâwâm târâ paru emelay, xina pepi odaxi âxiedobyrydâ. — Âdykâ Jesus? — kelymo. — Tokalâ kulâ keankâ pepi taunlo. Jesus olâ keankâ iodaxi nâxiebyra. Eynynonro modo lelâ keankâ âxieni. Mâkâ pebalâ keankâ idâlymo. Iwerâ olâ tarâpa — kelymo. 23 Aguelymo ume, xidadâ Tiberíadesdâpa âetyby modo paru nhekuâdylymo. Tywepiry odaypa âzetywâdylymo, Jesus kurâ domodo tuantoem, “Koendonro lelâlâ âmâ, awylygue xina ipyniry mâunduly” kehobyry iwaguepa. Xuize idâwânmomy, nepyramo olâ myakâwâm. 24 Jesus, xinalâ warâ târâpa awyly tientuomo, Tiberíadesdâpa âetaymby modo tywepiry odaji âxiedaynlymo, paru tienkuâdoem. Cafarnaum iduantaji saintybyem xuize idâlymo.
Jesus ize kydawyly, pyni kyiguepa kitoem ize kydato ara
25 Paru ekuânibyryem, Cafarnaumram saintybyem, Jesus agâ oxiodylymo. Eyam aguelymo: — Âmâ enra xina nhuinly, Jesus. Âdaraka xarâ aindyly? — kelymo. 26 — Kopaelâgâ pãogue âwatomobyry wâgâ kulâ uilymo, âdaituo adyesenry modo kehoem agânhedyly awyly mâuntuhomoem inkâba. Pão agui kânhenehonly medâmo lelâlâ wâne, adâituo agânhedyly awyly mâuntuba olâ âmaemo. 27 Pyni inepa adainrim, inakanhe ini warâ wâgâ inkâba âpaunzedaungâ. Tâlâ ise pyni emyenro âmaemoem, âdaunloenlâ inakanhe itânry. Emakewâni modo aunloenlâ Deus agâpa tyetuneba ise. Igueduo, aunloenlâ eagâ tâitoem eyam idâzemo. Âzeon-hondâdaungâ, xirâ augueho tâlâ mitomoem. Urâ, Uguondo Kaynâpa Âetyby kelygue tâzekeim, xuduze urâ âyanmo, yeinwândylymo-ro watay. Awârâ agânhetoem kâewyly awyly nutuen-ho Pabai Deus — kely Jesus. 28 Aituo Jesus nhapâiguelymo: — Âdyka Deus xina anhedyse ato awârâ amyguehobyry xina nhemakehoem, awârâ pyni emyenro? — kelymo. 29 Aituo Jesus in-hoguly: — Âdaunlo âwanu mâkeba ise amânhekylymo. Yeinwândylymo kulâ Deus ize ato, urâ mâkâ ingonotyby — kely. 30 — Adyesenry pylâ aiekâ, Messiaslâ mawyly, xina nheinwântoem. Âdyka ise amânhekyly, Deus Ingonotyby mawyly mâenehon-hoem? 31 Iweâpa kydamudo Egitodâba egaseday, âji âdy peba ato einkâ adakobâdaymo, maná myakâwândy ipynirymo. Iwenibyem Deus itaumbyry awo wâgâ: “Pão kaynâpa eyanmo ingonokyly nhedawyn-homoem” — kelymo Jesusram. 32 Aituo Jesus aguely: — Kaynâpa Deus ingonotyby maná kehogue, kydamudo xuamâmy Moisés. Pabai Deus lelâ mawânkâ pyni kuolanâni emyenro xudunri. Xirâ mâuntudyzemo kuru wato. 33 Deus, kydamudo tâwindygue niguepa itoem maná kau odaypa tingonotobyry, ara lâpylâ mâkâ ugonodyly xarâ onro anaxi. Pyni ize kurâ kyiguepa kitoem, arâ lâpylâ yeinwântaungâ, aunloenlâ Deus agâ mitomoem, âdaunloenlâ eagâpa mipyra mitomoem — kely. 34 — Pymâ, aunlolâ awârâ amygueho xinaram xudugâ, awârâ pyni mygueho — kelymo. 35 — Urâlâ mawânrâ mârâ pyni emyenro. Urâlâ ise yeinwânni modo aunloenlâ Deus agâ ienehonri, eagâpa ienehondânry warâ. Ynynonro modo nâsewinzedondaymba natuandondaymba warâ ise. 36 Deus eon-honrugue agânhekyly mâendylymo umelâ olâ auguehobyry mâinwândyseba mawylymo. 37 Idânârâ yeinwânniem Pabai ize ato modo, urâ xurâ lelâ. “Yam âetaungâ, aunloenlâ yagâ mitomoem” warâ auguely yeinwândysedo modoram. Yam âetaymby modo âdaunloenlâ izepa witaymba urâ. 38 — Deusdâpa ani kâewyly, ize ato agânhetoem, ize wato aiese inkâba. 39 Pabai koendâ yeinwântaynrim modo kâendyse awyly. Ynynonro modo tydâpa iedyly ize inkâba mâkâ. Xypyry etay, ynynonro modo kurâem kânhetondyze mâkâ, aunloenlâ eagâ itomoem. 40 Pabai ize ato mawânrâ idânârâ tymery einwânni modo, aunloenlâ eagâ awyly, eagâpa nipyra. Aguehobyry awylygue ise xypyry etay kurâem kânhetondylymo — kely Jesus. 41 Judeu domodo ewy nehoguebyra Jesus tywâgâlâ aguely: “Urâlâ Deus tydâpa ingonotyby pyni emyenro” kehobyry. 42 Aituo aguelymo: — José imery kulâ awâkâ Jesus. Nhunwym, ise warâ tutuze kurâ. Alâ “Deusdâpa kâewyly” kely. Kewâdyly kulâ awâkâ. Nuduwâpyra awâkâ Deusdâpa âetoem! — kelymo. 43 Jesus aguely eyanmo: — Inakanhe kulâ amyguelymo imowâdaungâ. 44 Âwâlâ kulâ ânguy yeinwântaymba, Pabai ugononibyry yeinwântomoem aniempyra watay. Pabai ugononibyry mawânkâ kurâdo yeinwântoem aienehoim. Xypyry etay olâ kurâem itondomoem aienehonze urâ. 45 Saguhoem Deus itaumbyry aguewâni modo ewy warâ akâwândy inwenily: “Idânârâ ise Deusram âzenomedâolymo, âdara einwândyly awyly wâgâ.” Idânârâ Pabai nhenomedâdo idani modo, tyangahu odaji ieni modo warâ yeinwânsemo. 46 Ânguy xirâ anano modo Pabai ugueho netaymba. Urâ lelâ mâkâ eni. Eydâlâma kâewyly. 47 — Idataungâ auguely. Yeinwântaynrim modo Deus agâpa nitaymbamo ise. Igueduo, Deusram idâzemo, aunloenlâ eagâ itomoem. 48 Pyni emyenro urâ. Urâlâ ise yeinwântaynrim modo aunloenlâ Deus agâ ienehoim. 49 Âji âdy peba ato einkâ tadakobâdyly ume maná myakâwândy kydamudo ipyniry. Manágue âduahonwânmo lelâlâ wâne, iguewânmo olâ. 50 Deusdâ âetyby einwânni modo, iguezemo lelâlâ wâne, nadaimpamo olâ ise. Idâzemo aunloenlâ Deus agâ tâitomoem. Pyni emyenro mawânkâ Deus Ingonotyby. 51 Pyni emyenrolâ urâ on-hondâzemo Deus ingonotyby. Yeinwântaynrim modo Deus agâpa tyetuneba ise. Iguelymo-ro watay, idâzemo Deusram, aunloenlâ eagâ tâitomoem. Yiguely ise, ynynonro modo aunloenlâ Deus agâ itomoem. Ynynonro modo eon-hondâniem, wodo pylâ ipynirymo-ro waunlo ara ise — kely Jesus. 52 Aituo idanipyry modo âjigue aguelymo: — Kypyniryem nitaymba ise awâkâ sodo! — kelymo. 53 Jesus aguely eyanmo: — Wodo mâmpyra âmaemo, unu mâenypa âmaemo warâ-ro watay, aunloenlâ Deus agâ mitaymba ise âmaemo. 54 Wodo sâni, unu enyim warâ olâ aunloenlâ ise Deus agâ awylymo, eagâpa tyesebamo. Xypyry etay ise kurâem âiehondylymo-ro warâ. Xirâ mâuntudyzemo kuru wato — kely. 55 Jesus aguely: — Pyni lelâlâ wodo, tânyzeim lelâlâ unu warâ. 56 Wodo sâni, unu enyim warâ watay, aunloenlâ ise yagâ awyly. Eagâlâ ise urâ; yagâlâ ise warâ. 57 Pabai ugononibyry igueypyem inkâba; aunlolâ mâkâ tâlâ awyly. Eagâ wawylygue, kadainwâpyra ise urâ; tâlâ lelâ. Wodo sâni modo lâpylâ yagâpa nipyramo, nadainwâpyramo warâ ise, tâlâ lelâ. Iguelymo-ro watay, eydâ watoam idâzemo, aunloenlâ yagâ tâitomoem. 58 Waunlo urâ pyni emyenro Deus eydâ atodâ igonotyby. Kydamudo ipynirybyry maná emyenro keba urâ. Maná tâinzemo lelâlâ wâne myakâwândy kydamudo, iguewâm olâ. Deus ezaypa xytâguybylâ urâ. Wodo sâni, unu enyim warâ yagâpa nâiehowâbyramo ise. Tyigueduo, idâzemo aunloenlâ Deus agâ tâitomoem — kely Jesus. 59 Cafarnaumdâ Jesus xirâ modo aguely, âtâ tâdâtâdyguyho oday tienomedâdylymo ume.
Jesus mawânkâ aunlolâ Deus agâ kyenehoim
60 Awârâ tindatuo, Jesus nhapygueni modo ewy aguelymo: — Arâ agueduo kiuntuwâbyra kurâ âdakeze aguely awyly. Kieinwântoem nuduwâpyra awârâ! — kelymo. 61 Akaemo agueho ânguy negatuba lelâlâ wâne Jesusram, tonomedâdomo izepa awylymo tutuze olâ Jesus. Awylygue eyanmo aguely: — Iwerâ yeinwântaymba âmaemo, augueho mâindadyseba midylymo warâ. 62 Âdaise wânkâ âmaemo, eydâ watobyryanlâ kâkuly mâentuomo? 63 Deus Ispiritury wâgâ mawânkâ ynynonro modo yeinwândylymo, âdalâ yagâpa nâiehoba tâitomoem. Igueduomo, Deus ezaxi idâze awylymo tutuen-honze Deus Ispiritury. Ânguy tâwâlâ kulâ âsemagueim lâpeba; ânguy tâwâlâ anientaymba Deus eydâ atoam tâtâhoem. Auguehobyry einwânni, aieni modo warâ agâlâ mawânkâ Deus Ispiritury. Deus Ispiritury agueduo lelâ akaemo âzemakeoly, aunloenlâ Deus agâ tâitoem tyigueduo. 64 Alâ olâ âmaemo ewy yeinwâmpyra mawylymo — kely. Tâinwâmpyramo awyly wâgâ Jesus aguewâm, tutuzelâ mawânkâ akaemo ewy tâinwâmpyra awyly. Ânguy tâgameim awyly xutuwâm lâpylâ. 65 Jesus aguely: — Âmaemo idânârâ inkâba yeinwândylymo. Awylygue âyanmo auguely. Pabai, yeinwântoem aguehobyry modo lelâ yeinwânni — kely. 66 Awârâ tindatuo, Jesus aguely idase nhapygueni modo ewy agui eagâpa tâisemo ani. 67 Aituo Jesus xina nhapâiguely: — Âmaemo-ro? Mydâdyse lâpylâ âmaemo? — kely. 68 Simão Pedro in-hoguly: — Agâpa tâidyse inkâba xina, Jesus. Âmâ lelâ âdara aunloenlâ Deus agâ xina idyly awyly wâgâ enomedâni, âdalâ eagâpa xina nipyra itoem. 69 Âmâ lelâ xina nheinwânkyly. Deus Ingonotyby mawyly, tutuze xina — kely. 70 Jesus aguely: — Kâinduakeyby âmaemo, doze lelâ. Tokalâ âmaemo ewy olâ Diabu emary — kely. 71 Judas wâgâ Jesus aguely, Simão Queriote donro imery. Jesus eynynonro lelâlâ wâne Judas, arâlâ olâ izepanro modo emaxi Jesus nhegamely nhâhomoem.
Jesus, iukonodo warâ
1 Arâ adâkely ewanikeimbyryem, Galiléia eynynâ Jesus adakobâdyly. Judéia eynynâ nadakobâbyra awyly, tonlo pymâ domodo mawânkâ tyândyse. 2 Âty Âtâ Wakurigueto etyguedo iwaguepa ani, kydamudo âji âdy peba ato einkâ adakobâdaymo, âtâ wakurigueto oday kulâ xykyhomobyry enanâgueho. 3 Aituo Jesus iukonodo eyam aguelymo: — Tarâpa ikâ. Judeiaram idâ, xidadâ Jerusalémram, Judeiadâ matay ampyguenibyry modo amânhekyly nhetomoem. 4 Mâkâ kurâ tâdutuodyze donro, adienkyly noentaymba, kurâ domodoram tâzehohoem. Aunlolâ inanry adyesenry kehoem amânhedyly; kurâ domodo enanaym pylâ aiekâ — kelymo. Âwankuem tiendylymogue kulâ, arâ aguelymo. 5 Iukonodo lelâlâ wâne, Jesus Messiaslâ awyly neinwâmpyramo olâ. 6 Jesus aguely: — Âtyam udâho oday inkâba awârâ. Âmaemo olâ âdalâ mydâlymo. 7 Yeinwântânry modo âizemo lelâ, urâ olâ yizepamo. Anhekylymo inakai wâgâ auguelygue, yizepa awylymo. 8 Âmaemolâ âtyam idâwâtaungâ. “Idâ” mygueduomo kulâ inkâba ise âtyam udâly; Pabai ugonotuo ise udâly — kely. 9 Arâ adâkebygueduo, Galileiadâlâ wao Jesus iweâpa kuba olâ târâ awyly.
Jesus âtâ wakurigueto etyryam idâhobyry
10 Âtyam tukonodo idâpygueduo, Jesus idâwâm lâpylâ. Tutuzebalâ idâly, kurâdo nutubalâ. 11 Judeu domodo iwymâry âtydâ nhuinlymo. Tonlo modo nhapâiguelymo: — Âdykâ Jesus? — kelymo. 12 Toenzepa iwâgâ aguewâni modo. Aguelymo: — Koendonro lelâlâ mâkâ — keim. Tâlâ, — Koendonro mâkeba mâkâ, konokuni kulâ — kewâni modo warâ. 13 Tutuzenryenlâ Jesus wâgâ aguelymo, pymâdo indadyseba tawylymogue. Jesus wâgâ adâkeduo, tânagazedyly tyntadylymogue. 14 Âty quatro iguandyly sakadybyem awyly ume, Jesus idâly Deus etyam. Târâ taseray âtâdyguyby modo nhenomedâdyly. 15 Pymâdo Jesus aguely tindatuo âsewânilymo; warâ aguelymo: — Kydâsenomedâdobyry ara nâsenomedâdaymba awâkâ, toenzepa olâ enomegu! Âdaraka awâkâ enomegu? — kelymo. 16 Aituo Jesus in-hoguly: — Unârygue kulâ inkâba xirâ kâenomedâdylymo. Deus ugononibyry, “Aguekâ” kehobyrylâ, augueho. 17 Pabai ize ato aieni modo xutuzemo Deus “Aguekâ” kehobyry augueho awyly; yangahu oday unâry kulâ mâkeba augueho awyly. 18 Tunâry tyangahu odano kulâ tagonroam egatuim tonomery wâgâ koendâ adâkehon-hoem kulâ aguely. Aunlo mâkeba olâ urâ. Unâ egatuim konokuni keba watay, tunâry kulâ mâkeba agueho, tugononibyry aguehobyrylâ. Tugononibyry mâkâ ehoguedyze ato, mâkâ mâkeba. Unâ egatuin-em Deus ingonotyby urâ. 19 Moisés myakâwândy Deus aguiendyse ato kâzewenry iweninri. Âmaemo olâ kâzewenry agueho mâinwâmpyramo. Yâze myguelymo, âdawipyralâ — kely. 20 Kurâ domodo aguely: — Tuândy kulâ âmâ! Diabu agonro keanra âmâ, arâ amyguehoem! Ânguy âze kewâpyra — kelymo: 21 — Iweâ kulâ keankâ adyesenry agânhedyly. Tâwâneim kua kânhedyly. Tâzekobyzegueho oday agânhedyly awylygue mâseguâdâdâmo, yagâ âewiâpadâmo-ro warâ. 22 Deus aguiendyse ato kâzewenryem saguhoenlâ Moisés iweniwâm. Warâ tâzezewenry wâgâ iwenibyem awyly: “Iamudo iwelo egaseyby tokalâ semana ipygueduo ilery ety iopiry satâwâdaungâ, Judeu tawyly nhenehon-hoem” kely. Moisés agâ inkâba kâzewenry tâjilery ety iopiry satâly adaguly, kydamudo agâlâ. Iamudo tokalâ semana ipygueduo, kâzewenry agueho arâ ilery ety iopiry mantâlymo, tâzekobyzegueho umelâ. 23 Iamudo ilery iopiry ety tâzekobyzegueho odaylâ kehoem tatâze âmaemo watay, nhewentâdaundâ, tâzekobyzegueho odaylâ tâwâneim kua kânhedylygue. 24 Inakanhe aini mâentuomo, inepa kâzewentâdaundâ. Âkealâ, âkealâba warâ awyly koendâ mâuntuduomo lelâ ewentâdaungâ — kely.
“Messiaslâka awâkâ Jesus?” kurâdo kehobyry
25 Aituo târâ Jerusalémdâ aguelymo: — Kywymârydo tyândyse atolâ awâkâ uguondo. 26 Etaungâ! Notoendaymba awâkâ. Tarâlâ idânârâam aguely. Ânguy etadâze kewâpyra. Kywymârydo nutumo keanra Deus Ingonotyby Messiaslâ awâkâ awyly. 27 Kurâem olâ awâkâ Messias keba. Tutuzema kurâ awâkâ âdykonlo awyly. Messias âewyly watay, MOK alelâ ise âepanâguely. Ânguy âdykonlo mâkâ awyly nutuwâbyra ise — kelymo. 28 Deus ety idaseray tienomedâday, kaynâ kehoem Jesus aguely: — Koendâ kehoem utudâ, âdykonlo wawyly tutuze warâ wâne âmaemo, inanajimo. Iozepa olâ arâ âunâgumo. Unâry wâgâ kulâ inkâba xirâ onro anaxi kâewyly; igonotybyem tarâ wawyly. Kewâdyly kulâ nitaymba mâkâ ugononibyry; tâinwânseim lelâlâ mâkâ agueho. Mâuntuba olâ âmaemo. 29 Urâ olâ tutuze ingonotybyenlâ mawânrâ kâewyly — kely. 30 Aguely tindatuo, sawâse kelymo. Ânguy olâ tâmary nhonwa niepyra, sawâto odayba awylygue. 31 Tonlo modo ewy agui Jesus tâinwânsemo myakâwâm. Aguelymo: — Messias âewyly-ro watay, adyesenry kehoem ise anhekyly, tâkezemo inanry. Awâkâ anhekyly takaze ânguy anientaymba. Arâ atayma Messiaslâ awâkâ-ro — kelymo.
Fariseu domodo guarda ingonotomobyry, Jesus nhawâtoem
32 Fariseu domodo, “Messiaslâ awâkâ Jesus” kely indadylymo. Aguely izepamo. Aituo kurâdo eynynâ Deus agâ aguewâni modo iwymârydo agâ aguelymo. Deus ety donro guarda modoram warâ aguelymo: — Jesus sawâtaunda; enetaungâ xarâ-ro warâ — kelymo. 33 Arâ âturudaymo, Jesus aguely tonlo modoram: — Âdiempa kulâ ise agâmo wawyly. Inepa ise kodopâdyly mâkâ ugononibyryanlâ. 34 Uize âmaemo, iepyra olâ ise âmaemo, udâhoram mydâpa mawylymogue — kely. 35 Aituo aguelymo: — Âdyanka ise awâkâ idâly, kiempyra kitoem? Eagonro xidadâ modoam ise idâly, judeu keba modo ety anaxi enomedâzemo? — kelymo. 36 — Âdakezeka enra awâkâ aguely: “Uize âmaemo, iepyra olâ ise âmaemo” kely? Xina nutuba enra awârâ — kelymo.
“Yam âetaungâ, tatuanzeim paru enyze âeto ara” Jesus kehobyry
37 Âty xypyry tohoguezeim kuru ume Jesus saudyly. Kaynâ kehoem aguely: — Yeinwântaungâ, âmaemo kâunduly mâenmakedyze donro modo. Yam âetaungâ, tatuanzeim paru enyze âeto ara. 38 Xirâ Deus itaumbyry awo wâgâ iweniby enanâguewâdaungâ: “Yeinwânni modo iweloem âiehozemo, âdaunloenlâ Deus agâpa nâiehoba itomoem. Paru sawedânry ara ise iodaymo eon-hondânimobe awyly aunlolâ” — kely. 39 Deus Ispiritury tâinwântaynrim modoam ingonokyly wâgâ ani Jesus aguely. Xirâ modo ume Deus Ispiritury eyanmo tugonoseba ani, xirâ anaynlâ Jesus awylygue, Tunwym tynrenseim ezaxi nâtâba awylygue.
Jesus einwânni, einwântânry warâ
40 Aguely idanipyry modo aguelymo: — Âkealâ, Deus eynynâ agueinlâ awâkâ uguondo. Messias kinwânwânkylylâ awâkâ — kelymo. 41 Einwântânry modo olâ aguelymo: — Messias mâkeba awâkâ. Galileiadâ kulâ mawânkâ âewyly. Mârâ eynynâ inkâba ise Messias âewyly. 42 “Davi ipemugu ewy ise Messias” tâkeze myakâwândy Deus lelâlâ. Iazely ise Belémdâ, Davi iazehobyrydâ. Arâ mawânrâ Deus itaumbyry awo wâgâ iwenibyem awyly — kelymo. Belémdâlâ iazeypy Jesus awyly nutuba tawylymogue, arâ aguelymo. 43 Jesus einwânni, einwântânry idylymo. 44 Ânguy olâ myakâwâm nawâpyra. Einwântânry modo ewy Jesus tianwâdysemo ani.
Judeu domodo iwymârydo Jesus neinwâmpyra atomobyry
45 Deus ety iguardary modo Jesus sawâse igonotyby modo odopâdylymo, fariseu domodo, kurâdo eynynâ Deus agâ aguewâni modo iwymârydo warâ eydâ atomoam. Aituo aguehonlymo: — Âdaituoka Jesus mâenepyra mawylymo? — kehonlymo. 46 Aituo in-hogulymo: — Ânguy mâkâ agueho ara kehoem aguewâpyra — kelymo. 47 Fariseu domodo iewiâpadaynly, aguelymo: — Mâkânra mâzenokuoaguimo lâpylâmy! 48 Kywymârydo mâkâ neinwântaymba. Xina fariseu domodo ewy tokalâ mâkâ neinwântaymba. 49 Âdaunlo modo kulâ mâkâ einwânni. Kâzewenry wâgâ nâsenomedâdaymba akaemo, xina âsenomedâdo ara. Inakanhe âiehoze akaemo Deusram — kelymo. 50 Akaemo duay tâlâ myani fariseu Nicodemos keho, kopae Jesus agâ agueze idâypy. Tataen-hodo aguely tindatuo, aguely: 51 — Idânârâ kehoem kâzewenry tutuze kurâ. Koendâpa ânguylâ iguehoem aguely, eagâ aguykeba kulâ, warâ awyly tutuzelâ kurâ. Âdy anhetyby kiuntuba kulâ âsenagazedoem kienwentâdaymba kurâ. Xarâ kyjigâsene, tâsemaguehoem, âdara kely awyly kindatoem — kely. 52-53 — Galiléia donro modo mâkâ eynynonro ewy ara amyguely. Tutuzelâ âmâ, Galileiadâ Deus itaumbyry egatuim âdaunloenlâ ipa awyly — kelymo.
Pekodo isoamba kulâ âdynanâoyby
1 Aituo kurâ domodo tâtyam idâwâdylymo. Jesus olâ idâly iwy Se Oliveira Ekaram. 2 Kopaelâgâem pealâ Jesus odopâdyly Deus etyam. Ekadyly, tydâtyguyim modo enomedâdyly nhaguondyly. 3 Nhenomedâdyly ume, fariseu domodo, Moisés inweniby enomedâni modo iwymârydo warâ Jesusram pekodo nhenewylymo. Eagonro uguondoam âdynanâoly emâmomy. Pekodoam aguelymo: — Tarâ ikâ idânârâ nhetodâ — kelymo. 4 Jesusram aguelymo: — Konomedâni, ohogüimby merâ pekodo, eagonro uguondoam âdynanâoly xina netai olâ. 5 Imeâgâemba kehoem merâ inakanhe aitobyry. Moisés kâzewenryem inweniby wâgâ: “Tuhugue tamytâze xyâwâtaungâ pekodo isoamba kulâ âdynanâoim” kelype. Âmâ-ro, âdara tâkeze âmâ? Tâwâlâ tuhugue xina nhâly? — kelymo. 6 Awârâ arâ nhapâiguelymo, Jesus âdalâ kulâ in-hoguly-ro watay tienwentâdomoem. “Tyâzepa awâkâ pekodo nidâ” kely-ro watay, “Kâzewenry neinwântaymba awâkâ Jesus” tâkezemo tâise. (“Xyâly lelâ awâkâ pekodo” kely-ro watay, “Nityendaymba awâkâ” tâkezemo tâise warâ.) Nhapâiguehomo nihoguba Jesus; enagozely lelâ, tâmary ewilygue onro wâgâ inwenily lelâ warâ. 7 Mâkâ pekodo wâgâ sapâiguezezemolâ. Aituo iwykaudyly, aguely: — Âmaemo ewy âdaunloenlâ inakanhe aitânrybe-ro watay, tâwâlâ waunroem merâ pekodo onwa tuhu name — kely. 8 Agueypyem âzewyondyly. Onro wâgâ inweniondyly. 9 Jesus arâ agueduo, idânârâ tutuzemo mawânkâ Deus izepa ato aieni lelâ tawylymo. Aituo tokalâ, tokalâ warâ âxiguewâdylymo, agaityom modo waunroem kuru âxigueim. Ânguy peba idyly, Jesus, pekodo alelâ âxiâim. 10 Aituo Jesus iwykaudyly, nhapâiguely: — Âdykâ âiguehoem iwentâni modo nitaimo? — kely. 11 — Ânguy lâpeba, Pymâ! — kely pekodo. — Âhoem auguewâpyra lâpylâ urâ. Iweâma idâ, inakanhe adâitonzeba olâ ikâ — kely Jesus.
Jesus mawânkâ âdara Deusram kytâly awyly xutuen-hoim
12 Jesus agueondyly Deus ety idaserano modoram: — Iajinu wâne kydadakobâdo tâsagonze, myara lâpylâ ywâgâ âdara Deusram tadaindyly xutuly. Yeinwântaynrim modo Deus agâpa tyetunebamo ise. Igueduomo, idâzemo lelâ aunloenlâ eagâ tâitomoem. Ize ato ara adâidyly xutuzemo. Iamu odaypa ise adakobâdylymo, ânwa tyajineim odakâ adakobâdylymo waunlo ara ise — kely. 13 Fariseu domodo eyam aguely: — Âwâgâlâ awârâ amyguely. Ânguy âkealâ amyguely awyly eon-hondâni lâpeba. Awylygue amygueho âdyem nipyra awyly — kelymo. 14 Aituo Jesus aguely: — Âkealâ ywâgâ auguely, tâinwânseim xirâ augueho. Idataungâ auguely. Tutuze urâ, âdykâba kâewyly, âdyam udâly warâ awyly. Âmaemo olâ mâuntubamo âdykâba kâewyly, âdyam udâly warâ awyly. 15 Ywâgâ koendâ mâuntuba lelâlâ wâne âmaemo, arâlâ olâ nhewentâdylymo. Ânguy ewentâze inkâba kâewyly, emakeze lakuru. 16 “Inakanhe kulâ mâkâ aidyly” uguely watay olâ; âkeá lelâlâ auguely. Yagâlâ Pabai ugononibyry; auguehobyry modogue yagâ tâseinwânze mâkâ-ro warâ. 17 Kâzewenry wâgâ iwenibyem: “Azagâ kurâ âkealâ aguelymo-ro watay, aguehomobyry tâzeinwân-honze” warâ iwenibyem awyly. 18 Tâlâ azagâ âkealâ ywâgâ agueim, urâ, Pabai ugononibyry warâ. Awylygue xina agueho tâinwânseim lelâlâ awyly — kely. 19 Akaemo aguely: — Âdykâka Pabai mygueho? — kelymo. Aituo Jesus in-hoguly: — Ânguy wawyly mâuntuwâbyra âmaemo. Pabai koendâ mâuntuwâbyra âmaemo warâ. Utulymo-ro watay, Pabai tutuze lâpylâ tâise âmaemo — kely. 20 Jesus xirâ modo wâgâ aguely, Deus ety idaseray tienomedâdaymo. Deusram dinheru xuduypy etadâdo kaixa iwaguepa. Tâwâlâ wâne izepaom modo agueho izepa awylymo, ânguy olâ nawâpyra, sawâto odaypa awylygue.
Xirâ anano keba tawyly wâgâ Jesus aguehobyry
21 Jesus aguely: — Idâze urâ; uize âmaemo-ro warâ. Inakanhe amitomobyry tygakezebalâ ise âiguelymo. Awylygue ise udâhoram mydâpa mawylymo — kely. 22 Aituo judeu domodo adapâiguelymo: — Âdyanka ise awâkâ idâly, kytâba kitoem? Âdyâly ise? — kelymo. 23 Jesus aguely: — Taunlo onwogonrolâ âmaemo. Urâma kaynonro. Xirâ ananolâ âmaemo, urâ olâ xirâ anano keba. 24 Yeinwâmpyra lelâ âmaemo-ro watay, inakanhe amitomobyry tygakeduneba ise. Inakanhe amitomobyry wâgâ tâzewentâgueozelâ ise âiguelymo, URÂLÂ URÂ kelygue tâzekeim mâinwâmpyra âmaemo-ro watay — kely. 25 Aituo nhapâiguelymo: — Ânguyka âmâ? — kelymo. Aituo in-hoguly: — Tutuzelâ âmaemo, aunlolâ inanry ywâgâ auguezesedyly. 26 Toenzepa âwâgâmo auguehobe wâne urâ. Augueho mâinwâmpyra olâ âmaemo, Deus ize ato amânhepyra mawylymo kâuntuen-hondyze wato. Mâkâ ugononibyry olâ kewâdyly kulâ waypa. Xirâ anano modoam auguehoem aguehobyrylâ augueho — kely. 27 Nutubamo myani mâkâ “Ugononibyry” keduo, tunwym Deus wâgâlâ aguely awyly. 28 Awylygue Jesus aguely: — Iwerâ ânguyem wawyly mâuntuwâbyra âmaemo. Yiguehoem kruz onwa yakâjibygueduomo, xutuze âmaemo, Uguondo Kaynâpa Âetyby wawyly, mâkâ URÂLÂ URÂgue tâzekeinlâ wawyly. Xutuze âmaemo, Pabai auguehoem aguehobyrylâ kâenomedâdo awyly, yangahu oday unâry kulâ mâkeba. 29 Yagâlâ ugononibyry, urâ kulelâ yânwâpyra, ize ato lelâ mawânrâ agânhekyly — kely. 30 Arâ aguely tindatuomo, agui kehoem einwânmâmomy.
Deus eynynonro wâgâ, Diabu eynynonro wâgâ warâ Jesus aguehobyry
31 Aituo Jesus aguely: — Augueho mâinwândylymo-ro watay, yagonroem lelâlâ ise âmaemo. 32 Ânguy wawyly koendâ mâuntulymo-ro watay, xutuze âmaemo, auguely âkealâ awyly. Mâuntuduomo, âzemakeoze âmaemo, mâkâ âuturimo emaymba — kely. 33 Aituo aguelymo: — Abraão iweompyrylâ xina. Âdykâ ânguyam xina nâdutuoba, xina tawâseba warâ. Âdaituoka “Mâkâ âuturimo emaymba âzemakeoze âmaemo” myguely? — kelymo. 34 — Diaburam kulâ Deus izepa ato aietaynrim modo âdutuoly. Inakanhe adâjidyly nimopamo. Diabu mawânkâ Deus izepa ato aiesezeni modo iwymâry; Satanásgue tâzekeim lâpylâ mâkâ. Xirâ mâuntudyzemo kuru wato. 35 Mâkâ kurâ adanâhoymby, tâwâlâ vende âieholy eagonro emaryem. Mâkâ imery olâ, aunlolâ imeryem awyly; âdaunloenlâ tunwym xurâempa nipyra. 36 Deus imery urâ. Diabu emaymba imakelymo-ro watay, mâkâ mâinwântondaymba ise âmaemo. Aunlolâ inakanhe amitomoem aguehobyry amânhetombyra ise âmaemo. 37 Abraão iweompyry lelâlâ wâne âmaemo. Arâlâ olâ, yâdyse mawylymo, inomedâdomo mâinwândyseba mawylymogue. 38 Pabai yam nhenehoymby inanry augueho. Amânhekylymo olâ, Diabu amânhetomoem aguehobyry kulâ — kely. 39 Aituo aguelymo: — Abraão iweompyry xina. Mâkâ aitobyry aralâ mawânrâ xina aidyly — kelymo. Aituo Jesus aguely: — “Abraão iweompyry xina” tâkeze wâne âmaemo, Abraão aitobyry arapa olâ amidylymo. Abraão aitobyry ara amidyse âmaemo-ro watay, Deus ize ato tâise amânhekylymo. 40 Âkealâ Deus aguehobyry kâindatyby inanry âyanmo augueho. Arâlâ olâ, yâze myguelymo. Awârâ amânhedyse matomo emyenro anientaymba akâwândy Abraão! 41 Unwânmo Diabu aito ara kulâ amidylymo — kely. Aituo aguelymo: — Diabu imeom mâkeba xina! Tokalelâ xina nhunwym, Deus lelâ. Deus imeom lelâlâ xina — kelymo. 42 Aituo Jesus aguely: — Deuslâ unwânmo-ro watay, ywynedâ tâise âmaemo, Deus ingonotybyenlâ mawânrâ tarâ wawyly. Âwâlâ kulâ inkâba kâewyly. Deuslâ mawânkâ ugononi. 43 Âyanmo augueho tydase lelâlâ wâne âmaemo, inomedâdyzemo wato mâuntudyzeba olâ âmaemo. 44 Diabu imeom kulâ âmaemo; ize atolâ mawânrâ amânhedyse matomo. Adagudaylâ Diabu kyârin-em awyly. Iozeno modo iduery kulâ mâkâ. Aunlolâ mâkâ kewâdyly kulâ awyly. Kewâdyly kulâ-ro watay, tâzewenrylâ mâkâ agueho. Augueondyly, konokuni kulâ mâkâ, idânârâ tâdâsenogudo modo adaguholâ mâkâ. 45 Uguewâdyly kulâ witaymba urâ, âmaemo olâ yeinwândysebamo. 46 Idânârâ âmaemo, inakanhe awipyra wawyly, tutuze âmaemo. Ânguy ienwentâni lâpeba. Awylygue augueho einwântaungâ. 47 Deus xurâ modo mawânkâ Deus agueho tâinwânsemo. Mâkâ mâinwâmpyra mawylymo, xurâ keba mawylymogue — kely.
Abraão wâgâ Jesus aguehobyry
48 Aituo tonlo modo judeu domodo eyam aguelymo: — “Âkealâ enra Samaria donro modo emyenro kulâ âmâ kadopâbeom” xina kely — kelymo. 49 Aituo Jesus aguely: — Kadopâbeom mâkeba urâ. Pabai ugueho tynrense urâ; âmaemo olâ yrempyramo âmaemo. 50 Won-honru wâgâ, koendonroem wawyly wâgâ warâ auguepa wâne urâ. Pabai olâ ywâgâ koendâ adâkeze. 51 Idânârâ auguehobyry einwântaynrim modo niguewâpyramo ise. Xirâ mâuntudyzemo kuru wato — kely. 52 Arâ Jesus aguely tintaduo, judeu domodo iwymârydo, aguelymo: — Iweâma tutuze xina, kadopâ agâ kulâ mawyly! Iweâpa myakâwândy kydamu Abraão iguely. Idânârâ saguhoem Deus eynynâ agueim modo lâpylâ iguewânmo. Warâ olâ amyguely: “Idânârâ auguehobyry einwântaynrim modo niguewâpyramo ise” myguely. 53 Kydamu Abraão, saguhoem Deus itaumbyry egatuwânibyry modo alelâ iweâpalâ myakâwândy iguelymo. Akaemo takaze tynrenseim mâkeba âmâ! Uguondo tynrenseim mawyly tâgaese wâne âmâ, âdy keba olâ âmâ — kelymo. 54 Aituo Jesus aguely: — Ywâgâ kulâ koendâ auguely-ro watay, augueho modo âdyem nitaymba tâise. Urâ lelâ ywâgâ koendâ aguein-ro watay, ânguy auguehobyry neinwântaymba tâise. Pabai olâ ywâgâ koendâ agueim, mâkâ “Xina iDeusry” myguehomolâ. 55 Âdykâ Deus mâentaymba âmaemo, urâ olâ tâense. “Kâuntuba urâ” uguely âyanmo-ro watay, uguewâdyly kulâ tâise. Koendâ kehoem tutuze, tâinwânse warâ olâ urâ yam agueho modo. 56 Kydamu Abraão toenzepa iomazewâm, tarâ xirâ onro anaym wawyly tientuo — kely. 57 — Âwâ! Cinquenta anu peba kuru maze-ro. Iweâpa lelâlâ myakâwândy Abraão iguely, azely iraynâlâ. Abraão mâentaymba âmâ! — kelymo. 58 Aituo Jesus aguely: — Abraão iazely iray, tâlâ wakâwâm — kely. 59 Jesus aguely tindatuomo, tyândyse idylymo. Tuhu nhanâdylymo, nhonwa tiamehomoem. Totoenze olâ ani. Aituo Deus etydâba egasely.
Jesus epy kua nhetobyry
1 Alâ ani tadakobâday Jesus uguondo epyem iazeypy nhedyly. 2 Aituo xina Jesus nhapâiguely: — Konomedâni, âdaituoka awâkâ uguondo epyem iazely? Izepa tato aieniem awyly xutuwâm Deus? Nhunwyndo inakanhe aitobyry wâgâ? — xina kely. 3 Aituo Jesus in-hoguly: — Awârâ modo wâgâ inkâba. Awâkâ arâ iazely, Deus eon-honru iwâgâ âzehohoem. 4 Tâmaryem akâwâm Deus xirâ anaxi ugonodyly. Peto oday lelâ kydâsewanily. Arâ lâpylâ Deus aguiendyse ato aguyjiene, kydâsewaniho nhuduly umelâ. Inepa mawânrâ ise xurâem aguipyra kito saindyly. 5 Xirâ anaym wawyly ara, âdara Deusram tâdâtâly awyly wâgâ konomedâdâ urâ; âdyam kytâly awyly kientoem iajimanâni emyenro urâ — kely. 6 Arâ aguenripyryem, Jesus KUITÚ kely onro onwa. Onro tâdakugue nhepizeândyly. Aienibyryem epy enu onwa PYRY PYRY nhedyly. 7 Aguely: — Idâ, Siloé donro paru etaryam âzemelagoguera — kely. (“Mâkâ igonotyby” keze Siloé kely.)Epy idâly âzemelagogueze. Odopâdyly, tâense lelâ, Jesus kua nhetybyem. 8 Ety iwaguepa tâtyuneim modo mâkâ epyemba awyly nhedylymo. Saguhoem dinheru nhekadyly enipyry modo lâpylâ koendâ tâense awyly nhedylymo. Aituo âseguâdâdylymo, aguelymo: — ÂH! Mâkâ epy ekadybyem, sakani modoam dinheru ekanibyrylâ awâkâ — kelymo. 9 — Mâkâlâ — kewâdylymo. — Mâkâ mâkeba. Emyenro kulâ awâkâ — kelymo. Mâkâ olâ warâ aguely: — Mâkâlâ urâ, epyem iazeypylâ — kely. 10 Aituo nhapâiguelymo: — Âdaraka amidyly kua mitoem? — kelymo. 11 Aituo in-hoguly: — Mâkâ uguondo Jesus keho enra ikila ienu onwa PYRY PYRY ieni. “Idâ, Siloé donro paru etaryam âzemelagoguera” keanry-ro warâ. Aituo enra udâly. Kâzemelagogueagui. Iwerâ tâense urâ — kely. 12 — Âdykâka mâkâ uguondo? — kelymo. — Kâuntuba aze — kely.
Fariseu domodo epyem iazeypy kua ietyby nhapâiguehomobyry
13-14 Tâzekobyzegueho oday Jesus epy kua nhedyly. Aituo mâkâ kua ietyby fariseu domodoram adaholy. 15 Fariseu domodoram adapâigueoly: — Âdaraka kua midyly? — kelymo. — Mâkâ uguondo kua yenipyry onro enra ienu onwa PYRY PYRY nhekyly. Parugue kâzemelagoguehoem agueanry. Âzemelagogueybyenlâ enra kâendyly-ro warâ — kely. 16 Fariseu domodo ewy aguely mâkânra: — Mâkâ kua âenipyry, tâzekobyzegueho oday mâkâ aidyly. Arâ atayma Deus ingonotyby mâkeba mâkâ uguondo-ro; adyesenry mawânkâ anientai tâzekobyzegueho oday — kelymo. Tâlâ olâ fariseu domodo ewy wakeim: — Deusram aguehomba adyesenry anhetoen-ro watay, Deus eon-honru tienehon-hoem adienkyly anientaymba tâise — keim. Jesus Messias awyly einwânni, einwântânry tâisemo ani. 17 Aituo eyam agueondylymo: — “Epyemba yetai mâkâ” mygueanse. Âdara mâkâ wâgâ âunâry? — kelymo. — Ienanaji, Deus eynynâ agueinlâ mâkâ — kely. 18 Pymâ domodo mâkâ aguely neinwâmpyramo. Aituo aguelymo: — Myguewâdyly kulâ. Epyem inkâba ani azely — kelymo. Awylygue sodo modo ingâsedylymo. 19 Sodo modo saintuo, nhapâiguelymo: — Âmerymoka awâkâ, epyem iazeypy myguehomo? Âdaituo pylâka iwerâ nhedyly? — kelymo. 20 Aituo in-hogulymo: — Xina imerylâ awâkâ. Tutuze xina epyem iazeypy awyly. 21 Âdara kua itobyry olâ xina nutuba. Ânguy kua ieni awyly xina nutuba lâgâlâ warâ. Xutuybyem mawânkâ. Awâkâlâ sapâiguewâdaungâ. Awâkâlâ ise âyanmo egatuim — kelymo. 22 Arâ sodo modo aguely olâ mârâ âtâ tâdâtâdyguyho odaypa tâzegaseonlymo xytaze, “Jesuslâ Messias” kelymo-ro watay. “Deus Ingonotyby Jesus awyly einwânni-ro watay, âtâ tâdâtâdyguyho odaxi negawâmpyra ise” tâkeze akâwâm pymâ domodo. 23 Awylygue mawânkâ: “Xutuybyem awâkâ. Awâkâlâ sapâiguewâdaungâ” kelymo. 24 Aituo mâkâ uguondo kua ietyby ingâsenehondylymo. Aguelymo eyam: — Amyguely idaselâ awâkâ Deus. Awylygue âkeá lelâlâ xinaram aguekâ. Tutuze xina, Deus izepa ato aieni awâkâ kua âenipyry awyly — kelymo. 25 Aituo in-hoguly: — Deus izepa ato adyese, aniempyra warâ awyly kâuntuwâbyra urâ. Kâuntuly epybyryem wawyly, iwerâ tâense urâ, mâkâ kua nhetybyem — kely. 26 Aituo nhapâigueondylymo: — Âdaraka enra aidyly? Âdaraka enra epyemba âedyly? — kelymo. 27 Aituo uguondo in-hoguly: — Azagâ lelâ âyanmo augueaki, yeinwâmpyra olâ âmaemo. Auguehobyry kompâzedyly-ro watay, mâinwâmpyra mawylymo, tutuze urâ. Mâkâ kua yenipyry mâinwândysemo lâpylâ âmaemo? — kely. 28 Aituo mâkâ agâ toenzepa kehoem iewiâpadylymo, aguelymo: — Âmâlâ mâkâ eynynonro, xina mâkeba! Moisés inweniby lelâ xina nheinwânkyly. 29 Deuslâ, Moisés kydamudo nhenomedâdoem agueim awyly, tutuze xina. Âdy Jesus wâgâ xina nutuwâbyra. Ânguy aguehoem igononi awyly xina nutuwâbyra warâ — kelymo. 30 Aituo mâkâ uguondo aguely: — Âwâ! Kua nhetybyem wawyly tâenselâ âmaemo. Toenzepa kâseguâdâdyly, Deus ingonotybylâ mâkâ awyly mâuntuba mawylymogue! 31 Deus tynynonro keba modo nhekadyby nudupa awyly, tutuzelâ kurâ, izepa ato aieni nhekadyby nuduwâpyra. Tynynonro modo nhekadyby lelâ anhekyly — kely. 32 — Kaudyly umelâ ânguy epyenlâ egaseyby kua tyese kely tydatuneba. Ânguy awâkâ uguondo ara aieni lâpeba. 33 Iwerâ olâ Jesus kua yetai. Deus keba igononi-ro watay, kua yetaymba tâise — kely uguondo. 34 — Epyem azely Deus izepa ato aienilâ mawylygue. Awylygue xinaram arâ kehoem adâkezeba ikâ — kelymo. Aituo, âtâ tâdâtâdyguyho odaypa nhegaseândylymo.
Jesus agueho tyeinwândysebaom modo
35 Âtâ tâdâtâdyguyho odaypa uguondo egaseândobyry xutuwânmy Jesus. Awylygue nhuinly. Tientuo, nhapâiguely: — Mâkâ Uguondo Kaynâpa Âetyby tâinwânse âmâ? — kely. 36 Aituo uguondo aguely: — Kâinwândyse urâ. Ânguy awyly yam aguekâ, ânguy amygueho awyly kâuntuhoem — kely. 37 — Tâenselâ âmâ! Eagâlâ amyguely! Urâlâ Uguondo Kaynâpa Âetyby — kely Jesus. 38 Jesus aguely idanipyryem, âzeguhoam idyly enado, tynrentoem, aguely: — Pymâ, âinwântâ urâ — kely. 39 Jesus aguely: — Xirâ anaxi kâewyly, ânguy yeinwânni, yeinwântânry warâ awyly âdutuhomoem. Epy modo wâne tyajine awyly nutuba myara Deus xurâ kebaom modo, nutuba awylymogue. Yeinwântaynrim modo olâ Deus xutuzemo, epybyryem kua ietybymoen-ro waunlo ara — kely. 40 Fariseu domodo ewy eydâ iwaguepalâ. Aituo aguely indadylymo. — “Epy ara” mygueduo, xinaranlâ enra amyguely? — kelymo. 41 Aituo Jesus in-hoguly: — “Xina Deus nutuwâbyra, tiuntudyze olâ xina” myguelymo-ro watay, Deus tygakeze tâise izepa ato amânhetomobyry. Tâwâlâ kulâ olâ, “Koendâ Deus tutuze xina” myguelymo, yeinwâmpyra kulâ. Arâma inakanhe amitomobyry tygakezeba awyly tânehonze awârâ. Deus xurâem, epy emyenro kulâ âmaemo — kely Jesus.
Kaneru sodo koendonro wâgâ Jesus nhegatuhobyry
1 Jesus aguely: — Idataungâ auguely. Kaneru sodo kura odaxi pyanta oze egawândyly. Tâmagazeinma tâzegawânto ozepa egawândyly, sahodâdobyry nhakaguyly. 2 Kaneru sodo tâzegawânto oze egawânni. 3 Egawântoem pyanta tâzenahugueoze. Ezedy wâgâ sodo tâguy ingâsedaynly. Todo itanru tydase kaneru. Kura odaypa nhetaguewâdyly. Poji nhaguhomoem nhadyly. 4 Waunroem idâly, eguydo nhapygue-ro warâ, todo itanru tydase tawylymogue. 5 Tiuntudânry kulâ niampyguedaymba. Itanru âkeloem awylygue, tâwenkeze lelâ — kely Jesus. 6 Kaneru todo nhutuho ara, “Yeinwânni modo utuly” keze ani Jesus aguely. Kaneru wâgâ kulelâba aguely awyly, nutubamo olâ-ro warâ.
Deus eydâ atoam tâzegawântolâ Jesus
7 Aituo Jesus aguely: — Kura iwyantary emyenro urâ. Pyanta oze kaneru domodo tâtary odaypa egasely poji aguze, egawântondyly tâxidâdomoem warâ. Arâ lâpylâ ywâgâ lelâ Deusram tâdâtâhoem wawyly. Xirâ mâuntudyzemo kuru wato. 8 Xirâ onro anaxi kâewyly iraynâ, toenzepa akâwâm “Deus Ingonotyby urâ” kewâni modo. Kewâdylymo kulâ olâ-ro warâ. Kaneru emagazeni emyenro kulâ akâwâm akaemo kewâdyly kulâ waunlo modo. Ynynonro modo olâ akâwâm aguelymo niwantaguebyramo. 9 Deus eydâ atoam tâzegawântolâ urâ. Tâsemaguehoem wâne kaneru kura odaxi tâgawânse myara ynynonro modo kâenmakely. Kaneru sodo tâguy poji anaym awyly ume tânuagaenzelâ myara lâpylâ ynynonro modo kâendyly. 10 Kaneru domodo emagazeze, inwenkeze, xyâze warâ kulâ tâmagazeim âewyly. Urâ olâ ynynonro modo emakeze kâewyly, igueduomo Deus agâ aunloenlâ itomoem lakuru.
Kaneru sodo koendonro
11 — Kaneru sodo koendonro emyenro urâ. Koendâ tâguy nhedyly; emakezemo tâigueze warâ. 12-13 Tâlâ olâ dinheru tienmakehoem kulâ kaneru eni, sodo keba olâ mâkâ. Auwa âepanâguely watay, todokeze lelâ. Aituo auwa kaneru nhawâdyly, ipemugudo adapâeguyly. 14-15 Mâkâ kaneru odo koendonro emyenro urâ. Utudâ Pabai; Pabai tutuze urâ warâ. Ynynonro modo tutuze lâpylâ urâ, kaneru odo koendonro tâguydo nhutuho ara. On-hondybyem urâ, ynynonro modoem yiguehoem. 16 Tâinkâ lelâba ynynonro modobe awyly. Utuzemo, yeinwânsemo warâ. Tokalâ âjiam lelâ ise ynynonro modo kâindâtyguyly, kâentomoem, kaneru odo koendonro, tientoanlâ tâguy indâtyguyho ara. 17 — Toenzepa Pabai ywynedyly, yeinwânni modo emakeze iguein-em wawylygue. Yigueduo, kurâem itonze urâ. 18 Ynynonro modo emakezelâ ise yiguely, awidyse wawylyguelâ. Aypa-ro watay, ânguy yâwâpyra tâise. “Igueze âmâ, kurâem itonze âmâ warâ” Pabai kehobyry aralâ ise awidyly — kely. 19 Awârâ tindatuo, judeu domodo nâseinwâmbyra idylymo Jesus wâgâ, aguelymo: 20 — Kadopâbe itybyem awâkâ! Awylygue âindâ kulâ awyly! Aguely kâjiwantaguedaundâ — kelymo. Tâlâ olâ warâ aguewâni modo: 21 — Kadopâ agonro arâ aguewâpyra, epy kua nietaymba warâ! — kewâni modo.
Judeu domodo Jesus izepa itomobyry
22 Azagâ nunâ sakabygueduo, kopâ ihuguely adaguly ume, âty “Deus Ety Koendâ Ietobyry Enanâgueho” saindyly. 23 Deus ety ivarandarydâ Jesus adakobâdyly, Salomão intânehoymbydâ. 24 Târâ atay, eydâ âtâdyguyby modo aguely: — Xina kâzenokudâ. Deus Ingonotybylâ âmâ? Mâkâ keba? Koendâ aguekâ, xina nhutuhoem — kelymo. 25 Aituo Jesus in-hoguly: — Deus Ingonotybylâ urâ, ugue. Yeinwâmpyra olâ mataunaguynre. Pabai eon-honrugue adyesenry modo ajiedâ, mâkâ ingonotybylâ wawyly kâenehohoem. Agânhekyly modo mâkâlâ ugononi awyly xutuen-hoim. 26 Ynynonro keba mawylymogue olâ Deus Ingonotyby wawyly mâinwâmpyra mawylymo. 27 Ynynonro modo ytanru tydase; idânârâ utudâmo warâ. Kaneru todo itanru tindatuo, eyam tâtâze myara ynynonro tawylygue, auguehobyry anhedylymo. 28 Ynynonro modo aunloenlâ Deus agonroem ienehonze urâ. Igueduomo eagâmolâ ise Deus. Typygueim keba ise eagâ awylymo. Iemakoaymo waunlo ara kehoem ise; ânguy iemaymba nhemakelyemba kehoem. 29 Pabai won-honru nhuduypy, idânârâ takaze kehoem imâem awyly; ânguy mâkâ emaymba nhemakelyem inkâba. 30 Tokalelâ xina Pabai agâ — kely Jesus. 31 Jesus aguely tindatuo, iopano modo tuhu nhanâtondylymo Jesus tyân-homoem. 32 Aituo Jesus eyanmo aguely: — Inumo angataylâ keankâ koendonro modo agânhedyly, Pabai “Aiekâ” kehobyry ara. Âdaunlo agânhekyly wâgâka tuhugue yâdyse mawylymo? — kely. 33 In-hogulymo: — Koendonro amânhedylygue inkâba xina âdyse awyly, Deus mâunâguedylygue. Xina emyenro kulâ âmâ, uguondo, Deus agâ âzekiba ise kerim. Awylygue xina tuhugue âdyse awyly — kelymo. 34 Aituo Jesus eyanmo agueondyly: — Warâ Deus itaumbyry awo wâgâ iwenibyem awyly: “deuslâ âmaemo” kely Deus eyanmo. 35 Âkealâ Deus itaumbyry awo wâgâ iweniby aguely awyly, tutuze kurâ. Deuslâ akaemo deusgue ezetâni awyly, tutuze kurâ, saguhoem kuru iwâgâ aguewâtyby modo. 36 Deuslâ xirâ onro anaxi ugononi, aguehobyry aiese. “Deus imery urâ” ugueduo kulâ, “Deus nhunâguedyly awâkâ” myguelymo. 37 Pabai “Aiekâ” kehobyry agânhepyra urâ-ro watay, âdy wâgâ yeinwântaymba tâise âmaemo. 38 Auguelygue kulâ yeinwâmpyra âmaemo-ro watay, agânhekyly mâentuomolâ einwântaungâ. Pabai Deus agâlâ wawyly, yagâlâ Pabai Deus awyly warâ — kely. 39 Aguely tindatuomo tyanwâdyse idylymo. Âsemaguewâm lelâ olâ. 40 Aituo Jesus târâpa âxiguely. Paru Jordão kuyam idâondyly, João kurâdo batiza nhetobyryam. 41 Toenzepa myani xuiwâni modo aguely: — Merâ uguondo adyesenry modo anhedyly ara, âdy aniempyra wâne ani João. Âkealâ olâ mykeankâ merâ uguondo wâgâ aguely — kelymo. 42 Agui tonlo modo Jesus tâinwânsemo myakâwâm.
Lázaro iguehobyry
1 Tâlâ ani uguondo, Lázaro keho, Betânia donro, Maria, Marta warâ iwiry. Tâwâne myani mâkâ. 2 (Mâkâ Maria, Pymâ Jesus ihuru onwa uriza nhapâdyly, tyangahudugue in-hugoguely itybylâ mâkâ.) 3 Paru Jordão kuynâ Jesus awyly ume, Lázaro eaundudo kurâ ingonodylymo Jesusram: — “Pymâ, toenzepa enra ataen-ho mâinwyneguyly ewânu!” kera. 4 Aguely tindatuo, Jesus aguely: — Tutuze urâ, Lázaro ewânu toenzepa awyly. Tâwânugue igueze, igueypyem lelâ nâtâzezebyra olâ ise. Mâkâ aidyly tientuo, toenzepa ise aguelymo: “Koendonro, ton-honreim warâ awâkâ Deus. Koendonro, ton-honreim warâ lâpylâ imery” kezemo. Aituo ise urâ, Pabai Deus warâ xina âdyren-honly — kely. 5 Toenzepa Jesus inwyneguyly mykâinane Maria, Marta, Lázaro warâ. 6 Toenzepa Lázaro ewânu kely tindatuo, myarâ idâze nadahulebyra ani; azagâ emedyly takaze wao mârâ âjidâ. 7 Aituo xinaram aguely: — Judéia yan-yam kydodopâne — kely. 8 Xina olâ warâ aguely: — Konomedâni, iweâ kulâ keankâ kypemugudo, judeu domodo, tuhugue âze kelymo. Myarâ kydodopâbyra koendâ kydawyly — xina kely. 9-10 Aituo Jesus xinaram aguely: — Odopâdonze urâ. Kopaelâgâembaba xixi iatygu doze horas ara lelâ. Peto oday adakobâni modo nâjihodaigâdaymba, xixi wâgâ. Kopae adakobâni modo olâ tâjihodaigâze, iamu oday tâtâho nepyra tawylygue — kely. 11 Aituo Jesus xinaram agueondyly: — Xykyly kulâ mâkâ kataen-ho Lázaro. Xuagueânse olâ urâ — kely. 12 — Pymâ, xykyly kulâ watayma, koendâ ise lelâ-ro — xina kely. 13 “Igueypyem Lázaro” keze olâ ani Jesus aguely. Xina nutuba olâ âdakeze aguely awyly. Lázaro xykyly kulâ-ro waunlo ara, xina enanaji. 14 Aituo koendâ xina nhutuhoem Jesus aguely: — Lázaro nigue. Ipa kuru nidâ. 15 Lázaro iguely iraynâ udâpa wawyly keankâ, won-honru mâentomoem. Âkealâ kuru yeinwântuomo, toenzepa ise womaru. Inoro, âguedy kyzeta — kely. 16 Aituo Tomé, Azagonropyry kelygue tâzekeim, xinaram aguely: — Inoro lâpylâ Jesus nhâduomo eagâlâ kyiguehoem — kely.
Jesus igueypy modo kurâem ietoni
17-18 Aituo xina Betânia iwaguepa saindyly. Jerusalémdâ iwague kuruba mârâ âji, três kilômetros awârâem. Âguedy eaundudopyry etyam xina saindyly iraynâ, uguondo saindyly xinaram agueze: — Ipa Lázaro nigue. Eguepybyry tuhu imâsedo odaji xina nhetadâdobyry quatro iguandyly idyly iwerâ — kely. 19 Toenzepa eaundudopyry itynrumo. Toenzepa ipemugudo idâly, âkelo kurâ domodo warâ etubanâzemo, iwirymo iguehobyry tiuntuduo. 20 Jesus tâtyam saindyly egary tindatuo myani Marta iose idâly, Maria olâ âtâdâlâ. 21 Aituo Marta Jesusram aguely: — Tarâlâ âmâ-ro watay, wi niguewâpyra tâise keankâ! 22 Igueypyem lelâlâ wâne, tutuze olâ urâ, Deusram mâenkaduo amyguehobyry adyese awyly — kely. 23 Aituo Jesus eyam aguely: — Igueypyem lelâ idâzesedyly nitaymba ise âwiry. Kurâem itonze lelâ — kely. 24 — Xypyry etay kurâem itondyly, tutuze urâ — kely Marta. 25 Aituo Jesus aguely: — Iguewâtyby modo kurâem ietoni urâ, aunloenlâ typyguenryem itomoem. Tâwâlâ ise yeinwânni modo iguely. 26 Yagâpa nitaymbamo ise yeinwânni modo. Deusram ise, tyigueduo, idâlymo aunloenlâ eagâ tâitomoem, nigueontaymbamo ise. Tâinwânse âmâ? — kely Jesus. 27 — Idânârâ amyguehobyry modo tâinwânse urâ. Deus, “Xirâ onro anaxi igonose urâ” kehobyrylâ mawyly tâinwânse urâ. Deus imery lelâlâ mawyly tâinwânse urâ warâ — kely Marta.
Jesus eogumatobyry
28 Agueypyem Marta idâly tywidyam agueze. Tydawere aguely, ânguy nidapyra itoem. — Idy, Jesus naintai. Âgâsedyly-ro warâ — kely. 29 Awârâ tindatuo myani Maria inepa kehoem saudyly. Jesus agâ oxioze idâly. 30 Etymoam kuru Jesus naimpyralâ, Marta agâ xina oxiodobyrydâlâ. 31 Târâ âtâ oday Maria etubanâze idâypy modope myani. Mâkâ saudyly, tâmaegoze kehoem egasely tientuo, tâgasezemo lâpylâ myani. Aituo nhapygue idâlymo, — Âguedy etadâdobyryam keanra idâly ohogüenze — tâkewâduomo. 32 Jesus eydâ atoam saintybyem, Maria âzeguhoam idyly enado. Aitybyem eyam aguely: — Tarâlâ âmâ-ro watay, wi niguewâpyra tâise keankâ! — kely. 33 Aituo Jesus, Maria eogunru nhedyly; eagonro modo eogunru nhedyly lâpylâ warâ. Aituo Jesus toenzepa itywandyly, tuoday âsewânily warâ. 34 Aituo nhapâiguelymo: — Âdykâka keankâ Lázaro eguepybyry mâentadâdylymo? — kely. — Egârâ, Pymâ — kelymo. 35 Jesus eogumadyly. 36 Aituo tonlo modo aguely: — Lázaro tywyneze lelâlâ galâ awâkâ Jesus! — kelymo. 37 Tâlâ olâ wakenri: — Epy kua niedâ awâkâ. Ton-honreba olâ keankâ Lázaro niguepa itoem aiese — kerim.
Jesus Lázaro kurâem nhetondobyry
38 Jesus idâly Lázaro eguepybyry etadâdobyryam, tâtagueim tuhugue tânahugueinram. Toenzepa kehoem itywandyly. 39 Aituo aguely: — Awârâ tuhu etywâdaungâ! — kely. Aituo âguedy eaundupyry Marta aguely Jesusram: — Alâ nidâ! Tywângue awâkâ! Etadâdobyry quatro iguandyly idyly iwerâ — kely. 40 Aituo Jesus aguely: — “Yeinwântâ lelâlâ âmâ-ro watay, Deus eon-honru ese âmâ” uguehobyry mâenanâguebaka âmâ? — kely. 41 Aituo mârâ tuhu imâsedo nhetylymo. Jesus kayam MYK idyly, aguely: — Pabai, tuomare urâ, âyam auguely tydase mawylygue. 42 Ydatâlâ mawyly tutuze urâ, tâwâlâ lelâlâ wâne yangahu oday kulâ unâgu. Ago olâ iwerâ auguely, merâ kurâ domodo auguely indatoem, âmâlâ ugononi awyly nheinwântomoem warâ — kely Jesus. 43 Arâ adâkebygueduo adaenkely: — Lázaro, igasegâ kuohoram! — kely. 44 Aituo Lázaro kurâem itondyly, egasely. Ituwyn-hobyry aralâ, ixinary, ihuru, ewâry, emary alelâ. Panugue emyan-huymbyem awyly. Aituo Jesus aguely: — Awârâ ituwyn-hobyry etywâdaungâ, adakobâdoem — kely.
Jesus xyâly wâgâ aguehomobyry
45 Jesus Lázaro kurâem nhetonduo, judeu domodo Maria etubanâze idâwâtyby modo ewy nheinwândyly lâpylâ. 46 Tâlâ olâ myakâwâm fariseu domodoram aitobyry egatuze idâim. 47 Aituo fariseu domodo, kurâdo eynynâ Deus agâ aguewâni modo iwymârydo, judeu domodo iwymârydo warâ âtâdyguylymo. Âjigue aguelymo: — Âdakiendylyka awâkâ Jesus? Adyesenry modo kehoem awâkâ anhekyly. Kurâ domodo aidyly tohoguezemo-ro warâ. 48 Alâ aguienehonzezedyly-ro watay, idânârâ kurâ domodo awâkâ einwânsemo lâpylâ. Aituo ise kywymâry Roma donro modo kagâ iewiâpadaynlymo. Kagâ âseguebyze âesemo, kainzemo, Deus ety sakalaguezemo warâ — kelymo. 49 Ilâem Caifás myakâwâm kurâdo eynynâ Deus agâ aguewâni modo iwymâry kuru. Aituo myani aguely: — Âdy mâuntuwâbyra âmaemo! 50 Jesus kydyâen-honre, kydadainhopa kitoem! Tokalâ iguelylâ ise koendonro, idânârâ kyiguepa kitoem — kely. 51 Âdatâkely awyly nutuwâbyra myani mâkâ. Kurâdo eynynâ Deus agâ aguewâni modo iwymâry lâwâne mâkâ ilâem, Jesus izetonro keba olâ myakâwâm. Alâ wâne, Deus nhutuen-honly, Jesus, judeu domodoem iguely awyly. Tyangahu odano kulâ mâkeba myani mâkâ agueho, Deus nhutuen-hoymbylâ. 52 Kurâ judeu domodoem kulelâ inkâba Jesus iguely, idânârâ kurâdo onro anano modoem. Mâkâ iguely, idânârâ tâinwânni modo tâinkonro lelâba, mâkâ nheinwântomoem, tokaleom ara lelâ itoem. 53 Ilâ umelâ myani judeu domodo iwymârydo Jesus xyâhoem aguelymo. 54 Awylygue Jesus kurâdo tâentoem kehoem nadakobâbyra awyly. Judeiadâpa âxiguely. Âtâ anary Efraim kehoam idâly; âji âdy peba ato iwaguepa myani mârâ âji. Xina agâlâ akâwâm târâ awyly. 55 Iwaguepa akâwâm Páscoa etyguedo. Toenzepa poji anaym tâtyuneim modo Jerusalémram idâly âty iraynâ. Kâzewenry ara aguidyly, kydokoguely wao warâ kydâzetyguedoem. Tâzetyguedoem ohonze myani idâlymo. 56-57 Fariseu domodo, kurâdo eynynâ Deus agâ aguewâni modo iwymârydo warâ, “Jesus âdykâ awyly mâuntulymo-ro watay, xina xurutaungâ, xina nhawânehon-hoem” kehomobyry wâgâ, myani ohonze idâypy modo Jesus nhuinlymo. Âjigue adapâiguelymo: — Âdara inanajimo? Âese wânkâ mâkâ âtyam? — kelymo.
Maria Jesus ihuru onwa uriza nhapâdobyry
1 Seis iguandyly Páscoa etyguedoem awyly ume, Jesus agâ xina idâly Betanianra, Lázaro etyram, igueypyem awyly ume kurâem nhetondyby. 2 Xina saindyly ani. Kopae Jesus ipyniry anhedylymo. Marta pyni epâni. Lázarope lâpylâ Jesus agâ mesa wâgâ âwinduase. 3 Xina âwinduadyly ume Maria uriza etary meio litru tâmânreim tâmaxi nhedyly. Nady nardo iwindy ekurugue aietyby ani mârâ uriza. Âjigueto myani mârâ, âdy agâ itugândyby keba. Awylygue toenzepa ewâendyly. Jesus ihuru onwa uriza nhapâdyly. Aitybyem tyangahudugue in-hugoguely. Toenzepa âtâ oday nhârânzely. 4 Judas Queriote donro ani Maria aidyly nehoguebyra. (Jesus eynynonro modo ewy izepaom modo emaxi egamenribyrylâ awâkâ Judas.) Aituo Judas aguely: 5 — Toenze tâwâenseim keba awârâ uriza! Awâkâ nhumeguyly! Awârâ uriza vende iedyly-ro watay, âdy pebaom modoram tâise ebyrypyry xuduly — kely. 6 Âdy pebaom modo tintyendylygue inkâba ani arâ aguely, tâmagazeim tawylygue. Dinheru Jesusram xuduypy etary eni ani mâkâ. Turâem tâtyze olâ mârâ odaji ietyby ewy. 7 Aituo Jesus xinaram aguely: — Arâ adâkezeba itaungâ Maria wâgâ. Kâjiwypazenehonwâdaundâ. Yigueduo ieguepybyry onwa tiampâdoem keankâ merâ pekodo xirâ nhekanâdyly. Niwânwâmpyra olâ, awylygue iweâlâ wonwa nhapâdyly. 8 Aunlolâ ise âdy pebaom modope awyly. Urâ olâ ise âdiempa kulâ agâmo wawyly — kely Jesus.
Lázaro xyâly kehomobyry
9 Agui kurâdo Jesus Betaniadâ kely indadylymo myani. Aituo myarâ idâlymo; Jesus ese kulelâba olâ idâlymo, Lázaro ese lâpylâ, mâkâ Jesus eon-honrugue kurâem itondyby. 10-11 Aituo, kurâdo eynynâ Deus agâ aguewâni modo iwymârydo âjigue aguelymo: — Lázaro kydyâen-honre lâpylâ warâ. Mâkâ kurâem itondyby tientuo, toenzepa kurâdo Jesus nheinwândylymo, kienomedâdomo neinwâmpyra idylymo. Âdara pylâka ise xyâhoem aguiendyly? — kelymo.
Jesus Jerusalémram saintobyry
12 Kopaelâgâem Jerusalémram Páscoa etygueze idâwâtyby modo, Jesus saindyly kely indadylymo. 13 Toenzepa myani iomarumo, saindyly tiuntuduomo. Wakuri sary nhatâwâdylymo; xidadâ odaypa egaselymo, tuomare kehoem Jesus iose. — Hosana Deusram! — kelymo. (“Tohoguezeim Deus” keze aguely.)Tohoguezeim kuru awâkâ Deus eon-honru enehonze âeni!Koendâ lelâ ise Deus israelita domodo iwymâryem ini agâ — kely kurâ domodo. 14 Aituo Jesus jumentinhu nhawâdyly. Nhonwa âkuly. Iwâgâ idâly. Deus itaumbyry iweniby agueho ara aidyly: 15 “Âmaemo Jerusalém donro modo tyanepa itaungâ. Etaungâ. Âwymârymo saindyly. Pymâ ton-honreim kawaru wâgâ sainto ara inkâba ise âewyly;jumentinhu wâgâ ise saindyly!”kely myakâwândy iweniby. 16 Jesus agâ tatay tâense, tydase warâ ani xina awârâ modo aidyly; âdakeze aguely awyly xina nutuba olâ. Igueypyem, Jesus kurâem itombygueduo, Deus eydâ atoam odopâduo warâ lelâlâ ani xina nhenanâguely, aise Deus kehobyry ara aituo. 17-18 Toenzepa kurâdo Jesus iose idâwâdylymo, xidadâ odaxi sainse idâly ume. Awârâ iraynâ, Lázaro igueypyem awyly ume kurâem nietondâ kely idamâmomy. “Lázaro, awâtârâba igasegâ” keduo aitobyry egatuly nimopamo myani enipyry modo. 19 Jesus wâgâ koendâ kurâ domodo aguely tindatuo, fariseu domodo âjigue aguelymo: — “Jesus kâzeinwântaundâ” kykely neinwântaymbamo. Etaungâ! Idânârâ eagâ idâlymo — kelymo.
Gregu domodo ewy Jesus agâ agueze idâhomobyry
20 Gregu ewy idâypybe myakâwâm Jerusalémram âty aiese idâwâtyby modo duay. Judeu kebamo wâne, alâ olâ Deus nhyrendylymo. 21 Yataen-ho Filipe, Galiléia eynynonro, Betsaidadâ tâtyreim iose myakâwâm idâlymo. Aituo aguelymo Filiperam: — Jesus agâ adâkedyze xina — kelymo. 22 Aituo myani Filipe, Andréram aguely. — Gregüem aguewâni modo ewy Jesus agâ adâkedyze — kely. Aituo azakâlâ Jesus agâ agueze idâlymo, Filipe, André alelâ. — Judeu keba modo ewy agâ adâkedyze — kelymo. 23 Jesus aguely: — Âdainkâba, tâwâlâ nâedâmo. Iwaguepa, won-honru, koendâ wawyly warâ idânârâ kurâdo nheto. 24 Idataungâ auguely. Nady ewy tâtâzeba watay, agui nitaymba, tokalâ kulâ. Ondaxi etâduo olâ, tyazeze, ago tâise, tâwiseze, ewyem tâise warâ. Arâ ewy agui idyly — kely. {“Yiguely, kurâem witondyly wipygueduo, toenzepa kurâ domodo yeinwânsemo” keze myakâwâm Jesus arâ aguely. } 25 Aituo Jesus aguely: — “Ize wato aralâ ise awidyly. Tâwâlâ Deus nidâ” myguelymo-ro watay, âigueduomo, Deus agâ inkâba ise âmaemo. Eydâ atoam mydâwâpyra ise âmaemo. “Deus ize ato ara lelâ ise awidyly, ize wato ara kulâba, tâwâlâ ise kâsenagazedyly, yiguely warâ” myguelymo watay olâ, Deus eydâ atoam idâze âmaemo, aunloenlâ. 26 Tywymâryem yizetonro modo, yeinwântaungâ. Auguely idataungâ warâ. Eydâ watodâ lâpylâ ise âmaemo. Pabai Deus koendâ ise yeinwânni modo wâgâ aguely — kely.
Jesus tyiguely wâgâ aguehobyry
27 Aituo Jesus aguely: — Takalague urâ iwerâ. Inepa kâzenagazeoly awyly, tutuze urâ. “Kâsenagazedo amaymba yekâ” keze urâ Pabairam? Arâ auguepa ise aze! Xirâ onro anaxi igueze âetybylâ urâ. 28 “Koendonro typygueim keba warâ on-honru enehongâ” keze olâ urâ Pabairam — kely. Aituo kaynâ tâjitanru aguely: — Koendonro typygueim keba warâ won-honru senen-ho. Kâenehondyly ise-ro warâ — kely. 29 Atonlo modo tâjitanru kau odaypa âeni indadyly. Aituo akaemo modo ewy aguely: — Kopâ awârâ agueim! — kelymo. Eagonro modo warâ agueim: — Kopâ keba agueim. Anju eagâ agueim — kelymo. 30 Warâ olâ Jesus aguely: — Kopâ keba, anju keba warâ agueim. Urâem inkâba Pabai târâ kaynâ aguely âmaemoenlâ. 31 Inepa kehoem Deus agueze xirâ onro anaym yeinwântânry modoram: “Âmaemo tâwentâzeim inakanhe amidylymogue” kely ise. Inepa ise Deus, Diabu pymâem ato xirâ anaym nhainly. Adiendyse tato anientaymba ise Diabu. 32 Kruz wâgâ sakâjibyem kadaunâhonduo, eon-honru sainze urâ. Idânârâ ynynonro modo igâseze urâ, yeinwântomoem — kely Jesus. 33 Adâkezelâ ani Jesus tyiguely iraynâ, âdara tyiguely awyly wâgâ. 34 Atonlobyry modo aguelymo: — Niguewâpyra ise Messias, tâkezema kâzewenry iweniby wâgâ. Aunloenlâ ise awâkâ Deus Ingonotyby, tâkeze warâ. “Urâ Uguondo Kaynâpa Âetyby yiguehoem kruz onwa âiehoze urâ” mygueaki olâ. Messiaslâ âmâ-ro watay, âdaituo pylâka “Igueze urâ” myguely? — kelymo. 35 Aituo Jesus in-hoguly: — Kydadakobâdo tâense wâne kydaze peto oday, myara ise Deus ize ato ara adâjidyly inomedâdomobyry mâuntulymo. Yeinwântaungâ, yeinwântomo nhuduly umelâ. Âdiempa kulâ ise agâmo wawyly. Yeinwântaungâ, iamu odaxi âsenagazeze mydâpa mitomoem. Iamu oday adakobâni modo wâne âdyam tâtâly nepyra, myara ise awâkâ yeinwântânry modo tâsenagazedoam tâtâly nutubamo awyly. 36 Agâmo wataylâ, auguely einwântaungâ. Arâ ise peto oday adakobâni ara mawylymo — kely.
Toenzepa judeu domodo ewy Jesus neinwâmpyra atobyry
Agueypyem Jesus târâpa âxiguely, kurâdo tâempyra itoem. 37 Jesus aidyly tâensemo lelâlâ wâne myakâwâm, arâlâ olâ agui judeu domodo neinwâmpyra awylymo. 38 Saguhoem Deus wâgâ agueypy Isaías aguehobyry ara kehoem aidyly:“Deus, agui kurâdoram xina âtaumbyry negatu, aguipa kulâ olâ keankâ xina aguehobyry einwânni. Tâensemo lelâlâ wâne toenzepa on-honrugue amânhetyby, aguipa kulâ olâ âinwânni modo”kely iweniwâm Isaías. 39 Deus izepa tawylymogue neinwâmpyra awylymo. Saguhoem Isaías inwenihobyry ara iwerâ aidyly: 40 “Deuslâ mawânkâ tienkyly modo nutuba itomoem aienehonrim, nhangahumo nhuanwanâdyly waunlo ara. Warâ neinwâmpyra awylymo, Deus ton-honru tânehonzelâ wâne, Tytaumbyry nhegatuen-hoymby nidadâmolâ wâne warâ. Tâinwânsemo wâne watay, tâsemaguezemo tâise”kely Isaías. 41 Deus, Jesus wâgâ aitaynrim modo nhenehonduo, mâkâ arâ inwenily. Awylygue arâ Jesus wâgâ inwenily. 42 Agui myani judeu iwymârydo Jesus einwânni modo, ânguyram negatubamo olâ myakâwâm. Fariseu domodo tâdâtâdyguyhoam tâkaunâbyra awyly nhytaguylymo. 43 Kurâ domodo kulâ tohoguedyze atomo, Deus keba tohogueniem ize atomo.
Jesus kâmakeze âetobyry
44 Ton-honre kehoem Jesus aguely: — Urâ kulelâ inkâba yeinwânni modo nheinwânkyly, mâkâ ugononibyry lâpylâ warâ. 45 Utuwâni modo ugononibyry tutuzemo lâpylâ. 46 Urâ iajimanâni emyenro xirâ onro anaxi kâewyly, yeinwânni modo Deus itaumbyry nhutuhomoem. Kâewyly ani, yeinwânni modo iamu odaypa iese. 47 Ânguy ewentâze inkâba xirâ onro anaxi kâewyly. Xirâ onro anano modo emakeze kâewyly, enagazezemo inkâba. 48 Augueho tindadyseba neinwâmpyra waunlo olâ xypyry etay, tâdâsenagazedoam igonose Deus. 49 — Unâry wâgâ kulâ inkâba awidyly. Pabailâ ugononi, awitoem, auguehoem warâ. 50 Deus aguehobyry ara lelâ amidylymo-ro watay, eagâpa mitaymba ise âmaemo. Âigueduomo, idâze âmaemo aunloenlâ eagâ mitomoem. Tutuze urâ, xirâ âkealâ awyly; Pabai “Aguekâ” kehobyrylâ xirâ augueho — kely Jesus.
Jesus, tynynonro modo in-hugoguehobyry
1 Tokalâ iguandyly kulelâ, Páscoa etyry adaguhoem. Tutuze myani Jesus tyigueho saindyly awyly, xirâ onro anaymba tâito, tunwynram todopâdo. Toenzepa xina inwynedyly tânehonze kâinane, tyigueho odaxi kehoem. 2 Kopae Jesus agâ xina âwinduadyly ani. Awârâ iraynâ, Diabu, Judas Queriote donro, Simão imery, nhangahu odaji xunâry nhedyly, Jesus tyândyse donro modoram nhegamehoem. 3 Idânârâ adienkyly modo adientoem Tunwym ton-honru tuduze awyly, tutuze akâwâm Jesus. Deusdâpa tâewyly, eyam todopâdyly warâ, tutuze myani. 4 Xina âwinduadyly umelâ Jesus saudyly. Tâty BOH waunlo nhetyly. Ilâpygueduo toalha nhanâdyly, âzepagâjily. 5 Adâipygueduo, paru bacia odaji XU nhedyly. Tokalâ, tokalâ warâ xina ihuru ingokely. Ilâpygueduo, toalhague xina in-hugoguewâdyly. 6 Simão Pedroam saintuo, mâkâ tuhuru igokedyzeba, âdykâ pymâ ânguy ihuru ingokely nepyra tawylygue. Aituo Jesusram aguely: — Urâem tâwaneim mâkeba âmâ, Pymâ. Awylygue uhuru mâingokedyzeba wawyly — kely. 7 Aituo Jesus eyam aguely: — Iwerâ mâuntuba wâne âmâ âdaituo arâ awidyly awyly. Xutuze olâ âmâ — kely. 8 — Uhuru mâingokewâbyra ise âmâ — kely Pedro. Aituo Jesus eyam aguely: — Âhuru kâingokeba urâ-ro watay, ynynonro mâkeba ise âmâ — kely. 9 Jesus agueduo, Pedro aguely: — Pymâ, arâ atayma, uhuru lelâba igokegâ-ro, iemary, yangahu alelâ-ro! — kely. 10 Aituo Jesus aguely: — Kipygueduo, idânârâ kodo tywykuneba, kuhuru lelâ tugokezeim, itybyem kaimpygueduo. Deus inakanhe matomobyry nhygakeduo, iweâ kulâ ityby ara âmaemo. Idânârâ tywykuneba wâne âmaemo; tokalâ olâ tywykeim Deus xurâem — kely Jesus. 11 Tutuze myakâwâm Jesus, ânguy tuduery emaxi tyâhoem tâgamenri awyly. Awylygue “Idânârâ tywykuneba wâne âmaemo; tokalelâ olâ tywykeim” kely, Judas agueho. 12 Xina ihuru ingokebygueduo, Jesus tâty BOH waunlo nhetondyly. Mesa onwa ekadondyly. Xinaram aguely: — Âdaituo âhugoguelymo mâuntuba mawylymo. 13 “Xina iwymâry”, tâkeze, “xina enomedâni” tâkeze warâ âmaemo yam. Âkealâ amyguelymo. 14 Âwymârymo lelâlâ urâ, inomedânimo lelâlâ warâ, âhurumo olâ xigokeagui, tagonro emawyadâni wâne myara. Agonromo ihugoguewâdaungâ lâpylâ, âsemawyadâni mawylymo mâenehon-homoem. 15 Aetomobyry ara amitomoem, âsemawyadâdaungâ, imawyadâdomobyry ara. 16 Idataungâ auguely. Tâzemary, tywymâry takaze kehoem tynrentuneba; unâ sani, igononibyry takaze kehoem tynrentuneba. 17 Âmaemoma midataimo auguely. Awidyly metaimo warâ. Âjigue mâsemawyadâduomo, koendâ kehoem ise Deus agâmo. 18 — Âmaemo kâinduakeyby modo âutudâmo urâ. Tutuze urâ, tokalâ âmaemo ewy agâ Deus koendâpa awyly. Deus itaumbyry iweniby ara ise aidyly: “Uduery ise yagâ âwinduani” kely iweniby. 19 Agâieholy wâgâ xirâ auguely, yizepanro modo emaxi kâzegameoly iraynâ, “Aise” uguehobyry aidyly-ro watay, URÂLÂ URÂ kelygue tâzekeim wawyly mâinwântomoem. 20 Kâingonotaymby modo koendâ edaenkunri, urâlâ nhedaenkuly waunlo ara lelâ. Koendâ iedaenkunri, mâkâ ugononibyrylâ koendâ nhedaenkuly. Xirâ mâuntudyzemo kuru wato — kely.
Tâgamenri wâgâ Jesus aguehobyry
21 Agueypyem, toenzepa kehoem Jesus adahulily. Xinaram aguely: — Idataungâ wao. Tokalâ âmaemo ewy ise yâdysedo modo emaxi iegamerim — kely. 22 Aituo xina âzedyly. Toenzepa xina âseguâdâdyly, ânguy agueho xina nutuba tawylygue. 23 Urâ Jesus toenzepa inwyneguyly iwaguepa ani iopay ekadybyem wawyly. 24 Simão Pedro PUK PUK idyly, ânguy wâgâ Jesus aguely awyly auguehoem. 25 Aituo ago Jesus iopaji udâly, kampâiguehoem: — Pymâ, ânguyka ise âdysedonro modo emaxi igameim? — uguely. 26 Jesus in-hoguly: — Mâkâ pão ikuiby kâunduhobyry — kely. Aituo pão SAGAI ietyby nhanâdyly, inkuily prato odanogue, Judasram nhuduly, Simão Queriote donro imeryram. 27 Judas pão nhemakely. Ilâenlâ Satanás emaxi idyly, Satanás “Aiekâ” kehobyry anhetoem. Aituo Jesus eyam aguely: — Amânhedyse mato inepa aiekâ — kely. 28 Xina mesa wogonro modo nutuwâbyra akâwâm âdaituo Jesus arâ aguely awyly. 29 Judas dinheru etary eni awylygue ani xina ewy tyangahu oday aguely:Tâlâ pylâ wakeim modo: — Jesus gâlâ keanra Judas pyni nhanâdyse âtyem warâ? — keim. Eagonro modo aguely: — Âdy pebaom modoram âdylâ nhuduen-honly lâgâlâ keanra Jesus — warâ kely. 30 Pão emakeimbyryem, inepa kehoem Judas idâly. Iamu odaylâ egasely, kopae awylygue.
Koendâ lelâ âjigue itaungâ, âpynedaungâ warâ
31 Judas âxiguebygueduo Jesus xinaram aguely: — Iwaguepa urâ Uguondo Kaynâpa Âetyby yigueho. Yigueday ise won-honru, koendâ wawyly, Deus koendâ awyly, eon-honru warâ kâenehonly. 32 Deus koendâ awyly, eon-honru warâ enehonze urâ. Alâpylâ awâkâ, koendâ wawyly, won-honru warâ enehonze. Inepa ise awârâ aidyly. 33 Tâjiunwym tymery inwynedo ara lâpylâ âwynedylymo. Âdiempa kulâ ise agâmo wawyly. Udâpygueduo, uize âmaemo. Judeu domodo iwymârydoam uguemy myara olâ âyanmo auguely: “Udâhobyryam mydâpa olâ ise âmaemo.” 34 Iwelo tâzezewenry ise xirâ: “Mâkâ agâ, mâkâ agâ warâ âpynedaungâ, âwynedylymo ara.” 35 Mâpynedylymo-ro watay, idânârâ kurâdo xutuze ynynonro mawylymo — kely.
Jesus Pedroram, “Azagâ tokalâ warâ ‘Kâuntuwâbyra urâ awâkâ’ keze âmâ”
kehobyry 36 Aituo ani Simão Pedro Jesus nhapâiguely: — Âdyanka ise mydâly, Pymâ? — kely. Aituo Jesus in-hoguly: — Iwerâma ise âmâ udâhobyryam mydâpa. Iweâkuba ise mydâly — kely. 37 Pedro nhapâigueondyly: — Âdaituoka iwerâ mydâhoram, udâpa wawyly? Kâmayno amaymba imakeze iguein-em kâdutuly! — kely. 38 Aituo Jesus eyam aguely: — Âkeaka? Xirâ enanâguegâ. Xirâ kopae, aukuma igâtudyly iraynâ, azagâ tokalâ warâ ise “Jesus kâuntuwâbyra urâ” myguely — kely.
Jesus ânwa Kunwyn-am tâdâtâho
1 Aituo Jesus xinaram aguely: — Tytyremba, tâseguâdâzeba warâ itaungâ. Deus einwântaungâ, yeinwântaungâ lâpylâ warâ. 2 Pabai eydâ atodâ toenzepa âtâ modo mâxidâdomoem. Ijidymo nhonse udâly. Aypa-ro watay, auguewâpyra tâise urâ. 3 Ijidymo nhonse idâypyem, odopâze urâ, nhesemo, yagâ eydâ watoam mydâhomoem. 4 Tutuze âmaemo ânwa eydâ watoam kani — kely. 5 Aituo Tomé aguely: — Xina nutuwâbyra âdyam mydâly awyly, Pymâ. Tutuzeinhe inkâba awârâ ânwa âyam tâdâtâho — kely. 6 Aituo Jesus aguely: — Ânwa Pabairam tâdâtâholâ urâ. Yagâ lelâ âdy iozeno awyly âdutuoly. Ywâgâ lelâ Deus eydâ atoam tadaindyly. Yeinwânni modo lelâ ise Pabairam idâim. Yeinwâmpyra âmaemo-ro watay, Pabairam aintaymba âmaemo. Yeinwântuomo lelâ eyam aindylymo. 7 Iwerâ utudâ âmaemo. Pabai xutuze lâpylâ âmaemo. Ietâ, utudâ warâ mawylymogue, Pabailâ mâuntulymo, mâenkylymo warâ — kely. 8 Aituo Filipe aguely Jesusram: — Pymâ, Kunwym Deus enehongâ. Awârâ kulâ xina nhekaguyly, tuomazehoem — kely. 9 Aituo Jesus aguely: — Filipe, iweâpa lelâlâ wâne agâmo wawyly. Ânguy wawyly mâuntuba lelâ waunlo ara olâ âmâ! Ieni modo, Pabai tâensemo lâpylâ. Awylygue ietâ kulâ, “Pabai mygueho enehongâ” tâkezeba ikâ. 10 Pabai agâ tokalâ wawyly; yagâ tokalâ Pabai awyly warâ tâinwânse wânkâ âmâ, Filipe? — kely. Aituo Jesus xinaram aguely: — Yangahu odano kulâ mâkeba xirâ augueho, Pabai “Aguekâ” kehobyrylâ. “Aiekâ” kehobyrylâ agânhekyly warâ. 11 Auguely einwântaungâ. Einwântaungâ Pabai agâ tokalelâ wawyly. Auguely wâgâ yeinwândyseba mataymo, Pabai Deus eon-honrugue agânhetaymby modo mâentybymo wâgâlâ yeinwântaungâ. 12 Idataungâ auguely. Idânârâ yeinwânni modo agânhetaymby modo aiese. Yara adyesenry modo anhetoem agueypyem urâ, adyesenry ton-honreim lelâlâ. Inepa ise Pabairam udâly. Urâ lelâlâ agânheto nuduompyrama ise. 13 Agânhetoem mâenkadybymo aiese urâ, iezedy wâgâ idânârâ kehoem agânhetoem amyguehomobyry. Pabai ton-honreim, koendonro warâ awyly kâenehohoem ise awidyly. 14 Idânârâ iezedy wâgâ mâenkadybymo aiese urâ — kely Jesus.
“Deus Ispiritury igonose urâ” Jesus kehobyry
15 Aituo Jesus aguely: — Ywynedâ mataymo, auguehobyry lelâ aietaungâ. 16 Pabairam ekaze urâ, âurunimo ingonotoem. Odokewâbyramo ise; alâ ise agâmo awyly. Deus Ispiriturylâ ise mâkâ. Mâkâ ise Deus wâgâ âkealâ kuru agueim. 17 Deus eynynâbaom modo agâ inkâba Deus Ispiritury. Nutuwâbyramo netaymbamo warâ ise. Âmaemo olâ xutuze. Alâ mawânkâ agâmo awyly. 18 — Âxigueze wâne urâ, omopamo olâ ise urâ. Agâmo witoem odopâze urâ. 19 Inepa ise Deus eynynâbaom modo iepyra idylymo. Âmaemo olâ iese. Igueypyem kurâem witondobyry wâgâ ise Deus agâpa mâseagongueba mawylymo; igueypyem, yagâlâ ise âmaemo. 20 Kurâem witonduo ise mâuntulymo, Pabai agâpa wipyra wawyly. Yagâpa mipyra mawylymo, agâpamo wipyra wawyly warâ mâuntulymo. 21 — Yeinwânni modo, auguehobyry idani modo warâ ywynedâ tawyly tânehonzemo. Ywyneni tywyneze Pabai. Iwynezemo lâpylâ urâ, koendâ utuhomoem aiese urâ — kely. 22 Aituo Judas, Jesus nhapâiguely, Queriote donro keba olâ, eagonro: — Âdaituoka ise xinaram kulelâ mâenehonly; Deus eynynâbaom modo pylâ nepyramo-ro warâ awyly? — kely. 23 Aituo Jesus in-hoguly: — Ywyneni modo auguehobyry lelâ ise anhekylymo; Pabai iwynezemo lâpylâ. Eagâmolâ ise xina-ro warâ. 24 Ywynedânry modo auguehobyry takazemo lelâ. Urâ kulâ mâkeba xirâ mâindakylymo agueim, Pabai aguehobyryenlâ xirâ auguely. 25 — Agâmo wawyly umelâ xirâ auguely. 26 Âxigueze urâ. Âurunimo âyanmo âese olâ. Deus Ispiritury ise mâkâ, Deus ingonotyby ietaybyaji agâmo itoem. Idânârâ âyanmo auguehobyry enanâgueze, inomedâzemo warâ auguehobyry modo mâuntuhomoem. 27 — Yara madahuliba âesemo. Xirâ onro anano modo toenzepa ise adahulilymo, eanumo warâ. Âmaemo olâ tadahulizeba itaungâ, tyanepa warâ. 28 “Idâze wâne urâ, odopâze olâ urâ” uguely midataimolâ. Toenzepa awârâ mâindatuomo madahulilymo. Tadahulizeba itaungâ. Urâem koendâ lelâ aidyse mataymo, tâjityenzeba itaungâ; tuomare itaungâ, Pabai ugononibyryam kodopâdyly awylygue. Yakadâ ton-honreim kuru mâkâ lelâ, unâ sodo ton-honreim kuru, egatuim takaze. 29 Pabairam udâly iraynâ xirâ auguely âyanmo. Udâduo ise, auguehobyry âkealâ awyly mâinwândylymo. 30 Agâmo alâ auguezesedyly witaymba ise urâ. Deus eynynâbaom modo iwymâry Diabu saindyly mawânkâ. Ton-honreba olâ ise mâkâ yagâ. 31 Idânârâ, Pabai “Aiekâ” kehobyry lelâ agânhekyly, Pabai tywyneze lelâlâ wawyly, eynynâbaom modo nheinwântomoem. — Autaungâ. Inoro tarâpa — kely ani Jesus.
Uva ipery emyenro awâkâ Jesus
1 Jesus xinaram aguely: — Uva ipery emyenro urâ. Pabai pylâ uva eni emyenro-ro warâ. Se tywindyen-ro watay, iwatary modo niguewâpyra, arâ lâpylâ urâ, ynynonro modo niguepa itoem aienehonrim wawyly. 2 Deus aguehobyry adiendysebaom modoma uva iwatary ewisedânry emyenro. Uva iwatary ewisedânry eni tatâwâze myara, ise Pabai tydatânry modo tygue nhedyly. Uva iwatary ewisenri watayma eni tâense, tuonse warâ. Inakai modo lelâ nhatâwâguyly, iwatary toenzepa ewiseondoem. Arâ lâpylâ Pabai, tynynonro modo odaypa izepa tato nhetyly, ize tato lelâ anhetomoem. 3 Pabai inakanhe amitomo nhygakely ani, inomedâdomobyry mâinwântomobyry wâgâ. 4 Yeinwânsezedaungâ lelâ, yagâpa mâiehowâbyra ise âmaemo; agâpamo wipyra ise urâ warâ. Uva iwatary wâne ipery wâgâ atay lelâ ewisely myara lâpylâ âmaemo, yeinwântuomo lelâ Deus ize ato ara amidylymo. 5 — Uva ipery emyenro urâ, uva iwatary emyenro âmaemo-ro warâ. Ipery wâgâ wâne uva iwatary koendâ kehoem PE warâ awyly, myara ise yagâpa itânry modo koendâ lelâ Deus ize ato ara aidyly. Urâ peba kulâ, mâkâ ize ato ara amipyra âmaemo. 6 Uva sodo iwatary satârimbyryem, âpa ezaypa nhamely. Aituo iwatary modo iladyly. Ilâpygueduo, indâtyguyly, nhaduândyly. Awyara ise, yagâpanro modo Deus iopayba iedyly. Petomâ onwanxi ise samely, mârâ uva iwatary ewisedânry iaduânto ara. 7 — Yagâpa mipyra âmaemo, âyanmo auguehobyry mâinwânsezedylymo lelâ watay, emakeze lelâ âmaemo idânârâ Pabairam mâenkadybymo. 8 Koendonro amânhedysemo wato amânhedylymo watay, uva iwatary tâwiseim emyenro ise âmaemo. Deus koendâ awyly, eon-honru warâ enehonze âmaemo amânhekylymo wâgâ. Arâ ise ynynonro kuru mawylymo mâenehonlymo. 9 Pabai ywynedyly ara lâpylâ âwynedylymo. Auguehobyry ara lelâ aitaungâ, âwynedâmo wawylygue. 10 Pabai agânhedyse ato agânhepyra witaymba urâ. Awylygue kadahuliba wawyly, ywynedâ awyly tutuze urâ. Arâ lâpylâ, “Aietaungâ” ugueho mâinmopa âmaemo-ro watay, madahuliwâbyra ise âmaemo, âwynedâmo wawyly enanâgueze âmaemo. 11 — Madahulidyzemo inkâba urâ, awylygue âurudylymo, tuomare lelâ mitomoem. 12 Xirâ auguehobyry ara aitaungâ: “Agonromo agâ âpynedaungâ; koendâ mâzetomo ara lâpylâ agonromo agâ koendâ âzetaungâ.” 13 Mâkâ tataen-ho emakeze iguerim mawânkâ tataen-ho iwyneni kuru. 14 Auguehobyry amânhedylymo watay, yataen-ho âmaemo. 15 “Yataen-ho” uguely âyanmo; “iemary” uguely mâkeba. Awylygue agâmo unâgu ywâgâ aini wâgâ. Pymâ tywâgâ aguewâpyra tâmarydoam. Âyanmo olâ auguely, idânârâ Pabai “Aguekâne” kehobyry. 16 — Âmaemo mâkeba keankâ atâen-homoem witoem uduakeim; urâlâ keankâ âduakenrimo, Deus ize ato amânhetomoem, yeinwândyly mâinmopa mitomoem. Arâ ise uva iwatary tâwiseim ara mawylymo, ewily inakanhe itânry. Ywâgâ mâenkadylymo-ro watay, idânârâ mâenkadybymo xuduze lelâ Pabai. 17 Awylygue, xirâ auguely: “Agonromo agâ âpynedaungâ; koendâ mâzetomo ara lâpylâ agonromo agâ koendâ âzetaungâ.”
Jesus nheinwândylymogue eynynonro modo âzenagazeoze
18 Jesus xinaram aguely: — Ynynâbaom modo âizepamo watay, enanâguewâdaungâ, âizepamo idyly iraynâ yizepa atomobyry. 19 Deus eynynâbaom modo eynynâlâ âmaemo-ro watayma tâise âwynedylymo. Saguhoem Deus eynynâba wâne ani âmaemo, alâ olâ âduakelymo urâ xurâem mitomoem. Awylygue iwerâ Deus eynynâbaom modo anhekyly amânhedyseba mawylymo. Awylygue âizepamo awylymo, inagazedylymo warâ. 20 — Auguehobyry enanâguewâdaungâ. Tâzemary, tywymâry takaze kehoem tynrentuneba. Pymâ eto ara lâpylâ ise emary modo âzeholy. Ienagazeni modo inagazezemo lâpylâ. Kâunrutomobyry anhedylymo-ro watay, mâunrutomo aiesemo lâpylâ. 21 Mâzenagazeolymo ise, ynynonroem mawylymogue. Mâkâ ugononibyry nutubamo mawânkâ. 22 Xirâ onro anaxi kâewyly, Deus wâgâ agueze. Tindatuo, neinwântaymbamo ani. Kâepyra urâ, eyanmo auguepa warâ watay, tâwâlâ tâise aguelymo: “Âdykâ Deus itaumbyry xina nidataymba. Tânagazeduneba xina, tindatânry kulâ neinwâmpyra tawylygue” kelymo tâise. Auguely tydase, agânhekyly tâense warâ akaemo, yeinwâmpyramo olâ; xypyry etay Deus enagazezemo. 23 — Yizepanro modo, Pabailâ izepa atomo lâpylâ. 24 Enanaynmolâ adyesenry modo kehoem agânhedyly. Idânârâ olâ yeinwâmpyramo. Xirâ adyesenry modo agânhepyra urâ-ro watay, “Tâwentâguezeinhe mawylymo” aguewâpyra tâise Deus. Akaemo iwerâ tâwentâguezeim, agânhetyby tâensemolâ mawânkâ, yeinwâmpyramo olâ. Yize inkâba akaemo, Pabai izepamo lâpylâ warâ. 25 “Warâ ise aidyly” tâkezelâ Deus. Iwenibyem itaumbyry awo wâgâ: “Âdaituoba kulâ yizepa awylymo” kely iwenibybe. 26 — Âurunimo âese, Deus Ispiritury keho, Deus eydâpalâ âeni. Deus wâgâ âkealonro ise inomedâdomo. Pabaidâpalâ ise âyanmo kâingonodyly, ywâgâ agueze lâpylâ mâkâ. 27 Xirâ onro anaym iewanu kanguly umelâ yagâ mawylymo. Awylygue ise ywâgâ mâindatybymo, mâentybymo warâ mâengatulymo — kely Jesus.
1 Jesus xinaram aguely: — “Ynynonro modo, ynynâbaom modoram âzenagazeoze” tâkeze urâ. Aidyly-ro watay, âtywambyramo, yeinwândyly mâinmopamo warâ mitomoem olâ auguely. 2 Âtâ tâdâtâdyguyho odaypa igaseânzemo, akaemo âhomo sainse. Âlymo-ro watay, Deus ize ato aralâ adâidyly waunlo ara ise enanajimo. Iozepa kulâ olâ arâ âpaunzedylymo. 3 Arâ aidylymo olâ ise, utuba, Pabai nutuba warâ tawylymogue. 4 Aidyly iraylâ olâ xirâ âyanmo auguely, mâzenagazeoduomo, madapâendyba mitomoem. “Kyam Jesus aguehobyrylâ xirâ aini” keze âmaemo — kely.
Deus Ispiritury ewano
Jesus aguely: — Yeinwâmpygueduomo, âdara mâzenagazeolymo awyly wâgâ auguepa ani urâ, agâmolâ wawylygue. 5 Inepa olâ ise udâly, mâkâ ugononibyryam. Âmaemo ewy olâ yapâigueba: “Âdyanka ise mydâly?” myguepamo. 6 Toenzepa âtynrumo, “Âydâpamo widyly” uguely mâindatuomo. Tâseguâdâzeba itaungâ. 7 — Idataungâ auguely. Udâly lakuru âmaemoem koendonro. Udâpa urâ-ro watay, Âurunimo nâetaymba ise. Udâduo olâ, âyanmo igonose urâ. 8 Deus Ispiritury âetuo, agueze mâkâ ynynâbaom modoram: “Wamyguelymo: ‘Tutuze xina, Deus ize ato, izepa ato warâ. Tutuze xina, koendonro, koendonro keba warâ. Tutuze xina, Deus ânguy nigonopyra awyly tâdâsenagazedoam âsenagazedoem’ myguelymo. Iozepa olâ amyguelymo” kely ise eyanmo. 9 — “Tutuze xina, Deus ize ato, izepa ato warâ” kelymo. Iozepa kulâ aguelymo, yeinwâmpyramo mawânkâ. 10 “Koendonro, koendâpaom warâ tutuze xina” kelymo. Iozepa kulâ aguelymo. Pabairam idâze urâ; ietombyra ise âmaemo-ro warâ. Myarâ kodopâduo ise koendonro lelâ wawyly mâuntulymo. Ietombyra ise âmaemo-ro warâ. 11 “Tutuze xina, Deus ânguy nigonopyra awyly tâdâsenagazedoam âsenagazedoem” kelymo. Iozepa kulâ aguelymo lâpylâ. Saguhoenlâ Deuslâ agueim: “Urâ xurâ keba modo iwymâry aunlolâ ise infernudâ âsenagazedyly” keim. “Ynynâbaom modo lâpylâ aunlolâ infernudâ Deus enagazenehonze” keim lâpylâ. 12 — Tâlâ urâ toenzepa âyanmo augueho, mâuntuhomoem nudupa olâ, toenzepa mawânrâ iwerâ âtynrumo. 13 Deus Ispiritury âetuo olâ, âyanmo xutuen-honze, idânârâ âkealonro Deus mâuntudyzemo ato. Âdy aini awyly wâgâ ise mâkâ aguely. Tyangahu odano kulâ mâkeba ise mâkâ agueho. Mâkâ agueho olâ ise Kunwym Deus tyam aguehobyrylâ. 14 Auguehobyry, âyanmo enanâguehonze mâkâ. Arâ ise mâkâ, koendâ wawyly, won-honru warâ nhutuen-honly. 15 Idânârâ augueho modo, Pabai aguehobyrylâ. Deus Ispiritury auguely idase, âyanmo egatuze-ro warâ — kely.
Tâjitynru, tojiomaru warâ
16 Jesus xinaram aguely: — Iweâ lelâlâ ise iepyra midylymo. Inepa olâ ise, ietondylymo — kely. 17 Xina âjigue aguely: — Âdakeze aguely awyly kiuntuwâbyra kurâ, “Iweâ lelâlâ ise iepyra midylymo. Inepa olâ ise ietondylymo” keduo. Wakeanry lâpylâ: “Iepyra mawylymo ise, Pabairam udâly awylygue” keanry. 18 Âdakezeka “Inepa olâ ise, ietondylymo” kely? Kiuntuwâbyra kurâ awârâ — xina kely. 19 Agueho koendâ xina nutuba awyly, tutuzelâ olâ Jesus. Awylygue aguely: — Idataungâ auguely. Adâkeonze urâ warâ. “Iweâ lelâlâ iepyra ise âmaemo. Inepa olâ ise ietondylymo.” Xirâ kebaka agonromo agâ madapâiguehomo? 20 Toenzepa âjityenze, eogumase warâ âmaemo. Ynynâbaom modo iomamunumo ume, tytynre ise âmaemo; omarumoem ise olâ awârâ. 21 Tymery egaseday, pekodo tuomaruneba ewânugue. Iamudo iazepygueduo olâ toenzepa tuomazeze, tymegue mawânkâ. 22 Arâ ise âtynrumo aunloenlâ nipyra awyly. Tytynre âmaemo iwerâ, “Iweâ lelâlâ ise iepyra midylymo” ugueduo, nhetonzemo olâ urâ. Aituo ise toenzepa omarumo. Ânguy tuomareba âenehonwâbyramo ise. 23 — Âurunimo âetuo, inomedâzemo mâkâ. Agâmopa lelâlâ wâne ise urâ, mâkâ olâ ise agâmolâ. Tâwâlâ mapâiguelymo mâuntudânrymo wâgâ. Idataungâ auguely. Iezedy wâgâ Pabai uguehoam mâenkadylymo-ro watay, xuduze mâkâ âyanmo. 24 “Jesus ezedy wâgâ xina nhekadyly” myguepa lelâ olâ âmaemo Deus agâ. Ekadaungâ. Mâenkadybymo emakeze âmaemo, toenzepa omaromoem. Xirâ mâuntudyzemo kuru wato — kely.
Jesus eon-honru, Diabu eon-honru takazeno kuru
25 Jesus aguely: — Tutuzenryem xirâ unâ kâengatuly, âdaunlo Deus awyly wâgâ inomedâdomoem. Tutuzeinhelâ inomedâdomo sainse olâ. Mâindakylymoenlâ mawânrâ ise âyanmo Pabai wâgâ auguely. 26 Mârâ ume, Deus agâ amyguedaymo, “Xina xirâ nhekadyly Jesus ezedy wâgâ” keze âmaemo. Âmaemoem auguezesedyly witaymba ise urâ. Âmaemolâma ise eagâ agueim. 27 Pabai âwynedâmo awylygue, koendonro xuduze mâkâ âmaemoem. Ywynedylymogue, Deusdâpa kâewyly tâinwânse mawylymogue warâ âwynedylymo. 28 Xirâ anaxi kâetoem, Deus ingonotyby urâ. Inepa ise tarâpa widyly. Pabairam ise udâly — kely Jesus. 29 Aituo xina aguely: — Iweâma tutuzeinhelâ amyguely. Amyguedyse mato moempyra âmâ. 30 Idânârâ tutuze mawyly, tutuze xina. Xina apâiguely iraynâlâ, tutuze âmâ, xina adâkedyze ato. Awylygue Deuslâ ogononi awyly xina nhutuly — xina kely. 31 Jesus aguely: — Deus ingonotyby wawyly tâinwânse lelâlâ wâne âmaemo, arâlâ olâ koendâ yeinwâmpyra mawylymo. 32 Inepa ise wodokelymo. Adapâeguywâze âmaemo, itymoam, itymoam ise âmaemo. Urâ kulelâ ise yânlymo. Urâ kulelâba olâ ise urâ, Pabai yagâlâ awylygue. 33 Xirâ modo wâgâ auguely aidyly iraynâlâ, âtywambyra mitomoem. Yeinwântâ mawylymogue, koendâ lelâ itaungâ, tâseguâdâzeba. Xirâ anaym mawylymo ara ton-honre ise âmaemoem; âsenagazeze âmaemo. Tâegane olâ itaungâ. Won-honruma ynynâbaom modo iwymâry Diabu eon-honru takazeno kuru — kely Jesus.
Jesus Tunwym agâ aguehobyry
1 Aguenripyryem, Jesus kauram MYK idyly. Deus agâ aguely: — Pabai, amyguehobyry aralâ ise inepa yiguely. Âmery wawylygue, enehongâ koendonro wawyly, won-honru warâ. Arâ awidyly, koendonroem mawyly, on-honru warâ kâenehohoem lâpylâ. 2 Idânârâ iwymâryem witoem amyguewâm. Kâenkyly lelâ asaemo. Âmâlâ lâpylâ asaemo ynynonroem ienehonrimo. Awylygue ise ynynonro modo agâpa kânhenehomba wawyly; igueduomo, aunloenlâ agâ nidâmo. 3 Akaemo aunloenlâ agâ itaynrim modo, idânârâ koendâ kehoem âutudâmo, âmâ lelâ Deus tokaleom mawyly. Utudâ lâpylâ asaemo, Jesus Cristo mâingonotyby wawyly. Kagâpa tyetuneba ise asaemo; igueduomo, idâzemo aunloenlâ kagâ itomoem. 4 — Koendonro mawyly, on-honru warâ senen-ho, xirâ anaym wawyly ara. Âwanu aiese ugonotobyry sewanike warâ. 5 Pabai, târâ agâ wawyly ume, tâdyren-honze akâwândy urâ, onro peba awyly ume. Tâwâlâ kâdyren-hondonji, izay watay kâdyren-hon-hobyry ara. 6 — Pabai, ynynonroem mânhenehonwâdyby modoram ânguy mawyly senen-ho. Âmâ xurâ lâpylâ asaemo. Âmâlâ ynynonroem ienehoinmo. Amygueho tâinwânse asaemo. 7 Tutuze asaemo, idânârâ agânhetaymby modo, won-honru mâunduypyguelâ agânhetaynly awyly. 8 Unâ eyanmo kâengatuhoem amyguehobyry segatu. Auguehobyry neinwândâmo. Eydâ matodâlâ mâingonotybyenlâ kâewyly awyly, tutuze asaemo. 9 — Pabai, âyam kâenkadyly, koendâ asaemo mâentoem. Yeinwântânry modo mâentoem kâenkadaymba urâ. Ynynonro modo olâ koendâ egâ. Âynynonro lâpylâ mawânkâ asaemo. 10 Idânârâ ynynonro modo, âynynonro lâpylâ. Idânârâ âynynonro modo, ynynonro lâpylâ. Adâkeday, adientay warâ tânehonzemo, koendonro wawyly, ton-honre wawyly warâ. 11 — Inepa ise udâly eydâ matoam. Xirâ anaymba ise urâ; asaemo olâ ise tarâlâ, yeinwântânry modo duaymo ise-ro warâ. Pabai, koendonro lelâlâ âmâ; inakanhe amitaymba âmâ. Toenzepa ton-honreim lâpylâ âmâ, on-honrugue awitoem yam amygue. Asaemo ynynonro modo egâ on-honrugue, tokaleom ara lelâ itomoem, urâ, âmâ warâ tokaleoem kydawyly ara. 12 Ijipyay, xirâ anaym eagâmo watay, on-honrugue tâensemo keankâ urâ. Asaemo ewy tokalâ kulâ keankâ ynynâba ini. Âunâry awo wâgâ iweniby aralâ keankâ aidyly, aise kehobyry aralâ. 13 — Inepa ise eydâ matoam udâly. Tarâ xirâ anaym wawyly ara, ynynonro modo xurâem agâ auguely, nâjityembyra itomoem, tytyremba wato ara, imâem kehoem iomarumo nidâ. 14 Eyanmo kâengatuhoem amyguehobyry segatu. Tâinwânse asaemo. Ynynâbaom modo adiendyse ato, adiendyse inkâba asaemo, ynynâbaom modo anhekyly, agânhedyseba wato ara lâpylâ. Awylygue, ynynâbaom modo izepa idylymo. 15 — Pabai, ynynâbaom modo duaypa mâentyhomoem kâenkadaymba urâ. Diaburam nâdynanâoba itomoem xuahurumoem ikâ wao, uguely olâ. 16 Ynynâbaom modo adiendyse ato agânhedyse inkâba urâ, arâ lâpylâ asaemo adiendysebamo awyly. 17 Amyguehobyry ara lelâ anidâmo; idânârâ amygueho âkealâ mawânrâ. 18 Âynynâbaom modo duaxi ugonotobyry ara, arâ lâpylâ asaemo kâingonodyly ynynâbaom modo duaxi. 19 Âyam kâtuly, idânârâ agânhedyse mato agânhetoem, kâenmakehomoem. Arâ awidyly âmâ xurâem itomoem, ize mato anhetomoem warâ. 20 — Asaemo lelâba mâentoem kâenkadyly. Asaemo ywâgâ aguely tindatuo yeinwânni modo olâ egâ lâpylâ. 21 Pabai, kâenkadyly, idânârâ yeinwânni modo tokaleom ara lelâ itomoem. Tokaleom ara kagâ itomoem kâenkadyly, yagâ mawyly ara, agâ wawyly ara warâ nidâmo. Tokaleoem nidâmo, yeinwântânry modo âmâlâ ugononi awyly nhutuhomoem. 22 Ton-honre witoem, koendonroem witoem warâ amyguehobyry ara lâpylâ eyanmo auguely, eon-honromoem, koendonroem itomoem warâ. Arâ awidyly, tokaleom ara lelâ itomoem, yagâ tokaleom mawyly ara, agâ wawyly ara warâ. 23 Augueondyly, Pabai. Tokaleom waunlo ara eagâmo wawyly; tokaleon-ro waunlo ara yagâ mawyly. Aituo tokaleom ara lelâ kagâ awylymo. Arâ tientuo, ynynâbaom modo xutuzemo, âmâ ugononi awyly, ywynedo ara lâpylâ mâinwynedylymo warâ. 24 — Pabai, âdykâ watodâlâ, yagâ ize urâ ynynonroem mânhenehonwâdyby modo. Kytanrugue kulâ onro kiungudyly iray ywynemâ. Ywynedylygue, koendonroem, ton-honreinhe warâ witoem amyguewâm. Urâ xurâ modo won-honru, koendâ wawyly warâ nhedysemo urâ. 25 Pabai, âdykâ inakanhe amitaymba âmâ. Yeinwântânry modo âutuwâbyra. Urâ olâ âutudâ. Akaemo yeinwântoem amânhenehoymby modo tutuzemo âmâ ugononi awyly. 26 Akaemoam âutuen-ho, alâ ise awisezedyly, âdara tagonro agâ tâpynedyly nhutuhomoem, ywynedâ âmâ ara, urâlâ eagâmo witoem, nhutuhomoem warâ — kely Jesus tunwym Deusram.
Jesus nhawâtomobyry, nhemakâjihomobyry warâ
1 Deus agâ agueypyem, Jesus xina agâ idâly. Xina xytâguyly; paru egatudo Cedrom xina nhekuâdyly; xina salokuly. Xina idâly toenzepa se modope atoam. 2 Judas, Jesus iduery modo emaxi egamenribyry, tutuze lâpylâ ani mârâ âji Se Oliveira Eka. Tâtâzezema kâinane xina myarâ Jesus agâ. 3 Târâ awyly tutuze tawylygue, Judas idâly Se Oliveira Ekaram sodadu pymâ romano ingonotyby modo agâ. Fariseu domodo, kurâdo eynynâ Deus agâ aguewâni modo iwymârydo warâ, Deus ety iguardary modo ingonodylymo Judas agâ. Espada, se, esagon-ho, tyatygueim warâgue tâmatunemo lelâ. 4 Tutuzelâ Jesus idânârâ âdy aini awyly. Eagâmo oxioze idâly. Nhapâiguelymo: — Ânguyka mâwinlymo? — kely. 5 — Jesus Nazaré donro — kelymo. — Mâkâ mâwinlymolâ urâ! — kely Jesus. Eagâmolâ akâwâm Judas, Jesus egamenribyry. 6 “Mâkâ mâwinlymolâ urâ” Jesus keduo, âjihujiguylymo, onro onwa ihuguewâdylymo. 7 Ihugueybyem, sautuomo, Jesus agueondyly: — Ânguyka mâwinlymo? — keondyly. — Jesus Nazaré donro — keondylymo. 8 — “Mâkâlâ urâ” ugueanselâma. Urâ mâwinlymo atay, asaemo yagonro modo tâwâlâ nâtâmo — kely. 9 Deus agâ adâkeday, “Tâensemo urâ. Tokalelâ olâ keankâ yagâpa ini” tâkehobyry wâgâ. Guarda domodoram nhekadyly tynynonro modo nawâpyra itomoem. 10 Simão Pedro tyspadary nhetyly ety odayba, kurâdo eynynâ Deus agâ aguewâni modo iwymâry kuru ety oday tâwaneim Malco keho iwantary aho eynynonro nhatâly. 11 Aituo Jesus aguely Pedroam: — Adâiseba ikâ. Âdahoru ekanâgâ. Pabai aguehobyry ara âsenagazeze urâ. Tâwâlâ lelâlâ wâne tâdâsenagazedyly eon-honru, tânyzeim tudureim kâenyly-ro waunlo ara kehoem — kely.
Jesus Anás enado satobyry
12 Ilâpygueduo, sodadu domodo iwymâry, sodadu domodo warâ Jesus nhawâdylymo, nhemakâjilymo. Deus ety iguardary domodo eagâmo adâisemo lâpylâ ani. 13 Waunroem kuru nhadylymo Anás etyram, Caifás imeindamunra. Mârâ ume kurâdo eynynâ Deus agâ aguewâni modo iwymâry kuru Caifás. 14 Caifáslâ awârâ iraynâ judeu domodo iwymârydoam agueim: “Tokalâ iguelylâ ise koendonro, idânârâ kyiguepa kitoem” keim.
Pedro, “Jesus kâuntuwâbyra urâ” kehobyry
15 Simão Pedro, urâ warâ xina idâly Jesus sani modo nhapygue âgânâ. Tâdutuoze ani urâ, kurâdo eynynâ Deus agâ aguewâni modo iwymâryam. Awylygue kâzekaunâoly lelâ âtâ idaseraji Jesus nhapygue. 16 Pedro olâ kuoholâ tâxiânze, pyanta iwaguepa. Pedro yagâ negawâmpyra awyly kâentuo, iegasely, auguely pekodo agâ, pyanta taseraji tâzegawânto enahungueim agâ: — Tâwâlâ yataen-ho negawândâ — uguely. Augueduo pekodo pyanta nhenahunguely, Pedro egawântoem. 17 Aituo pekodo eyam aguely: — Awâkâ uguondo eynynonro modo ewylâ âmâ — kely. Adâkehonduo: — Mâkâ mâkeba urâ! Kâuntuwâbyra urâ awâkâ! — kely Pedro. 18 Kopae igâwynugue târâ tâwanuneim modo, guarda domodo warâ taseray peto emanânimobyryem. XYDYK, XYDYK warâ peto tânâmize awylymo, tâuntomoem. Pedro âundyly lâpylâ eagâmo.
Jesus, kurâdo eynynâ Deus agâ aguewâni modo iwymârybyry enado aguehobyry
19 Anás Deus agâ aguewâni modo iwymârybyry Jesusram aguely: — Akaemo agonropyry modo wâgâ aguekâ yam. Ânguyka akaemo? Âdyka keankâ mâenomedâdomo? — kely. 20 Jesus in-hoguly: — Totoenzeba keankâ auguezesedyly. Âtâ tâdâtâdyguyho modo oday, Deus etydâ idânârâ kurâdo âtâdyguyho oday warâ kâenomedâdaymo, toense kulâ inkâba keankâ auguely. 21 Ydataynrimbyry modo tutuzemo âdy kâenomedâdomobyry awyly. Akaemo sapâiguegâ, urâ mâkeba — kely. 22 Arâ Jesus agueduo, Deus ety iguardary ewy eydâ iwaguepaom inwapagainly, aguely warâ: — Arâ adâkezeba ikâ kurâdo eynynâ Deus agâ aguewâni modo iwymârybyryam! — kely Jesusram. 23 — Iozepa augueaki watay, iozepa auguehobyry aguekâ. Iozelâ augueaki watay olâ, âdaituoba kulâ ywapagainhagui — kely Jesus. 24 Awârâpygueduo, Anás aguely guarda domodoram: — Caifásram Jesus sataungâ, kurâdo eynynâ Deus agâ aguewâni modo iwymâry kuruam — kely. Aituo Caifásram Jesus nhadylymo, emakâjibyenlâ.
Pedro, “Jesus kâuntuwâbyra urâ” keontobyry
25 Târâlâ Pedro, peto opay âundyly. Aituo aguehonly: — Awâkâ uguondo eynynonro modo ewylâ âmâ — kehonly. — Mâkâ mâkeba urâ! Kâuntuwâbyra urâ awâkâ! — kely Pedro. 26 Caifás etydâ tâwaneim ewy Pedro nhedyly, aguely. (Pedro iwantary nhatâyby ipemugu ani mâkâ.) — Nhentai waunlo ara olâ Jesus agâ Se Oliveira Ekadâ — kely. 27 — Mâkâ mâkeba urâ! Kâuntuwâbyra urâ awâkâ! — keondyly Pedro. Pedro aguely umelâ, aukuma igâtudyly.
Pilatosram Jesus satobyry
28 Caifás ety dombyryem Jesus nhadylymo Pilatos ety imâsedo idaseraji, pymâ Romadâpa ingonotyby etyram emedyly wâgâ. Judeu domodo iwymâry Pilatos ety odaji tâgawândysebamo, judeu keba awylygue. Aguelymo: — Kâzewenry ara, judeu keba modo ety odaji kâgawântaymba kurâ. Kâgawândyly-ro watay, tywykeim ara kulâ ise Deus kâendyly. Aituo ise xirâ kopae Páscoa kientyguebyra kurâ — kelymo. 29 Aituo Pilatos ety odaji akaemo tâgawândyseba awylygue, Pilatoslâ egaserim, eagâmo oxioze. Eyanmo aguely: — Âdara nidâka awâkâ uguondo, ienado mâenwentâguedomoem? — kely. 30 — Inakanhe aitobyry wâgâ merâ ewentâdyly. Inakanhe anipyra-ro watay, xarâ xina nenetaymba tâise. Xina ezewenry neinwântaymba merâ — kelymo. 31 — Âwymârymoanlâ sataungâ. Izewenrymo ara anipyra-ro watay, akaemolâ nenagazeneho — kely Pilatos. Aituo judeu domodo iwymârydo aguely: — Xinama ânguy nyâen-homba. Âmaemo Roma donropyry modo lelâ aieniem aguehoymby — kelymo. 32 Judeu domodolâ xyâen-hoin-ro watay, kruz wâgâ inkâba tâise iguely, romano domodo lelâ mawânkâ ewentâdyby modo kruz wâgâ takâjize xyâen-honrim. Arâ aidyly olâ Jesus “Warâ ise yiguely” kehobyry adahowandoem. 33 Pilatos tâty odaji egawântondyly. Sodadu domodoram aguely: — Xarâ Jesus enetaungâ — kely. Âtâ odaji Jesus nhadylymo. Târâ Pilatos aguely: — Judeu domodo iwymâry kuruka âmâ? — kely. 34 Jesus in-hoguly: — Awârâ yapâigueho angahu odanolâ awârâ? Eagonro modo awârâ ywâgâ âyam agueim? — kely. 35 Aituo Pilatos aguely: — Judeu mâkeba urâ. Yangahu oday inkâba xirâ unâry âtugudyly. Âpemugudolâ, kurâdo eynynâ Deus agâ aguewâni modo iwymârydolâ warâ inwentâni. Âdara midâka, akaemo iwentâdoem? — kely. 36 Aituo Jesus in-hoguly: — Pymâ lelâlâ wâne urâ, xirâ anaymba olâ pymâem wawyly. Xirâ anano pymâlâ urâ-ro watay, ynynonro modo tâjitoguyzemo tâise, iemakehomoem, ienwentâgueni judeu domodo emaxi kâzegameomba witoem — kely Jesus. 37 Jesus aguely tindatuo, Pilatos aguely: — Pymâ kuru âmâ? — kely. Jesus in-hoguly. — Pymâlâ urâ, amygueho aralâ. Xirâ onro anaynlâ yazely. Unâ iozeno egatuze keankâ kâewyly. Idânârâ unâ iozeno tindadysedo modo koendâ tydasemo, tutuzemo warâ augueho — kely. 38 Aituo Pilatos aguely: — Âdyka unâ iozeno mygueho? — kely.
“Nigue lelâ awâkâ Jesus” Pilatos kehobyry
Egaseybyem Pilatos agueondyly Jesus ewentâni modoram: — Ienanaji, merâ iguehoem! — kely. 39 — Izewenkemo alâ inanry Páscoa mâentyguedylymo ume etadâdyby ewy tokalâ kâentaguehonly, âdaunlo uguondo mâinduakeybymolâ. Âwymârymo Jesus âdara kânhenehonlyka ize matomo? Kâinmoen-hondyzeka âmaemo? — kely. 40 Aituo idânârâ in-hogulymo: — Alâ awâkâ nidâ! Barrabás etaguehongâ! — kelymo. Tâmagazeim, kyâim warâ myakâwâm Barrabás.
1 Ilâpyryem myani tonlo Roma donro sodadu domodoram Pilatos aguely: — Jesus sapioguwâdaungâ xikotygue — kely. 2 Agueduo, sodadu domodo Jesus nhapiogulymo. Ilâpyryem Jesus âwankuem nhedylymo. Tyguyreim koroaem xygatyby myakâwâm Jesus nhangahu onwa nhekylymo, pymâ domodo nhangahu wogonro ara. Âtâ BOH waunlo tapabileingue nhetydâdylymo, pymâdo âzetydâdo ara, âwankuem tientomoem. 3 Iopaji saindylymo. — Tynrenseim âmâ, judeu domodo iwymâry kuru! — kelymo, âwankuem nhedylymo. Tywapagainzemo myakâwâm. 4 Pilatos egaseondyly. Kurâdoram aguely: — Idataungâ auguely! Jesus enenehondonze urâ xarâ, xyâhoem urâem âdygue ewentâdo lâpeba mâkâ awyly mâuntuhomoem — kely. 5 Aituo sodadu domodo Jesus nhenetondylymo, âtâ BOH waunlo tapabileingue etydâdybyem, koroa tyguyreim xygatyby nhangahu wâgâ warâ. Pilatos aguely: — Etaungâ awâkâ uguondo! — kely. 6 Aituo kurâdo eynynâ Deus agâ aguewâni modo iwymârydo, Deus ety iguardary modo warâ Jesus tientuomo, adaenkelymo: — Kruz wâgâ nigue! Kruz onwa sakâjien-hongâ, iguehoem! — kelymo. Aituo Pilatos aguely: — Âmaemolâ sataungâ, kruz onwa sakâjiwâdaungâ warâ, iguehoem. Urâenma awâkâ âdanipyra — kely. 7 Târâ âtâdyguywâdyby modo aguelymo: — Tâwâlâ awâkâ nigue! Uguondo kulâ awâkâ, “Deus agâ âzekibaom urâ” nygue olâ. “Deus imery urâ” nygue lâpylâ warâ. Xina ezewenryem, Deus ara tâidysedonro xyâly lelâ — kelymo. 8 “ ‘Deus imery urâ’ nygue Jesus” kely tindatuo lakuru Pilatos, xyâen-honze âseanedyly kuru. 9 Tâty odaxi egawântondyly, Jesus târâlâ awylygue, nhapâiguely: — Âdykonloka âmâ? — kely. Nihoguba olâ Jesus. 10 Aituo Pilatos aguely: — Uhogugâ! Tarâ Jerusalémdâ pymâ kuru wawyly enanâguegâ. Ize urâ-ro watay, omoen-hondâ urâ, kruz wâgâ âehondâ urâ warâ — kely. 11 — Deus amânhedyse ato lelâ yagâ amânhekyly. Deus aguepa kulâ, âdy yagâ amânhetaymba âmâ. Yâen-honly-ro watay, inakanhe kulâ awârâ, tutuzelâma âmâ, âdara wipyra wawyly yiguehoem. Âsenagazeze âmâ ayenehon-hombyry wâgâ. Mâkâ âyam iegamerimbyry olâ ise akadâ kehoem kuru âsenagazeni — kely Jesus. 12 Jesus aguely tindatuo, Pilatos aguely: — Omoen-hoze urâ — kely. Judeu domodo târâ âtâdyguywâdyby aguelymo: — “Pymâ ton-honreim urâ” keanry Jesus. Romadâ kywymâry kuru toenzepa tyewiâpaze, tâjipyay pymâ kuruem ise kewâni modo agâ. Awâkâ uguondo mâimoen-honly-ro watay, pymâ Roma donro agâ iewiâpaze — kelymo. 13 Aguelymo tindatuo, Pilatos ekadyly tâwentâze, tâwentâzeba warâ awyly agueho mure onwa. Hebraiku-em, “Gabatá” awârâ âji ezedy: “Tadakobâdo tuhugue xygatyby” keze aguely. 14 Kuotataji iseaji Páscoa etyguedo iray akâwâm awârâ aidyly, âtyem todohondyly ume. Tonlo modoram Pilatos aguely: — Etaungâ! Anra tarâ âwymârymo kuru! — kely. 15 Akaemo olâ adaenkelymo lelâ: — Kruz wâgâ nigue! Kruz onwa sakâjien-hongâ, iguehoem! — kelymo. Aituo Pilatos eyanmo aguely: — Âwymârymo kâyâen-hondyzeka âmaemo? — kely. Kurâdo eynynâ Deus agâ aguewâni modo iwymârydo olâ warâ in-hogulymo: — Xina iwymâry mâkeba awâkâ! César lelâ pymâ kuru, Roma donro pymâ ton-honreim! — kelymo. 16 Aituo Pilatos, Jesus nhegamely sodadu domodoram. Kruz onwa Jesus sakâjize nhadylymo, iguehoem.
Jesus kruz wâgâ iguehoem sakâjihobyry
17 Kruz takâjiho tanâse Jesus idâly âji Calvário kehoram. (“Gólgota” keze aguely hebraiku-em.) 18 Myarâ saintybyem Jesus nhakâjilymo kruz onwa. Azagâ uguondo kyârimpyry nhakâjilymo lâpylâ, tokalâ aho eynynâ, eagonro pâem eynynâ warâ. 19 Tábua wâgâ iweniehonwânmy Pilatos: Jesus Nazaré donro merâ, judeu domodo iwymâry kuru kely akâwâm mârâ wâgâ iweniby azagâ tokalâ warâ itanwe: hebraiku-em, latín-em, gregüem warâ. Kruz wâgâ Jesus nhangawaym sodadu domodoram nhakâjien-honly. 20 Agui judeu domodo mârâ tábua wâgâ iweniby tytainzemo myakâwâm. Xidadâ iwaguepalâ mârâ âji Jesus nhakâjihomobyry awylygue, toenzepa sakadaynlymo-ro warâ. 21 Kurâdo eynynâ Deus agâ aguewâni modo iwymârydo aguelymo Pilatosram: — “Judeu domodo iwymâry kuru” kely keba tâise mâinwenien-honly. “ ‘Judeu domodo iwymâry kuru urâ’ nygue merâ” kely tâise mâinwenien-honly — kelymo. 22 Pilatos aguely: — Kâinwenien-hoymby, iwenibyenlâ ise! — kely. 23 Kruz onwa Jesus tiankâjibygueduo, quatro sodadu domodo Jesus ety iwogompyry nhanâdylymo, nhepajiwâdylymo lelâ. Ilâpyryem, ety iwogonro BOH waunlo takâjizenry nhanâdylymo. 24 Aituo âjigue aguelymo: — Ety BOH waunlo kiaunguepa kine. Dadu kydyânre, mâkâ tyzortygueim ise âtâ BOH waunlo sodo — kelymo. Aituo arâ aidylymo. Saguhoenlâ myakâwândy Deus itaumbyry awo wâgâ iwenibyem awyly: “Mâkâem, mâkâem warâ iety ywogonropyry nepajiwâdâmo. Ânguy ietybyry BOH waunlo sodoem ini awyly tiuntuhomoem dadu namemo” warâ iwenibyem awyly. Arâ aituomo iwenihobyry ara kehoem aidyly. 25 Kruzdâ iwaguepalâ akâwâm quatro pekodo modo: Maria, Jesus ise; Maria iwary; Maria (Magdala donro); Maria (Cleopas iwydy) warâ. 26 On-yam MYK itybyem Jesus tyze nhedyly, iedyly warâ, urâ toenzepa inwyneguyly. Aituo aguely tyzeram: — Âmerylâ-ro waunlo ara ise awâkâ João nhedyly — kely. 27 Aguely lâpylâ yam: — Awâkâlâ yze. Egâ, âzelâ mâenkyly-ro waunlo ara lelâ — kely. Agueduo, yze aralâ mâkâ kâendyly-ro warâ Jesus ize awyly. Ilâpyryem ietyram kandyly kâentoem.
Jesus iguehobyry
28 Ilâpygueduo tutuze myakâwâm Jesus kâmakehoem aiese tâetobyry âwanikely awyly. Saguhoenlâ Deus itaumbyry awo wâgâ iweniby aguehobyry ara aidyly aitoem aguely: — Tatuanze urâ! — kely. 29 Tâlâ akâwâm vinhu nhewantybygue etary tumykeim. Mârâ ikaji esponja inkuilymo. Se hissopo wâgâ ekâjibyem, Jesus itaryam nhalokuândylymo, nhugakâin-hoem. 30 Mârâ xugakâinrimbyryem, aguely. — Iweâma alâ aiese kâetobyry! Arâ aguely kâmakehoem aiese tâetobyry âdypygueândyly awylygue. Agueypyem, enagozely, iguely lelâ.
Lançague Jesus eledydâ ihoguyhobyry
31 Aituo judeu domodo iwymârydo Pilatosram idâlymo, aguelymo: — Kruz modo onwa sakâjiwâdyby izepa enra xina târâ awyly xirâ kopae, kopaelâgâ warâ. Sodadu domodoram ixinarymo xukawânehongâ, inepa iguehomoem, eguepymobyry niguampyralâ etyhoem — kelymo eyam. Tâzekobyzegueho adagulylâ mawânrâ tynrenseim lelâlâ ani mârâ tâzekobyzegueho-ro warâ, Páscoa etyguedo awylygue. Inakanhe mawânrâ tâise âty tynrenseim ume kehoem âguedy sakâjibyem awyly. Awylygue târâpa enâtâguyly, sadyly warâ ize awylymo. 32 Aituo nhekadybymo ara Pilatos anhenehonly. Sodadu domodo idâly. Jesus eapay kruz wâgâ sakâjiwâdyby modo ixinary nhukawâdylymo, mârâ ewânugue inepa iguehomoem. 33 Jesus iopaji saintybyem olâ, igueypyem awyly nhedylymo. Awylygue ixinary nukagâbyra awylymo. 34 Sodadu domodo ewy olâ akâwâm eledydâ Jesus tuhoguyze tylançarygue. Inepa kehoem iunu paru agonro ihuguely. 35 Urâ Jesus kruz wâgâ iguely enipyrylâ xirâ egatuim. Urâ kâentyby lelâlâ xirâ kâengatuly, mâinwântomoem lâpylâ. Âkealâ xirâ kâinwenily. Kâinweniby ara kehoem akâwâm aidyly. 36 Warâ myakâwândy saguhoenlâ iwenibyem awyly Deus itaumbyry awo wâgâ: “Ibyry ewy âdaunloenlâ tukagâduneba ise” warâ iwenibyem awyly. Aralâ akâwâm aidyly-ro warâ. 37 Arâ lâpylâ Deus itaumbyry awo wâgâ iwenibyem awyly: “Esemo mâkâ lançague tin-honguybymo” warâ iwenibyem awyly. Awârâ aituo saguhoenlâ Deus inwenien-hoymby ara kehoem aidyly.
Jesus eguepybyry tuhu imâsedo tâtagueim odaji nhetadâdomobyry
38 Aituo myakâwâm José Arimatéia donro Pilatosram idâly agueze: — Jesus nigueaki, Pymâ. Kruz wâgâpa kâyntâguyândyze olâ urâ, tuhu imâsedo tâtagueim odaji kâenkanâdoem. Tâwâlâ kâyntâguyândyly? — kely. — Tâwâlâ — Pilatos keduo, José idâly myakâwâm. Jesus einwânni lelâlâ myakâwâm José, ânguyram negatuba olâ-ro warâ, pymâdo tyntadylygue. Aituo myakâwâm José, Jesus eguepybyry kruz wâgâpa nhytâguyândyly, nhaleholy-ro warâ. 39 Nicodemos kopae Jesus agâ agueze idâypy, José agâ idâwâm lâpylâmy. Toenzepa myakâwâm Nicodemos aloés, mirra warâ nhadyly, trinta e cinco kilos lelâ, mârâ edunu tyânrânguneim âguedy onwa tientoem, inepa eguepybyry niwânzepa itoem. 40 Jesus eguepybyry nhadylymo, intuwynlymo, panu Nicodemos nhatyby tyânrânguneimpe tientybygue; kâzewenry awârâ, kâguepybyry kiontoem. 41 Kruz wâgâ Jesus iguehobyry iwaguepa, tâlâ myakâwâm âji toenzepa se imâsedo modo etâdyby, jardim keho. Mârâ jardindâ tâlâ myakâwâm tâtagueim iwelo esagueyby tuhu imâsedo oday ânguy igueypy tâtadâzeba myarâ, iweloem awylygue. 42 Iwaguepalâ myani mârâ jardim, Calvariodâ. Awylygue José, Nicodemos warâ Jesus eguepybyry myarâ nhetadâdylymo, tâzekobyzegueho adagulylâ awylygue.
Jesus kurâem itondobyry
1 Domingo, pealâ koendâ nemepyra awyly umelâ myani Maria Magdala donro Jesus eguepybyry etadâdobyryam idâly. Saintybyem, tâzegawânto enahun-ho tuhu ejikeybyem awyly nhedyly. 2 Aituo tâgase kehoem xinaram idâly. Toenzepa urâ Jesus inwyneguyly, Pedro warâ xina eydâ atoam idâly. Mâkâ xinaram aguely: — Kywymâry Jesus eguepybyrymy etadâdobyrydâba netymo. Âdyam nhetomobyry tutuzeba-ro warâ — kely. 3 Aituo Pedro, urâ warâ âguedy etadâdobyryam xina idâly. 4 Xina egatudyly. Pedro takaze olâ akâwâm iegaky awylygue waunroenlâ yaindyly. 5 Ioday kâentoem kâzewyly; panu linhugueto kâendyly, iegawâmpyra olâ akâwâm urâ. 6 Yaimpygueduo akâwâm Pedro saindyly, egawândyly alelâ. Târâpa Jesus eguepybyry. Panu âguedy ituwyn-hobyry lelâ nhekyly. 7 Panu apiduby Jesus nhangahu wogonropyry lelâ warâ nhekyly. Mârâ Jesus ituwyn-hobyry modo duaypa nhangawyn-hobyry, âikâlâ. 8 Urâ, waunroem saintyby, tâtagueim odaji iegawândyly lâpylâ, âguedy etadâdobyryam. Âguedy târâpa awyly kâentuo, kâinwândyly Jesus kurâem itondobyry. 9 Iwenibyem Deus itaumbyry awo wâgâ, Messias igueypyem kurâem itonze, kely. Tâenselâ, tydaselâ warâ lelâlâ wâne xina. Arâlâ olâ xina awârâ nutuba lelâ awyly. 10 Koendâ kehoem enuagaenibyryem, tâtyam xina odopâdyly.
Jesus Maria Magdala donroram âepanâguehobyry
11 Âguedy etadâdobyry kuoholâ myakâwâm Maria Magdala donro ohogüendyly. Tuogunru umelâ, âzewyly, IU idyly. 12 Azagâ anju nhedyly, âtâ tapekeingue âzetydâdybyem, Jesus eguepybyry etadâdobyrydâ ekadybymoem; târâpa itybyem olâ Jesus eguepybyry. Tokalâ ekadybyem awyly nhangahu ejidypyrydâ, eagonro ekadybyem awyly ihuru ejidypyrydâ warâ. 13 Anju domodo pekodo nhapâiguelymo: — Âdaituoka ogunru? — kelymo. Aituo pekodo in-hoguly: — Ywymâry eguepybyry nadâmomy. Âdyam nhetomobyry kâuntuba olâ urâ-ro warâ — kely. 14 Awârâ agueypyem, MYRYK idyly. XYDYK warâ uguondo nhedyly. Jesuslâ myakâwâm; nutuba olâ mâkâem awyly. 15 Aituo Jesus aguely: — Âdaituoka ogunru? Ânguyka mâwinly? — kely. Mârâ âji enilâ-ro waunlo ara mâkâ enanaji. Awylygue in-hoguly: — Âmâlâ eguepybyry tarâpa etyin-ro watay, âdyam mânhetobyry yam aguekâ. Urâ ise eagonro âjiam sanehoim — kely pekodo. 16 — Maria! — kely Jesus eyam. Tâzedy wâgâ tygâseduo, Jesus lelâlâ awyly nhutuly, aguely: — Rabôni! — kely. (Hebraiku-em, “Ywymâry” keze awârâ aguely.) 17 Jesus aguely: — Yawâdâ. Pabairam kodopâdaymba lelâ urâ. Ynynonro modoram idâ, akaemo konodo ara kehoem kâinwyneguyly modoram. Warâ eyanmo aguekâ: “ ‘Pabairam ise kodopâdyly, mâkâ Pabai myguehomo, âDeusrymo warâam’ keanry Jesus” kera eyanmo — kely. 18 Aituo Maria Magdala donro xina eydâ atoram idâly; xinaram aguely: — Kywymâry Jesus kurâem itondybyem setai — kely. Tyam Jesus aguehobyry xinaram nhegatuly.
Jesus tynynonro modoram âepanâguehobyry
19 Mârâ domingo, kopaelâ, âjigue âtâdyguybyem xina Jesus eynynonro modo. Pymâdo tawânehonly tytaze akâwâm xina. Awylygue pyanta modo koendâ kehoem enahunwâdybyem awyly. Pyanta enahuymby ozelâ Jesus egawândyly; âepanâguely xina ontay kehoem. Xinaram aguely: — Tâseguâdâzeba itaungâ, tyanepa warâ — kely. 20 Ilâpyryem xinaram tâmary kruz onwa takâjihobyry nhenehonly; sodadu lançague tuhoguyhobyry nhenehonly warâ. Emarydâ, eledydâ warâ xyâhobyry tientuo, tutuze akâwâm xina, Jesus lelâlâ mâkâ awyly. Awylygue toenzepa akâwâm xina ohomaendyly. 21 Aituo Jesus agueondyly: — Tâseguâdâzeba itaungâ, tyanepa warâ. Pabai ugonotobyry ara lâpylâ ogonodylymo, unâry mâengatuhomoem — kely. 22 Ilâpyryem xina onwa ÂBU kely, aguely: — Tâwâlâ Deus Ispiritury âyanmo nâedâ. 23 Deus izepa ato aienibyry modoam, “Deusram ekaze urâ, inakanhe amitomobyry nhygakehoem” mygueduomo, Deus xygakeze lelâ. “Inakanhe amitomobyry Deus nygakeba itoem ekaze urâ” mygueduomo olâ, Deus nygakeba ise — kely xinaram.
Jesus Toméram aguehobyry
24 Xinaram Jesus âepanâgueday, xina agâ inkâba akâwâm Tomé; xina eataen-ho Jesus eynynonro lâpylâ mâkâ. “Azagonropyry” kely lâpylâ mâkâ ezedy. 25 Ilâpygueduo, saimpygueduo, eyam xina aguely: — Kywymâry Jesus kurâem itondyby xina netai — xina kely. Xina neinwâmpyra olâ mâkâ. — Mâkâ kurâem itondybyem awyly kâinwântaymba urâ. Kâinwândyly ise, pregugue emarydâ sakâjihobyry kâendyly, iemarygue MÂ' kânhedyly, sodadu tylançarygue eledydâ in-hoguyhobyry iemarygue MÂN kânhedyly warâ watay lelâ ise kâinwândyly — kely. 26 Tokalâ semana sakanibyryem xina âtâdyguyondyly târâ, pyanta modo enahunwâdybyem kadiadugue. Ilâ ume Tomé târâlâ xina agâ. Pyanta enahuymby ozelâ Jesus egawândyly xina ontaji lelâ. Idânârâ xinaram aguely: — Tâseguâdâzeba itaungâ, tyanepa warâ — kely. 27 Ilâpyryem Toméram aguely: — Egâ iemary ihoguyhobyry; imary nhonwa iekâ. Iwâry saunâkâ, ieledydâ ihoguyhobyry onwa imary iekâ. Mâinwâmpyra mawyly imogâ. Kurâem itondybyem wawyly einwânkâ — kely. 28 Aituo Tomé eyam aguely: — Ywymâry, yDeusry warâ âmâlâ! — kely. 29 — Kurâem itondybyem wawyly mâinwândyly, ietuo kulâ, tuomare âmâ-ro warâ. Tuomareim kuru olâ ise iepyralâ yeinwânni modo! — kely Jesus.
Âdaituo João, Jesus wâgâ inwenily awyly xutuho
30 Xina eynynonro modo tâense akâwâm toenzepa lelâlâ ton-honrugue anhetyby. Xirâ pape wâgâ kâinwenipa olâ urâ idânârâ kehoem adyesenry modo Jesus anhetyby. 31 Xirâ pape kâinwenily olâ, Jesus tâinwânsezelâ mitomoem, Deus Ingonotyby Messias awyly mâuntuhomoem. Deus imery awâkâ Jesus. Tâinwânse âmaemo-ro watay, aunlolâ ise agâmo awyly. Âiguelymo watay, Deusram idâze âmaemo, aunloenlâ eagâ mitomoem.
Jesus âepanâguehobyry sete lelâ tynynonro modoram
1 Awârâpygueduo, Jesus âepanâguely tynynonro modoram. Saimu imâsedo Tiberíades emelay xina awyly ume Jesus âepanâgueondyly xinaram. (“Saimu Galiléia” kelygue lâpylâ mârâ ezeku.) Aityby ise âyanmo kâengatuly. 2 Xina sete lelâ âjigue târâ xina awyly: Simão Pedro, Tomé (Azagonropyry kelygue tâzekeim), Natanael (Caná, Galiléia eynynonro), urâ João, paigo Tiago, azagâ xina eataen-ho lâpylâ warâ. 3 Aituo Simão Pedro aguely xinaram: — Pepi oday kanra saweze ise udâly — kely. — Agâ kanra saweze idâze lâpylâ xina — xina kely. Aituo idânârâ xina idâly saimu emelaji. Pepi odaji xina âxiedyly. Emedyly ara kehoem âedâ paikaji samezeseze xina awyly, ânguy niwympa olâ. 4 Emedyly wâgâ, paru emelay uguondo xina nhedyly. Jesuslâ akâwâm mâkâ, xina nutuba olâ. 5 Aituo Jesus ago kehoem aguely xinaram: — Âdara kanra maweakimo? Agui maweakimo? — kely. Xina in-hoguly: — Ânguy xina nawewâpyra enra! — xina kely. 6 Xinaram aguely: — Pepi eahoru yan-yam âedâ samewâdaungâ. Toenzepa sawâse âmaemo — kely. Aituo xina âedâ nhamely. Inepa kehoem kanra modo inwynly. Toenzepa awylygue, pepi odaji epâguely xina nemaemba akâwâm. 7 Aituo urâ João, Jesus toenzepa inwyneguyly, Pedroram auguely: — Kywymâry Jesus mâkâ! — uguely. Simão Pedro auguely tindatuo, tâty BOH waunlo nhetondyly, kanra tianwâtoem tientyby. Paikaji adamely. Sagunuram idâly tywâre, inepa Jesusram taintoem. 8 Pepi oze xina idâly, tykâgueze, âedâ kanrague tumyke tâpâgueze, cem metros awârâem kulâ saintoem sagunu onwa. 9 Pepi odayba âzetybyem, peto ehoru kanra pylâ nhangatay âjihuly-ro warâ xina nhedyly. Pãobe lâpylâ akâwâm peto opay. 10 Aituo xinaram Jesus aguely: — Awâkâ kanra manwâtybymo ewy âenetaungâ — kely. 11 Aituo Simão Pedro pepi odaji âxiedyly. Âedâ sagunu wâgâ nhuxidyly. Tumyke kehoem mârâ âedâ, cento e cinquenta três kanra imâsedo modogue, nadatâwâbyra olâ mârâ âedâ. 12 — Âwinduataungârâ — kely Jesus. Jesuslâ awyly tutuzelâ akâwâm xina, tywypaze olâ akâwâm xina, mâkâlâ awyly tiuntuhoem eyam agueze. 13 Aituo Jesus iopaji xina saindyly. Pão nhanâdyly. Xina ara nhepajiwâdyly. Xina ara lâpylâ kanra âjihuyby nhepajiwâdyly. 14 Jesus kurâem itondybyem, azagâ tokalâ warâ âepanâguely idyly akâwâm xina tynynonro modoram.
Jesus Pedroam aguehobyry
15 Xina âwinduapygueduo, Jesus Simão Pedro nhapâiguely: — Simão, João Betsaida donro imery, toenzepa lelâlâ ywynedâ âmâ âdydo imeom takaze kehoem? — kely. Aituo Pedro in-hoguly: — Tutuzelâ âmâ, toenzepa âize wawyly — kely. — Arâ atayma ywâgâ aguekâne iwelo yeinwânni modoram. Tâguy ovelha imery nheto ara egâmo — kely Jesus. 16 Aituo Jesus agueondyly: — Simão, toenzepa lelâlâka ywynedyly? — kely. — Tutuzelâ âmâ, toenzepa âize wawyly — kely Pedro. — Arâ atayma ywâgâ aguekâne yeinwânni modoram. Ovelha eni ovelha nheto ara lâpylâ egâmo — keondyly Jesus. 17 Jesus agueondyly, saguhoem adâkehobyry araba: — Simão, toenzepa yize mawyly? — kely. Awârâ tindatuo, Pedro itywandyly, in-hoguly: — Idânârâ xuturinlâ âmâ; toenzepa âizetonro wawyly tutuzelâ âmâ — kely. Aituo Jesus agueondyly: — Arâ atayma ywâgâ aguekâne yeinwânni modoram. Ovelha eni, ovelha nheto ara egâmo — kely Jesus. 18 — Salokuzenomoem mawyly ume, ton-honre ani âmâ, ize matobyryam mydâhoem. Xirâ âyam augueho olâ ise âkealâ. Agaityoem mituo âzemakâjioze âmâ. Mydâdyseba matoam ise madaholy — kely Jesus. 19 Awârâ arâ adâkeday, Jesus nhutuen-honly, âdara Pedro iguely awyly. Arâ Pedro tyigueho odaji kehoem Deus nheinwântobyry wâgâ ise Deus âzehogueoly Pedro eon-honru nhuduhobyry wâgâ. Aituo Jesus Pedroram aguely: — Ynynonroenlâne ikâ — kely.
Jesus João agâ aguehobyry
20 Pedro ikaynâ akâwâm urâ, urâ toenzepa Jesus inwyneguyly. Kopae Páscoa ume xina âwinduatay, urâlâ akâwâm Jesus eatado ekani; urâlâ, “Ânguyka ise igamenri âehondyzedo modo emaxi?” kerim. Âdara tyiguely awyly wâgâ Jesus aguely idanipyryem, Pedro MYRYK idyly. Tykaynâ iedyly. 21 Jesus nhapâiguely: — Âdyka ise João agâ aini? — kely Pedro. 22 Jesus in-hoguly: — Awârâ wâgâ tâtynanâzeba ikâ. “Kodopâdo odaji niguepa nidâ” uguely watay, mâuntuly mâkeba awârâ. Yeinwânsezedyly wâgâ lelâ âtynanâgâ — kely Jesus. 23 Awylygue âjigue Jesus einwânni modo aguelymo: “ ‘Kodopâdo odaji niguewâpyra ise João’ nygue Jesus” kelymo. “Âiguewâpyra ise âmâ” kewâpyra akâwâm Jesus ywâgâ. Warâ ani aguely: “ ‘Kodopâdo odaji niguepa nidâ’ uguely watay, awârâ modo wâgâ tâtynanâzeba ikâ” kely Pedroram. 24 Kâentyby, kâindatyby warâ xirâ kâinwenily Jesus eynynonrolâ urâ João toenzepa inwyneguyly. Idânârâ yataen-ho modo tutuzemo âkealâ xirâ pape wâgâ kâinwenily awyly.
Iwenihobyry xypyry
25 Tâlâ wâne xirâ pape wâgâ kâinweniby. Tâlâ olâ toenzepa âdydo imeom modo Jesus anhetaymby. Idânârâ kehoem anhetyby, aguehobyry warâ iwenily watay, toenzepa lelâlâ tâise livrupe awyly! Idânârâ onro anaym pape iweniby ejidy lâpeba tâise. João