Naa waa ishtorya waa je Porrosht shiyokõr poõrc hn shiyokõr hnɨmich.
1 Wapkite Porrosht shiyokõr poõrc hn shiyokõr hnɨmich. 2 Nĩhyok ye latɨk chɨhɨkite ele hnɨmich eeych ehn yapaa nɨshii kushjãr owɨlpe. Shɨ pur dɨhlelta, hn pur onoot bahluta. Hn shɨ Porrosht Ɨchɨbich wɨchɨ je chɨkẽhe lekɨtiyohochɨs ese awɨt eeych. 3 Eseekite hn Porrosht ɨm: -Tuu poriĩt tokole.— Hn ese poriĩt tokole. 4 Hn umo wɨchɨ ese poriĩt uje ich ɨhɨ̃rt, hn sehekɨhɨchɨs shuu wɨchɨ ese poriĩt tɨ̃r wahacha, hn shuu wate asa dɨhlelta tɨ̃r wahacha. 5 Hn umo wɨchɨ ese poriĩt ɨm: —Tuu iich otsɨɨ deeych.— Hn umo asa dɨhlelta ɨm: —Tuu iich otsɨɨ dɨhlak.— Hn wɨchɨ uu dɨhlak hn deeych shuu iĩye par chɨbɨte je uu deeych nohmɨra uje Porrosht shiyokõr debiyokite. 6 Eseekite hn ɨm: —Tuu ohwɨt chɨhɨ uje sehek wɨchɨ awɨt hn seem awɨt par pehet tɨ̃r poõrc hn wɨchɨ yet iyehe hnɨmich eeych— ɨm: —par uje ohwɨt chɨhɨchɨs pehet.— 7 Eseekite hn sehek wɨchɨ awɨt par shuu pehet tɨ̃r poõrc hn shuu pehet iyehe hnɨmich hn chɨbɨte ohwɨt. Heke tokole ɨtsorz. 8 Eseekite hn umo wɨchɨ ese ohwɨt ɨm: —Lɨkɨ tuu iich otsɨɨ: "poõrc pehet."— Hn ich terɨhɨ uu daalo osiyer uje Porrosht shiyokõr debiyokite. 9 Eseekite hn ɨm: —Ese awɨt uje de hnɨmich eeych tuu tɨ̃rye par ese iyerc kako.— Ese awɨt tɨ̃rye hn hnɨmich tara wɨchɨ iyerc. 10 Hn Porrosht umo wɨchɨ ese uje kako ɨm: —Lɨkɨ tuu iich otsɨɨ: "hnɨmich."— Hn umo wɨchɨ ese awɨt ɨm: —Tuu iich otsɨɨ: "onoot bahluta."— Umo wir uje ich ɨhɨ̃rtso ese hnɨmich hn asa onoot bahluta. 11 Eseekite hn ɨm: —Tuu hnɨmich duhu wir tokole erze ɨhnemiyo hn yewo ĩya uje eyhi de. Nos kɨnaho kɨnaho, ye ɨlyepe. Tuu nos uu pohɨr tokole uje eesh hn eyhi dechɨ ehet.— Ɨm: —Nos kɨnehe kɨnehe, ye ɨlyẽrpe.— Heke tokole ɨtsorz. 12 Eseekite hn hnɨmich shuu wɨr ɨhnemiyo hn nos yewo ĩya hn pohɨr tokolɨhɨ hnɨmich eeych. Nos wɨr pohɨr uje eesh hn eyhi dechɨ ehet. Kal pohɨr shɨ kɨnehe kɨnehe, ye ɨlyẽrpe. Hn Porrosht umo uje nos ɨhɨrtso uje tokolɨhɨ lɨka hnɨmich eeych. 13 Hn ich terɨhɨ uu daalo 3 uje Porrosht shiyokõr wɨr debiyokite. 14 Eseekite hn ɨm: —Tuu luu tokolɨhɨ lɨka ele poõrc,— ɨm: —par erze luu dehek ɨre ese ich dɨhlak hn ese ich deeych. Hn tuu luu tokolɨhɨ lɨka par uje odɨraha wɨr ɨshɨ̃ryo erze daalo hn par odɨraha uu ãyo hn par odɨraha uu daalo uje kɨɨs hn par odɨraha uu daalo uje duhlu nẽhe. 15 Hn erze luu de poõrc chihit lɨka ele hnɨmich eeych.— Hn tokolkite ɨtsorz. 16 Eseekite hn shiyokõr luu otiyer deyo. Waa luut bahluta wat par tɨbey uje deeych hn waa luut shakaharrza wat par tɨbey uje dɨhlak. Hn shiyokõr porrzebe toy. 17 Hn Porrosht chɨbɨtɨchɨs poõrzkite par chihit hnɨmich eeych 18 hn par tɨbey uje deeych hn dɨhlak. Hn chɨbɨtɨchɨs poõrzkite par sehek ɨrɨhɨchɨs ese ich deeych hn ese ich dɨhlak. Hn Porrosht umokite uje ich ɨhɨ̃rtso. 19 Hn ich terɨhɨ uu daalo 4 uje Porrosht shiyokõr wɨr debiyokite. 20 Eseekite hn ɨm: —Tuu loshiyo hn yewo ĩya kɨnaho tokolɨhɨ lɨka ele awɨt uut tuu kɨhnipa hn chɨpɨrme ɨtspo tuu iyoho lɨka ele poõrc pehet.— 21 Eseekite hn Porrosht shiyokõr wɨr loshiyo deyo uje de awɨt uut hn nos yewo ĩya ich kɨhnipa. Nos kɨnaho kɨnaho, ye ɨlyepe. Hn nos shiyokõr wɨr chɨpɨrme uje ihyosh. Nos kɨnehe kɨnehe, ye ɨlyẽrpe. Hn umo wɨrkite uje ich nos ɨhɨ̃rtso. 22 Hn chiyuhu lahwoso oomo keytkẽr wɨr loshiyo hn erze chɨpɨrme ɨm: —Kɨhniyehe wahacha onoot bahlut uut nẽhe hn chɨpɨrme ɨtspo kɨhniyehe lɨka ĩrmo nẽhe.— 23 Hn ich terɨhɨ uu daalo 5 uje Porrosht shiyokõr wɨr debiyokite. 24 Eseekite hn ɨm: —Tuu loshɨpo tokolɨhɨ hnɨmich eeych. Nos wɨr kɨnaho kɨnaho, ye ɨlyepe. Tuu loshɨpo tokole uje ochuus hn uje chɨ̃r dehet hnɨmich hn erze loshɨpo uje de hmont ehet. Nos wɨr kɨnaho kɨnaho, ye ɨlyepe.— Heke tokole ɨtsorz. 25 Eseekite hn shiyokõr loshɨpo uje de hmont ehet. Ye duhu ɨlyepe. Nos kɨnaho kɨnaho, shiyokõr loshɨpo uje ochuus. Ye duhu ɨlyepe. Nos kɨnaho kɨnaho. Hn shiyokõr loshɨpo uje chɨ̃r dehet hnɨmich. Nos kɨnaho kɨnaho, ye ɨlyepe. Hn umo wɨrkite uje ich nos ihɨ̃rtso. 26 Entonse eseekite hn Porrosht ɨm: —Yiyokõr jente.— Ɨm: —Yuhu oneetshɨp eyok,— ɨm: —hn yɨbɨte õr par uje ahnũwo jente otɨbey nãhu doshiyo hn chɨpɨrme hn loshɨpo uje ochuus hn nos wɨr yewo uje chɨ̃r dehet hnɨmich.— 27 Eseekite hn Porrosht shiyokõr jente shuu ɨtsshɨp ɨre. Hnakɨrap hn tɨmchar uje shiyokõr shuu ɨtsshɨp ɨre. 28 Eseekite hn chiyuhu lahwoso oomoho õr ɨm: —Uhu olak aabo okɨhniyehe onuũr hnɨmich eeych nẽhe. Oyɨbɨte olak par uje ahnũwo doshiyo hn chɨpɨrme hn nos wɨr erze uje chɨ̃r dehet hnɨmich olak ɨr bahluwo.— 29 Eseekite hn umo õr ɨm: — Hmeychɨmlo, nos tokosim olak wɨr jõro ijaabo uje eyhish uje de lekɨtiyoho hnɨmich eeych hn tokosim olak wɨr pohɨr uje eesh hn eyhish de ehet par uje ewlo. 30 Hn nos wɨr erze loshɨpo hn nos wɨr erze chɨpɨrme hn nos wɨr erze uje chɨ̃r dehet hnɨmich, nos wɨr erze uje ihyerosh uje de lɨka hnɨmich eeych nos tokosim õr jõro ĩnyo par õr poso.— Hn tokole ɨtsorz. 31 Eseekite hn Porrosht nos umo wɨr uje shiyokõrkite uu webich oso hn uu uhurrzoso ich nos ɨhɨ̃rtso pisho. Hn ich terɨhɨ daalo 6 uje Porrosht chɨmɨt wɨr erze debiyokite.
1 Eseekite hn Porrosht chɨmɨt wɨchɨ ese poõrc hn ese hnɨmich hn nos wɨr erze uje de ehet ich yuwɨrpa. 2 Hn wɨchɨ ich terɨhɨ daalo 6 uje Porrosht chɨmɨt wɨr debiyo hn sakir por ese deeych yet uje ich terɨhɨ 7. 3 Hn chiyuhu lahwoso oomo ese deeych pork wɨchɨ uu deeych uje sakɨrkite nos chɨmɨt wɨr debiyo. Heke kal terɨhɨ uu deeych 7 ich Porrosht shuu otsakɨr.
Naa waa ishtorya waa je tatɨpo uje Porrosht shiyokõr ɨ̃rmo par jente õr owɨchish.
4 Naa waa ishtorya waa je Porrosht shiyokõr poõrc hn shiyokõr hnimichki te. Jehová wɨchɨ uu Porrosht pisht. Ese wɨchɨ je shiyokõr poõrc hn shiyokõr hnimichkite. 5 Wapkite ehn ye pohɨ̃rsh hnɨmich eeych pork ehn yapaa Porrosht duhu ibikɨhi lɨka hnɨmich eeych petɨk hn ye latɨk chɨhɨ lɨka par chish obiyoho wɨr erze jõro. 6 Hn ɨsɨhɨlt tarɨ̃chɨs hnɨmich eeych hn sɨta shuu panta. 7 Entonse eseekite hn Porrosht chiish wɨchye ese hnɨmich uje ich ɨhɨ̃rt hn shiyokõr wɨchɨ hnakɨrbich. Chɨmɨtɨke hn tɨbɨchu dɨjẽrpta ehet hn ɨshɨm ɨkɨrĩt. Heke ese hnakɨrbich eyuwosh. 8 Eseekite hn Porrosht shiyokõr shakɨrrza wahacha ese deeych wãrich, ese hnɨmich uje iich otsɨɨ Eden, hn chɨbɨte wɨchɨ ese hnakɨrbich ehet uje shiyokõrke. 9 Shuu pohɨr tokolɨhɨ wahacha ese shakɨrrza ehet uje ich ɨhɨ̃r hn ich om par otew. Hn wahacha shakɨrrza ehet pisht pohɨr de otiyer waa yata ye duhu õr ɨkɨrĩt nɨhnɨ̃rpe, hn waa yata shuu ochɨraha uje om hn mɨ̃hnɨk. 10 Eseekite hn onoota tãra Eden ehet hn chɨkãha wate asa shakɨrrza ehet par sɨta wɨr erze jõro. Hn tokolɨhɨchɨs ese Eden wɨrc. Wahacha Eden pɨt onoo uke de 4. 11 Waa onoota ukuta webich otɨta iich otsɨɨ Pison wɨchɨ je uushɨ chɨkãha ese hnɨmich uje iich otsɨɨ Havila. 12 Hn ese hnɨmich oro de ich ɨhɨ̃rtso pisho hn pohɨr otɨch de uje ich aat ehmuuj hn kojano de uje iiyo otsɨɨ ónice ich ɨhɨ̃rtso pisho. 13 Hn asa onoota ukuta yata waa je iich otsɨɨ Gihon wate uushɨ chɨkãha ese hnɨmich uje iich otsɨɨ Cus. 14 Hn asa onoota ukuta yatpo uje iich otsɨɨ Tigris. Wate uushɨ chɨkãha wahacha deeych wãrich uu hnɨmich wɨrc uje iich otsɨɨ Asiria. Hn waa onoota ukuta uhurrzotɨta iich otsɨɨ Eufrates. 15 Eseekite hn Jehová hnoy wɨchɨ ese hnakɨrbich chɨbɨte wate asa shakɨrrza ehet uje de Eden par uje tɨbey wɨr jõro. 16 Hn tatɨm wɨchɨ ese hnakɨrbich ɨm: -Nos wɨr erze pohɨr ee om par uje ew. 17 Shi waa pohorrza waa je shuu ochɨraha uje om hn mɨ̃hnɨk wat ye ew pork je ew nẽhe ich atɨ. — 18 Eseekite hn ɨm: -Ye ompe ese hnakɨrbich uje shɨ nohmɨra. Tiyokõr kuchẽrk uje om par uje takashɨm ɨre shɨ par ɨr ihyẽra.- 19 Porrosht nos shiyokõr wɨr loshɨpo hn chɨpɨrme shuu tãra hnɨmichkite hn tõhwa sowa Adán par uje Adán chukwẽra iiyo par uje Porrosht tẽr keshɨ duhu iiyo ɨnaapo. Hn erze wɨr iiyo ɨr iiyo pisho. 20 Hn Adán nos chukwẽra wɨr loshɨpo iiyokite uje ochuus hn nos wɨr uu chɨpɨrme uje iyohochɨs poõrc pehet hn nos wɨr loshɨpo uje de hmont ehet. Mahn par Adán nĩhyok ye loshɨpɨ̃rsh hn ye chɨpɨrmɨ̃rsh uje om par takashɨm ɨre. 21 Entonse eseekite hn Porrosht shuu wɨchɨ ese hnakɨrbich nɨmehe kuhɨ̃rt hn chiyuhu arrzɨbich nohmet hn shiyeru obichpo. 22 Hn ese arrzɨbich uje Porrosht chiyuhukite hn shiyokõr tɨmcharrza. Tõhwa wate tɨmcharrza hn sowa wɨchɨ ese hnakɨrbich. 23 Eseekite hn Adán ɨm: -Uu yok debiyo tokolɨhɨ naa debiyo hn uu yok pẽro tokolɨhɨ naa ẽro heke tukwẽra iich too: "tɨmchar," pork Porrosht shuu tãra hnakɨrbich.— 24 Heke Porrosht chɨbɨte uje ɨtsorz kal hnakɨrap uje chiileku tyenɨj iim deych hn iim data par hõr nerãhta otseyhiye ahɨr hn otokole shɨ õr nohmɨra. 25 Eseekite hn ese hnakɨrbich hõr nerãhta ich omeheshɨp eeych per ye opookpe uje õr ɨtsorz.
Naa waa ishtorya waa je Adán hõr nerãhta oyuwe uje Porrosht shuu ɨtsorz.
1 Eseekite hn uu echeẽt ma eykdeyo je nos wɨr uu loshɨpo yewo uje de hmont ehet uje Jehová shiyokõrkite. Ese echeẽt umo wate asa tɨmcharrza ɨm: —¿Je urũ pishɨ uje Porrosht nomo olak ɨlo: "¿Ye ewlo nos wɨr pohɨr uje de shakɨrrza ehet?"— 2 Hn waa tɨmcharrza umo ɨm: —Nos wɨr pohɨr ee uje de lɨka shakɨrrza õryok pwele oyahu 3 per waa pohorrza waa je de lɨka shakɨrrza ehet pisht Porrosht umo õryok ɨm: "Ye ewlo uu ee hn ye akɨhɨrlo noko atɨlo."— 4 Entonse eseekite hn echeẽt ɨm: —Ye atɨlope .— 5 Ɨm: —Porrosht chɨrahapa uje deeych yet je ewlo wate asa pohorrza ee nẽhe ich olak ɨle pẽrha hn olak ɨtso uu Porrosht. Erahalo uje om hn mɨ̃hnɨk.— 6 Eseekite hn asa tɨmcharrza hno teychɨm wate asa pohorrza ee. Umo uje ich ɨhɨ̃r pishɨ hn ompa par uje tew hn par oshuu ochɨraha deyuwo. Hn chekushu wate asa pohorrza ee hn tew hn ɨshɨm wɨchɨ dabich uje dechɨ ahɨr hn tew toy. 7 Entonse eseekite ich õr ɨle pẽrha hn ochɨrahaka uje omeheshɨp eeych. Pohorrza yata de wahacha iich otsɨɨ higuera. Ochekushu watɨ pohorrza ĩhyo hn oshiyerye oshiyõr dasuwo hn oyãha. 8 Eseekite hn ese hnakɨrbich hõr nerãhta ochunt uje Jehová dɨrkɨhɨchɨs asa shakɨrrza ehet uje terɨhɨ waa orta uje ich deeych kɨɨs. Omasaha wɨr jõro ehet hn otsakɨs ɨre. 9 Eseekite hn tɨbii wɨchɨs ese hnakɨrbich umo ɨm: —¿Owa chɨhɨ ɨraãpo?— 10 Hn ese hnakɨrbich ɨm: -Tukunt owa uje owa dechɨ ese shakɨrrza ehetɨke hn tɨkitɨla owa pork tɨkɨmeheshɨp eeych heke takɨs yok.- 11 Hn umo ɨm: -¿Yeẽk tatɨm owaka uje ameheshɨp eeych? ¿Je ew waa pohorrza eetaka waa je titɨm owahna too: "Ye ew?"- 12 Hn uu hnakɨrbich umo ɨm: -Waa tɨmcharrza waa je asɨm yokhna par pɨrãhto watɨ je ɨshɨm yok watɨ asa pohorrza eetaka hn taw.— 13 Entonse eseekite hn Jehová umo waa tɨmcharrza ɨm: -¿Ahakor latɨkpoko?- Hn waa tɨmcharrza umo ɨm: —Echeẽt wɨchɨ je sehnyẽr yok latɨke hn taw wate asa pohorrza ee.- 14 Hn Jehová umo wɨchɨ echeẽt ɨm: -Shɨ por uje ehniyẽr watɨke heke tajɨ̃r ekiyo. Uu loshɨpo uje ochuus hn erze loshɨpo yewo uje de hmont ehet wɨr ye tajɨ̃r ɨkiyope.- Ɨm: -Je shɨ ẽra erjorrza hnɨmich tenẽhe hn ew wɨr erze kuche uje de hnɨmich ukult eeych por erze daalo uje owa ɨka.— 15 Ɨm: —Tɨbɨte par uje owa hn asa tɨmcharrza olak ɨmahoye. Hn tuu wate tɨmcharrza aabo hn uu owa aabo õr ɨmahoye. Owa tyenɨj aas wɨchɨ tɨmcharrza ijɨt nɨtɨta oorrza nẽhe hn asa tɨmcharrza ijɨt tyenɨj shuu eheta chishak nẽhe.— 16 Eseekite hn Jehová umo wate asa tɨmcharrza ɨm: -Tuu owa dosɨ̃riyo deyo uje owa hmuker, hn tuu owa dospa uje eyjo oshũrha, per shish ahmũr pishɨ abich hn uu abich wɨchɨ je tɨbey pishɨ owa.— 17 Eseekite hn umo wɨchɨ ese hnakɨrbich ɨm: -Titɨm owahna too: "Ye ew wate asa, pohorrza ee," per ahakõrke uje erãhta tatɨm owaka hn ew . Heke tajɨ̃r lɨka hnɨmich ɨkiyo par uje tuu asew obiyo uje ich doso par uje esh wɨr abɨso uje tãra hnɨmich je shɨ ɨlorz tenẽhe por erze daalo uje owa ɨka.— 18 Hn Porrosht ɨm: —Tuu wonti tokolɨhɨ lekɨtiyo hn ohnakatuwo hn owa tyenɨj ew wɨr jõro uje de aach.— 19 Hn ɨm: —Eyuhu dɨhɨrc wap par esh uje ew je nẽhe shɨ atɨ nẽhe. Tiyokõr tɨ̃r owa hnɨmichhna hn janaha eeshi etɨ̃r ese hnɨmichpo nẽhe.— 20 Eseekite hn Adán chukwẽra wate asa nerãhta iich ɨm: -Eva- pork wate je tyenɨj nos oso õr datɨ nẽhe, 21 Eseekite hn Jehová shiyokõr wir õr ɨshuwo chɨ̃ra uu loshɨpo yũhɨr par ese hnakɨrbich hõr nerãhta hn shuu oyãha. 22 Hn Jehová ɨm: —Ese hnakɨrbich ich ɨtso eyoklo pork awra ich chɨraha uje om hn chɨraha uje mɨ̃hnɨk. Yãhɨrm õr wate asa pohorrza waa je ye duhu õr ɨkɨrĩt nɨhnĩrpe par uje ye odekushu wɨr ee nẽhe hn shish õr ɨka.— 23 Eseekite hn Jehová shuu wɨchɨ hnakɨrbich hõr nerãhta otokolɨhɨchɨs asa shakɨrrza uje de Eden ehet par ochishew obiyoho ese hnɨmich eeych uje ese hnakɨrbich tãrkite. ɨɨ̃ãẽĩõũáó¿ 24 Hn uje shuu otokolɨhɨchɨs asa shakɨrrza ehet. Hn chɨbɨte kuche uje tãra poõrc uje iiyo otsii kerubines par tɨbey wɨchɨ ese dehet uje tɨ̃r wate asa pohorrza waa je ye duhu õr ɨkɨrĩt nɨhnĩrpe. Chɨbɨte wɨr kerubines wahacha deeych wãrich asa shakɨrrza wɨrc pisht uje de Eden ehet. Hn chɨbɨte wɨchɨ toy espada kɨnaha uje hũra yokachash uje chukwer labɨhɨ lekɨtiyo. Hn wɨchɨ tɨbey wɨchɨ toy ese dehet par ye duhu latɨk tɨ̃r wate asa pohorrza waa je ye duhu õr ɨkɨrĩt nɨhnɨ̃rpe.