Sinia' jlamtis iyo i'nioye
1 Ti 'nelanjie'e t'ipi siunie inamtik ta'a ti po'o, ti je wakaljli'ijyi niwa wask'i'nelaja. Siunie inamtik yijap ta'a pi Sinia', 'yina jla'am ti Sinia'. 2 Jla'am ti yijap pi Sinia' ti 'nelanjie'e lajk'i puwa niwa wask'i'nelaja yi' ape'e 'ni ajnat. 3 'Yina ka lajak'i ti jla'am ti Sinia' ilisanayi wikie'eyi niwa wask'i'nelaja yi' ape'e 'ni ajnat, jla'am ti it'imina ti Sinia' ilisane. 4 Naka'ne ni siunie in'wasankiye tajle; janaka'ne siojona 'esi' napo i'nio' iyoyisi jika katesa'. 5 Janaka ti yata'm jikiowe'e ni ajnatiok, siunie ajnatiok je 'yijene paka inwone ka'nojmat'e. 6 Pope jak i'nio', jle' iyo'ate Juan, ti Sinia' ijliu'. 7 Ijwi'il siunie iyo ti i'wi'in janaka kates. Ti ijwijla'm napo i'nio' janaka kates ti i'wi'in, 'nakayi ti ja wikie'eyeyi ti ja ke inkakiuyis. 8 Juan je janaka kates, 'wenajliyi pet siupi titiejkinaja ti tijliukieje ka injwe'el siunie iyo janaka kates. 9 Siojona ijiate jla'am ti kates ti ja'nakajanit'i ape'e wikie'eyi napo i'nio' yi' ape'e 'ni ajnat, majleyet'ipi ilia'm. 10 Siunie i'nio' ti inamtik pajk'i ti yikiajlin'ni ape'e 'ni ajnat, jla'am ti it'imina ti Sinia' ilisane 'ni ajnat, 'yina kiakayetak'i lapakawo siunapo yi'i 'ni ajnat je itiant'iejesi. 11 'Nese 'ni jika ajnat, 'yina siunapo tijnayi ti jika kia'lis je isi'm ilia'm. 12 Siunapo isi'm ilia'm, siu'neje napo je 'yakakiu, napok iyo ji'niayija' kanwo Sinia' jilisa'. 13 Ijiatjliyi napok Sinia' jilis, 'yina je napoka napo i'nio' ka intajla ka jlama ka impojonit, jla'yi ka jitienkiujnieyeja' ni i'nio', 'wenajliyi jlam pa Sinia'. 14 Siunie inamtik ti iniwojwa'n i'nioye, yisajap. Je jlase' ki iyo ni jlemijnaye ti po'o, jla'yi ki iyo ni ijiatk'i ti yiyi. A'wena ki iyo ni jla'al ti wuj ti 'es, jla'yi ni jle' ti wuj, ti jlamkata ti tekiajlaja, 'yina kajeyepa ti jlam ti Jlas ijwienjli pi Sinia'. 15 Juan 'yakets'ijiap siunie jika'niye ti iyo'ate ti ijwile pijia'm: —'Naka siu'nie ajwel'nijpe ti awo'ate, “Po'o ni i'nio 'wanjli isia'm ti 'yaka'm itipe'e, nak siunie i'nio' ti po ta'a ti 'nelanjiejat'ipi, ti ya'am siliejlik'iji.” 16 Laj jlaja ki iyo siunie iwints'e'm ti ipijlatine sitipe'e ti kasp'elisijne'n, 17 Siunie inka'neyasajnaye ti tajle pi Moisés t'ipi ti tekiajlaja, siunie inemijnaye jla'yi ni ijiatk'i yisajap lapakawo ti naka jla'am Sijwajieti Jesús ti it'imina. 18 Lajk'ipa ka in'we'en pi Sinia'. Ijwienjli jla'am ti i'wi'in siunie Jlas ijwienjli, ti jla'am ti Sinia', ti ijwienjli yiyi'i pi Sinia'. Jla'am ti i'winkints'e'm, it'imina ti kastant'ieje.
Juan inajiejnawo 'yakajanit'i ape'e siunie iyo ni Sijwajieti Jesús
19 Siunapo anechiyasas Judíojos yiji jana Jerusalén ijliuyet'ipi napo pa'yijis siu'neje napo jla'yis Levítajas ti ijioyisi ja Juan ti i'yasisi'n ti iyo'ate: —¿Te'na'm? 20 'Yina je iyo'ni ka inijwek ti iyo'ate: —Sinia' je sijliu' ka iyo Injwajietiwoye. 21 Yikiajlayisi'iji ti i'yasisi'n: —Jakajliete, ¿te'na'm? ¿Amt'imi siupa injwejlanik jiwo Elías? Juan iyo'ne 'ate: —Je ya'am. Jlam yinjliyisi ape'e: —¿Amt'e jiat'eje siupa injwejlanik jiwo ti ja'nes? Isiujlie ti iyo'ate: —Je'e. 22 Iyonayisi 'ate: —Jlam woni'ni 'ate: jwelts'e'm, janaj'nina'a jajwilaja siojopo kasjlok. ¿Tent'ipa siupa jiwo jiat'e? 23 Juan isiujlie ti iyo'ate: —Ya'am siunie jla'lap ni i'nio' ti tan'ni ape'e 'ni ajnat mami'yi, iyot'iyipi pa injwejlanik jiwo Isaías ti iyo'ate, “Wakajlanit pi ji'niayi k'iye ni Saka'niona ka jnajyi.” 24 Iyo'ne 'ate siojopo Fariséojos jikawos 25 ti i'yasisi'n: —¿Yot'iyi'ni jiat'eje ti jiniejiejne'n napo i'nio'?, ti jijwe'el ti je injwajietiwo'wa'm, jla'yi ti jijwe'el je a'am siupi Elías, siu'neje ti jijwe'el je a'am siupi injwejlanik jiwo. 26 Juan isiujlie japo ti iyo'ate: —Ya'am anajiejni napo i'nio' ni i'niat. Po' ni i'nio' yi' aska kiowe'e ti je intant'iejayi, 27 ti 'wanjli isia'm. 'Yina tiwet'ianaja ka nakataja wek ka 'yakajli ka iliejnits'i niwa jisieti t'aka'. 28 Yi'i jlaja ajnat jle' iyo'ate Betania yi'i ja tewuk Jordán taj'le ni kilie' sek yinayi'i ja Juan ti iniejiejne'n japo i'nio', sekyi'i kiaka ti kiak iyo. Jesús jla'am ti initiajnat niwa jikeyis ni i'nio' 29 Siukia ti jlomaye'eje, jakayi'ne ja Juan ti i'wi'n ilia'm ja Jesús ti ijioyi. Iyo'ne 'ate ja Juan: —¡'Yena'yi ilia'm siunie naka Sinia' jiliajwa 'wolepo 'woma, ti initiajnat ni jloski'la napo i'nio', ti Sinia' ijliu' ajnat'e! 30 'Nak ajwel'nijpe ti awo'ate, “Po'o ni i'nio 'wanjli isia'm ti jana'am, ti 'yaka'm itipe'e. Naka i'nio' inia'an ti po'o ti ya'am je ajlijyi'ijne.” 31 'Yina kia'iyo je sitiant'ieje ti 'nelanjie'e. Ti ya'am ti ana'am, anajiejni ni i'niat napo i'nio' ti anajiejne'n, 'nakayi ka intant'ieje napo Israel jika kia'lis. 32 Juan iyoye'eje 'ate: —'Yina kia'iyo a'wenaja siujlieja Sinia' jikimet ti 'es ti yi' ape'e, ti 'yiniye ni ojwo' ti nama isia'm ti tal poliyi. 33 Ti 'nelanjie'e je sitiant'ieje kiu'. 'Yina siunie sijliu' ka iniejiejne'n napo i'nio', ka iniejiejni ni i'niat, iyonk'i 'ate, “Siuti ja'we'en siunie i'nio' Sinia' jikimet ti 'es janame ti jane'yi ape'e, janakaye siunie i'nio' ti janajiejni jana Sinia' jikimet ti 'es napo i'nio'.” 34 “Pajk'i ti a'we'en 'naka i'nio'. Ya'am ti akajanit'i ape'e ti 'naka Sinia' Jlas.”
Jesús t'eyasajnas ti iniajnat
35 Siukia jlomaye'eje, ini'wenayi siojopo times t'eyasajnas. 36 Juan i'wink'i ja Jesús ti t'iskiujnin'ni, sekyi'i iyo'ne 'ate: —¡Ji'wenak'i, 'nak Sinia' jiliajwa 'wolepo 'woma ti ijliu' ajnat'e! 37 Siojopo times Juan t'eyasajnas ti ipi'yayeyis, yamayisk'i siojo ijiojwi ja Jesús. 38 'Yina i'yen'ne ji'wechaja ja Jesús, i'wi'in japo ti yamk'i, sekyi'i iyo'ne 'ate ti i'yase'n: —¿Tempi jiniamayi? Isiujlie'ne ti iyo'ate: —Inka'neyasajnawo, ¿tepa jle'yi? 39 Jesús iyo'ne 'ate ti isiujlie: —Joniemet, 'yenayi. Yama'ni ti i'yenisi siojo yi'i'ni. Paj ti no'otiyeyiji sek 'wanjliyits'i'ne. 40 Ijwienjli siojo jle' iyo'ate Andrés, siojo Simón Pedro jikilia, 41 ta'a ti ya'am ti ijioyi ja ji'yini, yiyi ti iyonayi 'ate: —A'wena siojo Injwajieti ti Sinia' Jijliujwanik, yits'e. 42 Andrés yameje'ni ja ji'yini ja Jesús, sekyi'i ti iyonayi 'ate: —A'am ti e' iyo'ate Simón, ti Juan jlajts'a'm. 'Yejne'n, e' jawo'ne 'ate 'nakayi Cefas.
Jesús tane pa Felipe siu'neje pa Natanael
43-44 Siukia ti jlomaye'eje Jesús iyoye'ijyi ka inta 'niji yi'i jlaja ajnat jle' iyo'ate Galilea. Sek ini'wene'e'ne siojo i'nio' jle' iyo'ate Felipe, Betsaida jlele, siujlieja isi' taj'le siojopo Andrés jla'yi ja Pedro. Iyonayi 'ate ti tanayi: —Na'm ijyik'i. 45 Felipe yam'ne ti ijioyi ja Natanael, yiyi ti iyonayi 'ate: —A'wena siojo ijwilt'ipi ta'a siupa Moisés siu'neje papo injwejlanawos siupuwa 'yit'iyijpe. Je 'wena pa i'nio' ka jikiechaye naka Jesús, José jlas, Nazaret jlele. 46 Natanael iyo'ne 'ate ti isiujlie: —¿Mi 'est'iyiji ka poye pa kantajla'm japa Nazaret ka 'esie? Felipe iyo'ne 'ate ti isiujlie: —Jomet. Jlam 'esijyi ka a'we'en. 47 Jesús iyo'ne 'ate ti i'wina ilia'm ja Natanael: —Siunie 'la'n ilia'm, nak Israel jika kia'le ti lajk'i paka t'oniye ka je 'esie. 48 Natanael isiujlie'ne pet ti iyo'ate: —¿Yot'iyi'ni ti intant'iejk'i? Jesús isiujlie ti iyo'ate: —Pajk'i ta'a ti a'we'na, ti Felipe je ijiojli'ajyi, ti jle kiajwe jlaja higok. 49 Natanael iyo'ne 'ate: —Inka'neyasajnawo, ¡am ti Sinia' Jlajts'a'm, sa'am ti Israel jika kia'lits'e'm saka anechiyasts'a'm! 50 Iyo'ne 'ate ja Jesús ti isiujlie: —¿'Nakat'iyi jla'am ti ajwe'el ti a'we'na ti jle kiajwe jlaja a'la', it'imina ti je sakakiu? Je ijiate ka já a'we'en siuniwa ijiatk'iji'n kapajata. 51 Jesús yine'ne ape'e ti iyo'ate: —Ijiate siunie ajwe'el ti awo'ate, ti ja'wena ni poli ti ja 'ajlaja'm. Ja'wena napo Sinia' jijliujwajnas poli jlele ti janekiajlin'ni ape'e ni I'nio' Jlas, 'wena napo janekiajlin'ni kiajwe.
Jesús iyojwa'n at'esa' pi i'niat
1 Jlomas najape poyet'ipi ja tijwa'yi yi'i jlaja isi' jle' iyo'ate Caná, yiji jlaja ajnat Galilea. Siujlieja Jesús jlet yiji japo i'nio', 2 Jesús jla'yis japo t'eyasajnas sek yiyits'i kajeyepa ti ti'yasaja kajnoyi siojokia inlakijnieye ilisane siojo tijwa'yi. 3 'Yina siuti nojwat'ijyipi ki at'es, jlet iyone'ne 'ate ja Jesús: —Nojwi ki at'es. 4 Jesús iyo'ne 'ate ti isiujlie jlaja jlet: —Jla i'nioki, ¿yot'iyi'ni ti kiak jiwonk'i?, ti je yijliyi'ijyi siojona 'yaka jlomaye. 5 Iyone'ne 'ate siojopo iniuyisieje'ni ja tijwa'yi: —K'iuyeyijna'a siupi janwo'nase. 6 Ijwienjli sikio' itij'we ijwienjli tom'niji jawa inatiwa sisaj sekyi'i, siunapo Judíojos i'niat isiayisiamk'i'ni ti inilejes iyo siunie jike'. Cincuenta lítrojos pi ijniujli ti i'niat tisiayek'iji'n, iyot'iyi jawa setenta pi ijniujli. 7 Jesús iyone'ne 'ate siojopo inkawos: —I'niat sayets'iji'n niwak inatiwa. Ipionitisik'i'ne kiwa inatiwa, 8 sekyi'i Jesús ijliuye siojopo inkawos, ti iyo'ate: —Sayeyi k'iye pi jwamjla'a siojo jika anechiyas pet siunapo inkawos, tonieyi. Ijiatjliyi yamayisiji. 9 Siojo jika anechiyas siojopo inkawos ijyijlitam'ne jlam'ne i'niat ti 'nelanjie'e siukia ti iyo at'esa'. 'Yina je 'yijene siukia taj'le ti 'nelanjie'e. Japokata jla'am inkawos 'yijene pi iyone, kajeyepa ti jlamis ti isiayisk'iji'n kiwa inatiwa. Siojo jika anechiyas siojopo inkawos i'yase'ni siupi tijwa'yi, 10 ti iyo'ate: —¿Yot'iyi'ni? Jlam'ne tiniajnatajie'e siunie 'es at'es, ijiatjliyi ti pajata, ti jitiej je isisietajats'i'ni napo i'nio' jiwekie'aja ti tikimaja siunie je ijiat ka 'esie k'iye siunapo ijioyi jana inlakijnieye. Ijiate wat ti 'es siukia at'es ti jitiujmate pijia'm sik'ioye ti jiwents'e'm. Amta ti jiniajnat siunie 'es ti jiwents'e'm, ijiate ti 'es wata'a ti jilisa'n it'imina ki iyo. 11 Jakayi ti Jesús yi 'ne Canaja, ti yiji jlaja Galilea. Naka ti 'nelanjie'e iyoyeyi ka in'wenki'n siunie iyo ni jijweye. 'Yina ti i'wina siojopo t'eyasajnas, je 'yakakiuyis. 12 Yam'ni'ne ti ijioyisi jlaja Capernaum ti itimisieyi siukia iyoyisi, jla'yiki jlaja jlet siu'neje japo ji'niayi ijwienjliyi siu'neje japo t'eyasajnas. Sek 'wanjliyits'i paj ti jlomas nak nojwaja'm ti sek yiyits'i. Jesús ijiut kisie'e siupuwa je 'yujwanit'i ka tenaja kiajwe japa 'najla'wet 13 Ti majleyeyi ka neyi siojokia jloma siunapo Judíojos jiliakijnieye, Jesús yam'ne ti ijioyi siujlieja ajnat jle' iyo'ate Jerusalén. 14 'Nes'ne ti ijioye kiajwe siujlieja 'najla'wet. Sek i'wi'ne'ne japo ti takawejnajne'n. Po' japo iwin'ni jawa wakiajas, po'neje japo iwin'ni jawa ojwos, siu'neje japo jikiecha 'yutits'i'ni jawa jika wikijnies t'ejes yi'i siojo ji'wetis'ni pet. 15 'Yina isimi'ne siojowa nejia' sekyi'i ilisane'ne ti iyo jik'ajnata'. Ijiut'ne kisie'e wikie'eyi siojopo yi' kiajwe jlaja 'najla'wet, ijwiene'e jawa jiliajwas sontas, siu'neje jawa wakiajas. Isiajiek'iji'n jawa jika wikijniest'ejes japo i'nio' siojopo jikiecha 'yutits'i'ni, yajmatk'i isia'm siojowa yinisi'ni ape'e jawa wikijnies t'ejes. 16 Iyone'ne 'ate siojopo iwin'ni jawa ojwos: —¡Mayeyi kisie'e niwaka! ¡Ká awonayi inak ji'wukie jana Inia' 'wuk! 17 Siojopo t'eyasajnas jitiej wujwayi siukia iyo kiwa inamtis t'ipi ti tip'esina ti iyo'ate, “Je jlase' ni awo ti isiowe yapili'ni jana a'wuk ti sikiwita.” 18 Siojopo Judíojos ti i'wina siukia iyo ja Jesús, iyoyis'ne 'ate ti i'yasisi'n: —¿Ten siupi ja'wenkints'e'm ti jawoyi, 'nakayeyijna'a ti ja kasts'ajane siunie jitiajle'e ni ajweye? 19 Iyo'ne 'ate ti isiujlie japo: —Siuti janetiajnatajyi'n siujlie'e 'najla'wet, jlomas ja najapeja ka yikiajlana'aja pijia'm. 20 Iyo'ne 'ate siojopo Judíojos ti isiujlie: —¿Tepi jiwo'ojyi? 'Yejne'n, ti tilisanajayi jla'ak 'najla'wet cuarenta y seis kiwa jika najkapis kiwa yiji ti jiwekie'aja ti wakal. ¿Ti jijwe'el ja najapeja puwa jlomas ka atemayijna'a ti ja ekial pijia'm? 21 Jlamp'an'ne nakayep'antajpe ni t'ajwes ti ijwil'ni, ti ijwi'il siujlieja 'najla'wet. 22 Jak je iyoyi siojopo t'eyasajnas ti yiyeyi siojokia jloma ti Sinia' yikial pijia'm ti tajli ki a'no', jitiej wujwayispe siukia iyoyi ja Jesús, it'imina'ne ti je takakiunisi siukiwa inamtis ti yi'i ki ji'wet, siu'neje kiwa jlamtis ja Jesús. Jesús itiant'ieje ni jlosik ni i'nio' 23 'Yina ti Jesús je taljlijiajme jlaja Jerusalén, ti ijyiwitajam'ni siojokia inlakijnieye jle' iyo'ate Pascua, je pini' japo je 'yakakiu ti i'winis siukia iyo ti i'winki'n ti kiak je iyo paka in'wenis. 24 Jesús je 'yuyijk'i siupi iyo japo i'nio', 'yaka itiant'ieje siunie iniwonisi. 25 Ijiate lajatak'ipa ka injwejla'm ki iyo ki jlosik japo i'nio', kajeyepa jlam ti itiant'ieje ni jlosik iyo ni i'nio'.
Ti Nicodemo ijioyi pa Jesús ti ajnaj
1 Pope ja i'nio' Fariseo jle' iyo'ate Nicodemo, jika anechiyas jlam japo Judíojos. 2 Jakajimpe ti ijioyi ja Jesús ti ajnaj. Sekyi'i iyone'ne 'ate: —Inka'neyasajnawo, je kast'ayiji'n ti am ti inka'neyasajnawo'wa'm ti jitiajle pi Sinia'. Ijiate lajk'ipa ka inkajli ka inlesane iyo siuniwa ji'wenki'n siuti ja Sinia' ja ke inejiap. 3 Jesús iyo'ate ti isiujlie: —Ijiate, ijiatk'i siunie jayo, lajk'ipa kan'we'en pi k'iejliyi pi Sinia' jika anechijiayas ijiatjliyi jla'am ni i'nio' ti yikiajle'e ti k'iejli yiji'n, nak jantant'ieje. 4 Nicodemo ti ipi'yaye ja Jesús ti kia'iyo iyo'ne 'ate: —¿'Est'iyiji ka inekiajle'e ka k'iejli inejyi'n ni i'nio' ti kiji'il? ¿Jot'e ka 'najane paka iniwone ka inapi jitiowaja'm jana jlet, ka nekiajlayi'iji ka k'iejli inejyi'n? 5 Jesús iyo'ate ti isiujlie: —Ijiate, ijiatk'i siunie awo ti jayo'ate, lajk'ipa ka 'najane paka inwone ka 'noyi ni jika anechijiayas pi Sinia' ijiatjliyi jla'am ni i'nio' ti k'iejli yijijyi'n ni i'niat jla'yi jana Sinia' jikimet. 6 Siunie tajle pet ni i'nio' ti yiyetaja'n, ¿tepa jawo ka kiak je iwo pet? 'Yina jlam pet siunie k'iejli yiji'n ti tajle pet jana Sinia' jikimet ti 'es, ¿tepa jawo pet ka kiak je iwo? 7 Ká ajwelna'a ka inkelit siunie ti jayo'ate, “Jikajlayi ka ekiajlayi'iji ka k'iejli awayets'iji'n.” 8 Siunie jlajwu ti yejwutataje tajli pi tajli, 'wanjliyi tipe'yakietak'i'ni lapawo ti je ti'niejenaja siupi tajliyi siu'neje pi ijiojwi. 'Yina kiak iyo'ni siunapo ti k'iejli yik'iji'n ti tajle pet jana Sinia' jikimet. 9 Nicodemo yikiajlayi'iji ti i'yase'n ti iyo'ate: —¿Tepi t'i iyo ti kia'iyo? 10 Iyo'ne 'ate ja Jesús ti isiujlie: —¿Tepi t'i iyo ti jijwe'el je 'najane paka wone niwaka, ti a'am Israel jika kia'lis jika 'neyasajnawo'wa'm? 11 Ijiate, ijiatk'i siunie ti kasts'ajane ajwela, siunie a'wena ajwela. 'Yina kaskakiu ti ajwelata'ase'm. 12 Jijwel ka sakakiuye'ejyi ti atiejeje siuniwa ti 'yakaj yi' ajnat'e. ¿Tepa jawo ka ak'iuyek'i'm siuti atiejeje siuniwa yi' poliyi? 13 “Lajk'ipa ka i'nioye ajnat'e ka ijnojwa'm ni poli, ijwienjli jla'am siunie tajla'm ta'a ti 'nelanjie'e nama ajnat'e, naka I'nio' Jlas. 14 Iyoye'ate pi Moisés t'ipi ti yin pijia'm pi injla yi'i pi ajnat laj i'nioye'e, kiak janwo'ni pet ni I'nio' Jlas siunie ja tiwonaja ti ja tena pijia'm. 15 Jant'eminayijna'ape siunie i'nio' ti ja ke inkakiu intajana'a siojona in'wasankiye ti laj jlaja.” Sinia' wuj ti jlemijnaye yi'ne napo i'nio' yi' ape'e 'ni ajnat 16 Lapakawo ti Sinia' wuj ti yimijne'n napo i'nio' yi' ape'e 'ni ajnat, it'imina'ne ti yikial siunie Jlas ti ijwienjli, ja'nakayeyijpe siunie i'nio' ja ke inkakiu ja ke inetia'n, 'wenajliyi jla'am ti japoye siojona in'wasankiye ti laj jlaja. 17 Sinia' je ijliuye pa Jlas ka insa'a napo i'nio' yi' ape'e 'ni ajnat ti ijliuye t'ipi, 'wenajliyi ti ijliuye ka injwajiete'n. 18 I'nio' ni je 'yakakiu ni Sinia' Jlas, je tisiejek'i. Jlam pet ni i'nio' ti kakiujnieta 'yakaj ta'a ti ja tisiejek'i, jitis pet ti 'yakakiu ni Sinia' Jlas ti ijwienjli. 19 Wikie'eyi siunapo kakiujnietas 'yakaj ta'a ti ja tisiejek'i'yi, 'yaka iyo siuniwa je isis. Je yiminis siojona kates ti nama ajnat'e, 'wenajliyi ni ajnatiok ti 'namajasi. 20 Wikie'eyi siunapo iyo ni je 'es ne'wajasia'm jana kates. Je isienisiji jana kates, ti iyo ka je 'nakaja ape'e siunie je 'es ti iyoyisi. 21 Jlam pet siunie iyo ni ijiatk'i, nak lajk'ipa ka woyi ka je injweyi jana kates ti ijioyi, 'yina 'yakaja pet siunie iyo ti its'iuye ni Sinia', ni iyone.
Juan inajiejnawo ijiunit pa Jesús
22 Jlampa yama'niji siukia iyo, Jesús jla'yis japo t'eyasajnas ti ijioyis 'niji yi'i jlaja ajnat Judea. 'Wanjlejen'ne pa nojt'ijia'm kiwa jlomas, ti iniejiejne'n japo i'nio'. 23 Siujlieja ajnat jle' iyo'ate Enón je tojwape'n jlaja Salim, sek yiye'epe pet ja Juan ti iniejiejne'n japo i'nio' ti ijioyi'ni, kajeyepa ti je k'istie' jlam ki i'niat ti yiniji japo. 24 Jakiak siojokia jloma ti je t'otiejli'ijyi a'laja'm ja Juan. 25 Siojopo Juan t'eyasajnas iniewitayisijpe siojo Judío ape'e siunie iniwonisi ti inileje'n iyo niwa jikeyis ti jlomas ti iyo ka inilesanisiji. 26 Yam'ni 'ne ti takajwejlanisi ja jika anechiyasis, iyonisi'ne 'ate ti yiyeyisi: —Ika'neyasajnawo, siojo i'nio' yi'ne ajap ts'e yi'i ja Jordán 'niji isia'm, siojo jijwel'ni'ne. 'Nak p'an yiye'e wikie'eyi napo i'nio' ti ijioyi ti iniejiejne'n. 27 Tamti'ne ja Juan ti iyo'ate: —Lajk'ipa ka neyi ni i'nio' siuti Sinia' ka je jla'm ka inwejna'm pi k'iejliyi. 28 Asam'ne ti sipe'yaye ti awo'ate, “Je ya'am siunie Injwajieti Sinia' jijliujwanik, 'wenajliyi pet siunie isijmaye ti tiwenak'i'm ka niank'iye.” 29 'Yejne'n, ataj enayi 'ate ti po' ni janjwa'yi, siunie ti asejnia jana janeyi ti yijap, je int'ayeyiji'n pet ti naka siunie tijwa'yi. 'Yina po 'neje siunie t'ajajnajwa ti yijap, its'iuye'ni, je jlase' pi iyo ti inkaj'ni ti ipi'ya siupi iyo ti tamti. 'Yina kia'awo'ni pet, siu'nie inikanitiejeye lajayi'ni ji'wetayi. 30 Jlajma injlasa'nina'a pijia'm ni janwo ti ja tiwunitie, jlam pet ti ya'am jajliasa'nina'a pet isia'm.
Siunie tal 'niji pijia'm
31 Siunie tal 'niji pijia'm t'a'n ape'e wikie'eyi napo i'nio'. Jlam pet siunie tal 'ne ajnat'e ijwi'il siuniwa wask'i'nelaja yi' ajnat'e, kajeyepa ti ajnat jlele. Jlam pet siunie tal poliyi nak siunie ti t'a'n ape'e wikie'eyi napo i'nio'. 32 Ijwi'il siuniwa i'wi'in, siu'neje niwa ipi'ya, 'yina ka kiak iwo ka jwanjliyi paka ink'iuye siunie ijwilta. 33 Siunie i'nio' je 'yakakiu, nak 'yakajanit siuniwa Sinia' jlamtis ti ijiatk'i siunie iyoyi. 34 Siunie ti Sinia' ijliu', yamtik'iji'n siunie iyo niwa Sinia' jlamtis, kajeyepa ti Sinia' ipijlatijnia'm siojona jikimet. 35 Sinia' yimi'n ni Jlas, yikiajli'ne ni jijweye ka inkie ape'e wikie'eyi niwa wask'i'nelaja. 36 Siunie i'nio' ja ke inkakiu naka Sinia' Jlas nak siojona in'wasankiye ti laj jlaja japoye pet. Jlam pet ni i'nio' ti 'yakakiu ja ke in'we'en janak in'wasankiye 'wenajliyijna'a pet siunie ja tiwonaja ti Sinia' jiwak jane'ne.
Samaria jleliki ini'wene pa Jesús
1 Siojopo Fariséojos t'ijieyeyi ja Jesús ti 'yaka'm ape'e ja Juan siojopo t'eyasajnas, jla'yi japo jiniejiejnas ti 'loj jla'am. 2 (Jlam'ne je jakayeta ja Jesús ka inajiejne'n japo i'nio', japokata jla'am japo t'eyasajnas). 3 Jesús t'ijiek'i'ne pet kiaka, sekyi'i yam'ne ti tajla'm jlaja Judea yapilie 'niji yi'i jlaja Galilea; 4 'yina je iyojonk'iye ka nojwap jawa ajnatis yiji jlaja Samaria. 5 Yiyeyi siujlieja isi' jle' iyo'ate Sicar, je tojwape'n siujlieja ajnat Jacob yikialjinipi pa jlas José ka jikimita'. 6 Sekyi'i siujlieja jika i'niatjimpe pa Jacob. Jeús lapakawo ti yiwa siojo tajli, it'imina ti sek yiye'eje'n yi'i jlaja i'niat. Jlampa majleyet'iyijpe pa ka 'najlikisie. 7-8 Jlampa yama'ni japo t'eyasajnas ti iyoyisijyi'n jlaka isija'm, 'nesa siujlieja i'nioki Samaria jleliki ti it'iejliu. Jesús iyone'ne 'ate jlajaka i'nioki: —Joni pet pi jwamjla'aja ni i'niat. 9 Kajeyepa ti siunapo Judíojos je 'esi wita'm napo Samaria jlele, it'imina ti ji'lij kiak iyone ti isiujlie, ti iyo'ate: —¿Yot'iyi'n ti jit'iejlijk'i'm ni i'niat, ti a'm Judío'a'm, 'yina ti yam Samaria jlelikik'i'm pet? 10 Jesús iyo'ate ti isiujlie: —Siut'itie ka akatejnisieyi jlasa pa ka 'najane paka wone siunie Sinia' iwijna'm napo i'nio', siu'neje ni i'nio' t'ajlam'ni ni i'niat, amta ka 'ajla, sekjane'yi ka inwenata'm siunie i'niat ti in'wasankiye. 11 Iyo'ne 'ate siujlieja asejnia: —Lajk'ipa ka akiene ka asayi, ji'wenie'e ti tojwi. ¿Tepa t'e jatajle'e siupi i'niat ti in'wasankiye siupi jijwelk'im'ni? 12 ¿Ent'a ti jika'm ape'e siupi sitis t'ipi Jacob?, ti jlam ti yikialts'e siujlie'e jika i'niat ti i'yayisji'ni'nijpe, siu'neje papo jilis jla'yi ti jla'am, jiliajwas kia'iyojliyi ti i'yayinisi'ni. 13 Jesús isiujlie ti iyo'ate: —Siujlie'e i'niat, siupapo janami'ni ti jan'yaje ja ke inak'awote'n. 14 I'nio' pet ti jan'yaje siunie i'niat ti jawijna'm, ja ke pajana'a ka nekiajle'e ka inki'im. Kajeyepa ti siunie i'nio' ti jawijna'm 'nak i'niat janwoyeyinie'e siunie janwo ti ja jlomasiek'i ti ja ke inejets'i ilia'm siunie i'niat ti jantajla'm ti janwo 'wasankiyeja'. 15 Siujlieja i'nioki ipi'ya'ne jiwekie'e, sekyi'i iyo'ne 'ate: —Ijiatp'ane, wenk'i'm jiat'eje pak i'niat, 'nakayeyijna'a ti ja ke iyikiajle'e ka siki'im, ja ke iniamana'a ka iniam'ni i'niata. 16 Jesús iyo'ne 'ate: —Maj, apili pi ak'iemjla. 17 Iyo'ne 'ate jlajak i'nioki ti isiujlie: —Laj its'iemjlaye. Jesús iyo'ne pet 'ate ti isiujlie: —Jlam je wo ti jijwe'el laj ak'iemjlaye, kajeyepa 18 ti ijwienjli sikio' itij'we japo ajwa'yista'ni jletieje pa ti jiliyi. Siunie jlejiap je ak'iemjla. Ijiatk'i siunie jijwe'el. 19 Ti ipi'yaye ti kia'iyo, iyo'ne 'ate jlajak i'nioki: —'Yaka'niona, ijiatp'aneje ti a'm injwejlanik jiwo'wa'm. 20 ¿Tepit'i iyo ti sa'am ti atajlaja'm jana Samaria? Saka kijilas mases 'nak yine'e siujlie'e tikijnaki ti iyunitis pi Sinia', ti Judíojosts'ase'm jijwelaye ka japakataja Jerusalén ka toki'ni ka tiwunitie pi Sinia'. 21 Jesús isiujlie ti iyo'ate: —Jli i'nioki, ke sakakiu siunie jajwi'la'm. Yiyeyi siojona jloma ti ja ke asetiana ka ajoyeyi'ni janak tikijnaki, ka janakaye 'neje wek jana Jerusalén, ka wunitie pi Sinia'. 22 Ti asa'am Samaria jlele'ase'm je 'najanayi siunie jiwunitie, sa'am kasts'ajane kajeyepa ti siojona injwajieti tajle napo Judíojos. 23 Na'am siojona jloma, siujlie'e awakieja'm, ti ja ijiatayiji napo i'nio' ti janwunitis ni Sinia', lapakawo ti po' siojona Sinia' jikimet ti 'es ti janoyeje. Nak iyojonk'iye ni Sinia' napo iyunitis kanwo. 24 Sinia' jla'am ti yiyi siojona jikimet ti 'es, tepa janwo ka kiak je inwo ka ijiatayiji kanwunitis, je lajk'i jana Sinia' jikimet ti 'es ti janoyeje. 25 Jak je iyoyiji'ni siujlieja i'nioki ti ipi'yaye, iyo'ne 'ate: —Ts'ajane pi awone ti jon ka 'nes siupi Sinia' jijliujwanik ti Injwajieti, siuti ja'nes ja 'nakajanitiek'ijinna'a sik'ioye wikie'eyi siuniwa wask'i'nelaja. 26 Jesús isiujlie'ne ti iyo'ate: —Siupi jijwel'ni, ¡siu'nie jikamtijniene, 'naka! 27 Jlampa 'nesa'ni japo t'eyasajnas, kanwojlit'iyisipi pa ti i'winayis ti takamtijniene jlajak i'nioki. 'Yina lapakawo ti isipits'i, it'imina ti lajk'ipa kan'yase'n, kanwo'ate, “¿Yot'iyi'ni, tempa jisitia'n, ti jikamtijniene siojona i'nioki?” 28 Jlamsek iliyi'i'ne wekie'e jlaja jlate ti yama ti yapi isiyi, ti ijwile japo i'nio' ti iyo'ate: 29 —Joniemet ja'yenaja ja i'nio' ti 'yakajanitk'i ape'e wikie'eyi siuniwa 'yakeyis ti awot'iyi. ¿Ent'a 'naka ni Sinia' jijliujwanik ti Injwajieti? 30 Sek tajlayits'i japo i'nio' siojopo tal isija'm ti yam'ni, ti ijioyisi. 31 T'eyasajnas iyonisi'ni 'ate ti ijliutiejesi kan'yekiu'n: —'Yaka'niona, 'yekiun kiu wata'a. 32 'Yina isiujlie japo ti iyo'ate: —Po'o siunie yak ti je intant'iejayi. 33 Ti ipi'yayeyis ti kia'iyo japo t'eyasajnas iyoyis'ne 'ate ti ini'yasis: —¿Ent'a pot'ijyi wata'a pa nameje pi itiujw? 34 'Yina Jesús isiujlie'ne japo t'eyasajnas ti iyo'ate: —Siunie yak, naka ti awo siunie ijliuyijk'i'm ka itime ni jikijmaye ni i'nio' sijliu'. 35 Ti asa'am jiwoye'ate, “We'lajas ijniujlits'i puwa tomk'iye ka tilienaja'ana'a niwa jla' ni inwomik.” Awo'ate, 'yenajyi'n ni inwomik, wakajlayi ka tiliena'a. 36 I'nio' ni ilie'ne ni inwomik tiwok jikajaye, siuniwa ilie'ne ti ijiut wita'm ijioyi jana in'wasankiye ti laj jlaja. Ja 'nakayeyijna'a pet siunie ilie'ne ni inwomik jla'yi ni siunie takawijna'n kiak janwo ja inkasaja'n. 37 Ijiatk'i siunie ti iyo'ate, “Siunie i'nio' takawijna'n je naka ka inla'ne ni inwomik, 'wenayi pet ni siunie ilie'ne.” 38 'Yejne'n, ajlo'wase siunie inwomik ti je asampe ka akimayi, ji'wena' ti 'wenayi siunapo isima ti 'nelanjie'e, asa'am jlam jiwonayi pet 'ate ti jiliena'yi ni siunie jikimet.
Siupapo Samaria jlele je 'yakakiuyis pa Jesús
39 Siojopo sek ji'wet'e jlajak ajnat Samaria, ti ipi'yayis siujlieja i'nioki, siukia ji'lij ti iyo'ate, “'Yakajanitk'i ape'e wikie'eyi siuniwa 'yakeyis ti awot'iyi”, sekyi'i ti je 'yakakiuyeyis. 40 Ti yiyeyisi, iyonisi'ne 'ate ti je iwinis: —'Wanjli kiu wat sajap. Ijiatjliyi times kiwa jlomas ti 'wanjleje'n. 41 Sekyi'i ti ijiatayiji ti 'loj japo je 'yakakiu siukia iyo, ti jla'am ti tamti. 42 Sekyi'i'ne ti tiwonaja'ne 'ate jlajak i'nioki: —'Nakayi je pi amkataja siuniwa iyo niwa amtis ti jikajwejlants'e ti je akakiuk, 'yina ti kia'iyo ti sa'am ti ape'yak. Jla'yi ti ijiate ti kasts'ajane ti jla'am ni siunie Jijwajieti napo i'nio' yi' ape'e 'ni ajnat. Jesús i'mienit pa jlas siupa t'as jitieyi'i pa anechiyas ti jota 'na'al 43 Jlampa yama 'niji siukiwa jlomas times, Jesús yam'ne ti tajla'm jlaja Samaria ti ijio 'niji yi'i jlaja Galilea. 44 Je yapi 'niji yi'i jlaja Jerusalén kajeyepa siuki iyo jla'am ti ijwi'il ti iyo'ate, “Siunie injwejlanik jiwo ti yi'i jana ajnat ti ji'wetata'a, ji'wetijwas je iyo lajaye.” 45 Ti yiyeyi jlaja Galilea siojopo sek ji'wet'e isimis ilia'm, lapakawo ti i'winis siukia iyoyi ti yiyisi jakiak inlakijnieye Pascua ti yi' Jerusalenne kiakayik'i. 46 Ti paj'ni wat ape'e, yapilie 'niji yi'i jlaja Caná yiji jlaja Galilea, yi'i ti iyojwa'n at'esa' ki i'niat. 'Yina pope ja i'nio' anechiyas siojo 'yasa'n jitieyi'i, ji'wet jlaja jle' iyo'ate Capernaum, siojo jlas je 'es'ni. 47 Ti t'ijieyeyi ti yi' Galiléaja ti tal Judéaja, yam'ne ti ijioyi ti inip'elisini ti iyo'ate: —'Yaka'niona, kawo wata'a ka na'm ijyik'i i'wite, ka ajwajiet ja yas ti je pa 'esieyiji. Majleyeyi ka 'na'al. 48 Jesús isiujlie ti iyo'ate: —Siuti je 'wena niwa wask'i'nelaja ka ti'wenkina'ase'm, siu'neje niwa ti inesi'lieta, jikakiunieyi. 49 'Yina iyo'ne pet 'ate ja anechiyas 'yasa'n jitieyi'i: —'Yaka'niona, naj, na'm ijyik'i. Kets'ijyi'n, alenjlipa ja yas ti je 'yaljli'ijyi. 50 Sekyi'i ja Jesús iyone'ne 'ate: —Maj jiwekie'e ka api. 'Wasa'n pi as. Siojo i'nio' je ikakiu ja Jesús siukia iyone, sekyi'i ti yama ti yapi. 51 'Yina ti majleyeyi siojo ji'wet, jikawos t'osiyeyits'i ilia'm ti ijwilisia'm, ti iyo'ate: —¡'Wasa'n sie as! 52 I'yasen'ne japo jikawos ti iyo'ate: —¿Tent'i japa inetinki yiyi japa kiliekie' ti 'esie? Iyo'ate ti isiujlisie pet: —No'oti, ti kilie' toma 'niji, ti nojwayi ape'e. 53 Jak siojo jinia' ja kia'le jitiej wujwayi ti jakiak siojokia inetinki yitine ja Jesús ti iyo'ate, “'Wasa'n pi as.” Sekyi'i'ne ti je 'yakakiuye ja Jesús, kia'iyojliyi japo ji'wet jlele, wikie'eyi ti je 'yakakiuyis. 54 'Yina kiakayik'i'ne ti timiesieyiji ja Jesús ti iyo, ti i'winki'n siojo ti yisi'liet japo i'nio', ti ijio 'niji Galiléaja ti tal Judéaja.
Jesús ijwiejiet pa i'nio' ti je t'onk'i yi'i japa i'niat ti inajie'wet jle' iyo'ate Betzata
1 Yi'i 'neje jakia jloma ti paja, Jesús yapilie'eje Jerusalenne, ijyiwite siojokia jloma ti Judíojos iyo jiliakijnieyeja'. 2 'Yina sekyi'i siujlieja i'niat ti inajie'wet jle' iyo'ate Betzata, ti Hebréojos ji'lij, 'yakama'a ja 'wuk kiwet jlaja isi' jle' iyo'ate 'Wolepo' Ka 'Wuk Kiwet. Ijwienjli 'ni sikio' itij'we siojowa jlopalikis jlajak i'niat. 3 'Loj japo je isis tijwajiape'n. Po' japo talojo', siu'neje japo je t'ojni'n, siu'neje japo t'ajwes 'yajlits'iji'n, sek iniuyi'ik'iji'n ajnat'e yi'i siojowa ji'wetis ni jla'am. 5 'Yina po' siojo i'nio' ti pajk'i ti je 'es yiji japok je isis, treinta y ocho puwa jika najkapis yiji ti yi' jlo'wit'e. 6 Jesús ti i'winayi ti sek iniuyi'iji'n, ta'a ti 'yijene pi iyone ti k'iejliye je iyo siupi jiliaye. Iyone'ne 'ate: —¿Jiwotajank'iye ka i'nes? 7 Isiujlie ti iyo'ate: —'Yaka'niona, lapakawo ti lajk'i'ni wekie'eja paka inki'm isiajwe ka sejni'ni jana i'niat ti ti'wesieta. 'Wanjliyi'iji ti awotaja ka yikia'm, 'nes pa sekyi'i ti iniana'aja its'ioye, inianayi'iji jla'am ti yajma'm. 8 Jesús iyone'ne 'ate: —Kasit, kima ni ajotik, maj. 9 'Es'ne jak i'nio' jakayi, isim'ne kiajwe ja jlotik, sekyi'i ti yama, 'esieyiji ti t'iskiujni'n. Ijyiwitajam'ni siojokia jloma ti i'nio 'wanjlijyi'n. 10 Siojopo Judíojos ti i'winayis ti its'iewijin'ni jawa jlotikiwa, sekyi'i ti iyonisi'ni 'ate: —'Yejne'n, siujlie'e jloma awaki jla'ak jloma ti je 'esiji ka atejliajan'ni ni ajotik. 11 'Yina iyo'ne 'ate jak i'nio' ti isiujlie: —Siojo i'nio' ti sijwajiet iyonk'i 'ate, “Kima ni ajotik, maj.” 12 Iyoyis'ne 'ate ti i'yasis'ni: —¿Ten pak i'nio'? 13 Isiujlie japo ti iyo'ate: —T'eyi, je sitiant'ieje. Lapakawo ti je pini' japo i'nio' it'imina'ne ti je i'wink'i'ni. 14 Paj ti i'wina jla'am ja Jesús yi'i jlaja 'najla'wet jak i'nio', iyone'ne 'ate ti ijliuye: —Ke ekiajle'ena'a ka awo ni akeye, 'lojwinie'e ka ijiatayiji paka awo. 15 Yama ja i'nio' ti ijwile japo Judíojos ti iyo'ate: —Jakap'ampe ja Jesús ti sijwajiet. 16 Kiak it'imina'ne ja Jesús ti Judíojos iyo jitiejiejwaye, ti yiniji'ni pi k'iejliyi ti i'winki'n siojona jloma ti i'nio 'wanjlijyi'n. 17 Jesús iyone'ne 'ate japoka: —Jlam kia'iyo, siunie Inia' talk'i'ni ti isijme'n, 'yina kiak awo pet akijme'n. 18 Jak je iyoyiji'ni siojopo Judíojos ti kat'ajayi siukia iyo, ti yiminisk'i ti iyo kanlanis ti ipi'yayis ti je janakata ti je iyo lajaye siojona jloma ti i'nio 'wanjlijyi'n, siu'neje ti ijwilis ka iniwojwa'n 'ate pi Sinia', ti inijwe'el ti pak Jinia' pi Sinia'. Sinia' yikiajle pi jijweye ni Jlas kan'maniti'n jla'yi ka'nakajanit napo i'nio' 19 Jesús iyone'ne 'ate japoka: —Ijiate, ijiatk'i siunie jayo ti jajwi'lase'm, ti Sinia' Jlas je 'yakajli paka k'iejliyeyi pa kanlesane ka jlama. Ijiatjliyi jla'am siupi i'winaja ti iyo pi Jinia', pakayeyi wekie'e ti iyo. Wikie'eyi siuniwa Jinia' iyo, kia'iyojliyi pet ti ilisane. 20 Siunie Jinia' yimi'n ni Jlas, i'winkina siunie iyo. Ja ke ja'nakatajayik'i japoye'eje siojona jloma ti ja ijiatayiji ti janka'm ape'e siunie iyo 'nakayi, ti ja inesi'lieta. 21 Iyoye'ate ni Jinia' ti i'nisatk'i pijia'm napo 'yajle'n, 'yina kiak iyo'ni pet ni Jlas, iwijna'm napo iyo kanwejna'm jana ji'wasankiye. 22 Je jlam'ne ni Jinia' ka jlama ka 'nakajanit ka ne'yi pi i'nioye, 'yina ijwienjli jla'am ni Jlas ti pajk'i ti yikiajle wikie'eyi ni jijweye, nak 'yakajanit'ne jla'am ni i'nio', 23 ja 'nakayeyi ti ja tiwunitie ka iwoyena'a 'ate ni Jinia' ti intonitieye tena'a. I'nio' ni je iyunit ni Jlas, ja ke injwe'el ka pakataja ka inwunit pi Jinia' ti ijliu'. 24 “Ijiate, ijiatk'i siunie jayo ti jajwi'lase'm, ti siunie i'nio' ti its'iuye siunie ajwe'el, jla'yi ti je 'yakakiu siunie sijliu', itiej jana ji'wasankiye ti laj jlaja. Nak ja ke tisiejek'i lapakawo ti tijwajyi ni jota jiliayeja', yiyeja'm pet jana in'wasankiye. 25 Ijiate, ijiatk'i siunie jayo ti jajwi'lase'm, ti po' siojona jloma siujlie'e awakieja'm, ja wikie'eyeyi napo i'nio mases t'ipi ti pajk'i ti 'yajle'n jampe'yayi ni jla'lap ni Sinia' Jlas. Siunapo jampe'yayi napok 'wasanajana'a. 26 Iyoye pet 'ate ni Jinia' ti tajle jana in'wasankiye, kiak iyo'ni pet ni Jlas ti pajk'i ti yikiajle ni jijweye ka inwejna'm napo i'nio' jana ji'wasankiye. 27 Siu'neje ti yikiajle ka 'nakajanit napo i'nio', ti jla'am ti I'nio' Jlas. 28 “Ke k'iejliyeyijna'a paka awoyeyi ka ijnots'inajyits'i siunie ti jajwi'lase'm. Ti japoye jana jlomaye siunapo ti pajk'i ti 'yajle'n ti ja wikie'eyeyi ti jampe'yayisi siunie jla'lap jawo ni Sinia' Jlas, 29 jla'yi ti janok'i kisie'e ti jantajli niwa a'no'ol. Siupapo iyot'iyipi siunie 'es napok janapits'i pijia'm ti ji'wasankiye ti laj jlaja japoye. Jlam pet siupapo iyo ni je 'es, kiak janwo'ojyi ja'nesk'i pijia'm ti jantayi ka tisiejekik'i.” Siuniwa wask'i'nelaja ti 'yakajanit ni Jesús ti Sinia' Jlas 30 Jesús iyoye'eje 'ate: —Ya'am je akajli ka yama ka itiajlatk'i ka iyo pi k'iejliyeyi. Siunie ti akajanit'i ape'e napo i'nio' ti Inia' yikialk'i, ijiate awo. 'Yina 'es ti awo, 'yaka je ya'am ka intalk'i ka yama, najata jla'am ti awo siunie iyo ka iyo ni sijliu'. 31 “Siuka yama ya'am ka inijwe'el, siunie jajwi'il laj lajaye. 32 'Yina po' siunie sijwe'el, naka Inia', nak ijiate ti laja po' ni jlamtik. 33 “Ti jikajlunieyi'ni ja Juan ka ti'yasaja'n, siunie iyo ti isiuj'liase'm nak ijiatk'i. 34 'Yina je naka ka ts'esi puwa jlamtisie' pa ka ne'yi pi i'nioye ka sijwe'el. Awo ti ja 'nakayeyijna'a ka ajwaye. 35 Juan iyoye'ate jana kates ti yata'm ape'e 'ni ajnat, siunie jla'al inkaja'yi ejlowekie'e ti je itioyi'i. 36 'Yina po' 'neje siunie jwamjla'a ti 'yaka'm ape'e ja Juan ti sijwe'el: 'naka siu'nie awo. Siunie awo ti Inia' ijliuyijk'i'm, naka'ne ti 'yakajanit ti sijliu' ni Inia'. 37 “Siunie i'nio' ti sijliu' kiak iyojliyi pet sijwe'el. 'Yina ka kia'iwo ka ape'yaye pi jla'lap, ni'ne ka 'wena, 38 lapakawo ti nak it'imina ti jikakiunieyi siuniwa yamtis, ti ya'am ti sijliu' ni Inia'. 39 Wuj ti ji'yena' niwa inlesajna' kajeyepa ti jijwelayeta ka atajlayiji jana in'wasankiye ti laj jlaja, jlam'ne siuniwa inlesajna' niwak sijwe'el. 40 Ka kia'iwo ka joyek'i, ka'wena' jana as'wasankiyeja'. 41 “Ejlowekie'e ti je seminata napo i'nio', je awoyi ijliak'aliye. 42 Sitiant'ie'ase ti je jlemina' pi Sinia'. 43 Awo ti ya'am ti aname niwa jlamtis ni Inia', 'yina ka kia'iwo ka 'wenayi'ni ilia'm ka kima'yi. Jlam'ne ka na'm pa ka name puwa ka jlamtisie', pak ji'wenayi'ni ilia'm ti jikima'yi ilia'm. 44 ¿Tepa t'e jawo ka je sakakiuye siunie ajwe'el, ti asama'yasa'm ti jininekiajlayi ti jiniwunitie, jlam'ne ka woyejyi'n jla'am ka ijnonitie' pi Sinia' ti pakata? 45 “Ká atejnisieyijna'a jitieyi'i ni Inia' ka yama ka itiajlat'ase'm. Siunie jla'm ijiatayi Moisés, ti jinijijwiyejyin k'iye siupi iyont'iyisipi, janakaye jla'am. 46 Siuka ka je akakiuye siupi Moisés iyot'iyipi, kiak iyotaja'ni pet siuniwa ajwe'el ka je sakakiuyeyeta, kajeyepa siupa Moisés t'ipi ya'am ti sijwe'el. 47 Siuti jikakiunieyi pi ijwilt'ipi, ¿tepa jawo ka k'iuyeyi siunie ajwe'el?”
Jesús 'yakojniejne'n papo i'nio' cinco mil
1 Itimeje ja Jesús siukia iyo, yama'aja ti iwiets'ila ji'wechaja siujlieja tewuk iliyi Galilea, tiwonaja'ni 'neje 'ate Tiberias. 2 Je pini' japo i'nio' yamk'i, lapakawo ti i'winis siukia iyo ti i'winki'n ti ijwiejete'n japo je isis. 3 Sekyi'i ti ijioye ape'e jlaja tikijnaki jla'yis japo t'eyasajnas, yiyeyisk'iji'n seka'a. 4 Jlampa je tojwa'a siojokia jloma jiliakijnieye napo Judíojos jle' iyo'ate Pascua. 5 Jesús i'yejne'n japo i'nio' ti je pini', sekyi'i iyone'ne 'ate ja Felipe: —¿Tepa t'e jatiajlaja'a paka iwinaja'm 'napo i'nio' kantojw? 6 Ti jla'm iyone ja Felipe, siupi ka jitienkiujnieye inwone, ijiatjliyi je t'ayiji'n siukia janwo ti jankiujlie. 7 Felipe iyo'ne 'ate ti isiujlie: —'Wanjlit'itieje ka doscientos denáriojos ka tenaja puwa ka woyejesa', 'wanjliyi ka jwamjla'ajamk'i'ni 'yina ja ke ijnojli. 8 Ijwienjli'ne siojo t'eyasanik jla'am ja Jesús, jle' iyo'ate Andrés, Simón Pedro jikilia, iyo'ne 'ate: 9 —Poyeta siu'nie kia'le itiun'ni 'niwa woyejes ijwienjli sikio' itij'we ti tajle pa jlesiki mak, times 'neje niwa si'yus. ¿Jot'e ka ijnojli napo i'nio' ti je jlase'? 10 Jesús iyo'ne 'ate ti isiujlieyi japo t'eyasajnas: —Jloyeyi napo i'nio' ka inek'iji'n. Jop yi'i jak ajnat yiyits'i, jak yiyisk'ijin'ni'ne. Cinco mil japo i'nio' ja nojwaja'm ti 'najli japo ayijnies ti tetitinak'i. 11 Sekyi'i ja Jesús isimi'ne jawa woyejes, iyoye t'ajlayeja' ape'e ti t'ajle pi Sinia', itime ti ijliuyeyi ka tiwenak'i japo siojopo yik'iji'n. Kiak iyonjliyi kiwa si'yus, itime ti iwinak'iji japo pi k'ie'e pi iyo kantowis. 12 Ti yip'isieje'n japo i'nio', Jesús iyone'ne 'ate japo t'eyasajnas: —Mayek'i'ni niwa jijwa'al, 'esiji ka lajak'ina'a puwa ka akajyinana'a. 13 Yamayisk'i'ni ti ijiutis wita'm, itijwa'm sikioye times tom'niji kiwa tipoyijk'i siojowa tenajats'i jijwa'al kiwa woyejes ti taj'le pa jlesiki mak. 14 Iyone'ne 'ate japo i'nio' ti i'winayis siukia iyo ki i'winki'n: —Ijiatp'aneje ti 'naka 'ni tijwela'nijpe, siupa injwejlanik jiwo ti ja'nes ajnat'e. 15 'Yina Jesús 'yijene ta'a pi iyone siojopo i'nio' ti iyotaja ka inkimits'i ka inwonisi jika anechiyasa'. Yama'aja siojo ijiojwi ti iyo ka injwanjli paka ne'yi, ape'e jlaja tikijnaki ti toj pijia'm.
Jesús t'iskiujni'n ape'e pa i'niat
16 Ti k'iejli ajnalis wujwak'i'ni, siojopo t'eyasajnas ja Jesús yama'ni ti ijioyis tewuk iliyiji 17 tomayis i'niat ji'wechaja 'niji yi'i jlaja Capernaum. Jlampa ajnaj wujwa, ti je 'nesjli'ijyi ja Jesús. 18 Yejwuti'ni siukia jlajwu ti wujwi, jak je iyoyiji'ni siojo i'niat ti iyo ji'wukijlilisjimpeja'. 19 Pa nojt'ijiampe puwa kilómetrojos ni'ne ka injwanjli sikio' intej'we, ni'ne ka injwanjli japa tom'niji, ti i'winayits'i ilia'm ja Jesús ti ya'm ilia'm jlaja kasejkana, ti t'iskiujni'n ape'e ki i'niat. Je jlase' ki iyo ti je ijwiyisie. 20 Jesús iyo'ne 'ate: —¡Ya'am, ke ijnots'inak'i'm! 21 Iyoyeyis 'ate: —¡'Yaka'niona, kets'ijyi'n, sojmajia'm jla'a kasejkana! 'Yaka injwejlikie t'ipi, jakayi ta'a t'ipi ti yi' kisie'e jlaja kasejkana.
Siupapo i'nio' iyoyisijyin'ni pa Jesús
22 Siukia ti jlomaye'eje, siojopo i'nio' ti sek je tajlits'i jikiujts'i ja tewuk iliyi, iyoyeyis 'ate ti ti'yasanisi'ni: —¿Tepa t'e yi'i ja Jesús? Ti yama'ni japo t'eyasajnas je yamk'i, jlajakata 'neje siujlieja kasejkana yiyisi. 23 Sekyi'i ti 'nesa'ni siojowa kasejkanayis ijia 'wena tajli, tajle jlaja isi' jle' iyo'ate Tiberias, ti ijioyisi siojo je tojwape'n ja Jesús yine'e kiwa woyejes ti iyo t'ajlayeja' ape'e. 24 Siuti je i'winis ja Jesús siu'neje japo t'eyasajnas, sekyi'i ti yama'ni ti yiyis kasejkanaja, yi'i jlaja Capernaum ti iyoyisijyin'ni. Jesús jla'am ti woye siojona iyo in'wasankiyeja' 25 Ti yiyeyis i'niat ji'wechaja, ti i'winayis ja Jesús, iyoyeyis 'ate ti i'yasisi'n: —Inka'neyasajnawo, ¿tejnapa inetinki yiyi japa kiliekie' ti 'nak ji'nijts'e? 26 Jesús isiujlie ti iyo'ate: —Ijiate, ijiatk'i siunie jayo ti jayo'ate, ti nakata jla'am ti i'neliajayi siukia ti ji'yekiuniejyi'n ti nep'isiejyi'n, jlam'ne ka nakaye siunie ka 'najanayi paka awonayi ni iyo ti a'wenki'nase'm. 27 Ke injwesiejayiji'n ka akimajyi'n ape'e siunie asak ti je t'o'n, jlam ijiate jla'am siunie je netia'n ka paja, siu'neje ti iwi'nase'm jana a'wasankiye ti laj jlaja. Nak siunie inak ti I'nio' Jlas janwe'nase'm, lapakawo ti Sinia' jlam ti ijniejiet'e. 28 Siojopo i'nio' iyo'ne 'ate ti i'yasisi'n: —¿Tepa t'e ka iniwonataja, kayoki siuniwa Sinia' iyotaja ka iyoki? 29 Jesús iyo'ate ti isiujlie: —Siunie iyotaja ka awoyeyi, ka je akakiuye siunie jla'am ti ijliu'. 30 Iyo'ne 'ate japo i'nio': —¿Ten siupa ja'wenkints'e'm pa ja k'iejliyeyi ja 'nakayeyijna'a ti ja ke ikakiuk, siuti ja'wina? ¡'Wenkints'e'm siupi jiniwoni'ni! 31 Siupapo sitise'l t'ipi itiujwisjimpe siupuwa maná yi'i pi ajnat laj i'nioye'e. Siunie iyo niwa inamtis t'ipi ti iyo'ate, “Sinia' iwijna'm japa woye ti tal poliyi.” 32 Jesús isiujlie ti iyo'ate: —Ijiate, ijiatk'i siunie jayo ti jayo'ate, Moisés je jla'am 'ninta ka jlama ka inwe'nase'm siojona woye ti tal poliyi, 'wenajliyi jla'am ni Inia' ti iwi'nase'm janak woye ti ijiatk'i ti tal poliyi. 33 Siojona woye ti Sinia' je yi'n janaka siunie I'nio' ti tal poliyi, ti iwijnamk'i jana in'wasankiye napo i'nio' yi'i ape'e 'ni ajnat. 34 Iyoyeyis 'ate japo i'nio' ipi'yayeyis ti kia'iyo: —'Yaka'niona, 'esijyi ka wents'empe japak woye. 35 Jesús iyo'ne 'ate: —Yam woyek'i'm ti iyo in'wasankiyeja'. I'nio' ni jajnok'i, nak ja ke pajana'a ka inel'lia, jla'yi ni i'nio' ni ja ke sakakiu, kiak iyojliyi ja ke pajana'a ka inki'im. 36 Siunie iyo ti ajwelta'ase'm, ti sakakiuye 'wanjliyi ka si'wena'. 37 Wikie'eyi siunapo Inia' yikialk'i, napok ijiok'i. Napoka ti ijiok'i ja ke 'yakawona, 38 kajeyepa ti siuti anama ti atal poliyi, je ana'am ka iyoyi siupi ka intalk'i, 'wenajliyi jla'am siunie iyo ni i'nio' ti sijliu'. 39 Siunie iyo ni i'nio' ti sijliu', je iyotaja ka netiana'a paka ne'yi siunapo yikialk'i, 'najata ta jla'am ka iniujwank'i kisie'e ka intajli niwa a'no'ol siojona jloma yi' jlaja. 40 Siunie iyo ni Inia', i'niope na jan'yejne'n ni Sinia' Jlas, nak in'wenape jana ji'wasankiye ti laj jlaja, siunapo je 'yakakiu. Sek jane'yi ka yamape pet ka iniujwank'i kisie'e ti jantajli niwa a'no'ol siojona jloma yi' jlaja. 41 Sekyi'i'ne japo Judíojos ti ipi'yayis ti iyo'ate, “Yam woyek'i'm siojona ti tal poliyi”, tamtiyek'ijin'ni, 42 ti iyoyists'i 'ate: —¿Mi je 'nak Jesús, José jlas? Kasye'etant'ieje japo jiniewot. ¿Nit'i iyo ti ijwi'il ti tal poliyi? 43 Jesús iyone'ne 'ate japoka: —Leyeyi ti jisiemsiemiyek'i wita'm. 44 Lajk'ipa i'nioye ka 'najane paka inwone ka ijnok'i, siuti ja ke jlama ni Inia' ka inamijk'i ka ne'yi pa. Sekjane'yi ka yamana'a pet ka iniujwank'i kisie'e siojona jloma yi' jlaja, ti jantajli niwa a'no'ol. 45 Jilisajnat'ipi papo injwejlanawos ti iyo'ate, “Ja wikie'eyeyi napo i'nio' ti Sinia' ja'neyasajne'n.” 'Yina siunie its'iuye ni Inia', jla'yi ti ini'neyasane niwa jlamtis, nak ijiok'i pit. 46 “Ka net'i'yi pa kan'we'en pi Inia'. Ijwienjli jla'am siunie ti tajle pi Sinia', najata jla'am ti i'wi'in. 47 Jlam je awo ti awo'ate, siunie i'nio' ti jitienkiujnieye po', nak itiej jana ji'wasankiye ti laj jlaja. 48 Yam woyek'i'm siojona ti iyo i'wasankiyeja'. 49 Siupapo aska kijilas mases itiujwisjimpe siupuwa maná yi'i pi ajnat laj i'nioye'e. Ijiate, itiujwisieta lapakawo ti je puwaka ka i'maniti'n ka iwo ji'wasankiyeja'. 50 Siojona ajwel'ni janaka woye ti tal poliyi, i'nio' ni jantojw janaka woye, ja ke i'na'al. 51 Ya'am janaka siojona woye ti iyo i'wasankiyeja' ti tal poliyi. I'nio' ni jantojw janak woye, nak ja ke paja ka inetia'n, jajnok'i'ni puwa jlomas. Siojona woye ti jawijna'm ni i'nio', je 'wena pa ka ijwi'il, naka 'yajwes, ja'nakayeyijna'a ti ja ji'wasankiye japoye napo i'nio' yi' ape'e 'ni ajnat.” 52 Siojopo Judíojos, ti ipi'yayis ti kia'iyo, yapiliek'i wita'm ti iniewit. Iyoyis'ne 'ate: —¿Tepa t'e janiwone ti ijwi'il, janwents'e'm ni t'ajwes ka tiuwa? 53 Jesús iyone'ne 'ate papoka: —Ijiate, ijiatk'i siunie jayo, siuti ja ke atowa ni t'ajwes jla'yi ti ja ke a'yayejyi ni ji'woyis ni I'nio' Jlas, ja laja ji'wasankiyeja' siojona laj jlaja. 54 I'nio' ni itiujw ni 'yajwes, jla'yi ni i'yaje ni i'yoyis, nak jla'm ijiate ti jantaj jana ji'wasankiye ti laj jlaja. Sekjane'yi ka iniujwatana'a kisie'e ti jatiajlaja'm niwa a'no'ol, ts'ijiye siojona jloma ti yi' jlaja. 55 Siunie 'yajwes nak jlam ijiate jla'am ti inak ti ijiatk'i. Siunie i'yoyis kia'iyojliyi nak inat ti ijiatk'i. 56 I'nio' siunie itiujw ni 'yajwes, jla'yi ti i'yaje ni i'yoyis, nak je paj kantalk'i'm, kiak awo já atajla. 57 Siunie Inia' ti sijliu' ji'wasankiye po', it'imina pet ti i'wiesankiye po'. Tempi it'imina siunie i'nio' ti sitiujw, nak ji'wasankiye poye'eje. 58 Siojona woye ti tal poliyi, janak ajwe'el, je iyo'ate siojopa maná itiujw t'ipi papo aska kijilas mases. Ijiate itiuwisieta lapakawo ti je puwaka ka i'maniti'n ka iwo ji'wasankiyeja'. I'nio' ni jantojw janak woye ti tal poliyi, nak ja ke paja ka netia'n. 59 'Yina kiak iyo 'niwak Jesús jlamtis ti 'yiyasajne'n japo i'nio' yi'i jlaja Judíojos t'ajla'wet, yi'i jlaja Capernaum.
Inamtis ti iyo in'wasankiyeja'
60 'Loj japo i'nio' siojopo yamk'i ja Jesús, ti ipi'yayeyis siukia iyo ti taka'neyasa'n. Iyoyis'ne 'ate: —Atejnistieje ka insta' niwaka. ¿Tempa jank'iuye? 61 'Yina Jesús 'yijene ki iyone ti iniewit, jlam ininekialjliyisi, sekyi'i ja Jesús iyo'ne 'ate: —¿Jiliatayiji siukia awo ti amti? 62 ¿Tepat'e jota awoyeyi ka a'wenats'i ni I'nio' Jlas ka napi 'niji siunie tajli jla'am poliyi? 63 'Yejne'n, siojona Sinia' jikimet ti 'es, janak iyo 'wasankiyeja' napo i'nio', je'ne ka nakaye t'isie'n ka 'esieyi. Siuniwa yamtis ti ajwe'lase'm, niwak itio'nase jana Sinia' jikimet ti iyoye as'wasankiyeja'. 64 'Yina ya'am awo'ate, 'lojjli'ijyi ti asama ti jikakiunieyi. Jesús iyo ti itiant'ieje ta'a ti 'nelanjie'e isijme'n siojopo je its'iuyeje, siu'neje ja janekial. 65 Jla'am iyojli 'ate: —Tempi it'imina ti awo'ate ti ajwe'lase'm, lajk'ipa ka 'najane paka iniwone ka ijnok'i, ijwienjli jla'am siunie Inia' ti iyo 'niayija' pa. 66 Sekyi'i ti lajak'i papo ka nekk'i, siojopo yamtak'i ja Jesús ilik'i. 67 Jesús i'yasam'ne siojopo itijwa'm sikioye times tom'niji t'eyasajnas ti iyo'ate: —¿Tepi jiwoyeyi pet ti asa'am? ¿Ma jaleye ijyik'i? 68 Simón Pedro iyo'ate ti isiujlie: —'Yaka'niona, ¿ten jiat'eje siupa janajk'iji'ni? Jlajmiliet siuniwa amtis niwaka inamtis ti iyo 'wasankiyeja' pa, ti laj jlaja. 69 Pajk'i ti ak'iukie, it'imina ti kastant'ie'a ti a'm ti Sinia' inlesa'n. 70 Jesús iyo'ne 'ate: —Yam ti aki'mase'm siunie inojwajia'm, ti itijwa'm sik'ioye times to'm'niji. 'Yina ijwienjli'ne siunie imosik. 71 Jesús iyo ti ja Judas, siojo Simón Iscariote jlas, jakayeta ti tajla'm siojopo itijwa'm sik'ioye times to'm'niji t'eyasajnas, jla'am siojo janekial.
Ji'yijnis 'yakakiu pa Jesús
1 Jesús ti paja'ni wat ape'e yamaja, iniuyits'i siojowa isi'il yiji jlaja Galilea. 'Yina je iyo'ni ka ijno 'niji yi'i jlaja Judea, lapakawo siojopo Judíojos iyotaja ka inlanis. 2 Jlampa je tojwa'a siojokia jiliakijnieye japo Judíojos, ti kiajatak'i'ni niwa najkapis ti iyoyetajas jlopalikisie' ojwe, 3 ji'yijnis iyonisi'ne 'ate: —'Nak ká a'yi'nina'a, majna'a 'niji yi'i jana Judea, ja'nakayeyijna'a ti ja'we'en pet siunapo ya'm ajak'i siunie jiwo. 4 I'niojie'e ni ti iyojonk'iye ka ti'wena, je inijweki siunie iyo kanwo. Jlam 'esiji ka wikie'eyeyi ka a'wenkijna'm siunapo yi' ape'e 'ni ajnat, entipa jiwoyeyi. 5 Ji'yijnis iyone ja Jesús ti, lapakawo ti kia'iyo 'yakakiuyis. 6 Jesús isiujlie'ne pet ti iyo'ate: —Je yijliyi'ijyi siojona ika jlomaye, jlam'ne ti asa'am jijwelaye ka 'esieyiji ka ne'yi japa ka jlomaye. 7 Siunapo tajle ni ajnat je ne'wa'ase'm, kajeyepa ti lajk'ipa ka intajlat'ase'm, yo'otie ti ya'am akajanit'i ape'e siunie je 'es iyoyisi, it'imina ti ne'wajask'i'm. 8 Maye'ni jiwekie'e asa'am, ja ke iyik 'yaka je yijliyi'ijyi siojona 'yaka jloma. 9 Yiyi siukia iyo ja Jesús, sek 'wanjle'e'ne yi'i jlaja Galilea. 10 Jlampa yama'ni japo ji'yijnis ti ijioyisi jakia inlakijnieye. Jiwekie'eja pet ti ya'am ja Jesús, 'wenajliyi ki iyo ti jwamjla'a ti inijwekia'm japo i'nio'. 11 Siojopo jika anechiyasas japo Judíojos iyoyisijyin'ni. Iyoyis'ni 'ate ti ti'yasanisi'ni: —¿Tepa t'e yi'i? 12 Jle' po' wat ja Jesús, ti intaj totieje. Po' japo iyo'ate ti ijwilis, “I'nioyi jaka.” Po' japo iyo'ate, “Je 'es, 'yakajmank'iji'n napo i'nio'.” 13 Lapakawo ti je ijwiyisie japo jika anechiyasas, it'imina'ne ti inijwekisi ti jitiej ijiutisie. T'eyasajnaye iyo pa Jesús ti yiji japa inlakijnieye ti iyoyeta jlopalikisie' papo ojwe 14 Jikiowe'eyi jakia inlakijnieye ti Jesús ijioye kiajwe japa 'najla'wet, ti taka'neyasa'n. 15 Jlam jnots'iniji japo Judíojos ti ipi'yayis siukia iyo ti tamti. Iyoyis'ne 'ate: —¿Yot'iyi'ni ti 'yijen jwajla'aja, jejie'e ti'wena ka ini'neyasa'n? 16 Jesús isiujlie'ne japo ti iyo'ate: —Je ya'am ka intalk'i siunie aka'neyasane, tajle jla'am siunie sijliu'. 17 Siuti ja poye siunie janwo ni Inia' yi poliyi iyotaja ka inwo, sek jantaj'le ni i'nio' ti ja 'najane pa janwone, siuti ja ijiatayi ti jantalk'i, ni'ne ka intal Siniayi. 18 Siunie i'nio' iyojonk'iye ka tonitie je k'iejliyi paka inwo, najata jla'am iyo siunie tajle. Jlam'ne pet siunie ti iyojonk'iye ka tonitie siunie i'nio' sijliu', nak ijiatk'i siunie iyo jlamtikie'; ka ne ts'ijiye ka jla'am iwo siunie taka'neyasane. 19 “¿Je pak Moisés ti iwi'nase'm ni jika'neyasajnaye? 'Yina tiwet'ianaja ka injwanjli wata'a paka ink'iuye. ¿Yot'iyi'ni ti jiwoye'ijyi ka siliana?” 20 Iyo'ne 'ate japo i'nio' ti isiujlie: —¡Ataj je 'es! ¿Tempa iyotaja ka inla'an? 21 Jesús iyo'ne 'ate: —Ijwienjliyiji jiwekie'e siukia awoyi ti eniji siojona jloma ti i'nio 'wanjlijyi'n ti kawoyejliyit'ipi pa ti ji'wena'. 22 'Yejne'n siu'nie jayoyi, siupa Moisés t'ipi ijiate ti 'yijie'na'm ka woyeyi siunie ti jiwa tejwak'i pa, (jlam'ne ki iyo ti je jla'am ka intajle, 'wenajlit'iyijpe jla'am ti papok tajle siupapo aska kijilas t'ipi jike' iyont'iyisijpe). 'Wanjliyi ka janakaye siojona jloma ti i'nio 'wanjlijyi'n, je woyejliyi ti jlenayiji ti kiak jiwonayi napo kia'lis ti t'isie'n jiwa jlewajak'i. 23 Jlam'ne pet ti asa'am, ti je woyeyi ka akama'yi ape'e, naka iyo ni Moisés jika'neyasajnaye, sekyi'i ti je woyeyi ka akamaye'yi ilia'm napo kia'lis ti kiak jiwonayi ti t'isienis jijwa'al jlewaja'yi ti ijniujliejam'ni janak jloma ti i'nio 'wanjlijyi'n. 'Yina jak je iyoyiji ka je iyoyi 'ate: ¿yot'iyi'ni jiat'eje ti jitiajlatak'i'm ti ajwajiet jaka i'nio' wikie'eyi jawa t'ajwes iyo, jakiak jloma ti i'nio 'wanjlijyi'n? 24 Ijiatjliyi, je 'es ka 'yenayi napo as'lejwas siupa jloniye iyo ti ji'wena' siuniwa yi kisie'e, 'yina siuti jawo naka 'otatiji, 'wena ja ke 'asajiap'e siunie ti ijiate ti tijnajyi.
Jesús inijwe'el ti tajle pi Sinia'
25 Sekyi'i siojopo sek ji'wet'e, siujlieja ajnat Jerusalén, po' japo iyo'ate ti ini'yasis: —¿Je 'naka 'ni tiwoktajyin'ni ka tiliana? 26 Siusie, 'nak p'an yi'i takamtijniene napo i'nio', entip'an ti lajk'ipa ka in'yikisane. ¿Ent'a 'yijenayi pi iyone napo anechiyasas ti jlam ti Injwajieti ti Sinia' jijliujwanik? 27 Kasts'ajane pi awonaja siunie taj'le. Jlajmiliet pet siunie Sinia' jijliujwanik ka 'nesta, ja lajak'i pi i'nioye ka 'najane pa janwone siupi jantaj'le. 28 Jesús taka'neyasa'n kiajwe jlaja 'najla'wet. 'Yakets'ijiap ti tamti ti ipi'yayeyi japo i'nio' ti kia'iyo: —¿Intant'iejap'ank'i, jla'yi ti 'najanap'ane siunie ataj'le? 'Yejne'n, siuti ana'am je ya'am ka intalk'i, 'wenajliyi jla'am siunie sijliu', ijiate jla'am ti 'yu'we napo i'nio' ka je inkakiuyis, naka ni je intant'iejayi. 29 Sitiant'ieje ya'am kajeyepa ti atajle, jla'yi ti jla'am ti sijliu'. 30 Siojopo i'nio' ti ipi'yayisie, iyoyetajasi ka inkimits'i, 'yina 'yaka je yijliyi'ijyi siupa jlaj yi'i, it'imina'ne ti lajk'ipa ka jikiowe int'onitie ka poye pa ka k'iejliyeyi paka inwone. 31 Je pini'ne japo ti je 'yakakiuyis, iyoyis'ne 'ate: —Siuka 'nest'inie'e pi Injwajieti ti Sinia' jijliujwanik, ¿jot'e ka kia'iwo, ni'ne ka inkamna'a ape'e siunie iyo niwa i'winki'n?
Ti Fariséojos iyoyetajas ka inkimits'i pa Jesús
32 Siojopo Fariséojos ti 'yijenayisi pi iyone siukia tiwonaja ti intaj totieje, japoka 'ne'eje jla'am ti ijliu' papo tokis siojopo i'yena jlaja 'najla'wet, siu'neje japo pa'yijis jika anechiyasas, ka inkimits'i ja Jesús. 33 Sekyi'i ja Jesús iyone'ne 'ate japoka: — Ja ke sipaj asap, jayik'iji ti jayapili siunie i'nio' sijliu'. 34 Ja siwoyejyin'ni, 'yina ja ke si'wena', kajeyepa ti ja ke 'najanayi pi janiwonayi ka joyeyi siunie jayi'i. 35 Sekyi'i'ne japo jika anechiyasas japo Judíojos iyoyis'ne 'ate ti ini'yasis: —¿Tepat'e jajnojwi, ti ijwi'il ja ke i'wina? ¿Ent'a napok jajnoyi si'lijwas 'neje yajme'n ape'e 'ni ajnat ti je 'wet, ni'ne ka napokaye siunapo je 'esijiyi, je iliyi ni jike', ti ja'neyasajne'n? 36 ¿Tepat'e iyo ti kia'iyo, “Ja siwoyejyin'ni, 'yina ja ke si'wena', kajeyepa ti ja ke 'najanayi pi janiwonayi ka joyeyi siunie jayi'i”?
Tewukis siuniwa tajle ni i'niat ti iyo in'wasankiyeja'
37 Siukia jloma ti jlajayi jakiak inlakijnieye, jakiak siojokia jloma ti wuj, Jesús takasit'ne ti kiak iyoyeyi ti 'yakets'ijiap ti tamti: —Siunie i'nio' ti janki'im, ijnoyek'inie'e, in'yayena'a i'niati. 38 Siunie iyo niwa inamtis ti tip'esina t'ipi ti iyo'ate, “Siunie i'nio' ti ja ke sakakiu, siuniwa tewukis ti tajle ni i'niat ti iyo in'wasankiyeja' intajlajamna'a ni jitiowe.” 39 Jlam'ne papok ijwi'il ja Jesús siupapo ja ke inkakiu, ti ja tekiajlaja siojopa Sinia' jikimet ti 'es. 'Yina ti je 'nesjli'ijyi siojopa Sinia' jikimet ti 'es lapakawo ti je yijliyi'ijyi siojopa jloma ti ja tiwunitie ja Jesús.
Ti inik'isa papo i'nio'
40 Po' japo iyo'ate ti ipi'yayisie ja Jesús siukia iyo ti tamti: —Yaka ijiatat'ijyi ti 'naka 'ni injwejlanik jiwo ti tijwela'ni ja'nes. 41 Ijia japo iyo'ate: —Siunie Injwajieti ti Sinia' jijliujwanik, 'naka. 'Yina ijia japo iyo'ate: —Yaka je jat'inie'e, ¿yot'iyi'ni ka intajla'm jana Galilea siupa Injwajieti ti Sinia' jijliujwanik? 42 Ijwiljie'e niwa inamtis pak Sinia' jiliujwanik jantajla'm papo David, jla'yi ti ja ji'weta'a jana Belén, isi' siojona ji'wet t'ipi pi David. 43 'Yina Jesús jla'am ti it'imina japo i'nio' ti tejets'i wita'am. 44 Po' japo iyotaja ka inkimits'i ja Jesús ka i'notists'e a'laja'm, 'yina lajk'i'ne japo ti paja ka inkimits'i. Siupapo jika anechiyasas papo Judíojos 'yakakiuyis pa Jesús 45 Siojopo tokis i'yena jlaja 'najla'wet yapilisi siojo yi'i japo pa'yijis jika anechiyasas siu'neje japo Fariséojos. I'yasayisi'n japo tokis ti iyo'ate: —¿Yot'iyi'ni ti je niamayi? 46 Iyo'ne 'ate japo tokis ti isiujlie: —¡Lajk'ipa ka kia'iwo puwa ka jlamtisie', siunie iyo ti tamti! 47 Iyo'ne 'ate japo Fariséojos, ti ipi'yayeyis ti kia'iyo: —¿Yot'iyi'ni, kiak p'an jiwoyeyi pet jikinieyi siunie iyo? Lapakawo ti inkajlajyi. 48 ¿Pot'e jiat'eje napo saka anechiyasas ti je 'yakakiu, ni'ne ka napokaye napo Fariséojos? 49 Siunapo i'nio' ti je itiant'iejesi siuniwa inamtis t'ipi tajle pi Moisés, jiwet'ia japoye. 50 Sekyi'i ja Nicodemo, Fariseo 'neje, siojo ijioyi ja Jesús ti ajnaj, iyone'ne 'ate papo ijia: 51 —Iyo'ate siuniwa inamtis tajle pi Moisés t'ipi, “Siuti je pe'yajli'ijyi siupi jitis iyo ni i'nio', ke inesi'lie'yi ka asa'a.” 52 Iyo'ne 'ate ti isiujlisie: —¿Galilea jlelep'a'na'm 'neje? 'Ye'en niwa inamtis, ni'neyasane. Ja'we'en ti lajk'ipa injwejlanik jiwoye ka intajla'm jana Galilea.
Siojopa asejnia ti 'yu'ni
53 Sekyi'i japo i'nio' ijwienjlik'i'ni ti yapilie'ni.
1 'Yina Jesús teje'ne 'niji yi'i jlaja tikijnaki Olivokiet. 2 Siukia ti jlomaye'eje ti k'iejli mot, yapilieyi'ijyi jlaja 'najla'wet. I'nio' 'yakapajlayisi, sekyi'i yiyeje'n ti 'yiyasajne'n japok i'nio'. 3 Siojopo jiwos pi Moisés jika'neyasajnaye, siu'neje japo Fariséojos, itionayisi ja Jesús jlaja asejnia ti 'yuyi'ni pi jikiecha jik'iemjla. Yinayis jikiowe'e japo i'nio' nojk'i wita'm. 4 Ijwilayisiam'ne ja Jesús ti iyo'ate: —Inka'neyasajnawo, siujlie'e i'nioki ti'wenajaja jikiecha k'iemjla ti 'yuyi'ni. 5 Siunie Moisés jika'neyasajnaye iyo'ate, siojona asejnia kiak iniwone janak sisajas tikienajayi ti tiliana. 'Yina ¿tepi jiwo pet? 6 Lapakawo ti kiak iyotaja ka intajlatisie, it'imina ti kiak iyoyisi ti i'yasisi'n, jla'yi ti ijyijlitis. 'Yuye isia'm, sekyi'i ti ip'isina ni ajnat ti jijwuki isiene. 7 'Yina ti i'yasis'ni, e'tieje'ne ti tijna pijia'm, sekyi'i iyo'ne 'ate: —Siunie ti asa'am jane'yi pa ja laja jikeye, nak inanayijna'a ka sisajas intateje'n. 8 Yikiajlayi'iji ti 'yu isia'm, ip'isina ni ajnat. 9 Ti ipi'yayisie ja Jesús ti kia'iyo, sekyi'i ti ijwienjlik'i'ni ti yam'ni, japok inian'ni japo kijilas ti yam'ni. Jesús i'win'ne ti ijwienjli jlaja asejnia ti 'wanjlejap, 10 tijnaye pijia'm sekyi'i iyone'ne 'ate: —¿Najapo? ¿Lajk'i wekie'e pa ka k'iejliyi pa ka inwo'naja? 11 Iyo'ne 'ate jlajak i'nioki ti isiujlie: —Lajk'ipa, 'ni Ika'niona. 'Yina Jesús iyone'ne 'ate: —Kia'awo je asa'am. 'Yejne'n, maj, ke ekiajle'ena'a ka awo ni ake'.
Jesús jla'am ti jika kates napo i'nio' yi' ajnat'e
12 Jesús iyonayi'iji 'ate japo i'nio': —Ya'am ti jika katesk'i'm napo i'nio' yi' ape'e 'ni ajnat. I'nio' ni jana'am ijyik'i ja ke int'iskiuniejejyinna'a ni ajnatiok, siojona kates in'wasankiye tajle janejyi. 13 Iyo'ne 'ate japo Fariséojos: —Siunie jijwe'el, laj lajaye, 'yaka am a'am ti jitiajlat'a siunie jijwe'el. 14 Jesús iyo'ne 'ate ti isiujlieyi: —Siuniwa yamtis, ijiate wek yam yamata ti anijwe'el, lapakawo ti laja po'. Siunie atajli ts'ajane pi awone, siunie jajiojwi kia'iyojliyi, siuti asa'am je 'najanayi. 15 Siunie jiwoyeyi, jitis iyo pi i'nio' ti ji'yena', jiwoyeyi siupi jijwela' ka ijnewiteje ni i'nio'. Ya'am je'ne ka yama ka'ye'en ni jitis iyo ni i'nio'. 16 Siuti ja yama ti ja'ye'en ni jitis iyo ni i'nio', ja 'esie. ¿Tepa jawo ka kiak je iwo ti jantaja wita'm ki iyo siunie ijiatk'i? 'Yina ja ke sijwanjlajap ka'yenta siunie ja iyo, ti po' ni Inia', nak ja inoyijk'i'm, ti Jlam ti sijliu'. 17 Siuniwa inamtis ti tajle pi Moisés t'ipi iyo'ate, “Siunapo ti times ti ijniulwita'm siupi iyo ti ijwi'il, nak tiwok lajaye kajeyepa ti ijiatk'i siunie ijwi'il.” 18 Kiak iyo'ni siunie ajwe'el, awo ti yam ya'am ti anijwe'el, siunie Inia' kiak iyojliyi sijwe'el ti Jla'am ti sijliu'. 19 Sekyi'i japo Fariséojos i'yasayisi'n ti iyo'ate: —¿Tepa yi'i pi ana'? Jesús isiujlie ti iyo'ate: —Asa'am je intant'iejak'i, siunie Inia' kiak iyojliyi je intant'iejayi. Siuka intant'iejak'i intant'iejtaja ni Inia'. 20 Jesús yits'e yi'i jlaja 'najla'wet ti kia'iyo, iyo niwa jlamtis, yi'i siojowa tiwoki'ni ji'wajieta' pi Sinia' siojowa ti titietajak'i'ni. Siuti je yijliyi'iji siojopa jika jloma, it'imina'ne ti lajk'ipa ka inki'me.
Jesús yikiajlayi'iji ti inijwejla'm papo i'nio'
21 Jesús iyonayi'iji 'ate japo i'nio': —Jayik, siuti asa'am ja siwoyejyin'ni, ja i'wanjliyejyi ni aske' ka inetianatie. Siunie jajiojwi je 'najanayi paka wonayi ka ajoyeyi. 22 Siojopo Judíojos iyo'ne 'ate ti yinisi kiowe'e: —¿Ent'a iyo ka inila'an, it'imina ti kia'iyo ti iyo'ate, “Siunie jajiojwi je 'najanayi paka awonayi ka ajoyeyi”? 23 Jesús iyo'ne 'ate: —Asa'am as'wet 'ni ajnat. Jlam pet ti ya'am i'wit pet siunie 'niji pijia'm. 24 It'imina ti kia'awo ti awo'ate, “Ja ke atajlajyi ni aske' ka inetianatie.” Siuti ja sakakiuye ti ya'am siunie ti awo'ate “ya'am”, ja ke atajlajyi ni aske' ka inetiajnatie. 25 'Yina ti ipi'yayisie ti kia'iyo, i'yasayisi'n ti iyo'ate: —¿Te'na'm? Jesús isiujlie japo ti iyo'ate: —Siunie iyo ti 'nelanjie'e ni i'nio' ni ajwe'el ti ya'am, naka. 26 Po' siuniwa jayo'nase, jla'yi ti ja'ye'en siunie jiwoyeyi. Ijiatk'i siuniwa jlamtis ni i'nio' sijliu', jla'yi ti lajk'ipa jikiechaye ka ijwi'il, najata jla'am siunie iyo ka ijwi'il, ka ijwijla'm napo i'nio'. 27 'Yina je itiant'iejesk'i japo i'nio' ti ijwi'il pi Jinia' ti yi' poliyi. 28 It'imina'ne ti iyo'ate: —Ijiatjliyijna'a ka tenata pijia'm ni I'nio' Jlas, jiwekie'ejana'a ka intant'iejayi ti jla'am siunie ti iyo'ate “ya'am”, jla'yi ti ja intant'iejayi ti je awo ka iyo ka itiajlatk'i siunie awo. Je'e, 'wenajliyi siunie Inia' ts'eyasane ti ajwel pet. 29 Siunie I'nio' sijliu' yi' ijiap. Je sijwankite'n pi a'yi, kajeyepa ti awo siunie iyo ka iyo. 30 Ti kia'iyo ja Jesús je pini' japo i'nio' je 'yakakiu.
Sinia' Jlas iliejnits'i niwa t'aka iyo napo inke' kipijnas
31 Jesús iyonayi'iji 'ate siojopo Judíojos je 'yakakiuyis: —Siuti ja ke aleyeyi siunie iyo niwa yamtis, asa'am ti ja ijiatayi ti 'yiyasajna'yase'm. 32 Ja intant'iejayi ki iyo ni ijiatk'i, siuni ijiatk'i 'yiniyijna'a ka inlanajyits'i. 33 Iyoyis'ne 'ate ti isiujlieyisi pet: — ¿Yot'iyi'ni ti kiak jiwo, ti jiwo 'ate, “Ja ke kipijnasa'asem'ne paka ne'yi paka i'nioye”? Jlam'ne atajlaja'm pi Abraham t'ipi, lajk'ipa ka i'nioye ka jikipijnasats'e'm. 34 Jesús iyone'ne 'ate japoka: —Ijiate, ijiatk'i siunie jayo, ti siunie i'nio' iyoyi ni jloski'la, nak siunie jikipinik ni inke'. 35 Siunie i'nio' tiwoki inkipinikie' je paj ka napili pi ji'wet, jlampet siunie inas nak je paj pet ka intajla papo jiniewot. 36 Siuti kia'iyo ni Sinia' Jlas, ti iniuyeje pa ti kiak iyo, 'yina kiak janwo'nase pet jlam ja ijiatayijna'a ti janlanajyits'i. 37 Ijiate ti jinijwelayi pi Abraham ti asnaye, 'yina ti je kima'yi ilia'm niwa jlamtis, it'imina'ne ti jiwoyeyi ka siliana. 38 Ajwel pet siunie a'we'en ti ajiap ni Inia', jlam pet ti asa'am siunie jijwela' siunie ti jipe'yayeyi ni asna' ti tajle. 39 Ipi'yayis'ne ti kia'iyo, iyoyis'ne 'ate: —¡Abraham, pak sinia'! Jesús isiujlie'ne pet ti iyo'ate: —Siuka ijiatayiji ka jilisa'ase'm pi Abraham t'ipi, ka in'wenayeta ka woyeyi niwa iyot'iyi pi jla'am. 40 'Wenajliyi ti jiwoyeyi ka siliana' ti ajwelta'ase'm siunie ijiatk'i ti Sinia' ts'eyasane. ¡Abraham je kiak iniwone siunie jiwoyeyi! 41 Asa'am jiwoyeyi siunie jikijmaye iyo ni asna'. Iyoyis'ne 'ate: —Je sa'am siunapo jiniewot je 'yakaj, 'yina sinia' ijwienjli siupa atajlaja, paka Sinia'. 42 Jesús iyo'ne pet 'ate: —Ka ijiatayiji ti jijwela' asna' pi Sinia', ka seminayeta ti atajle pi Sinia', ya'am ti a'neye. Ti ana'am, je 'ne ka yama ka itiajlatk'i siunie awo, 'wenajliyi ni Sinia'. 43 ¿Yot'iyi'ni ti kiak iyo ti je woyeyi ka intant'iejayi siukia awo? 'Nakayi jla'am ti je woyeyi ka ak'iuyeyi niwa yamtis. 44 Imosik jilists'ase'm, siuti jitiajlayi, it'imina ti jiwoyeyi siunie iyo kanwo. Siunie imosik ti 'nelanjie'e ta'a ti tajlap'e ti iyo kalankijietaja, je paj ka ijiatak'i pa kanwo, lapakawo ti ijiateje ti yinjlajap siunie je ijiatk'i jitiowiji. Siuti ijwilata siuniwa sintijieyis, 'yakaja'a ti jla'am, jla'yi ti jla'am ti jinia' niwak sintijieyis. 45 Siuti ya'am ti ajwe'el siunie ijiatk'i, it'imina ti sakakiuye. 46 “¿Tepa jane'yi pa ti asa'am, ka inkajanit itipe'e ti po' pa awoyi 'yake'? Siuti ijiatk'i siunie ajwe'el, ¿yot'iyi'ni ti sakakiuye? 47 Siunie ti Sinia' jlas its'iuye ki iyo niwa jlamtis ni Sinia', 'yina siuti je lijts'ase'm, ¿tepa jawo ka k'iuyeyi?”
Ti Abraham lajlik'iji pa, Sijwajieti ta'a jla'm ti po'o
48 Siojopo Judíojos ipi'yayis jiwek ja Jesús ti kia'iyo, sekyi'i iyonayisi 'ate: —Ijiate siunie awona'a ti ajwela ti am Samaria jlele'a'am, ti imosik yi' awa'm. 49 Jesús isiujlie pet ti iyo'ate: —Lajk'ipa imosikie' ka ine' iwia'm. Siunie awo jiwunitieye e'ne ni Inia', 'wenajliyi pet siunie jiwoyeyi ti je woye ijiaye ti ya'am. 50 Ejlojli'iji jiwekie'e, lapakawo ti je awo ijliak'aliye ti kia'iyo, ka je siwunit napo i'nio'. 'Yina po' siunie ti iyotajank'iye ka siwunitie, naka siunie ja'nakajanit ki iyo napo i'nio', ti jla'am ja ijiatayi ti jajnajyi siunie janwo ka 'notatajajna'a. 51 'Yina awo'ate, jla'am je awo siunie ti awo'ate, i'nio' ni janwo niwa yamtis ja ke inetia'n. 52 Iyo'ate japo Judíojos ti isiujlie: —¡Ijiate ti awok'ija 'ate ti ajwela ti imosik yi' awa'm! Jlam'ne siupapo injwejlanawos t'ipi pajk'i ti 'yajle'n, Abraham kia'iyojliyi, ti jiwo'ate ti jlamti, “I'nio' ni janwo niwa yamtis ja ke inetia'n.” 53 ¿Ent'a jit'ia'n ape'e pa sinia' Abraham t'ipi, jlam'ne je k'iejeyeyik'i'ni ti 'ya'al, siu'neje papo injwejlanawos t'ipi? ¿Tent'ipa siupa jini'yejnap? 54 Iyo'ate ja Jesús ti isiujlie: —Ka yama ya'am ka iniwunit, siunie awo ti aniwunit siu'neje niwa yamtis laj lajaye. I'nio' ni siwunit, naka Inia' ti jiwoyeyeta 'ate ti jijwela' “Sinia'”. 55 'Yina je intant'iejayi. Jlampet ti ya'am sitiant'ieje. Siuka ijwi'il ka iyo'ate, “Je sitiant'ieje”, wuj ti jayo sintiye, ka iyoyena'a 'ateye jiwoyeyi. Ti ya'am jlam je awo ti sitiant'ieje, jla'yi ti awoyi niwa jlamtis, ti iyo ka iyo. 56 Abraham siupi jitiajlajia'm, ipini'yi ti iyo'ate, “Je ijiat ke i'wi'in siojona jloma ti ja'nes 'ne ajnat'e pi Saka'niona.” 'Yina ijiatjliyi kia'iyo ti i'wi'in, wuj ti ipini'yi. 57 Siojopo Judíojos iyonisi'ne 'ate ja Jesús: —Jlam'ne je jleyi puwa ka cincuéntaja puwa aka najkapisie, ¿ti jijwe'el jiwe'n ape'e pi Abraham? 58 Jesús isiujlie'ne pet ti iyo'ate: —Ijiate, ijiatk'i siunie awo, ti ya'am pajk'i ta'a ti sipo', ti siupi Abraham lajlik'ijipa. 59 Sekyi'i ti isimayisk'i'ni kiwa sisajas ti iyotaja ka intatisiji'n. Jlampa yama ti inijwekia'm, ti tal kiajwe jlaja 'najla'wet.
Jesús i'wijnajne'n siupa i'nio' talok ta'a ti k'iejli yiji'n
1 Ajnat siojo iniu'we ja Jesús, sek i'wi'ne siojo i'nio' talok ta'a ti k'iejli yiji'n. 2 Siojopo t'eyasajnas jla'am ja Jesús i'yase'n ti iyo'ate: —Inka'neyasajnawo, ¿yot'iyi'ni ti kia'iyo ni jiwet'ia, ti talok ta'a ti k'iejli yiyet'ijyimpe? ¿'Nakat'iyi jla'am ti iyo jikeye napo jiniewot, ni'ne ka jlama jla'am? 3 Jesús isiujlie ti iyo'ate: —Je 'naka ka jike' int'emina ni'ne ka napokaye napo jiniewot, 'wenajliyi siunie iyo ka 'nakaj ti Sinia' 'yijene pi iyone ni jiwet'ia iyo. 4 Alenjlipa ti jlomajli'ijyi, 'esijyi ka isimaja ni jikijmaye ni I'nio' sijliu'. Je pa tojwa'a siunie ti ja ajnaja, ti ja lajak'ipa ka inkajli ka inkijme'n. 5 'Esijyi ti ajli'ijyi 'ne ajnat'e, ti ya'am ti akajanit'i ape'e napo yi' ape'e 'ni ajnat. 6 Yiyik'i wekie'e ti kia'iyo, sekyi'i ti ijwiets'iunie ajnat'e, 'yina ti its'iatitieje'ni siukia ajnat ja iyone, sekyi'i ti 'yilinak'i ape'e jawa jitiete ja talok. 7 Itimeje ti iyonayi 'ate: —Maj, joyi siujlieja i'niat Siloé. Le'e ni atokio'. (Siunie ti iyo'ate Siloé iyo'ate, Tijliuk.) Yam'ne siojo i'nio' ti talok ti ijioyi jlajak i'niat. Yiyi ti ilija'a ja jitiokio', yaka jla'm iwo ti i'winaja'n. 8 Siojopo ji'wetijwas siu'neje japo ti i'winis'ni ti t'alk'i'ni japo pi k'iejliyi, iyoyeyis 'ate ti ininekiajlisi ti ini'yasis: —¿Mi 'naka 'na yijin'ni'ne ts'e, ti t'alk'i'ni japo ka tiwok ji'wajieta'? 9 Po' japo iyo'ate: —'Naka. Siojopo ijia iyo'ate: —Iyo'itieje ti ijyiwitk'i. Siojo jlameje iyo'ne 'ate: —Ijiate, ya'am. 10 Sekyi'i i'yasayisi'n ti iyo'ate: —¿Yot'iyi'ni jiat'eje ti ji'wejne'n? 11 Isiujlie ti iyo'ate: —Siojo i'nio' jle' iyo'ate Jesús, siunie iyonk'i, ijwiets'iujne'n, sekyi'i its'iatiti ki ajnat. 'Yilin'ne ape'e 'niwa itiete, sekyi'i sijliu'ne i'niate siujlieja jle' iyo'ate Siloé, ti iyonk'i 'ate, “Maj, joyi siujlieja i'niat Siloé, le'e ni atokio'.” Ijiatjliyi ak'ne, 'yina ti atemayi, sek a'yi ti a'wenap'ajne'n. 12 Iyo'ne 'ate japo i'nio' ti i'yasis'ni: —¿Tepa yi'i pak i'nio'? Siojo i'nio' iyo'ate: —T'eyi, pa yit'iyi.
Fariséojos ijialaskinisi siupa talokpe ka injwe'el siupa iyo ti i'wijne'n
13-14 Siukia jloma ti Jesús its'iatiti ki ajnat ti jlats'ilis ijline, ti i'wijnajne'n jak talok, jakiak jloma ti i'nio 'wanjlijyi'n. It'imina'ne ti tokiji japo Fariséojos jak i'nio', 15 i'yasisin'ne ti iyo'ate: —¿Tepat'e iyo ti 'nelanjie'e in'wejnajne'n? Isiujlie japo ti iyo'ate: —Its'iatiti ki ajnat ti jlats'ilis ijline. Sekyi'i kiak 'yiline'ne ape'e 'niwa itiete. 'Yina siuti itiokio' aleja'a, sekyi'i ti a'wenaja'n. 16 Siojopo ijia Fariséojos iyoyis'ne 'ate: —Yaka jet'i intal Siniaye siupi i'nio' 'yina siuti je ilisa'n siujlie'e jloma ti 'es, i'nio 'wanjlijyi'n. Jla'am iyojli 'ate japo ijia: —¿Yot'iyi'ni ka kia'iwo puwa kan'wenki'n ka kassesi'liet, siuka inke' jilianikie? Sekyi'i'ne ti inik'isaja japoka. 17 Yikiajlayisi'iji ti i'yasis'ni jak i'nio' ja talokpe, ti iyoyits'i 'ate: —¿Tepi jiwo pet ti a'am, siupi i'nio' in'wejnajne'n? Isiujlie japo ti iyo'ate: —Ya'am awo'ate, injwejlanik jiwo jaka. 18 Lapakawo ti je k'ask'i siukia iyo ti takakiunisi japo Judíojos, ti ijwilis ka je jakaye jak i'nio' ti talokpe, jla'yi ti takakiunisi ti i'wijne'n, it'imina'ne ti takajlunisi japo jiniewot. 19 Iyoyis'ni 'ate ti ti'yasanisi: —¿Mi asas 'ni siu'nie? ¿Ijiate ti jlam talok ta'a ti k'iejli yiyeje'n? ¿Tepit'i iyo ti i'wijne'n 'nakayi? 20 Siojopo jiniewot iyo'ate ti isiujlie: —Ijiate kasts'ajane pi awonaja 'yaka sas, ti 'nelanjie'e yiyeje'n jlam talok ta'a. 21 'Yina siuti 'es jla'yi ni iyo ti i'wijne'n, nak janjwe'el ti jla'am. 'Yasa'ni, isijlijie'e, ja 'nakaj jla'am siupa janwo ti janijwe'el. 22 Siuti ji'lij kiak iyone japok jiniewot jak i'nio' lapakawo ti je ijwiye japo Judíojos, kajeyepa ti pajk'i ti inipe'yayis ti iyoyits'i 'ate, “I'nio' ni janwo'ate Jesús nak Injwajietiwo ti Sinia' jijliujwanik, nak ja tijliukiepe”. 23 It'imina'ne ti kiak iyo japo jiniewot ti iyo'ate, “'Yasa'ni, isijlijie'e, ja 'nakaj jla'am siupa janwo ti ja inijwe'el.” 24 Japo Judíojos yikiajlayisi'iji ti tanisi jak i'nio' ja talokpe, sekyi'i iyonisi'ni 'ate: —'Yejne'n, sa'am awok'iate jike' po' pak i'nio'. ¿Tepi jiwo pet ti a'am? Ká ajwelts'e'm pi jiniliakie jitieyi'i pi Sinia'. 25 Isiujlie japo ti iyo'ate: —Je awo'ate ijiuski'la'n, ni'ne ka jeye. Nakata pet siunie ajwe'el ti ya'am, ti awope talokie 'nakayi ts'esie. 26 Yinayisi'iji ape'e ti i'yasis'ni: —¿Tepi iyo'naja ti i'wejnajne'n? 27 Isiujlie japo ti iyo'ate: —Pajatak'i ti ajwe'lase'm, 'yina je jik'iuyek'i'm. ¿Yoti'iyi'ni ti jiwoye ka yikiajle'e? ¿Ent'a kiak jiwoyeyi, jiwo ka akiniets'i pet? 28 Iyoyis'ne 'ate ti iliakiyis, ti ipi'yayis ti kia'iyo: —¡Nakp'an jlekk'i pet, sa'am akinieje pet pi iyot'iyipi pa Moisés! 29 Siupi Moisés kasts'ajane pi awonaja ti Sinia' tamtit'iyi'nijpe, jlam pet siuni i'nio' tiwet'ianaja ka ti'niejenaja siupi taj'le. 30 Siojo i'nio' isiujlie japo ti iyo'ate: —¡Kat'ajat'iyi wekie'e ka je 'najanayi siupi taj'le! ¡Awo ka jlamjliye ti sijwajiet it'imina ti a'wejne'n! 31 Jejie'e kast'ayiji'n ti siunapo i'nio' ti jloski'la po' Sinia' je its'iuye, napokata jla'am siunapo ijiunit, jla'yi ti iyo siunie iyo kanwo. 32 Je tipe'yak jiwekie'e ka ne'yi paka injwe'el paka 'najane pa kanwone pi i'nioye ka in'wejnajne'n ka talokie, ka intajlap'e ti k'iejli yiji'n. 33 Siut'itie ka je intal Siniayi, ka je inkajlataja ka inlesane siunie iyo. 34 Sekyi'i kat'ajayi ti jwesis, iyonisi'ne 'ate jak i'nio': —Jlam'ne ki iyo ti k'iejli impoye, ake' tipoyi awa'm. ¿Jijwelt'e ka kasts'eyasajne'n? Yiyisik'i wekie'e ti kia'iyo, sekyi'i ti tijliukie.
Siunapo jlosikis talojo'
35 'Yina Jesús t'ijieyi ti tijliuk jak i'nio' ja talokpe, siuti ini'wenayi'iji, sekyi'i iyone'ne 'ate ti i'yase'n: —¿Mi je kakiu siunie I'nio' Jlas? 36 Isiujlie ti iyo'ate: —'Yaka'niona, ¿tent'i pak i'nio' ka je 'yakakiu? 37 Jesús isiujlie ti iyo'ate: —K'iejli je 'we'en, ya'am ti akamtijniena. 38 Sekyi'i'ne ja i'nio' takosjlete'l itiyeyiji'n kiajwe, iyo'ne 'ate: —Je akakiu, ni 'yaka'niona. 39 Sekyi'i Jesús iyo'ne 'ate: —'Yejne'n, ti ana'm ajnat'e napok aname, siunapo talojo ti ja'wijnajne'n; jlam pet siunapo ijwil ka je talojoye jayojwa'n talojoye. 40 'Yina siojopo Fariséojos ti sekyi'i iyoyis'ne 'ate ti jwesis, ti ipi'yayisie: —¿Kiakt'i awoki pet, talojot'ets'e'm pet? 41 Jesús iyo'ne 'ate ti isiujlieyi pet: —Jlamt'itie ka ijiatayi ka talojoye'ase'm, ka lajata astesa'. Siuti jijwela' ti je talojoye'ase'm, nak it'imina ti astes po'o.
Siunie sontas jiwo siu'neje niwa jiliajwas
1 Jesús paj ti iyoye'eje 'ate: —Ijiate, ijiatk'i siunie jayo ti awo'ate, siunie ti je iniuyi ni jika 'wuk kiwet jana sontas ji'wuk, ti i'yujli wek paka'a, 'yina nak kajlajnata jla'yi ti kalankijieta. 2 Jlam ni iniuyi ni jika 'wuk kiwet jana sontas ji'wuk, nak ijiate ti jiwoyiji niwa sontas. 3 Siunie jiwo ni 'wuk kiwet 'yajlinitia'm k'iye, sekyi'i ni sontas jiwo tanayits'i puwa jiliajwas siupi jle' ijio'we, ijwienjlik'i'ni. Jlamtis iyo pi jika'niona itiant'iejesk'i. Sekyi'i ti yamayi ti tajlaja'm japa ji'wuk. 4 I'ye'en ti pajlat kisie'eyi sekyi'i ti yama ti iniank'iye, yamayisk'i pet pi jika'niona, kajeyepa ti itiant'iek'i pi jla'lap iyo pi jika'niona. 5 Jlajmiliet pet siunie i'nio' ti je ijiat ka jiwoye, je yamisk'i, 'wenajliyi ti je ijwiyisie, 'yina kajeyepa ti je itiant'iejesk'i pi jlamtis iyo. 6 Jesús yijnapeje jiwekie'e ti kia'iyo ka intejnisisk'i wata'a siojo iyontaja japo i'nio'. 7 Jesús yikiajlayi'iji ti iyone'ate japo i'nio': —Ijiate, ijiatk'i siunie ti jayo'ate, ya'am siunie 'wuk kiwet siunie iniuyi'ni niwa sontas. 8 Wikie'eyi siupapo iniant'i'nijpe its'ioye papok kajlajnatas, jla'yi ti kalankijietas. Siuniwa sontas je its'iuye. 9 Ijiate, ya'm 'wuk kiwetk'i'm. Siunie i'nio' ni ja'noyi nak 'wuk kiwet, nak janjwayepe. Janwoyena'a 'ate jana 'wolepo' ti ijiojwa'm, ni'ne ti iniu kisie'e, jan'we'en niwa jop siunie jlak. 10 Siunie i'nio' kajlajnata, je 'wena pet paka name siunie jikajlajnaye, jla'yi ni jikalankijieye siu'neje ti initiajnat pa. Yam je awoyeyi ti ana'am, ana'am ka jlam kiakatajak'i ka ji'wasankiye poye napo i'nio'.
Jesús nak sontas jiwo ti 'es
11 “Ya'am sontas jiwok'i'm siunie ti 'es. Siunie sontas jiwo ti 'es iniwe'n ape'e k'iye niwa jiliajwas. 12 I'nio' ni jikaja 'nejie'e wekie'e jana i'ye'en, i'wi'in ilia'm siunie k'iwajla, jlamsek iliyeyi'i wekie niwa sontas ti yamata ti i'yilta'n. Sekyi'i siupi k'iwajla t'ekiyeja'm, jlamsek ijiutiek'i'ni niwa sontas. 'Yaka je jiwo, jla'yi ti je jiliajwas, 13 kajeyepa ti najata jla'am ti i'ye'en jana jikaja, 'yina je niwaka'ne kan'ye'en niwa sontas. 14-15 “Ya'am siunie sontas jiwok'i'm siunie ti 'es. Iyoye'ate ni Inia' ti itiant'iek'i, jla'yi ti ya'am sitiant'ieje. 'Yina kiak awone niwa iliajwas sitiant'ieje jla'yi ti itiant'iejesk'i peyit. Aniwe'n ape'e niwa iliajwas. 16 'Yina kia'iyo po'neje siuniwa iliajwas ji'wuk 'wenayi, ti je ijiat ka je iniame. Je ijiat ka je ink'iuyisk'i'm siunie jayone, sekjane'yi ka ji'wet ijwienkitana'a, injwanjliyena'a siunie jiwo ti jan'yena. 17 “Siunie Inia' 'namak'i kajeyepa ti je e'n jana i'wiesankiye, pi jlomas janojwa'm janapik'i. 18 Ijiate, ja ke pakaye siupi jasitiajnat ti ja silia'an, lapakawo ti yam ya'am ti talk'i. Siunie awo ti kia'awo. Lapakawo ti nak tijniejietak'i'm pet, siunie ti je e'n jana i'wiesankiye jla'yi siunie ti janapik'i ka netieje siojona jloma, 'yina nak iyotaja ka iyo ni Inia'.” 19 Siojopo Judíojos ti ipi'yayisie ti kia'iyo, yikiajlayi'iji ti jlampa iyots'i'ni, 'yaka je ijniujlits'i. 20 'Loj japo iyo'ate: —¿Yot'iyi'ni ti jik'iuyeyi, ti imosik yiji, jitiej je 'es? 21 'Yina po' japo ijia iyo'ate: —Jejie'e kia'iyo pa ti ijiate ti jitiej je 'es puwaka jlamtisie, jla'yi ti ka kia'iwo paka injwajiet paka talokie.
Judíojos 'yakawonisie pa Jesús
22 Ki iyo ti wi'yitiepata pa yi'i jlaja Jerusalén. Jakiak siojokia jloma ti jitiej iyunitietajask'i siojokia jloma ti tekiajlat'ipi pijia'm siujlieja 'najla'wet ti Sinia' yikiajlayi'iji ti ilisa'n. 23 Jesús sekyi'i yi'i jlaja 'najla'wet, yikiajli'ni ts'e yi'i ja Salomón jika 'wuk kiwet. 24 Judíojos nojwayisiji ja Jesús ti iyonisi 'ate: —¿Tepat'iyi ka anijwelts'e'm ka ama siupi Injwajieti ti Sinia' jijliujwanik? Jlam woni'ni 'ate: nijwelts'e'm. 25 Isiujlie japo ti iyo'ate: —Pajatak'i ti anijwe'lase'm, 'yina sakakiuye. Ka lajak'i niwa Inia' jlamtis, niwak 'yakajanit itipe'e ti ya'am, siuniwa wask'i'nelaja alesane. 26 'Yina sakakiuye kajeyepa ti je asa'am siuniwa iliajwas sontas. 27 Siuniwa iliajwas siuniwa yamtis iyo itiant'iek'i, jla'yi ti ya'am sitiant'ieje. Namayis ijyik'i pi ajojwi. 28 Siojona ji'wasankiye ti laj jlaja ajwankitamk'i, ja ke paja ka netia'n. Ja ke talak'i ka paja. 29 Siuniwa Inia' iwink'i'm, 'yaka'm ape'e niwa ijia wask'i'nelaja, ti je ti'niejenaja ka talaja. 30 Siunie Inia' jla'yi ti ya'am kasjwanjli. 31 Siojopo Judíojos ti ipi'yayeyis ja Jesús ti kia'iyo, yikiajlayisi'iji ti isimisie jawa sisajas ti iyotajas ka intatisiji'n. 32 'Yina Jesús iyo'ne 'ate: —Je pini' siuniwa wask'i'nelaja ti isis alesane astayi'i, ti a'wenki'nase'm, Inia' jweye akiene. ¿Tepat'e yi'i niwaka siupi jitiajlatak'i'm ti jiwoyeyi ka sisajas sitietayiji'n? 33 Siojopo Judíojos iyo'ne 'ate ti isiujlieyisie: —Je'ne ka niwakaye siuniwa isis ti jilisane ka itiajlata'a'm ti sisajas jota itietajaja'n. Siunie atajlata'a'm naka ti jiliaki pi Sinia'. I'nioyeta'ame ti jiniwojwan'ni Siniaye. 34 Jesús isiujlie ti iyo'ate: —Sinia' iyo'ate ti yi'i niwa inlesajnat'ipi, “Asa'am diosists'ase'm.” 35 Ijiatjliyi, a'wena ti Sinia' yamite'e ti kia'iyo “diosists'ase'm” siupapo ijniejiet'ek'i ka injwe'el pet siupi jika'niye pi Sinia', jla'yi ti jlam je iyo niwa inamtis je takakiunieje. 36 'Yina kia'awo'ni pet, Sinia' sot ta'a 'niji ti silisa'n, ti sijliuye ajnat'e. ¿Yot'iyi'ni ti jijwela' ka iliaki pi Sinia', ti anijwe'el ti awo'ate “Sinia' Jlask'i'm”? 37 'Yejne'n, siuti ja ke 'yakajli ka ilisane siuniwa Inia' ilisane, ká ak'iuyek'i'm. 38 Siuti ja 'yakajli ka ilisane, 'wanjliyi ká akima'yi ijyilia'm, 'yina ká akakiunieyi ni siuniwa alesane, 'nakayi ti ja'najanayi ti jlam je awo Inia' yi' iwia'm, kia'awo pet ajyi ni Inia'. 39 Ti ipi'yayis ti kia'iyo ja Jesús, iyoyetajasijyi ka inkimits'i, jlampa yama ti i'yilta'n. 40 Jesús yapili siojo Juan yine'epe siojopo i'nio' ti iniejiejne'n. Iwiets'ila i'niat ji'wechaja, yi'i siojo tewuk Jordán; 'yina sek 'wanjle'e'ne. 41 Je pini' japo i'nio' ijioyi, iyoyis'ne 'ate ti jitiej ijiutisie: —Juan je kia'iyo puwa ka inlesane, 'yina wikie'eyi siuniwa yamtiyi ti ijwi'il 'nak i'nio', jlam je iyo; a'wena ti ijiatk'i. 42 Je pini' japo ti je 'yakakiu sekyi'i.
Ti 'yalt'itiejpe pa Lázaro
1 Pope ja i'nio' jle' iyo'ate Lázaro, isi' siujlieja Betania jlajak ji'wetis, siojopo jikitiawot María siu'neje jlaja Marta. 2 María siujlieja ti siunie jini inkajk'i 'yilinijk'i jawa jisietis ja Saka'niona, jla'yi ti ji'wole isiene ti ilijik'i. 3 'Yina ja Lázaro ti je 'es, sekyi'i japo jikitiawot takajlunieyi ja Jesús ka toki, ka tiwonaja 'ate: —'Yaka'niona, 'ajajnajwa ja je 'esi. 4 Jesús iyo'ne 'ate ti yiyeyi ki inka'niye: —Siupi jiliaye iyo, je nak kaneki kanla'an, 'wenajliyi siunie iyo ka 'nakaj ni Sinia' jijweye, jla'yi ni Jlas. 5 Jesús wuj ti 'namaja japo Marta siu'neje jlaja ji'yijnia, Lázaro kiak iyojliyi. 6 Ijiate Jesús t'ijieyetaja ja Lázaro ti je 'es 'yina times puwa jlomas ti 'wanjleje'n yi'i siojo yi'i. 7 Siukia ti jloma kiechaye'eje, iyone'ne 'ate japo t'eyasajnas ti i'yasayisi: —Naj kiu'ujwe 'niji Judéaja. 8 Isiujlisie'ne pet ti iyo'ate: —'Yaka'neyasajnawo, jeye pajk'i japo Judíojos ti iyotaja ka inlanis, ti sisajas iyo ka inkie'na. ¿Yot'iyi'ni ti jiwo ka apili? 9 Isiujlie japo t'eyasajnas ti iyo'ate: —'Yejne'n, jet'imi 'etsaka niwa inetitinki yiji jana jloma ijwienjli. Siuti kia'iyo, i'nio' t'iskiujnijyi'n ni jloma, ijiate tepa jawo kant'opi'ni isia'm, 'yaka janaka jla'am siojona kates ti 'yakajanit ape'e 'ni ajnat. 10 Jlam pet ni i'nio' ti t'iskiujnijyi'ni ni ajnaj, ijiate tepa janwo ka je int'opi'ni isia'm, 'yaka siojona kates lajk'ipa kanejyi. 11 Jesús yine'ne ape'e ti iyo'ate: —Siupa ts'ajajnajwa Lázaro imia'a, 'yina siuti jayik ka 'yujwata'nina'a. 12 T'eyasajnas isiujlie ti iyo'ate: —'Yaka'niona, siuti jijwel imia'a, ent'a ja 'esie. 13 Jlam'ne Jesús ijwi'il ti Lázaro 'ya'al. Siojopo t'eyasajnas ijwilta ka nakaye ti ijiate ti ijnieti. 14 Sekyi'i Jesús iyo'ne 'ate ti 'yakajanitiek'iyi: —Lázaro 'ya'al. 15 Lapakawo siuti sek je a'yi ts'ajkaj'ni pet, nak ja'nesieyi ti asa'am, 'nakayeyijna'a ja ke akakiunieyi. Naja'ni ti ja'yenaja. 16 Sekyi'i'ne ja Tomás, jak siojo Jesús t'eyasanik 'ne'eje, ti tiwonaja'ni 'ate Timesi, ti ipi'yaye ti kia'iyo ja Jesús, tanayi japo ijia t'eyasajnas ti iyo'ate: —Naja'ni pet, kiak jayoki, siliaye janoyi wita'm pa jiliaye janwo.
Jesús naka siunie ti yapilietak'i pijia'm napo, siu'neje jana in'wasankiye
17 Ti Jesús yiyeyi, 'yina i'wi'in ti jlampa ijniujliejets'i kiwa jlomas yamk'i ti pajk'i ti yi' ajnat kiajwe ja Lázaro. 18 Betania, siujlieja Lázaro 'wet, je tojwape'n jlaja Jerusalén, najape jawa kilómetrojos ja k'iejlajap'e. 19 'Loj japo Judíojos ijioyi japo Marta siu'neje jlaja María ti jika ameyik poye, ti yapisi. 20 Ti Marta t'ijieyeyi ja Jesús ti na'am, yam'ne 'najk'i k'iye ti ya'am ilia'm, 'yina María 'wanjle isi'wet'e. 21 Marta iyo'ne 'ate ti isiutieyi ja Jesús: —'Yaka'niona, ka 'nak a'yi ta'a je 'yalta'ne siukia 'yini. 22 'Yina 'wanjliyi ijiate kia'iyoyeta, lapakawo ti ts'ajane ti Sinia' janwe'na'm siupi k'iejliyi ti ja 'ajle. 23 Jesús isiujlie ti iyo'ate: —Je ijiat ka je inapi pijia'm ki a'yini. 24 Marta iyo'ne pet 'ate: —Ijiate nak ts'ajane pi awone ti siukia 'yini janapi pijia'm ka netiejenie'e siojopa jloma ti ja wikie'eyeyi napo 'yajle'n janapits'i pijia'm, ka netiena'a jlaja niwa jlomas. 25 Jesús sekyi'i iyone'ne 'ate ti ipi'yaye ti kia'iyo: —Ya'am siunie ti yapilietak'i pijia'm napok 'yajle'n, siu'neje ti ya'am in'wasankiyek'i'm. Siunie je sakakiu, 'wanjliyi ka 'na'al, 'yina ja'wasana. 26 I'nio' ni 'wasanjli'ijyi ape'e 'ni ajnat siuti ja ke sakakiu, je pajna'a ka 'na'al. ¿Ma je sakakiuyeyi? 27 Iyo'ne 'ate: —Ijiate, 'ni Ika'niona, je akakiu ti a'am ti Injwajieti a'm ti jitiajle pi Sinia', jla'yi ti Jlajts'a'm pi Sinia', pajk'i ti kasts'ajane pi awonaja ti jla'am ti ja'nes 'ne ajnat'e. Jesús yap ti yiyeyi pa Lázaro t'o' 28 Ti Marta iliyeyi ti takamtijnie'n, yama ti ijioyi jlaja ji'yijnia María, 'yina tisiemsiemiyi ti ijwijla'm ti iyo'ate: —Saka'niona 'nes, iyota ka joyi. 29 María ipi'ya wekie'e jlaja jikitia, sek tajla'a ti ya'am ti ijioyi ja Jesús. 30 Jesús je 'yutieje'eyi ja isi', je tal ts'e yi'i siojo ini'wene'e jlaja Marta. 31 Jlam'ne siojopo yi 'wet'e jlaja María ti yiyisiap'ni, ti i'winayisk'i ti takasit jlaja María, sek tajlayits'i pet, ti yamisk'i, lapakawo ti itijnistiejesi kajno a'noyi kanape. 32 María yiyi wekie'e ja Jesús, takosjlete'l jitiyeyiji'n kiajwe, ti iyo'ate: —'Yaka'niona, siuka 'nak a'yi, jlam je 'yalta'ne ki 'yini masa. 33 Jesús i'yejne'n jlaja María ti yap'ni, ti kia'iyojli siojopo Judíojos jla'yis. Je jlase' ki iyo ti a'tiek'i, sekyi'i jiyel iyom'ne. 34 Ti'yasane'ne siojo tenat'iyijpe ti iyo'ate: —¿Tepa jlena'yi pa t'o'? Iyo'ate ti isiujlisie: —Naj ka'yenaja, Saka'niona. 35 Sekyi'i ti yapa ja Jesús. 36 Siojopo Judíojos ti i'wina ti yap'ni, sekyi'i iyoyis'ne 'ate: —¡'Yenayi'n pet, ijiat ti yimint'eyi! 37 Po' japo ijia iyo'ate: —'Naka 'ni ijwiejiet'ne ja talok, ¿jet'i 'yijeneje paka wone ka i'manit ki Lázaro?
Lázaro yapi pijia'm ti 'wasa'n
38 Jesús yikiajlayi'iji siukia iyo ti jiyel iyo'om ti yiyeyi ja a'no', ijliasayi'ni jlaja kiawe. Tiwoki p'ota jlaja sisaj ti wuj. 39 Sekyi'i ti iyo'ne 'ate: —'Omaja ts'ijiye ni jip'ot. Marta, siujlieja Lázaro jikitia ape'e, iyo'ne 'ate: —'Yaka'niona, atejnistieje ka insotieje, kajeyepa ijniujliejets'i kiwa jlomas yamk'i ti yi' ajnat kiajwe. 40 Iyo'ne 'ate ja Jesús ti isiujlieyi: —¿Jlam'ne ajwe'la'm ti awo'ate ka je sakakiutiejna'a ja'we'en ni Sinia' jijweye? 41 Ijiutieyis ts'iji siujlieja sisaj tip'onajaja'm ja t'o' yi'i. Sekyi'i Jesús i'yena poliyi, iyo'ne 'ate: —Inia', ka ijiatayijia'm ti jik'iuk'i. 42 Sitiant'ieje ti je jikam'ni itipe'e siunie awoyi. 'Yina awotajank'iye siu'napo yi'ne i'nio' ka impe'yayis, jla'yi ka 'esieyi, ja 'nakayeyijna'a ka je inkakiuyis ti a'am ti sijliu'. 43 Yiyik'i wekie siukia iyo ti tamti, iyo'ne 'ate ka kia'iwo ka lakiyi'i: —¡Lázaro, no kisie'e! 44 Kiaka i'nio masa iniuye kisie'e, 'wanjliyi'i siukiwa tilie'nitiejek'i kiwa jikioye, siu'neje kiwa tits'ijwanak'i kiwa jisietis, kia'iyojliyi siukia jitiokio' siukia lotakinie tip'onaja'a. Sekyi'i Jesús ijliuye japo ti iyo'ate: —Lanajyits'i siuniwa tilie'nitiejek'i, ena'yate ka nek.
Tinikiujliejap pa Jesús ti ja tiliana
45 Siojopo Judíojos ti ijioyisi jlaja María ti yapisi, ti i'winis siukia Jesús iyo it'imina'ne ti 'loj siojopo je 'yakakiuyisie. 46 'Yina je lajk'i pet siojopo ijwi'il ja Jesús ti ijwile japo Fariséojos siukia Jesús iyoyi. 47 Sekyi'i'ne siojopo Fariséojos initotiek'i wita'm, siu'neje japo pa'yijis jika anechiyasas, siu'neje japo ijnosikis jiwos. Initotis'ne wita'm, ti iyoyits'i 'ate: —¿Tepat'e jayonaja? 'Nak siu'nie, je jlase' siuniwa a'wena ti iyo ti i'winki'n. 48 Siuti jayina 'ate, ka najatajana'a jlam ti ja ke inkakiu napo i'nio', sekjane'yi siunapo anechiyasas Roma jlele inama'nina'a ti janetiajnate'n jana si'wuk ti ajok'ni kiajwe, jla'yis napo saka kia'lis pet. 49 Kiaka najkap ti Caifás ti yi'i ti iyo pa'yi jika anechiyasa' ti wuj. Jaka'ne siojo ti iyone'ate japo ijia: —Ijiatp'aneje ti je 'najanayi. 50 Ataj p'an je wujwayiji siunie ti janjwanjli ni ti janinekial ape'e napo, nak ja 'esieyi ti ja ke inetia'n wikie'eyi napo i'nio'. 51 Caifás je jla'am ka jlamtisa', siukia iyo ti tamti, 'yina ti jla'am ti pa'yijis jika anechiyas, it'imina ti Sinia' jlam ti yamtijie'n ti ijwi'il ja Jesús ti janiwe'n ape'e napo i'nio' siunapo Judíojos. 52 Je ka napokataja, 'yina siu'neje napo Sinia' jilis netiajne'n ape'e 'ni ajnat, ka ji'wet injwankit. 53 Jakayi'ne ti tiwokieyi ka tiliana, iyoyis'ne 'ate, “'Esiji ka tiliana 'ni Jesús.” 54 It'imina'ne ja Jesús ti jeye kat'aja ka ini'wenkijnam'ni japo Judíojos. Tajla'm jlaja Judea, sekyi'i ti tejeye 'niji yi'i jlaja isi' jle' iyo'ate Efraín, 'yakama'a ja ajnat mami'yi. Sek yiyeyits'i, ti jla'yis japo t'eyasajnas. 55 Jlampa je tojwa'a siojokia jiliakijnieye japo Judíojos Pascua 'loj japo i'nio' tajlits'i jawa ajnatis ijioyisi yi'i jlaja Jerusalén. Jike' iyonisiji'ni ti yiyetaja, ti inilej siupi iyo pi jike', ti iyoyis jitienkiujnieye ink'iejyisa'. 56 Ti'yasanisi'ni'ne ja Jesús yi'i jlaja 'najla'wet. Iyoyis'ne 'ate: —¿Tepi iyo? ¿Mi jajnoyi jli siliakijnieye ni'ne ka jeye? 57 Siojopo Fariséojos, siu'neje japo pa'yijis jika anechiyasas pajk'i ta'a ti ijwila ape'e japo ti iyo'ate: —Siupi ja 'najane pi janwone siupi yi'i pi Jesús, injwelats'inie'e, sekjane'yi ka inajayinie'e ka isima'a.
María 'yilinik'i puwa jisietis pa Jesús siupa jini inkajk'i
1 Jlomas ijwienjli sikio' itij'we ijwienjli tom'niji puwa netia'n kaneyi siujlieja inlakijnieye Pascua, Jesús ya'am ti ijioyi siujlieja isi' Betania, ji'wet yi'i ja Lázaro, siojo Jesús ijwiejiet, ti yikial pijia'm ti 'yalta. 2 Takapijnanis'ne k'iye; Marta jlajak isiajiamk'i k'iye japo, 'yina Lázaro sekyi'i yiji japo, ti isijwane ja Jesús. 3 Sekyi'i'ne jlaja María ti yamayi siojo a'la' jlokiet'e' jle' iyo'ate nardo, ti jini inkajk'i, medio litro ti laja po'. 'Yilinayik'i jawa jisietis ja Jesús, sekyi'i itime ti ilijayik'i jawa ji'wole. Jini yapiliyeyijin'ni kiajwe jlaja 'wuk yiyis kiajwe. 4 Siojo Judas Iscariote, ti japok Jesús t'eyasajnas, jak siojo janekial ja Jesús jikiojyi japo janla'an, iyoni'ne 'ate japo ijia: 5 —¿Yot'iyi'ni ti je tiwena siu'nie a'la' jlokiet'e' ti jini inkajk'i, jlam'ne laja po', ka tekiajlaja pet siunapo p'ijliusis japa lajaye? 6 Siuti ji'lij kiak iyone ja Judas, jla'm iyo ka imp'elisijne'n napo p'ijliusis. Kajeyepa siuti jlam ti tijna'yi siujlieja wikiniet'aj jiwe ti i'yena, kajeyepa ti takajlane'ni pi jiwa siojopa titietajak'i'ni, japak 'neliaja pet. 7 'Yina Jesús isiujlie ti iyo'ate: —Ene wek 'ate, 'yina ti jlam iwiakajlanit ta'a its'ioye siuti janeyi siojona jloma ti ja titijik its'ioye. 8 Siunapo p'ijliusis jlam kiak janwo ja ke intal aska kiowe'e, jlampet ti ya'am ja ke yikiajle'e ka yi' aska kiowe'e.
Pa'yijis jika anechiyasas iyo kanlanis ja Lázaro
9 Siojopo Judíojos ti t'ijieyeyijpe ja Jesús ti yi'i Betániaja, 'yina siuti 'loj yamayis'ni ti ijioyisi jlajak isi'. 'Yina je jakata inta ti iyo kan'wenis ja Jesús, ijwienisieja'm ti iyo kan'wenis ja Lázaro siojo ti yapi pijia'm ti tajla'm ja a'no'. 10 Iyoyis'ne 'ate siojopo pa'yijis jika anechiyasas: —'Esiji ka kia'awo ja Lázaro ka tiliana. 11 Kajeyepa ti jla'am ti it'imina japo Judíojos ti iliyi ti its'iuye japok i'nio', ti je ikakiuyisi ja Jesús.
Jesús ti yiyeja'm japa Jerusalén, pakayi ti tonitie
12-19 Je pini' japo i'nio' ijioyisi siojokia inlakijnieye Pascua ti yi' Jerusalenne. Siukia ti jlomaye'eje Jesús yi' ape'e ja malekiatiok jlas ti teje 'niji yi'i jlajak isi'. 'Yina siojopo i'winaja siukia iyone ja Lázaro, ti tane ti iniujwa'n kisie'e ti tajla'm ja a'no'. Japok iyo jika'niyejayi pet japok sekyi'i, siukia iyone ja Lázaro ti yikial pijia'm. It'imina'ne japo i'nio' ti t'ijieyeyisi ti Jesús sek jano'we, iniakasajats'i jawa wisiuk ji'wole, ti yamayis ilia'm, sekyi'i'ne ti tanisi ape'e, ti iyo'ate: —¡Inwunitieye tena'a pi Sinia'! ¡'Esiji ka Saka'niona inlesa'n, jla'am ti ji'lij iwijna'm Sinia' janoyeje, ti jlam ti Israel jika anechiyas! Iyo niwa inamtis t'ipi, ti iyo'ate: “Sion jlele, jweyetajyits'i. 'Yena' ilia'm ni aska anechiyas, 'nes yi' ape'e ni malekiatiok jlas.” Ti 'nelanjie'e t'eyasajnas je itijnisisk'i siukia iyo. 'Yina ijiatjliyi jla'am ti yiyeyi siojokia jloma ti Sinia' yikiajle pi jijweye, jiwekie'aja ti jitiej wujwisk'i siukia iyoyi, siuniwa inamtis t'ipi ti ijwi'il jla'am. Jlam'ne pet japo Fariséojos, ti i'winayis ti kia'iyo, iyoyis'ne 'ate, ti jitiej ijiutisie: —¡'Wanjliyi, lajk'iyipa kayoki! ¡'Ye'en napo i'nio' ti 'yakapajlisk'i!
'Nak nojwaja'm siupapo je Judíojos iyoyisijyin'ni pa Jesús
20 'Nak nojwaja'm siojopo i'nio' je Judíojos yiji japo i'nio', ti je pini', ti ijioyisi jlaja inlakijnieye Pascua yi' Jerusalenne. 21 Japok'ne siojopo ijioyi ja Felipe, siojo ji'wet yi' Betsáidaja, yiji siujlieja ajnat Galilea, ti inip'elisine ka ina'an k'iye ti iyoyits'i 'ate: —'Ni isiecha, awoktajank'iye pet ka'wina pi Jesús. 22 Felipe yam'ne ti 'yuyi pet ape'e ja Andrés ti ijwijla'm, jak iyo'ne jla'yija ti ijwilisi ja Jesús. 23 'Yina Jesús iyo'ne 'ate ti isiujlie japo takajwejlane: —Yiyi siujlie'e jloma ti tenat'ijyipi ni I'nio' Jlas ti jijweye ja tiwenaja'm. 24 'Yejne'n, ka jla'm iyo wata'a, siunie ipiatatiok t'ejes 'wanjle'e siojona jlo', ti ja ke t'otie isia'm, tepa jawo ka jla' poye, 'yaka je netiajne'n ajnat kiajwe ka intal. Jlam pet ti tiwomajata kia'iyoyeyi pet, jla' poye ts'ijiye ti wakajlata. 25 I'nio' ni 'namaja jana ji'wasankiye, nak janetiajnat, jlam pet ni i'nio' ni ne'waja ni ji'wasankiye ape'e siu'nie ajnat, nak po ta'a pet siojona ji'wasankiye laj jlaja ti yiyi. 26 Siuti japoye pa jankijme'n ijiap, kanamana'a ijyik'i. Siunie jayi'i, sekjane'yi pet. Siunie Inia' janteme pet siunie janoyijk'i'm.
Jesús ijwi'il pi jiliaye janwo
27 —“¡Wuj ti ijliak'ali po' 'nakayi! ¿Tepat'e jayo? ¿Jot'e kayo'ate, “Inia', sijwajiete ni janwo ni iwit'iaye”? ¡Ajwel'ni ja jeye, lapakawo ti 'nak it'imina ti ana'am! 28 Inia', ¡'esiji ka awunit a'm ni e'e! Sekyi'i ti pesiejayi siupi ina'lap tom poliyi ti iyo'ate: —Pajk'i ti ateme, 'yina jayikiajle'eje ti jayunit. 29 Siojopo sekyi'i ti ipi'yayis, ijwil'ne ka inkiumtijni, 'yina po'neje japo ijwil ka injlojwanik poli jleliye pa ka inkamtijniene. 30 Jesús iyo'ate: —Je ti ya'am kant'emina ni siunie ina'lap ti pesieje, asa'am ti it'imina, 'yaka nak ijwi'il ni ja'nesieyi. 31 'Nak ja ti'yena 'ni ajnat. Siunie i'nio' tijniejieta'a, ti i'yena ni ajnat, ja totie kisie'e. 32 Siuti jasena pijia'm, sekjane'yi ti jayama ya'am ti jatiojne'n wikie'eyi napo i'nio'. 33 Siukiwa jlamtis iyo kiwak 'yakajanit siunie janwo ni jiliaye ti ja'na'al. 34 'Yina iyo'ne pet 'ate japo i'nio' ti isiujlie: —Siuniwa inamtis t'ipi niwak it'imina ti kasts'ajane pi awonaja ni Injwajieti ti Sinia' jijliujwanik ti ja ke paja ka netia'n. ¿Yot'iyi'ni ti jijwe'el pi I'nio' Jlas ja tena pijia'm? ¿Tent'i pak I'nio' Jlas, siupi jijwel'ni? 35 Jesús iyone'ne 'ate japo: —Je taljlitie'eje aska kiowe'e siojona kates, 'yina ja ke pajayi ka intajlanna'a aska kiowe'e. Katatayi ka askiuniek'iji'n alenjlipa ti 'yaka ask'ioye 'ni jloyeyi. Ja 'nakayeyijna'a siunie ajnatiok ja ke inesi'lietana'a ka netie'asenie'e. Ijiatjliyi siunie i'nio' yikiajli'ni nak ajnatiok, je 'yijene siupa jantajyi. 36 Ká akakiuye janak kates, ti je taljli'ijyi aska kiowe'e, ja 'nakayeyijna'a ti ja jloma jleleye'ase'm pet. Yiyik'i ti yama ja Jesús, inijwek'ni k'iye japo i'nio'.
Siukia it'imina ti Judíojos 'yakakiuyis pa Jesús
37 'Yakajlitieje ja Jesús ti i'winkinataja siukiwa iyo pi jijweye ti yisi'liete japo i'nio', 'yina lapawo ti 'yakakiuyis. 38 'Yina lapakawo ti yiyi siukia jloma siupi injwejlanik jiwo Isaías iyojinipi, ti iyo'ate: “'Yaka'niona, ¿tempa je 'yakakiu 'ni saka'niye? ¿Tempapo Saka'niona i'winkijna'm pi jijweye?” 39 Ijiatjliyi, japoka i'nio' je t'ekiye ki iyo ti 'yakakiuyis. Lapakawo ti po'neje siu'niwa inamtis 'yit'jini'ipe pa injwejlanik jiwo Isaías ti iyo'ate: 40 “Sinia' iyojwa'n talojoye, jla'yi siupi iyone ti it'iunit'i papo ka ijnewiteje pa jlosik, ja'nakayeyi ti ja ke in'wejne'n, siu'neje ti ja ke 'najajne'n, ja'nakayeyi ti ja ke inapik'i, ka ijwiejiete pi jiliaye iyo.” 41 Siupi Isaías, kiak iyone kiwa jlamtis lapakawo ti i'wi'in pi jijweye iyo ja Jesús, siu'neje ti ijwi'il siupa janwo. 42 'Wanjliyi, siojopo Judíojos je pini' japo its'iuye ti jla'am, kia'iyojliyi japo i'nio' anechiyasas, yameje ti je 'yakakiuyis ja Jesús. 'Yina je iyo'ni ka intanisi'ni ti kia'iyo, lapawo ti je ijwiye japo Fariséojos kajeyepa ka 'nijieyisi sek intajlata'a ka totiek'i kisie'e yi'i jawa 'najla'wetis. 43 Najata jla'am siunie i'yenis ka i'nio' ijnoniti jlam'ne kan'yenis ka Sinia' ijnoniti. Jesús jlamtis niwak jan'ye'en ni iyo napo i'nio' 44 Jesús yakets'ijiap ti tamti ti iyo'ate: —I'nio' na je sakakiu, je yamkata ka ink'iuk'i'm 'yina kia'iyo je 'yakakiu siunie I'nio' ti sijliu'. 45 I'nio' ni si'we'en jla'yi ti je yamkata ka si'we'en, 'yina kia'iyo i'wi'in ni I'nio' sijliu'. 46 Yam katesk'i'm, yam ana'm ajnat'e jat'imina napo i'nio' siunapo je sakakiu ja ke inejyi ni ajnatiok. 47 “Jlam pet siunie i'nio' ni ipi'yayeta niwa yamtis 'yina je iyo, ja ke yama ka isie'e, kajeyepa ti je nak ka nia'm ape'e, 'wenajliyi pet siunie aname ti ja'mienit ni i'nio'. 48 I'nio' ni je isi'm ijyilia'm, jla'yi ti je its'iuye niwa yamtis, po' pet ni siunie ti tijna'yi ti jansa'a. Siuniwa inamtis ti amtits'iji'n, niwak jansa'a ts'iji jlaja niwa jlomas. 49 Lapawo ti je yam ka intalk'i siu'nie awo, 'wenajliyi jla'am ni Inia' siunie sijliu', nak ijliuyijk'i'm siunie awo ka ijwi'il, jla'yi ni siunie aka'neyasane. 50 'Yina siunie jika'neyasajnaye ni Inia', ts'ajane pi awone ti tejeyi jana in'wasankiye ti laj jlaja. Ijiatjliyi siuniwa amtiyi, je int'ayiji'n ti jla'am ti ijliuyijk'i'm.”
Jesús jisietis ilik'iji'n papo t'eyasajnas
1 Jlampa ijwienjliye jakia jloma tomk'iye ka neyi siojokia inlakijnieye Pascua, Jesús pajk'i ta'a ti 'yijene pi iyone ti yiyi japak jloma ti janek ti jantaj'le 'ni ajnat, ti jani'wene pi Jinia' poliyi. Jesús yamjliyi ti 'namaja japok, siojopo tijna'yi pet, yi' ajnat'e, tajlap'e ti 'nelanjie'e, paj ti yiyeyi pi jlaj yi'i. 2-4 Jlampa itimayi pi imosik ja Judas Iscariote ti iwijna'm pi jlosik je 'es, ti iyo ka inla'an ja Jesús. Jesús 'yijene ti tal Siniayi, siu'neje ti janapili pi Sinia', siu'neje ti Jinia' pajk'i ti jijweye yikiajle. Jlajmiliet, siuti ti'yekiujni'n, Jesús iliejni'ni ja ji'wu' tomi pijia'm, isimayi siojo intokio' tilijiki'i'ni, ti its'ijwane jlajap. 5 Sekyi'i ti i'niat isiayeja'm ja tetik, iyoye ka jisietis inlejk'iji'n japo t'eyasajnas. Siojo intokio' tilijiki'i'ni jak isiene'ne ti ilijk'i'ni. 6 'Yina ti iyoyetaja ka inlej jawa Simón Pedro jisietis, sekyi'i iyo'ne 'ate: —'Ni ika'niona, ¿isietis jalejk'iji'n ti ya'am? 7 Jesús isiujlie ti iyo'ate: —Siu'nie awo, je intant'iejayi, je ijiate ka je 'najanayi. 8 Pedro isiujlie'ne pet ti iyo'ate: —Ja ke iwi'na'm ka paja 'niwa isietis ka lejk'iji'n. Jesús ti isiujlieyi'iji, iyo'ne 'ate: —Siuti je wo ka ilijk'iji'n niwa asatis, ja ke ayejenie'e siu'napo isimet pet. 9 Simón Pedro iyone'ne 'ate ja Jesús: —Ijiatp'ane, ja ke 'niwakatajana'a niwa isietis ti alejk'iji'n, jwane'e 'niwa isioye ka lejk'iji'n, siu'neje jli ijyitik ka leje. 10 Jesús isiujlie'ne pet ti iyo'ate: —Siuti itime ni i'nio' ti inie'yi i'niati, ijiatjliyi je yikiajle'e ka ina'yi i'niati kajeyepa ti itime, najataja ti jisietis ilijk'iji'n. Siuti asa'am kiak jiwoyeyi, ijiate je inwikie'eyetaja ka insisie. 11 Siuti Jesús iyo'ate, “Je inwikie'eyetaja ka insisie”, kajeyepa ti 'yijene ta'a pi iyone siojo yi'i ja janla'an. 12 'Yina ti itimayi ti ilijk'iji'n jawa jisietis, sekyi'i ti ji'wu' yikiajlayi, yapilie'eje ts'e yi'i jlaja jlak yinisi ape'e. Yiyeje'n sekyi'i iyo'ne 'ate ti i'yasa'm japo t'eyasajnas: —¿Mi jitijnisiets'i siunie awo'nase? 13 Siuti asa'am as'lej je lienayijk'i'm ti jiwoye'ate “Ika'neyasajnawo”, siu'neje ti jiwoye 'ate “Ika'niona”. Ijiate jlam je woyeyi, kajeyepa ijiatk'i siunie jiwoyeyi. 14 Jlajmiliet ti inka'neyasajnawok'i'm, jla'yi ti inka'nionak'i'm, siunie awo ti alejk'iji'n niwa assatis, 'yina kiak janiwonayi pit: leja' pet niwa jisietis napo as'lejwas. 15 Jla'm anane ask'ioye ti a'wenki'nase'm, ka kiak aniwonayiji siunie awo. 16 ¿Tepi yi'i pi i'nio' t'a'n ape'e pa jika anechiyas ti jla'am ti inkawo, siu'neje ni i'nio' tijliuk ka injwe'el ka t'a'n ape'e siupi ijliu'? 17 Siuti ja 'najanayi, ka ajejlitayeyijna'a pet ka woyeyi, ja'wenayena'a ti wuj ti 'es, je jwe'el ka je inkasajyi'n. 18 “'Yejne'n, je ajwe'el ka inwikie'eyeyi, je sit'iayiji'n siunapo aki'mik'i, lapajawo ti janeyi siojona jloma ti siuniwa inamtis t'ipi siunie iyo, ti iyo'ate, “Siu'nie i'nio' akijwane, nak teje ijyilia'm”. 19 Ajwe'lase'm ta'a, janakayeyi ti ja 'najanayi ta'a, 'wanjliyijna'ape ka'wina siuti kiak jawo, lapajawo ti ijiate ja'najanayi ti je 'wenayi pi kiechaye ti ya'am. 20 Ijiatk'i siunie jajwi'il ti awo'ate, Siunie i'nio' isi'm ilia'm ni siunie ajlo' pet, nak isi'm ijyilia'm. 'Yina jlam pet ni isi'm ijyilia'm, nakaye pet ti isi'm ilia'm siunie I'nio' sijliu' pet.”
Jesús ijwijla'm papo t'eyasajnas ti Judas janwe'en
21 Jlampa yiyeyik'i ti tamti, sekyi'i ja Jesús iyoyeyi siukia iyo ti iliate siukia iyo ti wuj ti jijliak'ali po', sekyi'i ti yinayi ape'e ti 'yakajanitiek'iyi, ti iyo'ate: —Ijiatk'i siunie jayo, ti ijwienjli ni siunie ti asa'am ja siwe'en. 22 Sekyi'i japo t'eyasajnas ti ini'yena, 'wena japo jitiej yikiajle pi jikiecha, kiajatak'i'ni lapakawo ti je 'yijenisi siojo jane'yi ja Jesús ijwi'il. 23 Ijwienjli'ne siojo Jesús wuj ti 'namaja, ti je itionit ti ti'yekiujni'n, 24 Simón Pedro ijliuyeyi jaka kan'yase'n ja Jesús ja yi'i siojo ijwil'ni, sekyi'i ti jikio' yejayiji'ni ti ijliuye. 25 Ijliasayi ja Jesús, sekyi'i i'yasen'ne ti iyo'ate: —'Yaka'niona, ¿tepa yi'i paka? 26 Iyo'ate ja Jesús ti isiujlie: —'Yejne'n, jats'iatiti 'ni woyewa, 'yina siupi jawijna'm japakaye. Ijiatjliyi, jlam iyoni'ni 'ate ti its'iatiti, iwijnam'ne ja Judas, Simón Iscariote jlas. 27 Siukia ti Judas isima ilia'm ja woye ti tiwenaja'm, jakayi ti imosik ijioyeja'm pi jikiowe. Sekyi'i Jesús iyone'ne 'ate: —Jlam woni'ni 'ate, siupi jawoyi. 28 Ka kia'iwo ka intejnisisie siojopo tejeyi wita'm ti isijwane siukia iyo ja Jesús. 29 'Yina ijia itijnistiejesi ka poye paka kanwejnamk'i japo p'ijliusis, ni'ne ka neki paka intajieta siojokia inlakijnieye, kajeyepa ti jlam ti tijna'yi siujlieja ineli wikiniet'awe. 30 Yiji wek kiojyi ki woye, sekyi'i ti yama ja Judas. Jlampa ajnaja.
Ye'li ink'ie'
31 Jlampa pajak'i ja Judas ti ya'am, Jesús iyo'ne 'ate: —Ja'nakaja'ne 'nakayi siuni iyo ni jijweye ni I'nio' Jlas, ti ja tonitie, 'yina siunie Sinia' kiak jawo'ojyi pet; ja'naka'aja pet ni jijweye iyo, ti ja tonitie, lapawo ti ya'am ti jat'imina siupa ja tiwonak'i. 32 Siuti I'nio' Jlas i'winki'ne ki iyo ti tonitie pa Sinia', kiak janwo pet ni Sinia' jan'wenki'ijne pet ki iyo ni jijweye iyo pet, ja ke pajayi wata'a. 33 'Napo ilis ti yimijna'ase'm, je pi itioyeyi'i niwa jlomas ti jatiaj'lase'm. Je jwela' ka je siwoyejyin'ni, ka woyena'a 'ate awone japo Judíojos ti kiak awone, ti awo'ate, “Siunie jajiojwi ja ke a'yakanayi.” 34 “Jaliyi'asap siu'nie i'lij ti ink'ie': 'esiji ka nineminape. Jawo'ate awo ti ya'am ti ts'ama'ase, kiak wonayi napo as'lejwas, ka ninemina'. 35 Siuti jawoyeyi naka, ti janikimayi ni asemijnaye, sekjane'yi kan'wenayena'a pet siunapo i'nio' yi' ape'e 'ni ajnat ti asa'am ti 'yiyasajna'yase'm.”
Jesús ijwi'il ti Pedro janikakiu
36 Simón Pedro i'yase'n ja Jesús ti iyo'ate: —'Yaka'niona, ¿tepat'e jajojwi? —Siunie jajiojwi — iyo ja Jesús ti isiujlie — je 'esiji ka nam kiu' ijyik'i 'nakayi. Je ijiat ka je ana'm ijyik'i ka pajata. 37 Pedro iyone'ne 'ate ja Jesús: —'Yaka'niona, ¿yot'iyi'ni ti jijwe'el ti je 'esiji ka yikta'a ajak'i 'nakayi? Jlam'ne siwakal ta'a ti iliaye jane'yi atepe'e. 38 Jesús isiujlie ti iyo'ate: —¿Mi ijiate siunie jijwe'el, ti inwakal ka alaye ine'yi itipe'e? Ijiate siunie jayo ti jajwi'il, ka majletiejejna'a ka nap ni ajwenta, ja najapajayiji ti janikakiu'ni, ti jajwe'el ja ke intant'iejk'i.
Jesús jla'am siunie 'nayi ijioyi pi Sinia'
1 “Ká awoye asjlak'aliye. Ataj womayi pi Sinia', jla'yi ka ataj womak'impe. 2 Ts'iji ji'wet yi'i ni Inia' 'loj siuniwa 'wukiu'ul, siunie jawaye'yi. Jlajmiliet siut'itie ka lajak'i puwa siuniwa ajwe'lase'm ti awakajlanit ta'a ask'ioye siunie jawaye'yi, 'yina ka lajatak'i pa kajwi'lase'm. 3 Siuti jayik, jla'yi ti jawiakajlanit siunie jawaye'yi. Jatimeje, ka'nisana'aja ti jayapi'liase, ti jaya'asiye ji'wete ni Inia', ti jawaye ijiap siunie jayi'i. 4 'Najanayi ala siunie 'nayi ijioyi siunie jajiojwi. 5 Tomás iyone'ne 'ate ja Jesús: —Je'e, 'ni Ika'niona, je kasts'ajane siupi jajojwi. ¿Tepat'e ka yoktaja ka kastant'ieje pak 'nayi? 6 Jesús iyo'ate ti isiujlie: —Yam 'nayijk'i'm, siunie ijiatk'i, jla'yi ti ya'am ti in'wasankiyek'i'm. I'nio' je i'yakane pi Sinia' ka siliejk'i. 7 Siuti ja intant'iejak'i, kiak jawo ja intant'iejayi'iji ni Inia'. Ijiatjliyi 'naka 'ni siu'nie intant'iejayi, jla'yi ti ji'wena'. 8 Sekyi'i ja Felipe iyo'ne 'ate: —'Yaka'niona, kantitie ka pajataja ka'wenkints'e'm jiwekie'e pi Sinia'. 9 Jesús isiujlie ti iyo'ate: —Felipe, awo ka pajliyek'i ti aye'asap, ¿je p'an intant'iejk'i? I'nio' ni si'we'en, i'win pet ni Inia'. ¿Yot'iyi'ni ti jiwo ka'winki'na'n pi Sinia'? 10 ¿Ijiatp'ane ti sakakiu ti ajwe'el ti ajyi pi Inia', jla'yi pet ti Jla'am yi' iwia'm? Siuniwa ajwe'el, je ya'am ka intalk'i. 'Wenajliyi ni Inia', ti Jlam ti yi' iwia'm, naka'ne ni isijme'n Jla'am. 11 Ke sakakiuye siunie ti ajwe'el ajyi ni Inia', jla'yi Jla'am yi' pet iwia'm. Ni'ne ka najataja ka je sakakiunieyi siuniwa iyo niwa a'wenki'n. 12 Ijiatk'i siunie jajwi'il ti siunie i'nio' ja ke sakakiu, jikijmaye jawo'ate iyo ni isijmaye, siupi jawo puwa jan'wenki'n. Ja jlam ijiatayi jla'am siupi jikijmaye jawo, lapajawo ti jayik, jajioyi ni yi'i ni Inia'. 13 Jak je iyoyiji, siuti japoye pi ja 'ajlayiji pi Sinia' siuti jasetina jats'iu'wase'm, sekjane'yijpe ka 'nakajajepi ni jijweye ni Jlas siunie jawo ni iyo ni Inia'. 14 Ja k'iejliyeyi siupi jisitiana', ti ja 'ajlayik'i'm siuti setina, jawi'nase'm.
Jesús ijwi'il ti janjlo' japa Sinia' jikimet ti 'es
15 “Siuti jijwe'el semina', ka woyeyina'a niwa yamtis ti ajlo'wase'm. 16-17 Siuti ya'am ja'yasejeje'n ni Inia' siojopa ka inoye'ase'm janak Sinia' jikimet ti ijiatk'i, ka ine'yasap wikie'eyi niwa jlomas. Siunapo yi'i ni ajnat, je yiyi, 'yaka je intant'ieje, jla'yi ti je i'wi'in. 'Yina asa'am intant'iejayi, kajeyepa ti yiye asap, jla'yi ti ja ke pajana ka intaj'lase'm. 18 “Ya'am ja ke iyojwa'm kimpejnasase'm. Jayapimet'eje ti jayapi'liase. 19 Je pi itioyeyi'i niwa jlomas, siunapo yi'i ni ajnat ja ke si'we'en, 'yina jlam pet ti asa'm ja si'wena'. Ja i'wasanajyi'n kajeyepa ti ja si'wasa'n. 20 Janak siojona jloma ti ja'najanayi pa jawonayi ti ya'am ajyi ni Inia', jlam pet ti asa'am jleye iwia'm, 'yina ya'am aye pet aswa'm. 21 “I'nio' ni isi'm ilia'm niwa yamtis, jla'yi ti iyoyi, nak je inijwek ti ijiate ti semi'n. Kiak iyojliyi pet ni Inia' yimi'n siunie i'nio' semi'n. Siuti ya'am kia'iyo jayimi'n, jla'yi ti jani'wenkijna'm.” 22 Judas (je Iscariote) i'yasen'ne ti iyo'ate: —'Yaka'niona, ¿yot'iyi'ni ti samkataja ti jani'wenkints'e'm, ti ja ke awo ka ani'wenkijna'm napo siunapo yi' ape'e 'ni ajnat? 23 Jesús isiujlie ti iyo'ate: —Siunie i'nio' semi'n its'iuye niwa yamtis. Siunie Inia' janemi'n. Sekjane'yi ka iniamajana'a, siu'neje ni Inia', ti jawieki. 24 I'nio' pet ni je semi'n, je its'iuye niwa yamtis. 'Yina kajeyepa siuniwa inamtis ti jipe'yaye je yamtis, 'wenajliyi ni Sinia' ti sijliu' nak jlamtis. 25 “Jlam awoni'ni 'ate ask'ioye ti mamjli'ijyi je ak ask'ioye. 26 Lapajawo ti japoye janak Sinia' jikimet ti 'es, ti asp'ot, ti Inia' janjlo'wase ti ja setijnape. Janoye'ase'm ka astaj wujwak'i wikie'eyi siuniwa awo'nase, siu'neje ti janaka ti ja'neyasana. 27 “Siuti jayik, jaliyi asap siunie ti ja akamaja. Awe'nase'm 'ni ikamankiye, siunie ti je iyo'ate ni tajle pet 'ni ajnat, siunie iwi'in. Ke injlak'alajyi'n, jla'yi ka je k'iejliyeyi paka ijnots'inayi. 28 'Yina sipe'yaye ti awo'ate, “Jayik, 'yina jayapimet'eje ti jayi'iji aska kiowe'e.” Siuti ja ijiatayi ka semina, ka kiak iwoyeyijna'a ka apeniyeyi'inna'a ti jayik ti jajioyi pi Inia', ti jla'am ti 'yaka'm itipe'e. 29 Jlam ajwe'lase'm ta'a niwaka, ja'nakayeyijna'a siuti ja'wena, ja ke sakakiuye. 30 “Laj i'witayi ka 'yakamtijnie'nase, 'yina je toj ilia'm siunie isie'e pet 'ni ajnat. 'Yina je akiajwe ti jla'am, 31 lapawo ti jlam kia'iyo, siunie ajnat ja'najanayijna'a paka wone ti emi'n ni Inia', jla'yi ti ja'najanayijna'a paka wone ti awo siunie Inia' ijliuyijk'i'm. “Kasitiets'i, naja'ni.”
Jesús jla'am siojona ijiate jla'am ti ts'ejniek jit'io
1 Jesús jlam yinjliyi ape'e ti iyo'ate: —Ya'am siojona ti ijiate jla'am ti ts'ejniek jit'io, jlam pet ni Inia' nak i'yena pet. 2 Siuti i'wi'in ni jik'as ni je 'es, je iyo jlaye, nak ijwiejaje. Jlam pet siuniwa jik'ase'l ti isis ti iyo 'ni jlaye, niwak ijiatayiji ti i'yena, sekyi'i ti yisitak'i ilia'm ti ilisa'n. 3 Siuniwa yamtis ti awo'nase ti 'eyasanayi, niwak it'imina ti insisie. 4 Si'niayi janjwanjli, jawo'ate awo'nase ti ya'am je alejliyi'iji ti ani'nopijiet'ase. Siunie jik'as jana ts'ejniek jit'io, ka lajak'i jana jitisiuk, je 'esiji ka iwo jlaye, kajeyepa lajk'i japa ka intajle. Kiak iyo'ni pet ti asa'am siuti si'niayi je ijwienjli, lajk'i pet pa ka intaj'l aswa'm ka 'esie ka woyeyi. 5 “Ya'am siojona ts'ejniek jit'io, asa'am ti jik'ase'lase'm. I'nio' ni je paj kanleyi ti ini'nopijietk'i, siupet ti ya'am kia'iyojliyi ani'nopijiet'ase, nak poye niwa tajla'm siuniwa isis ti iyo, niwak siuniwa jla'. 'Yina siuti siliejk'i je ji'yakana' paka woyeyi. 6 Jlam pet ni i'nio' ni je iyo ka jlam kiajatajak'i'ni ka ini'nopijiete wita'm, janakaye pet na ja tijliuk kisie'e, ja tiwonajayi 'ate iyo niwa jik'ase'l jana ts'ejniek jit'io ti yi'liayetajats'i. Sekyi'i ti totieja wita'm ti jwat t'otieja'm. 7 “Siuti je paj ka aleyeyi siunie jiwoyeyi ti jini'nopijietak'i, jla'yi siuti ja ke aleyeyi ti jiwoyeyi niwa yamtis, 'ajlayi siupi k'iejliyi pi jisitiana', ja tiwena'ase'm. 8 Siuti kia'iyo, ti po' niwa tal aswa'm siuniwa isis siunie jiwoyeyi, siunie Inia' wujwa pet ti tonitie, jla'yi ti ja'nakaja pet ti asa'am napoka ti ijiate ti 'yiyasajna'yase'm. 9 Wuj ti ts'ama'ase, iyoye pet 'ate siunie Inia' ti 'namak'i. Je pajana'a ka leyeyi siunie yimijnaye ti e'nase'm, ka woyeyi. 10 Siuti jawoyeyi siuniwa yamtis, ja ke ineyi ts'iji ka leyeyi siunie yimijnaye ka woyeyi, ka awoyena 'ate awo ti ak'iuye niwa jlamtis ni Inia' jla'yi ti ja ke ineyi ts'ijiye ka iliyi ni jlemijnaye. 11 “Kiak awo'nase ti awotajank'iye pet ka sinikanitieyi injwanjli, jla'yi ka impo'ase pet ni asnikanitieyi. 12 Siu'nie i'lij ti jawi'nase'm iyo'ate: 'esiji ka anikimayi siunie asemijnayeja' wonayi 'ate awo'nase ti emina'. 13 Siunie inka'namankiye ti ijiate jla'am ti t'an pijia'm, naka na ti 'yakajli ti inilayiti ti jikie po' ape'e papo t'ajajnajwas. 14 Asa'am 'yijejnajwasts'ase'm siuti jawoyeyi siunie ajloye'ase'm. 15 Je awo 'yakawosa'ase'm. Ataj enayi 'ate, siunie inkawo siunie iyo ni jika anechiyas je 'yijene. It'imina ti kiak awo'nase ti 'yijejnajwasts'ase'm ti lapajawo ka kiak je iwo ti wikie'eyi siuniwa tajle ni Inia' ti yikialk'i, ti ijliuyijk'i'm ka 'yiyasanayi, pajk'i ti ekiaj'lase pet. 16 Je 'nej 'ninta ka asama ka akimak'i'm, ya'am ijiate ti aki'mase'm. Sekyi'i awo'ne ka ijliuye ka akinie'ni, ka je piniye siupuwa ka asaye ka intajla aswa'm ja ke int'eki. Ja'nakayeyi pet ni Inia' ja k'iejliyeyi siupi jisitiana' ti ja 'ajlayi, janwe'nase'm kajeyepa ti jasetina. 17 “'Naka siu'nie ajlo'wase'm kawoyeyi: ka aninemina'.”
I'nio' yi' ape'e 'ni ajnat ne'waja'm ni Jesús jla'yi napo t'eyasajnas
18 “Siuti ji'wena' ti ne'wa'ase'm siunapo yi'i ni ajnat, 'wena ká atejnisieyi'i, ti ya'am ti siniajnatis ti ne'wajask'i'm. 19 Siut'itie ka atajlayi ni ajnat jla'm ijiataja ka i'nama'ase pet siunapo i'nio' yi' ape'e 'ni ajnat, ka kiak inwonata'ase pit iyone siunapo ti iyojonk'iye. 'Yina ya'am ti akima'yase'm ti atajle kiowe'e siunapo yiji ni ajnat, jak je iyoyiji'ni ka je ine'wa'ase'm siunapo yiji ni ajnat, lapakawo ti 'wena'ase'm. 20 Ataj wunitiets'i siunie awo'nase'ejyi ti awo'ate, “Jikawo je ika'm ape'e ni i'nio' ni anechiyas.” Siuti jlam sakojwaki'n ta'a, 'wena je woyeyi, kiak jawoyeyi pet. Siuti jlamt'i kiak awo ta'a, ti tik'iukk'i'm ni siunie iyo niwa yamtis, kiak inwoyenie'eje pet ti asa'am, ja tik'iukie'asemna'a siupi ja asamtikie'. 21 Niwaka siuniwa janwo'nase napo i'nio', lapawo ti ya'am ti jat'imi'nase, ti je itiant'iejesi ni Siunie sijliu'. 22 Je jlamtajas ka jitisa', ka je inia'am ti amti'yi, 'wenajlitieje ti ka yama ka itisa'. 'Nakayi lajk'ipa ka jitiej i'no'we, ka inip'onisi ki iyo niwa jloski'la. 23 'Yina je 'wena pet siunapo ne'wak'i'm, napok ne'waja'm ni Inia'. 24 Lajtak'iyi pa ka jitis iwo, ka lajak'iyi pet pa ka ilisane jikiowe'e ti jlamis, ki iyo siunie a'wenki'n, ti lajk'i pa ka kia'iwo, ni awoyi. 'Yina i'winisieta niwaka, yamjliyi ki iyo ti ne'wajask'i'm, jla'yi ti ne'wajasi ni Inia'. 25 'Yina jlam je iyo ni siunie iyonisk'i, lapakawo ti yiyeyi siojona jloma ti siupuwa iyo niwa inamtis t'ipi ti iyo'ate, “Jlam'ne lajatak'i pa ka intajlatisk'i'm ti ne'wajask'i'm.” 26 “Je ijiat ka je i'nes siojona asp'ota ti ijiate jlam ti Sinia' jikimet ti jajliu', ti jantajle ni Inia'. Janaka'ne ti ja sijwe'el. 27 'Yina asam'neje ti ja sijwela', lapakawo ti jleye ta'a ijiap ti 'nelanjie'e.
1 “Jla'm ajwe'lase'm ta'a niwaka, ja'nakayeyi ti ja ke anetiajnata siunie astankiujnieyejak'i. 2 Awojlitieje ti japoye jana jloma ti ja ijnotiejak'i kisie'e ti ja intajlajayi kiajwe niwa 'najla'wetis. Ja'wena'ajyi ti japoye siojona jloma ti japoye napo ti asama ti ja tilianaja'm, siupapo janlanajyi'n janjwelis ka pakaye Sinia' ka inoyeje siupi iyo. 3 Niwak siuniwa janwo napo i'nio', lajk'ipa ka intajle ti naka, ti je itiant'iejts'e ti sa'am, ya'am jla'yi ni Inia'. 4 Ajwe'lasem ta'a, 'nakayi 'wanjliyina'ajpe ka neyi janak jloma, siunie iyo niwa ajwe'lase'm ja ke inesi'lieta ka ataj enayeyijpe 'ate siunie janwo ni ajnat.
Jikijmaye iyo jana Sinia' jikimet ti 'es
“Jla'am je ajwe'lase'm ta'a naka ti 'nelanjie'e, lapawo ti je sitiana' ka kia'awo, ts'etsaka ti a'yasap. 5 'Yina 'nakayi jayik, jayapili ni siunie sijliu'. Tiwet'ianaja ka injwanjli wata paka si'yas'ni ka 'najane paka wone siunie jajiojwi. 6 'Wenajliyi ti je inkasajyi'n ti sipe'yaye ti kia'awo. 7 Ijiatk'i siunie jayo ti jajwi'lase'm, ti siunie ti jayik nak ja'nesieyi. Jlam ti kiak jawo, ja ke iyik, ja ke inamana'a pet siojona asp'ota ka ne'yasap. Jlam ti jayik, sekjane'yi ka namana'a janaka siojona ajwe'el, ti jajliu'. 8 Siuka 'nesta janaka Sinia' jikimet ti 'es, ka 'nakajanitiena'ape napo i'nio' siunie iyo niwa jikeyis, jla'yi ti po' siunie 'nayi tejeyi ts'iji ti i'nio' iyo ka 'esie, jla'yi 'neje ti Sinia' je ijiat ka je i'ye'en ni jitis iyo ni i'nio', niwak ja'nakajaniti ape'e. 9 Siunie jloski'la napo i'nio' yi' ape'e 'ni ajnat, naka ti sakakiuyis. 10 Siunie ti jayik jla'yi ti ja ke si'wena', nak ja'nakajanit ti ts'es. 11 Jlam pet siunie ti Sinia' jan'ye'en napo i'nio' siupi jitis iyo, naka pet ti siunie i'nio' ti isie'e 'ni ajnat, ja 'nakaj ti pajk'i ti tisiejek'i. 12 “Mawat je atejwta'aja kisie'e siuniwa ijia, 'wanjliyi je 'najanatieje, 'wanjli'itieje kajwi'lase'm. 13 Jlam ijiate ka 'nesta janaka ti ijiateje ti Sinia' jikimet ti 'es, janak ja into'nase siunie ki iyo ni ijiatk'i. 'Yina ja ke jlama ka jlamtisa' siunie jawo, janjwel pet siunie iyo ni ipi'yayi, ja'najanki'nase ta'a siunie jawo puwa ja'wena' ts'ijiye. 14 Ja wujwa ti ja siwunit, siuniwa janjwe'el ya'am ti jantalk'i, sekjane'yi ka injlasata'anie'ase ka intant'iejayi pet. 15 Wikie'eyi siuniwa yiyi ni Inia', isijmatis 'neje pet. It'imina ti kiak awo'najase ti awo'ate: siojona Sinia' jikimet ti 'es siuniwa janjwe'el ya'am ti jantalk'i, sekjane'yi ka injlasata'anie'ase pet, ka 'najanayi pet paka wonayi.
Siunie inikanitieyi jank'iuye 'wet'e siuniwa injlak'ali
16 “Ja ke pajayi wat siunie ti ja ke si'wena', 'yina jlomas 'nak janojwaja'm, ka si'wenayena'aja.” 17 Po' japo t'eyasajnas 'nak nojwaja'm, iyoyis'ne 'ate ti ini'yasis: —¿Tepit'e ijio'we kiaka ti iyonts'e 'ate, “Ja ke pajayi wat siunie ti ja ke si'wena', 'yina jlomas 'nak janojwaja'm ka si'wenayena'aja, ti jatial 'niji yi'i ni Inia'”? 18 ¿Tepat'i iyo ti iyo'ate “Ja ke pajayi wat”? Je kastant'iek'i siupi ijwi'il. 19 Jesús itijnisieje ti t'eyasajnas iyo ka i'yasisi'n, it'imina'ne ti iyo'ate: —“Ja ke pajayi wat siunie ti ja ke si'wena', 'yina jlomas 'nak janojwaja'm ka si'wenayena'aja.” ¿Nakt'e jininekiajlayi, ti jiwoyejyink'iye ka 'najanayi? 20 Ijiate siunie jayo ti jajwi'lase'm, ti japoye siojona jloma ti ja apajyi'n. Asajlas japoye, jla'yi ti janetia'n siunie asnikanitieyi iyo. Ja jlam'neja pet siunapo i'nio' yi'i 'ni ajnat ja wujwa ti ja inkasaja'n. Ja ejloye wekie'e, 'wanjliyi ka kia'awoyeyi ti ja ke inkasajyi'n. 'Yina lapawo ti siuniwa asjlak'ali iyo jank'iuye'e pet siunie asnikanitieyi. 21 'Yejne'n, siojona i'nioki ti jlas janejyi'n, je ijwiyeyiji'ni, 'yaka inilat yiyi siojopa jloma ti janejyi'n pi jlas. Siuti yiyetaja'n paja'nine ti yi' kisie'e pi kia'le, je jlase' ni iyo isiwaliyeyi'i'ni siupi ji'wok iyo 'yaka inka'a pi jlas ti k'iejli yi'i 'ni ajnat. 22 Kiak jiwoyeyi'ni pet ti asa'am, asjlak'ali poye 'nakayi. 'Yina siuka yapitiemet, ti ja'ye'nase, ja pakayeyi ti ja ke jlasiye ni asnikanitieyi siunie ja'wena', ti ja ke poye paka ijna'lase. 23 Janak siojona jloma ti ja ke ekiajlayi'ne ka si'yasayiji'n paka k'iejliyeyi. “Ijiatk'i siunie awo ti awo'ate, siunie Inia' siuti ja 'ajlayi pi k'iejliyeyi, janwe'nase'm siuti jasetina. 24 Awakie yi 'nijiye ti je setina ka k'iejliyeyi paka 'ajlayi. ¿Yot'iyi'ni ti je t'iejlayi? Janwe'nase'm 'nakayi ti ja ke jlasiye siunie asnikanitieyi ti ja'wena'.”
Sijwajieti Jesús t'a'n ape'e ni ajnat jijweye
25 “Siuniwa iyo niwa ajwe'lase'm niwak siuniwa jla'm ejnap jiwekie'e. 'Yina je ijiat ka je ineyi siojona jloma ti ja ke asetiana' ka kiak tiwona'ase. Ka jnieyetak'iyijna'a ti ja 'yakajanit'iase'm ki iyo ni Inia'. 26 Nak siunie jloma, ti ja 'ajlayi pi k'iejliyi pi jasetiana' ni Inia', ti jasetina. Ja ke yama'ne ka 'yasane ask'ioye pa, 27 'yaka jlam jla'am ni Inia' ti 'nama'ase. Tepa jawo ka kiak je iwo ti asam pet ti i'namajak'i, jla'yi ti je sakakiuye ti ya'am ti atajle ni Sinia'. 28 Ti anamape atajla kiu jitieyi'i ni Inia', ti ana'me 'ni ajnat. 'Nakayi jatiaj'leje 'ni ajnat ti jayapili ni Inia'.” 29 Sekyi'i japo t'eyasajnas iyo'ne 'ate: —'Esieyiji'ni ti je 'yejnap pa k'iejliyeyi, 'yakajak'i 'neje. 30 A'wena 'nakayi ti 'najane wikie'eyi niwa wask'i'nelaja, 'wanjliyi ka lajak'ipa ka in'yas'ni, ka in'yase'ni paka k'iejliyeyi. Nak it'imina ti je akakiukie ti ijiatp'ane ti jitial Siniayi. 31 Jesús isiujlie pet ti iyo'ate: —¿Je t'i pa sakakiuye 'nakayi? 32 'Nakayi yiyi janak jloma, siujlie'e jloma ti ja inetianajyi'n, ja apilie'ek'ina'a niwa as'wetis, ka sijwanjliyena'a pi ja siliyeyi'i. Mejla'ala ka ijiatayi ka sijwanjli, 'yina po' ni Inia' yi' ijiap. 33 “Wikie'eyi siuniwa ajwe'lase'm jant'eminajna'a ka akamankiye atajlayiji ti je sakakiuye. Ja ke jlasiye ni asjlak'ali ape'e 'ni ajnat. 'Yina ke ajlasatayijna'a isia'm siunie jiwoyeyi, 'yina pajk'i ti 'a'n ape'e ki iyo ni yi'i 'ni ajnat.”
Jesús 'yejlajne'n papo t'eyasajnas
1 Jesús jlampa itimayi ti ijwi'il kiwaka, sekyi'i i'yena poliyi, iyo'ne 'ate: —Inia', yiyi 'ni siu'nie k'ie'. Wunit 'ni As, 'yina siu'nie As janwunit pet. 2 Lapakawo ti a'm ti pajk'i ti jijweye jiwejna'm, ape'e wikie'eyi napo i'nio', ja'nakayeyi siunapo ti jlekiajle pet janwejna'm siojona ji'wasankiye ti laj jlaja. 3 Ijiatjliyi, siojona in'wasankiye ti laj jlaja, naka siunie kantiant'ie'a, ti a'm ti injwanjli ti ijiateje ti Sinia'a'm, siu'neje kantant'iejesi ni siunie jijliu' naka Injwajieti Jesús. 4 “Pajk'i ti ateme ti awunit siuti a'yi 'ni ajnat, 'yina ateme siukia jijliuyijk'i'm ka iyoyi. 5 'Nakayi, 'ni Inia', ti jayapi'lia, wenk'i'm siunie ijwiye, ijwiye iyopi ti je ataj'lajap, ti 'nelanjie'e je wakaljli'ijyi 'ni ajnat. 6 “Siunapo ti 'wena jlot'i, ti jitiajlaja'm siunapo ajnat jlele pet, pajk'i ti 'yijene pi iyo'naja, kajeyepa ti ajwejla'm. A'm ti tijna'ya'm napoka, 'yina jlekialk'i, siukia jiwone its'iuye. 7 Jak je iyoyiji, 'nakayi 'yijenayisiji pi iyonisi ti wikie'eyi siuniwa jiwenk'i'm a'm ti taj'la, 8 kajeyepa ti ateme ti ajwele siunie inka'niye ti taj'la, 'yina je 'yumajas ilia'm, kajeyepa ti 'yijene pi iyone ti a'm ti ataj'la, jla'yi ti je takakiunisi siunie ti a'm ti sijliu'. 9 'Ajlajnap'a napoka, 'yina je napoka siunapo ajnat jlele pet ka 'yejlajnap'a. Napokata jla'am siu'napo ti tijna'ya'm pet, ti jlekialk'i. 10 Wikie'eyi siuniwa yik'i akijmatis a'am, 'yina jlam pet siuniwa akijmatis isijmatis pet. Siunie it'iuni 'yaka ti yiji ti jlamis. 11 “Ti ya'am jayapi'lia, 'nak ja ke yi'i 'ne ajnat'e, jlajma ijiatayi ti jlamis ja ke intajlis 'ne ajnat'e. Inia' ti i'nes, 'esiji ka 'yena, ki iyo ni ajweye siunie ti jiwenk'impe, 'nakayeyijna'a ka injwanjli ino'we, ka iwoyena'a 'ate awoki ti sa'am. 12 Ti je ataljlijiap kiu'ujwe, wuj ti a'yena jla'yi ti anoyeje, 'yina ka lajak'i ni ajweye ti tajle ni e'e, siunie ine'e ti jlekialk'i. 'Yina ti jlamis lajk'ipa ka injwanjli ka netiane ijwienjliye jla'm siunie ti pajk'i ta'a ni jawo ti janetia'n, iyo niwa inamtis t'ipi. 13 “'Nakayi jayapi'lia. Ajwelta'a niwaka ti je ataljli'ijyi ajnat'e, ti awotajank'iye pet ka impoyijk'i ni jinikanitieyi, kawo'ate iyo siunie yik'i. 14 Pajk'i ti ajwejla'm siunie iyo niwa amtis, 'yina siunapo yi'i 'ni ajnat ne'wajasi, 'yaka je 'wet 'ni ajnat, iyoye'ate awo ti ya'am ti je i'wit 'ni ajnat. 15 Je a'yasane ka atajla'ne 'ni ajnat, 'wenajliyi ti a'yasane ka ajoskijiete ni imosik. 16 Iyo'ate awo ti je ataj'le 'ni ajnat 'yina kiak iyo'ni pet ti jlamis, je 'wet 'ni ajnat. 17 Am ja in'wesieyi ka lesajne'n, ti jatajlate siunie ijiatk'i. Siuniwa amtis ijiatk'i. 18 Ya'am ajloyi napok i'nio' yi'i 'ni ajnat, janwo'ate awoyi, ti a'm sijliu' ajnat'e jikiowe'e napoka. 19 Ya'am ja si'wesi siunie janiwone, ti janilesa'n ape'e ti jlamis, ja'nakayeyijna'a ka jlamisie pet ka ini'notatisiji ti jantajlatisi siunie ijiatk'i. 20 “Je napokata ka'yejlajnap'a. Kia'iyo 'ajlajnap'a siunapo ja ke sakakiu, ka impe'yayista siunie jika'niye jawo. 21 'Ajlajap'a Inia' ka ijiatayiji ka iniwo'om, sekjane'yi ti ja kasjwanjli ti janiwomaja pet, janwoyena'a 'ate pet ti a'am jle' ijiap, jlam pet ti ya'am a'yajap. Siupi jitienkiujnieye jla'yi siupi janwoyisi janjwanjli, ja'nakayeyijna'a siunapo i'nio' yi' ape'e 'ni ajnat ja ke sakakiu ti ijiate, ti am ti sijliu'. 22 Siunie ijwiye ti jiwenk'impe, nak pajk'i ti ekiajle, ja'nakayeyi'iji pet ti janiwo'om, ka woyena'a 'ate awoki, 23 'nakayeyijna'a pet ti ya'am jayiji ti jlamis, jlampet ti a'am jle' ijiap, sekjane'yi ka ijiatayijijna'a siunie iniwonisi ti iniwo'om. Siuti kiak jawo, ka intant'iejayijna'a napo i'nio' ti ya'am ti sijliu', jla'yi ki iyo ti wuj ti i'namaja siunapo jiwenk'i'm, iyo'ate pet ti semi'n. 24 “Inia', am a'am ti jiwenk'i'm, awojonk'iye pet ka neyis ijiap, ts'ijiye siunie jayi'i, ja'nakayeyi ti jan'wenis pet siunie ijwiye iyo ti jlekialk'i, kajeyepa ti semi'n ta'a jitiajlap'e ti je wakaljli'ijyi 'ni ajnat. 25 “Ji'yu, 'ni Inia' ti i'nes, siunapo yi' ape'e 'ni ajnat je itiant'ie'a, jlam pet ti ya'am sitiant'ie'a. Kia'iyojliyi pet siunapo jlekialk'i 'yijene pi iyone ti a'am ti sijliu'. 26 Yampe ti awo ika'niyejayiji, it'imina ti itiant'ie'a, 'yina ja ke iliyi ti awo ka intant'ie'a. 'Nakayeyijna'a siunie emijnaye ti jlenk'i'm janejyi pet niwa jikiojwa'l, siuti ya'am kiak jawo'ojyi ja yiji.”
Jesús tikima'a
1 Ti itimayi ti iyo t'ajlayeja', yam'ne ti jla'yis japo t'eyasajnas ti tomis ji'wechaja ja i'niat ji'niayi jle' iyo'ate Cedrón, ijioyeyisia'm siojo inwasok sekyi'i. 2 Judas, siojo iwi'in ja jika'niona, jlam ti itiant'ieje kajeyepa ti je piniyeyiji ti sek ijioyits'i'ni, ti jla'yis'ni siojopo ijia Jesús t'eyasajnas. 3 'Yina 'nes'ne ja Judas ti ajnaj jla'yis japo ijiawos siu'neje japo i'yena jlaja 'najla'wet. Siojopo pa'yijis jika anechiyasas japok ijliuk'i, japoka 'neje jla'am japo Fariséojos, ti iyoyis jikio' jleliye, jla'yi ti iyoyis jika katesila. 4 'Yina Jesús pajk'i ta'a ti 'yijene pi iyone siukia ja tiwonaja, it'imina'ne ti iniuye kisie'e, iyo'ne 'ate: —¿Tempi jiwoyejyin'ni? 5 Isiujlisie ti iyo'ate: —Siojo Jesús Nazaret jlele. Jesús isiujlie japo ti iyo'ate: —Ya'am. Judas, siojo iwi'in ja jika'niona, yiji japo i'nio'. 6 Jesús ti iyoye 'ate, “Ya'am”, jiwe ijliasatayik'iji'n japo i'nio', sekyi'i ti yamak'i isia'm. 7 Sekyi'i ti Jesús yikiajlayi'iji ti i'yase'n japo i'nio' ti iyo'ate: —¿Tempi jiwoyejyin'ni? Kiak iyoye'ijyi pet ti isiujlisie: —Awoktajayin'ni siojo Jesús Nazaret jlele. 8 'Yina Jesús kiak iyonayiji'ijyi japo, ti iyo'ate: —Pajk'i ti ajwe'lase'm ti awo'ate, “Ya'am”. Siuti ya'am ti siwoyejyin'ni, ena'yate siunapo ya'yis ka nek'ni. 9 Sekyi'i ti yiye kisie'e siukia ti Jesús iyo'ate, “Siunapo jiwenk'i'm, lajk'ipa ka injwanjli kanetiane.” 10 Jlam'ne siojo Simón Pedro ti jitisajnat tiok po', itiona kisie'e, ijwiejayi jlaja jik'iote siojo jle' iyo'ate Malco, pa'yijis jika anechiyas jikawo. 11 Jesús iyone'ne 'ate ja Pedro: —¡Ekialk'i ni atesajnat tiok! Siuti Inia' si'yayijni 'naka siu'nie pajyi, ¿yot'iyi'ni ka je i'yaje?
Jesús tena jitieyi'i pa Anás
12 Siojopo ijiawos jla'yi ja jika anechiyasis, siu'neje japo i'yena jlaja 'najla'wet, isimits'i'ne ja Jesús, sekyi'i ti ilie'nitisie. 13 Iniajnatis ti ijioyisiji ja Anás, siojo Caifás jikant'ek, ti jak jlameje ti jika anechiyasis japo pa'yijis siukia najkap. 14 Caifás jaka siojo iyone'ate japo Judíojos, “'Esiji ka injwanjli paka tiliana ape'e napo ijia.”
Pedro ijwil ka je intant'ieje pa Jesús
15 Simón Pedro jla'yi siojo Jesús t'eyasanik jikiecha 'wanjlejap'ni isia'm ja jika'niona ti tokiji jlaja pa'yijis jika anechiyas ji'wuk. Siojo Jesús t'eyasanik jikiecha ti pa'yijis jika anechiyas itiant'ieje, it'imina ti t'ajlinitie k'iye ti 'yuyijk'i ja Jesús. 16 'Yina Pedro 'wanjli jlam kisie'e yi'i ja 'wuk kiwet. Jak je iyoyiji'ni siojo Jesús t'eyasanik, ti titiant'ieki, ijioyi'ni siujlieja i'yena ja 'wuk kiwet, iyone'ne 'ate: —'Esiji ka 'ajlinit k'iye siunie i'nio'. 17 Siujlieja asejnia i'yasen'ne ja Pedro ti iyo'ate: —¿Am 'neje ti t'eyasanik'ia'm siojo i'nio'? Pedro isiujlie ti iyo'ate: —Je'e, je ya'am. 18 'Yina ti techaja'n jakayi, siojopo ijiawos siu'neje japo i'yena jlaja 'najla'wet, t'ajlet ijlianisi'i'ne, 'yina kiak tejeyits'i'ni'ne. Pedro kia'iyo sekyi'i teje'yi'ni pet ki jwat.
Ti pa'yijis jika anechiyas i'yas'ni pa Jesús
19 Siojo pa'yijis jika anechiyas i'yas'ni ja Jesús, ti i'yaseje'n japo t'eyasajnas, siu'neje ni iyo ni jika'neyasajnaye. 20 Jesús isiujlie ti iyo'ate: —Siuti amti je anijweki, eni'ni jitieyi'i wikie'eyi napo i'nio', jla'yi ti aka'neyasanata eni'ni kiajwe siuniwa 'najla'wetis je wus, siu'neje jana wuj, siu'neje niwa yi'i 'ni napo Judíojos ti initotietak'i wita'm. 'Yina lajk'ipa ka yi'i ka inijwek ti amtiyeta. 21 ¿Yot'iyi'ni ti si'yase'n? 'Yase'n siunapo sipe'ya'nijne, napok janjwe'la'm siunie iyo ni 'eyasane'ni. Napok 'yijene siunie ajwe'el. 22 Ti Jesús kia'iyo, siojo i'yena jlaja 'najla'wet sekyi'i ti ipiaj'ne ja Jesús, ti iyone'ate: —¿Kiak jiwo ti jikiujlie ni pa'yijis jika anechiyas? 23 Jesús isiujlie ti iyo'ate: —Siuti jijwe'el ka je 'esiek'i siunie awo, jwelik'i siupi awo ti je 'es. ¿Yot'iyi'ni ti sipa? 24 Anás ipi'yaye wekie'e, ta'a ti takajlunie ka tikiniejeje ja Caifás, tilie'nitie'ne ti tikinieje.
Pedro yikiajle'e ti ijwi'il ka je intant'ieje pa Jesús
25 Pedro siuti je t'eki kisie'e ti teje'yi'ni ja jwat. Jak je iyoyiji'ni siojopo yijap i'yasen'ne ti iyo'ate: —¿Me am 'neje ti t'eyasanik'ia'm 'neje siojo i'nio'? Sekyi'i Pedro iyo'ne 'ate, ti inikakiu: —Je'e, je ya'am. 26 Sekyi'i siojo pa'yijis jika anechiyas jikawo, siojo Malco jikiecha, siojo Pedro ijwiejepi jlaja jik'iote, yijap japo. Iyone'ne 'ate ja Pedro: —Awo ka amjliye'eje ti a'we'na ti jlejiap ts'e yi'i ja inwasok. 27 Pedro yikiajlayi'iji ti inikakiu, 'yina yiyik'i wekie'e yapa ja ajwenta.
Jesús tena jitieyi'i pa Pilato
28 Ti jloma 'yakajaja'n, Jesús tokiji'ni siojo yi'i ja Caifás, sek titiajlaja'a ti tikiniejeje siojo anechiyas Roma jlele. Siojopo Judíojos je 'yuyisk'i, 'yina ti iyo ka je inetiajnatis siukia jikeyis ti iyo'ate, “Siupa ka 'no kiajwe siojona je Judíojos ji'wuk, nakaye'eje siunie i'nio' ti t'ojli, je tiwenaja'm ka inkijwane siunapo ti'yekiujni jana Pascua.” 29 Kiak it'imina ja Pilato ti iniuye kisie'e. Sekyi'i iyo'ne 'ate: —¿Tempi jitiajlatayi siu'nie i'nio'? 30 Iyoyis'ne 'ate ti isiujlisie: —Siuka 'esie pakawo, 'yina jlam je anamataja'a'ni. 31 Pilato iyone'ne 'ate japo: —Kima'yi, asa'am ja in'wesieyi pi jawonayi ti ja'yena' siupi jitis iyo, iyo jla'am ni aska'neyasajnaye iyo ka woyeyi. Judíojos isiujlie ti iyoyits'iate: —Sa'am ti Judíojosts'e'm, asa'am je wents'e'm ka kiak iyonaja ka ne'yi paka iliana. 32 'Yina sekyi'i'ne ti yiye kisie'e siukia iyopi jla'am ja Jesús ti inijwe'el, siupi janwo ti ja tiliana. 33 Pilato yapilie'eje kiajwe jlaja 'wuk, sekyi'i ti tanayi ja Jesús. I'yasen'ne ti iyo'ate: —¿Mi a'am Judíojos jika anechiyasts'a'm? 34 Jesús isiujlie ti iyo'ate: —¿A'am t'e ti atankiujnieye, ni'ne ka poye paka injwe'la'm? 35 Pilato isiujlie ti iyo'ate: —¿Yamt'i mi Judíok'i'm ti a'lej kiak jiwone? A'wetijwas a'am siu'neje napo pa'yijis jika anechiyasas, napok yikialk'i ka'ye'en. ¿Ten siupi jiwoyi? 36 Jesús isiujlie ti iyo'ate: —Siunie tijnak'i'm ti awo anechiyasa' je tal 'ne ajnat'e. Siut'itie ka intal 'ne ajnat'e, jlam potie'ne papo ka ijnotiji'n ijyik'i ka je siwenis, je kia'iyotaja'ni ka sekiajlaja napo Judíojos. Siunie tijnak'i'm ti awo anechiyasa' je tal 'ne ajnat'e. 37 Siuti Pilato ipi'ya, iyo'ne 'ate: —Ijiatp'ane 'yakaj ti anechiyasts'a'm. Jesús isiujlie ti iyo'ate: —Ijiate siunie jiwo ti sijwe'el ti anechiyask'i'm. Ya'am anam'ne ajnat'e, jla'yi ti a'yiji'n, 'nakayi ti jayamtiyi siunie ijiatk'i. Wikie'eyi siunapo yiji siunie ijiatk'i its'iuk'i'm. 38 Pilato iyo'ne 'ate: —¿Ten siupi ijiatk'i?
Tinitotieje ape'e pa Jesús ti ja tiliana
Pilato iyotaja ka inojwa'n kisie'e ja Jesús, 'yina Judíojos je yina'ate. Siuti Pilato iliyeyi ti i'yas'ni ja Jesús, iniu'ne kisie'e. Sekyi'i ijwijla'm japo Judíojos ti iyo'ate: —Je a'we'en siupi ka jitis iwo siu'nie i'nio'. 39 Siuti asa'am po' ni aske', ti jiwayetaja siojona aslakijnieye Pascua anojwa'n kisie'e pi inkipinik ijwienjli. ¿Mi jlemina' ka iniujwa'n kisie'e ti asa'am Judíojosts'ase'm ni aska anechiyas? 40 Sekyi'i inikiul'ne japo ti iyoyits'i 'ate ti tanisi ape'e: —¡Je'e! ¡Ká anojwa'n kisie'e! ¡Nojwa'n jlam kisie'e ni Barrabás! Barrabás jak i'nio' kalankijieta.
1 Pilato ijliuye japo tokis ka inkimits'i ka ink'ajas'ni. 2 Isimisie'ne jawa k'itienis ti ijwinisik'i ti iyonisi 'ate siujlie'e jika wonta ni anechiyas, ti 'yutieyisia'm jlaja jletik ja Jesús, i'yuyenisk'i'ne siojo lotakinie isiat. 3 Yikiajlayisiap'ni ti iyoyis 'ate: —¡Atejwila'a'm, Judíojos jika anechiyas! Sekyi'i ti ipiejayis'ni jitiokio'we. 4 Pilato yapilie'eje kisie'e, ijwijlam'ne japo Judíojos ti iyo'ate: —'Yejne'n, aton kisie'e, 'nakayeyi ti ja'najanayi ti je a'we'en paka jitisa' siu'nie i'nio'. 5 Sekyi'i tiniamaja'ne kisie'e ja Jesús, k'itienis takapajlatajak'i'ni jlaja jletik, ti'wujienaja'ni siojo lotakinie isiat. Pilato iyo'ne 'ate: —¡'Yejne'n, ekiaj'lase siu'nie i'nio'! 6 Siojopo pa'yijis jika anechiyasas, siu'neje japo i'yena jlaja 'najla'wet, ti i'winayits'i ilia'm, iyoyis'ne 'ate ti tanisi ape'e: —¡K'iejwat'e japa cruz! ¡K'iejwat'e japa cruz! Pilato iyo'ne 'ate: —Kima'yi asa'am, k'iejwata'yi japa cruz, siuti ya'am je a'we'en paka jitisa'. 7 Judíojos isiujlie ja Pilato ti iyoyis 'ate: —Po' na saka'neyasajnaye, 'yu'we ka tiliana siu'nie i'nio', kajeyepa siunie saka'neyasajnaye iyo jitisa' ti ijwi'il ka Sinia' jlasa'. 8 Pilato ipi'yayi ti kia'iyo, kat'aja ti jnots'ijni. 9 Yapi'ne 'wuk kiajwe, i'yasen'ne ja Jesús ti iyo'ate: —¿Tepi jitiajli? Jesús je iyo ka inkiujlie. 10 Pilato i'yase'n ti iyo'ate: —¿Jop'an ka je akiulk'i'm? ¿Je 'najane ti it'iuni po' ka 'yakajliu'n ajap ka ink'iejwata'a japa cruz, ni'ne ka iyo ka iniujwa'n kisie'e? 11 Sekyi'i ja Jesús isiujlie ti iyo'ate: —Siunie at'oni ti yi'a, ka je intal Siniayi je 'najane paka wone ka siniujwa'n kisie'e. Jak je iyoyiji'ni siunie ti sekial ka ama ka si'ye'en, jitis 'yaka'm ape'e siunie iyo ni ates. 12 Sekyi'i ja Pilato ti iyoyetajayi'n siupi ka inwone ka inojwa'n kisie'e ja Jesús. Siojopo Judíojos iyo'ne 'ate: —¡Ka anojwantana'a kisie'e, ka akojwayena'a ni saka anechiyas Roma jlele! ¡Kajeyepa siunie iniwojwa'n anechiyasa' iyoye'ate ti jla'am ti teje'yi ilia'm ni saka anechiyas! 13 Siuti Pilato ipi'yayeyi, takajlunieyi ja Jesús ka titiona kisie'e. Sekyi'i ti tanayi ti ti'yena siupa jitis iyo, yi'i siojo tenaja'a'ni napo ti kia'iyo, Hebréojos ji'lij iyo'ate Gabata, ti iyo'ate Sisajas ti T'otata Ape'e. 14 Jakiak siojokia jloma ti je toj'we siujlie'e Pascua, siukia ti 'najlikisie. Pilato iyone'ne 'ate japo Judíojos: —¡'Yenajyi'n ni aska anechiyas! 15 Iyoyis'ne 'ate ti tanisi ape'e: —¡La'an! ¡La'an! ¡K'iejwat'e japa cruz! Pilato i'yasen'ne ti iyo'ate: —Jlam'ne asa'am ti aska anechiyas, ¿jiwoyeyi'iji ka ts'iejwat'e japa cruz? Siojopo pa'yijis jika anechiyasas isiujlie ti iyo'ate: —¡Lajk'ipa ka jikiechaye ka saka anechiyasa', ijwienjli jla'am ni saka anechiyas ni Roma jlele! 16 Sekyi'i'ne ja Pilato ti yikiajlayi japo i'nio' ja Jesús ka ink'iejwatits'i jlaja cruz, 'yina yamisi'ne.
Jesús ti tik'iejwata'a japa cruz
17 Jesús titilkinaja'ne jlaja jika cruz, ti tikiniejayi. Paj ti yiyeyi siojo ajnat jle' iyo'ate Ijnetik Jleli 'Wet, siunapo Hebréojos iyonisi 'ate Gólgota. 18 Sek tena'a ti tik'iejwata'a jlaja cruz, tijwanaja'a siojopo times, ijwienjli ja titiujmataja ji'lieme ijwienjli 'neje siojo titiujmataja jijweyeje. 19 Pilato takajlunie'ne ka tilisanaja siukiwa inamtis ka tena'a jlaja jika cruz ka iwo'ate, “JESÚS TI NAZARET JLELE, JUDÍOJOS JIKA ANECHIYAS”. 20 Siojowa inamtis tilisanaja tajla'm napo Hebréojos, Roma jlele, Griego ji'lij. Jak je iyoyiji japo Judíojos i'yen'ni 'ne; siojo tena'a ja Jesús ti tik'iejwata'a jlaja cruz je tojwape'n jlaja isi'. 21 Siojopo pa'yijis jika anechiyasas ijliuye ja Pilato ti iyo'ate: —Ká awonena'a 'ate, “Judíojos jika anechiyas”, wonena'a jla'am 'ate, “Inijwe'el jla'am ka Judíojos jika anechiyasa'”. 22 'Yina Pilato isiujlie ti iyo'ate: —¡Siunie 'ete'e, yi'i ni yi'i! 23 Siojopo tokis, ti itimayisi ti its'iejwatits'i jlaja cruz, inijnojlietayisi kiwa ji'wuye ja Jesús ti inik'isajasi, ti ijniujli ki nojwa'm ti ijniujlits'i. Isimisie'ne siukia ji'wu' siukia isaja tatijla wek jikiusk'i, 24 iyoyis'ne 'ate ti initajlatayisi: —Je 'esiji ka iyok jijwala', jla'am ijiate jla'am ka iliakijnie ape'e, jajnewite pi jajnewite pak jikimitayijijna'a. Sekyi'i ti yiye kisie'e siuniwa inamtis t'ipi ti iyo'ate: “Inik'isajasi kiwa ji'wuye, tiliakinits'i ape'e siukia ji'wu' tatijla wek jikiusk'i.” Kiak siukia iniwonisi japo tokis. 25 Siujlieja Jesús jlet sekyi'i, yi'i jlaja cruz, siu'neje jlaja jikitia jla'am jlaja jlet, siu'neje jlaja María Cleofas jik'iemjla, siu'neje jlaja María Magdala jleliki. 26 Siuti Jesús i'winayi jlaja jlet ti yijap siojo t'eyasanik ti wuj ti yimi'n, i'yase'ni jlaja jlet ti iyo'ate: —¡Asejnia, wone asa' naka! 27 Sekyi'i i'yase'ni siojo t'eyasanik ti iyo'ate: —¡Wone eta' janaka! Jakayik'i'ne siojo Jesús t'eyasanik María ijioyi'ne ji'wete.
Jesús 'ya'al
28 Yam'ne 'niji kiwaka, Jesús 'yijene pi iyone ti itime wikie'eyi siukia iyo. Iyo'ne 'ate: —Siki'im. Siuti kia'iyo, ti iyojonk'iye ka ijiatak'iyi siuniwa Sinia' jlamtis. 29 'Yina po' siojo tetik wuj tipoyi ki at'es ti tosijyi. T'otiejam'ne japa inkats'ili jak at'es, ti tits'ijwana'a ki a'la' jle' iyo'ate hisopo, sekyi'i tena'ne jikiwiti. 30 Jesús its'iujwam'ne, sekyi'i iyo'ne 'ate: —'Esiji, atejwi. Sekyi'i jletik iniajmana isia'm, ti 'yala.
Ijiawo 'yits'e jlawe'e pa Jesús
31 Jakiak siojokia jloma ti tome'e jla'a i'nio 'wanjlijyi'n. Siojopo Judíojos ti anechiyasas je iyoyisink'iye papo i'nio mases ka 'wanjliyek'i pijia'm ape'e puwa jika crusis, jla'yi ka neyi puwa ka jlomas 'nak nojwaja'm. 'Yina siojokia jloma i'nio 'wanjlijyi'n, ijyiwitajam'ni jakia Pascua, jakiak jloma ti wuj ti tilisana. It'imina'ne ti ijioyisi ja Pilato, ti iyonisi 'ate: —Kajlunie siunapo yi'ik'i pijia'm niwa jika crusis ka jlekijna akiajatajiamk'i, ja titimaja ka tenajana'a ajnat'e. 32 'Yina Pilato ijliuye'ne japo tokis ka kiak inwonisi. Yiyi ti kiak iyonayisiji iniajnatis'ne siojo ti tiniajnata ti tena pijia'm. Itimisi ti jlekijna isiajatamk'i, yamayisi'iji ja jikiecha tome jlep'e ja Jesús. 33 Ti ijliasayisi ja Jesús, i'winis'ne ti pajk'i ti 'ya'al. Jak je iyo'ni ka jlekijna inkiajatamk'i. 34 Siojo tokis kiecha isiene jlaja jika k'ok ti 'yita'm ja Jesús, ts'e jlawe'e. 'Yina 'woyis siu'neje ki i'niat ki tajla'm ti itiya kisie'e. 35 Siunie i'nio' i'winaja, nak ijwi'il ti yamtik'i, 'yina ijiatk'i siunie iyo niwa jlamtis. Kia'iyo 'yijene pi iyone ti ijiatk'i siunie yamtiyi, ti iyo ka je akakiuye. 36 Lapakawo ka kiak je iwo ti yiyi ti iyo ka ine kisie'e siuniwa inamtis t'ipi ti iyo'ate, “Ja ke ine'yina'a paka jleliye ka tikiajataja'm.” 37 Iyo 'neje 'ate niwa inamtis t'ipi, “Jla'am jan'yenisi'ni siukia 'yitisia'm.”
Jesús ti titijikie k'iye
38 Pope ja i'nio' jle' iyo'ate José, Arimatea jlele, yamk'ijin'ni ja Jesús, 'yina inijweki kajeyepa ti je ijwiye japo Judíojos siojopo anechiyasas. Ijioyi'ni ja Pilato ti iyo'ate: —Ke enk'i'm ka yiki ki t'ajwes masa ki Jesús. Pilato iyo'ne 'ate: —Ijiatp'ane, mayi. 'Yina José yami'ni, sekyi'i ti yamayi. 39 Nicodemo kia'iyo 'nes 'neje, siojo ijioyipi ja Jesús ti ajnaj. Ti itiuni kiwa t'ajwes ki Jesús najapeji ti itijwa'm niwa sikioye pi jikiojieti t'ipi siojo jini inkajk'i, mirra ti tijlijnataja ki áloe. 40 Siojo José jla'yi ja Nicodemo isimisie'ne ja lotakiniewa ti yikiajlisi wita'm kiwa t'ajwes masa ki Jesús. Ijwienisi'i 'ne siojo jini inkajk'i, iyonisi 'ate napo Judíojos, ti itijis k'iye pi jikiecha masa ti 'yalata. 41 'Yina po' siojo inwasok je tojwape'n siojo tena'a ja Jesús ti tik'iejwata'a jlaja cruz. Jaka siojo inwasok po' ja a'no' ti lajlijyi'ijyi kajeyepa ti ink'ie'. 42 Sek tena'a'ne ki t'ajwes masa ja Jesús, kajeyepa ti je tojwa, jla'yi ti je toj'we siojokia jloma ti i'nio 'wanjlijyi'n.
Jesús iniu kisie'e ti tajla'm pi a'no'
1 Siojokia tajlaja'm ti k'iejli mot, ti ajnaj 'wanjle ajnat'e, María Magdala jleliki ijio a'noyi. Ti yiyeyi, siujlieja sisaj tip'onajaja'm jet'i k'iejets'i'nijpe ti totie ts'ijiye. 2 Ta'a ti t'osi ti ijioyi ja Simón Pedro, siu'neje ja Jesús t'eyasanik ti jleminik, ijwijlam'ne japoka ti iyo'ate: —Titionat'ijyi kisie'e ki Saka'niona masa. Je kasts'ajane pi tena'a. 3 Siojo Pedro siu'neje ja Jesús t'eyasanik, ti ipi'yaye, yama'ni ti i'yenisi. 4 T'osiye'ni ti yama'ni, ijwienjli'ne siojo 'yakets'ijyine, jak je iyoyiji'ni ka je inane ti sek yiji. 5 T'akana isia'm ti i'yen jik'ioyi jlaja kiawe. Jawakata siojowa lotakijnies tekiajlaja wita'm. Ti i'wine jlam'ne je yame siojo yi'i. 6 Ji'niajk'i ja jikiecha, Simón Pedro 'nes'ne. Yiyi wekie'e ta'a jla'am ti 'yuyi, sekyi'i i'win'ne jla'am jawa lotakijnies kajeyepa ti yamejeyi siojo yi'i, 7 siu'neje ja lotakiniewa tits'ijwanak'i jakia jletik. Ijwienjli je yi'i, najata jla'am ti totie wita'm. 8 Kiak iyojliyi siojo inianta ti 'yuyi siojo a'no', ti 'yuyeyi pet sekyi'i ti i'wina, je takakiunieyi. 9 Mamjli'ijyi je 'yijenisi paka iwone niwa inamtis t'ipi ti iyo'ate, “Ti ijiate ti jano kisie'e ti jantajli pa a'no'.” 10 Yapilisni'ne.
Jesús ini'wenkijna'm japa María Magdala jleliki
11 Siujlieja María Magdala jleliki sek 'wanjle'e yi'i ja a'no'. Ti yap'ni t'akana isia'm ti i'yenta jik'ioyi jlaja kiawe. 12 Sekyi'i i'win'ne papo times Sinia' jijliujwajnas poli jlele ti ji'wuye lemi, yits'e tenat'itie'epe ja Jesús, ti yik'iji'n ijwienjli siupa tome 'niji jletik itijyi, ijwienjli pa tome 'niji jisietis itijyi. 13 Siupapo injlojwajnas poli jlele i'yasen'ne jlaja María ti iyo'ate: —Jla i'nioki, ¿yot'iyi'ni ti jlap'ni? Isiujlie ti iyo'ate: —Tikiniet'iyi ki t'ajwes masa ki 'Yaka'niona. Je ts'ajane pa tokiji. 14 Yiyik'i wek ti kia'iyo, María jitiej yikial'ne ji'wechaja sekyi'i ti i'wina ja Jesús, 'yina je itijnisieje ka jakaye Jesús. 15 Jesús i'yasen'ne jlaja María ti iyo'ate: —Jla i'nioki, ¿yot'iyi'ni ti jlap'ni? ¿Ten siupi jiwojyin'ni? María ijwilta ka pakaye siupi i'yena ja inwasok. I'yasen'ne ti iyo'ate: —Sip'elisin wata'a, ka ama'a ka ajlasat, jwelk'i'm siupi jle'ne, jayikinie'e. 16 Jesús tamti ti iyone'ate jlaja María: —¡María! María i'yejnen'ne ti ipi'yaye, iyo'ne 'ate: —¡Rabuni! (Hebréojos ji'lij ti iyo'ate, 'Yaka'neyasajnawo.) 17 Jesús iyo'ne 'ate: —Akio' lank'i'm, mawat je ajojliyi'ijyi ni Inia'. Maj kiu' wekie'e ka ajwele japo i'lijwas, jwejla'm ti jajioyi kiu' ni Inia', siunie Asna' pet. 18 María Magdala jleliki yam'ne ti ijwijla'm japo t'eyasajnas ja Jesús, ti iyo'ate: —A'we'neje ja Saka'niona. María ijwijla'm japo siukia Jesús iyone.
Jesús ini'wenkijna'm papo t'eyasajnas
19 Siukia jloma ti tajlaja'm, ti ajnaj, siupapo t'eyasajnas initaj'ne seka'a yi'i siujlieja 'wuk yiyis kiajwe, ti ip'ionisiamk'i jawa jika 'wuk kiwitawa, ti je ijwiyisink'iye siojopo Judíojos jika anechiyasas. Sekyi'i ti Jesús inikajanitie jikiowe'e japo t'eyasajnas, iyo'ne 'ate: —¡Kamaja! 20 Sekyi'i i'winkijnam'ne japo jawa jikioye, siu'neje ja ji'wet jlaja k'ok t'etajaja'm ts'e jlawe'e. Je jlase' ki iyo ti inkase'n ti i'winayis ja Jika'niona. 21 Jesús yikiajlayi'iji ti iyo'ate: —Kamaja'. Iyo'ate siunie ti Inia' sijliu', 'yina kiak ja iyo'nase pet ti jajliuye. 22 Sekyi'i Jesús ipiejwuye ape'e japo, ti iyo'ate: —Kima'yi ilia'm siujlie'e Sinia' jikimet ti 'es. 23 Siunapo ti jalenkinayi siuni iyo niwa jikeyis, ka netianape niwa jike' iyo. Jlampet siunapo ja ke alenkinayi niwa jikeyis, ja ke inetianape pet.
Tomás je 'yakakiu ti iniu kisie'e pa Saka'niona
24 Tomás, ti Jesús t'eyasanik kiecha, ti tiwonaja'ni 'neje 'ate Timesi, je yiji japo ijia ti Jesús inikajanitieja'm. 25 Ti 'nesa, ijia ijwijlam'ne ti iyo'ate: —Sa'am a'wenaja ja Saka'niona. Tomás isiujlie'ne japo ijia ti iyo'ate: —Ya'am ka je i'wi'in puwa ji'wetis puwa wikijnies ti t'etajajamk'i, ka ijiuki je 'yutk'i siupuwa ji'niajia, siu'neje ka je isies ape'e siupi t'eta'a jlawe'e, siuka isio' je yi'n ape'e, ja 'yakakiu. 26 Tijwajyi jakia inkijmaye ijwienjli, yikiajlayi'iji ti initaj kiajwe jlaja 'wuk. Jakayi'ne ti Tomás sekyiye'e. Siojowa 'wuk kiwitawa wikie'eyi ti tip'onajamk'i. Jesús inikajanit 'ne ti takasiti'n jikiowe'e japo. Iyo'ne 'ate ti itijwilayi: —¡Kamaja! 27 Sekyi'i iyone'ne 'ate ja Tomás: —'Yejne'n niwa isioye, ajwuki 'otk'i. Jonie ni akio', kiejts'e siu'nie yi'i ni t'eta'a. ¡Lek'i siunie jiwo ti kakiujnieta'a'm, wo atankiujnieyeja'! 28 Tomás iyo'ne 'ate: —¡'Ni Inia', 'Yaka'niona! 29 Jesús iyo'ne 'ate: —Je kakiunieyi'ne, kajeyepa ti si'we'en. ¡Jlajma ijiatayi ti Sinia' jamp'elisijne'n siunapo ti je i'winata, lapajawo ti naka jla'am ti je takakiunisi!
Siunie it'imina ti tilisanaja niwaka
30 Je piniyeta siuniwa Jesús i'winki'n, ti yine jitieyi'i japo t'eyasajnas, ti je yiji siu'nie inamtik jiwe. 31 Tepa jawo ka je tenaja ti nakaye ti jant'emina ka je akakiuye ja Jesús, ti ijiate ti Sinia' Jlas, Injwajieti ti Sinia' jijliujwanik, 'nakayeyijna'a ti ja'wena' jana as'wasankiye ti t'o'n, siunie ja ke inkakiu.
Jesús inikajanitia'm siupapo ijwienjli sikio' itij'we times tom'niji t'eyasajnas
1 Yama 'niji siukia iyo, Jesús inikajanitieja'ajme siojopo t'eyasajnas, jikiuts'i siojo tewuk iliyi jle' iyo'ate Tiberias. Kiak iyopi kiaka. 2 Japoka sek inita'a, Simón Pedro, siu'neje ja tamitaja'a'ni ti iyo'ate Timesi Tomás, Natanael siojo tal Canaja ti yiji jlaja Galilea, siu'neje japo Zebedeo jilis, jla'yis siojopo ijia times, Jesús t'eyasajnas. 3 Simón Pedro iyone'ne 'ate ti i'yase japo ijia: —Jayik, jayo'o. Ijia isiujlie ti iyo'ate: —Naj. Ja'yunina ajak'i. Yam'ni'ne tisiojmayeyisia'm jlaja kasejkana, kiak siukia ajnaj ti lajk'iyi pa ka in'wenis. 4 Ti jloma iniuye ts'ijiye, ja Jesús sek yiye'e jikiuts'i ja i'niat. Siojopo t'eyasajnas ti i'winayisi 'yina je itiant'iejesi'ne. 5 Jesús i'yasayi japo ti iyo'ate: —Kia'lis, ¿mi je 'wenayi pa? Isiujlisie ti iyoyis 'ate: —Lajk'iyi pa. 6 Jesús isiujlie japo ti iyo'ate: —Tatayeja'm 'niji asjweyeje jana aska 'nijiak jit'io, 'nak ja'wena'ne. Kiak iyonayisi, 'yina tojliyi ti je 'yakajlayeyisi pijia'm ti 'lojwa jawa yiji jlaja 'najak jit'io. 7 Sekyi'i'ne siojo Jesús t'eyasanik ti jleminik iyone'ne 'ate ja Pedro: —¡Saka'niona p'an! Simón Pedro ipi'ya wekie'e ti iyo'ate, “Saka'niona p'an”, jla'm iyoye'ni 'ate ti yikiajlits'i jawa ji'wuye, kajeyepa ti 'najleje'n, yama ti yikiwaja'm ja i'niat. 8 Siojopo ijia Jesús t'eyasajnas je tajlisi jlaja kasejkana ti yapilieyis kisie'e ti itionayis jikiusi, je tojwat jikiuts'i. 9 Ti tisiojmayeyisk'iji'n, i'winayisi jitieyiji ja jwat ti 'nisa'a, si'yus siu'neje jlaja woye ti pajk'i ta'a ti tena ape'e. 10 Jesús i'yas'ne ilia'm ti iyo'ate: —Toniemit puwa 'nak janojwaja'm siupuwa jilianajyi'n. 11 Simón Pedro yam'ne sekyi'i ti tisiojmayeja'm jlaja kasejkana, itiona kisie'e tipoyi jawa si'yus, ciento cincuenta y tres jawa si'yus wus 'najli. 'Wanjliyi 'lojwata jawa si'yus yiji jlaja 'najak jit'io, 'yina je its'isk'i. 12 Jesús tani'ni'ne japo t'eyasajnas ti iyo'ate: —Joniemit, ja'yekiunie. Lajk'ipa ka ji'lij je inkip'e japo t'eyasajnas ka in'yase'n ka wo'ate, “¿Te'na'm?”, kajeyepa ti itiant'iejesi ti jaka Jika'nionajas. 13 Jesús ijliasayi, sekyi'i isimayi jlaja woye, iwinak'i; kiak iyonjliyi ja si'yus. 14 Sekyi'i ti najapajayiji ja Jesús ti ini'wenkijna'm japo t'eyasajnas, tajlap'e ti 'nelanjie'e iniuye kisie'e.
Jesús takamtijniene pa Simón Pedro
15 Ti itimayisi ti ti'yekiujni'n, Jesús i'yase'n Simón Pedro ti iyo'ate: —Simón, Juan jlas, ¿mi ijiatt'iyi ti jika'm ape'e napo a'lejwas ti semi'n? Pedro isiujlie ti iyo'ate: —Ji'yu, 'najane ti emi'n. Jesús iyone'ne 'ate: —Ijiatp'ane, kojniejnenna'a niwa iliajwas 'wolepo' lis. 16 Jesús yikiajlayi'iji ti i'yase'n ti iyo'ate: —Simón, Juan jlas, ¿mi semi'n? Isiujlie ti iyo'ate: —Ji'yu, 'Yaka'niona, am 'najane ti emi'n. Jesús ijwijlam'ne ti iyo'ate: —'Yena niwa iliajwas 'wolepo'. 17 Jesús yikiajle'e'ne ti i'yase'n, sekyi'i ti najapajayiji ti iyo'ate: —Simón, Juan jlas, ¿mi semi'n? Pedro sekyi'i ti je inkajayi ka inkiujlie'ni, 'yina kajeyepa ti najapajayiji ti i'yas'ni ka ijiatayiji ka inemi'n. Isiujlie'ne ti iyo'ate: —'Yaka'niona, am ti 'najane wikie'eyi niwa wask'i'nelaja. 'Najane 'neje ti emi'n. Jesús iyone'ne 'ate: —Mayijinie'e pi jlak yi'i niwa iliajwas 'wolepo'. 18 Ijiatk'i siunie jajwi'la'm, am ti jwemik'ia'm ti jiwo ka ak paka ajojwi, jiwoye a'wuye. 'Yina siuti ja kijila'm ja 'akajnie k'iye ni akio', 'yina ja 'wenayeyi siupi ja'nojienk'ipi ja a'wuye, jajnokijipi ja ijnokiji, siupi je am ka awo ka ajojwi. 19 Ti kia'iyo ja Jesús itiant'iejeniti jla'am ja Pedro siupi jiliaye jawo, sekjane'yi ti jajnonitiapeje pi Sinia' siupi jiliayeja'. Itime ti kia'iyone, ti tanayi: —¡Naj, na'm ijyik'i!
Jesús t'eyasanik siupa wuj ti yimi'n
20 Pedro i'yena 'wechaja, i'win'ne ilia'm siojo Jesús t'eyasanik siojo ti wuj ti yimi'n. Jaka siojo ti te'wayiji ti ti'yekiujni'n, siojo ti i'yase'n ti iyo'ate, “'Yaka'niona, ¿ten siupi janekial?” 21 Pedro i'wijni wek ilia'm, sekyi'i i'yasen'ne ja Jesús ti iyo'ate: —'Yaka'niona, ¿nit'i pi ja k'iejliyeyi siupa jiliayeja' siu'nie i'nio'? 22 Jesús isiujlie ti iyo'ate: —Siuka iyo ka 'wasanajle ka iyapitiemet, ejlo wekie'e, je a'm ala. Naj, na'm ijyik'i. 23 It'imina ti wikie'eyi siojopo Sinia' jilis ijwi'il siojo Jesús t'eyasanik ti ijwilta ka je i'naleje. 'Yina Jesús je ijwi'il ka je i'naleje, 'najata jla'am ti iyo'ate, “Siuka iyo ka 'wasanajle ka iyapitiemet, ejlo wekie'e, je a'm ala.” 24 'Naka'ne 'ni ijwi'il niwa wask'i'nelaja, jla'yi ti ip'isi'n. Kasts'ajane ti ijiatk'i siunie ijwi'il. 25 'Loj niwa ijia Jesús 'yotate. 'Yina ka tipejlanitie ka tip'esijna' ajwelta ka lajayi 'weta ape'e 'ni ajnat puwa ka imp'esijnaye ka tenajajle wita'm.